མཁའ་འགྲོའི་ཆོས་མཛོད་ཆེན་མོ་ལས་འཕགས་བོད་ཀྱི་སྐྱེས་ཆེན་མ་དག་གི་རྣམ་ཐར་ཕྱོགས་བསྒྲིགས་པདྨ་དཀར་པོའི་ཕྲེང་བ།

སྟོན་པ་ཐུགས་རྗེ་ཅན་གྱི་མ་ཡུམ་སྒྱུ་འཕྲུལ་ཆེན་མོ་ལ་རྒྱལ་བུ་དོན་ཀུན་གྲུབ་པ་ཇི་ལྟར་འཁྲུངས་ཚུལ་གྱི་ལོ་རྒྱུས། འདུལ་བ་ལུང་གཞི་ལས་བཏུས།

གྲོང་ཁྱེར་ལྷས་བསྟན་དུ་རྒྱལ་པོ་ལེགས་པར་རབ་སད་ཅེས་བྱ་བ་རྒྱལ་སྲིད་བྱེད་དུ་འཇུག་སྟེ། འབྱོར་པ་དང་རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ། འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ། འབྲས་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་ན་བུ་གཅིག་པ་ལ་སྡུག་པ་བཞིན་དུ་རྒྱལ་སྲིད་སྐྱོང་བར་བྱེད་དོ། །

རྒྱལ་པོ་ལེགས་པར་རབ་སད་ཀྱི་བཙུན་མོ་དམ་པ་གཟུགས་བཟང་བ། ལྟ་ན་སྡུག་པ། མཛེས་པ་ཡུལ་གྱི་བཟང་མོ་ལུམ་བི་ནི་ཞེས་བྱ་བ་ཡོད་དོ། །ལྷས་བསྟན་ན་ཁྱིམ་བདག་ཕྱུག་ཅིང་ནོར་མང་བ་ལོངས་སྤྱོད་ཆེ་བ་ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་གནས་པ་དེའི་ཀུན་དགའ་ར་བ་མེ་ཏོག་ཕུན་སུམ་ཚོགས་པ་དང་། འབྲས་བུ་ཕུན་སུམ་ཚོགས་པ་དང་། ཆུ་ཕུན་སུམ་ཚོགས་པ་དང་། བྱ་སྣ་ཚོགས་སྐད་འབྱིན་པས་དེའི་ཀུན་དགའ་ར་བ་དགའ་དགའ་ལྟར་འདུག་པ་དེར་རྒྱལ་པོ་དུས་དུས་སུ་བཙུན་མོའི་འཁོར་དང་ལྷན་ཅིག་ལྷགས་ནས་དེ་ན་དགའ་བའི་རྩེད་མོ་ཉམས་སུ་མྱོང་བར་བྱེད་དོ། །ལུམ་བི་ནིས་དེ་མཐོང་ནས་འདོད་པ་སྐྱེས་ཏེ། དེས་སྨྲས་པ། ལྷ་ཀུན་དགའ་ར་བ་འདི་བདག་ལ་སྩལ་དུ་གསོལ། རྒྱལ་པོས་སྨྲས་པ། ཀུན་དགའ་ར་བ་འདི་ཁྱིམ་བདག་གི་ཡིན་ན་ཇི་ལྟར་སྦྱིན། གལ་ཏེ་ཁྱོད་ལ་ཀུན་དགའ་ར་བ་དགོས་ན་ཁྱོད་ཀྱི་ཕྱིར་དེ་བས་ལྷག་པར་བཟང་བ་གཞན་ཞིག་བྱའོ། །དེ་ནས་རྒྱལ་པོ་ལེགས་པར་རབ་སད་ཀྱིས་ལུམ་བི་ནིའི་ཆེད་དུ་དེ་བས་ཁྱད་པར་དུ་འཕགས་པའི་ཀུན་དགའ་ར་བ་ཞིག་བྱེད་དུ་བཅུག་ནས་དེའི་མིང་ལུམ་བི་ནིའི་ཚལ་ཞེས་བྱ་བར་གྱུར་ཏོ། །རྒྱལ་པོ་སེང་གེའི་འགྲམ་ལ་ཡུན་རིང་པོ་ནས་ཀྱེ་མའོ་བདག་གི་རྒྱུད་ལ་འཁོར་ལོས་སྒྱུར་བ་སྐྱེ་བར་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །

རྒྱལ་པོ་ལེགས་པར་རབ་སད་ལ་ཡང་ཡུན་རིང་པོ་ནས་ཀྱེ་མའོ་བདག་ནི་སེང་གེའི་འགྲམ་དང་ལྷན་ཅིག་གཉེན་དུ་གྱུར་ཀྱང་ཅི་མ་རུང་སྙམ་པའི་བསམ་པ་འདི་ཡོད་དོ། །ཇི་ཙམ་དུས་གཞན་ཞིག་ན་དེ་བཙུན་མོ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་བཙུན་མོ་སེམས་ཅན་དང་ལྡན་པར་གྱུར་ནས་དེ་ཟླ་བ་བརྒྱད་དམ་དགུ་འདས་པ་ན་བུ་མོ་གཟུགས་བཟང་ཞིང་ལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །བཙས་པ་དེའི་གཟུགས་བཟང་པོས་རྒྱལ་པོ་ལེགས་པར་རབ་སད་བཙུན་མོ་འཁོར་དང་བཅས་པ་དང་། ལྷས་བསྟན་ན་གནས་པའི་སྐྱེ་བོའི་ཚོགས་རྣམས་མཆོག་ཏུ་ངོ་མཚར་སྐྱེས་ཏེ། ཐེ་ཚོམ་དུ་གྱུར་ནས་ཅི་འདི་བུ་མོ་ཡིན་ནམ། འོན་ཏེ་ལས་སྣ་ཚོགས་སྤྲུལ་པའི་སྒྱུ་འཕྲུལ་ཡིན་སྙམ་མོ། །

དེའི་བཙས་པའི་བཙས་སྟོན་ཉི་མ་བདུན་གསུམ་ཉི་ཤུ་གཅིག་ཏུ་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། ལྷ་ལྷས་བསྟན་ན་གནས་པའི་སྐྱེ་བོའི་ཚོགས་ལམ་པོ་ཆེ་དང་། ཚོང་དུས་དང་། བཞི་མདོ་དང་། སུམ་མདོ་རྣམས་སུ་གླེང་བ་ཁ་ཅིག་གི་མཆིད་ནས་ནི་འདི་བུ་མོ་ཁོ་ན་ལགས་ཏེ་སྔོན་གྱི་ལས་ཀྱི་རྣམ་པར་སྨིན་པས་གཟུགས་བཟང་ཞིང་ཁ་དོག་ཕུན་སུམ་ཚོགས་པར་གྱུར་ཏོ་ཞེས་མཆིའོ། །གཞན་དག་གི་མཆིད་ནས་ནི་འདི་བུ་མོ་མ་ལགས་ཀྱི། འོ་ན་ཅི་ཞེ་ན། ལས་སྣ་ཚོགས་པས་སྤྲུལ་པའི་སྒྱུ་འཕྲུལ་ལགས་སོ་ཞེས་མཆི་ལགས་པས་དེ་བས་ན་བུ་མོའི་མིང་སྒྱུ་འཕྲུལ་ཞེས་གདགས་སོ་ཞེས་དེའི་མིང་སྒྱུ་འཕྲུལ་ཞེས་བཏགས་སོ། །

བུ་མོ་སྒྱུ་འཕྲུལ་མ་མ་བརྒྱད་ལ་རྗེས་སུ་གཏད་དེ་ཞེས་བྱ་བ་ནས་ཆེན་མོར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ལ་མཚན་མཁན་རྣམས་ཀྱིས་ལུང་བསྟན་པ་མཚན་ཕུན་སུམ་ཚོགས་པ་དུ་མ་དང་ལྡན་པའི་བུ་ཞིག་བཙའ་བར་འགྱུར་ཞིང་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་བསྟན་ཏོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་གཟུགས་བཟང་བ། ལྟ་ན་སྡུག་པ། མཛེས་པ། ཁ་དོག་བཟང་མོ་རྒྱས་པ་མཆོག་དང་ལྡན་པ་ཞིག་བཙས་སོ། །དེ་བཙས་པ་ན་གྲོང་ཁྱེར་དེ་དག་ཐམས་ཅད་སྣང་བ་རྒྱ་ཆེན་པོས་སྣང་བར་བྱས་ཏེ། སྒྱུ་འཕྲུལ་ལ་ཇི་ལྟ་བ་བཞིན་དུ་དེའི་གཟུགས་བཟང་བ་རྣམ་པ་ཐམས་ཅད་དུ་དཔྱད་པར་མི་ནུས་སོ། །དེའི་བཙས་པའི་བཙས་སྟོན་ཡང་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དེ། །བློན་པོ་རྣམས་ཀྱིས་སྨྲས་པ། སྒྱུ་འཕྲུལ་པས་འདི་ལྷག་པར་གཟུགས་བཟང་བས་དེ་བས་ན་སྒྱུ་འཕྲུལ་ཆེན་མོ་ཞེས་བགྱི་བར་གདགས་སོ་ཞེས་བཏགས་སོ། །

དེ་ཡང་བསྐྱེད་བསྲིངས་ནས་ཆེན་མོར་གྱུར་པ་དང་དེ་ལ་མཚན་མཁན་རྣམས་ཀྱིས་ལུང་བསྟན་པ།སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་ཞིག་བཙའ་བར་འགྱུར་ཏེ། དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་བསྟན་ཏོ། །

རྒྱལ་པོ་ལེགས་པར་རབ་སད་ཀྱིས་རྒྱལ་པོ་སེང་གེའི་འགྲམ་ལ་ཕོ་ཉ་བཏང་སྟེ། བདག་ལ་བུ་མོ་གཉིས་ཤིག་བཙའ་བ་ནི་སྒྱུ་འཕྲུལ་དང་། སྒྱུ་འཕྲུལ་ཆེན་མོ་ལགས་ཏེ། དེ་ལ་གཅིག་ལ་ནི་མཚན་ཐམས་ཅད་ཕུན་སུམ་ཚོགས་པའི་བུ་ཞིག་བཙའ་བར་འགྱུར་ཞིང་དེ་ནི་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་ཏོ། །ཅིག་ཤོས་ལ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པའི་བུ་ཞིག་བཙའ་བར་འགྱུར་ཞིང་དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་གྱིས། འདི་གཉིས་ལས་གང་བཞེད་པ་གཞོན་ནུ་ཟས་གཙང་གི་ཆུང་མར་སྣོམས་ཤིག་སེང་གེ་འགྲམ་གྱིས་སླར་སྤྲིང་བ། གཉིས་ཀ་ཡང་གཞོན་ནུ་ལ་དགོས་མོད་ཀྱི། འོན་ཀྱང་ཆུང་མ་འདྲ་བ་གཉིས་གཅིག་ལ་གཞག་པར་མི་བྱ་བས་གང་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པའི་བུ་བཙའ་བར་འགྱུར་ཞིང་དེ་ཡང་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ལུང་བསྟན་པ་རེ་ཞིག་འདོད་དོ། །ཅིག་ཤོས་ཀྱང་ཚོགས་ལ་བརྟག་པར་བྱའོ། །དེས་དེ་འཁོར་ལྔ་བརྒྱ་དང་བཀྲིའོ། །

དེའི་ཚེ་ཤཱཀྱ་རྣམས་ཀྱི་ཕྱིར་རྒོལ་བ་སྐྱ་བསེང་ཞེས་བྱ་བ་རི་ཁྲོད་པ་དག་ཅིག་ཡོད་ནས་ཤཱཀྱ་རྣམས་འདུས་ཏེ་རྒྱལ་པོ་སེང་གེ་འགྲམ་གྱི་དྲུང་དུ་སོང་ནས་ལྷ་སྐྱ་བསེང་རི་ཁྲོད་པ་བདག་ཅག་ལ་གནོད་པ་བགྱིད་ཀྱིས་གྲོགས་མཛད་དུ་གསོལ། དེས་སྨྲས་པ། ཤེས་ལྡན་དག་ཁོ་བོ་རྒས་པས་དེ་རྣམས་དང་ལྷན་ཅིག་གཡུལ་སྤྲད་པར་མི་ནུས་སོ། །ལྷ་གཞོན་ནུ་ཟས་གཙང་གཏང་དུ་གསོལ། དམ་ཞིག་བཅའ་སྟེ། གལ་ཏེ་གཞོན་ནུ་ཇི་ལྟ་བུ་འདོད་པའི་དམ་པ་གཅིག་བསླངས་པ་དེ་སྦྱིན་པ་ལྟ་ན་གཏོང་ངོ་། །

དེ་རྣམས་ཀྱིས་སྨྲས་པ། ལྷ་བཀའ་བཞིན་འཚལ་སྩལ་བར་བགྱིའོ། །རྒྱལ་པོས་དཔུང་གི་ཚོགས་ཡན་ལག་བཞི་པ་གཞོན་ནུ་ཟས་གཙང་ལ་གཏད་ནས། དེས་རི་ཁྲོད་པ་དེ་རྣམས་བཅོམ་རབ་ཏུ་བཅོམ་སྟེ་རྨེག་བཏའོ། །དེ་ནས་ཤཱཀྱ་རྣམས་མགུ་ནས་རྒྱལ་པོ་སེང་གེ་འགྲམ་གྱི་དྲུང་དུ་དོང་སྟེ། ལྷ་གཞོན་ནུས་རི་ཁྲོད་པ་རྣམས་བཅོམ་རབ་ཏུ་བཅོམ་སྟེ་རྨེག་བཏའ་ལགས་པས་བདག་ཅག་གློ་བ་དགའ་ན་གཞོན་ནུ་མཆོག་ཅི་བཞེད་གསུངས་ཤིག་འབུལ་ལོ། །ཤེས་ལྡན་དག་ཤཱཀྱ་རྣམས་ཀྱི་ཁྲིམས་སུ་བཅའ་བ་སུས་ཀྱང་མཉམ་པ་ལས་ཆུན་མ་གཞག་པར་མི་བྱའོ་ཞེས་བཅས་སོ། །ལྷ་ཅི་ཁྲིམས་དྲལ་ལམ། དེས་སྨྲས་པ། ལྷག་པར་ཤིན་ཏུ་བསྡམ་གྱི་དྲལ་བར་མི་བྱ་ན། འོན་ཀྱང་གཞོན་ནུའི་དམ་པ་ཞིག་སློང་བ་ནི་མཉམ་པ་ལས་ཆུན་མ་བླང་བ་ཡིན་ནོ། །ལྷ་རུང་གིས་དེ་བཞིན་དུ་མཛོད་ཅིག །

དེ་ནས་སེང་གེ་འགྲམ་གྱིས་ལེགས་པར་རབ་སད་ལ་ཕོ་ཉ་བཏང་ནས་ཁོ་བོས་ཚོགས་ལ་བརྟགས་ཟིན་གྱིས། བུ་མོ་ཅིག་ཤོས་ཀྱང་བཀྲི་ཞིག །དེས་དེ་ཡང་འཁོར་ལྔ་བརྒྱ་དང་བཀྲི་སྟེ་གཞོན་ནུ་ཟས་གཙང་གིས་གཉིས་ཀ་བླངས་སོ། །ཇི་ཙམ་ན་དུས་གཞན་ཞིག་ན་རྒྱལ་པོ་སེང་གེ་འགྲམ་ཤི་ནས་སེར་སྐྱའི་གཞི་ན་རྒྱལ་པོ་ཟས་གཙང་རྒྱལ་སྲིད་བྱེད་དུ་འཇུག་སྟེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་། མི་མང་པོས་གང་བ། འཐབ་པ་དང་། རྩོད་པ་དང་། འགྱེད་པ་དང་། ཆོམ་རྐུན་མེད་ཅིང་ནད་རབ་ཏུ་ཞི་བར་གྱུར་པ། འབྲས་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་ན་བུ་གཅིག་པ་ལ་སྡུག་པ་བཞིན་རྒྱལ་སྲིད་སྐྱོང་བར་བྱེད་དོ། །

དེས་དུས་གཞན་ཞིག་ན་བཙུན་མོ་སྒྱུ་འཕྲུལ་ཆེན་མོ་དང་། ལྷན་ཅིག་སྟེང་གི་ཁང་བཟང་གི་གཞི་སྐྱེས་པ་མེད་པར་དོང་ནས་རོལ་མོས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །འདི་ནི་ཆོས་ཉིད་ཡིན་ཏེ། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འཇིག་རྟེན་ལ་གཟིགས་པ་ལྔས་གཟིགས་པར་མཛད་དེ། རིགས་ལ་གཟིགས་པ་དང་། ཡུལ་ལ་གཟིགས་པ་དང་། དུས་ལ་གཟིགས་པ་དང་། རྒྱུད་ལ་གཟིགས་པ་དང་། བུད་མེད་ལ་གཟིགས་པའོ། །བྱང་ཆུབ་སེམས་དཔའ་རྣམས་རྒྱུ་གང་གིས་རིགས་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་རིགས་ཇི་ལྟ་བུ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། བྲམ་ཟེའི་རིགས་སམ། རྒྱལ་རིགས་ཀྱི་རིགས་སུ་ཡིན་ལ། དེ་ལ་རེས་འགའ་ནི་བྲམ་ཟེའི་རིགས་བཙུན་པར་བཀུར། རེས་འགའ་ནི་རྒྱལ་རིགས་ཏེ། ད་ལྟ་ནི་རྒྱལ་རིགས་བཙུན་པར་བཀུར་བར་གཟིགས་ནས། མ་ལ་བདག་ལ་གཞན་དག་བྱང་ཆུབ་སེམས་དཔས་རིགས་ངན་པར་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་རྒྱལ་རིགས་སུ་ཉིང་མཚམས་སྦྱོར་བ་བླང་བར་བྱའོ་སྙམ་མོ། །འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས། སྨད་པར་མི་འགྱུར་བའི་ལས་བྱས་ཤིང་བསགས་པ་དང་། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་རིགས་ལ་གཟིགས་པར་མཛད་དོ། །

བྱང་ཆུབ་སེམས་དཔའ་རྣམས་རྒྱུ་གང་གིས་ཡུལ་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་ཡུལ་ཇི་ལྟ་བུ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། འབྲས་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ། སློང་མོ་པ་བརྒྱ་འདུ་བ། མཐའ་འཁོབ་ཀྱི་སྐྱེ་བོ་མེད་པ། དབུས་པའི་སྐྱེ་བོ་གནས་པའི་ཡུལ་ཡིན་པར་གཟིགས་ནས་འདི་སྙམ་དུ་དགོངས་ཏེ། ཡུལ་དབུས་འདི་ནི་བུ་རམ་ཤིང་གི་ཕྲེང་བ་དང་། འབྲས་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ། སློང་མོ་པ་བརྒྱ་འདུ་བ། མཐའ་འཁོབ་ཀྱི་སྐྱེ་བོ་མེད་པ། དབུས་པའི་སྐྱེ་བོ་གནས་པ་ཡིན་གྱིས་མ་ལ་བདག་ལ་གཞན་དག་བྱང་ཆུབ་སེམས་དཔའ་ཡུལ་མཐའ་འཁོབ་རྣམས་སུ་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་ཡུལ་དབུས་སུ་ཉིང་མཚམས་སྦྱོར་བ་བླང་བར་བྱ་སྙམ་མོ། །

འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང་། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་ཡུལ་ལ་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་གང་གིས་དུས་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་དུས་ཇི་ལྟ་བུ་ཞིག་ཏུ་འཛམ་བུའི་གླིང་དུ་ཉིང་མཚམས་སྦྱོར་བ་ལེན་སྙམ་ན། སྐྱེ་དགུའི་ཚེ་ལོ་ཡར་སྐྱེ་བ་ན་བརྒྱད་ཁྲི་ཐུབ་པ་ཡན་ཆད་ཉིང་མཚམས་སྦྱོར་བ་མི་ལེན་ལ་མི་རྣམས་ཀྱི་ཚེ་ལོ་མར་འགྲིབ་པ་ན་བརྒྱ་ཐུབ་པ་མན་ཆད་ཉིང་མཚམས་སྦྱོར་བ་མི་ལེན་ནོ། །

བྱང་ཆུབ་སེམས་དཔའ་རྒྱུ་གང་གིས་མི་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ཡན་ཆད་ཉིང་མཚམས་སྦྱོར་བ་ལེན་པར་མི་མཛད་ཅེ་ན། མི་རྣམས་ཚེ་ལོ་བརྒྱད་ཁྲི་ཐུབ་པ་ན་ཡིད་འབྱུང་བར་དཀའ་ཞིང་སྐྱོ་བར་བྱ་བར་དཀའ་ལ། བླུན་ཞིང་དབང་པོ་རྟུལ་བ་དང་། བག་མེད་ཅིང་བདེ་བ་མང་བས་བདེན་པ་རྣམས་ཀྱི་སྣོད་དུ་མི་འགྱུར་བའི་ཕྱིར་རོ། །མར་འགྲིབ་པ་ལོ་བརྒྱ་མན་ཆད་དུ་ཡང་སྙིགས་མ་ལྔ་པོ་འདི་ལྟ་སྟེ། ཚེའི་སྙིགས་མ་དང་། ཉོན་མོངས་པའི་སྙིགས་མ་དང་། སེམས་ཅན་གྱི་སྙིགས་མ་དང་། ལྟ་བའི་སྙིགས་མ་དང་། དུས་ཀྱི་སྙིགས་མ་ཤས་ཆེ་བ་ཡིན་པས་བདག་ལ་གཞན་དག་བྱང་ཆུབ་སེམས་དཔས་སྙིགས་མ་ལྔ་ཤས་ཆེ་བའི་དུས་སུ་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་རོ་སྙམ་མོ། །འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང་། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་དུས་ལ་གཟིགས་པ་ཡིན་ནོ། །བྱང་ཆུབ་སེམས་དཔའ་རྒྱུ་གང་གིས་རྒྱུད་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ནི་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་རྒྱུད་ཅི་འདྲ་བ་ཞིག་ཏུ་ཉིང་མཚམས་སྦྱོར་བ་ལེན་སྙམ་ན། རིགས་གང་ཞིག་བཙུན་པར་བཀུར་ཞིང་མ་མེས་དང་ཕ་མེས་ཟུང་བདུན་གྱི་བར་སྤྱོད་པ་ལ་སྐྱོན་མེད་པ་ཡིན་པར་གཟིགས་ནས་དེ་འདི་སྙམ་དུ་དགོངས་ཏེ། ཤཱཀྱའི་རིགས་བརྒྱུད་འདི་ནི་བཙུན་པར་བཀུར་བ་ཡིན་ཞིང་མང་པོས་བཀུར་བ་ནས་བཟུང་སྟེ་སྤྱོད་པ་སྐྱོན་མེད་པ་ཡིན་གྱིས་མ་ལ་བདག་ལ་གཞན་དག་བྱང་ཆུབ་སེམས་དཔས་རྒྱུད་ངན་པ་ལས་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་བར་བདག་གིས་རྒྱལ་པོ་ཟས་གཙང་གི་རྒྱུད་དུ་ཉིང་མཚམས་སྦྱོར་བ་བླང་ངོ་སྙམ་མོ། །

འདི་ལྟར་བྱང་ཆུབ་སེམས་དཔས་ཐོག་མ་མེད་པའི་དུས་ནས་སྨད་པར་མི་འགྱུར་བའི་ལས་བྱས་ཤིང་བསགས་པ་དང་། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་རྒྱུད་ལ་གཟིགས་པར་མཛད་དོ། །བྱང་ཆུབ་སེམས་དཔའ་རྣམས་རྒྱུ་གང་གིས་བུད་མེད་ལ་གཟིགས་པར་མཛད་ཅེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་ན་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་རྣམས་བུད་མེད་ཅི་འདྲ་བ་ཞིག་གི་རུམ་དུ་ཉིང་མཚམས་སྦྱོར་བ་ལེན་སྙམ་ན། བུད་མེད་གང་ཞིག་གཟུགས་བཟང་མོ་དང་ལྡན་པ། ཚུལ་དང་ལྡན་པ། རིགས་དང་ལྡན་པ། རྒོད་བག་ཅན་མ་ཡིན་ལ་རིགས་འཕེལ་བར་འགྱུར་ཞིང་སྔོན་གྱི་སངས་རྒྱས་རྣམས་ལ་ཀྱེ་མ་བདག་སངས་རྒྱས་ཀྱི་ཡུམ་དུ་གྱུར་ཅིག་ཅེས་སྨོན་ལམ་བཏབ་པ་དང་། བྱང་ཆུབ་སེམས་དཔའ་རུམ་དུ་ཟླ་བ་བཅུར་འཛིན་ནུས་པ་དང་། རང་གི་དོན་ཡང་ཉམས་པར་མི་བྱེད་པ་ཡིན་པར་གཟིགས་ནས་འདི་སྙམ་དུ་དགོངས་ཏེ། སྒྱུ་འཕྲུལ་ཆེན་མོ་འདི་ནི་མ་མེས་དང་། ཕ་མེས་ཟུང་བདུན་གྱི་བར་སྤྱོད་པ་ལ་སྐྱོན་མེད་ཅིང་གཟུགས་དང་ལྡན་པ་དང་། ཚུལ་དང་ལྡན་པ་དང་། རྒོད་བག་ཅན་མ་ཡིན་པ་དང་། རིགས་འཕེལ་བར་འགྱུར་བ་དང་། བྱང་ཆུབ་སེམས་དཔའ་རུམ་དུ་ཟླ་བ་བཅུར་འཛིན་ནུས་པ་དང་། རང་གི་དོན་ཡང་མི་ཉམས་པ་ཡིན་ལ། འདི་ལྟར་སྒྱུ་འཕྲུལ་ཆེན་མོས་སྔོན་སངས་རྒྱས་རྣམས་ལ་ཀྱེ་མ་བདག་སངས་རྒྱས་ཀྱི་ཡུམ་དུ་གྱུར་ཅིག་ཅེས་སྨོན་ལམ་བཏབ་པ་ཡང་ཡིན་པས་བདག་ལ་གཞན་དག་བྱང་ཆུབ་སེམས་དཔའ་མཚན་ངན་པ་དང་ལྡན་པའི་བུད་མེད་ཀྱི་རུམ་དུ་ཉིང་མཚམས་སྦྱོར་བ་བླངས་སོ་ཞེས་གཞི་འདིས་ཁ་ཟེར་བར་མི་འགྱུར་རོ་སྙམ་མོ། །

འདི་ལྟར་བྱང་ཆུབ་སེམས་དཔས་སྨད་པར་མི་འགྱུར་བའི་ལས་བྱས་ཤིང་བསགས་པ་དང་། སངས་རྒྱས་བཅོམ་ལྡན་འདས་རྣམས་ནི་ཆོས་བཤད་པ་འབྲས་བུ་མེད་པ་མ་ཡིན་པས་རྒྱུ་འདིས་ན་བྱང་ཆུབ་སེམས་དཔའ་རྣམས་བུད་མེད་ལ་གཟིགས་པར་མཛད་དོ། །དེ་ནས་བྱང་ཆུབ་སེམས་དཔས་གཟིགས་པ་ལྔ་གཟིགས་ནས་འདོད་པ་ན་སྤྱོད་པའི་ལྷའི་རིས་དྲུག་ལ་ལན་གསུམ་དུ་བསྒྲགས་པ། གྲོགས་པོ་དག་དགའ་ལྡན་གྱི་ལྷའི་རིས་འདི་ནས་ང་ཤི་འཕོས་ཏེ་མི་རྣམས་ཀྱི་ནང་དུ་རྒྱལ་པོ་ཟས་གཙང་གི་ཆུང་མ་དམ་པའི་རུམ་དུ་ཉིང་མཚམས་སྦྱོར་བ་བླངས་ལ་དེའི་བུར་གྱུར་ཏེ་བདུད་རྩི་རྟོགས་པར་བྱས། ཁྱོད་ཅག་ལས་གང་དག་བདུད་རྩི་དོན་དུ་གཉེར་བ་དེ་ཕལ་ཆེར་ཡུལ་དབུས་ཀྱི་མི་རྣམས་སུ་ཉིང་མཚམས་སྦྱོར་བ་ལོངས་ཤིག །དེ་སྐད་ཅེས་བཀའ་སྩལ་པ་དང་། དགའ་ལྡན་གྱི་རིས་ཀྱི་ལྷ་རྣམས་ཀྱིས་བྱང་ཆུབ་སེམས་དཔའ་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་མཁྱེན་པར་མཛོད་ཅིག །ད་ལྟར་འཇིག་རྟེན་ནི་སྡིག་པས་གོས་པ། སྐྱེ་དགུ་ནི་མ་རུངས་པའི་བསམ་པ་ཅན། འཛམ་བུའི་གླིང་རྟོག་གེ་པ་དྲུག་དང་། རྗེས་སུ་སྒྲོགས་པ་དྲུག་དང་། སྙོམས་པར་འཇུག་པ་དྲུག་གིས་དཀྲུགས་པ་ལགས་སོ། །དེ་ལ་རྟོག་གེ་པ་དྲུག་གང་ཞེ་ན། འདི་ལྟ་སྟེ། འོད་སྲུང་རྫོགས་བྱེད་དང་། ཀུན་ཏུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱའི་བུ་ནོག་ཅན་དང་། གཅེར་བུ་པ་གཉེན་གྱི་བུའོ། །རྗེས་སུ་སྒྲོགས་པ་དྲུག་གང་ཞེ་ན། འདི་ལྟ་སྟེ། བྲམ་ཟེ་རྒྱུས་རྒྱལ་དང་། བྲམ་ཟེ་གནས་རྡེག་དང་། བྲམ་ཟེ་བཟང་ལྡན་དང་། བྲམ་ཟེ་ཚངས་པའི་ཚེ་དང་། བྲམ་ཟེ་པད་མའི་སྙིང་པོ་དང་། བྲམ་ཟེ་དམར་པོའོ། །སྙོམས་པར་འཇུག་པ་དྲུག་གང་ཞེ་ན། འདི་ལྟ་སྟེ། རངས་བྱེད་ཀྱི་བུ་ལྷག་སྤྱོད་དང་། སྒྱུ་རྩལ་ཤེས་ཀྱི་བུ་རིང་དུ་འཕུར་དང་། ཀུན་ཏུ་རྒྱུ་ལེགས་བཟང་དང་། བྲམ་ཟེའི་ཁྱེའུ་ཀུན་རྒྱལ་དང་། དྲང་སྲོང་མ་བཅིངས་པ་དང་། ལྟེང་རྒྱས་འོད་སྲུང་རལ་བ་ཅན་ནོ། །

འདིར་ནི་ཆོས་མཉན་པའི་སླད་དུ་བྱང་ཆུབ་སེམས་དཔའི་གདན་དཔག་ཚད་བཅུ་གཉིས་པ་བཤམ་པར་བགྱི་ཞིང་བདག་ཅག་འདི་སྙམ་དུ་བདག་ཅག་ལ་དགའ་ལྡན་གྱི་གནས་ན་བྱང་ཆུབ་སེམས་དཔའ་བཞུགས་པས་ཆོས་བཤད་དེ། ཆོས་དེ་བདག་ཅག་གིས་ཐོས་ནས་ཅི་ནས་ཀྱང་བདག་ཅག་གི་ཡུན་རིང་པོའི་དོན་དང་། སྨན་པ་དང་། བདེ་བར་འགྱུར་བ་དེ་ལྟ་དེ་ལྟར་བསྒྲུབ་པར་བགྱི་བར་སེམས་ལགས་སོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔས་དགའ་ལྡན་གྱི་རིས་ཀྱི་ལྷ་རྣམས་ལ་འདི་སྐད་ཅེས་སྨྲས་སོ། །གྲོགས་པོ་དག་དེའི་ཕྱིར་རོལ་མོའི་ཆ་བྱད་ཐམས་ཅད་རྡུངས་ཤིག །དགའ་ལྡན་གྱི་རིས་ཀྱི་ལྷ་རྣམས་ཀྱིས་རོལ་མོའི་ཆ་བྱད་ཐམས་ཅད་བརྡུངས་པ་དང་བྱང་ཆུབ་སེམས་དཔས་ཀྱང་དུང་བུས་ཏེ་སྨྲས་པ། གྲོགས་པོ་དག་འདི་ལ་སྒྲ་ལྷག་པར་གང་ཆེ། བཅོམ་ལྡན་འདས་དུང་གི་སྒྲ་ལགས་སོ། །གྲོགས་པོ་དག་ཇི་ལྟར་དུང་གི་སྒྲས་རོལ་མོའི་ཆ་བྱད་ཐམས་ཅད་ཟིལ་གྱིས་མནན་ཏེ། གནས་པ་དེ་བཞིན་དུ་ངས་ཀྱང་འཛམ་བུའི་གླིང་དུ་སོང་ལ་རྟོག་གེ་པ་དྲུག་དང་། རྗེས་སུ་སྒྲོགས་པ་དྲུག་དང་། སྙོམས་པར་འཇུག་པ་དྲུག་ཟིལ་གྱིས་མནན་ནས་བདུད་རྩི་རྟོགས་པར་བྱས་ཏེ་བདུད་རྩིས་འགྲོ་བ་ཚིམ་པར་བྱའོ། །མི་རྟག་པའི་དུང་འབུད་པར་བྱའོ། །སྟོང་པ་ཉིད་ཀྱི་རྔ་བརྡུང་བར་བྱའོ། །

བདག་མེད་པའི་སེང་གེའི་སྒྲ་བསྒྲག་པར་བྱའོ་ཞེས་སྨྲས་ནས་ཚིགས་སུ་བཅད་དེ་སྨྲས་པ། སེང་གེ་གཅིག་གིས་གཅན་གཟན་ཚོགས་ནི་དུ་མ་འཇོམས། །རྡོ་རྗེ་གཅིག་གིས་བྲག་གི་རྩེ་མོ་དུ་མ་འཇིག །བརྒྱ་བྱིན་གཅིག་གིས་ལྷ་མ་ཡིན་དབང་དུ་མ་འཇོམས། །ཉི་མ་གཅིག་གིས་མུན་པ་དུ་མ་རྣམ་པར་སེལ། །གྲོགས་པོ་དག་ཁྱེད་ཅག་ལས་གང་བདུད་རྩི་དོན་དུ་གཉེར་བ་དེ་ཡུལ་དབུས་ཀྱི་གྲོང་ཁྱེར་ཆེན་པོ་དྲུག་ཏུ་ཉིང་མཚམས་སྦྱོར་བ་ལོངས་ཤིག །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འདི་སྙམ་དུ་སེམས་ཏེ། བྱང་ཆུབ་སེམས་དཔའ་བཅོམ་ལྡན་འདས་འདི་ནི་བཙུན་མོ་སྒྱུ་འཕྲུལ་ཆེན་མོའི་ལྷུམས་སུ་ཉིང་མཚམས་སྦྱོར་བ་ལེན་པར་བཞེད་ཀྱིས། མ་ལ་བདག་གིས་དེ་ལ་གཟི་བརྗིད་བསྒྲུབ་པར་བྱ། ལྷུམས་ཀྱང་སྦྱང་བར་བྱའོ་སྙམ་ནས། ལྷ་རྣམས་ཀྱི་དབང་པོ་བརྒྱ་བྱིན་གྱིས་བཙུན་མོ་སྒྱུ་འཕྲུལ་ཆེན་མོ་ལ་གཟི་བརྗིད་བསྒྲུབས་ཤིང་ལྷུམས་ཀྱང་གཙང་མར་བྱས་སོ། །དེ་ནས་བྱང་ཆུབ་སེམས་དཔའ་དགའ་ལྡན་གྱི་གནས་ན་བཞུགས་པ་གཟིགས་པ་ལྔས་གཟིགས་ཏེ། འདོད་པ་ན་སྤྱོད་པའི་ལྷ་དྲུག་ལ་ལན་གསུམ་དུ་བསྒྲགས་ནས་ནམ་གྱི་གུང་ཐུན་ལ་གླང་པོ་ཆེར་བསྟན་ཏེ། བཙུན་མོ་སྒྱུ་འཕྲུལ་ཆེན་མོའི་ལྷུམས་སུ་ཞུགས་སོ། །

སྨྲས་པ། འགྲོ་བ་ཡོངས་སུ་བསྐྱབ་ཕྱིར་དམ་བཞེས་ནས། །ལྷ་རྣམས་ལ་བསྒོ་དེ་ནས་ཤི་འཕོས་ཏེ། །ནངས་པར་སྤྲིན་རུམ་ཉི་མ་གསར་འཆར་ལྟར། །དེ་ནི་བུ་རམ་ཤིང་པའི་ལྷུམས་སུ་ཞུགས། །འདི་ལྟར་སྒྱུ་འཕྲུལ་ཆེན་མོའི་རྨི་ལམ་བཞི་རྨིས་པ། གླང་པོ་ཆེ་དམ་པ་དཀར་པོ་མཆེ་བ་དྲུག་པ་ཞིག་བདག་གི་རུམ་དྲལ་ནས་ཞུགས་པ་དང་། སྟེང་གི་ནམ་མཁའ་ལ་འགྲོ་བ་དང་། རི་བྲག་ཆེན་པོ་ལ་འཛེག་པ་དང་། བདག་ལ་སྐྱེ་བོའི་ཚོགས་ཆེན་པོ་ཕྱག་བྱེད་པའོ། །དེས་རྒྱལ་པོ་ཟས་གཙང་ལ་སྨྲས་པ་དང་། རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་རྨི་ལམ་སྟོན་མཁན་དང་། མཚན་མཁན་གྱི་བྲམ་ཟེ་རྣམས་ཁུག་ཅིག །དེ་དག་གིས་རྨི་ལམ་སྟོན་མཁན་དང་། མཚན་མཁན་གྱི་བྲམ་ཟེ་རྣམས་བཀུག་པ་དང་། དེ་ནས་རྒྱལ་པོས་དེ་རྣམས་ལ་རྨི་ལམ་བསྙད་པ་ལས། དེ་རྣམས་ཀྱིས་སྨྲས་པ། ལྷ་བསྟན་བཅོས་ལས་ཇི་ལྟར་གཡར་སྔར་བབ་པ་དང་སྦྱར་ན་སྲས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་ཞིག་བལྟམ་པར་འགྱུར་ཏེ། གལ་ཏེ་ཁྱིམ་པ་ཁྱིམ་ན་གནས་པར་གྱུར་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བར་འཇིག་རྟེན་དུ་སྒྲ་རྣམ་པར་གྲག་པར་འགྱུར་རོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་དགའ་ལྡན་གྱི་ལྷའི་རིས་ནས་ཤི་འཕོས་ཏེ་ཡུམ་གྱི་ལྷུམས་སུ་ཞུགས་པ་དེའི་ཚེ་ས་ཆེན་པོ་འདི་ཤིན་ཏུ་གཡོས་པར་གྱུར། འཇིག་རྟེན་འདི་ཐམས་ཅད་སྣང་བ་རྒྱ་ཆེན་པོས་གསལ་བར་གྱུར་ཅིང་འཇིག་རྟེན་ན་འཇིག་རྟེན་གྱི་བར་གྱི་མུན་པ་མུན་གནག་སྨག་ཏུ་གྱུར་པ་གང་དུ་ཉི་མ་དང་ཟླ་བ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་དག་གིས་ཀྱང་འོད་ཀྱིས་སྣང་བར་མི་ནུས་པ་དེ་དག་ཀྱང་དེའི་ཚེ་སྣང་བ་རྒྱ་ཆེན་པོས་གསལ་བར་གྱུར་ཏོ། །

དེར་སེམས་ཅན་གང་དག་སྐྱེས་པ་དེ་དག་རང་གི་ལག་པ་བརྐྱང་བ་ཡང་མི་མཐོང་བ་ལས་དེ་རྣམས་སྣང་བ་དེས་སེམས་ཅན་གཅིག་གིས་གཅིག་མཐོང་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་བྱ་བར་ཤེས་སོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་སུ་ཞུགས་པ་དེའི་ཚེ་ལྷ་རྣམས་ཀྱི་དབང་པོ་བརྒྱ་བྱིན་གྱིས་དེ་ལ་མིའམ་མི་མ་ཡིན་པ་སུས་ཀྱང་འཚེ་བར་མི་འགྱུར་བར་ལྷའི་བུ་བཞི་ཡུམ་གྱི་སྲུང་མར་འཇོག་པ་ནི་ལག་ན་རལ་གྲི་དང་། ལག་ན་མདུང་དང་། ལག་ན་མདུང་ཐུང་དང་། ལག་ན་མདའ་བོ་ཆེའོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་ཡུམ་གྱི་ལྷུམས་ན་ཞུགས་པ་ནི་མཛོད་ཀྱི་ནང་དུ་རྫས་བཞག་པ་བཞིན་དུ་མངལ་གྱི་དྲི་མ་དང་། ཤ་མའི་དྲི་མ་དང་། ཁྲག་གི་དྲི་མ་དང་། མི་གཙང་བ་གང་ཡང་རུང་བ་སྣ་ཚོགས་ཀྱིས་མ་སྦགས་སོ། །དཔེར་ན་ནོར་བུ་རིན་པོ་ཆེ་ཀ་ཤིའི་རས་ཀྱིས་མི་གོས་པ་དང་། ཀ་ཤིའི་རས་ཀྱང་ནོར་བུ་རིན་པོ་ཆེས་མི་གོས་པ་དེ་བཞིན་དུ། གང་གི་ཚེ་བྱང་ཆུབ་སེམས་དཔའ་ཡུམ་གྱི་ལྷུམས་ན་བཞུགས་པ་ན་མཛོད་ཀྱི་ནང་དུ་རྫས་བཞག་པ་བཞིན་དུ་མངལ་གྱི་དྲི་མ་དང་། ཤ་མའི་དྲི་མ་དང་། ཁྲག་གི་དྲི་མ་དང་། མི་གཙང་བ་གང་ཡང་རུང་བ་སྣ་ཚོགས་པས་མ་སྦགས་སོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་སུ་ཞུགས་པ་དེའི་ཚེ་ཡུམ་གྱི་ལྷུམས་ན་དེ་དག་ཐམས་ཅད་ཡོངས་སུ་རྫོགས་པས་བཞུགས་པ་མཐོང་ངོ་། །

དཔེར་ན་ནོར་བུ་རིན་པོ་ཆེ་ནི་བཻཌཱུརྱ་ཟུར་བརྒྱད་པ་བཟང་པོའི་རིགས་དང་ལྡན་པ། དང་བ། གསལ་བ། དྲི་མ་མེད་པ་ཚོན་སྐུད་སྣ་ལྔ་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་ལ་བརྒྱུས་པ་དེ་སྐྱེས་བུ་མིག་དང་ལྡན་པས་མཐོང་ན་འདི་ནི་སྐུད་པའོ། །འདི་ནི་ནོར་བུའོ། །སྐུད་པ་འདི་ལ་ནོར་བུ་བརྒྱུས་པ་ཡིན་ནོ་ཞེས་ཤེས་པ་དེ་བཞིན་དུ། བྱང་ཆུབ་སེམས་དཔའ་བཅོམ་ལྡན་འདས་གང་གི་ཚེ་ཡུམ་གྱི་ལྷུམས་ན་བཞུགས་པ་དེའི་ཚེ་ཡུམ་གྱི་ལྷུམས་ན་དེ་ཐམས་ཅད་ཡོངས་སུ་རྫོགས་པས་བཞུགས་པ་མཐོང་ངོ་། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་ན་བཞུགས་པ་དེའི་ཚེ་དེའི་ཡུམ་འདི་ལྟ་སྟེ། བྱང་ཆུབ་སེམས་དཔའ་འཛིན་པས་ངལ་བའམ་ལུས་དུབ་པར་འགྱུར་བ་མེད་དོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་ན་བཞུགས་པ་དེའི་ཚེ་ཡུམ་དེང་ཕན་ཆད་ཇི་སྲིད་འཚོའི་བར་དུ་བརྟུལ་ཞུགས་ལྔའི་གཞི་བླངས་པར་གྱུར་ཏེ། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་གོ །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། སྦྱར་བའི་ཆང་དང་། འབྲུའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། སྦྱར་བའི་ཆང་དང་འབྲུའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བྱེད་དོ། །སྲོག་མི་གཅོད་དང་མ་བྱིན་མི་ལེན་དང་། །རྫུན་དུ་མི་སྨྲ་ཆང་ལ་མི་བརྐམ་དང་། །འཁྲིག་པའི་མི་ཚངས་སྤྱོད་པ་སྤོང་བ་འདི། །འདི་ནི་དོན་གྲུབ་ཡུམ་གྱི་ཆོས་ཉིད་ཡིན། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་སུ་བཞུགས་པ་དེའི་ཚེ་དེའི་ཡུམ་འདི་ལྟ་སྟེ། སྐྱེས་པ་རྣམས་ལ་འདོད་པ་དང་ལྡན་པའི་ཡིད་གཏོད་པ་མེད་དོ། །

ཉོན་མོངས་རྣམས་ལ་ཆགས་པར་མི་འགྱུར་ཞིང་། །དེ་ནི་འདོད་རྒྱུས་སེམས་གདུངས་མི་འགྱུར་ལ། །དེ་ཡུམ་འདོད་པའི་ཡོན་ཏན་ལྡན་པ་ཡི། །སྐྱེས་པ་རྣམས་ལ་སེམས་ནི་གཏོད་པ་མེད། །སྒྱུ་འཕྲུལ་ཆེན་མོ་འདོད་པ་སྐྱེས་པ། །ཀྱེ་མ་བདག་གིས་རྒྱ་མཚོ་ཆེན་པོ་བཞིའི་ཆུ་བཏུང་ངོ་སྙམ་ནས་དེས་རྒྱལ་པོ་ཟས་གཙང་ལ་སྨྲས་པ་དང་། རྒྱལ་པོ་ཟས་གཙང་གིས་མཚན་མཁན་རྣམས་ལ་སྨྲས་པ། ཅིའི་ཕྱིར་བཙུན་མོ་འདི་འདི་ལྟ་བུའི་འདོད་པ་སྐྱེ། མཚན་མཁན་རྣམས་ཀྱིས་སྨྲས་པ། ལྷ་བཙུན་མོ་ལ་སྲས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་བརྒྱན་པ་ཞིག་བལྟམ་པར་འགྱུར་ཏེ། དེ་རབ་ཏུ་བྱུང་ནས་ཤེས་བྱའི་མཚོ་མཐའ་དག་འཐུང་བར་འགྱུར་རོ་ཞེས་ལུང་བསྟན་ཏོ། །རྒྱལ་པོས་སྨྲས་པ། གལ་ཏེ་འདི་ལ་མཚོ་ཆེན་པོའི་ཆུ་མ་བླུད་ན་ཅིར་འགྱུར། སྲས་ཡན་ལག་མ་ཚང་བ་ཞིག་བཙས་པར་འགྱུར་རོ། །རྒྱལ་པོས་སྨྲས་པ། ང་མིང་ཟས་གཙང་མ་ཞེས་བྱ་བའི་བུ་ཡན་ལག་མ་ཚང་བར་བྱའམ། དེའི་ཚེ་གྲོང་ཁྱེར་སེར་སྐྱའི་གཞི་ན་ཀུན་ཏུ་རྒྱུ་མིག་དམར་ཞེས་བྱ་བ་མིག་འཕྲུལ་ལ་བྱང་བ་ཞིག་འདུག་པ་དེ་རྒྱལ་པོས་བཀུག་ནས་བསྒོ་བ་དང་། དེས་དེ་སྟེང་གི་ཁང་བཟང་གི་གཞི་ན་འདུག་པ་ལ་རྒྱ་མཚོ་ཆེན་པོ་བཞི་བསྟན་ཏེ་ཆུ་བླུད་པ་དང་། དེའི་འདོད་པ་སྐྱེས་པ་གང་ཡིན་པ་དེ་དང་བྲལ་བར་གྱུར་ཏོ། །

གཞན་ཡང་དེའི་འདོད་པ་སྐྱེས་པ། ཀྱེ་མ་བཙོན་ཐམས་ཅད་ཐར་བར་བྱའོ། །སྙམ་པ་དང་། རྒྱལ་པོས་བཙོན་ཐམས་ཅད་ཐར་བར་བྱས་ནས། དེའི་འདོད་པ་སྐྱེས་པ་གང་ཡིན་པ་དེ་དང་བྲལ་བར་གྱུར་ཏོ། །གཞན་ཡང་དེའི་འདོད་པ་སྐྱེས་པ། ཀྱེ་མ་སྦྱིན་པ་དག་སྦྱིན། བསོད་ནམས་དག་བྱའོ་སྙམ་པ་དང་། རྒྱལ་པོས་སྦྱིན་པ་དག་བྱིན། བསོད་ནམས་དག་བྱས་ནས་དེའི་འདོད་པ་སྐྱེས་པ་གང་ཡིན་པ་དེ་དང་བྲལ་བར་གྱུར་ཏོ། །གཞན་ཡང་དེའི་འདོད་པ་སྐྱེས་པ། ཀྱེ་མ་བདག་གིས་སྐྱེད་མོས་ཚལ་བལྟའོ་སྙམ་པ་དང་། རྒྱལ་པོས་སྐྱེད་མོས་ཚལ་བསྟན་ནས་དེའི་འདོད་པ་སྐྱེས་པ་གང་ཡིན་པ་དེ་དང་བྲལ་བར་གྱུར་ཏོ། །གཞན་ཡང་དེའི་འདོད་པ་སྐྱེས་པ། ཀྱེ་མ་བདག་སྐྱེད་མོས་ཚལ་དུ་འདུག་པར་བྱའོ་སྙམ་པ་དང་། རྒྱལ་པོ་ལེགས་པར་རབ་སད་ལ་ལུམ་བི་ནིའི་ཚལ་ཞེས་བྱ་བའི་སྐྱེད་མོས་ཚལ་ཡོད་ནས་དེ་ལ་རྒྱལ་པོ་ཟས་གཙང་གིས་སྤྲིང་བ། ཁྱོད་ཀྱི་བུ་མོ་སྐྱེད་མོས་ཚལ་དུ་འགྲོ་བར་འདོད་ཀྱིས་སྐྱེད་མོས་ཚལ་བྱི་དོར་བྱོས་ཤིག །དེས་ཞོ་ཤས་འཚོ་བ་དག་ལ་བསྒོ་བ། ཤེས་ལྡན་དག་སྐྱེད་མོས་ཚལ་བྱི་དོར་བྱོས་ཤིག །དེ་རྣམས་ཀྱིས་སྐྱེད་མོས་ཚལ་བྱི་དོར་བྱས་སོ། །

དེ་ནས་དེ་འཁོར་རྣམས་དང་ལྷན་ཅིག་དོང་ངོ་། །དེ་ནས་དེས་ལུམ་བི་ནིའི་ཚལ་དུ་འཆག་པ་ན་ཤིང་མྱ་ངན་འཚང་མེ་ཏོག་ཤིན་ཏུ་རྒྱས་པ་ཞིག་མཐོང་སྟེ། དེ་བལྟམ་པར་འདོད་ནས་དེ་ལ་བཟུང་སྟེ་འདུག་པ་དང་། ལྷ་རྣམས་ཀྱི་དབང་པོ་བརྒྱ་བྱིན་གྱིས་བསམས་པ། བྱང་ཆུབ་སེམས་དཔའི་ཡུམ་ནི་ངོ་ཚ་ཤེས་པ་དང་ལྡན་པས་སྐྱེ་བོའི་ཚོགས་ཆེན་པོས་བསྐོར་ན་བལྟམ་མི་ཕོད་ཀྱིས་ཐབས་ཤིག་བཤམ་པར་བྱའོ་སྙམ་ནས་དེས་རླུང་དང་ཆར་དྲག་པོ་ཞིག་སྤྲུལ་ནས་དེས་སྐྱེ་བོའི་ཚོགས་དེ་ཀུན་ཏུ་བྲོས་སོ། །

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བདག་ཉིད་མ་མ་རྒན་མོའི་ཆ་བྱད་དུ་མངོན་པར་སྤྲུལ་ནས་བཙུན་མོ་སྒྱུ་འཕྲུལ་ཆེན་མོའི་མདུན་དུ་བསྡད་པ་དང་། དེས་བལྟམ་པར་བརྩམས་སོ། །བྱང་ཆུབ་སེམས་དཔའ་བལྟམ་པ་དང་། བརྒྱ་བྱིན་གྱིས་པགས་པའི་སླེབ་མོས་བཟུང་ངོ་། །དེ་ནས་བྱང་ཆུབ་སེམས་དཔའ་འདི་སྙམ་དུ་དགོངས་ཏེ། བརྒྱ་བྱིན་འདི་བདག་གིས་བྱང་ཆུབ་སེམས་དཔའ་བླངས་སོ་ཞེས་དྲེགས་པར་འགྱུར་བར་མཁྱེན་ནས་བདག་ཉིད་རྡོ་རྗེའི་སྐུར་བྱིན་གྱིས་བརླབས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་འདར་བར་གྱུར་ཏོ། །

བྱང་ཆུབ་སེམས་དཔས་བཀའ་སྩལ་པ། ཀཽ་ཤི་ཀ་ང་ཐོངས་ཤིག །ཐོངས་ཤིག །ཕར་ཐོངས་ཤིག །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་བལྟམ་པ་དེའི་ཚེ་ཡང་ས་ཆེན་པོ་འདི་ཡང་གཡོས་པར་གྱུར་ཞེས་བྱ་བ་ནས་ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ། །ཤེས་ལྡན་དག་སེམས་ཅན་གཞན་ཡང་འདིར་སྐྱེས་སོ་ཞེས་བྱ་བའི་བར་གོང་མ་བཞིན་དུའོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་ནས་བལྟམ་པ་ན་རལ་གྲི་ཤུབས་ནས་བྱུང་བ་བཞིན་དུ་མངལ་གྱི་དྲི་མ་དང་། ཤ་མའི་དྲི་མ་དང་། ཁྲག་གི་དྲི་མ་དང་། མི་གཙང་བ་གཞན་དང་གཞན་སྣ་ཚོགས་ཀྱིས་མ་གོས་སོ། །ཆོས་ཉིད་ཀྱིས་གང་གི་ཚེ་བྱང་ཆུབ་སེམས་དཔའ་བཅོམ་ལྡན་འདས་ཡུམ་གྱི་ལྷུམས་ནས་བལྟམས་པ་དེའི་ཚེ་དེའི་ཡུམ་མི་འདུག་མི་ཉལ་འགྲེང་བཞིན་དུ་རྒྱལ་རིགས་མ་དེས་རྒྱལ་རིགས་བལྟམ་པར་བྱེད་དོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམ་པའི་མོད་ལ་སུས་ཀྱང་མ་བཟུང་བར་ཕྱོགས་བཞིར་གཟིགས་ནས་གོམ་པ་བདུན་བདུན་འདོར་ཞིང་ཚིག་ཏུ་ཡང་གསུངས་པ། འདི་ནི་ཤར་ཕྱོགས་ཡིན་ཏེ། མྱ་ངན་ལས་འདས་པའི་ཐོག་མར་འགྲོ་བར་བྱའོ། །འདི་ནི་ལྷོ་ཕྱོགས་ཡིན་ཏེ། འགྲོ་བ་མཐའ་དག་གི་ཡོན་གནས་སུ་གྱུར་པར་བྱའོ། །འདི་ནི་ནུབ་ཕྱོགས་ཡིན་ཏེ། ངའི་སྐྱེ་བ་ཐ་མ་ནི་འདི་ཡིན་པར་འགྱུར་རོ། །འདི་ནི་བྱང་ཕྱོགས་ཡིན་ཏེ། སྲིད་པའི་མཚོ་ལས་བརྒལ་བར་བྱའོ། །

དེའི་དབུའི་སྟེང་ནས་ལྷ་རྣམས་གདུགས་དཀར་པོ་དང་། རྔ་ཡབ་ནོར་བུའི་ཡུ་བ་ཅན་དག་འཛིན་ཏོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམ་པའི་མོད་ལ་བར་སྣང་ལས་ཆུ་བསིལ་བ་གཅིག་དང་། ཆུ་དྲོན་པོ་གཅིག་སྟེ་ཆུ་གཉིས་ཀྱི་རྒྱུན་སྤྱི་གཙུག་གི་སྟེང་དུ་འབབ་ཅིང་དེས་བྱང་ཆུབ་སེམས་དཔའ་ཁྲུས་མཛད་དོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམ་པའི་མོད་ལ་བསྐྲུན་པའི་ཡུམ་གྱི་མདུན་དུ་ཆུ་མིག་ཆེན་པོ་བྱུང་ནས་འབབ་པར་གྱུར་ཏེ། དེ་ལ་དེའི་ཡུམ་ཆུས་ཆུའི་བྱ་བ་བྱེད་དོ། །ཆོས་ཉིད་ཀྱིས་བྱང་ཆུབ་སེམས་དཔའ་བལྟམ་པའི་མོད་ལ་ལྷས་བར་སྣང་ལས་ལྷའི་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ཨ་ག་རུའི་ཕྱེ་མ་དང་། རྒྱ་སྤོས་ཀྱི་ཕྱེ་མ་དང་། ཙན་དན་གྱི་ཕྱེ་མ་དང་ཏ་མ་ལའི་འདབ་མས་འཐོར་རོ། །ལྷའི་མེ་ཏོག་མན་དཱ་ར་བས་ཀྱང་འཐོར་རོ། །ལྷའི་སིལ་སྙན་རྣམས་ཀྱིས་ཀྱང་སྒྲ་འབྱིན་ཏོ། །གོས་དག་ཀྱང་འཐོར་བར་བྱེད་དོ།། །།

སྟོན་པ་ཐུགས་རྗེ་ཅན་གྱི་མ་ཡུམ་སྒྱུ་འཕྲུལ་ཆེན་མོའི་ལོ་རྒྱུས་དང་རྒྱལ་བུ་དོན་ཀུན་གྲུབ་པ་ཇི་ལྟར་འཁྲུངས་ཚུལ། རྒྱ་ཆེར་རོལ་པའི་མདོ་ལས་བཏུས།

ལྷ་མོ་སྒྱུ་འཕྲུལ་ཡང་ཁྲུས་བྱས། ལུས་བྱུག་པས་བྱུགས། རྒྱན་སྣ་ཚོགས་ཀྱིས་ལག་པ་ཤིན་ཏུ་བརྒྱན་ཏེ། གོས་ཤིན་ཏུ་འཇམ་པ་མཆོག་བགོས་ཤིང་བཙུན་སྤུ་དང་བཅས་ལ། དགའ་བ་དང་། མཆོག་ཏུ་དགའ་བ་དང་། རངས་པ་ཐོབ་ནས། བུད་མེད་སྟོང་ཕྲག་བཅུས་བསྐོར་ཅིང་མདུན་དུ་བདར་ཏེ། ལྷན་ཅིག་ཏུ་རྒྱལ་པོ་ཟས་གཙང་མ་རོལ་མོ་བྱ་བའི་ཁང་བཟང་ན་བདེ་བར་གནས་པའི་དྲུང་དུ་ཕྱིན་ཏེ། གཡས་རོལ་ན་ཁྲི་བཟང་པོ་རིན་པོ་ཆེའི་དྲ་བས་བརྒྱན་པ་ལ་འདུག་ནས། འཛུམ་པའི་བཞིན་ཁྲོ་གཉེར་མེད་ཅིང་རབ་ཏུ་དད་པའི་མདོག་གིས་རྒྱལ་པོ་ཟས་གཙང་མ་ལ་ཚིགས་སུ་བཅད་པ་འདི་དག་སྨྲས་སོ། །

རྒྱལ་པོ་ས་བདག་ལེགས་པར་བདག་ལ་གསན་དུ་གསོལ། །རྒྱལ་པོ་ཁྱོད་ལ་གསོལ་གྱིས་བདག་ལ་དེ་གནོངས་ཤིག །བདག་གི་བསམ་པ་ཡིད་ལ་ཅི་མཆིས་ཅིར་དགའ་བ། །དེ་དག་བདག་ལ་གསན་ཅིང་ཐུགས་དགྱེས་རངས་པར་མཛོད། །ལྷ་བདག་བསྙེན་གནས་ཚུལ་ཁྲིམས་བརྟུལ་ཞུགས་ལེན་པར་གསོལ། །བདག་ནི་འགྲོ་ལ་བྱམས་པས་ཡན་ལག་བརྒྱད་ལེན་ཏེ། །སྲོག་ཆགས་གནོད་པ་སྤངས་ཤིང་བསམ་པ་རྟག་དག་པས། །ཇི་ལྟར་བདག་ལ་བྱམས་པ་དེ་ལྟར་གཞན་ལ་བགྱི། །རྐུ་སེམས་རྣམ་པར་སྤངས་ཏེ་འདོད་དང་དྲེགས་པ་སྤངས། །རྒྱལ་པོ་འདོད་པ་རྣམས་ལ་ལོག་པར་གཡེམ་མི་བགྱིད། །བདེན་ལ་གནས་ཤིང་ཕྲ་མ་མ་མཆིས་ཞེ་གཅོད་སྤང་། །མི་དགེ་ཀྱལ་པའི་ཚིག་ཀྱང་ཡོངས་སུ་མི་སྤྱོད་དོ། །གནོད་སེམས་ཞེ་སྡང་ཐ་བ་གཏི་མུག་རྒྱགས་པ་དང་། །བརྣབ་སེམས་ཀུན་སྤངས་རང་གི་ནོར་གྱིས་འཚལ་བར་བགྱི། །ཡང་དག་སྦྱོར་བས་ཁ་གསག་ཚུལ་འཆོས་ཕྲག་དོག་སྤང་། །དགེ་བཅུའི་ལས་ལམ་འདི་དག་བདག་གིས་སྤྱད་པར་བགྱི། །བདག་ནི་ཚུལ་ཁྲིམས་བརྟུལ་ཞུགས་མངོན་དགའ་རབ་བསྡམས་ཀྱིས། །མི་ཡི་དབང་པོ་བདག་ལ་བཞེད་པས་སྲེད་མ་མཛད། །རྒྱལ་པོ་ཁྱོད་ལ་ཡུན་རིང་མི་དགེར་གྱུར་དུ་མཆི། །བདག་གི་ཚུལ་ཁྲིམས་བརྟུལ་ཞུགས་ཉེར་གནས་དགྱེས་པར་མཛོད། །རྒྱལ་པོ་བདག་གི་འཚལ་བ་འདི་ལགས་དེང་མྱུར་སྩོལ། །ཁང་བཟང་བསིལ་ཁང་ལྡན་པ་ངང་སྐྱ་ལྡན་པའི་ནང་། །མེ་ཏོག་བཀྲམ་པའི་མཆིས་མལ་འཇམ་ཞིང་དྲི་བདའ་བར། །གྲོགས་མོས་རྟག་ཏུ་བསྐོར་ཅིང་བདེ་དགར་གནས་སྙམ་བགྱིད། །སྐྱེས་པ༌ཉུང་རུམ་རྣམས་དང་དེ་བཞིན་ཁྱེའུ་དག་དང་། །བུད་མེད་ཕལ་པ་རྣམས་ཀྱང་མདུན་ན་མཆིས་མི་འཚལ། །སྙན་ཞིང་ཡིད་མཆི་སྒྲ་སྙན་ཉན་པ་མ་གཏོགས་པར། །གཟུགས་དང་སྒྲ་བསུང་ཡིད་དུ་མི་མཆི་བདག་མི་འཚལ། །བཅིངས་དང་བཙོན་རར་སྩལ་བ་ཐམས་ཅད་དགྱེ་བར་གསོལ། །ནོར་གྱིས་བྲེལ་བའི་མི་རྣམས་ནོར་དང་ལྡན་པར་མཛོད། །ཟས་སྐོམ་རང་པ་ཤིང་རྟ་ཁྱོགས་དང་བཞོན་པ་རྟ། །འགྲོ་ལ་བདེ་བའི་སླད་དུ་དགུང་བདུན་སྩལ་བ་མཛོད། །ཕོ་བྲང་འདི་ན་སྐྱེས་པ་ཁྱེའུ་དང་བུད་མེད་དག །ཇི་སྙེད་མཆིས་པ་འཐབ་རྩོད་ཁྲོ་བའི་ཚིག་བྲལ་ཞིང་། །ཕན་ཚུན་བྱམས་པའི་ཡིད་ལྡན་ཕན་དང་དེས་སེམས་ཀྱིས། །དགའ་ཚལ་གནས་པའི་ལྷ་ལྟར་མཐུན་ཞིང་བདེ་སྤྱོད་མཛོད། །རྒྱལ་པོའི་ཆད་པ་ཆེ་ཕྲ་གཉེར་གྱིས་བདའ་བ་དང་། །གནོད་པ་བགྱིད་དང་རྡེག་བཙོག༌སྡིགས་རུ་མི་མཛད་པར། །ཀུན་ལའང༌དད་པའི་ཐུགས་ཀྱིས་བྱམས་དང་ཕན་དགོངས་ཏེ། །ལྷ་ཡིས་སྐྱེ་བོ་རྣམས་ལ་སྲས་གཅིག་བཞིན་དུ་གཟིགས། །རྒྱལ་པོས་དེ་སྐད་ཚིག་ཐོས་རབ་ཏུ་དགར་གྱུར་ནས། །སྨྲས་པ་ཁྱོད་ནི་ཅི་འདོད་དེ་ཀུན་དེ་བཞིན་བྱ། །ཁྱོད་ཀྱི་བསམ་པ་ཡིད་ཀྱིས་གང་རྣམས་རྗེས༌བསམས་ཤིང་། །ཁྱོད་ཀྱིས་མཆོག་བླངས་གང་ཡིན་དེ་ནི་ངས་སྦྱིན་ནོ། །རྒྱལ་པོའི་དམ་པས་རང་གི་འཁོར་ལ་བསྒོ་བ་ནི། །ཁང་བཟང་དམ་པའི་སྟེང་དུ་ཕུན་སུམ་ཚོགས་པ་ཤོམས། །མེ་ཏོག་མཛེས་པ་ཁྲོམ་ལ་བདུག་སྤོས་མཆོག་གིས་བདུགས། །གདུགས་དང་བ་དན་ཏ་ལའི་ཕྲེང་བའི་རྒྱན་ཀྱང་གྱིས། །འཐབ་ཕོད་སྟོང་ཕྲག་ཉི་ཤུ་སྣ་ཚོགས་གོ་ཆ་ཅན། །མདའ་མདུང་ལྕགས་མདའ་མདུང་ཐུང་རལ་གྲི་ཐོགས་པ་དག །ཡིད་འོང་སྒྲ་གཅན་ངང་སྐྱ་ལྡན་པ་བསྐོར་གྱིས་ཏེ། །ལྷ་མོ་འཇིགས་པ་མེད་པར་བྱ་ཕྱིར་སྲུང་ཞིང་གནས། །ཁྲུས་བྱས་སྤོས་བྱུགས་གོས་མཆོག་དག་གིས་ཡན་ལག་བརྒྱན། །བུད་མེད་རྣམས་ཀྱིས་དེ་བསྐོར་ལྷ་ཡི་བུ་མོ་འདྲ། །ཡིད་དུ་འོང་བའི་སྒྲ་ལྡན་སིལ་སྙན་སྟོང་བླངས་ཏེ། །ལྷ་མོ༌དེ་བཞུགས་ལྷ་ཡི་བུ་མོ་བཞིན་དུ་གནས། །ལྷ་ཡི་རིན་ཆེན་རིན་ཐང་ཆེན་པོས་རྩ་སྤྲས་པ། །ཁྲི་ལ་གོས་མཆོག་མང་པོས་ཡིད་འོང་མལ་བཤམས་ཏེ། །མལ་ཕྱིན་གཙུག་གི་ནོར་བུ་རིན་ཆེན་ཀློད་བྱས་ནས། །འདྲེས་པའི་ནགས་ཚལ་ལྷ་ཡི་བུ་མོ་བཞིན་དུ་གནས། །དགེ་སློང་དག་དེ་ནས་རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། ལྷའི་བུ་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དགའ་དང་། གཞན་འཕྲུལ་དབང་བྱེད་དང་། བདུད་ཀྱི་བུ་དེད་དཔོན་དང་། མི་མཇེད་ཀྱི་བདག་པོ་ཚངས་པ་དང་། མདུན་ན་འདོན་ཚངས་མཆོག་དང་། མདུན་ན་འདོན་ཚངས་བཟངས་དང་། འོད་བཀོད་པ་དང་། འོད་གསལ་དང་། གནས་གཙང་མའི་རིས་ཀྱི་དབང་ཕྱུག་ཆེན་པོ་དང་། མཐར་ཐུག་དང་། འོག་མིན་པ་དང་། དེ་དག་ལ་སོགས་པ་དང་། གཞན་ཡང་ལྷ་བརྒྱ་སྟོང་མང་པོ་འདུས་ཏེ། གཅིག་ལ་གཅིག་འདི་སྐད་ཅེས་སྨྲས་སོ། །

གྲོགས་པོ་དག་བདག་ཅག་གིས་བྱང་ཆུབ་སེམས་དཔའ་གཅིག་པུ་གཉིས་སུ་མེད་པར་གཤེགས་སུ་གསོལ་ན། བདག་ཅག་གིས་བྱས་པ་མ་ཤེས་པར་འགྱུར་ཏེ། བདག་ཅག་ལ་མི་ཆས། གྲོགས་པོ་དག་ཁྱེད་ཀྱི་ནང་ནས་བྱང་ཆུབ་སེམས་དཔའ་ཐོག་མ་ཡུམ་གྱི་ལྷུམས་སུ་གཤེགས་པ་དང་། ལྷུམས་ན་བཞུགས་པ་དང་། བལྟམ་པ་དང་། ཐོར་བུ་དང་། བྱིས་པའི་ནང་ན་རོལ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། རོལ་མོ་གཟིགས་པ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། །མྱ་ངན་ལས་འདས་པ་ཆེན་པོ་བསྟན་གྱི་བར་དུ་ཕན་པའི་སེམས་དང་། དགའ་བའི་སེམས་དང་། ཕངས་པའི་སེམས་དང་། བྱམས་པའི་སེམས་དང་། མཉེན་པའི་སེམས་ཀྱིས་རྟག་པར་རྒྱུན་དུ་བྱང་ཆུབ་སེམས་དཔའི་ཞབས་འབྲིང་ན་འཁོད་པར་སུ་དག་སྤྲོ། དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཁྱེད་ལས་སུ་ཞིག་རྟག་ཏུ་དགའ་ཡིད་ཀྱིས། །གཟུགས་མཆོག་མངའ་བའི་ཞབས་འབྲིང་བྱེད་པར་སྤྲོ། །སུ་དག་རང་གི་བསོད་ནམས་གཟི་བརྗིད་དང་། །སྟོབས་དང་གྲགས་པ་རྣམ་པར་སྤེལ་བར་འདོད། །གང་ཞིག་ལྷ་ཡི་ཕོ་བྲང་འདི་དག་ན། །ལྷ་མོ་དག་དང་འདོད་པའི་ཡོན་ཏན་གྱི། །ལྷ་ཡི་བདེ་བས༌དགའ་བར་འདོད་པ་དག །དྲི་མེད་ཟླ་བའི་ཞལ་གྱི༌ཞབས་འབྲིང་གྱིས། །དེ་བཞིན་འདྲེས་པའི་ནགས་ཚལ་མཛེས་པ་མཆོག །ལྷ་ཡི་འབྱུང་གནས་ལྷ་ཡི་ཕོ་བྲང་ན། །གསེར་མདོག་མེ་ཏོག་རྒྱས་པར་དགའ་འདོད་ན། །དྲི་མེད་གཟི་བརྗིད་མངའ་བའི་ཞབས་འབྲིང་གྱིས། །གང་གིས་སྣ་ཚོགས་ཤིང་རྟ་དེ་བཞིན་དུ། །དགའ་ཚལ་མེ་ཏོག༌མན་དཱར་འདབ་རྒྱས་སུ། །ལྷ་མོ་ལྷན་ཅིག་རྩེ་བར་འདོད་པ་དག །སྐྱེས་བུ་ཆེན་པོ་འདི་ཡི་ཞབས་འབྲིང་གྱིས། །འཐབ་བྲལ་བདག་པོའམ་དགའ་ལྡན་བདག་པོའམ། །ཡང་ན་དབང་ཕྱུག་འགྱུར་བར་འདོད་པ་དང་། །འགྲོ་བ་ཀུན་གྱིས་མཆོད་འོས་འདོད་པ་དག །གྲགས་པ་མཐའ་ཡས་འདི་ཡི་ཞབས་འབྲིང་གྱིས། །གང་ཞིག་འཕྲུལ་དགའི་ཁང་པ་མཛེས་པ་དང་། །དབང་སྒྱུར་ལྷ་ཡི་གནས་སུ་རྩེ་འདོད་ཅིང་། །ཡིད་ཀྱི་འཕྲུལ་གྱིས་ཐམས་ཅད་སྤྱོད་འདོད་པ། །ཡོན་ཏན་མཆོག་མངའ་འདི་ཡི་ཞབས་འབྲིང་གྱིས། །བདུད་ཀྱི་དབང་པོ་ཞེ་སྡང་ཡིད་མེད་པ། །རྫུ་འཕྲུལ་དབང་ཕྱུག་ཀུན་གྱི་མཐར་ཕྱིན་པའི། །འདོད་པའི་དབང་ཕྱུག་དབང་མཐར་ཕྱིན་འདོད་ན། །ཕན་པ་མཛད་པ་འདི་དང་ལྷན་ཅིག་དེང་། །དེ་བཞིན་འདོད་པའི་ཁམས་ལས་འདའ་བྱས་ཏེ། །ཚངས་པའི་གནས་སུ་གནས་པར་སུ་འདོད་པ། །དེ་ནི་ཚད་མེད་བཞི་ཡི་གཟི་མངའ་བ། །སྐྱེས་བུ་ཆེན་པོའི་ཞབས་འབྲིང་དེང་ནས་གྱིས། །འོན་ཏམ་གང་ཞིག་མི་ཡི་ནང་དག་ཏུ། །འཁོར་ལོས་སྒྱུར་ཡུལ་ཡངས་པར་སྐྱེ་འདོད་ན། །རིན་ཆེན་འབྱུང་གནས་མི་འཇིགས་བདེ་སྦྱིན་པ། །བསོད་ནམས་ཡངས་པ་མངའ་བའི་ཞབས་འབྲིང་གྱིས། །གང་ཞིག་ས་བདག་དེ་བཞིན་ཚོང་དཔོན་བུ། །ཕྱུག་ཅིང་སྐྱིད་ལ་ནོར་མང་ཚོགས་ཆེན་དང་། །དགྲ་ཡི་དཔུང་བཅོམ་འཁོར་དང་ལྡན་འདོད་པ། །དེ་ནི་ཕན་མཛད་འདི་དང་ལྷན་ཅིག་དེང་། །གཟུགས་དང་ལོངས་སྤྱོད་དེ་བཞིན་དབང་ཕྱུག་དང་། །སྙན་པ་གྲགས་དང་སྤོབས་དང་ཡོན་ཏན་དང་། །གཟུང་འོས་ཚིག་དང་མཉན་པའི་ཚིག་འདོད་པ། །དེ་ནི་ཚངས་དབྱངས་མཁས་པའི་གན་དུ་སོང་། །ལྷ་དང་མི་ཡི་འདོད་པ་གང་ཡིན་དང་། །སྲིད་པ་གསུམ་གྱི་བདེ་བ་ཐམས་ཅད་དང་། །བསམ་གཏན་བདེ་དང་དབེན་པའི་བདེ་འདོད་པ། །དེ་ནི་ཆོས་ཀྱི་དབང་ཕྱུག་ཞབས་འབྲིང་གྱིས། །འདོད་ཆགས་དང་ནི་ཞེ་སྡང་སྤོང་བ་དང་། །ཉོན་མོངས་མུན་པ་སེལ་བར་སུ་འདོད་ཅིང་། །ཞི་བ་རབ་ཞི་ཉེར་ཞི་ཡིད་ལྡན་པ། །དེ་ནི་ཐུགས་དུལ་ཞབས་འབྲིང་མྱུར་དུ་སོང་། །གང་ཞིག་སློབ་དང་མི་སློབ་རང་རྒྱལ་དང་། །ཐམས་ཅད་མཁྱེན་པའི་ཡེ་ཤེས་ཐོབ་འདོད་ཅིང་། །སྟོབས་བཅུས་སེང་གེའི་སྒྲ་སྒྲོགས་སུ་འདོད་པ། །དེ་ནི་ཡོན་ཏན་རྒྱ་མཚོ་མཁས་དྲུང་སོང་། །གང་ཞིག་ངན་སོང་རྣམས་ཀྱི་ལམ་གཅོད་ཅིང་། །བཟང་འགྲོ་འཆི་བ་མེད་པའི་ལམ་དབྱེ་དང་། །ཡན་ལག་བརྒྱད་ལམ་འགྲོ་བས་འགྲོ་འདོད་ན། །འགྲོ་ལམ་མཐར་འབྱིན་འདི་ཡི་ཞབས་འབྲིང་གྱིས། །གང་ཞིག་བདེ་གཤེགས་ཡོངས་སུ་མཆོད་པ་དང་། །ཐུགས་རྗེ་མངའ་བ་དེ་ལས་ཆོས་ཉན་དང་། །དགེ་འདུན་ཡོན་ཏན་ཐོབ་པར་འདོད་པ་ནི། །ཡོན་ཏན་རྒྱ་མཚོ་འདི་ཡི་ཞབས་འབྲིང་གྱིས། །སྐྱེ་རྒ་ན་འཆིའི་སྡུག་བསྔལ་ཟད་པ་དང་། །འཁོར་བའི་བཅིངས་པ་རྣམ་པར་གྲོལ་བ་དང་། །ནམ་མཁའི་མཐའ་མཉམ་རྣམ་དག་སྤྱོད་འདོད་པ། །དེ་ནི་སེམས་ཅན་དག་པའི་ཞབས་འབྲིང་གྱིས། །འགྲོ་བ་ཀུན་ན་ཡིད་འོང་སྡུག་མཛེས་ཤིང་། །གཟུགས་མཆོག་མཚན་དང་ཡོན་ཏན་རྒྱས་པ་དང་། །བདག་དང་དེ་བཞིན་གཞན་ཡང་འགྲེལ་འདོད་པ། །དེ་ནི་བལྟ་སྡུག་མཁས་པའི་གན་དུ་སོང་། །ཚུལ་ཁྲིམས་ཏིང་འཛིན་དེ་བཞིན་ཤེས་རབ་དང་། །ཟབ་ཅིང་བལྟ་དཀའ་གཏིང་དཔག་དཀའ་བ་ཡི། །རྣམ་གྲོལ་ཐོབ་འདོད་མཁས་པ་གང་ཡིན་དེ། །སྨན་པའི་རྒྱལ་པོའི་གན་དུ་མྱུར་དུ་སོང་། །ཡོན་ཏན་འདི་དང་གཞན་ཡང་རྣམ་མང་དང་། །སྲིད་པའི་བདེ་དང་དེ་བཞིན་མྱ་ངན་འདས། །ཡོན་ཏན་ཐམས་ཅད་རབ་ཏུ་རྫོགས་འདོད་པ། །དེ་ནི་བརྟུལ་ཞུགས་གྲུབ་མཁས་གན་དུ་སོང་། །ཚིག་དེ་ཐོས་ནས་རྒྱལ་ཆེན་བཞིའི་རིས་ཀྱི་ལྷ་འབུམ་ཕྲག་བརྒྱད་ཅུ་རྩ་བཞི་དང་། སུམ་ཅུ་རྩ་གསུམ་གྱི་ལྷ་འབུམ་དང་། འཐབ་བྲལ་གྱི་ལྷ་འབུམ་དང་། དགའ་ལྡན་གྱི་ལྷ་འབུམ་དང་། འཕྲུལ་དགའི་ལྷ་འབུམ་དང་། བདུད་ཀྱི་རིས་ཀྱི་ལྷ་སྔོན་གྱི་དགེ་བའི་ལས་ཀྱིས་བྱུང་བ་དྲུག་ཁྲི་དང་། ཚངས་རིས་ཀྱི་ལྷ་དྲུག་ཁྲི་བརྒྱད་སྟོང་དང་། འོག་མིན་གྱི་བར་གྱི་ལྷ་བརྒྱ་སྟོང་མང་པོ་དག་འདུས་པར༌གྱུར་པ་དང་། གཞན་ཡང་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་ལྷའི་བུ་བརྒྱ་སྟོང་མང་པོ་འདུས་པར་གྱུར་པ་དེ་དག་ལས་གང་དག་མཆོག་ཏུ་བྱ་བའི་ལྷའི་བུ་དག་གིས་ལྷའི་འཁོར་ཆེན་པོ་དེ་དག་ལ་ཚིགས་སུ་བཅད་པ་འདི་དག་སྨྲས་སོ། །

བདག་ཅག་རྣམས་ཀྱིས་བསམ་པ་ཡང་དག་ཅི་འདྲ་ཡི། །ཚིག་འདི་ལྷ་ཡི་དབང་པོ་དག་གིས་གསན་དུ་གསོལ། །འདོད་པའི་དགའ་འབྱོར་བསམ་གཏན་བདེ་བ་མཆོག་སྤངས་ཏེ། །སེམས་ཅན་དག་པ་དམ་པ་འདི་ཡི་ཞབས་འབྲིང་བགྱི། །ལྷུམས་སུ་གཤེགས་དང་ལྷུམས་ན་བཞུགས་དང་བལྟམས་པའི་ཚེ། །བདག་ཉིད་ཆེན་པོ་མཆོད་འོས་ཤིན་ཏུ་མཆོད་པར་བགྱི། །བསོད་ནམས་དག་གིས་བསྲུངས་པའི་དྲང་སྲོང་ཡོངས་བསྲུངས་ན། །ཞེ་སྡང་སེམས་ཀྱིས་སུས་ཀྱང་གླགས་རྙེད་འགྱུར་མ་མཆིས། །གླུ་དབྱངས་སིལ་སྙན་རོལ་མོའི་དབྱངས་སྒྲ་ལེགས་བསྒྲགས་པས། །ཡོན་ཏན་རྒྱ་མཚོ་མངའ་བའི་ཡོན་ཏན་བསྔགས་བརྗོད་དེ། །གང་ཐོས་སྐྱེ་བོ་བྱང་ཆུབ་མཆོག་ཏུ་སེམས་བསྐྱེད་པར། །ལྷ་དང་མི་རྣམས་ཐམས་ཅད་རབ་ཏུ་དགའ་བར་བགྱི། །རྒྱལ་པོའི་ཕོ་བྲང་མེ་ཏོག་སིལ་མས་རྒྱས་པར་དགང་། །ཨ་ག་རུ་མཆོག་ནག་པོས་བདུགས་ཏེ་དྲི་ཞིམ་བགྱི། །དེ་ཡི་དྲི་ཚོར་ལྷ་མི་རབ་ཏུ་དགའ་འགྱུར་ཞིང་། །ནད་མེད་རིམས་ནད་བྲལ་ཞིང་བདེ་བར་འགྱུར་བར་བགྱི། །མེ་ཏོག༌མན་དཱ་ར་དང་ཀུན་ནས་འདུ་བ་དང་། །སིམ་བྱེད་རབ་ཏུ་སིམ་བྱེད་སྠ་ལ་རྣམ་སྣང་དང་། །མེ་ཏོག་བཟང་པོས་ཕྲིན་ལས་དགེ་ལས་བྱུང་བ་དེ། །མཆོད་པའི་སླད་དུ་སེར་སྐྱའི་གྲོང་ཀུན་དགང་བར་བགྱི། །ཇི་སྲིད་ཡུམ་གྱི་ལྷུམས་ན་དྲི་གསུམ་མ་གོས་བཞུགས། །ཇི་སྲིད་རྒ་ཤི་མཐར་འབྱིན་བལྟམ་པར་གྱུར་གྱི་བར། །དེ་སྲིད་དུས་སུ་དང་བའི་ཡིད་ཀྱིས་ཞབས་འབྲིང་བགྱི། །བློ་གྲོས་ཆེ་མངའ་མཆོད་པ་བགྱི་བར་བདག་ཅག་སེམས། །བལྟམ་ནས་གོམ་པ་བདུན་གཤེགས་བརྒྱ་བྱིན་ཚངས་པ་ཡིས། །ལག་ཏུ་བླངས་ཏེ་སྤོས་ཆུ་དག་གིས་སྐུ་བསིལ་བ། །སེམས་ཅན་རྣམ་པར་དག་པ་དེ་ནི་མཐོང་བ་ཡི། །ལྷ་མི་དེ་དག་ཐོབ་པ་རྒྱ་ཆེན་ལེགས་པར་ཐོབ། །ཇི་སྲིད་བར་དུ་འཇིག་རྟེན་རྗེས་སུ་མཐུན་མཛད་ཅིང་། །འདོད་པའི་ཉོན་མོངས་འཇོམས་མཛད་བཙུན་མོའི་ནང་བཞུགས་ལ། །ཇི་སྲིད་ཅིག་ན་རྒྱལ་སྲིད་ཀུན་སྤངས་ཁབ་ནས་འབྱུང་། །དེ་སྲིད་དུས་སུ༌དད་པའི་སེམས་ཀྱིས་ཞབས་འབྲིང་བགྱི། །ཇི་སྲིད་ཅིག་ན་རན་བསྣམས་བྱང་ཆུབ་སྙིང་པོར་གཤེགས། །ཇི་སྲིད་ཅིག་ན་བདུད་བཅོམ་བྱང་ཆུབ་རེག་གྱུར་ཅིང་། །ཚངས་པ་ཁྲག་ཁྲིག་འཁོར་ལོ་བསྐོར་བར་གསོལ་བཏབ་པ། །དེ་སྲིད་བདེ་བར་གཤེགས་ལ་མཆོད་པ་རྒྱ་ཆེན་བགྱི། །སེམས་ཅན་བྱེ་བ་ཁྲག་ཁྲིག་འཆི་མེད་བཏུལ་གྱུར་ཏེ། །སྟོང་གསུམ༌ཁམས་སུ་སངས་རྒྱས་ཕྲིན་ལས་ནམ་ལགས་ནས། །ཞི་ཞིང་བསིལ་བའི་མྱ་ངན་འདས་པར་གཤེགས་གྱུར་པ། །དེ་སྲིད་ཀུན་གྱིས་དྲང་སྲོང་གྲགས་ཆེན་གཏང་མི་བགྱི། །དགེ་སློང་དག་དེ་ནས་འདོད་པ་ན་སྤྱོད་པའི་ལྷའི་བུ་མོ་དག་གིས། བྱང་ཆུབ་སེམས་དཔའི་ལུས་གཟུགས་ཕུན་སུམ་ཚོགས་པ་མཐོང་ནས་འདི་སྙམ་དུ་སེམས་ཏེ། སེམས་ཅན་དག་པ་མཆོག་དམ་པ་འདི་ལྟ་བུ་འཛིན་པར་འགྱུར་བའི་ན་ཆུང་དེ་ནི་ཇི་ལྟ་བུ་ཞིག་ཡོད་སྙམ་ནས། དེ་དག་ངོ་མཚར་དུ་གྱུར་ཏེ། མེ་ཏོག་དང་། སྤོས་དང་། ཕྲེང་བ་དང་། བྱུག་པ་མཆོག་ཏུ་བྱ་བ་དག་ཁྱེར་ནས་ལྷའི་ལུས་ཡིད་ལས་གྲུབ་པ་ཐོབ་ཅིང་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱིས་བྱིན་གྱིས་བརླབས་པ། དེ་དག་སྐད་ཅིག་དེ་ཉིད་ལ་ལྷའི་ཕོ་བྲང་དེ་ནས་མི་སྣང་བར་གྱུར་ཏེ། སེར་སྐྱའི་གྲོང་ཁྱེར་ཆེན་པོ་དམ་པ་སྐྱེད་མོས་ཚལ་བརྒྱ་སྟོང་གིས་བརྒྱན་པ། རྒྱལ་པོ་ཟས་གཙང་མའི་ཁྱིམ་མཆོག་ཁང་བཟང་ཆེན་པོ་ངང་སྐྱ་ལྡན་ཞེས་བྱ་བ་ལྷའི་དབང་པོའི་ཕོ་བྲང་ལྟ་བུ་དེར་ཕྱིན་ནས། ལྷའི་བུ་མོ་གོས་ལྷུག་ལྷུག་པོ་གྱོན་པ། དགེ་བ་དྲི་མ་མེད་པའི་བསོད་ནམས་ཀྱི་གཟི་བརྗིད་ཀྱིས་རབ་ཏུ་བརྒྱན་པ། ལྷའི་རྒྱན་གྱིས་ལག་པ་ཤིན་ཏུ་བརྒྱན་པ་དེ་དག་གིས་ལྷ་མོ་སྒྱུ་འཕྲུལ་མ་ལ་མཆོག་གི་སྟེང་ན་འདུག་པ་མཐོང་ནས། ཕན་ཚུན་མཛུབ་མོས་སྟོན་ཅིང་། ནམ་མཁའི་དཀྱིལ་ན་འཁོད་དེ། གཅིག་ལ་གཅིག་ཚིགས་སུ་བཅད་དེ་སྨྲས་པ། ལྷ་གནས་འཁོད་པའི་ལྷ་ཡི་བུ་མོ་རྣམས། །ཡིད་འོང་བྱང་ཆུབ་སེམས་དཔའི་སྐུ་མཐོང་ནས། །དེ་ཚེ་དེ་དག་འདི་སྙམ་སེམས་གྱུར་ཏེ། །བྱང་ཆུབ་སེམས་དཔའི་ཡུམ་གྱུར་ཅི་འདྲ་སྙམ། །ལག་ན་མེ་ཏོག་ཕྲེང་ཅན་དེ་དག་རྣམས། །ཐེ་ཚོམ་སྐྱེས་ནས་རྒྱལ་པོའི་ཕོ་བྲང་དུ། །མེ་ཏོག་དེ་བཞིན་བྱུག་པ་ཐོགས་ནས་སུ། །སོར་བཅུ་ཐལ་མོ་སྦྱར་ཏེ་འདུད་ཅིང་ལྷགས། །ལྷུག་ལྷུག་གོས་གྱོན་འཇོ་བག་གཟུགས་འཆང་བས། །ལྷ་མོ་སྒྱུ་འཕྲུལ་མལ་སྟེང་གནས་མཐོང་ནས། །ལག་པ་གཡས་པའི་སོར་མོས་ཕྱག་བྱས་ཏེ། །མི་ཡི་བུད་མེད་གཟུགས་ལ་ལེགས་ལྟོས་འཛེར། །བདག་ཅག་ང་རྒྱལ་སེམས་ཀྱིས་མངོན་སེམས་པ། །ལྷ་ཡི་བུ་མོ་གཟུགས་མཆོག་ཡིད་འོང་སྙམ། །རྒྱལ་པོའི་བཙུན་མོ་འདི་ཡི་གཟུགས་མཐོང་ན། །ལྷ་ཡི་ལུས་ཀྱང་ཟིལ་གྱིས་ནོན་པར་མཐོང་། །འདི་ནི་གང་ཟག་མཆོག་གི་ཡུམ་འགྱུར་དུ། །ཡོན་ཏན་ལྡན་པས་ཤིན་ཏུ་གཤའ་ཞིང་འོས། །ནོར་བུ་རིན་ཆེན་སྣོད་བཟང་གནས་པ་ལྟར། །ལྷ་མོ་འདི་ནི་ལྷ་ཡི་ལྷ་སྣོད་ཡིན། །རྐང་ལག་མཐིལ་དང་སྤྱི་བོ་མན་ཆད་དུ། །ཡན་ལག་ཡིད་འོང་ལྷ་ལས་ལྷག་པ་སྟེ། །མིག་གིས་ལྟ་ན་ངོམས་པར་འགྱུར་མ་ཡིན། །ཡིད་དང་སེམས་ནི་ཕྱིར་ཞིང་དགའ་བར་འགྱུར། །འདི་ཡི་ཁ་བཞིན་ལུས་མཛེས་སྡུག་པ་ནི། །ནམ་མཁའི་དཀྱིལ་ན་ཟླ་བ་མཛེས་པ་འདྲ། །ཉི་ལྟར་དྲི་མེད་མེ་ལྟར་འབར་བ་སྟེ། །འདི་ཡི་ལུས་ལས་འོད་གསལ་བཟང་པོ་འབྱུང་། །གསེར་སྦྲམ་བཙོ་མ་བཟང་པོའི་གསེར་བཞིན་དུ། །ལྷ་མོ་འདི་ཡི་ཁ་དོག་རྣམ་པར་མཛེས། །འདི་ཡི་སྐྲ་ནི་འཇམ་གཙང་དྲི་ཞིམ་སྟེ། །བུང་བ་མཆོག་གི་མདོག་འདྲ་ལྕང་ལོར་འཁྱིལ། །འདི་ཡི་མིག་ནི་པད་མའི་འདབ་མ་འདྲ། །རྣམ་དག་སོ་ནི་ནམ་མཁའི་སྐར་མ་བཞིན། །རྐེད་པ་གཞུ་ལྟར་ཕྲ་ཞིང་སྟ་ཟུར་ཡངས། །ཕྲག་པ་ཟླུམ་ཞིང་ཚིགས་རྣམས་མངོན་པ་མེད། །བརླ་ལེགས་གླང་པོ་མཆོག་གི་སྣ་འདྲ་སྟེ། །བྱིན་པ་ཤིན་ཏུ་ལེགས་པ་བྱིན་གྱིས་ཕྲ། །རྐང་ལག་མཐིལ་མཉམ་ཤིན་ཏུ་དམར་བ་སྟེ། །འདི་ནི་གཞན་མིན་ལྷ་ཡི་བུ་མོར་ངེས། །དེ་ལྟར་རྣམ་མང་དུ་མར་བལྟ་བྱས་ནས། །མེ་ཏོག་གཏོར་ཏེ་བསྐོར་བ་བྱས་ནས་ནི། །གྲགས་ལྡན་རྒྱལ་བའི་ཡུམ་ལ་བསྟོད་བྱས་ཏེ། །སྐད་ཅིག་གཅིག་གིས་ཕྱིར་ཡང་ལྷ་གནས་དོང་། །དེ་ནས་ཕྱོགས་བཞི་སྐྱོང་བ་བཞི་པོ་དང་། །འཐབ་བྲལ་རབ་དང་བརྒྱ་བྱིན་འཕྲུལ་པ་དང་། །ལྷ་ཚོགས་ལྷ་མིན་གྲུལ་བུམ་སྲིན་པོ་དང་། །མིའམ་ཅི་དང་ལྟོ་འཕྱེ་ཆེས་སྨྲས་པ། །སྐྱེས་བུ་མཆོག་གི་མདུན་དུ་ཁྱེད་དེང་ལ། །སྐྱེས་བུ་དམ་པ་དེ་ལ་བསྲུང་བ་གྱིས། །འགྲོ་བ་དག་ལ་ཡིད་ཀྱིས་སྡང་མ་བྱེད། །མི་རྣམས་ལ་ཡང་གཙེ་བ་མ་བྱེད་ཅིག །ལྷ་མོ་སྒྱུ་འཕྲུལ་ཁྱིམ་མཆོག་གང་གནས་པ། །དེར་ནི་མཐུན་པར་འཁོར་དང་ལྷན་ཅིག་ཀུན། །མདའ་གཞུ་རལ་གྲི་མདུང་ཐུང་མཚོན་ཐོགས་ལ། །ནམ་མཁའི་དཀྱིལ་ན་གནས་ཏེ་བལྟ་བར་གྱིས། །དེ་ལྟར་ཤི་འཕོའི་དུས་ཤེས་ལྷའི་བུ་རྣམས། །མེ་ཏོག་དེ་བཞིན་བྱུག་པ་ཐོགས་ནས་ནི། །སོར་བཅུ་ཐལ་མོ་སྦྱར་ཏེ་འདུད་བྱོས་ལ། །དགའ་བའི་སེམས་ཀྱིས་སྒྱུ་འཕྲུལ་དྲུང་དུ་དེང་། །སྨྲ་བའི་སེང་གེ་དུས་ནི་དེང་ལགས་ཀྱིས། །འཇིག་རྟེན་ཀུན་ལ་ཐུགས་རྗེ་བརྩེ་བསྐྱེད་དེ། །མི་དབང་སེམས་ཅན་དག་པ་འཆི་འཕོ་སྟོན། །མཆོད་སྦྱིན་དོན་དུ་བདག་ཅག་གསོལ་བ་འདེབས། །དགེ་སློང་དག་དེ་ནས་བྱང་ཆུབ་སེམས་དཔའ་འཆི་འཕོ་བའི་དུས་ཀྱི་ཚེ་ཤར་ཕྱོགས་ནས་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་ཕྱོགས་བཅུའི་ཕྱོགས་རེ་རེ་ནས་ཀྱང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ། དགའ་ལྡན་གྱི་གནས་དམ་པ་ན་གནས་པ་བརྒྱ་སྟོང་ཕྲག་མང་པོ་དག་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །

རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་། གླུ་དབྱངས་སྣ་ཚོགས་ལེན་ཅིང་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །དེ་བཞིན་དུ་སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ནང་ནས་ལྷའི་བུ་མོ་འབུམ་ཕྲག་བརྒྱད་ཅུ་རྩ་བཞི་སིལ་སྙན་དང་། གླུ་དབྱངས་སྣ་ཚོགས་ལེན་ཅིང་། བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། བྱང་ཆུབ་སེམས་དཔའ་ག་ལ་བ་དེར་ལྷགས་སོ། །

དེ་ནས་བྱང་ཆུབ་སེམས་དཔའ་ཁང་པ་བརྩེགས་པ་ཆེན་པོ་བསོད་ནམས་ཐམས་ཅད་ཀྱིས་ཡང་དག་པར་བྱུང་བ་དཔལ་གྱི་སྙིང་པོ་ལྷ་རྣམས་ཀྱིས་ཀུན་ནས་བལྟ་བའི་ནང་དུ་འདུག་སྟེ། བྱང་ཆུབ་སེམས་དཔའ་དེ་དག་དང་། ལྷ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས། དགའ་ལྡན་གྱི་གནས་དམ་པ་ནས་བསྐྱོད་པར་བརྩམས་སོ། །དགེ་སློང་དག་དེ་ལྟར་བསྐྱོད་པར་བརྩམས་པའི་ཚེ་བྱང་ཆུབ་སེམས་དཔས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལྟར་རྒྱ་ཆེ་ཞིང་ཡངས་ལ་ཐ་གྲུ་ཆེ་བ་འདིར༌སྔོན་ཆད་མ་བྱུང་བའི༌འོད་སྣང་བ་ལྷའི་འོད་ལས་ཤིན་ཏུ་འདས་པས་ཡོངས་སུ་གསལ་ཞིང་སྣང་བར་གྱུར་ཏོ། །འཇིག་རྟེན་གྱི་བར་གང་སྡིག་པ་སྡིག་པས་ཁེབས་ནས་མུན་པ་མུན་ནག་སྨག་ཏུ་གྱུར་པ་སྣང་བ་མེད་པ་གང་དུ་ཉི་མ་དང་ཟླ་བ་འདི་གཉིས་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་པས་ཀྱང་འོད་དང་། ཁ་དོག་དང་། གཟི་བརྗིད་ཀྱིས་ལམ་མེར་མ་གྱུར། ཐལ་ལེར་མ་གྱུར། ལྷང་ངེར་མ་གྱུར་པ་དེར་སེམས་ཅན་གང་དག་སྐྱེས་པ་དེ་དག་རང་རང་གིས་ལག་པ་བརྐྱང་བའང་མི་མཐོང་བ་དེ་དག་ཏུའང་དེའི་ཚེ་སྣང་བ་ཆེན་པོས་རྒྱས་པར་ཁྱབ་པར་གྱུར་ཅིང་། དེར་སྐྱེས་པའི་སེམས་ཅན་དེ་དག་སྣང་བ་དེས་ཁྱབ་པར་གྱུར་ནས་གཅིག་གིས་གཅིག་མཐོང་ཞིང་གཅིག་གིས་གཅིག་ཤེས་ཏེ། འདི་སྐད་དུ་ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ། །

ཀྱེ་གྲོགས་པོ་དག་སེམས་ཅན་གཞན་དག་ཀྱང་འདིར་སྐྱེས་སོ་ཞེས་ཟེར་བར་གྱུར་པ་དེ་ལྟ་བུའི་འོད་ལུས་ལས་བཀྱེའོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་དང་། ལྟས་ཆེན་པོ་བཅྭོ་བརྒྱད་དུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ལྡེག་རབ་ཏུ་ལྡེག །ཀུན་ཏུ་རབ་ཏུ་ལྡེག་གོ །འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །མཐའ་དམའ་ན་དབུས་མཐོ་བར་གྱུར་ཏོ། །དབུས་དམའ་ན་མཐའ་མཐོ་བར་གྱུར་ཏོ། །ཤར་ཕྱོགས་དམའ་ན་ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་ན་ཤར་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་ན་བྱང་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་ན་ལྷོ་ཕྱོགས་མཐོ་བར་གྱུར་ཏོ། །དེའི་ཚེ་སྒྲ་དགའ་བར་འགྱུར་བ། ཚིམ་པར་འགྱུར་བ། མགུ་བར་འགྱུར་བ། དད་པར་འགྱུར་བ། སིམ་པར་འགྱུར་བ། མཉན་པར་འོས་པ། བསྔགས་པར་འོས་པ། མཚུངས་པ་མེད་པ། མཉན་ན་གཏང་མི་བྲ་བ། མི་མཐུན་པ་མེད་པ། དངངས་བར་འགྱུར་བ་མེད་པ་དག་ཀྱང་གྲག་པར་གྱུར་ཏོ། །སྐད་ཅིག་དེ་ལ་སེམས་ཅན་གང་ལ་ཡང་གནོད་པའམ། འཇིགས་པའམ། དངང་བའམ། བག་ནོན་པ་མེད་པར་གྱུར་ཏོ། །སྐད་ཅིག་དེ་ལ་ཉི་ཟླ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་གི་འོད་ཀྱང་མི་སྣང་བར་གྱུར་ཏོ། །

སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་ཐམས་ཅད་ཀྱང་སྐད་ཅིག་དེ་ལ་སྡུག་བསྔལ་དང་བྲལ་ཞིང་བདེ་བ་ཐམས་ཅད་དང་ལྡན་པར་གྱུར་ཏེ། སེམས་ཅན་གང་ལ་ཡང་འདོད་ཆགས་ཀྱིས་གནོད་པར་མི་འགྱུར། ཞེ་སྡང་གིས་གནོད་པར་མི་འགྱུར། གཏི་མུག་གིས་གནོད་པར་མི་འགྱུར་ཞིང་། ཕྲག་དོག་གམ། སེར་སྣའམ། ང་རྒྱལ་ལམ། འཆབ་པའམ། རྒྱགས་པའམ། ཁྲོ་བའམ། གནོད་སེམས་སམ། ཡོངས་སུ་གདུང་བས་གནོད་པར་འགྱུར་བ་མེད་པར་གྱུར་ཏེ། སེམས་ཅན་ཐམས་ཅད་ཀྱང་སྐད་ཅིག་དེ་ལ། ཕན་ཚུན་ཕ་མ་ཙམ་དུ་སེམས་པའི་འདུ་ཤེས་སུ་གྱུར་ནས། བྱམས་པའི་སེམས་དང་། ཕན་པའི་སེམས་དང་ལྡན་པར་གྱུར་ཏོ། །ལྷ་དང་མིའི་རོལ་མོ་སིལ་སྙན་བྱེ་བ་ཁྲག་ཁྲིག་བརྒྱ་སྟོང་དག་ཀྱང་མ་དཀྲོལ་མ་བླངས་པར་ཡིད་དུ་འོང་བའི་སྒྲ་འབྱིན་པར་གྱུར་ཏོ། །

ལྷ་བྱེ་བ་ཁྲག་ཁྲིག་བརྒྱ་སྟོང་དག་ཀྱང་ལག་པ་དང་ཕྲག་པ་དང་སྤྱི་བོས་གཞལ་མེད་ཁང་ཆེན་པོ་དེ་དག་འདེག་ཅིང་ཁྱེར་བར་གྱུར་ཏོ། །ལྷའི་བུ་མོ་བརྒྱ་སྟོང་དག་གིས་ཀྱང་རང་རང་གི་གླུ་དབྱངས་བླངས་ཏེ། མདུན་དང་། རྒྱབ་དང་། གཡས་གཡོན་དག་ནས་བྱང་ཆུབ་སེམས་དཔའ་ལ་གླུ་དབྱངས་ཀྱི་སྒྲ་སྐད་ཀྱིས་མངོན་པར་བསྟོད་པ། ཁྱོད་ཀྱིས་སྔོན་ཆད་དགེ་ལས་བསགས་པ་དང་། །ཡུན་རིང་དུས་ཀྱི་དགེ་བས་བྱུང་བ་དང་། །ཁྱོད་ཀྱིས་ཆོས་རྣམས་ཀུན་གྱི་ཚུལ་སྦྱངས་པས། །དེ་རིང་མཆོད་པ་རྒྱ་ཆེན་བྱུང་བར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །སྲས་མོ་སྲས་སྡུག་སྦྱིན་པ་མཛད་པས་ན། །ལྷ་ཡི་མེ་ཏོག་ཆར་དུ་བབ་པ་འདི། །སྦྱིན་པ་སྤྱད་པ་དེ་ཡི་འབྲས་བུ་ལགས། །གཙོ་བོ་ཁྱོད་ཀྱིས་རང་གི་ཤ་བཅད་དེ། །སྲང་ལ་བཅལ་ནས་ཐུགས་བྱོན་བྱ་ཕྱིར་བཏང་། །སྦྱིན་པ་དེ་སྤྱད་པ་ཡི་འབྲས་བུ་དེས། །ཡི་དྭགས་འཇིག་རྟེན་རྣམས་ཀྱང་ཟས་སྐོམ་ཐོབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཚུལ་ཁྲིམས་མ་ཞིག་མ་ཉམས་བསྲུངས་པས་ན། །ཚུལ་ཁྲིམས་དེ་སྤྱད་པ་ཡི་འབྲས་བུ་དེས། །མི་ཁོམ་ངན་སོང་ཡོངས་སུ་དག་པར་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བྱང་ཆུབ་བསྒྲུབ་པའི་གཞིར་ནི་བཟོད་པ་བསྒོམས། །བཟོད་པ་དེ་སྤྱད་པ་ཡི་འབྲས་བུ་དེས། །ལྷ་དང་མི་ཀུན་བྱམས་པའི་སེམས་སུ་གྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །བརྩོན་འགྲུས་མ་གོད་དམ་པ་བསྒོམས་པས་ན། །བརྩོན་འགྲུས་དེ་སྤྱད་པ་ཡི་འབྲས་བུ་དེས། །སྐུ་ནི་རི་རབ་བཞིན་དུ་མཛེས་པར་གྲུབ། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་སྦྱང་སླད་བསམ་གཏན་བསྒོམས་མཛད་པས། །བསམ་གཏན་དེ་སྤྱད་པ་ཡི་འབྲས་བུ་དེས། །འགྲོ་བ་དག་ལ་ཉོན་མོངས་གནོད་མི་འགྱུར། །བསྐལ་པ་བྱེ་བ་མང་པོར་ཁྱོད་ཀྱིས་སྔོན། །ཉོན་མོངས་གཅོད་པའི་ཤེས་རབ་བསྒོམས་མཛད་པས། །ཤེས་རབ་དེ་སྤྱད་པ་ཡི་འབྲས་བུ་དེས། །འོད་གསལ་དམ་པ་རྣམ་པར་སྣང་ཞིང་མཛེས། །བྱམས་པའི་གོ་མནབས་ཉོན་མོངས་འཇོམས་མཛད་ཅིང་། །སེམས་ཅན་ཀུན་ལ་ཐུགས་རྗེ་ཆེས་བྱུང་བ། །དགྱེས་པ་མཆོག་བརྙེས་བཏང་སྙོམས་མཆོག་ལྡན་པ། །བདེ་གཤེགས་ཚངས་གྱུར་ཁྱོད་ལ་ཕྱག་འཚལ་ལོ། །

