མཁའ་འགྲོའི་ཆོས་མཛོད་ཆེན་མོ་ལས་འཕགས་བོད་ཀྱི་སྐྱེས་ཆེན་མ་དག་གི་རྣམ་ཐར་ཕྱོགས་བསྒྲིགས་པདྨ་དཀར་པོའི་ཕྲེང་བ།

རྒྱལ་པོའི་བུ་མོ་བྱམས་མ་ཞེས་བྱ་བས་གཞོན་ནུ་ནོར་བཟང་ལ་རང་གི་ཁང་བཟང་གི་བཀོད་པའི་མཐོང་བ་བསྟན་པ་དང་ཤེས་རབ་ཀྱི་ཕ་རོལ་དུ་ཕྱིན་པའི་རྒྱུད་ཀུན་ནས་རྣམ་ཐར་བརྒྱན་པའི་ ཏིང་ངེ་འཛིན་གྱི་ཕན་ཡོན་དག་གསུངས་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་དགེ་བའི་བཤེས་གཉེན་ལ་རིམ་གྲོ་བསམ་གྱིས་མི་ཁྱབ་པ་ལ་ཞུགས་པ་མོས་པ་རྒྱ་ཆེན་པོས་རྣམ་པར་དག་པ་ཐེག་པ་ཆེན་པོ་ལ་མངོན་དུ་ཕྱོགས་པ། སངས་རྒྱས་ཀྱི་ཡེ་ཤེས་ལ་མངོན་པར་མོས་པ། སངས་རྒྱས་ཀྱི་ཆོས་ལ་ཡང་དག་པར་ཞུགས་པ། དགེ་བའི་བཤེས་གཉེན་གྱི་རྗེས་སུ་འབྲང་བར་སྤྲོ་བ། ཆོས་ཀྱི་རིམ་གྲོ་ལ་རྣམ་པར་སྤྱོད་པ། ཆགས་པ་མེད་པའི་ཡེ་ཤེས་ལ་མངོན་དུ་གྱུར་པ། ཡང་དག་པའི་མཐའ་ཤིན་ཏུ་རྟོགས་པ། ཡེ་ཤེས་ཀྱི་མཐའ་ལ་གནས་པའི་ཡུལ་དང་ལྡན་པ། དུས་གསུམ་སྐད་ཅིག་གི་ཆ་ཤས་ལ་ཁོང་དུ་ཆུད་པར་བྱེད་པ། ནམ་མཁའི་མཐའ་གཉིས་སུ་མེད་པ་མངོན་དུ་གྱུར་པ། མི་གཉིས་པའི་མཐའ་རྣམ་པར་གདོན་མི་ཟ་བ་ཐོབ་པ། ཆོས་ཀྱི་དབྱིངས་ཀྱི་མཐའ་ལ་རྣམ་པར་མི་རྟོག་པར་གནས་པ། བསྒྲིབས་པ་མེད་པའི་མཐས་གདུལ་བ་ཁོང་དུ་ཆུད་པར་བྱ་བ་ལ་ཞུགས་པ། ཆོས་ཀྱི་མཐའ་དང་མི་འགལ་བར་བྱ་བ་ལ་གཞོལ་བ། དེ་བཞིན་གཤེགས་པའི་མཐའ་ལ་མཐའ་མེད་པར་ཁོང་དུ་ཆུད་པ། སངས་རྒྱས་ཐམས་ཅད་ཀྱི་མཐའ་ལ་རྣམ་པར་མི་རྟོག་པར་གནས་པ། སེམས་ཅན་ཐམས་ཅད་ཀྱི་འདུ་ཤེས་ཀྱི་དྲ་བ་རྣམ་པར་གཏོར་བའི་ཡེ་ཤེས་ལ་གཞོལ་བ། ཞིང་ལ་མངོན་པར་ཆགས་པ་ཐམས་ཅད་དང་བྲལ་བ། སངས་རྒྱས་ཀྱི་འཁོར་གྱི་དཀྱིལ་འཁོར་ཐམས་ཅད་ལ་ཆགས་པ་མེད་པའི་སེམས་དང་ལྡན་པ། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་ལ་གནས་པ་མེད་པར་སྤྱོད་པ། སེམས་ཅན་ཐམས་ཅད་ལ་བདག་མེད་པ་དང་། སེམས་ཅན་མེད་པའི་འདུ་ཤེས་དང་ལྡན་པ། སྒྲ་ཐམས་ཅད་ཚིག་གི་ལམ་ལྟ་བུར་ཁོང་དུ་ཆུད་པ། གཟུགས་ཐམས་ཅད་གཟུགས་ཀྱི་གཟུགས་བརྙན་དང་མཉམ་པར་རྣམ་པར་རིག་པར་བྱ་བ་ལ་གཞོལ་བ་དེ་མཐར་གྱིས་སེང་གེ་རྣམ་པར་བསྒྱིངས་པའི་གྲོང་ཁྱེར་གང་ན་བ་དེར་ཕྱིན་ཏེ། བུ་མོ་བྱམས་མ་ཚོལ་ཞིང་ཡོངས་སུ་རྨེད་རྨེད་པ་ལས། རྒྱལ་པོ་སེང་གེ་དཔལ་གྱི་བུ་མོ་བྱམས་མ་འཁོར་བུ་མོ་ལྔ་བརྒྱ་དང་ལྡན་པ་དེ་ཁང་པ་རྣམ་པར་སྣང་བའི་སྙིང་པོ་ཞེས་བྱ་བའི་ནང་ན་ཁྲི་ཙན་དན་སྦྲུལ་གྱི་སྙིང་པོའི་རྐང་པ་ཅན། གསེར་གྱི་ལྕག་ཕོད་ཀྱི་དྲ་བས་ལེགས་པར་བླས་པ། ལྷ་རྫས་ཀྱི་སྟན་བཏིང་བ་ལ་འདུག་ཅིང་ཆོས་སྟོན་ཏོ། །ཞེས་ཐོས་ནས། སེང་གེ་རྣམ་པར་བསྒྱིངས་པའི་གྲོང་ཁྱེར་དུ་སོང་སྟེ། རྒྱལ་པོ་སེང་གེ་དཔལ་གྱི་གནས་གང་ན་བ་དེར་ཕྱིན་ནས། རྒྱལ་པོའི་ཕྱི་སྒོའི་སྒོ་གང་ན་བུ་མོ་བྱམས་མ་མཐོང་བར་དགའ་བའི་ཕྱིར་སྡོད་ཅིང་འདུག་འདུག་པ་དང་། དེས་དེར་སྲོག་ཆགས་བརྒྱ་ཕྲག་དུ་མ་དང་། སྲོག་ཆགས་སྟོང་ཕྲག་དུ་མ་དང་། སྲོག་ཆགས་བརྒྱ་སྟོང་ཕྲག་དུ་མ་འདོང་བ་མཐོང་ནས། ཁྱེད་གང་ནས་འོངས། ད་གང་དུ་འདོང་ཞེས་དྲིས་པ་དང་། དེ་དག་ན་རེ་ངེད་ནི་བུ་མོ་བྱམས་མའི་དྲུང་དུ་ཆོས་མཉན་པའི་ཕྱིར་འདོང་ངོ་ཞེས་ནས། དེས་བསམས་པ་འདིར་ནི་སུ་འགྲོ་ཡང་བགག་པ་མེད་པ་ལྟ་ཞིག་སྙམ་སྟེ། དེ་ཡང་ནང་དུ་ཕྱིན་ཏོ། །

དེ་ལྟར་ཕྱིན་ཏེ་བལྟས་ན་ཁང་པ་རྣམ་པར་སྣང་བའི་སྙིང་པོ་ཅན་དེ་ཡང་། གཞི་ཤེལ་དུ་འདུག་པའི་ས་ལས་བླངས་ཏེ། བཻཌཱུརྱའི་ཀ་བ་བཀྱེ་བ། རྩིག་པ་རྡོ་རྗེ་ལས་བྱས་པ། འཛམ་བུ་ཆུ་ཀླུང་གི་གསེར་གྱི་ལྷུན་དང་ལྡན་པའི་བ་གམ་བརྒྱ་ཕྲག་སྟོང་གིས་བརྒྱན་པ། ནོར་བུ་རིན་པོ་ཆེ་གྲངས་མེད་པས་རྣམ་པར་བྲིས་པ། རིན་པོ་ཆེ་སྟོང་གི་སྙིང་པོའི་མེ་ལོང་གི་དཀྱིལ་འཁོར་གྱིས་ཤིན་ཏུ་སྤ་བར་བྱས་པ། ནོར་བུ་རིན་པོ་ཆེ་འགྲོ་བའི་ཡིད་དུ་འོང་བས་རྣམ་པར་བརྒྱན་པ། རིན་པོ་ཆེའི་ཤིང་ཐགས་གྲངས་མེད་པས་ཡོངས་སུ་བསྐོར་བ། གསེར་གྱི་དྲིལ་བུ་བརྒྱ་སྟོང་ཤིན་ཏུ་འཁྲོལ་བའི་སྒྲ་སྙན་པ་བསམ་གྱིས་མི་ཁྱབ་པའི་རྒྱན་དང་ལྡན་པ་འདུག་པར་མཐོང་ངོ་། །བུ་མོ་བྱམས་མ་དེ་ཡང་མིག་དཀར་ནག་འབྱེས་པ། སྐྲ་མཐོན་ཏིང་དུ་འདུག་པ། མདོག་གསེར་གྱི་ཁ་དོག་ལྟར་འདུག་པ་མཐོང་ནས། དེས་དེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཐལ་མོ་སྦྱར་ཏེ་མདུན་དུ་འདུག་ནས། འདི་སྐད་ཅེས་སྨྲས་སོ། །

འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། སྨྲས་པ། རིགས་ཀྱི་བུ། ཁོ་མོའི་གནས་ཀྱི་རྒྱན་ལ་ལྟོས་ཤིག །ཅེས་ནས་དེས་ཀུན་ཏུ་བྱུལ་ཏེ་བལྟས་པ་དང་། རྩིག་པ་རེ་རེ་དང་། ཀ་བ་རེ་རེ་དང་། མེ་ལོང་གི་དཀྱིལ་འཁོར་རེ་རེ་དང་། རྣམ་པའི་བྱེ་བྲག་རེ་རེ་དང་། དབྱིབས་རེ་རེ་དང་། ནོར་བུ་རིན་པོ་ཆེ་རེ་རེ་དང་། གསེར་གྱི་དྲིལ་བུ་རེ་རེ་དང་། རིན་པོ་ཆེའི་ཤིང་རེ་རེ་དང་། བ་སྤུའི་བུ་ག་རེ་རེ་དང་། རིན་པོ་ཆེའི་སེ་མོ་དོ་རེ་རེ་ལས་ཀྱང་། ཆོས་ཀྱི་དབྱིངས་ཐམས་ཅད་ན་བཞུགས་པའི་དེ་བཞིན་གཤེགས་པ་ཐོག་མ་ཐུགས་བསྐྱེད་པ་དང་བཅས་པ། སྤྱོད་པ་དང་སྨོན་ལམ་གྱི་ཡུལ་དང་བཅས་པ། འབྱུང་བའི་རྒྱན་དང་བཅས་པ། མངོན་པར་འཚང་རྒྱ་བའི་རྣམ་པར་འཕྲུལ་པ་དང་བཅས་པ། ཆོས་ཀྱི་འཁོར་ལོ་བསྐོར་བ་དང་བཅས་པ། ཡོངས་སུ་མྱ་ངན་ལས་འདའ་བ་སྟོན་པ་དང་བཅས་པར་གཟུགས་བརྙན་གྱི་ཚུལ་དུ་མཐོང་བར་གྱུར་ཏོ། །དམིགས་པ་དེ་དག་རེ་རེ་ལས་ཇི་ལྟ་བ་བཞིན་དུ་དམིགས་པ་ཐམས་ཅད་ལས་ཀྱང་མཐོང་བར་གྱུར་ཏོ། །འདི་ལྟ་སྟེ་དཔེར་ན། ཆུས་ཡོངས་སུ་གང་བའི་མཚོ་དང་ཞིང་རྙོག་པ་མེད་ལ་རྣམ་པར་གསལ་བ་ལ་ནི་ནམ་མཁའ་ཉི་ཟླ་དང་། སྐར་མའི་ཚོགས་ཀྱིས་བརྒྱན་པ། གཟུགས་བརྙན་གྱི་ཚུལ་དུ་ཡོངས་སུ་སྣང་ངོ་། །དེ་བཞིན་དུ་ཁང་པ་རྣམ་པར་སྣང་བའི་སྙིང་པོའི་དམིགས་པ་རེ་རེ་ལས་ཀྱང་ཆོས་ཀྱི་དབྱིངས་ཀུན་ན་བཞུགས་པའི་དེ་བཞིན་གཤེགས་པ་ཐམས་ཅད་གཟུགས་བརྙན་གྱི་ཚུལ་དུ་ཡོངས་སུ་སྣང་བར་གྱུར་ཏེ། དེ་ནི་བུ་མོ་བྱམས་མའི་སྔོན་གྱི་དགེ་བའི་རྩ་བའི་རྒྱུའི་ཕྱིར་ཏེ། དེས་དེ་ལྟར་རྣམ་པར་བལྟས་ནས། སངས་རྒྱས་མཐོང་བའི་རྒྱན་གྱི་མཚན་མ་དེ་ཡོངས་སུ་བཟུང་སྟེ། ཐལ་མོ་སྦྱར་ནས། བུ་མོ་བྱམས་མའི་གདོང་དུ་བལྟས་པ་དང་། དེས་སྨྲས་པ། རིགས་ཀྱི་བུ་ཁོ་མོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་ཞེས་བྱ་བ་ཐོབ་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་འདི་ནི་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱའི་ཀླུང་སུམ་ཅུ་རྩ་དྲུག་གི་བྱེ་མ་སྙེད་ལས་ཡོངས་སུ་བཙལ་བ་སྟེ། དེ་བཞིན་གཤེགས་པ་དེ་དག་གིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདི་སྒོ་སྣ་ཚོགས་ཀྱི་ཁོང་དུ་ཆུད་པར་བྱ་བས་རྟོགས་པར་མཛད་དེ། གཅིག་གིས་གང་གསུངས་པ་དེའང་གཉིས་ཀྱིས་མ་གསུངས་སོ། །སྨྲས་པ། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདིའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་ཀུན་ནས་རྣམ་པར་བརྒྱན་པ་འདི་ལ་ཁོ་མོ་མངོན་དུ་བྱེད་ཅིང་། སེམས་པ་དང་རྗེས་སུ་འབྲང་བར་བྱ་བ་དང་། རྣམ་པར་དཔྱོད་པ་དང་། རྗེས་སུ་སེམས་པ་དང་། དྲན་པར་བྱ་བ་དང་། ཡོངས་སུ་གཟུང་བ་དང་། རྣམ་པར་བརྟག་པ་དང་། མངོན་པར་བསྒྲུབ་པ་དང་། ཡང་དག་པར་བརྒྱན་པར་བྱ་བ་དང་། རབ་ཏུ་རྣམ་པར་དབྱེ་བ་བྱེད་པའི་ཚེ། གཟུངས་ཀུན་ནས་སྒོ་ཞེས་བྱ་བ་ཡོངས་སུ་སྐྱེ་སྟེ། གཟུངས་ཀྱི་དཀྱིལ་འཁོར་དེར་ནི་ཆོས་ཀྱི་སྒོ་བརྒྱ་སྟོང་གྲངས་མེད་པ་ཕྲག་བཅུ་ཡོངས་སུ་འདུའོ། །ཁོང་དུ་ཆུད་དོ། །མངོན་དུ་གྱུར་ཏོ། །མངོན་པར་འདུའོ། །ཁོངས་ན་འཁོད་དོ། །འདི་ལྟ་སྟེ། སངས་རྒྱས་ཀྱི་ཞིང་གི་སྒོ་དང་། སངས་རྒྱས་ཀྱི་སྒོ་དང་། ཆོས་ཀྱི་སྒོ་དང་། སེམས་ཅན་གྱི་སྒོ་དང་། འདས་པའི་སྒོ་དང་། མ་འོངས་པའི་སྒོ་དང་། ད་ལྟར་བྱུང་བའི་སྒོ་དང་། གནས་པའི་མཐའི་སྒོ་དང་། བསོད་ནམས་ཀྱི་སྒོ་དང་། བསོད་ནམས་ཀྱི་ཚོགས་ཀྱི་སྒོ་དང་། ཡེ་ཤེས་ཀྱི་སྒོ་དང་། ཡེ་ཤེས་ཀྱི་ཚོགས་ཀྱི་སྒོ་དང་། སྨོན་ལམ་གྱི་སྒོ་དང་། སྨོན་ལམ་གྱི་རྣམ་པའི་སྒོ་དང་། སྤྱོད་པའི་སྒོ་དང་། སྤྱོད་པ་རྣམ་པར་དག་པའི་སྒོ་དང་། སྤྱོད་པ་ཡོངས་སུ་འབྱུང་བའི་སྒོ་དང་། སྤྱོད་པ་ཡོངས་སུ་རྫོགས་པར་བྱ་བའི་སྒོ་དང་། ལས་ཀྱི་སྒོ་དང་། ལས་དང་མི་འགལ་བའི་སྒོ་དང་། ལས་ཀྱི་རྒྱུན་གྱི་སྒོ་དང་། ལས་མངོན་པར་འདུ་བྱ་བའི་སྒོ་དང་། མི་མཉམ་པའི་ལས་ཡོངས་སུ་སྤང་བའི་སྒོ་དང་། ཡང་དག་པའི་ལས་ལ་ནན་ཏན་དུ་བྱ་བའི་སྒོ་དང་། ལས་ལ་དབང་བསྒྱུར་བའི་སྒོ་དང་། ལེགས་པར་སྤྱད་པའི་སྒོ་དང་། ལེགས་པར་སྤྱད་པ་ཡང་དག་པར་བླང་བའི་སྒོ་དང་། ཏིང་ངེ་འཛིན་གྱི་སྒོ་དང་། ཏིང་ངེ་འཛིན་ཁོང་དུ་ཆུད་པར་བྱ་བའི་སྒོ་དང་། ཏིང་ངེ་འཛིན་ལ་རྣམ་པར་སྤྱད་པའི་སྒོ་དང་། ཏིང་ངེ་འཛིན་གྱི་སྤྱོད་ཡུལ་གྱི་སྒོ་དང་། ཏིང་ངེ་འཛིན་ལས་ལྡང་བའི་སྒོ་དང་། མངོན་པར་ཤེས་པའི་སྒོ་དང་། སེམས་རྒྱ་མཚོའི་སྒོ་དང་། སེམས་ཀྱི་རྣམ་གྲངས་ཀྱི་སྒོ་དང་། སེམས་ཀྱི་རྒྱུད་ཡོངས་སུ་དག་པར་བྱ་བའི་སྒོ་དང་། སེམས་ཀྱི་ཐིབས་པོ་སྣང་བར་བྱ་བའི་སྒོ་དང་། སེམས་ཀྱི་མཚོ་དང་བར་བྱ་བའི་སྒོ་དང་། སེམས་འབྱུང་བའི་སྒོ་དང་། སེམས་རྣམ་པར་རྒྱུ་བའི་སྒོ་དང་། སེམས་ཅན་ཀུན་ནས་ཉོན་མོངས་པ་རྒྱུ་བའི་སྒོ་དང་། ཉོན་མོངས་པའི་བག་ཆགས་ཀྱི་སྒོ་དང་། ཉོན་མོངས་པའི་སྦྱོར་བའི་སྒོ་དང་། མོས་པའི་སྒོ་དང་། སེམས་ཅན་གྱི་སྤྱོད་པའི་སྒོ་དང་། སེམས་ཅན་གྱི་སྤྱོད་པ་རྣམ་པ་ཐ་དད་པའི་སྒོ་དང་། འཇིག་རྟེན་འབྱུང་བའི་སྒོ་དང་། སེམས་ཅན་གྱི་བསམ་པའི་སྒོ་དང་། སེམས་ཅན་གྱི་འདུ་ཤེས་ཀྱི་རྣམ་པའི་སྒོ་དང་། ཕྱོགས་ཀྱི་སྒོ་དང་། ཆོས་ཀྱི་ཕྱོགས་ཀྱི་སྒོ་དང་། སྙིང་རྗེ་ཆེན་པོའི་སྒོ་དང་། བྱམས་པ་ཆེན་པོའི་སྒོ་དང་། ཞི་བའི་སྒོ་དང་། ངག་གི་ལམ་གྱི་སྒོ་དང་། ཚུལ་གྱི་སྒོ་དང་། ཁོང་དུ་ཆུད་པར་བྱ་བའི་སྒོ་དང་། རྣམ་པར་ཕྱེ་བའི་སྒོ་དང་། ཡང་དག་པར་འདུ་བའི་སྒོ་དང་། ཆགས་པ་མེད་པའི་མཐའི་སྒོ་དང་། ཀུན་གྱི་སྒོ་དང་། སངས་རྒྱས་ཀྱི་ཆོས་ཀྱི་སྒོ་དང་། བྱང་ཆུབ་སེམས་དཔའི་ཆོས་ཀྱི་སྒོ་དང་། ཉན་ཐོས་ཀྱི་ཆོས་ཀྱི་སྒོ་དང་། རང་སངས་རྒྱས་ཀྱི་ཆོས་ཀྱི་སྒོ་དང་། འཇིག་རྟེན་གྱི་ཆོས་ཀྱི་སྒོ་དང་། འཇིག་རྟེན་འབྱུང་བའི་ཆོས་ཀྱི་སྒོ་དང་། འཇིག་རྟེན་འཇིག་པའི་ཆོས་ཀྱི་སྒོ་དང་། འཇིག་རྟེན་ཀུན་ནས་གནས་པའི་སྒོ་དང་། འཇིག་རྟེན་གྱི་ཁམས་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་ཀུན་ནས་ཉོན་མོངས་པ་ལ་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་རྣམ་པར་དག་པ་ལ་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་གཅིག་ཏུ་ཀུན་ནས་ཉོན་མོངས་པའི་སྒོ་དང་། འཇིག་རྟེན་གྱི་ཁམས་གཅིག་ཏུ་རྣམ་པར་དག་པའི་སྒོ་དང་། འཇིག་རྟེན་གྱི་ཁམས་གཞི་མཉམ་པ་ཉིད་དུ་ཁོང་དུ་ཆུད་པར་བྱ་བའི་སྒོ་དང་། འཇིག་རྟེན་གྱི་ཁམས་སྣྲེལ་ཞིའི་སྒོ་དང་། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བའི་སྒོ་དང་། མིག་འཕྲུལ་དུ་འཇུག་པའི་སྒོ་དང་། འཇིག་རྟེན་གྱི་ཁམས་ཀྱི་རྒྱུད་ཀྱི་སྒོ་དང་། གནས་ཀྱི་འདུ་ཤེས་ཀྱི་རྣམ་པར་གྱུར་པའི་སྒོ་དང་། ཕྲ་བ་རྒྱ་ཆེན་པོར་ཁོང་དུ་ཆུད་པར་བྱ་བའི་སྒོ་དང་། རྒྱ་ཆེན་པོ་ཕྲ་བར་ཁོང་དུ་ཆུད་པར་བྱ་བའི་སྒོ་དང་། སངས་རྒྱས་མཐོང་བར་བྱ་བའི་སྒོ་དང་། སངས་རྒྱས་ཀྱི་སྐུ་རྣམ་པ་ཐ་དད་པའི་སྒོ་དང་། སངས་རྒྱས་ཀྱི་འོད་ཟེར་གྱི་དྲ་བ་རྣམ་པ་ཐ་དད་པའི་སྒོ་དང་། སངས་རྒྱས་ཀྱི་གསུང་གི་དཀྱིལ་འཁོར་རྣམ་པར་ཕྱེ་བའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་མངོན་པར་བསྒྲུབ་པའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་ཐ་དད་པའི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་ངེས་པའི་ཚིག་གི་སྒོ་དང་། སངས་རྒྱས་ཀྱི་ཆོས་ཀྱི་འཁོར་ལོ་འཁོར་བ་ཀུན་ཏུ་འཁོར་བའི་སྒོ་དང་། སངས་རྒྱས་ཀྱི་འཕྲིན་ལས་ཀྱི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་གྱི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་རྣམ་པར་ཕྱེ་བའི་སྒོ་དང་། སངས་རྒྱས་ཀྱི་འཁོར་གྱི་དཀྱིལ་འཁོར་རྒྱ་མཚོར་འཇུག་པའི་སྒོ་དང་། སངས་རྒྱས་ཀྱི་སྟོབས་སྣང་བའི་སྒོ་དང་། སངས་རྒྱས་ཀྱི་ཏིང་ངེ་འཛིན་གྱི་སྒོ་དང་། སངས་རྒྱས་ཀྱི་ཏིང་ངེ་འཛིན་གྱིས་རྣམ་པར་འཕྲུལ་པའི་སྒོ་དང་། སངས་རྒྱས་ཀྱི་རྣམ་པར་སྤྱོད་པའི་སྒོ་དང་། སངས་རྒྱས་ཀྱི་བྱིན་གྱིས་རླབས་ཀྱི་སྒོ་དང་། སངས་རྒྱས་ཀྱི་སྤྲུལ་པའི་སྒོ་དང་། སངས་རྒྱས་ཀྱི་སེམས་ཅན་ཕ་རོལ་གྱི་སེམས་ཐུགས་སུ་ཆུད་པའི་སྒོ་དང་། སངས་རྒྱས་ཀྱི་རྫུ་འཕྲུལ་གྱིས་རྣམ་པར་འཕྲུལ་པའི་སྒོ་དང་། དགའ་ལྡན་གྱི་ཕོ་བྲང་ན་བཞུགས་པའི་སྒོ་ནས་ཡོངས་སུ་མྱ་ངན་ལས་འདའ་བ་བསྟན་པའི་བར་གྱི་སྒོ་དང་། སེམས་ཅན་གྱི་དོན་ཚད་མེད་པ་མཛད་པའི་སྒོ་དང་། ཆོས་ཟབ་མོའི་ཚུལ་གྱི་སྒོ་དང་། ཆོས་སྣ་ཚོགས་ཀྱི་ཚུལ་གྱི་སྒོ་དང་། བྱང་ཆུབ་ཀྱི་སེམས་ཀྱི་ཆོས་ཀྱི་རྣམ་པའི་སྒོ་དང་། བྱང་ཆུབ་ཀྱི་སེམས་འབྱུང་བའི་རྣམ་པའི་ཆོས་ཀྱི་སྒོ་དང་། བྱང་ཆུབ་ཀྱི་སེམས་ཀྱི་ཚོགས་ཀྱི་རྣམ་པའི་སྒོ་དང་། སྨོན་ལམ་གྱི་རྣམ་པའི་སྒོ་དང་། སྤྱོད་པའི་རྣམ་པའི་སྒོ་དང་། མངོན་པར་ཤེས་པའི་རྣམ་པའི་སྒོ་དང་། འབྱུང་བའི་རྣམ་པའི་སྒོ་དང་། གཟུངས་རྣམ་པར་དག་པའི་རྣམ་པའི་སྒོ་དང་། ཡེ་ཤེས་ཀྱི་དཀྱིལ་འཁོར་རྣམ་པར་དག་པའི་རྣམ་པའི་སྒོ་དང་། ཤེས་རབ་ཡོངས་སུ་དག་པའི་རྣམ་པའི་སྒོ་དང་། བྱང་ཆུབ་ཚད་མེད་པའི་རྣམ་པའི་སྒོ་དང་། དྲན་པ་རྣམ་པར་དག་པའི་རྣམ་པའི་སྒོ་དག་སྟེ། རིགས་ཀྱི་བུ་དེ་ལྟར་ཁོ་མོས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་རྒྱུད་དྲན་པས་ཀུན་ནས་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་སེམས་ནམ་མཁའི་དབྱིངས་དང་མཉམ་པ། བློ་གྲོས་ཆོས་ཀྱི་དབྱིངས་ལྟར་ཡངས་པ། རྒྱུད་བསོད་ནམས་ཀྱི་ཚོགས་ཀྱིས་བརྟན་པ། འཇིག་རྟེན་ལས་འདས་པའི་ལམ་དུ་ཞུགས་པ། འཇིག་རྟེན་གྱི་ཆོས་ཡོངས་སུ་མི་རྒྱུ་བ། ཡེ་ཤེས་སྣང་བའི་མིག་རབ་རིབ་མེད་པ་རབ་ཏུ་ཐོབ་པ། ཆོས་ཀྱི་དབྱིངས་ཐམས་ཅད་མུན་པ་མེད་པར་ཁོང་དུ་ཆུད་པ། བློ་ནམ་མཁའ་ལྟར་ཚད་མེད་པ་དང་ལྡན་པ། དམིགས་པ་ཐམས་ཅད་ཀྱི་རྗེས་སུ་སོང་བའི་མིག་ཅན། ཆགས་པ་མེད་པའི་སྣང་བའི་སྙིང་པོ་དང་ལྡན་པ། ཆོས་ཐམས་ཅད་ཀྱི་དོན་རབ་ཏུ་དབྱེ་བ་ལ་མཁས་པ། ཟིལ་གྱིས་གནོན་ལ། འཇིག་རྟེན་ཀུན་གྱི་ཟིལ་གྱིས་མི་ནོན་པ། འཇིག་རྟེན་གྱི་སྤྱོད་པའི་ཚུལ་ལ་རྣམ་པར་སྤྱོད་པ། འཇིག་རྟེན་གྱི་ལམ་གྱི་རྒྱུད་ཐམས་ཅད་ན་ཁ་ན་མ་ཐོ་བ་མེད་པ། འཇིག་རྟེན་གྱི་དོན་བྱེད་པ་ལ་བརྩོན་པ། འགྲོ་བ་ཐམས་ཅད་ཀྱི་རྟེན་དུ་གྱུར་པ། འགྲོ་བ་ཐམས་ཅད་ཀྱི་ངག་གི་ཚུལ་དང་། རྣམ་པ་ལ་མཁས་པ། འགྲོ་བ་ཐམས་ཅད་དུ་གནས་པའི་བསམ་པ་དང་ལྡན་པ། བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་སྟོན་པ། དུས་ཀྱི་འཁོར་ལོ་ཐམས་ཅད་ལ་དབང་བསྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ། ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་མིག་གསུམ་པ་ཞེས་བྱ་བ་ཡོད་དེ། དེ་ན་དགེ་སློང་ལྟ་ན་སྡུག་པ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་བུ་མོ་བྱམས་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བུ་མོ་བྱམས་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། བུ་མོ་བྱམས་མའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་དགེ་བསྙེན་མ་ཕུལ་དུ་བྱུང་བ་ཞེས་བྱ་བས་བསོད་ནམས་ཀྱི་མཛོད་མི་ཟད་པའི་རྒྱན་ཞེས་བྱ་བའི་ཡོན་ཏན་མངོན་དུ་བརྙེས་པའི་ཚུལ། སངས་རྒྱས་ཕལ་བོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་རྒྱ་མཚོ་བརྟན་པ་ཞེས་བྱ་བ་ཡོད་དེ། དེ་ན་དགེ་བསྙེན་མ་ཕུལ་དུ་བྱུང་བ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་དགེ་བའི་བཤེས་གཉེན་གྱི་ཚིག་ཐོས་ནས་སྤུ་གཡོས་ཏེ། དགའ་བ་ཆེན་པོའི་ཤུགས་སྐྱེས་ནས། རབ་ཏུ་དགའ་བའི་ཡིད་དང་ལྡན་པར་གྱུར་པ་ངོ་མཚར་གྱི་བསམ་པ། རིན་པོ་ཆེ་རབ་ཏུ་དཀོན་པ་ཐོབ་པ། འགྲོ་བ་མང་པོ་ལ་ཕན་པའི་སེམས་དང་བསམ་པས་བྱུང་བ་སངས་རྒྱས་སྐྱེས་པ་གཅིག་ནས་གཅིག་ཏུ་བརྒྱུད་པར་འགྲོ་བ་ལ་དབང་བསྒྱུར་བ། ཆོས་ཀྱི་དཀྱིལ་འཁོར་རྣམ་པར་དག་པའི་བློ་གྲོས་ལ་བརྟེན་པ། ཐམས་ཅད་དུ་རྗེས་སུ་སོང་བའི༌རིག་པ་རྣམ་པར་ཕྱེ་བས་འབྱུང་བ་བསྟན་པ་ལ་བརྩོན་པ། དུས་གསུམ་གྱི་དབྱིངས་སུ་མ་འདྲེས་པའི་སངས་རྒྱས་ཀྱི་ཡུལ་དང་ལྡན་པ། བསོད་ནམས་མི་ཟད་པའི་རྒྱ་མཚོ་ལས་བྱུང་བའི་སེམས་དང་ལྡན་པ། ཡེ་ཤེས་ཀྱི་སྣང་བ་ཆེན་པོ་ལ་དབང་བསྒྱུར་བ། ཁམས་གསུམ་གྱི་ཁྱིམ་དུ་སྡུད་པའི་སྒོ་ཤིན་ཏུ་གཅོད་པ་དེས། ཁྱེའུ་དབང་པོའི་དབང་ཕྱུག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས། ཁྱེའུ་དབང་པོའི་དབང་ཕྱུག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཁྱེའུ་དབང་པོའི་དབང་ཕྱུག་གི་དྲུང་ནས་སོང་ངོ་། །

དེ་ནས་ཚོང་དཔོན་གྱི་བུ་ནོར་བཟང་དགེ་བའི་བཤེས་གཉེན་གྱི་གདམས་ངག་གི་སྤྲིན་གྱི་ཆར་ཡོངས་སུ་འཛིན་པ་བྱེད་ཅིང་། གངས་ཆེན་མཚོ་ལྟར་སྤྲིན་ཆེན་པོའི་ཆར་གྱིས་ངོམས་མི་ཤེས་པ་དགེ་བའི་བཤེས་གཉེན་གྱི་ཉི་མའི་ཡེ་ཤེས་ཀྱི་འོད་ཟེར་གྱིས་དགེ་བ་ཡོངས་སུ་སྨིན་པར༌བྱས་པའི་ས་གཞི་ལས་དབང་པོའི་མྱུ་གུ་འཐོན་ཅིང་སྐྱེས་པ། དགེ་བའི་བཤེས་གཉེན་གྱི་ཟླ་བ་ཉ་ཞིང་རྒྱས་པའི་གདམས་ངག་གི་འོད་ཟེར་གྱི་དྲ་བས་ལུས་དང་། སེམས་ཤིན་ཏུ་ཚིམ་པར་བྱས་པ། དཔྱིད་ཀྱི་ཉི་མའི་འོད༌ཀྱིས་གདུངས་པའི་རི་དྭགས་ཀྱི་ཚོགས་གསལ་ཞིང་བསིལ་བའི་གངས་ཆུ་ལ་འཐུང་བར་འདོད་པ་ལྟར། དགེ་བའི་བཤེས་གཉེན་གྱི་གདམས་ངག་གི་ཆུ་ལ་འཐུང་བར་འདོད་པ། བུང་བ་མང་པོ་འཁོར་ཞིང་ལྡིང་བས་རྒྱས་པར་གྱུར་པའི་པད་མོ་དང་ལྡན་པའི་པདྨོའི་མཚོ་ལྟར་དགེ་བའི་བཤེས་གཉེན་གྱི་གདམས་ངག་གིས་སེམས་ཀྱི་མེ་ཏོག༌བུན་ད་རི་ཀ་ཁ་ཕྱེ་བ། རིན་པོ་ཆེ་སྣ་ཚོགས་ཀྱིས་ཡོངས་སུ་རྒྱས་པའི་རིན་པོ་ཆེའི་གླིང་ལྟར་དགེ་བའི་བཤེས་གཉེན་གྱི་གདམས་ངག་རིན་པོ་ཆེ་འཕེལ་བའི་སྣང་བས་སེམས་ཤིན་ཏུ་སྣང་བར་བྱས་པ། འཛམ་བུའི་ཤིང་ཆེན་པོའི་མེ་ཏོག་དང་། འབྲས་བུའི་ཚོགས་ཆེན་པོ་དང་ལྡན་པ་ལྟར་དགེ་བའི་བཤེས་གཉེན་གྱི་གདམས་ངག་བསོད་ནམས་དང་ཡེ་ཤེས་ཀྱི་ཚོགས་སུ་གྱུར་པ། ཕུན་སུམ་ཚོགས་པ་དང་ལྡན་པ། ཀླུའི་དབང་པོ་ཆེན་པོ་རྩེད་མོ་དམ་པས་རྩེ་བ་ལས་བྱུང་བའི་ནམ་མཁའི་སྤྲིན་ཆེན་པོ་ལྟར་དགེ་བའི་བཤེས་གཉེན་གྱི་གདམས་ངག་ཐོས་པའི་ཚོགས་སུ་གྱུར་པའི་རྣང་ཤིན་ཏུ་ཆེ་བ། སུམ་ཅུ་རྩ་གསུམ་པའི་འཇིག་རྟེན༌གྱི་བརྒྱན་པའི་སྣ་ཚོགས་ཀྱི་སྤོ་ལྟར་དགེ་བའི་བཤེས་གཉེན་གྱི་གདམས་ངག་ལས་བྱུང་བའི་ཆོས་དྲི་མ་མེད་པ་སྣ་ཚོགས་བརྩེགས་པའི་སྤོར་གྱུར་པ། སུམ་ཅུ་རྩ་གསུམ་པའི་ཚོགས་ཀྱི་འཁོར་གྱིས་བསྐོར་བའི་བརྒྱ་བྱིན་ལྷ་མ་ཡིན་གྱི་དབང་པོའི་ཚོགས་རབ་ཏུ་འཇོམས་པ་ལྟར་དགེ་བའི་བཤེས་གཉེན་གྱི་གདམས་ངག་ལས་བྱུང་བའི་ཡོན་ཏན་དྲི་མ་མེད་པའི་ཚོགས་ཀྱིས་ཡོངས་སུ་བསྐོར་ཅིང་ཟིལ་གྱིས་མི་གནོན་ལ་གཞན་ལ་ཟིལ་གྱིས་གནོན་པ་དེ། མཐར་གྱིས་གྲོང་ཁྱེར་རྒྱ་མཚོ་བརྟན་པ་གང་ན་བ་དེར་ཕྱིན་ཏེ། དགེ་བསྙེན་མ་ཕུལ་དུ་བྱུང་བ་ཡོངས་སུ་ཚོལ་ཚོལ་བ་ལས་དེ་ལ་སྐྱེ་བོ་མང་པོས་བསྟན་ཏེ། རིགས་ཀྱི་བུ་དགེ་བསྙེན་མ་ཕུལ་དུ་བྱུང་བ་དེ་གྲོང་ཁྱེར་གྱི་དབུས་ཀྱི་རང་གི་ཁྱིམ་ན་འདུག་གོ༌ཞེས་ནས།

ཚོང་དཔོན་གྱི་བུ་ནོར་བཟང་དགེ་བསྙེན་མ་ཕུལ་དུ་བྱུང་བའི་གནས་གང་ན་བ་དེར་སོང་སྟེ། ཐལ་མོ་སྦྱར་ནས་སྒོ་གང་ན་སྡོད་སྡོད་པ་དང་། དེས་དགེ་བསྙེན་མ་ཕུལ་དུ་བྱུང་བའི་ཁྱིམ་དེ་ཤིན་ཏུ་རྒྱ་ཆེ་ལ་ཡངས་ཤིང་རིན་པོ་ཆེའི་ར་བས་ཡོངས་སུ་བསྐོར་བ་ཕྱོགས་བཞི༌ནས་སྒོ་ཤིན་ཏུ་མཛེས་པ་རྣམ་པར་ཕྱེ་བ། རིན་པོ་ཆེ་ཚད་མེད་གྲངས་མེད་པའི་རྒྱན་གྱིས་བརྒྱན་པ། བསོད་ནམས་ཀྱི་རྣམ་པར་སྨིན་པས་མངོན་པར་གྲུབ་པ་མཐོང་ནས། དེ་ཁྱིམ་དེར་སོང་སྟེ། ཀུན་ཏུ་བལྟས་ན་དགེ་བསྙེན་མ་ཕུལ་དུ་བྱུང་བ༌ན་ཆུང་ཤིན་ཏུ་གཞོན་པ་ཐོག་མ་དར་ལ་བབ་པ། གཟུགས་མངོན༌ཞིང་མཛེས་ལ་ལྟ་ན་སྡུག་པ་ཁ་དོག་དམ་པ། པྲི་ཡ་བ་ཤིན་ཏུ་རྒྱས་པ་དང་ལྡན་པ། སྐྲ་ཕྱེ་མར་བཞག་པ། ལུས་ལ་རྒྱན་མེད་པ། གོས་དང་སྨད་གཡོགས་དཀར་པོ་བགོས་པ། རིན་པོ་ཆེའི་ཁྲི་ལ་འདུག་པ་མཐོང་སྟེ། སངས་རྒྱས་དང་བྱང་ཆུབ་སེམས་དཔའ་མ་གཏོགས་པར་དེའི་ལུས་སམ། སེམས་ཀྱི་དབང་ངམ། གཟི་བརྗིད་དང་། ཁ་དོག་གིས་ཟིལ་གྱིས་མ་ནོན་པའི་སེམས་ཅན་ནི་ཁྱིམ་དེ་ན་གང་ཡང་མེད་དེ། ལྷའམ་མིའང་རུང་སྟེ། སེམས་ཅན་གང་གིས་དགེ་བསྙེན་མ་ཕུལ་དུ་བྱུང་བ་མཐོང་བར་གྱུར་པ་དེ་དག་ཐམས་ཅད་ཀྱིས་ཀྱང་། དགེ་བསྙེན་མ་ཕུལ་དུ་བྱུང་བ་ལ་སྟོན་པའི་འདུ་ཤེས་སུ་བསམ་པ་ཞིག །རིན་པོ་ཆེའི་ཁྲི་ལ་འདུག་པ་མཐོང་ངོ་། །

གཞན་ཡང་ཁྱིམ་དེ་ན་སྟན་ལྷ་རྫས་དང་། མིའི་རྫས་ལས་ཤིན་ཏུ་འཕགས་པ། བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པ་བྱེ་བ་སྟོང་ཕྲག་བཅུ་བཏིང་བ་དང་། མདུན་དུ་ཕྲུ་བ་གཅིག་ཅིག་བཞག་པ་ལས་ཁ་ཟས་དང་སྐོམ་གྱི་བག་གམ། གོས་དང་རྒྱན་གྱི་ལོངས་སྤྱོད་ཀྱི་བག་གཞན༌ཅི་ཡང་མི་སྣང་ངོ་། །བུད་མེད་སྟོང་ཕྲག་བཅུ་ཙམ་ཞིག༌མདུན་དུ་འདུག་པར་མཐོང་ནའང་དེ་དག་ཐམས་ཅད་ཀྱང་ལྷའི་བུ་མོའི་ཁ་དོག་དང་ལྡན་པ། ལྷའི་བུ་མོའི་གཟུགས་དང་ལྡན་པ། ལྷའི་བུ་མོའི་ཚུལ་དང་ལྡན་པ། ལྷའི་བུ་མོའི་སྤྱོད་པ་དང་ལྡན་པ། ལྷའི་བུ་མོའི་ལོངས་སྤྱོད་དང་ལྡན་པ། ལྷའི་བུ་མོའི་ཚུལ༌དུ་ཤིས་པ་དང་ལྡན་པ། ལྷ་རྫས་ཀྱི་གོས་ཡིད་བཞིན་དུ་གྱོན་པ། ལྷ་རྫས་ཀྱི་ལྷབ་ལྷུབ་ཀྱིས་ཤིན་ཏུ་ཀླུབས་པ། ལྷའི་བུ་མོའི་སྐད་ལྟ་བུའི་དབྱངས་སྙན་པ་དང༌ལྡན་པ་ལྷའི་བུ་མོའི་ཆུ་ཞེང་མཛེས་པ་དང་ལྡན་པ་ཤ་སྟག་སྟེ། དེའི་འཁོར་གྱི་བུད་མེད་ཀྱང་དེས་ཅི་བསྒོ་བ་བཞིན་དུ་བྱེད་ཅིང་མདུན་ན་འཁོད་དོ། །རིམ་གྲོ་བྱེད་དོ། །བཀུར་སྟི་བྱེད་དོ། །གདོང་དུ་ལྟའོ། །ཅི་བསྒོ་བ་ཉན་ཅིང་གནས་སོ། །རྗེ་སར་འཁོད་དོ། །ཡོངས་སུ་ལྟའོ། །རྣམ་པར༌ལྟའོ། །འདུད་དོ། །རབ་ཏུ་འདུད་དོ། །ཕྱག་འཚལ་ལོ། །དེ་དག་གི་ལུས་ལས་སྤོས་ཀྱི་ངད་ལྡང་བས་ནི། གྲོང་ཁྱེར་དེའི་འཁོར་ཐམས་ཅད་དུ་དྲི་ཞིམ་པོས་ཁྱབ་པར་འདུག་སྟེ། སེམས་ཅན་གང་གིས་དྲི་དེ་ཚོར་བར༌གྱུར་པ་དེ་དག་ཐམས་ཅད་ཀྱང་གནོད་སེམས་མེད་པའི་སེམས་དང་། ཤར༌གཉེར་བ་མེད་པའི་སེམས་དང་། འཚེ་བ་མེད་པའི་སེམས་དང་། ཕྲག་དོག་དང་། འཇུངས་པ་དང་བྲལ་བའི་སེམས་དང་། སྒྱུ་དང་གཡོ་མེད་པའི་སེམས་དང་། ཆགས་པ་དང་། ཁོང་ཁྲོ་བ་མེད་པའི་སེམས་དང་། ཞུམ་པ་དང་། གཟེངས་མཐོ་བ་མེད་པའི་སེམས་དང་། བྱམས་པའི་སེམས་དང་། ཕན་པའི་སེམས་དང་། སྡོམ་པ་ལ་གནས་པའི་སེམས་དང་། གཞན་གྱིས་ཡོངས་སུ་བཟུང་བ༌ལ་རེ་བ་མེད་པའི་སེམས་སུ་གྱུར་ཏེ། གང་གིས་དེ་དག་གི་སྐད་ཐོས་པ་དེ་དག་ཐམས་ཅད་ཀྱང་དགའ་བ་དང་། མོས་པ་དང་། དུལ་བའི་སེམས་དང་ལྡན་པར་འགྱུར་རོ། །གང་གིས་དེ་དག་མཐོང་བར་གྱུར་པ་དེ་དག་ཀྱང་། འདོད་ཆགས་དང་བྲལ་བ་ཙམ་དུ་རང་རང་གིས་ཤེས་པར་འགྱུར་རོ། །

དེ་ལྟར་མཐོང་ནས་ཚོང་དཔོན་གྱི་བུ་ནོར་བཟང་གིས་དགེ་བསྙེན་མ་ཕུལ་དུ་བྱུང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཕུལ་དུ་བྱུང་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ། བསོད་ནམས་ཀྱི་མཛོད་མི་ཟད་པའི་རྒྱན་ཅེས་བྱ་བ་ཐོབ་པ་སྟེ། རིགས་ཀྱི་བུ་ཁོ་མོ་ནི་ཕྲུ་བ་གཅིག་པོ་འདི་ལས་མོས་པ་སྣ་ཚོགས་ཅན་རྣམས་ཁ་ཟས་ཅི་ལ་དགའ་བ་བཞིན་དུ་ཚོད་མ་སྣ་ཚོགས་དང་། རོ་སྣ་ཚོགས་དང་། ཁ་དོག་སྣ་ཚོགས་དང་། དྲི་སྣ་ཚོགས་ཀྱིས་ཚིམ་པར་བྱེད་དེ། རིགས་ཀྱི་བུ་དེ་ལྟར་ཁོ་མོ་ནི་ཕྲུ་བ་གཅིག་པོ་འདི་ལས་ཅི་ལ་དགའ་བའི་ཁ་ཟས་ཀྱིས་སེམས་ཅན་བརྒྱའང་ཡོངས་སུ་ཚིམ་པར་བྱེད་དོ། །སེམས་ཅན་སྟོང་དང་སེམས་ཅན་བརྒྱ་ཕྲག་སྟོང་དང་། སེམས་ཅན་བྱེ་བ་དང་། སེམས་ཅན་བྱེ་བ་ཕྲག་བརྒྱ་དང་། སེམས་ཅན་བྱེ་བ་ཕྲག་སྟོང་དང་། སེམས་ཅན་བྱེ་བ་བརྒྱ་ཕྲག་སྟོང་དང་། སེམས་ཅན་བྱེ་བ་ཁྲག་ཁྲིག་བརྒྱ་ཕྲག་སྟོང་ནས། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པ་མོས་པ་སྣ་ཚོགས་ཅན་རྣམས་ཀྱང་ཅི་ལ་དགའ་བའི་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །ཡོངས་སུ་སྟོབས་པར་བྱེད་དོ། །ཡོངས་སུ་དགའ་བར་བྱེད་དོ། །ཡོངས་སུ་མགུ་བར་བྱེད་དོ། །ཡོངས་སུ་སྤྲོ་བར་བྱེད་དོ། །ཤིན་ཏུ་ཚིམ་པར་བྱེད་དོ། །ཡིད་བདེ་བར་བྱེད་དོ། །འོན་ཀྱང་ཕྲུ་བ་འདི་ལས༌འགོང་བར་འགྱུར༌བ་མེད་དོ། །འགྲི་བ་མེད་དེ་དམའ་བར་མི་འགྱུར་རོ། །ཟད་པར་མི་འགྱུར་རོ། །འབྲི་བར་མི་འགྱུར་རོ། །ས་མཚམས་ཡོད་པར་མི་འགྱུར་རོ། །མཐར་ཐུག་པར་མི་འགྱུར་རོ། །མུར་ཐུག་པར་མི་འགྱུར་རོ། །རིགས་ཀྱི་བུ་གཞུང་དེ་དང་འདྲ་བར་སེམས་ཅན་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་དང་། དེ་བཞིན་དུ་གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ནས་སེམས་ཅན་མོས་པ་སྣ་ཚོགས་ཅན་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་འོངས་ཀྱང་། ཅི་ལ་དགའ་བའི་ཁ་ཟས་ཚོད་མ་སྣ་ཚོགས་དང་། རོ་སྣ་ཚོགས་དང་། ཁ་དོག་སྣ་ཚོགས་དང་། དྲི་སྣ་ཚོགས་ཀྱིས་ཡོངས་སུ་ཚིམ་པར་བྱེད་དོ། །ཡོངས་སུ་དགའ་བར་བྱེད་དོ། །ཉམས་བདེ་བར་བྱེད་དོ། །ཤིན་ཏུ་ཚིམ་པར་བྱེད་དོ། །ཡིད་ཤིན་ཏུ་བདེ་བར་བྱེད་དོ། །འོན་ཀྱང་ཕྲུ་བ་འདི་ལས༌འགོང་བར་འགྱུར་བ་མེད་དོ། །འགྲིབ་པ་མེད་དོ། །དམའ་བར་མི་འགྱུར་རོ། །ཟད་པར་མི་འགྱུར་རོ། །ས་མཚམས་ཡོད་པར་མི་འགྱུར་རོ། །མཐར་ཐུག་པར་མི་འགྱུར་རོ། །མུར་ཐུག་པར་མི་འགྱུར་རོ། །རིགས་ཀྱི་བུ་གལ་ཏེ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་མོས་པ་སྣ་ཚོགས་ཅན་དང་། བསམ་པ་སྣ་ཚོགས་ཅན་ཐམས་ཅད༌འོངས་པར་གྱུར་ན་ཡང་། དེ་དག་ཐམས་ཅད་ཅི་ལ་དགའ་བའི་ཁ་ཟས་ཀྱིས་ཡོངས་སུ་ཚིམ་པར་བྱེད་པ་ནས། ཡིད་བདེ་བར༌བྱ་བའི་བར་དུ་བྱེད་དོ། །ཁ་ཟས་སྣ་ཚོགས་ཀྱིས་ཇི་ལྟ་བ་དེ་བཞིན་དུ་བཏུང་བ་རྣམ་པ་སྣ་ཚོགས་དང་། རོ་རྣམ་པ་སྣ་ཚོགས་དང་། སྟན་སྣ་ཚོགས་དང་། མལ་ཆ་སྣ་ཚོགས་དང་། བཞོན་པ་སྣ་ཚོགས་དང་། གོས་སྣ་ཚོགས་དང་། མེ་ཏོག་སྣ་ཚོགས་དང་། ཕྲེང་བ་སྣ་ཚོགས་དང་། སྤོས་སྣ་ཚོགས་དང་། བདུག་སྤོས་སྣ་ཚོགས་དང་། བྱུག་པ་སྣ་ཚོགས་དང་། ཕྱེ་མ་སྣ་ཚོགས་དང་། རིན་པོ་ཆེ་སྣ་ཚོགས་དང་། རྒྱན་སྣ་ཚོགས་དང་། རིན་པོ་ཆེའི་ཤིང་རྟ་སྣ་ཚོགས་དང་། གདུགས་སྣ་ཚོགས་དང་། རྒྱལ་མཚན་སྣ་ཚོགས་དང་། ལྷའི་བ་དན་སྣ་ཚོགས་དང་། ཡོ་བྱད་ཀྱི་ཡུལ་རྣམ་པ་སྣ་ཚོགས་ཀྱིས་ཡོངས་སུ་ཚིམ་པར་བྱེད་པ་ནས། ཡིད་དགའ་བར་འགྱུར་བའི་བར་དུ་བྱེད་དོ། །རིགས་ཀྱི་བུ་གཞན་ཡང་ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ན་ཉན་ཐོས་དང་། རང་སངས་རྒྱས་སྐུའི་ཐ་མ་འཛིན་པ་གང་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཅིང་ཉན་ཐོས་དང་། རང་སངས་རྒྱས་ཀྱི་བྱང་ཆུབ་ཀྱི་འབྲས་བུ་བརྙེས་པར་མཛད་དོ། །

ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ན་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་བརྒྱ་དང་། འཇིག་རྟེན་གྱི་ཁམས་སྟོང་དང་། འཇིག་རྟེན་གྱི་ཁམས་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་དང་། འཇིག་རྟེན་གྱི་ཁམས་བྱེ་བ་ཕྲག་བརྒྱ་དང་། འཇིག་རྟེན་གྱི་ཁམས་བྱེ་བ་ཕྲག་སྟོང་དང་། འཇིག་རྟེན་གྱི་ཁམས༌བྱེ་བ་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། འཇིག་རྟེན་གྱི་ཁམས་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་དང་། གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ནས། དེ་བཞིན་དུ་ཤར་ཕྱོགས་ཀྱི་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ན་ཉན་ཐོས་དང་། རང་སངས་རྒྱས་སྐུའི་ཐ་མ་འཛིན་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཅིང་ཉན་ཐོས་དང་། རང་སངས་རྒྱས་ཀྱི་འབྲས་བུ་བརྙེས་པར་མཛད་དོ། །ཤར་ཕྱོགས་ན་བཞུགས་པ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ན་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་དེ་བཞིན་ནོ། །རིགས་ཀྱི་བུ་ཤར་ཕྱོགས་ཀྱི་འཇིག་རྟེན་གྱི་ཁམས་གཅིག༌ན་སྐུ་ཚེ་གཅིག་གིས་ཐོགས་པའི་བྱང་ཆུབ་སེམས་དཔའ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཅིང་། སྙིང་པོ་བྱང་ཆུབ་ཏུ་བཞུགས་ནས་བདུད་སྡེ་དང་བཅས་པ་ཕམ་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །

ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ན་བཞུགས་པ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་བརྒྱ་དང་། འཇིག་རྟེན་གྱི་ཁམས་སྟོང་དང་། འཇིག་རྟེན་གྱི་ཁམས་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་དང་། འཇིག་རྟེན་གྱི་ཁམས་བྱེ་བ་བརྒྱ་དང་། འཇིག་རྟེན་གྱི་ཁམས་བྱེ་བ་སྟོང་དང་། འཇིག་རྟེན་གྱི་ཁམས༌བྱེ་བ་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། འཇིག་རྟེན་གྱི་ཁམས་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་དང་། གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ནས། ཤར་ཕྱོགས་ཀྱི་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་ན། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཞིང་སྙིང་པོ་བྱང་ཆུབ་ལ་བཞུགས་ནས། བདུད་སྡེ་དང་བཅས་པ་ཕམ་པར་མཛད་དོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཤར་ཕྱོགས་ན་བཞུགས་པ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་གི་ཕྱོགས་དང་། སྟེང་གི་ཕྱོགས་ཀྱི་འཇིག་རྟེན་གྱི་ཁམས་གཅིག་ན། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཅིང་སྙིང་པོ་བྱང་ཆུབ་ཏུ་བཞུགས་ཏེ། བདུད་སྡེ་དང་བཅས་པ་རབ་ཏུ་ཕམ་པར་མཛད་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ན་བཞུགས་པ་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་བརྒྱ་དང་། འཇིག་རྟེན་གྱི་ཁམས་སྟོང་དང་། འཇིག་རྟེན་གྱི་ཁམས་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་དང་། འཇིག་རྟེན་གྱི་ཁམས་བྱེ་བ་བརྒྱ་དང་། འཇིག་རྟེན་གྱི་ཁམས་བྱེ་བ་སྟོང་དང་། འཇིག་རྟེན་གྱི་ཁམས་བྱེ་བ་བརྒྱ་ཕྲག་སྟོང་དང་། འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། འཇིག་རྟེན་གྱི་ཁམས་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་དང་། གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ནས། རིགས་ཀྱི་བུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ན། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་ཁ་ཟས་ལས་གསོལ་ཅིང་། སྙིང་པོ་བྱང་ཆུབ་ཏུ་བཞུགས་ནས་བདུད་སྡེ་དང་བཅས་པ་ཕམ་པར་མཛད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །

རིགས་ཀྱི་བུ་ཁྱོད་ཀྱིས་ཁོ་མོའི་འཁོར་བུད་མེད་སྟོང་ཕྲག་བཅུ་པོ་འདི་དག་མཐོང་ངམ། སྨྲས་པ་འཕགས་མ་བདག་གིས་མཐོང་ངོ་། །སྨྲས་པ་རིགས་ཀྱི་བུ་བུད་མེད་འདི་དག༌ལ་སོགས་པ་བརྒྱ་སྟོང་གྲངས་མེད་པ་ཕྲག་བཅུ་ཁོ་མོ་དང༌སྐལ་བ་མཉམ་པར་སྤྱོད་པ། སྨོན་ལམ་གཅིག་པ། དགེ་བའི་རྩ་བ་གཅིག་པ། འབྱུང་བའི་རྒྱན་གཅིག་པ། མོས་པའི་ལམ་རྣམ་པར་དག་པ་གཅིག་པ། ཁོ་མོ་དང་སྐལ་བ་མཉམ་པར་དྲན་པ་རྣམ་པར་དག་པ། སྐལ་བ་མཉམ་པར་བློ་རྣམ་པར་དག་པ། སྐལ་བ་མཉམ་པར་བློ་ཚད་མེད་པར་གྱུར་པ། སྐལ་བ་མཉམ་པར་དབང་པོ་རབ་ཏུ་ཐོབ་པ། སྐལ་བ་མཉམ་པར་སེམས་ཀྱིས་རྒྱས་པར་འགེངས་པ། སྐལ་བ་མཉམ་པར་སྤྱོད༌ཡུལ་ཀྱི་ཡུལ་དང་ལྡན་པ། སྐལ་བ་མཉམ་པར་ཆོས་ཀྱི་ཚུལ་ལ་ཞུགས་པ། སྐལ་བ་མཉམ་པར་དོན་ངེས་པར་རྟོགས་པ། སྐལ་བ་མཉམ་པར་ཆོས་ཀྱི་དོན་སྟོན་པ། སྐལ་བ་མཉམ་པར་གཟུགས་རྣམ་པར་དག་པ། སྐལ་བ་མཉམ་པར་སྟོབས་ཚད་མེད་པ། སྐལ་བ་མཉམ་པར་བརྟན་པ་གཞན་གྱིས་མི་ཐུབ་པ། སྐལ་བ་མཉམ་པར་ཆོས་ཀྱི་སྒྲ་སྒྲོག་པ། སྐལ་བ་མཉམ་པར་དབྱངས་རྣམ་པར་དག་པ། ཚད་མེད་པའི་ཡོན་ཏན་བརྗོད་དུ་ཡོད་པས་རྣམ་པར་སྤྱོད་པ་ཐམས་ཅད་ལ་སྐལ་བ་མཉམ་པར་ཡོན་ཏན་རྣམ་པར་དག་པ། ལས་ཀྱི་རྣམ་པར་སྨིན་པ་ལ་ཁ་ན་མ་ཐོ་བ་མེད་ཅིང་རྣམ་པར་དག་པས། སྐལ་བ་མཉམ་པར་ལས་ཀྱི་རྣམ་པར་སྨིན་པ་རྣམ་པར་དག་པ། འགྲོ་བ་ཐམས་ཅད་ཡོངས་སུ་སྐྱོབ་པས། སྐལ་བ་མཉམ་པར་བྱམས་པ་ཆེན་པོས་རྒྱས་པར་འགེངས་པ། འགྲོ་བ་ཐམས་ཅད་ཡོངས་སུ་སྨིན་པར་བྱེད་པས། མི་སྐྱོ་བའི་ཕྱིར་སྐལ་བ་མཉམ་པར་སྙིང་རྗེ་ཆེན་པོས་རྒྱས་པར་འགེངས་པ། བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཚིམ་པར་བྱེད་པའི་ལུས་ཡོངས་སུ་སྟོན་པས། སྐལ་བ་མཉམ་པར་ལུས་ཀྱི་ལས་རྣམ་པར་དག་པ། ཆོས་ཀྱི་དབྱིངས་ཀྱི་ངེས་པའི་ཚིག་གི་ཐ་སྙད་ལ་སྐལ་བ་མཉམ་པར་ངག་གི་ལས་རྣམ་པར་དག་པ། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་སྐལ་བ་མཉམ་པར་འདོད་པ། སངས་རྒྱས་ལ་མཆོད་ཅིང་རིམ་གྲོ་བྱ་བའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་སྐལ་བ་མཉམ་པར་རྒྱུ་བ། ཆོས་ཐམས་ཅད་ཀྱི་ཚུལ་ཁོང་དུ་ཆུད་པར་བྱ་བ་ལ་སྐལ་བ་མཉམ་པར་མངོན་སུམ་དུ་གྱུར་པའི་ཡེ་ཤེས་དང་ལྡན་པ། བྱང་ཆུབ་སེམས་དཔའི་ས་ཐམས་ཅད་ཐོབ་པར་བྱ་བ་ལ་སྐལ་བ་མཉམ་པར་སྤྱོད་པ། རྣམ་པར་དག་པ་ཤ་སྟག་ཅིག་ཀྱང་ཡོད་དེ། རིགས་ཀྱི་བུ་བུད་མེད་སྟོང་ཕྲག་བཅུ་པོ་འདི་དག་ཀྱང་སྐད་ཅིག་གཅིག་ཏུ་འདི་ལྟ་སྟེ། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་རྣམས་ལ་ཞལ་ཟས་ཡོངས་སུ་འབུལ་བའི་ཕྱིར་ཕྱོགས་བཅུར་རྒྱས་པར༌འདོང་ངོ་། །ཕྲུ་བ་འདི་ཉིད་ནས་ཁ་ཟས་བླངས་ཤིང་། སྲིད་པའི་ཐ་མ་པ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་རྣམས་ལ་བསོད་སྙོམས་འབུལ་བའི་ཕྱིར་ཕྱོགས་བཅུར་རྒྱས་པར༌འདོང་ངོ་། །ཕྲུ་བ་འདི་ཉིད་ནས་ཁ་ཟས་བླངས་ཤིང་ཕྱོགས་བཅུ་རྒྱས་པར་བཀང་སྟེ་ཡི་དྭགས་ཀྱི་ཚོགས་ཐམས་ཅད་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །རིགས་ཀྱི་བུ་དེ་ལྟར་ཁོ༌མོ་ནི་ཕྲུ་བ་འདི་ཉིད་ནས་ལྷ་རྣམས་ནི་ལྷའི་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །ཀླུ་རྣམས་ནི་ཀླུའི་ཁ་ཟས་ཀྱིས། གནོད་སྦྱིན་རྣམས་ནི་གནོད་སྦྱིན་གྱི་ཁ་ཟས་ཀྱིས། དྲི་ཟ་རྣམས་ནི་དྲི་ཟའི་ཁ་ཟས་ཀྱིས། ལྷ་མ་ཡིན་རྣམས་ནི་ལྷ་མ་ཡིན་གྱི་ཁ་ཟས་ཀྱིས། ནམ་མཁའ་ལྡིང་རྣམས་ནི་ནམ་མཁའ་ལྡིང་གི་ཁ་ཟས་ཀྱིས། མིའམ་ཅི་རྣམས་ནི་མིའམ་ཅིའི་ཁ་ཟས་ཀྱིས། ལྟོ་འཕྱེ་ཆེན་པོ་རྣམས་ནི་ལྟོ་འཕྱེ་ཆེན་པོའི་ཁ་ཟས་ཀྱིས། མི་རྣམས་ནི་མིའི་ཁ་ཟས་ཀྱིས། མི་མ་ཡིན་པ་རྣམས་ནི་མི་མ་ཡིན་པའི་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །

རིགས་ཀྱི་བུ་ཡུད་ཙམ་ཞིག་སྡོད་དང༌དེའུ་རེ་མངོན་དུ་འགྱུར་རོ། །དགེ་བསྙེན་མ་ཕུལ་དུ་བྱུང་བ་དེས་ཚིག་དེ་བརྗོད་མ་ཐག་ཏུ་དེའི་མོད་ལ་འདི་ལྟ་སྟེ། དགེ་བསྙེན་མ་ཕུལ་དུ་བྱུང་བས། སྔོན་གྱི་སྨོན་ལམ་གྱིས་བོས་པས་སེམས་ཅན་གྲངས་མེད་པ་ཞིག་ཤར་ཕྱོགས་ཀྱི་སྒོ་ནས་ནང་དུ་འོངས་པར་གྱུར་ཏོ། །དེ་བཞིན་དུ་འདི་ལྟ་སྟེ། དགེ་བསྙེན་མ་ཕུལ་དུ་བྱུང་བའི་སྔོན་གྱི་སྨོན་ལམ་གྱིས་བོས་པས། སེམས་ཅན་གྲངས་མེད་པ་ཞིག །ལྷོ་ཕྱོགས་དང་ནུབ་ཕྱོགས་དང་། བྱང་ཕྱོགས་ཀྱི་སྒོ་ནས་ནང་དུ་འོངས་པར་གྱུར་ཏེ། དེ་ལྟར་འོངས་པ་དེ་དག་དགེ་བསྙེན་མ་ཕུལ་དུ་བྱུང་བས། སྟན་དེ་དག་ལ་བཀོད་དེ། སོ་སོ་ནས་ཅི་དགའ་བའི་ཁ་ཟས་ཚོད་མ་སྣ་ཚོགས་དང་། རོ་སྣ་ཚོགས་དང་། ཁ་དོག་སྣ་ཚོགས་དང་། དྲི་སྣ་ཚོགས་དང་ལྡན་པས་ཡོངས་སུ་ཚིམ་པར་བྱས་སོ། །ཡོངས་སུ་བསྟབས་པར་བྱས་སོ། །ཡོངས་སུ་དགའ་བར་བྱས་སོ། །ཡོངས་སུ་མགུ་བར་བྱས་སོ། །ཡོངས་སུ་སྤྲོ་བར་བྱས་སོ། །ཤིན་ཏུ་ཚིམ་པར་བྱས་སོ། །ཡིད་བདེ་བར་བྱས་སོ། །ཁ་ཟས་སྣ་ཚོགས་ཀྱིས་ཇི་ལྟ་བ་དེ་བཞིན་དུ་བཏུང་བ་རྣམ་པ་སྣ་ཚོགས་དང་། རོ་རྣམ་པ་སྣ་ཚོགས་དང་། སྟན་སྣ་ཚོགས་དང་། མལ་ཆ་སྣ་ཚོགས་དང་། བཞོན་པ་སྣ་ཚོགས་དང་། གོས་སྣ་ཚོགས་དང་། མེ་ཏོག་སྣ་ཚོགས་དང་། ཕྲེང་བ་སྣ་ཚོགས་དང་། སྤོས་སྣ་ཚོགས་དང་། བདུག་སྤོས་སྣ་ཚོགས་དང་། བྱུག་པ་སྣ་ཚོགས་དང་། ཕྱེ་མ་སྣ་ཚོགས་དང་། རིན་པོ་ཆེ་སྣ་ཚོགས་དང་། རྒྱན་སྣ་ཚོགས་དང་། རིན་པོ་ཆེའི་ཤིང་རྟ་སྣ་ཚོགས་དང་། གདུགས་སྣ་ཚོགས་དང་། རྒྱལ་མཚན་སྣ་ཚོགས་དང་། ལྷའི་བ་དན་སྣ་ཚོགས་དང་། ཡོ་བྱད་ཀྱི་ཡུལ་རྣམ་པ་སྣ་ཚོགས་ཀྱིས་ཡོངས་སུ་ཚིམ་པར་བྱས་པ་ནས། ཡིད་དགའ་བར་འགྱུར་བའི་བར་དུ་བྱས་སོ། །ལྷ་རྣམས་ནི་ལྷའི་ཁ་ཟས་ཀྱིས་ཡོངས་སུ་ཚིམ་པར་བྱས་སོ། །ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ཀྱང་མི་མ་ཡིན་པའི་ཁ་ཟས་ཀྱིས་ཡོངས་སུ་ཚིམ་པར་བྱས་པ་ནས། ཡིད་བདེ་བར་འགྱུར་བའི་བར་དུ་བྱས་སོ། །འོན་ཀྱང་ཕྲུ་བ་དེ་ལས༌འགོང་བར་གྱུར་པ་མེད། འགྲིབ་པ་མེད། དམས་པ་མེད། ཟད་པར་གྱུར་པ་མེད། ས་མཚམས་སུ་གྱུར་པ་མེད། མཐར་ཐུག་པ་མེད། མུར་ཐུག་པ་མེད་དོ། །དེ་ནས་དགེ་བསྙེན་མ་ཕུལ་དུ་བྱུང་བ་དེས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །

རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་བསོད་ནམས་ཀྱི་མཛོད་མི་ཟད་པའི་རྒྱན་ཅེས་བྱ་བ་འདི་ཤེས་པར་ཟད་ན། བྱང་ཆུབ་སེམས་དཔའི་བསོད་ནམས་ཆེན་པོའི་རྒྱ་མཚོ༌མི་ཟད་པས། མི་ཟད་པའི་བསོད་ནམས་དང་ལྡན་པ་བསོད་ནམས་ཀྱི་ཚོགས་རྒྱ་ཆེན་པོ་ཤིན་ཏུ༌བསགས་པས། ནམ་མཁའ་ལྟ་བུར་གྱུར་པ། འགྲོ་བ་ཐམས་ཅད་ཀྱི་སྨོན་ལམ་ཡོངས་སུ་རྫོགས་པར་བྱེད་པས། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོ་ལྟ་བུ། འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་བསྲུང་བས། བསོད་ནམས་ཆེན་པོའི་འཁོར་ཡུག་དང་ལྡན་པ། འགྲོ་བ་ཐམས་ཅད་དུ་རིན་པོ་ཆེ་སྙིམ་པ་ནས་ཆར་ལྟར་འཐོར་བས་བསོད་ནམས་ཆེན་པོའི་སྤྲིན་དུ་གྱུར་པ། ཆོས་ཀྱི་གྲོང་ཁྱེར་གྱི་སྒོ་འབྱེད་པས། བསོད་ནམས་ཆེན་པོའི་མཛོད་ལ་མངོན་སུམ་དུ་ལྟ་བ། འགྲོ་བ་ཐམས་ཅད་ཀྱི་ཕོངས་པའི་མུན་པ་སེལ་བས་བསོད་ནམས་ཆེན་པོའི་སྒྲོན་མར་གྱུར་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་འབྱུང་བ་ཆེན་པོ་ཞེས་བྱ་བ་ཡོད་དེ། དེ་ན་ཁྱིམ་བདག་མཁས་པ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ༌བགྱི་བ་དྲིས་ཤིག ། དེ་ནས་ཚོང་དཔོན་གྱི་བུ་ནོར་བཟང་དགེ་བསྙེན་མ་ཕུལ་དུ་བྱུང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་ཕུལ་དུ་བྱུང་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། དགེ་བསྙེན་མ་ཕུལ་དུ་བྱུང་བའི་དྲུང་ནས་བལྟ་བས་མི་ངོམས་བཞིན་དུ་སོང་ངོ་།། །།

དགེ་བསྙེན་མ་མི་གཡོ་བ་ཞེས་བྱ་བས་རང་གི་སྔོན་གྱི་སྐྱེས་རབས་དང་ཏིང་ངེ་འཛིན་ལ་བརྟེན་ནས་འཕགས་པའི་སྤྱོད་ཡུལ་ཟབ་མོ་དག་གཞོན་ནུ་ནོར་བཟང་ལ་བསྟན་པའི་སྐོར། སངས་རྒྱས་རྨད་གཅད་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

རིགས་ཀྱི་བུ་རྒྱལ་པོའི་ཕོ་བྲང་བརྟན་པར་དགེ་བསྙེན་མ་མི་གཡོ་བ་གང་ན་བ་དེར་སོངས་ཤིག་དང་། དེ་ལས་བྱང་ཆུབ་སེམས་དཔའི་སྤྱོད་པ་ཐོས་པར་འགྱུར་རོ། །དེ་ནས་ཚོང་དཔོན་གྱི་བུ་ནོར་བཟང་ཏིང་ངེ་འཛིན་གྱི་ཡེ་ཤེས་སྣང་བ་ལས་ལངས་ནས་མཐར་གྱིས་རྒྱལ་པོའི་ཕོ་བྲང་བརྟན་པར་དགེ་བསྙེན་མ་མི་གཡོ་བ་གང་ན་བ་དེར་སོང་ནས། དགེ་བསྙེན་མ་མི་གཡོ་བ་ཡོངས་སུ་ཚོལ་ཞིང་རྨེད་རྨེད་པ་ལས། དེ་ལ་འགྲོ་བ་མང་པོས་བསྟན་པ། རིགས་ཀྱི་བུ་དགེ་བསྙེན་མ་མི་གཡོ་བ་དེ་ནི་རང་གི་ཁྱིམ་ན་ཕ་མ་དང་། འགྲོགས་ཤིང་གཞོན་ནུར་གྱུར་པ་སྟེ། རང་གི་གཉེན་བཤེས་ཀྱི་ཚོགས་ཀྱིས་ཡོངས་སུ་བསྐོར་ཅིང་། སྐྱེ་བོའི་ཚོགས་ཆེན་པོ་ལ་ཆོས་སྟོན་ཏོ། །དེ་ནས་ཚོང་དཔོན་གྱི་བུ་ནོར་བཟང་དགའ་བ་ཆེན་པོ་དང་། མོས་ཤིང་སྤྲོ་བས། ཡོངས་སུ་རྒྱས་པའི་སེམས་དང་ལྡན་པ་དེ་དགེ་བསྙེན་མ་མི་གཡོ་བའི་ཁྱིམ་གང་ན་བ་དེར་སོང་སྟེ་ཕྱིན་ནས། དགེ་བསྙེན་མ་མི་གཡོ་བའི་ཁྱིམ་གྱི་སྒོ་ན་སྡོད་པའི་ཚེ། དེས་ཁྱིམ་དེ་ཐམས་ཅད་འོད་ལུས་དང་སེམས་ཤིན་ཏུ་བདེ་བར་བྱེད་པ། གསེར་གྱི་ཁ་དོག་ཏུ་འདུག་པ་ཞིག་གིས་ཁྱབ་ཅིང་གསལ་བར་གྱུར་ནས། འོད་དེས་ཚོང་དཔོན་གྱི་བུ་ནོར་བཟང་ལ་ཕོག་པར་གྱུར་མ་ཐག་ཏུ་ཚོར་བ་ཐམས་ཅད་ལ་དབང་བསྒྱུར་བའི་ཏིང་ངེ་འཛིན་གྱི་སྒོ་མང་པོ་དང་། ཞི་བའི་གནས་ཀྱི་ཏིང་ངེ་འཛིན་གྱི་སྒོ་མང་པོ་དང་། འགྲོ་བ་ཐམས་ཅད་དང་བྲལ་བའི་ཏིང་ངེ་འཛིན་གྱི་སྒོ་མང་པོ་དང་། ཀུན་ཏུ་ལྟ་བའི་བཏང་སྙོམས་དང་ལྡན་པའི་ཏིང་ངེ་འཛིན་གྱི་སྒོ་མང་པོ་དང་། དེ་བཞིན་གཤེགས་པའི་མཛོད་ཀྱི་ཏིང་ངེ་འཛིན་གྱི་སྒོ་མང་པོ་ལ་སོགས་པ། ཏིང་ངེ་འཛིན་གྱི་སྒོ་ལྔ་བརྒྱ་ཙམ་ལ་ཞུགས་པར་གྱུར་ཏེ། ཡོངས་སུ་སྐྱེས་སོ། །དེ་དག་ཀྱང་ཤིན་ཏུ་ཕྲ་ཞིང་གཞོན་པ་སྟེ། འདི་ལྟར་དཔེར་ན་ཐོག་མ་མངལ་དུ་ཞུགས་པའི་རྣམ་པར་ཤེས་པ་ལྟ་བུ་སྟེ། ཏིང་ངེ་འཛིན་དེ་དག་ཀྱང་ཤིན་ཏུ་ཕྲ་ཞིང་གཞོན་པར་སྐྱེས་པར་གྱུར་ཏོ། །

དེས་དྲི་ཞིམ་པོ་ཞིག་ཚོར་ནའང་དེ་ནི་ལྷ་ལའང་མེད་ལྷའི་བུ་མོ་ལ་ཡང་མེད། ཀླུ་ལ་ཡང་མེད་ཀླུའི་བུ་མོ་ལ་ཡང་མེད། གནོད་སྦྱིན་ལ་ཡང་མེད་གནོད་སྦྱིན་གྱི་བུ་མོ་ལ་ཡང་མེད། དྲི་ཟ་ལ་ཡང་མེད། དྲི་ཟའི་བུ་མོ་ལ་ཡང་མེད། ལྷ་མ་ཡིན་ལ་ཡང་མེད། ལྷ་མ་ཡིན་གྱི་བུ་མོ་ལ་ཡང་མེད། ནམ་མཁའ་ལྡིང་ལ་ཡང་མེད། ནམ་མཁའ་ལྡིང་གི་བུ་མོ་ལ་ཡང་མེད། མིའམ་ཅི་ལ་ཡང་མེད། མིའམ་ཅིའི་བུ་མོ་ལ་ཡང་མེད། ལྟོ་འཕྱེ་ཆེན་པོ་ལ་ཡང་མེད། ལྟོ་འཕྱེ་ཆེན་པོའི་བུ་མོ་ལ་ཡང་མེད། མི་ལ་ཡང་མེད། མིའི་བུ་མོ་ལ་ཡང་མེད་ཅིང་མི་སྲིད་པ་དེ་ལྟ་བུའི་དྲི་ཞིམ་པོ་ཚོར་བར་གྱུར་ཏོ། །

བུད་མེད་དེའི་གཟུགས་དང་མཉམ་པ་ཡང་ཕྱོགས་བཅུའི་འཇིག་རྟེན་ན་མེད་ན་ལྷག་པ་ལྟ་ག་ལས་འོང་། ཁ་དོག་དང་མདོག་དེ་ལྟ་བུ་ཡང་དེ་བཞིན་གཤེགས་པའི་སྐུ་མདོག་དང་ཁ་དོག་དང་། བྱང་ཆུབ་སེམས་དཔའ་དབང་བསྐུར་བའི་ཁ་དོག་དང་མདོག་མ་གཏོགས་པར་དེའི་ཁ་དོག་དང་། མདོག་ཏུ་མཉམ་པ་ཕྱོགས་བཅུའི་འཇིག་རྟེན་ན་མེད་ན་ལྷག་པ་ལྟ་ག་ལས་འོང་། ལུས་ཀྱི་ཆུ་ཞེང་དང་དབྱིབས་དེ་ལྟ་བུ་ཡང་དེ་བཞིན་གཤེགས་པའི་སྐུའི་ཁྲུན་ཆུ་ཞེང་དང་། དབྱིབས་དང་། བྱང་ཆུབ་སེམས་དཔའ་དབང་བསྐུར་བ་ཐོབ་པའི་ལུས་ཀྱི་ཆུ་ཞེང་དང་། དབྱིབས་མ་གཏོགས་པར་དེའི་ལུས་ཀྱི་ཆུ་ཞེང་དང་དབྱིབས་སུ་མཉམ་པ། ཕྱོགས་བཅུའི་འཇིག་རྟེན་ན་མེད་ན་ལྷག་པ་ལྟ་ག་ལས་འོང་། འོད་ཀྱི་རྒྱན་དེ་ལྟ་བུའང་དེ་བཞིན་གཤེགས་པའི་འོད་ཀྱི་རྒྱན་དང་། བྱང་ཆུབ་སེམས་དཔའ་དབང་བསྐུར་བ་ཐོབ་པའི་འོད་ཀྱི་རྒྱན་མ་གཏོགས་པར་དེའི་འོད་ཀྱི་རྒྱན་དང་། མཉམ་པ་ཕྱོགས་བཅུའི་འཇིག་རྟེན་ན༌མེད་ན་ལྷག་པ༌ལྟ་ག་ལས་འོང་། དེའི་ཁའི༌ངད་ཀྱི་དྲི་ཞིམ་པོ་དང་མཉམ་པའི་དྲི་དེ་ལྟ་བུ་ཡང་ཕྱོགས་བཅུའི་འཇིག་རྟེན་གྱི་ལྷའི་གནས་སམ། ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་གནས་ན་མེད་ན་ལྷག་པ་ལྟ་ག་ལས་འོང་། ཁྱིམ་གྱི་རྒྱན་དང་། ལོངས་སྤྱོད་དེ་ལྟ་བུའང་དེ་བཞིན་གཤེགས་པའི་ལོངས་སྤྱོད་དང་། བྱང་ཆུབ་སེམས་དཔའ་དབང་བསྐུར་བ་ཐོབ་པའི་ལོངས་སྤྱོད་མ་གཏོགས་པར་དེའི་ཁྱིམ་གྱི་རྒྱན་དང་། ལོངས་སྤྱོད་དུ་མཉམ་པ་ཡང་ཕྱོགས་བཅུའི་འཇིག་རྟེན་ན་མེད་ན་ལྷག་པ་ལྟ་ག་ལས་འོང་། གཡོག་འཁོར་ཕུན་སུམ་ཚོགས་པ། དེ་ལྟ་བུའང་དེ་བཞིན་གཤེགས་པའི་འཁོར་ཕུན་སུམ་ཚོགས་པ་དང་། བྱང་ཆུབ་སེམས་དཔའི་འཁོར་ཕུན་སུམ་ཚོགས་པ་མ་གཏོགས་པར་དེའི་གཡོག་འཁོར་ཕུན་སུམ་ཚོགས་པ་དང་། མཉམ་པ་ཡང་ཕྱོགས་བཅུའི་འཇིག་རྟེན་ན་མེད་ན་ལྷག་པ་ལྟ་ག་ལས་འོང་སྟེ། དགེ་བསྙེན་མ་མི་གཡོ་བ་དེ་ལ་འདོད་ཆགས་དང་ལྡན་པའི་སེམས་ཀྱིས་བལྟ་བར་ནུས་པའི་སེམས་ཅན་དེ་ལྟ་བུའང་ཕྱོགས་བཅུའི་འཇིག་རྟེན་གྱི་སེམས་ཅན་གྱི་རིས་ན་མེད་དོ། །དགེ་བསྙེན་མ་མི་གཡོ་བ་དེ་མཐོང་མ་ཐག་དུ་ཉོན་མོངས་པ་ཞི་བར་མི་འགྱུར་བ་དེ་ལྟ་བུའི་སེམས་ཅན་ཡང་ཕྱོགས་བཅུའི་འཇིག་རྟེན་གྱི་སེམས་ཅན་གྱི་རིས་ན་མེད་དེ། འདི་ལྟ་སྟེ་དཔེར་ན། ཚངས་པ་ཆེན་པོ་སྟོང་ཕྲག་བཅུ་ལ་དབང༌སྒྱུར་བ་ལ་ནི་འདོད་པ་ལ་སྤྱོད་པའི་ཉོན་མོངས་པ་རྣམས་མི་རྒྱུའོ། །

དེ་བཞིན་དུ་དགེ་བསྙེན་མ་མི་གཡོ་བའང་མཐོང་མ་ཐག་ཏུ་སེམས་ཅན་རྣམས་ཀྱི་ཉོན་མོངས་པ་མི་རྒྱུའོ། །དགེ་བསྙེན་མ་མི་གཡོ་བ་དེ་ལ་བལྟ་བས་ངོམས་པར་འགྱུར་བའི་སེམས་ཅན་དེ་ལྟ་བུའང་ཤེས་རབ་ཀྱིས་ངོམས་པ་མ་གཏོགས་པར་ཕྱོགས་བཅུའི་འཇིག་རྟེན་གྱི་ཁམས་ཀྱི་སེམས་ཅན་གྱི་རིས་ན་མེད་དོ། །དེ་ནས་ཚོང་དཔོན་གྱི་བུ་ནོར་བཟང་གིས་དགེ་བསྙེན་མ་མི་གཡོ་བའི་ལུས་ཀྱི་བྱིན་བསམ་གྱིས་མི་ཁྱབ་པ་དང་། གཟུགས་དང་ཁ་དོག་དང་དབྱིབས་དང་། ཆུ་ཞེང་བསམ་གྱིས་མི་ཁྱབ་པ་དང་། སའི་གཞི་དང་། གྲོང་ཁྱེར་དང༌རིན་པོ་ཆེ་ཐམས་ཅད་ལ་ཐོགས་པ་མེད་པའི་འོད་ཟེར་གྱི་དྲ་བའི་རྒྱན་བསམ་གྱིས་མི་ཁྱབ་པ་དང་། སེམས་ཅན་གྱི་དོན་བསམ་གྱིས་མི་ཁྱབ་པ་བསྒྲུབ་པ་མཐོང་སྟེ། བ་སྤུའི་བུ་ག་ཐམས་ཅད་ནས་བྱུང་བའི་དྲི་ཞིམ་པོ་ཚོར་ནས། འཁོར་རྒྱ་མཚོ་ཕུན་སུམ་ཚོགས་པ་མཐའ་ཡས་པ་མཐོང་སྟེ། ཁྱིམ་དང་གཞལ་མེད་ཁང་གི་རྒྱན་ཕུན་སུམ་ཚོགས་པ་མི་འཕྲོགས་པ་མཐོང་ནས་ཡོན་ཏན་རྒྱ་མཚོ་ཚད་མེད་པ་ཁོང་དུ་ཆུད་དེ། དགེ་བསྙེན་མ་མི་གཡོ་བ་ལ་ཚིགས་སུ་བཅད་པ་འདིས་བསྟོད་དོ། །

ཁྱོད་ཀྱིས་རྟག་ཏུ་ཚུལ་ཁྲིམས་དྲི་མེད་ཡོངས་བསྲུངས་ཏེ། །བཟོད་པ་ཤིན་ཏུ་ཡངས་པའང་ཡོངས་སུ་བསྒོམས་མཛད་ཅིང་། །བརྩོན་འགྲུས་བརྟན་པ་རྡོ་རྗེ་ལྟ་བུ་བསྒྲུབས་པས་ན། །རི་བོའི་རྒྱལ་པོ་ལྟ་བུར་འགྲོ་བར་འཕགས་ཤིང་འབར། །དེ་ནས་ཚོང་དཔོན་གྱི་བུ་ནོར་བཟང་གིས། དགེ་བསྙེན་མ་མི་གཡོ་བ་ལ་ཚིགས་སུ་བཅད་པ་དེས་མངོན་པར་བསྟོད་དེ་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ།

དེ་ནས་དགེ་བསྙེན་མ་མི་གཡོ་བས། བྱང་ཆུབ་སེམས་དཔའི་ངག་འཇམ་ཞིང་ཡིད་དུ་འོང་ལ་ཉམས་སུ་བདེ་བས། ཚོང་དཔོན་གྱི་བུ་ནོར་བཟང་ལ་དགའ་བར་འགྱུར་བའི་ཚིག་ཏུ་བརྗོད་ནས་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་ཐུབ་པར་དཀའ་བའི་ཡེ་ཤེས་ཀྱི་སྙིང་པོ་ཐོབ་པ་སྟེ། བྱང་ཆུབ་སེམས་དཔའི་སྤྱོད་པའི་སྒོ་ཡི་དམ་བརྟན་པ་ལ་སློབ་པ། ཆོས་ཐམས་ཅད་མཉམ་པ་ཉིད་ཀྱི་སའི་གཟུངས་ཀྱི་སྒོ་ཐོབ་པའོ། །ཁོ་མོ་ནི་སྤོབས་པའི་ཡེ་ཤེས་སྣང་བ། ཆོས་ཀྱི་གཞི་ཐམས་ཅད་སྣང་བར་བརྗོད་པ་ཐོབ་པའོ། །ཁོ་མོ་ནི་ཆོས་ཐམས་ཅད་ཡོངས་སུ་བཙལ་བས་མི་སྐྱོ་བའི་རྒྱན་གྱི་ཏིང་ངེ་འཛིན་གྱི་སྒོ་ཐོབ་པའོ། །སྨྲས་པ་འཕགས་མ་བྱང་ཆུབ་སེམས་དཔའི་རྣམ་པར་ཐར་པ་ཐུབ་པར་དཀའ་བའི་ཡེ་ཤེས་ཀྱི་སྙིང་པོ་དེའི་ཡུལ་ནི་ཇི་ལྟ་བུ་ཞིག་མཆིས། ཡི་དམ་ལ་བརྟན་པའི་བྱང་ཆུབ་སེམས་དཔའི་སྤྱོད་པའི་སྒོ་དང་། ཆོས་ཐམས་ཅད་མཉམ་པ་ཉིད་ཀྱི་སའི་གཟུངས་ཀྱི་སྒོ་དང་། ཆོས་ཀྱི་གཞི་ཐམས་ཅད་སྣང་བར་བརྗོད་པའི༌སྤོབས་པ་སྣང་བའི་སྒོ་དང་། ཆོས་ཡོངས་སུ་བཙལ་བས་མི་སྐྱོ་བའི་རྒྱན་གྱི་ཏིང་ངེ་འཛིན་གྱི་སྒོའི་ཡུལ་ནི་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་གནས་འདི་ནི་ཡིད་ཆེས་པར་དཀའོ། །སྨྲས་པ་འཕགས་མ་བསྟན་དུ་གསོལ། སངས་རྒྱས་ཀྱི་བྱིན་དང་། དགེ་བའི་བཤེས་གཉེན་གྱིས་ཡོངས་སུ་བཟུང་ན་ཡིད་ཆེས་པར་མཆི་གྲང་། རྟོགས་པ་དང་འཚལ་བ་དང་། རྣམ་པར་རྟོགས་པ་དང་། རྗེས་སུ་རྟོགས་པ་དང་། རིག་པ་དང་། དམིགས་སུ་ཕེབས་པ་དང་། གོམས་པ་དང་། མི་འགལ་བ་དང་། རྣམ་པར་མི་རྟོག་པ་དང་། སྒྲོ་འདོགས་པ་མ་མཆིས་པ་དང་། མཉམ་པར་བགྱིད་པར་ཡང༌མཆི་གྲང་།

དེ་ནས་དགེ་བསྙེན་མ་མི་གཡོ་བས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་སྔོན་འདས་པའི་དུས་ཤིག་ན་དྲི་མ་མེད་པའི་འོད་ཀྱི་བསྐལ་པ་ལ། དེ་བཞིན་གཤེགས་པ་ཕྱག་རབ་ཏུ་བརྐྱང་བ་ཞེས་བྱ་བ་འཇིག་རྟེན་དུ་བྱུང་སྟེ། ཁོ་མོ་ཡང་དེའི་ཚེ་རྒྱལ་པོ་གློག་གིས་བྱིན་པའི་བུ་ཞིག་མ་ཞིག་ཏུ་གྱུར་ནས། དེའི་ཚེ་ནུབ་མོ་མི་ཉལ་ཙམ་ཞིག་ན་རྒྱལ་པོའི་སྒོ་ཡང་བཅད། ཕ་དང་མ་ཡང་ཉལ། སྐྱེས་པ་དང་བུད་མེད་དག་ཀྱང་གཉིད་ཀྱིས་ལོག །རོལ་མོ་བརྡུང་བ་དང་དཀྲོལ་བའི་སྒྲ་ཡང་ཞི། ལྷན་ཅིག་སྤྱོད་པའི་བུད་མེད་ལྔ་བརྒྱ་ཙམ་དག་ཀྱང་ཉལ་བར་གྱུར་པ་ཞིག་ན། ཁོ་མོ་མལ་གྱི་སྟེང་ན་འདུག་ཅིང་། ནམ་མཁའི་དབྱིངས་ལ་རྒྱུ་བའི་སྐར་མའི་ཚོགས་ཀྱི་ཕྲེང་བ་རྣམ་པར༌འཁོད་པ་ལ་ལྟ་ལྟ་བ་ལས། སྟེང་གི་བར་སྣང་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕྱག་རབ་ཏུ་བརྐྱང་བ། རིའི་དབང་པོ་རི་རབ་ལྟར་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་འཁོར་མང་པོས་བསྐོར་བ། བྱང་ཆུབ་སེམས་དཔའི་ཚོགས་གྲངས་མེད་པས་ཡོངས་སུ་བསྐོར་བ། ཕྱོགས་ཐམས་ཅད་དུ་འོད་ཟེར་གྱི་དྲ་བ་ཐོགས་པ་མེད་པས་རྒྱས་པར་ཁྱབ་པའི་སྐུ་བཞུགས་པ་མཐོང་ངོ་། །དེ་བཞིན་གཤེགས་པ་དེའི་སྐུའི་བ་སྤུའི་བུ་ག་ཐམས་ཅད་ནས་ཀྱང་དྲི་ཞིམ་པོ་རྣམ་པ་འདི་ལྟ་བུ་བྱུང་སྟེ། དེས་ཁོ་མོའི་ལུས་དང་སེམས་ཤིན་ཏུ་བདེ་བར་གྱུར། ཡིད་ཤིན་ཏུ་དགའ་བར་གྱུར་ཏེ། མལ་གྱི་སྟེང་ནས་ལངས་ནས་སོར་མོ་བཅུའི་ཐལ་མོ་སྦྱར་ཏེ་ས་ལ་བབས་ནས། བཅོམ་ལྡན་འདས་དེ་བཞིན་གཤེགས་པ་ཕྱག་རབ་ཏུ་བརྐྱང་བ་དེ་ལ་ཕྱག་འཚལ་ཏེ། དེའི་སྤྱི་གཙུག་ལ་བལྟས་ནའང་། མཐར་ཐུག་པར་མ་རུང་། གཡས་གཡོན་གྱི་ཚད་ཀྱང་ཟིན་པར་མ་རུང་། མཚན་དང་དཔེ་བྱད་ཕུན་སུམ་ཚོགས་པ་ལ་བསམས་ནའང་ངོམས་པར་མ་རུང་སྟེ། དེའི་ཚེ་ཁོ་མོ་འདི་སྙམ་དུ་བསམས་སོ། །ལས་ཇི་ལྟ་བུ་ཞིག་བྱས་ན་ལུས་ཕུན་སུམ་ཚོགས་པ་འདི་ལྟ་བུ་ནི་འཐོབ་པར་འགྱུར། མཚན་དང་དཔེ་བྱད་བཟང་པོ་ཕུན་སུམ་ཚོགས་པ་ནི་སྐྱེ་བར་འགྱུར། འོད་ཀྱི་རྒྱན་ཕུན་སུམ་ཚོགས་པ་ནི་འབྱུང་བར་འགྱུར། འཁོར་ཕུན་སུམ་ཚོགས་པ་ནི་འགྲུབ་པར་འགྱུར། ཡིད་ཀྱི་རང་བཞིན་གྱི་གནས་དང་། ལོངས་སྤྱོད་ཕུན་སུམ་ཚོགས་པ་ནི་འབྱུང་བར་འགྱུར། བསོད་ནམས་ཕུན་སུམ་ཚོགས་པ་ནི་སྐྱེ་བར་འགྱུར། ཡེ་ཤེས་ཕུན་སུམ་ཚོགས་པ་ནི་རྣམ་པར་དག་པར་འགྱུར། ཏིང་ངེ་འཛིན་གྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཕུན་སུམ་ཚོགས་པ་ནི་ཡང་དག་པར་འགྲུབ་པར་འགྱུར། གཟུངས་ཕུན་སུམ་ཚོགས་པ་ནི་ཡོངས་སུ་རྫོགས་པར་འགྱུར། སྤོབས་པ་ཕུན་སུམ་ཚོགས་པ་ནི་དབང་དུ་འགྱུར་སྙམ་པ་དང་། རིགས་ཀྱི་བུ་དེ་ནས་བཅོམ་ལྡན་འདས་དེ་བཞིན་གཤེགས་པ་ཕྱག་རབ་ཏུ་བརྐྱང་བ་དེས་ཁོ་མོའི་བསམ་པ་ཐུགས་སུ་ཆུད༌ནས་དེས་འདི་སྐད་ཅེས་བཀའ་སྩལ་ཏོ། །

བུ་མོ་ཁྱོད་ཀྱིས་ཉོན་མོངས་པ་ཐམས་ཅད་གཞོམ་པའི་ཕྱིར་ཐུབ་པ་མེད་པའི་སེམས་སྐྱེད་ཅིག །མངོན་པར་ཞེན་པ་ཐམས་ཅད་བསལ་བའི་ཕྱིར་ཕམ་པ་མེད་པའི་སེམས་སྐྱེད་ཅིག །ཆོས་ཟབ་མོའི་ཚུལ་ཁོང་དུ་ཆུད་པར༌བྱ་བའི་ཕྱིར་ཞུམ་པ་མེད་པའི་སེམས་སྐྱེད་ཅིག །སེམས་ཅན་བསམ་པ་མི་ཟད་པ་དང་ལྡན་པའི་རྒྱ་མཚོའི་ཀློང་དུ་ལྟུང་བས་མི་སྒུལ་བའི་སེམས་སྐྱེད་ཅིག །སྲིད་པའི་ལམ་གྱི་རྒྱུད་ཐམས་ཅད་དུ་སྐྱེ་བའི་སྐྱེ་མཆེད་དུ་མགོ་རྨོངས་པ་མེད་པའི་སེམས་སྐྱེད་ཅིག །སངས་རྒྱས་ཐམས་ཅད་བལྟ་བར་མོས་པ༌རྒྱུན་མི་གཅད་པའི་ཕྱིར་ངོམས་མི་ཤེས་པའི་སེམས་སྐྱེད་ཅིག །སངས་རྒྱས་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་གཟུང་བའི་ཕྱིར་ཆོག་མི་ཤེས་པའི་སེམས་སྐྱེད་ཅིག །སངས་རྒྱས་ཐམས་ཅད་ཀྱི་ཆོས་ཀྱི་ཚུལ་སྣང་བ་རྟོགས་པར་བྱ་བའི་ཕྱིར་ངེས་པར་རྟོགས་པའི་སེམས༌སྐྱེད་ཅིག །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་གཟུང་བའི་ཕྱིར་ཡང་དག་པར་གཟུང་བའི་སེམས་སྐྱེད་ཅིག །དེ་བཞིན་གཤེགས་པའི་ཞལ་ནས་བྱུང་བ་ཤེས་པར་བྱ་བ་ལྟ་ལ་ཅི་སྨོས་ཀྱི་ཆུང་ངུ་ན་བརྡར་བྱེད་པ་ཙམ་ལ་ཡང་འཁྲུལ་པ་མེད་པའི་སེམས་སྐྱེད་ཅིག །བུ་མོ་ཁྱོད་ཀྱིས་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཆོས་རིན་པོ་ཆེ་རྣམ་པར་དབྱེ་བའི་ཕྱིར། རྣམ་པར་དབྱེ་བའི་སེམས་སྐྱེད་ཅིག་ཅེས་བྱུང་སྟེ། དེ་ལྟར་རིགས་ཀྱི་བུ་ཁོ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕྱག་རབ་ཏུ་བརྐྱང་བ་ལས། ཆོས་ཀྱི་ཚུལ་གྱི་གདམས་ངག་གི་སྒོ་རྣམ་པ་དེ་ལྟ་བུ་དག་ཐོས་ནས་ཐམས་ཅད་མཁྱེན་པའི་ཡེ་ཤེས་ལ་ནི་མངོན་པར་མོས་པར་གྱུར། སྟོབས་བཅུའི་རང་བཞིན་ལ་ནི་མངོན་པར་སྨོན་པར་གྱུར། སངས་རྒྱས་ཀྱི༌གསུང་ལ་ནི་མངོན་པར་དད་པར་གྱུར། སངས་རྒྱས་ཀྱི༌འོད་ཀྱི་རྒྱན་ནི་ཡོངས་སུ་སྦྱང་བར་དགའ། སངས་རྒྱས་ཀྱི་སྐུ་ཕུན་སུམ་ཚོགས་པ་ནི་ཡོངས་སུ་བསྒྲུབ་པར་དགའ། སངས་རྒྱས་ཀྱི་མཚན་དང་དཔེ་བྱད་བཟང་པོ་རྣམ་པར་དག་པ་ལ་ནི་མངོན་པར་མོས་པར་གྱུར། སངས་རྒྱས་ཀྱི་འཁོར་གྱི་དཀྱིལ་འཁོར་ཕུན་སུམ་ཚོགས་པ་ལ་ནི་མངོན་པར་སྨོན་པར་གྱུར། སངས་རྒྱས་ཀྱི་ཞིང་རྣམ་པར་དག་པ་ལ་ནི་མངོན་པར་དད་པར་གྱུར། སངས་རྒྱས་ཀྱི་སྤྱོད་ལམ་ཕུན་སུམ་ཚོགས་པ་ལ་ནི་མངོན་པར་མོས་པར་གྱུར། སངས་རྒྱས་ཀྱི་སྐུ་ཚེའི་ཚད་ཕུན་སུམ་ཚོགས་པ་ལ་ནི་མངོན་པར་དགའ་ནས། རྡོ་རྗེ་ལྟར་རི་དང་མཚོན་ཆ་ཐམས་ཅད་ཀྱི་མཐུས་ཐུབ་པར་དཀའ་བའི་སེམས་ཉོན་མོངས་པ་ཐམས་ཅད་དང་ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་ཕྱེད་མི་ཚུགས་པ་བསྐྱེད་དེ། རིགས་ཀྱི་བུ་དེ་ནས་ཉེ་བར་བཟུང་བ་ཚུན་ཆད་དུ་སེམས་བསྐྱེད་པ་དེའི་མཐུས་བསྐལ་པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་ཡིད་ཀྱི་དགུ་ལས་ཀྱང་འདོད་པ་ལ་སྤྱད་པར་ཡང་མི་དྲན་ན། གཉིས་ཀྱིས་གཉིས་འདུ་བ་ལྟ་ཅི་སྨོས། རིགས་ཀྱི་བུ་དེ་ནས་ཉེ་བར་བཟུང་བ་ཚུན་ཆད་དུ་རང་གི་གཉེན་བཤེས་ལའང་ཁོང་ཁྲོ་བའི་སེམས་ཅིག་མ་བསྐྱེད་ན། དེ་མ་ཡིན་པའི་སེམས་ཅན་མ་ཉེས༌པའི་གཞན་ལྟ་ཅི་སྨོས། དེ་ནས་ཉེ་བར་བཟུང་བ་ཚུན་ཆད་དུ་བདག་ཏུ་ལྟ་བ་དང་། ལྡན་པའི་སེམས་བསྐྱེད་པ་གཅིག་ཙམ་ཡང་བསྐྱེད་པར་མི་དྲན་ན། དེ་མ་ཡིན་པའི་ཡོ་བྱད་གཞན་ལ་བདག་གིར་བྱས་ཏེ། མངོན་པར་ཆགས་པ་ལྟ་ཅི་སྨོས། ཤི༌འཕོ་བ་དང་མངལ་ན་གནས་པའི་ཚེའང་སེམས་རྨོངས་པའམ། འདུ་ཤེས་སྣ་ཚོགས་སམ། ལུང་དུ་མ་བསྟན་པའི་སེམས་ཀྱང་བྱུང་དུ་མི་དྲན་ན། ལེགས་པར་བསམས་ཤིང༌གནས་པ་ལྟ་ཅི་སྨོས། བསྐལ་པ་དེ་སྙེད་ཅིག་ཏུ་སངས་རྒྱས་གཅིག་ཀྱང་ཆུང་ངུ་ན་རྨི་ལམ་དུ་མཐོང་བའི་རྣམ་པར་དམིགས་པར་ཡང༌བརྗོད་དུ་མི་དྲན་ན། བྱང་ཆུབ་སེམས་དཔའི་མིག་བཅུས་མཐོང་བར་གྱུར་པ་ལྟ་ཅི་སྨོས། དེ་ནས་ཉེ་བར་བཟུང་བ་ཚུན་ཆད་དུ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡང་དག་པར་འཛིན་ཀྱང་ཆུང་ངུ་ན་མིང་དུ་བྱ་བའི་རྣམ་པ་ཙམ་ཀྱི་ཆོས་ཀྱི་ཚིག་དང་། ཡི་གེ་གཅིག་ཀྱང་བརྗོད་པར་མི་དྲན་ན། དེ་བཞིན་གཤེགས་པའི་ཞལ་གྱི་མཛོད་ནས་བྱུང་བ་ལྟ་ཅི་སྨོས། དེ་ནས་ཉེ་བར་བཟུང་བ་ཚུན་ཆད་དུ་ཆོས་ཀྱི་རྒྱ་མཚོ་དེ་སྙེད་ཅིག༌འཐུང་འཐུང་ཡང་། ཆུང་ངུ་ན་འཇིག་རྟེན་པའི་ཆོས་རྣམས་ལ། ཚིག་འགའང་མ་བསམས་མ་བརྟགས་པར་མི་དྲན་ནོ། །

