མཁའ་འགྲོའི་ཆོས་མཛོད་ཆེན་མོ་ལས་འཕགས་བོད་ཀྱི་སྐྱེས་ཆེན་མ་དག་གི་རྣམ་ཐར་ཕྱོགས་བསྒྲིགས་པདྨ་དཀར་པོའི་ཕྲེང་བ།

གཞོན་ནུ་ནོར་བཟང་གི་དགེ་བའི་བཤེས་གཉེན་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པ་ཞེས་བྱ་བས་རང་གི་ཡོན་ཏན་རྒྱ་ཆེར་བསྟན་པ་དང་དེ་དག་གི་རྒྱུ་སྐྱེ་བ་སྔ་མར་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བས་བྱང་ཆུབ་སེམས་དཔའི་སྤྱོད་པ་ལ་ཇི་ལྟར་བསླབ་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའི་རྣམ་པར་ཐར་པ་སྒྲ་ཡིད་དུ་འོང་བ་དང་། རྣམ་པར་འཕྲུལ་པ་ཟབ་མོ་ལ་འཇུག་པ་དེ། དེ་བས་ཀྱང་རྒྱ་ཆེར་བསྒོམ་པ་དང་། ཡིད་ཆེས་པར་བྱ་བ་དང་། ཤིན་ཏུ་རྒྱས་པར་བྱེད་ཅིང་། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་གང་ན་བ་དེར་ཕྱིན་ནས། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་སྤོས་རིན་པོ་ཆེ་ཐམས་ཅད་ཀྱི་ཤིང་གི་ཡལ་གའི་ཁང་པ་བརྩེགས་པ་ཞིག་ན། སེང་གེའི་ཁྲི་རིན་པོ་ཆེའི་ཤིང་གི་མྱུ་གུའི་སྙིང་པོ་ཅན་ཞིག་ལ་འདུག་སྟེ། མཚན་མོའི་ལྷ་མོ་སྟོང་ཕྲག་བཅུས་ཀུན་ནས་བསྐོར་ཅིང་འདུག་པ་མཐོང་ངོ་། །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི། རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །ལྷ་མོ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་ཇི་ལྟར༌བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་པ་དང་། ཇི་ལྟར་སློབ་པ་དང་། ཇི་ལྟར་སྤྱོད་ཇི་ལྟར་སློབ་ཅིང་ཐམས་ཅད་མཁྱེན་པ་ཉིད་དུ་འབྱུང་བ་བདག་ལ་བཤད་དུ་གསོལ། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་མོའི་མཐུས་ནི་མི་མཇེད་ཀྱི་འཇིག་རྟེན་གྱི་ཁམས་ན་ཉི་མ་ནུབ་ཏུ་ཆ་བའི་ཚེ། པདྨོ་ཤིན་ཏུ་རྒྱས་པ་རྣམས་ཀྱང་རྣམ་པར་འཛུམ་པར་འགྱུར་རོ། །

སྐྱེས་པ་དང་བུད་མེད་བཟའ་ཤིང་གི་ར་བ་ན་གནས་ཤིང་། དགའ་བར་རྩེ་བ་ལ་བརྩོན་པ་དག་ཀྱང་ཁྱིམ་དུ་འདོང་བའི་བློ༌བསྐྱེད་དོ། །ལམ་དང་སྲང་ན་རྒྱུ་བའི་སེམས་ཅན་རྣམས་ཀྱང་ཞག་གི་གནས་སེམས་ཤིང་ཚོལ་ཏེ་འགྲོ་བའི་གནས་ཐམས་ཅད་དུ་མངོན་པར་གཞོལ་བར་འགྱུར་རོ། །ནགས་ཚལ་དང་གསེབ་དང་། ཕུག་ལ་རྟེན་པའི་སེམས་ཅན་རྣམས་ཀྱང་ནགས་ཚལ་དང་གསེབ་དང་ཕུག་ཏུ་འདོང་ངོ་། །ཤིང་ལ་གནས་པའི་སེམས་ཅན་རྣམས་ཀྱང་ཤིང་གི་གནས་ལ་བརྟེན་པར་མངོན་པར་གཞོལ་ལོ། །ཁུང་ན་གནས་པའི་སེམས་ཅན་རྣམས་ཀྱང་ཁུང་དུ་འདོང་ངོ་། །གྲོང་དང་གྲོང་ཁྱེར་དང་། ལྗོངས་དང་ཡུལ་ལ་གནས་པའི་སེམས་ཅན་རྣམས་ཀྱང༌གྲོང་དང་གྲོང་ཁྱེར་དང་ལྗོངས་དང་ཡུལ་དུ་འདོང་ངོ་། །ཆུ་ན་གནས་པའི་སེམས་ཅན་རྣམས་ཀྱང་ཆུར་འདོང་ངོ་། །ཕྱོགས་གཞན་གྱི་ཡུལ་དུ་ཕྱིན་པའི་སེམས་ཅན་རྣམས་ཀྱང་ནུབ་མོ་བདེ་ཞིང་དགའ་བར་གནས་པའི་དོན་དུ་རང་རང་གི་ཡུལ་གྱི་ཕྱོགས་ཀྱི་བསམ་པ་སྐྱེད་དོ། །རིགས་ཀྱི་བུ་གཞན་ཡང་། ཁོ་མོ་ནི༌སྐྱེས་པ་དང་བུད་མེད་གཞོན་ནུ་དར་ལ་བབ་པ། དར་བའི་ཉམས་དྲོད་ཀྱིས་མྱོས་པ་དང་། གླུ་དང་གར་དང་རོལ་མོའི་དགའ་བས་མྱོས་པ་དང་། འདོད་པའི་ཡོན་ཏན་ལ་དགའ་ཞིང་། བརྩོན་པ་རྣམས་ལ་སྐྱེ་བ་དང་། རྒ་ཤི་དང་། གཏི་མུག་གི་མུན་པ་ཆེན་པོས༌འཇིགས་པའི་གཉེན་པོར་དགེ་བའི་རྩ་བ་ཡོངས་སུ་བསྐྱེད་པའི་ཕྱིར། བརྩོན༌འགྲུས་ཀྱི་ལེགས་པས་བསྔགས་པ་བྱེད་དོ། །སེམས་ཅན་སེར་སྣ་དང་ལྡན་པ་རྣམས་ནི་སྦྱིན་པ་ལ་རབ་ཏུ་སྦྱོར་རོ། །སེམས་ཅན་ཚུལ་ཁྲིམས་ངན་པ་ཅན་རྣམས་ནི། ཚུལ་ཁྲིམས་ལ་རབ་ཏུ་འགོད་དོ། །ངན་སེམས་དང་ལྡན་པའི་སེམས་ཅན་རྣམས་ལ་ནི། བྱམས་པའི་ལེགས་པ༌བརྗོད་པར་བྱེད་དོ། །སེམས་འཁྲུགས་པའི་སེམས་ཅན་རྣམས་ནི་བཟོད་པ་ལ་རབ་ཏུ་འགོད་དོ། །ལེ་ལོ་ཅན་གྱི་སེམས་ཅན་རྣམས་ནི། བྱང་ཆུབ་སེམས་དཔའི་བརྩོན་འགྲུས་བརྩམ་པ་ལ་རབ་ཏུ་འགོད་དོ། །སེམས་ཅན་རྣམ་པར་མྱོས་པའི་སེམས་ཅན་རྣམས་ནི་བསམ་གཏན་ལ་རབ་ཏུ་འགོད་དོ། །

ཤེས་རབ་འཆལ་བ་ཅན་གྱི་སེམས་ཅན་རྣམས་ནི༌ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡོངས་སུ་སྦྱོར་རོ། །ཐེག་པ་དམའ་བ་ལ་མོས་པའི་སེམས་ཅན་རྣམས་ནི་ཐེག་པ་ཆེན་པོ་ལ་རབ་ཏུ་འགོད་དོ། །ཁམས་གསུམ་ལ་མངོན་པར་ཞེན་པའི་སེམས་ཅན་རྣམས་ནི། བྱང་ཆུབ་སེམས་དཔའི་སྨོན་ལམ་གྱི་ཕ་རོལ་ཏུ་ཕྱིན་པ། སྲིད་པའི་ལམ་གྱི་རྒྱུད་མཐར་ཕྱིན་པའི་དཀྱིལ་འཁོར་ལ་སྤྱོད་པ་ལ་རབ་ཏུ་འགོད་དོ། །དམིགས་པའི་དབང་དུ་གྱུར་པའི་སེམས་ཅན་ལས་དང་། ཉོན་མོངས་པས་རབ་ཏུ་མནར་བ་བསོད་ནམས་དང་། ཡེ་ཤེས་ཀྱི་སྟོབས་མེད་པ་རྣམས་ནི། བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དོ། །མི་ཤེས་པའི་མུན་ནག་གིས་ཁེབས་པའི། སེམས་ཅན་བདག་ཏུ་བྱ་བ་དང་། བདག་གིར་བྱ་བས་མ་རིག་པའི་མུན་ནག་ཏུ་འཐོམས་པ་རྣམས་ནི་བྱང་ཆུབ་སེམས་དཔའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འགོད་དེ། རིགས་ཀྱི་བུ་གཞན་ཡང་ཁོ་མོ་ནི། བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་ཐོབ་པའོ། །ནོར་བཟང་གིས་སྨྲས་པ། ལྷ་མོ་བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་དེའི་ཡུལ་ཇི་ལྟ་བུ་ཞིག་མཆིས་སྨྲས་པ། རིགས་ཀྱི་བུ་རྣམ་པར་ཐར་པ་དེ་ནི། དེ་བཞིན་གཤེགས་པའི་བསོད་ནམས་ཀྱིས་སེམས་ཅན་ཡོངས་སུ་སྡུད་པའི་ཡེ་ཤེས་དང་། ཐབས་སྣང་བ་དང་ལྡན་པ་སྟེ། དེ་ཅིའི་ཕྱིར་ཞེ་ན། རིགས་ཀྱི་བུ་སེམས་ཅན་རྣམས་ཀྱི་བདེ་བ་ཉམས་སུ་མྱོང་བ་ཇི་སྙེད་ཅིག་ཡོད་པ་དེ་དག་ཐམས་ཅད་ནི་དེ་བཞིན་གཤེགས་པའི་བསོད་ནམས་ཀྱི་མཐུས་བྱུང་བའོ། །

དེ་བཞིན་གཤེགས་པའི་གདམས་ངག་གི་ཚུལ་གྱིས་བྱུང་བའོ། །དེ་བཞིན་གཤེགས་པའི་གསུང་ལ་ནན་ཏན་ཏུ་བྱས་པས་བྱུང་བའོ། །དེ་བཞིན་གཤེགས་པའི་རྗེས་སུ་བསླབས་པས་བྱུང་བའོ། །དེ་བཞིན་གཤེགས་པའི་བྱིན༌གྱི་རླབས་ཀྱིས་བྱུང་བའོ། །དེ་བཞིན་གཤེགས་པས་བསྟན་པའི་ལམ་ལ་ནན་ཏན་དུ་བྱས་པས་བྱུང་བའོ། །དེ་བཞིན་གཤེགས་པ་དང་ཚུལ་འདྲ་བའི་དགེ་བའི་རྩ་བ་བསྐྱེད་པས་བྱུང་བའོ། །དེ་བཞིན་གཤེགས་པས་ཆོས་བསྟན་པའི་མཐུན་པའི་རྒྱུས་བྱུང་བའོ། །དེ་བཞིན་གཤེགས་པའི་ཡེ་ཤེས་ཀྱི་ཉི་མ་སྣང་བས་བྱུང་བའོ། །

རིགས་ཀྱི་བུ་དེ་བཞིན་གཤེགས་པའི་རིགས་ཀྱི་ཆོས་དཀར་པོའི་དཀྱིལ་འཁོར་གྱི་སྣང་བས་ནི། སེམས་ཅན་རྣམས་ཀྱི་བདེ་བ་ཡོངས་སུ་འབྱུང་སྟེ། དེ་ཅིའི་ཕྱིར་ཞེ་ན། འདི་ལྟར་རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ༌ཡངས་པ་ཡང་དག་པར་འབྱུང་བ་འདི་ལ་འཇུག་པའི་ཚེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱི་སྔོན་གྱི། བྱང་ཆུབ་སེམས་དཔའི་སྤྱོད་པ་རྒྱ་མཚོ་རྗེས་སུ་དྲན་པར་བྱེད་ཅིང་འཇུག༌པ་དང་། ཁོང་དུ་ཆུད་པར་བྱེད་པའི་ཚེ། འདི་ལྟར་བཅོམ་ལྡན་འདས་སྔོན་བྱང་ཆུབ་སེམས་དཔའི་ས་ལ་བཞུགས་པས། སེམས་ཅན་བདག་ཏུ་བྱ་བ་དང་། བདག་གིར་བྱ་བ་ལ་མངོན་པར་ཞེན་པ། མ་རིག༌པའི་མུན་པས་འཐོམས་པ། ལྟ་བའི་ཐིབས་པོའི༌ལྟ་བས་དགོན་པར་འཁྱམས་པ། སྲིད་པའི་དབང་དུ་གྱུར་པ། འདོད་ཆགས་ཀྱི༌བཅིངས་པས་གླགས་པ། ཞེ་སྡང་གིས་ཁོང་ཁྲོ་བའི་སེམས་དང་ལྡན་པ། གཏི་མུག་གིས་སེམས་ཀྱི་རྒྱུད་འཁྲུགས་པར་གྱུར་པ། ཕྲག་དོག་དང་སེར་སྣས་ཀུན་ནས་འཁོར་བ། ཉོན་མོངས་པས་རབ་ཏུ་དཀྲུགས་པའི་སེམས་དང་ལྡན་པ། འཁོར་བའི་སྡུག་བསྔལ་ཆེན་པོ་ཉམས་སུ་མྱོང་བར་གྱུར་པ། འཁོར་བ་ན་འཕོངས་པའི་སྡུག་བསྔལ་གྱིས་རབ་ཏུ་གཟིར་བ། སངས་རྒྱས་བལྟ་བ་ལས་ཕྱིར་ཕྱོགས་པར་གྱུར་པ། ཐམས་ཅད་གཟིགས་ནས་ཐུགས་རྗེ་ཆེན་པོའི༌དགོངས་པ་སྐྱེས་པར་གྱུར་ཏོ། །

སེམས་ཅན་ཐམས་ཅད་ཀྱི་དོན་དུ་འགྲོ་བ་ཐམས་ཅད་ལ་ཡོ་བྱད་དང་། རིན་པོ་ཆེ་ཡོངས་སུ་བསྡུ་ཞིང་། ཡོངས་སུ༌སྡུད་པའི་དགོངས་པ་དང་། སེམས་ཅན་ཐམས་ཅད་ཀྱི་མཁོ་བའི་ཡོ་བྱད་ཡོངས་སུ༌བསྒྲུབ་པའི་དགོངས་པ་དང་། དངོས་པོ་ཐམས་ཅད་ལ་ཆགས་པ་མི་མངའ་བའི༌དགོངས་པ་དང་། ཡུལ་ཐམས་ཅད་ལ༌ཡེ་བརྔམ་པ་མི་མངའ་བའི༌དགོངས་པ་དང་། དགའ་བ་ཐམས་ཅད་ལ་ཆགས་པ་མི་མངའ་བའི༌དགོངས་པ་དང་། ལོངས་སྤྱོད་ཐམས་ཅད་ལ་ཡོངས་སུ་མ་ཞེན་པའི༌དགོངས་པ་དང་། སྦྱིན་པ་ཐམས་ཅད་ལ་རྣམ་པར་སྨིན་པ་ལ་རེ་བ་མེད་པའི༌དགོངས་པ་དང་། འཇིག་རྟེན་གྱི་ཕུན་སུམ་ཚོགས་པ་ཐམས་ཅད་ལ་བཞེད་པ་མི་མངའ་བའི༌དགོངས་པ་དང་། རྒྱུ་དང་རྐྱེན་ལ་མ་རྨོངས་པའི༌དགོངས་པ་དང་། ལེགས་པར་འཚལ་བའི་ཆོས་ལ་ཡང་དག་པར་ཇི་ལྟ་བ་བཞིན་དུ་མཁྱེན་པའི༌དགོངས་པ་དང་། སེམས་ཅན་ཐམས་ཅད་ཀྱི་དོན་ལ་གཞོལ་བར་བྱ་བ་མངོན་པར་བསྒྲུབ་པའི༌དགོངས་པ་ཡང་དག་པར་སྐྱེས་པར་གྱུར་ཏེ།

དེ་དེ་ལྟར་ཆོས་ཐམས་ཅད་ཀྱི་རང་བཞིན་ལ་ཡང་དག་པར་ཞུགས་པའི་དགོངས་པ་དང་ལྡན་པ་སེམས་ཅན་གྱི་ཁམས་ཐམས་ཅད་དུ་བྱམས་པ་ཆེན་པོས་སྙོམས་པར་ཞུགས་པ་འགྲོ་བ་ཐམས་ཅད་ཐུགས་རྗེ་ཆེན་པོའི་སྤྲིན་གྱིས་རྒྱས་པར་དགང་བའི་སྦྱོར་བ་མངའ་བ་སེམས་ཅན་གྱི་འཇིག་རྟེན་ཐམས་ཅད་ཀུན་ནས་ཁེབས་པའི་ཆོས་ཀྱི་གདུགས་ཆེན་པོའི་དཀྱིལ་འཁོར་མངའ་བ། སེམས་ཅན་ཐམས་ཅད་ཀྱི་ཉོན་མོངས་པའི་རི་རྣམ་པར་འཇོམས་པའི་ཡེ་ཤེས་རྡོ་རྗེའི་མཚོན་ཆ་མངའ་བ། འགྲོ་བ་ཐམས་ཅད་ཀྱི་བདེ་བ་ཡོངས་སུ་བསྒྲུབ་པས་དགྱེས་པའི་ཤུགས་རྣམ་པར་འཕེལ་བའི༌དགོངས་པ་མངའ་བ། སེམས་ཅན་ཐམས་ཅད་ལ་བདེ་བ་ཕུལ་དུ་ཕྱིན་པ་མངོན་པར་བསྒྲུབ་པའི་སྨོན་ལམ་གྱི༌དགོངས་པ་མངའ་བ། བསམ་པ་དང་སྨོན་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ལ་ནོར་གྱི་ཆར་རབ་ཏུ་དབབ་པའི༌དགོངས་པ་མངའ་བ། སེམས་ཅན་ཐམས་ཅད་ཡོངས་སུ་མི་གཏོང་ཞིང་སྙོམས་པར་སྦྱོར་བའི༌དགོངས་པ་མངའ་བ། འཕགས་པའི་ནོར་གྱིས་སེམས་ཅན་ཐམས་ཅད་ཚིམ་པར་མཛད་པའི༌དགོངས་པ་མངའ་བ། སྟོབས་བཅུའི་ཡེ་ཤེས་རིན་པོ་ཆེ་ཕུལ་དུ་དྲི་མ་མེད་པ་ཐོབ་པར་མཛད་པའི༌དགོངས་པ་མངའ་བ། བྱང་ཆུབ་སེམས་དཔའི་མངོན་པར་ཤེས་པ་ཆེན་པོའི་སྟོབས་དང་ཤུགས་རབ་ཏུ་བརྙེས་པ་དེ་བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་ཀྱི་སྤྲིན་ཆེན་པོས་སེམས་ཅན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་ནམ༌མཁའི་མཐས་གཏུགས་པ་ཐམས་ཅད་རྒྱས་པར་བཀང་སྟེ། སེམས་ཅན་ཐམས་ཅད་ལ་མངོན་པར་གྱུར་པར་བཞུགས་ཤིང་སྦྱིན་པའི་དམིགས་པ་ཐམས་ཅད་ཀྱི་སྤྲིན་གྱི་ཆར་ཆེན་པོ་རྣམ་པ་ཐམས་ཅད་དུ་དབབ་པ་དང་། རིན་པོ་ཆེའི་རྒྱན་ཐམས་ཅད་ཀྱི་སྤྲིན་ཆེན་པོའི་ཆར་མངོན་པར་འབེབས་པ་མཛད་དེ། འདི་ལྟར་སེམས་ཅན་ཐམས་ཅད་སོ་སོའི་ཚུལ་དང་ཇི་ལྟར་མཐུན་པས་ལོངས་སྤྱོད་པར་བྱ་བའི་ཕྱིར་དངོས་པོ་རྣམ་པ་ཐ་དད་པ་མཐའ་ཡས་པ༌ཡོངས་སུ་གཏང་བ་དང་ཡོ་བྱད་རྣམ་པ་ཐ་དད་པ་ཚད་མེད་པ་ལ༌སྤྱད་པར་བྱ་བ་དང་སྦྱིན་པ་རྣམ་པ་སྣ་ཚོགས་ཐམས་ཅད་ཀྱིས་ཡོངས་སུ་བསྡུ་བའི་ཚུལ་དང་། དངོས་པོ་ཡོངས་སུ་གཏང་བ་རྣམ་པ་དུ་མ་ལ་ཡོངས་སུ་སྤྱད་པ་དང་། ཡོ་བྱད་ཀྱི་རྣམ་པ་དང་། རྒྱན་གྱི་འདུ་བྱེད་བརྗོད་དུ་མེད་པ་དང་། སྦྱིན་པའི་ཚོགས་རྣམ་པ་སྣ་ཚོགས༌མཚན་ཉིད་སྣ་ཚོགས་དང་ལྡན་པ། སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱ་བའི་སྦྱིན་པའི་ཚུལ་མཐའ་ཡས་པ་ཐུགས་སུ་ཆུད་པས་སེམས་ཅན་གྱི་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱ་བར་མངོན་པར་བསྒྲུབ་པའི་དངོས་པོ་ཐམས་ཅད་གཏང་བ་དང་། ཡོངས་སུ་གཏང་བ་དང་། སྦྱིན་པར་བྱ་བ་དང་།

འགྲོ་བ་ཐམས་ཅད་ཀྱི་འདུ་བྱེད་ཀྱི་སྡུག་བསྔལ་རྒྱུན་མི་ཆད་པ་ལས་ཡོངས་སུ་བསྐྱབ་པའི་ཚུལ་དུ་བྱ་བ་རྣམས། སེམས་ཅན་ཐམས་ཅད་ལ་ལན་ལ་རེ་བ་མི་མངའ་བ་དང་། འགྲོ་བ་ཐམས་ཅད་ལ་མཉམ་པ་ཉིད་དུ༌བྱུང་བའི་དགོངས་པ་མངའ་བས། འགྲོ་བ་ཐམས་ཅད་ཀྱི་སེམས་རིན་པོ་ཆེ་ཡོངས་སུ་སྦྱོང་བ་མཛད་ཅིང་སངས་རྒྱས་ཐམས་ཅད་ཀྱི་དགེ་བའི་རྩ་བ་རྒྱ་མཚོ་གཅིག་ཏུ་གྱུར་པ་ལས་བྱུང་བའི་ཡོངས་སུ་བསྡུ་བའི་ཚུལ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཡོ་བྱད་ཀྱི་ཆར་དབབ་པ། འགྲོ་བ་ཐམས་ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་འཕེལ་བར་མཛད་པས༌དགོངས་པའི་སྐད་ཅིག་རེ་རེ་ལ་སེམས་ཅན་མ་ལུས་པ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་གཅིག་ནས་གཅིག་ཏུ་བརྒྱུད་པ་རྣམ་པར་དག་པར་བྱ་བའི་ཕྱིར་མངོན་པར་བསྒྲུབ་པར་མཛད་པ་དང་། དགོངས་པའི་སྐད་ཅིག་རེ་རེ་ལ་ཞིང་གཅིག་ནས་གཅིག་ཏུ༌བརྒྱུད་པ་མ་ལུས་པ་ཐམས་ཅད་སངས་རྒྱས་ཀྱི་ཞིང་ཉེ་བར་ཉོན་མོངས་པ་མེད་ཅིང་བླ་ན་མེད་པའི་རྒྱན་རྣམ་པར་དག་པས་རྣམ་པར༌ཀླུབ་ཅིང་རབ་ཏུ་བརྒྱན་པ་ཡོངས་སུ་རྫོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་ཆོས་ཀྱི་ཚུལ་རྒྱ་མཚོ་མ་ལུས་པ་ཐམས་ཅད་རྒྱས་པར་དགང༌བ་རྣམ་པར་དག་པར་བྱ་བ་དང་དགོངས་པའི་སྐད་ཅིག་རེ་རེ་ལ་ནམ་མཁའི་དབྱིངས༌ཀྱི་གཏོས་མ་ལུས་པ་ཐམས་ཅད་རྒྱས་པར་དགང་བའི་ཡེ་ཤེས་ཀྱི་ཚུལ་ཡོངས་སུ་རྫོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་སེམས་ཅན་དང་དུས་མ་ལུས་པ་ཐམས་ཅད་ལ་འཇུག་ཅིང་ཡེ་ཤེས་ཀྱི་ཚུལ་རྣམ་པར་དག་པར་བྱ་བ་དང་། དགོངས་པའི་སྐད་ཅིག་རེ་རེ་ལ་འགྲོ་བ་མ་ལུས་པ་ཐམས་ཅད་རྣམ་པར་འདུལ་བའི་ཡེ་ཤེས་ཀྱི་ཚུལ་སྣང་བ་རབ་ཏུ་ཐོབ་པར་བྱ་བ་དང་། དགོངས་པའི་སྐད་ཅིག་རེ་རེ་ལ་དུས་མ་ལུས་པ་ཐམས་ཅད་དུ་ཆོས་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པར་བྱ་བ་དང་། དགོངས་པའི་སྐད་ཅིག་རེ་རེ་ལ་ཐམས་ཅད་མཁྱེན་པའི་ཡེ་ཤེས་ཀྱི་བྱིན༌གྱི་རླབས་ལ་མཁས་པ་མ་ལུས་པར་ཡོངས་སུ་བསྟན་པས་འགྲོ་བ་ཐམས་ཅད་ལ་ཕན་ཐོགས་པར་བྱ་བ་དང་། དགོངས་པའི་སྐད་ཅིག་རེ་རེ་ལ་འཇིག་རྟེན་གྱི་ཁམས་མ་ལུས་པའི་གྲངས་སུ་བྱ་བའི་རྒྱུད་དང་ལྡན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་མངོན་པར་བསྟན་པ། འཇིག་རྟེན་གྱི་ཁམས་རྒྱ་མཚོ་ཐམས་ཅད་ཡོངས་སུ་འདུ་བ། འཇིག་རྟེན་གྱི་ཁམས་འབྱམས་ཀླས་པ་སྣ་ཚོགས་བརྗོད་དུ་ཡོད་པ། འཇིག་རྟེན་གྱི་ཁམས་ཀྱི་རྒྱུད་རྣམ་པར་གནས་པ་སྣ་ཚོགས་ཀྱི་མཚམས་རྣམ་པར༌བརྒྱན་པ། གཞི་སྣ་ཚོགས་དང་ལྷུན་དུ་མར་བརྗོད་དུ་ཡོད་པ་རྣམ་པར་ཕྱེ་བ་སྣ་ཚོགས་ཀྱིས་བསྐལ་པ་རྣམ་པ་ཐ་དད་པ་བསྟན་དུ་ཡོད་པ། ཀུན་ནས་ཉོན་མོངས་ཤིང་རྣམ་པར་དག་པ་དང་རྣམ་པར་དག་ཅིང་ཀུན་ནས་ཉོན་མོངས་པ་དང་། གཅིག་ཏུ་ཡོངས་སུ་དག་པ་དང་གཅིག་ཏུ་ཀུན་ནས་ཉོན་མོངས་པ་དང་ཆེ་བ་དང་ཡངས་པ་དང་། ཚད་མེད་པ་དང་དོག་པ་དང་ཕྲ་བ་དང་རྒྱ་ཆེ་བ་དང་། གཞི་མཉམ་པ་དང་སྣྲེལ་ཞི་དང་སྤྱིའུ་ཚུགས་དང་། ཕྱོགས་དང་ཕྱོགས་མཚམས་སུ་མངོན་པར་བལྟས་པ་དང་། ཕྱོགས་རྒྱ་མཚོ་སྣ་ཚོགས་སུ་གཞོལ་བ་སྒོ་སྣ་ཚོགས་ནས་བསྟན་ཅིང་སྒོ་མཐའ་ཡས་པའི་དབྱིབས་རྣམ་པ་སྣ་ཚོགས་སུ་འདུག་པའི་རྣམ་པར་ཕྱེ་བ་སྣ་ཚོགས་དང་ལྡན་པའི་འཇིག་རྟེན་གྱི་ཁམས་རྒྱ་མཚོ༌ཐམས་ཅད་དུ་བྱང་ཆུབ་སེམས་དཔའི་སྤྱོད་པ་སྤྱད་དེ། བྱང་ཆུབ་སེམས་དཔའི་སྐྱོན་མེད་པ་ཡོངས་སུ་མནན་ནས། བྱང་ཆུབ་སེམས་དཔའི་སྤྱོད་པ་དང་། རྣམ་པར་འཕྲུལ་པས་རྒྱས་པར་དགང་བར་བྱ་བ་དང་། དགོངས་པའི་སྐད་ཅིག་རེ་རེ་ལ་དུས་གསུམ་གྱི་སངས་རྒྱས་ཀྱི་འཕྲིན་ལས་མ་ལུས་པ་ཐམས་ཅད་སེམས་ཅན་ཕ་རོལ་གྱི་སེམས་དང་བསམ་པས་རྣམ་པར་དམིགས་པར་བྱ་བའི་ཕྱིར་འགྲོ་བ་ཐམས་ཅད་ལ་ཐམས་ཅད་མཁྱེན་པའི་བསོད་ནམས་རྒྱ་མཚོའི་ཤུགས་རྣམ་པར་འཕེལ་བར་མཛད་དེ། མངོན་པར་བསྒྲུབ་པ་མཛད་པར་གྱུར་པ་མངོན་པར་ཤེས་སོ་རྗེས་སུ་དྲན་ནོ། །

རིགས་ཀྱི་བུ་དེ་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། འཇིག་རྟེན་གནས་པ་བསོད་ནམས་དང་ཡེ་ཤེས་ཀྱི་ཚོགས་དང་བྲལ་བ། སེམས་ཅན་བྱས་པ་དྲིན་དུ་མི་གཟོ་བས་ཡོངས་སུ་གང་བ། མི་ཤེས་པའི་མུན་པས་ཆོད་པ། བདག་ཏུ་བྱ་བ་དང་། བདག་གིར་བྱ་བ་ལ་མངོན་པར་ཞེན་པ་མ་རིག་པའི་མུན་པ་དང་རབ་རིབ་ཀྱིས་བསྒྲིབས་པ་ཚུལ་བཞིན་མ་ཡིན་པར་རྣམ་པར་རྟོག་པ་ལ་ཞུགས་པ། ལྟ༌བའི་ཐིབས་པོའི་བས་དགོན་པར་མགོ་རླག་པ། རྒྱུ་དང་འབྲས་བུ་ལ་མགོ་རྨོངས་པ་ཉོན་མོངས་པ་དང་ལས་ཀྱི་དབང་དུ་གྱུར་པ་འཁོར་བའི་མྱ་ངམ་ཆེན་པོའི་སྡུག་བསྔལ་གྱི་སའི་འོག་ཏུ་ལྟུང་བ། ཕོངས་པའི་སྡུག་བསྔལ་ཉམས་སུ་མྱོང་བར་གྱུར་པ་རྣམས་ལ་ཐུགས་རྗེ་ཆེན་པོ་བསྐྱེད་དེ། ཕ་རོལ་ཏུ་ཕྱིན་པ་སྤྱད་པའི་སྤྲིན་རྒྱ་ཆེན་པོ་མངོན་པར་བསྒྲུབས་ཏེ་དགེ་བའི་རྩ་བ་ལ་བརྟེན་པར་གནས་པ་ཡོངས་སུ་བསྔགས་པ་དང་། སེམས་ཅན་ཐམས་ཅད་ཀྱི་འཁོར་བའི་ཕོངས་པའི་སྡུག་བསྔལ་རྣམ་པར་བཟློག་པ་དང་། བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ལ་མངོན་པར་མོས་པར་བྱ་བ་དང་། རྒྱུའི་དཀྱིལ་འཁོར་གྱི་ཕྱོགས་མངོན་པར་བསྟན་པ་དང་། ལས་དང་ཆོས་སུ་མི་འགལ་བའི་ཕྱོགས་རབ་ཏུ་བརྗོད་པ་དང་། སངས་རྒྱས་ཀྱི་ཆོས་ཀྱི་དཀྱིལ་འཁོར་ཡོངས་སུ༌བསྡུ་བའི་ཕྱོགས་སྣང་བར་བྱ་བ་དང་། སེམས་ཅན་ཐམས་ཅད་ཀྱི་མོས་པའི་ཕྱོགས་རབ་ཏུ་བརྗོད་པར་བྱ་བ་དང་། སེམས་ཅན་ཐམས་ཅད་ཀྱི་ཞིང་ཡོངས་སུ་བསྒྲུབ་པའི་ཕྱོགས་ལེགས་པར་བསྟན་པ་དང་། དེ་བཞིན་གཤེགས་པ་ཐམས་ཅད་ཀྱི་རིགས་མི་གཅད་པའི་ཕྱོགས་ཀྱི་རྗེས་སུ་འབྲང་བར་བྱ་བ་དང་། སངས་རྒྱས་ཐམས་ཅད་ཀྱི་བསྟན་པའི་ཕྱོགས་ཡོངས་སུ་གཟུང་བ་དང་། མི་དགེ་བའི་ཆོས་ཐམས་ཅད་ཀྱི་ཕྱོགས་རྣམ་པར་བཟློག་པ་དང་། ཐམས་ཅད་མཁྱེན་པ་ཉིད་ཀྱི༌ཚོགས་ཀྱི་ཕྱོགས་ཡོངས་སུ་བརྗོད་པ་མཛད་དེ། ཕ་རོལ་ཏུ་ཕྱིན་པའི་སྤྲིན་ཆེན་པོས་སེམས་ཅན་གྱི་ཁམས་ཐམས་ཅད་རྒྱས་པར་བཀང་སྟེ། མངོན་པར་བསྒྲུབས་ནས་བསམ་པ་ཇི་ལྟ་བ་བཞིན་དུ་སེམས་ཅན་ཚིམ་པར་འགྱུར་བར་ཆོས་ཀྱིས་ཤིན་ཏུ་བསྡུ༌བ་ལ་སེམས་ཅན་རབ་ཏུ་དགོད་པར་མཛད་དོ། །

ཐམས་ཅད་མཁྱེན་པ་ཉིད་ཀྱི་ཚོགས་ལ་ཡང་དག་པར་བསྐུལ་ཏོ། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པ་ཆེན་པོ་ལ་རབ་ཏུ་བཙུད་དོ། །འཕགས་པའི་ནོར་ཐམས་ཅད་རབ་ཏུ་ཐོབ་པར་བྱ༌བས་ཉེ་བར་བརྟེན་ཏོ། །ཐམས་ཅད་མཁྱེན་པ་ཉིད་དུ་འདུན་པའི་ཤུགས་ཀྱིས་སེམས་ཅན་རྣམས་ཀྱི་དགེ་བའི་རྩ་བ་རྒྱ་མཚོ་རྣམ་པར༌འཕེལ་བར་མཛད་དོ། །དེ་བཞིན་གཤེགས་པའི་རྣམ་པར་འཕྲུལ་པའི་སྒོར་ཡང་དེ་དག་རབ་ཏུ་བཙུད་དེ། ཕུང་པོ་ཤིན་ཏུ་ཞི་བའི་བདེ་བས་ཡོངས་སུ་བསྡུ༌བས་ཡོངས་སུ་བསྡུས་ཏེ། དེ་བཞིན་གཤེགས་པའི་བདག་ཉིད་ཆེ་བ་ཉིད་ལ་མངོན་དུ་མོས་པར་བྱས་ཏེ། བྱང་ཆུབ་སེམས་དཔའ་ཡོངས་སུ་གཟུང་བའི་ཡེ་ཤེས་ལ་རབ་ཏུ་བཀོད་དོ། །ནོར་བཟང་གིས་སྨྲས་པ། འཕགས་མ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ་གནས་འདི་ནི་ཡིད་ཆེས་པར་དཀའ་བ་སྟེ། ཤེས་པར་དཀའ་བའོ། །མོས་པར་དཀའ་བའོ། །འཇུག་པར་དཀའ་བའོ། །བརྗོད་པར་དཀའ་བའོ། །ཁོང་དུ་ཆུད་པར་དཀའ་བ་སྟེ། ལྷ་དང་བཅས་པའི་འཇིག་རྟེན་དང་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཁོང་དུ་ཆུད་པར་མི་ནུས་སོ། །

གཞན་དུ་ན་དེ་བཞིན་གཤེགས་པའི་བྱིན༌གྱི་རླབས་དང་། དགེ་བའི་བཤེས་གཉེན་གྱིས་ཡོངས་སུ་བཟུང་བ་མ་གཏོགས་ཏེ། གནས་འདི་ནི་སེམས་ཅན་འཁོར་བའི་བདེ་བ་ཐམས་ཅད་ལ་མངོན་པར་འདོད་པ་མེད་པ་དེ་བཞིན་གཤེགས་པའི་བདེ་བ་ལ་ལྷག་པར་དམིགས་པ། སེམས་ཅན་ཐམས་ཅད་ཀྱི་སྡུག་བསྔལ་དང་ཡིད་མི་བདེ་བ་རབ་ཏུ་ཞི་བར་བྱ༌བ་ལ་ཞུགས་པ། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་མངོན་པར་མོས་པ། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པ་ནམ་མཁའི་སྤྱོད་ཡུལ་དང་ལྡན་པ། མོས་པ་ཡངས་པའི་ལམ་གྱིས་རྣམ་པར་དག་པ། འཁོར་བའི་རྒྱུན་ལས་ཕྱིར་ཕྱོགས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རྒྱ་མཚོ་ལ་མངོན་པར་མོས་པ་ཆོས་ཀྱི་གྲོང་ཁྱེར་དུ་འགྲོ་བར་གཅིག་ཏུ་ཆད་པ། དེ་བཞིན་གཤེགས་པའི་ཡུལ་ཡོངས་སུ་གནོན་པའི་བརྩོན་འགྲུས་ཅན། སངས་རྒྱས་ཀྱི་སའི་རྒྱུད་རྣམ་པར་གནོན་པ་ཐམས་ཅད་མཁྱེན་པའི་སྟོབས་ཡོངས་སུ་རྫོགས་པར་བྱ་བ་ལ་མངོན་པར་མོས་པ། སྟོབས་བཅུ་རབ་ཏུ་ཐོབ་པར་བྱ་བའི་མཐར་ཐུག་པ་རྣམས་ཀྱིས་བསོད་ནམས་དང་ཡེ་ཤེས་ཀྱི་ཚོགས་ཡངས་པས་ཉེ་བར་བརྟེན་པའི་སེམས་དང་། བསམ་པ་རྣམ་པར་དག་པ་དང་མ་ཞུམ་པ་དང་། ཉོན་མོངས་པ་མེད་པ་དང་། མ་ཡོ་བ་དང་། མ་ཉམས་པ་དང་། མ་འཆུམས་པ་དང་། མུན་པ་མེད་པའི་སེམས་དང་། ཡེ་ཤེས་ཀྱི་སྣང་བ་ཀུན་ཏུ་སྣང་བས་སྣང་བར་འགྱུར་བའི་སེམས་དང་། སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བར་ཤིན་ཏུ་འདུན་པའི་སེམས་དང་། བདུད་ཀྱི་འཁོར་དང་། ཉོན་མོངས་པ་ཐམས་ཅད་ཀྱིས་མི་ཐུབ་པའི་སེམས་དང་། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཐོབ་པར་བྱ་བར་སྐབས་ཕྱེ་བའི་སེམས་ཀྱིས་ཁོང་དུ་ཆུད་པ་དང་། འཇུག་པ་དང་། ཡིད་ཆེས་པར་བྱ་བ་དང་། གཟུང་བ་དང་རྗེས་སུ་འབྲང་བར་བྱ་བའམ། ཤེས་པར༌བྱ་བར་ནུས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་གནས་འདི་ནི་དེ་བཞིན་གཤེགས་པའི་ཡེ་ཤེས་ཀྱི་ཡུལ་ཏེ། བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ཡོངས་སུ་མ་ནོན་ན། སེམས་ཅན་གཞན་ཐམས་ཅད་ཀྱིས་ལྟ་ཅི་ཞིག་སྨོས། འོན་ཀྱང་སེམས་ཅན་ཅང་ཤེས་རྣམས་ཀྱི་བསམ་པ་ཕུན་སུམ་ཚོགས་པ་རྣམ་པར་དག་པར་བྱ་བ་དང་། དགེ་བའི་རྩ་བ་ལ་སྤྱོད་པའི་སེམས་ཅན་རྣམས་ཀྱི་ལྷག་པའི་བསམ་པ་དབང་དུ་འགྱུར་བར་བྱ་བ་དང་། ཁྱོད་ཀྱིས་བསམ་པ་ཐག་པ་ནས་ཡོངས་སུ་དྲིས་པའི་ལུང་བསྟན་པའི་ཆོས་ཉིད་རབ་ཏུ་འབྱུང་བ་ཐོབ་པར་བྱ་བའི་ཕྱིར་དེ་བཞིན་གཤེགས་པའི་བྱིན༌གྱི་རླབས་ཀྱིས་བསྟན་ཏོ། །

དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ། དོན་དེ་ཉིད༌ལ་བརྣན་ཏེ་བསྟན་པའི་ཕྱིར་དུས་གསུམ་དུ་བྱུང་བའི་དེ་བཞིན་གཤེགས་པའི་ཡུལ་ལ་རྣམ་པར་བལྟས་ཏེ། ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྲས་པོ་ཁྱོད་ཀྱིས་གང་དྲིས་པ། །དེ་ནི་བསམ་ཡས་ཟབ་མོ་སངས་རྒྱས་ཡུལ། །བསམ་ཡས་ཞིང་གི་རྡུལ་ཕྲན་རབ་སྙེད་ཀྱི། །བསྐལ་པ་མང་པོས་དེ་ཀུན་བརྗོད་མི་ནུས། །སེམས་ཅན་འདོད་པའི་སེམས་ལྡན་སྡང་བ་དང་། །དེ་བཞིན་གཏི་མུག་མུན་པས་བསྒྲིབས་པ་དང་། །འཆབ་དང་དྲེགས་པས་བསམ་པ་ཉམས་གྱུར་པས། །རྒྱལ་བའི་ཆོས་ཉིད་ཞི་བ་ཤེས་མི་ནུས། །ཕྲག་དོག་འཇུངས་པའི་དབང་གིས་རྗེས་འབྲང་དང་། །གཡོ་སྒྱུས་བསམ་པ༌རྙོགས་པར་གྱུར་པ་དང་། །ཉོན་མོངས་ལས་ཀྱི་སྒྲིབ་པས་བསྒྲིབས་པ་ཡིས། །སངས་རྒྱས་ཡུལ་འདི་ཤེས་པར་མི་ནུས་སོ། །ཕུང་པོ་ཁམས་དང་སྐྱེ་མཆེད་གནས་པ་དང་། །འཇིག་ཚོགས་མང་ལ་གནས་པར་གྱུར་པ་དང་། །ལྟ་སེམས་འདུ་ཤེས་ཕྱིན་ཅི་ལོག་གྱུར་པས། །ཞི་བའི་ས་འདི་ཤེས་པར་མི་ནུས་སོ། །རྒྱལ་བའི་ཡུལ་ནི་ཤེས་དཀའ་ཞི་བ་སྟེ། །རང་བཞིན་དྲི་མེད་རྣམ་པར་རྟོག་པ་མེད། །སྲིད་པར་རྟེན་ཅིང་འཁོར་ལ་ཆགས་པ་ཡིས། །ཆོས་འདི་ཡང་དག་ཤེས་པར་མི་ནུས་སོ། །སངས་རྒྱས༌རིགས་སུ་རིགས་ལྡན་གང་སྐྱེས་པ། །དེ་བཞིན་གཤེགས་པ་ཀུན་གྱིས་བྱིན་བརླབས་ཤིང་། །ཆོས་ཀྱི་རྒྱལ་པོའི་གདུང་རབས་ཡོངས་འཛིན་པ། །དྲང་སྲོང་དེ་དག་ཡུལ་ནི་འདི་ཡིན་ནོ། །དཀར་ཆོས་རྒྱ་མཚོས་མི་ངོམས་སེམས་ལྡན་ཞིང་། །གང་རྣམས་དགེ་བའི་བཤེས་ཀྱིས་ཡོངས་བཟུང་སྟེ། །ཐུབ་པའི་སྟོབས་ལ་དམིགས་པའི་སེམས་སྤྲིན་ཅན། །དེ་དག་འདི་ཐོས་བཟོད་པ་ཐོབ་པར་འགྱུར། །གང་རྣམས་བསམ་པ་དྲི་མེད་རྣམ་རྟོག་མེད། །བར་སྣང་མཁའ་བཞིན་ཕྱོགས་དང་ཕྱོགས་མཚམས་སུ། །མུན་པ་རྣམ་བསལ་བློ་གྲོས་སྒྲོན་མའི་སྤྲིན། །དྲི་མེད་དེ་དག་སྤྱོད་ཡུལ་འདི་ཡིན་ནོ། །སྙིང་རྗེའི་བསམ་པས་འགྲོ་བ་རྒྱ་མཚོ་རྣམས། །དུས་གསུམ་བྱུང་བ་གང་རྣམས་རྒྱས་བྱེད་ཅིང་། །སེམས་ཅན་མ་ལུས་རྗེས་འབྲང་བྱམས་པ་ཅན། །དེ་དག་རྒྱལ་བའི་ཚུལ་འདིར་འཇུག་པར་འགྱུར། །གང་རྣམས་འཛིན་མེད་དགའ་བའི་སེམས་ལྡན་ཞིང་། །རྟག་པར་བདོག་པ་ཐམས་ཅད་སྦྱིན་བརྩོན་ལ། །སེམས་ཅན་ཀུན་ལ་མཉམ་པར་ཞུགས་གྱུར་པ། །ཆགས་མེད་དེ་དག་སྤྱོད་ཡུལ་ས་འདི་ཡིན། །ཉོན་མོངས་མེད་སེམས་སྐྱོན་མེད་སྤྱོད་ལྡན་ཞིང་། །གང་རྣམས་འགྱོད་པ༌རྣམ་བསྩལ་སེམས་ལྡན་ཏེ། །སངས་རྒྱས་གདམས་ངག་ནན་ཏན་བྱེད་ལྡན་པ། །དྲི་མེད་དེ་དག་སྤྱོད་ཡུལ་འདི་ཡིན་ནོ། །གང་རྣམས་མི་སྒུལ་སེམས་ལྡན་མི་བསྐྱོད་སེམས། །ཆོས་ཀྱི་རང་བཞིན་རྟོགས་པའི་སེམས་ལྡན་ཞིང་། །ལས་ཀྱི་རྒྱ་མཚོར་མི་འགལ་སེམས་ལྡན་པ། །མི་ཟད་དེ་དག་རྣམ་ཐར་འདི་ཡིན་ནོ། །གང་རྣམས་མི་སྐྱེའི་སེམས་དང་མི་ལྡོག་སེམས། །བརྩོན་འགྲུས་མཐུ་དང་རྩལ་དུ་ལྡན་པ་རྣམས། །ཐམས་ཅད་མཁྱེན་ཚོགས་བརྩོན་འགྲུས་མཐའ་ཡས་པ། །བརྟུལ་ཞུགས་བཟང་ལྡན་དེ་དག་ཡུལ་འདི་ཡིན། །ཞི་བའི་སེམས་ལྡན་མཉམ་པར་བཞག་པ་གང་། །ཤིན་ཏུ༌ཞིར་གྱུར་རིམས་དང༌བྲལ་བ་རྣམས། །ཀུན་མཁྱེན་བསམ་གཏན་ཡན་ལག་མཚོར་སྤྱོད་པ། །རབ་ཏུ་ཞི་བ་དེ་དག་ཚུལ་འདི་ཡིན། །གང་རྣམས་ཆགས་པ་ཀུན་ལས་སེམས་གྲོལ་ཞིང་། །ཆོས་ཀྱི་རང་བཞིན་ཁོང་དུ་ཆུད་སེམས་ཅན། །རྒྱལ་བའི་ཆོས་དབྱིངས་རྟོགས་པ་ཁོང་ཆུད་པ། །ཤེས་རབ་སྒྲོན་མ་དེ་དག་ཚུལ་འདི་ཡིན། །སེམས་ཅན་རང་བཞིན་རྟོགས་སེམས་ལྡན་གྱུར་ཅིང་། །གང་རྣམས་སྲིད་པའི་མཚོ་ལ་ཆགས་མེད་སེམས། །སེམས་ཅན་སེམས་ལ་གཟུགས་བརྙན་ཟླ་འཆར་བ། །ལམ་མཁན་དེ་དག་རྣམ་ཐར་འདི་ཡིན་ནོ། །དུས་གསུམ་བྱུང་བའི་རྒྱལ་བ་རྒྱ་མཚོ་རྣམས། །སྨོན་ལམ༌གང་ཆེན་མཚོ་རྒྱུད་སྐྱེས༌པ་ཡི། །ཞིང་རྣམས་ཀུན་ཏུ་ཕྱི་མའི་མཐར་སྤྱོད་པ། །ཀུན་ཏུ་བཟང་པོ་དེ་དག་ཚུལ་འདི་ཡིན། །གང་རྣམས་ཆོས་དབྱིངས་ཚུལ་རྣམས་རྒྱ་མཚོ་ཡིས། །འགྲོ་བ་རྒྱ་མཚོ་འདུ་དང་འཇིག༌པ་ཡི། །བསྐལ་པར་བཅས་པ་ཁོང་དུ་ཆུད་པའི་རྣམས། །རྟོག་མེད་དེ་དག་རྣམ་ཐར་འདི་ཡིན་ནོ། །ཞིང་རྣམས་ཀུན་གྱི་རྡུལ་ཕྲན་ཐམས་ཅད་ལ། །སངས་རྒྱས་གྲངས་མེད་ཤིང་རྒྱལ་དྲུང་བཞུགས་ཤིང་། །བྱང་ཆུབ་འཚང་རྒྱ་འགྲོ་འདུལ་མཐོང་བ་ཡི། །ཆགས་མེད་མིག་ཅན་དེ་དག་ཚུལ་འདི་ཡིན། །ཁྱོད་ནི་བསྐལ་པ་རྒྱ་མཚོ་རྒྱ་ཆེན་དུ། །དགེ་བའི་བཤེས་གཉེན་མང་པོ་བསྙེན་བཀུར་ཏེ། །ཆོས་འདོད་ཆོས་ཚོལ་མི་སྐྱོ་འདིར་ཕྱིན་པས། །ཐོས་ནས་དེ་ནི་ཡོངས་སུ་གཟུང་བར་ནུས། །ཁྱོད་ཀྱི་བསམ་པ་ཡོངས་སུ༌སྦྱང་བའི་ཕྱིར། །བདེ་གཤེགས་བྱིན་རླབས་བསམ་གྱིས་མི་ཁྱབ་པས། །རྣམ་པར་སྣང་མཛད་ཚད་མེད་ཡུལ་འདི་ཡང་། །ཁོ་མོའི་ཚིག་ལས་ཆགས་པ་མེད་པར་འབྱུང་། །རིགས་ཀྱི་བུ་སྔོན༌འདས་པའི་དུས་བསྐལ་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེའི༌ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་བ་ཞེས་བྱ་བ་བྱུང་སྟེ།

རིགས་ཀྱི་བུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་བ་དེར་དེ་བཞིན་གཤེགས་པ་ཡེ་ཤེས་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟི་བརྗིད་རྒྱལ་པོ་ཞེས་བྱ་བ་བྱུང་སྟེ། དེ་བཞིན་གཤེགས་པ་ཡེ་ཤེས་རི་བོའི་འོད་ཆོས་ཀྱི་དབྱིངས་སུ་སྣང་བའི་གཟི་བརྗིད་རྒྱལ་པོ་དེ། སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་བ་ཞེས་བྱ་བ་འཇིག་རྟེན་གྱི་ཁམས་རྒྱ་མཚོའི་ས་དང་། རི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་འབྱམས་ཀླས་པ་བསྟན་དུ་ཡོད་པ་དང་ལྡན་པ། འཇིག་རྟེན་གྱི་ཁམས་ཀྱི་རྒྱུད་རེ་རེ་ཞིང་ཡང་བསྐལ་པའི་གྲངས་ཤིན་ཏུ་བསྟན་པ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་ལྡན་པ་བསྐལ་པ་རེ་རེ་ཞིང་ཡང་བསྐལ་པ་བར་མ་ཤིན་ཏུ་བསྟན་པ་དུ་མ་དང་ལྡན་པ་བསྐལ་པ་བར་མ་རེ་རེ་ཞིང་ཡང་འཇིག་རྟེན་གྱི་ཁམས་རྣམ་པ་ཐ་དད་དུ་བྱ་བ་བསྟན་པ་དུ་མ་དང་ལྡན་པ། དེ་བཞིན་གཤེགས་པ་འབྱུང་བ་དང་། རྫུ་འཕྲུལ་སྣ་ཚོགས་བསྟན་དུ་ཡོད་པ་དེ་བཞིན་གཤེགས་པ་འབྱུང་བ་རེ་རེ་ཞིང་ཡང་མདོ་སྡེ་ཡང་དག་པར་བསྟན་པ། འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བརྗོད་དུ་ཡོད་པ་མདོ་སྡེ་རེ་རེ་ལ་ཡང་བྱང་ཆུབ་སེམས་དཔའི་ལུང་བསྟན་པ།

འཇིག་རྟེན་གྱི་ཁམས་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བསྟན་དུ་ཡོད་པ་སེམས་ཅན་འདུལ་བ་མཐའ་དང་དབུས་མེད་པ་ཤིན་ཏུ་བསྟན་པ། ཐེག་པ་ཐ་དད་པའི་ཚུལ་གྱིས་བསྒྲུབས་པ། སངས་རྒྱས་ཀྱི་རྣམ་པར་འཕྲུལ་པ་དང་ཆོ་འཕྲུལ་སྣ་ཚོགས་ཀྱིས་རྣམ་པར་འདུལ་བ་དང་ལྡན་པ་ཡོངས་སུ༌སྦྱངས་ཏེ། རིགས་ཀྱི་བུ་འཇིག་རྟེན་གྱི་ཁམས་རྒྱ་མཚོ་གསེར་རིན་པོ་ཆེའི་རི་སྤོ་རྣམ་པར་སྣང་བ་དེར། འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་ཏུ་མངོན་པར་བལྟས་པའི་སྒོ་རྒྱལ་མཚན་གྱིས་རྣམ་པར་བརྒྱན་པ་ཞེས་བྱ་བ་བྱུང་སྟེ། རིགས་ཀྱི་བུ་འཇིག་རྟེན་གྱི་ཁམས་བར་མའི་རྒྱུད་ཕྱོགས་ཀུན་ཏུ་སྒོ་མངོན་པར་བལྟས་པ་རྒྱལ་མཚན་གྱིས་རྣམ་པར་བརྒྱན་པ་དེར། འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱི་མདོག་ཀུན་ཏུ་སྣང་བའི་དཔལ་ཞེས་བྱ་བ་འཇིག་རྟེན་གྱི་ཁམས་ཀྱི་གཞི་དང་། མཚམས་ཀྱི་རྒྱན་རིན་པོ་ཆེའི་རྒྱལ་པོ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་རབ་ཏུ་སྣང་བ་ལས་བྱས་པ། རིན་པོ་ཆེ་སྣ་ཚོགས་ཀྱི་མེ་ཏོག་རྒྱ་མཚོ་ལ་གནས་པ། ལྷུན་རིན་པོ་ཆེའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱི་སྤྲུལ་པའི་གཟུགས་བརྙན་རབ་ཏུ་སྟོན་པ་ལས་བསྒྲུབས་པ། ལྷའི་གྲོང་ཁྱེར་གྱི་དབྱིབས་སུ་འདུག་པ་རྣམ་པར་དག་ཅིང་ཀུན་ནས་ཉོན་མོངས་པ་བྱུང་བར་གྱུར་ཏེ། འཇིག་རྟེན་གྱི་ཁམས་དེར་གླིང་བཞི་པའི་འཇིག་རྟེན་གྱི་ཁམས་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་བྱུང་བར་གྱུར༌ཏོ། །གླིང་བཞི་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་གི་གླིང་བཞི་པ་དབུ་མ་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་ཞེས་བྱ་བ་བྱུང་སྟེ། གླིང་བཞི་པའི་འཇིག་རྟེན་གྱི་ཁམས་རིན་པོ་ཆེ་སྣ་ཚོགས་ཀྱི་རྩེ་མོའི་རྒྱལ་མཚན་དེར་གླིང༌ཆུ་ཞེང་དུ་དཔག་ཚད་བརྒྱ་ཕྲག་སྟོང་ཡོད་པ་བཞི་བྱུང་ནས་གླིང་རེ་རེར་ཡང་གྲོང་ཁྱེར་ཆེན་པོ་སྟོང་ཕྲག་རེ་རེ་བྱུང་ངོ་། །

གླིང་བཞི་པ་དེའི༌འཛམ་བུ་གླིང་གི་དབུས་སུ་རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ། སྤྲིན་གྱི་སྒྲོན་མ་ཞེས་བྱ་བ་གྲོང་ཁྱེར་སྟོང་ཕྲག་བཅུའི་འཁོར་དང་ལྡན་པ་བྱུང་ངོ་། །དེའི་ཚེ་འཛམ་བུའི་གླིང་དེའི་མི་རྣམས་ཀྱང་ཚེའི་ཚད་ལོ་སྟོང་ཕྲག་བཅུ་ཐུབ་པར་གྱུར་ཏོ། །རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ་སྤྲིན་གྱི་སྒྲོན་མ་དེར་འཁོར་ལོས་སྒྱུར་བའི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་སྟེ། འཁོར་ལོས་སྒྱུར་བའི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་བློན་པོ་ནི་ལྔ་བརྒྱ་བྱུང་ངོ་། །

བཙུན་མོ་ནི་སྟོང་ཕྲག་དྲུག་ཅུ་བྱུང་ངོ་། །སྲས་ནི་ཀུན་ཀྱང་དཔའ་བ་བརྟུལ་ཕོད་པ། ཡན་ལག་དམ་པའི་གཟུགས་དང་ལྡན་པ། ལྟ་ན་སྡུག་པ་གཟི་བརྗིད༌ཆེ་བ། སྟོབས་ཆེ་བ་བརྒྱ་ཕྲག་བདུན་བྱུང་ངོ་། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་ཚེ་ལ་འཛམ་བུའི་གླིང་ཐམས་ཅད་ཀྱང་གདུགས་གཅིག་གིས་བསྐྱངས་པར་གྱུར་ཏེ། ཕ་རོལ་གྱི་འཁོར་དང་དགྲ་ཐམས་ཅད་ཀྱང་ཤིན་ཏུ་ཆོམས་པར་གྱུར་ཏོ། །

དེའི་ཚེ་འཇིག་རྟེན་གྱི་ཁམས་དེར་བསྐལ་པ་བར་མ་ནི་ཟད་དུ་ཆ། རྙོག་པ་ལྔ་ནི་འཇིག་རྟེན་དུ་བྱུང་། དགེ་བ་བཅུའི་ལས་ཀྱི་ལམ་ནི་ནུབ་པར་གྱུར་ནས། སེམས་ཅན་མི་དགེ་བ་བཅུའི་ལམ་ལ་སྤྱོད་པ་ཕལ་ཆེར་ངན་སོང་དུ་ཡང་འདོང་བར་གྱུར་ཏོ། །དེ་དག་མི་དགེ་བ་བཅུའི་ལས་ཀྱི་ལམ་ཡོངས་སུ་འཛིན་པའི་རྒྱུས་ཚེ་ཐུང་བ་དང་ལོངས་སྤྱོད་ཆུང་བ་དང་གཟུགས་མ་ལེགས་པ་དང་། ཁ་དོག་མི་སྡུག་པ་དང་། ལུས་མ་ལེགས་པ་དང་། བདེ་བའི་རྣམ་པ་ཉུང་བ་དང་། སྡུག་བསྔལ་ཉམས་སུ་མྱོང་བའི་རྣམ་པ་མང་བ་དང་། ཕན་ཚུན་བསླུ་ཞིང་འདྲིད་པའི་རང་བཞིན་ཅན་དང་། ཕན་ཚུན་དབྱེ་བ་ལ་ཞུགས་པ་དང་། ཞེ་གཅོད་པའི་ཚིག་ལ་སྤྱོད་པ་དང་། འཆལ་བའི་ཚིག་ཏུ༌སྨྲ་བ་དང་། འདོད་པ་མི་བཟད་པས་ཟིལ་གྱིས་གནོན་པ་དང་། ཞེ་སྡང་བའི་ཡིད་ཀྱི་རྟོག་པ་དང་ལྡན་པ་དང་། ལྟ་བའི་ཐིབས་པོ་སྣ་ཚོགས་ཀྱི་མྱ་ངམ་དུ་འཁྱམས་པར་གྱུར་ནས། དེ་དག་ཆོས་མ་ཡིན་པའི་འདོད་ཆགས་ལ་ཞེན་ཅིང་འདོད་པ་མི་བཟད་པས་ཟིལ་གྱིས༌ནོན་ལ། ལོག་པའི་ཆོས་ཀྱིས་ཀུན་ནས་འཁོར་བས་ས་ལ་ཤིང་རྩི་དང་། ལོ་ཟས་སྐྱེ་བར་འགྱུར་བའི་ཆར་ཡང་དུས་སུ་མི་འབབ་པར་གྱུར་ཏེ། སེམས་ཅན་དེ་དག་ཀྱང་རྩྭ་དང་གེལ་པ་དང་སྨན་དང་ནགས་ཚལ་དང་། བཟའ་ཤིང་གི་ར་བ་དང་སྡོང་པོ་དག་ཀྱང་སྐམས་པར་གྱུར་ནས། ནད་སྣ་ཚོགས་ཀྱིས་ཐེབས་ཤིང་ཕྱོགས་དང་ཕྱོགས་མཚམས་སུ་སྐྱབས་མེད་པས། ཕན་ཚུན་ཁོད་མི༌མྱོང་ཞིང་གཡེན་སྤྱོ་བར་གྱུར་ཏེ།

དེ་དག་ཀུན་ཀྱང་གཅིག་ཏུ་འདུས་ནས་རྒྱལ་པོའི་གནས་རིན་པོ༌ཆེའི་ས་ལས་རྣམ་པར་བརྒྱན༌པ་སྤྲིན་གྱི་སྒྲོན་མ་གང་ན་བ་དེར་དོང་སྟེ། ཀུན་ནས་བསྐོར་ནས། ལ་ལ་ནི་ལག་པ་གྱེན་དུ་སྒྲེང་། ལ་ལ་ནི་ཐལ་མོ་སྦྱོར། ལ་ལ་ནི་ལུས་ཤིན་ཏུ་འདར། ལ་ལ་ནི་གྱེད། ལ་ལ་ནི་བུབ། ལ་ལ་ནི་ལུས་ཐམས་ཅད་ཀྱིས་ཕབ་ཅིང་ཕྱག་འཚལ། ལ་ལ་ནི་པུས་མོ་ས་ལ་འཛུགས། ལ་ལ་ནི་ལག་པ་ནམ་མཁའི་དབྱིངས་སུ་གཡོ་བ། ལ་ལ་ནི་གོས་མེད་ཅིང་སྒྲེན་མོར་འཁོད། ལ་ལ་ནི་ཁ་མིག་མི་སྡུག་པར་གྱུར་ཅིང་། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་མངོན་ཏུ་བལྟས་ཤིང་། སྙིང་རྗེ་རྗེ་སྐད་དུ་འོ་དོད་ཆེན་པོ་འབོད་དེ། ལྷ་ཆེན་པོ་བདག་ཅག་ནི་ཉམ་ཐག་གོ །བཀྲེས་པ་དང་སྐོམ་པའི་སྡུག་བསྔལ་གྱིས་རབ་ཏུ་གཟིར་ཏོ། །འཇིགས་པ་སྣ་ཚོགས་ཀྱིས་གཡེན་སྤྱོའོ། །བདག་ཅག་ལ་སྐྱབས་མ་མཆིས་སོ། །བདག་ཅག་ལ་མགོན་དང་དཔུང་གཉེན་མ་མཆིས་སོ། །སྡུག་བསྔལ་གྱི་ཤིང་ཐགས་ཀྱིས་འཁོར་ཏོ། །སྲོག་ཆད་ལ་ཐུག་གོ །འཆི་བར་གྱུར་མ༌ཁད་དོ། །ཞེས་ཏེ་སྨྲེ་སྔགས་སྣ་ཚོགས་སུ་བླ་ཞིང་དབྱངས་ཀྱི་རྣམ་པ་སྣ་ཚོགས་དང་། ཚིག་སྣ་ཚོགས་ཀྱིས་ཁ་གདོང་མི་སྡུག་པར་གྱུར་པར་འདུ་ཤེས་དང་ཚིག་སྣ་ཚོགས་ཀྱི་ཐ་སྙད་དང་། ཆོ་མགྲེང་དང་སྐད་ཀྱི་གདངས་དོན་སྣ་ཚོགས་བརྗོད་པའི་ཚིག་དང་། ངག་གིས་འོ་དོད་བོས་སོ། །

རྒྱལ་པོའི་གནས་དེའི་སྐྱེས་པ་དང་བུད་མེད་དང་ཁྱེའུ་དང་། བུ་མོ་བཀྲེས་པ་དང་སྐོམ་པས་མནར་བ་ལུས་ལ་རྒྱན་མེད་པ་སྒྲེན་མོ་གོས་མེད་པ། ཁ་དོག༌དང་མདོག་མི་སྡུག་པ་ལུས་གས་ཤིང་རྩུབ་པ། སྡུག་བསྔལ་ཞིང་ཡིད་མི་བདེ་ལ། མི་དགའ༌བ་དེ་དག་ཐམས་ཅད་ཀྱང་བདེ་བ་ནི་མངོན་པར་འདོད། སྡུག༌བསྔལ་གྱི་འཇིགས་པས་ནི་བརླ་ཁྱེར་ནས་རྒྱལ་པོ་ཤེས་པའི་སྐྱེས་བུ་ཆེན་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ། དེ་ལ་བདེ་བ་ཐམས་ཅད་ཐོབ་པར་བྱ་བའི་འདུ་ཤེས་དང་། སྡུག་བསྔལ་ཐམས་ཅད་དང་མི་འགྲོགས་པར་བྱ་བའི་འདུ་ཤེས་དང་། འཚོ་བའི་བསམ་པ་དང་ལྡན་ཞིང་གཏེར་ཐོབ་པར་བྱ་བའི་འདུ་ཤེས་དང་། མུ་སྟེགས་མཐོང་བར་བྱ་བའི་འདུ་ཤེས་དང་། ལམ་ཆེན་པོ་ལ་ནན་ཏན་དུ་བྱ་བའི་འདུ་ཤེས་དང་། གྲུ་ཆེན་པོའི་འདུ་ཤེས་དང་། ཡེ་ཤེས་ཀྱི་གླིང་ཆེན་པོའི་འདུ་ཤེས་དང་། དོན་ཆེན་པོ་རབ་ཏུ་ཐོབ་པར་བྱ་བའི་འདུ་ཤེས་དང་། མཐོ་རིས་ཀྱི་དགའ་བ་དང་བདེ་བ་ཐམས་ཅད་རབ་ཏུ་ཐོབ་པར་བྱ་བའི་འདུ་ཤེས་ཀྱིས་མགོན་དང་སྐྱབས་ཚོལ་བར་གྱུར་ཏོ། །རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་འཁོར་ཀུན་ནས་སློང་བ་མང་པོ་སྙིང་རྗེ་རྗེ་སྐད་དུ་འབོད་པའི་འོ་དོད་ཆེན་པོ་དེ་ཐོས་ནས། དེ་སྙིང་རྗེ་ཆེན་པོའི་སྒོ་བརྒྱ་སྟོང་གྲངས་མེད་པ་ཕྲག་བཅུ་ལ་ཞུགས་པར་གྱུར་ཏོ། །དེ་སྙིང་རྗེ་ཆེན་པོའི་ཚུལ་ཡིད་ལ་བབ་པའི་སེམས་སུ་གྱུར་ནས། ཡུད་ཙམ་ཞིག་རྩེ་གཅིག་ཏུ༌བསམས་ཏེ་སྙིང་རྗེ་ཆེན་པོ་དང་ལྡན་པའི་ཚིག་བཅུ་བརྗོད་དོ། །

བཅུ་གང་ཞེ་ན། ཀྱེ་ཧུད་ཀྱེ་སེམས་ཅན་འདི་དག་ནི་འཁོར་བའི་གཡང་ས་ཆེན་པོར་ལྷུང་ཡང་སྐྱབས་མེད་པ་ལྟ་ན། བདག་ནམ་ཞིག་འཁོར་བའི་གཡང་ས་ཆེན་པོར་ལྷུང་བའི་སེམས་ཅན་རྣམས་དེ་བཞིན་གཤེགས་པའི་ས་ལ་དགོད་པས་གནས་སུ་འགྱུར། ཀྱི་ཧུད་ཀྱེ་སེམས་ཅན་འདི་དག་ཉོན་མོངས་པའི་གནོད་པས་གཙེས་ཤིང་སྐྱབས་མེད་པ་ལྟ་ན། ནམ་ཞིག་བདག་སེམས་ཅན་ཉོན་མོངས་པ་སྣ་ཚོགས་ཀྱིས་འཇིགས་པ་དང་། གནོད་པས༌གཙེས་ཏེ་སྐྱབས་མེད་པ་རྣམས་ཁ་ན་མ་ཐོ་བ་མེད་པའི་ལས་ཀྱི་མཐའ་ལ་འགོད་པས་སྐྱབས་སུ་འགྱུར། ཀྱི་ཧུད་ཀྱེ་སེམས་ཅན་འདི་དག་འཇིག་རྟེན་ན་རྒ་ཤིའི་འཇིགས་པས་ཚར་ཆོད་ཅིང་མགོན་མེད་པ། ལྟ་ན་ནམ་ཞིག་བདག་སེམས་ཅན་མགོན་མེད་པ་རྣམས་ཀྱི་འཁོར་བའི་འཇིགས་པ་ཐམས་ཅད་རྣམ་པར་སེལ་བས་མགོན་དུ་འགྱུར། ཀྱི་ཧུད་ཀྱེ་སེམས་ཅན་འདི་དག་འཇིག་རྟེན་གྱི་འཇིགས་པ་སྣ་ཚོགས་ཀྱིས་གཙེས་ཏེ། རྟེན་མེད་པ་ལྟ་ན་ནམ་ཞིག་བདག་སེམས་ཅན་འཇིག་རྟེན་གྱི་འཇིགས་པ་སྣ་ཚོགས་ཀྱིས་གཙེས་པ་རྣམས་ཤིན་ཏུ་བདེ་ཞིང་སྐྱོན་མེད་པའི་ཐམས་ཅད་མཁྱེན་པའི་ལམ་ལ་འགོད་པས་རྟེན་དུ་འགྱུར།

ཀྱི་ཧུད་ཀྱེ་སེམས་ཅན༌འདི་དག་འཇིག་རྟེན་ན་མ་རིག་པའི་མུན་པར༌འཐོམས་ཏེ་ཐེ་ཚོམ་དང་ཡིད་གཉིས་ཀྱི་རབ་རིབ་ཀྱིས་བསྒྲིབས་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཀྱི་མ་རིག་པའི་མུན་པ་རྣམ་པར་སེལ་བས་སྒྲོན་མར༌གྱུར་པར་འོང་། ཀྱི་ཧུད་ཀྱེ་སེམས་ཅན་འདི་དག་ནི་སྣང་བ་དང་བྲལ་བ་ལྟ་ན་ནམ་ཞིག་བདག་ཡེ་ཤེས་ཀྱི་སྒོ་རབ་རིབ་མེད་པར་ཡོངས་སུ་སྟོན་པས་ཡེ་ཤེས་ཆེན་པོའི་སྣང་བ་འབྱིན་པར་འགྱུར།

ཀྱི་ཧུད་ཀྱེ་སེམས་ཅན་འདི་དག་ནི་ཕྲག་དོག་དང་འཇུངས་པ་དང་། གཡོ་དང་སྒྱུའི་རྙོག་པས་བསམ་པ་རྙོག་པ་ཅན་དུ་གྱུར་ཏེ། ཡེ་ཤེས་ཀྱི་མདོག་གསལ་བ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཤིན་ཏུ་དག་པ་ལ་རབ་ཏུ༌འགོད་ཅིང་བླ་ན་མེད་པའི་ཡེ་ཤེས་ཀྱི་མདོག་རབ་ཏུ་གསལ་བར་བྱེད་པར་འགྱུར། ཀྱི་ཧུད་ཀྱེ་སེམས་ཅན༌གྱི་འཇིག་རྟེན་ནི་འཁོར་བའི་རྒྱ་མཚོའི་ཡུལ་གྱི་རྒྱུད་དུ་ཞུགས་ཤིང་འདྲེན་པ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་ཆོས་རྒྱ་མཚོའི་ཚུལ་ལ་འཛུད་ཅིང་འདྲེན་པར༌འགྱུར་བར་འོང་།

ཀྱི་ཧུད་ཀྱེ་སེམས་ཅན༌གྱི་འཇིག་རྟེན་མ་དུལ་ཞིང་རྣམ་པར་འདྲེན་པ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་རྣམ་པ་ཐམས་ཅད་དུ་ཡོངས་སུ་སྨིན་པར་བྱ་བ་དང་། རྣམ་པར་གདུལ་བ་ལ་དེ་བཞིན་གཤེགས་པའི་བྱིན༌གྱི་རླབས་ཀྱི་དུས༌ལས་མི་འདའ་ཞིང་རྣམ་པར་འདྲེན་པར༌འགྱུར་བར་འོང་། ཀྱི་ཧུད་ཀྱེ་སེམས་ཅན༌གྱི་འཇིག་རྟེན་ནི་དམུས་ལོང་དུ་གྱུར་ཏེ། ཡོངས་སུ་འདྲེན་པ་མེད་པ་ལྟ་ན། ནམ་ཞིག་བདག་སེམས་ཅན་ཐམས་ཅད་སྒྲིབ་པ་མེད་པའི་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ལ་འཛུད་ཅིང་ཡོངས་སུ་འདྲེན་པར་འགྱུར་དེ་སྐད་དུ་དེས་སྙིང་རྗེ་ཆེན་པོ་དང་ལྡན་པའི་ཚིག་རྣམ་པ་བཅུ་བརྗོད་ནས་རྒྱལ་པོའི་གནས་དེར་དྲིལ་ཆེན་པོ་བརྡུངས་ཏེ། གཏོང་བ་ཆེན་པོའི་རྔ་བོ་ཆེ་ཡང་ཡོངས་སུ་བརྡུངས་ནས། སུ་ཅི་འདོད་པ་དེ་ལ་དེ་སྦྱིན་གྱིས། འགྲོ་བ་ཐམས་ཅད་ཀྱང་ཡོངས་སུ་ཚིམ་པར་བྱའོ་ཞེས་སྒྲ་བརྗོད་དེ། དེས་འཛམ་བུའི་གླིང་ཐམས་ཅད་ཀྱི་རྒྱལ་པོའི་གནས་ཐམས་ཅད་དང་། གྲོང་དང་གྲོང་ཁྱེར་དང་ལྗོངས་དང་། ཡུལ་དང་གྲོང་རྡལ་ཐམས་ཅད་དུ་ཡོ་བྱད་ཐམས་ཅད་ཀྱི་མཛོད་ཕྱེ་སྟེ། ལམ་གྱི་བཞི་མདོ་དང་། ལམ་གྱི་སུམ་མདོ་དང་སྲང་ཐམས་ཅད་དུ་ཡང་ཡོ་བྱད་སྣ་ཚོགས་ཀྱི་རྣམ་པ་མང་པོ་བཀོད་དེ་འགྲོ་བ་ཐམས་ཅད་ཉེ་བར་འཚོ་བར་བསྟབས་སོ། །མཛོད་དང་བང་བ་ཐམས་ཅད་ཀྱང་ཕྱེ་སྟེ། རིན་པོ་ཆེའི་གཏེར་ཆེན་པོ་དང་ཚོགས་ཀྱང་ཡོངས་སུ་བསྟན་ཏོ། །

རིན་པོ་ཆེ་རྣམ་པ་སྣ་ཚོགས་ཀྱི་ཕུང་པོ་དུ་མ་ཡང་སྤུངས་སོ། །ཟས་དང་སྐོམ་དང་། གོས་དང་བཞོན་པ་དང་མེ་ཏོག་དང་། ཕྲེང་བ་དང་བདུག་པ་དང་བྱུག་པ་དང་། ཕྱེ་མ་དང་གོས་རིན་པོ་ཆེ་ཁ་དོག་སྣ་ཚོགས་ཀྱི་མཛོད་ཕྱེ་ནས། ཁང་པ་དང་། གཞལ་མེད་ཁང་དང་། ཁྱིམ་མང་པོ་མལ་ཆ་དང་། སྟན་དང་གོས་ཀྱིས་ཡོངས་སུ་བརྒྱན་ཏེ། ནོར་དང་དབྱིག་ཐམས་ཅད་ཕུན་སུམ་ཚོགས་པར་བྱས་ནས། ནོར་བུ་རིན་པོ་ཆེའི་རྒྱལ་པོ་སྣང་བའི་གཟི་བརྗིད་རྣམ་པར་བཀོད་པས་མུན་པ་རྣམ་པར་སེལ་བ་བཤམས་ནས། དེས་སེམས་ཅན་དེ་དག་ཅི་འདོད་པའི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར། ཁྱིམ་དེ་དག་རེ་རེར་ཡང་རང་གི་ལུས་དང་འདྲ་བའི་སྤྲུལ་པའི་ལུས་མངོན་པར་སྤྲུལ་ཏེ་ཀུན་ཏུ་བཀོད་དོ། །

སེམས་ཅན་ཐམས་ཅད་ཀྱི་ནད༌ཐམས་ཅད་གསོ་བའི་ཕྱིར་སྨན་པ་དང་སྨན་དང་། རིམ་གྲོ་བ་དང་། འཚོ་བའི་ཡོ་བྱད་སྣ་ཚོགས་ཀྱི་རྐྱེན་ཕུན་སུམ་ཚོགས་པ་ཡོངས་སུ་བཤམས་སོ། །རིན་པོ་ཆེ༌སྣ་ཚོགས་ཀྱི་སྣོད་རྣམ་པ་ཐ་དད་པ་ཡོ་བྱད་སྣ་ཚོགས་ཀྱིས་ཅི་རིགས་སུ་བཀང་བ་དག་ཀྱང་ཉེ་བར་བཀོད་དེ། འདི་ལྟར་རིན་པོ་ཆེ་རྡོ་རྗེའི་སྣོད་ནི་སྤོས་ཀྱི་ནོར་བུ་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་། སྤོས་ཀྱི་ནོར་བུ་རིན་པོ་ཆེ་སྣ་ཚོགས་ཀྱི་སྣོད་ནི་གོས་ཁ་དོག་དམ་པ་སྣ་ཚོགས་ཀྱིས་ཡོངས་སུ་བཀང་ངོ་། །ཤིང་རྟ་མང་པོ་དབྱིབས་དང་། མདོག་སྣ་ཚོགས་སུ་འདུག་པ། རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་པ། རྟ་དང་གླང་པོ་དང༌བ་ལང་ཅང་ཤེས་ལ་བཅས་པ། རིན་པོ་ཆེའི་ཤིང་རྟ་སྣ་ཚོགས་རྒྱལ་པོའི་རྐྱེན་དུ་རུང་བ། རིན་པོ་ཆེ་ཐམས་ཅད་ཀྱི་རྒྱན་གྱིས་ལོངས་སྤྱོད་དང་ལྡན་པ། སྟན་སྣ་ཚོགས་བཏིང་བ། རིན་པོ་ཆེ་སྣ་ཚོགས་ཀྱིས་རྣམ་པར་བརྒྱན་པ། བླ་རེ་སྣ་ཚོགས་བྲེས་པ། རིན་པོ་ཆེའི༌དྲིལ་བུའི་དྲ་བ་བྲེས་པ། གདུགས་དང་། རྒྱལ་མཚན་དང་བ་དན་བསྒྲེང་བས་བརྒྱན་པ་དག་གིས་ཀྱང་། ཡུལ་གྱི་ཕྱོགས་གང་བར་བཀོད་དོ། །གྲོང་དང་གྲོང་ཁྱེར་དང་། ལྗོངས་དང་ཡུལ་ཐམས་ཅད་སྦྱིན་པར་ཡང་འོ་དོད་ཀྱིས་བསྒོའོ། །བཟའ་ཤིང་གི་ར་བ་དང་། ཀུན༌དགའི་ར་བ་དང་། དཀའ་ཐུབ་ཀྱི་ནགས་ཚལ་སྣ་ཚོགས་ཡོངས་སུ་གཏང་བ་དང་། ཁྱིམ་དང་ཆུང་མ་དང་བུ་དང་བུ་མོ་ཐམས་ཅད་ཡོངས་སུ་གཏང་བ་དང་། རིན་པོ་ཆེ་རིན་ཐང་མེད་པ་ཐམས་ཅད་ཡོངས་སུ་གཏང་བ་དང་། རང་གི་སྙིང་དང་རྐང་དང་རྒྱུ་མ་དང་མཁལ་མ་དང་ཚིལ་དང་། ཤ་དང་ཁྲག་དང་པགས་པ་དང་རྐ་ལག་དང་རྣ་བ་དང་། མིག་དང་སྣ་དང༌ལྕེ་དང་སོ་དང་། མཆུ་དང་མགོ་ཡོངས་སུ༌བཏང་བ་ནས། ཕྱི་ནང་གི་དངོས་པོ་ཐམས་ཅད་རྣམ་པ་ཐམས་ཅད་དུ་ཡོངས་སུ་གཏང་བར་ཡང་འོ་དོད་ཀྱིས་བསྒོའོ། །དེས་ཡོ་བྱད་དེ་ལྟ་བུ་ཡོངས་སུ་གཏང་བའི་རྣམ་པ་མང་པོ་བཤམས་ཏེ་བསོགས་ནས་རྒྱལ་པོའི་གནས་རིན་པོ་ཆེའི་ས་ལས་རྣམ་པར་བརྒྱན་པ། སྤྲིན་གྱི་སྒྲོན༌མ་དེའི་ཤར་ཕྱོགས་ལོགས་ན་གྲོང་ཁྱེར་རིན༌པོ་ཆེ་རྩེ་མོའི་གཟི་བརྗིད་ཅེས་བྱ་བའི་མདུན་རོལ་ནས་གཞི་མཉམ་པའི་ཕྱོགས་ཡངས་པ་ཆུ་ཞེང་དུ་རྒྱ་ཆེ་ཞིང་མཉམ༌པ་མཐོན་དམན་མེད་པ། རྣམ་པར་དག་ཅིང་གཞི་མཉམ་པ་ངམ་གྲོག་དང་གཡང་ས་དང་སྡོང་དུམ་དང་། ཚེར་མ་དང་། གསེག་མ་དང་། གྱོ་མོ་ཐམས་ཅད་མེད་པ་རིན་པོ་ཆེ་ཐམས་ཅད་ཀྱི་ཁམས་ལས་གྲུབ་པ། གཞི་རིན་པོ་ཆེ་ཐམས་ཅད་ལས་བྱས་ཤིང་། རིན་པོ་ཆེའི་རྒྱལ་པོ་ཐམས་ཅད་བཀྲམ་པ། ནོར་བུ་རིན་པོ་ཆེའི་རྒྱན་རྣམ་པ་དུ་མས་བརྒྱན་པ་རིན་པོ་ཆེའི་མེ་ཏོག་སྣ་ཚོགས་ཀྱིས་གང་བ་ཕྱེ་མ་སྣ་ཚོགས་དྲི་ཤིན་ཏུ་ཞིམ་པའི་རྡུལ༌ལྡང་བ། བདུག་སྤོས་སྣ་ཚོགས་ཀྱིས་བདུགས་པ། རིན་པོ་ཆེའི་སྒྲོན་མ་དཔལ༌གྱི་གཟི་བརྗིད་ཅན་རབ་ཏུ་འབར་བ། སྤོས་དང་བདུག་སྤོས་ཐམས་ཅད་ཀྱི་ན་བུན་དང་། སྤྲིན་གྱི་ནམ་མཁའ་ཀུན་ཏུ་ཁེབས་པའི་རྒྱན་དང་ལྡན་པ།

རིན་པོ་ཆེ་སྣ་ཚོགས་ཀྱི་ཤིང་གི་ཕྲེང་བ་ལེགས་པར་བཀྱེ་བས་མཛེས་པར་བརྒྱན་པ། ཁང་པ་དང་གཞལ་མེད་ཁང་དང་ཁང་པ་བརྩེགས་པ་སྣ་ཚོགས་ཀྱིས་ཡོངས་སུ་བརྒྱན་པ། གདུགས་དང་རྒྱལ་མཚན་དང་། བ་དན་བསྒྲེང་བ་རིན་པོ་ཆེའི་སྣམ་བུ་ལྡིང་བ། རྣམ་པར་སྣང་བ་རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བས་ཀུན་ནས་ཁེབས་པ། རིན་པོ་ཆེའི་སྤོས་ཐམས་ཅད་ཀྱི་རྒྱལ་པོའི་དྲ་བའི་གདུགས་ཀྱི་དཀྱིལ་འཁོར་ཅན། གསེར་གྱི་དྲ་བ་ལས་རིན་པོ་ཆེའི་དྲིལ་བུ་འཁྲོལ་བ་དང་ལྡན་པ། བླ་རེ་རིན་པོ་ཆེ་སྣ་ཚོགས་ཀྱིས་རྣམ་པར་མཛེས་པར༌བྱས་པས་ཁེབས་པར་བྲེས་པ། སྤོས་ཀྱི་རྒྱལ་པོ་སྣ་ཚོགས་ཀྱི་ཕྱེ་མ་རྣམ་པར་བཀྲམ་པ། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་དགའ་དགའ་ལྟར་གང་བ། རོལ་མོ་བརྡུང་བ་དང་། དཀྲོལ་བ་བྱེ་བ་ཁྲག་ཁྲིག་བརྒྱ་སྟོང་གི་སྒྲ་སྐད་ཡིད་དུ་འོང་བ་འབྱུང་བ། རིན་པོ་ཆེ་ཐམས་ཅད་ཀྱི་རྒྱན་སྣ་ཚོགས་རྣམ་པར་དག་པས་རྣམ་པར་བརྒྱན་པ། བྱང་ཆུབ་སེམས་དཔའི་ལས་རྣམ་པར་སྨིན་པས་མངོན་པར་གྲུབ་པ་ཞིག་ཡོད་པ། དེའི་དབུས་སུ་སེང་གེའི་ཁྲི་ཆེན་པོ་རིན་པོ་ཆེ་སྣ་བཅུ་ལས་གྲུབ་པའི་སའི་གཞི་སྣ་ཚོགས་ལ་གནས་པ། རིན་པོ་ཆེའི་ཁྲི་འཕང་སྣ་ཚོགས་བཅུའི་འཁོར་གྱིས་རྣམ་པར་མཛེས་པར་བྱས་པ། རིན་པོ་ཆེའི་ཤིང་ཡལ་ག་ཅན་བཅུས་སྟེགས་བུའི་མཚམས་རྣམ་པར་ཀླུབས་པའི་རྒྱན་མཛེས་པ་དང་ལྡན་པ། རྡོ་རྗེའི་འཁོར་ལོའི་སའི་གཞི་མི་ཤིགས་པ་ལ་རྐང་པ་རབ་ཏུ་རྟེན་པ། རིན་པོ་ཆེ་ཐམས་ཅད་ཀྱི་གཟུགས་དང་། མདོག་ཡོངས་སུ་འཛིན་པའི་སྟན་གྱི་འཁོར་ལོ་ཅན། རིན་པོ་ཆེ་དུ་མ་ལས་བྱས་པའི་བོག་རེའི་རྒྱན་བརྒྱ་ཕྲག་དུ་མས་བརྒྱན་པ། རིན་པོ་ཆེ་སྣ་ཚོགས་ཀྱི་ཚོམ་བུ་རྣམ་པ་ཐ་དད་པའི་རྒྱན་གྱིས་ཤིན་ཏུ་བརྒྱན་པ་རིན་པོ་ཆེའི་རྒྱལ་མཚན་ཀུན་ནས་རྣམ་པར་ཕྱེ་སྟེ། འབྲེལ་བར་བསྒྲེང་བ་རིན་པོ་ཆེ་སྣ་ཚོགས་ཀྱི་བ་དན་སྤྱངས་པ། རྣམ་པ་ཐ་དད་པའི་རྒྱན་དང་ལྡན་པ། རིན་པོ་ཆེའི་དྲིལ་བུའི་དྲ་བས་བརྒྱན་པའི་ལྷ་རྫས་ཀྱི་རིན་པོ་ཆེ་སྣ་ཚོགས་དང་། གསེར་གྱི་དྲ་བ་སྣ་ཚོགས་རྣམ་པར་བྲེས་པ། རིན་པོ་ཆེ་སྣ་ཚོགས་ཀྱི་མེ་ཏོག་གི་དྲ་བ་དང་། རིན་པོ་ཆེའི་རྒྱལ་པོ་ཆེན་པོའི་དྲ་བ་དང་། གོས་རིན་པོ་ཆེ་སྣ་ཚོགས་དང་། རིན་པོ་ཆེའི་དྲ་བས་ཅི་རིགས་སུ་ཀུན་ནས་བཀབ་ཅིང་མཛེས་པར་བྱས་པའི་རྒྱན་དང་ལྡན་པ། སྤོས་རིན་པོ་ཆེ་རྣམ་པ་ཐ་དད་པའི་ཚོགས་ལས༌སྙིམ་པས་བཅུས་ཤིང༌སྤོས་ཀྱི་སྤྲིན་མངོན་པར་གཏོར་བ། རིན་པོ་ཆེའི་རྒྱལ་པོ་ཁ་དོག་དང་དྲི་བསམ་གྱིས་མི་ཁྱབ༌པ་ལས་བྱུང་བའི་དབྱིབས་ཡིད་དུ་འོང་བ་སྣ་ཚོགས་དང་། སྤོས་ཐམས་ཅད་ཀྱི་ན་བུན་དང་སྤྲིན་འབྱུང་བ། གམ་ཡོ་ནས་ལྷ་རྫས་ཀྱི་སྤོས་དང་། བདུག་སྤོས་སྣ་ཚོགས་ཀྱིས་རབ་ཏུ་བདུགས་པ། ལྷ་རྫས་ལས་ཀྱང་འདས་པའི་སྟན་རེག་ན་བདེ་བ་ཁ་དོག་བཟང་པོ་དུ་མ་ཅན་ལེགས་པར་བཏིང་བ། ལྷ་རྫས་ཀྱི་རོལ་མོ་དང་གླུ་སྙན་པ་ཡིད་དུ་འོང་བ་བརྒྱ་སྟོང་དུ་མའི་སྒྲ་ཀུན་ནས་འབྱུང་བ། རིན་པོ་ཆེ་སྣ་ཚོགས་ཀྱི་ཐེམ་སྐས་ཀྱི་ཕྲེང་བ༌བ་དན་གྱིས་རྣམ་པར་ཀླུབས་པས། རབ་ཏུ་བརྒྱན་པའི་རྒྱན་དང་ལྡན་པ། རིན་པོ་ཆེའི་འབྲུའི་གཟུགས་རིན་པོ་ཆེ་སྣ་ཚོགས་ཀྱིས་སྤྲས་པ། རྣམ་པར་འཕྲུལ་པ་སྣ་ཚོགས་ཀྱིས་རྣམ་པར་སྣང་བར་བྱེད་པའི་འོད་དང་ལྡན་པ་མངོན་པར་གྲུབ་སྟེ།

དེ་ལ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ། གཟུགས་བཟང་བ་ཤིན་ཏུ་མཛེས་པ། ལྟ་ན་སྡུག་པ་ཁ་དོག་བཟང་པོ་དམ་པ་རྒྱས་པ་དང་ལྡན་པ་མི་ཆེན་པོའི་མཚན་རྣམ་པར་དག་པ་རབ་ཏུ་ཐོབ་པ། རིན་པོ་ཆེ་རྣམ་པར་སྣང་བའི་ཅོད་པན་ཅན། རྡོ་རྗེ་མཐུ་བོ༌ཆེ་ལྟར་མཁྲེགས་ཤིང་མི་ཤིགས་པའི་ལུས་དང་ལྡན་པ། རྩིབ་མའི་མཚམས་ཐགས་བཟང་ཞིང་བརྟན་པར་འབྲེལ་བ། ཡན་ལག་དང་ཉིང་ལག་ཐམས་ཅད་ཡོངས་སུ་བཟང་བ་ཀུན་ནས་བཟང་བ། ཀུན་ནས་མཛེས་པ་ཀུན་ནས་སྡུག་པ། རྣམ་པའི་མཆོག་ཐམས་ཅད་དང་ལྡན་པ། ཆོས་ཀྱི་རྒྱལ་པོ་ཆེན་པོའི་རིགས་སུ་བྱུང་བ། ཡོ་བྱད་ཐམས་ཅད་ལ་དབང་རབ་ཏུ་ཐོབ་པ། ཆོས་ཀྱི་དབང་ཤིན་ཏུ་རྣམ་པར་དག་པ། རང་གི་སེམས་ལ་དབང་བསྒྱུར་བ། ཚིག་གི་དཀྱིལ་འཁོར༌ཁ་མ་བབ་པ། མི་འཁྲུགས་པའི་ཡེ་ཤེས་དང་ལྡན་པ། ཆོས་ཀྱི་སྦྱོར་བ་མ་ནོར་བ་ཤིན་ཏུ་བརྟན་པར་བྱས་པ། ཡོན་ཏན་དང་ལེགས་པ་མཐའ་ཡས་པར་བརྗོད་དུ་ཡོད་པ་དེ་འདུག་པར་གྱུར་ཏོ། །

རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་སེང་གེའི་ཁྲི་ཆེན་པོ་ལ་འདུག་པ་དང་། སྟེང་གི་སྤྱི་བོའི་ཐད་ཀའི་བར་སྣང་ལ་གདུགས་ཀྱི་དཀྱིལ་འཁོར་ཆེན་པོ་རིན་པོ་ཆེ་སྣ་ཚོགས་རྣམ་པར་འབེལ་བའི་ཡུ་བ་ཅན་ནོར་བུ་རིན་པོ་ཆེ་དམ་པའི་མཛོད་ཀྱི་སྙིང་པོ་དང་ལྡན་པ། རིན་པོ་ཆེ་སྣ་ཚོགས་ཀྱི་ཤར་བུ་བརྒྱ་སྟོང་ལེགས་པར་བྲེས་པ། རིན་པོ་ཆེ་དུ་མའི་འོད་འཕྲོ་བ། དཔལ་གྱི་གཟི་བརྗིད་རབ་ཏུ་འབར་བས་རྣམ་པར་བརྒྱན་པ། འཛམ་བུ་ཆུ་ཀླུང་གི་གསེར༌འོད་འཚེར་ཞིང་གསལ་ལ་རྣམ་པར་དག་པས་བླ་ནས་བཀབ་པ། རིན་པོ་ཆེ་སྣ་ཚོགས་སྤ་བར་སྤེལ༌བས་སྤྲས་པའི་གསེར་གྱི་དྲ་བས་ནང་ཤུན་གྱི་རྒྱན་བྱས་པ་མུ་ཏིག་སྣ་ཚོགས་ཀྱི་སེ་མོ་དོ་མངོན་པར་སྤྱངས་པ་རིན་པོ་ཆེ་སྣ་ཚོགས་ཀྱི་དྲ་བས་ཀུན་ནས་བཀབ་པ།

རིན་པོ་ཆེའི་དྲིལ་བུའི་དྲ་བ་ལས་གསེར་རིན་པོ་ཆེའི་དྲིལ་ཆེན་རིན་པོ་ཆེའི་ཆུན་པོའི་ལྡ་ལྡི༌ལ་བརྒྱུས་པ་མངོན་པར་སྤྱངས་པ། ནོར་བུ་རིན་པོ་ཆེ་དམ་པའི་ཕྲེང་བ་ཀུན་ནས་མངོན་པར༌སྤྱངས་པའི་རྒྱན་དང་ལྡན་པ། ལྷ་རྫས་ཀྱི་སྒྲ་ཡིད་དུ་འོང་བའི་གདངས་གྲགས་པར་འབྱུང་བ། སེམས་ཅན་ཐམས་ཅད༌དགེ་བའི་ལས་ཀྱི་ལམ་ལ་བསྐུལ་བའི་དྲིལ་གྱི་སྒྲ་རྣམ་པར་གྲག་པ་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ། རིན་པོ་ཆེའི་རྡུལ་ཡབ་ཀྱིས་མངོན་པར་གཡོབ་ཅིང་། ལྷའི་དབང་པོ་བརྒྱ་བྱིན་པས་ཀྱང་ལྷག་པར་གཟི་བརྗིད་རབ་ཏུ་འབར་བས་ཤིན་ཏུ་མཛེས་སོ། །དེ་སེང་གེའི་ཁྲི་དེ་ལ་འདུག་མ་ཐག་ཏུ་འགྲོ་བ་མང་པོ་དེ་དག་ཐམས་ཅད་མངོན་དུ་གྱུར་ཏེ། ཐལ་མོ་སྦྱར་ནས་རྒྱལ་པོ་དེ་ལ་ཕྱག་འཚལ་ལོ། །

དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེའི་དྲུང་དུ་སློང་བའི་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་སྣ་ཚོགས་དངོས་པོ་སྣ་ཚོགས་ཡོངས་སུ་ལེན་པ་ཡོ་བྱད་སྣ་ཚོགས་ལ་མོས་པ། རིགས་སྣ་ཚོགས་དང་ལྡན་པ། འགྲོ་བའི་རྒྱུད་སྣ་ཚོགས་སུ་གཏོགས་པ། འདོད་པ་སྣ་ཚོགས་ཀྱི་སེམས་དང་ལྡན་པ། སྨོན་པ་དང་བསམ་པ་སྣ་ཚོགས་ཅན། ཕྱོགས་སྣ་ཚོགས་ནས་འདུས་པ། ཡུལ་གྱི་སྤྱོད་པ་སྣ་ཚོགས་ལ་གནས་པ། ལོངས་སྤྱོད་སྣ་ཚོགས་ལ་མངོན་པར་སྨོན་པའི་སེམས་དང་ལྡན་པ། བསམ་པ་དང་ཡོངས་སུ༌རྟོག་པ་སྣ་ཚོགས་ཅན། མིའི་རིས་སྣ་ཚོགས་སུ་གཏོགས་པ། རིགས་ཀྱི་སྐྱེ་གནས་སྣ་ཚོགས་སུ་སྐྱེས་པ། ཡུལ་སྣ་ཚོགས་ནས་འོངས་པ། སྒྲ་སྐད་དང་ཚིག་གི་འདུ་བྱེད་སྣ་ཚོགས་དང་ལྡན་པ། དབྱངས་ཀྱི་དཀྱིལ་འཁོར་སྣ་ཚོགས་འབྱིན་པ་དངོས་པོ་སྣ་ཚོགས་ཀྱི་དོན་དུ་གསོལ་བ་འདེབས་པ། ཚིག་དང་ངག་སྣ་ཚོགས་བརྗོད་པ། བསོད་ནམས་ཀྱི་རི་རབ་ཆེན་པོ་དེ་འབའ་ཤིག་གི་གདོང་དུ་ལྟ་བ་འདི་འབའ་ཞིག་ཤེས་པའི་སྐྱེས་བུ་ཆེན་པོ་ཡིན་ཞེས་ངེས་པར་སེམས་པ། བསོད་ནམས་ཆེན་པོས་བརྟན་པའོ། །སྐྱེས་བུ་ཆེན་པོའི་ཟླ་བའོ། །གཏོང་བ་ཆེན་པོའི་བསམ་པ་དང་ལྡན་པའོ། །ཞེས་བྱ་བར་འདུན་པའི་སེམས་ཀྱིས་རྟོག་པ། བྱང་ཆུབ་སེམས་དཔའི་སྨོན་ལམ༌གྱི་སེམས་ཀྱིས་འདུས་པ་བྱང་ཆུབ་སེམས་དཔའི་སྨོན་ལམ་གྱི་སེམས་ཀྱིས་སྤྲུལ་པའི་སློངས་མོ་བའི་ཚོགས་ཆེན་པོ་དེ་མཐོང་ནས། སློངས་མོ་བ་དེ་དག་ལ་སེམས་དགའ་བ་དང་སེམས་མོས་པ་དང་། སེམས་སྤྲོ་བ་དང་དགེ་བའི་བཤེས་གཉེན་མཐོང་བའི་འདུ་ཤེས་སུ་གྱུར་ཏོ། །སྙིང་རྗེ་ཆེན་པོའི་ཤུགས་དྲག་པོ་ཤིན་ཏུ་ཡངས་པ་ཡང་བྱུང་བར་གྱུར་ཏོ། །ཕྱི་མའི་མཐའི་བསྐལ་པར༌སློངས་མོ་བ་ཐམས་ཅད་ཡོངས་སུ་ཚིམ་པར་བྱ་བ་ལས་ཕྱིར་མི་ལྡོག་པའི་བརྩོན་འགྲུས་ཀྱི་ཤུགས་དྲག་པོ་ཡང་སྐྱེས་པར་གྱུར་ཏོ། །འགྲོ་བ་ཐམས་ཅད་དུ་སྙོམས་པའི་སྦྱོར་བས་ཡོངས་སུ་གཏོང་བའི་སེམས་ཀྱིས་རྒྱས་པར་དགང་བའི་སྤྲིན་ཀྱང་མངོན་པར་བྱུང་བར་གྱུར་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེས། སློངས་མོ་བ་དེ་དག་མཐོང་བའི་མོད་ལ་དེའི་རྒྱུས་ཆེས་དགའ༌བར་གྱུར་གྱིས། བསྐལ་པས་མཚམས་མེད་པའི་མཐས་ཀླས་པར་སྟོང་གསུམ་གྱི་འཁོར༌ལོས་སྒྱུར་བའི་རྒྱལ་པོ་ཐོབ་པས་ནི་མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་བརྒྱ་བྱིན་གྱི་དབང་ལ་གནས་པས་ནི་མ་ཡིན་ནོ། །

བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་རབ་མཚེ་མའི་ལྷའི་རྒྱལ་པོའི་དབང་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་མཐས་ཀླས་པར་རབ་དགའ་ལྡན་གྱི་ལྷའི་རྒྱལ་པོའི་དབང་ལ་གནས་པས་ནི་མ་ཡིན་ནོ། །བསྐལ་པ་ཚད་མེད་པའི་མཐས་ཀླས་པར་རབ་འཕྲུལ་དགའི་ལྷའི་རྒྱལ་པོའི་དབང་ཕྱུག་གི་དབང་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་བསམ་གྱིས་མི་ཁྱབ་པའི་མཐས་ཀླས་པར་དབང་བསྒྱུར་གྱི་ལྷའི་རྒྱལ་པོའི་དབང་རབ་ཏུ་ཐོབ་སྟེ། ལྷའི་བུ་མོ་བཞིན་བཟང་མོ་ཡིད་དུ་འོང་བས་བསྙེན་བཀུར་བས་ནི་མ་ཡིན་ནོ། །བསྐལ་པ་བརྗོད་དུ་མེད་པའི་མཐས་ཀླས་པར་ཚངས་པའི་གནས་ཀྱི་བདེ་བས་ཚངས་པའི་ཐབས་ལ་གནས་པ་ཐོབ་པས་ནི་མ་ཡིན་ནོ། །བསྐལ་པ་མཐའ་ཡས་པའི་མཐས་ཀླས་པར་གྱ་ནོམ་སྣང་བའི་ལྷའི་བདེ་བ་ཐོབ་པས་ནི་མ་ཡིན་ནོ། །བསྐལ་པ་དཔག་ཏུ་མེད་ཅིང་མི་ཟད་པར་དགེ་རྒྱས་ཀྱི་ལྷའི་བདེ་བ་ཐོབ་པས་ནི་མ་ཡིན་ནོ། །

བསྐལ་པ་མུ་མེད་པའི་མཐས་ཀླས་པར་གནས་གཙང་མའི་ལྷའི་རྣམ་པར་ཐར་པ་ཞི་བའི་བདེ་བ་ལ་རྣམ་པར་སྤྱོད་པ་ཐོབ་པས་ནི་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་སྲེད་པ་ལ་སྤྱོད་པ། ཕ་མ་དང་ཕུ་ནུ་དང་། བུ་སྲིང་དང་མཛའ་བོ་དང་། བློན་པོ་དང་། གཉེན་བཤེས་དང་། བུ་དང་བུ་མོ་དང་ཆུང་མ་དང་། ཡུན་རིང་པོ་ཞིག་ཏུ་བྲལ་ལ་འབྲོག་དགོན་པར་འཁྱམས་ཏེ། དེ་དག་མཐོང་བར་འདོད་འདོད་པ་ལས་དེ་དག་དང་ཕྲད་ན་དེ་དག་མཐོང་བས་མི་ངོམས་ཤིང་། དགའ་བ་དང་ཆགས་པ་ཆེན་པོ་སྐྱེ་བར་འགྱུར་རོ། །

རིགས་ཀྱི་བུ་དེ་བཞིན་དུ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ༌སྒྲོག་པས། སློངས་མོ་པ་དེ་དག་མཐོང་བར་གྱུར་པའི་མོད་ལ་དགའ་བའི་ཤུགས་ཆེན་པོ་སྐྱེས་སོ། །སེམས་ཀྱི་དགའ་བའི་རོ་བདེ་བ་དང་ལྡན་པར་གྱུར་ཏོ། །སེམས་སྤྲོ་བའི་ཤུགས་རབ་ཏུ་བྱུང་ངོ་། །རབ་ཏུ་དགའ་བ་ཆེན་པོའི་ཤུགས་ཡོངས་སུ་སྐྱེས་སོ། །སངས་རྒྱས་ཀྱི་བྱང་ཆུབ་ཏུ་དད་པ་དང་། མོས་པའི་ཤུགས་ཀྱི་སྟོབས་ཆེན་པོ་འཕེལ་ཏོ། །ཐམས་ཅད་མཁྱེན་པ་ཉིད་དུ་རྩ་བ་བརྟན་པའི་དད་པ་རྣམ་པར༌འཕེལ་ཏོ། །སངས་རྒྱས་ཐམས་ཅད་ཀྱི་ཆོས༌ལ་ལྷག་པའི་བསམ་པ་རྣམ་པར་དག་པའི་སྟོབས་མངོན་པར་འཕེལ་ཏོ། །བྱང་ཆུབ་སེམས་དཔའི་དབང་པོ་ལས་སུ་རུང་བ་ཡོངས་སུ་བྱུང་ངོ་། །སེམས་དགའ་བས་རྒྱས་པས་མོས་པའི་ཤུགས་ཆེན་པོ་སྐྱེས་པར་གྱུར་ཏོ། །སེམས་སྤྲོ་བའི་ཤུགས་ཡངས་པས་དགེ་བའི་བཤེས་གཉེན་ལ་དབང་པོ་དང་། བསམ་པ་ཤིན་ཏུ་གུས་པར་གྱུར་ཏོ། །

དེ་ཅིའི་ཕྱིར་ཞེ་ན། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཐམས་ཅད་མཁྱེན་པ་ཉིད་དུ་དམིགས་པ་ལ་བརྩོན་པ། ཐམས་ཅད་མཁྱེན་པ་ཉིད་ལ་རབ་ཏུ་གཞོལ་བ། ཐམས་ཅད་མཁྱེན་པ་ཉིད་ཀྱི་ལམ་དང་སྒོ་ལ་མངོན་དུ་བལྟས་པ། འགྲོ་བ་ཐམས་ཅད་ཤིན་ཏུ་ཚིམ་པར༌བྱས་པའི་ཡིད་ལ་བྱ་བ་ལ་བརྩོན་པ། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ལ་འཇུག་པའི་ནན་ཏན་ལ་འདུན་པ། བདུད་དང་ལས་དང་ཉོན་མོངས་པའི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། དེ་བཞིན་གཤེགས་པ་ཐམས་ཅད་ཀྱི་གདམས་ངག་མཐུན་པར་བླང་བ་ལ་སྟ་གོན་དུ་གནས་པ། དགེ་བའི་རྩ་བ་རྒྱ་མཚོ་ཀུན་ནས། ཡོངས་སུ་བསྡུ་བ་ལ་བརྩོན་པའི་སྙིང་པོ་ཅན། མངོན་པར་ཞེན་པ་ཐམས་ཅད་ལས་གྱེན་དུ་འཕགས་པའི་རྒྱུད་དང་ལྡན་པ། འཇིག་རྟེན་གྱི་ཡུལ་ཐམས་ཅད་ལ་མངོན་པར་ཞེན་པ་མེད་པ། ཆོས་ཀྱི་རང་བཞིན་ནམ་མཁའི་སྤྱོད་ཡུལ་ཅན།