ཤེས་རབ་སྒྲོན་མའི་འོད་དང་གཟིས་འཕགས་ཤིང་། །གཏི་མུག་སྐྱོན་གྱི་མུན་པ་ཀུན་སེལ་བ། །འདྲེན་པ་སྟོང་གསུམ་དག་ན་མིག་གྱུར་པའི། །ཐུབ་པ་ལམ་སྟོན་ཁྱོད་ལ་ཕྱག་འཚལ་ལོ། །རྫུ་འཕྲུལ་རྐང་པ་མངོན་ཤེས་མཆོག་ལ་མཁས། །བདེན་པ་གཟིགས་ཤིང་དམ་པའི་དོན་བསླབས་པ། །རྒལ་ནས་སྲོག་ཆགས་གཞན་དག་སྒྲོལ་མཛད་པ། །བདེ་གཤེགས་གྲོལ་གྱུར་ཁྱོད་ལ་ཕྱག་འཚལ་ལོ། །ཐབས་དང་མངོན་ཤེས་དམ་པ་ཀུན་ལ་མཁས། །འཆི་འཕོ་འཆི་འཕོ་མེད་པའི་འཕོ་བ་སྟོན། །འཇིག་རྟེན་ཆོས་ཀྱི་རྗེས་སུ་མཐུན་མཛད་ཀྱང་། །འཇིག་རྟེན་གང་དུའང་ཆགས་པ་ཁྱོད་མི་མངའ། །གང་དག་ཁྱོད་ནི་ཉན་ཏམ་ལྟར་ལྷགས་པ། །དེ་དག་ཐོབ་པ་དམ་པ་བསམ་མི་ཁྱབ། །ཁྱོད་ལ་ཆོས་ཉིད་ཐོས་ཏེ་གང་དད་ཅིང་། །དགའ་བ་ཡངས་པ་སྐྱེས་པ་སྨོས་ཅི་འཚལ། །དགའ་ལྡན་གནས་རྣམས་ཀུན་ནི་མོག་མོག་གྱུར། །འཛམ་བུའི་གླིང་དུ་ཉི་མ་མངོན་དུ་ཤར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཉོན་མོངས་གཉིད་ཀྱིས་ལོག་ལས་སད་པར་མཛད། །དེང་ནི་ཕོ་བྲང་འབྱོར་ཅིང་རྒྱས་གྱུར་ལ། །བྱེ་བ་ཁྲག་ཁྲིག་ལྷ་རྣམས་ལང་ལོང་གྱུར། །ལྷ་ཡི་བུ་མོས་སིལ་སྙན་སྒྲ་ཕྱུང་བས། །རྒྱལ་པོའི་ཁབ་ན་སིལ་སྙན་གྲགས་པར་འགྱུར། །བསོད་ནམས་གཟི་བརྗིད་རྫོགས་ཤིང་ལས་དགེ་བ། །བུད་མེད་གཟུགས་ཀྱི་མཆོག་དང་ལྡན་གྱུར་པ། །དེ་ཡི་སྲས་གྱུར་དེ་ནི་དེ་ལྟར་འབྱོར། །དཔལ་གྱིས་འཇིག་རྟེན་གསུམ་ནི་ཟིལ་གྱིས་གནོན། །མི་མཆོག་འབྱུང་བ་དེ་ཡི་གཟི་བརྗིད་ཀྱིས། །དེ་ཕྱི་ཕྱིན་ཆད་ཕོ་བྲང་དམ་པ་འདིར། །ལུས་ཅན་རྣམས་ལ་འདོད་དང་འཐབ་རྩོད་མེད། །ཀུན་ཀྱང་བྱམས་པའི་སེམས་ཀྱིས་སྲི་ཞུར་བཅས། །འཁོར་ལོས་སྒྱུར་བའི་རིགས་རྒྱལ་བྱུང་བས་ན། །རྒྱལ་པོའི་རིགས་ནི་རབ་ཏུ་འཕེལ་བར་འགྱུར། །སེར་སྐྱའི་གྲོང་འདི་ཤིན་ཏུ་ཕུན་སུམ་ཚོགས། །རིན་ཆེན་མཛོད་ཀྱིས་རབ་ཏུ་གང་བར་འགྱུར། །གནོད་སྦྱིན་སྲིན་པོ་གྲུལ་བུམ་གསང་བ་པ། །ལྷ་དང་ལྷ་མིན་ཚོགས་རྣམས་དབང་པོར་བཅས། །མི་མཆོག་སྲུང་བ་གང་དག་གནས་པ་རྣམས། །དེ་དག་རིང་པོར་མི་ཐོགས་ཐར་པ་འཐོབ། །གུས་དང་སྲི་ཞུ་ལ་ནི་གནས་ནས་སུ། །འདྲེན་པ་ཁྱོད་བསྟོད་བསོད་ནམས་གང་བསགས་པ། །ཀུན་ཀྱང་བྱང་ཆུབ་ཏུ་ནི་ཡོངས་སུ་བསྔོ། །མི་ཡི་དམ་པ་ཁྱོད་ལྟར་མྱུར་དུ་ཤོག །སྐྱོད་པར་བརྩམས་པའི་ལེའུ་སྟེ་ལྔ་པའོ། །

དགེ་སློང་དག་དེ་ལྟར་དགུན་འདས་ཏེ། དཔྱིད་ཀྱི་དུས་ལ་དཔྱིད་ཟླ་ཐ༌ཆུང་གི་ཚེ། སྐར་མ་ས་ག་ལ་བབ་པ་དུས་ཀྱི་དམ་པ་ལ་ཤིང་རྣམས་ཀྱི་ལོ་མ་རྒྱས་ཤིང་། མེ་ཏོག་མཆོག་ཏུ་རྒྱས་ནས་གྲང་དྲོ་དང་། མུན་པ་དང་། རྡུལ་མེད་ཅིང་སའི་གཞི་སྔོ་གཞོན་ནུ་སྐྱེས་པས་ཁེབས་པར་གནས་པའི་ཚེ། འཇིག་རྟེན་གསུམ་གྱི་གཙོ་བོ་འཇིག་རྟེན་གྱིས་མཆོད་པས་དུས་ལ་བབ་པའི་ཚོད་ལ་རྣམ་པར་གཟིགས་ནས། ཚེས་བཅོ་ལྔའི་ཟླ་བ་ཉ་ལ་སྐར་མ་རྒྱལ་གྱི་དུས་སུ། ཡུམ་གསོ་སྦྱོང་བླངས་པའི་རུམ་དུ། བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ནས་འཕོས་ཏེ། དྲན་ཞིང་ཤེས་བཞིན་དུ། གླང་པོའི་ཕྲུ་གུ་ཐལ་ཀར་མཆེ་བ་དྲུག་དང་ལྡན་པ། མགོའི་ཁ་དོག་སྲིན་བུ་ལྷམ་བུ་ཆུ་གཤེར་གྱི་མདོག་ལྟ་བུ། མཆེ་བ་ལ་གསེར་འཚིག་པ། ཡན་ལག་དང་ཉིང་ལག་ཐམས་ཅད་དང་ལྡན་པ། དབང་པོ་ཉམས་པ་མེད་པར་བྱས་ཏེ། མའི་གློ་གཡས་པ་ནས་ཞུགས་སོ། །ཞུགས་ནས་ཀྱང་གློ་གཡས་པ་ལོགས་སུ་བརྟེན་ཏེ་གནས་ཀྱི། གློ་གཡོན་པ་ལོགས་སུ་ནམ་ཡང་མ་བརྟེན་ཏོ། །ལྷ་མོ་སྒྱུ་འཕྲུལ་མལ་བདེ་བ་ན་ཉལ་བ་དེས་ཀྱང་རྨི་ལམ་འདི་ལྟ་བུ་མཐོང་ངོ་། །གླང་པོ་ཁ་བ་དངུལ་མདོག་མཆེ་བ་དྲུག །རྐང་ལག་རབ་མཛེས་མགོ་བོ་དམར་སྡུག་པ། །འགྲོས་བཟང་ལུས་ཚིགས་རྡོ་རྗེ་བཞིན་བརྟན་པ། །གླང་པོ་མཆོག་གཅིག་ཁོང་དུ་སོང་སྙམ་བྱེད། །དེས་ནི་དེ་འདྲའི་བདེ་བ་བརྒྱ་ལམ་ནའང་། །མ་མཐོང་མ་ཐོས་མྱོང་བར་མ་གྱུར་ཏེ། །ལུས་ཀྱང་བདེ་ཞིང་སེམས་ཀྱང་བདེར་གྱུར་ནས། །བསམ་གཏན་མཉམ་པར་བཞག་པ་བཞིན་དུ་གྱུར། །

དེ་ནས་ལྷ་མོ་སྒྱུ་འཕྲུལ་རྒྱན་དང་གོས་ལྷུག་ལྷུག་པོར་གྱོན་ཅིང་། ཐོགས་པ་ལས་ལུས་དང་སེམས་བདེ་བར་གྱུར་ཏེ། དགའ་བ་དང་། རངས་པ་དང་། ཉམས་བདེ་བ་ཐོབ་ནས། མལ་དམ་པ་དེ་ལས་ལངས་ཏེ་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་ཁང་བཟང་དེའི་སྟེང་ནས་བབས་ཏེ། ཤིང་མྱ་ངན་འཚང་གི་ནགས་ཚལ་ག་ལ་བ་དེར་སོང་ནས། དེ་མྱ་ངན་འཚང་གི་ནགས་ཚལ་དུ་བདེ་བར་འདུག་སྟེ། རྒྱལ་པོ་ཟས་གཙང་མའི་དྲུང་དུ་ཕོ་ཉ་བཏང་ནས། རྒྱལ་པོ་གཤེགས་སུ་གསོལ། ལྷ༌མོ་དེ་ཁྱོད་ཀྱི་ཞལ་མཐོང་བར་བཞེད་དོ། །ཞེས་བྱས་པ་དང་། རྒྱལ་པོ་ཟས་གཙང་མས་ཚིག་དེ་ཐོས་ནས། རབ་ཏུ་དགའ་བར་གྱུར་ཏེ། ལུས་གཡོས་ནས་ཁྲི་བཟང་པོ་ལས་ལངས་ཏེ། བློན་པོ་དང་། གྲོང་རྡལ་པ་དང་། འཁོར་དང་། གཉེན་པའི་སྐྱེ་བོ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། མྱ་ངན་འཚང་གི་ནགས་ཚལ་ག་ལ་བ་དེར་སོང་ངོ་། །སོང་ནས་ཀྱང་བདག་གི་ལུས་ཤིན་ཏུ་ལྕི་བ་སྙམ་བྱེད་ནས། མྱ་ངན་འཚང་གི་ནགས་ཚལ་དུ་འགྲོ་མ་ནུས་ཏེ། མྱ་ངན༌འཚང་གི་ནགས་ཚལ་གྱི་སྒོར་འདུག་ནས། ཅུང་ཟད་ཅིག༌བསམས་ཏེ།

དེའི་ཚེ་ཚིགས་སུ་བཅད་པ་འདི་སྨྲས་སོ། །བདག་ནི་གཡུལ་དུ་དཔའ་བའི་ཕུལ་ཕྱིན་པ། །དེང་ལྟར་ལུས་ལྕི་བདག་གིས་མྱོང་མི་དྲན། །བདག་གི་ཁྱིམ་དུའང་འགྲོ་བར་དེང་མ་ནུས། །ཀྱེ་མ་འདི་ཅི་སུ་ལ་དྲི་བར་བྱ། །གནས་གཙང་མའི་རིས་ཀྱི་ལྷ་དག་ནམ་མཁའི་དཀྱིལ་ན་འཁོད་ནས་ལུས་ཕྱེད་མངོན་པར་སྤྲུལ་ཏེ། རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སྨྲས་པ། དཀའ་ཐུབ་བརྟུལ་ཞུགས་ཡོན་ཏན་ལྡན་པ་འཇིག་རྟེན་གསུམ་གྱིས་མཆོད། །བྱམས་དང་སྙིང་རྗེ་ཐོབ་པས་བསོད་ནམས་ཡེ་ཤེས་དབང་བསྐུར་བའི། །བྱང་ཆུབ་སེམས་དཔའ་ཆེ་བ་དགའ་ལྡན་གནས་ནས་འཕོས་གྱུར་ཏེ། །རྒྱལ་པོ་ཁྱོད་ཀྱི་སྲས་གྱུར་ལྷ་མོ་སྒྱུ་འཕྲུལ་མངལ་དུ་ཞུགས། །དེ་ཚེ་རང་གི་མགོ་ཅོགས་སོར་བཅུ་ཐལ་མོ་སྦྱར་བྱས་ཏེ། །རྒྱལ་པོ་རིམ་གྲོ་བྱ་བར་ལྡན་གྱུར་དེ་ཡི་ནང་དུ་ཞུགས། །ང་རྒྱལ་དྲེགས་པ་མེད་པས་ལྷ་མོ་སྒྱུ་འཕྲུལ་ངོར་བལྟས་ཏེ། །ངས་ནི་ཁྱོད་ལ་ཅི་བྱ་ཅི་སྦྱར་ཁྱོད་ཀྱིས་ང་ལ་སྨྲོས། །ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ཀྱིས་དེ་ཡི་ལོ་རྒྱུས་གསན་པར་གསོལ། །སྟོང་གསུམ་ཁམས་འདི་མཛེས་པར་རབ་རིབ་མ་མཆིས་བདག་གིས་མཐོང་། །བདག་ནི་ཉལ་ཞིང་མཆིས་ན་ལྷ་རྣམས་བྱེ་བས་རབ་ཏུ་བསྟོད། །འོན་ཀྱང་བདག་ལ་ཁྲོ་ཞིང་འཚིག་དང་ཞེ་སྡང་རྨོངས་མ་མཆིས། །ཞི་བའི་སེམས་སུ་གྱུར་ཅིང་བསམ་གཏན་བདེ་དང་ལྡན་སྙམ་བགྱིད། །བདག་གི་རྨི་ལམ་འདི་ནི་རིགས་ལ་དགེའམ་དངོའམ་ཅི། །བདག་གི་རྨི་ལམ་འདི་ནི་ཡང་དག་ལྡན་པར་ལུང་སྟོན་པ། །རིག་བྱེད་རྨི་ལམ་གཞུང་ལ་མཁས་ཤིང་གཟའ་ཡི་ཆོ་ག་མཁན། །རྒྱལ་པོ་མྱུར་དུ་བྲམ་ཟེ་འདིར་ནི་ལེགས་པར་དགུག་ཏུ་གསོལ། །དེ་སྐད་ཚིག་ཐོས༌རྒྱལ་པོས་དེ་ཡི་དུས་ཀྱི་སྐད་ཅིག་ལ། །བྲམ་ཟེ་རིག་བྱེད་བསྟན་བཅོས་གཞུང་ལ་ཤིན་ཏུ་མཁས་པ་གཉེར། །སྒྱུ་འཕྲུལ་བྲམ་ཟེ་རྣམས་ཀྱི་མདུན་དུ་འདུག་ནས་འདི་སྐད་སྨྲས། །ཁོ་མོས་རྨི་ལམ་འདི་འདྲ་མཐོང་ན་དེ་ཡི་ལོ་རྒྱུས་གསོན། །བྲམ་ཟེ་རྣམས་ཀྱིས་སྨྲས་པ། ལྷ་མོ་བཀའ་སྩལ་དུ་གསོལ། ཁྱོད་ཀྱིས་རྨི་ལམ་ཅི་འདྲ་བ་ཞིག་གཟིགས། ཐོས་ནས་ཀྱང་དཔྱད་པར་བགྱིའོ། །

ལྷ་མོས་སྨྲས་པ། ཁ་བ་དངུལ་གྱི་མདོག་འདྲ་ཉི་ཟླའི་འོད་ལས་འཕགས་པ་སྟེ། །རྐང་ལག་ལེགས་ཤིང་རབ་འབྱེས་མཆེ་བ་དྲུག་ལྡན་ཆེ་བ་ཉིད། །གླང་པོའི་དམ་པ་རྡོ་རྗེ་བཞིན་དུ་ཚིགས་བརྟན་གཟུགས་བཟང་བ། །བདག་གི་རུམ་དུ་ཞུགས་ན་དེ་ཡི་ལོ་རྒྱུས་མཉན་པར་གྱིས། །དེ་སྐད་ཚིག་ཐོས་ནས་ནི་བྲམ་ཟེ་རྣམས་ཀྱིས་འདི་སྐད་སྨྲས། །རིགས་ལ་དངོ་བ་མ་མཆིས་དགྱེས་པ་རྒྱ་ཆེན་བརྙེས་པར་འགྱུར། །ཁྱོད་ལ་སྲས་མངའ་མཚན་གྱིས་ཡན་ལག་བརྒྱན་པ་སྐྱེ་བར་འགྱུར། །རྒྱལ་པོའི་རིགས་སུ་རིགས་ལྡན་འཁོར་ལོས་སྒྱུར་བ་ཆེ་བ་ཉིད། །གལ་ཏེ་འདོད་པ་དག་དང་རྒྱལ་སྲིད་ཕོ་བྲང་སྤངས་གྱུར་ཏེ། །འཇིག་རྟེན་ཀུན་ལ་ཐུགས་བརྩེ་ཆགས་མེད་རབ་ཏུ་བྱུང་གྱུར་ན། །དེ་ནི་འཇིག་རྟེན་གསུམ་ན་སྦྱིན་གནས་སངས་རྒྱས་འགྱུར་བ་སྟེ། །བདུད་རྩི་མཆོག་གི་རོ་ཡིས་འཇིག་རྟེན་ཐམས་ཅད་ཚིམ་མཛད་འགྱུར། །དེ་སྐད་ཚིག་སྙན་ལུང་བསྟན་ཏེ། །རྒྱལ་པོའི་ཕོ་བྲང་ཟན་ཟོས་ནས། །བྱ་དགའ་བྱིན་པ་བླངས་ནས་སུ། །བྲམ་ཟེ་དེ་དག་ཕྱིར་དོང་ངོ་། །དགེ་སློང་དག་དེ་ལྟར་རྒྱལ་པོ་ཟས་གཙང་མས་བྲམ་ཟེ་མཚན་དང་ལྟས་ཤེས་ཤིང་རྣམ་པར་འབྱེད་པ་དང་། རྨི་ལམ་གྱི་གཞུང་ཤེས་པ་དག་ལས་དེ་སྐད་ཀྱི་ཚིག་དེ་ཐོས་ནས། ཚིམ་ཞིང་མགུ་སྟེ། ཡི་རངས་ལ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས། བྲམ་ཟེ་དེ་དག་བཟའ་བ་དང་བཏུང་བ་དང་། མྱང་བ་མང་པོ་ཉམས་སུ་བསོད་པས་ཚིམ་ཞིང་ངོམས་པར་བྱས་ནས། བྱ་དགའ་བྱིན་ཏེ་བཀྱེའོ། །

དེ་ཉིད་ཀྱི་ཚེ་གྲོང་ཁྱེར་ཆེན་པོ་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེའི་སྒོ་བཞི་ན། གྲོང་ཁྱེར་གྱི་བཞི་མདོ་དང་སུམ་མདོ་ཐམས་ཅད་དུ་སྦྱིན་པ་བྱིན་ཏེ། ཇི་ཙམ་དུ་བྱང་ཆུབ་སེམས་དཔའ་ལ་མཆོད་པ་བྱ་བའི་ཕྱིར། ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། གོས་འདོད་པ་རྣམས་ལ་ནི་གོས། བཞོན་པ་འདོད་པ་རྣམས་ལ་ནི་བཞོན་པ། སྤོས་འདོད་པ་རྣམས་ལ་ནི་སྤོས། ཕྲེང་བ་འདོད་པ་རྣམས་ལ་ནི་ཕྲེང་བ། བྱུག་པ་འདོད་པ་རྣམས་ལ་ནི་བྱུག་པ། མལ་ཆ་འདོད་པ་རྣམས་ལ་ནི་མལ་ཆ། གནས་འདོད་པ་རྣམས་ལ་ནི་གནས། འཚོ་བ་འདོད་པ་རྣམས་ལ་ནི་འཚོ་བ་བྱིན་ནོ། །དགེ་སློང་དག་དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། ལྷ་མོ་སྒྱུ་འཕྲུལ་འདི་ཁྱིམ་གང་ན་འདུག་ན་བདེ་ཞིང་ཉོན་མོངས་པ་མེད་པར་འདུག་པར་འགྱུར་སྙམ་པ་དང་། དེ་ནས་སྐད་ཅིག་དེ་ཉིད་ལ་རྒྱལ་པོ་ཆེན་པོ་བཞི་རྒྱལ་པོ་ཟས་གཙང་མའི་དྲུང་དུ་འོངས་ཏེ་འདི་སྐད་ཅེས་སྨྲས་སོ། །ལྷ་ཐུགས་ལས་སུ་མ་མཛད་པར་བཏང་སྙོམས་སུ་བདེ་བར་བཞུགས་ཤིག །བདག་ཅག་གིས་བྱང་ཆུབ་སེམས་དཔའི་ཕོ་བྲང་བཤམ་མོ། །དེ་ནས་ལྷའི་དབང་པོ་བརྒྱ་བྱིན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །

སྐྱོང་བའི་གཞལ་མེད་ཁང་རྣམས་ངན། །སུམ་ཅུ་རྩ་གསུམ་པ་ཡི་བཟང་། །བྱང་ཆུབ་སེམས་དཔའི་ཕོ་བྲང་ནི། །རྣམ་པར་རྒྱལ་ཙམ་བདག་གིས་འབུལ། །དེ་ནས་ལྷའི་བུ་རབ་འཐབ་བྲལ་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །ཁོ་བོའི་ཁང་ཁྱིམ་མཐོང་གྱུར་ནས། །བརྒྱ་བྱིན་བྱེ་བ་ངོ་མཚར་གྱུར། །འཐབ་བྲལ་རབ་ཀྱི་དཔལ་ལྡན་ཁང་། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་ཡོངས་སུ་དགའ་ལྡན་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །གྲགས་པ་ཆེ་མངའ་སྔོན་ཆད་ནི། །དགའ་ལྡན་གང་དུ་བཞུགས་གྱུར་པ། །ཕོ་བྲང་དམ་པ་དགྱེས་པ་དེ། །རྒྱལ་བའི་སྲས་ལ་བདག་འབུལ་ལོ། །དེ་ནས་ལྷའི་བུ་རབ་འཕྲུལ་དགའ་རྒྱལ་པོ་ཟས་གཙང་མའི་གན་དུ་འོངས་ཏེ། འདི་སྐད་ཅེས་སྨྲས་སོ། །དཔལ་ལྡན་ཡིད་ལས་གྲུབ་པའི་ཁང་། །དེ་ནི་རིན་ཆེན་རང་བཞིན་ཏེ། །བྱང་ཆུབ་སེམས་དཔའ་མཆོག་དོན་དུ། །རྒྱལ་པོ་བདག་གིས་འབུལ་བར་བགྱིས། །དེ་ནས་ལྷའི་བུ་གཞན་འཕྲུལ་དབང་བྱེད་རྒྱལ་པོ་ཟས་གཙང་མའི་གན་དུ་འོངས་ཏེ་འདི་སྐད་ཅེས་སྨྲས་སོ། །འདོད་པའི་ཁམས་གནས་ཇི་སྙེད་པ། །གཞལ་མེད་ཁང་མཛེས་གང་ཡོད་པ། །བདག་གི་གཞལ་མེད་ཁང་དྲུང་ན། །འོད་དང་མདོག་ཀྱང་སྟོར་བར་སྣང་། །དེ་བས་དཔལ་ལྡན་བདག་གིས་འབུལ། །བྱང་ཆུབ་སེམས་དཔའ་མཆོད་པའི་ཕྱིར། །རིན་ཆེན་རང་བཞིན་ཕོ་བྲང་བཟང་། །དེ་ནི་རྒྱལ་པོ་བླང་བར་གྱིས། །ལྷ་ཡི་མེ་ཏོག་རབ་བཀང་སྟེ། །ལྷ་ཡི་སྤོས་ཀྱི་ངད་ལྡང་བའི། །ཕོ་བྲང་ཡངས་པ་བདག་གིས་འབུལ། །དེར་ནི་ལྷ་མོ་བཞུགས་པར་གྱིས། །དགེ་སློང་དག་དེ་ལྟར་འདོད་པ་ན་སྤྱོད་པའི་ལྷའི་དབང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལ་མཆོད་པའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་དམ་པ་དེར་རང་རང་གི་ཁྱིམ་ཕུལ་བར་གྱུར་ཏོ། །རྒྱལ་པོ་ཟས་གཙང་མས་ཀྱང་མིའི་ལས་ནི་འདས་ཀྱི་ལྷ་ཡི་ནི་མ་གྱུར་པ་བཤམས་པར་གྱུར་ཏེ། དེ་ལ་བྱང་ཆུབ་སེམས་དཔའ་བཀོད་པ་ཆེན་པོའི་ཏིང་ངེ་འཛིན་གྱི་མཐུས་ཁྱིམ་དེ་དག་ཐམས་ཅད་དུ་ལྷ་མོ་སྒྱུ་འཕྲུལ་མངོན་པར་བསྟན་ཏོ། །

བྱང་ཆུབ་སེམས་དཔའ་ལྷ་མོ་སྒྱུ་འཕྲུལ་གྱི་རུམ་ན་འདུག་པའི་ཚེ། གློ་གཡས་ཕྱོགས་ལོགས་སུ་སྐྱིལ་མོ་ཀྲུང་བཅས་ཏེ་གནས་པར་གྱུར་ཏོ། །ལྷའི་དབང་པོ་དེ་དག་ཐམས་ཅད་ཀྱང་སོ་སོ་ནས་བདག་ཉིད་ཀྱི་ཁྱིམ་ན་བྱང་ཆུབ་སེམས་དཔའི་མ་འདུག་གི་གཞན་མ་ཡིན་ནོ་ཞེས་དེ་ལྟར་ཤེས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ཏིང་འཛིན་བཀོད་པ་ཆེ་ལ་གནས་གྱུར་ཏེ། །སྤྲུལ་པ་བསམ་གྱིས་མི་ཁྱབ་སྤྲུལ་བྱས་ནས། །ལྷ་རྣམས་ཐམས་ཅད་བསམ་པ་རྫོགས་པར་བྱས། །རྒྱལ་པོའང་དེ་ལྟར་ཡིད་བཞིན་བསམ་པ་གྲུབ། །དེ་ནས་འཁོར་དེའི་ནང་ནས་ལྷའི་བུ་ཁ་ཅིག་འདི་སྙམ་དུ་སེམས་ཏེ། རྒྱལ་ཆེན་བཞིའི་རིས་ཀྱི་ལྷ་གང་ཡིན་པ་དེ་དག་ཀྱང་མིའི་ལུས་ཀྱི་དྲི་བྲོ་ན་སྐྱོ་ཞིང་འབྱོལ་ན། དེ་མ་ཡིན་པའི་ལྷ་གཞན་སུམ་ཅུ་རྩ་གསུམ་མམ། འཐབ་བྲལ་ལམ། དགའ་ལྡན་གྱི་ལྷའི་བུ་དག་ལྟ་སྨོས་ཀྱང་ཅི་དགོས་ན། ཇི་ལྟར་བྱང་ཆུབ་སེམས་དཔའ་གཙང་ཞིང་དྲི་ང་བ་དང་བྲལ་བ། འཇིག་རྟེན་ཐམས་ཅད་ལས་མངོན་པར་འཕགས་པ། སེམས་ཅན་རིན་པོ་ཆེ་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་དྲི་མི་ཞིམ་པར་བཞུགས་པར་གྱུར་སྙམ་པ་དང་། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ལྡན་འདས་ཇི་ཙམ་དུ་བུད་མེད་ཀྱི་ལུས་ནི་སྨད་པ་ལགས་པ་དང་། འདོད་ཆགས་ལ་སྤྱོད་ཅེས་བགྱི་བའི་བར་དུ་དེ་བཞིན་གཤེགས་པས་གསུངས་པ་ངོ་མཚར་ཆེ་ན། བཅོམ་ལྡན་འདས་དེ་བས་ཀྱང་འཇིག་རྟེན་ཐམས་ཅད་ལས་མངོན་པར་འཕགས་པ། སྔོན་བྱང་ཆུབ་སེམས་དཔར་གྱུར་པ། འདི་ལྟར་དགའ་ལྡན་གྱི་ལྷའི་རིས་ནས་འཕོས་ཏེ། ཡུམ་གྱི་ལྷུམས་མིའི་ལུས་སུ་གློ་གཡས་ཕྱོགས་སུ་བརྟེན་ཏེ་བཞུགས་སོ། །ཞེས་བགྱི་བ་འདི་ནི་རབ་ཏུའང་ངོ་མཚར་ཆེ་སྟེ། བཅོམ་ལྡན་འདས། སྔོན་བཅོམ་ལྡན་འདས་ཀྱིས་དེ་ལྟར་མཛད་དོ་ཞེས་དེ་སྐད་དུ་སྨྲ་བར་ནི་བདག་ལ་སྤྲོ་བ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་ཞེས་བྱ་བ་གང་བྱང་ཆུབ་སེམས་དཔའ་མའི་རུམ་ན་གནས་པའི་ཡོངས་སུ་སྤྱད་པར་གྱུར་པ་མཐོང་བར་འདོད་དམ། གསོལ་བ། བཅོམ་ལྡན་འདས་དེའི་དུས་ནི་ད་ལགས་སོ། །བདེ་བར་གཤེགས་པ་དེའི་དུས་ནི་ད་ལགས་ཏེ། དེ་བཞིན་གཤེགས་པས་བྱང་ཆུབ་སེམས་དཔའི་ཡོངས་སུ་སྤྱད་པ་དེ་བསྟན་ཏེ་མཐོང་ན་གློ་བ་དགའོ། །དེ་ནས་བཅོམ་ལྡན་འདས་ཀྱིས་རྣམ་པ་དེ་ལྟ་བུའི་མཚན་མ་མཛད་དེ། དེས་མི་མཇེད་ཀྱི་བདག་པོ་ཚངས་པ། ཚངས་པ་འབུམ་ཕྲག་དྲུག་ཅུ་རྩ་བརྒྱད་དང་ལྷན་ཅིག་ཚངས་པའི་འཇིག་རྟེན་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་ཕྱིན་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདུད་ཅིང་ཕྱོགས་གཅིག་ཏུ་འདུག་གོ །

དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་མི་མཇེད་ཀྱི་བདག་པོ་ཚངས་པ་ལ་བཀའ་སྩལ་པ། ཚངས་པ་ཁྱོད་ཀྱིས་སྔོན་ང་བྱང་ཆུབ་སེམས་དཔར་གྱུར་ཅིང་མའི་རུམ་ན་ཟླ་བ་བཅུར་འདུག་འདུག་པའི་བྱང་ཆུབ་སེམས་དཔའི་ཡོངས་སུ་སྤྱད་པ་བླངས་སམ། གསོལ་བ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་སོ། །བཀའ་སྩལ་པ། ཚངས་པ་ད་དེ་ག་ལ་ཡོད་སྟོན་ཅིག །གསོལ་བ། བཅོམ་ལྡན་འདས་དེ་ནི་ཚངས་པའི་འཇིག་རྟེན་ན་མཆིས་སོ། །བཀའ་སྩལ་པ། ཚངས་པ་དེའི་ཕྱིར་ཟླ་བ་བཅུ་པའི་བྱང་ཆུབ་སེམས་དཔའི་ཡོངས་སུ་སྤྱད་པ་དེ་འདིར་ཁྱོད་ཀྱིས་སྟོན་ཅིག་དང་། ཇི་ཙམ་དུ་འདུས་བྱས་པ་ཤེས་པར་འགྱུར་རོ། །དེ་ནས་མི་མཇེད་ཀྱི་བདག་པོ་ཚངས་པས། ཚངས་པ་དག་ལ་འདི་སྐད་ཅེས་སྨྲས་སོ། །ཁོ་བོས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་བླང་གིས་དེའི་བར་དུ་ཁྱེད་འཁོད་ཅིག །དེ་ནས་མི་མཇེད་ཀྱི་བདག་པོ་ཚངས་པ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་མི་སྣང་བར་གྱུར་ནས་སྐད་ཅིག་དེ་ཉིད་ལ་ཚངས་པའི་འཇིག་རྟེན་དུ་ཕྱིན་ཏོ། །

དེ་ནས་མི་མཇེད་ཀྱི་བདག་པོ་ཚངས་པས་ལྷའི་བུ་ཚངས་པ་བཟང་པོ་ལ་འདི་སྐད་ཅེས་སྨྲས་སོ། །གྲོགས་པོ་ཁྱོད་སོང་ལ་ཚངས་པའི་འཇིག་རྟེན་འདི་མན་ཆད་སུམ་ཅུ་རྩ་གསུམ་གྱི་གནས་ཡན་ཆད་དུ་སྒྲ་སྒྲོགས་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བདག་ཅག་གིས་དེ་བཞིན་གཤེགས་པའི་སྤྱན་སྔར་བཀུར་ན་ཁྱེད་ཀྱི་ནང་ནས་མཐོང་བར་སུ་དགའ་བ་མྱུར་དུ་ཤོག་ཅིག་ཅེས་སྒྲས་གོ་བར་གྱིས་ཤིག །དེ་ནས་མི་མཇེད་ཀྱི་བདག་པོ་ཚངས་པས། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་བླངས་ཏེ། ཚངས་པའི་གཞལ་མེད་ཁང་ཆེན་པོ་དཔག་ཚད་སུམ་བརྒྱ་པའི་སྟེང་དུ་བཞག་ནས། ལྷ་བྱེ་བ་ཁྲག་ཁྲིག་བརྒྱ་སྟོང་དུ་མས་ཀུན་ནས་བསྐོར་ཏེ། འཛམ་བུའི་གླིང་དུ་ཕབ་བོ། །

དེའི་ཚེ་བཅོམ་ལྡན་འདས་ཀྱི་ཞབས་འབྲིང་དུ་འདོད་པ་ན་སྤྱོད་པའི་ལྷའི་བུ་འདུས་པ་ཆེན་པོར་གྱུར་ཏེ། བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ཡང་ལྷའི་གོས་དང་། ལྷའི་ཕྲེང་བ་དང་། ལྷའི་སྤོས་དང་། ལྷའི་མེ་ཏོག་དང་། ལྷའི་རོལ་མོའི་དབྱངས་སྒྲ་དང་། ལྷའི་ལོངས་སྤྱོད་རྣམས་ཀྱིས་མངོན་པར་འདུས་བྱས་པར་གྱུར་ཅིང་ལྷ་དབང་ཆེ་བར་གྲགས་པ་དག་གིས་ཡོངས་སུ་བསྐོར་བར་གྱུར་པ་ནི་འདི་ཙམ་སྟེ། ལྷའི་དབང་པོ་བརྒྱ་བྱིན་རྒྱ་མཚོ་ཆེན་པོའི་དབུས་སུ་འདུག་ནས་རྒྱང་རིང་པོ་ནས་གདོང་ཐལ་མོས་བསྐྱབས་ཏེ་མགོ་བྱོལ་ནས་བལྟས་ཀྱང་མཐོང་བར་མི་ནུས་སོ། །དེ་ཅིའི་ཕྱིར་ཞེ་ན། ལྷའི་ནང་ན་ཚངས་པ་དག་ནི་མཐུ་ཆེ་བ་སྟེ། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་དག་ཀྱང་དེ་དག་གི་དྲུང་ན་དམའ་བ་ཡིན་ན། ལྷའི་དབང་པོ་བརྒྱ་བྱིན་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དེའི་ཚེ། ལྷའི་རོལ་མོ་དབྱངས་སྒྲའི་སྒྲ་དེ་དག་ཞི་བར་མཛད་དོ། །དེ་ཅིའི་ཕྱིར་ཞེ་ན། དེ་ཐོས་པ་ཙམ་གྱིས་འཛམ་བུའི་གླིང་གི་མི་རྣམས་མྱོ་མྱོ་པོར་འགྱུར་དུ་འོང་བའི་ཕྱིར་རོ། །

དེ་ནས་རྒྱལ་པོ་ཆེན་པོ་བཞི་ལྷའི་དབང་པོ་བརྒྱ་བྱིན་གྱི་དྲུང་དུ་ལྷགས་ནས་འདི་སྐད་ཅེས་སྨྲས་སོ། །ལྷའི་དབང་པོ་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་འདི་བདག་ཅག་གིས་མཐོང་བར་མི་ནུས་ན་ཇི་ལྟར་བགྱི། དེས་དེ་དག་ལ་སྨྲས་པ། གྲོགས་པོ་དག་ཁོ་བོས་ཀྱང་ཇི་ལྟར་བྱ། ཁོ་བོ་ཉིད་ཀྱིས་ཀྱང་མཐོང་བར་མི་ནུས་སོ། །གྲོགས་པོ་དག་འོན་ཀྱང་དེ་ནི་ནམ་བཅོམ་ལྡན་འདས༌ཀྱི་སྤྱན་སྔར་ཕུལ་བ་དེའི་ཚེ་མཐོང་གྲང་ངོ་། །དེ་དག་གིས་སྨྲས་པ། ལྷའི་དབང་པོ་དེ་བས་ན་ཅི་ནས་ཀྱང་མྱུར་དུ་མཐོང་བར་འགྱུར་བ་དེ་ལྟར་མཛད་དུ་གསོལ།

སྨྲས་པ། གྲོགས་པོ་དག་ལྷའི་བུ་མངོན་པར་འཕགས་པ་མངོན་པར་འཕགས་པ་དེ་དག་བཅོམ་ལྡན་འདས་ཀྱི༌སྤྱན་སྔར་ཕྱིན་ཏེ། དགའ་བར་བྱ་བའི་ཚིག་བརྗོད་པར་གྱུར་གྱི་བར་དུ་སྡོད་ཅིག །དེ་ནས་དེ་དག་ཕྱོགས་གཅིག་ཏུ་འཁོད་དེ་མགོ་བྱོལ་ནས་བཅོམ་ལྡན་འདས་ལོགས་སུ་ལྟ་ཞིང་འཁོད་པར་གྱུར་ཏོ། །

དེ་ནས་མི་མཇེད་ཀྱི་བདག་པོ་ཚངས་པ་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེ་ཁྱེར་ཏེ། དེ་བཞིན་གཤེགས་པ་ག་ལ་བ་དེར་ཕུལ་ལོ། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེ་ནི་གཟུགས་བཟང་བ་མཛེས་པ་ལྟ་ན་སྡུག་པ་གྲུ་བཞི་ལྷམ་པ། ཀ་བ་བཞི་ཟུག་པ། སྟེང་ཁང་པ་བརྩེགས་པས་ལེགས་པར་བརྒྱན་པ་སྟེ། དེའི་ཚད་ནི་འཕང་དུ་འདི་ལྟ་སྟེ། དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་ཙམ་མོ། །ཁང་པ་བརྩེགས་པ། དེའི་ནང་དུ་ཁྲི་བཤམས་པ་ནི་འདི་ལྟ་སྟེ་དཔེར་ན་བྱིས་པ་བཙས་ནས་ཟླ་བ་དྲུག་ལོན་པ་འདུག་པའི་སྟེགས་བུ་ཙམ་མོ། །བྱང་ཆུབ་སེམས་དཔའི་ཡོངས་སུ་སྤྱད་པར་བྱ་བ་རིན་པོ་ཆེ་བཀོད་པ་དེའི་ཁ་དོག་དང་དབྱིབས་ནི་འདི་ལྟ་བུ་སྟེ། ལྷ་དང་བཅས་པའི་འཇིག་རྟེན་ན་དེའི་དབྱིབས་དང་ཁ་དོག་འདྲ་བ་གང་ཡང་མེད་དོ། །ལྷ་རྣམས་ཀྱིས་དེ་མཐོང་ན་ཡང་མིག་འཁྲུགས་ཤིང་ངོ་མཚར་དུ་འགྱུར་རོ། །

དེ་དེ་བཞིན་གཤེགས་པའི༌སྤྱན་སྔར་བཞག་ན་ལྷམ་མེ། ལྷན་ནེ། ལྷང་ངེ་སྟེ། དཔེར་ན་མགར་བ་མཁས་པས་ཤིན་ཏུ༌བཞུ་སྟེ། ལེགས་པར་སྦྱངས་ནས། དྲི་མའི་སྐྱོན་མེད་པར་བྱས་པའི་གསེར་བཞིན་དུ་ཁང་པ་བརྩེགས་པ་དེ་རྣམ་པར་མཛེས་སོ། །བྱང་ཆུབ་སེམས་དཔའི་ཡོངས་སུ་སྤྱད་པ་དེའི་ནང་དུ་ཁྲི་བཤམས་པ་ནི། བྱང་ཆུབ་སེམས་དཔའི་དུང་མགྲིན་མ་གཏོགས་པ་ལྷ་དང་བཅས་པའི་འཇིག་རྟེན་ན་དེའི་དབྱིབས་དང་། ཁ་དོག་འདྲ་བ་གང་ཡང་མེད་དོ། །ཚངས་པ་ཆེན་པོས་གོས་བགོས་པ་དེ་ཡང་བྱང་ཆུབ་སེམས་དཔའི་ཁྲི་དེའི་དྲུང་ན་མཛེས་པར་མི་སྣང་སྟེ། འདི་ལྟ་སྟེ་དཔེར་ན། རླུང་དང་ཆར་གྱིས་བཏབ་པའི་ལྭ་བ་ནག་པོ་བཞིན་ནོ། །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་ལས་བྱས་པ་སྟེ། དེའི་ཕྱེ་མ་ཞོ་གཅིག་ལའང་སྟོང་གི་འཇིག་རྟེན་གྱི་ཁམས་ཀྱིས་རིན་དུ་མི་ཆོག་གོ །ཁང་པ་བརྩེགས་པ་དེ་ནི་ཙན་དན་སྦྲུལ་གྱི་སྙིང་པོ་དེ་ལྟ་བུས་ཀུན་ནས་བསྐོར་བ་སྟེ། ཁང་པ་བརྩེགས་པ་དེ་དང་འདྲ་བ་གཉིས༌པ་གཅིག་ཀྱང་ཁང་པ་བརྩེགས་པ་དང་པོ་དེའི་ནང་ན་མ་ཆགས་མ་རེག་པར་འདུག་གོ །ཁང་པ་བརྩེགས་པ་དེ་ཁོ་ན་དང་འདྲ་བ་གསུམ་པ་གཅིག་ཀྱང་ཁང་པ་བརྩེགས་པ་གཉིས་པ་དེའི་ནང་ན་མ་རེག་མ་ཆགས་པར་འདུག་གོ །སྤོས་ཀྱི་ཁང་པ་བརྩེགས་པ་གསུམ་པ་དེའི་ནང་དུ་ཁྲི་དེ་བཞག་སྟེ་གདན་བཏིང་ངོ་། །ཙན་དན་སྦྲུལ་གྱི་སྙིང་པོ་དེའི་ཁ་དོག་ནི་རྣམ་པ་འདི་ལྟ་བུ་སྟེ། དཔེར་ན་བཻཌཱུརྱ་སྔོན་པོ་རིགས་དམ་པ་དང་ལྡན་པ་བཞིན་ནོ། །

སྤོས་ཀྱི་ཁང་པ་བརྩེགས་པ་དེའི་འཁོར་ན་མེ་ཏོག་ལྷའི་ལས་འདས་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མ་བསྐྱེད་པར་བྱང་ཆུབ་སེམས་དཔའི་སྔོན་གྱི་དགེ་བའི་རྩ་བའི་རྣམ་པར་སྨིན་པས་ཁང་པ་བརྩེགས་པ་དེར་སྐྱེའོ། །བྱང་ཆུབ་སེམས་དཔའི་ཡོངས་སུ་སྤྱད་པ། རིན་པོ་ཆེ་བཀོད་པ་དེ་ནི་རྡོ་རྗེའི་རང་བཞིན་ཏེ། སྲ་ཞིང་བརྟན་ལ་མི་ཤིགས་པ་སྟེ། ཀ་ཙ་ལིན་དའི་གོས་ལྟར་རེག་ན་བདེ་བའོ། །འདོད་པ་ན་སྤྱོད་པའི་ལྷ་རྣམས་ཀྱི་གནས་བཀོད་པ་གང་ཇི་སྙེད་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་ཀུན་ཏུ་སྣང་ངོ་། །གང་གི་ནུབ་མོ་བྱང་ཆུབ་སེམས་དཔའ་མའི་རུམ་དུ་འཇུག་པ་དེ་ཡི་ནུབ་མོ་འོག་གི་ཆུའི་ཕུང་པོ་ནས་བཟུང་སྟེ། ས་ཆེན་པོའི་རྔམས་དཔག་ཚད་འབུམ་ཕྲག་དྲུག་ཅུ་རྩ་བརྒྱད་བརྟོལ་ཏེ་པད་མ་བྱུང་བས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་སོ། །པད་མ་དེ་ནི་ཁ་ལོ་སྒྱུར་བ་སྐྱེས་བུའི་དམ་པ་དང་། ཚངས་པ་ཆེན་པོ་བརྒྱ་ཕྲག་བཅུའི་སྟོབས་ལ་དབང་བས་མཐོང་དུ་ཟད་ཀྱི་གཞན་སུས་ཀྱང་མཐོང་བ་མེད་དོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སྙིང་ཁུ་དང་། སྙིང་པོ་དང་། བཅུད་ཇི་སྙེད་ཡོད་པ་དེ་དག་ཐམས་ཅད་པད་མ་ཆེན་པོ་དེ་ལ་ཟིལ་དངར་གྱི་ཐིགས་པར་ཆགས་ཏེ། འདུག་ནས་དེ་ཚངས་པ་ཆེན་པོས་བཻཌཱུརྱའི་སྣོད་བཟང་པོས་བླངས་ཤིང་བྱང་ཆུབ་སེམས་དཔའ་ལ་ཕུལ་ནས་བྱང་ཆུབ་སེམས་དཔས་ཀྱང་དེ་བླངས་ཏེ་ཚངས་པ་ཆེན་པོ་ལ་སྙིང་བརྩེ་བའི་ཕྱིར་འཐུངས་པར་གྱུར་ཏོ། །

སྙིང་ཁུའི་ཐིགས་པ་དེ་འཐུངས་ན་བྱང་ཆུབ་སེམས་དཔའ་སྲིད་པ་ཐ་མ་པ་བྱང་ཆུབ་སེམས་དཔའི་ས་ཐམས་ཅད་ཡོངས་སུ་རྫོགས་པ་མ་གཏོགས་པར་དེ་ཡང་དག་པར་བདེ་བར་ཞུ་བར་ནུས་པ་སེམས་ཅན་གྱི་ཁམས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །ལས་གང་གི་རྣམ་པར་སྨིན་པས་སྙིང་ཁུའི་ཐིགས་པ་དེ་ལྟ་བུ་བྱང་ཆུབ་སེམས་དཔའ་ལ་ཡོད་པར་གྱུར་ཅེ་ན། བྱང་ཆུབ་སེམས་དཔས་སྔོན་ཡུན་རིང་པོར་བྱང་ཆུབ་སེམས་དཔའི༌སྤྱོད་པ་སྤྱད་པའི་ཚེ། སེམས་ཅན་ནད་པ་དག་ལ་སྨན་བྱིན་པ་དང་། སེམས་ཅན་བསམ་པ་ལ་རྟེན་པ་རྣམས་ཀྱི་བསམ་པ་ཡོངས་སུ་བསྐང་བ་དང་། སྐྱབས་སུ་འོངས་པ་རྣམས་ཡོངས་སུ་མ་བཏང་བ་དང་། རྟག་པར་མེ་ཏོག་གི་ཕུད་དང་། འབྲས་བུའི་ཕུད་དང་། རོའི་ཕུད་དེ་བཞིན་གཤེགས་པ་རྣམས་དང་། དེ་བཞིན་གཤེགས་པའི་མཆོད་རྟེན་རྣམས་དང་། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་རྣམས་དང་། ཕ་དང་མ་ལ་ཕུལ་ཞིང་ཕྱིས་བདག་ཉིད་ཡོངས་སུ་སྤྱོད་སྤྱོད་པས་ལས་དེའི་རྣམ་པར་སྨིན་པས་ཚངས་པ་ཆེན་པོ་ཟིལ་དངར་གྱི་ཐིགས་པ་དེ་བྱང་ཆུབ་སེམས་དཔའ་ལ་འབུལ་ལོ། །ཁང་པ་བརྩེགས་པ་དེར་གནས་ཀྱི་ཁྱད་པར་དགའ་བ་དང་། རྩེད་མོ་དང་། ཕྲེང་བ་བརྒྱུས་པ་དང་ལྡན་པ་འཕགས་པ་༌འཕགས་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་སྔོན་གྱི་ལས་ཀྱི་རྣམ་པར་སྨིན་པས་དེར་བྱུང་བར་སྣང་ངོ་། །བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་དེར་གོས་སྟོང་ཕྲག་བརྒྱའི་རྒྱན་ཅེས་བྱ་བ༌ཕྲུགས་ཤིག་བྱུང་སྟེ། དེའི་བྱུང་བ་ནི་བྱང་ཆུབ་སེམས་དཔའ་སྲིད་པ་ཐ་མ་པ་མ་གཏོགས་པར་སེམས་ཅན་གྱི་རིས་ན་སེམས་ཅན་དེ་ལྟ་བུ་དེ་གང་ཡང་མེད་དོ། །གཟུགས་དང་། སྒྲ་དང་། དྲི་དང་། རོ་དང་། རེག་མཆོག་ཏུ་བྱ་བ་དམ་པ་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁང་པ་བརྩེགས་པ་དེ་ནི་མེད་པ་གང་ཡང་མེད་དོ། །ཡོངས་སུ་སྤྱད་པར་བྱ་བ་ཁང་པ་བརྩེགས་པ་དེ་ནི་འདི་ལྟར་ཕྱི་ནང་ཤིན་ཏུ༌ཡོངས་སུ་གྲུབ་པ། འདི་ལྟར་ཤིན་ཏུ་ཡོངས་སུ་རྫོགས་པ་སྟེ། འདི་ལྟ་སྟེ་དཔེར་ན། ཡུལ་ཀ་ལིང་ཀ་ནས་བྱུང་བའི་དར་ལྟར་རེག་ན་བདེ་བའོ། །

དེ་ཡང་འོལ་བྱིར་བསྟན་པར་ཟད་ཀྱི། དེ་ལ་དཔེ་མེད་དོ། །བྱང་ཆུབ་སེམས་དཔའི་སྔོན་གྱི་སྨོན་ལམ་གྱིས་འདི་ནི་བསམས་པས་འགྲུབ་སྟེ། གདོན་མི་ཟ་བར་བྱང་ཆུབ་སེམས་དཔའ་སེམས་དཔའ་ཆེན་པོ་མིའི་འཇིག་རྟེན་དུ་སྐྱེ་བ་དང་། མངོན་པར་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་བསྐོར་བ་དང་། མ་གང་གི་རུམ་དུ་སྐྱེ་བར་འགྱུར་བ་དེའི་རུམ་གཡས་པར་ཁང་པ་བརྩེགས་པ་རིན་པོ་ཆེ་བཀོད་པ་དམ་པ་སྔར་མངོན་པར་འགྲུབ་ཅིང་། ཕྱིས་བྱང་ཆུབ་སེམས་དཔའ་དགའ་ལྡན༌གྱི་གནས་ནས་འཕོས་ཏེ་ཁང་པ་བརྩེགས་པ་དེར༌སྐྱིལ་ཀྲུང་བཅས་ནས་འདུག་པར་འབྱུང་བ་དང་། བྱང་ཆུབ་སེམས་དཔའ་སྲིད་པ་ཐ༌མ་པའི་ལུས་ནུར་ནུར་པོ་དང་། མེར་མེར་པོ་དང་། ལྟར་ལྟར་པོ་དང་། རེང་རེང་པོར་འགྱུར་བ་མེད་ཅིང་། ཡན་ལག་དང་། ཉིང་ལག་དང་། མཚན་ཐམས་ཅད་ཕུན་སུམ་ཚོགས་པར་འདུག་བཞིན་དུ་འབྱུང་ལ། ལྷ་མོ་སྒྱུ་འཕྲུལ་གྱི་རྨི་ལམ་དུ་གླང་པོ་ཆེན་པོ་འོངས་པར་མཐོང་བ་འདི་ནི་ཆོས་ཉིད་དོ། །དེ་དེ་ལྟར་འདུག་པ་ལ་ལྷའི་དབང་པོ་བརྒྱ་བྱིན་དང་། རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གང་ལས་ལག་ན་རྡོ་རྗེ་སྐྱེས་པའི་གནོད་སྦྱིན་གྱི་རིགས་གསང་བ་པ་ཞེས་བྱ་བ་དེ་དག་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །

བྱང་ཆུབ་སེམས་དཔའ་ལ་རིམ་གྲོ་བྱེད་པའི་ལྷ་མོ་བཞི་ཡོད་དེ། ཨུ་ཁུ་ལི་ཞེས་བྱ་བ་དང་། མུ་ཁུ་ལི་ཞེས་བྱ་བ་དང་། རྒྱལ་མཚན་ལྡན་པ་ཞེས་བྱ་བ་དང་། འོད་དང་ལྡན་པ་ཞེས་བྱ་བ་སྟེ། བཞི་པོ་དེ་དག་ཀྱང་བྱང་ཆུབ་སེམས་དཔའ་མའི་རུམ་དུ་ཞུགས་པར་ཤེས་ནས་རྟག་ཏུ་རྒྱུན་མི་འཆད་པར་སྲུང་ངོ་། །ལྷའི་དབང་པོ་བརྒྱ་བྱིན་ཡང་ལྷའི་བུ་ལྔ་བརྒྱ་ཙམ་དང་ལྷན་ཅིག་བྱང་ཆུབ་སེམས་དཔའ་མའི་རུམ་དུ་ཞུགས་པ་ཤེས་ནས། རྟག་ཏུ་རྒྱུན་མི་འཆད་པར་ཕྱི་བཞིན་འབྲང་བར་གྱུར་ཏོ། །བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་ནི་རྣམ་པ་འདི་ལྟ་བུར་གྱུར་ཏེ། དཔེར་ན་མཚན་མོ་མུན་པ་ཤིན་ཏུ་གནག་པའི་ནང་ན་རིའི་སྤོ་ལ་མེའི་ཕུང་པོ་ཆེན་པོ་འདུག་པ་ནི་དཔག་ཚད་གཅིག་ནས་ཀྱང་སྣང་ངོ་། །དཔག་ཚད་ལྔའི་བར་ནས་ཀྱང་སྣང་ངོ་། །དེ་བཞིན་དུ་བྱང་ཆུབ་སེམས་དཔའ་མའི་རུམ་དུ་ཞུགས་པའི་ལུས་མངོན་པར་གྲུབ་པ་ཡང་དེ་ལྟ་བུར་གྱུར་ཏེ། འོད་གསལ་ཞིང་གཟུགས་བཟང་ལ་མཛེས་ཤིང་ལྟ་ན་སྡུག་པར་གྱུར༌པ་དེ། ཁང་པ་བརྩེགས་པ་དེའི་ནང་དུ༌སྐྱིལ་མོ་ཀྲུང་དུ་འདུག་ན་གསེར་གྱི་ས་ལེ་སྦྲམ་རིགས་དང་ལྡན་པ་རིན་པོ་ཆེ་བཻཌཱུརྱས་བརྒྱན་པ་ལྟར་ཤིན་ཏུ་མཛེས་པར་གྱུར་ཏོ། །

བྱང་ཆུབ་སེམས་དཔའི་མས་ཀྱང་བྱང་ཆུབ་སེམས་དཔའ་རུམ་ན་འདུག་པ་མཐོང་བར་གྱུར་ཏོ། །འདི་ལྟ་སྟེ་དཔེར་ན་སྤྲིན་གྱི་ཚོགས་ཆེན་པོའི་ནང་ནས་གློག་བྱུང་བ་ནི་སྣང་བ་ཆེན་པོ་སྐྱེད་དོ། །དེ་བཞིན་དུ་བྱང་ཆུབ་སེམས་དཔའ་མའི་རུམ་ན་འདུག་པ་ཡང་དཔལ་དང་། གཟི་བརྗིད་དང་། ཁ་དོག་གིས༌ཉེ་བར་རིན་པོ་ཆེའི་ཁང་པ་བརྩེགས་པ་དང་པོ་དེ་སྣང་བར་བྱེད་དོ། །སྣང་བར་བྱས་ནས་སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གཉིས་པ་སྣང་བར་བྱས་ནས། སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱེད་དོ། །སྤོས་ཀྱི་ཁང་པ་བརྩེགས་པ་གསུམ་པ་སྣང་བར་བྱས་ནས་མའི་ལུས་ཐམས་ཅད་སྣང་བར་བྱེད་དོ། །དེ་སྣང་བར་བྱས་ནས་དེ་སྟན་གང་ལ་འདུག་པ་དེ་སྣང་བར་བྱེད་དོ། །དེ་སྣང་བར་བྱས་ནས་ཁྱིམ་ཐམས་ཅད་སྣང་བར་བྱེད་དོ། །ཁྱིམ་ཐམས་ཅད་སྣང་བར་བྱས་ནས་འོད་འཕྲོ་བ་ཁྱིམ་གྱི་སྟེང་དུ་བྱུང་སྟེ། ཤར་ཕྱོགས་སྣང་བར་བྱེད་དོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་བཅུ་ཀུན་ཏུ་རྒྱང་གྲགས་ཙམ་དུ་ཕྱོགས་རེ་རེར་ཡང་བྱང་ཆུབ་སེམས་དཔའ་མའི་རུམ་ན་འདུག་པའི་དཔལ་དང་གཟི་བརྗིད་དང་ཁ་དོག་གིས་སྣང་བར་བྱས་པར་གྱུར་ཏོ། །

དགེ་སློང་དག་དེ་ལྟར་བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་ཆོས་མཉན་པའི་ཕྱིར་རྒྱལ་པོ་ཆེན་པོ་བཞི་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་གནོད་སྦྱིན་ལྔ་བརྒྱ་ཙམ་དག་དང་ལྷན་ཅིག་ཏུ་སྔ་དྲོའི་དུས་ཀྱི་ཚེ་འོངས་ཏེ། དེའི་ཚེ་བྱང་ཆུབ་སེམས་དཔས་དེ་དག་འོངས་པར་རིག་ནས་ལག་པ་གཡས་པ་བརྐྱང་སྟེ་མཛུབ་མོ་བསྒྲེང་ནས་སྟན་སྟོན་ཏོ། །འཇིག་རྟེན་སྐྱོང་བ་ལ་སོགས་པ་དེ་དག་ཀྱང་ཇི་ལྟར་བཏིང་བའི་སྟན་ལ་འཁོད་པར་གྱུར་ཏེ། དེ་དག་གིས་བྱང་ཆུབ་སེམས་དཔའ་མའི་རུམ་ན་འདུག་བཞིན་དུ། སྐྱེས་ཟིན་པའི་གཟུགས་དང་འདྲ་བར་ལག་པ་བསྐྱོད་ཅིང་འདེག་ལ། རྣམ་པར༌བསྐྱོད་ཅིང་གཞོག་པ་མཐོང་ནས། དེ་དག་དགའ་མགུ་ཞིང་ཉམས་བདེ་བ་ཐོབ་སྟེ། བྱང་ཆུབ་སེམས་དཔའ་ལ་ཕྱག་འཚལ་བར་གྱུར་ཏོ། །བྱང་ཆུབ་སེམས་དཔས་ཀྱང་དེ་དག་དེ་ལྟར་འཁོད་པ་མཐོང་ནས། ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར༌གཟེངས་བསྟོད། ཡང་དག་པར་དགའ་བར་བྱེད་དོ། །གང་གི་ཚེ་དེ་དག་འདོང་བར་འདོད་པར་གྱུར་པ་དེའི་ཚེའང་། བྱང་ཆུབ་སེམས་དཔས་དེ་དག་གི་སེམས་སེམས་ཀྱིས་རྣམ་པར་ཤེས་ནས་ལག་པ་གཡས་པ༌བརྐྱང་སྟེ་དེ་དག༌འདོང་བའི་བརྡ་སྟོན་ཏོ། །དེ་ལྟར་ལག་པ༌བརྐྱང་སྟེ། འདོང་བའི་བརྡ་བསྟན་ནས། ཕྱིར་སྐུམ་པར་བྱེད་དེ། མ་ལ་གནོད་པ་མེད་དོ། །དེའི་ཚེ་རྒྱལ་པོ་ཆེན་པོ་བཞི་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང༌འདོང་བར་གནང་ངོ་སྙམ་སེམས་ཤིང་། དེ་དག་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །

དེ་ལྟར་བྱང་ཆུབ་སེམས་དཔའ་ནུབ་མོ་མི་ཉལ་ནས་ལག་པ་གཡས་པ་བརྐྱང་ཞིང་བརྐྱངས་ནས་ཀྱང་བསྐུམ་པ་དང་། བསྐུམས་ནས་ཀྱང་དྲན་ཞིང་ཤེས་བཞིན་དུ་ལག་པ་དེ་འཇོག་པའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །གཞན་ཡང་གང་གི་ཚེ་སྐྱེས་པའམ། བུད་མེད་དམ། ཁྱེའུའམ། བུ་མོ་སུ་ཡང་རུང་སྟེ། བྱང་ཆུབ་སེམས་དཔའ་བལྟ་བའི་ཕྱིར་འོངས་པ་དེའི་ཚེ། ཐོག་མར་ནི་བྱང་ཆུབ་སེམས་དཔའ་དགའ་བར་བྱ་བ་སྨྲའོ། །དེའི་འོག་ཏུ་བྱང་ཆུབ་སེམས་དཔའི་མ༌དགའ་བར་བྱ་བ་སྨྲའོ། །དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། སྔར་དགའ་བར་བྱ་བ་སྨྲ་བ་ལ་མཁས་པར་གྱུར་ཏེ། ལྷའམ། ཀླུའམ། གནོད་སྦྱིན་ནམ། མིའམ། མི་མ་ཡིན་པ་སུ་ཡང་རུང་བྱང་ཆུབ་སེམས་དཔའ་ལ་སྔོན་དུ་དགའ་བར་བྱ་བའི་ཚིག་སྨྲ་བར་ནུས་པ་མེད་དོ། །

བྱང་ཆུབ་སེམས་དཔའ་ཉིད་ཐོག་མར་དགའ་བར་བྱ་བ་སྨྲ་ཞིང་དེའི་འོག་ཏུ་བྱང་ཆུབ་སེམས་དཔའི་མ་དགའ་བར་བྱ་བ་སྨྲའོ། །དེ་ནས་སྔ་དྲོའི་དུས་ཟད་དེ། ཉི་མ་གུང་ལ་བབ་ནས་ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷའི་བུ་མངོན་པར་འཕགས་པ། མངོན་པར་འཕགས་པ་དག་བྱང་ཆུབ་སེམས་དཔའ་བལྟ་བ་དང་། དེ་ལ་བསྙེན་བཀུར་བྱ་བ་དང་། ཆོས་མཉན་པའི་ཕྱིར་འོང་བ་དང་། བྱང་ཆུབ་སེམས་དཔས་དེ་དག་རྒྱང་རིང་པོ་ནས་འོངས་པ་མཐོང་ནས། གསེར་གྱི་མདོག་ཏུ་འདུག་པའི་ལག་པ་གཡས་པ༌བརྐྱང་སྟེ། ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷ་དག་དགའ་བར་བྱེད་ཅིང༌མཛུབ་མོ་བརྐྱང་སྟེ། སྟན་སྟོན་ཏོ། །དགེ་སློང་དག་དེའི་ཚེའང་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའ་ལ་ཕྱིར་བཟློག་མ་ནུས་ནས་ཇི་ལྟར་བཏིང་བའི་སྟན་དེ་དག་ལ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །

བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར༌གཟེངས་བསྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ༌བརྐྱང་བ་དེ་ལོགས་སུ་བྱང་ཆུབ་སེམས་དཔའི་མ་ཡང་ལྟ་བར་གྱུར་ཏོ། །དེས་ན་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བ་སྨྲའོ་སྙམ་མོ། །དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ༌ཞིག་ལ་སྨྲ་སྟེ། བདག་འབའ་ཞིག་ལ་དགའ་བར་བྱ་བ་སྨྲའོ་སྙམ་མོ། །ཁང་པ་བརྩེགས་པ་དེར་ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷ་དེ་དག་གི་གཟུགས་བརྙན་སྣང་བར་གྱུར་ཏོ། །

ཇི་ལྟར་བྱང་ཆུབ་སེམས་དཔའ་མའི་རུམ་ན་གནས་པའི་ལོངས་སྤྱོད་ཡོངས་སུ་དག་པར་གྱུར་པ་དེ་ལྟ་བུ་ནི་གཞན་དག་ན་མེད་དོ། །དགེ་སློང་དག་གང་གི་ཚེ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་གཞན་དག་འདོང་བར་འདོད་པར་གྱུར་པ་དེའི་ཚེའང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས། ལག་པ་གཡས་པ༌བརྐྱང་སྟེ་དེ་དག༌འདོང་བའི་བརྡ་སྟོན་ཏོ། །བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །དེའི་ཚེ་ལྷའི་དབང་པོ་བརྒྱ་བྱིན་དང་། དེ་མ་ཡིན་པའི་ལྷའི་བུ་སུམ་ཅུ་རྩ་གསུམ་པ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང༌འདོད་པར་གནང་ངོ་སྙམ་དུ་སེམས་ཤིང་། དེ་དག་ཀྱང་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་དོང་བར་གྱུར་ཏོ། །དགེ་སློང་དག་ཉི་མ་ཕྱེད་ཀྱི་དུས་འདས་ནས་ཕྱི་དྲོའི་དུས་ལ་བབ་པ་དང་། མི་མཇེད་ཀྱི་བདག་པོ་ཚངས་པ་ལྷའི་བུ་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། ལྷ་ཡུལ་བའི་སྙིང་ཁུའི་ཐིགས་པ་དེ་ཁྱེར་ནས་བྱང་ཆུབ་སེམས་དཔའ་ག་ལ་བ་དེར། བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་འོང་བར་གྱུར་ཏོ། །

དགེ་སློང་དག་བྱང་ཆུབ་སེམས་དཔས་མི་མཇེད་ཀྱི་བདག་པོ་ཚངས་པ་འཁོར་དང་བཅས་ཏེ་འོངས་པར་ཤེས་ནས། བྱང་ཆུབ་སེམས་དཔས་ཡང་གསེར་གྱི་མདོག་ཏུ་འདུག་པའི་ལག་པ་གཡས་པ༌བརྐྱང་སྟེ། མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་དེ་དག་ལ་དགའ་བར་བྱ་བ་སྨྲས་ཏེ། མཛུབ་མོ་བརྐྱང་ནས་སྟན་སྟོན་ཏོ། །དགེ་སློང་དག་མི་མཇེད་ཀྱི་བདག་པོ་ཚངས་པ་དེས་ཀྱང་བྱང་ཆུབ་སེམས་དཔའི་བཀའ་ལས་བཟློག་པར་མ་ནུས་ནས། ཇི་ལྟར་བཏིང་བའི་སྟན་དེ་དག་ལ་མི་མཇེད་ཀྱི་བདག་པོ་ཚངས་པ་དང་ཚངས་རིས་ཀྱི་ལྷའི་བུ་གཞན་དག་ཀྱང་འཁོད་པར་གྱུར་ཏོ། །བྱང་ཆུབ་སེམས་དཔས་དེ་ལྟར་འཁོད་པར་རིག་ནས་ཆོས་ཀྱི་གཏམ་གྱིས་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར༌གཟེངས་བསྟོད། ཡང་དག་པར་དགའ་བར་བྱེད་དོ། །བྱང་ཆུབ་སེམས་དཔས་ལག་པ་གང་དུ༌བརྐྱང་བ་དེ་ལོགས་སུ་ལྷ་མོ་སྒྱུ་འཕྲུལ་ཡང་ལྟ་བར་གྱུར་ཏོ། །

དེ་ལྟར་ན་ལྷ་དེ་དག་ཀྱང་བདག་ཅག་ནི་བྱང་ཆུབ་སེམས་དཔའ་དང་དགའ་བར་བྱ་བའི་གཏམ་བྱེད་དོ་སྙམ་སྟེ་ལྷའི་བུ་དེ་དག་རེ་རེ་ཞིང་ཡང་འདི་སྙམ་དུ་བྱང་ཆུབ་སེམས་དཔའ་ནི་བདག་འབའ་ཞིག་ལ༌སྨྲས་ཏེ། བདག་འབའ་ཞིག་ལ་དགའ་བའི་གཏམ་བྱེད་དོ་སྙམ་མོ། །དགེ་སློང་དག་གང་གི་ཚེ་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་དེ་དག་འདོང་བར་འདོད་པར་གྱུར་པ་དེའི་ཚེ་ཡང་བྱང་ཆུབ་སེམས་དཔས་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས་ལག་པ་གཡས་པ༌བརྐྱང་སྟེ། དེ་དག་འདོང་བའི་བརྡ་སྟོན་ཏོ། །དེ་ལྟར་འདོང་བའི་བརྡ་བསྟན་ནས་ཕྱིར་བསྐུམ་པ་བྱས་ཏེ། དྲན་ཞིང་ཤེས་བཞིན་དུ་ལག་པ་བཞག་ཀྱང་མ་ལ་གནོད་པ་མེད་དོ། །

དེའི་ཚེ་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷ་དེ་དག་ཀྱང་འདི་སྙམ་དུ་བདག་ཅག་ནི་བྱང་ཆུབ་སེམས་དཔས་ཀྱང་འདོང་བར་གནང་ངོ་སྙམ་དུ་སེམས་ཤིང་དེ་དག་བྱང་ཆུབ་སེམས་དཔའ་དང་། བྱང་ཆུབ་སེམས་དཔའི་མ་ལ་ལན་གསུམ་བསྐོར་བ་བྱས་ནས་འདོང་བར་གྱུར་ཏོ། །བྱང་ཆུབ་སེམས་དཔའ་ཡང་དྲན་ཞིང་ཤེས་བཞིན་དུ་ལག་པ་འཇོག༌པར་གྱུར་ཏེ། དགེ་སློང་དག་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། འོག་དང་། སྟེང་དང་། ཕྱོགས་བཅུ་ཀུན་ནས་ཀྱང་བྱང་ཆུབ་སེམས་དཔའ་བརྒྱ་སྟོང་མང་པོ་བྱང་ཆུབ་སེམས་དཔའ་དེ་བལྟ་བ་དང་། དེ་ལ་ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པ་དང་། ཆོས་ཡང་དག་པར་བརྗོད་པར་བྱ་བའི་ཕྱིར་འོང་བར་གྱུར་ཏོ། །དེ་དག་དེ་ལྟར་འོངས་པ་དང་། བྱང་ཆུབ་སེམས་དཔས་ལུས་ལས་འོད་བཀྱེ་སྟེ། འོད་ཀྱི་བཀོད་པ་དེ་དག་སེང་གེའི་ཁྲིར་སྤྲུལ་ནས། དེ་ལྟར་སྤྲུལ་པའི་ཁྲི་དེ་དག་ལ་བྱང་ཆུབ་སེམས་དཔའ་དེ་དག་འཁོད་དུ་བཅུག་སྟེ། དེ་དག་དེ་ལྟར་འཁོད་པར་ཤེས་ནས་འདི་ལྟ་སྟེ་ཐེག་པ་ཆེན་པོ་འདི་ཉིད་རྒྱ་ཆེར་རྣམ་པར་དབྱེ་བའི་དོན་དུ་དྲིས་ཏེ་བརྟགས་ཀྱང༌སྐལ་བ་མཉམ་པའི་ལྷ་རྣམས་མ་གཏོགས་པར་གཞན་སུས་ཀྱང་དེ་དག་མ་མཐོང་སྟེ། དགེ་སློང་དག་དེ་ལྟར་བྱང་ཆུབ་སེམས་དཔས་ནུབ་མོ་མི་ཉལ་ནས་ལུས་ལས་འོད་བཀྱེ་བའི་རྒྱུ་ནི་དེ་ཡིན་ནོ། །རྐྱེན་ནི་དེ་ཡིན་ནོ། །དགེ་སློང་དག་ལྷ་མོ་སྒྱུ་འཕྲུལ་གྱིས་ཀྱང་བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། ལུས་ལྕི་བར་མ་ཚོར་ཏེ། གཞན་དུ་ན་ཡང་བ་དང་། འཇམ་པ་དང་། བདེ་བར་ཚོར་ཞིང་ལྟོ་མི་བདེ་བའི་སྡུག་བསྔལ་གང་ཡང་མྱོང་བར་མ་གྱུར་ཏོ། །

འདོད་ཆགས་ཀྱིས་ཡོངས་སུ་གདུང་བའམ། ཞེ་སྡང་གིས་ཡོངས་སུ་གདུང་བའམ། གཏི་མུག་གིས་ཡོངས་སུ་གདུང་བས་ཀྱང་ཡོངས་སུ་གདུང་བར་མ་གྱུར། འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། གཙེ་བའི་རྣམ་པར་རྟོག་པ་དག་ལ་ཡང་རྣམ་པར་རྟོག་པར་མ་གྱུར་ཏེ། གྲང་བའམ། ཚ་བའམ། བཀྲེས་པའམ། སྐོམ་པའམ། མུན་པའམ། རྡུལ་ལམ། ངལ་བ་ཚོར་བའམ། མཐོང་བར་མ་གྱུར་ཏེ། དེ་ལ་གཟུགས་དང་། སྒྲ་དང་། དྲི་དང་། རོ་དང་། རེག་ཡིད་དུ་མི་འོང་བ་སྣང་བར་མ་གྱུར་ཏོ། །རྨི་ལམ་ངན་པ་ཡང་མཐོང་བར་མ་གྱུར་ཏོ། །དེ་ལ་བུད་མེད་ཀྱི་སྒྱུའམ། གཡོའམ། ཕྲག་དོག་གམ། བུད་མེད་ཀྱི་ཉོན་མོངས་པ་དག་ཀྱང་ཉམས་སུ་གནོད་པར་བྱེད་པར་མ་གྱུར་ཏོ། །དེའི་ཚེ་བྱང་ཆུབ་སེམས་དཔའི་མ་ནི་བསླབ་པའི་གཞི་ལྔ་ཡང་དག་པར་བླངས་ཏེ། ཚུལ་ཁྲིམས་དང་ལྡན་ཞིང་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ཏོ། །བྱང་ཆུབ་སེམས་དཔའི་མ་ཡང་སྐྱེས་པ་གང་ལ་ཡང་འདོད་ཆགས་ཀྱི་སེམས་སྐྱེ་བར་མ་གྱུར་ལ། སྐྱེས་པ་གང་ཡང་བྱང་ཆུབ་སེམས་དཔའི་མ་ལ་འདོད་ཆགས་ཀྱི་སེམས་མི་སྐྱེའོ། །

སེར་སྐྱའི་གྲོང་ཁྱེར་ཆེན་པོ་དེ་དང་། ཡུལ་གཞན་དག་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་སུ་གང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། འབྱུང་པོས་ནོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་མ་མཐོང་མ་ཐག་ཏུ་སོས་ཤིང་དྲན་པ་ཐོབ་པར་གྱུར་ཏོ། །མི་མ་ཡིན་པ་དེ་དག་ཀྱང་མྱུར་དུ་གནས་གཞན་དུ་འདོང་བར་གྱུར་ཏོ། །སེམས་ཅན་གང་ལ་ལ་ཞིག་ནད་སྣ་ཚོགས་ཀྱིས་ཐེབས་པར་གྱུར་ཏེ། རླུང་དང་། མཁྲིས་པ་དང་། བད་ཀན་དང་། འདུས་པ་ལས་བྱུང་བའི་ནད་ཀྱིས་གནོད་པར་གྱུར་པ་དང་། མིག་གི་ནད་དམ། རྣ་བའི་ནད་དམ། སྣའི་ནད་དམ། ལྕེའི་ནད་དམ། མཆུའི་ནད་དམ། སོའི་ནད་དམ། ལྐོག་མའི་ནད་དམ། ཤུ་བའམ། འབྲས་སམ། མཛེའམ། ཤ་བཀྲའམ། སྐེམ་པའམ། བརྗེད་བྱེད་དམ། རིམས་སམ། ལྦ་བའམ། ཕོལ་མིག་གམ། མེ་དབལ་ལམ། རྐང་ཤུ་ལ་སོགས་པའི་ནད་ཀྱིས་བཏབ་པར་གྱུར་པ་དེ་དག་ལ་བྱང་ཆུབ་སེམས་དཔའི་མས། ལག་པ་གཡས་པ་སྤྱི་བོར་བཞག་པ་ཙམ་གྱིས་ནད་དང་བྲལ་བར་གྱུར་ཅིང་། རང་རང་གི་གནས་སུ་འདོང་བར་གྱུར་ཏོ། །ཐ་ན་ལྷ་མོ་སྒྱུ་འཕྲུལ་གྱིས་རྩྭ་ཉག་མ་འགའ་ཞིག་ས་ལས་བླངས་ཏེ་སེམས་ཅན་ནད་པ་དག་ལ་བྱིན་ཡང་དེ་དག་དེ་བླངས་མ་ཐག་ཏུ་ནད་མེད་ཅིང་ཉམས་པ་མེད་པར་གྱུར་ཏོ། །

གང་གི་ཚེ་ལྷ་མོ་སྒྱུ་འཕྲུལ་དེས་བདག་གི་ལྟོ་གཡས་པར་བལྟས་པ་དེའི་ཚེ། བྱང་ཆུབ་སེམས་དཔའ་མའི་རུམ་ན་འདུག་པ་དེ་འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཤིན་ཏུ་དག་པ་ལ་གདོང་གི་དཀྱིལ་འཁོར་སྣང་བ་བཞིན་ཏེ། དེ་ལྟར་དེ་མཐོང་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་པར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པའི་བྱིན་གྱི་རླབས་ཀྱིས། ཉིན་མཚན་རྟག་ཏུ་རྒྱུན་མི་འཆད་པར་ལྷའི་རོལ་མོ་སིལ་སྙན་གྱི་སྒྲ་འབྱུང་ཞིང་ལྷའི་མེ་ཏོག་གི་ཆར་འབབ་པར་གྱུར་ཏོ། །ཆར་ནི་དུས་བཞིན་དུ་འབབ། རླུང་ནི་དུས་བཞིན་དུ་ལྡང་། དུས་དང་སྐར་མ་དག་ཀྱང་དུས་བཞིན་དུ་འགྱུར་ཞིང་འཕོ་བར་གྱུར་ཏོ། །རྒྱལ་སྲིད་ཀྱང་བདེ་ཞིང་ལོ་ལེགས་ལ་འཁྲུག་པ་མེད་ཅིང་དགྲ་མེད་པར་གྱུར་ཏོ། །

སེར་སྐྱའི་གྲོང་ཁྱེར་ཆེན་པོ་དེ་ན་ཤཱཀྱའི་རིགས་དང་། སེམས་ཅན་གཞན་དག་འཁོད་པ་ཐམས་ཅད་ཀྱང་ཟ་ཞིང་འཐུང་། དགའ་ཞིང་རྩེ་ལ་དགའ་མགུར་སྤྱོད་དོ། །སྦྱིན་པ་དག་ཀྱང་གཏོང་། བསོད་ནམས་དག་ཀྱང་བྱེད་དེ། ཟླ་བ་བཞི་འདས་པའི་དུས་སྟོན་བཞིན་དུ་ཐམས་ཅད་ཀྱང་དགའ་བའི་མཆོག་གིས་རྩེ་ཞིང་བདེ་བར་གནས་པས་གནས་པར་གྱུར་ཏོ། །རྒྱལ་པོ་ཟས་གཙང་མ་ཡང་ཚངས་པའི་སྤྱོད་པ་ཡང་དག་པར་བླངས་ཏེ། རྒྱལ་པོའི་ལས་བཏང་ནས་དཀའ་ཐུབ་ཀྱི་ནགས་ཚལ་ཡོངས་སུ་དག་པ་ན་གནས་པ་བཞིན་དུ༌ཐམས་ཅད་ཀྱང་དགའ་བའི་མཆོག་གིས་ཆོས་ཀྱི་རྗེས་སུ་འབྲང་བར་གྱུར་ཏོ། །དགེ་སློང་དག་བྱང་ཆུབ་སེམས་དཔའ་མའི་རུམ་ན་གནས་པ་ནི་རྣམ་པ་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པས་གནས་པར་གྱུར་ཏོ། །

དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་བྱང་ཆུབ་སེམས་དཔའི་ཡོངས་སུ་སྤྱད་པ་རིན་པོ་ཆེ་བཀོད་པ་སྔོན་བྱང་ཆུབ་སེམས་དཔའ་མའི་རུམ་ན་གནས་པའི་ཚེ་གནས་གནས་པ་མཐོང་ངམ། གསོལ་བ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །དེ་བཞིན་གཤེགས་པས་ཚེ་དང་ལྡན་པ་ཀུན་དགའ་བོ་དང་། ལྷའི་དབང་པོ་བརྒྱ་བྱིན་དང་། འཇིག་རྟེན་སྐྱོང་བ་བཞི་དང་། དེ་མ་ཡིན་པའི་ལྷ་དང་། མི་གཞན་དག་ཀྱང་བསྟན་ཏེ་མཐོང་ནས། དེ་དག་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་སོ། །མི་མཇེད་ཀྱི་བདག་པོ་ཚངས་པས་དེའི་ཕྱིར་ཡང་ཚངས་པའི་འཇིག་རྟེན་དུ་མཆོད་པར་བྱ་བའི་ཕྱིར་བཏེག་སྟེ་ཁྱེར་ནས་བཞག་པར་གྱུར་ཏོ། །

དེའི་ཚེ་བཅོམ་ལྡན་འདས་ཀྱིས་ཡང་དགེ་སློང་དག་ལ་བཀའ་སྩལ་པ། དགེ་སློང་དག་དེ་ལྟར་བྱང་ཆུབ་སེམས་དཔའ་མའི་རུམ་ན་འདུག་པས་ལྷ་དང་མི་ཁྲག་ཁྲིག་ཕྲག་སུམ་ཅུ་རྩ་དྲུག་ཐེག་པ་གསུམ་ལ་ཡོངས་སུ་སྨིན་པར་བྱས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གང་ཚེ་རྒྱལ་སྲས་སེམས་ཅན་དམ་པ་མ་ཡི་རུམ་གནས་པ། །དེ་ཚེ་ས་འདི་ཚལ་དང་བཅས་པར་རྣམ་པ་དྲུག་ཏུ་གཡོས། །གསེར་མདོག་འོད་བཀྱེ་ངན་སོང་ཐམས་ཅད་རྣམ་པར་སྦྱངས་པར་གྱུར། །ཆོས་ཀྱི་རྒྱལ་པོར་འགྱུར་ཞེས་ལྷ་ཡི་ཚོགས་རྣམས་རབ་ཏུ་དགའ། །གཞལ་མེད་ཁང་ཆེན་དབྱིབས་ལེགས་རིན་ཆེན་དུ་མས་རྣམ་པར་སྤྲས། །དེར་ནི་དཔའ་བོ་རྣམ་པར་འདྲེན་པ་ཞུགས་པར་གྱུར་ནས་འདུག །ཙན་དན་དྲི་ཞིམ་མཆོག་གིས་རབ་ཏུ་གང་ཞིང་རྣམ་པར་མཛེས། །སྟོང་གསུམ་རིན་ཆེན་ཡོངས་བཀང་དེ་ཡི་སྲང་ཕྱེད་རིན་མི་ཆོག །སྟོང་ཆེན་འཇིག་རྟེན་ཁམས་ཀྱང་འོག་ནས་བརྟོལ་བ་བྱས་ནས་ནི། །ཡོན་ཏན་འབྱུང་བའི་གནས་ཀྱི་པད་མའི་སྙིང་ཁུའི་ཐིགས་པ་བྱུང་། །དེ་བཞིན་ཞག་བདུན་བསོད་ནམས་གཟི་བརྗིད་ཚངས་པའི་འཇིག་རྟེན་འཕགས། །དེ་ལས་སྙིང་ཁུའི་ཐིགས་བླངས་ཚངས་པ་རྒྱལ་བའི་སྲས་ལ་འབུལ། །བྱང་ཆུབ་སེམས་དཔའ་དཔའ་བོ་ཚངས་པ་འདྲ་བ་མ་གཏོགས་པར། །སེམས་ཅན་གང་གིས་དེ་ཟོས་འཇུར་འགྱུར་སེམས་ཅན་རིས་ན་མེད། །བསྐལ་པ་དུ་མའི་བསོད་ནམས་གཟི་བརྗིད་སྙིང་ཁུའི་ཐིགས་གནས་པ། །དེ་ཟོས་ལུས་དང་སེམས་དང་ཤེས་པ་རྣམ་པར་དག་པར་གྱུར། །འདྲེན་པ་མཆོད་ཕྱིར་བརྒྱ་བྱིན་ཚངས་པ་འཇིག་རྟེན་སྐྱོང་བ་རྣམས། །བྱང་ཆུབ་སེམས་དཔའི་དྲུང་དུ་རྟག་པར་དུས་གསུམ་རྒྱུན་ཏུ་འོང་། །ཕྱག་བྱས་མཆོད་བྱས་ཆོས་ཀྱི་དམ་པ་དེ་དག་ཐོས་གྱུར་ནས། །བསྐོར་བ་བྱས་ཏེ་ཀུན་ཀྱང་གང་ནས་འོངས་པའི་གནས་སུ་འདོང་། །འཇིག་རྟེན་ཁམས་རྣམས་ཀུན་ནས་ཆོས་འདོད་བྱང་ཆུབ་སེམས་དཔའ་འོང་། །འོད་བཀོད་ཁྲིར་གྱུར་རྣམས་ལ་དེ་དག་གནས་པར་ཕན་ཚུན་སྣང་། །མཆོག་ཏུ་བྱ་བའི་ཐེག་པ་དམ་པའི་ཆོས་ནི་ཐོས་གྱུར་ནས། །ཀུན་ཀྱང་དགའ་བའི་སེམས་གྱུར་བསྟོད་པའི་ཕྲེང་བ་བརྗོད་ཅིང་འདོང་། །བུད་མེད་བྱིས་པ་གང་དག་སྡུག་བསྔལ་ལྡན་པར་གྱུར་པ་དང་། །འབྱུང་པོས་ནོན་དང་སེམས་འཁྲུགས་གོས་མེད་རྡུལ་གྱིས་ཡོག་པ་རྣམས། །དེ་ཀུན་ལྷ་མོ་སྒྱུ་འཕྲུལ་མཐོང་ནས་སེམས་ནི་རྙེད་གྱུར་ཏེ། །བློ་གྲོས་རྟོགས་དང་དྲན་དང་ལྡན་ཞིང་སོ་སོའི་ཁྱིམ་ཁྱིམ་འདོང་། །རླུང་དང་བད་ཀན་མཁྲིས་པའི་ནད་དང་འདུས་པའི་ནད་ཐེབས་དང་། །མིག་ནད་རྣ་ནད་དག་གིས་ལུས་སེམས་མི་བདེར་གྱུར་པ་དག །རྣམ་མང་ཐ་དད་ནད་ཀྱི་རྣམ་པས་གང་དག་གནོད་གྱུར་པ། །དེ་དག་སྒྱུ་འཕྲུལ་ལག་པ་མགོ་ལ་བཞག་པས་ནད་མེད་གྱུར། །ཡང་ན་རྩྭ་ཡི་ཉག་མ་འགའ་ཞིག་ས་ལས་བླངས་བྱས་ཏེ། །སྒྱུ་འཕྲུལ་ནད་པ་བྱིན་ན་ཐམས་ཅད་རིམས་ནད་མེད་པར་གྱུར། །བདེ་བ་ཐོབ་ཅིང་ད་རོད་མ་ཉམས་སོ་སོའི་ཁྱིམ་དུ་འདོང་། །དེ་ནི་སྨན་གྱུར་སྨན་པའི་རྒྱལ་པོ་རུམ་ན་འདུག་ཕྱིར་རོ། །གང་ཚེ་ལྷ་མོ་སྒྱུ་འཕྲུལ་བདག་གི་ལུས་ལ་བརྟག་བྱས་པ། །དེ་ཚེ་བྱང་ཆུབ་སེམས་དཔའ་རུམ་ན་འདུག་པ་མཐོང་བ་ནི། །ཇི་ལྟར་བར་སྣང་གནས་ཀྱི་ཟླ་བ་སྐར་མས་བསྐོར་གནས་པ། །དེ་བཞིན་བྱང་ཆུབ་སེམས་དཔའ་མཚན་གྱིས་ཀུན་ནས་བརྒྱན་པ་སྣང་། །དེ་ལ་འདོད་ཆགས་ཞེ་སྡང་གཏི་མུག་གནོད་པར་འགྱུར་བ་མེད། །འདོད་ལ་འདོད་པ་དེ་མེད་དེ་ལ་ཕྲག་དོག་འཚེ་བ་མེད། །དགའ་བའི་སེམས་དང་མགུ་བའི་སེམས་དང་དགའ་དང་ཡིད་བདེར་གནས། །དེ་ལ་བཀྲེས་དང་སྐོམ་དང་ཚ་དང་གྲང་བའི་གནོད་པ་མེད། །ལྷ་ཡི་རོལ་མོ་སིལ་སྙན་དབྱངས་སྒྲ་མ་བྱས་རྟག་ཏུ་འབྱུང་། །ལྷ་ཡི་སྤོས་དྲི་མེ་ཏོག་དམ་པ་མཆོག་མཛེས་ཆར་ཡང་འབབ། །ལྷ་དང་མི་རྣམས་དེ་ལ་ལྟ་ཞིང་ལྷ་མི་ཐམས་ཅད་ཀྱང་། །དེ་དག་ཕན་ཚུན་གནོད་པ་མེད་ཅིང་འཚེ་བ་གང་ཡང་མེད། །སེམས་ཅན་དགའ་བདེར་རྩེ་ཞིང་ཟས་དང་སྐོམ་གྱི་སྦྱིན་པ་བྱེད། །དགའ་བའི་སྒྲ་སྒྲོག་དེ་དག་དགའ་ཞིང་མགུ་བའི་ཡིད་དང་ལྡན། །རྒྱལ་པོའི་སྲིད་བདེ་འཁྲུག་པ་མེད་ཅིང་ཆར་པ་དུས་བཞིན་འབབ། །རྩྭ་དང་སྨན་དང་མེ་ཏོག་རྣམས་ཀྱང་དེ་ཡི་དུས་སུ་སྐྱེ། །རྒྱལ་པོའི་ཁབ་ཏུ་ཞག་བདུན་རིན་ཆེན་ཆར་པ་བབ་གྱུར་པས། །སེམས་ཅན་དབུལ་པོ་དེ་ལས་ལེན་ཅིང་སྦྱིན་བྱེད་བདེ་བར་སྤྱོད། །སེམས་ཅན་དབུལ་ཞིང་སྡུག་བསྔལ་གྱུར་པ་དེ་ཚེ་གང་ཡང་མེད། །རི་རབ་ཟོམ་གྱི་དགའ་ཚལ་སེམས་ཅན་བཞིན་དུ་དགའ་དང་ལྡན། །ཤཱཀྱའི་རྒྱལ་པོ་དེ་ཡང་གསོ་སྦྱོང་རབ་ལ་ཉེར་གནས་ཤིང་། །དེ་ནི་རྒྱལ་པོའི་བྱ་བ་མི་བྱེད་ཆོས་ལ་རྟག་པར་སྤྱོད། །དེ་ནི་དཀའ་ཐུབ་ནགས་ཚལ་སོང་ནས་ལྷ་མོ་སྒྱུ་འཕྲུལ་ལ། །སེམས་ཅན་མཆོག་སྲེལ་ཁྱོད་ཀྱི་ལུས་ལ་བདེ་བ་ཅི་འདྲ་རྨེད། །ལྷུམས་སུ་འཇུག་པའི་ལེའུ་སྟེ་དྲུག་པའོ། །དགེ་སློང་དག་དེ་ལྟར་ཟླ་བ་བཅུ་འདས་ཏེ། བྱང་ཆུབ་སེམས་དཔའ་བཙའ་བའི་དུས་ལ་བབ་པ་དང་། རྒྱལ་པོ་ཟས་གཙང་མའི་སྐྱེད་མོས་ཚལ་དུ་སྔ་ལྟས་སུམ་ཅུ་རྩ་གཉིས་བྱུང་ངོ་། །སུམ་ཅུ་རྩ་གཉིས་གང་ཞེ་ན། མེ་ཏོག་ཐམས་ཅད་ཁ་འབུས་ནས་རྒྱས་པར་གྱུར་པ་དང་། རྫིང་དག་ན་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་ཡོད་པ་དག་ཀྱང་ཁ་འབུས་ནས་རྒྱས་པར་གྱུར་པ་དང་། མེ་ཏོག་དང་འབྲས་བུའི་ཤིང་ལྗོན་པ་གསར་པ་དག་ཀྱང་ས་ལས་འཐོན་ཏེ་ཁ་འབུས་ནས་རྒྱས་པར་གྱུར་པ་དང་། རིན་པོ་ཆེའི་ཤིང་ལྗོན་པ་བརྒྱད་བྱུང་བ་དང་། གཏེར་ཆེན་པོ་ཉི་ཁྲི་འབུས་ཏེ་བྱུང་ནས་གནས་པར་སྣང་བ་དང་། ཁྱིམ་གྱི་ནང་དུ་ཡང་རིན་པོ་ཆེའི་མྱུ་གུ་འཐོན་པ་དང་སྤོས་ཆུའི་དཔལ༌གྱི་ཝ་འབྲུ་མར་དྲི་ཞིམ་པོས་སྦགས་པ་རྣམས་ཀྱང་ཟག་པར་གྱུར་པ་དང་། གངས་ཀྱི་རིའི་ངོས་ལས་སེང་གེའི་ཕྲུ་གུ་དག་འོངས་ཏེ། དགའ་བར་རྩེ་ཞིང་སེར་སྐྱའི་གྲོང་ཁྱེར་དམ་པ་ལ་བསྐོར་བ་བྱས་ནས་སྒོ་ན་གནས་པར་གྱུར་ཀྱང་སེམས་ཅན་གང་ལ་ཡང་འཚེ་བ་མེད་པར་གྱུར་པ་དང་། གླང་པོའི་ཕྲུ་གུ་ཐལ་ཀར་ལྔ་བརྒྱ་ལྷགས་ཏེ། རྒྱལ་པོ་ཟས་གཙང་མའི་རྐང་པ་ལ་སྣའི་རྩེ་མོས་ཉུག་ཅིང་གནས་པར་གྱུར་པ་དང་། ལྷའི་བྱིས་པ་རོགས་པ་སྐ་རགས་བཅིངས་པ་དག་ཀྱང་རྒྱལ་པོ་ཟས་གཙང་མའི་བཙུན་མོའི་འཁོར་གྱི་པང་པ་ནས་པང་པ་དག་ཏུ་འགྲེ་ལྡོག་པར་སྣང་བར་གྱུར་པ་དང་། ཀླུའི་བུ་མོ་མཆོད་པ་སྣ་ཚོགས་ཀྱི་ཡོ་བྱད་ཐོགས་པ་དག་ཀྱང་ལུས་ཕྱེད་ཕྱུང་ཞིང་ནམ་མཁའ་ལ་རྒྱུ་བར་སྣང་བ་དང་། ལྷའི་བུ་མོ་ཁྲི་ཡང་རྨ་བྱའི་མདོངས་ལག་ན་ཐོགས་ཤིང་ནམ་མཁའ་ལ༌འཁོད་པར་སྣང་བ་དང་། བུམ་པ་གང་བ་ཁྲི་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ལ་སྐོར་བ་བྱེད་པར་སྣང་བ་དང་། ལྷའི་བུ་མོ་ཁྲི་ཡང་སྤོས་ཆུའི་རིལ་བ༌བྲིང་ག་ར་གླད་ལ་ཐོགས་ཤིང་འཁོད་པར་སྣང་བ་དང་། ལྷའི་བུ་མོ་ཁྲི་ཡང་གདུགས་དང་། རྒྱལ་མཚན་དང་། བ་དན་ཐོགས་ཤིང་འཁོད་པར་སྣང་བ་དང་། ལྷའི་བུ་མོ་བརྒྱ་སྟོང་མང་པོ་དག་ཀྱང་དུང་དང་། རྔ་དང་། རྫ་རྔ་དང་། མཁར་རྔ་མགུལ་ནས་སྤྱངས་ཏེ་སྡོད་ཅིང་འཁོད་པར་སྣང་བ་དང་། རླུང་ཐམས་ཅད་ཀྱང་མི་ལྡང་པར་གནས་པར་གྱུར་པ་དང་། ཆུ་ཀླུང་དང་ཆུ་བྲན་ཐམས་ཅད་ཀྱང་མི་འགུལ་ཞིང་མི་འབབ་པར་གྱུར་པ་དང་། ཉི་ཟླ་དང་། གཞལ་མེད་ཁང་དང་། རྒྱུ་སྐར་དང་། སྐར་མའི་ཚོགས་རྣམས་ཀྱང་མི་རྒྱུ་བར་གྱུར་པ་དང་། སྐར་མ་རྒྱལ་དང་ཡང་ལྡན་པར་གྱུར་པ་དང་། རྒྱལ་པོ་ཟས་གཙང་མའི་ཁྱིམ་ཡང་རིན་པོ་ཆེའི་དྲ་བས་ཡོག་པར་གྱུར་པ་དང་། མེ་ཡང་མི་འབར་བར་གྱུར་པ་དང་། ཁང་པ་བརྩེགས་པ་དང་། ཁང་བཟང་དང་། ཡང་ཐོག་དང་། རྟ་བབས་དག་ལའང་ནོར་བུ་དང་། རིན་པོ་ཆེ་དག་འཕྱང་བར་སྣང་བར་གྱུར་པ་དང་། རས་བཅོས་བུའི་མཛོད་དང་། རིན་པོ་ཆེ་སྣ་ཚོགས་ཀྱི་མཛོད་རྣམས་ཀྱང་སྒོ་བྱེ་བར་སྣང་བ་དང་། བྱ་རོག་དང་། འུག་པ་དང་། བྱ་རྒོད་དང་། སྤྱང་ཀི་དང་། ཝའི་སྒྲ་དག་ཀྱང་མེད་པར་གྱུར་པ་དང་། སྒྲ་སྐད་སྙན་པའི་སྒྲ་དག་ཀྱང་འབྱུང་བར་གྱུར་པ་དང་། སྐྱེ་བོ་ཐམས་ཅད་ཀྱི་ལས་ཀྱི་མཐའ་འང་རྒྱུན་ཆད་པར་གྱུར་པ་དང་། སའི་ཕྱོགས་མཐོན་དམན་དུ་འདུག་པ་རྣམས་ཀྱང་མཉམ་པར༌གནས་པར་གྱུར་པ་དང་། ལམ་གྱི་བཞི་མདོ་དང་། སུམ་མདོ་དང་། སྲང་དང་། ཚོང་འདུས་ཀྱི་འཁོར་ཀྱང་ལག་མཐིལ་ལྟར་གཞི་མཉམ་ཞིང་འཇམ་ལ་མེ་ཏོག་སིལ་མས་གང་སྟེ་མཛེས་པར་སྣང་བ་དང་། སྦྲུམ་པ་ཐམས་ཅད་ཀྱང་བདེ་བ་དང་། ལེགས་པར་བཙའ་བར་གྱུར་པ་དང་། ཤིང་སཱ་ལའི་ནགས་ཚལ་གྱི་ལྷ་ཐམས་ཅད་ཀྱང་ཤིང་གི་ལོ་མའི་ནང་ནས་ལུས་ཕྱེད་ཕྱུང་སྟེ། ཕྱག་འཚལ་ཞིང་གནས་པར་སྣང་བ་སྟེ། སྔ་ལྟས་སུམ་ཅུ་རྩ་གཉིས་པོ་དེ་དག་བྱུང་བར་གྱུར་ཏོ། །

དེ་ནས་ལྷ་མོ་སྒྱུ་འཕྲུལ་བྱང་ཆུབ་སེམས་དཔའ་ཉིད་ཀྱི་གཟི་བརྗིད་དང་མཐུས་བྱང་ཆུབ་སེམས་དཔའ་བཙའ་བའི་དུས་ལ་བབ་པར་ཤེས་ཏེ། ནམ་གྱི་སྲོད་ལ་རྒྱལ་པོ་ཟས་གཙང་མའི་དྲུང་དུ་འོངས་ནས་ཚིགས་སུ་བཅད་དེ་སྨྲས་པ། བདག་གི་བསམ་པ་གང་ལགས་གསོལ་གྱིས་ལྷ་ནི་གསན་དུ་གསོལ། །ཡུན་རིང་རིང་པོ་འདས་ནས་སྐྱེད་མོས་ཚལ་གྱི་བློ་སྐྱེས་ཏེ། །གལ་ཏེ་ཁྱོད་མི་བཀྱོན་ཅིང་ཞེ་སྡང་ཕྲག་དོག་མི་མངའ་ན། །བདག་ནི་རྩེ་ནས་སྐྱེད་མོས་ཚལ་དུ་མྱུར་དུ་མཆི་བར་བགྱི། །ཆོས་དགོངས་བརྩོན་པ་དཀའ་ཐུབ་སྤྱོད་པས་ཁྱོད་ཀྱང་སྐྱོན་མཁྱེན་གྲང་། །བདག་ཀྱང་སེམས་ཅན་དག་པ་བསྲེལ་ནས་ཡུན་ནི་རིང་ལགས་ལ། །སཱ་ལའི་ཤིང་ལྗོན་སྡོང་པོ་མཆོག་ཀྱང་མེ་ཏོག་ཁ་འབུས་ཏེ། །སྐྱེད་མོས་ཚལ་གྱི་དོག་སར་ད་ནི་མཆི་བའི་རིགས་སོ་ལྷ། །སོས་ཀའི་དུས་མཆོག་བུད་མེད་རྣམས་ཀྱི་རྒྱན་དུ་གྱུར་ལགས་ཏེ། །ནགས་རྒྱུ་ཁུ་བྱུག་དང་ནི་རྨ་བྱ་སྒྲ་རབ་སྙན་པ་འབྱིན། །གཙང་ཞིང་མཛེས་ལ་སྣ་ཚོགས་མེ་ཏོག་རྡུལ་གྱི་ངད་ཀྱང་ལྡང་། །ད་ནི་མཆི་ན་མ་ཐོགས་ལེགས་པར་བཀའ་ལུང་སྩལ་དུ་གསོལ། །རྒྱལ་པོའི་དབང་པོས་ལྷ་མོ་ལས་ནི་དེ་སྐད་ཚིག་ཐོས་ནས། །དགའ་ཞིང་རབ་ཏུ་མགུ་བའི་སེམས་ཀྱིས་འཁོར་ལ་སྨྲས་པ་ནི། །བཞོན་པ་བཞོན་ཆེ་མགྱོགས་པའི་ཤུགས་ལྡན་དག་ཀྱང་བསྟད་པར་གྱིས། །ཡོན་ཏན་ཕུན་སུམ་ཚོགས་ལྡན་ལུམ་བི་ནི་ཚལ་བརྒྱན་པར་གྱིས། །རི་སྔོའི་མདོག་ལྡན་སྤྲིན་གྱི་ཁ་དོག་མཐུན་པར་གྱུར་པ་ཡི། །གླང་པོ་སྟོང་ཕྲག་ཉི་ཤུ་སྙེད་ཅིག་མྱུར་དུ་བསྟད་པར་གྱིས། །གླང་པོའི་དབང་པོ་མཆེ་བ་དྲུག་ལྡན་དྲིལ་མཛེས་གློ་ལ་བརྒྱུས། །གསེར་དང་ནོར་བུས་རྣམ་པར་སྤྲས་ཤིང་གསེར་གྱི་དྲ་བས་སྤུད། །རྒྱལ་པོའི་བཅིབས་པ་རླུང་ལྟར་མགྱོགས་པའི་ཤུགས་དང་ལྡན་པ་སྟེ། །དངུལ་དང་ཁ་བའི་མདོག་འདྲ་རྔ་རྔོག་ལྕང་ལོ་བཟང་འཁྲིལ་བའི། །རྟ་མཆོག་སྟོང་ཕྲག་ཉི་ཤུ་བགྲངས་པ་མྱུར་དུ་སྟོད་གྱིས་ཏེ། །གསེར་དྲིལ་གཡེར་ཀའི་དྲ་བ་གློ་ནས༌སྤྱང་བ་གྱིས། །སྐྱེས་བུ་རྟུལ་ཕོད་གཡུལ་ལ་མོས་ཤིང་འཐབ་འདོད་དཔའ་བོ་དག །མདའ་གཞུ་རལ་གྲི་མདུང་ཐུང་ཞགས་པ་མཚོན་ཆ་རྣོ་ཐོགས་པ། །སྟོང་ཕྲག་ཉི་ཤུ་བགྲངས་པ་མྱུར་དུ་ཆོས་ཏེ་བཤམ་གྱིས་ལ། །སྒྱུ་འཕྲུལ་འཁོར་དང་བཅས་པ་བག་ཡོད་པར་ནི་བསྲུང་བར་གྱིས། །ལུམ་བི་ནི་དེར་གསེར་དང་ནོར་བུའི་རྒྱན་ཁྲོམ་བརྒྱན་པར་གྱིས། །གོས་དམར་རྣམ་པ་མང་པོས་ཤིང་རྣམས་ཐམས་ཅད་བརྒྱན་པར་གྱིས། །ལྷ་ཡི་དགའ་ཚལ་བཞིན་དུ་མེ་ཏོག་སྣ་ཚོགས་ཆལ་པར་ཁྲོམ། །དེ་ལྟར་ཐམས་ཅད་བཤམས་ཟིན་མྱུར་དུ་ང་ལ་སྦྲན་པར་གྱིས། །

འཁོར་རྣམས་ཀྱིས་ནི་དེ་སྐད་ཚིག་ཐོས་སྐད་ཅིག་ཏུ། །བཞོན་པ་ཀུན་བཤམས་དེ་བཞིན་ལུམ་བི་ནི་ཡང་བརྒྱན་བྱས་ཏེ། །རྒྱལ་གྱུར་རྒྱལ་གྱུར་སྐུ་ཚེ་རིང་སྐྱོངས་རྒྱལ་པོ་གཤེགས་སུ་གསོལ། །ཇི་སྐད་བཀའ་སྩལ་དེ་བཞིན་ཀུན་བགྱིས་དུས་བབ་ལྷ་གཟིགས་ཤིག །མི་ཡི་བདག་པོ་དམ་པ་དེ་ཡང་དགའ་བའི་སེམས་གྱུར་ནམ། །ཁྱིམ་གྱི་དམ་པར་ཞུགས་ཏེ་བུད་མེད་རྣམས་ལ་འདི་སྐད་སྨྲས། །གང་ཞིག་ང་ལ་སྙིང་ཉེ་ང་ལ་དགའ་བར་འདོད་པ་དག །ང་ཡི་བཀའ་བཞིན་གྱིས་ཏེ་བདག་གི་ལུས་ཀུན་བརྒྱན་པར་གྱིས། །སྤོས་མཆོག་ངད་ཀྱི་དྲི་ཞིམ་ཁ་དོག་སྣ་ཚོགས་བདུག་པའི་གོས། །འཇམ་ཞིང་ཡིད་འོང་དགའ་བའི་སེམས་ཀྱིས་ལེགས་པར་བགོ་བར་གྱིས། །བྲང་ན་འཕྱང་བའི་མུ་ཏིག་སེ་མོ་དོ་ཡིས་བརྒྱན་པར་གྱིས། །རྒྱན་གྱི་ཁྱད་པར་ཐམས་ཅད་དེ་རིང་ཀུན་གྱིས་བསྟན་པར་གྱིས། །མཁར་རྔ་རྒྱུད་གཅིག་གླིང་བུ་པི་ཝང་རྫ་རྔ་དུམ་དུམ་ཕེག །སིལ་སྙན་ཡིད་དུ་འོང་བ་བརྒྱ་སྟོང་དག་ཀྱང་བཤམ་པར་གྱིས། །སྒྲ་སྙན་ཐོས་ནས་ལྷ་རྣམས་རབ་ཏུ་དགའ་བ་སྐྱེ་འགྱུར་ཞིང་། །ལྷ་མོ་རྣམས་ཀྱང་དེ་བཞིན་དགའ་བར་འགྱུར་བ་ཁྱེད་ཀྱིས་གྱིས། །ཤིང་རྟའི་མཆོག་འདིར་ལྷ་མོ་སྒྱུ་འཕྲུལ་གཅིག་པུ་འདུག་པར་གྱིས། །བུད་མེད་སྐྱེས་པ་གཞན་དག་སུ་ཡང་ཤིང་རྟ་དེར་མ་འཁོད། །ན་ཆུང་སྣ་ཚོགས་གོ་ཅན་རྣམས་ཀྱིས་ཤིང་རྟ་དེ་དྲོངས་ཏེ། །གང་དུའང་ཡིད་དུ་མི་འོང་མི་མཐུན་སྒྲ་རྣམས་མི༌གྲག་གིས། །ལྷ་མོ་སྒྱུ་འཕྲུལ་ཁྱིམ་ནས་བྱུང་སྟེ་སྒོ་དྲུང་ཕྱིན་པའི་ཚེ། །རྟ་དང་གླང་པོ་ཤིང་རྟ་རྐང་ཐང་དཔལ་ལྡན་སྣ་ཚོགས་དཔུང་། །རྒྱལ་པོའི་སྒོ་དྲུང་ལྷགས་ཚེ་སྒྲ་ཆེན་མང་པོ་གྲག་པར་གྱུར། །རྒྱ་མཚོ་ཆེན་པོ་འཁྲུགས་པའི་སྒྲ་ལྟར་དེ་དག་ཡོངས་སུ་གྲགས། །དེ་ཚེ་བཀྲ་ཤིས་དོན་དུ་དྲིལ་བུ་བརྒྱ་སྟོང་དཀྲོལ་བར་བྱས། །ཤིང་རྟ་དེ་ཡང་དེ་ལྟར་རྒྱལ་པོས་སྣ་ཚོགས་བརྒྱན་པ་ལ། །

ལྷ་རྣམས་སྟོང་གིས་ལྷ་ཡི་ཁྲི་ཡང་ལེགས་པར་བཤམ་པ་བྱས། །རིན་ཆེན་ཤིང་ལྗོན་མེ་ཏོག་ལོ་མ་ལྡན་བཞིན་ལྡན་པར་བྱས། །རྨ་བྱ་ཁྲུང་ཁྲུང་ངང་པ་ཡིད་དུ་འོང་བའི་སྒྲ་ཡང་འབྱིན། །གདུགས་དང་རྒྱལ་མཚན་བ་དན་ཆེ་ཕྲ་ཀུན་ནས༌འཁོར་བར་བསྒྲེང་། །ལྷ་ཡི་གོས་དང་དྲིལ་བུ་གཡེར་ཀའི་དྲ་བ་མཆོག་གིས་བཀབ། །ལྷ་ཡི་བུ་མོ་ནམ་མཁའ་ལས་ནི་ཤིང་རྟ་དེ་ལ་ལྟ། །ལྷ་ཡི་སྒྲ་དབྱངས་སྙན་པ་སྒྲོག་ཅིང་བསྟོད་པའི་ཚིག་བརྗོད་དེ། །