དེ་ནས་ཉེ་བར་བཟུང་བ་ཚུན་ཆད་དུ་དེ་སྙེད་ཅིག་གི་ཆོས་ཀྱི་ཚུལ་རྒྱ་མཚོ་ལས་ཀྱང་། ཆུང་ངུ་ན་འཇིག་རྟེན་པའི་བཟོའི་རྒྱུས་དང་། ཚུལ་ཡང་རུང་སྟེ། ཆོས་ཀྱི་ཚུལ་ཀྱི་སྒོ་གང་ལ་ཡང་ཁོ་མོས་ཏིང་ངེ་འཛིན་མངོན་པར་མ་བསྒྲུབས་པ་དེ་ལྟ་བུ་མེད་དོ། །དེ་ནས་ཉེ་བར་བཟུང་བ་ཚུན་ཆད་དུ་དེ་བཞིན་གཤེགས་པ་དེ་སྙེད་ཀྱི༌ཆོས་ཀྱི་འཁོར་ལོ་བཟུང་ཡང་ཇི་ལྟར་ཡོངས་སུ་བཟུང་བ་ལས་སེམས་ཅན་འདུལ་བའི་དབང་དུ་བྱ་བ་མ་གཏོགས་པར་ཆུང་ངུ་ན་རྗེས་སུ་བརྒྱུད་པའི་རྒྱུས་ཙམ་གྱི་ཚིག་དང་། ཡི་གེ་འགའ་ཡང༌བོར་བར་མི་དྲན་ནོ། །དེ་ནས་ཉེ་བར་བཟུང་བ་ཚུན་ཆད་དུ་སངས་རྒྱས་རྒྱ་མཚོ་དེ་སྙེད་ཅིག་མཐོང་ཡང་ཆུང་ངུ་ན་སྤྲུལ་པའི་སངས་རྒྱས་ཀྱི་སྨོན་ལམ་གྱི་རྒྱུད་ཀྱང་རུང་སྟེ། སྨོན་ལམ་འགའ་ཡང་ཁོ་མོས་སེམས་ཅན་རྒྱ་མཚོ་ཐམས་ཅད་རྣམ་པར་དག་པར་བྱ་བའི་ཕྱིར། མངོན་པར་མ་བསྒྲུབས་པ་མེད་དོ། །

དེ་ནས་ཉེ་བར་བཟུང་བ་ཚུན་ཆད་དུ་སངས་རྒྱས་རྒྱ་མཚོ་དེ་སྙེད་ཅིག་གི་སྔོན་གྱི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལས། བྱང་ཆུབ་སེམས་དཔའི་སྤྱོད་པ་འགའ་ཙམ་ཡང་ཁོ་མོས་བདག་གི་སྤྱོད་པ་ཡོངས་སུ་དག་པར་བྱ་བའི་ཕྱིར་མངོན་པར་མ་བསྒྲུབས་པ་དེ་ལྟ་བུ་མི་དྲན་ནོ། །དེ་ནས་ཉེ་བར་བཟུང་བ་ཚུན་ཆད་དུ་སེམས་ཅན་གང་ཁོ་མོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་བསྐུལ་བ་དེ་ལྟ་བུ་གཅིག་ཀྱང་མིག་ལམ་དུ༌འོངས་པར་མི་དྲན་ནོ། །དེ་ནས་ཉེ་བར་བཟུང་བ་ཚུན་ཆད་དུ་ཉན་ཐོས་དང་རང་སངས་རྒྱས་ཡིད་ལ་བྱ་བ་དང་ལྡན་པའི་སེམས་བསྐྱེད་པ་གཅིག་ཀྱང་མངོན་པར་བསྒྲུབས་སུ་མི་དྲན་ནོ། །

རིགས་ཀྱི་བུ་དེ་ནས་ཉེ་བར་བཟུང་བ་ཚུན་ཆད་དུ་བསྐལ་པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཅིག་ལོན་ཡང་ཚིག་དང་། ཡི་གེ་འགའ་ལ་ཡང་ཐེ་ཚོམ་བསྐྱེད་པའམ། གཉིས་ཀྱིས་འདུ་ཤེས་སམ། རྣམ་པར་རྟོག་པའི་འདུ་ཤེས་སམ། སྣ་ཚོགས་ཀྱི་འདུ་ཤེས་སམ། རབ་ཀྱི་འདུ་ཤེས་སམ། བཟང་ངན་གྱི་འདུ་ཤེས་སམ། སྡུག་མི་སྡུག་གི་འདུ་ཤེས་བསྐྱེད་དུ་མི་དྲན་ནོ། །རིགས་ཀྱི་བུ་ཁོ་མོ་ནི་དེ་ཕྱིན་ཅད་དུ་སངས་རྒྱས་བྱུང་བ་དང་མ་བྲལ་ལོ། །སངས་རྒྱས་བཅོམ་ལྡན་འདས་རྣམས་དང་མ་བྲལ་ལོ། །བྱང་ཆུབ་སེམས་དཔའ་རྣམས་དང་མ་བྲལ་ལོ། །ཡང་དག་པའི་དགེ་བའི་བཤེས་གཉེན་རྣམས་དང་མ་བྲལ་ལོ། །སངས་རྒྱས་ཀྱི་སྨོན་ལམ་ཐོས་པ་དང་མ་བྲལ་ལོ། །བྱང་ཆུབ་སེམས་དཔའི་སྤྱོད་པ་ཐོས་པ་དང་མ་བྲལ་ལོ། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ཚུལ་ཐོས་པ་དང་མ་བྲལ་ལོ། །བྱང་ཆུབ་སེམས་དཔའི་སའི་ཡེ་ཤེས་སྣང་བའི་ཚུལ་ཐོས་པ་དང་མ་བྲལ་ལོ། །བྱང་ཆུབ་སེམས་དཔའི་གཟུངས་དང་ཏིང་ངེ་འཛིན་མི་ཟད་པའི་མཛོད་དང་། གཏེར་ཐོས་པ་ཐོབ་པ་དང་མ་བྲལ་ལོ་མཐའ་དང་དབུས་མེད་པའི་འཇིག་རྟེན་གྱི་ཁམས་ཀྱི་དྲ་བ་ལ་འཇུག་ཅིང་ཁོང་དུ་ཆུད་པར་བྱ་བའི་ཚུལ་ཐོས་པ་དང་མ་བྲལ་ལོ། །མཐའ་དང་དབུས་མེད་པའི་སེམས་ཅན་གྱི་ཁམས་འབྱུང་བའི་རྒྱུ་ཐོས་པ་ཐོབ་པ་དང་མ་བྲལ་ལོ། །འགྲོ་བ་ཐམས་ཅད་ཀྱི་ཉོན་མོངས་པའི་དྲ་བའི་དཀྱིལ་འཁོར་ཡོངས་སུ་ཟད་པར་བྱ་བའི་ཡེ་ཤེས་སྣང་བ་དང་མ་བྲལ་ལོ། །སེམས་ཅན་ཐམས་ཅད་ཀྱི་དགེ་བའི་རྩ་བ་འབྱུང་བའི་རྒྱུའི་ཡེ་ཤེས་ཐོབ་པ་དང་མ་བྲལ་ལོ། །སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ལུས་ཡོངས་སུ་སྟོན་པ་དང་མ་བྲལ་ལོ། །སེམས་ཅན་ཐམས་ཅད༌ཀྱི་ཤེས་པར་བྱེད་པའི་དབྱངས་ཀྱི་དཀྱིལ་འཁོར་རྣམ་པར༌དག་པ་དང་མ་བྲལ་ལོ། །རིགས་ཀྱི་བུ་ཁོ་མོ་བྱང་ཆུབ་སེམས་དཔའི་རྣམ་པར་ཐར་པའི་སྒོ་ཐུབ་པར་དཀའ་བའི་ཡེ་ཤེས་ཀྱི་སྙིང་པོ་འདི་དང་། ཆོས་ཐམས་ཅད་ཡོངས་སུ་བཙལ་བས་མི་སྐྱོ་བའི་རྒྱན་གྱི་ཏིང་ངེ་འཛིན་གྱི་སྒོ་འདི་ལ་སྙོམས་པར་ཞུགས་ཏེ། བྱང་ཆུབ་སེམས་དཔའི་སྤྱོད་པའི་སྒོ་ཡི་དམ་ལ་བརྟན་པ་འདི་རྣམ་པར་ཕྱེ་བ་དང་། གཟུངས་ཀྱི་སྒོ་ཆོས་ཐམས་ཅད་མཉམ་པ་ཉིད་ཀྱིས་འདི་དང་། སྤོབས་པའི་ཡེ་ཤེས་སྣང་བའི་སྒོ་ཆོས་ཀྱི་གཞི་ཐམས་ཅད་སྣང་བར་བརྗོད་པ་འདི་རྣམ་པར་ཕྱེ་བ་དང་། ཆོ་འཕྲུལ་བསམ་གྱིས་མི་ཁྱབ་པ་ཡོད་ན་རིགས་ཀྱི་བུ་ཁྱོད་མངོན་སུམ་དུ་བལྟ་བར༌འདོང་ངམ། སྨྲས་པ། འཕགས་མ་འཚལ་ལོ། །དེ་ནས་དགེ་བསྙེན་མ་མི་གཡོ་བ་དེ་ན་དེ་ལྟར་འདུག་བཞིན་དུ་བྱང་ཆུབ་སེམས་དཔའི་རྣམ་པར་ཐར་པའི་སྒོ་ཐུབ༌པར་དཀའ་བའི་ཡེ་ཤེས་ཀྱི་སྙིང་པོ་ལ་སོགས་པ་དང་། ཏིང་ངེ་འཛིན་གྱི་སྒོ་ཐམས་ཅད་ཡོངས་སུ་བཙལ་བས་མི་སྐྱོ་བའི་རྒྱན་ལ་སོགས་པ་དང་། ཏིང་ངེ་འཛིན་གྱི་སྒོ་དོན་ཡོད་པའི་དཀྱིལ་འཁོར༌གྱི་རྒྱན་ལ་སོགས་པ་དང་། ཏིང་ངེ་འཛིན་གྱི་སྒོ་སྟོབས་བཅུའི་ཡེ་ཤེས་ཀྱི་དཀྱིལ་འཁོར་མངོན་དུ་འགྱུར་བ་ལ་སོགས་པ་དང་། ཏིང་ངེ་འཛིན་གྱི་སྒོ་སངས་རྒྱས་ཀྱི་རིགས་མི་ཟད་པའི་མཛོད༌ལ་སོགས་པ་ཏིང་ངེ་འཛིན་གྱི་སྒོ་བརྒྱ་སྟོང་ཕྲག་བཅུ་ལ་རྣམ་པར་བལྟ་བ་དང་། རྣམ་པར་དཔྱད་པ་དང་། རྗེས་སུ་འཇུག་པ་དང་། ངེས་པར་རྟོགས་པར་བྱས་སོ། །

དེ་ལྟར་དགེ་བསྙེན་མ་མི་གཡོ་བ་སྙོམས་པར་ཞུགས་མ་ཐག་ཏུ་ཚོང་དཔོན་གྱི་བུ་ནོར་བཟང་གིས་ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དུ་གཡོས་པ་དང་། བཻཌཱུརྱ་ཡོངས་སུ་དག་པའི་རྒྱུ་ལས་གྱུར་པར་གནས་པར་མཐོང་ངོ་། །འཇིག་རྟེན་གྱི་ཁམས་རེ་རེའི་གླིང་བཞི་པ་བྱེ་བ་ཕྲག་བརྒྱ་བརྒྱ་ན། དེ་བཞིན་གཤེགས་པ་བྱེ་བ་ཕྲག་བརྒྱ་བརྒྱ་བཞུགས་པར་མཐོང་སྟེ། ལ་ལ་ནི་དགའ་ལྡན་གྱི་གནས་ན་བཞུགས་པ་ནས། ལ་ལ་ནི་ཡོངས་སུ་མྱ་ངན་ལས་འདའ་བ་མཛད་པའི་བར་དུའང་མཐོང་ངོ་། །དེ་ཡང་འཇིག་རྟེན་གྱི་ཁམས༌བཻཌཱུརྱའི་རང་བཞིན་དེ་དག་ཡོངས་སུ་དག་ཅིང་སྒྲིབ་པ་མེད་པའི་ཕྱིར་ཏེ། དེ་བཞིན་གཤེགས་པ་དེ་དག་སོ་སོ་ནས་འོད་ཟེར་དང་། འོད་ཀྱི་དཀྱིལ་འཁོར་ཆོས་ཀྱི་དབྱིངས་ཐམས་ཅད་དུ་རྒྱས་པར་ཁྱབ་པ་མངའ་བ་དང་། དེ་བཞིན་གཤེགས་པ་དེ་དག་སོ་སོའི་འཁོར་གྱི་དཀྱིལ་འཁོར་ཤིན་ཏུ་རྣམ་པར་ཕྱེ་བ་རྒྱ་མཚོ་ཡང་མཐོང་བར་གྱུར་ཏོ། །དེ་བཞིན་གཤེགས་པ་དེ་དག་རེ་རེའི་གསུང་གི་དཀྱིལ་འཁོར་ཆོས་ཀྱི་འཁོར་ལོ་ཐམས་ཅད་བརྗོད་པ་སེམས་ཅན་ཐམས་ཅད་ཀྱི་རྣ་ལམ་དུ་རྣམ་པར་གྲགས་པའང་ཐོས་པར་གྱུར་ཏོ། །

དེ་ནས་དགེ་བསྙེན་མ་མི་གཡོ་བ་ཏིང་ངེ་འཛིན་དེ་ལས་ལངས་ནས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་མཐོང་ངམ། ཐོས་སམ་ཤེས་སམ། སྨྲས་པ་འཕགས་མ་མཐོང་ངོ་། །ཐོས་སོ་རིག་གོ ། རིགས་ཀྱི་བུ་ཁོ་མོ་ནི་དེ་ལྟར་བྱང་ཆུབ་སེམས་དཔའི་སྤྱོད་པ་ཡི་དམ་བརྟན་པ་ལ་སློབ་ཅིང་། ཆོས་ཐམས་ཅད་ཡོངས་སུ་བཙལ་བས་མི་སྐྱོ་བའི་རྒྱན་གྱི་ཏིང་ངེ་འཛིན་ལ་མཉམ་པར་བཞག་སྟེ། བྱང་ཆུབ་སེམས་དཔའི་རྣམ་པར་ཐར་པའི་སྒོ་ཐུབ་པར་དཀའ་བའི་ཡེ་ཤེས་ཀྱི་སྙིང་པོ་ལ་གནས་ནས། ཆོས་ཐམས་ཅད་མཉམ་པ་ཉིད་ཀྱི་སའི་གཟུངས་ཁོང་དུ་ཆུད་པ་དང་། སྤོབས་པའི་ཡེ་ཤེས་སྣང་བ་ཆོས་ཀྱི་གཞི་ཐམས་ཅད་སྣང་བ་བརྗོད་པ་ལ་མཁས་པའི་ལེགས་པར་བཤད་པས་སེམས་ཅན་ཐམས་ཅད་ཡོངས་སུ་ཚིམ་པར་བྱེད་པར་ཟད་ན་ཁོ་མོས་བྱང་ཆུབ་སེམས་དཔའ་ཡོན་ཏན་ཚད་མེད་བསམ་གྱིས་མི་ཁྱབ་པ་དང་ལྡན་པ་ནམ་མཁའི་དབྱིངས་ལ་འདབ་ཆགས་ཁྱུ་མཆོག་འཁོད་པ་ལྟར་གནས་མེད་པར་སྤྱོད་པ། ནམ་མཁའ་ལྡིང་གི་དབང་པོ་ཆེན་པོ་ལྟར་ཡོངས་སུ་སྨིན་པའི་བྱང་ཆུབ་སེམས༌དཔའ་གདོན་པའི་ཕྱིར། སེམས་ཅན་ཐམས་ཅད་ཀྱི་རྒྱ་མཚོ་ལ་འཇུག་པ༌ཚོང་པ་ལྟར་སྟོབས་བཅུའི་ཡེ་ཤེས་རིན་པོ་ཆེ་མངོན་པར་འདོད་ཅིང་། ཐམས་ཅད་མཁྱེན་པ་ཉིད་ཀྱི་རིན་པོ་ཆེའི་གླིང་དུ་རྒྱུ་བ། མཐུ་དང་ལྡན་པའི་ཉ་བ་ལྟར། ཡིད་དུ་འོང་བའི་ཆོས་ཀྱི་དཀྱིལ་འཁོར་གྱི་རྒྱ་དང་ལྡན་པའི་ལག་པས་སྲེད་པའི་ཆུ་ལས་བྱུང་བའི་སེམས་ཅན་ཡོངས་སུ་སྨིན་པར་མངོན་པར་གདོན་པའི་ཕྱིར། ཆོས་ཀྱི་རྒྱ་མཚོ་ལ་རྣམ་པར་རྒྱུ་བ། ལྷའི་དབང་པོ་ལྟར་ཉོན་མོངས༌པའི་ལྷ་མ་ཡིན་གྱི་གཡུལ་ཆེན་པོ༌བརྟུལ་བ་བཟློག་པའི་ཕྱིར། ཁམས་གསུམ་གྱི་གནས་ཡོངས་སུ་བཀང་ཞིང་རྣམ་པར་རྒྱུ་བ་ཉི་མའི་དཀྱིལ་འཁོར་ལྟར་སེམས་ཅན་གྱི་སྲེད་པའི་ཆུ་དང་། ཉོན་མོངས་པའི་འདམ་ཤིན་ཏུ་བསྐམ་པའི་ཕྱིར། ཆོས་ཀྱི་དབྱིངས་ཀྱི་ནམ་མཁའི་དབྱིངས་ལ་ཡང་དག་པར་འཕགས་པ་ཟླ་བ་ཉ་ཞིང་རྒྱས་པ་ལྟར་འདུལ་བའི་ཡིད་ཀྱི་མེ་ཏོག་ཀུ་མུ་ཏ་རྣམ་པར་ཁ་དབྱེ་བའི་ཕྱིར། ཡེ་ཤེས་ཀྱི་ནམ་མཁའ་ལ་མངོན་པར་ཤར་བ། སའི་གཞི་ལྟར་འགྲོ་བ་ཐམས་ཅད་ཀྱི་དགེ་བའི་དབང་པོའི་མྱུ་གུ་བསྐྱེད་ཅིང་། རྣམ་པར་སྤེལ་བའི་ཕྱིར་བྱམས་མི་བྱམས་དང་། མཐོན་དམན་མེད་པར་འཇིག་རྟེན་ན་མཉམ་པར་གནས་པ་རླུང་མར་ལྟར་སེམས་ཅན་ཐམས་ཅད་ཀྱི་ཉོན་མོངས་པ་དང་། ལྟ་བའི་ཤིང་དང་ཤིང་ཕྲན་གྱི་ནགས་ཚལ་དང་། ཀུན་དགའ་རྩ་བ་ནས་གདོན་པའི་ཕྱིར་ཆགས་པ་མེད་པར་ཕྱོགས་ཐམས་ཅད་དུ་རྣམ་པར་རྒྱུ་བ། འཁོར་ལོས་སྒྱུར་བ་ལྟར་བསྡུ་བའི་དངོས་པོའི་ཡོ་བྱད་དང་། རྐྱེན་གྱིས་འགྲོ་བ་ཐམས་ཅད་ཡོངས་སུ་བསྡུ་བའི་ཕྱིར། འཇིག་རྟེན་ན་རྣམ་པར་སྤྱོད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཡུལ་དགའ་འཛིན་ཚད་མེད་པ་ན། གྲོང་ཁྱེར་དགའ་བ་འཛིན་པ་ཞེས་བྱ་བ་ཡོད་དེ། དེ་ན་ཀུན་ཏུ་རྒྱུ་ཐམས་ཅད་དུ་འགྲོ་བ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་དགེ་བསྙེན་མ་མི་གཡོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏོ། །དགེ་བསྙེན་མ་མི་གཡོ་བ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། དགེ་བསྙེན་མ་མི་གཡོ་བའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་དགེ་སློང་མ་སེངྒེ་རྣམ་པར་བསྒྱིངས་པ་ཞེས་བྱ་བས་འཁོར་གྱི་ཚོགས་བསམ་གྱིས་མི་ཁྱབ་པ་ལ་ཏིང་ངེ་འཛིན་གྱི་སྒོ་དཔག་ཏུ་མེད་པ་བསྟན་ནས་བཞུགས་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཐར་གྱི་ཡུལ་ཤུ་མ་ཕྱི་མའི་མཐའི་གྲོང་ཁྱེར་ཀ་ལིང་གའི་ནགས་ཚལ་གང་ན་བ་དེར་སོང༌སྟེ་ཕྱིན་ནས། དགེ་སློང་མ་སེང་གེ་རྣམ་པར་བསྒྱིངས་པ་ཡོངས་སུ་ཚོལ་ཞིང་སེམས་ཅན་ཀུན་ལ་རྨེད་པའི་ཚེ། གང་ནས་གང་དུ་སོང་བ་དེ་དང་དེར༌རོགས་པ་བརྒྱ་ཕྲག་དུ་མ་དང་། བུ་མོ་བརྒྱ་ཕྲག་དུ་མ་ཞིག་སྲང་དང་ལམ་གྱི་བཞི་མདོ་དང་། ལམ་གྱི་སུམ་མདོ་དག་ན་ཚོགས་ཏེ། རྗེས་སུ་འབྲང་ངོ་། །སྐྱེས་པ་བརྒྱ་ཕྲག་དུ་མ་དང་། བུད་མེད་བརྒྱ་ཕྲག་དུ་མ་ཞིག་གིས་ཀྱང་རིགས་ཀྱི་བུ༌འདི་རེ་དགེ་སློང་མ་སེང་གེ་རྣམ་པར་བསྒྱིངས་པ་ནི། གྲོང་ཁྱེར་ཀ་ལིང་གའི་ནགས་ཚལ་འདི་ཉིད་ཀྱི་བཟའ་ཤིང་གི་ར་བ་ཆེན་པོ་རྒྱལ་བའི་འོད་ཀྱིས་བྱིན་པ་ཉི་མའི་མདོག་ན་སེམས་ཅན་ཚད་མེད་པའི་དོན་དུ་ཆོས་སྟོན་ཅིང་འདུག་གོ་ཞེས་བསྟན་ཏོ། །

དེ་ནས་ཚོང་དཔོན་གྱི་བུ་ནོར་བཟང་བཟའ་ཤིང་གི་ར་བ་ཉི་མའི་མདོག་དེར་ཕྱིན་ནས་ཀུན་ཏུ་བཙལ་ཏེ། བལྟས་ན་བཟའ་ཤིང་གི་ར་བ་དེ་ན། ཤིང་ཟླ་བ་ཤར་བ་ཞེས་བྱ་བ་ཁང་པ་བརྩེགས་པའི་དབྱིབས་ལྟར་འདུག་པ། འོད་སྣ་ཚོགས་ཀྱི་ཁ་དོག་ཅན་འོད་ཀྱི་མདོག་དང་ལྡན་པ། འཁོར་ཀུན་ཏུ་དཔག་ཚད་ཀྱི་ཁྱོན་ཙམ་དུ་འོད་ཀྱིས་རྒྱས་པར་འགེངས་པ་མང་པོ་དང་། ལོ་མའི་ཤིང་ཡོངས་སུ་འགེངས་པ་ཞེས་བྱ་བ་གདུགས་ཀྱི་རྣམ་པ་དང་དབྱིབས་སུ་འདུག་པའི་འདབ་མས་ཀུན་ནས་ཁེབས་པ། བཻཌཱུརྱ་སྔོན་པོའི་ཁ་དོག་ལྟར་འདུག་པའི་སྤྲིན་གྱི་མདོག་དང་ལྡན་པ་མང་པོ་དང་མེ་ཏོག་གི་ཤིང་མེ་ཏོག་གི་མཛོད་ཅེས་བྱ་བ། རིའི་རྒྱལ་པོ་ཁ་བ་ཅན་ལྟར་མདངས་དགའ་བའི་དབྱིབས་སྣ་ཚོགས་དང་ལྡན་པ་ཁ་དོག་སྣ་ཚོགས་ཀྱི་མེ་ཏོག་མི་ཟད་པའི་ཆར༌རབ་ཏུ་འབེབས་པ། སུམ་ཅུ་རྩ་གསུམ་གྱི་ལྷའི་ཕོ་བྲང་གི་རྒྱན་གྱི་ཀུན་ནས་འདུ་བ་དང། སུས་ཀྱང་མི་ཤིགས་པ་ལྟ་བུ་མང་པོ་དང་། ཤིང་ཏོག་གི་ཤིང་རྟག་ཏུ་སྨིན་པའི༌རོ་དཔེ་མེད་པའི་འབྲས་བུའི་ཚོགས་ཤེས་བྱ་བ་གསེར་གྱི་རི་བོའི་ལྷུན་ལྟར་འདུག་པ། རྟག་ཏུ་ཤིང་ཏོག་ཕུན་སུམ་ཚོགས་པར་གནས་པ་མང་པོ་དང་། རིན་པོ་ཆེའི་རྒྱལ་པོའི་ཤིང་རྣམ་པར་སྣང་བའི་མཛོད་ཅེས་བྱ་བ་རིན་པོ་ཆེའི་རྒྱལ་པོ་དཔེ་མེད་པའི་དབྱིབས་ལྟར་འདུག་པ། ལྷ་རྫས་ཀྱི་རིན་པོ་ཆེའི་ཕྲེང་བ་དང་། སེ་མོ་དོ་དང་། རྒྱན་རིན་པོ་ཆེ་ཡིད་བཞིན་གྱི་རྒྱལ་པོའི་མཛོད་ནས་བྱུང་བ་ལྟར་ཕུན་སུམ་ཚོགས་པ་དང་ལྡན་པ། རིན་པོ་ཆེའི་ཁ་དོག་གྲངས་མེད་པའི་འབྱུང་གནས་སུ་གྱུར་པ་མང་པོ་དང་། གོས་ཀྱི་ཤིང་དགའ་བར་བྱེད་པ་ཞེས་བྱ་བ་ལྷ་རྫས་ཀྱི་གོས་རིན་པོ་ཆེའི་ཁ་དོག་སྣ་ཚོགས་ཀྱི་ཚོགས་རབ་ཏུ་འགྱེད་ཅིང་འཕྱང་བས་ཤིན་ཏུ་བརྒྱན་པ་མང་པོ་དང་། རོལ་མོའི་ཤིང་དགའ་བ་སྐྱེད་པ་ཞེས་བྱ་བ་ལྷ་རྫས་ལས་ཀྱང་ལྷག་པའི་རོལ་མོ་ཡིད་དུ་འོང༌བའི་སྒྲ་སྙན་པ་འབྱིན་པ་མང་པོ་དང། སྤོས་ཀྱི་ཤིང་ཀུན་ཏུ་ཞིམ་པས་བརྒྱན་པ་ཞེས་བྱ་བ་ཕྱོགས་ཐམས་ཅད་དུ་ཐོགས་པ་མེད་པར་རྣམ་པ་ཐམས་ཅད་དུ་ཡིད་དུ་འོང་བའི་སྤོས་ཀྱི་ངད་འབྱུང་བ་མང་པོ་དག་ཀྱང་ཡོད་པར་མཐོང་། མཚེའུ་དང་ལུ་མ་དང་། ལྟེང་ཀ་དང་། རྫིང་བུ་རིན་པོ་ཆེ་བདུན་གྱི་ཕ་གུས་མཐའ་བརྩིགས་པ། ཕྱོགས་བཞི་ནས་རིན་པོ་ཆེའི་ཐེམ་སྐས་བཙུགས་པ། རིན་པོ་ཆེ་སྣ་ཚོགས་ཀྱི་ཁྲི་འཕང་དུས་དང་མཐུན་པའི་ཙན་དན་གྱི་དྲི་ཞིམ་པོས་བསྐུས་པས་ཀུན་ནས་བསྐོར་བ། གཞི་རིན་པོ་ཆེའི་རྒྱལ་པོ༌བཻཌཱུརྱ་སྔོན་པོ་ལས་ལེགས་པར་བླངས་པ། འཛམ་བུ་ཆུ་ཀླུང་གི་གསེར་གྱི་བྱེ་མ་བདལ་བ་ཡན་ལག་བརྒྱད་དང་ལྡན་པའི་ཆུ་ལྷ་རྫས་ཀྱི་དྲི་ཡིད་དུ་འོང་བ་ཅན་གྱིས་ཡོངས་སུ་གང་བ། རིན་པོ་ཆེའི་པད་མོ་དང་། ཨུཏྤ་ལ་དང་། ཀུ་མུ་ད་དང་། མེ་ཏོག༌པུན་ད་རི་ཀ་ཁ་དོག་སྣ་ཚོགས་ལྷ་རྫས་ཀྱི་བསུང་དང་ལྡན་པས། ཆུ་ཀུན་ནས་ཡོག་པ། བྱ་བྲན་སྣ་ཚོགས་ཀྱི་ཁྱུ་ལྷ་རྫས་ལས་ཀྱང་འདས་པའི་གཟུགས་ཡིད་དུ་འོང་བ་དང་ལྡན་པ། སྒྲ་སྙན་པ་འབྱིན་ཅིང་བརྗོད་པས་གང་བ། ལྷ་རྫས་ཀྱི་རིན་པོ་ཆེ་སྣ་ཚོགས་ཀྱི་ཤིང་གི་ཕྲེང་བ་ལེགས་པར་བཀྱེ་བས་ཡོངས་སུ༌བསྐོར་ཅིང་བརྒྱན་པ་དང་ལྡན་པ་ཤིང་སྣ་ཚོགས་དེ་དག་གི་དྲུང་ཐམས་ཅད་དུའང་རིན་པོ་ཆེའི་སེང་གེའི་ཁྲི་སྣ་ཚོགས་ཡིད་དུ་འོང་བའི་གཟུགས་དང་ལྡན་པ། རིན་པོ་ཆེ་སྣ་ཚོགས་ཀྱི་རྒྱན་བསམ་གྱིས་མི་ཁྱབ་པ་དུ་མས་བརྒྱན་པ། ལྷ་རྫས་ཀྱི་སྟན་རིན་པོ་ཆེ་སྣ་ཚོགས་འབེལ་བར་བཏིང་བ། ལྷ་རྫས་ཀྱི་སྤོས་དང་། བདུག་སྤོས་ཀྱི་རྣམ་པ་ཐམས་ཅད་ཀྱིས་བདུག་པ། ལྷ་རྫས་ལས་ཀྱང་འདས་པའི་དར་རིན་པོ་ཆེ་མངོན་པར་སྤྱངས་པ། རིན་པོ་ཆེ་སྣ་ཚོགས་ཀྱི་བླ་རེ་བཀྱེ་བ། རིན་པོ་ཆེ་སྣ་ཚོགས་དང་འཛམ་བུ་ཆུ་ཀླུང་གི་གསེར་གྱི་དྲ་བ་སྣ་ཚོགས་ཀུན་ནས་བྲེས་པ། རིན་པོ་ཆེའི་དྲིལ་གྱི་དྲ་བ་ཡིད་དུ་འོང་ཞིང་སྙན་པའི་སྒྲ་འབྱིན་པ། མང་པོས་བརྒྱན་པ། འཁོར་དུ་ལྷ་རྫས་ཀྱི་རིན་པོ་ཆེའི་སྟན་བརྒྱ་ཕྲག་དུ་མ་བཏིང་ཞིང་བཤམས་པ་མཐོང་ངོ་། །རིན་པོ་ཆེའི་ཤིང་དྲུང་ལ་ལར་ནི་སེང་གེའི་ཁྲི་རིན་པོ་ཆེའི་པདྨོའི་སྙིང་པོ་ཅན་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་ནོར་བུ་རིན་པོ་ཆེའི་སྤོས་ཀྱི་རྒྱལ་པོའི་པད་མོའི་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་ཀླུའི་རྒྱན་གྱི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་ནོར་བུ་རིན་པོ་ཆེའི་རྒྱལ་པོ་སེང་གེའི་བྱ་ལའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་རྣམ་པར་སྣང་བའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་ཕྱོགས་རྣམ་པར་སྣང་བའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །

ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་དབང་པོའི་རྡོ་རྗེའི་པད་མོས་སྙིང་པོ་བྱས་པ་བཤམས་པ་མཐོང་ངོ་། །ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ༌འགྲོ་བའི་ཡིད་དུ་འོང་བའི་པདྨོས་སྙིང་པོ་བྱས་པ་བཤམས་པ་མཐོང་ངོ་། །རིན་པོ་ཆེའི་ཤིང་དྲུང་ལ་ལར་ནི་སེང་གེའི་ཁྲི་རིན་པོ་ཆེའི་རྒྱལ་པོ་མདོག་དཀར་པོའི་པད་མོས༌སྙིང་པོ་བྱས་པ་བཤམས་པ་མཐོང་ངོ་། །བཟའ་ཤིང་གི་ར་བ་དེའི་གཞི་ཐམས་ཅད་ཀྱང་རིན་པོ་ཆེ་སྣ་ཚོགས་ཀྱིས་ཡོངས་སུ་གང་ཞིང་རྒྱ་མཚོ་ཆེན་པོ་ལྟར་རིན་པོ་ཆེའི་གླིང་གིས་ཡོངས་སུ་གང་བ་མཐོང་ངོ་། །བཻཌཱུརྱ་སྔོན་པོའི་དམ་པས་སྤྲས་ཏེ། རིན་པོ་ཆེ་ཐམས་ཅད་ཀྱིས་བརྒྱན་པའི་ས་ཕྱོགས་ཀ༌ཙ་ལིན་ད་ལྟར་རེག་ན་བདེ་ཞིང་འཇམ༌པ། གོམ་པ་བོར་ཞིང་བཏེག་པའི་ཚེ༌མཐོ་དམན་མེད་པ། རྡོ་རྗེ་རིན་པོ་ཆེ་མཆོག་གི་པདྨོའི་དྲི་ཡིད་དུ་འོང་བར་ཞིམ་ཞིང་རེག་ན་བདེ་བའི་སིལ་མ་ཀུན་ཏུ་བཀྲམ་པ། ང་ངུར་དང་། རྨ་བྱ་དང་། ཁྲུང་ཁྲུང་དང་། ཀུ་ན་ལ་དང་། ཀ་ལ་པིང་ཀ་དང་། ཀོ་ཀི་ལ་དང་། ཛི་བན་ཛི་བ་ཀ་སྒྲ་སྙན་ཅིང་ཡིད་དུ་འོང་བའི་ང་རོ་འབྱིན་པ་མང་པོས་གང་བ། ལྷ་རྫས་ཀྱི་རིན་པོ་ཆེའི་ཙན་དན་གྱི་ཤིང་མང་པོའི་ནགས་ཚལ་ཤིན་ཏུ་ལེགས་པར་འགྲིགས་པས་བརྒྱན་པ། རིན་པོ་ཆེ་སྣ་ཚོགས་ཀྱི་པདྨོའི་སྤྲིན་གྱི་ཆར་དང་། རིན་པོ་ཆེའི་མེ་ཏོག་སྣ་ཚོགས་མི་ཟད་པའི་ཆར་རྒྱུན་ཏུ་འབབ་པ། འདྲེས་པའི་ནགས་ཚལ་ལས་ཀྱང་ཁྱད་པར་དུ་འཕགས་པ། རིན་པོ་ཆེ་སྣ་ཚོགས་ཀྱི་ཁང་བུ༌བརྩེགས་མ་བརྒྱན་པར་བཀོད་པའི་ནང་ནས། སྤོས་ཀྱི་རྒྱལ་པོའི་བདུག་སྤོས་རིན་ཐང་མེད་པ་རྟག་ཏུ་འཐུལ་ཞིང་ཞིམ་པ་ལྷའི་མདུན་ས་ཆོས་བཟང་པོའི་རྒྱན་ལས་ཀྱང་ལྷག་པར་བརྒྱན་པ། ལྷ་རྫས་ལས་ཀྱང་འདས་པའི་རིན་པོ་ཆེའི་དྲ་བ་སྣ་ཚོགས་ཀྱིས་ཀུན་ནས་བྲེས་པ། མུ་ཏིག་རིན་པོ་ཆེའི་མེ་ཏོག་གི་ཕྲེང་བ་དང་། ལྡ་ལྡི་ཀུན་ནས༌བྲེས་པས་རབ་ཏུ་བརྒྱན་པ། རིན་པོ་ཆེའི་དྲིལ་བུ་རྣམ་པ་སྣ་ཚོགས་སུ་རྣམ་པར་བཀྱེ་བའི་གསེར་གྱི་དྲ་བ་འབར་བས། ཀུན་ནས་དཀྲིགས་པ། རོལ་མོའི་ཤིང་དང་། རིན་པོ་ཆེའི་ཏ་ལ་ལས་དྲིལ་བུའི་དྲ་བ་རླུང་གིས་ལེགས་པར་བསྐྱོད་པས་ཡིད་དུ་འོང་བའི་སྒྲ་སྙན་པའི་དབྱངས་འབྱུང་བ་དང་ལྡན་པ། དབང་བསྒྱུར་གྱི་ལྷའི་རྒྱལ་པོའི་ལྷ་མོ་དཔེ་ཚུལ་ཤིན་ཏུ་བཟང་བ་རྣམས་ཀྱིས་གླུ་སྙན་པའི་སྒྲ་རབ་ཏུ་ཡིད་དུ་འོང་བ༌ལེན་མ། ལྷ་རྫས་ཀྱི་ཡིད་བཞིན་གྱི་གོས་ཁ་དོག་སྣ་ཚོགས་ཀྱི་སྤྲིན་གྱི་ཆར་རབ་ཏུ་འབབ་པས་རྣམ་པར་མཛེས་པ། རྒྱ་མཚོ་ཆེན་པོ་ལྟར་ཁ་དོག་དང་། མདོག་སྣ་ཚོགས་སུ་ལྡན་པས་བལྟ་ན་གཏང་མི་བྲ་བ། ཁང་པ་བརྩེགས་པ་རིན་པོ་ཆེའི་རྒྱན་དང་ལྡན་པ་བརྒྱ་སྟོང་གྲངས་མེད་པས་རབ་ཏུ་བརྒྱན་པ། སུམ་ཅུ་རྩ་གསུམ་གྱི་ལྷའི་ཕོ་བྲང་ལྟར་བལྟ་ན་བཟང་བ། རིན་པོ་ཆེ་སྣ་ཚོགས་རྣམ་པར་ཕྱེ་བས་རྣམ་པ་ཐམས་ཅད་དུ་བརྒྱན་པའི་གདུགས་ཤིན་ཏུ་ལེགས་པ། རྣམ་པར་བསྒྲེང་ཞིང་བཀྲམ་པས་ཀུན་ནས་བལྟ་ན་མཛེས་པ། དབང་པོ་ཆེན་པོའི་འཇིག་རྟེན་ལྟར་ཤིན་ཏུ་མཛེས་པའི་དེའུ་སྣ་ཚོགས་ཀྱིས་བརྒྱན་པ། ཡིད་དུ་འོང་བའི་འོད་སྣང་བ་ཆེན་པོ་རྟག་པར་འབྱུང་བ། ཚངས་པ་ཆེན་པོའི་གཞལ་མེད་ཁང་ལྟར་ནོར་བུ་རིན་པོ་ཆེའི་རྒྱལ་པོ་འགྲོ་བ་ཡིད་དུ་འོང་བའི་འོད་ཀྱིས་འབར་བ་སྟེ། བཟའ་ཤིང་གི་ར་བ་ཆེན་པོ་ཉི་མའི་མདོག་ཅེས་བྱ་བ་དེ། དགེ་སློང་མ་སེང་གེ་རྣམ་པར་བསྒྱིངས་པའི་རྫུ་འཕྲུལ་གྱི་མཐུ་སྟོབས་དང་། བྱིན་གྱི་རླབས་ཆེ་ཞིང་བསམ་གྱིས་མི་ཁྱབ་པས། འཇིག་རྟེན་གྱི་ཁམས་གྲངས་མེད་པའི་གནས་སུ་གྱུར་པའི་ནམ་མཁའི་དབྱིངས་ལྟར་ཡངས་ཤིང་ཚད་མེད་དེ། རྒྱ་ཆེན་པོ་དང་ལྡན་པ་མཐོང་ངོ་། །

དེ་ནས་ཚོང་དཔོན་གྱི་བུ་ནོར་བཟང་གིས་དེ་ལྟར་ཡོན་ཏན་ཚད་མེད། བསམ་གྱིས་མི་ཁྱབ་པ་ཚོགས་པའི་བཟའ་ཤིང་གི་ར་བའི་རྒྱན་བྱང་ཆུབ་སེམས་དཔའི་ལས་ཀྱི་རྣམ་པར་སྨིན་པས་ཡོངས་སུ་གྲུབ་པ། འཇིག་རྟེན་ལས་འདས་པའི་དགེ་བའི་རྩ་བ་རྒྱ་ཆེན་པོ་ལས་སྐྱེས་པ། སངས་རྒྱས་ལ་མཆོད་ཅིང་རིམ་གྲོ་བྱས་པའི་རྒྱུ་མཐུན་པ་བསམ་གྱིས་མི་ཁྱབ་པ་ལས་བྱུང་བ། འཇིག་རྟེན་གྱི་ཁམས་ཐམས་ཅད་ན་ཡོད་པའི་དགེ་བའི་རྩ་བ་མ་ལུས་པས་མི་འཕྲོགས་པ། ཆོས་ཀྱི་རང་བཞིན་སྒྱུ་མའི་རྣམ་པ་ལྟ་བུས་གྲུབ་པ། དགེ་བའི་བསོད་ནམས་དྲི་མ་མེད་པ་རྒྱ་ཆེན་པོས་གྲུབ་ཅིང་བྱུང་བ། དགེ་སློང་མ་སེང་གེ་རྣམ་པར་བསྒྱིངས་པའི་སྔོན་གྱི་སྤྱོད་པ་བཟང་པོ་ལེགས་པར་བྱས་པ་དང་། རྒྱུ་མཐུན་པའི་སྟོབས་དང་། ཤུགས་ཀྱིས་བྱུང་བ་ཉན་ཐོས་དང་། རང་སངས་རྒྱས་ཐམས་ཅད་དང་། ཐུན་མོང་མ་ཡིན་པ། མུ་སྟེགས་ཅན་དང་། ཕས་ཀྱི་རྒོལ་བ་ཐམས་ཅད་ཀྱིས་མི་འཕྲོགས་པ། བདུད་ཀྱི་ལམ་ཡོངས་སུ་རྒྱུ་བ་ཐམས་ཅད་ཀྱིས་མི་ཚུགས་པ། བྱིས་པ་སོ་སོའི་སྐྱེ་བོ་ཐམས་ཅད་ཀྱིས་བལྟར་མེད་པ་མཐོང་སྟེ། ཤིང་སྣ་ཚོགས་དེ་དག་གི་དྲུང་གི་སེང་གེའི་ཁྲི་ཆེན་པོ་དེ་དག་ལའང་དགེ་སློང་མ་སེང་གེ་རྣམ་པར་བསྒྱིངས་པ། ལུས་ཤིན་ཏུ་མཛེས་པ། སྤྱོད་ལམ་ཞི་བ། ཡིད་ཞི་བ། ཤིན་ཏུ་དབེན་པ། དབང་པོ་ཐུལ་བ། གླང་པོ་ལྟར་ཤིན་ཏུ་དུལ་བ། མཚོ་ལྟར༌དྭངས་ཤིང་གསལ་ལ་རྙོག་པ་མེད་པའི་སེམས་དང་ལྡན་པ། རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་ལྟར་འདོད་པ་ཐམས་ཅད་སྒྲུབ་པ། པད་མོ་ལ་ཆུས་མི་ཆགས་པ་ལྟར་འཇིག་རྟེན་གྱི་ཆོས་ཀྱིས་མ་གོས་པ། སེང་གེ་ལྟར་འཇིགས་པ་དང་། སྐྱི་གཡའ་བ་མེད་པ། མི་འཇིགས་པ་རྣམ་པར་དག་པས། རིའི་དབང་པོ་ཆེན་པོ་ལྟར་མི་སྒུལ་བ། ཚུལ་ཁྲིམས་རྣམ་པར་དག་པས་ཡིད་དུ་འོང་བའི་སྤོས་ཀྱི་རྒྱལ་པོ་ལྟར་འགྲོ་བའི་སེམས་ཚིམ་པར་བྱེད་པ། ཁ་བའི་ཙན་དན་ལྟར་ཉོན་མོངས་པའི་གདུང་བ་རབ་ཏུ་ཞི་བར་བྱེད་པ། སྨན་གྱི་རྒྱལ་པོ་བལྟ་ན་བཟང་བ་ལྟར་འགྲོ་བ་ཐམས་ཅད་ཀྱི་སྡུག་བསྔལ་རྣམ་པར༌ཞི་བར་བྱེད་པ། ཆུའི་ལྷའི་ཞགས་པ་ལྟར་བལྟ་ན་དོན་ཡོད་པ། དེ་བཞིན་གཤེགས་པའི་འོད་ལྟར་ལུས་དང་སེམས་ཀྱི་བག་ཡངས་བདེ་བ་བསྐྱེད་པ། ཚངས་པ་ཆེན་པོ་ལྟར་འདོད་ཆགས་དང་། ཞེ་སྡང་དང་། གཏི་མུག་གི་ཀུན་ནས་ལྡང་བ་དང་བྲལ་བ། རིན་པོ་ཆེའི་རྒྱལ་པོ་ནོར་བུ་ཆུ་འདང་ལྟར་ཉོན་མོངས་པས་རྙོག་པ་ཅན་དུ་གྱུར་པའི་སེམས་ཅན་གྱི་སེམས་རབ་ཏུ༌དང་བར་བྱེད་པ། ཞིང་གཤིན་པ་ལྟར་དགེ་བའི་རྩ་བ་རྣམ་པར་འཕེལ་བར་བྱེད་པ་འདུག་པར་མཐོང་ངོ་། །

འཁོར་གྱི་སྟན་དེ་དག་ལའང་འཁོར་སྣ་ཚོགས་འཁོད་པར་མཐོང་སྟེ། འཁོར་གྱི་སྟན་ལ་ལ་ལ་ནི་ལྷའི་བུ་དབང་པོ་ཆེན་པོ་ལ་སོགས་པ། གཙང་མའི་གནས་ཀྱི་རིགས་སུ་གཏོགས་པའི་ལྷའི་བུ་རྣམས་འཁོད་ཅིང་དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་རྣམ་པར་ཐར་པ་མི་ཟད་པ་ཡང་དག་པར་འབྱེད་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ཚངས་པ་ཡིད་དུ་འོང་བ་ལ་སོགས་པ། ཚངས་པའི་རིས་སུ་གཏོགས་པའི་ལྷའི་བུ་རྣམས་འཁོད་ཅིང་དགེ་སློང་མ་སེང་གེ་རྣམ་པར་བསྒྱིངས་པས། དབྱངས་ཀྱི་དཀྱིལ་འཁོར་རྣམ་པར་དག་པ། གཞི་ཀུན་ནས༌འབྱེད་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི༌ལྷའི་བུ་དང་ལྷའི་བུ་མོའི་འཁོར་དང་བཅས་པ་དག་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་བྱང་ཆུབ་སེམས་དཔའི་བསམ་པ་རྣམ་པར་དག་པའི་དབང་གིས་རྣམ་པར་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་འཕྲུལ་དགའ་ལ་སོགས་པ་འཕྲུལ་དགའི༌ལྷའི་བུ་ལྷའི་བུ་མོའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཐམས་ཅད་དགེ་བས་རྣམ་པར་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་དགའ་ལྡན་ལ་སོགས་པ། དགའ་ལྡན་གྱི་རིས་སུ་གཏོགས་པའི་ལྷའི་བུ་ལྷའི་བུ་མོའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས་ཆོས་ཀྱི་སྒོ་རང་གི་སེམས་ཀྱི་མཛོད་ཀྱི་ཀློང་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་རབ་མཚེ་མ་ལ་སོགས་པ༌ལྷའི་བུ་ལྷའི་བུ་མོའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་རྒྱན་མཐའ་ཡས་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་ལྷའི་རྒྱལ་པོ་བརྒྱ་བྱིན་ལ་སོགས་པ་སུམ་ཅུ་རྩ་གསུམ་གྱི་རིས་སུ་གཏོགས་པའི་ལྷའི་བུ་ལྷའི་བུ་མོའི་འཁོར་དང་བཅས་པ་རྣམ་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སྐྱོ་བའི་སྒོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ཀླུའི་རྒྱལ་པོ་གངས་ཆེན་མཚོ་ལ་སོགས་པ་ཀླུའི་རྒྱལ་པོ་འོད་བརྒྱ་པ་དང་། དགའ་བོ་དང་བསྙེན་དགའ་བོ་དང་། ཡིད་དུ་འོང་བ་དང་། ཤུགས་ལྡན་དང་། མ་དྲོས་པ་ལ་སོགས་པ་ཀླུའི་བུ་མོའི་འཁོར་དང་བཅས་པ་ཀླུའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་རྫུ་འཕྲུལ་དང་། ཡུལ་གྱི་འོད་ཀྱི་བརྒྱན་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་རྒྱལ་པོ་ཆེན་པོ་ངལ༌བསོ་པོ་ལ་སོགས་པ་གནོད་སྦྱིན་གྱི་དབང་པོ་གནོད་སྦྱིན་གྱི་བུ་མོ་དང་། གནོད་སྦྱིན་གྱི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་འགྲོ་བ་ཐམས་ཅད་ཡོངས་སུ༌སྐྱོབ་པའི་མཛོད་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་དྲི་ཟའི་རྒྱལ་པོ་གནས་སྲུང་པོ་ལ་སོགས་པ་དྲི་ཟ་མང་པོ་དྲི་ཟའི་བུ་མོ་དང་། དྲི་ཟའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་དགའ་བ་མི་ཟད༌པ་ཆར་རབ་ཏུ་འབེབ་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྷ་མ་ཡིན་གྱི་དབང་པོ་སྒྲ་གཅན་ལ་སོགས་པ༌ལྷ་མ་ཡིན་རྣམས་ལྷ་མ་ཡིན་གྱི་བུ་མོ་དང་། ལྷ་མ་ཡིན་གྱི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཆོས་ཀྱི་དབྱིངས་ཤེས་པའི་ཚུལ་གྱི་ཤུགས་ཀྱིས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་ནམ་མཁའ་ལྡིང་གི་དབང་པོ་ཤུགས་འཛིན་ཆེན་པོ་ལ་སོགས་པ་ནམ་མཁའ་ལྡིང་གི་དབང་པོ་ནམ་མཁའ་ལྡིང་གི་བུ་མོ་དང་། ནམ་མཁའ་ལྡིང་གི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སྲིད་པའི་རྒྱ་མཚོས་འཇིགས་པའི་ཡུལ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་མིའམ་ཅིའི་རྒྱལ་པོ་སྡོང་པོ་ལ་སོགས་པ། མིའམ་ཅིའི་དབང་པོ་མིའམ་ཅིའི་བུ་མོ་དང་། མིའམ་ཅིའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་སྤྱོད་པ་སྣང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་ལྟོ་འཕྱེ་ཆེན་པོའི་དབང་པོ་ཁྲོ་གཉེར་གདོང་ལ་སོགས་པ། ལྟོ་འཕྱེ་ཆེན་པོའི་བུ་མོ་དང་། ལྟོ་འཕྱེ་ཆེན་པོའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ལ་དགའ་བ༌སྐྱེ་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སྐྱེས་པ་དང་། བུད་མེད་དང་། ཁྱེའུ་དང་བུ་མོ་བརྒྱ་སྟོང་མང་པོ་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཁྱད་པར་དུ་འགྲོ་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སྲིན་པོའི་དབང་པོ་རྟག་ཏུ་མདངས་འཕྲོག༌པ་སྡོང་པོའི་རྒྱལ་པོ་ལ་སོགས་པ༌སྲིན་པོའི་དབང་པོ་སྲིན་པོའི་བུ་མོ་དང་སྲིན་པོའི་བྱིས་པའི་འཁོར་དང་བཅས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས་ཆོས་ཀྱི་སྒོ་སྙིང་རྗེ་འབྱུང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་ཉན་ཐོས་ཀྱི་ཐེག་པ་ལ་མོས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཡེ་ཤེས་ཁྱད་པར་དུ་འཕགས་པའི་མཐུ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་རང་སངས་རྒྱས་ཀྱི་ཐེག་པ་ལ་མོས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་སངས་རྒྱས་ཀྱི་ཡོན་ཏན་རྒྱ་ཆེན་པོའི་འོད་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་སེམས་ཅན་ཐེག་པ་ཆེན་པོ་ལ་མོས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་ཡེ་ཤེས་སྣང་བའི་སྒོ་ཀུན་ཏུ་སྒོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ཐོག་མར་སེམས་བསྐྱེད་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་སངས་རྒྱས་ཐམས་ཅད་ཀྱི་སྨོན་ལམ་གྱི་ཕུང་པོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་གཉིས་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རྡུལ་དང་བྲལ་བའི་དཀྱིལ་འཁོར་ཅེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་གསུམ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རབ་ཏུ་ཞི་བའི་རྒྱན་ཅེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བཞི་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ཐམས་ཅད་མཁྱེན་པའི་ཤུགས་ཀྱི་ཡུལ་འབྱུང་བ་ཞེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་ལྔ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་སེམས་ཀྱི་རྒྱུད་མེ་ཏོག་གི་སྙིང་པོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་དྲུག་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་རྣམ་པར་སྣང་བའི་སྙིང་པོ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བདུན་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ས་ཀུན་ནས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བརྒྱད་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་ཆོས་ཀྱི་དབྱིངས་སུ་ལུས་ཤིན་ཏུ་རྣམ་པར་ཕྱེ་བའི་ཡུལ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་དགུ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་མི་དམིགས་པའི་སྟོབས་ཀྱི་གནས་ཀྱིས་བརྒྱན་པ་ཞེས་བྱ་བ་ཡང་དག་པར་བསྟན་པ་མཐོང་ངོ་། །འཁོར་གྱི་སྟན་ལ་ལ་ལ་ནི་བྱང་ཆུབ་སེམས་དཔའ་ས་བཅུ་པ་ལ་གནས་པ་རྣམས་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཏིང་ངེ་འཛིན་གྱི་སྒོ་སྒྲིབ་པ་མེད་པའི་དཀྱིལ་འཁོར་ཅེས་བྱ་བ་ཡང་དག་པར་བསྟན་པ་མཐོང་ངོ་། །

འཁོར་གྱི་སྟན་ལ་ལ་ལ་ནི་ལག་ན་རྡོ་རྗེའི་འཁོར་གྱི་དཀྱིལ་འཁོར་འཁོད་ཅིང་། དགེ་སློང་མ་སེང་གེ་རྣམ་པར་བསྒྱིངས་པས། ཆོས་ཀྱི་སྒོ་ཡེ་ཤེས་རྡོ་རྗེ་མཐུ་བོ་ཆེའི་རྒྱན་ཅེས་བྱ་བ་ཡང་དག་པར་བསྟན་པ་མཐོང་ངོ་། །དེ་ལྟར་སྐྱེ་བའི་སྐྱེ་མཆེད་རྣམ་པ་ཐ་དད་པ་ཐམས་ཅད་ཀྱི་སེམས་ཅན་དུ་གདགས་པ་དང་། སེམས་ཅན་གྱི་ལམ་གྱི་རྒྱུད་ཇི་སྙེད་པ་དེ་དག་གི་སེམས་ཅན་ཡོངས་སུ་སྨིན་པ་རྣམ་པར་འདུལ་བ། སྣོད་དུ་གྱུར་པ་ཇི་སྙེད་ཅིག་བཟའ་ཤིང་གི་ར་བ་དེར་འོངས་ཤིང་། འཁོར་གྱི་སྟན་ལ་སོ་སོར་འཁོད་པ། བསམ་པ་ཐ་དད་པ་མོས་པ་མི་མཚུངས་པ། བསམ་པ་ཤིན་ཏུ་གཞོལ་བར་གྱུར་པ། དད་པའི་རོ་རྔམས་ཆེན་པོ་དང་ལྡན་པ་རྣམས་ལ། དགེ་སློང་མ་སེང་གེ་རྣམ་པར་བསྒྱིངས་པས་ཅི་ནས་ཀྱང༌ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ། དེ་ལྟ་དེ་ལྟར་ཆོས་བསྟན་པ་མཐོང་ངོ་། །དེ་ཅིའི་ཕྱིར་ཞེ་ན། དེ་ནི་དགེ་སློང་མ་སེང་གེ་རྣམ་པར་བསྒྱིངས་པ་དེས་ཀུན་ཏུ་ལྟ་བའི་བཏང་སྙོམས་དང་ལྡན་པ་ལ་སོགས་པ་དང་། སངས་རྒྱས་ཀྱི་ཆོས་ཐམས་ཅད་ཤིན་ཏུ་བསྟན་པ་ལ་སོགས་པ་དང་། ཆོས་ཀྱི་དབྱིངས་ཀྱི་གཞི་ཐ་དད་པ་ལ་སོགས་པ་དང་། སྒྲིབ་པའི་དཀྱིལ་འཁོར་ཐམས་ཅད་རྣམ་པར་འཐོར་བ་ལ་སོགས་པ་དང་། འགྲོ་བ་ཐམས་ཅད་ཀྱི་དགེ་བའི་སེམས་ཡང་དག་པར་འབྱུང་བ་ལ་སོགས་པ་དང་། ཁྱད་པར་ཡོད་པའི་རྒྱན་ལ་སོགས་པ་དང་། ཆགས་པ་མེད་པའི་ཚུལ་གྱི་སྙིང་པོ་ལ་སོགས་པ་དང་། ཆོས་ཀྱི་དབྱིངས་ཀྱི་དཀྱིལ་འཁོར་ལ་སོགས་པ་དང་། སེམས་ཀྱི་མཛོད་ལ་སོགས་པ་དང་། ཀུན་ཏུ་མོས་པ་མངོན་པར་སྒྲུབ་པའི་སྙིང་པོ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་བརྒྱ་སྟོང་གྲངས་མེད་པ་ནོན་པའི་ཕྱིར་ཏེ། བཟའ་ཤིང་གི་ར་བ་ཉི་མའི་མདོག་དེར་བྱང་ཆུབ་སེམས་དཔའ་འམ། སེམས་ཅན་གཞན་ཇི་སྙེད་ཅིག་དགེ་སློང་མ་སེང་གེ་རྣམ་པར་བསྒྱིངས་པ་ལ་ལྟ་བ་དང་། ཆོས་མཉན་པའི་ཕྱིར་འོང་བ་དེ་དག་ཐམས་ཅད་ཀྱང་སྔོན། དགེ་སློང་མ་སེང་གེ་རྣམ་པར་བསྒྱིངས་པས། དགེ་བའི་ཆོས་ཡང་དག་པར༌བླང་བ་ལ་ཤིན་ཏུ་བཀོད་པ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བར་དུ་བྱས་པ་ཤ་སྟག་གོ །

དེ་ནས་ཚོང་དཔོན་གྱི་བུ་ནོར་བཟང་གིས། དགེ་སློང་མ་སེང་གེ་རྣམ་པར་བསྒྱིངས་པའི་བཟའ་ཤིང་གི་ར་བ་ཕུན་སུམ་ཚོགས་པ་དང་། ནགས་ཚལ་ཕུན་སུམ་ཚོགས་པ་དང་། གཙུག་ལག་ཁང་ཕུན་སུམ་ཚོགས་པ་དང་། འཆག་ས་ཕུན་སུམ་ཚོགས་པ་དང་། ལོངས་སྤྱོད་ཕུན་སུམ་ཚོགས་པ་དང་། མལ་ཆ་ཕུན་སུམ་ཚོགས་པ་དང་། འཁོར་གྱི་དཀྱིལ་འཁོར་ཕུན་སུམ་ཚོགས་པ་དང་། དབང་ཆེན་པོ་ཕུན་སུམ་ཚོགས་པ་དང་། རྫུ་འཕྲུལ་དང་རྣམ་པར་འཕྲུལ་པ་ཕུན་སུམ་ཚོགས་པ་དང་། དབྱངས་ཀྱི་རྒྱན་ཕུན་སུམ་ཚོགས་པ་རྣམ་པ་དེ་ལྟ་བུ་མཐོང་སྟེ། ཆོས་ཀྱི་ཚུལ་བསམ་གྱིས་མི་ཁྱབ་པའང་ཐོས་ནས། ཆོས་ཀྱི་སྤྲིན་གྱི་ཆར་ཆེན་པོས་སེམས་མངོན་པར་རླན་པ་དེའི་ཡིད་ལ་དགེ་སློང་མ་སེང་གེ་རྣམ་པར་བསྒྱིངས་པས། བསམ་པ་རྣམ་པར་དག་པ་ཕུན་སུམ་ཚོགས་པར་བྱས༌ཀྱིས་ད་ནི་གཡས་ཕྱོགས་སུ་བསྐོར་བ་ལན་བརྒྱ་སྟོང་དུ་མ་ཞིག་ཏུ་བྱའོ་སྙམ་པ་དང་།

དེའི་མོད་ལ་དགེ་སློང་མ་སེང་གེ་རྣམ་པར་བསྒྱིངས་པས། བཟའ་ཤིང་གི་ར་བ་དང་། འཁོར་གྱི་དཀྱིལ་འཁོར་དུ་བཅས་པ་དེ་དག་ཐམས་ཅད་ཀྱང་སྣང་བ་ཆེན་པོས་ཁྱབ་པར་བྱས་སོ། །དེ་ལྟར་གཡས་ཕྱོགས་སུ་བསྐོར་བ་བྱའོ། །སྙམ་དུ་བསམས་ནས་བསྐོར་བ་བྱེད་པའི་ཚེ། འཁོར་ཐམས་ཅད་ནའང་དགེ་སློང་མ་སེང་གེ་རྣམ་པར་བསྒྱིངས་པ་འདུག་པ་མཐོང་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེས་སྨྲས་པ། རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་རློམ་སེམས་ཐམས་ཅད་ཡོངས་སུ་བཅོམ་པ་ཞེས་བྱ་བ་ཐོབ་པའོ། །སྨྲས་པ། འཕགས་མ་བྱང་ཆུབ་སེམས་དཔའི་རྣམ་པར་ཐར་པ་རློམ་སེམས་ཐམས་ཅད་ཡོངས་སུ་བཅོམ་པ་དེའི་ཡུལ་ཇི་ལྟ་བུ་ཞིག་མཆིས། སྨྲས་པ་རིགས་ཀྱི་བུ་དེ་ནི་ཡེ་ཤེས་སྣང་བ་སྟེ། དུས་གསུམ་དུ་བྱུང་བའི་རྒྱན་སེམས་སྐད་ཅིག་གི་ཆ་ཤས་ལ་རྣམ་པར་དམིགས་པའི་རང་བཞིན་ནོ། །

སྨྲས་པ། འཕགས་མ་ཡེ་ཤེས་སྣང་བ་དེའི་ཡུལ་ཡང་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་ཁོ་མོ་ཡེ་ཤེས་སྣང་བ་འདི་ལ༌སྒྲུབ་པ་དང་ཡོངས་སུ་སྒྲུབ་པའི་ཚེ་ཆོས་ཐམས་ཅད་རབ་ཏུ་འཐད་པ་ཞེས་བྱ་བའི་ཏིང་ངེ་འཛིན་སྐྱེས་ཏེ། ཏིང་ངེ་འཛིན་དེ་ཐོབ་མ་ཐག་ཏུ་ཡིད་ཀྱི་རང་བཞིན་གྱི་ལུས་ཀྱིས་ཕྱོགས་བཅུ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་དུ། བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་དགའ་ལྡན་གྱི་ཕོ་བྲང་ན་བཞུགས་པ། ཐམས་ཅད་རེ་རེ་ལ་ཡང་ལུས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་མཆོད་པ་རྣམ་པ་ཐ་དད་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པ་སྦྱར་བའི་ཕྱིར་འགྲོ་སྟེ། འདི་ལྟར་ལྷའི་ལུས་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་དབང་པོའི་ལུས་མེ་ཏོག་གི་སྤྲིན་ཡོངས་སུ་འཛིན་པ་དང་། སྤོས་ཀྱི་སྤྲིན་ཡོངས་སུ་འཛིན་པ་དང་། བདུག་སྤོས་ཀྱི་སྤྲིན་ཡོངས་སུ་འཛིན་པ་དང་། ཕྲེང་བའི་སྤྲིན་ཡོངས་སུ་འཛིན་པ་དང་། བྱུག་པའི་སྤྲིན་ཡོངས་སུ་འཛིན་པ་དང་། ཕྱེ་མའི་སྤྲིན་ཡོངས་སུ་འཛིན་པ་དང་། ན་བཟའི་སྤྲིན་ཡོངས་སུ་འཛིན་པ་དང་། གདུགས་ཀྱི་སྤྲིན་ཡོངས་སུ་འཛིན་པ་དང་། རྒྱལ་མཚན་གྱི་སྤྲིན་ཡོངས་སུ་འཛིན་པ་དང་། བ་དན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་ལྷབ་ལྷུབ་ཀྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་དྲ་བའི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་གནམ་ཡོལ་གྱི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་རྒྱན་རྣམ་པར་ཕྱེ་བའི་སྤྲིན་ཡོངས་སུ་འཛིན་པ་དང་། རིན་པོ་ཆེའི་སྒྲོན་མའི་རྒྱན་གྱི་སྤྲིན་ཡོངས་སུ་འཛིན་པ་དང་། རིན་པོ་ཆེའི་གདན་གྱི༌རྒྱན་གྱི་སྤྲིན་ཡོངས་སུ་འཛིན་པ་མང་པོས་མཆོད་པ་སྦྱར་བའི་ཕྱིར་འགྲོའོ། །

དགའ་ལྡན་གྱི་གནས་ན་བཞུགས་པའི་བྱང་ཆུབ་སེམས་དཔའ་སྐུ་ཚེ་གཅིག་གིས་ཐོགས་པ་རྣམས་ལ་མཆོད་པ་བྱ་བའི་ཕྱིར། ཇི་ལྟར་འགྲོ་བ་དེ་བཞིན་དུ་ཡུམ་གྱི་སྐུར་གཤེགས་པ་དང་། བལྟམ་པ་དང་། བཙུན་མོའི་འཁོར་གྱི་ནང་ན་བཞུགས་པ་དང་། མངོན་པར་འབྱུང་བ་དང་། སྙིང་པོ་བྱང་ཆུབ་ཏུ་གཤེགས་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཤིང་སྙིང་པོ་བྱང་ཆུབ༌ལ་བཞུགས་པ་དང་། ཆོས་ཀྱི་འཁོར་ལོ་རབ་ཏུ༌བསྐོར་བའི་དེ་བཞིན་གཤེགས་པ་ཐམས་ཅད་དང་། དེ་བཞིན་དུ་ལྷའི་གནས་ན་བཞུགས་པ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་གནས་ན་བཞུགས་པ་དང་། འགྲོ་བ་ཐམས་ཅད་ཀྱི་སེམས་དང་བསམ་པ་ཡོངས་སུ་ཚིམ་པར་མཛད་ནས། ཡོངས་སུ་མྱ་ངན་ལས་འདའ་བའི་བར་དེ་དག་ཐམས་ཅད་ལའང་ཡིད་ཀྱི་རང་བཞིན་གྱི་ལུས་རྣམ་པ་དེ་ལྟ་བུ་དག་གིས་རྣམ་པ་དེ་ལྟ་བུའི་མཆོད་པ་བྱེད་ཅིང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོའོ། །སེམས་ཅན་གང་གིས་ཁོ་མོ་སངས་རྒྱས་མཆོད་པ་དང་། རིམ་གྲོ་བྱེད་པའི་ལས་འདི་ཤེས་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །སེམས་ཅན་གང་ཁོ་མོའི་དྲུང་དུ་འོང་བ་དེ་དག་ཐམས་ཅད་ལའང་ཁོ་མོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག་དང་། རྗེས་སུ་བསྟན་པ་འདི་ཉིད༌སྟོན་ཏེ། རིགས་ཀྱི་བུ་ཁོ་མོ་ཡེ་ཤེས་ཀྱི་མིག་གིས་སེམས་ཅན་ཐམས་ཅད་ལ་ལྟ་ཡང་། སེམས་ཅན་གྱི་འདུ་ཤེས་ཀྱང་མི་བསྐྱེད་ལ། རློམ་སེམས་ཀྱང་མི་བྱེད་དེ། འགྲོ་བ་ཐམས་ཅད་ཀྱི་སྐད་རྒྱ་མཚོ་ཡང་ཉན་ཏེ། ཚིག་གི་ལམ་ཐམས་ཅད་ལ་མངོན་པར་ཞེན་པ་མེད་པས། རློམ་སེམས་སུ་བྱེད་པ་མེད་དོ། །དེ་བཞིན་གཤེགས་པ་ཐམས་ཅད་ཀྱང་མཐོང་སྟེ། ཆོས་ཀྱི་ལུས་ཡོངས་སུ་ཤེས་པས་རློམ་སེམས་སུ་བྱེད༌པ་མེད་དོ། །དེ་བཞིན་གཤེགས་པ་ཐམས་ཅད་ཀྱི༌ཆོས་ཀྱི་འཁོར་ལོ་ཡོངས་སུ་འཛིན་ཀྱང་། ཆོས་ཀྱི་རང་བཞིན་ཁོང་དུ་ཆུད་པས་རློམ་སེམས་སུ་བྱེད་པ་མེད་དོ། །སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་ཀྱང་། ཆོས་ཉིད་སྒྱུ་མའི་རང་བཞིན་ཁོང་དུ་ཆུད་པས་རློམ་སེམས་སུ་བྱེད༌པ་མེད་དོ། །

རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་རློམ་སེམས་ཐམས་ཅད་ཡོངས་སུ་བཅོམ་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་ཆོས་ཀྱི་དབྱིངས་མཐའ་དང་དབུས་མེད་པ་ལ་ཞུགས་པ། ཆོས་ཐམས་ཅད་ལ་རློམ་སེམས་མེད་པར་གནས་ཀྱང་སྐྱིལ་མོ་ཀྲུང་གཅིག་གིས༌ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ། སངས་རྒྱས་ཀྱི་ཞིང་ཐམས་ཅད་རང་གི་ལུས་སུ་འདུས་པར་སྟོན་ཀྱང་། སྐད་ཅིག་གཅིག་གིས་དེ་བཞིན་གཤེགས་པ་ཐམས་ཅད་ཀྱི་དྲུང་དུ་འདོང་བ། ལུས་ལ་སངས་རྒྱས་ཀྱི་རྫུ་འཕྲུལ་ཐམས་ཅད་འབྱུང་ཞིང་རྒྱུ་བ། སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བ་སྤུའི་ཉག་མ་གཅིག་གིས་སྦམས་ཤིང་མངོན་པར་འཕེན་པ། རང་གི་བ་སྤུའི་བུ་གར་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་འདུ་བ་དང་། འཇིག་པའི་བསྐལ་པ་ཡོངས་སུ་སྟོན་པ། སྐད་ཅིག་གཅིག་ལ་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་གནས་པ། མཉམ་པ་ཉིད་ཀྱིས་ཡང་དག་པར་འཛུད་པ། སྐད་ཅིག་གཅིག་གིས་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར༌འཁོར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཡུལ་བགྲོད་དཀའ་བ་ན། གྲོང་ཁྱེར་རིན་པོ་ཆེའི་རྒྱན་ཅེས་བྱ་བ་ཡོད་དེ། དེ་ན་བཅོམ་པ་མ་ལྷའི་བཤེས་གཉེན་མ་ཞེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་དགེ་སློང་མ་སེང་གེ་རྣམ་པར་བསྒྱིངས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་མ་སེང་གེ་རྣམ་པར་བསྒྱིངས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། དགེ་སློང་མ་སེང་གེ་རྣམ་པར་བསྒྱིངས་པའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་བཅོམ་པ་མ་ལྷའི་བཤེས་གཉེན་མ་ཞེས་བྱ་བས་ཆགས་པ་དང་བྲལ་བ་མཐར་ཕྱིན་པ་ཞེས་བྱ་བ་སོགས་ཀྱི་ཏིང་ངེ་འཛིན་ཁྱད་པར་ཅན་བརྙེས་པས་ཆགས་པ་དང་བྲལ་ཏེ་ལམ་ལ་བཀོད་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་ཤེས་རབ་ཀྱི་སྣང་བ་ཆེན་པོ་དེས་སེམས་སྣང་བར་གྱུར་པ་དེ་ཐམས་ཅད་མཁྱེན༌པའི་ཡེ་ཤེས་སྣང་བ་དེ་ལ་ནི་སེམས། ཆོས་ཉིད་ཀྱི་རང་བཞིན་གྱི་སྟོབས་སྣང་བ་དེ་ལ་ནི་ཡང་དག་པར་རྗེས་སུ་ལྟ། སེམས་ཅན་ཐམས་ཅད་ཀྱི་སྐད་རྣམ་པར་དམིགས་པའི་མཛོད་ཀྱི་གཟུངས་ཀྱི་ཚུལ་དེ་ནི་བརྟན་པར་བྱེད། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ཡང་དག་པར་འཛིན་པའི་གཟུངས་ཀྱི་ཚུལ་དེ་ནི་ཤིན་ཏུ་རྒྱ༌ཆེ་བར་བྱེད། སྙིང་རྗེ་ཆེན་པོ་འགྲོ་བ་ཐམས་ཅད་ཀྱི་སྐྱབས་སུ་གྱུར་པའི་སྟོབས་དེ་ནི་ཉེ་བར་སྟོན། ཆོས་ཐམས་ཅད་ཀྱི་ཚུལ་སྣང་བའི་སྒོ་ནས་ཡང་དག་པར་འབྱུང་བའི་ཐམས་ཅད་མཁྱེན་པ་ཉིད་ཀྱི་ཤུགས་དེ་ལ་ནི་རབ་ཏུ་རྟོག །ཆོས་ཀྱི་དབྱིངས་རྒྱ་ཆེན་པོའི་དཀྱིལ་འཁོར་རྒྱས་པར་འགེངས་པའི་སྨོན་ལམ་ཡོངས་སུ་དག་པ་དེའི་རྗེས་སུ་ནི་འབྲང་། ཆོས་ཐམས་ཅད་ཀྱི་ཕྱོགས་སྣང་བར་བྱེད་པའི་ཡེ་ཤེས་ཀྱི་འོད་དེ་ནི་ཤིན་ཏུ་གསལ་བར་བྱེད། ཆོས་ཐམས་ཅད་ཀྱིས་ཕྱོགས་བཅུའི་འཇིག་རྟེན་གྱི་ཁམས་རྣམ་པར་ཕྱེ་བ་རྒྱས་པར་འགེངས་པའི་མངོན་པར་ཤེས་པའི་སྟོབས་དེ་ནི་མངོན་པར་སྒྲུབ། བྱང་ཆུབ་སེམས་དཔའི་ལམ་དང་། དྲན་པ་ཐམས་ཅད་ཉེ་བར་བླངས་པས་བརྩམས་པ་མཐར་དབྱུང་བའི་སྨོན་ལམ་དེ་ནི་ཡོངས་སུ་རྫོགས་པར་བྱེད་ཅིང་། མཐར་གྱིས་ཡུལ་བགྲོད་དཀའ་བའི་གྲོང་ཁྱེར་རིན་པོ་ཆེའི་རྒྱན་གང་ན་བ་དེར་ཕྱིན་ཏེ། བཅོམ་པ་མ་ལྷའི་བཤེས་གཉེན་མ་ཡོངས་སུ་ཚོལ་ཚོལ་བ་དང་། དེ་ལ་བཅོམ་པ་མ་ལྷའི་བཤེས་གཉེན་གྱི་ཡོན་ཏན་མངོན་པར་མི་ཤེས་ལ་ཡེ་ཤེས་ཀྱི་སྤྱོད་ཡུལ་གྱི་ཚུལ་ལ་མི་མཁས་པའི་མི་ཇི་སྙེད་པ་དེ་དག་འདི་སྙམ་དུ་སེམས་ཏེ། མི་འདི་དེ་ལྟར་ཞི་ཞིང་དུལ་བའི་དབང་པོ་དང་ལྡན་ལ་དེ་ལྟར་ཤེས་བཞིན་དང་ལྡན་ཏེ། དེ་ལྟར་འཁྲུལ་པ་མེད་ཅིང་དེ་ལྟར་ཡིད་འཁྲུགས་པ་མེད་ལ་དེ་ལྟར་གཉའ་ཤིང་གང་ཙམ་དུ་ལྟ་སྟེ། དེ་ལྟར་གནོད་པས་མི་ཚུགས་ཤིང་དེ་ལྟར་མཚན་མར་མི་འཛིན་ལ། གཟུགས་ཀྱི་རྣམ་པ་ཐམས་ཅད་ལ་གཡེང་བ་མེད་པའི་མིག་དང་ལྡན་ཏེ། ཡིད་ལ་བྲེལ་བ་མེད་ཅིང་། བསམ་པ་ཟབ་ལ་མངོན་པར་མཛེས་ཏེ། རྒྱ་མཚོ་ལྟར་འདུག་ཅིང་སེམས་མི༌ཉམས་མི་འཁྲུགས་པ་དེ་ལ་བཅོམ་པ་མ་ལྷའི་བཤེས་གཉེན་མས་ཀོ་ཅི་ཞིག་བྱ། འདི་ལྟ་བུ་དག་ནི་འདོད་ཆགས་ལ་དགའ་བ་མེད་དེ། སེམས་ཕྱིན་ཅི་ལོག་དང་ལྡན་ཡང་མི་སྲིད་དོ། །འདི་ལྟ་བུ་དག་ནི་སྡུག་ཅིང་གཙང་བའི་འདུ་ཤེས་ཡོངས་སུ་རྒྱུ་བ་མེད་དེ། འདི་ལྟ་བུ་དག་ནི་འདོད་པས་འཁོལ་ཀྱང་མི་སྲིད་དོ། །འདི་ལྟ་བུ་དག་ནི་བུད་མེད་ཀྱི་དབང་དུ་འགྱུར་བ་མེད་དེ། འདི་ལྟ་བུ་དག་ནི་བདུད་ཀྱི་སྤྱོད་ཡུལ་ལ་སྤྱོད་ཀྱང་མི་སྲིད་དོ། །འདི་ལྟ་བུ་དག་ནི་བདུད་ཀྱི་སྤྱོད་ཡུལ་ལ་ཆགས་པ་མེད་དེ། འདི་ལྟ་བུ་དག་ནི་འདོད་པའི་འདམ་དུ་བྱིང་བ་ཡང་མི་སྲིད་དོ། །འདི་ལྟ་བུ་དག་ནི་བདུད་ཀྱི་ཞགས་པས་བཅིངས་པར་འགྱུར་བ་མེད༌དེ། མི་དགོས་པ་བྱེད་ཀྱང་མི་སྲིད་དོ་སྙམ་མོ། །གང་ཡང་བཅོམ་པ་མ་ལྷའི་བཤེས་གཉེན་མའི་ཡོན་ཏན་གྱི་ཁྱད་པར་མངོན་པར་ཤེས་ཤིང་། ཡེ་ཤེས་ཀྱི་སྤྱོད་ཡུལ་མངོན་དུ་གྱུར་པ་དེ་དག་ནི་འདི་སྐད་ཅེས་འཛེར་ཏེ། རིགས་ཀྱི་བུ་དེ་ལྟར་ཁྱོད་བཅོམ་པ་མ་ལྷའི་བཤེས་གཉེན་མ་ལ་ཡོངས་སུ་དྲི་བར་སེམས་པ་ནི་ཁྱོད་ཀྱང་ཐོབ་པར་བྱ་བ་ལེགས་པར་ཐོབ་པ་སྟེ། ལེགས་སོ་ལེགས་སོ། །ཁྱོད་ནི་ངེས་པར་སངས་རྒྱས་སུ་སྨོན་པའོ། །ཁྱོད་ནི་བདག་ངེས་པར་སེམས་ཅན་ཐམས་ཅད་ཀྱི་གནས་སུ་བསྒྱུར་བར་འདོད་པའོ། །ཁྱོད་ནི་ངེས་པར་སེམས་ཅན་ཐམས་ཅད་ཀྱི་འདོད་ཆགས་ཀྱི་ཟུག་རྔུ་དབྱུང་བར་འདོད་པའོ། །ཁྱོད་ནི་ངེས་པར་སྡུག་ཅིང་གཙང་བའི་འདུ་ཤེས་རྣམ་པར་གཏོར་བར་འདོད་པའོ། །རིགས་ཀྱི་བུ༌འདེ་རེ་བཅོམ་པ་མ་ལྷའི་བཤེས་གཉེན་མ་ནི་གྲོང་ཁྱེར་གྱི༌ལམ་གྱི་སུམ་མདོའི་བྱང་ཕྱོགས་ལོགས་ཤིག་ན་རང་གི་ཁྱིམ་ན་འདུག་གོ །

དེ་ནས་ཚོང་དཔོན་གྱི་བུ་ནོར་བཟང་གིས་ཚིག་དེ་ཐོས་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། བཅོམ་པ་མ་ལྷའི་བཤེས་གཉེན་མའི་ཁྱིམ་གང་ན་བ་དེར་ཕྱིན་ནས། དེའི་ཁྱིམ་ཆེ་ཞིང་ཡངས་ལ་རིན་པོ་ཆེའི་ར་བ་རིམ་པ་བཅུས་བསྐོར་བ། རིན་པོ་ཆེ་ཏ་ལའི་ཕྲེང་བ་རིམ་པ་བཅུས་ཀུན་ནས་བསྐོར་བ། འོབས་སྤོས་ཆུས་གང་བ། ལྷ་རྫས་ཀྱི་རིན་པོ་ཆེའི་པད་མོ་དང་། ཨུཏ་པ་ལ་དང་། ཀུ་མུ་ཏ་དང་། མེ་ཏོག་པུན་ད་རི་ཀས་ཆུ་ཡོངས་སུ་ཁེབས་པ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ། གཞི་གསེར་གྱི་བྱེ་མ་བདལ་བ། སྤོས་ཡིད་དུ་འོང་བ་དང་། འདྲེས་པའི་ཆུ་དྲི་ཞིམ་པས་གང་བ། རིན་པོ་ཆེ་སིལ་མ་མང་པོས་ཤིན་ཏུ་བརྒྱན་པ། རིམ་པ་བཅུས་ཀུན་ནས་བསྐོར་བ། རིན་པོ་ཆེ་ཐམས་ཅད་ལས༌བྱས་པའི་ཁང་པ་དང་། གཞལ་མེད་ཁང་དང་། ཁང་པ་བརྩེགས་པས་རྣམ་པར་དགྲིགས་ཤིང་བ་གམ་དང་རྟ་བབས་དང་། སྐར་ཁུང་གི་ཤར་བུ་དང་། ཟླ་གམ་སེང་གེའི་ཤིང་ཏགས་དང་། སྣང་བའི་རྒྱལ་མཚན་ལ་སོགས་པ། རིན་པོ་ཆེ་སྣ་ཚོགས་ཀྱི་འོད་ཀྱིས་འབར་བ་རིན་པོ་ཆེ་རྣམ་པ་སྣ་ཚོགས་གྲངས་མེད་པའི་འབྱུང་གནས་ཀྱིས་བརྒྱན་པ། རིན་པོ༌ཆེའི་དག་ར་བཻཌཱུརྱས་སྤྲས་པའི་གཞི་དང་ལྡན་པ། ལྷ་རྫས་ཀྱི་སྤོས་ཞིམ་པོ་ཐམས་ཅད་ཀྱིས་འཁོར་ཐམས་ཅད་ནས་བདུགས་ཤིང་བསངས་པ། ཨ་ཀ་རུ་ནག་པོ་མཆོག་གི་བདུག་སྤོས་ཀྱིས་དྲི་ཞིམ་པར་བདུག་པ། སྤོས་ཀྱི་བྱུག་པས་འཁོར་ཀུན་ནས་བྱུག་པ། རིན་པོ་ཆེ་སྣ་ཚོགས་ཀྱི་ལན་ཀན་གྱིས་རྩིག་ངོས་ཀུན་ཏུ་བྲེས་པ། སྟེང་འཛམ་བུ་ཆུ་ཀླུང་གི་གསེར་གྱི་དྲ་བ་རིན་པོ་ཆེ་སྣ་ཚོགས་ཀྱིས་རབ་ཏུ༌སྤྲས་པས་ཀུན་ནས་བཀབ་པ། གསེར་གྱི་དྲིལ་གྱི་དྲ་བ་བརྒྱ་སྟོང་རླུང་གིས་བསྐྱོད་ཅིང་འཁྲོལ་བའི་སྒྲ༌ཡིད་དུ་འོང་ཞིང་སྙན་པ་འབྱུང་བ། རིན་པོ་ཆེ་ཐམས་ཅད་ཀྱི་མེ་ཏོག་གི་སྤྲིན་སིལ་མ་ཀུན་ཏུ་བཀྲམ་པས། རིན་པོ་ཆེའི་མེ་ཏོག་གི་རྒྱན་དང་ལྡན་པ། རིན་པོ་ཆེ་སྣ་ཚོགས་ཐམས་ཅད་ཀྱི་རྒྱལ་མཚན་བསྒྲེང་བས་སྒོ་ཤིན་ཏུ་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དྲ་བ་སྣང་བ། མུ་མེད་པར་བརྗོད་དུ་ཡོད་པ། རིན་པོ་ཆེ༌བྱུ་རུའི་སྡོང་པོ་དང་། རྡོ་རྗེ་དང་། མན་ཤེལ་ལ་སོགས་པའི་གཏེར་བརྒྱ་སྟོང་ཀུན་གྱིས་ཤེས་པ། ཕུན་སུམ་ཚོགས་པས་མཛོད་མི་ཟད་པ་དང་ལྡན་པ། བཟའ་ཤིང་གི་ར་བ་ཆེན་པོ་བཅུས་བརྒྱན་པ་མཐོང་སྟེ། དེ་ན་བཅོམ་པ་མ་ལྷའི་བཤེས་གཉེན་མ་གཟུགས་མཛེས་ཤིང་བཟང་ལ་ལྟ་ན་སྡུག་པ། གྱ་ནོམ་པའི་ཁ་དོག་དམ་པ་རྒྱས་པ་དང་ལྡན་པ། གསེར་གྱི་ཁ་དོག་ལྟར་འདུག་པའི་མདོག་ཅན་སྐྲ་མཐོན་མཐིང་དུ་འདུག་པ། ལུས་ཀྱི་ཡན་ལག་དང་ཉིང་ལག་ཚུལ་དང་འདྲ་བར་རྣམ་པར་གྲུབ་པ། འདོད་པའི་ཁམས་ཀྱི་ལྷ་དང་མི་ཐམས་ཅད་ལས་འཕགས་པའི་ཁ་དོག་དང་གཟུགས་དང་དབྱིབས་མཛེས་པ་དང་ལྡན་པ། ཚངས་པ་ལས་ཀྱང་འདས་པའི་དབྱངས་ཀྱི་ཡན་ལག་དང་ལྡན་པ། སེམས་ཅན་ཐམས་ཅད་ཀྱི་སྒྲ་སྐད་ཀྱི་ཚུལ་ལ་མཁས་པ། རྒྱན་ཐམས་ཅད་དང་ལྡན་ཞིང་ཡིད་དུ་འོང་བའི་དབྱངས་ཅན་རྣམ་པར་ཐར་པ་ཡི༌གེའི་འཁོར་ལོའི་རྒྱན་ལ་མཁས་པ་དང་ལྡན་པ། བཟོ་དང་གཙུག་ལག་ཐམས་ཅད་ལ་མཁས་པར་བྱུང་བ། ཆོས་ཀྱི་ཡེ་ཤེས་སྒྱུ་མ་ལ་མཁས་པར་བསླབས་པ། བྱང་ཆུབ་སེམས་དཔའི་ཐབས་དང་ཚུལ་རྣམ་པ་ཐམས་ཅད་དུ་ཐོབ་པ། རིན་པོ་ཆེའི་ལྷབ་ལྷུབ་སྣ་ཚོགས་ཀྱིས་རྣམ་པར་བརྒྱན་པའི་ལུས་ཡིད་དུ་འོང་བ་དང་ལྡན་པ། རིན་པོ་ཆེ་ཐམས་ཅད་ལས་བྱས་པའི་དྲ་བ་འོད་ཤིན་ཏུ་གསལ་བས་ལུས་རབ་ཏུ་བརྒྱན་པ། ལྷ་རྫས་ཀྱི་ནོར་བུ་རིན་པོ་ཆེའི་རྒྱན་དང་། ལྷབ་ལྷུབ་གྲངས་མེད་པས་རབ་ཏུ་བརྒྱན་པས། ལུས་ཤིན་ཏུ་འབར་བ། ནོར་བུ་རིན་པོ་ཆེ་དམ་པ་ཡིད་བཞིན་གྱི་རྒྱལ༌པོའི་ཅོད་པན་ཐོགས་པ། རིན་པོ་ཆེ༌བཻཌཱུརྱའི་ཕྲེང་བ་མདོ་ཟུངས་རྡོ་རྗེ་རིན་པོ་ཆེ་སྣ་ཚོགས་དང་། ནོར་བུ་རིན་པོ་ཆེ་སེང་གེ་མཛེས་པ་སྣ་ཚོགས་བཀྱེ་བ་མགུལ་ན་ཐོགས་པ། དགེ་བའི་རྩ་བ་སྤྱད་པ་ལ་སྐལ་བ་མཐུན་པ་དང་། སྨོན་ལམ་གཅིག་པའི་འཁོར་མང་པོ་གཞན་གྱིས་མི་ཕྱེད་ཅིང་ཡིད་དུ་འོང་བ་དང་ལྡན་པ། བསོད་ནམས་དང་ཡེ་ཤེས་ཀྱི་ཚོགས་ཆེན་པོའི་གཏེར་མི་ཟད་པའི་མཛོད་དང་ལྡན་པ་འདུག་པ་མཐོང་སྟེ། དེས་ཁྱིམ་དེ་དག་ཐམས་ཅད་དང་། རིན་པོ་ཆེའི་གནས་དང་། གཞལ་མེད་ཁང་གི་རྒྱན་དེ་དག་ཐམས་ཅད་ཀྱང་རང་གི་ལུས་ལས་བྱུང་བའི་འོད་དགའ་བར་བྱེད་པ། ལུས་བདེ༌བ་དང་སིམ་པ་སྐྱེད་པ། སེམས་ཁོང་ནས་དགའ་བར་བྱེད་པས་གསལ་ཞིང་སྣང་བར་བྱས་པ་མཐོང་ངོ་། །

དེ་ནས་ཚོང་དཔོན་གྱི་བུ་ནོར་བཟང་གིས་བཅོམ་པ་མ་ལྷའི་བཤེས་གཉེན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། ཇི་ལྟར༌བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་མས་བདག་ལ་བསྟན་དུ་གསོལ།

དེས་སྨྲས་པ་རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་འདོད་ཆགས་དང་བྲལ་བའི་མཐར་ཕྱིན་པ་ཞེས་བྱ་བ་ཐོབ་སྟེ། རིགས་ཀྱི་བུ་དེ་ལྟར་ཁོ་མོ་ནི་ལྷ་རྣམས་ལ་ལྷ་མོའི་གཟུགས་དང་ཁ་དོག་དང་། དབྱིབས་དང་ཆུ་ཞེང་ལས་ཀྱང་ལྷག་པར་ཁ་དོག་གསལ་བ་དང་། རྣམ་པར་དག༌པས་ཅི་ལ་མོས་པ་བཞིན་དུ་སྣང་བར་བྱེད་དོ། །དེ་བཞིན་དུ་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ལ་ཡང་བུད་མེད་ཀྱི་གཟུགས་དང་། ཁ་དོག་དང་དབྱིབས་དང་། ཆུ་ཞེང་ལྷག་པར་འོད་གསལ་ཞིང་རྣམ་པར་དག་པས་ཅི་ལ་མོས་པ་བཞིན་དུ་སྣང་བར་བྱེད་དོ། །སེམས་ཅན་གང་འདོད་ཆགས་ཀྱིས་ཀུན་ནས་འཁོར་བའི་སེམས་དང་ལྡན་པ་དག །ཁོ་མོའི་དྲུང་དུ་འོང་ནའང་དེ་དག་ཐམས་ཅད་ལ་ཁོ་མོ་ནི་འདོད་ཆགས་དང་འབྲལ་བར་འགྱུར་བའི་ཕྱིར་ཆོས་སྟོན་ཏེ། དེ་དག་གིས་ཆོས་དེ་ཐོས་ནས་ཀྱང་འདོད་ཆགས་དང་བྲལ་བ་ཐོབ་པར་འགྱུར་རོ། །

བྱང་ཆུབ་སེམས་དཔའི་ཏིང་ངེ་འཛིན་ཆགས་པ་མེད་པ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་ཁོ་མོ་མཐོང་མ་ཐག་ཏུ་འདོད་ཆགས་དང་བྲལ་བར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་དགའ་བ་དང་ལྡན་པ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་གཏམ་བྱས་པ་ཙམ་གྱིས་འདོད་ཆགས་དང་བྲལ་བ་ཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་ཆགས་པ་མེད་པའི་དབྱངས་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་ལག་ནས་བཟུང་བ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་དུ་རྗེས་སུ་འགྲོ་ཞིང་གནས་པ་ཞེས་བྱ་བའང་རབ་ཏུ་འཐོབ་བོ། །ལ་ལ་ནི་གཅིག་ཏུ་འགྲོགས་པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་བྲལ་བས་སྣང་བ་ཞེས་བྱ་བ་ཡང་རབ་ཏུ་འཐོབ་བོ། །

ལ་ལ་ནི་བལྟས་པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་རབ་ཏུ་ཞི་བའི་རྣམ༌པར་བརྒྱན་ཅེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་གླལ་བ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་ཕས་ཀྱི་རྒོལ་བ་རྣམ་པར༌འཐོར་བ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་མིག་བཙུམས་པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཡུལ་སྣང་བ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི༌པང་དུ་འཁྱུད་པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད༌ཡོངས་སུ་སྡུར་ཅིང་མི་གཏོང་བའི་སྙིང་པོ་ཞེས་བྱ་བ་ཡང་རབ་ཏུ་འཐོབ་བོ། །ལ་ལ་ནི་འོ་བྱས་པ་ཙམ་གྱིས་འདོད་ཆགས་དང་བྲལ་བ་འཐོབ་པར་འགྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་འགྲོ་བ་ཐམས་ཅད་བསོད་ནམས་ཀྱི་མཛོད་ལ་རེག་པར་བྱེད་པ་ཞེས་བྱ་བ་ཡང་རབ་ཏུ་འཐོབ་བོ། །

དེ་ལྟར་ཁོ་མོ་ནི་སེམས་ཅན་གང་ཇི་སྙེད་ཅིག་ཁོ་མོའི་དྲུང་དུ་འོང་བ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་རྣམ་པར་ཐར་པ་འདོད་ཆགས་དང་བྲལ་བའི་མཐར་ཕྱིན་པ་ཐམས་ཅད་མཁྱེན་པའི་ས་ཆགས་པ་མེད་པ་ལ་མངོན་དུ་གྱུར་པ་འདི་ཉིད་ལ་རབ་ཏུ་འགོད་དོ། །

སྨྲས་པ། འཕགས་མ་ཁྱོད་དེ་ལྟ་བུའི་ཕུན་སུམ་ཚོགས་པ་དང་ལྡན་པ་དེ་ཁྱོད་ཀྱིས་དགེ་བའི་རྩ་བ་ནི་གང་དུ༌བསྐྱེད། འཕྲིན་ལས་ནི་ཇི་ལྟ་བུ་ཞིག་བསགས། སྨྲས་པ། རིགས་ཀྱི་བུ་ཁོ་མོས་དྲན་ན་འདས་པའི་དུས་ཤིག་ན།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ཤིན་ཏུ་མཐོ་བར་གཤེགས་པ་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་ཤིན་ཏུ་མཐོ་བར་གཤེགས་པ་དེ་སེམས་ཅན་རྣམས་ལ་ཐུགས་བརྩེ་བའི་སྐུ་དོན་ཏུ་རྒྱལ་པོའི་གནས་སྒོ་བཟང་པོ་ཞེས་བྱ་བར་གཤེགས་ནས་སྒོའི་ཐེམ་པ་ལ་ཞབས་ཀྱིས་གནོན་པའི་ཚེ། གྲོང་ཁྱེར་དེ་ཐམས་ཅད་ཀྱང་། རབ་ཏུ་གཡོས་ནས་ཡངས་ཤིང་རྒྱ་ཆེ་ལ་རིན་པོ་ཆེ་དུ་མ་ལས་བྱས་པར་ཡོངས་སུ༌གྲུབ་པར་གྱུར་ཏེ། སྟེང་གི་བར་སྣང་ཡང་རིན་པོ་ཆེ་མང་པོའི་འོད་ཀྱིས་རྣམ་པར་བརྒྱན་པ་དང་། རིན་པོ་ཆེའི་མེ་ཏོག་སྣ་ཚོགས་ཀྱིས་ཡོངས་སུ་གང་བ་དང། ལྷ་རྫས་ཀྱི་རོལ་མོ་སྣ་ཚོགས་ཀྱི་སྒྲ་རབ་ཏུ་འབྱུང་བ་དང་། ལྷའི་ལུས་ཀྱི་སྤྲིན་ཚད་མེད་པ་རྒྱ་ཆེ་བས་ཁེབས་པར་གྱུར་ཏོ། །རིགས་ཀྱི་བུ་ཁོ་མོ་ཡང་དེའི་ཚེ་ཚོང་དཔོན་གྱི་ཆུང་མ་ཞིག་ཏུ་གྱུར་ཏེ། བློ་གྲོས་བཟང་མོ་ཞེས་བྱའོ། །

དེ་ནས་ཁོ་མོ་ཆོ་འཕྲུལ་གྱིས་ཡང་དག་པར་བསྐུལ་ནས་ཁྱིམ་ཐབ་དང་ལྷན་ཅིག་ཏུ་དོང་དོང་སྟེ། དེ་བཞིན་གཤེགས་པ་གྲོང་བར་གྱི་སྲང་དུ་གཤེགས་པ་ལ་དད་པ་རྒྱ་ཆེན་པོ་སྐྱེས་ཏེ། ཁོ་མོས་ནི་རིན་པོ་ཆེའི་དྲིལ་བུ་གཅིག་ཅིག་ཕུལ་ལོ། །དེའི་ཚེ་འཇམ་དཔལ་གཞོན་ནུར་གྱུར་པ་ཡང་བཅོམ་ལྡན་འདས་དེ་བཞིན་གཤེགས་པ་ཤིན་ཏུ་མཐོ་བར་གཤེགས་པའི་ཞམ་འབྲང་ན་འདུག་ཏེ། དེས་ཁོ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འདོད་ཆགས་དང་བྲལ་བའི་མཐར་ཕྱིན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའི་ཐབས་དང་ཡེ་ཤེས་མཐའ་ཡས་པ་ལ་གནས་པ། བསོད་ནམས་རྒྱ་ཆེ་ཞིང་ཡངས་པའི་མཛོད་དང་ལྡན་པ། ཡེ་ཤེས་ཀྱི་ཡུལ་ལ་ཐུབ་པ་མེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་གྲོང་ཁྱེར་དགེ་བའི་ཕ་རོལ་ཏུ་ཕྱིན་པ་ཞེས་བྱ་བ་ཡོད་དེ། དེ་ན་ཁྱིམ་བདག་ནན་ཁུགས་ཤེས་བྱ་བ་དེ་བཞིན་གཤེགས་པའི་མཆོད་རྟེན་ཙན་དན་གྱི་ཁྲི་འཕང་ཅན་ལ་མཆོད་པ་བྱེད་པ་ཞིག་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་བཅོམ་པ་མ་ལྷའི་བཤེས་གཉེན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བཅོམ་པ་མ་ལྷའི་བཤེས་གཉེན་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། བཅོམ་པ་མ་ལྷའི་བཤེས་གཉེན་མའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་སའི་ལྷ་མོ་བརྟན་མ་ཞེས་བྱ་བས་རྫུ་འཕྲུལ་དུ་མ་བསྟན་ཅིང་སའི་གཏེར་ཁ་དུ་མ་མངོན་དུ་སྣང་བར་མཛད་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་ཡུལ་མ་ག་དྷའི་སྙིང་པོ་བྱང་ཆུབ་ཏུ་སའི་ལྷ་མོ་བརྟན་མ་གང་ན་བ་དེར་སོང་བ་དང་དེ་འགྲོ་བའི་ཚེ་སའི་ལྷ་མོ་བརྒྱ་སྟོང་ཕྲག་བཅུ་གཅིག་ལ་གཅིག་འདི་སྐད་ཅེས་འཛེར་ཏོ། །སེམས་ཅན་ཐམས་ཅད་ཀྱི་རྟེན་དུ་འགྱུར་བ་ཞིག་ནི་འདི་ནས་ཚུར་འོང་ངོ་། །

དེ་བཞིན་གཤེགས་པའི་སྙིང་པོ་ཅན༌སེམས་ཅན་ཐམས་ཅད་ཀྱི་མ་རིག་པའི་སྒོ་ངའི་སྦུབས་འདྲལ་བར་འགྱུར་བ་ཞིག་ནི་འདི་ནས་ཚུར་འོང་ངོ་། །ཆོས་ཀྱི་རྒྱལ་པོའི་རིགས་སུ་བྱུང་བ་ཆགས་པ་མེད་ཅིང་དྲི་མ་མེད་པའི་ཆོས་ཀྱི་རྒྱལ་པོའི་གོ་འཕང་དམ་པ་འཐོབ་པར་འགྱུར་བ་ཞིག་ནི་འདི་ནས་ཚུར་འོང་ངོ་། །ཡེ་ཤེས་ཀྱི་མཐུ་བོ་ཆེ་རྡོ་རྗེའི་མཚོན་ཆ་ཅན་དཔའ་བོ་ཕས་ཀྱི་རྒོལ་བའི་འཁོར་ཐམས་ཅད་རབ་ཏུ་འདུལ་བ་ཞིག་ནི་འདི་ནས་ཚུར་འོང་ངོ་ཞེས་ནས། དེའི་མོད་ལ་ལྷ་མོ་བརྟན་མ་ལ་སོགས་པ། སའི་ལྷ་མོ་བརྒྱ་སྟོང་ཕྲག་བཅུས་ས་ཆེན་པོ་རབ་ཏུ་བསྐྱོད་དེ། འབྲུག་སྒྲ་ཟབ་མོ་ལྟ་བུའི་སྒྲ་ཆེན་པོ་གྲག་པར་བྱས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འོད་ཆེན་པོས་སྣང་བར་བྱས་ཏེ། ལུས་རིན་པོ་ཆེའི་རྒྱན་དང་། ལྷབ་ལྷུབ་ཐམས་ཅད་ཀྱིས་ཤིན་ཏུ་བརྒྱན་ནས། གློག་གི་ཕྲེང་བའི་ཚོགས་ནམ་མཁའི་དབྱིངས་ལས་འགྱུ་ཞིང་སྣང་བ་ལྟ་བུ་ཤ་སྟག་དུ་བྱས་ཏེ། ཤིང་ཐམས་ཅད་ཀྱི་མྱུ་གུ་ནི་སྐྱེ་བར་བྱེད། མེ་ཏོག་གི་ཤིང་ཐམས་ཅད་ནི་ཁ་འབུ་བར་བྱེད། ཆུ་ཀླུང་གི་རྒྱུན་ཐམས་ཅད་ནི་འབབ་པར་བྱེད། མཚོ་དང་མཚེའུ་དང༌ལུ་མ་ཐམས་ཅད་ནི་རྒྱས་པར་བྱེད། སྤོས་ཆུའི་ཆར་པ་ནི་རབ་ཏུ་འབབ་པར་བྱེད། མེ་ཏོག་གི་སྤྲིན་རབ་ཏུ་འཐོར་བའི་རླུང་ཆེན་པོ་ནི་ལྡང་བར་བྱེད། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་རབ་ཏུ་སྒྲ་སྒྲོག་པར་བྱེད། ལྷ་རྫས་ཀྱི་གཞལ་མེད་ཁང་དང་རྒྱན་གྱི་ཚོགས་མང་པོ་ནི་རབ་ཏུ་འཁྲོལ་བར་བྱེད། བ་ལང་དང་། ཁྱུ་མཆོག་དང་། གླང་པོ་དང་། སྟག་དང་། རི་དྭགས་ཀྱི་དབང་པོ་ནི་རབ་ཏུ་སྒྲ་འབྱིན་པར་བྱེད། ལྷ་དང་། ལྷ་མ་ཡིན་དང་། ཀླུ་དང་འབྱུང་པོའི་དབང་པོ་རྣམས་ནི་འབྲུག་སྒྲ་འབྱིན་པར་བྱེད། རིའི་དབང་པོ་ཆེན་པོ་རྣམས་ནི་ཕན་ཚུན་ཐུག་པར་བྱེད། གཏེར་གྱི་ཚོགས་བྱེ་བ་བརྒྱ་སྟོང་ནི་མངོན་དུ་བྱུང་བར་བྱེད་ཅིང་སའི་འོག་ནས་འཐོན་ཏོ། །

དེ་ནས་སའི་ལྷ་མོ་བརྟན་མས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འདིར་འོངས་པ་ལེགས་སོ། །སའི་ཕྱོགས་འདི་ནི་སྔོན་ཁྱོད་ཀྱི་གནས་སུ་གྱུར་ཏེ། ཁོ་མོའི་མངོན་སུམ་དུ་དགེ་བའི་རྩ་བ་བསྐྱེད་པ་ཡིན་ན། དེའི་རྣམ་པར་སྨིན་པའི་ཕྱོགས་འགའ་ཙམ་བལྟ་བར་འདོད་དམ། དེ་ནས་ཚོང་དཔོན་གྱི་བུ་ནོར་བཟང་གིས་སའི་ལྷ་མོ༌བརྟན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། སའི་ལྷ་མོ་བརྟན་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། སའི་ལྷ་མོ་བརྟན་མའི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་འཚལ་ལོ། །དེ་ནས་སའི་ལྷ་མོ་བརྟན་མས་རྐང་པའི་མཐིལ་གྱིས་ས་ཆེན་པོ་ལ་བརྡབས་ཏེ། རིན་པོ་ཆེའི་གཏེར་བྱེ་བ་བརྒྱ་སྟོང་གྲངས་མེད་པ་རབ་ཏུ་བརྒྱན་པ་བསྟན་ནས་འདི་སྐད་ཅེས་སྨྲས་སོ། །རིགས་ཀྱི་བུ་རིན་པོ་ཆེའི་གཏེར་བྱེ་བ་ཁྲག་ཁྲིག་བརྒྱ་སྟོང་འདི་དག་ཀྱང་ཁྱོད་ཀྱི་རྗེས་སུ་འབྲང་བའོ། །ཁྱོད་ཀྱི་སྔོན་དུ་འགྲོ་བའོ། །ཁྱོད་ཀྱིས་ཅི༌དགར་སྤྱད་པའོ། །ཁྱོད་ཀྱི་བསོད་ནམས་ཀྱི་རྣམ་པར་སྨིན་པ་ལས་བྱུང་བའོ། །ཁྱོད་ཀྱི་བསོད་ནམས་ཀྱི་སྟོབས་ཀྱིས༌བསྲུངས་པའོ། །འདི་ལས་ལོང་སྟེ། ཁྱོད་ཀྱིས་ཅི་དགོས་པ་དེ་དག་གྱིས་ཤིག །རིགས་ཀྱི་བུ་གཞན་ཡང་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་ཐུབ་པར་དཀའ་བའི་སྙིང་པོ་ཅན་ཐོབ་པ་སྟེ།