དེས་སློང་མོ་པ་དེ་དག་ལ་བུ་གཅིག་པའི་འདུ་ཤེས་བསྐྱེད་པའི་ཕྱིར་རོ། །ཕ་དང་མའི་འདུ་ཤེས་དང་། སྦྱིན་པའི་གནས་ཀྱི་འདུ་ཤེས་དང་། དགེ་བའི་བཤེས་གཉེན་གྱི་འདུ་ཤེས་དང་། དཀོན་པའི་འདུ་ཤེས་དང་། དཀའ་བ་བྱེད་པའི་འདུ་ཤེས་དང་། མང་པོ་བྱས་པའི་འདུ་ཤེས་དང་། ཕན་འདོགས་པ་དམ་པའི་འདུ་ཤེས་དང་། བྱང་ཆུབ་ཀྱི་ལམ་ཉེ་བར་སྟོན་པའི་འདུ་ཤེས་དང་། མཁན་པོའི་འདུ་ཤེས་དང་། སྟོན་པའི་འདུ་ཤེས་བསྐྱེད་པའི་ཕྱིར་ཏེ། དེ་ལྟར༌དེས་སློངས་མོ་བ་དེ་དག་དོན་ཅི་ལ་འོངས་པ་དང་། དོན་ཅི་ལ་ཕྱིན་པ་དང་། དུས་ཇི་ཙམ་ན་འདུས་པ་དང་། ཡུན་གང་དང་གང་ན་གནས་པ་དང་། དངོས་པོ་ཅི་དང་ཅི་སློང་བ་དང་། རྣམ་པ་གང་འདོད་པ་དང་། བསམ་པ་ཅི་འདྲ་བ་དང་། ཅི་དང་ཅི་ལ་སྨོན་པ་དང་། ཅི་དང་ཅི་འདོད་པ་དང་། དངོས་པོ་གང་དང་གང་ཚོལ་བ་དེ་དག་ཐམས་ཅད་ཚུལ་བཞིན་དུ་མི་དགའ་བ་མེད་པའི་བྱམས་པ་ཆེན་པོའི་དཀྱིལ་འཁོར་དང་། སློངས་མོ་པའི་འགྲོ་བ་ལས་ཕྱིན་ཕྱོགས་སུ་མ་བལྟས་པའི་གཏོང་བ་ཆེན་པོའི་འོད་ཟེར་དང་། སེམས་ཅན་ཐམས་ཅད་ལ་སྙོམས་པར་སྦྱོར་བའི་གཏོང་བའི་སྒོས་ཡོངས་སུ་ཚིམ་པར་བྱས་སོ། །དེས་ཟས་འདོད་པ་ལ་ནི་ཟས་བྱིན་ནོ། །སྐོམ་འདོད་པ་ལ་ནི་སྐོམ་བྱིན་ནོ། །གོས་འདོད་པ་ལ་ནི་གོས་བྱིན་ནོ། །མེ་ཏོག་འདོད་པ་ལ་ནི་མེ་ཏོག་བྱིན་ནོ། །

དེ་བཞིན་དུ་སྤོས་དང་། བདུག་སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་དང་། རིན་པོ་ཆེ་དང་། རྒྱན་དང་། སྟན་དང་། མལ་ཅ་དང་། ཁྱིམ་དང་། གཞལ་མེད་ཁང་དང་། གཙུག་ལག་ཁང་དང་། བཟའ་ཤིང་གི་ར་བ་དང་། ཀུན་དགའི་ར་བ་དང་། དཀའ་ཐུབ་ཀྱི་ནགས་ཚལ་དང་། རྟ་དང་གླང་པོ་ཆེ་དང་། ཤིང་རྟ་དང་། རྐང༌ཐང་དང་། དགལ་བ་དང་། ཁྱོགས་དང་། བཞོན་པ་དང་། གསེར་དང་། དབྱིག་དང་། ནོར་བུ་དང་། མུ་ཏིག་དང་། དུང་དང་། མན་ཤེལ་དང་། བྱི་རུ་དང་། ས་ལེ་སྦྲམ་དང་། དངུལ་དག་ཀྱང་བྱིན་པར་གྱུར་ཏོ། །རང་གི་ཁྱིམ་དང་། གཞལ་མེད་ཁང་དང་། བཙུན་མོའི་འཁོར་དང་གཡོག་འཁོར་དང་། རྒྱལ་པོའི་མཛོད་ཐམས་ཅད་ཀྱང་ཕྱེ་སྟེ། བགོས་ནས་རབ་ཏུ་བཏང་བར་གྱུར་ཏེ། སུ་ཅི་འདོད་པ་དེ་དག་དེ་ཁྱེར་ཅིག་ཅེས་ནས། ཡུལ་འདོད་པ་དག་ཀྱང་ཡུལ་བྱིན་ནོ། །གྲོང་འདོད་པ་དག་ཀྱང་གྲོང་བྱིན་ནོ། །གྲོང་ཁྱེར་འདོད་པ་དག་ཀྱང་གྲོང་ཁྱེར་བྱིན་ཏེ། སེམས་ཅན་ཐམས་ཅད་ལ་སྙོམས་པར་ཞུགས་པ་དེས༌སློངས་མོ་བ་དེ་དག་ཐམས་ཅད་ལ་ཅི་བདོག་པ་ཡོངས་སུ་བཏང་སྟེ། དངོས་པོ་ཐམས་ཅད་ཡོངས་སུ་བཏང་བས་མངོན་པར༌སྡུད་དོ། །

དེའི་ཚེ་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བ་བུ་མོ་དྲུག་ཅུའི་འཁོར་དང་ལྡན་པ། གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོའི་དམ་པ་རྒྱས་པ་དང་ལྡན་པ། མདོག་གསེར་གྱི་ཁ་དོག་ལྟ་བུ་དང་ལྡན་པ། སྐྲ་མཐོན་མཐིང་དུ་འདུག་པ། མིག༌དཀར་ནག་འབྱེས་པ། དྲི་ཞིམ་པོ་ཡིད་དུ་འོང་བ་དང་ལྡན་པ། ཚངས་པའི་དབྱངས་དང་ལྡན་པ། གོས་བཟང་བ། རྒྱན་གྱིས་ལེགས་པར་བརྒྱན་པ། དྲན་པ་དང་བློ་གྲོས་དང་། རིག་པ་དང་ཁྲེལ་ཡོད་པ། དགའ་བ་དང་ངོ་ཚ་ཤེས་པ་དང་། སྤྱོད་པ་དང་ཆ་ལུགས་ཕུན་སུམ་ཚོགས་པ། བླ་མ་ལ་སྲི་ཞུ་དང་ལྡན་པ། ཤེས་བཞིན་གྱི་དམ་པས་སྤྱོད་པ། བྱེད་དགུ་ཟབ་པ། ཆོས་བླང་བ་དང་། གཟུང་བ་དང་། ཁོང་དུ་ཆུད་པར་བྱ་བ་ལ་ཡིད་གཞུངས་པ་དང་ལྡན་པ། སྔོན་དགེ་བའི་རྩ་བ་ལ་ལེགས་པར་བྱས་པ། ཆོས་ཀྱིས་མངོན་པར་བརླན་པའི་སེམས་ཀྱི་རྒྱུད་རབ་ཏུ་དང་བ། དགེ་བའི་བསམ་པ་རྣམ་པར་དག་པ། མོས་པ་ཡངས་པ། ནམ་མཁའི་སྤྱོད་ཡུལ་ཅན། གཞན་ལ་ཕན་པར་དགའ་བའི་སེམས་དང་ལྡན་པ། སངས་རྒྱས་ལྟ་བའི་ཕྱོགས་ལ་རྣམ་པར་བལྟས་པ་ཐམས་ཅད་མཁྱེན་པའི་ཡེ་ཤེས་ལ་མངོན་པར་འདུན་པ་ཞིག་མཆོད་སྦྱིན་གྱི་ར་བ་ཆེན་པོ་དེར་འོངས་ཏེ། ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བ་དེ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི༌སེང་གེའི་ཁྲི་ཆེན་པོའི་གཡས་རོལ་ཧ༌ཅང་ཡང་མི་རིང་བ་ཞིག་ན་འདུག་འདུག་སྟེ། རྒྱལ་པོ་དེ་ལ་ཕྱག་འཚལ༌བ་ལས་ཕར་ཅི་ལ་ཡང་ལེན་པ་མེད་དོ། །

དེ་ཕྱོགས་གཅིག་ན་འདུག་ཅིང་སེམས་འདི་ལྟར་བསྐྱེད་པར་གྱུར་ཏེ། བདག་གིས་དགེ་བའི་བཤེས་གཉེན་འདི་ལྟ་བུ་མཐོང་ཞིང་འགྲོགས་སུ་ཡོད་པ་ནི་བདག་གིས་ཐོབ་པར་བྱ་བ་ལེགས་པར་ཐོབ་བོ་སྙམ་སྟེ། དེས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་དེ་ལ་དགེ་བའི་བཤེས་གཉེན་གྱི་འདུ་ཤེས་དང་། སྟོན་པའི་འདུ་ཤེས་དང་། སྙིང་བརྩེ་བར་བྱེད་པའི་འདུ་ཤེས་དང་། ཕན་འདོགས་པའི་འདུ་ཤེས་དང་། སངས་རྒྱས་ཀྱི་འདུ་ཤེས་བསྐྱེད་དེ། གཡོ་སྒྱུ་མེད་པའི་སེམས་ཀྱིས་དགའ་བ་དང་མོས་པ་དང་། སྤྲོ་བའི་ཤུགས་རབ་ཏུ་ཡངས་པ་ཐོབ་པས། རང་གི་རྒྱན་རྣམས་ལུས་ལས་བཀྲོལ་ཏེ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་གང་ན་བ་དེར་མངོན་པར་བལྟས་ཏེ། གཏོར་བ་དང་དེ་དག་དེའི་སེང་གེའི༌ཁྲིའི་འོག །ཁྲི་འཕང་གི་སའི་སྟེང་དུ༌གྲམ་པར་གྱུར་ཏོ། །

དེའི་རྒྱན་དེ་དག་དེ་ལྟར་གཏོར་ནས་སྨོན་ལམ་བཏབ་པ། ཇི་ལྟར་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་འདི་སེམས་ཅན་མགོན་མེད་ཅིང་མུན་པའི་ནང་ན༌འཐོམས་པ་རྣམས་ཀྱི་མགོན་སྐྱབས་སུ་གྱུར་པ་དེ་ལྟར་བདག་ཀྱང་མ་འོངས་པའི་དུས་ན་འགྱུར་བར་ཤོག་ཅིག །འདིས་ཆོས་གང་ཤེས་པ་དེ་དག་ཀྱང་བདག་གིས་ཀྱང་ཤེས་པར་ཤོག་ཅིག །འདི་ཐེག་པ་གང་གིས་འབྱུང་བ་དེས་བདག་ཀྱང་འབྱུང་བར་ཤོག་ཅིག །འདི་ལམ་གང་ནས་ཞུགས་པ་དེ་ནས་བདག་ཀྱང་འཇུག་པར་ཤོག་ཅིག །ཇི་ལྟར་འདི་གཟུགས་བལྟ་ན་བཏང་མི་བྲ་ལ་ཟད་མི་ཤེས་པའི་ལོངས་སྤྱོད་དང་ལྡན་ཏེ། གཡོག་འཁོར་མཐའ་ཡས་ལ་གཞན་གྱིས་མི་ཐུབ་ཅིང་ཐུབ་པར་དཀའ་སྟེ། ཐུབ་པ་མེད་པ་དེ་བཞིན་བདག་ཀྱང་ཤོག་ཅིག ། འདི་གང་དང་གང་དུ་སྐྱེ་བར་འགྱུར་བ་དེ་དང་དེར་བདག་ཀྱང་སྐྱེ་བར་འགྱུར་བར་ཤོག་ཅིག །སྙམ་པ་དང་དེ་དེ་ལྟར་སེམས་ཤིང་ཡིད་ལ་བྱེད་པ་ལ་བརྩོན་པ། རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཤེས་ནས་དེ་ལ་བལྟས་ཏེ།

འདི་སྐད་ཅེས་སྨྲས་སོ། །བུ་མོ་ཁྱོད་ལ་ཅི་དགོས་པ་ཁྱེར་ཅིག །བུ་མོ་ང་ནི་བདོག་པ་ཐམས་ཅད་ཡོངས་སུ་གཏོང་བ་སྟེ། སེམས་ཅན་ཐམས་ཅད་ཡོངས་སུ་ཚིམ་པར་བྱ་བ་ལ་ཞུགས་པའོ། །དེ་སྐད་ཅེས་བྱས་པ་དང་། དེའི་ཡིད་ལ་ཡང་བདག་ནི་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་ཐུགས་སུ་ཆུད་པར་གྱུར་ཏོ། །སྙམ་ནས་དེ་བས་ཀྱང་མོས་པར་གྱུར་ཏོ། །དེ་དེ་ལྟར་མོས་པའི་སེམས་སུ་གྱུར་ཏེ། དགེ་བའི་རྩ་བ་ཡངས་ཤིང་རྒྱ་ཆེ་བའི་ཤུགས་ཡོངས་སུ་སྐྱེས་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་ཆད་ས་ལས་རྣམ་བརྒྱན་སྤྲིན་འདི་ནི། །རྒྱལ་པོ་སེང་གེ་ཁྱོད་འཁྲུངས་མ་གྱུར་ཚེ། །མདངས་དཀར་མ་གྱུར་གཟི་བརྗིད་མ་མཆིས་ཏེ། །ཡི་དྭགས་འཇིགས་པའི་གནས་དང་ཅི་མི་འདྲ། །མི་དག་ཀུན་ཀྱང་སྲོག་གཅོད་མོས་པར་གྱུར། །མ་བྱིན་ལེན་ལ་ཚུལ་དང་སྦྱོར་མ་མཆིས། །བརྫུན་དུ་སྨྲ་ཞིང་བརླང་བའི་ཚིག་ཀྱང་བརྗོད། །ཕྲ་མ་ཁྱལ་བའི་ཚིག་ཀྱང་རབ་ཏུ་སྨྲ། །གཞན་གྱི་ནོར་ལ་ཆགས་པའི་སེམས་དང་ལྡན། །གང་ཟག་གཞན་ལ་ཀུན་ཀྱང་ངན་དུ་སེམས། །ལྟ་བའི་རྣམ་གནས་སྡིག་ཏོའི་སྤྱོད་ཡུལ་ཅན། །ལོག་པའི་སྦྱོར་བས་ངན་པའི་འགྲོ་བར་ལྷུང་། །ཆོས་ངན་ཆོས་ལ་སྤྱོད་པའི༌མིའི་རྣམས། །མ་རིག་གཏི་མུག་མུན་པས་བསྒྲིབས་པ་དག །ལྟ་བ་ལོག་ཞུགས་ཕྱིན་ཅི་ལོག་མཐོང་བས། །དགུང་ལོ་མང་པོར་དགུང་ཆར་བབ་མ་གྱུར། །དགུང་ཆར་མ་བབ་ས་བོན་ཆབ་འཚལ་ཏེ། །ལོ༌ཐོག་མི་འཁྲུངས་ཞུགས་ཤིང་འཁྲུངས་མ་གྱུར། །མཚོ་དང་ལུ་མ་ཆུ་བྲན་རྒྱུད་ཀྱང་སྐམས། །ནགས་ཚལ་རྩི་ཤིང་ཀུན་ཀྱང་དེ་བཞིན་ཏེ། །རྣམ་དག་སྤྱན་ཁྱོད་འཁྲུངས་པར་མ་གྱུར་པས། །ཆབ་ཀླུང་ཀུན་ཀྱང་མ་ལུས་སྐམས་པར་གྱུར། །བཟའ་ཤིང་ར་བ་ཀུན་ཀྱང་རི་དགོན་འདྲ། །རུས་པ་དཀར་པོས་དོག་ས་གཏམས་པར་གྱུར། །གང་ཚེ་ཁྱོད་ལ་སློང་བ་མང་འདུས་ཏེ། །སློང་བ་ཐམས་ཅད་ཡོངས་སུ་ཚིམ་མཛད་ནས། །ཕྱོགས་བཞི་ཀུན་ནས་སྤྲིན་ཆེན་འདུས་པར་གྱུར། །ཐང་དང་གཤོང་རྣམས་ཀུན་ཀྱང་ངོམས་པར་བགྱིས། །སླན་ཅད་རྐུན་ཆོམ་གཡོན་ཅན་ཆད་པར་གྱུར། །དགུམ་པ་མ་མཆིས་སུ་འང་གཟུང་མ་མཆིས། །མགོན་མེད་གང་ཡང་འགུམ་པར་མི་འགྱུར་ཏེ། །ཁྱོད་ནི་འགྲོ་བ་མགོན་མེད་ཀུན་གྱི་སྐྱབས། །སྲོག་གཅོད་པ་ལ་མངོན་པར་མོས་པའི་མི། །གཞན་རྣམས་བཀུམ༌ཞིང་དེ་ཡི་ཁྲག་འཚལ་ལ། །གཅིག་ལ་གཅིག་གི་ཤ་འཚལ་གྱུར་པ་དག །ཁྱོད་ཀྱི་སྦྱིན་པ་ཆེན་པོས་བྱམས་སེམས་གྱུར། །བརྒྱ་སྟོང་གྲངས་སུ་འགྲངས་པར་གྱུར་པ་ལས། །དེ་ཚེ༌འགའ་ཞིག་རད་པ་འཚལ༌གྱུར་གྱིས། །གཞན་ནི་རྩྭ་དང་ལོ་མ༌ར་ད་འཚལ། །དེ་ཚེ་ཀུན་ཀྱང་ཡི་དྭགས་བཀྲེས་མནར་བཞིན། །འགྲོ་བ་མགོན་མེད་མགོན་དུ་ཁྱོད་འཁྲུངས་ནས། །ས་བོན་མ་བཏབ་མ་རྨོས་འབྲས་ཀྱང་བྱུང་། །དཔག་བསམ་ཤིང་ལས་མཛོད་རྣམས༌རྣམ་པར་འཐོན། །སྐྱེས་པ་བུད་མེད་མཁས་པ་གདའ་བར་གྱུར། །ཟླ་བ་ཟླ་ཕྱེད་དོན་དུ་སྔོན་ཆད་ནི། །ལམ་ནོར་གནས་པ༌སྩོགས་ཤིང་སྲི་ཞུར་བགྱིད། །དེང་སང་རད་པ་རབ་འཚལ་རྒྱན་མང་ལྡན། །དགའ་བའི་གནས་ན་རྩེ་བའི་ལྷ་ཡང་འདྲ། །སླན་ཆད་ལོག་པ་རྣམས་ལ་མི་ཟད་ཞུགས། །ཆོས་ངན་འདོད་ཆགས་མི་རྣམས་ཞེན་ཅིང་ཆགས། །ན་ཆུང་གཞོན་ནུ་གཞན་གྱིས༌བསྲུངས་པ་རྣམས། །ནན་གྱིས༌ཕྲོགས་རློམ་ཆབ་འཚལ་མ༌རུངས་བགྱིས། །ལྷ་མོ་བཟང་མོའི་ཁ་དོག་གཟུགས་ལྡན་པ། །གོས་བཟང་རྒྱན་ལྡན་དེང་སང༌མཐོང་གྱུར་ཏེ། །གཞན་གྱི་བུད་མེད་སྤོས་དྲི་གདའ་མཆིས་ཀྱང་། །དགའ་ལྡན་ཇི་བཞིན་མཆིས༌འབྲང་རྒྱན་གྱིས་འཚལ། །ཤོ་བེ་བརླང་བ་ཕྲ་མ༌ཀྱལ་པ་རྣམས། །སྔོན་ཆད་གཡོ་སྒྱུའི་དབང་གིས༌ངག་ཏུ་བརྗོད། །དེང་སང་ཚིག་གི་ནོངས་པ་བཞི་སྤངས་ཤིང་། །ལྟ་བ་ངན་སྤངས་ཆོས་ལ་ཀུན་ཀྱང་སྤྱོད། །ཚངས་དབྱངས་ཀ་ལ་པིང་ཀའི༌སྒྲར་འབྱུང་བའི། །ཁྱོད་ཀྱི་གསུང་མཆོག༌འདི་ཡི་ཆ་ཤས་ལའང་། །རོལ་མོ་སྒྲ་དབྱངས་ཤིན་ཏུ་སྙན་པ་དང་། །ལྷ་རྫས་གླུ་དབྱངས་འདི་དག་ཉེར་མི་འགྱུར། །ཁྱོད་ཀྱི་སྤྱི་གཙུག་དབུ་སྟེང་གདུགས་ལྡིང་བ། །རིན༌ཆེན་རྒྱུས་བགྱིས་གསེར་གྱི་དྲ་བས་བཀབ། །དཔལ་གྱི་སྙིང་མཛོད་ཡུ་བ༌བཻཌཱུརྱ། །ཀུན་ནས་རིན་ཆེན་མཆོག་གི་དྲིལ་གྱིས་འཁོར། །དྲིལ་ལས་བྱུང་བའི་སྒྲས་ཀྱང་མ་ལུས་པའི། །འཇིག་རྟེན་སྒྲ་དབྱངས་མ་ལུས་ཟིལ་མནན་ཅིང་། །སངས་རྒྱས་གསུང་གི་ཡན་ལག་འདྲ་བར་འཁྲོལ། །དམ་པའི་ཆོས་ཀྱི་སྒྲ་དབྱངས་ཞི་བ་སྒྲོག །དེ་ཐོས་སེམས་ཅན་ཉོན་མོངས་ཞི་བར་བགྱིད། །མ་ལུས་ཕྱོགས་ཀྱི་ཞིང་རྣམས་བརྒྱུད་པ་ཡི། །བསྐལ་པ་རྒྱ་མཚོའི་བདེ་གཤེགས་རྒྱ་མཚོ་དང་། །བློ་ལྡན་རྒྱ་མཚོའི་མཚན་གྱི་འཁོར་ལོ་རྣམས། །སྔོན་མཐའི་ཞིང་རྣམས་གཅིག་ནས་གཅིག་བརྒྱུད་དུ། །གང་མཚན་གང་དང་གང་ལགས་རིམ་བཞིན་དང་། །མ་ལུས་ཕྱོགས་སུ་དམ་ཆོས་འཁོར་ལོ་ཡང་། །ཁྱོད༌ཀྱི་བྱིན་གྱིས་དྲིལ་རྣམས་རབ་ཏུ་སྒྲོག །ཁྱོད་ཀྱི་དྲིལ་སྒྲ་ཐོགས་པ་མ་མཆིས་པར། །ཚངས་དབང་ལྷ་དབང་འགྲོ་བའི་བདག་པོ་རྣམས། །རང་རང་ལས་ཀྱི་ཚུལ་ནི་ཀུན་བརྗོད་ཅིང་། །འཛམ་བུའི་རྒྱལ་མཚན་ཁྱབ་པར་ཀུན་ཏུ་སྒྲོག །དྲིལ་གྱི་སྒྲ་ལས་ལྷ་དང་མི་རྣམས་ཀྱིས། །རང་རང༌ལས་ཀྱི་ཚུལ་རྒྱུད་ཐོས་གྱུར་ནས། །སྡིག༌ཏོ་རྣམས་སྤངས་དགེ་བ་སྤྱོད་པར་གྱུར། །སངས་རྒྱས་བྱང་ཆུབ་མཆོག་ལ་ཀུན་ཀྱང་གནས། །ཁྱོད་ཀྱི་ཡབ་ནི་མི་བདག་སྐར་མའི་འོད། །དེ་ཡི་བཙུན་མོ་པདྨོ་ཁྱོད་ཀྱི་ཡུམ། །རྙོག་པ་ལྔ་རྣམས་ཤིན་ཏུ་རྒྱས་གྱུར་དུ། །ཆོས་འགྲིབ་རྒྱལ་སྲིད་དེས་ནི་བཞེས་པར་གྱུར། །དེ་ཡི་བཟའ་ཤིང་ར་བ་ཡངས་བྱུང་བ། །མེ་ཏོག་རྒྱས་བརྒྱན་རིན་ཆེན་སྒྲོན་མ་སྟེ། །ཤིང་མང་བརྒྱས་བསྐོར་རྫིང་བུ༌ལྔ་བརྒྱ་ཡིས། །དེ་ནི་ཤིན་ཏུ་བརྒྱན་པ་བྱུང་བར་གྱུར། །དེ་དག་སོ་སོ་རེ་རེའི་ངོགས་སུ་ཡང་། །ཀ་བ་སྟོང་ལྡན་གཞལ་མེད་ཁང་བཟང་བྱུང་། །སྟེགས་བུ་བཟང་པོ་སྣ་ཚོགས་སྟོང་གིས་བརྒྱན། །ཟླ༌གམ་དྲ་བས་ཀུན་ནས་མཛེས་པར་བགྱིས། །ཆོས་ངན་སྟོབས་ནི་རབ་ཏུ་འཕེལ་གྱུར་པས། །དགུང་ལོ་མང་པོར་དགུང་ཆར་བབ་མ་གྱུར། །རྫིང་བུ་ཀུན་གྱི་ཆབ་དང་ཞུགས་ཤིང་རྣམས། །དེ་ཚེ་ལོ་མ་མདོག་དང་བཅས་ཏེ་སྐམས། །དགུང་བདུན༌ན་ནི་ཁྱོད་བལྟམ་གྱུར་པའི་ཚེ། །དེ་ཚེ་ངོ་མཚར་རྨད་བྱུང་ལྟས་བྱུང་སྟེ། །དེ་དག་མཐོང་ནས་སེམས་ཅན་ངེས་རྟོགས་པར། །བདག་ཅག་སྐྱོབ་པ་ངེས་པར་འབྱུང་ཞེས་མཆིས། །དགུང་གི་གུང་ལ་བབ་ནས་རྣམ་དྲུག་ཏུ། །ཁམས་ཀྱི་དོག་ས་ཡོངས་སུ་གཡོས་པར་གྱུར། །མ་སྨད་ཤིན་ཏུ་བཟང་བའི་རྫིང་དེ་ཡི། །དབུས་སུ་གདུགས་དང་མཉམ་པའི་འོད་ཅིག་བྱུང་། །ཆབ་བཟང་ཡན་ལག་བརྒྱད་ལྡན་རྒྱས་པར་གྱུར། །རྫིང་བུ་ལྔ་བརྒྱ་ཀུན་ཀྱང་དེ་བཞིན་ཏེ། །ཞུགས་ཤིང་ཀུན་ཀྱང་ལོ་མ་འཁྲུངས་པར་གྱུར། །མེ་ཏོག་འབྲས་བུ་ཁ་དོག་མདོག་དང་ལྡན། །རྫིང་བུ་དེ་རྣམས་ཆབ་ཀྱིས་བལྟམ་གྱུར་པས། །ནགས་ཚལ་མ་ལུས་དེ་དག་ངོམས་པར་བགྱིས། །ཆབ་ཆེན་དེ་ལས་བྱུང་བའི་རྒྱུད་འཕྲོས་པས། །འཛམ་བུའི་རྒྱལ་མཚན་ཆབ༌ཀྱིས་བལྟམ་པར་གྱུར། །ཞུགས་ཤིང་སྨན་དང་ལོ་ཐོག་ལྡུམ་བུ་ཡང་། །འཁྲུངས་གྱུར་ཞུགས་ཤིང་མེ་ཏོག་འབྲས་བུ་རྒྱས། །དོག་སའི་སྟེང་ན་མཆིས་དགུའི་ས་བོན་རྣམས། །ཀུན་ཀྱང་ཆབ་ཀྱིས་བརླན༌པས་རྣམ་པར་འཁྲུངས། །ཆབ་ཀྱིས་བངས་གྱུར་དོག་སའི་ཕྱོགས་རྣམས་ཀྱང་། །དེ་ཚེ་ཐམས་ཅད་རབ་ཏུ་མཉམ་པར་གྱུར། །སྒང་གཤོང༌དོག་སའི་ཕྱོགས་རྣམས་ཇི་སྙེད་པ། །དེ་དག་ཀུན་ཀྱང་དེ་ཚེ་མཉམ་པར་གྱུར། །གཡང་ས་གྲོག་པོ་མི་བདེ་ཕྱོགས་ཀྱི་རྣམས། །དེ་ཚེ་ཡུད་ཀྱིས་ཀུན་ཀྱང་མཉམ་པར་གྱུར། །ཚེར་མ་གསེག་མ་ལ་སོགས་མ་མཆིས་གྱུར། །རིན་ཆེན་བཟང་པོའི་འབྱུང་གནས་ཡོངས་སུ་འཐོན། །སྐྱེས་པ་བུད་མེད་ཚོགས་རྣམས་དགའ་བར་གྱུར། །སྐོམ་པས་གདུངས་པ་ཀུན་ཀྱང་ཆབ་ལ་འཚལ། །ཀྱེ་མ་དེ་རིང་བདེ་ན་སུ་མཐུ་ཤེས། །སྙན་པར་བརྗོད་པ་དེ་སྐད༌ཆེད་ཏུ་བརྗོད། །དོག་སའི་མངའ་བདག་སྐར་འོད་སྲས་དང་བཅས། །སྲས་མོ་བློན་པོའི་ཚོགས་བཅས༌དེ་ཡི་ཚེ། །སྐྱེ་བོ་བྱེ་བ་སྟོང་གིས་ཡོངས་བསྐོར་ཏེ། །བཟའ་ཤིང་ར་བར་དགྱེས་པར་གཤེགས་པ་མཛད། །མདངས་དགའ་རྫིང་ཆེན་ཡོངས་སུ་མ་སྨད་པ། །སྤོས་ཆུས་བལྟམས་པ་དབུས་ན་མཆིས་གྱུར་པའི། །དེ་ཡི་དབུས་སུ་ཆོས་སྟེགས་བཟང༌པོ་ཡི། །ཕོ་བྲང་སྟེང་གཤེགས་བཙུན་མོ་བཅས་པར་བཞུགས། །དགུང་བདུན་ལོན་པར་གྱུར་ནས༌དེ་ཡི་ཆབ། །དགུང་གི་གུང་ལ་གྱེན་དུ་ལུད་པར་གྱུར། །རི་དང་གཞལ་མེད་ཁང་གི་ཕྲེང་བཅས་པའི། །དོག་སའང་དེ་ཚེ་ཡོངས་སུ་གཡོས་པར་གྱུར། །ཡོངས་སུ་མ་སྨད༌དེ་ཡི་དབུས་ནས་ཀྱང་། །པདྨོ་ཆེན་པོ་ལོ་མ་སྟོང་ལྡན་འཁྲུངས། །གདུགས་སྟོང་མདོག་གསལ་སྤྲིན་གྱི་དྲ་བ་ཅན། །རི་རབ་རྩེ་མོ་མན་ཅད་འོད་ཀྱིས་འགེངས། །ཆུ་བ་རྡོ་རྗེ་ནང་རིམ་དྲི་གདའ་སྟེ། །རིན་ཆེན་དབང་པོའི་ལོ་མ་རྣམ་དག་ཡངས། །འཛམ་བུ་ཆུ་ཀླུང་གསེར་བཟང་སྙིང་པོ་ཅན། །ཟེ་བ་སྤོས་རབ་འབར་བ་ཕུན་སུམ་ཚོགས། །མགོན་པོ་ཁྱོད་ནི༌དེ་ཡི་སྙིང་པོ་ལས། །སྐྱིལ་མོ་ཀྲུང་བཅས་སྐུ་ནི་བྱུང་བར་གྱུར། །མཚན་གྱིས་རྣམ་བརྒྱན་ཡན་ལག་ཤིན་ཏུ་མཛེས། །ལྷ་མང་བརྒྱས་ཀྱང་མངོན་པར་མཆོད་པ་བགྱིས། །རྒྱལ་པོ་ཕོ་བྲང་སྟེང་ནས་ཤོད་གཤེགས་ཏེ། །ཕྱག་གཉིས༌བརྐྱང་སྟེ་ལེགས་པར་ཁྱོད་བླངས་ནས། །བཙུན་མོའི་མགོ་ལ་བཞག་སྟེ་འདི་སྐད་གསུངས། །ཁྱོད་ཀྱི་བུ་འདི་ཡིན་གྱིས་དགར་གྱིས་ཤིག །འཇིག་རྟེན་མགོན་ཁྱོད་དེ་ལྟར་བལྟམས་གྱུར་ཚེ། །བྱེ་བའི་གཏེར་རྣམས་རབ་ཏུ་འཐོན་པར་གྱུར། །ཞུགས་ཤིང་ཀུན་ཀྱང་མངོན་པར་ཁ་འབུས་ཏེ། །སྟེང་གི་མཁའ་ལས་རོལ་མོའི་སྒྲ་ཡང་བྱུང་། །འཛམ་བུ་རྒྱལ་མཚན་སེམས་ཅན་ཐམས་ཅད་ཀྱང་། །ཁྱོད་ལ་མངོན་ལྟ་བཏུད་ཅིང་ཕྱག་ཀྱང་འཚལ། །ཐལ་མོ་སྦྱར་ཅིང་ཀྱེ་མ་མགོན་མེད་པའི། །མགོན་ཞིག་བྱུང་ཞེས་དགའ་བའི་ཚིག་ཀྱང་བརྗོད། །ཁྱོད་ཀྱི་སྐུ་ལས་འོད་ཟེར་མང་བྱུང་བས། །དོག་ས་ཀུན་ཏུ་རབ་ཏུ་སྣང་བར་གྱུར། །འགྲོ་བའི་མུན་པ་ཀུན་ཀྱང་རྣམ་བསྩལ་ནས། །ནད་མང་མ་ལུས་རབ་ཏུ་ཞི་བར་གྱུར། །གནོད་སྦྱིན་གྲུལ་བུམ་ཤ་ཟ་མང་པོའི་ཚོགས། །རྣམ་པར་འཚེ་བ་དེ་དག་བསྩལ་བར་གྱུར། །ཤིན་ཏུ་གདུག་པས་སེམས་ཅན༌འགུམ་པ་ཡི། །སྦྲུལ་གདུག་ཀུན་ཀྱང་དེ་ཚེ་ཡོངས་མི་རྒྱུ། །ཐོབ་མེད་སྨད་པ་མི་སྙན་སྡུག་བསྔལ་དང་། །ནད་རླུང་ནད་མང་གནོད་པར་འཚེ་བ་དག །མདོར་བསྡུ་ཀུན་ཀྱང་ཞི་ཞིང་མ་མཆིས་གྱུར། །འཇིག་རྟེན་ཀུན་ཏུ་རབ་དགའ་བྱུང་བར་གྱུར། །ཕན་ཚུན་མ་དང་འདྲ་བའི་འདུ་ཤེས་ཀྱིས། །ཁོང་ནས་བྱམས་པར་དེ་ཚེ་འགྲོ་ཀུན་གྱུར། །ཤར་གཉེར་སེམས་བྲལ་འཚེ་བ་མ་མཆིས་ཏེ། །ཐམས་ཅད་མཁྱེན་ལམ་ནན་ཏན་ལྡན་པར་གྱུར། །ངན་སོང་རྒྱུད་རྣམས་རྣམ་པར་རབ་ཏུ་བཟློག །མཐོ་རིས་ལམ་ཆེན་ཀུན་ཀྱང་བཏོད་པར་གྱུར། །ཐམས་ཅད་མཁྱེན་པའི་ལམ་ཡང་ཤིན་ཏུ་བསྟན། །དེ་ལྟར་ཁྱོད་ཀྱིས་འགྲོ་དོན་ཡངས་པ་མཛད། །རྒྱ་མཚོ་ཆེ་འདྲ་ཡོངས་སུ་གཏོང་མཛད་པ། །ཁྱོད་མཐོང་བདག་ནི་ཐོབ་པ་དམ་པ་ཐོབ། །ཡུན་རིང་འཁྱམས་པའི་འགྲོ་བ་མགོན་བྲལ་དུ། །ཁྱོད་ནི་རྨད་དུ་བྱུང་བའི་མགོན་ཞིག་གཤེགས། །

དེ་ནས་ཚོང་དཔོན་གྱི་བུ་མོ་རིན་ཆེན་འོད་ཀྱིས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་ཚིགས་སུ་བཅད་པ་དེ་དག་གིས་མངོན་པར་བསྟོད༌དེ། སྙན་པར་བཀུར་ནས་རབ་ཏུ་བསྔགས་ཏེ། ལན་བརྒྱ་ཕྲག་སྟོང་དུ་གཡས་ཕྱོགས་སུ་བསྐོར་བ་བྱས་ཏེ། ཕྱག་འཚལ་ནས་ཕྱོགས་གཅིག་ཏུ་གུས་པའི་ཚུལ་གྱིས་འདུག་གོ །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས། ཚོང་དཔོན་གྱི་བུ་མོ་རིན་ཆེན་འོད་ལ་བལྟས་ཏེ་འདི་སྐད་ཅེས་སྨྲས་སོ། །བུ་མོ་དེ་ལྟར་ཁྱོད་སེམས་ཅན་ཕ་རོལ་གྱི་ཡོན་ཏན་གྱི་ཁྱད་པར་ཤེས་པའི་མངོན་པར་ཤེས་པ་ལ་ཞུགས་པ་ལེགས་སོ་ལེགས་སོ། །

བུ་མོ་འཇིག་རྟེན་ཐམས་ཅད་ནའང་སེམས་ཅན་གང་སེམས་ཅན་ཕ་རོལ་གྱི་ཡོན་ཏན་ལ་མོས་པ་དེ་ལྟ་བུ་ནི་དཀོན་ཏེ། བུ་མོ་སེམས་ཅན་མུན་པས༌བསྒྲིབས་པས་ཕན་བཏགས་པ་ལ་དྲིན་དུ་མི་གཟོ་བའི། བློ་ཕྱིན་ཅི་ལོག་ལ་ཞུགས་པ་སེམས་འཁྲུགས་པར་གྱུར་པ།རྒྱུད་འཛིངས་པར༌གྱུར་པ། མུན་པའི་སེམས་དང་ལྡན་པ། བསམ་པ་ངང་གིས་ལོག་པ། ནན་ཏན་དང་མི་ལྡན་པ། སེམས་ཅན་ཕ་རོལ་གྱི་ཡོན་ཏན་གྱི་ཁྱད་པར་མངོན་པར་མི་ཤེས་པ་རྣམས་ཀྱིས་ནི་བྱང་ཆུབ་སེམས་དཔའི་ཡོན་ཏན་ལ་འཇུག་པར་བྱ་བའམ།

དེ་བཞིན་གཤེགས་པའི་ཡོན་ཏན་ལ་བརྟག་པར་བྱ་བའམ། ཡོན་ཏན་ཐམས་ཅད་ཤེས་པའི་ཁྱད་པར་མངོན་པར་ཤེས་པ་ཐོབ་པར་བྱ་བར་མི་ནུས་སོ། །བུ་མོ་དེ་ལྟར་ཁྱོད་སེམས་ཅན་ཆེན་པོ་མངོན་པར་ཤེས་པས་བྱང་ཆུབ་སེམས་དཔའི་ཡོན་ཏན་གྱི་རྣམ་པ་དེ་ལྟ་བུ་ལ་འཇུག་པ་ནི་གདོན་མི་ཟ་བར་བྱང་ཆུབ་ཏུ་ཡང་དག་པར་ཞུགས་པའོ། །དེ་ལྟར་ངའི་ཁམས་སུ་ཁྱོད་ལྟ་བུ་ཡེ་ཤེས་དེ་འདྲ་བ་དང་ལྡན་པ་སྐྱེས་པ་ནི། འཛམ་བུའི་གླིང་དུ་ངས་སེམས་ཅན་ཡོངས་སུ་བསྡུས་པའི་མཐུ་དོན་ཡོད་དོ། །དེ་ནས་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས། ནོར་བུ་རིན་པོ་ཆེ་ཆེན་པོ་རིན་ཐང་མེད་པ་དང་། ནོར་བུ་རིན་པོ་ཆེ་སྐར་མའི་འོད་སྣ་ཚོགས་དང་། གོས་རིན་པོ་ཆེ་རིན་ཐང་མེད་པ་བདག༌གིས་ལག་བདར་ཏེ་བླངས་ནས། ཚོང་དཔོན་གྱི་བུ་མོ་རིན་ཆེན་འོད་ལ་བྱིན་ནོ། །

དེའི་འཁོར་གྱི་བུ་མོ་ཐམས་ཅད་ཀྱང་གོས་རིན་པོ་ཆེ་སྣ་ཚོགས་ཀྱིས་ཁྱེད་པར་བྱིན་ནས་འདི་སྐད་ཅེས་སྨྲས་སོ། །བུ་མོ་གོས་རིན་པོ་ཆེ་འདི་ཁྱེར་ལ་བདག་གིས་ཡོངས་སུ་སྤྱད་པར་གྱིས་ཤིག་དེ་ནས་ཚོང་དཔོན་གྱི་བུ་མོ་རིན་ཆེན་འོད་འཁོར་དང་བཅས་པས་པུས་མོ་གཉིས་ས་ལ་ཕབ་སྟེ། གོས་རིན་པོ་ཆེ་དེ་དག་ལག་པ་གཉིས་ཀྱིས་བླངས་ནས་སྤྱི༌བོ་ལ་བླངས་ཏེ། ཕྱིར་ཕྱུང་ནས་གོས་རིན་པོ་ཆེ་དེ་དག་བགོས་སོ། །

དེའི་འཁོར་གྱི་བུ་མོ་ཐམས་ཅད་ཀྱིས་ཀྱང་སོ་སོ་ནས་རང་རང་གི་གོས་རིན་པོ་ཆེ་དེ་དག་བགོས་ནས། དེས་གོས་རིན་པོ་ཆེ་དེ་དག་བགོས་པའི་འོག་ཏུ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ལ་བདག་གི་འཁོར་བུ་མོ་དེ་དག་དང་བཅས་པས་གཡས་ཕྱོགས་སུ་བསྐོར་བ་བྱས་སོ། །དེ་དག་ཐམས་ཅད་ཀྱི་གོས་རིན་པོ་ཆེ་དེ་དག་ལ་རྒྱུ༌སྐར་དང་སྐར་མ་ཐམས་ཅད་ཀྱི་གཟུགས་བརྙན་སྣང་བར་གྱུར་ཏེ། དེ་དག་མཐོང་ནས་འགྲོ་བའི་ཚོགས་མང་པོ་འདི་སྐད་ཅེས་འཛེར་ཏེ། བུ་མོ་ཁྱོད་ཀྱི་འཁོར་བུ་མོ་འདི་དག་ནི་མཚན་མོའི་ལྷ་མོ་སྐར་མའི་ཚོགས་ཀྱིས་བརྒྱན་པ་ལྟར་ཤིན་ཏུ་མཛེས་པ་སྟེ། ཁྱོད་དེ་དག་གིས་བསྐོར་བས་གྱ་ནོམ་པར་མཛེས་སོ། །དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན། དེ༌ལྟར་མི་བལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི། དེའི་ཚེ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པ་ཞེས་བྱ་བར་གྱུར་ཏོ། །

རིགས་ཀྱི་བུ་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཀྱི་བཙུན༌མོ་པདྨོའི་འོད་ཅེས་བྱ་བ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡུམ་དུ་གྱུར་པ་དེ་གཞན་ཞིག་ཡིན་པ་སྙམ་དུ་སེམས་ན་ཡང་དེ་ལྟར་མི་བལྟ་སྟེ། ལྷ་མོ་སྒྱུ་མ་འདི་ནི་དེའི་ཚེ་རྒྱལ༌པོ་བཙུན་མོ་པདྨོའི་འོད་ཅེས་བྱ་བར་གྱུར་ཏེ། རྫུས་ཏེ་བྱུང་བའི་གཞོན་ནུ་ཐུ་བར་ལེན་ལེན་པའོ། །ཡང་རིགས་ཀྱི་བུ་ཁྱོད་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་བ་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པའི་ཡབ་དུ་གྱུར་པ། དེ་གཞན་ཞིག་ཡིན་པ་སྙམ་དུ་སེམས་ནའང་། དེ་ལྟར་མི་བལྟ་སྟེ། རྒྱལ་པོ་ཟས་གཙང་མ་ནི་དེའི་ཚེ་དེའི་དུས་ན་རྒྱལ་པོ་སྐར་མའི་འོད་ཅེས་བྱ་བར་གྱུར་ཏོ། །

ཡང་རིགས་ཀྱི་བུ་ཁྱོད་དེའི་ཚེ་དེའི་དུས་ན་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་སེམས་ནའང་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་ཚོང་དཔོན་གྱི་བུ་མོ་རིན་ཆེན་འོད་ཅེས་བྱ་བར་གྱུར་ཏོ། །ཡང་རིགས་ཀྱི་བུ་ཁྱོད༌དེའི་ཚེ་དེའི་དུས་ན་སེམས་ཅན་འཛམ་བུའི་གླིང་དེར་སྐྱེས་ཤིང་རྒྱལ་པོ་ཆོས་ཐམས་ཅད་ཀྱི་ང་རོའི་གདུགས་ཀྱི་དཀྱིལ་འཁོར་རབ་ཏུ་སྒྲོག་པས་བསྡུ་བའི་དངོས་པོ་བཞིས་ཡོངས་སུ་བསྡུས་པ་དེ་དག་གཞན་དག་ཅིག་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ། བཅོམ་ལྡན་འདས་ཀྱི༌འཁོར་གྱི་དཀྱིལ་འཁོར་འདི་ཉིད་དུ་འདུས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་བཀོད་དེ། ལ་ལ་ནི་ས་དང་པོ་ལ་བཀོད། ལ་ལ་ནི་ས་གཉིས་པ། ལ་ལ་ནི་ས་གསུམ་པ། ལ་ལ་ནི་ས་བཞི་པ། ལ་ལ་ནི་ས་ལྔ་པ། ལ་ལ་ནི་ས་དྲུག་པ། ལ་ལ་ནི་ས་བདུན་པ། ལ་ལ་ནི་ས་བརྒྱད་པ། ལ་ལ་ནི་ས་དགུ་པ། ལ་ལ་ནི་བྱང་ཆུབ་སེམས་དཔའི་ས་བཅུ་པ་ལ་བཀོད་པར་གྱུར་པའི་བྱང་ཆུབ་སེམས་དཔའི་སྨོན་ལམ་སྣ་ཚོགས་རྣམ་པ་ཐ་དད་པ་དང་། ཐམས་ཅད་མཁྱེན་པ་ཉིད་དུ་འཇུག་པ་སྣ་ཚོགས་དང་། ཚོགས་སྣ་ཚོགས་དང་། ཡང་དག་པར་བསྒྲུབ་པ་སྣ་ཚོགས་དང་། སྤྱོད་པ་སྣ་ཚོགས་དང་། འབྱུང་བ་སྣ་ཚོགས་དང་། ལམ་གྱི་རྒྱན་རྣམ་པར་དག་པ་སྣ་ཚོགས་དང་། རྣམ་པར་འཕྲུལ་པ་དང་། ཁྱུ་མཆོག་གི་མཐུ་ཕྱུང་བ་སྣ་ཚོགས་དང་། ལམ་གྱི་རྒྱན་རྣམ་པ་སྣ་ཚོགས་ཀྱིས་ཡོངས་སུ་བྱུང་སྟེ། རྣམ་པར་ཐར་པ་ལ་རྣམ་པར་སྤྱོད་པ་སྣ་ཚོགས་ཀྱིས་འཁོར་གྱི་དཀྱིལ་འཁོར་འདི་ན་ཆོས་ཀྱི་གཞལ་མེད་ཁང་སྣ་ཚོགས་ན་རྣམ་པར་སྤྱོད་པས་འཁོད་ཅིང་རྣམ་པར་སྤྱོད་པ་འདི་དག་ཡིན་ནོ། །

དེ་ནས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པས་དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བའི་འོད་སྤྲོ་བ་ཡངས་པ་ཡང་དག་པར་འབྱུང་བ་འདི་ཉིད་བརྣན་ཏེ་བསྟན་པའི་ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། རྒྱལ་བའི་སྲས་པོ་ཁོ་མོའི་མིག་ཡངས་ཏེ། །ཕྱོགས་ཀུན་ཞིང་མང་རྒྱ་མཚོ་སྣ་ཚོགས་ཀྱི། །སེམས་ཅན་རྒྱ་ཆེན༌གང་ཆེན་མཚོ་ཡི་རྣམས། །འཁོར་བར་གྱུར་ཚེ་ཀུན་ལ་རྣམ་པར༌བལྟ། །འབྱམས་ཀླས་ཞིང་རྣམས་ཀུན་ན་བཞུགས༌པ་ཡི། །རྒྱལ་བ་བྱང་ཆུབ་ཤིང་གི་དྲུང་བཞུགས་པ། །རྡུལ་མེད་ཀུན་ཀྱང་ཕྱོགས་བཅུ་རྒྱས་བཀང་སྟེ། །ཆོས་སྒྲོག་རྟག་པར་འགྲོ་འདུལ་མཐོང་བར་བྱེད། །ཁོ་མོའི་རྣ་བ་རྒྱ་མཚོ་ཡོངས་སུ་དག །སྒྲ་རྣམས་མ་ལུས་ཐམས་ཅད་དེས་ཐོས་ཏེ། །བདེ་བར་གཤེགས་པས་ཆོས་གསུངས་མ་ལུས་པར། །ཐམས་ཅད་དགའ་བས་ཡང་དང་ཡང་དུ་ཐོས། །ཁོ་མོའི་ཡེ་ཤེས་གཉིས་མེད་ཆགས་པ་མེད། །སེམས་ཅན་གཞན་གྱི་སེམས་ཀྱི་ཡུལ་ལ་འཇུག །འགྲོ་བའི་སེམས་ཀྱི་རྒྱ་མཚོ་ཡངས་པ་རྣམས། །མ་ལུས་ཀུན་ལ་མཚན་ཉིད་དངོས་ཀྱིས་འཇུག །སྔོན་གྱི་མཐའ་དྲན་ཏིང་ངེ་འཛིན་སྟོབས་ཀྱིས། །བསྐལ་པའི་རྒྱ་མཚོ་ཚད་མེད་ཁོ་མོས་ཤེས། །ཚེ་རབས་རྒྱུད་མང་གང་ཆེན་མཚོ་དག་ཀྱང་། །ཕ་རོལ་དག་དང་བདག་ལའང་དེ་བཞིན་ཤེས། །རྒྱ་མཚོའི་ཞིང་གཅིག་རྡུལ་ཕྲན་རབ་སྙེད་ཀྱི། །བསྐལ་པ་སྐད་ཅིག་གཅིག་གིས་མ་ལུས་ཤེས། །སེམས་ཅན་འགྲོ་རྒྱུད་དག་ན་འཁོར་བ་དང་། །སངས་རྒྱས་རྣམ་འཕྲུལ་ཚོགས་བཅས་དེ་བཞིན་ནོ། །དེ་དག་ཐོག་མའི་སྨོན་ལམ་ཅི་འདྲ་དང་། །ཡང་དག་བསྒྲུབ་ཚུལ་འཇུག་ཚུལ་རྣམ་ཡངས་དང་། །སྤྱོད༌ལ་བརྟེན་པས་ཚོགས་རྣམས་ཡངས་བསྒྲུབ་པ། །འཇིག་རྟེན་མཁྱེན་པ་རྣམས་ཀྱང་ཁོ་མོས་དྲན། །མཉམ་མེད་ཚད་མེད་ཚོགས་གྱུར་ཡོན་ཏན་མཚོ་མངའ་བའི། །དབང་བསྐུར་སར་བྱོན་ཇི་སྙེད་དེ་དག་དང་། །བྱང་ཆུབ་འཚང་རྒྱའི་ཚུལ་ནི་རྣམ་ཡངས་ལ། །སེམས་ཀྱི་སྐད་ཅིག་གཅིག་གིས་ཁོ་མོ་འཇུག །ཐབས་ཀྱི་རྣམ་པ་གང་དང་གང་དག་གིས། །བདེ་གཤེགས་འཁོར་ལོ་དམ་པ་འགྲོར་བསྐོར་དང་། །མྱ་ངན་འདས་པ་ཡོན་ཏན་ཚད་མེད་དང་། །ཆོས་རྣམས་གནས་པའི་དུས་ཀྱང་ཁོ་མོས་ཤེས། །དྲི་མེད་ཐེག་པ་རྒྱ་མཚོའི་ཚུལ་རྣམས་དང་། །སེམས་ཅན་རྣམ་འདུལ་རྣམ་ཡངས་ཇི་སྙེད་དང་། །འགྲོ་བ་དེ་དག་གིས་ནི་གང་བསྟན་པ། །སོ་སོ་ཀུན་ལ་སྣ་ཚོགས་ཚུལ་གྱིས་འཇུག །དགའ་བའི་གཏེར་དང་མོས་པའི་དབྱིག་གི་རྣམས། །ཀུན་ཏུ་སྣང་བ་རྣམ་ཐར་ཚུལ་འདི་ཡིན། །ཁོ་མོས་བསྐལ་པ་བརྒྱ་མང་རྒྱ་ཆེར་བསྒོམས། །དེ་ཚུལ་དེ་ལ་ཁྱོད་ཀྱང་མྱུར་འཇུག་གིས། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། དགའ་བའི་འོད་འཕྲོ་བ་ཡངས་པ་ཡང་དག་པར་འབྱུང་བ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཐམས་ཅད་མཁྱེན་པ་ཉིད་ལ་འཇུག་པའི་སྨོན་ལམ་རྒྱ་མཚོ་ལ་ཞུགས་པ།

དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་རྒྱ་མཚོ་མངོན་པར་བསྒྲུབ་པའི་སྨོན་ལམ་ཡོངས་སུ་རྫོགས་པ། བྱང་ཆུབ་སེམས་དཔའི་ས་གཅིག་ནོན་པས་བྱང་ཆུབ་སེམས་དཔའི་ས་རྒྱ་མཚོ་ཐམས་ཅད་ཡོངས་སུ་གནོན་པའི་སྟབས་ལ་མཁས་པ། བྱང་ཆུབ་སེམས་དཔའི་སྤྱོད་པ་རྒྱ་མཚོ་ཐམས་ཅད་སྤྱོད་པ་རེ་རེར་ཡང་དག་པར་འདུ་བའི་སྨོན་ལམ་དང་། སྤྱོད་པ་ཡོངས་སུ་དག་པ་བྱང་ཆུབ་སེམས་དཔའི་རྣམ་པར་ཐར་པ་རེ་རེ་ལ། བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོ་ཐམས་ཅད་ཡོངས་སུ་འདུ་བར་རྣམ་པར་སྤྱད་པ་ལ་དབང་བསྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་སྙིང་པོ་བྱང་ཆུབ་འདི་ཉིད་ན་མཚན་མོའི་ལྷ་མོའི་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཅེས་བྱ་བ་ཞིག་བཅོམ་ལྡན་འདས་ཀྱི་སྤྱན་སྔར་ཕྱིན་ཅིང་འདུག་གིས། དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཡོངས་སུ་སྨིན་པར་བྱ་བ་དང་། ཇི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ༌སྦྱང་བར་བྱ་བ་དང་། ཇི་ལྟར་དེ་བཞིན་གཤེགས་པ་ཐམས་ཅད་ཤིན་ཏུ་མཉེས་པར་བྱ་བས་བསྙེན་བཀུར་ཞིང་རིམ་གྲོ་བྱ་བ་དང་། ཇི་ལྟར་བྱང་ཆུབ་སེམས་དཔས་སངས་རྒྱས་ཀྱི་ཞིང་ཐམས་ཅད་ལ་བརྩོན་པར་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བར་བྱས་ནས་ཡང་དང་ཡང་བལྟས་ཏེ། མཚན་མོའི་ལྷ་མོ་ཤིང་ཐམས་ཅད་ཀྱི་མེ་ཏོག་རྒྱས་པས་བདེ་བར་གནས་པའི་དྲུང་ནས་སོང་ངོ་།། །།

གཞོན་ནུ་ནོར་བཟང་གིས་དགེ་བའི་བཤེས་གཉེན་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཅེས་བྱ་བ་མཇལ་ནས་འདུ་ཤེས་རྣམ་པར་དག་པ་སོགས་ཀྱི་ཡོན་ཏན་དུ་མ་མངོན་དུ་བརྙེས་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་གང་ན་བ་དེར་སོང་སོང་ནས། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་འཁོར་གྱི་དཀྱིལ་འཁོར་དེ་ཉིད་ན། ཆོས་ཀྱི་དབྱིངས་ཀྱི་ཚུལ་རབ་ཏུ་སྣང་བའི་རིན་པོ་ཆེའི་དྲ་བས༌ཀུན་ནས་གཡོག་པའི་ལུས་དང་ལྡན་པ། ཉི་ཟླ་དང་གཟའ་སྐར་དང་། རྒྱུ་སྐར་ཐམས་ཅད་ཀྱི་གཟུགས་བརྙན་ཡོངས་སུ་སྟོན་པའི་ལུས་དང་ལྡན་པ། བསམ་པ་ཇི་ལྟ་བ་བཞིན་དུ་སེམས་ཅན་གྱིས་རྣམ་པར་དམིགས་པར་སྟོན་པའི་ལུས་དང་ལྡན་པ། སེམས་ཅན་ཐམས་ཅད་ཀྱི་ལུས་ཀྱི་དབྱིབས་དང་འདྲ་བར་རང་གི་ལུས་རྣམ་པར་དམིགས་པར་བྱེད་པའི་ལུས་དང་ལྡན་པ། ཁ་དོག་རྒྱ་མཚོ་ཡངས་པ་མཐའ་དང་དབུས་མེད་པ་རྣམ་པར་དམིགས་པར་སྟོན་པའི་ལུས་དང་ལྡན་པ་སྤྱོད་ལམ་ཐམས་ཅད་ལ་རྣམ་པར་སྤྱོད་པའི་ཚུལ་ཡོངས་སུ་སྟོན་པའི་ལུས་དང་ལྡན་པ། སྒོ་ཀུན་ཏུ་མངོན་པར་བལྟས་པར༌རྣམ་པར་དམིགས་པར་བྱེད་པའི་ལུས་དང་ལྡན་པ། ཆོས་ཀྱི་སྤྲིན་གྱི་འབྲུག་སྒྲ་ཀུན་ཏུ་སྒྲོག་ཅིང་རྣམ་པར་འཕྲུལ་པ་སྣ་ཚོགས་ཀྱི་ཕྱོགས་ཐམས་ཅད་རྒྱས་པར་བཀང་སྟེ། འགྲོ་བ་ཐམས་ཅད་ལ་མངོན་དུ་གནས་པའི་ལུས་དང་ལྡན་པ། དུས་ཐམས་ཅད་དུ་འགྲོ་བ་ཐམས་ཅད་ཀྱི་དོན་ལ་མངོན་དུ་བལྟས་པར་ནམ༌མཁའི་དབྱིངས་ཀྱིས་ཀློ་བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཞབས་ལ་འདུད་ཅིང་ཕྱག་འཚལ་བའི་ལུས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་བསགས་པ་ལ་གཅེས་ཤིང་སྔོན་དུ་འགྲོ་བའི་ལུས་དང་ལྡན་པ། དེ་བཞིན་གཤེགས་པ་ཐམས་ཅད་ལས་མངོན་དུ་ཆོས་ཀྱི་སྤྲིན་ཡང་དག་པར་ལེན་ཅིང་ཡོངས་སུ་འཛིན་པའི་སྨོན་ལམ་གྲུབ་ཅིང་ཡོངས་སུ་རྫོགས་པར་བྱ་བའི་སེམས་ལས་ཕྱིར་ཕྱོགས་སུ་མ་གྱུར་ཅིང་། དྲན་པས་ཡོངས་སུ་འཛིན་པའི་ལུས་དང་ལྡན་པ་མཐའ་དང་དབུས་མེད་པའི་འོད༌ཀྱིས་ཕྱོགས་དང་ཕྱོགས་མཚམས་ཐམས་ཅད་རྒྱས་པར་འགེངས་པའི་ལུས་དང་ལྡན་པ། འགྲོ་བ་ཐམས་ཅད་ཀྱི་མུན་པ་རྣམ་པར་སེལ་བའི་ཆོས་ཀྱི་སྒྲོན་མའི་འོད་ཀུན་དུ་འགྱེད་ཅིང་། སྣང་བ་ཡོངས་སུ་སྟོན་པའི་ལུས་དང་ལྡན་པ། ཆོས་སྒྱུ་མའི་རྣམ་པ་ལྟ་བུའི་ཡེ་ཤེས་ཀྱི་ལུས་དྲི་མ་མེད་པ་རབ་ཏུ་སྟོན་པའི་ལུས་དང་ལྡན་པ། ཆོས་ཀྱི་ལུས་མུན་པ་དང་རྡུལ་དུ་བྲལ་བ་རབ་ཏུ་སྟོན་པའི་ལུས་དང་ལྡན་པ། ཆོས་ཉིད་སྒྱུ་མ་ལྟ་བུ་ལས་བྱུང་བའི་ལུས་དང་ལྡན་པ། ཆོས་ཉིད་རབ་ཏུ་རྟོགས་པས་མུན་པ་མེད་པའི་སེམས་དང་ལྡན་པར་ཡེ་ཤེས་ཀྱི་སྣང་བ་སྒོ་ཀུན་ཏུ་གསལ་བ་རབ་ཏུ་ཐོབ་པ། ཤིན་ཏུ་ནད་མེད་ཅིང་གདུང་བ་མེད་པའི་ཡིད་ཀྱི་ལུས་དང་ལྡན་པ། ཆོས་ཀྱི་སྐུ་མི་ཤིགས་ཤིང་བརྟན་པ་དང་ལྡན་པའི་དབྱིངས་ལས་བྱུང་བ། དེ་བཞིན་གཤེགས་པའི་བྱིན་གྱིས་རླབས་གནས་མེད་པའི་རང་བཞིན་ཀུན་ནས་ཉོན་མོངས་པ་མེད་པའི་ངང་དྲི་མ་མེད་པའི་ཆོས་ཉིད་ཀྱི་ལུས་རྣམ་པར་དག་པའི་ལུས་དང་ལྡན་པ་དེ་རིན་པོ་ཆེའི་རྒྱལ་པོ་འགྲོ་བ་ཐམས་ཅད་ཀྱི་གནས་རབ་ཏུ༌སྣང་བའི་སྙིང་པོ་ཅན་གྱི་སྟན་ལ་འདུག་པ་མཐོང་ངོ་། །དེས་དེ་མཐོང་ནས་སྤྱི་བོས་བཏུད་དེ་མཐོང་བར་བྱ་བའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རྗེས་སུ་དྲན་པར་བྱས་ནས་སའི་གཞི་ལས་བཏུད་དེ་རྒྱངས་བཅད་པ་ཞིག་ཏུ་མངོན་པར་བཏུད་དོ། །

དེ་ནས་ཚོང་དཔོན་གྱི་བུ་ནོར་བཟང་སའི་གཞི་དེ་ལས༌ལངས་ཏེ་ཐལ་མོ་སྦྱར་ནས། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་དེའི་ལུས་ལ་བལྟས་པ་དང་། འདུ་ཤེས་རྣམ་པར་དག་པ་བཅུ་ཐོབ་པར་གྱུར་ཏེ། དེ་དག་ཐོབ་པས་དགེ་བའི་བཤེས་གཉེན་ཐམས་ཅད་དང་སྐལ་བ་མཉམ་པར་རབ་ཏུ་ཐོབ་པར་གྱུར་ཏོ། །བཅུ་གང་ཞེ་ན་འདི་ལྟ་སྟེ། ཐམས་ཅད་མཁྱེན་པ་ཉིད་དུ་བརྩམས་པའི་བརྩོན་འགྲུས་ལ་དམིགས་པ་ཐམས་ཅད་དུ་གནས་པར་བྱ་བའི་ཕྱིར། དགེ་བའི་བཤེས་གཉེན་རྣམས་ལ་རང་གི་སེམས་ཀྱི་འདུ་ཤེས་རབ་ཏུ་ཐོབ་པར་གྱུར་ཏོ། །དགེ་བའི་བཤེས་གཉེན་བསྙེན་བཀུར་ཞིང་དགེ་བའི་རྩ་བ་ཡངས་པ་ཡོངས་སུ་བསྒྲུབ་པ་གྲུབ་པར་བྱ་བའི་ཕྱིར། རང་གི་ལས་རྣམ་པར༌སྨིན་པ་རྣམ་པར་དག་པའི་རང་བཞིན་གྱི་འདུ་ཤེས་རབ་ཏུ་ཐོབ་བོ། །

སྨོན་ལམ་ཐམས་ཅད་ཀྱིས་བརྒྱན་པའི་སྤྱོད་པ་ལ་ཡང་དག་པར་གནས་པར་བྱ་བའི་ཕྱིར། བྱང་ཆུབ་སེམས་དཔའི་སྤྱོད་པའི་རྒྱན་གྱི་འདུ་ཤེས་རབ་ཏུ་ཐོབ་བོ། །དགེ་བའི་བཤེས་གཉེན་ཐམས་ཅད་ཀྱི་གདམས་ངག་གི་ལམ་ལ་ནན་ཏན་དུ་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་རབ་ཏུ་བསྒྲུབ་པའི་འདུ་ཤེས་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་ཡུལ་དུ་གྱུར་པའི་ཆོས་བླ་ན་མེད་པ་ལ་རྣམ་པར་སྤྱོད་པའི་སྣང་བ་ཡོངས་སུ་མཐོང་བར་བྱ་བའི་ཕྱིར་ཉམས་སུ་མྱོང་བ་བསྐྱེད་པའི་འདུ་ཤེས་རབ་ཏུ་ཐོབ་བོ། །ཀུན་ཏུ་བཟང་པོའི་སྤྱོད་པས་འབྱུང་བའི་སྨོན་ལམ་དང་། སྤྱོད་པ་རྣམ་པར་དག་པར་བྱ་བའི་ཕྱིར་འབྱུང་བ་གཅིག་གི་འདུ་ཤེས་རབ་ཏུ་ཐོབ་པར་གྱུར་ཏོ། །

དགེ་བའི་ཆོས་ཡོངས་སུ་བསགས་པ་ཐམས་ཅད་རྣམ་པར་འཕེལ་བར་བྱ་བའི་ཕྱིར་ཐམས་ཅད་མཁྱེན་པའི་བསོད་ནམས་རྒྱ་མཚོའི་འབྱུང་གནས་ཀྱི་འདུ་ཤེས་རབ་ཏུ་ཐོབ་བོ། །སངས་རྒྱས་ཀྱི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ལ་བརྩོན་འགྲུས་ཀྱི་ཤུགས་ཡོངས་སུ་འཕེལ་བར་བྱ་བའི་ཕྱིར། དགེ་བའི་ཆོས་ཡོངས་སུ་མ་རྫོགས་པ་ཡོངས་སུ་རྫོགས་པར་བྱེད་པ་དང་། ཡང་དག་པར་འཕེལ་བར་བྱེད་པ་དང་། ཡོངས་སུ་སྐྱོང་བའི་འདུ་ཤེས་རབ་ཏུ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་བསམ་པ༌ཐམས་ཅད་ཡོངས་སུ་རྫོགས་པར་བྱ་བའི་ཕྱིར། དགེ་བའི་རྩ་བ་ཐམས་ཅད་ཡོངས་སུ་རྫོགས་པའི་འདུ་ཤེས་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཐམས་ཅད་ཀྱི་ཆོས་ལ་དབང༌བསྒྱུར་བ་རབ་ཏུ་གནས་པར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་དོན་ཐམས་ཅད་ཡོངས་སུ་སྒྲུབ་པའི་འདུ་ཤེས་རབ་ཏུ་ཐོབ་སྟེ། འདུ་ཤེས་རྣམ་པར་དག་པ་བཅུ་པོ་དེ་དག་རབ་ཏུ་ཐོབ་པར་གྱུར་ཏོ། །

དེ་དག་ཐོབ་པས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་སྣང་བ་ལས་བྱང་ཆུབ་སེམས་དཔའ་དང་། བསྐལ་པ་མཐུན་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏེ། འདི་ལྟར་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་དུས་གསུམ་རྗེས་སུ་དྲན་པའི་ཚུལ་ལ་དྲན་པའི་སྐལ་བ་མཉམ་པ་དང་། ཆོས་རྒྱ་མཚོའི་ཚུལ་ཐམས་ཅད་ཐ་མི་དད་པར་ཁོང་དུ་ཆུད་པར་བྱ་བ་ལ་བློ་གྲོས་ཀྱི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དཀྱིལ་འཁོར་རིག་པས་རྗེས་སུ་ཤེས་པར་བྱ་བའི་བྱེ་བྲག་དང་། ཚུལ་ཐ་དད་པར་མཁས་པ་ལ་རེག་པའི་སྐལ་བ་མཉམ་པ་དང་། བློ་ནམ་མཁའ་དང་མཉམ་པས་དུས་གསུམ་ཐམས་ཅད་ཀྱི་ཚུལ་རྒྱ་མཚོ་སྣང་བ་རབ་ཏུ་ཐོབ་པར་བྱ་བའི་ཕྱིར་བློའི་སྐལ་བ་མཉམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་དབང་པོ་རྣམ་པར་དག་པའི་སྐལ་བ་མཉམ་པ་དང་།

རྣམ་པ་ཐམས་ཅད་དུ་སེམས་ཅན་ཡོངས་སུ་བསྡུ་བའི་རྒྱན་གྱིས་རྣམ་པར་བརྒྱན་པའི་བྱང་ཆུབ་སེམས་དཔའི་ལམ་གྱི་ཡོན་ཏན་ལ་ནན་ཏན་དུ་བྱ་བའི་རྒྱན་གྱི་ལམ་ཁོང་དུ་ཆུད་པར་བྱ་བའི་ཕྱིར་སེམས་རྣམ་པར་དག་པའི་སྐལ་བ་མཉམ་པ་དང་། དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་སྣང་བ་རབ་ཏུ་ཐོབ་པར་བྱ་བའི་ཕྱིར་སྤྱོད་ཡུལ་གྱི་སྐལ་བ་མཉམ་པ་དང་། ཐམས་ཅད་མཁྱེན་པའི་ཚུལ་རྒྱ་མཚོ་ལ་འཇུག་པའི་ལམ་སྣང་བ། རྣམ་པ་ཐམས་ཅད༌རབ་ཏུ་ཐོབ་པར་བྱ་བའི་ཕྱིར་ཚུལ་གྱི་རྗེས་སུ་འབྲང་བའི་སྐལ་བ་མཉམ་པ་དང་། ཆོས་ཐམས་ཅད་ཀྱི་རང་བཞིན་ཤེས་ཤིང་ཁོང་དུ་ཆུད་པ་རབ་ཏུ་ཐོབ་པར་བྱ་བའི་ཕྱིར། དོན་ཁོང་དུ་ཆུད་པའི་སྐལ་བ་མཉམ་པ་དང་། ཆོས་ཀྱི་ཚུལ་རྒྱ་མཚོ་ཐམས་ཅད་ལ་ཆོས་ལ་རྣམ་པར་སྤྱོད་པའི་སྐལ་བ་མཉམ་པ་དང་། སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར་མི་འཇིགས་པའི་སྐལ་བ་མཉམ་པ་དང་། བསམ་པ་ཇི་ལྟ་བ་བཞིན་དུ་འགྲོ་བ་རྣམས་ལ་རྣམ༌པ་ཐ་དད་པར་ཡོངས་སུ་བསྟན་པའི་མཚན་དང་དཔེ་བྱད་བཟང་པོས་རྣམ་པར་བྲིས་པའི་ལུས་རྣམ་པར་དག་པ་རབ་ཏུ་ཐོབ་པར་བྱ་བའི་ཕྱིར་གཟུགས་ཀྱི་ལུས་རྣམ་པར་དག་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་སྟོབས་ཡོངས་སུ་རྫོགས་པས་ཐམས་ཅད་མཁྱེན་པ་ཉིད་དུ་དམིགས་པ། རྣམ་པར་འཕེལ་བར་བྱ་བའི་ཕྱིར་སྟོབས་ཀྱི་སྐལ་བ་མཉམ་པ་དང་། སེམས་དང་བསམ་པའི་ནམ་མཁའ་ཡོངས་སུ་དག་པར་བྱ་བའི་ཕྱིར་མི་འཇིགས་པའི་སྐལ་བ་མཉམ་པ་དང་། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་གནས་པས་མི་སྐྱོ་བ་རབ་ཏུ་ཐོབ་པར་བྱ་བའི་ཕྱིར་བརྩོན་འགྲུས་ཀྱི་སྐལ་བ་མཉམ་པ་དང་། ཆོས་ཐམས་ཅད་ལ་སྒྲིབ་པ་མེད་པའི་ཡེ་ཤེས་སྣང་བ་རབ་ཏུ་ཐོབ་པར་བྱ་བའི་ཕྱིར་སྤོབས་པས་སྐལ་བ་མཉམ་པ་དང་། འགྲོ་བ་ཐམས་ཅད་ལས་མངོན་པར་འཕགས་པའི་ལུས་ཡོངས་སུ་དག་པར་བྱ་བའི་ཕྱིར་ཟིལ་གྱིས་མི་ནོན་པའི་སྐལ་བ་མཉམ་པ་དང་། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱ་བའི་ཚིགས་ཡོངས་སུ་དག་པར་བྱ་བའི་ཕྱིར་མ་ཞུམ་མི་དམའ་བའི་སྐལ་བ་མཉམ་པ་དང་། ཆོས་ཀྱི་ཚུལ་རྒྱ་མཚོ་ཐམས་ཅད་ཀྱི་སྒྲ་རབ་ཏུ་བསྒྲག་པའི་ཕྱིར་དབྱངས་ཀྱི་སྐལ་བ་མཉམ་པ་དང་། འགྲོ་བ་ཐམས་ཅད་ཀྱི་ཚིག་རྣམ་པར་དམིགས་པའི་ཐ་སྙད་དང་། ཚུལ་རྒྱ་མཚོ་ལ་དབྱངས་ཀྱི་ཡན་ལག་རྣམ་པར་དག་པའི་སྐལ་བ་མཉམ་པ་དང་། དེ་བཞིན་གཤེགས་པའི་གདམས་ངག་གི་ཡོན་ཏན་ཁོང་དུ་ཆུད་པ་རྣམ་པར་དག་པར་བྱ་བ་ལ་ཡོན་ཏན་རྣམ་པར་དག་པའི་སྐལ་བ་མཉམ་པ་དང་། ཁ་ན་མ་ཐོ་བ་མེད་པའི་ལས་རྣམ་པར་སྨིན་པ་ཡོངས་སུ་དག་པར་བྱ་བའི་ཕྱིར་ཆོས་དང་ལས་ཀྱི་རྒྱུད་དུ་མི་འགལ་བའི་སྐལ་བ་མཉམ་པ་དང་། སངས་རྒྱས་བྱུང་བ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་མཆོད་སྦྱིན་གྱིས་ཆོས་བཟང་པོ་ལ་རབ་ཏུ་གནས་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ལ་ཡང་དག་པར་གནས་པར་བྱ་བའི་ཕྱིར། ཚངས་པའི་སྤྱོད་པ་རྣམ་པར་དག་པའི་སྐལ་བ་མཉམ་པ་དང་། བྱམས་པའི་ཚུལ་སྣ་ཚོགས་ཀྱིས་སྐད་ཅིག་རེ་རེ་ལ་སེམས་ཅན་རྒྱ་མཚོ་ཐམས་ཅད་དུ་རྒྱས་པར་དགང༌བར་བྱ་བའི་ཕྱིར་བྱམས་པ་ཆེན་པོའི་སྐལ་བ་མཉམ་པ་དང་། སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབས་པའི་ཆོས་ཀྱི་སྤྲིན་གྱི་ཆར་མངོན་པར་དབབ་པའི་ཕྱིར། སྙིང་རྗེ་ཆེན་པོའི་ཚུལ་རྒྱ་མཚོ་ལ་འཇུག་པའི་སྐལ་བ་མཉམ་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་ཐབས་ཀྱི་རྒྱུད་དུ་སྐལ་བ་མཉམ་པར་བྱ་བའི་ཕྱིར་ལུས་ཀྱི་ལས་ཀྱི་སྐལ་བ་མཉམ་པ་དང་། ཆོས་ཐམས་ཅད་བརྗོད་ཅིང་སྨོས་པ་ལ་ངག་གི་ལས་རྣམ་པར་དག་པའི་སྐལ་བ་མཉམ་པ་དང་། སེམས་ཅན་ཐམས་ཅད་ཀྱི་སེམས་ལ་ཐམས་ཅད་མཁྱེན་པ་ཉིད་དུ་དམིགས་པ་ཉེ་བར་བསྒྲུབ་པའི་ཕྱིར་ཡིད་ཀྱི་ལས་ཀྱི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་ལ་རྒྱན་རྣམ་པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པའི་སྐལ་བ་མཉམ་པ་དང་། སངས་རྒྱས་འབྱུང་བ་རྒྱ་མཚོ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་འགྲོ་བའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ལ་དུས་མ་ལུས་པར་མཆོད་པ་ཐམས་ཅད་ཀྱིས་རིམ་གྲོ་བྱ་བའི་ཕྱིར། མཆོད་པས་རིམ་གྲོ་བྱ་བའི་སྐལ་བ་མཉམ་པ་དང་། སེམས་ཅན་གྱི་ཁམས་ཐམས་ཅད་དུ་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བའི་སྐལ་བ་མཉམ་པ་དང་། ཆོས་ཀྱི་ཚུལ་ཐམས་ཅད་ལ་སྣང་བ་རབ་ཏུ་ཐོབ་པའི་སྐལ་བ་མཉམ་པ་དང་། ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་ཏིང་ངེ་འཛིན་རབ་ཏུ་ཐོབ་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་རྒྱ་མཚོ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་དང་། རྣམ་པར་འཕྲུལ་པས་རྒྱས་པར་དགང་བའི་ཕྱིར་ཀུན་ཏུ་རྒྱས་པར་དགང་བའི་སྐལ་བ་མཉམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་འཕྲུལ་པའི་ཚུལ་རྒྱ་མཚོ་ལ་བྱང་ཆུབ་སེམས་དཔའི་རྣམ་པར་སྤྱོད་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་སྤྱོད་པ༌ལ་གནས་པ་ལ་འཁོར་གྱི་སྐལ་བ་མཉམ་པ་དང་། འཇིག་རྟེན་གྱི་ཁམས་ཐམས་ཅད་ཤིན་ཏུ་ཕྲ་བར་འཇུག་པ་ལ་འཇུག་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཤིན་ཏུ་ཡངས་པ་ཐམས་ཅད་དུ་སེམས་རྣམ་པར་ཕྱེ་བའི་སྐལ་བ་མཉམ་པ་དང་། སངས་རྒྱས་ཀྱི་ཞིང་རྒྱ་མཚོ་ཐམས་ཅད་ལ་འཇུག་པ་རྣམ་པ་ཐ་དད་པ་ཁོང་དུ་ཆུད་པར་བྱ་བ་ལ་ཁོང་དུ་ཆུད་པ་རྣམ་པ་ཐ་དད་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་རྣམ་པར་ཕྱེ་བ་ཡེ་ཤེས་མཐའ་ཡས་པས་རྣམ་པར་དམིགས་པར་བྱ་བ་ལ་ཚུལ་འབྱམས་ཀླས་པས་ཀུན་ཏུ་རྒྱས་པར་དགང་བའི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་དུ་མངོན་པར་འབྱུང་བའི་སྐལ༌བ་མཉམ་པ་དང་ཕྱོགས་ཐམས་ཅད་རྒྱས་པར་དགང་བ་ཡང་དག་པར་གཞོལ་བ་ཐོགས་པ་མེད་ཅིང་ཕྱིར་མི་ལྡོག་པར་བྱ་བའི་ཕྱིར་ཕྱིར་མི་ལྡོག་པའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱི་སྙིང་པོ་བྱང་ཆུབ་ཏུ་རྣམ་པར་འཚང་རྒྱ་བའི་ཡེ་ཤེས་ཀྱི་དཀྱིལ་འཁོར་སྣང་བ་རབ་ཏུ་ཐོབ་པར་བྱ་བའི་ཕྱིར་མུན་པ་རྣམ་པར་སེལ་བའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱི༌འཁོར་གྱི་དཀྱིལ་འཁོར་རྒྱ་མཚོར་རྗེས་སུ་ཕྱིན་པའི་སྐལ་བ་མཉམ་པ་དང་། སངས་རྒྱས་ཀྱི་ཞིང་བརྗོད་དུ་མེད་པའི་དེ་བཞིན་གཤེགས་པ་མཆོད་ཅིང་རིམ༌གྲོར་བྱ་བའི་སྦྱོར་བ་ལ་སངས་རྒྱས་ཀྱི་ཞིང་ཐམས་ཅད་ལུས་ཀྱི་དྲ་བས་རྒྱས་པར་དགང་བའི་སྐལ་བ་མཉམ་པ་དང་། ཆོས་ཀྱི་ཚུལ་རྒྱ་མཚོ་རྗེས་སུ་རྒྱུ་བ་དེ་དང་དེ་དག་ལ་ཡེ་ཤེས་མངོན་སུམ་གྱི་སྐལ་བ་མཉམ་པ་དང་། རྗེས་སུ་མཐུན་པའི་ཆོས་ཀྱི་ཚུལ་ཐམས་ཅད་མངོན་དུ་བྱ་བའི་སྦྱོར་བ་ལ་ནན་ཏན་གྱི་སྐལ་བ་མཉམ་པ་དང་། ཆོས་ཀྱི་མོས་པ་ཤིན་ཏུ་ཤས་ཆེ༌བའི་བརྩམ་པ་རྣམ་པར་དག་པར་བྱ་བའི་ཕྱིར༌བཙལ་བའི་སྐལ་བ་མཉམ་པ་དང་། ལུས་དང་ངག་དང་ཡིད་ཀྱི་ལས་ཀྱིས་སངས་རྒྱས་ཀྱི་ཡོན་ཏན་གྱི་རྒྱན་ཡོངས་སུ་བསྒྲུབ་པ་ལ་རྣམ་པར་དག་པའི་སྐལ་བ་མཉམ་པ་དང་། ཉམ༌ང་བའི་རྟོག་པ་མེད་པའི་སེམས་ཀྱི་དཀྱིལ་འཁོར་གྱིས་ཆོས་ཐམས་ཅད་ཀྱི་ཡེ་ཤེས་དཀྱིལ་འཁོར་ཡོངས་སུ་དག་པར་བྱ་བའི་ཕྱིར་ཡིད་ཀྱི་སྐལ་བ་མཉམ་པ་དང་། དགེ་བའི་རྩ་བ་ཐམས་ཅད་ཀྱི་ཚོགས་ཡང་དག་པར་བརྩམས་པ་མཐར་ཕྱིན་པར་བྱ་བའི་སྦྱོར་བ་ལ་བརྩོན་འགྲུས་བརྩམས་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པར་བྱ་བ་ལ་སྤྱོད་པའི་རྒྱན་གྱི་སྐལ་བ་མཉམ་པ་དང་། ཆོས་ཐམས་ཅད་ཀྱི་མཚན་མ་ཁོང་དུ་ཆུད་པར་བྱ་བ་ལ་ཆགས་པ་མེད་པ་རྣམ་པར་སྤྱད་པའི་སྐལ་བ་མཉམ་པ་དང་། ཆོས་ལ་རྣམ་པར་སྤྱོད་པའི་ཡེ་ཤེས་ཀྱིས་རྣམ་པར་འཕྲུལ་པ་དེ་དང་དེ་དག་ཏུ་ཐབས་མཁས་པའི་ཚུལ་གྱི་སྐལ་བ་མཉམ་པ་དང་། བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཡུལ་བསྟན་པས་ཡང་དག་པར་བསྐུལ་བའི་ཕྱིར་སྐྱེ་མཆེད་རྣམ་པར་དག་པའི་སྐལ་བ་མཉམ་པ་དང་། ཆོས་ཐམས་ཅད་བསྒོམ་པ་དང་། རྣམ་པར་བསྒོམ་པ་རབ་ཏུ་ཐོབ་པར་བྱ་བའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་རབ་ཏུ་ཐོབ་པར་བྱ་བའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་བྱིན༌གྱི་རླབས་ཀྱི་སྐལ་བ་མཉམ་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་རབ་ཏུ་ཐོབ་པར་བྱ་བ་ལས་ཡོངས་སུ་གནན་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་རྣམ་པར་དགོད་པ་ཐམས་ཅད་ལ་རབ་ཏུ་གནས་པའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱིས་ལུང་བསྟན་པ་ལ་ཡོངས་སུ་བསྟན་པའི་སྐལ་བ་མཉམ་པ་དང་། སྐད་ཅིག་གཅིག་གི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་ཏིང་ངེ་འཛིན་གྱི་སྐལ་བ་མཉམ་པ་དང་། སངས་རྒྱས་ཀྱི་འཕྲིན་ལས་མཚན་ཉིད་སྣ་ཚོགས་ལ་ཏིང་ངེ་འཛིན་རྣམ་པར་དགོད་པའི་སྐལ་བ་མཉམ་པ་དང་། རྗེས་སུ་དྲན་པའི་དམིགས་པའི་ཚུལ་རྒྱ་མཚོ་ཐམས་ཅད་ལ་རྗེས་སུ་དྲན་པའི་སྐལ་བ་མཉམ་པ་དང་། བྱང་ཆུབ་སེམས་དཔའི་བྱ་བ་ལ་ཕྱི་མའི་མཐའི་བསྐལ་པའི་མུར་ཐུག་པར་ཞེ་ནོན་པ་ལ་བྱང་ཆུབ་སེམས༌དཔས་སྤྱད་པའི་སྐལ་བ་མཉམ་པ་དང་། སངས་རྒྱས་ཀྱི་ཡེ་ཤེས་ཚད་མེད་པ་ལ་མོས་ཤིང་དགའ་བའི་ཤུགས་རྒྱ་མཚོ་རྣམ་པར་འཕེལ་བར་བྱ་བའི་ཕྱིར་མོས་པའི་སྐལ་བ་མཉམ་པ་དང་། སྒྲིབ་པའི་རི་ཐམས་ཅད་ལ་རྣམ་པར་བཟློག་པའི་སྐལ་བ་མཉམ་པ་དང་། སངས་རྒྱས་ཀྱི་ཡེ་ཤེས་ཀྱི་ཚོགས་མཐའ་ཡས་པ་ཡོངས་སུ་བསྒྲུབ་པའི་ཕྱིར། ཕྱིར་མི་ལྡོག་པའི་ཡེ་ཤེས་ཀྱི་སྐལ་བ་མཉམ་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དུས་སུ་སྐྱེ་བའི་སྐལ་བ་མཉམ་པ་དང་། ཐམས་ཅད་མཁྱེན་པ་ཉིད་ཀྱི་ཚུལ་གྱི་སྒོ་ལ་རྣམ་པར་སྤྱོད་པའི་སྐལ་བ་མཉམ་པ་དང་། ཆོས་ཀྱི་དབྱིངས་ཀྱི་ཚུལ་གྱིས་ཁྱུ་མཆོག་གི་མཐུ་ཕྱུང་བའི་ཡུལ་ལ་རབ་ཏུ་འཇུག་པར་བྱ་བའི་ཕྱིར་ཡུལ་གྱི་སྐལ་བ་མཉམ་པ་དང་། གཞི་ཐམས་ཅད་ཡོངས་སུ་ཆོམས་པའི་སེམས་སུ་བྱ་བའི་ཕྱིར་གཞི་མེད་པའི་སྐལ་བ་མཉམ་པ་དང་། ཆོས་མཉམ་པ་ཉིད་ཀྱི་ཡེ་ཤེས་ལ་འཇུག་པར་བྱ་བའི་ཕྱིར་ཆོས་བསྟན་པའི་སྐལ་བ་མཉམ་པ་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་རང་གི་ལུས་ཀྱིས་ཡང་དག་པར་གནོན་པའི་ཕྱིར་བརྩོན་པའི་སྐལ་བ་མཉམ་པ་དང་། འཇིག་རྟེན་ཐམས་ཅད་ཀྱིས་ཁོང་དུ་ཆུད་པར་བྱ་བའི་ནན་ཏན་གྱི་ཚུལ་ལ་མངོན་པར་ཤེས་པའི་སྐལ་བ་མཉམ་པ་དང་། ཕྱོགས་ཐམས་ཅད་ཀྱི་ཞིང་རྒྱ་མཚོར་འཇུག་པར་བྱ་བ་ལ་མངོན་པར་འདུ་བྱ་བ་མེད་པའི་རྫུ་འཕྲུལ་རབ་ཏུ་ཐོབ་པའི་སྐལ་བ་མཉམ་པ་དང་། གཟུངས་རྒྱ་མཚོ་ཐམས་ཅད་ཀྱི་སྣང་བ་རབ་ཏུ་ཐོབ་པར་བྱ་བ་ལ་གཟུངས་ཀྱི་སའི་སྐལ་བ་མཉམ་པ་དང་། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་དགོངས་པ་ཁོང་དུ་ཆུད༌པར་བྱ་བའི་སྐལ་བ་མཉམ་པ་དང་། ནམ་མཁའི་དབྱིངས་ལྟ་བུའི་ཆོས་ཀྱི་ཚུལ་ཐམས་ཅད་ཁོང་དུ་ཆུད་པར༌བྱ་བའི་ཕྱིར་ཆོས་ཟབ་མོ་ལ་འཇུག་པའི་སྐལ་བ་མཉམ་པ་དང་། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་སྣང་བར་བྱ་བའི་སྐལ་བ་མཉམ་པ་དང་། བསམ་པ་ཇི་ལྟ་བ་བཞིན་དུ་འགྲོ་བས་རྣམ་པར་དམིགས་པར་བསྟན་པ་ལ་མངོན་པར་གསལ་བའི་སྐལ་བ་མཉམ་པ་དང་། ཞིང་གི་བྱིན་གྱི་རླབས་དང་། རྣམ་པར་འཕྲུལ་པ་སེམས་ཅན་ཡོངས་སུ་བསྟན་པའི་ཕྱིར་རབ་ཏུ་སྐྱོད་པའི༌སྐལ་བ་མཉམ་པ་དང་། མཐོང་བ་དང་ཐོས་པ་དང་། རྗེས་སུ་དྲན་པས་སེམས་ཅན་འདུལ་བའི་ཕྱིར་དོན་ཡོད༌པར་སྤྱད་པའི་སྐལ་བ་མཉམ་པ་དང་། སྨོན་ལམ་རྒྱ་མཚོའི་ཚུལ་ཐམས་ཅད་ཡོངས་སུ་རྫོགས་པས་སྟོབས་བཅུའི་ཡེ་ཤེས་རྗེས་སུ་འཚང་རྒྱ༌བར་བྱ་བའི་ཕྱིར་འབྱུང་བའི་སྐལ་བ་མཉམ་པ་ཡང་རབ་ཏུ་ཐོབ་པར་གྱུར་ཏོ། །

དེ་ལྟར་ཚོང་དཔོན་གྱི་བུ་ནོར་བཟང་ཤིན་ཏུ་དགའ་བའི་སེམས་སུ་གྱུར་ཏེ། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་བལྟས་པས་འདུ་ཤེས་རྣམ་པར་དག་པ་དེ་དག་ཐོབ་པར་གྱུར་ཏེ། འདི་དག་ལ་སོགས་པ་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལས་སྐལ་བ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་ཐོབ་པར་གྱུར་ཏོ། །

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལས་བལྟ་བའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་ཞུགས་པ་དགེ་བའི་བཤེས་གཉེན་གྱི་འདུ་ཤེས་རྣམ་པར་དག་པ་མཐའ་དང་དབུས་མེད་པ་རབ་ཏུ་ཐོབ་པ་སྐལ་བ་མཉམ་པའི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་ཞུགས་པས་བླ་གོས་ཕྲག་པ་གཅིག༌ལ་གཟར་ཏེ། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད༌གང་ན་བ་དེར་ཐལ་མོ་སྦྱར་ཏེ། བཏུད་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དེ་ནི་བདག་གི་སེམས་ལ་བདག༌དགོངས་ཏེ། །བྱང་ཆུབ་མོས་པ་མི་ལྡོག་ཤིན་ཏུ་བརྟན། །ཁྱོད་ཀྱི་ཐུགས་ལའང་བདག་ནི་དེ་བཞིན་དུ། །བདག་གི་བཞིན་དུ་དེ་རིང་བརྟན་པར་སྐྱེས། །སྡིག་ཏོ་མ་ལུས་རྣམ་པར་བྱང་བར་གྱུར། །དགེ་བའི་རྣམ་སྨིན་མི་མཉམ་རབ་ཏུ་ཐོབ། །བདག་གིས་བལྟ་ན་མཛེས་པ་ཁྱོད་མཐོང་བས། །ཆོས་དཀར་མི་བས་བདག་གིས་ཡོངས་སུ་བསགས། །བདག་གི་སེམས་ནི་ཡོན་ཏན་ཆུ་བོས་བརྒྱན། །སེམས་ཅན་ཕན་བརྩོན་རྣམ་པ་ཐ་དད་པས། །བརྒྱན་གྱུར་དེས་ནི་ཕྱི་མཐའི་བསྐལ་པར་ཡང་། །ཞིང་རྣམས་ཀུན་ཏུ་སྤྱོད་པ་སྤྱད་པར་བགྱི། །འཕགས་མས་བདག་ལ་ཐུགས་བརྩེ་མཛད་སླད་དུ། །ཆོས་རྣམས་ཐམས་ཅད་གྲུབ་པ་ཁྱོད་ཀྱིས་བསྟན། །བདག་ལ་སྨན་སླད་རྗེས་སུ་གཟུང་དགོངས་ཏེ། །ཆོས་ཀྱི་གདམས་ངག་དམ་པ་སྩལ་དུ་གསོལ། །ངན༌འགྲོར་ལྷུང་བའི་ལམ་ནི་རྣམ་པར་བཟློག །མཐོ་རིས་ཤུལ་གཙང་དམ་པ་ཡོངས་སུ་བསྟན། །བདེ་གཤེགས་མ་ལུས་བཞུད་ཅིང་རྗེས་བཞུད་པའི། །ཐམས་ཅད་མཁྱེན་པའི་ཤུལ་ཀྱང་ཁྱོད་ཀྱིས་བསྟན། །དཔེ་མེད་རྨད་དུ་བྱུང་མངའ་ཁྱོད་ལ་བདག །འབྱུང་བའི་འདུ་ཤེས་དམ་པ་ཉེ་བར་སྐྱེས། །ནམ་མཁའ་ལྟ་བུར་དྲི་མེད་ཚད་མེད་པའི། །ཐམས་ཅད་མཁྱེན་ཉིད་ཆོས་སྒོ་རྣམ་པར་དག །ཀུན་མཁྱེན་ཚད་མེད་འབྱུང་གནས་བཟང༌པོ་ཡི། །འདུ་ཤེས་དེ་རིང་ཚད་མེད་ཁྱོད་ལ་སྐྱེས། །བསོད་ནམས་རྒྱ་མཚོ་མཁའ་ལྟར་ཚད་མེད་པའི། །སེམས་ལས་བྱུང་བ་སྐད་ཅིག་རེ་རེར་འབྱུང་། །འཕགས་མ་ཕ་རོལ་ཕྱིན་པས་བདག་བཀུར་གསོལ། །བསམ་ཡས་བསོད་ནམས་ཀྱིས་ཀྱང་རྣམ་སྤེལ་གསོལ། །ཡོན་ཏན་དགེ་བ་ཐམས་ཅད་ཡོངས་འཕེལ་ནས། །ཐམས་ཅད་མཁྱེན་པའི་གོ་འཕང་མྱུར་ཐོབ་མཛོད། །དགེ་བའི་བཤེས་གཉེན་རྣམས་ལ་རྟག་པར་བདག །ཐམས་ཅད་མཁྱེན་ལམ་རབ་རྫོགས་འདུ་ཤེས་ཏེ། །དེ་ཡི་སླད་དུ་བདག་གི་ཆོས་དཀར་རྣམས། །མྱུར་དུ་རྫོགས་པར་འགྱུར་ཞེས་ཚིམ་པར་གྱུར། །དེ་སླད་འདི་ལས་དོན་ཀུན་རབ་ཏུ་བྱུང་། །དགེ་བའི་ཡོན་ཏན་ལྡན་པ་གྲུབ་པར་གྱུར། །བརྗོད་པ་མཐའ་ཡས་ཐམས་ཅད་མཁྱེན་པའི་ལམ། །འདི་ནི་ཡོངས་སུ་བསྒྲུབས་ཤིང་འགྲོ་ལ་བརྗོད། །ཡོན་ཏན་ཚད་མེད་ཁྱོད་ནི་སློབ་དཔོན་གྱུར། །ཐམས་ཅད་མཁྱེན་གྱི་ཆོས་ལ་བདག་འདྲེན་པ། །བསྐལ་པ་བྱེ་བ་ཁྲག་ཁྲིག་གྲངས་མེད་པས། །འཕགས་མ་ཁྱོད་ལ་བདག་གིས་ལན་མི་ལོན། །དེ་ནས་ཚོང་དཔོན་གྱི་བུ་ནོར་བཟང་གིས་ཚིགས་སུ་བཅད་པ་དེ་དག་སྨྲས་ནས། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་འདི་སྐད་ཅེས་སྨྲས་སོ། །