གང་ཚེ་ལྷ་མོ་སྒྱུ་འཕྲུལ་སེང་གེའི་ཁྲི་ལ་འདུག་གྱུར་པ། །དེ་ཚེ་སྟོང་གསུམ་ས་འདི་རྣམ་པ་དྲུག་ཏུ་རབ་ཏུ་གཡོས། །ལྷ་རྣམས་གོས་ཀྱི་གཡབ་མོ་འབྱིན་ཅིང་མེ་ཏོག་སྣ་ཚོགས་འཐོར། །དེ་རིང་ལུམ་བི་ནི་འདིར་འགྲོ་བའི་དམ་པ་བལྟམས་གྱུར་ཏེ། །འཇིག་རྟེན་སྐྱོང་བ་བཞི་ནི་ཤིང་རྟའི་མཆོག་དེ་འདྲེན་པར་བྱེད། །སུམ་ཅུ་རྩ་གསུམ་བདག་པོ་དབང་པོའང་ལམ་གྱི་བྱི་དོར་བྱེད། །ཚངས་པ་སྐྱེ་བོ་མི་སྲུན་སེལ་ཅིང་སྔོན་དུ་འགྲོ་བར་གྱུར། །ལྷ་རྣམས་བརྒྱ་ཕྲག་སྟོང་ཡང་ཐལ་མོ་སྦྱར་བས་ཕྱག་འཚལ་འདུད། །རྒྱལ་པོ་རབ་ཏུ་དགའ་བའི་སེམས་ཀྱིས་བཀོད་པ་དེ་ལ་ལྟ། །དེ་ནི་འདི་སྙམ་འདི་ནི་ལྷ་ཡི་ལྷ་ཞིག་ཡིན་སྙམ་བྱེད། །གང་ལ་སྐྱོང་བ་བཞི་དང་ཚངས་པ་དབང་པོར་བཅས་པའི་ལྷ། །མཆོད་པ་རྒྱ་ཆེན་བྱེད་པ་འདི་ནི་ངེས་པར་སངས་རྒྱས་འགྱུར། །སྲིད་པ་གསུམ་ན་ལྷ་ཀླུ་བརྒྱ་བྱིན་ཚངས་པ་འཇིག་རྟེན་སྐྱོང་། །གང་ཡང་མཆོད་པ་འདི་འདྲ་བཟོད་པའི་སེམས་ཅན་དེ་མེད་དེ། །ཡང་ན་མགོ་འགས་ཡང་ན་དེ་དག་སྲོག་དང་བྲལ་བར་འགྱུར། །འདི་ནི་ལྷ་ཡི་དམ་པ་ཡིན་པས་མཆོད་པ་ཐམས་ཅད་བཟོད། །དགེ་སློང་དག་དེ་ནས་ལྷ་མོ་སྒྱུ་འཕྲུལ་རྟའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་གིས་ནི་ཀུན་ནས་བསྐོར། གླང་པོ་ཆེའི་ཤིང་རྟ་རྒྱན་ཐམས་ཅད་ཀྱིས་བརྒྱན་པ་བརྒྱད་ཁྲི་བཞི་སྟོང་དང་། རྐང་ཐང་དཔའ་ཞིང་རྟུལ་ཕོད་པ་ཡན་ལག་དམ་པ་དང་ལྡན་པ། གོ་ཆ་ལེགས་པར་བགོས་པ་སྲ་བའི་གོ་གྱོན་པ་བརྒྱད་ཁྲི་བཞི་སྟོང་གིས་ནི་ཡོངས་སུ་བསྲུངས། ཤཱཀྱའི་བུ་མོ་སྟོང་ཕྲག་དྲུག་ཁྲིས་ནི་མདུན་དུ་བདར། རྒྱལ་པོ་ཟས་གཙང་མའི་ཕུ་ནུའི་རིགས་སུ་སྐྱེས་པའི་ཤཱཀྱ་རྒན་པ་དང་། གཞོན་པ་དང་། བར་མ་བཞི་ཁྲིས་ནི་ཡོངས་སུ་བསྲུངས། རྒྱལ་པོ་ཟས་གཙང་མའི་སླས་གླུ་དང་རོལ་མོའི་དབྱངས་སྒྲ་ནི་བྱེད། ཁར་བའི་སིལ་ཁྲོལ་དང་། ཕེག་རྡོབ་སིལ་སྙན་དང་། གླུ་དབྱངས་ལེན་པ་དྲུག་ཁྲིས་ནི་ཀུན་ནས་བསྐོར། ལྷའི་བུ་མོ་བརྒྱད་ཁྲི་བཞི་སྟོང་དང་། ཀླུའི་བུ་མོ་བརྒྱད་ཁྲི་བཞི་སྟོང་དང་། དྲི་ཟའི་བུ་མོ་བརྒྱད་ཁྲི་བཞི་སྟོང་དང་། མིའམ་ཅིའི་བུ་མོ་བརྒྱད་ཁྲི་བཞི་སྟོང་དང་། ལྷ་མ་ཡིན་གྱི་བུ་མོ་བརྒྱད་ཁྲི་བཞི་སྟོང་བཀོད་པའི་རྒྱན་སྣ་ཚོགས་ཀྱིས་བརྒྱན་པ་ཤ་སྟག་གླུ་དང་རོལ་མོའི་དབྱངས་སྒྲ་སྣ་ཚོགས་ཀྱིས་བསྔགས་པ་བརྗོད་པ། རྗེས་སུ་འབྲང་བས་འགྲོའོ། །ལུམ་བི་ནིའི་ནགས་ཚལ་དེ་ཐམས་ཅད་ཀྱང་སྤོས་ཆུའི་ཆག་ཆག་གིས་བཏབ་ཅིང་ལྷའི་མེ་ཏོག་གིས་གཏོར་བར་གྱུར་ཏོ། །

ནགས་ཚལ་དམ་པ་དེའི་ནང་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་དུས་ལ་མ་བབ་པར་ལོ་མ་དང་མེ་ཏོག་དང་འབྲས་བུ་སྐྱེད་པར་གྱུར་ཏོ། །ནགས་ཚལ་དེ་ནི་ལྷ་རྣམས་ཀྱིས་ཀྱང་ལེགས་པར་བརྒྱན་པར་གྱུར་ཏེ། འདི་ལྟ་སྟེ་དཔེར་ན། འདྲེས་པའི་ཚལ་ལྷ་རྣམས་ཀྱིས་ལེགས་པར་བརྒྱན་པ་བཞིན་ནོ། །དེ་ནས་ལྷ་མོ་སྒྱུ་འཕྲུལ་ལུམ་བི་ནིའི་ནགས་ཚལ་དུ་ཕྱིན་ནས་ཤིང་རྟ་དམ་པ་དེ་ལས་བབས་ཏེ། མི་དང་ལྷའི་བུ་མོ་དག་གིས་ཡོངས་སུ་བསྐོར་ཅིང་། ཤིང་དྲུང་ནས་ནི་ཤིང་དྲུང་དག་ཏུ་འགྲོ། ནགས་ཚལ་ནས་ནི་ནགས་ཚལ་དག་ཏུ་འཆག །ལྗོན་པ་ནས་ནི་ལྗོན་པ་དག་ལ་ལྟ་ཞིང་དེ་རིམ་གྱིས་ཤིང་རིན་པོ་ཆེ་ཆེན་པོ་མཆོག་དང་ཕུལ་དུ་བྱ་བ། ཡལ་ག་ཤིན་ཏུ་རྣམ་པར་འབྱེས་པ། ལོ་མ་དང་དོག་པ་བཟང་པོ་དང་ལྡན་པ། མི་དང་ལྷའི་མེ་ཏོག་སྣ་ཚོགས་རབ་ཏུ་རྒྱས་པ། སྤོས་མཆོག་དང་ཕུལ་དུ་བྱ་བའི་དྲིའི་ངད་དང་ལྡན་པའི་གོས་ཁ་དོག་སྣ་ཚོགས་སྤྱངས་པ། ནོར་བུ་དང་རིན་པོ་ཆེ་སྣ་ཚོགས་ལྟ་བུའི་འོད་རྣམ་པ་ཐ་དད་པ་འབར་བ། རྩ་བ་དང་། སྡོང་པོ་དང་། ཡལ་ག་དང་། ལོ་མ་རྣམས་རིན་པོ་ཆེ་ཐམས་ཅད་ཀྱིས་ལེགས་པར་བརྒྱན་པ། ཡལ་ག་རིང་ཞིང་ཤིན་ཏུ་རྣམ་པར་འབྱེས་པ། བླག་ཤ་ཞེས་བྱ་བ་སའི་ཕྱོགས་ལག་མཐིལ་ལྟར་མཉམ་ཞིང་ཤིན་ཏུ་བཟང་ལ་ཡངས་པ། རྩྭ་སྔོན་པོ་རྨ་བྱའི་མགྲིན་པ་ལྟ་བུ་སྐྱེས་པ། ཀ་ཙ༌ལིན་དིའི་གོས་ལྟར་རེག་ན་བདེ་བའི་ས་ལ་འདུག་པ། སྔོན་གྱི་རྒྱལ་བའི་ཡུམ་གྱིས་བརྟེན་པ། ལྷའི་གླུ་དབྱངས་བླངས་པ། གནས་གཙང་མའི་ལྷ་བཟང་ཞིང་དྲི་མ་མེད་ལ་རྣམ་པར་དག་པ་རབ་ཏུ་ཞི་བའི་སེམས་དང་ལྡན་པ་རྣམས་ཀྱིས་ཐོར་ཚུགས་དང་ཅོད་པན་མངོན་པར་བཏུད་པའི་སྤྱི་བོས་མངོན་པར་ཕྱག་བྱ་བའི་ཤིང་ལྗོན་པ་བླག་ཤ་དེའི་དྲུང་དུ་ཕྱིན་ཏོ། །

དེ་ནས་བྱང་ཆུབ་སེམས་དཔའི་གཟི་བརྗིད་དང་མཐུས་ཤིང་བླག་ཤ་དེས་མངོན་པར་བཏུད་དེ་ཕྱག་བྱས་སོ། །དེ་ནས་ལྷ་མོ་སྒྱུ་འཕྲུལ་ནམ་མཁའི་དཀྱིལ་དུ་སྣང་བའི་གློག་གི་ཕྲེང་བ་ལྟ་བུའི་ལག་པ་གཡས་པ་བརྐྱང་ནས། བླག་ཤའི་ཡལ་ག་ལས་བཟུང་སྟེ། ཚུལ་དུ་ཤིས་པར་ནམ་མཁའི་དཀྱིལ་དུ་བལྟས་ནས་བྱ་སྨྱངས་བྱེད་ཅིང་འདུག་པར་གྱུར་ཏོ། །དེ་ནས་དེའི་ཚེ་འདོད་པ་ན་སྤྱོད་པའི་ལྷའི་ནང་ནས་ལྷའི་བུ་མོ་དྲུག་ཁྲི་ལྷགས་ཏེ། ལྷ་མོ་སྒྱུ་འཕྲུལ་ལ་རིམ་གྲོ་དང་བཀུར་སྟི་བྱེད་པར་གྱུར་ཏོ། །བྱང་ཆུབ་སེམས་དཔའ་མའི་རུམ་ན་འདུག་པའི་ཚེ། རྣམ་པ་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་གནས་སོ། །

དེ་ཟླ་བ་བཅུ་ཚང་ནས་མའི་གློ་གཡས་པ་ནས་དྲན་ཞིང་ཤེས་བཞིན་དུ་མངལ་གྱི་དྲི་མས་མ་གོས་པར་བྱུང་སྟེ། གཞན་ལྟར་མ་ཡིན་ཞིང་གཞན་དག་ལ་མངལ་གྱི་དྲི་མ་ཞེས་བྱ་བ་བརྗོད་པ་དེ་ལྟ་བུ་མེད་པར་གྱུར་ཏོ། །དགེ་སློང་དག་དེའི་ཚེ་ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་གཉིས་མདུན་ན་འཁོད་དེ། དེ་གཉིས་ཀྱིས་རིམ་གྲོ་དམ་པ་ཆེན་པོས་ལྷའི་གོས་ཀ་ཤི་པའི་སླེབ་མོས་ལུས་དང་ཡན་ལག་ཐམས་ཅད་ཀྱིས་དྲན་ཞིང་ཤེས་བཞིན་དུ་བྱང་ཆུབ་སེམས་དཔའ་བླངས་སོ། །བྱང་ཆུབ་སེམས་དཔའ་ཁང་པ་བརྩེགས་པ་གང་གི་ནང་ན་འདུག་ཅིང་མའི་རུམ་ན་གནས་གནས་པ་དེ་ཡང་མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷ་རྣམས་ཀྱིས་ཚངས་པའི་འཇིག་རྟེན་དུ༌གྱེན་དུ་བཏེག་སྟེ། མཆོད་རྟེན་དུ་བྱ་བ་དང་། མཆོད་པ་བྱ་བའི་ཕྱིར་ཁྱེར་རོ། །དེ་ལྟར་བྱང་ཆུབ་སེམས་དཔའ་དེ་ནི་མིར་གྱུར་པ་གང་གིས་ཀྱང་མ་བླངས་ཀྱི། བྱང་ཆུབ་སེམས་དཔའ་དེ་ནི་ལྷ་རྣམས་ཀྱིས་བླངས་སོ། །

དེ་ནས་བྱང་ཆུབ་སེམས་དཔའ་བཙས་མ་ཐག་ཏུ་ས་ལ་འབབ་སྟེ། བྱང་ཆུབ་སེམས་དཔའ་དེ་ས་ལ་བབས་པར་གྱུར་མ་ཐག་ཏུ་པད་མ་ཆེན་པོ་ཞིག་གིས་ས་འདི་ཡང་བརྟོལ་ཏེ་བྱུང་ངོ་། །ཀླུའི་རྒྱལ་པོ་ཆེན་པོ་དགའ་བོ་དང་། ཉེ་དགའ་བོ་གཉིས་ཀྱང་ནམ་མཁའི་དཀྱིལ་ན་ལུས་ཕྱེད་ཕྱུང་སྟེ་འཁོད་ནས་བསིལ་བ་དང་། དྲོ་བའི་ཆུའི་རྒྱུན་གཉིས་མངོན་པར་སྤྲུལ་ནས་བྱང་ཆུབ་སེམས་དཔའི་ལུས་བཀྲུས་སོ། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ལ་སོགས་པ་གཞན་ཡང་ལྷའི་བུ་བརྒྱ་སྟོང་མང་པོ་དག་བྱང་ཆུབ་སེམས་དཔའ་བཙས་མ་ཐག་ཏུ་སྤོས་ཆུ་སྣ་ཚོགས་དང་། མེ་ཏོག་སིལ་མས་ལུས་འཁྲུ་ཞིང་མངོན་པར་འཐོར་རོ། །བར་སྣང་ལས་ཀྱང་རྡུལ་ཡབ་ཀྱི་རྔ་མ་གཉིས་དང་། རིན་པོ་ཆེའི་གདུགས་བྱུང་བར་གྱུར་ཏོ། །དེ་པད་མ་ཆེན་པོ་དེ་ལ་འདུག་ནས་ཕྱོགས་བཞིར་རྣམ་པར་ལྟ་སྟེ། སེང་གེའི་ལྟ་སྟངས་དང་། སྐྱེས་བུ་ཆེན་པོའི་ལྟ་སྟངས་ཀྱིས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྔོན་གྱི་དགེ་བའི་རྩ་བའི་རྣམ་པར་སྨིན་པ་ལས་བྱུང་བ་ལྷའི་མིག་ཐོགས་པ་མེད་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་གྲོང་ཁྱེར་དང་། གྲོང་རྡལ་དང་ཡུལ་འཁོར་དང་། ཕོ་བྲང་འཁོར་དང་། ལྗོངས་སུ་བཅས། ཡུལ་དུ་བཅས། མི་དང་ལྷར་བཅས་པ་རྣམས་མཐོང་བར་གྱུར་ཏོ། །

སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའང་རབ་ཏུ་ཤེས་ཏེ། ཤེས་ནས་ཀྱང་སེམས་ཅན་གང་ཚུལ་ཁྲིམས་སམ། ཏིང་ངེ་འཛིན་ཏམ། ཤེས་རབ་བམ། དགེ་བའི་སྤྱོད་པས་བདག་དང་འདྲ་བ་དེ་ལྟ་བུ་གང་ལ་ལ་ཞིག་ཡོད་དམ་ཞེས་རྣམ་པར་ལྟའོ། །དེའི་ཚེ་བྱང་ཆུབ་སེམས་དཔས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བདག་དང་མཚུངས་པའི་སེམས་ཅན་གང་ཡང་མ་མཐོང་ནས། དེའི་ཚེ་བྱང་ཆུབ་སེམས་དཔའ་སེང་གེ་ལྟར་འཇིགས་པ་མེད་ཅིང་བག་ཚ་བ་མེད་དེ། ཞུམ་པ་དང་བག་འཆུམས་པ་མེད་པས་ལེགས་པར་བསམ་པ་དྲན་པར་བྱས་ཏེ། བསམས་བརྟགས་ནས་སེམས་ཅན་ཐམས་ཅད་ཀྱི༌སེམས་ཀྱི་སྤྱོད་པ་ཤེས་པར་བྱ་སྟེ། སུས་ཀྱང་བསྟན་པ་མེད་པར་བྱང་ཆུབ་སེམས་དཔའ་དགེ་བའི་རྩ་བའི་ཆོས་ཐམས་ཅད་ཀྱི་སྔོན་དུ་འགྲོ་བར་བྱའོ་ཞེས་ཤར་ཕྱོགས་ལོགས་སུ་གོམ་པ་བདུན་བོར་རོ། །དེ་ལྟར་བྱང་ཆུབ་སེམས་དཔའ་གང་དང་གང་དུ་གོམ་པ་བོར་བ་དེ་དང་དེ་དག་ཏུ་པད་མ་དག་ཀྱང་སྐྱེས་པར་གྱུར་ཏོ། །

ལྷ་དང་མི་རྣམས་ཀྱི་སྦྱིན་པའི་གནས་སུ་འགྱུར་བར་བྱའོ་ཞེས་ལྷོ་ཕྱོགས་ལོགས་སུ་གོམ་པ་བདུན་བོར་རོ། །ནུབ་ཕྱོགས་ལོགས་སུ་གོམ་པ་བདུན་བོར་ནས་གོམ་པ་བདུན་པ་ལ་གནས་ཏེ་ང་ནི་འཇིག་རྟེན་ན་ཕུལ་དུ་ཕྱིན་པའོ། །འདི་ནི་ངའི་སྐྱེ་བ་ཐ་མ་སྟེ། སྐྱེ་བ་དང་། རྒ་བ་དང་། ན་བ་དང་། འཆི་བ་མཐར་དབྱུང་ངོ་ཞེས་སེང་གེ་ལྟར་ཚིམ་པར་གྱུར་པའི་སྒྲ་བསྒྲགས་སོ། །སེམས་ཅན་ཐམས་ཅད་ཀྱི་ནང་ན་བླ་ན་མེད་པར་བྱའོ་ཞེས་བྱང་ཕྱོགས་ལོགས་སུ་གོམ་པ་བདུན་བོར་རོ། །བདུད་དང་བདུད་ཀྱི་སྡེ་ནི་གཞོམ་པར་བྱའོ། །

སེམས་ཅན་དམྱལ་བ་པ་ཐམས་ཅད་ཀྱི་སེམས་ཅན་དམྱལ་བའི་མེ་གསད་པའི་ཕྱིར་ཆོས་ཀྱི་ཆར་སྤྲིན་ཆེན་པོའི་ཆར་ཕབ་སྟེ། དེ་དག་བདེ་བས་ཚིམ་པར་བྱའོ་ཞེས་འོག་གི་ཕྱོགས་ལོགས་སུ་གོམ་པ་བདུན་བོར་རོ། །སེམས་ཅན་ཐམས་ཅད་ཀྱི་གྱེན་དུ་བལྟ་བར་འགྱུར་བར་བྱའོ་ཞེས་སྟེང་གི་ཕྱོགས་ལོགས་སུ་གོམ་པ་བདུན་བོར་ནས་སྟེང་དུ་ལྟའོ། །བྱང་ཆུབ་སེམས་དཔས་ཚིག་དེ་བརྗོད་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྒྲས་མངོན་པར་གོ་བར་གྱུར་ཏེ། དེ་ནི་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པ་ལས་བྱུང་བའི་མངོན་པར་ཤེས་པའི་ཆོས་ཉིད་དོ། །གང་གི་ཚེ་བྱང་ཆུབ་སེམས་དཔའ་སྲིད་པ་ཐ་མ་པ་བཙའ་བར་འགྱུར་བ་དང་། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། རྫུ་འཕྲུལ་གྱི་ཆོ་འཕྲུལ་གྱི་རྣམ་པ་དེ་ལྟ་བུ་དེ་དག་བྱུང་ངོ་། །དགེ་སློང་དག་དེའི་ཚེ་སེམས་ཅན་ཐམས་ཅད་ཀྱང་རབ་ཏུ་དགའ་ཞིང་སྤུ་གཡོས་པར་གྱུར་ཏོ།། །།

ཡུམ་སྒྱུ་འཕྲུལ་ཆེན་མོ་སྟོན་པའི་མ་ཡུམ་དུ་གྱུར་དགོས་པའི་སྐྱེ་བ་སྔོན་གྱི་ལོ་རྒྱུས་ངོ་མཚར་ཅན། དྲིན་ལན་བསབ་མདོ་ལས་བཏུས།

དེ་ནས་དྲི་ཟའི་བུ་ཆོས་ཀྱི་ཕྲེང་བ་འདུག་པ་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་སངས་རྒྱས་གང་ན་བར་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡུམ་ལྷ་མཛེས་འདི་བསོད་ནམས་ཅི་བགྱིས་ན་ཅིའི་རྒྱུ་ཅིའི་རྐྱེན་གྱིས་དེ་བཞིན་གཤེགས་པ་བལྟམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང་ཁྱོད་ལ་བཤད་པར་བྱའོ། །

སྔོན་འདས་པ་གྲངས་མེད་པ་བསམ་གྱིས་མི་ཁྱབ་པའི་ཕ་རོལ་ན་སངས་རྒྱས་རྣམ་པར་གཟིགས་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེ་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་ཞེས་བྱ་བ་འཇིག་རྟེན་དུ་བྱུང་ངོ་། །སངས་རྒྱས་དེའི་དམ་པའི་ཆོས་ནུབ་ནས་གཟུགས་བརྙན་ལ་ཆོས་སྤྱོད་པའི་བར་དུ་ནུབ་པར་གྱུར་ནས། དེའི་ཚེ་ཡུལ་བཱ་རཱ་ཎ་སཱི་ཞེས་བྱ་བ་ན་འཕགས་པ་གནས་ཞེས་བྱ་བའི་རི་ཞིག་ཡོད་དེ། རི་དེ་ལ་རང་སངས་རྒྱས་ཞེས་བྱ་བ་བརྒྱ་སྟོང་སྙེད་གནས་སོ། །རི་དེ་ལ་དྲང་སྲོང་མངོན་བར་ཤེས་པ་ལྔ་དང་ལྡན་པ་གྲངས་མེད་པ་ཞིག་ཀྱང་རི་དེ་ལ་གནས་སོ། །ངས་དེ་ལྟར་འཕགས་པ་དང་དྲང་སྲོང་མང་པོ་གནས་པའི་ཕྱིར། རི་དེ་ཡང་འཕགས་པ་གནས་ཞེས་བཏགས་སོ། །རི་དེ་ལ་དྲང་སྲོང་གཅིག་ནི་རི་དེའི་ལྷོ་ཕྱོགས་ན་གནས་སོ། །དྲང་སྲོང་གཅིག་ནི་རི་དེའི་བྱང་ཕྱོགས་ན་གནས་ཏེ། དྲང་སྲོང་དེ་གཉིས་གནས་པའི་བར་ན་ཆུ་མིག་གཅིག་ཡོད་དེ་ཆུ་མིག་དེའི་དྲུང་ན་ཕ་བོང་ཕྱ་ལེབ་བཟང་པོ་གཅིག་ཡོད་དོ། །དེའི་ཚེ་དེའི་དུས་གཅིག་ན་རིའི་ལྷོ་ཕྱོགས་ལོགས་ན་གནས་པའི་དྲང་སྲོང་དེ་ཕ་བོང་དེའི་སྟེང་དུ་གོས་དང་རྐང་པ་བཀྲུས་ཏེ་ཕྱིར་གནས་སུ་སོང་བ་དང་། རིང་པོ་མ་ལོན་པར་ཤྭ་བ་ཡུ་མོ་གཅིག་ཆུ་མིག་ལ་ཆུ་འཐུང་དུ་འོངས་པ་དང་ཆུ་མིག་ལ་ཆུ་འཐུངས་པའི་འོག་ཏུ་ཕ་བོང་དེའི་སྟེང་ན་དྲང་སྲོང་གིས་གོས་བཀྲུས་པའི་ཁུ་བ་འཐུངས་སོ། །གོས་བཀྲུས་པའི་ཁུ་བ་འཐུངས་པའི་འོག་ཏུ་ཕྱིར་འཕོངས་རོལ་དུ་བལྟས་ཏེ་མོ་མཚན་ལ་བལྡགས་སོ། །དེ་ནས་ཤྭ་བ་ཡུ་མོ་དེའི་ལྟོར་བུ་ཆགས་ཏེ་ཟླ་བ་ཚང་བ་དང་། རི་དྭགས་ཀྱི་ཆོས་ཀྱིས་བུ་འབྱུང་བ་ན་ཐོག་མ་གནས་གང་དུ་མངལ་དུ་ཆགས་པ་དེར་བུ་འབྱིན་པས་ཆུ་མིག་གི་དངོར་འོངས་ཏེ་ཕ་བོང་དེའི་སྟེང་ངུ་ཞིང་འགྲེ་ནས་བུ་མོ་གཅིག་བྱུང་ངོ་། །

དེའི་ཚེ་ན་ལྷོ་ཕྱོགས་ལོགས་ཀྱི་དྲང་སྲོང་དེས་ཤྭ་བ་ངུ་བའི་སྐད་ཐོས་ནས་སྙིང་རྗེ་བའི་སེམས་སྐྱེ་སྟེ་ཤྭ་བའི་དྲུང་དུ་ལྟར་སོང་བ་དང་། ཤ་ཡུ་མོ་དེ་ལ་བུ་མོ་གཅིག་བྱུང་སྟེ་ཤྭ་བ་དེ་ལ་ལྡག་ཅིང་འདུག་པ་ལས་དྲང་སྲོང་དེར་འོངས་པ་དང་ཤྭ་བ་ཡང་བུ་བོར་ནས་སོང་ངོ་། །དེ་ནས་དྲང་སྲོང་དེ་ཤྭ་བ་ལ་བཙས་པའི་བུ་མོ་དེ་མཛེས་ཤིང་སྡུག་ལ། མཚན་དང་ལྡན་པར་མཐོང་བས་སྙིང་རྗེའི་སེམས་ཀྱིས་རྩྭའི་གོས་ཀྱིས་དཀྲིས་ཏེ་པང་དུ་བླངས་ནས་ཕྱིར་གནས་སུ་འོངས་ནས་ཤིང་ཏོག་དང་། འབྲས་བུ་བརྡས་ནས་གསོས་གསོས་པ་དང་། མཐར་གྱིས་ཆེར་སྐྱེས་ནས་ལོ་བཅུ་བཞི་ལོན་པ་དང་། དྲང་སྲོང་ཡང་བུ་མོ་དེ་ལ་ཤིན་ཏུ་བྱམས་ཏེ་རྟག་ཏུ་རྒྱུན་མི་འཆད་པར་མེ་གསོར་བཅུག་པ་ལས་ཉི་མ་གཅིག་ལེ་ལོ་བྱས་ནས་མེ་ཤི་བར་གྱུར་པ་དང་། དྲང་སྲོང་གིས་ཚིག་གིས་སྤྱོས་ཏེ་བུ་མོ་ཐོག་མ་བསྐྱེད་ནས་ད་ཙམ་གྱི་བར་དུ་མེ་ཤི་མ་མྱོང་ན་ཅིའི་ཕྱིར་མེ་བསད་ཅེས་གཤེས་ཏེ། རིའི་བྱང་ཕྱོགས་ལོགས་ན་གནས་པའི་དྲང་སྲོང་གི་ཐད་དུ་མེ་ལེན་དུ་བཏང་ངོ་། །དེ་ནས་བུ་མོ་དེས་ཕས་བསྒོ་བ་བཞིན་དུ་རིའི་བྱང་ཕྱོགས་ལོགས་སུ་སོང་བ་ལས་གོམ་པ་རེ་རེ་ཞིང་རྐང་པའི་འོག་ནས་པད་མོ་རེ་རེ་སྐྱེས་ཏེ། འགྲོ་བའི་རྗེས་བཞིན་ཁོད་མཉམ་པར་དངར་བ་དང་པད་མོ་སྐྱེས་ནས་རིའི་བྱང་ཕྱོགས་ལོགས་སུ་མེ་ལེན་དུ་སོང་ངོ་། །

དེའི་ཚེ་ན་དྲང་སྲོང་དེས་བུ་མོ་དེ་ཤིན་ཏུ་བསོད་ནམས་དང་ལྡན་ཞིང་རྐང་པའི་འོག་ནས་པད་མོ་སྐྱེས་པ་མཐོང་ནས་བུ་མོ་དེ་ལ་འདི་སྐད་ཅེས་སྨྲས་སོ། །ཁྱོད་མེ་འདོད་ན་ཁོ་བོའི་སྤྱིལ་པོ་འདི་ལན་བདུན་སྐོར་ལ་གོམ་པའི་བར་མཉམ་པ་དང་། ཉེ་རིང་ཐག་རན་པར་གོམ་པའི་འོག་ནས་པད་མོ་སྐྱེས་པར་བྱོས་ཤིག །དེ་ལྟར་ལན་བདུན་བསྐོར་བ་བྱས་ནས་ཀྱང་བུ་མོ་ལ་ཁྱོད་མེ་འདོད་ན་ཕྱིར་ཡང་གཡས་ཕྱོགས་ནས་བསྐོར་ཏེ་སོངས་ཤིག་དང་མེ་སྦྱིན་ནོ་བར་བསྒོའོ། །དེའི་ཚེ་ན་བུ་མོ་མེ་འདོད་པའི་ཕྱིར་དྲང་སྲོང་གིས་བསྒོ་བ་བཞིན་བྱས་མེ་བླངས་ནས་ཕྱིར་སོང་ངོ་། །བུ་མོ་དེ་ཕྱིར་སོང་ནས་རིང་པོ་མ་ལོན་པར་ཡུལ་བཱ་རཱ་ཎ་སཱིའི་རྒྱལ་པོ་དང་བློན་པོ་ཆེན་པོ་དང་། འཁོར་བརྒྱ་སྟོང་སྙེད་དང་བཅས་སུ་རི་དེ་ལ་འཆག་ཅིང་རི་དྭགས་ལ་ལིངས་འདེབས་སུ་འོངས་པ་དང་། དེ་ནས་བཱ་རཱ་ཎ་སཱིའི་རྒྱལ་པོ་བལ་གྱི་གླང་པོ་ཆེ་ལ་ཞོན་ནས་རི་བྱང་ཕྱོགས་ལོགས་ཀྱི་དྲང་སྲོང་ག་ལ་བ་དེར་འོངས་ནས་དེར་ཕྱིན་པ་དང་། དྲང་སྲོང་དེའི་སྤྱིལ་པོ་ལ་པད་མོས་འཁོར་བར་བསྐོར་བ་དེ་མཐོང་ནས་རབ་ཏུ་དགའ་རངས་པའི་སེམས་སྐྱེས་ཏེ། དྲང་སྲོང་ཆེན་པོ་ལ་ཤིན་ཏུ་ལེགས་སོ་ལེགས་སོ། །ཡོན་ཏན་ཆེན་པོ་དང་ལྡན་པའི་དྲང་སྲོང་སྟོན་ཅིང་འདྲེན་པའི་ཡོན་ཏན་དང་ལྡན་པ་དགེའོ་ཞེས་བསྟོད་དོ། །

དེ་ནས་དྲང་སྲོང་དེས་རྒྱལ་པོ་ལ་འདི་སྐད་གསོལ་ཏོ། །རྒྱལ་པོ་ཆེན་པོ་མཁྱེན་ཏམ། པད་མོ་འདི་དག་ནི་བདག་གི་ནུས་པ་མ་ལེགས་སོ། །རྒྱལ་པོས་སྨྲས་པ། འོ་ན་འདི་སུས་བྱས། དྲང་སྲོང་གིས་གསོལ་བ། རྒྱལ་པོ་ཆེན་པོ་རི་ལྷོ་ཕྱོགས་ལོགས་ན་གནས་པའི་དྲང་སྲོང་ལ་རི་དྭགས་ཀྱིས་བཙས་པའི་བུ་མོ་བྱད་བཞིན་བཟང་ཞིང་སྡུག་པ། མིའི་མཚན་དང་ལྡན་པ། འཇིག་རྟེན་ན་དཀོན་པ་འགྲོ་བའི་རྗེས་བཞིན་རྐང་པའི་འོག་ནས་པད་མོ་སྐྱེ་བ་ཞིག་ཡོད་དོ། །རྒྱལ་པོ་དེ་སྐད་སྨྲས་པ་ཐོས་ནས་སེམས་རབ་ཏུ་དགའ་རངས་ཏེ། རིའི་ལྷོ་ཕྱོགས་ལོགས་ཀྱི་དྲང་སྲོང་ག་ལ་བ་ལོགས་སུ་སོང་སྟེ་ཕྱིན་པ་དང་། དྲང་སྲོང་དེའི་རྐང་པ་ལ་མགོ་བོས་ཕྱག་འཚལ་ནས་དྲང་སྲོང་དེས་སྒོར་བྱུང་ནས་བསུས་ཏེ་རྒྱལ་པོ་ཆེན་པོ་ཤུལ་རིང་པོ་ནས་གཤེགས་ན་རབ་ཏུ་ངལ་བར་མ་གྱུར་ཏམ་ཞེས་བྲོ་དྲིས་སོ། །

དེ་ནས་རྒྱལ་པོ་ཆེན་པོས་དྲང་སྲོང་དེ་ལ་འདི་སྐད་ཅེས་སྨྲས་སོ། །བཙུན་པ་ཁྱོད་ལ་བུ་མོ་ཞིག་ཡོད་པ་དེ་གཉེན་བྱ་བར་འདོད་དོ། །དྲང་སྲོང་གིས་སྨྲས་པ། རྒྱལ་པོ་ཆེན་པོ་བདག་ཕོངས་པ་ལ་བུ་མོ་གཅིག་པུ་ཞིག་ཡོད་པ་དེ་ཆུང་ལ་ཅི་ཡང་མི་ཤེས་ཏེ། ཆུང་ནས་རི་ལ་བསྐྱེད་བསྐྱེད་པས་མིའི་ཆོས་ཚུལ་ཅི་ཡང་མ་རྟོགས་ཏེ། རྩྭའི་རྩ་བ་དང་འབྲས་བུ་གཞན་མི་ཟ་ན། ཇི་ལྟར་རྒྱལ་པོ་ལ་འབུལ་དུ་རུང་བུ་མོ་འདི་ཡང་རི་དྭགས་ཀྱིས་བཙས་ཏེ་འབུལ་དུ་མི་རུང་ངོ་ཞེས་ཇི་ལྟར་གྱུར་པ་རྒྱུས་ཀྱིས་ཞིབ་ཏུ་གསོལ་བའི་བར་དུའོ། །རྒྱལ་པོས་སྨྲས་པ། དེ་ལྟ་བུ་ཡིན་ཡང་སླའི་ད་ལྟར་གང་ན་འདུག་སྟོན་ཅིག །དྲང་སྲོང་གིས་སྨྲས་པ། ད་ལྟར་སྤྱིལ་པོའི་ནང་ན་འདུག་གོ་ཞེས་སྨྲས་སོ། །དེའི་ཚེ་རྒྱལ་པོ་ཆེན་པོ་སྤྱིལ་པོའི་ནང་དུ་ཞུགས་ནས་བུ་མོ་ལ་བལྟས་ཏེ་རབ་ཏུ་དགའ་བའི་སེམས་སྐྱེས་ཏེ་རི་དྭགས་ཀྱི་བུ་མོ་སྤོས་ཆུས་བཀྲུས་ནས། རིན་ཐང་མེད་པའི་གོས་བསྐོན་ཏེ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ནས། བལ་གྱི་གླང་པོ་ཆེའི་སྟེང་དུ་བཞག་ནས། འཁོར་བརྒྱ་སྟོང་སྙེད་ཀྱིས་བསྐོར་ཏེ། རོལ་མོ་བྱེད་ཅིང་ཕྱིར་ཡུལ་དུ་འོངས་སོ། །

དེའི་ཚེ་རི་དྭགས་ཀྱི་བུ་མོ་དེ་ཐོག་མ་བཙས་ནས། དེ་ལྟ་བུའི་མི་མང་པོ་མ་མཐོང་བས་དངངས་ཤིང་སྐྲག་གོ །དེའི་ཚེ་དྲང་སྲོང་དེ་རི་མཐོན་པོའི་ཁར་སོང་ནས་བུ་མོ་དེ་ལ་མིག་མི་འཛུམ་པར་ལྟ་ཞིང་འདི་སྙམ་དུ། ད་ནི་བདག་གི་བུ་མོ་ཡང་ཇེ་རིང་ཇེ་རིང་སོང་བས་མ་མཐོང་བར་གྱུར་ནས་ཕྱིར་གནས་སུ་འགྲོའོ་སྙམ་བསམས་ནས་མིག་མཆི་མ་ཟག་ཅིང་མཆིས་ཏེ། བདག་གིས་བུ་མོ་གསོས་པ་འདི་ཅི་ཡང་ཤེས་པ་མེད་པར་བྲལ་བར་གྱུར་ཏོ། །ཡང་འདི་སྙམ་དུ་བསམས་ཏེ། བདག་ད་དུང་གནས་འདི་ལས་མི་གཡོ་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་བདག་གི་བུ་མོ་ཕྱིར་བདག་ལ་ལྟ་བར་གྱུར་ལ། ཅི་སྟེ་མ་མཐོང་བར་གྱུར་ན་མི་དགའ་ཞིང་སྡུག་བསྔལ་གྱིས་གདུངས་པར་འགྱུར་གྱིས། རེ་ཞིག་འདི་ཁོ་ནར་བསྡད་དོ་སྙམ་ནས།

དེ་ནས་ཀྱང་རིང་ཞིག་བསྡད་དེ་མ་མཐོང་གི་བར་དུ་བལྟས་ཀྱང་བུ་མོས་ཕྱིར་མ་བལྟས་སོ། །དེ་ལྟར་བུ་མོས་ཕྱིར་མ་བལྟས་པས་དྲང་སྲོང་དེ་ཁྲོ་བའི་སེམས་སྐྱེས་ནས་འདི་སྐད་ཅེས་སྨྲས་སོ། །ཡང་བྱོལ་སོང་ལས་སྐྱེས་པས་ང་ལ་ཡང་ཕྱིར་མ་བལྟས་ཏེ། ངས་ཆུང་ངུ་ནས་གསོས་གསོས་ནས་ད་མིར་གྱུར་ཏེ་རྒྱལ་པོས་ཕྲོགས་པས་བདག་ཡེའུར་གྱུར་ཏོ་ཞེས་སྤྱིལ་པོར་ཞུགས་ནས་རིག་སྔགས་བྱས་ཏེ། གལ་ཏེ་རྒྱལ་པོས་བོར་བར་གྱུར་ན་ནི་དེར་ཡང་ཟད་དོ། །ཅི་སྟེ་གཅེས་སུ་བྱས་ལ་བོར་བར་མ་གྱུར་ན་བསམས་པ་ལྟར་མ་གྲུབ་ཅིག་ཅེས་སྔགས་ཀྱིས་བཏབ་བོ། །

དེའི་ཚེ་ན་བཱ་རཱ་ཎ་སཱིའི་རྒྱལ་པོ་ཆེན་པོ་དེ་ཕོ་བྲང་དུ་ཕྱིན་ནས་གཅེས་སུ་བྱས་ནས་མཚན་ཡང་བཙུན་མོ་རི་དྭགས་མ་ཞེས་བཏགས་སོ། །མཐའི་རྒྱལ་ཕྲན་དང་། བློན་པོ་རྣམས་ཀྱང་འདུས་ནས་རྒྱལ་པོ་ལ་ཚིག་སྙན་པས་བསྟོད་ནས་རྒྱལ་པོ་ཡང་རབ་ཏུ་དགའ་རངས་པར་གྱུར་ཏོ། །དེ་ནས་ཀྱང་རིང་པོ་མ་ལོན་པར་མངལ་དུ་བུ་ཆགས་པར་གྱུར་ནས་རྒྱལ་པོ་ཉིད་བཙུན་མོའི་རིམ་གྲོ་བྱེད་དེ། མལ་ཆ་དང་། ཟས་དང་བཏུང་བ་ལ་སོགས་པ་བཟང་ཞིང་འཇམ་པོར་སྦྱོར་ཏོ། །

དེ་ནས་ཟླ་བ་བཅུ་ཚང་ནས་བུ་ཁྱེའུ་གཅིག་བཙས་ན་རྒྱལ་པོའི་གདུང་འཚོབ་པར་རེ་བ་ལས་ཟླ་བ་ཚང་ནས་པད་མོ་ཞིག་བཙས་སོ། །དྲང་སྲོང་གི་རིག་སྔགས་ཀྱི་མཐུས་རྒྱལ་པོ་ཁྲོས་པར་གྱུར་ནས་འདི་སྐད་དུ། བྱོལ་སོང་ལས་སྐྱེས་པ་བདེན་ཞེས་བཙུན་མོ་ལས་ཕྱུང་སྟེ་པད་མོ་ཡང་བོར་དུ་བཅུག་གོ །དེ་ནས་རིང་ཞིག་ལོན་པ་དང་བཱ་རཱ་ཎ་སཱིའི་བློན་པོ་རྣམས་དང་སྐྱེད་མོས་ཚལ་དུ་ལྟད་མོ་ལྟ་ཞིང་རྩེར་ཕྱིན་པ་དང་། རྩེ་ཞིང་རོལ་མོ་བྱེད་དེ་རྟ་དང་གླང་པོ་ཆེ་ཡང་འཐབ་ཏུ་བཅུག །གྱད་རྣམས་ཀྱང་སྟོབས་འགྱེད་དུ་བཅུག་པ་ལས་གྱད་ཀྱི་ནང་ན་གྱད་རབ་ཏུ་མཆོག་ཏུ་སྟོབས་ཆེ་བ་གཅིག་རྡོག་པ་ས་ལ་བརྡབས་ན་ས་ཡང་འགུལ་ཏེ། དྲུང་ན་པད་མོའི་རྫིང་ཞིག་ཡོད་པ་ཡང་འགུལ་བར་གྱུར་ཏོ། །པད་མོའི་རྫིང་དེའི་དྲུང་ན་ཕ་བོང་ཞིག་ཡོང་དེ། དེའི་འོག་ན་པད་མོ་ཞིག་ཡོད་པ་རྫིང་གི་ནང་དུ་ལྷུང་ངོ་། །རྫིང་དུ་ལྷུང་བའི་པད་མོ་དེ་མདོག་རབ་ཏུ་བཟང་ལ་ཁ་དོག་ལེ་བརྒན་དུ་འདུག་ལ་འཚེར་བའི་འོད་ཆགས་པ་རྒྱལ་པོས་མཐོང་ནས་སེམས་རབ་ཏུ་དགའ་སྟེ། བློན་པོ་རྣམས་ལ་པད་མོ་འདི་ལྟ་བུ་ནི་སྔོན་ཆད་ཡང་མཐོང་མ་མྱོང་ངོ་ཞེས་སྨྲས་སོ། །དེ་ནས་པད་མོ་དེ་ཆུའི་ནང་ནས་ཕྱུངས་ཤིག་ཅེས་བསྒོ་ནས་པད་མོ་ལེན་དུ་བཏང་བ་ལས། པད་མོ་དེ་ལ་འདབ་མ་ལྔ་བརྒྱ་ཡོད་དེ། འདབ་མ་རེ་རེའི་འོག་ན་ཁྱེའུ་གཞོན་ནུ་བྱད་བཞིན་བཟང་ཞིང་མཛེས་ལ་ཕལ་ལས་འཕགས་པ་རེ་རེ་ཡོད་པར་མཐོང་ངོ་། །དེ་ནས་པད་མོ་ལེན་པའི་མི་དེས་པད་མོ་དེ་ལ་ངོ་མཚར་ཆེ་བ་དེ་ལྟ་བུ་དག་མཐོང་ནས། རྒྱལ་པོ་ཆེན་པོ་པད་མོ་དེ་ལ་འདབ་མ་ལྔ་བརྒྱ་མཆིས་ཏེ། འདབ་མ་རེ་རེའི་འོག་ན་ལྷའི་བུ་རེ་རེ་ཡོད་དོ་ཞེས་གསོལ་ཏོ། །རྒྱལ་པོས་ཚིག་དེ་ཐོས་ནས་བ་སྤུ་ཀུན་ལངས་པ་ཙམ་དུ་དངངས་ནས་མི་དེ་ལ་ཡང་དག་པར་བདེན་ནམ་ཞེས་བཀའ་སྩལ་ཏོ། །

དེ་ཉིད་བཙུན་མོ་རི་དྭགས་མས་བཙས་པའི་པད་མོ་ཡིན་ནམ་ཞེས་བཙུན་མོ་ལས་བཙས་པའི་པད་མོ་གར་བོར་ཞེས་དྲིས་ན། བཙུན་མོས་གསོལ་བ། རྒྱལ་པོ་ཆེན་པོ་པད་མོ་དེ་རྫིང་གི་འགྲམ་ན་ཕ་བོང་ཞིག་མཆིས་པའི་འོག་ཏུ་སྦས་སོ་ཞེས་གསོལ་བ་དང་། དེ་ཉིད་བཙུན་མོ་རི་དྭགས་མས་བཙས་པ་ཡིན་པར་ཡིད་ཆེས་པས་ཕྱིར་ཕོ་བྲང་གི་ནང་དུ་འོངས་སོ། །ཕྱིར་ཕོ་བྲང་དུ་ཕྱིན་ནས་བཙུན་མོ་རི་དྭགས་མ་ལ་བདག་ནི་གཏི་མུག་ཅན། ཤེས་པ་མེད་པ། མཛངས་ངན་མི་རྟོགས་པས་བཙུན་མོ་བདེན་པར་འོང་ངོ་སྙམ་ནས་བཙུན་མོའི་ཡིད་དང་འགལ་བར་གྱུར་པ་བཤགས་སོ་ཞེས་སྨྲས་ནས་ཕྱིར་བཙུན་མོ་དམ་པར་དབང་བསྐུར་རོ། །དེ་ནས་རྒྱལ་པོ་ཤིན་ཏུ་དགའ་ནས་བློན་པོ་རྣམས་དང་། བྲམ་ཟེ་དང་། རྒྱལ་ཕྲན་དང་། མཚན་མཁན་ཀུན་བསྡུས་ནས་རྒྱལ་བུ་ལྔ་བརྒྱ་པང་དུ་བླངས་ནས་མཚན་མཁན་རྣམས་ལ་མཚན་བཟང་ངན་བལྟར་བཅུག་གོ །མཚན་མཁན་གྱིས་གསོལ་བ། རྒྱལ་བུ་འདི་དག་ནི་རྒྱལ་པོའི་བསོད་ནམས་དང་དབང་ཐང་གིས་གྲུབ་སྟེ། གལ་ཏེ་ཁྱིམ་ན་གནས་ན་མཐའ་བཞི་རང་འདུ་ཞིང་ལྷ་རྣམས་ཀྱང་འགོ་བར་འགྱུར། གལ་ཏེ་རབ་ཏུ་བྱུང་ན་གདོན་མི་ཟ་བར་སྐྱེ་ཤིའི་རྩ་བ་གཅོད་ཅིང་འདོད་པའི་ཆུ་ཀླུང་ལས་ཐར་ཏེ། འཁོར་བའི་རྒྱ་མཚོའི་ཕ་རོལ་ཏུ་ཕྱིན་ཅིང་། རིག་པ་གསུམ་དང་། མངོན་པར་ཤེས་པ་དྲུག་དང་ལྡན་ཞིང་དགེ་སྦྱོང་གི་འབྲས་བུ་བཞི་འཐོབ་པར་འགྱུར་རོ། །

རྒྱལ་པོས་ཚིག་དེ་ཐོས་ནས་ལྷག་པར་དགའ་བར་གྱུར་ནས་རྒྱལ་བུ་ལྔ་བརྒྱ་གསོ་བའི་མ་མ་ལྔ་བརྒྱ་བཏུས་པ་དང་། དེ་ནས་བཙུན་མོ་རི་དྭགས་མས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཡུལ་ཁམས་ཀུན་ཏུ་མ་མ་བཏུ་མི་དགོས་ཏེ། ད་ལྟར་རྒྱལ་པོའི་ཕོ་བྲང་ན་བཙུན་མོ་ལྔ་བརྒྱ་ཡོད་ལ། བཙུན་མོ་དེ་དག་བདག་ལ་བུ་ཡོད་པས་ཐམས་ཅད་ཕྲག་དོག་བྱེད་དོ། །ད་རྒྱལ་པོས་བཙུན་མོ་རེ་རེ་ཞིང་རྒྱལ་བུ་རེ་རེ་གསོར་བཅུག་ན་རྒྱལ་བུ་རྣམས་ཀྱང་སོས་པར་འགྱུར་རོ། །རྒྱལ་པོས་བཙུན་མོ་ལ་སྨྲས་པ། བཙུན་མོ་ལྔ་བརྒྱ་བཙུན་མོ་ལ་ཕྲག་དོག་བྱེད་པར་གྱུར་ན་གཞུ་བ་དང་། བརྡེག་པ་དང་། སྤང་བ་དང་། བསྐྲད་པ་དང་། སྲོག་ལ་དབབ་པའི་བར་དུ་བཙུན་མོའི་ཡིད་དང་མི་འགལ་བར་བདག་བྱེད་ན། ཅིའི་ཕྱིར་དགྲར་གྱུར་པ་དེ་དག་ལ་དེ་ལྟ་བུའི་ཤིན་ཏུ་བཟོད་དཀའ་བ་ཉམས་སུ་ལེན་ཅིང་། གནམ་སའི་བར་ན་དྲིན་ཆེ་བ་བདག་གི་བུ་བཙུན་མོ་རྣམས་ལ་སྦྱིན་པར་སེམས། དེའི་ཚེ་བཙུན་མོ་ལྔ་བརྒྱས་དེ་སྐད་ཅེས་སྨྲས་པ་ཐོས་ཏེ་རབ་ཏུ་དགའ་ནས་བཙུན་མོ་རི་དྭགས་མས་བདག་ཅག་ལ་བདེ་བ་དང་སྐྱིད་པ་རྒྱུན་དུ་བསྟབས་ལ་ད་ཡང་སྲས་བུ་བདག་ཅག་ལ་བྱིན་པས་རབ་ཏུ་དགའོ་ཞེས་སྨྲས་སོ། །དེའི་ཚེ་ན་འཁོར་བརྒྱ་སྟོང་སྙེད་ཀྱང་ཚིག་དེ་དག་ཐོས་ནས་རབ་ཏུ་དགའ་བའི་སེམས་སྐྱེས་ཏེ་བྱང་ཆུབ་ཏུ་སེམས་བསྐྱེད་པར་གྱུར་ཏོ། །

དེ་ནས་རྒྱལ་པོ་ཆེན་པོས་བཙུན་མོ་ལ་ངོ་མཚར་ཆེ་སྟེ། བདག་ནི་ཁྱོད་ཙམ་མི་ཕོད་དོ་ཞེས་སྨྲས་སོ། །བཙུན་མོས་སྨྲས་པ། ཕྲག་དོག་གི་དབང་གིས་ཞེ་སྡང་སྐྱེ་སྟེ། ཉེས་པའི་གཉེན་པོར་ནི་བཟོད་པ་སྒོམ། ཁྲོ་བའི་གཉེན་པོར་ནི་བྱམས་སེམས་བསྐྱེད་དགོས་ཏེ། བདག་ནི་ཐོག་མ་ནས་ཅི་ལ་ཡང་རྩོད་པ་མ་མྱོང་སྟེ། བཙུན་མོ་རྣམས་རང་ལ་འཚེ་ཞིང་གནོད་པ་བྱེད་དུ་ཟད་དོ། །དཔེར་ན་མི་ཞིག་མཚན་མོ་སོང་སོང་བ་ཞིག་ལས་ཤིང་དུམ་ཅིག་མཐོང་བ་ལས། དགྲའམ་ཡི་དྭགས་སུ་འདུ་ཤེས་སྐྱེས་ཏེ། མོད་ལ་དངངས་སྐྲག་ནས་བྲོས་སོ། །མུན་ཁུང་དུ་བྲོས་པ་ལས་ལ་ལ་ནི་བྲག་མཐོན་པོ་ལས་གཡང་དུ་ལྷུང་། ལ་ལ་ནི་ཆུའམ། མེའམ། ཚེར་ཕུང་ངམ། ནགས་ཚལ་གྱི་ནང་དུ་ལྷུང་ནས་ལུས་རྨས་ཤིང་ཞིག་པར་གྱུར་ཏེ། དེ་ལྟར་འདུ་ཤེས་ལོག་པའི་རྐྱེན་གྱིས་དེ་ལྟ་བུའི་གནོད་པ་དང་ཕྲད་དོ། །དེ་བཞིན་དུ་སེམས་ཅན་ཐམས་ཅད་ཀྱང་རང་སྐྱེ། རང་འཆི་བ་ནི་དར་གྱི་སྲིན་བུའམ། ཕྱེ་མ་ལེབ་མེར་སོང་བ་དང་འདྲ་སྟེ་སུས་ཀྱང་བཞེན་མ་བཏབ་བོ། །ཉེས་པ་ཐམས་ཅད་ནི་མི་བདེན་པར་འདུ་ཤེས་པ་ལས་བྱུང་སྟེ། བཙུན་མོའི་རྣམས་ཀྱང་དེ་དང་འདྲ་བས་ན་བདག་ནི་ཤེས་པ་མེད་པ་འམ། ཕལ་དང་རྩོད་པ་ཅི་ཡང་མེད་དོ། །བཙུན་མོ་ལྔ་བརྒྱ་པོ་རྣམས་བཙུན་མོ་རི་དྭགས་མ་ལ་ཕྱག་བྱས་ཏེ། རང་གི་ཉེས་པ་མཐོལ་བཤགས་ནས་བཙུན་མོ་རི་དྭགས་མའི་གཡོག་དང་རིམ་གྲོ་བྱེད་ཅིང་མའམ། བུ་མོ་ལྟར་སེམས་ཏེ། རྒྱལ་བུ་ལ་ཡང་བདག་གི་བུ་དང་འདྲ་བར་གསོ་ཞིང་རིམ་གྲོ་བྱེད་དོ། །

དེ་ནས་རྒྱལ་བུ་ལྔ་བརྒྱ་བགས་ཀྱིས་ཆེར་སྐྱེས་ནས། རྒྱལ་བུ་གཅིག་ཅིག་གིས་མཐུ་སྟོབས་ནི་མི་སྟོང་ཐུབ་པས། མཐའི་རྒྱལ་ཕྲན་དག་ལྡོག་ཅིང་བཀའ་མི་ཉན་པ་ཡོད་ན། དམག་རྣམ་བཞི་མི་དགོས་པར་རྒྱལ་བུ་ཉིད་འབེབས་ཤིང་རྒོལ་དུ་འགྲོ་སྟེ། དེའི་ཚེ་ན་ཡུལ་ཡང་བདེ་ཞིང་སྐྱིད་ལ་སྲུངས་མའི་ལྷ་ཡང་དགའ་བས། རླུང་དང་ཆར་ཆུ་ཡང་དུས་བཞིན་དུ་ལྡང་ཞིང་འབེབས་སོ། །མི་རྣམས་ཀྱང་དལ་ལ་བདེ་སྐྱིད་དོ། །རྒྱལ་བུ་ལྔ་བརྒྱ་ཡང་བལ་གྱི་གླང་པོ་དམ་པ་ལ་ཞོན་ཞིང་སྐྱེད་མོས་ཚལ་དུ་ཡིད་བཞིན་དུ་རྩེ་དགའ་ཞིང་འཁོད་པ་ལ་ཕ་མ་ཡང་རྒྱལ་བུ་དེ་དག་ལ་མིག་གིས་འབྲས་བུ་དང་འདྲ་བར་སེམས་ཏེ་བྱམས་སོ། །དེའི་ཚེ་རྒྱལ་བུ་ལྔ་བརྒྱ་ཆེར་སྐྱེས་ཏེ། ཤེད་རྫོགས་ནས་ཕྱིས་དུས་གཞན་ཞིག་ན་ཐམས་ཅད་པད་མོའི་རྫིང་དེའི་འགྲམ་དུ་འདུས་ཏེ་འདུག་འདུག་པ་ལས་སོ་སོའི་གཟུགས་བརྙན་རྫིང་གི་ཆུ་ལ་སྣང་བར་གྱུར་ནས་གཅིག་ལ་གཅིག་འདི་སྐད་ཅེས་སྨྲས་སོ། །

འདི་ལྟ་སྟེ། ཆོས་ཐམས་ཅད་ནི་སྒྱུ་མའམ། སྤྲུལ་པའམ། རྨི་ལམ་འམ། ཆུའི་གཟུགས་བརྙན་ལྟ་བུ་སྟེ། བདེན་པའམ། ཡང་དག་པ་མེད་དོ། །བདག་ཅག་ཀྱང་ད་ལྟར་དེ་དང་འདྲ་སྟེ། རིགས་ཆེ་ཞིང་བཙུན་ལ་ཕོ་བྲང་གི་ནང་ན་གནས་ནས་འདོད་པ་ལྔ་ལ་བག་མེད་པར་སྤྱོད་པས་ལོངས་སྤྱོད་མོད་ཀྱི། དར་བའི་ཚེ་ལོ་དང་གཟུགས་བཟང་པོ་ནི་ཡིད་བརྟན་དུ་མི་རུང་སྟེ། གྲུབ་པ་ཡོད་ན་འཇིག་པར་འགྱུར། སྐྱེ་བ་ཡོད་ན་འཆི་བར་འགྱུར་ཏེ། གཞོན་ཞིང་དར་བ་ཡང་རིང་པོར་མི་ཐོགས་ཏེ་རྒས་ཤིང་རྒུད་པར་འགྱུར། ཁ་ཟས་ཀྱི་ཚོད་མ་ཟིན་ན་ན་བར་འགྱུར། ཚེ་ལོ་བརྒྱ་ཐུབ་ན་ཡང་ཐ་མར་ཤི་དགོས་སོ། །ཞེས་རྒྱལ་བུ་རྣམས་མི་དགའ་བའི་མྱ་ངན་གྱིས་ནོན་ཏོ། །ཟས་དང་སྐོམ་ཡང་མི་འདོད་པར་ཕྱིར་ཕོ་བྲང་དུ་འོངས་ནས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །

འཇིག་རྟེན་དག་ནི་སྡུག་བསྔལ་བ་སྟེ་བདེ་བ་མ་མཆིས་པས་ཡབ་རྒྱལ་པོ་བདག་ཅག་རབ་ཏུ་འབྱུང་བར་གསོལ་ལོ། །རྒྱལ་པོས་རྒྱལ་བུ་རྣམས་ལ་སྨྲས་པ། སྐྱེ་བ་དང་། རྒ་བ་དང་། ན་བ་དང་། ཤི་བ་ནི་ཐམས་ཅད་ལ་ཡོད་པར་འདྲ་ན་ཁྱེད་འབའ་ཞིག་མྱ་ངན་བྱར་ཡང་ཅི་ཡོད། རྒྱལ་བུས་གསོལ་བ། བདག་ཅག་ནི་ཤི་ནས་སྐྱེ་བ་ཡང་ནས་ཡང་དུ་ལེན་པའི་ཉོན་མོངས་པ་དང་། འགྲོ་བ་ལྔར་རྒྱུན་དུ་འགྲོ་བར་མི་བཟོད་དོ། །དེ་ནས་རྒྱལ་པོས་ཀྱང་རྒྱལ་བུའི་ཡི་དམ་མ་བཟློག་སྟེ། རབ་ཏུ་འབྱུང་བར་གནང་ངོ་། །བཙུན་མོས་རྒྱལ་བུ་རྣམས་ལ་སྨྲས་པ། ཁྱེད་རབ་ཏུ་བྱུང་ནས་ཁོ་མོ་སྤངས་ལ་ལམ་རིང་དུ་མ་འགྲོ་བར་ཕོ་བྲང་རྒྱབ་ཀྱི་སྐྱེད་མོས་ཚལ་ན་རབ་ཏུ་དབེན་ལ་ཤིང་དང་ཚལ་ཡང་དབེན་པ་ཡོད་ཀྱིས། དེར་འདུག་ཅིག་དང་། ཡོད་བྱད་རྣམ་བཞིས་མི་བྲེལ་བར་བྱ་ཞིང་འབུལ་ལོ། །རྒྱལ་བུ་རྣམས་རབ་ཏུ་བྱུང་ནས་བཙུན་མོས་གསོལ་བ་བཞིན་རྒྱབ་ཀྱི་སྐྱེད་མོས་ཚལ་ན་གནས་པ་ལས་རྒྱལ་བུ་དེ་དག་ཐམས་ཅད་ཀྱིས་རེ་རེ་ནས་མཐར་གྱིས་རང་སངས་རྒྱས་ཀྱི་བྱང་ཆུབ་ཐོབ་པར་གྱུར་ཏོ། །དེ་ལྟར་རྒྱལ་བུ་བཞི་བརྒྱ་དགུ་བཅུ་རྩ་དགུ་མཐར་གྱིས་རབ་ཏུ་བྱུང་། རང་བྱང་ཆུབ་ཀྱི་འབྲས་བུ་ཐོབ་པར་གྱུར་ནས་རྒྱལ་པོའི་ཕོ་བྲང་དུ་ལྷགས་ཏེ། ཡབ་རྒྱལ་པོ་དང་ཡུམ་ལ་བདག་ཅག་རབ་ཏུ་བྱུང་བའི་དོན་དེ་ཐོབ་བོ་ཞེས་སྨྲས་ནས། དགེ་སློང་དེ་དག་སྟེང་གི་ནམ་མཁའ་ལ་འཕགས་ཏེ་ཤར་ཕྱོགས་ནས་མི་སྣང་བར་གྱུར་ན་ནུབ་ཕྱོགས་ནས་བྱུང་ངོ་། །ནུབ་ཕྱོགས་ནས་མི་སྣང་བར་གྱུར་ན་ཤར་ཕྱོགས་ནས་བྱུང་ངོ་། །ལྷོ་ཕྱོགས་ནས་མི་སྣང་བར་གྱུར་ན་བྱང་ཕྱོགས་ནས་བྱུང་ངོ་། །བྱང་ཕྱོགས་ནས་མི་སྣང་བར་གྱུར་ན། ལྷོ་ཕྱོགས་ནས་བྱུང་ངོ་། །ཆེད་འགའ་ནི་ལུས་ཆེན་པོས་ནམ་མཁའི་ཁམས་གང་བར་གྱུར། ཆེད་འགའ་ནི་ལུས་གཅིག་ལས་ལུས་གྲངས་མེད་པར་སྤྲུལ། ཆེད་འགའ་ནི་ལུས་ཀྱི་ཆ་སྟོད་ན་ཆུ་འབབ་ན། ལུས་ཀྱི་ཆ་སྨད་ན་མེ་འབར་བ་ལ་སོགས་པ་ཆོ་འཕྲུལ་རྣམ་པ་སྣ་ཚོགས་པ་བསྟན་ནས་ལུས་ལ་མེ་བཏང་ནས་མྱ་ངན་ལས་འདས་སོ། །

དེ་ནས་བཙུན་མོ་རི་དྭགས་མས་སྐུ་གདུང་བསྡུས་ནས་རྒྱབ་ཀྱི་སྐྱེད་མོས་ཚལ་དུ་མཆོད་རྟེན་བཞི་བརྒྱ་དགུ་བཅུ་རྩ་དགུ་བྱས་ནས་མཆོད་པ་བྱེད་དོ། །རྒྱལ་བུ་ནང་གི་ཆུང་ངུ་ཡང་ཞག་དགུ་བཅུ་འདས་ནས་རང་སངས་རྒྱས་ཀྱི་བྱང་ཆུབ་ཐོབ་སྟེ། དེ་ཡང་ཡབ་དང་ཡུམ་ལ་ཆོ་འཕྲུལ་ཆེན་པོ་བསྟན་ཏོ། །ཆོ་འཕྲུལ་ཆེན་པོ་བསྟན་ནས་མྱ་ངན་ལས་འདས་སོ། །དེ་ནས་བཙུན་མོ་རི་དྭགས་མས་སྐུ་གདུང་བསྡུས་ནས་མཆོད་རྟེན་བརྩིགས་ཏེ་མཆོད་པ་བྱས་སོ། །དེའི་ཚེ་ན་བཙུན་མོ་རི་དྭགས་མས་ཉིན་གཅིག་བཞིན་བདུག་སྤོས་དམ་པ་དང་། མེ་ཏོག་དམ་པ་དང་། རོལ་མོ་སྣ་ཚོགས་ཀྱིས་རང་སངས་རྒྱས་ལྔ་བརྒྱའི་མཆོད་རྟེན་ལ་མཆོད་པ་བྱེད་ཅིང་མཆོད་རྟེན་དེ་དག་གི་དྲུང་ན་མི་དགའ་ཞིང་མྱ་ངན་བྱེད་དེ་འདི་སྐད་ཅེས་སྨྲས་སོ། །བདག་གིས་བུ་ལྔ་བརྒྱ་བཙས་ནས་རབ་ཏུ་བྱུང་མོད་ཀྱི། དེ་ལ་གཅིག་ཙམ་ཡང་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་མེད་པས་འདི་སྐད་ཅེས་སྨོན་ལམ་དུ་བཏབ་བོ། །བདག་གིས་རང་སངས་རྒྱས་ལྔ་བརྒྱ་ལ་མཆོད་པ་བྱས་ཤིང་མཆོད་རྟེན་ལྔ་བརྒྱ་བརྩིགས་ཏེ། སྐུ་གདུང་ལ་མཆོད་པའི་བསོད་ནམས་ཅི་ཡོད་པ་སེམས་ཅན་ཐམས་ཅད་ལ་བསྔོའོ། །བདག་མ་འོངས་པའི་དུས་ན་བུ་མང་དུ་བཙས་ཤིང་བླ་ན་མེད་པའི་བྱང་ཆུབ་ཏུ་སེམས་མི་བསྐྱེད་པ་མི་འདོད་ཀྱི། བུ་གཅིག་པུ་ཞིག་བཙས་ལ་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཚེ་དེ་ཉིད་ལ་རབ་ཏུ་བྱུང་ནས་ཐམས་ཅད་མཁྱེན་པའི་ཡེ་ཤེས་དང་ལྡན་པར་ཤོག་ཅིག་ཅེས་སྨོན་ལམ་དུ་བཏབ་བོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ།

དེའི་ཚེ་དེའི་དུས་ན་བཙུན་མོ་རི་དྭགས་མ་དེ་གཞན་ཞིག་ཡིན་སྙམ་དུ་སེམས་ན་དེ་ལྟར་མི་བལྟ་སྟེ། དེའི་ཚེ་དེའི་དུས་ན་བཙུན་མོ་རི་དྭགས་མ་དེ་ཉིད་ནི་ད་ལྟར་ཡུམ་ལྷ་མཛེས་ཉིད་ཡིན་ནོ། །ཡུམ་ལྷ་མཛེས་དེ་ལྟར་རང་སངས་རྒྱས་ལྔ་བརྒྱ་ལ་མཆོད་པ་བྱས་ཏེ་དགེ་བའི་རྩ་བ་གྲངས་མེད་པ་བསྐྱེད་པས་དེ་བས་ན་ད་ལྟར་དེ་བཞིན་གཤེགས་པའི་སྐུ་བལྟམས་པ་ཡིན་ནོ། །སངས་རྒྱས་ཀྱི་ཆོས་འདི་བསྟན་པ་ན་ལྷ་དང་མི་གྲངས་མེད་པ་འབྲས་བུ་དང་པོ་ཐོབ་པ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏོ། །སེམས་ཅན་ཚད་མེད་པ་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ།། །།

རྒྱལ་བུ་དོན་ཀུན་གྲུབ་པའི་བཙུན་མོ་ས་འཚོ་མའི་ཡོན་ཏན་དང་ལོ་རྒྱུས། རྒྱ་ཆེར་རོལ་བའི་མདོ་ལས་བཏུས།

དུས་གཞན་ཞིག་ན་རྒྱལ་པོ་ཟས་གཙང་མ་ཤཱཀྱའི་ཚོགས་དང་ལྷན་ཅིག་ཏུ་འདུན་ས་ན་འདུག་འདུག་པ་དེའི་ཚེ། ཤཱཀྱ་རྒན་རབས་རྒན་རབས་ཁ་ཅིག་གིས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛད་དུ་གསོལ། གཞོན་ནུ་དོན་ཐམས་ཅད་གྲུབ་པ་འདི་ནི་བྲམ་ཟེ་ལྟས་མཁན་རྣམས་དང་། བློ་ངེས་པ་དང་ལྡན་པའི་ལྷ་མང་པོས་འདི་སྐད་དུ་བསྟན་ཏེ། གཞོན་ནུ་འདི་གལ་ཏེ་མངོན་པར་བྱུང་བར་གྱུར་ན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །

ཇི་སྟེ་མངོན་པར་མ་བྱུང་ན་ནི་འཁོར་ལོས་སྒྱུར་བའི་རྒྱལ་པོ་མཐའ་བཞི་ལས་རྣམ་པར་རྒྱལ་བ་ཆོས་ཀྱི་རྒྱལ་པོ་ཆོས་དང་ལྡན་ཞིང་རིན་པོ་ཆེ་སྣ་བདུན་དང་ལྡན་པར་འགྱུར་རོ། །དེའི་རིན་པོ་ཆེ་སྣ་བདུན་ནི་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེ་དང་བདུན་ནོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་སྟོང༌ཚང་བ་འབྱུང་ངོ་། །དེ་གནོད་པར་བྱ་བ་དང་། མཚོན་ཆ་མེད་པར་ཆོས་དང་མཐུན་པས་སའི་དཀྱིལ་འཁོར་འདི་ལས་མངོན་པར་རྒྱལ་བར་བྱས་ཏེ། གཅིག་པུ་གནས་པར་འགྱུར་རོ་ཞེས་མཆི་ན། དེའི་སླད་དུ་གཞོན་ནུ་དེའི་བཙུན་མོ་བླང་བར་བགྱིའོ། །དེ་ལྟར་མཛད་དང་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ཏེ། དགྱེས་པ་ལ་ལོངས་སྤྱོད་ཅིང་མངོན་པར་འབྱུང་བར་ཡང་མི་འགྱུར་ཏེ། དེ་ལྟར་གྱུར་པ་དང་བདག་ཅག་གི་འཁོར་ལོས་སྒྱུར་བའི་གདུང་ཡང་མི་འཆད། ཁམས་ཀྱི་རྒྱལ་པོ་ཐམས་ཅད་ཀྱིས་ཀྱང་མི་སྙན་པར་མི་བརྗོད་ཅིང་རིམ་གྲོར་བགྱི་བར་འགྱུར་རོ། །དེ་ནས་རྒྱལ་པོ་ཟས་གཙང་མས་སྨྲས་པ། གལ་ཏེ་དེ་ལྟར་བྱ་ན་དེའི་ཕྱིར་གཞོན་ནུའི་ཚུལ་དང་མཐུན་པའི་བུ་མོ་གང་ཞིག་ཡོད་ཁྱེད་ཀྱིས་ལྟོས་ཤིག །དེའི་ཚེ་ཤཱཀྱ་ལྔ་བརྒྱ་ཙམ་སོ་སོ་ནས་འདི་སྐད་དུ་བདག་གི་བུ་མོ་ནི་གཞོན་ནུའི་ཚུལ་དང་མཐུན་ནོ། །བདག་གི་བུ་མོ་ནི་གཞོན་ནུའི་ཚུལ་དང་མཐུན་ནོ་ཞེས་ཟེར་རོ། །

རྒྱལ་པོས་སྨྲས་པ། གཞོན་ནུ་དེ་ནི་ཤིན་ཏུ་ཕུལ་ཆེ་བ་ཡིན་གྱིས། གཞོན་ནུ་ཉིད་ལ་ཁྱོད་བུ་མོ་གང་འདོད་ཅེས་དྲི་བར་བྱའོ་ཞེས། དེ་དག་ཀུན་ཀྱང་འདུས་ཏེ། གཞོན་ནུ་ལ་དངོས་པོ་དེ་བརྗོད་དོ། །གཞོན་ནུས་སྨྲས་པ། ད་སྟེ་དགུང་བདུན་ན་འདིའི་ལན་གསན་པར་གསོལ། དེ་ནས་བྱང་ཆུབ་སེམས་དཔའ་འདི་སྙམ་དུ༌བསམས་ཏེ། འདོད་པའི་སྐྱོན་ནི་བདག་གིས་མཐའ་ཡས་རིག །འཐབ་མོ་འཁོན་བཅས་མྱ་ངན་སྡུག་བསྔལ་རྩ། །འཇིགས་བྱེད་དུག་གི་ལོ་མ་འདྲ་བ་སྟེ། །མེ་དང་འདྲ་ཞིང་རལ་གྲིའི་སོ་དང་འདྲ། །འདོད་པའི་ཡོན་ཏན་བདག་འདོད་མ་ཡིན་ཏེ། །བདག་ནི་བུད་མེད་ཚོགས་དང་མཛེས་མ་ཡིན། །བསམ་གཏན་ཏིང་འཛིན་བདེ་བས་ཞི་སེམས་སུ། །བདག་ནི་མི་སྨྲ་ནགས་ཚལ་གནས་པར་བྱ། །ཡང་དེས་བརྟགས་ནས་ཐབས་མཁས་པ་མངོན་དུ་བྱས་ཏེ། སེམས་ཅན་ཡོངས་སུ་སྨིན་པར་བྱ་བ་ལ་བལྟས་ནས། སྙིང་རྗེ་ཆེན་པོ་བསྐྱེད་དེ།

དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདམ་དང་ལྕག་ལྕིག་ཁྲོད་ནས་པད་མ་རྣམ་པར་འཕེལ། །མི་རྣམས་གང་བའི་ནང་ན་རྒྱལ་པོ་མཆོད་པ་འཐོབ། །གང་ཚེ་བྱང་ཆུབ་སེམས་དཔའ་འཁོར་མཆོག་ཐོབ་གྱུར་པ། །དེ་ཚེ་སེམས་ཅན་བྱེ་བ་ཁྲག་ཁྲིག་འཆི་མེད་འདུལ། །སྔོན་གྱི་བྱང་ཆུབ་སེམས་དཔའ་མཁས་པ་གང་བྱུང་བ། །དེ་དག་ཀུན་གྱིས་བཙུན་མོ་སྲས༌དང་སླས་ཀྱང་བསྟེན། །འོན་ཀྱང་འདོད་པས་ཆགས་མེད་བསམ་གཏན་བདེ་མ་ཉམས། །བདག་ཀྱང་དེ་དག་ཡོན་ཏན་རྗེས་སུ་བསླབ་པར་བྱ། །གང་ལ་སྤྱོད་ལམ་ཡོན་ཏན་བདེན་པའི་ཚིག་མེད་པ། །བུད་མེད་ཕལ་པ་གང་ཡང་བདག་གི་ཚུལ་མཐུན་མིན། །གང་ཞིག་བདག་གི་སེམས་ནི་མངོན་པར་དགའ་བྱེད་ཅིང་། །བག་ཡོད་གཟུགས་དང་ན་ཚོད་རུས་རིགས་དག་པ་འོས། །དེས་ནི་ཡོན་ཏན་ཚིགས་སུ་བཅད་དེ་ཡི་གེར་བྲིས། །འདི་འདྲའི་བུ་མོ་མཆིས་ན་བདག་ལ་བཀའ་སྩོལ་ཅིག །སྐྱེ་བོ་ཕལ་པ་མ་བསྡམས་བདག་ལ་མཁོ་མ་ལགས། །ཡོན་ཏན་བརྗོད་པ་འདི་ལྡན་མཆིས་ན་བདག་སྩོལ་ཅིག །དར་ཅིང་གཟུགས་བཟང་ལྡན་ཡང་གཟུགས་ཀྱི་དྲེགས་དང་བྲལ། །ཕུ་ནུ་མ་ལ་བྱམས་ལྟར་བྱམས་པའི་སེམས་ལྡན་ཞིང་། །གཏོང་ལ་དགའ་སྟེ་དགེ་སྦྱོང་བྲམ་ཟེ་སྦྱིན་ཚུལ་ཅན། །དེ་འདྲའི་བུ་མོ་མཆིས་ན་ཡབ་ཀྱིས་བདག་སྩོལ་ཅིག །གང་རྒྱལ་མ་མཆིས་འགྱིང་དང་བྲལ་བས་བྲན་མོ་བཞིན། །སྒྲ་དྲི་རོ་ལ་མ་ཆགས་ཆང་ལ་མ་ཆགས་ཏེ། །འདོད་བྲལ་བརྣབ་སེམས་མ་མཆིས་རང་གི་ནོར་གྱིས་འཚལ། །བདེན་ལ་གནས་ཤིང་མི་འཕྱར་གཡེང་བ་མ་ལགས་པ། །ངོ་ཚའི་གོས་འཚལ་རྒོད་དང་ཁེངས་པ་མ་མཆིས་གནས། །ལྷ་དང་བཀྲ་ཤིས་མ་ཆགས་རྟག་ཏུ་ཆོས་ལ་བརྩོན། །ལུས་དང་ངག་དང་ཡིད་ཀྱི་དངོས་པོ་རབ་དག་པ། །གཉིད་དང་རྨུགས་པ་མི་མང་ང་རྒྱལ་གླེན་བྲལ་ཞིང་། །རྟོག་དང་ལྡན་ལ་ལེགས་པའི་ལས་རྣམས་རྟག་སྤྱོད་དེ། །གྱོས་སྒྱུག་གཉིས་ལའང་སྟོན་པ་བཞིན་གྱི་རིམ་གྲོར་ལྡན། །བྲན་དང་བྲན་མོ་ཀུན་ལའང་བདག་བཞིན་བྱམས་སྲེལ་བ། །སྨད་འཚོང་བཞིན་དུ་བསྟན་བཅོས་ཆོ་ག་འཚལ་ཅིང་མཁས། །སླད་ཀྱིས་ཉལ་ཞིང་སྔོན་དུ་མལ་ནས་ལྡང་བགྱིད་པ། །བྱམས་པས་རྗེས་སྙེགས་མ་བཞིན་ཚུལ་འཆོས་མ་མཆིས་པ། །དེ་འདྲའི་བུད་མེད་མཆིས་ན་ཡབ་ཀྱིས་བདག་སྩོལ་ཅིག །དགེ་སློང་དག་དེ་ནས་རྒྱལ་པོ་ཟས་གཙང་མས་ཚིགས་སུ་བཅད་པ་དེ་དག་ཐོས་ནས། མདུན་ན་འདོན་ལ་སྨྲས་པ། བྲམ་ཟེ་ཆེན་པོ་ཁྱོད་སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ལ། ཁྱིམ་ཐམས་ཅད་དུའང་སོང་སྟེ། བུ་མོ་དག་ལྟོས་ལ་གང་ལ་ཡང་རུང་སྟེ་ཡོན་ཏན་དེ་ལྟ་བུ་དག་ཡོད་ན། རྒྱལ་རིགས་ཀྱི་བུ་མོ་ཡང་རུང་། བྲམ་ཟེའི་བུ་མོ་ཡང་རུང་། རྗེའུ་རིགས་ཀྱི་བུ་མོ་ཡང་རུང་། དམངས་རིགས་ཀྱི་བུ་མོ་ཡང་རུང་གིས། བུ་མོ་དེ་དག་འདིར་འོན་ཅིག །དེ་ཅིའི་ཕྱིར་ཞེ་ན། གཞོན་ནུ་འདི་ནི་རིགས་དོན་དུ་གཉེར་བ་མ་ཡིན༌རུས་དོན་དུ་གཉེར་བ་མ་ཡིན་གྱི། གཞོན་ནུ་འདི་ནི་ཡོན་ཏན་དོན་དུ་གཉེར་བ་ཡིན་ནོ། །

དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །རྒྱལ་རིགས་བྲམ་ཟེའི་བུ་མོ་དང་། །རྗེའུ་རིགས་དམངས་རིགས་དེ་བཞིན་ཏེ། །སུ་ལ་ཡོན་ཏན་འདི་ཡོད་པའི། །བུ་མོ་དེ་ནི་འདིར་འོན་ཅིག །ང་ཡི་བུ་འདི་རིགས་དག་དང་། །རུས་ལ་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། །དེ་ལ་འདི་ཡི་ཡིད་དགའོ། །དགེ་སློང་དག་དེ་ནས་བྲམ་ཟེ༌མདུན་ན་འདོན་དེས་ཚིགས་སུ་བཅད་པ་ཡི་གེར་བྲིས་པ་དེ་ཁྱེར་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ནས། ཁྱིམ་ནས་ཁྱིམ་དུ་ཡོན་ཏན་དེ་ལྟ་བུ་དང་ལྡན་པའི་བུ་མོ་ལྟ་ཞིང་ཚོལ་དུ་སོང་སོང་བ་ལས། ཡོན་ཏན་དེ་ལྟ་བུ་དང་ལྡན་པའི་བུ་མོ་མ་མཐོང་སྟེ། དེ་ནས་རིམ་གྱིས་ཤཱཀྱ་ལག་ན་བེ་ཅོན་ཅན་གྱི་ཁྱིམ་དུ་ཕྱིན་ནས། དེས་བལྟས་ན། བུ་མོ་གཟུགས་མཛེས་ཤིང་ལྟ་ན་སྡུག་ལ་ཡིད་དུ་འོང་བ། མདོག་བཟང་པོ་རྒྱས་པ་མཆོག་དང་ལྡན་པ། ཧ་ཅང་ཡང་མི་རིང་བ། ཧ་ཅང་ཡང་མི་ཐུང་བ། ཧ་ཅང་ཡང་མི་སྦོམ་པ། ཧ་ཅང་ཡང་མི་སྐེམ་པ། ཧ་ཅང་ཡང་མི་དཀར་བ། ཧ་ཅང་ཡང་མི་གནག་པ། གཟོད་མ་དར་ལ་བབ་པ། བུད་མེད་རིན་པོ་ཆེ་ལྟར་སྣང་བ་ཞིག་མཐོང་བ་དང་། བུ་མོ་དེས་བྲམ་ཟེ་མདུན་ན་འདོན་དེའི་རྐང་པ་གཉིས་ནས་བཟུང་སྟེ་འདི་སྐད་ཅེས་སྨྲས་སོ། །

བྲམ་ཟེ་ཆེན་པོ་ཁྱོད་ལ་དགོས་པ་ཅི་ཞིག་མཆིས། བྲམ་ཟེ་མདུན་ན་འདོན་གྱིས་ཚིགས་སུ་བཅད་དེ་སྨྲས་པ། ཟས་གཙང་སྲས་པོ་གཟུགས་ནི་མཆོག་ཏུ་མཛེས་གྱུར་ཅིང་། །སུམ་ཅུ་རྩ་གཉིས་མཚན་ལྡན་ཡོན་ཏན་གཟི་བརྗིད་ཅན། །དེ་ཡིས་བུད་མེད་རྣམས་ཀྱི་ཡོན་ཏན་ཡི་གེར་བྲིས། །སུ་ལ་ཡོན་ཏན་འདི་ཡོད་དེ་ཡི་ཆུང་མར་འོས། །ཞེས་སྨྲས་ཏེ། དེས་དེ་ལ་ཡི་གེ་དེ་བྱིན་ནོ། །དེ་ནས་བུ་མོ་དེས་ཚིགས་སུ་བཅད་པའི་ཡི་གེ་དེ་བཀླགས་ནས། བཞིན་འཛུམ་པ་བསྟན་ཏེ། བྲམ་ཟེ་མདུན་ན་འདོན་དེ་ལ་ཚིགས་སུ་བཅད་དེ་སྨྲས་པ། བྲམ་ཟེ་ཡོན་ཏན་འདི་དག་བདག་ལ་ཀུན་ཚང་གིས། །དེས་པའི་གཟུགས་ཅན་དེ་ནི་བདག་གི་ཁྱིམ་ཐབ་བོ། །གལ་ཏེ་གཞོན་ནུ་བཞེད་ན་ཕྱི་བཤོལ་མ་མཛད་གསུངས། བརྒྱ་ལ་སྐྱེ་བོ་ཕལ་དང་བཞུགས་པར་འགྱུར་ཡང་གདའ། དེ་ནས་བྲམ་ཟེ་མདུན་ན་འདོན་དེ། རྒྱལ་པོ་ཟས་གཙང་མའི་དྲུང་དུ་སོང་སྟེ་དོན་དེ་བརྗོད་དོ། །རྒྱལ་པོ་ཆེན་པོ་བདག་གིས་གཞོན་ནུའི་ཚུལ་དང་མཐུན་པའི་བུ་མོ་མཐོང་ངོ་། །རྒྱལ་པོས་སྨྲས་པ། སུ་ལ་དེ་ལྟ་བུ་ཞིག་ཡོད། སྨྲས་པ། ལྷ་ཤཱཀྱ་ལག་ན་བེ་ཅོན་ཅན་ལ་བུ་མོ་དེ་ལྟ་བུ་ཞིག་མཆིས་སོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། གཞོན་ནུ་དེ་ནི་ཤིན་ཏུ་ཕུལ་ཆེ་ཞིང་བཟང་བ་ལ་མོས་པ་ཡིན་ལ། བུད་མེད་དག་ནི་ཕལ་ཆེར་ཡོན་ཏན་མེད་པ་དག་ཀྱང་། བདག་ལ་ཡོན་ཏན་ཡོད་པར་ཁས་ལེན་གྱིས། བདག་གིས་ཡིད་དུ་འོང་བའི་ཡོ་བྱད་དག་ཅིག་བྱས་ཏེ། གཞོན་ནུ་འདི་བུ་མོ་ཐམས་ཅད་ལ་སྦྱིན་པ་བྱེད་དུ་གཞུག་གོ །བུ་མོ་དེ་དག་གི་ནང་ནས་གང་ལ་གཞོན་ནུ་མིག་མངོན་པར་ཆགས་པར་གྱུར་པ་དེ། གཞོན་ནུ་ལ་སྦྱིན་པར་བྱའོ་སྙམ་མོ། །

དེ་ནས་རྒྱལ་པོ་ཟས་གཙང་མས་ཡིད་དུ་འོང་བའི་ཡོ་བྱད་གསེར་དང་། དངུལ་དང་། རིན་པོ་ཆེ་སྣ་ཚོགས་ལས་བྱེད་དུ་བཅུག་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་ཀུན་གྱིས་ཀྱང་གཞོན་ནུ་མཐོང་བར་འགྱུར་ཏེ། ཡིད་དུ་འོང་བའི་ཡོ་བྱད་དག་ཀྱང་བུ་མོ་དག་ལ་སྦྱིན་པ་བྱེད་ཀྱིས། བུ་མོ་ཐམས་ཅད་ཀྱང་འདུན་ཁང་དུ༌ཤོག་ཅིག་ཅེས་བསྒོའོ། །དགེ་སློང་དག་དེ་ནས་ཞག་བདུན་ལོན་པ་དང་། བྱང་ཆུབ་སེམས་དཔའ་འདུན་ཁང་དུ་སོང་སྟེ། སེང་གེའི་ཁྲི་ལ་འདུག་གོ །དེའི་ཚེ་རྒྱལ་པོ་ཟས་གཙང་མས་བྱ་ར་བ་དག་བཀོད་ནས། གཞོན་ནུ་འདི་བུ་མོ་གང་ལ་མིག་ཆགས་པ་དེ་ང་ལ་གྱིས་ཤིག་ཅེས་བསྒོའོ། །དགེ་སློང་དག་དེ་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོ་དེ་ན་བུ་མོ་གང་ཇི་སྙེད་ཅིག་ཡོད་པ་དེ་དག་ཐམས་ཅད་འདུན་ཁང་ག་ལ་བ་དེ་དང་། བྱང་ཆུབ་སེམས་དཔའ༌གང་ན་བ་དེར་བྱང་ཆུབ་སེམས་དཔའ་བལྟ་བ་དང་ཡིད་དུ་འོང་བའི་ཡོ་བྱད༌བླངས་པའི་ཕྱིར་དེར་དོང་ངོ་། །དགེ་སློང་དག་དེ་ནས་བྱང་ཆུབ་སེམས་དཔས་བུ་མོ་ཇི་ལྟར་འོངས་པ་དེ་དག་ལ་ཡིད་དུ་འོང་བའི་ཡོ་བྱད་རྣམས་བྱིན་ནོ། །དེ་ནས་བུ་མོ་དེ་དག་གིས་བྱང་ཆུབ་སེམས་དཔའི་དཔལ་དང་གཟི་བརྗིད་མ་བཟོད་ནས། ཡིད་དུ་འོང་བའི་ཡོ་བྱད་དེ་དག་བླངས་ཤིང་མྱུར་བ་མྱུར་བར་ཕྱིར་དོང་ངོ་། །

དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བྱ་བ་བྲན་མོའི་ཚོགས་ཀྱིས་བསྐོར་ཅིང་མདུན་དུ་བདར་ཏེ། འདུན་ཁང་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་པ་དང་། མིག་མི་འཛུམ་པར་བྱང་ཆུབ་སེམས་དཔའ་ལ་ལྟ་ཞིང་ཕྱོགས་གཅིག་ཏུ་འདུག་པར་གྱུར་ཏོ། །གང་གི་ཚེ་བྱང་ཆུབ་སེམས་དཔས་ཡིད་དུ་འོང་བའི་ཡོ་བྱད་དེ་དག་བྱིན་ཟིན་པར་གྱུར་པ་དེའི་ཚེ་བྱང་ཆུབ་སེམས་དཔའི་དྲུང་དུ་འོངས་ནས་འཛུམ་དམུལ་ཏེ་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ་བདག་གིས་ཁྱོད་ལ་ནོངས་པ་ཅི་ཞིག་བགྱིས་ན། བདག་ལ་དེ་ལྟར་དངན་སྡང་མཛད། སྨྲས་པ། ངས་ནི་ཁྱོད་ལ་དངན་སྡང་བྱས༌པའང་མེད་ན། ཁྱོད་ནི་ཤིན་ཏུ་འཕྱིས་ཏེ་འོངས་སོ་ཞེས་སྨྲས་ནས་དེས་སོར་གདུབ་སྲང་བརྒྱ་སྟོང་དུ་མ་རི་བ་ཕུད་དེ་དེ་ལ་བྱིན་ནོ། །བུ་མོ་དེས་སྨྲས་པ། གཞོན་ནུ་ཁྱོད་ལ་བདག་གིས་འདི་ལྟ་ཞིག་འཚལ་བ་འོས་སམ། སྨྲས་པ། འོ་ན་རྒྱན་གཞན་དང་གཞན་དག་ཡོད་པ་འདི་དག་ཀྱང་ཁྱོད་ཁྱེར་ཅིག །དེས་སྨྲས་པ། གཞོན་ནུ་བདག་ནི་རྒྱན་མ་མཆིས་པར་བགྱིད་པ་མ་ལགས་ཀྱི་རྒྱན་དང་ལྡན་པར་བགྱིད་པ་ལགས་སོ་ཞེས་སྨྲས་ནས་བུ་མོ་དེ་སོང་ངོ་། །དེ་ནས་བྱ་ར་བར་བཀོད་པའི་མི་དེ་དག་རྒྱལ་པོ་ཟས་གཙང་མའི་དྲུང་དུ་སོང་ནས། ལོ་རྒྱུས་དེ་དག་སྨོས་ཏེ་སྨྲས་པ། ལྷ་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་ཞེས་བགྱི་བ་དེ་ལ་གཞོན་ནུ་སྤྱན་ཆགས་པར་གྱུར་ལ་ཆུང་ཟད་ཅིག་ཏུ་བཀའ་མཆིད་ཀྱང་བགྱིས་སོ། །

དེ་ནས་རྒྱལ་པོ་ཟས་གཙང་མས་ཚིག་དེ་ཐོས་ནས་ཤཱཀྱ་ལག་ན་བེ་ཅོན་ཅན་གྱི་གན་དུ་བྲམ་ཟེ་མདུན་ན་འདོན་ཕོ་ཉར་བཏང་སྟེ། ཁྱོད་ཀྱི་བུ་མོ་ཞིག་ཡོད་པ་དེ་ངའི་གཞོན་ནུ་ལ་བྱིན་ཅིག་ཅེས་སྤྲིང་ངོ་། །ལག་ན་བེ་ཅོན་ཅན་གྱིས་སྨྲས་པ། འཕགས་པ་གཞོན་ནུ་དེ་ནི་ཕོ་བྲང་ན་སྐྱིད་དེ་བར་འཁྲུངས་པ་ལགས་ལ། བདག་ཅག་གི་རིགས་ཀྱི་ཆོས་ནི་འདི་ལྟ་བུ་ལགས་ཏེ། སྒྱུ་རྩལ་ཤེས་པ་ལ་བུ་མོ་གཏོང་གི །སྒྱུ་རྩལ་མི་ཤེས་པ་ལ་མི་གཏོང་བ་ལགས་ན། གཞོན་ནུ་དེ་ནི་སྒྱུ་རྩལ་ཤེས་པ་ཡང་མ་ལགས་ལ། རལ་གྲིའི་ཐབས་དང་། འཕོང་དང་། སྟོབས་དང་། གྱད་ཀྱི་འཛིན་སྟངས་ཀྱི་ཚུལ་ཤེས་པ་ཡང་མ་ལགས་ན། བདག་གིས་སྒྱུ་རྩལ་ཤེས་པ་མ་ལགས་པ་ལ་བུ་མོ་ཇི་ལྟར་གཏང་། ཚིག་དེ་རྒྱལ་པོ་ལ་བཟླས་པ་དང་། དེ་ནས་རྒྱལ་པོ་འདི་སྙམ་དུ་སེམས་ཏེ། ང་ལ་དེས་འདི་དང་ལན་གཉིས་སུ་བསྔོས་ཏེ། གང་གི་ཚེ་ངས་ཤཱཀྱ་གཞོན་ནུ་དག །གཞོན་ནུའི་རིམ་གྲོ་བྱེད་དུ་ཅིའི་ཕྱིར་མི་འོང་ཞེས་བྱས་པ་དེའི་ཚེ་ཡང་། ཅི་ངེད་ལུགས་ཀྱི་རིམ་གྲོ་བྱེད་དུ་འོང་ངམ་ཞེས་ཟེར་ལ། དའང་འདི་སྐད་ཟེར་རོ་སྙམ་དུ་སེམས་ཤིང་འདུག་པར་གྱུར་ཏོ། །བྱང་ཆུབ་སེམས་དཔས་ཀྱང་གཏམ་དེ་ཐོས་ནས་རྒྱལ་པོ་ཟས་གཙང་མ་ག་ལ་བ་དེར་སོང་སྟེ་ཕྱིན་ནས་འདི་སྐད་ཅེས་སྨྲས་སོ། །ཅི་ནོངས་ཏེ་དེ་ལྟར་ཞལ་ཟུང་གནག་པར་བཞུགས། རྒྱལ་པོས་སྨྲས་པ། གཞོན་ནུ་དེ་དྲི་བས་ཅི་ཞིག་བྱ། གཞོན་ནུས་སྨྲས་པ། ལྷ་དེ་ནི་བཀའ་མི་སྩལ་དུ་མི་རུང་ངོ་ཞེས་ལན་གསུམ་གྱི་བར་དུ་བྱང་ཆུབ་སེམས་དཔས་རྒྱལ་པོ་ཟས་གཙང་མ་ལ་དྲིས་པ་དང་། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་དངོས་པོ་དེ་དག་བརྗོད་དོ། །

བྱང་ཆུབ་སེམས་དཔས་སྨྲས་པ། ལྷ་གྲོང་ཁྱེར་འདི་ན་བདག་དང་སྒྱུ་རྩལ་གྱིས་འགྲན་པར་ནུས་པ་འགའ་མཆིས་སམ། དེ་ནས་རྒྱལ་པོ་ཟས་གཙང་མ་བགད་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བུ་ཁྱོད་ཀྱིས་སྒྱུ་རྩལ་བསྟན་པར་ནུས་སམ། སྨྲས་པ། ལྷ་དེ་ནི་བདག་གིས་ལེགས་པར་རྔོ༌ཐོག་གོ །དེ་བས་ན་སྒྱུ་རྩལ་འཚལ་བ་རྣམས་ཀུན༌ཀྱང་བསོག་ཏུ་གསོལ། དེ་དག་གི༌མདུན་དུ་བདག་གིས། སྒྱུ་རྩལ་བསྟན་པར་བགྱིའོ། །དེ་ནས་རྒྱལ་པོ་ཟས་གཙང་མས་སེར་སྐྱའི་གནས་ཀྱི་གྲོང་ཁྱེར་ཆེན་པོར་དྲིལ་གྱི་སྒྲ་བསྒྲགས་ཏེ། དེང་ནས་ཞག་བདུན་ན་གཞོན་ནུ་རང་གི་སྒྱུ་རྩལ་སྟོན་གྱིས། དེར་སྒྱུ་རྩལ་ཤེས་པ་ཐམས་ཅད༌ཤོག་ཅིག་ཅེས་བསྒོའོ། །དེ་ནས་ཞག་བདུན་ལོན་པ་དང་། ཤཱཀྱ་གཞོན་ནུ་ལྔ་བརྒྱ་ཙམ་ཚོགས་པར་གྱུར་ཏོ། །

དེ་ནས་ཤཱཀྱ་ལག་ན་བེ་ཅོན་ཅན་གྱི་བུ་མོ་ས་འཚོ་མ་རྒྱལ་བའི་རུ་མཚོན་དུ་བཞག་སྟེ། འདིར་རལ་གྲིའི་ཐབས་དང་འཕོང་དང་། སྟོབས་དང་། གྱད་ཀྱི་འཛིན་སྟངས་ཀྱིས་སུ་རྒྱལ་བ་དེ་ནི་འདི་ཁྱེར་ཅིག་ཅེས་དམ་བཅས་ནས། དེའི་ཚེ་ཐམས་ཅད་ཀྱི་ཐོག་མ་ལ་གཞོན་ནུ་ལྷ་སྦྱིན་གྲོང་ཁྱེར་ནས་བྱུང་ངོ་། །དེའི་ཚེ་བྱང་ཆུབ་སེམས་དཔའི་བཞོན་པར་གླང་པོ་དཀར་པོ་བོང་ཤིན་ཏུ་ཆེ་བ་ཞིག་གྲོང་ཁྱེར་དུ་ཁྲིད་པ་གཞོན་ནུ་ལྷ་སྦྱིན་གྱིས་མཐོང་ནས་ཕྲག་དོག་དང་། ཤཱཀྱའི་ང་རྒྱལ་དང་། སྟོབས་ཀྱི་ང་རྒྱལ་གྱིས་དྲེགས་ནས། དེས་གླང་པོ་དེ་ལག་པ་གཡོན་པས་སྣ་ནས་བཟུང་སྟེ། ལག་པ་གཡས་པས་ཐལ་མོ་ལན་ཅིག་བསྣུན་པས་བསད་པར་གྱུར་ཏོ། །

དེའི་འོག་ཏུ་གཞོན་ནུ་མཛེས་དགའ་བོ་བྱུང་བ་དང་། དེས་གླང་པོ་ཆེན་པོ་དེ་གྲོང་ཁྱེར་གྱི་སྒོར་བསད་པ་མཐོང་ནས། སུས་བསད་ཅེས་དྲིས་པ་དང་།

སྨྲས་པ། ལྷ་སྦྱིན་གྱིས་བསད་དོ། །སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ་ཞེས། དེས་གླང་པོ་དེའི་མཇུག་མ་ནས་བཟུང་སྟེ། གྲོང་ཁྱེར་གྱི་སྒོ་ནས་གུད་དུ་བོར་རོ། །དེའི་འོག་ཏུ་བྱང་ཆུབ་སེམས་དཔའ་ཤིང་རྟ་ལ་ཞོན་ཏེ་བྱུང་བ་དང་། བྱང་ཆུབ་སེམས་དཔས་གླང་པོ་དེ་ལྟར་བསད་པ་མཐོང་ངོ་། །མཐོང་ནས་ཀྱང་སུས་བསད་ཅེས་དྲིས་པ་དང་། སྨྲས་པ། ལྷ་སྦྱིན་གྱིས་བསད་དོ། །སྨྲས་པ། ལྷ་སྦྱིན་གྱིས་དེ་ནི་མ་ལེགས་པ་ཞིག་བྱས་སོ། །གྲོང་ཁྱེར་འདིའི་སྒོ་ནས་སུས་བོར་ཞེས་དྲིས་པ་དང་སྨྲས་པ། མཛེས་དགའ་བོས་བོར་རོ། །སྨྲས་པ། མཛེས་དགའ་བོས་དེ་ལྟར་བྱས་པ་ཡང་ལེགས་ན། སེམས་ཅན་འདི་ནི་ལུས་ཆེན་པོ་དང་ལྡན་པ་སྟེ། རུལ་ན་གྲོང་ཁྱེར་ཐམས་ཅད་དྲི་མི་ཞིམ་པས་གང་བར་འགྱུར་རོ་ཞེས་ནས། དེ་ནས་བྱང་ཆུབ་སེམས་དཔས་ཤིང་རྟ་ལ་འདུག་བཞིན་དུ་རྐང་པ་ཡ་གཅིག་ས་ལ་བརྐྱང་སྟེ། རྐང་པའི་མཐེ་བོས་གླང་པོ་དེ་བླངས་ཏེ། ར་བ་བདུན་རིམ་དང་འོབས་བདུན་རིམ་འདས་ནས་གྲོང་ཁྱེར་གྱི་ཕྱི་རོལ་རྒྱང་གྲགས་གཅིག་ཙམ་དུ་འཕངས་སོ། །གླང་པོ་དེ་ཕྱོགས་གང་དུ་ལྷུང་བའི་ཕྱོགས་དེ་ཤོང་ཆེན་པོ་ཞིག་ཏུ་གྱུར་ནས། ད་ལྟར་གླང་པོའི་ཤོང་ཞེས་བྱ་བ་ཡིན་ནོ། །

དེའི་ཚེ་ལྷ་དང་མི་བརྒྱ་སྟོང་མང་པོ་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་ལ། གོས་ཀྱི་གཡབ་མོ་འབྱིན་པར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག་སྨྲས་སོ། །གླང་པོའི་དབང་པོ་བདོ་བ་བཞིན་བཞུད་པ། །ཞབས་ཀྱི་མཐེ་བོས་གླང་པོའི་དབང་པོ་བླངས། །ར་བ་བདུན་དང་འོབས་བདུན་ཡོངས་འདས་ནས། །གྲོང་ཁྱེར་འདི་ཡི་ཕྱི་རོལ་རྒྱང་རིང་འཕངས། །མཁྱེན་པ་མཆོག་མངའ་འདིས་ནི་གདོན་མི་ཟར། །ང་རྒྱལ་སྟོབས་ཀྱིས་མཐོ་བའི་ལུས་ཅན་རྣམས། །འཁོར་བའི་གྲོང་ནས་ཕྱི་རོལ་རྒྱང་རིང་དུ། །ཤེས་རབ་སྟོབས་ཀྱིས་འདིས་ནི་འཕེན་པར་འགྱུར། །དགེ་སློང་དག་དེ་ནས་ཤཱཀྱ་གཞོན་ནུ་ལྔ་བརྒྱ་ཙམ་གྲོང་ཁྱེར་ནས་འཐོན་ནས། སའི་ཕྱོགས་གང་དུ་ཤཱཀྱ་གཞོན་ནུ་དག་སྒྱུ་རྩལ་སྟོན་པ་དེར་དོང་ངོ་། །རྒྱལ་པོ་ཟས་གཙང་མ་དང་། ཤཱཀྱ༌རྒན་རབས་རྒན་རབས་དག་དང་། སྐྱེ་བོ་ཕལ་པོ་ཆེ་དག་ཀྱང་བྱང་ཆུབ་སེམས་དཔའ་དང་། ཤཱཀྱ་གཞོན་ནུ་གཞན་དག་གི་སྒྱུ་རྩལ་གྱི་ཁྱད་པར་མཐོང་བར་འདོད་དེ་སའི་ཕྱོགས་དེར་དོང་ངོ་། །

དེ་ནས་ཐོག་མར་ཤཱཀྱ་གཞོན་ནུ་ཡི་གེ་མཁས་ཤིང་ཡི་གེའི་ཆོ་ག་ཤེས་པ་དེ་དག་དང་། བྱང་ཆུབ་སེམས་དཔར་ཡི་གེ་འགྲན་ཏོ། །དེའི་ཚེ་ཤཱཀྱ་དེ་དག་གིས་སློབ་དཔོན་ཀུན་གྱི་བཤེས་གཉེན་དཔང་དུ་བཞག་སྟེ། གཞོན་ནུ་འདི་དག་གི་ནང་ནས། ཡི་གེ་འབྲུའམ། ཡི་གེའི་སྣ་གྲངས་ཀྱི་མཐར་ཕྱིན་པས་ཁྱད་པར་དུ་འཕགས་པ་གང་ཡིན་ཁྱོད་ཀྱིས་བྱེ་བྲག་ཕྱེས་ཤིག །དེ་ནས་སློབ་དཔོན་ཀུན་གྱི་བཤེས་གཉེན་བྱང་ཆུབ་སེམས་དཔའ་ཡི་གེ་ལ་མཁས་པ་མངོན་དུ་མཐོང་བས་བཞིན་འཛུམ་པ་བསྟན་ཏེ། ཚིགས་སུ་བཅད་པ་འདི་དག་སྨྲས་སོ། །མི་ཡི་འཇིག་རྟེན་ལྷ་ཡི་འཇིག་རྟེན་ནམ། །ལྷ་མིན་འཇིག་རྟེན་དྲི་ཟའི་འཇིག་རྟེན་ནམ། །འཇིག་རྟེན་ཀུན་གྱི་ཡི་གེ་ཇི་སྙེད་གང་། །དེ་ལ་སེམས་ཅན་དག་པ་འདིས་མཐར་ཕྱིན། །མི་ཡི་ཟླ་བ་འདི་ཡིས་གང་མཁྱེན་པའི། །ཡི་གེ་དག་དང་ཡི་གེའི་སྣ་གྲངས་ཀྱི། །མིང་ཡང་ཁྱེད་དང་ངས་ནི་ཡོང་མི་ཤེས། །འདི་ལ་མངོན་སུམ་ངས་ཤེས་འདི་རྒྱལ་འགྱུར། །ཤཱཀྱ་རྣམས་ཀྱིས་སྨྲས་པ། གཞོན་ནུ་འདི་ཡི་གེ་ཤེས་པ་ལ་ཁྱད་པར་དུ༌འཕགས་པ་ལྟའང་འཕགས་པར་ཆུག་སྟེ། གཞོན་ནུ་འདི་གྲངས་ཀྱིས་ཤེས་པ་ལ་ཁྱད་པར་ཅི་ཡོད་འགྲན་པར་བྱའོ། །

དེ་ནས་ཤཱཀྱ་སྲིད་སྒྲུབ་ཅེས་བྱ་བ་རྩིས་པ་ཆེན་པོ་བྱེད་པ་བགྲང་བ་དང་། རྩིས་ཀྱི་ཕ་རོལ་ཏུ་ཕྱིན་པ་ཞིག་ཡོད་པ་དེ་དཔང་དུ་བཞག་སྟེ། གཞོན་ནུ་འདི་དག་གི་ནང་ནས་གྲངས་ཀྱི་ཤེས་པ་ལ་ཁྱད་པར་དུ་གང་འཕགས་ཁྱོད་ཀྱིས་ལྟོས་ཤིག་ཅེས་བྱས་ཏེ། དེ་ནས་དེའི་ཚེ་བྱང་ཆུབ་སེམས་དཔས་ནི་རྩིས་མགོ་ཕོག །ཤཱཀྱ་གཞོན་ནུ་གཅིག་གིས་ནི་བརྩིས་པ་དང་། བྱང་ཆུབ་སེམས་དཔའ་ལ་སླེབས་པར་མ་ནུས་སོ། །དེ་ནས་ཤཱཀྱ་གཞོན་ནུ་གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། བརྒྱ་ནས། ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་བརྩིས་ཀྱང་བྱང་ཆུབ་སེམས་དཔའ་ལ་མ༌སླེབས་སོ། །དེ་ནས་བྱང་ཆུབ་སེམས་དཔས་སྨྲས་པ། ཁྱེད་ཀྱིས་ནི་རྩིས་མགོ་ཕོག་ཅིག །ཁོ་བོས་ནི་བརྩིའོ། །དེའི་ཚེ་ཤཱཀྱ་གཞོན་ནུ་གཅིག་གིས་རྩིས་མགོ་ཕོག་ན། བྱང་ཆུབ་སེམས་དཔས༌རྩིས་ཀྱི་ཆོད་པ་ལ་མ༌སླེབས་སོ། །དེ་ནས་ཤཱཀྱ་གཞོན་ནུ་གཉིས་དང་། གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། བརྒྱ་ནས་ཤཱཀྱ་གཞོན་ནུ་ལྔ་བརྒྱའི་བར་གྱིས་དུས་གཅིག་ཏུ་རྩིས་མགོ་ཕོག་ཀྱང་བྱང་ཆུབ་སེམས་དཔས་རྩིས་ཀྱི་ཆོད་པ་ལ༌མ་སླེབས་སོ། །བྱང་ཆུབ་སེམས་དཔས་སྨྲས་པ། འདི་ལ་བརྩད་དེ་ཡང་ཅི་རུང་གིས། ཁྱེད་ཐམས་ཅད་གཅིག་ཏུ་འདུས་ཏེ་རྩིས་མགོ་ཕོག་ཅིག་དང་། ཁོ་བོས་བརྩིའོ། །དེ་ནས་ཤཱཀྱ་གཞོན་ནུ་ལྔ་བརྒྱས་ཚིག་གཅིག་ཏུ་བརྗོད་པས་སྔ་ཕྱི་མེད་པར་རྩིས་མགོ་ཕོག་ན། བྱང་ཆུབ་སེམས་དཔས་རྨོངས་པ་མེད་པར་བརྩིས་ཏེ། དེ་ལྟར་ཤཱཀྱ་གཞོན་ནུ་དེ་དག་ཐམས་ཅད་ནི་ཕུག་ཐུག་པར་གྱུར། བྱང་ཆུབ་སེམས་དཔའ་ལ་ནི་ཐུག་པའི་མཐའ་མེད་པར་གྱུར་ཏོ། །