དེ་ལྟར་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་འདི་དང་ལྡན་པས། དེ་བཞིན་གཤེགས་པ་མར་མེ་མཛད་ཚུན་ཆད་དུ་བྱང་ཆུབ་སེམས་དཔའི་རྗེས་སུ་འབྲང་ཞིང་། རྟག་ཏུ་བསྲུང་བ་ལ་ཞུགས་པ་སྟེ། དེ་ཚུན་ཆད་དུ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་སེམས་ཀྱི་སྤྱོད་པ་ལ་རྣམ་པར་སྤྱོད་དོ། །ཡེ་ཤེས་ཀྱི་ཡུལ་ལ་འཇུག་གོ །སྨོན་ལམ་གྱི་དཀྱིལ་འཁོར་ཁོང་དུ་ཆུད་པར་བྱེད་དོ། །བྱང་ཆུབ་སེམས་དཔའི་སྤྱོད་པ་རྣམ་པར་དག་པ་རྗེས་སུ་རྟོགས་པར་བྱེད་དོ། །ཏིང་ངེ་འཛིན་ཐམས་ཅད་ཀྱི་ཚུལ་གྱི་རྗེས་སུ༌འབྲང་ངོ་། །བྱང་ཆུབ་སེམས་དཔའི་མངོན་པར་ཤེས་པ་ཐམས་ཅད་དང་། སེམས་རྒྱ་ཆེན་པོས་རྒྱས་པར་འགེངས་སོ། །བྱང་ཆུབ་སེམས་དཔའ་ཐམས་ཅད་ཀྱི་སྟོབས་ཀྱིས་དབང་བསྒྱུར་བ་དང་། ཞིང་གི༌དྲ་བ་ཐམས་ཅད་རྒྱས་པར་དགང་བ་དང་། དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པ་ཡང་དག་པར་མནོད་པ་དང་། དུས་ཐམས་ཅད་དུ་མངོན་པར་འཚང་རྒྱ་བ་ཡང་དག་པར་བསྟན་པ་དང་། ཆོས་ཀྱི་འཁོར་ལོ་བསྐོར་བའི་ཚུལ་ཐམས་ཅད་དང་། མདོ་སྡེ་ཡང་དག་པར་བརྗོད་པའི་ཆོས་ཀྱི་སྤྲིན་གྱི་ཚུལ་ཐམས་ཅད་དང་། ཆོས་སྣང་བ་ཆེན་པོས་སྣང་བར་བྱ་བའི་ཚུལ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཚུལ་དང་། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཡང་དག་པར་བསྟན་པའི་ཚུལ་ཡང་རྗེས་སུ་རྟོགས་པར་བྱེད་དོ། །ཡང་དག་པར་འཛིན་ཏོ། །ཡང་དག་པར་ནོད་དོ། །རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་ཐུབ་པར་དཀའ་བའི་སྙིང་པོ་ཅན་འདི་ཡང་བསྐལ་པ༌རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེའི་ཡང་ཕ་རོལ་ཅིག་ཏུ་འཇིག་རྟེན་གྱི་ཁམས་ཟླ་བའི་རྒྱལ་མཚན་ཞེས་བྱ་བར་བསྐལ་པ་སྣང་བས་རྣམ་པར་བརྒྱན་པ་ལ་དེ་བཞིན་གཤེགས་པ་སྤྱན་བཟང་པོ་ལས་ཐོབ་སྟེ། རིགས་ཀྱི་བུ་དེ་ལྟར་ཁོ་མོ་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་ཐུབ་པར་དཀའ་བའི་སྙིང་པོ་ཅན་འདི་ལ་ཡོངས་སུ་དཔྱོད་དཔྱོད། རྣམ་པར་དཔྱོད་དཔྱོད། ཤིན་དུ་དཔྱོད་དཔྱོད། ཡང་དག་པར་འཕེལ་བར་བྱེད་བྱེད་དེ། ཤིན་ཏུ་རྒྱས་པར་བྱེད་བྱེད་པས། བསྐལ་པ་བཟང་པོ་ལ་ཐུག་གི་བར་དུ་དེ་བཞིན་གཤེགས་པ་མཐོང་བ་དང་མ་བྲལ་ལོ། །

དེ་སྲིད་ཀྱི་བར་གྱིས་ཁོ་མོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །དེ་བཞིན་གཤེགས་པ་དེ་དག་ཐམས་ཅད་སྙིང་པོ་བྱང་ཆུབ་ཏུ་གཤེགས་པའི་རྣམ་པར་འཕྲུལ་པ་ཡང་མཐོང་སྟེ། ཁོ་མོ་ནི་དེ་བཞིན་གཤེགས་པ་དེ་དག་ཐམས་ཅད་ཀྱི་དགེ་བའི་རྩ་བ་མངོན་སུམ་དུ་མཐོང་བའོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་ཐུབ་པར་དཀའ་བའི་སྙིང་པོ་ཅན་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་ཞམ་རིང་དུ་འབྲང་བ། སངས་རྒྱས་ཐམས་ཅད་ཀྱི་གསུང་གི་རྗེས་སུ་འབྲང་བ། དེ་བཞིན་གཤེགས་པའི་ཡེ་ཤེས་འཇུག་པར་དཀའ་བ་ལ་རབ་ཏུ་ཞུགས་པ། སེམས་ཀྱི་སྐད་ཅིག་གིས་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པའི་ཤུགས་དང་ལྡན་པ། དེ་བཞིན་གཤེགས་པ་དང་མཉམ་པ་ཉིད་དུ་གྱུར་པའི་ལུས་དང་ལྡན་པ། སངས་རྒྱས་ཐམས་ཅད་ཀྱི་དགོངས་པ་དྲི་མ་མེད་པའི་སྙིང་པོར་གྱུར་པ། སངས་རྒྱས་འབྱུང་བ་ཐམས་ཅད་རྟག་ཏུ་མངོན་པར་བསྒྲུབས་པ། སངས་རྒྱས་ཀྱི་འཕྲིན་ལས་ཐ་མི་དད་པའི་ཕོ་ཉར་གྱུར་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་འཛམ་བུའི་གླིང་འདི་ཉིད་ཀྱི་ཡུལ་མ་ག་དྷ་ཞེས་བྱ་བ་ན་གྲོང་ཁྱེར་སེར་སྐྱའི་གནས་ཞེས་བྱ་བ་ཡོད་དེ།

དེ་ན་མཚན་མོའི་ལྷ་མོ༌དཔྱིད་དང་ལྡན་པ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས༌བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་སའི་ལྷ་མོ་བརྟན་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། སའི་ལྷ་མོ་བརྟན་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། སའི་ལྷ་མོ་བརྟན་མའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་དཔྱིད་དང་ལྡན་པ་ཞེས་བྱ་བས་རང་གི་ཡོན་ཏན་གྱི་རྣམ་གྲངས་དུ་མ་བསྟན་ཅིང་དེའི་རྒྱུ་སྐྱེ་བ་སྔ་མ་རྣམས་སུ་བྱང་ཆུབ་སེམས་དཔའི་ལམ་ལ་ཇི་ལྟར་བསླབ་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་སའི་ལྷ་མོ་བརྟན་མའི་གདམས་ངག་རྗེས་སུ་དྲན་པར་བྱེད་ཅིང་། བྱང་ཆུབ་སེམས་དཔའི་རྣམ་པར་ཐར་པ་ཡེ་ཤེས་ཐུབ་པར་དཀའ་བའི་སྙིང་པོ་ཅན་དེ་རྗེས་སུ་དྲན་པར་བྱ་བ་དང་། བྱང་ཆུབ་སེམས་དཔའི་ཏིང་ངེ་འཛིན་བསྒོམ་པ་དེ་རབ་ཏུ་གོམས་པར་བྱ་བ་དང་། བྱང་ཆུབ་སེམས་དཔའི་ཆོས་ཀྱི་ཚུལ་དེའི་རྗེས་སུ་བསམ་པ་དང་། བྱང་ཆུབ་སེམས་དཔའི་རྣམ་པར་ཐར་པས་རྣམ་པར་རྩེ་བ་དེ་ལ་རྣམ་པར་དཔྱད་པ་དང་། བྱང་ཆུབ་སེམས་དཔའི་རྣམ་པར་ཐར་པའི་ཡེ་ཤེས་ཤིན་ཏུ་ཕྲ་བ་དེ་ལ་རྣམ་པར་བལྟ་བ་དང་། བྱང་ཆུབ་སེམས་དཔའི་རྣམ་པར་ཐར་པའི་ཡེ་ཤེས་རྒྱ་མཚོ་དེ་ལ་འཇུག་པར་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པའི་ཡེ་ཤེས་ཐ་དད་པ་དེ་ལ་ཡིད༌ཆེས་པར་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པའི་ཡེ་ཤེས་ཤིན་ཏུ༌སྦྱང་བ་དེ་རྗེས་སུ་རྟོགས་པར་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པའི་ཡེ་ཤེས་རྒྱ་མཚོ་དེ་ལ་འབབ་པར་བྱ་བ་བྱེད་ཅིང་། གྲོང་ཁྱེར་ཆེན་པོ་སེར་སྐྱའི་གནས་གང་ན་བ་དེར་ཕྱིན་ཏེ། གྲོང་ཁྱེར་ཆེན་པོ་སེར་སྐྱའི་གནས་ལ་གཡས་ཕྱོགས་སུ་བསྐོར་ནས། ཤར་ཕྱོགས་ལོགས་ཀྱི་གྲོང་ཁྱེར་གྱི་སྒོ་ནས་སོང་སྟེ། ཉི་མ་ནུབ་ནས་རིང་པོ་མ་ལོན་པ་ཞིག་ཏུ་གྲོང་ཁྱེར་གྱི་ལམ་གྱི་སུམ་མདོའི་དབུས་ཤིག་ན། བྱང་ཆུབ་སེམས་དཔའི་གདམས་ངག་མཐུན་པར་ལེན་པ་དེ་མཚན་མོའི་ལྷ་མོ་དཔྱིད་དང་ལྡན་པ་མཐོང་བར་འདོད་ཅིང་། དགེ་བའི་བཤེས་གཉེན་ཡོད་ན་སངས་རྒྱས་ཀྱི་ཡེ་ཤེས་ཐོབ་པར་འགྱུར་བར་ངེས་པའི་བློ་གྲོས་དང་ལྡན་པ། ཡེ་ཤེས་ཀྱི་མིག་ཀུན་ཏུ༌ལྟ་བའི་ཡུལ་གྱི་རང་བཞིན་གྱི་བྱིན༌གྱི་རླབས་དང་ལྡན་པ། ཕྱོགས་ཐམས་ཅད་དུ་མངོན་པར་གཞོལ་ཞིང་། དགེ་བའི་བཤེས་གཉེན་ལ་བལྟ་བའི་སེམས་ཀྱིས་མོས་པ་དང་། ཡེ་ཤེས་ཆེན་པོའི་སྙིང་པོར་གྱུར་པའི་འདུ་ཤེས་ཀྱི་སེམས་དང་ལྡན་པ། དམིགས་པ་ཐམས་ཅད་ལ་རབ་ཏུ་ཞུགས་པའི་ཡེ་ཤེས་ཀྱི་མིག་དང་ལྡན་པ། ཆོས་ཀྱི་དབྱིངས་ཀྱི་ཚུལ་ཐམས་ཅད་དུ་ཡེ་ཤེས་རྒྱ་མཚོ་འབྱམས་ཀླས་པས་རྒྱས་པར་འགེངས་པ་དང་ལྡན་པའི་ཏིང་ངེ་འཛིན་གྱི་མིག་གིས་ཕྱོགས་ཐམས་ཅད་དུ་ཤེས་བྱའི་རྒྱ་མཚོ་ལ་རྣམ་པར་ལྟ་བ། ཡེ་ཤེས་ཆེན་པོའི་མིག་འཐོབ་པར་བྱ་བ་ལ་རབ་ཏུ་གཞོལ་ཞིང་བསམ་པ་རྩེ་གཅིག་ཏུ་བཞག་ནས་འདུག་འདུག་པ་དང་།

མཚན་མོའི་ལྷ་མོ་དཔྱིད་དང་ལྡན་པ་དེ་གྲོང་ཁྱེར་ཆེན་པོ་སེར་སྐྱའི་གནས་ཀྱི་སྟེང་གི་ནམ་མཁའི་དབྱིངས་ལས་ནོར་བུ་རིན་པོ་ཆེ་སྣ་ཚོགས་དཔེ་མེད་པའི་ཁང་པ་བརྩེགས་པ་ཞིག་ན། རིན་པོ་ཆེའི་སེང་གེའི་ཁྲི་ཆེན་པོ་སྤོས་ཞིམ་པོ་ཐམས་ཅད་ཀྱི་པདྨོའི་སྙིང་པོ་ཅན་ཞིག་ལ་ལུས་ཀྱི་མདོག་གསེར་གྱི་ཁ་དོག་ཏུ་འདུག་པ། སྐྲ་འཇམ་ཞིང་མང་ལ་མཐོན་མཐིང་དུ་འདུག་པ། མིག་དཀར་ནག་འབྱེས་པ། གཟུགས༌བཟང་ཞིང་མཛེས་པ། ལྟ་ན་སྡུག་པ། ལུས་རྒྱན་དང་ལྷབ་ལྷུབ་ཐམས་ཅད་ཀྱིས་ཀླུབས་ཤིང་བརྒྱན་པ། ཁ་དོག་བསྒྱུར་བའི་གོས་བགོས་པ་ཚངས་པའི་གཙུག་ཏོར་གྱི་ཅོད་པན་ཟླ་བའི་དཀྱིལ་འཁོར་གྱིས་བརྒྱན་པ་ཐོགས་པ་ལུས་ལ་རྒྱུ་སྐར་དང་། གཟའ་དང་སྐར་ཆེན་དང་། སྐར་མའི་ཚོགས་ཐམས་ཅད་ཀྱི་གཟུགས་བརྙན་སྣང་བར་གྱུར་པ་འདུག་པ་མཐོང་ངོ་། །དེས་སེམས་ཅན་གྱི་ཁམས་ཡངས་པར་མི་ཁོམ་པ་དང་། ངན་སོང་དང་། ངན་འགྲོ་དང་། ལོག་པར་ལྟུང་བ་ནས་སེམས་ཅན་ཇི་སྙེད་ཅིག་ཡོངས་སུ་བགྲོལ་བ་དེ་དག༌ཐམས་ཅད་ཀྱང་དེའི་བ་སྤུའི་སྦུབས་སུ་ཆུད་པར་མཐོང་ངོ་། །ཇི་སྙེད་ཅིག་མཐོ་རིས་ཀྱི་འཇིག་རྟེན་དུ་བཀོད་པ་དང་། ཇི་སྙེད་ཅིག་ཉན་ཐོས་དང་། རང་སངས་རྒྱས་ཀྱི་བྱང་ཆུབ་དང་། ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར༌བྱས་པ། དེ་དག་ཐམས་ཅད་ཀྱང་དེའི་བ་སྤུའི་སྦུབས་སུ་ཆུད་པར་མཐོང་ངོ་། །ལུས་མངོན་པར་བསྒྲུབ་པ་དང་། གཟུགས་མངོན་པར་བསྒྲུབ་པ་དང་། ཁ་དོག་མངོན་པར་བསྒྲུབ་པའི་ཐབས་སྣ་ཚོགས་ཀྱིས་ཇི་སྙེད་ཅིག་ཡོངས་སུ་སྨིན་པར་བྱས་པ་དེ་དག་ཀྱང་དེའི་བ་སྤུའི་སྦུབས་སུ་ཆུད་པར་མཐོང་ངོ་། །

ང་རོ་མངོན་པར་བསྒྲུབ་པ་དང་། དབྱངས་ཀྱི་ཡན་ལག་མངོན་པར་བསྒྲུབ་པ་དང་། སྐད་ཀྱི་ཚུལ་སྣ་ཚོགས་ཡོངས་སུ་སྦྱར་བ་ཇི་སྙེད་ཅིག་གིས་ཡོངས་སུ་སྨིན་པར༌བྱས་པ་དེ་དག་ཀྱང་། དེའི་བ་སྤུའི་སྒོ་ནས་རྗེས་སུ་བརྗོད་པ་ཐོས་སོ། །དུས་མངོན་པར་བསྒྲུབ་པ་དང་། བསམ་པ་དང་མོས་པ་ཇི་ལྟ་བ་བཞིན་དུ་སེམས་ཅན་ཀྱི་རྗེས་སུ་འབྲང་བར་བྱ་བ་དང་། བྱང་ཆུབ་སེམས་དཔའི་སྤྱོད་པ་དང་། བྱང་ཆུབ་སེམས་དཔའི་རྣམ་པར་གནོན་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་རྣམ་པར་འཕྲུལ་པའི་སྒོ་དང་། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་དང་། བྱང་ཆུབ་སེམས་དཔའི་རྣམ་པར༌སྤྱོད་པ་དང་། བྱང་ཆུབ་སེམས་དཔའི་ཡོངས་སུ་ལྟ་བ་དང་། བྱང་ཆུབ་སེམས་དཔའི་རྣམ་པར་ལྟ་བ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་དང་། བྱང་ཆུབ་སེམས་དཔའི་སྐྱེས་བུ་སེང་གེ་ཆེན་པོའི་རྣམ་པར་བསྒྱིངས་པ་དང་། བྱང་ཆུབ་སེམས་དཔའི་རྣམ་པར་ཐར་པས། རྣམ་པར་རྩེ་བ་ཇི་སྙེད་ཅིག་གིས་དེས་སེམས་ཅན་ཡོངས་སུ་སྨིན་པར་བྱས་པ་དེ་དག་ཀྱང་། དེའི་བ་སྤུའི་སྦུབས་སུ་ཆུད་པར་མཐོང་ངོ་། །

དེས་ཐབས་སྣ་ཚོགས་དང་ལྡན་པའི་ཆོས་ཀྱི་ཚུལ་རྒྱ་མཚོ་དེ་དག་མཐོང་ཞིང་ཐོས་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། མཚན་མོའི་ལྷ་མོ་དཔྱིད་དང་ལྡན་པ་དེ་ལ་ལུས་ཐམས་ཅད་ཀྱིས་ཕབ་ནས་ཕྱག་འཚལ་ཏེ། ལངས་ནས་མཚན་མོའི་ལྷ་མོ་དཔྱིད་དང་ལྡན་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་མཚན་མོའི་ལྷ་མོ་དཔྱིད་དང་ལྡན་པའི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །

ལྷ་མོ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་དེ་ལྟར་བདག་གིས་དགེ་བའི་བཤེས་གཉེན༌གྱི་བྱིན་གྱི་རླབས་ཀྱིས་སངས་རྒྱས་ཀྱི་ཡོན་ཏན་ཐམས་ཅད་འབྱུང་བར་ཡང་དག་པར་མཐོང་བས། དགེ་བའི་བཤེས་གཉེན་གྱི་ཕྱག་ཏུ་བདག་ཉིད་བོར་བ་ལགས་ན། ལྷ་མོ་ཤུལ་གང་ལ་བརྟེན་ན། བྱང་ཆུབ་སེམས་དཔའི་སྟོབས་བཅུའི་སར་འབྱུང་བར་འགྱུར་བའི་ཐམས་ཅད་མཁྱེན་པའི་ཤུལ་བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་དཔྱིད་དང་ལྡན་པས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་དགེ་བའི༌བཤེས་གཉེན་ཀྱི་བྱིན་གྱིས་ནོན་ཏེ། དགེ་བའི་བཤེས་གཉེན་གྱི་ཚིག་མཉན་པར་འདོད་པ་དང་། དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ་བྱེད་པ་ལེགས་སོ་ལེགས་སོ། །རིགས་ཀྱི་བུ་ཁྱོད་ནི་དེ་ལྟར་དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ༌བྱེད་པས། གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་འགྱུར་རོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྣང་བས་འགྲོ་བ་རྣམ་པར་འདུལ་བའི་སྒོ་ཐོབ་པ་སྟེ། བསམ་པ་མི་མཉམ་པ་དང་ལྡན་པའི་སེམས་ཅན་རྣམས་ལ་བྱམས་པའི་སེམས་དང་ལྡན་པའོ། །མི་དགེ་བའི་ལས་ཀྱི་ལམ་ལ་ཞུགས་པ་རྣམས་ལ་སྙིང་རྗེའི་སེམས་དང་ལྡན་པའོ། །དགེ་བའི་ལས་ཀྱི་ལམ་ལ་ཞུགས་པ་རྣམས་ལ་དགའ་བའི་སེམས་དང་ལྡན་པའོ། །སེམས་མཉམ་པ་དང་མི་མཉམ་པར་ལྡན་པའི་སེམས་ཅན་རྣམས་ལ་མི་གཉིས་པའི་སེམས་དང་ལྡན་པའོ། །

ཀུན་ནས་ཉོན་མོངས་པ་རྣམས་ལ་རྣམ་པར་བྱང་བའི་སེམས་དང་ལྡན་པའོ། །ཉམ་ང་བར་གྱུར་པ་རྣམས་ལ་ཡང་དག་པར་ཞུགས་པའི་སེམས་དང་ལྡན་པའོ། །དམའ་བ་ལ་མོས་པ་རྣམས་ལ་ཡངས་པ་ལ་མོས་པ་ཡོངས་སུ་བསྐྱེད་པའི་སེམས་དང་ལྡན་པའོ། །དབང་པོ་ཞུམ་པ་རྣམས་ལ་བརྩོན་འགྲུས་ཆེན་པོའི་ཤུགས་རྣམ་པར་སྤེལ་བའི་སེམས་དང་ལྡན་པའོ། །འཁོར་བ་ལ་མངོན་པར་མོས་པ་རྣམས་ལ་འཁོར་བའི་རྒྱུད་ཀྱི་འཁོར་ལོ་ལས་རྣམ་པར་བཟློག་པའི་སེམས་དང་ལྡན་པའོ། །ཉན་ཐོས་དང་། རང་སངས་རྒྱས་ཀྱི་ཐེག་པ་ལ་མངོན་པར་མོས་པའི་སེམས་ཅན་རྣམས་ལ། ཐམས་ཅད་མཁྱེན་པ་ཉིད་ཀྱི་ལམ་ལ་དགོད་པའི་སེམས་དང་ལྡན་པའོ། །རིགས་ཀྱི་བུ་དེ་ལྟར་ཁོ་མོ་དེ་ལྟ་བུའི་སེམས་དང་ཡིད་ལ་བྱ་བར་ལྡན་ལ། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྣང་བས་འགྲོ་བ་རྣམ་པར་འདུལ་བའི་སྒོ་འདི་དང་ཡང་ལྡན་པས་སེམས་ཅན་གང་ཇི་སྙེད་ཅིག་མུན་ནག་སྨག་ཏུ་གྱུར་པའི་ནམ་ལ་མི་ནི་ཉལ་བར་གྱུར། འབྱུང་པོའི་ཚོགས་ནི་རྒྱུ་བར་གྱུར། རྐུན་ཆོམ་མང་པོས་ནི་རྒྱས་པར་གྱུར། སེམས་ཅན་མི་བསྲུན་པའི་ཚུལ་ཅན་ནི་ཕྱོགས་སུ་རྒྱུ་བར་གྱུར། སྤྲིན་སྟུག་པོ་ནག་པོས་ནི་ཀུན་ནས་ཁེབས་པར་གྱུར། དུད་པ་དང་རྡུལ་གྱི་ཚོགས་ཀྱིས་ནི༌ཀུན་ནས་འགྲིགས་པར་གྱུར། རྫི་ཆར་མི་བཟད་པས་ནི་རབ་ཏུ་གཏགས་པར་གྱུར། ཟླ་སྐར་གྱི་ཚོགས་ནི་མི་སྣང་བར་གྱུར། མིག་གིས་བྱ་བའི་མཐུ་ནི་མེད་པར་གྱུར་པའི་མུན་པ་ལ་སེམས་ཅན་གང་ཇི་སྙེད་ཅིག་རྒྱ་མཚོ་ལ་སྤྱོད་དམ། ཐང་ལ་སྤྱོད་དམ། རི་ལ་སྤྱོད་དམ། ནགས་ཚལ་གཞན་ན་སྤྱོད་དམ། ཡུལ་གཞན་ན་སྤྱོད་དམ། གྲོང་གཞན་ན་སྤྱོད་དམ། ཕྱོགས་གཞན་ན་སྤྱོད་དམ། ཕྱོགས་མཚམས་གཞན་ན་སྤྱོད་དམ། ལམ་གཞན་ན་སྤྱོད་ཀྱང་རུང་སྟེ། རྒྱ་མཚོ་ལ་སྤྱོད་སྤྱོད་པ་ལས་གྲུ་བུབ་པར་གྱུར་པའམ། ཐང་ལ་སྤྱོད་སྤྱོད་པ་ལས་ཉམ་ཉེས་པའམ། རི་ལ་སྤྱོད་སྤྱོད་པ་ལས་གཡང་ས་ཆེན་པོར་ལྷུང་བར་གྱུར་པའམ། འབྲོག་དགོན་པ་ལ་སྤྱོད་སྤྱོད་པ་ལས་ཁ་ཟས་ཀྱིས་འཕོངས་པར་གྱུར་པའམ། ནགས་ཚལ་ཐིབས་པོར་སྦའི་ཟང་ཟིང་ལ་ཐོགས་སམ། ཚུལ་མ་ཡིན་པའི་ཉམ་ཉེས་ཤིག་ཏུ་གྱུར་ཏམ། ཡུལ་གཞན་ན་སྤྱོད་སྤྱོད་པ་ལས་ཆོམ་པོས་བཅོམ་པའམ། གྲོང་གཞན་ན་སྤྱོད་སྤྱོད་པ་ལས་མི་བསྲུན་པའི་ཚུལ་ཅན་གྱིས་གཙེས་པའམ། ཕྱོགས་གཞན་ན་སྤྱོད་སྤྱོད་པ་ལས་འབྲོག་རྨིས་པའམ། ཕྱོགས་མཚམས་གཞན་ན་སྤྱོད་སྤྱོད་པ་ལས་མགོ་རྨོངས་པའམ། ལམ་གཞན་ན་སྤྱོད་སྤྱོད་པ་ལས་ཉེ་ཞོར་གྱུར་ཀྱང་རུང་སྟེ། རིགས་ཀྱི་བུ་ཁོ་མོ་ནི་སེམས་ཅན་དེ་དག་ལ་ཐབས་སྣ་ཚོགས་ཀྱི་སྒོ་ནས་སྐྱབས་སུ་གྱུར་པར་བྱེད་པ་སྟེ། འདི་ལྟར་རྒྱ་མཚོ་ཆེན་པོ་ལ་སྤྱོད་པ་རྣམས་ཀྱི་རླུང་སྤྲིན་ནག་པོ་གཏོར་བ་དང་། ཆུའི༌རྙོག་པ་གདང་བ་དང་། རླུང་མི་ཟད་པའི་དཀྱིལ་འཁོར་བཟློག་པ་དང་། རླབས་ཀྱི་ཤུགས་ཆེན་པོ་ཞི་བར་བྱ་བ་དང་། གློག་གི་འཇིགས་པ་ལས་ཐར་བར་བྱ་བ་དང་། ཕྱོགས་བསྟན་པ་དང་། ཆུའི་ལམ་ལེགས་པར་དམིགས་པ་དང་། འགྲམ་བསྟན་པ་དང་། རིན་པོ་ཆེའི་གླིང་དུ་ཕྱིན་པར་བྱ་བའི་ཕྱིར་ལམ་ཡོངས་སུ་བསྟན་ཏེ། ཡོངས་སུ་སྦུད་པའི་གཟུགས་དང་། དེད་དཔོན་གྱི་གཟུགས་དང་། རྟའི་རྒྱལ་པོ་རྔོག་ཆེན་གྱི་གཟུགས་དང་། གླང་པོའི་རྒྱལ་པོའི་གཟུགས་དང་། རུ་སྦལ་གྱི་རྒྱལ་པོའི་གཟུགས་དང་། ལྷ་མ་ཡིན་གྱི་རྒྱལ་པོའི་གཟུགས་དང་། ནམ་མཁའ་ལྡིང་གི་རྒྱལ་པོའི་གཟུགས་དང་། མིའམ་ཅིའི་རྒྱལ་པོའི་གཟུགས་དང་། ལྟོ་འཕྱེ་ཆེན་པོའི༌རྒྱལ་པོའི་གཟུགས་དང་། རྒྱ་མཚོའི་ལྷའི་གཟུགས་དང་། མཉན་པའི་གཟུགས་ཀྱིས་སྐྱབས་སུ༌གྱུར་པར་བྱེད་དོ། །དགེ་བའི་རྩ་བ་དེ་ཡང་འདི་ལྟར་སེམས་ཅན་ཐམས་ཅད་སྡུག་བསྔལ་གྱི་ཕུང་པོ་ཐམས་ཅད་ལས་ཡོངས་སུ་བཟློག་པའི་ཕྱིར་སྐྱབས་སུ་གྱུར་པར་ཤོག་ཅིག་ཅེས་ཡོངས་སུ་བསྔོའོ། །ཐང་ལ་སྤྱོད་པའི་སེམས་ཅན༌མུན་པ་ཆེན་པོ་ཤིན་ཏུ་གནས་པའི་ནམ་ལ། ས་གཞི་འོད་མ་དང་། ཚེར་མ་དང་། གསེག་མ་དང་། གྱོ་མོས་གང་བ། སྦྲུལ་གདུག་པ་གཏུམ་པོ་ཤིན་ཏུ་མང་བ། ཐག་ཐུག་དང་། མི་བདེ་བའི་ལམ་ཅན་རྡུལ་དང་ཕྱར་དར་ཤིན་ཏུ་འཐུལ་བ། རྫི་ཆར་དྲག་པོས་གཏགས་པ། ཚ་བ་དང་། གྲང་བའི་སྡུག་བསྔལ་ཡོད་པ། སྦྲུལ་དང་གཅན་ཟན་གྱིས་བག་ཚ་བ་ཡོད་པ། ཐོང་མི་དང་། ཆོམ་པོ་རྒྱུ་བར་གྱུར་པ་ཞིག་ན། མགོ་འཁོར་བར་གྱུར་པའི་སེམས་ཅན་རྣམས་ལ། ཉི་མའི་གཟུགས་དང་། ཟླ་བའི་གཟུགས་དང་། སྐྱ་རེངས་འཆར་བའི་གཟུགས་དང་། སྐར་མདའ་ཆེན་པོའི་གཟུགས་དང་། གློག་གི་ཕྲེང་བ་འབྱུང་བའི་གཟུགས་དང་། རིན་པོ་ཆེའི་འོད་ཀྱི་གཟུགས་དང་། གཟའི་འཁོར་གྱི་གཟུགས་དང་། རྒྱུ་སྐར་དང་སྐར་མའི་ཚོགས་ཀྱི་གཞལ་མེད་ཁང་གི་འོད་ཀྱི་གཟུགས་དང་། ལྷའི་གཟུགས་དང་། བྱང་ཆུབ་སེམས་དཔའི་གཟུགས་ཀྱིས་སྐྱབས་སུ༌གྱུར་པར་བྱེད་དོ། །

སེམས་ཀྱང་དགེ་བའི་རྩ་བ་འདིས་ཉོན་མོངས་པའི་མུན་པ་ཐམས་ཅད་རྣམ་པར་བསལ་བའི་ཕྱིར། སེམས་ཅན་ཐམས་ཅད་ཀྱི་སྐྱབས་སུ་ཤོག་ཅིག་པར་བསྐྱེད་དོ། །རིའི་གཡང་ས་ལ་སྤྱོད་ཅིང་འཆི་བས་འཇིགས་སྐྲག་པ་རྣམས་ཀྱི༌སྲོག་དབྱུང་བ་དང་། གྲགས་པ་འདོད་པའི་དབང་དུ་གྱུར་པ་དང་། སྙན་པ་དང་། སྒྲའི་རྒྱལ་མཚན་འདོད་པ་དང་། ལོངས་སྤྱོད་ཚོལ་བ་དང་། འདོད་པའི་ཟིལ་གྱིས་ནོན་པ་དང་། ཡོ་བྱད་ཡོངས་སུ་ཚོལ་བ་ལ་བརྩོན་པ་དང་། འཇིག་རྟེན་གྱི་ཕུན་སུམ་ཚོགས་པ་འདོད་ཅིང་བརྩོན་པ་དང་། བུ་དང་ཆུང་མ་གཏོང་མི་ཕོད་པས་ཐོགས་པར་གྱུར་པ་དང་། ལྟ་བའི་ཐིབས་པོར་འཁྱམས་པ་དང་། སྡུག་བསྔལ་བ་དང་། འཇིགས་པ་སྣ་ཚོགས་ཀྱིས་གཙེས་པ་རྣམས་ལ་ཡང་ཐབས་སྣ་ཚོགས་ཀྱི་སྒོ་ནས་སྐྱབས་སུ༌གྱུར་པར་བྱེད་དེ། འདི་ལྟར་རིའི་ཕུག་དང་། བྱ་སྐྱིབས་མངོན་པར་བསྒྲུབ་པ་དང་། ཤིང་ཐོག་དང་། རྩ་བ་བཟའ་རུང་བ་མངོན་པར་བསྒྲུབ་པ་དང་། ཆུའི་ལམ་དང་། ཆུ་མིག་མངོན་པར་བསྒྲུབ་པ་དང་། ཚ་བ་དང་། གྲང་བའི་གཉེན་པོ་མངོན་པར་བསྒྲུབ་པ་དང་། ཡང་དག་པའི་ལམ་བསྟན་པ་དང་། ཀ་ལ་པིང་ཀའི་སྒྲ་སྐད་བསྒྲག་པ་དང་། རྨ་བྱའི་རྒྱལ་པོའི་སྐད་འབྱིན་པའི་དབྱངས་དང་། སྨན་འབར་བས་སྣང་བའི་གཟུགས་དང་། རིའི་ལྷའི་འོད་ཀྱི་གཟུགས་དང་། རིའི་ཕུག་དང་སུལ་དང་། ལྟོངས་སུ་རླག་སྟེ། སྡུག་བསྔལ་སྣ་ཚོགས་ཀྱིས་གཙེས་པའི་སེམས་ཅན་རྣམས་ཀྱི་མུན་པའི་རབ་རིབ་རྣམ་པར་བསལ་བ་དང་། སའི་གཞི་མཉམ་པར་མངོན་པར་བསྒྲུབ་པས་སྐྱབས་སུ་གྱུར་པར་བྱེད་དེ། སེམས་ཀྱང་ཇི་ལྟར་བདག་གིས་སེམས་ཅན་རི་ལ་སྤྱོད་པ་འདི་དག་ཡོངས་སུ་བསྐྱབས་པ་དེ་བཞིན་དུ་འཁོར་བའི་རིའི་ལམ་རྒྱུད་གཡང་ས་ལ་གནས་ཤིང་རྒ་ཤིའི་གདོན་གྱིས་ཟིན་པ་དེ་དག་གི་སྐྱབས་སུའང་བདག༌འགྱུར་བར་ཤོག་ཅིག་པར་བསྐྱེད་དོ། །

ནགས་ཚལ་ཐིབས་པོའི་དྲ་བས་ཐོགས་པའི་སེམས་ཅན་མཚན་མོ་མུན་པའི་མུན་ནག་གིས་ཆོད་དེ། ཤིང་དང་། ཤིང་འཕྲན་འཛིངས་པའི་གསེབ་ཤིན་ཏུ་ཉམ་ང་བ་དང་། ཆུ་དང་། རྩྭ་དང་། སྤོང་པོ་དང་། འཁྲི་ཤིང་གིས་ལམ་ཆོད༌པ་དང་། ཤིང་དང་ཤིང་ཕྲན་སྣ་ཚོགས་ཀྱི་ནགས་ཚལ་ཐིབས་པའི་ནང་དུ་ཕྱིན་ཏེ། སྟག་གི་སྒྲ་ཐོས་པས་སྐྲག་པའི་སྙིང་ཅན་དོན་མ་གྲུབ་པས། སེམས་འཁྲུགས་པར་གྱུར་པ་དང་། འཇིགས་པ་དང་འཚེ་བ་དང་། མི་དགའ་བ་སྣ་ཚོགས་ཀྱིས་ཉམས་མི་བདེ་བ་ནགས་ཚལ་སྟུག་པོ་ནས་འབྱུང་བའི་ཕྱོགས་མི་ཤེས་པ་རྣམས་ལ། ཁོ་མོ་ནི་བདེ་བར་འགྲོ་བའི་ལམ་ཡོངས་སུ་སྟོན༌པ་བྱེད་དེ། སེམས་ཀྱང་འདི་ལྟར་དགེ་བའི་རྩ་བ་འདིས་སེམས་ཅན་ལྟ་བའི་ཐིབས་པོ་སྣ་ཚོགས་ལ་གནས་པ། སྲེད་པའི་དྲ་བས་འཁྲིས་པར་གྱུར་པ། འཁོར་བའི་སྡུག་བསྔལ་སྣ་ཚོགས་ཀྱིས་གཙེས་པ་རྣམས་སྡུག་བསྔལ་ཐམས་ཅད་ལས་ཡོངས་སུ་འགྲེལ་བར་ཤོག་ཅིག་པར་བསྐྱེད༌དོ། །འབྲོག་དགོན་པ་ལ་སྤྱོད་པའི་སེམས་ཅན་མུན་པའི་ནང་ན༌འཐོམས་པ་རྣམས་ཀྱང་ཐབས་ཀྱི་སྒོ་སྣ་ཚོགས་ཀྱིས་བདེ་བ་ཡོངས་སུ་བསྐྱེད་ཅིང་ལམ་བསྟན་ཏེ། དེ་དག་འཇིགས་པ་མེད་པ་དང་། བདེ་བ་ལ་རབ་ཏུ་བཀོད་ནས། སེམས་ཀྱང་དགེ་བའི་རྩ་བ་འདིས་སེམས་ཅན་འཁོར་བའི་འབྲོག་དགོན་པ་ན་འཐོམས་པ་ངན་སོང་ཐམས་ཅད་ཀྱི་ལམ་དུ་ཞུགས་པ་རྣམས་སྡུག་བསྔལ་ཐམས་ཅད་ལས་ཡོངས་སུ་བཀྲོལ་ཏེ་ཤིན་ཏུ་ཕུན་སུམ་ཚོགས་པས། བདེ་བ་ཐམས་ཅད་མཁྱེན་པའི་ལམ་ལ་རབ་ཏུ་དགོད་པར་བྱ་བར་ཤོག་ཅིག་པར་བསྐྱེད་དེ། རིགས་ཀྱི་བུ་ཡུལ་དང་ལྗོངས་ལ་ཆགས་པའི་སེམས་ཅན་མངོན་པར་ཆགས་པའི་རྒྱུ་ལས་བྱུང་བའི་སྡུག་བསྔལ་ཉམས་སུ་མྱོང་བར་གྱུར་པ་རྣམས་ལའང་ཁོ་མོ་ནི་སྐྱོ་བར་བྱ་བའི་ཐབས་སྣ་ཚོགས་ཀྱིས་ཡུལ་ལ་མངོན་པར་ཆགས་པ་དེ་ལས་གྱེན་དུ༌བསྐྱོད་པར་བྱེད་དེ་སེམས་ཀྱང་འདི་ལྟར་དགེ་བའི་རྩ་བ་འདིས་སེམས་ཅན་ཐམས་ཅད་ཕུང་པོ་ལ་མངོན་པར་ཆགས་པ་ལས་གྱེན་དུ་བསྐྱོད་དེ། གནས་མེད་པའི་ཐམས་ཅད་མཁྱེན་པའི་ཡེ་ཤེས་ལ་དགོད་པར་བྱ་བར་ཤོག་ཅིག་པར་བསྐྱེད་དོ། །

རིགས་ཀྱི་བུ་ཁོ་མོ་ནི་གྲོང་ན་སྤྱོད་པའི་སེམས་ཅན་ཁྱིམ་དང་གནས༌ཀྱི་འཆིང་བས་གླགས་པ་རྣམས་མཚན་མོ་མུན་པ་ཤིན་ཏུ་གནག་པས་ཆོད་པའི་ནང་ན་ཁྱིམ་གྱི་དོན་སྣ་ཚོགས་ཉམས་སུ་གནོད་པས། སྡུག་བསྔལ་བར་གྱུར་པ་རྣམས་ཀྱང་སྐྱོ་བར་འགྱུར་བའི་སྒོ་སྣ་ཚོགས་ཀྱིས་སྐྱོ་བར་བྱས་ཏེ། ཆགས་པ་མེད་པའི་སེམས་ཡོངས་སུ་བསྐྱེད་ནས། ཆོས་ཀྱི་སྦྱིན་པས་ཡོངས་སུ་བཟུང་སྟེ། ཚིམ་པར་བྱས་ནས་རྟེན་པ་མེད་པའི་ཆོས་ལ་བཀོད་དེ། སེམས་ཀྱང་འདི་ལྟར་དགེ་བའི་རྩ་བ་འདིས་སེམས་ཅན་སྐྱེ་མཆེད་དྲུག་གི་གྲོང་ལ་གནས་པ་རྣམས་འཁོར་བའི་ལམ་གྱི་རྒྱུད་ཀྱི་སྤྱོད་ཡུལ་ལས་གྱེན་དུ་བསྐྱོད་དེ། ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ་ལ་དགོད་པར་བྱ་བར་ཤོག་ཅིག་པར་བསྐྱེད་དོ། །

རིགས་ཀྱི་བུ་གང་ཡང་མཚན་མོ་མུན་པ་ཤིན་ཏུ་གནག་པའི་ནང་ན། ཤར་ཕྱོགས་ལ་སོགས་པའི་ཕྱོགས་དང་། ཕྱོགས་མཚམས་རེ་རེར་ཕྱོགས་བསླད་པར་གྱུར་པ། སའི་ཕྱོགས་མཉམ་པ་ལ་མི་མཉམ་པའི་གཡང་སར་འདུ་ཤེས་པ་དང་། སྒང་བུ་ལ་གཤོང་དུ་འདུ་ཤེས་པར་གྱུར་ཏེ། ཕྱོགས་ཀྱི་ལམ་དང་ས་ཚོད་ལ་མགོ་འཁོར་བར་གྱུར་པ་དེ་དག་ལའང་ཁོ་མོ་ནི་ཐབས་སྣ་ཚོགས་ཀྱིས་སྣང་བར་བྱས་ཏེ། ཕྱིར་འབྱུང་བ་རྣམས་ལ་ནི་སྒོ༌ཡོངས་སུ་སྟོན་ཏོ། །རྒལ་བར་འདོད་པ་རྣམས་ལ་ནི་མུ་སྟེགས་ཡོངས་སུ་སྟོན་ཏོ། །རྐྱལ་བར་འདོད་པ༌རྣམས་ལ་ནི་གྲུ་ཡོངས་སུ་སྟོན་ཏོ། །ཁྱིམ་དུ་འགྲོ་བར་འདོད་པ་རྣམས་ལ་ནི་ཁྱིམ་ཡོངས་སུ་སྟོན་ཏོ། །རྣམ་པར་བལྟ་བར་འདོད་པ་རྣམས་ལ་ནི་ཕྱོགས་ཡོངས་སུ་སྟོན་ཏོ། །ས་གཞི་མཐོ་བ་དང་། དམའ་བ་ཡང་ཡོངས་སུ་སྟོན་ཏོ། །སའི་ཕྱོགས་མཉམ་པ་དང་། མི་མཉམ་པ་དང་། གཟུགས་ཀྱི་རྣམ་པ་སྣ་ཚོགས་ཀྱང་ཡོངས་སུ་སྟོན་ཏོ། །ལམ་གྱིས་དུབ་པ་རྣམས་ལ་གྲོང་དང་གྲོང་ཁྱེར་དང་ལྗོངས་དང་ཁམས་དང་། རྒྱལ་པོའི་ཕོ་བྲང་འཁོར་ཀྱང་ཡོངས་སུ་སྟོན་ཏོ། །ཚ་བ་དང་སྐོམ་པས་མནར་བ་རྣམས་ལ་ཡང་མཚོ་དང་མཚེའུ་དང་། ལུ་མ་དང་རྫིང་དང་རྫིང་བུ་དང་ཆུ་ཀླུང་དང་། ནགས་ཚལ་དང་བཟའ་ཤིང་གི་ར་བ་དང་། ཀུན་དགའ་ཡིད་དུ༌འོང་བ་ཡོངས་སུ་སྟོན་ཏོ། །སྡུག་པ་དང་བྲལ་ཞིང་འཕྲད༌པར་འདོད་པ་རྣམས་ལ་ཕ་དང་མ་དང་བུ་དང་ཆུང་མ་དང་། མཛའ་བོ་དང་། བློན་པོ་དང་། གཉེན་བཤེས་དང་ཡིད་དུ་འོང་བའི་གཟུགས་ཀྱི་རྣམ་པ་སྣ་ཚོགས་ཡོངས་སུ་སྟོན་ཏོ། །སེམས་ཀྱང་ཇི་ལྟར་བདག་གིས་སེམས་ཅན་མཚན་མོ་མུན་པ་མུན་ནག་གིས་ཆོད་པ། མིག་རབ་རིབ་ཀྱིས་ཉམས་པ། ཕྱོགས་བསླད་པ། ལམ་འཁོར་བ་རྣམས་ལ་གཟུགས་ཀྱི་རྣམ་པ་སྣ་ཚོགས་རྣམ་པར་དམིགས་པར་བྱ་བའི་ཕྱིར། སྣང་བ༌བསྐྱེད་དེ། འོད་བྱས་པ་དེ་བཞིན་དུ་བདག་གིས་ཡུན་རིང་པོ་ནས་འཁོར་བའི་མུན་པ་ན་གནས་པའི་སེམས་ཅན་ཡང་དག་པ་ཉིད་ཀྱི་ཕྱོགས༌ལ་བསླད་པ་མ་རིག་པའི་མུན་པར་འཐོམས་པ་ཡེ་ཤེས་ཀྱི་མིག་མི་ཤེས་པའི་ལིང་ཏོག་གིས་ཆོད་པ། འདུ་ཤེས་དང་། སེམས་དང་ལྟ་བས་ཕྱིན་ཅི་ལོག་ཏུ་གྱུར་པ། མི་རྟག་པ་ལ་རྟག་པར་འདུ་ཤེས་པ། སྡུག་བསྔལ་བ་ལ་བདེ་བར་འདུ་ཤེས་པ། བདག་མེད་པ་ལ་བདག་ཏུ་འདུ་ཤེས་པ། མི་སྡུག་པ་ལ་སྡུག་པར་འདུ་ཤེས་པ། བདག་དང་སེམས་ཅན་དང་། སྲོག་དང་། གསོ་བ་དང་། གང་ཟག་ཏུ་འཛིན་པ་དམ་པོ་ལ་གནས་པ། ཕུང་པོ་དང་ཁམས་དང་སྐྱེ་མཆེད་ལ་གནས་པ། རྒྱུ་དང་འབྲས་བུ་ལ་མགོ་འཁོར་བ། མི་དགེ་བའི་ལས་ཀྱི་ལམ་གྱི་ཕྱོགས་སུ་ཞུགས་པ། སྲོག་གཅོད་པ། མ་བྱིན་པར་ལེན་པ། འདོད་པས་ལོག་པར་གཡེམ་པ། རྫུན་དུ་སྨྲ་བ། ཕྲ་མ་ཟེར་བ། ངག་རྩུབ་པོ་འབྱིན་པ། ཚིག་ཀྱལ་པ་སྨྲ་བ། ཆགས་སེམས་དང་ལྡན་པ། གནོད་སེམས༌ཀྱི་སེམས་དང་ལྡན་པ། ལོག་པར་ལྟ་བ་ཅན། ཕར་མི་ཤེས་པ། མར་མི་ཤེས་པ། དགེ་སྦྱོང་དང་། བྲམ་ཟེར་མི་ཤེས་པ། དབང་པོ་མི་ཤེས་པ། སྐྱེས་བུ་དམ་པར་མི་ཤེས་པ། ཆོས་མ་ཡིན་པ་ལ་ཆགས་ཤིང་ཞེན་པ། མི་ཚུལ་བའི་འདོད་པས་ཟིལ་གྱིས་ནོན་པ། ལོག་པའི་ཆོས་ཀྱིས་ཡོངས་སུ་འཁྲིས་པ། དེ་བཞིན་གཤེགས་པ་ལ་སྐུར་པ་འདེབས་པ། ཆོས་ཀྱི་འཁོར་ལོ་ནུབ་པར་བྱ་བ་ལ་ཞུགས་པ། བདུད་ཀྱི་རྒྱལ་མཚན་འཛིན་པ། བྱང་ཆུབ་སེམས་དཔའ་ལ་གནོད་པར་བྱེད་པ། ཐེག་པ་ཆེན་པོ་ལ་ཞེ་སྡང་བ། བྱང་ཆུབ༌ཀྱི་སེམས་ལ་མོས་པ༌སྤོང་བར་བྱེད་པ། བྱང་ཆུབ་སེམས་དཔའ་ལ་མི་སྙན་དུ་རྗོད་པ། སྣོད་མ་སྐམས་པར་སྙིང་རིང་བ། གནོད་པ་མ་བྱས་པར་དགྲར་ལེན་པ། འཕགས་པ་ལ་སྐུར་པ་འདེབས་པ། སྐྱེས་བུ་དམ་པ་མ་ཡིན་པས། སྤྱོད་པའི་ཆོས་ཀྱི་སྤྱོད་ཡུལ་ཅན། མཆོད་རྟེན་དང་། དགེ་འདུན་གྱི་དངོས་པོ་ལ་འཁུ་བ། ཕ་མ་ལ་ལོག་པར་སེམས་པ། མཚམས་མེད་པའི་ལས་བྱེད་པ། གཡང་ས་ཆེན་པོ་ལ་མངོན་པར་ལྟས་པའི་སེམས་ཅན་རྣམས་ཀྱི་མ་རིག་པའི་མུན་པ་ཤེས་རབ་ཀྱི་སྣང་བ་ཆེན་པོས་བསལ་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་བསྐུལ་ནས། ཐེག་པ་ཆེན་པོ་ཀུན་ཏུ་བཟང་པོས་སྟོབས་བཅུའི་ཡེ་ཤེས་ཀྱི་སའི་ལམ་ཡོངས་སུ་སྟོན་པར་གྱུར་ཅིག །དེ་བཞིན་གཤེགས་པའི་ས་དང་། དེ་བཞིན་གཤེགས་པའི་ཡུལ་དང་། ཐམས་ཅད་མཁྱེན་པའི་ཡེ་ཤེས་ཀྱི་ཚུལ་རྒྱ་མཚོ་དང་། སངས་རྒྱས་ཀྱི་ཡེ་ཤེས་ཀྱི་སྤྱོད་ཡུལ་དང་། སངས་རྒྱས་ཀྱི་ཡུལ་དང་། སྟོབས་བཅུ་ཡོངས་སུ་གྲུབ་པ་དང་། སངས་རྒྱས་ཀྱི་གཟུངས་ཀྱི་སྟོབས་དང་། སངས་རྒྱས་ཐམས་ཅད་ཀྱི་སྐུ་མཆོག་ཏུ་གྱུར་པ་ཡོངས་སུ་སྟོན་པར་ཤོག་ཅིག །ཡོངས་སུ་བསྟན་ནས་ཀྱང་། སངས་རྒྱས་ཐམས་ཅད་ཀྱི་མཉམ་པ་ཉིད་ཀྱི་གནས་ལ་རབ་ཏུ་དགོད་པར་ཤོག་ཅིག་པར་བསྐྱེད་དོ། །རིགས་ཀྱི་བུ་ཁོ་མོ་ནི་སེམས་ཅན་ཡུན་རིང་པོ་ནས་ན་ཞིང་ནད་ཀྱིས་ཡོངས་སུ་སྐྱོ༌བ། ལུས་ཉམ་ཆུང་བ་དང་། རྒས་པ། རྒ་བའི་ཟིལ་གྱིས་ནོན་པ་དང་། མགོན་མེད་པ་དང་། ཕོངས་ཤིང་དབུལ་བ་དང་། ལོག་པར་ལྟུང་བ་དང་། ཡུལ་གཞན་དུ་ཕྱིན་པ་དང་། ཕྱོགས༌ལོག་པར་ཞུགས་པ་དང་། བཙོན་ར་ན་འདུག་པ་དང་། ཆད་པས་བཅད་པ་དང་། ཉེས་པ་བྱུང་སྟེ། རྒྱལ་པོས་གསད་པར༌བཀྲི་བ་རྣམས་ཀྱང་སྲོག་དང་བྲལ་གྱི་འཇིགས་པ་ལས་ཡོངས་སུ་བསྐྱབ་པའི་ཕྱིར་གནས་སོ། །

རིགས་ཀྱི་བུ་དེ་ལྟར་ཁོ་མོ་ནི་སེམས་ཅན་ནད་པ་རྣམས་ཀྱི་ནད་ཐམས་ཅད་ནི་ཐབས་ཐམས་ཅད་ཀྱིས་གསོ་བ་ནན་ཏན་དུ་བྱེད་དོ། །རྒས་པ་དང༌རྒ་བའི་ཟིལ་གྱིས་ནོན་པ་རྣམས་ལ་ནི་བསྙེན་བཀུར་བ་དང་། རིམ་གྲོ་དང་། ཡོ་བྱད༌ཀྱིས་མི་ཕོངས་པར་ཡོངས་སུ༌བསྡུད་པ་བྱེད་དོ། །མགོན་མེད་པའི་སེམས་ཅན་རྣམས་ལ་མགོན་བྱེད་དོ། །ཕོངས་ཤིང་དབུལ་བ་རྣམས་ལ་ནི་ནོར་དང་། གསེར་གྱི་ཕུང་པོས་ཡོངས་སུ་སྡུད་དོ། །ལོག་པར་ལྟུང་བ་རྣམས་ནི་དོན་མཐུན་པས་ཡོངས་སུ་སྡུད་དོ། །ཡུལ་གཞན་དུ་ཕྱིན་པ་རྣམས་ནི། རང་གི་ཡུལ་དུ་ཕྱིན་པར་བྱེད་དོ། །ཕྱོགས་ལོག་པར་ཞུགས་པ་རྣམས་ནི། ཕྱོགས་མ་ནོར་བར་འཛུད་དོ། །བཙོན་ར་ན་འདུག་པ་རྣམས་ནི་བཙོན་ར་ནས་ཐར་བར་བྱེད་དོ། །ཆད་པས་གཅད་པ་ནི་ཆད་པའི་སྡུག་བསྔལ་ལས་གྲོལ་བར་བྱེད་དོ། །ཉེས་པ་བྱུང་སྟེ། རྒྱལ་པོས་གསད་པར༌བཀྲི་བ་རྣམས་ནི་སྲོག་གི་དབུགས་ཕྱིན་པ་ཐོབ་པར་བྱེད་དོ། །སེམས་ཀྱང་བདག་ཇི་ལྟར་སེམས་ཅན་འདི་དག་འཇིགས་པ་དང་། གནོད་པ་སྣ་ཚོགས་ལས་ཡོངས་སུ་སྐྱོབ་ཅིང་། མགོན་བྱེད་པ་དེ་བཞིན་དུ་བདག་གིས་འདི་རྣམས་བླ་ན་མེད་པའི་ཆོས་ཀྱི་ཡོངས་སུ་བསྡུ་བས་ཡོངས་སུ་བསྡུས་ཏེ། ཉོན་མོངས་པ་ཐམས་ཅད་ལས་ཡོངས་སུ༌དགྲོལ་བར་བྱའོ། །སྐྱེ་བ་དང་རྒ་བ་དང་ན་བ་དང་། འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་ཡང་དག་པར་བཟླ་བར་བྱའོ། །ངན་སོང་དང་ལོག་པར་ལྟུང་བའི་འཇིགས་པ་ཐམས་ཅད་ལས་ཡོངས་སུ་དགྲོལ་བར་བྱའོ། །དགེ་བའི་བཤེས་གཉེན་གྱི༌གཟུངས་ལ་རབ་ཏུ་དགོད་པར་བྱའོ། །ཆོས་རིན་པོ༌ཆེ་སྦྱིན་པའི་ཡོངས་སུ་བསྡུ་བས༌ཡོངས་སུ་བསྡུ་བར་བྱའོ། །ཁ་ན་མ་ཐོ་བ་མེད་པའི་ལས་ལ་རབ་ཏུ་དགོད་པར་བྱའོ། །དེ་བཞིན་གཤེགས་པའི་སྐུ་རྣམ་པར་དག༌ལ་ཡང་དག་པར་བསྐུལ་བར་བྱའོ། །རྒ་ཤི་ཡོངས་སུ་མེད་པའི་དབྱིངས་ཤིན་ཏུ་རྟོགས༌པ་ལ་རབ་ཏུ་དགོད་པར་བྱ་བར་བསྐྱེད་དོ། །

རིགས་ཀྱི་བུ་ཁོ་མོ་ནི་སེམས་ཅན་ལོག་པའི་ལམ་ལ་ཞུགས༌པ། ལྟ་བའི་རྣམ་པ་ཐིབས་པོ་སྣ་ཚོགས་ལ་མངོན་པར་ཞེན་པ། ལོག་པར༌ལྟ་བའི་སྤྱོད་ཡུལ་ཅན་ལུས་དང་ངག་དང་ཡིད་ཀྱི་ལས་ཉམ་ང་བར་འགྱུར་བ་ལ་ཡོངས་སུ་སྤྱོད་པ། བརྟུལ་ཞུགས་དང་དཀའ་ཐུབ་སྣ་ཚོགས་ལ་གནས་པ་ཡང་དག་པར་རྫོགས་པའི་སངས་རྒྱས་མ་ཡིན་ཡང་། ཡང་དག་པར་རྫོགས་པའི་སངས་རྒྱས་སུ་འདུ་ཤེས་པ། ལུས་གདུང་བ་དང་། ཡོངས་སུ་གདུང་བ་ལ་རབ་ཏུ་བརྩོན་པ། མཚོ་དང་། མཚེའུ་དང་། ལུ་མ་དང་། རྫིང་བུ་དང་། ཆུ་ཀླུང་དང་། རིའི་གཟར་དང་། ཕྱོགས་དང་ཕྱོགས་མཚམས་ལ་འདུད་ཅིང་ཕྱག་འཚལ་བ་མོས་པ། སྡིག་པའི་གྲོགས་པོའི་དབང་དུ་གྱུར་པ་རྣམས་ལ་ཡང་ཐབས་སྣ་ཚོགས་ཀྱིས་མགོན་དུ་གྱུར་པར་བྱེད་དེ། དེ་དག་སྡིག་པའི་ལྟ་བའི་རྣམ་པ་དང་། ངན་སོང་ཐམས་ཅད་ཀྱི་གཡང་སར་ལྟུང་བའི་ལམ་ལས་རྣམ་པར་བཟློག་གོ །འཇིག་རྟེན་པའི་ཡང་དག༌པའི་ལྟ་བ་ལ་རབ་ཏུ་བཀོད་ཅིང་། ལྷ་དང་མིའི་ཕུན་སུམ་ཚོགས་པ་ལའང་ཡོངས་སུ་འགོད་དོ། །སེམས་ཀྱང་ཇི་ལྟར་བདག་གིས་སེམས་ཅན་འདི་དག་ཉམ་ང་བའི་ནན་ཏན་དང་། སྡུག་བསྔལ་ལས་ཡོངས་སུ་བཀྲོལ་བ་དེ་བཞིན་དུ་བདག་གིས་སེམས་ཅན་ཐམས་ཅད་ཀྱང་། འཕགས་པ་འཇིག་རྟེན་ལས་འདས་པའི་ཕ་རོལ་ཏུ་ཕྱིན་པའི་ལམ་ལ་བཀོད་དེ། ཐམས་ཅད་མཁྱེན་པ་ཉིད་ལས་ཕྱིར་མི་ལྡོག་པར་བྱས་ལ་ཀུན་ཏུ་བཟང་པོའི་སྨོན་ལམ་ཆེན་པོས་ཐམས་ཅད་མཁྱེན་པ་ཉིད་ལ་དགོད་པར་བྱའོ། །སེམས་ཅན་གྱི་ཁམས་ཐམས་ཅད་མ་དུལ་གྱི་བར་དུ་བྱང་ཆུབ་སེམས་དཔའི་ས་ལས་ཀྱང་མི་གཡོ་བར་བྱ་བར་བསྐྱེད་དོ། །

དེ་ནས་མཚན་མོའི་ལྷ་མོ་དཔྱིད་དང་ལྡན་པས་དེའི་ཚེ། བྱང་ཆུབ་སེམས་དཔའི་རྣམ་པར་ཐར་པའི་ཕྱོགས་སེམས་ཅན་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྣང་བས་འགྲོ་བ་རྣམ་པར་འདུལ་བའི་སྒོ་འདི་བརྣན་ཏེ། བསྟན་པར་བྱ་བའི་ཕྱིར་སངས་རྒྱས་ཀྱི་བྱིན༌གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་པ་འདི་དག་སྨྲས་སོ། །གཏི་མུག་མ་རིག་མུན་ནག༌བསྩལ་དོན་དུ། །སེམས་ཅན་ཕན་ཕྱིར་ཁོ༌མོ་ཆོས་བསྟན་ཏེ། །དུས་ལ་བསྡད་ཅིང་འགྲོ་བ་བདེ་བར་བྱས། །འདི་ནི་རྣམ་ཐར་ཚུལ་མཆོག་ཞི་བ་ཡིན། །ཁོ་མོས་བྱམས་ཡངས་ཤིན་ཏུ༌སྤྱད་པ་བྱས། །བསྐལ་པ་མཐའ་ཡས་སྔོན་ཆད་ཤིན་ཏུ་བསྒོམས། །དེས་ནི་འཇིག་རྟེན་རྒྱས་བཀང་སྣང་བར་བྱས། །ནོར་བཟང་བརྟན་པས་ཚུལ་འདི་ཤེས་པར་གྱིས། །ཁོ་མོའི་སྙིང་རྗེ་རྒྱ་མཚོ་ཚད་མེད་དེ། །འདི་ལས་དུས་གསུམ་རྒྱལ་བ་འཇིག་རྟེན་འབྱུང་། །དེས་ནི་འགྲོ་བའི་སྡུག་བསྔལ་ཞི་བར་བྱེད། །ནོར་བཟང༌བརྟན་པས་ཚུལ་འདི་ཤེས་པར་གྱིས། །འཇིག་རྟེན་བདེ་བ་མངོན་པར་བསྒྲུབ་པ་དང་། །མ་བྱས་འཕགས་པའི༌བདེ་བ་མངོན་བསྒྲུབ་ཅིང་། །དེས་ནི་ཁོ་མོ་དགའ་མགུ་རངས་པར་བྱེད། །རྒྱལ་སྲས་ཁྱོད་ཀྱིས་ཚུལ་འདི་ཤེས་པར་གྱིས། །སངས་རྒྱས་སྟོབས་རྣམས་ཡོངས་སུ་སྦྱོང་བྱེད་ཅིང་། །ཉན་ཐོས་ཡེ་ཤེས་རྣམ་ཐར་འབྲས་བུ་དང་། །འདུས་བྱས་སྐྱོན་ལས་རྟག་ཏུ་ཕྱིར་ཕྱོགས་ཀྱིས། །རྒྱལ་སྲས་ཁྱོད་ཀྱིས་ཚུལ་འདི་ཤེས་པར་གྱིས། །ཁོ་མོའི་མིག་ནི་རྒྱ་ཆེ་ཡོངས་སུ་དག །དེས་ནི་ཕྱོགས་བཅུའི་ཞིང་རྣམས་མང་པོ་མཐོང་། །ཞིང་དབྱིངས་དེ་དག་ཀུན་གྱི་རང་བྱུང་རྣམས། །བྱང་ཆུབ་ཤིང་དབང་དྲུང་ན་བཞུགས་པ་མཐོང་། །སངས་རྒྱས་སྐུ་ནི་མཚན་གྱིས་ཡོངས་བརྒྱན་ཅིང་། །འོད་བཟང་རྣམ་པ་སྣ་ཚོགས་ཀུན་འགྱེད་དེ། །བ་སྤུ་ཀུན་ནས་འོད་ཟེར་མང་འགྱེད་པའི། །སངས་རྒྱས་འཁོར་དང་བཅས་པ་ཁོ་མོས་མཐོང་། །ཞིང་དབྱིངས་དེ་དག་ཀུན་གྱི་སེམས་ཅན་རྣམས། །ཤི་འཕོ་སྐྱེ་བའི་སྒོར་ཡང་ཀུན་མཐོང་སྟེ། །བྱིས་པ་དེ་དག་འགྲོ་རྒྱུད་རྒྱ་མཚོ་ན། །འཁོར་ཞིང་རང་རང་ལས་ཀྱང་མྱོང་བར་བྱེད། །ཁོ་མོའི་རྣ་བ་རྒྱ་མཚོ་རྣམ་དག་སྟེ། །དེར་ནི་སྒྲ་རྣམས་མ་ལུས་ཡོངས་སུ་འདུ། །འགྲོ་བ་ཀུན་ཀྱི་སྒྲ་སྐད་རྒྱ་མཚོ་དག །ཀུན་ཀྱང་ཐོས་ནས་དྲན་པས་ཡོངས་སུ་འཛིན། །དབྱངས་ཀྱི་ཡན་ལག་སྒྲ་སྐད་ཐམས་ཅད་ཀྱིས། །དཔེ་ཟླ་མེད་པའི་གསུང་ནི་རབ་བརྒྱན་ཏེ། །དེས་ནི་རྒྱལ་བ་འཁོར་ལོ་རབ་ཏུ་བསྐོར། །དེ་དག་ཁོ་མོས་ཐོས་ཤིང་དྲན་པས་འཛིན། །ཁོ་མོའི༌སྣ་ཡི་མཐུ་ཡང་རྣམ་དག་སྟེ། །ཆོས་ཚུལ་རྒྱ་མཚོ་དག་ལ་ཐོགས་པ་མེད། །རྣམ་ཐར་གནས་རྣམས་ཀུན་ཏུ་རབ་འཇུག་པའི། །ཚུལ་འདི་རྒྱལ་སྲས་ཁྱོད་ཀྱིས་ཤེས་པར་གྱིས། །ཁོ་མོའི་ལྕེ་ནི་རྒྱ་ཆེ་རབ་ཏུ་ཡངས། །སྲབ་ཅིང་མདོག་དམར་རིན་ཆེན་འོད་དུ་དག །སེམས་ཅན་བསམ་པ་ཇི་བཞིན་དེ་ཤེས་བྱེད། །རྒྱལ་སྲས་ཁྱོད་ཀྱིས་ཚུལ་འདི་ཤེས་པར་གྱིས། །ཁོ་མོའི་ཆོས་ལུས་ཤིན་ཏུ་རྣམ་དག་སྟེ། །དུས་གསུམ་ཀུན་ཏུ་འོད་གསལ་རབ་ཏུ་གནས། །གཟུགས་ལུས་སེམས་ཅན་བསམ་པ་ཇི་བཞིན་ཏེ། །དེ་དག་ཀུན༌གྱི་དད་པའི་དབང་དུ་མཐོང་། །ཁོ་མོའི་སེམས་ནི་ཆགས་མེད་ཟག་པ་མེད། །སྒྲ་དབྱངས་སྤྲིན་གྱི་ང་རོ་ཇི་བཞིན་ཏེ། །དེ་ཡི་ཁོངས་སུ་མི་མཆོག་ཀུན་ཆུད་ཀྱང་། །དེ་ལ་ཁོ་མོ་རྣམ་པར་རྟོག་པ་མེད། །ཞིང་གི་དབྱིངས་ཀྱི་སེམས་ཅན་བསམ་མི་ཁྱབ། །དེ་དག་སེམས་ཀྱི་རྒྱ་མཚོ་ཁོ་མོས་ཤེས། །དེ་དག་དབང་པོ་བསམ་པ་རབ་ཤེས་ཀྱང་། །དེ་ལ་ཁོ་མོ་རྣམ་པར་རྟོག་པ་མེད། །ཁོ་མོའི་རྫུ་འཕྲུལ་རབ་ཡངས་ཤིན་ཏུ་གྲུབ། །དེས་ནི་བསམ་ཡས་ཞིང་ཡང་རབ་ཏུ་བསྐྱོད། །ལུས་ཀྱི་འོད་དང་མཐུ་ཡང་དེ་བཞིན་ཏེ། །དེས་ནི་སེམས་ཅན་གདུལ་དཀའ་ཤིན་ཏུ་འདུལ། །ཁོ་མོའི་བསོད་ནམས་རྣམ་ཡངས་ཡོངས་སུ་དག །ཀུན་ཏུ་རྒྱན་བྱེད་ཟད་པ་མེད་པའི་མཛོད། །དེས་ནི་རྒྱལ་བ་རྣམས་ལ་མཆོད་པ་བྱེད། །འགྲོ་བ་ཐམས་ཅད་ཉེ་བར་འཚོ་བའང་ཡིན། །ཁོ་མོའི་ཤེས་རབ་རྣམ་ཡངས་ཤིན་ཏུ་དག །དེས་ནི་ཆོས་མང་རྒྱ་མཚོ་རབ་ཏུ་ཤེས། །འགྲོ་བ་ཀུན་གྱི་ཐེ་ཚོམ་ཡོངས་སུ་གཅོད། །རྒྱལ་སྲས་ཁྱོད་ཀྱིས་ཚུལ་འདི་ཤེས་པར་གྱིས། །དུས་གསུམ་ཀུན་ལ་ཁོ་མོ་ཞུགས་གྱུར་པས། །སངས་རྒྱས་རྒྱ་མཚོ་ཀུན་ཀྱང་མཐོང་ཞིང་ཤེས། །དེ་དག་སྨོན་ལམ་ལ་ཡང་རབ་ཏུ་ཞུགས། །ཚུལ་འདི་དཔག་ཡས་རབ་ཏུ་རྫོགས་པ་ཡིན། །རྡུལ་མང་ཀུན་ལ་ཞིང་རྣམས་རྒྱ་མཚོ་མཐོང་། །དེ་དག་དུས་གསུམ་འཇུག་པ་དེ་བཞིན་ཏེ། །དེ་དག་ཀུན་གྱི་སངས་རྒྱས་རྒྱ་མཚོ་མཐོང་། །འདི་ནི་ཀུན་ཏུ་གནས་པའི༌ཚུལ་གྱིས། །རྣམ་པར་སྣང་མཛད་བྱང་ཆུབ་སངས་རྒྱས་ཏེ། །ཕྱོགས༌རྣམས་ཀུན་གྱི་ཞིང་རྣམས་ཡོངས་བཀང་ཞིང་། །རྡུལ་སྦུབས་ཀུན་གྱི་བྱང་ཆུབ་ཤིང་དྲུང་ན། །ཞི་བའི་ཆོས་རྣམས་གསུང་དུ་སྒྲོག་པ་ལྟོས། །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་དཔྱིད་དང་ལྡན་པ་ལ་འདི་སྐད་ཅེས་སྨྲས་སོ། །ལྷ་མོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས། ཇི་སྲིད་ཅིག་ལགས། དེ་ལྟར་ཁྱོད་ཚུལ་འདི་ལྟ་བུས་སེམས་ཅན་གྱི་དོན་བགྱི་བ་ལ་སྟ་གོན་དུ་ཞུགས་པའི་རྣམ་པར་ཐར་པ་དེ་ནི་ཁྱོད་ཀྱིས་བརྙེས་ནས་ཇི་སྲིད་ཅིག་ལགས། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་དཔྱིད་དང་ལྡན་པས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །

རིགས་ཀྱི་བུ་སྔོན་འདས་པའི་དུས་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པའི་ཡང་། ཕ་རོལ་ཅིག་ཏུ་བསྐལ་པ་རབ་ཏུ་ཞི་བའི་འོད་ཅེས་བྱ་བ། སངས་རྒྱས་བྱེ་བ་ཕྲག་ལྔ་བརྒྱ་སྐྱེས་པ་བྱུང་སྟེ། དེའི་འཇིག་རྟེན་གྱི་ཁམས་ནི་རིན་ཆེན་དཔལ་འབྱུང་ཞེས་བྱ་བར་གྱུར་ཏོ། །འཇིག་རྟེན་གྱི་ཁམས་དེའི་གླིང་བཞི་པ་འབྲིང་པོ་རིན་ཆེན་ཟླ་བ་སྒྲོན་མའི་འོད་ཅེས་བྱ་བ་དེ་ན། རྒྱལ་པོའི་གནས་པད་མོའི་འོད་ཅེས་བྱ་བ་ཡོད་དེ། རྒྱལ་པོའི་གནས་དེར་རྒྱལ་པོ་ཆོས་རབ་མུ་སྟེགས་ཞེས་བྱ་བ་ཆོས་དང་མཐུན་པའི་རྒྱལ་པོ་འཁོར་ལོས༌སྒྱུར་བ་གླིང་བཞི་ལ་དབང་བ་རིན་པོ་ཆེ་བདུན་དང་ལྡན་པ་བྱུང་སྟེ། དེས་ས་ཆེན་པོ་དེ་ཡང་རི་དང་རྒྱ་མཚོར་བཅས་པའི་མཐས་གཏུགས་པར་ཆོས་ཀྱིས་རྒྱས་པར་བྱས་ནས། བདེ་བར་གནས་པར་བྱས་སོ། །རྒྱལ་པོ་ཆོས་རབ་མུ་སྟེགས་དེའི་བཙུན་མོ་ཆོས་ཀྱི་བློ་གྲོས་ཟླ་བ་ཞེས་བྱ་བ་བྱུང་སྟེ། དེ་སྲོད་ལ་འདོད་པས་མྱོས་ཤིང་དགའ་བར་རྩེ་རྩེ༌བས་དུབ་ནས་ནམ་གྱི་གུང་ལ་བཙུན་མོའི་འཁོར་གྱི་གནས་སུ་ཕྱིན་ཏེ་ཉལ་ལོ། །དེ་ནས་རྒྱལ་པོའི་གནས་པད་མོའི་འོད་དེའི་ཤར་ཕྱོགས་ཀྱི་ནགས་ཚལ་ཆེན་པོ་ཞི་བའི་དཔལ་འབྱུང་བ་ཞེས་བྱ་བར་རིན་པོ་ཆེའི༌རྒྱལ་པོ་རྒྱན་ཐམས་ཅད་ཀྱི་འོད་དང་ལྡན་པའི་ལྷུན་ཅན། སངས་རྒྱས་ཐམས་ཅད་ཀྱི་རྣམ་པར་འཕྲུལ་པས་བྱུང་བའི་བྱང་ཆུབ་ཀྱི་ཤིང་ཆེན་པོའི་དྲུང་དུ། དེ་བཞིན་གཤེགས་པ་ཆོས་ཐམས་ཅད་རབ་ཏུ་སྒྲོག་པའི་རྒྱལ་པོ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས། དེའི་མཐུས་འཇིག་རྟེན་གྱི་ཁམས་རིན་ཆེན་དཔལ་འབྱུང་བ་ཐམས་ཅད་འོད་ཆེན་པོ༌ཁ་དོག་དུ་མ་ཅན་གྱིས་རྒྱས་ཤིང་གང་བར་གྱུར་ཏོ། །

རྒྱལ་པོའི་གནས་པད་མོའི་འོད་ཅེས་བྱ་བ་དེ་ན་མཚན་མོའི་ལྷ་མོ་ཟླ་བ་ཤིན་ཏུ་རྣམ་པར་དག་པའི་འོད་ཅེས་བྱ་བ་འདུག་འདུག་སྟེ། དེས་རྒྱལ་པོའི་བཙུན་མོ་ཆོས་ཀྱི་བློ་གྲོས་ཟླ་བའི་གན་དུ་སོང་ནས། རྒྱན་བཀྲོལ་བའི་སྒྲས་སད་པར་བྱས་ཏེ། འདི་སྐད་ཅེས་སྨྲས་སོ། །འདི་ལྟར་རྒྱལ་པོའི་བཙུན་མོ་ཤེས་པར་གྱིས་ཤིག །ནགས་ཚལ་ཆེན་པོ་ཞི་བའི་དཔལ་འབྱུང་བར་དེ་བཞིན་གཤེགས་པ་ཆོས་ཐམས་ཅད་རབ་ཏུ་སྒྲོག་པའི་རྒྱལ་པོ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །

དེ་ནས་དེས་རྒྱལ་པོའི་བཙུན་མོ་དེའི་མདུན་དུ་སངས་རྒྱས་ཀྱི་ཡོན་ཏན་བསྔགས་པ་དང་། སངས་རྒྱས་ཀྱི་རྣམ་པར་འཕྲུལ་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་རྒྱ་ཆེར་བཤད་དོ། །རིགས་ཀྱི་བུ་རྒྱལ་པོའི་བཙུན་མོ་དེའང་དེ་བཞིན་གཤེགས་པའི་འོད་ཀྱིས་སྣང་བར་གྱུར་ཏེ། བསམ་པ་ཐག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས། དེས་དེ་བཞིན་གཤེགས་པ་དེ་དང་། བྱང་ཆུབ་སེམས་དཔའ་དང་། ཉན་ཐོས་ཀྱི་དགེ་འདུན་དུ་བཅས་པ་ལ་མཆོད་པ་དང་། རིམ་གྲོ་ཆེར་བྱས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས།

དེའི་ཚེ་དེའི་དུས་ཀྱི་རྒྱལ་པོའི་བཙུན་མོ་ཆོས་ཀྱི་བློ་གྲོས་ཟླ་བ་ཞེས་བྱ་བ་དེ་གཞན་ཞིག་ཡིན་པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན། རྒྱལ་པོའི་བཙུན་མོ་ཆོས་ཀྱི་བློ་གྲོས་ཟླ་བ་ཞེས་བྱ་བར་གྱུར་ཏོ། །རིགས་ཀྱི་བུ་ཁོ་མོ་ནི་མོས་པའི་སེམས་བསྐྱེད་པ་དེ་དང་། དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བ་དེས། བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཚུན་ཆད་དུ་ནམ་ཡང་ངན་སོང་ལོག་པར་ལྟུང་བར་མ་སྐྱེས་ཏེ། སེམས་ཅན་དམྱལ་བར་མ་ཡིན་ནོ། །

བྱོལ་སོང་གི་སྐྱེ་གནས་སུ་མ་ཡིན། ཡི་དྭགས་སུ་མ་ཡིན་ནོ། །ནམ་ཡང་རིགས་དམའ་བར་མ་སྐྱེས་སོ། །ནམ་ཡང་དབང་པོ་དང་མི་ལྡན་པར་མ་གྱུར་ཏོ། །ནམ་ཡང་སྡུག་བསྔལ་བར་མ་གྱུར་ཏེ། དེ་ལྟར་ཁོ་མོས་རྟག་པར་ལྷའི་ནང་དུ་ལྷའི་བདག་ཉིད་ཆེ་བ་ཉིད་ཐོབ། མིའི་ནང་དུ་ནི། མིའི་བདག་ཉིད་ཆེ་བ་ཉིད་ཐོབ་སྟེ། འདི་ལྟར་སངས་རྒྱས་དང་བྱང་ཆུབ་སེམས་དཔའི་དགེ་བའི་བཤེས་གཉེན་དང་ཡང་མ་བྲལ་ལོ། །དུས་ངན་པར་ཡང་མ་སྐྱེས་སོ། །རིགས་ཀྱི་བུ་དེ་ལྟར་ཁོ་མོས་སངས་རྒྱས་གཅིག་ནས་གཅིག་ཏུ་དགེ་བའི་རྩ་བ་བསྐྱེད་དེ་བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཅིག་ཏུ་ལམ་བདེ་ཞིང་མཉམ་པ་ནས་ཉེ་ཞོ་མེད་པར་ཕྱིན་ཀྱང་དེ་ཙམ་གྱིས་ཁོ་མོའི་བྱང་ཆུབ་སེམས་དཔའི་དབང་པོ་ཡོངས་སུ་གྲུབ་པར་མ་གྱུར་ཏེ། རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་དེ་དག་ནི་འདས། བསྐལ་པ་བཟང་པོ་འདིའི་སྔ་རོལ་གྱི་ནི་བསྐལ་པ་ཆེན་པོ་སྟོང་ཕྲག་བཅུའི་ཐོག་མ་ལ་བབ་པ་དེའི་ཚེ། འཇིག་རྟེན་གྱི་ཁམས་གཟི་བརྗིད་རྡུལ་གྱི་དྲི་མ་མེད་པ་ཞེས་བྱ་བར། བསྐལ་པ་མྱ་ངན་མེད་ཅིང་། རྡུལ་དང་བྲལ་བ་ཞེས་བྱ་བ་བྱུང་སྟེ། རིགས་ཀྱི་བུ་འཇིག་རྟེན་གྱི་ཁམས་གཟི་བརྗིད་རྡུལ་གྱི་དྲི་མ་མེད་པའི་དཔལ་དེ་ནི་ཀུན་ནས་ཉོན་མོངས་ལ་རྣམ་པར་དག་པར་གྱུར་ཏེ། དེར་སངས་རྒྱས་ལྔ་བརྒྱ་བྱུང་ངོ་། །

སངས་རྒྱས་ལྔ་བརྒྱ་པོ་དེ་དག་གི་ཐོག་མ་ལ་དེ་བཞིན་གཤེགས་པ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མིའི་སྟོན་པ། སངས་རྒྱས་བཅོམ་ལྡན་འདས་རི་རབ་རྒྱལ་མཚན་སྤྱན་ཡངས་ཤིང་ཞི་བའི་དཔལ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་ཁོ་མོ་ཡང་ཚོང་དཔོན༌སྙན་པ་རྣམ་པར་གྲགས་པའི་བུ་མོ་ཤེས་རབ་སྣང་བའི་དཔལ་ཞེས་བྱ་བ། གཟུགས་མཛེས་ཤིང་བཟང་ལ་ལྟ་ན་སྡུག་པ་ཁ་དོག་ཤིན་ཏུ་མཛེས་ཤིང་རྒྱས་པ་དང་ལྡན་པ་ཞིག་ཏུ་གྱུར་ཏེ། མཚན་མོའི་ལྷ་མོ་ཟླ་བ་ཤིན་ཏུ་རྣམ་པར་དག་པའི་འོད་ཅེས་བྱ་བ་དེ་ཡང་། སྨོན་ལམ་གྱི་དབང་གིས་གླིང་བཞི་པའི་འཇིག་རྟེན་གྱི་ཁམས་རྡུལ་དང་བྲལ་བའི་རྒྱལ་པོའི་གནས་རྒྱལ་མཚན་སྣ་ཚོགས་སུ་མཚན་མོའི་ལྷ་མོ་མིག་རྣམ་པར་དག་པ་ཞེས་བྱ་བར་གྱུར་ཏེ། དེས༌ཁོ་མོ་མཚན་མོ་མི་ཉལ་ཙམ་ཞིག་ན། ཕ་མ་ཉལ་བར་གྱུར་པ་དང་། ཁྱིམ་དེ་ཡང་ཡོངས་སུ་བསྐྱོད་དེ་འོད་ཆེན་པོས་སྣང་བར་བྱས་ནས་རང་གི་གཟུགས་བསྟན་ཏེ། སངས་རྒྱས་ཀྱི་ཡོན་ཏན་བསྔགས་པ་བརྗོད་ནས། དེ་བཞིན་གཤེགས་པ་ཐོག་མ་མངོན་པར་སངས་རྒྱས་ནས། ཞག་བདུན་ལོན་ཏེ། སྙིང་པོ་བྱང་ཆུབ་ལ་བཞུགས་པ་དེ་བསྟན་ཏོ། །

དེ་ནས་ཁོ་མོ་ཕ་མ་དང་གཉེན་བཤེས་ཀྱི་ཚོགས་ཆེན་པོ་དང་འགྲོགས་ཏེ། མཚན་མོའི་ལྷ་མོ་ཤིན་ཏུ་རྣམ་པར་དག་པའི་ཟླ་བའི་འོད་སྔོན་དུ་བདར་ནས། དེ་བཞིན་གཤེགས་པ་དེའི་སྤྱན་སྔར་ཕྱིན་ཏོ། །དེ་ནས་ཁོ་མོས་དེ་བཞིན་གཤེགས་པ་དེ་ལ་མཆོད་པ་རྒྱ་ཆེན་པོ་བྱས་ཏེ། དེ་བཞིན་གཤེགས་པ་དེའི་ཞལ་མཐོང་མ་ཐག་ཏུ་ཏིང་ངེ་འཛིན་འགྲོ་བ་འདུལ་ཞིང་སངས་རྒྱས་མཐོང་བར་བྱེད་པ་ཞེས་བྱ་བ་དང་། ཏིང་ངེ་འཛིན་དུས་གསུམ་གྱི་དབྱིངས་ཡེ་ཤེས་ཀྱིས་སྣང་བའི་དཀྱིལ་འཁོར་ཅེས་བྱ་བ་ཡང་ཐོབ་པར་གྱུར་ཏོ། །

དེ་ཐོབ་པས་ཀྱང་ཁོ་མོས་བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཀྱང་རྗེས་སུ་དྲན་པར་གྱུར་ཏོ། །ཁོ་མོའི་བྱང་ཆུབ་ཀྱི་སེམས་དེ་ཡང་མངོན་དུ་གྱུར་ཏེ། དེ་ལྟར་ཁོ་མོས་དེ་བཞིན་གཤེགས་པ་དེ་ལས་ཆོས་བསྟན་པ་ཐོས་ཏེ། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྣང་བས་འགྲོ་བ་རྣམ་པར་འདུལ་བའི་སྒོ་འདི་ཡང་ཐོབ་པར་གྱུར་ཏོ། །དེ་ཐོབ་པས་ཀྱང་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ལུས་ཀྱིས་རྒྱས་པར་འགེངས་ཏེ། འཇིག་རྟེན་གྱི་ཁམས་དེ་དག༌དེ་བཞིན་གཤེགས་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་མིག་ལམ་དུ་སྣང་ཞིང་། བདག་ཉིད་ཀྱང་དེ་དག་ཐམས་ཅད་ཀྱི་ཞབས་ཀྱི་དྲུང་ན་འདུག་པར་ཤེས་སོ། །འཇིག་རྟེན་གྱི་ཁམས༌དེ་དག་ཏུ་སེམས་ཅན་ཇི་སྙེད་ཅིག་སྐྱེས་པ་དེ་དག་ཐམས་ཅད་ཀྱང་ཁོ་མོའི་མིག་ལམ་དུ་སྣང་སྟེ། དེ་དག་གི་སྒྲ་སྐད་རྣམ་པ་ཐ་དད་པའི་བརྡ་ཡང་རབ་ཏུ་ཤེས་སོ། །སེམས་དང་བསམ་པ་དང་། དབང་པོ་དང་མོས་པ་ཡང་རབ་ཏུ་ཤེས་སོ། །སྔོན་གྱི་མཐའི་དགེ་བའི་བཤེས་གཉེན་རྣམས་ཀྱི་དྲུང་དུ་ཡོངས་སུ་སྨིན་པར་གྱུར་པའང་རབ་ཏུ་ཤེས་སོ། །དེ་དག་ལ་བསམ་པ་ཇི་ལྟ་བ་བཞིན་དུ་ཚིམ་པར༌འགྱུར་བའི་ལུས་ཀྱང་ཡོངས་སུ་སྟོན་ཏོ། །ཁོ་མོའི་རྣམ་པར་ཐར་པ་དེ་ཡང་སེམས་ཀྱི་སྐད་ཅིག་རེ་རེ་ལ་རྣམ་པར་འཕེལ་ཏེ། རྣམ་པར་ཐར་པའི་སེམས་དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་འཇིག་རྟེན་གྱི་ཁམས་བརྒྱའི་རྡུལ་ཤིན་ཏུ་ཕྲ་བ་སྙེད་ལུས་ཀྱིས་རྒྱས་པར་འགེངས་སོ། །དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྟོང་གི་རྡུལ་ཤིན་ཏུ་ཕྲ་བ་སྙེད་ལུས་ཀྱིས་རྒྱས་པར་འགེངས་སོ། །

དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་འཇིག་རྟེན་གྱི་ཁམས་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ལུས་ཀྱིས་རྒྱས་པར་འགེངས་སོ། །དེ་བཞིན་དུ་སེམས་ཀྱི་སྐད་ཅིག་རེ་རེ་ཞིང་སངས་རྒྱས་ཀྱི་ཞིང་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དག་ཀྱང་ལུས་ཀྱིས་རྒྱས་པར་འགེངས་སོ། །སངས་རྒྱས་ཀྱི་ཞིང་དེ་དག་ན་དེ་བཞིན་གཤེགས་པ་ཇི་སྙེད་ཅིག་བཞུགས་པ་དེ་དག་ཐམས་ཅད་ཀྱང་ཁོ་མོའི་མིག་ལམ་དུ་སྣང་སྟེ། བདག་ཉིད་ཀྱང་དེ་དག་གི་ཞབས་ཀྱི་དྲུང་ན་འདུག་པར་ཤེས་སོ། །སངས་རྒྱས་བཅོམ་ལྡན་འདས་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ལེན་ཏོ། །འཛིན་ཏོ། །ཡོངས་སུ་འཛིན་ཏོ། །ཉེ་བར་འཛིན་ཏོ། །དེ་བཞིན་གཤེགས་པ་དེ་དག་གི་སྔོན་གྱི་ཚུལ་རྒྱ་མཚོ་དང་། སྨོན་ལམ་རྒྱ་མཚོ་ལ་ཡང་འཇུག་གོ །དེ་བཞིན་གཤེགས་པ་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པ་དེ་དག་ཐམས་ཅད་ཀྱང་རང་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར། མངོན་པར་སྒྲུབ་བོ། །སེམས་ཅན་ཇི་སྙེད་ཅིག་འཇིག་རྟེན་གྱི་ཁམས་རྒྱ་མཚོ་དེ་དག་དུ་སྐྱེས་པར་གྱུར་པ་དེ་དག་ཐམས་ཅད་ཀྱང་། ཁོ་མོའི་མིག་ལམ་དུ་སྣང་སྟེ། སེམས་ཅན་དེ་དག་གི་བསམ་པ་དང་དབང་པོ་དང་མོས་པའི་བྱེ་བྲག་ཇི་སྙེད་པ་དེ་སྙེད་ཀྱི་བྱེ་བྲག་དུ་དེ་དག་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་ལུས་བྱིན་གྱིས༌རློབ་སྟེ། དེ་ལྟར་ཁོ་མོའི་རྣམ་པར་ཐར་པ་དེ་ནི་སེམས་ཀྱི་སྐད་ཅིག་རེ་རེ་ལ་ཡང་ཆོས་ཀྱི་དབྱིངས་འབྱམས་ཀླས་པ་རྒྱས་པར་འགེངས་པའི་ཚུལ་གྱིས་རྣམ་པར་འཕེལ་ལོ། །

རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྣང་བས་འགྲོ་བ་རྣམ་པར་འདུལ་བའི་སྒོ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་མཐའ་དང་དབུས་མེད་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་བྱུང་བ། ཆོས་ཀྱི་དབྱིངས་རྒྱ་མཚོའི་ཚུལ་འབྱམས་ཀླས༌པར་འདལ་བ་ལ་འཇུག་པར་དབང་སྒྱུར་བ། བྱང་ཆུབ་སེམས་དཔས་ཡང་དག་པར་བསྒྲུབ་པའི་ཏིང་ངེ་འཛིན་ཡེ་ཤེས་རྡོ་རྗེའི་དཔལ་གྱིས་རྣམ་པར་རྩེ་བ། འཇིག་རྟེན་གྱི་ཁམས་ཐམས་ཅད་དུ། དེ་བཞིན་གཤེགས་པའི་རིགས་ཐམས་ཅད་ཡང་དག་པར་གཟུང་བ་ལ་སྨོན་ལམ་ཆེན་པོས་བྱུང་བ། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་སེམས་ཀྱི་སྐད་ཅིག་གཅིག་གིས་ཡོངས་སུ་དག་པར་བྱ་བའི་བསོད་ནམས་ཀྱི་རྒྱ་མཚོ་ཆེན་པོ་ཡོངས་སུ་གྲུབ་པ། སེམས་ཀྱི་སྐད་ཅིག་རེ་རེ་ལ་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཡེ་ཤེས༌ལ་དབང་བསྒྱུར་བའི་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཐམས་ཅད་ཀྱི་སྒྲིབ་པའི་མུན་པ་ཐམས་ཅད་རྣམ་པར་སེལ་བའི་ཡེ་ཤེས་ཀྱི་ཉི་མའི་མིག་དང་ལྡན་པ། སེམས་ཅན་གྱི་ཁམས་ཐམས་ཅད་ལ་ཐེག་པ་ཆེན་པོ་རྣམ་པར་དམིགས་པར་བྱ་བའི་མཐུ་དང་ལྡན་པ། འགྲོ་བ་ཐམས་ཅད་ཀྱི་ཐེ་ཚོམ་དང་། ནེམ་ནུར་དང་། ཡིད་གཉིས་ཀྱི་རབ་རིབ་རྣམ་པར་སེལ་བའི་བློ་གྲོས་ཀྱི་ཟླ་བ་དང་ལྡན་པ། སྲིད་པའི་རྒྱ་མཚོ་ཐམས་ཅད་ལ་མངོན་པར་ཆགས་པ་ལས་གྱེན་དུ་བསྐྱོད་པའི་སྒྲ་དབྱངས་ཀྱི་དཀྱིལ་འཁོར་རྣམ་པར་དག་པ། ཆོས་ཀྱི་དབྱིངས་ཐམས་ཅད་ཀྱིས་རྡུལ་གྱི་ཆ་ཤས་ལ་རྣམ་པར་འཕྲུལ་པ། ཡོངས་སུ་སྟོན་པ་ལ་དབང་བསྒྱུར་བ། དུས་གསུམ་གྱི་དབྱིངས་ཀྱི་དཀྱིལ་འཁོར་ལ་ཡེ་ཤེས་དབྱེར་མེད་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། སྤྱོད་ཡུལ་ལ་འཇུག་པའམ། རྣམ་པར་ཐར་པས་རྣམ་པར་རྩེ་བ་ཡོངས་སུ་བསྟན་པར་ནུས་རེ་སྐན། སོང་རིགས་ཀྱི་བུ་ཡུལ་མ་ག་དྷ་འདི་ཉིད་ཀྱི་སྙིང་པོ་བྱང་ཆུབ་ལ་ཁོ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས༌བསྐྱེད་བསྐྱེད་པ། ཡང་དང་ཡང༌བསྐུལ་བསྐུལ་བའི་མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཅེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གྱིས། མཚན་མོའི་ལྷ་མོ་དཔྱིད་དང་ལྡན་པ་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་སྐུ་ཤིན་ཏུ་རྣམ་པར་དག་པ་མཐོང་། །མཚན་གྱིས་རྣམ་བརྒྱན་རི་བོ་ཇི་བཞིན་དུ། །འཇིག་རྟེན་ཀུན་ལས་མངོན་འཕགས་འཇིག་རྟེན་དུ། །ཕུན་སུམ་ཚོགས་སྐུ་འཇམ་དཔལ་བཞིན་དུ་མཛེས། །ཁྱོད་ཀྱི་ཆོས་སྐུ་ཤིན་ཏུ་རྣམ་དག་སྟེ། །དུས་གསུམ་ཀུན་ཏུ་མཉམ་ཞིང་རྣམ་མི་རྟོག །དེར་ནི་འཇིག་རྟེན་མ་ལུས་ཀུན༌འདུས་ཏེ། །འབྱུང་ཞིང་རྣམ་པར་འཇིག་ཀྱང་ཆགས་མི་མངའ། །ལམ་རྒྱུད་འབྱམས་ཀླས་ཐམས་ཅད་ཀུན་ཏུ་ཡང་། །ཁྱོད་ཀྱི་སྐུ་ནི་གཟུགས་བརྙན་རྣམ་པར་ཕྱེ། །སྐར་ཆེན༌ཟླ་སྐར་རྒྱུ་སྐར་ཚོགས་ལ་ཇི་བཞིན་དུ། །སྤུ་རྩེ་ཀུན་ལའང་ཁྱོད་ནི་བདག་གིས་མཐོང་། །ཁྱོད་ཀྱི་ཐུགས་ཡངས་ཤིན་ཏུ་རྣམ་དག་སྟེ། །ཕྱོགས་རྣམས་ཀུན་ཏུ་ནམ་མཁའི་དབྱིངས་སུ་རྒྱས། །དེར་ནི་མི་མཆོག་ཀུན་ཀྱང་ཡོངས་སུ་འདུ། །ཁྱོད་ལ་ཡེ་ཤེས་མི་རྟོག༌དམ་པ་མངའ། །ཞིང་གི་རྡུལ་སྙེད་རྣམ་པ་སྣ་ཚོགས་སྤྲིན། །ཁྱོད་ཀྱི་སྤུ་རྩེ་ཀུན་ནས་མངོན༌མཐོ་ཞིང་། །རྒྱན་མང་སྣ་ཚོགས་ཆར་པ་མངོན་འབེབས་ཤིང་། །ཕྱོགས་བཅུའི་སངས་རྒྱས་ཞབས་དྲུང་རྒྱས་པར་འགེངས། །འགྲོ་བ་ཀུན་སྙེད་ལུས་རྣམས་མཐའ་ཡས་པ། །ཁྱོད་ཀྱི་སྤུ་རྩེ་ཀུན་ནས་མངོན་མཐོ་ཞིང་། །ཕྱོགས་བཅུའི་འཇིག་རྟེན་རྒྱས་པར་ཡོངས་བཀང་ནས། །སྣ་ཚོགས་ཐབས་ཀྱིས་སེམས་ཅན་རྣམ་པར་སྤྱོད། །སྤུ་རྩེ་ཀུན་ལ་བསམ་ཡས་ཞིང་གི་རྣམས། །སྣ་ཚོགས་རྒྱན་ལྡན་རྣམ་པ་ཐ་དད་མཐོང་། །ལམ་རྒྱུད་སེམས་ཅན་ཁྱོད་ཀྱིས་རྣམ་སྦྱངས་པ། །ཇི་སྙེད་དེ་དག་བསམས་བཞིན་ཀུན་ཀྱང་བྱུང་། །གང་ཞིག་ཁྱོད་ཀྱི་མཚན་ཐོས༌དགའ་གྱུར་པ། །དེ་དག་ཐོབ་བྱ་ལེགས་ཐོབ་ལེགས་པར་འཚོ། །སེམས་ཅན་གང་གིས་ཁྱོད་ཀྱི་སྐུ་མཐོང་བ། །བྱང་ཆུབ་ལམ་ལ་མངོན་དུ༌བལྟས་པར་འགྱུར། །དེ་ལྟར་ཐོས་ནས་རབ་ཏུ་སེམས་དགའ་ལ། །མཐོང་བ་ཙམ་གྱིས་ཉོན་མོངས་ཞི་མཛད་པས། །བསྐལ་པ་བསམ་ཡས་ངན་སོང་གནས༌ཀྱང་ཆུང་། །ཁྱོད་ཀྱི་ཞལ་ལྟའི་དོན་དུ་མོས་པར་བགྱི། །ཞིང་རྣམས་སྟོང་གི་རྡུལ་སྙེད་ལུས་བྱས་ཏེ། །དེ་སྙེད་བསྐལ་པ༌བརྒྱུད་དེ་ཁྱོད་འདྲ་བའི། །སྤུ་རྩེ་གཅིག་གི་ཡོན་ཏན་ལེགས་བརྗོད་ཀྱང་། །ལེགས་པའི་མཐར་ཕྱིན་ནམ་དུའང་མི་འགྱུར་རོ། །

དེ་ནས་ཚོང་དཔོན་གྱི་བུ་ནོར་བཟང་གིས། མཚན་མོའི་ལྷ་མོ་དཔྱིད་དང་ལྡན་པ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་ནས། །མཚན་མོའི་ལྷ་མོ་དཔྱིད་དང་ལྡན་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་དཔྱིད་དང་ལྡན་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། །ཡང་དང་ཡང་བལྟས་ཏེ། དགེ་བའི་བཤེས་གཉེན་ལ་བསྙེན་བཀུར་བྱ་བས། མ་ངོམས་བཞིན་དུ་མཚན་མོའི་ལྷ་མོ་དཔྱིད་དང་ལྡན་པའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཅེས་བྱ་བས་བྱང་ཆུབ་སེམས་དཔའི་སྤྱོད་པ་འགྲུབ་པའི་ཆོས་བཅུ་དང་རང་གི་ཆེ་བའི་ཡོན་ཏན་དག་བསྟན་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་དཔྱིད་དང་ལྡན་པ་ཐོག་མ་བྱང་ཆུབ་ཏུ་ཞུགས་པའི་བྱང་ཆུབ་ཀྱི་སེམས་ཀྱི་དཀྱིལ་འཁོར་ཡོངས་སུ་དག་པ་ནི་ཁོང་དུ་ཆུད་པར་བྱེད། བྱང་ཆུབ་སེམས་དཔའི་སྙིང་པོ་ཡང་དག་པར་འབྱུང་བ་ལ་ནི་རྗེས་སུ་དཔྱོད། བྱང་ཆུབ་སེམས་དཔའི་སྨོན་ལམ་རྒྱ་མཚོ་ལ་ནི་ཡོངས་སུ་འཇུག །བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ལམ་ནི་ཡོངས་སུ་སྦྱོང་། བྱང་ཆུབ་སེམས་དཔའི་སའི་དཀྱིལ་འཁོར་ནི་ཡོངས་སུ་གནོན། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ནི་རྒྱ་ཆེར་བྱེད། བྱང་ཆུབ་སེམས་དཔའི་འབྱུང་བ་རྒྱ་མཚོ་ནི་རྗེས་སུ་འབྲང་། ཐམས་ཅད་མཁྱེན་པའི་སྣང་བ་ཆེན་པོ་རྒྱ་མཚོ་ལ་ནི་རྣམ་པར་ལྟ། འགྲོ་བ་ཐམས་ཅད་ཡོངས་སུ་བསྐྱབ་པ་ལ་གཞོལ་བའི་བྱང་ཆུབ་སེམས་དཔའི་སྙིང་རྗེ་ཆེན་པོའི་སྤྲིན་ནི་རྒྱ་ཆེར་བྱེད། མཚན་མོའི་ལྷ་མོ་དཔྱིད་དང་ལྡན་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱི་དཀྱིལ་འཁོར་ནི་ཞིང་ཐམས་ཅད་དུ་ཕྱི་མའི་མཐར་བྱིན༌གྱིས་བརླབ་པས་མངོན་པར་སྒྲུབ་ཅིང་། མཚན་མོའི་ལྷ་མོ་ཀུན་ཏུ་ཟབ༌པའི་དཔལ་དྲི་མ་མེད་པའི་འོད་གང་ན་བ་དེར་སོང་སྟེ། མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ལ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཀྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ས་ལ་སྤྱོད་པ་དང་། ཇི་ལྟར་འབྱུང་བ་དང་། ཇི་ལྟར་ནན་ཏན་དུ༌བགྱི་བ་མ་འཚལ་ཏོ། །

སྨྲས་པ་རིགས་ཀྱི་བུ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་། བྱང་ཆུབ་སེམས་དཔའི་ས་ལ་སྤྱོད་པ་དང་། འབྱུང་བ་དང་ཡོངས་སུ་འགྲུབ་པ་འདྲི་བ་ལེགས་སོ། །ལེགས་སོ། །རིགས་ཀྱི་བུ་ཆོས་བཅུ་དང་ལྡན་པའི་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་གྲུབ་པ་ཡིན་ཏེ།

བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་ཐམས་ཅད་མངོན་དུ་གྱུར་པར་མཐོང་བའི་ཏིང་ངེ་འཛིན་ཐོབ་པ་རྣམ་པར་དག་པ་དང་། སངས་རྒྱས་ཐམས་ཅད་ཀྱི་སྐུ་མཚན་སྣ་ཚོགས་དང་ལྡན་པ་རྣམ་པར་བལྟ་བའི་མིག་རྣམ་པར་དག་པ་དང་། དེ་བཞིན་གཤེགས་པའི་ཁ་དོག་རྒྱ་མཚོ་མཐའ་དང་དབུས་མེད་པ་རྣམ་པར་དམིགས་པར་བྱ་བ་ལ་འཇུག་པ་དང་། སངས་རྒྱས་ཀྱི་ཆོས་སྣང་བའི་དཀྱིལ་འཁོར་རྒྱ་མཚོ་ཚད་མེད་པ་ལ་ཆོས་ཀྱི་དབྱིངས་ཐམས་ཅད༌ཀྱི་ཚད་ཀྱིས་འཇུག་པ་དང་། དེ་བཞིན་གཤེགས་པ་ཐམས་ཅད་ཀྱི་བ་སྤུའི་སྒོ་ནས་འོད་ཟེར་རྒྱ་མཚོ་སེམས་ཅན་ཐམས་ཅད་དང་མཉམ་པ་དང་། སེམས་ཅན་སྣ་ཚོགས་ཀྱི་དོན་དུ་བཀྱེ་བ་ལ་འཇུག་པ་དང་། བ་སྤུའི་བུ་ག་རེ་རེ་ནས་འོད་འཕྲོ་བ་རིན་པོ་ཆེ་ཐམས་ཅད་ཀྱི་ཁ་དོག་དུ་འདུག་པ་རྒྱ་མཚོ་སྟོན་པ་དང་། སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱིས་སྤྲུལ་པ་རྒྱ་མཚོས་ཆོས་ཀྱི་དབྱིངས་ཐམས་ཅད་རྒྱས་པར་བཀང་ཞིང་སེམས་ཅན་འདུལ་བའི་བྱིན་གྱིས་རླབས་ལ་འཇུག་པ་དང་། དེ་བཞིན་གཤེགས་པའི་གསུང་སེམས་ཅན་ཐམས་ཅད་ཀྱི་དབྱངས་ཀྱི་ཡན་ལག་དང་ལྡན་པས། དུས་གསུམ་དུ་བྱུང་བའི་ཆོས་ཀྱི་འཁོར་ལོའི་སྒྲ་སྒྲོག་པས། མདོ་སྡེ་ཐམས་ཅད་ཀྱི་སྤྲིན་གྱི་འབྲུག་སྒྲ་འབྱིན་པའི་དཀྱིལ་འཁོར་ལ་འཇུག་པ་དང་། སངས་རྒྱས་ཀྱི་མཚན་རྒྱ་མཚོ་མཐའ་དང་དབུས་མེད་པ་ལ་འཇུག་པ་དང་། སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་པས་སེམས་ཅན་འདུལ་བ་ལ༌འཇུག་པ་སྟེ། རིགས་ཀྱི་བུ་ཆོས་བཅུ་པོ་འདི་དག་དང་ལྡན་པའི་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་གྲུབ་པ་ཡིན་ནོ། །

རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ། བསམ་གཏན༌ཞི་བའི་བདེ་བས་ཀུན་ཏུ་རྣམ་པར་གནོན་པ་ཐོབ་པ་སྟེ། རིགས་ཀྱི་བུ་ཁོ་མོ་ནི་དེའི་མཐུས། དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱང་མཐོང་སྟེ། དེ་བཞིན་གཤེགས་པ་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པ་ལའང་འཇུག་གོ །འཁོར་གྱི་དཀྱིལ་འཁོར་རྒྱ་མཚོ་དང་། ཏིང་ངེ་འཛིན་མཐའ་དང་དབུས་མེད་པའི་རྣམ་པར་འཕྲུལ་བ་རྒྱ་མཚོ་དང་སྔོན་གྱི་ཚུལ་རྒྱ་མཚོ་དང་། མཚན་རྒྱ་མཚོ་ལའང་འཇུག་གོ །དེ་བཞིན་གཤེགས་པ་དེ་དག་གི་ཆོས་ཀྱི་འཁོར་ལོ་རབ་ཏུ་འཁོར་བ་རྣམ༌པ་ཐ་དད་པ་ལའང་འཇུག་གོ །

དེ་བཞིན་གཤེགས་པའི་སྐུ་ཚེའི་ཚད་སྣ་ཚོགས་དང་། དབྱངས་ཀྱི་ཡན་ལག་རྣམ་པ་ཐ་དད་པ་དང་། དེ་བཞིན་གཤེགས་པ་དེ་དག་གི་ཆོས་ཀྱི་དབྱིངས་མཐའ་དང་དབུས་མེད་པའི་སྐུའང་འཇུག་སྟེ། དེ་བཞིན་གཤེགས་པ་དེ་དག་ལ་དངོས་པོར་མངོན་པར་ཞེན་པའང་མེད་དོ། །

དེ་ཅིའི་ཕྱིར་ཞེ་ན། འཇིག་རྟེན་གྱི་ཁམས་ཐམས་ཅད་དུ་བཞུད་པ་འགགས་པའི་ཕྱིར། དེ་བཞིན་གཤེགས་པ་དེ་དག་ནི་བཞུད་པ་མེད་པའོ། །རང་བཞིན་གྱིས་བྱུང་བ་མེད་པས་ན། དེ་བཞིན་གཤེགས་པ་དེ་དག་ནི་བྱོན་པ་མེད་པའོ། །མི་སྐྱེ་བའི་ཆོས་ཉིད་དང་། མཉམ་པའི་སྐུ་མངའ་བའི་ཕྱིར། དེ་བཞིན་གཤེགས་པ་དེ་དག་ནི་མ་སྐྱེས་པའོ། །མི་སྐྱེ་བའི་མཚན་ཉིད་དང་ལྡན་པའི་ཕྱིར། དེ་བཞིན་གཤེགས་པ་དེ་དག་ནི་མ་འགགས་པའོ། །སྒྱུ་མའི་རྣམ་པ་ལྟ་བུར་མཐོང་ཞིང་རྣམ་པར་དམིགས་པའི་ཕྱིར། དེ་བཞིན་གཤེགས་པ་དེ་དག་ནི་མི་བདེན་པ་མ་ཡིན་པའོ། །འགྲོ་བ་ཐམས་ཅད་ཀྱི་དོན་དུ་བྱུང་བའི་ཕྱིར། དེ་བཞིན་གཤེགས་པ་དེ་དག་ནི་རྫུན་པ་མ་ཡིན་པའོ། །ཤི་འཕོ་དང་སྐྱེ་བ་ལས་རྣམ་པར་འདས་པའི་ཕྱིར། དེ་བཞིན་གཤེགས་པ་དེ་དག་ནི་འཕོ་བ་མེད་པའོ། །ཆོས་ཀྱི་རང་བཞིན་གྱིས་འཇིག་པ་མེད་པའི་ཆོས་ཉིད་ཡིན་པའི་ཕྱིར་དེ་བཞིན་གཤེགས་པ་དེ་དག་ནི་འཇིག་པ་མེད་པའོ། །ངག༌གི་ལམ་ཐམས་ཅད་ལས་ཡོངས་སུ་འདས་པའི་ཕྱིར། དེ་བཞིན་གཤེགས་པ་དེ་དག་ཐམས་ཅད་ནི་མཚན་ཉིད་གཅིག་པའོ། །ཆོས་ཀྱི་མཚན་ཉིད་ཀྱི་རང་བཞིན་གྱི་མཐར༌ཐུག་པས། དེ་བཞིན་གཤེགས་པ་དེ་དག་ནི་མཚན་ཉིད་མི་མངའ་བའོ། །རིགས་ཀྱི་བུ་ཁོ་མོ་ནི་དེ་ལྟར་དེ་བཞིན་གཤེགས་པ་ཐམས་ཅད་ཁོང་དུ་ཆུད་པར་བྱེད་ཅིང་། བྱང་ཆུབ་སེམས་དཔའི་རྣམ་པར་ཐར་པ་བསམ་གཏན༌ཞི་བའི་བདེ་བས་ཀུན་ཏུ་རྣམ་པར་གནོན་པ་འདི་དེ་བཞིན་གཤེགས་པའི་བསམ་གཏན་གྱི་དཀྱིལ་འཁོར་སྣང་བས་ཤིན་ཏུ་རྒྱ་ཆེར་བྱེད་དོ། །ཤིན་ཏུ་ཡངས་པར་བྱེད་དོ། །ཁོང་དུ་ཆུད་པར་བྱེད་དོ། །རྟོགས་པར་བྱེད་དོ། །མཉམ་པར་བྱེད་དོ། །མངོན་པར་སྒྲུབ་བོ། །གཞི་སྙོམས་པར་བྱེད་དོ། །རབ་ཏུ་འཇུག་གོ །རྣམ་པར་འཕེལ་བར་བྱེད་དོ། །ངེས་པར་སེམས་སོ། །ཉེ་བར་རྟོག་གོ །དྲན་པར་བྱེད་དོ། །སྤྱོད་ཡུལ་དུ་བྱེད་དོ། །བརྟན་པར་བྱེད་དོ། །སྣང་བར་བྱེད་དོ། །རབ་ཏུ་བརྗོད་དོ། །རྣམ་པར་དཔྱོད་དོ། །རྣམ་པར་འབྱེད་དོ། །ཚོགས་སུ་བྱེད་དོ། །ཡིད་ཆེས་པར་བྱེད་དོ། །ཡོངས་སུ་རྟོག་པ་ཐམས་ཅད་རྒྱུ་བ་མེད་པའི་སྙིང་རྗེ་ཆེན་པོ་དེ་ལ་གནས་ཏེ། སེམས་ཅན་ཐམས་ཅད་ཡོངས་སུ་བསྐྱབ་པ་ལ་ཡང་དག་པར་སྤྱད་པར་སེམས་རྩེ་གཅིག་ཏུ་བྱ་བའི་ཕྱིར་བསམ་གཏན་དང་པོ་སྒོམ་མོ། །ཡིད་ཀྱི་ལས་ཐམས་ཅད་ཉེ་བར་ཞི་བར་བྱ་བ་དང་། ཡེ་ཤེས་ཀྱི་སྟོབས་དང་། མཐུས་སེམས་ཅན་ཐམས་ཅད་ཡོངས་སུ་བསྡུ་བ་ལ་དགའ་བའི་བདེ་བ་ལ་སེམས་རྩེ་གཅིག་ཏུ་བྱ་བའི་ཕྱིར། བསམ་གཏན་གཉིས༌པ་སྒོམ་མོ། །འཁོར་བར་ལོག་པར་ཞུགས་པ་ལ་བཏང་སྙོམས་སུ་བྱས་ཏེ། སེམས་ཅན་ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བའི་ཕྱིར། བསམ་གཏན་གསུམ་པ་སྒོམ་མོ། །སེམས་ཅན་ཐམས་ཅད་ཀྱི་ཉོན་མོངས་པ་དང་། སྡུག་བསྔལ་རབ་ཏུ་ཞི་བར་བྱ་བའི་ཕྱིར་བསམ་གཏན་བཞི་པ་སྒོམ་མོ། །ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་དཀྱིལ་འཁོར་ཤིན་ཏུ༌ཡོངས་པར་བྱ་བ་དང་། ཏིང་ངེ་འཛིན་རྒྱ་མཚོ་ཐམས་ཅད་མངོན་པར་སྒྲུབ་པ་ལ་མཁས་པར་བྱ་བ་དང་། བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོ་ཐམས་ཅད་ཀྱི་ཚུལ་ལ་འཇུག་པར་བྱ་བ་དང་། བྱང་ཆུབ་སེམས་དཔའི་རྣམ་པར་རྩེ་བའི་ཡེ་ཤེས་ཐམས་ཅད་མངོན་པར་ཤེས་པར་བྱ་བ་དང་། བྱང་ཆུབ་སེམས་དཔའི་སྤྱོད་པས་རྣམ་པར་འཕྲུལ་པ་ཐམས་ཅད་མངོན་པར་བསྒྲུབ་པར་བྱ་བའི་ཕྱིར། སྒོ་ཀུན་ནས་ཆོས་ཀྱི་དབྱིངས་ལ་འཇུག་པའི་ཡེ་ཤེས་ཀྱི་ཚུལ་ཡོངས་སུ་སྦྱོང་ཞིང་། བྱང་ཆུབ་སེམས་དཔའི་རྣམ་པར་ཐར་པ་བསམ་གཏན་ཞི་བའི་བདེ་བས་ཀུན་ཏུ་རྣམ་པར་གནོན་པ་འདི་སྒོམ་མོ། །རིགས་ཀྱི་བུ་དེ་ལྟར་ཁོ་མོ་རྣམ་པར་ཐར་པ་འདི་སྒོམ་ཞིང་ཐབས་སྣ་ཚོགས་ཀྱིས་སེམས་ཅན་ཡོངས་སུ་སྨིན་པར་བྱེད་དེ། འདི་ལྟར་ནུབ་མོ་ཞི་བར་གྱུར་པའི་ཚེ་དགའ་བ་ལ་མོས་པའི་སེམས་ཅན་རྣམས་ཀྱིས་མི་སྡུག་པའི་འདུ་ཤེས༌བསྐྱེད་དོ། །

མི་དགའ་བའི་འདུ་ཤེས་དང་། ཡོངས་སུ༌སྐྱོ་བའི་འདུ་ཤེས་དང་། བགེགས་སུ་འགྱུར་བའི་འདུ་ཤེས་དང་། འཆིང་བའི་འདུ་ཤེས་དང་། སྲིན་མོའི་འདུ་ཤེས་དང་། མི་རྟག་པའི་འདུ་ཤེས་དང་། སྡུག་བསྔལ་བའི་འདུ་ཤེས་དང་། བདག་མེད་པའི་འདུ་ཤེས་དང་། རྗེ་མེད་པའི་འདུ་ཤེས་དང་། གཞན་ལ་རག་ལས་པའི་འདུ་ཤེས་དང་། རྒ་ཤིའི་འདུ་ཤེས་དང་། འདོད་པའི་ཡུལ་དང་ལོངས་སྤྱོད་ཐམས་ཅད་ལ་དགའ་བ་མེད་པའི་འདུ་ཤེས་བསྐྱེད་དེ། སེམས་ཅན་དེ་དག་ཀྱང་སེམས་དེ་ལ་ཡོངས་སུ་སྒོམ་པས། འདོད་པའི་དགའ་བ་ཐམས་ཅད་ལ། མངོན་པར་དགའ་བ་མེད་པས་ཆོས་ལ་མོས་པའི་དགའ་བ་ལ་འཇུག་ཅིང་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་། །དེ་དག་དགོན་པ་ལ་གནས་པའི་ཚེའང་ཆོས་དང་མཐུན་པའི་དད་པ་ཡོངས་སུ་བསྐྱེད་དེ། སྒྲ་ཆེན་པོ་འཇིགས་པ་མི་སྙན་པའི་སྒྲ་སྐད་ཐམས་ཅད་ཀྱང་ཞི་བར་བྱེད་དོ། །མཚན་མོ་ཞི་བར་གྱུར་པ་ལས་སངས་རྒྱས་ཀྱི་ཆོས་ཟབ་མོ་ཡང་ཡང་དག་པར་སྟོན་ཏོ། །སྤང་བ་དང་མཐུན་པའི་རྐྱེན་ཡང་ཉེ་བར་སྟོན་ཏོ། །ཁྱིམ་གྱི་སྒོ་ཡང་རྣམ་པར་འབྱེད་དོ། །ལམ་ཡང་ཡོངས་སུ་སྟོན་ཏོ། །སྣང་བས་ཀྱང་མངོན་པར་བྱེད་དོ། །མུན་པས་ཆོད་པ་ཡང་རྣམ་པར་སེལ་ཏོ། །འཇིགས་པའང་མེད་པར་བྱེད་དོ། །རབ་ཏུ་བྱུང་བ་ལ་ཡང་ཡང་དག་པར་བསྔགས་པ་བྱེད་དོ། །སངས་རྒྱས་ཀྱི་ལེགས་པའང་བརྗོད་དོ། །ཆོས་ཀྱི་ལེགས་པ་དང་། དགེ་འདུན་གྱི་ལེགས་པ་དང་། དགེ་བའི་བཤེས་གཉེན་གྱི་ལེགས་པ་ཡང་བརྗོད་དོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ལའང་བསྔགས་པ་བྱེད་དོ། །

རིགས་ཀྱི་བུ་ཁོ་མོ་རྣམ་པར་ཐར་པ་འདི་ལ་སྒོམ་ཞིང་སེམས་ཅན་རྣམས་ཀྱི་ཆོས་མ་ཡིན་པའི་འདོད་ཆགས་ཀྱིས་ཞེན་པ་རྣམས་ཀྱི་ཆོས་མ་ཡིན་པའི་འདོད་ཆགས་ཀྱི་ཡོངས་སུ་རྟོག་པ་རྣམས་ཀྱང་མེད་པར་བྱེད་དོ། །ཚུལ་མ་ཡིན་པའི་འདོད་པས་ནོན་པ་རྣམས་དང་། ལོག་པར་ཡོངས་སུ་རྟོག་པའི་སྤྱོད་ཡུལ་ཅན་རྣམས་ཀྱི་ཡོངས་སུ་རྟོག་པ་དེ་དག་དང་ཡིད་ལ་བྱ་བ་དེ་དག་ཀྱང་མེད་པར་བྱེད་དོ། །སྡིག་ཏོ་མི་དགེ་བའི་ཆོས་མ་སྐྱེས་པ་རྣམས་མི་སྐྱེ་བ་དང། སྡིག་ཏོའི་ཡོངས་སུ་རྟོག་པ་སྐྱེས་པར་གྱུར་པ་རྣམས་ཀྱང་མེད་པར་འགྱུར་བའི་རྐྱེན་ཉེ་བར་སྒྲུབ་བོ། །དགེ་བའི་ཡོངས་སུ༌རྟོག་པའི་ཕ་རོལ་ཏུ་ཕྱིན་པ་དང་ལྡན་པ་དང་། སྤྱོད་པ་དང་ལྡན་པ་དང་། ཐམས་ཅད་མཁྱེན་པའི་ཡེ་ཤེས་སུ༌འབྱུང་བའི་སྨོན་ལམ་མངོན་པར་བསྒྲུབ་པ་དང་ལྡན་པ་དང་། བྱམས་པའི་ཚུལ་དང་ལྡན་པ་དང་། སེམས་ཅན་རྣམས་ལ་སྙིང་རྗེ་ཆེན་པོས་རྒྱས་པར་འགེངས་པ་དང་ལྡན་པ་དང་། ལྷ་དང་མིའི་བདེ༌བ་རྣམ་པ་སྣ་ཚོགས་ཡོངས་སུ་བསྐྱེད་པ་དང་། ལྡན་པའི་ཡོངས་སུ་རྟོགས་པ་བསྐྱེད་པ་དང་། སྐྱེས་ནས་ཀྱང་ཚུལ་སྣ་ཚོགས་ཀྱི་རྐྱེན་ཉེ་བར་བསྒྲུབ་པར་བྱེད་པ་ནས་ཐམས་ཅད་མཁྱེན་པ་ཉིད་དང་མཐུན་པའི་རྐྱེན་ཀྱང་ཉེ་བར་སྒྲུབ་པ་བྱེད་དེ། རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་བསམ་གཏན༌ཞི་བའི་བདེ་བས་ཀུན་ཏུ་རྣམ་པར་གནོན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་བྱུང་བའི་བྱང་ཆུབ་སེམས་དཔའ༌རྣམ་པ་མཐའ་ཡས་པའི་ཆོས་ཀྱི་དབྱིངས་ཀྱི་ཡེ་ཤེས་རབ་ཏུ་ཐོབ་པ། དགེ་བའི་རྩ་བ་ཐམས་ཅད་ཀྱིས་རྣམ་པར་སྤེལ་བའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མཐུས་སེམས་ཀྱི་སྣང་བ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཡུལ་ལ་གནས་པའི་སེམས་དང་ལྡན་པ། གནས་ཐམས་ཅད་དུ་སྒྲིབ་པ་མེད་པའི་སེམས་དང་ལྡན་པ། ཐམས་ཅད་མཁྱེན་པ་ཉིད་ཀྱི་སྨོན་ལམ་ཡོངས་སུ་རྫོགས་པའི་སེམས་དང་ལྡན་པ། ཞིང་རྒྱ་མཚོ་ཐམས་ཅད་དུ་ཞུགས་པའི་སེམས་དང་ལྡན་པ། སངས་རྒྱས་རྒྱ་མཚོ་ཐམས་ཅད་མཐོང་བར་བྱ་བ་ལ་ཞུགས་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་ཡང་དག་པར་གཟུང་བའི་སེམས་དང་ལྡན་པ་སེམས་ཅན་ཐམས་ཅད་ཀྱི་མ་རིག་པའི་མུན་པ་རྣམ་པར་སེལ་བ། འཁོར༌བའི་བདེ་བ་ལ་དགའ་ཞིང་སྲེད་པ་ཟད་ཅིང་མཐར་ཕྱིན་པར༌འགྱུར་བའི་ལམ་གྱིས། ཐམས་ཅད་མཁྱེན་པ་ཉིད་དུ་སྣང་བ་སྐྱེད་པའི་སེམས་དང་ལྡན་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་འདི་ཉིད་ན་ང་དང་ཡང་རྒྱང་མི་རིང་སྟེ། རྣམ་པར་སྣང་མཛད་ཀྱི་སྙིང་པོ་བྱང་ཆུབ་ཀྱི་གཡས་རོལ་ཅིག་ན། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ལམ་ལ་བརྩོན་པར་བྱ་བ་དྲིས་ཤིག །

དེ་ནས་མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཀྱིས་དེའི་ཚེ། བྱང་ཆུབ་སེམས་དཔའི་རྣམ་པར་ཐར་པ་བསམ་གཏན༌ཞི་བའི་བདེ་བས་ཀུན་ཏུ་རྣམ་པར་གནོན་པ་འདི་ཉིད་བརྣན་ཏེ། བསྟན་པར་བྱ་བའི་ཕྱིར། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། དུས་རྣམས་ཀུན་ཏུ་བྱུང་བའི་བདེ་གཤེགས་རྣམས། །མངོན་དུ་བྱ་བར་མོས་པའི་སེམས༌དང་ལྡན། །དེ་དག་མིག་ཡངས་རྣམ་པར་དག་པར་འགྱུར། །དེས་ནི་སངས་རྒྱས་རྒྱ་མཚོ་མཐོང་བར་འོང་། །རྒྱལ་བའི་སྐུ་གསལ་དྲི་མ་མེད་ལ་ལྟོས། །མཚན་གྱིས་ཡོངས་སུ་རྒྱན་པས་ཤིན་ཏུ་མཛེས། །རྒྱལ་བའི་རྣམ་པར་འཕྲུལ་པ་ཆོས་དབྱིངས་རྣམས། །སྐད་ཅིག་རེ་རེས་རྒྱས་འགེངས་དེ་ལའང་ལྟོས། །བྱང་ཆུབ་ཤིང་དྲུང་སངས་རྒྱས་གདན་རབ་ལ། །བདེ་གཤེགས་རྣམ་པར་སྣང་མཛད་མངོན་སངས་རྒྱས། །ཆོས་དབྱིངས༌ཡངས་པ་རྒྱས་པ་ཁྱབ་མཛད་ཅིང་། །འགྲོ་བའི་བསམ་པ་ཇི་བཞིན་འཁོར་ལོ་བསྐོར། །རྒྱལ་བས་ཆོས་ཉིད་ལུས་མེད་རབ་ཞི་བ། །གཉིས་མེད་རང་བཞིན་མེད་པ་ཐུགས་ཆུད་ནས། །གཟུགས་སྐུ་བཟང་པོ་མཚན་གྱིས་བརྒྱན་པ་ཡིས། །འགྲོ་བ་མ་ལུས་བཀང་ཞིང་སྟོན་པ་མཛད། །སངས་རྒྱས་སྐུ་ནི་རྒྱ་ཆེ་བསམ་མི་ཁྱབ། །ཆོས་ཀྱི་དབྱིངས་ཀུན་ཡོངས་སུ་རྒྱས་བཀང་ཞིང་། །དེ་ནི་ཀུན་ཏུ་མཉམ་པར་སྣང་བ་སྟེ། །རྒྱལ་བ་ཐམས་ཅད་ཀུན་ཏུ་སྟོན་པ་མཛད། །ཞིང་རྣམས་ཀུན་གྱི་རྡུལ་རབ་ཕྲ་བ་སྙེད། །འོད་ཀྱི་དཀྱིལ་འཁོར་མངའ་བའི་སངས་རྒྱས་སྐུ། །ཁ་དོག་བཟང་པོ་གཞན་དང་གཞན་སྣང་བས། །ཆོས་དབྱིངས་རྒྱས་པར་སྐད་ཅིག་རེ་རེས་འགེངས། །རྒྱལ་བའི་བ་སྤུའི་སྒོ་ནས་འོད་ཟེར་སྤྲིན། །རྒྱ་ཆེ་བསམ་ཡས་མི་ཟད་མངོན་འབྱུང་བ། །དེ་དག་འགྲོ་བ་མ་ལུས་འགེངས་བྱེད་ཅིང་། །སྲོག་ཆགས་རྣམས་ཀྱི་ཉོན་མོངས་གདུང་བ་སེལ། །སངས་རྒྱས་སྤྲུལ་པ་རྒྱ་མཚོ་མི་ཟད་པ། །རྒྱལ་བའི༌སྤུ་ཡི་འཁོར་ནས་ཡོངས་སྟོན་ཅིང་། །ཆོས་དབྱིངས་ཡངས་པ་རྒྱས་པར་ཀུན་བཀང་སྟེ། །སྲོག་ཆགས་རྣམས་ཀྱི་སྡུག་བསྔལ་ངན་སོང་སེལ། །སངས་རྒྱས་གསུང་སྙན་རབ་ཏུ་སྒྲོག་མཛད་པ། །དབྱངས་ཀྱི་ཡན་ལག་རྒྱ་མཚོའི་སྒྲ་འོད་ཅན། །ཆོས་ཆར་ཆེན་པོ་རབ་ཏུ་འབེབས་པ་མཛད། །སྲོག་ཆགས་བྱང་ཆུབ་བསམ་པ་ཡོངས་སུ་སྐྱེད། །བསྐལ་པ་རྒྱ་མཚོ་སྤྱད་པ་སྤྱོད་པའི་ཚེ། །འདིས་ནི༌སྔན་ཅད་ཡོངས་སུ་གཟུང་མཛད་པ། །དེ་དག་ཀུན་གྱི་རྒྱལ་བ་རྣམ་པར་སྣང་མཛད་པ། །ཞིང་རྣམས་ཀུན་ཏུ་གཟུགས་བརྙན་མཚན་ཉིད་མཐོང་། །དེ་བཞིན་གཤེགས་པ་འཇིག་རྟེན་ཀུན་ཏུ་འབྱུང་། །སེམས་ཅན་རེ་རེ་ཀུན་ལའང་མངོན་པར་བཞུགས། །མོས་པའི་ཚུལ་བཞིན་སྤྱོད་ཡུལ་གཞན་དང་གཞན། །དེ་དག་ཁོ་མོས་ཀུན་ཏུ་ཤེས་མི་ནུས། །རྒྱལ་སྲས་དམ་པ་ཐམས་ཅད་མ་ལུས་པར། །བདེ་གཤེགས་བ་སྤུ་གཅིག་གི་རྩ་ལས་འབྱུང་། །རྣམ་ཐར་དེ་ལ་གང་རྣམས་བསམ་ཡས་པ། །དེ་དག་ཐམས་ཅད་ཁོ་མོས་ཤེས་མི་ནུས། །ཁོ་མོའི་འདབ་ན་གནས་པའི་ལྷ་མོ་འདི། །འཇིག་རྟེན་མགོན་ལ་མངོན་གྱུར་རབ་ཏུ་དགའ། །མིང་དུ་སྣང་བ་འོད་འཕྲོ་མིག་ཅེས་བྱ། །དེ་ལ་བྱང་ཆུབ་སྤྱོད་པ་ཅི་འདྲ་དྲིས། །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། མཚན་མོའི་ལྷ་མོ་ཀུན་ཏུ་ཟབ་པའི་དཔལ་དྲི་མ་མེད་པའི་འོད་ཀྱི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ཞེས་བྱ་བས་གཞོན་ནུ་ནོར་བཟང་ལ་རང་གི་སྐུ་ལུས་ཀྱི་སྤྲུལ་བའི་བཀོད་པ་ཚད་མེད་པ་དག་བསྟན་ཅིང་ཡོན་ཏན་དེ་དག་གི་རྒྱུ་རྐྱེན་བསྟན་པའི་སྐོར། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་དགེ་བའི་བཤེས་གཉེན་གྱི་གདམས་ངག་གི་བྱིན་གྱིས་བརླབས་པ། དགེ་བའི་བཤེས་གཉེན་གྱི། ཚིག་ལ་ནན་ཏན་དུ་བྱ་བའི་སེམས་ཡང་དག་པར་སྐྱེས་པ། དགེ་བའི་བཤེས་གཉེན་གྱི་སྨན་པ་ལ་ནད་པ་ལྟ་བུའི་འདུ་ཤེས་ཀྱིས་ཡོངས་སུ་སྤྱད་པའི་སེམས་དང་ལྡན་པ། དགེ་བའི་བཤེས་གཉེན་མཐོང་བ་ཡིད་ལ་བྱེད་པ་མ་འཁྲུགས་པའི་སེམས་དང་ལྡན་པ། དགེ་བའི་བཤེས་གཉེན་བལྟ་བ་ལ་བསྒྲིབས་པའི་རི་ཐམས་ཅད་རྣམ་པར་གཏོར་བའི་གླགས་རྙེད་པའི་སེམས་དང་ལྡན་པ། དགེ་བའི་བཤེས་གཉེན་མཐོང་བ་ལ་སེམས་ཅན༌གྱི་ཁམས་ཐམས་ཅད་ཡོངས་སུ་བསྐྱབ་པའི་སྙིང་རྗེ་ཆེན་པོའི་ཚུལ་རྒྱ་མཚོ་ལ་འཇུག་པ་ཐོབ་པའི་སེམས་དང་ལྡན་པ། དགེ་བའི་བཤེས་གཉེན་མཐོང་བ་ལ་ཆོས་ཀྱི་དབྱིངས་ཀྱི་ཚུལ་རྒྱ་མཚོའི་ཡེ་ཤེས་སྣང་བ་རབ་ཏུ་ཐོབ་པའི་སེམས་དང་ལྡན་པ་དེ། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་གང་ན་བ་དེར་སོང་ངོ་། །དེ་ནས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བས། ཚོང་དཔོན་གྱི་བུ་ནོར་བཟང་དེ་བས་ཀྱང་དགེ་བའི་བཤེས་གཉེན་གྱི་དྲུང་དུ་འགྲོ་བ་དགེ་བའི་རྩ་བའི་ཚོགས་ལས་བྱུང་བས་ཡོངས་སུ་སྨིན་པར་བྱ་བའི་ཕྱིར། དགེ་བའི་བཤེས་གཉེན་གྱི་དྲུང་དུ་འགྲོ་བ་ཚོགས་ཆེན་པོ་ལས་བྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་རྣམ་པར་གནོན་པ་ཆེན་པོར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་བརྩོན་འགྲུས་ཀྱི་ལས་འཇུག་པར་དཀའ་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་བསྡད་ཅིང་ཤིན་ཏུ་ལེགས་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ཕྱོགས་མཐའ་དང་དབུས་མེད་པ་ལ་འཇུག་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ཡུན་རིང་པོར་གནས་པས་བྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་དོན་མཐའ་ཡས་པ་ཡོངས་སུ་རྫོགས་པའི་རྣམ་པར་དམིགས༌པ་འབྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ལམ་གྱི་རྒྱན་མཐའ་དང་དབུས་མེད་པའི་ཚོགས་ཀྱིས་ཡོངས་སུ་གནོན་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་སྒོ་ཀུན་ནས་རྣམ་པར་གནོན་པས་བྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་གཡོ་བ་མེད་པར་འོང་བས་རྣམ་པར་གནོན་པར་བྱིན་གྱིས་བརླབས་སོ། །

དེ་ནས་ཚོང་དཔོན་གྱི་བུ་ནོར་བཟང་ཐམས་ཅད་མཁྱེན༌པའི་ཚོགས་ཀྱི་བརྩོན་འགྲུས་ལ་རབ་ཏུ་བརྩོན་པས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་སྨོན་ལམ་ཆེན་པོ་རྒྱ་མཚོ་མངོན་པར་བསྒྲུབ་པའི་རྣམ་པར་གནོན་པས་དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། སེམས་ཅན་གཅིག་གི་དོན་དུ་ཕྱི་མའི་མཐའི་བསྐལ་པའི་མུར་ཐུག་པར་སྡུག་བསྔལ་ཉམས་སུ༌བླང་བའི་ཞེ་ནོན་པས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། རྡུལ་ཤིན་ཏུ་ཕྲ་བ་གཅིག་ལ་ཆོས་ཀྱི་དབྱིངས་ཐམས་ཅད་དུ་སྒྲ་སྒྲོག་ཅིང་ཡུན་རིང་པོར་གནས་པའི་རྣམ་པར་གནོན་པ་དང་། བརྩོན་འགྲུས་ཆེན་པོའི་གོ་བགོས་པས་དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། ཕྱོགས་རྒྱ་མཚོ་འབྱམས་ཀླས་པ་ཐམས་ཅད་དུ་ཤུགས་ཀྱིས་འགྲོ་བས་དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། བ་སྤུའི་སྦུབས་གཅིག་ཏུ་ཕྱི་མའི་མཐའི་བསྐལ་པར་བྱང་ཆུབ་སེམས་དཔའི་སྤྱོད་པ་ལ་གནས་པས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། བྱང་ཆུབ་སེམས་དཔའི་སྤྱོད་པ་ལ་གནས་ནས་ཀྱང་སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པའི་ཡེ་ཤེས༌འགེངས་པ་ལ་གནས་པར་བྱ་བས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། དུས་གསུམ་དུ་གཤེགས་པའི་དེ་བཞིན་གཤེགས་པའི་རྣམ་པར་འཕྲུལ་པའི་རྒྱན་དང་། ལམ་ཡོངས་སུ་གནོན་པར་ཞེ་ནོན་པས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། ཆོས་ཀྱི་དབྱིངས་ཀྱི་ཚུལ་གྱིས་རྒྱུན་ཏུ་ཞུགས་པའི་ལམ་ཡོངས་སུ་གནས་པས། དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། ཆོས་ཀྱི་དབྱིངས་ཀྱི་ཚུལ་ཐམས་ཅད་ལ་དམིགས་པ་ལས་མ༌གཡོས་པར། ཆོས་ཀྱི་དབྱིངས་ཀུན་ཏུ་རྒྱས་པར་འགེངས་པས་དགེ་བའི་བཤེས་གཉེན་གྱི་དྲུང་དུ་འགྲོ་བས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་གང་ན་བ་དེར་ཕྱིན་པ་དང་། དེས་མཚན་མོའི༌ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ། བཅོམ་ལྡན་འདས༌ཀྱི་འཁོར་གྱི་དཀྱིལ་འཁོར་ན་སེང་གེའི་ཁྲི་མེ་ཏོག་གི་སྙིང་པོ་ཅན་ལ་འདུག་ཅིང་། བྱང་ཆུབ་སེམས་དཔའི་ཏིང་ངེ་འཛིན་ཀུན་ཏུ་བཟང་པོའི་དགའ་བ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་ལ། མཉམ་པར་བཞག་པ་མཐོང་ངོ་། །

དེའི་བ་སྤུའི་བུ་ག་ཐམས་ཅད་ནས་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པའི་སྤྱོད་པ་མངོན་པར་སྟོན་པའི་སྤྲིན་སེམས་ཅན་ཐམས་ཅད། མངོན་པར་དགའ་བ། སེམས་ཅན་ཐམས་ཅད་ཀྱི་ཡིད་དུ་འོང་བ། སེམས་ཅན་ཐམས་ཅད་ཀྱིས་བལྟ་ན་ཉམས་སུ་བདེ་བ། སེམས་ཅན་ཐམས་ཅད་ཀྱིས་ལྟ་ན་སྡུག་པ་རྣམ་པ་སྣ་ཚོགས་འབྱུང་བ་ཡང་མཐོང་སྟེ། འདི་ལྟར་སེམས་ཅན་ཐམས་ཅད་ལ་ཕན་གདགས་ཤིང་རྩོད་པ་མེད་པར་བྱ་བ་དང་། དངོས་པོ་ཐམས་ཅད་ལ༌ཕངས་པར་རྩི་བ་མེད་པར་བྱ་བ་དང་། སེམས་ཅན་ཐམས་ཅད་ལ་སྦྱོར་བ་མཚུངས་པས་ཡོངས་སུ་གཏང་བར་བྱ་བ་དང་། སེམས་ཅན་ཐམས་ཅད་ལ་མཉམ་པའི་སེམས་སུ་བྱ་བ་དང་། སེམས་ཅན་ཐམས་ཅད་ལ་བརྙས་པ་མེད་པར་ཡོངས་སུ་གཏང་བ་དང་། ནང་དང་ཕྱིའི་དངོས་པོ་ཐམས་ཅད་ཡོངས་སུ་གཏང་བ་དང་དགའ་བ་ཆེན་པོ་ཡོངས་སུ་གཏང་བར་བསྟན་པ་དང་། འཇིག་རྟེན་ཐམས་ཅད་དུ་སེམས་ཅན་གྱི་བསམ་པ་ཇི་བཞིན་གྱི་སྦྱིན་པའི་སྤྱོད་པ་ཡོངས་སུ་བསྟན་པར་བྱ་བའི་ཕྱིར། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་དང་མཐུན་པའི་སྒྲས་སྦྱིན་པའི་སྤྱོད་པ་ཡོངས་སུ་སྟོན་པའི་སྤྲིན་དང་། དུས་གསུམ་དུ་བྱུང་བའི་བྱང་ཆུབ་སེམས་དཔའ་རྣམས་གཏང་བར་དཀའ་བ་ཡོངས་སུ་གཏོང་བའི་སྤྲུལ་པ་བསམ་གྱིས་མི་ཁྱབ་པའི་སྤྲིན་འཐོན་ནས། ཕྱོགས་བཅུའི་འཇིག་རྟེན་གྱི་ཁམས་འབྱམས་ཀླས་པར་གཏོགས་པའི་སེམས་ཅན་ཐམས་ཅད་ཀྱིས་རྣམ་པར་དམིགས་པར༌གྱུར་པ་མཐོང་ངོ་། །འདི་ལྟ་སྟེ། བྱང་ཆུབ་སེམས་དཔའི་ཁྱུ་མཆོག་གི་མཐུ་ཕྱུང་བ་དང་། རྣམ་པར་འཕྲུལ་པ་བསམ་གྱིས་མི་ཁྱབ་པ་ཐོབ་པས། བ་སྤུའི་བུ་ག་ཐམས་ཅད་ནས། སེམས་ཅན་ཐམས་ཅད་དང་མཉམ་པའི་སྐྱེ་བ་སྣ་ཚོགས་སུ་སྤྲུལ་པའི་ལུས་ཀྱི་སྤྲིན་མངོན་པར༌འཐོན་ཏེ། འཇིག་རྟེན་གྱི་ཁམས་ཐམས་ཅད་དུ། གཏོགས་པའི་སེམས་ཅན་ཐམས་ཅད་ལ་རྒྱས་པར་ཁྱབ་པར་བྱས་ནས། མངོན་སུམ་དུ་བརྟུལ་ཞུགས་ཐམས་ཅད་ཀྱི་ཡིད་དམ་ལས་མི་གཡོ་བར་ཡོངས་སུ་བསྟན་པ་དང་། སེམས་ཅན་གྱི་ཁམས་དང་མཉམ་པའི་དཀའ་ཐུབ་དང་། བརྟུལ་ཞུགས་ཀྱི་དཀྱིལ་འཁོར་སྣ་ཚོགས་རབ་ཏུ་སྟོན་པ་དང་། འཇིག་རྟེན་ཐམས་ཅད་དུ་གནས་པ་མེད་པ་དང་། ཡུལ་ཐམས་ཅད་ལ་ལྟོས་པ་མེད་པ་དང་། འཁོར་བ་ཐམས་ཅད་དུ་གནས་པ་ལས་ཕྱིར་ཕྱོགས་པ་དང་། ལྷ་དང་མིའི་ཕུན་སུམ་ཚོགས་པ་རྒུད་པའི་སྒོར་གཞོལ་བ་ཡོངས་སུ་སྟོན་པ་དང་། མི་སྡུག་པའི་དཀྱིལ་འཁོར་རབ་ཏུ་སྟོན་པ་དང་། འཇིག་རྟེན་གྱི་སྡུག་པའི་འདུ་ཤེས་ཀྱིས་ཕྱིན་ཅི་ལོག་རྣམ་པར་བཟློག་པ་དང་། མི་རྟག་པ་དང་། གཡོ་བ་དང་། འཇིག་པ་དང་། འགྱུར་བའི་ཆོས་ཉིད་ཡོངས་སུ་སྟོན་པ་དང་། འདུ་བྱེད་ཐམས་ཅད་ཀྱི་ཆོས་ཉིད་སྡུག་བསྔལ་ཞིང་བདག་མེད་པ་ཡོངས་སུ་སྟོན་པ་དང་། དེ་བཞིན་གཤེགས་པའི་ཡུལ་ལ་གནས་པ་དང་། མི་འབྲལ་བར་མོས་པར་བྱེད་པ་དང་། དེ་བཞིན་གཤེགས་པའི་ཚུལ་ཁྲིམས་ཤིན་ཏུ་དག་པར་བྱ་བའི་ཕྱིར། སེམས་ཅན་རྣམས་ལ་ཡང་དག་པར་བསྐུལ་བ་དང་། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་གྱི་སྒྲས་ཚུལ་ཁྲིམས་ཀྱི་སྤྱོད་པ་ཡོངས་སུ་སྟོན་པ་དང་། སེམས་ཅན་ཐམས་ཅད་ཡོངས་སུ་ཚིམ་པར་བྱེད་པའི་ཚུལ་ཁྲིམས་ཀྱི་དྲི་ཞིམ་པོ་ཡོངས་སུ་སྟོན་པར་བྱེད་ཅིང་། སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ནས་སེམས་ཅན་ཐམས་ཅད་དང་མཉམ་པའི་ལུས་ཁ་དོག་སྣ་ཚོགས་སུ་སྤྲུལ་པའི་སྤྲིན༌འཐོན་ཏེ། ཡན་ལག་དང་ཉིང་ལག་ཐམས་ཅད་ཀྱང་ཉམས་སུ་བཟོད་པ་སེམས་ཅན་ཐམས་ཅད་ལ་ཡོངས་སུ་སྟོན་པ། སེམས་ཅན་ཐམས་ཅད་ཀྱིས་ལུས་ལ་གནོད་པར༌ཐོ་བརྩམས་ཀྱང་ཉམས་སུ་བཟོད་པར་བྱེད་པ་དང་སེམས་ཅན་ཐམས་ཅད་ཀྱི་ཚུལ་དང་མི་འདྲ་བའི༌ཚིག་གིས་སྤྱོ་བ་དང་། བརྒྱད་པ་དང་། སྨད་པ་དང་། བསྐྱུང་བ་དང་། བརྡེག་པ་དང་། བསྡིགས་པ་ཉམས་སུ་བཟོད་པར་བྱེད་པ༌ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱིས་མི་སྒུལ་བ་ཡོངས་སུ་སྟོན་པ་དང་། རིམ་གྲོ༌བྱས་པ་དང་། རིམ་གྲོ་མ་བྱས་པ་ཐམས་ཅད་ཀྱིས་མཐོ་བ་དང་དམའ་བར་མི་འགྱུར་བ་ཡོངས་སུ་སྟོན་པ་དང་། སེམས་ཅན་ཐམས་ཅད་ལ་ང་རྒྱལ་མེད་པ་ཡོངས་སུ་སྟོན་པ་དང་། ཆོས་ཐམས་ཅད་ཀྱི་རང་བཞིན་ལ་བཟོད་པ་མི་ཟད་པས་ཡེ་ཤེས་མི་ཟད་པ་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་ཡོངས་སུ་སྤང་བའི་ཕྱིར་བཟོད་པའི༌སྤྱོད་པ་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་ལུས་དབྱིབས་མི་སྡུག་ཅིང་། ཁ་དོག་མི་མཛེས་པའི་གཟུགས་རྣམ་པར་ཟློག་པ་བྱེད་པ་དང་། སེམས་ཅན་ཐམས་ཅད་ལ་དེ་བཞིན་གཤེགས་པའི་སྐུ་མདོག་རྣམ་པར་དག་པ་བླ་ན་མེད་པ་ཡོངས་སུ་སྟོན་ཅིང་སེམས་ཅན་ཡོངས་སུ་སྨིན་པར༌བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ནས་སེམས་ཅན་ཐམས་ཅད་དང་མཉམ་པའི་སྐྱེ་བ་སྣ་ཚོགས་ཀྱི་ལུས་ཁ་དོག་དང་དབྱིབས་དང་། ཆུ་ཞེང་སྣ་ཚོགས་སུ་སྤྲུལ་པའི་སྤྲིན༌འཐོན་ཏེ། སེམས་ཅན་རྣམས་ཀྱི་བསམ་པ༌ཇི་ལྟ་བ་བཞིན་དུ་རྒྱས་པར་ཁྱབ་པར་བྱས་ནས། ཐམས་ཅད་མཁྱེན་པ་ཉིད་ཀྱི་ཚོགས་ཆེན་པོ་ལ་བརྩོན་འགྲུས་ཀྱིས་སྔོན་དུ་འདོར་བ། ཡང་དག་པར་སྟོན་པ་དང་། བདུད་ཀྱི་དཀྲུགས་མ་ཐམས་ཅད་རྣམ་པར་འཐོར་བའི་བརྩོན་འགྲུས་དང་། བྱང་ཆུབ་ཏུ་བརྩམས་པ་མི་འཁྲུགས་མི་ཟློགས་པའི་བརྩོན་འགྲུས་དང་། སེམས་ཅན་ཐམས་ཅད་འཁོར་བའི་རྒྱ་མཚོ་ལས་རབ་ཏུ་བསྒྲལ་བའི་བརྩོན་འགྲུས་དང་མི་ཁོམ་པ་དང་ངན་སོང་དང་། ངན་འགྲོ་དང་ལོག་པར་ལྟུང་བའི་ལམ་ཐམས་ཅད་རྣམ་པར་བཟློག་པའི་བརྩོན་འགྲུས་དང་། མི་ཤེས་པའི་རི་རྣམ་པར་གཏོར་བའི་བརྩོན་འགྲུས་དང་། དེ་བཞིན་གཤེགས་པ་ཐམས་ཅད་མཆོད་ཅིང༌བསྙེན་བཀུར་བས་ཡོངས་སུ་མི་སྐྱོ་བའི་བརྩོན་འགྲུས་དང་། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་ཡང་དག་པར་བླང་བ་དང་། ཡོངས་སུ་བཟུང་བའི་བརྩོན་འགྲུས་དང་། སྒྲིབ་པ་ཐམས་ཅད་ཀྱི་རི་རབ་ཏུ་གཞོམ་ཞིང་རྣམ་པར་གཏོར་བའི་བརྩོན་འགྲུས་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བས་མི་སྐྱོ་བའི་བརྩོན་འགྲུས་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བའི་བརྩོན་འགྲུས་དང་། དེ་བཞིན་གཤེགས་པའི་བརྩོན་འགྲུས་རྣམ་པར་དག་པ་བླ་ན་མེད་པ་ཡོངས་སུ་སྟོན་ཅིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ནས་ལུས་སྣ་ཚོགས་ཁ་དོག་དང་དབྱིབས་རྣམ་པ་ཐ་དད་པར་སྤྲུལ་པའི་སྤྲིན་འཐོན་ཏེ། ཐབས་སྣ་ཚོགས་ཀྱིས་སེམས་ཅན་རྣམས་ཀྱི་དགའ་བ་ཡོངས་སུ་བསྐྱེད་པ་དང་། ཡིད་བདེ་བ་རྣམ་པར་ཟློག་པ་དང་། འདོད་པའི་དགའ་བ་ཐམས་ཅད་རྣམ་པར་སྨོད་པ་དང་། ངོ་ཚ་ཤེས་པའི་ཆོས་ཉིད་འཇིག་རྟེན་དུ་སྒྲོག་པ་དང་། དབང་པོ་བསྡམས་པ་ལ་སེམས་ཅན་རྣམས་རབ་ཏུ་དགོད་པ་དང་། ཚངས་པའི་སྤྱོད་པ་བླ་ན་མེད་པ་ཡང་དག་པར་བསྔགས་པ་བྱེད་པ་དང་། འདོད་པའི་འཇིག་རྟེན་བདུད་ཀྱི་ཡུལ་འཇིག་པ་དང་བཅས་པར་ཡོངས་སུ་སྟོན་པ་དང་། འདོད་པའི་དགའ་བ་དང་བྲལ་བ་རྣམས་ལ་འཇིག་རྟེན་གྱི་འདོད་པ་དང་། དགའ་བའི་ཡུལ་ཐམས་ཅད་ཡོངས་སུ་སྟོན་པ་དང་། ཆོས་ལ་མོས་ཤིང་དགའ་བ་ལ་སེམས་ཅན་རབ་ཏུ་དགོད་པ་དང་། མཐར་གྱིས་བསམ་གཏན་དང་། ཏིང་ངེ་འཛིན་དང་སྙོམས་པར་འཇུག་པའི་སྒོ་མངོན་པར་བསྒྲུབ་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་རྣམ་པར་གསལ་བ་ལ་ངེས་པར་རྟོགས་པའི་སེམས་ཡོངས་སུ་བརྗོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པ་དང་། བྱང་ཆུབ་སེམས་དཔའི་མངོན་པར་ཤེས་པ་དང་། རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་ཡོངས་སུ་སྟོན་པ་བྱེད་ཅིང་། སེམས་ཅན་རྣམས་ཀྱི་དགའ་བ་ཡོངས་སུ་བསྐྱེད་པ་དང་། སྤྲོ་བ་འཕེལ་བར་བྱ་བ་དང་། ཉམས་བདེ་བ་ཡོངས་སུ་བསྐྱེད་པ་དང་། ཡིད་མི་བདེ་བ་བཟློག་པ་དང་། སེམས་སྐྱོན་མེད་པ་ཡོངས་སུ་བསྒྲུབ་པ་དང་། སེམས་ལས་སུ་རུང་བར་བྱ་བ་དང་། བསམ་པ་རྣམ་པར་སྦྱང་བ་དང་། དབང་པོ་གསལ་བར་བྱ་བ་དང་། ལུས་ཀྱི་བདེ་བ་ཡོངས་སུ་བསྐྱེད་པ་དང་། ཆོས་ལ་དགའ་བའི་ཤུགས་རྣམ་པར་འཕེལ་བར་བྱ་བ་བྱེད་ཅིང་། སེམས་ཅན་རྣམས་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ནས། སྐྱེ་བ་ཐམས་ཅད་དང་འདྲ་བའི་ལུས་ཀྱི་སྤྲིན་སྣ་ཚོགས་འཐོན་ཏེ། ཞིང་ཐམས་ཅད་ཀྱི་ཁོངས་སུ་ཆུད་པའི་སེམས་ཅན་ཐམས་ཅད་ཀྱི་ཡིད་བཞིན་དུ་བསྟན་པའི་ཕྱིར་དགེ་བའི་བཤེས་གཉེན་གྱི་གན་དུ་འགྲོ་བས༌སྐྱོ་བ་མེད་པ་ཡོངས་སུ་སྟོན་པ་དང་། སློབ་དཔོན་དང་། བླ་མ་དང་། དགེ་བའི་བཤེས་གཉེན་ལ་རིམ་གྲོ་བྱ་བ་དང་། བསྙེན་བཀུར་བས་སྐྱོ་བ་མེད་པ་ཡོངས་སུ་སྟོན་པ་དང་། དེ་བཞིན་གཤེགས་པ་ཐམས་ཅད་ཀྱི༌ཆོས་ཀྱི་འཁོར་ལོ་འཁོར་བ་ཡང་དག་པར་བླང་ཞིང་ཡོངས་སུ་བཟུང་བས་སྐྱོ་བ་མེད་པའི་བརྩོན་འགྲུས་ཡོངས་སུ་སྟོན་པ་དང་། སངས་རྒྱས་རྒྱ་མཚོ་ཐམས་ཅད་ཁོང་དུ་ཆུད་པར་བྱ་བའི་ཚུལ་ཡང་དག་པར་བརྗོད་པ་དང་། ཆོས་ཀྱི་སྒོ་རྒྱ་མཚོ་ཐམས་ཅད་རྣམ་པར་འབྱེད་པ་དང་། ཆོས་ཐམས་ཅད་ཀྱི་མཚན་ཉིད་དང་རང་བཞིན་དང་ཚུལ་མངོན་པར་བརྗོད་པ་དང་། ཆོས་ཐམས་ཅད་ཏིང་ངེ་འཛིན་གྱི་སྒོར་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་དྲི་བ་དང་ཐེ་ཚོམ་རྒྱ་མཚོ་རྣམ་པར་སེལ་བས་ཤེས་རབ་ཀྱི་ཡུལ་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་ལྟ་བའི་རི་ཤིན་ཏུ་འཇོམས་པའི་ཤེས་རབ་རྡོ་རྗེ་ཡོངས་སུ་སྟོན་པ་དང་། སེམས་ཀྱི་སྐད་ཅིག་གཅིག་དང་ལྡན་པས། སེམས་ཅན་ཐམས་ཅད་ཀྱི་མ་རིག་པའི་མུན་པ་རྣམ་པར་སེལ་བའི་ཤེས་རབ་ཀྱི་ཉི་མའི་དཀྱིལ་འཁོར་འཆར་བ་ཡོངས་སུ་སྟོན་པ་བྱེད་ཅིང་། སེམས་ཅན་ཐམས་ཅད་ཀྱི་དགའ་བ་ཡོངས་སུ་སྐྱེ་བར་བྱ་བས་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ནས་ཁ་དོག་དང་དབྱིབས་བསམ་གྱིས་མི་ཁྱབ་པའི་ལུས་མང་པོ་འགྲོ་བ་ཐམས་ཅད་དང་མཉམ་པའི་སྤྲུལ་པའི་སྤྲིན་འཐོན་ཏེ་བསམ་པ་དང་མོས་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ལ་མངོན་དུ་གནས་ཤིང་། སྒྲ་སྐད་སྣ་ཚོགས་ཀྱིས་ཡོངས་སུ་སྦྱང་བའི་བསྟན་པས་འཇིག་རྟེན་པའི་བསོད་ནམས་དང་བསོད་ནམས་མ་ཡིན་པ་མངོན་པར་སྟོན་པ་དང་། འཇིག་རྟེན་པའི་བྱ་བ་ཐམས་ཅད་རབ་ཏུ་རྒྱུ་བ་དང་ཁམས་གསུམ་པ་འབྱུང་བ་ཐམས་ཅད་ཡོངས་སུ་བསྟན་པ་དང་། ཁམས་གསུམ་པ་ཐམས་ཅད་ལས་འབྱུང་བའི་ཕྱོགས་ཡང་དག་པར་བརྗོད་པ་དང་། ལྟ་བའི་མྱ་ངན་མི་བཟད་པ་ཐམས་ཅད་ལས་འབྱུང་བའི་ཕྱོགས་ཡང་དག་པར་བསྟན་པས། ཐམས་ཅད་མཁྱེན་པ་ཉིད་ཀྱི་ལམ་གྱི་ཁྱད་པར་ཡོངས་སུ་བརྗོད་པ་དང་། ཉན་ཐོས་དང་རང་སངས་རྒྱས་ཀྱི་སའི་ལམ་ལས་ཡོངས་སུ་བཟླ་བ་ཡང་དག་པར་སྟོན་པ་དང་། རིམ་གྲོ་བྱས་པ་དང་། རིམ་གྲོ་མ་བྱས་པ་ལ་བྱམས་སྡང་གིས་གོས་པ་མེད་པར་ཡོངས་སུ་སྟོན་པ་དང་། འཁོར་བ་དང་མྱ་ངན་ལས་འདས་པའི་སྒོ་ལ་མི་གནས་པ་ཡང་དག་པར་སྟོན་པ་དང་། དགའ་ལྡན་གྱི་གནས་ལ་སོགས་པ་གཅིག་ནས་གཅིག་ཏུ་རྒྱུ་བ་རྒྱུན་མི་འཆད་པ་ཡོངས་སུ་སྟོན་པ་དང་། སྙིང་པོ་བྱང་ཆུབ་ཏུ་སོང་ཞིང་མངོན་པར་རྫོགས་པར་འཚང་རྒྱ་བ་རྒྱུན་མི་འཆད་པ་ཡོངས་སུ་སྟོན་པ་བྱེད་ཅིང་ཐམས་ཅད་མཁྱེན་པ་ཉིད་དུ་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །

བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ལུས་སྤྲུལ་པའི་སྤྲིན་འཐོན་ཏེ། སེམས་ཅན་གྱི་འཇིག་རྟེན་ཐམས་ཅད་ལ་མངོན༌སུམ་དུ་གནས་ཤིང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་ཡོངས་སུ་བརྗོད་པ་དང་། ཆོས་ཀྱི་དབྱིངས་ཐམས་ཅད་རྣམ་པར་དག་པའི་མཐར་ཐུག་པའི་སྨོན་ལམ་གྱི་ཁྱད་པར་ཡོངས་སུ་བརྗོད་པ་དང་། སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་དག་པར་བྱ་བ་ཡོངས་སུ་བརྗོད་པ་དང་། དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོ་བྱ་བ་རྒྱུན་མི་འཆད་པ་ཡོངས་སུ་བརྗོད་པ་དང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པ་རྒྱུན་མི་འཆད་པ་ཡོངས་སུ་སྟོན་པ་དང་། འཇིག་རྟེན་གྱི་ཁམས་རྒྱ་མཚོ་ཐམས་ཅད༌ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ལ་འཇུག་པ་རྒྱུན་མི་འཆད་པ་ཡོངས་སུ་སྟོན་པ་དང་། ཞིང་ཐམས་ཅད་དུ་ཕྱི་མའི་མཐའི་བསྐལ་པའི་མུར་ཐུག་པར་གནས་ཤིང་། ཐམས་ཅད་མཁྱེན་པ་ཉིད་ཀྱི་ལམ་རྣམ་པར་དག་པར་བྱ་བ་ཡོངས་སུ་བརྗོད་པ་རྒྱུན་མི་འཆད་པ་ཡང་དག་པར་སྟོན་པ་དང་། སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པའི་སྟོབས་ལ་འཇུག་པ་རྒྱུན་མི་འཆད་པ་ཡང་དག་པར་བརྗོད་པ་དང་། དུས་གསུམ་གྱི་ཚུལ་རྒྱ་མཚོ་ཐམས་ཅད་ལ་འཇུག་པ་རྒྱུན་མི་འཆད་པ་ཡོངས་སུ་སྟོན་པ་དང་། ཞིང་ཐམས་ཅད་དུ་རྫུ་འཕྲུལ་གྱི་རྣམ་པར་འཕྲུལ་པ་ཡོངས་སུ་བསྟན་པ་རྒྱུན་མི་འཆད་པ་ཡང་དག་པར་སྟོན་པ་བྱེད་ཅིང་། བྱང་ཆུབ་སེམས་དཔའི་སྨོན་ལམ་དང་། སྤྱོད་པ་ཡོངས་སུ་བསྟན་པས་སེམས་ཅན་ཐམས་ཅད༌ཐམས་ཅད་མཁྱེན་པ་ཉིད་ལ་རབ་ཏུ་འགོད་པ་མཐོང་ངོ་། །བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འགྲོ་བ་ཐམས་ཅད་ཀྱི་སེམས་དང་མཉམ་པའི་ལུས་ཀྱི་སྤྲུལ་པའི་སྤྲིན་མང་པོ་འཐོན་ཏེ། སེམས་ཅན་ཐམས་ཅད་ལ་མངོན་པར་གནས་ཤིང་། ཐམས་ཅད་མཁྱེན་པ་ཉིད་ཀྱི་ཚོགས་ཀྱི་སྟོབས་མུ་མེད་པ་ཡོངས་སུ་སྟོན་པ་དང་། ཐམས་ཅད་མཁྱེན་པའི་སེམས་ཀྱི་སྟོབས་མི་ཟད་པ་དང་། མི་འཇིགས་པ་དང་། ཆུད་མི་ཟ་བའི་ཆོས་ཅན་ཡོངས་སུ་སྟོན་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་སྒྲུབ་པའི་སྟོབས་ཕྱིར་མི༌ལྡོག་ཅིང་ཕྱིར་མི་ཟློགས་ལ་ཐུབ་པ་མེད་པ་དང་། རྒྱུན་མེད་པ་དང་། བླ་ན་མེད་པ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྟོབས་འཁོར་བའི་ཉེས་པ་ཐམས་ཅད་ཀྱིས་མི་གོས་པ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྟོབས་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཐོར་བ་དང་། བྱང་ཆུབ་སེམས་དཔའ་རྣམས་ཀྱི་སྟོབས་ཉོན་མོངས་པ་ཐམས་ཅད་ཀྱི་དྲི་མས་ཉེ་བར་ཉོན་མོངས་པ་མེད་པ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྟོབས་ལས་ཀྱི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོའི་སྟོབས་བསྐལ་པ་ཐམས་ཅད་དུ་གནས་ཀྱང་། བྱང་ཆུབ་སེམས་དཔའི་སྤྱོད་པས་སྐྱོ་བ་མེད་པ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྟོབས་སངས་རྒྱས་ཀྱི་ཞིང་ཐམས་ཅད་ཡོངས་སུ༌བསྐྱོད་ཅིང་བསྒུལ་བས། སེམས་ཅན་ཐམས་ཅད་རབ་ཏུ་དགའ་བར་བྱེད་པ་ཡོངས་སུ་སྟོན་པ་དང་། བྱང་ཆུབ་སེམས་དཔའ་རྣམས་ཀྱི་སྟོབས་བདུད་དང་། ཕས་ཀྱི་རྒོལ་བའི་ཚོགས་ཐམས་ཅད་རབ་ཏུ་འཇོམས་པ་ཡོངས་སུ་སྟོན་པ་དང་། ཆོས་ཀྱི་འཁོར་ལོ་བསྐོར་བའི་ཡེ་ཤེས་ཀྱི་སྟོབས་ཆེན་པོ་འཇིག་རྟེན་དུ་རབ་ཏུ་བརྗོད་པ་བྱེད་ཅིང་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་ལུས་ཀྱི་སྤྲུལ་པ་རྒྱ་མཚོ་ཁ་དོག་མཐའ་ཡས་པ་འགྲོ་བ་ཐམས་ཅད་ཀྱི་སེམས་དང་མཉམ་པའི་སྤྲིན་ཕྱོགས་བཅུ་མཐའ་ཡས་པའི་སེམས་ཅན་གྱི་ཁམས་སུ་རྒྱས་པར་འགེངས་པ་འཐོན་ཏེ། སེམས་ཅན་རྣམས་ཀྱི་བསམ་པ་དང་། མོས་པ་ཇི་ལྟ་བ་བཞིན་དུ་བྱང་ཆུབ་སེམས་དཔའི་སྤྱོད་པ་དང་། ཡེ་ཤེས་ཀྱི་རྣམ་པར་གནོན་པ་ཡོངས་སུ་སྟོན་པ་དང་། སེམས་ཅན་གྱི་ཁམས་རྒྱ་མཚོ་ཐམས་ཅད་ལ་འཇུག་པའི་ཡེ་ཤེས་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་སེམས་རྒྱ་མཚོ་ལ་འཇུག་པའི་ཡེ་ཤེས་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ཡོངས་སུ་ཤེས་པའི་ཡེ་ཤེས་ཡོངས་སུ་སྟོན་པ་དང་། སེམས་ཅན་ཐམས་ཅད་ཀྱི་སྤྱོད་པ་རྒྱ་མཚོ་ལ་འཇུག་པའི་ཡེ་ཤེས་ཡོངས་སུ་སྟོན་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དུས་ལས་མི་འདའ་བའི་ཡེ་ཤེས་ཡོངས་སུ་སྟོན་པ་དང་། ཆོས་ཀྱི་དབྱིངས་ཐམས་ཅད་དུ་གྲགས་པར་སྒྲོག་པའི་ཡེ་ཤེས་ཡོངས་སུ་སྟོན་པ་དང་། སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་དུ་ཡེ་ཤེས་ཀྱི་ཚུལ་རྒྱ་མཚོས་རྒྱས་པར་འགེངས་པའི་ཡེ་ཤེས་ཡོངས་སུ་སྟོན་པ་དང་འཇིག་རྟེན་གྱི་ཁམས་རྒྱ་མཚོ་ཐམས་ཅད་འདུ་བ་དང་། འཇིག་པའི་ཡེ་ཤེས་ཡོངས་སུ་སྟོན་པ་དང་། འཇིག་རྟེན་གྱི་ཁམས་ཐམས་ཅད་ཀྱི་གཞི་དང་དབྱིབས་དང་། རྒྱན་རྣམ་པར་དགོད་པའི་ཡེ་ཤེས་ཡོངས་སུ་སྟོན་པ་དང་། དེ་བཞིན་གཤེགས་པ་ཐམས་ཅད་ཀྱི་མཆོད་པ་རྣམ་པར་སྤྲུལ་ཏེ། སྤྱན་སྔར་ཕྱིན་ནས། མཆོད་ཅིང་རིམ་གྲོ་བྱེད་པ་དང་། ཆོས་ཀྱི་འཁོར་ལོའི་སྤྲིན་ཡང་དག་པར་འཛིན་པའི་ཡེ་ཤེས་ཡོངས་སུ་སྟོན་པ་བྱེད་ཅིང་། དེ་ལྟར༌ཡེ་ཤེས་ཀྱི་ཕ་རོལ་ཏུ་ཕྱིན་པའི་སྤྱོད༌པ་ཡོངས་སུ་སྟོན་པས་སེམས་ཅན་རྣམས་ཀྱི་དགའ་བ་བསྐྱེད་པ་དང་། སེམས༌རབ་ཏུ་དང་བར་བྱེད་པ་དང་། རབ་ཏུ་དགའ་བ་བསྐྱེད་པ་དང་། མོས་པ་འཕེལ་བར་བྱེད་པ་དང་། ཡིད་མི་བདེ་བ་རྣམ་པར་ཟློག་པ་དང་། སེམས་རྣམ་པར་སྤྱོད་པ་དང་། སེམས་སྐྱོན་མེད་པར་སྐྱེ་བར་བྱེད་པ་དང་། དབང་པོ་གསལ་བར་བྱེད་པ་དང་། མོས་པའི་སྟོབས་ཡོངས་སུ་བསྐྱེད་པ་དང་། ཐམས་ཅད་མཁྱེན་པ་ཉིད་ལས་ཕྱིར་མི་ལྡོག་པར་བྱེད་པ་མཐོང་ངོ་། །ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་བསྟན་པས་འཇིག་རྟེན༌དུ་ཅི་ལྟར་སེམས་ཅན་ཡོངས་སུ་སྨིན་པར་གྱུར་པ༌མཐོང་བ་དེ་བཞིན་དུ་བྱང་ཆུབ་སེམས་དཔའི་ཆོས་ཐམས་ཅད་རབ་ཏུ་སྒྲོག་པའི་ཚུལ་གྱིས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་ཐོག་མ་སེམས་བསྐྱེད་པའི་ཚོགས་དང་། དགེ་བའི་བཤེས་གཉེན་བསྙེན་བཀུར་བའི་ཐབས་དང། དེ་བཞིན་གཤེགས་པའི་ཞབས་ཀྱི་དྲུང་དུ་ཕྱིན་ཅིང་མཆོད་པ་དང་། རིམ་གྲོ་བྱས་པའི་ཚུལ་དང་། དགེ་བའི་ཆོས་སྤྱད་པའི་ཐབས་ཇི་སྙེད་པ་དང་། སྦྱིན་པའི་ཕ་རོལ་ཏུ་ཕྱིན་པའི་སྤྱོད་པས༌གཏང་བར་དཀའ་བ་ཡོངས་སུ་གཏོང་བ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ༌སྦྱང་བའི་ཐབས་དང་། རྒྱལ་སྲིད་ཀྱི་དབང་ཕྱུག་ཆེན་པོ་དང་། འཁོར་མང་པོ་དང་། ལོངས་སྤྱོད་ཀྱི་དབང་ཆེན་པོ་ཡོངས་སུ་བཏང་སྟེ། མངོན་པར་འབྱུང་བའི་ཐབས་ཇི་སྙེད་པ་དང་། འཇིག་རྟེན་གྱི་དཀའ་བའི༌སྤྱོད་པ་བརྟུལ་ཞུགས་དང་དཀའ་ཐུབ་ཆེན་པོའི་དཀྱིལ་འཁོར་ལ༌བཟོད་པ་མངོན་པར་བསྒྲུབས་པ་ཇི་སྙེད་ཅིག་ཡོད་པ་དང་། བྱང་ཆུབ་སེམས་དཔའི་བརྟུལ་ཞུགས་ཡང་དག་པར༌བླང་བའི་སྦྱོར་བ་ལ་མི་གཡོ་བར་བྱ་བ་ཇི་སྙེད་ཅིག་ཡོད་པ་དང་། བྱང་ཆུབ་སེམས་དཔའི༌ཡི་དམ་བརྟན་པའི་ཆོས་རྒྱ་མཚོ་སེམས་ཅན་གྱི་ཁམས་ཐམས་ཅད་ཀྱི་ཉེས་བྱས༌དང་། ངན་དུ་སྨྲ་བ་དང་། ཉེས་པར་སྤྱོད་པ་ཐམས་ཅད་བག་ལ་ཞ་བར་བྱེད་པའི་སྦྱོར་བ་དང། ལུས་དང་སེམས་ཀྱི་གནོད་པ་ཉམས་སུ་བཟོད་པར་བྱེད་པའི་སྦྱོར་བ་ཇི་སྙེད་ཅིག་ཡོད་པ་དང་། ཆོས་ཐམས་ཅད་འཇིག་པ་མེད་པའི་ཆོས་ཉིད་ལ་བཟོད་པ་དང་། ཆོས་ཐམས་ཅད་ལ་ཡིད་ཆེས་པའི་བཟོད་པ་དང་ཆོས་ཐམས་ཅད་ཀྱི་རང་བཞིན་ངེས་པར་རྟོགས་པའི་བཟོད་པ་ཇི་སྙེད་ཅིག་ཡོད་པ་དང་། ཐམས་ཅད་མཁྱེན་པ་ཉིད་དུ་རྩོམ་ཞིང་སྦྱོར་བའི་བརྩོན་འགྲུས་ཇི་སྙེད་ཅིག་ཡོད་པ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་སྒྲུབ་པའི་བརྩོན་འགྲུས་ཇི་སྙེད་ཅིག་ཡོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྤྱོད་པ་ཇི་སྙེད་པ་ཐམས་ཅད་དང་། བསམ་གཏན་གྱི་ཕ་རོལ་ཏུ་ཕྱིན་པའི་ཚོགས་དང་། བསམ་གཏན་གྱི་ཕ་རོལ་ཏུ་ཕྱིན་པ་ལ་བརྩོན་པར༌བྱ་བ་དང་། བསམ་གཏན་གྱི་ཕ་རོལ་ཏུ་ཕྱིན་པའི་བསྒྲུབ་པ་རྣམ་པར་དག་པའི་སྤྱོད་པ་ཇི་སྙེད་ཅིག་ཡོད་པ་དང་། བྱང་ཆུབ་སེམས་དཔའི་ཏིང་ངེ་འཛིན་རབ་ཏུ་ཐོབ་པས། རྣམ་པར་འཕྲུལ་པ་ཇི་སྙེད་ཅིག་ཡོད་པ་དང། ཏིང་ངེ་འཛིན་གྱི་སྒོ་རྒྱ་མཚོ་ལ་འཇུག་པ་ཇི་སྙེད་ཅིག་ཡོད་པ་དང་། བསམ་གཏན་གྱི་ཕ་རོལ་ཏུ་ཕྱིན་པའི་སྤྱོད་པ་ཇི་སྙེད་པ་ཐམས་ཅད་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཚོགས་ཇི་སྙེད་པ་དང་། བྱང་ཆུབ་སེམས་དཔའི་ཤེས་རབ་ཆེན་པོའི་ཉི་མའི་དཀྱིལ་འཁོར་རྣམ་པར་སྦྱང་བའི་ཚུལ་ཇི་སྙེད་ཅིག་ཡོད་པ་དང་། ཤེས་རབ་ཆེན་པོའི་སྤྲིན་ཡོངས་སུ་འདུ་བའི་ཚུལ་ཇི་སྙེད་ཅིག་ཡོད་པ་དང་། ཤེས་རབ་ཀྱི་གཏེར་ཆེན་པོའི་ཚོགས་ཇི་སྙེད་ཅིག་ཡོད་པ་དང་། ཤེས་རབ་ཀྱི་རྒྱ་མཚོ་ཆེན་པོ་ལ་རྣམ་པར་དཔྱད་པའི་ཚུལ་དང་། སྦྱོར་བ་ཇི་སྙེད་པ་ཐམས་ཅད་དང་། ཐབས༌ཆེན་པོ་ལ་མཁས་པའི་ཚུལ་གྱི་སྦྱོར་བ་ཇི་སྙེད་ཅིག་ཡོད་པ་དང་། ཐབས་ཆེན་པོ་ལ་མཁས་པ་ཡོངས་སུ་དག་པར་བྱ་བ་དང་ལྡན་པའི་སྔོན་གྱི༌སྦྱོར་བ་ཇི་སྙེད་པ་ཐམས་ཅད་དང་། བྱང་ཆུབ་སེམས་དཔའི་སྨོན་ལམ་གྱི་ཕ་རོལ་ཏུ་ཕྱིན་པའི་ལུས་ཇི་སྙེད་ཅིག་ཡོད་པ་དང་སྨོན་ལམ་ཆེན་པོའི་ཕ་རོལ་ཏུ་ཕྱིན་པ་ཡོངས་སུ་གྲུབ་པ་ཇི་སྙེད་ཅིག་ཡོད་པ་དང་། སྨོན་ལམ་ཆེན་པོའི་ཕ་རོལ་ཏུ་ཕྱིན་པའི་སྤྱོད་པ་ཇི་སྙེད་ཅིག་ཡོད་པ་དང་། སྨོན་ལམ་ཆེན་པོའི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི། སྦྱོར་བ་ཇི་སྙེད་པ་ཐམས་ཅད་དང་། སྟོབས་ཀྱི་ཕ་རོལ་ཏུ་ཕྱིན་པ་ཐོབ་པར་བྱ་བའི་ཚོགས་ཆེན་པོ་ཇི་སྙེད་ཅིག་ཡོད་པ་དང་། སྟོབས་ཀྱི་ཕ་རོལ་ཏུ་ཕྱིན་པའི་རྐྱེན་དུ་གྱུར་པ་ཇི་སྙེད་ཅིག་ཡོད་པ་དང་། སྟོབས་ཀྱི་ཕ་རོལ་ཏུ་ཕྱིན་པའི་ཚུལ༌རྒྱ་མཚོ་ཆེན་པོ་ཇི་སྙེད་ཅིག་ཡོད་པ་དང་། སྟོབས་ཀྱི་ཕ་རོལ་ཏུ་ཕྱིན་པ་ཤིན་ཏུ་བསྟན་པ་ཇི་སྙེད་ཅིག་ཡོད་པ་དང་། སྟོབས་ཀྱི་ཕ་རོལ་ཏུ་ཕྱིན་པ་དང་ལྡན་པའི་སྔོན་གྱི་སྦྱོར་བ་ཇི་སྙེད་པ་ཐམས་ཅད་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་སྦྱོར་བ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ཚུལ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་ཕྱོགས་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་རྗེས་སུ་འབྲང་བར་བྱ་བ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་འབྱམས་ཀླས་པ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་ཚུལ་ལ་ཡང་དག་པར་གཞོལ་བར་བྱ་བ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་ཚུལ་རྣམ་པར་དམིགས་པར་བྱ་བ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་འབྱམས་ཀླས་པའི་རྗེས་སུ་འབྲང་བར་བྱ་བ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པས་རྒྱས་པར་འགེངས་པ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་རྒྱ་ཆེན་པོ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་ལྷུན་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་འགྲུབ་པར་བྱ་བ་དང་ལྡན་པའི་སྔོན་གྱི་སྦྱོར་བ་ཇི་སྙེད་པ་ཐམས་ཅད་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་སྤྱོད་པའི་རྣམ་པ་རབ་ཏུ་ཕྱེ་བ་ལ་འཇུག་པ་འབྱུང་བ་ཡོངས་སུ་བསྒྲུབ་པ་ཇི་སྙེད་ཅིག་ཡོད་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་ཡང་དག་པར་གཞོལ་བར་བྱ་བའི་ཚུལ་དང་ལྡན་པའི་ཆོས་རྣམས་དང་། ཆོས་ཡོངས་སུ་བསྡུ་བ་དང་། ཆོས་ཀྱི་ཡེ་ཤེས་ཀྱི་རྗེས་སུ་འབྲང་བ་དང་། ལས་ཀྱི་ཡེ་ཤེས་ཀྱི་རྗེས་སུ་འབྲང་བ་དང་། ཞིང་གི་ཡེ་ཤེས་ཀྱི་རྗེས་སུ་འབྲང་བ་དང་། བསྐལ་པའི་ཡེ་ཤེས་ཀྱི་རྗེས་སུ་འབྲང་བ་དང་། དུས་ཀྱི་ཡེ་ཤེས་ཀྱི་རྗེས་སུ་འབྲང་བ་དང་། སངས་རྒྱས་འབྱུང་བའི་ཡེ་ཤེས་ཀྱི་རྗེས་སུ་འབྲང་བ་དང་། སངས་རྒྱས་ཀྱི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་སེམས་ཡོངས་སུ་འབྱུང་བའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་རྣམ་པར་དགོད་པའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་འབྱུང་བའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་རབ་ཏུ་འཇུག་པའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་སྨོན་ལམ་གྱི༌ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་ཀྱི་འཁོར་ལོའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་རྣམ་པར་འབྱེད་པའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་རྒྱ་མཚོའི་ཚུལ་གྱི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་གངས་ཆེན་མཚོའི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་ཀྱི་རྒྱུད་ཀྱི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་ཀྱི་གཏེར་གྱི་ཡེ་ཤེས་ཀྱི་རྗེས་སུ་འབྲང་བ་དང་། བྱང་ཆུབ་སེམས་དཔའི་ཆོས་ཀྱི་ལུགས་ཀྱི་ཡེ་ཤེས་ཀྱི་རྗེས་སུ་འབྲང་བ་ཇི་སྙེད་ཅིག་ཡོད་པ་དང་། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་ལྡན་པའི༌བྱང་ཆུབ་སེམས་དཔའི་སྤྱོད་པ་མཐའ་དང་དབུས་མེད་པའི་དམིགས་པ་ཅན་དེ་དག་ཐམས་ཅད་དེའི༌བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་མངོན་པར་འཐོན་ཏེ། སེམས་ཅན་གྱི་ལུས་ཀྱི་སྤྲིན་ཁ་དོག་སྣ་ཚོགས་ཅན་དུ་མངོན་པར་མཆོད་ཅིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །

འདི་ལྟ་སྟེ། འོག་མིན་དང་། ཤིན་ཏུ་མཐོང་བ་དང་། གྱ་ནོམ་སྣང་བ་དང་། མ་དྲོས་པ་དང་། མི་ཆེ་བའི་གཙང་མའི་གནས་ཀྱི་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །དེ་བཞིན་དུ་འབྲས་བུ་ཆེ་བ་དང་། བསོད་ནམས་འཕེལ་བ་དང་། སྤྲིན༌དང་བྲལ་བའི་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །དགེ་རྒྱས་དང་ཚད་མེད་དགེ་བ་དང་། དགེ་བ་ཆུང་བའི་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ཀུན་སྣང་དང་བ་དང་། ཚད་མེད་སྣང་བ་དང་། སྣང་བ་ཆུང་ངུའི་ལྷ་ལྟ་བུའི་ལུས་ཀྱི་སྤྲིན་དུ༌མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ཚངས་ཆེན་དང་། ཚངས་ལྷ་ཉེ་ཕན་དང་། ཚངས་པ་ཀུན་རིས་ཀྱི་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །དབང་སྒྱུར་གྱི་ལྷའི་རྒྱལ་པོ་ལྷ་མོའི་ཚོགས་དང་ལྷའི་བུ་དང་བཅས༌པ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ལྷའི་རྒྱལ་པོ་རབ་འཕྲུལ་དགའ་ལྷ་མོའི་ཚོགས་དང་། ལྷའི་བུ་དང་བཅས༌པ་ལྟ་བུའི་ལུས་ཀྱི་སྤྲིན་དུ་མངོན༌པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །རབ་དགའ་ལྡན་གྱི་ལྷའི་རྒྱལ་པོ་ལྷ་མོའི་ཚོགས་དང་ལྷའི་བུ་དང་བཅས་པ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །རབ་མཚེ་མའི་ལྷའི་རྒྱལ་པོ་ལྷ་མོའི་ཚོགས་དང་ལྷའི་བུ་དང་བཅས་པ༌ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །

ལྷའི་རྒྱལ་པོ་བརྒྱ་བྱིན་ལྷ་མོའི་ཚོགས་དང་། ལྷའི་བུ་དང་བཅས་པ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །དྲི་ཟའི་རྒྱལ་པོ་གནས་སྲུང་པོ་དང་། དྲི་ཟའི་བུ་དང་། དྲི་ཟའི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །གྲུལ་བུམ་གྱི་རྒྱལ་པོ་འཕགས་སྐྱེས་པོ་དང་། གྲུལ་བུམ་གྱི་བུ་དང་གྲུལ་བུམ་གྱི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ཀླུའི་རྒྱལ་པོ་མིག་མི་བཟང་དང་། ཀླུའི་བུ་དང་། ཀླུའི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །གནོད་སྦྱིན་གྱི་རྒྱལ་པོ་ཆེན་པོ༌ངལ་བསོ་པོ་དང་། གནོད་སྦྱིན་གྱི་བུ་དང་གནོད་སྦྱིན་གྱི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །མིའམ་ཅིའི་རྒྱལ་པོ་སྡོང་པོ་དང་། མིའམ་ཅིའི་བུ་དང། མིའམ་ཅིའི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོ་དང་། ལྟོ་འཕྱེ་ཆེན་པོའི་བུ་དང་། ལྟོ་འཕྱེ་ཆེན་པོའི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ནམ་མཁའ་ལྡིང་གི་དབང་པོ་ཤུགས་དྲག་སྟོབས་ཆེན་དང་། ནམ་མཁའ་ལྡིང་གི་བུ་དང་ནམ་མཁའ་ལྡིང་གི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ལྷ་མ་ཡིན་གྱི་དབང་པོ་སྒྲ་གཅན་དང་། ལྷ་མ་ཡིན་གྱི་བུ་དང་། ལྷ་མ་ཡིན་གྱི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །

ཆོས་ཀྱི་རྒྱལ་པོ་གཤིན་རྗེ་དང་། གཤིན་རྗེའི་བུ་དང་། གཤིན་རྗེའི་བུ་མོ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །མིའི་དབང་པོ་དང་སྐྱེས་པ་དང་བུད་མེད་དང་ཁྱེའུ་དང་། བུ་མོ་ཐམས་ཅད་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །དེ་བཞིན་དུ་འགྲོ་བའི་རྒྱུད་ཐམས་ཅད་དུ་གཏོགས་པའི་སེམས་ཅན་ཐམས་ཅད་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །ཉན་ཐོས་དང་རང་སངས་རྒྱས་དང་དྲང་སྲོང་ཐམས་ཅད་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །རླུང་དང་ཆུ་དང་མེའི་ཕུང་པོ་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །རྒྱ་མཚོ་དང་། ཆུ་ཀླུང་དང་། རི་དང་། ནགས་ཚལ་དང་། ལོ་ཏོག་དང་། སྨན་དང་། ཤིང་དང་། སའི་ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་སེམས་ཅན་ཡོངས་སུ་སྨིན་པར་བྱེད་པ་མཐོང་ངོ་། །བཟའ་ཤིང་གི་ར་བ་དང་། གྲོང་ཁྱེར་དང་། སྙིང་པོ་བྱང་ཆུབ་དང་། ཉིན་པར་དང་། མཚན་མོ་དང་། ནམ་མཁའ་དང་། ཕྱོགས་དང་། རྐང་གིས་འགྲོ་བ་དང་། ལུས་ཀྱི་རིས་སུ་གཏོགས༌པ་དང་། ལྷ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། སེམས་ཅན་ཡོངས་སུ་སྨིན་པར་བྱེད་པ་མཐོང་བ་ནས། དེ་བཞིན་དུ་ལག་ན་རྡོ་རྗེ་ལྟ་བུའི་ལུས་ཀྱི་སྤྲིན་དུ་མངོན་པར་མཐོ་ཞིང་། ཕྱོགས་བཅུར་རྒྱས་པར་བཀང་སྟེ། ཆོས་ཀྱི་དབྱིངས་ཀྱི་ཚུལ་འབྱམས་ཀླས་པ་ཐམས་ཅད་དུ་སེམས་ཅན་ཐམས་ཅད་ལ་མངོན་པར་གནས་ཤིང་། སེམས་ཅན་ཡོངས་སུ་སྨིན་པར་བྱེད་པའི་བར་དུ་མཐོང་སྟེ། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་སེམས་ཐོག་མ་བསྐྱེད་པའི་ཚོགས་ལ་སོགས༌པའི་སྔོན་གྱི། ཚེ་རབས་ལ་ཡོངས་སུ་བསྒྲུབས་པའི་དགེ་བའི་སེམས་གཅིག་ནས་གཅིག་ཏུ་བརྒྱུད་དེ། རྒྱུན་མ་ཆད་པའི་ཚུལ་ཇི་སྙེད་པ་དང་། བྱང་ཆུབ་ཏུ་སེམས་བསྐྱེད་པའི་བསྔགས་པ་གཅིག་ནས་གཅིག་ཏུ༌བརྒྱུད་ཅིང་འདབ་ཆགས་པ་དང་། ཤི་འཕོ་དང་སྐྱེ་བ་ཡོངས་སུ་བཟུང་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ལུས་ཡོངས་སུ་བཟུང་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། མིང་གི་འཁོར་ལོ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། དགེ་བའི་བཤེས་གཉེན་གྱི་གན་དུ་འགྲོ་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། སངས་རྒྱས་བྱུང་སྟེ་བསྙེན་བཀུར་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཆོས་ཀྱི་ཚིག་དང་། ཡི་གེ་བླངས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང། བྱང་ཆུབ་སེམས་དཔའི་ལམ་གྱི་ནན་ཏན་གྱི་སེམས་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཏིང་ངེ་འཛིན་རབ་ཏུ་ཐོབ་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཏིང་ངེ་འཛིན་ཐོབ་པས་སངས་རྒྱས༌མཐོང་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཞིང་མཐོང་བའི་མིག་གི་རྒྱས་པར་བཀང་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བསྐལ་པ་གཅིག་ནས་གཅིག་ཏུ་བརྒྱུད་པའི་ཡེ་ཤེས་ཀྱི་འཁོར་ལོ་འདབ་ཆགས་པ་དང་། ཆོས་ཀྱི་དབྱིངས་ཁོང་དུ་ཆུད་པའི་ཡེ་ཤེས༌གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། སེམས་ཅན་གྱི་ཁམས་ལ་རྣམ་པར་ལྟ་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཆོས་ཀྱི་དབྱིངས་ཀྱི་ཚུལ་རྒྱ་མཚོར་གཏོགས་པའི་སེམས་ཅན་ཕ་རོལ་གྱི༌ཤི་འཕོ་དང་། སྐྱེ་བ་ཤེས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ལྷའི་རྣ་བ་ཡོངས་སུ་དག་པ་རྟོགས་པར་བྱེད་པའི་ཤེས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། སེམས་ཅན་གྱི་ཁམས་ཐམས་ཅད་ཀྱི་སེམས་ལ་རྣམ་པར་བལྟ་ཞིང་དབྱིངས་ལ་འཇུག་པའི་སྒོ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཐོག་མ་ལྷའི་མིག་ལ་ཞུགས་པའི་སྒོ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཐོག་མ་ལྷའི་རྣ་བ་རྣམ་པར་དམིགས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཐོག་མ་སེམས་ཅན་ཕ་རོལ་གྱི་སེམས་ཤེས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཐོག་མ་བདག་དང་སེམས་ཅན་ཕ་རོལ་གྱི་སྔོན་གྱི་གནས་རྗེས་སུ་དྲན་པ་ཤེས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། ཐོག་མ་དངོས་པོ་མེད་པ་ལ་རབ་ཏུ་གནས་ཏེ། མངོན་པར་འདུ༌བྱ་བ་མེད་པའི་རྫུ་འཕྲུལ་ཐོབ་པའི་རྐྱེན༌གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། རྫུ་འཕྲུལ་ཆེན་པོའི་རྣམ་པར་གནོན་པས། ཕྱོགས་རྒྱས་པ་འགེངས་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་རྣམ་པར་ཐར་པ་ཐོབ་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་རྣམ་པར་ཐར་པ་རྒྱ༌མཚོའི་ཚུལ་བསམ་གྱིས་མི་ཁྱབ་པ་ལ་འཇུག་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་ཏིང་འཛིན་གྱི་རྣམ་པར་འཕྲུལ་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་རྣམ་པར་གནོན་པ༌གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་ཡོངས་སུ་གནོན་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་མིང་དུ་བྱ་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་དང་། བྱང་ཆུབ་སེམས་དཔའི་ལམ་ལ་འཇུག་པ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་ནས། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་བྱང་ཆུབ་སེམས་དཔའི་ཡེ་ཤེས་ཤིན་ཏུ་ཕྲ་བ་གཅིག་ནས་གཅིག་ཏུ་བརྒྱུད་ཅིང་འདབ་ཆགས་པ་ཇི་སྙེད་པ་དེ་དག་ཐམས་ཅད་དེའི་བ་སྤུའི་སྒོ་ཐམས་ཅད་ནས་སྤྲུལ་པའི་ལུས་ཀྱི་སྤྲིན་དུ་མངོན་པར་འཐོན་ཏོ། །སེམས་ཅན་རྣམས་ལ་ཆོས་འཆད་པ་དང་། ཡང་དག་པར་སྟོན་པ་དང་། གསལ་བར་བྱེད་པ་དང་། ཡོངས་སུ་སྟོན་པ་དང་། རྗེས་སུ་བརྗོད་པ་དང་། རབ་ཏུ་འབྱེད་པ་དང་། ཤིན་ཏུ་རྒྱ་ཆེར་བྱེད་པ་དང་། འགྲང་བ་དང་། ངེས་པར་སྟོན་པ་དང་། རྣམ་པར་རིག་པར་བྱེད་པ་དང་། ཉེ་བར་བསྒྲུབ་པ་མཐོང་སྟེ། ལ་ལ་ལ་ནི་རླུང་གི་དཀྱིལ་འཁོར་ཤིན་ཏུ་འཁྲུགས་པའི་སྒྲ་སྐད་ཀྱིས་ཆོས་སྟོན་པ་མཐོང་ངོ་། །

ལ་ལ་ལ་ནི་ཆུའི་ཕུང་པོ་རབ་ཏུ་རློབ་པའི་སྒྲ་སྐད་ཀྱིས། ལ་ལ་ལ་ནི་མེའི་མེ་ལྕེ་ཤིན་ཏུ་རློབ་པའི་སྒྲ་སྐད་ཀྱིས། ལ་ལ་ལ་ནི་རྒྱ་མཚོའི་འབྲུག་གི་སྒྲ་སྐད་ཀྱིས། ལ་ལ་ལ་ནི་ས་ཡོངས་སུ་གཡོས་པའི་སྒྲ་སྐད་ཀྱིས། ལ་ལ་ལ་ནི༌རི་ཆེན་པོ་ཕན་ཚུན་ཐུག་ཅིང་འཐབ་པའི་སྒྲ་སྐད་ཀྱིས་ལ་ལ་ལ་ནི་ལྷའི་གྲོང་ཁྱེར་གཡོས་པའི་ང་རོ་སྙན་པའི་སྒྲ་སྐད་ཀྱིས། ལ་ལ་ལ་ནི་ལྷའི་གཞལ་མེད་ཁང༌འཐུབ་ཅིང་འཁྲོལ་བའི་སྒྲ་སྐད་ཀྱིས་ཆོས་སྟོན་པ་མཐོང་ངོ་། །

ལ་ལ་ལ་ནི་ལྷའི་དབང་པོའི་སྐད་ཀྱིས། ལ་ལ་ལ་ནི་ཀླུའི་དབང་པོའི་སྐད་ཀྱིས། ལ་ལ་ལ་ནི་གནོད་སྦྱིན་གྱི་དབང་པོའི་སྐད་ཀྱིས། ལ་ལ་ལ་ནི་དྲི་ཟའི་དབང་པོའི་སྐད་ཀྱིས། ལ་ལ་ལ་ནི་ལྷ་མ་ཡིན་གྱི་དབང་པོའི་སྐད་ཀྱིས། ལ་ལ་ལ་ནི་ནམ་མཁའ་ལྡིང་གི་དབང་པོའི་སྐད་ཀྱིས། ལ་ལ་ལ་ནི་མིའམ་ཅིའི་དབང་པོའི་སྐད་ཀྱིས། ལ་ལ་ལ་ནི་ལྟོ་འཕྱེ་ཆེན་པོའི༌དབང་པོའི་སྐད་ཀྱིས། ལ་ལ་ལ་ནི་མིའི་དབང་པོའི་སྐད་ཀྱིས། ལ་ལ་ལ་ནི་ཚངས་པའི་དབང་པོའི་སྐད་ཀྱིས། ལ་ལ་ལ་ནི་ལྷ་མོའི་གླུའི་དབྱངས་ཀྱིས། ལ་ལ་ལ་ནི་ལྷ་རྫས་ཀྱི་རོལ་མོ་ལེགས་པར་བླངས་པའི་དབྱངས་ཀྱིས། ལ་ལ་ལ་ནི་ནོར་བུ་རིན་པོ་ཆེའི་སྒྲ་དབྱངས་ཀྱིས། ལ་ལ་ལ་ནི་སེམས་ཅན་གྱི་རིས་ཐམས་ཅད༌ཀྱི་སྐད་སྣ་ཚོགས་ཀྱིས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་རྣམ་པར་ཐར་པའི་ཡུལ་སེམས་ཅན་རྣམས་ལ་རབ་ཏུ་བརྗོད་པ་མཐོང་ངོ་། །དེ་བཞིན་དུ་བྱང་ཆུབ་སེམས་དཔའི་ལུས་ཀྱི་སྤྲིན་གྱིས་བྱང་ཆུབ་སེམས་དཔའི་སྒྲ་སྐད་སྣ་ཚོགས་དང་། དེ་བཞིན་གཤེགས་པའི༌སྤྲུལ་པའི་སྐུའི་སྤྲིན་གྱིས་དེ་བཞིན་གཤེགས་པའི་གསུང་རྣམ་པ་ཐ་དད་པའི་དབྱངས་ཀྱི་ཡན་ལག་གི་ཚུལ་གྱིས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་རྣམ་པར་ཐར་པའི་ཡུལ་ཐོག་མ་སེམས་བསྐྱེད་པ་དང་བཅས་པ་ཡོངས་སུ་བྱུང་སྟེ། གྲུབ་ཅིང་ཡང་དག་པར་འདུས་པ་དང་བཅས་རྣམ་པར་ཐར་པའི་རྣམ་པར་རྩེ་བ་དང་བཅས་པ། སེམས་ཅན་ཐམས་ཅད་ལ་རྣམ་པར་དམིགས་པར་བྱེད་པ་མཐོང་ངོ་། །

དེའི་སྤྲུལ་པའི་གཟུགས་ཀྱི་སྤྲིན་རེ་རེས་ཀྱང་སེམས་ཀྱི་སྐད་ཅིག་རེ་རེ་ལ་ཕྱོགས་བཅུའི་འཇིག་རྟེན་གྱི་ཁམས་གྱི་སངས་རྒྱས་ཀྱི་ཞིང་བརྗོད་དུ་མེད་པའི༌ཡང་བརྗོད་དུ་མེད་པ་རྣམ་པར་སྦྱོང་བ་མཐོང་ངོ་། །སེམས་ཅན་རྒྱ་མཚོ་མཐའ་ཡས་པ་དག་ཀྱང་ངན་སོང་གི་སྡུག་བསྔལ་ཐམས་ཅད་ལས་རྣམ་པར་འགྲེལ་པ་མཐོང་ངོ་། །སེམས་ཅན་གྱི་ཁམས་མཐའ་དང་། དབུས་མེད་པ་དག་ཀྱང་མིའི་ཕུན་སུམ་ཚོགས་པ་ལ་རབ་ཏུ་འགོད་པ་མཐོང་ངོ་། །སེམས་ཅན་རྒྱ་མཚོ་མཐའ་དང་དབུས་མེད་པ་དག་ཀྱང་འཁོར་བའི་རྒྱ་མཚོ་ལས་གྱེན་དུ་བསྐྱོད་པ་མཐོང་ངོ་། །སེམས་ཅན་རྒྱ་མཚོ་མཐའ་དང་དབུས་མེད་པ་དག་ཀྱང་ཉན་ཐོས་དང་། རང་སངས་རྒྱས་ཀྱི་ས་ལ་རབ་ཏུ་འགོད་པ་མཐོང་ངོ་། །སེམས་ཀྱི་སྐད་ཅིག་རེ་རེ་ལ་སེམས་ཅན་རྒྱ་མཚོ་མཐའ་དང་དབུས་མེད་པ་དག་ཀྱང་སྟོབས་བཅུའི་ཡེ་ཤེས་ཀྱི་སར་འཛུད་པ། ཚོང་དཔོན་གྱི་བུ་ནོར་བཟང་གིས་མཐོང་ངོ་། །ཐོས་སོ་རྣམ་པར་དཔྱད་དོ། །ཞུགས་སོ་ཁོང་དུ་ཆུད་དོ། །ངེས་པར་རྟོགས་སོ། །རྗེས་སུ་ཤེས་སོ། །རྗེས་སུ་འབྲངས་སོ། །རྗེས་སུ་ཞུགས་སོ། །མཉམ་པ་ཉིད་དུ་བྱིན་གྱིས་བརླབས་ཏེ། དེ་ནི་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་བྱང་ཆུབ་སེམས་དཔའི་རྣམ་པར་ཐར་པ་ཀུན༌ཏུ་བཟང་པོས་དགའ་བ་ཤིན་ཏུ་ཡངས་པའི༌རྒྱ་མཚོ་བསམ་གྱིས་མི་ཁྱབ་པའི་རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བའི་བྱིན་དང་། སྔོན་སྐལ་བ་མཉམ་པར་སྤྱད་པ་དང་། དེ་བཞིན་གཤེགས་པའི་བྱིན༌གྱི་རླབས་ཀྱིས་བྱིན་དུ་བརླབས་པ་དང་། དགེ་བའི་རྩ་བ་རྣམ་པར་སྨིན་པ་བསམ་གྱིས་མི་ཁྱབ་པ་དང་། བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོའི་སྣོད་དུ་གྱུར་པའི་ཕྱིར་རོ། །

དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་དགའ་བའི་ཤུགས་དྲག་པོ་གངས་ཆེན་མཚོ་སྣང་བ་ཆེན་པོ་རབ་ཏུ་ཐོབ་པ། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་དེས། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་མདུན་དུ་འདུག་སྟེ། ཐལ་མོ་སྦྱར་ནས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རྒྱལ་བའི་ཆོས་རྣམས་ཤིན་ཏུ་ཟབ། །དེ་ལ་ཁྱོད་ཀྱིས་བསྐལ་པ་ཚད་མེད་བསླབས། །བསམ་པ་ཇི་བཞིན་གཟུགས་རྣམས་ཀྱིས། །འགྲོ་བ་ཀུན་བཀང་འཇིག་རྟེན་རིམ་པས་བསྟན། །བདག་མེད་མགོན་མེད་ལོག༌པ་ཡི། །འདུ་ཤེས་རྟག་ཏུ་འཁྲུལ་པ་མཁྱེན་གྱུར་ནས། །རྫུ་འཕྲུལ་རྣམ་པ་དུ་མ་ཡིས། །ལུས་དང་དབང་ཕྱུག་སྟོན་མཛད་འགྲོ་བ་འདུལ། །ཤིན་ཏུ་རིམས་བྲལ་རབ་ཏུ་ཞི། །ཆོས་སྐུ་གཉིས་མེད་རྣམ་པར་དག་པ་མངའ། །འགྲོ་བ་མ་ལུས་གཉིས་གནས་པ། །སྤྲུལ་པའི་སྤྲིན་སྒྲ་འབྲུག་གིས་རྣམ་པར་འདུལ། །ཕུང་པོ་ཁམས་དང་སྐྱེ་མཆེད་ལ། །ཁྱོད་ནི་ནམ་ཡང་མི་གནས་མི་རྟེན་ཏེ། །ཡན་ལག་ཀུན་རྒྱས་གཟུགས་མཆོག་དང་། །དབང་ཕྱུག་ཡོངས་སུ་བསྒྲགས་པས་འགྲོ་བ་འདུལ། །ཕྱི་དང་ནང་ལས་རྣམ་པར་གྲོལ། །གཉིས་ལས་བྱུང་བའི་མཚོ་ལས་འཕགས་གྱུར་ཀྱང་། །འཁོར་བའི་རྒྱ་མཚོ་མཐའ་ཡས་པའི། །གཟུགས་བརྙན་འགྲོ་བའི་རྒྱུད་དུ་རབ་ཏུ་སྟོན། །ཁྱོད་ལ་གཡོ་བ་མི་མངའ་སྟེ། །ནམ་ཡང་རློམ་སེམས་གཡོ་བའི་སྤྲོས་མི་མངའ། །འཇིག་རྟེན་སྤྲོས་མོས་བྱིས་པ་རྣམས། །ཆོས་ཀྱི་རང་བཞིན་སྟོན་ཅིང་འདུལ་བ་མཛད། །ཏིང་འཛིན་རྒྱ་མཚོ་ཀུན་སྤྱོད་པས། །བསྐལ་པ་མང་པོར་རྩེ་གཅིག་ཐུབ་བཞུགས་ཀྱང་། །ཕྱོགས་བཅུའི་བདེ་གཤེགས་མཆོད་དོན་དུ། །སྤུ་རྣམས་རྩེ་ལས་སྤྲུལ་པའི་སྤྲིན་ཀྱང་འགྱེད། །སངས་རྒྱས་སྟོབས་ལ་འཇུག་པའི་ཚུལ། །སྐད་ཅིག་རེ་རེར་མཐའ་ཡས་ཐུགས་སུ་ཆུད། །སེམས་ཅན་བསྡུ་བའི་སྦྱོར་བ་རྣམས། །སོ་སོའི་རྐྱེན་བཞིན་གོ་བར༌བགྱི་བས་བསྟན། །ཁྱོད་ཀྱིས་སྲིད་པའི་རྒྱ་མཚོ་དག །ལས༌ཀྱིས་རྣམ་བྲིས་སྣ་ཚོགས་གཟུགས་གཟིགས་ཤིང་། །ཆོས་ཀྱི་སྒྲིབ་པ་མེད་པའི་ལམ་བསྟན་ཏེ། །སེམས་ཅན་ཀུན་ཀྱང་རྣམ་པར༌སྦྱོང་བ་མཛད། །ཁྱོད་སྐུ་མཚན་བྲིས་རྣམ་དག་ཀྱང་། །ཀུན་ཏུ་བཟང་པོའི་སྤྱོད་པ་དམ་པ་ཡིས། །སེམས་ཅན་བསམ་པའི་དབང་ཚུལ་དུ། །ཁྱོད་ནི་ལྷ་མོའི་སྐུ་གཟུགས་སྟོན། །

དེ་ནས་ཚོང་དཔོན་གྱི་བུ་ནོར་བཟང་གིས། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ལ་ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། འདི་སྐད་ཅེས་སྨྲས་སོ། །ལྷ་མོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས་ཇི་སྲིད་ཅིག་ལགས། ལྷ་མོ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་དགའ་བ་ཤིན་ཏུ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་འདི་ཐོབ་ནས་ཇི་སྲིད་ཅིག་ལགས།