ལྷ་མོ་ཁྱོད་ཀྱིས་བདག་ལ་བྱང་ཆུབ་སེམས་དཔའི་རྣམ་པར་ཐར་པའི་ཡུལ་བསམ་གྱིས་མི་ཁྱབ་པ་འདི་ནི་བསྟན་ན་ལྷ་མོ་རྣམ་པར་ཐར་པ་འདིའི་མིང་ནི་ཅི་ཞེས་བགྱི། ལྷ་མོ་ཁྱོད་ནི་ཇི་སྲིད་ཅིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ཇི་སྲིད་ཅིག་ན་ནི་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར། དེ་སྐད་ཅེས་སྨྲས་པ་དང་། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་རྣམ་པར་ཐར་པ་འདི་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་ཡང་དག་པར་བསྐུལ་བའི་དགེ་བའི་རྩ་བ་ཡོངས་སུ་འབྱུང་བ་ཞེས་བྱ་བ་སྟེ། རིགས་ཀྱི་བུ་ཁོ་མོ་རྣམ་པར་ཐར་པ་འདི་དང་ལྡན་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་ཁོང་དུ་ཆུད་དེ་ཆོས་ཐམས་ཅད་ཀྱི་ངོ་བོ་ཉིད་ལ་ཞུགས་ནས། གནས་མེད་པའི་ཆོས༌ལ་བརྟེན་ཏེ། འཇིག་རྟེན་ཐམས་ཅད་ལས་འཕགས་པར་གྱུར་ཏོ། །ཆོས་རྣམས་ཀྱི་གཟུགས་ཤིན་ཏུ་རྣམ་པར་ཕྱེ་བ་ལ་ཞུགས་ཏེ། མི་འདྲ་བ་མེད་པའི་ཁ་དོག་དང་། སྣ་ཚོགས་མེད་པའི་ཁ་དོག་དང་། རྣམ་པ་ཐ་དད་པ་མེད་པའི་ཁ་དོག་དང་། མི་རྟོག་པའི་ཁ་དོག་དང་། མི་སྔོ་བའི་ཁ་དོག་དང་། མི་སེར་བའི་ཁ་དོག་དང་། མི་དམར་བའི་ཁ་དོག་དང་། མི་དཀར་བའི་ཁ་དོག་དང་། མི་མཐུན་པ་མེད་པ་དང་། སྣ་ཚོགས་མེད་པ་དང་། རྣམ་པ་ཐ་དད་པ་མེད་པ་དང་། རྟོག་པ་མེད་པ་དང་། མི་སྔོ་བ་དང་མི་སེར་བ་དང་། མི་དམར་བ་དང་མི་དཀར་བའི་ཁ་དོག་གི་ཆོས་ཉིད་ལ་ཞུགས་ནས་ཁ་དོག་རྣམ་པར་ཕྱེ་བ་དུ་མའི་གཟུགས་ཀྱི་ལུས་སྣ་ཚོགས་ཀྱི་ཁ་དོག་ཅན། ཁ་དོག་དུ་མ་དང་ཁ་དོག་ཚད་མེད་པ་དང་། ཁ་དོག་རྣམ་པར་དག་པ་དང་རྒྱན་ཐམས་ཅད་འབྱིན་པའི་ཁ་དོག་དང་ཀུན་ཏུ་སྣང་བའི་ཁ་དོག་དང་། འགྲོ་བ་ཐམས་ཅད་དང་འདྲ་བའི་ཁ་དོག་དང་། འཇིག་རྟེན་ཐམས་ཅད་ལ་མངོན་དུ་གྱུར་ཅིང་ལྷག་པའི་ཁ་དོག་དང༌གཟུགས་བརྙན་ཀུན་ཏུ་སྣང་བའི་ཁ་དོག་དང་། མི་མཐུན་པ་མེད་པའི་ཁ་དོག་དང་། མཚན་དང་དཔེ་བྱད་བཟང་པོས་རྣམ་པར་སྦྱངས་པའི་ཁ་དོག་དང་། ཁ་ན་མ་ཐོ་བ་མེད་པར་སྤྱོད་པའི་འོད་དང་ལྡན་པའི་ཁ་དོག་དང་། སྟོབས་ཆེན་པོས་རྣམ་པར་གནོན་པ་ཡོངས་སུ་སྟོན་པའི་ཁ་དོག་དང་། ཟབ་མོ་ཐོབ་པར་དཀའ་བའི་ཁ་དོག་དང་། འཇིག་རྟེན་ཐམས་ཅད་ཀྱིས་མི་ཐུབ་པའི་ཁ་དོག་དང་། འགྲོ་བ་ཐམས་ཅད་ཀྱི་ཚིག་གིས་མི་ཟད་པའི་ཁ་དོག་དང་། སྐད་ཅིག་རེ་རེ་ལ་སྣ་ཚོགས་སུ་འགྱུར་བའི་ཁ་དོག་དང་། ཁ་དོག་གི་སྤྲིན་སྣ་ཚོགས་ཡོངས་སུ་སྟོན་པའི་ཁ་དོག་དང་། གཟུགས་དང་དབྱིབས་སྣ་ཚོགས་ཀྱི་ཁ་དོག་དང་། རྣམ་པར་འཕྲུལ་པ་ཚད་མེད་པ་སྟོན་པའི་ཁ་དོག་དང་། ཤིན་ཏུ་ཡིད་དུ་འོང་ཞིང་རྣམ་པར་སྣང་བའི་ཁ་དོག་དང་། བཟང་པོ་དང་མཛེས་པ་ཐམས་ཅད་འབེལ་བའི་ཁ་དོག་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། མཐུན་པའི་ཁ་དོག་དང་། བསམ་པ་ཇི་ལྟ་བ་བཞིན་དུ་འདུལ་བ་ལ་མངོན་དུ་འགྱུར་བའི་དགེ་བའི་ཁ་དོག་དང་། ཐོགས་པ་མེད་པར་ཀུན་ཏུ་སྣང་བའི་ཁ་དོག་དང་། དྭངས་ཤིང་རྙོག་པ་མེད་ལ་རྣམ་པར་གསལ་ཏེ། འོད་དང་བའི་ཁ་དོག་དང་། མི་ཤེས་པའི་ལུས་ཀྱིས་བསྒྲུབས་པས་མཛེས་པར་གྱུར་པའི་ཁ་དོག་དང་། ཆོས་ཀྱི་ཚུལ་བསམ་གྱིས་མི་ཁྱབ་པ་རབ་ཏུ་སྟོན་པའི་ཁ་དོག་དང་། ཟིལ་གྱིས་མ་ནོན་ལ་ཟིལ་གྱིས་གནོན་པས་ཐམས་ཅད་ཟིལ་དུ་རླག་པར་བྱེད་པའི་ཁ་དོག་དང་། མུན་པ་དང་རབ་རིབ་མེད་པའི་ཁ་དོག་དང་། མུན་པ་ཐམས་ཅད་རྣམ་པར་སེལ་བའི་ཁ་དོག་དང་། དཀར་པོ་ཐམས་ཅད་ཤིན་ཏུ་བསྒྲུབས་པའི་ཁ་དོག་དང་། བདག་ཉིད་ཆེ་བའི་ཡོན་ཏན་རྒྱ་མཚོའི་ཁ་དོག་དང་། སྔོན་བླ་མ་ལ་རིམ་གྲོར་བྱས་པས་ཤིན་ཏུ་བསྒྲུབས་པའི་ཁ་དོག་དང་། ལྷག་པའི༌བསམ་པའི་ནམ་མཁའ་ཡོངས་སུ་དག་པར་བྱེད་པའི་ཁ་དོག་དང་། མཆོག་དམ་པ་ཕུལ་དུ་བྱུང་བར་ཤིན་ཏུ་ཡངས་པའི་ཁ་དོག་དང་། མི་འཕྲོགས་མི་ཟད་པའི་ཡོན་ཏན་རྒྱ་མཚོ་རབ་ཏུ་སྟོན་པའི་ཁ་དོག་དང་། འཇིག་རྟེན་ཐམས་ཅད་ལ་མི་གནས་ཤིང་མ་འདྲེས་པའི་ཁ་དོག་དང་། ཐོགས་པ་མེད་པར་ཕྱོགས་ཐམས་ཅད་རྒྱས་པར་འགེངས་པའི་ཁ་དོག་དང་། སེམས་ཀྱི་སྐད་ཅིག་འབྱམས་ཀླས་པ་ལ་ཞིང་རྒྱ་མཚོ་བརྗོད་དུ་མེད་པར་ཁ་དོག་སྣ་ཚོགས་རྣམ་པ་དུ་མ་ཡོངས་སུ་སྟོན་པའི་ཁ་དོག་དང་། སེམས་ཅན་ཐམས་ཅད་ཀྱི་དགའ་བའི་ཤུགས་ཆེན་པོ་རྣམ་པར་འཕེལ་བར་བྱེད་པའི་ཁ་དོག་དང་། སེམས་ཅན་རྒྱ་མཚོ་ཐམས་ཅད་ཡོངས་སུ༌སྡུད་པའི་ཁ་དོག་དང་། བ་སྤུའི་སྒོ་ཐམས་ཅད་ནས་སངས་རྒྱས་ཀྱི་ཡོན་ཏན་རྒྱ་མཚོ་མ་ལུས་པའི་སྤྲིན་གྱི་སྒྲ་སྒྲོག་པའི་ཁ་དོག་དང་། སེམས་ཅན་ཐམས་ཅད་ཀྱི་བསམ་པ་དང་། མོས་པ་རྒྱ་མཚོ་རྣམ་པར༌སྦྱོང་བའི་ཁ་དོག་དང་། ཆོས་ཐམས་ཅད་ཀྱི་དོན་རྣམ་པར་གདོན་མི་ཟ་བ་ཡོངས་སུ་སྟོན་པའི་ཁ་དོག་དང་། འོད་ཟེར་གྱི་དྲ་བའི་དཀྱིལ་འཁོར་ཁ་དོག་སྣ་ཚོགས་སུ་སྣང་བའི་ཁ་དོག་དང་། ནམ་མཁའ་ལྟར་དྲི་མ་མེད་པར་སྣང་བའི་ཁ་དོག་དང་། རིན་པོ་ཆེའི་རྒྱལ་པོ་རྣམ་པར་དག་པ་ལྟར་རྡུལ་གྱི་དྲི་མ་མེད་པའི་འོད་ལ་གནས་པའི་ཁ་དོག་དང་། ཆོས་ཉིད་དྲི་མ་མེད་པའི་འོད་ཀྱི་ཁ་དོག་དང་། ཁ་དོག་དཔག་ཏུ་མེད་པའི་ཚུལ་རྒྱ་མཚོ་རྣམ་པ་ཐ་དད་པ་ཡོངས་སུ་སྟོན་པའི་ཁ་དོག་དང་། ཕྱོགས་ཀུན་ཏུ་སྣང་བར་བྱེད་པའི་ཁ་དོག་དང་། དུས་ལ་གང་དུ་བབ་པར་འགྲོ་བ་ཡོངས་སུ༌སྟོན་པར་མ་འདྲེས་པའི་ཁ་དོག་དང་། ཞི་བ་དང་དུལ་བའི་ཕྱོགས་ལས་བྱུང་བའི་ཁ་དོག་དང་། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པའི་ཁ་དོག་དང་། འགྲོ་བ་བསོད་ནམས་ཀྱི་ཞིང་ཐམས་ཅད་ལ་རབ་ཏུ་སྟོན་པའི་ཁ་དོག་དང་། འཇིགས་པ་ཐམས་ཅད་རབ་ཏུ་སེལ་བའི་ཁ་དོག་དང་། དོན་ཡོད་པར་འགྲོ་བ་རྒྱས་པར་འགེངས་པའི་ཁ་དོག་དང་། ཡེ་ཤེས་ཀྱི་རྣམ་པར་གནོན་པ་ཆེན་པོ་རབ་ཏུ་རྗོད་པའི་ཁ་དོག་དང་། ཆགས་པ་མེད་པའི་ལུས་ཀྱིས་ཀུན་ཏུ་རྒྱས་པར་འགེངས་པའི་ཁ་དོག་དང་། ལུས་དམ་པའི་སྤྲིན་གྱི༌དབྱངས་ཀྱིས་འགྲོ་བ་ཀུན་ཏུ་སྟོན་པར་བྱེད་པའི་ཁ་དོག་དང་། བྱམས་པའི་རྒྱ་མཚོ་ཆེན་པོ་ཡོངས་སུ་སྡུད་པའི་ཁ་དོག་དང་། བསོད་ནམས་ཀྱི་རི་རབ་ཆེན་པོ་ཡོངས་སུ་སྒྲུབ་པའི་ཁ་དོག་དང་། འགྲོ་བ་ཐམས་ཅད་དུ་མི་གནས་ཀྱང་འཇིག་རྟེན་གྱི་རྒྱུད་ཐམས་ཅད་དུ་གཟུགས་བརྙན་འབྱུང་བའི་ཁ་དོག་དང་། ཡེ་ཤེས་ཀྱི་སྟོབས་ཆེན་པོ༌རྣམ་པར་སྦྱོང་བའི་ཁ་དོག་དང་། འཇིག་རྟེན་ཐམས་ཅད་ཀྱི་རྗེས་སུ་དྲན་པ་དང་། འགྲོགས་པའི་ཁ་དོག་དང་། རིན་པོ་ཆེ་ཐམས་ཅད་ལྟ་བུའི་ཁ་དོག་དང་། རྣམ་པར་སྣང་བའི་སྙིང་པོ་ལྟར་ཡོངས་སུ་སྟོན་པའི་ཁ་དོག་དང་། འགྲོ་བ་ཐམས་ཅད་ཀྱི་མོས་པའི་ཚུལ་དང་མཐུན་པའི་ཁ་དོག་དང་། ཐམས་ཅད་མཁྱེན་པ་ཉིད་ཀྱི་རྣམ་པ་ལ་མངོན་དུ་གྱུར་པའི་ཁ་དོག་དང་། མིག༌འཛུམ་གྱིས་རྒྱས་པས་འགྲོ་བ་མོས་པར་བྱེད་པའི་ཁ་དོག་དང་། རིན་པོ་ཆེའི་རྒྱན་དམ་པའི་འོད་ཀྱི་ཁ་དོག་དང་། འགྲོ་བ་ཐམས་ཅད་དུ་ཐོགས་པ་མེད༌པ་ལ་ཕྱིར་ཕྱོགས་པ་མེད་པའི་ཁ་དོག་དང་། ངེས་པ་མེད་ཅིང་མངོན་པར་ཞེན་པ་མེད་པའི་ཁ་དོག་དང་། བྱིན༌གྱི་རླབས་ཀྱིས་རྣམ་པར་འཕྲུལ་པའི་ཁྱུ་མཆོག་གི་མཐུ་འབྱིན་པ་ཡོངས་སུ་སྟོན་པའི་ཁ་དོག་དང་། རྫུ་འཕྲུལ་ཐམས་ཅད་ཀྱིས་རྣམ་པར་འཕྲུལ་པའི་ཁྱུ་མཆོག་གི་མཐུ་ཕྱུང་བ་ཡོངས་སུ་སྟོན་པའི་ཁ་དོག་དང་། དེ་བཞིན་གཤེགས་པའི་དགེ་བའི་རྩ་བ་སྣང་བར་བྱེད་པའི་ཁ་དོག་དང་། ཆོས་ཀྱི་དབྱིངས་ཁ་ན་མ་ཐོ་བ་མེད་པའི་ཚུལ་རྒྱ་མཚོ་ལ་རབ་ཏུ་ཞུགས་པའི་ཁ་དོག་དང་། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཕྱིན་པའི་གཟུགས་བརྙན་འབྱུང་བའི་ཁ་དོག་དང་། ཁ་དོག་སྣ་ཚོགས༌རྒྱ་མཚོ་རབ་ཏུ་སྒྲུབ་པའི་ཁ་དོག་དང་། ལེགས་པར་སྤྱད་པ་དང་། རྒྱུ་མཐུན་པ་བཟང་པོས་བྱུང་བའི་ཁ་དོག་དང་། འདུལ་བ་ཇི་ལྟ་བ་བཞིན་དུ་ཉེ་བར་སྒྲུབ་པའི་ཁ་དོག་དང་། འཇིག་རྟེན་ཐམས་ཅད་ཀྱིས་བལྟ་ན་མི་ངོམས་པའི་ཁ་དོག་དང་། འོད་དང་བ་རྣམ་པ་སྣ་ཚོགས་ཀྱི་འོད་དུ་སྣང་བའི་ཁ་དོག་དང་། དུས་གསུམ་གྱི་ཁ་དོག་རྒྱ་མཚོ་ཐམས་ཅད་ཡོངས་སུ་བསྟན་པའི་ཁ་དོག་དང་། འོད་ཟེར་ཁ་དོག་ཐམས་ཅད་དང་ལྡན་པ་རྒྱ་མཚོ་རབ་དུ་འགྱེད་པའི་ཁ་དོག་དང་། འོད་ཀྱི་དཀྱིལ་འཁོར་རྒྱ་མཚོ་ཁ་དོག་བརྗོད་དུ་མེད་པ་སྣ་ཚོགས་རྣམ་པ་ཐ་དད་པ་ཡོངས་སུ་སྟོན་པའི་ཁ་དོག་དང་། སྤོས་ཐམས་ཅད་ཀྱི་འོད་འཕྲོ་བ་ཀུན་ལས་འདས་པའི་ཁ་དོག་དང་། བ་སྤུའི་སྒོ་རེ་རེ་ནས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་ཉི་མའི་དཀྱིལ་འཁོར་གྱི་སྤྲིན་ཡོངས་སུ་སྟོན་པའི་ཁ་དོག་དང་། ཟླ་བའི་དཀྱིལ་འཁོར་གྱི་གཟུགས་དྲི་མ་མེད་ཅིང་ཡངས་པའི་སྤྲིན་གྱི་བྱིན་གྱི་རླབས་ཀྱི་ཁ་དོག་དང་། མེ་ཏོག་ཡིད་དུ་འོང་བའི་རི་རབ་ཀྱི་སྤྲིན་མཐའ་ཡས་པ་རབ་ཏུ་འགྱེད་པའི་ཁ་དོག་དང་། ཕྲེང་བ་སྣ་ཚོགས་མངོན་པར་སྒྲུབ་པའི་ཤིང་གི་སྤྲིན༌གྱི་ཕྲེང་བ་ཐམས་ཅད་ཀྱི་ཆར་རབ་ཏུ་འབེབས་པའི་ཁ་དོག་དང་། རིན་པོ་ཆེ་ཐམས་ཅད་ཀྱི་པདྨོའི་སྤྲིན་ཡོངས་སུ་སྟོན་པའི་ཁ་དོག་དང་། སྤོས་དང་བདུག་སྤོས་ཐམས་ཅད་ཀྱི་ན་བུན་གྱི་གཟུགས་ཀྱི་སྤྲིན་གྱིས་ཆོས་ཀྱི་དབྱིངས༌ཐམས་ཅད་རྒྱས་པར་འགེངས་པའི་ཁ་དོག་དུ་སེམས་ཀྱི་སྐད་ཅིག་རེ་རེ་ལ་ཕྱེ་མའི་མཛོད་ཀྱི་སྤྲིན་ཐམས་ཅད་བྱིན་གྱིས་བརླབས་ཤིང་། ཕྱོགས་བཅུར་ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་རྒྱས་པར་བཀང་ནས་མཐོང་བས་འདུལ་བའི་སེམས་ཅན་རྣམས་དང་། ཐོས་པས་འདུལ་བ་དང་། རྗེས་སུ་དྲན་པས་འདུལ་བ་དང་། ཆོས་ཀྱི་འཁོར་ལོ་སྤྲུལ་པ་མངོན་པར་བསྒྲུབ་པས་འདུལ་བ་དང་། ཡོངས་སུ་སྨིན་པར་འགྱུར་བའི་དུས་ལ་བབ་པས་འདུལ་བར༌འགྱུར་བ་དང་། གཟུགས་ཀྱི་ལུས་ཡོངས་སུ་བསྟན་པས་འདུལ་བ་དང་། བསྙེན་བཀུར་བྱ་བས་འདུལ་བ་དང་། ཁོང་དུ་ཆུད་པར་བྱ་བས་འདུལ་བ་དང་། རྣམ་པར་འཕྲུལ་པ་དང་། ཆོ་འཕྲུལ་སྣ་ཚོགས་ཡོངས་སུ་བསྟན་པས་འདུལ་བ་དང་། རྣམ་པར་འཕྲུལ་པ་དང་། ཆོ་འཕྲུལ་བསམ་གྱིས་མི་ཁྱབ་པ༌རྣམ་པར་དམིགས་པ་ཡོངས་སུ་བསྟན་པས་འདུལ་བའི་སེམས་ཅན་རྣམས་ཀྱི་བསམ་པའི་དབང་དང་། དུས་ཀྱི་དབང་དང་། མི་དགེ་བའི་ལས་ལས་རྣམ་པར་བཟློག་པའི་དབང་དང་། དགེ་བའི་ལས་ཡོངས་སུ་བསྒྲུབ་པ་ལ་སོ་སོར་འགོད་པའི་དབང་དང་། སྔོན་སྨོན་ལམ་ཆེན་པོ་མངོན་པར་བསྒྲུབ་པའི་དབང་དང་། ཐམས་ཅད་མཁྱེན་པ་ཉིད་ཀྱི་ཤུགས་ཀྱི་དབང་དང་། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོའི་རྣམ་པར་འཕྲུལ་པ་རབ་ཏུ་ཐོབ་པའི་ཆོས་ཀྱི་དབང་དང་། འགྲོ་བ་ཐམས་ཅད་ཡོངས་སུ་བསྐྱབ་པ་ཤིན་ཏུ༌བསྒྲུབས་པའི་སྙིང་རྗེ་ཆེན་པོའི་སྟོབས་ཡོངས་སུ་འབྱུང་བའི་དབང་དང་། བྱམས་པ་ཆེན་པོའི་རྒྱ་མཚོ་རྣམ་པར་དག་པ་ཡོངས་སུ་བསྐྱེད་པའི་བསམ་པའི་དབང་གིས། དེ་བཞིན་གཤེགས་པའི་བྱིན༌གྱི་རླབས་ཡང་དག་པར་བླང་བའི་ཕྱིར་རབ་ཏུ་འཇུག་གོ །རིགས་ཀྱི་བུ་དེ་ལྟར་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར༌བྱས་པས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་ལ་རབ་ཏུ་གནས་ཏེ། རྣམ་པར་དབྱེ་བ་མེད་པའི་ཆོས་ལ་ཞུགས་ནས་མཐའ་དང་དབུས་མེད་པའི་ལུས་ཀྱི་ཁ་དོག་དང་དབྱིབས་ཡོངས་སུ་བསྟན་ཏེ། སྤྱོད་པའི་ལུས་རེ་རེ་ལས་མཐའ་དང་དབུས་མེད་པའི་ཁ་དོག་རྒྱ་མཚོ་འཇིག་རྟེན་དུ་རྣམ་པར་དམིགས་པར་བྱས་ཏེ། སྤྱོད་པའི་ཁ་དོག་རེ་རེ་ལས་མཐའ་དང་དབུས་མེད་པའི་འོད་ཟེར་གྱི་སྤྲིན་ཡོངས་སུ་བཀྱེ་ཞིང་འོད་གཟེར་རེ་རེ་ལས་ཀྱང་སངས་རྒྱས་ཀྱི་ཞིང་གི་གཟུགས་བརྙན་མཐའ་དང་དབུས་མེད་པ་ཡོངས་སུ་བསྟན་ནས། སངས་རྒྱས་ཀྱི་ཞིང་རེ་རེར་ཡང༌དེ་བཞིན་གཤེགས་པ་འབྱུང་བ་མཐའ་དང་དབུས་མེད་པ་ཡོངས་སུ་བསྟན་ཏེ། དེ་བཞིན་གཤེགས་པ་རེ་རེ་ཞིང་ཡང་སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་སུ་སྟོན་པ་བྱེད་ཅིང་སྔོན་གྱི་དགེ་བའི་རྩ་བས་ཡང་དག་པར་བསྐུལ་བ་བྱེད་དོ། །

དགེ་བའི་རྩ་བ་མ་བསྐྱེད་པ་རྣམས་ཀྱང་ཡོངས་སུ་བསྐྱེད་དོ། །བསྐྱེད་པ་རྣམས༌ཀྱང་ཡངས་པར་བྱེད་དོ། །དགེ་བའི་རྩ་བ་ཡངས་པར་བྱས་པ་རྣམས་ནི་རྣམ་པར་འཕེལ་བར་བྱེད་དེ། ཁོ་མོ་ནི་སེམས་ཀྱི་སྐད་ཅིག་རེ་རེ་ལ་ཡང་། སེམས་ཅན་ཀྱི་ཁམས་མཐའ་དང་དབུས་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་རབ་ཏུ༌འགོད་པར་བྱེད་དོ། །རིགས་ཀྱི་བུ་གཞན་ཡང་ཁྱོད་ཀྱིས་འདི་སྐད་དུ་སྨྲས་ཏེ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས་ནི་ཇི་སྲིད་ཅིག་ལོན། བསྐལ་པ་བརྒྱ་ཕྲག་ཇི་སྙེད་ཅིག་ནས་ནི་བྱང་ཆུབ་ཀྱི་སྤྱོད་པ་ལ་སྤྱོད་སྤྱོད་ཅེས་ཟེར་བ་དེའི་དོན་ཀྱང་། སངས་རྒྱས་ཀྱི་བྱིན༌གྱི་རླབས་ཀྱིས་བསྟན་པར་བྱའོ། །

རིགས་ཀྱི་བུ༌བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི་རྟོག་པ་དང་། རྣམ་པར་རྟོག་པའི་ཡུལ་དང་ལྡན་པ། དེ་ལ་འཁོར་བ་རིང་བའམ། འཁོར་བ་ཐུང་བར་རྣམ་པར་དགོད་ཅིང་བརྗོད་པར་བྱ་བ་བྱེད་དོ། །བསྐལ་པ་ཀུན་ནས་ཉོན་མོངས་པའམ། བསྐལ་པ་རྣམ་པར་དག་པའམ། བསྐལ་པ་ཆུང་བའམ། བསྐལ་པ་ཆེ་བའམ། བསྐལ་པ༌མང་བའམ། བསྐལ་པ་ཐ་དད་པའམ། བསྐལ་པ་རྣམ་པ་སྣ་ཚོགས་སུ་བྱ་བའམ། བསྐལ་པ་རྣམ་པ་ཐ་དད་པར་བྱ་བར་ཡང་རྣམ་པར་དགོད་པ་དང་། བརྗོད་པར་བྱ་བ་མེད་དོ། །

དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི་རང་བཞིན་གྱི་ངོ་བོ་ཉིད་ཀྱིས་ཡོངས་སུ་དག་པ་སྟེ། འདུ་ཤེས་ཀྱི་དྲ་བ་ཐམས་ཅད་དང་བྲལ༌བ་སྒྲིབ་པའི་རི་ཐམས་ཅད་ལས་ཡང་དག་པར་འདས་པའི་བསམ་པ་ལ་ཡོངས་སུ་འཆར་ཏེ། དེའང་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དུས་སུ་འདུལ་བ་ཇི་ལྟ་བ་བཞིན་དུ་སྣང་བར་བྱེད་དོ། །

རིགས་ཀྱི་བུ་འདི་ལྟ་སྟེ། ཉི་མའི་དཀྱིལ་འཁོར་ལ་ཉིན་མཚན་གྱི་གྲངས་སུ་བྱ་བ་མེད་དེ། མི་སྲིད་ཀྱང་ཉི་མའི་དཀྱིལ་འཁོར་ནུབ་ན་ནི་ནུབ་མོར་སྣང་ངོ་། །ཉི་མའི་དཀྱིལ་འཁོར་ཤར་ན་ནི་ཉིན་བར་དུ་སྣང་ཞིང་བརྗོད་པ་ཡོད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ལ་རྟོག་པ་དང་། ཡོངས་སུ་རྟོག་པ་ཐམས་ཅད་མེད་དེ། འཁོར་བ་ན་གནས་པའི་འདུ་ཤེས་ཀྱི་རྣམ་པ་ཐམས་ཅད་དང་། དུས་སུ་བྱ་བ་ཐམས་ཅད་ཀྱང་མེད་མོད་ཀྱི། འོན་ཀྱང་བྱང་ཆུབ་སེམས་དཔའི་བསམ་པ་ལས་བྱུང་བའི་ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དུས་ཀྱི་དབང་གིས་བསྐལ་པར་གནས་པ་དང་། འཁོར་བའི་འདུ་ཤེས་ཀྱི་རྣམ་པར་བགྲང་བའི་གྲངས་སུ་བགྲང་བ་ཡིན་ཏེ། ཡེ་ཤེས་ཀྱི་དཀྱིལ་འཁོར་རྣམ་པར་རྟོག་པ་མེད་པ་ལ་སྔོན་གྱི་མཐའ་དང་ཕྱི་མའི་མཐའི་བསྐལ་པར་གནས་པའི་འདུ་ཤེས་ཀྱི་རྣམ་པར་བགྲང་བ་ཡོད་དོ། །རིགས་ཀྱི་བུ་འདི་ལྟ་སྟེ། དཔེར་ན། ཉི་མའི་དཀྱིལ་འཁོར་ནི་ནམ་མཁའི་དབྱིངས་ལ་འདུག་ཀྱང་། རིན་པོ་ཆེའི་རི་ཐམས་ཅད་དང་། རིན་པོ་ཆེའི་ཤིང་ཐམས་ཅད་དང་། རིན་པོ་ཆེའི་སྣོད་ཐམས་ཅད་དང་། རིན་པོ་ཆེའི་འབྱུང་གནས་ཐམས་ཅད་དང་། རྒྱ་མཚོ་ཐམས་ཅད་དང་། མཚོ་དང་མཚེའུ་ཐམས་ཅད་དང་། ཆུ་དང་བའི་སྣོད་ཐམས་ཅད་དང་། འགྲོ་བ་ཐམས་ཅད་ཀྱི་སེམས་ལ་གཟུགས་བརྙན་རྣམ་པར་དམིགས་པ་སྣང་སྟེ། སེམས་ཅན་ཐམས་ཅད་ལ་མངོན་དུ་གྱུར་པར་སྣང་ངོ་། །

རིན་པོ་ཆེ་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལ་ཉི་མའི་དཀྱིལ་འཁོར་གྱི་གཟུགས་བརྙན་བྱུང་བར་སྣང་ཡང་། ཉི་མའི་དཀྱིལ་འཁོར་དེ་ནི་རིན་པོ་ཆེའི་རི་རྣམས་ལའང་གནས་པ་མེད་དོ། །རིན་པོ་ཆེའི་ཤིང་ནས་རིན་པོ་ཆེའི་རྡུལ་ཤིན་ཏུ་ཕྲ་བ་རྣམས་ཀྱི་བར་དུའང་ཞུགས་པ་མེད། རིན་པོ་ཆེའི་འབྲུ་རྣམས་ཀྱི་ཁོངས་སུ་ཆུད་པའང་མ་ཡིན། རིན་པོ་ཆེའི་འབྱུང་གནས་རྣམས་ཀྱི་རྗེས་སུ་སོང་བའང་མ་ཡིན། རྒྱ་མཚོ་རྣམས་ཀྱི་ནང་དུ་སོང་བའང་མ་ཡིན། ཆུའི་སྣོད་ཐམས་ཅད་ཀྱི་ནང་དུ་ཞུགས་པ་ཡང་མ་ཡིན་མོད་ཀྱི། ཐམས་ཅད་ཀྱི་ཁོངས་ན་འདུག་པར་ཡང་སྣང་ངོ་། །

རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་བའི་རྒྱ་མཚོ་ལས་ནི་གྱེན་དུ་འཕགས། དེ་བཞིན་གཤེགས་པའི་ཆོས་ཀྱི་དབྱིངས་ཀྱི་ནམ་མཁའ་ལ་ནི་མངོན་པར་བྱུང་། ཆོས་ཀྱི་རང་བཞིན་ནམ་མཁའི་རྒྱུད་ལ་ནི་རྒྱུ་ཞིང་སྤྱོད། ཞི་བའི་ནམ་མཁའི་དབྱིངས་ལ་ནི་གནས་པར་གྱུར་མོད་ཀྱི་སྲིད་པའི་ལམ་གྱི་རྒྱུད་དང་། སྐྱེ་གནས་ཐམས་ཅད་དུའང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དོན་དུ་སེམས་ཅན་ཐམས་ཅད་དང་འདྲ་བའི་ལུས་སུ་སྐྱེ་བར་སྣང་སྟེ། འཁོར་བའི་ཉེས་པས་གོས་པར་མི་འགྱུར་རོ། །

སྐྱེ་བ་དང་འཆི་འཕོ་བའི་སྡུག་བསྔལ་གྱིས་ཉེ་བར་གདུང་བ་མེད་དོ། །རྟོག་པ་དང་རྣམ་པར་རྟོག་པ་དག་དང་། འགྲོགས་པ་མེད་དོ། །བསྐལ་པ་ལའང་རིང་བའི་འདུ་ཤེས་སམ། ཐུང་བའི་འདུ་ཤེས་སུ༌འགྱུར་བ་མེད་དོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་ཕྱིན་ཅི་ལོག་ལས་ཤིན་ཏུ་འདས་པ་དང་། འདུ་ཤེས་དང་སེམས་དང་ལྟ་བའི་ཕྱིན་ཅི་ལོག་ལས་ཡོངས་སུ་འདས་པ་དང་། རྨི་ལམ་ལྟ་བུའི་འཇིག་རྟེན་ཐམས་ཅད་ཡང་དག་པ་ཇི་ལྟ་བ་བཞིན་དུ་ཡེ་ཤེས་ཀྱིས་ཁོང་དུ་ཆུད་པ་དང་། སྒྱུ་མ་ལྟ་བུའི་འཇིག་རྟེན་ཐམས་ཅད་རབ་ཏུ་རྟོགས་པ་དང་། སེམས་ཅན་མེད་པའི་ཡེ་ཤེས་ཀྱི་དབྱིངས་རབ་ཏུ་ཐོབ་པ་དང་། ཡང་དག་པ་ཇི་ལྟ་བ་བཞིན་དུ་ཆོས་རབ་ཏུ་མཐོང་བས་སྙིང་རྗེའི་དཀྱིལ་འཁོར་ཤིན་ཏུ་ཡངས་པ་དང་སྨོན་ལམ་ཆེན་པོའི་སྟོབས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་དོན་དུ་སེམས་ཅན་ཐམས་ཅད་ལ་མངོན་དུ་གྱུར་པར་སྣང་ངོ་། །

རིགས་ཀྱི་བུ་འདི་ལྟ་སྟེ། དཔེར་ན། ཆུ་ཀླུང་ཆེན་པོ་ལ་སོགས་པ་ལ་གྲུ་ནི་རྟག་ཏུ་རྒྱུན་མི་འཆད་པར་སེམས་ཅན་ཡོངས་སུ་བསྒྲལ་བ་ལ་བརྩོན་པ་སྟེ། ནམ་མ༌ཞིག་གི་བར་དུ་རྒྱུན་གཅོད་པ་མེད་ཀྱང་། དེ་ལ་ཕ་རོལ་གྱི་ངོགས་ལ་མངོན་པར་ཆགས་པ་མེད། ཚུ་རོལ་གྱི་ངོགས་ལའང་མངོན་པར་ཆགས་པ་མེད། ཆུའི་དབུས་ནའང་གནས་པ་མེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡང་ཕ་རོལ་ཏུ་ཕྱིན་པ་ཆེན་པོའི་གྲུའི་མཐུས་འཁོར་བའི་ཆུ་ཀླུང་གི་རྒྱུད་ལས་སེམས་ཅན་ཐམས་ཅད་ཡོངས་སུ་བསྒྲལ་བ་ལ་ཞུགས་པ་ཡིན་ཏེ། དེ་ལ༌ཚུ་རོལ་གྱི་མུས་འཇིགས་པ་མེད་དོ། །ཕ་རོལ་གྱི་མུར་བདེ་བར་འགྱུར་བའི་འདུ་ཤེས་མེད་དོ། །འོན་ཀྱང་རྟག་ཏུ་རྒྱུན་མི༌འཆད་པར་བྱང་ཆུབ་སེམས་དཔའི་སྤྱོད་པ་ལ་བསྐལ་པ་དཔག་ཏུ་མེད་པ་ཐམས་ཅད་དུ་གནས་པར་བྱ་བར་ཞེ་ནོན་པས་སེམས་ཅན་ཐམས་ཅད་ཡོངས་སུ་བསྒྲལ་བར་བྱ་བ་ལ་ཞུགས་པ་ཡིན་ཏེ། བསྐལ་པའི་རྣམ་པ་ཐ་དད་པ་ལ་མངོན་པར་ཞེན་པ་མེད་དོ། །

བསྐལ་པ་འདའ་བར་བྱ་བ་ལ་རིང་བའི་འདུ་ཤེས་སུ་གྱུར་ཅིང་བྱང་ཆུབ་སེམས་དཔའི་སྤྱད་པ་ལ་སྤྱོད་པ་མ་ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན། ཆོས་ཀྱི་དབྱིངས་ལྟར་ཡངས་པའི་ནམ་མཁའི་དབྱིངས་ནམ་མཁའི་གཞིའི་དཀྱིལ་འཁོར༌ནི་འཇིག་རྟེན་གྱི་ཁམས་ཐམས་ཅད་འདུའམ་འཇིག་གམ་འདས་པར་གྱུར་ཀྱང་རྣམ་པར་རྟོག་པ་མེད་ཅིང་རང་བཞིན་གྱིས་རྣམ་པར་དག་ལ་ཀུན་ནས་ཉོན་མོངས་པ་མེད་དེ། འཁྲུག་པ་མེད་ཅིང་བསྒྲིབས་པ་མེད་ལ་ཕྱི་མའི་མཐའི་དུས་སུ་ཞིང་ཐམས་ཅད་འཛིན་ཀྱང་ཡོངས་སུ་སྐྱོ་བ་མེད་དོ། །

རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའི་བསམ་པ་ཡེ་ཤེས་ནམ་མཁའི་དཀྱིལ་འཁོར་ཀྱང་སྨོན་ལམ་ཆེན་པོའི་རླུང་གི་དཀྱིལ་འཁོར་གྱིས་ཀུན་ནས་བསྐོར་ཅིང་ངན་སོང་གི་གཡང་ས་ཐམས་ཅད་ལས་སེམས་ཅན་ཡོངས་སུ་འཛིན་ཀྱང་ཡོངས་སུ་སྐྱོ་བ་མེད་དོ། །བདེ་བའི་ལམ་ལ་འགོད་པ་བྱེད་ཀྱང་ཡོངས་སུ་སྒྱིད་ལུག་པ་མེད་དོ། །ཐམས་ཅད་མཁྱེན་པའི་ལམ་ལ་འགོད་ཀྱང་ཞུམ་པར་བྱེད་པ་མེད་དོ། །ཉོན་མོངས་པ་ཐམས་ཅད་ཀྱིས་ཀྱང་འཁྲུག་པ་མེད་དོ། །འཁོར་བའི་ཉེས་པ་ཐམས་ཅད་ཀྱིས་ཀྱང་ཡོངས་སུ་གདུང་བ་མེད་དོ། །རིགས་ཀྱི་བུ་འདི་ལྟ་སྟེ། དཔེར་ན། སྒྱུ་མའི་རྣམ་པ་ལས་གྲུབ་པའི་མི་ཡན་ལག་དང་ཉིང་ལག་ཤིན་ཏུ་ཚང་བ་ལ་ལུས་ལ་གནས་པའི་ཆོས་བཅུ་མེད་དེ། བཅུ་གང་ཞེ་ན། འདི་ལྟ་སྟེ། དབུགས་ནང་དུ་རྒྱུ་བའམ། དབུགས་ཕྱིར་རྒྱུ་བའམ། གྲང་བའམ། དྲོ་བའམ། བཀྲེས་པའམ། སྐོམ་པའམ། དགའ་བའམ། མི་དགའ་བའམ། སྐྱེ༌བའམ། རྒ་བའམ། ན་བའམ། འཆི༌བ་དང་། གནོད་པར་འགྱུར་བ་མེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཡེ་ཤེས་སྒྱུ་མའི་རྣམ་པ་ལས་བྱུང་བའི་གཟུགས་དང་ལྡན་པ། ཆོས་ཀྱི་དབྱིངས་ཐ་མི་དད་པའི་ལུས་དང་ལྡན་པ། སྲིད་པའི་ལམ་གྱི་རྒྱུད་ཐམས་ཅད་དུ་སེམས་ཅན་ཡོངས་སུ་སྨིན་པར་བྱེད་པའི་དོན་དུ་སྐྱེས་ཏེ། བསྐལ་པ་ཐམས་ཅད་དུ་གནས་པ་ལའང་ཆོས་བཅུ་མེད་དེ།

བཅུ་གང་ཞེ་ན། འདི༌ལྟ་སྟེ་འཁོར་བ་ལ་མངོན་པར་དགའ་བའམ། འཁོར་བ་སྲིད་པའི་ལམ་གྱི་རྒྱུད་དུ་སྐྱེ་བས་སྐྱོ་བར་འགྱུར་བའམ། ཡུལ་གྱི་དགའ༌བ་ལ་འདུན་པའམ། ཁོང་ཁྲོ་བའི་སེམས་སམ། ལོངས་སྤྱོད་པར་འདོད་པའམ། ཉོན་མོངས་པ་ཐམས་ཅད་ཀྱིས་ཡོངས་སུ་གདུང་བའམ། སྡུག་བསྔལ་གྱི་ཚོར་བ་ཉམས་སུ་མྱོང་བའམ། ལམ་ཉམ་ང་བར་སྐྱེ་བས་འཇིགས་པའམ། སྲིད་པར་མངོན་པར་འདུན་པའམ། མངོན་པར་ཆགས་པ་མེད་དོ། །འོན་ཀྱང་རིགས་ཀྱི་བུ་སངས་རྒྱས་ཀྱི་བྱིན༌གྱི་རླབས་ཀྱིས་མ་འོངས་པའི་བྱང་ཆུབ་སེམས་དཔའ་རྣམས་ཀྱང་བྱང་ཆུབ་སེམས་དཔའི་སྨོན་ལམ་རྒྱ་ཆེན་པོའི་སྟོབས་རྣམ་པར་འཕེལ་བར་བྱ་བའི་ཕྱིར་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་བསྐལ་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དེའི་ཡང་ཕ་སྔ་འདས་པར་གྱུར་པ་དེའི་ཚེ་དེའི་དུས་ན། འཇིག་རྟེན་གྱི་ཁམས་རིན་པོ་ཆེའི་འོད་ཅེས་བྱ་བ་ཞིག་བྱུང་སྟེ། རིགས་ཀྱི་བུ་འཇིག་རྟེན་གྱི་ཁམས་རིན་པོ་ཆེའི་འོད་དེ་ལ་བསྐལ་པ་ནི་འོད་བཟང་པོ་ཞེས་བྱ་བ་བྱུང་ངོ་། །བསྐལ་པ་འོད་བཟང་པོ་ཞེས་བྱ་བ་དེ་ལ་ནི་སངས་རྒྱས་སྟོང་ཕྲག་བཅུ་བྱུང་བར་གྱུར་ཏེ། རིགས་ཀྱི་བུ་སངས་རྒྱས་སྟོང་ཕྲག་བཅུ་པོ་དེ་དག་ལས་བསྐལ་པའི་དང་པོ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་ཞེས་བྱ་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་བསྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེ་ཐམས་ཅད་ཀྱི་ཐོག་མ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །

རིགས་ཀྱི་བུ་དེ་བཞིན་གཤེགས་པ་དེ་གླིང་བཞི་པའི་དབུས་ན་རྒྱལ་པོའི་གནས་དགའ་བས་བརྒྱན་པ་ཞེས་བྱ་བ་ཡོད་པ་དང་། ཚོད་དུ་ཡང་རྒྱང་མི་རིང་བ་ཞིག་བྱུང་སྟེ། རྒྱལ་པོའི་གནས་དགའ་བས་བརྒྱན་པ་དེའི་ཤར་ཕྱོགས་ལོགས་ན། ནགས་ཚལ་འོད་བཟང་པོ་ཞེས་བྱ་བ་ཞིག་ཡོད་དེ། ནགས་ཚལ་འོད་བཟང་པོ་དེར་སྙིང་པོ་བྱང་ཆུབ་རིན་པོ་ཆེའི༌མེ་ཏོག་གི་སྤྲིན་ཅེས་བྱ་བ་བྱུང་ངོ་། །སྙིང་པོ་བྱང་ཆུབ་རིན་པོ་ཆེའི་སྤྲིན་ཅེས་བྱ་བ་དེར་གདན་སེང་གེའི་ཁྲི་རིན་པོ་ཆེ་རྣམ་པར་སྣང་བའི་སྙིང་པོ་ཅན་བྱུང་སྟེ། དེ་ལ་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེའི་ཚེ་མིའི་ཚེའི་ཚད་ལོ་སྟོང་ཕྲག་བཅུ་ཐུབ་པ་ལས་འཇིག་རྟེན་དུ་སེམས་ཅན་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་ཟེར་བ་དང་། ཞེ་གཅོད་པའི་ཚིག་སྨྲ་བ་དང་། ཚིག་ཁྱལ་པ་ཟེར་བ་དང་། ཆགས་སེམས་དང་ལྡན་པ་དང་། གནོད་སེམས་ཡོད་པ་དང་། ལོག་པར་ལྟ་བ་ཅན་བྱུང་སྟེ། དེ་ལྟར་མི་དགེ་བའི་ལས་ཀྱི་ལམ་བཅུ་རྣམ་པར་རྒྱས་པར་གྱུར་ནས་རབ་ཏུ་བརྟན་པར་གྱུར་ཏེ།

བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེས་འཇིག་རྟེན་གྱི་དབང་པོའི་སྔོན་གྱི་རྒྱལ་བ་ལ༌བྱ་བ་བྱས་པ་རྣམས་དང་། འཛམ་བུ་གླིང་གི་མི་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་ཕྱིར་སྙིང་པོ་བྱང་ཆུབ་མཆོག་ཏུ་གཤེགས་ཏེ། བྱང་ཆུབ་སེམས་དཔའ་རྣམས་ལ་ཆོས་བསྟན་ཏོ། །དེའི་ཚེ་རྒྱལ་པོའི་གནས་དགའ་བས་བརྒྱན་པ་དེ་ན་རྒྱལ་པོ་རྒྱལ་བའི་འོད་ཅེས་བྱ་བ་འདུག་འདུག་སྟེ། དེས་མི་མ་བྱིན་པར་ལེན་པ། རྐུ་བ། སྡིག་ཏོ་བྱེད་པ། སྲོག་གཅོད་པ། འདོད་པས་ལོག་པར་གཡེམ་པ། བརྫུན་ཟེར་བ། ཕྲ་མ་སྨྲ་བ། ཞེ་གཅོད་པའི་ཚིག་དང་ལྡན་པ། ཚིག་ཁྱལ་བ་སྨྲ་བ། ཆགས་སེམས་ཅན་གནོད་སེམས་ཡོད་པ། ལོག་པར་ལྟ་བ། ཆོས་མ་ཡིན་པའི་འདོད་ཆགས་ལ་ཞེན་པ། འདོད་པ༌མི་བཟད་པས་མངོན་པར་ནོན་པ། ལོག་པའི་ཆོས་ཀྱིས་ཀུན་ནས་འཁོར་བ། སྡིག་ཏོ་བྱེད་བྱེད་པ། ཁྲོ་གཏུམ་བྱེད་བྱེད་པ། བསོད་ནམས་མ་བྱས་པ། འཇིགས་པས་བག་ཚ་བ་མེད་པ། མར་མི་ཤེས་པ། ཕར་མི་ཤེས་པ། དགེ་སྦྱོང་དུ་བྱ་བ་མེད་པ། བྲམ་ཟེར་བྱ་བ་མེད་པ། ཚུལ་མི་ཤེས་པ་གཡོན་དང་ལྡན་པ་བརྒྱ་སྟོང་དུ་མ་རབ་ཏུ་གདུལ་བར་བྱ་བའི་ཕྱིར་བཙོན་རར་བཙུད་པར་གྱུར་ཏོ། །རྒྱལ་པོ་རྒྱལ་བའི་འོད་དེ་ལ་བུ་གཟུགས་བཟང་བ་ཤིན་ཏུ་མཛེས་པ་བལྟ་ན་སྡུག་པ། ཁ་དོག་བཟང་པོ་དམ་པ་རྒྱས་པ་དང་ལྡན་པ་མི་ཆེན་པོའི་མཚན༌ཉི་ཤུ་རྩ་བརྒྱད་དང་ལྡན་པ། རྣམ་པར་རྒྱལ་བ་ཞེས་བྱ་བ་ཞིག་ཡོད་པ་དེ། ཁང་པ་གླུ་སྙན་པའི་དབྱངས་ཞེས་བྱ་བའི་སྟེང་དུ་ཕྱིན་ཏེ། བུད་མེད་ཀྱི་འཁོར་མང་པོས་ཡོངས་སུ་བསྐོར་ཅིང་འདུག་འདུག་པ་ལས་བཙོན་ར་ན་འཁོད་པའི་སེམས་ཅན༌མཚོན་ཆ་སྣ་ཚོགས་ཀྱིས་དམ་དུ་གླགས་པ། དེ་དག་གི་སྒྲ་འཇིགས་འཇིགས་སྐད་དུ་འབོད་པ་ཐོས་པར་གྱུར་ཏོ། །

ཐོས་ནས་མི་དགའ་ཞིང་ཤིན་ཏུ་ཉམས་མི་བདེ་བའི་སེམས་སུ་གྱུར་ཏེ། སྙིང་རྗེ་ཆེན་པོ་སྐྱེས་ནས་ཁང་སྟེང་དེ་ནས་ཤོད་དུ་བབས་ཏེ། བཙོན་ར་དེར་ཕྱིན་ནས་བཙོན་ར་དམ་པོ་ན་འཁོད་པའི་སེམས་ཅན་ཤིང་སྒྲོག་དང་ལྕགས་སྒྲོག་དང་། ཁོང་སྒྲིལ་དང་། ལྟུང་དང་མདོ༌རྟོད་ཀྱིས་བསྒྲོགས་ཤིང་བརྟོད་དེ་གཅིག་གི་ལུས་དང་གཅིག་ཏུ་སྦྲེལ་ནས་མུན་པ་མུན་ནག་ཏུ་བཙུད་དེ། དུད་པའི་རབ་རིབ་ཀྱིས་འགྲིགས་ཤིང་། རླུང་ནད་ཉམས་སུ་མི་བདེ་བས་ཉམ་ཐག་པར་གྱུར་པ། དབུགས་ཤིན་ཏུ་མི་བདེ་བ་རྒྱུ་བ་བཀྲེས་པ་དང་། སྐོམ་པས་མནར་བ། སྒྲེན་མོ་གོས་མེད་པ་ལུས་ཐམས་ཅད་ཕྱག་དར་དང་རྡུལ་གྱི་ནང་ན་འགྲེ་བ། ལུས་རང་གིས་སྐྲས་ཡོག་པ། བརླ༌སྒྲིལ་གྱིས་དམ་དུ་བཅིངས་པ། ཉོན་མོངས་པ་སྣ་ཚོགས་ཀྱིས༌ཐོ་བཙམས་པ་སྡུག་བསྔལ་གྱི་ཚོར་བས་ཟིལ་གྱིས་མནན་ཅིང་། སྡུག་བསྔལ་ཉམས་སུ་མྱོང་བར་གྱུར་ཏེ། མི་བཟད་པ་སྣ་ཚོགས་ཀྱི་སྨྲེ་སྔགས༌ཀྱིས་བླ་ཞིང་འོ་དོད་འབོད་པ་དེ་དག་མཐོང་ནས་སྙིང་རྗེ་ཆེན་པོ་སྐྱེས་ཏེ། སྙིང་རྗེའི་བསམ་པ་རྒྱ་ཆེན་པོ་བྱུང་ནས་གཞན་ལ་ཕན་པར་བྱ་བའི་སེམས་སྐྱེས་ཏེ། བཙོན་རའི་ཐིབས་པོ་ན་འཁོད་པའི་སེམས་ཅན་རྣམས་བཙོན་ར་ནས་ཐར་བར་བྱའོ། །

ཞེས་དབུགས་བཏོན་ནས་དེས་སེམས་ཅན་དེ་དག་མི་འཇིགས་པ་བྱིན་ཏེ། རྒྱལ་པོ་རྒྱལ་བའི་འོད་གང་ན་བ་དེར་སོང་སྟེ། འདི་སྐད་ཅེས་གསོལ་ཏོ། །ལྷའི་ཞལ་སྔ་ནས་མཁྱེན་པར་མཛད་ཏུ་གསོལ། བཙོན་ར་མི་བདེ་བ་ན་མཆིས་པའི་སེམས་ཅན་རྣམས་ལ་གློ་བ་རྗེས་ནས་བདག་གིས་མི་འཇིགས་པ་སྩལ་ན་དེ་དག་དགྱེ་བར་ཅི་གནང་ཞེས་ནས། དེ་ནས་རྒྱལ་པོ་རྒྱལ་བའི་འོད་ཀྱིས་བློན་པོ་ལྔ་བརྒྱ་པོ་བསགས་ནས་ཁྱེད་ཇི་སྙམ་དུ་སེམས་ཞེས་སྨྲས་པ་དང་། དེ་དག་གིས་སྨྲས་པ། བཙོན་འདི་རྣམས་ནི་རྒྱལ་པོའི་ཕྱག་མཛོད་རྐུ་བ། རྒྱལ་པོའི་སྐུ་ལ་དར་བ། བཙུན་མོའི་འཁོར་དུ་ཞུགས་པ་ལས་བཟུང་བ་ཤ་སྟག་སྟེ། དེ་དག་ནི་མི་དགུམ་དུའང་མི་རུང་། དེ་དག་གི་ཆད་པ་ནི་དགུམ་པས་འབྲ་བར་བས་ཏེ། མ་ལགས་ནའང་བཙོན་རར་གུམ་ན་ཆད་པ་འབྲ་ལགས་གྲང་། དེ་དག་གི་མགོན་སུ་བགྱིད་པ་དེའང་རྒྱལ་པོའི༌ཞལ་སྔར་གློ་བ་རིང་ངོ་། །

དེ་ནས་རྒྱལ་པོའི་བུ་རྣམ་པར་རྒྱལ་བ་སྙིང་རྗེ་ཆེན་པོས་མི་བཟོད༌ཅེས་ནས་བློན་པོ་དེ་དག་ལ་སྨྲས་པ། ཁྱོད་ཀྱིས་ཇི་སྐད་དུ༌སྨྲས་པ། དེ་ལྟར་ཡང་རུང་སྟེ། ངས་ཁོང་ཏ་འདི་དག་གི་དོན་དུ་སྡུག་བསྔལ་ཉམས་སུ༌བླངས་པ་ཐམས་ཅད་ཀྱང་བཟོད་པར་བྱ་ན་དེ་དག་ལ༌ཁྱོད་ཀྱིས་ཅི་བྱ། དེ་ང་ལ་གྱིས་ཏེ་ཉེས་པ་ཅན་དེ་དག་ཁྱེ་ཤིག ། ངས་དེ་རྣམས་བཙོན་ར་ནས་དགྲོལ་བའི་དོན་དུ་མི་བདེ་བ་ཐམས་ཅད་ཉམས་སུ༌བླངས་ཏེ། ལུས་དང་སྲོག་ཡོངས་སུ་དོར་བར་བྱའོ། །

དེ་ཅིའི་ཕྱིར་ཞེ་ན། གལ་ཏེ་ངས་སེམས་ཅན་འདི༌རྣམས་ཙམ་ཞིག་ཀྱང་བཙོན་ར་ནས་དགྲོལ་བར་མ་ནུས་ན་ཁམས་གསུམ་པའི་བཙོན་ར་ན་འཁོད་པའི་སེམས་ཅན་སྲེད་པའི་ཞགས་པས་གླགས་པ། མ་རིག་པའི་ཐིབས་པོ་ན་འཁོད་པ། གཏི་མུག་གི་མུན་པར་བཙུད་པ། ཕོངས་པའི་སྡུག་བསྔལ་གྱིས་མནར་བ་ངན་སོང་གི་རྒྱུད་ཟབས་སུ་རིང་ཞིང་འབྱུང་བར་དཀའ་བར་ཆུད་པ། དབྱིབས་མི་སྡུག་ལ་མདོག་མི་སྡུག་པ་དང་ལྡན་པ། དབང་པོའི་སྦྱོར་བ་ཐམས་ཅད་དང་བྲལ་བ། ནོར་བའི་ཡིད་དང་ལྡན་པ། འབྱུང་བ་མི་མཐོང་བ་སྣང་བ་མེད་པ་ཁམས་གསུམ་པ་ལ་མངོན་པར་ཞེན་པ། བསོད་ནམས་དང་། ཡེ་ཤེས་ཀྱི་ཚོགས་མེད་པ། ཡེ་ཤེས་ཀྱི་སྐྱེ་མཆེད་དང་སྐོལ་བ་ཉོན་མོངས་པ་སྣ་ཚོགས་ཀྱིས་སེམས་དྲི་མ་ཅན་དུ་གྱུར་པ། སྡུག་བསྔལ་གྱི་ཤིང་ཐགས་ཀྱིས་འཁོར་བ་དང་། བདུད་ཀྱི་དབང་དུ་གྱུར་པ། སྐྱེ་བ་དང་རྒ་བ་དང་། ན་བ་དང་། འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བ་དང་། འཁྲུག་པས་མནར་བ་རྣམས་ཀྱང་ཇི་ལྟར་ཁྲོལ་བར་བྱ་ཞེས་ནས། རྒྱལ་པོ་གཞོན་ནུ་རྣམ་པར་རྒྱལ་བས་བཙོན་ར་ན་འཁོད་པའི་སེམས་ཅན་དེ་དག་བདག་ཉིད་ཡོངས་སུ་གཏང་བ་དང་། རྣམ་པ་ཐམས་ཅད་དུ་ཡོངས་སུ་གཏང་བས། གཡོག་འཁོར་ཐམས་ཅད་དང་། ནོར་གྱི་ཕུང་པོ་ཐམས་ཅད་ཀྱིས༌བླུས་ཏེ། བརྩོན་ར་དེ་དག་ནས་ཡོངས་སུ་བཀྱེ་ནས་སེམས་ཅན་དེ་དག་གི་སྡུག་བསྔལ་ཉམས་སུ་བླངས་ཏེ། ཕྱིར་ལྡོག་པ་མེད་པར་གྱུར་ཏོ། །དེ་ནས་བློན་པོ་ལྔ་བརྒྱ་པོ་དེ་དག་གིས་ལག་པ་གྱེན་དུ་བསྒྲེང་སྟེ། འོ་དོད་བོས་ནས་རྒྱལ་པོ་རྒྱལ་བའི་འོད་ཀྱི་གན་དུ་སོང་སྟེ། འདི་སྐད་ཅེས་སྨྲས་སོ། །རྒྱལ་པོའི་ཞལ་སྔ་ནས་མཁྱེན་པར་མཛད་དུ་གསོལ། གཞོན་ནུ་རྣམ་པར་རྒྱལ་བའི་མཆིད་ཐབས་སུ་བགྱིས་པས། རྒྱལ་པོའི་ཆབ་སྲིད་ཀྱང་སྟོར་བར་འགྱུར། བདག་ཅག་རྣམས་ཀྱང་སྲོག་ལ་འབབ་པར་ཐེ་ཚོམ་འཚལ་ཏེ། ལྷའི་ཞལ་སྔ་ནས་རྒྱལ་པོ་གཞོན་ནུ་རྣམ་པར་རྒྱལ་བ་ལ་བཀའ་ནན་མ་མཛད་ན་ནི། རིང་པོ་ཡང་མི་ཐོགས་པར་ལྷའི་ཞལ་སྔར་སྐུ༌ལ་དར་བར་འགྱུར་རོ་ཞེས་པ་དང་། དེ་ནས་རྒྱལ་པོ་རྒྱལ་བའི་འོད་ཤིན་ཏུ་ཁྲོས་ནས། རྒྱལ་པོའི་བུ་རྣམ་པར་རྒྱལ་བ་དང་། གཡོན་དང་ལྡན་པའི་མི་དེ་དག་དུ་བཅས་ཏེ་གསད་པར་བྱས་སོ། །དེ་ནས་དེའི་མ༌སྐྱེད་སྐྱེད་པས་ཐོས་ནས་མི་དགའ་སྟེ། བུད་མེད་ཀྱི་འཁོར་སྟོང་དང་བཅས་ཏེ། སྐྲ་ནི་བཤིག །ལུས་ཀྱི་རྒྱན་ནི་བོར་རང་གི་བཞིན་ནི་དྲལ། བྲང་ནི་བརྡུང་མགོ་ནི་ཕྱག་དར་གྱིས་གང་བར་སྙིང་རྗེ་རྗེ་སྐད་ཀྱི་ང་རོར་ངུ་ཞིང་རྒྱལ་པོའི་དྲུང་དུ་ཕྱིན་ནས། འཁོར་དང་བཅས་པས་རྐང་པ་གཉིས་ལ་ཕྱག་འཚལ་ཏེ། འདི་སྐད་དུ་གསོལ་བ་བཏབ་བོ། །ལྷའི་ཞལ་སྔ་ནས་ཐུགས་ཅི་དགོངས། རྒྱལ་པོ་གཞོན་ནུ་རྣམ་པར་རྒྱལ་བ་གཏང་དུ་གསོལ། རྒྱལ་པོ་གཞོན་ནུ་རྣམ་པར་རྒྱལ་བའི་སྲོག་སྩལ་དུ་གསོལ་ཞེས་ནས།

དེ་ནས༌རྒྱལ་པོས་རྒྱལ་པོ་གཞོན་ནུ་རྣམ་པར་རྒྱལ་བ་མདུན་དུ་བཞག་སྟེ། འདི་སྐད་ཅེས་སྨྲས་སོ། །གཞོན་ནུ་གཡོན་དང་ལྡན་པའི་མི་འདི་རྣམས་ཐོང་། དེ་སྟེ་མི་གཏོང་ཞིང་དེ་རྣམས་ཀྱི་ལེ་ལན་དུ་ཤི་བར་གྱུར་ཏ་རེ་ཞེས་པ་དང་། དེས་ཞུམ་པ་མེད་པའི་སེམས་མ་འཁུམས་པ་ཐམས་ཅད་མཁྱེན་པ་ཉིད་དུ་དམིགས་པར་བརྩོན་པ། གཞན་ལ་ཕན་པར་གཞོལ་བ། སྙིང་རྗེ་ཆེན་པོ་སྔོན་དུ་འགྲོ་བས་འཆི་བར་ཁས་བླངས་པ་དང་། དེའི་མས་རྒྱལ་པོ་རྒྱལ་བའི་འོད་ལ་ཟླ་བ་ཕྱེད་ཅིག་ཏུ་ཕྲད་པར་གསོལ་བ་བཏབ་པ། དགུང་ཟླ་ཕྱེད་གཅིག་ཏུ་གཞོན་ནུ༌འདི་སྦྱིན་པ་སྩོལ་དུ་ཅི་གནང་། དེ་སླན་ཅད་ནི་སུ་ཅི་དགྱེས་པ་དེའང་མཛད་པར་གསོལ་ཞེས་པ་དང་། དེ་དེ་ལྟར་གྱིས་ཤིག་ཅེས་རྒྱལ་པོས་གནང་ངོ་། །

དེ་ནས་རྒྱལ་པོའི་གནས་དགའ་བས་བརྒྱན་པ་དེའི་བྱང་ཕྱོགས་ལོགས་ཤིག་ན། སྔོན་མཆོད་སྦྱིན་གྱི་གནས་སུ་བྱ་བའི་བཟའ་ཤིང་གི་ར་བ་ཆེན་པོ་ཉི་མའི་འོད་ཅེས་བྱ་བ་དེར་གཞོན་ནུ་དེ་སོང་ནས། སུ་ཅི་འདོད་པ་དེ་ལ་དེ་བྱིན་ཏེ། དེས་གཏན་པ་མེད་པའི་མཆོད་སྦྱིན་བྱས་ནས་ཟླ་བ་ཕྱེད་དུ་སྦྱིན་པ་རྣམ་པ་སྣ་ཚོགས་བྱིན་ཏེ། ཟས་འདོད་པ་ལ་ཟས་བྱིན། སྐོམ་འདོད་པ་ལ་སྐོམ་བྱིན། བཞོན་པ་དང་། གོས་དང་། མེ་ཏོག་དང་། ཕྱེ་མ་དང་། བྱུག་པ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་རིན་པོ་ཆེའི་རྒྱན་དང་། ཡོ་བྱད་ཐམས་ཅད་དང་། ལྷབ་ལྷུབ་ཐམས་ཅད་དང་། ཡོ་བྱད་ཀྱི་རྣམ་པ་ཐམས་ཅད་ཀྱང་དེ་དག་འདོད་པ་ལ་ཡོངས་སུ་བཏང་སྟེ།

དེ་ནས་ཉི་མ་ཐ་མ་ལ་བབ་པར་གྱུར་པ་དང་། འགྲོ་བ་མང་པོའི་ཚོགས་ཀུན་ནས་འདུས་ཏེ། རྒྱལ་པོའི་བློན་པོ་དང་། བུད་མེད་ཀྱི་ཚོགས་དང་། ཚོང་དཔོན་དང་། ཁྱིམ་བདག་དང་། ལྗོངས་དང་། ཡུལ་གྱི་མི་དང་། ཞགས་པ་འཐུབ་པ་ཐམས་ཅད་ཀྱང་ཀུན་ནས་འདུས། བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མ་རྒྱལ་པོ་དེ་བཞིན་གཤེགས་པ་དེ་ཡང་། སེམས་ཅན་ཡོངས་སུ་སྨིན་པར་བྱ་བ་དང་། གདུལ་བའི་དུས་ཐུགས་སུ་ཆུད་ནས། མཆོད་སྦྱིན་གྱི་གནས་དེར་གཤེགས་ཏེ། ལྷའི་དབང་པོའི་ཚོགས་ཀྱིས་ནི་ཡོངས་སུ་བསྐོར། ཀླུའི་དབང་པོས་ནི་ཡང་དག་པར་མཆོད། གནོད་སྦྱིན་གྱི་དབང་པོས་ནི་ལུས་མངོན་པར་བཏུད། དྲི་ཟའི་དབང་པོས་ནི་མངོན་པར་བསྟོད། ལྷ་མ་ཡིན་གྱི་དབང་པོས་ནི་ལུས་ཤིན་ཏུ་བཏུད་ནམ་མཁའ་ལྡིང་གི་དབང་པོ་གཙུག་གི་རིན་པོ་ཆེས་རྣམ་པར་བརྒྱན་པས་ནི་སེམས༌དང་བའི་མཆོད་པའི་རྣམ་པས་རབ་ཏུ་བཀང་། མིའམ་ཅིའི་དབང་པོ་རྣམས་ཀྱིས་ནི་དགའ༌བའི་ཡིད་ཀྱིས་ཡོངས་སུ་མཆོད་དེ། བསྟོད་པའི་གླུའི་དབྱངས་ཀྱིས་ཡོངས་སུ་བསྐུལ། ལྟོ་འཕྱེ་ཆེན་པོའི་དབང་པོ་རྣམས་ཀྱིས་ནི་ཀུན་ནས་བསྐོར་ཅིང་ཞལ་དུ་བལྟ་བ་དེ། འགྲོ་བའི་ཚོགས་ཆེན་པོ་དེ་དང་། རྒྱལ་པོ་གཞོན་ནུ་རྣམ་པར་རྒྱལ་བས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི༌སྒྲོན་མ་རྒྱལ་པོ་ཤིན་ཏུ་མཛེས་པ་བལྟ་ན་སྡུག་པ། དབང་པོ་ཞི་བ༌ཐུགས་ཞི་བ། ཤིན་ཏུ་དབེན་པར་དབང་པོ་ལས་རྒྱལ་བ། གླང་པོ་ལྟར་ཤིན་ཏུ་དུལ་བ། མཚོ་ལྟར་རབ་ཏུ༌དྭངས་ཤིང་གསལ་ལ་རྙོག་པ་མེད་པ། སངས་རྒྱས་ཀྱི་རྣམ་པར་འཕྲུལ་པ་དང་། ཆོ་འཕྲུལ་ཆེན་པོ་དང་། སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་ཆེན་པོས་ནི་རྣམ་པར་མཛེས། སངས་རྒྱས་ཀྱི་བདག་ཉིད་ཆེ་བས་ནི་རབ་ཏུ་འབར། སངས་རྒྱས་ཀྱི་མཚན་དང་དཔེ་བྱད་བཟང་པོའི་རྒྱན་གྱིས་ནི་སྐུ་མཛེས་པར་བརྒྱན། འཇིག་རྟེན་ཐམས་ཅད་ནི་སངས་རྒྱས་ཀྱི་འོད་ཀྱི་དཀྱིལ་འཁོར་སྣང་བས་རྒྱས་པར་འགེངས་ཤིང་། སངས་རྒྱས་ཀྱི་འོད་ཟེར་གྱིས་རབ་ཏུ་སྣང་བ་མཛད། སྐུའི་བ་སྤུའི་བུ་ག་ཐམས་ཅད་ནས་ནི། སྤོས་རིན་པོ་ཆེའི་ངད་འཕྲོ་བའི་འཁོར་ལོ་རབ་ཏུ་འགྱེད། སངས་རྒྱས་ཀྱི་ཞིང་རབ་ཏུ་བསྐྱོད་པའི་ཚུལ་དུ་ནི་འཇིག་རྟེན་གྱི་ཁམས་ཐམས་ཅད་ཡོངས་སུ༌བསྐྱོད་པ་མཛད་ཅིང་། རྒྱན་ཐམས་ཅད་ཀྱི་སྤྲིན་གྱི་ཆར་རབ་ཏུ་འབེབས་པའི་སངས་རྒྱས་ཀྱི་རྣམ་པར་གནོན་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བའི་སངས་རྒྱས་ཀྱི་སྤྱོད་ལམ་དང་། སེམས་ཅན་ཐམས་ཅད་ཀྱི་དགའ་བའི་ཤུགས་རྣམ་པར་འཕེལ་བར་མཛད་པའི་སངས་རྒྱས་ཀྱི་ཞལ་བལྟ་བའི་བྱིན་གྱིས། ཕ་ཟད་ཅིག་ནས་ཚུར་གཤེགས་པ་མཐོང་ནས། དེ་བཞིན་གཤེགས་པ་ལ་སེམས་མངོན་པར་མོས་པར་གྱུར་ཏོ། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བ་དང་། འགྲོ་བའི་ཚོགས་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོ་དེ། ཕ་ཟད་དུ་བསུ་ནས་མོས་པའི་སེམས་ཀྱིས་ལུས་ཐམས་ཅད་ཀྱིས་ཕབ་སྟེ་ཕྱག་འཚལ་ནས། ཞབས་གཉིས་ལ་སྤྱི་བོས་གཏུགས་ཏེ། མཆོད་པ་རྣམ་པ་སྣ་ཚོགས་ཀྱིས་ཡང་དག་པར་མཆོད་ནས་ཚིག་འདི་སྐད་དུ་བརྗོད་དོ། །

བཅོམ་ལྡན་འདས་ཚུར་གཤེགས་སུ་གསོལ། བདེ་བར་གཤེགས་པ་ཚུར་གཤེགས་སུ་གསོལ། དེ་བཞིན་གཤེགས་པས་བདག་ཅག་དགོངས་སོ། །བདེ་བར་གཤེགས་པས་བདག་ཅག་ཡོངས་སུ་བཟུང་ངོ་། །དེ་ནས་རྒྱལ་པོ་གཞོན་ནུ་རྣམ་པར་རྒྱལ་བས་བཅོམ་ལྡན་འདས་ལ་གདན་དམ་པས་བསྟབས་ཏེ། འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཏིང་བ་འདིར་བཞུགས་སུ་གསོལ་ཞེས་ནས་བཅོམ་ལྡན་འདས་དེར་གཤེགས་པ་དང་གདན་དེ་ཡང་གཙང་སྦྲ་ལྷུར་ལེན་པའི་ལུས༌ཀྱི་རིས་སུ་གཏོགས་པའི་ལྷ་རྣམས་ཀྱིས་སངས་རྒྱས་ཀྱི་བྱིན་གྱིས་རིན་པོ་ཆེ་སྤོས་ཀྱི་རྒྱལ་པོའི་པདྨོའི་སྙིང་པོ་ཅན་དུ་བྱིན་གྱིས་བརླབས་ནས། གདན་དེ་ལ་བཅོམ་ལྡན་འདས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོ་དེ་བཞིན་གཤེགས་པ་བཞུགས་སོ། །འཁོར་གྱི་སྟན་དེ་དག་ལ་བྱང་ཆུབ་སེམས་དཔའ་རྣམས་འཁོད་དེ། དེའི་ཞལ་མཐོང་མ་ཐག་ཏུ་འཁོར་དེའི་སེམས་ཅན་ཐམས་ཅད་ཀྱང་། སྒྲིབ་པ་ཐམས་ཅད་དང་བྲལ་ཏེ། ནད་ཐམས་ཅད་ཀྱང་ཞི་བར་གྱུར་ནས། འཕགས་པའི་ཆོས་ཀྱི་སྣོད་དུ་གྱུར་ཏོ། །

དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོས་སེམས་ཅན་དེ་དག་སྣོད་དུ་གྱུར་པར་ཐུགས་སུ་ཆུད་ནས། བསྟན་པ་རིམ་པས་བཀའ་སྩལ་ཏེ། འདི་ལྟར་རྒྱུའི་དཀྱིལ་འཁོར་རབ་ཏུ་སྣང་བ་ཞེས་བྱ་བའི་མདོ་སྡེ་ཡང་དག་པར་བསྟན་ནས་ཞལ་གྱི་སྒོ་ནས་འགྲོ་བ་ཐམས་ཅད་ཀྱི་སྐད་རྒྱ་མཚོ་དང་། ངེས་པའི་ཚིག་དང་། ངག་གིས་དབྱངས་སུ་བརྗོད་པའི་གསུང་དབྱངས་ཀྱི་ཡན་ལག་སྟོང་དང་ལྡན་པ། ཆོས་ཀྱི་ཡན་ལག་ཐམས་ཅད་དང་ལྡན་པ་རབ་ཏུ་བསྒྲགས་པ་དང་། དེའི་མོད་ལ་འཁོར་དེ་ནས་སྲོག་ཆགས་བྱེ་བ་ཕྲག་བརྒྱད་ཅུ་ནི་རྡུལ་དང་བྲལ་ཏེ། དྲི་མ་མེད་པར་གྱུར་ནས། ཆོས་ལ་ཆོས་ཀྱི་མིག་སྐྱེས་པར་གྱུར་ཏོ། །སྲོག་ཆགས་བྱེ་བ་མང་ཞིག་གིས་ནི། མི་སློབ་པའི་ས་ཐོབ་པར་གྱུར་ཏོ། །སྲོག་ཆགས་སྟོང་ཕྲག་བཅུ་ནི་ཐེག་པ་ཆེན་པོ་ལ་རྣམ་པར་དུལ་བར་གྱུར་ཏོ། །འདི་ལྟར་བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་དང་། སྨོན་ལམ་ཆེན་པོ་ཡོངས་སུ་རྫོགས་པའི་ཚུལ་ལ་ཞུགས་པར་གྱུར་ཏོ། །དེ་ལྟར་བཅོམ་ལྡན་འདས་དེས་སངས་རྒྱས་ཀྱི་རྣམ་པར་འཕྲུལ་པ་ཆེན་པོས་ཆོས་ཀྱི་འཁོར་ལོ་རབ་ཏུ་བསྐོར་བའི་ཚེ། ཕྱོགས་བཅུའི་སེམས་ཅན་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཐེག་པ་ཆེན་པོ་ལ་རྣམ་པར་དུལ་བར་གྱུར་ཏོ། །ཕྱོགས་བཅུའི་འཇིག་རྟེན་སངས་རྒྱས་ཀྱི་ཞིང་འབྱམས་ཀླས་པ་སྣ་ཚོགས་སུ་གཏོགས་པའི་སེམས་ཅན་མཐའ་དང་དབུས་མེད་པ་དག༌གི་ཡང་ངན་སོང་གི་ས་རྣམ་པར་བཟློག་པར་གྱུར་ཏོ། །སེམས་ཅན་གྲངས་ལས་འདས་པ་ཞིག་ནི་མཐོ་རིས་སུ་སྐྱེ་བའི་ལམ་ལ་རབ་ཏུ་བཀོད་པར་གྱུར་ཏོ། །

རྒྱལ་པོ་གཞོན་ནུ་རྣམ་པར་རྒྱལ་བས་ཀྱང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར༌བྱ་བས། བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཐོབ་པར་གྱུར་ཏོ། །རིགས་ཀྱི་བུ་དེ་ལ༌དེའི་ཚེ་དེའི་དུས་ན་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བ་བྱུང་སྟེ། རང་གི་ལུས་དང་སྲོག་ཡོངས་སུ་བཏང་ནས། ནོར་གྱི་ཚོགས་དང་། འཁོར་ཐམས་ཅད་དང་། མིའི་འཇིག་རྟེན་ན་འཚོ་བའི་བདེ་བ་ཡོངས་སུ་སྤངས་ནས་བཙོན་ར་ན་འཁོད་པའི་སེམས་ཅན་དེ་དག་ཐར་བར་བྱས་པ། མཆོད་སྦྱིན་ཆེན་པོ་གཏན་པ་མེད་པའི་མཆོད་སྦྱིན་བྱེད་བྱེད་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི༌སྒྲོན་མའི་རྒྱལ་པོ་དེ་ལ་བསྙེན་བཀུར་བྱེད་བྱེད་པ་དེ་བཞིན་གཤེགས་པ་དེའི་ཞལ་མཐོང་བའི་མོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་ཡང་ཐོབ་པར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི། རིགས་ཀྱི་བུ་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བར་གྱུར་ཏོ། །

དེ་ལྟར་ཁོ་མོ་རྒྱལ་པོ་གཞོན་ནུ་རྣམ་པར་རྒྱལ་བ་ཞེས་བྱ་བར་གྱུར་ཏེ། སྙིང་རྗེ་ཆེན་པོས་རབ་ཏུ་མི་དགའ་ཞིང་འགྲོ་བ་ཐམས་ཅད་ལ་ཕན་པར་ཞུགས་ཏེ། ཁམས་གསུམ་ལ་མི་གནས་པ་དང་། རྣམ་པར་སྨིན་པའི་ལན་ལ་རེ་བ་མེད་པ་དང་། གྲགས་པ་དང་སྙན་པ་དང་། མིང་སྨོས་པ་ལ་མངོན་པར་དགའ་བ་མེད་པ་དང་། བདག་ལ་བསྟོད་པ་མེད་པ་དང་། གཞན་ལ་སྨོད་པ་མེད་པ་དང་། དངོས་པོ་ཐམས་ཅད་ལ་མངོན་པར་ཞེན་པ་མེད་པ་དང་། སྲིད་པའི་འདུ་ཤེས་ལས་གྱེན་དུ་འཕགས་པ་དང་། ཁམས་གསུམ་པ་ལ་མངོན་པར་དགའ་བ་མེད་པ་དང་། འཇིག་རྟེན་གྱི་ཡུལ་གྱི་བདེ་བ་ལས་ཕྱིར་ཕྱོགས་པ་དང་། དེ་བཞིན་གཤེགས་པའི་ཡུལ་ལ་མངོན་ཏུ་གྱུར་པ་དང་། བྱང་ཆུབ་སེམས་དཔའི་བསམ་པ་རྣམ་པར་དག་པ་དང་། ལྷག་པའི་བསམ་པ་རྡོ་རྗེ་ཡོངས་སུ་གྲུབ་པ་དང་། འགྲོ་བ་ཐམས་ཅད་ལ་བྱམས་པ་ཆེན་པོས་ནན་ཏན་དུ་བྱེད་པ་དང་། འགྲོ་བ་ཐམས་ཅད་ལ་སྙིང་བརྩེ་བས་སྡུག་བསྔལ་རྣམ་པར་ཞི་བར་བྱ་བ་ལ་བརྩོན་པ་དང་། དེ་བཞིན་གཤེགས་པའི་སྟོབས་ལ་བསམ་པ་ཐག་པ་ནས་ལྷག་པར་དམིགས་པ་དང་། བྱང་ཆུབ་སེམས་དཔའི་ལམ་ཡོངས་སུ༌སྦྱང་བ་དང་། ཐེག་པ་ཆེན་པོའི་རྒྱན་གྱིས་འབྱུང་བའི་ལམ་རབ་ཏུ་བརྒྱན་པར་བྱ་བ་དང་། ཐམས་ཅད་མཁྱེན་པ་ཉིད་ཀྱི་སྒོ་མངོན་པར་བལྟ་བར་བྱ་བའི་ཚུལ་གྱིས་དེ་དག་དེ་ལྟ་བུར་དགའ་བ་དག་ཀྱང་བྱས་པར་གྱུར་ཏོ། །རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཡུན་དེ་སྲིད་དུ་རིང་བ་ཞིག་ནས་ཐོབ་པར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས།

དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ལ་ལོག་པར་གསོལ་བ་འདེབས་ཤིང་ཁོ་མོ་བསད་པའི་ཕྱིར་གྲོས་སུ་གསོལ་བའི་བློན་པོ་ལྔ་བརྒྱ་པོ་རྣམས་གཞན་དག་ཅིག་ཡིན་པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། ལྷས་བྱིན་གྱིས་བཅོམ་ལྡན་འདས་དགྲོངས་པའི་ཕྱིར་སྐྱེས་བུ་ལྔ་བརྒྱ་བཀྱེ་བ་དེ་དག་ཡིན་ཏེ། དེ་དག་ཀྱང་བཅོམ་ལྡན་འདས་ཀྱིས་མ་འོངས་པའི་དུས་བསྐལ་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ན་བསྐལ་པ་འོད་བཟང་པོ་ཞེས་བྱ་བ་གཅིག་ལ་སངས་རྒྱས་ལྔ་བརྒྱ་སངས་རྒྱས་ཀྱི་ཞིང་གི་ཡོན་ཏན་དང་རྒྱན་སྣ་ཚོགས་དང་ལྡན་པ། རིགས་དང་རྒྱུད་སྣ་ཚོགས་སུ་སྐྱེས་པ། ཕ་དང་མ་སྣ་ཚོགས་སུ་སྨོས་པ་སྐྱེ་བའི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ་མངོན་པར་འབྱུང་བའི་རྣམ་པར་འཕྲུལ་པ་སྣ་ཚོགས་དང་ལྡན་པ། བྱང་ཆུབ་ཀྱི་ཤིང་གི་འོད་སྣ་ཚོགས་ཡོངས་སུ་སྟོན་པ། སྙིང་པོ་བྱང་ཆུབ་སྣ་ཚོགས་སུ་ཉེ་བར༌འདོང་བའི་སྒོ་སྣ་ཚོགས་དང་ལྡན་པ། བདུད་ཕམ་པ་སྣ་ཚོགས་ཡོངས་སུ་སྟོན་པ་མངོན་པར་འཚང་རྒྱ་བའི་རྣམ་པར་འཕྲུལ་པ་སྣ་ཚོགས་ཡོངས་སུ་སྟོན་པ། ཆོས་ཀྱི་འཁོར་ལོ་རབ་ཏུ་བསྐོར་བའི་ཚུལ་དང་། མིང་དང་ངེས་པའི་ཚིག་སྣ་ཚོགས་དང་ལྡན་པ། མདོ་སྡེའི་ཚུལ་ཤིན་ཏུ་བསྟན་པ་སྣ་ཚོགས་དང་ལྡན་པ། ཚིག་གི་ལམ་དང་སྐད་སྣ་ཚོགས་རབ་ཏུ་སྟོན་པ། འཁོར་གྱི་དཀྱིལ་འཁོར་གྱི་རྒྱན་སྣ་ཚོགས་དང་ལྡན་པ། འོད་ཀྱི་དཀྱིལ་འཁོར་གྱི་མཐུ་དང་རྒྱན་སྣ་ཚོགས་རབ་ཏུ་འགྱེད་པ། ཚེའི་ཚད་སྣ་ཚོགས་དང་ལྡན་པ། བསྟན་པའི་བྱིན་གྱི་རླབས་སྣ་ཚོགས་དང་ལྡན་པ། བསྟན་པ་རྣམ་པར་དམིགས་པ་སྣ་ཚོགས་དང་ལྡན་པ། མིང་སྣ་ཚོགས་དང་ལྡན་པ། སྙིང་རྗེ་ཆེན་པོའི་ལུས་སུ་གྱུར་པ་ཤ་སྟག་ཏུ༌འགྱུར་ཏེ། དེ་དག་གི་བསྐལ་པའི་དང་པོ་ལ་དེ་བཞིན་གཤེགས་པ་ཐུགས་རྗེ་ཆེན་པོ་མངའ་བ་ཞེས་བྱ་བ་འཇིག་རྟེན་གྱི་ཁམས་རིན་ཆེན་འོད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །དེའི་རྗེས་ལ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་གཉིས་པ་འགྲོ་བ་ཐམས་ཅད་ལ་ཕན་པའི་སྨོན་ལམ་ཟླ་བ་ཞེས་བྱ་བ་འབྱུང་ངོ་། །དེ་བཞིན་གཤེགས་པ་གསུམ་པ་ཐུགས་རྗེ་ཆེན་པོའི་སེང་གེ་ཞེས་བྱ་བ་འབྱུང་ངོ་། །དེ་བཞིན་གཤེགས་པ་བཞི་པ་འཇིག་རྟེན་ཐམས་ཅད་ལ་ཕན་པར་མཛད་པ་ཞེས་བྱ་བ་འབྱུང་བ་ནས། ཐམས་ཅད་ཀྱི་ཐ་མ་དེ་བཞིན་གཤེགས་པ་སྨན་པའི་རྒྱལ་པོ་ཞེས་བྱ་བ་འབྱུང་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་གཡོན་དང་ལྡན་པའི་མིའི་རྒྱལ་པོ་ལ་སྙིང་རིང་བར་གྱུར་ཏེ། ཁོ་མོས་གསོད་མ་མིའི་ལག་ཏུ་ཕྱིན་པ་ལས་རང་གི་ལུས་དང་སྲོག་ཡོངས་སུ་བཏང་སྟེ། བཙོན་ར་དེ་དག་ནས་བཀྱེ་བ་དེ་རྣམས་གཞན་དག་ཅིག་ཡིན༌པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། དེ་བཞིན་གཤེགས་པ་ལོག་པར་དད་སེལ་ལ་སོགས་པ་བསྐལ་པ་བཟང་པོའི་དེ་བཞིན་གཤེགས་པ་རྣམས་དང་། དེ་མ་ཡིན་པའི་བྱང་ཆུབ་སེམས་དཔའ་གྲངས་མེད་པ་བརྒྱ་སྟོང་ཕྲག་བཅུ་དག་སྟེ། བཅོམ་ལྡན་འདས་དེ་བཞིན་གཤེགས་པ་སྟོབས་མཐའ་ཡས་གྲགས་པར་བརྗོད་པའི་དཔལ་ཡང་དག་པར་འབྱུང་བའི་བློ་གྲོས་མཐོང་བར་གྱུར་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། ད་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཡང་སྒོམ་ཞིང་ཤིན་ཏུ་རྒྱས་པར་བྱེད༌པ་དག་གོ །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། སྨྲ་བ་ཆེན་པོ་བདེན་པ་ཅན་ནི་དེའི་ཚེ་དེའི་དུས་ན་རྒྱལ་པོ་རྒྱལ་བའི་འོད་ཅེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་འཁོར་དུ་གྱུར་པ་བཙུན་མོའི་འཁོར་དང་། བཙུན་མོའི་གནས་ཀྱི་སྒོ་བའམ། འཁོར་ན་གནས་པའམ། རྗེས་སུ་འཆའ་བ་དེ་དག་ཀྱང་གཞན་དག་ཅིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། ཞགས་པ་འཐུབ་པ་སྟོང་ཕྲག་དྲུག་ཅུ་པོ་སྨྲ་བ་ཆེན་པོ་བདེན་པ་ཅན༌གྱིས་སྨྲ་བའི་རྒྱལ་མཚན་ཡོངས་སུ་གཟུང་བའི་དོན་དུ་བཅོམ་ལྡན་འདས་ལ་རྒོལ་དུ་འགྲོ་བའི་ཚེ། བཅོམ་ལྡན་འདས་ཀྱི་སྤྱན་སྔར་བླགས་ནས་ཀུན་ཀྱང་ཞིང་སྣ་ཚོགས་ཀྱི་རྒྱན་དང་། བསྐལ་པ་སྣ་ཚོགས་དང་། མིང་སྣ་ཚོགས་ཀྱིས་དེ་བཞིན་གཤེགས་པ་འཇིག་རྟེན་དུ་འབྱུང་བར་འགྱུར་རོ་ཞེས་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དག་གོ །རིགས་ཀྱི་བུ་རྒྱལ་པོ་གཞོན་ནུ་རྣམ་པར་རྒྱལ་བ་དེ་ཕ་དང་མས་གནང་ནས། སེམས་ཅན་བཙོན་ར་བ་དེ་དག་ཡོངས་སུ་བཀྲོལ་བའི་འོག་ཏུ་སྲིད་ཤིན་ཏུ་བདེ་བ་དང་། ནོར་དང་དབྱིག་རིན་པོ་ཆེ་ཕུན་སུམ་ཚོགས་པ་དག་ཀྱང་བོར། བུ་དང་ཆུང་མ་དག་ཀྱང་སྤངས་ནས། བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན༌མའི་རྒྱལ་པོའི་ཞམ་རིང་དུ་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་ལོ་སྟོང་ཕྲག་ལྔར་ཚངས་པར༌སྤྱོད་པ་སྤྱད་དེ། དེའི་བར་སྐབས་སུ་ཏིང་ངེ་འཛིན་གྱི་སྒོ་སྟོང་ཕྲག་བཅུ་ཡོངས་སུ་བསྒྲུབས་སོ། །གཟུངས་ཀྱི་སྒོ་སྟོང་ཕྲག་བཅུ་ཡང་རབ་ཏུ་ཐོབ་བོ། །མངོན་པར་ཤེས་པའི་ཚུལ་སྟོང་ཕྲག་བཅུ་ལའང་རབ་ཏུ་ཞུགས་སོ། །བྱང་ཆུབ་སེམས་དཔའི་གཏེར་སྟོང་ཕྲག་བཅུའང་རབ་ཏུ་ཐོབ་བོ། །ཐམས་ཅད་མཁྱེན་པའི་ཤུགས་སྟོང་ཕྲག་བཅུའང་ཡོངས་སུ་སྐྱེས་སོ། །བཟོད་པའི་སྒོ་སྟོང་ཕྲག་བཅུ་ཡང་ཡོངས་སུ་སྦྱངས་སོ། །སེམས་ངེས་པར་བཞག་པ་སྟོང་ཕྲག་བཅུ་ཡང་མངོན་པར་བསྒྲུབས་སོ། །བྱང་ཆུབ་སེམས་དཔའི་སྟོབས་ཀྱི་ལུས་སྟོང་ཕྲག་བཅུ་ཡང་ཡོངས་སུ་སྤེལ་ཏོ། །བྱང་ཆུབ་སེམས་དཔའི་ཡེ་ཤེས་ཀྱི་སྒོ་སྟོང་ཕྲག་བཅུར་ཡང་རབ་ཏུ་ཞུགས་སོ། །

ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྟོང་ཕྲག་བཅུ་ཡང་ཡོངས་སུ་སྐྱེས་སོ། །སངས་རྒྱས་བལྟ་བའི་ཕྱོགས་ཀྱི་སྒོ་སྟོང་ཕྲག་བཅུ་ཡང་མངོན་དུ་གྱུར་ཏོ། །བྱང་ཆུབ་སེམས་དཔའི་སྨོན་ལམ་སྟོང་ཕྲག་བཅུ་ཡང་མངོན་པར་བསྒྲུབས་སོ། །དེ་དེ་ལྟ་བུའི་ཆོས་དང་ལྡན་པས་སེམས་ཀྱི་སྐད་ཅིག་རེ་རེ་ལ་ཕྱོགས་བཅུར་སངས་རྒྱས་ཀྱི་ཞིང་སྟོང་ཕྲག་བཅུ་ཡོངས་སུ་གནོན་ཏོ། །འཇིག་རྟེན་གྱི་ཁམས་རེ་རེ་ཞིང་ཡང་སེམས་ཀྱི་སྐད་ཅིག་རེ་རེ་ལ་སངས་རྒྱས་སྟོང་ཕྲག་བཅུ་སྔོན་གྱི་མཐའ་དང་ཕྱི་མའི་མཐའ་རྗེས་སུ་དྲན་ནོ། །དེ་བཞིན་གཤེགས་པ་དེ་དག་གི་སངས་རྒྱས་ཀྱི་སྤྲུལ་པ་རྒྱ་མཚོ་སྟོང་ཕྲག་བཅུ་ཕྱོགས་བཅུར་གཤེགས་པ་དེ་དག་ཀྱང་མཐོང་ཞིང་ཤེས་སོ། །སེམས་ཀྱི་སྐད་ཅིག་རེ་རེ་ལ་ཡང་སངས་རྒྱས་ཀྱི་ཞིང་སྟོང་ཕྲག་བཅུར་གཏོགས་པའི་སེམས་ཅན་འགྲོ་བའི་རྒྱུད་སྣ་ཚོགས་སུ་སྐྱེས་པ་ཤི་འཕོ་ཞིང་སྐྱེ་བར༌འགྱུར་བ་མཐོ་བ་དང་། དམའ་བ་དང་། བདེ་འགྲོའི་ལམ་དུ་ཕྱིན་པ་དང་། ངན་སོང་གི་ལམ་དུ་ཕྱིན་པ་དང་། ཁ་དོག་སྡུག་པ་དང་། ཁ་དོག་མི་སྡུག་པ་ལས་ཇི་བཞིན་དུ་སྐྱེས་པར་གྱུར་པ་ཐམས་ཅད་ཀྱང་མཐོང་བར་གྱུར་ཏོ། །

སེམས་ཅན་དེ་དག་གི་ཤི་འཕོ་དང་སྐྱེ་བ་ཡང་ཁོང་དུ་ཆུད་ཅིང་མཐོང་སྟེ། སེམས་ཀྱི་རྒྱུད་དང་། སེམས་ཀྱི་སྤྱོད་པ་དང་། སེམས་ཀྱི་འདབ་འབྲེལ་བ་དང་། བསམ་པ་སྣ་ཚོགས་དང་། དབང་པོ་རྒྱ་མཚོ་དང་། སྦྱོར་བ་འབྱམས་ཀླས་པ་དང་། ལས་མཐར་ཐུག་པ་དང་། ཡོངས་སུ་སྨིན་པར་བྱ་བ་དང་། རྣམ་པར་གདུལ་བའི་དུས་ཀྱང་ཁོང་དུ་ཆུད་ཅིང་མཐོང་ངོ་། །

རིགས་ཀྱི་བུ་རྒྱལ་པོ་གཞོན་ནུ་དེ་དེ་ནས་ཤི་འཕོས་ནས་ཀྱང་འཛམ་བུའི་གླིང་དེ་ཉིད་དུ་རྒྱལ་པོའི་གནས་དགའ་བ་དང་ལྡན་པར་རྒྱལ་པོ་དེ་ཉིད་ཀྱི་རིགས་སུ་སྐྱེས་ནས། འཁོར་ལོས་སྒྱུར་བའི་རྒྱལ་སྲིད་ཐོབ་པར་གྱུར་ཏོ། །དེ་འཁོར་ལོས་སྒྱུར་བའི་རྒྱལ་པོར་གྱུར་པས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་འཁོར་ལོའི་སྒྲ་ནམ་མཁའི་སྤྲིན་གྱི་སྒྲོན་མའི་རྒྱལ་པོ་ཡོངས་སུ་མྱ་ངན་ལས་འདས་པའི་འོག་ཏུ་དེ་བཞིན་གཤེགས་པ་ཆོས་ཀྱི་ནམ༌མཁའ་ལ་དཔལ་ཤིན་ཏུ་འཕགས་པའི་རྒྱལ་པོ་བསྙེན་བཀུར་ཏོ། །དེའི་འོག་ཏུ་སྙིང་པོ་བྱང་ཆུབ་དེ་ཉིད་དུ་བརྒྱ་བྱིན་དུ་གྱུར་ཏེ། དེ་བཞིན་གཤེགས་པ་ལྷ་དབང་སྙིང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་མཚེ་མའི་ལྷའི་རྒྱལ་པོར་གྱུར་ཏེ། དེ་བཞིན་གཤེགས༌པ་སའི་དཔལ་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་དགའ་ལྡན་གྱི་ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་ཆོས་ཀྱི་འཁོར་ལོའི་འོད་རབ་ཏུ་བསྒྲགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་རབ་འཕྲུལ་དགའི་ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་ནམ་མཁའ་མཛེས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དབང་བསྒྱུར་གྱི་ལྷའི་རྒྱལ་པོར་གྱུར་ཏེ། དེ་བཞིན་གཤེགས་པ་སྟོབས་ལ་ཐུབ་པ་མེད་པའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་ལྷ་མ་ཡིན་གྱི་དབང་པོར་གྱུར་ཏེ། དེ་བཞིན་གཤེགས་པ་ཆོས་ཐམས་ཅད་ཀྱི་འབྲུག་སྒྲ་བསྒྲགས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་ཚངས་པའི་དབང་པོར་གྱུར་ཏེ། དེ་བཞིན་གཤེགས་པ་ཆོས་ཀྱི་འཁོར་ལོ་སྤྲུལ་པ་ཀུན་ཏུ་སྣང་བའི་དབྱངས་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ་འཇིག་རྟེན་གྱི་ཁམས་རིན་ཆེན་འོད་དེ་ཉིད་དུ་བསྐལ་པ་འོད་བཟང་པོ་དེ་ཉིད་ལ་དེ་བཞིན་གཤེགས་པ་དེ་དག་ལ་སོགས་པ། སངས་རྒྱས་སྟོང་ཕྲག་བཅུ་བྱུང་སྟེ། དེ་བཞིན་གཤེགས་པ་དེ་དག་ཐམས་ཅད་ཀྱང་རྒྱལ་པོ་གཞོན་ནུ་རྣམ་པར་རྒྱལ་བས་བསྙེན་བཀུར་ཏོ། །རིགས་ཀྱི་བུ་བསྐལ་པ་འོད་བཟང་པོ་དེའི་འོག་ཏུ་བསྐལ་པ་འོད་ཟེར་བཟང་པོ་ཞེས་བྱ་བ་བྱུང་སྟེ། བསྐལ་པ་འོད་ཟེར་བཟང་པོ་དེ་ལ་ཡང་སངས་རྒྱས་སྟོང་ཕྲག་བཅུ་བྱུང་ངོ་། །ཁོ་མོ་ཡང་བསྐལ་པ་དེ་ལ་རྒྱལ་པོ་བློ་གྲོས་ཆེན་པོ་ཞེས་བྱ་བ་ཞིག་ཏུ་གྱུར་ཏེ། དེའི་ཚེ་ཁོ་མོ་རྒྱལ་པོར་གྱུར་པས་དེ་བཞིན་གཤེགས་པ་མཚན་གྱི་དཔལ་རི་བོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ཁྱིམ་བདག་ཅིག་ཏུ་གྱུར་ཏེ། དེ་བཞིན་གཤེགས་པ་ཕུང་པོ་ཡོངས་སུ་གྲུབ་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་བློན་པོ་ཞིག་ཏུ་གྱུར་ཏེ། དེ་བཞིན་གཤེགས་པ་དྲི་མ་མེད་པའི་སྲས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ལྷ་མ་ཡིན་གྱི་དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་ཤུགས་མངའ་བ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་བསྐལ་པ་དེ་ཉིད་ལ་ཤིང་གི་ལྷ་མོ་ཞིག་ཏུ་གྱུར་ཏེ། དེ་བཞིན་གཤེགས་པ་མཚན་ཉིད་རི་རབ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་དེད་དཔོན་ཞིག་ཏུ་གྱུར་ཏེ། དེ་བཞིན་གཤེགས་པ་ཕྱག་དྲི་མ་མེད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་གྲོང་ཁྱེར་གྱི་ལྷ་མོ་ཞིག་ཏུ་གྱུར་ཏེ། དེ་བཞིན་གཤེགས་པ་སེང་གེ་རྣམ་པར་གནོན་པས་བཞུད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་ངལ་བསོ་པོ་ཞིག་ཏུ་གྱུར་ཏེ། དེ་བཞིན་གཤེགས་པ་ལྷ་དབང་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་དྲི་ཟའི་རྒྱལ་པོ་ཞིག་ཏུ་གྱུར་ཏེ། དེ་བཞིན་གཤེགས་པ་གྲགས་པ་ཆོས་ཀྱིས་འཕགས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་བསྐལ་པ་དེ་ཉིད་ལ་གྲུལ་བུམ་གྱི་དབང་པོ་ཞིག་ཏུ་གྱུར་ཏེ། དེ་བཞིན་གཤེགས་པ་སྣང་བའི་ཅོད་པན་ཞེས་བྱ་བ་བསྙེན་བཀུར་ཏོ། །རིགས་ཀྱི་བུ་དེ་ལྟར་ཁོ་མོས་དེ་བཞིན་གཤེགས་པ་བཅུ་པོ་དེ་དག་ལ་སོགས་པ་བསྐལ་པ་འོད་ཟེར་བཟང་པོ་དེ་ལ་སྐྱེ༌བའི་རིགས་སྣ་ཚོགས་སུ་སྐྱེས་ནས། དེ་བཞིན་གཤེགས་པ་བྱེ་བ་ཕྲག་དྲུག་ཅུ་བསྙེན་བཀུར་ཏེ། ཁོ་མོས་དེ་བཞིན་གཤེགས་པ་དེ་དག་ཐམས་ཅད་ལ་མཆོད་པ་བྱས་སོ། །

དེ་བཞིན་གཤེགས་པ་རེ་རེའི་སྤྱན་སྔར་འགྲོ་བའི་ཚེའང་སེམས་ཅན་གྱི་ཁམས་མཐའ་དང་དབུས༌མེད་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་བཞིན་གཤེགས་པ་རེ་རེའི་སྤྱན་སྔར་འགྲོ་བའི་ཚེའང་ཏིང་ངེ་འཛིན་གྱི་སྒོ་སྣ་ཚོགས་རབ་ཏུ་ཐོབ་པར་གྱུར་ཏོ། །གཟུངས་ཀྱི་སྒོ་སྣ་ཚོགས་དང་། མངོན་པར་བསྒྲུབ་པའི་ཚུལ་སྣ་ཚོགས་དང་། སོ་སོ་ཡང་དག་པར་རིག་པ་མངོན་པར་བསྒྲུབ་པའི་ཚུལ་སྣ་ཚོགས་དང་། ཐམས་ཅད་མཁྱེན་པ་ཉིད་ཀྱི་ཚུལ་རྗེས་སུ་རྟོགས་པར་བྱ་བ་སྣ་ཚོགས་དང་། ཆོས་སྣང་བའི་སྒོ་ཐོབ་པར་བྱ་བའི་ཚུལ་སྣ་ཚོགས་དང་། ཡེ་ཤེས་ཀྱི་ཚུལ་ཁོང་དུ་ཆུད་པར་དཔྱད་པ༌རྣམ་པ་སྣ་ཚོགས་དང་། ཕྱོགས་རྒྱ་མཚོ་ལ་འཇུག་པའི་སྣང་བ་སྣ་ཚོགས་དང་། ཞིང་རྒྱ་མཚོ་སྣ་ཚོགས་ལ་འཇུག་ཅིང་ཁོང་དུ་ཆུད་པར་བྱ་བའི་སྣང་བ་སྣ་ཚོགས་དང་། དེ་བཞིན་གཤེགས་པ་རྒྱ་མཚོ་མཐོང་བར་བྱ་བ་རྣམ་པར་དམིགས་པའི་སྣང་བ་སྣ་ཚོགས་ཀྱང་རབ་ཏུ་ཐོབ་བོ། །ཡོངས་སུ་གནོན་ཏོ། །རྣམ་པར་དག་གོ །ཡོངས་སུ་རྫོགས་སོ། །ཡོངས་སུ་གནས་པར་གྱུར་ཏོ། །སྐྱེས་སོ། །བྱུང་ངོ་། །རྣམ་པར་འཕེལ་ཏོ། །ཡོངས་སུ་འཕེལ་ཏོ། །རབ་ཏུ་བྱུང་ངོ་། །རྣམ་པར་བྱུང་ངོ་། །བསྐལ་པ་འོད་ཟེར་བཟང་པོ་དེ་ལ་དེ་བཞིན་གཤེགས་པ་རྣམས་ཇི་ལྟར་རིམ་གྲོར་བྱས་པ་དེ་བཞིན་དུ་བསྐལ་པ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་དུ། དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དང་། དེ་བཞིན་གཤེགས་པ་ཇི་སྙེད་ཅིག་འཇིག་རྟེན་གྱི་ཁམས་གཞན་ནས་དེ་དག་ཏུ་བྱོན་ཏེ། ཆོས་བསྟན་པར་གྱུར་པའི་དེ་བཞིན་གཤེགས་པ་དེ་དག་ཐམས་ཅད་ལས་ཀྱང༌ཁོ་མོས་ཆོས་བསྟན་པ་ཐོས་ཏེ། ཐོས་ནས་ཀྱང་ཡོངས་སུ་བཟུང་ངོ་། །

དེ་བཞིན་གཤེགས་པ་དེ་དག་ཐམས་ཅད་ཀྱང་། ཁོ་མོས་བསྙེན་བཀུར་ཏོ། །རིམ་གྲོར་བྱས་སོ། །སངས་རྒྱས་བཅོམ་ལྡན་འདས། དེ་དག་གི་བསྟན་པ་ཡང་ཁོ་མོས་ཡོངས་སུ་བཟུང་ངོ་། །དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཐོབ་པར་བྱ་བའི་ཚུལ་སྣ་ཚོགས་དང་། རྣམ་པར་ཐར་པའི་ཚུལ་གྱི་སྒོ་སྣ་ཚོགས་ཀྱིས་ཐོབ་པར་གྱུར་ཏོ། །དེ་ནས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱིས། དེའི་ཚེ་རྣམ་པར་ཐར་པའི་ཚུལ་འདི་ཉིད་ཡོངས་སུ་བརྗོད་པ་དང་། ཡོངས་སུ་བསྟན་པའི་ཕྱིར་ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། བསམ་གྱིས་མི་ཁྱབ་རྣམ་ཐར་དམ་པ་འདི། །གྲགས་པ་ཁྱོད་ཀྱིས་བདག་ལ་གང་དྲིས་པ། །བདེ་བར་གཤེགས་པའི་བྱིན་གྱིས་དེ་བསྟན་ཀྱིས། །མ་ལུས་ཡང་དག་ཇི་བཞིན་བདག་ལས་ཉོན། །བསྐལ་པ་བསམ་ཡས་ཡངས་པ་མཐའ་ཡས་པ། །རྒྱ་མཚོའི་ཞིང་གི་རྡུལ་དང་གྲངས་མཉམ་པ། །དེ་ཀུན་འདས་པའི་སྔ་རོལ་མདངས་དགའ་བའི། །འཇིག་རྟེན་ཁམས་ཤིག་བྱུང་བ་རིན་ཆེན་འོད། །དེ་ཚེ་བསྐལ་པ་བཟང་པོའི་འོད་ཀྱང་བྱུང་། །དེ་ལ་རྒྱལ་བ་དཔག་ཏུ་མེད་པ་སྐྱེས། །ཐུབ་པའི་དབང་པོ་དེ་དག་ཁོ་མོ་ཡིས། །རྣམ་ཐར་འདི་ལ་བསྒོམ་ཞིང་བསྙེན་བཀུར་ཏོ། །རྒྱལ་པོའི་གནས་རབ་ཡངས་ཤིང་བཟང་བྱུང་བ། །དེ་ཡི་མིང་ནི་དགའ་བས་བརྒྱན་པ་སྟེ། །དེ་ཚེ་སེམས་ཅན་རྣམ་པར་མ་དག་སེམས། །མི་བཟད་ངན་དུ་སྤྱོད་པ་དེར༌བྱུང་གྱུར། །དེ་ནི་རྒྱལ་པོ་རྒྱལ་བའི་འོད་བྱུང་སྟེ། །སེམས་ཅན་དེ་དག་ཆོས་ཀྱིས་བསྐྱང་བ་བྱས། །དེ་ཡི་བུ་ནི་རྣམ་པར་རྒྱལ་བ་སྟེ། །མཛེས་ཤིང་མཚན་གྱིས་ཡན་ལག་བརྒྱན༌པའོ། །གཡོན་ལྡན་སྟོང་ཕྲག་མང་པོ་དེ་དག་ཀྱང་། །དེ་ཚེ་རྒྱལ་པོས་གསད་པར་བྱས་མཐོང་ནས། །གཞོན་ནུ་སྙིང་བརྩེ་མི་དགས་ཀུན་ནས་འཁོར། །མྱུར་དུ་དགྱེ་བར་རྒྱལ་པོ་དེ་ལ་གསོལ། །རྒྱལ་པོས་ཐོས་ནས་དེ་ཚེ་བློན་པོ་རྣམས། །མ་ལུས་ཀུན་བསྡུས་དེ་ལ་བཀའ་སྩལ་ནས། །ཀུན་གྱིས་དེ་ལ་ཕྱག་བྱས་ཕྱིར་གསོལ་པ། །དེ་ནི་རྒྱལ་པོ་ཁྱོད་དགྲོངས་ཐབས་གཅིག་ལགས། །རྒྱལ་པོ་དེ་ལྟར་ལོག་པར་ཐུགས་བཅུག་ནས། །སྲས་དེ་གསད་པར་དེ་ཚེ་བྱས་གྱུར་ཀྱང་། །བདག་སྲོག་ཕངས་པར་མ་བརྩིས༌ངོམ་ཟུང་མེད། །རྒྱལ་པོའི་སྲས་ཀྱིས་གསད་པར་བྱས་མ་བཏང་། །གསད་པར་བྱས་པ༌དེ་ཡི་མས་ཐོས་ནས། །རྒྱལ་པོ་དེ་ལ་འཁོར་བཅས་གསོལ་བ་འདེབས། །དགུང་ཟླ་ཕྱེད་ཅིག་སྦྱིན་པ་མ་ལུས་པར། །འཇིག་རྟེན་སྩོལ་དུ་གཞོན་ནུ༌བཏང་བར་གནང་། །རྒྱལ་པོ་དེས་ཀྱང་དེ་ལྟར་གནང་གྱུར་ནས། །དེས་ནི་ཅི་འདོད་སྦྱིན་པ་ཡོངས་སུ་བཏང་། །ཟླ་བ་ཕྱེད་དུ་ཉིན་མཚན་སྦྱིན་བྱས་གནས། །ཉི་མའི་ཐ་མར་ཚོགས་པར་གྱུར༌པ་ཡི། །ཞགས་པ༌འཐུབ་པ་གང་རྣམས་ཅི་འདོད་པ། །དེ་ལ་དེ་བྱིན་འཆི་བར་སྟ་གོན་གནས། །རྒྱལ་པོའི་གནས་དེར་འགྲོ་བ་མང་པོ་དག །ཆོ་ངེར་ངུ་ཞིང་ཀུན་ཀྱང་འདུས་པར་གྱུར། །བྱང་ཆུབ་ཤིང་དྲུང་བདེ་གཤེགས༌དེ་ཡི་ཚེ། །དམ་ཆོས་དབྱངས་མཆོག་སྒྲོན་མའི་རྒྱལ་བཞུགས་པས། །འགྲོ་བའི་དབང་པོ་སྨིན་པར་ཐུགས་ཆུད་ནས། །མཆོད་སྦྱིན་ར་བར་ཐུགས་རྗེ་ཆེན་པོས་བྱོན། །དེ་བཞིན་གཤེགས་པའི་རྣམ་འཕྲུལ་རྣམ་ཕྱེ་བས། །དེ་ཡི་འཁོར་དུ་བདེ་གཤེགས་བྱོན་གྱུར་ནས། །ཆོས་ཀྱི་སྒྲོན་མེའི་སྤྲིན་གྱི་སྒྲ་སྒྲོག་པའི། །མདོ་སྡེའི་རྒྱལ་པོ་བདེ་བར་གཤེགས་པས་བཤད། །འགྲོ་བ་མཐའ་དང་དབུས་མེད་རྣམ་བཏུལ་ནས། །དེ་ཚེ་བྱང་ཆུབ༌མཆོག་ཏུ་ལུང་ཡང་བསྟན། །རྒྱལ་པོའི་སྲས་པོ་རྣམ་པར་རྒྱལ་བ་ཡང་། །ཤིན་ཏུ་དགའ་བས་བྱང་ཆུབ་མཆོག་ཏུ་ཞུགས། །བདེ་གཤེགས་བསྙེན་བཀུར་མཆོད་པ་རྣམས་ཡངས་པས། །དེ་ལ་མཆོད་བྱས་དགའ་བར་སྨྲས་པ་ནི། །འགྲོ་བ་རྣམ་འདུལ་སྐྱབས་སུ་བདག་འགྱུར་གྱི། །མགོན་དང་གནས་དང་དཔུང་དུའང་དེ་བཞིན་ཞེས། །རྒྱལ༌བ་དེ་ཡི་ཞམ་རིང་ཐར་བར་ཞུགས། །ཡང་དག་བྱང་ཆུབ་ལམ་ནི་ཡོངས་ཚོལ་ཞིང་། །ཆོས་ཀྱི་རང་བཞིན་རབ་ཏུ་བརྟག་བྱ་བས། །དེར་གནས་བསྐལ་པ་བརྒྱ་ཕྲག་མང་དུ་སྤྱད། །སྡུག་བསྔལ་རྒྱ་མཚོར་ལྷུང་ཞིང་མདོངས་གྱུར་པའི། །འགྲོ་བ་མགོན་མེད་ཀུན་ལ་སྙིང་བརྩེ་བས། །ཡང་དག་བྱང་ཆུབ་ལམ་ལ་ཡོངས༌བསྒོམས་ནས། །དེ་ཚེ་དེའི་རྣམ་ཐར་འདི་ཐོབ་བོ། །བསྐལ་པ་དེ་ལ་བདེ་གཤེགས་གང་བྱུང་བ། །དེ་དག་ཀུན་ལའང་དགའ་བས་བསྙེན་བཀུར་ནས། །དེ་དག་ཀུན་ལ་མཆོད་པ་ཆེན་པོ་བྱས། །ཆོས་ཀྱི་འཁོར་ལོ་ཡོངས་སུ་བཟུང་བར་གྱུར། །དེ་ཡི་འོག་ཏུ་བསྐལ་པ་རྒྱ་མཚོ་རྣམས། །ཞིང་མང་རྒྱ་མཚོ་རྡུལ་སྙེད་ཀུན་ལ་ཡང་། །རྒྱལ་བ་ཇི་སྙེད་སྐྱེས་པར་གྱུར་པ་དག །རབ་ཏུ་མཆོད་དེ་དེ་དག་བསྙེན་བཀུར་བྱས། །རྣམ་པར་རྒྱལ་ཞེས་བྱ་བ་ཁོ་མོ་ཡིན། །ཉམ༌ང་བཙོན་རར་གནས་པའི་བཙོན་མཐོང་ནས། །དེ་དག་དགྲོལ་ཕྱིར་ལུས་ཀྱང་ཡོངས་སུ་བཏང་། །རྣམ་ཐར་འདི་ཡང་དེ་ཚེ་ཐོབ་པར་གྱུར། །ཞིང་རྣམས་རྒྱ་མཚོའི་རྡུལ་ཕྲན་རབ་འགྲངས་པའི། །བསྐལ་པ་རྒྱ་མཚོ་མང༌པོར་བསྒོམ་པར་བྱས། །ཚུལ་མང་མཐའ་དང་དབུས་མེད་མཉམ་མེད་པས། །སྐད་ཅིག་རེ་རེ་དག་ཏུ་རྣམ་པར་སྤེལ། །ཐུབ་པའི་བདག་པོ་ཇི་སྙེད་མཐོང་གྱུར་པ། །དེ་དག་སྤྱན་སྔར་སྔན་ཆད་འདི་ཐོབ་སྟེ། །སྒོ་ཚུལ་རྣམ་པ་གཞན་དང་གཞན་དག་གིས། །དེ་དག་གིས་ནི་རྣམ་ཐར་འདི་ཡང་བསྟན། །དེ་དག་རྣམ་ཐར་མ་ནོར་བསམ་ཡས་ལ། །བསྐལ་པ་བྱེ་བ་མང་པོར་ཁོ་མོས་བསླབས། །དེ་ལ་རྒྱལ་བས་བཀོད་ཅིང་གྲོལ་གྱུར་པ། །དེ་དག་དམ་ཆོས་སྤྲིན་ལས་ཅིག་ཅར་འཐུང་། །ཕྱོགས་བཅུ་ཀུན་གྱི་ཞིང་རྣམས་ཐམས་ཅད་དུ། །ཐོགས་པ་མེད་པར་ལུས་ཀྱིས་རྒྱས་པར་འགེངས། །སྐད་ཅིག་རེ་རེར་ཞིང་རྒྱུད་བསམ་ཡས་པའི། །དུས་གསུམ་རྒྱུད་རྣམས་ཀུན་ལའང་རབ་ཏུ་འཇུག །དུས་གསུམ་རྒྱལ་བ་རྒྱ་མཚོ་མ་ལུས་པ། །རེ་རེ་ཀུན་ལའང་མངོན་དུ་རབ་ཏུ་ལྟ། །དེ་དག་ལུས་ཀྱི་གཟུགས་བརྙན་རྒྱལ་བ་ལ། །སྤྲིན་ཏུ་གྱུར་པ་རྣམས་ཀྱང་སྤྱན༌སྔར་འགྲིམ། །ཕྱོགས་རྣམས་ཀུན་ཏུ་ཉེ་བར་ཕྱིན་འདོང་ཞིང་། །རྒྱལ་བའི་སྤྱན་སྔར༌འདོང་བས་ཤིན་ཏུ་མཛེས། །རྒྱན་རྣམས་མ་ལུས་མངོན་པར་ཆར་འབེབས་ཤིང་། །རྒྱལ་བ་རྣམས་ལ་དེ་དག་མཆོད་པ་བྱེད། །སངས་རྒྱས་རྒྱ་མཚོ་ཆེ་ལ་རྣམ་ཡངས་པའི། །ཞུ་བ་མཐའ་ཡས་ཀུན་ཀྱང་ཞུ་བ་བྱེད། །རྒྱལ་བའི་ཆོས་སྤྲིན་མངོན་པར་ཆར་འབབ་པ། །ཀུན་ཀྱང་མ་ལུས་ཡོངས་སུ་འཛིན་པ་བྱེད། །ཕྱོགས་བཅུ་མ་ལུས་ཀུན་ཏུ་དེ་དག་འདོང་། །རྒྱལ་བའི་དཀྱིལ་འཁོར་ཀུན་གྱི་སྤྱན་སྔར་འབབ། །གཟུགས་མང་རྣམ་པ་སྣ་ཚོགས་བསྟན་གནས་ཤིང་། །རྣམ་འཕྲུལ་སྣ་ཚོགས་ཉེ་བར་སྟོན་པ་བྱེད། །ཁ་དོག་མཐའ་ཡས་རང་གི་ལུས་གཟུགས་ཀྱིས། །ཕྱོགས་རྣམས་ཐམས་ཅད་རྣམ་པ་སྟོང་དུ་འགེངས། །དེ་དག་ལུས་གཅིག་ལས་ཀྱང་གཟུགས་ཀྱི་རྣམས། །མཐའ་དང་དབུས་མེད་རྣམ་པར་སྟོན་པར་བྱེད། །བ་སྤུ་རེ་རེའི་སྒོ་ནས་གྲངས་མེད་པའི། །འོད་ཟེར་མང་པོ་རྒྱ་མཚོ་དེ་དག་འགྱེད། །སྐྱེ་དགུ་ཉོན་མོངས༌མེ་ཡིས་གདུངས་པ་དག །སྣ་ཚོགས་ཐབས་ཀྱིས་རབ་ཏུ་ཞི་བར་བྱེད། །འདི་ལ་གནས་པ་ལུས་སྤྲུལ་སྤྲིན་མང་བ། །བ་སྤུ་རེ་རེའི་སྒོ་ནས་འགྱེད་བྱེད་ཅིང་། །ངོ་མཚར་རྨད་ཀྱིས་ཕྱོགས་ཀུན་རྒྱས་བཀང་ནས། །ཆོས་ཆུའི་ཆར་གྱིས་སེམས་ཅན་རྣམ་པར་འདུལ། །ཚུལ་འཇུག་འདི་ནི་བསམ་གྱིས་མི་ཁྱབ་གཟུགས། །རྒྱལ་སྲས་ཀུན་གྱི་གནས་སུ་གྱུར་པ་སྟེ། །དེ་ལ་གནས་ཤིང་ཕྱི་མཐའི་བསྐལ་པར་ཡང་། །ཞིང་རྣམས་ཀུན་ཏུ་སྤྱད་པ་རབ་ཏུ་སྤྱོད། །བསམ་པ་ཇི་བཞིན་ཆོས་རྣམས་སྟོན་བྱེད་ཅིང་། །དེ་དག་ལྟ་བའི་དྲ་བ་རྣམ་པར་བཟློག །མཐོ་རིས་མྱ་ངན་འདས་ལ་སེམས་ཅན་འགོད། །ཐམས་ཅད་མཁྱེན་པའི་ས་ཡང་རྣམ་པར་སྟོན། །འཇིག་རྟེན་སྐྱེ་གནས་ཐམས་ཅད་མ་ལུས་པར། །ཁ་དོག་མཐའ་ཡས་ལུས་མང་བསམ་ཡས་པ། །བསམ་པ་བཞིན་དུ་ཆོས་རྣམས་རྗོད་བྱེད་དེ། །དེ་དག་སེམས་ཅན་ཀུན་གྱི་གཟུགས་བརྙན་གཟུགས། །འདི་དང་གཞན་དག་ཚད་ལས་འདས༌པ་ཡི། །ཡོན་ཏན་རྒྱ༌མཚོ་ཞིང་མང་རྒྱ་མཚོ་ཡི། །རྡུལ་ཕྲན་རབ་སྙེད་བསམ་གྱིས་མི་ཁྱབ་པ། །རྣམ་ཐར་ཞི་བ་འདི་ལྡན་ཐོབ་པར་འགྱུར། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཇི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་འཇིག་རྟེན་ཐམས་ཅད་ཀྱི་ལམ་གྱི་རྒྱུད་ལས་འདས་པ། འཇིག་རྟེན་གྱི་སྐྱེ་གནས་ཐམས་ཅད་དུ་གཟུགས་བརྙན་རབ་ཏུ་འབྱུང་བ། འཇིག་རྟེན་གྱི་ཤེས་པ་ཐམས་ཅད་ལས་ཡང་དག་པར་འདས་པ། ཤེས་བྱའི་སྒྲིབ་པ་ཐམས་ཅད་ཀྱི་རི་རྣམ་པར་འཐོར་བ་ལ་བརྩོན་པ། ཆོས་ཐམས་ཅད་ཀྱི་རང་བཞིན་དང་། མཚན་ཉིད་རབ་ཏུ་རྟོགས་པ་ཉོན་མོངས་པའི་སྒྲིབ་པ་དང་། མུན་པ་ཐམས་ཅད་རྣམ་པར་སེལ་བ་ལ་བརྩོན་པ། ཆོས་ཐམས་ཅད་རབ་ཏུ་དཔྱད་པས་མངོན་པར་བསྒྲུབ་པ་ལ་མཁས་པ། བདག་མེད་པའི་ཆོས་མངོན་ཏུ་གྱུར་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་རྒྱུན་མི་གཅོད་པ། ཆོས་ཀྱི་དབྱིངས་ཀྱི་ཚུལ་གཉིས་སུ་མེད་པར་རབ་ཏུ་རྟོགས་པ་དག་གི་ལམ་གྱི་ཚུལ་རྒྱ་མཚོ་ཐམས་ཅད་ཀྱི་རྗེས་སུ་འབྲང་བའི་བློ་དང་ལྡན་པ། དེ་དག་གི་སྤྱོད་པ་ཤེས་པའམ། ཡོན་ཏན་རྒྱ་མཚོ་ལ་འཇུག་པའམ། ཡེ་ཤེས་ཀྱི་རྣམ་པར་གནོན་པ་ཡོངས་སུ་ཤེས་པར་བྱ་བའམ། སེམས་ཀྱི་གནས་ཁོང་དུ་ཆུད་པར་བྱ་བའམ། ཏིང་ངེ་འཛིན་ལ་དབང་བསྒྱུར་བ་རྟོགས་པར་བྱ་བའམ། རྣམ་པར་ཐར་པས་རྣམ་པར་འཕྲུལ་པ་ཡོངས་སུ་ཤེས་པར་བྱ་བར་ནུས་རེ་སྐན། སོང་རིགས་ཀྱི་བུ་འཛམ་བུའི་གླིང་འདི་ཉིད་ཀྱི་ལུམ་བི་ནིའི་ནགས་ཚལ་ན། ལུམ༌བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན་པ་དང་། ཇི་ལྟར་ན་འཇིག་རྟེན་རྣམས་ལ་སྣང་བར་བྱེད་པར་འགྱུར་བ་དང་། ཇི་ལྟར་ན་ཕྱི་མའི་མཐའི་བསྐལ་པའི་མུར་ཐུག་པར་བྱང་ཆུབ་སེམས་དཔའི་སྤྱོད་པ་སྤྱད་པས་མི་སྐྱོ་བར་འགྱུར་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་ཀྱིས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཐལ་མོ་སྦྱར་ཏེ་ཕྱིར་ལྟ་ཞིང་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོ་དགའ་བའི་དཔལ་ཞེས་བྱ་བས་ལྷ་མོ་སྒྱུ་འཕྲུལ་གྲོང་ཁྱེར་ཆེན་མོ་དང་རང་གི་སྐྱེ་བ་སྔ་མའི་མཛད་པ་བསྟན་པའི་སྐོར། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་ཀྱི་གདམས་ངག་དེ་རྗེས་སུ་དྲན་པར་བྱེད་ཅིང་། བྱང་ཆུབ་སེམས་དཔའི་རྣམ་པར་ཐར་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བས་བསམ་པ་ཅི་ལྟ་བ་བཞིན་དུ་དགེ་བའི་རྩ་བ་ལ་ཡང་དག་པར་བསྐུལ་བ་དེ་ལ་ཡོངས་སུ་བསྒོམ་པ་དང་། ཁོང་དུ་ཆུད་པར་བྱ་བ་དང་། རྒྱ་ཆེར་བྱེད་ཅིང་མཐར་གྱིས་ལུམ་བི་ནིའི་ནགས་ཚལ་གང་ན་བ་དེར་ཕྱིན་ཏེ། ལུམ་བི་ནིའི་ནགས་ཚལ་ལ་གཡས་ཕྱོགས་སུ་བསྐོར་བ་བྱས་ནས། ལུམ་བི་ནིའི་ནགས་ཚལ༌གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ཡོངས་སུ་ཚོལ་ཚོལ་བ་ལས། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལུམ་བི་ནིའི་ནགས་ཚལ་ན་རིན་པོ་ཆེའི་ཤིང་གི་ཡལ་ག་ཐམས་ཅད་ཀྱི་དཀྱིལ་འཁོར་གྱི་ཁྱིམ་བརྩེགས་པ་ཞིག་ན། སེངྒེའི་ཁྲི་རིན་པོ་ཆེའི་པདྨོའི་སྙིང་པོ་ཅན་ཞིག་ལ་འདུག་ཅིང་། ནགས་ཚལ་གྱི་ལྷ་མོ་ཁྲག་ཁྲིག་བརྒྱ་སྟོང་ཕྲག་ཉི་ཤུའི་འཁོར་གྱིས་ཀུན་ནས་བསྐོར་ཏེ། མདུན་དུ་བྱས་ནས་ཆོས༌བསྟན་ཏེ། བྱང་ཆུབ་སེམས་དཔའ་ཐམས་ཅད་ཀྱི་སྐྱེ་བ་རྒྱ་མཚོ་ཤིན་ཏུ་བསྟན་པ་ཞེས་བྱ་བའི་མདོ་སྡེ་ཡོངས་སུ་སྟོན་ཅིང་དེ་བཞིན་གཤེགས་པའི་རིགས་ཀྱི་རྒྱུད་དུ་རིགས་དང་ལྡན་པར་སྐྱེས་པའི་བྱང་ཆུབ་སེམས་དཔའ་རྣམས་ཀྱི་ཡོན་ཏན་རྒྱ་མཚོའི་ཤུགས་རྣམ་པར་འཕེལ་བར་བྱེད་ཅིང་འདུག་པ་མཐོང་ནས། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གང་ན་བ་དེར་སོང་སྟེ་ཕྱིན་ནས། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ནས། མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་ན་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་བྱུང་བ་ལགས་པའང་མ་འཚལ། ཇི་ལྟར་ན་བྱང་ཆུབ་སེམས་དཔའ་རྣམས་སྤྱོད་པ་ལ་སྤྱོད་ཅིང་སེམས་ཅན་རྣམས་ལ་སྣང་བ་འབྱིན་པར་འགྱུར་བ་ཡང་མ་འཚལ་ཏོ། །