དེ་ནས་རྩིས་པ་ཆེན་པོ་སྲིད་སྒྲུབ་ངོ་མཚར་དུ་གྱུར་ཏེ་ཚིགས་སུ་བཅད་པ་འདི་དག་སྨྲས་སོ། །ལེགས་པའི་བློ་མངའ་འདི་དྲིས་ན། །མཁྱེན་པ་ཤིན་ཏུ་མྱུར་བ་སྟེ། །ཤཱཀྱ་གཞོན་ནུ་ལྔ་བརྒྱ་ཙམ། །ཀུན་ཀྱང་རྩིས་ཀྱི་ལམ་ལ་ཐུག །དེ་ཡི་ཤེས་རབ་འདི་འདྲ་སྟེ། །ཡེ་ཤེས་བློ་གྲོས་དྲན་ལྡན་ཡང་། །རྩིས་ཀྱི་མཁྱེན་པ་རྒྱ་མཚོ་དེ། །ད་དུང་སྦྱོང་ཞིང་སློབ་པ་མཛད། །དེ་ནས་ཤཱཀྱའི་ཚོགས་ཐམས་ཅད་ངོ་མཚར་དུ་གྱུར་ཏེ། ཤིན་ཏུ་རྨད་དུ་བྱུང་བར་སེམས་ཤིང་། དེའི་ཚེ་ཐམས་ཅད་མགྲིན་གཅིག་ཏུ་ཚིག་འདི་སྐད་ཅེས་སྨྲས་སོ། །ཀྱེ་དོན་གྲུབ་གཞོན་ནུ་ཁྱོད་ནི་རྒྱལ་ལོ་རྒྱལ་ལོ་ཞེས་ཐམས་ཅད་སྟན་ལས་ལངས་ཏེ། ཐལ་མོ་སྦྱར་ནས་བྱང་ཆུབ་སེམས་དཔའ་ལ་ཕྱག་འཚལ་ཏེ་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ལ་སྲས་དེ་ལྟར་དྲིས་པ་ལ་སྤོབས་པ་མྱུར་ཞིང་མགྱོགས་ལ་ཡང་ཞིང་ཤུགས་དང་ལྡན་པ་ཅན་མངའ་བ་ནི་བརྙེས་པ་ལེགས་པར་བརྙེས་སོ། །དེ་ནས་རྒྱལ་པོ་ཟས་གཙང་མས༌བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །བུ་རྩིས་པ་ཆེན་པོ་སྲིད་སྒྲུབ་གྲངས་ཀྱི་ཤེས་པ་ལ་མཁས་པ་དང་། རྩིས་ཀྱི་ལུགས་འགྲན་ནུས་སམ། སྨྲས་པ། ལྷ་རྔོ༌ཐོག་གོ །སྨྲས་པ་འོ་ན་རྩིས་ཤིག །དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་བྱེ་བ་ལས་བརྒྱར་གོང་དུ་བསྒྲེས་པ་ཞེས་བགྱི་བའི་རྩིས་ཀྱི་ལུགས་མཁྱེན་ཏམ། སྨྲས་པ།

ཤེས་སོ། །

སྨྲས་པ། འོ་ན་བྱེ་བ་ལས་བརྒྱར་གོང་དུ་བསྒྲེས་པའི་རྩིས་ཀྱི་ལུགས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ། བྱེ་བ་ཕྲག་བརྒྱ་ན་ཐེར་འབུམ་ཞེས་བྱའོ། །ཐེར་འབུམ་ཕྲག་བརྒྱ་ན་ཁྲག་ཁྲིག་ཅེས་བྱའོ། །ཁྲག་ཁྲིག་ཕྲག་བརྒྱ་ན་གཏམས་པ་ཞེས་བྱའོ། །གཏམས་པ་ཕྲག་བརྒྱ་ན་དཀྲིགས་པ་ཞེས་བྱའོ། །དཀྲིགས་པ་ཕྲག་བརྒྱ་ན་མི་འཁྲུགས་པ་ཞེས་བྱའོ། །མི་འཁྲུགས་པ་ཕྲག་བརྒྱ་ན་ཁྱད་ཕྱིན་ཅེས་བྱའོ། །ཁྱད་ཕྱིན་ཕྲག་བརྒྱ་ན་ཕང་སྟེང་ཞེས་བྱའོ། །ཕང་སྟེང་ཕྲག་བརྒྱ་ན་མང་འཛིན་ཅེས་བྱའོ། །མང་འཛིན་ཕྲག་བརྒྱ་ན་གླང་པོའི་སྟོབས་ཞེས་བྱའོ། །གླང་པོའི་སྟོབས་ཕྲག་བརྒྱ་ན་ངོགས་འཐོབ་ཅེས་བྱའོ། །ངོགས་འཐོབ་ཕྲག་བརྒྱ་ན་རྣམ་པར་གཞག་པ་གདགས་པ་ཞེས་བྱའོ། །རྣམ་པར་གཞག་པ་གདགས་པ་ཕྲག་བརྒྱ་ན་རྒྱུ་རིག་ཅེས་བྱའོ། །རྒྱུ་རིག་ཕྲག་བརྒྱ་ན་ལག་སྦྱིན་ཞེས་བྱའོ། །ལག་སྦྱིན་ཕྲག་བརྒྱ་ན་རྒྱུ་དབང་ཞེས་བྱའོ། །རྒྱུ་དབང་ཕྲག་བརྒྱ་ན་རྫོགས་ཐོབ་ཅེས་བྱའོ། །རྫོགས་ཐོབ་ཕྲག་བརྒྱ་ན་བགྲང་རྟོགས་ཞེས་བྱའོ། །བགྲང་རྟོགས་ཕྲག་བརྒྱ་ན་སྒྲིབ་པ་ཞེས་བྱའོ། །སྒྲིབ་པ་ཕྲག་བརྒྱ་ན་སྟོབས་ཞེས་བྱའོ། །སྟོབས་ཕྲག་བརྒྱ་ན་ཀུན་སྟོབས་ཞེས་བྱའོ། །ཀུན་སྟོབས་ཕྲག་བརྒྱ་ན་རྣམ་པར་བརྡ་ཤེས་ལྡན་ཞེས་བྱའོ། །རྣམ་པར་བརྡ་ཤེས་ལྡན་ཕྲག་བརྒྱ་ན་བརྡ་ཤེས་ཀུན་ཞེས་བྱའོ། །བརྡ་ཤེས་ཀུན་ཕྲག་བརྒྱ་ན་རྣམ་འབྱུང་ཞེས་བྱའོ། །རྣམ་འབྱུང་ཕྲག་བརྒྱ་ན་དེའི་མཚན་ཉིད་ཅེས་བྱ་སྟེ། འདི་ལྟར་དེའི་མཚན་ཉིད་ཅེས་བྱ་བའི་རྩིས་ཀྱིས་ནི་རིའི་རྒྱལ་པོ་རི་རབ་བརྩི་བའི་གཞིར་བྱས་ཀྱང་ཆོད་པར་རུང་ངོ་། །དེ་ཡི་ཡང་གོང་ན་རྒྱལ་མཚན་གྱི་རྩེ་མོའི་ནོར་བུ་ཞེས་བྱ་བའི་གྲངས་ཡོད་དེ། གྲངས་དེས་ནི་གང་གཱའི་ཀླུང་གི་བྱེ་མ་སྙེད་བརྩི་བའི་གཞིར་བྱས་ཀྱང་ཆོད་པར་རུང་ངོ་། །

དེའི་ཡང་གོང་ན་རྒྱལ་མཚན་གྱི་རྩེ་མོ་ངེས་པར་སྒྲོགས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་དེད་འདྲེན་གདགས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཏན་ལ་འབེབས་པ་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོགས་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་གཅོད་རྟོགས་ལྡན་ཞེས་བྱ་བའི་གྲངས་ཡོད་དོ། །དེའི་ཡང་གོང་ན་ཐམས་ཅད་རྣམ་པར་འབྱེས་པ་ཞེས་བྱ་བའི་གྲངས་ཡོད་དེ། གྲངས་དེས་ནི་གང་གཱའི་ཀླུང་བཅུའི་བྱེ་མ་བརྩི་བའི་གཞིར་བྱས་ཀྱང་ཆོད་པར་རུང་ངོ་། །དེའི་ཡང་གོང་ན་སྙིང་པོ་མཆོག་ཅེས་བྱ་བའི་གྲངས་ཡོད་དེ། གྲངས་དེས་ནི་གང་གཱའི་ཀླུང་བྱེ་བ་ཕྲག་བརྒྱའི་བྱེ་མ་དང་མཉམ་པ་བརྩི་བའི་གཞིར་བྱས་ཀྱང་ཆོད་པར་རུང་ངོ་། །དེའི་ཡང་གོང་ན་རྡུལ་ཕྲ་རབ་ལ་འཇུག་པའི་རྗེས་སུ་སོང་བ་ཞེས་བྱ་བའི་གྲངས་ཡོད་དེ། གྲངས་དེ་ལ་ནི་དེ་བཞིན་གཤེགས་པ་དང་། བྱང་ཆུབ་ཀྱི་སྙིང་པོ་མཆོག་དམ་པར་གནས་པའི་བྱང་ཆུབ་སེམས་དཔའ་དང་། ཆོས་ཐམས་ཅད་ལ་དབང་བསྐུར་བ་མངོན་དུ་གྱུར་པའི་བྱང་ཆུབ་སེམས་དཔའ་མ་གཏོགས་པར་སེམས་ཅན་གྱི་རིས་ན་གྲངས་དེ་ཤེས་པ་ནི་ང་དང་གཞན་ཡང་ང་དང་འདྲ་བ་སྲིད་པ་ཐ་མ་པར་གྱུར་པ་ཁྱིམ་གྱི་གནས་ནས་མངོན་པར་མ་བྱུང་བའི་བྱང་ཆུབ་སེམས་དཔའ་མ་གཏོགས་པ་གང་ཡང་མེད་དོ། །

སྲིད་སྒྲུབ་ཀྱིས་སྨྲས་པ། གཞོན་ནུ་རྡུལ་ཕྲ་རབ་ལ་འཇུག་པའི་རྗེས་སུ་སོང་བའི་གྲངས་ལ་ཇི་ལྟར་རྗེས་སུ་འཇུག་པར་བགྱི། བྱང་ཆུབ་སེམས་དཔས་སྨྲས་པ།

རྡུལ་ཕྲ་རབ་ཀྱི་རྡུལ་བདུན་ལ་ནི་རྡུལ་ཕྲ་མོ་གཅིག་གོ །རྡུལ་ཕྲ་མོ་བདུན་ལ་ནི་རྡུལ་ཆུང་ངུ་གཅིག་གོ །རྡུལ་ཆུང་ངུ་བདུན་ལ་ནི་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་བདུན་ལ་ནི་རི་བོང་རྡུལ་གཅིག་གོ །རི་བོང་རྡུལ་བདུན་ལ་ནི་ལུག་རྡུལ་གཅིག་གོ །ལུག་རྡུལ་བདུན་ལ་ནི་གླང་རྡུལ་གཅིག་གོ །གླང་རྡུལ་བདུན་ལ་ནི་སྲོ་མ་གཅིག་གོ །སྲོ་མ་བདུན་ལ་ནི་ཡུངས་འབྲུ་གཅིག་གོ །ཡུངས་འབྲུ་བདུན་ལ་ནི་ནས་གཅིག་གོ །ནས་བདུན་ལ་ནི་སོར་གཅིག་གོ །སོར་བཅུ་གཉིས་ལ་ནི་མཐོ་གང་ངོ་། །མཐོ་དོ་ལ་ནི་ཁྲུ་གང་ངོ་། །ཁྲུ་བཞི་ལ་ནི་གཞུ་གང་ངོ་། །གཞུ་སྟོང་ལ་ནི་ཡུལ་མ་ག་དྷཱའི་རྒྱང་གྲགས་གཅིག་གོ །རྒྱང་གྲགས་བཞི་ལ་ནི་དཔག་ཚད་གཅིག་གོ །དེ་ལ་ཁྱེད་ཀྱིས་ནང་ནས་དཔག་ཚད་ལ་རྡུལ་ཕྲ་རབ་དེ་ལྟ་བུ་དུ༌ཡོད་སུས་ཤེས། སྲིད་སྒྲུབ་ཀྱིས་སྨྲས་པ། གཞོན་ནུ་བདག་ཉིད་ཀྱང་དེ་ལ་མགོ་རྨོངས་ན་གཞན་བློ་ཆུང་ངུ་དང་ལྡན་པ་ལྟ་སྨོས་ཀྱང་ཅི་འཚལ། དེ་བས་ན་གཞོན་ནུས་དཔག་ཚད་ལ་རྡུལ་ཕྲ་རབ་དེ་ལྟ་བུ་དུ་མཆིས་བཤད་དུ་གསོལ། བྱང་ཆུབ་སེམས་དཔས་སྨྲས་པ། དེ་ལ་དཔག་ཚད་ལ་ནི་རྡུལ་ཕྲ་རབ་མི་འཁྲུགས་ཁྲག་ཁྲིག་གཅིག་དང་། བྱེ་བ་ཁྲག་ཁྲིག་འབུམ་ཕྲག་སུམ་ཅུ་དང་། བྱེ་བ་དྲུག་ཅུ་ཕྲག་བརྒྱ་དང་། བྱེ་བ་ཕྲག་སུམ་ཅུ་རྩ་གཉིས་དང་། འབུམ་ཕྲག་ལྔ་དང་། ཁྲི་ཉིས་སྟོང་ཡོད་དེ། དཔག་ཚད་ལ་ནི་རྡུལ་ཕྲ་རབ་དེ་སྙེད་ཅིག་ཡོད་དོ། །དེ་ལྟར་འཇུག་པ་དེས་འཛམ་བུའི་གླིང་འདི་ལ་ནི་དཔག་ཚད་བདུན་སྟོང་ཡོད་དོ། །ནུབ་ཀྱི་བ་ལང་སྤྱོད་ལ་ནི་དཔག་ཚད་བརྒྱད་སྟོང་ཡོད་དོ། །ཤར་གྱི་ལུས་འཕགས་ལ་ནི་དཔག་ཚད་དགུ་སྟོང་ཡོད་དོ། །བྱང་གི་སྒྲ་མི་སྙན་ལ་ནི་དཔག་ཚད་ཁྲི་ཡོད་དེ། དེ་ལྟར་འཇུག་པ་དེས་གླིང་བཞི་པའི་འཇིག་རྟེན་གྱི་ཁམས་འདི་ལ་སོགས་པ་གླིང་བཞི་པ་ཆེན་པོའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང་། འཁོར་ཡུག་དང་འཁོར་ཡུག་ཆེན་པོ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་། རྒྱལ་ཆེན་བཞིའི་རིས་ཀྱི་ལྷ་བྱེ་བ་ཕྲག་བརྒྱ་དང་། སུམ་ཅུ་རྩ་གསུམ་བྱེ་བ་ཕྲག་བརྒྱ་དང་། འཐབ་བྲལ་བྱེ་བ་ཕྲག་བརྒྱ་དང་། དགའ་ལྡན་བྱེ་བ་ཕྲག་བརྒྱ་དང་། འཕྲུལ་དགའ་བྱེ་བ་ཕྲག་བརྒྱ་དང་། གཞན་འཕྲུལ་དབང་བྱེད་བྱེ་བ་ཕྲག་བརྒྱ་དང་། ཚངས་རིས་བྱེ་བ་ཕྲག་བརྒྱ་དང་། ཚངས་པའི་མདུན་ན་འདོན་བྱེ་བ་ཕྲག་བརྒྱ་དང་། ཚངས་འཁོར་བྱེ་བ་ཕྲག་བརྒྱ་དང་། ཚངས་ཆེན་བྱེ་བ་ཕྲག་བརྒྱ་དང་། འོད་ཆུང་བྱེ་བ་ཕྲག་བརྒྱ་དང་། ཚད་མེད་འོད་བྱེ་བ་ཕྲག་བརྒྱ་དང་། འོད་གསལ་བྱེ་བ་ཕྲག་བརྒྱ་དང་། དགེ་ཆུང་བྱེ་བ་ཕྲག་བརྒྱ་དང་། ཚད་མེད་དགེ་བྱེ་བ་ཕྲག་བརྒྱ་དང་། དགེ་རྒྱས་བྱེ་བ་ཕྲག་བརྒྱ་དང་། སྤྲིན་མེད་བྱེ་བ་ཕྲག་བརྒྱ་དང་། བསོད་ནམས་སྐྱེས་བྱེ་བ་ཕྲག་བརྒྱ་དང་། འབྲས་བུ་ཆེ་བྱེ་བ་ཕྲག་བརྒྱ་དང་། སེམས་ཅན་འདུ་ཤེས་མེད་པ་བྱེ་བ་ཕྲག་བརྒྱ་དང་། མི་ཆེ་བ་བྱེ་བ་ཕྲག་བརྒྱ་དང་། མི་གདུང་བ་བྱེ་བ་ཕྲག་བརྒྱ་དང་། གྱ་ནོམ་སྣང་བྱེ་བ་ཕྲག་བརྒྱ་དང་། ཤིན་ཏུ་མཐོང་བྱེ་བ་ཕྲག་བརྒྱ་དང་། འོག་མིན་གྱི་ལྷའི་རིས་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཅེས་བྱ་སྟེ། ཡངས་ཤིང་རྒྱ་ཆེ་བ་དེ་ལ་དཔག་ཚད་དུ་ཡོད་པ་དང་། དཔག་ཚད་བརྒྱ་ཕྲག་དུ་ཡོད་པ་དང་། དཔག་ཚད་སྟོང་ཕྲག་དུ་ཡོད་པ་དང་། དཔག་ཚད་བྱེ་བ་ཕྲག་དུ་ཡོད་པ་དང་། དཔག་ཚད་ཐེར་འབུམ་ཕྲག་དུ་ཡོད་པ་དང་། དཔག་ཚད་ཁྲག་ཁྲིག་ཕྲག་དུ་ཡོད་པ་དང་། དེ་བཞིན་དུ་སྦྱར་ཏེ། དཔག་ཚད་སྙིང་པོ་དམ་པའི་རྩིས་ཀྱི་བར་དུ༌ཐུག་པ་ལ་རྡུལ་ཕྲ་རབ་དེ་ལྟ་བུ་དུ་ཡོད་ཅེས་བྱ་བའི་རྩིས་དེ་ནི་གྲངས་དང་བགྲང་བ་ལས་འདས་པ་སྟེ། དེ་ནི་གྲངས་མེད་པ་ཞེས་བྱའོ། །

དེ་བས་ཀྱང་ཤིན་ཏུ་གྲངས་མེད་པ་དེ་སྙེད་ཀྱི་རྡུལ་ཕྲ་རབ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་དོ། །བྱང་ཆུབ་སེམས་དཔས་རྩིས་ཀྱི་ལེའུ་འདི་བསྟན་པའི་ཚེ། རྩིས་པ་ཆེན་པོ་སྲིད་སྒྲུབ་དང་། ཤཱཀྱའི་ཚོགས་ཐམས་ཅད་ཀྱང་ཚིམ་ཞིང་མགུ་ལ་ཡི་རངས་ཏེ་ངོ་མཚར་རྨད་དུ་བྱུང་བ་ཐོབ་ནས། དེ་དག་ཐམས་ཅད་ཀྱང་གོས་རེ་རེ་ཞིག་བཞག་སྟེ་གོས་དང་རྒྱན་ལྷག་མ་གཞན་བྱང་ཆུབ་སེམས་དཔའ་ལ་ཡོན་དུ་ཕུལ་ལོ། །དེ་ནས་རྩིས་པ་ཆེན་པོ་སྲིད་སྒྲུབ་ཀྱིས་ཚིགས་སུ་བཅད་པ་འདི་དག་སྨྲས་སོ། །འདི་ལྟར་བྱེ་བ་བརྒྱ་ན་ཐེར་འབུམ་དེ་བཞིན་དུ། །ཁྲག་ཁྲིག་དང་ནི་གཏམས་པའི་རྒྱུད་དང་དེ་བཞིན་དུ། །དཀྲིགས་པ་མི་འཁྲུགས་བདག་གི་ཤེས་ཐུག་དེ་གོང་མིན། །མཚུངས་པ་མེད་ཀྱི་མཁྱེན་པ་རྩིས་ལ་དེ་བས་ལྷག །ཡང་ཀྱེ་ཤཱཀྱ་དག་སྟོང་གསུམ་དག་གི་རྡུལ་དང་རྩྭ་དང་ནགས་ཚལ་དང་། །སྨན་དང་ཆུ་ཡི་ཐིགས་པ་ཇི་སྙེད་ཡོད་པ༌ཡང་། །ཧུང་ཞེས་བྱ་བ་གཅིག་ལ་འདི་ཡིས་རྩི་ནུས་ན། །ལྔ་བརྒྱ་ཙམ་དག་གི་ལྟ་ངོ་མཚར་ཅི་ཞིག་ཆེ། །དེ་ནས་ལྷ་དང་མི་བརྒྱ་སྟོང་དག །ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་། །ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ནས་ལྷའི་བུ་དག་གིས་ཀྱང་ཚིགས་སུ་བཅད་པ་འདི་དག༌བརྗོད་དོ། །དུས་གསུམ་སེམས་ཅན་མ་ལུས་ཇི་སྙེད་གང་ཡོད་པའི། །སེམས་དང་སེམས་བྱུང་འདུ་ཤེས་རྣམ་པར་རྟོག་པ་དག །མཆོག་དང་ཐ་མ་དེ་བཞིན་རྒྱ་ཆུང་ཡངས་པ་དག །ཐམས་ཅད་སེམས་ཀྱི་འགྱུར་བ་གཅིག་གིས་རབ་ཏུ་མཁྱེན། །དགེ་སློང་དག་དེ་ལྟར་ཤཱཀྱ་གཞོན་ནུ་དེ་དག་ཐམས་ཅད་ཟིལ་གྱིས་ནོན་པར་གྱུར་ཏེ། བྱང་ཆུབ་སེམས་དཔའ་འབའ་ཞིག་ཁྱད་པར་དུ་འཕགས་པར་གྱུར་ཏོ། །དེའི་རྗེས་ལ་མཆོངས་པ་དང་། རྐྱལ་དང་། བང་ལ་སོགས་པ་ཐམས་ཅད་ལའང་བྱང་ཆུབ་སེམས་དཔའ་ཉིད་ཁྱད་པར་དུ་འཕགས་པར་གྱུར་ནས། ནམ་མཁའི་དཀྱིལ་ནས་ལྷའི་བུ་དག་གིས་ཚིགས་སུ་བཅད་པ་འདི་དག་སྨྲས་སོ། །བརྟུལ་ཞུགས་དཀའ་ཐུབ་སྡོམ་པའི་ཡོན་ཏན་དང་། །བསྐལ་པ་བྱེ་བར་བཟོད་དུལ་བྱམས་སྟོབས་ཀྱིས། །ལུས་དང་སེམས་ནི་ཅི་ནས་ཡང་མཛད་པས། །དེ་ཡི་ཤུགས་ཀྱི་ཁྱད་པར་མཉན་པར་གྱིས། །སེམས་ཅན་མཆོག་འདི་གྲོང་ཁྱེར་འདི་ན་བཞུགས་པར་ཁྱེད་ཀྱིས་མཐོང་། །འོན་ཀྱང་འདི་ནི་ཕྱོགས་བཅུའི་འཇིག་རྟེན་ཁམས་རྣམས་ཐམས་ཅད་དུ། །སྐད་ཅིག་གཅིག་ལ་རིན་ཆེན་གསེར་དང་མཆོད་པ་སྣ་ཚོགས་ཀྱིས། །རྒྱལ་བ་དཔག་ཏུ་མེད་པ་དག་ལ་མཆོད་པ་མཛད་དུ་བཞུད། །འོན་ཀྱང་རྫུ་འཕྲུལ་དེ་འདྲ་བརྙེས་པ་དེ། །བྱོན་ཏམ་བཞུད་པར་ཁྱེད་ཀྱིས་ཡོང་མི་ཤེས། །ཇི་ཙམ་ཞུགས་ཞེས་དེ་ལ་ཅི་ཞིག་བསྐྱེད། །འདི་ནི་མཚུངས་པ་མེད་ཀྱིས་རིམ་གྲོ་སྐྱེད། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་དེ་དག་གིས་སྨྲས་པ། གཞོན་ནུ་འདི་ལ་སྟོབས་ཀྱི་ཁྱད་པར་ཅི་ཡོད་པའང་སད་པར་བྱའོ། །དེ་ནས་བྱང་ཆུབ་སེམས་དཔའ་ཕྱོགས་གཅིག་ཏུ་འདུག་ནས། ཤཱཀྱ་གཞོན་ནུ་ལྔ་བརྒྱ་པོ་དེ་དག་ཀྱང་དུས་གཅིག་ཏུ་སོ་སོ་ནས་སྟོབས་འགྱེད་པར་གྱུར་ཏེ། ཤཱཀྱ་གཞོན་ནུ་སུམ་ཅུ་རྩ་གཉིས་ཤིག་འཚོགས་ནས་བྱང་ཆུབ་སེམས་དཔའ་ལ་བརྒལ་བ་ལྟར་ཆས་ཏེ་འཁོད་དོ། །དེའི་ནང་ནས་དགའ་བོ་དང་། ཀུན་དགའ་བོ་གཉིས་ཀྱིས་བྱང་ཆུབ་སེམས་དཔའ་ལ་སྟོབས་བརྒལ་བའི་ཕྱིར་དྲུང་དུ་ཕྱིན་པ་དང་། བྱང་ཆུབ་སེམས་དཔའི་ལག་གིས་རེག་མ་ཐག་ཏུ་དེ་གཉིས་ཀས་ཀྱང་བྱང་ཆུབ་སེམས་དཔའི་མཐུ་དང་གཟི་བརྗིད་མ་བཟོད་དེ་ས་ལ་འགྱེལ་ལོ། །

དེའི་འོག་ཏུ་ཤཱཀྱ་གཞོན་ནུ༌ལྷ་སྦྱིན་ང་རྒྱལ་ཅན་མཐུ་སྙེམས་པ་དེ་སྟོབས་ཀྱི་ང་རྒྱལ་དང་ཤཱཀྱའི་ང་རྒྱལ་གྱིས་སྙེམས་ལ། བྱང་ཆུབ་སེམས་དཔའ་ལ་སྔོ་ཞིང་ཐམས་ཅད་དང་ལྡན་པའི་ལྟད་མོ་པའི་དཀྱིལ་འཁོར་ལ་བསྐོར་ཏེ། བསྒྱིངས་ནས་བྱང་ཆུབ་སེམས་དཔའ་ལ་སྟོབས་བརྒལ་ཏོ། །དེ་ནས་བྱང་ཆུབ་སེམས་དཔས་མ་བརྟབས་ཤིང་མི་རིངས་པར་སྟངས་བཟང་པོར་གཞོན་ནུ༌ལྷ་སྦྱིན་ལག་པ་གཡས་པས་བཏེག་སྟེ་བསད་པའི་བློས་མ་ཡིན་གྱི་ང་རྒྱལ་བཅག་པའི་ཕྱིར་བྱམས་པའི་སེམས་ཀྱིས་ནམ་མཁའ་ལས་བསྐོར་བསྐོར་ཏེ་སའི་སྟེང་དུ་བོར་ཡང་དེའི་ལུས་ལ་གནོད་པར་གྱུར་པ་མེད་དོ། །དེ་ནས་བྱང་ཆུབ་སེམས་དཔས་སྨྲས་པ། དེ་ལྟ་བུ་གནོད་པར་འགྱུར༌བས་ཆོག་གིས་ཐམས་ཅད་གཅིག་ཏུ་འདུས་ཏེ་བརྒལ་བར་གྱིས་ཤིག །དེ་ནས་དེ་དག་ཐམས་ཅད་ང་རྒྱལ་གྱིས་རློམ་ཞིང་བྱང་ཆུབ་སེམས་དཔའ་ལ་རུབ་པར་གྱུར་ཏོ། །དེ་ནས་དེ་དག་བྱང་ཆུབ་སེམས་དཔའ་ལ་རེག་མ་ཐག་ཏུ་བྱང་ཆུབ་སེམས་དཔའི་དཔལ་དང་གཟི་བརྗིད་དང་ལུས་ཀྱི་མཐུ་མ་བཟོད་དེ། བྱང་ཆུབ་སེམས་དཔས་རེག་པ་ཙམ་གྱིས་ས་ལ་འགྱེལ་བར་གྱུར་ཏོ། །

དེ་ནས་ལྷ་དང་མི་བརྒྱ་སྟོང་དེ་དག་ཨེ་མ་ཨ་ལ་ལ་ཞེས་ཟེར་ཞིང་། ཅ་ཅོ་དང་ག་ཞའི་སྒྲ་བརྒྱ་སྟོང་ཕྱུང་ངོ་། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་མེ་ཏོག་གི་ཆར་ཆེན་པོ་མངོན་པར་ཕབ་སྟེ། དབྱངས་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་གྱད་ཆེན་སྟོབས་པོ་ཆེ་འདྲ་ལ། །ཅིག་ཅར་སྐྱེས་བུའི་མཆོག་ལ་རུབ་གྱུར་ཀྱང་། །རེག་པ་ཙམ་གྱིས་ས་ལ་འགྱེལ་བར་འགྱུར། །ལྷུན་པོ་རི་རབ་རྡོ་རྗེའི་འཁོར་ཡུག་དང་། །ཕྱོགས་བཅུ་དག་ན་རི་གཞན་གང་ཡོད་པ། །ལག་པས་མཉེས་ཤིང༌རྨེག་མེད་ཕྱེར་རློག་ན། །མི་ལུས་སྙིང་པོ་མེད་པ་མཚར་ཅི་ཆེ། །འདི་ནི་ཤིང་དབང་མཆོག་དྲུང་སྡང་བའི་གྱད། །དཔུང་བཅས་བདུད་རྣམས་རྒྱལ་མཚན་སྡེར་བཅས་པ། །ནག་པོའི་རྩ་ལག་བྱམས་པའི་སྟོབས་ཀྱིས་འཇོམས། །བླ་མེད་བྱང་ཆུབ་ཞི་བར་འཚང་ཡང་རྒྱ། །དེ་ལྟར་བྱང་ཆུབ་སེམས་དཔའ་དེ་གཅིག་པུ་ཁྱད་པར་དུ་འཕགས་པར་གྱུར་ཏོ། །དེ་ནས་ཤཱཀྱ་ལག་ན་བེ་ཅོན་ཅན་གྱིས་ཤཱཀྱ་གཞོན་ནུ་དེ་དག་ལ་འདི་སྐད་ཅེས་སྨྲས་སོ། །འདི་དག་ནི་སད་ཀྱང་ཟིན། མཐོང་ཡང་ཟིན་གྱིས་ད་ནི་འཕོང༌ཞིག་བསྟན་པར་གྱིས་ཤིག །དེའི་ཚེ་ཀུན་དགའ་བོས་རྒྱང་གྲགས་གཉིས་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ལྷ་སྦྱིན་གྱིས་རྒྱང་གྲགས་བཞིའི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་མཛེས་དགའ་བོས་རྒྱང་གྲགས་དྲུག་གི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །དེའི་འོག་ཏུ་ཤཱཀྱ་ལག་ན་བེ་ཅོན་ཅན་གྱིས༌རྒྱང་གྲགས་བརྒྱད་ཀྱི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་སོ། །

དེ་ནས་བྱང་ཆུབ་སེམས་དཔས་རྒྱང་གྲགས་བཅུའི་ཕ་རོལ་ཏུ་ལྕགས་ཀྱི་རྔ་གཅིག་འབེན་དུ་བཙུགས་ཏེ། དེའི་དྲུང་དུ་ཤིང་ཏ་ལ་བདུན་དངར་ནས་དེའི་ཕ་རོལ་ཏུ་ལྕགས་ཀྱི་ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་གཅིག་བཙུགས་སོ། །དེ་ནས་ཀུན་དགའ་བོས་རྒྱང་གྲགས་གཉིས་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆོད་ཀྱི་ལ་ཕོག་པར་མ་ནུས་སོ། །ལྷ་སྦྱིན་གྱིས་རྒྱང་གྲགས་བཞིའི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །མཛེས་དགའ་བོས་རྒྱང་གྲགས་དྲུག་གི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། དེ་ཕན་ཆད་ཀྱི་ལ་ཕོག་པར་མ་ནུས་སོ། །

ལག་ན་བེ་ཅོན་ཅན་གྱིས༌རྒྱང་གྲགས་བརྒྱད་ཀྱི་ཕ་རོལ་ན་རྔའི་འབེན་འདུག་པ་ལ་འཕངས་ན་ཕོག་པར་གྱུར་ཏེ། ཐལ་བྱུང་དུ་ཕྱིན་ནས་དེ་ཕན་ཆད་ཀྱི་ལ་ཕོག་པར་མ་ནུས་སོ། །དེ་ནས་བྱང་ཆུབ་སེམས་དཔའ་ལ་གཞུ་གང་དང་གང་བྱིན་པ་དེ་དག་ལ་ལ་ནི་གཞུ་རྒྱུད་ཆད། ལ་ལ་ནི་ཆག་ནས་བྱང་ཆུབ་སེམས་དཔས་སྨྲས་པ། གྲོང་ཁྱེར་འདི་ན་གཞུ་གཞན་ལ་ལ་བདག་གིས་བདུང་བཟོད་པའམ། ལུས་ཀྱི་སྟོབས་དང་མཐུ་བཟོད་པ་མཆིས་སམ། རྒྱལ་པོས་སྨྲས་པ། བུ་ཡོད་དོ། །གཞོན་ནུས་སྨྲས་པ། ལྷ་དེ་ལྟ་བུ་གང་ན་མཆིས། རྒྱལ་པོས་སྨྲས་པ། བུ་ཁྱོད་ཀྱི་མེས་སེང་གེའི་ཟ་འགྲམ་ཞེས་བྱ་བ་བྱུང་སྟེ། དེའི་གནམ་རུ་ད་ལྟར་ལྷ་ཁང་ན་སྤོས་དང་ཕྲེང་བས་མཆོད་དེ། དེ་ནི་སུས་ཀྱང་བདུང་བར་ཡང་མི་ནུས་ན། དགང་བར་ལྟ་སྨོས་ཀྱང་ཅི་དགོས་པ་ཞིག་ཡོད་དོ། །

བྱང་ཆུབ་སེམས་དཔས་སྨྲས་པ། ལྷ་དེ་བླང་དུ་གསོལ། སད་པར་བགྱིའོ། །དེ་ནས་གཞུ་དེ་བླངས་ཏེ་འོངས་པ་དང་། ཤཱཀྱ་གཞོན་ནུ་ཐམས་ཅད་ཀྱིས་ནན་ཏན་གྱི་མཆོག་གིས་བསྒྲིམས་ཀྱང་གཞུ་དེ་བདུང་བར་ཡང་མ་ནུས་ན་དགང་བར་ལྟ་སྨོས་ཀྱང་ཅི་དགོས་ཏེ་མ་ནུས་སོ། །དེ་ནས་གཞུ་དེ་ཤཱཀྱ་ལག་ན་བེ་ཅོན་ཅན་གྱིས་ལུས་ཀྱི་མཐུ་སྟོབས་ཐམས་ཅད་ཕྱུང་སྟེ། གཞུ་དེ་བདུང་བར་བརྒལ་ན་མ་བདུངས་སོ། །དེ་ནས་གཞུ་དེ་བྱང་ཆུབ་སེམས་དཔའ་ལ་བྱིན་ནོ། །དེ་ནས་བྱང་ཆུབ་སེམས་དཔས་གཞུ་དེ་བླངས་ཏེ་སྟན་ལས་མ་ལངས་པར་སྐྱིལ་མོ་ཀྲུང་ཕྱེད་བཅས་ཏེ། ལག་པ་གཡོན་པས་བཟུང་ནས་ལག་པ་གཡས་པའི་སོར་མོ་གཅིག་གིས་བདུངས་སོ། །གཞུ་དེ་དེ་ལྟར་བདུངས་པའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་དུ་སྒྲ་མངོན་པར་གྲག་པར་གྱུར་ཏོ། །གྲོང་ཁྱེར་གྱི་མི་ཐམས་ཅད་ཀྱང༌སྐྲག་སྐྲག་པོར་གྱུར་ཏེ། གཅིག་ལ་གཅིག་འདྲི་ཞིང་འདི་ལྟར་ཅིའི་སྒྲ་ཞིག་ཅེས་ཟེར་རོ། །

དེ་ལ་ལ་ལ་ན་རེ། གཞོན་ནུ་དོན་གྲུབ་ཀྱིས་མེས་ཀྱི༌གནམ་རུ་བདུངས་ནས་དེའི་སྒྲ་བྱུང་བ་ནི་འདི་ཡིན་ནོ་ཞེས་ཟེར་རོ། །དེ་ནས་ལྷ་དང་མི་བརྒྱ་སྟོང་དག་ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་། རྒྱལ་པོ་ཟས་གཙང་མ་དང་། སྐྱེ་བོའི་ཚོགས་ཕལ་པོ་ཆེ་དེ་དག་ལ་ཚིགས་སུ་བཅད་དེ་སྨྲས་པ། གདན་ལས་མ་བཞེངས་བརྩལ་བ་མ་མཆིས་སུ། །ཐུབ་པས་གནམ་རུ་འདི་འདྲ་བདུངས་པ་ལས། །གདོན་མི་འཚལ་བར་དགོངས་པ་རྫོགས་གྱུར་ཏེ། །བདུད་ཀྱི་སྡེ་བཅོམ་མྱུར་དུ་ཐུབ་པར་བྱོན། །དགེ་སློང་དག་དེ་ལྟར་བྱང་ཆུབ་སེམས་དཔས་མདའ་བླངས་ནས་གཞུ་དེ་དང་སྦྱར་ཏེ་བཀང་ནས་འཕངས་པའི་མཐུ་སྟོབས་ཀྱིས་ཀུན་དགའ་བོའི་འབེན་དུ་རྔ་བཙུགས་པ་དང་། ལྷ་སྦྱིན་གྱི་འབེན་དུ་རྔ་བཙུགས་པ་དང་། མཛེས་དགའ་བོའི་འབེན་དུ་རྔ་བཙུགས་པ་དང་། ལག་ན་བེ་ཅོན་ཅན་གྱི་འབེན་དུ་རྔ་བཙུགས་པ་དེ་དག་ཐམས་ཅད་ལས་ཐལ་ནས་རྒྱང་གྲགས་བཅུའི་ཕ་རོལ་ཏུ་བདག་གི་འབེན་ལྕགས་ཀྱི་རྔ་བཙུགས་པ་དང་། ཤིང་ཏ་ལ་བདུན༌དངར་བ་དང་། ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་ལས་ཀྱང་ཐལ་ཏེ་མདའ་དེ་ས་ལ་ཟུག་ནས་མི་སྣང་བར༌ནུབ་པར་གྱུར་ཏོ། །

ས་ཕྱོགས་གང་དུ་མདའ་དེ་ཟུག་སྟེ་ནུབ་པའི་ས་ཕྱོགས་དེར་ཁྲོན་པ་ལྟ་བུའི་ཁུང་ཞིག་བྱུང་ནས་ད་ལྟར་ཡང་མདའི་ཁྲོན་པ་ཞེས་བྱ་བ་ཡིན་ནོ། །དེའི་ཚེ་ལྷ་དང་མི་བརྒྱ་སྟོང་དག །ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །ཤཱཀྱའི་ཚོགས་དེ་དག་ཐམས་ཅད་ཀྱང་ངོ་མཚར་རྨད་དུ་བྱུང་བ་ཐོབ་སྟེ། ཀྱེ་ངོ་མཚར་ཏོ། །འདིས་ནི་བསླབས་ཀྱང་མ་བསླབས་པར་རྩལ་གྱི་ཤེས་པ་དེ་ལྟ་བུ་དང་ལྡན་པ་ནི་ངོ་མཚར་ཆེའོ་ཞེས་ཟེར་རོ། །ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་རྒྱལ་པོ་ཟས་གཙང་མ་དང་། སྐྱེ་བོའི་ཚོགས་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །དེ་ལྟར་ངོ་མཚར་ཡང་ཅི་ཆེ་སྟེ། དེ་ཅིའི་ཕྱིར་ཞེ་ན། འདི་ནི༌ས་ཡི་སྙིང་པོ་སྔོན་གྱི་སངས་རྒྱས་གདན་ལ་བཞུགས། །ཞི་གནས་གནམ་རུ་ཐོགས་ཤིང་སྟོང་པ་བདག་མེད་མདའ་རྣམས་ཀྱིས། །ཉོན་མོངས་དགྲ་རྣམས་བཅོམ་སྟེ་ལྟ་བའི་དྲ་བ་དྲལ་ནས་སུ། །བྱང་ཆུབ་དམ་པ་ཞི་བ་རྡུལ་མེད་མྱ་ངན་མེད་པ་འཐོབ། །དེ་སྐད་ཅེས་སྨྲས་ནས། ལྷའི་བུ་དེ་དག་གིས་བྱང་ཆུབ་སེམས་དཔའ་ལ་ལྷའི་མེ་ཏོག་དག་གིས་མངོན་པར་གཏོར་ཏེ་དོང་ངོ་། །

དེ་བཞིན་དུ་མཆོངས་པ་དང་། ཡི་གེ་དང་། ལག་རྩིས་དང་། རྩིས་དང་། གྲངས་དང་། གྱད་ཀྱི་འཛིན་སྟངས་དང་། རྒྱང་ནས་ཕོག་པ་དང་། བང་དང་། ཚར་དང་། རྐྱལ་དང་།འཕོང་དཔྱད་དང་། གླང་པོ་ཆེའི་གཉར་ཞོན་པ་དང་། རྟ་རྩལ་དང་། ཤིང་རྟའི་ཐབས་དང་། མདའ་གཞུའི་ཐབས་དང་། བརྟན་པ་དང་། མཐུ་དང་། དཔའ་བ་དང་། འགྱེད་སྟོབས་དང་། ལྕགས་ཀྱུས་སྒྱུར་ཐབས་དང་། ཞགས་པའི་ཐབས་དང་། མདུན་དུ་བསྣུར་བ་དང་། ཕྱིར་བསྣུར་བ་དང་། བཟུར་བ་དང་། འཛིན་སྟངས་དང་། གོམ་སྟབས་དང་། ཐོར་ཚུགས་དང་། གཅད་པ་དང་། དྲལ་བ་དང་། དབུག་པ་དང་། གཞིག་པ་དང་། གཤེག་པ་དང་། མི་འཆོར་བར་འཕོག་པ་དང་། གནད་དུ་འཕོག་པ་དང་། སྒྲ་གྲག་པར་འཕོག་པ་དང་། ཚབས་ཆེ་བ་དང་། ཆོ་ལོའི་རྩེད་མོ་དང་། སྙན་དངགས་སྦྱར་བ་དང་། ལམ་དང་། རི་མོ་དང་། གཟུགས་དང་། གཟུགས་ཀྱི་ལས་དང་། ཐབས་ཀྱི་དཔྱད་དང་། མེའི་ལས་དང་། རོལ་མོའི་དབྱངས་སྒྲ་དང་། གར་དང་། གླུ་དང་། ཡི་གེ་ཀླག་པའི་མིག་འོར་དང་། གཏམ་དང་། བཞད་གད་དང་། རྩེད་མོ་དང་། བྲོ་དང་། སྒེག་པ་དང་། ཕྲེང་བ་བརྒྱུ་བ་དང་། རླུང་ཡབ་གཡོབ་པ་དང་། ནོར་བུ་ཚོན་གྱིས་བསྒྱུར་བ་དང་། གོས་ཚོན་གྱིས་བསྒྱུར་བ་དང་། མིག་འཕྲུལ་གྱི་ཆོ་ག་དང་། རྨི་ལམ་གྱི་དཔྱད་དང་། བྱའི་སྐད་དང་། བུད་མེད་ཀྱི་མཚན་དང་། སྐྱེས་པའི་མཚན་དང་། གླང་པོ་ཆེའི་མཚན་དང་། རྟའི་མཚན་དང་། བ་ལང་གི་མཚན་དང་། རའི་མཚན་དང་། ལུག་གི་མཚན་དང་། ཁྱིའི་མཚན་དང་། ཤེས་གསལ་དང་། སྒྲ་ངེས་པར་སྦྱོར་བ་དང་། ང་རོ་སྒྱུར་བ་དང་། སྔོན་གྱི་རབས་དང་། སྔོན་བྱུང་བ་དང་། རིག་བྱེད་དང་། ལུང་བསྟན་པ་དང་། ངེས་པའི་ཚིག་དང་། ཡི་གེ་ལྕི་ཡང་དང་། ཚིག་བསྡེབ་པ་དང་། མཆོད་སྦྱིན་གྱི་ཆོ་ག་དང་། སྐར་མའི་ལུགས་དང་། གྲངས་ཅན་གྱི་ལུགས་དང་། རྣལ་འབྱོར་གྱི་ལུགས་དང་། ལས་ཀྱི་ཚོགས་དང་། བྱེ་བྲག་པའི་ལུགས་དང་། ནོར་གྱི་རིག་པ་དང་། ཕུར་བུའི་ལུགས་དང་། ཆུའི་ལུགས་དང་། ལྷ་མ་ཡིན་གྱི་ལུགས་དང་། བྱ་དང་རི་དྭགས་ཀྱི་སྐད་དང་། གཏན་ཚིགས་ཀྱི་རིག་པ་དང་། རྒྱ་སྐྱེགས་ཀྱི་འཁྲུལ་འཁོར་དང་། སྤྲ་ཚིལ་གྱི་ལས་དང་། འདྲུབ་ཤུར་དང་། བརྐོ་བཞོག་དང་། ལོ་མ་དྲ་བ་དང་། སྤོས་སྦྱར་བ་ལ་སོགས་པའི་སྒྱུ་རྩལ་འཇིག་རྟེན་པ་དང་ལྷ་དང་མི་ལས་འདས་པ་ཐམས་ཅད་ལའང་བྱང་ཆུབ་སེམས་དཔའ་འབའ་ཞིག་ཁྱད་པར་དུ་འཕགས་པར་གྱུར་ཏོ། །

དེའི་ཚེ་ཤཱཀྱ་ལག་ན་བེ་ཅོན་ཅན་གྱིས་རང་གི་བུ་མོ་ས་འཚོ་མ། བྱང་ཆུབ་སེམས་དཔའ་ལ་ཕུལ་ལོ། །རྒྱལ་པོ་ཟས་གཙང་མས་ཀྱང་། དེ་རིམ་གྱིས་བག་མར་བླངས་ཏེ་བྱང་ཆུབ་སེམས་དཔའ་ལ་ཕུལ་ལོ། །དེ་ན་བྱང་ཆུབ་སེམས་དཔས་འཇིག་རྟེན་དང་མཐུན་པ་ཙམ་དུ་བྱ་བའི་ཕྱིར་བུད་མེད་བརྒྱད་ཁྲི་བཞི་སྟོང་གི་ནང་དུ་འདུག་སྟེ། དགའ་ཞིང་རྩེ་ལ་ཡོངས་སུ་སྤྱོད་པ་སྟོན་ཏོ། །བུད་མེད་བརྒྱད་ཁྲི་བཞི་སྟོང་དེ་དག་ཐམས་ཅད་ཀྱི་ནང་ན། ཤཱཀྱའི་བུ་མོ་ས་འཚོ་མ་བཙུན་མོའི་མཆོག་ཏུ་དབང་བསྐུར་བར་གྱུར་ཏོ། །དེ་ན་ཤཱཀྱའི་བུ་མོ་ས་འཚོ་མ་གྱོས་སྒྱུག་གམ་ནང་མི་གང་མཐོང་ཡང་རུང་སྟེ། གདོང་མི་སྦེད་དོ། །དེ་དག་ཀྱང་དེ་ལ་བག་སར་མོ་ནི་ཞུམ་ཞུམ་པོར་འདུག་པའི་རིགས་ན། འདི་ནི་རྟག་ཏུ་མ་གཡོགས་སོ་ཞེས་འཕྱ་སྨོད་ཅིང་མི་སྙན་པར་ཟེར་རོ། །

དེའི་ཚེ་ཤཱཀྱའི་བུ་མོ་ས་འཚོ་མས་གཏམ་དེ་ཐོས་ནས་ནང་མི་རྣམས་ཀྱི་མདུན་དུ་འདུག་སྟེ། ཚིགས་སུ་བཅད་པ་འདི་དག་སྨྲས་སོ། །འདུག་དང་འགྲེང་དང་འཆག་པ་ལ། །འཕགས་པ་དག་ནི་མ་གཡོགས་མཛེས། །ནོར་བུ་རིན་ཆེན་འོད་གསལ་བ། །རྒྱལ་མཚན་རྩེ་མོར་གསལ་ན་མཛེས། །འཕགས་པ་འགྲོ་ནའང་མཛེས་པ་སྟེ། །འོང་ནའང་དེ་བཞིན་མཛེས་པ་ཡིན། །འགྲེང༌བ་འམ་དེ་བཞིན་འདུག་པ་དང་། །ཐམས་ཅད་དུ་ཡང་འཕགས་པ་མཛེས། །འཕགས་པ་སྨྲ་ནའང་མཛེས་པ་སྟེ། །མི་སྨྲར་འདུག་ཀྱང་དེ་བཞིན་མཛེས། །དཔེར་ན་ཀ་ལ་པིང་ཀ་ནི། །མཐོང་དང་སྒྲ་ཐོས་དེ་བཞིན་ནོ། །ཀུ་ཤའི་གོས་ནི་གྱོན་པ་དང་། །གོས་ངན་གྱོན་དང་ལུས་རིད་པ། །དེ་ནི་རང་གི་གཟི་ཡིས་མཛེས། །ཡོན་ཏན་ལྡན་པ་ཡོན་ཏན་བརྒྱན། །གང་ལ་སྡིག་པ་མེད་གྱུར་པ། །འཕགས་པ་ཀུན་ཏུ་དགེ་བ་ཡིན། །བྱིས་པ་སྡིག་པ་བྱེད་པ་ནི། །ཇི་སྙེད་བརྒྱན་ཀྱང་མཛེས་མ་ཡིན། །གང་དག་སྙིང་ལ་སྡིག་པ་ཡོད་ཅིང་ཚིག་འཇམ་པ། །དེ་དག་དུག་གི་བུམ་པར་བདུད་རྩི་བླུགས་པ་བཞིན། །བྲག་གི་སེར་ག་རྩུབ་པ་ལྟ་བུར་ནང་ཡང་རྩུབ། །དེ་འདྲ་དེ་དག་སྦྲུལ་གྱི་ཁ་ལ་ཉུག་པ་བཞིན། །དེས་པ་དེ་དག་གན་དུ་ཀུན་འོང་ཀུན་ཕྱག་འཚལ། །འབབ་སྟེགས་ཐམས་ཅད་ལྟ་བུར་འགྲོ་བ་ཀུན་གྱི་གསོས། །འཕགས་པ་དག་ནི་རྟག་ཏུ་འོ་ཞོས་བཀང་བུམ་འདྲ། །བདག་ཉིད་དག་པ་དེ་འདྲ་མཐོང་ན་བཀྲ་ཤིས་དགེ །གང་དག་སྡིག་པའི་གྲོགས་པོ་ཡུན་རིང་ཡོངས་སྤོང་ཞིང་། །དགེ་བའི་བཤེས་གཉེན་རིན་པོ་ཆེས་ནི་ཡོངས་བཟུང་ལ། །སྡིག་པ་རྣམ་སྤོང་སངས་རྒྱས་ཆོས་ལ་མངོན་ཆགས་པ། །དེ་ལྟ་བུ་དག་མཐོང་བ་བཀྲ་ཤིས་འབྲས་བུ་ཡོད། །གང་དག་ལུས་བསྡམས་ལུས་ཀྱི་སྐྱོན་རྣམས་རབ་བསྡམས་དང་། །གང་དག་ཚིག་བསྡམས་རྟག་ཏུ་ཚིག་འཆལ་མེད་གྱུར་ལ། །དབང་པོ་སྦས་ཤིང་ཤིན་ཏུ་བསྡམས་ལ་ཡིད་དང་བ། །དེ་ལྟ་བུ་དག་གདོང་གཡོགས་ཏེ་ནི་ཅི་ཞིག་བྱ། །གལ་ཏེ་ལུས་ལ་གོས་ནི་སྟོང་གིས་གཡོགས་གྱུར་ཀྱང་། །གང་དག་སེམས་བཤུས་ངོ་ཚ་མེད་ཅིང་ཁྲེལ་མེད་དང་། །གང་དག་འདི་འདྲའི་ཡོན་ཏན་མེད་ཅིང་བདེན་ཚིག་མེད། །དེ་དག་སྒྲེན་མོ་བས་ཀྱང་སྒྲེན་མོར་འཇིག་རྟེན་རྒྱུ། །གང་ཞིག་སེམས་སྦས་རྟག་ཏུ་དབང་པོ་བསྡམས་གྱུར་ཅིང་། །བདག་གི་ཁྱོས་ཆོག་སེམས་ཅན་གཞན་ལ་མི་སེམས་པ། །དེ་འདྲ་བ་དག་ཉི་ཟླ་བཞིན་དུ་མ་གཡོགས་སྣང་། །དེ་འདྲ་བ་དག་གདོང་གཡོགས་ཏེ་ནི་ཅི་ཞིག་བྱ། །གཞན་ཡང་དྲང་སྲོང་བདག་ཉིད་ཆེ་དང་གཞན་སེམས་བློ་མཁས་དང་། །དེ་བཞིན་ལྷ་ཚོགས་དག་གིས་ཁོ་མོའི་བསམ་པ་དང་། །ཁོ་མོའི་ཚུལ་ཁྲིམས་ཡོན་ཏན་སྡོམ་དང་བག་ཡོད་མཁྱེན། །དེ་ལྟ་བས་ན་ཁོ་མོས་གདོང་བཀབ་ཅི་ཞིག་དགོས། །དགེ་སློང་དག་རྒྱལ་པོ་ཟས་གཙང་མས་ཤཱཀྱའི་བུ་མོ་ས་འཚོ་མའི་སྤོབས་པ་དང་བསྟན་པའི་ཚིགས་སུ་བཅད་པ་རྣམ་པ་འདི་ལྟ་བུ་འདི་ཐོས་སོ། །ཐོས་ནས་ཀྱང་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། རས་བཅོས་བུ་བཟང་པོ་རིན་པོ་ཆེ་དུ་མས་སྤྲས་པ་ཟུང་གཅིག་དང་།མུ་ཏིག་གི་དོ་ཤལ་སྲང་བྱེ་བ་བརྒྱ་སྟོང་རི་བ་དང་། མུ་ཏིག་དམར་པོ་བཟང་པོས་སྤྲས་པའི་གསེར་གྱི་ཕྲེང་བས་ཤཱཀྱའི་བུ་མོ་ས་འཚོ་མ་ལ་བཀབ་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཁོ་བོའི་བུ་ནི་ཡོན་ཏན་ཅི་འདྲས་བརྒྱན་པ་དང་། །མནའ་མ་རང་གི་ཡོན་ཏན་ཇི་ལྟར་རབ་སྨྲ་བ། །སེམས་ཅན་དག་པ་དེ་གཉིས་ཕྲད་པར་གྱུར་པ་ནི། །མར་དང་མར་གྱི༌ཉིང་ཁུ་ཇི་ལྟར་འདྲ་བ་བཞིན། །སྒྱུ་རྩལ་བསྟན་པའི་ལེའུ་སྟེ་བཅུ་གཉིས་པའོ།། །།

སྟོན་པ་ཐུགས་རྗེ་ཅན་གྱིས་བཙུན་མོ་དྲུག་ཁྲི་བདེན་པ་ལ་བཀོད་ཚུལ་དང་སྐུ་སྲས་དགྲ་གཅན་འཛིན་གྱི་མ་ཡུམ་གྲགས་འཛིན་མ་སྟོན་པ་ལ་ཆགས་ཚུལ་སོགས་ཀྱི་ལོ་རྒྱུས། འདུལ་བ་ལུང་གཞི་ལས་བཏུས།

གང་གི་ཉི་མ་ལ་བྱང་ཆུབ་སེམས་དཔའ་ཕྱིར་བྱུང་བ་དེ་ཉིད་ཀྱི་ཉི་མ་ལ་གྲགས་འཛིན་མ་སེམས་ཅན་དང་ལྡན་པར་གྱུར་ཏོ། །གང་གི་ཚེ་བྱང་ཆུབ་སེམས་དཔའ་དཀའ་བ༌སྤྱད་པ་དེའི་ཚེ་བཙུན་མོ་ཡང་དཀའ་བ་སྤྱད་པ་ལ་ཞུགས་པས་གྲགས་འཛིན་མ་མངལ་ཞུམ་པར་གྱུར་ཏོ། །གང་གི་ཚེ་བཅོམ་ལྡན་འདས་ཀྱིས་དཀའ་བ་སྤྱད་པ་དོན་མེད་པར་ཐུགས་སུ་ཆུད་ནས་ཅི་བདེར་དབུགས་འབྱིན་པ་དང་། ཅི་བདེར་དབུགས་རྔུབ་པ་དང་། འབྲས་ཆན་དང་ཟན་དྲོན་གྱི་ཞལ་ཟས་མང་པོ་གསོལ་ཞིང་། མར་དང་ཏིལ་མར་གྱིས་སྐུ་བྱུགས་ནས་ཆུ་འཇམ་པོས་སྐུ་འཁྲུ་བར་མཛད་པ་དེའི་ཚེ་བཙུན་མོ་ཡང་ཅི་བདེར་དབུགས་འབྱིན་པ་དང་། ཅི་བདེར་དབུགས་རྔུབ་པ་དང་། འབྲས་ཆན་དང་ཟན་དྲོན་གྱི་ཁ་ཟས་མང་པོ་ཟ་ཞིང་། མར་དང་ཏིལ་མར་གྱིས་ལུས་བྱུགས་ནས་ཆུ་འཇམ་པོས་ལུས་འཁྲུ་བར་བྱེད་པ་དེའི་ཚེ་མངལ་དེ་ཡང་སླར་རྒྱས་པར་གྱུར་ཏོ། །

དེའི་མངལ་གྱི་མཚན་མ་སྐྱེས་པར་གྱུར་པ་དང་། ཤཱཀྱ་རྣམས་ཀྱིས༌ཅོ་དྲི་བ་དང་བཅས་པར་སྨྲས་པ། བྱང་ཆུབ་སེམས་དཔའ་དཀའ་ཐུབ་ཀྱི་ནགས་སུ་བཞུད་ནས་ཁྱོད་ཀྱིས་བྱི་ཕྱིན་ཏོ། །དེས་སྨྲས་པ། ཁོ་མོའི་སྡིག་པ་ཞི་བས་བྱི་མ་ཕྱིན་ཏོ། །ཇི་མངོན་ཁྱོད་ཡིད་ཆེས་པར་བྱའོ། །ཇི་ཙམ་ཞིག་ན་དེ་ཁྱེའུ་ཞིག་བཙས་ཏེ། དེ་ཉི་མ་གང་ལ་བཙས་པའི་ཉི་མ་དེ་ཉིད་ལ་ཟླ་བ་སྒྲ་གཅན་གྱིས་ཟིན་ཏོ། །དེ་བཙས་པའི་བཙས་སྟོན་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེའི་ཉེ་དུ་རྣམས་ཀྱིས་སྨྲས་པ། འདི་བཙས་པ་ན་ཟླ་བ་སྒྲ་གཅན་གྱིས་ཟིན་པས་དེ་བས་ན་ཁྱེའུའི་མིང་ནི་སྒྲ་གཅན་ཟིན་དུ་གདགས་སོ་ཞེས་བཏགས་སོ། །གཞོན་ནུ་བཙས་པ་ན་ཤཱཀྱ་རྣམས་ཡང་དང་ཡང་དུ་གླེང་བ་ཁོ་ནར་བྱེད་ནས། དེས་བདེན་པ་གསོལ་བ་བྱས་ཏེ། སྒྲ་གཅན་ཟིན་བཟང་པོ་བྱང་ཆུབ་སེམས་དཔའི་པང་ཚད་ཀྱི་རྡོ་ལ་ཞོན་ནས་རོལ་པ་རྫིང་གི་ནང་དུ་བཅུག་སྟེ། གལ་ཏེ་འདི་བྱང་ཆུབ་སེམས་དཔའ་ལས་སྐྱེས་པ་ཡིན་ན་འཕྱོ་བར་གྱུར་ཅིག༌ཅེས་དེ་བཅུག་པ་དང་། དེ་ཕ་རོལ་དུ་བྱུང་ངོ་། །དེས་ཕ་རོལ་ནས་ཚུ་རོལ་དུ་འོང་བར་གྱུར་ཅིག་ཅེས་སྨྲས་པ་དང་། དེ་ཕ་རོལ་ནས༌ཚུ་རོལ་དུ་འོངས་ནས་དེ་རྣམས་ངོ་མཚར་སྐྱེས་པར་གྱུར་ཏོ། །

གྲགས་འཛིན་མས་སྨྲས་པ། ཤེས་ལྡན་དག་ཇི་ལྟར་བྱང་ཆུབ་སེམས་དཔའ་ལས་སྐྱེས་པ་ཡིན་ཞིང་ཁོ་མོས༌བྱི་མ་ཕྱིན་པར་ཡང་ཡིད་ཆེས་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ལོ་དྲུག་གིས་མངོན་པར་རྫོགས་པར་སངས་རྒྱས་ཏེ་ལོ་བཅུ་གཉིས་འདས་པ་ན་སེར་སྐྱའི་གཞིར་བྱོན་ནས་ཉི་མ་གཅིག་ནི་རྒྱལ་པོའི་ཕོ་བྲང་དུ་གདུགས་ཚོད་གསོལ། ཉི་མ་གཅིག་ནི་བཙུན་མོའི་ནང་དུ་གསོལ་བ་དེའི་ཚེ་གྲགས་འཛིན་མ་འདི་སྙམ་དུ་སེམས་ཏེ། གང་གིས་ན་བཅོམ་ལྡན་འདས་བདག་གིས་དབང་དུ༌འགྱུར་བའི་ཐབས་ལེགས་པ་ཅི་ཞིག་ཡོད་སྙམ་མོ། །སེར་སྐྱའི་གཞི་ན་ཀུན་ཏུ་རྒྱུ་མོ་དབང་དུ་བྱ་བ་ལ་སོགས་པ་ལས་རྣམས་ལ་ཤིན་ཏུ་མཁས་པ་ཞིག་ཡོད་དེ། གྲགས་འཛིན་མས་དེ་ལ༌ཀཱར་ཥཱ་པ་ཎ་ལྔ་བརྒྱ་བྱིན་ནས་ཆེ་ཞེ༌ཀཱར་ཥཱ་པ་ཎ་འདི་རྣམས་ལས་དབང་དུ་བྱ་བ་བྱོས་ལ་སྐུར་ཅིག །དེས་དབང་དུ་བྱ་བའི་ལ་དུ་ཞིག་གྲགས་འཛིན་མ་ལ་བསྐུར་བ་དང་། གྲགས་འཛིན་མས་སྒྲ་གཅན་ཟིན་གྱི་ལག་ཏུ་བྱིན་ནས་སྨྲས་པ། བུ་ཁྱོད་ཀྱི་ཡབ་གང་ཡིན་པ་དེ་ལ་ཕུལ་ཅིག །སངས་རྒྱས་བཅོམ་ལྡན་འདས་རྣམས་ཀྱིས་དེ་ལྟ་བུ་མི་མཁྱེན་པ་དང་། མི་གཟིགས་པ་དང་། ཐུགས་སུ་མི་ཆུད་པ་དང་། རྣམ་པར་མི་རིག་པ་ཅི་ཡང་མི་མངའ་བས་བཅོམ་ལྡན་འདས་ཀྱིས་དགོངས་པ། གྲགས་འཛིན་མ་ལ་མི་སྙན་པ༌གྲག་གིས་དེ་སྤང་བར་བྱའོ་སྙམ་ནས་བཅོམ་ལྡན་འདས་ཀྱིས་སངས་རྒྱས་ལྔ་བརྒྱ་སྤྲུལ་པ་དང་། སྒྲ་གཅན་ཟིན་གྱིས་སངས་རྒྱས་ཐམས་ཅད་ལ་བརྟགས་ནས་བཅོམ་ལྡན་འདས་རྒན་པའི་ངང་ལ་བཞུགས་པ་ལ་ཕུལ་ལོ། །

བཅོམ་ལྡན་འདས་ཀྱིས་བཞེས་ནས་སླར་ཡང་དེ་ལ་བྱིན་ཏེ་སྒྲ་གཅན་ཟིན་གྱིས་ཟོས་སོ། །བཅོམ་ལྡན་འདས་ཀྱིས་ཡོན་བསྔོ་བ་མཛད་ནས་གཤེགས་པ་དང་། བཅོམ་ལྡན་འདས་ཀྱི་རྗེས་བཞིན་གཞོན་ནུ་སྒྲ་གཅན་ཟིན་བཟང་པོ་འབྲང་ནས་སླར་བཟློག་ཀྱང་ངུས་ཏེ་སླར་ལྡོག་ཏུ་མ་བཏུབ་བོ། །བཅོམ་ལྡན་འདས་ཀྱིས་དགོངས་པ། སེམས་ཅན་འདི་ནི་སྲིད་པ་ཐ་མ་པ་ཡིན་པས་འདིས་ཁྱིམ་གྱི་གནས་པས་གནས་མི་ཕོད་དོ་སྙམ་མོ། །སྒྲ་གཅན་ཟིན་གྱིས་བཅོམ་ལྡན་འདས་ཀྱི་ཞལ་འཚོས་པ་དང་། རྒྱལ་པོ་ཟས་གཙང་བཙུན་མོའི་བུད་མེད་དང་ཤཱཀྱ་རྣམས་དང་བཅས་པ་ངོ་མཚར་སྐྱེས་ནས། གྲགས་འཛིན་མ་ལ་ལྷག་པར་མངོན་པར་དགའ་བར་གྱུར་ཏོ། །དེ་ནས་གྲགས་འཛིན་མའི་མི་སྙན་པ་ཐམས་ཅད་ཀྱི་ཐམས་ཅད་དུ་མེད་པར་གྱུར་ཏོ། །བཅོམ་ལྡན་འདས་ཀྱིས་གཞོན་ནུ་སྒྲ་གཅན་ཟིན་བཟང་པོ་རབ་ཏུ་དབྱུང་བར་བརྩམས་པ། རྒྱལ་པོ་ཟས་གཙང་གིས་ཐོས་ནས་དེ་བཅོམ་ལྡན་འདས་ཀྱི་དྲུང་དུ་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་གཞོན་ནུ་སྒྲ་གཅན་ཟིན་བཟང་པོ་རབ་ཏུ་འབྱིན་པར་མཛད་པར་ངེས་པར་ལྟ་ན། དེང་གི་གདུགས་གཅིག་ལ་མཆིས་སུ་གསོལ་ཅིག་དང་། འདི་ལ་དེའི་བར་དུ་བདག་གིས་མཆོད་པ་བགྱིའོ། །རྒྱལ་པོ་ཟས་གཙང་གིས་སྒྲ་གཅན་ཟིན་གྱི༌སྐྱེ་བོའི་དུས་སྟོན་ཆེན་པོ་བྱས་སོ། །

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་གཞོན་ནུ་སྒྲ་གཅན་ཟིན་རབ་ཏུ་བྱུང་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལས་མཉན་ནས་གཞོན་ནུ་སྒྲ་གཅན་ཟིན་བཟང་པོ་རབ་ཏུ་བྱུང་ངོ་། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་སྒྲ་གཅན་ཟིན་གྱིས་སྐྱེ་བོའི་ཚོགས་ཆེན་པོའི་དབུས་སུ་བཅོམ་ལྡན་འདས་ལ་དུས་ཞལ་འཚོས་པར་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་མེ་ཏོག་གི་ཕྲེང་བས་ངོ་ཤེས་པར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་རི་འོར་ན་ཁྱིམ་བདག་ཅིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་གིས་བུ་ལོན་དེད་པ་དང་ནོར་འཕྲོག་པ་སྐྱེས་ཀྱིས་ཟོང་ཐོགས་ཏེ་རྒྱ་མཚོ་ཆེན་པོར་འཇུག་ཏུ་འགྲོའོ། །

དེས་སྨྲས་པ། རྗེའི་སྲས་དེ་བཞིན་དུ་མཛོད་ཅིག །དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་ལས་དེ་ཉིད་དུ་ཤིའོ། །དེ་ནས་དེའི་ཆུང་མས་མྱ་ངན་བསང་བ་བྱས་ནས་ལག་ལས་ཀྱི་མཐུ་དང་གཉེན་གྱི་མཐུས་བསྣུན་བསྐྱངས་ཏེ་བསྐྱེད་དོ། །དེ་དང་ཧ་ཅང་ཡང་མི་རིང་བ་ཞིག་ན་ཐ་ག་པ་རང་གི་བཟོ་ལ་མཁས་པ་ཞིག་གནས་ཏེ། དེ་རང་གི་བཟོས་ཐམས་ཅད་གྲུབ་པར་འགྱུར་རོ། །དེས་དེའི་རང་གི་བཟོས་འབྱོར་པ་འགྲུབ་པ་མཐོང་ནས་སྨྲས་པ། ཐ་གའི་ལས་ནི་མཆོག་ཡིན་གྱི། རྒྱ་མཚོར་འཇུག་པ་ནི་དེ་ལྟ་བུ་མ་ཡིན་ཏེ། དེར་སོང་ན་ཚུལ་མ་ཡིན་པས་སྡུག་བསྔལ་བར་འགྱུར་རོ། །

དེས་ཐ་ག་པ་དེ་ལ་སྨྲས་པ། མིང་པོ་དཔོན་པོ་འདི་ཡང་ཐ་ག་པའི་ལས་སློབས་ཤིག །དེས་སྨྲས་པ། རུང་གིས་དེ་བཞིན་དུ་བྱའོ་ཞེས་དེས་དེ་ལ་བསླབ་པར་བརྩམས་པ་ན་དེ་སྒྲིན་པོ་གཡེར་བག་ཅན་ཞིག་པས་དེས་དུས་ཐུང་ངུ་ཞིག་གིས་ཐ་ག་པའི་ལས་རྣམས་ལོབས་སོ། །ཐ་ག་པ་དེ་ནི་བཟང་པོས་འཁྲུ་བ་དང་། བཟང་པོ་གྱོན་པ་དང་། ཁ་ཟས་བཟང་པོ་ཟ་ནས་ཁྱེའུ་དེས་སྨྲས་པ། ཞང་པོ་ཁྱོད་ཀྱང་ལས་འདི་ཁོ་ན་བྱེད་ལ་བདག༌ཅག་ཀྱང་འདི་ཁོ་ན་བྱེད་པ་ལས་ཅིའི་ཕྱིར་ཁྱོད་ནི་བཟང་པོས་འཁྲུ། བཟང་པོ་གྱོན། ཟས་བཟང་པོ་ལ་ཡོངས་སུ་ལོངས་སྤྱོད་ལ། བདག་ནི་མི་འགྲུབ། དེས་སྨྲས་པ། ཚ་བོ་བདག་ནི་ལས་གཉིས་བྱེད་དེ། ཉིན་པར་ནི་ཐ་ག་པའི་ལས་སོ། །ནུབ་མོ་ནི་རྐུན་པོ་བྱེད་དོ། །དེས་སྨྲས་པ། ཞང་པོ་གལ་ཏེ་དེ་ལྟ་ན་བདག་ཀྱང་རྐུན་པོ་བགྱིའོ། །ཚ་བོ་ཁྱོད་ཀྱིས་རྐུན་པོ་བྱེད་མི་ནུས་སོ། །ཞང་པོ་ནུས་སོ། །དེས་བསམས་པ། རེ་ཞིག་འདི་བགམ་པར་བྱའོ་སྙམ་ནས་དེ་ཁྲིད་དེ་ཚོང་འདུས་སུ་སོང་ནས་དེས་དེར་རི་བོང་ཞིག་ཉོས་ཏེ་དེ་ལ་གཏད་ནས་ཚ་བོ་རེ་ཞིག་སྲེགས་ཤིག་དང་། དེའི་བར་དུ་བདག་ཁྲུས་བྱས་ནས་འོང་ངོ་ཞེས་དེ་ཁྲུས་བྱེད་དུ་སོང་བ་དང་། དེས་དེ་མྱུར་བ་མྱུར་བ་ཞིག་ཏུ་བསྲེགས་ནས༌གཟུགས་གཅིག་ཟོས་སོ། །ཐ་ག་པ་དེ་ཁྲུས་བྱས་ནས་འོངས་ཏེ་ཚ་བོ་རི་བོང་བསྲེགས་སམ། ཞང་པོ་བསྲེགས་སོ། །འོ་ན་བལྟའོ། །དེས་དེ་བྱིན་པ་དང་རྐང་ལག་གསུམ་མཐོང་ནས་སྨྲས་པ། ཚ་བོ་རི་བོང་འདིའི་གཟུགས་བཞི་པ་ཤོས་གར་སོང་།

དེས་སྨྲས་པ། ཞང་པོ་རི་བོང་ལ་གཟུགས་བཞི་པ་ཡོད་ཀྱང་མེད་ན་གར་འགྲོ། དེས་བསམས་པ། རེ་ཞིག་བདག་ཀྱང་རྐུན་མ་ཡིན་ན། འདི་ནི་རྐུན་ཆེན་ཡིན་ནོ་སྙམ་ནས། དེས་དེ་དང་རི་བོང་གཟུགས་གསུམ་པོ་ཁྱེར་ཏེ་ཆང་འཚོང་གི་ཁྱིམ་ཞིག་ཏུ་ཞུགས༌ནས་ཚ་བོ་ཆང་བཏུང་ངམ། བཏུང་ངོ་། །དེ་གཉིས་ཀྱིས་འཐུངས་ནས་ཐ་ག་པས་སྨྲས་པ། ཚ་བོ་ཆང་རིན་ནི་གྱ་གྱུས་དགང་ངོ་། །དེས་སྨྲས་པ། ཞང་པོ་སུས་འཐུངས་པ་དེ་གྱ་གྱུ་བྱེད་གྲང་། བདག་གིས་ནི་མ་འཐུངས་པས་གྱ་གྱུ་བྱར་ཅི་ཡོད། ཐ་ག་པ་དེས་བསམས་པ། འདི་ནི་རྐུན་ཆེན་ཡིན་པས་ལྷན་ཅིག་རྐུན་མ་བྱ་ནུས་སོ་སྙམ་ནས་དེ་དེ་དང་ལྷན་ཅིག་ཁྱིམ་འབིགས་པའི་རྐུན་མ་ལ་ཞུགས་ཏེ། དེ་གཉིས་ཀྱིས་ཁྱིམ་ཕུག་ནས་ཐ་ག་པ་དེས་བུ་གར་མགོ་བཅུག་པ་དང་དེས་སྨྲས་པ། ཞང་པོ་ཁྱོད་རྐུན་མ་བྱེད་ཀྱང་ཐབས་མི་ཤེས་ཏེ། ཐོག་མར་རྐང་པ་གཞུག་པར་བྱའི་མགོ་ནི་མ་ཡིན་ནོ། །གལ་ཏེ་མགོ་བཅད་པར་གྱུར་ན་ངོ་ཤེས་པས་རིགས་ཐམས་ཅད་བརླག་པར་འགྱུར་གྱིས་རྐང་པ་ཆུག་ཅིག །དེས་རྐང་པ་བཅུག་པ་དང་། ཚོར་ནས་རྐུན་པོ་རྐུན་པོ་ཞེས་ཀུ་ཅོ་བཏོན་ནས་སྐྱེ་བོའི་ཚོགས་ཆེན་པོས་རྐང་པ་གཉིས་ནས་བཟུང་ནས་འཐེན་ཏོ། །དེ་ནི་གཅིག་པུ་ཡིན་པས་སླར་འདྲེན་མ་ནུས་ནས་མགོ་བཅད་དེ་ཁྱེར་ཏེ་སོང་ངོ་། །བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པུ་གར་ཞུགས་པ་ལས་ཟིན་ན། དེའི་མགོ་གཅིག་གིས་བཀུམ་ནས་འཚལ་ཏེ་མཆིས་སོ། །རྒྱལ་པོས་སྨྲས་པ། ཤེས་ལྡན་དག་མགོ་བཅད་དེ་ཁྱེར་ཏེ་སོང་བ་གང་ཡིན་པ་དེ་ནི་རྐུན་ཆེན་ཡིན་ནོ། །དེང་ལ་རོ་མགོ་རྡུམ་དེ་ལམ་པོ་ཆེའི་བཞི་མདོར་ཞོག་སྟེ་ཕྱོགས་དབེན་པར་འཁོད་དང་། དེ་ལས་བཟུང་སྟེ་ཆོ་ངེ་འདེབས་པ་ཡོད་ན་དེ་ནི་རྐུན་པོ་ཡིན་གྱིས་དེ་ཟུངས་ཤིག །དེ་ནས་རྒྱལ་པོའི་མི་དེ་རྣམས་ཀྱིས་རོ་མགོ་རྡུམ་དེ་ལམ་པོ་ཆེའི་བཞི་མདོར་བཞག་ནས་ཕྱོགས་དབེན་པར་བསྡད་དོ། །

རྐུན་པོ་ཅིག་ཤོས་དེས་བསམས་པ། བདག་གིས་ཞང་པོའི་མགུལ་ནས་འཇུས་ཏེ་ངུད་མོས་མི་གདབ་པ་ལྟ་མི་སྲིད་དོ་སྙམ་ནས། དེས་བདག་ཉིད་སྨྱོན་པའི་ཆ་བྱད་དུ་ཞུགས་ནས་བུད་མེད་ཀྱི་མགུལ་ནས་ཀྱང་འཇུས། སྐྱེས་པ་དང་། ཤིང་རྟ་དང་། རྟ་དང་། ཁྱུ་མཆོག་དང་། མ་ཧེ་དང་། ར་དང་། ཁྱིའི་མགུལ་ནས་ཀྱང་འཇུ་བར་བརྩམས་ནས་གང་གི་ཚེ་འཇིག་རྟེན་གྱིས་སྨྱོས་པར་ཤེས་པ་དེའི་ཚེ་རོ་མགོ་རྡུམ་པང་དུ་བླངས་ཏེ་ཇི་ཙམ་འདོད་ཀྱི་བར་དུ་ངུས་ནས་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། སྨྱོན་པ་ཞིག་གིས་རོ་མགོ་རྡུམ་དེ་པང་དུ་བླངས་ཏེ་ཇི་ཙམ་འཚལ་གྱི་བར་དུ་ངུས་ནས་མཆིས་སོ། །རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་མ་ཅིག་ཤོས་ཡིན་ན། དེ་མ་བཟུང་བ་མ་ལེགས་པ་ཞིག་བྱས་ཀྱིས་དེ༌ཟུངས་ཤིག །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོ་ལ་བཀུར་སྟི་མི་བྱ་བ་ལྟ་མི་སྲིད་དོ་སྙམ་ནས་དེས་ཤིང་རྟ་པའི་ཆ་བྱད་དུ་བྱས་ནས་ཤིང་རྟ་ཤིང་སྐམ་གྱིས་བཀང་སྟེ། ཕྱོགས་དེར་འོངས་ནས་དེའི་སྟེང་དུ་ཤིང་རྟ་ཤིང་སྐམ་གྱིས་བཀང་བ་བཞག་སྟེ་གླང་བཀྲོལ་ནས་ཤིང་རྟ་མེས་བཏང་སྟེ་སོང་བ་དང་། མེ་དེས་རོ་མགོ་རྡུམ་དེ་ཡང་ཚིག་གོ །རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་རྐུན་པོ་གཅིག་པོ་དེ་བསྲེགས་ལགས་སོ། །སུས་དེ་དག་གིས་ཇི་ལྟར་གྱུར་པ་རྣམས་སྨྲས་པ་དང་རྒྱལ་པོས་སྨྲས་པ། ཤེས་ལྡན་དག་ཤིང་རྟ་པ་གང་ཡིན་པ་དེ་ཉིད་རྐུན་པོ་ཅིག་ཤོས་ཡིན་ཏེ། དེ་མ་བཟུང་བ་མ་ལེགས་པ་ཞིག་བྱས་ཀྱིས༌ཟུངས་ཤིག །རྐུན་པོ་ཅིག་ཤོས་ཀྱིས་བསམས་པ། བདག་གིས་ཞང་པོ་ལ་དུར་ཁྲོད་དུ་མཚུན་གྱི་བྱ་བ་མ་བྱས་པ་ནི་མི་སྲིད་དོ་སྙམ་ནས། དེས་བྲམ་ཟེའི་ཆ་བྱད་དུ་བྱས་ནས་ཁྱིམ་ནས་ཁ་སློང་ཞིང་བརྒྱུས་ཏེ་བསླངས་པ་དེ་ལས་དེའི་ཕངས་ཤ་ལྔ་བྱས་ནས་དུར་ཁྲོད་དུ་བཞག་སྟེ་སོང་ངོ་། །

རྒྱལ་པོའི་མི་རྣམས་ཀྱིས་རྒྱལ་པོ་ལ་སྨྲས་པ། ལྷ་བྲམ་ཟེ་ཞིག་གིས་ཁྱིམ་ནས་སློང་ཞིང་བརྒྱུས་ཏེ་ཕྱོགས་གང་དུ་རོ་མགོ་རྡུམ་བསྲེགས་པ་དེར་དེས་ཕངས་ཤ་ལྔ་བགྱིས་སྟེ་བཞག་སྟེ་མཆིས་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་པོ་ཅིག་ཤོས་ཡིན་ན། དེ་མ་བཟུང་བ་ནི་མ་ལེགས་པ་ཞིག་བྱས་སོ། །རྐུན་པོ་ཅིག་ཤོས་ཀྱིས་བསམ་པ། བདག་གིས་ཞང་པོའི་རུས་པ་རྣམས་གང་གཱར་མི་འདོར་བ་ལྟ་མི་སྲིད་དོ་སྙམ་ནས། དེས་ཐོད་པ་ཅན་གྱི་ཆ་བྱད་དུ་བྱས་ཏེ་ཕྱོགས་དེར་སོང་ནས་དེས་དེར་ལུས་ཐལ་བས་བྱུགས་ཤིང་རུས་པ་དང་ཐལ་བས་ཐོད་པ་བཀང་ནས་གང་གཱར་ཕོ་སྟེ་སོང་ངོ་། །རྒྱལ་པོའི་མི་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་པ་དང་། རྒྱལ་པོས་སྨྲས་པ། ཤེས་ལྡན་དག་དེ་ཉིད་རྐུན་པོ་ཅིག་ཤོས་ཡིན་ན་དེ་མ་བཟུང་བ་ནི་མ་ལེགས་པ་ཞིག་བྱས་སོ། །མདོར་ན་ཁྱེད་འདུག་ཅིག་དང་། ངས་དེ་གཟུང་ངོ་ཞེས་རྒྱལ་པོས་གང་གཱའི་གྲུའི་ནང་དུ་སྐྱེད་མོས་ཚལ་བྱེད་དུ་བཅུག་སྟེ། འགྲམ་གཉིས་སུ་སྲུང་མའི་མི་དག་བཀོད་ནས་རྒྱལ་པོའི་བུ་མོ་གཟུགས་བཟང་བ། མཛེས་པ། ལྟ་ན་སྡུག་པ་ཞིག་ཆུའི་སྐྱེད་མོས་ཚལ་དེར་བཞག་སྟེ་བསྒོ་བ། གལ་ཏེ་ཁྱོད་ལ་འགའ་ཞིག་གིས་བཟུང་དང་སྐད་ཕྱུངས་ཤིག །སྲུང་མའི་མི་རྣམས་ལ་ཡང་བསྒོ་བ། གང་གི་ཚེ་སྐད་འབྱིན་པ་དེའི་ཚེ་ཁྱེད་ཅག་ཆུའི་སྐྱེད་མོས་ཚལ་དུ་དེངས་ཤིག །དེ་ན་གལ་ཏེ་མི་འགའ་ཞིག་ཡོད་པ་དང་། དེ་བཟུང་ལ་ང་ལ་ཕུལ་ཅིག །རྐུན་པོ་ཅིག་ཤོས་ཀྱིས་བསམས་པ། བདག་གིས་རྒྱལ་པོའི་བུ་མོ་དང་ལྷན་ཅིག་དགའ་མགུར་མ་སྤྱད་དུ་མི་གཏོང་ངོ་སྙམ་ནས་དེ་གང་གཱའི་འབབ་ཕྱོགས་ཞིག་ཏུ་འདུག་སྟེ། དེས་དེར་རྫེའུ་སྟོང་པ་ཞིག༌ཏུ་ཆུ་བསྐུར་བར་བརྩམས་སོ། །གཅིག་བསྐུར་བ་དང་སྲུང་མའི་མི་རྣམས་ཀྱིས་རྐུན་པོའོ་སྙམ་ནས་བསྙགས་ཏེ་དེ་དག་གིས་དེ་ལ་ཐལ་མོ་གཅིག་བསྣུན་ནས་བཅག་གོ །གཉིས་པ་ཤོས་བསྐུར་བ་དང་། དེ་ཡང་བཅག་གོ །གསུམ་པ་ཤོས་བསྐུར་བ་དང་། དེ་ཡང་བཅག་ནས་སྲུང་མ་དག་ན་རེ་འདི་དག་ནི་རྫེའུ་སྟོང་པ་ཆུས་ཁྱེར་བ་ཡིན་ནོ་ཞེས་བག་བོར་ཏེ་འདུག་གོ །དེ་ནས་རྐུན་པོ་ཅིག་ཤོས་པོ་དེས་རྫེའུ་ཞིག་གི་ནང་དུ་མགོ་བཅུག་ནས་རྒྱུན་ཕྱོགས་སུ་བརྐྱལ་ཏེ། ཕྱོགས་དེར་ཕྱིན་པ་དང་དེ་ནས་གྲུ་ལ་འཛེགས་ནས་བུ་མོ་ལ་སྨྲས་པ། ཁྱོད་བསད་ད་རེ་སྒྲ་མ་འབྱིན་ཅིག །དེ་སྐྲག་ནས་ཅང་མི་སྨྲ་བར་འདུག་པ་དང་། དེ་དེ་དང་ལྷན་ཅིག་དགའ་མགུར་སྤྱད་ནས་སོང་ངོ་། །དེས་ངུ་བར་བརྩམས་ཏེ། ཤེས་ལྡན་དག་རྐུན་པོ་ཅིག་ཤོས་ཀྱིས་ཁོ་མོ་ལ་དགའ་མགུར་སྤྱད་ནས་སོང་ངོ་། །སྲུང་མ་རྣམས་ཀྱིས་སྨྲས་པ། གང་གི་ཚེ་དགའ་མགུར་སྤྱད་པ་དེའི་ཚེ་ཅང་མི་སྨྲ་བར་འདུག་ལ། གང་གི་ཚེ་དགའ་མགུར་སྤྱད་ནས་སོང་བ་དེའི་ཚེ་དུས་ན་ད་གང་དུ་བཙལ་བར་བྱ། སྲུང་མ་རྣམས་ཀྱིས་རྒྱལ་པོ་ལ་ཇི་ལྟར་གྱུར་པ་སྨྲས་སོ། །

རྒྱལ་པོས་སྨྲས་པ། དེ་མ་བཟུང་བ་ནི་མ་ལེགས་པ་ཞིག་བྱས་སོ། །བུ་མོ་དེ་རྐུན་པོ་དང་ལྷན་ཅིག་དགའ་མགུར་སྤྱད་པས་སེམས་ཅན་དང་ལྡན་པར་གྱུར་ཏེ། དེ་ཟླ་བ་བརྒྱད་དམ་དགུ་འདས་པ་ན་ཁྱེའུ་ཞིག་བཙས་སོ་ཞེས་རྐུན་པོ་ཅིག་ཤོས་ཀྱིས་ཐོས་ནས་དེས་བསམས་པ། བདག་གི་བུ་བཙས་པའི་དགའ་སྟོན་མ་བྱས་པར་མི་བཏང་ངོ་སྙམ་ནས། དེས་ནང་ཀོར་མའི་ཆ་བྱད་དུ་བྱས་ནས་རྒྱལ་པོའི་ཕོ་བྲང་ནས་ཕྱིར་བྱུང་སྟེ་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་ལྷའི་ཞལ་ནས་ཚོང་རྡལ་དུ་ཕྲོག་རློམ་གྱིས་ཤིག་ཅེས་བཀའ་སྩལ་ཏོ། །དེ་རྣམས་ཀྱིས་བསམས་པ། རྒྱལ་པོའི་དཔོན་པོ་བཙས་པས་དེས་ན་བདག་ཅག་ཚོང་རྡལ་དུ་ཕྲོག་རློམ་བྱེད་དུ་བཅུག་གོ་སྙམ་ནས། དེ་རྣམས་ཕྲོག་རློམ་བྱ་བར་བརྩམས་པ་ན་སྒྲ་མཐོན་པོ་དང་སྒྲ་ཆེན་པོ་བྱུང་ནས་རྒྱལ་པོས་སྨྲས་པ་དེ་ཅི་ཡིན། བློན་པོ་རྣམས་ཀྱིས་རྒྱས་པར་སྨྲས་སོ། །

དེས་སྨྲས་པ། གལ་ཏེ་དེ་ལྟ་ན་ང་ཡང་དེས་བསླུས་པར་གྱུར་གྱིས། རྒྱལ་སྲིད་དོར་བའམ་དེ་ཆད་པས་གཅད་པ་ཞིག་བྱའོ། །སྙམ་དུ་བསམས་ནས། དེར་འཁོར་གྱི་ཁྱམས་རྩིག་ཏུ་བཅུག་སྟེ། དུས་ཆུང་ངུ་ཞིག་བསྡད་ནས་དེས་བློན་པོ་རྣམས་ལ་བསྒོ་བ། ཤེས་ལྡན་དག་ཡུལ་འཁོར་དུ་དྲིལ་འདི་སྐད་དུ་སྒྲོགས་སུ་ཆུག་ཅིག །ཡུལ་འཁོར་ན་སྐྱེས་པ་ཇི་སྙེད་གནས་པ་དེ་དག་ཐམས་ཅད་སྙད་མ་འདོགས་པར༌འཁོར་གྱི་ཁྱམས་སུ་འདུས་ཤིག །སུ་མ་འདུས་པ་དེ་ནི་ཆད་པས་གཅད་དོ་ཞེས་སྒྲོགས་ཤིག །བློན་པོ་རྣམས་ཀྱིས་དྲིལ་སྒྲོགས་སུ་བཅུག་ནས་ཡུལ་འཁོར་ན་གནས་པའི་སྐྱེས་པ་ཐམས་ཅད་འདུས་པ་དང་། དེ་ནས་རྒྱལ་པོས་ཁྱེའུ་དེ་ལ་མེ་ཏོག་གི་ཕྲེང་བ་ཞིག་བྱིན་ནས་བསྒོ་བ། ཁྱོད་ཀྱི་ཕ་གང་ཡིན་པ་དེ་ལ་བྱིན་ཅིག །སྲུང་མའི་སྐྱེས་པ་རྣམས་ལ་བསྒོ་བ། ཁྱེའུ་འདིས་སུ་ལ་མེ་ཏོག་ཕྲེང་བ་བྱིན་པ་དེ་ཁྱེད་ཅག་གིས་ཟུང་ལ་ང་ལ་ཕུལ་ཅིག །དེ་ནས་ཁྱེའུ་དེ་མེ་ཏོག་གི་ཕྲེང་བ་དེ་ཁྱེར་ནས༌སྐྱེ་བོའི་ཚོགས་ལ་རྟོག་ཅིང་རྒྱུ་བ་ན་དེས་རྐུན༌པོ་ཅིག་ཤོས་པོ་དེ་མཐོང་ངོ་། །

སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པ་ཡིན་པས་དེས་དེ་ལ་མེ་ཏོག་ཕྲེང་བ་བྱིན་པ་དང་། རྒྱལ་པོའི་མི་རྣམས་ཀྱིས་རྐུན་པོ་ཅིག་ཤོས་པོ་དེ་བཟུང་ནས་རྒྱལ་པོ་ལ་ཕུལ་ལོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་འདི་ལ་ཇི་ལྟར་བསྒྲུབ་པར་བྱ། དེ་རྣམས་ཀྱིས་སྨྲས་པ། ལྷ་དགུམ་ལགས༌སོ། །རྒྱལ་པོས་སྨྲས་པ། ཤེས་ལྡན་དག་སྐྱེས་བུ་འདི་ལྟ་བུའི་དཔའ་བོ་ག་ལ་གསད། འདི་ལ་སྤྱན་རས་ཀྱིས༌བཙའ་བར་བྱའོ་ཞེས་དེས་བུ་མོ་རྒྱན་ཐམས་ཅད་ཀྱིས་བརྒྱན་ནས་དེ་ལ་ཆུང་མར་བྱིན་ཏེ། རྒྱལ་སྲིད་ཕྱེད་ཀྱང་བགོས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྐུན་པོ་ཅིག་ཤོས་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ཀྱི་དེའི་བུ་གང་ཡིན་པ་དེ་ནི་སྒྲ་གཅན་ཟིན་འདི་ཉིད་ཡིན་ཏེ། དེ་ན་ཡང་ང་ལ་འདིས་མེ་ཏོག་གི་ཕྲེང་བས་ངོ་ཤེས་སོ། །ད་ལྟར་ཡང་འདིས་ང་ལ་དུས་ངོ་ཤེས་པར་བྱས་སོ། །དགེ་སློང་དག་དེ་ལྟ་བས་ན་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པས་ལས་ཀྱི་གནས་པ་ལ་གོམས་པར་བྱའོ། །གྲགས་འཛིན་མས་བསམས་པ། གལ་ཏེ་སྒྲ་གཅན་ཟིན་གྱི་ཡབ་ཕོ་བྲང་དུ་གཤེགས་དང་། ཇི་ལྟར་ཡང་སླར་གཤེགས་པར་མི་འགྱུར་བ་དེ་ལྟ་བུར་སྤྱད་པར་བྱའོ་སྙམ་ནས། དེ་ནས་བདག་ཉིད་དང་། ས་འཚོ་མ་དང་། རི་དྭགས་སྐྱེས་ལ་སོགས་པ་བུད་མེད་དྲུག་ཁྲི་རྒྱན་སྣ་ཚོགས་ཀྱིས་བརྒྱན་ཅིང་ཤིན་ཏུ་དྲི་ཞིམ་པོའི་མེ་ཏོག་གི་ཕྲེང་བ་དང་། བདུག་པས་བསྒོས་པའི་གོས་རྣམས་ཀྱིས་བཀླུབས་སོ། །

དེ་ནས་བཅོམ་ལྡན་འདས་ཀྱིས་སྔ་དྲོ་ན་བཟའ་ཤམ་ཐབས་མནབས་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ་འདུལ་བའི་སྐྱེ་བོ་ལ་གཟིགས་ནས་ཕོ་བྲང་གི་ནང་དུ་ཞུགས་སོ། །དེ་ནས་གྲགས་འཛིན་མ་དང་། རི་དྭགས་སྐྱེས་དང་། ས་འཚོ་མ་ལ་སོགས་ཏེ་བུད་མེད་དྲུག་ཁྲི་གཟུགས་དང་། ལང་ཚོ་དང་། དྲེགས་པའི་རྒྱགས་པས་ཟིན་ཅིང་ཡིད་ལ་གཅགས་པས་གཡེན་སྤྱོ་ཞིང་བསྐྱོད་པ་ན་གསེར་གྱི་འོག་པག་ལྷོད་པར་བཅིངས་པ་མང་པོ་འཁྲོལ་ཞིང་སྒྲ་འབྱིན་ལ། འཛུམ་པའི་གླུ་དབྱངས་སྙན་པ་དང་། མིག་དང་སྨིན་མ་སྐྱོད་ཅིང་ནུ་མ་དང་། ཡན་ལག་རྣམས་གསལ་བར་སྟོན་པ། བུད་མེད་ཀྱི་ཚུལ་གྱིས་སྟེག་ཆོས་རྣམས་བསྟན་ཏོ། །

དེ་ནས་བཅོམ་ལྡན་འདས་ཀྱིས་འདི་སྙམ་དུ་དགོངས་ཏེ། གལ་ཏེ་གདུགས་ཚོད་གསོལ་ན་འདུལ་བའི་སྐྱེ་བོའི་དུས་ལས་ཀྱང་འདས་པར་འགྱུར་ལ། བུད་མེད་འདི་རྣམས་ཀྱང་འདོད་ཆགས་ཀྱིས་གདུངས་པས་བདེན་པའི་སྣོད་དུ་མི་འགྱུར་གྱིས་འདི་ལྟར་སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་མ་ལ་ངས་ཕོ་བྲང་དུ་རྫུ་འཕྲུལ་གྱི་ཆོ་འཕྲུལ་བསྟན་པས་དད་པར་བྱའོ་སྙམ་དུ་དགོངས་ཏེ། ཤར་ཕྱོགས་ཀྱི་སྟེང་གི་བར་སྣང་ལ་མངོན་པར་འཕགས་ནས་སྤྱོད་ལམ་རྣམ་པ་བཞི་མཛད་དེ། འདི་ལྟ་སྟེ་འཆག་པ་དང་། བཞེངས་པ་དང་། བཞུགས་པ་དང་། མནལ་བ་མཛད་དོ། །མེའི་ཁམས་ལ་ཡང་སྙོམས་པར་འཇུག་པར་མཛད་དེ། མེའི་ཁམས་ལ་སྙོམས་པར་ཞུགས་པ་ན་སངས་རྒྱས་བཅོམ་ལྡན་འདས་ཀྱི་སྐུ་ལས་འོད་ཟེར་རྣམ་པ་སྣ་ཚོགས་དག་འབྱིན་པར་མཛད་དེ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་དག་གོ །གཞན་ཡང་ཆོ་འཕྲུལ་ཟུང་དུ་སྟོན་པར་བྱེད་དེ། སྐུའི་སྨད་ནས་འབར་བར་མཛད་ལ་སྐུའི་སྟོད་ནས་ཆུ་གྲང་མོའི་རྒྱུན་འབེབས་པར་མཛད་དེ། སྐུའི་སྟོད་ནས་འབར་བར་མཛད་ལ་སྐུའི་སྨད་ནས་ཆུ་གྲང་མོའི་རྒྱུན་འབེབས་པར་མཛད་དོ། །ཤར་ཕྱོགས་ལ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ནོ། །ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ༌བཞི་བསྟན་ནས་རྫུ་འཕྲུལ་གྱི་ཆོ་འཕྲུལ་མངོན་པར་འདུ་མཛད་པ་སླར་བསྡུས་ཏེ། དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །

དེ་ནས་བུད་མེད་དེ་རྣམས་ཀྱིས་བཅོམ་ལྡན་འདས་ཀྱི་རྫུ་འཕྲུལ༌གྱི་ཆོ་འཕྲུལ་དག་མཐོང་ནས་དད་པར་གྱུར་ཏེ། ཤིང་རྩ་བ་ནས་བཅད་པ་བཞིན་དུ་བཅོམ་ལྡན་འདས་ཀྱི་ཞབས་ལ་གཏུགས་ཏེ་ཆོས་མཉན་པའི་ཕྱིར་སྤྱན་སྔ་ན་འཁོད་དོ། །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་མཁྱེན་ནས། གང་ཐོས་པས་འཕགས་པའི་བདེན་པ་བཞི་སོ་སོར་ཡང་དག་པར་ཁོང་དུ་ཆུད་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། ས་འཚོ་མ་དང་། རི་དྭགས་སྐྱེས་ལ་སོགས་པ་བུད་མེད་དྲུག་ཁྲིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །

གྲགས་འཛིན་མ་ནི་ལྷག་པར་འདོད་ཆགས་ཀྱིས་ཟིལ་གྱིས་ནོན་པས་བདེན་པ་མཐོང་བར་མ་བྱས་ཏེ། དེ་འདི་སྙམ་དུ་སེམས་ཏེ། མ་ལ་བདག་གིས་བཅོམ་ལྡན་འདས་རོའི་སྲེད་པས་དབང་དུ་བྱའོ་སྙམ་དུ་བསམས་ནས། རང་ཉིད་ཀྱིས་བཅོམ་ལྡན་འདས་ཀྱི་ཆེད་དུ་བཟའ་བ་དང་བཏུང་བ་དག་གཡོས་ནས་བདག་རང་གི་ལག་ནས་བཅོམ་ལྡན་འདས་ལ་འབུལ་བར་བྱའོ་ཞེས་པ་དགེ་སློང་རྣམས་ཀྱིས་ཐོས་ནས་བཅོམ་ལྡན་འདས་ལ་གསོལ་བ། བཙུན་པ་བཅོམ་ལྡན་འདས་ལ་གྲགས་འཛིན་མ་ནི་རང་གི་ལག་ནས་བགྱིས་པའི་རོའི་སྲེད་པས་དབང་དུ༌བགྱི་བར་འཚལ་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ང་སྔོན་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་པས་རོ་སོ་སོར་ཉམས་སུ་མྱོང་ཞིང་རོ་སོ་སོའི་ཆགས་པ་ཉམས་སུ་མྱོང་བ་ལས་ད་ལྟར་ང་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་ཏེ། རོ་སོ་སོར་ཉམས་སུ་མྱོང་ཡང་རོ་ལ་སོ་སོར་ཆགས་པར་འགྱུར་བའི་ཉམས་སུ་མྱོང་བ་མེད་ན། ད་ང་ལ་གྲགས་འཛིན་མས་རོའི་སྲེད་པས་ཇི་ལྟར་དབང་དུ་བྱ། དགེ་སློང་རྣམས་ཐེ་ཚོམ་སྐྱེས་ཏེ་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་གྲགས་འཛིན་མས་དབང་དུ་བགྱི་བའི་སླད་དུ་ལ་དུས་དབང་དུ་བགྱི་བར་བརྩམས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ད་ལྟར་གྱི་འབའ་ཞིག་ཏུ་མ་ཟད་ཀྱི་ཇི་ལྟར་འདིས་འདས་པའི་དུས་ན་ཡང་དགའ་བར་འགྱུར་བས་དབང་དུ་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་རྡལ་མེད་པའི་དགོན་པའི་གནས་མེ་ཏོག་དང་། འབྲས་བུ་དང་། ཆུ་དང་། རྩ་བ་ཕུན་སུམ་ཚོགས་པ་ཞིག་ན་དྲང་སྲོང་དཀའ་ཐུབ་དྲག་པ་རྩ་བ་དང་། འབྲས་བུ་དང་། ཆུ་ལ་ལོངས་སྤྱོད་པ། པགས་པ་དང་ལོ་མ་གྱོན་པ་ཞིག་གནས་ཏེ། དེས་མངོན་པར་ཤེས་པ་ལྔ་མངོན་སུམ་དུ་བྱས་པས་དེ་ལ་རི་དྭགས་གདུག་པ་རྣམས་ཀྱང་འདྲིས་པའི་གནས་པས་བསྟི་གནས་ན་གནས་སོ། །

དེ་ཕྱོགས་གཞན་ཞིག་ཏུ་གཅི་བའི་ཕྱིར་སོང་བ་ན་རི་དྭགས་མོ་ཞིག་རྗེས་བཞིན་རྗེས་བཞིན་དུ་འབྲེང་ངོ་། །དེས་ཁུ་བ་དང་བཅས་པར་གཅིས་པ་དེ་རི་དྭགས་མོ་དེས་འཐུངས་ནས་ལྕེས་མོ་མཚན་ལ་བལྡགས་སོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པ་ཡིན་པས་སེམས་ཅན་དང་ལྡན་པར་གྱུར་ཏོ། །དེ་འབྱུང་བའི་དུས་སུ་ཕྱོགས་དེར་འོངས་ནས་ཁྱེའུ་ཞིག་བྱུང་བ་དང་དེས་དྲི་བསྣམས་ན་རིས་མི་མཐུན་པའི་སེམས་ཅན་ཡིན་ཏེ། སྐྲག་ནས་གཅིན་རྟུག་ཤོར་ནས་བོར་ཏེ་སོང་ངོ་། །ཇི་ཙམ་ཞིག་ན་དྲང་སྲོང་དེ་ཕྱོགས་དེར་ཕྱིན་པ་དང་། དེས་ཁྱེའུ་དེ་མཐོང་ནས་འདི་སུའི་བུ་ཡིན་སྙམ་པའི་བསམ་པ་ལ་ཞུགས་པ་ན། བདག་ཉིད་ཀྱི་ཡིན་པར་མཐོང་ནས་དེས་དེ་བསྟི་གནས་སུ་ཁྱེར་ཏེ་བསྣུན་བསྙོད་ནས་བསྐྱེད་དེ། དེ་ཆེན་པོར་གྱུར་པ་དང་མགོ་ལ་རི་དྭགས་ཀྱི་རྭ་སྐྱེས་པར་གྱུར་ཏེ། དེ་ལ་རི་དྭགས་ཀྱི་རྭ་འདྲ་བ་ཡོད་པས་དྲང་སྲོང་རྭ་ཅན་དྲང་སྲོང་རྭ་ཅན་ཞེས་བྱ་བར་གྱུར་ཏོ། །

ཇི་ཙམ་ན་དྲང་སྲོང་དེ་ནད་ཀྱིས་ཐེབས་པར་གྱུར་ནས། དྲང་སྲོང་དེ་དང་མཐུན་པའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏེ། གང་གི་ཚེ་དེ་འཆི་བ་ལ་ཐུག་པའི་ཚོར་བ་སྐྱེས་ནས་རིང་པོ་མི་ཐོགས་པར་འཆི་བར༌འགྱུར་བ་དེའི་ཚེ་དེས་བུ་དེ་ལ་སྨྲས་པ། བུ་བསྟི་གནས་འདིར་ཕྱོགས་སྣ་ཚོགས་ན་གནས་པའི་དྲང་སྲོང་རྣམས་དུས་དུས་སུ་འོང་གིས་ཁྱོད་ང་ལ་དགའ་བས་དེ་རྣམས་ལ་ཀུན་ཏུ་སྤྱོད་པའི་ཆོས་ཀྱིས་འོངས་པ་ལེགས་སོ་ཞེས་བརྗོད་པས་ཡང་དག་པར་དགའ་བར་བྱ་ཞིང་། སྟན་ལ་མགྲོན་དུ་བོས་ལ་རྩ་བ་དང་། འབྲས་བུ་ཅི་ནུས་པར་སྟོབས་ཤིག་ཅེས་སྨྲས་ནས། བསགས་པ་ཀུན་གྱི་མཐའ་ཟད་ཅིང་། །མཐོན་པོ་ཀུན་གྱི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས་དུས་ཀྱི་ཆོས་དང་ལྡན་པར་གྱུར་ཏོ། །དེས་དེ་དྲང་སྲོང་གི་ཆོས་བཞིན་དུ་བསྲེགས་ཏེ། དེ་ཕ་དང་བྲལ་བའི་མྱ་ངན་གྱིས་ནོན་པས་སྐྱོ་བ་སྐྱེས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེས་དུས་གཞན་ཞིག་ན་ཆུའི་དོན་དུ་བུམ་པ་ཁྱེར་ནས་སོང་བ་ན་ལྷས་ཆར་དབབ་པར་བརྩམས་སོ། །དེ་ཆུས་བུམ་པ་བཀང་ནས་ཁྱེར་ཏེ༌འོང་བ་འགྲེད་ནས་རྡེག་འཆོས་སོ། །དྲང་སྲོང་རྣམས་ནི་མྱུར་དུ་ཁྲོ་བ་ཡིན་པས་དེས་ཆུ་ཉུང་ཞིག་བླངས་ཏེ་གཏོར་ནས་དམོད་པ་བོར་བ་སྤྱོད་པ་ངན་པ་ཅན་ཁྱོད་ཀྱིས་བུམ་པ་ཆུས་བཀང་བ་ཆག་པར་བྱས་ཀྱིས། དེ་ལྟ་བས་ན་ཁྱོད་ཉི་མ་འདི་ནས་བཟུང་སྟེ་ལོ་བཅུ་གཉིས་སུ་ཆར་མི་འབེབས་པར་གྱུར་ཅིག་ཅེས་བྱས་པས་ལྷ་ཆར་མི་འབེབས་པར་གྱུར་ཏོ། །བཱ་རཱ་ཎ་སཱིར་མུ་གེ་ཆེན་པོ་བྱུང་ནས་སྐྱེ་བོའི་ཚོགས་ཀུན་ཏུ་དོང་ངོ་། །

རྒྱལ་པོས་ལྟས་མཁན་རྣམས་བཀུག་སྟེ་སྨྲས་པ། ཤེས་ལྡན་དག་སུ་ཞིག་གི་མཐུས༌ན་ལྷ་ཆར་མི་འབེབས། དེ་རྣམས་ཀྱིས་སྨྲས་པ། དྲང་སྲོང་ཁྲོས་པས་ལགས་སོ། །ཇི་སྟེ་དྲང་སྲོང་དེ་དཀའ་ཐུབ་དེ་ལ་བསྐྱོད་པར་ནུས་ན་ལྷ་དེ་བཞིན་དུ་ཆར་འབེབས་ཀྱི་གཞན་དུ་ན་ནི་མ་ལགས་སོ། །རྒྱལ་པོ་སེམས་ཁོང་དུ་ཆུད་ཅིང་འདུག་པ་དང་། བཙུན་མོ་དང་། བློན་པོ་དང་། གཞོན་ནུ་རྣམས་ཀྱིས་སྨྲས་པ། ལྷ་ཅིའི་སླད་དུ་ཐུགས་མི་དགྱེས། དེས་སྨྲས་པ། དྲང་སྲོང་ཁྲོས་པས་ལྷ་ཆར་མི་འབེབས་ལ་ལྟས་མཁན་རྣམས་ཀྱང་འདི་སྐད་ཅེས་གལ་ཏེ་དྲང་སྲོང་དེ་དཀའ་ཐུབ་དེ་ལས་བསྐྱོད་ན་དེ་བཞིན་དུ་ལྷ་ཆར་འབེབས་ཀྱི། གཞན་དུ་ན་མ་ཡིན་ནོ་ཞེས་ཟེར་ཏེ།དཀའ་ཐུབ་དེ་ལ་སུ་ཞིག་གིས་བསྐྱོད་པར་ནུས་པ་མི་ཤེས་སོ། །