དེ་ནས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བས། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། དྲན་པ་བསྐལ་པ་མང་འདས་པ། །ཞིང་གི་རྡུལ་སྙེད༌དེ་ཡི་སྔ་རོལ་ན། །ཞིང་ནི་རིན༌ཆེན་མདོག་བདེ༌འབྱུང་། །དེ་ཡི་བསྐལ་པ་ཞི་བའི་དབྱངས་ཞེས་བྱ། །གླིང་བཞི་བྱེ་བ་ཁྲག་ཁྲིག་སྟེ། །བརྒྱ་སྟོང་ཕྲག་བཅུ་རྣམས་ཀྱིས་ཡོངས་སུ་གང་། །ཚད་མེད་རིན་ཆེན་རི་བོ་འདྲ། །གླིང༌བཞི་བར་མ་བཟང་པོ་རྣམ་པར་བཀྲམ། །རྒྱལ་པོའི་ཕོ་བྲང་བྱེ་བ་བརྒྱ། །སྟོང་ཕྲག་བཅུ་རྣམས་ཡོངས་སུ་ཚང་བ་སྟེ། །རྒྱལ་པོའི་ཕོ་བྲང་མདངས་དགའ་བ། །དབུས་ན་གནས་པ་སྤོས་ཀྱི་རྒྱལ་མཚན་འོད། །དེར་ནི་ཕྱོགས་ཀྱི་དབང་པོ༌ས་ཡི་བདག །འཁོར་ལོས་སྒྱུར་བ་མངོན་པར་གཟུགས་བཟང་བྱུང་། །མཚན་རབ་སུམ་ཅུ་གཉིས་དང་ལྡན། །དེ་ཡི་ལུས་ཀྱང་དཔེ་བྱད་བཟང་པོས་བརྒྱན། །པད་མོའི་སྦུབས་ནས་རྫུས་ཏེ་བྱུང་། །གསེར་གྱི་མདོག་བཟང་འོད་བྱུང་ལུས་དང་ལྡན། །འཛམ་བུའི་རྒྱལ་མཚན་ཐམས་ཅད་དུ། །མཁའ་ལས་འགྲོ་ཞིང་འོད་ཀྱིས་དེ་འགེངས་སོ། །དེ་ཡི་བུ་ནི་སྟོང་ཚང་སྟེ། །ཀུན་ཀྱང་ཡན་ལག་དམ་པའི་གཟུགས་དང་ལྡན། །བློན་པོ་མཁས་ཤིང་གསལ་བ་དང་། །མཛངས་ཤིང་ཡིད་གཞུངས་བྱེ་བ་ཤིན་ཏུ་མང་། །བཙུན་མོ་བྱེ་བ་ཕྲག་བཅུ་ཚང་། །ལྷ་མོ་ཇི་བཞིན་དགའ་བའི་ཚུལ་ལ་མཁས། །དེ་དག་ཕན་སེམས་བདེ་སེམས་ཀྱིས། །རྒྱལ་པོ་དེ་ལ་ཉེ་བའི་ཡིད་དུ་གནས། །རྒྱལ་པོ་དེ་ནི་ས་ཆེན་དེ། །རི་དང་ཁོར་ཡུག་ཀུན་གྱི་མཐས་ཀླས་པའི། །གླིང་བཞིའི་ཕུན་སུམ་ཚོགས་པ་དག །ཀུན་ཀྱང་ཆོས་ཀྱི་སྟོབས་ཀྱིས་གནས་པར་བྱེད། །ཁོ་མོ་འཁོར་ལོས་སྒྱུར་བ་ཡི། །བཙུན་མོ་ཚངས་པའི་སྒྲ་སྐད་རིན་ཆེན་ལུས། །གསེར་གྱི་མདོག་འཆང་དྲི་མེད་འོད། །དཔག་ཚད་སྟོང་དུ་འོད་ཀྱིས་རྒྱས་པར་འགེངས། །ཉི་མ་ནུབ་པར་གྱུར་ནས་ཀྱང་། །རྒྱལ་པོ་སྲས་དང་འཁོར་བཅས་གཟིམས་གྱུར་ནས། །རོལ་མོའི་དབྱངས་ཀྱང་ཞི་གྱུར་ཏེ། །ཁོ་མོ་མལ་ན་བདེ་བར་ཉལ་ཉལ་ན། །ནམ་གྱི་ཕྱེད་ཙམ་གུང་ཞིག་ལ། །སངས་རྒྱས་དཔལ་གྱི་རྒྱ་མཚོ་བྱུང་བར་གྱུར། །དེ་ཚེ་རྒྱལ་བས་རྣམ་འཕྲུལ་བ། །ཕྱོགས་བཅུ་རྒྱས་པར་བཀང་སྟེ་བསྟན་པ་མཛད། །རྒྱལ་བའི་འོད་ཟེར་རྒྱ་མཚོ་དེས། །ཞིང་གི་རྡུལ་སྙེད་འཇིག་རྟེན་ཁྱབ་པར་གྱུར། །རྣམ༌འཕྲུལ་སྐུ་རྣམས་སྣ་ཚོགས་ཀྱིས། །ཕྱོགས་བཅུ་ཐམས་ཅད་མ་ལུས་རྒྱས་པར་བཀང་། །ས་རྣམས་རི་དང་བཅས་པར་གཡོས། །རྒྱལ་བ་བྱུང་ཞེས་སྒྲ༌ཡང་ཡོངས་སུ་བརྗོད། །ལྷ་དང་ལྷ་མིན་མི་དང་ཀླུ། །ཀུན་ཀྱང་རྒྱལ་བ་བྱུང་བས་རབ་ཏུ་དགའ། །སངས་རྒྱས་བ་སྤུའི་སྒོ་ཀུན་ནས། །སྤྲུལ་པའི་རྒྱ་མཚོ་མང་པོ་མངོན་པར་བྱུང་། །དེས་ནི་ཕྱོགས་བཅུ་རྒྱས་བཀང་ནས། །འཇིག་རྟེན་བསམ་པ་བཞིན་དུ་ཆོས་ཀྱང་བསྟན། །རྣམ་འཕྲུལ་མཐའ་ཡས་དེ་དག་ཀྱང་། །རྒྱལ་བས་ཐམས་ཅད་བདག་གི་རྨི་ལམ་བསྟན། །ཟབ་མོའི་འབྲུག་སྒྲ་ཐོས་གྱུར་ནས། །ཁོང་དུ་ཆུད་པས་ཁོ་མོ་དགའ་ཡིད་གྱུར། །མཚན་མོའི་ལྷ་མོ་སྟོང་སྙེད་ཀྱང་། །ཁོ་མོའི་སྟེང་གི་བར་སྣང་མཁར་གནས་ཤིང་། །རྒྱལ་བའི་ལེགས་པ་བརྗོད་བྱས་ནས། །ཁོ་མོ་སད་པར་སྨྲ་ཞིང་བརྗོད། །ལྷ་ཡི་བློ་གྲོས་བཙུན་མོ་ལོངས། །ཁྱོད་ཀྱི་རྒྱལ་པོའི་ཁམས་སུ༌རྒྱལ་བ་སྐྱེས། །བསྐལ་པ་རྒྱ་མཚོ་བརྒྱ་དག་ཏུ། །དེ་འདྲའི་ཕུན་སུམ་ཚོགས་པ་རྣམ་དག་ཀུན། །ཁོ་མོ་དགར་གྱུར་སད་པར་གྱུར། །འོད་གསལ་དྲི་མེད་རྣམ་དག་མཐོང་། །འོད་བཟང་དེ་ནི་ག་ལས་བལྟ་བལྟ་ན། །བྱང་ཆུབ་ཤིང་རྒྱལ་དྲུང་གི་རྒྱལ་བ་མཐོང་། །མཚན་ཉིད་སུམ་ཅུ་གཉིས་ཀྱིས་བརྒྱན། །བ་སྤུ་ཀུན་ནས་འོད་ཟེར་རྒྱ་མཚོ་བཀྱེ། །རི་རབ་ཇི་བཞིན་མངོན་པར་འཕགས། །རྒྱལ་བ་གཡས་གཡོས་ཀུན་ཏུའང་དེ་བཞིན་ནོ། །མཐོང་ནས་ཁོ་མོ་རབ་དགའ་སྟེ། །དེ་འདྲར་འགྱུར་བར་སེམས་ཀྱང་ཡོངས་སུ་བསྐྱེད། །སངས་རྒྱས༌རྣམ་འཕྲུལ་ཡངས་མཐོང་ནས། །ཁོ་མོས་སྨོན་ལམ་ཤིན་ཏུ་རྒྱ་ཆེན་བཏབ། །ཁོ་མོས་རྒྱལ་པོ་བཞེངས་སུ་གསོལ། །དེ་ཡི་འཁོར་དང་བུད་མེད་ཚོགས་ཀྱང་བསླང་། །སངས་རྒྱས་འོད་ཡངས་མཐོང་གྱུར་ནས། །ཀུན་ཀྱང་བདེ་བའི་ལུས་སུ་གྱུར། །རྒྱལ་པོ་དེ་དང་ལྷན་ཅིག་ཏུ། །བཞོན་པ་བྱེ་བ་སྲོག་ཆགས་ཁྲག་ཁྲིག་གིས། །ཡོངས་སུ་བསྐོར་ཏེ་དཔུང་བཅས་པ། །རྒྱལ་བའི་སྤྱན་སྔར་ཀུན་ཀྱང་དོང་། །ལོ་གྲངས་སྟོང་ཕྲག་ཉི་ཤུར་ཡང་། །ཁོ་མོས་རྒྱལ་བ་དེ་ལ་མཆོད་བཀུར་བྱས། །རིན་ཆེན་བདུན་ཡང་ཡོན་དུ་ཕུལ། །རྒྱ་མཚོ་ཡོངས་དང་བཅས་པའི་ས་ཡང་གསོལ། །མདོ་སྡེ་རྒྱ་མཚོ་ཡོན་ཏན་སྤྲིན། །སྨོན་ལམ་མཚོ་ལས་ཡོངས་སུ་བྱུང་བའི་རྒྱན། །ཀུན་ཀྱང་དེ་བཞིན་གཤེགས་ལས་བྱུང་། །བསམ་པ་ཇི་བཞིན་འགྲོ་བར་དེ་བཞིན་བསྟན། །མཚན་མོའི་ལྷ་མོ་ཇི་སྙེད་ཅིག །དེ་ཚེ་སྙིང་བརྩེར་ཁོ་མོ་ཕན་བསྟན་པ། །དེ་འདྲར་གྱུར༌ཏེ་མྱོས་བསལ་ཞེས། །ཁོ་མོ་མོས་པ་ཡོངས་སུ་སྐྱེས་པར་གྱུར། །ཁོ་མོའི་སྨོན་ལམ་དེ་འདྲའི་སེམས། །ཐོག་མ་བྱང་ཆུབ་མཆོག་ཏུ༌སྐྱེས་པར་གྱུར། །འཁོར་བའི་རྒྱ་མཚོ་གནས་པའི་ཚེ། །སྲིད་པའི་རྒྱ་མཚོས་དེ་ནི་ཞིག་མ་གྱུར། །སངས་རྒྱས་བྱེ་བ་ཁྲག་ཁྲིག་རྣམས། །ཁོ་མོས་དད་པ་བསྐྱེད་དེ་མཆོད་པ་བྱས། །འཁོར་བའི་ལྷ་དང་མི་དབུས་སུ། །ཡུལ་གྱི་དགའ་དང་བདེ་ལ་མངོན་པར་སྨོན། །རྒྱལ་བའི་དང་པོ་དཔལ་གྱི་མཚོ། །དེ་ཡི་འོག་མ་ཡོན་ཏན་སྒྲོན་མ་སྟེ། །རྒྱལ་བ་གསུམ་པ་རིན་ཆེན་དཔལ། །སངས་རྒྱས་བཞི་པ་ནམ་མཁའི༌ཤེས་རབ་བོ། །རྒྱལ་བ་ལྔ་པ་མེ་ཏོག་མཆོག །རྒྱལ་བ་དྲུག་པ་ཆགས་མེད་ཟླ་བའི་བློ། །རྒྱལ་བ༌བདུན་པ་འོད་རྒྱལ་ཆོས་ཀྱི་ཟླ། །བརྒྱད་པ་ཡེ་ཤེས་དཀྱིལ་འཁོར་སྣང་བའོ། །རིན་ཆེན་འོད་འཕྲོ་རི་སྒྲོན་ཏེ། །རྒྱལ་བ་དགུ་པ་དེ་ཚེ་བྱུང༌བར་གྱུར། །བཅུ་པ་དུས་གསུམ་འོད་དབྱངས་ཏེ། །དེ་དག་ཁོ་མོས་དད་པས་མཆོད། །བཅུ་པོ་དེ༌ལས་སོགས་པ་དག །མི་ཡི་དབང་པོ་དམ་པ་ཀུན་མཆོད་དེ། །ཚུལ་གྱི་རྒྱ་མཚོ་འདིར་ཞུགས་པའི། །མིག་ནི་དེ་སྲིད་ཡུན་གྱིས་ཐོབ་མ་གྱུར། །དེ་འོག་ཞིང་གི་འཚམས་སྦྱོར་བ། །རིན་ཆེན་ཐམས་ཅད་འོད་ཅེས་བྱ་བ་བྱུང་། །བསྐལ་པ༌ལྷ་ཡི་དཔལ་ཞེས་བྱ། །སངས་རྒྱས་ལྔ་བརྒྱ་དེ་ལ་བྱུང་བར་གྱུར། །ཐོག་མ་ཟླ་བའི་དཀྱིལ་འཁོར་བྱུང་། །གཉིས་པ་ཉི་མའི་སྒྲོན་མ་མངོན་པར་སྐྱེས། །སྣང་བའི་རྒྱལ་མཚན་སངས་རྒྱས་གསུམ། །དེ་ཡི་འོག་ཏུ་རིན་ཆེན་རི་བོའོ། །མེ་ཏོག་འོད་འཕྲོ་རྒྱ་མཚོ་སྒྲོན། །མེ་ཡི་དཔལ་དང༌ལྷ་ཡི་དཔལ་གྱི་མཆོག །སྣང་བའི་རྒྱལ་པོ་འོད་ཀྱི་དཔལ། །བཅུ་པ་ཡེ་ཤེས་ཀུན་སྣང་རྒྱལ༌པོ་འོ། །བཅུ་པོ་དེ་ལ་སོགས་པ་དག །མི་ཡི་དབང་པོ་དེ་དག་ཁོ་མོ་ཡིས། །ཕུང་པོའི་གནས་ལ་དད་དགའ་ཞིང་། །གནས་མེད་ཆོས་ལ་གནས་ཀྱི༌བློ་མཆོད་དོ། །དེ་འོག༌དེ་ཡི་མཚམས་སྦྱོར་བ། །འཇིག་རྟེན་ཁམས་བཟང་བྱུང་བར་གྱུར་པ་ནི། །པད་མའི་སྒྲོན་མ་སྤྲིན་གྱི་དཔལ། །དེ་ཚེ་བསྐལ་པ༌ཚངས་པའི་འོད་ཅེས་བྱ། །དེ་ལ་རྒྱལ་བ་ཚད་མེད་དེ། །དེ་དག་འཁོར་དང་བཅས་པ་ཁོ་མོས་མཆོད། །རྒྱལ་བ་དེ་དག་ཐམས་ཅད་ལས། །རིམ་གྲོ་ཆེན༌པོས་ཁོ་མོས་ཆོས་ཀྱང་ཐོས། །རྒྱལ་བའི་དང་པོ་རིན་ཆེན་རི། །དེ་ཡི་འོག་མ་ཡོན་ཏན་རྒྱ་མཚོ་སྟེ། །རྒྱལ་བ་ཆོས་དབྱིངས༌དབྱངས་ཀྱི་དཔལ། །ཆོས་རབ་རྒྱ་མཚོ་སྒྲོག་པ་བཞི་པའོ། །ཆོས་ཀྱི་རྒྱལ་མཚན་གཟུངས་ཀྱི་འོད། །ཆོས་སྟོབས་འོད་དང་ནམ་མཁའི་བློ་གྲོས་ཏེ། །ཆོས་འོད་རི་བོ་སྤོ་མཐོན་དང་། །དེ་དག་ཐ་མའི་མཚན་ནི་སྤྲིན་དཔལ་ལོ། །བཅུ་པོ་དེ་ལ་སོགས་པ༌དག །མི་ཡི་དམ་པ་དེ་དག་ཀུན་མཆོད་དེ། །རྒྱལ་བའི་རྒྱ་མཚོ་འདིར་ཞུགས་པའི། །ཆོས་ཉིད་དེ་ནི་དག༌མ་གྱུར། །དེ་ཡི་འོག་ཏུ་དེ་བཞིན་གཤེགས། །ཉི་མའི་སྒྲོན་མ་དཔལ་གྱི་དཔལ་ཞེས་བྱ། །ཞིང་ནི་སངས་རྒྱས་ཡོད་པ་སྟེ། །དེ་ལ་བསྐལ་པ་ཟླ་བའི་དཔལ་བྱུང་ངོ་། །དེ་ལ་སྟོབས་བཅུ་བྱུང་བ་ནི། །བྱེ་བ་བརྒྱད་ཅུ་ཡོངས་སུ་ཚང་བ་སྟེ། །དེ་དག་ཀུན་ལའང་མཆོད་པའི་སྒོ། །རྒྱ་ཆེ་མཐའ་ཡས་ཡིད་འོང་དུ་མ་བྱས། །ཐོག་མར་བྱུང་བ་དྲི་ཟའི་རྒྱལ། །དེ་ཡི་འོག་ཏུ་སངས་རྒྱས་ཤིང་རྒྱལ་ཏེ། །རྒྱལ་བ་གསུམ་པ་ཡོན་ཏན་རི། །དེ་ཡི་འོག་ཏུ་རིན་ཆེན་སྤྱན་གཤེགས་སོ། །རྣམ་པར་སྣང་མཛད་འོད་ཀྱི་རྒྱན། །ཆོས་ཀྱི་རྒྱ་མཚོ་སངས་རྒྱས་གཟི་བརྗིད་དཔལ། །འཇིག་རྟེན་དབང་པོ་འོད་བཟང་དཔལ། །ཀུན་གྱི་ཐ་མ་ཆོས་འོད་རྒྱལ་པོའོ། །བཅུ་པོ་དེ་ལ་སོགས་པ་དག །བདེ་གཤེགས་དེ་དག་ཐམས་ཅད་མཆོད་བྱས་ཀྱང་། །ཆོས་ཀྱི་རྒྱ་མཚོར་འཇུག༌པ་ཡི། །ཡེ་ཤེས་ཁོ་མོས་ཐོབ་པར་མ་གྱུར་ཏོ། །དེ་ཡི་འོག་ཏུ་ཞིང་དག་པ། །རྡོ་རྗེའི་རང་བཞིན་མི་ཕྱེད་གཟི་བརྗིད་བརྟན། །ཀུན་ཏུ་འོད་སྤྲིན་མིང་ལྡན་བྱུང་། །རྒྱན་གཅིག་ཀུན་ནས་མཛེས་པར་གནས་པའོ། །དེ་ལ་སེམས་ཅན་དག་པ་མང་། །ཉོན་མོངས་དྲི་མས་ཉོན་མོངས་ཤིན་ཏུ་ཉུང་། །བསྐལ་པ་རབ་ཞི་བློ་གྲོས་འོད། །སངས་རྒྱས་སྟོང་རྣམས་བྱུང་བས་རྣམ་པར་བརྒྱན། །རྒྱལ་བའི་དང་པོ་རྡོ་རྗེ་གཙུག །གཉིས་པ་ཆགས་མེད་སྟོབས་མངའི་མཚན་ལྡན་པ། །རྒྱལ་བ་ཆོས་ཉིད་གཟུགས་བརྙན་དང་། །ཕྱོགས་རྣམས་ཀུན་ཏུ་སྒྲོན་མ་གསལ་བའི་བདག །རྒྱལ་བ་ལྔ་པ་ཐུགས་རྗེའི་འོད། །རྒྱལ་བ་དྲུག་པ་བརྟུལ་ཞུགས་རྒྱ་མཚོའོ། །བདེ་གཤེགས་བཟོད་འཁོར་སྒྲོན་མ་དང་། །བརྒྱད་པ་ཆོས་ཀྱི་དཀྱིལ་འཁོར་སྣང་བ་སྟེ། །སྣང་བ་རྒྱ་མཚོས་བརྒྱན་པ་དང་། །དེ་དག་ཐ་མ་ཞི་བའི་རྒྱལ་པོའོ། །བཅུ་པོ་དེ་ལ་སོགས་པ་དག །མི་ཡི་དམ་པ་དེ་ཀུན་ཁོ་མོས་མཆོད། །ཆོས་ཉིད་ནམ་མཁའ་མཉམ་པ་འདི། །རང་བཞིན་ཡོངས་སུ་ཀུན་ནས་དག་པ་སྟེ། །དེ་ལ་གནས་ཤིང་ཞིང་གི་རྣམས། །འབྱམས་ཀླས་ཀུན་ཏུ་སྤྱོད་སྤྱད་མ་དག་གོ །དེ་ཡི་འོག་ཏུ་མདངས་དགའ་བའི། །ཞིང་གི་སྤོས་སྒྲོན་སྤྲིན་གྱི་དཔལ་ཞེས་བྱ། །ཀུན་ནས་ཉོན་མོངས་ཡོངས་སུ་དག །དེ་ཡི་བསྐལ་པ་ལེགས་པར་བྱུང་ཞེས༌བྱ། །རྒྱལ་བ་བྱེ་བ་དེ་ཚེ་བྱུང་། །དེ་དག་ཀུན༌གྱི་དེ་ཚེའི་བསྐལ་པ་བརྒྱན། །མགོན་པོ་དེ་དག་ཆོས་གསུང་བ། །ཁོ་མོས་དྲན་པའི་སྟོབས་ཀྱིས་ཡོངས་སུ་བཟུང་། །རྒྱལ་བའི་དང་པོ་གྲགས་ཡངས་ཏེ། །ཆོས་ཀྱི་རྒྱ་མཚོ་ཤུགས་དྲག་དཔལ་གྱི་རྒྱལ། །ཆོས་དབང་རྒྱལ་པོ་ཡོན་ཏན་སྤྲིན། །ཆོས་ཀྱི་དཔལ་དང༌ལྷ་ཡི་ཅོད་པན་ནོ། །ཡེ་ཤེས་འོད་འཕྲོ་གཟི་བརྗིད་དཔལ། །རྐང་གཉིས་དམ་པ་བདུན་པ་དེ་ཡིན་ནོ། །རྒྱལ་བ་བརྒྱད་པ་ནམ་མཁའི་དབྱིངས། །དགུ་པ་ཀུན་ཏུ་འབྱུང་བའི་སྒྲོན་མ་སྟེ། །དེ་དག་ཐ་མའི་སངས་རྒྱས་ནི། །མཛོད་སྤུའི་དཔལ་གྱི་འོད་ཀྱི་བློ་གྲོས་ཏེ། །རྒྱལ་བ་མི་མཆོག་དེ་དག་ལ། །མཆོད་པ་བྱས་ནས་ཆགས་མེད་དེ་མ་སྦྱངས། །དེ་ཡི་འོག་མ་རྒྱན་རབ་ཅན། །རིན་ཆེན་སྣ་ཚོགས་ཀུན་ཏུ་གནས་པ་སྟེ། །འཇིག་རྟེན་རྣམ་པར་ཕྱེ་བའི་མཐའ། །རིན་ཆེན་རྒྱལ་མཚན་བློ་གྲོས་མཆོག །དེ་ཚེའི་བསྐལ༌པ་སྙིང་པོའི་ཚོགས། །དེ་ལ་སངས་རྒྱས་བརྒྱ་ཕྲག་ལྔ་བྱུང་སྟེ། །རྣམ་ཐར་ཆགས་མེད་འདི་འདོད་ཅིང་། །རང་བྱུང་དེ་དག་ཐམས་ཅད་ཁོ་མོས་མཆོད། །ཐོག་མའི་མཚན་ནི་ཡོན་ཏན་འཁོར། །ཞི་བའི་དབྱངས་དང་རྒྱ་མཚོ་ཕུན་སུམ་ཚོགས། །ཉི་མའི་གཟི་བརྗིད་དཔལ་གྱི་བདག །མཚན་གྱི་སྤྲིན་སྒྲ་དབྱངས་ཞེས་བྱ་བ་དང་། །ཆོས་དབྱངས་རྒྱལ་པོ་ཡོན་ཏན་བདག །བསོད་ནམས་རི་རབ་ཞི་བའི་འོད་ཀྱི་རྒྱལ། །བཅུ་པོ་དེ་ལ་སོགས་པ་དག །རྒྱལ་བ་དེ་དག་ཀུན་ཀྱང་ཁོ་མོས་མཆོད། །རྒྱལ་བའི་ལམ་ནི་དེར་སྦྱངས་ཏེ། །དེ་ལ་རྒྱལ་བ་ཀུན་ཀྱང་ཡང་དག་གཞོལ། །འོན་ཀྱང་ད་དུང་རྒྱལ༌བ་ཡི། །ཚུལ་འདིར་འཇུག་པའི་བཟོད་པ་མ་ཐོབ་བོ། །དེ་འོག་ཡིད་འོང་འོད་ལྡན་པ། །ཡོངས་སུ་དག་པའི་འཇིག་རྟེན་ཁམས༌བྱུང་སྟེ། །ཞིང་དབྱངས་ཕྲེང་བའི་བློ་གྲོས་ཅན། །སེམས་ཅན་ཉོན་མོངས་ཉུང་བའི་གནས་ཡིན་ནོ། །བསྐལ་པ༌བདེ་ཞིང་མངོན་དགའ་སྟེ། །དེ་ལ་སངས་རྒྱས་བྱེ་བ་བརྒྱད་ཅུ་བྱུང་། །མི་མཆོག་དེ་ཀུན་ཁོ་མོས་མཆོད། །རྒྱལ་བ་མཆོག་གི་ལམ་ཡང་རྣམ་པར་སྦྱངས། །རྒྱལ་བའི་དང་པོ་མེ་ཏོག་བརྩེགས། །རྒྱ་མཚོའི་སྙིང་པོ་ཡང་དག་འབྱུང་བའི་མཆོག །ལྷ་དབང་གཙུག་ཕུད་རིན་ཆེན་གཙོ། །གསེར་གྱི་རི་བོ་རིན་ཆེན་བརྩེགས་པ་དང་། །ཆོས་ཀྱི་རྒྱལ་མཚན་ནོར་གྱི་དཔལ། །དེ་དག་ཀུན་གྱི་ཐ་མ་ཡེ་ཤེས་བློ། །བཅུ་པོ་དེ་ལ་སོགས་པ་དག །ལྷ་དང༌མི་གཙོ་དེ་དག་ཁོ་མོས་མཆོད། །དེ་འོག་མཚམས་སྦྱོར་ཞིང་བྱུང་བ། །སྤྲུལ་པ་བཟང་པོའི་རྒྱལ་མཚན་སྒྲོན་མ་སྟེ། །བསྐལ་པ་སྟོང་གི་དཔལ་ཞེས་བྱ། །དེ་ལ་སངས་རྒྱས་བྱེ་བ་ཁྲག་ཁྲིག་དྲུག །ཞི་བའི་རྒྱལ་མཚན་ཞི་གནས་དཔལ། །ཞི་བའི་སྒྲོན་མ་སྤྲིན་གྱི་རྒྱལ་པོའི་དཔལ། །སྣང་བའི་འོད་ཀྱི་རྒྱལ་པོ་དང་། །རྣམ་པར་སྤྲིན་མཆེད་ཉི་མའི་གཟི་བརྗིད་དང་། །ཆོས་ཀྱི་སྒྲོན་མ་དཔལ་གྱི་རི། །འོད་འཕྲོའི་དཔལ་དང༌ལྷ་ཡི་སྙིང་པོའི་དཔལ། །དེ་དག་ཐ་མར་བྱུང་བ་ནི། །སེང་གེའི་སྒྲ་སྒྲོགས་མཁས་པ་སྒྲོན་མའོ། །བཅུ་པོ་དེ་ལ་སོགས་པ་དག །བདེ་གཤེགས་ཟླ་བ་དེ་དག་ཁོ་མོས་མཆོད། །འོན་ཀྱང་ཚུལ་མཚོ་འདིར་འཇུག་པའི། །བཟོད་པ་ཁོ་མོས་ཐོབ་པར་མ་གྱུར་ཏོ། །

དེ་འོག་མཚམས་སྦྱོར་ཞིང་བྱུང་བ། །ཀུན་ཏུ་སྣང་བའི་དཔལ་ཞེས་བྱ་བ་སྟེ། །བསྐལ་པ་གནས་མེད་རྣམ་པར་བརྒྱན། །དེ་ལ་སངས་རྒྱས་བྱེ་བ་སུམ་ཅུ་དྲུག །དང་པོ་ཡོན་ཏན་ཀུན་ཏུ་སྤྲིན། །དེ་ཡི་འོག་མ་སངས་རྒྱས་ནམ་མཁའི་ཐུགས། །སངས་རྒྱས་ལེགས་བྱུང་རྣམ་བརྒྱན་དང་། །རྒྱ་མཚོ་ཆོས་ཀྱི་སྤྲིན་སྒྲ་སྒྲོགས་པའི་དབྱངས། །རྒྱལ་བ་ཆོས་དབྱིངས་གསུང་དབྱངས་དང་། །སྤྲུལ་པའི་སྤྲིན་སྒྲ་སྙན་པའི་དཔལ་མངའ་དང་། །སངས་རྒྱས་ཕྱོགས་ཀུན་གཟི་བརྗིད་དང་། །ཆོས་ཀྱི་རྒྱ་མཚོ་ཡོངས་བྱུང་སྒྲ་དབྱངས་དང་། །ཡོན་ཏན་རྒྱ་མཚོ་དཔལ་གྱི་སྒྲོན། །རྒྱལ་བའི་ཉི་མ་དགུ་པ་བྱུང་བར་གྱུར། །དེ་དག་ཀུན་གྱི་ཐ་མ་སྟེ། །རིན་ཆེན་དཔལ་སྒྲོན་ཡོན་ཏན་དཔལ་མཆོད་དོ། །རིན་ཆེན་དཔལ་སྒྲོན་ཡོན་ཏན་དཔལ། །རྐང་གཉིས་དམ་པ་བྱུང་བར་གྱུར་པའི་ཚེ། །ཁོ་མོ་ལྷ་མོ་ཟླ་བཞིན་ཏེ། །མི་ཡི་དམ་པ་བྱུང་ཚེ་མཆོད་པ་བྱས། །རྒྱལ་བ་དེས་ནི་ཁོ་མོ་ལ། །མདོ་སྡེ་སྨོན་ལམ་རྒྱ་མཚོ་འབྱུང་བའི་རྒྱན། །གནས་མེད་རྒྱན་ཀྱང་རབ་ཏུ་བཤད། །ཐོས་ནས་ཁོ་མོས་དྲན་པའི་སྟོབས་ཀྱིས་བཟུང་། །ཁོ་མོས་མིག་ཡངས་དེར་ཐོབ་སྟེ། །ཏིང་འཛིན་ཞི་དང༌གཟུངས་ཀྱི་སྟོབས་ཀྱང་ཐོབ། །སྐད་ཅིག་རེ་རེ་ཞིང་བརྒྱུད་པའི། །རྒྱལ་བ་རྒྱ་མཚོ་མང་པོའང་ཁོ་མོས་མཐོང་། །བྱམས་ཚུལ་ཀུན་ཏུ་སྣང་བའི་སྤྲིན། །བྱང་ཆུབ་སེམས་རབ་མཁའ་དང་མཉམ་པ་སྟེ། །སྙིང་རྗེའི་སྙིང་པོས་བརྒྱན་པ་ཡང་། །སངས་རྒྱས་སྟོབས་ཀྱི་ཚུལ་དུ་ཡངས་པར་སྐྱེས། །འགྲོ་བ་ཕྱིན་ཅི་ལོག་གྱུར་ཏེ། །རྟག་དང་བདེ་དང་གཙང་དང་བདག་ཞེན་པ། །གཏི་མུག་མདོངས་གྱུར་མ་རིག་བསྒྲིབས། །ཉོན་མོངས་འཁྲུགས་ཤིང་ལོག་པར་འདུ་ཤེས་པ། །ལྟ་བའི་རྣམ་པར་སྟུག་ལ་སྤྱོད། །ལམ༌གྱི་འགྲོ་རྒྱུད་ཉམ་ངར་སྲེད་དབང་གྱུར། །རྣམ་པ་སྣ་ཚོགས་བྱེ་བྲག་ཏུ། །ལས་ཀྱིས་རྣམ་པར་བྲིས་པས་ཀུན་བྱུང་བ། །འགྲོ་རྒྱུད་ཀུན་གྱི་ཤི་འཕོའི་སྒོར། །སྐྱེ་བར་འགྱུར་བས་ཀུན་ཏུ༌སྐྱེར་འགྱུར་ཅིང་། །སྐྱེ་དང་རྒ་ཤི་གནོད་པ་རྣམས། །ལུས་དང་སེམས་ཀྱི་ཉམས་སུ་མྱོང་གྱུར་པ། །མཐོང་ནས་དེ་དག་ཕན་བདེའི་ཕྱིར། །ཞིང༌རྣམས་འབྱམས་ཀླས་ཐམས་ཅད་ཀྱི། །སྟོབས་བཅུ་གང་ལས་བྱུང༌བ་ཡི། །བླ་ན་མེད་པའི་སེམས་ཀྱང་ཁོ་མོས་བསྐྱེད། །དེ་ལས་སྨོན་ལམ་སྤྲིན་བྱུང་བ། །འགྲོ་བ་ཀུན་ལ་བདེ་བར་གཞོལ་བའི་མཆོག །ཚོགས་རྣམས་འབྱུང་བ་མཐའ་ཡས་དང་། །ལམ་ཚུལ་རྒྱ་མཚོ་རྟོགས་པའང་དེ་ནས་བྱུང་། །འཇུག་པའི་སྤྲིན་ཡངས་ཐོབ་གྱུར་པ། །ལམ༌ཆུད་ཀུན་ཏུ་སྒོ་གསལ་ཤུགས་ལྡན་ཏེ། །ཕ་རོལ་ཕྱིན་གྱི་སྤྲིན་ཡངས་པའང་། །ཆོས་དབྱིངས་འབྱམས་ཀླས་ཀུན་ཏུ་རྣམ་པར་འབྱེད། །ས་གནོན་ཤུགས་དྲག་ཡངས་ལྡན་དང་། །དུས་གསུམ་རྒྱ་མཚོའི་ཚུལ་གྱི་ས་རྣམས་ལ། །ཆགས་པ་མེད་པར་སྤྱོད་པར་གྱུར། །སྐད་ཅིག་གཅིག་གིས་རྒྱལ་བ་ཀུན་དྲུང་འགྲོ། །གཞན་ཡང་རྒྱལ་སྲས་ཁོ་མོས་ནི། །སྤྱོད་པ་ཀུན་ཏུ་བཟང་པོ་ཡོངས་སུ་ནོན། །ཆོས་དབྱིངས་བྱེ་བྲག་བཅུ་རྣམས་ཀྱི། །རྒྱ་མཚོའི༌ཚུལ་ལའང་ཁོ་མོ་རྟོགས་པར་འཇུག །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན། རྒྱལ་པོ་འཁོར་ལོས་སྒྱུར་བ། སངས་རྒྱས་ཀྱི་རིགས་ཀྱི་རྒྱུན་མི་གཅོད་པ་ལ་ཞུགས་པ། མིའི་བདག་པོ་ཞེས་བྱ་བ་བྱུང་བ། དེ་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ་དེ་ལྟར་མི་བལྟ་སྟེ། འཇམ་དཔལ་གཞོན་ནུར་གྱུར་པ་ནི། དེའི་ཚེ་དེའི་དུས་ན་རྒྱལ་པོ་མིའི་བདག་པོ་ཞེས་བྱ་བ་འཁོར་ལོས་སྒྱུར་བ་སངས་རྒྱས་ཀྱི་རིགས༌རྒྱུན་མི་གཅོད་པ་ལ་ཞུགས་པའོ། །ཁོ་མོ་སད་པར་བྱེད་པའི་མཚན་མོའི་ལྷ་མོ་དེ་ནི་བྱང་ཆུབ་སེམས་དཔའ་ཀུན་ཏུ་བཟང་པོས་སྤྲུལ་པའོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་སྒྱུར་བའི་བཙུན་མོ་བུད་མེད་རིན་པོ་ཆེ་བཟང་པོའི་བློ་གྲོས་མ་ཞེས་བྱ་བ༌བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན། འཁོར་ལོས་སྒྱུར་བའི་བཙུན་མོ་བུད་མེད་རིན་པོ་ཆེ་བཟང་པོའི་བློ་གྲོས་མ་ཞེས་བྱ་བར་གྱུར་ཏེ། ཁོ་མོ་མཚན་མོའི་ལྷ་མོ་དེས་སད་པར་བྱས་ནས། སངས་རྒྱས་བལྟ༌བ་ལ་ཡང་དག་པར་བསྐུལ་ཏོ། །རིགས་ཀྱི་བུ་ཁོ་མོས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དེ་སྲིད་ཅིག་ནས་བསྐྱེད་དེ། དེ་ལྟར་ཁོ་མོ་སེམས་བསྐྱེད་པ་དེའི་མཐུས། བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དུ་ནམ་ཡང་ངན་སོང་ལོག་པར་ལྟུང་བར་མ་སྐྱེས་ཏེ། རྟག་ཏུ་རྒྱུན༌མ་འཆད་པར་ལྷ་དང་མིའི་འགྲོ་བའི་རྒྱུད་ལ་བརྟེན་ཅིང་། ཐམས་ཅད་དུའང་དེ་བཞིན་གཤེགས་པ་བལྟ་བ་དང་ལྡན་པར་གྱུར་ཏོ། །ཐ་མར་ཁོ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་སྒྲོལ་མ་ཡོན་ཏན་རྒྱལ་མཚན་མཐོང་བ་ཙམ་གྱིས་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་དགའ་བ་ཤིན་ཏུ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་ཞེས་བྱ་བ་འདི་ཐོབ་སྟེ། དེ་ཐོབ་པས་ཁོ་མོ་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བའི་དོན་དུ་རྣམ་པ་འདི་ལྟ་བུས་སྟ་གོན་དུ་གནས་པ་ཡིན་ནོ། །

རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་དགའ་བ་རྒྱ་ཆེན་པོའི་ཤུགས་ཀྱི་རྒྱལ་མཚན་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འཁོད་ཅིང་། སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པ་ཉིད་དུ་འཇུག་པའི་ཤུགས་དྲག་པོ་རྒྱ་མཚོ་ཆེན་པོ་རབ་ཏུ་ཐོབ་པ། འཇུག་པའི་སྒོ་ཐམས་ཅད་ལ་སེམས་ཀྱི་སྐད་ཅིག་རེ་རེ་ཞིང་སྨོན་ལམ་ཆེན་པོ་རྒྱ་མཚོས་འཇུག་པ། རབ་ཏུ་ཐོབ་པ། སེམས་ཀྱི་སྐད་ཅིག་རེ་རེ་ཞིང་སྨོན་ལམ་རྒྱ་མཚོ་ཐམས་ཅད་ཀྱི་ཚུལ་ལ་ཕྱི་མའི་མཐའི་བསྐལ་པར་སྤྱད་པའི་དཀྱིལ་འཁོར་མངོན་པར་བསྒྲུབ་པ་ལ་མཁས་པ། སྤྱོད་པ་རེ་རེ་ལའང་ལུས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་བསྒྲུབ་པ་ལ་མཁས་པ། ལུས་རེ་རེས་ཀྱང་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་རྒྱས་པར་འགེངས་པ་ལ་མཁས་པ། ཆོས་ཀྱི་དབྱིངས་ཀྱི་ཚུལ་རྒྱ་མཚོ་རེ་རེ་ལའང་སངས་རྒྱས་ཀྱི་ཞིང་ཐམས་ཅད་དུ། སེམས་ཅན་རྣམས་ཀྱི་བསམ་པ་ཇི༌ལྟ་བ་བཞིན་དུ་ལུས་རྣམ་པར་དམིགས་པའི་སྤྱོད་པ་ཡོངས་སུ་སྟོན་པ་ལ་མཁས་པ། ཞིང་ཐམས་ཅད་དུའང་ཞིང་གི་རྡུལ་ཤིན་ཏུ་ཕྲ་བ་ཐམས་ཅད་ལ་དེ་བཞིན་གཤེགས་པ་རྒྱ་མཚོ་མཐའ་དང་དབུས་མེད་པ་ལ་འཇུག་པར་མཁས་པ། དེ་བཞིན་གཤེགས་པ་རེ་རེ་ཞིང་ཡང་ཆོས་ཀྱི་དབྱིངས་ཀྱིས་ཀླས་པར་རྒྱས་པར་འགེངས་པའི་དེ་བཞིན་གཤེགས་པའི་རྣམ་པར་འཕྲུལ་པ་ལ་འཇུག་པར་མཁས་པ། དེ་བཞིན་གཤེགས་པ་རེ་རེའི་སྔོན་གྱི་མཐའི་བསྐལ་པ་ལ། བྱང་ཆུབ་སེམས་དཔའི་སྤྱོད་པའི་ཚོགས་ཡོངས་སུ་བསྒྲུབ་པ་ཡང་དག་པར་བསྡུས་པ་ལ་འཇུག་པར་མཁས་པ། དེ་བཞིན་གཤེགས་པ་རེ་རེའི་ཆོས་ཀྱི་འཁོར་ལོ་ཤིན་ཏུ༌ཡངས་པ། ཡང་དག་པར༌བླང་བ་དང་། ཡོངས་སུ་གཟུང་བ་ལ་མཁས་པ། དུས་གསུམ་ཐམས་ཅད་ཀྱི་དེ་བཞིན་གཤེགས་པའི་རྣམ་པར་འཕྲུལ་པའི་ཚུལ་རྒྱ་མཚོ་ལ་འཇུག་པར་མཁས་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་དེ་བཞིན་གཤེགས་པའི་འཁོར་གྱི་དཀྱིལ་འཁོར་འདི་ཉིད་ན་ཁོ་མོ་དང་། རྒྱང་མི་རིང་བ་ཞིག་ན་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ཞེས་བྱ་བ་འདུག༌གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ལ་འཇུག་པར་བྱ་བ་དང་། ཇི་ལྟར་ཡོངས་སུ༌སྦྱང་བར་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ༌རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ལ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ།

མཚན་མོའི་ལྷ༌མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ཞེས་བྱ་བས་རང་གི་ཡོན་ཏན་གྱི་རྣམ་གྲངས་དཔག་ཏུ་མེད་པ་སྣང་བར་མཛད་ཅིང་དེ་དག་གི་རྒྱུ་རྐྱེན་བསྟན་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་དགའ་བ་ཤིན་ཏུ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་དེ་ལ་མོས་པར་བྱ་བ་དང་། ཁོང་དུ་ཆུད་པར་བྱ་བ་དང་། རྟོགས་པར་བྱ་བ་དང་། ཤེས་པར་བྱ་བ་དང་། ཡིད་ཆེས་པར་བྱ་བ་དང་། རབ་ཏུ་གཞོལ་བར་བྱ་བ་དང་། རྒྱས་པར་དགང༌བར་བྱ་བ་དང་། རྗེས་སུ་ཤེས་པར་བྱ་བ་དང་། རྗེས་སུ་དྲན་པར་བྱ་བ་དང་། རྗེས་སུ་གཞོལ་བར་བྱ་བ་དང་། བསྒོམ་པ་བྱེད་ཅིང་དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ་བྱ་བ་དང་། གདམས་ངག་རྗེས་སུ་བསྟན་པ་ལ་བར་ཆད་མེད་པར་བྱ་བའི་ཕྱིར་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བས། འགྲོ༌ཁར་གདམས་པ་རྗེས་སུ་དྲན་པར་བྱེད་ཅིང་། དགེ་བའི་བཤེས་གཉེན་བལྟ་བའི་སུ་སེམས་པའི་དབང་པོའི་དཀྱིལ་འཁོར་དང་། དགེ་བའི་བཤེས་གཉེན་མཐོང་བ་ཐོབ་པར་བྱ་བ་ལ་ཡང་དག་པར་སྤྱོད་པ། ཕྱོགས་ཀུན་ཏུ་མངོན་པར་བལྟས་པ་དང་། དགེ་བའི་བཤེས་གཉེན་བཙལ་བར་ཡིད་ལ་བྱ་བ་དང་། ང་རྒྱལ་ཐམས་ཅད་དང་བྲལ་བ་དང་། དགེ་བའི་བཤེས་གཉེན་བསྙེན་བཀུར་བའི་མཐུ་ཚོགས་ཆེན་པོས་ཡོངས་སུ་བསྒྲུབ་པར་ཞེ་ནོན་པ་དང་། དགེ་བའི་བཤེས་གཉེན་དང་། རྒྱུད་ཀྱི་ཚུལ་གཅིག་ཏུ་གྱུར་པའི་དགེ་བའི་རྩ་བས་དགེ་བའི་བཤེས་གཉེན་གྱི་ཐབས་མཁས་པའི་སྤྱོད་པ་ཐམས་ཅད་ལ་བསམ་པ་མི་ཕྱེད་པས་ཞུགས་པ། དགེ་བའི་བཤེས་གཉེན་ལ་བརྟན་པ་ཡོངས་སུ་འཕེལ་བར་བྱ་བ་ལ་བརྩོན་འགྲུས་ཀྱི་ཤུགས་ཆེན༌པོ་རྒྱ་མཚོ་ཡོངས་སུ་སྐྱེས་པ། བསྐལ་པ་ཐམས་ཅད་དུ་དགེ་བའི་བཤེས་གཉེན་མཉམ་པ་ཉིད་ཁོང་དུ་ཆུད་པས་གནས་པར་བྱ་བའི་སྨོན་ལམ་དང་ལྡན་པ་དེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་དྲུང་དུ་སོང་ངོ་། །

དེ་དེ་ལྟར་འགྲོ་བའི་ཚེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱིས་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་བ་སྟོན་པའི་ཁྱུ་མཆོག་གི་མཐུ་ཕྱུང་བ་ཡོངས་སུ་བསྟན་པའི་ཕྱིར། མཚན་དང་དཔེ་བྱད་བཟང་པོས་ཡོངས་སུ་གྲུབ་པའི་ལུས་བསྟན་ཏེ། མཛོད་སྤུ་ནས་འོད་ཟེར་ཡེ་ཤེས་ཀྱི་འོད་ཀུན་ཏུ་སྣང་བ་དྲི་མ་མེད་པའི་མདངས་ཀྱི་རྒྱལ་མཚན་ཞེས་བྱ་བ་འོད་ཟེར་གྱི་འཁོར་མཐའ་དང་དབུས་མེད་པ་དང་ལྡན་པ་བཀྱེའོ། །དེས་འཇིག་རྟེན་ཐམས་ཅད་སྣང་བར་བྱས་ནས། ཚོང་དཔོན་གྱི་བུ་ནོར་བཟང་གི་སྤྱི་བོར་འདུས་ཏེ་ལུས་ཐམས་ཅད་དུ་ཁྱབ་པར་གྱུར་ཏོ། །

ཚོང་དཔོན་གྱི་བུ་ནོར་བཟང་ལ་འོད་ཟེར་དེས་རེག་པར་གྱུར་མ་ཐག་ཏུ་དེ་ཉིད་ཀྱི་མོད་ལ་ཏིང་ངེ་འཛིན་ཤིན་ཏུ་རྡུལ་དང་བྲལ་བ་ཞེས་བྱ་བའི་དཀྱིལ་འཁོར་ཐོབ་པར་གྱུར་ཏོ། །དེ་ཐོབ་པས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་དང་། མཚན་མོའི་ལྷ་མོ་སེམས་ཅན་ཀུན་ནས་སྐྱོང་བའི་གཟི་བརྗིད་ཀྱི་དཔལ་གཉིས་ཀྱི་བར་གྱི་ལམ་ན་སའི་དཀྱིལ་འཁོར་ཡོད་པ་དེ་ལ་མེའི་རྡུལ་ཤིན་ཏུ་ཕྲ་བའམ། ཆུའི་རྡུལ་ཤིན་ཏུ་ཕྲ་བའམ། སའི་རྡུལ་ཤིན་ཏུ་ཕྲ་བའམ། རྡོ་རྗེའི་རྡུལ་ཤིན་ཏུ་ཕྲ་བའམ། ནོར་བུ་རིན་པོ་ཆེའི་རྒྱལ་པོ་དམ་པ་སྣ་ཚོགས་ཀྱི་རྡུལ་ཤིན་ཏུ་ཕྲ་བའམ། མེ་ཏོག་དང་། སྤོས་དང་། ཕྱེ་མའི་རྡུལ་ཤིན་ཏུ་ཕྲ་བའམ་རྒྱན་ཐམས་ཅད་ཀྱི་རྡུལ་ཤིན་ཏུ་ཕྲ་བའམ། དམིགས་པ་ཐམས་ཅད་ཀྱི་རྡུལ་ཤིན་ཏུ་ཕྲ་བ་ཇི་སྙེད་ཅིག་ཡོད་པའི་རྡུལ་ཤིན་ཏུ་ཕྲ་བ་དེ་དག་ཐམས་ཅད་ལ་རྡུལ་ཕྲ་མོ་རེ་རེ་ཞིང་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད། ཆུའི་ཕུང་པོ་དང་བཅས། མེའི་ཕུང་པོ་དང་བཅས། རླུང་གི་ཕུང་པོ་དང་བཅས། སའི་ཕུང་པོ་དང་བཅས། འཇིག་རྟེན་གྱི་ཁམས་ཀྱི་མཚམས་དང་བཅས། གཞི་དང་བཅས་རྟེན་དང་བཅས་པ་དབྱིབས་སྣ་ཚོགས་ཅན་སའི་གཞི་རྣམ་པ་ཐ་དད་པ་སྣ་ཚོགས་དང་ལྡན་པའི་རིའི་འཁོར་སྣ་ཚོགས་ཅན་ཆུ་རླུང་དང་མཚོ་སྣ་ཚོགས་ཀྱིས་བརྒྱན་པ་རྒྱ་མཚོ་སྣ་ཚོགས་ཀྱིས་ཀུན་ནས་འཁོར་བ། ལྷ་རྫས་ཀྱི་ཁྱིམ་སྣ་ཚོགས་ཀྱི་རྒྱན་དང་ལྡན་པ། ཤིང་སྣ་ཚོགས་ཀྱིས་ཡོངས་སུ་གང་བ། ནམ་མཁའི་དབྱིངས་ཀྱི་རྒྱན་སྣ་ཚོགས་ཅན། ལྷའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ཀླུའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། གནོད་སྦྱིན་གྱི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། དྲི་ཟའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ལྷ་མ་ཡིན་གྱི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ནམ་མཁའ་ལྡིང་གི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། མིའམ་ཅིའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ལྟོ་འཕྱེ་ཆེན་པོའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། མིའི་གྲོང་ཁྱེར་གྱི་ཁྱིམ་གྱི་རྒྱན་དང་བཅས་པ། ཕྱོགས་དང་ཕྱོགས་མཚམས་ཐམས་ཅད་ན་རྣམ་པར་གནས་པའི་སེམས་ཅན་ཐམས་ཅད་ཀྱི་གྲོང་ཁྱེར་གྱི༌ཁྱིམ་གྱི་གནས་དང་། སེམས་ཅན་དམྱལ་བའི་འཇིག་རྟེན་གྱི་ཡུལ་དང་། བྱོལ་སོང་གི་སྐྱེ་གནས་ཀྱི་འཇིག་རྟེན་གྱི་ཡུལ་དང་། གཤིན་རྗེའི་འཇིག་རྟེན་གྱི་ཡུལ་དང་། མི་དང་མི་མ་ཡིན་པའི་ལམ་གྱི་རྒྱུད་ཀྱི་ཤི་འཕོ་དང་། སྐྱེ་བའི་ཡུལ་དང་བཅས་པ། སྐྱེ་བ་སྣ་ཚོགས་ཀྱིས་མ་འདྲེས་པའི་རྒྱུད་མཐའ་ཡས་པའི་བྱེ་བྲག་ལ་ཡོངས་སུ་གཞོལ་བ་རྣམས་འདུ་ཞིང་འཇིག་པར་གྱུར་པ་མཐོང་ངོ་། །

འཇིག་རྟེན་གྱི་ཁམས་དེ་དག་ཀྱང་རྣམ་པ་སྣ་ཚོགས་སུ་མཐོང་སྟེ། འཇིག་རྟེན་གྱི་ཁམས་ལ་ལ་ནི་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ཡོངས་སུ་དག་པར་མཐོང་ངོ་། །ལ་ལ་ནི་ཤིན་ཏུ་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ལམ་གྱི་རྒྱུད་ཡོངས་སུ་དག་པར་མཐོང་ངོ་། །ལ་ལ་ནི་ཀུན་ནས་ཉོན་མོངས་པ་ལ་ཡོངས་སུ་དག་པར་མཐོང་ངོ་། །ལ་ལ་ནི་རྣམ་པར་དག་པ་ལ་ཀུན་ནས་ཉོན་མོངས་པར་མཐོང་ངོ་། །ལ་ལ་ནི་ཤིན་ཏུ་ཡོངས་སུ་དག་པར་མཐོང་ངོ་། །ལ་ལ་ནི་གཞི་མཉམ་པར་མཐོང་ངོ་། །ལ་ལ་ནི་སྤྱིའུ་ཚུགས་སུ་གནས་པར་མཐོང་ངོ་། །ལ་ལ་ནི་སྣྲེལ་ཞིར་འདུག་པར་མཐོང་ངོ་། །འཇིག་རྟེན་གྱི་ཁམས་དེ་དག་གི་སེམས་ཅན་གྱི་ལམ་གྱི་རྒྱུད་དང་། སེམས་ཅན་གྱི་སྐྱེ་གནས་ཐམས་ཅད་ན་མཚན་མོའི་ལྷ་མོ་སེམས་ཅན་ཀུན་ཏུ༌སྐྱོང་བའི་གཟི་བརྗིད་དཔལ་སེམས་ཅན་སོ་སོ་ནས་འདུལ་བའི་རྐྱེན་བཞིན་དུ་འཇིག་རྟེན་ཐམས་ཅད་ལ་མ་འདྲེས་པར་ཡོངས་སུ་བསྟན་པའི་ཕྱིར། སེམས་ཅན་ཐམས་ཅད་ལ་མངོན་དུ་གྱུར་པར་གནས་པར་མཐོང་ངོ་། །སེམས་ཅན་ཚེའི་ཚད་རྣམ་པ་ཇི་ལྟ་བུ་དང་ལྡན་པ་དང་། མོས་པའི་སྤྱོད་ཡུལ་རྣམ་པ་སྣ་ཚོགས་ཅན་དང་། ལུས་རྣམ་པ་ཇི་ལྟ་བུ་དང་ལྡན་པ་དང་། ངག་རྣམ་པར་ཕྱེ་བ་དང་། ངེས་པའི་ཚིག་གི་འདུ་བྱེད་ཀྱི་ཐ་སྙད་རྣམ་པ་ཇི་ལྟ་བུ་དང་ལྡན་པ་དང་། སྦྱོར་བའི་རྣམ་པ་ཇི་ལྟ་བུ་དང་ལྡན་པ་དང་། དབང་གི་རྣམ་པ་ཇི་ལྟ་བུ་དང་ལྡན་པ་རྣམས་ཡོངས་སུ་སྨིན་པར་བྱ་བ་དང་གདུལ་བའི་དོན་དུ་སེམས་ཅན་ཐམས་ཅད་ལ་མ་འདྲེས་པར་མངོན་སུམ་དུ་གནས་པར་མཐོང་ངོ་། །

དེ་ཡང་འདི་ལྟ་སྟེ། སེམས་ཅན་དམྱལ་བའི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་སེམས་ཅན་དམྱལ་བའི་སྡུག་བསྔལ་དང་། འཇིགས་པ་རྣམ་པར་བཟློག་པ་དང་། བྱོལ་སོང་གི་སྐྱེ་གནས་སྣ་ཚོགས་སུ་སྐྱེས་པའི་སེམས་ཅན་རྣམས་ཀྱི་གཅིག་ལ་གཅིག་ཟ་བའི་འཇིགས་པ་རྣམ་པར་བཟློག་པ་དང་། གཤིན་རྗེའི་འཇིག་རྟེན་གྱི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་བཀྲེས་པ་དང་། སྐོམ་པ་ལ་སོགས་པའི་སྡུག་བསྔལ་གྱི་འཇིགས་པ་རྣམ་པར་བཟློག་པ་དང་། ཀླུའི་འཇིག་རྟེན་གྱི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་ཀླུའི་སྡུག་བསྔལ་དང་། འཇིགས་པ་ཐམས་ཅད་རྣམ་པར་བཟློག་པ་དང་། འདོད་པའི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་འདོད་པའི་ཁམས་ཀྱི་སྡུག་བསྔལ་དང་། འཇིགས་པ་རྣམ་པར་བཟློག་པ་དང་། མིའི་འཇིག་རྟེན་གྱི་ལམ་གྱི་རྒྱུད་དུ་གཏོགས་པའི་སེམས་ཅན་རྣམས་ཀྱི་མཚན་མོའི་མུན་པ་མུན་ནག་གིས། ཆོད་པའི་མུན་པའི་འཇིགས་པ་ཐམས་ཅད་རྣམ་པར་བཟློག་པ་དང་། མི་སྙན་པ་དང་། བསྔགས་པ་མ་ཡིན་པ་དང་། གྲགས་པ་མ་ཡིན་པའི་སྒྲ་དང་། ཚིགས་སུ་བཅད་པ་ལ་མངོན་པར་ཞེན་པའི་སེམས་ཅན་རྣམས་ཀྱི་གྲགས་པ་མ་ཡིན་པ་དང་། བསྔགས་པ་མ་ཡིན་པའི་འཇིགས་པ་རྣམ་པར་བཟློག་པ་དང་། འཁོར་གྱི་འཇིགས་པར་ལྷུང་བའི་སེམས་ཅན་རྣམས་ཀྱི་འཁོར་ཏུ་བག་ཚ་བའི་འཇིགས་པ་རྣམ་པར་བཟློག་པ་དང་། འཆི་བས་འཇིགས་ཤིང་སྡང་བའི་སེམས་ཅན་རྣམས་ཀྱི་འཆི་བའི་འཇིགས་པ་རྣམ་པར་བཟློག་པ་དང་། ངན་སོང་གི་གཡང་སས་འཇིགས་ཤིང༌སྡང་བའི་སེམས་ཅན་རྣམས་ཀྱི་ངན་སོང་གི་གཡང༌སའི་འཇིགས་པ་རྣམ་པར་བཟློག་པ་དང་། འཚོ་བ་མེད་པས་འཇིགས་ཤིང་སྐྲག་པའི་སེམས་ཅན་རྣམས་ཀྱི་འཚོ་བ་མེད་པའི་འཇིགས་པ་རྣམ་པར་བཟློག་པ་དང་། དགེ་བའི་རྩ་བ་ཆུད་ཟོས་ཀྱིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་དགེ་བའི་རྩ་བ་ཆུད་ཟོས་ཀྱི་འཇིགས་པ་རྣམ་པར་བཟློག་པ་དང་། བྱང་ཆུབ་ཀྱི་སེམས་ཉམས་ཀྱིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་བྱང་ཆུབ་ཀྱི་སེམས་ཉམས་ཀྱི་འཇིགས་པ་རྣམ་པར་བཟློག་པ་དང་། སྡིག་ཏོའི་གྲོགས་པོ་དང་འཕྲད་ཀྱིས་འཇིགས་ཤིང་བག་ཚ་བའི་སེམས་ཅན་རྣམས་སྡིག་ཏོའི་གྲོགས་པོ་དང་འཕྲད་པའི་འཇིགས་པ་རྣམ་པར་བཟློག་པ་དང་། དགེ་བའི་བཤེས་གཉེན་དང་བྲལ་གྱིས་དོགས་ཤིང་བག་ཚ་བའི་སེམས་ཅན་རྣམས་ཀྱི་དགེ་བའི་བཤེས་གཉེན་དང་བྲལ་བའི་འཇིགས་པ་རྣམ་པར་བཟློག་པ་དང་། ཉན་ཐོས་དང་། རང་སངས་རྒྱས་ཀྱི་སར་ལྷུང་གིས་འཇིགས་ཤིང་བག་ཚ་བའི་སེམས་ཅན་རྣམས་ཀྱི་ཉན་ཐོས་དང་། རང་སངས་རྒྱས་ཀྱི་སར་ལྟུང་བའི་འཇིགས་པ་རྣམ་པར་བཟློག་པ་དང་། འཁོར་བའི་གནས་སྣ་ཚོགས་ཀྱི་སྡུག་བསྔལ་གྱིས་འཇིགས་ཤིང་སྐྲག་པ་རྣམས་ཀྱི་འཁོར་བའི་གནས་སྣ་ཚོགས་ཀྱི་སྡུག་བསྔལ་གྱི་འཇིགས་པ་རྣམ་པར་བཟློག་པ་དང་། སེམས་ཅན་སྐལ་བ་མི་མཉམ་པ་དང་འཕྲད་ཀྱིས་འཇིགས་ཤིང་བག་ཚ་བ་རྣམས་ཀྱི་སེམས་ཅན་སྐལ་བ་མི་མཉམ་པ་དང་འཕྲད་པའི་འཇིགས་པ་རྣམ་པར་བཟློག་པ་དང་། དུས་མི་བཟད་པར་སྐྱེས་ཀྱིས་འཇིགས་ཤིང་བག་ཚ་བ་རྣམས་ཀྱི་དུས་མི་བཟད་པར་སྐྱེ་བའི་འཇིགས་པ་རྣམ་པར་བཟློག་པ་དང་། རིགས་ངན་པར་སྐྱེས་ཀྱིས་འཇིགས་ཤིང་བག་ཚ་བ་རྣམས་ཀྱི་རིགས་ངན་པར་སྐྱེ་བའི་འཇིགས་པ་རྣམ་པར་བཟློག་པ་དང་། སྡིག་ཏོའི་ལས་བྱས་ཀྱིས་འཇིགས་ཤིང་བག་ཚ་བ་རྣམས་ཀྱི། སྡིག་ཏོའི་ལས་བྱེད་པའི་འཇིགས་པ་རྣམ་པར་བཟློག་པ་དང་། ལས་དང་ཉོན་མོངས་པའི་སྒྲིབ་པས་འཇིགས་ཤིང༌སྡང་བ་རྣམས་ཀྱི་ལས་དང་ཉོན་མོངས་པའི་སྒྲིབ་པའི་འཇིགས་པ་རྣམ་པར་བཟློག་པ་དང་། འདུ་ཤེས་ཀྱི་རྣམ་པ་སྣ་ཚོགས་ཀྱིས་གནས་དང་འཆིང་བས་འཇིགས་ཤིང༌སྡང་བ་རྣམས་ཀྱི་འདུ་ཤེས་རྣམ་པ་སྣ་ཚོགས་ཀྱི་གནས་དང་། འཆིང་བའི་འཇིགས་པ་རྣམ་པར་བཟློག༌པའི་ཕྱིར་སེམས་ཅན༌ཐམས་ཅད་ལ་སོ་སོར་མངོན་ཏུ་གྱུར་པར་གནས་པ་མཐོང་ངོ་། །

འདི་ལྟ་སྟེ་སྒོ་ང་ལས་སྐྱེས་པའི་སེམས་ཅན་དང་། མངལ་ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། གཟུགས་ཡོད་པ་དང་། གཟུགས་མེད་པ་དང་། འདུ་ཤེས་ཡོད་པ་དང་། འདུ་ཤེས་མེད་པ་དང་། འདུ་ཤེས་ཡོད་པའང་མ་ཡིན། འདུ་ཤེས་མེད་པ་ཡང་མ་ཡིན་པའི་སེམས་ཅན་ཐམས་ཅད་ཡོངས་སུ་བསྐྱབ་པའི་སྨོན་ལམ་གྱི་སྟོབས་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་ཤུགས་དྲག་པོ་དང་། རྣམ་པར་གནོན་པ་ཤིན་ཏུ་ཡངས་པའི་སྟོབས་དང་། བྱང་ཆུབ་སེམས་དཔའི་མངོན་པར་ཤེས་པ་ཆེན་པོའི་སྟོབས་དང་། མཐུ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་བསྒྲུབས་པའི་སྟོབས་ཀྱིས་སྙིང་རྗེ་ཆེན་པོའི་ཚུལ་རྒྱ་མཚོའི་ཤུགས་དྲག་པོ་ཤིན་ཏུ་སྐྱེས་པའི་ཕྱིར་འགྲོ་བ་ཐམས་ཅད་དུ་ཐོགས་པ་མེད་པའི་བྱམས་པ་ཆེན་པོས་རྒྱས་པར་དགང་བ་དང་། སེམས་ཅན་ཐམས་ཅད་ཀྱི་བདེ་བ་ཡོངས་སུ་བསྒྲུབ་པ་དང་། དགའ་བའི་ཤུགས་རྣམ་པར་འཕེལ་བར་བྱ་བ་དང་། སེམས་ཅན་ཐམས་ཅད་ཡོངས་སུ་བསྡུ་བའི་ཡེ་ཤེས་རབ་ཏུ་བསྒྲུབ་པའི་ཕྱིར། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོའི་རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་དང་ལྡན་པས་ཞིང་ཐམས་ཅད་ཡོངས་སུ་དག་པར་བྱ་བ་ལ་མངོན་དུ་གྱུར༌པར་གནས་པར་མཐོང་ངོ་། །

ཆོས་ཐམས་ཅད་ཀྱི་རྒྱུས་ཤེས་པར་བྱ་བ་ལ་མངོན་དུ་གྱུར་པ་དང་། སངས་རྒྱས་ཐམས་ཅད་མཆོད་ཅིང་རིམ་གྲོ་བྱ་བ་ལ་མངོན་དུ་གྱུར་པ་དང་། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡོངས་སུ་གཟུང་བ་ལ་མངོན་དུ་གྱུར་པ་དང་། དགེ་བའི་རྩ་བ་ཐམས་ཅད་བསགས་པ་ལ་མངོན་དུ་གྱུར་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་རྣམ་པར་འཕེལ་བར་བྱ་བ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་སེམས་ལ་སྒྲིབ་པ་མེད་པར་མངོན་དུ་གྱུར་པར་གནས་པ་དང་། སེམས་ཅན་ཐམས་ཅད་ཀྱི་དབང་པོ་ཡོངས་སུ་སྨིན་པར་བྱ་བ་ལ་མངོན་དུ་གྱུར་པར་གནས་པ་དང་། སེམས་ཅན་ཐམས་ཅད་ཀྱི་མོས་པ་རྒྱ་མཚོ་རྣམ་པར་སྦྱང་བ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་སྒྲིབ་པའི་ཆོས་རྣམ་པར་བཟློག་པ་ལ་མངོན་དུ་གྱུར་པ་དང་། སེམས་ཅན་ཐམས་ཅད་ཀྱི་མི་ཤེས་པའི་མུན་པ་རྣམ་པར་བསྩལ་བ་ལ་མངོན་དུ་གྱུར་ཅིང་ཐམས་ཅད་མཁྱེན་པའི་ཡེ་ཤེས་སྣང་བ་ཡོངས་སུ་བསྐྱེད་པའི་དོན་དུ་གནས་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་དཔའི་རྣམ་པར་ཐར་པའི་ཁྱུ་མཆོག་གི་མཐུ་ཕྱུང་བ་དང་། རྣམ་པར་འཕྲུལ་པ་འཇིག་རྟེན་ཐམས་ཅད་ལ་མངོན་པར་གནས་ཤིང་། འགྲོ་བ་རྣམ་པར་འདུལ་བ་སྟོན་པ་བསམ་གྱིས་མི་ཁྱབ་པ་དེ་ལྟ་བུར་མཐོང་ནས་རབ་ཏུ་དགའ་བ་སྐྱེས་ཏེ། སྤྲོ་བ་ཆེན་པོའི་ཤུགས་དྲག་པོ་རྒྱ་མཚོ་རབ་ཏུ་ཐོབ་ནས། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་ནས་ངོར་གྱེན་དུ་བལྟས་སོ། །

དེ་ནས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱིས་བྱང་ཆུབ་སེམས་དཔའི་གཟུགས་དང་། མཚན་རྣམ་པར་དག་པ་དེ་མི་སྣང་བར་བྱས་ཏེ། མཚན་མོའི་ལྷ་མོའི་གཟུགས་སུ་བྱས་ཏེ། རྣམ་པར་འཕྲུལ་པ་ཐམས་ཅད་འབྱིན་ཅིང་འདུག་པར་གནས་སོ། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་མདུན་དུ་འདུག་སྟེ། ཐལ་མོ་སྦྱར་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཁྱོད་ཀྱི་སྐུ་ཡང་མཚན་རབ་རྒྱན་གྱིས་བརྒྱན། །ཤིན་ཏུ་བཟང་ཞིང་མཛེས་པ་བདག་གིས་མཐོང་། །ནམ་མཁའ་སྐར་མའི་ཚོགས་ཀྱིས་བརྒྱན་པ་བཞིན། །དཔེ་བྱད་བཟང་པོས་རྣམ་པར་བྲིས་པ་མཐོང་། །འོད་ཀྱི་འཁོར་ཅན་སྐུ་བཟང་དམ་པའི་མཆོག །མཐའ་ཡས་ཞིང་གི་རྡུལ་ཁམས་མང་པོ་སྙེད། །ཁ་དོག་སྣ་ཚོགས་རྣམ་པའི་དཔེ་ཚུལ་དུ། །ཕྱོགས་རྣམས་ཀུན་གྱི་དབྱིངས་སུ་ཁྱབ་པར་གང་། །འོད་ཟེར་དྲ་བ་མང་པོ་འགྲོ་སེམས་མཉམ། །ཁྱོད་ཀྱི་བ་སྤུའི་སྒོ་ནས་འགྱེད་པ་མཛད། །འོད་ཟེར་སྒོ་ལ་པདྨོའི་ཡིད་འོང་གནས། །ཁྱོད་ཀྱི་སྤྲུལ་པ་འགྲོ་བའི་སྡུག་བསྔལ་སེལ། །སྤོས་ཀྱི་ན་བུན་སྤྲིན་དུ་ཆགས་པ་འགྱེད། །འགྲོ་བའི་གཟུགས་སུ་གནས་ཏེ་ཀུན་ནས་མཛེས། །མེ་ཏོག་སྒོ་རྣམས་ཀུན་ནས་དགྱེ་མཛད་པས། །ཆོས་དབྱིངས་བཞུགས་པའི་རྒྱལ་བ་ཀུན་ཏུ་ཁྱབ། །ཁྱོད་ཀྱི་ཕྲག་པའི་ལྷུན་ཡངས་འཕགས་པ་ནི། །རིན་ཆེན་འོད་འཕྲོ་རི་བོ་རི་རབ་འདྲ། །དྲི་མེད་དེ་ནི་འགྲོ་བ་ཀུན་ཏུ་གསལ། །གཏི་མུག་མུན་ནག་རྣམ་པར་བཟློག་པ་མཛད། །ཁྱོད་ཀྱི་དྲི་མེད་ཞལ་མདོག་བཟང་བ་ལས། །ན་བུན་སྤྲིན་དང་ཉི་མ་ཡངས་པ་འབྱུང་། །ཁྱོད་ཀྱི་ཉི་མའི་འཁོར་འདྲ་འོད་བཟང་བ། །རྣམ་པར་སྣང་མཛད་སྤྱོད་ཡུལ་ཡངས་པ་འབྱིན། །ཁྱོད་ཀྱི་སྤྱན་ནས་ཟླ་སྐར་འོད་འབྱུང་བ། །རྟག་ཏུ་དྲི་མེད་སྤྲིན་ལྟར་མང་བ་སྟེ། །དེ་དག་ཕྱོགས་བཅུར་བཀང་ཞིང་འགྲོ་བ་རྣམས། །རབ་ཏུ་སྣང་བྱེད་འཇིག་རྟེན་རབ་རིབ་སེལ། །ཁྱོད་ཀྱི་མཚན་ལས་འགྲོ་བའི་ལུས་མཉམ་པའི། །སྤྲུལ་པ་རྒྱ་མཚོ་ཕྱོགས་སུ་ཁྱབ་པར་འཕྲོ། །དེ་དག་ཆོས་དབྱིངས་ཡངས་པར་རྒྱས་འགེངས་ཤིང་། །སེམས་ཅན་ཚད་མེད་ཚོགས་རྣམས་ཡོངས་སུ་འདུལ། །ཁྱོད་ཀྱི་སྐུ་ནི་འབྱམས་ཀླས་ཕྱོགས་སུ་སྣང་། །འགྲོ་བ་ཀུན་ལ་མངོན་གྱུར་དགའ་བ་བསྐྱེད། །རྒྱལ་པོ་མེ་དང་རྐུན་པོ་ཆུས་བསྐྱེད་པའི། །འཇིགས་པ་ཐམས་ཅད་རྣམ་སེལ་ཞི་བར་མཛད། །གང་ཚེ་ཁྱོད་ཀྱི་སྤྱན་སྔར་བདག་བཏང་ནས། །ཡོན་ཏན་རྣམ་པར་སེམས་ཤིང་ཉེར་ཕྱིན་པ། །དེའི་ཚེ་འོད་ཟེར་དྲི་མེད་འཁོར་བཟང་བ། །ཁྱོད་ཀྱི་ཞལ་གྱི་སྨིན་མཚམས་གསེབ་ནས་འཐོན། །ཕྱོགས་རྣམས་རྒྱ་མཚོ་བརྒྱ་མང་སྣང་མཛད་ནས། །འཇིག་རྟེན་སྣང་བ་རྒྱ་ཆེ་ཡོངས་བསྐྱེད་དེ། །རྣམ་འཕྲུལ་རྣམ་པ་མང་པོ་རྣམ་བསྟན་ནས། །དེ་ཚེ་བདག་གི་ལུས་ཀྱི་གསེབ་ཏུ་ཞི། །གང་ཚེ་འོད་ཀྱི་འཁོར་གྱིས་བདག་རེག་པ། །དེ་ཚེ་བདེ་བ་རྨད་བྱུང་ཡངས་པ་མྱོང་། །གཟུངས་དང་ཏིང་འཛིན་བརྒྱ་མང་ཡོངས་སུ་གནོན། །ཕྱོགས་བཅུའི་རྒྱལ་བ་དཔག་ཡས་མཐོང་བར་འགྱུར། །གོམ་པ་རྣམ་བོར་གྱེན་དུ་བཏེག་པ་ལའང་། །རྡུལ་ཕྲན་གྲངས་སྙེད་ཚུལ་ནི་བདག་གིས་རིག །རྡུལ་ཕྲན་ཤིན་ཏུ་ཕྲ་བ་གཅིག་ལ་ཡང་། །ཞིང་གི་རྡུལ་སྙེད་ཞིང་རྣམས་མཐོང་བར་གྱུར། །རྡུལ་ལ་གནས་ཀྱང་རྣམ་པ་ཐ་དགུ་སྟེ། །ཞིང་མང་བརྒྱ་ནི་ཤིན་ཏུ་ཉོན་ཡང་མོངས། །དེ་ཡི་འགྲོ་བ་སྡུག་བསྔལ་ཉམས་སུ་མྱོང་། །ཆོང་ངེར་ངུ་ཞིང་སྨྲེ་སྔགས་ཡོངས་སུ་འདོན། །ཞིང་མང་ལ་ལ་ཀུན་ནས་ཉོན་མོངས་དག །དེ་ན་སྡུག་བསྔལ་མང་ཞིང་བདེ་བ་ཆུང་། །རྒྱལ་བ་ཐུགས་རྗེ་ཅན་ཡང་དེར༌སྐྱེས་ཏེ། །རྒྱལ་བའི་ཉན་ཐོས་རང་རྒྱལ་དེ་བཞིན་ནོ། །ཞིང་ཚུལ་ལ་ལ་ཡོངས་དག་ཉོན་མོངས་ཏེ། །བྱང་ཆུབ་སེམས་དཔའི་གནས་བཟང་མང་པོས་བརྒྱན། །སྐྱེས་པ་བུད་མེད་ཡོངས་བརྒྱན་ལྟ་ན་སྡུག །སྐྱོན་མེད་རྒྱལ་བའི་གདུང་ཡང་རྒྱུན་མི་འཆད། །ཞིང་རྣམས་རྒྱ་མཚོ་ཡངས་ཤིང་དྲི་མེད་པ། །རྡུལ་ལ་གནས་ཤིང་མཉམ་པའི་གཞི་དང་ལྡན། །དེ་དག་བསྐལ་པ་བརྒྱ་མང་སྔོན་གྱི་ཚེ། །རྣམ་པར་སྣང་མཛད་སྤྱོད་མཛད་ཡོངས་སུ་སྦྱངས། །ཞིང་རྣམས་འབྱམས་ཀླས་ཀུན་ནས་རྒྱལ་བ་དག །ཤིང་དབང་དམ་པའི་དྲུང་དུ་གཤེགས་པ་སྟོན། །རྣམ་པར་འཕྲུལ་ཞིང་བྱང་ཆུབ་འཚང་ཡང་རྒྱ། །ཆོས་ཀྱི་འཁོར་ལོ་བསྐོར་ཅིང་འདུལ་བ་སྟོན། །རྣམ་པར་སྣང་མཛད་སྤྱོད་ཡུལ་ཡངས་པ་ལ། །ཁྱོད་ཀྱང་ཀུན་ཏུ་རྗེས་སུ་བཞུད་པར་མཐོང་། །མཆོད་པ་སྟོང་ཕྲག་ཚད་མེད་ཁྲག་ཁྲིག་གིས། །རྒྱལ་བ་ཀུན་ལ་མངོན་པར་མཆོད་མཛད་མཐོང་། །དེ་ནས་ཚོང་དཔོན་གྱི་བུ་ནོར་བཟང་གིས་ཚིགས་སུ་བཅད་པ་དེ་དག་སྨྲས་ནས། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་འདི་སྐད་ཅེས་སྨྲས་སོ། །

ལྷ་མོ་བྱང་ཆུབ་སེམས་དཔའི་རྣམ་པར་ཐར་པ་དེ། དེ་ལྟ་བུ་ཟབ་པ་ནི་ངོ་མཚར་ཆེ་ན། རྣམ་པར་ཐར་པ་དེའི་མིང་ནི་ཅི་ཞེས་བགྱི། དེ་ཁྱོད་ཀྱིས་བརྙེས་ནས་ཡུན་ནི་ཇི་སྲིད་ཅིག་ལགས། བྱང་ཆུབ་སེམས་དཔས་ཇི་ལྟར་ནན་ཏན་དུ་བགྱིས་ན་རྣམ་པར་ཐར་པ་དེ་ཡོངས་སུ་དག་པར་འགྱུར། སྨྲས་པ་རིགས་ཀྱི་བུ་གནས་འདི་ནི་ལྷ་དང་བཅས་པའི་འཇིག་རྟེན་དང་། ཉན་ཐོས་དང་རང་སངས་རྒྱས་སུ་བཅས་པས་ཡིད་ཆེས་པར་དཀའ་བ་སྟེ། དེ་ཅིའི་ཕྱིར་ཞེ་ན། འདི་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཁོང་དུ་ཆུད་པ་རྣམས་ཀྱི་སྤྱོད་ཡུལ་ཏེ། འདི་ནི་བྱང་ཆུབ་སེམས་དཔའ་སྙིང་རྗེ་ཆེན་པོ་ལྷུར་ལེན་པ། འགྲོ་བ་ཐམས་ཅད་ཡོངས་སུ་བསྐྱབ་པ་ལ་ཞུགས་པ། མི་ཁོམ་པ་དང་ངན་སོང་དང་། ངན་འགྲོའི་ལམ་ཐམས་ཅད་རྣམ་པར་བཟློག་པ་ལ་ཞུགས་པ། སངས་རྒྱས་ཀྱི་ཞིང་ཐམས་ཅད་སངས་རྒྱས་ཀྱི་ཞིང་ཡོངས་སུ་དག་པ། བླ་ན་མེད་པར་བྱ་བ་ལ་ཞུགས་པ། སངས་རྒྱས་ཀྱི་ཞིང་ཐམས་ཅད་ན་བཞུགས་པའི་དེ་བཞིན་གཤེགས་པའི་རིགས་རྒྱུན་མི་གཅད་པ་ལ་ཞུགས་པ། སངས་རྒྱས༌ཐམས་ཅད་ཀྱི་བསྟན་པ་ཡོངས་སུ་གཟུང་བ་ལ་ཞུགས་པ། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་གནས་པས། གནས་པར་བྱ་བའི་སྨོན་ལམ་ཆེན་པོ་རྒྱ་མཚོ་ལ་ཞུགས་པ། ཆོས་རྒྱ་མཚོ་ཐམས་ཅད་ལ་བསྒྲིབས་པ་མེད་པའི་ཡེ་ཤེས་སྣང་བ་རྣམ་པར་སྦྱང་བ་ལ་ཞུགས་པ། སྐད་ཅིག་རེ་རེ་ཞིང་དུས་གསུམ་གྱི་ཚུལ་རྒྱ་མཚོ་ཐམས་ཅད་དུ་ཡེ་ཤེས་སྣང་བས། རྣམ་པར་གནས་པ་རབ་ཏུ་ཐོབ་པ་རྣམས་ཀྱི་ཡུལ་ཏེ། འོན་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་གི་ཕ་རོལ་ཏུ་འཇིག་རྟེན་གྱི་ཁམས་རྣམ་པར་སྣང་མཛད་གཟི་བརྗིད་དཔལ་ཞེས་བྱ་བར་བསྐལ་པ་རྡུལ་དང་བྲལ་བའི་དཀྱིལ་འཁོར་ཅེས་བྱ་བ་བྱུང་སྟེ། བསྐལ་པ་དེ་ལས་སངས་རྒྱས་རི་རབ་གྱི་རྡུལ་ཤིན་ཏུ་ཕྲ་བ་སྙེད་བྱུང་བར་གྱུར་ཏོ། །

འཇིག་རྟེན་གྱི་ཁམས་རྣམ་པར་སྣང་མཛད་གཟི་བརྗིད་དཔལ་ཞེས་བྱ་བ་དེ་ནི་རིན་པོ་ཆེ་ཐམས་ཅད་ཀྱི་སྤྲིན་གྱི་རྒྱན་གྱིས་བརྒྱན་པ་སྟེ། རྡོ་རྗེ་ལས་བྱས་པའི་གཞལ་མེད་ཁང་དང་། གནས་ཀྱིས་ཡོངས་སུ་མཛེས་པར་བྱས་པའོ། །འཇིག་རྟེན་གྱི་ཁམས་དེའི་གཞི་ནི་རིན་པོ་ཆེའི་རྒྱལ་པོ་དྲི་མ་མེད་པའི་འོད་ཀྱི་རྒྱ་མཚོ་ལས་བླངས་པ་སྟེ། ལྷུན་དང་ལུས་ནི་ནོར་བུ་རིན་པོ་ཆེའི་སྤོས་ཐམས་ཅད་ཀྱི་རྒྱལ་པོ་ལས་གྱུར་པའོ། །དེ་ནི་དབྱིབས་ཀུན་ཏུ་ཟླུམ་པ་སྟེ། རྣམ་པར་དག་ཅིང་ཀུན་ནས་ཉོན་མོངས་པ། ལྷབ་ལྷུབ་ཐམས་ཅད་ཀྱི་སྤྲིན་གྱི་བླ་རེས་ཀུན་ནས་ཁྱབ་པ། རིན་པོ་ཆེའི་ཁོར་ཡུག་རྒྱན་ཐམས་ཅད་དང་ལྡན་པ། རིམ་པ་སྟོང་གིས་ཡོངས་སུ་བསྐོར་བ། གླིང་བཞི་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཤིན་ཏུ༌རྒྱས་པར་བརྒྱན་པ་སྟེ། དེ་ལ་གླིང་བཞི་པ་ལ་ལ་ནི་ཀུན་ནས་ཉོན་མོངས་པ་སྟེ། སེམས་ཅན་ཀུན་ནས་ཉོན་མོངས་པའི་ལས་དང་ལྡན་པ་རྣམས་ཀྱི་གནས་སོ། །ལ་ལ་ནི་ཀུན་ནས་ཉོན་མོངས་ཤིང་རྣམ་པར་དག་པ་སྟེ། སེམས་ཅན་ལས་འདྲེན་མ་དང་ལྡན་པ་རྣམས་ཀྱི་གནས་སོ། །ལ་ལ་ནི་རྣམ་པར་དག་ཅིང་ཀུན་ནས་ཉོན་མོངས་པ་སྟེ། སེམས་ཅན་ཡོངས་སུ་དག་ཅིང་ཀུན་ནས་ཉོན་མོངས་པ་དགེ་བའི་རྩ་བ་སྦྱངས་པ། ཁ་ན་མ་ཐོ་བ་ཉུང་བ་རྣམས་ཀྱི་གནས་སོ། །ལ་ལ་ནི་ཤིན་ཏུ་ཡོངས་སུ་དག་པ་སྟེ། བྱང་ཆུབ་སེམས་དཔའ་དག་པ་རྣམས་ཀྱི་གནས་སོ། །འཇིག་རྟེན་གྱི་ཁམས་རྣམ་པར་སྣང་མཛད་གཟི་བརྗིད་དཔལ་ཞེས་བྱ་བ་དེའི་ཤར་ཕྱོགས་ལོགས་ཀྱི་ཁོར་ཡུག་གི་མཚམས་ན། གླིང་བཞི༌པའི་རིན་ཆེན་མེ་ཏོག་སྒྲོན་མའི་རྒྱལ་མཚན་ཞེས་བྱ་བ་རྣམ་པར་དག་ཅིང་ཀུན་ནས་ཉོན་མོངས་པ། མ་རྨོས་མ་བསྐྱེད་པའི་འབྲས་ལ་ཡོངས་སུ་སྤྱོད་པ། སྔོན་གྱི་ལས་ཀྱི་རྣམ་པར་སྨིན་པས་མངོན་པར་གྲུབ་པའི་ཁང་པ་བརྩེགས་པའི་གནས་དང་། གཞལ་མེད་ཁང་ལ་ཡོངས་སུ་སྤྱོད་པ། འཁོར་ཀུན་ནས་ཡིད་བཞིན་གྱི་ཤིང་གིས་འཁོར་བ། སྤོས་ཀྱི་ཤིང་སྣ་ཚོགས་ཀྱི་ལྷུན་ལས་སྤོས་ཀྱི་སྤྲིན་རྒྱུན་མི་འཆད་པར་འབྱུང་བ། ཕྲེང་བ་སྣ་ཚོགས་ཀྱི་ཤིང་ལས་ཕྲེང་བའི་སྤྲིན་རྒྱུན་མི་འཆད་པར་འབྱུང་བ། མེ་ཏོག་སྣ་ཚོགས་ཀྱི་ཤིང་ལས་མེ་ཏོག་ཁ་དོག་དང་། དྲི་བསམ་གྱིས་མི་ཁྱབ་པའི་སྤྲིན༌ཀྱི་ཆར་རྒྱུན་མི་འཆད་པར་འབབ་པ། ཕྱེ་མ་དང་། ཁ་དོག་སྣ་ཚོགས་ཀྱི་ཤིང་གི་ལྷུན་ལས་སྤོས་རིན་པོ་ཆེའི་རྒྱལ་པོ་ཐམས་ཅད་ཀྱི་ཕྱེ་མའི་ཆར་རྒྱུན་མི་འཆད་པར་འབབ་པ། རིན་པོ་ཆེའི་ཤིང་སྣ་ཚོགས་ལས་རིན་པོ་ཆེའི་འབྲུ་མང་པོ་འབྲུལ་བའི། ཁ་དོག་སྣང་བས་ཤིན་ཏུ་སྣང་བར་བྱས་པ། ལྷ་རྫས་ཀྱི་རོལ་མོ་སྣ་ཚོགས་ཀྱི་ཤིང་ལས། སིལ་སྙན་སྣ་ཚོགས་ཀྱི་སྤྲིན་རླུང་གིས་བསྐྱོད་ཅིང་། ནམ་མཁའི་དབྱིངས་ལས་སྒྲ་དབྱངས་སྙན་པ་འབྱུང་བ། ཉིན་མཚན་གྱི་བདེ་བ་ཉི་མ་དང་ཟླ་བས་འབྱུང་བ། ནོར་བུ་རིན་པོ་ཆེ་ཀུན་ཏུ་སྣང་བས་གཞི་བྱས་པའི་ས་རབ་ཏུ་མཉམ་པར་གྱུར་པ་སྟེ། གླིང་བཞི་པ་དེར་རྒྱལ་པོའི་ཕོ་བྲང་བྱེ་བ་ཁྲག་ཁྲིག་བརྒྱ་སྟོང་བྱུང་བར་གྱུར་ཏེ། རྒྱལ་པོའི་ཕོ་བྲང་དེ་དག་རེ་རེ་ཞིང་ཡང་ཆུ་ཀླུང་སྟོང་གིས་ཡོངས་སུ་བསྐོར་བའོ། །

ཆུ་ཀླུང་དེ་དག༌ཐམས་ཅད་ཀྱང་ལྷ་རྫས་ཀྱི་མེ་ཏོག་སིལ་མས་གང་བའོ། །ལྷ་རྫས་ཀྱི་རོལ་མོ་དང་། གླུའི་སྒྲ་སྐད་སྙན་ཅིང་ཡིད་དུ་འོང་བ་འབྱིན་པའོ། །ཆུ་འགྲམ་རིན་པོ་ཆེའི་ཤིང་ཡིད་དུ་འོང་བས་རྣམ་པར་བརྒྱན་པའོ། །རིན་པོ་ཆེ་སྣ་ཚོགས་ཀྱིས་ཤིན་ཏུ་བརྒྱན་པའི་གྲུ་ཕན་ཚུན་དུ་རྒྱུ་བའོ། །བདེ་བ་སྣ་ཚོགས་ཅི་དགའ་བར་ཡོངས་སུ་སྤྱད་དུ་ཡོད་པའོ། །ཆུ་ཀླུང་གི་མཚམས་ཀྱི་གཞི་རེ་རེ་དག་ནའང་། གྲོང་ཁྱེར་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ཀུན་ནས་གནས་པ་སྟེ། གྲོང་ཁྱེར་དེ་དག་རེ་རེ་ཞིང་ཡང་གྲོང་རྡལ་བྱེ་བ་ཁྲག་ཁྲིག་བརྒྱ་ཕྲག་སྟོང་གིས་ཡོངས་སུ་བསྐོར་བའོ། །གྲོང་དང་གྲོང་ཁྱེར་དང་གྲོང་རྡལ་དེ་དག་ཐམས་ཅད་ཀྱང་ལྷ་རྫས་ཀྱི་བཟའ་ཤིང་གི་ར་བ་དང་། གཞལ་མེད་ཁང་དང་། ཁང་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གི་འཁོར་གྱིས་ཡོངས་སུ་བསྐོར་བའོ། །གླིང་བཞི་པ་དེའི་འཛམ་བུའི་གླིང་གི་དབུས་ན་རྒྱལ་པོའི་ཕོ་བྲང་དབུ་མ་རིན་པོ་ཆེའི་མེ་ཏོག་སྒྲོན་མ་ཞེས་བྱ་བ་ཡོད་པར་གྱུར་ཏོ། །

དེ་ནི་སྐྱིད་ཅིང་ལོངས་སྤྱོད་ཕུན་སུམ་ཚོགས་པ་དང་ལྡན་ལ། རྟག་དུ་ལོ་ལེགས་ཤིང་བདེ་བའི་རྣམ་པ་ཐམས་ཅད་དང་ལྡན་པའོ། །ལྷ་དང་མི་མང་པོས་ཡོངས་སུ་གང་བའོ། །སེམས་ཅན་དགེ་བ་བཅུའི་ལས་ཀྱི་ལམ་དང་ལྡན་པ་རྣམས་ཀྱི་གནས་སུ་གྱུར་པ་སྟེ། རྒྱལ་པོའི་ཕོ་བྲང་རིན་པོ་ཆེ་མེ་ཏོག་སྒྲོན་མ་ཞེས་བྱ་བ་དེ་ན་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་ཞེས་བྱ་བ་འཁོར་ལོས་སྒྱུར་བ། གླིང་བཞི་ལ་དབང་བ་པད་མོའི་སྙིང་པོ་ལས་རྫུས་ཏེ་བྱུང་བ། མི་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་ཤིན་ཏུ་བརྒྱན་པ་ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་བདུན་དང་ལྡན་པ་གནས་པར་གྱུར་ཏོ། །དེའི་བུ་དཔའ་ཞིང་རྟུལ་ཕོད་ལ་ཡན་ལག་དམ་པའི་གཟུགས་དང་ལྡན་པ། གཞན་གྱི་འཁོར་རབ་ཏུ་འཇོམས་པ། རྣམ་པ་ཐམས་ཅད་ཡོངས་སུ་ཚང་བའི་ཡན་ལག་དམ་པ་དང་ལྡན་པ་སྟོང་ཚང་བར་བྱུང་ངོ་། །

དེའི་བཙུན་མོའི་འཁོར་གྱི་བུད་མེད་ཀྱང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ཡོད་པར་གྱུར་ཏོ། །དེ་དག་ཀུན་ཀྱང་འཁོར་ལོས་སྒྱུར་བའི་སྐལ་བ་དང་མཉམ་པའི་དགེ་བའི་རྩ་བ་ལས་བྱུང་བ་མཐུན་པར་སྤྱོད་པ་རིན་པོ་ཆེའི་རྒྱན་རང་འཁྲུངས་སུ་བྱུང་བ། དགེ་བའི་སེམས་དང་ལྡན་པ། ལྷའི་བུ་མོ་དང་ཁྱད་པར་མེད་པར་འདྲ་བའི་གཟུགས་ཅན། འཛམ་བུ་ཆུ་ཀླུང་གི་གསེར་གྱི་ཁ་དོག༌ལྟ་བུའི་མདོག་དང་ལྡན་པའི་ལུས་ཅན། ལུས་ཀྱི་བ་སྤུ་ལས་ལྷ་རྫས་ཀྱི་སྤོས་སྣ་ཚོགས་འབྱུང་བ། ལུས་ལས་ལྷ་རྫས་ཀྱི་འོད་དྲི་ཞིམ་པོ་དྲི་མ་མེད་པར་རབ་ཏུ་འགྱེད་པ་ཤ་སྟག་གོ །དེའི་བློན་པོ་བྱེ་བ་ཕྲག་བཅུ་བྱུང་སྟེ་བློན་པོ་རིན་པོ་ཆེ་ལ་སོགས་པ་དག་གོ །འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པད་མོ་དཔལ་གྱི་གཙུག་ཕུད་སྙིང་པོ་དེའི་བཙུན་མོ་དམ་པ་བུད་མེད་རིན་པོ་ཆེ་དཔལ་གྱི་བཞིན་ཡོངས་སུ་རྒྱས་པ་ཞེས༌བྱ་བ་གཟུགས་མཛེས་ཤིང་སྡུག་ལ། ལྟ་ན་ཡིད་དུ་འོང་བ་ཁ་དོག་བཟང་པོ་ཤིན་ཏུ་རྒྱས་པའི་དམ་པ་དང་ལྡན་པ། སྐྲ་མཐོན་མཐིང་དུ་འདུག་པ། མིག་དཀར་ནག་འབྱེས་པ། མདོག་གསེར་གྱི་ཁ་དོག་དུ་འདུག་པ། ཚངས་པའི་དབྱངས་དང་ལྡན་པ། ལུས་ལས་འོད་རྟག་ཏུ་འབྱུང་བ། འཁོར་ཀུན་ཏུ་དཔག་ཚད་སྟོང་གི་ཚད་དུ་འོད་ཁ་དོག་དུ་མ་དང་ལྡན་པ། ལྷ་རྫས་ཀྱི་དྲི་ཞིམ་པོ་ཅན་འགྱེད་པ་བྱུང་ངོ་། །

རྒྱལ་པོའི་བཙུན་མོ་དཔལ་གྱི་བཞིན་ཡོངས་སུ་རྒྱས་པ་ཞེས་བྱ་བ་དེ་ལས་བུ་མོ་པདྨོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བ་ཡན་ལག་ཐམས་ཅད་ཚང་བ། གཟུགས་མཛེས་ཤིང་སྡུག་པ། ལྟ་ན་ཡིད་དུ་འོང་བ། འཇིག་རྟེན་ཐམས་ཅད་གྱིས་བལྟ་ན་མི་ངོམས་པ་བྱུང་བར་གྱུར་ཏེ། རིགས་ཀྱི་བུ་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ལ་བལྟ་ན་སུ་ཡང་ངོམས་པར་མི་འགྱུར་བ་དེ་བཞིན་དུ་འཁོར་ལོས་སྒྱུར་བའི་བུ་མོ་པདྨོ་བཟང་མོ་མིག་ཡིད་དུ་འོང་བའི་དཔལ་དེ་ལ་བལྟ་བས་ཀྱང་སུ་ཡང་ངོམས་པར་མི་འགྱུར་ཏེ། ཤེས་རབ་ཀྱིས་ཡོངས་སུ་ངོམས་པར་འགྱུར་བ་ནི་མ་གཏོགས་སོ། །

དེའི་ཚེ་དེའི་དུས་ན། སེམས་ཅན་རྣམས་ཀྱང་ཚེ་དཔག་ཏུ་མེད་པར་གྱུར་ཏེ། ཚེ་ལ་གཅིག་ཏུ་ངེས་པ་མེད་པས་བར་མ་དོར་འཆི་བ་ནི་ཡོད་དོ། །དེའི་དུས་ན་སེམས་ཅན་རྣམས་ཀྱི་དབྱིབས་སྣ་ཚོགས་དང་། ཁ་དོག་སྣ་ཚོགས་དང་། དབྱངས་སྣ་ཚོགས་དང་། མིང་སྣ་ཚོགས་དང་། རིགས་སྣ་ཚོགས་དང་། ཚེའི་ཚད་སྣ་ཚོགས་དང་། ཆུ་ཞེང་རྣམ་པ་ཐ་དད་པ་དང་། མོས་པ་དང་སྟོབས་དང་། བརྩོན་འགྲུས་དང་། མཐུ་རྣམ་པ་ཐ་དད་པ་དང་། ཡིད་དུ་འོང་བ་དང་། ཡིད་དུ་མི་འོང་བ་རྣམ་པ་ཐ་དད་པ་དང་། ཡངས་པ་དང་དམའ་བ་ལ་མོས་པ་སྣ་ཚོགས་ཀྱང་ཡོད་པར་གྱུར་ཏེ། དེ་ལ་སེམས་ཅན་ཇི་སྙེད་ཅིག༌ཁ་དོག་བཟང་བ་དང་། ཡངས་པ་ལ་མོས་པ་དང་། ཡན་ལག༌ཚང་བ་དང་། ལྟ་ན་སྡུག་ཅིང་ཡིད་དུ་འོང་བར་གྱུར་པ་དེ་དག་ནི་འདི་སྐད་ཅེས༌འཛེར་ཏེ། ཀྱེ་མི་དག་ང་ནི༌ཁྱེད་པས་ཁ་དོག་ཆེས་བཟང་ངོ་ཞེས་ཟེར་རོ། །དེ་བཞིན་དུ་སེམས་ཅན་ཇི་སྙེད་ཅིག་ལུས་ཀྱི་དབྱིབས་ལེགས་པ་དང་ལྡན་པར་གྱུར་པ་དེ་དག་ཀྱང་། སེམས་ཅན་ལུས་ཀྱི་དབྱིབས་མི༌སྡུག་པར་འགྱུར་བ་རྣམས་ལ་རློམ་ཞིང་ཁྱད་དུ་གསོད་དོ། །དེ་དག་དེ་ལྟར་གཅིག་ལ་གཅིག་ཁྱད་དུ་གསོད་པ་ལས་བྱུང་བའི་མི་དགེ་བའི་རྩ་བས་ཚེའི་ཚད་ལས་ཀྱང་ཡོངས་སུ་བྲི་བར་གྱུར་ཏོ། །ཁ་དོག་དང་སྟོབས་དང་བདེ་བ་ལས་ཀྱང་ཡོངས་སུ་བྲི་བར་གྱུར་ཏོ། །

རྒྱལ་པོའི་ཕོ་བྲང་རིན་པོ་ཆེའི་མེ་ཏོག་སྒྲོན་མ་དེའི་བྱང་ཕྱོགས་ལོགས་ན། སྙིང་པོ་བྱང་ཆུབ་ཀྱི་ཤིང་ཀུན་ཏུ་གྲགས་པའི་ཆོས་ཀྱི་སྤྲིན་སྒྲའི་རྒྱལ་མཚན་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་རྒྱན་སྐད་ཅིག་རེ་རེ་ལ་ཡོངས་སུ་སྟོན་པ། རྩ་བ་རིན་པོ་ཆེའི་རྒྱལ་པོ་རྡོ་རྗེ་ལྟར་སྲ་ཞིང་མི་འཇིག་པ། ནོར་བུ་རིན་པོ་ཆེ་ཐམས་ཅད་ལས་གྲུབ་པས་ལྷུན་ཤིན་ཏུ་ཡངས་ཤིང་རྒྱས་པ། སྡོང་པོ་དང་ཡལ་ག་དང་ལོ་མ་དང་། འདབ་མ་དང་མེ་ཏོག་དང་། འབྲས་བུ་རིན་པོ་ཆེ་ཐམས་ཅད་ཀྱི་རྒྱུ་ལས་གྲུབ་པ། ཀུན་ཏུ་ཆ་མཉམ་པར་བཀོད་ཅིང་། ཀུན་ཏུ་ཁྱབ་པའི༌ཡན་ལག་དང་ལྡན་པ། རྒྱན་ཀུན་ཏུ་རྒྱས་པར་འགེངས་ཤིང་མི་ཟད་པ་དང་ལྡན་པ། རིན་པོ་ཆེ་སྣ་ཚོགས་ཀྱི་འོད་འཕྲོ་དང་། འོད་ཟེར་ཀུན་ཏུ་སྣང་བ་འགྱེད་པ། དེ་བཞིན་གཤེགས་པ་ཐམས་ཅད་ཀྱི་ཡུལ་གྱི་རྣམ་པར་འཕྲུལ་པའི་དབྱངས་རྗེས་སུ་སྒྲོག་པ་ཡོད་དེ། སྙིང་པོ་བྱང་ཆུབ་དེའི་མདུན་རོལ་ན། སྤོས་ཆུའི་མཚོ་རིན་པོ་ཆེའི་མེ་ཏོག་དང་། གློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཞེས་བྱ་བ་ཡོད་དེ། དེ་ནི་རིན་པོ་ཆེའི་ཤིང་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུས་ཀུན་ནས་བསྐོར་བ་སྟེ། རིན་པོ་ཆེའི་ཤིང་དེ་དག་ཐམས་ཅད་ཀྱང་བྱང་ཆུབ་ཀྱི་ཤིང་གི་དབྱིབས་སུ༌འཁོད་པ་ཤ་སྟག་གོ ། སྤོས་ཆུའི་མཚོ་ཆེན་པོ་རིན་པོ་ཆེའི་མེ་ཏོག་དང་། གློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཞེས་བྱ་བ་དེའི་འགྲམ་ཐམས་ཅད་ཀྱང་ནོར་བུ་རིན་པོ་ཆེ་ཐམས་ཅད་བཀྲམ་ཞིང་རྣམ་པར་བཀོད་པ་སྟེ། རིན་པོ་ཆེ་ཐམས་ཅད་ཀྱི་ཕྲེང་བ་སྣ་ཚོགས་སུ༌དགྲིགས་པའོ། །རིན་པོ་ཆེ་རྣམ་པར་དག་པ་ལས་བྱས་པའི་ཁང་པ་སྣ་ཚོགས་ཀྱི་རྒྱན་གྱིས་ཡོངས་སུ་བརྒྱན་པའོ། །རྒྱན་རྣམ་པར་དག་པ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་པའོ། །སྙིང་པོ་བྱང་ཆུབ་དེའི་འཁོར་ཐམས་ཅད་ཀྱང་ནོར་བུ་རིན་པོ་ཆེའི་ཁང་པ་བརྩེགས་པ་ཆེན་པོ་རྒྱན་བསམ་གྱིས་མི་ཁྱབ་པ་དང་ལྡན་པ། པདྨའི་སྙིང་པོ་ཅན་ཤ་སྟག་གིས་ཡོངས་སུ་འཁོར་བ་སྟེ། སྤོས་ཆུའི་མཚོ་ཆེན་པོ་རིན་པོ་ཆེའི་མེ་ཏོག་དང་གློག་དང་ཆོས་ཀྱི་འབྲུག་སྒྲའི་སྤྲིན་གྱི་དབྱངས་ཞེས་བྱ་བ་དེའི་དབུས་ནས། པདྨོའི་རྒྱལ་པོ༌ཆེན་པོ་ལོ་མའི་མཚམས་ནས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་ཟེར་གྱི་སྤྲིན་གྱི་རྒྱན་ཅེས་བྱ་བ་བྱུང་བར་གྱུར་ཏེ། པདྨོ་ཆེན་པོ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་དག་གི་ནང་ནས་བསྐལ་པའི་ཐོག་མ་པ་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ༌ཡོན་ཏན་དཔལ་གྱི་རྒྱལ་པོ་ཞེས་བྱ་བ་བྱུང་བར་གྱུར་ཏེ། དེ་ནི་བསྐལ་པ་དེ་ལ་ཐམས་ཅད་ཀྱི་ཐོག་མར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེས་ལོ་སྟོང་ཕྲག་དུ་མ་ཞིག་དུ་ཆོས་བསྟན་པས། སེམས་ཅན་ཡོངས་སུ་སྨིན་པར་མཛད་ནས། ལོ་སྟོང་ཕྲག་བཅུར་འོད་ཟེར་སྣང་བའི་རྣམ་པར་འཕྲུལ་པས་ཡོངས་སུ་སྨིན་པར་མཛད་དོ། །དེ་བཞིན་གཤེགས་པ་དེ་ལོ་སྟོང་ཕྲག་བཅུ་ན་འབྱུང་བར་འགྱུར་རོ། །ཞེས་བྱ་བའི་ཚེ་པདྨོའི་རྒྱལ་པོ་ཆེན་པོ་ལོ་མའི་མཚམས་ནས། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་ཟེར་གྱི་སྤྲིན་གྱི་རྒྱན་ཅེས་བྱ་བ་དེ་ལས་སེམས་ཅན་ཐམས་ཅད་རྡུལ་དང་འབྱེད་པའི་སྒྲོན་མ་ཞེས་བྱ་བའི་འོད་ཟེར་བྱུང་བར་གྱུར་ཏེ། འོད་དེས་ཕོག་པའི་སེམས་ཅན་རྣམས་ཀྱིས་ཀྱང་ལོ་སྟོང་ཕྲག་བཅུ་ན་དེ་བཞིན་གཤེགས་པ་འབྱུང་བར་འགྱུར་རོ་ཞེས་བྱ་བར་ཤེས་སོ། །ལོ་སྟོང་ཕྲག་དགུ་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་དེ་ལས་རྡུལ་དང་བྲལ་བའི་དཔལ་གྱི་སྙིང་པོ་ཞེས་བྱ་བའི་འོད་ཟེར་བྱུང་སྟེ། འོད་ཟེར་དེས་ཕོག་པའི་སེམས་ཅན་དེ་དག་གིས་ཀྱང་གཟུགས་ཐམས་ཅད་ཤིན་ཏུ་ཕྲ་བར་མཐོང་བར་གྱུར་ཏོ། །

ལོ་སྟོང་ཕྲག་བརྒྱད་ན་དེ་བཞིན་གཤེགས་པ་འབྱུང་ངོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་སེམས་ཅན་ཐམས་ཅད་ཀྱི་ལས་རྣམ་པར་སྨིན་པའི་དབྱངས་ཞེས་བྱ་བ་བྱུང་སྟེ། དེས་ཕོག་པའི་སེམས་ཅན་དེ་དག་ཐམས་ཅད་ཀྱིས་ཀྱང་རང་རང་གི་ལས་རྒྱ་མཚོ་ཁོང་དུ་ཆུད་པར་གྱུར་ཏེ། ལས་དྲན་པའི་ཡེ་ཤེས་ཀྱང་ཐོབ་པར་གྱུར་ཏོ། །ལོ་སྟོང་ཕྲག་བདུན་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་དེ་ཉིད་ལས་འོད་ཟེར་དགེ་བའི་རྩ་བ་ཐམས་ཅད་ཡང་དག་པར་འབྱུང་བའི་དབྱངས་ཞེས་བྱ་བ་བྱུང་སྟེ། འོད་ཟེར་དེས་སེམས་ཅན་དེ་དག་ལ་ཕོག་ནས་དབང་པོ་ཉམས་པ་མེད་ཅིང་ཡོངས་སུ་ཚང་བར་གྱུར་ཏོ། །ལོ་སྟོང་ཕྲག་དྲུག་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་སངས་རྒྱས་ཀྱི་ཡུལ་བསམ་གྱིས་མི་ཁྱབ་པའི་དབྱངས་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་བསམ་པ་རྒྱ་ཆེན་པོས་རྣམ་པར་འཕྲུལ་བར་གྱུར་ཏོ། །

ལོ་སྟོང་ཕྲག་ལྔ་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་སྒྲ་འབྱིན་པའི་གཟུགས་བརྙན་རྣམ་པར་དམིགས་པ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་སངས་རྒྱས་ཀྱི་ཞིང་རྣམ་པ་ཐམས་ཅད་དུ་ཡོངས་སུ་དག་པར་མཐོང་བར་གྱུར་ཏོ། །