དེ་སྐད་ཅེས་སྨྲས་པ་དང་། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེ་བ་སྟེ། དེ་དག་དང་ལྡན་ན་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་སྐྱེས་པ་ཡིན་ནོ། །

དེ་དག་ལས་བྱུང་ན་བྱང་ཆུབ་སེམས་དཔའ་རྣམས་སེམས་ཀྱི་སྐད་ཅིག་རེ་རེ་ལའང་བྱང་ཆུབ་སེམས་དཔའི་དགེ་བའི་རྩ་བས་རྣམ་པར་འཕེལ་བར་འགྱུར་ཏེ།

ཐོགས་པ་མེད་པ་དང་ཞུམ་པ་མེད་པ་དང་། ཕྱིར་ལྡོག་པ་མེད་པ་དང་། རྒྱུན་གཅོད་པ་མེད་པ་དང་། ཡོངས་སུ་སྐྱོ་བ་མེད་པ་དང་། སྒྱིད་ལུག་པར་འགྱུར་བ་མེད་པ་དང་། ཉམས་པར་འགྱུར་བ་མེད་པ་དང་། ཉམས་དམའ་བར་འགྱུར་བ་མེད་པ་དང་། ཡོངས་སུ༌ཡི་འཆད་པར་འགྱུར་བ་མེད་པ་དང་། ཆུད་ཟ་བར་འགྱུར་བ་མེད་པ་དང་། ཐམས་ཅད་མཁྱེན་པ་ཉིད་ཀྱི༌ཕྱོགས་ཀྱི་རྗེས་སུ་འབྲང་བར་འགྱུར་བ་དང་། ཆོས་ཀྱི་དབྱིངས་ཀྱི་ཚུལ་ལ་ཡོངས་སུ་གཞོལ་བར་འགྱུར་བ་དང་། སངས་རྒྱས་ཀྱི་བྱང་ཆུབ་ཏུ་ཡོངས་སུ་སྨིན་པ་འཐོབ་པར་འགྱུར་བ་དང་། བྱང་ཆུབ་སེམས་དཔའི་སེམས་བསྐྱེད་པ་ཤིན་ཏུ་ཡངས་པར་འགྱུར་བ་དང་། ཕ་རོལ་ཏུ་ཕྱིན་པ་ཐམས་ཅད་ཀྱིས་རྣམ་པར་འཕེལ་བར་འགྱུར་བ་དང་། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་རྣམ་པར་ལྡོག་པར་འགྱུར་བ་དང་། དེ་བཞིན་གཤེགས་པའི་སར་ཡོངས་སུ་གྲུབ་པར་འགྱུར་བ་དང་། ཡེ་ཤེས་ཀྱིས་མངོན་པར་ཤེས་པ་ཤིན་ཏུ་བྱང་བར་འགྱུར་བ་དང་། སངས་རྒྱས་ཀྱི་ཆོས་མངོན་དུ་འགྱུར་བ་དང་། ཐམས་ཅད་མཁྱེན་པའི་ཡུལ་གྱི་དོན་དང་ལྡན་པར་འགྱུར་བའོ། །བཅུ་གང་ཞེ་ན་འདི་ལྟ་སྟེ། སངས་རྒྱས་ཐམས་ཅད་ལ་བསྙེན་བཀུར་བའི་སྨོན་ལམ་གྱིས་སྦྱོར་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་དང་པོའོ། །

བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་འགྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་གཉིས་པའོ། །ཆོས་ཀྱི་ཚུལ་ལ་ངེས་པར་རྟོགས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་གསུམ་པའོ། །དུས་གསུམ་སྣང་བར༌བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བཞི་པའོ། །ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་ལྔ་པའོ། །དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་དྲུག་པའོ། །དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བདུན་པའོ། །ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བརྒྱད་པའོ། །ཆོས་ཀྱི་དབྱིངས་སྤྲུལ་པས་བརྒྱན༌པར་བྱེད་པའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ༌དགུ་པའོ། །

དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་དྲག་པོའི་སྙིང་པོ་ཞེས་བྱ་བ་ནི་བྱང་ཆུབ་སེམས་དཔའི་སྐྱེ་བ་བཅུ་པའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་སྐྱེ་བ་དང་པོ་སངས་རྒྱས་ཐམས་ཅད་ལ་བསྙེན་བཀུར་བའི་སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཐོག་མར་སངས་རྒྱས་མཆོད་ཅིང་རིམ་གྲོ་བྱ་བ་ལ་འཇུག་སྟེ། དེ་སངས་རྒྱས་བཅོམ་ལྡན་འདས་རྣམས་ལ་རིམ་གྲོ་དང་། བཀུར་སྟི་དང་། བསྟི་སྟང་དང་། མཆོད་པ་བྱེད་ཅིང་བསྙེན་བཀུར་བྱེད་དེ། དགྱེས་པར་བྱེད་ལ་ཐུགས་བྱུང་བར་མི་བྱེད་པས། དེ་བཞིན་གཤེགས་པའི་ཞལ་བལྟ་བས་མི་ངོམས་པ་སངས་རྒྱས་ལ་རིམ་གྲོ་བྱ་བར་བརྩོན་པ་སངས་རྒྱས་ལ་དགའ་བའི་ཤུགས་ཀྱིས་རྣམ་པར་སྤེལ་བའི་ཤུགས་དང་ལྡན་པ། དེ་བཞིན་གཤེགས་པ་མཐོང་བས་མོས་པའི་ཤུགས་དྲག་པོ་ཡོངས་སུ་སྐྱེས་པ། དེ་ཕྱིར་མི་ལྡོག་པའི་དད་པས་བསོད་ནམས་ཡོངས་སུ་སྡུད་པའི་ཚེ། དེ་བཞིན་གཤེགས་པ་ཐམས་ཅད་ལ་མཆོད་པའི་ཚོགས་ཡོངས་སུ་བསྡུ་བ་ལ་བརྩོན་ཞིང་སྦྱོར་བ་རྒྱུན་མི་གཅོད་པ་ཡིན་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའ་རྣམས་ཀྱི་སྐྱེ་བ་དང་པོ། སངས་རྒྱས་ཐམས་ཅད་ལ་བསྙེན་བཀུར་བའི་སྨོན་ལམ་གྱི་སྦྱོར་བའི་སྙིང་པོ་ཞེས་བྱ་བ་སྟེ། ཐམས་ཅད་མཁྱེན་པ་ཉིད་ཀྱི་ཚོགས་དགེ་བའི་རྩ་བ་ཡོངས་སུ་འགྲུབ༌པ་ཡང་དག་པར་སྡུད་པར་འགྱུར་བའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའི་སྐྱེ་བ་གཉིས་པ། བྱང་ཆུབ་ཀྱི༌སེམས་ཀྱི་ཡན་ལག་ཡོངས་སུ་གྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་ལྟར་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སེམས་དང་། ཤིན་ཏུ་དགྱེས་པར་བྱ་བའི་ཕྱིར་སངས་རྒྱས་ཐམས་ཅད་བསྙེན་བཀུར་བའི་སེམས་དང་། དངོས་པོ་ཐམས་ཅད༌ལ་ཕོངས་པར་མི་བརྩི་བའི་ཕྱིར། སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་སེམས་དང་། ཐམས་ཅད་མཁྱེན་པ་ཉིད་མངོན་དུ་འགྱུར་བར་བྱ་བའི་ཕྱིར། བྱམས་པ་ཆེན་པོའི་སེམས་དང་། འགྲོ་བ་ཐམས་ཅད་ཡོངས་སུ་བསྡུ་བའི་སྦྱོར་བས་རྒྱས་པར༌དགང་བའི་ཕྱིར་བྱམས་པ་ཆེན་པོའི་སེམས་དང་། ཐམས་ཅད་མཁྱེན་པ་ཉིད་ཀྱི་གོ༌ཆ་བརྟན་པར་བྱ་བའི་ཕྱིར་འགྲོ་བ་ཐམས་ཅད་ཡོངས་སུ་མི་གཏོང་བའི་སེམས་དང་། ཡང་དག་པ་ཇི་ལྟ་བ་བཞིན་དུ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་གཡོ་དང་སྒྱུ་མེད་པའི་སེམས་དང་། བྱང་ཆུབ་སེམས་དཔའི་ལམ་ལ་ནན་ཏན་དུ་བྱ་བའི་ཕྱིར་ཁ་འོག་ཏུ་ལུས་ཁྲུས་པའི་སེམས་དང་། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་དང་། མི་འགལ་བར་བྱ་བའི་ཕྱིར། སངས་རྒྱས་ཐམས་ཅད་ལ་སྐུ་བསླུ་བ་མེད་པའི་སེམས་དང་། ཕྱི་མའི་མཐའི་མུར་ཐུག་པར་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་རྒྱུན་མི་གཅད་པའི་ཕྱིར་ཐམས་ཅད་མཁྱེན་པ་ཉིད་དུ་སྨོན་ལམ་ཆེན་པོ་འདེབས་པའི་སེམས་དང་། དེ་དག་ལ་སོགས་པ་བྱང་ཆུབ་ཀྱི་སེམས་ཀྱི་ཡན་ལག་གི་ཚོགས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཡོངས་སུ་རྫོགས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་རིགས་སུ་སྐྱེས་པ་ཡིན་ཏེ། རིགས་ཀྱི་བུ་དེ་ནི་བྱང་ཆུབ་སེམས་དཔའི་སྐྱེ་བ་གཉིས་པ། བྱང་ཆུབ་ཀྱི་སེམས་ཀྱི་ཡན་ལག་ཡོངས་སུ་འགྲུབ་པར་འགྱུར་བ་འབྱུང་བའི་སྙིང་པོ་ཞེས་བྱ་བའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ངེས་པར་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཆོས༌ཐམས་ཅད་ཀྱི་ཚུལ་རྒྱ་མཚོ་ཡོད་དོ་ཅོག་ངེས་པར་རྟོགས་པས་མངོན་དུ་བྱ་བའི་སེམས་དང་ལྡན་པ་ཐམས་ཅད་མཁྱེན་པའི་ལམ་གྱི་རྣམ་པ་ཡོངས་སུ་རྫོགས་པར་བྱ་བས་མངོན་དུ་བྱ་བར་གཅིག་ཏུ་སེམས་པའི་སེམས་དང་ལྡན་པ། ཁ་ན་མ་ཐོ་བ་མེད་པའི་ལས་ལ་ཡང་དག་པར་སྤྱད་པར་སེམས་པའི་སེམས་དང་ལྡན་པ། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ཡོངས་སུ་དག་པར༌བྱ་བས་མངོན་དུ་བྱ་བའི་སེམས་དང་ལྡན་པ་བྱང་ཆུབ་སེམས་དཔའི་ཡོན་ཏན་ཐམས་ཅད་ལ་ནན་ཏན་དུ་བྱ་བས་ཡོངས་སུ་གྲུབ་པར་བྱ་བའི་སེམས་དང་ལྡན་པ། བྱང་ཆུབ་སེམས་དཔའི་ལམ་གྱི་རྒྱན་ཐམས་ཅད་མངོན་པར་བསྒྲུབ་པའི་སེམས་དང་ལྡན་པ། ཐམས་ཅད་མཁྱེན་པ་ཉིད་དུ་དམིགས་པའི་ཚོགས་རྒྱ་ཆེན་པོ་ཡོངས་སུ་བསྒྲུབ་པ་བསྐལ་པའི་མེ་འབར་བས་ཀྱང་། རྒྱུན་མི་གཅད་པར་བརྩོན་པར་བྱ་བའི་སེམས་དང་ལྡན་པ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་རབ་ཏུ་ཞུགས་པས། བྱང་ཆུབ་སེམས་དཔའི་སྤྱོད་པ་ཀུན་ཏུ་བཟང་པོ་མངོན་པར་བསྒྲུབ་པའི་སེམས་དང་ལྡན་པ། ཡོངས་སུ་སྤྱོད་པའི་ཚུལ་ཐམས་ཅད་ལ༌རབ་ཏུ་ཞུགས་པ་ནི་བྱང་ཆུབ་སེམས་དཔའི་ཡོན་ཏན་ཡོངས་སུ་རྫོགས་པར་བྱ་བ་ལ་དངོས་པོ་ཐམས་ཅད་རྣམ་པར་བསྒོམ་པས་དངོས་པོ་མེད་པའི་ཚུལ་ལ་ཞུགས་པའི་སེམས་དང་ལྡན་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའི་སྐྱེ་བ་གསུམ་པ་ཆོས་ཀྱི་ཚུལ་ལ་ངེས་པར་རྟོགས་པས་གཞག་པའི་སྦྱོར་བའི་ཚུལ་མངོན་དུ་གྱུར་པ་འབྱུང་བའི་སྙིང་པོ་ཞེས་བྱ་བའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང༌བར་བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའི་ལྷག་པའི་བསམ་པའི་དབྱིངས་ལ་གྱ་ནོམ་པར་ཡོངས་སུ་དག་པ་ཡིན། སངས་རྒྱས་ཀྱི་བྱང་ཆུབ་ལ་སྣང་བ་རབ་ཏུ་ཐོབ་པ་ཡིན། བྱང་ཆུབ་སེམས་དཔའི་ཚུལ་རྒྱ་མཚོ་ལ་རབ་ཏུ་ཞུགས་པ་ཡིན། བསམ་པ་བརྟན་པ་རྡོ་རྗེའི་ཁམས་ལྟ་བུས་ཡོངས་སུ་ཟིན་པའི་སེམས་དང་ལྡན་པས་ཤིན་ཏུ་བརྟན་པ་ཡིན། སྲིད་པའི་ལམ་གྱི་རྒྱུད་དུ་སྐྱེ་བ་ལས་ཕྱིན་ཕྱོགས་སུ་ཕྱོགས་པ་ཡིན། དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་ཡོངས་སུ་གྲུབ་པར་བྱ་བ་ལ་མངོན་དུ་གྱུར་པ་ཡིན། བྱང་ཆུབ་སེམས་དཔའི་དབང་པོ་རྣམ་པར་སྤེལ་བ་ལ་ཁྱད་པར་དུ་འབོགས་པ་རབ་ཏུ་ཐོབ་པ་ཡིན། ལྷག་པའི་བསམ་པ་ཤིན་ཏུ་འོད་གསལ་བར་བྱ་བའི་ཕྱིར་སེམས་ཤིན་ཏུ་དགེ་བ་ཡིན། སྨོན་ལམ་བརྟན་ཞིང་རྒྱ་ཆེ་བ་རྣམ་པར་འཕེལ་བར་བྱ་བ་ལ་མི་གཡོ་བ་ཡིན། སྒྲིབ་པ་ཐམས་ཅད་ཀྱི་རི་རྣམ་པར་གཏོར་བའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་དགོངས་པ་ཡིན། འགྲོ་བ་ཐམས་ཅད་ཉེ་བར་འཚོ་བས་མགོན་དུ་གྱུར་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཞི་པ་དུས་གསུམ་སྣང་བར་བྱ་བའི་ལྷག་པའི་བསམ་པ་རྣམ་པར་དག་པའི་སྙིང་པོ་ཞེས་བྱ་བའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་ལྔ་པ་ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་རབ་ཏུ་ཞུགས་པས་སྦྱོར་བ་ཕུན་སུམ་ཚོགས་པ་ཡིན། སྦྱིན་པ་ལྷུག་པར་གཏོང་བས་དངོས་པོའི་འདུ་ཤེས་ཐམས་ཅད་ལས་གྱེན་དུ་འཕགས་པ་ཡིན། ཚུལ་ཁྲིམས་མཐའ་ཡས་པས་མཐའ་ལས་རྒལ་བར་རྣམ་པར་དག་པ་ཡིན། སངས་རྒྱས་ཀྱི་ཆོས་ཐམས་ཅད་ལ་བཟོད་པའི་སྣང་བ་རབ་ཏུ་ཐོབ་པས། དེ་བཞིན་གཤེགས་པའི་ཡུལ་ལ་གནས་པའི་བཟོད་པ་དང་ལྡན་པ་ཡིན། ཐམས་ཅད་མཁྱེན་པ་ཉིད་དུ་ཡངས་པར་འབྱུང་བ་ལ་ཞུགས་པས་བརྩོན་འགྲུས་ཆེན་པོ་དང་ལྡན་པ་ཡིན། སྒོ་ཀུན་ཏུ་ལྟ་བའི་ཏིང་ངེ་འཛིན་གྱི༌ཡེ་ཤེས་ཀྱི་དཀྱིལ་འཁོར་རྣམ་པར་དག་པས་བསམ་གཏན་ལ་རབ་ཏུ་བརྩོན་པ་ཡིན། ཆོས་སྣང་བ་ཐམས་ཅད་རབ་ཏུ་ཐོབ་པས་ཤེས་རབ་ཀྱི་མཐུའི་འོད་དང་ལྡན་པ་ཡིན། སངས་རྒྱས་བལྟ་བ་རྒྱ་མཚོ་རྣམ་པར་དམིགས་པར་བྱ་བ་ལ་ཞུགས་པས་ཐོགས་པ་མེད་པའི་མིག་དང་ལྡན་པ་ཡིན། འཇིག་རྟེན་ཐམས་ཅད་ཡོངས་སུ་ཚིམ་པར་བྱེད་པས། ཆོས་ཐམས་ཅད་ཀྱི་དེ་ཁོ་ན་ཉིད་ལ་དབང་བསྒྱུར་བས་སྨོས་པ་ཡིན། ཆོས་ཀྱི་ཚུལ་ཡང་དག་པ་ཇི་ལྟ་བ་བཞིན་དུ་ཐོབ་པར་བྱ་བ་ལ་རབ་ཏུ་བརྩོན་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་ལྔ་པ་ཀུན་ནས་སྣང་བའི་འོད་ཀྱི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་པ་དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བ་གང་ཞེ་ན།

རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བ་ཡིན། དེ་བཞིན་གཤེགས་པའི་རྒྱུད་དུ་སྐྱེས་པ་ཡིན། ཚུལ་གྱི་སྒོ་ཐམས་ཅད་ལ་ཤིན་ཏུ་གྲུབ་པ་ཡིན། འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་རྣམས་ཀྱི་སྨོན་ལམ་ཆེན་པོ་རྣམ་པར་དག་པ་ཡིན། དེ་བཞིན་གཤེགས་པ་ཐམས་ཅད་ཀྱི་དགེ་བའི་རྩ་བ་ལ་རང་བཞིན་གཅིག་པའི་དགེ་བའི་རྩ་བར་གྱུར་པ་ཡིན། སངས་རྒྱས་ཐམས་ཅད་དང་ལུས་གཅིག་ཏུ་གྱུར་པ་ཡིན། ཆོས་དཀར་པོས་འཇིག་རྟེན་གཞན་དུ་འགྲོ་བ་ཡིན། སངས་རྒྱས་ཀྱི་བྱིན་གྱི་རླབས་ཡོངས་སུ་བསྟན་པའི་ཏིང་ངེ་འཛིན་ལ་བདག་ཉིད་ཆེ་བའི་ཆོས་ཀྱིས་རྣམ་པར་སྤྱོད་པ་ཡིན། དུས་ལ་ཇི་ལྟར་བབ་པ་བཞིན་དུ་སེམས་ཅན་རྣམ་པར་དག་པར་བྱ་བའི་ཆོས་ལ་ཞུགས་པ་ཡིན། སངས་རྒྱས་ཀྱི་ཆོས་ཡོངས་སུ༌དྲིས་པ་ལ་སྤོབས་པ་རྒྱུན་མི་འཆད་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དྲུག་པ་དེ་བཞིན་གཤེགས་པའི་རིགས་ཀྱི་རྒྱུད་དུ་འབྱུང་བའི་སྙིང་པོ་ཞེས་བྱ་བའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་སངས་རྒྱས་ཀྱི་སྟོབས་ལ་འཇུག་པའི་སྣང་བས་སངས་རྒྱས་ཀྱི་ཞིང་དུ་འགྲོ་བ་ལས་ཕྱིར་མི་ལྡོག་གོ །བྱང་ཆུབ་སེམས་དཔའི་ཡོན་ཏན་རྒྱ་མཚོ་ལས་ཕྱིར་མི་འགྱུར་རོ། །ཆོས་ཐམས་ཅད་སྒྱུ་མའི་རྣམ་པ་ལྟར་ཡང་དག་པ་ཇི་ལྟ་བ་བཞིན་དུ་ཤེས་པར་བྱ་བ་ལ་གནས་པས་ཡོངས་སུ༌ཡི་ཆད་པར་མི་འགྱུར་རོ། །འཇིག་རྟེན་ཐམས་ཅད་རྨི་ལམ་ལྟ་བུར་རབ་ཏུ་རྟོགས་པར་བྱེད་དོ། །གཟུགས་སུ་རྣམ་པར་དམིགས་པའི་གནས་ཐམས་ཅད་གཟུགས་བརྙན་ལྟ་བུར་མངོན་པར་སྒྲུབ་བོ། །

མངོན་པར་ཤེས་པས་རྣམ་པར་འཕྲུལ་པ་སྤྲུལ་པ་ལྟ་བུ་ལ་དབང་རབ་ཏུ་ཐོབ་པར་བྱེད་དོ། །སྲིད་པ་ཐམས་ཅད་དུ་སྐྱེ་བ་གྲིབ་མ་ལྟ་བུར་གདོད་རབ་ཏུ་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲ་བརྙན་ལྟ་བུར་རབ་ཏུ་ཤེས་སོ། །ཐབས་ཀྱི་ཚུལ་དོན་སྣ་ཚོགས་དང་ལྡན་པ་ལ་རབ་ཏུ་བརྩོན་པས་ཆོས་ཀྱི་དབྱིངས་ཀྱི་ཚུལ་རབ་ཏུ་བསྟན་པ་ལ་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བདུན་པ་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་འོད་སྣང་བའི་རྒྱན་གྱི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བརྒྱད་པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བ་གང་ཞེ་ན། རིགས་ཀྱི་བུ་འདི་ལ་བྱང་ཆུབ་སེམས་དཔའ་གཞོན་ནུར་གྱུར་ཅིང་བྱང་ཆུབ་སེམས་དཔའི་རྣམ་པར་དགོད་པ་ལ་རྣམ་པར་གནས་པ་ཡིན་ཏེ། དེ་ལ་གནས་ནས་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ལ་རྣམ་པར༌དཔྱོད་དེ། ཡེ་ཤེས་ཀྱི་ཚུལ་གྱི་སྒོ་རེ་རེ་ལ་ཡང་བྱང་ཆུབ་སེམས་དཔའི་སྤྱོད་ཡུལ་ཚད་མེད་པ་ཡོངས་སུ་སྟོན་པས་བསྐལ་པ་ཚད་མེད་པ་ཟད་པར་འགྱུར་རོ། །

བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལའང་ཕ་རོལ་ཏུ་ཕྱིན་པའི་དམ་པས་དབང་དུ་འགྱུར་ཏེ། སེམས་ཀྱི་སྐད་ཅིག་རེ་རེ་ཞིང་སེམས་ཀྱི་སྐད་ཅིག་ཐམས་ཅད་ལ་ཡང་ཕྱོགས་བཅུའི་སངས་རྒྱས་ཀྱི་ཞིང་བརྗོད་དུ་མེད་པ་དག་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་སྐྱེས་ཏེ། དམིགས་པ་ཐ་མི་དད་པས་ཐ་མི་དད་པའི་ཏིང་ངེ་འཛིན་ལ་སྙོམས་པར་འཇུག་གོ །ཐ་མི་དད་པའི་ཆོས་རྣམས་ལ་ཐ་དད་པའི་ཡེ་ཤེས་ཀྱི་དབང་ཡོངས་སུ་སྟོན་ཏོ། །དམིགས་པ་བརྗོད་དུ་མེད་པ་དག་ཀྱང་སྒྲིབ་པ་མེད་པའི་དབྱིངས་སུ་ནོན་པར་བྱེད་དོ། །དམིགས་པ་ཆུང་ངུས་ཀྱང་མཐའ་ཡས༌པར་བསྟན་པའི་ས་ལ་ཡོངས་སུ་འཇུག་གོ ། ཆོས་ཉིད་ཚད་མེད་པ་ཡང་ཆུང་བའམ། ཆེ་བར་ཁོང་དུ་ཆུད་པར་བྱེད་དོ། །འཇིག་རྟེན་ཐམས་ཅད་ཀྱང་རྣམ་པར་དམིགས་པ་དང་མཉམ་པར་རབ་ཏུ་རྟོགས་པར་བྱེད་དོ། །ཆོས་ཀྱི་དམིགས་པ་ཐམས་ཅད་དང་། རྣམ་པར་ཤེས་པའི་རྒྱུད་ཐམས་ཅད་ཀྱང་བསྒོམས་པས་ཁོང་དུ་ཆུད་པར་བྱེད་དོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བརྒྱད་པ་ཡེ་ཤེས་ཀྱི་སྒོ་ཀུན་ནས་རྣམ་པར་དཔྱད་པས་ཡོངས་སུ་འགྲུབ་པ་འབྱུང་བའི་སྙིང་པོ་ཞེས་བྱ་བའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་ཆོས་ཀྱི་དབྱིངས་སྤྲུལ་པས་བརྒྱན་པར་བྱེད་པའི་སྙིང་པོ་ཞེས་བྱ་བ་གང་ཞེ་ན།

རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་ཀྱི་སྐད་ཅིག་ཐམས་ཅད་ལ་རྒྱན་སྣ་ཚོགས་དང་། རྒྱན་དུ་མར་ལྡན་པའི་སངས་རྒྱས་ཀྱི་ཞིང་བྱིན་གྱིས་རློབ་སྟེ། སྤྲུལ་པ་ཐམས་ཅད་ལ་མི་འཇིགས་པའི་ཕ་རོལ་ཏུ་ཕྱིན་པའི་དམ་པ་ཐོབ་པ་ཡིན། སངས་རྒྱས་ཀྱི་སྤྲུལ་པ་ཐམས་ཅད་ལ་ཤིན་ཏུ་མཁས་པར་གྱུར་པ་ཡིན། ཆོས་ཀྱི་སྤྲུལ་པ་ལ་མི་འཇིགས་པ་རྣམ་པར་དག་པ་ཡིན། ཆོས་ཀྱི་དབྱིངས་དམ་པ་ཆགས་པ་མེད་པའི་སྤྱོད་ཡུལ་དང་ལྡན་པ་ཡིན། བསམ་པ་ཇི༌ལྟ་བ་བཞིན་དུ་སེམས་ཅན་གྱི་ལུས་རྣམ་པར༌དམིགས་པར་བྱ་བའི་བྱིན་གྱི་རླབས་ལ་མཁས་པ་ཡིན། སེམས་ཅན་གདུལ་བ་ལ་མཁས་པ་བསམ་གྱིས་མི་ཁྱབ་པ་དང་ལྡན་པ་ཡིན། སྤྱོད་པ་སྣ་ཚོགས་ཀྱི་མངོན་པར་འཚང་རྒྱ་བ་ཡོངས་སུ་སྟོན་པ་ཡིན། ཐམས་ཅད་མཁྱེན་པ་ཉིད་ཀྱི་ལམ་སྒྲིབ་པ་མེད་པ་མངོན་པར་བསྒྲུབ་པ་ལ་མཁས་པ་ཡིན། དེའི་རྒྱུད་ཀྱི་ཆོས་ཀྱི་འཁོར་ལོ་བསྐོར་བ་ལ་མཁས་པ་ཡོངས་སུ་སྟོན་པ་ཡིན། སེམས་ཅན་མཐའ་དང་དབུས་མེད་པ་གདུལ་བའི་ཐབས་མངོན་པར་བསྒྲུབ་པ་ལ་མཁས་པ་ཡིན། རྣམ་པར་སྣང་མཛད་ཀྱི་ཡེ་ཤེས་དབྱིག་ཏུ༌བྱ་བའི་མཛོད་དང་ལྡན་པས་སེམས་ཅན་གདུལ་བའི་དུས་ལ་བབ་ན་རྟག་ཏུ་སྟ་གོན་དུ་གནས་པ་ཡིན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་དགུ་པ་ཆོས་ཀྱི་དབྱིངས་སྤྲུལ་པས་བརྒྱན་པ་བྱེད་པའི་སྙིང་པོ་ཞེས་བྱའོ། །

རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་དྲག༌པོའི་སྙིང་པོ་ཞེས་བྱ་བ་གང་ཞེ་ན། འདི་ལ་བྱང་ཆུབ་སེམས་དཔའ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང་། རང་བཞིན་གཅིག་པའི་ཡུལ་ལ་དབང་བསྐུར་བ་ཡིན་ཏེ། འཇིག་རྟེན་གྱི་ཁམས་ཐམས་ཅད་འདབ་ཆགས་པའི་ཡུལ་ལ་རབ་ཏུ་འཇུག་པ་ཡིན། སེམས་ཅན་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའི་ཤི་འཕོ་དང་། སྐྱེ་བའི་སེམས་རྒྱུད་ཆགས་པར་འབྱུང་བ་ཡང་རབ་ཏུ་ཤེས་སོ། །བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་འདབ་ཆགས་པའི་ཡུལ་ཡང་རབ་ཏུ་ཤེས་སོ། །འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་ཐམས་ཅད་ཀྱི་མངོན་པར༌རྫོགས་པར་འཚང་རྒྱ་བ་འདབ་ཆགས་པ་ཡང་རབ་ཏུ་ཤེས་སོ། །ཆོས་ཐམས་ཅད་ཀྱི་རྒྱུད་འདབ་ཆགས་པ་ལ་མཁས་པར་བྱ་བ་ཡང་རབ་ཏུ་ཤེས་སོ། །བསྐལ་པ་འཇིག་པ་དང་འདུ་བ་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའ་དང་ད་ལྟར་བྱུང་བ་རྣམས་ཀྱང་མིང་དང་བཅས། ས་ཚིགས་དང་བཅས་པར་འདབ་ཆགས་པར་རབ་ཏུ་ཤེས་སོ། །སེམས་ཅན་ཚུལ་ཇི་ལྟ་བུར་ཡོངས་སུ་སྨིན་པར་བྱས་པ་དང་། དུས་ལ་གང་དུ་བབ་པ་རྣམས་ལ་མངོན་པར་རྫོགས་པར་འཚང་རྒྱ་བའི་རྒྱན་དང་། རྣམ་པར་འཚང་རྒྱ་བས་གདུལ་བར་བྱ་བ་ཡོངས་སུ་བསྟན་པའི་བྱིན་གྱིས་རླབས་ཀྱི་ཡེ་ཤེས་ཀྱང་མངོན་པར་སྒྲུབ་བོ། །སངས་རྒྱས་བྱུང་བ་ཐམས་ཅད་མངོན་པར་འཚང་རྒྱ་བའི་དྲུང་དུ་ཉེ་བར་འགྲོ་ཞིང་ཆོས་ཀྱི་འཁོར་ལོ་བསྐོར་བ་ལ་མཁས་པའི་ཚུལ་འདབ་ཆགས་པ་ཡང་། སེམས་ཅན་གྱི་ཁམས་མཐའ་དང་དབུས་མེད་པ་གདུལ་བའི་ཐབས་མངོན་པར་བསྒྲུབ་པ་ལ་མཁས་པས་ཡོངས་སུ་སྟོན་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་པ་དེ་བཞིན་གཤེགས་པའི་ས་ཡོངས་སུ་གནོན་པའི་ཤུགས་དྲག་པོའི་སྙིང་པོ་ཞེས༌བྱ་བའོ། །རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྐྱེ་བ་བཅུ་རྣམས་ཏེ། དེ་དག་གིས་བྱང་ཆུབ་སེམས་དཔའ་རྣམས་སྐྱེ་བར་འགྱུར་བའོ། །འབྱུང་བར་འགྱུར་བའོ། །ཡང་དག་པར༌སྒྲུབ་པར་བྱེད་པའོ། །ཡང་དག་པར་འཕེལ་བར་བྱེད་པའོ། །རབ་ཏུ་རྫོགས་པར་བྱེད་པའོ། །ཡོངས་སུ་གྲུབ་པར་བྱེད་པའོ། །ཞིང་མ་ལུས་པ་ཐམས་ཅད་ཁོང་དུ་ཆུད་པར་བྱ་བའི་ཕྱིར་རྒྱན་གཅིག་གི་ལྷབ་ལྷུབ་ལ་རྒྱན་དང་། ལྷབ་ལྷུབ་ཀྱི་རྒྱུད་རྣམ་པ་སྣ་ཚོགས་ཀྱི་བྱིན་གྱིས་རློབ་པའོ། །སེམས་ཅན་གྱི་ཁམས་གདུལ་བ་རྒྱུན་མི་གཅད་པའི་ཕྱིར་ཕྱི་མའི་མཐའི་བསྐལ་པའི་མུར་ཐུག་པར་བྱིན༌གྱིས་རླབས་ཀྱིས་རྒྱུན་འཆད་པ་མེད་པར་བྱེད་པའོ། །

ཆོས་རྒྱ་མཚོ་ཐམས་ཅད་ཀྱི་དམིགས་པ་སྣ་ཚོགས་དང་། ཤིན་ཏུ་བསྟན་པ་གཅིག་ནས་གཅིག་ཏུ་བརྒྱུད་པ་སྣ་ཚོགས་དུ་མ་རྣམ་པ་ཐ་དད་པ་དང་། ཆོས་མཐའ་ཡས་པ་གཅིག་ནས་གཅིག་ཏུ་བརྒྱུད་པའི་རྒྱུན་མངོན་པར་འཚང་རྒྱ་བར་བྱེད་པའོ། །སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་བསམ་གྱིས་མི་ཁྱབ་པ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས༌ཀྱི་མཐས་གཏུགས་པ་ཡོངས་སུ་སྟོན་པའོ། །སེམས་ཅན་ཚད་མེད་པ་སྤྱོད་པ་རྒྱ་མཚོ་སྣ་ཚོགས་དང་ལྡན་པ་ཡོངས་སུ་སྨིན་པར་བྱ་བ་དང་། གདུལ་བས་ཡོངས་སུ་འདུལ་བ་རྣམས་ལ་ཆོས་ཀྱི་འཁོར་ལོ་བསྐོར་བ་ཡོངས་སུ་བསྟན་པའོ། །སེམས་ཅན་གྱི་ཁམས་ཐམས་ཅད་སངས་རྒྱས་འབྱུང་བ་དང་མི་འབྲལ་བར་བྱིན་གྱིས་རློབ་པའོ། །ཆོས་ཐམས་ཅད་ཀྱི་སྤྲིན་དབྱངས་ཀྱི་ཡན་ལག་རྒྱ་མཚོ་བརྗོད་དུ་མེད་པས་རྣམ་པར་དག་པ་དམིགས་པ་ཐམས་ཅད་ལས་རབ་ཏུ་འབྱུང་བ་རྣམ་པར་དམིགས་པར་བྱེད་པའོ། །ཚད་མེད་པར་རྣམ་པར་སྤྱོད་པ་ལ་བསྒྲིབས་པ་མེད་པར་རྟོགས་པས་ཁོང་དུ་ཆུད་པ་རྣམས་ཆོས་ཡིད་དུ་འོང་བའི་རྒྱན་ཐམས་ཅད་དང་ལྡན་པའི་བྱང་ཆུབ་སེམས་དཔའི་དཀྱིལ་འཁོར་བསམ་པ་དང་། མོས་པ་གང་དང་ལྡན་པའི་ཚུལ་བཞིན་དུ་སེམས་ཅན་རྣམས་ལ་ཡོངས་སུ་སྟོན་པའོ། །སངས་རྒྱས་ཀྱི་ས་ཚད་མེད་པའི་རྗེས་སུ་སོང་བ་རྣམས་འཇིག་རྟེན་ཐམས་ཅད་ཡོངས་སུ་བསྒྲུབ་པའི་དོན་དུ་ཆོས་ཀྱི་མཛོད་མཐའ་དང་དབུས་མེད་པ་རབ་ཏུ་སྟོན་པའོ། །དེ་ནས་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས།

དེའི་ཚེ་བྱང་ཆུབ་སེམས་དཔའི་ཆོས་ཀྱི་དོན་འདི་ཉིད་གསལ་བར་བརྗོད་པའི་ཕྱིར་སངས་རྒྱས་ཀྱི་བྱིན་གྱིས་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་དེ་སྨྲས་པ། ལྷག་པའི་བསམ་པ་དྲི་མེད་རྙོག་པ་མེད་པ་ཡིས། །གང་རྣམས་རྒྱལ་བ་བལྟ་བས་ནམ་ཡང་མི༌ངོམས་ཤིང་། །རྒྱལ་བ་ཀུན་གྱི་ཕྱི་མའི་མཐའ་ཡི་རྒྱན་སྤྲིན་ལ། །སྨོན་པའི་མཁས་པ་དེ་དག་སྐྱེ་བའི་ཐོག་མ་གནས། །དུས་གསུམ་བྱུང་བའི་འཇིག་རྟེན་མ་ལུས་ཀུན་བཀང་སྟེ། །ཞིང་དང་སེམས་ཅན་དེ་བཞིན་ཆོས་དང་སངས་རྒྱས་རྣམས། །སེམས་ཅན་དགྲོལ་ཕྱིར་སྨོན་ལམ་འདེབས་པས་བརྒྱན་པའི་སེམས། །དེ་ནི་བསམ་གྱིས་མི་ཁྱབ་རྣམས་ཀྱི་སྐྱེ་བ་གཉིས། །གང་རྣམས་ཆོས་ཀྱི་སྤྲིན་འཐུང་ནམ་ཡང་མི་ངོམས་ཤིང་། །ངེས་པར་རྟོགས་པའི་ཡིད་ཀྱིས་དུས་གསུམ་ཆགས་མེད་ལུས། །མཁའ་དབྱིངས་དྲི་མེད་མཉམ་མེད་སེམས་ཀྱི་ལུས་ལྡན་པ། །མཚུངས་པ་མེད་པ་དེ་ནི་དེ་དག་སྐྱེ་བ་གསུམ། །ལྷག་པའི་བསམ་པ་རི་རབ་རྡོ་རྗེ་མཚུངས་བསྟན་པས། །ཐམས་ཅད་མཁྱེན་ཚུལ་རྒྱ་མཚོར་རྣམ་པར་འཇུག་བྱེད་ཅིང་། །གང་རྣམས་སྙིང་རྗེ་ཆེན་པོའི་གང་ཆེན་མཚོར་འཇུག་པ། །དེ་ནི་སྐྱེས་བུ་ཁྱུ་མཆོག་རྣམས་ཀྱི་སྐྱེ་བ་བཞི། །གང་རྣམས་བྱམས་པས་ཕྱོགས་བཅུ་རྒྱས་པར་ཡོངས་བཀང་ཞིང་། །ཕ་རོལ་ཕྱིན་པ་དྲི་མེད་རྒྱ་མཚོ་མངོན་བསྒྲུབས་ཏེ། །ཆོས་ཀྱི་འོད་འགྱེད་འགྲོ་བ་ཡོངས་སུ་སྨིན་བྱེད་པ། །དེ་ནི་སྐྱེས་བུ་ཆེན་པོ་དེ་དག་སྐྱེ་བ་ལྔ། །ཆོས་ཀྱི་རང་བཞིན་རབ་ཏུ་རྟོགས་པས་ཆགས་མེད་སེམས། །དུས་གསུམ་དཔེ་ཟླ་མེད་པའི་སངས་རྒྱས་རིགས་བྱུང་ཞིང་། །གང་རྣམས་ཆོས་དབྱིངས་རྒྱ་མཚོའི་ཚུལ་ལ་འཇུག་བྱེད་པ། །འདི་ནི་མཁས་པ༌དེ་དག་སྐྱེ་བ་ཡངས་པ་དྲུག །གང་རྣམས་ཆོས་ལུས་ཡོངས་དག་ཆགས་པ་མེད་པའི་སེམས། །ཞིང་རྣམས་མ་ལུས་རང་གི་ལུས་ཀྱིས་དགང་བྱས་ཤིང་། །སངས་རྒྱས་སྟོབས་རྣམས་མ་ལུས་ཁོང་དུ་ཆུད་རྟོགས་པ། །དེ་ནི་མཁས་པ་རྣམས་ཀྱི་སྐྱེ་བ་བསམ་ཡས་བདུན། །གང་རྣམས་ཡེ་ཤེས་རྒྱ་མཚོའི་ཚུལ་ལ་དབང་ལྡན་ཞིང་། །ཐམས་ཅད་མཁྱེན་པའི་སྒོ་ཚུལ་རྣམ་པར་དཔྱོད་བྱེད་ལ། །ཏིང་འཛིན་ཀུན༌ཚུལ་གང་ཆེན་མཚོ་ལ་ཡོངས་འཇུག་པ། །དེ་ནི་དེ་བཞིན་ཉིད་རྟེན་རྣམས་ཀྱི་སྐྱེ་བ་བརྒྱད། །གང་རྣམས་ཞིང་ཀུན་འབྱམས་ཀླས་ཡོངས་སུ་སྦྱོང་བྱེད་ཅིང་། །སེམས་ཅན་ཐམས་ཅད་ཡོངས་སུ་སྨིན་བྱེད་འདུལ་ལ་རབ་བརྩོན་ལ། །སངས་རྒྱས་རྣམ་པར་འཕྲུལ་པའི་རྒྱན་རྣམས་རྣམ་སྟོན་པ། །དེ་ནི་གྲགས་པ་ཆེན་པོ་རྣམས་ཀྱི་སྐྱེ་བ་དགུ། །གང་རྣམས་རྒྱལ་བའི་སྟོབས་རྣམས་ཇི་བཞིན་རབ་ཞུགས་ཏེ། །ཐམས་ཅད་མཁྱེན་པའི་ཤུགས་དྲག་ཡངས་པ༌རྣམ་སྤེལ་ཅིང་། །གང་རྣམས་ཆོས་དབྱིངས་གཞི་ཚུལ་ཐ་དད་ཆགས་མེད་པ། །དེ་ནི་རྒྱལ་སྲས་རྣམས་ཀྱི་སྐྱེ་བ་བཅུ་ཡིན་ནོ། །

རིགས་ཀྱི་བུ་སྐྱེ་བ་བཅུ་པོ་དེ་དག་གིས་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རིགས་སུ་སྐྱེའོ། །དེ་ལྟར་ན་འཇིག་རྟེན་ཐམས་ཅད་ལ་སྣང་བར་བྱེད་པ་ཡིན་ནོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན༌པ་ཐོབ་པའོ། །

སྨྲས་པ། འཕགས་མ་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད༌པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་བསྟན་པ་འདིའི་ཡུལ་ཇི་ལྟ་བུ་ཞིག་མཆིས། སྨྲས་པ། རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའ་ཐམས་ཅད་ཀྱི་སྐྱེ་བ་ཡོངས་སུ་ལྟ་ཞིང་། ཉེ་བར་འགྲོ་བའི་སྨོན་ལམ་ཡོངས་སུ་གྲུབ་པ་སྟེ། རིགས་ཀྱི་བུ་དེ་ལྟར་ཁོ་མོ་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྐྱེ་བ་རྒྱ་མཚོ་ཤིན་ཏུ་ཡངས་པ་ལ་འཇུག་ཅིང་ཁོང་དུ་ཆུད་པ་སྟེ། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བྱང་ཆུབ་སེམས་དཔའི་སྐྱེ་བ་ཁོང་དུ་ཆུད་པར་བྱེད་ཅིང་། གླིང་བཞི་པ་སྐལ་བ་དང་ལྡན་པའི་འཛམ་བུའི་གླིང་དེའི་ལུམ་བི་ནིའི་ནགས་ཚལ་དུ་བྱང་ཆུབ་སེམས་དཔའ་འབྱུང་བ་ཡོངས་སུ་བལྟ་བའི་དོན་དུ་སྔོན་གྱི་སྨོན་ལམ་གྱིས་སྐྱེས་ཏེ། ད་ལྟར་ཁོ་མོ་འདི་ན་བྱང་ཆུབ་སེམས་དཔའ་འབྱུང་བའི་རྗེས་སུ་དྲན་པ༌སྒོམ་ཞིང་རྣམ་པར་སྤྱོད་དོ། །དེ་ལྟར་ཁོ་མོ་འདི་ན་གནས་གནས་ཏེ། དེ་ཕན་ཆད་ལོ་བརྒྱ་ན་བཅོམ་ལྡན་འདས་དགའ་ལྡན་གྱི་ཕོ་བྲང་ནས་འཕོ་བར་འགྱུར་རོ་ཞེས་བྱ་བའི་ཚེ། ལུམ་བི་ནིའི་ནགས་ཚལ་འདིར་སྔོན་གྱི༌ལྟས་བཅུ་བྱུང་བར་གྱུར་ཏེ།

བཅུ་གང་ཞེ་ན། འདི་ལྟར་ལུམ་བི་ནིའི་ནགས་ཚལ་འདི་ཐམས་ཅད་མཐོ་དམན་མེད་ལ། ངམ་གྲོག་དང་། གཡང་ས་མེད་ཅིང་མཉམ་པར་གནས་པར་གྱུར་པ་འདི་ནི་སྔོན་གྱི་ལྟས་དང་པོ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་གསེག་མ་དང་། གྱོ་མོ་མེད་ལ་སྡོམ་དུམ་དང་ཚེར་མ་དང་བྲལ་ཏེ། སའི་གཞི་རྡོ་རྗེ་ལས་གྲུབ་པར་གྱུར་ནས། རིན་པོ་ཆེ་མང་པོས་ཡོངས་སུ་གང་བར་གནས་པར་གྱུར་པ་འདི་ནི་སྔོན་གྱི་ལྟས་གཉིས་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་རིན་པོ་ཆེ་ཐམས་ཅད་ཀྱི་ཤིང་དང༌སཱ་ལ་དང་། ཏ་ལའི་ཕྲེང་བས་རྣམ་པར་འཁྲིགས་པས་ཡོངས་སུ་བརྒྱན་པར་ཀུན་ནས་གནས་པར་གྱུར་པ་འདི་ནི་སྔོན་གྱི་ལྟས་གསུམ་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ལྷ་རྫས་ལས་ཀྱང་འདས་པའི་སྤོས་ཀྱི་མྱུ་གུ་ཀུན་ནས་འཐོན་པ་དང་། ཕྱེ་མ་ཐམས་ཅད་ཀྱི་མཛོད་ཀུན་ནས་འཐོན་པ་དང་། རྒྱལ་མཚན་ཐམས་ཅད་ཀྱི་སྤྲིན་དང་ན་བུན་ཡོངས་སུ་བྱུང་བ་དང་། སྤོས་ཀྱི་རིན་པོ་ཆེའི༌གཟུགས་ཀྱི་ཤིང་དྲུང་ཀུན་ནས་འཁོར་ཏེ། རྒྱན་ཡོངས་སུ་སྤྱངས་པར་ཀུན་ནས་གནས་པར་གྱུར་པ་འདི་ནི་སྔོན་གྱི་ལྟས་བཞི་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ལྷ་རྫས་ཀྱི་མེ་ཏོག་དང་། ཕྲེང་བ་དང་། ལྷབ་ལྷུབ་སྣ་ཚོགས་ཀྱིས་མཛོད་རྣམ་པ་ཐམས་ཅད་དུ་ཡོངས་སུ་རྒྱས་པ་དང་ལྡན་པར་ཀུན་ནས་གནས་པར༌གྱུར་པ་འདི་ནི་སྔོན་གྱི་ལྟས་ལྔ་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ཀྱི་ཤིང་ཐམས་ཅད་ལ་ནོར་བུ་རིན་པོ་ཆེ་དམ་པའི་མཛོད་མངོན་པར་གྲུབ་པར་གྱུར་པ་འདི་ནི་སྔོན་གྱི་ལྟས་དྲུག་པ་བྱུང་བའོ། །ཡང་ལུམ་བི་ནིའི་ནགས་ཚལ་འདི་ཐམས་ཅད་ཀྱི་པདྨོའི་ཚལ་ཐམས་ཅད་དུ་ཆུ་ལས་སྐྱེས་པའི་མེ་ཏོག་ཐམས་ཅད་ཀྱང་ཁ་འབུས་ཏེ། སའི་གཞི་ལས་འཐོན་ནས། ཆུ་ལས་མངོན་པར་འཕགས་པར་གནས་པ་འདི་ནི་སྔོན་གྱི་ལྟས་བདུན་པ་བྱུང་བའོ། །

ཡང་འཇིག་རྟེན་གྱི་ཁམས་འདིའི་འདོད་པ་ལ་སྤྱོད་པ་དང་། གཟུགས་ལ་སྤྱོད་པའི་ལྷའི་བུ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། འཇིག་རྟེན་གྱི་དབང༌པོ་དང་། འགྲོ་བའི་དབང་པོ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ལུམ་བི་ནིའི་ནགས་ཚལ་འདི་ན་ཐལ་མོ་སྦྱར་ཅིང་འཁོད་པར་གྱུར་ཏེ། འདི་ནི་སྔོན་གྱི་ལྟས་བརྒྱད་པ་བྱུང་བའོ། །ཡང་འཛམ་བུའི་གླིང་གི་འཇིག་རྟེན་གྱི་ཁམས་འདིའི་ལྷའི༌བུ་མོའམ། ཀླུའི་བུ་མོའམ། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་བུ་མོ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་རབ་ཏུ་དགའ་བའི་ཡིད་ཀྱིས་མཆོད་པའི་རྣམ་པ་ཐམས་ཅད་ལག་ན་ཐོགས་ཤིང་བླག་ཤའི་ཡལ་ག་ལ་མངོན་ཏུ༌བལྟས་ཏེ། འདུད་ཅིང་ཕྱག་འཚལ་བར་འཁོད་པར་གྱུར་པ་འདི་ནི་སྔོན་གྱི་ལྟས་དགུ་པ་བྱུང་བའོ། །ཡང་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སྐུ་ལྟེ་བའི་དཀྱིལ་འཁོར་དག་ནས་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པའི་སྒྲོན་མ་ཞེས་བྱ་བའི་འོད་ཟེར་མང་པོ་འཐོན་ཏེ།

ལུམ་བི་ནིའི་ནགས་ཚལ་འདི་ཐམས་ཅད་སྣང་བར་བྱས་ནས་གནས་པར་གྱུར་ཏེ། འོད་ཟེར་གྱི་སྒོའི་དཀྱིལ་འཁོར་དེ་དག་ཐམས་ཅད་ལའང་དེ་བཞིན་གཤེགས་པ་དེ་དག་ཐམས་ཅད་ཀྱི་སྐྱེ་བས་རྣམ་པར་འཕྲུལ་པ་གཟུགས་བརྙན་དུ་གྱུར་པར་སྣང་བ་དང་། ཐོག་མ་བལྟམ་པའི་རྣམ་པར་འཕྲུལ་པ་དང་བཅས་པར་བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱང་སངས་རྒྱས་ཀྱི་གསུང་གི་དབྱངས་དང་ལྡན་པར་འོད་ཟེར་གྱི་སྒོའི་དཀྱིལ་འཁོར་དེ་དག་ལས་སྒྲར་འཐོན་ཅིང་གྲགས་པར་གྱུར་པ་འདི་ནི་སྔོན་གྱི་ལྟས་བཅུ་པ་བྱུང་བའོ། །

བྱང་ཆུབ་སེམས་དཔའི་སྐྱེ་བའི་དུས་ལ་བབ་པའི་ཚེ། སྔོན་གྱི་ལྟས་བཅུ་པོ་དེ་དག་བྱུང་བར་གྱུར་ཏེ། དེ་བྱུང་བས་འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་བྱང་ཆུབ་སེམས་དཔའ་འབྱུང་བར་འགྱུར་རོ་ཞེས་བྱ་བར་ཤེས་སོ། །རིགས་ཀྱི་བུ་དེ་ལྟར་ཁོ་མོ་སྔོན་གྱི་ལྟས་བཅུ་པོ་དེ་དག་མཐོང་བས་ཀྱང་དགའ་བའི་ཤུགས་བསམ་གྱིས་མི་ཁྱབ་པ་རབ་ཏུ་ཐོབ་བོ། །རིགས་ཀྱི་བུ་གཞན་ཡང་ལྷ་མོ་སྒྱུ་མ་གྲོང་ཁྱེར་ཆེན་པོ་སེར་སྐྱའི་གནས་ནས་བྱུང་བའི་ཚེ། ལུམ་བི་ནིའི་ནགས་ཚལ་འདིར་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏེ། དེ་དག་བྱུང་བས་སེམས་ཅན་ཚད་མེད་པ་རྣམས་ཐམས་ཅད་མཁྱེན་པའི་ཆོས་ཀྱི་སྣང་བས་དགའ་བའི་ཤུགས་རྣམ་པར་འཕེལ་བར་གྱུར་ཏོ། །བཅུ་གང་ཞེ་ན། འདི་ལྟ་སྟེ། སའི་སྟེང་ན་གནས་པའི་རིན་པོ་ཆེའི་ཁང་པ་བརྩེགས་པ་ཐམས་ཅད་དུ་སྣང་བ་རབ་ཏུ་བྱུང་ངོ་། །རིན་པོ་ཆེའི་པདྨོ་ཁ༌མ་བྱེ་བ་ཁ་འབྱེ་བར་གྱུར་པའི་འདབ་མ་ཐམས་ཅད་ལས་སྣང་བ་རབ་ཏུ་བྱུང་སྟེ། བལྟམ་པ་ལེགས་པར་བལྟམ་མོ་ཞེས་བྱ་བའི་སྒྲ་སྙན་པ་ཡང་དེ་དག་ལས་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་ཀྱིས་ཐོག་མ་སེམས་བསྐྱེད་པའི་སྣང་བ་ཇི་སྙེད་ཅིག་ཡོད་པ་དེ་དག་ཀྱང་། ལུམ་བི་ནིའི་ནགས་ཚལ་འདིར་སྣང་བར་བྱས་ཏེ་མངོན་པར་ཤར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་བྱང་ཆུབ་སེམས༌དཔའི་ས་ཐམས་ཅད་ཡོངས་སུ་གནོན་པའི་སྣང་བ་རྣམ་པར་འཕྲུལ་པ་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་ངོ་། །ཕྱོགས་བཅུའི་བྱང་ཆུབ་སེམས་དཔའ་རྣམས་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་སྒྲུབ་ཅིང་། ཡེ་ཤེས་ཁོང་དུ་ཆུད་པའི་སྣང་བ་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །

ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་ཐམས་ཅད་ལ་དབང་བསྒྱུར་བའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སྨོན་ལམ་རྒྱ་ཆེན་པོ་མངོན་པར་སྒྲུབ་པའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་རྣམས་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བར་བྱེད་པའི་ཡེ་ཤེས་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་ཀྱིས་ཆོས་ཀྱི་དབྱིངས་ཀྱི་ཚུལ་གྱི་ཡེ་ཤེས་ཁོང་དུ་ཆུད་པའི་སྣང་བ་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །ཕྱོགས་བཅུའི་བྱང་ཆུབ་སེམས་དཔའ་ཐམས་ཅད་སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་དང་། སྐྱེ་བ་དང་མངོན་པར་འབྱུང་བ་དང་། བྱང་ཆུབ་ཏུ་རྣམ་པར་འཚང་རྒྱ་བ་དང་། ཡེ་ཤེས་ཐུགས་སུ་ཆུད་པར་མཛད་པའི་སྣང་བའི་འོད་ཇི་སྙེད་ཅིག་ཡོད་པ་དེ་དག་ཀྱང་ལུམ་བི་ནིའི་ནགས་ཚལ་འདིར་བྱུང་བར་གྱུར་ཏོ། །

སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་རབ་ཏུ་བྱུང་བར་གྱུར་ཏེ། དེ་དག་གིས་སེམས་ཅན་མཐའ་དང་དབུས་མེད་པའི་སེམས་དང་། བསམ་པའི་མུན་པ་འཐིབས་པོ་ཐམས་ཅད་ཀྱང་རབ་ཏུ་སྣང་བར་བྱས་སོ། །རིགས་ཀྱི་བུ་དེ་ལ་ལྷ་མོ་སྒྱུ་མ་ཤིང་བླག་ཤའི་ནགས་སུ་ཕྱིན་པའི་ཚེ། འཇིག་རྟེན་གྱི་དབང་པོ༌འདུས་པ་ཐམས་ཅད་དང་། འདོད་པའི་ཁམས་ཀྱི་ལྷའི་བུ༌ལྷའི་བུའི་ཚོགས་དང་། ལྷའི་བུ་མོ་འཁོར་དང་བཅས་ཏེ་འདུས་པ་ཐམས་ཅད་དང་། གཟུགས་ལ་སྤྱོད་པའི་ལྷའི་བུ་དྲི་ང་བ་མེད་པ་ཐམས་ཅད་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་འཁོར་དང་བཅས་ཏེ། ཚོགས་པ་བྱང་ཆུབ་སེམས་དཔའ་ལ་མཆོད་པར་བརྩོན་པ་ཐམས་ཅད་ཀྱི་ལུས་དང་། མཆོད་པའི་ཚོགས་ཐམས་ཅད་ཀྱང་ལྷ་མོ་སྒྱུ་མའི་གཟི་བརྗིད་དང་དཔལ་དང་ཁ་དོག་དང་གཟུགས་ཀྱིས་རབ་ཏུ་སྣང་བར་བྱས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་འོད་གང་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཟིལ་དུ་རླག་པར་གྱུར་ཏེ་ཟིལ་གྱིས་མནན་ཏོ། །ལྷ་མོ་སྒྱུ་མའི་བ་སྤུའི་སྒོ་ཐམས་ཅད་ནས་བྱུང་བའི་འོད་དང་སྣང་བ་དག་ནི་འོད་གཞན་གྱིས་ཉམས་པར་གྱུར་པ་མེད། བསྒྲིབས་པར་གྱུར་པ་མེད། ཆོད་པར་གྱུར་པ་མེད། ཐོགས་པར་གྱུར་པ་མེད་དེ། དེས་ཕྱོགས་ཐམས་ཅད་རྒྱས་པར་བཀང་ནས་སེམས་ཅན་དམྱལ་བའི་སྡུག་བསྔལ་ཐམས་ཅད་དང་། བྱོལ་སོང་གི་སྐྱེ་གནས་ཀྱི་སྡུག་བསྔལ་ཐམས་ཅད་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་དང་། སྲིད་པའི་ལམ་གྱི་རྒྱུད་དུ་གཏོགས་པའི་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་དང་། ཉོན་མོངས་པ་ཐམས་ཅད་རབ་ཏུ་ཞི་བར་བྱས་ཏེ། ལྷག་གེ་ལྷམ་མེ་ལྷང་ངེར་གནས་པར་གྱུར་ཏོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ། ལུམ་བི་ནིའི་ནགས་ཚལ་དུ་བྱུང་བ་དང་པོའོ། །

རིགས་ཀྱི་བུ་གཞན་ཡང་གང་གི་ཚེ་ལྷ་མོ་སྒྱུ་མའི་ལུས་སུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཆུད་ཅིང་གཟུགས་བརྙན་འབྱུང་བ་སྣང་བར་གྱུར་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱའི་འཛམ་བུའི་གླིང་ཐམས་ཅད་ཀྱི་རྒྱལ་པོའི་གནས་མིང་སྣ་ཚོགས་དང་ལྡན་པ་ཤ་སྟག་དང་། ནགས་ཚལ་གྱི་མིང་སྣ་ཚོགས་དང་ལྡན་པ་ཤ་སྟག་དང་། ཤིང་དྲུང་རྣམ་པ་ཐ་དད་པ༌ཤ་སྟག་ཏུའང་ལྷ་མོ་སྒྱུ་མ་ཕྱིན་ཅིང་། འཇིག་རྟེན་གྱི་དབང་པོ་ཐམས་ཅད་ཀྱིས་ཡོངས་སུ་བསྐོར་ཏེ། བྱང་ཆུབ་སེམས་དཔའི་སྐྱེ་བ་ལ་སྟ་གོན་དུ་སྡོད་ཅིང་། བྱང་ཆུབ་སེམས་དཔའ་ཡུམ་གྱི་ཡེ་ཤེས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པས་རྣམ་པ་འདི་བཞིན་དུ་སྣང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་གཉིས་པའོ། །རིགས་ཀྱི་བུ་གཞན་ཡང་ལྷ་མོ་སྒྱུ་མའི་བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ལ་ཡང་སྔོན་གྱི་བྱང་ཆུབ་སེམས་དཔའི་སྤྱོད་པ༌མངའ་བའི་ཚེ། བཅོམ་ལྡན་འདས་ཀྱིས་དེ་བཞིན་གཤེགས་པ་ཇི་སྙེད་ཅིག་བསྙེན་བཀུར་ཏེ། རིམ་གྲོ་མཛད་པ་དང་། བསྟི་སྟང་དང་བཀུར་སྟི་མཛད་དེ་མཆོད་པ་དེ་དག་ཐམས་ཅད་ཀྱང་ཡོངས་སུ་སྣང་བར་གྱུར་ཏོ། །དེ་བཞིན་གཤེགས་པ་དེ་དག་གིས་ཆོས་ཇི་སྙེད་ཅིག་བསྟན་པ་དེ་དག་ཐམས་ཅད་ཀྱང་བ་སྤུའི་བུ་ག་དེ་དག་ནས་སངས་རྒྱས་ཀྱི་གསུང་གི་ཡན་ལག་དང་ལྡན་པར་མ་ལུས་པར་གྲགས་པར་གྱུར་ཏེ། དཔེར་ན། ཆུའི༌ཕོར་བུ་ཆུང་ངུའམ། གསེར་གྱི་རྡུལ་ཕྲ་མོའམ། མེ་ལོང་གི་དཀྱིལ་འཁོར་ཤིན་ཏུ་གསལ་བའམ། ཆུ་ཤིན་ཏུ་དྭངས་བ་ལ་ནམ་མཁའི་དཀྱིལ་འཁོར་ཉི་ཟླ་དང་། གཟའ་སྐར་གྱི་ཚོགས་ཀྱིས་རབ་ཏུ་བརྒྱན་པ་དང་། སྤྲིན་གྱི་ཚོགས་འབྲུག་སྒྲ་ཟབ་མོ་འབྱིན་པ་ཅན་ཡང་གཟུགས་བརྙན་དུ་གྱུར་པར་སྣང་ངོ་། །

རིགས་ཀྱི་བུ་དེ་བཞིན་དུ་ལྷ་མོ་སྒྱུ་མའི་བ་སྤུའི་སྒོའི་དཀྱིལ་འཁོར་ཐམས་ཅད་ལའང་། སྔོན་གྱི་དེ་བཞིན་གཤེགས་པའི་རྣམ་པར་འཕྲུལ་པ༌རྣམས་ཀྱང་ཡོངས་སུ་སྣང་། ཆོས་བསྟན་པའི་སྒྲ་ཐམས་ཅད་ཀྱང་གྲགས་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་གསུམ་པའོ། །རིགས་ཀྱི་བུ་གཞན་ཡང་ལྷ་མོ་སྒྱུ་མའི་ལུས་ཐམས་ཅད་དང་། བ་སྤུའི་སྒོའི་དཀྱིལ་འཁོར་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་ཞིང་ཇི་སྙེད་ཅིག་དང་། འཇིག་རྟེན་གྱི་ཁམས་རྒྱ་མཚོ་ཇི་སྙེད་ཅིག་དང་། འཇིག་རྟེན་གྱི་ཁམས་འབྱམས་ཀླས་པ་ཇི་སྙེད་ཅིག་དང་། འཇིག་རྟེན་གྱི་ཁམས་ཀྱི་རྒྱུད་ཇི་སྙེད་ཅིག་དང་། འཇིག་རྟེན༌ཁམས་ཀྱི་མིང་དུ་བྱ་བ་ཇི་སྙེད་ཅིག་ཏུ་བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་དེ། ཞིང་གི་གཞི་ཇི་ལྟ་བུ་ཞིག་དང་ལྡན་པར་གྱུར་པ་དང་། དབྱིབས་ནི་ཅི་འདྲ་བ་དང་། རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། ལྷུན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། རིའི་རྒྱན་ནི་ཇི་ལྟ་བུ་དག་ཅིག་ཡོད་པར་གྱུར་པ་དང་། གྲོང་དང་། གྲོང་ཁྱེར་དང་། ཡུལ་དང་། ལྗོངས་དང་། གྲོང་རྡལ་གྱི་རྒྱན་ནི་ཇི་ལྟ་བུ་དག་ཅིག་གནས་གནས་པ་དང་། བཟའ་ཤིང་གི་ར་བ་དང་། མཚོ་དང་། ལུ་མ་དང་། རྒྱ་མཚོའི་རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། ནམ་མཁའ་དང་སྤྲིན་གྱི་རྒྱན་ནི་ཇི་ལྟ་བུ་ཞིག་དང་ལྡན་པར་གྱུར་པ་དང་། སེམས་ཅན་གྱི་གནས་ནི་ཇི་ལྟ་བུ་ཞིག་ཡོད་པར་གྱུར་པ་དང་། ཐེག་པ་བསྟན་པ་ནི་གང༌དང་ཡང་ལྡན་པར་གྱུར་པ་དང་། བསྐལ་པའི་མིང་དང་གྲངས་ཇི་སྙེད་ཅིག་ཅེས་བྱ་བར་གྱུར་པ་དང་། སངས་རྒྱས་སྐྱེ་བ་ནི་ཇི་སྙེད་ཅིག་བྱུང་བར་གྱུར་པ་དང་། རྣམ་པར་དག་པ་ནི་གང་དུ་འདུ་བར་གྱུར་པ་དང་། སེམས་ཅན་གྱི་ཚེའི་ཚད་ནི་ཇི་ཙམ་ཞིག་དང་ལྡན་པར་གྱུར་པ་དང་། འཇིག་རྟེན་གྱི་སྐྱེ་གནས་ནི་གང་དུ་སྐྱེས་པར་གྱུར་པ་དང་། སེམས་ཅན་ཇི་ལྟ་བུ་ཞིག་དང་འགྲོགས་འགྲོགས་པ་དང་། དགེ་བའི་བཤེས་གཉེན་ནི་ཇི་ལྟ་བུ་ཞིག་ལ་བརྟེན་བརྟེན་པ་དང་། དགེ་བའི་ཆོས་ནི་ཇི་ལྟ་བུ་ཞིག་ལ་བརྩོན་པར་སྤྱོད་སྤྱོད་པ་དང་། ཆོས་ཀྱི་ནན་ཏན་ནི་ཇི་ལྟ་བུ་ཞིག་ལ་བརྩོན་པར་བྱས་ཏེ། བྱང་ཆུབ་སེམས་དཔའི་སྤྱོད་པ་སྤྱོད་སྤྱོད་པའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་ཡོངས་སུ་སྣང་བར་གྱུར། བཅོམ་ལྡན་འདས་ཀྱིས་ཕྱིར་མི་ལྡོག་པའི་གནས་བརྙེས་ནས། སྔོན་སྐུ་ནི་ཇི་སྙེད་ཅིག །རྣམ་པར་སྤྱོད་པ་ཇི་ལྟ་བུ་ཞིག །ཆ་བྱད་ནི་ཇི་ལྟ་བུ་ཞིག །ལོངས་སྤྱོད་པ་ནི་ཅི་དང་ལྡན། བདེ་བ་དང་སྡུག་བསྔལ་ནི་ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི་ཇི་ལྟ་བུ་ཞིག་དང་ལྡན་པར་གྱུར་ཏེ། སྔོན་བྱང་ཆུབ་སེམས་དཔའི་སྤྱོད་པ་སྤྱད་པར་གྱུར་པ་དེ་དག་ཐམས་ཅད་ཀྱང་བ་སྤུའི་སྒོ་ཐམས་ཅད་ནས་ཡོངས་སུ་སྣང་བར་གྱུར་ཏོ། །

སངས་རྒྱས་ཀྱི་ཞིང་དེ་དག་ཐམས་ཅད་ཀྱི་སྐྱེ་གནས༌དེ་དང་། དེ་དག་ཏུ་ལྷ་མོ་སྒྱུ་མ་བྱང་ཆུབ་སེམས་དཔའི་ཡུམ་དུ་གྱུར་པ་དང་། བྱང་ཆུབ་སེམས་དཔའི་སྐུ་དེ་དག་ཐམས་ཅད་ཀྱང་། ལྷ་མོ་སྒྱུ་མའི་བ་སྤུའི་སྒོ་ཐམས་ཅད་དུ་རྣམ་པར་འཕྲུལ་པའི་གཟུགས་བརྙན་བྱུང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ། ལུམ་བི་ནིའི་ནགས་ཚལ་དུ་བྱུང་བ་བཞི་པའོ། །

རིགས་ཀྱི་བུ་གཞན་ཡང་བཅོམ་ལྡན་འདས་ཀྱི་སྔོན་སྐུ་ནི་ཇི་སྙེད་ཅིག་གིས་བྱང་ཆུབ་སེམས་དཔའི་སྤྱོད་པ་སྤྱད་པ་དང་། ཁ་དོག་ནི་ཇི་ལྟ་བུ་ཞིག་དབྱིབས་ནི་ཅི་འདྲ་བ་ཞིག །ཆ་བྱད་ནི་ཇི་ལྟ་བུ་ཞིག །ད་རོད་ནི་ཇི་ལྟ་བུ་ཞིག །ལོངས་སྤྱོད་ནི་ཅི་དང་ལྡན། བདེ་བ་དང་སྡུག་བསྔལ་ནི་ཇི་ལྟ་བུ་ཞིག་སྐུ་ཉམས་སུ་བཞེས། སྐུ་ཚེའི་རྒྱུད་ནི་ཇི་ལྟ་བུ་ཞིག་དང་ལྡན་པར་གྱུར་པ་དེ་དག་ཐམས་ཅད་ཀྱང་ལྷ་མོ་སྒྱུ་མའི་ལུས་ཀྱི་བ་སྤུའི་སྒོ་ཐམས་ཅད༌ལས་གཟུགས་བརྙན་དུ་སྣང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་ལྔ་པའོ། །རིགས་ཀྱི་བུ་གཞན་ཡང་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། གཏང་བར་དཀའ་བ་ཡོངས་སུ་བཏང་སྟེ། ཞབས་དང་ཕྱག་ཡོངས་སུ་བཏང་བའམ། སྙན་དང་ཤངས་ཡོངས་སུ་བཏང་བའམ། ལྗགས་དང་ཚེམས་ཡོངས་སུ་བཏང་བའམ། སྤྱན་དང་དབུ་ཡོངས་སུ་བཏང་བའམ། ཤ་དང་ཁྲག་ཡོངས་སུ་བཏང་བའམ། རུས་པ་དང་རྐང་ཡོངས་སུ་བཏང་བའམ། མཁལ་མ་དང་ཐུགས་ཡོངས་སུ་བཏང་བའམ། པགས་པ་དང་ཕྲི་ཡོངས་སུ་བཏང་བའམ། ཕྱི་ནང་གི་དངོས་པོ་ཡོངས་སུ་བཏང་བའམ། སྲས་པོ་དང་སྲས་མོ༌དང་བཙུན་མོ་ཡོངས་སུ་བཏང་བའམ། སྐུ་ཡོངས་སུ་བཏང་བའམ། ལོངས་སྤྱོད་རིན་པོ་ཆེ་ཡོངས་སུ་བཏང་བའམ། གྲོང་དང་གྲོང་ཁྱེར་དང་ལྗོངས་དང་། ཡུལ་དང་ཁམས་དང་། རྒྱལ་པོའི་གནས་ཡོངས་སུ་བཏང་བའམ། ནོར་དང་འབྲུ་དང་མཛོད་དང་བང་བ་ཡོངས་སུ་བཏང་བའམ། ནོར་བུ་དང་། མུ་ཏིག་དང་། བཻཌཱུརྱ་དང་། དུང་དང་། མན་ཤེལ་དང་། བྱི་རུ་དང་། གསེར་དང་། དངུལ་ཡོངས་སུ་བཏང་བའམ། རིན་པོ་ཆེའི་རྒྱན་སྣ་ཚོགས་ཡོངས་སུ་བཏང་བའམ། མལ་ཆ་ཡོངས་སུ་བཏང་བའམ། ཁང་པ་དང་གཞལ་མེད་ཁང་ཡོངས་སུ་བཏང་བའམ། ཡོ་བྱད་ཡོངས་སུ་བཏང་བའམ། དེ་ལྟར་གཏོང་བའི་བྱང་ཆུབ་སེམས་དཔའི་སྐུ་གཟུགས་དང་། རྣམ་པ་ཇི་ལྟ་བུར་ཡོངས་སུ་བཏང་བར་གྱུར་པ་དང་། ལེན་པ་དེ་དག་ཀྱང་རྣམ་པ་ཇི་ལྟ་བུས་ལེན་པར་གྱུར་པ་དང་། སྦྱིན་པའི་དངོས་པོ་རྣམ་པ་ཇི་ལྟ་བུ་དག་ཡོངས་སུ་བཏང་བར་གྱུར་པ་དང་། ཡུལ་གྱི་ཕྱོགས་གང་དག་ཏུ་ཡོངས་སུ་བཏང་བར་གྱུར་པ་དང་། དེའི་ཚེ་བྱང་ཆུབ་སེམས་དཔའི་འཁོར་དུ་གྱུར་པ་དེ་དག་ཐམས་ཅད་ཀྱང་། ལྷ་མོ་སྒྱུ་མའི་བ་སྤུའི་སྒོ་ཐམས་ཅད་ལས་གཟུགས་བརྙན་དུ་སྣང་བར་གྱུར་ཏོ། །སློང་མོ་བའི་སྒྲ་དེ་དག་ཀྱང་གྲག་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་དྲུག་པའོ། །རིགས་ཀྱི་བུ་གཞན་ཡང་སྔོན་གྱི་མཐའི་རྒྱུད་དུ་བྱུང་བའི་དེ་བཞིན་གཤེགས་པ་རྣམས་ཡུམ་གྱི་སྐུ་ནས་བལྟམས་པར་གྱུར་པའི་ཚེ། སངས་རྒྱས་ཀྱི་ཞིང་གི་རྒྱན་དང་། ལྷབ་ལྷུབ་ཇི་སྙེད་ཅིག་བྱུང་བར་གྱུར་པ་དང་། སེམས་ཅན་གྱི་རྒྱན་རྣམ་པར་ཕྱེ་བ་དང་། བཟའ་ཤིང་གི་རྒྱན་རྣམ་པར་ཕྱེ་བ་དང་། མེ་ཏོག་དང་བདུག་པ་དང་། སྤོས་དང་ཕྲེང་བ་དང་བྱུག་པ་དང་ཕྱེ་མ་དང་། ན་བཟའ་དང་གདུགས་དང་རྒྱལ་མཚན་དང་། བ་དན་གྱི་རྒྱན་རྣམ་པར་ཕྱེ་བ་དང་། རིན་པོ་ཆེའི་རྒྱལ་པོ་ཐམས་ཅད༌རྣམ་པར་འཕྲུལ་པའི་རྒྱན་རྣམ་པར་ཕྱེ་བ་དང་། རོལ་མོ་དང་གླུ་དང་། བསྟོད་པ་དང་། སིལ་སྙན་གྱི་སྒྲ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ཀྱང་། ལྷ་མོ་སྒྱུ་མ་ལུམ་བི་ནིའི་ནགས་ཚལ་དུ་ཕྱིན་པའི་ཚེ། ལུམ་བི་ནིའི་ནགས་ཚལ་འདིར་ཡོངས་སུ་བྱུང་བར་གྱུར་ཏོ། །མངོན་པར་སྐྱེས་སོ། །འགྲོ་བས་རྣམ་པར་དམིགས་སུ་ཡོད་པར་བྱུང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་བདུན་པའོ། །

རིགས་ཀྱི་བུ་གཞན་ཡང་བྱང་ཆུབ་སེམས་དཔའི་ལོངས་སྤྱོད་ལྷའི་དབང་པོ་ཐམས་ཅད་ཀྱི་གནས་ཀྱི་རྒྱན་གྱི་ལོངས་སྤྱོད་ལས་ཡོངས་སུ་འདས་པ་དང་། ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། མིའི་དབང་པོ་ཐམས་ཅད་ཀྱི་གནས་ཀྱི་རྒྱན་གྱི་ལོངས་སྤྱོད་ལས་འདས་པ་འདི་ལྟ་སྟེ། རིན་པོ་ཆེའི་རྒྱལ་པོ་ཐམས་ཅད་ཀྱི་ཁང་པ་བརྩེགས་པའི་ལོངས་སྤྱོད་དམ། རིན་པོ་ཆེའི་རྒྱལ་པོའི་གཞལ་མེད་ཁང་གི་ལོངས་སྤྱོད་དམ། རིན་པོ་ཆེའི་རྒྱལ་པོའི་དྲ་བའི་ལོངས་སྤྱོད་དམ། རིན་པོ་ཆེའི་རྒྱལ་པོའི་འབྲུའི་ལོངས་སྤྱོད་དམ། རིན་པོ་ཆེའི་རྒྱལ་པོའི་གཟུགས་ཀྱི་ལོངས་སྤྱོད་དམ། རིན་པོ་ཆེའི་རྒྱན་ཐམས་ཅད་ཀྱི་ལོངས་སྤྱོད་དམ། སྤོས་ཀྱི་རྒྱལ་པོ་ཐམས་ཅད་ཀྱི་ལོངས་སྤྱོད་དམ། དམིགས་པ་ཐམས་ཅད་བཟང་ཞིང་མཐུན་པའི་ལོངས་སྤྱོད་ཀྱང་རུང་སྟེ།

དེ་དག་ཐམས་ཅད་ལྷ་མོ་སྒྱུ་མའི་རུམ་ནས་མ་འདྲེས་པར་འཐོན་ཏེ། ལུམ་བི་ནིའི་ནགས་ཚལ་འདི་ཡོངས་སུ་བརྒྱན་ཅིང་ཀུན་ནས་གནས་པར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བ་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་བརྒྱད་པའོ། །རིགས་ཀྱི་བུ་གཞན་ཡང་ལྷ་མོ་སྒྱུ་མའི་ལུས་ལས་བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་བཅོམ་ལྡན་འདས་རྣམ་པར་སྣང་མཛད་དང་། སྐུ་གཟུགས་དང་སྐུ་མདོག་དང་། དབྱིབས་འདྲ་བ་མཚན་དང་དཔེ་བྱད་བཟང་༌པོའི་རྒྱན་གྱིས་འདྲ་བར་བརྒྱན་པ་དང་། འོད་འདྲ་བ་དང་། འོད་ཟེར་འདྲ་བ་རབ་ཏུ་འགྱེད་པ། ཚུལ་དང༌འགྲོས་སྟབས་འདྲ་བ། རྩལ་དང་མཐུ་འདྲ་བ། རྣམ་པར་སྣང་བའི་རྣམ་པར་འཕྲུལ་པ་མཐུན་པ། འཁོར་འདྲ་བ། རྒྱན་མཚུངས་པ་མང་པོ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་ལེགས་པ་རྒྱ་མཚོ་ཡོངས་སུ་བརྗོད་ཅིང་མཐུན་པར་གྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་དགུ་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་བལྟམ་པར་གྱུར་པའི་དུས་ལ་བབ་པ་དང་། ལྷ་མོ་སྒྱུ་མའི་མདུན་དུ་འོག་གི་རྡོ་རྗེའི་གཞི་ལས་ས་ཆེན་པོ་མངོན་པར་བརྟོལ་ཏེ། རིན་པོ་ཆེའི་རྒྱལ་པོ་པདྨོ་ཆེན་པོ་རིན་པོ་ཆེ་ཐམས་ཅད་ཀྱི་རྒྱན་གྱི་དམ་པ་ཞེས་བྱ་བ་ཆུ་བ་རིན་པོ་ཆེའི་རྒྱལ་པོ་གཞན་གྱིས་མི་ཐུབ་པའི་རྡོ་རྗེ་ཆེན་པོ་ལས་གྲུབ་པ། རིན་པོ་ཆེའི་རྒྱལ་པོ་འགྲོ་བ་རྒྱ་མཚོའི་ནང་རིམ་དང་ལྡན་པ། ཟེ་བའི་རྩེ་མོ་རིན་པོ་ཆེའི་རྒྱལ་པོ་ཐམས་ཅད་ཀྱིས་བརྒྱན་པ། འདབ་མའི་ཕྲེང་བ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱིས་བརྒྱན་ཅིང་ཤིན་ཏུ་རྣམ་པར་ཕྱེ་བ། ལོ་མའི་དཀྱིལ་འཁོར་རིན་པོ་ཆེའི་རྒྱལ་པོ་སྣ་ཚོགས་ཀྱིས་བྱས་པ། སྙིང་པོ་མཛེས་པ་རིན་པོ་ཆེ་ཡིད་བཞིན་གྱིས་རྣམ་པར་དག་པ་དང་ལྡན་པ། ཟེ་བའི་ཕྲེང་བ་རྣམ་པར་ཕྱེ་བ་དང་། རིན་པོ་ཆེ་ཐམས་ཅད་ཀྱི་ཁ་དོག་ཚད་མེད་པ་དང་ལྡན་པ། རིན་པོ་ཆེའི་རྒྱལ་པོ་གྲངས་མེད་པའི་དྲ་བའི་རྒྱན་དང་ལྡན་པས་ཡོངས་སུ་ཡོག་པ། རིན་པོ་ཆེའི་རྒྱལ་པོ་རྡོ་རྗེ་མཐུ་བོ་ཆེས་མི་ཤིགས་པས་ལྷུན་ཀུན་ནས་བཀབ་པ། ལྷའི་རིས་ཐམས་ཅད་ཀྱིས་ཀུན་ནས་བསྐོར་བ། ཀླུའི་དབང་པོ་ཐམས་ཅད༌ཀྱིས་སྤོས་ཆུའི་སྤྲིན་གྱི་ཆར་མངོན་པར་དབབ་པ། གནོད་སྦྱིན་གྱི་དབང་པོ་ཐམས་ཅད་ཀྱིས་ཀུན་ནས་བསྐོར་ཅིང་ལྷ་རྫས་ཀྱི་མེ་ཏོག་སྙིམ་པ་ནས་གཏོར་བ། དྲི་ཟའི་དབང་པོ་ཐམས་ཅད་ཀྱིས་སྔོན་གྱི་སངས་རྒྱས་ལ་རིམ་གྲོ་བྱས་པའི་གླུའི་དབྱངས་སྙན་ཅིང་ཡིད་དུ་འོང་བའི་ང་རོ་དང་སྦྱར་ཏེ་བསྟོད་པའི་སྤྲིན་གྱིས་མངོན་པར་བསྟོད་པ།

ལྷ་མ་ཡིན་གྱི་དབང་པོ་ཐམས་ཅད་ཀྱིས་ང་རྒྱལ་དང་རློམ་པ་དང་། དྲེགས་པ་ཐམས་ཅད་བཏང་ཞིང་ཤིན་ཏུ་བཏུད་དེ་ཕྱག་བྱ་བ། ནམ་མཁའ་ལྡིང་གི་དབང་པོ་ཐམས་ཅད་ཀྱིས་རིན་པོ་ཆེའི་སྣམ་བུ་ཀུན་ཏུ་སྤྱངས་ཏེ། ནམ་མཁའ་ཀུན་ནས་བརྒྱན་པར་བྱ་བ། མིའམ་ཅིའི་དབང་པོ་ཐམས་ཅད་ཀྱིས་བྱང་ཆུབ་སེམས་དཔའི་ཡོན་ཏན་ཡོངས་སུ་བརྗོད་ཅིང་རོལ་མོ་དང་གླུའི་དབྱངས་ལ་བརྩོན་པ་དང་། ཉམས་རབ་ཏུ་བདེ་བས་ཀུན་ནས་བལྟ་བ། ལྟོ་འཕྱེ་ཆེན་པོའི་དབང་པོ་ཐམས་ཅད་ཀྱིས་ཤིན་ཏུ་དགའ་བ་དང་། མོས་པ་སྐྱེས་པས་ཡོངས་སུ་བལྟ་ཞིང་སྒྲ་སྙན་པ་ཕྱུང་སྟེ། རྒྱན་གྱི༌སྤྲིན་ཐམས་ཅད་ཀྱི་ཆར་མངོན་པར་དབབ་པ་བྱུང་བར་གྱུར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ལུམ་བི་ནིའི་ནགས་ཚལ་དུ་བྱུང་བ་བཅུ་པའོ། །

རིགས་ཀྱི་བུ་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་བཅུ་པོ་དེ་དག་ལུམ་བི་ནིའི་ནགས་ཚལ་དུ་བྱུང་བར་གྱུར་ནས། དེའི་རྗེས་ལ་བྱང་ཆུབ་སེམས་དཔའ་འོད་ཚད་མེད་བསམ་གྱིས་མི་ཁྱབ་པ་མངའ་བ། བལྟ་ན་གཏང་མི་བྲ་བ་ཞིག་ལྷ་མོ་སྒྱུ་མའི་རུམ་ནས༌བལྟམ་སྟེ། ནམ་མཁའི་དབྱིངས་རུམ་ནས་ཉི་མའི་དཀྱིལ་འཁོར་ཤར་བ་ལྟ། སྤྲིན་གྱི་ཚོགས་རུམ་ནས་གློག་གི་ཕྲེང་བ༌འགྱུ་བ་ལྟ། རི་ཆེན་པོའི་སྤོ་རུམ་ནས་ཉི་མ་ཤར༌ཀའི་སྤྲིན་ཀོ་ལྟ། མུན་པ་སྟུག་རུམ་ནས་སྒྲོན་མ་ཆེན་པོ་བྱུང་བ་ལྟ་སྟེ། མངོན་པར་བལྟམ་པར་གྱུར་ཏོ། །དེ་ལྟར་བྱང་ཆུབ་སེམས་དཔའ་ལྷ་མོ་སྒྱུ་མའི་ལུས་ལས་གཟུགས་བརྙན་ལྟར་བསྟན་པའི་ཆོས་ཉིད་དང་། རྨི་ལམ་ལྟར་བསྟན་པའི་ཆོས་ཉིད་དང་། སྒྱུ་མའི་རྣམ་པའི་གཟུགས་རྣམ་པར་དམིགས་པ་ལྟར་བསྟན་པའི་ཆོས་ཉིད་དང་། འགྲོ་བ་དང་འོང་བ་མེད་པའི་ཆོས་ཉིད་དང་། སྐྱེ་བ༌མེད་པ་དང་། འགག་པ་མེད་པའི་འོད་རྣམ་པར་དམིགས་པ་ཡོངས་སུ་བསྟན་པའི་ཆོས་ཉིད་ཀྱིས་མངོན་པར་འབྱུང་བ་ཡོངས་སུ་བསྟན་ཏོ། །རིགས་ཀྱི་བུ་དེ་ལྟར་ཁོ་མོ་ནི་ལུམ༌བི་ནིའི་ནགས་ཚལ་འདི་ན་གནས་ཤིང་། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་དེ། རིགས་ཀྱི་བུ་ཁོ་མོ་གླིང་བཞི་པ་སྐལ་བ་དང་ལྡན་པ་འདི་ལ་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་ལ་ལྟ་ཞིང་ཁོང་དུ་ཆུད་པར་བྱ་བར་གནས་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཐམས་ཅད་ཀྱི་འཛམ་བུའི་གླིང་བྱེ་བ་ཕྲག་བརྒྱ་ཐམས་ཅད་ནའང་། བཅོམ་ལྡན་འདས་རྣམ་པར་སྣང་མཛད་ཀྱི༌སྐུ་ཚེའི་རྣམ་པར་འཕྲུལ་པ་བྱེ་བ་ཕྲག་བརྒྱ་ལ་ལྟ་ཞིང་ཁོང་དུ་ཆུད་པར་བྱེད་དོ། །

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་འདུས་པའི་རྡུལ་ཤིན་ཏུ་ཕྲ་བའི༌ཁོང་དུ་ཆུད་པའི་སངས་རྒྱས་ཀྱི་ཞིང་ཐམས་ཅད་རྡུལ་ཤིན་ཏུ་ཕྲ་བ་ལ་འཇུག་པའི་ཡེ་ཤེས་ཀྱིས་ཁོང་དུ་ཆུད་པ་དག་ཏུ་ཡང་སེམས་ཀྱི་སྐད་ཅིག་རེ་རེ་ལ་སེམས་ཀྱིས་ཁོང་དུ་ཆུད་པར་བྱ་བ་རེ་རེས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཚེའི་རྣམ་པར་འཕྲུལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ལ་ལྟ་ཞིང་ཁོང་དུ་ཆུད་པར་བྱེད་དོ། །

དེའི་འོག་མའི་སེམས་ཀྱིས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་རྣམས་ཀྱི༌ཁོང་དུ་ཆུད་པའི་སངས་རྒྱས་ཀྱི་ཞིང་དེ་དག་ལས་སངས་རྒྱས་ཀྱི་ཞིང་རེ་རེར་ཡང་དེ་དང་མཉམ་པའི་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ལ་ལྟ་ཞིང་ཁོང་དུ་ཆུད་པར་བྱེད་དེ། ཚུལ་དེ་ལྟ་བུས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བའི་ཁོང་དུ་ཆུད་པའི་སངས་རྒྱས་ཀྱི་ཞིང་རེ་རེ་དག་ཏུ་ཡང་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ཐམས་ཅད་ལ་ལྟ་ཞིང་། ཁོང་དུ་ཆུད་པར་བྱེད་ཀྱང་། རྡུལ་ཤིན་ཏུ་ཕྲ་བ་ཐམས་ཅད་ཀྱི་རྡུལ་རེ་རེ་ལ་ཞིང་གཅིག་ནས་གཅིག་ཏུ༌བརྒྱུད་པའི་མཐའ་རྙེད་པར་མ་རུང་ངོ་། །

ཞིང་ཐམས་ཅད་ཀྱི་ཞིང་རེ་རེར་བྱང་ཆུབ་སེམས་དཔའ་སྐྱེ་བ་གཅིག་ནས་གཅིག་ཏུ༌བརྒྱུད་པ་ཡང་མུ་རྙེད་པར་མ་རུང་ངོ་། །ཇི་ལྟར་ཁོ་མོ་འཇིག་རྟེན་གྱི་ཁམས་འདིའི་བྱང་ཆུབ་སེམས་དཔའ་སྐྱེ་བ་རྣམ་པར་འཕྲུལ་པ་ཐམས་ཅད་ལ་ལྟ་ཞིང་ཁོང་དུ་ཆུད་པར་བྱེད་པ། དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་མཐའ་དང་དབུས་མེད་པ་དང་། རྡུལ་ཤིན་ཏུ་ཕྲ་བ་ཐམས་ཅད་ལའང་སེམས་ཀྱི་སྐད་ཅིག་རེ་རེའི་སེམས་ཀྱི་ཁོང་དུ་ཆུད་པར་བྱ་བ་རེ་རེ་ལ། བྱིན༌གྱིས་རླབས་རྒྱུན་མི་ཆད་པའི་ཚུལ་གྱིས་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་ཐམས་ཅད་ལ་ལྟ་ཞིང་ཁོང་དུ་ཆུད་པར་བྱེད་དོ། །དེ་སྐད་ཅེས་སྨྲས་པ་དང་།

ཚོང་དཔོན་གྱི་བུ་ནོར་བཟང་གིས་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བ་རྣམ་པར་འཕྲུལ་པ་ཡོངས་སུ་སྟོན་པ་འདི་རྙེད་ནས་ཡུན་ཇི་སྲིད་ཅིག་ལགས། སྨྲས་པ། རིགས་ཀྱི་བུ་སྔོན་འདས་པའི་དུས་བསྐལ་པ་སངས་རྒྱས་ཀྱི་ཞིང་བྱེ་བའི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་དེའི་ཡང་ཕ་སྔ་ཞིག་ཏུ་འཇིག་རྟེན་གྱི་ཁམས་ཀུན་ནས་རིན་པོ་ཆེ་ཞེས་བྱ་བར་བསྐལ་པ་མཉམ་པར་གཞག་པ་ཞེས་བྱ་བ་སངས་རྒྱས་བྱེ་བ་ཁྲག་ཁྲིག་ཕྲག་བརྒྱད་ཅུ་བྱུང་བ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་ཞེས་བྱ་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་བསྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །

རིགས་ཀྱི་བུ་འཇིག་རྟེན་གྱི་ཁམས་ཀུན་ནས་རིན་པོ་ཆེ་ཞེས་བྱ་བ་དེར་གླིང་བཞི་པ་དབུ་མ་རྒྱན་སྣ་ཚོགས་ཀྱི་འོད་ཅེས་བྱ་བ་བྱུང་སྟེ། གླིང་བཞི་པ་དེའི་འཛམ་བུའི་གླིང་གི་དབུས་སུ་རྒྱལ་པོའི་གནས་རི་རབ་རྣམ་པར་དག་པའི་རྒྱན་གྱི་རྒྱལ་མཚན་ཞེས་བྱ་བ་བྱུང་སྟེ། རྒྱལ་པོའི་གནས་དེར་རྒྱལ་པོ་རིན་པོ་ཆེ་འོད་འཕྲོ་བའི་མིག་གི་འོད་ཅེས་བྱ་བ་བྱུང་ངོ་། །རྒྱལ་པོ་རིན་པོ་ཆེའི་འོད་འཕྲོ་བའི་མིག་གི་འོད་དེ་ལ་བཙུན་མོ་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བ་མངའོ། །

རིགས་ཀྱི་བུ་དཔེར་ན། གླིང་བཞི་པ་སྐལ་བ་དང་ལྡན་པ་འདིའི་འཛམ་བུའི་གླིང་དུ་ལྷ་མོ་སྒྱུ་མ་བཅོམ་ལྡན་འདས་རྣམ་པར་སྣང་མཛད་ཀྱི་ཡུམ་དུ་གྱུར་པ་དེ་བཞིན་དུ་དེའི་ཚེ། དེའི་དུས་ན་གླིང་བཞི་པ་རྒྱན་སྣ་ཚོགས་ཀྱི༌འོད་ཀྱི་འཛམ་བུའི་གླིང་དུའང་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བ་ཡང་བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏེ། སངས་རྒྱས་བྱེ་བ་ཁྲག་ཁྲིག་ཕྲག་བརྒྱད་ཅུ་བསྐལ་པའི་དང་པོ་ལ་བྱུང་སྟེ། ཐོག་མར་བྱུང་བའི་བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གྱི་ཡུམ་དུ་གྱུར་ཏོ། །རིགས་ཀྱི་བུ་ལྷ་མོ་རབ་ཏུ་དགའ་བའི་འོད་ལ་དབང་བསྒྱུར་བ་དེ་བྱང་ཆུབ་སེམས་དཔའ་སྐྱེ་བའི་དུས་ལ་བབ་པ་དང་། བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་དང་ལྷན་ཅིག་ཏུ་བཟའ་ཤིང་གི་ར་བ་ཆེན་པོ་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་བ་དེར་ཕྱིན་ཏེ། དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུ་དེ་ཡང་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་བསམ་གྱིས་མི་ཁྱབ་པས༌དེ་ལྟར་བལྟམ་མོ། །

དེའི་ཚེ་བཟའ་ཤིང་གི་ར་བ་ཆེན་པོའི་འོད་ཀྱི་དཀྱིལ་འཁོར་གསེར་གྱི་མེ་ཏོག་ཅེས་བྱ་བ་དེའི་དབུས་སུ་ཕོ་བྲང་བརྩེགས་པ་རིན་པོ་ཆེ་སྣ་ཚོགས་བཟང་པོ་ལས་བརྩེགས་པ་ཞེས་བྱ་བ་བྱུང་སྟེ། ཕོ་བྲང་བརྩེགས་པ་དེའི་ནང་དུ་ཤིང་འདོད་པ་ཐམས་ཅད་འབྱིན་པའི་ཡལ་ག་ལ༌འཇུ་སྟེ། ལྷ་མོ་རབ་ཏུ་དགའ་བའི་འོད་ལ་དབང་བསྒྱུར་བ་ལས་བཅོམ་ལྡན་འདས་དེ་བཞིན་གཤེགས་པ་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན༌བལྟམ་མོ། །

དེའི་ཚེ་བཅོམ་ལྡན་འདས་དེ༌བལྟམ་ཁར། མ་མ་དྲི་མ་མེད་པ་སྐྱེད་པའི་འོད་ཅེས་བྱ་བ་སྟ་གོན་དུ་གནས་གནས་ཏེ། བྱང་ཆུབ་སེམས་དཔའ་དེ་བལྟམ་པར་གྱུར་མ་ཐག་ཏུ་འཇིག་རྟེན་གྱི་དབང་པོ་རྣམས་ཀྱིས་སྤོས་དྲི་ཤིན་ཏུ་ཞིམ་པའི་སྤོས་ཆུའི་བུམ་པ། མེ་ཏོག་དྲི་ཞིམ་ཞིང་ཡིད་དུ་འོང་བ་སྣ་ཚོགས་མངོན་པར་འཐོར་བས་སྐུ་བསིལ་ཏེ། དེ་ལ་ཚུལ་དང་མཐུན་པའི་མཆོད་པ་བསམ་གྱིས་མི་ཁྱབ་ལ་གྲངས་མེད་པ་མཆོག་ཏུ་བྱ་བས་མཆོད་ནས་མ་མ་དྲི་མ་མེད་པ་སྐྱེད་པའི་འོད་ཀྱི་པང་དུ་བཞག་གོ །མ་མ་དེས་བྱང་ཆུབ་སེམས་དཔའ་པང་དུ་བླངས་མ་ཐག་ཏུ། དེའི་མོད་ལ་མ་མ་དེ་དགའ་བ་དང་མོས་པའི་ཤུགས་ཆེན་པོ་ཐོབ་པར་གྱུར་ནས། བྱང་ཆུབ་སེམས་དཔའི་ཏིང་ངེ་འཛིན་ཡུལ་ཀུན་ཏུ༌ལྟ་བ་ཞེས་བྱ་བ་ཐོབ་པར་གྱུར་ཏོ། །

དེ་ཐོབ་པར་གྱུར་མ་ཐག་ཏུ་དེས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཚད་མེད་པ་དེ་དག་ཐམས་ཅད་ཀྱང་མཐོང་བར་གྱུར་ཏོ། །བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་ལའང་ཤིན་ཏུ་ཕྲ་བའི་ཚུལ་གྱིས་ཞུགས་པར་གྱུར་ཏེ། དེ་ནི་དཔེར་ན། མའི་མངལ་དུ་ཞུགས་མ་ཐག་པའི་རྣམ་པར་ཤེས་པ་ལྟ་བུའོ། །རྣམ་པར་ཐར་པ་དེ་ཐོབ་པར་གྱུར་པས་ཀྱང་། དེས་དེ་བཞིན་གཤེགས་པ་ཐམས་ཅད་སྐྱེ་བའི་རྣམ་པར་འཕྲུལ་པ། ཡང་དག་པར༌བལྟ་བའི་སྨོན་ལམ་ཆེན་པོ་ཡང་མངོན་པར་བསྒྲུབས་སོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད༌པས་བསྐྱེད་པའི་འོད་ཅེས་བྱ་བ་བྱུང་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་བྱང་ཆུབ་སེམས་དཔའི་མ་མ་དྲི་མ་མེད་པ་སྐྱེད་པའི་འོད་ཅེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས།