རྒྱལ་པོ་དེའི་བུ་མོ་ཞི་ལྡན་མ་ཞེས་བྱ་བ་དེས་སྨྲས་པ། ལྷ་གལ་ཏེ་དེ་ལྟ་ན་ཐུགས་ལས་ཆུང་ངུར་མཛོད་ཅིག་དང་། བདག་གིས་དྲང་སྲོང་དེ་དཀའ་ཐུབ་དེ༌ལས་ཇི་ནས་ཀྱང་གཡོས་པར་གྱུར་པ་དེ་ལྟར་བགྱིའོ། །དེས་སྨྲས་པ། ཐབས་ཅི་ཞིག་གིས་བྱ། དེས་སྨྲས་པ། བདག་དང་བུད་མེད་གཞན་རྣམས་བྲམ་ཟེ་རྣམས་ལ་གསང་ཚིག་འདོན་དུ་སྩོལ་ཅིག །གྲུ་ཟམ་གྱི་བསྟི་གནས་མེ་ཏོག་དང་། འབྲས་བུ་དང་། ཆུ་ཕུན་སུམ་ཚོགས་པ་བགྱིད་དུ་སྩོལ་ཅིག །དེས་དེ་དང་བུད་མེད་གཞན་དག་ཀྱང་བྲམ་ཟེ་ལ་གསང་ཚིག་སློབ་ཏུ་བཅུག་གོ །གྲུ་ཟམ་གྱི་བསྟི་གནས་ཀྱང་བྱེད་དུ་བཅུག་གོ །དེ་ནས་དེས་དབང་དུ་བྱ་བའི་རྫས་དང་ཆང་གིས་བཀང་བའི་འབྲས་བུ་དེ་དག་དང་། གཞན་ཡང་འབྲས་བུ་རྣམ་པར་བཀྲ་བ་སྣ་ཚོགས་བྱེད་དུ་བཅུག་ནས། དྲང་སྲོང་གི་ཆ་བྱད་དུ་བྱས་ཏེ། དེ་རྩྭ་དང་ཤིང་ཤུན་གྱོན་ནས་བུད་མེད་རྣམས་དང་ལྷན་ཅིག་བྲམ་ཟེ་རྣམས་ལ་གསང་ཚིག་འདོན་ཅིང་དེའི་བསྟི་གནས་སུ་ལྷགས་པ་དང་། དྲང་སྲོང་ལ་སློབ་མ་རྣམས་ཀྱིས་སྨྲས་པ། མཁན་པོ་ཁྱོད་ཀྱི་བསྟི་གནས་སུ་དྲང་སྲོང་མང་དུ་ལྷགས་སོ། །དྲང་སྲོང་རྣམས་ལྷགས་པ་ལེགས་ཀྱིས་ནང་དུ་ཤོག་ཅིག །དེ་རྣམས་ནང་དུ་ཞུགས་པ་དེས་མཐོང་ནས་ཚིགས་སུ་བཅད་པས་སྨྲས་པ། བརྟགས་པ་མེད་པར་འགྱིང་ཞིང་འགྲོ་བ་དང་། །བཞིན་ཡང་ཁ་སྤུ་རྣམས་དང་བྲལ་གྱུར་ཅིང་། །འདི་རྣམས་བྲང་ནི་མཐོ་དམན་གྱུར་པ་སྟེ། །ཨེ་མ་དྲང་སྲོང་ཆ་བྱད་སྔོན་མ་བྱུང་། །དེ་དེ་རྣམས་ལ་ཐེ་ཚོམ་གྱི་ཀུན་ནས་དཀྲིས་པའི་བློས་རྩ་བ་དང་འབྲས་བུ་བསྟབས་སོ། །

དེ་རྣམས་ཀྱིས་དེ་དག་ཟོས་ནས་དྲང་སྲོང་དེ་ལ་སྨྲས་པ། ཁྱོད་ཀྱི་འབྲས་བུ་འདི་དག་ནི་རྩུབ་པ་ཁ་བ་བསྐ་བ་ཡིན་གྱི། བདག་ཅག་གི༌ཆུ་ནང་གི་བསྟི་གནས་དེ་ན་ཡོད་པའི་འབྲས་བུ་རྣམས་ནི་བདུད་རྩི་དང་འདྲ་བ་ཡོད་དེ། འདི་ལྟར་ཁྱོད་བདག་ཅག་གི་བསྟི་གནས་སུ་སྤྱན་འདྲེན་ཏོ། །དེས་ཁས་བླངས་ནས་དེ་དེ་རྣམས་དང་གྲུ་ཟམ་གྱི་སྐྱེད་མོས་ཚལ་དུ་ཞུགས་ནས་དེས་དེ་ལ་དབང་དུ་བྱ་བའི་རྫས་ཆང་གིས་བཀང་བ་དང་ལྡན་པའི་ན་ལི་ཀེ་རའི་འབྲས་བུ་རྣམས་དང་། གཞན་དག་ཀྱང་བྱིན་ནོ། །དེ་ཆང་གིས་མྱོས་པ་དང་དབང་དུ་བྱ་བའི་རྫས་ཀྱི་སྦྱོར་བས་དེ་དེ་དང་ལྷན་ཅིག་མི་ཚངས་པར་སྤྱད་པས་རྫུ་འཕྲུལ་ཡོངས་སུ་ཉམས་སོ། །ཆར་ལ་མངོན་པར་དགའ་བའི་ལྷས་སྤྲིན་ཀུན་ནས་བསྡུས་པ་དང་དྲང་སྲོང་དེས་བཀག་གོ །ཞི་ལྡན་མས་སྨྲས་པ། ད་དུང་ཁྱོད་ཀྱིས་བདག་ཉིད་སུ་ཡིན་པ་མི་ཤེས་སམ། དེས་དེའི་འདོད་ཆགས་ཀྱི་ཞགས་པས་བཅིངས་ནས་རྒྱལ་པོ་ལ་ཕུལ་ནས་ལྷ་དྲང་སྲོང་དེ་ནི་འདི་ལགས་སོ། །དེ་ནས་ལྷས་ཆར་དབབ་པར་བརྩམས་ནས་ལོ་ལེགས་པར་གྱུར་ཏོ། །རྒྱལ་པོས་ཞི་ལྡན་མ་འཁོར་དང་བཅས་ཏེ་དྲང་སྲོང་དེ་ལ་ཆུང་མར་བྱིན་ནོ། །

དེས་ཞི་ལྡན་མ་སྤངས་ནས་གཞན་དག་དང་ལྷན་ཅིག་དགའ་མགུར་སྤྱོད་པ་ལ་ཞུགས་པ་ན། དེ་ལ་ཞི་ལྡན་མ་ཕྲག་དོག་གི་ཀུན་ནས་དཀྲིས་པའི་སྙིང་གིས་དེ་ལ་བཀུར་སྟི་མ་ཡིན་པ་བྱ་བར་བརྩམས་པ་དང་། དེ་ནས་ཕར་ཅིག་ཚུར་ཅིག་རྩོད་པས་མཆིལ་ལྷམ་དང་བཅས་པའི་རྡོག་པས་མགོར་བསྣུན་པ་དང་། དེས་བསམས་པ། སྤྲིན་གྱི་འབྲུག་སྒྲ་ཡང་བདག་གིས་མནགས་པར་མི་བཟོད་ན་ད་ནི་འདོད་ཆགས་ཀྱི་ཞགས་པས་བཅིངས་ན་བུད་མེད་ཙམ་གྱིས་ཀྱང་བརྙས་སམ་སྙམ་ནས་དེས་བརྩོན་འགྲུས་ལ་གནས་པས་སླར་ཡང་མངོན་པར་ཤེས་པ་ལྔ་མངོན་སུམ་དུ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་དྲང་སྲོང་གང་ཡིན་པ་དེ་ནི་ང་ཉིད་ཡིན་ནོ། །ཞི་ལྡན་མ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ང་རོའི་སྲེད་པས་དབང་དུ་བྱས་སོ། །ད་ལྟར་ཡང༌འདིས་ལ་དུས་དབང་དུ་བྱ་བ་ལ་ཞུགས་སོ། །གང་གི་ཚེ་བཅོམ་ལྡན་འདས་ཕོ་བྲང་དུ་གདུགས་ཚོད་གསོལ་ནས་ཕྱི་རོལ་དུ་བྱུང་བ་དེའི་ཚེ་གྲགས་འཛིན་མ་ཁྱིམ་ཐབ་ཀྱི་བྱམས་པ་དང་བྲལ་ལོ་སྙམ་སྟེ་རེ་ཐག་ཆད་ནས་ཁང་ཐོག་ཏུ་འཛེགས་ཏེ་བདག་ཉིད་མཆོངས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་བཅོམ་ལྡན་འདས་ཀྱི་རྫུ་འཕྲུལ་གྱིས་དེ་བླངས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱི་སླད་དུ་གྲགས་འཛིན་མ་ཁང་ཐོག་ནས་བདག་ཉིད་མཆོངས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་གྱི་འདི་འབའ་ཞིག་ཏུ་མ་ཟད་དེ། ཇི་ལྟར་འདིས་འདས་པའི་དུས་ན་ཡང་ངའི་ཕྱིར་བདག་ཉིད་བོར་བ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་སྦྱིན་ཞེས་བྱ་བ་ཞིག་བྱུང་སྟེ། དེ་དུས་གཞན་ཞིག་ན་རི་དྭགས་ཤོར་ཞིང་རིམ་གྱིས་སོང་སྟེ་རི་སུལ་ཞིག་ཏུ་ཕྱིན་པ་དང་། དེས་དེ་ན་མིའམ་ཅི་ཕོ་དང་། མིའམ་ཅི་མོ་གཉིས་ལས་མིའམ་ཅི་ཕོ་ནི་ཉལ། མིའམ་ཅི་མོ་ནི་མ་ཉལ་བ་ཞིག་མཐོང་ནས་རྒྱལ་པོས་གཞུ་རྣ་དྲུང་དུ་བཀང་བའི་མདས་མིའམ༌ཅི་ཕོ་གནད་དུ་བསྣུན་ནས་སྲོག་དང་ཕྲལ་ཏེ། རྒྱལ་པོས་མིའམ་ཅི་མོ་ཆུང་མའི་དོན་དུ་བཟུང་ནས་ཁྲིད་དེ་སོང་བ་ལས་དེས་སྨྲས་པ། ལྷ་རེ་ཞིག་གཞེས་ལ་དེའི་བར་དུ་བདག་གིས་མིའམ་ཅིའི་རོ་ལ་མཆོད་པ་བགྱིད་ན་གནང་བར་མཛད་དུ་གསོལ། རྒྱལ་པོས་སྨྲས་པ། རེ་ཞིག་གང་དུ་འགྲོ་བར་འགྱུར། དེ་ལ་མཆོད་པ་ཇི་ལྟར་བྱེད་པ་བལྟའོ་སྙམ་ནས་དེས་དེ་ལ་གནང་ངོ་། །དེ་ནས་དེས་མིའམ་ཅིའི་རོ་དེ་ལ་ཤིང་གི་ཕུང་པོ་བྱས་ནས་མེ་སྦར་ཏེ་བདག་ཉིད་མཆོངས་སོ། །ལྷས་ཚིགས་སུ་བཅད་པས་སྨྲས་པ། མིའམ་ཅི་མོ་དགའ་སྤྱད་ཅེས། །དོན་གཞན་དུ་ནི་བསམས་པ་ལས། །གཞན་དུ་ཡོངས་སུ་བསྒྱུར་བྱས་པས། །སྲོག་ཆགས་གཉིས་ནི་བསད་པར་གྱུར། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་མིའམ་ཅི་གང་ཡིན་པ་དེ་ནི་ང་ཉིད་ཡིན་ནོ། །མིའམ་ཅི་མོ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེ་ན་ཡང་འདིས་ངའི་ཕྱིར་བདག་ཉིད་མེ་ཕུང་དུ་མཆོངས་སོ། །ད་ལྟར་ཡང་འདིས་ངའི་ཕྱིར་ཁང་ཐོག་ནས་བདག་ཉིད་མཆོངས་སོ། །

བཅོམ་ལྡན་འདས་ཀྱིས་དགོངས་པ། ད་ནི་གྲགས་འཛིན་མ་གདུལ་བའི་དུས་ལ་བབ་ཀྱིས། མ་ལ་འདི་ངས་འཁོར་བའི་འབྲོག་དགོན་པ་ནས་བསྒྲལ་བར་བྱའོ་སྙམ་དུ་དགོངས་ནས་དེ་ལ་གང་ཐོས་པས་འཕགས་པའི་བདེན་པ་བཞི་ཡང་དག་པར་ཁོང་དུ་ཆུད་པར་འགྱུར་བ་དེ་ལྟ་བུའི་ཆོས་བཤད་པ་མཛད་དེ། གྲགས་འཛིན་མ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཇི་ཙམ་ན་དགྲ་བཅོམ་མར་གྱུར་པ་དང་། དེ་རང་གི་རིགས་རྒྱུད་དང་མཐུན་པར་བྱ་བ་དང་། འཕགས་པའི་ལམ་ཐོབ་པས་དགེ་སློང་མ་རྣམས་ཀྱི་ནང་དུ་དགོས་པ་བྱུང་བ་རྣམས་ལ་ཤིན་ཏུ་འཛེམ་པ་དང་ལྡན་ནོ། །

དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་ཀྱི་དགེ་སློང་མ་རྣམས་ལ་འཛེམ་པ་དང་ལྡན་པའི་མཆོག་ནི་འདི་ལྟ་སྟེ་སྒྲ་གཅན་ཟིན་གྱི་མ་གྲགས་འཛིན་མ་འདི་ཡིན་ནོ། །ཞེས་གསུངས་སོ།། །།

བྲན་མོ་ཞིག་གིས་ཆོས་ཚིག་གཅིག་བློར་བཟུང་ནས་ཤི་བས་བུ་མོ་མུ་ཏིག་ཅན་དུ་སྐྱེས་ཏེ་སངས་རྒྱས་ཀྱི་བྲིས་སྐུ་མཐོང་ནས་འབྲས་བུ་ཐོབ་ཚུལ། འདུལ་བ་ལུང་གཞི་ལས་བཏུས།

སངས་རྒྱས་བཅོམ་ལྡན་འདས་ཡུལ་སེར་སྐྱའི་གཞི་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །གང་གི་ཚེ་བཅོམ་ལྡན་འདས་ཀྱིས་ཤཱཀྱ་རྣམས་བདེན་པ་ལ་བཀོད་པ་དེའི་ཚེ་དེ་རྣམས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་འདོང་བར་བྱེད་དོ། །བཅོམ་ལྡན་འདས་ཀྱིས་ཀྱང་དེ་རྣམས་ལ་ཡང་དང་ཡང་དུ་ཆོས་འཆད་པར་མཛད་དོ། །རྒྱལ་པོ་ཟས་གཙང་གི་ཀུན་ཏུ་སྤྱོད་པ་ནི་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་འགྲོ་བར་བྱེད་དོ། །ཇི་ཙམ་ན་དུས་གཞན་ཞིག་ན་བཅོམ་ལྡན་འདས་འཁོར་བརྒྱ་ཕྲག་དུ་མའི་གུང་ལ་བཞུགས་ནས་སྦྲང་མའི་སྦྲང་རྩི་དྭངས་མ་ལྟ་བུའི་ཆོས་བཤད་པ་ན་འཁོར་བརྒྱ་ཕྲག་དུ་མ་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་པར་བྱེད་དོ། །

རྒྱལ་པོ་ཟས་གཙང་ཡང་ཆོས་མཉན་པའི་ཕྱིར་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ཀྱི་སྤྱན་སྔར་སོང་སྟེ། དེས་ཆོས་མཉན་ནས་སོང་ངོ་། །དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ཏེ་དད་པ་སྐྱེས་ནས་རང་གི་ཁྱིམ་དུ་སོང་སྟེ་སྨྲས་པ། ཀྱེ་མའོ་སངས་རྒྱས། ཀྱེ་མའོ་ཆོས། ཀྱེ་མའོ་དགེ་འདུན། སངས་རྒྱས་བྱུང་བ་ནི་བདག་འབྲས་བུ་དང་བཅས་པ་ཡིན་ནོ། །མིང་ཆེན་གྱི་ཆུང་མ་དམ་པས་སྨྲས་པ། རྗེའི་སྲས་དེ་ཅི་ལགས། དེས་སྨྲས་པ། དེང་བཅོམ་ལྡན་འདས་ཀྱིས་འཁོར་བརྒྱ་ཕྲག་དུ་མའི་མདུན་དུ་འདི་འདྲ་བའི་ཆོས་བཤད་པ་མཛད་དེ། དེ་ཐོས་པས་སྲོག་ཆགས་བརྒྱ་སྟོང་ཕྲག་དུ་མས་ཁྱད་པར་ཆེན་པོ་རྟོགས་སོ། །

དེས་སྨྲས་པ། རྗེའི་སྲས་སངས་རྒྱས་བྱུང་བ་ནི་བདག་འབྲས་བུ་དང་བཅས་པ་ཡིན་ནོ་ཞེས་གསུངས་པ་གང་ལགས་པ་དེ་མད་དེ། སངས་རྒྱས་བྱུང་བ་ནི་ཁྱེད་ཅག་ཁོ་ན་ལ་འབྲས་བུ་དང་བཅས་པ་ལགས་ཀྱི་བདག་ཅག་ལ་ནི་མ་ལགས་སོ། །ཅིའི་ཕྱིར་འདི་ལྟར་བཅོམ་ལྡན་འདས་འཇིག་རྟེན་དུ་བྱུང་བ་ནི་སྐྱེས་པ་རྣམས་ཀྱི་ཕྱིར་ལགས་ཀྱི་བུད་མེད་རྣམས་ཀྱི་ཕྱིར་ནི་མ་ལགས་སོ། །དེས་སྨྲས་པ། བཟང་མོ་དེ་སྐད་མ་སྨྲ་ཞིག །བཅོམ་ལྡན་འདས་ནི་སེམས་ཅན་ཐམས་ཅད་ལ་ཕན་པ་དང་། ཐུགས་བརྩེ་བ་ཡིན་གྱིས་སོང་ཞིག་དང་། ཁྱོད་ཀྱིས་ཀྱང་བཅོམ་ལྡན་འདས་ཀྱི་སྤྱན་སྔ་ནས་ཆོས་ཐོས་པར་འགྱུར་རོ། །

དེས་སྨྲས་པ། ལྷ་ཤཱཀྱའི་ཚོགས་ཀྱིས་བསྐོར་ནས་བཅོམ་ལྡན་འདས་ལ་བལྟ་བའི་ཕྱིར་དུས་གསུམ་དུ་བཞུད་ལ། ལྷའི་མདུན་དུ་མངོན་སུམ་དུ་བདག་གིས་ཆོས་མཉན་པ་གཡར་ཚ་ལགས་སོ། །འདི་ལྟར་གལ་ཏེ་ལྷ་སྔ་དྲོ་བཞུད་ན་བདག་གིས་ཀྱང་སླད་དྲོ་བཅོམ་ལྡན་འདས་ལས་ཆོས་མཉན་པར་བགྱིའོ། །ཤཱཀྱ་མིང་ཆེན་གྱིས་བསམས་པ། ལྷ་ལ་གསོལ་གྱིས་འགྲོའོ་སྙམ་པ་ལས་ཡང་བསམས་པ། རང་གི་ཆུང་མའི་ཆེད་ལ་ལྷ་ལ་གསོལ་བ་བྱེད་མི་ཕོད་ཀྱིས། ལྷ་ནི་སྐྱེ་དགུའི་བདག་མོ་ཆེན་མོ་ལ་བཀུར་སྟི་མང་དུ་བྱེད་དེ། དེའི་ཚིག་ཉན་པར་འགྱུར་བས་དེ་ལ་དོན་འདི་རིག་པར་བྱའོ་སྙམ་ནས། དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་གང་ན་བ་དེར་སོང་སྟེ་ཕྱིན་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་དོན་དེ་སྨྲས་པ་དང་། དེས་སྨྲས་པ། བཀའ་བཞིན་འཚལ། ལྷ་ལ་གསོལ་བར་བགྱིའོ། །དེ་ནས་ཤཱཀྱ་མིང་ཆེན་ཁྱིམ་དུ་སོང་ནས་ཤཱཀྱ་རྣམས་ཀྱི་ཆུང་མ་རྣམས་ལ་སྨྲས་པ་དང་། དེ་ནས་ཤཱཀྱ་རྣམས་ཀྱི་ཆུང་མ་དང་། གཞན་དག་གི་ཆུང་མ་རྣམས་སྐྱེ་དགུའི་བདག་མོ་ཆེན་མོ་གང་ན་བ་དེར་སོང་སྟེ་ཕྱིན་ནས། སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །

གཽ་ཏ་མཱི་མཁྱེན་པར་མཛོད་ཅིག་བདག་ཅག་གིས་བཅོམ་ལྡན་འདས་འཁོར་བརྒྱ་ཕྲག་དུ་མའི་མདུན་དུ་སྙན་པ་སྙན་པའི་ཆོས་སྦྲང་མའི་སྦྲང་རྩི་དྭངས་མ་ལྟ་བུ་བཤད་པ་ན་འཁོར་བརྒྱ་ཕྲག་དུ་མའི་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་ཏོ་ཞེས་ཐོས་ནས་བདག་ཅག་ཀྱང་བཅོམ་ལྡན་འདས་ལས་ཆོས་དེ་ཐོས་པར་འཚལ་གྱིས་བདག་ཅག་གི་ཕྱིར་ལྷ་ལ་ཅི་ནས་ཀྱང་ལྷ་ནི་སྔ་དྲོ་བཅོམ་ལྡན་འདས་ཀྱི་སྤྱན་སྔར་བཞུད་ལ། བདག་ཅག་ཀྱང་སླད་དྲོ་མཆི་བར་གསོལ་ཅིག །དེས་སྨྲས་པ། ཕུ་ནུ་མོ་དག་ཁྱེད་ཀྱིས་སེམས་བསྐྱེད་པ་ལེགས་ཏེ། རྒྱལ་པོ་ཟས་གཙང་ལ་བརྟག་གིས་སྐད་ཅིག་སྡོད་ཅིག །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི༌རྒྱལ་པོ་ཟས་གཙང་གང་ན་བ་དེར་སོང་སྟེ་ཕྱིན་ནས། རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །བདག་གིས་བཅོམ་ལྡན་འདས་འཁོར་བརྒྱ་ཕྲག་དུ་མའི་གུང་ལ་བཞུགས་ནས་སྙན་པ་སྙན་པའི་ཆོས་སྦྲང་མའི་སྦྲང་རྩི༌དྭངས་མ་ལྟ་བུ་བཤད་པ་ན་འཁོར་བརྒྱ་ཕྲག་དུ་མ་དབང་པོ་རྣམས་མི་གཡོ་བས་བཅོམ་ལྡན་འདས་ལས་སྙན་པ་སྙན་པའི་ཆོས་ཉན་ཏོ་ཞེས་ཐོས་སོ། །ཤཱཀྱའི་མཆིས་འབྲང་རྣམས་ཀྱིས་ཀྱང་དེ་སྐད་ཐོས་ནས་དེ་རྣམས་ཆོས་ཉན་པར་འཚལ་ན་ལྷ་ནི་སྔ་དྲོ་བཅོམ་ལྡན་འདས་ཀྱི་སྤྱན་སྔར་གཤེགས་པའི་རིགས་སོ། །བདག་གིས་ཀྱང་ཤཱཀྱའི་མཆིས་འབྲང་རྣམས་དེད་དེ་བཅོམ་ལྡན་འདས་ཀྱི་སྤྱན་སྔར་སླད་དྲོ་མཆི་བར་བགྱིའོ། །དེ་ཅིའི་ཕྱིར་ཞེ་ན། སྔ་དྲོ་ནི་དེ་རྣམས་བསྡུམ་པའི་བགྱི་བ་དག་བགྱིད་པས་བཅོམ་ལྡན་འདས་ཀྱི་སྤྱན་སྔར་མཆི་བའི་སྐབས་མ་མཆིས་སོ། །

རྒྱལ་པོ་ཟས་གཙང་མའི་ཀུན་ཏུ་སྤྱོད་པ་ནི་གང་གི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཚིག་སྨྲས་པ་དེའི་ཚེ་ལུས་ཀྱི་བ་སྤུ་ཟིང་ཞེས་བྱེད་ནས་ལངས་ཏེ། རེ་ཞིག་སྐྱེ་དགུའི་བདག་མོ་ཆེན་མོའི་ཚིག་གི་ལན་མ་བྱིན་པ་དེའི་བར་དུ་མི་འདུག་པ་ཡིན་པས་དེས་མགོ་བོས་བཏུད་དེ་སྨྲས་པ། གཽ་ཏ་མཱི་བཀའ་བཞིན་འཚལ། དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ཤཱཀྱའི་ཆུང་མ་ལྔ་བརྒྱས་ཡོངས་སུ་བསྐོར་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་ནྱ་གྲོ་དྷའི་ཀུན་དགའ་ར་བར་སོང་ངོ་། །ཇི་ཙམ་ན་ཤཱཀྱ་མིང་ཆེན་གྱི་ཆུང་མ་ཡང་རྒྱན་ཐམས་ཅད་ཀྱིས་བརྒྱན་ནས་དེ་དང་ལྷན་ཅིག་སོང་སྟེ། གཟུགས་དང་ལང་ཚོ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པས་འདོད་ཆགས་དང་མ་བྲལ་བ་དག་ཆགས་པ་སྐྱེ་བར་ཞུགས་པ་དེ་ཚེ་དང་ལྡན་པ་ཀུན་དགའ་བོས་མཐོང་ནས་སྨྲས་པ། སྲིང་མོ་རེ་ཞིག་ཁྱོད་ཀྱི་རང་བཞིན་གྱི་གཟུགས་ཉིད་ཀྱང་བཟང་མོ་ལྟ་ན་སྡུག་པ་མཛེས་པ་ཡིན་ན་རྒྱན་ཐམས་ཅད་ཀྱིས་བརྒྱན་པ་ལྟ་སྨོས་ཀྱང་ཅི་དགོས། ཁྱོད་རྒྱན་གྱིས་བརྒྱན་པ་འདིར༌འོངས་པ་གང་ཡིན་པ་དེ་ནི་མ་ལེགས་པ་ཞིག་བྱས་ཏེ། བདག་ཉིད་ཆེན་པོ་འདི་དག་ནི་ཐམས་ཅད་འདོད་ཆགས་དང་བྲལ་བ་ཁོ་ན་ཡང་མ་ཡིན་ནོ་ཞེས་དེ་ལ་དེ་སྐད་སྨྲས་པ་དང་། ངོ་ཚ་བ་སྙིང་ལ་ཕོག་པས་སྤྱི་བོ་སྨད་ནས་མཐའ་གཅིག་ཏུ་སོང་སྟེ། རྒྱན་རྣམས་བཀྲོལ་ནས་སེམས༌ཁོང་དུ་ཆུད་ཅིང་འདུག་པ་ལས། དེའི་མངག་གཞུག་མ་བུ་མོ་བསྐྱེད་མ་ཞེས་བྱ་བ་དང་། དེ་ལྷན་ཅིག་ཆོས་མཉན་པའི་ཕྱིར་འོངས་པས་དེས་དེ་ལ་བོས་ཏེ་སྨྲས་པ། བསྐྱེད་མ་སོང་ལ་རྒྱན་འདི་དག་ཁྱིམ་དུ་ཞོག་ལ་ཤོག་ཅིག །དེ་རིངས་པར་སོང་ནས་དེས་ཁྱིམ་དུ་བཞག་སྟེ་སླར་འོངས་སོ། །

དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་ལྔ་བརྒྱ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ཀྱིས་ཀྱང་ཆོས་བཤད་པ་མཛད་དོ། །ཆོས་བཤད་པ་དེ་མཛད་པ་དེའི་ཚེ་ཇི་ཙམ་ན་ཤཱཀྱའི་བུ་མོ་ཞིག་མགུལ་པ་ན་མུ་ཏིག་གི་དོ་ཤལ་བཏགས་པ་ལ་མྱུར་བ་མྱུར་བར་ལྟ་ཞིང་ལག་པས་ནོམ་པར་བྱེད་དོ། །དེ་ནས་བཅོམ་ལྡན་འདས་ཀྱིས་མི་རྟག་པ་དང་ལྡན་པའི་ཆོས་བཤད་པར་བརྩམས་སོ། །འོན་ཀྱང་དེ་ཆོས་ལ་མི༌གཏོད་ཀྱི་མུ་ཏིག་གི་དོ་ཤལ་ཁོ་ན་ལ་རྟོག་པར་བྱེད་དོ། །མིང་ཆེན་གྱི་ཆུང་མ་དམ་པས་ཤཱཀྱའི་བུ་མོ་མགུལ་པ་ན་མུ་ཏིག་གི་དོ་ཤལ༌བཏགས་པ་ལ་མྱུར་བ་མྱུར་བར་རྟོག་པར་བྱེད་པ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ཉོན་མོངས་འདི་འདུ་བྱེད་རྣམས་འདི་ལྟར་མི་རྟག་པར་བཤད་ན་མུ་ཏིག་གི་དོ་ཤལ་འདི་ལ་ལྷག་པར་ཆགས་ཏེ་མྱུར་བ་མྱུར་བར་བརྟག་ཏུ་ཅི་ཡོད། གལ་ཏེ་བདག་གི་མུ་ཏིག་གི་ཕྲེང་བ་མཐོང་ན་འདིའི་རྒྱགས་པ་ཐམས་ཅད་དང་བྲལ་བར་འགྱུར་རོ་སྙམ་དུ་བསམས་ནས་མངག་གཞུག་མའི་བུ་མོ་བསྐྱེད་མ་ལ་སྨྲས་པ། བསྐྱེད་མ་སོང་ལ་ཁོ་མོའི་མུ་ཏིག་གི་དོ་ཤལ་མྱུར་དུ་ཁྱེར་ཏེ་ཤོག་ཅིག །དེ་ཆོས་ཉན་པ་དེ་ལ་སེམས་བསྡུས་པས་དེ་འདི་སྙམ་དུ་སེམས་ཏེ། ཀྱི་ཧུད་འདི་འདྲ་བའི་ཆོས་འཆད་ན་བདག་ཇོ་མོས་མངགས་པས་ཆོས་ཀྱི་བར་ཆད་བྱུང་བར་གྱུར་ཏེ། མདོར་ན་བྲན་གྱི་རང་བཞིན་དུ་གྱུར་པ་ནི་རེ་སྡུག་སྙམ་དུ་བསམས་ནས་སྡུག་བསྔལ་དང་ཡིད་མི་བདེ་བས་གདུངས་པས་ཚིགས་སུ་བཅད་པས་སྨྲས་པ། གང་ཡང་སྡིག་པས་དེ་རིང་རྒྱལ་ཞལ་བལྟ་བ་དང་། །བདེ་གཤེགས་ཞལ་ནས་དྲི་མེད་ཆོས་མཉན་མི་འཐོབ་པ། །བྲན༌དངོས་གཞན་དབང་སྡུག་བསྔལ་མང་པོ་ཐ་ཆད་དེ། །བདག་གི་འཚོ་བ་སྔོན་བྱས་ལས་ཀྱིས་ཐོབ༌པ་ངན། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བུ་མོ་བསྐྱེད་མ་འདི་ནི་སྔོན་གྱི་སངས་རྒྱས་རྣམས་ལ་ལྷག་པར་བྱ་བ་བྱས་པ་ཡིན་མོད་ཀྱི། ཚེ་ཆུང་ཞིག་ཡོད་པས་འདི་འཁོར་བའི་བཙོན་ར་ནས་དབྱུང་བར་བྱའོ་སྙམ་དུ་དགོངས་ནས། རྫུ་འཕྲུལ་གྱིས༌གྲོ་ག་ལ། དགེ་མ་སྐྱེ་བ་བྱུང་ན་ནི། །འཇིག་པ་ཡིན་པར་བསམས་ནས་སུ། །ངས་གསུངས་པ་ཡི་དགེ་བ་ལ། །བརྩོན་འགྲུས་བསྐྱེད་ནས་མཉན་པར་བྱ། །ཞེས་བྲིས་ནས་བྱིན་ནོ། །

དེ་ནས་བུ་མོ་བསྐྱེད་མ་དགའ་བ་དང་། མགུ་བ་དང་། རངས་པ་དང་། ཡིད་བདེ་བ་སྐྱེས་ནས་ཚིགས་སུ་བཅད་པ་སྨྲས་བཞིན་སངས་རྒྱས་ལ་དམིགས་པའི་སེམས་ཁོ་ནས་སོང་བ་དང་། ལས་རྣམས་བསྐལ་པ་བརྒྱར་ཡང་ནི། །ཆུད༌མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །ཅེས་བྱ་བ་ཡིན་པས་ཚེ་ཆུང་ཞིག་ཡོད་པའི་ལས་ཚོགས་པ་རྙེད་པ་དེ་བ་དྲུས་མ་ཞིག་གིས་བསད་དོ། །དེ་སངས་རྒྱས་ལ་སེམས་མངོན་པར་དད་པར་བྱས་ཏེ་ཤི་བས་སིང་ག་ལའི་གླིང་དུ་སིང་ག་ལའི་རྒྱལ་པོའི་བཙུན་མོ་དམ་པའི་མངལ་དུ་སྐྱེས་པར་གྱུར་ཏེ། གང་གི་ཉི་མ་ལ་ཉིང་མཚམས་སྦྱར་བ་དེ་ཁོ་ནའི་ཉིན་པར་མུ་ཏིག་གི་ཆར་པ་བབ་བོ། །རྒྱལ་པོས་ལྟས་མཁན་རྣམས་བཀུག་སྟེ་སྨྲས་པ་དང་། དེ་རྣམས་ཀྱིས་སྨྲས་པ། ལྷ་འདི་ནི་སེམས་ཅན་ཞིག་བཙུན་མོའི་ལྷུམས་སུ་ཞུགས་པ་དེའི་མཐུ་ལགས་སོ། །ཇི་ཙམ་ན་མངལ་གྱི་སྨིན་པར་བྱ་བའི་ཕྱིར་དེ་སྒྲ་ཡིད་དུ་མི་འོང་བ་ཅུང་ཟད་ཀྱང་མི་གྲག་ཅིང་གྲང་བ་ན་གྲང་བའི་ཡོ་བྱད་དང་། དྲོ་བ་ན་དྲོ་བའི་ཡོ་བྱད་དང་། སྨན་པས་བསྟན་པའི་ཁ་ཟས་ཧ་ཅང་ཁ་བ་མ་ཡིན་པ་དང་། ཧ་ཅང་སྐྱུར་བ་མ་ཡིན་པ་དང་། ཧ་ཅང་ལན་ཚྭ་ཅན་མ་ཡིན་པ་དང་། ཧ་ཅང་མངར་བ་མ་ཡིན་པ་དང་། ཧ་ཅང་རྩུབ་པ་མ་ཡིན་པ་དང་། ཧ་ཅང་བསྐ་བ་མ་ཡིན་པ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། རྩུབ་པ་དང་། བསྐ་བ་རྣམས་སྤངས་པའི་ཁ་ཟས་ཀྱིས་བསྙེན་བཀུར་བྱེད་ཅིང་དོ་ཤལ་དང་སེ་མོ་དོས་ལུས་བརྒྱན་ནས་ལྷའི་བུ་མོ་དགའ་ཚལ་ན་རྒྱུ་བ་བཞིན་དུ་ཁྲི༌ནས་ཁྲི་དང་། ཁྲིའུ་ནས་ཁྲིའུར་འགྲོ་ཞིང་འོག་གི་ས་ལ་འབབས་པར་མི་བྱེད་དོ། །

དེ་ཟླ་བ་བརྒྱད་དམ་དགུ་འདས་ནས་བུ་མོ་གཟུགས་བཟང་བ་མཛེས་པ་ལྟ་ན་སྡུག་པ་ཞིག་བཙས་ཏེ། གང་གི་ཉི་མ་ལ་བཙས་པ་དེ་ཉིད་ཀྱི་ཉིན་པར་ཡང་མུ་ཏིག་གི་ཆར་བབ་ནས་རྒྱལ་པོས་བསམས་པ། འདི་ལྟར་བུ་མོའི་མཐུས་མུ་ཏིག་གི་ཆར་འབབ་པ་ནི་དེ་ཉིད་ཀྱི་མུ་ཏིག་ཏུ་འགྱུར་རོ་ཞེས་དེས་དེ་ཉིད་ལ་བྱིན་ནོ། །དེ་ནས་ཉི་མ་བདུན་གསུམ་ཉི་ཤུ་རྩ་གཅིག་ཏུ་དེའི་བཙས་སྟོན་རྒྱ་ཆེར་བྱས་ནས་བུ་མོའི་མིང་ཅིར་གདགས་ཞེས་མིང་འདོགས་པར་བྱེད་དོ། །བློན་པོ་རྣམས་ཀྱིས་སྨྲས་པ། གང་གི་ཕྱིར་འདིའི་མཐུས་མུ་ཏིག་གི་ཆར་བབ་པས་དེ་བས་ན་བུ༌མོ་འདིའི་མིང་མུ་ཏིག་ཅན་ཞེས་གདགས་སོ་ཞེས་དེའི་མིང་མུ་ཏིག་ཅན་ཞེས་བྱ་བར་བཏགས་ཏེ། བུ་མོ་མུ་ཏིག་ཅན་མ་མ་བརྒྱད་ལ་གཏད་དེ། པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ཏེ། དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་པོ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད་སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་མོར་གྱུར༌པ་དེའི་ཚེ་རང་གི་རིགས་དང་མཐུན་པའི་སྤྱོད་པ་དང་། གནས་པས་རྒྱལ་པོ་ནང་མི་དང་བཅས་པས་ལྷག་པར་བཀུར་སྟི་བྱེད་དོ། །ཇི་ཙམ་དུས་གཞན་ཞིག་ན་མཉན་ཡོད་ཀྱི་ཚོང་པ་རྣམས་ཀྱིས་ནོར་བསྒྲུབ་པའི་ཕྱིར་རྒྱ་མཚོའི་གྲུ་བོ་ཆེ་བསྒྲུབས་ཏེ། རྒྱ་མཚོ་ཆེན་པོར་ཞུགས་པ་དང་དེ་རྣམས་གྲུ་བོ་ཆེ་ཕན་ཕུན་མེད་པར་རླུང་གི་ཤུགས་ཀྱིས་སིང་ག་ལའི་གླིང་དུ་ཕྱིན་ཏོ། །

དེ་ནས་སྣོད་རྣམས་མཁོས་སུ་ཕབ་སྟེ། རྒྱལ་པོའི་ཕོ་བྲང་དང་ཧ་ཅང་ཡང་མི་རིང་བ་ཞིག་ཏུ་འབྲང་བཏབ་བོ། །དེ་རྣམས་ཀྱིས་མཚན་མོའི་ཐུན་ཐ་མ་ལ་ཆེད་དུ་བརྗོད་པ་དང་། ཕ་རོལ་འགྲོ་བྱེད་དང་། བདེན་པ་མཐོང་བ་དང་། གནས་བརྟན་གྱི་ཚིགས་སུ་བཅད་པ་དང་། གནས་བརྟན་མའི་ཚིགས་སུ་བཅད་པ་དང་། རི་གནས་ཀྱི་ཚིགས་སུ་བཅད་པ་དང་། ཐུབ་པའི་ཚིགས་སུ་བཅད་པ་དང་། དོན་གྱི་ཚོམས་ཀྱི་མདོ་སྡེ་རྣམས་རྒྱས་པར་འདོན་པ་ལ་ཞུགས་པ་མུ་ཏིག་ཅན་ཁྱིམ་གྱི་ནང་ན་འདུག་པས་སྐར་ཁུང་ནས་ཐོས་ནས། དེ་ནས་དེས་རྒྱལ་པོ་ལ་སྨྲས་པ། ལྷ་ཡུལ་དབུས་ཀྱི་ཚོང་པ་རྣམས་མཆིས་ནས༌མཆིད་སྙན་པར་ལེན་ཏོ། །རྒྱལ་པོས་བློན་པོ་དག་ལ་བསྒོ་བ། ཤེས་ལྡན་དག་གླུ་མཁན་རྣམས་ཁུག་ཅིག །དེ་རྣམས་བཀུག་པ་དང་མུ་ཏིག་ཅན་གྱིས་སྨྲས་པ། ཤེས་ལྡན་དག་ཡུལ་དབུས་ཀྱི་རོལ་མོ་ཅི་འདྲ་བ་ཁོ་མོས་མཉན༌གྱིས་ལོངས་ཤིག །མས་ཀྱིས་སྨྲས་པ། ལྷ་མོ་བདག་ཅག་ནི་རོལ་མོ་མཁན་མ་ལགས་ཏེ། བདག་ཅག་ནི་མཉན་ཡོད་ཀྱི་ཚོང་པ་རླུང་གི་ཤུགས་ཀྱིས་འདིར་མཆིས་པ་ལགས་ཏེ། བདག་ཅག་གིས་མཚན་མོའི་ཐུན་ཐ་མ་ལ་སངས་རྒྱས་ཀྱི་གསུང་བཏོན་ཏོ། །མུ་ཏིག་ཅན་གྱིས་སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་དེ་ཐོས་ནས་སྙིང་དགའ་བས་བ་སྤུ་ཐམས་ཅད་ཟིང་ཞེས་བྱེད་དེ།

དེ་ངོ་མཚར་སྐྱེས་ནས་དྲིས་པ། སངས་རྒྱས་ཞེས་བྱ་བ་འདི་ཅི་ཡིན། དེ་རྣམས་ཀྱིས་སངས་རྒྱས་ཀྱི་ཆེ་བའི་བདག་ཉིད༌རྒྱས་པར་སྨྲ་བར་བརྩམས་ཏེ། ལྷ་མོ་ཤཱཀྱ་རྣམས་ཀྱི་གཞོན་ནུ་གངས་རིའི་ངོས་དང་ཉེ་བ། ཆུ་བོ་སྐལ་ལྡན་ཤིང་རྟའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་ཡང་མི་རིང་བ་ཞིག་ཏུ་བྱུང་སྟེ། དེ་བྲམ་ཟེ་མཚན་མཁན་རྣམས་དང་། ལྟས་མཁན་རྣམས་ཀྱིས་གལ་ཏེ་ཁྱིམ་པ་ཁྱིམ་ན་གནས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་འདི་ལྟ་བུ་དག་འབྱུང་བར་འགྱུར་བ་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེའོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་བར་འགྱུར་ཞིང་། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པ་གནོད༌པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །

གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་ན། དེ་བཞིན་གཤེགས་པ་དགྲ་བཅོམ་པ་ཡང་དག་༌པར་རྫོགས་པའི་སངས་རྒྱས་ཞེས་བྱ་བ་འཇིག་རྟེན་དུ་སྒྲ་རྣམ་པར་གྲགས་པར་འགྱུར་རོ་ཞེས་ལུང་བསྟན་ཏེ། དེ་ལྟ་བུ་དེ་ནི་སངས་རྒྱས་ཞེས་བགྱི་བ་ལགས་སོ། །མུ་ཏིག་ཅན་གྱིས་སྨྲས་པ། གང་གི་ཚེ་ཁྱེད་ཅག་ཡུལ་དུ་འདོང་བ་དེའི་ཚེ་ཁོ་མོ་ལ་སྦྲོན་ཅིག །དེ་རྣམས་ཀྱིས་སྨྲས་པ། ལྷ་མོ་བཀའ་བཞིན་འཚལ། སྦྲན་པར་བགྱིའོ། །ཇི་ཙམ་ན་དེ་རྣམས་ཡུལ་དུ་འདོང་བའི་དུས་ལ་བབ་ནས་དེ་རྣམས་ཀྱིས་མུ་ཏིག་ཅན་ལ་སྦྲན་པ་དང་། དེས་བཅོམ་ལྡན་འདས་ལ་ཡི་གེ་གསོལ་བ། ལྷ་དང་ལྷ་མིན་མི་ཡིས་ཕྱག་བགྱིས་པ། །སྐྱེ་དང་སྙུན་དང་བསྙེངས་ལས་ངེས་བྱུང་ཞིང་། །གཙོ་བོ་གྲགས་པ་རྒྱ་ཆེན་རབ་གྲགས་པ། །དྲང་སྲོང་བདུད་རྩིའི་ཆ་ལས་ཐུགས་རྗེས་གནོང་། །ཞེས་གསོལ་ཏོ། །

དེ་ནས་ཡི་གེ་དེ་ཚོང་པ་དེ་རྣམས་ཀྱིས་ཁྱེར་ནས༌རིམ་གྱིས་མཉན་ཡོད་དུ་ཕྱིན་པ་དང་། ལམ་གྱིས་དུབ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་མཉན་ཡོད་ཀྱི་ཚོང་པ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་སིང་ག་ལའི་གླིང་ན་སིང་ག་ལའི་རྒྱལ་པོའི་བུ་མོ་དེས་མཆིད་ཡི་གེ་གསོལ་བ་འདི་ལགས་སོ། །བཅོམ་ལྡན་འདས་ཀྱིས་མུ་ཏིག་ཅན་གྱི་འདུལ་བའི་དུས་མཁྱེན་ནས་ཉིད་ཀྱིས་བླངས་ཏེ༌བཀླགས་སོ། །བཀླགས་ནས་བཀའ་སྩལ་པ། གང་གི་ཚེ་ཁྱེད་ཅག་སླར་འདོང་བར་གྱུར་པ་དེའི་ཚེ་ངའི་སྙན་དུ་གསོལ་ཅིག །བཙུན་པ་བཀའ་བཞིན་འཚལ་ཞེས་ཚོང་པ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་དོང་ངོ་། །

དེ་ནས་ཟོང་བསྒྱུར་ཏེ་བསྒྱུར་བའི་ཟོང་ཐོགས་ནས་བཅོམ་ལྡན་འདས་ཀྱི་སྤྱན་སྔར་སོང་སྟེ་གསོལ་བ། བཅོམ་ལྡན་འདས་བདག་ཅག་མཆི་ན་བདག་ཅག་གིས་མུ་ཏིག་ཅན་ལ་ཇི་སྐད་བགྱི་བཀའ་སྩལ་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་ལེགས་པར་བྱི་དོར་བྱས་པའི་རས་དང་རི་མོ་མཁན་དག་ཁུག་ཅིག །དེ་རྣམས་ཀྱིས་རས་དང་རི་མོ་མཁན་དག་བཀུག་ནས་ཕུལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། རས་ལ་དེ་བཞིན་གཤེགས་པའི་སྐུའི་གཟུགས་བརྙན་བྲིས་ཤིག །རི་མོ་མཁན་རྣམས་ཀྱིས་སངས་རྒྱས་ཀྱི་སྐུའི་གཟུགས་བརྙན་བྲི་བར་བརྩམས་པ་ལས་དེ་བཞིན་གཤེགས་པ་ནི་བསོད་ནམས་བརྒྱ་ཕྲག་དུ་མས་བསྒྲུབས་པ་ཡིན་པས་རི་མོ་མཁན་རྣམས་ཀྱིས་བཅོམ་ལྡན་འདས་ཀྱི་སྐུའི་གཟུགས་བརྙན་བྲི་བར་མ་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། རས་སྟོན་ཅིག་དང་འོད་གཏང་ངོ་། །དེ་རྣམས་ཀྱིས་རས་བསྟན་པ་དང་བཅོམ་ལྡན་འདས་ཀྱིས་འོད༌བཏང་བ་ལ་རི་མོ་མཁན་རྣམས་ཀྱིས་ཚོན་རྩི་སྣ་ཚོགས་ཀྱིས་རྒྱས་པར་བྱས་སོ། །དེ་ནས་བཅོམ་ལྡན་འདས་ཀྱིས་སྐུའི་གཟུགས་བརྙན་གྱི་འོག་ཏུ་གསུམ་ལ་སྐྱབས་སུ་འགྲོ་བ་དང་། བསླབ་པའི་གཞི་ལྔ་རྣམས་དང་། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་པོ་ལུགས་དང་མཐུན་པ་དང་། ལུགས་དང་མི་མཐུན་པ་དང་། འཕགས་པའི་ལམ་ཡན་ལག་བརྒྱད་པ་བྲིས་སོ། །གོང་དུ་ནི་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པས། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྲིས་ནས་སིང་ག་ལའི་རྒྱལ་པོ་ལ་བཀའ་ཡིག་སྤྲིང་པ། རས་ལ་རི་མོར་བྲིས་པ་ངས་མུ་ཏིག་ཅན་ལ་སྐྱེས་སུ་བསྐུར་བ་ཡིན་གྱིས། ཁྱོད་ཀྱིས་དེ་ལ་ས་ཕྱོགས་ཡངས་ཤིང་རྒྱ་ཆེ་བར་སིང་ག་ལའི་གླིང་ན་གནས་པའི་སྐྱེ་བོའི་ཚོགས་བསྡུས་ལ། བཀུར་སྟི་ཆེན་པོས་རས་འདི་ཁྲོམས་ཤིག །ཚོང་པ་དེ་རྣམས་ལ་བཀའ་སྩལ་པ། གལ་ཏེ་མུ་ཏིག་ཅན་འདི་ཅི་ཡིན་ཞེས་འདྲི་ན། འདི་ནི་བཅོམ་ལྡན་འདས་དེའི་སྐུའི་གཟུགས་བརྙན་ཡིན་ནོ་ཞེས་བརྗོད་པར་བྱའོ། །

གལ་ཏེ་འོག་མ་འདི་ཅི་ཡིན་ཞེས་འདྲི་ན་དེ་དག་ནི་གསུམ་ལ་སྐྱབས་སུ་འགྲོ་བ་དང་། བསླབ་པའི་གཞི་ལྔ་རྣམས་དང་། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བར་འགྲོ་བར་འཇུག་པ་དང་ལྡོག་པའོ། །འདི་ནི་བདུད་རྩི་རྟོགས་པའི་འཕགས་པའི་ལམ་ཡན་ལག་བརྒྱད་པ་ཡིན་ནོ་ཞེས་བརྗོད་པར་བྱའོ། །གལ་ཏེ་གོང་མ་འདི་ཅི་ཡིན་ཞེས་འདྲི་ན་སྤྲོ་བར་བྱ་བ་ཡིན་ཏེ། གང་ཞིག་སྐྱབས་སུ་འགྲོ་བ་དང་བསླབ་པའི་གཞི་རྣམས་བླངས་ཏེ། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བ་འདི་ལ་རྟོག་ཅིང་བརྩོན་འགྲུས་རྩོམ་པ་དེ་བདུད་རྩི་རྟོགས་པའི་འཕགས་པའི་ལམ་ཐོབ་ནས་སྡུག་བསྔལ་ཐམས་ཅད་ལས་གྲོལ་བར་འགྱུར་བ་ཡིན་ནོ་ཞེས་བརྗོད་པར་བྱའོ། །བཙུན་པ་བཀའ་བཞིན་འཚལ་ཞེས་ཚོང་པ་དེ་རྣམས་ཀྱིས་བཅོམ་ལྡན་འདས་ལས་མཉན་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་དགེ་མཚན་དང་། བཀྲ་ཤིས་དང་། བདེ་ལེགས་སུ༌འགྱུར་བ་དག་བྱས་ཏེ། ཟོང་ཁྱེར་ནས་སིང་ག་ལའི་གླིང་དུ་སོང་སྟེ། རིམ་གྱིས་སིང་ག་ལའི་གླིང་དུ་ཕྱིན་ནས་ལམ་གྱིས་དུབ་པ་ངལ་སོས་ཏེ། རྒྱལ་པོའི་དྲུང་དུ་སོང་ནས་རྐང་པ་གཉིས་ལ་གཏུགས་ཏེ་ཡི་གེ་བྱིན་ནོ། །

རྒྱལ་པོས་ཡི་གེ༌བཀླགས་ཏེ་བཀླགས་ནས་གྲོང་ཁྱེར་དེ་རྡོ་བ་དང་། གསེག་མ་དང་། གྱོ་མོ་བསལ་ནས་ཙན་དན་གྱི་ཆུས་ཆག་ཆག་བཏབ། རྒྱལ་མཚན་དང་བ་དན་བསྒྲེང་། དར་གྱི་ཆུན་འཕྱང་མང་པོ་བཏགས། ཤིན་ཏུ་དྲི་ཞིམ་པོའི་པོག་པོར་ཉེ་བར་བཞག །མེ་ཏོག་སྣ་ཚོགས་བཀྲམ་སྟེ། སིང་ག་ལའི་གླིང་ན་གནས་པའི་སྐྱེ་བོའི་ཚོགས་བསོགས་ནས། དེ་ནས་བཀུར་སྟི་ཆེན་པོ་བྱས་ཏེ་གྲོང་ཁྱེར་གྱི་དབུས་སུ་རིན་པོ་ཆེ་སྣ་བཞི་ལས་བྱས་པའི་སེང་གེའི་ཁྲི་བཤམས་ཏེ། རས་ཕྱེ་བ་དང་སྐྱེ་བོའི་ཚོགས་ཆེན་པོས་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་གསང་བསྟོད་དེ་སྨྲས་སོ། །

དེ་ནས་རྒྱལ་པོའི་བུ་མོ་མུ་ཏིག་ཅན་དད་པ་དྲག་པོས་གཏད་པའི་སྙིང་གིས་བ་སྤུ་ཟིང་ཞེས་བྱེད་ཅིང་མིག་མཆི་མས་གང་བས་ཞབས་གཉིས་ལ་གཏུགས་ཏེ་ཚོང་པ་རྣམས་ལ་དྲིས་པ། ཤེས་ལྡན་དག་འདི་ཅི་ཡིན། དེ་རྣམས་ཀྱིས་སྨྲ་བར་བརྩམས་པ། འདི་ནི་བཅོམ་ལྡན་འདས་དེའི་སྐུའི་གཟུགས་བརྙན་ལགས་སོ། །འོག་མ་འདི་དག་ཅི་ཡིན། འདི་ནི་གསུམ་ལ་སྐྱབས་སུ་འགྲོ་བ་དང་བསླབ་པའི་གཞི་ལྔ་རྣམས་དང་། ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བ་འགྲོ་བར་འཇུག་པ་དང་ལྡོག་པའོ། །འདི་ནི་བདུད་རྩི་རྟོགས་པའི་འཕགས་པའི་ལམ་ཡན་ལག་བརྒྱད་པ་ལགས་སོ། །གོང་མ་འདི་ཅི་ཡིན། སྤྲོ་བར་བགྱི་བ་ལགས་ཏེ། གང་ཞིག་སྐྱབས་སུ་སོང་ནས་བསླབ་པའི་གཞི་རྣམས་བླངས་ཏེ་ལུགས་དང་མཐུན་པ་དང་ལུགས་དང་མི་མཐུན་པའི་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པ་འདི་ལ་རྟོག་ཅིང་བརྩོན་འགྲུས་རྩོམ་པ་དེ་བདུད་རྩི་རྟོགས་པའི་ལམ་ཐོབ་ནས་སྡུག་བསྔལ་ཐམས་ཅད་ལས་གྲོལ་བར༌འགྱུར་བ་ལགས་སོ། །

དེ་ནས་མུ་ཏིག་ཅན་གྱིས་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པ་ལུགས་དང་མཐུན་པ་དང་ལུགས་དང་མི་མཐུན་པ་བསམ་པར་བརྩམས་ཏེ། ཇི་སྲིད་ལན་གསུམ་དུ་མ་བཟླས་པ་དེའི་བར་དུ་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས་ཚིགས་སུ་བཅད་པས་སྨྲས་པ། རིང་ན་བཞུགས་པའི་སངས་རྒྱས་ཀྱིས། །ཤེས་རབ་མིག་ནི་རྣམ་སྦྱངས་པས། །གང་ལ་འདི་འདྲའི་གསོས་མངའ་བ། །སྨན་མཁས་དེ་ལ་ཕྱག་འཚལ་ལོ། །རིང་ན་བཞུགས་པའི་སངས་རྒྱས་ཀྱིས། །ལྟ་བའི་རི་བོ་དྲུངས་ཕྱུང་སྟེ། །ལྟ་བའི་ཟུག་རྔུ་སེལ་མཛད་པ། །སྨན་མཁས་དེ་ལ་ཕྱག་འཚལ་ལོ། །ཞེས་ཚིགས་སུ་བཅད་པས་སྨྲས་ནས་ཚོང་པ་རྣམས་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅག་ནམ་འདོང་བ་དེའི་ཚེ་ཁོ་མོ་ལ་སྦྲོན་ཅིག །དེ་ནས་ཚོང་པ་རྣམས་ཀྱིས་ཟོང་རྣམས་བསྒྱུར་ཏེ་བསྒྱུར་བའི་ཟོང་རྣམས་ཁྱེར་ནས་མུ་ཏིག་ཅན་གྱི་དྲུང་དུ་སོང་སྟེ། ལྷ་མོ་བདག་ཅག་མཆི་ན་བདག་ཅག་གིས་ཅི་ཞིག་བགྱི་བར་བཀའ་སྩལ་པར་གསོལ། དེས་སྨྲས་པ། ཁོ་མོའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག༌འཚོལ་ལ་གནོད་པ་ཆུང་ངམ། ཉམ་ང་བ་ཉུང་ངམ། འཚོའམ། བསྐྱོད་པ་ཡང་ངམ། སྟོབས་དང་བདེ་བ་དང་། སྐུ་ཉམས་དང་ལྡན་ནམ་རེག་པར་གནས་སམ་ཞེས་ཞུས་ལ་འདི་སྐད་ཅེས། བཙུན་པ་དགེ་བའི་བཤེས་གཉེན་གྱིས་བགྱི་བ་གང་ལགས་པ་དེ་བཅོམ་ལྡན་འདས་ཀྱིས་མཛད་དེ། བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་རྣམས་ལས་ནི་རྐང་པ་ཕྱུང་། ལྷ་དང་མི་རྣམས་སུ་ནི་བཞག །འཁོར་བ་ལས་ནི་རྒྱང་བསྲིངས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་བོ་ལས་ནི་བསྒྲལ། ངན་སོང་གི་སྒོ་ནི་བསྐུམ། མཐོ་རིས་ཐར་པའི་སྒོ་ནི་ཕྱེ། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་ཏེ། བཙུན་པ་བདག་ནི་འཕགས་སོ། །མངོན་པར་འཕགས་སོ། །བདག་བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་སྐྱབས་སུ༌མཆི་ཡིས། དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད༌འཚོ་བའི་བར་དུ་སྲོག་དང་ཡང་བསྡོས་དེ་སྐྱབས་སུ་མཆི་བར་མངོན་པར་དད་ལགས་སོ། །ཞེས་གསོལ་ལ། མུ་ཏིག་བྲེ་གསུམ་པོ་འདི་ཁྱེར་ལ་ཆ་གཅིག་ནི་སངས་རྒྱས་ལ། ཆ་གཅིག་ནི་ཆོས་ལ། ཆ་གཅིག་ནི་དགེ་འདུན་ལ་ཕུལ་ཅིག །དེ་ནས་ཚོང་པ་དེ་རྣམས་ཀྱིས་ཟོང་དང༌སྐྱེས་བསྐུར་བ་ཡང་ཁྱེར་ཏེ་དོང་ནས་རིམ་གྱིས་མཉན་ཡོད་དུ་ཕྱིན་པ་དང་། ལམ་གྱིས་དུབ་པ་ངལ་སོས་ནས་བཅོམ་ལྡན་འདས་གང་ན་བ་དེར་སོང་སྟེ་ཞབས་གཉིས་ལ་གཏུགས་ནས་ཇི་སྐད་སྤྲིང་བ་བཞིན་བཅོམ་ལྡན་འདས་ལ་གསོལ་ནས་འདི་སྐད་ཅེས་ཀྱང་གསོལ་ཏོ། །བཙུན་པ་སྐྱེས་སུ་ཕུལ་བའི་མུ་ཏིག་བྲེ་གསུམ་པོ་འདི་ལགས་ཏེ། མུ་ཏིག་ཆ་གཅིག་ནི་སངས་རྒྱས་ལ། ཆ་གཅིག་ནི་ཆོས་ལ། ཆ་གཅིག་ནི་དགེ་འདུན་ལ་ཕུལ་ལགས་སོ། །

ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཞུས་པ། བཙུན་པ་སྐྱེས་འདི་གང་ནས་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཤཱཀྱ་མིང་ཆེན་གྱི་མངག་གཞུག་མ་བསྐྱེད་མ་ཞེས་བྱ་བ་ང་ལས་ཆོས་མཉན་ནས་སོང་བ་ལས། ལམ་ཀར་བ་དྲུས་མས་བསད་པ་མཐོང་ངམ། བཙུན་པ་མཐོང་ལགས་སོ། །དེས་ང་ལ་སེམས་དང་བ་བསྐྱེད་དེ་ཤི་བས་སིང་ག་ལའི་རྒྱལ་པོའི་བུ་མོ་མུ་ཏིག་ཅན་ཞེས་བྱ་བར་གྱུར་ཏེ། བདེན་པ་མཐོང་ནས་དེས་སྐྱེས་བསྐུར་བ་འདི་ཡིན་ནོ། །

འདི་ལས་སངས་རྒྱས་ཀྱི༌སྐལ་བ་གང་ཡིན་པ་དེས་དྲི་གཙང་ཁང་གི་ཞལ་ཞལ་བྱོས་ཤིག །ཆོས་ཀྱི་གང་ཡིན་པ་དེ་ནི་ཆོས་འཛིན་པའི་གང་ཟག་རྣམས་ལའོ། །དགེ་འདུན་གྱི་གང་ཡིན་པ་དེ་ནི་དགེ་འདུན་གྱིས་མཉམ་པར་བགོས་ཤིག །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་མུ་ཏིག་ཅན་གྱིས་ལས་ཅི་ཞིག་བགྱིས་ན་དེས་ན༌བྲན་མོར་གྱུར་ལགས། ལས་ཅི་ཞིག་བགྱིས་ན་དེས་རྒྱལ་པོ་ཕྱུག་པོའི་རིགས་སུ་སྐྱེས་ཤིང་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མུ་ཏིག་ཅན་འདི་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བའི་ལས་དག་བྱས་ཤིང་བསགས་པས་མུ་ཏིག་ཅན་འདི་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར།

དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་དག་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་རྣམས་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི༌ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་འཇིག་རྟེན་དུ་སྟོན་པ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་ནས། དེས་སངས་རྒྱས་ཀྱི་མཛད་པ་མཐའ་དག་མཛད་ནས་བུད་ཤིང་ཟད་པའི་མེ་བཞིན་དུ་བཱ་རཱ་ཎ་སཱིར་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་། རྒྱལ་པོ་ཀྲྀ་ཀཱིས་དེའི་སྐུ་དྲི་ཞིམ་པོའི་ཤིང་ཐམས་ཅད་ཀྱིས་སྤུངས་ཏེ། སྤུངས་ནས་བཀུར་སྟི་ཆེན་པོས་བསྲེགས་ཏེ་མེ་དེ་འོ་མས་བསད་ནས་སྐུ་གདུང་དེ་རྣམས་གསེར་གྱི་བུམ་པར་བླུགས་ཏེ། ལམ་པོ་ཆེའི་བཞི་མདོར་རིན་པོ་ཆེ་སྣ་བཞི་ལས་བྱུང་བའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་ཡོད་ལ། འཕང་དུ་དཔག་ཚད་ཕྱེད་པ་ཞིག་བརྩིགས་ནས་དུས་མཆོད་ཆེན་པོ་བཙུགས་སོ། །

བཱ་རཱ་ཎ་སཱི་ན་ཚོང་དཔོན་ཕྱུག་པ་ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་ཡོད་པ་དེས། རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་ཀྱང་དེ་ལ་བུ་ཕོ་ཡང་མེད་བུ་མོ་ཡང་མེད་ནས། དེ་ལག་པ་འགྲམ་པ་ལ་གཏད་ནས་བདག་གི་ཁྱིམ་དུ་ནོར་ཕལ་པོ་ཆེ་བསགས་ཀྱང་བདག་ལ་བུ་ཕོ་ཡང་མེད་བུ་མོ་ཡང་མེད་པས་བདག་ཤི་ནས་བདོག་པ་ཐམས་ཅད་བུ་མེད་དོ་ཞེས་བྱས་ཏེ་རྒྱལ་པོས་དབང་བྱས་པར་འགྱུར་རོ་སྙམ་ནས་སེམས༌ཁོང་དུ་ཆུད་ཅིང་འདུག་པ་དེ་ལ་དགེ་སྦྱོང་དང་བྲམ་ཟེ་དང་། གྲོགས་པོ་དང་མཛའ་བཤེས་དང་། ཉེ་དུ་དང་། ལྟས་མཁན་རྣམས་ཀྱིས་སྨྲས་པ། ལྷ་མཉེས་པར་བྱོས་ཤིག་དང་ཁྱོད་ལ་བུ་ཡོད་པར་འགྱུར་རོ། །

དེ་བུ་མེད་དེ་བུ་མངོན་པར་འདོད་པས་ཞི་བ་དང་། ཆུ་ལྷ་དང་། ལུས་ངན་དང་། བརྒྱ་བྱིན་དང་། ཚངས་པ་ལ་སོགས་པ་གཞན་ཡང་ལྷ་ཁྱད་པར་ཅན་རྣམས་ལ་གསོལ་བ་འདེབས་པ་འདི་ལྟ་སྟེ། ཀུན་དགའ་ར་བའི་ལྷ་དང་། ནགས་ཚལ་གྱི་ལྷ་དང་། བཞི་མདོའི་ལྷ་དང་། སུམ་མདོའི་ལྷ་དང་། གཏོར་མ་ལེན་པའི་ལྷ་དང་། ལྷན་ཅིག་སྐྱེས་པའི་ལྷ་དང་། ཆོས་མཐུན་པ་པ་དང་། རྟག་ཏུ་རྗེས་སུ་འབྲང་བའི་ལྷ་ལ་ཡང་གསོལ་བ་འདེབས་སོ། །འདི་ལྟར་གསོལ་བ་འདེབས་པའི་རྒྱུས་བུ་ཕོ་དང་བུ་མོ་སྐྱེ་བར་འགྱུར་རོ་ཞེས་འཇིག་རྟེན་ན་དེ་སྐད་དུ་གྲགས་པ་ཡོད་དེ། དེ་ཡང་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་ན་ནི་རེ་རེ་ཡང་དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །

འོན་ཀྱང་གནས་གསུམ་མངོན་དུ་གྱུར་པ་ལས་བུ་ཕོ་དང་བུ་མོ༌སྐྱེ་བར་འགྱུར་ཏེ། གནས་གསུམ་གང་ཞེ་ན་ཕ་དང་མ་གཉིས་ཆགས་པར་གྱུར་ཅིང་ལྷན་ཅིག་འདུས་པ་དང་། མ་མངལ་རུང་བར་གྱུར་ཅིང་ཟླ་མཚན་དང་ལྡན་པ་དང་། དྲི་ཟ་ཉེ་བར་གནས་པར་གྱུར་པ་སྟེ། གནས་དེ་གསུམ་མངོན་དུ་གྱུར་པ་ལས་བུ་ཕོ་དང་བུ་མོ་སྐྱེ་བར་འགྱུར་བ་ཡིན་ན་དེས་བུ་ཡོད་པའི་ལས་མ་བྱས་པས་དེས་ན་དེ་ལ་བུ་ཕོ་དང་བུ་མོ་མེད་དོ། །ཇི་ཙམ་ན་དེ་ནད་ཀྱིས་ཐེབས་ནས་དེ༌རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་རྣམས་ཀྱིས་བསྙེན་བཀུར་བྱས་ཀྱང་དེའི་ནད་ཞི་བར་མ་གྱུར་ཏོ། །

དེ་ནས་དེའི་ཆུང་མས་བསམས་པ། བདག་གི་ཁྱིམ་ན་ནོར་ཕལ་མོ་ཆེ་བསགས་པ་ནི་བདག་ལ་བུ་ཕོ་ཡང་མེད་བུ་མོ་ཡང་མེད་ལ། བདག་གི་ཁྱིམ་ཐབ་འདི་ནི་འཆི་བར་འགྱུར་གྱིས། ད་ནི་གལ་ཏེ་འཇིག་རྟེན་ཕ་རོལ་གྱི་ལམ་རྒྱགས་མ་བླངས་ན་ནོར་ཟས་འདི་ཐམས་ཅད་བདག་ལ་བུ་མེད་དོ་ཞེས་བྱས་ནས་རྒྱལ་པོས་དབང་བྱས་པར་འགྱུར་རོ་སྙམ་ནས། དེའི་མུ་ཏིག་གི་དོ་ཤལ་བརྒྱ་སྟོང་རི་བ་མགུལ་ན་ཐོགས་པ་དེས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་དེ་ལ་དྲི་དང་བྱུག་པས་བྱུགས་ནས་མཆོད་པ་བྱས་ཏེ་བཏགས་ནས་དད་པ་དྲག་པོས་དྲུང་དུ་གཏུགས་ཏེ་སྨོན་ལམ་བཏབ་པ། སྦྱིན་པའི་ཆོས་ཡོངས་སུ་བཏང་བ་དང་སེམས་བསྐྱེད་པའི་དགེ་བའི་རྩ་བ་འདིས་བདག་ཕྱུག་པོའི་རིགས་སུ༌སྐྱེས་ཤིང་ཡོན་ཏན་འདི་ལྟ་བུ་ཡང་ཐོབ་ཅིང་སྟོན་པ་འདི་ལྟ་བུ་མཉེས་པར་བྱེད་ཀྱི། མི་མཉེས་པར་མ་གྱུར་ཅིག་ཅེས་བྱས་སོ། །

དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཚོང་དཔོན་གྱི་ཆུང་མ་གང་ཡིན་པ་དེ་ནི་མུ་ཏིག་ཅན་འདི་ཉིད་ཡིན་ཏེ། འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བྱ་བ་བྱས་ནས། སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ཕྱུག་པོའི་རིགས་སུ་སྐྱེས་ཤིང་བཙས་པ་ན་མུ་ཏིག་གི་ཆར་བབ་བོ། །ངའི་བསྟན་པ་ལ་ཡང་དད་པ་བསྐྱེད་པས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །

གཞན་ཡང་ཚོང་དཔོན་ནོར་མང་དུ་བསགས་པ་དེའི་ཆུང་མར་གྱུར་པ་ན་དེ་ན་འདིས་དབང་ཕྱུག་གི་གྲགས་པས་རྒྱགས་ནས་སྤྱོད་ཡུལ་ན་གནས་པའི་འཇིག་རྟེན་ཐམས་ཅད་ལ་ཚིག་ཏུ་བྲན་མོའི་བུ་ཞེས་སྨྲས་པས། དེའི་ལས་ཀྱི་རྣམ་པར་སྨིན་པས་ཚེ་རབས་མང་པོར་བྲན་མོར་གྱུར་ཏོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ཞིང་། གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་ལ། འདྲེན་མ་རྣམས་ཀྱི་ནི་འདྲེན་མ་ཡིན་ནོ། །དེ་བས་ན་དགེ་སློང་དག་གཅིག་ཏུ་གནག་པའི་ལས་རྣམས་དང་། འདྲེན་མ་རྣམས་ནི་སྤངས་ལ། གཅིག་ཏུ་དཀར་བའི་ལས་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ། །ཞེས་གསུངས་སོ།། །།

ས་ག་མའི་བུ་སུམ་ཅུ་རྩ་གཉིས་རྒྱལ་པོ་གསལ་རྒྱལ་གྱིས་བསད་ཀྱང་སངས་རྒྱས་ཀྱིས་ཆོས་བསྟན་ནས་འབྲས་བུ་ཐོབ་པའི་དབང་གིས་ས་ག་མ་ལ་མྱ་ངན་མ་སྐྱེས་པའི་ཚུལ། འདུལ་བ་ལུང་གཞི་ལས་བཏུས།

ཀོ་ས་ལའི་རྒྱལ་པོ་གསལ་རྒྱལ་གྱི་བློན་པོའི་མཆོག་རི་དྭགས་འཛིན་ཅེས་བྱ་བ་དེས་རིགས་མཉམ་པ་ལས་ཆུང་མ་བླངས་ཏེ་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད་དགའ་བར་བྱེད་དགའ་མགུར་སྤྱོད་པར་བྱེད་པ་ལས་ཁྱེའུ་ཞིག་བཙས་སོ་ཞེས་བྱ་བ་ནས་དེ་བཞིན་དུ་ཁྱེའུ་བདུན་བཙས་ཏེ། དེ་ལ་དྲུག་གི་མིང་ནི་ཅི་དགའ་བར་བཏགས་སོ། །ཐ་ཆུང་གང་ཡིན་པ་དེའི་མིང་ནི་ས་ག་ཞེས་བྱ་བར་བཏགས་སོ། །

ཇི་ཙམ་ན་རི་དྭགས་འཛིན་གྱི་ཆུང་མ་ཤི་ནས། དེས་བུ་དྲུག་གི་ཁྱིམ་ཕུབ་པ་དང་དེ་རྣམས་རང་རང་གི་ཆུང་མ་རྣམས་དང་ལྷན་ཅིག་བྱི་དོར་ལྷུར་ལེན་ཅིང་ཁྱིམ་གྱི་འཚོ་ནམ་མི་སེམས་པར་འདུག་གོ །ཁྱིམ་བདག་རི་དྭགས་འཛིན་འགྲམ་པ་ལ་ལག་པ་གཏད་ནས་སེམས༌ཁོང་དུ་ཆུད་ཅིང་འདུག་གོ །

དེའི་གྲོགས་བཤེས་བྲམ་ཟེ་ཞིག་ཡོད་པ་དེ་འོངས་ནས་དེས་དེ་སེམས༌ཁོང་དུ་ཆུད་པ་མཐོང་ནས་སྨྲས་པ། ཁྱིམ་བདག་ཅིའི་ཕྱིར་སེམས་ཁོང་དུ་ཆུད། བདག་གི་བུ་འདི་དག་རང་རང་གི་ཆུང་མ་དང་ལྷན་ཅིག་བྱི་དོར་ལྷུར་ལེན་ཅིང་ཁྱིམ་གྱི་འཚོ་ནམ་མི་སེམས་པར་འདུག་པས་ཁྱིམ་ཞིག་པར་འགྱུར་རོ། །དེས་སྨྲས་པ། ཅིའི་ཕྱིར་ས་ག་ལ་ཁྱིམ་མི་དབུབ་གལ་ཏེ་ན་ཡང་ལྷག་པར་ཕུང་ཀྲོལ་བྱེད་ཀྱང་སུས་ཤེས། གལ་ཏེ་ན་འདི་ལྷག་པར་ལེགས་པར་བྱེད་ཀྱང་སུས་ཤེས། གལ་ཏེ་ཁྱོད་དད་ན་བུ་མོ་ཞིག་བཙལ་ལོ། །དེ་བཞིན་དུ་གྱིས་ཤིག །དེ་ཚོལ་ཞིང་རིམ་གྱིས་ཡུལ་ཙམ་པར་ཕྱིན་ཏོ། །ཙམ་པ་ན་ཁྱིམ་བདག་སྟོབས་ཀྱི་བཤེས་གཉེན་ཞེས་བྱ་བ་ཡོད་དེ། དེའི་བུ་མོ་ས་ག་མ་ཞེས་བྱ་བ་གཟུགས་བཟང་བ། དར་ལ་བབ་པ། ཚུལ་དང་དུལ་བ་དང་ལྡན་པ། མཁས་པ། གཡེར་བ་ཞིག་ཡོད་པ་དེ་བུ་མོ་ཡིད་འཕྲོག་མ་གང་འདོད་པ་རྣམས་དང་ལྷན་ཅིག་ཏུ་སྐྱེད་མོས་ཚལ་གྱི་གཞིར་ཆས་པ་དང་བྲམ་ཟེ་དེ་ཡང་ཕྱོགས་དེར་ཕྱིན་ཏེ། དེས་བུ་མོ་རྣམས་མཐོང་ནས་དེས་བསམས་པ། འདི་རྣམས་ཁོ་ན་ལ་རེ་ཞིག་བརྟག་པར་བྱའོ་སྙམ་ནས་དེ་བརྟག་པ་ལྷུར་ལེན་ཅིང་དལ་བུས་འཇབ་ཅིང་དེ་རྣམས་ཀྱི་ཕྱི་བཞིན་དུ་སོང་ངོ་། །

བུད་མེད་ནི་ཕལ་ཆེར་ཡང་བའི་རང་བཞིན་ཅན་ཡིན་པས་དེ་རྣམས་ལས་ཁ་ཅིག་ནི་བང་རྒྱུག །ཁ་ཅིག་ནི༌མཆོང་བར་བྱེད། ཁ་ཅིག་ནི་འགྲེ། ཁ་ཅིག་ནི་དགོད། ཁ་ཅིག་ནི་ལུས་སྒྱུར་བར་བྱེད། ཁ་ཅིག་ནི་གླུ་ལེན་པར་བྱེད། འདི་དག་དང་གཞན་ཡང་སྤྱོད་ཚུལ་ངན་པ་དག་བྱེད་དོ། །དུལ་བ་ཕུན་སུམ་ཚོགས་པ་དེ་ནི་གོམ་པ་དལ་གྱིས་དེ་དག་དང་ལྷན་ཅིག་འགྲོའོ། །

ཇི་ཙམ་ན་སྐྱེད་མོས་ཚལ་དུ་ཕྱིན་པ་དང་བུ་མོ་དེ་རྣམས་ནི་རྫིང་གི་འགྲམ་དུ་གོས་རྣམས་བཞག་ནས་མོད་ལ་ཞུགས་ཏེ་རྩེ་བར་བརྩམས་སོ། །དེ་ནི་ཇི་ཙམ་ཇི་ཙམ་ཆུར་ནུབ་པ་དེ་ཙམ་དེ་ཙམ་དུ་གོས་དག་རྫེ་ཞིང་འཇུག་ལ། ཇི་ཙམ་ཇི་ཙམ་ལྡང་བ༌དེ་ཙམ་དེ་ཙམ་དུ་གོས་དག་འབེབས་ཤིང་ལྡང་སྟེ། དེ་ལྟ་བུར་སྤྱོད་ལམ་ཞི་བ་ཡིན་ནོ། །དེ་ནས་ཁྲུས་ཀྱི་བརྩོན་པ་བྱས་ནས་གནས་གཅིག་ཏུ་འདུག་པ་དང་། བུ་མོ་དེ་རྣམས་ནི་ཐོག་མར་རང་ཟས་ཟོས་ནས་དེའི་འོག་ཏུ་འཁོར་གྱི་སྐྱེ་བོ་ལ་སྦྱིན་པར་རྩོམ་མོ། །དེ་ནི་འཁོར་གྱི་སྐྱེ་བོ་ལ་སྔར་བྱིན་ནས་དེའི་འོག་ཏུ་རང་ཟ་བར་རྩོམ་མོ། །དེ་ནས་ཟོས་ཤིང་འཐུངས་ནས་སྐྱེད་མོས་ཚལ་གྱི་བདེ་བ་ཉམས་སུ་མྱོང་བར་བྱས་ནས་དོང་ངོ་། །

ཇི་ཙམ་ན་ལམ་ཀར་ཆུ་རྒལ་བར་བྱེད་པ་ན་བུ་མོ་དེ་རྣམས་ནི་མཆིལ་ལྷམ་ཕུད་ནས་རྒལ་ལོ། །དེ་ནི་མཆིལ༌ལྷམ་དང་བཅས༌པས་དོང་ངོ་། །ཡང་དོང་སྟེ། དེ་དག་ཀུན་དགའི་ར་བར་ཞུགས་པ་དང་དེས་ནི་གདུགས་ཐོགས་ཏེ་ཨ་མྲའི་ཚལ་ནས་བྱུང་ངོ་། །གཞན་དག་གིས་གདུགས་རྣམས་བོར་རོ། །དེ་ནས་རླུང་དང་ཆར་པ་བབ་ནས་དེའི་ཚེ་བུ་མོ་རྣམས་ལྷ་ཁང་དུ་ཞུགས་ནས་འདུག་གོ །དེ་ནི་བླ་གབ་མེད༌པ་ནའོ། །

བྲམ་ཟེ་དེ་ཡང་དེའི་རྗེས་བཞིན་དུ་སོང་བ་ལས་དེས་དེའི་མཚན་ཉིད་དང་སྤྱོད་ཚུལ་དེ་ལྟ་བུ་མཐོང་ནས། དེ་ནས་ངོ་མཚར་སྐྱེས་ཏེ་བུ་མོ་དེ་ལ་དྲི་བར་བརྩམ་པ། བུ་མོ་ཁྱོད་སུའི་སྟོབས་ཀྱི་བཤེས་གཉེན་གྱི་བུ་མོའོ། །བུ་མོ་ཁྱོད་ལ་ཅུང་ཟད་ཅིག་དྲིས་མ་ཁྲོ་ཞིག །དེས་འཛུམ་པ་སྔོན་དུ་བཏང་ནས་སྨྲས་པ། ཁུ་གུ་འདི་ལ་ཁྲོར་ཅི་མཆིས་དྲིས་ཤིག །བུ་མོ་འདི་དག་ཐམས་ཅད་ནི་རྒྱུག་པ་དང་། མཆོང་བ་དང་། འགྲེ་བ་དང་། ལུས་སྒྱུར་བར་བྱེད་པ་དང་། གླུ་ལེན་པར་བྱེད་ཅིང་འདི་དག་དང་གཞན་ཡང་སྤྱོད་ཚུལ་ངན་པ་བྱེད་ཅིང་འགྲོ་ན། ཁྱོད་ནི་ཚུལ་དང་དུལ་བ་ཕུན་སུམ་ཚོགས་པས་དལ་བུས་རྒྱུ་ཞིང་དེ་རྣམས་དང་ལྷན་ཅིག་སྐྱེད་མོས་ཚལ་དུ་འགྲོ་བར་བྱེད་དོ། །དེས་སྨྲས་པ་བུ་མོ་ཐམས་ཅད་ནི་ཕ་དང་མས་བཙོང་བའི་རྫས་ཡིན་ན། གལ་ཏེ་བདག་གིས༌མཆོངས་སམ་འགྲེས་ནས་རྐང་པའམ་ལག་པ་ཆག་པར་གྱུར་ན། བདག་ལ་སུ་ཞིག་སློང་བར་འགྱུར་ཏེ། ངེས་པར་བདག་ཇི་སྲིད༌འཚོ་བའི་བར་དུ་ཕ་དང་མ་ཁོ་ནའི་གསོན་མར་འགྱུར་རོ། །བུ་མོ་ལེགས་ཏེ། དེ་ནི་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་འདི་དག་ནི་གོས་རྣམས་མཐའ་གཅིག་ཏུ་བཞག་ནས་གོས་གཅིག་ཀྱང་མེད་པར་མོད་ལ་ཞུགས་ནས་རྩེ་བར་རྩོམ་ལ། ཁྱོད་ནི་ཇི་ཙམ་ཇི་ཙམ་དུ་ཆུར་ནུབ་པ་དེ་ཙམ་དེ་ཙམ་དུ་གོས་རྫེ་བར་བྱེད་དོ། །

ཁུ་གུ་བུད་མེད་ནི་ངོ་ཚ་ཤེས་པ་དང་ཁྲེལ་ཡོད་པ་དང་ལྡན་པར་བྱ་དགོས་པས་གལ་ཏེ་བདག་གི་གོས་ཕུད་པ་འགའ་ཞིག་གིས་མཐོང་ན། མི་རིགས་པར་འགྱུར་རོ། །བུ་མོ་ཁྱོད་ལ་དེ་ན་སུ་ཞིག་ལྟ། ཁུ་གུ་རེ་ཞིག་ཁྱོད་ཁོ་ནས་ཀྱང་བདག་མཐོང་བར་འགྱུར་རོ། །བུ་མོ་ལེགས་ཏེ། དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་འདི་དག་ནི་རང་སྔར་ཟོས་ནས་དེའི་འོག་ཏུ་འཁོར་གྱི་སྐྱེ་བོ་ལ་ཟན་སྦྱིན་པར་བྱེད་ལ། ཁྱོད་ནི་འཁོར་གྱི་སྐྱེ་བོ་ལ་སྔར་ཟན་བྱིན་ནས་དེའི་འོག་ཏུ་རང་ཟ་བར་བྱེད་དོ། །ཁུ་གུ་བདག་ཅག་ནི་བསོད་ནམས་ཀྱི་འབྲས༌བུས་འཚོ་བས་བདག་ཅག་ལ་རྟག་ཏུ་དུས་སྟོན་མཆིས་ལ། འདི་དག་ནི་ཚེགས་འབྱུང་བའི་འབྲས་བུས་འཚོ་བ་ལགས། བརྒྱ་ལམ་ན་ལན་འགའ་རྒྱ་ཆེན་པོར་འཐོབ་པའི་ཕྱིར་རོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །

གཞན་ཡང་འདི་དྲི་སྟེ། འཇིག་རྟེན་ཐམས་ཅད་ནི་སྐམ་ལ་མཆིལ་ལྷམ་གྱོན་ལ་ཁྱོད་ནི་ཆུ་ལ་གྱོན་པ་དེ་ཅི། ཁུ་གུ་འཇིག་རྟེན་བླུན་མོད། ཆུ་ཁོ་ན་ལ་མཆིལ་ལྷམ་བགོ་འཚལ་ཏེ། ཅིའི་སླད་དུ་ཞེ་ན། ཐང་ལ་ནི་སྡོང་དུམ་དང་། ཚེར་མ་དང་། རྡོ་བ་དང་། ཟུག་རྡོ་དང་། ཉ་ཕྱིས་ཀྱི་དུམ་བུ་དང་། སྲིན་ཀོག་གི་དུམ་བུ་རྣམས་མངོན་ལ། ཆུ་ལ་ནི་དེ་དག་མི་མངོན་པས་དེས་ན་ཆུ་ཁོ་ན་ལ༌མཆིལ་ལྷམ་བགོ་བར་བགྱིའི་ཐང་ལ་ནི་མ་ལགས་སོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །གཞན་ཡང་འདི་དྲི་སྟེ། བུ་མོ་དེ་དག་ནི་ཉི་མ་ལ་གདུགས་ཐོགས་ན། ཁྱོད་ནི་ཀུན་དགའི་ར་བའི་ཤིང་གི་གྲིབ་མ་ལ་ཐོགས་པར་བྱེད་ན། འདི་ལ་རིགས་པ་ཅི་ཞིག་ཡོད། ཁུ་གུ་འཇིག་རྟེན་བླུན་མོད་ཀུན་དགའ་ར་བ་ཁོ་ནར་གདུགས་བཅང་འཚལ་ཏེ། དེ་ཅིའི་སླད་དུ་ཞེ་ན། ཀུན་དགའ་ར་བ་ནི་རྟག་ཏུ་སྤྲེའུ་དང་བྱ་རྣམས་ཀྱིས་གང་བས་བྱ་རྣམས་ནི་གཅིན་རྟུག་འཐོར་ཞིང་རུས་པའི་དུམ་བུ་དག་འཐོར་རོ། །སྤྲེའུ་རྣམས་ཀྱང་བཤང་བ་དང་གཅི་བ་བྱེད་ཅིང་འབྲས་བུའི་ཟ་འཕྲོ་དག་འཐོར་བར་བྱེད་ལ། རང་བཞིན་གྱིས་རྒོད་བག་ཅན་ཡིན་པས་ཕན་ཚུན་ཡལ་ག་གཞན་དུ་འགྲོ་བར་བྱེད་པ་ན་ཤིང་དུམ་དག་ལྷུང་བར་བྱེད་དོ། །བླ་གབ་མ་མཆིས་པ་ལ་ནི་དེ་དག་མ་མཆིས་སོ། །བརྒྱ་ལ་མཆིས་ན་ཡང་དེ་རེས་འགའ་ཞིག་འབབ་པར་བས་ཏེ། དེས་ན་ཀུན་དགའ་ར་བ་ཁོ་ནར་གདུགས་བཅང་བར་བགྱིའི། བླ་གབ་མ་མཆིས་པར་ནི་མ་ལགས་སོ། །བུ་མོ་ལེགས་ཏེ་དེ་ཡང་ཁོང་དུ་ཆུད་དོ། །

གཞན་ཡང་འདི་དྲི་སྟེ་བུ་མོ་འདི་དག་ནི་རླུང་དང་ཆར་པ་བྱུང་ན་ལྷ་ཁང་དུ་འཇུག་ན་ཁྱོད་ནི་བླ་གབ་མེད་པར་འདུག་གོ །ཁུ་གུ་བླ་གབ་མ་མཆིས་པ་ཁོ་ནར་གནས་པར་བགྱིའི། ལྷ་ཁང་དུ་འཇུག་པར་ནི་མ་ལགས་སོ། །བུ་མོ་འདི་ལ་རིགས་པ་ཅི་ཡོད། ཁུ་གུ་ལྷ་ཁང་སྟོང་པ་འདི་དག་ནི་རྟག་ཏུ་དྭ་དང་། ནལ་ཕྲུག་དང་། གཡོན་ཅན་རྣམས་ཀྱིས་མི་སྟོང་ལགས་ཏེ། གལ་ཏེ་བདག་ཞུགས་པའི་ཡན་ལག་དང་ཉིང་ལག་དག་ལ་འགའ་ཞིག་གིས་རེག་ན། དེ་ལྟ་ན་བདག་གི་ཕ་མ་དག་ལ་མི་སྙན་པར་མི་འགྱུར་རམ། ཉིས་ན་བླ་གབ་མེད་པར་སྲོག་དང་ཕྲལ་བ་ནི་བླའི། ལྷ་ཁང་སྟོང་པར་ནི་མི་འཇུག་གོ །

དེ་ནས་བྲམ་ཟེ་དེ་དེའི་སྤྱོད་ཚུལ་གྱིས་རངས་ཤིང་ཡིད་བདེ་བ་སྐྱེས་ནས་ཁྱིམ་བདག་སྟོབས་ཀྱི་བཤེས་གཉེན་གྱི་ཁྱིམ་དུ་ཞུགས་ཏེ་བུ་མོ་ཐོབ་པར་འདོད་པའི་སྤྲོ་བ་དང་བཅས་པའི་བདེ་ལེགས་སུ་གྱུར་ཅིག །བདེ་ལེགས་སུ་གྱུར་ཅིག་ཅེས༌སྨྲས་པ་དང་། ཁྱིམ་འཁོར་གྱི་སྐྱེ་བོས་སྨྲས་པ། བྲམ་ཟེ་རེ་ཞིག་བསླང་བའི་དུས་ནི་མ་ཡིན་ན། ཅི་ཞིག་སློང་། བུ་མོ་སློང་ངོ་། །སུ་ཞིག་གི་ཆེད་དུ། མཉན་ཡོད་ན་བློན་པོའི་མཆོག་རི་དྭགས་འཛིན་ཅེས་བྱ་བ་དེའི་བུ་ས་ག་ཞེས་བྱ་བའི་འོ། །དེ་རྣམས་ཀྱིས་སྨྲས་པ། དེ་དང་བདག་ཅག་ནི་རིགས་མཉམ་པ་ཡིན་ན། འོན་ཀྱང་ཡུལ་ཧ་ཅང་ཡང་ཐག་རིང་ཆེས་སོ། །དེས་སྨྲས་པ། རིང་པོ་ཁོ་ན་ལ་བུ་མོ་སྦྱིན་པར་བྱའོ། །ཅིའི་ཕྱིར་ཞེ་ན། ཉེ་ན་རེ་ཞིག་གལ་ཏེ་བདེ་བར་གྱུར་པ་ཐོས་ན་དགའ་བ་སྐྱེད་པར་ཟད། ཉེ་ན་སྡུག་བསྔལ་བར་གྱུར་ན་སྦྱིན་པ་དང་མཆོད་པ་དང་། བཀུར་སྟི་བྱ་བས་དུབ་པར་འགྱུར་ཞིང་ནོར༌འགེད་པར་ཡང་འགྱུར་རོ། །

དེ་རྣམས་ཀྱིས་སྨྲས་པ། གལ་ཏེ་དེ་ལྟ་ན་སྦྱིན་ནོ། །དེ་ནས་བྲམ་ཟེ་དེ་བདེ་ལེགས་སུ་གྱུར་ཅིག་ཅེས་སྨྲས་ནས་སོང་སྟེ་རིམ་གྱིས་མཉན་ཡོད་དུ་ཕྱིན་ནས་ལམ་གྱིས་དུབ་པ་བསལ་ཏེ་བློན་པོའི་མཆོག་རི་དྭགས་འཛིན་གྱི་དྲུང་དུ་སོང་ནས། དེ་ནས་བུ་མོའི་ཟ་བ་དང་། གནས་པའི་སྤྱོད་ཚུལ་དང་། གཟུགས་བཟང་ཞིང་དར་ལ་བབ་པ་དང་། མཛེས་པ་དང་མཁས་པ་དག་ཇི་ལྟ་བ་བཞིན་དུ་བསྙད་ནས་སྨྲས་པ། བདག་གི་ཉོན་མོངས་པ་ཆེན་པོས་ཡུལ་དང་ཚོང་རྡལ་སྣ་ཚོགས་སུ་བརྒྱུས་པས་སྡུག་བསྔལ་གྱིས་དེ་རྙེད་ཀྱིས་ད་ནི་སོངས་ལ་ལོངས་ཤིག །དེ་ནས་བློན་པོའི་མཆོག་རི་དྭགས་འཛིན་གྱིས་ཉི་མ་དང་ཚེས་གྲངས་དང་། ཡུད་ཙམ་དང་རྒྱུ་སྐར་དག་བསྟུན་ནས་ཙམ་པར་འོངས་ཏེ། དཔལ་གྱི་འབྱོར་བ་ཆེན་པོས་ས་གའི་ཆུང་མ་བླངས་སོ། །

དེ་མི་ཡུལ་དུ་འགྲོ་བའི་ཚེ་མས་བསླབས་པ། བུ་མོ་ཁྱོད་ཀྱིས་ཉི་མ་དང་ཟླ་བ་གཉིས་ལ་རྟག་ཏུ་ཕྱག་བྱ། མེ་ལ་བསྙེན་བཀུར་བྱ། མེ་ལོང་དྲི་མ་ཕྱི་བར་བྱ། གོས་དཀར་པོ་བགོ་བར་བྱ། བླང་བར་བྱའི་སྦྱིན་པར་མི་བྱ། ཚིག་བསྲུང་བར་བྱ། ལངས་ནས་སུ་ལ་ཡང་སྟན་བསྟབ་པར་མི་བྱ། ཞིམ་པོ་བཟའ་བར་བྱ། བདེ་བར་ཉལ་བར་བྱ། ཐེམ་སྐས་གཟུགས་པར་བྱའོ། །དེ་ནས་རི་དྭགས་འཛིན་གྱིས་ཐོས་ནས་དེས་བསམས་པ། བུ་མོ་འདི་ལྟ་བ་ལོག་པར་འཛིན་དུ་བཅུག་སྟེ། བདག་གིས་འདི་ལྟ་བ་ལོག་པ་དང་ཕྲལ་ལ་ཡང་དག་པའི་ལྟ་བ་འཛིན་དུ་གཞུག་གོ་སྙམ་དུ་བསམས་ནས་དེ་བླངས་ཏེ་ཆས་སོ། །དེ་ནས་དེའི་མ་སྡུག་པས་སྙིང་དཀྲུགས་ཤིང་མིག་མཆི་མས་གང་བས་མགུལ་ནས་འཁྱུད་ནས་ངུ་བཞིན་གྱི་ང་རོས་སྨྲས་པ། བུ་མོ་ཁྱོད་མཐོང་བའི་ཐ་མ་ནི་འདི་ཡིན་ནོ། །

དེས་དེ་ལ་ཤེས་པར་བྱ་བའི་ཕྱིར་སྨྲས་པ། ཡུམ་རེ་ཞིག་ཁྱོད་འདིར་འཁྲུངས་སམ། འོན་ཏེ་ཉེ་དུའི་ཁྱིམ་དུ་བུ་མོ་ཉེ་དུའི་ཁྱིམ་དུའོ། །ཁྱོད་ཀྱི་ཁང་པ་དེ་ཡིན་ནམ། འོན་ཏེ་འདི་ཡིན་འདི་ཡིན་ནོ། །བདག་ཀྱང་འདིར་སྐྱེས་ལ་དེར་བདག་གནས་པར་བསལ་འདུ་བ་མཆིས་ན་གདོན་མི་ཟ་བར་མཐར་འབྲལ་བར་འགྱུར་ན། བཤུམས་སུ་ཅི་མཆིས་ཅང༌མ་གསུངས་ཤིག །དེ་ནས་རི་དྭགས་འཛིན་ནི་ཐང་ལ་སོང་ངོ་། །ས་ག་མ་ནི་ཁྱིམ་ཐབ་དང་། རང་གི་ཁྱིམ་ནས་ཐོབ་པའི་འཁོར་གྱི་སྐྱེ་བོ་དང་ལྷན་ཅིག་ཏུ་གྲུར་དོང༌བ་ལས་དེ་ན་རྟ་རྒོད་མ་རྟེའུ་སྨད་བྱུང་ནས་རིང་པོ་མ་ལོན་པ་ཞིག་གྲུར་གཞུག་པར་བྱས་པ་དང་། རྟེའུ་ཐང་ལ་མི་དགའོ་སྙམ་ནས་བསྒྲིམས་ཀྱང་འཇུག་ཏུ་མ་བཏུབ་པ་དང་ཀུ་ཅོ་བྱུང་བས་ས་ག་མས་ཐོས་ནས་དེས་སྨྲས་པ། ཅིའི་ཕྱིར་ཀུ་ཅོ་འདི་བྱུང་དེ་རྣམས་ཀྱིས་ཇི་ལྟར་གྱུར་པ་རྣམས་སྨྲས་པ་དང་། ས་ག་མས་སྨྲས་པ་རྟེའུ་སྔར་ཆུག་ཅིག་དང་རང་ཉིད་འཇུག་པར་འགྱུར་རོ། །དེ་རྣམས་ཀྱིས་དེ་བཞིན་བྱས་པ་དང་ཞུགས་སོ། །

དེ་ནས་རི་དྭགས་འཛིན་གྱིས་དེ་རྣམས་ལ་དྲིས་པ། ཅིའི་ཕྱིར་ཁྱེད་ཅག་རིང་ཞིག་ལོན་ནས་འོངས། རྟ་རྒོད་མ་གྲུར་མཆོང་དུ་མ་བཏུབ་ལགས་སོ། །འོ་ན་ཇི་ལྟར་མཆོངས། ཙམ་པ་མོས་ཐབས་བཤམས་པ་ཞིག་བསྟན་ཏེ། རྟེའུ་སྔར་བཅུག་པས་སོ། །ཙམ་པ་མོ་ནི་མཁས་པ་ཡིན་ནོ། །ཇི་ཙམ་ན༌མགྲོན་པ་རྣམས་ལམ་ཁར་ནུབ་མོ་འབྲང་བཏབ་སྟེ་གནས་པ་ལས་རི་དྭགས་འཛིན་གྱི་མལ་བྱ་སྐྱིབས་ཤིག་ཏུ་བཅས་པ་ས་ག་མས་མཐོང་ནས་དྲིས་པ། འདི་སུའི་མལ། རི་དྭགས་འཛིན་གྱིའོ། །སྤོས་ཤིག །ཅིའི་ཕྱིར་གལ་ཏེ་གཉིད་ཀྱིས་ལོག་པ་ལ་བྱ་སྐྱིབས་སྟེང་དུ་རྡིབ་ན་གདོན་མི་ཟ་བར་ནོན་པས་འཆི་བར་འགྱུར་ཏེ། བདག་ལ་གང་ཞིག་བླངས་ན་གྱོས་པོ་ཁྱིམ་དུ་མ་ཕྱིན་པར་ལམ་ཀར་ཤི་བ་འདི་ལྟ་བུའི་བུ་མོ་བག་མར་བླངས་ཞེས་ཇི་སྲིད༌འཚོ་བའི་བར་དུ་མི་སྙན་པ་འབྱུང་བར་འགྱུར་རོ། །མལ་དེ་ཡང་སྤོས་པ་ལས་གད་པ་ཞིག་པ་དང་། སྐྱེ་བོའི་ཚོགས་ཆེན་པོས་ཁྱིམ་བདག་ནོན་ཏོ་ཞེས་ཀུན་བརྒྱུགས་པ་དང་ཁྱིམ་བདག་གིས་སྨྲས་པ། ཤེས་ལྡན་དག་བདག་འདི་ན་འདུག་གིས་མ་སྐྲག་པར་མལ་རྟོགས་ཤིག །མལ་སྤོས་སོ། །སུས་ས་ག་མས་སོ། །ཙམ་པ་མོ་ནི་མཁས་པ་ཡིན་ནོ། །ཡང་སྐྱེད་མོས་ཚལ་རྙིང་པ་ཞིག་ཏུ་ནུབ་མོ་འབྲང་བཏབ་སྟེ་འཁོད་པ་ལས་རི་དྭགས་འཛིན་གྱི་མལ་ལྷ་ཁང་སྟོང་པ་ཞིག་ཏུ་བཅས་པ་དང་ས་ག་མས་མཐོང་ནས་དྲིས་པ། འདི་སུའི་མལ། དཔོན་པོའི་འོ། །སྤོས་ཤིག །ཅིའི་ཕྱིར་གལ་ཏེ་ལྷ་ཁང་རྡིབ་སྟེ། དེས་ནོན་ན་ཤི་བར་འགྱུར་ཏེ། བདག་ལ་ཞེས་བྱ་བ་ནས་མི་སྙན་པ་འབྱུང་བར་འགྱུར་རོ་ཞེས་བྱ་བའི་བར་གོང་མ་བཞིན་དུའོ། །མལ་དེ་ཡང་སྤོས་པ་ལས་ལྷ་ཁང་ཞིག་པ་དང་སྐྱེ་བོའི་ཚོགས་ཆེན་པོས་བརྒྱུགས་པ་དང་ཞེས་བྱ་བ་ནས་ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །ཇི་ཙམ་ན་རིམ་གྱིས་མཉན་ཡོད་དུ་ཕྱིན་ནས་ལམ་གྱིས་དུབ་པ་བསལ་ཏེ་མཛའ་བཤེས་དང་། ཉེ་དུ་དང་གཉེན་གྱི་སྐྱེ་བོ་སྤྲས་ནས་ས་ག་མ་རང་གི་རིགས་དང་འཚམ་པའི་ཁྱིམ༌གྱི་ལས་དག་བྱེད་དོ། །

རི་དྭགས་འཛིན་གྱི་མནའ་མ་དྲུག་གིས༌རེ་མོ་རེ་མོས་ཁྱིམ་མིའི་ཟན་སྦྱོར་བ་ལས་ས་ག་མ་ལ་ཡང་དེ་བཞིན་དུ་བསྒོ་སྟེ། ཁྱོད་ཀྱིས་རེས་ཀྱང་ཞག༌བདུན་པ་ལ་སྦྱོར་ཅིག །དེའི་རེས༌ལ་བབ་ཏུ་ཉེ་བ་དང་། གྱོས་པོ་དང་། སྒྱུག་མོ་དང་། ཁྱིམ་བདག་རྣམས་ཀྱི་དྲིའི་ལྷག་མ་གང་ཡིན་པ་དེ་དག༌རིལ་བུར་བྱས་ནས་ཉི་མ་རེ་རེ་ཞིང་སྐེམས་སོ། །ཉི་མ་རེ་རེ་ཞིང་ནོད་པའི་ཕྱེ་གང་ཡིན་པ་དེ་ལས་ཀྱང་དྲེ་ཁ་ཕྲི་སྟེ་བཞག་ལ། ལྷག་མ་མར་དང་བསྲེས་པས་དེ་དང་ཚད་མཉམ་པར་གྱུར་ཏོ། །སང་ལྟ་བུ་རེས་བབ་པ་ན་ཆང་བཏུང་ལ་རག་པར་བྱ་བ་དང་། ཁྱིམ་ཐབ་དང་རང་གི་མེ་ཏོག་གི་ཕྲེང་བ་རྙིང་པ་གང་ཡིན་པ་དེ་དག་བསིལ་བར་བཞག་ནས། ཇི་ཙམ་ན་ནམ་ནངས་པ་དང་། ལས་བྱེད་པ་རྣམས་ལ་སྐྱུར་རྩི་དང་། དྲི་དང་། མེ་ཏོག་དང་། ཟས་དང་། ཆང་དག་བྱིན་ནོ། །

དེ་རྣམས་ཤིན་ཏུ་མགུ་ནས་བདག་ཅག་རིང་ཞིག་ལོན་ནས་ཁྱིམ་བདག་གི་ཆུང་མ་རྙིང་པས་བཞིན་བལྟས་སོ་ཞེས་དེ་རྣམས་ཀྱིས་དེའི་ཉིན་པར་ལས་ཉིས་འགྱུར་དུ་བྱས་སོ། །ཇི་ཙམ་ན་རི་དྭགས་འཛིན་གྱིས་ཕྱི་དྲོའི་དུས་སུ་ལས་ཀྱི་མཐའ་ལ་བལྟས་པ་ན་ལས་མང་དུ་ཟིན་པ་མཐོང་ནས་དེས་དྲིས་པ། ཅི་ཁྱེད་ཅག་གིས་གླ་མི་གཞན་དག་ཅིག་བཀུག་གམ། སུས་ཀྱང་མ་བཀུག་གོ །གང་གིས་ན་ལས་ཉིས་འགྱུར་དུ་བྱས་པ་འདི་ལ་རྒྱུ་ཅི་ཞིག་ཡོད། དེ་རྣམས་ཀྱིས་སྨྲས་པ། དཔོན་པོ་ཟས་ཅི་འདྲ་བ་དེ་འདྲ་བའི་ལས་བགྱིད་དོ། །དེ་ཇི་ལྟ་བུ་ཡིན། དེ་རྣམས་ཀྱིས་ཇི་ལྟར་གྱུར་པ་རྒྱ་ཆེར་སྨྲས་པ་དང་། རི་དྭགས་འཛིན་གྱི་བུ་རྣམས་ཀྱིས་རང་རང་གི་ཆུང་མ་ལ་སྨྲས་པ་ལས་དེ་རྣམས་ཀྱིས་སྨྲས་པ། ས་ག་མས་ཇི་ལྟར་བགྱིས་པ་བཞིན་དུ་གལ་ཏེ་བདག་ཅག་གིས་ཀྱང་ཁྱིམ་ནས་བརྐུས་ལ་གླ་མི་རྣམས་དགའ་བར་བགྱིས་པ་དང་། བདག་ལ་ཡང་ཇོ་བོ་དང་ཁྱེད་གླ་མི་རྣམས་དགའ་བར་འགྱུར་རོ། །

དེ་ནས་རི་དྭགས་འཛིན་གྱིས་ས་ག་མ་ལ་དྲིས་པ། བུ་མོ་ཁྱོད་ཀྱིས་ཁ་ཟས་རྣམས་ཇི་ལྟར་བཤམས། དེས་རྒྱས་པར་སྨྲས་པ་དང་རི་དྭགས་འཛིན་མགུ་ནས་དེས་དེ་ཁོ་ན་ཁྱིམ་གྱི་བྱ་བ་རྣམས་བྱེད་དུ་བཅུག་སྟེ། ནང་མི་ཐམས་ཅད་ལ་སྨྲས་པ། ཁྱེད་ཅག་ལས༌གང་ཞིག་ས་ག་མས་བྱིན་པས་མགུ་བ་ནི་དེས་གནས་པར་བགྱིས་ལ་དེ་དང་རྗེས་སུ་མཐུན་པར་ཡང་གྱིས་ཤིག །ཇི་ཙམ༌ན་དེ་ཁྱིམ་གྱི་དཔོན་མོར་གྱུར་ནས་སྤྱོད་ཚུལ་དང་། གནས་པ་དང་། དེས་པས་ནང་མི་ཐམས་ཅད་དགའ་བར་གྱུར་ཏོ། །ཇི་ཙམ་དུས་གཞན་ཞིག་ན་ས་ག་མའི་ཁྱིམ་སྟེང་ནས་ངང་པ་རྣམས་ཀྱིས་བྱང་གི་སྒྲ་མི་སྙན་གྱི་གླིང་ནས་མ་རྨོས་མ་བཏབ་པའི་འབྲས་སཱ་ལུ་དག་ཁྱེར་ནས་དོང་བ་ལས་རྒྱལ་པོའི་ཁབ་ན་འདུག་པའི་ངང༌པ་དེས་དེ་དག་མཐོང་ནས་སྐད་ཕྱུང་བ་དང་དེ་རྣམས་ཀྱིས་ཀྱང་སྐྱེ་གནས་མཐུན་པའི་གཅུགས་པས་མནགས་མ་ཐུབ་སྟེ་སྐད་ཕྱུང་བ་དང་རྒྱལ་པོའི་ཁབ་ཀྱི་ཁང་ཐོག་ཏུ་འབྲས་ཀྱི་སྙེ༌མ་རྣམས་ལྷུང་བར༌གྱུར་ཏོ། །

དེ་ནས་རྒྱལ་པོས་བློན་པོ་རྣམས་ལ་རེ་རེ་བྱིན་པ་དང་རི་དྭགས་འཛིན་གྱིས་རང་གི་སྐལ་བ་ས་ག་མ་ལ་བྱིན་ནོ། །དེས་ཟ་མ་ཏོག་གི་ནང་དུ་བཅུག་སྟེ་ཞིང་པ་རྣམས་ལ་བསྒོ་བ་དང་། དེ་རྣམས་ཀྱང་ཤིན་ཏུ་མགུ་སྟེ། དེ་རྣམས་ཀྱིས་ཞིང་ཆུང་ངུ་ཞིག་ལེགས་པར་བསྟན་ནས་དུས་ཤེས་པར་བྱས་ཏེ་བཏབ་པ་ལས་ལྷས་དུས་བཞིན་དུ་ཆར་ཕབ་པས་ས་བོན་དང་མཐུན་པར་ཕུན་སུམ་ཚོགས་པར་སྐྱེས་སོ། །ཕྱི་དེ་ལོ་ལ་ནི་རབ་ཏུ་མང་པོར་སྐྱེས་པར་གྱུར་ཏོ། །ཡང་ཕྱི་དེ་ལོ་ལ་ནི་དེ་བས་ཀྱང་མང་པོར་གྱུར་ཏེ། དེ་བཞིན་དུ་ཇི་ཙམ་ན་བང་བ་ཐམས་ཅད་ངང་པས་ཁྱེར་ཏེ༌འོངས་པའི་འབྲས་སཱ་ལུས་གང་བར་གྱུར་ཏོ། །

ཇི་ཙམ་ན་ཀོ༌ས་ལའི་རྒྱལ་པོ་གསལ་རྒྱལ་ནད་ཀྱིས་ཐེབས་ནས་དེས་སྨན་པ་རྣམས་བཀུག་སྟེ་དྲིས་པ་དང་། དེ་རྣམས་ཀྱིས་སྨྲས་པ། ལྷ་གལ་ཏེ་ངང་པས་འཚལ་ཏེ་མཆིས་པའི་སཱ་ལུ་བརྙེས་ན་དེ་ལ། འཇམས་བསྒྲལ་ནས་གསོལ་ཅིག་དང་། སོས་པར་འགྱུར་ལགས་སོ། །རྒྱལ་པོས་བློན་པོ་རྣམས་བཀུག་ནས་སྨྲས་པ། ཤེས་ལྡན་དག་ཁྱེད་ལ་ངང་པས་ཁྱེར་ཏེ་འོངས་པའི་སཱ་ལུའི་སྙེ་མ་བྱིན་པ་དེ་དག་ཁྱེད་ཀྱིས་ཅིར་བྱས། དེ་ནས་ཁ་ཅིག་གིས་སྨྲས་པ། ལྷ་བདག་ཅག་གིས་ནི་ལྷ་ཁང་དུ་ཕུལ་ལོ། །