ལོ་སྟོང་ཕྲག་བཞི་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་དེ་བཞིན་གཤེགས་པ་ཐམས་ཅད་ཀྱི་ཡུལ་ཐ་མི་དད་པའི་སྒྲོན་མ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་གཤེགས༌པ་དེའི་རྣམ་པར་འཕྲུལ་པ་ཐམས་ཅད་དུ་སོང་བ་ལ་ཞུགས་པར་གྱུར་ཏོ། །ལོ་སྟོང་ཕྲག་གསུམ་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་ཟེར་འགྲོ་བ་ཐམས་ཅད་ལ་མངོན་དུ་གྱུར་པའི་སྒྲོན་མ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་གཤེགས་པ་དེ་ཡང་མངོན་དུ་མོས་པས་མཐོང་བར་གྱུར་ཏོ། །ལོ་སྟོང་ཕྲག་གཉིས་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་ཟེར་དུས་གསུམ་གྱི་ཡེ་ཤེས་ཀྱི་གློག་གི་སྒྲོན་མ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་ཚུལ་རབ་ཏུ་སྒྲོག་པ་བྱུང་སྟེ། དེས་སེམས་ཅན་དེ་དག་ལ་རེག་ནས་དེ་བཞིན་གཤེགས་པ་དེའི་སྔོན་གྱི་ཚུལ་རྒྱ་མཚོ་ལ་རྟོག་ཅིང་འཇུག་པར་གྱུར་ཏོ། །ལོ་སྟོང་ན་དེ་བཞིན་གཤེགས་པ་དེ་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ལས་འོད་ཟེར་ཡེ་ཤེས་རབ་རིབ་མེད་པ། དེ་བཞིན་གཤེགས་པའི་སྒྲོན་མ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་དང་། ཞིང་ཐམས་ཅད་དང་། སེམས་ཅན་ཐམས་ཅད་མཐོང་བར་འགྱུར་བའི་མིག་ཀུན་ཏུ་ལྟ་བ་ཐོབ་པར་གྱུར་ཏོ། །

དེ་བཞིན་གཤེགས་པ་དེ་ལོ་བརྒྱ་ན་འབྱུང་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་འགྲོ་བ་ཐམས་ཅད་ཀྱིས་སངས་རྒྱས་མཐོང་བ་རྣམ་པར་སྨིན་པའི་དགེ་བའི་རྩ་བ་ལས་བྱུང་བ་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས། དེ་བཞིན་གཤེགས་པ་སྐྱེ་བའི་འདུ་ཤེས་ཐོབ་པར་གྱུར་ཏོ། །དེ་བཞིན་གཤེགས་པ་དེ་ཞག་བདུན་ན་སྐྱེ་བར་འགྱུར་རོ་ཞེས་བྱ་བའི་ཚེ། བྱང་ཆུབ་ཀྱི་ཤིང་ཆེན་པོ་དེ་ཉིད་ལས་འོད་ཟེར་སེམས་ཅན་ཐམས་ཅད་རབ་ཏུ་དགའ་བ་དང་། སྤྲོ་བ་དང་མོས་པ་ཡོངས་སུ་འབྱུང་བའི་དབྱངས་ཞེས་བྱ་བ་བྱུང་སྟེ། དེས་སེམས་ཅན་དེ་དག་ལ་ཕོག་ནས་སངས་རྒྱས་མཐོང་བར་འགྱུར་བའི་དགའ་བའི་ཤུགས་ཆེན་པོ་སྐྱེས་པར་གྱུར་ཏོ། །

རིགས་ཀྱི་བུ་དེ་ལྟར་འོད་ཟེར་གྱིས་ཡོངས་སུ་སྨིན་པར་བྱ་བའི་ཚུལ་ཚད་མེད་པ་རྣམ་པ་དེ་ལྟ་བུས་ལོ་སྟོང་དུ་སེམས་ཅན་རྣམས་ཡོངས་སུ་སྨིན་པར་མཛད་ནས་ཞག་བདུན་པ་ལ་ཐུག་པ་དང་། འཇིག་རྟེན་གྱི་ཁམས་དེ་ཐམས་ཅད་ཡོངས་སུ་བསྐྱོད་པའི་ཚུལ་ཚད་མེད་པས་ཡོངས་སུ་བསྐྱོད་ནས་ཤིན་ཏུ་དག་པར་བྱིན་གྱིས་བརླབས་སོ། །ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་ཡོངས་སུ་དག་པ་ཇི་སྙེད་པ་རྒྱན་བསམ་གྱིས་མི་ཁྱབ་པ་རྣམ་པ་སྣ་ཚོགས་དང་ལྡན་པ་དེ་དག་ཐམས་ཅད་ཀྱང་སངས་རྒྱས་ཀྱི་ཞིང་དེར་སེམས་ཀྱི་སྐད་ཅིག་རེ་རེ་ལ་ཡོངས་སུ་བསྟན་པར་གྱུར་ཏོ། །དེ་ནས་ཞག་བདུན་པ་ཐ་མ་ལ་བབ་པ་དང་། འཇིག་རྟེན་གྱི་ཁམས་དེ་ན་སེམས་ཅན་སངས་རྒྱས་མཐོང་བར་འགྱུར་བ་ཡོངས་སུ་སྨིན་པ་དེ་དག་ཐམས་ཅད་སྙིང་པོ་བྱང་ཆུབ་ཏུ་མངོན་པར་གཞོལ་བར་གྱུར་ཏོ། །

དེ་ནས་འཇིག་རྟེན་གྱི་ཁམས་དེའི་ཁོར་ཡུག་ཐམས་ཅད་དང་། རི་རབ་ཐམས་ཅད་དང་། རི་ཐམས་ཅད་དང་། ཆུ་ཀླུང་ཐམས་ཅད་དང་། རྒྱ་མཚོ་ཐམས་ཅད་དང་ཤིང་ཐམས་ཅད་དང་། སའི་གཞི་ཐམས་ཅད་དང་། གྲོང་ཁྱེར་ཐམས་ཅད་དང་། ར་བ་ཐམས་ཅད་དང་། གནས་ཐམས་ཅད་དང་། གཞལ་མེད་ཁང་ཐམས་ཅད་དང་། གོས་དང་རྒྱན་དང་ལོངས་སྤྱོད་ཐམས་ཅད་དང་། རོལ་མོའི་ཤིང་ཐམས་ཅད་དང་། རོལ༌མོ་བརྡུང་བའི་དབྱངས་ཐམས་ཅད་དང་། སྤྲུལ་པའི་རྒྱན་ཐམས་ཅད་ཀྱི་དམིགས་པ་རེ་རེ་ལས་ཀྱང་དེ་བཞིན་གཤེགས་པ་ཐམས་ཅད་ཀྱི་ཡུལ་དང་། མཐུའི་སྒྲ་རབ་ཏུ་སྒྲོག་པའི་སྤོས་དང་། བདུག་སྤོས་ཐམས་ཅད་ཀྱི་སྤྲིན་མངོན་པར་འཐོན་ཏེ། རིན་པོ་ཆེའི་འོད་འཕྲོ་བའི་སྤྲིན་དང་། སྤོས་དང་བདུག་སྤོས་ཐམས་ཅད་ཀྱི་འོད་འཕྲོ་བ་དམ་པ་དང་། སྤོས་རིན་པོ་ཆེ་ཐམས་ཅད་ཀྱི་གཟུགས་ཀྱི་སྤྲིན་དང་། གོས་རིན་པོ་ཆེ་དང་། རྒྱན་རིན་པོ་ཆེ་ཐམས་ཅད་ཀྱི་སྤྲིན་དང་། རིན་པོ་ཆེའི་མེ་ཏོག་སྣ་ཚོགས་ཀྱི་རི་རབ་ཀྱི་སྤྲིན་དང་ཕྱེ་མ་སྣ་ཚོགས་ཀྱི་སྤྲིན་མང་པོ་དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱི་སྤྲིན་རྣམ་པར་སྟོན་པ་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་གྱི་སྤྲིན་རབ་ཏུ་འགྱེད་པ། རོལ་མོ་བརྡུང་བ་དང་། དཀྲོལ་བ་ཐམས་ཅད་ཀྱི་སྤྲིན་ཡོངས་སུ་འཁྲོལ་ཞིང་རྡུང་བ། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་གྱི་སྒྲ་སྐད་ཀྱི་སྤྲིན་རབ་ཏུ་འབྱིན་པ། དེ་བཞིན་གཤེགས་པ་ཐམས་ཅད་ཀྱི་དབྱངས་ཀྱི་ཡན་ལག་དང་། གསུང་རྒྱ་མཚོའི་སྤྲིན་རབ་ཏུ་སྒྲོག་པ། དེ་བཞིན་གཤེགས་པ་ཐམས་ཅད་ཀྱི་མཚན་དང་དཔེ་བྱད་བཟང་པོའི་གཟུགས་བརྙན་སྣ་ཚོགས་ཀྱི་སྤྲིན་རབ་ཏུ་སྟོན་པར་བྱེད་ཅིང་། དེ་བཞིན་གཤེགས༌པ་འབྱུང་བའི་ལྟས་སྔོན་དུ་བྱུང་བ་བསམ་གྱིས་མི་ཁྱབ་པ་ཡོངས་སུ་སྟོན་ཏེ། རིན་པོ་ཆེའི་རྒྱལ་པོའི་པདྨོ་ཆེན་པོའི་ལོ་མའི་མཚམས་ནས། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཡུལ་རྣམ་པར་སྟོན་པའི་འོད་ཟེར་གྱི༌སྤྲིན་གྱི་རྒྱན་དེའི་པདྨོའི་འཁོར་རིན་པོ་ཆེའི་རྒྱལ་པོ་ལས་བྱས་པ་ཆེན་པོ་ཤ་སྟག་ཏུ་བྱས་ཏེ་འཁོད་དོ། །རིན་པོ་ཆེའི་རྒྱལ་པོའི་པདྨོ་ཆེན་པོའི་འཁོར་ཀྱི་རིན་པོ་ཆེའི་པད་མོ་ཆེན་པོ་དེ་དག་གི་ཟེ་བ་དང་། སྙིང་པོ་ལ་སེང་གེའི་ཁྲི་རིན་པོ་ཆེའི་པདྨོ་ཆེན་པོའི་སྙིང་པོ་ཅན། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དག་བྱུང་བར་གྱུར་ཏེ། རིན་པོ་ཆེའི་སྙིང་པོ་ཅན་གྱི་ཁྲི་དེ་དག་ལའང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །

བཅོམ་ལྡན་འདས་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་དེ་བཞིན་གཤེགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་མ་ཐག་ཏུ་དེའི་མོད་ལ། ཕྱོགས་བཅུའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་མང་པོ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་མངོན་སུམ་དུ་ཆོས་ཀྱི་འཁོར་ལོ་བསྐོར་བར་གྱུར་ཏོ། །དེ་ནས་ཀྱང་འཇིག་རྟེན་གྱི་ཁམས་དེ་དག་གི་སེམས་ཅན་ཚད་མེད་པ་རྣམས་ངན་སོང་དང་ལོག་པར་ལྟུང་བ་ཐམས་ཅད་ལས་རྣམ་པར་བཟློག་གོ །སེམས་ཅན་ཚད་མེད་པ་ནི་མཐོ་རིས་སུ་སྐྱེ་བ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཉན་ཐོས༌ཀྱི་ས་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་རང་སངས་རྒྱས་ཀྱི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །

སེམས་ཅན་ཚད་མེད་པ་ནི་ཤུགས་དྲག་པོའི་འོད་ཀྱིས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་བརྩོན་འགྲུས་དྲི་མ་མེད་པའི་རྒྱལ་མཚན་གྱི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་ཆོས་རབ་ཏུ་བསྒོམ་པའི་གནས་སུ་བྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་དབང་པོ་ཡོངས་སུ་དག་པ་རབ་ཏུ་བསྒོམས་པས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་སྟོབས་མཉམ་པ་ཉིད་ལ་ཡང་དག་པར་སྤྱོད་པ་ཁོང་དུ་ཆུད་པས་འབྱུང་བའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །སེམས་ཅན་ཚད་མེད་པ་ནི་ཆོས་ཀྱི་གྲོང་ཁྱེར་མངོན་དུ་འགྱུར་བའི་ཡུལ་གྱི་ཐེག་པ་སྐྱེ་བས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཐམས་ཅད་དུ་རྗེས་སུ་སོང་བའི་རྫུ་འཕྲུལ་ཐ་མི་དད་པའི་ཚུལ་གྱི་ཐེག་པས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་སྤྱོད་པའི་སྦྱོར་བ་ལ་ཡང་དག་པར་གཞོལ་བའི་ཚུལ་གྱིས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཏིང་ངེ་འཛིན་གྱིས་འཇུག་པའི་ཚུལ་གྱིས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་དམིགས་པའི་ཡུལ་ཐམས་ཅད་ཡོངས་སུ་དག་པའི་དཀྱིལ་འཁོར་གྱི་ཚུལ་གྱིས་འབྱུང་བའི་བྱང་ཆུབ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་བྱང་ཆུབ་ཏུ་སེམས་བསྐྱེད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ལམ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་ཕ་རོལ་ཏུ་ཕྱིན་པའི་ལམ་རྣམ་པར་དག་པ་ལ་རབ་ཏུ་བཀོད་དོ། །

སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ས་དང་པོ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ས་གཉིས་པ་དང་། གསུམ་པ་དང་བཞི་པ་དང་ལྔ་པ་དང་། དྲུག་པ་དང་བདུན་པ་དང་། བརྒྱད་པ་དང་དགུ་པ་ལ་རབ་ཏུ་བཀོད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའི་ས་བཅུ་པ་ལ་རབ་ཏུ་བཀོད་དོ། །

སེམས་ཅན་ཚད་མེད་པ་ནི་བྱང་ཆུབ་སེམས་དཔའི་སྤྱོད་པ་སྨོན་ལམ་གྱི་ཁྱད་པར་ཅན་ལ་བཙུད་དོ། །སེམས་ཅན་ཚད་མེད་པ་ནི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་རྣམ་པར་དག་པ་ལ་རབ་ཏུ་བཀོད་དོ། །དེ་ལྟར་དེ་བཞིན་གཤེགས་པ་དེས་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་དང་། རྣམ་པར་འཕྲུལ་པ་བསམ་གྱིས་མི་ཁྱབ་པས་ཆོས་ཀྱི་འཁོར་ལོ་བསྐོར་བས་སེམས་ཀྱི་སྐད་ཅིག་རེ་རེ་ལ་སེམས་ཅན་གྱི་ཁམས་མཐའ་དང་དབུས་མེད་པ་རྣམ་པར་དུལ་བར་གྱུར་ཏོ། །འཇིག་རྟེན་གྱི་ཁམས་དེའི་སེམས་ཅན་ཐམས་ཅད་ཀྱིས་ཀྱང་དེ་བཞིན་གཤེགས་པ་དེའི་སྐུ་སྣ་ཚོགས་དང་། ཐབས་མཁས་པ་སྣ་ཚོགས་ཀྱིས་བསྒྲུབས་པའི་ཆོས་བསྟན་པ་ཡོངས་སུ་ཤེས་པར༌གྱུར་ཏེ། རྒྱལ་པོའི་ཕོ་བྲང་རིན་པོ་ཆེའི་མེ་ཏོག་སྒྲོན་མའི་སེམས་ཅན་གཟུགས་དང་། ཁ་དོག་དང་ཡུལ་དང་ལོངས་སྤྱོད་ཀྱིས་རྒྱགས་ཤིང་དྲེགས་ཏེ་གཅིག་ལ་གཅིག་ཁྱད་དུ་གསོད་པ་དེ་རྣམས་གདུལ་བའི་དོན་དུ་བྱང་ཆུབ་སེམས་དཔའ་ཀུན་ཏུ་བཟང་པོས་ཁ་དོག་དང་གཟུགས་མཆོག་ཏུ་ཕྱིན་པར་མངོན་པར་སྤྲུལ་ཏེ། རྒྱལ་པོའི་ཕོ་བྲང་དེར་ཕྱིན་ཏོ། །

དེའི་འོད་ཤིན་ཏུ་ཡངས་པས་རྒྱལ་པོའི་གནས་དེ་དག་ཐམས་ཅད་དུ་ཡོངས་སུ་སྣང་བར་གྱུར་ཏེ། རྒྱལ་པོའི་གནས་དེའི་འོད་དང་། འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པདྨོའི་དཔལ་གྱི་གཙུག་ཕུད་སྙིང་པོའི་ལུས་ལས་བྱུང་བའི་འོད་དང་། བུད་མེད་རིན་པོ་ཆེའི་འོད་དང་། རིན་པོ་ཆེའི་ཤིང་གི་འོད་དང་། ནོར་བུ་རིན་པོ་ཆེ་ཆེན་པོའི་འོད་དང་། ཉི་ཟླ་དང་གཟའ་སྐར་དང་རྒྱུ་སྐར་གྱི་འོད་དང་། འཛམ་བུའི་གླིང་ན་འོད་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་མི་སྣང་བར་གྱུར་ཏེ། དཔེར་ན་ཉི་མ་ཤར་ཏེ་མུན་པ་དང་། ཟླ་བ་དང་གཟའ་སྐར་དང་། རྒྱུ་སྐར་གྱི་འོད་ཀྱང་མི་སྣང་ལ་མེ་དང་ནོར་བུའི་འོད་ཀྱང་མི་སྣང་ངོ་། །དེ་བཞིན་དུ་བྱང་ཆུབ་སེམས་དཔའ་ཀུན་ཏུ་བཟང་པོས་ཟིལ་གྱིས་ནོན༌ནས་འཛམ་བུའི་གླིང་དེ་ན་འོད་ཡོད་པ་ཐམས་ཅད་ཀྱང་མི་སྣང་བར་གྱུར་ཏོ། །འདི་ལྟ་སྟེ་དཔེར་ན། འཛམ་བུ་ཆུ་ཀླུང་གི་གསེར་གྱི་ས་ལེ་སྦྲམ་གྱི་དྲུང་དུ་སྣག༌ཙའི་གཟུགས་བཞག་ན་མཛེས་པར་མི་རུང་། ལྷ་གེར་མི་རུང་། ལྷ་མེར་མི་རུང་། ལྷ་ངེར་མི་རུང་ངོ་། །དེ་བཞིན་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་མདུན་དུ་སེམས་ཅན་དེ་དག་གི་གཟུགས་ཀྱི་ལུས་ཀྱང་མཛེས་པར༌མ་རུང་། ལྷ་གེར་མ་རུང་། ལྷ་མེར་མ་རུང་། ལྷ་ངེར་མ་རུང་ངོ་། །དེ་ནས་དེ་དག་འདི་སྙམ་དུ་གྱུར་ཏེ། དེ་ལྟ་བུ་ཞིག་དེ་ལྟར་དེའི་དྲུང་དུ་བདག་ཅག་གི་ལུས་སམ། འོད་དམ་ཁ་དོག་གམ། གཟི་བརྗིད་ཀྱིས་ཀྱང་མཛེས་པར༌མ་རུང་། ལྷ་གེར་མ་རུང་། ལྷ་མེར་མ་རུང་། ལྷ་ངེར་མ་རུང་བ་དེ་ལྟ་ལྷའམ། ཚངས་པའམ། ཅི་ཞིག་དེའི༌མཚན་མ་ནི་གཟུང་བར་མི་ནུས་སོ་སྙམ་མོ། །

དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་རྒྱལ་པོའི་གནས་རིན་པོ་ཆེའི་མེ་ཏོག་སྒྲོན་མའི་དབུས་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པདྨོ་དཔལ་གྱི་གཙུག་ཕུད་སྙིང་པོའི་གཞལ་མེད་ཁང་གི་སྟེང་གི་བར་སྣང་ལ་འདུག་སྟེ། འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ༌རིན་ཆེན་པདྨོ་དཔལ་གྱི་གཙུག་ཕུད་སྙིང་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཤེས་པར་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་སྟེ། ཁྱོད་ཀྱི་ཁམས་འདི་ཉིད་ཀྱི་སྙིང་པོ་བྱང་ཆུབ་ཆོས་ཀུན་ཏུ་སྣང་བའི་ཆོས་ཀྱི་སྤྲིན་གྱི་སྒྲ་དབྱངས་རྒྱལ་མཚན་འདི་ཉིད་ན་རྣམ་པར་སྤྱོད་དོ་ཞེས་པ་དང་། རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ་པདྨོ་བཟང་པོ་མིག་ཡིད་དུ་འོང་བའི་དཔལ་གྱི་ཟླ་བས་བྱང་ཆུབ་སེམས་དཔའ་ཀུན་ཏུ་བཟང་པོའི་གཟུགས་ཀྱི་ལུས་དང་། འོད་དང་རྣམ་པར་འཕྲུལ་པ་དང་རྒྱན་མཐོང་སྟེ། དབྱངས་ཐོས་ནས་དགའ་བ་དང་། མོས་པའི་ཤུགས་ཆེན་པོ་སྐྱེས་ཏེ། དེའི་ཚེ་སེམས་འདི་སྙམ་དུ་བསྐྱེད་དོ། །བདག་གིས་དགེ་བའི་རྩ་བ་གང་ཅི་བསགས་པ་དེས་བདག་ཀྱང་ལུས་འདི་འདྲ་བར་ཐོབ་པར་ཤོག་ཅིག །རྒྱན་འདི་འདྲ་བ་དང་། མཚན་འདི་འདྲ་བ་དང་། སྤྱོད་ལམ་འདི་འདྲ་བ་དང་། རྫུ་འཕྲུལ་འདི་འདྲ་བར་ཤོག་ཅིག །ཇི་ལྟར་འདིས་མཚན་མོ་མུན་ནག་གི་ནང་ན་སེམས་ཅན་རྣམས་ལ་སྣང་བ་ཆེན་པོ་བསྐྱེད་དེ། སངས་རྒྱས་སྐྱེ་བ་ཡོངས་སུ་བརྗོད་པ་དེ་བཞིན་དུ། བདག་གིས་ཀྱང་སེམས་ཅན་རྣམས་ཀྱི་མི་ཤེས་པའི་མུན་པ༌བསྩལ་ཏེ་ཡེ་ཤེས་ཆེན༌པོ་འདི་སྣང་བ་བསྐྱེད་པར་བྱའོ། །གང་དང་གང་དུ་སྐྱེས་པ་ཐམས་ཅད་དུའང་དགེ་བའི་བཤེས་གཉེན་འདི་དང་མི་འབྲལ་བར་ཤོག་ཅིག །

དེ་ནས་རིགས་ཀྱི་བུ་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པདྨོ་དཔལ་གྱི་གཙུག་ཕུད་སྙིང་པོ་ཡན་ལག་བཞིའི་དཔུང་གི་ཚོགས་དང་ལྷན་ཅིག །རིན་པོ་ཆེ་བདུན་དང་ལྷན་ཅིག །བུད་མེད་ཀྱི་ཚོགས་ཀྱི་འཁོར་དང་ལྷན་ཅིག་བུ་དང་བློན་པོ་དང་། ལྗོངས་ཀྱི་མི་དང་ལྷན་ཅིག་ཏུ་རྒྱལ་པོའི་རྫུ་འཕྲུལ་ཆེན་པོ་དང་། རྒྱལ་པོའི་མཐུ་ཆེན་པོས་རྒྱལ་པོའི་གནས་རིན་པོ་ཆེའི་མེ་ཏོག་སྒྲོན་མ་དེ་ནས་འཕགས་ཏེ་གྱེན་ཏུ་ནམ་མཁའ་ལ་དཔག་ཚད་གཅིག་ཙམ་དུ་མངོན་པར་འཕགས་ནས། འཛམ་བུའི་གླིང་ཐམས་ཅད་དང་། གླིང༌བཞི་པའི་འཇིག་རྟེན་གྱི་ཁམས་ཐམས་ཅད་སྣང་བ་ཆེན་པོས་རྒྱས་པར་བཀང་སྟེ། སེམས་ཅན་ཐམས་ཅད་སངས་རྒྱས་བལྟ་བ་ལ་ཡོངས་སུ་བསྐུལ་བའི་དོན་དུ་རིན་པོ་ཆེའི་རི་ཐམས་ཅད་ལ་གཟུགས་བརྙན་མངོན་པར་བསྟན་ཅིང་གླིང་བཞི་པའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ལ་མངོན་སུམ་དུ་གནས་ཏེ་སངས་རྒྱས་ལ་བལྟ་བ་དེ་ཚིགས་སུ་བཅད་དེ་གླུའི་དབྱངས་ཀྱིས་བསྔགས་པ། ལུས་ཅན་ཐམས་ཅད་སྐྱབས་མཛད་པའི། །སངས་རྒྱས་འཇིག་རྟེན་བྱུང་བར་གྱུར། །འཇིག་རྟེན་གཙོ་བོ་དེ་བལྟ་བར། །ཀུན་ཀྱང་ལངས་ཏེ་འདོང་བར་གྱིས། །ལུས་ཅན་ཀུན་ལ་ཕན་དོན་དུ། །ཆོས་རབ་སྟོན་པར་གང་མཛད་པའི། །དེ་བཞིན་གཤེགས་པ་འབྱུང་བ་ནི། །བསྐལ་པ་བྱེ་བའི་བརྒྱ་ལམ་ནའོ། །འཇིག་རྟེན་ཕྱིན་ཅིར་ལོག་གྱུར་ཅིང་། །མི་ཤེས༌སྒྲིབ་པས་བསྒྲིབས་གྱུར་ཏེ། །འཁོར་བའི་སྡུག་བསྔལ་མྱོང༌བ་རྣམས། །གཟིགས་ཤིང་ཐུགས་རྗེ་ཆེ་བསྐྱེད་ནས། །སྡུག་བསྔལ་ཐམས་ཅད་གཞིལ་དོན་དུ། །སེམས་ཅན་ཡོངས་སུ་སྨིན་བྱའི་ཕྱིར། །བསྐལ་པ་བྱེ་བ་གྲངས་མེད་དུ། །བྱང་ཆུབ་སྤྱོད་པ་སྤྱད་པ་མཛད། །བསྐལ་པ་མཐའ་ཡས་མུ་མེད་པར། །སངས་རྒྱས་བྱང་ཆུབ་མཆོག་དོན་དུ། །ཞབས་དང་ཕྱག་ཀྱང་ཡོངས་སུ་བཏང་། །སྤྱན་དང་སྙན་དང་དབུ་ཡང་བཏང་། །མཐོང་ཞིང་བསྙེན་བཀུར་བྱས་པ་དང་། །ཐོས་པ་དོན་ཡོད༌འགྱུར་བ་ཡིན། །འཇིག་རྟེན་མགོན་པོ་འཇིག་རྟེན་དུ། །འབྱུང་བ་བསྐལ་པ་བྱེ་བར་དཀོན། །དེ་ནི་བྱང་ཆུབ་གདན་ལ་བཞུགས། །གསུང་བའི་དམ་པ་བལྟར་ཡང་ཡོད། །བདུད་རྣམས་སྡེ་དང་བཅས་བཏུལ་ཏེ། །བྱང་ཆུབ་མཆོག་ཏུ་རྣམ་སངས་རྒྱས། །འོད་ཟེར་དཀྱིལ་འཁོར་མཐའ་ཡས་པ། །སངས་རྒྱས་སྐུ་ལས་མངོན་བཀྱེ་ཞིང་། །འགྲོ་བ་ཚིམ་པར་མཛད༌པ་ཡི། །ཁ་དོག་སྣ་ཚོགས་འདི་ལ་ལྟོས། །འོད་ཟེར་སྤྲིན་མང་གྲངས་མེད་པ། །སངས་རྒྱས་སྐུ་ལས་འཐོན༌པ་རྣམས། །དེས་ནི་སེམས་ཅན་སྣང་གྱུར་ན། །བདེ་བ་དཔེ་མེད་འཐོབ་པར་འགྱུར། །བརྩོན་འགྲུས་ཆེན་པོ་རབ་རྩོམ་སྟེ། །རང་དང་རང་གི་བསམ་པ་ཡིས། །མགོན་པོ་དེ་ལ་མཆོད་པ་གྱིས། །ཚུར༌གཤེགས་དེ་ཡི་གན་དུ་འདོང་། །དེ་ནས་རྒྱལ་པོ་རྣམ་པར་སྣང་བ་རིན་ཆེན་པདྨོ་དཔལ་གྱི་གཙུག་ཕུད་སྙིང་པོས་ཚིགས་སུ་བཅད་པ་དེ་དག་གིས་བདག་གི་ཁམས་ན་གནས་པའི་སེམས་ཅན་ཐམས་ཅད་ཡོངས་སུ་བསྐུལ་ཏེ། མཆོད་པའི་སྤྲིན་སྣ་ཚོགས་བརྒྱ་སྟོང་ཕྲག་བཅུ་འཁོར་ལོས་སྒྱུར་བའི་དགེ་བའི་རྩ་བས་ཡོངས་སུ་གྲུབ་པའི་ཆར་པ། སྙིང་པོ་བྱང་ཆུབ་ཀུན་ནས་ལྡང་བའི་ཆོས་ཀྱི་སྤྲིན་གྱི་དབྱངས་ཀྱི་རྒྱལ་མཚན་གྱི་འཁོར་ཀུན་ཏུ་མངོན་པར་འབེབས་ཤིང་། རིན་པོ་ཆེའི་གདུགས་ཀྱི་སྤྲིན་གྱི་ནམ་མཁའ་ཀུན་ནས་ཡོག་པར་བྱ་བ་དང་། མེ་ཏོག་ཐམས་ཅད་ཀྱི་བླ་རེའི་སྤྲིན་གྱིས་ནམ་མཁའ་བླ་ནས་ཁེབ་པར་བྱ་བ་དང་། ན་བཟའ་སྣ་ཚོགས་ཀྱི་སྤྲིན་གྱིས་ནམ་མཁའ་ཀུན་ནས་ཡོག་ཅིང་བརྒྱན་པར་བྱ་བ་དང་། རིན་པོ་ཆེ་སྣ་ཚོགས་ཀྱི་དྲིལ་བུའི་དྲ་བའི་སྤྲིན་གྱིས་ནམ་མཁའི་དབྱིངས་བརྒྱན་པར་བྱ་བ་དང་། སྤོས་སྣ་ཚོགས་རྒྱ་མཚོས་དྲི་ཞིམ་པར་བྱས་པའི༌སྤོས་གྱི་འོད་ཟེར་གྱི་སྤྲིན་གྱི་རྒྱན་ནམ་མཁའི་དབྱིངས་ལ་བྱིན་གྱིས་བརླབ་པར་བྱ་བ་དང་། རིན་པོ་ཆེ་ཐམས་ཅད་ཀྱི་ཁྲི་ལ་རིན་པོ་ཆེའི་གདན༌འབེལ་བར་བཏིང་བའི་སྤྲིན་གྱི་རྒྱན་ནམ་མཁའི་དབྱིངས་ལ་བྱིན་ཀྱིས་བརླབ་པ་དང་། རིན་པོ་ཆེ་ཐམས་ཅད་ཀྱི་རྒྱལ་མཚན་གྱི་སྤྲིན་མངོན་པར་བསྒྲེང་བའི་རྒྱན་ནམ་མཁའི་དབྱིངས་ལ་བྱིན༌གྱིས་བརླབ་པ་དང་། ཁང་པ་དང་གཞལ་མེད་ཁང་ཐམས་ཅད་ཀྱི་སྤྲིན་གྱིས་ཀུན་ནས་ཡོག་པའི་རྒྱན་ནམ་མཁའི་དབྱིངས་ལ་བྱིན་གྱིས་བརླབ་པ་དང་། མེ་ཏོག་སྣ་ཚོགས༌ཀྱི་སྤྲིན་གྱིས་ཀུན་ནས་ཡོག་པའི་རྒྱན་ནམ་མཁའི་དབྱིངས་ལ་བྱིན༌གྱིས་བརླབ་པ་དང་། མཆོད་པའི་རྒྱན་ཐམས་ཅད་ཀྱི་སྤྲིན་གྱི་ཆར་རབ་ཏུ་འབབ་པའི་རྒྱན་ནམ་མཁའི་དབྱིངས་ལ་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ༌ཡོན་ཏན་དཔལ་གྱི་རྒྱལ་པོ་གང་ན་བ་དེར་སོང་སྟེ། ཕྱིན་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་སྟན་ནོར་བུ་རིན་པོ་ཆེ་ཆེན་པོའི་ཕྱོགས་ཀུན་ཏུ་རྣམ་པར་སྣང་བའི་པདྨོའི་སྙིང་པོ་ཅན་ལ་འདུག་གོ །དེ་ནས་འཁོར་ལོས་སྒྱུར་བའི་བུ་མོ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་པདྨོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ༌བས་རང་གི་རྒྱན་རྣམས་ལུས་ལས་བཀྲོལ་ཏེ། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་ཀྱི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་ལ་གཏོར་ཏོ་མངོན་པར་གཏོར་ཏོ། །

དེ་ནས་རྒྱན་དེ་དག་བཅོམ་ལྡན་འདས་དེའི་དབུའི་གཙུག་གི་སྟེང་གི་བར་སྣང་ལ་ནོར་བུ་རིན་པོ་ཆེའི་རྒྱན་གྱི་གདུགས་ཆེན་པོ་ནོར་བུ་རིན་པོ་ཆེ་སྣ་ཚོགས་ཀྱི་དྲ་བས་ཡོངས་སུ་བསྐོར་བ་ཀླུའི་དབང་པོའི་ལུས་ཀྱིས་གཟུང་བ་རྒྱན་ཐམས་ཅད༌ཀྱི་ལུས་ཀྱིས་དབྱིབས་ཤིན་ཏུ་ལེགས་པར་ཀུན་ནས་བསྐོར་བ། རྒྱན་གྱི་གདུགས་ཀྱི་དཀྱིལ་འཁོར་བཅུས་ཡོངས་སུ་བསྐོར་བ། ཤིན་ཏུ་དག་པ་ཁང་པ་བརྩེགས་པའི་དབྱིབས་སྣ་ཚོགས་ཀྱིས་བརྒྱན་པ། རིན་པོ་ཆེ་ཐམས་ཅད་ཀྱི་ལྷབ་ལྷུབ་ཀྱི་སྤྲིན་གྱིས་ཀུན་ནས་ཡོག་པ། ནོར་བུ་རིན་པོ་ཆེའི་རྒྱལ་པོ་ཐམས་ཅད་ཀྱི་ཤིང་གི་རྒྱན་གྱིས་ཀུན་ནས་ཁེབས་པ། ནོར་བུ་རིན་པོ་ཆེའི་རྒྱལ་པོ་སྤོས་ཐམས་ཅད་ཀྱི་རྒྱ་མཚོས་ཡོངས་སུ་བརྒྱན་པར་འདུག་པར་གྱུར་ཏེ། དེའི་དབུས་ན་བྱང་ཆུབ་ཀྱི་ཤིང་ཆེན་པོ་ཆོས་ཀྱི་དབྱིངས་ལས་བྱུང་བའི་རིན་པོ་ཆེ་ཐམས་ཅད་ཀྱི༌ཡལ་ག་དང་། ལྷུན་དུ་ལྡན་པ་ཞེས་བྱ༌བ་རྒྱན་བརྗོད་ན་མཐའ་དང་དབུས་མེད་པ་སྐད་ཅིག་རེ་རེ་ཞིང་རྒྱན་སྣ་ཚོགས་ཡོངས་སུ་སྟོན་པ་ཡོད་པ་མཐོང་བར་གྱུར་ཏོ། །

དེའི་དྲུང་ན་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་བྱུང་བ་བྱང་ཆུབ་སེམས་དཔའི་རྒྱན་སྣ་ཚོགས་ཐ་མི་དད་ཅིང་བསམ་གྱིས་མི་ཁྱབ་པ་ལ་རྣམ་པར་སྤྱོད་པ་ཤ་སྟག་གིས་བསྐོར་ཅིང་མདུན་དུ་བྱས་པ་དང་། འཇིག་རྟེན་གྱི་དབང་པོ་ཐམས་ཅད་ཀྱང་དེ་ལ་མངོན་ཏུ་གྱུར་པ་མཐོང་ངོ་། །བཅོམ་ལྡན་འདས་རྣམ་པར་སྣང་མཛད་དེའི་སངས་རྒྱས་ཀྱིས་རྣམ་པར་འཕྲུལ་པ་མཐའ་དང་དབུས་མེད་པ་ཡང་མཐོང་བར་གྱུར་ཏོ། །

སྔོན་གྱི་བྱང་ཆུབ་སེམས་དཔའི་སྤྱོད་པ་བསྐལ་པ་གཅིག་ནས་གཅིག་ཏུ་བརྒྱུད་པ་ལའང་ཞུགས་པར་གྱུར་ཏོ། །འཇིག་རྟེན་གྱི་ཁམས་དེའི་འདུ་བ་དང་འཇིག་པའི་བསྐལ༌པ་ལའང་ཞུགས་པར་གྱུར་ཏོ། །འཇིག་རྟེན་གྱི་ཁམས་དེར་འདས་པའི་སངས་རྒྱས་ཀྱི་རྒྱུད་གཅིག་ནས་གཅིག་ཏུ་བརྒྱུད་པ་ལའང་ཞུགས་པར་གྱུར་ཏོ། །འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་སངས་རྒྱས་མཆོད་པ་ལ་བརྩོན་པར་གནས་པ་ཡང་མཐོང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་ལ་མངོན་དུ་གྱུར་པར་ཡང་མཐོང་ངོ་། །བྱང་ཆུབ་སེམས་དཔའ་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་གཟུགས་བརྙན་དུ་གྱུར་པར་འཁོད་ཅིང་བདག་ཉིད་ཀྱང་རྗེས་སུ་འབྲང་བར་མཐོང་ངོ་། །དེ་བཞིན་གཤེགས་པ་ཐམས་ཅད་ཀྱི་ཞབས་གྱི་དྲུང་དང་བྱང་ཆུབ་སེམས་དཔའ་ཐམས་ཅད་ཀྱི་དྲུང་དང་། སེམས་ཅན་ཐམས་ཅད་ཀྱི་གནས་དང་། འཇིག་རྟེན་གྱི་ཁམས་དེ་དང་དེ་དག་ཐམས་ཅད་ནའང་བྱང་ཆུབ་སེམས་དཔའ་ཀུན་ཏུ་བཟང་པོའི་གཟུགས་བརྙན་ཀུན་ཏུ་བྱུང་སྟེ། འཇིག་རྟེན་གྱི་ཁམས་དེ་དག་རེ་རེ་ནའང་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་མཚམས་གྱི་རྒྱན་དང་བཅས་པ་དང་གཞི་དང་བཅས་པ་དང་། དབྱིབས་དང་བཅས་པ་དང་། ལྷུན་དང་བཅས་པ་དང་། རྒྱན་སྣ་ཚོགས་ཡོངས་སུ་དག་པ་དང་བཅས་པ། རྒྱན་སྣ་ཚོགས་ཀྱི་སྤྲིན་གྱིས་ཀུན་ནས་ཁེབས་པ་རྣམ་པར་བཀོད་པ་དང་། མིང་དང་གྲངས་རྣམ་པ་སྣ་ཚོགས་དང་ལྡན་པ་དང་། དེ་བཞིན་གཤེགས་པའི་རྒྱུད་སྣ་ཚོགས་ལས་བརྗོད་པ་དུས་གསུམ་གྱི་ཚུལ་སྣ་ཚོགས་སུ་གཏོགས་པ་དང་། ཕྱོགས་འབྱམས་ཀླས་པ་སྣ་ཚོགས་སུ་འདུ་བ་ཆོས་ཀྱི་དབྱིངས་འབྱམས་ཀླས་པ་སྣ་ཚོགས་ཀྱི་ཁོངས་སུ་གཏོགས་པ། ཆོས་ཀྱི་དབྱིངས་ཀྱི་གཞི་སྣ་ཚོགས་སུ་འདུས་པ། ནམ་མཁའི་དབྱིངས་སྣ་ཚོགས་ལ་རྣམ་པར་གནས་པ། སྙིང་པོ་བྱང་ཆུབ་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་རྣམ་པར་འཕྲུལ་པ་སྣ་ཚོགས་ཀྱིས་བྱུང་བ་སངས་རྒྱས་ཀྱི་སེང་གེའི་གདན་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་སྣ་ཚོགས་དང་ལྡན་པ། དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་རྒྱུད་སྣ་ཚོགས་ཅན། དེ་བཞིན་གཤེགས་པའི་ཐབས་མཁས་པ་སྣ་ཚོགས་ཡོངས་སུ་བརྗོད་པ་དང་ལྡན་པ། དེ་བཞིན་གཤེགས་པའི་ཆོས་ཀྱི་འཁོར་ལོ་འཁོར་བའི་ཚུལ་སྣ་ཚོགས་ཅན་དེ་བཞིན་གཤེགས་པའི་དབྱངས་ཀྱི་ཡན་ལག་དང་། གསུང་གི་ང་རོ་སྣ་ཚོགས་རབ་ཏུ་འབྱུང་བ། སྐད་སྣ་ཚོགས་རྒྱ་མཚོ་ཤིན་ཏུ་བསྟན་པ་དང་ལྡན་པ་དང་། མདོ་སྡེའི་སྤྲིན་སྣ་ཚོགས་རྗེས་སུ་སྒྲོག་པ་ཅན་དག་ཀྱང་མཐོང་བར་གྱུར་ཏོ། །

མཐོང་ནས་དེ་བས་ཀྱང་དགའ་བ་དང་། མོས་པའི་ཤུགས་ཆེན་པོ་ཐོབ་པར་གྱུར་ཏེ། དེ་དེ་ལྟར་དགའ་བའི་ཤུགས་ཆེན་པོ་སྐྱེས་པར་གྱུར་པ་ལ། བཅོམ་ལྡན་འདས་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོ་དེ་བཞིན་གཤེགས་པ་དེས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྒྲགས་པ་ཞེས་བྱ་བའི་མདོ་སྡེ་འཁོར་གྱི་མདོ་སྡེ། སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དང་བཅས་པ་ཡང་དག་པར་བསྟན་ཏེ། དེས་མདོ་སྡེ་དེ་ཐོས་པར་གྱུར་ནས། ཏིང་ངེ་འཛིན་གྱི་སྒོ་སྟོང་ཕྲག་བཅུ་ཤིན་ཏུ་ཕྲ་ཞིང་རེག་ན་བདེ་བར་ཐོབ་པར་གྱུར་ཏེ།

དེ་ནི་དཔེར་ན་མའི་མངལ་དུ་རྣམ་པར་ཤེས་པ་ཞུགས་པར་གྱུར་མ་ཐག་པ་ལྟ་བུ་དང་འདི་ལྟ་སྟེ་དཔེར་ན། སེམས་ཅན་རྣམས་ཀྱི་ལས་མངོན་པར་བསྒྲུབས་པ་ལྟ་བུ་དང་། འདི་ལྟ་སྟེ་དཔེར་ན། ཞིང་བཟང་པོ་དམ་པའི་ས་བོན་བཏབ་ནས་རིང་པོར་མ་ལོན་ཡང་མྱུ་གུ་སྐྱེ་བའི་རྒྱུར་གྱུར་པ་ལྟ་བུ་སྟེ། དེ་བཞིན་དུ་ཏིང་ངེ་འཛིན་དེ་དག་ཀྱང་འཇམ་ཞིང་ཡིད་དུ་འོང་བ་སྟེ། འདི་ལྟར་དེ་བཞིན་གཤེགས་པ་ཐམས་ཅད་མངོན་དུ་རྣམ་པར་དམིགས་པ་ཞེས་བྱ་བའི་ཏིང་ངེ་འཛིན་དང་། ཞིང་འབྱམས་ཀླས་པ་ཐམས་ཅད་དུ་སྣང་བ་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་དང་། དུས་གསུམ་གྱི་ཚུལ་ཐམས་ཅད་ལ་འཇུག་པ་ཁོང་དུ་ཆུད་པ་ཞེས་བྱ་བའི་ཏིང་ངེ་འཛིན་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲོག་པ་ཞེས་བྱ་བའི་ཏིང་ངེ་འཛིན་དང་། སངས་རྒྱས་ཐམས་ཅད་ཀྱི་སྨོན་ལམ་རྒྱ་མཚོ་རྣམ་པར་དམིགས་པ་ཞེས་བྱ་བའི་ཏིང་ངེ་འཛིན་དང་། འཁོར་བ་ཐམས་ཅད་ཀྱི་སྡུག་བསྔལ་གྱིས་གཟིར་བའི་སེམས་ཅན་འབྱུང་བའི་ང་རོ་རབ་ཏུ་བསྒྲགས་པས་རྣམ་པར་དམིགས་པར་བྱེད་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཀྱི་མུན་ནག་རྣམ་པར་སེལ་བའི་སྨོན་ལམ་གྱི་རྒྱན་ཅེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་སྡུག་བསྔལ་དང་བྲལ་བའི་སྨོན་ལམ་གྱིས་རྣམ་པར་དམིགས་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཀྱི་བདེ་བ་འགྲུབ་པ་ཡོངས་སུ་འབྱིན་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འདུལ་བས་མི་སྐྱོ་བའི་སྙིང་པོ་ཞེས་བྱ་བའི་ཏིང་ངེ་འཛིན་དང་བྱང་ཆུབ་སེམས་དཔའ་ཐམས་ཅད་ཀྱི་ལམ་ལ་འཇུག་པའི་རྒྱལ་མཚན་ཞེས་བྱ་བའི་ཏིང་ངེ་འཛིན་དང་། བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་པར་སྒྲུབ་པའི་རྒྱན་ཅེས་བྱ་བའི་ཏིང་ངེ་འཛིན་དང་། དེ་དག་ལ་སོགས་པའི་ཏིང་ངེ་འཛིན་གྱི་སྒོ་སྟོང་ཕྲག་བཅུ་རྣམས་དེས་ཐོབ་པར་གྱུར་ཏེ། དེ་ཕྲ་བ་ལ་མཉམ་པར་བཞག་པའི་སེམས་དང་། མི་གཡོ་བའི་སེམས་དང་། རབ་ཏུ་དགའ་བའི་སེམས་དང་། དབུགས་ཕྱིན་པའི་སེམས་དང་། དཔག་ཏུ་མེད་པའི་སེམས་དང་། དགེ་བའི་བཤེས་གཉེན་གྱི་རྗེས་སུ་འབྲང་བའི་སེམས་དང་། ཐམས་ཅད་མཁྱེན་པ་ཉིད་ཤིན་ཏུ་ཟབ་པ་ལ་དམིགས་པའི་སེམས་དང་། བྱམས་པའི་རྗེས་སུ་འགྲོ་བའི་ཚུལ་རྒྱ་མཚོ་ལ་ཞུགས་པའི་སེམས་དང་། མངོན་པར་ཞེན་པ་ཐམས་ཅད་ལས་གྱེན་དུ་འཕགས་པའི་སེམས་དང་། འཇིག་རྟེན་གྱི་ཡུལ་ཐམས་ཅད་ལ་མི་གནས་པའི་སེམས་དང་། དེ་བཞིན་གཤེགས་པའི་ཡུལ་ལ་འཇུག་པའི་སེམས་དང་། སངས་རྒྱས་ཐམས་ཅད་ཀྱི་གཟུགས་དང་། ཁ་དོག་རྒྱ་མཚོས་སྣང་བར་གྱུར་པའི་སེམས་དང་། འཁྲུག་པ་མེད་པའི་སེམས་དང་། གཡོ་བ་མེད་པའི་སེམས་དང་། ཁོང་ཁྲོ་བ་མེད་པའི་སེམས་དང་། མཐོ་དམན་མེད་པའི་སེམས་དང་། མི་སྐྱོ་བའི་སེམས་དང་། མི་ཟློགས་པའི་སེམས་དང་། ཞུམ་པ་མེད་པའི་སེམས་དང་། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པའི་སེམས་དང་། ཆོས་ཐམས་ཅད་ཀྱི་ཚུལ་རྒྱ་མཚོའི་རྗེས་སུ་སོང་བའི་སེམས་དང་། ཆོས་ཐམས་ཅད་རབ་ཏུ་འབྱེད་པའི་ཚུལ་ཀྱི་རྗེས་སུ་སོང་བའི་སེམས་དང་། སེམས་ཅན་རྒྱ་མཚོ་ཐམས་ཅད་ལ་འཇུག་པའི་སེམས་དང་། འགྲོ་བ་ཐམས་ཅད་ཡོངས་སུ་བསྐྱབ་པའི་སེམས་དང་། སངས་རྒྱས་རྒྱ་མཚོ་མང་པོའི་སྣང་བ་ཡོངས་སུ་སྐྱེས་པའི་སེམས་དང་། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་ལ་འཇུག་པའི་སེམས་དང་། སྒྲིབ་པ་ཐམས་ཅད་ཀྱི་རི་རྣམ་པར་འཐོར་བའི་སེམས་དང་། བསོད་ནམས་ཀྱི་ཚོགས་རྒྱ་ཆེན་པོ་ཡང་དག་པར་སྒྲུབ་པའི་སེམས་དང་། དེ་བཞིན་གཤེགས་པའི་སྟོབས་བཅུ་ལ་སྤོབས་པ་མངོན་སུམ་དུ་གྱུར་པའི་སེམས་དང་། བྱང་ཆུབ་སེམས་དཔའི་ཡུལ་ཐམས་ཅད་ལ་སྣང་བ་ཐོབ་པའི་སེམས་དང་། བྱང་ཆུབ་སེམས་དཔའི་ཚོགས་ཐམས་ཅད་འཕེལ་བར་བྱེད་པའི་སེམས་དང་། ཕྱོགས་རྒྱ་མཚོ་ཐམས་ཅད་རྒྱས་པར་འགེངས་པའི་སེམས་དང་ལྡན་པས་ཀུན་ཏུ་བཟང་པོའི་སྨོན་ལམ་ཆེན་པོ་ལ་ལྷག་པར་དམིགས་པར་བྱ་བས་སྨོན་ལམ་རྒྱ་མཚོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་རང་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དོན་དུ་མངོན་པར་སྒྲུབ་སྟེ། འདི་ལྟར་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱ་བ་དང་། ཆོས་ཀྱི་དབྱིངས༌འབྱམས་ཀླས་པ་ཡོངས་སུ་ཤེས་པར་བྱ་བ་དང་། ཆོས་ཀྱི་དབྱིངས་ཀྱི་ཚུལ་རྒྱ་མཚོ་ལ་འཇུག་པར་བྱ་བ་དང་། སངས་རྒྱས་ཀྱི་ཞིང་ཐམས་ཅད་དུ་ཕྱི་མའི་བསྐལ་པར་བྱང་ཆུབ་སེམས་དཔའི་སྤྱོད་པ་སྤྱད་པར་བྱ་བ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཐམས་ཅད་ལ་ཕྱི་མའི་མཐའི་བསྐལ་པར་གནས་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་དྲུང་དུ་འགྲོ་བར་བྱ་བ་དང་། དགེ་བའི་བཤེས་གཉེན་ཐམས་ཅད་བསྙེན་བཀུར་བ་དང་། དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོ་བྱ་བ་ཡོངས་སུ་རྫོགས་པར་བྱ་བ་དང་། སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པའི་ཡེ་ཤེས་རྣམ་པར་བསྒྲུབ་པ་དང་། རྣམ་པར་འཚང་རྒྱ་བར་བྱ་བས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པར་བྱ་བའི་ཕྱིར། དེ་དག་ལ་སོགས་པ་སྨོན་ལམ་མངོན་པར་བསྒྲུབ་པའི་སྒོ་རྒྱ་མཚོ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་སྨོན་ལམ་མངོན་པར་སྒྲུབ་པར་གྱུར་ཏོ། །དེའི་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་བསྒྲུབ་པའི་ཕྱིར། བཅོམ་ལྡན་འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོས་སྔོན་གྱི་དགེ་བའི་རྩ་བ་ཡོངས་སུ་བསྐུལ་བ་མཛད་དོ། །རབ་ཏུ་བསྟན་པ་མཛད་དོ། །ཡོངས་སུ་བསྟན་པ་མཛད་དོ། །རྣམ་པར་དབྱེ་བ་མཛད་དོ། །རྣམ་པར་དགྲོལ་བ་མཛད་དོ། །ཡང་དག་པར་བསྟན་པར་མཛད་དོ། །ཆུད་ཟ་བར་མི་འགྱུར་བར་བྱ་བའི་ཕྱིར་རབ་ཏུ་བརྟན་པར་མཛད་དོ། །རྒྱ་ཆེན་པོར་ཁྱབ༌པར་བྱ་བའི་ཕྱིར་ཤིན་ཏུ་ཡངས་པར་མཛད་དོ། །ཐམས་ཅད་མཁྱེན་པ་ཉིད་ལྷུར་ལེན་པར་བྱ་བའི་ཕྱིར་རབ་ཏུ་གནས་པར་མཛད་དེ། དེ་ནི་འདི་ལྟ་སྟེ། ཐོག་མ་སེམས་བསྐྱེད་པ་ནས་ཉེ་བར་བཟུང་བ༌ཕྱིན་ཅད་དེ་བཞིན་གཤེགས་པའི་སྔོན་གྱི་སྨོན་ལམ་རྒྱ་མཚོ་གྲངས་མེད་པ་རབ་ཏུ་ཐོབ་པར་བྱ་བའི་ཕྱིར་རོ། །

རིགས་ཀྱི་བུ་སྔོན་འདས་པའི་དུས་དེའི་ཡང་ཕ་རོལ་གྱི་བསྐལ་པ་བཅུ་པ་ལ་འཇིག་རྟེན་གྱི་ཁམས་རིན་ཆེན་ཉི་མའི་འཁོར་ལོ་རྣམ་པར་སྣང་བའི་འོད་ཅེས་བྱ་བར་དེ་བཞིན་གཤེགས་པ་ཟླ་བའི་རྒྱལ་མཚན་དཔལ་གྱི༌དཔལ་གྱི་གསུང་རབ་ལ་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ་པདྨོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་དེ། བྱང་ཆུབ་སེམས་དཔའ་ཀུན་ཏུ་བཟང་པོས་ཡོངས་སུ་བསྐུལ་ཏེ། དེ་བཞིན་གཤེགས་པའི་སྐུ་གཟུགས་པདྨོ་ལ་བཞུགས༌པ་ཞིག་བཅོས་སོ། །བཅོས་ནས་ཀྱང་རི་མོ་བྲིས་སོ། །རི་མོ་བྲིས་ནས་ཀྱང་རིན་པོ་ཆེས་ཤིན་ཏུ་བརྒྱན་ཏོ། །དགེ་བའི་བཤེས་གཉེན་བྱང་ཆུབ་སེམས་དཔའ་ཀུན་ཏུ་བཟང་པོ་ལ་བརྟེན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུའང་སེམས་བསྐྱེད་དོ། །དེ་དགེ་བའི་རྩ་བ་དེས་ལོག་པར་མི་ལྟུང་བའི་ཆོས་ཅན་དུ་གྱུར་ཏེ། རྟག་ཏུ་ལྷའི་དབང་པོའི་རིགས་དང་མིའི་དབང་པོའི་རིགས་སུ་སྐྱེས་པར་གྱུར་ཏོ། །ཐམས་ཅད་དུ་ཡང་གཟུགས་མཛེས་ཤིང་སྡུག་ལ་བལྟ་ན་ཡིད་དུ་འོང་བ་དང་། ཁ་དོག་བཟང་པོ་ཤིན་ཏུ་རྒྱས་པ་དམ་པ་དང་ལྡན་པར་གྱུར་ཏེ། རྟག་ཏུ་དེ་བཞིན་གཤེགས་པ་མཐོང་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་ཡང་བྲལ་བར་མ་གྱུར་ཏོ། །དགེ་བའི་བཤེས་གཉེན་དེ་ཉིད་ཀྱིས་ཚེ་རབས༌དེ་དང་དེ་དག་དུ་ཡོངས་སུ་སྨིན་པར་བྱས་སོ། །དྲན་པར་བྱས་སོ། །ད་ཡང་དེས་བྱང་ཆུབ་སེམས་དཔའ་ཀུན་ཏུ་བཟང་པོ་ཡོངས་སུ་བསྙེན་བཀུར་ཏེ། ཡིད་འབྱུང་བར་མ་བྱས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པདྨོ་དཔལ་གྱི་གཙུག་ཕུད་སྙིང་པོ་ཞེས་བྱ་བ༌བྱུང་བ་དེ་གཞན་ཞིག་ཡིན་སྙམ་དུ་སེམས་ན་ནི། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟ་སྟེ། བྱང་ཆུབ་སེམས་དཔའ་བྱམས་པ་ནི། དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་རྣམ་པར་སྣང་བ་རིན་ཆེན་པདྨོ་དཔལ་གྱི་གཙུག་ཕུད་སྙིང་པོ་ཞེས་བྱ་བར་གྱུར་ཏོ། །

རིགས་ཀྱི་བུ་དེའི་ཚེ་དེའི་དུས་ན་རྒྱལ་པོའི་བཙུན་མོ་དཔལ་གྱི་བཞིན་ཡོངས་སུ་རྒྱས་པ་ཞེས་བྱ་བ་བྱུང་བ་དེ། གཞན་ཞིག་ཡིན་སྙམ་དུ་སེམས་ན་ཡང་དེ་ལྟར་མི་བལྟ་སྟེ། མཚན་མོའི་ལྷ་མོ་ཁོ་མོའི་དྲུང་ན་འདུག་པ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་འདི་ཡིན་ནོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ། པདྨོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བ༌བྱུང་བ་དེ་གཞན་ཞིག་ཡིན་སྙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་རྒྱལ་པོའི་བུ་མོ་ཡེ་ཤེས་ཀྱི་འོད་ཀུན་ཏུ་འཕྲོ་བ། པདྨོ་བཟང་མོ་མིག་ཡིད་དུ་འོང་བའི་དཔལ་གྱི་ཟླ་བ་ཞེས་བྱ་བར་གྱུར་ཏོ། །ཁོ་མོ་བུ་མོ་གཞོན་ནུར་གྱུར་ཏེ། དེ་བཞིན་གཤེགས་པ་དབང་པོའི་རྒྱལ་མཚན་དཔལ་གྱི༌དཔལ་གྱི་གསུང་རབ་ལ་དེ་བཞིན་གཤེགས་པའི་སྐུ་པདྨོ་ལ་བཞུགས་པ་བཅོས་པ་དེ་ནི་ཁོ་མོའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་གྱུར་ཏོ། །

དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས། ཁོ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྐུལ་བ་དེ་ནི། ཁོ་མོས་བྱང་ཆུབ་ཏུ་སེམས་དང་པོ་བསྐྱེད་པ་ཡིན་ནོ། །ཁོ་མོས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་རིན་པོ་ཆེའི་འོད་ཀུན་ཏུ་འཕྲོ་བའི་དཔལ་ཡོན་ཏན་དཔལ་གྱི་རྒྱལ་པོའི་དྲུང་དུ་ཕྱིན་ཏེ། རྒྱན་གྱིས་གཏོར་ནས་དེ་བཞིན་གཤེགས་པའི་རྣམ་པར་འཕྲུལ་པ་དང་། ཆོ་འཕྲུལ་མཐོང་བར་གྱུར་ཏེ། ཁོ་མོས་བཅོམ་ལྡན་འདས་དེའི་དྲུང་ནས་ཆོས་ཐོས་པར་གྱུར་པ་དེའི་ཚེ། ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་བ་སྟོན་པ་འདི་ཐོབ་བོ། །དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་དག་ཐམས་ཅད་ཀྱང་བསྙེན་བཀུར་ཏེ། ཡོ་བྱད་དང་མཆོད་ཅིང་རིམ་གྲོ་བྱ་བ་ཐམས་ཅད་ཀྱིས་ཀྱང་བཀུར་སྟི་བྱས་སོ། །དེ་བཞིན་གཤེགས་པ་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ཁོ་མོས་ཐོས་ཏེ། དེ་བཞིན་གཤེགས་པ་དེ་དག་གི་གདམས་ངག་དང་རྗེས་སུ་བསྟན་པ་ལའང་ཞུགས་པར་གྱུར་ཏོ། །

དེ་བཞིན་གཤེགས་པ་དེ་དག་ལ་ཁོ་མོས་རིམ་གྲོ་ཆེར་བྱས་ཏེ། རིམ་གྲོ་དེའི་རྣམ་པས་སེམས་ཀྱི་སྐད་ཅིག་གཅིག་ལ་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའི་དཀྱིལ་འཁོར་དེ་དག་དང་། སངས་རྒྱས་ཀྱི་ཞིང་དེ་དག་ཐམས་ཅད་ཀྱང་མཐོང་སྟེ། འཇིག་རྟེན་གྱི་ཁམས་རྣམ་པར༌སྣང་བའི་ཁམས་དེ་ནི་འདས་པར་གྱུར། བསྐལ་པ་རྡུལ་དང་བྲལ་བའི་དཀྱིལ་འཁོར་དེ་ནི་མཐར་ཕྱིན་པར་གྱུར་ནས། དེའི་རྗེས་ལ་འཇིག་རྟེན་གྱི་ཁམས་ནི་རིན་ཆེན་འཁོར་ལོ་སྣ་ཚོགས་ཀྱིས་ཀླུབས་ཤིང་བརྒྱན་པ་ཞེས་བྱ། བསྐལ་པ་ནི་འོད་ཆེན་པོ་ཞེས་བྱ་བ་ཞིག་བྱུང་སྟེ། དེ་ལ་སངས་རྒྱས་ལྔ་བརྒྱ་བྱུང་བར་གྱུར་ཏོ། །དེ་དག་ཐམས་ཅད་ཀྱང་ཁོ་མོས་བསྙེན་བཀུར་ཏེ། བསྐལ་པ་འོད་ཆེན་པོ་དེ་ལ་དེ་བཞིན་གཤེགས་པ་ཐུགས་རྗེ་ཆེན་པོའི་སྤྲིན་གྱི་རྒྱལ་མཚན་ཞེས་བྱ་བ་བསྐལ་པའི་དང་པོ༌ལ་བྱུང་སྟེ། དེ་མངོན་པར་བྱུང་བའི་ཚེ། ཁོ་མོ་མཚན་མོའི་ལྷ་མོར་གྱུར་པས་མཆོད་པ་བྱས་སོ། །དེའི་འོག་ཏུ་དེ་བཞིན་གཤེགས་པ་རྡོ་རྗེ་མཐུ་བོ་ཆེའི་དཔལ་ཞེས་བྱ་བ་བྱུང་སྟེ། དེ་ལ་ཁོ་མོ་འཁོར་ལོས་སྒྱུར་བར་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་སངས་རྒྱས་ཐམས་ཅད་སྐྱེ་ཞིང་འབྱུང་བ་ཞེས་བྱ་བ། མདོ་སྡེ༌སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །

དེའི་འོག་ཏུ་དེ་བཞིན་གཤེགས་པ་མེའི་འོད་འཕྲོ་རིའི་དཔལ་གྱིས་རྣམ་པར་བརྒྱན་པ་ཞེས་བྱ་བ་བྱུང་སྟེ་དེ་ལ་ཁོ་མོ་ཚོང་དཔོན་གྱི་བུ་མོར་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ༌མོ་ལ་མདོ་སྡེ་དུས་གསུམ་སྣང་བའི་སྙིང་པོ་ཞེས་བྱ་བ། མདོ་སྡེ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱིས་མངོན་པར་འཕགས་པའི་ཤུགས་ཀྱི་རྒྱལ་པོ་ཞེས་བྱ་བ་བྱུང་སྟེ། དེ་ལ་ཁོ་མོ་ལྷའི་རྒྱལ་པོར་གྱུར་པས་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་ཆོས་ཀྱི་དབྱིངས་ཀྱི་གཞི་ཐམས་ཅད་ཤེས་པའི་བྱེ་བྲག་ཅེས་བྱ་བ་མདོ་སྡེ་ལྔ་བརྒྱའི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །

དེའི་འོག་ཏུ་དེ་བཞིན་གཤེགས་པ་ཆོས་ཟབ་མོའི་དཔལ་རྒྱ་མཚོས་ཡང་དག༌པར་འབྱུང་བའི་འོད་ཅེས་བྱ་བ་བྱུང་སྟེ། དེ་ལ་ཁོ་མོ་ཀླུའི་དབང་པོའི་བུ་མོར་གྱུར་པས། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་སྤྲིན་གྱི་ཆར་མངོན་པར་ཕབ་སྟེ་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ༌དགའ་བ་རྒྱ་མཚོ་རྣམ་པར་འཕེལ་བའི་ཤུགས་ཞེས་བྱ་བ་མདོ་སྡེ་བྱེ་བ་བརྒྱ་སྟོང་ཕྲག་བཅུའི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་རིན་ཆེན་རི་བོའི་སྤོའི་འོད་ཟེར་སྒྲོན་མ་ཞེས་བྱ་བ་བྱུང་སྟེ། དེ་ལ་ཁོ་མོ་རྒྱ་མཚོའི་ལྷ་མོར་གྱུར་པས། རིན་པོ་ཆེའི་པདྨོའི་སྤྲིན༌གྱི་ཆར་གྱིས་ཉེ་བར་བསྙེན་ཏེ་མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་ཆོས་ཀྱི་དབྱིངས་རྒྱ་མཚོའི་ཚུལ་ཞེས་བྱ་བ་མདོ་སྡེ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་བཅས་པ་ཡང་དག་པར་བསྟན་ཏེ། དེའང་ཁོ་མོས་ཐོས་ནས་ཡོངས་སུ་བླངས་སོ། །དྲན་པས་ཡང་དག་པར་བཟུང་ངོ་། །དེའི་འོག་ཏུ་དེ་བཞིན་གཤེགས་པ་ཡོན་ཏན་རྒྱ་མཚོ་སྣང་བའི་དཀྱིལ་འཁོར་གྱི་དཔལ་ཞེས་བྱ་བ་བྱུང་སྟེ། དེ་ལ་ཁོ་མོ་དྲང་སྲོང་མངོན་པར་ཤེས་པ་ལྔ་དང་ལྡན་པར་གྱུར་པ། དྲང་སྲོང་སྟོང་ཕྲག་དྲུག་ཅུས་ཀུན་ནས་བསྐོར་བས་རྫུ་འཕྲུལ་ཆེན་པོའི་རྣམ་པར་འཕྲུལ་པ་ཉེ་བར་བསྟན་ཏེ། སྤོས་ཀྱི་མེ་ཏོག་རི་བོ་ཙམ་གྱི་སྤྲིན་གྱི་ཆར་མངོན་པར་ཕབ་སྟེ། མཆོད་པ་བྱས་སོ། །དེ་བཞིན་གཤེགས་པ་དེས་ཁོ་མོ་ལ་མདོ་སྡེ་ཆོས་གནས་མེད་པའི་སྒྲོན་མ་ཞེས་བྱ་བ་མདོ་སྡེ་སྟོང་ཕྲག་བཅུའི་འཁོར་དང་བཅས༌པ་ཡང་དག་པར་བསྟན་སྟེ། དེ་ཡང་ཁོ་མོས་ཐོས་ནས་ཡོངས་སུ་བཟུང་ངོ་། །དེའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་སྙིང་པོ་ཞེས་བྱ་བ་བྱུང་སྟེ། ཁོ་མོ་ཡང་མཉམ་པ་ཉིད་ཀྱི་དོན་འབྱུང་བ་ཞེས་བྱ་བའི་སའི་ལྷ་མོ་ཞིག་ཏུ་གྱུར་ནས། ཁོ༌མོ་སའི་ལྷ་མོའི་འཁོར་གྲངས་མེད་པ་དང་བཅས་པས་རིན་པོ་ཆེའི་ཤིང་ཐམས་ཅད་ཀྱི་ལྷུན་ལས་རིན་པོ་ཆེའི་མེ་ཏོག་གི་སྤྲིན་གྱི་ཆར་མངོན་པར་ཕབ་སྟེ་རིན་པོ་ཆེའི་ཕྲེང་བའི་སྤྲིན་གྱི་ཆར་ཡང་རབ་ཏུ་ཕབ་ནས། དེ་བཞིན་གཤེགས་པ་དེ་ལ་མཆོད་པ་བྱ་བའི་ཕྱིར་སྤྱན་སྔར་ཕྱིན་ཏོ། །

དེ་བཞིན་གཤེགས་པ་དེས་ཁོ་མོ་ལ་མདོ་སྡེ་དེ་བཞིན་གཤེགས་པ་ཐམས་ཅད་ཡང་དག་པར་འབྱུང་བའི༌གནས་ཀྱི་སྙིང་པོ་ཞེས་བྱ་བའི་མདོ་སྡེ་གྲངས་མེད་པའི་འཁོར་དང་བཅས་པ་ཡང་དག་པར་བསྟན་ཏེ། དེ་ཡང་ཁོ་མོས་ཐོས་ནས་བཟུང་སྟེ་ཆུད་ཟོས་པར་མ་བྱས་སོ། །རིགས་ཀྱི་བུ་དེ་བཞིན་གཤེགས་པ་ལྔ་བརྒྱ་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་ཆོས་ཀྱི་དབྱིངས་ནམ་མཁའ་མཛོད་སྤུས་ཡོངས་སུ་རྒྱས་པའི་རྩེ་མོ་དཔལ་གྱི་སྒྲོན་མ་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་ཁོ་མོ་ཡང་གར་མཁན་གྱི་བུ་མོ་བཞིན་མངོན་པར་མཛེས་པའི་དཔལ་ཞེས་བྱ་བ་ཞིག་ཏུ་གྱུར་ཏེ། དེ་བཞིན་གཤེགས་པ་དེ་གྲོང་ཁྱེར་དུ་གཤེགས་ནས། གར་མཁན་གྱི་ཚོགས་ཀྱིས་རོལ་མོ་བྱས་པའི་ཚེ། ཁོ་མོས་སངས་རྒྱས་ཀྱི་བྱིན་གྱིས་སྟེང་གི་ནམ་མཁའི་དབྱིངས་ལས། ཚིགས་སུ་བཅད་པ་སྟོང་གིས་དེ་བཞིན་གཤེགས་པ་དེ་ལ་མངོན་པར་བསྟོད་དེ་སྤྱན་སྔར་ཕྱིན་ཏོ། །དེ་བཞིན་གཤེགས་པ་དེས་མཛོད་སྤུ་ནས་འོད་ཟེར་ཆོས་ཀྱི་དབྱིངས་རྣམ་པར་སྣང་བའི་རྒྱན་ཅེས་བྱ་བ་བཀྱེ་སྟེ། ཁོ་མོའི་ལུས་ཐམས་ཅད་ཀྱང་སྣང་བར་མཛད་དོ། །འོད་ཟེར་དེས་ཁོ་མོ་ལ་ཕོག་མ་ཐག་ཏུ་རྣམ་པར་ཐར་པ། ཆོས་ཀྱི་དབྱིངས་ཀྱི་ཚུལ་ཡོངས་སུ་འཁྱིལ་བའི་སྙིང་པོ་ཞེས་བྱ་བ་ཐོབ་པར་གྱུར་ཏོ། །རིགས་ཀྱི་བུ་དེ་ལྟར་དེ་བཞིན་གཤེགས་པ་དེ་དག་ལ་སོགས་པ་བསྐལ་པ་འོད་ཆེན་པོ་ལ་འཇིག་རྟེན་གྱི་ཁམས་རིན་ཆེན་འཁོར་ལོ་སྣ་ཚོགས་ཀྱིས་ཀླུབས་ཤིང་བརྒྱན་པར་སངས་རྒྱས་ལྔ་བརྒྱ་བྱུང་བར་གྱུར་པ་དེ་དག་ཐམས་ཅད་ཀྱང་མཉེས་པར་བྱས་ཏེ། དེ་བཞིན་གཤེགས་པ་དེ་དག་ལ་ཁོ་མོས་མཆོད་པ་ཡང་བྱས་སོ། །དེ་བཞིན་གཤེགས་པ་དེ་དག་གིས་ཁོ་མོ་ལ་ཆོས་བསྟན་པ་དེ་དག་ཐམས་ཅད་ཀྱང་དྲན་ཏེ། ཆོས་ཀྱི་ཚུལ་དེ་དག་ལས་ཡི་གེ་འགའམ། ཚིག་འགའ་ཡང་བརྗེད་པར་མ་གྱུར་ཏོ། །དེ་བཞིན་གཤེགས་པ་དེ་དག་རེ་རེའི་དྲུང་དུ་འགྲོ་བའི་ཚེ་ཡང་སངས་རྒྱས་ཀྱི་ཆོས་ཡོངས་སུ་བརྗོད་པར་བྱ་བས་སེམས་ཅན་ཚད་མེད་པའི་དོན་བྱས་སོ། །དེ་བཞིན་གཤེགས་པ་དེ་དག་རེ་རེ་ལ་ཡང་ཁོ་མོས་ཆོས་ཀྱི་དབྱིངས་ཀྱི་རང་བཞིན་རྒྱ་མཚོ་དུས་གསུམ་གྱི་ཡེ་ཤེས་ཀྱི་སྙིང་པོ་ཆོས་ཀྱི་དབྱིངས་ཤིན་ཏུ་ཡངས་པ་ཞེས་བྱ་བའི་ཐམས་ཅད་མཁྱེན་པའི་གློག་མངོན་པར་སྣང་བ་ཀུན་ཏུ་བཟང་པོའི་སྤྱོད་པ་ཐམས་ཅད་ལ་གནས་པར་ཡང་དག་པར་གཞོལ་བ་ཐོབ་པར་གྱུར་ཏེ། རིགས་ཀྱི་བུ་ཁོ་མོ་ལ་ནི་ད་ལྟར་ཡང་སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པ་མཐའ་དང་དབུས་མེད་པ་ཡོངས་སུ་སྣང་སྟེ། དེ་བཞིན་གཤེགས་པ་དེ་དག་ཁོ་མོས་མཐོང་བར་གྱུར་པས་ཐམས་ཅད་མཁྱེན་པའི་གློག་མངོན་པར་སྣང་བ། སྔོན་ཆད་མ་ཐོབ་པ་སྔོན་ཆད་མ་མཐོང་བ་དག་ཀྱང་ཁོ་མོའི་སེམས་ཀྱི་རྒྱུད་ལ་གནས་པར་གྱུར་ཏེ། འོན་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལས་གཡོ་བ་མེད་དོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པའི་གློག་མངོན་པར་སྣང་བ་ཐོབ་པ་འདི་ནི་མཐའ་དང་དབུས་མེད་པར་བསྟན་པའོ། །

དེ་ནས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་ཀྱི་དཔལ་གྱིས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས། འགྲོ་བ་རྣམ་པར་འདུལ་བ་ཞེས་བྱ་བ་འདི་བརྣན་ཏེ་བསྟན་པ་དང་། རྣམ་པར་དབྱེ་བར་བྱ་བའི་ཕྱིར་སངས་རྒྱས་ཀྱི་བྱིན༌གྱི་རླབས་ཀྱིས་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། །ཟབ་མོ་བལྟ་དཀའ་ཁོང་དུ་ཆུད་དཀའ་སྟེ། །དུས་གསུམ་དབྱིངས་ཀུན་ཐ་དད་ཚུལ་ལྡན་ལ། །ཆོས་འོད་དཀྱིལ་འཁོར་ཀུན་ཏུ་འོད་འབྱུང་བའི། །ཁོ་མོའི་ཚིག་འདི་ནོར་བཟང་མཉན་པར་གྱིས། །སངས་རྒྱས་ཡོན་ཏན་འདོད་པས་བྱང་ཆུབ་ཏུ། །ཁོ་མོས་ཐོག་མ་ཇི་ལྟར་སེམས་བསྐྱེད་དང་། །ཇི་ལྟར་ཁོ་མོས་རྣམ་ཐར་འདི་ཐོབ་པ། །དེ་དག་རྣམ་པར་ཕྱེ་བའི་ཚུལ་འདི་ཉོན། །འདི་ནས་སངས་རྒྱས་ཞིང་གི་རྡུལ་སྙེད་ཀྱི། །བསྐལ་པ་གཅིག་ནས་གཅིག་བརྒྱུད་ཕ་རོལ་ཏུ། །འཇིག་རྟེན་ཁམས་ཡངས་དྲི་མའི་སྐྱོན་མེད་པ། །རྣམ་སྣང་རྒྱལ་མཚན་སྒྲོན་མའི་དཔལ་བྱུང་སྟེ། །བསྐལ་པ་རྡུལ་དང་བྲལ་བའི་དཀྱིལ་འཁོར་བྱུང་། །དེ་ལ་སངས་རྒྱས་རིགས་ནི་རྒྱུན་མ་ཆད། །དེ་ཚེ་རི་རབ་རྡུལ་ཕྲན་རབ་སྙེད་ཀྱི། །སྟོབས་བཅུ་སྐྱོན་མེད་མང་པོ་བྱུང་བར་གྱུར། །དེ་ལ་བདེ་གཤེགས་ཐོག་མར་རིན་ཆེན་འོད། །ཀུན་ཏུ་འཕྲོ་དཔལ༌ཡོན་ཏན་དཔལ་རྒྱལ་བྱུང་། །རྒྱལ་བ་ཆོས་ཀྱི་རྒྱལ་མཚན་རི་རབ་དཔལ། །ཡོན་ཏན་སེང་གེའི་དབང་པོ་རྒྱལ་བ་ཞི། །རྒྱལ་བ་ཞི་བའི་རྒྱལ་པོ་སྐྱེ་བཅིལ་དང་། །གྲགས་པའི་རི་བོ་ཡོན་ཏན་རི་རབ་དཔལ། །རྒྱལ་བ་ཉི་མ་ཟླ་ཞལ་བཅོམ་ལྡན་འདས། །བཅུ༌པོ་དེ་དག་ཚུལ་འདི་ཐོག་མའོ། །རྒྱལ་བ་ནམ་མཁའི་གཞི་དང་ཀུན་ནས་འོད། །ཕྱོགས་སུ་ཡོངས་བྱུང་དྲན་པ་རྒྱ་མཚོའི་སྒོ། །རྒྱལ་བ་མངོན་འཕགས་འོད་མངའ་རི་རབ་དཔལ། །བདེ་གཤེགས་ཆོས་ཀྱི་འོད་འཕྲོ་རི་བོ་དཔལ། །ཐུགས་རྗེ་ཆེ་མངའ་དགུ་པ་པདྨོས་འཕགས། །སངས་རྒྱས་བཅུ་པ་ཆོས་དབྱིངས་མེ་ཏོག་སྟེ། །སངས་རྒྱས་རྒྱ་མཚོ་ཡོངས་སུ་བརྗོད་པ་ལས། །ཚུལ་འདི་བཅུ་པ་གཉིས་པ་འདི་ཡིན་ནོ། །འོད་དཔལ་རྒྱལ་པོ་ཡེ་ཤེས་བློ་གྲོས་དང་། །སྣ་ཚོགས་དོན་དབང་དཔལ་གྱི་བློ་གྲོས་ལྷ། །རྒྱལ་བ་ཤུགས་ཀྱི་རྒྱལ་བློ་ཡེ་ཤེས་དཔལ། །སྣང་བའི་རྒྱལ་པོ་འོད་ཀྱི་རྒྱལ་མཚན་དཔལ། །རྒྱལ་བ་རྣམ་པར་གནོན་པའི་ལྷ་སྟབས་དང་། །དེ་བཞིན་ཆོས་དབྱིངས་པདྨོ་བཅུ་པ་སྟེ། །རྒྱ་ཆེན་ཡོངས་སུ་བསྟན་ལས་ཚུལ་འདི་ནི། །ཚུལ་འདིར་བཅུ་པ་གསུམ་པ་བསྟན་པའོ། །རིན་ཆེན་འོད་འཕྲོ་རི་དཔལ་བཅོམ་ལྡན་འདས། །དེ་ཡི་འོག་མ་ཡོན་ཏན་རྒྱ་མཚོ་དཔལ། །ཆོས་ཀྱི་འོད་དང་པདྨོ་སྙིང་པོ་དཔལ། །འགྲོ་བའི་ཟླ་བ་སྤྱན་ཚུལ་བདེ་བར་གཤེགས། །སྤོས་ཀྱི་འོད་དང་རིན་ཆེན་རི་རབ་དཔལ། །རྒྱལ་བ་དྲི་ཟ་ལུས་འོད་རྒྱལ་པོ་དང་། །རིན་ཆེན་སྙིང་པོ་རྒྱལ་དཔལ་གཟི་བརྗིད་ལྡན། །རྒྱལ་བ་བཅུ་པ་ཞི་བའི་གཟུགས༌ཀྱི་སྟབས། །དེ་ཡི་འོག་མ་རྒྱལ་བ་རྒྱ་ཆེན་བློ། །རིན་ཆེན་འོད་དང་ནམ་མཁའི་སྤྲིན་གྱི་དཔལ། །རྒྱལ་བ་དམ་པའི་མཚན་གྱི་དཔལ་གྱུར་དང་། །བརྟུལ་ཞུགས་དཀྱིལ་འཁོར་རང་གི་ལུས་ཀྱི་འོད། །མཐུ་ཆེན་བརྟུལ་ཞུགས་རི་རབ་དཔལ་མངའ་དང་། །རྒྱལ་བ་ཡོན་ཏན་འཁོར་ཡུག་དཔལ་གྱི་རྒྱལ། །བཅོམ་ལྡན་མི་ཕམ་བརྟུལ་ཞུགས་རྒྱལ་མཚན་དང་། །ཤིང་གི་རི་བོ་རྒྱལ་བ་དེ་དག་བཅུ། །རྒྱལ་བ་སཱ་ལའི་རྒྱལ་པོ་དཔལ་གྱི་མཆོག །འཇིག་རྟེན་དབང་པོའི་ལུས་ནི༌སྣང་བའི་འོད། །མངོན་པར་འཕགས་འོད་དཔལ་གྱི་བཅོམ་ལྡན་འདས། །རྡོ་རྗེ་འོད་དང༌ས་ཡི་གཟི་བརྗིད་དཔལ། །རྒྱལ༌བ་ཟབ་ཆོས་འོད་ཀྱི་རྒྱལ་པོ་དཔལ། །ཆོས་ཀྱི་རྒྱ་མཚོ་དབྱངས་ཀྱི་བློ་གྲོས་དང་། །རི་རབ་རྒྱལ་མཚན་དཔལ་དང་བློ་གྲོས་སྣང་། །རྒྱལ་བ་བཅུ་པ་རིན་ཆེན་རྒྱལ་པོ་དཔལ། །ཚངས་པའི་འོད་དང་རྒྱལ་བ་ནམ་མཁའ་དབྱིངས། །དེ་བཞིན་ཆོས་ཀྱི་དབྱིངས་ནི་གཟུགས་བརྙན་དཔལ། །སྣང་བའི་དཀྱིལ་འཁོར་འོད་ཀྱི་བཅོམ་ལྡན་འདས། །ཐ་དད་ཕྱོགས་མཁྱེན་ཡེ་ཤེས་བློ་གྲོས་དང་། །ནམ་མཁའི་སྒྲོན་མ་མངོན་པར་དགའ་བའི་དཔལ། །རྣམ་པར་སྣང་མཛད་འོད་དཔལ་བདེ་བར་གཤེགས། །བསོད་ནམས་རབ་ཏུ་སྣང་དཔལ་ཞི་བའི་དཔལ། །བཅུ་པར་སྙིང་རྗེ་ཆེན་པོའི་སྤྲིན་གྱི་དཔལ། །དེ་བཞིན་ཉིད་འོད་སྟོབས་སྣང་བློ་གྲོས་དང་། །རྒྱལ་བ་འགྲོ་བ་ཐམས་ཅད་མངོན་གཟུགས་དང་། །དེ་ཚེ་རྒྱལ་བ་མངོན་འཕགས་འོད་མང་འབྱུང་། །དེ་ཡི་འོག་མ་ཞི༌བའི་སྐུ་ཡི་འོད། །ཆོས་འཕགས་བདེ་གཤེགས་དེ་བཞིན་བྱུང་བར༌འགྱུར། །དེ་ཡི་འོག་མ་རླུང་གི་དྲག་ཤུལ་དཔལ། །དཔའ་བའི་རྒྱལ་མཚན་རིན་ཆེན་ལུས་ཀྱི་དཔལ། །དུས་གསུམ་སྣང་བའི་འོད་ནི་བཅུ་པའོ། །སྨོན་ལམ་རྒྱ་མཚོ་རབ་ཏུ་སྣང་དཔལ་དང་། །གཉིས་པ་དགོངས་པ་རྡོ་རྗེ་རི་བོ་དཔལ། །རྒྱལ་བ་གསུམ་པ་སེང་གེ་རི་རབ་དཔལ། །དྲན་པའི་རྒྱལ་མཚན་རྒྱལ་པོ་ཆོས་དཔལ་བློ། །ཤེས་རབ་སྒྲོན་མ་འོད་ཀྱི་རྒྱལ་མཚན་དཔལ། །དེ་ཡི་འོག་མ་རྒྱལ་བ་རྒྱ་ཆེན་བློ། །རྒྱལ་བ་ཆོས་དབྱིངས་ཚུལ་གྱི་ཡེ་ཤེས་སྟོབས། །ཆོས་ཀྱི་རྒྱ་མཚོ་བློ་གྲོས་ཡེ་ཤེས་དཔལ། །ཆོས་འཛིན་པ་དང་རིན་ཆེན་སྦྱིན་དཔལ་དང་། །རྒྱལ་བ་ཡོན་ཏན་ཁོར་ཡུག་དཔལ་གྱི་སྤྲིན། །བཟོད་པའི་སྒྲོན་མ་དཔལ་དང་གཟི་བརྗིད་ལྡན། །ཤུགས་འོད་ཞི་གནས་དབྱངས་ཀྱི་རྒྱལ་བ་དང་། །ཞི་བའི་རྒྱལ་མཚན་འགྲོ་བའི་སྒྲོན་མ་དཔལ། །སངས་རྒྱས་སྨོན་ལམ་ཆེན་པོ་ཤུགས་ཀྱི་དཔལ། །བཅོམ་ལྡན་གཞན་གྱིས་མི་ཐུབ་རྒྱལ་མཚན་སྟོབས། །རྒྱལ་བ་ཡེ་ཤེས་འོད་འཕྲོ་རྒྱ་མཚོ་དཔལ། །རྒྱལ་བ་ཆོས་དབང་བློ་གྲོས་ཆགས་པ་མེད། །འགྲོ་སྐད་རྒྱ་མཚོ་དབྱངས་ཀྱི་བློ་གྲོས་དང་། །ཐམས་ཅད་དབྱངས་ཀྱི་ཡན་ལག་སྒྲ་སྐད་དཔལ། །དབང་སྒྱུར་མཆོད་སྦྱིན་གྲགས་པའི་མཆོད་སྡོང་བློ། །ཕྱོགས་ཡུལ་འགྲོ་བ་མངོན་སུམ་བཅོམ་ལྡན་འདས། །སེམས་ཅན་བསམ་པར་མཉམ་པ་སྐུ་ཡི་དཔལ། །གཞན་ཡང་སངས་རྒྱས་གནས་དང་བཅས་པའི་དཔལ། །རྒྱལ་བ་རང་བཞིན་ལུས་དཔལ་བཟང་པོ་དང་། །དེར་ནི་རྒྱལ་བ་དེ་ལ་སོགས་པ་བྱུང་། །དེ་དག་བྱུང་ནས་འགྲོ་བ་སྒྲོན་མ་མཛད། །བསྐལ་པ་རི་རབ་ཤིན་ཏུ་ཕྲ་རྡུལ་སྙེད། །བདག་གིས་རྒྱལ་བ་རྒྱ་མཚོ་དེ་དག་མཆོད། །བསྐལ་པ་སངས་རྒྱས་ཞིང་གི་རྡུལ་སྙེད་པོ། །དེ་དག་དུ་ནི་རྒྱལ་བ་གང་བྱུང་བ། །བདེ་གཤེགས་དེ་དག་ཐམས་ཅད་བདག་གིས་མཆོད། །རྣམ་པར་ཐར་པའི་ཚུལ་ནི་འདི་ལ་ཞུགས། །རྣམ་པར་ཐར་པའི་ཚུལ་འདི་སྒོམ་བྱེད་ཅིང་། །བསྐལ་པ་མཐའ་ཡས་བདག༌གི་སྔོན་སྤྱད་ཀྱིས། །ཁྱོད་ཀྱིས་ཐོས་ནས་ནན་ཏན་མྱུར་གྱིས་ཤིག །ཚུལ་འདི་རིང་པོ་མི་ཐོགས་ཐོབ་པར་འགྱུར། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས། འགྲོ་བ་རྣམ་པར་འདུལ་བ་སྟོན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་མཐའ་དང་དབུས་མེད་པའི་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལ་མོས་པ་སྣ་ཚོགས་ཀྱིས་ཡང་དག་པར་གནས་པ། བསམ་པ་སྣ་ཚོགས་ཀྱི་ལུས་དང་ལྡན་པ། དབང་པོ་རྒྱ་མཚོ་སྣ་ཚོགས་ཡོངས་སུ་གྲུབ་པ། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་སྣ་ཚོགས་ཤིན་ཏུ་རྟོགས་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་འདི་ཉིད་ན་ཁོ་མོ་དང་རྒྱང་མི་རིང་བ་ཞིག་ན་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ཞེས་བྱ་བ་པདྨོའི་ཁྲི་རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱིས་རབ་ཏུ་བརྒྱན་པ་ཞིག་ལ་འདུག་ཅིང་། མཚན་མོའི་ལྷ་མོ་གྲངས་མེད་པ་བརྒྱ་སྟོང་ཕྲག་བཅུའི་འཁོར་གྱིས་བསྐོར་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང༌བལྟས་ཏེ། མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ཞེས་བྱ་བས་རང་གི་ཡོན་ཏན་གྱི་རྣམ་གྲངས་དང་ཆོས་ཀྱི་སྒོ་མོ་རྒྱ་ཆེར་བསྟན་ཅིང་སྐྱེ་བ་སྔ་མ་རྣམས་སུ་བྱང་ཆུབ་སེམས་དཔའི་ལམ་ལ་ཇི་ལྟར་བསླབ་ཚུལ་གསུང་པའི་སྐོར། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་གྱི་བྱང་ཆུབ་སེམས་དཔའི་རྣམ་པར་ཐར་པ་འཇིག་རྟེན་ཐམས་ཅད་མངོན་དུ་གྱུར་པས་འགྲོ་བ་རྣམ་པར་འདུལ་བ་དེ་ལ་ཡོངས་སུ་སྒོམ་ཞིང་ཁོང་དུ་ཆུད་པར་བྱ་བ་དང་། ཡིད་ཆེས་པར་བྱ་བ་དང་། འཇུག་པར་བྱ་བ་དང་། ཤིན་ཏུ་རྒྱས་པར་བྱ་བ་དང་། ཡོངས་སུ་ཁྱབ་པར་བ་བ་དང་། རབ་ཏུ་མཆོད་པར་བྱ་བ་དང་། དབང་དུ་བྱ་བ་དང་། སྣང་བར་བྱ་བ་དང་། ཡང་དག་པར་གཞོལ་བར་བྱ་བ་བྱེད་ཅིང་། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་། ལྡན་པ་གང་ན་བ་དེར་ཕྱིན་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་ལྷ་མོ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་སྟེ། བདག་ནི་དགེ་བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ལ་སློབ་ཅིང་། བྱང་ཆུབ་སེམས་དཔའི་སྤྱོད་པ་ལ་ཞུགས་ཏེ། བྱང་ཆུབ་སེམས་དཔའི་སྤྱོད་པ་ལ་ནན་ཏན་དུ་བགྱི་བ་དང་། བྱང་ཆུབ་སེམས་དཔའི་སྤྱོད་པ་ལ་རབ་ཏུ་གནས་པས་ཐམས་ཅད་མཁྱེན་པ་ཉིད་དུ་འབྱུང་བར་འཚལ་ན། འཕགས་མ་ལྷ་མོ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལྟར་ཁྱོད་དགེ་བའི་བཤེས་གཉེན་གྱི་རྟེན་གྱིས་བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ལེགས་སོ་ལེགས་སོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་ཐོབ་པའོ། །

ནོར་བཟང་གིས་སྨྲས་པ། འཕགས་མ་ཁྱོད་ནི་འཕྲིན་ལས་ཅི་མཛད་ཡུལ་གང་དང་ལྡན་སྦྱོར་བ་གང་དང་ལྡན། ཅི་ལ་རྣམ་པར་དཔྱོད། བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ༌དེའི་ཡུལ་ནི་ཇི་ལྟ་བུ་ཞིག་མཆིས་དེས་སྨྲས་པ། རིགས་ཀྱི་བུ་ཁོ་མོ་ནི་སེམས་དང་བསམ་པ་རྒྱ་མཚོ་ཡོངས་སུ་དག་པའི་མཉམ་པ་ཉིད་ལ་ཞུགས་པ་སྟེ། འཇིག་རྟེན་གྱི་རྡུལ་དང་དྲི་མ་ཐམས་ཅད་རྣམ་པར་བསལ་བས་མི་ཕྱེད་པས་བརྒྱན་པའི་བསམ་པ་ལ་ཞུགས་པའོ། །བརྩམས་པ་ལས་མི་ལྡོག་མི་བཟློག་པའི་སེམས་དང་ལྡན་པའོ། །རིན་པོ་ཆེའི་རི་བོ་ལྟར་ཡོན་ཏན་གྱིས་བརྒྱན་པའི་སེམས་མི་སྒུལ་བ་དང་ལྡན་པའོ། །མི་གནས་མི་རྟེན་པའི་སེམས་དང་ལྡན་པའོ། །འགྲོ་བ་ཐམས་ཅད་ཡོངས་སུ་བསྐྱབ་པ་ལ་མངོན་པར་ཕྱོགས་པའི་སེམས་དང་ལྡན་པའོ། །སངས་རྒྱས་རྒྱ་མཚོ་ཐམས་ཅད་མཐོང་བས་མི་ངོམས་པའི་སེམས་དང་ལྡན་པའོ། །བྱང་ཆུབ་སེམས་དཔའ་ཐམས་ཅད་ཀྱི་སྟོབས་ཀྱིས་བསམ་པ་རྣམ་པར་དག་པའི་སེམས་དང་ལྡན་པའོ། །དྲན་པའི་རྒྱ་མཚོ་ཡེ་ཤེས་ཀྱི་སྣང་བ་ཆེན་པོས་བརྒྱན་པ་ལ་ཡང་དག་པར་གནས་པའི་སེམས་དང་ལྡན་པའོ། །སེམས་ཅན་ཐམས་ཅད་མྱ་ངན་གྱི་དགོན་པ་ལས་ཡང་དག་པར་བཟླ་བ་ལ་ཞུགས་པའོ། །སེམས་ཅན་ཐམས་ཅད་སྡུག་བསྔལ་བ་དང་ཡིད་མི་བདེ་བ་ལས་རྣམ་པར་བཟློག་པ་ལ་མངོན་པར་བརྩོན་པའོ། །སེམས་ཅན་ཐམས་ཅད་ཀྱི་ཡིད་དུ་མི་འོང་བའི་གཟུགས་དང་། སྒྲ་དང་དྲི་དང་བྲོ་དང་རེག་ཡོངས་སུ་རྒྱུ་བ་རྣམ་པར་བཟློག་པ་ལ་ཞུགས་པའོ། །སེམས་ཅན་ཐམས་ཅད་ཀྱི་སྡུག་པ་དང་། མི་སྡུག་པ་དང་བྲལ་ཞིང་འཕྲད་པའི་སྡུག་བསྔལ་རབ་ཏུ་ཞི་བར་བྱ་བ་ལ་ཞུགས་པའོ། །སེམས་ཅན་ཐམས་ཅད་ཀྱི་ཡུལ་གྱི་རྐྱེན་ལས་བྱུང་བས་མགོ་རྨོངས་པའི་སྡུག་བསྔལ་རྣམ་པར་བཟློག་པ་ལ་རབ་ཏུ་བརྩོན་པའོ། །

ལོག་པར་ལྷུང་བའི་སེམས་ཅན་ཐམས་ཅད་ཀྱི་རྟེན་དུ་གྱུར་པའོ། །སེམས་ཅན་ཐམས་ཅད་འཁོར་བའི་གནས་ཀྱི་སྡུག་བསྔལ་ལས་འབྱུང་བ་ཡང་དག་པར་སྟོན་པ་ལ་མངོན་པར་བརྩོན་པའོ། །སེམས་ཅན་ཐམས་ཅད་ཀྱི་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བ་དང་། འཁྲུག་པ་རྣམ་པར་བཟློག་པ་ལ་ཞུགས་པའོ། །སེམས་ཅན་ཐམས་ཅད་ལ་དེ་བཞིན་གཤེགས་པའི་བདེ་བ་བླ་ན་མེད་པ་ཡོངས་སུ་བསྒྲུབ་པར་ཞུགས་པ་སྟེ། གྲོང་དང་། གྲོང་ཁྱེར་དང་། ལྗོངས་དང་། ཡུལ་དང་། ཁམས་དང་། རྒྱལ་པོའི་གནས་ན༌འཁོད་པའི་སེམས་ཅན་ཐམས་ཅད་བདེ་བར་རིམ་གྲོ་བྱ་བས་ཉམས་དགའ་བར་འགྱུར་ཞིང་དེ་དག་ལ་ཆོས་དང་མཐུན་པར་བསྲུང་བ་དང་། བསྐྱབ་པ་དང་། རིམ་གྲོ་བྱ་བ་ཡང་ལེགས་པར་བྱེད་དེ། དེ་དག་རིམ་པས་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱེད་དོ། །འདི་ལྟ་སྟེ་ཁང་ཁྱིམ་དང་། གཞལ་མེད་ཁང་ན་གནས་པའི་སེམས་ཅན་རྣམས་ཀྱི་མངོན་པར་ཆགས་པ༌མེད་པ་ཡོངས་སུ་བསྐྱེད་དོ། །ཡིད་མི་བདེ་བ་དེ་དང་དེ་དག་ཀྱང་རྣམ་པར་སེལ་ཏོ། །མངོན་པར་ཞེན་པ་ཐམས་ཅད་རྒྱུན་གཅོད་པ་དང་། ཆོས་ཐམས་ཅད་ཀྱི་རང་བཞིན་ཡོངས་སུ་ཤེས་པར་བྱ་བའི་ཕྱིར་ཆོས་སྟོན་ཏོ། །ཕ་མ་དང་ཕུ་ནུ་དང་སྲིང་མོ་དང་གཉེན་བཤེས་དང་འགྲོགས་པའི་སེམས་ཅན་ཡུན་རིང་པོ་ནས་བཤེས་ཤིང་མཛའ་བར་གྱུར་པ་དག་ལ་སངས་རྒྱས་དང་བྱང་ཆུབ་སེམས་དཔའ་དང་འཕྲད་པར་བྱ་བའི་ཕྱིར་ཆོས་སྟོན་ཏོ། །བུ་སྨད་དང་འགྲོགས་པའི་སེམས་ཅན་རྣམས་ལ་འཁོར་བའི་སྲེད་པ་ཐམས་ཅད་རབ་ཏུ༌སྤང་བ་དང་། སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་སུ་བྱ་བ་དང་། སྙིང་རྗེ་ཆེན་པོ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །

ཚོང་དུས་ཀྱི་དབུས་ན་འཁོད་པའི་སེམས་ཅན་རྣམས་ལ་འཕགས་པའི་དགེ་འདུན་དང་། དེ་བཞིན་གཤེགས་པ་མཐོང་བར་བྱ་བ་ལ་ཡང་དག་པར་གཞོལ་བར་བྱ་བའི་ཕྱིར་ཆོས་སྟོན་ཏོ། །ལོངས་སྤྱོད་ཀྱི་དྲེགས་པས་མྱོས་པའི་སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །གླུ་དང་གར་དང་རོལ་མོ་ལ་མངོན་པར་དགའ་བའི་སེམས་ཅན་རྣམས་ལ་ཆོས་ཀྱི་དགའ་བ་ལ་མོས་པར་བྱ་བའི་ཕྱིར་ཆོས་སྟོན་ཏོ། །ཡུལ་གྱི་དགའ་བ་ལ་ཆགས་པའི་སེམས་ཅན་རྣམས་ལ་དེ་བཞིན་གཤེགས་པའི་ཡུལ་ལ་ཡང་དག་པར་གཞོལ་བར་བྱ་བའི་ཕྱིར་ཆོས་སྟོན་ཏོ། །ཁྲོ་བས་ཡོངས་སུ་ནོན་པའི་སེམས་ཅན་རྣམས་ལ་བཟོད་པའི་ཕ་རོལ་ཏུ་ཕྱིན་པ་ལ་རབ་ཏུ་དགོད་པར་བྱ་བའི་ཕྱིར་ཆོས་སྟོན་ཏོ། །སེམས་ཅན་ལེ་ལོ་ཅན་རྣམས་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པར་བྱ་བའི་ཕྱིར་ཆོས་སྟོན་ཏོ། །སེམས་རྣམ་པར་མྱོས་པའི་སེམས་ཅན་རྣམས་ལ་དེ་བཞིན་གཤེགས་པའི་བསམ་གཏན་གྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལྟ་བའི་རྣམ་པ་ཐིབས༌པོར་སུབས་པའི་སེམས་ཅན་མ་རིག་པའི་མུན་ནག༌ན་འཐོམས་པ་རྣམས་ལ་ལྟ་བའི་རྣམ་པ་ཐིབས་པོ་དང་མ་རིག་པའི་མུན་པ་རྣམ་པར་བསྩལ་བའི་ཕྱིར་ཆོས་སྟོན་ཏོ། །ཤེས་རབ་འཆལ་བ་ཅན་གྱི་སེམས་ཅན་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཁམས་གསུམ་པ་ལ་མངོན་པར་ཞེན་པའི་སེམས་ཅན་རྣམས་ལ་འཁོར་བ་ལས་འབྱུང་བར་བྱ་བའི་ཕྱིར་ཆོས་སྟོན་ཏོ། །དམའ་བ་ལ་མོས་པའི་སེམས་ཅན་རྣམས་ལ་དེ་བཞིན་གཤེགས་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་བྱ་བའི་ཕྱིར་ཆོས་སྟོན་ཏོ། །བདག་ལ་ཕན་པར་བརྩོན་པའི་སེམས་ཅན་རྣམས་ལ་སེམས་ཅན་ཐམས་ཅད་ལ་ཕན་པར་བྱ་བའི་སྨོན་ལམ་ཡོངས་སུ་རྫོགས་པར་འགྱུར་བར་བྱ་བའི་ཕྱིར་ཆོས་སྟོན་ཏོ། །བསམ་པ་ཉམ་ཆུང་བའི་སེམས་ཅན་རྣམས་ལ་བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །མ་རིག་པའི་མུན་པས་སེམས་བློང་བའི་སེམས་ཅན་རྣམས་ལ་བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར༌དག་པར་བྱ་བའི་ཕྱིར་ཆོས་སྟོན་ཏོ། །གཟུགས་མི་སྡུག་པ་དང་ལྡན་པའི་སེམས་ཅན་རྣམས་ལ་དེ་བཞིན་གཤེགས་པའི་གཟུགས༌ཀྱི་སྐུ་རྣམ་པར་དག་པར་བྱ་བའི་ཕྱིར་ཆོས་སྟོན་ཏོ། །

ལུས་ཀྱི་དབྱིབས་མི་མཛེས་པ་དང་ལྡན་པའི་སེམས་ཅན་རྣམས་ལ་ཆོས་ཀྱི་སྐུ་བླ་ན་མེད་པ་རྣམ་པར་དག་པའི་ཕྱིར་ཆོས་སྟོན་ཏོ། །ཁ་དོག་མི་སྡུག་པ་དང་ལྡན་པའི་སེམས་ཅན་རྣམས་ལ་དེ་བཞིན་གཤེགས་པའི་སྐུ་མདོག་གསེར་གྱི་ཁ་དོག་ལྟ་བུ་དང་ཤིན་ཏུ་འཇམ་ཞིང་ཀ་ཙ༌ལིནྡ་ཀ་ལྟར་རེག་ན་བདེ་བའི་ལུས་རྣམ་པར་དག་པའི་ཕྱིར་ཆོས་སྟོན་ཏོ། །སྡུག་བསྔལ་བའི་སེམས་ཅན་རྣམས་ལ་དེ་བཞིན་གཤེགས་པའི༌བདེ་བ་དམ་པ་ཐོབ༌པར་བྱ་བའི་ཕྱིར་ཆོས་སྟོན་ཏོ། །

བདེ་བའི་སེམས་ཅན་རྣམས་ལ་ཐམས་ཅད་མཁྱེན་པ་ཉིད་ཀྱི་བདེ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ནད་པ་ན་བའི་སེམས་ཅན་རྣམས་ལ་བྱང་ཆུབ་སེམས་དཔའི་ལུས་གཟུགས་བརྙན་ལྟ་བུ་ཡོངས་སུ་གྲུབ་པར་བྱ་བའི་ཕྱིར་ཆོས་སྟོན་ཏོ། །དགའ་བ་སྣ་ཚོགས་ལ་བརྩོན་པའི་སེམས་ཅན་རྣམས་ལ་བྱང་ཆུབ་སེམས་དཔའི་སྤྱོད་པའི་དགའ་བ་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕོངས་པའི་སེམས་ཅན་རྣམས་ལ་བྱང་ཆུབ་སེམས་དཔའི་ཆོས་ཀྱི་གཏེར་དང་མཛོད་རབ་ཏུ་ཐོབ་པར་བྱ་བའི་ཕྱིར་ཆོས་སྟོན་ཏོ། །བཟའ་ཤིང་གི་ར་བ་ན་གནས་པའི་སེམས་ཅན་རྣམས་ལ་སངས་རྒྱས་ཀྱི་ཆོས་ཡོངས་སུ་བཙལ༌བ་ལ་མངོན་པར་བརྩོན་པའི་རྒྱུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ལམ་དུ་ཞུགས་པའི་སེམས་ཅན་རྣམས་ལ་ཐམས་ཅད་མཁྱེན་པའི་ལམ་དུ་འཇུག་པར་བྱ་བའི་ཕྱིར་ཆོས་སྟོན་ཏོ། །གྲོང་ན་གནས་པའི་སེམས་ཅན་རྣམས་ལ་ཁམས་གསུམ་པ་ཐམས་ཅད་ལས་འབྱུང་བར་བྱ་བའི་ཕྱིར་ཆོས་སྟོན་ཏོ། །ཡུལ་གྱི་འདབ་ན་གནས་པའི་སེམས་ཅན་རྣམས་ལ་ཉན་ཐོས་དང་རང༌སངས་རྒྱས་ཀྱི་ལམ་ལས་ཡང་དག་པར་འདའ་བར་བྱ་བ་དང་། དེ་བཞིན་གཤེགས་པའི་ས་ལ་རབ་ཏུ་དགོད་པར་བྱ་བའི་ཕྱིར་ཆོས་སྟོན་ཏོ། །གྲོང་རྡལ་ན་འཁོད་པའི་སེམས་ཅན་རྣམས་ལ་ཆོས་ཀྱི་རྒྱལ་པོའི་ཕོ་བྲང་དུ་གནས་པར་འགྱུར༌བར་བྱ་བའི་ཕྱིར་ཆོས་སྟོན་ཏོ། །ཕྱོགས་མཚམས་ན་འཁོད་པའི་སེམས་ཅན་རྣམས་ལ་དུས་གསུམ་མཉམ་པ་ཉིད་ཀྱི་ཡེ་ཤེས་རབ་དུ་ཐོབ་པར་བྱ་བའི་ཕྱིར་ཆོས་སྟོན་ཏོ། །ཕྱོགས་ན་གནས་པའི་སེམས་ཅན་རྣམས་ལ་ཆོས་ཐམས་ཅད་ཀྱི་ཡེ་ཤེས་མངོན་པར་ཤེས་པར་བྱ་བའི་ཕྱིར་ཆོས་སྟོན་ཏོ། །