དེའི་ཚེ་དེའི་དུས་ན་བུད་མེད་ཁྲག་ཁྲིག་བརྒྱ་སྟོང་ཕྲག་ཉི་ཤུ་བྱུང་བར་གྱུར་པ་དེ་དག་གཞན་དག་ཅིག་ཡིན་པ་ཙམ་དུ་སེམས་ན་ཡང་དེ་ལྟར་མི་བལྟ་སྟེ། ལྷ་མོ་ཁྲག་ཁྲིག་བརྒྱ་སྟོང་ཕྲག་ཉི་ཤུ་པོ་ལུམ་བི་ནིའི་ནགས་ཚལ་ན༌གནས་པ་ཁོ་མོའི༌འཁོར་དུ་གྱུར་པ་འདི་དག་ཡིན་ནོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་དབང་ཕྱུག་གི་ཡོན་ཏན་གཞན་གྱིས་མི་ཐུབ་པའི་རྒྱལ་མཚན་གཞོན་ནུའི་ཡུམ་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ནའང་དེ་ལྟར་མི་བལྟ་སྟེ། ལྷ་མོ་སྒྱུ་མ་འདི་ནི་དེའི་ཚེ་དེའི་དུས་ན་རབ་ཏུ་དགའ་བའི་འོད་ལ་དབང་བསྒྱུར་བ་ཞེས་བྱ་བའི་ལྷ་མོར་གྱུར་ཏོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་རིན་པོ་ཆེའི་འོད་འཕྲོ་བའི་མིག་གི་འོད་ཅེས་བྱ་བ་བྱུང་བ་དེ་གཞན་ཞིག་ཡིན་པ༌ཙམ་དུ་སེམས་ན་ཡང་དེ་ལྟར་མི་བལྟ་སྟེ། རྒྱལ་པོ་ཟས་གཙང་མ་འདི་ནི༌དེའི་ཚེ་དེའི་དུས་ན་རྒྱལ་པོ་རིན་པོ་ཆེ་འོད་འཕྲོ་བའི་མིག་གི་འོད་ཅེས་བྱ་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོ་ནི་དེ་ཕྱིན་ཆད་དུ་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང་། སེམས་ཅན་རྣམ་པར་འདུལ་བའི་ཁྱུ་མཆོག་གི་མཐུས་རྣམ་པར་འཕྲུལ་པ་རྒྱ་མཚོ་ལ་ལྟ་ཞིང་ཁོང་དུ་ཆུད་པར་བྱེད་པ་དང་། སྐད་ཅིག་ཐམས་ཅད་དུ་བྲལ་བར་མ་གྱུར་ཏོ། །

རིགས་ཀྱི་བུ་ཁོ་མོ་ནི་མི་མཇེད་ཀྱི་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་འབྱམས་ཀླས་པ་ལས་བྱུང་བའི་དེ་བཞིན་གཤེགས་པ་རྣམས་ཀྱི༌སངས་རྒྱས་ཀྱི་ཞིང་རྒྱ་མཚོ་རྡུལ་ཤིན་ཏུ་ཕྲ་བ་ཐམས་ཅད་ན་ཡོད་པ་ལ་སེམས་ཀྱི་སྐད་ཅིག་ཐམས་ཅད་དུ་རྡུལ་ཤིན་ཏུ་ཕྲ་བ་ཐམས་ཅད་ལ་ཡོངས་སུ༌འདལ་བའི་ཡེ་ཤེས་ཀྱི་མིག་གིས་ལྟ་ཞིང་ཁོང་དུ་ཆུད་པར་བྱེད་དེ། སངས་རྒྱས་ཀྱི་ཞིང་དེ་དག་ཏུ་དེ་བཞིན་གཤེགས་པ་བྱུང་བ་རྒྱ་མཚོ་དག་ཀྱང་ལྟ་ཞིང་ཁོང་དུ་ཆུད་པར་བྱེད་ལ་དེ་བཞིན་གཤེགས་པ་དེ་དག་གི་བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་མཚོ་ཆེན་པོ་དག་ལ་ཡང་ལྟ་ཞིང་ཁོང་དུ་ཆུད་པར་བྱེད་པ་དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས༌དཔའི་སྐྱེ་བའི་རྣམ་པར་འཕྲུལ་པ་རྒྱ་མཚོ་དང་སེམས་ཅན་རྣམ་པར་གདུལ་བའི་ཁྱུ་མཆོག་གི་མཐུ་ཕྱུང་བས། རྣམ་པར་འཕྲུལ་པ་རྒྱ་མཚོ་ཐམས་ཅད་ལའང་། སེམས་ཀྱི་སྐད་ཅིག་ཐམས་ཅད་དུ་ལྟ་ཞིང་ཁོང་དུ་ཆུད་པར་བྱེད་དོ། །

ཇི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་རྡུལ་ཤིན་ཏུ་ཕྲ་བ་འབྱམས་ཀླས་པ་ཐམས་ཅད་གཅིག་ནས་གཅིག་ཏུ་བརྒྱུད་པ་ལ་འཇུག་པས་བྱང་ཆུབ་སེམས་དཔའ་སྐྱེ་བ་མ་ནོར་བར་མངོན་དུ་གྱུར་ཏེ། སངས་རྒྱས་ཀྱི་ཡོན་ཏན་ལ་ཞུགས་པར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་རྡུལ་ཤིན་ཏུ་ཕྲ་བ་འབྱམས་ཀླས་པ་ཐམས་ཅད་ཀྱི་ཁོང་དུ་ཆུད་པའི་ཞིང་རྒྱ་མཚོ་ཐམས་ཅད་ལའང་འཇུག་སྟེ། དེ་དག་ཏུའང་སངས་རྒྱས་རྒྱ་མཚོ་ཤིན་ཏུ་ཡངས་པ་ལ་འཇུག་གོ །སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔར་གྱུར་པའི་བྱང་ཆུབ་སེམས་དཔའ་འབྱུང་བའི་རྣམ་པར་འཕྲུལ་པ་རྣམས་ཀྱང་མངོན་དུ་གྱུར༌པར་ལྟའོ། །དེ་བཞིན་གཤེགས་པར་གྱུར་ནས་ཀྱང་མཆོད་པ་བྱེད་དོ། །དེ་བཞིན་གཤེགས་པ་དེ་དག་ལས་ཀྱང་ཆོས་བསྟན་པ་ཉན་ཏོ། །ཆོས་ལ་ཡང་གཉེར་བའི་ཆོས་ཀྱི་ནན་ཏན་དུ་བྱེད་དོ། །དེ་ནས་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱིས་དེའི་ཚེ། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་གསལ་བར་བསྟན་པའི་ཕྱིར་སངས་རྒྱས་ཀྱི་བྱིན༌གྱིས་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། ཚིགས་སུ་བཅད་པ་འདི་དག་སྨྲས་སོ། །རིམ་གྲོ་བསྐྱེད་ཅིང་ང་ལ་གང་འདྲི་བ། །དེ་དག་བདག་ལས་རྒྱལ་བའི་སྲས་ཉོན་ཅིག །རྒྱལ་བའི་སྤྱོད་ཡུལ་བལྟ་དཀའ་ཞི་བ་སྟེ། །རྒྱུ་དང་རྐྱེན་གྱི་ཚུལ་གྱིས་རྣམ་པར་བསྟན། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སྔོན་གྱི་བསྐལ་པ་བསམ་གྱིས་མི་ཁྱབ་དྲན། །བསྐལ་པའི་མིང་ནི་སྔ་ཕྱི་མཉམ་ཞེས་བྱ། །དེ་ལ་རྒྱལ་བ་བྱེ་བ་བརྒྱད་ཅུ་བྱུང་། །བསྐལ་པའི་དང་པོར་དེ་བཞིན་གཤེགས་བྱུང་བ། །དབང་ཕྱུག་ཡོན་ཏན་མི་ཐུབ་རྒྱལ་མཚན་ནོ། །ནགས་ཚལ་དམ་པ་གསེར་མདོག་མེ་ཏོག་ཏུ། །མགོན་པོ་དེ་འཁྲུངས་བདག་གིས་མཐོང་བར་གྱུར། །མིང་དུ་དྲི་མེད་སྐྱེད་པའི་འོད་ཅེས་བྱ། །དེ་ཡི་མ་མ་མཁས་པར་བདག་གྱུར་ཏེ། །བལྟམ་མ་ཐག་ཏུ་གསེར་མདོག་དམ་པའི་འོད། །འཇིག་རྟེན་དབང༌པོས་བདག་གི་པང་དུ་བཞག །གང་ཟག་དམ་པ་པང་དུ་བཞག༌ཚེ་ཡང་། །དེ་ཡི་སྤྱི་གཙུག་བལྟ་བར་མི་ནུས་ཏེ། །བསམ་ཡས་དེ་ལ་གཡས་དང་གཡོན་དུ་ཡང་། །བལྟས་ཤིང་མཐའ་རྙེད་མཐོང་བར་མ་གྱུར་ཏོ། །མཚན་རབ་བཟང་པོས་དེ་ནི་ཡོངས་སུ་བརྒྱན། །དྲི་མེད་དེ་སྐུ་བལྟ་ན་རབ་སྡུག་སྟེ། །རིན་ཆེན་གཟུགས་འདྲ་བདག་གིས་མཐོང་གྱུར་ནས། །དགའ་བའི་ཤུགས་དྲག་མཚུངས་མེད་རྣམ་པར་འཕེལ། །དེ་ཡི་ཡོན་ཏན་དཔག་ཡས་སེམས་སེམས་ནས། །ཁོ་མོའི་བསོད་ནམས་རྒྱ་མཚོ་དཔག་མེད་འཕེལ། །དེ་ཡི་རྣམ་འཕྲུལ་རྒྱ་མཚོ་མཐོང་གྱུར་ནས། །རྒྱ་ཆེན་བྱང་ཆུབ་སེམས་ཀྱང་སྐྱེས་པར་གྱུར། །རྒྱལ་བའི་ལེགས་པ་རྒྱ་མཚོ་དགའ་སྨོན་ནས། །སྨོན་ལམ་རྒྱ་མཚོ་བདག་གིས་རབ་ཏུ་བསྐྱེད། །འབྱམས་ཀླས་ཞིང་རྣམས་ཐམས་ཅད༌རྣམ་པར་སྦྱངས། །ངན་སོང་ལམ་རྣམས་ཀུན་ཀྱང་རྣམ་པར་བཟློག །ཞིང་རྣམས་འབྱམས་ཀླས་ཀུན་གྱི་བདེ་གཤེགས་རྣམས། །མ་བྱོན་བསམ་གྱིས་མི་ཁྱབ་མཆོད་པ་དང་། །སེམས་ཅན་སྡུག་བསྔལ་རྣམ་པར་དགྲོལ་བའི་ཕྱིར། །སྨོན་ལམ་རྒྱ་མཚོ་ཁོ་མོས་བཏབ་པར་གྱུར། །མགོན་པོ་དེ་ལས་བདག་གིས་ཆོས་ཐོས་ནས། །རྣམ་ཐར་དམ་པའི་དཀྱིལ་འཁོར་འདི་ཡང་ཐོབ། །བསྐལ་པ་ཞིང་རྣམས་བྱེ་བའི་རྡུལ་སྙེད་དུ། །སྤྱད་པ༌སྤྱད་དེ་དེ་ཡང་རྣམ་པར་སྦྱངས། །དེ་ལ་མགོན་པོ་ཇི་སྙེད་བྱུང་གྱུར་པ། །དེ་དག་མ་ལུས་བདག་གིས་ཀུན་ཀྱང་མཆོད། །རྣམ་ཐར་རྒྱ་མཚོ་འདི་ནི་སྦྱོང་བྱེད་ཅིང་། །དེ་དག་བསྟན་པ་ཁོ་མོས་ཡོངས་སུ་བཟུང་། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སྟོབས་བཅུ་མངའ་བ་ཇི་སྙེད་འདས་བྱུང་བ། །དེ་དག་ཆོས་ཀྱི་འཁོར་ལོ་ཁོ་མོས་བཟུང་། །རྣམ་ཐར་དཀྱིལ་འཁོར་འདི་ཡང་རབ་ཏུ་བསྒོམས། །སངས་རྒྱས་ཞིང་གི་རྡུལ་ཕྲན་ཇི་སྙེད་པ། །རྡུལ་རྩེ་འབྱམས་ཀླས་ཀུན་ལ་རྣམ་པར་མཐོང་། །རྡུལ་ཕྲན་རེ་རེ་ལ་ཡང་རྒྱ་མཚོའི་ཞིང་། །སྔོན་ཆད་རྒྱལ་བས་སྦྱངས་པ་རབ་ཏུ་མཐོང་། །ཞིང་རྣམས་འབྱམས་ཀླས་དེ་དག་ཀུན་ཏུ་ཡང་། །མགོན་པོ་ཐུགས་རྒྱུད་གཅིག་ལ་བསམ་ཡས་པའི། །རྣམ་འཕྲུལ་ཡངས་པ་ཡོངས་སུ་སྟོན་མཛད་ཅིང་། །ནགས་ཚལ་མཆོག་ཏུ་འཁྲུངས་གྱུར་བདག་གིས་མཐོང་། །རྒྱལ་བ༌ལ་ལ་ཞིང་རྣམས་ལ་ལ་ན། །བྱང་ཆུབ་དམ་པར་འཚང་རྒྱ་ཐུགས་དགོངས་ཤིང་། །དགའ་ལྡན་འཇིག་རྟེན་ཉིད་ན་བཞུགས་པ་ཡང་། །ཞིང་རྣམས་བྱེ་བ་བསམ་གྱིས་མི་ཁྱབ་པ། །ཞིང་རྣམས་རྒྱ་མཚོའི་དབྱིངས་སུ་རྣམ་འཕྲུལ་པ། །ཤིན་ཏུ་ཡངས་པ་སྐྱེ་བའང་བདག་གིས་མཐོང་། །ན་ཆུང་དམ་པའི་ཚོགས་ཀྱི་དབུས་བཞུགས་ཤིང་། །མགོན་པོ་ཆོས་རྣམས་སྟོན་པའང་དེ་བཞིན་མཐོང་། །ཞིང་རྣམས་བྱེ་བའི་རྡུལ་ཕྲན་རབ་སྙེད༌ཀྱི། །དཔའ་བོ་སེམས་ཀྱི་སྐད་ཅིག་རེ་རེ་ལ། །མངོན་པར་འབྱུང་ཞིང་ཤིང་རྒྱལ་དྲུང་གཤེགས་དང་། །སངས་རྒྱས་སྤྱོད་ཡུལ་ཡངས་པ་སྟོན་པ་མཐོང་། །ཞིང་གཅིག་རྡུལ་ལ་བསམ་གྱིས་མི་ཁྱབ་པར། །ཡུལ་རྣམས་གཞན་དང་གཞན་དག་སྟོན་མཛད་པས། །འགྲོ་རྒྱུད་སེམས་ཅན་སྡུག་བསྔལ་སྒྲོལ་མཛད་ཅིང་། །མི་གཙོ་རྣམ་པར་འཚང་རྒྱ་བདག་གིས་མཐོང་། །རྡུལ་ཕྲན་རེ་རེའི་རྩེ་ལ་མི་ཟད་པའི། །རང་འབྱུང་འཁོར་ལོ་རབ་ཏུ་བསྐོར་མཛད་ཅིང་། །དབྱངས་རྣམས་རྒྱ་མཚོ་མི་ཟད༌སྒྲོག་མཛད་པ། །ཆོས་སྤྲིན་རྒྱ་ཆེན་ཆར་འབེབས་མཛད་པ་མཐོང་། །འགྲོ་བ་ཀུན་ལ་རྣམ་པ་དུ་མར་ཡང་། །སྐད་ཅིག་རེ་རེར་མྱ་ངན་འདས་སྟོན་པ། །ཞིང་རྣམས་བྱེ་བའི་རྡུལ་ཕྲན་རབ་སྙེད་ཀྱི། །སངས་རྒྱས་ཞིང་གཅིག་རྡུལ་ལས་བདག་གིས་མཐོང་། །རྡུལ་གཅིག་བལྟས་ཀྱང་ཞིང་རྣམས་རྒྱ་མཚོ་དང་། །རྒྱལ་བ་འབྱུང་བ་ཇི་སྙེད་ཀུན་ཀྱང་མཐོང་། །ཚེ་རབས་ཀུན་ཏུ་ལུས་མང་ཁྲག་ཁྲིག་གིས། །དེ་དག་མཆོད་པའི་དོན་དུ་ཉེ་བར་ཕྱིན། །ཞིང་ཚུལ་རྒྱ་མཚོ་བསམ་གྱིས་མི་ཁྱབ་པའི། །འགྲོ་རྒྱུད་མི་ཟད་ཇི་སྙེད་ཡོད༌པ་ཡི། །འགྲོ་བ་ཀུན་ལ་མངོན་དུ་ཁོ་མོ་ནི། །ཆོས་སྤྲིན་ཡངས་པའི་ཆར་ཡང་རབ་ཏུ་འབེབས། །རྒྱལ་སྲས་ཁོ་མོས་བསམ་གྱིས་མི་ཁྱབ་པའི། །རྣམ་ཐར་དཀྱིལ་འཁོར་དམ་པ་འདི་ཤེས་ཀྱི། །བསྐལ་པ་བྱེ་བ་ཁྲག་ཁྲིག་བསམ་ཡས་སུ། །ཐམས་ཅད་བསྟན་པ་ཁོ་མོས་ནུས་རེ་སྐན། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ་སེམས་ཀྱི་སྐད་ཅིག་རེ་རེ་ལ་བསྐལ་པ་ཐམས་ཅད་དུ་ཞུགས་པའི་མངལ་ནས་ཡོངས་སུ་བྱུང་བའི་སེམས་དང་ལྡན་པ། ཆོས་ཀྱི་ཚུལ་ཐམས་ཅད་ངེས་པར་རྟོགས་པའི་སྐྱེ་བ་རབ་ཏུ་སྟོན་པ། དེ་བཞིན་གཤེགས་པ་ཐམས་ཅད་མཆོད་པའི་སྨོན་ལམ་གྱིས་བསམ་པ་ཡོངས་སུ་བསྐྱེད་པ་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་བྱ་བ་ལ་རབ་ཏུ་གཞོལ་བ། སེམས་ཅན་ཐམས་ཅད་ཀྱི་རིགས་དང་རྒྱུད་ཀྱི་ལམ་ཡོངས་སུ་བསྟན་པ་ལ་གཟུགས་བརྙན་ལྟ་བུར་གྱུར་པ།

དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་པདྨོའི་ནང་ནས་སྐྱེ་བ་འགྲོ་བ་ཐམས་ཅད་ཡོངས་སུ་སྨིན་པར་བྱ་བའི་དུས་ལ་མཁས་པ། སེམས་ཅན་ཐམས་ཅད་གདུལ་བ་ལ་མངོན་པར་མོས་ཤིང་ཚེར་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ། ཞིང་འབྱམས་ཀླས་པ་ཐམས་ཅད་དུ་རྣམ་པར་འཕྲུལ་པའི་སྤྲིན་ཡོངས་སུ་སྟོན་པ། འགྲོ་བ་ཐམས་ཅད་ཀྱི༌ལམ་གྱི་རྒྱུད་དུ་སྐྱེ་བ་དང་། རིགས་སུ་གཟུགས་བརྙན་བྱུང་བར་གྱུར་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་གྲོང་ཁྱེར་ཆེན་པོ་སེར་སྐྱའི་གནས་འདི་ན་ཤཱཀྱའི་བུ་མོ་གོ་པ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་སེམས་ཅན་ཡོངས་སུ་སྨིན་པར་བྱ་བའི་ཕྱིར། འཁོར་བ་ན་འཁོར་བར་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་ལུམ་བི་ནིའི་ནགས་ཚལ༌གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས༌ཡང་དང་ཡང་བལྟས་ཏེ། ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་དྲུང་ནས་སོང་ངོ་།། །།

ཁང་པའི་ལྷ་མོ་མྱ་ངན་མེད་པའི་དཔལ་དང་གཞོན་ནུ་ནོར་བཟང་གཉིས་ཀྱིས་ཆོས་ཀྱི་བགྲོ་གླེང་མཛད་ཚུལ་དང་དགེ་བའི་བཤེས་གཉེན་ཤཱཀྱའི་བུ་མོ་གོ་བ་ཞེས་བྱ་བས་ཐེག་པ་ཆེན་པོའི་ཆོས་བཅུའི་ལམ་གྱི་ཉམས་ལེན་བསྟན་པའི་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་ལུམ་བི་ནིའི་ནགས་ཚལ་གྱི་ལྷ་མོ་གཟི་བརྗིད་ཀྱི་དཀྱིལ་འཁོར་བཟང་པོས་དགའ་བའི་དཔལ་གྱི་དྲུང་ནས་སོང་སྟེ། གྲོང་ཁྱེར་ཆེན་པོ་སེར་སྐྱའི་གནས་གང་ན་བ་དེར་ཕྱིན་ནས། བྱང་ཆུབ་སེམས་དཔའི་རྣམ་པར་ཐར་པ་བསྐལ་པ་ཚད་མེད་པར་དམིགས་པ་ཐམས་ཅད་དུ་བྱང་ཆུབ་སེམས་དཔའི་སྐྱེ་བས་རྣམ་པར་འཕྲུལ་པ་ཡོངས་སུ་སྟོན་པ་དེ་ཉིད་བསྒོམ་པ་དང་། ཁོང་དུ་ཆུད་པར་བྱ་བ་དང་། རྒྱ་ཆེར་བྱ་བ་དང་། ནན་ཏན་དུ་བྱ་བ་དང་། ཤིན་ཏུ༌སྦྱང་བ་དང་། ཡོངས་སུ་བསམ་པ་དང་། རྣམ་པར་དབྱེ་བ་བྱེད་ཅིང་། བྱང་ཆུབ་སེམས་དཔའ་ཡང་དག་པར་འགྲོ་བའི༌ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་གང་ན་བ་དེར་སོང་ངོ་། །

དེར་འགྲོ་བའི་ཚེ་བྱང་ཆུབ་སེམས་དཔའ་ཡོངས་སུ་བགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ཞེས་བྱ་བ༌དེ་ལ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས་བསུ་ནས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ་ཤེས་རབ་དང་། ཡེ་ཤེས་ཆེན་པོས་རྣམ་པར་གནོན་པ་བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པ་སྒོམ་པ་ལ་ལྷག་པར་དམིགས་པའི་སྨོན་ལམ་གྱི་སེམས་དང་ལྡན་པ། ཆོས་ཡངས་པའི་གཞལ་མེད་ཁང་གི་སྤྱོད་ཡུལ་ལ་སྤྱོད་པ། ཆོས་ཀྱི་གྲོང་ཁྱེར་དུ་མངོན་པར་གཞོལ་བ། བྱང་ཆུབ་སེམས་དཔའི་ཐབས་ཀྱི་ཚུལ་མཐའ་ཡས་པས་སེམས་ཅན་འདུལ་བ་ལ་འཇུག་པ་རྒྱུན་མི་གཅོད་པ། དེ་བཞིན་གཤེགས་པའི་ཡོན་ཏན་རྒྱ་མཚོ་སྣང་བ་རབ་ཏུ་ཐོབ་པ། འགྲོ་བ་ཐམས་ཅད་རྣམ་པར་གདུལ་བ་ལ་རབ་ཏུ་སྣང་བའི་སྤོབས་པ་དང་། ཡེ་ཤེས་མངོན་དུ་གྱུར༌པ་སེམས་ཅན་ཐམས་ཅད་ཀྱི་སྤྱོད་པ་ཤེས་པའི་ལུས་ཀྱིས་འགྲོ་ཞིང་རྗེས་སུ་འབྲང་བར་བྱ་བའི་སྤྱོད་པ་ལ་མངོན་དུ་གྱུར་པའི་སེམས་དང་ལྡན་པ། འགྲོ་བ་ཐམས་ཅད་ཀྱི་སེམས་ཀྱི་དགའ་བ་རྒྱ་མཚོའི་ཤུགས་རྣམ་པར་འཕེལ་བར་བྱ་བའི་སྨོན་ལམ་དང་ལྡན་པ།

དེ་བཞིན་གཤེགས་པ་ཐམས་ཅད་ཀྱི་ཆོས་ཁོང་དུ་ཆུད་པར་བྱ་བའི་ལམ་དུ་ཞུགས་པ། ཁྱོད་བྱོན་པ་ལེགས་སོ། །མིག་ཕྱིར་གླན་པ་མེད་པས་སྤྱོད་པ་དང་། སྤྱོད་ལམ་ཟབ་ཅིང་རྣམ་པར་དག་པའི་སྤྱོད་ཡུལ་ཅན་ཁྱོད་ལ་བལྟས་ན། ཁྱོད་ནི་རིང་པོ་མི་ཐོགས་པར་དེ་བཞིན་གཤེགས་པའི་སྐུ་དང་། གསུང་དང་། ཐུགས་ཀྱི་རྒྱན་རྣམ་པར་དག་པ་བླ་ན་མེད་པ་རབ་ཏུ་ཐོབ་སྟེ། མཚན་དང་དཔེ་བྱད་བཟང་པོས་རབ་ཏུ་བརྒྱན་པའི་ལུས་དང་སྟོབས་བཅུའི་ཡེ་ཤེས་སྣང་བས་བརྒྱན་པའི་སེམས་ཀྱིས་འཇིག་རྟེན་དུ་རྣམ་པར་སྤྱོད་པར་འགྱུར་རོ། །ཁྱོད་ཀྱི་བརྩོན་འགྲུས་དང་རྣམ་པར་གནོན་པ་ལ་བལྟས་ན། ཁྱོད་ནི་རིང་པོ་མི་ཐོགས་པར་དུས་གསུམ་གྱི་དེ་བཞིན་གཤེགས་པ་མངོན་དུ་གྱུར་པར་མཐོང་བ་དང་ལྡན་ཞིང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་འཛིན་པ་དང་། བྱང་ཆུབ་སེམས་དཔའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ཆོས་ཞི་བ་དང་ལྡན་པའི་གཞལ་མེད་ཁང་གི་དགའ་བ༌མྱོང་བ་དང་། སངས་རྒྱས་ཀྱི་རྣམ་པར་ཐར་པ་ཟབ་མོར་ཆུད་པར་འགྱུར་རོ། །

དེ་ཡང་དེ་ལྟར་ཁྱོད་དགེ་བའི་བཤེས་གཉེན་གྱི་དྲུང་དུ་འགྲོ་བ་དང་། བལྟ་བ་དང་བསྙེན་བཀུར་བ་དང་། གདམས་ངག་མ་ནོར་བར་བླང་བ་དང་། དེའི་ཡོན་ཏན་ལ་ནན་ཏན་དུ་བྱ་བའི་ཚུལ་ལ་བརྩོན་པར་བྱེད་པས་ཡོངས་སུ་མི་སྐྱོ། ཕྱིར་མི་ལྡོག ། སྒྱིད་ལུག་པར་མི་འགྱུར་ཏེ། ཁྱོད་ལ་བགེགས་སམ། བར་དུ་གཅོད་པའམ། སྒྲིབ་པ་གང་གིས་ཀྱང་མི་ཚུགས་ཏེ། བདུད་དམ་བདུད་ཀྱི་རིས་སུ་གཏོགས་པའི་ལྷ་རྣམས་ཀྱང་མདུན་ན་གནས་པ་མེད་པས་དེའི་ཕྱིར་ཁྱོད་ནི་རིང་པོར་མི་ཐོགས་པར་སེམས་ཅན་ཐམས་ཅད་དགའ་བར་བྱེད་པར་འགྱུར་རོ། །དེ་སྐད་ཅེས་སྨྲས་པ་དང་།

ཚོང་དཔོན་གྱི་བུ་ནོར་བཟང་གིས་བྱང་ཆུབ་སེམས་དཔའ་ཡོངས་སུ་འགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ལ་འདི་སྐད་ཅེས་སྨྲས་སོ། །ལྷ་མོ་ཁྱོད་ཀྱིས་ཇི་སྐད་དུ་སྨྲས་པ་དེ་ལྟར་འགྱུར་རོ། །ལྷ་མོ་ཁོ་བོ་ནི་སེམས་ཅན་ཐམས་ཅད་ཀྱི་ཉོན་མོངས་པའི་གདུང་བ་རྣམ་པར་ཞི་བས་དགའ་བར༌འགྱུར་ཏེ། སེམས་ཅན་ཐམས་ཅད་ཀྱི་ལས་ཉམ་ང་བའི་རྣམ་པར་སྨིན་པའི་ཕྱིར་ལྡོག་པ་དང་། སེམས་ཅན་ཐམས་ཅད་ཀྱི་བདེ་བ་འགྲུབ་པ་དང་། སེམས་ཅན་ཐམས་ཅད་ཁ་ན་མ་ཐོ་བ་མེད་པའི་ལས་ལ་ནན་ཏན་ཏུ་བྱེད་པས་དགའ་བ་དམ་པ་ཉམས་སུ་ཚོར་བར་འགྱུར་རོ། །ནམ་སེམས་ཅན་དེ་དག་ལས་དང་ཉོན་མོངས་པ་རྣམ་པ་སྣ་ཚོགས་མི་བདེ་བའི་སྦྱོར་བས་སེམས་རྣམ་པར་འཁྲུགས་ཤིང་ངན་སོང་དུ༌ལྟུང་བར་འགྱུར་བའམ། བདེ་བའི་རྒྱུད་ན་གནས་ཀྱང་ལུས་དང་སེམས་ཀྱི་སྡུག་བསྔལ་དང་ཡིད་མི་བདེ་བ་སྣ་ཚོགས་ཉམས་སུ་མྱོང་བར་གྱུར་ཅིང་། མི་དགའ་བར་གནས་པ་དེའི་ཚེ། བྱང་ཆུབ་སེམས་དཔའ་རྣམས་ཀྱང་ཤིན་ཏུ་ཡིད་མི་བདེ་བར་འགྱུར་རོ། །

ལྷ་མོ་འདི་ལྟ་སྟེ། དཔེར་ན། མི་ཤིན་ཏུ་ངང་གིས་བྱམས་པ་ཞིག་ལ་བུ་གཅིག་པ་སྡུག་ཅིང་ཡིད་དུ་འོང་བ་ཞིག་བདོག་པར་གྱུར་ལ། དེའི་ཡན་ལག་དང་ཉིང་ལག་བཅད་པ་ཞིག་མཐོང་ན་ཤིན་ཏུ་ངང་གིས་བྱམས་པའི་ཕྱིར་རབ་ཏུ་ཡིད་མི་བདེ་ཞིང་མི་དགའ་བར་འགྱུར་རོ། །ལྷ་མོ་དེ་བཞིན་དུ་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེའང་སེམས་ཅན་རྣམས་ལས་དང་ཉོན་མོངས་པའི་དབང་གིས་ངན་སོང་གསུམ་གྱི་རྒྱུད་དུ་ལྷུང་བ་ཞིག་མཐོང་ན་རབ་ཏུ་མི་དགའ་ལ་ཤིན་ཏུ་ཉམས་མི་བདེ་བར་འགྱུར་རོ། །

གང་གི་ཚེ་སེམས་ཅན་རྣམས་ལུས་དང་ངག་དང་ཡིད་ཀྱིས་ལེགས་པར་སྤྱད་པ་ཡང་དག་པར་ལེན་པའི་རྒྱུས་ལུས་ཞིག་ནས་བདེ་བའི་རྒྱུད་མཐོ་རིས་ཀྱི་འཇིག་རྟེན་དུ་སྐྱེ་བར་གྱུར་ཏམ། ལྷ་དང་མིའི་ལམ་གྱི་རྒྱུད་དུ་ལུས་དང་སེམས་ཀྱི་བདེ་བ་ཉམས་སུ་མྱོང་བ་ཞིག་ཏུ་གྱུར་ན། དེའི་ཚེ་བྱང་ཆུབ་སེམས་དཔའ་ཤིན་ཏུ་བདེ་བ་དང་ལྡན་ཞིང་། ཉམས་བདེ་བ་དང་ཡིད་དགའ་བ་དང་། རབ་ཏུ་སྤྲོ་བ་དང་། དགའ་བའི་ཡིད་ཉམས་སུ་བདེ་བ་དང་ལྡན་པར་འགྱུར་རོ། །ལྷ་མོ་བྱང་ཆུབ་སེམས་དཔའ་རྣམས་ནི་བདག་གི་དོན་གྱི་ཕྱིར་ཐམས་ཅད་མཁྱེན་པ་ཉིད་དུ་སྨོན་ཅིང་དོན་དུ་གཉེར་བ་མ་ཡིན་ཏེ། འཁོར་བའི་དགའ་བ་དང་། བདེ་བ་སྣ་ཚོགས་ཉམས་སུ་མྱོང་བར་བྱ་བའི་ཕྱིར་མ་ཡིན། འདོད་པའི་ཁམས་སུ་གཏོགས་པའི་དགའ་བ་རྣམ་པ་ཐ་དད་པར་སྣ་ཚོགས་དོན་དུ་གཉེར་བས་མ་ཡིན། འདུ་ཤེས་དང་སེམས་དང་ལྟ་བ་ཕྱིན་ཅི་ལོག་ཏུ་གྱུར་པའི་དབང་གིས་མ་ཡིན། ཀུན་ཏུ་སྦྱོར་བ་དང་། འཆིང་བ་དང་། བག་ལ་ཉལ་བ་དང་། ཀུན་ནས་འཁོར་བའི་དབང་དུ་གྱུར་པས་མ་ཡིན། སྲེད་པ་དང་ལྟ་བའི་དབང་དུ་གྱུར་པས་མ་ཡིན། སེམས་ཅན་སྣ་ཚོགས་དང་འདུ༌ཞིང་འཛི་བའི་དགའ་བའི་འདུ་ཤེས་ཀྱིས་སེམས་རྣམ་པར་འཕེལ་བས་མ་ཡིན། བསམ་གཏན་གྱི་དགའ་བ་དང་བདེ་བ༌མྱོང་བ་ཡོངས་སུ་ཆགས་པས་མ་ཡིན། སྒྲིབ་པ་སྣ་ཚོགས་ཀྱིས་བསྒྲིབས་ཤིང་འཁོར་བའི༌རྒྱུད་ན་འགྲེ་ལྡོག་པ་མ་ཡིན་གྱི། ལྷ་མོ་བྱང་ཆུབ་སེམས་དཔའ་རྣམས་ནི་སེམས་ཅན་འཁོར་བའི་རྒྱ་མཚོ་ན་འཁོད་ཅིང་། སྡུག་བསྔལ་དཔག་ཏུ་མེད་པས་ཤིན་ཏུ་མནར་བ་རྣམས་ལ་སྙིང་རྗེ་ཆེན་པོ་བསྐྱེད་ཅིང་། འགྲོ་བ་ཐམས་ཅད་ཡོངས་སུ་བསྡུ་བའི་སྨོན་ལམ་ཆེན་པོ་མངོན་པར་བསྒྲུབས་ཏེ། དེ་དག་སྙིང་རྗེ་ཆེན་པོས་སྨོན་ལམ་མངོན་པར་བསྒྲུབས་པའི་ཤུགས་ཀྱིས་སེམས་ཅན་ཡོངས་སུ་སྨིན་པར་བྱ་བ་དང་། གདུལ་བ་ལ་བརྩོན་ཞིང་འཁོར་བ་ན་བྱང་ཆུབ་སེམས་དཔའི་སྤྱད་པ་སྤྱོད་པར་སྣང་ངོ་། །

དེ་དག་ནི་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་རྣམ་པར་བཟློག་པའི་དོན་དུ་ཐམས་ཅད་མཁྱེན་པའི་ཡེ་ཤེས་སྒྲིབ་པ་མེད་པ་ཡོངས་སུ་ཚོལ་ཞིང་དེ་བཞིན་གཤེགས་པ་ཐམས་ཅད་མཆོད་པ་དང་། བསྙེན༌བཀུར་བའི་སྨོན་ལམ་མངོན་པར་སྒྲུབ་བོ། །དེ་དག་དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་སྨོན་ལམ་གྱི་དབང་གིས་བྱང་ཆུབ་སེམས་དཔའི་སྤྱོད་པས་ཡོངས་སུ་སྐྱོ་བ་མེད་དེ། དེ་དག་བྱང་ཆུབ་སེམས་དཔའི་སྤྱད་པ་ལ་སྤྱོད་པའི་ཚེ། ཀུན་ནས་ཉོན་མོངས་པའི་ཞིང་མཐོང་ན། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བའི་སྨོན་ལམ་མངོན་པར་སྒྲུབ་བོ། །ཀུན་ནས་ཉོན་མོངས་པའི་ཞིང་ཡོངས་སུ་སྦྱོང་ཞིང་སེམས་ཅན་ཐམས་ཅད་ཀྱི་སྐྱེ་མཆེད་སྣ་ཚོགས་མཐོང་བར་གྱུར་པའི་ཚེ། ཆོས་ཀྱི་སྐུ་ཐ་དད་པ་མེད་ཅིང་བླ་ན་མེད་པ་ཡོངས་སུ་དག་པར་བྱ་བའི་ཕྱིར་སྨོན་ལམ་མངོན་པར་སྒྲུབ་བོ། །སེམས་ཅན་རྣམས་ཀྱི་ལུས་དང་ངག་དང་སེམས་ཀུན་ནས་ཉོན་མོངས་པ་དང་ལྡན་པར་མཐོང་ན། སེམས་ཅན་ཐམས་ཅད་ཀྱི་ལུས་དང་། ངག་དང་། སེམས་ཀྱི་རྒྱན་ཡོངས་སུ་དག་པར་བྱ་བའི་ཕྱིར་སྨོན་ལམ་མངོན་པར་སྒྲུབ་བོ། །སེམས་ཅན་སྐྱེ་མཆེད་མ་ཚང་བ་དང་། སེམས་ཡོངས་སུ་མ་དག་པ་མཐོང་ན། སེམས་ཅན་ཐམས་ཅད་ཀྱི་སེམས་དང་། སྤྱོད་པ༌ཡོངས་སུ་སྦྱོང་ཞིང་བྱང་ཆུབ་སེམས་དཔའི་སྤྱད་པ་ལ་སྤྱོད་པས་ཡོངས་སུ་སྐྱོ་བ་མེད་དོ། །

ལྷ་མོ་དེ་ལྟར་བྱང་ཆུབ་སེམས་དཔའ་རྣམས་ནི་ཡོངས་སུ་སྐྱོ་བ་མེད་པའི་སེམས་ཀྱིས་བྱང་ཆུབ་སེམས་དཔའི་སྤྱོད་པ་མཐའ་དང་དབུས་མེད་པ་ལ་སྤྱོད་དེ། དེ་ལྟར་སྤྱོད་པ་ནི་ལྷ་དང་མིའི་ཕུན་སུམ་ཚོགས་པ༌ཡོངས་སུ་བསྐྱེད་པས་ལྷ་དང་བཅས་པའི་འཇིག་རྟེན་གྱི་རྒྱན་དུ་གྱུར་པ་ཡིན། བྱང་ཆུབ་ཏུ་སེམས་བསྐྱེད་པ་ལ་རབ་ཏུ་འགོད་པའི་ཕྱིར་ཕ་དང་མར་གྱུར་པ་ཡིན། བྱང་ཆུབ་སེམས་དཔའི་ལམ་དུ་འཛུད་པས་མ་མ་ལྟ་བུར་གྱུར་པ་ཡིན། ངན་སོང་གི་གཡང་སའི་འཇིགས་པ་ལས་བསྲུང་བའི་ཕྱིར་ལྷན་ཅིག་སྐྱེས་པའི་ལྷ་རྟག་ཏུ་ཕྱི་བཞིན་འབྲང་བ་ལྟ་བུར་གྱུར་པ་ཡིན། འཁོར་བའི་རྒྱ་མཚོ་ལས་སྒྲོལ་བའི་ཕྱིར་མཉན་པ་ཆེན་པོ་ལྟ་བུར་གྱུར་པ་ཡིན། བདུད་དང་ཉོན་མོངས་པའི༌འཇིགས་པ་ཐམས་ཅད་རྣམ་པར་བཟློག་པའི་ཕྱིར་སྐྱབས་སུ་གྱུར་པ་ཡིན། ཤིན་ཏུ་བསིལ་བའི་རང་བཞིན་ཉེ་བར་སྟོབས་པས་གནས་སུ་གྱུར་པ་ཡིན། སངས་རྒྱས་རྒྱ་མཚོ་ཐམས་ཅད་དུ་འཇུག་པར་བྱེད་པས་མུ་སྟེགས་སུ་གྱུར་པ་ཡིན། ཆོས་རིན་པོ་ཆེའི་གླིང་དུ་སྐྱེལ་བས་མགོན་བྱེད་པར་གྱུར་པ་ཡིན། སངས་རྒྱས་ཀྱི་ཡོན་ཏན་ཐམས་ཅད་ཀྱི་མེ་ཏོག་གིས་སེམས་ཡོངས་སུ་རྒྱས་པར་བྱེད་པས་མེ་ཏོག་ཏུ་གྱུར་པ་ཡིན། བསོད་ནམས་དང་ཡེ་ཤེས་ཀྱི་འོད་ཡངས་པ་རབ་ཏུ་འགྱེད་པས་རྒྱན་དུ་གྱུར་པ་ཡིན། ཀུན་ནས་མཛེས་པས་དགའ་བ་དང་བདེ་བ་དམ་པ༌བྱེད་པ་ཡིན། ཁ་ན་མ་ཐོ་བ་མེད་པའི་ལས་ལ་ནན་ཏན་ཏུ་བྱེད་པས་ཕྲད་ན་ལེགས་པ་ཡིན། ཡན་ལག་དམ་པ་རྣམ་པ་ཐམས་ཅད་དུ་ཡོངས་སུ་ཚང་བའི་ལུས་དང་ལྡན་པས་ཀུན་ཏུ་བཟང་བ་ཡིན།

བལྟ་ན་མི་མཐུན་པ་མེད་པས་གཏང་མི་བྲ་བའི་གཟུགས་དང་ལྡན་པ་ཡིན། ཡེ་ཤེས་ཀྱི་འོད་ཟེར་རབ་ཏུ་འགྱེད་པའི་ཕྱིར་འོད་བྱེད་པ་ཡིན། ཆོས་ཀྱི་སྒྲོན་མ་འཛིན་པའི་ཕྱིར་སྣང་བ་བྱེད་པ་ཡིན། བྱང་ཆུབ་ཀྱི་བསམ་པ་ཡོངས་སུ་དག་པར་བྱེད་པའི་ཕྱིར་གསལ་བར་བྱེད་པ་ཡིན། བདུད་ཀྱི་ལས་རྣམ་པར་བཟློག་པའི་ཕྱིར་དམག་དཔོན་དུ་གྱུར་པ་ཡིན། ཤེས་རབ་ཀྱི་འོད་ཟེར་གྱི་དྲ་བ་རབ་ཏུ་སྣང་བ་འགྱེད་པའི་ཕྱིར་ཉི་མར་གྱུར་པ་ཡིན། ཆོས་ཀྱི་ནམ་མཁའ་ལ་བློའི་ཟླ་བ་འཆར་བར་བྱེད་པས་ཟླ་བར་གྱུར་པ་ཡིན། འགྲོ་བ་ཐམས་ཅད་དུ་ཆོས་ཀྱི་སྤྲིན་ཆེན་པོའི་ཆར་འབབས་པས་སྤྲིན་དུ་གྱུར་པ་ཡིན་ཏེ། ལྷ་མོ་དེ་ལྟར་ནན་ཏན་དུ་བྱེད་པའི་བྱང་ཆུབ་སེམས་དཔའ་རྣམས་ནི་སེམས་ཅན་ཐམས་ཅད་ཀྱི་ཡིད་དུ་འོང་བ་ཡིན་ནོ། །དེ་ནས་བྱང་ཆུབ་སེམས་དཔའ་ཡོངས་སུ་བགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་ཁྱིམ་གྱི་ལྷ་མོ་སྟོང་ཕྲག་བཅུ་དང་བཅས་པས། ཚོང་དཔོན་གྱི་བུ་ནོར་བཟང་ལ་ལྷ་རྫས་ལས་ཀྱང་འདས་པའི་མེ་ཏོག་དང་། ཕྲེང་བ་དང་། བདུག་སྤོས་དང་། ཕྱེ་མ་དང་། བྱུག་པ་དང་། རིན་པོ་ཆེའི་རྒྱན་གྱི་ཆར་ཡིད་ཀྱི་རང་བཞིན་མངོན་པར་ཕབ་སྟེ། ཀུན་ནས་བསྐོར་ཅིང་རྗེས་སུ་འབྲངས་ནས། བྱང་ཆུབ་སེམས་དཔའི་ཁང་པར་འགྲོ་བའི་ཚེ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །

བྱང་ཆུབ་རྫོགས་པར་ཐུགས་བསྐྱེད་ཅིང་། །སེམས་ཅན་ཀུན་ལ་ཐུགས་བརྩེ་བས། །རྒྱལ་བ་ཡེ་ཤེས་ཉི་མ་རྣམས། །བར་འགའ་ཞིག་ན་འཇིག་རྟེན་འབྱུང་། །བསྐལ་པ་བྱེ་བ་མང་པོས་ཀྱང་། །ཁྱོད་ཀྱི་ཞལ་མཐོང་ཤིན་ཏུ་དཀའ། །འཇིག་རྟེན་མ་རིག་མདོངས་པ་ལ། །ཁྱོད་ཀྱི་ཡེ་ཤེས་ཉི་ཆེན་ཡིན། །མི་ཤེས་རབ་རིབ༌བསྒྲིབས་པ་ཡི། །འཇིག་རྟེན་ཕྱིན་ཅི་ལོག་གཟིགས་ནས། །ཐུགས་རྗེ་ཆེན་པོ་རབ་བསྐྱེད་དེ། །ཁྱོད་ནི་རང་བྱུང་ཉིད་དུ་ཞུགས། །ཁྱོད་ཀྱི་དགོངས་པ་རྣམ་དག་པས། །སངས་རྒྱས་བྱང་ཆུབ་དོན་དུ་བརྩོན། །དགེ་བཤེས་བསྙེན་བཀུར་བསྟེན་མཛད་ཅིང་། །ལུས་སྲོག་ཕངས་པར་མཛད་མི་མངའ། །ཁྱོད་ནི་འཇིག་རྟེན་རྟེན་མི་མངའ། །འདུ་འཛི་མི་མངའ་གནས་མི་མངའ། །འདྲེས་པ་མ་མཆིས་མི་རྟེན་པས། །དགོངས་པ་ཐོགས་མེད་ནམ་མཁའ་བཞིན། །བྱང་ཆུབ་སེམས་དཔའི་སྤྱོད་མཛད་ཅིང་། །བསོད་ནམས་དཀྱིལ་འཁོར་འོད༌བཟང་བས། །ཡེ་ཤེས་སྒྲོན་མ་རབ་འགྱེད་པ། །འཇིག་རྟེན་ཚད་མེད་ཀུན་ཏུ་འཆར། །འཇིག་རྟེན་ནས་ཀྱང་འཕགས་མི་མཛད། །འཇིག་རྟེན་ཆོས་ཀྱིས་ཡོང་མི་འགོ །ཆགས་པ་མེད་པར་འཇིག་རྟེན་སྤྱོད། །མཁའ་ལ་སེར་བུ་ཇི་བཞིན་ནོ། །བསྐལ་པའི་མེ་འབར་མེ་བཞིན་དུ། །རྟག་ཏུ་འབར་བས་རབ་ཏུ་བརྩོན། །མེ་ལྟ༌བུ་ཡི་བརྩོན་འགྲུས་ཀྱིས། །བྱང་ཆུབ་སྤྱད་པ་སྤྱོད་པར་མཛད། །སེང་གེ་བཞིན་དུ་ཤིན་ཏུ་དཔའ། །བརྩོན་འགྲུས་རྣམ་པར་གནོན་པ་བརྟན། །ཡེ་ཤེས་རྣམ་པར་གནོན་དང་ལྡན། །གཞན་གྱིས་ཐུབ་པ་མེད་པར་སྤྱོད། །ཆོས་དབྱིངས་རྒྱ་མཚོ་འདི་དག་ན། །རྒྱ་མཚོའི་ཚུལ་རྣམས་ཇི་སྙེད་པ། །དེར་ཡང་དགེ་བཤེས་བསྙེན་བཀུར་བས། །དཔའ་བོ་ཁྱོད་ནི་འཇུག་པར་འགྱུར། །དེ་ནས་བྱང་ཆུབ་སེམས་དཔའ༌ཡོངས་སུ་བགྲོ་བའི་ཁང་པའི་ལྷ་མོ་མྱ་ངན་མེད་པའི་དཔལ་གྱིས། ཚོང་དཔོན་གྱི་བུ་ནོར་བཟང་ལ་ཚིགས་སུ་བཅད་པ་དེ་དག་གིས་མངོན་པར་བསྟོད་དེ། དེ་འགྲོ་བའི་ཕྱི་བཞིན་ཆོས་འདོད་པའི་དོན་དུ་འབྲང་བར་གྱུར་ཏོ། །

དེ་ནས་ཚོང་དཔོན་གྱི་བུ་ནོར་བཟང་བྱང་ཆུབ་སེམས་དཔའ༌ཡང་དག་པར་བགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་དུ་ཕྱིན་ཏེ། ནང་དུ་སོང་ནས་ཤཱཀྱའི་བུ་མོ་གོ་པ་མཐོང་བར་འདོད་དེ་ཀུན་ཏུ་བལྟས་ན་ཤཱཀྱའི་བུ་མོ་གོ་པ་བྱང་ཆུབ་སེམས་དཔའ༌ཡང་དག་པར་བགྲོ་བའི་ཁང་པ་ཆོས་ཀྱི་དབྱིངས་རབ་ཏུ་སྣང་བའི་འོད་ཀྱི་དབུས་ན། སྟན་རིན་པོ་ཆེ་བྱང་ཆུབ་སེམས་དཔའ་ཐམས་ཅད་ཀྱི་གནས་སྣང་བར་བྱེད་པའི་གཟུགས་བརྙན་གྱི་པདྨོའི་སྙིང་པོ་ཅན་ཞིག་ལ་བུད་མེད་རྒྱལ་པོའི་རིགས་སུ་བྱུང་བ། སྔོན་བྱང་ཆུབ་སེམས་དཔའི་སྤྱོད་པ་ལ་དགེ་བའི་རྩ་བའི་སྐལ་བ་མཉམ་པ། སྔོན་སྦྱིན་པའི་ཡོངས་སུ་བསྡུ་བས་ཤིན་ཏུ་བསྡུས་པ། ཚིག་སྙན་ཅིང་འཇམ་པར་སྨྲ་བའི་ངང་ཚུལ་དང་ལྡན་པ། ཐམས་ཅད་མཁྱེན་པ་ཉིད་དུ། དོན་མངོན་དུ་བྱ་བས་ཤིན་ཏུ་བསྡུས་པ། སངས་རྒྱས་དང་བྱང་ཆུབ་སེམས་དཔའི་ཡང་དག་པར་བསྒྲུབ་པ་ལ་དོན་མཐུན་པས་ཤིན་ཏུ་བཟུང་བ། སྙིང་རྗེ་ཆེན་པོ་སྔོན་དུ་འགྲོ་བས་བུ་དང་བུ་མོ་ཡོངས་སུ་གཟུང་བའི་ཚུལ་བཅངས་པ། བྱམས་པ་ཆེན་པོ་དང་ལྡན་པའི་རང་གི་ཁྱིམ་ཐབ་ཀྱི་རྗེས་སུ་འབྲང་བ་ཡོངས་སུ་དག་པར་བྱས་པ། སྔོན་བྱང་ཆུབ་སེམས་དཔའི་ཐབས་མཁས་པ། བསམ་གྱིས་མི་ཁྱབ་པས་ཡོངས་སུ་སྨིན་པར་བྱས་པ། སྟོང་ཕྲག་བརྒྱད་ཅུ་རྩ་བཞིའི་འཁོར་གྱིས་ཀུན་ནས་བསྐོར་ཅིང་འདུག་པ་མཐོང་ངོ་། །

བུད་མེད་སྟོང་ཕྲག་བརྒྱད་ཅུ་རྩ་བཞི་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ཚུལ་ལ་ཞུགས་པ། བྱང་ཆུབ་སེམས་དཔའི་བསླབ་པ་ལ་གཞན་གྱི་དྲིང་མི་འཇོག་པ། ཆགས་པ་ཐམས་ཅད་དང་བྲལ་བའི་སེམས་དང་ལྡན་པ། འཁོར་བའི་དགའ་བ་ཐམས་ཅད་ཀྱིས་སྐྱོ་བའི་ཡིད་དང་ལྡན་པ། ཆོས་ཀྱི་དབྱིངས་ཀྱི་ཚུལ་ཆགས་པ་མེད་པས་ཡོངས་སུ་དག་པ་ཐམས་ཅད་མཁྱེན་པ་ཉིད་མངོན་དུ་བྱ་བའི་སེམས་ཀྱི་ཤུགས་དང་ལྡན་པ། སྒྲིབ་པ་དང་བར་དུ་གཅོད་པའི་དྲ་བ་དང་བྲལ་བ། ཆགས་པའི་ལམ་ཐམས་ཅད་ལས་ཤིན་ཏུ་འདས་པ། ཆོས་ཀྱི་སྐུ་ལ་ལེགས་པར་སྤྲུལ་པས་རྣམ་པར་སྤྱོད་པ། འཇིག་རྟེན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མངོན་པར་ཕྱོགས་པ། བསོད་ནམས་རྒྱ་མཚོ་དྲི་མ་མེད་པས་ཡོངས་སུ་བྱུང་བའི་སེམས་དང་ལྡན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་གྱིས་ཤིན་ཏུ་བྱུང་བ། བྱང་ཆུབ་སེམས་དཔའི་སྟོབས་ཀྱི་ཤུགས་ཡངས་པས་ཡེ་ཤེས་ཀྱི་ཉི་མའི་དཀྱིལ་འཁོར་གྱིས་སེམས་རབ་ཏུ་སྣང་བ་ཡང་དག་པར་བསྐྱེད་པ་ཤ་སྟག་གོ །དེ་ནས་ཚོང་དཔོན་གྱི་བུ་ནོར་བཟང་ཤཱཀྱའི་བུ་མོ་གོ་པ་གང་ན་བ་དེར་ཕྱིན་ནས། ཤཱཀྱའིབུ་མོ་གོ་པའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལངས་ནས་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །

འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན་ཇི་ལྟར་ན་བྱང་ཆུབ་སེམས་དཔའ་རྣམས༌འཁོར་བ་ན་ཡོངས་སུ་འཁོར་ཡང་འཁོར་བའི་སྐྱོན་གྱིས་མི་གོས་པ་དང་། ཆོས་ཐམས་ཅད་མཉམ་པ་ཉིད་ཀྱི་རང་བཞིན་ཡང་ཁོང་དུ་ཆུད་ལ་ཉན་ཐོས་དང་། རང་སངས་རྒྱས་ཀྱི་ས་ལ་ཡང་མི་གནས་པ་དང་། སངས་རྒྱས་ཀྱི་ཆོས་སྣང་བ་ཡང་རབ་ཏུ་ཐོབ་ལ་བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་པ་དང་། བྱང་ཆུབ་སེམས་དཔའི་ས་ལ་ཡང་རབ་ཏུ་གནས་ལ་དེ་བཞིན་གཤེགས་པའི་ཡུལ་ཡང་ཡོངས་སུ་སྟོན་པ་དང་། འཇིག་རྟེན་གྱི་ལམ་གྱི་རྒྱུད་ཐམས་ཅད་ལས་ཀྱང་ཡོངས་སུ་འདས་ལ། འཇིག་རྟེན་གྱི་ལམ་གྱི་རྒྱུད་ཐམས་ཅད་དུ་ཡང་ཉེ་བར་སྤྱོད་པ་དང་། ཆོས་ཀྱི་ལུས་ཡོངས་སུ་གྲུབ་པ་དང་ལྡན་ཡང་། གཟུགས་ཀྱི་ལུས་ཁ་དོག་མཐའ་ཡས་པའང་མངོན་པར་སྒྲུབ་པ་དང་། མཚན་མ་མེད་པའི་ཆོས་ཀྱི་སྐུ་ལ་ཡང་རབ་ཏུ་གཞོལ་ལ་འགྲོ་བ་ཐམས་ཅད་ཀྱི་ཁ་དོག་དང་དབྱིབས་ཀྱི་ལུས་ཀྱང་ཡོངས་སུ་སྟོན་པ་དང་། ཆོས་ཐམས་ཅད་བརྗོད་དུ་མ་མཆིས་པར་ཡང༌རབ་ཏུ་རྟོགས་ལ། ངག་གི་ལམ་དང་ངེས་པའི་ཚིག་ཐམས་ཅད་བརྗོད་པས་ཀྱང་། སེམས་ཅན་རྣམས་ལ་ཆོས་སྟོན་པ་དང་། སེམས་ཅན་ཐམས་ཅད་སེམས་ཅན་མེད་པར་ཡང་རབ་ཏུ་ཤེས་ལ། སེམས་ཅན་གྱི་ཁམས་གདུལ་བའི་ཚུལ་ལས་ཀྱང་མི་ལྡོག་པ་དང་། ཆོས་ཐམས་ཅད་མ་སྐྱེས་པ་དང་། མ་འགགས་པར་ཡང་ཁོང་དུ་ཆུད་ལ་དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོར་བྱ་བའི་སྦྱོར་བ་ལས་ཀྱང་ཕྱིར་མི་ལྡོག་པ་དང་། ཆོས་ཐམས་ཅད་ལ་ལས་དང་རྣམ་པར་སྨིན་པ་མ་མཆིས་པར་ཡང་རྟོགས་ལ། དགེ་བའི་ལས་མངོན་པར་འདུ་བྱ་བའི་སྦྱོར་བ་ལས་ཀྱང་། ཕྱིར་མི་ལྡོག་པ་མ་འཚལ་ཏོ། །དེ་སྐད་ཅེས་སྨྲས་པ་དང་། ཤཱཀྱའི་བུ་མོ་གོ་པས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །

རིགས་ཀྱི་བུ༌དེ་ལྟར་ཁྱོད་བྱང་ཆུབ་སེམས་དཔའི་སྤྱོད་པའི་ཆོས་ཉིད་རྣམ་པ་དེ་ལྟ་བུས་དྲི་བར་སེམས་པ་ལེགས་སོ་ལེགས་སོ། །དྲི་བ་བརྗོད་པ་དེ་དག་ཀྱང་ཀུན་ཏུ་བཟང་པོའི་སྨོན་ལམ་དང་སྤྱོད་པ་ལ་མངོན་དུ་གྱུར་པའི་ཚིག་གོ །རིགས་ཀྱི་བུ་དེ་བས་ན་ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང་། སངས་རྒྱས་ཀྱི་བྱིན༌གྱི་རླབས་ཀྱིས་བསྟན་པར་བྱའོ། །

རིགས་ཀྱི་བུ། ཆོས་བཅུ་དང་ལྡན་པའི་བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་སྤྱོད་པ་རྣམ་པ་འདི་ལྟ་བུ་མིག་འཕྲུལ་གྱི་གཞིའི་དཔེ་དང་འདྲ་བ། ཡེ་ཤེས་ཀྱི་འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །བཅུ་གང་ཞེ་ན་འདི་ལྟ་སྟེ། དགེ་བའི་བཤེས་གཉེན་རླབས་པོ་ཆེ་ལ་བརྟེན་པ་དང་། མོས་པ་རྒྱ་ཆེན་པོ་རབ་ཏུ་ཐོབ་པ་དང་། དགེ་བའི་བསམ་པ་རླབས་པོ་ཆེ་རྣམ་པར་དག་པ་དང་། བསོད་ནམས་དང་ཡེ་ཤེས་རྒྱ་མཚོ་ཡངས་པས་རབ་ཏུ་བརྟན་པའི་སེམས་དང་། སངས་རྒྱས་སྐྱེ་བ་འབྱུང་བའི་ཆོས་བསྟན་པ་ཆེན་པོ་ཐོས་པ་རབ་ཏུ་ཐོབ་པ་དང་། དུས་གསུམ་གྱི་དེ་བཞིན་གཤེགས་པ་ལ་མོས་པའི་སེམས་ཀྱིས་གནས་པ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཐམས་ཅད་མཉམ་པ་ཉིད་དུ་ཁོང་དུ་ཆུད་པ་དང་། དེ་བཞིན་གཤེགས་པ་ཐམས་ཅད་ཀྱི་བྱིན༌གྱི་བརླབས་རབ་ཏུ་ཐོབ་པ་དང་། རང་བཞིན་གྱིས་སྙིང་རྗེ་ཆེན་པོའི་ལྷག་པའི་བསམ་པ་རྣམ་པར་དག་པ་དང་། འཁོར་བའི་འཁོར་ལོ་ཐམས་ཅད་རབ་ཏུ་གཅད་པའི་སེམས་ཀྱི་སྟོབས་ཤུགས་དྲག་པོ་དང་ལྡན་པ་རབ་ཏུ་ཐོབ་པ་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི༌བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱོད་པ་རྣམ་པ་འདི་ལྟ་བུ་མིག་འཕྲུལ་གྱི་གཞིའི་དཔེ་དང་འདྲ་བ་འོད་ཀུན་ཏུ་འབྱུང་བ་ཡོངས་སུ་རྫོགས་པར་བྱེད་དོ། །རིགས་ཀྱི་བུ་དེ་ལ་བརྩོན་འགྲུས་ཕྱིར་མི་ལྡོག་པ་དང་ལྡན་པའི་བྱང་ཆུབ་སེམས་དཔའ་རྣམས་ནི་ཆོས་དེ་དག་ཐོབ་པར་གྱུར་ནས་ཀྱང་མི་ཟད་པའི་ཚུལ་དུ་མངོན་པར་སྒྲུབ་ཅིང་། བསྒོམ་པ་དང་ཤིན་ཏུ་རྒྱ་ཆེ་བར་བྱ་བའི་ཕྱིར་དགེ་བའི་བཤེས་གཉེན་བསྙེན་བཀུར་ཅིང་རྣམ་པ་བཅུས་མངོན་པར་དགའ་བར་བྱེད་དོ། །

བཅུ་གང་ཞེ་ན་འདི་ལྟ་སྟེ། ལུས་དང་སྲོག་ལ་ཕོངས་པར་མི་རྩི་བ་དང་། འཁོར་བའི་ཡོ་བྱད་དོན་དུ་མི་གཉེར་བ་དང་། ཆོས་ཐམས་ཅད་ཀྱི་རང་བཞིན་མཉམ་པ་ཉིད་དུ་ཁོང་དུ་ཆུད་པ་དང་། ཐམས་ཅད་མཁྱེན་པའི་སྨོན་ལམ་ལས་ཕྱིར་མི་ལྡོག་པ་དང་། ཆོས་ཀྱི་དབྱིངས་ཀྱི་ཚུལ་ཐམས་ཅད་ལ་རྣམ་པར་ལྟ་བ་དང་། སྲིད་པའི་རྒྱ་མཚོ་ཐམས་ཅད་ལས་གྱེན་དུ་འཕགས་པའི་ཡིད་དང་། གནས་མེད་པའི་ཆོས་ཀྱི་ནམ་མཁའ་ལ་མི་གནས་མི་རྟེན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་ལ་བསྒྲིབས་པ་མེད་པ་དང་། ཞིང་རྒྱ་མཚོ་ཐམས་ཅད་དུ་རབ་ཏུ་འདལ་བ་དང་། བྱང་ཆུབ་སེམས་དཔའི་ཡེ་ཤེས་ཀྱི་དཀྱིལ་འཁོར་བསྒྲིབས་པ་མེད་པ་ཤིན་ཏུ་སྦྱངས་པ་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་རྣམས་དགེ་བའི་བཤེས་གཉེན་བསྙེན་བཀུར་ཅིང་མངོན་པར༌དགའ་བར་བྱེད་དོ། །དེ་ནས་ཤཱཀྱའི་བུ་མོ་གོ་པས་དོན་དེ་ཉིད་ཡོངས་སུ་བསྟན༌པར་བྱ་བའི་ཕྱིར། སངས་རྒྱས་ཀྱི་བྱིན་གྱིས་ཕྱོགས་བཅུར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རླབས་ཆེན་དྲི་མེད་བློ་ལྡན་གཞན་གྱི་དོན་ཞུགས་ཤིང་། །དགེ་བཤེས་དམ་པ་བསྙེན་བརྩོན་གཡོ་དང་སྒྱུ་མེད་པ། །སྟོན་པའི་འདུ་ཤེས་ཐོབ་ཅིང་སྐྱོ་མེད་བརྩོན་འགྲུས་ཅན། །དེ་དག་སྤྱོད་པ་འཇིག་རྟེན་མིག་འཕྲུལ་འདྲ་འདི་ཡིན། །གང་རྣམས་མོས་པ་རླབས་ཆེན་མཁའ་དང་འདྲ་ལྡན་ཞིང་། །དེའི་ཁོངས་སུ་དུས་གསུམ་འཇིག་རྟེན་ཆུད་པ་དང་། །ཞིང་དང་སེམས་ཅན་ཆོས་དང་སངས་རྒྱས་དེ་བཞིན་པ། །ཡེ་ཤེས་འོད་བྱེད༌སྤྱོད་པ་དེ་དག་འདི་ཡིན་ནོ། །གང་རྣམས་བསམ་པ་མཁའ་འདྲ་མཐའ་དང་དབུས་མེད་ལ། །ཀུན་ནས་ཉོན་མོངས་དྲི་མས་མ་གོས་རབ་དག་ཅིང་། །དེ་བཞིན་གཤེགས་པ་ཀུན་གྱི་ཡོན་ཏན་འབྱུང་གྱུར་པ། །དེ་དག་སྤྱོད་པ་མིག་འཕྲུལ༌གཞི་ཡི་རྣམ་པ་འདྲ། །ཀུན་མཁྱེན་ཡེ་ཤེས་རྣམ་ཡངས་ཚད་མེད་བསམ་ཡས་དག །ཡོན་ཏན་རྒྱ༌མཚོས་ཡིད་གསལ་ལྡན་པ་ཉེར་བརྟན་པ། །དེ་དག་བསོད་ནམས་རྒྱ་མཚོའི་ལུས་དང་སྙིང་པོ་སྟེ། །འཇིག་རྟེན་སྤྱོད་ཀྱང་འཇིག་རྟེན་དྲི་མས་གོས་མི་འགྱུར། །རྒྱལ་བའི་གསུང་གི་ཡན་ལག་སྒྲ་སྐད་ཚུལ་ཀུན་གྱིས། །ཆོས་ཀྱི་འབྲུག་སྒྲ་ཉན་ཀྱང་གང་རྣམས་མི་ངོམས་ཤིང་། །ཆོས་ཚུལ་རྗེས་སུ་སྙེགས་པའི་ཤེས་རབ་འོད་ཀྱི་སྒྲོན། །དེ་དག་འགྲོ་བར་འོད་གསལ་བྱེད་པའི་སྤྱོད་འདི་ཡིན། །གང་རྣམས་ཕྱོགས་བཅུའི་དེ་བཞིན་གཤེགས་པ་ཚད་མེད་པ། །གཞན་དང་གཞན་དག་སེམས་ཀྱི་སྐད་ཅིག་ཀུན་སེམས་ཤིང་། །བདེ་གཤེགས་རྒྱ་མཚོ་ཐམས་ཅད་ལྟ་ཞིང་ཤེས་བྱེད་པ། །སངས་རྒྱས་སེམས་ལྡན་དེ་དག་སྤྱོད་ཡུལ་འདི་ཡིན་ནོ། །རྒྱལ་བ་རྣམས་ཀྱི་རྣམ་པར་ཡངས་པའི་འཁོར་མཐོང་ཞིང་། །དེ་དག་ཏིང་ངེ་འཛིན་ཚུལ་རྒྱ་མཚོ་མང་པོ་དང་། །སྨོན་ལམ་རྒྱ་མཚོ་མཐའ་དང་དབུས་མེད་ཚུལ་འཇུག་པ། །མིག་འཕྲུལ་ལྟ་བུ་དེ་དག་སྤྱོད་པ་འདི་ཡིན་ནོ། །ཕྱོགས་བཅུའི་རྒྱལ་བ་མ་ལུས་ཀུན་གྱིས་བྱིན་བརླབས་ཏེ། །ཕྱི་མཐའི་བསྐལ་པར་སྤྱོད་བྱེད་ཀུན་ཏུ་བཟང་པོ་རྣམས། །ཞིང་རྣམས་འབྱམས་ཀླས་ཀུན་ཏུ་གཟུགས་བརྙན་བྱུང་གྱུར་པ། །ཆོས་འོད་བྱེད་པ་དེ་དག་སྤྱོད་པ་འདི་ཡིན་ནོ། །གང་རྣམས་ཡེ་ཤེས་ཉི་མའི་སྙིང་རྗེའི་དཀྱིལ་འཁོར་ཅན། །འགྲོ་བ་ཉམ་ཉེས་མཐོང་ཞིང་ཆོས་ཀྱི་འོད་སྣང་བས། །འགྲོ་བའི་མུན་པ༌བསྩལ་ཅིང་བསྟན་པ་འཆར་འབྱུང་བ། །ཉི་མ་ལྟ་བུར་དེ་དག་སྤྱོད་པ་འདི་ཡིན་ནོ། །སྐྱེ་དགུ་སྲིད་པའི་རྒྱུད་ན་འགྲོ་ལྡོག་མཐོང་གྱུར་ནས། །ཡིད་གསལ་འཁོར༌བའི་རྒྱུད་རྣམས་ཕྱིར་ཟློག་རབ་གནས་ཤིང་། །ཆོས་ཀྱི་འཁོར་ལོ་ཀུན་ནས་ཡོངས་སུ་སྒྲུབ་བྱེད་པ། །སྤྱོད་པ་ཀུན་བཟང་དམ་པའི་བློ་ཅན་རབ་ཏུ་སྤྱོད། །ཚུལ༌འདིར་བསླབས་པ་དེ་དག་མཐའ་དང་དབུས་མེད་པའི། །ལུས་རྣམས་བསམ་པ་ཇི་བཞིན་འགྲོ་བར་ཉེར་བསྟན་ཏེ། །གཟུགས་བརྙན་མིག་ཡོར་འདྲ་བའི་རང་ལུས་ཚད་མེད་པས། །སྲིད་པའི་རྒྱ་མཚོ་དག་ན་འགྲོ་མང་ཡོངས་སྨིན་བྱེད། །བྱམས་ཚུལ་ཤིན་ཏུ་ཡངས་པས་འགྲོ་མང་རྒྱས་བཀང་སྟེ། །མོས་པ་སྣ་ཚོགས་འགྲོ་ལ་རྣམ་པར་སྤྱོད་བསྟན་ནས། །འགྲོ་བར་བསམ་པ་ཇི་བཞིན་ཆོས་ཀྱི་ཆར་འབེབས་ཤིང་། །བརྟན་པ་བྱང་ཆུབ་དོན་དུ་སེམས་ཅན་ཁྲག་ཁྲིག་འདུལ། །དེ་ནས་ཤཱཀྱའི་བུ་མོ་གོ་པས་ཚིགས་སུ་བཅད་པ་དེ་དག་སྨྲས་ནས། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་མོས་ནི་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་ཐམས་ཅད་ལ་རྣམ་པར༌བལྟ་བའི་ཡུལ་ཐོབ་པའོ། །ནོར་བཟང་གིས་སྨྲས་པ། འཕགས་མ་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོའི་ཚུལ་ལ་རྣམ་པར་ལྟ་བའི་ཡུལ༌དེའི་ཡུལ་ཇི་ལྟ་བུ་ཞིག་མཆིས།

སྨྲས་པ། རིགས་ཀྱི་བུ་ཁོ་མོ་བྱང་ཆུབ་སེམས་དཔའི་རྣམ་པར་ཐར་པ་འདི་ལ་སྙོམས་པར་ཞུགས་ན། འཇིག་རྟེན་གྱི་ཁམས་འདིའི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་མཐོང་ཞིང་ཁོང་དུ་ཆུད་དོ། །བསྐལ་པ་དེ་དག་གི་སེམས་ཅན་ལམ་གྱི་རྒྱུད་ཐམས་ཅད་དུ་གཏོགས་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །སེམས་ཅན་དེ་དག་གི་ཤི་འཕོ་དང་སྐྱེ་བའི་སྒོ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །མངོན་པར་འགྲུབ་པའི་སྒོ་ཇི་སྙེད་ཅིག་ཡོད་པ་དང་། ལས་མངོན་པར་འདུ་བྱེད་པ་ཡོངས་སུ་སྒྲུབ་པ་ཇི་སྙེད་ཅིག་ཡོད་པ་དང་། ལས་རྣམ་པར་སྨིན་པ་སྣ་ཚོགས་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །

དེ་དག་གི་ལས་ཡོངས་སུ་བླངས་པ་དགེ་བ་ཡང་རབ་ཏུ་ཤེས་སོ། །མི་དགེ་བ་དང་འབྱུང་བ་དང་མི་འབྱུང་བ་དང་། ངེས་པ་དང་མ་ངེས་པ་དང་། ལོག་པར་ངེས་པ་དང་། བག་ལ་ཉལ་བ་དང་བཅས་པ་དང་། བག་ལ་ཉལ་བ་མེད་པ་དང་། དགེ་བའི་རྩ་བ་ཕུན་སུམ་ཚོགས་པ་དང་། དགེ་བའི་རྩ་བ་རྒུད་པར་གྱུར་པ་དང་། དགེ་བའི་རྩ་བ་ཡོངས་སུ་ཟིན་པ་དང་། མི་དགེ་བའི་རྩ་བ་ཡོངས་སུ་ཟིན་པ་དང་། དགེ་བ་དང་མི་དགེ་བ་ཡོངས་སུ་ཟིན་པ་དང་། དེ་དག་གི་དགེ་བའི་ཆོས་ཡོངས་སུ་འདུས་པ་དང་། སྡིག་ཏོའི་ཆོས་ཡོངས་སུ་འདུས་པའི་ལས་ཡོངས་སུ་བླངས་པ་ཡང་རབ་ཏུ་ཤེས་སོ། །བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་སངས་རྒྱས་བཅོམ་ལྡན་འདས་ཇི་སྙེད་ཅིག་བྱུང་བ་དེ་དག་གི་མཚན་རྒྱ་མཚོ་ཡང་ཤེས་ཤིང་ཁོང་དུ་ཆུད་དོ། །

སངས་རྒྱས་བཅོམ་ལྡན་འདས་དེ་དག་གི་ཐུགས་དང་པོ་བསྐྱེད་པ་རྒྱ་མཚོ་ཡང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་དུ་ཞུགས་པའི་ཚུལ་རྒྱ་མཚོ་ཡང་རབ་ཏུ་ཤེས་སོ། །སྨོན་ལམ་རྒྱ་མཚོ་ཐམས་ཅད་མངོན་པར་བསྒྲུབས་པ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་བྱུང་བ་རྣམས་ཀྱི་དྲུང་དུ་གཤེགས་པ་རྒྱ་མཚོ་ཡང་རབ་ཏུ་ཤེས་སོ། །སྔོན་གྱི་སངས་རྒྱས་ལ་མཆོད་ཅིང་རིམ་གྲོར་མཛད་པའི་སྦྱོར་བ་རྒྱ་མཚོ་ཡང་རབ་ཏུ་ཤེས་སོ། །སྔོན་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་མཛད་པ་རྒྱ་མཚོ་ཡང་རབ་ཏུ་ཤེས་སོ། །འབྱུང་བའི་རྒྱན་རྒྱ་མཚོ་ཡང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གིས་སེམས་ཅན་ཡོངས་སུ་སྨིན་པར་མཛད་པ་དང་། བཏུལ་བ་རྒྱ་མཚོ་ཡང་རབ་ཏུ་ཤེས་སོ། །མངོན་པར་འཚང་རྒྱ་བར་མཛད་པ་རྒྱ་མཚོ་ཡང་རབ་ཏུ་ཤེས་སོ། །ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་འཕྲུལ་པ་ཡང་རབ་ཏུ་ཤེས་སོ། །སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་ཐམས་ཅད་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་འཁོར་གྱི་དཀྱིལ་འཁོར་རྣམ་པར་ཕྱེ་བ་དག་ཀྱང་རབ་ཏུ་ཤེས་སོ། །འཁོར་གྱི་དཀྱིལ་འཁོར་དེ་དག་ན་ཉན་ཐོས་ཇི་སྙེད་ཅིག་འཁོད་པ་དེ་དག་གི་འབྱུང་བའི་ཚུལ་ཡང་རབ་ཏུ་ཤེས་སོ། །སྔོན་གྱི་དགེ་བའི་རྩ་བ་ཡང་རབ་ཏུ་ཤེས་སོ། །ལམ་བསྒོམས་པ་སྣ་ཚོགས་ཀྱང་རབ་ཏུ་ཤེས་སོ། །ཡེ་ཤེས་ཐོབ་པར་བྱ་བ་ཕུན་སུམ་ཚོགས་ཤིང་རྣམ་པར་དག་པའི་བྱེ་བྲག་ཀྱང་རབ་ཏུ་ཤེས་སོ། །

དེ་བཞིན་གཤེགས་པ་དེ་དག་གིས་སེམས་ཅན་ཇི་སྙེད་ཅིག་རང་སངས་རྒྱས་ཀྱི་བྱང་ཆུབ་ལ་བཀོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་སྔོན་གྱི་དགེ་བའི་རྩ་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །༌རང་སངས་རྒྱས་དེ་དག་གིས་རང་སངས་རྒྱས་ཀྱི་བྱང་ཆུབ་ཁོང་དུ་ཆུད་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་ཞི་བའི་རྣམ་པར་སྤྱོད་པ་ལ་རྣམ་པར་རྩེ་བའི་རྣམ་པར་ཐར་པའི་སྒོ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །

རང་སངས་རྒྱས་དེ་དག་གི་རྫུ་འཕྲུལ་གྱི་རྣམ་པར་འཕྲུལ་པ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གིས་སེམས་ཅན་ཇི་སྙེད་ཅིག་ཡོངས་སུ་སྨིན་པར་བྱས་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གིས་ཆོས་བསྟན་པ་ཇི་སྙེད་ཅིག་བརྗོད་པ་དེ་དག་ཀྱང་རབ་ཏུ་ཤེས་སོ། །རང་སངས་རྒྱས་དེ་དག་གི་ཏིང་ངེ་འཛིན་མཐའ་ཡས་པ་ལ་རྣམ་པར་སྤྱོད་ཅིང་རྣམ་པར་ཐར༌པའི་སྒོ་རྣམ་པ་སྣ་ཚོགས་ཀྱིས་རྣམ་པར་བརྩེ་བ་ཇི་སྙེད་ཅིག་ཡོད་པ་དེ་དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གི་ཡོངས་སུ་མྱ་ངན་ལས་འདའ་བ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཇི་སྙེད་པ་དེ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་དེ་དག་གིས་ཐོག་མ་དགེ་བའི་རྩ་བ་བསྐྱེད་པ་དག་ཀྱང་རབ་ཏུ་ཤེས་སོ། །ཐོག་མ་སེམས་བསྐྱེད་པའི་སྨོན་ལམ་དག་ཀྱང་རབ་ཏུ་ཤེས་སོ། །སྨོན་ལམ་རྣམ་པ་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པས་འབྱུང་བའི་རྒྱན་ཐམས་ཅད་མངོན་པར་བསྒྲུབ་པ་རྣམ་པ་ཐ་དད་པ་རབ་ཏུ་ཤེས་སོ། །

ཕ་རོལ་ཏུ་ཕྱིན་པའི་ལམ་གྱི་ཡན་ལག་གི་ཚོགས་རྣམ་པར་དག་པར་བྱ་བ་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ལམ་ལ་ནན་ཏན་དུ་བྱ་བའི་རྒྱན་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་ཚོགས་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་ཤུགས་དྲག་པོ་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་བཟེམ་པའི་མཐུ་དང་ལྡན་པའི་ཏིང་ངེ་འཛིན་གྱི་དཀྱིལ་འཁོར་རྣམ་པ་ཐ་དད་པ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པས་རྣམ་པར་རྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་གནོན་པའི་རྣམ་པར་སྤྱོད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་རབ་ཏུ་གནས་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་བསྒོམ་པའི་རྒྱུད་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ༌སྦྱང་བའི་ཚུལ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ལ་ཡང་དག་པར་གནས་པར་བྱ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སའི་མཚན་མ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་སའི་དབང་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ནས་སར་འཕར་བའི་ཡེ་ཤེས་དག་ཀྱང་རབ་ཏུ་ཤེས་སོ། །བྱང་ཆུབ་སེམས༌དཔའི་ས་ཡོངས་སུ་བསྡུ་བའི་ཡེ་ཤེས་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ས་ཡོངས་སུ་སྨིན་པར་བྱ་བའི་ཡེ་ཤེས་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་རྣམ་པར་དགོད་པ་ལ་ཡང་དག་པར་གནས་པར་བྱ་བ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་གྱི་རྒྱ་ཡང་རབ་ཏུ་ཤེས་སོ། །བྱང་ཆུབ་སེམས་དཔའི་སྤྱོད་པའི་རྣམ་པར་བརྩེ་བ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་ཏིང་ངེ་འཛིན་རྒྱ་མཚོ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་རྣམ་པར་ཐར་པའི་ཚུལ་རྒྱ་མཚོ་དག་ཀྱང་རབ་ཏུ་ཤེས་སོ། །

བྱང་ཆུབ་སེམས་དཔའ་དེ་དག་སེམས་ཀྱི་སྐད་ཅིག་རེ་རེ་ལ་ཏིང་ངེ་འཛིན་རྒྱ་མཚོ་སྣ་ཚོགས་ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་ཀྱི་སྣང་བའི་ཚུལ་ཐོབ་པར་བྱེད་པ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་ཀྱི་གློག་གི་སྣང་བའི་སྤྲིན་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་བཟོད་པ་ཐོབ་པའི་ཚུལ་དག་ཀྱང་རབ་ཏུ་ཤེས་སོ། །ཐམས་ཅད་མཁྱེན་པ་ཉིད་དུ་འཇུག་པའི་ཡེ་ཤེས་ཀྱི་རྣམ་པར་གནོན་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་རྣམས་ཞིང་རྒྱ་མཚོར་རྗེས་སུ༌བགྲོད་པར་བྱེད་པ་དག་ཀྱང་རབ་ཏུ་ཤེས་སོ། །ཆོས་རྒྱ༌མཚོའི་ཚུལ་ལ་འཇུག་པ་དག་ཀྱང་རབ་ཏུ་ཤེས་སོ། །སེམས་ཅན་རྒྱ་མཚོའི་མཚན་ཉིད་ཐ་དད་པ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའི་དམ་པར་སྤྱོད་པའི་ཚུལ་ཐམས་ཅད་ཀྱི་རྣམ་པར་འཕྲུལ་པ་དག་ཀྱང་རབ་ཏུ་ཤེས་སོ། །སྨོན་ལམ་གྱི་ཚུལ་སྣ་ཚོགས་རྒྱ་མཚོ་དག་ཀྱང་རབ་ཏུ་ཤེས་སོ། །རྫུ་འཕྲུལ་གྱི་རྣམ་པར་འཕྲུལ་པ་སྣ་ཚོགས་རྒྱ་མཚོ་རྣམ་པ་ཐ་དད་པ་དག་ཀྱང་རབ་ཏུ་ཤེས་སོ། །རིགས་ཀྱི་བུ་ཁོ་མོ་ཇི་ལྟར་མི་མཇེད་ཀྱི་འཇིག་རྟེན་གྱི་ཁམས་འདིའི་འདས་པ་དང་། ད་ལྟར་བྱུང་བའི་བསྐལ་པ་སྣ་ཚོགས་རྒྱ་མཚོ་ལ་ཞུགས་ཏེ། ཁོང་དུ་ཆུད་པ་དེ་བཞིན་དུ་ཕྱི་མའི་མཐའ་གཅིག་ནས་གཅིག་ཏུ་བརྒྱུད་དེ། རྒྱུན་མི་འཆད་པའི་མ་འོངས་པའི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །

མི་མཇེད་ཀྱི་འཇིག་རྟེན་གྱི་ཁམས་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱི༌བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གནས་པ་གཅིག་ནས་གཅིག་ཏུ་བརྒྱུད་པ་དག་ན་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །

མི་མཇེད་ཀྱི་འཇིག་རྟེན་གྱི་ཁམས་ཕྱོགས་བཅུར་འདབ་ཆགས་སུ་གཅིག་ནས་གཅིག་ཏུ་བརྒྱུད་པར་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་ཇི་ལྟར་ཤེས་པ་དེ་བཞིན་དུ་ཕྱོགས་བཅུ་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་དུ་གཏོགས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །ཕྱོགས་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་དུ་གཏོགས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་ཇི་ལྟར་ཤེས་པ་དེ་བཞིན་དུ་ཕྱོགས་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་ཕྱོགས་བཅུར་འདབ་ཆགས་སུ་གཅིག་ནས་གཅིག་ཏུ་བརྒྱུད་པ་དག་ལ་གནས་པའི་འཇིག་རྟེན་གྱི་ཁམས་ཀྱི་རྒྱུད་གཅིག་ནས་གཅིག་ཏུ་བརྒྱུད་པ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །

ཕྱོགས་ཀུན་ཏུ་འོད་རྣམ་པར་སྣང་བའི་འཇིག་རྟེན་གྱི་ཁམས་ཀྱི་རྒྱུད་ཕྱོགས་བཅུར་འདབ་ཆགས་སུ་གཅིག་ནས་གཅིག་ཏུ་བརྒྱུད་པ་དག་ལ་གནས་པའི་འཇིག་རྟེན་གྱི་ཁམས་ཐམས་ཅད་ཀྱི་བསྐལ་པ་རྒྱ་མཚོ་རྣམས་རབ་ཏུ་ཤེས་པ་དེ་བཞིན་དུ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་འདིར་གཏོགས་པའི་འཇིག་རྟེན་གྱི་ཁམས་འབྱམས་ཀླས་པ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །དེ་བཞིན་དུ་འཇིག་རྟེན་གྱི་ཁམས་ཚུལ་དུ་བྱ་བ་རྣམས་དང་། དེ་བཞིན་དུ་འཇིག་རྟེན་གྱི་ཁམས་ཀྱི༌འཁོར་ལོ་རྣམས་དང་། འཇིག་རྟེན་གྱི་ཁམས་ཀྱི་དཀྱིལ་འཁོར་རྣམས་དང་། འཇིག་རྟེན་གྱི་ཁམས་ཀྱི་བྱེ་བྲག་རྣམས་དང་། འཇིག་རྟེན་གྱི་ཁམས་ཀྱི་ཆུ་ཀླུང་རྣམས་དང་། འཇིག་རྟེན་གྱི་ཁམས༌ཀྱི་གློང་རྣམས་དང་། འཇིག་རྟེན་གྱི་ཁམས་ཡོངས་སུ་འཁྱིལ་པ་དང་། འཇིག་རྟེན་གྱི་ཁམས་རི་རབ་དང་། འཇིག་རྟེན་གྱི་ཁམས་ཡོངས་སུ་འབྱུང་བ་དང་། འཇིག་རྟེན་གྱི་ཁམས་པདྨོ་དང་། འཇིག་རྟེན་གྱི་ཁམས་སྡོང་པོ་དང་། འཇིག་རྟེན་གྱི་ཁམས༌རྟ་བགབ་དང་། འཇིག་རྟེན་གྱི་མིང་དུ་བྱ་བ་རྣམས་ཀྱི་བསྐལ་པ་རྒྱ་མཚོ་དག་ཀྱང་རབ་ཏུ་ཤེས་སོ། །

འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ། འདི་ཇི་ལྟར་ཤེས་པར་གྱུར་པ་དེ་བཞིན་དུ། ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་དག་གི་བཅོམ་ལྡན་འདས་རྣམ་པར་སྣང་མཛད་ཀྱི་སྔོན་གྱི་སྨོན་ལམ་རྒྱ་མཚོ་དག་ཀྱང་རབ་ཏུ་ཤེས་སོ། །རྗེས་སུ་དྲན་ནོ། །སྔོན་གྱི་སྦྱོར་བ་རྒྱ་མཚོ་དག་ལའང་ཤེས་ཤིང་། ཁོང་དུ་ཆུད་དོ། །སྔོན་ཡོངས་སུ་བསྒྲུབས་པའི་ཚུལ་རྒྱ་མཚོ་དག་ལའང་ཤེས་ཤིང་ཁོང་དུ་ཆུད་དོ། །བསྐལ་པ་མཐའ་དང་དབུས་མེད་པར་བྱང་ཆུབ་སེམས་དཔའི་སྤྱོད་པ་ལ་ཡང་དག་པར་བཞུགས་པ་མཛད་པ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་ཡོངས་སུ་དག་པར་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་ཡོངས་སུ་སྨིན་པར་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་རྣམས་ལ་བསྙེན་བཀུར་མཛད་ཅིང་གཤེགས་པའི་རྣམ་པར་འཕྲུལ་པ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་ལ་མཆོད་ཅིང་རིམ་གྲོར་མཛད་པའི་སྦྱོར་བའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་གྱི་དེ་བཞིན་གཤེགས་པ་དག་གིས་ཆོས་བསྟན་པ་ཡོངས་སུ་བཟུང་བའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྔོན་བྱང་ཆུབ་སེམས་དཔའ་ཏིང་ངེ་འཛིན་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཡོ་བྱད་ལ་དབང་བསྒྱུར་བ་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །

སྔོན་གྱི་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་ནན་ཏན་ཏུ་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །སྦྱིན་པའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ཚུལ་ཁྲིམས་དང་བརྟུལ་ཞུགས་ཀྱི་དཀྱིལ་འཁོར་ཡོངས་སུ་དག་པ་མངོན་པར་བསྒྲུབ་པ་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་བཟོད་པ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་བརྩོན་འགྲུས་ཀྱི་ཤུགས་དྲག་པོ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བསམ་གཏན་གྱི་ཡན་ལག་ཐམས་ཅད་ཡོངས་སུ་རྫོགས་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཤེས་རབ་ཀྱི་དཀྱིལ་འཁོར་ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཇིག་རྟེན་གྱི་ཁམས་ཀྱི་སྐྱེ་གནས་ཐམས་ཅད་དུ་སྐུའི་གཟུགས་བརྙན་ཡོངས་སུ་བསྟན་པ་མཛད་པའི་ཐབས་ཀྱི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཀུན་ཏུ་བཟང་པོའི་སྤྱོད་པ་དང་སྨོན་ལམ་གྱི་དཀྱིལ་འཁོར་ཡོངས་སུ་དག་པར་མཛད་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཞིང་རྒྱ་མཚོ་ཐམས་ཅད་ཡོངས་སུ་རྒྱས་པར་མཛད་པ༌དག་ཀྱང་ཤེས་ཤིང་ཁོང་དུ་ཆུད་དོ། །སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་མཛད་པའི་ཚུལ་རྒྱ་མཚོ་དག་ཀྱང་། ཤེས་ཤིང་ཁོང་དུ་ཆུད་དོ། །དེ་བཞིན་གཤེགས་པ་ཐམས་ཅད་ལས་ཡེ་ཤེས་སྣང་བར་གྱུར་པ། རྒྱ་མཚོ་དག་ཀྱང༌ཤེས་ཤིང་ཁོང་དུ་ཆུད་དོ། །སངས་རྒྱས་ཐམས་ཅད་ཀྱི་བྱང་ཆུབ་ཡོངས་སུ་གནས་པ་མཛད་པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །

དེ་བཞིན་གཤེགས་པའི་ཡེ་ཤེས་སྣང་བ་རབ་ཏུ་བརྙེས་པའི་ཚུལ་དག་ཀྱང་ཤེས་ཤིང་ཁོང་དུ་ཆུད་དོ། །ཐམས་ཅད་མཁྱེན་པ་ཉིད་དུ་ཞུགས་ཏེ་ཐུགས་སུ་ཆུད་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཆོས་ཀྱི་འཁོར་ལོ་བསྐོར་བའི་ཁྱུ་མཆོག་གི་མཐུ་དང་རྣམ་པར་རོལ་བའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་གྱི་དཀྱིལ་འཁོར་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །འཁོར་གྱི་དཀྱིལ་འཁོར་དེ་དག་གི་བྱང་ཆུབ་སེམས་དཔའ་ཐམས་ཅད་ཀྱི་སྔོན་གྱི་དགེ་བའི་རྩ་བ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཐོག་མའི་སྨོན་ལམ་གྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སེམས་ཅན་ཡོངས་སུ་སྨིན་པར་བྱེད་པ་དང་། གདུལ་བའི་ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བཅོམ་ལྡན་འདས་ཀྱིས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། སེམས་ཅན་རྒྱ་མཚོ་ཡོངས་སུ་སྨིན་པར་མཛད་པ་དེ་དག་ཀྱང་ཤེས་ཤིང་ཁོང་དུ་ཆུད་དོ། །

སེམས་ཅན་དེ་དག་གི་སེམས་ཀྱི་སྐད་ཅིག་རེ་རེའི་དགེ་བའི་རྩ་བ་རྣམ་པར་འཕེལ་བའི་ཐབས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཏིང་ངེ་འཛིན་རབ་ཏུ་ཐོབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །གཟུངས་ཀྱི་སྒོ་རབ་ཏུ་ཐོབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སྤོབས་པའི་ཡེ་ཤེས་ཀྱི་དཀྱིལ་འཁོར་རྣམ་པར་དག་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའི་ས་ཐམས་ཅད་ཡོངས་སུ་གནོན་པའི་རྣམ་པར་འཕྲུལ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །སྤྱོད་པའི་དྲ་བ་མངོན་པར་བསྒྲུབ་པའི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །

མཐར་གྱིས་ཡོངས་སུ་བསྒྲུབ་པའི་ཕྱོགས་ལ་འཇུག་པའི་ཡེ་ཤེས་ཀྱི་ཚུལ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །དེ་དག་གི་དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག༌པའི་རྣམ་པར་འཕྲུལ་པ་རྒྱ་མཚོ་དག་ཀྱང་ཤེས་ཤིང་ཁོང་དུ་ཆུད་དོ། །ཇི་ལྟར་བཅོམ་ལྡན་འདས་རྣམ་པར་སྣང་མཛད་ཀྱི་སངས་རྒྱས་དང་། བྱང་ཆུབ་སེམས་དཔའི་སྤྱོད་པ་རྒྱ་མཚོ་ཆོས་ཀྱི་དབྱིངས་ཐམས་ཅད་དུ་བྱུང་བ་ཤེས་ཤིང་ཁོང་དུ་ཆུད་དེ། མངོན་པར་བསྒྲུབས་པ་དེ་བཞིན་དུ། དེ་བཞིན་གཤེགས་པ་ཐམས་ཅད་ཀྱི་སངས་རྒྱས་དང་། བྱང་ཆུབ་སེམས་དཔའི་སྤྱོད་པ་རྒྱ་མཚོ་དང་། ཡེ་ཤེས་ཀྱི་སྒྱུ་མའི་དྲ་བ་མཐའ་ཡས་པ་ལ་འཇུག་པ། ཆོས་ཀྱི་དབྱིངས་མཐའ་ཡས་པ་རྒྱས་པར་འགེངས་པ། སྒོ་མཐའ་ཡས་པ་ནས་ཤིན་ཏུ་བསྟན་པར་བྱ་བ། ཕྱི་མའི་མཐའི་བསྐལ་པར་གནས་པ་ལ་འཇུག་པས་བསྟན་པར་བྱ་བ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་བྱུང་བ་ཐམས་ཅད་ཀྱང་མ་འདྲེས་པར་ཤེས་ཤིང་། ཁོང་དུ་ཆུད་དེ་མངོན་པར་སྒྲུབ་བོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའི་རྣམ་པར་ཐར་པ། བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་བལྟ་བའི་ཡུལ་གྱི་ཡུལ་ནི་དེ་ལྟ་བུ་སྟེ། དེའི་ཕྱིར་དེ་ལ་སྙོམས་པར་ཞུགས་ན་སེམས་ཅན་ཐམས་ཅད་ཀྱི་སེམས་དང་། སྤྱོད་པའི་ཚུལ་རབ་ཏུ་ཤེས་སོ། །

སེམས་ཅན་ཐམས་ཅད་ཀྱི་དགེ་བའི་ཚོགས་ཀྱང་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བའི་ཡེ་ཤེས་ཀྱི་ཚུལ་རྣམས་ཀྱང་རབ་ཏུ་ཤེས་སོ། །སེམས་ཅན་ཐམས་ཅད་ཀྱི་ལས་སྣ་ཚོགས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་གྱི་སྒོ་རྣམས་ཀྱང་རབ་ཏུ་ཤེས་སོ། །ཉན་ཐོས་ཐམས་ཅད་ཀྱི་ཏིང་ངེ་འཛིན་གྱི་ས་ཡང་རབ་ཏུ་ཤེས་སོ། །རང་སངས་རྒྱས་ཐམས་ཅད་ཀྱི་རྣམ་པར་ཐར་པ་ཞི་བས་རྣམ་པར་འཕྲུལ་པ་ཡང་ཤེས་ཤིང་ཁོང་དུ་ཆུད་དོ། །བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་རྒྱ་མཚོའི་ཚུལ་དག་ཀྱང་རབ་ཏུ་ཤེས་སོ། །བྱང་ཆུབ་སེམས་དཔའ་ཐམས་ཅད་ཀྱི་རྣམ་པར་ཐར༌པའི་ཚུལ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་ཐར་པའི་ཚུལ་རྒྱ་མཚོ་ལ་འཇུག་པ་ཡང་རབ་ཏུ་ཤེས་སོ། །དེ་ནས་ཚོང་དཔོན་གྱི་བུ་ནོར་བཟང་གིས་ཤཱཀྱའི་བུ་མོ་གོ་པ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་བརྙེས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ། སྔོན་འདས་པའི་དུས་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་འདས་པའི་ཕ་རོལ་ཅིག་ཏུ་འཇིག་རྟེན་གྱི་ཁམས་མི་འཇིགས་པ་བྱེད་པ་ཞེས་བྱ་བ་བྱུང་སྟེ། འཇིག་རྟེན་གྱི་ཁམས། དེའི་བསྐལ་པ་འགྲོ་བའི་མཆོག་ཅེས་བྱ་བར་གྱུར་ཏོ། །

འཇིག་རྟེན་གྱི་ཁམས་དེའི་དབུས་སུ། གླིང་བཞི་པ་བདེ་བ་ཡོད་པ་ཞེས་བྱ་བ་བྱུང་སྟེ། གླིང་བཞི་པ་དེའི་འཛམ་བུའི་གླིང་གི་དབུས་སུ། རྒྱལ་པོའི་གནས་སྡོང་པོ་རི་བོའི་དཔལ་ཞེས་བྱ་བ། གྲོང་རྡལ་སྟོང་ཕྲག་བརྒྱད་ཅུ་རྩ་བཞིའི་ཕུལ་དུ་བྱ་བ་བྱུང་བ་སྟེ། རྒྱལ་པོའི་གནས་སྡོང་པོ་རི་བོའི་དཔལ༌དེ་དང་། གྲོང་རྡལ་སྟོང་ཕྲག་བརྒྱད་ཅུ་རྩ་བཞི་པོ་དེ་དག་ཀྱང་སོ་སོ་ནས་སའི་གཞི༌བཻཌཱུཪྻ་སྔོན་པོ་ལས་གྲུབ་པ་ལ་གནས་པ། རིན་པོ་ཆེ་བདུན་ལས་བྱས་པའི་ར་བས་ཀུན་ནས་བསྐོར་བ། འོབས་སྤོས་ཆུས་ཡོངས་སུ་གང་བ་གཞི་གསེར་གྱི་བྱེ་མ་བདལ་བ། ཨུཏྤལ་དང་། པདྨོ་དང་། ཀུ་མུ་ཏ་དང་། མེ་ཏོག༌པུནྡ་རི་ཀ་ཤིང་རྟའི་འཁོར་ལོ་ཙམ་ཁ་དོག་དང་འོད་ཀྱི་དྲ་བ་སྣ་ཚོགས་ཤིང་དྲི༌ཤིན་ཏུ་ཞིམ་པས་ཀུན་ནས་ཁྱབ་པ་བདུན་གྱིས་ཡོངས་སུ་བསྐོར་བ། རིན་པོ་ཆེ་ལས་བྱས་པའི་སྟེགས་བུའི་ཁྲི་འཕང་བདུན་ལས་ཏ་ལའི་ཕྲེང་བ་རིམ་པ་བདུན་གྱིས་ཀུན་ནས་དགྲིགས་པ། རིན་པོ་ཆེ་སྣ་བདུན་གྱི་ཤིང་གི་ནགས་ཚལ་གྱི་ཕྲེང་བ་དགྲིགས་པས་ཀུན་ནས་བསྐོར་བ་སྟེ། སྟེང་ནས་གསེར་གྱི་དྲ་བ་བྲེས་པ་རིན་པོ་ཆེ་སྣ་ཚོགས་ཀྱིས་རྣམ་པར་ཕྱེ་བའི་མིག་མངས་རིས་མཛེས་པར་རྣམ་པར་བྲེས་པས་སའི་གཞི་ཤིན་ཏུ་སྤ་བར་གྱུར་པ། དངོས་གྲུབ་ཅན་གྱི་ཚོགས་རྣམ་པར་རྒྱུ་བ། བྱ་བཙུན་པའི་ཁྱུས་སྒྲ་སྐད་ཡིད་དུ་འོང་བའི་དབྱངས་སྙན་པ་ཕྱུང་བ། བཟའ་ཤིང་གི་ར་བ་བྱེ་བ་བརྒྱ་ཕྲག་སྟོང་གིས་མཛེས་པར་བྱས་པ་ཤིན་ཏུ་སྐྱིད་ཅིང་ཕུན་སུམ་ཚོགས་པར་གནས་པ་སྐྱེས་པ་དང་། བུད་མེད་བརྒྱ་སྟོང་རབ་ཏུ་དགའ་བས་གང་བ། སེར་བུ་བདེ་ཞིང་ཡིད་དུ་འོང་བས་བསྐྱེད་དེ། མེ་ཏོག་གི་ཆར་མང་པོ་རྒྱུན་མི་འཆད་པར་རབ་ཏུ་འགྲུལ་བ། སའི་བདག་པོ་དམ་པ་བརྒྱ་ཕྲག་སྟོང་གི་གནས་སུ་གྱུར་པ་དག་སྟེ། གྲོང་རྡལ་ཆེན་པོ་དེ་དག་གི་རིན་པོ་ཆེའི་ཤིང་ཐམས་ཅད་དང་། གསེར་གྱི་དྲ་བའི་རྒྱན་ལ་སོགས་པ་རླུང་གིས་བསྐྱོད་དེ། རོལ་མོ་མང་པོའི་སྒྲ༌དང་མཉམ་པའི་སྒྲ་སྐད་བྱུང་བ་དག་ལས་ཡིད་དུ་འོང་བའི་ཚིག་འདི་སྐད༌དག་འབྱུང་ངོ་། །

གསོལ་ཅིག་མནོབས་ཤིག་ཆོས་ལ་སྤྱོད་ཅིག །བྱང་ཆུབ་ཏུ་སེམས་སྐྱེད་ཅིག ། ཕྱིར་མི་ལྡོག་པའི་ས་ལ་མངའ་ཐོབ་པར་མཛོད་ཅིག །ཁྱེད་རྣམས་བདེ་བར་གྱུར་ཅིག་ཅེས་ཟེར་རོ། །རྒྱལ་པོའི་གནས་སྡོང་པོ་རི་བོའི་དཔལ་དེར༌ཁམས་ཀྱི་རྒྱལ་པོ་ནོར་གྱི་བདག་པོ་ཞེས་བྱ་བ་བྱུང་སྟེ། དེ་ལ་བཙུན་མོའི་འཁོར་བུད་མེད་སྟོང་ཕྲག་བརྒྱད་ཅུ་རྩ་བཞི་ཡོད་དོ། །བློན་པོ་བརྒྱ་ཕྲག་ལྔ་ཡོད་པར་གྱུར་ཏེ། རྒྱལ་པོ་ནོར་གྱི་བདག་པོ་དེ་ལ་བུ་ལྔ་བརྒྱ་ཡོད་པ་དེ་ཐམས་ཅད་ཀྱང་། དཔའ་བོ་རྟུལ་ཕོད་པ་ཡན་ལག་དམ་པའི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་ཤིན་ཏུ་མཛེས་པ། བལྟ་ན་སྡུག་པ། ཁ་དོག་བཟང་པོའི་མཆོག་ཤིན་ཏུ་རྒྱས་པ་དང་ལྡན་པ་ཤ་སྟག་གོ །རྒྱལ་པོ་ནོར་གྱི་བདག་པོ་དེའི་བཙུན་མོ་དམ་པ་ནི་པདྨོའི་དཔལ་དམ་པ་འབྱུང་བ་ཞེས་བྱ་བ་སྟེ། བུད་མེད་སྟོང་ཕྲག་བརྒྱད་ཅུ་རྩ་བཞི་པོ་དེ་དག་གི་ནང་ནས་གཙོ་མོར་བྱ་བའོ། །དེའི་བུ་གཟི་བརྗིད་ཀྱི་དབང་པོ་ཞེས་བྱ་བ་གཟུགས་བཟང་བ་ཤིན་ཏུ་མཛེས་པ་བལྟ་ན་སྡུག་པ། མི་ཆེན་པོའི་མཚན་སུམ་ཅུ་རྩ་གཉིས་ཀྱིས་རབ་ཏུ་བརྒྱན་པའི་ལུས་དང་ལྡན་པ་ཞིག་ཡོད་པར་གྱུར་ཏེ། དེ་ལ་མི་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་ཡོད་པར་གྱུར་ཏོ། །

དེའང་འདི་ལྟར་རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་དེ་རྐང་པའི་མཐིལ་ཤིན་ཏུ་གནས་པ་དང་ལྡན་ཏེ། ས་ཆེན་པོ་ལ་རྐང་པའི་མཐིལ་འདོར་ན་མཉམ་པར་འདོར་ལ། འདེག་ན་མཉམ་པར་འདེག་སྟེ། གཞོག་ན་རྐང་པའི་མཐིལ་ཀུན་གྱིས་ས་ཆེན་པོ་ལ་མཉམ་པར་རེག་གོ །དེའི་རྐང་པའི་མཐིལ་གཉིས་ལ་འཁོར་ལོ་རྩིབས་སྟོང་དང་ལྡན་པ། ལྟེ་བ་དང་བཅས་པ་མུ་ཁྱུད་དང་བཅས་པ། རྣམ་པ་ཐམས་ཅད་དུ་ཤིན་ཏུ་ཚང་བ་ཤིན་ཏུ་མཛེས་པ་བལྟ་ན་སྡུག་པ་དག་ཀྱང་བྱུང་བར་གྱུར་ཏོ། །དེའི་རྐང་པའི་བོལ་གཉིས་ཀྱང་ཤིན་ཏུ་རྒྱས་པར་གྱུར་ཏོ། །

རྐང་པའི་སྟེང་གི་མདོག་ཤིན་ཏུ་གསལ་ལ། ཤིན་ཏུ་མཛེས་ཏེ། མེ་ཏོག་དམ་པ་བས་ཀྱང་ལྷག་པར་མདོག་བཟང་ཞིང་གསལ་བར་གྱུར༌ཏེ། དེའི་རྐ་ལག་གི་སོར་མོ་དྲ་བར་འབྲེལ་པར་གྱུར་ཏེ། ཤིན་ཏུ་མཛེས་པ་རྣམ་པར་ཕྱེ་བ། བུ་ག་མེད་པས་ཟག་པ་མེད་པ་ནི་དཔེར་ན་ངང་པའི་རྒྱལ་པོ་གནས་སྲུང་ལྟ་བུར་གྱུར་ཏོ། །དེའི་རྐང་པའི་རྟིང་པ་ཡངས་པ་ཤིན་ཏུ་དག་ལ་ཤིན་ཏུ་གསལ་བ་རིན་པོ་ཆེ་ཐམས་ཅད་ཀྱི་འོད་རབ་ཏུ་འགྱེད་པར་གྲུབ་པ་དང་ལྡན་པར་གྱུར་ཏོ། །དེའི་སོར་མོ་རྣམས་ཀྱང་རིང་ཞིང་ཟླུམ་ལ་ཚིགས་བར་མཉམ་ཞིང་ཡངས་པ་དང་ལྡན་པར་གྱུར་ཏེ། དེ་དག་མཉམ་པར་ས་ལ་འཇོག་གོ །མཉམ་པར་ས་ལས་འདེག་གོ །དེའི་རྐང་པ་དང་ལག་པའི་མཐིལ་ཡང་ཀ་ཙ་ལིནྡི་བས་ཀྱང་ལྷག་པར་རེག་ན་བདེ་བར་གྱུར་ཏེ། དེས་སྐྱེས་པའམ་བུད་མེད་དམ། ཁྱེའུ་དང་བུ་མོ་གང་ལ་རེག་ཀྱང་རུང་སྟེ། དེ་དག་ཐམས་ཅད་ཀྱང་བདེ་བ་དང་། ཡིད་དགའ་བའི་དམ་པས་ཚིམ་ཞིང་ཡིད་ཤིན་ཏུ་བདེ་བར་འགྱུར་རོ། །