གཞན་དག་གིས་སྨྲས་པ། བདག་ཅག་གིས་མེའི་ནང་དུ་སྩལ་ཏོ། །

གཞན་དག་གིས་སྨྲས་པ། བདག་གིས་སྒོ་ཁང་དུ་བཏགས་སོ། །རི་དྭགས་འཛིན་གྱིས་སྨྲས་པ། ལྷ་བདག་གིས་ས་ག་མ་ལ་སྩལ་ན་རེ་ཞིག་དེས་ཅིར་བགྱིས་སྨྲ་བར་འཚལ་ལོ། །དེས་ས་ག་མ་ལ་དྲིས་པ་དང་། དེས་སྨྲས་པ། ཇོ་བོ་ཅི་ངང་པས་འཚལ་ཏེ་མཆིས་པའི་སཱ་ལུ་འཚལ་བ་ཞིག་མཆིས་སམ། རྒྱལ་པོ་སྙུན་གྱིས་ཐེབས་པ་ལ་སྨན་པ་རྣམས་ཀྱིས་ངང་པས་ཁྱེར་ཏེ་འོངས་པའི་སཱ་ལུ་བསྟན་ཏོ། །དེ་ནས་ས་ག་མས་གསེར་སྣོད་ཀྱི་ནང་དུ་ངང་པས་ཁྱེར་ཏེ་འོངས་པའི་འབྲས་ཀྱིས་བཀང་ནས་རྒྱལ་པོ་ལ་བསྐུར་བ་ལས་རྒྱལ་པོས་ཟོས་ནས་སོས་པར་གྱུར་ཏོ། །

དུས་གཞན་ཞིག་ན་རྒྱལ་པོ་ལ་ལྗོངས་ཀྱི་མི་རྣམས་ཀྱིས་རྟ་རྒོད་མ་སྨད་གཉིས་ཤིག་ཕུལ་བ་ལས་དེ་ལ་མ་ནི་གང་ཡིན། རྟེའུ་ནི་གང་ཡིན་པ་འགས་ཀྱང་མ་ཤེས་ནས་རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ལེགས་པར་རྟོགས་ལ་ང་ལ་གསོལ་ཅིག །བློན་པོ་རྣམས་ཀྱིས་ཉིན་ཐོག་ཐག་ཏུ་དཔྱད་ན་དུབ་སྟེ་གཏན་ལ་མ་ཕེབས་སོ། །རི་དྭགས་འཛིན་ཕྱི་དྲོ་ཁྱིམ་དུ་སོང་བ་དང་ས་ག་མས་རྐང་པ་གཉིས་ལ་གཏུགས་ནས་སྨྲས་པ། ཇོ་བོ་ཇི་སྟེ་དེ་རིང་རིང་ཞིག་ལོན་ནས་གཤེགས། དེས་ཇི་ལྟར་གྱུར་པ་རྣམས་རྒྱས་པར་སྨྲས་པ་དང་ས་ག་མས་སྨྲས་པ། ཇོ་བོ་འདི་ལ་དཔྱད་དུ་ཅི་ཞིག་མཆིས། དེ་གཉིས་ཆས་མཉམ་པར་སྩལ་དང་བུ་གང་ལགས་པ་དེ་ནི་མྱུར་དུ་འཚལ་ནས་མའི་སྐལ་བ་ལ་འཚལ་ལོ། །མ་གང་ལགས་པ་དེ་ནི་མི་འཚལ་བར་མགོ་སྟེག་གེ་མཆིས་ཏེ། རྟགས་ནི་དེ་ལགས་སོ། །རི་དྭགས་འཛིན་གྱིས་བློན་པོ་རྣམས་ལ་སྨྲས་ནས་དེ་རྣམས་ཀྱིས་ཀྱང་ཇི་སྐད་བསྟན་པ་བཞིན་བརྟགས་ནས་དེ་ནས་ནམ་ནངས་པ་དང་རྒྱལ་པོ་ལ་སྨྲས་པ། ལྷ་འདི་ནི་མ་ལགས་སོ། །འདི་ནི་བུ་ལགས་སོ། །རྒྱལ་པོས་སྨྲས་པ། ཁྱེད་ཅག་གིས་ཇི་ལྟར་ཤེས། ལྷ་འདི་ལྟ་བུ་དང་འདི་ལྟ་བུ་ལགས་སོ། །ཁར་རྩང་ཅི་སྟེ་མ་ཤེས། ལྷ་བདག་ཅག་གིས་འཚལ་བར་རྔོ་ག་ལ་ཐོག །ས་ག་མས་དེ་སྐད༌བསྟན་ལགས་མོད། རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ། །

མི་ཞིག་ཆུ་འགྲམ་དུ་ལྷམ་བཞག་ནས་ཁྲུས་བྱེད་པ་དང་། མི་གཞན་ཞིག་འོངས་ནས་དེས༌ལྷམ་དེས་མགོ་ལ་དཀྲིས་ནས་དེ་ཉིད་ན་ཁྲུས་བྱ་བར་བརྩམས་སོ། །མི་དེ་ཁྲུས་བྱས་ནས་ལངས༌ནས་ལྷམ་དེ་མ་མཐོང་ངོ་། །མི་དེས་སྨྲས་པ། ཀྱེ་ནང་རྗེ་ཅི་ཚོལ་ལྷམ་མོ། །ཁྱོད༌ཀྱི་ལྷམ་ག་ལ་ཡོད། གལ་ཏེ་ཁྱོད༌ལ་ལྷམ་ཡོད་པར་གྱུར་ན། ཇི་ལྟར་ངས་མགོ་ལ་དཀྲིས་ནས་ཞུགས་པ་དེ་བཞིན་དུ་ཁྱོད་ཀྱིས་ཀྱང་ལྷམ་གྱིས་མགོ་ལ་དཀྲིས་ནས་ཞུགས་པར་འགྱུར་རོ། །

དེས་སྨྲས་པ། འོ་ནི་ཉིད་ཁོ་བོའི་ལྷམ་ཡིན་ནོ། །དེ་གཉིས་ཁྱོད་ཀྱི་ངའི་ཞེས་རྩོད་པར་གྱུར་ནས། དེ་གཉིས་རྒྱལ་པོའི་དྲུང་དུ་སོང་ངོ་། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་ལེགས་པར་རྟོགས་ལ་གང་གི་ཡིན་པ་དེ་ལ་བྱིན་ཅིག །དེ་རྣམས་ཀྱིས་བརྟག་པར་བརྩམས་ནས་གཅིག་ལ་དྲིས་པ་དང་། དེས་སྨྲས་པ། བདག་གི་ལགས་སོ། །ཅིག་ཤོས་ལ་ཡང་དྲིས་པ་དང་། དེས་སྨྲས་པ། བདག་གི་ལགས་སོ། །ཞེས་ཁྱོད་ཀྱི་དང་ངའི་ཞེས་པ་ལ་ཉི་མ་འདས་ཏེ་བློན་པོ་རྣམས་དུབ་ནས་དགོངས་ཀ་གཏན་ལ་མ་ཕེབས་པ་བཞིན་དུ་ཁྱིམ་དུ་དོང་ངོ་། །ས་ག་མས་རི་དྭགས་འཛིན་གྱི་ཞེས་བྱ་བ་ནས་དྲིས་ཏེ་ཞེས་བྱ་བའི་བར་གོང་མ་བཞིན་དུ་སྟེ། དེས་ཇི་ལྟར་གྱུར་པ་རྣམས་སྨྲས་པ་དང་། ས་ག་མས་སྨྲས་པ། ཇོ་བོ་འདི་ལ་དཔྱད་དུ་ཅི་ཞིག་མཆིས། དེ་གཉིས་ལ་གཅིག་ཀྱང་ཕྱེད་ཁྱེར་ཅིག །ཅིག་ཤོས་ཀྱང་ཕྱེད་ཁྱེར་ཅིག་ཅེས་གསུངས་ཤིག་དང་། གང་གི་ལགས་པ་དེའི་མཆིད་ནས་ནི་ཅིའི་ཕྱིར་བདག་གི༌ལྷམ་དྲལ་ཞེས་མཆིའོ། །གང་མ་ལགས་པ་དེའི་གློ་བ་ནི་རེ་ཞིག་བདག་གིས་ཕྱེད་ཐོབ་ན་ཡང་དེར་ཟད་འདིར་བདག་ལ་ཅི་ཞིག་འགེད་སྙམ་སྟེ་དེ་ལྟར་བརྟག་པར་བགྱིའོ། །

རི་དྭགས་འཛིན་སོང་ནས་བློན་པོ་རྣམས་ལ་སྨྲས་ནས་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །རྒྱལ་པོ་ལ་ཚོང་པ་གྲུ་བས་ཙནྡན་གྱི་སྡོང་དུམ་ཞིག་སྐྱེས་སུ་ཕུལ་བ་དང་། དེའི་མགོ་གང་ཡིན་མཇུག་གང་ཡིན་པ་མ་ཤེས་ནས་རྒྱལ་པོས་བློན་པོ་རྣམས་ལ་བསྒོ་བ་ཇི་ལྟ་བུ་ཡིན་རྟོགས་ཤིག །དེ་རྣམས་ཀྱིས་ཉིན་ཐོག་ཐག་དཔྱད༌ན་མ་ཤེས་ནས་དགོངས་ཀ་ཁྱིམ་དུ་དོང་ངོ་། །ས་ག་མས་ཞེས་བྱ་བ་ནས་རི་དྭགས་འཛིན་གྱིས་དྲིས་པ་ཞེས་བྱ་བའི་བར་གོང་མ་བཞིན་དུའོ། །དེས་ཇི་ལྟར་གྱུར་པ་རྣམས་རྒྱ་ཆེར་སྨྲས་པ་དང་། ས་ག་མས་སྨྲས་པ། ཇོ་བོ་འདི་ལ་དཔྱད་དུ་ཅི་མཆིས་ཆབ་ཏུ་འོར་ཅིག་དང་རྩ་བ་གང་ཡིན་པ་དེ་ནི༌འབྱིང་བར་འགྱུར་རོ། །ཐོར་ཏོ་གང་ལགས་པ་ནི་སྟེང་དུ་འབྱུང་བར་འགྱུར་རོ། །དེ་ལ་བརྟག་པ་ནི་དེ་ལགས་སོ། །རི་དྭགས་འཛིན་གྱིས་བློན་པོ་རྣམས་ལ་སྨྲས་ནས་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །རི་འོར་ན་ཁྱིམ་བདག་ཅིག་ཡོད་པ་དེས་དེ་དང་རིགས་མཉམ་པ་ལས་ཆུང་མ་བླངས་པ་ལས་དེ་ལ་བུ་ཕོ་ཡང་མེད། བུ་མོ་ཡང་མེད། དེ་བུ་མངོན་པར་འདོད་པས་ཆུན་མ་ཞིག་བླངས་པ་དང་། དེ་ལ་ཆུང་མ་ཆེན་མོ་ཤོས་རང་བཞིན་གྱིས་ཕྲག་དོག་ཅན་ཞིག་པས་དེའི་མངལ་མ་རུངས་བར་བྱ་བའི་སྦྱོར་བ་ཞིག་བྱས་པ་ལས་དེའི་མངལ་ཤིན་ཏུ་རྣམ་པར་དག་པས་སེམས་ཅན་དང་ལྡན་པར་གྱུར་ནས་ཇི་ཙམ་ན་ཟླ་བ་དགུ་འདས་པ་དང་། ཁྱེའུ་ཞིག་བཙས་སོ། །དེས་བསམས་པ། ཤ་ཁོན་རྣམས་ལ་ནི་འདི་ལྟ་སྟེ། ཆེན་ཆུན་འདི་ཐ་ཆད་ཡིན་པས་གདོན་མི་ཟ་བར་མ་ཡར་མོས་ཐབས་གང་ཡང་རུང་བ་ཞིག་གིས་གསོད་པར་འགྱུར་ན། བདག་གི་ཁྱིམ་ཐབ་བམ། བདག་གིས་ཅི་བྱར་ཡོད། བདག་གིས་ནམ་དུ་ནི་སྲུང་ཡེ་དེ་ཁོ་ན་ལ་སྦྱིན་པར་བྱའོ་སྙམ་ནས་དེ་དང་ཁྱིམ་ཐབ་ལྷན་ཅིག་གྲོས་བྱས་ཏེ་རུང་ནས་ཆེན་མ་ཤོས་ལ་སྨྲས་པ། ཆེ་ཞེ་བདག་གི་བུ་འདི་ཁྱོད་ལ་བྱིན་གྱིས་གསོས་ཤིག །དེས་བསམས་པ་ཁྱིམ་ནི་གང་ལ་བུ་ཡོད་པ་དེ་ཁོ་ནའི་ཡིན་པར་ཟད་པས་ཁྱིམ་གྱི་བདག་མོར༌གྱུར་པས་གསོའོ་སྙམ་ནས། དེས་དེ་གསོས་པ་ལས་དེའི་ཕ་ཡང་ཤི་བར་གྱུར་ཏོ། །

དེ་གཉིས་ཁྱིམ་གྱི་ཕྱིར་རྩོད་པར་གྱུར་ནས་གཅིག་གིས་སྨྲས་པ། འདི་ཁོ་མོའི་བུ་ཡིན་ནོ། །ཅིག་ཤོས་ཀྱིས་སྨྲས་པ། འདི་ནི་ཁོ་མོའི་བུ་ཡིན་ནོ། །རྒྱལ་པོའི་དྲུང་དུ་སོང་བ་དང་། རྒྱལ་པོས་བློན་པོ་རྣམས་ལ་བསྒོ་བ་ཤེས་ལྡན་དག་དེང་ལ་གང་ཡིན་པ་རྟོགས་ཤིག །དེ་རྣམས་ཀྱིས་དཔྱད་པ་ལས་ཉི་མ་འདས་ཀྱང་གཏན་ལ་མ་ཕེབས་ནས། དགོངས་ཀ་ཁྱིམ་དུ་དོང་བ་དང་། ས་ག་མས་རི་དྭགས་འཛིན་ལ་དྲིས་ཏེ་ཞེས་བྱ་བ་ནས་འདི་ལ་དཔྱད་དུ་ཅི་མཆིས་ཞེས་བྱ་བའི་བར་གོང་མ་བཞིན་དུ་སྟེ། དེ་གཉིས་ལ་ཁོ་བོ་ཅག་གིས་གང་གི་བུ་ཡིན་པ་མི་ཤེས་ཀྱིས། ཁྱེད་ཅག་གཉིས་ལས་གང་སྟོབས་ཆེ་བ་དེ་ཁྱེར་ལ་སོང་ཞིག་ཅེས་གསུངས་ཤིག་དང་། ལག་པ་གཉིས་ནས་བཟུང་ནས་འདྲེན་པར་བགྱིད་དེ། དེ་སྡུག་བསྔལ་གྱིས་ངུ་བར་གྱུར་པ་དང་དེའི་མ་གང་ལགས་པ་དེ་ནི་བརྩེ་བ་མཆིས་པས་འདི་གསོན་ན་ནམ་ཞིག་ན་མཐོང་བར་འགྱུར་གྲང་སྙམ་ནས་གཏོང་བར་བགྱིད་དོ། །

ཅིག་ཤོས་ནི་བརྩེ་བ་མ་མཆིས་པས་གང་གི་ཚེ་མི་གཏོང་བ་དེའི་ཚེ་དེ་ལ་ལྕག་གིས་གཞུས་ཤིག་དང་ཇི་ལྟར་གྱུར་པ་སྨྲ་བར་འགྱུར་ཏེ། འདི་ལ་བརྟག་པ་ནི་འདི་ལགས་སོ། །རི་དྭགས་འཛིན་གྱིས་བློན་པོ་རྣམས་ལ་སྨྲས་པ་དང་ཞེས་བྱ་བ་ནས་རྒྱལ་པོས་སྨྲས་པ། ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །དུས་གཞན་ཞིག་ན་རི་དྭགས་འཛིན་ནད་ཀྱིས་ཐེབས་ནས་དེ་ལ་སྨན་པས་ཉི་མ་གཅིག་སྨན་བྱིན་པ་ལས་ཐེག་གི་བར་གྱུར་ཏོ། །ཕྱི་དེ་ཉིན་པར་སྨན་མ་ཡིན་པ་བྱིན་པས༌ནད་ལ་བབ་པར་གྱུར་ཏོ། །

ས་ག་མས་བསམས་པ། ཇོ་བོ་ཇིའི་སླད་དུ་ཉིན་གཅིག་ནི་ཐེག་གི་བར་གྱུར་ལ། ཉིན་གཅིག་ནི༌ན་བར་གྱུར་སྙམ་ནས་དེས་སྨན་གང་དག་གིས་ཐེག་གི་བར་གྱུར་པའི་རྟགས་དེ་དག་བཟུང་ནས། དེ་ནས་དེས་སྨན་པ་རྣམས་སྒོ་ནས་སླར་བཟློག་ནས་རང་ཉིད་ཀྱིས་དཔྱད་པ་ལས་སོས་པར་གྱུར་ཏོ། །རི་དྭགས་འཛིན་གྱིས་བསམས་པ། གང་གིས་ན་བདག་ཉིན་གཅིག་ནི་ཐེག་གི་ཉིན་གཅིག་ནི་ན༌བ་ལས་གང་གི་ཚེ་སྨན་པ་མི༌འོང་བ་དེའི་ཐེག་གི་བ་འདི་ལ་རྒྱུ་ཅི་ཞིག་ཡོད་སྙམ་སྟེ། དེས་ས་ག་མ་ལ་དྲིས་པ་ཞེས་བྱ་བ་ནས་ཙམ་པ་མོ་ནི་མཁས་པ་ཡིན་ནོ་ཞེས་བྱ་བའི་བར་གོང་མ་བཞིན་དུའོ། །

ཀོ་ས་ལའི་རྒྱལ་པོ་གསལ་རྒྱལ་གྱི་གླང་པོ་ཆེའི་བླ་དཔལ་སྐྱེད་ཅེས་བྱ་བ་དེ་ལ་དུས་གཞན་ཞིག་ན་རྒྱལ་པོ་གཤེ་བར་གྱུར་ཏོ། །ཞེས་ས་ག་མས་ཐོས་ནས་དེས་རི་དྭགས་འཛིན་ལ་སྨྲས་པ། ཇོ་བོ་བློན་པོ་ཐམས་ཅད་ལ་མཐར་གྱིས་བཀའ་བབ་པར༌འགྱུར་གྱིས། དཔལ་སྐྱེད་ལ་ལྷ་བཟོད་པ་མཛད་དུ་སྩལ་བའི་རིགས་སོ། །དེས་སྨྲས་པ། བུ་མོ་བཟོད་པ་བྱེད་དུ་གཞུག་གོ །དེ་ནས་དེས་རྒྱལ་པོ་ལ་སྨྲས་པ། ལྷ་དཔལ་སྐྱེད་ནི་ལྷ་ལ་གློ་བ་ཉེ་བ་ལགས་ན་དེ་ལ་བཟོད་པ་མཛད་དུ་གསོལ། རྒྱལ་པོས་སྨྲས་པ། བཟོད་པར་བྱའོ། །ལྷ་གལ་ཏེ་བཟོད་པར་མཛད་ན་དེའི་དབང་ཐང་དེ་དག་སྩལ་དུ་གསོལ། དེ་བཞིན་དུ་སྦྱིན་ནོ། །དཔལ་སྐྱེད་ཀྱིས་ཇི་ལྟར་ས་ག་མས་བདག་ལ་རྒྱལ་པོ་བཟོད་པ་བྱེད་དུ་བཅུག་པ་ཤེས་ནས་དེ་དེ་ལ་ལན་གླན་པའི་བསམ་པས་གནས་སོ། །དུས་གཞན་ཞིག་ན་རི་དྭགས་འཛིན་ཕོ་མཚན་ལ་ནད་བྱུང་སྟེ། དེའི་རིམ་གྲོ་ས་ག་མ་བྱེད་པ་ལས་དེ་འཛེམ་པར་གྱུར་ཏོ། །

དེས་སྨྲས་པ། ཇོ་བོ་འདི་ལ་འཛེམ་དུ་ཅི་མཆིས། ཅི་ཕའི་རིམ་གྲོ་བུ་མོ་མི་བགྱིད་དམ། འོན་ཀྱང་དེ་འཛེམ་པར་གྱུར་ཏོ། །དེས་བསམས་པ་འདི་བདག་གིས་རིམ་གྲོ་བྱར་ནི་མི་བཏུབ་པས་དེའི་ཆུང་མ་ཞིག་བླང་ངོ་སྙམ་པ་ནས་དེ་དཔལ་སྐྱེད་ཀྱི་ཁྱིམ་དུ་སོང་བ་དང་། དེས་འོངས་པ་ལེགས་སོ་ཞེས་བྱ་བའི་ཚིག་སྨྲས་ནས་སྟན་བསྟབས་ཏེ་འདུག་གོ །དཔལ་སྐྱེད་ལ་བུ་མོ་ཞིག་ཡོད༌པ་དེ་དེས་དེ་ལ་སྨྲས་པ། བུ་མོ་ས་ག་མའི་རྐང་པ་གཉིས་ལ་ཟུངས་ཤིག །ས་ག་མས་སྨྲས་པ། བདག་གིས་འདིའི་རྐང་པ་ལ་གཟུང་བར་འགྱུར་བའི་གནས་གང་ལགས་པ་དེ་ནི་མཆིས་སོ་ཞེས་སྨྲས་ནས་ཡང་སྨྲས་པ། བཀྲ་ཤིས་པར་གྱུར་ཅིག །བཀྲ་ཤིས་པར་གྱུར་ཅིག །དཔལ་སྐྱེད་ཀྱིས་སྨྲས་པ། ཅི་ཞིག་སློང་། བུ་མོ་སློང་ངོ་། །སུ་ཞིག་གི་ཆེད་དུ། དེས་སྨྲས་པ། གྱོས་པོའི་ཆེད་དུའོ། །དེ་ཅང་མི་སྨྲ་བར་འདུག་གོ །དཔལ་སྐྱེད་ཀྱི་ཆུང་མས་སྨྲས་པ། དགོག་ཅིག་ན་དེ་ལ་ཅི་སྟེ་སྦྱིན། ས་ག་མས་སྨྲས་པ། མི་རྣམས་ཀྱི་ལང་ཚོ་ནི་ནོར༌ཡིན་པས་དཔྱད་དུ་ཅི་ཡོད་བྱིན་ཅིག །དཔལ་སྐྱེད་ཀྱིས་སྨྲས་པ། བཟང་མོ་བདག་ཅག་ལ་ས་ག་མས་ཕན་བཏགས་ཀྱིས་བྱིན་ཅིག །གལ་ཏེ་དེ་ལྟ་ན་སྦྱིན་པར་བྱའོ། །

དེ་ནས་རི་དྭགས་འཛིན་གྱིས་དཔལ་གྱི་འབྱོར་བ་ཆེན་པོས་བག་མར་བླངས་ནས། དེ་དེའི་རིམ་གྲོ་བྱེད་པར་གྱུར་ཏེ་ས་ག་མ་ནི་དེ་ལྟར་མི་བྱེད་དོ། །རི་དྭགས་འཛིན་གྱིས་སྨྲས་པ། བུ་མོ་བདག་ལ་ཚིག་བྱིན་ཅིག །དེས་སྨྲས་པ། ཇོ་བོ་ཅུང་ཟད་ཉམས་པར་མ་གྱུར་ཏམ། བུ་མོ་ཁྱོད་ལ་མས་བསླབས་པ་གང་ཡིན་པ་དེ་ཅུང་ཟད་བླངས་ཏེ་མི་གནས་སམ། ཇོ་བོ་ཐམས་ཅད་བླངས་ལགས་ཏེ། ཉི་མ་དང་ཟླ་བ་གཉིས་ལ་ཕྱག་བྱོས་ཤིག་ཅེས་མཆི་བ་གང་ལགས་པ་ནི་མནའ་མའི་ཉི་མ་དང་ཟླ་བ་ལྟ་བུ་ནི་གྱོས་སྒྱུག་ལགས་པས་རེ་ཞིག་བདག་གིས་ཕྱག་བགྱིས་ལགས་སོ། །

མེ་ལ་བཀུར་སྟི་བྱའོ་ཞེས་མཆི་བ་གང་ལགས་པ་ནི་བུད་མེད་ཀྱི་ཁྱིམ་ཐབ་ནི་མེ་ལྟ་བུ་ལགས་ཏེ། ཁྱིམ་ཐབ་ལ་ཧ་ཅང་བསྙེན་པར་མི་བགྱི། ཧ་ཅང༌བསྲིང་བར་ཡང་མི་བགྱི་སྟེ་བདག་ནི་ཁྱིམ་ཐབ་ལ་མེ་ལྟ་བུར་བསྙེན་བཀུར་བགྱིད་དོ། །མེ་ལོང་ཕྱི་བར་བྱའོ་ཞེས་མཆི་བ་གང་ལགས་པ་ནི་སྡུམ་པ་ནི་མེ་ལོང་ལྟ་བུ་ལགས་པས་རྟག་ཏུ་ཞལ་ཞལ་བགྱི་ཞིང་ཕྱག་དར་བགྱི་བ་ལགས་ཏེ། སྡུམ་པ་དེ་ལ་བདག་གདུགས་གཅིག་བཞིན་དུ་བྱི་དོར་བགྱིད་ལགས་སོ། །གོས་དཀར་པོ་བགོ་བར་བྱའོ་ཞེས་མཆི་བ་གང་ལགས་པ་ནི་ཁྱིམ་གྱི་ལས་བགྱིད་པ་ན་གོས་གཞན་དག་ཁོ་ནས་སོ། །ལྷ་མཆོད་པ་དང་ཁྱིམ་ཐབ་ཀྱི་དྲུང་དུ་མཆི་བ་ན་ནི་གོས་དཀར་པོ་རྣམས་བགོ་བར་བགྱི་བ་སྟེ། དེ་ཡང་བདག་བགྱིད་ལགས་སོ། །བླང་བར་བྱའི་སྦྱིན་པར་མི་བྱའོ་ཞེས་མཆི་བ་གང་ལགས་པ་ལ་ཅི་ཞིག་བླང་བར་བགྱི་ཞེ་ན། འཇིག་རྟེན་ལས་ཚིག་ངན་པ་སྨྲས་པའོ། །ཚིག་ངན་པ་ནི་སུ་ལ་ཡང་སྨྲ་བར་མི་བགྱི་བ་སྟེ། དེ་ཡང་བདག་གིས་ཡང་དག་པར་བླངས་ཏེ་གནས་ལགས་སོ། །ཚིག་བསྲུང་བར་བྱའོ་ཞེས་མཆི་བ་གང་ལགས་པ་ནི་གསང་བའི་ཚིག་མི་འཕེལ་བར་བགྱི་བ་སྟེ། བདག་ལ་ངག་བསྡམ་པ་མཆིས་ལགས་སོ། །ལངས་ནས་སུ་ལ་ཡང་སྟན་བསྟབ་པར་མི་བྱའོ་ཞེས་མཆི་བ་གང་ལགས་པ་ནི་དེ་འདི་སྐད་ཅེས་ཁྱོད་རིགས་ཀྱི་མནའ་མ་ཡིན་པས་ཁྱོད་གནས་དབེན་པ་ན་འདུག་པར་བྱའོ་ཞེས་མཆི་བ་ལགས་ཏེ། བདག་དབེན་པ་ཁོ་ན་ན་མཆིས་ལགས་སོ། །

ཞིམ་པོ་བཟའ་བར་བྱའོ་ཞེས་མཆི་བ་གང་ལགས་པ་ནི་ཤིན་ཏུ་བཀྲེས་ནས་བཟའ་བར་བགྱི་བ་སྟེ། བདག་ནི་རྟག་ཏུ་ཁྱིམ་གྱི་སྐྱེ་བོ་ཟས་འཚལ་བའི་འོག་ཏུ་འཚལ་ལོ། །བདེ་བར་ཉལ་བར་བྱ་ཞེས་མཆི་བ་གང་ལགས་པ་ནི་མཚན་མོ་ཁྱིམ་གྱི་དགོས་པ་ཐམས་ཅད་བགྱིས་ནས་སྣོད་བརྟུལ་ཏེ་ཅི་ནས་ཀྱང་ལྡང་མི་དགོས་པར་ཁྱོད་ཉལ་བར་བྱའོ་ཞེས་བགྱི་བ་ལགས་ཏེ། འདི་ནི་ལེགས་པར་བཞག་པའོ། །འདི་ནི་ཉེས་པར་བཞག་པའོ་ཞེས་བདག་དེ་ཁོ་ན་བཞིན༌དུ་བགྱིད་དོ། །ཐེམ་སྐས་བཅའ་བར་བྱའོ་ཞེས་མཆི་བ་གང་ལགས་པ་ནི་འདི་སྐད་ཅེས་ཁྱོད་སྔོན་དགེ་བ་བཅུའི་ལས་ཀྱི་ལམ་དང་ལྡན་པ་དེས་ལྷའི་འགྲོ་བ་ཐོབ་ནས་འདིར་མིའི་འཇིག་རྟེན་དུ་སྐྱེས་པ་འདི་ནི་ལས་ཀྱིས་ཡིན་པས་འདིར་ཡང་ཁྱོད་ཀྱིས་སྦྱིན་པ་དག་བྱིན། བསོད་ནམས་དག་བྱས་ཏེ་སྡིག་པ་མི་བྱའོ། །འདི་ནི་དབྱིག་གི་ཡ་གད་མཐོ་རིས་ཀྱི་ཐེམ་སྐས་ལྟ་བུ་ཡིན་ནོ་ཞེས་བགྱི་བ་ལགས་ཏེ་དེ་ཡང་བདག་རྔོ་ཅི༌ཐོག་གིས་བགྱིད་དོ། །ས་ག་མ་ལེགས་སོ་ལེགས་སོ། །ཁྱོད་ཀྱི་མ་མཁས་པ་ཡིན་ན། གང་གི་ཕྱིར་མས་ལྡེམ་པོར་སྨྲས་པ་རྟོགས་པས་ན། ཁྱོད་ནི་ལྷག་པར་ཡང་མཁས་པ་ཡིན་ནོ། །དེ་ནས་རི་དྭགས་འཛིན་འདི་སྙམ་དུ་སེམས་ཏེ། གལ་ཏེ་བཅོམ་ལྡན་འདས་ཀྱིས་གནང་ན་ས་ག་མ་ལ་བདག་གིས་མ་ཞེས་བོད་དོ་སྙམ་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཙུན་པ་མནའ་མ་ལ་མ་ཞེས་བོད་དུ་རུང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཆོས་ལྔ་དང་ལྡན་ན་སྟེ། ལྔ་གང་ཞེ་ན་ནད་གཡོག་བྱེད་པ་དང་། ཐབ་རིར་བབ་པའི་ཆུང་མ་ལེན་པ་དང་། སྲོག་གི་སྐྱབས་བྱེད་པ་དང་། ནོར་སྲུང་བ་དང་། ཤེས་རབ་ཀྱི་བགོ་བཤའ་བྱེད་པའོ། །བར་སྡོམ་ལ། ནད་གཡོག་དང་ནི་ཆུང་མ་དང་། །སྲོག་དང་ནོར་ནི་སྦྱིན་པ་དང་། །ཤེས་རབ་སྒྲུབ་པར་བྱེད་པ་དང་། །ལྔ་པོ་འདི་དག་མར་བཤད་དོ། །དེ་ནས་རི་དྭགས་འཛིན་ཀོ་ས་ལའི་རྒྱལ་པོ་གསལ་རྒྱལ་གང་ན་བ་དེར་སོང་སྟེ་ཕྱིན་པ་དང་། རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་བདག་ནི་ས་ག་མ་ལ་མ་ཞེས་འབོད་པར་འཚལ་ལོ། །རྒྱལ་པོས་སྨྲས་པ། ས་ག་མས་ང་ལ་ཡང་རིམ་གྲོ་བྱས་པས། ཕྱི་མོ་ལ་དྲིས་ལ་ངས་ཀྱང་དེ་ལ་སྲིང་མོ་ཞེས་འབོད་དོ། །དེས་ཕྱི་མོ་ལ་དྲིས་པ་དང་། དེས་སྨྲས་པ། ཁྱོད་ཀྱིས་བོས་ཀྱང་རུང་མ་བོས་ཀྱང་རུང་། དེ་ནི་ཁྱོད་ཀྱི་སྲིང་མོ་ཁོ་ན་ཡིན་ནོ། །རིང་དུ་འཕུར་ཚངས་སྦྱིན་མངག་གཞུག་མའི་བུ་མོ་དང་འདུས་པ་ལས་དེ་ལས་བུ་ཕོ་ཞིག་བཙས་ཏེ་དེའི་མིང་སྟོབས༌ཀྱི་བཤེས་གཉེན་དུ་བཏགས་པ་ལས་དེ་རྒྱལ་པོ་མེས་ཀྱིས་ཉེས་པ་འགའ་ཞིག་གི་ཕྱིར་སྤྱུགས་པ་ལས་ཙམ་པར་སོང་ནས་གནས་པ་དེའི་བུ་མོ་ནི་འདི་ཡིན་པས་དེས་ན་ཁྱོད་ཀྱི་སྲིང་མོར་འོང་ངོ་། །དེ་ནས་རྒྱལ་པོས་གླང་པོ་ཆེ་ལ་ཞོན་ནས་དྲིལ༌སྒྲོགས་སུ་བཅུག་པ། ས་ག་མ་འདི་རི་དྭགས་འཛིན་གྱི་ནི་མ་རྒྱལ་པོ་གསལ་རྒྱལ་གྱི་ནི་སྲིང་མོ་ཡིན་ནོ། །

དེས་སྔོན་གྱི་ཀུན་དགའ་ར་བར་གཙུག་ལག་ཁང་བརྩིགས་ནས་ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་དང་། དེ་བཞིན་དུ་གནས་བརྟན་རྣམས་ཀྱིས་ཀྱང་མདོ་སྡེའི་ནང་དུ་སངས་རྒྱས་བཅོམ་ལྡན་འདས་མཉན་ཡོད་ན་རི་དྭགས་འཛིན་གྱི་མ་ས་ག་མའི་སྔོན་གྱི་ཀུན་དགའ་ར་བའི་ཁང་བཟང་ན་བཞུགས་སོ་ཞེས་གདགས་པ་བྱས་སོ། །དུས་གཞན་ཞིག་ན་ས་ག་མ་ལས་སྒོ་ང་སུམ་ཅུ་རྩ་གཉིས་བྱུང་ངོ་། །ཞེས་རི་དྭགས་འཛིན་གྱིས་ཐོས་ནས་ལག་པ་འགྲམ་པ་ལ་གཏད་ནས་སེམས༌ཁོང་དུ་ཆུད་ཅིང་འདུག་སྟེ། ཡུལ་གྱི་བཟང་མོ་ལ་ཕུང་བ་ཅི་འདྲ་བ་དག་བྱུང་བར་གྱུར་སྙམ་ནས་རི་དྭགས་འཛིན་གྱིས་དོར་བར་བརྩམས་པ་དང་། ས་ག་མས་སྨྲས་པ། ཇོ་བོ་མ་དོར་བར་བཅོམ་ལྡན་འདས་ལ་ཞུས་ཤིག །དེ་ནས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། མ་དོར་བར་གཟེབ་སུམ་ཅུ་རྩ་གཉིས་གྱིས་ལ་ཤིང་བལ་གྱིས་ཁོང་སྟེ། གཟེབ་བུ་རྣམས་ཀྱི་ནང་དུ་སྒོ་ང་རེ་རེ་ཞོག་ལ་ས་ག་མས་དུས་གསུམ་དུ་ལག་པས་བྱུགས་ཤིག་ཅེས་སྒོ་ཞིག་དང་། དེ་ནས་ཉི་མ་བདུན་པ་ལགས་ནས་གཞོན་ནུ་སུམ་ཅུ་རྩ་གཉིས་འབྱུང་བར་འགྱུར་རོ། །དེས་དེ་བཞིན་དུ་བྱས་པ་ལས་ཉི་མ་བདུན་པ་ལགས་པ་དང་། གཞོན་ནུ་སུམ་ཅུ་རྩ་གཉིས་བྱུང་ནས་བསྲིངས་བསྐྱེད་དེ་ནར་སོན་པ་དང་རྩལ་པོ་ཆེ་ཐུབ༌རླག་པ་ཤ་སྟག་ཏུ་གྱུར་ཏོ། །

དུས་གཞན་ཞིག་ན་དེ་རྣམས་ཤིང་རྟར་ཞུགས་ཏེ་ཕྱིར་བྱུང་ནས་སླར་འཇུག་པ་དང་། མདུན་ན་འདོན་གྱི་བུ་ཤིང་རྟར་ཞུགས་ནས་ཕྱིར་འབྱུང་བ་དང་ཇི་ཙམ་ན་ཕན་ཚུན་ཤིང་རྟའི་མདའ་གཉིས་ཐུག་པ་དང་། མདུན་ན་འདོན་གྱི་བུས་སྨྲས་པ། ཟུར་ཅིག །དེ་རྣམས་ཀྱིས་སྨྲས་པ། ཁྱོད་ཉིད་ཟུར་ཅིག །མདུན་ན་འདོན་གྱི་བུས་མཇལ་ཏོ་ཞེས་བྱས་ནས་ཚིག་རྩུབ་པོ་སྨྲ་བར་བརྩམས་པ་དང་། དེ་ནས་ས་ག་མའི་བུ་རྣམས་ཀྱིས་ཤིང་རྟའི་མདའ་ནས་བཟུང་སྟེ་འཕངས་པས་ཕྱག་དར་གྱི་ཕུང་པོའི་སྟེང་དུ་བརྡབ་བསྣུན་ཏོ། །

དེ་དེ་ནས་གོས་ཀྱིས་མགོ་བསྒྱུར་ཏེ་ཕའི་དྲུང་དུ་སོང་ནས་མིག་མཆི་མས་གང་བས་སྨྲས་པ། ཡབ་ས་ག་མའི་བུ་རྣམས་ཀྱིས་བདག་འདི་འདྲ་བའི་གནས་སྐབས་སུ་བགྱིས་སོ། །བུ་ཅིའི་ཕྱིར། དེས་རྒྱས་པར་སྨྲས་པ་དང་། དེས་སྨྲས་པ། བུ་གལ་ཏེ་དེ་ལྟ་ན་ཐབས་ཤིག༌བཤམ་པར་བྱས་ལ་དེ་རྣམས་མཐར་གྱིས་ཁ་གདག་གིས་མྱ་ངན་མ་བྱེད་ཅིག །དེ་དེ་རྣམས་ལ་ཀླན་ཀ་ཚོལ་བ་ལྷུར་ལེན་ཅིང་གནས་སོ། །དུས་གཞན་ཞིག་ན་ཀོ༌ས་ལའི་རྒྱལ་པོ་གསལ་རྒྱལ་ལ་རི་འོར་བ་ལོག་པར་གྱུར་ནས། རྒྱལ་པོས༌དེ་ལ་དམག་ཁ་ཆེན་ཅིག་བཀྱེ་བ་ལས་རྡུགས་རབ་ཏུ་རྡུགས་ནས་སླར་ལོག་གོ །དེ་བཞིན་དུ་ལན་བདུན་གྱི་བར་དུ་དམག་ཁ་ཆེན་པོ་བཀྱེ་བ་ལས་རྡུགས་རབ་ཏུ་རྡུགས་ཏེ༌སླར་ལོག་ནས་རྒྱལ་པོ་རང་ཉིད་དཔུང་གི་ཚོགས་ཡན་ལག་བཞི་དང་བྱུང་བ་དང་ས་ག་མའི་བུ་ནང་དུ་འཇུག་པ་དེ་རྣམས་ཀྱིས་དེ་མཐོང་ནས་སྨྲས་པ།

ལྷ་གང་དུ་གཤེགས་རི་འོར་བ་རྣམས་འབེབས་སུའོ། །ལྷ་བཞུགས་ཤིག་བདག་ཅག་མཆིའོ། །དེ་བཞིན་དུ་གྱིས་ཤིག །དེས་དེ་རྣམས་ལ་དཔུང་གི་ཚོགས་ཡན་ལག་བཞི་པ་གཏད་ནས་དེ་རྣམས་དོང་སྟེ་རི་འོར་བ་རྣམས་ཕབ་ནས་གཏེའུ་བཟུང་དཔྱ་བླངས་ཏེ། སླར་འོངས་པ་དང་མདུན་ན་འདོན་གྱིས་སྨྲས་པ། ལྷ་འདི་དག་ནི་འཕགས་པར་རྩལ་པོ་ཆེ་དག་ཅིག་སྟེ། རེ་ཞིག་ལྷའི་དཀའ་བས་བསྒྲུབ་པ་གང་ལགས་པ་དེ་ནི་འདི་དག་གིས་འབྲིང་གིས་བསྒྲུབས་ཀྱིས་ལྷས་འདི་ལ་དགོངས་ཤིག །རྒྱལ་པོ་རྣམས༌ནི་ཁུམ་ཕྲིག་ཅན་ཡིན་པས་སྙིང་ལ་བཞག་སྟེ་སླར་མདུན་ན་འདོན་ལ་དྲིས་པ་དེ་ལ་ཇི་ལྟར་བསྒྲུབ་པར་བྱ། དེས་སྨྲས་པ། ལྷ་དེ་ལ་ཇི་ལྟར་བསྒྲུབ་པར་བགྱི། གལ་ཏེ་དེ་དག་འཚལ་བར་གྱུར་ན། ལྷ་རྒྱལ་སྲིད་ནས་ཕྱུང་ནས་རང་ཉིད་རྒྱལ་སྲིད༌བགྱིད་པར་འགྱུར་རོ། །

རྒྱལ་པོ་ཇེ་མི་དགའ་ནས་བསམས་པ། དེ་ལྟར་འགྱུར་སྲིད་ཀྱིས་ཇི་ལྟར་གསད་པར་བྱ་ཞེ་ན། ཐབས་བཤམ་པ་སེམས་ཤིང་གསང་འཕེལ་དུ་དོགས་པས་སུ་ལ་ཡང་མི་འདྲི་བར་དེ་བདག་ཉིད་ཀྱིས་དཔྱད་པ་ལས་བློ་སྐྱེས་པ་འདི་ཁོ་ནར་མགྲོན་དུ་བོས་ལ་བསྟུངས་ཏེ་གཏང་ངོ་སྙམ་ནས་དེས་ས་ག་མ་ལ་སྤྲིང་བ། ཆེ་ཞེའི་བུ་རྣམས་སང་འདིར་ཟན་ཟོ༌ཞིག །དེས་བསམས་པ། སང་ནི་བུ་རྣམས་ཞང་པོའི་དེར་ཟ་བར་འགྱུར་གྱིས། བདག་གིས་ཀྱང་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ་སྙམ་དུ་བསམས་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་རི་དྭགས་འཛིན་གྱི་མ་ས་ག་མ་ལ་ཆོས་དང་ལྡན་པའི་གཏམ་གྱིས་ཞེས་བྱ་བ་ནས་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ། །

དེ་ནས་རི་དྭགས་འཛིན་གྱི་མ་ས་ག་མ་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་རི་དྭགས་འཛིན་གྱི་མ་ས་ག་མ་ལ་གནང་ངོ་ཞེས་བྱ་བ་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །རྒྱལ་པོའི་ཕོ་ཉ་དེ་རྣམས་ཀྱིས་དྲུང་དུ་འོངས་ནས་ཁྱེའུ་ཤོག་ཅིག་ཅེས་བོས་སོ། །

དེ་ནས་རྒྱལ་པོས་དུག་ཧ་ལ་ཧ་ལ་དང་ཟས་སུ་སྦྱར་བས་རྨོངས་པར་བྱས་ནས་མགོ་རྣམས་བཅད་དེ། དེ་ནས་གཟེབ་བཀང་ནས་སྟེང་དུ༌ཕུ་བོ་ཤོས་ཀྱི་མགོ་བཞག་སྟེ་རྒྱ་སྐྱེགས་ལ་རྒྱས་བཏབ་ནས་ས་ག་མ་ལ་བསྐུར་བ་དང་ས་ག་མས་བསམས་པ། གདོན་མི་ཟ་བར་ལྷས་སྲིང་མོའི་བུ་རྣམས༌ལ་བགོ་བ་ཞིག་བསྐུར་བ་ཡིན་གྱིས། བདག་གིས་ཀྱང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བགོ་བར་འབུལ་ལོ་སྙམ་ནས། དེ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་རྣམས་ཀྱིས་ཞེས་བྱ་བ་ནས། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་ཞེས་བྱ་བའི་བར་གོང་མ་བཞིན་དུའོ། །གཟེབ་ཁ་དབྱེ་བར་རྩམ་པ་དང་བཅོམ་ལྡན་འདས་ཀྱིས་དགོངས་པ། གལ་ཏེ་ས་ག་མས་བདེན་པ་མ་མཐོང་བར་བུ་བསད་པ་མཐོང་ན་བདེན་པ་རྣམས་ཀྱི་སྣོད་དུ་མི་འགྱུར་བའི་གནས་གང་ཡིན་པ་དེ་ཡོད་དོ་སྙམ་དུ་དགོངས་ནས་ས་ག་མ་ལ་བཀའ་སྩལ་པ། རེ་ཞིག་འདུག་ལ་ཆོས་ཉོན་ལ་ཕྱིས་ཅི་དགའ་བ་གྱིས་ཤིག །དེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཆོས་མཉན་པའི་ཕྱིར་སྤྱན་སྔར་འདུག་གོ །

དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་བ་དང་ཁམས་དང་རང་བཞིན་མཁྱེན་ནས་ཞེས་བྱ་བ་ནས་བདེན་པ་མཐོང་བར་མཛད་དོ་ཞེས་བྱ་བའི་བར་གོང་མ་བཞིན་དུའོ། །དེ་ནས་བདེན་པ་མཐོང་ནས་གཟེབ་ཁ་ཕྱེ་བ་དང་བུའི་མགོ་རྣམས་མཐོང་ནས། དེ་ནས་གསོལ་བ། བཅོམ་ལྡན་འདས་འདུ་བྱེད་ཐམས་ཅད་ནི་འདི་ལྟར་མི་རྟག་པ་ལགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཀོ་ས་ལའི་རྒྱལ་པོ་གསལ་རྒྱལ་གྱིས་ས་ག་མའི་བུ་རྣམས་བསྟུངས་པ་ནི་ཉེས་སོ། །གལ་ཏེ་མ་བསྟུངས་པར་གྱུར་ན་འདི་རྣམས་ཁོ་ནས་གྲོགས་བྱས་པས་དེའི་ལག་མཐིལ་དུ་ས་མཐའ་དག་འཇོག་པར་འགྱུར་བ་ཞིག །དེ་ནས་ཀོ་ས་ལའི་རྒྱལ་པོ་གསལ་རྒྱལ་ལུས་རྡུལ་གྱིས་གཡོག་ཅིང་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་ཀོ༌ས་ལའི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །

རྒྱལ་པོ་ཆེན་པོ་ཁྱོད་ལུས་རྡུལ་གྱིས་ཡོག་ཅིང་གང་ནས་འདིར་འོངས། བཙུན་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་གྱི་དབང་ཕྱུག་དང་མཐུ་དང་། བརྩོན་འགྲུས་ཐོབ་པ། སའི་དཀྱིལ་འཁོར་ཆེན་པོ་ལེགས་པར་ཕབ་སྟེ་གནས་པ་རྣམས་ཀྱིས་རྒྱལ་པོའི་བགྱི་བ་དང་། རྒྱལ་པོའི་སྒྲུབ་པ་ཐ་དད་པ་གང་དག་ལགས་པ་དེ་དག་བདག་གིས་བགྱིས་ཏེ། ཡོངས་སུ་རྫོགས་ནས་ལུས་རྡུལ་གྱིས་གཡོག་ཅིང་ང་མཆིས་པ་ལགས་སོ། །རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ལ་དྲི་བར་བྱས། ཁྱོད་ཀྱིས་ཇི་ལྟར་བཟོད་པ་དེ་ལན་ཐོབ་ཅིག །རྒྱལ་པོ་ཆེན་པོ་དཔེར་ན་ཁྱོད་ལ་འདིར་ཤར་ཕྱོགས་ནས༌མི་ཡིད་ཆེས་པ་ཡིད་བརྟན་དུ་རུང་བ། བརྟན་པ། འཇིག་རྟེན་ལ་མི་སླུ་བ་ཞིག་འོངས་ནས། དེ་འདི་སྐད་ཅེས་ལྷ་བདག་ད་གཟོད་འདི་ནས་ཤར་ཕྱོགས་སུ་མཆི་མཆི་ན།

དེ་ནས་བདག་གིས་རི་བྲག་ཆེན་པོ་མ་ཆག་པ། སེར་ཀ་མ་མཆིས་པ། ཕྲག་མ་མཆིས་པ། ཤིན་ཏུ་མཁྲེགས་པ། གཅིག་ཏུ་སྡུག་པ་ཞིག་སའི་བར་དང་ནམ་མཁའི་བར་གྱི་སེམས་ཅན་ཐམས་ཅད་དང་། སྲོག་ཆགས་ཐམས་ཅད་དང་། འབྱུང་པོ་ཐམས་ཅད་དང་། རྩྭ་དང་། ཤིང་དང་། ཡལ་ག་དང་། ལོ་མ་དང་། འདབ་མ་ཇི་སྙེད་པ་ཐམས་ཅད་ཕྱེ་མར་རློག་ཅིང་མཆི་བ་མཐོང་གིས་ལྷ་ཁྱོད་ཀྱི་བགྱི་བའམ། བསྒྲུབ་པ་གང་ལགས་པ་དེ་མཛོད་ཅིག་ཅེས་ཟེར་ལ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་མི་ཞིག་འོངས་ཏེ་ཞེས་བྱ་བ་ནས་བགྱི་བའམ་བསྒྲུབ་པ་དེ་མཛོད་ཅིག་ཅེས་ཟེར་ཏེ། རྒྱལ་པོ་ཆེན་པོ་འཇིགས་པ་ཆེན་པོའི་ཡང་ཆེན་པོ་མི་བཟད་པར་བྱེད་པ་མི་བཟད་པ་དེ་ལྟ་བུ་ཉེ་བར་གནས་ན་མི་ཉིད་ཐོབ་པ་ནི་རྙེད་པར་དཀའ་ན། ཁྱོད་ཀྱིས་ཅི་ཞིག་བྱ། བཙུན་པ་འཇིགས་པ་ཆེན་པོའི་ཡང་ཆེན་པོ་མི་བས་པར་བགྱིད་པ་མི་བཟད་པ་དེ་ལྟ་བུ་ཉེ་བར་གནས་ན་མི་ཉིད་ཐོབ་པ་རྙེད་པར་དཀའ་བ་ལགས་པས་དོན་སྤྱོད་པ་དང་། ཆོས་སྤྱད་པ་དང་། བསོད་ནམས་སྤྱད་པ་དང་། དགེ་བ་སྤྱད་པ་དང་། བཟང་པོ་སྤྱད་པ་དང་། སངས་རྒྱས་རྣམས་ཀྱི་བསྟན་པ་ལ་བརྩོན་པར༌བགྱི་བ་མ་ལགས་པར་གཞན་ཅི་ཞིག་བགྱིར་མཆིས། རྒྱལ་པོ་ཆེན་པོ་ཁྱོད་ཅིའི་ཕྱིར་འདི་སྐད་ཅེས་བཙུན་པ་འཇིགས་པ་ཆེན་པོའི་ཡང་ཆེན་པོ་དེ་ལྟ་བུ་ཞེས་བྱ་བ་ནས་སངས་རྒྱས་རྣམས་ཀྱི་བསྟན་པ་ལ་བརྩོན་པར་བགྱི་ཞེས་བྱ་བའི་བར་གོང་མ་བཞིན་དུའོ། །

བཙུན་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བའི་བར་གོང་མ་བཞིན་དུ་སྟེ། སའི་དཀྱིལ་འཁོར་ཆེན་པོ་ལེགས་པར་ཕབ་སྟེ་གནས་པ་དེ་རྣམས་ཀྱིས་གླང་པོ་ཆེ་རྣམས༌དང་གླང་པོ་ཆེར་འགྱེད་པ་དང་། རྟ་པ་རྣམས་དང་རྟ་པར་འགྱེད་པ་དང་། ཤིང་རྟ་པ་རྣམས་དང་ཤིང་རྟ་པར་འགྱེད་པ་དང་། དཔུང་བུ་ཆུང་རྣམས་དང་དཔུང་བུ་ཆུང་དུ་འགྱེད་པ་དང་། གསང་ཚིག་མཁན་རྣམས་དང་གསང་ཚིག་མཁན་དུ་འགྱེད་པ་དང་། ནོར་རྣམས་ཀྱིས་ནོར༌དུ་རྒྱལ་བ་ཐ་དད་པ་གང་དག་ལགས་པ་དེ་དག་ཐམས་ཅད་དེའི་ཚེ་འགྱེད་པའི་མཐུ་མ་མཆིས་པ་དང་སྟོབས་མ་མཆིས་པ་དང་། ཕ་རོལ་གནོན་པ་མ་མཆིས་པ་ལགས་པས་དེའི་སླད་དུ་བདག་འདི་སྐད་ཅེས་བཙུན་པ་འཇིགས་པ་ཆེན་པོའི་ཡང་ཆེན་པོ་དེ་ལྟ་བུ་ཉེ་བར་གནས་ན་ཞེས་བྱ་བ་ནས་སངས་རྒྱས་རྣམས་ཀྱི་བསྟན་པ་ལ་བརྩོན་པར་བགྱི་བ་མ་ལགས་པར༌གཞན་ཅི་ཞིག་བགྱིར་མཆིས་ཞེས་བྱ་བའི་བར་གོང་མ་བཞིན་དུའོ། །

རྒྱལ་པོ་ཆེན་པོ་དེ་བཞིན་དུ་སྲོག་ཆགས་འདི་དག་ཀྱང་རྟག་ཏུ་རྒྱུན་མི་འཆད་པར་རྒ་བ་དང་། འཆི་བས་འཇོམས་པ་ཡིན་ནོ། །རྒྱལ་པོ་ཆེན་པོ་དེ་ལྟར་རྒ་བ་དང་འཆི་བས་འཇོམས་པ་ན་སྐྱེས་པ་གང༌དག་གིས་དོན་སྤྱད་པ་དང་ཞེས་བྱ་བ་ནས། སངས་རྒྱས་རྣམས་ཀྱི་བསྟན་པ་ལ་བརྩོན་པར་བྱ་བ་མ་ཡིན་པར་གཞན་ཅི་ཞིག་བྱར་ཡོད་ཅེས་བྱ་བའི་བར་གོང་མ་བཞིན་དུའོ། །

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པས་བཀའ་སྩལ་པ། ཇི་ལྟར་ཆེ་ཞིང་རྒྱ་ཆེ་བའི། །རི་བོ་ནམ་མཁའ་ལས༌འོང་བ། །ཀུན་ནས་ཡང་དག༌འོང་བ་ཡིས། །ས་ནི་ཕྱེ་མར་རློག་པ་ན། །དེ་ལ་གླང་པོ་ཆེས་མི་རྫི། །དཔུང་བུ་ཆུང་དང་ཤིང་རྟ་དང་། །རྟས་མིན་གསང་ཚིག་མཁན་དང་ནི། །ནོར་གྱིས་འགྱེད་པས་རྒྱལ་མི་འཐོབ། །དེ་བཞིན་རྒ་དང་འཆི་བ་ཡིས། །མི་རྣམས་འཇོམས་པར་བྱེད་པ་ན། །རྒྱལ་རིགས་བྲམ་ཟེ་རྗེའུ་རིགས་དང་། །དམངས་རིགས་གདོལ་པ་གཡུང་པོ་དང་། །ཚུལ་ཁྲིམས་འཆལ་དང་ཚུལ་ཁྲིམས་ལྡན། །ཁྱིམ་པ་དེ་བཞིན་བརྟུལ་ཞུགས་ཅན། །ལང་ཚོ་ཉིད་དང་རྒན་པོ་དང་། །དེ་བཞིན་བར་མའི་མི་རྣམས་ལ། །ཅུང་ཟད་ཀྱང་ནི་འཛེམ་མེད་པར། །ཐམས་ཅད་མངོན་དུ་འཇོམས་པར་བྱེད། །དེ་ལྟ་བས་ན་མཁས་པའི་མི། །བདག་གི་དོན་ལ་བལྟ་བ་ཡིས། །སངས་རྒྱས་ཆོས་དང་དགེ་འདུན་ནི། །བླ༌མེད་དག་ལ་དད་བྱ་ཞིང་། །ལུས་དང་ངག་དང་ཡིད་དག་གིས། །དམ་པའི་ཆོས་ནི་སྤྱད་བྱས་ན། །འདི་ན་སྨད་པར་མི་འགྱུར་ཞིང་། །མཐོ་རིས་སོང་ནས་དགའ་བར་འགྱུར། །དེ་ནས་ཀོ༌ས་ལའི་རྒྱལ་པོ་གསལ་རྒྱལ་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་སྟེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སྟན་ལས་ལངས་ནས་སོང་ངོ་། །

དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རི་དྭགས་འཛིན་གྱི་མ་ས་ག་མས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་སྒོ་ང་སུམ་ཅུ་རྩ་གཉིས་བྱུང་བ་དེ་རྣམས་ལས་ཀྱང་བུ་ཕོ་སུམ་ཅུ་རྩ་གཉིས་བྱུང་སྟེ་རྩལ་པོ་ཆེ་ཐུབ་རླག་པ་ཤ་སྟག་ཏུ་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་སྨོན་ལམ་བཏབ་ལགས། དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་དུ་ཁྱིམ་བདག་ཅིག་གི་བུ་ཤི་ནས་དེའི་ཆུང་མ་དེ་རྟག་ཏུ་བུ་མངོན་པར་འདོད་པར་གྱུར་ཏོ། །

གང་གི་ཚེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སངས་རྒྱས་ཀྱི་མཛད་པ་མཐའ་དག་མཛད་ནས་ཤིང་ཟད་པའི་མེ་བཞིན་དུ་ཕུང་པོ་ལྷག་མ་མེད་པའི་མྱ་ངན་ལས༌འདས་པའི་དབྱིངས་སུ༌ཡོངས་སུ་མྱ་ངན་ལས་འདས་པ་དེའི་ཚེ་བཱ་རཱ་ཎ་སཱིར་རྒྱལ་པོ་ཀྲྀ་ཀཱི་ཞེས་བྱ་བ་བྱུང་སྟེ། དེས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་རིན་པོ་ཆེ་སྣ་བཞི་ལས་བརྩིགས་སོ། །དེ་ནས༌བུད་མེད་བུ་མེད་པ་བུ་མངོན་པར་འདོད་པ་གང་ཡིན་པ་དེ་ཡང་རྒས་པར་གྱུར་ནས་མཆོད་རྟེན་དེ་ལ་བྱི་དོར་བྱས་ནས་འདུག་གོ །དེས་འདུན་པའི་སློང་མོ་བྱས་ནས་མཆོད་རྟེན་དེ་ལ་མཆོད་པར་བྱས་ཏེ་སྨོན་ལམ་བཏབ་པ། བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་བྱ་བ་བྱས་པ་གང་ཡིན་པའི་དགེ་བའི་རྩ་བ་དེས་བདག་བུ་མང་པོར་གྱུར་ཅིག་ཅེས་བྱས་ཏེ་སོང་ནས་གྲོང་ཁྱེར་དུ་ཞུགས་སོ། །

དེ་ན་བུད་མེད་ཅིག་བུ་ནད་ཀྱི་སྡུག་བསྔལ་གྱི་ཚོར་བས་ཉེན་ནས་ངུ་བ་དང་དེས་གཞན་ཞིག་ལ་དྲིས་པ། ཅིའི་ཕྱིར་འདི་ངུ་བར་གྱུར་དེས་ཇི་ལྟར་གྱུར་པ་རྣམས་སྨྲས་པ་དང་དེས་བསམས་པ། གལ་ཏེ་བདག་ཀྱང་བུ་བྱུང་བར་གྱུར་ན། བདག་ཀྱང་སྡུག་བསྔལ་འདི་ལྟ་བུ་ཉམས་སུ་མྱོང་བར་འགྱུར་རོ་སྙམ་པ་ལས། ཅི་ཙམ་ན་སུམ་ཅུ་རྩ་གཉིས་ཀྱི་དགེ་འདུན་གྱིས་མཆོད་རྟེན་དེ་ལ་མཆོད་པ་བྱེད་པ་ན་བུད་མེད་དེ་ཡང་དེ་དང་ཧ་ཅང་མི་རིང་བ་ཞིག་ན་འདུག་གོ །

དེ་རྣམས་ཀྱིས་མཆོད་པ་བྱས་ནས་སྨོན་ལམ་བཏབ་པ། དགེ་བའི་རྩ་བ་འདིས་བདག་ཅག་ཚན་པོ་ཆེ་ཆེན་པོའི་སྟོབས་དང་ལྡན་པར་གྱུར་ཅིག་ཅེས་བྱས་སོ། །དེས་དེ་རྣམས་ལ་དྲིས་པ་བུ་དག་ཁྱེད་ཀྱིས་སྨོན་ལམ་ཅི་ཞིག་བཏབ། དེ་རྣམས་ཀྱིས་སྨྲས་པ། ཡུམ་འདི་དང་འདི་དག་གོ །དེས་སྨྲས་པ། བུ་དག་གལ་ཏེ་དེ་ལྟར་ན་ཁྱེད་ཅག་གི་མར་བདག་ཁོ་ན་གྱུར་ཅིག །ཡུམ་དེ་བཞིན་དུ་གྱུར་ཅིག་ཅེས་སྨྲས་ནས་དེ་རྣམས་དོང་ངོ་། །དེས་བསམས་པ། རེ་ཞིག་བུད་མེད་དེ་ལན་གཅིག་བཙའ་ན་ཡང་སྡུག་བསྔལ་གྱི་ཚོར་བས་ཉེན་ནས་དེ་ལྟར་ངུ་ན། བདག་ལ་ལན་སུམ་ཅུ་རྩ་གཉིས་བཙའ་ན་ཇི་ལྟར་བྱ་ཞེས་དེ་དེ་ལྟར་རྣམ་པར་རྟོག་པ་ན། མཆོད་རྟེན་དང་ཉེ་བ་ན་བྱ་གག་མོ་ཞིག་ཡོད་པ་སྒོ་ང་འབྱུང་བར་དེ་དེ་ཐང་ཅིག་ཙམ་གྱིས་སྒོ་ང་སུམ་ཅུ་རྩ་གཉིས་བྱུང་ལ་སྨྲེ་སྔགས་ཀྱང་མི་འདོན་ཏོ། །དེས་བསམས་པ། འབྱུང་བའི་ཐབས་འདི་ནི་རུང་བ་ཡིན་ནོ་སྙམ་དུ་རིག་ནས་མཆོད་རྟེན་དེ་ལ་དད་པ་དྲག་པོས་སྨོན་ལམ་གདབ་པར་བརྩམས་པ། ཇི་ལྟར་བྱ་གག་མོ་འདི་ཐང་ཅིག་ཙམ་གྱིས་སྒོ་ང་སུམ་ཅུ་རྩ་གཉིས་བྱུང་བ་དེ་བཞིན་དུ་བདག་གི་བུ་སུམ་ཅུ་རྩ་གཉིས་ཀྱང༌ཅིག་ཅར་སྒོ་ངར་འབྱུང་བར་གྱུར་ཅིག་ཅེས་བྱས་སོ། །

དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་བུད་མེད་རྒན་མོ་གང་ཡིན་པ་དེ་ནི་ས་ག་མ་འདི་ཉིད་ཡིན་ནོ། །སུམ་ཅུ་རྩ་གཉིས་ཀྱི་དགེ་འདུན་གང་ཡིན་པ་དེ་ནི་ས་ག་མའི་བུ་འདི་རྣམས་ཁོ་ན་ཡིན་ཏེ། འདིས་དེ་ན་སྨོན་ལམ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་སྒོ་ང་སུམ་ཅུ་རྩ་གཉིས་བྱུང་ངོ་། །བཙུན་པ། ས་ག་མའི་བུ་རྣམས་ཀྱིས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་ནོངས་པ་མ་བགྱིས་ཤིང་སྐྱོན་མ་མཆིས་པར་རྒྱལ་པོ་གསལ་རྒྱལ་གྱིས་བཀུམ་ནས་དེ་རྣམས་ཀྱི་མགོས་གཟེབ་བཀང་སྟེ་ས་ག་མ༌ལ་བསྐུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ཁོ་ནས་ལས་རྣམས་བྱས་ཤིང་བསགས་པ་དག་ནི་ཞེས་བྱ་བ་ནས་ལུས་ཅན་རྣམས་ལ་འབྲས་བུར་འགྱུར་ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང༌བ་རི་འོར་ཞིག་ན་ཆང་འཚོང་ཞིག་གནས་སོ། །ཆོམ་རྐུན་པ་རབ་ཏུ་མང་པོ་ཆང་ཚོལ་ཞིང་དེའི་དྲུང་དུ་འོངས་ནས་དྲིས་པ། ཆང་ཡོད་དམ། ཆང་འཚོང་གི་ཆུང་མས་སྨྲས་པ། ཡོད་དོ་ཞེས་དེ་རྣམས་ལ་ཆང་བླུད་ན་འཛར་བ་མེད་ནས་དེས་གླང་ཞིག་བསྟན་དེ་འདི་སོད་ཅིག །དེ་རྣམས་ཀྱིས་སྨྲས་པ། མཚོན་ཆ་མེད་དོ། །དེས༌གཏའ་བླངས་ནས་མཚོན་ཆ་བྱིན་པ་དང་། དེ་རྣམས་ཀྱིས་དེ་བསད་པར༌བརྩམས་སོ། །དེ་གསོད་པ་ན་སེམས་ལ་བདག་གསོད་པ་གང་ཡིན་པ་འདི་དག་ཐམས་ཅད་ནི་ཆང་འཚོང་གི་ཆུང་མ་འདི་ཡིན་གྱིས། བདག་གང་དུ་འདི་རྣམས་ཀྱི་མགོ་བཅད་ནས་གཟེབ་བཀང་སྟེ་འདི་ལ་བསྐུར་བར་འགྱུར་བ་དེར་སྐྱེ་བར་གྱུར་ཅིག་ཅེས་བསམས་སོ། །

དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་གླང་གང་ཡིན་པ་དེ་ནི་ཀོ་ས་ལའི་རྒྱལ་པོ་གསལ་རྒྱལ་འདི་ཉིད་ཡིན་ནོ། །ཆོམ་རྐུན་པ་གང་ཡིན་པ་དེ་རྣམས་ནི་ས་ག་མའི་བུ་འདི༌དག་ཉིད་ཡིན་ནོ། །དེའི་ཚེ་དེའི་དུས་ཀྱི་ཆང་འཚོང་གི་ཆུང་མ་གང་ཡིན་པ་དེ་ནི་ས་ག་མ་འདི་ཉིད་ཡིན་ནོ་ཞེས་རྒྱས་པར་བྱའོ།། །།(མདོ་སྡེ་མཛངས་བླུན་དུ་བློན་པོ་རི་དྭགས་ཀྱི་ལེའུ་ཞེས་པའི་ནང་དུ་ཡང་ལྷ་འཚམས་མ་ཞེས་བྱའི་ལོ་རྒྱུས་འདི་ལས་ཅུང་བསྡུས་ལ་བྱ་ཚུལ་འགའ་རེ་མི་འདྲ་ཡང་དོན་དུ་འདི་དང་དོན་གཅིག་པའི་རྣམ་ཐར་ཞིག་ཡོད། )

བཙུན་མོ་ཟླ་འོད་ཀྱིས་དགེ་སློང་མ་རི་མའི་མདུན་ནས་ཆོས་ཐོས་ཏེ་ལྷ་ཡུལ་དུ་སྐྱེས་ནས་འབྲས་བུ་ཐོབ་ཚུལ། འདུལ་བ་ལུང་རྣམ་འབྱེད་ལས་བཏུས།

བཅོམ་ལྡན་འདས་ཀྱིས་དགོངས་པ། རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང་གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་དགེ་སློང་མ་གང་གིས་གདུལ་བ་ཡིན་སྙམ་དུ་དགོངས་ན། དགེ་སློང་མ་རི་མའི་གདུལ་བ་ཡིན་པར་གཟིགས་ནས་དེ་ནས་བཅོམ་ལྡན་འདས་ཀྱིས་དགེ་སློང་མ་རི་མ་ལ་བཀའ་སྩལ་པ། རི་མ་གྲོང་ཁྱེར་སྒྲ་གྲོགས་ན་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང་། སྒྲ་གྲོགས་ན་གནས་པའི་བུད་མེད་རྣམས་ལ་སོམས་ཤིག །དགེ་སློང་མ་རི་མས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །

དེ་ནས་དགེ་སློང་མ་རི་མ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོགས་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ངོ་། །རྒྱལ་པོ་གཟུགས་ཅན་སྙིང་པོས་ཀྱང་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་འདི་སྐད་ཅེས་ཤེད་མཐུན་དགྱེས་པ་ཁྱོད་ཀྱི་ཕྱིར་བདག་གིས་ཉན་ཐོས་མ་ཆེན་མོ་སྟོན་པས་བསྔགས་པ་འདི་འཁོར་ལྔ་བརྒྱ་དང་གཏང་གིས་ཁྱོད་ཀྱིས་ཀྱང་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་ཡང་བྱེད་དུ་གཞུག་པར་བྱ། ཁྲི་དང་ཁྲིའུ་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་ལྔ་བརྒྱ་ཡང་འབུལ་བར་བྱ། བསོད་སྙོམས་ལྔ་བརྒྱ་ཡང་སྦྱོར་དུ་གཞུག་པར་བྱ་སྟེ། དེས་ན་ཁྱེད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ། །

རྒྱལ་པོ་ཨུ་ཏྲ་ཡ་ནས་འཕྲིན་ཡིག་དེ་བཀླགས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། དེས་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱེད་དུ་བཅུག་ནས་བདག་ཉིད་དཔུང་གི་ཚོགས་ཡན་ལག་བཞི་པ་དང་། སྐྱེ་བོ་འབུམ་ཕྲག་དུ་མའི་འཁོར་དང་བཅས་པས་བསུ་ནས་བཀུར་སྟི་ཆེན་པོས་གྲོང་ཁྱེར་དུ་འཇུག་ཏུ་བཅུག་ཅིང་། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་བྱེད་དུ་བཅུག་སྟེ། ཁྲི་དང་ཁྲིའུ་དང་། སྟན་ནང་ཚངས་ཅན་དང་ལ་བ་དང་སྔས་དང་གོར་བུ་ལྔ་བརྒྱ་ཡང་འབུལ་དུ་བཅུག །བསོད་སྙོམས་ལྔ་བརྒྱ་ཡང་སྦྱོར་དུ་བཅུག་གོ །

དགེ་སློང་མ་རི་མ་ཉིན་རེ་ཞིང་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་དང་། གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་ཀྱི་ནང་དུ་ཞུགས་ཏེ་ཆོས་སྟོན་པར་བྱེད་དོ། །རྒྱལ་པོ་ཨུ་ཏྲ་ཡ་ན་ནི་པི་ཝཾ་མཁས་པ་ཡིན་ལ། བཙུན་མོ་ཟླ་འོད་ནི་གར་མཁས་པ་ཡིན་པས་ཇི་ཙམ་དུ་དུས་གཞན་ཞིག་ན་རྒྱལ་པོ་ཨུ་ཏྲ་ཡ་ནས་པི་ཝཾ་སྦྲེངས་ཏེ་བཙུན་མོ་ཟླ་འོད་གར་བྱེད་དོ། །དེས་དེ་གར་བྱེད་པ་ན་ཆུད་ཟ་བའི་མཚན་མ་མཐོང་ནས་དེས་དེ་ལ་མགོ་མཇུག་ཏུ་བརྟགས་ཏེ་བསམས་ན་ཞག་བདུན་འདས་ན་འདི་དུས་བྱེད་པར་འགྱུར་རོ་སྙམ་ནས་དེའི་ལག་ནས་པི་ཝཾ་ཤོར་ཏེ་ས་ལ་ལྷུང་བ་དང་། བཙུན་མོ་ཟླ་འོད་ཀྱིས་སྨྲས་པ། ལྷ་བདག་གིས་གར་མ་ལེགས་སམ་ཅི་ནོངས། ཟླ་འོད་ཁྱོད་ཀྱིས་གར་མ་ལེགས་པ་མ་ཡིན་ཏེ། འདི་ལྟར་ངས་ཁྱོད་གར་བྱེད་པ་ན་ཆུད་ཟ་བའི་མཚན་མ་མཐོང་བས་ཉི་མ་བདུན་པ་ལ་ཁྱེད་དུས་བྱེད་པར་འགྱུར་རོ། །བཙུན་མོ་ཟླ་འོད་ཀྱིས་རྒྱལ་པོའི་རྐང་པ་གཉིས་ལ་གཏུགས་ཏེ་སྨྲས་པ། ལྷ་གལ་ཏེ་དེ་ལྟ་ན་བདག་གིས་ལྷ་ལ་བསྙེན་བཀུར་ནི་བགྱིས་ལགས་ན། གལ་ཏེ་ལྷས་གནང་ན་བདག་རབ་ཏུ་འབྱུང་ངོ་། །

རྒྱལ་པོས་སྨྲས་པ། ཟླ་འོད་དུས་ཡིན་གྱིས་གནང་ངོ་། །གལ་ཏེ་ཁྱེད་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །གལ་ཏེ་ཀུན་ཏུ་སྦྱོར་བ་ལྷག་མ་དང་བཅས་པས་དུས་བྱས་ཏེ་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་ཁྱེད་ལྷར་གྱུར་པས་ང་ལ་བལྟ་བར་བྱའོ། །

དེས་སྨྲས་པ། ལྷ་བཀའ་བཞིན་འཚལ། རྒྱལ་པོ་ཨུ་ཏྲ་ཡ་ནས་བཙུན་མོ་ཟླ་འོད་དགེ་སློང་མ་རི་མ་ལ་གཏད་དེ་སྨྲས་པ། འཕགས་མ་བཙུན་མོ་ཟླ་འོད་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཚལ་གྱིས་དེའི་སླད་དུ་འཕགས་མས་འདི་རབ་ཏུ་འབྱུང་བ་དང་། རྫོགས་པར་བསྙེན་པར་མཛད་པའི་རིགས་སོ། །དགེ་སློང་མ་རི་མས་སྨྲས་པ། དེ་ལྟར་བགྱིའོ་ཞེས་དེས་དེ་རབ་ཏུ་བྱུང་ཞིང་རྫོགས་པར་བསྙེན་པར་བྱས་སོ། །དགེ་སློང་མ་རི་མས་བསམས་པས། དེ་ལ་འཆི་བའི་འདུ་ཤེས་སྒོམས་ཤིག་ཅེས་གདམས་ངག་བྱིན་ནོ། །བཙུན་མོ་ཟླ་འོད་ཀྱིས་འཆི་བའི་འདུ་ཤེས་བསྒོམ་པར་བརྩམས་ནས་དེ་ཉི་མ་བདུན་པ་ལ་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་སྐྱེས་པའོ། །ལྷའི་བུ་མོ་ཟླ་འོད་ཀྱིས་བསམས་པ། བདག་གང་ནས་ཤི་འཕོས་སྙམ་ན། མི་རྣམས་ཀྱི་ནང་ནས་ཤི་འཕོས་པ་དང་། གང་དུ་སྐྱེས་སྙམ་ན་རྒྱལ་ཆེན་བཞི་པའི་ནང་དུ་སྐྱེས་པ་དང་། ལས་གང་གིས་སྐྱེས་སྙམ་ན་བཅོམ་ལྡན་འདས་ཀྱི་བསྟན་པ་ལ་ཚངས་པར་སྤྱོད་པ་སྤྱད་པ་ཉིད་ཀྱིས་སྐྱེས་པར་མཐོང་ངོ་། །

དེ་ནས་ལྷའི་བུ་མོ་ཟླ་འོད་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །

དེ་ནས་ལྷའི་བུ་མོ་ཟླ་འོད་རྣ་ཆ་གདུབ་འཁོར་གཡོ་ཞིང་དྲི་མ་མེད་པ་ཐོགས་ཏེ་དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང་། པད་མ་དང་། ཀུ་མུ་ད་དང་། པདྨ་དཀར་པོ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང་། འདི་ལྟར་ལྷའི་བུ་མོ་ཟླ་འོད་ཀྱི་ཁ་དོག་གི་མཐུས་འོད་མའི་ཚལ་ཀ་ལན་ད་ཀའི་གནས་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷའི་བུ་མོ་ཟླ་འོད་ཀྱི་བསམ་པ་དང་བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་ལྷའི་བུ་མོ་ཟླ་འོད་ཀྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་བ་མཛད་དོ། །

དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །

ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་བརྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །

དེ་ནས་ལྷའི་བུ་མོ་ཟླ་འོད་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཏོག་འབྱོར་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་པ་ལྟ་བུར་གྱུར་ཏེ་ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོང་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ་། །དེ་འདི་སྙམ་དུ་སེམས་ཏེ། བདག་གིས་རྒྱལ་པོ་ཨུ་ཏྲ་ཡ་ན་ལ་ཁས་བླངས་པས་ད་དེ་བལྟས་པའི་དུས་ཡིན་ནོ་སྙམ་ནས། དེ་ནས་ལྷའི་བུ་མོ་ཟླ་འོད་རྒྱལ་པོ་ཨུ་ཏྲ་ཡ་ན་ག་ལ་བ་དེར་སོང་ངོ་། །

དེའི་ཚེ་ན་རྒྱལ་པོ་ཨུ་ཏྲ་ཡ་ན་གཅིག་པུ་སྟེང་གི་ཁང་བཟང་གི་གཞིར་གཏོགས་པ་ན་ཉལ་ཞིང་འདུག་ནས་དེས་དེ་སྣང་བ་རྒྱ་ཆེན་པོས་ཁྱབ་པར་བྱས་ཏེ་སེ་གོལ་གྱི་སྒྲས་བསླང་བ་དང་། དེ་གཉིད་ཀྱིས་ནོན་པའི་མིག་དང་རྣམ་པར་ཤེས་པ་མི་གསལ་བས་སྨྲས་པ། ཁྱོད་སུ། དེས་སྨྲས་པ། བདག་ཟླ་འོད་དོ། །རྒྱལ་པོས་སྨྲས་པ། ཚུར་ཤོག་དགའ་མགུར་སྦྱད་པར་བྱའོ། །

དེས་སྨྲས་པ་ལྷ་བདག་ཤི་ཞིང་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཏེ། གལ་ཏེ་བདག་དང་ལྷན་ཅིག་མཇལ་བཞེད་ན་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ཞིག་དང་། གལ་ཏེ་ཚེ་འདི་ཉིད་ལ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་མཛད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ལགས་སོ། །

གལ་ཏེ་ཀུན་ཏུ་སྦྱོར་བ་ལྷག་མ་དང་བཅས་པས་དུས་བགྱིས་ཏེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་དེར་ཁྱོད་བདག་དང་མཇལ་བར་འགྱུར་རོ་ཞེས་སྨྲས་ཏེ་དེ་ཉིད་དུ་མི་སྣང་བར་གྱུར་ཏོ།། །།

རྒྱལ་པོ་པད་སའི་བཙུན་མོ་དཔལ་ལྡན་ལ་གནས་བརྟན་ཤཱ་རིའི་བུས་ཆོས་བསྟན་ནས་བདེན་པ་ལ་བཀོད་ཚུལ། འདུལ་བ་ལུང་རྣམ་འབྱེད་ལས་བཏུས།

དུས་གཞན་ཞིག་ན་མགུ་བྱེད་རྒས་པར་གྱུར་ནས་དེས་འཆི་བའི་དུས་ཀྱི་ཚེ་སྨོན་ལམ་བཏབ་པ། བདག་གིས་དགེ་སློང་གི་དགེ་འདུན་ལ་ཇི་སྲིད་འཚོའི་བར་དུ་བསྙེན་བཀུར་བྱས་པའི་དགེ་བའི་རྩ་བ་གང་ཡིན་པ་འདིས་བདག་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེ་ཞིང་སྔོ་བསངས་ཅན་གྱི་ཆུ་ཞེང་ཅི་འདྲ་བ་དེ་ལྟ་བུར་བདག་ཀྱང་གྱུར་ཏེ། པད་སའི་རྒྱལ་པོ་ཤར་པ་བདག་གི་ཁྱིམ་ཐབ་ཏུ་གྱུར་ཅིག་ཅེས་བཏབ་བོ། །དེ་ཤི་ཞིང་དུས་ལ་བབ་ནས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་སོ། །གང་གི་ཉིན་མོ་སྐྱེས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས་སྣང་བར་གྱུར་ཏོ། །

དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། ལྟ་ན་སྡུག་པ་མཛེས་པ་ཞིག་བྱུང་ངོ་། །བྱུང་མ་ཐག་ཏུ་ཡང་དེས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །

ཉེ་དུ་རྣམས་ཀྱིས་སྨྲས་པ། གང་གི་ཕྱིར་བུ་མོ་འདི་གང་གི་ཉིན་མོ་མའི་མངལ་དུ་ཞུགས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས་སྣང་བར་གྱུར་ལ། བཙས་པ་ན་ཡང་འདིས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་པ་དེའི་ཕྱིར་བུ་མོ་འདིའི་མིང་དཔལ་ལྡན་དུ་གདགས་སོ་ཞེས་དེའི་མིང་དཔལ་ལྡན་ཞེས་བྱ་བར་བཏགས་སོ། །གང་གི་ཚེ་དེ་སྨྲ་ཤེས་པར་གྱུར་པ་དེའི་ཚེ་ན་དགེ་སློང་གང་དག་ཁྱིམ་དེར་བསོད་སྙོམས་ལ་ཞུགས་པ་དེ་དག་གི་གན་དུ་སོང་སྟེ། རྐང་པ་ལ་ཕྱག་འཚལ་ནས་སྙུན་གསོལ་བར་བྱེད་དོ། །

ཇི་ཙམ་ན་ཚེ་དང་ལྡན་པ་ཀུན་དགའ་བོ་དེར་བསོད་སྙོམས་ལ་ཞུགས་པ་དང་། དེ་དེའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། བཙུན་པ་ཀུན་དགའ་བོ་ཇི་ལྟར་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་ཆེ་གེ་མོ་དག་གནོད་པ་ཆུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་ནམ། བདེ་འམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ། དེས་སྨྲས་པ། སྲིང་མོ་བཅོམ་ལྡན་འདས་དང་། དགེ་སློང་གནས་བརྟན་གནས་ཆེ་གེ་མོ་དག་གནོད་པ་ཆུང་། ཉམ་ང་བ་ཉུང་། བསྐྱོད་པ་ཡང་། འཚོ་བ་སྟོབས་དང་ལྡན། བདེ། ཁ་ན་མ་ཐོ་བ་མེད། བདེ་བ་ལ་རེག་པར་གནས་སོ། །དེ་སྨྲས་པའི་ཚིག་ཐོས་ནས་ཁྱིམ་བདག་གདངས་ཅན་གྱི་ནང་མི་དག་མཆོག་ཏུ་ངོ་མཚར་བར་གྱུར་ཏོ། །

དེ་ནས་ཚེ་དང་ལྡན་པ་ཀུན་དགའ་བོས་ཨ་རོག་གྱ་ཞེས་བྱས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་གསོལ་བ། བཅོམ་ལྡན་འདས་ཁྱིམ་བདག་གདངས་ཅན་གྱི་བུ་མོ་བྱིས་པ་ཞིག་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་དག་ལ་སྙུན་གསོལ་ཞིང་། ཁྱིམ་བདག་གདངས་ཅན་གྱི་ནང་མི་དག་གིས་དེ་ཐོས་ནས་མཆོག་ཏུ་ངོ་མཚར་སྐྱེས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་དེ་མི་ཤེས་སམ། བཅོམ་ལྡན་འདས་མ་འཚལ་ཏོ། །ཀུན་དགའ་བོ་དེ་ནི་མགུ་བྱེད་ཡིན་ཏེ། སྨོན་ལམ་གྱི་དབང་གིས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་ཏེ་ད་ལྟར་བུ་མོ་དཔལ་ལྡན་ཞེས་བྱའོ། །

གང་གི་ཚེ་དཔལ་ལྡན་ཆེན་མོར་གྱུར་པ་དེའི་ཚེ་ན་དེ་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀོོ་དྱ་དག་དང་། ཤཱཀྱ་དག་དང་། ལི་ཙྪ་བཱི་དག་དང་། གཞན་ཡང་མང་པོ་དག་འོང་བར་བརྩམས་སོ། །

ཁྱིམ་བདག་གདངས་ཅན་འདི་སྙམ་དུ་དཔལ་ལྡན་སློང་བ་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་རོ་སྙམ་ནས། དེ་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་གོ །དཔལ་ལྡན་གྱིས་དེ་མཐོང་ནས་སྨྲས་པ། ཡབ་ཁྱོད་ཅིའི་སླད་དུ་ཕྱག་ལ་ཞལ་གཏད་དེ་སེམས་ཁོང་དུ་ཆུད་ཅིང་བཞུགས།

དེས་སྨྲས་པ། བུ་མོ་ཁྱོད་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀོོ་དྱ་དག་དང་། ཤཱཀྱ་དག་དང་། ལིཙྪ་བཱི་དག་དང་། གཞན་ཡང་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་ན། ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་མི་འདུག་ཏུ་རུང་། དེ་སྨྲས་པ། ཡབ་ཐུགས་ངན་མ་མཛད་ཅིག །བདག་གིས་ཁྱིམ་ཐབ་འཚལ་ལགས་སོ། །བུ་མོ་གང་། ཡབ་པད་སའི་རྒྱལ་པོ་ཤར་པའོ། །བུ་མོ་གལ་ཏེ་དེ་ལྟ་ན་ཇེ་གོ་རིམ་བྱའོ། །ཡབ་གོ་རིམ་ཇི་ལྟ་བུ་ལགས་བུ་མོ་ཁོ་བོས་པད་སའི་རྒྱལ་པོ་ཤར་པ་འདི་ཉིད་དུ་སྤྱན་དྲང་གིས། གང་གི་ཚེ་དེས་བཤོས་གསོལ་བ་དེའི་ཚེ་ན་ཁྱོད་སྟེང་གི་ཁང་བཟང་གི་གཞི་ན་འདུག་པས་ཕོ་ལོང་འཕང་བར་བྱའོ། །ཡབ་མ་ནོངས་ཀྱིས་དེ་བཞིན་བགྱིའོ། །དེས་པད་སའི་རྒྱལ་པོ་ཤར་པ་ཁྱིམ་གཞན་དུ་མགྲོན་དུ་བོས་ཏེ་ཟན་ཟོས་པ་དང་། དཔལ་ལྡན་སྟེང་གི་ཁང་བཟང་གི་གཞིན་འདུག་བས་ཕོ་ལོང་འཕངས་སོ། །རྒྱལ་པོས་སྟེང་དུ་བརྟག་པར་བརྩམས་པ་དང་། རྒྱལ་པོས་དེ་མཐོངས་ནས་སྨྲས་པ། གདངས་ཅན་ཁྱོད་ན་རེ་སྔོ་བསངས་ཅན་དུས་ལ་བབ་ཅེས་ཟེར་ན་འདི་ན་འདུག་པ་འདི་མ་ཡིན་ནམ། ལྷ་འདི་ནི་སྔོན་བསངས་ཅན་མ་ལགས་སོ། །འོ་ན་འདི་ཅི་མིང་། ལྷ་འདི་ནི་སྔོ་བསངས་ཅན་གྱི་ནུ་མོ་དཔལ་ལྡན་ཞེས་བགྱིའོ། །ཅི་འགའ་ཞིག་ལ་བྱིན་ནམ། ལྷ་སུ་ཡང་མ་སྩལ་ཏོ། །གལ་ཏེ་དེ་ལྟ་ན་ང་ལ་ཅིའི་ཕྱིར་མི་སྦྱིན། ལྷ་གསོལ་ལོ། ཁྱིམ་བདག་གདངས་ཅན་གྱིས་བྱིན་ནས་པད་སའི་རྒྱལ་པོ་ཤར་པས་དཔལ་གྱི་འབྱོར་བས་བག་མར་བླངས་ཏེ་བཙུན་མོའི་འཁོར་གྱི་ནང་དུ་བཅུག་གོ །དུས་གཞན་ཞིག་ན་དེས་རྒྱལ་པོ་ལ་སྨྲས་པ། ལྷ་བདག་དགེ་སློང་མཐོང་བར་འཚལ་ལོ། །

རྒྱལ་པོས་སྨྲས་པ། ཁྱོད་འདོད་མོད་ཀྱི། དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ །ལྷ་དེ་ལྟ་ན་བདག་རྣམ་པ་ཐམས་ཅད་དུ་བཙོན་རར་སྩལ་དུ་བས་མོད། གལ་ཏེ་དགེ་སློང་མཐོང་བར་མི་གནང་ན། དེང་སླན་ཅད་འཚལ་མ་ཡང་མི་འཚལ། ཕྱག་ཀྱང་མི་འཚལ་ལོ། །དེས་ཟན་གཅད་པ་ལ་ཞུགས་པ་དང་། རྒྱལ་པོས་ཁྱིམ་བདག་གདངས་ཅན་ལ་སྨྲས་པ། ཁྱིམ་བདག་ཁྱོད་སོ་སོར་མི་རྟོག་གམ། ལྷ་ཅི་ལགས། དཔལ་ལྡན་ཟན་གཅད་པ་ལ་ཞུགས་སོ། །ལྷ་ཅིའི་སླད་དུ་དགེ་སློང་མཐོང་བར་འདོད་ན་དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ །ལྷ་འོ་ན་འདི་ལ་ཇི་ལྟར་བསྒྲུབ་པར་བགྱི། ཁྱིམ་བདག་དེའི་ཕྱིར་ཁྱོད་ཀྱིས་བདག་ཉིད་ཀྱི་མིང་གིས་ར་བར་དགེ་སློང་གི་དགེ་འདུན་སྤྱན་དྲོངས་ཏེ། བར་དུ་སྒོ་ཐོད་ལ་བཤོས་གསོལ་ཅིག །ཁྱིམ་བདག་གདངས་ཅན་གྱི་ཁྱིམ་རྒྱལ་པོ་དང་འདབ་ཆགས་སུ་འདུག་པས་དེས་ར་བའི་བར་དུ་སྒོ་གཏོད་ནས་སའི་བྱི་དོར་བྱེད་དུ་བཅུག་གོ །

དེ་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་གདངས་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུངས་སོ། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །

དེ་ནས་ཁྱིམ་བདག་གདངས་ཅན་གྱིས་དེ་ཉིད་ཀྱི་མཚན་མོ་བཟའ་བ་དང་། བཅའ་བ་གཙང་ཞིང་བསོད་པ་དག་སྟ་གོན་བྱས་ནས་ནངས་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་པ་དང་། ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་ནི་ཞུགས་སོ། །

བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་བོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང་། ལྷ་རྣམས་ལ་ཆོས་སྟོན་པར་བཞེད་པ་དང་། ནད་པ་ལ་ལྟ་བར་བཞེད་པ་དང་། གནས་མལ་ལ་རྟོག་པར་བཞེད་པ་དང་། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །

ཚེ་དང་ལྡན་པ་ཤཱ་རིའི་བུ་འཇུག་པ་ན་རྒྱལ་པོ་བཙུན་མོའི་འཁོར་དང་བཅས་པ་འདུག་ནས་དེའི་ཕྱིར་ལྡོག་པར་བརྩམས་པ་དང་། རྒྱལ་པོས་མཐོང་ནས་སྨྲས་པ། འཕགས་པ་ཤཱ་རིའི་བུ་གཤེགས་སུ་གསོལ། དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ་ཚེ་དང་ལྡན་པ་དག་བཞི་པོ་དག་གི་ཚིག་ནི་མི་གཅིག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་། དགེ་སློང་དགྲ་བཅོམ་པ་ཟག་པ་ཟད་པའི་ཚིག་དང་། དགེ་སྐོས་ཀྱི་ཚིག་དང་། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་ཡིན་གྱིས། ཚེ་དང་ལྡན་པ་དག་དྲན་པ་ཉེ་བར་ཞོག་ཅིག་དང་འཇུག་པར་བྱའོ་ཞེས་དེ་ཞུགས་ནས། དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ །

དེ་ནས་བཙུན་མོ་དཔལ་ལྡན་གྱིས་ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་བདེ་བར་འཁོད་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་ཤཱ་རིའི་བུ་ལ་སོགས་པ། དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ། ཆོས་མཉན་པའི་ཕྱིར་ཚེ་དང་ལྡན་པ་ཤཱ་རིའི་བུའི་མདུན་དུ་འདུག་གོ །

དེ་ནས་ཚེ་དང་ལྡན་པ་ཤཱ་རིའི་བུ་བཙུན་མོ་དཔལ་ལྡན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག་པར་བྱེད། ཡང་དག་པར་གཟེངས་བསྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད་ན་དེས་བདེན་པ་དག་མ་མཐོང་ངོ་། ཚེ་དང་ལྡན་པ་ཤཱ་རིའི་བུས་བསམས་པ། ཅི་འདི་ལ་དགེ་བའི་རྩ་བ་དག་ཡོད་དམ། འོན་ཏེ་མེད་སྙམ་ན། ཡོད་པར་མཐོང་ངོ་། །སུ་ལ་རག་ལས་སྙམ་ན། བདག་ཉིད་ལ་རག་ལས་པར་མཐོང་ནས། དེ་དེ་ལ་ཆོས་སྟོན་ཅིང་རྣམ་པར་དཔྱོད་པ་ན་ཉི་མ་ནུབ་པའི་དུས་ལ་བབ་ནས་དགེ་སློང་རྣམས་སྟན་ལས་ལངས་ཏེ་དོང་ངོ་། །

ཚེ་དང་ལྡན་པ་ཤཱ་རིའི་བུས་བསམས་པ་འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི། འདི་ཉིད་རྐྱེན་དུ་མཛད་ནས་གནང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །སྙམ་ནས། དེ་གདུལ་བ་ལ་ལྟོས་པས་དེ་ཉིད་དུ་འདུག་གོ །ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་གྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། གང་ཐོས་ནས་བཙུན་མོ་དཔལ་ལྡན་གྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །

དེས་བདེན་པ་མཐོང་ནས་སྨྲས་པ། འཕགས་པ་བདག་གིས་དགེ་བའི་བཤེས་གཉེན་འཕགས་པ་ཤཱ་རིའི་བུ་ལ་བརྟེན་ནས་འཕགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །

དེ་ནས་ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་བདེན་པ་དག་ལ་བཞག་སྟེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་སྐབས་དེ་བཅོམ་ལྡན་འདས་ལ་རྒྱས་པར་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ་ལེགས་སོ། །བདུན་པོ་དག་གི་ཚིག་ནི་མི་གཅག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་། དགེ་སློང་དགྲ་བཅོམ་པ་ཟག་པ་ཟད་པའི་ཚིག་དང་། དགེ་འདུན་གྱི་གནས་བརྟན་གྱི་ཚིག་དང་། དགེ་སྐོས་ཀྱི་ཚིག་དང་། མཁན་པོའི་ཚིག་དང་། སློབ་དཔོན་གྱི་ཚིག་དང་། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་གོ། །།

བྲམ་ཟེའི་མཚན་མཁན་གྱིས་སྐྱེས་པ་ལྔ་བརྒྱ་དང་འགྲོགས་པར་ལུང་བསྟན་པའི་བུ་མོ་འོད་བཟང་མའི་སྐྱེ་བ་སྔ་ཕྱིའི་རྣམ་ཐར་གྱི་སྐོར། འདུལ་བ་ལུང་ཕྲན་ཚེགས་ལས་བཏུས།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་དེ་ལ་སེམས་ཅན་ཞུགས་པར་གྱུར་ཏོ། །

གང་གི་ཉིན་མོ་དེ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ནས་མདངས་བཟང་བར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་བུ་མོ་གཟུགས་བཟང་བ། མཛེས་པ། ལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ནས་མཉན་ཡོད་ཀུན་ཏུ་ཁྱིམ་བདག་ཆེ་གེ་མོ་ཞིག་གི་བུ་མོ་གཟུགས་བཟང་བ། མཛེས་པ། ལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །དེ་བཙས་པའི་ཚེ་དེའི་ཁྱིམ་ཉི་མའི་འོད་བཞིན་དུ་སྣང་བར་གྱུར་ཏོ་ཞེས་སྒྲ་དེ་གྲགས་པ་དང་། སྲོག་ཆགས་བརྒྱ་སྟོང་ཕྲག་མང་པོ་ངོ་མཚར་དུ་གྱུར་ནས་ཁྱིམ་བདག་དེའི་ཁྱིམ་དུ་འདུས་སོ། །རེ་ཞིག་ན་བྲམ་ཟེ་ལྟས་མཁན་ཞིག་ཡུལ་གཞན་ནས་འོངས་པ་དེ་ཡང་ངོ་མཚར་གྱི་ཕྱིར་དེ་ཉིད་དུ་འདུས་ཏེ་དེས་དེ་ལ་ཕན་ཚུན་དུ་བལྟས་ནས་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁྱེད་ཀྱིས་བུ་མོ་འདི་མཐོང་ངམ། དེ་དག་གིས་སྨྲས་པ་མཐོང་ངོ་། །ཤེས་ལྡན་དག་བུ་མོ་འདི་ནི་ཅི་ནས་ཀྱང་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་འགྱུར་རོ། །

དེ་དག་གིས་སྨྲས་པ། བྲམ་ཟེ་འདིའི་གཟུགས་འདི་ལྟར་མཛེས་པ་དང་སྦྱར་ན་འདི་ནི་གདོན་མི་ཟ་བར་སྐྱེས་པ་ལྔ་བརྒྱ་དང་དགའ་མགུར་སྤྱོད་པར་འགྱུར་རོ། །མཉན་ཡོད་ཐམས་ཅད་དུ་ཡང་ཁྱིམ་བདག་ཅིག་གི་བུ་མོ་གཟུགས་བཟང་བ། མཛེས་པ། ལྟ་ན་སྡུག་པ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་ཏེ། དེ་བཙས་པའི་ཚེ་དེའི་ཁྱིམ་དེ་ཉི་མའི་འོད་བཞིན་དུ་སྣང་བར་གྱུར་ཏོ། །

དེ་ལ་མཚན་མཁན་གྱིས་བུ་མོ་འདི་ནི་སྐྱེས་པ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་ལུང་བསྟན་ཏོ་ཞེས་སྒྲ་གྲགས་ནས་གང་གིས་སྒྲ་ཐོས་པ་དེ་ཡང་དེར་འོང་བར་གྱུར་ཏོ། །ཞག་བདུན་གསུམ་ཉི་ཤུ་རྩ་གཅིག་ཏུ་དེ་བཙས་པའི་བཙས་སྟོན་རྒྱ་ཆེན་པོ་བྱས་ནས་མིང་འདོགས་པར་བྱེད་དེ། བུ་མོ་འདིའི་མིང་ཇི་སྐད་དུ་གདགས། ཉེ་དུ་དག་གིས་སྨྲས་པ། བུ་མོ་འདི་བཙས་པའི་ཚེ་ཁྱིམ་ཉི་མའི་འོད་བཞིན་དུ་སྣང་བར་གྱུར་པས། དེའི་ཕྱིར་བུ་མོའི་མིང་འོད་བཟང་མ་ཞེས་གདགས་སོ་ཞེས་དེའི་མིང་འོད་བཟང་མ་ཞེས་བྱ་བར་བཏགས་སོ། །འོད་བཟང་མ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་ཞོ་ལྡུད་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེད་གྲོགས་ཀྱི་མ་མ་གཉིས་ལ་གཏད་དེ། དེ་མ་མ་བརྒྱད་ཀྱིས་འོ་མ་དང་། ཞོ་དང་། མར་སར་དང་། མར་ཀར་དང་། མར་གྱི་ཉིང་ཁུ་དང་། གཞན་ཡང་ཡོ་བྱད་ཀྱི་ཁྱད་པར་གཙོ་བོ་གཙོ་བོ་དག་གིས་བསྐྱེད་བསྲིངས་ཏེ་རྫིང་གི་པདྨ་བཞིན་དུ་སྐྱེད་དྲག་པར་གྱུར་ཏོ། །

དེ་གང་གི་ཚེ་ཆེན་མོར་གྱུར་པ་དེའི་ཚེ་གཟུགས་དང། ལང་ཚོ་མཛེས་པ་དང་། གཡེར་བ་དང་། སྒྱུ་རྩལ་གྱི་ཡོན་ཏན་གྱི་ཁྱད་པར་དང་ལྡན་པས་ནགས་ཚལ་མེ་ཏོག་རྒྱས་པའི་ནང་ན་ནགས་ཚལ་གྱི་ལྷ་བཞིན་དུ་ཁྱིམ་དེ་ན་མཛེས་སོ། །དེའི་གཟུགས་དང་། ལང་ཚོ་དང་། ཁ་དོག་དང་། རྒྱུ་བ་དང་། གནས་པའི་ཁྱད་པར་གྱིས་འཇིག་རྟེན་པའི་ལམ་གྱིས་འདོད་ཆགས་དང་བྲལ་བའི་དྲང་སྲོང་དག་ཀྱང་སེམས་འཕྲོག་པར་བྱེད་ན་ཐོག་མ་མེད་པའི་དུས་ནས་ཉོན་མོངས་པ་ཀུན་ཏུ་སྤྱོད་པ་བསགས་པ་རིགས་དང་། གཟུགས་དང་། ལང་ཚོ་དང་། དབང་ཕྱུག་གི་དྲེགས་པས་རྒྱགས་པའི་མི་རྣམས་ལྟ་སྨོས་ཀྱང་ཅི་དགོས། ཁྱིམ་བདག་དེ་ཡང་ནང་མིའི་སྐྱེ་བོའི་འཁོར་དང་བཅས་ཏེ་དེ་སྲུང་བ་ལྷུར་ལེན་ཅིང་གཉིད་ཀྱང་མི་ལོག་གོ །

ཡུལ་ཀོ་ས་ལའི་རྒྱལ་པོ་གསལ་རྒྱལ་བཙུན་མོའི་འཁོར་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པ་དང་། གཞན་ཡང་འདབ་ཆགས་ན་གནས་པའི་རྒྱལ་པོ་དང་། བློན་པོའི་བུ་དང་། མདུན་ན་འདོན་གྱི་བུ་ལ་སོགས་པས་བསླང་བར་བསམས་ཀྱང་བུ་མོ་འོད་བཟང་མ་སྐྱེས་བུ་ལྔ་བརྒྱ་དང་ལྷན་ཅིག་དགའ་མགུར་སྤྱོད་པར་མཚན་མཁན་གྱིས་ལུང་བསྟན་པས་ན་འཇིག་རྟེན་གྱི་དཔྱས་སུ་དོགས་པའི་ཕྱིར་སུས་ཀྱང་མ་བསླངས་སོ། །དེ་ཡང་དེའི་ཁྱིམ་གྱི་སྐར་ཁུང་དྲ་བ་ཅན་དང་། སྐར་ཁུང་དང་། སྟེགས་བུ་དང་། ཁང་ཐོག་ཏུ་འདུག་ནས་སུ་སློང་སྙམ་ཞིང་སྐྱེས་པ་དག་ལ་ལྟ་བར་བྱེད་དོ། །ཁྱིམ་བདག་དེས་དེའི་སྤྱོད་པ་མཐོང་ནས་རང་གི་རིགས་རྒྱུད་དང་མཐུན་པ་གཞན་དག་ལ་མི་སློང་ཡང་དེ་བཞིན་དུ་སྦྱིན་པར་བརྩམས་ན་འགའ་ཡང་ལེན་དུ་མ་བཏུབ་བོ། །

དེ་ནས་ཁྱིམ་བདག་དེ་དེ་སུ་ཡང་མ་འདོད་པས་ཡིད་མི་བདེ་བ་སྐྱེས་ཏེ་བྱ་བ་ཐམས་ཅད་ཀྱི་བློ་བཏང་ནས་དེ་སྦྱིན་པའི་ཐབས་སེམས་པས་ལུས་སྐྱ་བོ་བསེང་བསེང་པོ་ཤ་བྲི་ངན་པ་རྐེ་བ་ཤིག་ཤིག་པོ་ཞིག་ཏུ་གྱུར་ཏོ། །དེའི་ཚེ་མཉན་ཡོད་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཀྱང་དེ་རང་གི་ལས་ཀྱིས་ཤི་བར་གྱུར་ཏོ། །དེ་བཞིན་དུ་གཉིས་པ་དང་། གསུམ་པ་ནས་བདུན་པའི་བར་བླངས་ཀྱང་དེ་ཡང་རང་གི་ལས་ཀྱིས་ཤི་བར་གྱུར་ཏོ། །

དེ་དག་གིས་ཀྱང་ཚེ་ཐུང་བར་འགྱུར་བའི་ལས་བྱས་ལ་དེས་ཀྱང་དཔྱ་བར་འགྱུར་བའི་ལས་བྱས་པས་དེའི་མིང་ཆུང་མ་གསོད་པ་ཆུང་མ་གསོད་པ་ཞེས་བྱ་བར་ཆགས་སོ། །དེས་གཞན་དུ་བསླངས་པ་དང་། དེ་དག་གིས་སྨྲས་པ། ངེད་ཀྱི་བུ་མོ་ཅི་སྟེ་གསད་ཅེས་ཟེར་རོ། །དེས་ཡུགས་ས་མོ་དག་ཀྱང་བསླང་བར་བརྩམས་པ་དང་། དེ་དག་ཀྱང་ངེད་ཀྱི་ལུས་ཅིའི་ཕྱིར་དོར་ཞེས་ཟེར་ནས་དེ་ལ་ཐམས་ཅད་ཀྱིས་ཀྱང་མ་སྟེར་བ་དང་། ཆུང་མ་མེད་ཀྱང་བླ་ཞེས་ཆུང་མ་འདོད་པའི་རེ་ཐག་བཅད་ནས་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་རྣམས་དང་ལྷན་ཅིག་བསྟེན་པར་བརྩམས་སོ། །དེའི་ཕ་སངས་རྒྱས་པའི་དགེ་བསྙེན་ཞིག་པས་དེས་བསམས་པ། བདག་གི་ཕ་སངས་རྒྱས་པའི་དགེ་བསྙེན་ཡིན་ན། བདག་ལ་དགེ་སྦྱོང་དང་། བྲམ་ཟེ་དང་། སྤྱོད་པ་པ་དང་། ཀུན་ཏུ་རྒྱུ་བ་རྣམས་ཀྱིས་ཅི་ཞིག་བྱ། བཅོམ་ལྡན་འདས་ཀྱི་ཉན་ཐོས་པ་རྣམས་ལ་བསྙེན་བཀུར་བྱ་ཞིང་དེ་དག་ལ་བྱ་བ་བྱས་ནས་དེ་ཉིད་དུ་རབ་ཏུ་འབྱུང་ངོ་སྙམ་ནས་དེ་ཡང་དང་ཡང་དུ་རྒྱལ་བྱེད་ཀྱི་ཚལ་དུ་འགྲོ་བར་གྱུར་ཏོ། །

ཇི་ཙམ་དུས་གཞན་ཞིག་ན་མཛའ་བོ་ཞིག་གིས་མཐོང་ནས། དེས་སྨྲས་པ། གྲོགས་པོ་ཁྱོད་རྒྱལ་བྱེད་ཀྱི་ཚལ་དུ་ཡང་དང་ཡང་དུ་འགྲོ་ན་རབ་ཏུ་འབྱུང་བར་མི་རྩོལ་གྲང་། གྲོགས་པོ་བདག་རབ་ཏུ་བྱུང་ཟིན་ན་ཡང་རབ་ཏུ་འབྱུང་ཅི་དགོས། བདག་གིས་ཆུང་མ་གཅིག་བླངས་ཀྱང་རང་གི་ལས་ཀྱིས་ཤི་བར་གྱུར། དེ་བཞིན་དུ་གཉིས་པ་དང་། གསུམ་པ་ནས་བདུན་པའི་བར་ཡང་རང་གི་ལས་ཀྱིས་ཤི་བར་གྱུར་ཏེ།

དེ་དག་གིས་ཀྱང་ཚེ་ཐུང་བར་འགྱུར་བའི་ལས་བྱས། ཁོ་བོས་ཀྱང་དཔྱ་བར་འགྱུར་བའི་ལས་བྱས་པས་ཁོ་བོའི་མིང་ཆུང་མ་གསོད་པ་ཆུང་མ་གསོད་པ་ཞེས་བྱ་བར་ཆགས་ནས་བདག་ཡི་ཆད་དོ་དགེ་སློང་དག་ལ་ངེས་པར་བསྙེན་བཀུར་བྱ་བ་ནི་བདག་གི་ཕའི་ལུགས་ཡིན་ཏེ་འདི་མི་བྱ་ན་གཞན་སུ་ལ་བསྙེན་བཀུར་བྱ། དེས་སྨྲས་པ། གྲོགས་པོ་དེ་ཡང་བདེན་ན་འོན་ཀྱང་གདོན་མི་ཟ་བར་བུ་བསྐྱེད་དགོས་ཏེ་གཞན་དུ་ན་རབས་འཆད་པར་འགྱུར་ན་ཅི་སྟེ་གཞན་གྱི་བུ་མོ་སློང་བར་མི་བྱེད། དེས་སྨྲས་པ། གྲོགས་པོ་ཅི་ཕན་གང་ལ་བསླངས་པ་དེ་ངེད་ཀྱི་བུ་མོ་ཅི་སྟེ་གསད་ཅེས་ཟེར་རོ། །དེས་སྨྲས་པ། གྲོགས་པོ་གལ་ཏེ་དེ་ལྟ་ན་ཡུགས་ས་མོ་དག་བསླང་ན་ཅི་ཉེས། དེས་སྨྲས་པ། གྲོགས་པོ་བདག་གིས་བསླང་ན་དེ་དག་ཀྱང་ངའི་ལུས་ཅིའི་ཕྱིར་ཡོངས་སུ་དོར་ཞེས་ཟེར་རོ། །དེས་སྨྲས་པ། གྲོགས་པོ་གལ་ཏེ་དེ་ལྟ་ན་འོད་བཟང་མ་ཅིའི་ཕྱིར་མི་བསླང་། དེས་སྨྲས་པ། གྲོགས་པོ་འཇིག་རྟེན་ཀུན་ཏུ་གྲགས་པ་དེས་ཇི་སྨད་འཚོང་མའི་ཁྱིམ་དུ་བྱའམ། དེས་སྨྲས་པ། གྲོགས་པོ་ཁྱོད་དད་པ་ཅན་ཡིན་པས་ཁྱོད་ཀྱིས་ཁྱིམ་དུ་དགེ་སློང་ལས་སུ་ཞིག་འོང་སློངས་ཤིག །དེས་སྨྲས་པ། གྲོགས་པོ་གལ་ཏེ་དེ་ཡང་མི་སྟེར་མོད། གྲོགས་པོ་སློངས་ཤིག་དང་། དེའི་ཕ་ཡང་སྐྱོ་ཞིང་འདུག་པས་སྟེར་བར་འགྱུར་རོ། །