འདོད་ཆགས་ལ་གཅིག་ཏུ་དགའ་བའི་སེམས་ཅན་རྣམས་ལ་མི་སྡུག་པའི་སྒོས་འཁོར་བའི་སྲེད་པ་རྣམ་པར་བཟློག་པའི་ཕྱིར་ཆོས་སྟོན་ཏོ། །ཞེ་སྡང་ལ་སྤྱོད་པའི་སེམས་ཅན་རྣམས་ལ་བྱམས་པ་ཆེན་པོའི་ཚུལ་རྒྱ་མཚོ་ལ་འཇུག་པར་བྱ་བའི་ཕྱིར་ཆོས་སྟོན་ཏོ། །གཏི་མུག་ལ་སྤྱོད་པའི་སེམས་ཅན་རྣམས་ལ་ཆོས་ཐམས་ཅད་ཀྱི་སྒོ་རྒྱ་མཚོ་རབ་ཏུ་འབྱེད་པའི་ཡེ་ཤེས་མངོན་པར༌ཤེས་པར་བྱ་བའི་ཕྱིར་ཆོས་སྟོན་ཏོ། །ཆ་མཉམ་པ་ལ་སྤྱོད་པའི་སེམས་ཅན་རྣམས་ལ་ཐེག་པ་ཐམས་ཅད་ཀྱི་སྨོན་ལམ་གྱི་ཚུལ་རྒྱ་མཚོས་ཁྱད་པར་དུ་འགྲོ་བར་བྱ་བའི་ཕྱིར་ཆོས་སྟོན་ཏོ། །འཁོར་བའི་ཡུལ་གྱི་དགའ་བའི་བསམ་པ་ཅན་གྱི་སེམས་ཅན་རྣམས་ལ་འཁོར་བའི་ཡུལ་ལ་དགའ་བ་རྣམ་པར་བཟློག་པའི་ཕྱིར་ཆོས་སྟོན་ཏོ། །འཁོར་བའི་སྡུག་བསྔལ་ཐམས་ཅད་ཀྱིས་གཙེས་པའི་སེམས་ཅན་རྣམས་ལ་འཁོར་བའི་སྡུག་བསྔལ་ཐམས་ཅད་ཀྱིས་ཉེ་བར་ཉོན་མོངས་པ་མེད་པར་བྱ་བའི་ཕྱིར་ཆོས་སྟོན་ཏོ། །དེ་བཞིན་གཤེགས་པས་འདུལ་བའི་སེམས་ཅན་རྣམས་ལ་མི་སྐྱེ་བའི་གནས་ཡང་དག་པར་བསྟན་པའི་ཕྱིར་ཆོས་སྟོན་ཏོ། །ཕུང་པོ་ལ་གནས་པའི་བསམ་པ་ཅན་གྱི་སེམས་ཅན་རྣམས་ལ་གཞི་མེད་པའི་ཆོས་ཀྱི་སྤྱོད་ཡུལ་ལ་རྣམ་པར་སྤྱོད་པར་བྱ་བའི་ཕྱིར་ཆོས་སྟོན་ཏོ། །བསམ་པ་ཞུམ་པའི་སེམས་ཅན་རྣམས་ལ་ལམ་གྱི་རྒྱུན་གྱི་ཁྱད་པར་ཡང་དག་པར་བསྟན་པར་བྱ་བའི་ཕྱིར་ཆོས་སྟོན་ཏོ། །མཐོ་བའི་ང་རྒྱལ་ཅན་གྱི་སེམས་ཅན་རྣམས་ལ་ཆོས་ཐམས་ཅད་མཉམ་པ་ཉིད་ཀྱི་བཟོད་པ་ཡང་དག་པར་བསྟན༌པར་བྱ་བའི་ཕྱིར་ཆོས་སྟོན་ཏོ། །གཡོ་སྒྱུའི༌ཡུལ་གྱི་བསམ་པ་དང་ལྡན་པའི་སེམས་ཅན་རྣམས་ལ་བྱང་ཆུབ་སེམས་དཔའི་བསམ་པ་ཡོངས་སུ་དག་པར་བྱ་བའི་ཕྱིར་ཆོས་སྟོན་ཏེ།

དེ་ལྟར་རིགས་ཀྱི་བུ་ཁོ་མོ་ནི་སེམས་ཅན་ཐམས་ཅད་ཆོས་ཀྱི་སྦྱིན་པས་ཡོངས་སུ་བསྡུས་ཤིང་ངན་སོང་གི་ལམ་གྱི་རྒྱུད་སྡུག་བསྔལ་བ་ཐམས་ཅད་ནས་རྣམ་པར་བཟློག་པ་དང་། ལྷ་དང་མིའི་ཕུན་སུམ་ཚོགས་པ་དང་། བདེ་བ་ཡོངས་སུ་བསྟན་པ་དང་། ཁམས་གསུམ་པ་ལས་གྱེན་དུ་བསྐྱོད་པ་དང་། ཐམས་ཅད་མཁྱེན་པ་ཉིད་ལ་རབ་ཏུ་དགོད་པ་དང་། ཐབས༌རྣམ་པ་སྣ་ཚོགས་ཀྱིས་ཡོངས་སུ་སྨིན་པར་བྱེད་བྱེད་པས། དགའ་བ་ཆེན་པོའི་ཤུགས་རྒྱ་མཚོའི་སྣང་བ་རབ་ཏུ་ཐོབ་པས་དགའ་ཞིང་སྤྲོ་ལ་ཡིད་བདེ་བར་གྱུར་པའོ། །གཞན་ཡང་རིགས་ཀྱི་བུ་ཁོ་མོ་ནི་ཕྱོགས་དང་། ཕྱོགས་མཚམས་ཀྱི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ལ་རྣམ་པར་ལྟ་ཞིང་སྨོན་ལམ་རྒྱ་མཚོ་ལ་སྤྱོད་པའི་བྱང་ཆུབ་སེམས་དཔའ་ལུས་སྣ་ཚོགས་རྣམ་པར་དག་པ། འོད་ཀྱི་དཀྱིལ་འཁོར་སྣ་ཚོགས་ཀྱི་རྒྱན་དང་ལྡན་པ། འོད་ཟེར་དང་འོད་ཀྱི་དཀྱིལ་འཁོར་ཁ་དོག་མཐའ་ཡས་པ་རབ་ཏུ་འགྱེད་པ་ཐམས་ཅད་མཁྱེན་པ་ཉིད་ཀྱི་ཚུལ་རྒྱ་མཚོ་སྣ༌ཚོགས་ལ་ཞུགས་པའི་ཡེ་ཤེས་སྣང་བ་ཅན། ཏིང་ངེ་འཛིན་རྒྱ་མཚོ་སྣ་ཚོགས་ལ་ཞུགས་པར་རྣམ་པར་འཕྲུལ་བ་སྣ་ཚོགས་ཀྱི་ཡུལ་དང་ལྡན་པ། དབྱངས་ཀྱི་ཡན་ལག་དང་སྐད༌རྒྱ་མཚོ་སྣ་ཚོགས་ཀྱི་དབྱངས་དང་ལྡན་པ། རྒྱན་སྣ་ཚོགས་ཀྱིས་རྣམ་པར་ཀླུབས་པའི་ལུས་ཅན། དེ་བཞིན་གཤེགས་པའི་ཚུལ་སྣ་ཚོགས་ལ་ཞུགས་པ། ཞིང་རྒྱ་མཚོ་འབྱམས་ཀླས་པ་སྣ་ཚོགས་སུ་ཞུགས་པའི་ལུས་དང་ལྡན་པ། སངས་རྒྱས་རྒྱ་མཚོ་སྣ་ཚོགས་ལ་ཞུགས་པ། སོ་སོ་ཡང་དག་པར་རིག་པ་རྒྱ་མཚོ་སྣ་ཚོགས་ལ་ཞུགས་པ། དེ་བཞིན་གཤེགས་པའི་རྣམ་པར་ཐར་པ་དང་། ཡེ་ཤེས་ཀྱི་ཡུལ་སྣ་ཚོགས་ཀྱིས་སྣང་བར་གྱུར་པ། ཡེ་ཤེས་རྒྱ་མཚོ་སྣ་ཚོགས་ཀྱི་སྣང་བ་རབ་ཏུ་ཐོབ་པ། ཏིང་ངེ་འཛིན་རྒྱ་མཚོ་སྣ་ཚོགས་ཀྱི་ཚུལ་ལ་རྣམ་པར་སྤྱོད་པ་ཆོས་སྣ་ཚོགས་ཀྱི་རྣམ་པར་ཐར་པའི་གཞལ་མེད་ཁང་ན་རྣམ་པར་རྩེ་བའི་ཡུལ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སྒོ་སྣ་ཚོགས་ལ་མངོན་དུ་གནས་པ། ཆོས་ཀྱི་དབྱིངས་སྣ་ཚོགས་ཀྱི་ནམ་མཁའི་རྒྱན་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱིས་ནམ་མཁའ་རྒྱས་པར་འགེངས་པ། འཁོར་གྱི་དཀྱིལ་འཁོར་རྒྱ་མཚོ་སྣ་ཚོགས་ལ་རྣམ་པར་ལྟ་བ། འཇིག་རྟེན་གྱི་ཁམས་སྣ་ཚོགས་ནས་འདུས་པ། སངས་རྒྱས་ཀྱི་ཞིང་སྣ་ཚོགས་འབྱམས་ཀླས་པར་རྗེས་སུ༌འདོང་བ། ཕྱོགས་རྒྱ་མཚོ་སྣ་ཚོགས་ནས་ཡོངས་སུ་འདུས་པ། དེ་བཞིན་གཤེགས་པ་ཐ་དད་པས་བཀྱེ་བ། དེ་བཞིན་གཤེགས་པ་ཐ་དད་པའི་ཞབས་ཀྱི་དྲུང་ནས་ལྷགས་པ། བྱང་ཆུབ་སེམས་དཔའི་ཚོགས་སྣ་ཚོགས་ཀྱི་འཁོར་དང་ལྡན་པ། རྒྱན་སྣ་ཚོགས་ཀྱི་སྤྲིན་གྱི་ཆར་རབ་ཏུ་འབེབས་པ། དེ་བཞིན་གཤེགས་པའི་ཚུལ་སྣ་ཚོགས་ལ་ཞུགས་པ་དེ་བཞིན་གཤེགས་པའི་ཆོས་རྒྱ་མཚོ་སྣ་ཚོགས༌ལ་རྣམ་པར་སྤྱོད་པ། ཡེ་ཤེས་སྣ་ཚོགས་རྒྱ་མཚོ་ལ་ཞུགས་པ། རྒྱན་གྱི་སྙིང་པོ་སྣ་ཚོགས་ཅན་གྱི་སྟན་ལ་འཁོད་པ་རྣམས་ཀྱི་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་སུ་བསྐྱེད་དེ། དེ་དག་དགའ་བ་སྣ་ཚོགས་ཀྱི་ཤུགས་རྒྱ་མཚོ་ཡོངས་སུ་སྐྱེས་ནས། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོར་འདོང་སྟེ། དེ་དག་དེ་བཞིན་གཤེགས་པའི་སྟོབས་ཚད་མེད་པ་རྗེས་སུ་སེམས་པས་ཀྱང་དགའ་བའི་ཤུགས་ཆེན་པོ་རྒྱ་མཚོ་ཡོངས་སུ་འབྱུང་བར་འགྱུར་རོ། །

རིགས་ཀྱི་བུ་གཞན་ཡང་ཁོ་མོ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་ཀྱི་སྐུ་ཡོངས་སུ་དག་པ་མཚན་གྱིས་རབ་ཏུ་བརྒྱན་པ། བསམ་གྱིས་མི་ཁྱབ་པ་མཐོང་ནས་དགའ་བ་ཆེན་པོ་དང་མོས་ཤིང་ཉམས་བདེ་བ་རབ་ཏུ་ཐོབ་སྟེ། སེམས་ཀྱི་སྐད་ཅིག་རེ་རེ་ལའང་འོད་ཀྱི་དཀྱིལ་འཁོར་ཆོས་ཀྱི་དབྱིངས་ལྟར་ཡངས་པ། ཁ་དོག་རྒྱ་མཚོ་མཐའ་དང་དབུས་མེད་པར་སྣང་བ་ལ་ལྟ་ཞིང་སེམས་ཀྱི་སྐད་ཅིག་རེ་རེ་ལ་དགའ་བ་ཆེན་པོའི་ཤུགས་རྒྱ་མཚོ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་བ་སྤུའི་སྒོ་རེ་རེ་ནས་ཀྱང་འོད་ཟེར་ཆེན་པོ་སངས་རྒྱས་ཀྱི་ཞིང་མཐའ་དང་དབུས་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་སྟེ། འོད་ཟེར་རེ་རེ་ཞིང་ཡང་འོད་ཟེར་རྒྱ་མཚོ་སངས་རྒྱས་ཀྱི་ཞིང་མཐའ་ཡས་པའི་རྡུལ་ཤིན་ཏུ་ཕྲ་བ་སྙེད་ཀྱི་འཁོར་དང་ལྡན་པས་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་དང་། སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་མཛད་པ་མཐོང་ཞིང་སེམས་ཀྱི་སྐད་ཅིག་རེ་རེ་ལ་དགའ་བ་ཆེན་པོའི་ཤུགས་རྒྱ་མཚོ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་དབུ་དང་། སྐུ་ཕྲག་པ་གཉིས་ཀྱི་ལྷུན་ལས་སེམས་ཀྱི་སྐད་ཅིག་རེ་རེ་ལ་རིན་པོ་ཆེ་ཐམས་ཅད་ཀྱི་འོད་འཕྲོ་བའི༌རིའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ༌སྙེད་འབྱུང་ཞིང་། ཆོས་ཀྱི་དབྱིངས་རྒྱ་མཚོ་ཐམས་ཅད་རྒྱས་པར་འགེངས་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་བ་སྤུའི་སྒོ་རེ་རེ་ནས་སེམས་ཀྱི་སྐད་ཅིག་རེ་རེ་ལ་ཁ་དོག་དྲི་ཞིམ་པོ་དང་། འོད་ཟེར་སྣ་ཚོགས་ཅན་གྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་འབྱུང་ཞིང༌སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་མཚན་རེ་རེ་ནས། དེ་བཞིན་གཤེགས་པའི་སྐུ་གཟུགས་མཚན་གྱིས་རབ་ཏུ་བརྒྱན་པའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་བྱུང་སྟེ་འཇིག་རྟེན་གྱི་ཁམས་རྒྱ་མཚོ་ཐམས་ཅད་རྒྱས་པར་འགེངས་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་དཔེ་བྱད་བཟང་པོ་རེ་རེ་ལས་སེམས་ཀྱི་སྐད་ཅིག་རེ་རེ་ལ་དེ་བཞིན་གཤེགས་པའི་སྤྲུལ་པའི་སྐུ་དཔེ་བྱད་བཟང་པོ་བརྒྱད་ཅུའི་ཤིན་ཏུ་འབར་བའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ༌སྙེད་འབྱུང་སྟེ། སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་ཤིང་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དབྱངས་སུ་སྒྲོག་པའི་འབྲུག་སྒྲ་འབྱིན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་སངས་རྒྱས་རྣམ་པར་འཕྲུལ་པའི་སྐུ་དང་པོ་བྱང་ཆུབ་ཏུ་ཐུགས་བསྐྱེད་པ་དང་བཅས། ཕ་རོལ་ཏུ་ཕྱིན་པའི་ལམ་རྣམ་པར་དག་པའི་རྒྱན་དང་བཅས། བྱང་ཆུབ་སེམས་དཔའི་ས་ཡོངས་སུ་གནོན་པའི་རྣམ་པར་འཕྲུལ་པ་དང་བཅས་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འབྱུང་བ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་སེམས་ཀྱི་སྐད་ཅིག་རེ་རེ་ལ་ལྷའི་དབང་པོའི་ལུས་ཀྱི་སྤྲིན་ལྷའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ལྷའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལས་སེམས་ཀྱི་སྐད་ཅིག་རེ་རེ་ལ་ཀླུའི་དབང་པོའི་ལུས་ཀྱི་སྤྲིན་ཀླུའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང༌སྟེ། ཀླུའི་དབང་པོའི་ལུས༌ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས་གནོད་སྦྱིན་གྱི་དབང་པོའི་ལུས་ཀྱི་སྤྲིན་གྱི་གནོད་སྦྱིན་གྱི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། གནོད་སྦྱིན་གྱི༌དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་ཐམས་ཅད་ནས། དྲི་ཟའི་དབང་པོའི་ལུས་ཀྱི་སྤྲིན་དྲི་ཟའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། དྲི་ཟའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ༌རེ་རེ་ནས་ལྷ་མ་ཡིན་གྱི་དབང་པོའི་ལུས་ཀྱི་སྤྲིན་ལྷ་མ་ཡིན་གྱི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ལྷ་མ་ཡིན་གྱི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་པར་གནས་ཤིང་། ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ནམ༌མཁའ་ལྡིང་གི་དབང་པོའི་ལུས་ཀྱི་སྤྲིན་ནམ་མཁའ་ལྡིང་གི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། ནམ་མཁའ་ལྡིང་གི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །གཞན་ཡང་རིགས་ཀྱི་བུ་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་མིའམ་ཅིའི་དབང་པོའི་ལུས་ཀྱི་སྤྲིན་མིའམ་ཅིའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། མིའམ་ཅིའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ལྟོ་འཕྱེ་ཆེན་པོའི་ལུས་ཀྱི་སྤྲིན་ལྟོ་འཕྱེ་ཆེན་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་རྒྱས་པར་བཀང་སྟེ། ལྟོ་འཕྱེ་ཆེན་པོའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཆོས་སྟོན་པ་མཐོང་ནས་དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །

རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན། སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་མིའི་དབང་པོའི་ལུས་ཀྱི་སྤྲིན་མིའི་དབང་པོའི་རྣམ་པར་འཕྲུལ་པ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། མིའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང༌ཆོས་སྟོན་པ་མཐོང་ནས། དགའ་བ་ཆེན་པོའི་ཤུགས་རྒྱ་མཚོ་ཤིན་ཏུ་ཡངས་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ལ་རྣམ་པར་བལྟས་ན་སེམས་ཀྱི་སྐད་ཅིག་རེ་རེ་ལ་བ་སྤུའི་སྒོ་རེ་རེ་ནས་ཚངས་པའི་དབང་པོའི་ལུས་ཀྱི་སྤྲིན་ཚངས་པའི་དབང་པོའི་རྣམ་པར་འཕྲུལ་པའི་ཡུལ་དང་བཅས་པ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱུང་ཞིང་ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། ཚངས་པའི་དབང་པོའི་ལུས་ཡོངས་སུ་བསྟན་པས་འདུལ་བའི་སེམས་ཅན་རྣམས་ལ་མངོན་དུ་གནས་ཤིང་ཚངས་པའི་སྒྲ་སྐད་དང་དབྱངས་ཀྱིས་ཆོས་སྟོན་པ་མཐོང་ནས་སེམས་ཀྱི་སྐད་ཅིག་རེ་རེ་ལ་ཐམས་ཅད་མཁྱེན་པ་ཉིད་དང་ལྡན་པའི་དགའ་བ་ཆེན་པོའི་ཤུགས་རྒྱ་མཚོ་ཆོས་ཀྱི་དབྱིངས་ལྟར་རྒྱ་ཆེ་ཞིང་ཤིན་ཏུ་ཡངས་པ་རབ་ཏུ་འཐོབ་སྟེ། སྔོན་ཐོབ་པར་གྱུར་པ་འཐོབ་པར་འགྱུར་བ་མ་ཡིན་ནོ། །

སྔོན༌ཁོང་དུ་ཆུད་པ་ཁོང་དུ་ཆུད་པར་འགྱུར་བ་མ་ཡིན་ནོ། །སྔོན་ཞུགས་པ་ལ་འཇུག་པར་འགྱུར་བ་མ་ཡིན་ནོ། །སྔོན་ཁྱབ་པར་གྱུར་པ་ཁྱབ་པར་འགྱུར་བ་མ་ཡིན་ནོ། །སྔོན་མཐོང་བ་མཐོང་བར་འགྱུར་བ་མ་ཡིན་ནོ། །སྔོན་ཐོས་པ་ཐོས་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཀྱི་རང་བཞིན་གྱི་མཚན་ཉིད་ཡོངས་སུ་ཤེས་པ་ལྟར་ན་ཆོས་ཐམས་ཅད་མཚན་ཉིད་གཅིག་པའང༌ཅི་རོབ་མ་ཡིན་ཏེ། དུས་གསུམ་གྱི་ཚུལ་ལ་འཇུག་པའི༌སྒོ་ནས་ཆོས་ཐམས་ཅད༌ཀྱང་མཐའ་དང་དབུས་མེད་པར་བསྟན་དུ་ཡོད་པ་སྟེ། འདི་ནི་རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པའི་ཚུལ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་ཐར་པའི་ཚུལ་རྒྱ་མཚོའི་སྣང་བ་སྟེ། རིགས་ཀྱི་བུ་རྣམ་པར་ཐར་པ་འདི་ནི་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ལ་འཇུག་པའི་ཕྱིར་མཐའ་དང་དབུས་མེད་པའོ། །རྣམ་པར་ཐར་པ་འདི་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་། ཐ་མི་དད་པས་ཟད་མི་ཤེས་པའོ། །རྣམ་པར་ཐར་པ་འདི་ནི་བྱང་ཆུབ་སེམས་དཔའི་ཡེ་ཤེས་ཀྱི་མིག་གིས་རྣམ་པར་ཤེས་པར་བྱ་བ་ཡིན་པས་མུ་མེད་པའོ། །རྣམ་པར་ཐར་པ་འདི་ནི་ཆོས་ཀྱི་དབྱིངས་ཐ་མི་དད་པའི་ཚུལ་གྱི་གཏན་དུ་རྒྱས་པར་འགེངས་པས་གཏིང་མེད་པའོ། །རྣམ་པར་ཐར་པ་འདི་ནི་དམིགས་པ་གཅིག་ཏུ་རྣམ་པར་འཕྲུལ་པ་ཐམས་ཅད་ཡོངས་སུ་འདུ་བར་བྱེད་པས་སྒོ་ཐམས་ཅད་དང་ལྡན་པའོ། །

རྣམ་པར་ཐར་པ་འདི་ནི་ཆོས་ཐམས་ཅད་ཀྱི་ལུས་དང་མི་གཉིས་པར་སྤྱོད་པས་དོན་ཡོད་པའོ། །རྣམ་པར་ཐར་པ་འདི་ནི་སྒྱུ་མ་ལྟ་བུར་ཡོངས་སུ་སྤྱོད་པས་མ་སྐྱེས་པའོ། །རྣམ་པར་ཐར་པ་འདི་ནི་ཐམས་ཅད་མཁྱེན་པ་ཉིད་ཀྱི་སྨོན་ལམ་གྱི་གཟུགས་བརྙན་དུ་བྱུང་བས་གཟུགས་བརྙན་ལྟ་བུའོ། །རྣམ་པར་ཐར་པ་འདི་ནི་བྱང་ཆུབ་སེམས་དཔའི་སྤྱོད་པས་ཤིན་ཏུ་སྤྲུལ་པའི་ཕྱིར་སྤྲུལ་པ་ལྟ་བུའོ། །རྣམ་པར་ཐར་པ་འདི་ནི་འགྲོ་བ་ཐམས་ཅད་ཀྱི་རྟེན་དུ་གྱུར་པས་ས་ཆེན་པོ་ལྟ་བུའོ། །རྣམ་པར་ཐར་པ་འདི་ནི་འགྲོ་བ་ཐམས་ཅད་སྙིང་རྗེ་ཆེན་པོས་མངོན་པར་རླན་པར་བྱེད་པས་ཆུའི་ཕུང་པོ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ཀྱི་སྲེད་པའི་རླན་ཡོངས་སུ་སྐེམས་པས་མེའི་ཕུང་པོ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ་རབ་ཏུ་སྟོན་པའི་ཕྱིར་རླུང་གི་ཕུང་པོ་ལྟ་བུའོ། །རྣམ་པར་ཐར་པ་འདི་ནི་འགྲོ་བ་ཐམས་ཅད་ཀྱི་ཡོན་ཏན་གྱི་རྒྱན་གྱི་གཞི་ཡིན་པས་རྒྱ་མཚོ་ལྟ་བུའོ། །རྣམ་པར་ཐར་པ་འདི་ནི་ཆོས་ཐམས་ཅད་ཀྱི་ཡེ་ཤེས་རིན་པོ་ཆེ་རྒྱ་མཚོ་ལས་མངོན་པར་འཕགས་པས་རི་རབ་རིའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་ཆོས་ཐམས་ཅད་ཀྱི་རྣམ་པར་ཐར་པའི་གཞལ་མེད་ཁང་རྣམ་པར་སྤྱོད་པའི་ཕྱིར་རྣམ་པར་སྤྱོད་པའི་རླུང་གི་དཀྱིལ་འཁོར་ལྟ་བུའོ། །རྣམ་པར་ཐར་པ་འདི་ནི་དུས་གསུམ་དུ་འབྱུང་བའི་དེ་བཞིན་གཤེགས་པའི་རྣམ་པར་འཕྲུལ་པ་ཐམས་ཅད་ཀྱི་གོ་འབྱེད་པས་ནམ་མཁའ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ལ་ཆོས་ཀྱི་སྤྲིན་གྱི་ཆར་མངོན་དུ་འབེབས་པས་སྤྲིན་ཆེན་པོ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་ཐམས་ཅད་ཀྱི་མི་ཤེས་པའི་མུན་ནག་རྣམ་པར་སེལ་བས་ཉི་མ་ལྟ་བུའོ། །རྣམ་པར་ཐར་པ་འདི་ནི་བསོད་ནམས་དང་ཡེ་ཤེས་ཀྱི་རྒྱ་མཚོ་ཆེན་པོས་ཤིན་ཏུ་བསྒྲུབ་པའི་ཕྱིར་ཟླ་བ་ལྟ་བུའོ། །

རྣམ་པར་ཐར་པ་འདི་ནི་ཐམས་ཅད་དུ་སོང་བའི་ཕྱིར་དེ་བཞིན་ཉིད་ལྟ་བུའོ། །རྣམ་པར་ཐར་པ་འདི་ནི་ལས་ཀྱི་ཆོས་ཀྱིས་ཤིན་ཏུ་སྤྲུལ་པའི་ཕྱིར་རང་གི་གྲིབ་མ་ལྟ་བུའོ། །རྣམ་པར་ཐར་པ་འདི་ནི་སེམས་ཅན་གྱི་མོས་པ་ཇི་ལྟ་བ་བཞིན་དུ་ཆོས་ཀྱི་སྒྲ་རབ་ཏུ་སྒྲོགས་པས་བྲག་ཆ་ལྟ་བུའོ། །རྣམ་པར་ཐར་པ་འདི་ནི་བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱིས་རྣམ་པར་དམིགས་པར་བྱེད་པའི་ཕྱིར་གཟུགས་བརྙན་ལྟ་བུའོ། །རྣམ་པར་ཐར་པ་འདི་ནི་སངས་རྒྱས་ཐམས་ཅད་ཀྱི་རྣམ་པར་འཕྲུལ་པའི་མེ་ཏོག་ཤིན་ཏུ་རྒྱས་པའི་ཕྱིར་ཤིང་གི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་མི་ཤིགས་པའི་ཆོས་ཅན་ཡིན་པས་རྡོ་རྗེ་ལྟ་བུའོ། །རྣམ་པར་ཐར་པ་འདི་ནི་རྣམ་པར་འཕྲུལ་པ་མཐའ་དང་དབུས་མེད་པ་རྒྱ་མཚོ་མངོན་པར་བསྒྲུབ་པས། ནོར་བུ་ཡིད་བཞིན་རིན་པོ་ཆེའི་རྒྱལ་པོ་ལྟ་བུའོ། །རྣམ་པར་ཐར་པ་འདི་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྣམ་པར་དམིགས་པར་བྱ་བ་ལ་སྒྲིབ་པ་མེད་པས་རིན་པོ་ཆེའི་རྒྱལ་པོ་དྲི་མ་མེད་པའི་སྙིང་པོ་ལྟ་བུའོ། །རྣམ་པར་ཐར་པ་འདི་ནི་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་མཉམ་པ་ཉིད་དུ་སྒྲོག་པས་ནོར་བུ་རིན་པོ་ཆེ་དགའ་བའི་རྒྱལ་མཚན་ལྟ་བུ་སྟེ། རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་ཤིན་ཏུ་ཡངས་པ་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ནི་དཔེ་ཚད་མེད་པ་རྣམ་པར་འགོད་པའི་རྗེས་སུ་འབྲང་བས་བསྟན་པར་བྱའོ། །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་འདི་སྐད་ཅེས་སྨྲས་སོ། །འཕགས་མ་ལྷ་མོ་ཇི་ལྟར་ནན་ཏན་དུ་བགྱིས་ན། བྱང་ཆུབ་སེམས་དཔས་དེ་ལྟ་བུའི་རྣམ་པར་ཐར་པ་དེ་ཡོངས་སུ་འགྲུབ་པར་འགྱུར། སྨྲས་པ་རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚོགས་ཆེན་པོ་ཆོས་ཡངས་པ་དང་ལྡན་པ། རྣམ་པར་རྒྱ་ཆེན་པོ་གསལ་བ་ཆེན་པོ་སྣང་བ་ཆེན་པོ། འོད་ཆེན་པོ་བྱིན་ཆེན་པོ་རྣམ་པར་དབྱེ་བ་ཆེན་པོ་འབྱུང་བ་ཆེན་པོ་ཕུན་སུམ་ཚོགས་པ་ཆེན་པོ་སྟེ། དེ་དག་ལ་ནན་ཏན་དུ་བྱེད་པའི་བྱང་ཆུབ་སེམས་དཔའ་རྣམས་ཀྱི་རྣམ་པར་ཐར་པ་འདི་ལྟ་བུ་ཕུན་སུམ་ཚོགས་པར་འགྱུར་བ་དག་གོ །བཅུ་གང་ཞེ་ན་འདི་ལྟ་སྟེ། བྱང་ཆུབ་སེམས་དཔའི་སྦྱིན་པ་སེམས་ཅན་རྒྱ་མཚོ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱེད་པ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཚུལ་ཁྲིམས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བཟོད་པ་ཆོས་ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བརྩོན་འགྲུས་ཐམས་ཅད་མཁྱེན་པ་ཉིད་དུ་ཡང་དག་པར་བརྩམས་པ་ལས་ཕྱིར་མི་ལྡོག་པ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་བསམ་གཏན་སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རབ་ཏུ་ཞི་བར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཤེས་རབ་ཀྱི་ཆོས་རྒྱ་མཚོ་ཐམས་ཅད་ཡོངས་སུ་ཤེས་པར་བྱ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཐབས་སེམས་ཅན་རྒྱ་མཚོ་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བ་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་སྨོན་ལམ་ཕྱི་མའི་མཐའི་མུར་ཐུག་པའི་བསྐལ་པར་སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་པའི་ཕྱིར་ཞིང་རྒྱ་མཚོ་ཐམས་ཅད་ལ་ཞུགས་པ་ནི་རྒྱ་ཆེན་པོའི་ཆོས་སོ། །

བྱང་ཆུབ་སེམས་དཔའི་སྟོབས་སངས་རྒྱས་ཀྱི་ཞིང་ཐམས་ཅད་དུ་སྐད་ཅིག་རེ་རེ་ལ་མངོན་པར་རྫོགས་པར་འཚང་རྒྱ་བ་ཡོངས་སུ་བསྟན་པ་རྒྱུན་མི་གཅད་པའི་ཕྱིར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ་ནི་རྒྱ་ཆེན་པོའི་ཆོས་སོ། །བྱང་ཆུབ་སེམས་དཔའི་ཡེ་ཤེས་དུས་གསུམ་གྱི་ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་ཐོབ་པར་བྱ་བའི་ཕྱིར་དེ་བཞིན་གཤེགས་པའི་སྟོབས་ལ་ཞུགས་པ་ནི་རྒྱ་ཆེན་པོའི་ཆོས་སོ། །རིགས་ཀྱི་བུ་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྒྱ་ཆེན་པོའི་ཆོས་ཚོགས་ཆེན་པོ་དང་ལྡན་པ་རྣམས་ཏེ། དེ་དག་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་རྣམ་པར་ཐར་པ་དེ་ལྟ་བུ་ཕུན་སུམ་ཚོགས་པར་འགྱུར་རོ། །རྣམ་པར་དག་པར་འགྱུར་རོ། །ཡོངས་སུ་འབྱུང་བར་འགྱུར་རོ། །ཡང་དག་པར་འཕེལ་བར་འགྱུར་རོ། །ཀུན་ནས་འབྱུང་བར་འགྱུར་རོ། །

རབ་ཏུ་སྐྱེ་བར་འགྱུར་རོ། །ཡོངས་སུ་འགྲུབ་པར་འགྱུར་རོ། །ཤིན་ཏུ་བརྟན་པར་འགྱུར་རོ། །རྣམ་པར་ཡངས་པར་འགྱུར་རོ། །ཡོངས་སུ་རྫོགས་པར་འགྱུར་རོ། །ཡོངས་སུ་གནས་པར་འགྱུར་རོ། །

ནོར་བཟང་གིས་སྨྲས་པ། འཕགས་མ་ལྷ་མོ་ཁྱོད་ཡུན་ཇི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས། དེས་སྨྲས་པ། རིགས་ཀྱི་བུ་འཇིག་རྟེན་གྱི་ཁམས་རྒྱ་མཚོ་གཞི་མེ་ཏོག་གི་སྙིང་པོའི་རྒྱན་གྱིས་བརྒྱན་པ། འདིའི་ཤར་ཕྱོགས་ལོགས་སུ་འཇིག་རྟེན་གྱི་ཁམས་རྒྱ་མཚོ་སྟོང་ཕྲག་བཅུ་འདས་པའི་ཕ་རོལ་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་ཀྱི་དྲི་མ་མེད་པའི་འོད་རྣམ་པར་བརྒྱན་པ་ཞེས་བྱ་བ་ཡོད་དེ། དེའི་དབུས་ན་འཇིག་རྟེན་གྱི་ཁམས་ཀྱི་རྒྱུད་དེ་བཞིན་གཤེགས་པ་ཐམས་ཅད་ཀྱི་འོད་དང་སྨོན་ལམ་གྱི་དབྱངས་ཞེས་བྱ་བ་ཡོད་དོ། །དེའི་དབུས་ན་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་སྤྲིན་སྣ་ཚོགས་དང་ལྡན་པ་འཇིག་རྟེན་གྱི་འོག་གི་མཚམས་ནས། རིན་པོ་ཆེ་ཐམས་ཅད་ཀྱི་ཕྲེང་བའི་དྲ་བ་རྒྱ་མཚོས་བརྟན་པ། རིན་པོ་ཆེའི་རྒྱལ་པོ་སྤོས་ཀྱི་རྡོ་རྗེ་ཐམས་ཅད་ཀྱི་རྒྱན་གྱི་ལྷུན་དང་ལྡན་པ། ཁང་པ་བརྩེགས༌པའི་རྒྱའི་དབྱིབས་སུ་འདུག་པ་རྣམ་པར་དག་ཅིང་ཀུན་ནས་ཉོན་མོངས་པ་ལྷ་རྫས་ཀྱི་གཞལ་མེད་ཁང་དང་གནས་ཀྱི་སྤྲིན་གྱིས་ཀུན་ཏུ་གང་བ། གསེར་ལྟར་དྲི་མ་མེད་པའི་འོད་ཀྱི་རྒྱན་ཅེས་བྱ་བ་ཡོད་པ་དེར་བསྐལ་པ་ཀུན་ཏུ་སྣང་བའི་རྒྱལ་མཚན་ཅེས་བྱ་བ་བྱུང་སྟེ། འཇིག་རྟེན་གྱི་ཁམས་དེ་ནས་སྙིང་པོ་བྱང་ཆུབ་རིན་པོ་ཆེ་ཐམས་ཅད་ཀྱི་སྙིང་པོ་འོད་སྣ་ཚོགས་ཅན་ཞེས་བྱ་བ་ཡོད་དེ། དེར་བཅོམ་ལྡན་འདས་དེ་བཞིན་གཤེགས་པ་ཕྱིར་མི་ལྡོག་པའི་ཆོས་ཀྱི་དབྱིངས་ཀྱི་དབྱངས་ཞེས་བྱ་བ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། དེའི་ཚེ་དེའི་དུས་ན་ཁོ་མོ་ཡང་སྙིང་པོ་བྱང་ཆུབ་ཀྱི་ལྷ་མོ་བསོད་ནམས་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བ་ཞིག་ཏུ་གྱུར་ཏེ། བྱང་ཆུབ་ཀྱི་ཤིང་དེ་ལ་འདུག་འདུག་ནས། དེར་ཁོ་མོས་དེ་བཞིན་གཤེགས་པ་དེ་མངོན་པར་འཚང་རྒྱ་བའི་རྣམ་པར་འཕྲུལ་པ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་གཤེགས་པ་དེ་མཐོང་ནས་ཀྱང་ཁོ་མོས་དེ་བཞིན་གཤེགས་པའི་ཡོན་ཏན་རྒྱ་མཚོའི་འོད་ཅེས་བྱ་བའི་ཏིང་ངེ་འཛིན་ཐོབ་བོ། །

དེའི་འོག་ཏུ་འཇིག་རྟེན་གྱི་ཁམས་དེ་ཉིད་ཀྱི་རྒྱལ་པོའི་གནས་ཀུན་ནས་ཡོངས་སུ་རྒྱས་པའི་དཔལ་གྱི་སྙིང་པོ་ཞེས་བྱ་བར་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་བརྗིད་ཅེས་བྱ་བ་མངོན་པར་སངས་རྒྱས་སོ། །ཁོ་མོ་ནི་དེ་ནས་ཤི་འཕོས་ཏེ་སྙིང་པོ་བྱང་ཆུབ་དེ་ཉིད་དུ་ཡེ་ཤེས་ཕུན་སུམ་ཚོགས་པའི་བསོད་ནམས་འོད་ཅེས་བྱ་བའི་མཚན་མོའི་ལྷ་མོ་ཞིག་ཏུ་གྱུར་ཅིང་འདུག་འདུག་སྟེ། ཁོ་མོས་དེར་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་སྡོང་པོ་རི་བོ་གཟི་བརྗིད་དེས་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་མཐོང་ནས་འགྲོ་བ་ཐམས་ཅད་དུ་ཡོངས་སུ་སྟོན་པའི་མཉམ་པ་ཉིད་ཀྱི་འོད་ཀྱི་ཡུལ་ཞེས་བྱ་བའི་ཏིང་ངེ་འཛིན་ཐོབ་བོ། །

དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་གསུང་གི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཆོས་ཐམས་ཅད་ཀྱིས་ཡང་དག་པ་འཕེལ་བར་བྱེད་པའི་གནས་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་རིན་པོ་ཆེའི་འོད་ཟེར་སྒྲོན་མའི་རྒྱལ་མཚན་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སངས་རྒྱས་རྒྱ་མཚོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྤྲིན་སྒྲའི་རྒྱལ་པོ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་ཆོས་རྒྱ་མཚོ་ཐམས་ཅད་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་ཐོབ་བོ། །

དེའི་འོག་ཏུ་ཁོ་མོ་ལྷའི་བུ་མོ་ཞིག་ཏུ་གྱུར་ཏེ། སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཡེ་ཤེས་སྐར་མདའ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏེ།

དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་སེམས་ཅན་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་པའི་སྒྲོན་མ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་རྣམ་པར་འཕྲུལ་པའི་ཤུགས་ཀྱི་རྒྱལ་མཚན་དཔལ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཡང་དག་པར་འཇུག་པའི་སྙིང་པོ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཆོས་ཀྱི་སྒྲོན་མ་ཡེ་ཤེས་ཀྱི་རྣམ་པར་གནོན་པ་ཞེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་འཇིག་རྟེན་གྱི་ཁམས་ཐམས་ཅད་དུ་ཡེ་ཤེས་ཐོགས་པ་མེད་པའི་འཁོར་ལོ་སྣང་བའི་གཟི་བརྗིད་ཅེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་སྙིང་པོ་བྱང་ཆུབ་དེ་ཉིད་དུ་དེ་བཞིན་གཤེགས་པ་ཡེ་ཤེས་ཀྱི་སྟོབས་ཀྱི་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་དུས་གསུམ་གྱི་སེམས་ཅན་གྱི་སྤྱོད་པ་དང་། དབང་པོ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །

རིགས་ཀྱི་བུ་དེ་ལྟར་ཁོ་མོས་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེར་བསྐལ་པ་ཀུན་ཏུ་སྣང་བའི་རྒྱལ་མཚན་ལ་དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །ལ་ལ་ནི་ལྷའི་དབང་པོར་གྱུར་ཏེ་བསྙེན་བཀུར་ཏེ། ལ་ལ་ནི་ཀླུའི་དབང་པོར་གྱུར་པས་བསྙེན་བཀུར་ཏོ། །ལ་ལ་ནི་གནོད་སྦྱིན་གྱི་དབང་པོར་གྱུར་པས། ལ་ལ་ནི་དྲི་ཟའི་དབང་པོར་གྱུར་པས། ལ་ལ་ནི་ལྷ་མ་ཡིན་གྱི་དབང་པོར་གྱུར་པས། ལ་ལ་ནི་ནམ་མཁའ་ལྡིང་གི་དབང་པོར་གྱུར་པས། ལ་ལ་ནི་མིའམ་ཅིའི་དབང་པོར་གྱུར་པས། ལ་ལ་ནི་ལྟོ་འཕྱེ་ཆེན་པོའི་དབང་པོར་གྱུར་པས། ལ་ལ་ནི་མིའི་དབང་པོར་གྱུར་པས། ལ་ལ་ནི་ཚངས་པའི་དབང་པོར་གྱུར་པས། ལ་ལ་ནི་ལྷར་གྱུར་པས། ལ་ལ་ནི་མིར་གྱུར་པས། ལ་ལ་ནི་བུད་མེད་དུ་གྱུར་པས། ལ་ལ་ནི་སྐྱེས་པར་གྱུར་པས། ལ་ལ་ནི་ཁྱེའུར་གྱུར་པས། ལ་ལ་ནི་བུ་མོར་གྱུར་པས་བསྙེན་བཀུར་ཏེ། དེ་བཞིན་གཤེགས་པ་དེ་དག་ཐམས་ཅད་ཀྱང་ཁོ་མོས་མཆོད་པའི་ཡོ་བྱད་ཅི་བདོག་པས་མཆོད་དོ། །

དེ་བཞིན་གཤེགས་པ་དེ་དག་ཐམས་ཅད་ཀྱང་རིམ་གྲོ་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་ཆོས་བསྟན་པ་ཡང་ཐོས་སོ། །དེ་ནས་ཁོ་མོ་ཤི་འཕོས་ནས་འཇིག་རྟེན་གྱི་ཁམས་དེ་ཉིད་དུ་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱད་དོ། །དེ་ནས་ཤི་འཕོས་ནས་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདིའི་འཇིག་རྟེན་གྱི་ཁམས་མི་མཇེད་དུ་སྐྱེས་ཏེ། ཁོ་མོས་བཅོམ་ལྡན་འདས་དེ་བཞིན་གཤེགས་པ་ལོག་པར་དད་སེལ་བསྙེན་བཀུར་ཏོ། །དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་མུན་པའི་རྡུལ་ཐམས་ཅད་དང་བྲལ་བས་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །

དེའི་འོག་ཏུ་ཁོ་མོས་དེ་བཞིན་གཤེགས་པ་གསེར་ཐུབ་བསྙེན་བཀུར་ཏེ། དེ་བཞིན་གཤེགས་པ་དེ་མཐོང་མ་ཐག་ཏུ་ཁོ་མོས་ཞིང་རྒྱ་མཚོ་ཐམས་ཅད་སྣང་བ་རྗེས་སུ་འཕྲོ་བར་བྱ་བས་རྒྱས་པར་འགེངས་པ་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ་ཁོ་མོས་དེ་བཞིན་གཤེགས་པ༌བསོད་སྐྱབས་བསྙེན་བཀུར་ཏེ། དེ་བཞིན་གཤེགས་པ། དེ་མཐོང་མ་ཐག་ཏུ། ཁོ་མོས་སེམས་ཅན་ཐམས་ཅད་ཀྱི། སྐད་རྒྱ་མཚོ་འབྲུག་སྒྲ་སྒྲོག་པའི། སྒྲ་དབྱངས་ཞེས་བྱ་བའི་ཏིང་ངེ་འཛིན་ཐོབ་བོ། །དེའི་འོག་ཏུ། ཁོ་མོས་བཅོམ་ལྡན་འདས། དེ་བཞིན་གཤེགས་པ་རྣམ་པར་སྣང་མཛད་འདི་བསྙེན་བཀུར་ཏེ། དེའི་སྙིང་པོ་བྱང་ཆུབ་ལ་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པའི་རྣམ་པར་འཕྲུལ་པའི་སྒོ་རྒྱ་མཚོ་སེམས་ཀྱི་སྐད་ཅིག་རེ་རེ་ལ་ཡོངས་སུ་སྟོན་པ་མཛད་པ་མཐོང་ནས་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་རྒྱན་པ་འདི་ཐོབ་བོ་དེ་ཐོབ་མ་ཐག་ཏུ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏོ། །

ཆོས་ཀྱི་དབྱིངས་ཀྱི་ཚུལ་རྒྱ་མཚོ་དེ་དག་ཐམས་ཅད་དུ་གཏོགས་པའི་སངས་རྒྱས་ཀྱི་ཞིང་ཇི་སྙེད་པ་དེ་དག་ལ་རྡུལ་ཤིན་ཏུ་ཕྲ་བ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱི་རྡུལ་ཤིན་ཏུ་ཕྲ་བ་རེ་རེ་ལ་ཡང་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ལ་ཞུགས་ཏེ་མཐོང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་ལས་སངས་རྒྱས་ཀྱི་ཞིང་རེ་རེ་ན་ཡང་བཅོམ་ལྡན་འདས་རྣམ་པར་སྣང་མཛད་སྙིང་པོ་བྱང་ཆུབ་ཏུ་གཤེགས་ཏེ་སེམས་ཀྱི་སྐད་ཅིག་རེ་རེ་ལ་མངོན་པར་རྫོགས་པར༌འཚང་རྒྱ་བའི་རྣམ་པར་འཕྲུལ་པ་ཡོངས་སུ་སྟོན་པ་མཛད་ཅིང་མངོན་པར༌རྫོགས་པར་འཚང་རྒྱ་བའི་རྣམ་པར་འཕྲུལ་པ་རེ་རེས་ཀྱང་ཆོས་ཀྱི་དབྱིངས་ཀྱི་ཚུལ་རྒྱ་མཚོ་རྒྱས་པར་འགེངས་པ་མཛད་པ་མཐོང་ངོ་། །དེ་བཞིན་གཤེགས་པ་དེ་དག་ཐམས་ཅད་ལས་དེ་བཞིན་གཤེགས་པ་རེ་རེའི་ཞབས་ཀྱི་དྲུང་ན་ཡང་བདག་མངོན་དུ་འདུག་པར་ཤེས་པར་གྱུར་ཏོ། །འཇིག་རྟེན་གྱི་ཁམས་དེ་དག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་ལ་བཞུགས་པ་དེ་དག་གིས་ཆོས་བསྟན་པ་དེ་དག་ཐམས་ཅད་ཀྱང་ཐོས་པར་གྱུར་ཏོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བ་སྤུའི་སྒོ་ཐམས་ཅད་ནས་སྤྲུལ་པ་རྒྱ་མཚོ་བྱུང་སྟེ། ཆོས་ཀྱི་སྤྲིན་རྒྱ་མཚོ་རབ་ཏུ་སྒྲོག་པ་དང་། རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་མཛད་ཅིང་ཆོས་ཀྱི་དབྱིངས་ཀྱི་ཕྱོགས་རྒྱ་མཚོ་ཐམས་ཅད་དུ་གཏོགས་པའི་ཞིང་རྒྱ་མཚོ་ཐམས་ཅད་དང་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱི་སེམས་ཅན་འབྱམས་ཀླས་པ་ཐམས་ཅད་འགྲོ་བའི་རྒྱུད་སྣ་ཚོགས་སུ་སྐྱེས་པ་དག་གི་ནང་ན་སེམས་ཅན་གྱི་བསམ་པའི་དབང་དུ་འདུ་ཤེས་ཀྱི་རྣམ་པ་སྣ་ཚོགས་ཀྱི་ཆོས་ཀྱི་འཁོར་ལོ་བསྐོར་བ་དེ་དག་ཐམས་ཅད་ཀྱང་ཡོངས་སུ་འཛིན་ཏོ། །ཁོང་དུ་ཆུད་པར་བྱེད་དོ། །

ངེས་པར་རྟོགས་པར་བྱེད་དོ། །དོན་དང་ཚིག་དང་ཡི་གེ་འཛིན་པའི་ཤུགས་ཀྱིས་རྣམ་པར་གནོན་པའི༌གཟུངས་ཀྱི་མཐུས་ཡོངས་སུ་འཛིན་ཏོ། །ཆོས་ཀྱི་དཀྱིལ་འཁོར་ཐམས་ཅད་རྣམ་པར་དག་པའི་སྙིང་པོ་ཁོང་དུ་ཆུད་པའི་ཤེས་རབ་ཀྱིས་ཡོངས་སུ༌སྦྱོང་ངོ་། །ཆོས་རྒྱ་མཚོ་ཐམས་ཅད་རྣམ་པར་འབྱེད་པ་ལ་མཁས་པའི་རིགས་པས་ཁོང་དུ་ཆུད་པར་བྱེད་དོ། །དུས་གསུམ་ལྟར་རྣམ་པར་ཡངས་པའི་བློས་རྒྱས་པར་འགེངས་སོ། །དེ་བཞིན་གཤེགས་པ་དང་མཉམ་པ་ཉིད་ཀྱི་རྗེས་སུ་འགྲོ་བའི་ཤེས་རབ༌ཀྱིས་མཉམ་པར་བྱེད་ཅིང་ཆོས་ཀྱི་ཚུལ་ཐམས་ཅད་མངོན་པར་སྒྲུབ་བོ། །ཚུལ་ཐམས་ཅད་ལ་མདོ་སྡེའི་སྤྲིན་མངོན་པར་སྒྲུབ་བོ། །མདོ་སྡེའི་སྤྲིན་ཐམས་ཅད་ལ་ཆོས་རྒྱ་མཚོ་ཡོངས་སུ་གཞོག་པར་བྱེད་དོ། །ཆོས་རྒྱ་མཚོ་ཐམས་ཅད་ལ་ཆོས་ཀྱི་རྒྱུད་ཐམས་ཅད་ཡང་དག་པར་གཞོལ་བར་བྱེད་དོ། །ཆོས་ཀྱི་རྒྱུད་ཐམས་ཅད་ལ་ཆོས་ཀྱི་སྤྲིན་ཡོངས་སུ་ཤེས་པར་བྱེད་དོ། །ཆོས་ཀྱི་སྤྲིན་ཐམས་ཅད་ལ་ཆོས་ཀྱི་རླབས་ཡོངས་སུ་སྐྱེད་དོ། །ཆོས་ཀྱི་རླབས་ཐམས་ཅད་ལ་ཆོས་ཀྱི་དགའ་བའི་ཤུགས་རྒྱ་མཚོ་རབ་ཏུ་ཐོབ་པར་བྱེད་དོ། །ཆོས་ཀྱི་དགའ་བའི་ཤུགས་རྒྱ་མཚོ་ཐམས་ཅད་ལས་རབ་ཏུ་ཐོབ་པར་བྱ་བའི་ཤུགས་མངོན་པར་སྒྲུབ་བོ། །སའི་ཤུགས་ཐམས་ཅད་ལ་ཏིང་ངེ་འཛིན་རྒྱ་མཚོའི་ཤུགས་མངོན་པར་སྒྲུབ་བོ། །ཏིང་ངེ་འཛིན་རྒྱ་མཚོའི་སྤྲིན་ཐམས་ཅད་ལ་སངས་རྒྱས་མཐོང་བ་རྒྱ་མཚོ་རབ་ཏུ་ཐོབ་པར་བྱེད་དོ། །

སངས་རྒྱས་མཐོང་བ་རྒྱ་མཚོ་ཐམས་ཅད་ལ་སྣང་བ་རྒྱ་མཚོ་རབ་ཏུ་ཐོབ་པར་བྱེད་དོ། །སྣང་བ་རྒྱ་མཚོ་ཐམས་ཅད་ལ་དུས་གསུམ་གྱི་ཡེ་ཤེས་ཀྱི་དཀྱིལ་འཁོར་གྱིས་ཡོངས་སུ་གཞོག་པར་བྱེད་དོ། །ཕྱོགས་རྒྱ་མཚོ་མཐའ་དང་དབུས་མེད་པ་རྒྱས་པར་དགའ་བའི་ཚུལ་དང་། དེ་བཞིན་གཤེགས་པའི་སྔོན་གྱི་མཐའི་སྤྱོད་པ་རྒྱ་མཚོ་ཚད་མེད་པ་ལ་འཇུག་པའི་ཚུལ་དང་། དེ་བཞིན་གཤེགས་པའི་སྔོན་གྱི་སྦྱོར་བ་རྒྱ་མཚོ་ཚད་མེད་པའི་ཡེ་ཤེས་སྣང་བའི་ཚུལ་དང་། དེ་བཞིན་གཤེགས་པའི་དཀའ་བ་ཚད་མེད་པ་ཡོངས་སུ་གཏོང་བའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཚུལ་ཁྲིམས་ཀྱི་དཀྱིལ་འཁོར་ཚད་མེད་པ་ཡོངས་སུ་དག་པ་སྣང་བར་བྱ་བའི་ཚུལ་དང་། དེ་བཞིན་གཤེགས་པའི་བཟོད་པའི་ས་ཚད་མེད་པ་ཡོངས་སུ་སྦྱོང་བའི་ཚུལ་དང་། དེ་བཞིན་གཤེགས་པའི་བརྩོན་འགྲུས་ཆེན་པོའི་ཤུགས་ཚད་མེད་པ་རྣམ་པར་འཕེལ་བར༌བྱ་བའི་མཐུའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་བསམ་གཏན་གྱི་དཀྱིལ་འཁོར་དང་། བསམ་གཏན་གྱི་ཡན་ལག་རྒྱ་མཚོ་ཚད་མེད་པ་ཡོངས་སུ་དག་པར་བྱ་བའི་སྦྱོར་བས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ཡོངས་སུ་དག་པར་བྱ་བ་དང་། རྣམ་པར་དམིགས་པ་སྣང་བར་བྱ་བའི་ཚུལ་དང་། དེ་བཞིན་གཤེགས་པའི་ཐབས་མཁས་པའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་འཇུག་པར་བྱ་བའི་ཚུལ་དང་། དེ་བཞིན་གཤེགས་པའི་སྨོན་ལམ་གྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་འཇུག་པར་བྱ་བའི་ཚུལ་དང་། དེ་བཞིན་གཤེགས་པའི་བསོད་ནམས་དང་། ཡེ་ཤེས་ཀྱི༌སྟོབས་ཀྱི་ཕ་རོལ་ཏུ་ཕྱིན་པ་ཚད་མེད་པ་ལ་གནས་པར་བྱ་བ་དང་། ཡོངས་སུ་འཕེལ་བར་བྱ་བའི་ཡེ་ཤེས་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཚད་མེད་པ་ལ་རྣམ་པར་སྤྱད་པ་རབ་ཏུ་ཐོབ་པར་བྱ་བའི༌ཡེ་ཤེས་ཡོངས་སུ་བསྒྲུབ་པའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཡོངས་སུ་གནོན་པར་མཛད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ས་ཡོངས་སུ་གནོན་པའི་མཚམས་ཀྱི་རྣམ་པར་འཕྲུལ་པ་ཚད་མེད་པས་བསྐལ་པ་རྒྱ་མཚོ་གནས་པར་བྱ་བའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སའི་དཀྱིལ་འཁོར་ཚད་མེད་པ་ཡོངས་སུ་གནོན་པའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཚད་མེད་པ་ལ་གནས་པར་བྱ་བའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་ས་ཚད་མེད་པ་ཡོངས་སུ་དག་པར་བྱ་བའི་ཚུལ་དང་། དེ་བཞིན་གཤེགས་པའི་ས་ཚད་མེད་པ་ཡེ་ཤེས་རྒྱ་མཚོས་རྣམ་པར་དཔྱད་པའི་ཚུལ་དང་། དེ་བཞིན་གཤེགས་པའི་སའི་ཡེ་ཤེས་སྣང་བ་ཚད་མེད་པ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པ་བྱང་ཆུབ་སེམས་དཔར་གྱུར་པས་སྔོན་གྱི་སངས་རྒྱས་མ་ལུས་པར་གཟིགས་པ་དང་། རྗེས་སུ་འབྲང་བར་མཛད་པ་ཚད་མེད་པ་རྣམ་པར་དམིགས་པར་བྱ་བའི་ཚུལ་དང་། དེ་བཞིན་གཤེགས་པ་བྱང་ཆུབ་སེམས༌དཔར་གྱུར་པས་སྔོན་གྱི་སངས་རྒྱས་རྒྱ་མཚོ་མ་ལུས་པར་གཟིགས་ཤིང་བསྐལ་པ་རྒྱ་མཚོར་བཞུགས་བཞུགས་པ་ཚད་མེད་པའི་ཚུལ་དང་། དེ་བཞིན་གཤེགས་པ་སྔོན་བྱང་ཆུབ་སེམས་དཔར་གྱུར་པས་ཞིང་རྒྱ་མཚོ་མ་ལུས་པར་རྒྱས་པར་དགང་བའི་སྐུ་མངོན་པར་བསྒྲུབ་པ་ཚད་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་བྱང་ཆུབ་སེམས་དཔའི་སྤྱོད་པ་ཚད་མེད་པས་ཆོས་ཀྱི་དབྱིངས་མ་ལུས༌པ་རྒྱས་པར་དགང་བའི་ཚུལ་དང་། དེ་བཞིན་གཤེགས་པའི་སྔོན་གྱི་བྱང་ཆུབ་སེམས་དཔའི་སྤྱོད་པ་ཐབས་སྣ་ཚོགས་ཀྱི་སྒོ་དང་ལྡན་པས་སེམས་ཅན་ཐམས་ཅད་ཡོངས་སུ་སྨིན་པར་མཛད་པ་དང་། རྣམ་པར་གདུལ་བ་མཛད་པ་ཚད་མེད་པ་ཡོངས་སུ་བསྟན་པའི་ཚུལ་དང་། དེ་བཞིན་གཤེགས་པའི་འོད་ཕྱོགས་རྒྱ་མཚོ་མ་ལུས་པ་ཐམས་ཅད་དུ༌རབ་ཏུ་འཕྲོ་བ༌ཚད་མེད་པས་རྒྱས་པར་དགང་བར་བྱ་བའི་ཚུལ་དང་། དེ་བཞིན་གཤེགས་པ་སེམས་ཅན་ཐམས་ཅད་ལ་མངོན་དུ་གྱུར་པ༌རྣམ་པར་འཕྲུལ་པ་ཚད་མེད་པ་ཡོངས་སུ་བསྟན་པའི་ཚུལ་དང་། དེ་བཞིན་གཤེགས་པའི་ཡེ་ཤེས་ཀྱི་ས་ཚད་མེད་པ་ཡོངས་སུ་གནོན་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་མངོན་པར་རྫོགས་པར་བྱང་ཆུབ་པའི་རྣམ་པར་འཕྲུལ་པ་ཚད་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཆོས་ཀྱི་འཁོར་ལོ་རབ་ཏུ་འཁོར་བ་དང་། ཆོས་ཀྱི་སྤྲིན་ཚད་མེད་པ་ཐམས་ཅད་མ་ལུས་པར་ཡང་དག་པར༌བླང་ཞིང་ཡོངས་སུ་གཟུང་བའི་ཚུལ་དང་། དེ་བཞིན་གཤེགས་པའི་མཚན་རྒྱ་མཚོ་ཚད་མེད༌པར་རྣམ་པར་དམིགས་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་སྐུ་རྒྱ་མཚོའི་རྒྱུད་ཚད་མེད་པ་རྣམ་པར་དམིགས༌པ་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་དང་། དེ་བཞིན་གཤེགས་པའི་ཡུལ་ཤིན་ཏུ་ཡངས་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཚུལ་གྱིས་དེ་བཞིན་གཤེགས་པ་དེ་དག་གིས་ཐོག་མ་ཐུགས་བསྐྱེད་པ་ནས། དམ་པའི་ཆོས་ནུབ་པར་མ་གྱུར་པའི་བར་དེ་དག་ཐམས་ཅད་ལ་ཡང་འཇུག་ཅིང་ཁོང་དུ་ཆུད་པར་བྱེད་དོ། །

དེ་སྐད་དུ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཐོབ་ནས་ཇི་སྲིད་ཅིག་ལོན་ཞེས་ཟེར་བ་ནི། དེ་ལྟར་ཁོ་མོས་བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དུ་བྱང་ཆུབ་ཀྱི་ཤིང་གི་ལྷ་མོ་བསོད་ནམས་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བར་གྱུར་ཏེ། དེ་བཞིན་གཤེགས་པ་ཕྱིར་མི་ལྡོག་པའི་ཆོས༌ཀྱི་དབྱིངས་ཀྱི་དབྱངས་ཀྱིས་ཆོས་བསྟན་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཏུ་བྱང་ཆུབ་སེམས་དཔའི་སྤྱོད་པ་སྤྱད་ན། མི་མཇེད་ཀྱི་འཇིག་རྟེན་གྱི་ཁམས་འདིར་སྐྱེས་ཏེ། ལོག་པར་དད་སེལ་ལ་སོགས་པ་ཐ་མ་ཤཱཀྱ་ཐུབ་པའི་བར་གྱི་དེ་བཞིན་གཤེགས་པ་བསྐལ་པ་བཟང་པོ་པ་དག་ཀྱང་བསྙེན་བཀུར་ཏོ། །མ་བྱོན་པའི་སངས་རྒྱས་རྣམས་ཀྱང་བསྙེན་བཀུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུའང་སངས་རྒྱས་ཀྱི་རྒྱུད་མ་བྱོན་པ་རྣམས་ཡོངས་སུ་བསྙེན་ཅིང་བཀུར་རོ། །མཆོད་དོ། །རིགས་ཀྱི་བུ་ད་དུང་དུའང་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེ་ཡང་ཡོད་ལ་སངས་རྒྱས་ཀྱི་རིགས་ཀྱང་རྒྱུན་མ་ཆད་ཀྱིས། དེ་བས་ན་རིགས་ཀྱི་བུ་ཚུལ་འདི་ལ་བྱང་ཆུབ་སེམས་དཔའི་རྣམ་པར་གནོན་པ་ཆེན་པོས་བརྩོན་པར་གྱིས་ཤིག །

དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས། དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཉིད་བརྣན་ཏེ་བསྟན་པར་བྱ་བའི་ཕྱིར། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། རྣམ་ཐར་དགེ༌འདི་ཇི་ལྟར་ཐོབ༌འགྱུར་བ། །ཁོ་མོའི་ཚིག་འདི་ནོར་བཟང་ཁྱོད་ཉོན་ཅིག །ཐོས་ནས་དགའ་བའི་སྟོབས་ཀྱང་ཡོངས་སྐྱེད་དེ། །རྣམ་ཐར་ཚུལ་འདི་ལ་ནི་འཇུག་པར་གྱིས། །བདག་གི་སེམས་དང་བསམ་པ་ཡོངས་སྦྱོང་ཞིང་། །མོས་པའི་ཤུགས་ཡངས་ཡོངས་སུ་སྐྱེད་བྱས་ཏེ། །ཐམས་ཅད་མཁྱེན་པའི་ཡེ་ཤེས་གྲོང་འདུན་པས། །བསྐལ་པ་རྒྱ་མཚོ་མང་པོར་སྔོན་སྤྱད་དོ། །བདེ་གཤེགས་དུས་གསུམ་བྱུང་བ་ཐོས་ནས་ཀྱང་། །དེ་དག་ཀུན་ལ་མོས་པ་ཡངས༌བསྐྱེད་དོ། །བསྐལ་པ་བརྒྱ་ཕྲག་མང་པོར་སྒོ་ཀུན་ཏུ། །དེ་དག་འཁོར་དང་བཅས་པར་ཁོ་མོས་བཀུར། །སྔོན་གྱི་བདེ་གཤེགས་ཁོ་མོས་མཐོང་གྱུར་ནས། །འགྲོ་ལ་ཕན་ཕྱིར་ཡུན་རིང་མཆོད་བྱས་ཏེ། །སྤྲོ་བའི་སྟོབས་ནི་རྣམ་ཡངས་ཡོངས་བསྐྱེད་ནས། །བདག་གིས་གདུང་བ་མེད་པའི་ཆོས་ཀྱང་ཐོས། །རྣམ་པར་ཐར་པ་འདི་ལ་འཇུག་པ་ན། །ཕ་དང་མ་དང་བླ་མའི་སྐྱེ་བོ་ལ། །དེ་ཚེ་བདག་གིས་ཕན་བདེས་བསྟི་སྟང་བྱས། །བསྙེན་བཀུར་སྲི་ཞུར་གནས་པ་ཀུན་ཀྱང་བྱས། །རྒས་པ་ནད་པ་ནོར་མེད་མི་རྣམས་དང་། །དབང་པོ་མ་ཚང་སྡུག་བསྔལ་མགོན་མེད་པ། །མང་པོ་བདག་གིས་བྱམས་སེམས་བདེ་བཀོད་ནས། །ཚེ༌རབས་བརྒྱར་ཡང་ནོར་ཕྱུག་མགོན་ཡང་བྱས། །རྒྱལ་པོ་མེ་དང་རྐུན་ཆོམ་རྐྱེན་གྱུར་དང་། །སེང་གེ་གླང་པོ་ཕ་རོལ་དགྲས་འཇིགས་དང་། །སྲིད་པའི་རྒྱ་མཚོའི་འཇིགས་དངོས་སྣ་ཚོགས་ལས། །སྔོན་ཚེ་སྤྱོད་པའི་དུས་ན་བདག་གིས་བསྐྱབས། །རྟག་ཏུ་སྲིད་གསུམ་ཉོན་མོངས་གདུངས་གྱུར་ཏེ། །ལས་ཀྱིས་རབ་གདུངས་དེ་བཞིན་མི་དགེ་བས། །འཁོར་བའི་རི་གཟར༌གཡང་དུ་ལྷུང་བ་ཡི། །སྐྱེ་བོ་འགྲོ་བའི་རྒྱུད་དུ་བདག་གིས་བསྐྱབས། །སྡུག་བསྔལ་ངན་སོང་གཡང་སས་འཇིགས་པ་དག །རྟག་ཏུ་མི་བདེ་ཤིན་ཏུ་མི་ཟད་དང་། །སྐྱེ་རྒ་ན་ཞིང་འཆི་བའི་འཇིགས་མང་ཀུན། །བདག་གིས་འཇིག་རྟེན་སྤྱོད་ཚེ་ཞི་བར་བྱས། །འཁོར་བའི་སྡུག་བསྔལ་ཞི་བར་བྱ་བ་དང་། །སེམས་ཅན་ཀུན་གྱི་བདེ་བ་ཡོངས་བསྐྱེད་ཅིང་། །སངས་རྒྱས་བདེ་བ་དམ་པ་བསྐྱེད་པ་ནི། །བསྐལ་པ་ཕྱི་མཐར་ཁོ་མོའི་སྨོན་ལམ་མོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་ཞུགས་པ་ཕྱི་ནང་གི་སྡུག་བསྔལ་མ་ལུས་པ་ལས་རྣམ་པར་གྲོལ་བ། བསྐལ་པའི་མིང་དུ་བྱ་བ་ཐམས་ཅད་ཤེས་པར་གྱུར་པ་འཇིག་རྟེན་གྱི་ཁམས་རྒྱ་མཚོ་ཐམས་ཅད་འབྱུང་བ་དང་། འཇིག་པའི་རྒྱུས་ལ་མཁས་པ་དེ་དག་གི་སྤྱོད་པ་ཤེས་པའམ་ཡོན་ཏན་བརྗོད་པ་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་འདི་ཉིད་ན་བཅོམ་ལྡན་འདས་རྣམ་པར་སྣང་མཛད་ཀྱི་འཁོར་གྱི་དཀྱིལ་འཁོར་ན། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་སྨྲས་སོ། །དགེ་བའི་བཤེས་ཀྱིས་མ་ནོར་མཐུན་བསྟན་པས། །ལྷ་མོ་ཁྱོད་ཀྱི་དྲུང་དུ་ཉེ་བར་མཆིས། །མཐའ་དང་དབུས་མི་མངའ་བའི་སྐུ་ཚུལ་དུ། །ཁྱོད་ནི་གདན་ལ་བཞུགས་པར་བདག་གིས་མཐོང་། །ཁ་དོག་དབྱིབས་དང་མཚན་མའི་སྤྱོད་ཡུལ་བ། །སྲིད་ལ་གནས་དང་དངོས་པོར་འདུ་ཤེས་དང་། །འདུ་ཤེས་དམའ་དང་ལོག་པར་ལྟ་བ་ཡིས། །ཁྱོད་ཀྱི་སྤྱོད་ཡུལ་འཚལ་བར་མི་ནུས་སོ། །ཁྱོད་ཀྱི་སྐུ་གཟུགས་བལྟ་ན་མཐའ་ཡས་པས། །ཁྱོད་ཀྱི་སྐུ་གཟུགས་མདོག་གི་མཚན་མ་ནི། །བསྐལ་པ་མཐའ་ཡས་དག་ཏུ་ཡོངས་བརྟགས་ཀྱང་། །ལྷ་དང་འཇིག་རྟེན་བཅས་པས་ཤེས་མི་ནུས། །ལྷ་མོ་ཁྱོད་ནི་ཕུང་པོའི་གནས་ལས་འཕགས། །སྐྱེ་མཆེད་རྣམས་ལའང་དེ་བཞིན་མི་གནས་ཏེ། །འཇིག་རྟེན་རྣམ་པར་འདས་པས་ཐེ་ཚོམ་བྲལ། །འཇིག་རྟེན་དག་ཏུ་རྣམ་པར་འཕྲུལ་པ་མཛད། །གཡོ་བ་མི་མངའ་སྐྱོན་བྲལ་ཆགས་པ་མེད། །ཁྱོད་ཀྱིས་ཡེ་ཤེས་སྤྱན་ནི་རྣམ་སྦྱངས༌པས། །རྡུལ་གྱི་གོ་ལ་ཐམས་ཅད་རྡུལ་ཚད་དུ། །སངས་རྒྱས་རྣམ་པར་འཕྲུལ་པ་མང་པོ་གཟིགས། །ཁྱོད་ཀྱི་སྐུ་ནི་ཆོས་སྐུའི་སྙིང་པོ་ཅན། །ཁྱོད་ཀྱི་ཐུགས་ཀྱང་ཡེ་ཤེས་ཆགས་པ་མེད། །ཁྱོད་ནི་ཀུན་ཏུ་འོད་ཀྱིས་སྣང་མཛད་པས། །འཇིག་རྟེན་སྐྱེ་བོ་རྣམས་ལ་མཐའ་ཡས་སྣང་། །སེམས་ལས་མཐའ་ཡས་ལས་རྣམས་ཡོངས་སུ་འབྱུང་། །འཇིག་རྟེན་ཐམས་ཅད་ལས་ཀྱིས་རྣམ་པར་བྲིས། །འགྲོ་བ་སེམས་ཀྱི་དངོས་སུ་མཁྱེན་གྱུར་པས། །རང་གི་སྐུ་ཡང་འགྲོ་བ་སྙེད་དུ་བསྟན། །འཇིག་རྟེན་དུ་ནི་རྨི་ལམ་འདྲར་མཁྱེན་ནས། །སངས་རྒྱས་ཀུན་ཀྱང་གཟུགས་བརྙན་ལྟ་བུ་དང་། །མ་ལུས་ཆོས་རྣམས་སྒྲ་བརྙན་འདྲར་མཁྱེན་པས། །ཆགས་པ་མི་མངའ་འགྲོ་བ་ཀུན་དུ་སྤྱོད། །དུས་གསུམ་གནས་པའི་འགྲོ་བ་ཐམས་ཅད་ལ། །སྐད་ཅིག་རེ་རེ་རང་གི་སྐུ་སྟོན་ཀྱང་། །ཁྱོད་ཀྱི་ཐུགས་ལ་གཉིས་སུ་མི་རྒྱུ་སྟེ། །ཕྱོགས་རྣམས་ཀུན་ཏུ་ཆོས་ཀྱང་རབ་ཏུ་བསྟན། །རྡུལ་ལ་འགྲོ་བ་རྒྱ་མཚོ་མཐའ་ཡས་དང་། །དེ་བཞིན་སེམས་ཅན་མཚོ་ཆེན་དཔག་ཡས་དང་། །མཐའ་དབུས་མེད་པའི་བདེ་གཤེགས་གངས་ཆེན་མཚོ། །ཀུན་ཀྱང་ཁྱོད་ཀྱི་རྣམ་ཐར་དམ་པའི་ཡུལ། །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པ་ལ། ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་ གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ཞེས་བྱ་བས་ཏིང་ངེ་འཛིན་གྱི་ཡོན་ཏན་དུ་མ་ཐོབ་ཚུལ་དང་དེ་དག་གི་རྒྱུ་སྐྱེ་བ་བརྒྱ་ལ་སངས་རྒྱས་བརྒྱ་ཕྲག་གཅིག་ལ་བསྙེན་བཀུར་བྱས་ཚུལ་སོགས་བསྟན་པའི་སྐོར། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས། སེམས་ཀྱི་སྐད་ཅིག་རྣམ་པར་བརྒྱན་པ་དེ་ནི་སྒོམ་པ་དང་། རྗེས་སུ་སྒོམ་པ་དང་། ཡང་དག་པར་སྒོམ་པ་དང་། མཚན་མོའི་ལྷ་མོའི་སྒྲ་རྒྱ་མཚོ་རབ་ཏུ་ཞི་བ་དང་ལྡན་པའི་གདམས་ངག་དང་། རྗེས་སུ་བསྟན་པ་ལ་ནི་རྗེས་སུ་འབྲང་བར་བྱ་བ་དང་། རྗེས་སུ་དྲན་པར་བྱ་བ་དང་། ཁོང་དུ་ཆུད་པར་བྱེད། ཚིག་དང་ཡི་གེ་རེ་རེ་ལ་ནི་ཚུལ་དུ་མ་དང་བསམ་པ་ཚད་མེད་པས་ཆོས་ཉིད་ཀྱི་ཚུལ་ཤེས་པ་རྗེས་སུ་དྲན་པར་བྱེད་ཅིང་དྲན་པས་རྗེས་སུ་འབྲང་བར་བྱ་བ་དང་། བློ་གྲོས་ཀྱིས་རྣམ་པར་དབྱེ་བ་དང་། རིག་པས་ཁོང་དུ་ཆུད་པར་བྱ་བ་དང་། བློས་ཤིན་ཏུ་ཡངས་པར་བྱ་བ་དང་། ལུས་ཀྱིས༌རེག་པར་བྱས་ཏེ། རྣམ་པར་སྤྱད་པ་དང་། རྗེས་སུ་འཇུག་པར་བྱེད་ཅིང་། མཐར་གྱིས་མཚན་མོའི་ལྷ་མོ་གྲོང་ཁྱེར་ཐམས་ཅད༌བསྲུང་བ་འབྱུང་བའི་གཟི་བརྗིད་དཔལ་གང་ན་བ་དེར་ཕྱིན་པ་དང་། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་པདྨོའི་ཁྲི་ཆེན་པོ། ནོར་བུ་རིན་པོ་ཆེའི་རྒྱལ་པོ་གྲོང་ཁྱེར་དང་། གནས་ཐམས་ཅད་རབ་ཏུ་སྣང་བར་བྱེད་པའི་སྙིང་པོ་ཅན་ལ་ཕྱོགས་ཐམས་ཅད་དང་། འགྲོ་བ་ཐམས་ཅད་ལ་མངོན་དུ་གྱུར་པའི་ལུས་དང་། འགྲོ་བ་ཐམས་ཅད་ཀྱི་གཟུགས་དང་། མཉམ་པའི་ལུས་དང་སེམས་ཅན་ཐམས་ཅད་ལ་མངོན་དུ་གྱུར་པའི་ལུས་དང་། འགྲོ་བ་ཐམས་ཅད་ཀྱིས་མ་གོས་པའི་ལུས་དང་། འགྲོ་བ་ཐམས་ཅད་དང་རང་བཞིན་མཉམ་པའི་ལུས་དང་། འགྲོ་བ་ཐམས་ཅད་ལས་མངོན་པར་འཕགས་པའི་ལུས་དང་། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མཐུན་པའི་ལུས་དང་། འགྲོ་བ་ཐམས་ཅད་དུ་སྒྲ་རབ་ཏུ་སྒྲོགས་པའི་ལུས་དང་། འགྲོ་བ་ཐམས་ཅད་དུ་འཕོ་བ་མེད་པའི་ལུས་དང་། སྒྲིབ་པ་ཐམས་ཅད་ཤིན་ཏུ་བཅོམ་པའི་ལུས་དང་། དེ་བཞིན་ཉིད་ཀྱི་རང་བཞིན་གྱི་ལུས་དང་། འགྲོ་བ་ཐམས་ཅད༌གདུལ་བར་མཐར་ཕྱིན་པར་བྱེད་པའི་ལུས་སུ་འདུག་ཅིང་། མཚན་མོའི་ལྷ་མོ་བརྗོད་དུ་མེད་པའི་འཁོར་གྱིས་བསྐོར་ཏེ། འདུག་པ་མཐོང་ནས། དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི༌གཟི་བརྗིད་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །

ལྷ་མོ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ན། ལྷ་མོ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་རྗེས་སུ་བསླབས་ན་སེམས་ཅན་ལ༌སྨན་པར་འགྱུར་བ་ལགས། ཇི་ལྟར་ན་སེམས་ཅན་བླ་ན་མེད་པའི་ཡོངས་སུ་བསྡུ་བས་ཡོངས་སུ་སྡུད་པར་འགྱུར། ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པས་གནང་བའི་བྱང་ཆུབ་སེམས་དཔའི་ལས་ལ་བརྩོན་པ་ལགས། ཇི་ལྟར་བརྩོན་པར་བགྱིས་ན་བྱང་ཆུབ་སེམས་དཔའ་ཆོས་ཀྱི་རྒྱལ་པོ་ཉེ་བར་འགྱུར་བ་བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང་།

མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱིས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་དེ་ལྟར་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། རྣམ་པར་གདུལ་བའི་མཐར་ཕྱིན་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་རིགས༌ཡང་དག་པར་གཟུང་བའི་སྦྱོར་བ་མཐར་ཕྱིན་པར་བྱ་བ་དང་། ཕྱོགས་འབྱམས་ཀླས་པ་ཐམས་ཅད་རྒྱས་པར༌དགང་བའི་ཡེ་ཤེས་རབ་ཏུ་སྦྱར་བ་དང་། ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པ་མངོན་དུ་འགྱུར་བ་དང་། ཤེས་བྱ་ནམ་མཁའི་དབྱིངས་དང་མཉམ་པར་མཐའ་ཡས་པ་རྒྱས་པར་དགང་བ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བླང་ཞིང་ཡོངས་སུ་གཟུང་བའི་ཕྱིར་འགྲོ་བ་རྒྱ་མཚོ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཆོས་ཀྱི་སྤྲིན་གྱི་ཆར་མངོན་པར་དབབ་པའི་སྤྱོད་པའི་ཚུལ་ཡོངས་སུ་འདྲི་བ་ལེགས་སོ་ལེགས་སོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་ཐོབ་པ་སྟེ། དེ་ལྟར་ཁོ་མོ་རྣམ་པར་ཐར་པ་དེ་དང་ལྡན་པས་ཆོས་སྨྲ་བ་ཆེན་པོའི་གོ་འཕང་ཐོགས་པ་མེད་པ་ལ་དམིགས་པའི་སྦྱོར་བ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་མཛོད་ཡོངས་སུ་གཏང་བའི་སྨོན་ལམ་དང་ལྡན་པ། སྙིང་རྗེ་ཆེན་པོ་དང་བྱམས་པ་ཆེན་པོའི་སྟོབས་རབ་ཏུ་ཐོབ་པ། སེམས་ཅན་ཐམས་ཅད་བྱང་ཆུབ་ཀྱི་སེམས་ལ་འགོད་པའི་ཕྱིར་སེམས་ཅན་ཐམས་ཅད་ཀྱི་དོན་བྱ་བ་ལ་ཞུགས་པ། བྱང་ཆུབ་ཀྱི་སེམས་ཀྱི་དགེ་བའི་རྩ་བ་དང་། ཚོགས་རབ་ཏུ་བསགས་པ་རྒྱུན་མི་གཅད་པའི་ཕྱིར། འགྲོ་བ་ཐམས་ཅད་ཁ་ལོ་བསྒྱུར་བའི་ས་ལ་ཡང་དག་པར་གནས་པ་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་ཀྱི་ལམ་ལ་རབ་ཏུ་དགོད་པའི་ཕྱིར། འཇིག་རྟེན་གྱི་ཆོས་ཀྱི་སྤྲིན་ཐམས་ཅད་ལས་ཆོས་ཀྱི་ཉི་མ་ཡོངས་སུ་འབྱུང་བའི་སྦྱོར་བ་དང་ལྡན་པ། དགེ་བའི་རྩ་བ་ཚད་མེད་པ་བསྐྱེད་པས། འཇིག་རྟེན་ཐམས་ཅད་སྣང་བར་བྱ་བའི་ཕྱིར། འགྲོ་བ་ཐམས་ཅད་ལ་མཉམ་པའི་སེམས་སུ་འཇུག་པ་རྒྱུན་མི་འཆད་པ། འགྲོ་བ་ཐམས་ཅད་ཀྱི་དགེ་བའི་རྩ་བ་མངོན་པར་འདུ་བྱ་བ་ཡོངས་སུ་བསྒྲུབ་པའི་སྦྱོར་བ་ཤེས་པར་བྱ་བའི་ཕྱིར། སེམས་རྣམ་པར་དག་པའི་སྦྱོར་བ་དང་ལྡན་པ་དགེ་བའི་ལས་ཀྱི་ལམ་ཐམས་ཅད་མཐུན་པར་བསྒྲུབ་པས་སེམས་ཅན་ཐམས་ཅད་ཀྱི་དེད་དཔོན་དུ་ཞུགས་པ། མི་དགེ་བའི་ལས་ཀྱི་ལམ་ཐམས་ཅད་རབ་ཏུ་སྤངས་པ། སེམས་ཅན་ཐམས་ཅད་དགེ་བའི་ཆོས་ལ་རབ་ཏུ་དགོད་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ལ་ལམ་བདེ་བ་ཡོངས་སུ་སྟོན་པའི་སྦྱོར་བ་དང་ལྡན་པ། སེམས་ཅན་ཐམས་ཅད་ཀྱི་ཐེག་པའི་རྒྱན་ཀྱི་ཐོག་མར་འདྲེན་པ་ལ་ཞུགས་པ། དགེ་བའི་ཆོས་ཀྱི་སྤྱོད་པ་ཐམས་ཅད་ལ་སེམས་ཅན༌ཐམས་ཅད་རབ་ཏུ་དགོད་པའི་སྦྱོར་བ་དང་ལྡན་པ། དགེ་བའི་བཤེས་གཉེན་ཐམས་ཅད་ལ་མི་ཕྱེད་པར་བསྙེན་བཀུར་དང་རིམ་གྲོ་བྱེད་པ་ལ་ཞུགས་པ། སེམས་ཅན་ཐམས་ཅད་དེ་བཞིན་གཤེགས་པའི་བསྟན་པ་ལ་རབ་ཏུ་དགོད་པའི་སྦྱོར་བ་དང་ལྡན་པ། ཆོས་ཀྱི་སྦྱིན་པའི་སྔོན་འདྲེན་ཅིང་ཆོས་དཀར་པོ་ཐམས་ཅད་ཡང་དག་པར་བརྩམ་པའི་སྦྱོར་བ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་བསྐྱེད་པས་མངོན་པར་བྱུང་བས་བསམ་པ་བརྟན་ཞིང་མི་ཤིགས་པ། རྡོ་རྗེ་མཐུ་བོ་ཆེ་ལྟར་བརྟན་ཞིང་སྲ་བས་སངས་རྒྱས་ཀྱི་སྟོབས་ལ་དམིགས་པའི་སེམས་རྒྱ་ཆེན་པོའི་དཀྱིལ་འཁོར་དང་ལྡན་པར་དགེ་བའི་བཤེས་གཉེན་ལ་བརྟེན་ཅིང་རྣམ་པར་སྤྱོད་དེ། ཁོ་མོ་ནི་ཉོན་མོངས་པ་དང་ལས་ཀྱི་སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་སེམས་དང་ལྡན་པའོ། །

ཐམས་ཅད་མཁྱེན་པ་ཉིད་ཀྱི་ཚོགས་ཡང་དག་པར་རྩོམ་པའོ། །དཀར་པོའི་ཆོས་ཐམས་ཅད་ཡང་དག་པར་བསྒྲུབ་པའི་སྦྱོར་བ་དང་ལྡན་པའོ། །ཐམས་ཅད་མཁྱེན་པ་ཉིད་མཐའ་དང་དབུས་མེད་པ་ལ་མངོན་པར་འདུན་ཅིང་དམིགས་པའི་སེམས་ཀྱི་སྦྱོར་བ་ལ་བརྩོན་པའོ། །

རིགས་ཀྱི་བུ་དེ་ལྟར་ཁོ་མོ་ཆོས་སྣང་བའི་སྒོ་སེམས་ཅན་ཐམས་ཅད་ཡོངས་སུ་སྟོན་པ་རྣམ་པ་དེ་ལྟ་བུ་ཡོངས་སུ༌སྦྱོང་ཞིང་དགེ་བའི་རྩ་བ་བསགས་པའི་ཚོགས་ལ་སྟ་གོན་ཏུ་གནས་པས་རྣམ་པ་བཅུས་ཆོས་ཀྱི་དབྱིངས་ལ་རྣམ་པར་བལྟ་ཞིང་ཁོང་དུ་ཆུད་པ་དང་། རྗེས་སུ་གཞོལ་བར་བྱེད་དོ། །བཅུ་གང་ཞེ་ན་འདི་ལྟ་སྟེ། ཡེ་ཤེས་སྣང་བ་ཤིན་ཏུ་ཡངས་པ་ཐོབ་པས་ཆོས་ཀྱི་དབྱིངས་ནི་ཚད་མེད་པར་ཁོང་དུ་ཆུད་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྣམ་པར་དམིགས་པར་བྱ་བའི་ཕྱིར་ཆོས་ཀྱི་དབྱིངས་ནི་མཐའ་དང་དབུས་མེད་པར་ཁོང་དུ་ཆུད་པར་བྱེད་དོ། །སངས་རྒྱས་ཀྱི་ཞིང་ཐམས་ཅད་ཡོངས་སུ་གནན་པ་དང་། དེ་བཞིན་གཤེགས་པ་མཆོད་ཅིང་རིམ་གྲོ་བྱ་བའི་ཕྱིར་ཆོས་ཀྱི་དབྱིངས་ནི་མུ་མེད་པར་ཁོང་དུ་ཆུད་པར་བྱེད་དོ། །

འཇིག་རྟེན་གྱི་ཁམས་རྒྱ་མཚོ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ཡོངས་སུ་བསྟན་པའི་ཕྱིར་ཆོས་ཀྱི་དབྱིངས་ནི་ས་མཚམས་མེད་པ་ཁོང་དུ་ཆུད་པར་བྱེད་དོ། །དེ་བཞིན་གཤེགས་པའི་ཡེ་ཤེས་ཀྱི་དཀྱིལ་འཁོར་ཐ་མི་དད་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་ནི་རིས་ཚད་མེད་པར་ཁོང་དུ་ཆུད་པར་བྱེད་དོ། །བསམ་པ་ཇི་ལྟ༌བ་བཞིན་དུ་སེམས་ཅན་ཐམས་ཅད་ཀྱིས་རྣམ་པར་དམིགས་པའི་དེ་བཞིན་གཤེགས་པའི་གསུང་གི་དཀྱིལ་འཁོར་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི་རྒྱུད་ཀྱི་ཚུལ་གཅིག་ཏུ་གྱུར་པར་ཁོང་དུ་ཆུད་པར་བྱེད་དོ། །འགྲོ་བ་ཐམས་ཅད་རྣམ་པར༌གདུལ་བའི་མཐར་ཕྱིན་པས། དེ་བཞིན་གཤེགས་པས་སྔོན་གྱི་སྨོན་ལམ་གྱི་མཐར་ཐུག་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་ནི་རང་བཞིན༌གྱི་རྒྱ་ཆེ་བར་ཁོང་དུ་ཆུད་པར་བྱེད་དོ། །

བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་འབྱམས་ཀླས་པ་ལ་འཇུག་པར་བྱ་བའི་ཕྱིར། ཆོས་ཀྱི་དབྱིངས་ནི་འགྲོ་བ་ཐམས་ཅད་ལ་མཉམ་པ་ཉིད་དུ་གྱུར་པར་ཁོང་དུ་ཆུད་པར་བྱེད་དོ། །ཀུན་ཏུ་བཟང་པོའི་སྤྱོད་པས་རྣམ་པར་འཕྲུལ་པའི་རྒྱན་ལ་འཇུག་པར་བྱ་བའི་ཕྱིར་ཆོས་ཀྱི་དབྱིངས་ནི་རྒྱན་གཅིག་ཏུ་གྱུར་པར་ཁོང་དུ་ཆུད་པར་བྱེད་དོ། །དགེ་བ་ཐམས་ཅད་ཀྱིས་ཆོས་ཀྱི་དབྱིངས་རྒྱས་པར་དགང་ཞིང་རྣམ་པར་དག་པར་བྱ་བར་ཆུད་མི་ཟ་བའི་ཆོས་ཅན་དུ་བྱ་བའི་ཕྱིར་ཆོས་ཀྱི་དབྱིངས་ནི་ཐུག་པ་མེད་པར་ཁོང་དུ་ཆུད་པར༌བྱེད་དོ། །རིགས་ཀྱི་བུ་དེ་ལྟར་ཁོ་མོ་རྣམ་པ་བཅུ་པོ་དེ་དག་གིས་དགེ་བའི་རྩ་བ་དང་། ཚོགས་ཐམས་ཅད་ཡོངས་སུ་བསགས་པ་དང་། སངས་རྒྱས་ཀྱི་བདག་ཉིད་ཆེ་བ་ཉིད་ལ་འཇུག་པར་བྱ་བ་དང་། སངས་རྒྱས་ཀྱི་ཡུལ་བསམ་གྱིས་མི་ཁྱབ་པ་རྗེས་སུ་རྟོགས་པར་བྱ་བའི་ཕྱིར། ཆོས་ཀྱི་དབྱིངས་ཐམས་ཅད་ལ་རྣམ་པར་བལྟའོ། །ཁོང་དུ་ཆུད་པ་དང་རྗེས་སུ་གཞོལ་བར་བྱེད་དོ། །རིགས་ཀྱི་བུ་གཞན་ཡང་ཁོ་མོ་དེ་ལྟར་དེ་བཞིན་གཤེགས་པའི་བདག་ཉིད་ཆེ་བ་ཉིད་ཀྱི་རྗེས་སུ་འབྲང་བའི་ཡིད་ལ་བྱ་བ་དང་ལྡན་པས། གཟུངས་ཀྱི་དཀྱིལ་འཁོར་གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏེ།

བཅུ་གང་ཞེ་ན་འདི་ལྟར་ཆོས་རྒྱ་མཚོ་ཐམས་ཅད་ཡང་དག་པར་འདུ་བ་ཞེས་བྱ་བའི་གཟུངས་ཀྱི་དཀྱིལ་འཁོར་དང་། ཆོས་ཐམས་ཅད་བྱིན་གྱིས་རློབ་པའི་གཟུངས་ཀྱི་དཀྱིལ་འཁོར་དང་། ཆོས་ཀྱི་སྤྲིན་ཐམས་ཅད་ཡོངས་སུ་འཛིན་པའི་གཟུངས་ཀྱི་དཀྱིལ་འཁོར་དང་། དེ་བཞིན་གཤེགས་པ་ཐམས་ཅད་ཀྱི་དགོངས་པ་སྒྲོན་མའི་གཟུངས་ཀྱི་དཀྱིལ་འཁོར་དང་། སེམས་ཅན་ཐམས་ཅད་ཀྱི་ལས་རྒྱ་མཚོ་རབ་ཏུ་སྣང་བར་བྱེད་པའི་སྙིང་པོའི་གཟུངས་ཀྱི་དཀྱིལ་འཁོར་དང་། ཐེག་པའི་ཚུལ་རྒྱ་མཚོ་དྲི་མ་མེད་པ་ཐམས་ཅད་ལ་ཡང་དག་པར་གཞོལ་བའི་གཟུངས་ཀྱི་དཀྱིལ་འཁོར་དང་། སངས་རྒྱས་རྒྱ་མཚོ་ཐམས་ཅད་ཀྱི་སྒྲོན་མའི་སྙིང་པོའི་གཟུངས་ཀྱི་དཀྱིལ་འཁོར་དང་། དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར༌ལོའི་གློང་རབ་ཏུ་སྒྲོག་པའི་གཟུངས་ཀྱི་དཀྱིལ་འཁོར་དང་། དུས་གསུམ་གྱི་སངས་རྒྱས་ཀྱི་སྔོན་གྱི་སྨོན་ལམ་རྒྱ་མཚོ་བསྟན་པ་ལ་ཡང་དག་པར་གཞོལ་བའི་གཟུངས་ཀྱི་དཀྱིལ་འཁོར་དང་། ཆོས་ཐམས་ཅད་ལ་མངོན་པར་འཁྱིལ་པའི་ཤུགས་དྲག་པོའི་གཟུངས་ཀྱི་དཀྱིལ་འཁོར་དང་། ཐམས་ཅད་མཁྱེན་པ་ཉིད་ཀྱི་ཤུགས་རབ་ཏུ་འབྱུང་བ་ཞེས་བྱ་བའི་གཟུངས་ཀྱི་དཀྱིལ་འཁོར་དང་། རིགས་ཀྱི་བུ་གཟུངས་ཀྱི་དཀྱིལ་འཁོར་བཅུ་པོ་དེ་དག་ལ་སོགས་པ་གཟུངས་ཀྱི་དཀྱིལ་འཁོར་གྱི་རྒྱུད་སྟོང་ཕྲག་བཅུས་སེམས་ཅན་རྣམས་ལ་ཆོས་སྟོན་ཏོ། །

རིགས་ཀྱི་བུ་གཞན་ཡང་ཁོ་མོ་ནི་ཐོས་པའི་ཤེས་རབ་ཀྱིས་སེམས་ཅན་རྣམས་ལ་ཆོས་སྟོན་ཏོ། །བསམ་པའི་ཤེས་རབ་དང་། བསྒོམ་པའི་ཤེས་རབ་ཀྱིས་སེམས་ཅན་རྣམས་ལ་ཆོས་སྟོན་ཏོ། །སྲིད་པའི་རྒྱུད་གཅིག་ལས་ཀྱང་བརྩམས་ཤིང་སེམས་ཅན་རྣམས་ལ་ཆོས་སྟོན་ཏོ། །སྲིད་པའི་རྒྱུད་རྒྱ་མཚོ་ཐམས་ཅད་ལས་ཀྱང་བརྩམས་ཤིང་སེམས་ཅན་རྣམས་ལ་ཆོས་སྟོན་ཏོ། །དེ་བཞིན་གཤེགས་པ་གཅིག་གི་མཚན་གྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །

དེ་བཞིན་གཤེགས་པ་ཐམས་ཅད་ཀྱི་མཚན་གྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །འཇིག་རྟེན་གྱི་ཁམས་རྒྱ་མཚོ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །འཇིག་རྟེན་གྱི་ཁམས་རྒྱ་མཚོ༌ཐམས་ཅད་ལས་ཀྱང་བརྩམས་ཤིང་ཆོས་སྟོན་ཏོ། །སངས་རྒྱས་གཅིག་གིས་ལུང་བསྟན་པ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ལུང་བསྟན་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་གཅིག་གི་ཆོས་ཀྱི་འཁོར་ལོ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །མདོ་སྡེ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ལ་ཡང་དག་པར་གཞོལ་བའི་མདོ་སྡེ་ལས་ཀྱང་བརྩམས་ཤིང་ཆོས་སྟོན་ཏོ། །

དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་ཀུན་ནས་འདུས་པ་ལས་ཀྱང་བརྩམས་ཤིང་ཆོས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཀུན་ནས་འདུས་པ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །ཐམས་ཅད་མཁྱེན་པ་ཉིད་ཀྱི་སེམས་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །བྱང་ཆུབ་ཀྱི་སེམས་ཀྱི་ཡན་ལག་རྒྱ་མཚོ་ཐམས་ཅད་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་གཅིག་ལས་ཀྱང་བརྩམས་ཤིང་ཆོས་སྟོན་ཏོ། །ཐེག་པ་ཐམས་ཅད་ཀྱི་འབྱུང་བ་རྒྱ་མཚོ་ལས་ཀྱང་བརྩམས་ཤིང་ཆོས་སྟོན་ཏོ། །

རིགས་ཀྱི་བུ་དེ་ལྟར་ཁོ་མོས་བསྟན་པའི་ཚུལ་མངོན་པར་བསྒྲུབ་པ་བརྗོད་དུ་མེད་པས་སེམས་ཅན་རྣམས་ལ་ཆོས་སྟོན་ཏེ། རིགས་ཀྱི་བུ་དེ་ལྟར་ཁོ་མོ་ཆོས་ཀྱི་དབྱིངས་ཀྱི་ཚུལ༌ཐ་མི་དད་པས་དེ་བཞིན་གཤེགས་པ་རྒྱ་མཚོ་ལ་འཇུག་ཅིང་སེམས་ཅན་ཐམས་ཅད་ལ་ཆོས་སྟོན་པས། བླ་ན་མེད་པའི་ཡོངས་སུ་བསྡུ་བ་བྱེད་ཅིང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ཕྱི་མའི་མཐའི་མུར་ཐུག་པའི་བསྐལ་པ་རྒྱ་མཚོར་གནས་པར་བྱ་བས་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ལ་སེམས་ཀྱི་སྐད་ཅིག་རེ་རེ་ཞིང་རྣམ་པར་འཕེལ་བའི་རྣམ་པར་ཐར་པའི་ཡུལ་བསྒོམ་པའི་ཚུལ་གྱིས་ཡོངས་སུ་སྒོམ་སྟེ་རྣམ་པར་ཐར་པའི་ཡུལ་བསྒོམ་པའི་ཚུལ་རེ་རེས་ཀྱང་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་དུ་རྒྱས་པར་འགེངས་སོ། །

ནོར་བཟང་གིས་སྨྲས་པ། ལྷ་མོ་བྱང་ཆུབ་སེམས་དཔའི་རྣམ་པར་ཐར་པ་དེ། དེ་ལྟར་ཟབ་པ་ངོ་མཚར་ཆེ་ན། འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་འདི་བརྙེས་ནས་ཇི་སྲིད་ཅིག་ལགས་སྨྲས་པ། རིགས་ཀྱི་བུ་སྔོན་འདས་པའི་དུས་བསྐལ་པ་འཇིག་རྟེན་གྱི་རྒྱུད་ཀྱི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ཅིག་ཏུ་འཇིག་རྟེན་གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་ཀྱི་སྤྲིན་ཅེས་བྱ་བ་རིན་པོ་ཆེའི་སྤོས་ཐམས་ཅད་དང་ལྡན་པ། གླིང་བཞི་པའི་འཇིག་རྟེན་གྱི་ཁམས་རྡུལ་ཤིན་ཏུ་ཕྲ་བ་སྙེད་ཀྱི༌སྤྲིན་ལ་བླངས་པ། དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་དབྱངས་སུ་སྒྲོག་པའི་པདྨོས་མཚམས་རྣམ་པར་བརྒྱན་པ། ལྷུན་སེམས་ཅན་ཐམས་ཅད་ཀྱི་ལས་རྒྱ་མཚོས་བྱུང་བའི་ནོར་བུ་རིན་པོ་ཆེའི་རྒྱལ་པོ་རྒྱ་མཚོ་ལས་གྲུབ་པ། པདྨོ་ཆེན་པོའི་དབྱིབས་སུ་འདུག་པ། རྣམ་པར་དག་ཅིང་ཀུན་ནས་ཉོན་མོངས་པ༌མེད་པ། མེ་ཏོག་གི་ཁོར་ཡུག་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀུན་ནས་བསྐོར་བ། སྤོས་ཀྱི་རིན་པོ་ཆེ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་རི་རབ་ལྟར་མངོན་པར་འཕགས་པ་དང་ལྡན་པ། གླིང་བཞི་པ་ཆེན་པོའི་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་རྒྱན་དང་ལྡན་པ། གླིང་བཞི་པ་རེ་རེ་ཞིང་ཡང་གྲོང་རྡལ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་ཡང་བརྗོད་དུ་མེད་པ་དང་ལྡན་པ་བྱུང་ངོ་། །རིགས་ཀྱི་བུ་འཇིག་རྟེན་གྱི་ཁམས་དེའི་བསྐལ་པ་མདོག་དྲི་མ་མེད་པའི་འོད་ཅེས་བྱ་བ་བྱུང་སྟེ། བསྐལ་པ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་ངོ་། །འཇིག་རྟེན་གྱི་ཁམས་ཆོས་ཀྱི་འོད་འཕྲོ་བའི་གྲོང་ཁྱེར་དཔལ་གྱི་སྤྲིན་གྱི་གླིང་བཞི༌པ་དབུ་མ་རྒྱལ་མཚན་སྣ་ཚོགས་ཞེས་བྱ་བ་བྱུང་སྟེ། དེའི་དབུས་ན་རྒྱལ་པོའི་གནས་རིན་ཆེན་མེ་ཏོག་ཀུན་ཏུ། སྣང་བ་ཞེས་བྱ་བ་ཡོད་པར་གྱུར་ཏེ། རྒྱལ་པོའི་གནས་དེ་དང་ཧ་ཅང་ཡང་མི་རིང་བ་ཞིག་ན་སྙིང་པོ་བྱང་ཆུབ་ཆོས་ཀྱི་རྒྱལ་པོའི་ཕོ་བྲང་རབ་ཏུ་སྣང་བ་ཞེས་བྱ་བ་ཡོད་དེ། སྙིང་པོ་བྱང་ཆུབ་དེ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་གི་བསྐལ༌པའི་དང་པོ་ལ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོ་ཞེས་བྱ་བ་བྱུང་སྟེ།

དེའི་ཚེ་འཁོར་ལོས་སྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་བྱུང་ནས། དེས་བཅོམ་ལྡན་འདས་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོ་ལས་མདོ་སྡེ་ཆོས་ཐམས་ཅད་ཀྱི་ཀློང་རྒྱ་མཚོ་ཞེས་བྱ་བ་ཡོངས་སུ་བཟུང་སྟེ། བཟུང་ནས་ཀྱང་ཆོས་ཀྱི་འཁོར་ལོ་རྗེས་སུ་བསྐོར་ཏོ། །ཡོངས་སུ་མྱ་ངན་ལས་འདས་ནས་ཀྱང་རབ་ཏུ་བྱུང་སྟེ། བསྟན་པ་ཡོངས་སུ་བཟུང་ངོ་། །བསྟན་པ་ནུབ་དུ་ཆ་སྟེ། བསྟན་པ་ཡང་སྟོང་དུ་གྱེས། ཆོས་བསྟན་པ་ཤིན་དུ་བསྟན་པའི་ཚུལ་ནི་བརྒྱ་ཕྲག་བཅུར་གྱུར། རྙོག་པའི་བསྐལ་པ་བར་མ་ནི་ཉེ་བར་གནས་པར་གྱུར་པའི་ཚེ། སེམས་ཅན་ལས་དང་ཉོན་མོངས་པའི༌སྒྲིབ་པས་བསྒྲིབས་པ། འཐབ་མོ་དང་རྩོད་པ་དང་དཀྲུགས་མ་ལ་ཞུགས་པར་གྱུར་པ་དང་། དགེ་སློང་སངས་རྒྱས་ཀྱི་བསྟན་པའི་ཡོན་ཏན་དོན་དུ་མི་གཉེར་ཅིང་ཡུལ་གྱི་དགའ་བ་ལྷུར་ལེན་པར་གྱུར་པ། རྒྱལ་པོ་དང་རྐུན་པོའི་གཏམ་ལ་ཞུགས་པ། བུད་མེད་དང་ཡུལ་དང་རྒྱ་མཚོའི་གཏམ་ལ་མོས་པ། འཇིག་རྟེན་རྒྱང་འཕེན་པའི་ཚིག་ལ་ཞུགས༌པ་རྣམས་ཡོངས་སུ་སྐྱོ་བ་བསྐྱེད་པའི་ཕྱིར། ཀྱེ་མའོ་བསྐལ་པ་དུ་མར་ཡོངས་སུ་བསྒྲུབས་པའི་ཆོས་ཀྱི་སྒྲོན་མ་ཆེན་པོ་ནི་ནུབ་པར་གྱུར་མ་ཁད་དོ། །ཞེས་ཆོས་དང་ལྡན་པའི་འོ་དོད་བོས་ཏེ། ཡོངས་སུ་སྐྱོ་བར་འགྱུར་བའི་གཏམ་བྱས་ནས། དེ་སྟེང་གི་ནམ་མཁའི་དབྱིངས་སུ་ཏ་ལ་བདུན་ཙམ་དུ་མངོན་པར་འཕགས་ནས། འོད་འཕྲོ་བ་ཁ་དོག་མཐའ་ཡས་པའི་སྤྲིན་རབ་ཏུ་བཀྱེ་སྟེ། འོད་ཟེར་གྱི་དྲ་བའི་རྒྱན་ཆེན་པོ་ཁ་དོག་སྣ་ཚོགས་དང་ལྡན་པ་བཀྱེ་ནས། འོད་ཁ་དོག་དུ་མ་དང་ལྡན་པས་འཇིག་རྟེན་གྱི་ཉོན་མོངས་པའི་གདུང་བ་ཞི་བར་བྱས་ཏེ། སེམས་ཅན་མཐའ་དང་དབུས་མེད་པ་དག་ཀྱང་བྱང་ཆུབ་ལ་རབ་ཏུ་བཀོད་དོ། །དེ་བཞིན་གཤེགས་པའི་བསྟན་པ་དེ་ཡང་ཕྱིར་གསལ་བར་བྱས་ཏེ། ལོ་སྟོང་ཕྲག་དྲུག་ཅུར་གནས་པར་གྱུར་ཏོ། །