དེའི་བྱིན་པ་རི་དྭགས་ཨེ༌ནེ་ཡའི་བྱིན་པ་ལྟར་འདུག་པར་གྱུར་ཏེ། རིམ་གྱིས་གཞོལ་བ་དང་། ཤིན་ཏུ་མཛེས་པ་དང་། ལེགས་པར་གྲུབ་པར་གྱུར་པས། རི་དྭགས་ཀྱི་རྒྱལ༌པོ་ཨེ་ནེ་ཡ་ལྟར་དེ་ལ་སུས་ཀྱང་བསྙེགས་པའམ། སླེབས་པར་མི་ནུས་ཏེ། འགྲོ་བས་ངལ་ཞིང་དུབ་པར་མི་འགྱུར་རོ། །རྒྱལ་བུ་གཞོན་ནུ་གཟི་བརྗིད་ཀྱི་དབང་པོ་དེ་བདུན་ཤིན་ཏུ་མཐོ་བ་དང་ལྡན་པར་གྱུར་ཏེ། དེའི་རྐང་པ་གཉིས་ལ་ཤིན་ཏུ་མཐོ་བ་ཟླུམ་ལ༌ཤིན་ཏུ་ལེགས་པ་དང་། ཤིན་ཏུ་རྒྱས་པ་དང་། ཚིགས་མི་སྣང་བ་དང་། ཤིན་ཏུ་ཡིད་དུ་འོང་བ་དང་། བལྟ་ན་སྡུག་པ་གཉིས་གྲུབ་པར་གྱུར་ཏོ། །ལག་པ་ལ་གཉིས། ཐལ་གོང་གི་ལྷུན་ལ་གཉིས། ལྟག་པ་ལ་གཅིག་སྟེ། དེ་ལྟར་བདུན་ནོ། །དེའི་མཚན་གསང་བའི་སྦུབས་ན་འདུག་པར་གྲུབ་པར་གྱུར་ཏེ། དེའི་གསང་བའི་གནས་སྦུབས་ན་འདུག་པ་ཤིན་ཏུ་མི་མངོན་ལ་ནང་དུ་ནུབ་ཅིང་ཀུན་ནས་ཡོག་པར་འདུག་པ་སྟེ། དཔེར་ན་གླང་པོ་ཅང་ཤེས་སམ། རྟ་ཅང་ཤེས་ལྟར་འདུག་པས་དེ་གོས་མ་གྱོན་པར་འདུག་ཀྱང་བུད་མེད་དམ། སྐྱེས་པའམ། ཁྱེའུ་འམ། བུ་མོའམ། རྒན་པའམ། དར་ལ་བབ་པའམ། བླ་མའམ། བླ་མར་བྱ་བ་རྣམས་ཀྱིས་ཀྱང་མི་མཐོང་སྟེ། གཞན་དུ་ན་བདག་ལོངས་པར་སྤྱོད་པའམ། ཆེད་དུ་བསྟན་པར༌བྱས་ཏེ། འདོད་པས་སྤྱད་པ་ནི་མ་གཏོགས་སོ། །རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་དེ་རོ་སྟོད་སེང་གེ་ལྟར་འདུག་པ་དང་ལྡན་པར་གྱུར་ཏེ། ལུས་རིམ་པས་རྒྱས་ལ་རོ་སྟོད་ཤིན་ཏུ་ཡངས་ཤིང་རྫོགས་པས་རི་དྭགས་ཀྱི་རྒྱལ་པོ་བས་ཀྱང་མཛེས་པར་དབྱིབས་ཤིན་ཏུ་ལེགས་པའི་རོ་སྟོད་དང་ལྡན་པར་གྱུར་ཏོ། །དེའི་ཐལ་གོང་རྒྱས་ཤིང་ལུས་ཤིན་ཏུ་རྒྱས་པ་ལུས་རྣམ་པར་ཕྱེ་བ། ལུས་ཀྱི་ཆ་ཐམས་ཅད་རྐྱེན་དུ་འབབ་པར་མཉམ་པ། ལུས་ལ་དམའ་བ་མེད་པ། ལུས་ལ་མཐོ་བ་མེད་པ། ལུས་ལ་ཞུམ་པ་མེད་པ། ལུས་ལ་དགུ་བ་མེད་པ། ལུས་རིན་པོ་ཆེའི་གཏན་པ་ཤིན་ཏུ་ཕྱིས་པ་བས་ཀྱང་ལྷག་པར་གསལ་བར་གྱུར་ཏོ། །དེའི་དཔུང་མགོ་ཤིན་ཏུ་ཟླུམ་ཞིང་ཤ་རྒྱས་ལ་ཤིན་ཏུ་མཛེས་པར་གང་བ་དང་ལྡན་པར་གྱུར་ཏོ། །

དེས་མི་ཆེན་པོའི་མཚན་ལག་པ་ཤིན་ཏུ་རིང་བ་ཐོབ་པར་གྱུར་པ་དེས་ལུས་མ༌བཏུད་དེ། ལུས་དྲང་པོར་འདུག་ཀྱང་པུས་མོའི་ལྷ་ང་གཉིས་ལ་ཉུག་ཅིང་རེག་གོ །དེས་མི་ཆེན་པོའི་མཚན་ལུས་ཆེ་ཞིང་དྲང་བའང་ཐོབ་པར་གྱུར་ཏེ། རྣམ་པ་ཐམས་ཅད་དུ་མཆོག་ཏུ་གྱུར་པ་དང་ལྡན་ལ་ལུས་ཚུལ་དང་འདྲ་བར་མཉམ་པ་དང་། ལུས་རབ་ཏུ་གཉེན་པ་དང་། ལུས་ཤིན་ཏུ་ལྗི་བ་དང་། ལུས་རབ་ཏུ་གསལ་བ་དང་། ལུས་ཤིན་ཏུ་སིམ་པར་བྱེད་པ་དང་ལྡན་པར་གྱུར་ཏོ། །དེས་མི་ཆེན་པོའི་མཚན་མགུལ་དུང་ལྟ་བུ་ཡང་ཐོབ་པར་གྱུར་ཏེ། མི༌དམའ་བའི་མགུལ་དང་། དེའི་མགུལ་གྱི་འཁོར་ཐམས་ཅད་དང་། བཞིན་གྱི་འཁོར་ཐམས་ཅད་ན་རྩ་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཤིན་ཏུ་མཉམ་པར་གྱུར་ཏེ། ཀུན་ཀྱང་རབ་ཏུ་ཚང་བར་གྱུར་ཏོ། །མི་ཆེན་པོའི་མཚན་སེང་གེའི་འགྲམ་པ་ལྟ་བུ་ཡང་ཐོབ་པར་གྱུར་ཏེ། ཟ་འགྲམ་ཤིན་ཏུ་འཁྲེགས་པ་དང་། བཞིན་གྱི་དཀྱིལ་འཁོར་ཤིན་ཏུ་རྒྱས་པ་དང་། བཞིན་གྱི་དཀྱིལ་འཁོར་ཤིན་ཏུ་ལེགས་ཤིང་ཡོངས་སུ་དག་པ་དང་། ཁའི་སྒོ་ཤིན་ཏུ་ཡངས་པ་དང་ལྡན་པར་གྱུར་ཏོ། །མི་ཆེན་པོའི་མཚན་སོ་མཉམ་པ་བཞི་བཅུ་དང་ཡང་ལྡན་པར་གྱུར་ཏེ། སོ་མ་ཚང་བ་མེད་ལ་ཟས་ཤིག་ཟ་ན་ཡང་ལན་གཅིག༌བལྡད་པས་ཆུང་ངུ་ན་འབྲས༌ཆན་གྱི་འབྲུ་འགའ་ཡང་མ་ཞིབ་པར་ཟ་བ་མེད་དོ། །སོ་ཐགས་བཟང་ཞིང་མཉམ་པ་རབ་ཏུ་ཐོབ་སྟེ། མཚམས་ཆུ་སྒོ་མེད་པ་དང་། ཤིན་ཏུ་མཉམ་པ་དང་། རྐྱེན་རྐྱེན་ཏུ་ཤིན་ཏུ་མཛེས་པ་སྟེ། དེ་ཁ་ཟས་ཤིག་ཟ་ན་ཡང་འགོ་བ་དང་། འཆགས་པ་དང་། ཞེན་པ་དང་། ལྗན་ལྗིན་ཏུ་འགྱུར་བའམ། ཐོགས་པར་འགྱུར་བའམ། གསེབ་འགང་བར་འགྱུར་བ་མེད་དོ། །

མི་ཆེན་པོའི་མཚན་སོ་མཉམ་པ་རབ་ཏུ་ཐོབ་པར་གྱུར་ཏེ། སོ་མཉམ་ཞིང་རྡ་རྡོ་མེད་པ་དང་། སོ་ལྷག་མེད་པ་དང་། སོ་ཞུམ་པ་མེད་པ་དང་། སོ་གྱེས་པ་མེད་པ་དང་སོ་ཐོག་དྲུང་མཉམ་པ་དང་། སོ་རྡོ་བ་མེད་པར་གྱུར་ཏོ། །གཞོན་ནུ་དེའི་མཆེ་བ་ཤིན་ཏུ་དཀར་བར་གྱུར་ཏེ། མཆེ་བ་སྐྱོན་མེད་པ། མཆེ་བ་ཤིན་ཏུ་གསལ་བ། མཆེ་བ་ཤིན་ཏུ་དག་པ། མཆེ་བ་ཤིན་ཏུ་བརྟན་པར་གྱུར་ཏོ། །མི་ཆེན་པོའི་མཚན་ལྕེ་ཤིན་ཏུ་ཡངས་པ་ཡང༌རབ་ཏུ་ཐོབ་པར་གྱུར་ཏེ། དེའི་ལྕེ་ནི་ཤིན་ཏུ་ཡངས་ལ་སྲབ་ཅིང་མཉེན་ཏེ། ཤིན་ཏུ་འཇམ་པ་དང་། ལས་སུ་རུང་བ་དང་། ཡིད་དུ་འོང་བ་དང་བསྒྱུར་ན་བདེ་བ་དང་། གདོང་གི་དཀྱིལ་འཁོར་ཀུན་ཏུ་འགེབས་པ་དང་། བདེན་ཞིང་ཕན་པར་འགྱུར་བའི་དོན་དང་། ཡི་གེ་དང་ངག་དང་ངེས་པའི་ཚིག་ཐོགས་པ་མེད་པར་བརྗོད་པར་གྱུར་ཏོ། །གཞོན་ནུ་དེ་ཚངས་པའི་དབྱངས་དང་ལྡན་པར་གྱུར་ཏེ། དབྱངས་ཡིད་དུ་འོང་བ་དང་། རོལ་མོའི་སྒྲ་དང་། གླུའི་ང་རོ་དང་། སིལ་སྙན་ཀྱི་དབྱངས་དང་། སྒྲ་སྐད་དང་བརྗོད་ཅིང་སྨྲ་བའི་ཚིག་གི་ལས་ཡིད་དུ་འོང་བ་བརྗོད་པས་ངག་གི་ལས་མངོན་པར་དགའ་བ་སྐྱེད་པ། འཇིག་རྟེན་ཐམས་ཅད་མངོན་པར་འདུན་པར་འགྱུར་བར་ཚངས་པ་ལས་ཀྱང་ལྷག་པའི་དབྱངས༌ཀྱི་ངག་རྗོད་དེ། འཁོར་གྱི་དཀྱིལ་འཁོར་ལས་ཀྱང་གུད་དུ། མི་འདའ་བར་ཐམས་ཅད་ཀྱི་ཡིད་དང་། མཐུན་པར་བྱེད་པ་དང་ལྡན་པར་གྱུར་ཏོ། །གཞོན་ནུ་དེ་ནི། མིག་དཀར་ནག་འབྱེས་པར་གྱུར་ཏེ། མིག་ཤིན་ཏུ་དང་བ་དང་། མིག་ཡོངས་སུ་དག་པ་དང་། མིག་ལ་འོད་ཆགས་པ་དང་། མིག་རྣམ་པར་གསལ་བ་དང་། མིག་མངོན་པར་མཛེས་པ་དང་། མིག་བལྟ་ན་སྡུག་པ་དང་། མིག་ཡིད་དུ་འོང་བ་དང་། མིག་འཛུམ་པ་དང་ལྡན་པར་གྱུར་ཏོ། །

གཞོན་ནུ་དེ་ནི་རྫི་མ་བའི༌རྫི་མ་ལྟ་བུ་དང་ལྡན་པར་གྱུར་ཏེ། མིག་གི་སྐྱེ་མཆེད་རིན་པོ་ཆེ་པདྨ་རཱ་ག་ལྟར་ཤིན་ཏུ་དག་པ། མིག་གི་སྤྲིན་མཉམ་པ། མིག་གི་སྤྲིན་མཚུངས་པ། མིག་གི་སྤྲིན་ལེགས་པ། མིག་གི་སྤྲིན་ཡངས་པ། མིག་གི་སྤྲིན་རྫོགས་པ། མིག་གི་སྤྲིན་ཤིན་ཏུ་བརྟན་པར་གྱུར་ཏོ། །དེའི་སྨིན་མཚམས་སུ་མཛོད་སྤུ་སྐྱེས་པར་གྱུར་ཏེ། འཇམ་པ་ལས་སུ་རུང་བ། ཤིན་དུ་མཉེན་པ། ཤིང་བལ་ལྟར་རེག་ན་བདེ་བ། དང་བ། གསལ་བ་འོད་ཡོད་པ། ཆབ་རོམ་ལྟ་བུ་ཁ་བའི་ཁ་དོག་ལྟར་འདུག་པ། འོད་ཟེར་དཀར་པོའི་དཀྱིལ་འཁོར་གྱི་འོད་རབ་ཏུ་སྣང་བ་དང་ལྡན་པར་གྱུར་ཏོ། །དེའི་སྤྱི་བོ་ལ་གཙུག་ཏོར་མངོན་པར་གྲུབ་པར་གྱུར་ཏེ། ཤིན་ཏུ་ལེགས་པ། ཀུན་ནས་ཟླུམ་པ། དབུས་སུ་བབ་པ། སྐྲའི་རྒྱན་དུ་གྱུར་པ། རིན་པོ་ཆེའི་པད་མོ་འདབ་མ་བྱེ་བ་བརྒྱ་ཕྲག་སྟོང་དང་ལྡན་པ་ལྟར་སྣང་བ། ཀུན་ནས་ཆ་མཉམ་པར་གནས་པ། རིན་ཐང་གདབ་ཏུ་ཚད་མེད་པས་གཅེས་པའི་གཙུག་ཏུ་གྱུར་པ་དང་ལྡན་པར་གྱུར་ཏོ། །གཞོན་ནུ་དེ་ནི་པགས་པ་ཤིན་ཏུ་འཇམ་པ་དང་ལྡན་པར་གྱུར་ཏེ། དེའི་ལུས་ལ་རྡུལ་ལམ། དྲི་མའམ། རྔུལ་ལམ། སེར་གའམ། གཉེར་མའམ། ལྷོད་པའམ། འཁུམས་པའམ། འཕྱང་བའམ། སློད་བག་ཏུ་གནས་པ་མེད་པར་གྱུར་ཏོ། །

གཞོན་ནུ་དེ་ནི་མདོག་གསེར་གྱི་ཁ་དོག་ལྟ་བུ་དང་ལྡན་པར་གྱུར་ཏེ། འཛམ་བུ་ཆུ་ཀླུང་གི་གསེར་གྱི་མདོག་ལྟ་བུ་དང་ལྡན་ཞིང་འོད་ཀུན་ཏུ་འདོམ་གང་བ་དང་། གསེར་ལྟར་གཅིག་ཏུ་འབར་བའི་འོད་ཀྱི་དཀྱིལ་འཁོར་གྱིས་མཛེས་པར་བརྒྱན་པ་དང་། བ་སྤུའི་བུ་ག་ཐམས་ཅད་ནས་དྲི་ཞིམ་པོའི་འོད་ཟེར་འབྱུང་བས་ལུས་ཀྱི་རྒྱན་རབ་རིབ་མེད་ཅིང་འོད་གསལ་བ་དང་ལྡན་པར་གྱུར་ཏོ། །གཞོན་ནུ་དེ་ནི་བ་སྤུ་རེ་རེར་བྱུང་བ་དང་ལྡན་པར་གྱུར་ཏེ། བ་སྤུའི་བུ་ག་རེ་རེ་ནས་བ་སྤུ་རེ་རེ་སྐྱེས་པར་གྱུར་པ། བཻཌཱུཪྻ་སྔོན་པོའི་ཁ་དོག་ལྟ་བུ་གཡས་ཕྱོགས་སུ་འཁྱིལ་པ། ལེགས་པར་སྐྱེས་པ། མཐང་ལ་ཞ་བར་འདུག་པ་ཤིན་ཏུ་ལེགས་པར་གནས་པ་དང་ལྡན་པར་གྱུར་ཏོ། །གཞོན་ནུ་དེའི་སྤུ་ཡན་ལག་གྱེན་དུ་འཁྱིལ་པར་གྱུར་ཏེ། ཕྱིར་མི་ཟློག་པའི་སྤུ་དང་། མི་ལྡོག་པའི་སྤུ་དང་། མ་འདྲེས་པའི་སྤུ་དང་ལྡན་པར་གྱུར་ཏོ། །གཞོན་ནུ་དེ་མི་ཆེན་པོའི་མཚན་སྐྲ་མཐོན་མཐིང་དུ་འདུག་པ་ཐོབ་པར་གྱུར་ཏེ། དེའི་སྐྲ་ནོར་བུ་རིན་པོ་ཆེ་རྣམ་པར་སྣང་བའི་མདོག་ལྟར་མཐོན་མཐིང་དུ་འདུག་པ། འཇམ་པ་སྣུམ་པ། ལེགས་པར་འཁྱིལ་པ། གཡས་ཕྱོགས་སུ་འཁྱིལ་པ། དྲུང་ཤིན་ཏུ་རན་པ། ཟད་ཟེད་མེད་པ། འཇམ་འཇམ་ལྟར་འདུག་པ། མི་འཛིང་བ། དབྱིབས་མཉམ་ཞིང་མཐུན་པར་གནས་པ་དང་ལྡན་པར་གྱུར་ཏོ། །རྒྱལ་བུ་གཞོན་ནུ་དེ་ཤིང༌ནྱ་གྲོ་དྷ་ལྟར་ཆུ་ཞེང་གབ་པའི་མི་ཆེན་པོའི་མཚན་རབ་ཏུ་ཐོབ་པར་གྱུར་ཏེ། ཀུན་ནས་གྱེན་དུ་རན་པ་དང་། ཀུན་ཏུ་བཟང་བ་དང་། ཀུན་ཏུ་མཛེས་པ་དང་ལྡན་པར་གྱུར་ཏེ། དེ་ནི་མདུན་ནས་བལྟས་ནའང་ངོམས་མི་ཤེས་ཤིང་བལྟ་ན་ཡིད་དུ་འོང་བ་རྒྱབ་དང་གཡས་གཡོན་དང་། འགྲོ་བ་དང་འདུག་པ་དང་། འགྲེང་བ་དང་ཉལ་བ་དང་། སྨྲ་བ་དང་། མི་སྨྲ་བར་འདུག་པ་ལ་བལྟས་ན། ཡང་ངོམས་མི་ཤེས་ཤིང་ཡིད་དུ་འོང་ལ་བལྟ་ན་སྡུག་པར་གྱུར་ཏོ། །

རིགས་ཀྱི་བུ་རྒྱལ་པོ་གཞོན་ནུ་གཟི་བརྗིད་ཀྱི་བདག་པོ་དེ་མི་ཆེན་པོའི་མཚན་སུམ་ཅུ་རྩ་གཉིས་པོ་འདི་དག་གིས་ཡོངས་སུ་བརྒྱན་པའི་ལུས་དང་ལྡན་པར་གྱུར་ཏེ། སེམས་ཅན་ཐམས་ཅད་ཀྱི་བལྟ་ན་ཡིད་དུ་མི་འོང་བའི་བག་མེད་པ་བལྟ་ན་བསམ་པ་ཐམས་ཅད་ཡོངས་སུ་རྫོགས་པར་བྱེད་པ། བལྟ་ན་སེམས་ཅན་ཐམས་ཅད་ཀྱི་དགའ་བ་ཡོངས་སུ་འབྱུང་བ། དེ་ལྟ་བུ་ཞིག་སྐྱེས་པར་གྱུར་ཏོ། །རིགས་ཀྱི་བུ་དེ་ནས་ལན༌གཅིག་ཅིག་རྒྱལ་པོ་གཞོན་ནུ་གཟི་བརྗིད་ཀྱི་བདག་པོ་དེ་ཡབ་ཀྱིས་གནང་ནས་རྒྱལ་པོའི་གནས་སྡོང༌པོ་རི་བོ་དཔལ་གྱི་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་དེར་ས་བཟང་པོ་ལྟ་བའི་ཕྱིར་བུ་མོ་སྟོང་ཕྲག་ཉི་ཤུ་དང་ལྷན་ཅིག་ཏུ་བསོད་ནམས་ཀྱི་གཟི་བརྗིད༌དང་དཔལ་གྱི་བསྐལ་པ་བཟང་པོའི་རྣམ་པར་འཕྲུལ་པའི་རྒྱན་གྱིས་བྱུང་ནས་སྐྱེས་པ་དང་། བུད་མེད་ཀྱི་ཚོགས་ཀྱིས་ཀུན་ནས་དགའ་བར༌བྱ་ཞིང་། འཛམ་བུ་ཆུ་ཀླུང་གི་གསེར་གྱི་ཤིང་རྟ་རྡོ་རྗེ་རིན་པོ་ཆེའི་འཁོར་ལོ་ཆེན་པོ་བཞི་དང་ལྡན་པ། རྡོ་རྗེ་མཐུ་བོ་ཆེའི་སྲོག་ཤིང༌གི་རྩ་བ་ཅན་ཙན་དན་དམ་པ་ལས་བསྒྲུབས་པའི་ཡུ་བ་བཟང་པོ་དང་ལྡན་པ། རིན་པོ་ཆེའི་རྒྱལ་པོ་སྤོས་སྣ་ཚོགས་ཀྱི་ཤིང་ཐགས་རྣམ་པར་བཀྱེ་བ། རིན་པོ་ཆེ་ཐམས་ཅད་ཀྱི་མེ་ཏོག་སྣ་ཚོགས་ཀྱིས་རབ་ཏུ་མཛེས་པར་བྱས་པ། རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོག་པའི་རྒྱན་དང་ལྡན་པ། སེང་གེའི་ཁྲི་རིན་པོ་ཆེ་དམ་པའི༌དྲ་བའི་རྒྱན་གྱི་སྙིང་པོ་ཅན་དབུས་སུ་བཤམས་པ།

བུ་མོ་ལྔ་བརྒྱས་རིན་པོ་ཆེའི་སྲད་བུའི་ལྡ་ལྡི་ནས་ཡོངས་སུ་གཟུང་བ། ནམ་མཁའ་ལ་ཆགས་པ་མེད་པའི་རླུང་ལྟར་མགྱོགས་པའི་རྟ་ཅང་ཤེས་སྟོང༌དང་བཅས་པ་ལ་ཞོན་ནས་གདུགས་ཆེན་པོ་རིམ་གྱིས་གཞོལ་ཞིང་བལྟ་ན་སྡུག་པ། སྟེང་ཡོགས་རིན་པོ་ཆེའི་རྒྱལ་པོ༌བཻཌཱུཪྻ་དཀར་པོ་ལས་བྱས་པ། འོད་དྲི་མ་མེད་པ་ཚད་མེད་པ་འབྱུང་བ། རིན་པོ་ཆེ་བསམ་གྱིས་མི་ཁྱབ་པ་རྨད་དུ་བྱུང་བ་སྣ་ཚོགས་ཐམས་ཅད་ཀྱིས་སྤ་བར་སྤྲས་ཏེ། རྣམ་པ་ཐམས་ཅད་དུ་མཛེས་པར་བརྒྱན་པ། ཡུ་བ་རིན་པོ་ཆེའི་རྒྱལ་པོ༌བཻཌཱུརྱ་སྔོན་པོ༌ལས་བསྒྲེང་བས་ནི་བསྐྱབས། སྲོག་ཆགས་བརྒྱ་སྟོང་མང་པོས་ནི་ཡོངས་སུ་བསྐོར། རོལ་མོ་བརྒྱ་སྟོང་མང་པོ་ལྷ་རྫས་ཀྱི་དབྱངས་ཡིད་དུ་འོང་བ་སྙན་པ་དང་ལྡན་པ་དག་ནི་རབ་ཏུ་བླངས། མེ་ཏོག་གི་ཆར་ཆེན་པོ་ནི་མངོན་པར་འབབ། ལྷ་རྫས་ཀྱི་སྤོས་དྲི་ཞིམ་པའི་བདུག་སྤོས་ཀྱི་སྣོད་བྱེ་བ་ཁྲག་ཁྲིག་བརྒྱ་སྟོང་གིས་ནི་རབ་ཏུ་བདུག་ཅིང་འགྲོ་བར་གྱུར་ཏོ། །དེ་དེ་ལྟར་འགྲོ་བའི་ཚེ་ལམ་ཡང་རྒྱུད་བརྒྱད་དང་ལྡན་པར་གྱུར་ཏེ། མཐོ་དམན་མེད་པ་དང་། གསེག་མ་དང་གྱོ་མོ་མེད་པ་དང་། གསེར་དངུལ་དང་རིན་པོ་ཆེའི་རྒྱལ་པོ་སྣ་ཚོགས་ཀྱི་ཁམས་ཀྱིས་སའི་གཞི་རབ་ཏུ་བསྒྲུབས་པ་དང་། གསེར་གྱི་བྱེ་མ་བཀྲམ་པ་དང་། རིན་པོ་ཆེ་སྣ་ཚོགས་ཀྱི་མེ་ཏོག་སིལ་མས་ཆལ་བར་གང་བ་དང་། གཡས་གཡོན་ནས་རིན་པོ་ཆེའི་ཤིང་གི་ཕྲེང་བས་དགྲིགས་པ་དང་། རིན་པོ་ཆེ་སྣ་ཚོགས་ཀྱི་ཁ་རན་བཀྱེ་བ་དང་། སྟེང་ནས་རིན་པོ་ཆེའི་དྲིལ་བུའི་དྲ་བ་བྲེས་པ་དང་། རིན་པོ་ཆེའི༌གནམ་ཡོལ་སྣ་ཚོགས་ཀྱིས་བཀབ་པ་དང་། རིན་པོ་ཆེའི་རྒྱལ་མཚན་དང་། བ་དན་དང་། སྣམ་བུ་བརྒྱ་སྟོང་རབ་ཏུ་བརྒྱན་པ་དུ་མ༌བསྒྲེང་ཞིང་སྤྱངས་པས་མཛེས་པར་བརྒྱན་པ་དང་། གཡས་གཡོན་ནས་རིན་པོ་ཆེའི་སྟེགས་བུའི་ཕྲེང་བ་རྣམ་པར་བཀོད་པས་རྣམ་པར་བརྒྱན་པ་སྟེ། རིན་པོ་ཆེའི་སྟེགས་བུ་ལ་ལ་ལ་ནི་སློངས་མོ་བའི་ཚོགས་ལ་ཡོངས་སུ་བསྟབས་པའི་དོན་དུ་རིན་པོ་ཆེའི་སྣོད་སྣ་ཚོགས། རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་བ་བཀོད།

སྟེགས་བུ་ལ་ལ་ལ་ནི་རྒྱན་འདོད་པའི་སློངས་མོ་བ་རྣམས་བརྒྱན་པའི་དོན་དུ་རིན་པོ་ཆེ་ཐམས་ཅད་ཀྱི་རྒྱན་གྱི་རྣམ་པ་ཡོངས་སུ་བཀོད། སྟེགས་བུ་ལ་ལ་ལ་ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར་ཡིད་བཞིན་གྱི་ནོར་བུ་རིན་པོ་ཆེ་བཀོད། སྟེགས་བུ་ལ་ལ་ལ་ནི་སུ་ཅི་འདོད་པ་དེ་དག་ལ་དེ་སྦྱིན་པའི་དོན་དུ་ཁ་ཟས་དང་བཏུང་བ་དང་། བྲོ་བ་སྣ་ཚོགས་ཀྱིས་ཡོངས་སུ་བཀང་བའི་སྣོད་མང་པོ་བཀོད་སྟེགས་བུ་ལ་ལ་ལ་ནི་རྣམ་པ་ཐམས་ཅད་དུ་མཆོག་ཏུ་ཞིམ་པའི་རོ་དང་། ཁ་དོག་དང་དྲི་དང་། བྲོ་དང་། རེག་ཡིད་དུ་འོང་བ་དང་ལྡན་པའི་ལྷ་རྫས་ཀྱི་ཁ་ཟས་ཀྱི་རྣམ་པ་བཀོད། སྟེགས་བུ་ལ་ལ་ལ་ནི་རོ་བྲོ་བ་སྣ་ཚོགས་དང་ལྡན་པའི་ལྷ་རྫས་ཀྱི་ཤིང་ཏོག་སྣ་ཚོགས་ཐམས་ཅད་སྤུངས། སྟེགས་བུ་ལ་ལ་ལ་ནི་གོས་འདོད་པ་རྣམས་ཡིད་བཞིན་དུ་སྤྱོད་དུ༌གཟུད་པའི་ཕྱིར་ལྷ་རྫས་ཀྱི་གོས་རིན་པོ་ཆེ་ཁ་དོག་སྣ་ཚོགས་དང་ལྡན་པ་མདོག་བཟང་པོ་རྣམ་པ་སྣ་ཚོགས་དག་དང་རི་མོ་སྣ་ཚོགས་ཤིན་ཏུ་སྤ་བར་རྣམ་པར་ཕྱེ་བ་ཤིན་ཏུ་བཙུན་པ་ལ་འོས་པ་ཤིན་ཏུ་ཕྲ་བ། རབ་ཏུ་འཇམ་པ། ཐགས་སུ་མ་བཏགས་པ། བྱེ་བ་བརྒྱ་ཕྲག་སྟོང་སྙེད་ཡོངས་སུ་བཀོད་པར་གྱུར་ཏོ། །

སྟེགས་བུ་ལ་ལ་ལ་ནི་བྱུག་པ་འདོད་པའི་སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་སྤྱོད་དུ༌གཟུད་པའི་ཕྱིར། ལྷ་རྫས་ཀྱི་སྤོས་ཀྱི་རྣམ་པ་ཁ་དོག་དང་། དྲི་རྣམ་པ་སྣ་ཚོགས་ཐམས་ཅད་དང་ལྡན་པ་དག་ཀྱང་བཀོད་པར་གྱུར་ཏོ། །སྟེགས་བུ་ལ་ལ་ལ་ནི་སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་སྤྱོད་དུ༌གཟུད་པའི་ཕྱིར་ཡོ་བྱད་ཐམས་ཅད་ཀྱི་ཕུང་པོ་དག་ཀྱང་བཀོད་པར་གྱུར་ཏོ། །སྟེགས་བུ་ལ་ལ་ལ་ནི་ན་ཆུང་གཟུགས་བཟང་བ་རབ་ཏུ་མཛེས་པ་ཤིན་ཏུ་སྡུག་པ། ཆ་ལུགས་སྡུག་གུ་སྣ་ཚོགས་དང་ལྡན་པ་ཡིད་དུ་འོང་བའི་གོས་སྣ་ཚོགས་གྱོན་པ། རྒྱན་ཐམས་ཅད་ཀྱིས་མཛེས་པར་བརྒྱན་པ། བྱུག་པ་སྣ་ཚོགས་ཀྱིས་ཚུལ་སྡུག་གུར་བརྒྱན་ཅིང་མཛེས་པར་བྱས་པའི་ལུས་དང་ལྡན་པ། བུད་མེད་ཀྱི་བཟོ་དང་སྒྱུ་དང་། ཤེས་ཉེན་གྱི་ཚུལ་ལ་མཁས་པ་དག་ཀྱང་བཀོད་པར་གྱུར་ཏོ། །

དེའི་ཚེ་རྒྱལ་པོའི་གནས་སྡོང་པོ་རི་བོའི་དཔལ་དེ་ཉིད་ན༌སྦྲུལ་འཚོང་མའི་དམ་པ་རྒྱལ་པོའི་ལོངས་སྤྱོད་དུ་འོས་པ། བལྟ་ན་མཛེས་པ་ཞེས་བྱ་བ་ཞིག་ཡོད་པ། དེའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བ་གཟུགས་བཟང་ཞིང་ཤིན་ཏུ་མཛེས་པ། བལྟ་ན་སྡུག་པ་ཧ་ཅང་ཡང་མི་རིང་ཧ་ཅང་ཡང་མི་ཐུང་། ཧ་ཅང་ཡང་མི་སྦོམ། ཧ་ཅང་ཡང་མི་ཕྲ། ཧ་ཅང་ཡང་མི་དཀར། ཧ་ཅང་ཡང་མི་སྔོ་བ། སྐྲ་མཐོན་མཐིང་དུ་འདུག་པ། མིག་དཀར་ནག་འབྱེས་པ། བཞིན་ཡིད་དུ༌འོང་བ། ཚངས་པའི་དབྱངས་དང་ལྡན་པ། འཇམ་ཞིང་སྙན་པར་སྨྲ་བ། ཤེས་རབ་དང་ལྡན་པ། ཤེས་ཉེན་གྱི་ཚུལ་ཐམས་ཅད་ལ་མཁས་པ་གཙུག་ལག་ཐམས་ཅད་ལ་ཤེས་པ། བརྩོན་པ། ལེ་ལོ་མེད་པ། རིམ་འགྲོ་ཡོད་པ། མོས་པ་དང་ལྡན་པ། བྱམས་པའི་སེམས་འདོགས་པ། ཁོང་ཁྲོ་བ་མི་མངའ་བ། བལྟ་ན་མི་ངོམས་ཤིང་ཡིད་དུ་འོང་བ། འདོད་ཆགས་དང་ཞེ་སྡང་དང་། གཏི་མུག་ཆུང་བ། ངོ་ཚ་ཤེས་ཤིང་ཁྲེལ་ཡོད་པ། དྲང་ཞིང་མཉེན་པ། གཡོ་དང་སྒྱུ་མེད་པ་ཞིག་ཡོད་དེ། དེ་མ་དང་ལྷན་ཅིག་ཏུ་བུ་མོ་དུ་མ་ཞིག་གིས༌ཡོངས་སུ་བསྐོར་ཏེ། རིན་པོ་ཆེའི་ཤིང་རྟ་ལ་ཞོན་ནས་རྒྱལ་པོའི་གནས་སྡོང་པོ་རི་བོའི་དཔལ་ནས་བྱུང་སྟེ།

རྒྱལ་པོས་བཀའ་སྩལ་ནས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་ནས། ཕར་རྒྱལ་བུ་གཞོན་ནུ་དེ་གླུ་ལེན་ཞིང་འདོང་འདོང་བ་ལས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་མཐོང་ནས། འདོད་ཆགས་ཀྱི་སེམས་ཤིན་ཏུ་མི་བཟད་པ་ཞིག་གཡོས་ཏེ། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ཤིན་ཏུ་ཡིད་དུ་འོང་ཆེས་ནས་རྗེས་སུ་འབྲང་ཞིང་སེམས་ལ་རང་དབང་མེད་པས། བལྟ་ན་སྡུག་པ་ལ་འདི་སྐད་ཅེས་སྨྲས་སོ། །མ་འདི་ལྟར་མཁྱེན་པར་མཛོད་ཅིག །གལ་ཏེ་བདག་རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་མ་བཏང་ན་ནི་འགུམ་པའམ། སྲོག་ལ་འབབ་པའི་སྡུག་བསྔལ་གཅིག་ཏུ་འགྱུར་རོ། །དེས་སྨྲས་པ། བུ་མོ་དེ་ལྟ་བུའི་སེམས་མ་སྐྱེད་ཅིག །གཞོན་ནུ་འདི་ནི་འཁོར་ལོས་སྒྱུར་བའི་མཚན་དང་ལྡན་པ་སྟེ། དེའི་ཡབ་ནོར་གྱི་བདག་པོ་མི་བཞུགས་པར་གྱུར་ན། འཁོར་ལོས་སྒྱུར་བའི་རྒྱལ་སྲིད་ལ་གནས་པར་འགྱུར་བའི་གནས་ཡོད༌དོ། །དེ་འཁོར་ལོས་སྒྱུར་བའི་རྒྱལ་པོར་འགྱུར་བས། དེའི་བུད་མེད་རིན་པོ་ཆེ་ནམ་མཁའ་ལ་འགྲོ་བ་འབྱུང་བར་འགྱུར་ལ། བུ་མོ་བདག་ཅག་ཀྱང་། སྦྲུལ་འཚོང་མ་དག་ཅིག་སྟེ། འཇིག་རྟེན་ཐམས་ཅད་དགའ་བར་བྱེད་པ་ཡིན་གྱི། ཡུ་བུས་སེམས་ཅན་འགའ་ཞིག་ལ་ནམ་འཚོའི་བར་དུ་བསྙེན་བཀུར་མི་བྱར་མི་རུང་བའང་མེད་དེ། ཡུ་བུ་ནི་རྒྱལ་པོ་ནོར་གྱི་བདག་པོའི་བཀས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་རིམ་འགྲོར༌འདོང་འདོང་བར་ཟད་ཀྱིས་དེ་ལྟ་བུའི་སེམས་བརྟན་པར་མ་བྱེད་ཅིག །གནས་དེ་ནི་ཐོབ་པར་ཡང་ཤིན་ཏུ་དཀའོ། །

དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བྱ་བ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། དེའི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ཅེས་བྱ་བ་ཡང་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བ་ཞེས་བྱ་བ་དེའི་ནང་དུ་བྱུང་སྟེ། དེར་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་ཐོག་མར་མངོན་པར་རྫོགས་པར་སངས་རྒྱས་ནས། ཞག་བདུན་ལོན་པ་དེ་བུ་མོ་དེ་ཤིང་རྟ་ལ་ཞོན་བཞིན་དུ་ཡུར་ཞིང་འཆོག་འཆོག་པའི་རྨི་ལམ་དུ་མཐོང་ནས་སད་པར་གྱུར་པ་དང་། སྔོན་གཉེན་བཤེས་སུ་གྱུར་པའི་ལྷ་མོ་ཞིག་གིས་བསྟན་པ། བུ་མོ་དེ་བཞིན་གཤེགས་པའི་སྐུ་ཉི་མ་དམ་པ་དེ་ནི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ཅེས་བྱ་བ་ན་རྣམ་པར་སྤྱོད་ཅིང་ཐོག་མ་མངོན་པར་རྫོགས་པར་སངས་རྒྱས་ནས་ཞག་བདུན་ལོན་ཏེ། བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། ཚངས་པ་དང་། གྱ་ནོམ་སྣང་བ་དང་། འོག་མིན་གྱི་ལྷའི་ཚོགས་ཀྱིས་མདུན་དུ་བྱས་ཤིང་བཞུགས་ཏེ། དེར་སའི་ལྷ་མོ༌ཐམས་ཅད་ཀྱང་ཀུན་ནས་འདུས། ཆུའི་ལྷ་མོ་དང་། མེའི་ལྷ་མོ་དང་། རླུང་གི་ལྷ་མོ་དང་། རྒྱ་མཚོའི་ལྷ་མོ་དང་། ཆུ་ཀླུང་གི་ལྷ་མོ་དང་། རིའི་ལྷ་མོ་དང་། མཚན་མོའི་ལྷ་མོ་དང་། སྐྱ་རེངས་འཆར་བའི་ལྷ་མོ་དང་། ནགས་ཚལ་གྱི་ལྷ་མོ་དང་། ཤིང་གི་ལྷ་མོ་དང་། སྨན་གྱི་ལྷ་མོ་དང་། ལོ་ཐོག་གི་ལྷ་མོ་དང་། གྲོང་ཁྱེར་གྱི་ལྷ་མོ་དང་། རྐང་གིས་འགྲོ་བའི་ལྷ་མོ་དང་། སྙིང་པོ་བྱང་ཆུབ་ཀྱི་ལྷ་མོ་དང་། ལུས་ཀྱི་འོད་ཟེར་གྱི་ལྷ་མོ་དང་། སེམས་ཅན་གྱི་རིས་ཀྱི་ལྷ་མོ་དང་། ནམ་མཁའི་ལྷ་མོ་དང་། ཕྱོགས་ཐམས་ཅད་ཀྱི་ལྷ་མོ་དག་ཀྱང་བཅོམ་ལྡན་འདས་སྐུ་ཉི་མ་དམ་པའི་ཞལ་བལྟ་བའི་ཕྱིར་ཀུན་ནས་འདུས་སོ་ཞེས་ནས། དེ་ལྟར་དེས་དེ་བཞིན་གཤེགས་པ་མཐོང་བ་དང་། དེ་བཞིན་གཤེགས་པའི་ཡོན་ཏན་ཐོས་པས་བག་ཚ༌མེད་པ་ཐོབ་པར་གྱུར་ཏེ། སྐབས་སུ་བབ་ནས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོའི་མདུན་དུ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གཟུགས་ཀྱི་མཆོག་གིས་འཇིག་རྟེན་ཁྱད་པར་འཕགས། །ཡོན་ཏན་རྣམས་ཀྱིས་ཐམས་ཅད་ཕྱོགས་སུ་གྲགས། །ཤེས་རབ་སྟོབས་ཀྱིས་བདག་དང་འདྲ་མ་མཆིས། །སྒྱུ་རྩལ༌དགའ་བ་སྒྱུ་མའི་ཚུལ་ཀུན་འཚལ། །སྲོག་ཆགས་མང་པོ་སྟོང་ཕྲག་དུ་མ་ཡིས། །འདོད་ཆགས་དབང་གིས་བདག་ལ་རབ་བལྟས་ཀྱང་། །གཞོན་ནུ་བདག་ནི་འཇིག་རྟེན་གང་ལ་ཡང་། །གློ་བ་ཆགས་པར་གྱུར་པ་གཅིག་མ་མཆིས། །སེམས་ཅན་གང་ལ་ཡང་ཞེན་པར་གྱུར་པའམ། །གང་ལའང་ཁོང༌ཁྲོར་བདག་གི་སེམས་མ་གྱུར། །གང་ལའང་དགྲ་མི་བགྱིད་དེ་ཞེ་མི་སྡང་། །བདག་ནི་སེམས་ཅན་སྨན་པར་དགའ་བ་ལགས། །སྐུ་གཞན་སྐུ་མཆོག་ཡོན་ཏན་རབ་མངའ་ཁྱོད། །གང་ཚེ་བདག་གིས་གསལ་བར་མཐོང་གྱུར་པ། །དེ་ཚེ་དབང་པོ་ཀུན་ཀྱང་ཉམས་སུ་བདེ། །རྒྱ་ཆེ་ཡངས་པར་ཤིན་ཏུ་དགའ་བར་གྱུར། །ཁྱོད་ཀྱི་དབུ་བཟང་ལྕང༌ལོར་འཁྲིལ་བ་ནི། །རིན་ཆེན་རྣམ་སྣང་མདོག་ཏུ་མཐོན་མཐིང་གསལ། །ཞལ་གྱི་སྨིན་སྡུག་འཕྲལ་བ་ཤངས་སུ་མཛེས། །ཁྱོད་ཀྱི་ཞལ་སྔར་ལུས་འདི་བདག་འབུལ་ལོ། །མཚན་གྱི་རབ་འཆང་གཟི་བརྗིད་ཆེ་མངའ་བ། །སྐུ་གཟུགས་གསེར་གྱི༌རི་བོ་བཟང་པོ་འདྲ། །ཁྱོད་ཀྱི་སྤྱན་སྔར་བདག་ལྟ་མི་མཛེས་ཏེ། །ཟིལ་དུ་རླག་པས་སྣག་ཚའི་གཟུགས་ཀྱང་འདྲ། །སྤྱན༌གསལ་རིང་ལ་དཀར་ནག་འབྱེས་པས་མཛེས། །ཤིན་ཏུ་ཞལ་རྒྱས་སེང་གེའི་ཟ་འགྲམ་ཅན། །ཁྱོད་ཀྱི་གསུང་ནི་ཐོགས་པ་མ་མཆིས་ན། །གསུང་མཆོག་མངའ་བས་བདག་ནི་གཟུང་དུ་གསོལ། །ཁྱོད་ཀྱི་ཞལ་ན་ལྗགས་ཡངས་མངའ་བ་ནི། །མདོག་དམར་ཡངས་པ་རིན་ཆེན་མཆོག་གི་འོད། །ཚངས་དབྱངས་ཡན་ལག་མཆོག་གི་གསུང་མངའ་བས། །གསུང་ཞིང་འགྲོ་བ་རབ་ཏུ་དགའ་བ་མཛད། །ཁྱོད་ཀྱི་ཞལ་ན་ཐགས་བཟང་ཚེམས་མངའ་བ། །དུང་ལྟར་དྲི་མེད་ཤིན་ཏུ་རྣམ་པར་གསལ། །འཛུམ་ཞིང་བཞད་པ་རྣམ་པར་སྟོན་མཛད་ཀྱང་། །སྐྱེས་བུ་དཔལ་ཁྱོད་འགྲོ་བ་དགའ་བར་མཛད། །ཁྱོད་ཀྱི་སྐུ་ལ་མཚན་རབ་མཛེས་པ་རྣམས། །སུམ་ཅུ་རྩ་གཉིས་དག་ཅིང་འོད་ཀྱང་གསལ། །སྐུ་གཟུགས་བཟང་པོ་ཡོངས་སུ་དེས་བརྒྱན་པས། །མི་ཡི་དབང་པོ་འཁོར་ལོས༌སྒྱུར་བ་བྱོན། །

དེ་ནས་རྒྱལ་བུ་གཟི་བརྗིད་ཀྱི་བདག་པོས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་སུའི། ཁྱོད་ལ་ཡོངས་སུ་སྲུང་བ་ནི་གང་ཞིག་ཡོད། བུ་མོ་ང་ལ་ནི་གཞན་གྱིས་ཡོངས་སུ་གཟུང་བའི་བུད་མེད་བདག་གིར་བྱར་མི་རུང་ངོ་ཞེས་ནས།

དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །བལྟ་སྡུག་གཟུགས་ཀྱི་ཡོན་ཏན་ལེགས་ལྡན་པ། །མཚན་བཟང་བསོད་ནམས་རྣམ་པར་དག་པའི་ལུས། །ཁྱོད་ལ་དྲི་བའི་དོན་འདི་ང་ལ་སྨྲོས། །ལུས་མཆོག་ཁྱོད་ནི་སུ་ཡིས་ཡོངས་སུ་གཟུང་། །ཁྱོད་ལ་ཕ་དང་མ་ནི་ཡོད་དམ་མེད། །ཁྱིམ་ཐབ་མེད་དམ་ཁྱོད་ནི་སུ་ཞིག་དབང་། །གཟུགས་མཛེས་ཁྱོད་ལ་སེམས་ཅན་གཞན་ནམ་གཅིག །བདག་གི་ཡིན་པར་འདུ་ཤེས་བྱེད་མེད་དམ། །ཁྱོད་ཀྱི་ཡིད་ནི་གསོད་ལ་མི་དགའ་འགྲང་། །གཞན་ལས་མ་བྱིན་ཕྲོགས་པར་མི་བྱེད་དམ། །འདོད་པས་ལོག་པར་གཡེམ་ལ་མི་དགའ༌འགྲང་། །བརྫུན་དུ་བརྗོད་སྨྲར་ཡིད་ནི་མི་མོས་སམ། །ཁྱོད་ཀྱི་བློ་གྲོས་མཛའ་འབྱེད་མི་འཇུག་གམ། །ཚིག་བརླང་གཞན་ལ་གནོད་པར་མི་སྨྲ་འགྲང་། །གཞན་གྱི་ནོར་ལ་ཆགས་པར་སེམས་མེད་དམ། །འགྲོ་བ་རྣམས་ལ་གནོད་པར་མི་སེམས༌འགྲང་། །བལྟ་བའི་འབྲོག་དགོན་ལམ་དུ་མ་ཞུགས་འགྲང་། །ལས་ཀྱི་རྒྱུད་ལ༌ཡེ་བརྔམ་སེམས་མེད་དམ། །གཡོ༌མདོག་སྒྱུ་ཡི་དབང་དུ་མི་འགྲོ་འམ། །མི་འཐད་འཇིག་རྟེན་གནོད་པར་མི་བྱེད་འགྲང་། །ཕ་མ་གཉེན་དང་མཛའ་བཤེས་བླ་མ་ལ། །སྲི་ཞུ་རིམ་གྲོར་བྱ་བའི་ཚུལ་འཆང་ངམ། །ཕོངས་པར་གྱུར་པ་ཡོངས་སུ་བསྡུ་དོན་དུ། །ཁྱེད་ཀྱི་ཡིད་ལ༌བྱིན་པར་སེམས་ཡོད་དམ། །ཆོས་དང་མཐུན་པར་དུས་སུ་འདོམས་བྱེད་ཅིང་། །ལུས་དང་སེམས་ཡིད་ཡོངས་སུ་དག་བྱེད་ལ། །ཡང་དག་ལས་སུ་རུང་བ་སྐྱེད་བྱེད་པའི། །དགེ་བཤེས་རྣམས་ལ་དགའ་བར་སེམས་ཡོད་དམ། །སངས་རྒྱས་རྣམས་ལ་རིམ་གྲོར་བྱེད་ལྡན་ནམ། །སངས་རྒྱས་སྲས་ལ་དགའ་མཆོག་ཡོད་དམ་མེད། །གང་ལས་བདེ་གཤེགས་སྲས་རྣམས་སྐྱེར་འགྱུར་བའི། །ཆོས་ཀྱི་དམ་པ་དེ་ནི་ཤེས་མི་ཤེས། །ཆོས་ཡིད་མཆོག་ལ་གནས་པར་ཁྱོད་བྱེད་འགྲང་། །ཆོས་མིན་སྤྱད་པའི་བློ་གྲོས་མེད༌འགྲང་ངོ་། །ལེགས་པ་མཐའ་ཡས་ཡོན་ཏན་རྒྱ་མཚོ་ལ། །གུས་པའི་སྲི་ཞུ་དགའ་སེམས་མཆོག་ཡོད་དམ། །སྐྱེ་བོ་མགོན་མེད་ཕོངས་པར་གྱུར༌པ་ཡི། །འདྲེན་པ་རྣམས་ལ་བྱམས་པའི་ཡིད་ཡོད་དམ། །ངན་སོང་འགྲོ་བའི་ལམ་ལ་ཞུགས་པ་ཡི། །ཤིན་ཏུ་ཉམ་ཐག་སྙིང༌རྗེ་སེམས་འགྲང་ངོ་། །གཞན་གྱི་ཕུན་སུམ་ཚོགས་པ་མཐོང་གྱུར་ན། །ཁྱོད་ནི་དགའ་བ་མཆོག་དང་ལྡན་འགྱུར་རམ། །སྐྱེ་བོ་ཉོན་མོངས་རྣམས་ཀྱིས་འཁོལ་གྱུར་ལ། །ཤེས་རབ་མཐུ་བསྐྱེད་བཏང་སྙོམས་བྱེད་མི་བྱེད། །མི་ཤེས་གཉིད་ལོག་སྐྱེ་བོ་མང་མཐོང་ན། །བྱང་ཆུབ་དམ་པར་སྨོན་ལམ་འདེབས་བྱེད་འགྲོང་། །བསྐལ་པ་མཐའ་ཡས་སྤྱད་པ་སྤྱོད་བྱེད་ན། །སྨོན་ལམ་དམ་པས་སྐྱོ་བར་མི་འགྱུར་འགྲང་། །དེ་ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས༌པའི་མ་སྦྲུལ་འཚོང་མའི་གཙོ་མོ་བལྟ་ན་སྡུག་པས་རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་བདག་གི་བུ་མོ་འདི་ནི་རྫུས་ཏེ་བྱུང་བ། པད་མོའི་ནང་ནས་སྐྱེས་པ་སྟེ། སྔན་ཆད་ཁྱིམ་གྱི་ནང་ནས་ཕྱི་རོལ་ཏུ་མ་བྱུང་ངོ་ཞེས་ནས། དེའི་ཚེ་ཚིགས་སུ་བཅད་པ་འདི་དག་ཅེས་སྨྲས་སོ། །

བུ་མོ་འདི་ལ་ཁྱོད་ཀྱིས་གང་སྨྲས་པ། །དེ་ནི་བདག་གིས༌རིམ་པས་ཁྱོད་ལ་བརྗོད། །ཇི་ལྟར་བུ་མོ་འདི་སྐྱེས་བསྐྱེད་བསྐྱེད་པ། །བདག་གིས་ཁྱོད་ལ་གསོལ་གྱིས་གསན་དུ་གསོལ། །གང་ཚེ་དགུང་སངས་ཁྱོད་ནི་བལྟམ་གྱུར་པ། །དེ་ཚེ་བདག་གི་བུ་མོ་འདི་སྐྱེས་ཏེ། །རྫུས་ཏེ་དྲི་མེད་པད་མའི་སྦུབས་ནས་བྱུང་། །ཡན་ལག་ཀུན་ཚང་མིག་ཡངས་འདི་ཡང་སྐྱེས། །དུས་ཀྱི་ནང་ན་སོས་ཀ་དུས་མཆོག་ལ། །སྨན་དང་ལོ་ཏོག་མྱུ་གུ་འཐོན་པའི་ཚེ། །སཱ་ལའི་ར་བ་བཟའ་ཤིང་རབ་མཆོག་ཏུ། །བདག་ནི་རྩེ་དགའ་དེ་ཁྲོད་མཆི་མཆི་སྟེ། །སྣ་ཚོགས་ཡལ་གའི་ལོ་མ་རྒྱས་གྱུར་ཅིང་། །ཞུགས་ཤིང་མེ་ཏོག་སྡུག་རྒྱས་སྤྲིན་གྱི་མདོག །བྱ་བྲན་སྣ་ཚོགས་སྒྲ་སྙན་ཞུགས་ཤིང་ནང་། །ནགས་ཁྲོད་མྱ་ངམ་མ་མཆིས་དགར་མཆིས་མཆིས། །རྒྱན་དང་ལྡན་ཞིང་ཤིན་ཏུ་ཡིད་འོང་ལ། །རིན་ཆེན༌རད་པ་སྣ་ཚོགས་འཚལ་པ་རྣམས། །རོལ་མོ་གླུ་ལ་ཤིན་ཏུ་བསླབས་པ་ཡི། །བུ་མོ་བརྒྱ་ཕྲག་བརྒྱད་དང་བདག་ཀྱང་ལྡན། །སྤོས་མཆོག་ལྡན་པའི༌པུན་ད་རི་ཀ་དང་། །རྫིང་འགྲམ་མེ་ཏོག་སིལ་མས༌བལྟམས་པ་ཡི། །ས་ཕྱོགས་དེ་ན་བུད་མེད་མང་པོ་དང་། །བདག་ཅག་དེ་ན་དགའ་བར་མཆིས་མཆིས་ན། །ཆབ་དབུས་དེ་ནས་རིན་ཆེན་པད་མོའི་མཆོག །འདབ་མ་སྟོང་དང་ལྡན་པ་བྱུང་བར་གྱུར། །ལོ་མ་རིན་ཆེན༌ཡུ་བ་བཻཌཱུརྱ། །སྙིང་པོ་འཛམ་བུ་ཆུ་ཀླུང་གསེར་ལས་བགྱིས། །སྤོས་མཆོག་རིན་ཆེན་དམ་པའི་ཟེ་བ་ཅན། །འོད་ཆེན་འཛམ་བུའི་རྒྱལ་མཚན་ཀུན་ཏུ་འཕྲོ། །དེ་ཚེ་དགུང་ལ་གདུགས༌ཤིག་ཤར་ཏམ་ཞེས། །སྐྱེ་བོ་ཀུན་ཀྱང་ཡིད་གཉིས་འཚལ་བར་གྱུར། །དགུང་སངས་གྱུར་ནས་པད་མོ་ཆེན་པོ་དེ། །གདུགས༌ཀྱི་འོད་ཀྱིས་རབ་ཏུ་རྒྱས་བགྱིས་ནས། །སྣང་བ་དེ་དང་སྒྲ་སྙན་རབ་ཀྱང་བཀྱེ། །འདི་འབྱུང་དེ་ནི་སྔོན་གྱི་ལྟས་སུ་བྱུང་། །བུད་མེད་རིན་ཆེན་འདི་འདྲ་འཇིག་རྟེན་དུ། །ཚུལ་ཁྲིམས་དམ་པ་རྣམ་པར་དག་པས་བྱུང་། །སུག་ལས་བགྱིས་པ་ཆབ་འཚལ་མི་འགྱུར་བས། །འདི༌ནི་སྔོན་ཆད་ལེགས་པར་སྤྱད་པའི་འབྲས། །སྐྲ་ནི་མཐོན་མཐིང་མིག་ཡངས་ཨུད་པ་ལ། །ཚངས་པའི་དབྱངས་ལྡན་ཁ་དོག་རྣམ་དག་ལྡན། །ཕྲེང་བ་རྒྱན་མཆོག་ཆ་ལུགས་དབྱིབས་སུ་ཤིས། །དཔལ་ལྟར་དྲི་མེད་པད་མོའི་མཆོག༌ལས་སྐྱེས། །ལུས་ནི་རྣམ་དག་ཡན་ལག་རྒྱན་དུ་མཉམ། །ལུས་ཀྱི་དབྱིབས་ལེགས་ཡན་ལག་ཡོངས་སུ་ཚང་། །གསེར་གྱི་གཟུགས་ལ་ནོར་བུས་ཕྱིས་པ་འདྲ། །ཕྱོགས་ཀུན་འོད་ཀྱིས་རྣམ་པར་གདའ་བར་གསལ། །ལུས་ལས་ཙན་དན་རྒྱལ་པོའི་སྤོས་ཀྱི་དྲི། །ཕྱོགས་སུ་རྒྱས་པར༌འདི་ཡི་ལུས་ལས་འབྱུང་། །སྒྲ་སྙན་ལྷ་རྫས་ཡིད་དུ་འོང་བརྗོད་ཚེ། །ཁ་ནས༌ཨུད་པ་ལ་ཡི་ངད་ཀྱང་ལྡང་། །འདི་ནི་གང་ཚེ་འཛུམ་ཞིང་རྒོད་པའི་ཚེ། །རོལ་མོའི་སྒྲ་སྙན་དེ་ཚེ་འབྱུང་བར་འགྱུར། །བུད་མེད་རིན་ཆེན་འཇིག་རྟེན་འདིར་བྱུང་སྟེ། །ཐ་མལ་ཀུན་གྱི་དབང་དུ་འགྱུར་མ་ལགས། །ཁྱོད་མ་གཏོགས་པར༌མི་ཡི་འཇིག་རྟེན་ན། །༌འདི་ཡི་བདག་པོ་གཞན་ནི་གཅིག་མ་མཆིས། །མཚན་རབ་བརྒྱན་པའི་སྐུ་གཟུགས་མཛེས་མངའ་བ། །ཁྱོད་ཀྱི་ཞལ་སྔར་བུ་མོ་འདི་བཞེས་གསོལ། །འདི་ནི་ཧ་ཅང་མི་རིང་མི་ཐུང་སྟེ། །ཧ་ཅང་མི་སྦོམ་ཧ་ཅང༌ཕྲ་མ་ལགས། །ལྟོ་ནི་གཞུ་འདྲ་ནུ་མ་ཤས་ཀྱང་རྒྱས། །ཡན་ལག་སྐྱོན་བྲལ་འདི་ནི་ཁྱོད་ལ་འོས། །གྲངས་དང་ཡི་གེ་ཤེས་བགྱི་ཚུལ་རྣམས་དང་། །ལག་བརྡའི་ཚུལ་དང་གཙུག་ལག་ཚུལ་ལ་མཁས། །འཇིག་རྟེན་ཀུན་ན་བཟོ་རྣམས་ཇི་སྙེད་པ། །མ་ལུས་དེ་ལ་འདི་ནི་ཕ་རོལ་ཕྱིན། །མདའ་གཞུའི་ཚུལ་ལའང་རྣམ་པ་རྒྱུས་སུ་མཁས། །འཕོང་གི་ཆོ་ག་རྣམ་པར་ངེས་པར་རྟོགས། །དགྲ་ཡིད༌བཞོང་ཞིང་དབབ་པ་ཀུན་ལ་ཡང་། །འདི་ནི་མཆོག་ཏུ་ཕ་རོལ་ཕྱིན་པར་གྱུར། །ལུས་རྣམས་ཀུན་ལ་རིན་ཆེན་རྣམ་དག་པའི། །འོད་མཆོག་འཁོར་གྱིས་ཤིན་ཏུ་མཛེས་པ་སྟེ། །སྔོན་བགྱིས་ལེགས་པས་ཤིན་ཏུ་སྡུག་པར་བརྒྱན། །འདི་ནི་ཁྱོད་ཀྱི་ཕྱག་རྗེད་ཁྱོད་ལ་འོས། །མི་ཡི་འཇིག་རྟེན་གནས་རྣམས་ཇི་སྙེད་པ། །དེ་དག་གསོ་བའི་ཚུལ་གྱི་ཆོ་ག་འཚལ། །དེ་དག་མ་ལུས་ཐམས་ཅད་ཞིར་བགྱི་ནའང་། །མ་ནོར་སྨན་གྱི༌ཆོ་གས་གསོ་ལ་མཁས། །འཛམ་བུའི་རྒྱལ་མཚན་སྐད་རྣམས་ཐམས་ཅད་དང་། །སྐྱེ་བོའི་ངེས་ཚིག་མ་ལུས་བྱེ་བྲག་དང་། །འཇིག་རྟེན་ཐ་སྙད་བརྗོད་པའི་མཚམས་སྦྱར་བ། །སྣ་ཚོགས་ཀུན་ལའང་འདི་ནི་ཕ་རོལ་ཕྱིན། །དབྱངས་ཀྱི་ཡན་ལག་མངོན་པར་བསྒྲུབ་པའི་ཚུལ། །དེ་དག་བྱེ་བྲག་ཚུལ་ལའང་རབ་ཏུ་ཞུགས། །འཇིག་རྟེན་གླུ་གར༌རྣམ་པ་ཇི་སྙེད་པ། །མ་ལུས་དེ་རྣམས་ཀུན་གྱི་ཚུལ༌ཡང་འཚལ། །རོལ་མོ་སིལ་སྙན་དག་གི་ཐབས་རྣམས་དང་། །བཞད་གད་རོལ་མོའི་ཚུལ་ལ་རྣམ་པར་མཁས། །ཆགས་དང་མ་ཆགས་མི་རྣམས་མངོན་འཚལ་ཀྱང་། །ཁོང་ཁྲོ་ཆགས་པར་འགྱུར་བ་མ་མཆིས་སོ། །འཇིག་རྟེན་བུད་མེད་སྒྲ་རྣམས་ཇི་སྙེད་པ། །ཁྱད་པར་ནང༌དུ་དེ་ལ་མ་ལུས་འཚལ། །བུད་མེད་སྐྱེ་བོའི་སྐྱོན་དུ་བགྱི་བ་རྣམས། །གྲངས་མེད་དེ་དག་འདི་ལ་གཅིག་མ་མཆིས། །ཐིལ་གྱིས་བལྟ་དང་ཟུར་གྱིས་བལྟ་བ་དང་། །ཡན་ལག་སྟབས་དང་ཡན་ལག་རྣམས་བསྟན་དང་། །ཤེས་ཉེན་ཀུན་ལ་མཁས་པའི་མཐར་ཕྱིན་ཏེ། །ཁྱོད་ཀྱི་དགོངས་པ་ཡོངས་སུ་རྫོགས་པར་བགྱིད། །འདི་ནི་ཕྲག་དོག་སེར་སྣ་མ་མཆིས་ཏེ། །འདོད་པ༌ཞེ་དུག་མི་ལྡང་སྡིག་མི་བགྱིད། །བཟོད་ཅིང་དྲང་ལ་མཉེན་ཞིང་དེས་པ་སྟེ། །མི་ཁྲོ་མི་བརླང་ཤིན་ཏུ་མཁས་པ་ལགས། །ལྡང་བའི་ངང་ཚུལ་ཡིད་དུ་འོང་བའི་ངག །རྟག་ཏུ་བླ་མའི་ཐུགས་དང་སྦྱོར་བ་སྟེ། །སྐུ་ཉམས་གར་བདེ་ལྟ་ཞིང་སྲིད་ཞུ་ཆེ། །ཁྱོད་ཀྱི་སྤྱོད་མཐུན་རྗེས་སྙེགས་ཚུལ་དང་མཐུན། །རྒས་ཤིང་གཏུགས་དང་ནད་དང་ལྡན་པ་དང་། །ཕོངས་པ་ཤིན་ཏུ་སྡུག་བསྔལ་གྱུར་པ་དང་། །མིག་དང་བྲལ་ཞིང་མགོན་སྐྱབས་མ་མཆིས་ལ། །འདི་ནི་སྙིང་བརྩེ་རྟག་ཏུ་བསྐྱེད་པ་ལགས། །འདི་ནི་རྟག་ཏུ་གཞན་དོན་སེམས་ལ་བརྩོན། །བདག་ལ་སྨན་པ་སེམས་པར་བགྱིད་མ་མཆིས། །འཇིག་རྟེན་ཀུན་ལ་སྨན་པར་དགའ་བ་སྟེ། །རླབས་ཆེན་སེམས་ཀྱི་ཡོན་ཏན་ཀུན་གྱིས་བརྒྱན། །མཆིས་སམ་ཉལ་ལམ་མཆིའམ་འགྲེང་ཡང་རུང་། །སྨྲ་འམ་མི་སྨྲ་འཛུམ་ཞིང་རྒོད་ཀྱང་རུང་། །རྟག་ཏུ་བག་མཆིས་དྲན་པ་ཤེས་བཞིན་ཏེ། །འདི་ནི་འཇིག་རྟེན་ཀུན་གྱིས་རྟག་ཏུ་བསྔགས། །བསོད་ནམས་ལྡན་པས་ཀུན་ཏུ་རྣམ་པར་སྣང་། །འགྲོ་བ་ཀུན་ཀྱང་རྟག་ཏུ་དགའ་བ་སྟེ། །འདི་ལ་ལྟ་བས་འཇིག་རྟེན་ངོམས་མི་འགྱུར། །འདི་ནི་གང་ལའང་ཆགས་པར་མ་མཆིས་ལགས། །དགེ་བཤེས་རྣམས་ལ་སྲི་ཞུ་འདི་ཆེ་སྟེ། །དེ་དག་མཐོང་བར་རྟག་པར་རབ་ཏུ་དགའ། །རྗེས་སུ་ཅི་འབྱུང་ལྟ་ཞིང་སྐྱོན་མེད་ཚུལ། །སེམས༌བདག་བརྟན་པ་རི་རབ་རི་དང་འདྲ། །འདི་ནི་བསོད་ནམས་མཆོག་གིས་རྟག་ཏུ་བརྒྱན། །མི་མཛའ་དགྲར་ལེན་འདི་ལ་ཡོང་མ་མཆིས། །འདིའི་ཤེས་འདྲ་བུད་མེད་གཅིག་མ་མཆིས། །རྒྱལ་སྲས་ཁྱོད་ལ་འདི་ནི་ཚུལ་དང་མཐུན། །དེ་ནས་རྒྱལ་བུ་གཟི་བརྗིད་ཀྱི་བདག་པོ་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ལས་འོད་ཀྱི་སྤྲིན་འབྱུང་བར་ཕྱིན་ཏེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པའི་མ༌སྦྲུལ་འཚོང་མའི་གཙོ་མོ་བལྟ་ན་སྡུག་པའི་མདུན་དུ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་འདི་སྐད་ཅེས་སྨྲས་སོ། །

བུ་མོ་ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཡིན་ཏེ། དེ་བས་ན་ངས་ཐམས་ཅད་མཁྱེན་པའི་ཚོགས་ནི་ཚད་མེད་པ་ཞིག་བསགས་པར་བྱ་དགོས། བསྐལ་པ་མཐའ་དང་དབུས་མེད་པ་ཞིག་ཏུ་བྱང་ཆུབ་སེམས་དཔའི༌སྤྱད་པ་སྤྱོད་དེ། ཕ་རོལ་ཏུ་ཕྱིན་པ་ཐམས་ཅད་ནི་ཡོངས་སུ་རྫོགས་པར་བྱ་དགོས། ཕྱི་མའི་མཐའི་བསྐལ་པའི་མུར་ཐུག་པར་ནི་དེ་བཞིན་གཤེགས་པ་རྣམས་མཆོད་པར་བྱ་དགོས་ཏེ། སངས་རྒྱས་ཐམས་ཅད་ཀྱི་བསྟན་པ་ནི་ཡོངས་སུ་གཟུང་བར་བྱ། སངས་རྒྱས་ཀྱི་ཞིང་ཐམས་ཅད་ནི་ཡོངས་སུ་སྦྱང་བར་བྱ། དེ་བཞིན་གཤེགས་པ་ཐམས་ཅད་ཀྱི་རིགས་ནི་མི་གཅད་པར་བྱ། སེམས་ཅན་གྱི་རྒྱུད་ཐམས་ཅད་ནི་ཡོངས་སུ་སྨིན་པར་བྱ། སེམས་ཅན་ཐམས་ཅད་ཀྱི་འཁོར་བའི་སྡུག་བསྔལ་ནི་རྣམ་པར་བཟློག་པར་བྱ། མཐའ་ལས་རྒལ་བར་བདེ་བ་ལ་ནི་སེམས་ཅན་རབ་ཏུ་དགོད་པར་བྱ། སེམས་ཅན་ཐམས་ཅད་ཀྱི་ཡེ་ཤེས་ཀྱི་མིག་ནི་ཡོངས་སུ་དག་པར་བྱ། བྱང་ཆུབ་སེམས་དཔའ་ཐམས་ཅད་ཀྱིས་བསྒྲུབ་པ་ལ་ནི་བརྩོན་པར་བྱ། བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་ལ་ནི་གནས་པར་བྱ། བྱང་ཆུབ་སེམས་དཔའ་ཐམས་ཅད་ཀྱི་ས་ནི་ཡོངས་སུ་བསྒྲུབ་པར་བྱ། སེམས་ཅན་གྱི་ཁམས་ཐམས་ཅད་ནི་ཡོངས་སུ་སྦྱང་བར་བྱ། སེམས་ཅན་ཐམས་ཅད་ཀྱི་ཕོངས་པ་ཡོངས་སུ་གཅད་པའི་ཕྱིར་བདག་གི་ནོར་ཐམས་ཅད་ནི་གཏང་བར་བྱ། ཕྱི་མའི་མཐའི་མུར་ཐུག་པའི་བསྐལ་པར་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། ཁ་ཟས་དང་། བཏུང་བའི་སྦྱིན་པས་ནི་སེམས་ཅན་ཡོངས་སུ་ཚིམ་པར་བྱ། ཡོ་བྱད་ཀྱི་དངོས་པོ་ཐམས་ཅད་ཡོངས་སུ་གཏང་བས་ནི་སློང་བའི་ཚོགས་ཐམས་ཅད་ཡོངས་སུ་ཚིམ་པར་བྱ་དགོས་ཏེ། དེ་ལྟར་ང་བདོག་པ་ཐམས་ཅད་ཡོངས་སུ་གཏོང་བ་ལ་ནན་ཏན་ཉམས་སུ་ལེན་པའི་ཚེ། ཕྱི་ནང་གི་དངོས་པོ་གང་ཅིའང་རུང་སྟེ། ཡོངས་སུ་མི་གཏང་བ་དེ་ལྟ་བུ་མེད་པས་དེ་ལྟར་ངས་བུ་དང་བུ་མོ་དང་། ཆུང་མ་ཡང་སྦྱིན་པར་བྱ་དགོས། མིག་དང་མགོ་དང་རྐང་ལག་དང་། ཡན་ལག་དང་ཉིང་ལག་ཐམས་ཅད་ཀྱང་ཡོངས་སུ་གཏང་དགོས་ན། དེའི་ཚེ་ཁྱོད་གཞན་བྱིན་ན། ངའི་སྦྱིན་པའི་བགེགས་སུ་འགྱུར་རོ། །

བུ་ཡིད་དུ་འོང་བ་ཡོངས་སུ་གཏང་ན་ཡིད་མི་དགའ་བར་འགྱུར་རོ། །ལུས་དང་སེམས་ཀྱི་སྡུག་བསྔལ་ཡང་མང་པོ་ཞིག་ཉམས་སུ་མྱོང་བར་འགྱུར་རོ། །ང་ལ་བདོག་པ་ཐམས་ཅད་ཡོངས་སུ་གཏང་བར་བྱས་ན་སེར་སྣའི་སེམས་སུ་འགྱུར་རོ། །ངའི་ཡན་ལག་དང་ཉིང་ལག་གཏུབས་ཤིང་སློངས་མོ་བ་རྣམས་ལ་གཏོང་བའི་ཚེ། ཡིད་མི་དགའ་བར་ཡང་འགྱུར་རོ། །ནམ་ཞིག་ན་ངས་ཁྱོད་བོར་ཏེ་དེ་བཞིན་གཤེགས་པའི་བསྟན་པ་ལ་རབ་ཏུ་འབྱུང་བར་འགྱུར་བ་དེ་ལྟ་བུའི་དུས་ཀྱང་ཡོད་དེ། དེའི་ཚེའང་ཁྱོད་ཡིད་མི་དགའ་བར་འགྱུར་རོ། །ཞེས་ནས་རྒྱལ་བུ་གཟི་བརྗིད་ཀྱི་བདག་པོས་དེའི་ཚེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་ཚིགས་སུ་བཅད་དེ་སྨྲས་པ། ངས་ནི་འགྲོ་ཀུན་སྙིང་རྗེ་རབ་བསྐྱེད་དེ། །ཡུན་རིང་མཆོག་ནས་བྱང་ཆུབ༌རབ་ཞུགས་པས། །ཡང་དག་བྱང་ཆུབ་ཚོགས་ཆེན་རྒྱ་མཚོ་རྣམས། །ཚད་མེད་ཐམས་ཅད་ཡོངས་སུ་རྫོགས་བྱ་དགོས། །བསྐལ་པ་རྒྱ་མཚོ་མཐའ་དང་དབུས་མེད་པར། །མཁའ་ལྟར་ཚད་མེད་སྨོན་ལམ༌རྣམ་སྦྱངས་ཤིང་། །དེ་བཞིན་གཤེགས་པ་བཞུགས་པའི༌ས་ཡི་རྣམས། །བསྐལ་པ་མཐའ་ཡས་ཡོངས་སུ་སྦྱངས་ཡང་དགོས། །རྒྱལ་བ་དུས་གསུམ་འབྱུང་བ་ཐམས་ཅད་ཀྱི། །ཕ་རོལ་ཕྱིན་པའི་ལམ་ལ་ངས༌བསླབས་ཏེ། །ཡེ་ཤེས་བླ་ན་མེད་པའི་ཚུལ་ཆེན་གྱིས། །བྱང་ཆུབ་ལམ་མཆོག་རྣམ་པར་སྦྱངས་ཡང་དགོས། །ཕྱོགས་རྣམས་ཀུན་གྱི་ཞིང་རྣམས་ཐམས་ཅད་ཀྱང་། །ཀུན་ནས་ཉོན་མོངས་རྣམ་པར་སྦྱང་བར་བྱ། །འཇིག་རྟེན་ཀུན་གྱི་མི་ཁོམ་ཐམས་ཅད་དང་། །ངན་སོང་ཀུན་ཀྱང་རྣམ་པར་བཟློག་དགོས་སོ། །ཉོན་མོངས་བསྒྲིབས་ཤིང་གཏི་མུག་མུན་འཐོམས་པའི། །སེམས་ཅན་ཀུན་ཀྱང་མ་ལུས་རྣམ་སྦྱང་དགོས། །སྣ་ཚོགས་ཐབས་ཀྱིས་ཡོངས་སུ་སྦྱང་བྱས་ཏེ། །ཐམས་ཅད་མཁྱེན་ལམ་ཚུལ་ལ་དགོད་ཀྱང་དགོས། །ཆགས་མེད་ས་རྣམས་ཀུན་ཀྱང་ངས་སྦྱངས་ཏེ། །བསྐལ་པ་རྒྱ་མཚོར་རྒྱལ་བ་མཆོད་པར་བྱ། །འགྲོ་བ་མ་ལུས་ཀུན་ལ་བྱམས་བསྐྱེད་དེ། །འཇིག་རྟེན་དག་ཏུ་མ་ལུས་སྦྱིན་གཏང་དགོས། །སློང་བ་ཀུན་ནས་འདུས་ཤིང་འོངས་མཐོང་ནས། །ཐམས་ཅད་གཏང་བར་རྟག་ཏུ་བརྩོན༌གྱུར་ན། །དེ་ཚེ་ཁྱོད་ནི་ང་སེམས་མི་མཐུན་ཏེ། །ཞུམ་ཞིང་དམའ་ལ་འཇུངས་པར་མི་འགྱུར་རམ། །ངའི་མགོ་འདོད་འོངས་པ་ངས་མཐོང་སྟེ། །བྱང་ཆུབ་སེམས་དཔའི་སྤྱད་པ་སྤྱོད་གྱུར་ན། །དེ་ཚེ་ཁྱོད་ནི་སྡུག་བསྔལ་གདུངས༌གྱུར་གྱིས། །འདི་འདྲའི་དོན་ཐོས་རབ་ཏུ་བསྟན་པར་གྱིས། །ངའི་རྐ་ལག་གཏུབས་པ་མཐོང་གྱུར་ན། །ཁྱོད་ནི་མི་དགའ་དེ་ཚེ་སློང་བ་ལ། །བུད་མེད༌རང་གིས་ཚིག་དྲག་མི་བཟོད་སྨྲ། །དོན་འདི་ཐོས་ཤིང་སེམས་ལ་ཡོངས་སུ་སོམས། །འཕགས་པའི་དངོས་དང་དེ་བཞིན་བུ་རྣམས་དང་། །ཁྱོད་ཀྱང་སློང་བའི་ཚོགས་ལ་སྦྱིན་དགོས་ཀྱིས། །དོན་འདི་ཐོས་ཏེ་མི་དགའ་མེད་ན་ལྟ། །ཁྱོད་དགའ་ཐམས་ཅད་དེ་བཞིན་བྱ་ལ་རག །དེ་སྐད་ཅེས་སྨྲས་པ་དང་། བུ་མོ་དགའ་བའི་འོད་ཀྱི་དཔལ་ཤིན་ཏུ༌སྦྱངས་པས། རྒྱལ་བུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །

གཞོན་ནུ་ཇི་སྐད༌གསུངས་པ་དེ་ལྟར་བགྱིའོ། །བདག་ནི་ཁྱོད་ཅི་དགྱེས་པ་དང་། ཅི་བཞེད་པར་ལོངས་སྤྱོད་པ་དང་། གང་དུ་དགྱེས་པར་མཆི་བ་དང་། ཐམས་ཅད་དུ་ཡང་སླད་ན་མ༌ལས་པར་རྗེས་སུ་འབྲང་བ་དང་། རྟག་ཏུ༌ཞམ་རིང་སླེབས་པ་དང་། དོན་ཐམས་ཅད་ལ་བརྩོན་པ་དང་། ཐུགས་དང་མཐུན་པར་སྤྱད་པ་དང་། མད་པར་ཉམས་སུ་བླང་བ་དང་། མི་མཐུན་པ་མ་མཆིས་པར་ནན་ཏན་ཏུ་བགྱི་བའི་ཚུལ་ལ་སྤྱད་པར་བགྱིའོ། །ཞེས་ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས། རྒྱལ་པོའི་སྲས་གཟི་བརྗིད་ཀྱི་བདག་པོ་ལ་ཚིགས་སུ་བཅད་དེ་སྨྲས་པ། བདག་གི་ལུས་འདི་སེམས་ཅན་དམྱལ༌བ་ཡི། །ཞུགས་ཀྱིས་ཡོངས་གདུངས་ཞུ་བར་གྱུར་ཀྱང་རུང་། །ཁྱོད་སྤྱོད་སྐལ་བ་མཉམ་པའི་ཕྱག་རྗེད་དུ། །ཚེ་རབས་རྒྱ་མཚོར་བདག་གིས་སྤྲོ་བར་བགྱི། །ཚེ་རབས་མཐའ་ཡས༌སྐྱེས་པ་རེ་རེ་ཞིང་། །བདག་གི་ལུས་ནི་ཤིན་ཏུ་གཏུབས་གཤགས་ཀྱང་། །བརྟན་དམ་སེམས་ཀྱིས་རབ་ཏུ་སྤྲོ་བར་བགྱིས། །དད་དགེ་ཁྱོད་ཀྱིས་བདག༌གི་ཁྱིམ་ཐབ་མཛོད། །ཁོར་ཡུག་རི་ཡིས་བསྐལ་པ་མཐའ་ཡས་སུ། །བདག་གི་མགོ་ནི་ཡོངས་སུ་བཏགས་གྱུར་ཀྱང་། །སེམས་ལ་མི་བདེ་མ་མཆིས་དད་པར་བགྱིད། །ཁྱོད་ཀྱིས་རྟག་པར་བདག་གི་ཁྱིམ་ཐབ་མཛོད། །ཁྱོད་ཀྱིས་ཚེ་རབས་གྲངས་མེད་ཐམས་ཅད་དུ། །བདག་ལ་ཐུགས་བརྟན་ཐུགས་ཀྱིས་མངའ་མཛད་དེ། །ཡན་ལག་ཤ་གཏུབས་གཞན་ལ་སྩལ་བར་མཛོད། །ཁྱོད་ཀྱི་ཆོས་ལ་བདག་ཀྱང༌བརྟན་གཞག་གསོལ། །བདག་གི་ལུས་ནི་སླད་ན་མ་ལས་པར། །སྐྱེས་བུ༌ལྷ་ཡི་སྲས་པོ་ཁྱོད་ལ་དབུལ། །བསྐལ་པ་རྒྱ་མཚོར་སྤྱོད་པ་མཛད་པའི་ཚེ། །སྐྱེ་བོ་སློང་བ་རྣམས་ལ་དགྱེས་པར་གསོལ། །སེམས་ཅན་ཀུན་ལ་ཐུགས་རྗེ་མཐའ་ཡས་པ། །བསྐྱེད་དེ་སེམས་ཅན་རྒྱ་མཚོ་བསྡུ་སླད་དུ། །བྱང་ཆུབ་དམ་པ་མཆོག་ཏུ་ཁྱོད་བཞུགས་པས། །དེ་སླད་བདག་ཀྱང་ཐུགས་རྗེས་གཟུང་བ་མཛོད། །ལོངས་སྤྱོད་དོན་དང་ནོར་གྱི་དོན་མ་ལགས། །འདོད་སྤྱོད་དགའ་བ་བསྐྱེད་པའི་དོན་སླད་དུ། །སེམས་ཅན་མཆོག་ཁྱོད་ཁྱོར་འཚལ་མ་ལགས་ཀྱི། །ཁྱོད་དང་སྤྱོད་པ་མཐུན་པར༌སྤྱད་སླད་དུའོ། །སྤྱན་གསལ་མཛེས་ཤིང་བྱམས་པའི་ཐུགས་མངའ་བ། །ཁྱོད་ནི་འཇིག་རྟེན་གཟིགས་པ་ཅི་ཚུལ༌ལགས། །ཐུགས་རྗེ་ཆེ་ཡི་འདོད་ཆགས་ཐུགས༌མི་མངའ། དེ་ལ་ཐུབ་དབང་འགྱུར་བ་གདོན་མི་འཚལ། །ཁྱོད་ཀྱི་ཞབས་ཀྱིས་བཅགས་པའི་ས་རྣམས་ཀྱང་། །དྲི་མེད་རིན་ཆེན་འོད་དུ་གནས་པ་ལས། །ཁམས་གསུམ་ཀུན་ཏུ་འཁོར་ལོས་སྒྱུར་བར་ཡང་། །མཚན་རབ་ཡོངས་ཀྱིས་བརྒྱན་བྱོན་གདོན་མི་འཚལ། །བདག་གིས་གཡར་ལམ་མཐོང་བ་དགུང་ཞིག་ལ། །ཆོས་བཟང་སྤྲིན་འོད་བྱང་ཆུབ་སྙིང༌པོ་ཡི། །ཤིང་དབང་དྲུང་ན་དེ་བཞིན་གཤེགས་པ་བཞུགས། །སངས་རྒྱས༌སྲས་མང་དུ་མས་མདུན་དུ་བདར། །རྒྱལ་བའི་དབང་པོ་སྐུ་མཆོག་ཉི་མ་དེ། །འཛམ་བུ་ཆུ་ཀླུང་རིན་ཆེན་འཚེར་བ་འདྲ། །གཡར་ལམ་མཐོང་བར་ཕྱག་གིས་བདག་མགོ་བྱུག །དེ་ནས་སང་ནས་གློ་བ་རབ་ཏུ་དགའ། །དགའ་བའི་འོད་ཅེས་བགྱི་བ་རྣམ་དག་ལུས། །སྔན་ཆད་གཉེན་བཤེས་གྱུར་པའི་ལྷ་མོ་ཡིས། །བདག་ལ་བསྟན་པ་བདེ་གཤེགས་དེ་ཉིད་ནི། །སྙིང་པོ་ཡང་དག་བྱང་ཆུབ་ཡོངས་ལ་ཞུགས། །སྔོན་ཡང་གཞོན་ནུ་གཟི་བརྗིད་ཁྱོད་བལྟ་ཞེས། །བདག་གི་སེམས་བསྐྱེད་དེ་ལྟར་བསམ་པར་གྱུར། །མདང་སུམ་དགུང་ལ་ལྷ་མོ་དགེ་བ་ཡིས། །གཞོན་ནུ་དེ་ནི་མཐོང་བར་འགྱུར་ཞེས་བསྟན། །བདག་གི་བདེ་གཤེགས་གཡར་ལམ་རྨིས་པས་མཐོང་། །ཡོངས་སུ་དག་པའི་སེམས་ཅན་ཁྱོད་ཀྱང་མཐོང་། །ཡིད་བཞིན་བསམ་གྲུབ་ཁྱོད་དང་བདག་བཅས་པས། །དེ་རིང་རྒྱལ་བ་དེ་ལ་མཆོད་པར་བགྱི། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས། དེ་བཞིན་གཤེགས་པ་སྐུ་ཉི་མ་དམ་པའི་མཚན་ཐོས་ཏེ། སངས་རྒྱས་བལྟ་བའི་སྐབས་བྱུང་ནས་དགའ་བ་དང་མོས་པའི་ཤུགས་ཆེན་པོ་སྐྱེས་ཏེ། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་ནོར་བུ་རིན་པོ་ཆེ་ལྔ་བརྒྱས་མངོན་པར་གཏོར་ནས། གཙུག་གི་རིན་པོ་ཆེ་དཔལ་གྱི་འོད་འབར་བ་ཞེས་བྱ་བ་ཡང་དེ་ལ་བྱིན་ནོ། །མེའི་མདོག་ལྟར་འདུག་པའི་ནོར་བུ་རིན་པོ་ཆེ་དམ་པས་བརྒྱན་པའི་གོས་རིན་པོ་ཆེས་ཀྱང་དེ་བཀབ་བོ། །དེ་དེ་ལྟར་རིམ་གྲོར་བྱས་ཀྱང་དགའ་བར་གྱུར་པའམ། ཉམས་བདེ་བར་གྱུར་པ་ལྟ་བུའང་མེད་ལ་དགའ་བ་དང་མོས་པར༌ཡང་མ་གྱུར་གྱི། གཞན་དུ་ན་ཐལ་མོ་སྦྱར་ཅིང་མིག་མི་འགེབས་པར་གཞོན་ནུ་གཟི་བརྗིད༌བདག་གི་གདོང་ལ་བལྟ་ཞིང་གནས་པར་གྱུར་ཏོ། །དེ་ནས༌སྦྲུལ་འཚོང་མའི་གཙོ་མོ་བལྟ་ན་སྡུག་པས། རྒྱལ་བུ་གཞོན་ནུ་གཟི་བརྗིད་ཀྱི་བདག་པོ་ལ་ཚིགས་སུ་བཅད་དེ་སྨྲས་པ། བུ་མོ་འདི་ནི་ཁྱོད་གསལ་བགྱི་སྙམ་ནས། །ཡུན་རིང་སྔ་ནས་བདག་གིས་བསམ༌བསམ་སྟེ། །གཟུགས་མཛེས་དེ་ཡང་དེ་རིང་ཁྱོད་ལ་ཕུལ། །བསོད་ནམས་ལེགས་བརྒྱན་ཡོན་ཏན་རབ་དང་ལྡན། །ཚུལ་ཁྲིམས་བློ་དང་ཡོན་ཏན་གཞན་གྱིས་ཀྱང་། །བུ་མོ་དམ་པ་འདི་དང་འདྲ་བ་ནི། །༌མི་ཡི་འཇིག་རྟེན་གང་ནའང་མ་མཆིས་ཏེ། །འཇིག་རྟེན་བུད་མེད་ནང་ན་མཆོག །པད་མོའི་སྦུབས་ནས་སྐྱེས་པས་རིགས་སྨོས་སུ། །སྐྱོན་གྱི་དྲི་མས་མ་གོས་འཐད་མ་ལགས། །མ་ལུས་སྐྱོན་གྱིས་མ་གོས་སེམས་དང་ལྡན། །རྟག་པར་ཁྱོད་ཀྱི་སྤྱོད་ཚུལ་མཐུན་པར་འགྱུར། །རེག་ན་བདེ་ལ་ཀུན་ནས་འཕགས་པས་ན། །༌འདི་ཡི་ལུས་ནི་ཤིན་ཏུ་འཇམ་པ་སྟེ། །བྲོ་འཚལ་ནད་པ་གང་ལ་རེག་གྱུར་ཀྱང་། །དེའི་མོད་ལ་བྲོ་དང་བྲལ་བར་འགྱུར། །འདིའི་ལུས་ལས་སྤོས་ཀྱི་ངད་འབྱུང་བ། །སྤོས་མཆོག་གཞན་རྣམས་མངོན་པར་ཟིལ་གྱིས་གནོན། །དེ་ཡི་དྲི་ཞིམ་ཚོར་ན་རྣམ་དག་པའི། །ཚུལ་ཁྲིམས་གནས་པར་མི་རྣམས་ཀུན་ཀྱང་འགྱུར། །འདི་ཡི་ལུས་ནི་གསེར་གྱི་མདོག་འདྲ་སྟེ། །པད་མོའི་མཆོག་ལྟར་རྣམ་པར་རབ་ཏུ་གསལ། །ཁྲོས་པས་བལྟས་ན་བྱམས་པའི་སེམས་ལྡན་པར། །སེམས་ཅན་མ་ལུས་ཀུན་ཀྱང་རབ་ཏུ་འགྱུར། །འདི་ཡི་ཚིག་སྙན་ཡིད་དུ་འོང་བ་སྟེ། །ཉམས་སུ་བདེ་བས་འགྲོ་བ་ཉན་པར་དགའ། །ཐོས་ན་དེ་རྒྱུས་སྐྱོན་གྱི་མུན་པ༌དང་། །མི་དགེའི་སུག་ལས་བགྱིད་པར་མོས་མི་འགྱུར། །འདི་ནི་བསམ་དག་ཡིད་ལ་དྲི་མེད་དེ། །འདི་ལ་ཀུན་ཏུ་གཡོ་དང་སྒྱུ་མ་མཆིས། །ཇི་སྨྲ་དེ་དག་ཡིད་ལའང་དེ་བཞིན་ཏེ། །ཚིག་དབྱངས་དེས་ནི་འགྲོ་བ་ཚིམ་པར་བགྱིད། །སྒྱུ་ཡིས་སེམས་ཅན་འདྲིད་པར་མི་བགྱིད་དེ། །ནོར་གྱི་དོན་དུ་འགྲོ་བ་ཡོངས་མི་སླུ། །ཡིད༌བསྡམས་ཁྲེལ་གྱིས་འཛེམ་དང་ལྡན་པ་སྟེ། །རྒན་ནམ་གཞོན་ལའང་རྟག་ཏུ༌སྲི་ཞུས་སྤྱོད། །རིགས་རྒྱུད་གཟུགས་ཀྱིས་དྲེགས་པ་མ་མཆིས་ཏེ། །འདི་ནི་འཁོར་གྱིས་དྲེགས་པའང་ཡོང་མ་མཆིས། །ང་རྒྱལ་རློམ་སེམས་ཡོངས་དང་བྲལ་བ་སྟེ། །འགྲོ་བ་རྣམས་ལ་རྟག་ཏུ་གུས་པར་འདུད། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་འཁོར་དང་བཅས་པ་དང་། བུ་མོ་སྟོང་ཕྲག་ཉི་ཤུ་དང་། འཁོར་ཐམས་ཅད་དང་བཅས་པར་བཟའ་ཤིང་གི་ར་བ་སྤོས་ཀྱི་མྱུ་གུའི་རྩེ་མོ་ནས་འོད་ཀྱི་སྤྲིན་འབྱུང་བ་དེ་ནས་བྱུང་སྟེ། སྙིང་པོ་བྱང་ཆུབ་ཆོས་ཀྱིས་འཕགས་པའི་འོད་གང་ན་བ་དང་། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི་ཞལ་བལྟ་བ་དང་། དེ་ལ་ཕྱག་འཚལ་བ་དང་། མཆོད་པ་དང་བསྙེན་བཀུར་བྱ་བའི་ཕྱིར་དོང་སྟེ། དེ་རྟ་བབས་སའི་བར་དུ་བཞོན་པས་སོང་ནས་བབས་ཏེ་རྐང་པས། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི༌དྲུང་དུ་སོང་ངོ་། །

དེ་ནས་རྒྱལ༌པོའི་བུ་གཞོན་ནུ་གཟི་བརྗིད་ཀྱི་བདག་པོས༌རྒྱང་རིང་ཞིག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཏུ་བཟང་བ་བལྟ་ན་སྡུག་པ་དབང་པོ་ཞི་བ་ཐུགས་ཞི་བ། དབང་པོ་བསྡམས་པ། གླང་པོ་ལྟར་ཤིན་ཏུ་དུལ་བ། མཚོ་ལྟར༌དྭངས་ཤིང་རྙོག་པ་མེད་ལ་རྣམ་པར་གསལ་བ་མཐོང་ངོ་། །དེ་ལྟར་མཐོང་ནས་དེའི་སེམས་མངོན་པར་མོས་པར་གྱུར༌ཏེ། དེ་ལྟར་སེམས་མངོན་པར་མོས་པར་གྱུར་ནས་སངས་རྒྱས་མཐོང་བའི་དགའ་བ་དང་། མོས་པའི་ཤུགས་ཆེན་པོ་རྣམ་པར་སྤེལ་ཏེ་དགའ་བ་དང་མོས་པ་དང་། སྤྲོ་བ་ཆེན་པོས་ཡོངས་སུ་རྒྱས་པའི་སེམས་ཀྱིས་བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ལ་སོགས་པ་འཁོར་ཐམས་ཅད་དང་བཅས་པས། བཅོམ་ལྡན་འདས་དེའི་ཞབས་ལ་སྤྱི་བོས་ཕྱག་འཚལ་ཏེ། རིན་པོ་ཆེ་དམ་པའི་པད་མོ་སྟོང་ཕྲག་ལྔ་བརྒྱས་བཅོམ་ལྡན་འདས་དེ་ལ་མངོན་པར་གཏོར་ཏེ། བཅོམ་ལྡན་འདས་དེའི་གཙུག་ལག་ཁང་ལྔ་བརྒྱ་ནོར་བུ་རིན་པོ་ཆེའི་རྒྱལ་པོ་སྤོས་སྣ་ཚོགས་ལས་བྱས་པ་རིན་པོ་ཆེའི་རྒྱལ་པོ་སྣ་ཚོགས་ཀྱིས་རབ་ཏུ་བརྒྱན་པ། ལྔ་བརྒྱ་བརྩིགས་སོ། །གཙུག་ལག་ཁང་རེ་རེ་ཞིང་ཡང་ནོར་བུ་རིན་པོ་ཆེའི་རྒྱལ་པོ་སྟོང་ཕྲག་ལྔ་བརྒྱས་རབ་ཏུ་བརྒྱན་ཏོ། །

དེ་ནས་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པས་གཞོན་ནུ་གཟི་བརྗིད་ཀྱི་བདག་པོའི་བསམ་པ་ཐུགས་སུ་ཆུད་ནས་མདོ་སྡེ་སྒོ་ཀུན་ཏུ་ལྟ་བའི་སྒྲོན་མ་ཞེས་བྱ་བ་ཡང་དག་པར་བསྟན༌ཏོ། །དེས་དེ་ཐོས་ནས་ཆོས་ཐམས་ཅད་ཀྱི་ཚུལ་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་བཅུ་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་ཐམས་ཅད་ཀྱི་སྨོན་ལམ་རྒྱ་མཚོ་ཡང་དག་པར་འབྱུང་བ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །དུས་གསུམ་སྣང་བའི་སྙིང་པོ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སངས་རྒྱས་ཐམས་ཅད་ཀྱི་དཀྱིལ་འཁོར་མངོན་དུ་གྱུར་པར་འབྱུང་བ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སེམས་ཅན་འབྱམས་ཀླས་པ་ཐམས་ཅད་རབ་ཏུ་སྣང་བར་བྱ་བ་ལ་འཇུག་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །འཇིག་རྟེན་ཐམས་ཅད་དུ་འབྱུང་བའི་ཡེ་ཤེས་ཀྱི་སྣང་བ་ལ་ཞུགས་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ལ་འཇུག་པ་སྣང་བའི་སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །འགྲོ་བ་ཐམས་ཅད་ཡོངས་སུ་བསྐྱབ་པའི་ཡེ་ཤེས་ཀྱི་སྤྲིན་ཅེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མངོན་དུ་གྱུར་པའི་སྒྲོན་མ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྒྲ་རྣམས་དམིགས་པར་བྱེད་པ་ཞེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་བོ། །ཀུན་ཏུ་བཟང་པོའི་སྤྱོད་པའི་དཀྱིལ་འཁོར་ཡོངས་སུ་དག་པར་བྱེད་པའི་སྨོན་ལམ་གྱི་སྤྲིན་ཅེས་བྱ་བའི་ཏིང་ངེ་འཛིན་གྱི་སྒོ་རབ་ཏུ་ཐོབ་སྟེ། ཏིང་ངེ་འཛིན་གྱི་སྒོ་བཅུ་པོ་འདི་དག་ལ་སོགས་པ་ཆོས་ཀྱི་ཚུལ་ཐམས་ཅད་ལ་ཏིང་ངེ་འཛིན་གྱི་སྒོ་རྒྱ་མཚོ་ཕྲག་བཅུ་རབ་ཏུ་ཐོབ་པར་གྱུར་ཏོ། །

བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་ཀྱང་ཡེ་ཤེས་ཐུབ་པར་དཀའ་བ་རྒྱ་མཚོའི་སྙིང་པོ་ཞེས་བྱ་བའི་སེམས་ངེས་པར་གཞག་པ་རབ་ཏུ་ཐོབ་པར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ༌ལས་ཀྱང་ཕྱིར་མི་ལྡོག་པར་གྱུར་ཏོ། །དེ་ནས་རྒྱལ་པོའི་བུ་གཟི་བརྗིད་ཀྱི་བདག་པོས། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དང་། འཁོར་ཐམས་ཅད་དང་བཅས་ཏེ། བཅོམ་ལྡན་འདས་དེའི་སྤྱན་སྔ་ནས་དོང་ངོ་། །དེ་ནས་རྒྱལ་པོའི་གནས་སྡོང་པོ་རི་བོའི་དཔལ་གང་ན་བ་དང་། རྒྱལ་པོ་ཡབ་ནོར་གྱི་བདག་པོ་གང་ན་བ་དེར་དོང་སྟེ། དྲུང་དུ་ཕྱིན་ནས། རྒྱལ་པོ་ཡབ་ནོར་གྱི་བདག་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དོན་འདི་བརྗོད་དོ། །ལྷའི་ཞལ་སྔ་ནས་མཁྱེན་པར་མཛད་དུ་གསོལ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བགྱི་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བ་ཁ་ལོ་བསྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཁྱོད་ཀྱི་ཁམས་འདི་ཉིད་ཀྱི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ༌སྡུག་པའི་འོད་ན་རྣམ་པར་སྤྱོད་དེ། མངོན་པར༌རྫོགས་པར་སངས་རྒྱས་ནས་རིང་པོ་མ་ལགས་སོ། །དེ་ནས་རྒྱལ་པོ་ནོར་གྱི་བདག་པོས། གཞོན་ནུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་ལ་དོན་འདི་ལྷ་འམ་མིའམ་སུ་ཞིག་གིས་སྦྲན།

དེས་སྨྲས་པ། བདག་ལ་བུ་མོ་དགའ་བའི་འོད༌ཀྱི་དཔལ་ཤིན་ཏུ་སྦྱངས་པས་སྦྲན་ཏོ། །དེ་ནས་རྒྱལ་པོ་ནོར་གྱི་བདག་པོས་སངས་རྒྱས་བྱུང་བར་ཐོས་ནས། སངས་རྒྱས་སྐྱེ་བ་ལ་ནི་གཏེར་རབ་ཏུ་ཐོབ་པ་ཙམ་དུ་སེམས། སངས་རྒྱས་རིན་པོ་ཆེ་དང་ཕྲད་པར་ནི་དཀའ་བར་སེམས། དེ་བཞིན་གཤེགས་པ་མཐོང་བས་ནི་ངན་སོང་གི་གཡང་སའི་འཇིགས་པ་ཐམས་ཅད་ཀྱང་རྣམ་པར་ལྡོག་པར་སེམས། ཉོན་མོངས་པའི་ནད་ཆེན་པོ་རབ་ཏུ་ཞི་བར་བྱ་བ་ལ་ནི་སྨན་པའི་རྒྱལ་པོ༌ཆེན་པོ་དང་ཕྲད་པ་ཙམ་དུ་སེམས། འཁོར་བའི་སྡུག་བསྔལ་ཐམས་ཅད་ལས་ནི་ཡོངས་སུ་འགྲེལ་པ་ཡིན་པར་སེམས། ཤིན་ཏུ་བདེ་ཞིང་ལྡན་པ་ལ་ནི་རབ་ཏུ་གཞོག་པར་སེམས། རབ་རིབ་མེད་པའི་ཡེ་ཤེས་ཀྱི་སྣང་བ་ནི་ཡང་དག་པར་སྟོན་པར་སེམས། མ་རིག་པའི་མུན་པ་བསྩལ་བ་ལ་ནི་སྒྲོན་མ་ཆེན་པོ་བྱུང་བ་ཙམ་དུ་སེམས། འཇིག་རྟེན་མགོན་མེད་པ་ལས་ནི་ཆོས་ཀྱི་ཚུལ་གྱི་མགོན་དང་ཕྲད་པར་སེམས། འཇིག་རྟེན་འདྲེན་པ་མེད་པ་ལས་ནི་ཐམས་ཅད་མཁྱེན་པ་ཉིད་ཀྱི་ཐེག་པས་འདྲེན་པ་སྐྱེས་པར་སེམས་ཤིང་སངས་རྒྱས་བྱུང་བར་ཐོས་པས་མོས་པ་དང་། སྤྲོ་བ་ཆེན་པོ་སྐྱེས་ནས་རྒྱལ་རིགས་དང་བྲམ་ཟེ་དང་ལྗོངས་ཀྱི་མི་དང་། ཡུལ་གྱི་མི་དང་། བློན་པོ་དང་ཞམ་རིང་བ་དང་། གཞོན་ནུ་དང་རྒྱལ་ཕྲན་དང་། ཁམས་ཀྱི་བདག་པོ་དང་། འཁོར་ཐམས་ཅད་ཀྱང་ཀུན་ནས་བསྡུས་ནས། སངས་རྒྱས་བྱུང་བར་སྒྲ་སྙན་པ་སྒྲོག་པའི་གཞོན་ནུ་གཟི་བརྗིད་ཀྱི་བདག་པོ་ལ་རྒྱལ་པོའི་སྲིད་དེ་ཡང་ཆོས་ཀྱི༌དགབ་པར་བྱིན་ནོ། །

དེ་ལྟར་གཞོན་ནུ་དེ་རྒྱལ་སྲིད་ལ་དབང་བསྐུར་ནས། སྲོག་ཆགས་སྟོང་ཕྲག་བཅུ་དང་ལྷན་ཅིག་ཏུ། བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་གང་ན་བ་དེར་སོང་སྟེ། སྤྱན་སྔར་ཕྱིན་ནས། བཅོམ་ལྡན་འདས་དེའི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་དེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བཅོམ་ལྡན་འདས་དེའི་སྤྱན་སྔར་རང་གི་འཁོར་དང་བཅས་ཏེ་འཁོད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པས། རྒྱལ་པོ་ནོར་གྱི་བདག་པོ་དང་། འཁོར་གྱི་དཀྱིལ་འཁོར་ཐམས་ཅད་ལ་གཟིགས་ནས། དེའི་ཚེ་མཛོད་སྤུ་ནས་འོད་གཟེར་འགྲོ་བ་ཐམས་ཅད་ཀྱི་སེམས་ཀྱི་སྒྲོན་མ་ཞེས་བྱ་བ་རབ་ཏུ་བཀྱེའོ། །དེས་ཕྱོགས་བཅུའི་འཇིག་རྟེན་གྱི་ཁམས་སྣང་བར་བྱས་ཏེ། འཇིག་རྟེན་གྱི་དབང་པོ་ཐམས་ཅད་མངོན་སུམ་དུ་བཀོད་ནས། སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་ཏེ། སངས་རྒྱས་ཀྱིས་འདུལ་བའི་སེམས་ཅན་རྣམས་ཀྱི་བསམ་པ་དང་། ལྷག་པའི་བསམ་པ་རྣམ་པར་སྦྱངས་ནས། དེའི་ཚེ་སངས་རྒྱས་ཀྱི་བྱིན༌གྱི་རླབས་བསམ་གྱིས་མི་ཁྱབ་པའི་མཐུས་སངས་རྒྱས་ཀྱི་སྐུ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། སངས་རྒྱས་ཀྱི་གསུང་དབྱངས་ཀྱི་ཡན་ལག་རྒྱ་མཚོ་ཐམས་ཅད་དང་ལྡན་པས། གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་གཟུངས་ཀྱི་སྒོ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་བཅས་པར་ཡང་དག་པར་བསྟན་ཏོ། །

དེ་ནས་རྒྱལ་པོ་ནོར་གྱི་བདག་པོས་གཟུངས་ཀྱི་སྒོ་དེ་ཐོས་ནས་ཆོས་ཐམས་ཅད་ལ་ཆོས་ཀྱི་སྣང་བ་ཆེན་པོ་སྐྱེས་པར་གྱུར་ཏོ། །འཁོར་དེའི་བྱང་ཆུབ་སེམས་དཔའ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མའི་གཟུངས་རབ་ཏུ་ཐོབ་པར་གྱུར་ཏོ། །ཁྲག་ཁྲིག་དྲུག་ཅུས་ནི་ཉེ་བར་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །སྲོག་ཆགས་སྟོང་ཕྲག་བཅུས་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པར་རྣམ་པར་དག་པར་གྱུར་ཏོ། །སེམས་ཅན་གྲངས་མེད་པ་ཞིག་གིས་ནི་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡོངས་སུ་བསྐྱེད་དོ། །ཕྱོགས་བཅུར་ཡང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཡོངས་སུ་བསྟན་པ་དེས་སེམས་ཅན་གྱི་ཁམས་མཐའ་དང་དབུས་མེད་པ་ཐེག་པ་གསུམ་གྱིས་དུལ་བར་གྱུར་ཏོ། །དེ་ནས་རྒྱལ་པོ་ནོར་གྱི་བདག་པོ་ཆོས་ཀྱི་སྣང་བ་རབ་ཏུ་ཐོབ་པ། དེའི་ཡིད་ལ་འདི་སྙམ་སྟེ། ཁྱིམ་ན་གནས་པས་ནི་རྣམ་པ་འདི་ལྟ་བུའི་ཆོས་ཀྱང་ཁོང་དུ་ཆུད་པར་མི་ནུས་ལ་ཡེ་ཤེས་རྣམ་པ་འདི་ལྟ༌བུ་ཡང་བསྒྲུབས་པར་མི་ནུས་ཀྱིས་བདག་ནི་བཅོམ་ལྡན་འདས་ཀྱི་ཞམ་རིང་དུ་རབ་ཏུ་འབྱུང་ངོ་སྙམ་ནས། རྒྱལ་པོ་ནོར་གྱི་བདག་པོས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བཅོམ་ལྡན་འདས་ཀྱི་ཞམ་རིང་དུ༌རབ་ཏུ་འབྱུང་ཞིང་བསྙེན་པར་རྫོགས་པའི་དགེ་སློང་གི་ཚུལ་ལ་མཆིས་པར་ཅི་གནང་ཞེས་ནས། བཅོམ་ལྡན་འདས་དེས་བཀའ་སྩལ་པ། རྒྱལ་པོ་ཆེན་པོ་དེའི་དུས་ལ་དབབ་པར་ཤེས་ན་རུང་ངོ་། །