དེ་ཁྱིམ་བདག་དེའི་ཁྱིམ་དུ་སོང་སྟེ་དེས་སྨྲས་པ། བདེ་ལེགས་སུ་གྱུར་ཅིག །བདེ་ལེགས་སུ་གྱུར་ཅིག །ཁྱིམ་བདག་དེས་སྨྲས་པ། ཅི་ཞིག་འདོད། འོད་བཟང་མའོ། །སྦྱིན་ནོ། །དེས་དེ་དཔལ་གྱི་འབྱོར་པ་ཆེན་པོས་བག་མར་བླངས་ཏེ་ལྡེ་མིག་དང་། ལྡེ་མིག་ཀྱོག་པོ་དག་བྱིན་ནས་ཁྱིམ་གྱི་བདག་མོར་བཅུག་སྟེ་སྨྲས་པ། བཟང་མོ་ཁོ་བོ་ཅག་གི་རིགས་ཀྱི་ལུགས་ཀྱིས་ནི་སྟོན་པ་སངས་རྒྱས་དང་། དགེ་སློང་དག་སྦྱིན་གནས་ཡིན་པས་ཁྱོད་ཀྱིས་ཀྱང་དེ་དག་ལ་བྱ་བ་བྱོས་ཤིག །

དེས་སྨྲས་པ། ཇོ་བོ་ལེགས་ཀྱིས་དེ་བཞིན་དུ་བགྱིའོ། །ཁྱིམ་བདག་དེའི་ཁྱིམ་དུ་དགེ་སློང་དག་ཉིན་གཅིག་བཞིན་དུ་ཟན་ཟ་བ་ལ་འོད་བཟང་མ་རང་གིས་ལག་དར་ཏེ་འབྲིམ་མོ། །དེ་ན་དགེ་སློང་གང་དག་ཁ་དོག་དང་། དབྱིབས་དང་། ལང་ཚོའི་ཁྱད་པར་ཕུན་སུམ་ཚོགས་པ་དེ་དག་དེས་མཐོང་ནས་རྣམ་པར་རྟོག་པ་སྐྱེས་པར་གྱུར་ཏོ། །དེ་དེ་དག་ལ་རྟོག་པ་འཕེལ་བས་ཡིད་བདེ་བ་སྐྱེས་པར་གྱུར་ཏོ། །ཁྱིམ་བདག་དེ་ཡང་རི་འོར་ཞིག་ཏུ་དོན་ཞིག་ཡོད་ནས་དེས་བཟང་མོ་ཁོ་བོ་ནི་རི་འོར་ཆེ་གེ་མོ་ཞིག་ཏུ་དོན་ཞིག་ཡོད་དེ། བདག་དེར་འགྲོས་ཁྱོད་ཀྱིས་ཡོན་གནས་དག་དེ་བཞིན་དུ་བཤོས་གསོལ་ཅིག་ཅེས་བསྒོ་བ་དང་། དེས་སྨྲས་པ། རྗེའི་སྲས་ལེགས་ཀྱིས་དེ་བཞིན་དུ་བགྱིས་བཞུད་ཅིག །དེས་དགེ་སློང་རྣམས་ལ་ཡང་འཕགས་པ་བདག་ནི་རི་འོར་ཆེ་གེ་མོ་ཞིག་ཏུ་བགྱི་བ་ཞིག་བྱུང་ནས་བདག་དེར་མཆིའི་ཁྱེད་ཅག་དེ་བཞིན་དུ་བདག་གི་སྡུམ་པར་བཤོས་གསོལ་ཅིག་ཅེས་སྨྲས་པ་དང་། དེ་དག་གིས་སྨྲས་པ། ཁྱིམ་བདག་སོང་ཞིག་ནད་མེད་པར་གྱུར་ཅིག །ཟན་བཟའ་བར་བྱའོ་ཞེས་བྱས་པ་དང་། དེ་ཡང་རི་འོར་གྱི་གྲོང་དུ་སོང་ངོ་། །

དགེ་སློང་དག་ཀྱང་དེ་བཞིན་དུ་དེའི་ཁྱིམ་དུ་ཟན་བཟའ་བར་བརྩམ་པ་དང་། འོད་བཟང་མ་བདག་གི་ཁྱོ་མེད་དོ་སྙམ་ནས། བུད་མེད་ཀྱི་གཡོ་དང་། བུད་མེད་ཀྱི་སྒྱུ་དང་། བུད་མེད་ཀྱི་ཚུལ་འཆོས་པ་གང་དག་ཡིན་པ་དེ་དག་དགེ་སློང་རྣམས་ལ་སྟོན་པར་རྩོམ་པ་དང་། དགེ་སློང་རྣམས་ཀྱིས་གཅིག་ལ་གཅིག་ཉེས་དམིགས་བྱུང་ན། འདི་ལ་ཇི་ལྟར་བསྒྲུབ་པར་བྱ་ཞེས་བགྲོས་པ་དང་། དེ་ན་ཁ་ཅིག་གིས་སྨྲས་པ། འདི་ལ་བསྒྲུབ་ཏུ་ཅི་ཡོད། སང་ནས་མི་འོང་དུ་ཟད་མོད། གཞན་དག་གིས་སྨྲས་པ། ཚེ་དང་ལྡན་པ་བདག་ཅག་ནི་བསོད་སྙོམས་པ་ཡིན་པས་སང་ནས་བསོད་སྙོམས་ལ་འདོང་དུ་ཟད་མོད། གཞན་དག་གིས་ཀྱེ་ལེགས་ཀྱིས་དེ་བཞིན་དུ་བྱའོ་ཞེས་སྨྲས་ནས། དེ་དག་ཕྱི་དེ་ཉིན་ནས་བསོད་སྙོམས་ལ་ཞུགས་སོ། །

ཇི་ཙམ་དུས་གཞན་ཞིག་ན་ཁྱིམ་བདག་དེ་སླར་འོངས་ནས་འོད་བཟང་མ་ལ་དྲིས་པ། འོད་བཟང་མ་ཡོན་གནས་དག་བཤོས་གསོལ་ཏམ། དེས་སྨྲས་པ། ཉིན་གཅིག་བྱོན་ནས་དེ་ཕན་ཆད་ཡེ་མ་བྱོན་ཏོ། །དེས་བསམས་པ། ངེས་པར་འདིས་དེ་དག་གི་མདུན་དུ་བུད་མེད་ཀྱི་གཡོ་དག་བསྟན་ཏེ་བཀུར་སྟི་མ་བྱས་པས་འཛེམ་ནས་དེ་དག་མ་འོངས་སོ་སྙམ་སྟེ། དེས་དེ་དག་གི་དྲུང་དུ་སོང་ནས་ཡང་སྤྱན་དྲངས་པ་དང་། དེ་དག་གིས་སྨྲས་པ། ཁྱིམ་བདག་བདག་ཅག་ནི་བསོད་སྙོམས་པ་ཡིན་པས་བསོད་སྙོམས་ལ་རྒྱུའོ། །

དེས་སྨྲས་པ། འཕགས་པ་བདག་གིས་འཚལ་གྱིས་གཤེགས་དང་དེ་ལྟ་བུའི་ཉེས་དམིགས་མི་མཆིའོ། །དེ་དག་གིས་ཁས་བླངས་པ་དང་། དེ་དག་གི་རྐང་པ་ལ་ཕྱག་འཚལ་ནས་སོང་ངོ་། །དགེ་སློང་དག་ཕྱི་དེ་ཉིན་དེའི་ཁྱིམ་དུ་འོངས་པ་དང་། ཁྱིམ་བདག་དེས་འོད་བཟང་མ་ཁྱིམ་དུ་བཅུག་ནས་ཕྱི་སྒོ་བཅད་དེ་བཞག་ནས་དེ་ནས་དེ་དག་ལ་རང་གིས་ལག་དར་ཏེ་འབྲིམ་བར་བརྩམས་པ་ན་འོད་བཟང་མ་ཁྱིམ་གྱི་ནང་ན་འདུག་བཞིན་དུ་དགེ་སློང་ཟན་ཟ་བ་དེ་དག་ལ་རྣམ་པར་རྟོག་པ་སྐྱེས་པར་གྱུར་ཏེ་འཕགས་པ་ཆེ་གེ་མོ་ཞིག་གི་རྐང་པ་ནི་འདི་འདྲ། བྱིན་པ་ནི་འདི་འདྲ། བརླ་ནི་འདི་འདྲ། རྐེད་པ་དང་། རྩིབ་ལོགས་དང་། རྒྱབ་དང་། ལྟོ་དང་། བཞིན་དང་། སོ་དང་། མཆུ་དང་། སྣ་དང་། མིག་དང་། དཔྲལ་བ་དང་། མགོ་ནི་འདི་འདྲའོ་ཞེས་དེ་དེ་ལྟར་རྣམ་པར་རྟོག་པ་ན་ས་བཅུ་པའི་འདོད་ཆགས་ཀྱི་མེ་བྱུང་བར་གྱུར་པ་རྣམ་པར་རྟོག་པའི་རླུང་གི་ཤུགས་བདོ་བ་དེས་སྤར་བས་རྟུལ་ཏེ་དེ་ཉིད་དུ་འཆི་བའི་དུས་བྱས་སོ། །

དགེ་སློང་དག་ཟན་ཟོས་ཏེ་ཡོན་བཤད་པ་བྱས་ནས་དོང་བ་དང་། ཁྱིམ་བདག་དེས་སྒོ་ཕྱེ་ནས་སྨྲས་པ། འོད་བཟང་མ་ཚུར་ཤོག་ཟན་ཟོ་ཞེས་བྱས་ན་དེ་དུས་ལས་འདས་པས་སུ་ཞིག་ལན་འདེབས། དེས་ནང་དུ་ཞུགས་ན་ཅི་ཙམ་ན་ས་ལ་འགྱེལ་བ་མཐོང་ངོ་། །དེས་བསམས་པ་གདོན་མི་ཟ་བར་འདི་གཉིད་ཀྱིས་ལོག་གིས་བསླང་ངོ་སྙམ་ནས་དེས་དེ་བསྒུལ་བར་བརྩམ་པ་དང་། རེ་ཞིག་ན་དུས་ལས་འདས་པར་མཐོང་ནས་དེ་ངོམ་ཟུང་གནག་ཅིང་སྨ་བབ་ནས་ནང་མི་དག་ལ་སྨྲས་པ། ཤེས་ལྡན་དག་བདག་ལྟ་བྱུར་ངན་པ་ཆུང་མ་རིན་པོ་ཆེ་འདི་ལྟ་བུ་དང་བྲལ་བར་གྱུར་གྱིས་མཛའ་གྲོགས་དང་། ཕུ་ནུ་དང་། གཉེན་དག་ལ་འོད་བཟང་མ་དུས་ལས་འདས་སོ་ཞེས་སྦྲོན་ཅིག་ཅེས་བྱས་པ་དང་། དེ་དག་གིས་ཀུ་ཅོ་བཏོན་ཏེ། ཁ་ཅིག་ནི་ས་ལ་སྒྱེལ་ནས་ངུ་ཞིང་འདུག །ཁ་ཅིག་ནི་ཁྱིམ་བདག་ངུ་བའི་ལག་པ་དང་། རྐང་པ་ནས་འཛིན་པར་བྱེད། མཛའ་བཤེས་དང་། ཕུ་ནུ་དང་། གཉེན་ཁ་ཅིག་ནི་ངུད་མོའི་སྒྲ་འབྱིན་པར་བྱེད་དོ། །

ཁྱིམ་བདག་དེ་རང་གི་སྐྱེ་བོ་དང་བཤེས་ཀྱི་འཁོར་རྒྱ་ཆེ་བ་ཞིག་པས་དེ་རྣམས་ཇི་སྲིད་དུ་ངུ་བ་དེའི་བར་དུ་ཉི་མ་ནུབ་ནས་དེ་དག་གོས་སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གིས་ཁྱོགས་བརྒྱན་ཏེ། བཀུར་སྟི་ཆེན་པོས་དེ་དུར་ཁྲོད་དུ་ཁྱེར་རོ། །རེ་ཞིག་ཅིག་ན་མི་རྒོད་ལྔ་བརྒྱ་ཙམ་ཞིག་རི་འོར་ཞིག་ཏུ་སོང་ནས་རྙེད་པ་དང་ཁེ་ཕྱིན་ནས་དུར་ཁྲོད་དེ་དང་ཧ་ཅང་མི་རིང་བར་འོངས་པ་གྲོང་ཁྱེར་ན་གནས་པའི་མི་ཞིག་གིས་མཐོང་ནས་དེས་བསམས་པ། སྐྱེ་བོའི་ཚོགས་ཆེན་པོ་གྲོང་ཁྱེར་ནས་བྱུང་སྟེ་འོད་བཟང་མ་སྐྱེལ་བར་དུར་ཁྲོད་དུ་སོང་བ་རྣམས་མི་རྒོད་དེ་དག་གིས་ཚུལ་མ་ཡིན་པར་གནོད་པ་བྱས་ན་མི་རུང་གིས་སྦྲན་ཏོ་སྙམ་ནས་དེ་མགྱོགས་པར་སོང་སྟེ། སྐྱེ་བོའི་ཚོགས་ཆེན་པོ་དེ་དག་ལ་ཤེས་ལྡན་དག་མི་རྒོད་ལྔ་བརྒྱ་ཙམ་ཧ་ཅང་མི་རིང་བ་ཞིག་ན་འདུག་གིས་བྲོས་ཤིག་ཅེས་སྦྲན་པ་དང་། དེ་དག་གིས་ཀྱང་སང་རིམ་གྲོ་བྱའོ་ཞེས་སྲུང་མ་གཞག་སྟེ། འོད་བཟང་མ་ཇི་ལྟར་རྒྱན་སྣ་ཚོགས་ཀྱིས་བཀླུབས་པ་དང་། དྲི་དང་། བདུག་པ་དང་། གོས་དང་། ཕྱེ་མ་དང་། གདུགས་དང་། རྒྱལ་མཚན་དང་། བ་དན་དག་གིས་མཛེས་པར་བྱས་ཏེ་ཕྱུང་ནས་བསྙལ་བ་བཞིན་དུ་བོར་ཏེ་འབྲོས་བསླང་ནས་གྲོང་ཁྱེར་དུ་ཞུགས་སོ། །ཅི་ཙམ་ན་མི་རྒོད་དེ་དག་ཕྱོགས་དེར་ཕྱིན་པ་དང་། སྲུང་མ་རྣམས་བྲོས་སོ། །མི་རྒོད་རྣམས་ཀྱིས་རབ་ཏུ་བརྒྱན་པ་དེ་མཐོང་ནས་མཆོག་ཏུ་ངོ་མཚར་སྐྱེས་སོ། །

དེ་ནས་འོད་བཟང་མའི་གོས་རྣམས་བཤུས་ནས་བལྟས་པ་དང་། དེ་དག་གིས་དེའི་གཟུགས་གཞོན་ལ་མཛེས་པ་མཐོང་ནས་རབ་ཏུ་ཆགས་ཏེ་ཤེས་ལྡན་དག་གར་བསྐོར་ཀྱང་བུད་མེད་འདི་ལྟ་བུ་དང་ལྷན་ཅིག་དགའ་མགུར་སྤྱད་པར་ཟད་དོ་ཞེས་སྨྲས་ནས་དེ་དག་གིས་དེ་དང་ལྷན་ཅིག་དགའ་མགུར་སྤྱད་དེ་ཀཱར་ཥཱ་པ་ཎ་ལྔ་བརྒྱ་བཞག་པ་དང་། འོད་བཟང་མའི་རོ་ལ་ཡང་སྐྱེས་བུ་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་བྱིན་ཏེ་དགའ་མགུར་སྤྱོད་དོ་ཞེས་ཀུན་ཏུ་སྒྲ་གྲགས་སོ། །

དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་གི་མཆིས་འབྲང་འོད་བཟང་མས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་འོད་དང་ལྡན་པར་གྱུར་ཅིང་བཙས་མ་ཐག་ཏུ་ཁྱིམ་ཐམས་ཅད་འོད་ཀྱིས་སྣང་བར་བགྱིས་པ་དང་། གུམ་ནས་ཀྱང་མི་རྒོད་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་སྩལ་ནས་དགའ་མགུར་སྤྱད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱིམ་བདག་གི་ཆུང་མ་འོད་བཟང་མ་ཉིད་ཀྱིས་ལས་བྱས་ཤིང་བསགས་པ། ཚོགས་རྙེད་པ། རྐྱེན་ཡོངས་སུ་བསྒྱུར་བ། དབའ་རྒལ་བཞིན་དུ་ཉེ་བར་གནས་པ་ངེས་པར་གྱུར་པ་ཡིན་ཏེ། འོད་བཟང་མས་ལས་བྱས་ཤིང་བསགས་པ་དག་གཞན་སུ་ཞིག་གིས་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་རྣམས་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་དགེ་བ་དང་མི་དགེ་བའི་ལས་བྱས་ཤིང་བསགས་པ་རྣམས་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་འོད་སྲུང་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། བཱ་རཱ་ཎ་སཱིའི་གྲོང་ཁྱེར་ན་ཉེ་བར་རྟེན་ཅིང་དྲང་སྲོང་སྨྲ་བ་རི་དྭགས་ཀྱི་ནགས་ན་བཞུགས་སོ། །

དེའི་ཚེ་དེའི་དུས་ན་བཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཀྲྀ་ཀཱི་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། རྒྱལ་སྲིད་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་བ་དང་། འཐབ་པ་དང་། རྩོད་པ་དང་། ནང་འཁྲུག་དང་། འཁྲུག་སློང་རབ་ཏུ་ཞི་བ། ནད་མེད་པ། སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ་ཆོས་ཀྱི་རྒྱལ་པོས་ཆོས་བཞིན་བྱེད་དུ་འཇུག་གོ །ཇི་ཙམ་ན་ཡང་དག་པར་རྫོགས་པའི་སངས་རྒྱས་འོད་སྲུང་སངས་རྒྱས་ཀྱི་མཛད་པ་མཐའ་དག་མཛད་ནས་བུད་ཤིང་ཟད་པའི་མེ་བཞིན་དུ་ཕུང་པོ་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདས་པ་དང་། རྒྱལ་པོ་ཀྲྀ་ཀཱི་བཙུན་མོ་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པས་དེའི་སྐུ་གདུང་ལ་བཀུར་སྟི་ཆེན་པོས་སྐུ་གདུང་གི་མཆོད་པ་བྱས་ནས་རིན་པོ་ཆེ་སྣ་བཞིའི་མཆོད་རྟེན་ཁོ་ར་ཁོར་ཡུག་ཏུ་དཔག་ཚད་གཅིག་པ་ཕང་དུ་དཔག་ཚད་ཕྱེད་པ་གཅིག་བརྩིགས་སོ། །

དེ་ན་ཚོང་དཔོན་གྱི་བུ་མོ་ཞིག་དད་པ་སྐྱེས་ནས་སྲོག་ཤིང་ལ་མེ་ལོང་ཞིག་བཏགས་སོ། །དགེ་སློང་དག་ཇི་སྙམ་དུ་སེམས། ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་ལ་དད་པ་སྐྱེས་ནས་སྲོག་ཤིང་ལ་མེ་ལོང་བཏགས་པ་གང་ཡིན་པའི་ཚོང་དཔོན་གྱི་བུ་མོ་དེ་ནི་ཁྱིམ་བདག་གི་ཆུང་མ་འོད་བཟང་མ་འདི་ཉིད་ཡིན་ཏེ། དེའི་ཚེ་དེའི་དུས་ན་གང་འདིས་ཡང་དག་པར་རྫོགས་པའི་སངས་རྒྱས་འོད་སྲུང་གི་མཆོད་རྟེན་གྱི་སྲོག་ཤིང་ལ་མེ་ལོང་བཏགས་པ་དེའི་ལས་ཀྱི་རྣམ་པར་སྨིན་པས་འོད་དང་ལྡན་བཞིན་དུ་སྐྱེས་ལ་སྐྱེས་མ་ཐག་ཏུ་ཡང་ཁྱིམ་ཐམས་ཅད་འོད་ཀྱིས་སྣང་བར་གྱུར་པ་ཡིན་ནོ། །

གང་ཡང་ཤི་ནས་སྐྱེས་བུ་ལྔ་བརྒྱས་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་པ་དེ་ཡང་ཉོན་ཅིག །དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ཁྱེར་ན་རྒྱལ་པོ་ཚངས་བྱིན་ཞེས་བྱ་བ་རྒྱལ་སྲིད་བྱེད་དུ་འཇུག་སྟེ། རྒྱལ་སྲིད་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ། འཐབ་མོ་དང་། རྩོད་པ་དང་། ནང་འཁྲུག་དང་། འཁྲུག་སློང་རབ་ཏུ་ཞི་བ། ཆོམ་རྐུན་དང་། ནད་དང་བྲལ་བ་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་ཕུན་སུམ་ཚོགས་པ། ཆོས་ཀྱི་རྒྱལ་པོས་ཆོས་བཞིན་བྱེད་དུ་འཇུག་གོ །

དེའི་ཚེ་དེའི་དུས་ན་བཱ་རཱ་ཎ་སཱི་ན་གཟུགས་ཀྱིས་འཚོ་བ་བཟང་མོ་ཞེས་བྱ་བ་གཟུགས་བཟང་བ། མཛེས་པ། ལྟ་ན་སྡུག་པ། སྐྱེས་པའི་ཡིད་དུ་འོང་བ། སྔོན་རྒྱལ་པོ་ཚངས་བྱིན་གྱི་ཞང་པོས་ཡོངས་སུ་སྤྱད་པ་ཞིག་འདུག་གོ །རེ་ཞིག་དུས་གཞན་ཞིག་ན་དགེ་འདུན་པ་ལྔ་བརྒྱ་བཟའ་བ་དང་བཅའ་བ་མང་པོ་དག་སྦྱར་ཏེ་སྐྱེད་མོས་ཚལ་དུ་དོང་ནས་ཕན་ཚུན་ཤེས་ལྡན་དག་བདག་ཅག་གིས་སྐྱེད་མོས་ཚལ་གྱི་ལོངས་སྤྱོད་ཐམས་ཅད་ནི་བཤམས་ན་བུད་མེད་མེད་ཀྱིས་དོང་ལ་སྨད་འཚོང་འགའ་ཞིག་དགུག་གོ་ཞེས་སྨྲས་པ་དང་། ལེགས་ཀྱིས་དེ་བཞིན་དུ་བྱ་ན་སུ་ཞིག་དགུག །བཟང་མོའོ། །དེ་དག་བཟང་མོའི་དྲུང་དུ་སོང་སྟེ་བཟང་མོ་ཚུར་ཤོག །སྐྱེད་མོས་ཚལ་དུ་འདོང་ངོ་། །དེས་སྨྲས་པ། གལ་ཏེ་ཀཱར་ཥཱ་པ་ཎ་སྟོང་བྱིན་ན་འགྲོའི་གཞན་དུ་ནི་མ་ཡིན་ནོ། །

དེ་དག་གིས་སྨྲས་པ། ཀཱར་ཥཱ་པ་ཎ་ལྔ་བརྒྱ་ཇེ་ཁྱེར་ཅིག །ལྔ་བརྒྱ་ནི་དགའ་མགུར་སྤྱད་ནས་སྦྱིན་ནོ། །དེས་སྨྲས་པ། ལེགས་ཀྱིས་དེ་བཞིན་དུ་བྱས་བྱིན་ཅིག །དེ་དག་གིས་ཀཱར་ཥཱ་པ་ཎ་ལྔ་བརྒྱ་བྱིན་ནས། དེས་སྨྲས་པ། དེངས་ཤིག་དྲི་དང་། ཕྲེང་བ་དང་། གོས་དག་བགོས་ལ་འོང་ངོ་ཞེས་བྱས་པ་དང་། དེ་དག་དོང་ངོ་། །དེ་འགྱོད་པ་སྐྱེས་ནས་གལ་ཏེ་བདག་དགེ་འདུན་པ་ལྔ་བརྒྱ་དང་ལྷན་ཅིག་དགའ་མགུར་སྤྱད་ན་བདག་གི་གནས་སྐབས་ཅི་འདྲ་བར་འགྱུར། བདག་གིས་ཀཱར་ཥཱ་པ་ཎ་ལྔ་བརྒྱ་ཞིག་ཀྱང་བླངས་ན་ད་ཇི་ལྟར་བྱ་སྙམ་པ་ལས། དེས་བདག་རྒྱལ་པོའི་ཞང་པོས་ཡོངས་སུ་སྤྱད་པས་དེ་ཁོ་ན་ལ་སྐྱབས་འཚལ་གྱི་གཞན་དུ་ནི་མ་ཡིན་ནོ་སྙམ་པའི་བློ་སྐྱེས་ནས་དེས་དེའི་གན་དུ་བྲན་མོ་མངག་གཞུག་མ་མངགས་ཏེ། བུ་མོ་རྒྱལ་པོའི་ཞང་པོའི་དྲུང་དུ་སོང་ལ། སོང་ནས་འདི་སྐད་ཅེས་བདག་ངན་ཏེ་དགེ་འདུན་པ་ལས་ཀཱར་ཥཱ་པ་ཎ་ལྔ་བརྒྱ་བླངས་ན་དགེ་འདུན་པ་དེ་དག་ལྔ་བརྒྱ་ཡོད་དེ། ཇི་སྟེ་བདག་དགེ་འདུན་པ་ལྔ་བརྒྱ་དང་ལྷན་ཅིག་དགའ་མགུར་སྤྱད་པར་གྱུར་ན་བདག་གི་གནས་སྐབས་ཅི་འདྲ་བར་འགྱུར། ཁྱོད་ཀྱིས་སྔོན་བདག་ཡོངས་སུ་བཟུང་བས་དེའི་སླད་དུ་ཁྱོད་ཀྱིས་བདག་དེ་དག་ལས་ཡོངས་སུ་བསྐྱབ་པའི་རིགས་ཞེས་སྨོས་ཤིག །བུ་མོ་དེས་དེའི་དྲུང་དུ་སོང་སྟེ་སྨྲས་པ་དང་། དེ་ཡང་རྒྱལ་པོ་ལ་རྟེན་པ་ཡིན་པས་དེ་དག་ལས་དེ་ཕྲོགས་སོ། །སངས་རྒྱས་རྣམས་འབྱུང་བ་མེད་པ་ན་རང་སངས་རྒྱས་དམན་པ་དང་། ཕོངས་པ་ལ་ཐུགས་བརྩེ་བ། བས་མཐའི་གནས་མལ་ལ་དགའ་བ་འཇིག་རྟེན་གྱི་སྦྱིན་གནས་གཅིག་པུར་གྱུར་པ་དག་འཇིག་རྟེན་དུ་བྱུང་ངོ་། །

དེ་ནས་རང་སངས་རྒྱས་ཤིག་ལྗོངས་རྒྱུ་ཞིང་བཱ་རཱ་ཎ་སཱིར་ཕྱིན་ཏེ། བདག་ཉིད་ཆེན་པོ་ཞི་བའི་བདག་ཉིད་ཅན་རབ་ཏུ་དབེན་པར་གནས་པ་དེ་རབ་ཏུ་དབེན་པར་གནས་ཚོལ་ཞིང་སྐྱེད་མོས་ཚལ་དེར་ཕྱིན་པ་དང་། དགེ་འདུན་པ་དེ་དག་གིས་ལུས་མཛེས་པ་དང་། སེམས་མཛེས་པ་མཐོང་ནས་དེ་དག་གིས་བསམས་པ། གར་བསྐོར་ཀྱང་ཡོན་གནས་ཀྱི་ཞིང་འདི་ལྟ་བུ་ལ་བྱ་བ་བྱ་དགོས་སོ་སྙམ་ནས་དེ་དག་གིས་གཅིག་ལ་གཅིག་དྲིས་ཏེ། དེ་ལ་གཙང་ཞིང་བསོད་པའི་བཟའ་བ་དང་བཅའ་བ་དག་གིས་ལྷུང་བཟེད་བཀང་སྟེ་ཕུལ་ལོ། །བདག་ཉིད་ཆེན་པོ་དེ་དག་ནི་ངག་གིས་ཆོས་མི་སྟོན་གྱི་ལུས་ཀྱིས་ཆོས་སྟོན་པ་ཡིན་པས་སྟེང་གི་ནམ་མཁའ་ལ་མངོན་པར་འཕགས་ཏེ་འབར་བ་དང་། གསལ་བ་དང་། ཆར་འབབ་པ་དང་། གློག་འགྱུ་བ་ལ་སོགས་པའི་ཆོ་འཕྲུལ་བྱ་བར་བརྩམས་པ་དང་། སོ་སོའི་སྐྱེ་བོ་ནི་རྫུ་འཕྲུལ་གྱིས་དད་པར་འགྱུར་བས་ཤིང་རྩ་བ་ནས་བཅད་པ་བཞིན་དུ་ཞབས་ལ་གཏུགས་ནས་གང་བདག་ཅག་གིས་ཡང་དག་པའི་སྦྱིན་གནས་འདི་ལྟ་བུ་ལ་བྱ་བ་བྱས་པའི་དགེ་བའི་རྩ་བ་འདིས་བདག་ཅག་གཟུགས་ཀྱིས་འཚོ་བ་ལ་ཐ་ན་ཤི་ན་ཡང་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་མགུར་སྤྱོད་པར་ཤོག་ཤིག་ཅེས་སྨོན་ལམ་བཏབ་བོ། །

དགེ་སློང་དག་ཇི་སྙམ་དུ་སེམས། གཟུགས་ཀྱིས་འཚོ་བ་བཟང་མོ་ཞེས་བྱ་བ་གང་ཡིན་པ་དེ་ནི་ཁྱིམ་བདག་གི་ཆུང་མ་འོད་བཟང་མ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་དགེ་འདུན་པ་ལྔ་བརྒྱ་པོ་དེ་དག་ནི་མི་རྒོད་ལྔ་བརྒྱ་པོ་འདི་དག་ཉིད་ཡིན་ཏེ། དེའི་ཚེ་དེའི་དུས་ན་གང་འདི་དག་གིས་རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་བཏབ་པ་དེའི་ལས་ཀྱི་རྣམ་པར་སྨིན་པས་འདི་དག་གིས་འཁོར་བར་འཁོར་བ་ན་ཚེ་རབས་ལྔ་བརྒྱར་ཀཱར་ཥཱ་པ་ཎ་ལྔ་བརྒྱ་བྱིན་ཞིང་དགའ་མགུར་སྤྱད་དེ་ད་ལྟར་ཁྱིམ་བདག་གི་ཆུང་མར་གྱུར་པ་ལས་ཤི་བའི་བར་དུ་ཡང་ཀཱར་ཥཱ་པ་ཎ་ལྔ་བརྒྱ་བྱིན་ནས་དགའ་མགུར་སྤྱད་པ་ཡིན་ནོ། །

དེ་ལྟར་ན་དགེ་སློང་དག་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་གནག་པ་ཡིན། གཅིག་ཏུ་དཀར་བ་རྣམས་དང་། འདྲེན་མ་རྣམས་ཀྱི་ཡང་འདྲེན་མ་རྣམས་ཡིན་ནོ། །དེ་ལྟ་བས་ན་དགེ་སློང་དག་གཅིག་ཏུ་གནག་པའི་ལས་རྣམས་དང་། འདྲེན་མ་རྣམས་སྤངས་ཏེ་གཅིག་ཏུ་དཀར་བའི་ལས་ཁོ་ན་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཞེས་གསུངས་སོ།། །།

བྲམ་ཟེའི་བུ་མོ་ཞིག་བག་མར་འགྲོ་བའི་ལམ་བར་ནས་སངས་རྒྱས་ལ་བསོད་སྙོམས་ཕུལ་བས་འབྲས་བུ་ཤིང་ནྱ་གྲོ་དྷའི་དཔེ་ལ་བསྟེན་ནས་གསུངས་ཚུལ། འདུལ་བ་ལུང་གཞི་ལས་བཏུས།

སེར་སྐྱའི་གཞིའི་བྲམ་ཟེའི་བུ་མོ་ཞིག་ནྱ་གྲོ་དྷར་བག་མར་བཏང་བ་དང་། བྲམ་ཟེའི་བུ་མོས་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ། དཔེ་བྱད་བཟང་པོ་བརྒྱད་བཅུས་མཛེས་པ། སྐུ་འོད་འདོམ་གང་གིས་བརྒྱན་པ། འོད་ཟེར་ཉི་མ་སྟོང་བས་ལྷག་པ། གཤེགས་ན་རིན་པོ་ཆེའི་རི་བོ་འགྲོ་བ་ལྟར་ཀུན་ནས་བཟང་བ་མཐོང་ངོ་། །མཐོང་མ་ཐག་ཏུ་དེ་འདི་སྙམ་དུ་སེམས་ཏེ། བཅོམ་ལྡན་འདས་འདི་ནི་ཤཱཀྱའི་རིགས་དགའ་བ་ལས་འཁོར་ལོས་སྒྱུར་བའི་རིགས་ཀྱི་རྒྱལ་སྲིད་ཀྱང་སྤངས། བཙུན་མོ་མང་པོ་དང་། མཛོད་དང་། བང་མཛོད་ཀྱི་འབྱོར་པ་རྣམས་ཀྱང་སྤངས་ནས་རབ་ཏུ་བྱུང་བ་དེ་ཡིན་ཏེ། དེ་ད་ལྟར་བསོད་སྙོམས་ལ་རྒྱུས། གལ་ཏེ་བདག་ལས་བསོད་སྙོམས་ཀྱི་ཟན་བཞེས་ན་ནི་དེ་ལ་བདག་གིས་འབུལ་ལོ་སྙམ་མོ། །

དེ་ནས་བཅོམ་ལྡན་འདས་ཀྱི་ཐུགས་ཀྱིས་དེའི་སེམས་མཁྱེན་ནས་ལྷུང་བཟེད་བཟེད་དེ། སྲིང་མོ་གལ་ཏེ་ཁྱོད་ཀྱིས་ཡོངས་སུ་བཏང་ན་ལྷུང་བཟེད་འདིར་ཕུལ་ཅིག །དེ་ནས་དེ་ལྷག་པར་དད་པ་སྐྱེས་ཏེ། བཅོམ་ལྡན་འདས་ཀྱི་ཐུགས་ཀྱིས་བདག་གི་སེམས་མཁྱེན་ཏོ་སྙམ་དུ་རིག་ནས་དད་པ་དྲག་པོས་བཅོམ་ལྡན་འདས་ལ་བསོད་སྙོམས་ཀྱི་ཟན་ཕུལ་བ་དང་། དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ཞེས་བྱ་བ་ནས། མཛོད་སྤུར་ནུབ་པར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། རྒྱུ་མ་མཆིས་རྐྱེན་མ་མཆིས་པར་ནི་ཞེས་བྱ་བ་ནས། འཛུམ་པ་མཛད་ཅེས་བྱ་བའི་བར་གོང་མ་བཞིན་དུའོ། །ཀུན་དགའ་བོ་ཁྱོད་ཀྱིས་བྲམ་ཟེའི་བུ་མོ་གང་ཞིག་དད་པ་སྐྱེས་ནས་ང་ལ་བསོད་སྙོམས་ཀྱི་ཟན་ཕུལ་བ་དེ་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་བྲམ་ཟེའི་བུ་མོ་དེ་དགེ་བའི་རྩ་བ་འདིས་བསྐལ་པ་བཅུ་གསུམ་དུ་ལོག་པར་འགྲོ་བར་མི་འགྱུར་ཞིང་ལྷ་དང་མི་རྣམས་སུ་ཉིང་མཚམས་སྦྱར་ཅིང་འཁོར་ནས་སྲིད་པ་ཕྱི་མ་དང་། སྐྱེ་གནས་ཕྱི་མ་དང་། ལུས་ཕྱི་མ་དང་། བདག་གིས་ངོ་བོ་ཐོབ་པ་ཕྱི་མ་ལ་རང་སངས་རྒྱས་ཤིན་ཏུ་ལེགས་སྨོན་ཞེས་བྱ་བར་འགྱུར་རོ། །

ཀུན་ཏུ་བྲམ་ཟེའི་བུ་མོ་ཆེ་གེ་མོ་ཞིག་དད་པ་སྐྱེས་ནས་བཅོམ་ལྡན་འདས་ལ་བསོད་སྙོམས་ཟན་ཞིག་ཕུལ་བས། བཅོམ་ལྡན་འདས་ཀྱིས་དེ་རང་བྱང་ཆུབ་ཏུ་ལུང་བསྟན་ཏོ་ཞེས་སྒྲ་གྲགས་སོ། །དེའི་ཁྱོ་མེ་ཏོག་དང་ཡམ་སྲེག་ཤིང་གི་ཕྱིར་དགོན་པར་སོང་བ་དེས་བདག་གི་ཆུང་མས་དགེ་སྦྱོང་གཽ་ཏ་མ་ལ་བསོད་སྙོམས་ཟན་ཞིག་ཕུལ་བས། དགེ་སྦྱོང་གཽ་ཏ་མས་དེ་རང་བྱང་ཆུབ་ཏུ་ལུང་བསྟན་ཏོ་ཞེས་ཐོས་སོ། །ཐོས་ནས་ཀྱང་མི་བཟོད་པ་སྐྱེས་ཏེ། བཅོམ་ལྡན་འདས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏ་མ་བདག་གི་སྡུམ་པར་བྱོན་ཏམ། བྲམ་ཟེ་སོན་ཏོ། །ཤེས་ལྡན་གཽ་ཏ་མ་བདག་གི་མཆིས་འབྲང་གིས་བསོད་སྙོམས་བཤོས་ཤིག་ཕུལ་ནས་ཁྱོད་ཀྱིས་དེ་རང་བྱང་ཆུབ་ཏུ་ལུང་བསྟན་སྐད་ན་མད་དམ། བྲམ་ཟེ་བདེན་ནོ། །ཀྱེ་གཽ་ཏ་མ་ཁྱོད་འཁོར་ལོས་སྒྱུར་བའི་རྒྱལ་སྲིད་སྤངས་ནས་རབ་ཏུ་བྱུང་ན། ད་བསོད་སྙོམས་བཤོས་ཙམ་གྱི་སླད་དུ་ཇི་ལྟར་ཤེས་བཞིན་གྱི་རྫུན་གྱི་ཚིག་གསུངས། ས་བོན་འདི་ཙམ་གྱི་འབྲས་བུ་འདིའོ་ཞེས་བགྱི་བ་ཁྱོད་ལ་སུ་ཞིག་ཡིད་ཆེས་པར་འགྱུར། བྲམ་ཟེ་དེའི་ཕྱིར་ཁྱོད་ཉིད་ལ་དྲི་ཡིས། ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཅིག །བྲམ་ཟེ་ཇི་སྙམ་དུ་སེམས། ཁྱོད་ཀྱིས་ངོ་མཚར་རྨད་དུ་བྱུང་བའི་ཆོས་མཐོང་བ་འགའ་ཡོད་དམ། ཀྱེ་གཽ་ཏ་མ་རེ་ཞིག་ངོ་མཚར་རྨད་དུ་བྱུང་བའི་ཆོས་གཞན་ལྟ་ཞོག །ནྱ་གྲོ་དྷ་འདི་ཉིད་དུ་ངོ་མཚར་རྨད་དུ་བྱུང་བའི་ཆོས་ཤིག་མཐོང་བ་དེ་རེ་ཞིག་གསོན་ཅིག །ཀྱེ་གཽ་ཏ་མ་ནྱ་གྲོ་དྷ་འདིའི་ཤར་ཕྱོགས་ན་ནྱ་གྲོ་དྷའི་ཤིང་ཆེན་པོ་ཞིག་མཆིས་ཏེ། དེའི་མིང་གིས་གྲོང་འདི་ནྱ་གྲོ་དྷ་ཞེས་བགྱིའོ། །

དེའི་འོག་ན་ཤིང་རྟ་ལྔ་བརྒྱ་མ་རེག་ཅིང་ཕན་ཚུན་མ་ཐུག་པར་མཆིས་ལགས་སོ། །བྲམ་ཟེ་ནྱ་གྲོ་དྷ་དེའི་ས་བོན་ཚད་ཇི་ཙམ་ཞིག་ཡོད། ཅི་རེ་ཞིག་ཞིང་རྣང་ཙམ་མམ། ཀྱེ་གཽ་ཏ་མ་མ་ལགས་སོ། །རེ་ལྡེ་ཙམ་མམ། ཏིལ་འདྲུ་བའི་འཁོར་ལོ་ཙམ་མམ། ཤིང་རྟའི་འཁོར་ལོ་ཙམ་མམ། བའི་ཀོ་བ་ཙམ་མམ། བིལ་བ་ཙམ་མམ། ཀ་པིད་ཐའི་འབྲས་བུ་ཙམ་མམ། ཀྱེ་གཽ་ཏ་མ་མ་ལགས་སོ། །ཀྱེ་གཽ་ཏ་མ་ཡེ་ཡུངས་ཀར་གྱི་བཞི་ཆ་ཙམ་མཆིས་ལགས་སོ། །བྲམ་ཟེ་ས་བོན་དེ་ཙམ་གྱི་འབྲས་བུ་ཤིང་ཆེན་པོ་དེ་ཙམ་ཞིག་སྐྱེས་སོ་ཞེས་བྱ་བ་ཁྱོད་ལ་སུ་ཞིག་ཡིད་ཆེས་པར་འགྱུར། ཤེས་ལྡན་གཽ་ཏ་མ་ཡིད་ཆེས་ཀྱང་རུང་མ་ཆེས་ཀྱང་རུང་བདག་གི་མངོན་སུམ་དུ་གྱུར་ལགས་སོ། །ཀྱེ་གཽ་ཏ་མ་རེ་ཞིག་ཞིང་སྣག་ཆེ་བ་སེར་སྨེ་བ་དོག་ས་ཚྭ་སྒོ་མ་མཆིས་པའི་ཕྱོགས་སུ་ས་བོན་སར་པ་གྲུང་པོ་མ་ཉམས་པར་མཆིས་པ་ལ་དུས་དུས་སུ་ལྷས་ཆར་ཕབ་ན་དེས་ན་ཤིང་ནྱ་གྲོ་དྷ་ཆེན་པོ་འདིར་འཁྲུངས་ལགས་སོ། །

དེ་ནས་བཅོམ་ལྡན་འདས་ཀྱིས་བྱུང་བ་དེ་ལ་ཚིགས་སུ་བཅད་དེ་བཀའ་སྩལ་པ། བྲམ་ཟེ་ཁྱོད་ཀྱིས་ཇི་ལྟ་བུར། །ཞིང་དང་ས་བོན་མངོན་སུམ་ལྟར། །དེ་བཞིན་ལས་ཀྱི་རྣམ་སྨིན་ཡང་། །དེ་བཞིན་གཤེགས་པའི་མངོན་སུམ་མོ། །ཇི་ལྟར་བྲམ་ཟེ་ཁྱོད་ཀྱི་ས་བོན་ནི། །ཆུང་དང་ཤིན་ཏུ་ཤིང་ཆེན་དེ་མཐོང་བ། །བྲམ་ཟེ་ངས་ཀྱང་ས་བོན་ཆུང་ངུ་དང་། །ཕུན་སུམ་ཆེན་པོ་དེ་ཡང་དེ་བཞིན་མཐོང་། །དེ་ནས་བཅོམ་ལྡན་འདས་ཀྱིས་ཞལ་ནས་ལྗགས་བརྐྱང་བས་དབུ་སྐྲ་ལ་ཐུག་པའི་བར་ཞལ་གྱི་དཀྱིལ་འཁོར་ཐམས་ཅད་གཡོགས་ནས་བྲམ་ཟེ་དེ་ལ་བཀའ་སྩལ་པ། བྲམ་ཟེ་དེ་ཇི་སྙམ་དུ་སེམས། གང་གི་ཞལ་ནས་ལྗགས་བྱུང་བས་ཞལ་གྱི་དཀྱིལ་འཁོར་ཐམས་ཅད་ཡོག་པར་བྱེད་པ་དེ་ཅི་ག་འཁོར་ལོས་སྒྱུར་བའི་རྒྱལ་སྲིད་སྟོང་གི་ཕྱིར་ཡང་ཤེས་བཞིན་དུ་རྫུན་གྱི་ཚིག་གསུང་ངམ། ཀྱེ་གཽ་ཏ་མ་མ་ལགས་སོ། །

བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ང་ཡི་ལྗགས་ནི་སྒྱུ་མེད་བདེན་པས་བསྐྱེད་པ་དག །ཅི་ག་མི་བདེན་པ་ནི་གསུང་བར་འགྱུར་སྲིད་དམ། །བྲམ་ཟེ་ང་ཡིས་ཇི་སྐད་བཤད་པ་དེ་བཞིན་པས། །དེ་བཞིན་གཤེགས་པ་ཡིན་ཞེས་རྟོགས་པར་བྱ་བའི་རིགས། །དེ་ནས་བྲམ་ཟེ་དེ་མངོན་པར་དད་ནས་དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་ཞེས་བྱ་བ་ནས། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བཙུན་པ་བདག་ནི་འཕགས་སོ། །

མངོན་པར་འཕགས་སོ་ཞེས་བྱ་བའི་བར་གོང་མ་བཞིན་དུའོ། །

བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས་བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་ཡང་བསྡོས་ཏེ་སྐྱབས་སུ་མཆི་བར་མངོན་པར་དད་ལགས་སོ། །དེ་ནས་བྲམ་ཟེ་དེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་ནས་ཡི་རངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།

མཛེ་མོ་ཞིག་གིས་སངས་རྒྱས་ལ་འབྲས་ཁུ་ལྷུང་བཟེད་གང་ཕུལ་བས་དགའ་ལྡན་དུ་སྐྱེས་ཚུལ། འདུལ་བ་ལུང་གཞི་ལས་བཏུས།

དེ་ནས་ཚེ་དང་ལྡན་པ་འོད་སྲུང་ཆེན་པོ་དགོན་པའི་གནས་མལ་ཞིག་ནས་སྐྲ་དང་ཁ་སྤུ་རིང་ཞིང་ཆོས་གོས་ངན་པ་ཞིག་གྱོན་ཏེ་རྒྱལ་བྱེད་ཀྱི་ཚལ་དུ་འོངས་ཏེ། དེས་བལྟས་ན་རྒྱལ་བྱེད་ཀྱི་ཚལ་སྟོང་པར་འདུག་ནས་དེས་དགེ་སྐོས་ལ་དྲིས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་གང་དུ་བཞུད། དེས་སྨྲས་པ། ཁྱིམ་བདག་མགོན་མེད་ཟས་སྦྱིན་གྱིས་སྤྱན་དྲངས་སོ། །དེས་བསམས་པ། དེ་ཉིད་དུ་བསོད་སྙོམས་བཟའ་ཞིང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བྱའོ་སྙམ་ནས། དེ་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་སོང་བ་དང་། སྒོ་སྲུངས་ཀྱིས་སྨྲས་པ། འཕགས་པ་ནང་དུ་མ་བཞུད་པར་གཞེས་ཤིག །ཅིའི་ཕྱིར་ཁྱིམ་བདག་མགོན་མེད་ཟས་སྦྱིན་གྱི་མཆིད་ནས་རེ་ཞིག་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་མ་གསོལ་གྱི་བར་དུ་གཞན་མུ་སྟེགས་པ་དག་ནང་དུ་མ་བཏང་ཞིག །དེའི་འོག་ཏུ་མུ་སྟེགས་པ་རྣམས་ལ་སྦྱིན་ནོ་ཞེས་བསྒོ་ལགས་སོ། །

ཚེ་དང་ལྡན་པ་འོད་སྲུང་ཆེན་པོས་བསམས་པ། བྲམ་ཟེ་དང་ཁྱིམ་བདག་དག་གིས་བདག་ལ་དགེ་སྦྱོང་ཤཱཀྱའི་སྲས་ཀྱི་ཡིན་ནོ་ཞེས་བྱ་བར་མ་ཤེས་པ་དེ་ནི་བདག་གིས་རྙེད་པ་ལེགས་པར་རྙེད་ཀྱིས་སོང་ལ་སྐྱེ་བོ་བཀྲེན་པ་རྣམས་ལ་སྙིང་རྗེ་བྱའོ་སྙམ་དུ་བསམས་ཏེ་སྐྱེད་མོས་ཚལ་དུ་སོང་ནས་དེས་བསམས་པ། དེང་བདག་གིས་སུ་ཞིག་རྗེས་སུ་གཟུང་བར་བྱ་སྙམ་པ་དང་། རེ་ཞིག་ཅིག་ན་གྲོང་ཕྱི་ཉུག་མ་མཛེས་ཐེབས་པ་ལུས་ཞིག་ཅིང་ལུས་ལས་རྣག་ཁྲག་འཛག་པ་ཞིག་སློང་མོ་ལ་རྒྱུ་ཞིང་འདུག་ནས་དེའི་དྲུང་དུ་དེ་སོང་བ་དང་དེས་ཀྱང་བསླངས་ན་འབྲས་ཁུ་ཞིག་རྙེད་ནས། དེས་ཚེ་དང་ལྡན་པ་འོད་སྲུང་ཆེན་པོ་ལུས་མཛེས་པ་དང་སེམས་དང་ཞིང་སྤྱོད་ལམ་ཞི་བར་མཐོང་ནས་དེས་བསམས་པ། ངེས་པར་བདག་གིས་ཡོན་གནས་འདི་ལྟ་བུ་ལ་བྱ་བ་མ་བྱས་པས་དེས་ན་བདག་འདི་ལྟ་བུའི་གནས་སུ་གྱུར་གྱིས། གལ་ཏེ་འཕགས་པ་འོད་སྲུང་ཆེན་པོས་བདག་ལ་ཐུགས་བརྩེ་བའི་ཕྱིར་འབྲས་ཁུ་བཞེས་ན་བདག་གིས་འདི་འབུལ་ལོ་སྙམ་པ་དང་།

དེ་ནས་ཚེ་དང་ལྡན་པ་འོད་སྲུང་ཆེན་པོས་དེའི་བསམ་པ་སེམས་ཀྱིས་ཤེས་ནས་ལྷུང་བཟེད་བཟེད་དེ། སྲིང་མོ་གལ་ཏེ་ཁྱོད་ཀྱིས་བཏང་བ་ཡིན་ན་ལྷུང་བཟེད་འདིར་ལུགས་ཤིག །དེ་ནས་དེས་སེམས་མངོན་པར་དད་པར་བྱས་ནས་ལྷུང་བཟེད་དེར་བླུགས་པ་དང་སྦྲང་མ་ཞིག་ལྷུང་ངོ་། །དེས་དེ་དབྱུང་བར་བརྩམས་པ་དང་། འབྲས་ཁུ་དེའི་ནང་དུ་སོར་མོ་གཅིག་ཆད་དེ་ལྷུང་ངོ་། །

དེས་བསམས་པ། འཕགས་པས་བདག་གི་སེམས་བསྲུང་བའི་བསགས་ཕོར་ཟད་ཀྱི་འོན་ཀྱང་གསོལ་ནི་མི་གསོལ་ལོ་སྙམ་པ་དང་། ཚེ་དང་ལྡན་པ་འོད་སྲུང་ཆེན་པོས་དེའི་བསམ་པ་སེམས་ཀྱིས་ཤེས་ནས་དེའི་མངོན་སུམ་ཁོ་ནར་འབབ་པའི་རྩིག་དྲུང་ཞིག་ཏུ་འདུག་ནས་འཐུངས་པ་དང་། དེས་བསམས་པ། ཅུང་ཟད་དུ་ན་བདག་གི་སེམས་བསྲུང་བའི་ཕྱིར་གསོལ་གྱི། འོན་ཀྱང་འདིས་ཟས་ཀྱི་གོ་ཆོད་པར་ནི་མ་བྱས་སོ་སྙམ་པ་དང་། དེ་ནས་ཚེ་དང་ལྡན་པ་འོད་སྲུང་ཆེན་པོས་དེའི་བསམ་པ་སེམས་ཀྱིས་ཤེས་ནས་གྲོང་ཕྱི་ཉུག་མ་དེ་ལ་འདི་སྐད་ཅེས་སྨྲས་སོ། །སྲིང་མོ་རབ་ཏུ་དགའ་བ་སྐྱེད་ཅིག་དང་ཁྱོད་ཀྱིས་བྱིན་པའི་ཟས་འདིས་ཁོ་བོ་ཉིན་ཞག་གཅིག་འདའ་བར་བྱའོ། །

དེ་ལྷག་པར་དགའ་བ་སྐྱེས་ནས་བདག་གིས་འཕགས་པ་འོད་སྲུང་ཆེན་པོ་ལ་བསོད་སྙོམས་བསྟབས་ན་བཞེས་སོ་སྙམ་ནས། ཚེ་དང་ལྡན་པ་འོད་སྲུང་ཆེན་པོ་ལ་སེམས་དང་བ་བསྐྱེད་ནས་ཤི་བས་དགའ་ལྡན་གྱི་ལྷའི་རིས་སུ་སྐྱེས་སོ།། །།

དབུལ་མོ་གྲོང་ཉུག་མས་སངས་རྒྱས་ལ་མར་མེ་ཕུལ་བའི་ལོ་རྒྱུས། འདུལ་བ་ལུང་གཞི་ལས་བཏུས།

དེ་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཀོ་ས་ལའི་རྒྱལ་པོ་གསལ་རྒྱལ་གྱིས་ཟླ་བ་གསུམ་དུ་ཞལ་ཟས་རོ་བརྒྱ་དང་ལྡན་པ་གསོལ་ནས་དགེ་སློང་རེ་རེ་ལ་ཡང་འབུམ་རི་བའི་གོས་རེ་རེ་བསྐོན་ཏེ། འབྲུ་མར་གྱི་བུམ་པ་བྱེ་བ་བསོགས་ནས་མར་མེའི་ཕྲེང་བ་བལྟམ་པར་བརྩམས་སོ། །དེ་ན་གདུགས་ཚོད་ཀྱི་ཁ་དང་། མཆོད་པའི་ཚེ་ཅ་ཅོའི་སྒྲ་ཆེན་པོ་གྲག་པ་དང་། ཅི་ཙམ་ན་གྲོང་ཉུག་མ་ཤིན་ཏུ་སྡུག་བསྔལ་བ་ཞིག་རྫའི་ཆག་དུམ་ཞིག་ཐོགས་ཏེ་སློང་བ་ལ་ཞུགས་པ་དེས་སྒྲ་ཆེན་པོ་དང་སྒྲ་མཐོན་པོ་ཐོས་སོ། །ཐོས་ནས་ཀྱང་དྲིས་པ། ཤེས་ལྡན་དག་སྒྲ་མཐོན་པོ་དང་སྒྲ་ཆེན་པོ་འདི་ཅི་ཞིག་ཡིན། གཞན་དག་གིས་སྨྲས་པ། ཀོ་ས་ལའི་རྒྱལ་པོ་གསལ་རྒྱལ་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཟླ་བ་གསུམ་དུ་གདུགས་ཚོད་གསོལ་ནས་དགེ་སློང་རེ་རེ་ལ་ཡང་འབུམ་རི་བའི་གོས་རེ་རེ་བསྐོན་ཏེ། འབྲུ་མར་གྱི་བུམ་པ་བྱེ་བ་བསོགས་ཏེ་མར་མེའི་ཕྲེང་བ་གཏོང་བར་རྩོམ་པ་ཡིན་ནོ། །

དེ་ནས་གྲོང་ཉུག་མ་དེ་འདི་སྙམ་དུ་སེམས་ཏེ། ཀོ་ས་ལའི་རྒྱལ་པོ་གསལ་རྒྱལ་འདི་བསོད་ནམས་ཀྱིས་ངོམས་མི་ཤེས་ནས་ད་དུང་ཡང་སྦྱིན་པ་དག་གཏོང་བསོད་ནམས་དག་བྱེད་ན། མ་ལ་བདག་གིས་ཀྱང་འགའ་ཞིག་ལས་བསླངས་ལ་བཅོམ་ལྡན་འདས་ལ་མེ་མར་ཞིག་བལྟམ་མོ་སྙམ་ནས། དེས་བསླངས་པའི་འབྲུ་མར་ཉུང་ཟད་སྣོད་གྱོ་རལ་གྱི་ནང་དུ་བླུགས་ཏེ་བཅོམ་ལྡན་འདས་ཀྱི་འཆག་སའི་སླད་དུ་མར་མེ་བལྟམ་ནས། ཞབས་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་བ་འདིས་ཇི་ལྟར་སྟོན་པ་བཅོམ་ལྡན་འདས་ཤཱཀྱ་ཐུབ་པ་འདི་སྐྱེ་དགུའི་ཚེ་ལོ་བརྒྱ་ཐུབ་པ་ན་འཇིག་རྟེན་དུ་བྱུང་བ་དེ་བཞིན་དུ་བདག་ཀྱང་སྐྱེ་དགུའི་ཚེ་ལོ་བརྒྱ་ཐུབ་པ་ན་སྟོན་པ་ཤཱཀྱ་ཐུབ་པ་ཞེས་བྱ་བ་ཁོ་ནར་འགྱུར་ཞིང་། ཡང་ཇི་ལྟར་འདིའི་ཟུང་མཆོག་དང་ཟུང་བཟང་པོ་ཤཱ་རིའི་བུ་དང་། མཽད་གལ་གྱི་བུ་དང་། ཉེ་གནས་དགེ་སློང་ཀུན་དགའ་བོ་དང་། ཡབ་ཟས་གཙང་དང་། ཡུམ་ལྷ་མོ་སྒྱུ་འཕྲུལ་ཆེན་མོ་དང་། སྲས་གཞོན་ནུ་སྒྲ་གཅན་ཟིན་བཟང་པོ་དང་། གྲོང་ཁྱེར་སེར་སྐྱའི་གཞི་ལགས་པ་དེ་བཞིན་དུ་བདག་གི་ཡང་ཟུང་མཆོག་དང་ཟུང་བཟང་པོ་ཤཱ་རིའི་བུ་དང་། མཽ་འགལ་གྱི་བུ་དང་། ཉེ་གནས་དགེ་སློང་ཀུན་དགའ་བོ་དང་། ཡབ་ཟས་གཙང་དང་། ཡུམ་ལྷ་མོ་སྒྱུ་འཕྲུལ་ཆེན་མོ་དང་། སྲས་གཞོན་ནུ་སྒྲ་གཅན་ཟིན་བཟང་པོ་དང་། གྲོང་ཁྱེར་སེར་སྐྱའི་གཞིར་འགྱུར་ཞིང་ཇི་ལྟར་ཡང་བཅོམ་ལྡན་འདས་འདི་སྐུ་གདུང་གསེས་ནས་ཡོངས་སུ་མྱ་ངན་ལས་འདས་པ་དེ་བཞིན་དུ་བདག་ཀྱང་སྐུ་གདུང་གསེས་ནས་ཡོངས་སུ་མྱ་ངན་ལས་འདའ་བར་གྱུར་ཅིག་ཅེས་བྱས་སོ། །

ཇི་ཙམ་ན་མར་མེ་དེ་དག་ཐམས་ཅད་ནི་ཤིའོ། །དེས་བཏང་བའི་མར་མེ་ནི་འབར་ཞིང་འདུག་གོ །ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ཇི་སྲིད་ནང་དུ་ཡང་དག་མ་བཞག་པ་དེ་སྲིད་དུ་སངས་རྒྱས་བཅོམ་ལྡན་འདས་རྣམས་ཀྱི་ཉེ་གནས་རྣམས་ནང་དུ་ཡང་དག་མི་འཇོག་པས་ཚེ་དང་ལྡན་པ་ཀུན་དགའ་བོས་བསམས་པ། སངས་རྒྱས་བཅོམ་ལྡན་འདས་རྣམས་འོད་ལ་མནལ་བར་མཛད་པ་དེ་ནི་གནས་མ་ཡིན་ཞིང་གོ་སྐབས་མེད་པས་མ་ལ་བདག་གིས་མར་མེ་དེ་གསད་པར་བྱའོ་སྙམ་ནས་དེས་ལག་པས་གསད་པར་བརྩམས་པ་ལས་མ་ནུས་སོ། །དེ་ནས་ཆོས་གོས་ཀྱི་གྲྭ་དང་། དེ་ནས་བསིལ་ཡབ་ཀྱིས་གཡབས་ན་འོན་ཀྱང་གསད་པར་མ་ནུས་སོ། །

བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འདི་ཅི་བྱེད། དེས་གསོལ་བ། བཅོམ་ལྡན་འདས་བདག་གི་གློ་བ་ལ་བསམས་པ། སངས་རྒྱས་བཅོམ་ལྡན་འདས་རྣམས་འོད་ལ་མནལ་བར་མཛད་པ་ནི་གནས་མ་མཆིས་ཤིང་གོ་སྐབས་མ་མཆིས་ཀྱིས། མ་ལ་བདག་གིས་ཞུགས་མར་དགུམ་མོ་སྙམ་ནས་བདག་གིས་དེ་སུག་པས་དགུམ་པར་བརྩམས་ན་རྔོ་མ་ཐོག་གོ །

དེ་ནས་ཆོས་གོས་ཀྱི་གྲྭ་དང་། དེ་ནས་བསིལ་ཡབ་ཀྱིས་གཡབས་ན་འོན་ཀྱང་རྔོ་མ་ཐོག་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དུབ་པར་མ་བྱེད་ཅིག །གལ་ཏེ་རྣམ་པར་འཐོར་རླུང་ལངས་ན་དེས་ཀྱང་གསད་པར་མི་ནུས་ན་ལག་པ་དང་། ཆོས་གོས་ཀྱི་གྲྭ་དང་། བསིལ་ཡབ་ཀྱིས་ལྟ་སྨོས་ཀྱང་ཅི་དགོས། འདི་ལྟར་མར་མེ་འདི་ནི་བུ་མོ་འདིས་སེམས་ཀྱིས་མངོན་པར་འདུ་བྱེད་པ་ཆེན་པོས་བུས་པ་ཡིན་ནོ། །གཞན་ཡང་ཀུན་དགའ་བོ་བུ་མོ་འདི་ནི་སྐྱེ་དགུ་རྣམས་ཀྱི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་ཞིང་དེའི་ཟུང་མཆོག་དང་ཟུང་བཟང་པོ་ཤཱ་རིའི་བུ་དང་། མཽ་འགལ་གྱི་བུ་དང་། ཉེ་གནས་དགེ་སློང་ཀུན་དགའ་བོ་དང་། ཡབ་ཟས་གཙང་དང་། ཡུམ་ལྷ་མོ་སྒྱུ་འཕྲུལ་ཆེན་མོ་དང་། སྲས་གཞོན་ནུ་སྒྲ་གཅན་ཟིན་བཟང་པོ་དང་གྲོང་ཁྱེར་སེར་སྐྱའི་གཞི་ཞེས་བྱ་བར་འགྱུར་ལ། དེ་སྐུ་གདུང་གསེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །

གྲོང་ཉུག་མ་ཆེ་གེ་མོ་ཞེས་བྱ་བས་བཅོམ་ལྡན་འདས་ཀྱི་འཆག་སའི་སླད་དུ་མར་མེ་བཏང་བས་དེ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ།། །།(མདོ་སྡེ་མཛངས་བླུན་དུ་ཡང་བསྙེན་དགའ་མོ་ཞེས་བྱ་བའི་རྣམ་ཐར་འདི་དང་མིང་མི་འདྲ་བ་ལས་དོན་གཅིག་པ་ཞིག་ཡོད། )

བུ་མོ་ཞིག་གིས་སངས་རྒྱས་ལ་ཕུལ་ཟིན་པའི་ནས་ལྷུང་བཟེད་དོ་གཙང་མར་བྱས་ཏེ་བཙུན་མོ་རིན་པོ་ཆེར་འགྱུར་བར་སྨོན་ལམ་བཏབ་ཚུལ། འདུལ་བ་ལུང་གཞི་ལས་བཏུས།

དེ་ནས་བཅོམ་ལྡན་འདས་དགེ་སློང་ལྔ་བརྒྱར་དགེ་སློང་གཉིས་ཀྱིས་མ་ཚང་བ་དང་ཐབས་ཅིག་ཏུ་དགྲ་མཐར་དབྱར་བཞུགས་པར་ཞལ་གྱིས་བཞེས་སོ། །ཚེ་དང་ལྡན་པ་ཤཱ་རིའི་བུ་དང་། མཽ་འགལ་གྱི་བུ་ནི་རི་བོ་རྩེ་གསུམ་གྱི་ཁར་སོང་སྟེ་དབྱར་གནས་པར་ཁས་བླངས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ལྷའི་བདུད་རྩིས་བསྟབས་སོ། །དེ་ནས་དེད་དཔོན་གྱིས་བཅོམ་ལྡན་འདས་ལ་ནི་ནས་བྲེའུ་ཆུང་དོ་དོ་འབུལ་ལོ། །དགེ་སློང་གཞན་རྣམས་ལ་བྲེའུ་ཆུང་རེ་རེའོ། །

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དེ་བཞིན་གཤེགས་པའི་ཆེད་དུ་ནས་ལ་ཅི་ལེགས་སུ་བྱོས་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས། བཅོམ་ལྡན་འདས་ཀྱི་སྐུ་སྐལ་བླངས་ཏེ་བུད་མེད་རྒན་མོ་གཞན་ཞིག་གང་ན་ཡོད་པ་དེར་སོང་ནས་ཕྱིན་པ་དང་།

བུད་མེད་དེ་ལ་འདི་སྐད་ཅེས་སྨྲས་སོ། །སྲིང་མོ་དེ་བཞིན་གཤེགས་པའི་ཆེད་དུ་ནས་ལ་ཅི་ལེགས་སུ་བྱ་ན་ཁྱོད་ནུས་སམ། དེས་སྨྲས་པ། འཕགས་པ་བདག་རྒན་མོས་རྔོ་མི་ཐོག་སྟེ་འོན་ཀྱང་བུ་མོ་འདི་གཞོན་ལགས་ཀྱིས་འདི་ལ་སྩོལ་ཅིག་དང་། འདིས་ནི་ཅི་ལེགས་སུ་བགྱིད་པར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོ་དེའི་དྲུང་དུ་སོང་སྟེ་ཕྱིན་ནས་སྨྲས་པ། སྲིང་མོ་ཁྱོད་ཀྱིས་དེ་བཞིན་གཤེགས་པའི་ཆེད་དུ་ནས་ལ་ཅི་ལེགས་སུ་བྱེད་ནུས་སམ། དེས་སྨྲས་པ། འཕགས་པ་བདག་དང་དམ་ཞིག་བཅའ་སྟེ། གལ་ཏེ་བདག་ལ་ཚིག་འགའ་གསུངས་བ་ལྟ་ན་ཅི་ལེགས་སུ་བགྱིའོ། །དེས་སྨྲས་པ། བྱི་དོར་གྱིས་ཤིག་དང་སྨྲའོ། །དེ་ནས་འདྲུ་ཞིང་དྲིས་པ། འཕགས་པ་སངས་རྒྱས་ཞེས་བགྱི་བ་འདི་ཅི་ལགས། ཚེ་དང་ལྡན་པ་ཀུན་དགའ་བོས་བསམས་པ། གལ་ཏེ་འདི་ལ་བདག་གིས་སངས་རྒྱས་ཀྱི་བསྔགས་པ་བརྗོད་ན། སངས་རྒྱས་ཀྱི་ཆོས་རྣམས་ནི་ཟབ་པ་ཡིན་པས་འདིས་ཤེས་པར་མི་འགྱུར་བའི་གནས་གང་ཡིན་པ་དེ་ཡོད་ཀྱིས། མ་ལ་བདག་གིས་འདི་ལ་འཁོར་ལོས་སྒྱུར་བའི་བསྔགས་པ་བརྗོད་པར་བྱའོ་སྙམ་དུ་བསམས་ནས་སྨྲས་པ། སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་རིན་པོ་ཆེ་སྣ་བདུན་ཡང་འཇིག་རྟེན་དུ་འབྱུང་བར་འགྱུར་ཏེ། བདུན་པོ་དེ་དག་གང་ཞེ་ན། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཡིན་ནོ། །

སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་འཁོར་ལོ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་བཅྭོ་ལྔ་པ་དེ་ཉིད་ལ་མགོ་ཁྲུས་བྱས་ཏེ་སྨྱུང་བ་བྱས་ནས། དེ་སྟེང་གི་ཁང་བཟང་གི་གཞི་ལ་བློན་པོའི་ཚོགས་ཀྱིས་བསྐོར་ནས་འདུག་པ་ན། ཤར་ཕྱོགས་ནས་འཁོར་ལོ་རིན་པོ་ཆེ་ལྟེ་བ་དང་བཅས་པ། རྩིབས་སྟོང་དང་ལྡན་པ། མྱུ་ཁྱུད་དང་བཅས་པ། རྣམ་པ་ཐམས་ཅད་ཡོངས་སུ་རྫོགས་པ། མཛེས་པ། མཁན་བཟོས་མ་བྱས་པ། བཟང་པོ་ཐམས་ཅད་གསེར་ལས་བྱས་པ་ཞིག་འབྱུང་བར་འགྱུར་ཏེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གང་ཡིན་པ་འདིས་གསོ་སྦྱོང་བཅྭོ་ལྔ་པ་དེ་ཉིད་ཀྱི་ཚེ་ཞེས་བྱ་བ་ནས་ཐམས་ཅད་གསེར་ལས་བྱས་ཞེས་བྱ་བ་ནས་དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་སོ་ཞེས་བྱ་བའི་བར་གོང་མ་བཞིན་དུའོ། །བདག་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོར་གྱུར་ཏོ་སྙམ་ནས། དེ་ནས་འཁོར་ལོས་སྒྱུར་བའི་རྒྱལ་པོས་འཁོར་ལོ་རིན་པོ་ཆེ་དེ་བརྟག་པར་འདོད་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། འཁོར་ལོ་རིན་པོ་ཆེ་དེ་ལག་པ་གཉིས་ཀྱིས་བླངས་ནས་ལག་པ་གཡོན་པར་བཞག་སྟེ་ལག་པ་གཡས་པས་སྤོར་ཅིང་། ཀྱེ་འཁོར་ལོ་རིན་པོ་ཆེ་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པར་རྣམ་པར་རྒྱལ་བར་གྱུར་ཅིག །རྣམ་པར་རྒྱལ་བར་གྱུར་ཅིག་ཅེས་སྨྲའོ། །

དེ་ནས་འཁོར་ལོ་རིན་པོ་ཆེ་དེ་འཁོར་ལོས་སྒྱུར་བའི་རྒྱལ་པོས་སྤར་བ་དང་། སྟེང་གི་ནམ་མཁའ་ལ་འཕགས་ནས་ཤར་ཕྱོགས་སུ་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པ་ནས་འགྲོ་བར་འགྱུར་རོ། །འཁོར་ལོ་རིན་པོ་ཆེ་དེའི་རྗེས་བཞིན་དུ་འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་འགྲོ་བར་འགྱུར་རོ། །ཕྱོགས་གང་དུ་འཁོར་ལོ་རིན་པོ་ཆེ་དེ་སྡོད་པ་དེར་འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་གནས་འདེབས་པར་འགྱུར་ཞིང་། ཤར་ཕྱོགས་ཀྱི་ཁམས་ཀྱི་རྒྱལ་ཕྲན་གང་དག་ཡིན་པ་དེ་དག་འཁོར་ལོས་སྒྱུར་བའི་རྒྱལ་པོ་གང་ན་བ་དེར་དོང་སྟེ་ལྷགས་པ་དང་། འཁོར་ལོས་སྒྱུར་བའི་རྒྱལ་པོ་ལ་འདི་སྐད་ཅེས་ལྷ་ཚུར་གཤེགས། ལྷ་བྱོན་པ་ལེགས་སོ། །ཡུལ་འཁོར་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་གང་ལགས་པ་འདི་ནི་ལྷའི་ལགས་ཀྱིས། ལྷས་རྗེས་སུ་བསྐྱང་དུ་གསོལ། བདག་ཅག་ནི་ལྷའི་བཀའ་བཞིན་བགྱིད་པ་ལགས་སོ་ཞེས་སྨྲས་པ་དང་། དེའི་ཕྱིར་སྣ་བོ་དག་ཁྱེད་ཅག་རང་རང་གི་ཡུལ་འཁོར་ཆོས་ཀྱིས་རྗེས་སུ་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །འགའ་ཞིག་ཆོས་མ་ཡིན་པ་སྤྱོད་དམ་འདྲེན་མར་སྤྱོད་པ་ཞིག་ཡོད་ན། ཁྱེད་ཀྱིས་དེ་ཡུལ་འཁོར་དུ་མ་བཞག་ཅིག །དེ་ལྟ་ན་ཁྱེད་ཅག་ཁོ་བོའི་བཀའ་བཞིན་བྱེད་པ་ཡིན་ནོ། །དེ་ནས་འཁོར་ལོ་རིན་པོ་ཆེ་དེ་ཤར་ཕྱོགས་མངོན་པར་ཕབ་ནས་ཤར་ཕྱོགས་ཀྱི་རྒྱ་མཚོ་ཆེན་པོ་ནས་སླར་ལོག་སྟེ། ལྷོ་དང་། ནུབ་དང་། བྱང་ཕྱོགས་སུ་ཡང་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པར་འགྲོ་བར་འགྱུར་བས། དེ་ནས་འཁོར་ལོ་རིན་པོ་ཆེ་དེ་འཁོར་ལོས་སྒྱུར་བའི་རྒྱལ་པོས་སྤར་བ་དང་། སྟེང་གི་ནམ་མཁའ་ལ་འཕགས་ནས་བྱང་ཕྱོགས་སུ་སྔོན་གྱི་འཁོར་ལོས་སྒྱུར་བ་འཕགས་པའི་ལམ་སྲོལ་གང་ཡིན་པར་འགྲོ་བར་འགྱུར་རོ། །

འཁོར་ལོ་རིན་པོ་ཆེ་དེའི་རྗེས་བཞིན་དུ་འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་འགྲོ་བར་འགྱུར་རོ། །ཕྱོགས་གང་དུ་འཁོར་ལོ་རིན་པོ་ཆེ་དེ་སྡོད་པ་དེར་འཁོར་ལོས་སྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་དང་ལྷན་ཅིག་གནས་འདེབས་པར་འགྱུར་ཞིང་། བྱང་ཕྱོགས་ཀྱི་ཁམས་ཀྱི་རྒྱལ་ཕྲན་གང་དག་ཡིན་པ་དེ་དག་འཁོར་ལོས་སྒྱུར་བའི་རྒྱལ་པོ་གང་ན་བ་དེར་དོང་སྟེ་ལྷགས་པ་དང་། འཁོར་ལོས་སྒྱུར་བའི་རྒྱལ་པོ་ལ་འདི་སྐད་ཅེས་ལྷ་ཚུར་གཤེགས། ལྷ་བྱོན་པ་ལེགས་སོ། །ཡུལ་འཁོར་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་གང་ལགས་པ་འདི་ནི་ལྷའི་ལགས་ཀྱིས། ལྷས་རྗེས་སུ་བསྐྱང་དུ་གསོལ། བདག་ཅག་ནི་ལྷའི་བཀའ་བཞིན་བགྱིད་པ་ལགས་སོ་ཞེས་སྨྲས་པ་དང་། དེའི་ཕྱིར་སྣ་བོ་དག་ཁྱེད་ཅག་རང་རང་གི་ཡུལ་རྣམས་ཆོས་ཀྱིས་རྗེས་སུ་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །འགའ་ཞིག་ཆོས་མ་ཡིན་པ་སྤྱོད་དམ། འདྲེན་མར་སྤྱོད་ན་ཁྱེད་ཀྱིས་ཡུལ་འཁོར་དུ་མ་བཞག་ཅིག །དེ་ལྟ་ན་ཁྱེད་ཅག་ཁོ་བོའི་བཀའ་བཞིན་བྱེད་པ་ཡིན་ནོ། །དེ་ནས་འཁོར་ལོ་རིན་པོ་ཆེ་དེས་བྱང་ཕྱོགས་མངོན་པར་ཕབ་ནས་བྱང་ཕྱོགས་ཀྱི་རྒྱ་མཚོ་ཆེན་པོ་ནས་སླར་ལོག་སྟེ། རྒྱལ་པོའི་ཕོ་བྲང་དེ་ཉིད་དུ་ཕྱིན་ནས་དཀོར་ཁང་གི་སྟེང་དུ་སྲོག་ཤིང་བཙུགས་པ་བཞིན་དུ་གནས་སོ། །

སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་འཁོར་ལོ་རིན་པོ་ཆེ་དེ་ལྟ་བུ་འཇིག་རྟེན་དུ་འབྱུང་བར་འགྱུར་རོ། །སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་གླང་པོ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་འཁོར་ལོས་སྒྱུར་བའི་གླང་པོ་ནི་ཐལ་དཀར་མེ་ཏོག་ཀུ་མུ་དའི་མདོག་ལྟ་བུ་ཡན་ལག་བདུན་ལེགས་པར་གནས་པ། གཟུགས་བཟང་བ། མཛེས་པ། ལྟ་ན་སྡུག་པ་ཡིན་ནོ། །འཁོར་ལོས་སྒྱུར་བའི་རྒྱལ་པོས་འདི་མཐོང་ན་སེམས་མངོན་པར་དད་པར་གྱུར་ནས། ཀྱེ་མའོ་གླང་པོ་རིན་པོ་ཆེ་བཟང་པོ་ཞིག་ཡིན་གྱིས་མྱུར་དུ་དུལ་བར་འགྱུར་བར་བྱའོ་སྙམ་ནས། དེ་ནས་འཁོར་ལོས་སྒྱུར་བའི་རྒྱལ་པོས་གླང་པོ་འདུལ་སྦྱོང་མཁན་མཁས་པ་ཕོ་ཉས་བཀུག་ནས་འདི་སྐད་ཅེས་སྨྲས་སོ། །

དེས་པ་ཁྱོད་ཀྱིས་གླང་པོ་རིན་པོ་ཆེ་འདི་མྱུར་བ་ཁོ་ནར་ལེགས་པར་དུལ་བར་བྱོས་ལ་ང་ལ་ཕུལ་ཅིག །ལྷ་བཀའ་བཞིན་འཚལ་ཞེས་གླང་པོ་འདུལ་སྦྱོང་མཁན་མཁས་པས་འཁོར་ལོས་སྒྱུར་བའི་རྒྱལ་པོའི་ལྟར་མཉན་ནས། གླང་པོ་རིན་པོ་ཆེ་དེ་ལ་བསླབ་པ་ཐམས་ཅད་ཉིན་ཞག་གཅིག་ལ་སློབ་པར་བྱེད་དེ། དེ་ལ་ཉིན་ཞག་གཅིག་ལ་བསླབ་པ་ཐམས་ཅད་སློབ་པ་ན་ཉིན་ཞག་གཅིག་གིས་བསླབ་པ་ཐམས་ཅད་ལོབས་པ་ནི་དཔེར་ན་གླང་པོ་ཆེ་གཞན་རྣམས་ལོ་དུ་མ་དང་། ལོ་ཁྱུད་སྐོར་དུ་མར་བསླབ་པ་ཐམས་ཅད་བསླབས་ནས་བསླབ་པ་ཐམས་ཅད་ལོབས་པ་དེ་བཞིན་དུ། གླང་པོ་རིན་པོ་ཆེ་དེ་ལ་ཉིན་ཞག་གཅིག་ལ་བསླབ་པ་ཐམས་ཅད་བསླབས་པ་ན་ཉིན་ཞག་གཅིག་གིས་བསླབ་པ་ཐམས་ཅད་ལོབས་སོ། །དེ་དུལ་བར་རིག་ནས་འཁོར་ལོས་སྒྱུར་བའི་རྒྱལ་པོ་ལ་འབུལ་བར་བྱེད་དེ། ལྷ་གླང་པོ་རིན་པོ་ཆེ་བཟང་པོ་ནི་དུལ་ལགས་ཏེ། ལྷ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ།

དེ་ནས་འཁོར་ལོས་སྒྱུར་བའི་རྒྱལ་པོས་གླང་པོ་རིན་པོ་ཆེ་དེ་བརྟག་པར་འདོད་ནས། ཉི་མ་འཆར་ཀའི་དུས་ཀྱི་ཚེ་གླང་པོ་རིན་པོ་ཆེ་དེ་ལ་ཞོན་ནས་རྒྱ་མཚོའི་མཐས་ཀླས་པའི་ས་ཆེན་པོ་བསྐོར་ཏེ། རྒྱལ་པོའི་ཕོ་བྲང་དེ་ཉིད་དུ་ཕྱིན་པ་ན་ཞལ་ཚུས་ལ་འབབ་སྟེ། སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་གླང་པོ་རིན་པོ་ཆེ་དེ་ལྟ་བུ་འཇིག་རྟེན་དུ་འབྱུང་བར་འགྱུར་རོ། །སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་རྟ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་འཁོར་ལོས་སྒྱུར་བའི་རྒྱལ་པོའི་རྟ་ནི་ཐམས་ཅད་སྔོ་བ་མགོ་གནག་ཅིང་རྔོག་མཇུག་སྡུག་པ། གཟུགས་བཟང་བ། མཛེས་པ། ལྟ་ན་སྡུག་པ་ཡིན་ཏེ། འཁོར་ལོས་སྒྱུར་བའི་རྒྱལ་པོས་དེ་མཐོང་ནས་སེམས་མངོན་པར་དད་པར་གྱུར་ནས། ཀྱེ་མ་རྟ་རིན་པོ་ཆེ་བཟང་པོ་ཞིག་ཡིན་གྱིས་མྱུར་དུ་དུལ་བར་འགྱུར་བར་བྱའོ་སྙམ་ནས།

དེ་ནས་འཁོར་ལོས་སྒྱུར་བའི་རྒྱལ་པོས་རྟ་མཁན་མཁས་པ་ཕོ་ཉས་བཀུག་སྟེ་འདི་སྐད་ཅེས་སྨྲས་སོ། །དེས་པ་ཁྱོད་ཀྱིས་རྟ་རིན་པོ་ཆེ་འདི་མྱུར་བ་ཁོ་ནས་ལེགས་པར་དུལ་བར་བྱོས་ལ་ང་ལ་ཕུལ་ཅིག །ལྷ་བཀའ་བཞིན་འཚལ་ཞེས་རྟ་མཁན་མཁས་པས་འཁོར་ལོས་སྒྱུར་བའི་རྒྱལ་པོ་ལས་མཉན་ནས། རྟ་རིན་པོ་ཆེ་དེ་ལ་བསླབ་པ་ཐམས་ཅད་ཉིན་ཞག་གཅིག་ལ་སློབ་པར་བྱེད་དེ། དེ་ལ་བསླབ་པ་ཐམས་ཅད་ཉིན་ཞག་གཅིག་ལ་སློབ་པ་ན། ཉིན་ཞག་གཅིག་གིས་བསླབ་པ་ཐམས་ཅད་ལོབས་པ་ནི་དཔེར་ན་རྟ་གཞན་རྣམས་ལོ་དུ་མ་དང་། ལོ་ཁྱུད་སྐོར་དུ་མར་བསླབ་པ་ཐམས་ཅད་བསླབས་ནས་བསླབ་པ་ཐམས་ཅད་ལོབས་པ་དེ་བཞིན་དུ། རྟ་རིན་པོ་ཆེ་དེ་ལ་ཉིན་ཞག་གཅིག་ལ་བསླབ་པ་ཐམས་ཅད་སློབ་པ་ན་ཉིན་ཞག་གཅིག་གིས་བསླབ་པ་ཐམས་ཅད་ལོབས་སོ། །དེ་དུལ་བར་རིག་ནས་འཁོར་ལོས་སྒྱུར་བའི་རྒྱལ་པོ་ལ་འབུལ་བར་བྱེད་དེ། ལྷ་རྟ་རིན་པོ་ཆེ་བཟང་པོ་ནི་དུལ་ལགས་ཏེ། ལྷ་ད་དེའི་དུས་ལ་བབ་པར་མཁྱེན་པར་མཛད་དུ་གསོལ། དེ་ནས་འཁོར་ལོས་སྒྱུར་བའི་རྒྱལ་པོས་རྟ་རིན་པོ་ཆེ་བརྟག་པར་འདོད་ནས་ཉི་མ་འཆར་ཀའི་དུས་ཀྱི་ཚེ་རྟ་རིན་པོ་ཆེ་ལ་ཞོན་ནས་རྒྱ་མཚོའི་མཐས་ཀླས་པའི་ས་ཆེན་པོ་བསྐོར་ཏེ་རྒྱལ་པོའི་ཕོ་བྲང་དེ་ཉིད་དུ་ཕྱིན་པ་ན་ཞལ་ཚུས་ལ་འབབ་སྟེ། སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་རྟ་རིན་པོ་ཆེ་དེ་ལྟ་བུ་འཇིག་རྟེན་དུ་འབྱུང་བར་འགྱུར་རོ། །

སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་ནོར་བུ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་འཁོར་ལོས་སྒྱུར་བའི་རྒྱལ་པོའི་ནོར་བུ་ནི་ཟུར་བརྒྱད་ཡོད་པ། བཻཌཱུརྱ་བཟང་པོའི་རིགས་ཅན། དྭངས་བ། གསལ་བ། རྣམ་པར་དང་བ་ཡིན་ཏེ། འཁོར་ལོས་སྒྱུར་བའི་རྒྱལ་པོའི་ཕོ་བྲང་ན་མེ་མར་གྱི་བྱ་བ་ཐམས་ཅད་ནོར་བུ་དེའི་འོད་ཀྱིས་བྱེད་དོ། །དེ་ནས་འཁོར་ལོས་སྒྱུར་བའི་རྒྱལ་པོས་ནོར་བུ་རིན་པོ་ཆེ་བརྟག་པར་འདོད་ནས་མུན་གནག་སྨག་ཏུ་གྱུར་ལ། ལྷས་མཚན་མོ་ཆར་གྱི་རྒྱུན་དལ་བུ་དལ་བུས་འབེབས་ཤིང་། གློག་འགྱུ་བའི་དུས་སུ་ནོར་བུ་རིན་པོ་ཆེ་དེ་རྒྱལ་མཚན་གྱི་རྩེ་མོ་ལ་བཞག་ནས་སྐྱེད་མོས་ཚལ་གྱི་ནང་དུ་དཔུང་གི་ཚོགས་ཡན་ལག་བཞི་དང་ལྷན་ཅིག་དོང་བ་ན། འཁོར་ལོས་སྒྱུར་བའི་རྒྱལ་པོའི་དཔུང་གི་ཚོགས་ཡན་ལག་བཞི་པོ་ཇི་སྙེད་པ་ཐམས་ཅད་དང་། རྒྱང་གྲགས་ཕྱེད་ཁོ་ར་ཁོར་ཡུག་ཏུ་ནོར་བུའི་འོད་ཀྱིས་གསལ་བར་འགྱུར་ཏེ། སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་ནོར་བུ་རིན་པོ་ཆེ་དེ་ལྟ་བུ་འཇིག་རྟེན་དུ་འབྱུང་བར་འགྱུར་རོ། །

སྲིང་མོ་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན་བཙུན་མོ་རིན་པོ་ཆེ་ཇི་ལྟ་བུ་ཞིག་འཇིག་རྟེན་དུ་འབྱུང་བར་འགྱུར་ཞེ་ན། སྲིང་མོ་འདི་ལ་འཁོར་ལོས་སྒྱུར་བའི་རྒྱལ་པོའི་བཙུན་མོ་ནི་གཟུགས་བཟང་བ། མཛེས་པ། ལྟ་ན་སྡུག་པ། ཧ་ཅང་མི་དཀར་བ། ཧ་ཅང་མི་སྔོ་བ། ཉ་ཁར་བ་ལྟར་པགས་པ་འཇམ་པ། ཧ་ཅང་མི་རིང་བ། ཧ་ཅང་མི་ཐུང་བ། བོང་རན་པ། ཧ་ཅང་མི་སྦོམ་པ། ཧ་ཅང་མི་སྐེམ་པ། ཧ་ཅང་མི་ཚོ་བ། ཤ་དྲེ་རན་པ་གང་ཡིན་པ་སྟེ། སྲིང་མོ་དེ་ནི་གྲང་བའི་ཚེ་ལུས་ལ་རེག་ན་དྲོ་བ། ཚ་བའི་ཚེ་ལུས་ལ་རེག་ན་བསིལ་བ། ཡུལ་ཀ་ལིང་ཀའི་གོས་ལྟར་རེག་ན་འཇམ་པའོ། །སྲིང་མོ་དེའི་བ་སྤུའི་བུ་ག་ཐམས་ཅད་ནས་ནི་ཙན་དན་གྱི་དྲི་འབྱུང་ངོ་། །ཁ་ནས་ནི་ཨུཏྤ་ལ་སྔོན་པོའི་དྲི་འབྱུང་ངོ་། །ཇི་སྲིད་ཀྱིས་ཚེ་དང་ལྡན་པ་ཀུན་དགའ་བོས་བཙུན་མོ་རིན་པོ་ཆེའི་བར་དུ་བཤད་པ་དེ་སྲིད་ཀྱིས་བུ་མོ་དེས་ཀྱང་ནས་ཀྱི་བྱ་བ་ཟིན་ནས། དེས་རྐང་པ་གཉིས་ལ་གཏུགས་ཏེ་སྨོན་ལམ་གདབ་པར་བརྩམས་པ། འཕགས་པ་དགེ་བའི་རྩ་བ་འདིས་བདག་འཁོར་ལོས་སྒྱུར་བའི་བཙུན་མོ་རིན་པོ་ཆེར་གྱུར་ཅིག །

དེ་ནས་ཚེ་དང་ལྡན་པ་ཀུན་དགའ་བོས་ནས་བྱི་དོར་བྱས་པ་ཁྱེར་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཕུལ་ལོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པ་ཡིན་པས། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ནས་འདི་སུ་ཞིག་གིས་བྱི་དོར་བྱས། བཙུན་པ་བྲམ་ཟེའི་བུ་མོ་ཆེ་གེ་མོ་ཞིག་གིས་བགྱིས་ལགས་སོ། །ཀུན་དགའ་བོ་ཁྱོད་བྲམ་ཟེའི་བུ་མོ་དེ་དང་ལྷན་ཅིག་སྐབས་ཀྱི་གཏམ་དག་བྱས་སམ། བཅོམ་ལྡན་འདས་བགྱིས་ལགས་སོ། །ཀུན་དགའ་བོ་དེས་ན་ཁྱོད་བྲམ་ཟེའི་བུ་མོ་དེ་དང་ལྷན་ཅིག་སྐབས་ཀྱི་གཏམ་ཇི་སྙེད་བྱས་པ་དེ་དག་ཐམས་ཅད་ང་ལ་རྒྱས་པར་གསོལ་ཅིག །དེ་ནས་ཚེ་དང་ལྡན་པ་ཀུན་དགའ་བོས་བྲམ་ཟེའི་བུ་མོ་དང་ལྷན་ཅིག་སྐབས་ཀྱི་གཏམ་ཇི་སྙེད་བྱས་པ་དེ་དག་ཐམས་ཅད་བཅོམ་ལྡན་འདས་ལ་རྒྱས་པར་གསོལ་ཏོ། །

དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་ཅིའི་ཕྱིར་བུ་མོ་དེ་ལ་སངས་རྒྱས་ཀྱི་བསྔགས་པ་མ་བརྗོད། བཙུན་པ་བདག་གིས་འདི་སྙམ་དུ་སངས་རྒྱས་ཀྱི་ཆོས་ནི་ཟབ་པ་ལགས་པས་བུ་མོ་འདིས་རྟོགས་པར་མི་འགྱུར་བ་གང་ལགས་པའི་གནས་དེ་མཆིས་སོ་སྙམ་དུ་བསམས་ནས། དེའི་སླད་དུ་བདག་གིས་དེ་ལ་འཁོར་ལོས་སྒྱུར་བའི་བསྔགས་པ་བརྗོད་ལགས་སོ། །ཀུན་དགའ་བོ་ཁྱོད་ཀྱིས་མ་ལེགས་པ་ཞིག་བྱས་ཏེ། ཁྱོད་ཀྱིས་གལ་ཏེ་དེ་ལ་སངས་རྒྱས་ཀྱི་བསྔགས་པ་བརྗོད་པ་བྱས་ན། དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་སེམས་བསྐྱེད་པར་འགྱུར་བ་གང་ཡིན་པའི་གནས་དེ་ཡོད་པ་ཞིག །ཀུན་དགའ་བོ་འོན་ཀྱང་བུ་མོ་དེ་འཁོར་ལོས་སྒྱུར་བའི་རྒྱལ་པོའི་བཙུན་མོ་རིན་པོ་ཆེར་འགྱུར་རོ། །

ཀུན་ཏུ་བྲམ་ཟེའི་བུ་མོ་ཆེ་གེ་མོ་ཞིག་བཅོམ་ལྡན་འདས་ཀྱི་དོན་དུ་ནས་བྱི་དོར་བྱས་པས་བཅོམ་ལྡན་འདས་ཀྱིས་དེ་འཁོར་ལོས་སྒྱུར་བའི་རྒྱལ་པོའི་བཙུན་མོ་རིན་པོ་ཆེར་ལུང་བསྟན་ཏོ་ཞེས་སྒྲ་གྲགས་པ་དག་བུ་མོ་ལྔ་བརྒྱར་གཉིས་ཀྱིས་མ་ཚང་བ་ཞིག་གིས་ཐོས་ནས། དགེ་སློང་ལྔ་བརྒྱར་དགེ་སློང་གཉིས་ཀྱིས་མ་ཚང་བ་རྣམས་ཀྱི་ནས་བྱི་དོར་བྱས་ཏེ། དེ་རྣམས་ཀྱིས་ཀྱང་སྨོན་ལམ་བཏབ་པ། བདག་ཅག་དེའི་འཁོར་དུ་གྱུར་ཅིག །ཅེས་བྱས་སོ།། །།

རྒྱལ་པོ་གསལ་རྒྱལ་གྱི་བཙུན་མོ་གཟུགས་མཛེས་པའི་མཆོག་དབྱར་ཚུལ་མ་དང་རེག་བྱ་འཇམ་པའི་མཆོག་ཕྲེང་ལྡན་མ་གཉིས་ཀྱི་ལོ་རྒྱུས། འདུལ་བ་ལུང་ཕྲན་ཚེགས་ལས་བཏུས།

སངས་རྒྱས་བཅོམ་ལྡན་འདས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེའི་ཚེ་ཤཱཀྱ་མིང་ཆེན་གྱི་ཁྱིམ་གྱི་ཞལ་ཏ་བ་དུས་ལས་འདས་པ་དང་། རི་བྲགས་ན་གནས་པའི་སྐྱེ་བོའི་ཚོགས་དག་ཤཱཀྱ་མིང་ཆེན་ག་ལ་བ་དེར་སོང་སྟེ་སྨྲས་པ། རྗེ་ཁྱོད་ཀྱི་ཁབ་ཀྱི་ཞལ་ཏ་བ་གུམ་ན། ཞལ་ཏ་བ་གཞན་ཞིག་བསྐོར་གསོལ། དེས་དེའི་དྲུང་ན་བྲམ་ཟེའི་ཁྱེའུ་ཞིག་འདུག་པ་དེ་ལ་སྨྲས་པ། བྲམ་ཟེའི་ཁྱེའུ་རེ་ཞིག་ཁྱོད་སོང་ཞིག །ཇི་ཙམ་ན་ཞལ་ཏ༌བ་གཞན་ཞིག་བཏང་ངོ་། །

དེ་སོང་ནས་དེས་ཆོས་བཞིན་དུ་རིགས་པར་སྤྱད་པས་དཔྱ་ནར་མ་དང་། བླ་སྐྱེས་རབ་ཏུ་མང་པོར་ཕུལ་བ་དང་། ཤཱཀྱ་མིང་ཆེན་གྱིས་སྨྲས་པ། བྲམ་ཟེའི་ཁྱེའུ་དཔྱ་ནར་མ་དང་བླ་སྐྱེས་འདི་ལྟར་མང་བ་ཁྱོད་ཀྱིས་སྐྱེ་བོའི་ཚོགས་ལ་གནོད་པར་མ་བྱས་གྲང་། དེས་སྨྲས་པ། རྗེ་དཔྱ་ནར་མ་དང་བླ་སྐྱེས་འདི་རིགས་པས་མཆིས་པ་ལགས་ཏེ། བདག་གིས་སྐྱེ་བོའི་ཚོགས་ལ་གནོད་པ་བགྱིས་པ་མ་ལགས་སོ། །དེས་རི་བྲགས་ན་གནས་པའི་སྐྱེ་བོའི་ཚོགས་དེ་ལ་སྨྲས་པ། ཤེས་ལྡན་དག་བྲམ་ཟེའི་ཁྱེའུ་འདིས་ཁྱེད་འགའ་ལ་གནོད་པ༌མི་བྱེད་གྲང་། རྗེ་དཔྱ་ནར་མ་དང་བླ་སྐྱེས་འདི་རིགས་པས་མཆིས་པ་ལགས་ཏེ། འདིས་འགའ་ལ་ཡང་གནོད་པ་མ་བགྱིས་སོ་ཞེས་སྨྲས་པ་དང་། དེས་དེ་རི༌བྲགས་ཀྱི་ཞལ་ཏ་བར་བཅུག་གོ །འཇིན་རྟེན་ནི་འབྱོར་པ་འདོད་ཅིང་རྒུད་པ་དང་མི་མཐུན་པ་ཡིན་པས། དེ་ལ་བྲམ་ཟེ་གཞན་ཞིག་གིས་བུ་མོ་བྱིན་པ་དང་། དེས་དེ་ཉི་མ་དང་། ཚེས་གྲངས་དང་། ཡུད་ཙམ་དང་སྦྱར་ནས་བག་མར་བླངས་སོ། །དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་ཁྱེའུ་ཞིག་བཙས་ཏེ། དེ་བཙས་པའི་བཙས་སྟོན་རྒྱ་ཆེར་བྱས་ནས་རིགས་དང་མཐུན་པའི་མིང་ཡང་བཏགས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་ཞིག་བཙས་ཏེ། དེའི་བཙས་སྟོན་ཡང་རྒྱ་ཆེར་བྱས་ནས་མིང་ཟླ་བ་ཞེས་བྱ་བར་བཏགས་སོ། །དེ་བསྐྱེད་བསྲིངས་ཏེ་ཆེན་མོར་གྱུར་པ་དང་། དེ་མཁས་ཤིང་སྤྱོད་ལམ་དང་འགྲོ་འདུག་འོ་གཟེ་བས་རི་བྲགས་ན་གནས་པའི་སྐྱེ་བོའི་ཚོགས་ཐམས་ཅད་ཀྱི་ཡིད་དུ་འོང་བར་གྱུར་ཏོ། །

ཇི་ཙམ་དུས་གཞན་ཞིག་ན་བྲམ་ཟེའི་ཁྱེའུ་དེ་ན་བར་གྱུར་ནས་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་གྱིས་རིམ་གྲོ་བྱས་ཀྱང་ནད་དེ་ཞི་བར་མ་གྱུར་ནས། རི་བྲགས་པ་དེས་དཔྱ་ནར་མ་དང་། བླ་སྐྱེས་ཕུལ་བ་གང་ཡིན་པ་དེ་དག་ཐམས་ཅད་སྤྱད་ཅིང་སྐྱིན་པོ་གཞན་དག་བླངས་ནས། འོན་ཀྱང་སོས་པར་མ་གྱུར་ནས་དེ་དེ་ཉིད་དུ་དུས་ལས་འདས་སོ། །རི་བྲག་ན་གནས་པའི་སྐྱེ་བོའི་ཚོགས་དག་ཤཱཀྱ་མིང་ཆེན་ག་ལ་བ་དེར་འོངས་ཏེ་སྨྲས་པ། རྗེ་ཞལ་ཏ་བ་དེ་ནི་གུམ་ལགས་སོ། །དེས་སྨྲས་པ། ཤེས་ལྡན་དག་དེ་ན་དཔྱ་ནར་མ་དང་བླ་སྐྱེས་སུ་ཕུལ་བ་ཡོད་དམ། རྗེ་ཏེ་པོར་མང་དུ་ཕུལ་མོད་ཀྱི་དེས་བྲོ་འཚལ་བའི་ཡོ་བྱད་དུ་སྤྱད་ན་འོན་ཀྱང་སོས་པར་མ་གྱུར་ནས་སྐྱིན་པོ་གཞན་དག་ཀྱང་བགྱིས་སོ། །ངེད་ལ་དེ་ན་ལྷག་མ་ཅུང་ཟད་ཅི་ཡོད་པ་དེས་བུ་ལོན་སོབས་ཤིག །རྗེ་དེ་ན་ཅུང་ཟད་ཀྱང་མ་མཆིས་ཏེ། ལུས་པར་བཏབ་ན་དེའི་མཆིས་འབྲང་དང་། བུ་ཕོ་དང་བུ་མོ་མཆིས་ཏེ། དེའི་བུ་མོ་དེ་མཁས་ཤིང་སྤྱོད་ལམ་དང་འགྲོ་འདུག་འོ་གཟེ་བ་ལགས་པས་རི་བྲགས་ན་གནས་པའི་སྐྱེ་བོའི་ཚོགས་ཐམས་ཅད་ཀྱི་ཡིད་དུ་མཆི་བར་གྱུར་ཏོ། །མིང་ཆེན་གྱིས་སྨྲས་པ། ཤེས་ལྡན་དག་དེའི་ཆུང་མ་དང་བུ་ཕོ་དག་ཅི་དགར་ཐོང་ལ་བུ་མོ་དེ་འདིར་ཁུག་ཅིག །དེ་རྣམས་ཀྱིས་དེའི་ཆུང་མ་དང་བུ་ཕོ་དེ་དག་ཅི་དགར་བཏང་ནས་བུ་མོ་དེ་མིང་ཆེན་གྱི་གན་དུ་ཁྲིད་དོ། །

ཤཱཀྱ་མིང་ཆེན་གྱི་ཆུང་མ་རྒན་མོ་གཅིག་ཁ་ཟས་གཡོ་བ་དང་། མེ་ཏོག་ཐུ་བའི་ལས་རྣམ་གཉིས་བྱེད་པ་དེས་སྨྲས་པ། ཇོ་བོ་ད་ནི་བདག་ཤིན་དུ་རྒས་པས་སུག་ལས་རྣམ་གཉིས་བགྱིད་རྔོ་མི་ཐོག་ན། ཟླ་བ་འདི་བདག་གི་དན་གྲོགས་སུ་བསྐོར་གསོལ། དེས་དེ་དན་གྲོགས་སུ་བསྐོས་སོ། །དེ་ལ་དེས་སྨྲས་པ། ཟླ་བ་ཁྱོད་ནི་ཀུན་དགའ་བར་སོང་ལ་མེ་ཏོག་ཐུས་ཤིག །ངས་ནི་ཁ་ཟས་གཡོའོ། །དེ་ཀུན་དགའི་ར་བར་སོང་ནས་མེ་ཏོག་བཏུས་ཏེ་དེ་ནས་ཕྲེང་བ་ལེགས་པར་བརྒྱུས་ནས་མིང་ཆེན་གྱི་གན་དུ་སོང༌བ་དང་། དེ་མཐོང་ནས་ཡོངས་སུ་དགའ་སྟེ་སྨྲས་པ། ལེགས་སོ་ཞོག༌ཅིག་ཅེས་སྨྲས་ནས་ཆུང་མ་རྒན་མོ་དེ་ལ་འདི་སྐད་ཅེས་སྨྲས་སོ། །ཅིའི་ཕྱིར་སྔོན་ནི་མེ་ཏོག་ཉུང་ལ་དེ་རིང་མང་བར་གྱུར། དེས་སྨྲས་པ། སྔོན་ནི་ཁྱོད་ཀྱི་གཉེན་དག་མཆིས་ནས་བདག་ལ་སློང་བ་ན་བདག་གིས་དེ་དག་ལ་སྩལ༌པ། འདིས་ནི་སུ་ལ་ཡང་མ་སྩལ་བ་དང་བདག་ནི་རྒས་པས་མིག་རྟུལ་ལ། འདི་ནི་མིག་རྣོ་བས་ཐུ་མཁས་པ་ལས་གྱུར་ཏོ། །དེས་སྨྲས་པ། གལ་ཏེ་དེ་ལྟ་ན་དེ་ཀུན༌དགའ་ར་བར་ཐོང་ལ་དེར་ཞོག་ཅིག །དེས་དེ་ཀུན་དགའི་ར་བ་དེ་ཉིད་དུ་བཞག་པ་དང་། དེ་མེ་ཏོག་གི་ཕྲེང་བ་བཟང་པོ་རྒྱུད་པར་བྱེད་པས་དེའི་མིང༌ཕྲེང་ལྡན་མ་ཕྲེང་ལྡན་མ་ཞེས་བྱ་བར་གྲགས་སོ། །དུས་གཞན༌ཞིག་ན་དེ་ཁྱིམ་ནས་རང་གི་ཟན་བླངས་ཏེ་ཀུན་དགའ་ར་བར་སོང་བ་དང་། བཅོམ་ལྡན་འདས་ཀྱང་བསོད་སྙོམས་ལ་གཤེགས་སོ། །

དེས་བཅོམ་ལྡན་འདས་སྐུ་བལྟ་བས་ཆོག་མི་ཤེས་པ་མཐོང་ནས་ཤིན་ཏུ་བདེ་ཞིང་རབ་ཏུ་དགའ་བས་རྟོག་པར་བྱེད་ཅིང་བསམས་པ། འདི་ལྟ་བུའི་ཡོན་གནས་ཡང་དག་པ་ལ་བདག་གིས་བྱ་བ་མ་བྱས་པས་དེས་ན་བདག་འདི་ལྟ་བུའི་གནས་སྐབས་སུ་གྱུར་པར་གདོན༌མ་ཟོས་སོ། །དེའི་ཕྱིར་གལ་ཏེ་བཅོམ་ལྡན་འདས་ཀྱིས་བདག་ལས་བསོད་སྙོམས་བཞེས་ན། བདག་གིས་བཅོམ་ལྡན་འདས་ལ་འབུལ་ལོ་སྙམ་པ་དང་། སྐབས་དེ་ལྟ་བུ་ལ་སངས་རྒྱས་བཅོམ་ལྡན་འདས་རྣམས་ལ་མི་མཁྱེན་པ་དང་། མི་གཟིགས་པ་དང་། མི་རིག་པ་དང་། རྣམ་པར་མི་མཁྱེན་པ་ཅི་ཡང་མི་མངའ་བས་སངས་རྒྱས་བཅོམ་ལྡན་འདས་རྣམས་ནི་ཆོས་ཉིད་ཀྱིས་ཞེས་བྱ་བ་ནས། ལུས་ཅན་རྣམས་ལ་འབྲས་བུར་སྨིན་ཅེས་བྱ་བའི་བར་སྔ་མ་བཞིན་ནོ། །

དེ་ནས་བཅོམ་ལྡན་འདས་ཀྱིས་དེ་རྗེས་སུ་གཟུང་བའི་ཕྱིར་ལྷུང་བཟེད་བཟེད་དེ་སྲིང་མོ་ཁྱོད་ཀྱིས་གལ་ཏེ་ཡོངས་སུ་བཏང་ན་ལྷུང་བཟེད་འདིར་བྱིན་ཅིག་ཅེས་བཀའ་སྩལ་པ་དང་། དེས་ཤིན་ཏུ་དད་པས་བཅོམ་ལྡན་འདས་ལ་བསོད་སྙོམས་དེ་ཕུལ་ནས་ཞབས་གཉིས་ལ་ཕྱག་འཚལ་ཏེ་སྨོན་ལམ་བཏབ་པ། བདག་གི་དགེ་བའི་རྩ་བ་འདིས་བྲན་མོ་དང་དབུལ་པོར་མི་འགྱུར་བར་ཤོག་ཅིག །ཇི་ཙམ་ན་དེའི་ཕའི་གྲོགས་པོ་བྲམ་ཟེ་མཚན་མཁན་ཞིག་ཡོད་པ་དེས་དེ་མཐོང་ནས་སྨྲས་པ། བུ་མོ་ཁྱོད་ག་ལས་འོངས། རི་བྲགས་དེ་ཁོ་ན་ནས་སོ། །སུ་ལ་གནས་ཤིང་འདུག་དེས་སྨྲས་པ། གང་ན༌སྐལ་བ་ཆུང་ངུ་གནས་པ་ན་སྟེ། བདག་མིང་ཆེན༌གྱི་བྲན་མོ་བགྱིས་སོ། །ཁྱོད་ཀྱི་ཕ་དེ་གར་སོང་། གུམ་མོ། །མ་དང་མིང་པོ་དེ་དག་གར་དོང་། གར་མཆིས་མ་འཚལ་ཏོ། །ཟླ་བ་ཁྱོད་བྲན་མོའི་འོས་མ་ཡིན་ན་ལག་པ་རྐྱོངས་ཤིག་དང་བལྟའོ། །དེས་ལག་པ་བརྐྱང་བ་དང་། དེས་བལྟས་ནས་ཚིགས་སུ་བཅད་དེ་སྨྲས་པ། གང་གི་ལག་པའི་མཐིལ་དག་ལ། །ལྕགས་ཀྱི་འཁོར་ལོའི་མཚན་ཡོད་པ། །བྲན་གྱི་རིགས་སུ་སྐྱེས་གྱུར་ཀྱང་། །རྒྱལ་པོའི་བཙུན་མོར་བཞེས་པར་འགྱུར། །གང་གི་བཞིན་ནི་རྒྱས་པ་དང་། །ངང་པའི་རྒྱལ་པོའི་གདངས་འདྲ་བ། །བྲན་གྱི་རིགས་སུ་སྐྱེས་གྱུར་ཀྱང་། །རྒྱལ་པོའི་བཙུན་མོར་བཞེས་པར་འགྱུར། །གང་གི་རྐང་པའི་མཐིལ་དག་ལ། །གྲོང་ཁྱེར་ཅོག་དང་རྟ་བབས་བཅས། །བྲན་གྱི་རིགས་སུ་སྐྱེས་གྱུར་ཀྱང་། །རྒྱལ་པོའི་བཙུན་མོར་བཞེས་པར་འགྱུར། །ཁྱོད་མི་དགར་མ་བྱེད་པར་སོང་ཞིག་དང་། ཁྱོད་བྲན་མོར་མི་འགྱུར་གྱི་ཁྱོད་རྒྱལ་པོའི་བཙུན་མོར་འགྱུར་རོ། །