དེའི་ཚེ་འཁོར་ལོས་སྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ། དེ་ཉིད་ཀྱི་བུ་མོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བ་དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་སྟེ། དེས་ཡོངས་སུ་སྐྱོ་བར་འགྱུར་བའི་སྒྲ་དེ་ཐོས་ནས་ཆོ་འཕྲུལ་ཆེན་པོ་དེ་མཐོང་སྟེ། འཁོར་དང་བཅས་པས་བྱང་ཆུབ་ཏུ་སེམས་བསྐྱེད་ནས། དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་ཏེ། དེ་བཞིན་གཤེགས་པ་མངོན་དུ་འགྱུར་བ་ལ་ཡང་དག་པར་གཞོལ་བ་ཞེས་བྱ་བའི་ཏིང་ངེ་འཛིན་ཀྱང་རབ་ཏུ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བའི་གཟུངས་ཀྱང་རབ་ཏུ་ཐོབ་བོ། །ཆོས་རྒྱ་མཚོའི་ཚུལ་ཐམས་ཅད་ལ་འཇུག་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རབ་ཏུ་ཐོབ་པར་གྱུར་ཏོ། །

དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཀྱིས་ཀྱང་དེ་བཞིན་གཤེགས་པ་ཐམས་ཅད་ཀྱི་བསྟན་པ་ལས་བྱུང་བའི་འོད་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་དང་། བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཡང་ཤིན་ཏུ་ཕྲ་ཞིང་འཇམ་པའི་ཚུལ་དུ་རབ་ཏུ་ཐོབ་པར༌གྱུར་ཏེ། དེ་ཐོབ་པས་དེ་ལ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་རྣམ་པར་འཕྲུལ་པ་དེ་དག་ཐམས་ཅད་ཀྱང་མངོན་དུ་གྱུར་ཏོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བ་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་བསྟན་པ་ལ་རབ་ཏུ་བྱུང་སྟེ། ཆོས་ཀྱི་འཁོར་ལོ་རྗེས་སུ་བསྐོར་བ་དང་། ཡོངས་སུ་མྱ་ངན་ལས་འདས་ནས་ཀྱང་བསྟན་པ་ནུབ་ཏུ་ཆ་བའི་ཚེ་དང་དུས་ན་བསྟན་པ་ཡོངས་སུ་འཛིན་ཅིང་ཆོས་ཀྱི་སྒྲོན་མ་ཆེན་པོ་འབར་བར་བྱེད་བྱེད་པ་དེ་གཞན་ཞིག་ཡིན་པ་སྙམ་དུ་སེམས་ན་ནི། རིགས་ཀྱི་བུ་ཁྱོད༌ཀྱིས་དེ་ལྟར་མི་བལྟ་སྟེ། བྱང་ཆུབ་སེམས་དཔའ་ཀུན་དུ་བཟང་པོ་ནི་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས་དེའི་ཚེ་དེའི་དུས་ན་འཁོར༌ལོས་སྒྱུར་བའི་རྒྱལ་པོ་ཉི་མ་ལྟར་བཞིན་མདོག་དྲི་མ་མེད་པའི་བུ་མོ་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བ་དགེ་སློང་མ་བརྒྱ་ཕྲག་སྟོང་གི་འཁོར་དང་ལྡན་པ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་དགེ་སློང་མ་ཆོས་ཀྱི་འཁོར་ལོས་སྤྲུལ་པའི་འོད་ཅེས་བྱ་བར་གྱུར་ཏེ། དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་མཚོ་ཐམས་ཅད་ཀྱི་དབྱངས་འོད་ཀྱི་རྒྱལ་པོའི་བསྟན་པ་ཡང་ཡོངས་སུ་བཟུང་ངོ་། །དགེ་སློང་མ་བརྒྱ་ཕྲག་སྟོང་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱས་ཏེ། དེ་བཞིན་གཤེགས་པ་མངོན་དུ༌འགྱུར་བ་ལ་ཡང་དག་པར་གཞོལ་བའི་ཏིང་ངེ་འཛིན་ལའང་རབ་ཏུ་བཀོད་དོ། །

དེ་བཞིན་གཤེགས་པ་ཐམས་ཅད་ཀྱི༌ཆོས་ཀྱི་འཁོར་ལོས་སྤྲུལ་པའི་འོད་ཀྱི་གཟུངས་དང་། ཆོས་རྒྱ་མཚོའི་ཚུལ་ཐམས་ཅད་ལ་འཇུག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལའང་རབ་ཏུ་བཀོད་དོ། །དེ་བཞིན་གཤེགས་པ་དེའི་འོག་ཏུ་ཁོ་མོས་དེ་བཞིན་གཤེགས་པ་ཆོས་དྲི་མ་མེད་པའི༌རི་བོ་ཡེ་ཤེས་ཀྱི་རྩེ་མོའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་གྱི་འོད་རབ་ཏུ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མ་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོ་ཤིན་ཏུ་བསྟན་པའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་དཀྱིལ་འཁོར་ཡེ་ཤེས་ཀྱི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་མེ་ཏོག་དཔལ་གྱི་རྒྱལ་མཚན་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འོད་འཕྲོ་རི་བོ་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཚུལ་ཟབ་མོ་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཡེ་ཤེས་ཡང་དག་པར་འབྱུང་བ་ཀུན་ཏུ་སྣང་བའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འབྱུང་གནས་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིའི་དབང་པོ་དཔལ་གྱི་སྙིང་པོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་མཁྱེན་པའི་རི་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་བརྩོན་འགྲུས་དྲག་པོའི་རྒྱལ་མཚན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རིན་པོ་ཆེའི་མེ་ཏོག་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟབ་མོ་ཞི་བ་བརྩེགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་ཚུལ་རབ་ཏུ་སྣང་བའི་འོད་ཀྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འོད་འཕྲོ་བ་དཔལ་གྱི༌རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་བཟང་པོའི་དཀྱིལ་འཁོར་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤྱིའུ་ཚུགས་ཀྱི་ཕྱོགས་ཡེ་ཤེས་ཀྱིས་སྣང་བར་མཛད་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་མེ་ཏོག་ཀུན་ཏུ་རྒྱས་པའི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སེང་གེའི་དཔལ་གྱི་རྒྱལ་མཚན་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཉི་མ་ཀུན་ཏུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་རིན་པོ་ཆེས་རྣམ་པར་བརྒྱན་པའི་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཉི་མའི་རྣམ་པར་གནོན་པས་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཆོས་ཀྱི་དྲ་བ་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་པདྨོ་རབ་ཏུ་རྒྱས་པའི་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་ཉི་མའི་འཁོར་ལོ་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མི་བསྙེངས་པའི་རྡོ་རྗེ་སེང་གེ་མཐུ་བོ་ཆེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་རྒྱལ་མཚན་ཀུན་ཏུ་དཔལ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་སྐུ་ཆོས་ཀྱི་པདྨོའི་མེ་ཏོག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་མེ་ཏོག་དཔལ་གྱི༌རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དབྱིག་རི་བོ་སྣང་བའི་ཕུང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སྤོའི་འོད་འཕྲོ་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྒོ་ཀུན་ནས་ཆོས་སྟོན་པའི་རི་བོའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྙིང་པོ་བྱང་ཆུབ་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རབ་ཏུ༌འབར་བའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གཟུགས་བརྙན་ཀུན་ཏུ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྤྲིན་གྱི་རྒྱལ་མཚན་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྡོ་རྗེ་ལྟར་བརྟན་པའི་རྒྱལ་མཚན་༌རྒྱ་མཚོའི་སྤྲིན་ཅེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་གྲགས་པའི་རི་བོ་དཔལ་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཙན་དན་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་མེ་ཏོག་ཀུན་ནས༌རྒྱས་པའི་གཟི་བརྗིད་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེམས་ཅན་ཐམས་ཅད་དུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་པདྨོ་དཔལ་གྱི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྤོས་ཀྱི་འོད་འཕྲོ་བ་རབ་ཏུ་སྣང་བའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྒྱུ་པདྨོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱི་རི་བོ་རྣམ་པར་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྙན་པ་ཀུན་ཏུ་རྣམ་པར་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་དུ་སྣང་བའི་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་གྲོང་ཁྱེར་རབ་ཏུ་སྣང་བའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤིང་གི་རི་བོ་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་ཀུན་ཏུ་རྣམ་པར་སྣང་བའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་ང་རོ་རབ་ཏུ་སྒྲོག་པའི་འོད་ཅེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཀྱི་གནས་བསྒྲུབ་པ་ཡོངས་སུ་འགྲུབ་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀུན་ཏུ་སྣང་བའི་དམ་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་དམ་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྟོབས༌ཀྱི་དཔའ་བའི་རྒྱལ་མཚན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོའི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་ཡོན་ཏན་གྱི་ཅོད་པན་ཡེ་ཤེས་དང་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་ཟླ་བས་འཕགས་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་པདྨོ་རྣམ་པར་སྣང་བས་རྣམ་པར་སངས་རྒྱས་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་པདྨོ་སྣང་བའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་དཔལ་གྱི་རྩེ་མོའི་སྤྲིན་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་མེ་ཏོག་ཀུན་ནས་རྣམ་པར་དག་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་དཔལ་གྱི་རི་བོའི་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་དཀྱིལ་འཁོར་སྤོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བསོད་ནམས་སྣ་ཚོགས་ཀྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་རི་བོ་རྒྱལ་མཚན་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན༌རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ཉི་མའི་སྤྲིན་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྤྲིན་སྙན་པ་རྣམ་པར་གྲགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་ན་བུན་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བྱང་ཆུབ་རྣམ་པར་སངས་རྒྱས་པའི་ཡེ་ཤེས་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་རྣམ་པར་སངས་རྒྱས་པའི་དཔལ་གྱི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གསེར༌རིན་པོ་ཆེའི་རི་བོ་གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དཔལ་གྱི་རི་བོ་གཟི་བརྗིད་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤེས་རབ་ཀྱི་སྒྲ་ཀུན་ཏུ་འབྱུང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྟོབས་ཀྱི་དཔལ་བརྩེགས་པ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་སྤོས་འོད་འཕྲོ་བའི་སྤྲིན་ཕུན་སུམ་ཚོགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གསེར་རིན་པོ་ཆེའི༌རིའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་གཙུག་ཏོར་གྱི་མཛོད་ཆོས་ཐམས་ཅད་ཀྱི༌འོད་ཀྱི་དཀྱིལ་འཁོར་གྱི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་འཁོར་ལོ་རབ་ཏུ་འབར་བའི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས༌པ་རིའི་རྩེ་མོ་མངོན་པར་འཕགས་པའི་གཟི་བརྗིད་ཅེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་བརྩོན་འགྲུས་ཀྱི་སྒྲོན་མ་ཀུན་ཏུ་སྣང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་ཕྱག་རྒྱ་ཤིན་ཏུ་ཡངས་པའི་ཅོད་པན་ཤེས་རབ་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་པོ་ཆེ་ཡིད་དུ་འོང་བའི་དཔལ་གྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་སྒྲོན་མ་རིན་ཆེན་བླ་རེའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་ནམ་མཁའ་ལ་སེང་གེའི་འོད་ཤིན་ཏུ་མཛེས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་གྱིས་རྣམ་པར་བརྒྱན་པའི་རྒྱལ་མཚན་ཟླ་བ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་འོད་ཟེར་གྱི་རི་བོ་རྣམ་པར་སྣང་བའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ༌ཆོས་ཀྱི་ནམ་མཁའ་སྒྲིབ་པ་མེད་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་མཚན་ཡིད་དུ་འོང་བའི་མེ་ཏོག་གི་ཡན་ལག་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འཇིག་རྟེན་གྱི་དབང་པོ་དམ་པའི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཆོས་ཐམས་ཅད་ཏིང་ངེ་འཛིན་གྱི་འོད་ཀྱི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ༌ཆོས་ཀྱི་སྒོའི་དབྱངས་མང་པོའི་མཛོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་འབར་བའི་འོད་འཕྲོ་རྒྱ་མཚོའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་དུས་གསུམ་གྱི་མཚན་རབ་ཏུ་སྣང་བའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་དཀྱིལ་འཁོར་དཔལ་གྱི་རི་བོ་སྣང་བའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི༌དབྱིངས་ཀྱི་སེང་གེའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་རི་རབ་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་རྒྱ་མཚོ་ཐམས་ཅད་སྣང་བར་མཛད་པའི་སེང་གེ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་འོད་ཀུན་ཏུ་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤེས་རབ་ཀྱི་འོད་ཀུན་ཏུ༌བསལ་བ་ཆོས་ཀྱི་གྲོང་ཁྱེར་རབ་ཏུ་སྣང་བ་ཞེས་བྱ་བ་བསྙེན་བཀུར་ཏོ། །

དེ་ལྟར་རིགས་ཀྱི་བུ་སངས་རྒྱས་བརྒྱ་པོ་འདི་དག་ལ་སོགས་པ། བསྐལ་པ་མདོག་དྲི་མ་མེད་པའི་འོད་ཅེས་བྱ་བ་ལ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཅིག་བྱུང་སྟེ། རིགས་ཀྱི་བུ་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཐམས་ཅད༌ཀྱི་ཐ་མར་དེ་བཞིན་གཤེགས་པ་ཆོས་ཀྱི༌དབྱིངས་ཀྱི་གྲོང་ཁྱེར་ཡེ་ཤེས་ཀྱི་འོད་ཀྱིས་རབ་ཏུ་སྣང་བའི་རྒྱལ་པོ་ཞེས་བྱ་བ་བྱུང་བར་གྱུར་ཏེ། དེ་ལྟར་རིགས་ཀྱི་བུ་ཁོ་མོས་དེ་བཞིན་གཤེགས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལས་ཆོས་རྒྱ་མཚོ་ཐམས་ཅད་ཀྱི་དབྱངས་ཀྱི་འོད་ཀྱི་རྒྱལ་པོ་ཞེས་བྱ་བ་ལ་སོགས་པ་ཐ་མ་ཆོས་ཀྱི་དབྱིངས་ཀྱི་གྲོང་ཁྱེར་ཡེ་ཤེས༌ཀྱི་འོད་ཀྱི་རབ་ཏུ་སྣང་བའི་བར་དེ་དག་ཐམས་ཅད་ཁོ་མོས་མཆོད་དོ། །

དེ་བཞིན་གཤེགས་པ་དེ་དག་ཐམས་ཅད་ལ་ཁོ་མོས་རིམ་གྲོ་བྱས་སོ། །ཐམས་ཅད་ཀྱིས་ཆོས་བསྟན་པ་ཡང་ཐོས་སོ། །དེ་བཞིན་གཤེགས་པ་དེ་དག་ཐམས་ཅད་ཀྱི་བསྟན་པ་ལའང་ཁོ་མོ་རབ་ཏུ་བྱུང་ངོ་། །དེ་བཞིན་གཤེགས་པ་དེ་དག་ཐམས་ཅད་ཀྱི་བསྟན་པ་ཡང་ཁོ་མོས་ཡོངས་སུ་བཟུང་ངོ་། །བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཡང་དེ་བཞིན་གཤེགས་པ་དེ་དག་ཐམས་ཅད་ལས་ཐོབ་པའི་ཚུལ་རྣམ་པ་སྣ་ཚོགས་ཀྱིས་རབ་ཏུ་ཐོབ་བོ། །དེ་བཞིན་གཤེགས་པ་དེ་དག་ཐམས་ཅད་ཀྱི་ཞབས་ཀྱི་དྲུང་དུའང་ཁོ་མོས་སེམས་ཅན་རྒྱ་མཚོ་མཐའ་དང་དབུས་མེད་པ་ཡོངས་སུ་སྨིན་པར་བྱས་སོ། །དེ་ཚུན་ཆད་དུ་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ནི་ཁོ་མོས་ཆོས་ཀྱི་ནན་ཏན་གྱིས་མཆོད་པ་བྱས་ཏེ། རིགས་ཀྱི་བུ་དེ་ཕྱིན་ཆད་དུ་ཁོ་མོས་སེམས་ཅན་འཁོར་བའི་མུན་པ་ན་འཁོད་ཅིང་མི་ཤེས་པའི་གཉིད༌ཀྱིས་ལོག་པ་རྣམས་ཀྱི་མེལ་ཚེ་བྱས་སོ། །དེ་དག་གི་སེམས་ཀྱི་གྲོང་ཁྱེར་ཡང་ཡོངས་སུ་བསྲུངས་སོ། །དེ་དག་ཁམས་གསུམ་གྱི་གྲོང་ཁྱེར་ནས་གྱེན་དུ་བསྐྱོད་ཅིང་ཐམས་ཅད་མཁྱེན་པ་ཉིད་ཀྱི་གྲོང་རྡལ་དུ་ཡང་རབ་ཏུ་བཀོད་དོ། །

རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འཇིག་རྟེན་གྱི་ཚིག་ཀྱལ་པ་རྣམ་པར་བཟློག་པ། གཉིས་སུ༌སྨྲ་བ་མེད་པ་ལ་རབ་ཏུ༌འགོད་པ། བདེན་པ་ལ་རབ་ཏུ་གཞོག་པའི་མཐར་ཕྱིན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དག་གི་ལམ་གྱི་རང་བཞིན་ཐམས་ཅད་ཐོགས་པ་མེད་པར་ཤེས་པ། སེམས་ཀྱི་སྐད་ཅིག་རེ་རེ་ལ་ཆོས་ཐམས་ཅད་མངོན་པར་འཚང་རྒྱ་བར་དབང་བསྒྱུར་བ། སེམས་ཅན་ཐམས་ཅད་ཀྱི་སྒྲ་སྐད་དང་། ཚིག་རྒྱ་མཚོ་ལ་ཞུགས་པ། སྐད་རྒྱ་མཚོ་ཐམས་ཅད་མངོན་པར་འདུ་བྱ་བ་ལ་མཁས་པ། ཆོས་ཐམས་ཅད་ཀྱི་གྲངས་དང་མིང་རྒྱ་མཚོའི་ཚུལ་དང་། ཆོ་ག་ལ་མཁས་པ། ཆོས་ཐམས་ཅད་ལ་ཡང་དག་པར་གཞོལ་བའི་གཟུངས་རྒྱ་མཚོ་ལ་དབང་བསྒྱུར་བ། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་ཏུ་ཆོས་ཀྱི་སྤྲིན་མངོན་པར་བསྒྲུབ་པ་ལ་མཁས་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་སྤྱོད་པའི་མཐར་ཕྱིན་པར་བྱེད་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པའམ། སེམས་ཅན་ཐམས་ཅད་ཡོངས་སུ་སྡུད་པའི་ནན་ཏན་ཞེས་པར་བྱ་བའམ། བྱང་ཆུབ་སེམས་དཔའི་ལམ་བླ་ན་མེད་པར་བརྩམས་པའི་སྦྱོར་བའམ། བྱང་ཆུབ་སེམས་དཔའི་ཡེ་ཤེས་ཤིན་ཏུ་ཕྲ་བ་ཁོང་དུ་ཆུད་པའམ། བྱང་ཆུབ་སེམས་དཔའི་ཆོས་ཀྱི་གཏེར་དང་། མཛོད་རྣམ་པར་འབྱེད་པའི་ཁྱུ་མཆོག་གི་མཐུའམ། བྱང་ཆུབ་སེམས་དཔའི་ཆོས་ཀྱི་གཏམ་ལ་སེང་གེའི་ཁྲི་ཡོངས་སུ་མནན་པར་བྱ་བ་ཤེས་པར་ནུས་རེ་སྐན། དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་ནི་ཆོས་ཐམས་ཅད་ཀྱི་སའི་དཀྱིལ་འཁོར་གྱི་གཟུངས་ཡོངས་སུ་གནོན་པ་ཤ་སྟག་གོ །

སོང་རིགས་ཀྱི་བུ་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་འདི་ཉིད་དུ་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པར་བདེ་བར་གནས་པ་ཞེས་བྱ་བ་འདུག་སྟེ། ཁོ་མོ་དང་རྒྱང་མི་རིང་བ་ཞིག་ན་འདུག་གིས། དེའི་གན་དུ་སོང་ལས་ཇི་ལྟར་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པ་ཉིད་དུ་སློབ་པ་དང་། ཇི་ལྟར་ནན་ཏན་དུ་བྱེད་ཅིང་སེམས་ཅན་ཐམས་ཅད་ཐམས་ཅད་མཁྱེན་པ་ཉིད་དུ༌འགོད་པར་བྱེད་པ་དྲིས་ཤིག །དེ་ནས་མཚན་མོའི་ལྷ་མོ་གྲོང་ཁྱེར་ཐམས་ཅད༌བསྲུང་བ་འབྱུང་བའི་གཟི་བརྗིད་དཔལ་གྱིས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་འདི་ཉིད༌བརྣན་ཏེ། བསྟན་པའི་ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། རྣམ་ཐར་གང་གིས་དུས་གསུམ་རྒྱལ་བ་མ་ལུས་དང་། །ཆོས་དབྱིངས་ཀུན་དུ་འབྱམས་ཀླས་མཐའ་དང་དབུས་མེད་པ། །ཤེས་བྱེད་མཚན་ཉིད་ཀུན་གྱི་གཞིར་ཐུག་རྟོགས་པ་ཡི། །རྒྱལ་སྲས་རྣམས་ཀྱི་རྣམ་ཐར་ཟབ་ཅིང་བལྟ་བར་དཀའ། །ཚོགས་ལས་བྱུང་བའི་རྣམ་ཐར་ཚུལ་ནི་མཐའ་ཡས་ཏེ། །ཆོས་ཉིད་ཐོས་པས་ཚད་མེད་བསམ་དུ་མེད་པ་ཡིན། །ཡོངས་སུ་འཕེལ་ཞིང་ཀུན་ཏུ་ཆགས་མེད་ཤུགས་དྲག་པར། །དུས་གསུམ་བྱམས་པའི་ཚུལ་གྱི་ལམ་ལ་འཇུག་པར་གྱིས། །འདི་ལྟར་སངས་རྒྱས་ཞིང་རྒྱུད་རྡུལ་ཕྲན་རབ་སྙེད་ཀྱི། །བསྐལ་པ་འདས་པའི་སྔ་རོལ་སྔོན་གྱི་ཞིང་བྱུང་བ། །འཇིག་རྟེན་ཁམས་ནི་ཆོས་འོད་སྤྲིན་གྱི༌གྲོང་ཁྱེར་དཔལ། །བསྐལ་པ་འབྱུང་བ་དྲི་མེད་མདོག་ཏུ་འོད་ཆེན་ནོ། །བསྐལ་པ་དེ་གཅིག་རྒྱལ་བའི་གདུང་ནི་རྒྱུན་མ་ཆད། །སངས་རྒྱས་རི་རབ་རྡུལ་ཕྲན་རབ་སྙེད་བྱུང་བར་གྱུར། །བདེ་གཤེགས་ཆོས་ཀྱི་རྒྱ་མཚོ་འོད་དབྱངས་རྒྱལ་པོ་ནི། །ཐོག་མར་བྱུང་སྟེ་དེ་དག་བསྐལ་པ་དང་པོ་པ། །རྒྱལ་བ་ཆོས་སྤྲིན་གྲོང་ཁྱེར་འོད་སྣང་རྒྱལ་པོ་ནི། །བདེ་གཤེགས་དེ་དག་ཀུན་གྱི་ཐ་མར་འཇིག་རྟེན་བྱུང་། །དེ་དག་ཀུན་གྱི་སྤྱན་སྔར་ཕྱིན་ཏེ་ཁོ་མོས་མཆོད། །དེ་དག་ཀུན་ལས་ཆོས་ཀྱང་དགའ་བ་ཆེན་པོས་ཐོས། །ཁོ་མོས་ཐོག་མར་མཐོང་བ་གསེར་མདོག་འོད་མངའ་བ། །རྒྱ་མཚོའི་ཆོས་འོད་སྒྲོག་པའི་གསུང་གི་རྒྱལ་པོ་སྟེ། །མཚན་རབ་སུམ་ཅུ་གཉིས་ཀྱིས་ཡོངས་བརྒྱན་རི་བོ་འདྲ། །མཐོང་ནས་བདག་ནི་བདེ་གཤེགས་འགྱུར་སྙམ་བློ་གྲོས་གྱུར། །དེ་བཞིན་གཤེགས་པ་དེ་ནི་ཁོ་མོས་མཐོང་མོད་ལ། །ཐམས་ཅད་མཁྱེན་ཉིད་འབྱམས་ཀླས་འབྱུང་བའི་རྒྱུ་རྐྱེན་ཀྱིས། །མཁའ་དབྱིངས་རྣམ་ཡངས་དེ་བཞིན་ཉིད་ཀྱི་རང་བཞིན་ཅན། །རྒྱལ་བའི་སེམས་ཀྱི་དང་པོ་སྟོབས་ལྡན་རབ་ཏུ་སྐྱེས། །སྙིང་རྗེ་བདུད་རྩིའི་རྒྱ་མཚོ་ཆེ་ལས་བྱུང་བ་དེས། །དུས་གསུམ་གཤེགས་པའི་བདེ་བར་གཤེགས་པ་ཐམས་ཅད་ཀུན། །རྒྱལ་སྲས་རྒྱ་མཚོས་བསྐོར་བ་མ་ལུས་ཐམས་ཅད་དང་། །སེམས་ཅན་རྒྱ་མཚོར་བཅས་པའི་རྒྱ་མཚོའི་ཞིང་ཡང་རྒྱས། །ལུས་ཀྱིས་ཞིང་རྣམས་ཐམས་ཅད་མ་ལུས་ཁྱབ་བྱ་དང་། །འགྲོ་བ་ཀུན་གྱི་བསམ་པ་བཞིན་དུ་ལུས་བསྟན་ཕྱིར། །ཞིང་རྣམས་མ་ལུས་བསྐྱོད་ཅིང་སྣང་བར་བྱ་བ་དང་། །འགྲོ་བ་སྨིན་བྱའི་དོན་དུ་བདག་གིས་སེམས་ཀྱང་བསྐྱེད། །རྒྱལ་བ་གཉིས་པའི་སྤྱན་སྔར་ཁོ་མོ་ཕྱིན་ནས་ཀྱང་། །ཞིང་རྣམས་རྒྱ་མཚོ་བཅུ་བཞུགས་རྒྱལ་བའི་དབང་པོ་མཐོང་། །རྒྱལ་བ་ཐ་མ་མཐོང་ནས་ཞིང་གི་རྒྱ་མཚོ་རྣམས། །རྒྱ་མཚོའི་ཞིང་གི་རྡུལ་ཕྲན་རབ་སྙེད་བཞུགས་པ་མཐོང་། །དེ་ཡི་ཚུ་རོལ་བསྐལ་པ་ཞིང་རྒྱུད་རྡུལ་སྙེད་དུ། །རྒྱལ་བ་འགྲོ་བའི་སྒྲོན་མ་ཇི་སྙེད་སྐྱེས་གྱུར་པ། །དེ་དག་ཐམས་ཅད་སྤྱན་སྔར་ཁོ་མོ་ཕྱིན་གྱུར་ཏེ། །རྣམ་ཐར་རྒྱ་མཚོའི་ཚུལ་འདི་སྤྱོད་ཚེ་མཆོད་པ་བྱས། །དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་ཐོབ་པ་ཏིང་ངེ་འཛིན་གྱི་སྒོ་རྒྱ་མཚོ་མཐའ་དང་དབུས་མེད་པ་ལ་ཞུགས་པ། གཟུངས་ཀྱི་སྒོ་རྒྱ་མཚོ་རྒྱ་ཆེན་པོ་ལས་བྱུང་བའི་སེམས་དང་ལྡན་པ། བྱང་ཆུབ་སེམས་དཔའི་མངོན་པར་ཤེས་པའི་སྣང་བ་ཆེན་པོ་རབ་ཏུ་ཐོབ་པ། སོ་སོ་ཡང་དག་པར༌རིག་པ་ཆེན་པོ་རྒྱ་མཚོ་ལ་ཞུགས་པ། དགའ་བའི་ཤུགས་རྒྱ་མཚོ་ཤིན་དུ་ཡངས་པ་རྣམ་པར་འཕེལ་བའི་སེམས་དང་ལྡན་པ་དེས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང༌བ་འབྱུང་བའི་གཟི་བརྗིད་དཔལ་ལ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་ཀྱི་ཤེས་རབ་ཆོས་ཡངས་རྒྱ་མཚོ་ཀུན་ལ་སྤྱོད། །སྲིད་པའི་རྒྱ་མཚོ་མཐའ་དབུས་མེད་པར་ཁྱོད་ཀྱིས་སྤྱད། །ཡེ་ཤེས་ལུས་མཆོག་སྙིང་པོ་ཚེ་རིང༌སྙུན་བྲལ་བ། །ལྷ་མོ་ཁྱོད་ནི་འཁོར་འདིར་བྱོན་ཅིང་རྣམ་པར་མཛེས། །ཆོས་ཀྱི་རང་བཞིན་ནམ་མཁའ་ལྟ་བུ་ཐུགས་ཆུད་དེ། །དུས་གསུམ་ཀུན་གྱི་ཚུལ་ཡང་ཆགས་མེད་ཐུགས་ཆུད་མཛད། །ཐུགས་ཀྱི་སྐད་ཅིག་གཅིག་ལ་ཚད་མེད་བསམ་ཡས་པའི། །དམིགས་པ་ཐམས་ཅད་རྟོག་པ་མི་མངའ་འཇལ་བ་མཛད། །ཡེ་ཤེས་སྤྱན་མངའ་ཆོས་ཉིད་སེམས་ཅན་མེད་གཟིགས་ཀྱང་། །སེམས་ཅན་རྒྱ་མཚོ་མཐའ་ཡས་ཐུགས་རྗེས་གཟིགས་པ་མཛད། །ཐུགས་ཀྱི་རྣམ་ཐར་ཤིན་ཏུ་ཡངས་ལ་འཇུག་མཛད་ཅིང་། །སེམས་ཅན་ཚད་མེད་འདུལ་ཞིང་ཡོངས་སུ་སྨིན་པར་མཛད། །ཁྱོད་ནི་ཆོས་ཀྱི་དཀྱིལ་འཁོར༌རྣམ་དཔྱད་ཚུལ་མཁྱེན་ཏེ། །ཆོས་ཀྱི་རང་བཞིན་ཤེས་བྱའི་ཚུལ་ལ་རྣམ་སངས་རྒྱས། །འཕགས་ལམ་དྲི་མ་མེད་པ་ཐམས་ཅད་ཡོངས༌བསྒོམ་སྟེ། །འགྲོ་བ་མ་ལུས་རྣམ་པར་སྦྱོང་ཞིང་ཡོངས་སུ་འབྱུང་། །ཐམས་ཅད་མཁྱེན་པའི་ཡེ་ཤེས་དྲི་མེད་རྟོགས་མཛད་པས། །ཁྱོད་ནི་སེམས་ཅན་རྒྱ་མཚོའི་མཆོག་ལས་མངོན་པར་སྐྱེས། །ཁྱེད་ནི་ཆོས་དབྱིངས༌ཁོངས་ཆུད་སེམས་ཅན་ཀུན་ཁྱབ་པར། །ཆོས་རབ་བསྟན་ཅིང་འཇིག་རྟེན་འཇིགས་པ་ཞི་བར་མཛད། །ཁྱོད་ནི་རྣམ་པར་སྣང་མཛད་སྨོན་ལམ་ལམ་ཚུལ་གྱིས། །ཡང་དག་བཞུད་ཅིང་ཆགས་མེད་བློ་ཡང་དྲི་མེད་ལྡན། །ཐམས་ཅད་བགྲོད་པའི་རྒྱལ༌བའི་སྟབས་ནི་ཐུགས་ཆུད་ཅིང་། །ཞིང་རྣམས་ཀུན་གྱི་རྒྱལ་བ་རྣམ་པར་འཕྲུལ་པ་གཟིགས། །ཁྱོད་ཀྱི་ཐུགས་ནི་མཁའ་འདྲ་ཐུབ་པར་དཀའ་བ་སྟེ། །ཉོན་མོངས་ཀུན་གྱི་དྲི་མས་མ་གོས་སྔ་ནས་དག །དེར་ནི་དུས་གསུམ་བྱུང་བའི་ཞིང་རྣམས་ཐམས་ཅད་དང་། །སངས་རྒྱས་སྲས་དང་བཅས་པ་སེམས་ཅན་ཀུན་བཅས་འདུས། །སྐད་ཅིག་གཅིག་གིས་ཉིན་མཚན་ཡུད་དུ་ཟླ་བ་དང་། །སྐད་ཅིག་ཡུད་ཙམ་ལོ་དང་འདུ་འཇིག་བསྐལ་པ་དང་། །བསྐལ་པ་རྒྱ་མཚོ་མིང་གྲངས་རྒྱ་མཚོར་བཅས་པ་དང་། །འགྲོ་བ་རྣམས་ཀྱི་འདུ་ཤེས་རྒྱ་མཚོའང་ཐུགས་སུ་ཆུད། །ཕྱོགས་རྣམས་ཀུན་གྱི་སེམས་ཅན་སྐྱེ་འཆི་ཇི་སྙེད་དང་། །གཟུགས་ཡོད་པ་དང་གཟུགས་མེད་འདུ་ཤེས་ཡོད་མེད་ཀྱི། །རྣམ་སྤྱོད་བདེན་པའི་ཚུལ་ནི་ཐུགས་སུ་ཆུད་མཛད་ཅིང་། །དེ་དག་ལམ་བསྟན་བྱང་ཆུབ༌མཆོག་ཏུ་འགོད་པ་མཛད། །རྣམ་པར་སྣང་མཛད་སྨོན་ལམ་འདྲི་བའི་རིགས་ལས་འབྱུང་། །བདེ་གཤེགས་ཀུན་གྱི་སྐུ་གཅིག་ཚུལ་ལས་ཡང་དག༌འཁྲུངས། །ཁྱོད་ནི་ཆོས་སྐུ་ཡོངས་དག་ཐུགས་ལ་ཆགས་མི་མངའ། །འཇིག་རྟེན་ཀུན་ཏུ་སྐུ་གཟུགས་ཡིད་བཞིན་སྟོན་པ་མཛད། །དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ལ་ཚུལ་དང་འདྲ་བའི་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། ཡང་དང་ཡང་བལྟས་ནས་མཚན་མོའི་ལྷ་མོ་གྲོང་ཁྱེར་ཐམས་ཅད་བསྲུང་བ་འབྱུང་བའི་གཟི་བརྗིད་དཔལ་གྱི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་ཁྱེའུ་དཔལ་འབྱུང་དང་བུ་མོ་དཔལ་གྱི་བློ་གྲོས་མ་གཉིས་ཀྱིས་སྒྱུ་མ་ལྟ་བུའི་ཏིང་ངེ་འཛིན་གྱི་ཡོན་ཏན་བརྙེས་ཚུལ་དང་རྒྱལ་བ་བྱམས་པའི་དྲུང་དུ་བྱོན་པར་བསྐུལ་ཞིང་སྨོན་ལམ་དང་སྤྱོད་པ་དང་ཏིང་འཛིན་རེ་རེས་ཆོག་ཤེས་མི་རུང་བ་སོགས་གདམས་པ་རྒྱ་ཆེར་གནང་བའི་སྐོར། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཐར་གྱིས་གྲོང་ཁྱེར་ཡིད་བཟང་པོའི་སྒོར་སོང་སྟེ། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་གང་ན་བ་དེར་ཕྱིན་ནས་དེ་གཉིས་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །

འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་པ་དག་ནི་བྱང་ཆུབ༌སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་འཕགས་པ་དག་གིས་བདག་ལ་བཀའ་སྩལ་དུ་གསོལ། དེ་ནས་ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་བདག་ཅག་གཉིས་ཀྱིས་ནི་བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རྣམ་པ་ཞེས་བྱ་བ་ཐོབ་སྟེ། མངོན་དུ་བྱས་སོ་རིགས་ཀྱི་བུ་དེ་ལྟར་ཁོ་བོ་ཅག་རྣམ་པར་ཐར་པ་འདི་དང་ལྡན་པས། འཇིག་རྟེན་ཐམས་ཅད་སྒྱུ་མའི་རྣམ་པར་རྒྱུ་རྐྱེན་སྒྱུ་མ་ལས་བྱུང་བར་མཐོང་ངོ་། །ལས་དང་ཉོན་མོངས་པ་སྒྱུ་མར་ཤེས་པས། སེམས་ཅན་ཐམས་ཅད་ཀྱང་སྒྱུ་མའི་རྣམ་པར་ཤེས་སོ། །མ་རིག་པ་དང་། སྲིད་པ་དང་། སྲེད་པའི་རྒྱུ་ལས་བྱུང་བས་འགྲོ་བ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཕན་ཚུན་གྱི་རྐྱེན་གྱི་རྒྱུ་ལས་བྱུང་བས་ཆོས་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །

ཕྱིན་ཅི་ལོག་གི༌སྒྱུ་མ་ལས་བྱུང་བས་ཁམས་གསུམ་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཡང་དག་པ་མ་ཡིན་པའི་རྟོག་པའི་རྒྱུས་བསྐྱེད་པས་སེམས་ཅན་ཐམས་ཅད་ཀྱི་ཤི་འཕོ་དང་། འབྱུང་བ་དང་། སྐྱེ་བ་དང་། རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ཀྱང་སྒྱུ་མའི་རྣམ་པར་མཐོང་ངོ་། །འདུ་ཤེས་དང་སེམས་དང་ལྟ་བ་ཕྱིན་ཅི་ལོག་གི་རྒྱུ་ལས་དངོས་པོ་མེད་པའི་འདུ་ཤེས་ཀྱིས་རྨོངས་ཏེ། བྱུང་བས་ཞིང་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །ཡེ་ཤེས་ཀྱིས་སྤོང་བའི༌རྒྱུ་ལས་བརྟག་སྟེ། བསྐྱེད་པས་ཉན་ཐོས་དང་རང་སངས་རྒྱས་ཐམས་ཅད་ཀྱང་སྒྱུ་མའི་རྣམ་པར་མཐོང་ངོ་། །སྒྱུ་མར་མངོན་པར་བསྒྲུབ་པ་ལས་གྲུབ་སྟེ། སྤྲུལ་པའི་སྤྱོད་པ་དང་། འདུལ་བའི་སྒྱུ་མའི་རང་བཞིན་པས་བྱང་ཆུབ་སེམས་དཔའི་སྤྱོད་པ་དང་། སྨོན་ལམ༌གྱིས་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བ་གཅིག་ནས་གཅིག་ཏུ་བརྒྱུད་པ་ཡང་སྒྱུ་མའི་རྣམ་པ་ལྟ་བུར་ཤེས་སོ། །སྨོན་ལམ་དང་ཡེ་ཤེས་སྒྱུ་མས་མངོན་པར་བསྒྲུབས་ཏེ། ཡུལ་བསམ་གྱིས་མི་ཁྱབ་པ་སྒྱུ་མའི་རང་བཞིན༌ཡིན་པས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་དཀྱིལ་འཁོར་ཡང་སྒྱུ་མར་མཐོང་ངོ་། །

རིགས་ཀྱི་བུ་བདག་ཅག་གཉིས་ཀྱིས་ནི་བྱང་ཆུབ་སེམས་དཔའི་རྣམ་པར་ཐར་པ་སྒྱུ་མའི་རང་བཞིན་འདི་ཤེས་པར་ཟད་ན། ཁོ་བོ་ཅག་གིས་བྱང་ཆུབ་སེམས་དཔའ་ལས་སྒྱུ་མ་མཐའ་ཡས་པས་རྣམ་པར་བསྒྲུབས་པའི་དྲ་བ་ཁོང་དུ་ཆུད་པ་རྣམས་ཀྱི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། དེ་ནས་ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མས་ཚོང་དཔོན་གྱི་བུ་ནོར་བཟང་དགེ་བའི་རྩ༌བའི་ཤུགས་དྲག་པོ་བསམ་གྱིས་མི་ཁྱབ་པས་མངོན་པར་བརླན་ནས་རང་གི་རྣམ་པར་ཐར་པའི་ཡུལ་བསྟན་ཏེ།

འདི་སྐད་ཅེས་སྨྲས་སོ། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཕྱོགས་ཀྱི་སྒོའི་གནས་རྒྱ་མཚོའི་འགྲམ་ཞེས་བྱ་བ་དེ་ན་བཟའ་ཤིང་གི་ར་བ་རྒྱན་ཆེན་པོ་ཞེས་བྱ་བ་ཡོད་དེ། དེའི་ནང་ན་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་ཞེས་བྱ་བ་བྱང་ཆུབ་སེམས་དཔའི་དགེ་བའི་རྩ་བ་རྣམ་པར་སྨིན་པ་ལས་མངོན་པར་གྲུབ་པ། བྱང་ཆུབ་སེམས་དཔའི་སེམས་དང་ཡིད་ལ་བྱ་བ་ལས་བྱུང་བ། བྱང་ཆུབ་སེམས་དཔའི་སྨོན་ལམ་ལས་མངོན་པར་སྐྱེས་པ། བྱང་ཆུབ་སེམས་དཔའི་དབང་ལས་བྱུང་བ། བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱི་སྟོབས་ཀྱིས་སྤྲུལ་པ། བྱང་ཆུབ་སེམས་དཔའི་ཐབས་མཁས་པ་ལས་བྱུང་བ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་སྟོབས་ཀྱིས་རྫོགས་པ། བྱང་ཆུབ་སེམས་དཔའི་སྙིང་རྗེ་ཆེན་པོས་སེམས་ཅན་རྣམ་པར་གདུལ་བའི་དོན་དུ་བསྟན་པ། བྱང་ཆུབ་སེམས་དཔའི་བྱིན་གྱི་རླབས་རྣམ་པར་ཕྱེ་བས་བསྒྲུབས་པ། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་གནས་ལ་འཇུག་པའི་རྒྱན་གྱིས་བརྒྱན་པ་ཡོད་དེ།

དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཞེས་བྱ་བ་སྐྱེ་བའི་ས་ལ་གནས་པའི་མི་རྣམས་རྗེས་སུ་གཟུང་བ་དང་། ཕ་དང་མ་དང༌གཉེན་དུ་གྱུར་པ་རྣམས་ཡོངས་སུ་སྨིན་པར༌བྱ་བ་དང་། དེར་སྐྱེས་པའི་བྱང་ཆུབ་སེམས་དཔའ་སྐལ་བ་མཉམ་པ་རྣམས་ཀྱི་ཐེག་པ་ཆེན་པོ་རབ་ཏུ་བརྟན་པར་བྱ་བ་དང་། དེ་མ་ཡིན་པའི་སེམས་ཅན་གཞན་རྣམས་ཀྱང་གར་འོས་པའི་སར་དགེ་བའི་རྩ་བས་ཡོངས་སུ་སྨིན་པར་བྱ་བ་དང་། རང་གི་རྣམ་པར་ཐར་པའི་ཚུལ་ལ་འཇུག་པར་བྱ་བ་ཡོངས་སུ་བསྟན་པ་དང་། བྱང་ཆུབ་སེམས་དཔའི་སྐྱེ་བ་ལ་དབང་བསྒྱུར་བ་ཐམས་ཅད་ཀྱི་རྗེས་སུ་སོང་བ་རབ་ཏུ་བརྗོད་པ་དང་། སེམས་ཅན་ཐམས་ཅད་ཀྱི་སྐྱེ་བ་ཡོངས་སུ་བསྟན་པ་ལ་མངོན་པར་གཞོལ་བར་བྱ་བས་སེམས་ཅན་ཡོངས་སུ་སྨིན་པར་བྱ་བ་མི་གཏང་བ་དང་། འགྲོ་བ་ཐམས་ཅད་ཡོངས་སུ་གཟུང་བ་མི་སྨད་པས་བྱང་ཆུབ་སེམས་དཔའི་སྙིང་རྗེ་ཆེན་པོའི་སྟོབས་བསྟན་པར་བྱ་བ་དང་། བྱང་ཆུབ་སེམས་དཔའི་གནས་གཞི་རྟེན་ཐམས་ཅད་ལས་གྱེན་དུ་འཕགས་པ་ཁོང་དུ་ཆུད་པར་བྱ་བ་དང་གནས་མེད་པ་ལ་གཞོལ་བར་སྲིད་པར་སྐྱེ་བ་ཐམས་ཅད་ན་གནས་པ་ཡོངས་སུ་བསྟན་པའི་དོན་དུ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་དྲི་བ་དང་། ཇི་ལྟར༌བྱང་ཆུབ་སེམས་དཔས་བྱང་ཆུབ་སེམས་དཔའི་ལམ་ཡོངས་སུ་དག་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་བསླབ་པ་ལ་ནན་ཏན་དུ་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་ཀྱི་སེམས་ཡོངས་སུ༌སྦྱང་བར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ཚོགས་ཡོངས་སུ་བསགས་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ས་ཡོངས་སུ་གནོན་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་བཟོད་པ་ལ་འཇུག་པར་བྱ་བ་དང་། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་ནན་ཏན་གྱི་ཡོན་ཏན་ལ་གནས་པར་བྱ་བ་དང་། ཇི་ལྟར་བྱང་ཆུབ་སེམས་དཔས་དགེ་བའི་བཤེས་གཉེན་བསྙེན་བཀུར་བར་བྱ་བ་དྲིས་ཤིག །

དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་བྱམས་པ་ཞེས་བྱ་བ་དེ་ནི། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་ཞུགས་པའོ། །དེ་ནི་སེམས་ཅན་ཐམས་ཅད་ཀྱི་སེམས་དང་བསམ་པ་རྟོགས་པར་ཁོང་དུ་ཆུད་པའོ། །དེ་ནི་སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་ཞུགས་པའོ། །དེ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མངོན་དུ་གྱུར་པའོ། །དེ་ནི་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱས་པའོ། །དེ་ནི་བྱང་ཆུབ་སེམས་དཔའི་ས་ཐམས་ཅད་ལ་རབ་ཏུ་གནས་པའོ། །དེ་ནི་བྱང་ཆུབ་སེམས་དཔའི་བཟོད་པ་ཐམས་ཅད་རབ་ཏུ་ཐོབ་པའོ། །དེ་ནི་བྱང་ཆུབ་སེམས་དཔའི་སྐྱོན་མེད་པར་ཞུགས་པའོ། །དེ་ནི་ལུང་བསྟན་པ་ཐམས་ཅད་ཡང་དག་པར༌བླང་བའོ། །དེ་ནི་བྱང་ཆུབ་སེམས་དཔའི་རྣམ་པར་ཐར་པ་ཐམས་ཅད་ལ་རྣམ་པར༌རྩེ་བའོ། །དེ་ནི་སངས་རྒྱས་ཀྱི་བྱིན་གྱི་རླབས་ཐམས་ཅད་ཡོངས་སུ༌བླང་བའོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་དབང་བསྐུར་བས་མངོན་པར་དབང་བསྐུར་བའོ། །

རིགས་ཀྱི་བུ་དགེ་བའི་བཤེས་གཉེན་དེ་ཁྱོད་ལ་དགེ་བའི་རྩ་བ་ཐམས་ཅད་ཀྱིས་ནི་མངོན་པར་བརླན་པར་བྱེད་དོ། །བྱང་ཆུབ་ཏུ་སེམས་བསྐྱེད་པ་ནི་རྣམ་པར་འཕེལ་བར་བྱེད་དོ། །ལྷག་པའི་བསམ་པའི་དབྱིངས་ནི་རབ་ཏུ་བརྟན་པར་བྱེད་དོ། །དགེ་བའི་རྩ་བ་ཐམས་ཅད་ནི་ཤིན་ཏུ་བྱང་བར་བྱེད་དོ། །བྱང་ཆུབ་སེམས་དཔའི་དབང་པོའི་ཤུགས་ནི་ཡང་དག་པར་འཕེལ་བར་བྱེད་དོ། །ཆོས་ཀྱི་ཕྱོགས་བསྒྲིབས་པ་མེད་པ་ནི་ཡོངས་སུ་སྟོན་པར་བྱེད་དོ། །གཞི་ཀུན་ཏུ་ཟུག་པའི་ས་ཁོང་དུ་ཆུད་པར་བྱ་བ་ནི་རྟོགས་པར་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་སར་འབྱུང་བའི་སྒོ་ལ་ནི་གཞོག་པར་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་དང་། སྨོན་ལམ་གྱི་ཡོན་ཏན་ཡོངས་སུ་གྲུབ་པ་ནི་ཡང་དག་པར་རྫོགས་པར་འགྱུར་རོ། །བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ༌ཐོབ་པར་བྱ་བའི་སྐྱེ་བའི་སྒོ་ནི་ཡོངས་སུ་སྟོན་པར་འགྱུར་གྱིས། རིགས་ཀྱི་བུ་ཁྱོད་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག །ཆོས་ཀྱི་སྒོའི་འོད་སྣང་བ་གཅིག་ལ་གཞོལ་བར་མ་བྱེད་ཅིག །སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་སེམས་ཤིག ། སྨོན་ལམ་གཅིག་པུ་མངོན་པར་བསྒྲུབ་པ་ལྷུར་མ་ལེན་ཅིག །ལུང་བསྟན་པ་གཅིག་གིས་མཐར་ཐུག་པས་རྒྱུན་གཅད་པར་མ་བྱེད་ཅིག །བཟོད་པ་གསུམ་ལ་འཇུག་པས་ཆོག་པར་བྱ་བའི་འདུ་ཤེས་སུ་མ་བྱེད་ཅིག །ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བ་རྒྱུན་མ་གཅོད་ཅིག །ས་བཅུ་ཐོབ་པས་མཐར་ཐུག་པར་མ་བྱེད་ཅིག །སངས་རྒྱས་ཀྱི་ཞིང་ཚད་ཡོད་པ་ཡོངས་སུ་གཟུང་བ་དང་། ཡོངས་སུ་དག་པར་བྱ་བ་མ་སྨོན་ཅིག །དགེ་བའི་བཤེས་གཉེན་ཚད་ཡོད་པ་དགའ་བར་བྱ་བ་དང་། བསྙེན་བཀུར་བས་ངོམས་པར་མ་བྱེད་ཅིག །

དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔས་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །བྱང་ཆུབ་སེམས་དཔའི་ཚོགས་ཚད་མེད་པ་ཤིན་ཏུ་བསྒྲུབ་དགོས་སོ། །བྱང་ཆུབ་སེམས་དཔའི་སེམས་ཀྱི་རྒྱུ་ཚད་མེད་པ་ཡོངས་སུ་བསགས་དགོས་སོ། །ཡོངས་སུ་བསྔོ་བའི་ཚུལ་ཚད་མེད་པ་ལ་བསླབ་པར་བྱ་དགོས་སོ། །སེམས་ཅན་གྱི་ཁམས་ཚད་མེད་པ་ཡོངས་སུ་སྨིན་པར་བྱ་དགོས་སོ། །སེམས་ཅན་གྱི་བསམ་པའི་ཁམས་ཚད་མེད་པ་ལ་འཇུག་པར་བྱ་དགོས་སོ། །སེམས་ཅན་གྱི་དབང་པོ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་མོས་པ་ཚད་མེད་པའི་རྗེས་སུ་འབྲང་བར་བྱ་དགོས་སོ། །སེམས་ཅན་གྱི་སྤྱོད་པ་ཚད་མེད་པ་ཁོང་དུ་ཆུད་པར་བྱ་དགོས་སོ། །སེམས་ཅན་ཚད་མེད་པ་གདུལ་བར་བྱ་དགོས་སོ། །ཉོན་མོངས་པ་དང་བག་ལ་ཉལ་བ་ཚད་མེད་པ་ཡང་དག་པར་གཞོམ་དགོས་སོ། །ལས་ཀྱི་སྒྲིབ་པ་ཚད་མེད་པ་ཡོངས་སུ་སྦྱང་དགོས་སོ། །ལྟ་བའི་རྣམ་པ་ཚད་མེད་པ་རྣམ་པར་བཟློག་དགོས་སོ། །སེམས་ཀྱི་ཀུན་ནས་ཉོན་མོངས་པ་ཚད་མེད་པ་བསྩལ་བར་བྱ་དགོས་སོ། །སེམས་རྣམ་པར་དག་པ་ཚད་མེད་པ་བསྐྱེད་པར་བྱ་དགོས་སོ། །སྡུག་བསྔལ་གྱི་ཟུག་རྔུ་ཚད་མེད་པ་ཡང་དག་པར་དབྱུང་དགོས་སོ། །སྲིད་པའི་རྒྱ་མཚོ་ཚད་མེད་པ་ཡོངས་སུ་བསྐམ་པར་བྱ་དགོས་སོ། །མ་རིག་པའི་མུན་པ་ཚད་མེད་པ་རྣམ་པར་བསལ་དགོས་སོ། །ང་རྒྱལ་གྱི་རི་ཚད་མེད་པ་རབ་ཏུ་བསྙིལ་དགོས་སོ། །འཁོར་བའི་བཅིངས་པ་ཚད་མེད་པ་ཤིན་ཏུ་གཏུབ་དགོས་སོ། །སྲིད་པའི་ཆུ་བོ་ཚད་མེད་པ་བརྒལ་དགོས་སོ། །ཚེའི་རྒྱ་མཚོ་ཚད་མེད་པ་བསྐམ་དགོས་སོ། །

སེམས་ཅན་འདོད་པའི་འདམ་དུ་ཐོགས་པ་ཚད་མེད་པ་ཡོངས་སུ་དགྲོལ་དགོས་སོ། །སེམས་ཅན་ཁམས་གསུམ་གྱི་ཁྱིམ་དུ་ཐོགས་པ་ཚད་མེད་པ་གདོན་པར་བྱ་དགོས་སོ། །སེམས་ཅན་ཚད་མེད་པ་འཕགས་པའི་ལམ་ལ་དགོད་དགོས་སོ། །འདོད་ཆགས་དང་ཞེ་སྡང་དང་གཏི་མུག་གི་སྤྱོད་པ་ཚད་མེད་པ་རབ་ཏུ་ཞི་བར་བྱ་དགོས་སོ། །བདུད་ཀྱི་ཞགས་པ་ཚད་མེད་པ་ལས་ཡང་དག་པར༌འདའ་བར་བྱ་དགོས་སོ། །བདུད་ཀྱི་ལས་ཚད་མེད་པ་རྣམ་པར་བཟློག་དགོས་སོ། །བྱང་ཆུབ་སེམས་དཔའི་ལྷག་པའི་བསམ་པའི་ཁམས་ཚད་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔའི་སྦྱོར་བ་ཚད་མེད་པ་རྣམ་པར་འཕེལ་བར་བྱ་དགོས་སོ། །བྱང་ཆུབ་སེམས་དཔའི་དབང་པོ་ཚད་མེད་པ་ཡོངས་སུ་བསྐྱེད་དགོས་སོ། །བྱང་ཆུབ་སེམས་དཔའི་མོས་པ་ཚད་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔའི་མཉམ་པ་ཉིད་ཚད་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་པའི་ཁྱད་པར་ཚད་མེད་པའི་རྗེས་སུ་འབྲང་བར་བྱ་དགོས་སོ། །བྱང་ཆུབ་སེམས་དཔའི་ཡོན་ཏན་ཚད་མེད་པ་ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་བྱ་བའི་སྤྱོད་པ་ཚད་མེད་པ་ཡོངས་སུ་རྫོགས་པར་བྱ་དགོས་སོ། །འཇིག་རྟེན་གྱི་སྤྱོད་པ་ཚད་མེད་པའི་རྗེས་སུ་འབྲང་བར་བྱ་དགོས་སོ། །འཇིག་རྟེན་གྱི་རྗེས་སུ་འབྲང་བ་ཚད་མེད་པ་ཡོངས་སུ་བསྟན་དགོས་སོ། །དད་པའི་སྟོབས་ཚད་མེད་པ་ཡོངས་སུ་བསྐྱེད་དགོས་སོ། །བརྩོན་འགྲུས་ཀྱི་སྟོབས་ཚད་མེད་པ་ཉེ་བར་བརྟན་དགོས་སོ། །

དྲན་པའི་སྟོབས་ཚད་མེད་པ་ཡོངས་སུ་དག་པར་བྱ་དགོས་སོ། །ཏིང་ངེ་འཛིན་གྱི་སྟོབས་ཚད་མེད་པ་ཡོངས་སུ་རྫོགས་པར་བྱ་དགོས་སོ། །ཤེས་རབ་ཀྱི་སྟོབས་ཚད་མེད་པ་བསྐྱེད་པར་བྱ་དགོས་སོ། །མོས་པའི་སྟོབས་ཚད་མེད༌པ་བརྟན་པར་བྱ་དགོས་སོ། །བསོད་ནམས་ཀྱི་སྟོབས་ཚད་མེད་པ་ཡང་དག་པར་བསྒྲུབ་དགོས་སོ། །ཡེ་ཤེས་ཀྱི་སྟོབས་ཚད་མེད་པ་རྣམ་པར་སྤེལ་དགོས་སོ། །བྱང་ཆུབ་སེམས་དཔའི་སྟོབས་ཚད་མེད་པ་ཡང་དག་པར་བསྒྲུབ་དགོས་སོ། །སངས་རྒྱས་ཀྱི་སྟོབས་ཚད་མེད་པ་ཡོངས་སུ་རྫོགས་པར་བྱ་དགོས་སོ། །ཆོས་ཀྱི་སྒོ་ཚད་མེད་པ་རབ་ཏུ་དབྱེ་དགོས་སོ། །ཆོས་ཀྱི་ཕྱོགས་ཚད་མེད་པ་ལ་འཇུག་པར་བྱ་དགོས་སོ། །ཆོས་ཀྱི་སྒོ་ཚད་མེད་པ་ཡོངས་སུ་སྦྱང་དགོས་སོ། །ཆོས་ཀྱི་སྣང་བ་ཚད་མེད་པ་ཡང་དག་པར་བསྐྱེད་དགོས་སོ། །ཆོས་ཀྱི་གསལ་བ་ཚད་མེད་པ་རབ་ཏུ་བྱ་དགོས་སོ། །དབང་པོའི་རྒྱུད་ཚད་མེད་པ་སྣང་བར་བྱ་དགོས་སོ། །ཉོན་མོངས་པའི་ནད་ཚད་མེད་པ་ཡོངས་སུ་ཤེས་པར་བྱ་དགོས་སོ། །ཆོས་ཀྱི་སྨན་ཚད་མེད་པ་ཡང་དག་པར་བསྡུ་དགོས་སོ། །ཉོན་མོངས་པའི་ནད་ཀྱིས་བཏབ་པའི་སེམས་ཅན་གྱི་ཁམས་ཚད་མེད་པ་གསོ་དགོས་སོ། །བདུད་རྩིའི་ཚོགས་ཚད་མེད་པ་ཡང་དག་པར་བསྡུ་བར་བྱ་དགོས་སོ། །སངས་རྒྱས་ཀྱི་ཞིང་ཚད་མེད་པ་འདའ་བར་བྱ་དགོས་སོ། །དེ་བཞིན་གཤེགས་པ་ཚད་མེད་པ་མཆོད་དགོས་སོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཚད་མེད་པར་འཇུག་པར་བྱ་དགོས་སོ། །

དེ་བཞིན་གཤེགས་པའི་བསྟན་པ་ཚད་མེད་པ་ཡོངས་སུ་གཟུང་དགོས་སོ། །སེམས་ཅན་གྱི་གནོད་པ༌ཚད་མེད་པ་བཟོད་པར་བྱ་དགོས་སོ། །མི་ཁོམ་པ་དང་ངན་སོང་གི་ལམ་ཚད་མེད་པ་ཡོངས་སུ་གཅད་དགོས་སོ། །སེམས་ཅན་གྱི་བདེ་བ་ཚད་མེད་པ་ཉེ་བར་བསྒྲུབ་དགོས་སོ། །སེམས་ཅན་བསྡུ་བ་ཚད་མེད་པ་བྱ་དགོས་སོ། །གཟུངས་ཀྱི་སྒོ་ཚད་མེད་པ་ཡོངས་སུ་སྦྱང་དགོས་སོ། །སྨོན་ལམ་གྱི་སྒོ་ཚད་མེད་པ་མངོན་པར་བསྒྲུབ་དགོས་སོ། །བྱམས་པ་ཆེན་པོ་དང་། སྙིང་རྗེ་ཆེན་པོའི་སྟོབས་ཚད་མེད་པ་ཡོངས་སུ་བསྒོམ་དགོས་སོ། །ཆོས་ཡོངས་སུ་བཙལ་བ་ལ་བརྩོན་པར་བྱ་བ་ཚད་མེད་པ་རྒྱུན་མི་གཅད་པར་བྱ་དགོས་སོ། །ངེས་པར་རྟོགས་པའི་སྟོབས་ཚད་མེད་པའི་རྗེས་སུ་འཇུག་དགོས་སོ། །མངོན་པར་ཤེས་པ་མངོན་དུ་བསྒྲུབ་པ་ཚད་མེད་པ་བསྐྱེད་དགོས་སོ། །རིག་པ་དང་ཡེ་ཤེས་ཀྱི་སྣང་བ་ཚད་མེད་པ་རྣམ་པར་དག་པར་བྱ་དགོས་སོ། །སེམས་ཅན་གྱི་རྒྱུད་ཚད་མེད་པའི་རྗེས་སུ་འགྲོ་བར་བྱ་དགོས་སོ། །སྲིད་པར་སྐྱེ་བ་ཚད་མེད་པ་ཡོངས་སུ་གཟུང་དགོས་སོ། །ལུས་རྣམ་པར་ཕྱེ་བ་ཚད་མེད་པ་ཡོངས་སུ་བསྟན་དགོས་སོ། །སྐད་རྣམ་པར་ཕྱེ་བ་ཚད་མེད་པ་ཡོངས་སུ་ཤེས་པར་བྱ་དགོས་སོ། །སེམས་ཅན་གྱི་སེམས་རྣམ་པ་ཐ་དད་པ་ཚད་མེད་པ་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་ཡུལ་རྒྱ་ཆེན་པོའི་རྗེས་སུ་འཇུག་པར་བྱ་དགོས་སོ། །བྱང་ཆུབ་སེམས་དཔའི་གནས་ཤིན་ཏུ་ཡངས་པར་རྗེས་སུ་སྤྱད་དགོས་སོ། །བྱང་ཆུབ་སེམས་དཔའི་རྣམ་པར་སྤྱོད་པ་ཟབ་མོ་ལ་རྣམ་པར་བལྟ་དགོས་སོ། །བྱང་ཆུབ་སེམས་དཔའི་ཡུལ་རྟོགས་པར་དཀའ་བ་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་ལམ་བགྲོད་པར་དཀའ་བ་བགྲོད་པར་བྱ་དགོས་སོ། །བྱང་ཆུབ་སེམས་དཔའི་ཤུགས་བསྒྲུབ་པར་དཀའ་བ་ཡོངས་སུ་གཟུང་དགོས་སོ། །བྱང་ཆུབ་སེམས་དཔའི་སྐྱོན་མེད་པ་འཇུག་པར་དཀའ་བ་ལ་འཇུག་པར་བྱ་དགོས་སོ། །བྱང་ཆུབ་སེམས་དཔའི་སྤྱོད་པ་རྣམ་པ་སྣ་ཚོགས་ཁོང་དུ་ཆུད་པར་བྱ་དགོས་སོ། །བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་དུ་ཁྱབ་པ་ཀུན་ཏུ་བསྟན་དགོས་སོ། །བྱང་ཆུབ་སེམས་དཔའི་ཆོས་ཀྱི་སྤྲིན་ཡོངས་སུ་གཟུང་དགོས་སོ། །

བྱང་ཆུབ་སེམས་དཔའི་སྤྱོད་པའི་དྲ་བ་མཐའ་དང་དབུས་མེད་པ་རབ་ཏུ་རྒྱས་པར་བྱ་དགོས་སོ། །བྱང་ཆུབ་སེམས་དཔས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱ་དགོས་སོ། །བྱང་ཆུབ་སེམས་དཔས་ལུང་བསྟན་པ་ཚད༌མེད་པར་ཡང་དག་པར་མནོད་དགོས་སོ། །བྱང་ཆུབ་སེམས་དཔས་བཟོད་པའི་སྒོ་དཔག་ཏུ་མེད་པ་ལ་འཇུག་པར་བྱ་དགོས་སོ། །བྱང་ཆུབ་སེམས༌དཔས་ས་གྲངས་མེད་པ་ཡོངས་སུ༌སྦྱང་བར་བྱ་དགོས་སོ། །བྱང་ཆུབ་སེམས་དཔས་ཆོས་ཀྱི་སྒོ་དཔག་ཏུ་མེད་པ་ཡོངས་སུ་དག་པར་བྱ་དགོས་སོ། །བྱང་ཆུབ་སེམས་དཔས་སངས་རྒྱས་ཀྱི་ཞིང་བརྗོད་དུ་མེད་པ་ཡོངས་སུ་སྦྱང་དགོས་སོ། །བྱང་ཆུབ་སེམས་དཔས་བསྐལ་པ་མཐའ་ཡས་པར་གོ་ཆ་བགོ་དགོས་སོ། །བྱང་ཆུབ་སེམས་དཔས་དེ་བཞིན་གཤེགས་པ་དཔག་ཏུ་མེད་པ་མཆོད་པར་བྱ་དགོས་སོ། །བྱང་ཆུབ་སེམས་དཔས་སྨོན་ལམ་མངོན་པར་བསྒྲུབ་པ་བསམ་གྱིས་མི་ཁྱབ་པ་མངོན་པར་བསྒྲུབ་དགོས་སོ། །

རིགས་ཀྱི་བུ་མདོར་ན་སེམས་ཅན་ཐམས་ཅད་ཡོངས་སུ་སྨིན་པར་བྱེད་པས་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་སེམས་ཅན་ཐམས་ཅད་དང་མཉམ་པར་བསྟན་ཏོ། །བསྐལ་པ་ཐམས་ཅད་དུ་གནས་པས་བསྐལ་པ་ཐམས་ཅད་དང་མཉམ་པར་བསྟན་ཏོ། །ཐམས་ཅད་དུ་སྐྱེ་བ་ཡོངས་སུ་སྟོན་པས་སྐྱེ་བ་ཐམས་ཅད་དང་མཉམ་པར་བསྟན་ཏོ། །དུས་གསུམ་གྱི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་དུས་ཐམས་ཅད་དང་མཉམ་པར་བསྟན་ཏོ། །ཆོས་ཐམས་ཅད་ལ་ནན་ཏན་དུ་བྱེད་པས་ཆོས་ཐམས་ཅད་དང་མཉམ་པར་བསྟན་ཏོ། །ཞིང་ཐམས་ཅད་ཡོངས་སུ་དག་པར་བྱེད་པས་ཞིང་ཐམས་ཅད་དང་མཉམ་པར་བསྟན་ཏོ། །

སྨོན་ལམ་ཐམས་ཅད་ཡོངས་སུ་རྫོགས་པར་བྱེད་པས། སྨོན་ལམ་ཐམས་ཅད་དང་མཉམ་པར་བསྟན་ཏོ། །སངས་རྒྱས་ཐམས་ཅད་མཆོད་པ་མངོན་པར་བསྒྲུབ་པས། སངས་རྒྱས་ཐམས་ཅད་དང་མཉམ་པར་བསྟན་ཏོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་དང་གཅིག་ཏུ༌འགྱུར་བའི་ཕྱིར། བྱང་ཆུབ་སེམས་དཔའ་ཐམས་ཅད་དང་མཉམ་པར་བསྟན་ཏོ། །དགེ་བའི་བཤེས་གཉེན་ཐམས་ཅད་ལ་བསྙེན་བཀུར་བྱེད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་དགེ་བའི་བཤེས་གཉེན་ཐམས་ཅད་དང་མཉམ་པར་བསྟན་ཏོ། །རིགས་ཀྱི་བུ་དེ་བས་ན་ཁྱོད་ཀྱིས་དགེ་བའི་བཤེས་གཉེན་ཡོངས་སུ་བཙལ་བ་ལ་སྐྱོ་བར་མི་བྱའོ། །དགེ་བའི་བཤེས་གཉེན་མཐོང་བས་ངོམས་པ་བསྐྱེད་པར་མི་བྱའོ། །དགེ་བའི་བཤེས་གཉེན་ལ་ཡོངས་སུ༌དྲི་བས་ཆོག་ཤེས་པར་མི་བྱའོ། །དགེ་བའི་བཤེས་གཉེན་དང་འགྲོགས་པ་ལས་བསམ་པ་ཕྱིར་ལྡོག་པར་མི་བྱའོ། །དགེ་བའི་བཤེས་གཉེན་ལ་ཕུ་དུད་དང་། རིམ༌གྲོའི་སྦྱོར་བ་རྒྱུན་གཅད་པར་མི་བྱའོ། །དགེ་བའི་བཤེས་གཉེན་གྱི་གདམས་ངག་དང་། རྗེས་སུ་བསྟན་པ་ལ་ལོག་པར་གཟུང་བར་མི་བྱའོ། །དགེ་བའི་བཤེས་གཉེན་གྱི་ཡོན་ཏན་ཐོབ་པར་འགྱུར་བ་ལ་ཐེ་ཚོམ་མི་བསྐྱེད་དོ། །དགེ་བའི་བཤེས་གཉེན་གྱིས་འབྱུང་བའི་སྒོ་བསྟན་པ་ལ་ཡིད་གཉིས་སུ་མི་བྱའོ། །དགེ་བའི་བཤེས་གཉེན་གྱི་ཐབས་ཀྱི་བསམ་པ་དང་། འཇིག་རྟེན་གྱི་རྗེས་སུ་འབྲང་བར་བྱ་བའི་རྒྱུད་ལ་ཞེ་སྡང་བསྐྱེད་པར་མི་བྱའོ། །དགེ་བའི་བཤེས་གཉེན་ལ་མོས་པ་རྣམ་པར་བསྐྱེད་པས་ལུས་དང་སེམས་རྣམ་པར་ལྡོག་པར་མི་བྱའོ། །

དེ་ཅིའི་ཕྱིར་ཞེ་ན། རིགས་ཀྱི་བུ༌བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཐམས་ཅད་ཐོས་པ་ནི་དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་པར་བྱ་བ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་སྨོན་ལམ་གྱི་རྒྱུན་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་ཚོགས་ཐམས་ཅད་ནི་དགེ་བའི་བཤེས་གཉེན་གྱིས་བསྒྲུབས་པའོ། །བྱང་ཆུབ་སེམས༌དཔའི་ཆོས་ཀྱི་སྒོ་སྣང་བ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་འབྱུང་བའི་སྒོ་རྣམ་པར་དག་པ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའི་བསླབ་པ་ལ་ནན་ཏན་དུ་བྱ་བ་ཐམས་ཅད་ནི་དགེ་བའི་བཤེས་གཉེན་ལ་རག་ལས་པའོ། །བྱང་ཆུབ་སེམས་དཔའི་ཡོན་ཏན་གྱི་ཆོས་ཐམས་ཅད་ནི་དགེ་བའི་བཤེས་གཉེན་ལ་གནས་པའོ། །བྱང་ཆུབ་སེམས་དཔའི་ལྷག་པའི་བསམ་པ་ཡོངས་སུ་དག་པ་ཐམས་ཅད་ནི་དགེ་བའི་བཤེས་གཉེན་རྩ་བར་གྱུར་པའོ། །

བྱང་ཆུབ་སེམས་དཔའི་སེམས་བསྐྱེད་པ་བརྟན་པ་ཐམས་ཅད་ནི་དགེ་བའི་བཤེས་གཉེན་ལས་སྐྱེས་པའོ། །བྱང་ཆུབ་སེམས་དཔའི་གཟུངས་དང་སྤོབས་པའི་སྒོ་སྣང་བ་ཐམས་ཅད་དུ་ཁྲིད་པ་ནི་དགེ་བའི་བཤེས་གཉེན་ནོ། །བྱང་ཆུབ་སེམས་དཔའི་རྣམ་པར་དག་པའི་སྒོའི་མཛོད་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའི་ཡེ་ཤེས་སྣང་བ་ཐམས་ཅད་ནི་དགེ་བའི་བཤེས་གཉེན་གྱིས་ཡང་དག་པར་བསྐྱེད་པའོ། །བྱང་ཆུབ་སེམས་དཔའི་སྨོན་ལམ་ཁྱད་པར་ཅན་ཐམས་ཅད་ནི་དགེ་བའི་བཤེས་གཉེན་གྱི་ལག་ན་འདུག་པའོ། །བྱང་ཆུབ་སེམས་དཔའི་སྨོན་ལམ་གྱི་ཚུལ་གྱི་རྒྱུད་གཅིག་ཏུ་གྱུར་པ་ཐམས་ཅད་ནི་དགེ་བའི་བཤེས་གཉེན་ལ་བརྟེན་པའོ། །བྱང་ཆུབ་སེམས་དཔའི་ཡང་དག་པར་བསྒྲུབ་པ་ཁྱད་པར་ཅན་མཉམ་པ་ཐམས་ཅད་ནི་དགེ་བའི་བཤེས་གཉེན་གྱི་རྒྱུད་ལས་བྱུང་བའོ། །བྱང་ཆུབ་སེམས་དཔའི་གསང་བའི་གནས་ཐམས་ཅད་ནི་དགེ་བའི་བཤེས་གཉེན་གྱི་མཛོད་ན་འདུག་པའོ། །བྱང་ཆུབ་སེམས་དཔའི་ཆོས་ཐམས་ཅད་ནི་དགེ་བའི་བཤེས་གཉེན་གྱི་འབྱུང་གནས་ནས་བྱུང་བའོ། །བྱང་ཆུབ་སེམས་དཔའི་དབང་པོའི་ཤུགས་ཀྱི་མྱུ་གུ་ཐམས་ཅད་ནི་དགེ་བའི་བཤེས་གཉེན་གྱིས་རྣམ་པར་སྤེལ་བའོ། །བྱང་ཆུབ་སེམས་དཔའི་ཡེ་ཤེས་རྒྱ་མཚོ་ཐམས་ཅད་ནི་དགེ་བའི་བཤེས་གཉེན་གྱིས་ཡང་དག་པར་སྤེལ་བའོ། །བྱང་ཆུབ་སེམས་དཔའི་གཏེར་གྱི་མཛོད་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བསྐྱངས་པའོ། །བྱང་ཆུབ་སེམས་དཔའི་བསོད་ནམས་བསགས་པ་ཐམས་ཅད་ནི་དགེ་བའི་བཤེས་གཉེན་གྱིས་བསྲུངས་པའོ། །བྱང་ཆུབ་སེམས་དཔའི་ཚེ་རྣམ་པར་དག་པ་ཐམས་ཅད་ནི་དགེ་བའི་བཤེས་གཉེན་གྱིས་བསྐྱེད་པའོ། །

བྱང་ཆུབ་སེམས་དཔའི་ཆོས་མཉན་པའི་སྤྲིན་ཐམས་ཅད་ནི་དགེ་བའི་བཤེས་གཉེན་གྱི་ཁ་ནས་བྱུང་བའོ། །བྱང་ཆུབ་སེམས་དཔའ་འབྱུང་བའི་ལམ་ལ་འཇུག་པ་ཐམས་ཅད་ནི་དགེ་བའི་བཤེས་གཉེན་གྱི་ཁོང་ན་ཡོད་པའོ། །སངས་རྒྱས་ཐམས་ཅད་ཀྱི་བྱང་ཆུབ་ནི་དགེ་བའི་བཤེས་གཉེན་ལ་རིམ་གྲོ་བྱས་པས་ཐོབ་པའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའི་ཡོན་ཏན་བརྗོད་པ་ཐམས་ཅད་ནི་དགེ་བའི་བཤེས་གཉེན་གྱིས་བསྟན་པའོ། །བྱང་ཆུབ་སེམས་དཔའི་ཆོས་ཀྱི་ཕྱོགས་ཀྱི་རྗེས་སུ་འབྲང་བ་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བསྟན་པའོ། །བྱང་ཆུབ་སེམས་དཔའི་སེམས་དང་ལྷག་པའི་བསམ་པའི་བདག་ཉིད་ཆེ་བ་ནི་དགེ་བའི་བཤེས་གཉེན་གྱིས་ཡང་དག་པར་བརྗོད་པའོ། །བྱང་ཆུབ་སེམས་དཔའ་རྣམས་ཀྱི་བྱམས་པ་ཆེན་པོའི་སྟོབས་ནི་དགེ་བའི་བཤེས་གཉེན་ལས་བྱུང་བའོ། །བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོའི་སྟོབས་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་དབང་ཐམས་ཅད་ནི་དགེ་བའི་བཤེས་གཉེན་གྱིས་ཡོངས་སུ་བཟུང་བའོ། །བྱང་ཆུབ་སེམས་དཔའ་རྣམས་ཀྱི་ཡན་ལག་ཐམས་ཅད་ནི་དགེ་བའི་བཤེས་གཉེན་གྱིས་བསྐྱེད་པའོ། །བྱང་ཆུབ་སེམས་དཔའི་ཕན་པ་ཉེ་བར་བསྒྲུབ་པ་ཐམས་ཅད་ནི་དགེ་བའི་བཤེས་གཉེན་ལས་བྱུང་བའོ། །

རིགས་ཀྱི་བུ་དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་ངན་སོང་དུ་མི་ལྟུང་ངོ་། །དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི་ཐེག་པ་ཆེན་པོ་ལས་མི་ལྡོག་གོ །དགེ་བའི་བཤེས་གཉེན་གྱིས་ཡོངས་སུ་བསམ་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་བསླབ་པ་དང་འགལ་བར་མི་བྱེད་དོ། །དགེ་བའི་བཤེས་གཉེན་གྱིས་ཤིན་ཏུ༌བསྲུངས་པའི་བྱང་ཆུབ་སེམས་དཔའ་རྣམས་ནི་སྡིག་པའི་གྲོགས་པོའི་ལག་ཏུ་མི་འདོང་ངོ་། །

དགེ་བའི་བཤེས་གཉེན་གྱིས་ཡོངས་སུ་བསྐྱངས་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་ཆོས་ལས་ཉམས་པར་མི་འགྱུར་རོ། །དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་སོ་སོའི་སྐྱེ་བོའི་ས་ལས་ཡོངས་སུ་འདའོ། །དགེ་བའི་བཤེས་གཉེན་གྱིས་ཡོངས་སུ་བསྲུངས་པའི་བྱང་ཆུབ་སེམས་དཔའ་རྣམས་ནི་ཉན་ཐོས་དང་རང་སངས་རྒྱས་ཀྱི་སྐྱོན་མེད་པར་མི་འཇུག་གོ །དགེ་བའི་བཤེས་གཉེན་གྱིས་བསྐྱངས་པའི་བྱང་ཆུབ་སེམས་དཔའ་རྣམས་ནི་འཇིག་རྟེན་ལས་མངོན་པར་འཕགས་པ་ཡིན་ནོ། །དགེ་བའི་བཤེས་གཉེན་གྱིས་ཡང་དག་པར་བསྐྱེད་པའི་བྱང་ཆུབ་སེམས་དཔའ་རྣམས་ནི་འཇིག་རྟེན་གྱི་ཆོས་ཀྱིས་མི་གོས་པ་ཡིན་ནོ། །དགེ་བའི་བཤེས་གཉེན་བསྙེན་བཀུར་བའི་བྱང་ཆུབ་སེམས་དཔའ་རྣམས་ནི་སྤྱོད་པ་ཐམས་ཅད་ལ་མི་འཁྲུལ་པར་སྤྱོད་པ་ཡིན་ནོ། །དགེ་བའི་བཤེས་གཉེན་གྱིས་བསྒྲུབས་པའི་བྱང་ཆུབ་སེམས་དཔའ་རྣམས་ནི༌བརྩམ་པ་ཐམས་ཅད་ལས་ཕྱིར་མི་ལྡོག་གོ །དགེ་བའི་བཤེས་གཉེན་གྱིས་ཡོངས་སུ་བཟུང་བའི་བྱང་ཆུབ་སེམས་དཔའ་རྣམས་ནི་ལས་དང་ཉོན་མོངས་པས་ཐུབ་པར་དཀའ་བ་ཡིན་ནོ། །

དགེ་བའི་བཤེས་གཉེན་གྱི་སྟོབས་ཀྱིས་བརྟན་པའི་བྱང་ཆུབ་སེམས་དཔའ་རྣམས་ནི་བདུད་ཐམས་ཅད་ཀྱིས་མི་ཐུབ་པ་ཡིན་ནོ། །དགེ་བའི་བཤེས་གཉེན་གྱི་རྟེན་ལ་གནས་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་ཀྱི་ཡན་ལག་ཐམས་ཅད་ཀྱིས་རྣམ་པར་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ་དགེ་བའི་བཤེས་གཉེན་ནི༌བསྒྲིབ་པར་འགྱུར་བའི་ཆོས་ཐམས་ཅད་ལས་རྣམ་པར༌སྦྱོང་བའོ། །དགེ་བའི་བཤེས་གཉེན་ནི་སྡིག་ཏོ་ལས་རྣམ་པར་བཟློག་པའོ། །དགེ་བའི་བཤེས་གཉེན་ནི་མི་བྱ་བ་རྣམས་ཁོང་དུ་ཆུད་པར་བྱེད༌པའོ། །བག་མེད་པའི་གནས་ལས་ཡང་དག་པར་བཟློག་པའོ། །མ་རིག་པའི་མུན་པ་རྣམ་པར་སེལ་བའོ། །ལྟ་བའི་འཆིང་བ༌འཐུབ་པའོ། །འཁོར་བའི་གྲོང་ཁྱེར་ནས་འདོན་པའོ། །འཇིག་རྟེན་གྱི་གནས་འདོར་བར་བྱེད་པའོ། །བདུད་ཀྱི་ཞགས་པ་ལས་ཐར་བར་བྱེད་པའོ། །སྡུག་བསྔལ་གྱི་ཟུག་རྔུ་འབྱིན་པའོ། །མི་ཤེས་པའི་ཐིབས་པོ་ལས་ཐར་བར་བྱེད་པའོ། །ལྟ་བའི་མྱ་ངན་ལས་ཡོངས་སུ༌ཟློ་བའོ། །སྲིད་པའི་ཆུ་བོ་ལས་སྒྲོལ་བའོ། །འདོད་པའི་འདམ་ནས་འབྱིན་པའོ། །ལམ་མི་བདེ་བ་ནས་རྣམ་པར་ཟློག་པའོ། །བྱང་ཆུབ་སེམས་དཔའི་ལམ་ཡང་དག་པར་སྟོན་པའོ། །བྱང་ཆུབ་སེམས་དཔའི་ཡི་དམ་ལ་གཞོག་པའོ། །ནན་ཏན་ལ་རབ་ཏུ་འགོད་པའོ། །ཐམས་ཅད་མཁྱེན་པ་ཉིད་དུ་འགྲོ་བའི་ཕྱོགས་རབ་ཏུ་སྟོན་པའོ། །ཤེས་རབ་ཀྱི་མིག༌རྣམ་པར་སྦྱོང་བའོ། །བྱང་ཆུབ༌ཀྱི་སེམས་རྣམ་པར་འཕེལ་བར་བྱེད་པའོ། །སྙིང་རྗེ་ཆེན་པོ་ཡང་དག་པར་སྐྱེད་པའོ། །སྤྱོད་པ་ཡོངས་སུ་སྟོན་པའོ། །ཕ་རོལ་ཏུ་ཕྱིན་པའི་གདམས་ངག་རབ་ཏུ་སྟོན་པའོ། །ས་ལ་རབ་ཏུ་འགོད་པའོ། །བཟོད་པ་རྣམ་པར་འབྱེད་པའོ། །དགེ་བའི་རྩ་བ་ཐམས་ཅད་ཡོངས་སུ་འགྲུབ་པར་བྱེད་པའོ། །ཚོགས་ཐམས་ཅད་སྐྱེད་པར་བྱེད་པའོ། །བྱང་ཆུབ་སེམས་དཔའི་ཡོན་ཏན་ཐམས་ཅད་སྟོབས་པའོ། །སངས་རྒྱས་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པར་བྱེད་པའོ། །

ཡོན་ཏན་ཐམས་ཅད་ཡོངས་སུ་སྟོན་པའོ། །དོན་ཐམས་ཅད་ཡང་དག་པར་ལེན་དུ་འཇུག་པའོ། །ནན་ཏན་ལ་གཟེངས་བསྟོད་པའོ། །འབྱུང་བའི་སྒོ་སྟོན་པའོ། །ལམ་གོལ་བ་ལས་ཡོངས་སུ་སྲུང་བའོ། །ཆོས་སྣང་བའི་སྒོ་སྣང་བར་བྱེད་པའོ། །ཆོས་ཀྱི་སྒོ་མངོན་པར་བརླན་པར་བྱེད་པའོ། །ཆོས་ཐོས་པར་བྱ་བའི་སྤྲིན་གྱི་ཆར་རབ་ཏུ་འབེབས་པའོ། །ཉོན་མོངས་པ་ཐམས་ཅད་ཞི་བར་བྱེད་པའོ། །ལྟ་བའི་རྣམ་པ་ཐམས་ཅད་ལས༌རྣམ་པར་ཟློག་པའོ། །སངས་རྒྱས་ཀྱི་ཆོས་ཐམས་ཅད་ལ་གནས་པར་བྱེད་པའོ། །འདི་ལྟར་ཡང་རིགས་ཀྱི་བུ་དགེ་བའི་བཤེས་གཉེན་ནི་སངས་རྒྱས་ཀྱི་རིགས་སུ་སྐྱེས་པས་མ་ལྟ་བུའོ། །དགེ་བའི་བཤེས་གཉེན་ནི་ཕན་པ་རྒྱ་ཆེན་པོར་སྒྲུབ་པས་ཕ་ལྟ་བུའོ། །དགེ་བའི་བཤེས་གཉེན་ནི་སྡིག་པ་ཐམས་ཅད་ལས་སྲུང་བས་མ་མ་ལྟ་བུའོ། །དགེ་བའི་བཤེས་གཉེན་ནི་བྱང་ཆུབ་སེམས་དཔའི་བསླབ་པ་ཁོང་དུ་ཆུད་པར་བྱེད་པས་སློབ་དཔོན་ལྟ་བུའོ། །དགེ་བའི་བཤེས་གཉེན་ནི༌ཕ་རོལ་ཏུ་ཕྱིན་པའི་ལམ་དུ་འཛུད་པས་ལམ་མཁན་ལྟ་བུའོ། །དགེ་བའི་བཤེས་གཉེན་ནི་ཉོན་མོངས་པའི་ནད་ལས་ཐར་བར་བྱེད་པས་སྨན་པ་ལྟ་བུའོ། །དགེ་བའི་བཤེས་གཉེན་ནི་ཡེ་ཤེས་ཀྱི་སྨན་རྣམ་པར་འཕེལ་བར་བྱེད་པས་གངས་རི་ལྟ་བུའོ། །དགེ་བའི་བཤེས་གཉེན་ནི་འཇིགས་པ་ཐམས་ཅད་ལས༌སྲུང་བས་དཔའ་བོ་ལྟ་བུའོ། །དགེ་བའི་བཤེས་གཉེན་ནི་འཁོར་བའི་ཆུ་བོ་ཆེན་པོ་ལས་སྒྲོལ་བས་མཉན་པ་ལྟ་བུའོ། །དགེ་བའི་བཤེས་གཉེན་ནི་ཐམས་ཅད་མཁྱེན་པའི་ཡེ་ཤེས་རིན་པོ་ཆེའི་གླིང་དུ་ཕྱིན་པར་བྱེད་པས་སྐྱ་བ་འཛིན་པ་ལྟ་བུའོ། །

རིགས་ཀྱི་བུ་དེ་ལྟ་བས་ན་དེ་ལྟར་ཡིད་ལ་བྱ་བ་རྒྱུན་མ་ཆད་པས་ཁྱོད་ཀྱིས་དགེ་བའི་བཤེས་གཉེན་བསྙེན་པར་གྱིས་ཤིག །ཁུར་ཐམས་ཅད་བཀུར་བས་ཡོངས་སུ་མི་སྐྱོ་བའི་ཕྱིར་ས་ལྟ་བུའི་སེམས་དང་། མི་ཕྱེད་པའི་ཕྱིར་རྡོ་རྗེ་ལྟ་བུའི་སེམས་དང་སྡུག་བསྔལ་ཐམས་ཅད་ཀྱིས་མི་བསྒུལ་བའི་ཕྱིར་འཁོར་ཡུག་ལྟ་བུའི་སེམས་དང་། ཅི་དགའ་བར་བཀའ་ཉན་པས་བྲན་ལྟ་བུའི་སེམས་དང་། ངག་ཐམས་ཅད་མི་གཅག་པས་སློབ་མ་ལྟ་བུའི་སེམས་དང་། ལས་ཐམས་ཅད་ཉམས་སུ་བླང་བ་ལ་མི་སྨད་པས་འཇིག་རྟེན་གྱི་བྲན་ལྟ་བུའི་སེམས་དང་། ཉོན་མོངས་པ་ཐམས་ཅད་ཀྱིས་མི་སྐྱོ་བའི་ཕྱིར་མ་མ་ལྟ་བུའི་སེམས་དང་། བྱའོ་ཅོག་ལ་མཐུན་པར་གཟུང་བས་གཡོག་ལྟ་བུའི་སེམས་དང་། ང་རྒྱལ་དང་མཐོ་བའི་ང་རྒྱལ༌སྤོང་བས་ཕྱག་དར་བ་ལྟ་བུའི་སེམས་དང་། དུས་དང་དུས་མ་ཡིན༌པར་མཐོ་དམན་དུ་འགྱུར་བས་ཟླ་བ་ཉ་བ་ལྟ་བུའི་སེམས་དང་། མི་སྲུན་པ་ཐམས་ཅད་རྣམ་པར༌སྤོང་བས་རྟ་ཅང་ཤེས་ལྟ་བུའི་སེམས་དང་། ཁུར་ལྕི་བ་བཀུར་བས་ཐེག་པ་ལྟ་བུའི་སེམས་དང་། དུལ་བ་དང་ཅང་ཤེས་ཀྱི་བསམ་པས་གླང་པོ་ལྟ་བུའི་སེམས་དང་། མི་སྒུལ་མི་བསྐྱོད་པས་རི་ལྟ་བུའི་སེམས་དང་། མི་ཁྲོ་བས་ཁྱི་ལྟ་བུའི་སེམས་དང་། ང་རྒྱལ་དང་དུས་མེད་པས་གདོལ་པ་ལྟ་བུའི་སེམས་དང་། དྲེགས་པ་ཐམས་ཅད་མེད་པས་ཁྱུ་མཆོག་རྭ་བཅད་པ་ལྟ་བུའི་སེམས་དང་། རློམ་སེམས་མེད་པས་མཚན་བུ་ལྟ་བུའི་སེམས་དང་། འགྲོ་ཞིང་འོང་བས་མི་སྐྱོ་བས་གྲུ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངག་གི་མཐར་ཕྱིན་པར་བྱེད་པས་ཟམ་པ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངོར་བལྟ་བས་བུ་མཛངས་པ་ལྟ་བུའི་སེམས་དང་། ཆོས་ཀྱི་རྒྱལ་པོའི་བཀའ་ལས་མི་འགལ་བར་བྱ་བས་རྒྱལ་པོ་གཞོན་ནུ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་པར་བྱའོ། །

རིགས་ཀྱི་བུ་ཁྱོད་ཀྱིས་བདག་ལ་ནི་ནད་པར་འདུ་ཤེས་བསྐྱེད་དོ། །དགེ་བའི་བཤེས་གཉེན་ལ་ནི་སྨན་པའི་འདུ་ཤེས་དང་། གདམས་ངག་ལ་ནི་སྨན་གྱི་འདུ་ཤེས་དང་། ནན་ཏན་ཉམས་སུ་བླང་བ་ལ་ནི་ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་མགྲོན་པོའི་འདུ་ཤེས་བསྐྱེད༌པར་བྱའོ། །དགེ་བའི་བཤེས་གཉེན་ལ་ནི་ལམ་མཚོན་པའི་འདུ་ཤེས་དང་། གདམས་ངག་ལ་ནི་ལམ་གྱི་འདུ་ཤེས་དང་། ནན་ཏན་ལ་ནི་ཕྱོགས་བདེ་བར་འགྲོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཕ་རོལ་ཏུ་འགྲོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་མཉན་པའི་འདུ་ཤེས་དང་། རྗེས་སུ་བསྟན་པ་ལ་མུ་སྟེགས་ཀྱི་འདུ་ཤེས་དང་། ནན་ཏན་ལ་ནི་གྲུའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི༌ཞིང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཀླུའི་དབང་པོའི་འདུ་ཤེས་དང་། གདམས་ངག་ལ་ནི་ཆར་པའི་འདུ་ཤེས་དང་། ནན་ཏན་ལ་ནི་ལོ་ཏོག་འགྲུབ་པའི་འདུ་ཤེས་བསྐྱེད་པར་བྱའོ། །རིགས༌ཀྱི་བུ་ཁྱོད་ཀྱིས་བདག་ལ་ནི་དབུལ་པོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ངལ༌བསོ་པོའི་འདུ་ཤེས་དང་། གདམས་ངག་ལ་ནི་ནོར་དང་དོན་གྱི་འདུ་ཤེས་དང་། ནན་ཏན་ལ་ནི་དབུལ་བ་སེལ་བའི་འདུ་ཤེས་བསྐྱེད་པར་བྱའོ། །

རིགས་ཀྱི་བུ་ཁྱོད་ཀྱིས་བདག་ལ་ནི་སློབ་མའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སློབ་དཔོན་གྱི་འདུ་ཤེས་དང་གདམས་ངག་ལ་ནི༌བཟོ་བའི་འདུ་ཤེས་དང་། ནན་ཏན་ལ་ནི་བཟོ་ཁོང་དུ་ཆུད་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་འཇིགས་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་དཔའ་བོའི་འདུ་ཤེས་དང་། གདམས་ངག་ལ་ནི་མཚོན་ཆའི་འདུ་ཤེས་དང་། ནན་ཏན་ལ་ནི་དགྲ་སེལ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་ཚོང་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སྐྱ་བ་འཛིན་པའི་འདུ་ཤེས་དང་། གདམས་ངག་ལ་ནི་རིན་པོ་ཆེའི་འདུ་ཤེས་དང་། ནན་ཏན་ལ་ནི་རིན་པོ་ཆེ་སྡུད་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་བུ་དམ་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཕ་མའི་འདུ་ཤེས་དང་། རྗེས་སུ་བསྟན་པ་ལ་ནི་རིགས་ཀྱི་བུའི་ཚུལ་གྱི་འདུ་ཤེས་དང་། ནན་ཏན་ལ་ནི་ཚུལ་མ་ཉམས་པའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་རྒྱལ་པོ་གཞོན་ནུའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ཆོས་ཀྱི་རྒྱལ་པོ་དང་བློན་པོ་དམ་པའི་འདུ་ཤེས་དང་། གདམས་ངག་ལ་ནི་རྒྱལ་པོའི་ཁྲིམས་ཀྱི་འདུ་ཤེས་དང་། ནན་ཏན་ལ་ནི་ཡེ་ཤེས་ཀྱི་རྒྱལ་པོའི་ཅོད་པན་དང་རྒྱན་དང་། ཆོས་ཀྱི་ཐབས་མགོ་ལ་འཆིང་བ་དང་། ཆོས་ཀྱི་རྒྱལ་པོའི་གྲོང་ཁྱེར་ལ་རྣམ་པར་ལྟ་བའི་འདུ་ཤེས་བསྐྱེད་པར༌བྱ་སྟེ། རིགས་ཀྱི་བུ་ཁྱོད་ཀྱིས་དེ་ལྟ་བུའི་འདུ་ཤེས་ཡིད་ལ་བྱ་བ་ཡོངས་སུ་སྒོམ་སྟེ། དགེ་བའི་བཤེས་གཉེན་རྣམས་ལ་ཉེ་བར་བསྙེན་པར་གྱིས་ཤིག །

དེ་ཅིའི་ཕྱིར་ཞེ་ན། རིགས་ཀྱི་བུ་དེ་ལྟར་དགེ་བའི་བཤེས་གཉེན་ལ་ལྷག་པའི་བསམ་པ་ཡོངས་སུ་དག་པའི་བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་གྱི་ངག་ཐམས་ཅད་ཉམས་སུ་ལེན་པའི་ཚེ། གངས་ཀྱི་རི་ལ་བརྟེན་པའི་རྩྭ་དང་གེལ་པ་དང་། སྨན་དང་ནགས་ཚལ་ལྟ་བུར་དགེ་བའི་རྩ་བ་ཐམས་ཅད་ཀྱིས་རྣམ་པར་འཕེལ་ལོ། །རྒྱ་མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཆོས་ཐམས་ཅད་ཀྱི་སྣོད་དུ་འགྱུར་རོ། །གངས་ཆེན་མཚོ་ཆེན་པོ་རིན་པོ་ཆེ་མང་པོའི་འབྱུང་གནས་སུ་གྱུར་པ་ལྟར་ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་རོ། །མེའི་དྲོད་ཀྱིས་གསེར་ཡོངས་སུ་འབྱང་བ་ལྟར་བྱང་ཆུབ་ཀྱི་སེམས་ཡོངས་སུ་བྱང་བར་འགྱུར་རོ། །རྒྱ་མཚོ་ཆེན་པོ་ལས་འཕགས་པའི་རི་རབ་ལྟར་འཇིག་རྟེན་ལས་མངོན་པར་འཕགས་པར་འགྱུར་རོ། །པད་མོ་ལ་ཆུས་མི་ཆགས་པ་ལྟར་འཇིག་རྟེན་གྱི་ཆོས་ཀྱིས་མི་གོས་པར་འགྱུར་རོ། །རྒྱ་མཚོ་ཆེན་པོ་རོ་རུལ་པ་དང་མི་འགྲོགས་པ་ལྟར། སྤྱོད་པ་ངན་པ་ཐམས་ཅད་དང་མི་འགྲོགས་སོ། །ཡུད་དུ་ཡར་གྱི་ཟླ་བ་ལྟར་ཆོས་དཀར་པོས་རྣམ་པར་འཕེལ་བར་འགྱུར་རོ། །འཛམ་བུའི་གླིང་སྣང་བར་བྱེད་པའི་ཉི་མ་ལྟར་ཆོས་ཀྱི་དབྱིངས་སུ་སྣང་བར་འགྱུར་རོ། །ཕ་མ་དང་འགྲོགས་པའི་བུ་ལྟར་བྱང་ཆུབ་སེམས་དཔའི་སྨོན་ལམ་གྱི་ལུས་ཐམས་ཅད་ཡང་དག་པར་སྐྱེ་བར་འགྱུར་རོ། །དེ་ལྟར་མདོར་ན་རིགས་ཀྱི་བུ་དགེ་བའི་བཤེས་གཉེན་གྱི་གདམས་ངག་ལ་ཞུགས་པའི་བྱང་ཆུབ་སེམས་དཔའ་རྣམས་ནི་ཡོན་ཏན་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུ་ནི༌རབ་ཏུ་འཛིན་པར་འགྱུར་རོ། །དེའི་ལྷག་པའི་བསམ་པ༌བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་ཡོངས་སུ་སྦྱོང་བར་འགྱུར་རོ། །བྱང་ཆུབ་སེམས་དཔའི་དབང་པོ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་རབ་ཏུ་འཕེལ་བར་འགྱུར་རོ། །བྱིན་གྱི་རླབས་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་རྣམ་པར་སྤྱོད་པར་འགྱུར་རོ། །སྒྲིབ་པའི་ཆོས་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི༌རྣམ་པར་སྦྱོང་བར་འགྱུར་རོ། །སྒྲིབ་པའི་ཆོས་གྲངས་མེད་པ་བརྒྱ་སྟོང་ཕྲག་བཅུ་ནི་ཡོངས་སུ་དག་པར་འགྱུར་རོ། །

བདུད་གྲངས་མེད་པ་བརྒྱ་སྟོང་ཕྲག་བཅུ་ལས་ནི་ཡང་དག་པར་འདས་པར་འགྱུར་རོ། །ཆོས་ཀྱི་སྒོ་གྲངས་མེད་པ་བརྒྱ་སྟོང་ཕྲག་བཅུ་ལ་ནི་རབ་ཏུ་འཇུག་པར་འགྱུར་རོ། །ཚོགས་རྣམ་པར་དག་པའི་སྒོ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་ནི་ཡོངས་སུ་རྫོགས་པར་འགྱུར་རོ། །སྤྱོད་པ་གྲངས་མེད་པ་བརྒྱ་སྟོང་ཕྲག་བཅུ་ནི་ཀུན་ནས་དག་པར་འགྱུར་རོ། །སྨོན་ལམ་ཆེན་པོ་གྲངས་མེད་པ་བརྒྱ་སྟོང་ཕྲག་བཅུ་ནི་མངོན་པར་གྲུབ་པར་འགྱུར་རོ། །རིགས་ཀྱི་བུ་དེ་ལྟར་མདོར་ན་བྱང་ཆུབ་སེམས་དཔའི་སྤྱད་པ་ཐམས་ཅད་དང་། བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཐམས་ཅད་དང་། བྱང་ཆུབ་སེམས་དཔའི་ས་ཐམས་ཅད་དང་། བྱང་ཆུབ་སེམས་དཔའི་བཟོད་པ་ལ་འཇུག་པ་ཐམས་ཅད་དང་། བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་ཐམས་ཅད་དང་། བྱང་ཆུབ་སེམས་དཔའི་མངོན་པར་ཤེས་པའི་ཡེ་ཤེས་ཀྱིས་རྣམ་པར་འཕྲུལ་པ་ཐམས་ཅད་དང་། བྱང་ཆུབ་སེམས་དཔའི་གཟུངས་དང་སྤོབས་པའི་སྣང་བ་ཐམས་ཅད་དང་། བྱང་ཆུབ་སེམས་དཔའི་བསྔོ་བའི་ཡེ་ཤེས་དང་མངོན་པར་ཤེས་པ་ཚད་མེད་པ་ཐམས་ཅད་དང་། བྱང་ཆུབ་སེམས་དཔའི་སྨོན་ལམ་མངོན་པར་བསྒྲུབ་པ་ཐམས་ཅད་དང་། སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་ཅིང་ཡོངས་སུ་གྲུབ་པ་རྣམས་ནི་དགེ་བའི་བཤེས་གཉེན་ལ་རག་ལས་པ་དག་གོ །

དགེ་བའི་བཤེས་གཉེན་རྩ་བར་གྱུར་པ་དག་གོ །དགེ་བའི་བཤེས་གཉེན་ལས་བྱུང་བ་དག་གོ །དགེ་བའི་བཤེས་གཉེན་སྐྱེ་གནས་སུ་གྱུར་པ་དག་གོ །དགེ་བའི་བཤེས་གཉེན་སྐྱེ་མཆེད་དུ་གྱུར་པ་དག་གོ །དགེ་བའི་བཤེས་གཉེན་ལས་ཡོངས་སུ་སྐྱེས་པ་དག་གོ །དགེ་བའི་བཤེས་གཉེན༌གྱིས་ཡོངས་སུ་སྤེལ་བ་དག་གོ །དགེ་བའི་བཤེས་གཉེན་ལ་རབ་ཏུ་རྟེན་པ་དག་གོ །དགེ་བའི་བཤེས་གཉེན་རྒྱུར་གྱུར་པའོ། །དགེ་བའི་བཤེས་གཉེན་ལས་རབ་ཏུ་སྐྱེས་པ་དག་གོ །དེ་ནས་ཚོང་དཔོན་གྱི་བུ་ནོར་བཟང་གིས་རྣམ་པ་དེ་ལྟ་བུའི་དགེ་བའི་བཤེས་གཉེན་གྱི་ཡོན་ཏན་དང་། བསྔགས་པ་རྗེས་སུ་བསྟན་པ་དང་། བྱང་ཆུབ་སེམས་དཔའི་སྤྱོད་པ་ཚད་མེད་པ་དང་། སངས་རྒྱས་ཀྱི་ཆོས་རྒྱ་ཆེན་པོ་ཐོས་ནས་དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་གཉིས་ཀྱི་རྐང་པ་ལ་སྤྱི་བོས་ཕྱག་འཚལ་ཏེ། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མ་གཉིས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཁྱེའུ་དཔལ་འབྱུང་བ་དང་། བུ་མོ་དཔལ་གྱི་བློ་གྲོས་མའི་དྲུང་ནས་སོང་ངོ་།། །།