དེ་ནས་རྒྱལ་པོ་ནོར་གྱི་བདག་པོ་སྲོག་ཆགས་སྟོང་ཕྲག་བཅུ་དང་ལྷན་ཅིག་ཏུ་དེ་བཞིན་གཤེགས་པ་སྐུ་ཉི་མ་དམ་པའི་ཞམ་རིང་དུ་རབ་ཏུ་བྱུང་ངོ་། །དེ་ལྟར་རབ་ཏུ་བྱུང་ནས་རིང་པོ་མ་ལོན་པར་གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་དེ་འཁོར་དང་བཅས་པར་ཡོངས་སུ་བསྒྲུབས་སོ། །བསྒོམས་སོ། །ཤིན་ཏུ་བསྒོམས་སོ། །དེ་སྙེད་ཀྱི་ཏིང་ངེ་འཛིན་གྱི་སྒོ་ཡང་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའི་མངོན་པར་ཤེས་པ་བཅུ་ཡང་རབ་ཏུ་ཐོབ་བོ། །སོ་སོ་ཡང་དག་པར་རིག་པའི་ཚུལ་རྒྱ་མཚོ་ལ་ཡང་དག་པར་ཞུགས་པར་གྱུར་ཏོ། །ཕྱོགས་བཅུའི་དེ་བཞིན་གཤེགས་པའི་དྲུང་དུ་འགྲོ་བ་ཐོགས་པ་མེད་པའི་སྤྱོད་ཡུལ་ཞེས་བྱ་བའི་ལུས་ཡོངས་སུ་དག་པ་ཡང་རབ་ཏུ་ཐོབ་སྟེ། དེས་བཅོམ་ལྡན་འདས་དེའི་ཆོས་ཀྱི་འཁོར་ལོ་ཡང་དག་པར་བླངས་སོ། །ཡོངས་སུ་བཟུང་ངོ་། །གཏམ་གྱི་སྐྱེས་བུ་ཡང་བྱས་སོ། །ཆོས་སྨྲ་བ་ཆེན་པོ་ཡང་བྱས་སོ། །བསྟན་པ་ཡོངས་སུ་གཟུང་བ་ཡང་བྱས་སོ། །མངོན་པར་ཤེས་པ་ཐོབ་པའི་སྟོབས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ལུས་ཡོངས་སུ་བསྟན་ནས། སངས་རྒྱས་བྱུང་བ་དེ་རབ་ཏུ་བརྗོད་པ་དང་། སྔོན་གྱི་དེ་བཞིན་གཤེགས་པས་ཡོངས་སུ་བསྒྲུབས་པའི་ཆོས་ཉིད་མངོན་པར་བརྗོད་པ་དང་། སྔོན་གྱི་སྦྱོར་བ་ཕུན་སུམ་ཚོགས་པ་དེ་དག་ཡོངས་སུ་བརྗོད་པ་དང་། སངས་རྒྱས་ཀྱི་རྣམ་པར་འཕྲུལ་པའི་མཐུ་དེ་དག་ཡོངས་སུ་བརྗོད་པར་བྱ་བས་བསྟན་པ་ཡོངས་སུ་གཟུང་བ་བྱས་སོ། །

རྒྱལ་པོའི་སྲས་གཟི་བརྗིད་ཀྱི་བདག་པོས་ཀྱང་དེའི་ཉིན་པར་ཟླ་བ་ཉ་སྟེ། རྒྱས་པའི་ཚེ་རིན་པོ་ཆེ་བདུན་རབ་ཏུ་ཐོབ་པར་གྱུར་ཏེ། དེ་ཁང་པའི་སྟེང་ན་བུད་མེད་ཀྱི་ཚོགས་ཀྱིས་བསྐོར་ཅིང་འདུག་པའི་མདུན་དུ་འཁོར་ལོ་རིན་པོ་ཆེ་ཆེན་པོ་ཤུགས་ལ་ཐོགས་པ་མེད་པ་ཞེས་བྱ་བ་རྩིབས་སྟོང་ཕྲག་བརྒྱ་དང་ལྡན་པ་རིན་པོ་ཆེ་ཐམས་ཅད་ཀྱིས་བརྒྱན་པ། ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་གྲུབ་པ། འོད་ཀུན་ཏུ༌འབྱུང་བ་རྣམ་པའི་མཆོག་ཐམས་ཅད་དང་ལྡན་པ་བྱུང་བར་གྱུར་ཏོ། །གླང་པོ་རིན་པོ་ཆེ་ཆེན་པོ་རྡོ་རྗེ་རིན་པོ་ཆེའི་རིའི་གཟི་བརྗིད་ཅེས་བྱ་བ་བྱུང་བར་གྱུར་ཏོ། །རྟ་རིན་པོ་ཆེ་རི་སྔོ་རླུང་གི་ཤུགས་ཞེས་བྱ་བ་བྱུང་བར་གྱུར་ཏོ། །ནོར་བུ་རིན་པོ་ཆེ་ཆེན་པོ་ཉི་མའི་སྙིང་པོ་འོད་སྤྲིན་རྒྱལ་པོ་ཞེས་བྱ་བ་བྱུང་བར་གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དེ་ཡང་བུད་མེད་རིན་པོ་ཆེར་བྱུང་བར་གྱུར་ཏོ། །ཁྱིམ་བདག་རིན་པོ་ཆེ་ནོར༌ཀྱི་ཕུང་པོ་མང་པོ་ཞེས་བྱ་བ་བྱུང་བར་གྱུར་ཏོ། །བློན་པོ་རིན་པོ་ཆེ་མིག་དྲི་མ་མེད་པ་ཞེས་བྱ་བ་ཡང་བྱུང་བར་གྱུར་ཏོ། །དེ་ལྟར་བདུན་ནོ་དེ་དེ་ལྟར་རིན་པོ་ཆེ་བདུན་དང་ལྡན་པའི་རྒྱལ་པོ་འཁོར་ལོས་སྒྱུར་བ་གླིང་བཞི་ལ་དབང་བ་ཆོས་དང་ལྡན་པ། ཆོས་ཀྱི་རྒྱལ་པོ་རྣམ་པར་རྒྱལ་བ་དང་ལྡན་པ་ཡུལ་གྱི་མཐུ་དང་བརྩོན་འགྲུས་སུ་ལྡན་པར་གྱུར་ཏེ། དེ་ལ་བུ་དཔའ་ལ་བརྟུལ་ཕོད་ཅིང་ཡན་ལག་དམ་པའི་གཟུགས་དང་ལྡན་པ་ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡོད་པར་གྱུར་ཏེ། དེས་ས་ཆེན་པོ་འདི་སྐྱོན་མེད་པ་དང་། དགྲ་མེད་པ་དང་། གནོད་པ་མེད་པ་དང་། འཚེ་བ་མེད་པ་དང་། སྐྱིད་པ་དང་ཕུན་སུམ་ཚོགས་པ་དང་། བདེ་བ་དང་ལོ་ལེགས་པ་དང་། མདངས་དགའ་བ་དང་། སྐྱེ་བོའི་མི་མང་པོས་ཡོངས་སུ་གང་བ་ཡང་རི་དང་རྒྱ་མཚོའི་མཐས་ཀླས་པར་ཆོས་ཀྱིས་མངོན་པར་བརྒྱན་ཏེ། གནས་པར་བྱས་སོ། །

དེས་འཛམ་བུའི་གླིང་དེའི་རྒྱལ་པོའི་གནས་སྟོང་ཕྲག་བརྒྱད་ཅུ་རྩ་བཞི་དག་ཏུ་ཡང་རྒྱལ་པོའི་གནས་རེ་རེར་གཙུག་ལག་ཁང་ལྔ་བརྒྱ་ལྔ་བརྒྱ་བྱེད་དུ༌བཙུད་དེ། ཐམས་ཅད་ཀྱང་རྣམ་པའི་མཆོག་ཐམས་ཅད་དང་ལྡན་པ་ཤ་སྟག་གོ །ལོངས་སྤྱོད་དང་ཡོ་བྱད་ཀྱི་རྣམ་པ་ཐམས་ཅད་ཕུན་སུམ་ཚོགས་པ་ཤ་སྟག་གོ །བཟའ་ཤིང་གི་ར་བ་དང་། ཁང་པ་དང་འཆག་ས་དང་། དུས་ཐམས་ཅད་དུ་བདེ་བར་སྤྱད་པའི་ནགས་ཚལ་གྱི་ཕྲེང་བས༌རྣམ་པར་བརྒྱན་པ་ཤ་སྟག་གོ །གཙུག་ལག་ཁང་རེ་རེ་ཞིང་ཡང་དེ་བཞིན་གཤེགས་པའི་མཆོད་རྟེན་བརྩིགས་པ་ནི་ལྷུན་གྱི་རྒྱ་ཤིན་ཏུ་ཆེ་བར་བྱས་པ་སྟེ། ནང་རིན་པོ་ཆེ་རྣམ་པ་མང་པོས་བརྒྱན་པ། རིན་པོ་ཆེའི་རྒྱལ་པོ་སྣ་ཚོགས་ཀྱིས་རྣམ་པར་སྤྲས་པ་ཤ་སྟག་སྟེ། རྒྱལ་པོའི་གནས་དེ་ཐམས་ཅད་དུའང་བཅོམ་ལྡན་འདས་དེ་བཞིན་གཤེགས་པ་སྐུ་ཉི་མ་དམ་པ་འཁོར་དང་བཅས་པ། གྲོང་ཁྱེར་དུ་གཤེགས་པར་བྱ་བའི་ཕྱིར་སྤྱན་དྲངས་སོ། །རྒྱལ་པོའི་གནས་དེ་དག་ཀུན་ཏུ་ཡང་དེ་བཞིན་གཤེགས་པ༌དེ་ལ་དེ་བཞིན་གཤེགས་པའི་མཆོད་པ་རྣམ་པ་ཐམས་ཅད་དུ་བསམ་གྱིས་མི་ཁྱབ་པས་མཆོད་དེ། སངས་རྒྱས་གྲོང་ཁྱེར་དུ་གཤེགས་པའི་ཆོ་འཕྲུལ་དང་། རྣམ་པར་འཕྲུལ་པས་སེམས་ཅན་ཚད་མེད་པའི་དགེ་བའི་རྩ་བ་ཡོངས་སུ་བསྐྱེད་པའི་ཕྱིར་གཤེགས་སུ་གསོལ་ཏོ། །དེར་ཡང་སེམས་ཅན་མ་དད་པའི་སེམས་དང་ལྡན་པ་རྣམས་ནི་དད་པ་ཐོབ་པར་གྱུར་ཏོ། །དད་པ་དང་ལྡན་པའི་སེམས་ཅན་རྣམས་ནི་སངས་རྒྱས་མཐོང་བས་དགའ་བའི་ཤུགས་རྣམ་པར་འཕེལ་བར་གྱུར་ཏོ། །དགའ་བའི་ཤུགས་རྣམ་པར་འཕེལ་བའི་སེམས་ཅན་རྣམས་ནི་བྱང་ཆུབ་ཀྱི་བསམ་པ་རྣམ་པར་དག་པ་ཐོབ་པར་གྱུར་ཏོ། །

བྱང་ཆུབ་ཀྱི་བསམ་པ་རྣམ་པར་དག་པའི་སེམས་ཅན་རྣམས་ནི་སྙིང་རྗེ་ཆེན་པོའི་སེམས་སྐྱེས་པར་གྱུར་ཏོ། །སེམས་ཅན་ལ་ཕན་པར་ཞུགས་པའི་སེམས་ཅན་རྣམས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བ་ལ་བརྩོན་པར་གྱུར་ཏོ། །སངས་རྒྱས་ཀྱི་ཆོས་ཀྱི་ཚུལ་གྱི་རྣམ་པ་ལ་མཁས་པའི་སེམས་ཅན་རྣམས་ནི་ཆོས་ཐམས་ཅད་ཀྱི་རང་བཞིན་ངེས་པར་ཁོང་དུ་ཆུད་པར་བྱ་བའི་ཕྱིར་སེམས་མངོན་པར་གཞོལ་བར་གྱུར་ཏོ། །ཆོས་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི་དུས་གསུམ་མཉམ་པ་ཉིད་ལ་འཇུག་པའི་ཕྱིར། སེམས་མངོན་པར་གཞོལ་བར་གྱུར་ཏོ། །དུས་གསུམ་གྱི་ཡེ་ཤེས་སྣང་བ་ཐོབ་པའི་སེམས་ཅན་རྣམས་ནི་སངས་རྒྱས་གཅིག་ནས་གཅིག་ཏུ་བརྒྱུད་པ་རྣམ་པར་དམིགས་པར་བྱ་བའི་དོན་དུ་ཡེ་ཤེས་སྣང་བ་ལ་ཞུགས་པར་གྱུར་ཏོ། །དེ་བཞིན་གཤེགས་པ་སྣ་ཚོགས་རྣམ་པར་དམིགས་པར་བྱ་བ་ལ་ཞུགས་པའི་སེམས་ཅན་རྣམས་ནི་འགྲོ་བ་ཐམས་ཅད་ཡོངས་སུ་བསྡུ་བའི་དོན་དུ་སེམས་མངོན་པར་གཞོལ་བར་གྱུར་ཏོ། །འགྲོ་བ་ཐམས་ཅད་ཡོངས་སུ་བསྡུ་བ་ལ་བརྩོན་པའི་སེམས་ཅན་རྣམས་ནི་བྱང་ཆུབ་སེམས་དཔའི་ལམ་རྣམ་པར་དག་པར་བྱ་བའི་ཕྱིར་སྨོན་ལམ་སྐྱེད་པར་གྱུར་ཏོ། །ལམ་གྱི་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་མངོན་པར་བསྒྲུབ་པའི་ཕྱིར་ཡེ་ཤེས་སྣང་བ་སྐྱེད་པར་གྱུར་ཏོ། །

ཆོས་རྒྱ་མཚོ་རྣམ་པར་དབྱེ་བ་ལ་མངོན་པར་མོས་པའི་སེམས་ཅན་རྣམས་ནི་ཞིང་གི་དྲ་བ་ཐམས་ཅད་རང་གི་ལུས་ཀྱིས་རྒྱས་པར་གང་བའི་དོན་དུ་སེམས་མངོན་པར་གཞོལ་བར་གྱུར་ཏོ། །ཞིང་མཉམ་པ་ཉིད་ལ་ཞུགས་པའི་སེམས་ཅན་རྣམས་ནི་སེམས་ཅན་ཐམས་ཅད་ཀྱི་དབང་པོ་རྒྱ་མཚོ་ཡོངས་སུ་ཤེས་པར་བྱ་བའི་ཕྱིར་སྨོན་ལམ་འདེབས་པར་གྱུར་ཏོ། །འགྲོ་བ་ཐམས་ཅད་ཀྱི་དབང་པོ་དང་མོས་པ་ཇི་ལྟ་བ་བཞིན་དུ་རྣམ་པར༌དཔྱད་པ་ལ་བརྩོན་པའི་སེམས་ཅན་རྣམས་ནི་ཐམས་ཅད་མཁྱེན་པ་ཉིད་ཁོང་དུ་ཆུད་པར་བྱ་བའི་ཕྱིར་བསམ་པ་རྣམ་པར་དག་པར་གྱུར་ཏོ། །སེམས་ཅན་རྣམ་པ་དེ་ལྟ་བུ་དག་གི་དོན་རྣམ་པ་དེ་ལྟ་བུ་དེ་དག་འགྲུབ་པར་འགྱུར་བ་མཐོང་ནས། རྒྱལ་པོ་གཟི་བརྗིད་ཀྱི་བདག་པོས་སངས་རྒྱས་ཀྱི་རྣམ་པར་འཕྲུལ་པ་དང་། ཆོ་འཕྲུལ་བསམ་གྱིས་མི་ཁྱབ་པ་བསྟན་པས་སེམས་ཅན་དེ་དག་ཡོངས་སུ་སྨིན་པར་བྱ་བ་དང་། གདུལ་བའི་དོན་དུ་རྒྱལ་པོའི་གནས་དེ་དག་ཐམས་ཅད་དུ་དེ་བཞིན་གཤེགས་པ་སྐུ་ཉི་མ་དམ་པ་གཤེགས་སུ་གསོལ་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོའི་བུ་གཟི་བརྗིད་ཀྱི་བདག་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི། ཁྱོད་ཀྱིས་དེ་ལྟར་མི་བལྟ་སྟེ། བཅོམ༌ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་འདི་ནི་དེའི་ཚེ་དེའི་དུས་ན། རྒྱལ་པོའི་བུ་གཟི་བརྗིད་ཀྱི་བདག་པོ་ཞེས་བྱ་བ་འཁོར་ལོས་སྒྱུར་བའི་རྒྱལ་སྲིད་ལ་དབང་བ་དེ་བཞིན་གཤེགས་པ་སྐུ་ཉི་མ་དམ་པ་ལ་བསྙེན་བཀུར་བྱེད་བྱེད་པ་དེ་ཡིན་ནོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་གཞོན་ནུ་གཟི་བརྗིད་ཀྱི་བདག་པོའི་ཡབ་དུ་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། དེ་བཞིན་གཤེགས་པ་རིན་པོ་ཆེའི་མེ་ཏོག་གི་འོད་ཅེས་བྱ་བ་ནི་དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོ་ཞེས་བྱ་བར་གྱུར་པ་སྟེ། ད་ལྟར་ཤར་ཕྱོགས་སུ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོའི་ཕ་རོལ་གྱི་འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ་མཁའི་གཟུགས་བརྙན་གྱི་སྤྲིན་ཅེས་བྱ་བ་ན། འཇིག་རྟེན་གྱི་ཁམས་ཀྱི་རྒྱུད་དབུ་མ་དུས་གསུམ་རབ་ཏུ་སྣང་བའི་རིན་པོ་ཆེའི་རྒྱལ་པོ་ཡོངས་སུ་འབྱུང་བའི་དབྱིངས་ཞེས་བྱ་བའི་འཇིག་རྟེན་གྱི་ཁམས་སངས་རྒྱས་ཀྱི་འོད་ཀྱི་དཀྱིལ་འཁོར་དཔལ་གྱི་སྒྲོན་མ་ཞེས་བྱ་བ་ན། སྙིང་པོ་བྱང་ཆུབ་ཐམས་ཅད་ལ་དབང་བའི་ལུས་རབ་ཏུ་སྣང་བ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའི་འཁོར་གྱིས་བསྐོར་ཅིང་ཆོས་སྟོན་ཏོ། །བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་འོད་ཅེས་བྱ་བ་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། འཇིག་རྟེན་གྱི་ཁམས་རྒྱ་མཚོ་ཆོས་ཀྱི་དབྱིངས་ནམ༌མཁའི་གཟུགས་བརྙན་དུ་སྣང་བའི་སྤྲིན་ཡོངས་སུ་དག་པར་མཛད་དེ། འཇིག་རྟེན་གྱི་ཁམས་རྒྱ་མཚོ་དེར་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དང་། འབྱུང་བ་དང་འབྱུང་བར་འགྱུར་བ་དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་མེ་ཏོག་གི་འོད་དེས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨིན་པར་མཛད་པ་ཤ་སྟག་གོ །རིགས་ཀྱི་བུ་དེ་ལ་ཇི་སྙམ་དུ་སེམས།

དེའི་ཚེ་དེའི་དུས་ན་རྒྱལ་པོའི་བཙུན་མོ་པད་མོ་དཔལ་གྱི་སྙིང་པོ་འབྱུང་བ་ཞེས་བྱ་བ་བྱུང་སྟེ། གཞོན་ནུ་གཟི་བརྗིད་ཀྱི་བདག་པོའི་ཡུམ་དུ་གྱུར་པ་བུད་མེད་སྟོང་ཕྲག་བརྒྱད་ཅུ་རྩ་བཞིའི་གཙོ་མོར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི། དེ་ལྟར་མི་བལྟ་སྟེ། རིགས་ཀྱི་བུ་བཅོམ་ལྡན་འདས་ཀྱི་ཡུམ་ལྷ་མོ་སྒྱུ་མ་བྱང་ཆུབ་སེམས་དཔའ༌བསྐྱེད་བསྐྱེད་པ་རྣམ་པར་ཐར་པ་ཀུན་ཏུ་སྣང་ཞིང་སྒྲིབ་པ་མེད་པ་ལ་རབ་ཏུ་གནས་པ། སྔོན་དེ་བཞིན་གཤེགས་པས་ཡོངས་སུ་བསྒྲུབས་པ་མངོན་དུ་གྱུར་པ། བྱང་ཆུབ་སེམས་དཔའི་སྐྱེ་བ་ཐམས་ཅད་ཡོངས་སུ་བསྟན་པའི་ཚུལ་ལ་མཁས་པ་འདི་ནི་དེའི་ཚེ་དེའི་དུས་ན་རྒྱལ་པོ་ནོར་གྱི་བདག་པོའི་བཙུན་མོ་དམ་པ་པད་མོ་དཔལ་གྱི་སྙིང་པོ་འབྱུང་བ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན༌སྦྲུལ་འཚོང་མའི་གཙོ་མོ་བལྟ་ན་སྡུག་པ་ཞེས་བྱ་བ་བྱུང་བ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི༌བལྟ་སྟེ། ཤཱཀྱ་ལག་ན་ཁར་བའི་ཆུང་མ་ཁོ་མོའི་མ་མིག་མཛེས་ཞེས་བྱ་བ་འདི་ནི་དེའི་ཚེ་དེའི་དུས་ན༌སྦྲུལ་འཚོང་མའི་གཙོ་མོ་བལྟ་ན་སྡུག་པ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་བུ་མོ་དགའ་བའི་འོད༌ཀྱི་དཔལ་ཤིན་ཏུ་སྦྱངས་པ། ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན། སྦྲུལ་འཚོང་མའི་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་ཞེས་བྱ་བར་གྱུར་ཏོ། །

རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་གཟི་བརྗིད་ཀྱི་བདག་པོའི་འཁོར་དུ་གྱུར་པ་དེ་རྣམས་གཞན་ཞིག་ཡིན་པ་ཙམ་དུ་སེམས་ན་ནི། རིགས་ཀྱི་བུ༌དེ་ནི་དེ་ལྟར་མི་བལྟ་སྟེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པར་བྱ་བ་ལ་དགོད་དགོད་པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་འདི་ཉིད་ན་འཁོད་ཅིང་། འཇིག་རྟེན་གྱི་ཁམས་ཐམས་ཅད་དུ་གཟུགས་བརྙན་རབ་ཏུ་བྱུང་བའི་ལུས་དང་། བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ལ་རྣམ་པར་སྤྱོད་པ་ལས་མ་ཉམས་པའི་སེམས་དང་། དེ་བཞིན་གཤེགས་པ་ཐམས་ཅད་ཀྱི་ཞལ་མངོན་དུ་མཐོང་བར་རྣམ་པར་དམིགས་པའི་མིག་དང་དེ་བཞིན་གཤེགས་པ་ཐམས་ཅད་ཀྱི་གསུང་གི་ཡན་ལག་གི་སྤྲིན་ནམ་མཁའ་དང་མཉམ་པའི་འཁོར་ལོ་རབ་ཏུ་བསྒྲགས་པའི་དབྱངས་རྣམ་པར་དམིགས་པའི་རྣ་བ་དང་། ཆོས་ཐམས་ཅད་ལ་རྣམ་པར་སྤྱད་པར་དབང་བསྒྱུར་བའི་དབུགས་ཕྱི་ནང་དུ་རྒྱུ་བ་དང་། སངས་རྒྱས་ཀྱི་ཞིང་ཐམས་ཅད་དུ་རྗེས་སུ་གྲགས་པའི་མིང་གི་སྒྲ་དང་། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་ཉེ་བར་འགྲོ་བ་རྒྱུན་མི་གཅོད་པའི་བྱང་ཆུབ་སེམས་དཔའི་ལུས་དང་། སེམས་ཅན་ཐམས་ཅད་ལ་བསམ་པ་ཇི་ལྟ་བ་བཞིན་དུ་མངོན་པར་སྟོན་པའི་ལུས་ཡོངས་སུ་སྨིན་པར་བྱ་བ་དང་། གདུལ་བ་ལ་རྗེས་སུ་མཐུན་པ་མངོན་པར་བསྒྲུབས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་ཡོངས་སུ་རྫོགས་པར་བྱ་བ་དང་། ཡང་དག་པར་བསྒྲུབས་པ་ཕྱོགས་ཀྱི་དྲ་བ་མ་ལུས་པ་ཐམས་ཅད་དུ་འདལ་ཏེ། མ་འོངས་པའི་བསྐལ་པ་ཐམས་ཅད་དུ་རྒྱུན་མི་འཆད་པ་དང་ལྡན་པ་ཤ་སྟག །བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་ན་འཁོད་པ་འདི་དག་ཡིན་ནོ། །

རིགས་ཀྱི་བུ་དེ་བཞིན་གཤེགས་པ་སྐུ་ཉི་མ་དམ་པ་དེ་ནི་འཁོར༌ལོས་སྒྱུར་བ་གཟི་བརྗིད་ཀྱི་བདག་པོ་དང་། ཁོ་མོས་ནམ་བཞུགས་ཀྱི་བར་དུ་ན་བཟའ་དང་བཤོས་དང་། གཟིམ་ཆ་དང་། སྙུན་གྱི་རྐྱེན་སྨན་དང་ཡོ་བྱད་ཀྱིས་བསྙེན་བཀུར་ཏོ། །རིགས་ཀྱི་བུ་དེ་བཞིན་གཤེགས་པ་སྐུ་ཉི་མ་དམ་པ་ཡོངས་སུ་མྱ་ངན་ལས་འདས་པའི་འོག་ཏུ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་སྐུ་ཤིན་ཏུ་དང་བ་ཞེས་བྱ་བ་འཇིག་རྟེན་དུ་བྱུང་སྟེ། དེ་ཡང་ཁོ་མོ་ཅག་གིས་བསྙེན་བཀུར་ཏོ། །རིམ་གྲོར་བྱས་སོ། །བསྟི་སྟང་དུ་བྱས་སོ། །ཕུ་དུད་དུ་བྱས་སོ། །མཆོད་དོ། །དེའི་འོག་ཏུ་དེ་བཞིན་གཤེགས་པ་སྐུ་ཐམས་ཅད་ལ་ཡེ་ཤེས་ཀྱི་གཟུགས་བརྙན་གྱི་ཟླ་བ་སྣང་བ་ཞེས་བྱ་བ་འཇིག་རྟེན་དུ་བྱུང་སྟེ། དེ་ཡང་ཁོ་མོ་ཅག་གིས་ལྷའི་དབང་པོར་གྱུར་ཏེ། བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འཛམ་བུ་ཆུ་ཀླུང་གི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་མཚན་གྱིས་རྣམ་པར་བརྒྱན་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་སྣ་ཚོགས་འབར་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཤིན་ཏུ་རྣམ་པར་གཟིགས་པའི་ཡེ་ཤེས་དཔལ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཡེ་ཤེས་ཆེན་པོའི་འོད་གཟེར་ཤིན་ཏུ་ཡངས་པའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྡོ་རྗེ་མཐུ་བོ་ཆེའི་བརྩོན་འགྲུས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་གཞན་གྱིས་མི་ཐུབ་པའི་མཐུ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཀུན་ཏུ་རྣམ་པར་གཟིགས་པའི་ཡེ་ཤེས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ༌ཡེ་ཤེས་དྲི་མ་མེད་པ་ཕུན་སུམ་ཚོགས་པའི་སྤྲིན་ཅེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་སེང་གེ་རྣམ་པར་བསྒྱིངས་པའི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་འབར་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་འོད་ཟེར་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཉི་མའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་རིན་པོ་ཆེའི་པད་མོ་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བསོད་ནམས་སྒྲོན་མའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་འོད་ཟེར་གྱི་སྤྲིན་གྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཀུན་ཏུ་རྣམ་པར་སྣང་བའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྒྱན་དང་གདུགས་ཀྱི་དབྱངས་ཀྱི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་སྣང་བས་རྣམ་པར་གནོན་པའི་སེང་གེ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཆོས་ཀྱི༌དབྱིངས་ཀྱི་ཡུལ་གྱི་བློ་གྲོས་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སེམས་ཅན་ནམ་མཁའི་སེམས་སྣང་བའི་གཟུགས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རབ་ཏུ་ཞི་བའི་སྤོས་ཀྱི་གཙུག་བཟང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཞི་བའི་དབྱངས་ཀུན་ཏུ་བསྒྲགས་པ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཡེ་ཤེས་རབ་ཏུ་བརྟན་པའི་འོད་ཟེར་གྱི་དྲ་བའི་གཟུགས་ཀྱི་ཕུང་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་བདུད་རྩིའི་རི་བོའི་གཟི་བརྗིད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་འབྲུག་སྒྲ་སྒྲོག་པའི་དབྱངས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སངས་རྒྱས་ནམ་མཁའ་སྣང་བའི་གཙུག་ཕུད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་ཟེར་ཟླ་བ་མཛོད་སྤུའི་སྤྲིན་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་ཞལ་ཤིན་ཏུ་རྒྱས་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་ཤིན་ཏུ་རྣམ་པར་དག་པའི་མེ་ཏོག་སྣང་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་འོད༌འཕྲོ་བའི་རི་བོ་དཔལ་གྱི་གཟི་བརྗིད་རྒྱལ་པོ་ཞེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཡོན་ཏན་རྒྱ་ཆེན་པོ་གཟི་བརྗིད་ཀྱི་འོད་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཏིང་ངེ་འཛིན་གྱི་རི་རབ་མངོན་པར་འཕགས་པའི་ཡེ་ཤེས་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྐུ་འོད་འཕྲོ་བའི་དཀྱིལ་འཁོར་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་མཆོག་གི་འོད་ཀྱི་གཟི་བརྗིད་ཅེས་བྱ་བ་བསྙེན་བཀུར་ཏོ། །

དེའི་འོག་ཏུ་དེ་བཞིན་གཤེགས་པ་ཡེ་ཤེས་ཀྱི་སྤྱོད་པ་ཀུན་ཏུ་ཐོགས་པ་མེད་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་འོད་འཕྲོ་རྒྱ་མཚོའི་སྒོའི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རིན་ཆེན་ཟླ་བའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱི་གཞལ་མེད་ཁང་གི་དབྱངས་ཀྱི་རྒྱན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡོན་ཏན་མི་མཚུངས་གྲགས་པའི་རྒྱལ་མཚན་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཕྱག་རབ་ཏུ་བརྐྱང་པ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་སྔོན་གྱི་སྨོན་ལམ་གྱི་འཕྲུལ་པའི་ཟླ་བ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ནམ་མཁའི་ཡེ་ཤེས་དོན་གྱི་སྒྲོན་མ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་ཀྱིས་འཕགས་པའི་ནམ་མཁའི་དབང་ཕྱུག་ཅེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་རྣམ་པར་སྣང་མཛད་དཔལ་གྱི་སྙིང་པོའི་རྒྱལ་པོ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་མཐུ་བོ་ཆེའི་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཡེ་ཤེས་དཔལ་ཞེས་བྱ་བ་བསྙེན་བཀུར་ཏོ། །དེའི་འོག་ཏུ་དེ་བཞིན་གཤེགས་པ་ཆོས་རྒྱ་མཚོའི་པད་མོ་ཞེས་བྱ་བ་བསྙེན་བཀུར་ཏོ། །

རིགས་ཀྱི་བུ་དེ་ལྟར་དེ་བཞིན་གཤེགས་པ་དེ་དག་ལ་སོགས་པ་འཇིག་རྟེན་གྱི་ཁམས་དེར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་བྱུང་སྟེ། དེ་དག་ཐམས་ཅད་ཁོ་མོ་ཅག་གིས་ན་བཟའ་དང་། བཤོས་དང་། གཟིམས་ཆ་དང་། སྙུན་གྱི་རྐྱེན་སྨན་དང་། ཡོ་བྱད་ཀྱིས་བསྙེན་བཀུར་ཏོ། །རིམ་གྲོར་བྱས་སོ། །བསྟི་སྟང་དུ་བྱས་སོ། །ཕུ་དུད་དུ་བྱས་སོ། །མཆོད་དོ། །རིགས་ཀྱི་བུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་པོ་དེ་དག་ཐམས་ཅད་ཀྱི་ཐ་མར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་གཟི་བརྗིད་ཅེས་བྱ་བ་བྱུང་སྟེ། བཅོམ་ལྡན་འདས་དེ་གྲོང་ཁྱེར་དུ་གཤེགས་པ་ལ་ཁོ་མོ་རྒྱལ་པོའི་ཆུང་མར་གྱུར་ཏེ། ཁྱིམ་ཐབ་དང་བཅས་པས་དེ་བཞིན་གཤེགས་པའི༌མཆོད་པ་མཆོད་པའི་སྒོ་རྣམ་པ་ཐམས་ཅད་དུ་བཤམས་པས་མཆོད་པ་བྱས་ནས་བཅོམ་ལྡན་འདས་དེ་ལས་ཆོས་ཀྱི་རྣམ་གྲངས་དེ་བཞིན་གཤེགས་པ་ཐམས་ཅད་སྐྱེ་བ་འབྱུང་བའི་སྒྲོན་མ་ཞེས་བྱ་བ་ཐོས་སོ། །

དེ་ཐོས་ནས་ཁོ་མོས་ཡེ་ཤེས་ཀྱི་མིག་རབ་ཏུ་ཐོབ་སྟེ། བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་ཡང་རབ་ཏུ་ཐོབ་པར་གྱུར་ཏེ། རིགས་ཀྱི་བུ་དེ་ལྟར་ཁོ་མོ་རྣམ་པར་ཐར་པ་འདི་ལ་སྒོམ་ཞིང་བྱང་ཆུབ་སེམས་དཔའ་དང་ལྷན་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱོད་ཅིང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྒྱུ་རྒྱུ་སྟེ། སངས་རྒྱས་ཀྱི་ཞིང་དེ་སྙེད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་དེ་དག་ལ་དེ་བཞིན་གཤེགས་པ་མཐའ་དང་དབུས་མེད་པ་ཞིག་བསྙེན་བཀུར་ནས། བསྐལ་པ་ལ་ལ་ལ་ནི་དེ་བཞིན་གཤེགས་པ་བསྐལ་པར་བཞུགས་པ་གཅིག་ཀྱང་བསྙེན་བཀུར་ཏོ། །

བསྐལ་པ་ལ་ལ་ལ་ནི་དེ་བཞིན་གཤེགས་པ་གཉིས་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་བརྗོད་དུ་མེད་པའི་བར་དག་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་བསྙེན་བཀུར་ཏེ། དེ་སྲིད་དུ་ཁོ་མོས་བྱང་ཆུབ་སེམས་དཔའི་སྐུ་ཡང་ཚད་ནི་ཇི་ཙམ་ཞིག །དབྱིབས་ནི་ཇི་ལྟ་བུ་ཞིག །སྐུ་མདོག་ནི་ཅི་འདྲ་བ་ཞིག་ཡིན་པ་ཁོང་དུ་མ་ཆུད་དོ། །སྐུའི་ཕྲིན་ལས་ཀྱང་ཁོང་དུ་མ་ཆུད། གསུང་གི་ཕྲིན་ལས་དང་ཐུགས་ཀྱི་ཕྲིན་ལས་ཀྱང་ཁོང་དུ་མ་ཆུད་དོ། །ཡེ་ཤེས་ཀྱི་གཟིགས་པ་དང་། ཡེ་ཤེས་ཀྱི་སྤྱོད་ཡུལ་དང་། ཡེ་ཤེས་ཀྱི་ཏིང་ངེ་འཛིན་གྱི་ཡུལ་ཡང་ཁོང་དུ་མ་ཆུད་དོ། །རིགས་ཀྱི་བུ་བྱང་ཆུབ་སེམས་དཔའ་ཇི་སྙེད་ཅིག་གིས་བྱང་ཆུབ་སེམས་དཔའི་སྤྱོད་པ་མཛད་པ་མཐོང་ནས། བྱང་ཆུབ་སེམས་དཔའ་ལ་དགའ་བའི་སེམས༌སྐྱེས་ཏེ། བརྡ་སྣ་ཚོགས་དང་བསྙེན་པ་སྣ་ཚོགས་ཀྱིས་མོས་པ་བསྐྱེད་པར་གྱུར་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་འཇིག་རྟེན་དང་འཇིག་རྟེན་ལས་འདས་པའི་ཐབས་སྣ་ཚོགས་ཀྱིས་ཡོངས་སུ་བཟུང་སྟེ། བྱང་ཆུབ་སེམས་དཔའི་འཁོར་དུ་གྱུར་ཏོ། །དེ་དག་ཀྱང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཁོར་དུ་འགྲོགས་འགྲོགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །

རིགས་ཀྱི་བུ་དེ་ལྟར་ཁོ་མོས་དེ་བཞིན་གཤེགས་པ་ཆོས་རྒྱ་ཆེན་པོ་ལ་མོས་པ་ཡང་དག་པར་འབྱུང་བའི་གཟི་བརྗིད་ཀྱི་ཞལ་མཐོང་མ་ཐག་ཏུ་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ལ་རྣམ་པར་ལྟ་བའི་ཡུལ་འདི་ཐོབ་ནས། རྣམ་པར་ཐར་པ་འདི༌སྒོམ་ཞིང་བྱང་ཆུབ་སེམས་དཔའ་དང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་འགྲོགས་འགྲོགས་ཏེ། བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་དེ་བཞིན་གཤེགས་པ་ཇི་སྙེད་ཅིག་བྱུང་བར་གྱུར་པ་དེ་དག་ཐམས་ཅད་ཀྱང་ཁོ་མོས་བསྙེན་བཀུར་ཏོ། །མཆོད་དོ་རིམ་གྲོར་བྱས་སོ། །དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཁོ་མོས་ཆོས་བསྟན་པ༌ཐོས་ཏེ། ཡོངས་སུ་བླངས་སོ། །ཡང་དག་པར་གཟུང་ངོ་། །སངས་རྒྱས་བཅོམ་ལྡན་འདས་དེ་དག་ཐམས་ཅད་ལས་ཀྱང་ཁོ་མོས་རྣམ་པར་ཐར་པ་འདི་ཚུལ་སྣ་ཚོགས་དང་། མདོ་སྡེའི་ཚུལ་གྱི་གསུང་སྣ་ཚོགས་དང་། རྣམ་པར་ཐར་པའི་རང་བཞིན་སྣ་ཚོགས་དང་། རྣམ་པར་ཐར་པའི་སྒོ་སྣ་ཚོགས་དང་། རྣམ་པར་ཐར་པའི་རྒྱུད་སྣ་ཚོགས་དང་། དུས་ལ་འཇུག་པ་སྣ་ཚོགས་དང་། ཞིང་རྒྱ་མཚོ་ལ་འཇུག་པ་སྣ་ཚོགས་དང་། སངས་རྒྱས་བལྟ་བ་རྒྱ་མཚོ་རྣམ་པར་དམིགས་པར་བྱ་བ་སྣ་ཚོགས་དང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་འཇུག་པ་སྣ་ཚོགས་དང་། བྱང་ཆུབ་སེམས་དཔའི་སྨོན་ལམ་རྒྱ་མཚོའི་ཚུལ་གྱི་ལམ་སྣ་ཚོགས་དང་། བྱང་ཆུབ་སེམས་དཔའི་སྤྱོད་པ་མངོན་པར་བསྒྲུབ་པ་སྣ་ཚོགས་དང་། བྱང་ཆུབ་སེམས་དཔའི་རྣམ་པར་ཐར་པ་འབྱམས་ཀླས་པ་སྣ་ཚོགས་ཀྱིས་ཐོབ་པར་གྱུར་ཀྱང་། བྱང་ཆུབ་སེམས་དཔའི་རྣམ་པར་ཐར་པ་ཀུན་ཏུ་བཟང་པོའི་ཚུལ་ནི་ཁོང་དུ་མ་ཆུད་དོ། །

དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་ནི་ནམ་མཁའི་དབྱིངས་ཀྱིས་ཀླས་པར་ཚད་མེད་དོ། །སེམས་ཅན་གྱི་མིང་དུ་བྱ་བ་ཐམས་ཅད་ཀྱི་དབྱིངས་ལྟར་ཚད་མེད་དོ། །དུས་གསུམ་གྱི་རྒྱུད་རྒྱ་མཚོའི་དབྱིངས་ལྟར་ཚད་མེད་དོ། །ཕྱོགས་རྒྱ་མཚོའི་དབྱིངས་ལྟར་ཚད་མེད་དོ། །ཆོས་ཀྱི་དབྱིངས་ཀྱི་ཚུལ་རྒྱ་མཚོའི་དབྱིངས་ལྟར་ཚད་མེད་དོ། །རིགས་ཀྱི་བུ་བྱང་ཆུབ་སེམས་དཔའ་ཀུན་ཏུ་བཟང་པོ་རྣམས་ཀྱི་རྣམ་པར་ཐར་པའི་ཚུལ་གྱི་ལུས་ནི་དེ་བཞིན་གཤེགས་པའི་ཡུལ་དང་མཉམ་པའོ། །དེ་ལྟར་རིགས་ཀྱི་བུ་ཁོ་མོས་བསྐལ་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་བྱང་ཆུབ་སེམས་དཔའི་སྐུ་ལ་ལྟ་ལྟ་ཡང་བལྟ་བས་མ་ངོམས་ཏེ། རིགས་ཀྱི་བུ་འདི་ལྟ་སྟེ་དཔེར་ན། གཅིག་ཏུ་འདོད་ཆགས་ལ་སྤྱོད་པའི་སྐྱེས་པ་དང་བུད་མེད་ཕན་ཚུན་ནས་ཕྲད་པར་དུས་བྱས་པ་གཉིས་ལ་ནི་སེམས་ཀྱི་རྒྱུད་ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བ༌གཙང་བའི་འདུ་ཤེས་དང་། རྣམ་པར་རྟོག་པས་མྱོས་པ་ལས་བྱུང་བ་ཚད་མེད་པ་ཞིག་སྐྱེའོ། །རིགས་ཀྱི་བུ་དེ་བཞིན་དུ་ཁོ་མོ་བྱང་ཆུབ་སེམས་དཔའི་སྐུ་ལ་ལྟ་ན་བ་སྤུའི་སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཀྱི་རྒྱུད་འབྱམས་ཀླས་པ་མཐའ་དང་དབུས༌མེད་པ་ཚད་མེད་པར་ཤིན་ཏུ་བསྟན་པ་གཞི་སྣ་ཚོགས་དང་ལྡན་པ། མཚམས་ཀྱི་རྒྱན་སྣ་ཚོགས་དང་ལྡན་པ་དབྱིབས་སྣ་ཚོགས་དང་ལྡན་པ་རིའི་རྒྱན་སྣ་ཚོགས་ཀྱིས་བརྒྱན་པ་སའི་གཞིའི་རྒྱན་སྣ་ཚོགས་བསྟན་དུ་ཡོད་པ་སྤྲིན་སྣ་ཚོགས་དང་ལྡན་པའི་ནམ་མཁའ་ཀུན་ནས་ཁྱབ་པའི་རྒྱན་དང་ལྡན་པ། ཚུལ་དང་མིང་དང་གྲངས་སྣ་ཚོགས་སུ་བརྗོད་པ་སངས་རྒྱས་འབྱུང་བ་དང་དེ་བཞིན་གཤེགས་པའི་རྒྱུད་སྣ་ཚོགས་འབྱུང་བ་སྙིང་པོ་བྱང་ཆུབ་ཀྱི་རྒྱན་སྣ་ཚོགས་ཀྱིས་བརྒྱན་པ། དེ་བཞིན་གཤེགས་པའི་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་རྒྱན་སྣ་ཚོགས་དང་ལྡན་པ། མདོ་སྡེའི་ཚུལ་སྣ་ཚོགས་ཤིན་ཏུ་བསྟན་པའི་སྒྲ་འབྱུང་བ། ཐེག་པའི་ཚུལ་སྣ་ཚོགས་མངོན་པར་བསྒྲུབ་པ་འབྱུང་བ་དང་ལྡན་པ། ཡོངས་སུ་དག་པའི་འོད་དང་སྣང་བ་སྣ་ཚོགས་ཀྱི་རབ་ཏུ་སྣང་བ་མཚན་མ༌སྔན་ཆད་མ་མཐོང་བ་དག་སེམས་ཀྱི་སྐད་ཅིག་རེ་རེ་ཞིང་མིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་སངས་རྒྱས་རྒྱ་མཚོ་མཐའ་དང་དབུས་མེད་པ་སྙིང་པོ་བྱང་ཆུབ་ཀྱི་རྒྱན་སྣ་ཚོགས་མངའ་བ་ཆོས་ཀྱི་འཁོར་ལོ་བསྐོར་བའི་རྣམ་པར་འཕྲུལ་པ་སྣ་ཚོགས་དང་ལྡན་པ་མདོ་སྡེའི་ཚུལ་སྣ་ཚོགས་སྒྲོག་པའི་རྣམ་པར་འཕྲུལ་པ་དང་ལྡན་པ་དག་ཀྱང་རྒྱུན་མི་འཆད་པའི་ཚུལ་དུ་སེམས་ཀྱི་སྐད་ཅིག་རེ་རེ་ལ་མིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་སེམས་ཅན་རྒྱ་མཚོ་མཐའ་དང་དབུས་མེད་པ་ཁྱིམ་དང་ཀུན་དགའི་ར་བ་དང་རི་དང་གཞལ་མེད་ཁང་དང་ཆུ་ཀླུང་དང་རྒྱ་མཚོ་ལ་གནས་པ་གཟུགས་དང་ལུས་སྣ་ཚོགས་ཅན་ལོངས་སྤྱོད་ཀྱི་ཡུལ་སྣ་ཚོགས་དང་ལྡན་པ། སྤྱོད་པ་དང་སྤྱོད་ཡུལ་དང་སྦྱོར་བ་སྣ་ཚོགས་དང་ལྡན་པ། དབང་པོ་སྣ་ཚོགས་སུ་བསྒྲུབ་པའི་ཚུལ་དང་ལྡན་པ་དག་ཀྱང་སེམས་ཀྱི་སྐད་ཅིག་རེ་རེ་ལ་མིག་ལམ་དུ་སྣང་ངོ་། །བ་སྤུའི་སྒོ་རེ་རེ་ནས་ཀྱང་དུས་གསུམ་རྒྱ་མཚོ་ལ་འཇུག་པའི་ཚུལ་མཐའ་དང་དབུས་མེད་པ་ཞིག་མིག་ལམ་དུ་སྣང་ངོ་། །

བྱང་ཆུབ་སེམས་དཔའི་སྨོན་ལམ་རྒྱ་མཚོ་མཐའ་དང་དབུས་མེད་པ་ཞིག་ནི་རྣམ་པར་དག་པར་འགྱུར་རོ། །བྱང་ཆུབ་སེམས་དཔའི་སའི་སྤྱོད་པ་རྣམ་པ་ཐ་དད་པ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །བྱང་ཆུབ་སེམས་དཔའི་ཕ་རོལ་ཏུ་ཕྱིན་པའི་ཚུལ་རྒྱ་མཚོ་ཡོངས་སུ་དག་པ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །བྱང་ཆུབ་སེམས་དཔའི་སྔོན་གྱི་སྦྱོར་བ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །བྱང་ཆུབ་སེམས་དཔའི་བྱམས་པ་ཆེན་པོའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་སྣང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་གདུལ་བའི་མཐུ་དང་ཐབས་རྒྱ་མཚོ་དག་ལའང་འཇུག་ཅིང་ཁོང་དུ་ཆུད་དོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་སྤྲིན་གྱི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་ཡོངས་སུ་འགྲུབ་བོ། །བྱང་ཆུབ་སེམས་དཔའི་དགའ་བའི་ཤུགས་ཆེན་པོ་རྒྱ་མཚོ་མཐའ་དང་དབུས་མེད་པ་དག་ཀྱང་རྣམ་པར་འཕེལ་ཏེ། སེམས་ཀྱི་སྐད་ཅིག་རེ་རེ་ལ་ཡང་སེམས་ཅན་ཐམས་ཅད་ཡོངས་སུ་བསྡུ་བའི་ཚུལ་རྒྱ་མཚོ་མཐའ་དང་དབུས་མེད་པ་དག་ཀྱང་རབ་ཏུ་འགྲུབ་བོ། །རིགས་ཀྱི་བུ་དེ་ལྟར་ཁོ་མོ་བསྐལ་པ་སངས་རྒྱས་ཀྱི་ཞིང་བརྒྱའི་རྡུལ་ཤིན་ཏུ་ཕྲ་བ་སྙེད་དག་ཏུ་བྱང་ཆུབ་སེམས་དཔའ་བ་སྤུའི་སྒོ་རེ་རེ་ཞིང་སེམས་ཀྱི་སྐད་ཅིག་རེ་རེ་ལ་ཆོས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཞུགས་ཏེ། ཁོང་དུ་ཆུད་པར་བྱས་ཀྱང་མཐར་ཐུག་པར་མ་གྱུར་ཏེ་སྔོན་ཁོང་དུ་ཆུད་པ་ལ་བཟླས་ཏེ། ཁོང་དུ་ཆུད་པར་བྱས་པའང་མེད་དོ་སྔོན༌ཐོས་པ་ལ་བཟླས་ཏེ། ཐོས་པར་བྱ་བའང་མེད་དོ། །

རིགས་ཀྱི་བུ༌དེ་ལྟར་དོན་ཐམས་ཅད་གྲུབ༌པ་བཙུན་མོའི་འཁོར་གྱི་ནང་ན་བཞུགས་ཤིང་བུད་མེད་ཀྱི་ཚོགས་ཀྱིས་ཡོངས་སུ་བསྐོར་བར་བཞུགས་པའི་ཚེའང་ཁོ་མོ་ནི་བ་སྤུའི་སྒོ་རེ་རེ་ནས་ཀྱང་དུས་གསུམ་གྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཆོས་ཀྱི་དབྱིངས་ལ་འཇུག་པའི་ཚུལ་རྒྱ་མཚོ་ཁོང་དུ་ཆུད་པར་བྱ་བས་ཡོངས་སུ་འཇུག་གོ །

རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་ཤེས་ཏེ། མཉམ་པར་གཞོག་པར་ཟད་ན་ཁོ་མོས་བྱང་ཆུབ་སེམས་དཔའ་ཐབས་ཀྱི་ཚུལ་རྒྱ་མཚོ་མཐའ་དང་དབུས་མེད་པ་ལ་ཞུགས་པ་སེམས་ཅན་ཐམས་ཅད་དང་མཉམ་ཞིང་འདྲ་བའི་དབྱིངས་སུ་གནས་པའི་ལུས་རྣམ་པར་དམིགས་པ་ཡོངས་སུ་སྟོན་པ་འགྲོ་བ་ཐམས་ཅད་ཀྱི་བསམ་པ་དང་མཐུན་པར་སྤྱོད་པ་ཡོངས་སུ་སྟོན་པ། བ་སྤུའི་སྒོ་ཐམས་ཅད་ནས་ཁ་དོག་མཐའ་ཡས་པའི་སྤྲུལ༌པའི་སྤྲིན་རབ་ཏུ་འགྱེད་པ་ལུས་མེད་པའི་ཆོས་ཉིད་ཀྱི་ངོ་བོ་ཉིད་ཀྱི་རང་བཞིན་ཤིན་ཏུ་རྣམ་པར་དག་པ་ནམ་མཁའི་མཚན་ཉིད་དུ་འགྲོ་བའི་རང་བཞིན་ཁོང་དུ་ཆུད་པས་རྣམ་པར་རྟོག་པ་མེད་པ་ཐམས་ཅད་དུ་རྗེས་སུ་སོང་བའི་བློ་རྣམ་པར་གདོན་མི་ཟ་བས། དེ་བཞིན་གཤེགས་པ་དང་མཉམ་པ་རྣམ་པར་འཕྲུལ་པ་ལ་བརྩོན་པ་རྣམ་པར་ཐར་པའི་ཡུལ་མཐའ་དང་དབུས་མེད་པས་རྣམ་པར་འཕྲུལ་པ་ལ་ཞུགས་པ་ཆོས་ཀྱི་དབྱིངས་ཤིན་ཏུ་རྒྱ་ཆེན་པོར་སེམས་བསྐྱེད་པས་འཇུག་པ་ལ་རྣམ་པར་སྤྱོད་ཅིང་དབང་བསྒྱུར་བ་ཆོས་ཀྱི་གནས་སྒོ་ཐམས་ཅད་དང་ལྡན་པའི་རྣམ་པར་ཐར་པ་རྒྱ་མཚོ་ལ་རྣམ་པར་རྩེ་བ་དེ་དག་གི་སྤྱོད་པ་ཤེས་པའམ་ཡོན་ཏན་གྱི་གཏེར་མ་ལུས་པར་བསྟན་པར་ནུས་རེ་སྐན།

སོང་རིགས་ཀྱི་བུ་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་འདི་ཉིད་ན་ཁྲི་རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ་ནོར་བུ་རིན་པོ་ཆེའི་རྒྱལ་པོའི་པད་མོའི་སྙིང་པོ་ཅན་ལ་བྱང་ཆུབ་སེམས་དཔའི་ཡུམ་ལྷ་མོ་སྒྱུ་མ་ཞེས་བྱ་བ་འདུག་གིས་དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔའི་སྤྱད་པ་ལ་སྤྱོད་པའི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཆོས་ཀྱི་དྲི་མ་ཐམས་ཅད་ཀྱིས་མི་གོས་པ་ཡིན་པ་དང་། དེ་བཞིན་གཤེགས་པ་མཆོད་པའི་ནན་ཏན་ལ་རྒྱུན་མི་ཆད་པ་ཡིན་པ་དང་བྱང་ཆུབ་སེམས་དཔའི་ལས་ཀྱི་མཐའ་ཐམས་ཅད་ལས་ཕྱིར་མི་ལྡོག་པ་ཡིན་པ་དང་། བྱང་ཆུབ་སེམས་དཔའི་རྣམ་པར་ཐར་པ་ལ་འཇུག་པ་ལ་སྒྲིབ་པ་ཐམས་ཅད་དང་བྲལ་བར་འགྱུར་བ་ཡིན་པ་དང་བྱང་ཆུབ་སེམས་དཔའི་རྣམ་པར་སྤྱོད་པ་ཐམས་ཅད་ལ་གཞན་གྱི་དྲིང་མི་འཇོག་པ་ཡིན་པ་དང་། དེ་བཞིན་གཤེགས་པ་ཐམས་ཅད་དང་མངོན་དུ་གྱུར་པར་གནས་པ་ཡིན་པ་དང་། སེམས་ཅན་ཐམས་ཅད་ཡོངས་སུ་བསྡུ་བའི་ནན་ཏན་ལས་ཕྱིར་མི་ལྡོག་པ་ཡིན་པ་དང་། ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་གནས་པར་བྱ་བ་ལས་ཕྱིར་མི་ལྡོག་པ་ཡིན་པ་དང་། ཐེག་པ་ཆེན་པོའི་སྨོན་ལམ་ལས་ཕྱིར་མི་ཟློགས་པ་ཡིན་པ་དང་འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་གཟུང་བ་དང་རྣམ་པར་སྤེལ་བ་ལ་སྒྱིད་ལུག་པར་མི་འགྱུར་བ་ཡིན་པ་དྲིས་ཤིག །དེ་ནས་ཤཱཀྱའི་བུ་མོ་གོ་བས་རྣམ་པར་ཐར་པའི་སྒོའི་ཚུལ་འདི་ཉིད་ཡོངས་སུ་བསྟན་པའི་ཕྱིར་སངས་རྒྱས་ཀྱི་བྱིན༌གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །

ཡང་དག་བྱང་ཆུབ་སྤྱོད་ལ༌བརྩོན་པ་ཡི། །སེམས་ཅན་དམ་པ་སེམས་ཅན་སུས་མཐོང་བ། །མོས་པའི་སེམས་སམ་ཁོང་ཁྲོ་ལྡན་ཡང༌རུང་། །དེ་ཡི་བསྡུ་བས་ཀུན་ཀྱང་ཡོངས་སུ་འདུ། །ཞིང་བརྒྱའི་རྡུལ་ཕྲན་རབ་ཏུ་ཕྲ་སྙེད་ཀྱི། །བསྐལ་པ་མང་པོ་ཁོ་མོས་འདི་ནས་དྲན། །དེ་ཡི་ཕ་རོལ་བསྐལ་པ་རྣམ་བརྒྱན་ལ། །འཇིག་རྟེན་ཁམས་རབ་རི་བོའི་འོད་བྱུང་ངོ་། །དེ་ལ་ཐུབ་པ་སྟོང་ཕྲག་འགྲངས་པ་ནི། །བྱེ་བ་ཁྲག་ཁྲིག་སུམ་ཅུ་དྲུག་བྱུང་སྟེ། །དེ་ཀུན་ཐ་མར་ཐུབ་དབང་བྱུང་བ་ནི། །འགྲོ་བའི་སྒྲོན་མ་ཆོས་ཀྱི་རྒྱལ་མཚན་ནོ། །དེ་ཚེ་རྒྱལ་པོ་དཔལ་གྱི་གཟི་བརྗིད་བྱུང་། །ཐུབ་དབང་དེ་ནི་མྱ་ངན་ཡོངས་འདས་ནས། །དགྲ་ཡི་འཁོར་བཅོམ་འཛམ་བུའི་རྒྱལ་མཚན་འདིར། །བཀའ་ལ་ཐོགས་མེད་མངའ་བདག་དམ་པར་གྱུར། །དེ་ལ་བུ་ནི་བརྒྱ་ཕྲག་ལྔ་ཡོད་དེ། །ཀུན་ཀྱང་དཔའ་ཞིང་བརྟུལ་ཕོད་གཟུགས་དང་ལྡན། །ཡན་ལག་ཀུན་རྫོགས་རྣམ་པར་དག་པའི་ལུས། །གོང་ན་མེད་པའི་དཔལ་གྱིས་རབ་ཏུ་བརྒྱན། །རྒྱལ་པོ་སྲས་བཅས་བདེ་གཤེགས་འདུན་པར་གྱུར། །རྒྱལ་བའི་མཆོད་པ་རྒྱ་ཆེན་རབ་ཀྱང་བྱས། །དེ་ནི་རྟག་ཏུ་དམ་ཆོས་ཡོངས་བཟུང་བའི། །ཆོས་ལ་མངོན་བརྩོན་རབ་ཏུ་བརྟན་པར་གྱུར། །རྒྱལ་པོ་དེ་སྲས་འོད་གཟེར་བཟང་པོ་ནི། །སེམས་ཅན་རྣམ་དག་གཞོན་ནུ་འཁྲུངས་གྱུར་པ། །ཤིན་ཏུ་བལྟ་མཛེས་ཡིད་འོང་གཟུགས་ལྡན་ཏེ། །ཡན་ལག་མཚན་རབ་སུམ་ཅུ༌གཉིས་ཀྱིས་བརྒྱན། །རྒྱལ་སྲིད་ཡོངས་སུ་སྤངས་ནས༌མི་ཡི་འཁོར། །བྱེ་བ་ལྔས་བསྐོར་དེ་ཚེ་རབ་ཏུ་བྱུང་། །རབ་ཏུ་བྱུང་ནས་བརྩོན་འགྲུས་བརྟན་ལྡན་ཏེ། །རྒྱལ་བའི་ཆོས་ཀྱང་ཡོངས་སུ་གཟུང་བར་གྱུར། །ཕོ་བྲང་དམ་པ་སྡོང་པོ་ལྡན་པ་ནི། །གྲོང་མཆོག་བྱེ་བ་སྟོང་གིས་ཀུན་ནས་བསྐོར། །ནགས་ཚལ་ཡལ་ག་སྣ་ཚོགས་དེར་བྱུང་བ། །རབ་ཏུ་སྒྲ་ཞི་བླ་ན་མེད་པའི་དཔལ། །དེ་ན་འོད་བཟང་བརྟུལ་ཞུགས་རབ་ལྡན་པ། །འཇིགས་མེད་ཤེས་རབ་སྤོབས་དང་ལྡན་པ་བཞུགས། །དེས་ནི་སེམས་ཅན་ཉོན་མོངས་སྦྱངས་པའི་ཕྱིར། །རྒྱལ་བའི་ཆོས་ཀྱང་ཡོངས་སུ་བསྟན་པ་མཛད། །ཤེས་རབ་ལྡན་པ་དེ་ནི་བསོད་སྙོམས་ལ། །སྤྱོད་ལམ་མཛེས་ཤིང་ཆ་བྱད་ཞི་བ་དང་། །མི་གཡེང་སྤྱན་གྱིས་དགོངས་པ་མཁྱེན་བཞིན་དུ། །ཚུལ་ཟབ༌བརྟན་པར་བཞུད་པས་གྲོང་དུ་བྱོན། །གྲོང་མཆོག་དགའ་བའི་རྒྱལ་མཚན་ཞེས་བྱ་བར། །ཚོང་དཔོན་ལེགས་པ་སྙན་གྲགས་དེར་བྱུང་སྟེ། །ཁོ་མོ༌དེ་ཡི་བུ་མོ་ཡིད་འོང་གྱུར། །གཟུགས་མཛེས་ལྡན་ཏེ་ཉི་མའི་འོད་ཅེས་བྱ། །ཁྱིམ་གྱི་དམ་པ༌དེ་ཡི་སྒོ་ནས་སུ། །འོད་ཟེར་བཟང་པོ་འཁོར་བཅས་ཁོ་མོས་མཐོང་། །ཡན་ལག་མཚན་བརྒྱན་ཤིན་ཏུ་མཛེས་པ་སྟེ། །དེ་ལ་ཁོ་མོ་མོས་པ་མཆོག་ཅིག་སྐྱེས། །དེ་ནི་ཁོ་མོའི་ཁྱིམ་གྱི་སྒོར་བྱོན་ནས། །ནོར་བུ༌དེ་ཡི་ལྷུང་བཟེད་ནང་དུ་གསོལ། །རྒྱན་རྣམས་ཀུན་ཀྱང་བཀྲོལ་ཏེ་མོས་སེམས་ཀྱིས། །ཤིན་ཏུ་འདུན་པར་དེ་ལ་བདག་གིས་ཕུལ། །བདེ་གཤེགས་སྲས་པོ་འོད་ཟེར་བཟང་དཔལ་ལ། །འདོད་ཆགས་སེམས་ཀྱིས་མཆོད་པ༌རྣམས་བསྒྲུབས་པས། །བསྐལ་པའི་དམ་པ་ཉིས་བརྒྱ་ལྔ་བཅུར་ཡང་། །ངན་སོང་གང་དུའང་སོང་བར་མ་གྱུར་ཏོ། །ལྷ་ཡི་ཡུལ་དུ་ལྷ་རིགས་ལྡན་པར་སྐྱེས། །མི་ཡི་ཡུལ་དུ་རྒྱལ་པོའི་སྲས་མོར་གྱུར། །ཁ་དོག་མཐའ་ཡས༌སྐུ་ཡི་མདོག་མངའ་བས། །ཀུན་ཏུ་ཁོ་མོ་མངོན་པར་ཞལ་ཡང་བསྟན། །བསྐལ་པ་ཉིས་བརྒྱ་ལྔ་བཅུ་འདས་གྱུར་ནས། །སྦྲུལ་འཚོང་གཙོ་མོ་བལྟ་ན་སྡུག་པ་སྟེ། །མི་འཇིགས་བྱེད་པའི་བུ་མོར་སྐྱེས་པར་གྱུར། །དེ་ཚེ་ཤིན་ཏུ་སྦྱངས་ཞེས་བྱ་བ་ཡིན། །རྒྱལ་བུ་གཟི་བརྗིད་འོད་ཀྱི་བདག་མཐོང་ནས། །ཁོ་མོས་དེ་ལ་དགའ་བས་མཆོད་པ་བྱས། །བདག་ཉིད་དེ་ལ་ཡོངས་སུ་དབུལ་བྱས་ནས། །ཁོ་མོ༌དེ་ཡི་དབང་གྱུར་ཆུང་མར་གྱུར། །དྲང་སྲོང་ཆེན་པོའི་སྐུ་མཆོག་ཉི་མ་ལའང་། །བདག་ཅག་བསྡོམས་ཏེ་ལེགས་པར་མཆོད་པ་བྱས། །མོས་པས་སངས་རྒྱས༌དེ་ཡི་ཞལ་བལྟས་ནས། །བདག་གིས་བྱང་ཆུབ་མཆོག་ཏུ་སེམས་ཀྱང་བསྐྱེད། །རྒྱལ་བ་བྱེ་བ་དྲུག་ཅུ་ཚང་བ་ཡང་། །བསྐལ་པ་དེ་ལ་ཁོ་མོས་རིམ་གྲོ་བྱས། །རྒྱལ་བ་དེ་དག་ཐ་མའི་དུས་ཀྱི་ཚེ། །སངས་རྒྱས་མོས་པའི་གཟི་བརྗིད་བྱུང་བར་གྱུར། །དེར་ནི་ཁོ་མོའི་ཆོས་མིག་རྣམ་པར་དག །ཆོས་ཀྱི་རང་བཞིན་བདག་གིས་ཁོང་དུ་ཆུད། །ཚུལ་མིན་རྣམ་རྟོག་རབ་ཏུ་ཞི་བར་གྱུར། །དེ་ཚེ་ཚུན་ཆད་ཁོ་མོས་སྣང་བ་ཐོབ། །རྒྱལ་སྲས་རྣམས་ཀྱི་ཏིང་ངེ་འཛིན་གྱི་ཡང་། །དེ་ཕྱི་ཚུན་ཆད་རྣམ་པར་མཐོང་བར་གྱུར། །སེམས་ཀྱི་སྐད་ཅིག་གཅིག་གིས་རྒྱ་མཚོའི་ཞིང་། །བསམ་ལས་རྣམ་འདས་ཕྱོགས་སུ་ཁོ་མོ་འཇུག །ཕྱོགས་རྣམས་ཀུན་གྱི་སྣ་ཚོགས་རྣམ་དག་པའི། །ཞིང་རྣམས་ཚད་མེད་རྨད་མཐོང་ཁོ་མོས་མཐོང་། །མཐོང་ཡང་དེ་དག་ལ་ནི་ཆགས་པ་མེད། །ཉོན་མོངས་བཅས་ལའང་ཁོང་ཁྲོ་སྡང་བ་མེད། །ཞིང་རྣམས་དེ་དག་མ་ལུས་ཐམས་ཅད་ཀྱི། །སྙིང་པོ་བྱང་ཆུབ་སངས་རྒྱས་མ་ལུས་མཐོང་། །དེ་དག་འོད་ཀྱི་རྒྱ་མཚོ་ཚད་མེད་པའང་། །སེམས་ཀྱི་སྐད་ཅིག་གཅིག་གིས་རྣམ་པར་བལྟ། །དེ་དག་འཁོར་གྱི་དཀྱིལ་འཁོར་རྒྱ་མཚོ་ཡང་། །སེམས་ཅིག་ཐོགས་པ་མེད་པས་ཁོང་དུ་ཆུད། །རྣམ་པར་ཐར་པ་ཚད་མེད་ཐམས་ཅད་དང་། །དེ་དག་ཏིང་འཛིན་མ་ལུས་དེ་བཞིན་ཤེས། །དེ་དག་སྤྱོད་པ་ཡངས་པའང་ཁོང་དུ་ཆུད། །ས་ཚུལ་མ་ལུས་ཀུན་ཀྱང་ཁོ་མོས་ཤེས། །སྨོན་ལམ་གྲངས་མེད་རྒྱ་མཚོ་ཆེན་པོ་ཡང་། །སྐད་ཅིག་རེ་རེས་མཐའ་ཡས་ཁོང་དུ་ཆུད། །བསྐལ་པ་མཐའ་ཡས་སྤྱད་པ་སྤྱོད་བྱེད་ཅིང་། །སྐྱེས་བུ་དམ་པའི་སྐུ་ལ་ལྟ་ལྟ་སྟེ། །དེ་ཡི་བ་སྤུ༌རྣམ་པར་འཕྲུལ་པ་ཡང་། །ནམ་ཡང་མུར་ཕྱིན་བདག་གིས་མ་ནུས་སོ། །དེ་ཡི་བ་སྤུ་གཅིག་གི་རྩེ་ལ་ཡང་། །ཞིང་མང་རྒྱ་མཚོ་གྲངས་ལས་འདས་པ་མཐོང་། །རླུང་གི་ཕུང་པོ་ཆུ་བོ་ཆེན་པོ་དང་། །ས་ཡི་ལྷུན་རྣམས་མེ་ཡིས་ཡོངས་གང་མཐོང་། །གཞི་རྣམས་སྣ་ཚོགས་རྣམ་ཕྱེའི་གཟུགས་ལྡན་ཞིང་། །དབྱིབས་ཚུལ་སྣ་ཚོགས་ཁོང་དུ་ཆུད་བྱ་བ། །དབྱིབས་དང་ལུས་ཀྱི་རྣམ་པས་སྣ་ཚོགས་ཤིང་། །ལུས་དང་རྣམ་པ་མཐའ་ཡས་གཟུགས་ལྡན་པའི། །བརྗོད་ཡས་ཁམས་རྣམས་ཞིང་རྣམས་རྒྱ་མཚོ་དག །ཚད་མེད་རྣམས་སུ་ཐ་དད་གསལ་བར་མཐོང་། །ཆོས་ཀྱི་གསུང་གིས་འགྲོ་བ་གདུལ་དོན་དུ། །བརྩོན་པའི་རྒྱལ་བ་དེ་ཉིད་བཞུགས་པ་མཐོང་། །བསྐལ་པར་སྤྱོད་པ་ཡངས་པ་སྤྱོད་པའི་ཚེ། །སྐུ་ཡི་ཕྲིན་ལས་ཁོ་མོས་དེ་མ་ཤེས། །གསུང་དང་ཐུགས་མིན་དེ་གཉིས་ཕྲིན་ལས་མིན། །རྫུ་འཕྲུལ༌རྣམ་འཕྲུལ་ཐ་དད་ཚུལ་མ་ཤེས། །

དེ་ནས་ཚོང་དཔོན་གྱི་བུ་ནོར་བཟང་གིས་ཤཱཀྱའི་བུ་མོ་གོ་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཤཱཀྱའི་བུ་མོ་གོ་པ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས༌ཏེ། ཤཱཀྱའི་བུ་མོ་གོ་པའི་དྲུང་ནས༌སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་ཆེན་མོ་ལྷ་མོ་སྒྱུ་མ་ཞེས་བྱ་བས་རང་གི་སྐུ་ལུས་ཀྱི་བཀོད་པ་དང་ཡོན་ཏན་གྱི་རྣམ་གྲངས་རྒྱ་ཆེར་བསྟན་ཏེ་གཞོན་ནུ་ནོར་བཟང་ལ་ཏིང་ངེ་འཛིན་གྱི་སྒོ་མོ་དཔག་ཏུ་མེད་པ་བརྙེས་པའི་ཚུལ་སོགས། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་ལྷ་མོ་སྒྱུ་མའི་གན་དུ་འགྲོ་བར་མངོན་དུ་བལྟས་ནས། སངས་རྒྱས་ཀྱི་སྤྱོད་ཡུལ་གྱི་རྒྱུད་ཀྱི་ཡེ་ཤེས་ལ་ཞུགས་པ་དེས་འདི་སྙམ་དུ༌བསམས་སོ། །བདག་གི་དགེ་བའི་བཤེས་གཉེན་འཇིག་རྟེན་ཐམས་ཅད་ལས་གྱེན་དུ་འཕགས་པའི་སྐྱེ་མཆེད་དྲུག་དང་ལྡན་པ། གནས་མེད་པ་ལ་རབ་ཏུ་གནས་པ། ཆགས་པ་ཐམས་ཅད་ལས་ཡང་དག་པར་འདས་པའི་ལུས་དང་ལྡན་པ། ཆགས་པ་མེད་པར་འགྲོ་བའི་ལམ་དུ་ཞུགས་པ་ཆོས་ཀྱི་ལུས་ཤིན་ཏུ་རྣམ་པར་དག་པ། ལུས་ཀྱི་ལས་སྒྱུ་མས་ལེགས་པར་སྤྲུལ་པའི་ལུས་དང་ལྡན་པ། ཡེ་ཤེས་སྒྱུ་མའི་རྣམ་པས་འཇིག་རྟེན་ན་རྣམ་པར༌སྤྱོད་པ། སྨོན་ལམ་སྒྱུ་མའི་གཟུགས་དང་ལུས་སུ་ལྡན་པ། སངས་རྒྱས་ཀྱི་བྱིན༌གྱིས་རླབས་ཡིད་ཀྱི་རང་བཞིན་གྱི་ལུས་དང་ལྡན་པ། མ་སྐྱེས་མ་འགགས་པའི་ལུས་དང་ལྡན་པ། འོངས་པ་མེད་པའི་ལུས་དང་ལྡན་པ། བདེན་པ་མེད་པ་དང་། རྫུན་པ་མེད་པའི་ལུས་དང་ལྡན་པ། མ་འཕོས་མ་ཞིག་པའི་ལུས་དང་ལྡན་པ། མ་བྱུང༌མི་འཇིག་པའི་ལུས་དང་ལྡན་པ། མཚན་ཉིད་མེད་པར་མཚན་ཉིད་གཅིག་པའི་ལུས་དང་ལྡན་པ། གཉིས་ལ་ཆགས་པ་དང་བྲལ་བའི་ལུས་དང་ལྡན་པ། ཀུན་གཞི་མེད་པ་ལ་གནས་པའི་ལུས་དང་ལྡན་པ། མི་ཟད་ཅིང་ཉམས་པ་མེད་པའི་ལུས་དང་ལྡན་པ། གཟུགས་བརྙན་ལྟར་རྣམ་པར་རྟོག་པ་མེད་པའི་ལུས་དང་ལྡན་པ། རྨི་ལམ་དང་མཉམ་པར་རྣམ་པར་རྒྱུ་བའི་ལུས་དང་ལྡན་པ་མེ་ལོང་གི་དཀྱིལ་འཁོར་ལྟར་འཕོ་བ་མེད་པའི་ལུས་དང་ལྡན་པ། །ཕྱོགས་མེད་པ་ལྟར་རབ་ཏུ་ཞི་བར་ཁོང་དུ་ཆུད་པའི་ལུས་དང་ལྡན་པ། ཕྱོགས་ཀུན་ཏུ་རྒྱས་པར་འགེངས་པའི་ལུས་དང་ལྡན་པ། དུས་གསུམ་དུ་ཐ་མི་དད་པའི་ལུས་དང་ལྡན་པ། ལུས་མེད་པའི་སེམས་ཀྱི་ལུས་རྣམ་པར་མི་རྟོག་པའི་ལུས་དང་ལྡན་པ། འཇིག་རྟེན་ཐམས་ཅད་ཀྱི་མིག་གི་ལམ་ལས་ཡོངས་སུ་འདས་པའི་ལུས་དང་ལྡན་པ། ཀུན་ཏུ་བཟང་པོའི་མིག་གི་རྒྱུད་ཀྱིས་རྣམ་པར་ཤེས་པར༌བྱ་བས་འདུལ་བའི་ལུས་དང་ལྡན་པ། ཆགས་པ་མེད་པས། ནམ་མཁའི་སྤྱོད་ཡུལ་དང་ལྡན་པ་རྣམས་མཐོང་བར་བྱ་བའམ། བསྙེན་བཀུར་བར་བྱ་བའམ། མངོན་གསུམ་དུ་འཕྲད་པར་བྱ་བའམ། འགྲོགས་པར་བྱ་བའམ། མཚན་མ་གཟུང་བར་བྱ་བའམ། དབྱངས་ཀྱི་དཀྱིལ་འཁོར་རྣམ་པར་རིག་པར༌ཤེས་པར་བྱ་བའམ། ཚིག་གི་རྒྱུད་ཡོངས་སུ་ཤེས་པར་བྱ་བའམ། གདམས་ངག་ཡོངས་སུ་གཟུང་བར་བྱ་བར་ཐབས་ཇི་ལྟ་བུ་ཞིག་ཏུ་ནུས་པར་འགྱུར་སྙམ་ནས།

དེ་ལྟར་སེམས་ཤིང་ཡིད་ལ༌བྱེད་པ་ལ་བརྩོན་པར་གནས་པའི་ཚེ། གྲོང་ཁྱེར་གྱི་ལྷ་མོ་རིན་ཆེན་མིག་ཅེས་བྱ་བ་ནམ་མཁའི་ལྷ་མོའི་ཚོགས་ཀྱིས་ཡོངས་སུ་བསྐོར་བ་ཞིག་གིས། བདག་གི་ལུས་རྒྱན་སྣ་ཚོགས་ཀྱིས༌ཡོངས་སུ་བརྒྱན་པ། བདག་གི་ལུས་རྒྱན་གྱིས་རྣམ་པར་ཀླུབས་པར་ནམ་མཁའ་ལ་འདུག་པར་ཉེ་བར་བསྟན་ནས། ལྷ་རྫས་ཀྱི་མེ་ཏོག་རྣམ་པ་དང་། ཁ་དོག་དུ་མ་ཅན་སྙིམ་པ་ནས་མངོན་པར་གཏོར་ཏེ། ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འཁོར་བའི་ཡུལ་ལ་དགའ་བར་མི་གནས་པས་སེམས་ཀྱི་གྲོང་ཁྱེར་ཡོངས་སུ་བསྲུང་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པའི་སྟོབས་བཅུ་ལ་དམིགས་པས་སེམས་ཀྱི་གྲོང་ཁྱེར་བརྒྱན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཕྲག་དོག་དང་། སེར་སྣ་དང་གཡོ་དང་བྲལ་བས་སེམས་ཀྱི་གྲོང་ཁྱེར་ཡོངས་སུ༌སྦྱང་བ་ལ་བརྩོན་པར་གྱིས་ཤིག ། རིགས་ཀྱི་བུ་ཁྱོད་ཀྱིས་ཆོས་ཐམས་ཅད་ཀྱི་རང་བཞིན་ངེས་པར་རྟོགས་པར་བྱ་བས་སེམས་ཀྱི་གྲོང་ཁྱེར་གྱི་ཡོངས་སུ་གདུང་བ་རབ་ཏུ་ཞི་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་འགྲུས་ཆེན་པོའི་ཤུགས་རྣམ་པར་སྤེལ་བས་སེམས་ཀྱི་གྲོང་ཁྱེར་རྣམ་པར་སྤེལ་བ་ལ་བརྩོན་པར་གྱིས་ཤིག །

རིགས་ཀྱི་བུ་ཁྱོད་ཀྱིས་ཏིང་ངེ་འཛིན་དང་། སྙོམས་པར་འཇུག་པ་དང་། བསམ་གཏན་དང་། རྣམ་པར་ཐར་པ་དང་། ཆོས་ཀྱི་གཞལ་མེད་ཁང་ཡངས་པའི་རྣམ་པར་སྤྱོད་པ་ལ་དབང་བསྒྱུར་བས་སེམས་ཀྱི་གྲོང་ཁྱེར་དང་། གནས་ཀྱི་མཛོད་བརྒྱན་པ་དང་། བསྲུང་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ཡང་དག་པར་བསྒྲུབས་པའི་ས་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་ཐོབ་པར༌འཚལ་བས། སེམས་ཀྱི་གྲོང་ཁྱེར་སྣང་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཡང་དག་པར་འབྱུང་བའི་ཐབས་ཀྱི་ལམ་གྱིས་རང་གི་སེམས་ཀྱི་གྲོང་ཁྱེར་དུ་གཞོལ་བར་བྱ་བས་སེམས་ཀྱི་གྲོང་ཁྱེར་ཉེ་བར་བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་མངོན་པར་བསྒྲུབ་པའི་སེམས་རྣམ་པར་དག་པས་སེམས་ཀྱི་གྲོང་ཁྱེར་གྱི་ར་བ་བརྟན་པ་མངོན་པར་བསྒྲུབ་པར་གྱིས་ཤིག ། རིགས་ཀྱི་བུ་ཁྱོད་ཀྱིས་ཉོན་མོངས་པ་དང་། བདུད་ཀྱི་རིས་ཀྱི་སྡིག་ཏོའི་གྲོགས་པོ་དང་། བདུད་ཀྱི་འཁོར་གྱིས་མི་ཆོམས་པར་བྱ་བས་སེམས་ཀྱི་གྲོང་ཁྱེར༌བརྒལ་དཀའ་བ་དང་། ཤིགས་པར་དཀའ་བ་མངོན་པར་བསྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་སྣང་བས་ཁོང་དུ་ཆུད་པར་བྱ་བའི་ཕྱིར་སེམས་ཀྱི་གྲོང་ཁྱེར་སྣང་བར་བྱ་བ་ལ་བརྩོན་པར་གྱིས་ཤིག །

རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་ཡོངས་སུ༌གཟུང་བར་སེམས་ཀྱི་གྲོང་ཁྱེར་མངོན་པར་བརླན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་བསོད་ནམས་རྒྱ་མཚོ་རང་གི་སེམས་ཀྱིས་ཡང་དག་པར༌བླང་བས་སེམས་ཀྱི་གྲོང་ཁྱེར་བརྟན་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་བྱམས་པ་ཆེན་པོས་འགྲོ་བ་ཐམས་ཅད་རྒྱས་པར་དགང་བས་སེམས་ཀྱི་གྲོང་ཁྱེར་རབ་ཏུ་རྒྱས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་མི་དགེ་བའི༌ཆོས་ཀྱི་གཉེན་པོ་ཆོས་ཀྱི་གདུགས་ཡངས་པ་བསྒྲུབ་པས་སེམས་ཀྱི་གྲོང་ཁྱེར་ཡོངས་སུ་དག་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་སྙིང་རྗེ་ཆེན་པོ་ཤིན་ཏུ་ཡངས་པས་འགྲོ་བ་ཐམས་ཅད་ཀྱི་དོན་དུ་སེམས་གཡོ་བར་བྱ་བས་སེམས་ཀྱི་གྲོང་ཁྱེར༌རབ་ཏུ་བསྐྱོད་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཕྱི་ནང་གི་དངོས་པོ་འགྲོ་བ་ཐམས་ཅད་ལ་ཡོངས་སུ་བསྟན་པའི་ཕྱིར་སེམས་ཀྱི་གྲོང་ཁྱེར་གྱི་སྒོ་དབྱེ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་འཁོར་བའི་ཡུལ་ཐམས་ཅད་ལ་དགའ་བ༌ལས་ཕྱིན་ཕྱོགས་སུ་བལྟ་བས་སེམས་ཀྱི་གྲོང་ཁྱེར་རྣམ་པར་དག་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་མི་དགེ་བའི་ཆོས་ཀྱི་རྒྱུད་ཐམས་ཅད་མི་སྲིད་པར་བྱ་བས་སེམས་ཀྱི་གྲོང་ཁྱེར་གྱི་སྲོག་རབ་ཏུ་མཁྲང་བ་མངོན་པར་བསྒྲུབ་པ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པ་ཉིད་ཀྱི་ཚོགས་ཡང་དག་པར་བསྒྲུབ་པའི་བརྩོན་འགྲུས་ལས་ཕྱིར་མི་ལྡོག་པར་བྱ་བས་སེམས་ཀྱི་གྲོང་ཁྱེར་བརྟན་པར་བྱ་བ་ལ་བརྩོན་པར་གྱིས་ཤིག །

རིགས་ཀྱི་བུ་ཁྱོད་ཀྱིས་དུས་གསུམ་གྱི་དེ་བཞིན་གཤེགས་པའི་དཀྱིལ་འཁོར་ཐམས་ཅད་དྲན་པ་ཤིན་ཏུ་སྣང་བར༌བྱ་བས་སེམས་ཀྱི་གྲོང་ཁྱེར་རབ་ཏུ་གསལ་བར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེ་སྣ་ཚོགས་ཀྱི་ཆོས་ཀྱི་སྒོ་རབ་ཏུ་དབྱེ་བའི་ཡེ་ཤེས་ལ་མངོན་པར་མཁས་པར་བྱ་བས་སེམས་ཀྱི་གྲོང་ཁྱེར་རྣམ་པར་དབྱེ་བའི་ཚུལ་ལ་མཁས་པར་གྱིས་ཤིག །རིགས་ཀྱི་བུ་ཁྱོད་ཀྱིས་འགྲོ་བ་ཐམས་ཅད་དང་མངོན་སུམ་དུ་གནས་པའི་ཐམས་ཅད་མཁྱེན་པའི་སྒོ་དང་། ལམ་གྱི་ཚུལ་ཡོངས་སུ་བསྟན་པའི་ཕྱིར་སེམས་ཀྱི་གྲོང་ཁྱེར་དམིགས་པར་བྱ་བ་ལ་བརྩོན་པར་གྱིས་ཤིག ། རིགས་ཀྱི་བུ་ཁྱོད་ཀྱིས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི༌སྨོན་ལམ་རྒྱ་མཚོ་རང་གི་སྨོན་ལམ་དུ་མངོན་པར་བསྒྲུབ་པ་རྣམ་པར་དག་པར་བྱ་བའི་ཕྱིར་སེམས་ཀྱི་གྲོང་ཁྱེར་བྱིན༌གྱིས་བརླབ་པའི་ཚུལ་ལ་མཁས་པར་གྱིས་ཤིག ། རིགས་ཀྱི་བུ་ཁྱོད་ཀྱིས་ཆོས་ཀྱི་དབྱིངས་ཐམས་ཅད་དུ་བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་རྣམ་པར་སྤེལ་བས་སེམས་ཀྱི་གྲོང་ཁྱེར་གྱི་ཚོགས་ཀྱི་མཐུ་རྣམ་པར་འཕེལ་བར་བྱ་བའི་ཐབས་ལ་མཁས་པར་གྱིས་ཤིག །རིགས་ཀྱི་བུ་ཁྱོད་ཀྱིས་སེམས་ཅན་ཐམས་ཅད་ཀྱི་སེམས་དང་བསམ་པ་དང་། དབང་པོ་དང་མོས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བར་ཤེས་པར་བྱ་བས་སེམས་ཀྱི་གྲོང་ཁྱེར་ནས་འོད་ཀུན་ཏུ་དགྱེ་བའི་ཐབས་ལ་མཁས་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཆོས་ཀྱི་དབྱིངས་ཀྱི་ཚུལ་ཐམས་ཅད་ཡང་དག་པར༌བསྡུ་བས་སེམས་ཀྱི་གྲོང་ཁྱེར་དུ་དབང་བསྒྱུར་བའི་ཚུལ་ལ་མཁས་པར་གྱིས་ཤིག །

རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པ་ཐམས་ཅད་དྲན་ཞིང་སྣང་བར་བྱ་བས་སེམས་ཀྱི་གྲོང་ཁྱེར་འོད་གསལ་བར་བྱ་བ་ལ་བརྩོན་པར་གྱིས་ཤིག ། རིགས་ཀྱི་བུ་ཁྱོད་ཀྱིས་ལུས་མེད་པའི་ཆོས་ཀྱི་ཚུལ་ཐམས་ཅད་ཁོང་དུ་ཆུད་པར་བྱ་བས་སེམས་ཀྱི་གྲོང་ཁྱེར་གྱི་རང་བཞིན་ཡོངས་སུ་ཤེས་པར་བྱ་བ་ལ་བརྩོན་པར་གྱིས་ཤིག །རིགས་ཀྱི་བུ་ཁྱོད་ཀྱིས་ཐམས་ཅད་མཁྱེན་པའི་ཆོས་ཀྱི་གྲོང་ཁྱེར་དུ་འགྲོ་བར་བྱ་བས་སེམས་ཀྱི་གྲོང་ཁྱེར་སྒྱུ་མ་ལྟ་བུར་བརྟག་པ་ལ་བརྩོན་པར་གྱིས་ཤིག་དང་། རིགས་ཀྱི་བུ་དེ་ལྟར་སེམས་ཀྱི་གྲོང་ཁྱེར་ཡོངས་སུ༌སྦྱང་བ་ལ་བརྩོན་པའི་བྱང་ཆུབ་སེམས་དཔས་དགེ་བའི་རྩ་བ་ཐམས་ཅད་ཡོངས་སུ་བསྒྲུབ་པ་ཐོབ་པར་ནུས་སོ། །དེ་ཅིའི་ཕྱིར་ཞེ་ན། དེ་ལྟར་སེམས་ཀྱི་གྲོང་ཁྱེར་ཡོངས་སུ་དག་པའི་བྱང་ཆུབ་སེམས་དཔའ་དེའི་མདུན་ན་ནི་སངས་རྒྱས་མཐོང་བར་བྱ་བ་ལ་སྒྲིབ་པའམ། ཆོས་མཉན་པར་བྱ་བ་ལ་སྒྲིབ་པའམ། དེ་བཞིན་གཤེགས་པ་མཆོད་ཅིང་རིམ་གྲོ་བྱ་བ་ལ་སྒྲིབ་པའམ། སེམས་ཅན་ཡོངས་སུ་བསྡུ་བའི་སྦྱོར་བ་ལ་སྒྲིབ་པ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་སྒྲིབ་པ་ཡང་རུང་སྟེ། སྒྲིབ་པ་ཐམས་ཅད་མི་གནས་སོ། །རིགས་ཀྱི་བུ་སྒྲིབ་པ་ཐམས་ཅད་དང་བྲལ་བའི་སེམས་དང་། ལྷག་པའི་བསམ་པས་དགེ་བའི་བཤེས་གཉེན་ཡོངས་སུ་བཙལ་བ་ལ་མངོན་པར་བརྩོན་པའི་བྱང་ཆུབ་སེམས་དཔས་ནི་ལས༌གྲོན་ཆུ་ངུས་དགེ་བའི་བཤེས་གཉེན་མཐོང་བར་འགྱུར་ཏེ། རིགས་ཀྱི་བུ་དགེ་བའི་བཤེས་གཉེན་ལ་རག་ལས་པ་ཡང་བྱང་ཆུབ་སེམས་དཔའ་རྣམས་ཀྱི་ཐམས་ཅད་མཁྱེན་པ་ཉིད་དོ། །

དེ་ནས་ལུས་ཀྱི་རིས་སུ་གཏོགས་པའི་ལྷ་མོ་ཆོས་ཀྱི་པད་མོ་དཔལ་གྱི་དཀྱིལ་འཁོར་ཅེས་བྱ་བ་དང་ངོ་ཚ་ཤེས་པའི་དཔལ་གྱི་དོག་པའི་འོད་ཅེས་བྱ་བ་གཉིས་ཤིག་ལྷ་མོའི་ཚོགས་ཚད་མེད་པས་ཡོངས་སུ་བསྐོར་ནས། ལྷ་མོ་སྒྱུ་མའི་ལེགས་པ་བརྗོད་ཅིང་སྙིང་པོ་བྱང་ཆུབ་ནས་འཐོན་ཏེ། ཚོང་དཔོན་གྱི་བུ་ནོར་བཟང་གི་མདུན་གྱི་ནམ་མཁའ་ལ་འཁོད་ནས། རང་རང་གི་རིན་པོ་ཆེའི་རྣ་ཆ་ལས་འོད་ཟེར་གྱི་དྲ་བ་རིན་པོ་ཆེའི་ཁ་དོག་དུ་འདུག་པ་དུ་མ་དང་། སྤོས་དང་། བདུག་པ་དྲི་མ་མེད་པ། འོད་འཕྲོ་བའི་ཁ་དོག་དུ་འདུག་པ་དུ་མ་དང་། སེམས་དང་བསམ་པ་མོས་པར་བྱེད་པའི་ཁ་དོག་དང་། སེམས་ཀྱི་དགའ་བའི་ཤུགས་རྣམ་པར་འཕེལ་བར་བྱེད་པའི་ཁ་དོག་དང་། ལུས་ཀྱི་གདུང་བ་སིམ་པར་བྱེད་པའི་ཁ་དོག་དང་། ལུས་རྣམ་པར་དག་པ་ཡོངས་སུ་སྟོན་པའི་ཁ་དོག་དང་། ལུས་ཀྱི་མཐུ་ཐོགས་པ་མེད་པར་འབྱུང་བའི་ཡུལ་དང་ལྡན་པའི་འོད་ཟེར་གྱི་དྲ་བ་མང་པོ་བཀྱེ་བས། ཞིང་རྒྱ་ཆེན་པོ་སྣང་བར་བྱས་ནས། ཚོང་དཔོན་གྱི་བུ་ནོར་བཟང་ལ་དེ་བཞིན་གཤེགས་པ་ཐམས་ཅད་ཀྱི་སྐུ་ཐམས་ཅད་དུ་ཁྱབ་པ། ཐམས་ཅད་ལ་མངོན་དུ་གྱུར་པ་ཡོངས་སུ་བསྟན་ནས་འཇིག་རྟེན་ཐམས་ཅད་ལ་གཡས་ཕྱོགས་སུ་བསྐོར་བ་བྱས་ཏེ། ཚོང་དཔོན་གྱི་བུ་ནོར་བཟང་གི་སྤྱི་བོའི་གཙུག་ཏུ་ཤར་ནས། སྤྱི་བོའི་གཙུག་མན་ཆད་བ་སྤུའི་བུ་ག་ཐམས་ཅད་དུ་ཞུགས་ཏེ་ལུས་ཀུན་ཏུ་ཁྱབ་པར་གྱུར་ཏོ། །

དེ་ལྟར་ལྷ་མོ་དེ་དག་གི་འོད་ཟེར་གྱིས། ཚོང་དཔོན་གྱི་བུ་ནོར་བཟང་ལ་ཕོག་མ་ཐག་ཏུ་དེའི་མོད་ལ་མུན་པ་ཐམས་ཅད་དང་། མི་གནས་པའི་མིག་རྡུལ་དང་བྲལ་བའི་འོད་སྣང་བ་ཞེས་བྱ་བ་ཐོབ་པར་གྱུར་ཏོ། །སེམས་ཅན་གྱི་རང་བཞིན་ཁོང་དུ་ཆུད་པར་བྱེད་པའི་མིག་རབ་རིབ་དང་བྲལ་བ་ཞེས་བྱ་བ་ཐོབ་པར་གྱུར་ཏོ། །ཆོས་ཐམས་ཅད་ཀྱི་རང་བཞིན་གྱི་དཀྱིལ་འཁོར་ལ་རྣམ་པར་ལྟ་བའི་མིག་རྡུལ་དང་བྲལ་བས་དབང་བསྒྱུར་བ་ཞེས་བྱ་བ་ཐོབ་པར་གྱུར་ཏོ། །

ཞིང་ཐམས་ཅད་ལ་རྣམ་པར་ལྟ་བའི་མིག་རྣམ་པར་དག་པ་ལ་དབང་བསྒྱུར་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་ལ་རྣམ་པར་ལྟ་བའི་མིག་རྣམ་པར་སྣང་བ་ཞེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པའི་གཟུགས་ཀྱི་སྐུ་ཡོངས་སུ་གྲུབ་པ་རྣམ་པར་ཕྱེ་བ་བསམ་གྱིས་མི་ཁྱབ་པ་ལ་རྣམ་པར་ལྟ་བའི་མིག་རྣམ་པར་དག་པའི་བློ་གྲོས་ཞེས་བྱ་བ་ཐོབ་པར་གྱུར་ཏོ། །ཞིང་རྒྱ་མཚོ་འབྱམས་ཀླས་པ་ཐམས་ཅད་ཀྱི་འཇིག་རྟེན་གྱི་ཁམས་འབྱུང་བ་དང་། འཇིག་པ་རྣམ་པར་ཕྱེ་བ་ལ་རྣམ་པར་ལྟ་བའི་མིག་ཆགས་པ་མེད་པའི་འོད་ཅེས་བྱ་བ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་མདོ་སྡེའི་ཚུལ་མངོན་པར་བསྒྲུབ་པའི་ཕྱོགས་ལ་རྣམ་པར་ལྟ་བའི་མིག་ཀུན་ཏུ་སྣང་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་རྣམ་པར་འཕྲུལ་པ་དང་། སེམས་ཅན་འདུལ་བའི་བྱིན་གྱིས་རླབས་ལ་རྣམ་པར་ལྟ་བའི་མིག་ཀུན་ནས་ཡུལ་དུ་འགྱུར་བ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་དུ་བྱུང་བའི་སངས་རྒྱས་སྐྱེས་པ་ལ་རྣམ་པར་ལྟ་བའི་མིག་ཀུན་ཏུ་ལྟ་བ་ཞེས་བྱ་བ་ཐོབ་པར་གྱུར་ཏོ། །

དེ་ནས་བྱང་ཆུབ་སེམས་དཔའ་ཡང་དག་པར་འགྲོ་བའི་ཁང་པའི་སྒོ་སྲུང་སྲིན་པོའི་དབང་པོ་སྲིན་པོ་སྟོང་ཕྲག་བཅུའི་གཙོ་བོ་མིག་བཟང་ཞེས་བྱ་བ་ཆུང་མར་བཅས་བུ་དང་བཅས། རང་གི་གཉེན་བཤེས་དང་འཁོར་དུ་བཅས་པས། ཚོང་དཔོན་གྱི་བུ་ནོར་བཟང་ལ་མེ་ཏོག་ཁ་དོག་སྣ་ཚོགས་ཡིད་དུ་འོང་བས་མངོན་པར་གཏོར་ཏེ། འདི་སྐད་ཅེས་སྨྲས་སོ། །

རིགས་ཀྱི་བུ་ཆོས་བཅུ་དང་ལྡན་པའི་བྱང་ཆུབ་སེམས་དཔས་ནི་དགེ་བའི་བཤེས་གཉེན་ཐམས་ཅད་དང་ཉེ་བར་བསྙེན་པ་ཡིན་ཏེ། བཅུ་གང་ཞེ་ན་འདི་ལྟར་བསམ་པ་ཡོངས་སུ་དག་པ། གཡོ་དང་སྒྱུ་མེད་པ་དང་། འགྲོ་བ་ཐམས་ཅད་ཡོངས་སུ་སྡུད་པ་ལ་ཐ་མི་དད་པའི་སྙིང་རྗེ་ཆེན་པོ་དང་། སེམས་ཅན་ཐམས་ཅད་ལ་སེམས་ཅན་མེད་པའི་རང་བཞིན་ངེས་པར་རྟོགས་པའི་རབ་ཏུ་རྟོགས་པ་དང་། ལྷག་པའི་བསམ་པའི་སྟོབས་ཐམས་ཅད་མཁྱེན་པར་འགྲོ་བ་ལས་ཕྱིར་མི་ལྡོག་པ་དང་། དེ་བཞིན་གཤེགས་པའི་དཀྱིལ་འཁོར་ལ་མངོན་པར་འདུན་པའི་མོས་པའི་སྟོབས་དང་། ཆོས་ཐམས་ཅད་ཀྱི་རང་བཞིན་དྲི་མ་མེད་པས་རྣམ་པར་དག་པའི་མིག་དང་། སེམས་ཅན་གྱི་དཀྱིལ་འཁོར་ཐམས་ཅད་ལ་ཐ་མི་དད་པའི་བྱམས་པ་ཆེན་པོ་དང་། བསྒྲིབས་པ་ཐམས་ཅད་རྣམ་པར་འཐོར་བའི་ཡེ་ཤེས་ཀྱི་སྣང་བ་དང་འཁོར་བའི་སྡུག་བསྔལ་ཐམས་ཅད་ཀྱི་གཉེན་པོ་གདུགས་སུ་གྱུར་པའི་ཆོས་ཀྱི་སྤྲིན་ཆེན་པོ་དང་། ཆོས་ཀྱི་དབྱིངས་ཀྱི་རྒྱུད་ཐམས་ཅད་ལ་རབ་ཏུ་ཞུགས་ཤིང་། དགེ་བའི་བཤེས་གཉེན་གྱི་རྗེས་སུ་འབྲང་བ་མངོན་དུ༌གྱུར་པའི་ཡེ་ཤེས་ཀྱི་མིག་སྟེ། རིགས་ཀྱི་བུ་ཆོས་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཐམས་ཅད་དང་ཉེ་བར་བསྙེན་པ་ཡིན་ནོ། །

ཏིང་ངེ་འཛིན་ལ་ངེས་པར་གཞག་པའི་སྒོ་བཅུས་རྣམ་པར་ལྟ་བའི་བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཐམས་ཅད་དང་མངོན་ཏུ་གྱུར་པ་ཐོབ་པ་ཡིན་ཏེ། བཅུ་གང་ཞེ་ན། ཏིང་ངེ་འཛིན་ལ་ངེས་པར་གཞག་པའི་སྒོ་ཆོས་ཐམས་ཅད་ནམ་མཁའ་ལྟར་རྡུལ་དང་བྲལ་བར་རྣམ་པར་དཔྱོད་པའི་དཀྱིལ་འཁོར་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་རྒྱ་མཚོ་ཐམས་ཅད་མངོན་དུ་གྱུར་པའི་མིག་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དམིགས་པ་ཐམས་ཅད་ལ་རྣམ་པར་མི་རྟོག་རྣམ་པར་མི་དཔྱོད་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཕྱོགས་ཐམས་ཅད་དུ་དེ་བཞིན་གཤེགས་པའི་སྤྲིན་ཡོངས་སུ་འབྱུང་བ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་ཐམས་ཅད་མཁྱེན་པའི་ཡེ་ཤེས་དང་། བསོད་ནམས་རྒྱ་མཚོ་སོགས་པའི་སྙིང་པོ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་སེམས་བསྐྱེད་པ་ཐམས་ཅད་ལ་དགེ་བའི་བཤེས་གཉེན་འབྱུང་བ་དང་། འབྲལ་བ་མེད་ཅིང་ཉེ་བར་གྱུར་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་དགེ་བའི་བཤེས་གཉེན་གྱི་ཁར་ལས་པས་ཡོངས་སུ་གྲུབ་པ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་ཐམས་ཅད་དང་ཡོངས་སུ་མི་འབྲལ་བ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་ཐམས་ཅད་མཉམ་པ་ཉིད་ཀྱིས་རྟག་པར་ཀུན་ཏུ་ཉེ་བར་འགྲོ་བའི་སྦྱོར་བ་དང་། ཏིང་ངེ་འཛིན་ལ་ངེས་པར་གཞག་པའི་སྒོ་དགེ་བའི་བཤེས་གཉེན་གྱི་ཐབས་ཀྱི་སྤྱོད་པ་ཐམས་ཅད་ཀྱིས་དུབ་པ་མེད་པའི་སྦྱོར་བ་སྟེ།

རིགས་ཀྱི་བུ་ཏིང་ངེ་འཛིན་ལ་ངེས་པར་གཞག་པའི་སྒོ་བཅུ་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་དགེ་བའི་བཤེས་གཉེན་ཐམས་ཅད་དང་། མངོན་ཏུ་གྱུར་པ་ཐོབ་པ་ཡིན་ཏེ། ཏིང་ངེ་འཛིན་གྱི་རྣམ་པར་ཐར་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དགེ་བའི་བཤེས་གཉེན་གྱི་ཁ་ནས་གྲགས་པ་ཞེས་བྱ་བ་ཡང་ཐོབ་པས་དེ་ལ་ཞུགས་པའི་བྱང་ཆུབ་སེམས་དཔའ་ནི་སངས་རྒྱས་ཐམས་ཅད་ཐ་མི་དད་ཅིང་མཉམ་པ་ཉིད་དུ༌འགྱུར་བ་ཡང་རབ་ཏུ་འཐོབ་བོ། །དགེ་བའི་བཤེས་གཉེན་ཐ་མི་དད་ཅིང་ཐམས་ཅད་དུ་ཁྱབ་པའང་རབ་ཏུ་ཐོབ་པར་འགྱུར་རོ། །སྲིན་པོའི་དབང་པོ་མིག་བཟང་གིས་དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟང་གིས་ནམ་མཁའི་དབྱིངས་ལ་བལྟས་ཏེ་འདི་སྐད་ཅེས་སྨྲས་སོ། །འཕགས་པ་བདག་ལ་ཐུགས་བརྩེ་བར་མཛད་དེ། དགེ་བའི་བཤེས་གཉེན་བསྟེན་པས་སྨན་ཡོན་བཏགས་པ་མ་ནོངས་སོ། །ད་དུང་ཡང་དགེ་བའི་བཤེས་གཉེན་བལྟ་བའི་སླད་དུ། ཇི་ལྟར་བརྩོན་པར་བགྱི་བ་དང་། ཕྱོགས་གང་ལོགས་སུ་མཆི་བར་བགྱི་བ་དང་། གནས་གང་ཞིག་དུ་ཡོངས་སུ་བཙལ་བ་དང་། དམིགས་པ་གང་ཞིག་བསམ་པར་བགྱི་བའི་ཐབས་ཀྱི་སྒོ་མ་ནོར་བར་བསྟན་དུ་གསོལ། སྨྲས་པ་རིགས་ཀྱི་བུ་དེ་བས་ན་ཕྱོགས་ཀུན་ཏུ་རབ་ཏུ་འདུད་པའི་ལུས་དང་། དམིགས་པ་ཐམས་ཅད་དུ་དགེ་བའི་བཤེས་གཉེན་དྲན་པ་དང་། འབྲེལ་པའི་བསམ་པ་དང་། ཀུན་ཏུ་འགྲོ་བའི་ཏིང་ངེ་འཛིན་གྱི་རྗེས་སུ་འབྲང་བ་དང་། སེམས་ཀྱི་ཤུགས་རྨི་ལམ་ལྟ་བུ་དང་། ཡིད་ཀྱི་ལུས་གཟུགས་བརྙན་ལྟ་བུས་རྣམ་པར་རྒྱུ་སྟེ། འགྲོ་བས་དགེ་བའི་བཤེས་གཉེན༌གྱི་གན་དུ་སོང་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་སྲིན་པོའི་དབང་པོ་མིག་བཟང་གིས་ཇི་སྐད་དུ་གཏམས་པ་དེ་ལྟར་ནན་ཏན་དུ་བྱས་པ་དང་། མདུན་གྱི་སའི་ནང་ནས་པད་མོ་ཆེན་པོ་རྡོ་རྗེ་རིན་པོ་ཆེ་ཐམས་ཅད་ལས་གྲུབ་པའི་ཆུ་བ་ཅན། ནང་རིམ་རིན་པོ་ཆེའི་རྒྱལ་པོ་འགྲོ་བ་རྒྱ་མཚོ་སྣ་ཚོགས་ལས་བྱས་པ། རིན་པོ་ཆེའི་རྒྱལ་པོ་ཐམས་ཅད༌ལས་འདབ་མའི་ཕྲེང་བ་གྲུབ་པ། རིན་པོ་ཆེའི་རྒྱལ་པོ་རྣམ་པར་སྣང་བའི་སྙིང་པོ་ཅན་སྤོས་ཀྱི་རིན་པོ་ཆེའི་རྒྱལ་པོ་རིན་པོ་ཆེ་ཐམས་ཅད་ཀྱི་མདོག་གི་ཟེ་བ་དང་ལྡན་པ། རིན་པོ་ཆེའི་དྲ་བ་གྲངས་མེད་པས་ཀུན་ནས་ཡོག་པ་བྱུང་བ་མཐོང་ངོ་། །

རིན་པོ་ཆེའི་རྒྱལ་པོའི་པད་མོ་ཆེན་པོ་དེའི་སྙིང་པོ་ལའང་། ཁང་པ་བརྩེགས་པ་ཆོས་ཀྱི་ཕྱོགས་སུ་ཡང་དག་པར་གཞོལ་བའི་སྙིང་པོ་ཞེས་བྱ་བ་ཤིན་ཏུ༌སྤ་ལ་བལྟ་ན་སྡུག་པ་སའི་གཞི་རྣམ་པར་སྣང་བའི་དབྱིབས་དང་ལྡན་པ། རིན་པོ་ཆེའི་རྒྱལ་པོ་ཐམས་ཅད་ལས་བྱས་པའི་ཀ་བ་སྟོང་ཚང་བས་མཛེས་པར་བརྒྱན་པ། རྒྱན་ཐམས་ཅད་དུ་རིན་པོ་ཆེ་ཐམས་ཅད་བཀྲམ་པ། འཛམ་བུ་ཆུ་ཀླུང་གི་གསེར་དྲི་མ་མེད་པའི་ལྷ་རྫས་ཀྱི་གཞི་བཏིང་བ། མུ་ཏིག༌གི་ཕྲེང་བ་སྣ་ཚོགས་ཀྱི་དྲ་བ་གྲངས་མེད་པ་ཀུན་ནས་བྲེས་པ། རིན་པོ་ཆེའི་རྒྱལ་པོ་སྣ་ཚོགས་རབ་ཏུ་སྤ་བར་སྤེལ་བས་བརྒྱན་པ། འཛམ་བུ་ཆུ་ཀླུང་གི་ནོར་བུ་རིན་པོ་ཆེས་ཀུན་ནས་རྣམ་པར་ཕྱེ་བ། རིན་པོ་ཆེའི་ཁྲི་འཕང་གྲངས་མེད་པས་ཀུན་ནས་བསྐོར་བ། ཕྱོགས་ཐམས་ཅད་ནས་རིན་པོ་ཆེའི་རྒྱལ་པོའི་ཐེམ་སྐས་མཛེས་པར་བཀྱེ་བ་གནས་པར་མཐོང་ངོ་། །