དེ་གནས་དེ་ནས་སྐྱེད་མོས་ཚལ་དུ་སོང་བ་དང་། ཡུལ་ཀོ་ས་ལའི་རྒྱལ་པོ་གསལ་རྒྱལ་རི་དྭགས་ཤོར་དུ༌ཆས་པ་རྟས་ཁ་ཁྱེར་ཏེ། གཅིག་པུ་སེར་སྐྱའི་གནས་སུ་ཕྱིན་ཏོ། །དེ་ཕན༌ཚུན་འཁྱམ་པ་ལས་མིང་ཆེན་གྱི་ཀུན་དགའ་ར་བར་སོང་ནས། དེས་བུ་མོ་དེ་ལ་དྲིས་པ། བུ་མོ་འདི་སུའི་ཀུན་དགའ་ར་བ་ཡིན། དེས་སྨྲས་པ། ལྷ་ཤཱཀྱ་མིང་ཆེན་གྱི་ལགས་སོ། །དེ་རྟ་ལས་བབས་ཏེ་སྨྲས་པ། བུ་མོ་རྐང་པ༌བཀྲུས་ཆུ་ལོངས་ཤིག །དེ་ཤིན་དུ་མྱུར་བར་རྫིང་བུར་སོང་སྟེ་ཉི་མའི་འོད་ཟེར་གྱིས་བསྲོས་པའི་ཆུ་བླངས་པ་དང་། དེས་རྐང་པ་བཀྲུས་ནས་ཡུད་ཙམ་ཞིག་བསྡད་དེ་སྨྲས་པ། བུ་མོ་གདོང་བཀྲུས་ཆུ་ལོངས་ཤིག །དེས་ཆུའི་སྟེང་རིམ་ལག་པས་བསལ་ཏེ། ཆུ་ཧ་ཅང་དྲོ་བ་ཡང་མ་ཡིན་ཧ་ཅང་གྲང་བ་ཡང་མ་ཡིན་པ་བླངས་ནས་དེས་གདོང་བཀྲུས་སོ། །དེས་ཡང་སྨྲས་པ། བུ་མོ་བཏུང་དགོས༌ཀྱིས་ཆུ་ལོངས་ཤིག །དེས་ཆུ་རྣམ་པར་གློངས་ཏེ་ཆུ༌བསིལ་བའི་ལོ་མའི་སྣོད་དུ་བླངས་པ་རྒྱལ་པོས་འཐུངས་ནས་སྨྲས་པ། བུ་མོ་ཀུན་དགའ་ར་བ་འདི་ན་རྫིང་བུ་གསུམ་ཡོད་དམ་ཅི་ན། ཁྱོད་ཀྱིས་ཆུ་རྣམ་པ་གསུམ་ཁྱེར་ཏེ་འོངས། དེས་སྨྲས་པ། ལྷ་འདི་ན་རྫིང་བུ་གཅིག་ཁོ་ན་མཆིས་ཀྱི། གསུམ་ནི་མ་མཆིས་སོ། །དེས་སྨྲས་པ། འོ་ན་ཁྱོད་ཀྱིས་ཆུ་རྣམ་པ་གསུམ་ག་ལས་ཁྱེར་ཏེ་འོངས། དེས་ཇི་ལྟར་གྱུར་པ་བརྗོད་པ་དང་། རྒྱལ་པོས་སྨྲས་པ། དེས་ནི་གོའོ་འདི་དྲི་བར་བྱ་སྟེ། ཅིའི་ཕྱིར་ཁྱོད་ཀྱི་ཆུ་རྣམ་པ་གསུམ་ཁྱེར་ཏེ་འོངས། དེས་སྨྲས་པ། ལྷ་བདག་གིས་དང་པོར་ཆབ་དྲོན་པོ་འཚལ་ཏེ་མཆིས་པ་ནི་ལྷ་མཉེལ་བསོས་པར་བགྱི༌བའི་སླད་དུའོ། །

སླད་ཀྱིས་ཧ་ཅང་དྲོ་བ་ཡང་མ་ལགས། ཧ་ཅང་གྲང་བ་ཡང་མ་ལགས་པ་འཚལ་ཏེ་མཆིས་པ་ནི་དྲོ་བ་དང་གྲང་བ་གང་ལགས་པ་དག་སྤྱན་ལ་གནོད་པའི་སླད་དུའོ། །རྣམ་པར་གློངས་ནས་ཤིན་ཏུ་བསིལ་བ་འཚལ་ཏེ་མཆིས་པ་ནི་ལྷ་སྐྱེམས་པ་དང་བྲལ་བར་བགྱི་བའི་སླད་དུའོ། །དེས་བསམས་པ། བུ་མོ་འདི་ནི་མཁས་པ་ཡིན་ནོ་སྙམ་དུ་རིག་ནས་སྨྲས་པ། བུ་མོ་མཛངས་ཤིང་མཁས་པ་ཁྱོད་རྐང་པ་མཉེ་དགོས༌ཀྱིས་རེ་ཞིག་མལ་ཆོས་ཤིག །དེས་དེའི་རྐང་པ་མཉེས་པ་དང་། དེ་རེག་བྱ་དང་ལྡན་པ་ཡིན་པས་མཉེས་མ་ཐག་ཉིད་དུ་དེ་གཉིད་ལོག་གོ །དེ་གཉིད་ལོག་པ་དང་། དེས་བསམས་པ། རྒྱལ་པོ་འདི་དག་ལ་ནི་དགྲ་མང་བས་གལ་ཏེ་འདི་གཉིད་ལོག་པ་ལ་འགའ་ཞིག་གིས་གནོད་པ་བྱེད་ན་ངེས་པར་བདག་གི་རྗེ་བོ་ལ་གྲགས་པ་མ་ཡིན་པར་འགྱུར་བས་སྒོ་གཅད་པར་བྱའོ་སྙམ་ནས། དེ་སྒོ་བཅད་དེ་འདུག་པ་དང་། ཇི་ཙམ་ན་གཅིག་ནས་གཅིག་ཏུ་ཐོས་ཏེ་དཔུང་གི་ཚོགས་ཡན་ལག་བཞི་པ་དག་སྐྱེད་མོས་ཚལ་དེར་ལྷགས་ནས་དེ་རྣམས་སྒོ་ཕྱེ་ཞེས་ཟེར་རོ། །དེས་སྒོ་མ་ཕྱེ་བ་དང་། རྒྱལ་པོ་ཀུ་ཅོའི་སྒྲས་སད་ནས་སྨྲས་པ། བུ་མོ་དེ་ཅི་ཞིག །དེས་སྨྲས་པ། ལྷ་མི་དག་ཅིག་ཆབ་སྒོ་ཕྱེ་ཞེས་མཆི་ཞིང་། ལྷའི་མཚན་ཡང་སྨོས་སོ། །

དེས་སྨྲས་པ། བུ་མོ་སྒོ་འདི་སུས་བཅད། ལྷ་བདག་གིས་བཀུམ་མོ། །ཅིའི་ཕྱིར་བཅད། ལྷ་བདག་གིས་གློ་བ་ལ་རྒྱལ་པོ་འདི་དག་ལ་ནི་དགྲ་མང་བས་གལ་ཏེ་འདི་མནལ་ལོག་པ་ལ་འགའ་ཞིག་གིས་གནོད་པ་བགྱིས་ན་ངེས་པར་བདག་གི་རྗེ་བོ་ལ་གྲགས་པ་མ་ལགས་པར་འགྱུར་རོ་སྙམ་ནས། དེའི་སླད་དུ་བདག་གིས་ཆབ་སྒོ་བཀུམ་མོ། །དེས་སྨྲས་པ། བུ་མོ་མཛངས་མ་ཁྱོད་ལ་ངའི་ཐེ་ཚོམ་འདི་དྲི་བར་བྱ་སྟེ། རེ་ཞིག་ཁྱོད་མིང་ཆེན་གྱི༌ཅིར་འོང་སྨྲོས་ཤིག །

དེས་སྨྲས་པ། བདག་དེའི་མངག་གཞུག་བགྱིད་པའི་བྲན་མོ་ལགས་སོ་ཁྱོད་དེའི་མངག་གཞུག་བྱེད་པའི་བྲན་མོ་མ་ཡིན་གྱི། ཁྱོད་ངེས་པར་དེའི་བུ་མོ༌ཡིན་གྱིས་དྲང་པོར་སྨོས་ཤིག །དེ་ཅང་མི༌སྨྲ་བར་འདུག་པ་དང་། རྒྱལ་པོས་སྨྲས་པ། བུ་མོ་ཁྱོད་མིང་ཆེན་གྱི་གན་དུ་སོང་ལ། རྒྱལ་པོ་གསལ་རྒྱལ་ཁྱོད་ཀྱི་ཀུན་དགའ་ར་བ་ན་བཞུགས་སོ་ཞེས་བྱོས་ཤིག །དེ་མྱུར་བ་མྱུར་བར་སོང་སྟེ། ཇོ་བོ་ཀོ་ས་ལའི་རྒྱལ་པོ་གསལ་རྒྱལ་ཁྱོད་ཀྱི་ཀུན་དགའ་ར་བ་ན་བཞུགས་སོ་ཞེས་སྨྲས་སོ། །ཤཱཀྱ་མིང་ཆེན་གྱིས་ཐོས་ནས་བཟའ་བ་དང་། བཏུང་བ་དང་། དྲི་དང་ཕྲེང་བ་དག་བཤམས་ནས། སྐྱེ་བོ་ཕལ་པོ་ཆེས་བསྐོར་ཏེ་ཀུན་དགའ་ར་བར་སོང་ངོ་། །དེ་ནས་གཅིག་ལ་གཅིག་བྱོན་པ་ལེགས་སོ་ཞེས་བྱ་བའི་ཚིག་གིས་ཀུན་ཏུ་སྤྱད་པས་སོ་སོ་ཡང་དག་པར་དགའ་བར་བྱས་ནས། རྒྱལ་པོ་ཁྲུས་བྱས་ཤིང་ཟན་ཟོས་ནས་གཏམ་དག་བྱས་ཏེ་ཡུད་ཙམ་ཞིག་བསྡད་ནས་སྨྲས་པ། མིང་ཆེན་བུ་མོ་འདི་ཁྱོད་ཀྱི་ཅིར་འོང་། ལྷ་མངག་གཞུག་བགྱིད་པའི་བྲན་མོ་ལགས་སོ། །འདི་ཁྱོད་ཀྱི་མངག་གཞུག་བྱེད་པའི་བྲན་མོ་མ་ཡིན་གྱི། འདི་ཁྱོད་ཀྱི་བུ་མོ་ཡིན་གྱིས་ང་ལ་བྱིན་ཅིག །དེས་སྨྲས་པ། ལྷ་ཤཱཀྱའི་བུ་མོ་གཞན་འདི་བས་ཆེས་ཁྱད་པར་འཕགས་པ་དག་མཆིས་ན་དེ་དག་བཞེས་སུ་གསོལ། འདི་ཅིར་འཚལ། རྒྱལ་པོས་སྨྲས་པ། འདི་ཉིད་ང་ལ་དགོས་ཀྱིས། འདི་ང་ལ་བྱིན་ཅིག །དེས་སྨྲས་པ། ལྷ་གལ་ཏེ་དེ་ལྟ་ན་ཚུལ་བཞིན་བགྱིས་ཏེ་འབུལ་ལོ། །དེ་བཞིན་བྱོས་ཤིག །དེ་ནས་ཤཱཀྱ་མིང་ཆེན་གྱིས་གྲོང་ཁྱེར་མཛེས་པར་བྱེད་དུ་བཅུག་སྟེ། བུ་མོ་དེ་རྒྱན་ཐམས་ཅད་ཀྱིས་བཀླུབས་ནས་གླང་པོ་ཆེ་ལ་བསྐྱོན་ཏེ་ལམ་པོ་ཆེ་དང་། སྲང་དང་། ལམ་གྱི་སུམ་མདོ་དང་། བཞི་མདོ་དག་ཏུ་གྲོང་ཁྱེར་སེར་སྐྱའི་གནས་ན་འཁོད་པ་དང་། ཡུལ་སྣ་ཚོགས་ནས་ལྷགས་པའི་སྐྱེ་བོའི་ཚོགས་ལ་ཤེས་ལྡན་དག་ཉོན་ཅིག་ཤཱཀྱ་མིང་ཆེན་གྱི་བུ་མོ་ཕྲེང་ལྡན་མ་ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོར་ཕུལ་ལོ་ཞེས་དྲིལ༌བསྒྲགས་པ་བྱས་སོ། །

དེ་ནས་དེ་ཀོ་ས་ལའི་རྒྱལ་པོ་གསལ་རྒྱལ་གྱི་བཙུན་མོར་ཕུལ་བར་སྐྱེ་བོ་ཕལ་པོ་ཆེ་རྣམས་ཀྱིས་ཀྱང་ཤེས་སོ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་དཔལ་གྱི་འབྱོར་པ་ཆེན་པོས་བླངས་ནས་མཉན་ཡོད་དུ་ཁྲིད་པ་དང་། དེའི་མས་བདག་གི་བུས་བྲན་མོ་ཆུང་མར་བླངས་སོ་ཞེས་ཐོས་ཏེ། དེ་ཀུན་ནས་དཀྲིས་པ་སྐྱེས་ནས་བསམས་པ། འདི་ནི་ངེས་པར་ཕ་དེའི་བུ་མ་ཡིན་པའམ། བདག་གི་ཁོང་དུ་དོན་མེད་པ་ཞིག་བསྲེལ་ཏེ། འདི་ལྟར་བྲན་མོའི་ཁྱོར་སྐྱེས་པར་གྱུར་ཏོ་སྙམ་ནས། དེ་ཡང་སེམས་ཁོང་དུ་ཆུད་ཅིང་འདུག་པ་དང་། རྒྱལ་པོས་ཀྱང་ཕྲེང་ལྡན་མ་ལ་སྨྲས་པ། ཕྲེང་ལྡན་མ་སོང་ལ་སྒྱུག་མོའི་ཞབས་ལ་ཕྱག་བྱོས་ཤིག །དེ་སོང་སྟེ་དེའི་རྐང་པ་གཉིས་ལ་བཟུང་བ་དང་། དེ་རེག་བྱ་དང་ལྡན་པ་ཡིན་པས་དེས་རེག་པ་ཙམ་གྱིས་དེ་གཉིད་ལོག་སྟེ་སད་ནས་བསམས་པ། བུ་ཟན་མའི་བུ་མོ་འདིའི་རེག་པ་འདི་འདྲ་བས་ཀོ་ས་ལའི་རིགས་འདི་རྒྱས་པར་འགྱུར་རོ་སྙམ་མོ། །

དེའི་ཚེ་ཀོ་ས་ལའི་རྒྱལ་པོ་གསལ་རྒྱལ་ལ་བཙུན་མོ་དམ་པ་རྒྱལ་རིགས་དབྱར་ཚུལ་མ་དང་། ཕྲེང་ལྡན་མ་གཉིས་ཡོད་དེ། གང་གི་ཚེ་རྒྱལ་པོ་ཕྲེང་ལྡན་མ་དང་ཐབས་ཅིག་ཏུ་བཞུགས་པ་དེའི་ཚེ། ཕྲེང་ལྡན་མ་རྒྱལ་རིགས་དབྱར་ཚུལ་མ་ནི་འདི་ལྟ་བུར་ཡང་གཟུགས་བཟང་ངོ་ཞེས་དབྱར་ཚུལ་མའི་བསྔགས་པ་བརྗོད་པ་དང་། དེས་སྨྲས་པ། ལྷ་དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། མ་རིངས་ཤིག་དང་རིང་པོ་མི་ཐོགས་པར་མཐོང་བར་འགྱུར་རོ། །དེ་རེ་བ་དང་བཅས་པས་འདུག་གོ །

གང་གི་ཚེ་རྒྱལ་རིགས་དབྱར་ཚུལ་མ་དང་ཐབས་ཅིག་ཏུ་འདུག་པ་དེའི་ཚེ་ཡང་དབྱར་ཚུལ་མ་ཕྲེང་ལྡན་མ་ནི་དེ་ལྟ་བུའི་རེག་བྱ་དང་ཡང་ལྡན་པ་ཡིན་ནོ་ཞེས་ཕྲེང་ལྡན་མའི་བསྔགས་པ་བརྗོད་པ་དང་། དེས་སྨྲས་པ་ལྷ་དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། མ་རིངས་ཤིག་དང་རིང་པོར་མི་ཐོགས་པར༌མཐོང་བར་འགྱུར་རོ། །དེ་དག་རྒྱལ་པོས་ཇི་ལྟ་ཇི་ལྟར་ཡ་མཚན་བསྐྱེད་པ༌དེ་ལྟ་དེ་ལྟར་ཕན་ཚུན་མཐོང་བར་སྤྲོ་བར་གྱུར་ཏོ། །ཇི་ཙམ་དུས་གཞན་ཞིག་ན་སོ་གའི་དུས་ལ་བབ་སྟེ། ནགས་ཚལ་ན་ཤིང་རྣམས་མེ་ཏོག་རྒྱས་པར་གྱུར་ཅིང་ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཤང་ཤང་ཏེའུ་སྒྲ་འབྱིན་པའི་སྐྱེད་མོས་ཚལ་གྱི་གནས་སུ་རྒྱལ་པོ་བཙུན་མོའི་ཚོགས་ཀྱིས་ཡོངས་སུ་བསྐོར་ཅིང་གཤེགས་སོ། །

བུད་མེད་ནི་མེ་ཏོག་དང་འབྲས་བུ་ལ་དགའ་བ་ཡིན་པས་སྐྱེད་མོས་ཚལ་དེ་དང་དེ་དག་ཏུ་འཁྱམ་པར་བརྩམས་པ་དང་། རྒྱལ་རིགས་དབྱར་ཚུལ་མ་ངལ་བས་སྐྱོ་ཞིང་སྙོམ་པར་གྱུར་ནས་ཤིང་མྱ་ངན་འཚང་ལ་སྙེས་ཏེ་འདུག་པ་དང་། ཇི་ཙམ་ན་ཕྲེང་ལྡན་མས་མཐོང་ངོ་། །དེ་དེའི་གཟུགས་བཟང་བ་མཐོང་བས་ཤིང་གི་ལྷ་མོ་ཡིན་ནོ་སྙམ་དུ་རིག་ནས། མོད་ལ་རྐང་པ་ལ་ཕྱག་བྱས་པ་དང་། ཕྲེང་ལྡན་མའི་ལག་པས་རེག་མ་ཐག་པ་ཉིད་དུ་གཉིད་ལོག་པར་གྱུར་ཏོ། །

ཇི་ཙམ་ན་རྒྱལ་པོས་དབྱར་ཚུལ་མ་ལ་ཕྲེང་ལྡན་མའི་བསྔགས་པ་བརྗོད་པར་བརྩམས་པ་དང་། དེས་སྨྲས་པ། ལྷ་དེ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། དེ༌ཁྱེད་ཀྱིས་མཐོང་ངོ་། །ལྷ་བདག་མི་དྲན་ནོ། །ངས་ཁྱོད་དྲན་པར་བྱའོ། །ལེགས་སོ། །གང་གི་ལག་པ་གཉིས་ཀྱིས་ཁྱོད་ཀྱི་རྐང་པ་ལ་བཟུང་བ་དེ་དྲན་ནམ། ལྷ་དེ་ལྷ་མོ་ཕྲེང་ལྡན་མ་ལགས་སམ། དེ་ཡིན་ནོ། །ལྷ་གང་ཁྱོད་རེག་བྱ་དང་ལྡན་པའི་བཙུན་མོ་དེ་ལྟ་བུ་སྤངས་ཏེ། བདག་གི་དྲུང་དུ་གཤེགས་པ་དེ་ནི་ཁྱོད་བདག་ལ་ངེས་པར་བྱམས་ཤིང་ཐུགས་གཅུགས་པ་ལགས་སོ། །དེ་བཞིན་དུ་ཕྲེང་ལྡན་མ་ལ་དབྱར་ཚུལ་མ་ནི་འདི་ལྟ་བུ་ཡིན་ནོ་ཞེས་བསྔགས་པ་བརྗོད་པར་བརྩམས་པ་དང་། དེས་སྨྲས་པ། ལྷ་བདག་གིས་ནམ་ཞིག་ན་མཐོང་བར་འགྱུར་ལགས། རྒྱལ་པོས་སྨྲས་པ། དེ་ཁྱོད་ཀྱིས་མཐོང་ངོ་། །ལྷ་བདག་མི་དྲན་ནོ། །ངས་ཁྱོད་དྲན་པར་བྱའོ། །ལེགས་སོ། །ཁྱོད་ཀྱིས་ཤིང་མྱ་ངན་འཚང་ལ་སྙེས་ཏེ་འདུག་པ་གང་ལ་ཕྱག་བྱས་པ་དེ་དྲན་ནམ། ལྷ་ཅི་དེ་དབྱར་ཚུལ་མ་ལགས་སམ། དེ་ཡིན་ནོ། །ལྷ་གང་ཁྱོད་ཀྱིས་བཙུན་མོ་གཟུགས་བཟང་བ་དེ་ལྟ་བུ་སྤངས་ཏེ་བདག་གི་དྲུང་དུ་གཤེགས་པ་དེ་ནི་ཁྱོད་ངེས་པར་བདག་ལ་བྱམས་ཤིང་ཐུགས་གཅུགས་པ་ལགས་སོ། །

སྐབས་དེར་ཀོ་ས་ལའི་རྒྱལ་པོ་གསལ་རྒྱལ་ལ་བཙུན་མོ་དམ་པ་རྒྱལ་རིགས་དབྱར་ཚུལ་མ་དང་། ཕྲེང་ལྡན་མ་གཉིས་ཡོད་དེ། དེ་དག་ལས་གཅིག་ནི་གཟུགས་བཟང་བ་རྣམས་ཀྱི་མཆོག་ཡིན་ལ། ཅིག་ཤོས་ནི་རེག་བྱ་དང་ལྡན་པ་རྣམས་ཀྱི་མཆོག་ཡིན་ནོ་ཞེས་ཕྱོགས་སུ་སྒྲ་གྲགས་པ་དང་། དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པར་མཛད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་མོ་ཕྲེང་ལྡན་མ་དང་། དབྱར་ཚུལ་མས་ལས་ཅི་ཞིག་བགྱིས་ན། ལས་དེའི་རྣམ་པར་སྨིན་པས་གཅིག་ནི་རེག་བྱ་དང་ལྡན་པ་རྣམས་ཀྱི་མཆོག་ཏུ་གྱུར་ལ། ཅིག་ཤོས་ནི་གཟུགས་བཟང་བ་རྣམས་ཀྱི་མཆོག་ཏུ་གྱུར།

བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན་གྱི། འོན་ཀྱང་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི༌ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། བསྐལ་པ་བརྒྱ་ཕྲག་རྣམས་སུ་ཡང་། །ལས་རྣམས་ཆུད་ཟར་མི་འགྱུར་ཏེ། །ཚོགས་ཤིང་དུས་ལ་བབ་པ་ན། །ལུས་ཅན་རྣམས་ལ་འབྲས་བུར་སྨིན། །དགེ་སློང་དག་སྔོན་བྱུང་བ་འདས་པའི་དུས་ན་རི༌བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དེ། དེ་རྩེ་བར་བྱེད། དགའ་བར་བྱེད། དགའ་མགུར་སྤྱད་པས་བུ་ཁྱེའུ་ཞིག་བཙས། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་མོ་ཞིག་བཙས་ཏེ། དེ་དག༌བསྲིངས་ཤིང་བསྐྱེད་ནས་ཆེན་པོར་གྱུར་ཏོ། །

ཇི་ཙམ་དུས་གཞན་ཞིག་ན་བྲམ་ཟེ་དེ་ཆུང་མ་དང་བཅས་ཏེ་ཤི་ནས་བྲམ་ཟེའི་ཁྱེའུ་དེ་ཕ་མ་དང་བྲལ་བས་དབེན་པ་ལ་དགའ་བར་གྱུར་ཏེ། དེ་སྲིང་མོ་དེ་ཁྲིད་དེ་དགོན་པའི་གནས་སུ་སོང་ནས་འཁོད་དེ། དེར་དེ་དག་རྩ་བ་དང་། སྡོང་བུ་དང་། མེ་ཏོག་དང་། འབྲས་བུ་དག་གིས་འཚོ་བར་བརྩམས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྦྲུལ་ནག་པོ་ལ་ནི་ཉེས་དམིགས་རྣམ་པ་ལྔ་ཡོད་དེ། ལྔ་གང་ཞེ་ན། ཁྲོ་བ་དང་། ཁོན་དུ་འཛིན་པ་དང་། འཁུ་བ་དང་། བྱས་པ་མི་གཟོ་བ་དང་། དུག་རྣོ་བའོ། །དེ་བཞིན་དུ་བུད་མེད་ཁ་ཅིག་ལ་ཡང་ཉེས་དམིགས་རྣམ་པ་ལྔ་ཡོད་དེ། ལྔ་གང་ཞེ་ན། ཁྲོ་བ་དང་། ཁོན་དུ་འཛིན་པ་དང་། འཁུ་བ་དང་། བྱས་པ་མི་གཟོ་བ་དང་། དུག་རྣོ་བའོ། །དགེ་སློང་དག་དེ་ལ་བུད་མེད་ཀྱི་དུག་རྣོ་བ་ནི་འདི་ཡིན་ཏེ། འདི་ལྟར་བུད་མེད་ནི་ཕལ་ཆེར་འདོད་ཆགས་ལྷག་པར་ཆེ་བའོ། །དེའི་སྲིང་མོ་དེ་ཉོན་མོངས་པ་དག་གིས་གདུངས་ནས། དེས་སྨྲས་པ། མིང་པོ་བདག་དགོན་པའི་རྩ་བ་དང་། སྡོང་བུ་དང་། མེ་ཏོག་དང་། འབྲས་བུས་འཚོ་བའི་རྔོ་མི༌ཐོག་གིས་གྲོང་མཐར་བཞུད་དོ། །དེས་དེ་ཁྲིད་དེ་གྲོང་མཐར་སོང་སྟེ། དེ་བྲམ་ཟེ་ཞིག་གི་དེར་སློང་མོ་ལ་ཞུགས་སོ། །

དེས་སྲིང་མོ་དང་ལྷན་ཅིག་སློང་མོའི་ཕྱིར་ཅིག་ཅར་སྒྲ་ཕྱུང་བ་བྲམ༌ཟེས་ཐོས་ནས་ཕྱིར་ཕྱུང་ནས་སྨྲས་པ། དྲང་སྲོང་དག་ཀྱང་ཆུང་མ་དང་བཅས་ཏེ་རྒྱུའམ། དེས་སྨྲས་པ། འདི་བདག་གི་ཆུང་མ་མ་ཡིན་གྱི་སྲིང་མོའོ། །འདི་སུ་ལ་བྱིན། སུ་ལ་ཡང་མ་བྱིན་ནོ། །གལ་ཏེ་དེ་ལྟ་ན་ཁོ་བོ་ལ་ཅིའི་ཕྱིར་མི་བྱིན། འདི་ནི་དམ་པ་མ་ཡིན་པ་སྡིག་པའི་ཆོས་དེ་སྤངས་པ་ཡིན་ནོ། །དེ་འདོད་པའི་འདོད་ཆགས་ཀྱིས་གདུངས་པས་སྨྲས་པ། མིང་པོ་ཅི་བདག་དགོན་པའི་རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། འབྲས་བུས་འཚོ་བའི་རྔོ་མི་ཐོག་པ་མེད་སྙམ་མམ། བདག་གིས་ནི་ཉོན་མོངས་པ་སྤང་རྔོ་མ་ཐོག་པའི་སླད་དུ་ཁྱོད་ལ་འདི་སྐད་བགྱིས་ཀྱིས། བདག་བྲམ་ཟེ་འདི་ལ་སྩོལ་ཅིག །དེས་སྨྲས་པ། དེ་ནི་ཆོས་དང་འགལ་བས་ངས་ཁྱོད་སྦྱིན་པར་མི་བྱའི་ཁྱོད་ཉིད་ཤེས་པར་ཟད་དོ། །བྲམ་ཟེ་དེས་དེ་དང་དེའི་བསམ་པ་ཤེས་པ་ནས་འབྱོར་པའི་དཔལ་ཆེན་པོས་དེ་བག་མར་བླངས་ཏེ། རང་གི་ཁྱིམ་དུ་བཅུག་གོ །དེ་ནས་དེའི་མིང་པོ་དེ་ལ་སྨྲས་པ། མིང་པོ་ཚུར་བྱོན་ཁྱོད་ཀྱི་ཁབ་དབུབ་པར་མཛོད་ཅིག་དང་ཐབས་ཅིག་ཏུ་བཞུགས་སོ། །དེས་སྨྲས་པ། སྲིང་མོ་ཁོ་བོ་ནི་འདོད་པ་དོན་དུ་མི་གཉེར་ཏེ། ཁྱོད་ཀྱིས་གནང་ན་རབ་ཏུ་འབྱུང་ངོ་། །དེས་སྨྲས་པ། དམ་ཞིག་བཅའ་སྟེ། གལ་ཏེ་ཁྱོད་སྐབས་སྐབས་སུ་བདག་གཟིགས་ཤིང་བྱོན་ན་གནང་བར་བགྱིའོ། །དེས་སྨྲས་པ། ལེགས་ཏེ་དེ་བཞིན་བྱའོ། །དེ་དེས་གནང་ནས་དྲང་སྲོང་རྣམས་ཀྱི་ནང་དུ་རབ་ཏུ་བྱུང་ངོ་། །

དེ་དགེ་བའི་རྩ་བ་བསྐྱེད་པ་ཡིན་པས་དེས་སློབ་དཔོན་མེད་པར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་མངོན་དུ་བྱས་ཏེ་རང་བྱང་ཆུབ་མངོན་སུམ་དུ་བྱས་ནས་དེས་བསམས་པ། བདག་གིས་སྲིང་མོ་དེ་ལ་འོང་ངོ་ཞེས་དམ་བཅས་པས་དེའི་ཕྱིར་དེའི་གན་དུ་འགྲོ་བར་བྱའོ་སྙམ་ནས། དེ་དེའི་གན་དུ་སོང་ངོ་། །སོང་ནས་འབར་བ་དང་། གསལ་བ་དང་། ཆར་འབབ་པ་དང་། གློག་འབྱུང་བའི་ཆོ་འཕྲུལ་དག་བྱ་བར་བརྩམས་པ་དང་། སོ་སོའི་སྐྱེ་བོ་དག་ནི་རྫུ་འཕྲུལ་ལ་མྱུར་དུ་དད་པ་ཡིན་པས་དེ་ཤིང་དྲུངས་ནས་བཅད་པ་བཞིན་དུ་རྐང་པ་ལ་ཕྱག་འཚལ་ཏེ་སྨྲས་པ། མིང་པོ་ཁྱོད་ཀྱིས་ཡོན་ཏན་གྱི་ཁྱད་པར་འདི་ལྟ་བུ་ཐོབ་བམ། ཐོབ་བོ། །གལ་ཏེ་དེ་ལྟ་ན་ཁྱོད་ནི་བསོད་སྙོམས་དོན་དུ་གཉེར་བ་ལགས། བདག་ཀྱང༌བསོད་ནམས་དོན་དུ་གཉེར་བ་ལགས་པས་དེའི་སླད་དུ་འདི་ཉིད་དུ་བཞུགས་ཤིག་དང་། ཁྱོད་ལ་བདག་གིས་བསོད་སྙོམས་འབུལ་བར་བགྱིའོ། །

དེས་སྨྲས་པ། སྲིང་མོ་ཁྱོད་ནི་གཞན་ལ་རག་ལས་པ་ཡིན་གྱིས། ཁྱིམ་ཐབ་ལ༌ཇེ་དྲིས་ཤིག །ལེགས་ཏེ་དེ་བཞིན་བགྱིའོ། །དེས་ཁྱིམ་ཐབ་ལ་སྨྲས་པ། རྗེའི་སྲས་བདག་གི་མིང་པོ་རབ་ཏུ་བྱུང་བ་བརྟུལ་ཞུགས་གྲུབ་པ་བདག་ཉིད་ཆེན་པོར་གྱུར་ཏེ། གལ་ཏེ་ཁྱོད་ཀྱིས་གནང་ན་བདག་གིས་ཟླ་བ་གསུམ་དུ་བསོད་སྙོམས་ལ་སྤྱན་དྲང་ངོ་། །དེས་སྨྲས་པ། བཟང་མོ་གལ་ཏེ་འདི་རབ་ཏུ་བྱུང་བར་མ་གྱུར་ན་བདག་ཅག་གིས་མི་འདོད་བཞིན་གསོ་དགོས་པར་འགྱུར་ན། ད་རབ་ཏུ་བྱུང་སྟེ་བརྟུལ་ཞུགས་གྲུབ་པ་བདག་ཉིད་ཆེན་པོར་གྱུར་ན་ལྟ་སྨོས་ཀྱང་ཅི་དགོས། སོང་ལ་སྤྱན་དྲོངས་ཤིག །དེས་དེ་ཟླ་བ་གསུམ་དུ་བསོད་སྙོམས་ལ་སྤྱན་དྲངས་སོ། །

བྲམ་ཟེ་དེའི་ཆུང་མ་གཉིས་པ་གཞན་ཞིག་ཡོད་པ་དེས་བསམས་པ། བདག་ཅག་ལོངས་སྤྱོད༌ཐུན་མོང་ལས་འདི་ནི་བསོད་ནམས་འདི་ལྟ་བུ་བྱེད་ན་བདག་གི་ཅིའི་ཕྱིར་མི་བྱ་སྙམ་དུ་རིག་ནས་དེ་ལ་སྨྲས་པ། ཕུ་ནུ་མོ་ཁྱོད་ཀྱི་དྲལ་གང་ལགས་པ་དེ་བདག་གི་མིང་པོ་ཡང་དེ་ཁོ་ན་ལགས་པས་ཁྱོད་ཀྱི་གདུགས་གཅིག་བཤོས་གསོལ་ལ། བདག་གིས་ཀྱང་གདུགས་གཅིག་བཤོས་གསོལ་བར་བགྱིའོ། །དེས་སྨྲས་པ། ལེགས་ཏེ། དེ་བཞིན་བགྱིའོ། །རང་སངས་རྒྱས་ཀྱི་སྲིང་མོ་དེ་དེའི་སེམས་བསྲུང་བའི་ཕྱིར་ཟས་བསོད་པ་རེག་བྱ་ཕུན་སུམ་ཚོགས་པ་ཟས་དམན་པས་གཡོགས་ཏེ་དེ་ལ་བསྟན་ནས་ཕུ་ནུ་མོ་ཁྱོད་རྗེས་སུ་ཡི་རང་བར་བྱོས་ཤིག །བདག་གི་མིང་པོ་ལ་ཞལ་ཟས་འདི་ལྟ་བུ་གསོལ་ལོ། །

དེས་སྨྲས་པ། ལེགས་སོ། །རྗེས་སུ་ཡི་རང་ངོ་། །དེ་ཡང་དེའི་སེམས་བསྲུང་བའི་ཕྱིར་ཟས་དམན་པ་བསོད་པ་དག་གིས་གཡོགས་ཏེ་དེ་ལ་བསྟན་ནས། ཕུ་ནུ་མོ་ཁྱོད་ཀྱང་རྗེས་སུ་ཡི་རང་བ་གྱིས་ཤིག །བདག་ཀྱང་དྲལ་ལ་ཞལ་ཟས་བསོད་པ་ཁ་དོག་ཕུན་སུམ་ཚོགས་པ་འདི་ལྟ་བུ་གསོལ་ལོ། །དགེ་སློང་དག་ཇི་སྙམ་དུ་སེམས། རང་སངས་རྒྱས་ཀྱི་སྲིང་མོ་གང་ཡིན་པ་དེས་རང་སངས་རྒྱས་ལ་རེག་བྱ་ཕུན་སུམ་ཚོགས་པ་ཟས་དམན་པས་བཀབ༌སྟེ་འབུལ་བ་གང་ཡིན་པ་དེ་ནི་ལྷ་མོ་ཕྲེང་ལྡན་མ་འདི་ཉིད་ཡིན་ཏེ། དེའི་ཚེ་དེའི་དུས་ན་འདིས་གང་རང་སངས་རྒྱས་ལ་རེག་བྱ་ཕུན་སུམ་ཚོགས་པ་ཟས་དམན་པས་བཀབ་སྟེ། ཕུལ་བའི་ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་རེག་བྱ་དང་ལྡན་པར་གྱུར་ཏེ། དའི་བར་དུ་ཡང་རེག་བྱ་དང་ལྡན་པ་རྣམས་ཀྱི་མཆོག་ཏུ་གྱུར་ཏོ། །

ཅིག་ཤོས་གང་ཡིན་པ་དེས་རང་སངས་རྒྱས་ལ་ཟས་དམན་པ་ཁ་དོག་ཕུན་སུམ་ཚོགས་པས་བཀབ་སྟེ་ཕུལ་བ་གང་ཡིན་པ་དེ་ནི་རྒྱལ་རིགས་དབྱར་ཚུལ༌མ་འདི་ཉིད་ཡིན་ཏེ། དེའི་ཚེ་དེའི་དུས་ན་གང་འདིས་རང་སངས་རྒྱས་ལ་ཟས་དམན་པ་ཁ་དོག་ཕུན་སུམ་ཚོགས་པས་བཀབ་སྟེ་ཕུལ་བའི་ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་གཟུགས་བཟང་བར་གྱུར༌ཏེ། དའི་བར་དུ་ཡང་གཟུགས་བཟང་བ་རྣམས་ཀྱི་མཆོག་ཏུ་གྱུར་ཏོ། །ཞེས་གསུངས་སོ།། །།

བཙུན་པ་ཤཱ་རིའི་བུ་སྐྱེ་བ་སྔ་མར་བྲམ་ཟེའི་བུ་མོར་གྱུར་ཚུལ་གྱི་ལོ་རྒྱུས། འདུལ་བ་ལུང་ཕྲན་ཚེགས་ལས་བཏུས།

དགེ་སློང་དག་སྔོན་བྱུང་བ་རི་བྲགས་ཤིག་ན་བྲམ་ཟེ་ཞིག་གནས་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དང་ལྷན་ཅིག་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྩེ་བར་བྱེད་དགའ་བར་བྱེད། དགའ་མགུར་སྤྱོད་པར་བྱེད་པ་ལས་དུས་གཞན་ཞིག་ན་ཆུང་མ་ལ་སེམས་ཅན་ཞུགས་པར་གྱུར་ཏོ། །དེ་ཟླ་བ་བརྒྱད་དམ་དགུ་འདས་ནས་བུ་མོ་གཟུགས་བཟང་བ། ལྟ་ན་སྡུག་པ་མཛེས་པ་ཞིག་བཙས་ཏེ། དེ་བཙས་སྟོན་ཞག་བདུན་གསུམ་ཉི་ཤུ་གཅིག་ཏུ་རྒྱ་ཆེར་བྱས་ནས། རིགས་དང་མཐུན་པའི་མིང་བཏགས་སོ། །དེ་བསྐྱེད་བསྲིངས་ཏེ་ཆེན་མོར་གྱུར་པ་དང་། རེ་ཞིག་ཅིག་ན་རི་བྲགས་དེར་རྐུན་པོ་ལྔ་བརྒྱ་ཞིག་འཇོམས་འདོད་ཅིང་ལྷགས་སོ། །

དེ་དག་གི་སྡེ་དཔོན་གང་ཡིན་པ་དེ་སྐོམ་པས་གདུངས་ནས་བྲམ་ཟེ་དེའི་ཁྱིམ་དུ་ཞུགས་པ་དང་། ཇི་ཙམ་ན་བུ་མོ་དེ་མཐོང་ངོ་། །མཐོང་ནས་ཀྱང་སྨྲས་པ། བུ་མོ་ཆུ་བྱིན་ཅིག །དེས་སྨྲས་པ། རེ་ཞིག་ཅུང་ཞིག་གཞེས་ཤིག །དེ་ཅང་མི་སྨྲ་བར་འདུག་གོ །དེས་མྱུར་བ་མྱུར་བར་མར་མེ་བུས་པ་དང་། རྐུན་པོའི་སྡེ་དཔོན་བུ་མོ་དེ་ལ་མིག་གཏད་དེ་རྟོག་གོ །བུ་མོ་དེ་མར་མེ་བུས་ནས་ཆུ་ལ་ལྟ་བ་དང་། རྐུན་པོའི་སྡེ་དཔོན་གྱིས་སྨྲས་པ། བུ་མོ་ཅི་ལ་ལྟ། དེས་སྨྲས་པ། ཆུ་ལ་ལྟའོ། །དེས་སྨྲས་པ། དེ་ལ་བལྟར་ཅི་ཡོད། དེས་སྨྲས་པ། འདིར་སྦུར་མའམ་སྐྲ་སོང་དུ་འོང་བས་སོ། །དེས་སྨྲས་པ། བུ་མོ་ཁོ་བོ་ནི་ཁྱེད་ལ་གནོད་པ་བྱ་བའི་ཕྱིར་ཞུགས་པ་ཡིན་པས་ཁོ་བོ་ལ་དུག་བླུད་པར་བྱ་བ་ཡིན་ན་ཁྱོད་ཀོ་དེ་སྐད་སྨྲས་པ་ལྟ་ཞིག །དེས་ཚིགས་སུ་བཅད་དེ་སྨྲས་པ། གཞན་གྱི་ནོར་འཕྲོག་གཡོན་ཅན་གྱིས། །བྱ་བ་གང་དེ་རྐུན་པོ་རྣམས། །བྱེད་དམ་འོན་ཏེ་མིན་ཡང་རུང་། །བདག་གིས་ཆོས་ནི་རྟག་བསྲུང་བྱ། །དེ་ཤིན་ཏུ་དགའ་ནས་སྨྲས་པ། བུ་མོ་ཁྱོད་བདག་གི་སྲིང་མོར་བྱ་ན་ཅི་ཞིག་བྱ་སྨྲོས་ཤིག །དེས་སྨྲས་པ། ཁྱོད་གཞན་གྱི་ནོར་ལ་མངོན་པར་ཆགས་པ་བསྐྱེད་པས་མདས་གནད་དུ་བསྣུན་ནས་དུས་བྱས་པར་གྱུར་ན། བདག་མིང་པོ་དང་བྲལ་བའི་སྡུག་བསྔལ་གྱིས་ཉམ་ཐག་ཅིང་ཆོ་ངེ་འདེབས་ན་དགའ་བར་མི་འགྱུར་བས་རྐུན་པོ་བྱེད་པའི་མིང་པོ་གང་ཡིན་པ་དེ་ལྟ་བུ་ནི་བདག་ལ་མི་དགོས་སོ། །དེ་ལྟ་བས་ན་གལ་ཏེ་ཁྱོད་ཀྱིས་བརྟུལ་ཞུགས་ཀྱི་གཞི་ལྔ་ཡང་དག་པར་ལེན་ནུས་ན་དེ་ལྟ་ན་བདག་གིས་ཁྱོད་ཀྱི་སྲིང་མོ་བྱའོ། །དེས་མི་འདོད་བཞིན་དུ་ཚིག་ཡིད་དུ་འོང་བ་སྙན་པའི་ཚུལ་གྱིས་སྨྲས་པ་དང་། དེས་དེ་སྲིང་མོ་བྱ་བར་ཤིན་ཏུ་དགའ་ཞིང་འདོད་པར་གྱུར་ཏེ། དེས་སྨྲས་པ། སྲིང་མོ་ལེགས་ཏེ་དེ་བཞིན་དུ་བྱའོ། །དེས་དེ་ཆོམ་རྐུན་ལས་བཟློག་སྟེ་བརྟུལ་ཞུགས་ཀྱི་གནས་ལྔ་ལ་བཞག་གོ །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྐུན་པོའི་སྡེ་དཔོན་དེ་ནི་བྲམ་ཟེ་འདི་ཉིད་ཡིན་ནོ། །དེའི་ཚེ་དེའི་དུས་ཀྱི་བྲམ་ཟེའི་བུ་མོ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེའི་ཚེ་ཡང་འདིས་རྐུན་པོ་ལས་བཟློག་སྟེ་བསླབ་པའི་གཞི་ལྔ་ལ་བཞག་གོ །ད་ལྟར་ཡང་གཙང་སྦྲས་དད་པར་བྱས་ནས་འཁོར་བའི་དགོན་པ་ལས་བསྒྲལ་ཏེ། གྲུབ་པ་དང་བདེ་བ་བླ་ན་མེད་པ་ཤིན་ཏུ་མཐར་ཐུག་པའི་མྱ་ངན་ལས་འདས་པ་ལ་བཞག་པ་ཡིན་ནོ། །ཞེས་གསུངས་སོ།། །།

བུ་མོ་སྐྲ་ཅན་མས་སྐྲ་བཙོང་སྟེ་ཀར་ཤ་པ་ཎ་ལྔ་བརྒྱའི་རིན་གྱིས་འཕགས་པ་ཀ་ཏྱ་ན་ལ་གདུགས་ཚོད་ཕུལ་བའི་ཚུལ། འདུལ་བ་ལུང་ཕྲན་ཚེགས་ལས་བཏུས།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀ་ཏྱའི་བུ་ཆེན་པོ་ལ་བཀའ་སྩལ་པ། ཀ་ཏྱའི་བུ་འཕགས་རྒྱལ་གྱི་རྒྱལ་པོ་གཏུམ་པོ་རབ་སྣང་བཙུན་མོའི་འཁོར་དང་། གཞོན་ནུ་དང་། བློན་པོ་དང་། འཕགས་རྒྱལ་ན་གནས་པའི་སྐྱེ་བོའི་ཚོགས་དང་བཅས་པ་ལ་སོམས་ཤིག །བཙུན་པ་དེ་ལྟར་འཚལ་ལོ་ཞེས་ཚེ་དང་ལྡན་པ་ཀ་ཏྱའི་བུ་ཆེན་པོས་བཅོམ་ལྡན་འདས་ཀྱི་ལྟར་མཉན་ཏེ། དེ་ཉིད་ཀྱི་མཚན་མོ་འདས་ནས་སྔ་དྲོ་ཆོས་གོས་དང་ཤམ་ཐབས་བགོས། ལྷུང་བཟེད་ཐོགས་ཏེ་བཱ་རཱ་ཎ་སཱིར་བསོད་སྙོམས་ལ་ཞུགས་སོ། །བཱ་རཱ་ཎ་སཱིར་བསོད་སྙོམས་སྤྱད་ནས་ཟས་ཀྱི་བྱ་བ་བྱས་ཏེ་ཟས་ཕྱིས་ལེན་པ་སྤངས་ནས། གནས་མལ་ཇི་ལྟར་སྤྱད་པ་ཆམ་དུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་འཕགས་རྒྱལ་གང་ན་བ་དེར་རྒྱུ་ཞིང་སོང་ངོ་། །

དེའི་ཚེ་ཡུལ་ཀ་ནྱཱ་ཀུབ་ཛ་ན་ཚེ་དང་ལྡན་པ་ཀ་ཏྱའི་བུ་ཆེན་པོའི་སྔོན་ཁྱིམ་པའི་མཛའ་བོ་བྲམ་ཟེ་ཞིག་གནས་པ་དེའི་བུ་མོ་གཟུགས་ཁྱད་པར་ཅན་དང་ལྡན་པས་ཚེ་རབས་སྔ་མའི་མིང་དང་མཐུན་པར་སྐྲ་ཅན་ཞེས་བཏགས་སོ། །ཇི་ཙམ་ན་ལྷོ་ཕྱོགས་ནས་གར་མཁན་གྱི་སློབ་དཔོན་ཞིག་འོངས་ཏེ་དེས་དེའི་སྐྲ་བཟང་བར་མཐོང་ནས་བྲམ་ཟེའི་དྲུང་དུ་འོངས་ཏེ་དེས་སྨྲས་པ། ཀྱེ་བྲམ་ཟེ་ཆེན་པོ་བུ་མོ་འདིའི་སྐྲ་རྣམས་བདག་ལ་བྱིན་ཅིག་དང་། ཀཱར་ཥཱ་པ་ཎ་སྟོང་སྦྱིན་ནོ་ཞེས་སྨྲས་པ་དང་། དེས་སློབ་དཔོན་བདག་ཅག་ནི་བྲམ་ཟེ་ཡིན་ཏེ། བདག་ཅག་སྐྲ་འཚོང་དུ་མི་རུང་ན་ཇི་ལྟར་སྐྲ་བཙོང་ཞེས་སྨྲས་པ་དང་། གར་མཁན་གྱི་སློབ་དཔོན་དེ་ཅང་མི་ཟེར་བར་སོང་ངོ་། །བྲམ་ཟེ་དེ་ཡང་ཕྱི་དེ་ཉིན་དུས་ལས་འདས་སོ། །དེའི་ཆུང་མས་ཇི་ལྟར་འཕགས་པ་ཀ་ཏྱའི་བུ་ཆེན་པོ་འཁོར་ལྔ་བརྒྱ་དང་དེ་ནས་ཐག་མི་རིང་བ་ཞིག་ན་འདུག་སྟེ། འཕགས་རྒྱལ་དུ་འོང་བར་འདོད་དོ་ཞེས་ཐོས་སོ། །ཁྱོ་དང་བྲལ་བས་སྡུག་བསྔལ་བ་དང་ཡིད་མི་བདེ་བ་སྐྱེས་པ་དེ་ཚེ་དང་ལྡན་པ་ཀ་ཏྱའི་བུ་ཆེན་པོ་འོང་བ་ཐོས་ནས་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་གོ །

བུ་མོ་སྐྲ་ཅན་མས་མ་དེ་ལྟར་འདུག་པ་མཐོང་ངོ་། །མཐོང་ནས་ཀྱང་སྨྲས་པ། མ་ཅིའི་ཕྱིར་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག །དེས་སྨྲས་པ། བུ་མོ་འཕགས་པ་ཀ་ཏྱའི་བུ་ཆེན་པོ་ཁྱོད་ཀྱི་ཕའི་ཆུང་པོ་གྲོགས་འདི་ནས་མི་རིང་བ་ཞིག་ན་འདུག་སྟེ་འཕགས་རྒྱལ་དུ་འོང་འདོད་ན་ཁྱོད་ཀྱི་ཕ་ནི་དུས་ལས་འདས། བདག་ཅག་གི་ཁྱིམ་གྱི་གནས་སྐབས་ནི་འདི་ལྟ་བུར་གྱུར་པས་རིང་ཞིག་ན་འོངས་པ་དེ་ལ་ཉི་མ་འགའི་བསོད་སྙོམས་ཀྱང་སྦྱིན་མི་ནུས་པས་སོ། །

དེས་སྨྲས་པ། མ་གལ་ཏེ་དེ་ལྟ་ན་གར་མཁན་གྱི་སློབ་དཔོན་དེ་བདག་གི་སྐྲ་ཀཱར་ཥཱ་པ་ཎ་སྟོང་གིས་ཉོ་བས་དེ་ཉིད་དུ་ཚོངས་ལ་འཕགས་པ་ཀ་ཏྱའི་བུ་ཆེན་པོ་ལ་བསོད་སྙོམས་ཕུལ་ཅིག །བདག་གི་སྐྲ་ནི་ཡང་སྐྱེ་བར་འགྱུར་གྱིས་མྱ་ངན་མ་མཛད་ཅིག །དེས་དེའི་ཚིག་དད་པ་ལས་བྱུང་བ་དེ་ཐོས་ནས། བུ་མོ་ལེགས་ཀྱིས་དེ་ལྟར་བྱའོ་ཞེས་སྨྲས་ཏེ། གར་མཁན་གྱི་སློབ་དཔོན་གང་ན་བ་དེར་སོང་སྟེ་ཕྱིན་ནས་སྨྲས་པ། སློབ་དཔོན་ཁྱོད་ཀྱིས་ངའི་བུ་མོའི་སྐྲ་ཀཱར་ཥཱ་པ་ཎ་སྟོང་གིས་འཇལ་ན་དེ་སྣོམས་ལ་ཀཱར་ཥཱ་པ་ཎ་སྟོང་སྩོལ་ཅིག །དེས་སྨྲས་པ། སྲིང་མོ་དེའི་ཚེ་ནི་ཁོ་བོ་ལ་དེ་དག་དགོས་ཀྱི་ད་ནི་དེ་དག་མི་དགོས་མོད་ཀྱི་འོན་ཀྱང་ཀཱར་ཥཱ་པ་ཎ་ལྔ་བརྒྱར་འཚོང་ན་བླང་ངོ་། །དེས་སྨྲས་པ། སློབ་དཔོན་སྩོལ་ལ་འདི་དག་བཞེས་ཤིག །དེ་བླངས་སོ། །ཇི་ཙམ་ན་ཚེ་དང་ལྡན་པ་ཀ་ཏྱའི་བུ་ཆེན་པོ་ཡུལ་ཀ་ནྱཱ་ཀུབ་ཛར་ཕྱིན་ནས་དེ་དབེན་པ་བླ་གབ་མེད་པ་ཞིག་ཏུ་འདུག་གོ །དེ་ནས་བྲམ་ཟེ་མོ་དེ་རྟབས་བོར་གོམ་པ་བསླང་སྟེ། ཚེ་དང་ལྡན་པ་ཀ་ཏྱའི་བུ་ཆེན་པོ་གང་ན་བ་དེར་སོང་ནས་ཕྱིན་པ་དང་། ཚེ་དང་ལྡན་པ་ཀ་ཏྱའི་བུ་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་ཀ་ཏྱའི་བུ་ཆེན་པོ་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་།

དེས་སྨྲས་པ། བྲམ་ཟེ་མོ་ངའི་འཁོར་སྐྱེ་བོ་ཕལ་པོ་ཆེའོ། །དེས་སྨྲས་པ། འཕགས་པ་འཁོར་ཇི་སྙེད་ཅིག་མཆིས། བྲམ་ཟེ་མོ་ངའི་འཁོར་ལྔ་བརྒྱ་ཡོད་དོ། །འཕགས་པ་ལེགས་ཏེ་དེ་བཞིན་བགྱི་ཡིས་གནང་བར་མཛོད་ཅིག །ཚེ་དང་ལྡན་པ་ཀ་ཏྱའི་བུ་ཆེན་པོས་བྲམ་ཟེ་མོ་དེ་ལ་ཅང་མི་ཟེར་བས་ཁས་བླངས་སོ། །དེ་ནས་བྲམ་ཟེ་མོ་དེ་ཚེ་དང་ལྡན་པ་ཀ་ཏྱའི་བུ་ཆེན་པོས་ཅང་མི་ཟེར་བས་ཁས་བླངས་པར་རིག་ནས་རྐང་པ་ལ་ཕྱག་བྱས་ནས་སྟན་ལས་ལངས་ཏེ་སོང་ངོ་། །དེ་ནས་བྲམ་ཟེ་མོ་དེས་དེ་ཉིད་ཀྱི་ནུབ་མོ་གཙང་ཞིང་བསོད་པའི་བཟའ་བ་དང་བཅའ་བ་དག་བཤམས་ཏེ་ནང་པར་སྔར་ལངས་ནས་སྟན་བཏིང་། ཆུ་ར་བཞག་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་ལ་སྤྱན་འདྲེན་གྱིས་འཕགས་པ་གདུགས་ཚོད་བཤམས་ལགས་ཏེ།

འཕགས་པ་ད་དེའི་དུས་ལ་བབ་པར་དགོངས་སུ་གསོལ་ཞེས་དུས་གདབ་པར་བྱས་སོ། །དེ་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་སྔ་དྲོ་ཆོས་གོས་དང་ཤམ་ཐབས་བགོས་ལྷུང་བཟེད་ཐོགས་ནས་དགེ་སློང་མང་པོས་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་བྲམ་ཟེ་མོ་དེའི་བཀད་ས་གང་ན་བ་དེར་སོང་ངོ་། །ཕྱིན་ནས་དགེ་སློང་གི་དགེ་འདུན་གྱི་གུང་ལ་སྟན་བཤམས་པ་ཉིད་ལ་འདུག་གོ །དེ་ནས་བྲམ་ཟེ་མོ་དེས་ཀ་ཏྱའི་བུ་ཆེན་པོ་ལ་སོགས་པ་དགེ་སློང་གི་དགེ་འདུན་དག་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་། བཅའ་བ་དག་རང་གི་ལག་དར་ཏེ་ཡང་དག་པར་ཚིམ་པར་བྱེད། ཡང་དག་པར་སྟོབས་པར་བྱེད་དོ། །རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གིས་ལག་དར་ཏེ་ཡང་དག་པར་ཚིམ་པར་བྱས་ཡང་དག་པར་བསྟབས་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་བཤོས་གསོལ་ནས་ལྷུང་བཟེད་གྱུ་ཕྱག་བཅབས་པར་རིག་ནས་ཚེ་དང་ལྡན་པ་ཀ་ཏྱའི་བུ་ཆེན་པོའི་མདུན་དུ་ཆོས་མཉན་པའི་ཕྱིར་སྟན་ཆེས་དམའ་བ་ཞིག་བཏིང་ནས་འདུག་གོ །

དེ་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་བྲམ་ཟེ་མོ་དེ་ལ་ཆོས་འཆད་པར་འདོད་ནས་བྲམ་ཟེ་མོ་དེ་ལ་འདི་སྐད་ཅེས་སྨྲས་སོ། །བྲམ་ཟེའི་བུ་མོ་སྐྲ་ཅན་ག་རེ། དེས་སྨྲས་པ། འཕགས་པ་སྤྱོད་ལམ་ཉམས་ལགས་སོ། །དགྲ་བཅོམ་པ་རྣམས་ནི་མ་བསམས་པར་ཡེ་ཤེས་མཐོང་བ་མི་འཇུག་པས་དེས་བུ་མོ་སྐྲ་ཅན་གྱི་སྤྱོད་པ་བསམས་ནས་སྨྲས་པ། བྲམ་ཟེ་མོ་དགེ་བའི་བསམ་པ་ཅན་གྱི་བུ་མོ་དེ་བོས་ཤིག །དེས་བོས་པ་དང་། ཁང་པ་ནས་ཕྱུང་སྟེ་དད་པ་དྲག་པོས་ཚེ་དང་ལྡན་པ་ཀ་ཏྱའི་བུ་ཆེན་པོའི་རྐང་པ་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་པ་དང་། བྲམ་ཟེ་མོ་དེས་སྨྲས་པ། འཕགས་པ་སྐྲ་ཅན་མ་འདི་སྡིག་པ་སྤངས་པས་ཁྱོད་ཀྱི་སྲས་མོ་ལགས་ཏེ། དེའི་སླད་དུ་ཇི་ལྟར་བགྱིས་ཀྱང་བདག་ཅག་གིས་ཁྱོད་ཁོ་ན་ལ་ཞུ་འཚལ་ན་འདི་བདག་ཅག་གིས་སུ་ལ་སྩལ་བར་བགྱི་གསུངས་ཤིག །དེས་སྨྲས་པ། བྲམ་ཟེ་མོས་ཆ་མ་ཡིན་པ་ཞིག་དྲིས་ཏེ། དེ་ནི་རབ་ཏུ་བྱུང་བ་ལ་འཚམ་པ་མ་ཡིན་མོད་ཀྱི་འོན་ཀྱང་བུ་མོ་འདིས་གསང་བའི་རྒྱན་ལྔ་བརྒྱ་དང་། ཕྱི་རོལ་གྱི་རྒྱན་ལྔ་བརྒྱ་དང་། གྲོང་གི་མཆོག་ལྔ་བརྒྱ་རྙེད་པར་འགྱུར་རོ། །

དེས་སྨྲས་པ། འཕགས་པ་བདག་ཅག་བྲམ་ཟེ་ནི་འབུལ་བ་ལགས་ན་བདག་ཅག་གིས་དེ་དག་ག་ལས་རྙེད། དེས་སྨྲས་པ། བྲམ་ཟེ་མོ་དེ་སྐད་མ་ཟེར་ཅིག །བུ་མོ་འདིས་ཞིང་བཟང་པོ་ལ་དད་པ་དྲག་པོས་བྱ་བ་བྱས་པས་བསོད་ནམས་ཀྱི་དབང་ཆེ་བར་གྲགས་པ་ཡིན་ཏེ། ངེས་པར་འདི་ལ་ཐམས་ཅད་འབྱོར་པར་འགྱུར་གྱིས་སྨྲེ་སྔགས་མ་འདོན་ཅིག་ཅེས་བྱས་པ་དང་། དེ་ཅང་མི་ཟེར་བར་འདུག་གོ །ཚེ་དང་ལྡན་པ་ཀ་ཏྱའི་བུ་ཆེན་པོས་བྲམ་ཟེ་མོ་དེ་དང་བུ་མོ་དེ་ལ་ཆོས་དང་མཐུན་པའི་གཏམ་གྱིས་ཡང་དག་པར་སྟོན། ཡང་དག་པར་ལེན་དུ་འཇུག །ཡང་དག་པར་གཟེངས་བསྟོད། ཡང་དག་པར་དགའ་བར་བྱེད་ཅིང་རྣམ་པ་དུ་མར་ཆོས་དང་མཐུན་པའི་གཏམ་གྱིས་ཡང་དག་པར་བསྟན། ཡང་དག་པར་ལེན་དུ་བཅུག །ཡང་དག་པར་གཟེངས་བསྟོད། ཡང་དག་པར་དགའ་བར་བྱས་ནས་སྟན་ལས་ལངས་ཏེ་སོང་ནས་རིམ་གྱིས་འཕགས་རྒྱལ་དུ་ཕྱིན་ཏོ། །

དེ་གྲོང་ཁྱེར་དུ་ཞུགས་པའི་ཚེ་མོད་ལ་ཡམས་ཀྱི་ནད་ཕྱེད་ཞི་བར་གྱུར་པ་དང་། ཆབ་སྒོ་བས་རྒྱལ་པོ་ལ་སྦྲན་པ། ལྷ་སྔོན་མ་བྱུང་བའི་རྟགས་དང་ཆ་ལུགས་འཆང་བའི་དགེ་སྦྱོང་ཞིག་གཡོག་ལྔ་བརྒྱ་དང་མཆིས་ཏེ། དེ་མཆིས་པའི་མོད་ལ་ཡམས་ཀྱི་ནད་ཕྱེད་ཞི་བར་གྱུར་ཏོ། །རྒྱལ་པོས་སྨྲས་པ། ཀྱེ་སྐྱེས་བུ་ལེགས་ཀྱིས་དེ་ལ་བཀུར་སྟི་གྱིས་ཤིག །བྲམ་ཟེ་རྣམས་ཀྱིས་སྨྲས་པ། ལྷ་བདག་ཅག་གིས་ཉིན་མཚན་དུ་ཞི་བའི་ལས་ལ་བརྩོན་པར་བགྱིས་པས་ན་བདག་ཅག་གི་མཐུས་ཡམས་ཀྱི་ནད་ཕྱེད་ཞི་བར་གྱུར་ཏེ་དགུང་རིང་པོ་མི་ཐོགས་པར་ཐམས་ཅད་ཡོང་ཡེ་ཞི་བར་བགྱིའོ། །

དགེ་སློང་དག་གིས་ནི་རྒྱལ་པོ་གཏུམ་པོ་རབ་སྣང་ལ་ནད་མེད་པར་གྱུར་ཅིག་ཅེས་སྨྲས་ནས་ཅང་མི་ཟེར་བར་དོང་ངོ་། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཆབ་སྒོ་བ་ནི་ལྷ་སྔོན་མ་བྱུང་བའི་རྟགས་དང་ཆ་ལུགས་འཆང་བའི་དགེ་སྦྱོང་ཞིག་འཁོར་ལྔ་བརྒྱ་དང་འདིར་མཆིས་ཏེ། དེ་མཆིས་པའི་མོད་ཉིད་ལ་ཡམས་ཀྱི་ནད་ཕྱེད་ཞི་བར་གྱུར་ཏོ་ཞེས་ཟེར། བྲམ་ཟེ་རྣམས་ནི་ལྷ་བདག་ཅག་གིས་གདུགས་མཚན་དུ་ཞི་བའི་ལས་ལ་བརྩོན་པར་བགྱིས་པས་བདག་ཅག་གིས་མཐུས་ཡམས་ཀྱི་ནད་ཕྱེད་ཞི་བར་གྱུར་ཏོ་ཞེས་ཟེར་ཏེ་དེ་གང་གི་མཐུ་ཡིན་པ་མི་ཤེས་ན། དེང་ལ་དགེ་སྦྱོང་དང་བྲམ་ཟེ་དེ་དག་གླང་པོ་ཆེའི་བྲེས་ཀྱི་མི་གཙང་བའི་ཕྱོགས་ཤིག་ཏུ་འབྲས་ཆན་ངན་པ་དང་། རྩབས་དག་གི་ཟས་བྱིན་ལ་ཟོས་ནས་ཕྱིར་བྱུང་བ་དང་གཉིས་ཀ་ལ་ཟན་ཅི་འདྲ་བ་ཞིག་དྲིས་ཤིག །ལྷ་དེ་ལྟར་འཚལ་ལོ་ཞེས་སྨྲས་ནས། བློན་པོ་རྣམས་ཀྱིས་བསྒོ་བ་བཞིན་དུ་གླང་པོ་ཆེའི་བྲེས་ཀྱི་མི་གཙང་བའི་ཕྱོགས་ཤིག་ཏུ་སྟན་བཏིང་ནས་དགེ་སྦྱོང་དང་བྲམ་ཟེ་དག་ལ་ཟན་བྱིན་ཏེ་ཟོས་ཟིན་ནས་ཕྱིར་བྱུང་བ་དང་། བྲམ་ཟེ་རྣམས་ལ་སྒོ་བས་ཀྱེ་བྲམ་ཟེ་ཆེན་པོ་དག་ལྷས་ཁྱེད་ཅག་ཅི་འདྲ་བའི་ཁ་ཟས་ཀྱིས་ཚིམ་པར་བྱས་ཞེས་དྲིས་པ་དང་། དེ་དག་ཁྲོས་ཏེ་སྨྲས་པ། བྱེད་སྟངས་དང་རྒྱལ་པོ་ཐམས་ཅད་ཆོས་མ་ཡིན་པ་ལ་གཞོལ་བ་ཞིག་སྟེ། དེས་བྲམ་ཟེ་རྣམས་ལ་འབྲས་ཆན་མི་གཙང་བ་དང་། སྲན་ཚོད་ཡན་ལག་གཉིས་པ་དང་། རྩབ་མོ་བྱིན་ཏེ་ཚིམ་པར་བྱས་མོད་ཅེས་བྱས་པ་དང་། དེ་ཅང་མི་ཟེར་བར་འདུག་གོ །དེ་དག་དོང་ནས་དགེ་སློང་རྣམས་ལ་དྲིས་པ། འཕགས་པ་ཁྱེད་ལྷས་ཅི་འདྲ་བའི་ཁ་ཟས་ཀྱིས་ཚིམ་པར་བྱས། དེ་དག་གིས་སྨྲས་པ། བཞིན་བཟངས་སྦྱིན་པ་པོས་ནི་བྱིན། ལེན་པ་པོ་རྣམས་ཀྱིས་ནི་ཟོས་ཏེ། འབྱུང་བ་ཆེན་པོ་རྣམས་ཚིམ་པར་བྱས་ཤིང་ཉིན་ཞག་གི་རྒྱགས་བླངས་སོ། །སྒོ་བས་རྒྱལ་པོ་ལ་སྨྲས་པ། ལྷ་བྲམ་ཟེ་རྣམས་ནི་འདི་སྐད་མཆིའོ། །དགེ་སློང་རྣམས་ནི་འདི་སྐད་མཆིའོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་ད་ནི་གཉིས་ཀ་གླང་པོ་ཆེའི་བྲེས་མ་ཡིན་པའི་གཙང་མའི་ཕྱོགས་ཤིག་ཏུ་ཁ་ཟས་བསོད་པ་དག་བྱིན་ལ་དེ་བཞིན་དུ་དྲིས་ཤིག །དེ་དག་གིས་གླང་པོ་ཆེའི་བྲེས་མ་ཡིན་པའི་གཙང་མའི་ཕྱོགས་ཤིག་ཏུ་སྟན་བཤམས་ཏེ་ཁ་ཟས་བསོད་པས་ཚིམ་པར་བྱས་ན་དེ་བཞིན་དུ་སྒོ་བས་དྲིས་པ་དང་། བྲམ་ཟེ་རྣམས་ཀྱིས་སྨྲས་པ། བྱེད་སྟངས་དང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞིག་སྟེ་ཟས་ཅི་འདོད་པ་བྱིན་ནས་ཚིམ་པར་བྱས་སོ། །

དེས་བྲམ་ཟེ་དག་རྒྱལ་པོའི་ཕོ་བྲང་འདི་ནི་སྐོ་ཤམ་པའི་ཁ་ན་ལས་པས་རེས་འགའ་ནི་ངན་པར་གྱུར། རེས་འགའ་ནི་བཟང་པོར་གྱུར་གྱིས་ང་མ་འཕྱ་ཞིག་ཅེས་སྨྲས་པ་དང་། དེ་དག་ཅང་མི་ཟེར་བར་འདུག་གོ །དེ་དག་དོང་ནས་དགེ་སློང་དག་ལ་དྲིས་པ་དང་། དེ་དག་གིས་སྔ་མ་བཞིན་དུ་སྨྲས་སོ། །སྒོ་བས་རྒྱལ་པོ་ལ་དེ་བཞིན་དུ་སྨྲས་སོ། །གླང་པོ་ཆེའི་བྲེས་ཇི་ལྟ་བ་དེ་བཞིན་དུ་རྟའི་བྲེས་དང་། ཕྱག་དར་ཁྲོད་དང་། ས་ཕྱོགས་གཙང་མར་ངན་པ་དང་བསོད་པ་དག་སྦྱར་བར་བྱས་སོ། །རྒྱལ་པོ་གཏུམ་པོ་རབ་སྣང་གིས་བསམས་པ། དགེ་སློང་དག་སྦྱིན་གནས་ཡིན་གྱི་བྲམ་ཟེ་དག་ནི་མ་ཡིན་ནོ་སྙམ་དུ་རིག་ནས་དད་པ་སྐྱེས་ཏེ་ཚེ་དང་ལྡན་པ་ཀ་ཏྱའི་བུ་ཆེན་པོ་ག་ལ་བ་དེར་སོང་སྟེ་ཕྱིན་པ་དང་། ཚེ་དང་ལྡན་པ་ཀ་ཏྱའི་བུ་ཆེན་པོའི་རྐང་པ་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་པ་དང་རྒྱལ་པོ་གཏུམ་པོ་རབ་སྣང་ལ་ཚེ་དང་ལྡན་པ་ཀ་ཏྱའི་བུ་ཆེན་པོས་ཆོས་དང་ལྡན་པའི་གཏམ་གྱིས་ཡང་དག་པར་སྟོན། ཡང་དག་པར་ལེན་དུ་འཇུག་ཡང་དག་པར་གཟེངས་བསྟོད། ཡང་དག་པར་དགའ་བར་བྱེད་ཅིང་རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་ལེན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་མི་སྨྲ་བར་འདུག་གོ །

དེ་ནས་རྒྱལ་པོ་གཏུམ་པོ་རབ་སྣང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ། ཚེ་དང་ལྡན་པ་ཀ་ཏྱའི་བུ་ཆེན་པོ་ལ་འདི་སྐད་ཅེས་འཕགས་པ་ཀ་ཏྱའི་བུ་ཆེན་པོ་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་ཞེས་སྨྲས་པ་དང་། ཚེ་དང་ལྡན་པ་ཀ་ཏྱའི་བུ་ཆེན་པོས་རྒྱལ་པོ་གཏུམ་པོ་རབ་སྣང་ལ་ཅང་མི་ཟེར་བས་གནང་ངོ་། །དེ་ནས་རྒྱལ་པོ་གཏུམ་པོ་རབ་སྣང་གིས་ཚེ་དང་ལྡན་པ་ཀ་ཏྱའི་བུ་ཆེན་པོས་ཅང་མི་སྨྲ་བས་གནང་བར་རིག་པས་ཚེ་དང་ལྡན་པ་ཀ་ཏྱའི་བུ་ཆེན་པོའི་རྐང་པ་ལ་མགོ་བོས་ཕྱག་འཚལ་ཏེ་སྟན་ལས་ལངས་ནས་སོང་ངོ་། །དེ་ནས་རྒྱལ་པོ་གཏུམ་པོ་རབ་སྣང་གིས་དེ་ཉིད་ཀྱི་ནུབ་མོ་གཙང་ཞིང་བསོད་པའི་བཟའ་བ་དང་བཅའ་བ་དག་བཤམས་ཏེ། ནངས་པར་སྔར་ལངས་ནས་གདན་བཏིང་ཆུ་ར་བཞག་སྟེ། ཚེ་དང་ལྡན་པ་ཀ་ཏྱའི་བུ་ཆེན་པོ་ལ་སྤྱན་འདྲེན་པས་འཕགས་པ་ཀ་ཏྱའི་བུ་ཆེན་པོ་གདུགས་ཚོད་དེ་བཤམས་ལགས་ཏེ་ད་དེའི་དུས་ལ་བབ་པར་དགོངས་སུ་གསོལ་ཞེས་དུས་ཚོད་གདས་པར་བྱས་སོ། །

ཚེ་དང་ལྡན་པ་ཀ་ཏྱའི་བུ་ཆེན་པོ་སྔ་དྲོ་ཆོས་གོས་དང་ཤམ་ཐམས་བགོས་ལྷུང་བཟེད་ཐོགས་ཏེ་དགེ་སློང་གི་ཚོགས་ཀྱིས་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ་རྒྱལ་པོ་གཏུམ་པོ་རབ་སྣང་གི་བཀད་ས་གང་ན་བ་དེར་སོང་སྟེ་ཕྱིན་པ་དང་། དགེ་སློང་གི་དགེ་འདུན་གྱི་གུང་ལ་སྟན་བཤམས་པ་ཉིད་ལ་འདུག་པ་དང་། དེ་ཡང་འདུག་སྟེ་རོལ་མོའི་སྒྲ་ཕྱུང་ནས་བྲོ་གར་མཁན་རྣམས་ཀྱིས་བྲོ་གར་རྣམ་པ་དུ་མ་དག་བྱ་བར་བརྩམས་པ་དང་། ཚེ་དང་ལྡན་པ་ཀ་ཏྱའི་བུ་ཆེན་པོ་དང་དགེ་སློང་དག་དབང་པོ་བསྡམས་ཏེ་འཁོད་དོ། །

གླུ་གར་དང་རོལ་མོའི་སྒྲ་དེ་དག་ཞི་ནས་རྒྱལ་པོ་གཏུམ་པོ་རབ་སྣང་གིས་འཕགས་པ་ཅི་གར་བཟང་ལགས་སམ། གླུ་སྙན་ལགས་སམ་ཞེས་སྨྲས་པ་དང་། ཚེ་དང་ལྡན་པ་ཀ་ཏྱའི་བུ་ཆེན་པོས་སྨྲས་པ། རྒྱལ་པོ་ཆེན་པོ་གང་གིས་ཐོས་པའམ་མཐོང་བ་དག་ལའོ། །དེས་སྨྲས་པ། འཕགས་པ་དབང་པོ་ནང་དུ་བསྡུས་པ་རྣམས་ཀྱིས་མ་གཟིགས་སུ་ནི་སྩོལ་ན་ཇི་ལྟར་མ་གསན། དེས་སྨྲས་པ། ལྷ་ཁྱོད་ལ་མི་གསད་པ་ལ་ཐུག་པ་འགའ་ཡོད་དམ། འཕགས་པ་མཆིས་ན་དེ་ཅིར་འཚལ། ལྷ་སྐྱེས་བུ་དེའི་ལག་ཏུ་སྣོད་ཏིལ་མར་གྱིས་ཁོང་སྟེ་བསྐུར་ལ་ཕྱི་བཞིན་གཤེད་མའི་མི་ཐོང་སྟེ་དེ་ལ་འདི་སྐད་ཅེས་ཀྱི་མི་ཁྱོད་ཚུར་ཤོག །སྣོད་འབྲུ་མར་གྱིས་ཁང་ཆང་དུ་གང་བ། བྱ་རོག་གིས་བཏུང་དུ་རུང་བ་འདི་ཁྱེར་ལ་ལྗོངས་བཟང་པོ་ཐམས་ཅད་སྐོར་ལ་འདིར་ཁྱེར་ཏེ་ཤོག་ཅིག །ཇི་སྟེ་ཏིལ་མར་ཐིགས་པ་གཅིག་ས་ལ་བོ་ན་མི་རལ་གྲི་གདེངས་པ་འདིས་ཁྱོད་ཀྱི་མགོ་དྲུངས་ནས་བཅད་དེ་ས་ལ་འདོར་དུ་གཞུག་གོ་ཞེས་བསྒོ་ལ། དེའི་མདུན་དུ་རོལ་མོའི་སྒྲ་སྣ་ཚོགས་ཕྱུང་སྟེ་བྲོ་གར་རྣམ་པ་སྣ་ཚོགས་བྱེད་དུ་ཆུག་ཅིག་དང་། དེ་ནས་ཁྱོད་ཡིད་ཆེས་པར་འགྱུར་རོ་ཞེས་སྨྲས་སོ། །

རྒྱལ་པོ་གཏུམ་པོ་རབ་སྣང་དེས་ཇི་སྐད་བསྟན་པ་ཐམས་ཅད་རིམ་གྱིས་བྱས་ནས་མི་དེ་ལ་ཀྱེ་སྐྱེས་བུ་ཅི་གར་བཟང་ངམ། གླུ་སྙན་པ་བླངས་སམ། རོལ་མོའི་སྒྲ་སྙན་ཏམ་ཞེས་དྲིས་པ་དང་། དེས་སྨྲས་པ། ལྷ་གང་གིས་མཐོང་བའམ། ཐོས་པ་དག་ལའོ། །རྒྱལ་པོས་སྨྲས་པ། ཀྭའེ་སྐྱེས་བུ་དབང་པོ་ནང་དུ་བསྡུས་པ་དག་གིས་མ་མཐོང་དུ་ནི་ཆུག་ན། ཇི་ལྟར་མ་ཐོས། དེས་ལྷ་བདག་འདི་སྙམ་དུ་གལ་ཏེ་བདག་གིས་འབྲུ་མར་གྱི་སྣོད་འདི་ལས་འབྲུ་མར་ཐིགས་པ་གཅིག་ས་ལ་བོ་ན་ཡང་གཤེད་མ་མི་རལ་གྲི་གདེངས་པ་འདིས་བདག་གི་མགོ་དྲུངས་ནས་བཅད་ནས་ས་ལ་བོར་རོ་སྙམ་སྟེ་བདག་འཆི་བས་འཇིགས་སྐྲག་ནས་འབྲུ་མར་གྱི་སྣོད་ལ་སེམས་རྩེ་གཅིག་ཏུ་གཏད་དེ་ལྟ་བས་ཉམ་ཐག་སྟེ་འདིར་མཆིས་ན་ཇི་ལྟར་མཐོང་ངམ་ཐོས་ཞེས་སྨྲས་པ་དང་། རྒྱལ་པོ་སྤོབས་པ་མེད་ནས་ཅང་མི་ཟེར་བར་འདུག་གོ །ཚེ་དང་ལྡན་པ་ཀ་ཏྱའི་བུ་ཆེན་པོས་སྨྲས་པ། ལྷ་ཁྱོད་ཀྱིས་མཐོང་ངམ། འཕགས་པ་མཐོང་ལགས་སོ། །ལྷ་རེ་ཞིག་མི་འདི་ཚེ་གཅིག་གི་སྡུག་བསྔལ་གྱི་ཕྱིར་བདག་ཉིད་མི་གཡེང་བ་དང་། བག་ཡོད་པར་ཀུན་ཏུ་སྲུང་བར་བགྱིད་ན། བདག་ཅག་དགེ་སློང་རོལ་མོའི་སྒྲ་ལ་ལྟ་བ་དང་། ཉན་པ་སྤོང་བ་བླངས་ཏེ། བསླབ་པ་བཟུང་བ་དག་ཚེ་རབས་དུ་མའི་སྡུག་བསྔལ་གྱི་རྒྱུ་གར་དང་། གླུ་དང་། རོལ་མོའི་སྒྲ་ལ་ལྟ་བའམ་ཉན་པ་ལྟ་སྨོས་ཀྱང་ཅི་དགོས་ཏེ་དེ་ནི་གནས་མེད་དོ། །རྒྱལ་པོ་གཏུམ་པོ་རབ་སྣང་འབྲུ་མར་གྱི་སྣོད་མཐོང་བས་ཡིད་ཆེས་ཏེ་ལྷག་པར་དད་ནས་བཙུན་མོའི་འཁོར་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པས་ཀ་ཏྱའི་བུ་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པ་ལ་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་དར་ཏེ་ཡང་དག་པར་ཚིམ་པར་བྱེད། ཡང་དག་པར་སྟོབས་པར་བྱེད་ཅིང་རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་དར་ཏེ་ཡང་དག་པར་ཚིམ་པར་བྱས། ཡང་དག་པར་བསྟབས་ནས་ཚེ་དང་ལྡན་པ་ཀ་ཏྱའི་བུ་ཆེན་པོས་གདུགས་ཚོད་གསོལ་ནས་ལྷུང་བཟེད་གྱུ་ཕྱག་བཅབས་པར་རིག་ནས་སྟན་ཆེས་དམའ་བ་ཞིག་བླངས་ཏེ། ཚེ་དང་ལྡན་པ་ཀ་ཏྱའི་བུ་ཆེན་པོའི་མདུན་དུ་འདུག་གོ །འདུག་ནས་ཚེ་དང་ལྡན་པ་ཀ་ཏྱའི་བུ་ཆེན་པོ་ལ་འདི་སྐད་ཅེས་སྨྲས་སོ། །

འཕགས་པ་ཇི་ལྟར་བདག་གིས་བགྱིས་པ་དེ་ལྟར་འཁོར་ལྔ་བརྒྱ་ལ་བསོད་པའི་ཞལ་ཟས་ཀྱིས་ཚིམ་པར་བགྱིས་པ་གཞན་འགའ་མཆིས་སམ། དེས་སྨྲས་པ། ལྷས་བདག་དུ་མ་བས་ཁྱད་ཞུགས་པ་ཁྱོད་ཀྱིས་བདག་འཁོར་ལྔ་བརྒྱ་དང་བསོད་པའི་ཁ་ཟས་འདི་ལྟ་བུས་ཚིམ་པར་བྱས་པ་གང་ཡིན་པ་འདི་ལ་ངོ་མཚར་ཅི་ཞིག་ཆེ། བདག་འདིར་འོངས་པའི་ཚེ་རི་འོར་ན་གནས་པའི་བུ་མོ་ཞིག་གིས་བདག་ཉིད་ཀྱི་སྐྲ་བཙོངས་ནས་འཁོར་ལྔ་བརྒྱ་དང་ཁ་ཟས་བསོད་པ་འདི་ལྟ་བུས་ཚིམ་པར་བྱས་པ་ནི་འདི་བས་ཆེས་ཁྱད་ཞུགས་པར་ངོ་མཚར་ཆེའོ། །

རྒྱལ་པོ་གཏུམ་པོ་རབ་སྣང་གིས་བསམས་པ། བུ་མོ་གང་ཞིག་གིས་སྐྲ་ཀཱར་ཥཱ་པ་ཎ་ལྔ་བརྒྱར་ལྡོམ་པ་དེ་ལྟ་བུའི་བུད་མེད་ནི་ལྷ་དག་གི་ནང་ན་ཡང་ག་ལ་ཡོད། མདོར་ན་དེ་བཙལ་བར་བྱའོ་སྙམ་ན་ཚེ་དང་ལྡན་པ་ཀ་ཏྱའི་བུ་ཆེན་པོ་ནི་བསྙེན་པར་དཀའ་བ་ཡིན་པས་དེས་དེ་ལ་བུ་མོ་དེ་རི་འོར་གང་ན་འདུག་ཅེས་དྲི་བར་མ་ནུས་ཏེ། དེས་ཞོ་ཤས་འཚོ་བ་རྣམས་ལ་བསྒོ་བ། ཤེས་ལྡན་དག་ཀ་ཏྱའི་བུ་ཆེན་པོ་ལམ་གང་ནས་འོངས་པ་དེ་ནས་དེང་ལ་རི་འོར་གང་ན་བུ་མོ་ཞིག་གིས་སྐྲ་བཙོངས་ནས་འཕགས་པ་ཀ་ཏྱའི་བུ་ཆེན་པོ་འཁོར་ལྔ་བརྒྱ་དང་བཅས་པ་ལ་བཤོས་གསོལ་བ་ཚོལ་ལ་བཙལ་ནས་དེ་ངའི་དོན་དུ་སློངས་ཤིག །ལྷ་དེ་ལྟར་འཚལ་ལོ་ཞེས་ཞོ་ཤས་འཚོ་བ་རྣམས་ཀྱིས་རྒྱལ་པོ་གཏུམ་པོ་རབ་སྣང་གི་ལྟར་མཉན་ཏེ་རིམ་གྱིས་ཚོལ་བ་ན་ཀ་ནྱཱ་ཀུབ་ཛར་ཕྱིན་ཏེ་དེ་དག་གིས་དེ་བཙལ་ལོ། །

བཙལ་ནས་ལམ་གྱིས་དུབ་པ་ངལ་གསོ་སྟེ། བྲམ་ཟེ་མོ་དེའི་ཁྱིམ་གང་ན་བ་དེར་སོང་སྟེ་ཕྱིན་པ་དང་། སྒོ་ཁང་དུ་འཁོད་ནས་སྨྲས་པ། བཀྲ་ཤིས་པར་གྱུར་ཅིག །བཀྲ་ཤིས་པར་གྱུར་ཅིག །བྲམ་ཟེ་མོ་དེས་སྨྲས་པ། ཤེས་ལྡན་དག་ཅི་འདོད། དེ་དག་གིས་སྨྲས་པ། བུ་མོ་སྐྲ་ཅན་མའོ། །བྲམ་ཟེ་མོས་སྨྲས་པ། སུའི་དོན་དུ་སློང་དེ་དག་གིས་སྨྲས་པ། བྲམ་ཟེ་མོ་རྒྱལ་པོ་གཏུམ་པོ་རབ་སྣང་གིའོ། །དེས་སྨྲས་པ། ཤེས་ལྡན་དག་ལེགས་མོད་ཀྱི་འོན་ཀྱང་འདི་ལ་གཉོད་མང་དུ་དགོས་སོ། །དེ་དག་གིས་སྨྲས་པ། སྲིང་མོ་ཇི་ཙམ་ཞིག་དགོས། དེས་སྨྲས་པ། གསང་བའི་རྒྱན་ལྔ་བརྒྱ་དང་། ཕྱི་རོལ་གྱི་རྒྱན་ལྔ་བརྒྱ་དང་། གྲོང་ཁྱེར་མཆོག་ལྔའོ། །དེ་དག་གིས་རྒྱལ་པོ་གཏུམ་པོ་རབ་སྣང་ལ་ལྷ་བུ་མོ་གཉོད་འདི་སྙེད་ཅིག་གིས་ཁུགས་སོ་ཞེས་དོན་དེ་སྤྲིང་བ་དང་། རྒྱལ་པོ་གཏུམ་པོ་རབ་སྣང་གིས་ཕྱིར་སྤྲིང་བ། ཤེས་ལྡན་དག་བུ་མོ་གཉོད་ཇི་ཙམ་གྱིས་ཁུགས་པ་ནོས་ཤིག་ཐམས་ཅད་སྦྱར་རོ། །དེ་དག་གིས་བླངས་ནས་རྒྱལ་པོས་ཉི་མ་དང་། ཚེས་གྲངས་དང་། ཡུད་ཙམ་དང་སྦྱར་ཏེ་དཔལ་གྱི་འབྱོར་པ་ཆེན་པོས་བག་མར་བླངས་སོ། །

གང་གི་ཉིན་པར་འཕགས་རྒྱལ་དུ་ཕྱིན་པ་དེ་ཉིད་ཀྱི་ཉིན་པར་ཡུལ་འཕགས་རྒྱལ་དུ་མི་ངས་ཐམས་ཅད་ཀྱི་ཐམས་ཅད་དུ་ཉེ་བར་ཞི་ཞིང་ཞི་བར་གྱུར་ནས་དེའི་མིང་ཞི་བ་ཞེས་བྱ་བར་ཆགས་སོ། །ཞེས་གསུངས་སོ།། །།

དད་པ་ཅན་གྱི་བུ་མོ་སྡེ་ཆེན་མ་ཞེས་བྱ་བས་བརླའི་ཤ་བཅད་ནས་བྱིན་པས་དགེ་སློང་ཞིག་ནད་ལས་ཐར་བའི་ཚུལ། འདུལ་བ་ལུང་གཞི་ལས་བཏུས།

སངས་རྒྱས་བཅོམ་ལྡན་འདས་ཡུལ་ཀ་ཤི་ནས་ལྗོངས་རྒྱུ་ཞིང་གཤེགས་པ་ན་བཱ་རཱ་ཎ་སཱིར་བྱོན་ནས། བཱ་རཱ་ཎ་སཱི་ན་དྲང་སྲོང་སྨྲ་བ་རི་དྭགས་ཀྱི་ནགས་ན་བཞུགས་སོ། །བཱ་རཱ་ཎ་སཱི་ན་ཁྱིམ་བདག་སྡེ་ཆེན་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་གནས་སོ། །དེའི་ཆུང་མ་ནི་སྡེ་ཆེན་མ་ཞེས་བྱའོ། །དེ་ཆུང་མ་དང་བཅས་ཏེ་དད་པ་བཟང་བ་དགེ་བའི་བསམ་པ་ཅན་ཡིན་ཏེ། དེས་བཅོམ་ལྡན་འདས་ཡུལ་ཀ་ཤི་ཞེས་བྱ་བ་ནས་ལྗོངས་རྒྱུ་ཞིང་གཤེགས་པ་ན་བཱ་རཱ་ཎ་སཱིར་བྱོན་ནས། བཱ་རཱ་ཎ་སཱི་ན་དྲང་སྲོང་སྨྲ་བ་རི་དྭགས་ཀྱི་ནགས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་འདི་སྙམ་དུ་སེམས་ཏེ། བཅོམ་ལྡན་འདས་བདག་གི་ཁྱིམ་དུ་ལན་མང་དུ་སྤྱན་དྲངས་ཏེ་ཞལ་ཟས་ནི་གསོལ་ན་ཡོ་བྱད་ཐམས་ཅད་ཀྱིས་མ་བསྟབས་ཀྱིས། མ་ལ་བདག་གིས་ད་བཅོམ་ལྡན་འདས་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པར་བྱའོ་སྙམ་ནས། བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ །

ཕྱོགས་གཅིག་ཏུ་འདུག་པ་དང་བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་སྡེ་ཆེན་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་དེ་རྗེས་སུ་ཡི་རངས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་དགུང་ཟླ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམ་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་འབུལ་ན་བདག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་སྡེ་ཆེན་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་སྟན་ལས་ལངས་ཏེ་སོང་ངོ་། །

བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ཁྱིམ་བདག་སྡེ་ཆེན་གྱིས་ཟླ་བ་གསུམ་དུ་ན་བཟའ་ཆོས་གོས་དང་། བསོད་སྙོམས་དང་། གཟིམ་ཆ་དང་། སྙུན་དཔྱད་ཀྱི་རྐྱེན་སྨན་དང་། ཡོ་བྱད་རྣམས་ཀྱིས་བསྙེན་བཀུར་ཁོ་ན་བྱས་སོ། །ཁྱིམ་བདག་སྡེ་ཆེན་གྱི་ཀུན་ཏུ་སྤྱོད་པ་ནི་ནང་པར་སྔར་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་དགེ་སློང་རྣམས་ལ་ལྟ་བར་བྱེད་པ་ལས་དགེ་སློང་ན་བ་ནད་ཚབས་ཆེ་བ་སྡུག་བསྔལ་བའི་ནད་པ་གཞན་ཞིག་ཡོད་པ་དེ་ལ་སྨན་པས་ཤ་ཁུ་འཐུངས་ཤིག་ཅེས་བསྟན་ཏོ། །དེ་ནས་ཁྱིམ་བདག་སྡེ་ཆེན་དགེ་སློང་དེ་གང་ན་བ་དེར་སོང་སྟེ་ཕྱིན་ནས་རྐང་པ་གཉིས་ལ་མགོ་བོས་ཕྱག་བྱས་ཏེ་དྲིས་པ། འཕགས་པ་སྨན་པས་ཅི་བསྟན། དེས་སྨྲས་པ། ཤ་ཁུ་འཐུངས་ཤིག་ལོ། །དེ་ནས་ཁྱིམ་བདག་སྡེ་ཆེན་རང་གི་ཁྱིམ་དུ་སོང་སྟེ་ཆུང་མ་ལ་སྨྲས་པ། སློབ་དཔོན་ཆེ་གེ་མོ་ཞེས་བྱ་བ་ལ་སྨན་པས་ཤ་ཁུ་འཐུངས་ཤིག་ཅེས་བསྟན་གྱིས་སྦྱོར་ལ་སྐུར་ཅིག །དེས་བུ་མོ་ཞིག་ལ་རིན་བསྐུར་ནས་ཚོང་འདུས་སུ་བཏང་བ་ལས། དེའི་ཉིན་མོ་རྒྱལ་པོའི་སྲས་བལྟམ་ནས། དེས་དྲིལ་སྒྲོགས་སུ་བཅུག་པ། སུས་ཀྱང་སྲོག་གཅད་པར་མི་བྱའོ། །གང་ཞིག་སྲོག་བཅད་ན་ཆད་པས་ཆོད་པར་བཅད་དོ་ཞེས་བསྒོའོ། །

དེ་ནས་རིན་གྱིས་ཀྱང་ཚོང་དུས་སུ་ཤ་མ་རྙེད་ནས། དེ་ནས་བུ་མོ་དེས་དེ་ལྟར་གྱུར་པ་དག་ཁྱིམ་བདག་སྡེ་ཆེན་ལ་རྒྱས་པར་བརྗོད་པ་དང་། ཁྱིམ་བདག་སྡེ་ཆེན་གྱི་ཆུང་མས་བསམས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བདག་ཅག་གི་ཡོ་བྱད་ཐམས་ཅད་ཀྱིས་བསྟབས་ན། གལ་ཏེ་དགེ་སློང་ཞིག་སྨན་མེད་པས་ཤི་བར་གྱུར་ན་མ་ལེགས་སོ་ཞེས་དེ་སྙམ་དུ་དཔྱད་ནས། གྲི་རྣོན་པོ་བླངས་ཏེ་ཁྱིམ་དུ་ཞུགས་ནས་བརླའི་ཤ་ལས་བཅད་དེ་བུ་མོ་ལ་བྱིན་ནས་བུ་ཤ་འདི་ཁུ་བར་བྱོས་ལ་འཕགས་པ་ཆེ་གེ་མོ་ཞེས་བྱ་བའི་དྲུང་དུ་ཁྱེར་ཅིག །དེས་དེ་ཁྱེར་ནས་དགེ་སློང་གི་ལོངས་སྤྱད་པ་ལས་སོས་པར་གྱུར་ཏོ། །

དགེ་སློང་དེས་འདི་ལྟར་བདག་ལ་ཁྱིམ་བདག་གི་ཆུང་མ་འདིས་རང་གི་ཤས་བསྙེན་བཀུར་བྱས་པར་རིག་ནས་དེ་འདི་སྙམ་དུ་སེམས་ཏེ། བདག་དད་པས་བྱིན་པ་ལོངས་སྤྱད་ནས་གློས་ཕབ་སྟེ་འདུག་པ་ནི་རིགས་པ་མ་ཡིན་གྱི། མ་ལ་བདག་གིས་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བརྩོན་པར་བྱའོ་སྙམ་ནས། དེ་བརྩོན་འགྲུས་བརྩམ་པར་བརྩམས་ཏེ། དེས་བརྩོན་པ་དང་། འབད་པ་དང་། བརྩལ་བ་བྱས་པས་འཁོར་བའི་འཁོར་ལོ་ཆ་ལྔ་པོ་གཡོ་བ་དང་། མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་དུ་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་ནས་དགྲ་བཅོམ་པར་གྱུར་ཏེ། ཁམས་གསུམ་གྱི་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཉམ་པའི་སེམས་སྟེའུ་དང་ཙན་དན་དུ་མཉམ་པ། རིག་པས་མ་རིག་པའི་སྒོ་ངའི་སྦུབས་དྲལ་ཅིང་རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པའི་རྙེད་པ་དང་ཆགས་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་པོ་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། བརྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །

སྐབས་དེ་ལ་སངས་རྒྱས་བཅོམ་ལྡན་འདས་རྣམས་ནི་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པའམ། རྣམ་པར་མི་མཁྱེན་པ་ཅུང་ཟད་ཀྱང་མི་མངའོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་མནབས་ལྷུང་བཟེད་དང་། ཆོས་གོས་བསྣམས་ནས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་གྱིས་བལྟས་ཏེ་ཁྱིམ་བདག་སྡེ་ཆེན་གྱི་ཁྱིམ་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་བཀའ་སྩལ་པ། ཁྱིམ་བདག་ཁྱིམ་བདག་གི་ཆུང་མ་སྡེ་ཆེན་མ་མི་སྣང་ན་ག་རེ། བཅོམ་ལྡན་འདས་སྤྱོད་ལམ་རྔོ་མི་ཐོག་པས་ཕུགས་ན་མཆིས་སོ། །སངས་རྒྱས་བཅོམ་ལྡན་འདས་རྣམས་ཀྱི་ཆེ་བའི་བདག་ཉིད་ནི་བསམ་གྱིས་མི་ཁྱབ་པ་ཡིན་པས་བཅོམ་ལྡན་འདས་ཀྱིས་གང་གིས་ན་རྨ་དེ་མདོག་འདྲ་བ་དང་། པགས་པ་འདྲ་བ་དང་། བ་སྤུ་འདྲ་བར་གྱུར་པ་དེ་ལྟར་བྱིན་གྱིས་བརླབས་སོ། །

དེ་ནས་ཁྱིམ་བདག་སྡེ་ཆེན་གྱི་ཆུང་མ་དད་པ་སྐྱེས་ཏེ་སྒོར་བྱུང་ནས་བཅོམ་ལྡན་འདས་ཀྱི་ཞབས་གཉིས་ལ་གཏུགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཅི་ཁྱིམ་བདག་གི་ཆུང་མ་འདི་བྱང་ཆུབ་སེམས་དཔའི་སྦུངས་ཉམས་སུ་མྱོང་བར་བྱེད་དམ། དེས་ཚིགས་སུ་བཅད་དེ་གསོལ་བ། བསྒྲིམ་མི་དགོས་པར་འཁོར་བ་ན། །ལུས་ནི་ཤིན་ཏུ་རྙེད་པར་སླའི། །བསྐལ་པ་བྱེ་བ་སྟོང་རྣམས་སུ། །སྦྱིན་གནས་ཤིན་ཏུ་རྙེད་པར་དཀའ། །དེ་ནས་ཁྱིམ་བདག་སྡེ་ཆེན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་གཙང་ཞིང་བསོད་པའི་བཟའ་བ་དང་བཅའ་བ་རྣམས་རང་གི་ལག་གིས་སྟོབས་ཤིང་ཚིམ་པར་བྱེད་དོ། །རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་གིས་བསྟབས་ཤིང་ཚིམ་པར་བྱས་ཏེ། བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ། ལྷུང་བཟེད་གྱུ་བར་རིག་ནས་སྟན་ཆེས་དམའ་བ་ཞིག་བླངས་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ །དེ་ནས་བཅོམ་ལྡན་འདས་ཀྱིས་ཁྱིམ་བདག་སྡེ་ཆེན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་བསྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་བཅོམ་ལྡན་འདས་གཙུག་ལག་ཁང་དུ་གཤེགས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཤ་རྣམས་ཀྱི་ནང་ནས་ནི་འདི་ལྟ་སྟེ། མིའི་ཤ་ཐ་ཆད་ཡིན་ནོ། །དེ་ལྟ་བས་ན་དགེ་སློང་གིས་མིའི་ཤ་བཟའ་བར་མི་བྱའོ། །དགེ་སློང་གིས་མི་ཤ་ཟོས་ན་ལྟུང་བ་སྦོམ་པོར་འགྱུར་རོ། །

གཞན་ཡང་ངས་དགེ་འདུན་གྱི་གནས་བརྟན་གྱི་དགེ་སློང་གི་ཀུན་ཏུ་སྤྱོད་པའི་ཆོས་བཅའ་བར་བྱ་སྟེ། དགེ་འདུན་གྱི་གནས་བརྟན་གྱི་དགེ་སློང་གིས་ཤ་འདྲིམ་པར་བྱེད་ན་འདི་ཅིའི་ཤ་ཞེས་དྲི་བར་བྱའོ། །གལ་ཏེ་དགེ་འདུན་གྱི་གནས་བརྟན་གྱིས་མ་སྤོབས་ན་གནས་བརྟན་གཉིས་པས་དྲི་བར་བྱའོ། །དགེ་འདུན་གྱི་གནས་བརྟན་གྱིས་ཀུན་ཏུ་སྤྱད་པའི་ཆོས་ཇི་ལྟར་བཅས་པ་བཞིན་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་ཐམས་ཅད་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་སྡེ་ཆེན་གྱི་མཆིས་འབྲང་གིས་རང་གི་ཤས་དགེ་སློང་འདི་ལ་བསྙེན་བཀུར་བགྱིས་ལ། དགེ་སློང་འདིས་ཀྱང་སྡེ་ཆེན་མ་ལ་བརྟེན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་འབའ་ཞིག་མ་ཡིན་གྱི། ཇི་ལྟར་འདིས་འདས་པའི་དུས་ན་ཡང་དགེ་སློང་འདི་ལ་རང་གི་ཤས་བསྙེན་བཀུར་བྱས་ཏེ་འདིས་ཀྱང་དེ་ལ་བརྟེན་ནས་མངོན་པར་ཤེས་པ་ལྔ་མངོན་སུམ་དུ་བྱས་པ་དེ་ཤིན་ཏུ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་བཤད་དོ། །

དགེ་སློང་དག་སྔོན་བྱུང་བ་བཱ་རཱ་ཎ་སཱིའི་གྲོང་ན་ཁྱིམ་བདག་སྡེ་ཆེན་ཞེས་བྱ་བ་ཞིག་ཡོད་དེ། དེའི་ཆུང་མ་སྡེ་ཆེན་མ་ཞེས་བྱའོ། །ཇི་ཙམ་ན་བྲམ་ཟེ་ཚོགས་འདོན་དུ་འཇུག་པ་གཞན་ཞིག་བྲམ་ཟེའི་བུ་ལྔ་བརྒྱ་ཙམ་ལ་བྲམ་ཟེའི་གསང་ཚིག་འདོན་དུ་འཇུག་གོ །དེ་ལ་ཁྱིམ་བདག་སྡེ་ཆེན་དད་པ་སྐྱེས་ཏེ། དེས་དེ་འཁོར་དང་བཅས་པ་ལ་ཡོ་བྱད་ཐམས་ཅད་ཀྱིས་བསྟབས་ཏེ། ཁྱིམ་བདག་སྡེ་ཆེན་གྱིས་བྲམ་ཟེ་དེ་འཁོར་དང་བཅས་པ་ལ་བཀུར་སྟི་ཁོ་ན་བྱས་སོ། །

ཁྱིམ་བདག་དེའི་ཀུན་ཏུ་སྤྱོད་པ་ནི་ནང་པར་སྔར་ལངས་ཏེ་ནད་པ་རྣམས་ལ་ལྟ་བར་བྱེད་པས་ཇི་ཙམ་ན་བྲམ་ཟེའི་ཁྱེའུ་གཞན་ཞིག་ན་བ་སྡུག་བསྔལ་བ་ནད་ཚབས་ཆེ་བར་གྱུར་ནས་དེ་ལ་སྨན་པས་ཤ་ཁུ་འཐུངས་ཤིག་ཅེས་བསྟན་ཏོ། །དེ་ནས་ཁྱིམ་བདག་སྡེ་ཆེན་བྲམ་ཟེའི་ཁྱེའུ་གང་ན་བ་དེར་སོང་སྟེ་སོན་ནས་ཕྱག་བྱས་ཏེ་དྲིས་པ། བྲམ་ཟེའི་ཁྱེའུ་ཁྱོད་ལ་སྨན་པས་ཅི་བསྟན། དེས་སྨྲས་པ། ཤ་ཁུ་འཐུངས་ཤིག་ལོ། །དེ་ནས་ཁྱིམ་བདག་སྡེ་ཆེན་ཁྱིམ་དག་ཏུ་སོང་ནས་ཆུང་མ་ལ་སྨྲས་པ། བྲམ་ཟེའི་ཁྱེའུ་ཆེ་གེ་མོ་ཞེས་བྱ་བ་ལ་ཤ་ཁུ་འཐུངས་ཤིག་ཅེས་སྨན་པས་བསྟན་གྱིས་དེ་སྦྱོར་ལ་སྐུར་ཅིག །དེས་བུ་མོ་ཞིག་ལ་རིན་བསྐུར་ཏེ་ཚོང་དུས་སུ་བཏང་ངོ་། །དེ་ཉིད་ཀྱི་ཉིན་མོ་རྒྱལ་པོའི་བུ་བཙས་ནས་དེས་དྲིལ་སྒྲོགས་སུ་བཅུག་སྟེ། སུས་ཀྱང་སྲོག་གཅད་པར་མི་བྱའོ། །གང་གིས་སྲོག་བཅད་པར་གྱུར་ན་དེ་ཆད་པས་ཆོད་པར་བཅད་དོ་ཞེས་བསྒོའོ། །དེ་ནས་ཚོང་དུས་སུ་རིན་གྱིས་ཀྱང་ཤ་མ་རྙེད་དོ། །དེ་ནས་བུ་མོ་དེས་དེ་ལྟར་གྱུར་པ་དག་ཁྱིམ་བདག་སྡེ་ཆེན་གྱི་ཆུང་མ་ལ་རྒྱས་པར་སྨྲས་པ་དང་། ཁྱིམ་བདག་སྡེ་ཆེན་གྱི་ཆུང་མས་བསམས་པ། བྲམ་ཟེ་འཁོར་དང་བཅས་པ་འདི་དག་བདག་ཅག་གིས་ཡོ་བྱད་ཐམས་ཅད་བསྟབས་ན། གལ་ཏེ་བྲམ་ཟེའི་ཁྱེའུ་ཞིག་སྨན་མེད་པས་དུས་བྱས་པར་གྱུར་ན་མ་ལེགས་སོ་ཞེས་དེ་སྙམ་དུ་དཔྱད་ན། གྲི་རྣོན་པོ་བླངས་ཏེ་ཁྱིམ་གྱི་ནང་དུ་ཞུགས་ནས་བརླའི་ཤ་ལས་བཅད་དེ་བུ་མོ་ལ་བྱིན་ནས། བུ་ཤ་འདི་ཁུ་བར་བྱོས་ལ་བྲམ་ཟེའི་ཁྱེའུ་ཆེ་གེ་མོ་ཞེས་བྱ་བའི་དྲུང་དུ་ཁྱེར་ཅིག །དེས་ཁྱེར་ནས་བྲམ་ཟེའི་ཁྱེའུ་དེས་ལོངས་སྤྱད་ནས་སོས་པར་གྱུར་ཏོ། །

བྲམ་ཟེའི་ཁྱེའུ་དེས་འདི་ལྟར་བདག་ལ་ཁྱིམ་བདག་གི་ཆུང་མ་དེས་རང་གི་ཤས་བསྙེན་བཀུར་བྱས་པར་རིག་ནས་དེ་འདི་སྙམ་དུ་སེམས་ཏེ། བདག་དད་པས་བྱིན་པ་ཡོངས་སུ་ལོངས་སྤྱད་ནས་བདག་གློས་ཕབ་སྟེ་འདུག་པ་ནི་རིགས་པ་མ་ཡིན་གྱིས། མ་ལ་བདག་གིས་མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བདག་གིས་འབད་པར་བྱའོ་སྙམ་ནས། དེ་ནས་དེ་ཞི་བའི་ཕྱོགས་སུ་སོང་སྟེ་མངོན་པར་ཤེས་པ་ལྔ་མངོན་སུམ་དུ་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་ཁྱིམ་བདག་སྡེ་ཆེན་ཞེས་བྱ་བའི་ཆུང་མ་གང་ཡིན་པ་དེ་ནི་ཁྱིམ་བདག་སྡེ་ཆེན་གྱི་ཆུང་མ་འདི་ཉིད་ཡིན་ནོ། །

དེའི་ཚེ་དེའི་དུས་ཀྱི་བྲམ་ཟེའི་ཁྱེའུ་གང་ཡིན་པ་དེ་ནི་དགེ་སློང་འདི་ཉིད་ཡིན་ཏེ་དེའི་ཚེ་ཡང་འདིས་དགེ་སློང་དེ་ལ་རང་གི་ཤས་བསྙེན་བཀུར་བྱས་ཏེ། འདིས་ཀྱང་དེ་ལ་བརྟེན་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །ད་ལྟར་ཡང་འདིས་དགེ་སློང་འདི་ལ་རང་གི་ཤས་བསྙེན་བཀུར་བྱས་སོ། །དགེ་སློང་འདིས་ཀྱང་འདི་ལ་བརྟེན་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་སོ། །ཞེས་གསུངས་སོ།། །