ཁང་པ་བརྩེགས་པ་དེའི་དབུས་ན་ཡང་ཁྲི་ནོར་བུ་རིན་པོ་ཆེ་ཡིད་བཞིན་གྱི་པད་མོའི་སྙིང་པོ་ཅན། ནོར་བུ་རིན་པོ་ཆེའི་གཟུགས་འཇིག་རྟེན་གྱི་དབང་པོའི་དབྱིབས་ལྟ་བུའི་རྟེན་གྱིས་བཟུང་བ། ནོར་བུ་རིན་པོ་ཆེའི་འབྲུ་ཐམས་ཅད་ཀྱི་ཁ་དོག་དུ་འདུག་པ། དབང་པོའི་རྒྱལ་མཚན་རབ་ཏུ་སྣང་བའི་དབྱིབས་སུ་འདུག་པ། རྡོ་རྗེ་རིན་པོ་ཆེའི་འཁོར་ལོའི་ས་ལ་རྟེན་པ། རིན་པོ་ཆེའི་རྒྱལ་པོ་སྣ་ཚོགས་ཀྱི་ཕྲེང་བས་བརྒྱན་པ། རིན་པོ་ཆེའི་ཁྲི་འཕང་དུ་མ་ལས་བླངས་པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱིས་རབ་ཏུ་སྤྲས་པ། རིན་པོ་ཆེ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་པ། རིན་པོ་ཆེའི་རྒྱལ་པོའི་སྟན་ལྷ་རྫས་ལས་འདས་པ་ལེགས་པར་བཏིང་བ། གོས་རིན་པོ་ཆེ་ཁ་དོག་མཐའ་ཡས་པ་སྣ་ཚོགས་ཀྱི་གཞི་ཐམས་ཅད་དུ་བཀྲམ་པ། རིན་པོ་ཆེའི་གོས་ཐམས་ཅད་ཀྱི་གནམ་ཡོལ་བྲེས་པས། ནམ་མཁའ་རབ་ཏུ་བརྒྱན་པ། རིན་པོ་ཆེ་ཐམས་ཅད་ཀྱི་དྲ་བ་ཀུན་ཏུ་བྲེས་པ། ཕྱོགས་ཀུན་ནས་རིན་པོ་ཆེའི་རྒྱལ་མཚན་དགྲིགས་པའི་སྒྲ་འབྱུང་བ། རིན་པོ་ཆེ་ཐམས་ཅད་ཀྱི་སྣམ་བུའི་རྒྱལ་མཚན་ཕུར་ལབ་དུ་ལྡིང་བ། སྤོས་ཀྱི་རིན་པོ་ཆེ་ཐམས་ཅད་ཀྱི་རྒྱལ་མཚན་རྣམ་པར་བྲེས་པས་ཀུན་ནས་བརྒྱན་པ། མེ་ཏོག་ཐམས་ཅད་ཀྱི་རྒྱལ་མཚན་ལས་མེ་ཏོག་གི་གློང་སྣ་ཚོགས་ཆར་དུ་མངོན་པར་འབྲུལ་པ། རིན་པོ་ཆེའི་དྲིལ་བུའི་རྒྱལ་མཚན་འཁྲོལ་བའི་སྒྲ་ཡིད་བདེ་བའི་དབྱངས་སྙན་པར་གྲགས་པ། ཁང་པའི་ཁ་ཐམས་ཅད་ནས་རིན་པོ་ཆེ་སྣ་ཚོགས་ཀྱི་ཕྲེང་བ་རབ་ཏུ་སྤྱངས་པ། རིན་པོ་ཆེའི་གཟུགས་སྣ་ཚོགས་ཀྱི་ཁ་ནས་སྤོས་ཆུ་ཁ་དོག་དུ་མ་དང་ལྡན་པའི་ཆར་འབབ་པ། ནོར་བུ་རིན་པོ་ཆེའི་རྒྱལ་པོ་རྣམ་པར་སྣང་བ་ལས་གླང་པོ་དམ་པའི་གཟུགས་སུ་བྱས་པའི་ཁ་ནས་པད་མོའི་དྲ་བ་འབྱུང་བ་དང་ལྡན་པ། རྡོ་རྗེ་སྣ་ཚོགས་ཀྱི་སེང་གེའི་ཁ་ནས་སྤོས་ཀྱི་སྤྲིན་ཁ་དོག་མཐའ་ཡས་པ་རབ་ཏུ་འབྱུང་བ། རིན་པོ་ཆེའི་རྒྱལ་པོ་རྣམ་པར་སྣང་བ། ཚངས་པའི་གཟུགས་སུ་འདུག་པའི་ཁ་ནས་བྱམས་པ་ཆེན་པོའི་ཚུལ་ཚངས་པའི་དབྱངས་ཀྱི་ང༌རོ་སྒྲོག་པ་དང་ལྡན་པ།

རིན་པོ༌ཆེ་སྣ་ཚོགས་ཤིན་ཏུ་མཛེས་པའི་གཟུགས་ཀྱི་ཁ་ནས་དཀར་པོའི་ཕྱོགས་ཀྱི་ལེགས་པ་རབ་ཏུ་བརྗོད་པའི་ང་རོ་འབྱུང་བ་དུས་གསུམ་གྱི་སངས་རྒྱས་ཀྱི་མཚན་གསེར་གྱི་དྲིལ་གྱི་ཕྲེང་བ་ལས་སྒྲ་སྙན་པའི་དབྱངས་སུ་འབྱུང་བ་དང་ལྡན་པ། ནོར་བུ་རིན་པོ་ཆེ་དམ་པའི་དྲིལ་གྱི་ཕྲེང་བ་ལས་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོའི་སྒྲ་ཡིད་དུ་འོང་བ་འབྱུང་བ། རྡོ་རྗེའི་དྲིལ་སྣ་ཚོགས་ལས་བྱང་ཆུབ་སེམས་དཔའི་སྨོན་ལམ་ཐམས་ཅད་ཀྱི་སྒྲ་རབ་ཏུ་འབྱུང་བ། རིན་པོ་ཆེའི་རྒྱལ་པོ་ཟླ་བའི་རྒྱལ་མཚན་གྱི་ཕྲེང་བས་སངས་རྒྱས་ཐམས་ཅད་ཀྱི་གཟུགས་བརྙན་རབ་ཏུ༌འབྱུང་བའི་དབྱངས་སྣ་ཚོགས༌རབ་ཏུ་བསྒྲག་པ། ནོར་བུ་རིན་པོ་ཆེའི་རྒྱལ་པོ་སྙིང་པོ་དག་པའི་ཕྲེང་བས་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་ཚེ་གཅིག་ནས་གཅིག་ཏུ་བརྒྱུད་པའི་གཟུགས་བརྙན་རྣམ་པར་དམིགས་པར་བྱ་བ། རིན་པོ་ཆེའི་རྒྱལ་པོ་ཉི་མའི་སྙིང་པོའི་ཕྲེང་བས་ནམ་མཁའི་དབྱིངས་ཀྱི་མཐས་ཀླས་པའི་ཕྱོགས་བཅུའི་སངས་རྒྱས་ཀྱི་ཞིང་སྣ་ཚོགས་ཀྱི་དབྱིངས་སུ་འོད་ཟེར་ཡོངས་སུ་བསྟན་པ། རིན་པོ་ཆེའི་རྒྱལ་པོ་སྣང་བའི་རྒྱལ་མཚན་གྱི་ཕྲེང་བས་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་སྣང་བ་རབ་ཏུ་བཀྱེ་བ། ནོར་བུ་རིན་པོ་ཆེའི་རྒྱལ་པོ༌རྣམ་པར་སྣང་བའི་ཕྲེང་བས་སྤྲུལ་པའི་སྤྲིན་འགྲོ་བ་ཐམས་ཅད་ཀྱི་དབང་པོ་ལྟ་བུ་དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པའི་འོད་རབ་ཏུ་དགྱེ་བ། རིན་པོ་ཆེའི་རྒྱལ་པོ་ཡིད་བཞིན་གྱི་ཕྲེང་བས་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་འཕྲུལ་པས་སྐད་ཅིག་རེ་རེ་ལ་ཆོས་ཀྱི་དབྱིངས་སུ་རྒྱས་པར་དགང་བ། རིན་པོ་ཆེའི་རྒྱལ་པོ་རི་བོའི་རྒྱལ་མཚན་གྱི་ཕྲེང་བས། ལྷའི་དབང་པོ་ཐམས་ཅད་ཀྱི་ཁྱིམ་གྱི་ལྷ་མོའི་དབྱངས་སྙན་པ་རབ་ཏུ་བསྒྲག་པ་དང་ལྡན་ཞིང་ཁྲི་དེ། དམིགས་པ་ཐམས་ཅད་དུ་དེ་བཞིན་གཤེགས་པ་ལ་བསྟོད་པའི་སྤྲིན་འགྱེད་པས་ཡོན་ཏན་དང་། ལེགས་པ་བསམ་གྱིས་མི་ཁྱབ་པ་བརྗོད་དུ་ཡོད་པ་དང་། རིན་པོ་ཆེའི་རྒྱན་གྲངས་མེད་པའི་འཁོར་གྱི་སྟན་གྱིས་བསྐོར་བར་མཐོང་ངོ་། །

ཁྲི་དེ་ལ་ལྷ་མོ་སྒྱུ་མ་འཇིག་རྟེན་གསུམ་ལས་ཡང་དག་པར་འདས་པའི་གཟུགས་འཇིག་རྟེན་ཐམས་ཅད་ལ་མངོན་པར་གནས་པ་དང་། སྲིད་པའི་རྒྱུད་ཐམས་ཅད་ལས་གྱེན་དུ་འཕགས་པའི་གཟུགས་འགྲོ་བ་ཐམས་ཅད་ཀྱིས་རྣམ་པར་དམིགས་སུ་ཡོད་པ་དང་། འཇིག་རྟེན་ཐམས་ཅད་ཀྱིས་མ་གོས་པའི་གཟུགས་བསོད་ནམས་ཡངས་པས་བྱུང་བ་དང་། འགྲོ་བ་ཐམས་ཅད་དང་མཉམ་ཞིང་འདྲ་བའི་གཟུགས་སེམས་ཅན་ཐམས་ཅད་ལ་རང་བཞིན་མངོན་པར་སྟོན་པ་དང་། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་མཐུན་པའི་གཟུགས་སེམས་ཅན་ཐམས་ཅད་དང་མངོན་སུམ་དུ་འདལ་བ་དང་། དུས་གསུམ་ཐམས་ཅད་དུ་འགྲོ་བ་ནམ་མཁའ་ལ་རྣམ་པར་དམིགས་པ་ཐ་མི་དད་པའི་གཟུགས་འགྲོ་བ་ཐམས་ཅད་ཀྱི་མཐས་ཀླས་པར་དམིགས་སུ་ཡོད་པར་བྱིན་གྱིས་རློབ་པ་དང་། འགྲོ་བ་མེད་པའི་གཟུགས་འཇིག་རྟེན་གྱི་ལམ་གྱི་རྒྱུད་ཐམས་ཅད་འགག་པ་དང་། འོང་བ་མེད་པའི་གཟུགས་འགྲོ་བ་ཐམས་ཅད་དུ་མ་བྱུང་བ་དང་། མ་སྐྱེས་པའི་གཟུགས་མི་སྐྱེ་བར་མཉམ་པའི་ཆོས་ལ་བརྩོན་པ་དང་། མ་འགགས་པའི་གཟུགས་འཇིག་རྟེན་གྱི་རྣམ་པར་སྤྱོད་པ་ཐམས་ཅད་ལ་གཞོལ་བ་དང་། ཡང་དག་པར་དམིགས་པའི་གཟུགས་བདེན་པ་མེད་པ་དང་། འཇིག་རྟེན་གྱི་རྣམ་པར་དམིགས་པའི་གཟུགས་རྫུན་པ་མེད་པ་དང་། འཕོ་བ་མེད་པའི་གཟུགས་ཤི༌འཕོ་བ་དང་། སྐྱེ་བ་ལས་འདས་པ་དང་། མི་འཇིག་པའི་གཟུགས་ཆོས་ཀྱི་དབྱིངས་ཀྱི་རང་བཞིན་གྱིས་འཇིག་པ་མེད་པ་དང་། མཚན་ཉིད་མེད་པའི་གཟུགས་དུས་གསུམ་ཚིག་གི་ལམ་དུ་གཞོལ་བ་དང་། མཚན་ཉིད་གཅིག་པའི་གཟུགས་མཚན་ཉིད་མེད་པས་བྱུང་བ་དང་། གཟུགས་བརྙན་ལྟ་བུའི་གཟུགས་འགྲོ་བ་ཐམས་ཅད་ཀྱི་སེམས་དང་བསམ་པ་ཇི་ལྟ་བ་བཞིན་དུ་དམིགས་པ་དང་། སྒྱུ་མ་ལྟ་བུའི་གཟུགས་ཡེ་ཤེས་སྒྱུ་མས་ཡོངས་སུ་གྲུབ་པ་དང་། སྨིག་རྒྱུ་བ་ལྟ་བུའི་གཟུགས་འགྲོ་བའི་འདུ་ཤེས་བཞིན་དུ་བྱིན་གྱིས་རློབ་པ་ལ་གཞོལ་བ་དང་། གྲིབ་མ་ལྟ་བུའི་གཟུགས་སྔོན་གྱི་སྨོན་ལམ་གྱིས་འགྲོ་བ་ཐམས་ཅད་ཀྱི་རྗེས་སུ་འབྲང་བ་དང་། རྨི་ལམ་ལྟ་བུའི་གཟུགས་བསམ་པ་ཇི་ལྟ་བ་བཞིན་དུ་འགྲོ་བས་དམིགས་པ་ལ་མ་འདྲེས་པ་དང་། ཆོས་ཀྱི་དབྱིངས་ཐམས་ཅད་དུ་གཞོལ་བའི་གཟུགས་ནམ་མཁའི་དབྱིངས་ལྟར་རང་བཞིན་ཡོངས་སུ་དག་པ་དང་། སྙིང་རྗེ་ཆེན་པོས་བྱུང་བའི་གཟུགས་སེམས་ཅན་གྱི་རྒྱུད་ཐམས་ཅད་ཡོངས་སུ་བསྐྱང་བ་ལ་བརྩོན་པ་དང་། ཆགས་པ་མེད་པའི་སྒོས་བྱུང་བའི་གཟུགས་སྐད་ཅིག་རེ་རེས་ཆོས་ཀྱི་དབྱིངས་རྒྱས་པར་འགེངས་པ་དང་། མཐའ་དང་དབུས་མེད་པའི་གཟུགས་རྙོག་པ་མེད་པར་འགྲོ་བ་ཐམས་ཅད་ལ་རྟེན་པ་དང་། ཚད་མེད་པའི་གཟུགས་ཚིག་གི་ལམ་ཐམས་ཅད་ལས་ཡང་དག་པར་འདས་པ་དང་། མི་གནས་པའི་གཟུགས་འགྲོ་བ་ཐམས་ཅད་གདུལ་བའི་བྱིན་གྱིས་རླབས་ཀྱིས་གྲུབ་པ་དང་། བྱིན་གྱིས་མ་བརླབས་པའི་གཟུགས་བྱིན༌གྱིས་རླབས་ཀྱིས་འགྲོ་བའི་དོན་ལ་བརྩོན་པ་དང་། མ༌བྱུང་བའི་གཟུགས་སྨོན་ལམ་སྒྱུ་མས་ཡོངས་སུ་གྲུབ་པ་དང་། ཟིལ་གྱིས་མ་ནོན་པའི་གཟུགས་འཇིག་རྟེན་ཐམས་ཅད་ལས་མངོན་པར་འཕགས་པ་དང་། ཡང་དག་པ་མ་ཡིན་པའི་གཟུགས་ཞི་གནས་ཀྱི་སྣང་བས་རྣམ་པར་དམིགས་པ་དང་། མི་འབྱུང་བའི་གཟུགས་འགྲོ་བའི་ལས་ཇི་ལྟ་བ་བཞིན་དུ་རྗེས་སུ་འབྲང་བ་དང་། རིན་པོ་ཆེ་ཡིད་བཞིན་གྱི་རྒྱལ་པོ་ལྟར་བསམ་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་སྨོན་ལམ་ཡོངས་སུ་གྲུབ་པ་དང་། རྣམ་པར་མི་རྟོག་པའི་གཟུགས་འགྲོ་བ་ཐམས་ཅད་ཀྱི་ཡོངས་སུ་རྟོག་པ་བཞིན་དུ་ཉེ་བར་གནས་པ་དང་། མི་རྟོག་པས་རྟོག་པ་མེད་པའི་གཟུགས་འགྲོ་བ་ཐམས་ཅད་ཀྱིས་རྣམ་པར་དམིགས་པ་དང་། ཐོགས་པ་མེད་པའི་གཟུགས་འཁོར་བ་ལས་བཟློག་པ་ལ་རབ་ཏུ་བརྩོན་པ་དང་། རྣམ་པར་དག་པའི་གཟུགས་དེ་བཞིན་ཉིད་དང་། མཉམ་པར་རྣམ་པར་མི་རྟོག་པ་དང་། རྣམ་པ་དེ་ལྟ་བུའི་གཟུགས་གཟུགས་མེད་པར་གཟུགས་སུ་སྣང་བ་དང་། ཚོར་བ་མེད་པའི་གཟུགས་ཀྱིས་འཇིག་རྟེན་གྱི་སྡུག་བསྔལ་གྱི་ཚོར་བ་རབ་ཏུ་ཞི་བར་བྱ་བ་ལ་བརྩོན་པ་དང་། འདུ་ཤེས་ཀྱི་རྣམ་པ་ཐམས་ཅད་ལས་གྱེན་དུ་འཕགས་པའི་གཟུགས་སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པས་རྣམ་པར་དམིགས་པ་དང་། མངོན་པར་འདུ་བྱ་བ་མེད་པའི་ཆོས་ཉིད་ཀྱིས་བྱུང་བའི་གཟུགས་ཆོས་སྒྱུ་མའི་རྣམ་པས་གྲུབ་པ་དང་། རྣམ་པར་ཤེས་པའི་ཡུལ་ལས་ཡོངས་སུ་འདས་པའི་གཟུགས་བྱང་ཆུབ་སེམས་དཔའི་སྨོན་ལམ་ཀྱི་ཡེ་ཤེས་ལས་བྱུང་བ་དང་། རང་བཞིན་མེད་པའི་གཟུགས་འགྲོ་བ་ཐམས་ཅད་ཀྱི་ཚིག་གི་ལམ་ལ་གཞོལ་བ་དང་། གདུང་བ་ཡོངས་སུ་བསྩལ་བའི་གཟུགས་ཆོས་ཀྱི་སྐུ་བསིལ་བ་དམ་པ་དང་ལྡན་པས།

ལྷ་མོ་སྒྱུ་མ་བསམ་པ་ཇི་ལྟ་བ་བཞིན་དུ་འགྲོ་བའི་གཟུགས་ཀྱི་ལུས་ཡོངས་སུ་སྟོན་པ་དང་། སེམས་ཅན་གྱི་བསམ་པའི་དབང་དུ་འགྲོ་བ་ཐམས་ཅད་དང་མཉམ་ཞིང་འདྲ་བའི་གཟུགས་ཀྱི་ལུས་འགྲོ་བ་ཐམས་ཅད་ཀྱི་གཟུགས་ཀྱི་ལུས་ལས་འཕགས་པ་སྟོན་ཅིང་འདུག་པ་མཐོང་ངོ་། །དེ་ལ་སེམས་ཅན་ལ་ལས་ནི་ལྷ་མོ་སྒྱུ་མ་དེ་བདུད་ཀྱི་བུ་མོའི་གཟུགས་སུ་འདུག་ལ་བདུད་ཀྱི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་དབང་བསྒྱུར་གྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རབ་འཕྲུལ་དགའི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རབ་དགའ་ལྡན་གྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རབ་མཚེ་མའི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་སུམ་ཅུ་རྩ་གསུམ་གྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་རྒྱལ་པོ་ཆེན་པོ་བཞིའི་རིས་ཀྱི་ལྷའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་གྲུལ་བུམ་གྱི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །ལ་ལས་ནི་ལྟོ་འཕྱེ་ཆེན་པོའི་དབང་པོའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །སེམས་ཅན་ལ་ལས་ནི་ལྷ་མོ་སྒྱུ་མ་དེ་མིའི་དབང་པོའི་བུ་མོའི་གཟུགས་བས་ཀྱང་ལྷག་པར་མཐོང་ངོ་། །

དེ་ནས་ཚོང་དཔོན་གྱི་བུ་ནོར་བཟང་འགྲོ་བ་ཐམས་ཅད་ཀྱི་གཟུགས་ཀྱི་འདུ་ཤེས་དང་བྲལ་ཡང་སེམས་ཅན་ཕ་རོལ་གྱི་བསམ་པ་ལ་འཇུག་པ་དེས་སེམས་ཅན་ཐམས་ཅད་ཀྱི་བསམ་པའི་རྣམ་པ་ལ་ལྷ་མོ་སྒྱུ་མ་འགྲོ་བ་ཐམས་ཅད་ཉེ་བར་འཚོ་བའི་བསོད་ནམས་དང་ལྡན་པ། ཐམས་ཅད་མཁྱེན་པ་ཉིད་ཀྱི་བསོད་ནམས་ཀྱིས་བསྒྲུབས་པའི་ལུས་དང་ལྡན་པ། སྦྱིན་པའི་ཕ་རོལ་ཏུ་ཕྱིན་པའི་སྦྱོར་བ་ཐ་མི་དད་པ་དང་ལྡན་པ། འགྲོ་བ་ཐམས་ཅད་ལ་མཉམ་པ་ཉིད་ཀྱི་ཞུགས་པ། སྙིང་རྗེ་ཆེན་པོའི་ལྷས་སུ་སེམས་ཅན་ཐམས་ཅད་ཡོངས་སུ་སྡུད་པ། དེ་བཞིན་གཤེགས་པའི་ཡོན་ཏན་ཐམས་ཅད་ལ་ནན་ཏན་དུ་བྱས་པས་བྱུང་བ། བཟོད་པ་ཐམས་ཅད་ཀྱི་ཚུལ་རྒྱ་མཚོ་ལ་ཞུགས་པ། ཐམས་ཅད་མཁྱེན་པ་ཉིད་ཀྱི་བརྩོན་འགྲུས་ཀྱི་ཤུགས༌ཀྱིས་སེམས་ཅན་རྣམ་པར་སྤེལ་བ། ཆོས་ཀྱི་དཀྱིལ་འཁོར་ཐམས་ཅད་ཡོངས་སུ་དག་པར་བྱ་བ་ལ་ཕྱིར་མི་ལྡོག་པའི་བརྩོན་འགྲུས་དང༌ལྡན་པ། ཆོས་ཐམས་ཅད་ཀྱི་རང་བཞིན་ངེས་པར་རྟོགས་པས་བྱུང་བ། བསམ་གཏན་གྱི་ཡན་ལག་དང་ཚུལ་ཐམས་ཅད་ལས་ཡོངས་སུ་གྲུབ་པའི་སེམས་དང་ལྡན་པ། བསམ་གཏན་གྱི་ཡན་ལག་ཐ་མི་དད་པའི་ཡུལ་ཡོངས་སུ་འཛིན་པའི་དེ་བཞིན་གཤེགས་པའི་བསམ་གཏན་གྱི་དཀྱིལ་འཁོར་སྣང་བ་རབ་ཏུ་ཐོབ་པ། སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་བསྐམ་པ་ལ་ཤིན་ཏུ་གདོན་མི་ཟ་བར་བྱས་པའི་ངེས་པར་རྟོག་པ་སྣ་ཚོགས་ལ་གནས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་རྣམ་པར་དབྱེ་བའི་ཚུལ་ལ་མཁས་པ། ཆོས་ཐམས་ཅད་ཀྱི་ཚུལ་རྒྱ་མཚོ་རྣམ་པར་དཔྱད་པའི་ཤེས་རབ་དང་ལྡན་པ། དེ་བཞིན་གཤེགས་པ་ཐམས་ཅད་མཐོང་བས་མ་ངོམས་པ། དུས་གསུམ་གྱི་དེ་བཞིན་གཤེགས་པ་གཅིག་ནས་གཅིག་ཏུ་བརྒྱུད་པ་ལ་རྣམ་པར་ལྟ་བའི་རྒྱུན་མི་གཅོད་པ། སངས་རྒྱས་ཐམས་ཅད་ལྟ་བའི་སྒོ་ལ་མངོན་དུ་གྱུར་པ། དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྒྲུབས་པའི་ལམ་ཡོངས་སུ་དག་པར་བྱ་བ་རྣམ་པ་ཐ་དད་པའི་ཚུལ་ལ་མཁས་པ།

དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ནམ་མཁའ་དང་མཉམ་པ་སེམས་ཅན་ཐམས་ཅད་ཡོངས་སུ་བསྡུ་བའི་ཐབས་ཀྱི་ཚུལ་ལ་མཁས་པ། འགྲོ་བ་མཐའ་དང་དབུས་མེད་པ། བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་། གདུལ་བའི་སྣང་བ་རབ་ཏུ་ཐོབ་པ། སངས་རྒྱས་ཐམས་ཅད་ཀྱི་སྐུ་རྣམ་པར་དག་པ་རྣམ་པ་ཐ་དད་པ་ལ་ཞུགས་པ། ཞིང་རྒྱ་མཚོ་ཐམས་ཅད་ཡོངས་སུ་དག་པར་བྱ་བའི་སྨོན་ལམ་དང་ལྡན་པ། སེམས་ཅན་གྱི་ཁམས་ཐམས་ཅད་རྣམ་པར་གདུལ་བའི་བྱིན་གྱིས་རླབས་མཐར་ཐུག་པར་བྱ་བའི་སྨོན་ལམ་ཡོངས་སུ་དག་པ། དེ་བཞིན་གཤེགས་པའི་ཡུལ་ཐམས་ཅད་མཆོད་པས་རྒྱས་པར་དགང་བའི་སེམས་དང་། ལྡན་པ། བྱང་ཆུབ་སེམས་དཔའི་རྣམ་པར་འཕྲུལ་པ་ཐམས་ཅད་ལ་བརྩོན་པས་བྱུང་བ། ཆོས་ཀྱི་སྐུ་བླ་ན་མེད་པ་ཡོངས་སུ་དག་པ་དང་ལྡན་པ། གཟུགས་ཀྱི་ལུས་མཐའ་ཡས་པ་ཡོངས་སུ་སྟོན་པ། བདུད་ཀྱི་དཔུང་ཐམས་ཅད་རབ་ཏུ་འཇོམས་པ། དགེ་བའི་རྩ་བ་ཤིན་ཏུ་རྒྱ་ཆེན་པོའི་སྟོབས་དང་ལྡན་པ། ཆོས་ཀྱི་སྟོབས་རབ་ཏུ་སྐྱེས་པའི་བློ་ཅན། སངས་རྒྱས་ཀྱི་སྟོབས་སྣང་བ་རབ་ཏུ་ཐོབ་པ། བྱང་ཆུབ་སེམས་དཔའི་དབང་ཐམས་ཅད་ཀྱི་སྟོབས་ཡོངས་སུ་རྫོགས་པ། ཐམས་ཅད་མཁྱེན་པ་ཉིད་ཀྱི་ཤུགས་ཀྱི་སྟོབས་ཡོངས་སུ་སྐྱེས་པ། དེ་བཞིན་གཤེགས་པའི་ཡེ་ཤེས་གློག་གིས་ཤེས་རབ་སྣང་བར་བྱས་པ། སེམས་ཅན་མཐའ་དང་དབུས་མེད་པའི་སེམས་རྒྱ་མཚོ་རྣམ་པར་དཔྱད་པ་ལ་མཁས་པ། འགྲོ་བ་ཤིན་ཏུ་མང་བའི་བསམ་པ་ལ་ཞུགས་པ། སེམས་ཅན་ཕ་རོལ་གྱི་དབང་པོ་རྣམ་པ་ཐ་དད་པ་ཤེས་པར་བྱ་བའི་ཚུལ་ལ་མཁས་པ། སེམས་ཅན་མཐའ་ཡས་པའི་མོས་པ་རྣམ་པ་ཐ་དད་པའི་རྒྱུས་ལ་མཁས་པར་ཁོང་དུ་ཆུད་པ། ཕྱོགས་བཅུའི་ཞིང་རྒྱ་མཚོ་ཚད་མེད་པ་ལུས་ཀྱིས་རྒྱས་པར་འགེངས་པ། འཇིག་རྟེན་གྱི་ཁམས་རྣམ་པ་ཐ་དད་པ་ཐམས་ཅད་ཤེས་པར་བྱ་བའི་ཚུལ་དང་། རྣམ་པ་ལ་མཁས་པ། ཞིང་ཐ་དད་པའི་ཚུལ་ཐམས་ཅད་ཤེས་པར་བྱ་བའི་ཚུལ་ལ་མཁས་པའི་རྗེས་སུ་སོང་བ། ཡེ་ཤེས་ཀྱི་ལྟ་བ་ཕྱོགས་རྒྱ་མཚོ་ཐམས་ཅད་དུ་རབ་ཏུ་འདལ་བ། དུས་རྒྱ་མཚོ་ཐམས་ཅད་དུ་ཁྱབ་པའི་བློ་དང་ལྡན་པ། སངས་རྒྱས་རྒྱ་མཚོ་ཐམས་ཅད་ལ་མངོན་སུམ་དུ་འདུད་པའི་ལུས་ཅན། ཆོས་ཀྱི་སྤྲིན་རྒྱ་མཚོའི་ཆར་ཐམས་ཅད་ཡང་དག་པར་གཟུང་བ་ལ། མངོན་ཏུ་གྱུར་པའི་སེམས་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རབ་ཏུ་རྫོགས་པར་བྱ་བའི་ནན་ཏན་གྱིས་འབྱུང་བ་ལ་རབ་ཏུ་བརྩོན་པ། བྱང་ཆུབ་སེམས་དཔའི་ཚོགས་ཐམས་ཅད་ཡོངས་སུ་བསྒྲུབ་པ་ལ་རབ་ཏུ་ཞུགས་པའི་བློ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱི་རབ་ཏུ་འཇུག་པ་ལ་རྣམ་པར་དཔྱོད་པའི་མཐུ་ཡོད་པ། བྱང་ཆུབ་ཀྱི་སེམས་ཀྱི་ཡན་ལག་ཐམས་ཅད་ཡོངས་སུ་གྲུབ་པ། བྱང་ཆུབ་སེམས་དཔའ་ཐམས་ཅད་ཡོངས་སུ་བསྐྱང་བ་ལ་རབ་ཏུ་བརྩོན་པ། སངས་རྒྱས་ཐམས་ཅད་ཀྱི་ལེགས་པའི་སྤྲིན་ཀུན་ཏུ་སྣང་བ་རབ་ཏུ་སྟོན་པ། བྱང་ཆུབ་སེམས་དཔའ་དང་རྒྱལ་བ་ཐམས་ཅད་སྐྱེད་པའི་སྨོན་ལམ་གྱིས་བྱུང་བ་དང་། དེ་དག་ལ་སོགས་པ་མཐོང་བའི་ཚུལ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱིས་ལྷ་མོ་སྒྱུ་མ་ཚོང་དཔོན་གྱི་བུ་ནོར་བཟང་གིས་མཐོང་བར༌གྱུར་ཏོ། །

དེས་དེ་མཐོང་ནས་ལྷ་མོ་སྒྱུ་མ་ཇི་སྙེད་ཡོད་པ་དེ་སྙེད་དུ་བདག་གི་ལུས་བྱིན་གྱིས་བརླབས་ནས། ཕྱོགས་ཐམས་ཅད་ལ་མངོན་ཏུ་བལྟས་པའི་ལྷ་མོ་སྒྱུ་མ་ལ་ཐམས་ཅད་དུ་ཁྱབ་པའི་ལུས་ཀྱིས་ཕྱག་བྱས་སོ། །དེས་དེ་ལྟར་ཕྱག་བྱས་མ་ཐག་ཏུ་ཏིང་ངེ་འཛིན་གྱི་སྒོ་མཐའ་དང་དབུས་མེད་པ་ཐོབ་པར་གྱུར་ཏེ། དེས་ཏིང་ངེ་འཛིན་གྱི་སྒོ་དེ་དག་ལ་རྣམ་པར་བལྟས་ནས། མཚན་མར་བྱ་བ་དང་། བསྒོམ་པ་དང་། ལྷུར་བླང་བ་དང་། རྗེས་སུ་དྲན་པར་བྱ་བ་དང་། རྒྱས་པར་དགང་བ་དང་། རབ་ཏུ་རྒྱ་ཆེར་བྱ་བ་དང་། བལྟ་བ་དང་། རྣམ་པར་སྤེལ་བ་དང་། མངོན་པར་བསྒྲུབ་པ་དང་། རྒྱས་གདབ་པར་བྱས་ཏེ། ཏིང་ངེ་འཛིན་གྱི་སྒོ་དེ་དག་ལས་ལངས་ནས་ལྷ་མོ་སྒྱུ་མ་འཁོར་དང་བཅས། གནས་དང་བཅས། སྟན་དང་བཅས་པ་ལ་གཡས་ཕྱོགས་སུ་བསྐོར་བ་བྱས་ཏེ། མདུན་དུ་འདུག་ནས་ཐལ་མོ་སྦྱར་ཏེ། འདི་སྐད་ཅེས་སྨྲས་སོ། །འཕགས་མ་བདག་ནི་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དགེ་བའི་བཤེས་གཉེན་བསྙེན་བཀུར་བ་ལ་ཡོངས་སུ་བསྐུལ་བ་བགྱིས་པ་སྟེ། དེ་ལྟར་བདག་དགེ་བའི་བཤེས་གཉེན་ནས་དགེ་བའི་བཤེས་གཉེན་དུ་བསྙེན་བཀུར་བགྱིད་ཅིང་མཐར་གྱིས་ཁྱོད་ཀྱི་ཞབས་ཀྱི་དྲུང་འདིའི་བར་དུ་མཆིས་པ་ལགས་ན། འཕགས་མ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ༌བསླབས་ན། ཐམས་ཅད་མཁྱེན་པ་ཉིད་དུ་འགྲུབ་པ་ལགས།

དེས་སྨྲས་པ་རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་ཐོབ་པ་སྟེ། རིགས་ཀྱི་བུ་ཁོ་མོ་རྣམ་པར་ཐར་པ་དེ་དང་ལྡན་པས་འཇིག་རྟེན་གྱི་ཁམས་རྒྱ་མཚོ་འདིའི་འཇིག་རྟེན་གྱི་ཁམས་ཐམས་ཅད་ཀྱི་འཛམ་བུའི་གླིང་ཐམས་ཅད་ན་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྲིད་པའི་ཐ༌མ་ལ་སྐྱེ་བས་རྣམ་པར་འཕྲུལ་པ་ཇི་སྙེད་ཅིག་ཡོད་པའི་བྱང་ཆུབ་སེམས་དཔའི་སྲིད་པའི་ཐ་མ་པ་དེ་དག་ཐམས་ཅད་སོ་སོའི་མར་གྱུར་པ་སྟེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཁོ་མོའི་ལྟོ་ན་གནས་པ་ཁོ་མོའི་ལྟོ་གཡས་པ༌ནས་འབྱུང་ངོ་། །

རིགས་ཀྱི་བུ་སྐལ་བ་དང་ལྡན་པའི་གླིང་བཞི་པ་འདི་ཉིད་ཀྱི་གྲོང་ཁྱེར་ཆེན་པོ་སེར་སྐྱའི་གནས་སུ་ཡང་། རྒྱལ་པོ་ཟས་གཙང་མའི་བཙུན་མོའི་རིགས་དང་ལྡན་པའི་ཚུལ་གྱིས་བྱང་ཆུབ་སེམས་དཔའ་དོན་གྲུབ། བྱང་ཆུབ་སེམས་དཔའ་སྐྱེ་བའི་རྣམ་པར་འཕྲུལ་པ་རྒྱ་ཆེན་པོ་བསམ་གྱིས་མི་ཁྱབ་པས་བསྐྱེད་དོ། །རིགས་ཀྱི་བུ་དེ་ལྟར་ཁོ་མོ་རྒྱལ་པོ་ཟས་གཙང་མའི་ཕོ་བྲང་ན་འདུག་འདུག་པ་ལས་བྱང་ཆུབ་སེམས་དཔའ་དགའ་ལྡན་གྱི་ཕོ་བྲང་ནས་འཕོ་བའི་དུས་ལ་བབ་པ་དང་། བ་སྤུའི་སྒོ་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འོད་ཟེར་དེ་བཞིན་གཤེགས་པ་ཐམས་ཅད་ཀྱི་ཡུམ་གྱི་ཡོན་ཏན་གྱི་དཀྱིལ་འཁོར་ལས་བྱུང་བའི་སྣང་བ་ཞེས་བྱ་བ་མང་པོ་བྱང་ཆུབ་སེམས་དཔའ་ཐམས་ཅད་ཀྱི་ཡུམ་གྱི་ཡོན་ཏན་གྱི་རྒྱན་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་འཐོན་ནས། འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ། ཁོ་མོའི་ལུས་ལ་ཤར་ནས། སྤྱི་བོ་མན་ཆད་བ་སྤུའི་བུ་ག་ཐམས་ཅད་དུ་འཕྲོས་པར་གྱུར་ཏོ། །

རིགས་ཀྱི་བུ་དེ་ལྟར་བྱང་ཆུབ་སེམས་དཔའི་འོད་ཟེར་མིང་གཅིག་ལ། བྱང་ཆུབ་སེམས་དཔའི་ཡུམ་གྱི་རྣམ་པར་འཕྲུལ་པ་དང་། རྒྱན་དང་རྣམ་པར་ཐར་པ་སྣ་ཚོགས་རབ་ཏུ་འགྱེད་པ་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་ཁོ་མོའི་ལུས་སུ་བྱང་ཆུབ་སེམས་དཔའི་འོད་ཟེར་གྱི་སྒོའི་དཀྱིལ་འཁོར་གྱིས་རྣམ་པར་དམིགས་པར་བྱས་ཏེ། བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པའི་ཚུལ་དང་རྒྱན་ཐམས་ཅད་ཡོངས་སུ་སྣང་བར་གྱུར་ཏོ། །ཁྱིམ་དང་འཁོར་ལ་ཡང་དེ་བཞིན་དུ་སྣང་བར་གྱུར་ཏོ། །

རིགས་ཀྱི་བུ་དེ་ལྟར་བྱང་ཆུབ་སེམས་དཔའི་འོད་ཟེར་དེ་དག་ཁོ་མོའི་ལུས་སུ་དོང་མ་ཐག་ཏུ་དེའི་མོད་ལ་བྱང་ཆུབ་སེམས་དཔའི་འོད་ཟེར་གྱི་སྒོའི་དཀྱིལ་འཁོར་དེ་དག་གིས་བྱང་ཆུབ་སེམས་དཔའ་གང་དག་གི་སྐྱེ་བའི་ཚུལ་དང་། རྣམ་པར་འཕྲུལ་པ་རྣམ་པར་དམིགས་པར་བྱས་པ་དེ་དག་ཐམས་ཅད་ཀྱང་ཁོ་མོས༌མཐོང་བར་གྱུར་ཏེ། དེ་དག་ཐམས་ཅད་ཀྱང་སྙིང་པོ་བྱང་ཆུབ་ཏུ་གཤེགས་ནས། སེང་གེའི་གདན་ལ་བཞུགས་ཤིང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱིས་བསྐོར་ཏེ། འཇིག་རྟེན་གྱི་དབང་པོ་རྣམས་ཀྱིས་བསྐོར་ཅིང་། ཆོས་ཀྱི་འཁོར་ལོ་བསྐོར་བ་མང་པོ་མཐོང་ངོ་། །དེ་བཞིན་གཤེགས་པ་དེ་དག་གིས་སྔོན་བྱང་ཆུབ་སེམས་དཔའི་སྤྱོད་པ་མཛད་པའི་ཚེ། དེ་བཞིན་གཤེགས་པ་ཇི་སྙེད་ཅིག་བསྙེན་བཀུར་བ་དེ་དག་ཐམས་ཅད་ཀྱང་ཁོ་མོས་དང་པོ་ཐུགས་བསྐྱེད་པ་དང་། སྐྱེ་བའི་རྣམ་པར་འཕྲུལ་པ་དང་བཅས་མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས༌འདའ་བའི་རྣམ་པར་འཕྲུལ་པ་དང་བཅས། སངས་རྒྱས་ཀྱི་ཞིང་ཡོངས་སུ་དག་པའི་རྒྱན་དང་བཅས་པར་མཐོང་ངོ་། །

དེ་བཞིན་གཤེགས་པ་དེ་དག་གི་སྤྲུལ་པའི་དཀྱིལ་འཁོར་སེམས་ཀྱི་སྐད་ཅིག་རེ་རེ་ལ་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པ་དེ་དག་ཐམས་ཅད་ཀྱང་ཁོ་མོས་མཐོང་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་འོད་ཟེར་དེ་དག་དོང་མ་ཐག་ཏུ་ཁོ་མོའི་ལུས་ཀྱང་འགྲོ་བ་ཐམས་ཅད་ལས་མངོན་པར་འཕགས་པར་གྱུར་ཏེ། རུམ་ནམ་མཁའི་དབྱིངས་ལྟར་ཡངས་པར་གྱུར་ཀྱང་མིའི་ལུས་ལས་ལྷག་པར་ཡང་མི་སྣང་ངོ་། །

ཕྱོགས་བཅུ་ན་བྱང་ཆུབ་སེམས་དཔའི་མངལ་གྱི་གནས་དང་། ཁང་ཁྱིམ་དང་རྒྱན་ཇི་སྙེད་ཅིག་ཡོད་པ་དེ་དག་ཐམས་ཅད་ཀྱང་ཁོ་མོའི་ལུས་ཀྱི་ཁོང་དུ་ཆུད་པ་དང་། ཁོ་མོའི་ལུས་སུ་ཤོང་བར་གྱུར་པར་སྣང་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་མངལ་གྱི་གནས་དང་། ཁང་ཁྱིམ་དང་རྒྱན་དང་ལོངས་སྤྱོད་བྱུང་བར་གྱུར་པ་དང་། དེའི་མོད་ལ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་སྨོན་ལམ་གཅིག་པ་སྐལ་བ་མཉམ་པར་སྤྱོད་སྤྱོད་པ། དགེ་བའི་རྩ་བ་གཅིག་པ་རྒྱན་གཅིག་པ། རྣམ་པར་ཐར་པ་གཅིག་ལ་རྣམ་པར་སྤྱོད་པ། ཡེ་ཤེས་ཀྱི་ས་གཅིག་ལ་གནས་པ། རྣམ་པར་འཕྲུལ་པ་གཅིག་གིས་བྱུང་བ། སྨོན་ལམ་གཅིག་གིས་གྲུབ་པ། སྤྱོད་པ་གཅིག་གིས་བྱུང་བ། ཆོས་ཀྱི་ལུས་ཡོངས་སུ་དག་པ། གཟུགས་ཀྱི་ལུས་མཐའ་དང་དབུས་མེད་པའི་བྱིན༌གྱིས་རླབས་དང་ལྡན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་དང་རྣམ་པར་འཕྲུལ་པས་བྱུང་བ་དག་དང་། རིན་པོ་ཆེའི་ཀླུའི་དབང་པོའི་སྙིང་པོའི་ཁང་པ་བརྩེགས་པ་ན་འཁོད་ཅིང་། ཀླུའི་རྒྱལ་པོ་གང་ཆེན་མཚོ་ལ་སོགས་པ་ཀླུའི་དབང་པོ་སྟོང་ཕྲག་བརྒྱད་ཅུ་དང་། འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་མངོན་པར་མཆོད་ཅིང་།

བྱང་ཆུབ་སེམས་དཔའི་རྣམ་པར་འཕྲུལ་པ་དགའ་ལྡན་གྱི་ཕོ་བྲང་ཐམས་ཅད་ནས་ཤི་འཕོ་ཡོངས་སུ་སྟོན་པས། དགའ་ལྡན་གྱི་གནས་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་དུ་འདལ་བའི་གླིང་བཞི་པར་སྐྱེ་བ་ལེན་པ་ཡོངས་སུ་སྟོན་པ། སེམས་ཅན་ཡོངས་སུ་སྨིན་པར་བྱ་བའི་ཐབས་ཀྱི་ཚུལ་བསམ་གྱིས་མི་ཁྱབ་པ་ལ་མཁས་པའི་རྗེས་སུ་སོང་བ་དང་སེམས་ཅན་བག་མེད་པ་ཐམས་ཅད་ཡོངས་སུ་བསྐུལ་ཞིང་མངོན་པར་ཞེན་པ། ཐམས་ཅད་ལས་གྱེན་དུ་བསྐྱོད་པ་དང་། འོད་ཟེར་གྱི་དྲ་བ་ཆེན་པོ་རབ་ཏུ༌དགྱེ་བས་འཇིག་རྟེན་གྱི་མུན་པ་ཐམས་ཅད་རྣམ་པར་སེལ་བ་དང་། ངན་སོང་ཐམས་ཅད་ཀྱི་སྡུག་བསྔལ་ཞི་བར་བྱེད་པ་དང་། སེམས་ཅན་དམྱལ་བའི་ལམ་གྱི་རྒྱུད་ཐམས་ཅད་ནས་རྣམ་པར་བཟློག་པ་དང་། སེམས་ཅན་ཐམས་ཅད་ཀྱི་སྔོན་གྱི་ལས་ཡོངས་སུ་བསྐུལ་བ་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པ་དང་། སེམས་ཅན་ཐམས་ཅད་ལ་ལུས་མངོན་པར་སྟོན་པས་དགའ་ལྡན་གྱི་ཕོ་བྲང་ནས་འཕོས་ཏེ། འཁོར་དང་བཅས་པར་ཁོ་མོའི་ལུས་སུ་ཞུགས་ནས་དེ་དག་ཐམས་ཅད་ཀྱང་ཁོ་མོའི་ཁོང་ན་གོམ་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་དུ་ཡངས་པ་ནས། འཇིག་རྟེན་གྱི་ཁམས་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ཡངས་པའི་འགྲོས་ཀྱིས་རྒྱུ་ཞིང་སྤྱོད་དོ། །

ཕྱོགས་བཅུའི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱི་དེ་བཞིན་གཤེགས་པའི་ཞབས་ཀྱི་དྲུང་གི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་བརྗོད་དུ་མེད་པ་དག་ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་མངལ་གྱི་གནས་དང་། རྣམ་པར་འཕྲུལ་པ་ལྟ་བའི་ཕྱིར་ཁོ་མོའི་ཁོང་དུ༌འདོང་ངོ་། །རྒྱལ་པོ་ཆེན་པོ་བཞི་དང་། བརྒྱ་བྱིན་དང་རབ་མཚེ་མ་དང་རབ་དགའ་ལྡན་དང་རབ་འཕྲུལ་དགའ་དང་དབང་བསྒྱུར་གྱི་ལྷའི་དབང་པོ་རྣམས་དང་། ཚངས་པ་རྣམས་ཀྱང་མངལ་གྱི་གནས་ན་བཞུགས་པའི་བྱང་ཆུབ་སེམས་དཔའ་ལ་ལྟ་བ་དང་། ཕྱག་བྱ་བ་དང་། བསྙེན་བཀུར་བ་དང་། ཆོས་མཉན་པའི་གཏམ་ཉམས་སུ་མྱོང་བར་བྱ་བའི་ཕྱིར་ཉེ་བར་དོང་ཡང་ཁོ་མོའི་རུམ་འདིས་དེ་སྙེད་ཀྱི་འཁོར་གྱི་དཀྱིལ་འཁོར་ཅིག་ཡོངས་སུ་བཟུང་ཡང་ཡངས་པར་གྱུར་པ་ཡང་མེད། མིའི་ལུས་ཐ་མལ་པ་ལས་ཁོ་མོའི་ལུས་ཁྱད་པར་ཅན་དུ་གྱུར་པ་ཡང་མེད་མོད་ཀྱི། འཁོར་གྱི་དཀྱིལ་འཁོར་དེ་སྙེད་ཀྱང་ཡོངས་སུ་བཟུང་ངོ་། །ལྷ་དང་མི་དེ་དག་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་ལོངས་སྤྱོད་སྣ་ཚོགས་དང་། རྒྱན་ཡོངས་སུ་དག་པ་ཡང་མཐོང་བར་གྱུར་ཏོ། །དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་རོ། །རིགས་ཀྱི་བུ་ཇི་ལྟར་ཁོ་མོ་སྐལ་བ་དང་ལྡན་པའི་གླིང་བཞི་པ་འདིའི་འཛམ་བུའི་གླིང་ན་བྱང་ཆུབ་སེམས་དཔའ་ཁོང་ན་ཡོངས་སུ་འཛིན་པ་དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་གླིང་བཞི་པ་ཐམས་ཅད་ཀྱི་འཛམ་བུའི་གླིང་དག་ན་ཡང་རྣམ་པར་འཕྲུལ་པའི་རྒྱན་གྱི་ཚུལ་འདི་ཉིད་ཀྱིས་ཡོངས་སུ་འཛིན་པར་བྱེད་དེ། བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པ་འདི་ཉིད་ཤིན་ཏུ་བསྒོམས་པའི་ཕྱིར་ཁོ་མོའི་ལུས་འདི་གཉིས་སུ་གྱུར་པའང་མེད། མི་གཉིས་པའང་མེད། གཅིག་ལ་གནས་པ་ཡང་མེད། མང་པོ་ལ་གནས་པ་ཡང་མེད་དོ། །

རིགས་ཀྱི་བུ་ཇི་ལྟར་ཁོ་མོ་བཅོམ་ལྡན་འདས་རྣམ་པར་སྣང་མཛད་འདིའི་ཡུམ་དུ་གྱུར་པ་དེ་བཞིན་དུ་སྔོན་གྱི་དེ་བཞིན་གཤེགས་པ་མཐའ་དང་དབུས་མེད་པ༌དག་གི་ཡང་ཡུམ་དུ་གྱུར་ཏོ། །ལ་ལ་ཞིག་ཏུ་བྱང་ཆུབ་སེམས་དཔའ་པད་མོའི་སྦུབས་ནས་རྫུས་ཏེ་སྐྱེ་བ་ཞིག་ཏུ་གྱུར་ན་ཡང་པད་མོའི་ཚལ་གྱི་ལྷ་མོར་གྱུར་ཅིང་ཁོ་མོ་བྱང་ཆུབ་སེམས་དཔའ་ལེན་ཏེ། འཇིག་རྟེན་རྣམས་ཀྱིས་ཀྱང་ཁོ་མོ་ནི་བྱང་ཆུབ་སེམས་དཔའི་ཡུམ་ཡིན་པར་ཤེས་སོ། །ལ་ལ་ཞིག་ཏུ་ཐུ་བར་སྐྱེ་བར་གྱུར་ན་ཡང་དེ་དག་ཏུ་ཡང་ཁོ་མོས་ཐུ་བར་བླངས་ཏེ། བྱང་ཆུབ་སེམས་དཔའི་ཡུམ་དུ་གྱུར་ཏོ། །ལ་ལ་ཞིག་ཏུ་སངས་རྒྱས་ཀྱི་ཞིང་དུ་དེ་བཞིན་འབྱུང་བར་གྱུར་ན་ཡང་དེ་དག་ཏུའང་ཁོ་མོ་སྙིང་པོ་བྱང་ཆུབ་ཀྱི་ལྷ་མོར་གནས་གནས་སོ། །རིགས་ཀྱི་བུ་ཐབས་ཀྱི་སྒོ་ཇི་སྙེད་ཅིག་གིས་བྱང་ཆུབ་སེམས༌དཔའ་སྲིད་པའི་ཐ་མ་པ་འཇིག་རྟེན་དུ་འབྱུང་བ་ཡོངས་སུ་སྟོན་པ་དེ་སྙེད་ཀྱི་ཐབས་ཀྱི་སྒོས་ཁོ་མོ་བྱང་ཆུབ་སེམས་དཔའི་ཡུམ་དུ་གྱུར་ཏེ། རིགས་ཀྱི་བུ་ཁོ་མོ་འཇིག་རྟེན་གྱི་ཁམས་འདི་ན་བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་ཡོངས་སུ་བསྟན་པ་དག་ཏུ་ཡུམ་དུ་གྱུར་པ། དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ལོག་པ་དད་སེལ་དང་། གསེར་ཐུབ་དང་བསོད་སྐྱབས་ཀྱི་ཡུམ་དུ་ཡང་གྱུར་ཏོ། །

དེ་བཞིན་དུ་མ་བྱོན་པའི་དེ་བཞིན་གཤེགས་པ་བསྐལ་པ་བཟང་པོ་པ་རྣམས་ཀྱི་ཡང་ཡུམ་དུ་འགྱུར་ཏེ། འདི་ལྟར་བྱང་ཆུབ་སེམས་དཔའ་བྱམས་པ་དགའ་ལྡན་གྱི་གནས་ན་བཞུགས་ཤིང་ཤི་འཕོ་ཡོངས་སུ་སྟོན་པའི་དུས་ལ་བབ་པ་དང་། འོད་ཟེར་བྱང་ཆུབ་སེམས་དཔའ་ཐམས་ཅད་སྐྱེ་བར་འབྱུང་ཞིང་མངལ་ན་བཞུགས་པའི་རྣམ་པར་འཕྲུལ་པ་ཡོངས་སུ་སྟོན་པའི་འོད་བཀྱེ་ནས་ཆོས་ཀྱི་དབྱིངས་ཐམས་ཅད་ཀྱི་ཚུལ་དང་གཞི་རབ་ཏུ་སྣང་བར་བྱས་ཏེ། ཆོས་ཀྱི་དབྱིངས་ཀྱི་ཚུལ་དང་། གཞི་ཇི་སྙེད་ཅིག་ཏུ་བྱང་ཆུབ་སེམས་དཔའ་བྱམས་པས་མིའི་འཇིག་རྟེན་གྱི་མིའི་དབང་པོའི་རིགས་སུ་ཚེར་སྐྱེ་བ་ཡོངས་སུ་བསྟན་པས་སེམས་ཅན་གདུལ་བར་བྱ་བ་ཇི་སྙེད་ཅིག་ཡོད་པ་དེ་དག་ཐམས་ཅད་དུའང་ཁོ་མོ་བྱང་ཆུབ་སེམས་དཔའི་ཡུམ་དུ་འགྱུར་རོ། །བྱང་ཆུབ་སེམས༌དཔའ་བྱམས་པའི་ཡུམ་དུ་ཇི་ལྟར་འགྱུར་བ་དེ་བཞིན་དུ་བྱམས་པའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བ། སེང་གེ་དང་། དེ་བཞིན་དུ་རབ་ཏུ་སྣང་བ་དང་། དཔལ་དང་སྤྱན་བཟང་པོ་དང་། མེ་ཏོག་དང་། མེ་ཏོག་དཔལ་དང་། རྒྱས་པ་དང་། རྒྱལ་དང་། ཐུགས་བཟང་པོ་དང་། རྡོ་རྗེ་དང་། རྡུལ་དང་བྲལ་བ་དང་། ཟླ་བ་སྒྲོན་མ་འཛིན་པ་དང་། གྲགས་པ་དང་། རྡོ་རྗེ་དག་པ་དང་། དོན་གཅིག་ཏུ་སྟོན་པ་དང་། མི་དཀར་ཡན་ལག་དང་། ཕ་རོལ་ཏུ་ཕྱིན་པ་དང་། རིན་པོ་ཆེ་འོད༌འཕྲོ་བའི་རི་བོ་དང་། སྒྲོན་མ་ཆེན་པོ་འཛིན་པ་དང་། པད་མོ་དམ་པ་དང་། སྒྲ་རྣམ་པར་གྲགས་པ་དང་། ཡོན་ཏན་དཔག་ཏུ་མེད་པ་མངའ་བ་དང་། མར་མེའི་དཔལ་དང་། ཡན་ལག་རྣམ་པར་བརྒྱན་པ་དང་། ལེགས་པར་བཞུད་པ་དང་། བྱམས་པའི་དཔལ་དང་། སྤྲུལ་པ་བཟང་པོ་དང་། གནས་དང་བྲལ་བ་དང་། གཟི་བརྗིད་འབར་བ་དང་། གསུང་མཐའ་ཡས་པ་དང་། ལེན་པ་མེད་པའི་སྤྱན་དང་། ལེན་པ་མེད་པའི་མུ་ཁྱུད་དང་། ཡིད་གཉིས་རྣམ་པར་སེལ་བ་དང་། ཡོངས་སུ་དག་པ་དང་། འོད་ཤིན་ཏུ་ཡངས་པ་དང་། གྲགས་པ་དག་པས་བྱུང་བ་དང་། སྤྲིན་གྱི་དཔལ་དང་། གཙུག་ཕུད་རྣམ་པར་མཛེས་པ་དང་། ཤིང་གི་རྒྱལ་པོ་དང་། རིན་པོ་ཆེའི་དཀྱིལ་འཁོར་རིན་པོ་ཆེ་ཐམས་ཅད་ཀྱིས་རྣམ་པར་བརྒྱན་པའི་ཁ་དོག་དང་། བློ་གྲོས་རྒྱ་མཚོ་དང་། རིན་པོ་ཆེ་བཟང་པོ་དང་། སྟོབས་ལ་ཐུབ་པ་མེད་པ་དང་། དགོངས་པ་ཡོངས་སུ་རྫོགས་པ་དང་། དབང་ཕྱུག་ཆེན་པོ་དང་། དབང་པོའི་དཔལ་དང་། མེའི་དཔལ་དང་། མཆོག་གི་དཔལ་དང་། ཙན་དན་གྱི་སྤྲིན་དང་། མི་དཀར༌རིངས་པོའི་སྤྱན་དང་། བློ་གྲོས་དམ་པ་དང་། བློ་གྲོས་རྣམ་པར་བསྒོམས་པ་དང་། སྒྲུབ་པའི་རྒྱལ་པོ་དང་། སྦྱོང་བའི་རྒྱལ་པོ་དང་། རྡོ་རྗེ་བློ་གྲོས་དང་། རྣམ་པར་བརྒྱན་པ་དང་། ཕུན་སུམ་སྣ་ཚོགས་དང་། ཟེ་བ་དགའ་བ་དང་། དབང་ཕྱུག་ལྷ་དང་། གཙུག་ཏོར་དཔལ་དང་། ཡེ་ཤེས་རྡོ་རྗེའི་རི་བོ་དང་། དཔལ་གྱི་སྙིང་པོ་དང་། གསེར་གྱི་དྲ་བས་སྐུ་རྣམ་པར་བརྒྱན་པ་དང་། ཤིན་ཏུ་རྣམ་པར་ཕྱེ་བ་དང་། དབང་ཕྱུག་ལྷ་དང་། དབང་ཆེན་ལྷ་དང་། མི་དམིགས་པའི་དཔལ་དང་། རྣམ་པར་དག་པས་དགྱེས་པ་དང་། འོད་འཕྲོ་མངའ་བ་དང་། ཆུའི་དཔལ་དང་། རྣམ་དག་བློ་གྲོས་དང་། ཐེག་པ་དམ་པ་དང་། མ་ཉམས་པའི་ཡོན་ཏན་འབྱུང་བ་དང་། དགྲ་ལས་དབེན་པ་དང་། གསུང་སྒྲོག་པ་དང་། དབང་དུ་གྱུར་པའི་ཡོན་ཏན་གཟི་བརྗིད་དང་། རྣམ་པར་སྣང་མཛད་དཔལ་དང་། དྲི་ཞིམ་པོའི་ལོངས་སྤྱོད་དང་། དྲི་ཞིམ་པོ་རྣམ་པར་ཕྱེ་བ་དང་། ཡན་ལག་རྣམ་པར་ཕྱེ་བ་དང་། ས་ག་བཟང་པོ་དང་། ཞལ་ནས་སྤོས་ཐམས་ཅད་འོད་དུ་འཕྲོ་བ་དང་། རྡོ་རྗེ་རིན་པོ་ཆེས་རྣམ་པར་བརྒྱན་པ་དང་། རབ་ཏུ་བཞད་པའི་སྤྱན་དང་། འདོད་ཆགས་རྡུལ་བཅོམ་དང་། སྐུ་མཆོག་ཏུ་འཁྲུངས་པ་དང་། ལྷའི་དབྱིག་དང་། རླབས་ཆེན་ལྷ་དང་། འགོག་པར་གཞོལ་བ་དང་། ཐུགས་རྣམ་པར་སངས་རྒྱས་པ་དང་། རྡུལ་རྣམ་པར་བསྩལ་པ་དང་། འོད་འཕྲོ་མངའ་ཆེན་དང་། ཉེ་བར་ཞི་བ་མངའ་བ་དང་། ས་གའི་ལྷ་དང་། རྡོ་རྗེ་རི་བོ་དང་། ཡེ་ཤེས་འོད་འཕྲོ་འབར་བའི་སྐུ་དང་། བདེ་བ་མཛད་པ་དང་། བསྐྲུན་པའི་སྟག་དང་། དགེ་བ་ཡོངས་སུ་རྫོགས་པ་དང་། གྲགས་པ་ཡིད་དུ་འོང་བས་བཟང་བ་དང་། མཐུས་རྣམ་པར་གནོན་པ་དང་། དོན་དམ་པ་རྣམ་པར་གནོན་པ་དང་། ཞི་བའི་འོད་ཟེར་དང་། གཅིག་ཏུ་འཕགས་པ་དང་། དབྱངས་ཟབ་མོ་དང་། སའི་བདག་པོ་དང་། དཔག་ཏུ་མེད་པ་དང་། དབྱངས་ཀྱི་དཔལ་དང་། རྣམ་པར་གྲགས་པ་དང་། ལོངས་སྤྱོད་མཐུན་པ་དང་། ལོངས་སྤྱོད་ཚོགས་པ་དང་། སྨན་པའི་དམ་པ་དང་། ཡོན་ཏན་ཟླ་བ་དང་། བཞད་པའི་གཟི་བརྗིད་དང་། ཡོན་ཏན་བསགས་པ་དང་། ཟླ་བ་འཕགས་པ་དང་། ཉི་མའི་ལྷ་དང་། འཇིགས་པར་གྲགས་པ་དང་། འོད་ཟེར་གྱི་ཞལ་དང་། སཱ་ལའི་དབང་པོའི་ལྷུན་དང་། གྲགས་པ་དང་། སྨན་གྱི་རྒྱལ་པོ་དང་། རིན་ཆེན་མཆོག་དང་། བློ་གྲོས་རྡོ་རྗེ་དང་། དཀར་པོའི་དཔལ་དང་། གཞི་ཤིན་ཏུ་སྦྱངས་པ་དང་། རིན་ཆེན་རྒྱལ་པོ་དང་། གྲགས་པ་ཆེན་པོ་དང་། ཤུགས་དྲག་འཛིན་པ་དང་། མི་དཔོགས་འོད་དང་། འོད་འཕྲོ་ཆེན་པོས་བཞུགས་པ་དང་། དོན་ཡོད་པའི་ཆོས་ལ་མངའ་བ་དང་། བརྩོན་འགྲུས་མ་ཉམས་པ་དང་། དག་པའི་ལྷ་དང་། འོད་བརྟན་པ་དང་། ཀུན་གྱི་བཤེས་གཉེན་དང་། རྣམ་པར་གྲོལ་བའི་དབྱངས་དང་། རྣམ་པར་བསྒྲགས་པའི་རྒྱལ་པོ་དང་། ཚིག་གཅོད་པ་དང་། ཙམ་པ་ཀ་དྲི་མ་མེད་པའི་འོད་དང་། ཁ་ན་མ་ཐོ་བ་མི་མངའ་བ་དང་། ཟླ་བ་རྣམ་པར་འཕགས་པ་དང་། སྒྲོན་མ་འཛིན་པ་དང་། སྐུ་རྣམ་པར་མཛེས་པ་དང་། བརྗོད་དུ་མེད་པར་འཕགས་པ་དང་། འགྲོ་བའི་བཤེས་གཉེན་དང་། འོད་ཟེར་མང་པོ་དང་། དབྱངས་ཀྱི་ཡན་ལག་དཔའ་བོ་དང་། ཆུའི་ལྷའི་སྤྱན་དང་། མོས་པའི་བློ་གྲོས་མངའ་བའི་གཟི་བརྗིད་དང་། མེ་ཏོག་ཀུན་དའི་དཔལ་དང་། མཆོད་པའི་ཟླ་བ་དང་། བློ་མི་མངའ་བ་དང་། ཆགས༌པ་མི་མངའ་བ་དང་། མི་དམིགས་པའི་བློ་གྲོས་དང་། ཕུང་པོ་བསགས་པ་དང་། ངན་སོང་རབ་ཏུ་འཇོམས་པ་དང་། མེ་ཏོག་དམ་པ་དང་། སེང་གེ་རྣམ་པར་སྒྲོག་པ་དང་། དོན་མི་དམའ་བ་དང་། བསྒྲིབས་པ་མེད་པར་གཟིགས་པ་དང་། ཕ་རོལ་གྱི་ཚོགས་འཇོམས་པ་དང་། རླུང་གི་མུ་ཁྱུད་དང་། སྙིང་པོ་མི་གཡོ་བ་དང་། སྙིང་པོ་བཟང་པོ་དང་། གཞན༌གྱིས་མི་ཐུབ་པའི་རི་བོ་དང་། མི་གནས་ཡེ་ཤེས་དང་། མཐའ་ཡས་བཞུགས་པ་དང་། གཡུལ་དུ་བརྟན་པ་དང་། སྤྱོད་པས་གྲུབ་པ་དང་། བླ་མས་བོན་པ་དང་། མཆོག་ཏུ་དགའ་བ་དང་། རྗེས་སུ་འཛིན་པའི་ཟླ་བ་དང་། ལྷུན་མི་གཡོ་བ་དང་། ཐུགས་དྲག་པོ་དང་། ཐུགས་བརྩེ་བའི་བློ་གྲོས་དང་། ཤིན་ཏུ་མཐོ་འཛིན་པ་དང་། འོད་ཟེར་མུ་ཁྱུད་དང་། མཚན་དཔེ་མེད་པ་དང་། གཟི་བརྗིད་མཉམ་པ་དང་། ཐམས་ཅད་ཁ་དོག་དང་། མཚན་མ་མེད་པའི་ཤེས་རབ་དང་། མི་གཡོ་བའི་ལྷ་དང་། བསམ་གྱིས་མི་ཁྱབ་པའི་དཔལ་དང་། རྣམ་པར་ཐར་པའི་ཟླ་བ་དང་། བླ་ན་མེད་པའི་རྒྱལ་པོ་དང་། ཟླ་བའི་ཕུང་པོ་དང་། མཆོད་པའི་ཚངས་པ་དང་། སྤྱན་མི་འགྱུར་བ་དང་། བྱམས་པའི་རིགས་དང་། ཕྲིན་ལས་འཕགས་པ་དང་། གཉེར་བའི་ཆོས་ཀྱི་བློ་གྲོས་དང་། བླ་ན་མེད་པའི་དཔལ་དང་། ཚངས་པའི་ལྷ་དང་། ཡོན་ཏན་བསམ་གྱིས་མི་ཁྱབ་པའི་འོད་དང་། བླ་ན་མེད་པའི་ཆོས་ཀྱི་སྤྱོད་ཡུལ་དང་། མཐའ་ཡས་བཟང་པོ་དང་། ཚུལ་དང་འདྲ་བའི་གཟུངས་དང་། བྱང་ཆུབ་སེམས་དཔའ་ཤིན་ཏུ་མཐོ་བའི་ལྷ་དག་སྟེ། རིགས་ཀྱི་བུ་དེ་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་མ་བྱོན་པའི་དེ་བཞིན་གཤེགས་པ་བྱམས་པ་ལ་སོགས་ཏེ། སྨོས་པ་འདི་དག་ལ་སོགས་པ་བསྐལ་པ་བཟང་པོའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ཡུམ་དུའང་ཁོ་མོ་ཉིད་འགྱུར་རོ། །

འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པའི་ཆོས་ཀྱི་དབྱིངས་ཀྱི་ཚུལ་མཐའ་དང་དབུས་མེད་པ་ལ་ཞུགས་ཏེ། ཇི་ལྟར་དེ་བཞིན་གཤེགས་པ་བྱམས་པའི་ཡུམ་དུ་ཡོན་ཏན་གྱི་ཁྱད་པར་བརྗོད་དུ་མེད་པས་འགྱུར་བ་དེ་བཞིན་དུ་ཡོན་ཏན་གྱི་ཁྱད་པར་བརྗོད་དུ་མེད་པའི་ཡང་བརྗོད་དུ་མེད་པས་དེ་བཞིན་གཤེགས་པ་སེང་གེ་ནས་དེ་བཞིན་གཤེགས་པ་སྣང་བའི་བར་གྱི་ཡུམ་དུ་འགྱུར་རོ། །ཇི་ལྟར་དེ་བཞིན་གཤེགས་པ་བསྐལ་པ་བཟང་པོ་བ་རྣམས་ཀྱི་ཡུམ་དུའང་འགྱུར་བ་དེ་བཞིན་དུ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་ཐམས་ཅད་ཀྱི་འཇིག་རྟེན་གྱི་ཁམས་ཀྱི་རྒྱུད་ཐམས་ཅད་དང་། འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ན་འཛམ་བུ་གླིང་ཡོད་པ་ཐམས་ཅད་དུ་ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱད་པ་སྤྱོད་ཅིང་བསྐལ་པ་ཐམས་ཅད་དུ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱིན་གྱིས་བརླབས་ཏེ། མ་བྱོན་པའི་དེ་བཞིན་གཤེགས་པ་བྱང་ཆུབ་སེམས༌དཔར་འགྱུར་བ་ཐམས་ཅད་ཀྱི་ཡུམ་དུ་ཡང་འགྱུར་རོ། །

དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟང་གིས་ལྷ་མོ་སྒྱུ་མ་ལ་འདི་སྐད་ཅེས་སྨྲས་སོ། །འཕགས་མ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི་རྣམ་པས་རྣམ་པར་བརྒྱན་པ་འདི་བརྙེས་ནས་ཇི་སྲིད་ཅིག་ལགས། སྨྲས་པ། རིགས་ཀྱི་བུ་སྔོན་འདས་པའི་དུས་བསྐལ་པ་བསམ་གྱིས་མི་ཁྱབ་པ། སེམས་ཀྱི་ཡུལ་ལས་འདས་པ་རིགས་དང་ལྡན་པའི་བྱང་ཆུབ་སེམས་དཔའི་མིག་གི་ལམ་གྱིས་རྣམ་པར་དམིགས་པ་རྣམ་པར་ཤེས་པས་བགྲང་བ་ལས་ཡོངས་སུ་འདས་པའི་ཕ་རོལ་ཅིག་ཏུ་བསྐལ་པ་དགེ་བའི་འོད་ཅེས་བྱ་བ་ཞིག་བྱུང་སྟེ། བསྐལ་པ་དགེ་བའི་འོད་དེ་ལ་འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་དཔལ་ཞེས་བྱ་བ་རྣམ་པར་དག་ལ་ཀུན་ནས་ཉོན་མོངས་པ་རིན་པོ་ཆེ་དུ་མ་ལས་གྲུབ་པ་ཁོར་ཡུག་དང་བཅས་པ་རི་རབ་དང་རྒྱ་མཚོར་བཅས་པ། འགྲོ་བ་ལྔའི་རྒྱུད་དང་བཅས་པ། སྣ་ཚོགས་བལྟ་ན་མཛེས་པ་ཞིག་བྱུང་སྟེ། འཇིག་རྟེན་གྱི་ཁམས་རི་བོ་ཤིན་ཏུ་མཐོ་བའི་དཔལ་དེར་གླིང་བཞི་པ་བྱེ་བ་བརྒྱ་ཕྲག་བཅུ་བྱུང་སྟེ། གླིང་བཞི་པ་བྱེ་བ་བརྒྱ་ཕྲག་བཅུ་པོ་དེ་དག༌གི་དབུས་ན་གླིང་བཞི་པ་དབུ་མ་སེང་གེ་རྒྱལ་མཚན་དམ་པའི་གཟི་བརྗིད་ཅེས་བྱ་བ་ཞིག་ཡོད་པར་གྱུར་ཏེ། གླིང་བཞི་པ་དེར་རྒྱལ་པོའི་གནས་བྱེ་བ་བརྒྱ་ཕྲག་བརྒྱད་ཅུ་བྱུང་བར་གྱུར་ཏོ། །རྒྱལ་པོའི་གནས་བྱེ་བ་བརྒྱ་ཕྲག་བརྒྱད་ཅུ་པོ་དེ་དག་གི་དབུས་སུ་རྒྱལ་པོའི་གནས་དབུ་མ་རྒྱལ་མཚན་གྱི་དམ་པ་དང་ལྡན་པ་ཞེས་བྱ་བ་བྱུང་སྟེ། དེར་འཁོར་ལོས་སྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་བྱ་བ་བྱུང་ངོ་། །རྒྱལ་པོའི་གནས་རྒྱལ་མཚན་གྱི་དམ་པ་དང་ལྡན་པ་དེར་སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་ཅེས་བྱ་བ་ཞིག་བྱུང་སྟེ། དེ་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བ་འདུག་འདུག་གོ །སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་དེ་ལ་བྱང་ཆུབ་སེམས་དཔའ་རྒྱལ་མཚན་དྲི་མ་མེད་པ་ཞེས་བྱ་བ་ཞིག་ཐམས་ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བའི་ཕྱིར་འདུག་པ་ལས་དེའི་ཐམས་ཅད་མཁྱེན་པ་ཉིད་ཀྱི་ཆོས་ཁོང་དུ་ཆུད་པར་བྱ་བ་ལ་བར་ཆད་བྱ་བའི་ཕྱིར་བདུད་ཁ་དོག་བཟང་པོའི་འོད་ཅེས་བྱ་བ་བདུད་ཀྱི་སྡེ་ཆེན་པོའི་འཁོར་དང་ལྡན་པ་ཞིག་ལུས་མི་སྣང་བར་མ་བྱས་པར་དྲུང་དུ་ཕྱིན་པར་གྱུར་ཏོ། །འཁོར་ལོས་སྒྱུར་བ་གཟི་བརྗིད་ཆེན་པོའི་མཐུ་དེ་ཡང་བྱང་ཆུབ་སེམས་དཔའི་དབང་ཐོབ་པའི་རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ་ཞིག་སྟེ། དེས་བདུད་ཀྱི་སྡེ་དེ་བས་ཀྱང་འཕགས་ལ་ཆེས་མང་བའི་དཔུང་གི་ཚོགས་ཆེན་པོ་མངོན་པར་སྤྲུལ་ཏེ། བདུད་ཀྱི་སྡེ་ཕམ་པར་བྱ་བའི་ཕྱིར་སྙིང་པོ་བྱང་ཆུབ་དེའི་འཁོར་ཀུན་ནས་ཡོངས་སུ་བསྐོར་བ་དང་། དེས་བདུད་ཀྱི་སྡེ་ཆེན་པོ་དེ་ཡང་རྣམ་པར་གཏོར་བར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་རྒྱལ་མཚན་དྲི་མ་མེད་པ་དེས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །

དེ་ནས་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་གྱིས་འཁོར་ལོས༌སྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ལ་བུའི་འདུ་ཤེས་བསྐྱེད་ནས། དེ་བཞིན་གཤེགས་པ་དེའི་ཞབས་གཉིས་ལ་ཕྱག་འཚལ་ནས་སྨོན་ལམ་བཏབ་པ། བཅོམ་ལྡན་འདས་བདག་གང་དང་གང་དུ་སྐྱེས་པ་དེ་དང་དེར་འཁོར་ལོས་སྒྱུར་བ་གཟི་བརྗིད་ཆེན་པོའི་མཐུ་འདི་བདག་གི་བུར་གྱུར་ཅིག །ནམ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་བ་དེའི་ཚེའང་། བདག་ཉིད་དེའི་མར་གྱུར་ཅིག །ཅེས་ནས་དེས་སྨོན་ལམ་དེ་སྐད་དུ་བཏབ་སྟེ། སྙིང་པོ་བྱང་ཆུབ་ཡལ་ག་སྣ་ཚོགས་ཀྱི་འོད་དེ་ཉིད་ལ་གནས་ཤིང་བསྐལ་པ་འོད་བཟང་པོ་དེ་ཉིད་ལ་དེ་བཞིན་གཤེགས་པ་ཁྲག་ཁྲིག་ཕྲག་བཅུ་བསྙེན་བཀུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་པ་དེ་གཞན་ཞིག་ཡིན་པ་ཙམ་དུ་སེམས་ན་རིགས་ཀྱི་བུ་ཁྱོད་ཀྱིས་དེ་ལྟར་མི་བལྟ་སྟེ། ཁོ་མོ་ནི་དེའི་ཚེ་དེའི་དུས་ན་སྙིང་པོ་བྱང་ཆུབ་ཀྱི་ལྷ་མོ་མིག་གི་དཔལ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་འཁོར་ལོས༌སྒྱུར་བ་གཟི་བརྗིད་ཆེན་པོའི་མཐུ་ཞེས་བྱ་བ་བྱང་ཆུབ་སེམས་དཔའི་དབང་ཐོབ་པ། རྫུ་འཕྲུལ་ཆེན་པོའི་རྣམ་པར་འཕྲུལ་པས་བྱུང་བ་བདུད་ཀྱི་སྡེ་ཆེན་པོ་རྣམ་པར་འཐོར་བར་བྱེད་བྱེད་པ་དེ་གཞན་ཞིག་ཡིན་པ་ཙམ་དུ་སེམས་ན་ནི་དེ་ལྟར་མི་བལྟ་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འདི་ནི་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་གཟི་བརྗིད་ཆེན་པོའི་མཐུ་ཞེས་བྱ་བར་གྱུར་ཏོ། །རིགས་ཀྱི་བུ་དེ་ལྟར་ཁོ་མོ་དེ་ནས་ཉེ་བར་བཟུང་ནས་གང་དང་གང་དུ་སྐྱེས་པ་དེ་དག་ཐམས་ཅད་དུའང་འདི་ནི་ཁོ་མོའི་བུར་གྱུར་ཏེ། སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའི་སྤྱད་པ་སྤྱོད་ཅིང་འགྲོ་བའི་རྒྱུད་ཀྱི་སྒོ་ཐམས་ཅད་དང་། སྐྱེ་གནས་ཀྱི་སྒོ་ཐམས་ཅད་དང་། དགེ་བའི་རྩ་བའི་སྒོ་ཐམས་ཅད་དང་། བྱང་ཆུབ་སེམས་དཔའི༌སྤྱོད་པའི་རྒྱུད་ཀྱི་ཚུལ་ཐམས་ཅད་དང་། སྐྱེས་པའི༌རབས་ཀྱི་ཚུལ་ཐམས་ཅད་དང་། ལྷའི་དབང་པོའི་ཚེ་ཐམས་ཅད་དང་། འཇིག་རྟེན་གྱི་དབང་པོའི་འགྲོ་བའི་རྒྱུད་ཐམས་ཅད་དང་། དབང་ཕྱུག་གི་ས་ཐམས་ཅད་དང་། འགྲོ་བའི་རྒྱུད་དུ་སྣང་བ་ཐམས་ཅད་གང་དང་གང་སེམས་ཅན་ཡོངས་སུ་སྨིན་པར་བྱ་བའི་དོན་དུ་སྐྱེས་པར་གྱུར་པ་དེ་དག་ཐམས་ཅད་དུ་ཡང་ཁོ་མོ་ཉིད་འདིའི་ཡུམ་དུ་གྱུར་ཏེ། སྲིད་པ་ཐམས་ཅད་དུ་ཡང་ཁོ་མོ་ཉིད་དང་འབྲལ་བ་མེད་པར་ཡུམ་དུ་གྱུར་ཏོ། །བྱང་ཆུབ་སེམས་དཔའི་སྐྱེ་བའི་སྒོ་ཐམས་ཅད་དུ་སྐད་ཅིག་སྐད་ཅིག་བྱང་ཆུབ་སེམས་དཔའི་སྐྱེ་བའི་རྣམ་པར་འཕྲུལ་པ་བསྟན་པར་གྱུར་པ་དེ་དག་ཐམས་ཅད་དུའང་ཁོ་མོ་ཉིད་འདིའི་ཡུམ་དུ་གྱུར་ཏོ། །འདས་པའི་དེ་བཞིན་གཤེགས་པ་མཐའ་དང་དབུས་མེད་པ་ཚད་མེད་པ་དག་གི་ཡུམ་དུའང་ཁོ་མོ་གྱུར་ཏོ། །ཕྱོགས་བཅུའི་དེ་བཞིན་གཤེགས་པ་ད་ལྟར་བྱུང་བ་མཐའ་དང་དབུས་མེད་པ་ཚད་མེད་པ་དག་གི་ཡུམ་དུ་ཡང་ཁོ་མོ་གྱུར་ཏེ། དེ་བཞིན་གཤེགས་པ་ཇི་སྙེད་ཅིག་གི་སྲིད་པ་ཐ་མ་ལ་ཁོ་མོ་བྱང་ཆུབ་སེམས་དཔའི་ཡུམ་དུ་གྱུར་པའི་དེ་བཞིན་གཤེགས་པ་དེ་དག་ཐམས་ཅད་ཀྱི་སྐུ་ལྟེ་བའི་དཀྱིལ་འཁོར་ནས་འོད་ཟེར་མང་པོ་བྱུང་ཞིང་ཁོ་མོའི་ལུས་དང་སེམས་རབ་ཏུ་སྣང་བར་མཛད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་སྨོན་ལམ་ཆེན་པོའི་ཡེ་ཤེས་སྒྱུ་མའི༌རྣམ་པས་རྣམ་པར་བརྒྱན་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའི་སྙིང་རྗེ་ཆེན་པོའི་སྙིང་པོ་དང་ལྡན་པ་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་བྱ་བ་དང་། གདུལ་བས་མི་ངོམས་པའི་ལྟོ་ཅན་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ། བ་སྤུའི་རྩེ་མོ་ལས་འབྱུང་བར་སྟོན་པ་ལ་དབང་བསྒྱུར་བ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་སུམ་ཅུ་རྩ་གསུམ་གྱི་དབང་པོའི་གནས་དེ་ཉིད་ན་ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་ཅེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །

དེ་ནས་ཚོང་དཔོན་གྱི་བུ་ནོར་བཟང་གིས་ལྷ་མོ་སྒྱུ་མའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ་ལྷ་མོ་སྒྱུ་མའི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་ལྷའི་བུ་མོ་ལྷ་དབང་འོད་ཅེས་བྱ་བས་དྲན་པ་ཐོགས་པ་མེད་པ་རྣམ་པར་དག་པའི་བརྒྱན་པའི་ཏིང་འཛིན་གྱི་ཡོན་ཏན་ཐོབ་ཚུལ་དང་དེའི་ཕན་ཡོན། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་སུམ་ཅུ་རྩ་གསུམ་གྱི་དབང་པོའི་གནས་གང་ན་བ་དང་། ལྷའི་བུ་དྲན་པ་དང་ལྡན་པའི་བུ་མོ་ལྷ་དབང་འོད་གང་ན་བ་དེར་སོང་སྟེ་ཕྱིན་ནས། ལྷའི་བུ་མོ་ལྷ་དབང་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ལྷའི་བུ་མོ་ལྷ་དབང་འོད་ཀྱི་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་མ་ལྷ་མོ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་མ་ལྷ་མོ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བསྟན་དུ་གསོལ། དེ་སྐད་ཅེས་སྨྲས་པ་དང་། ལྷའི་བུ་མོ་ལྷ་དབང་འོད་ཀྱིས་ཚོང་དཔོན་གྱི་བུ་ནོར་བཟང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་མོ་ནི་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་ཞེས་བྱ་བ་ཐོབ་པ་སྟེ། རིགས་ཀྱི་བུ་ཁོ་མོས་མངོན་པར་དྲན་པ་བསྐལ་པ་ཨུད་པ་ལ་ཞེས་བྱ་བ་ཞིག་བྱུང་བ་ལ་ཁོ་མོས་དེ་བཞིན་གཤེགས་པ་ཆུ་ཀླུང༌གང་གཱའི་བྱེ་མ་སྙེད་ཅིག་བསྙེན་བཀུར་ཏེ། དེ་དག་མངོན་པར་བྱུང་བའི་ཚེའང་ཡོངས་སུ་བསྲུང་བ་བྱས་སོ། །མཆོད་པ་བྱས་སོ། །ལོངས་སྤྱོད་པའི་དོན་དུ་བཟའ་ཤིང་གི་ར་བ་གསོལ་ཏོ། །

སངས་རྒྱས་བཅོམ་ལྡན་འདས་དེ་དག་བྱང་ཆུབ་སེམས་དཔར་གྱུར་ཏེ། ཡུམ༌གྱི་སྐུ་ན་བཞུགས་པ་དང་། བལྟམ་པ་དང་གཤེགས་སྟབས་བདུན་དུ་བཞུད་པ་དང་། སེང་གེའི་ང་རོ་ཆེན་པོ་སྒྲོགས་པ་དང་། གཞོན་ནུའི་ས་ལ་བཞུགས་པ་དང་། བཙུན་མོའི་འཁོར་གྱི་ནང་ན་བཞུགས་པའམ། མངོན་པར༌འབྱུང་བའམ། བྱང་ཆུབ་ཏུ་མངོན་པར་རྫོགས་པར་འཚང་རྒྱ་བའམ། ཆོས་ཀྱི་འཁོར་ལོ༌བསྐོར་བའམ། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པ་མཛད་པའི་ཚེ། སེམས་ཅན་ཡོངས་སུ་སྨིན་པ་དང་། རྣམ་པར་གདུལ་བ་མཛད་པ་དེ་དག་ཐམས་ཅད་ཀྱང་ཐུགས་དང་པོ་བསྐྱེད༌པ་ནས་ཉེ་བར་བཟུང་བ་ཚུན་ཅད་དམ་པའི་ཆོས་མཐར་ཐུག་པར་ཟད་ཀྱི་བར་དུ་ཁོ་མོས་ཤེས་སོ། །དྲན་ནོ། །རྗེས་སུ་དྲན་ནོ། །བཟུང་ངོ་། །ཡོངས་སུ་བཟུང་ངོ་། །ཉེ་བར་བཟུང་ངོ་། །རྗེས་སུ་འབྲང་བར་བྱེད་དོ། །བསྐལ་པ་ས་བཟང་པོ་ཞེས་བྱ་བ་ཞིག་བྱུང་བ་དེ་ལ། ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་བཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་གྲགས་པ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་དམིགས་སུ་མེད་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བསྙེན་བཀུར་ཏོ། །བསྐལ་པ་འོད་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ༌འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་འོད་གཞལ་དུ་མེད་པ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་ཉི་ཤུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་དཔལ་ཤིན་ཏུ་འབར་བ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང༌གང་གཱའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་སྙིང་རྗེ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང༌གང་གཱ་བརྒྱད་ཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་རྒྱལ་བར་གྱུར་པ༌ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང་གངྒཱ་དྲུག་ཅུའི་བྱེ་མ་སྙེད་ཅིག་བསྙེན་བཀུར་ཏོ། །བསྐལ་པ་ཟླ་བ་བཟང་པོ་ཞེས་བྱ་བ་ཞིག་བྱུང་བ་དེ་ལ་ཁོ་མོས་དེ་བཞིན་གཤེགས་པ་ཆུ་ཀླུང༌གང་གཱ་བདུན་ཅུའི་བྱེ་མ་སྙེད་ཅིག་བསྙེན་བཀུར་ཏོ། །རིགས་ཀྱི་བུ་དེ་ལྟར་ཚུལ་དེ་བཞིན༌དུ་ཁོ་མོ་རྟག་ཏུ་རྒྱུན༌མ་ཆད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་བྲལ་བར་མ་གྱུར་པ་ནི་བསྐལ་པ་ཆུ༌ཀླུང་གངྒཱའི་བྱེ་མ་སྙེད་ཅིག་དྲན་ཏེ། ཁོ་མོས་དེ་བཞིན་གཤེགས་པ་དེ་དག་ཐམས་ཅད་ལས་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་འདི་ཐོས་སོ། །ཐོས་ནས་ཀྱང་ཡོངས་སུ་བཟུང་ངོ་། །ཇི་སྐད་དུ་གསུངས་པ་བཞིན་དུ་ཁོང་དུ་ཆུད་དོ། །རྣམ་པར་ཐར་པ་འདི་ཉིད་ལ་ཁོ་མོ་རྟག་ཏུ་རྒྱུན་མ་ཆད་པར་རྗེས་སུ་ཞུགས་པར་གནས་གནས་ཏེ། དེ་བཞིན་གཤེགས་པ་དེ་དག་གི་བྱང་ཆུབ་སེམས་དཔའི་ས་ཉེ་བར་བཟུང་བ་ནས་དམ་པའི་ཆོས་གནས་པ་ཟད་པའི་མཐར་ཐུག་གི་བར་གྱི་སངས་རྒྱས་ཀྱི་རྣམ་པར་འཕྲུལ་པ་ཇི་སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའི་རྣམ་པར་ཐར་པ་དྲན་པ་ཐོགས་པ་མེད་ལ་རྣམ་པར་དག་པས་བརྒྱན་པ་འདི་དྲན་ནོ། །རྗེས་སུ་དྲན་ནོ། །བཟུང་ངོ་། །ཡོངས་སུ་བཟུང་ངོ་། །ཉེ་བར་བཟུང་ངོ་། །རྗེས་སུ་འབྲང་བར་བྱེད་དོ། །རིགས་ཀྱི་བུ་ཁོ་མོས་བྱང་ཆུབ་སེམས་དཔའི་རྣམ་པར་ཐར་པ་འདི་ཤེས་པར་ཟད་ན། ཁོ་མོས་བྱང་ཆུབ་སེམས་དཔའ༌མུན་པའི་མུན་ནག་དང་བྲལ་བ། འཁོར་བའི་ནམ་ནངས་པ། སྒྲིབ་པ་དང་བྲལ་བ། གཉིད་མེད་པ་ལ་མོས་ཤིང་། དགའ་བ་སྙོམས་པ་དང་། ལེ་ལོ་རྣམ་པར་སྤངས་པ། ལུས་ཀྱི་འདུ་བྱེད་ཤིན་ཏུ་བྱང་བ། རྟག་པར་ཆོས་ཐམས་ཅད་ཀྱི་རང་བཞིན་ཁོང་དུ་ཆུད་པས་ཤིན་ཏུ་དག་པ། སྟོབས་བཅུ་རྣམ་པར་དག་པ་ཁོང་དུ་ཆུད་པ། དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། སོང་རིགས་ཀྱི་བུ་གྲོང་ཁྱེར་ཆེན་པོ་སེར་སྐྱའི་གནས་ན་བྱིས་པའི་སློབ་དཔོན་ཀུན་གྱི་བཤེས་གཉེན་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དགེ་བའི་རྩ་བ་བསམ་གྱིས་མི་ཁྱབ་པའི་ཤུགས་དྲག་པོ་རྣམ་པར་འཕེལ་བས། ལྷའི་བུ་མོ་ལྷ་དབང་འོད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལྷའི་བུ་མོ་ལྷ་དབང་འོད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ལྷའི་བུ་མོ་ལྷ་དབང་འོད་ཀྱི་དྲུང་ནས་སོང་ངོ་།། །།

གཞོན་ནུ་ནོར་བཟང་གི་དགེ་བའི་བཤེས་གཉེན་དགེ་བསྙེན་མ་བཟང་མོ་མཆོག་ཅེས་བྱ་བས་ཐོགས་པ་མེད་པའི་ཏིང་ངེ་འཛིན་གྱི་ཕན་ཡོན་གྱི་རྣམ་གྲངས་གསུངས་ཚུལ། སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ་ལས་བཏུས།

དེ་ནས་ཚོང་དཔོན་གྱི་བུ་ནོར་བཟང་ལྗོངས་དག་པའི་གྲོང་ཁྱེར་འཚོ་བ་གང་ན་བ་དང་། དགེ་བསྙེན་མ་བཟང་མོའི་མཆོག་གང་ན་བ་དེར་སོང་སྟེ་ཕྱིན་ནས། དགེ་བསྙེན་མ་བཟང་མོའི་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས། དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། དགེ་བསྙེན་མ་བཟང་མོའི་མཆོག་གི་མདུན་དུ་འདུག་ནས་ཐལ་མོ་སྦྱར་ཏེ། འདི་སྐད་ཅེས་སྨྲས་སོ། །

འཕགས་མ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་མ་འཚལ་ཏེ། འཕགས་མ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་ཏུ་བགྱི་བ་འཕགས་མས་བདག་ལ་བསྟན་དུ་གསོལ། དེས་སྨྲས་པ་རིགས་ཀྱི་བུ་ཁོ་མོ་ནི་ཆོས་ཀྱི་རྣམ་གྲངས་གནས་མེད་པའི་དཀྱིལ་འཁོར་ཅེས་བྱ་བ་ཤེས་ཤིང་སྟོན་པ་སྟེ། ཁོ་མོས་ཐོགས་པ་མེད་པ་ཞེས་བྱ་བའི་ཏིང་ངེ་འཛིན་ཀྱང་ཐོབ་བོ། །ཏིང་ངེ་འཛིན་དེ་ནི་ཆོས་གང་ལ་ཡང་ཐོགས་པ་མེད་དེ། དེ་ལ་གནས་ན་ཐམས་ཅད་མཁྱེན་པ་ཉིད་དུ་མིག་ཐོགས་པ་མེད་པ་ལ་འཇུག་གོ །ཐམས་ཅད་མཁྱེན་པ་ཉིད་དུ་རྣ་བ་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་སྣ་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ལྕེ་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ལུས་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ཡིད་ཐོགས་པ་མེད་པ་ཡང་རབ་ཏུ་འཇུག་གོ ། ཐམས་ཅད་མཁྱེན་པ་ཉིད་ཀྱི་རླབས་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་སྣང་བ་ཐོགས་པ་མེད་པ་དང་། ཐམས་ཅད་མཁྱེན་པ་ཉིད་དུ་ཤུགས་ཐོགས་པ་མེད་པ་འགྲོ་བ་རབ་ཏུ་སྣང་བའི་དཀྱིལ་འཁོར་དག་ཀྱང་རབ་ཏུ་འཇུག་གོ ། རིགས་ཀྱི་བུ་ཁོ་མོ་ནི་ཆོས་ཀྱི་རྣམ་གྲངས་གནས་མེད་པའི་དཀྱིལ་འཁོར་འདི་ཤེས་ཤིང་ཁོང་དུ་ཆུད་པར་ཟད་ན། ཁོ་མོས་བྱང་ཆུབ་སེམས་དཔའི་སྤྱོད་པ་ཆགས་པ་མེད༌པ་ལ་རིལ་གྱིས་ཤེས་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་ན་གྲོང་ཁྱེར་རྒྱས་པའི་འགྲམ་ཞེས༌པ་ཡོད་དེ། དེ་ན་གསེར་འཚོང་གཅེས་པ་གཏོང་བ་ཞེས་བྱ་བ་འདུག་གིས་དེའི་གན་དུ་སོང་ལ། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟང་གིས་དགེ་བསྙེན་མ་བཟང་མོའི་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་བསྙེན་མ་བཟང་མོའི་མཆོག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། དགེ་བསྙེན་མ་བཟང་མོའི་མཆོག་གི་དྲུང་ནས་སོང་ངོ་།། །།

སྨད་འཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་རྗེ་བཙུན་འཇམ་པའི་དབྱངས་ཀྱིས་རྫུ་འཕྲུལ་གྱིས་ཐེག་པ་ཆེན་པོའི་ལམ་ལ་བཀོད་ཚུལ། འཇམ་དཔལ་རྣམ་པར་རོལ་བའི་མདོ་ལས་བཏུས།

བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བརྒྱ་སྟོང་དང་ཐབས་ཅིག་ཏུ་བཞུགས་ཏེ། དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་སྨད་འཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་འདུག་སྟེ། བུ་མོ་དེ་ཡང་སྔོན་གྱི་དགེ་བའི་རྩ་བའི་རྒྱུས་ལུས་ཀྱི་མདོག་གསེར་གྱི་ཁ་དོག་ལྟ་བུར་མངོན་པར་གྲུབ་པར་གྱུར་ཅིང་། སའི་ཕྱོགས་གང་དུ་འགྲེང་བ་དང་། འདུག་པ་དང་། འགྲོ་བའི་ས་ཕྱོགས་དེ་དག་ཀྱང་གསེར་གྱི་ཁ་དོག་ལྟ་བུའི་འོད་ཀྱིས་སྣང་བར་གྱུར་ཏེ། དེས་གོས་དམར་པོའམ། དཀར་པོའམ། གང་དག་གྱོན་པར་གྱུར་པའི་གོས་དེ་དག་ཐམས་ཅད་ཀྱང་གསེར་གྱི་ཁ་དོག་ལྟ་བུ་ཉིད་དུ་ཀུན་དུ་སྣང་ངོ་། །བུ་མོ་དེ་ཡང་སྐྱེ་བོའི་ཚོགས་ཐམས་ཅད་ལ་དགའ་ཞིང་ཡིད་གཅུགས་པ་དང་། ལྟ་བས་མི་ངོམས་ཤིང་བཀའ་བློ་བདེ་ལ་དེས་པ་དང་། འཇམ་པ་དང་། སྙན་པ་དང་། དགའ་བ་སྨྲ་ཞིང་བཞིན་འཛུམ་པ་དང་། ཤིན་ཏུ་མཐུན་པར་འཛིན་པ་དང་། ཁྲོ་གཉེར་མེད་པ་དང་། མི་རྩུབ་པ་དང་། མི་བརླང་བར་གྱུར་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དེ་ན་རྒྱལ་བུ་གཞོན་ནུ་རྣམས་དང་། བློན་པོའི་བུ་གཞོན་ནུ་རྣམས་དང་། ཚོང་དཔོན་གྱི་བུ་གཞོན་ནུ་རྣམས་དང་། ཁྱིམ་བདག་གི་བུ་གང་ཇི་སྙེད་པ་དེ་དག་ཀྱང་དེ་ལ་ཤིན་ཏུ་ཆགས་ཤིང་ཡིད་འབྲང་བར་གྱུར་ཏེ་ལྟ་བས་ཆོག་མི་ཤེས་སོ། །སྨད་འཚོང་མའི་བུ་མོ་གསེར་མཆོག་འོད་དཔལ་དེ་སྐྱེད་མོས་ཚལ་ལམ། འབབ་ཆུའམ། རྫིང་བུའམ། ཁྱིམ་མམ། ལམ་པོ་ཆེའམ། གྲོང་བར་རམ། གང་དང་གང་དུ་འགྲོ་བ་དེ་དང་དེ་དག་ཏུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་མང་པོ་རྣམས་ཀྱང་ཤིན་ཏུ་ལྟད་མོར་གྱུར་ནས་ཀུན་འདུས་ཏེ་དེའི་ཕྱི་བཞིན་འབྲང་ཞིང་འགྲོའོ། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་དེ་ཚོང་དཔོན་གྱི་བུ་འཇིགས་བྱིན་ཞེས་བྱ་བས་ནོར་གྱིས་གླས་ཏེ། སྐྱེད་མོས་ཚལ་གྱི་སར་བྱུང་ནས་རྟ་བཞི་དང་ལྡན་པའི་ཤིང་རྟ་དང་། ནོར་བུ་དང་། མུ་ཏིག་དང་། བཻཌཱུརྱ་དང་། གསེར་གྱིས་ལེགས་པར་བརྒྱན་པ། གདུགས་དང་རྒྱལ་མཚན་དང་། བ་དན་བསྒྲེང་ཞིང་མེ་ཏོག་དང་། བདུག་པ་དང་། སྤོས་དང་། ཕྱེ་མ་དང་། མེ་ཏོག་ཕྲེང་གིས་མཛེས་པར་བྱས་པ། མེ་ཏོག་ཙམ་པ་ཀའི་ཕྲེང་བས་སྐར་ཁུང་བྱས་པའི་ནང་དུ་སྟན་བཟང་པོ་བཤམས་པ་ལ་འདུག་ནས། འདི་ལྟར་རྩེ་ཞིང་དགའ་བའི་བསམ་པས་ཤིང་རྟ་དེའི་མདུན་དུ་ནི་སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་པ་དག་གིས་དྲངས། ཤིང་རྟ་དེའི་ཕྱི་བཞིན་དུ་ནི་ཉེ་བར་སྤྱད་པ་དང་། ཡོངས་སུ་སྤྱད་པ་ཐོགས་པ་ཐམས་ཅད་རྗེས་སུ་འབྲང་ལ། སྐྱེ་བོའི་ཚོགས་ཆེན་པོ་ལྟད་མོ་ལྟ་བའི་བསམ་པ་ཅན་དག་ཀྱང་ཕྱི་བཞིན་འབྲང་བར་གྱུར་ཅིང་སྐྱེད་མོས་ཚལ་གྱི་སར་དོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་ནང་དུ་ཡང་དག་འཇོག་ལས་ལངས་ཏེ། སེམས་ཅན་ཐམས་ཅད་ལ་སྙིང་རྗེ་ཆེན་པོ་སྐྱེས་ནས་འདི་སྙམ་དུ་སེམས་ཏེ། སུ་ཞིག་རྫུ་འཕྲུལ་གྱི་ཆོ་འཕྲུལ་ལམ། ཀུན་བརྗོད་པའི་ཆོ་འཕྲུལ་ལམ། རྗེས་སུ་བསྟན་པའི་ཆོ་འཕྲུལ་གྱིས་འདུལ་བར་འགྱུར་བའི་སེམས་ཅན་གང་ཐེག་པ་ཆེན་པོ་འདི་ལ་ཡོངས་སུ་སྨིན་པར་བྱ་སྙམ་པ་དང་། འཇམ་དཔལ་གཞོན་ནུར་གྱུར་པས་སྨད་འཚོང་མའི་བུ་མོ་གསེར་མཆོག་འོད་དཔལ་ཚོང་དཔོན་གྱི་བུ་འཇིགས་བྱིན་དང་ལྷན་ཅིག་ཏུ་ཤིང་རྟ་ལ་ཞོན་ཏེ་སྐྱེད་མོས་ཚལ་གྱི་སར་འགྲོ་བ་མཐོང་ངོ་། །མཐོང་ནས་ཀྱང་གདུལ་བའི་ཕྱིར་དེའི་དབང་པོ་དང་། སྟོབས་དང་བརྩོན་འགྲུས་ཀྱི་བྱེ་བྲག་ལ་རྣམ་པར་བལྟས་ན་དེ་སྔོན་གྱི་དགེ་བའི་རྩ་བ་དང་ལྡན་ཞིང་ཆོས་ཀུན་ཤེས་པར་བྱ་བའི་ནུས་པ་དང་། མཐུ་དང་། སྐལ་བ་ཡོད་པར་རིག་ནས། དེའི་ཚེ་འཇམ་དཔལ་གཞོན་ནུར་གྱུར་པས་འདི་ལྟ་བུ་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་ཏེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱས་པས། འདི་ལྟར་རང་གི་ལུས་བསྟན་མ་ཐག་ཏུ་ཉི་མ་དང་ཟླ་བའི་འོད་ཀྱང་ཟིལ་དུ་རླག་པར་བྱེད་ན། སེམས་ཅན་གཞན་དག་གི་ལྟ་སྨོས་ཀྱང་ཅི་དགོས་པ་དེ་ལྟ་བུར་རང་གི་ལུས་མངོན་པར་སྤྲུལ་ནས། གོས་གང་གི་འོད་ཀྱིས་དཔག་ཚད་གཅིག་ཙམ་གྱི་ཁོར་ཡུག་སྣང་བས་སྣང་བར་བྱེད་པའི་གོས་དེ་ལྟ་བུ་ཡང་ལུས་ལ་གྱོན་པར་ཀུན་དུ་བསྟན་ཏོ། །རང་གི་ལུས་རྒྱན་ཐམས་ཅད་ཀྱིས་རྣམ་པར་བརྒྱན་པར་ཡང་བསྟན་ཏོ། །

དེ་ནས་འཇམ་དཔལ་གཞོན་ནུར་གྱུར་པས་ལུས་ལ་གོས་དང་རྒྱན་ཐམས་ཅད་ཀྱིས་ལེགས་པར་བརྒྱན་ནས་ལམ་གང་ནས་སྨད་འཚོང་མའི་བུ་མོ་གསེར་མཆོག་འོད་དཔལ་འོང་བའི་ལམ་དེའི་མདུན་ལོགས་སུ་བསྡད་དོ། །འཇམ་དཔལ་གཞོན་ནུར་གྱུར་པས་དེར་བསྡད་མ་ཐག་ཏུ་དེ་ནས་ཚོང་དཔོན་གྱི་བུ་དེའི་ཤིང་རྟ་ཡང་མོག་མོག་པོར་གྱུར། སྨད་འཚོང་མའི་བུ་མོ་གསེར་མཆོག་འོད་དཔལ་གྱི་ལུས་ཐམས་ཅད་ཀྱང་མོག་མོག་པོར་གྱུར་ཏོ། །འདི་ལྟ་སྟེ་དཔེར་ན། འཛམ་བུའི་ཆུ་བོའི་གསེར་གྱི་དྲུང་དུ། སྣག་ཚའི་ཡུག་བཞག་ན་ལམ་མེར་མི་འདུག །ལྷན་ནེར་མི་འདུག །ལྷང་ངེར་མི་འདུག་གོ །དེ་བཞིན་དུ་འཇམ་དཔལ་གཞོན་ནུར་གྱུར་པའི་ལུས་ཀྱི་འོད་ཀྱིས༌རེག་པ་ན་བུ་མོ་དེའི་ལུས་ཀྱང་ལམ་མེར་མི་འདུག །ལྷན་ནེར་མི་འདུག །ལྷང་ངེར་མི་འདུག་གོ །སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་འཇམ་དཔལ་གཞོན་ནུར་གྱུར་པ་ལྷའི་བུ་གཞོན་ནུ་ལྟར་འདུག་ལ། ལུས་ལ་རྒྱན་གྱིས་བརྒྱན་ཅིང་གསལ་བའི་གོས་ལེགས་པར་གྱོན་ལ། གོས་དེ་ལས་ཀྱང་འོད་འབྱུང་བར་མཐོང་སྟེ། མཐོང་མ་ཐག་ཏུ་དེ་བདག་གི་ལུས་ལ་བརྙས་པའི་འདུ་ཤེས་དང་། དམན་པའི་འདུ་ཤེས་སྐྱེས་ཤིང་གོས་དེ་ལ་ཡང་མངོན་པར་འདོད་པ་དང་། གཟུང་བའི་འདུ་ཤེས་སྐྱེས་ནས་དེ་འདི་སྙམ་དུ་སེམས་ཏེ།

ཚོང་དཔོན་གྱི་བུ་འདིས་ཆོག་གིས་བདག་ཤིང་རྟ་འདི་ལས་བབས་ལ་འདི་དང་ལྷན་ཅིག་ཏུ་དགའ་བ་དང་། རྩེ་བ་དང་། དགའ༌མགུར་སྤྱད་ལ་གོས་འདི་ཡང་བསླང་བར་བྱའོ་སྙམ་མོ། །བུ་མོ་དེས་དེ་ལྟ་བུའི་སེམས་བསྐྱེད་མ་ཐག་ཏུ་དེ་ནས་འཇམ་དཔལ་གཞོན་ནུར་གྱུར་པའི་བྱིན༌གྱིས་བརླབས་ཀྱིས་རྒྱལ་པོ་ཆེན་པོ་རྣམ་ཐོས་ཀྱི་བུས་བདག་ཉིད་མིའི་གཟུགས་སུ་མངོན་པར་སྤྲུལ་ནས་བུ་མོ་དེ་ལ་འདི་སྐད་ཅེས་སྨྲས་སོ། །བུ་མོ་ཁྱོད་སྐྱེས་བུ་དམ་པ་འདི་ལ་ཀུན་དུ་ཆགས་པའི་སེམས་མ་སྐྱེད་ཅིག །དེ་ཅིའི་ཕྱིར་ཞེ་ན། འདི་ནི་འདོད་པ་དོན་དུ་གཉེར་བ་མ་ཡིན་པའི་ཕྱིར་རོ། །བུ་མོས་སྨྲས་པ། འདི་སུ་ཞིག་ཡིན། འདིའི་མིང་ཅི། རྣམ་ཐོས་ཀྱི་བུས་སྨྲས་པ། འདི་ནི་བྱང་ཆུབ་སེམས་དཔའ་སྟེ། འཇམ་དཔལ་གཞོན་ནུར་གྱུར་པ་ཞེས་བྱའོ། །བུ་མོས་སྨྲས་པ། བྱང་ཆུབ་སེམས་དཔའ་ཞེས་བྱ་བ་དེ་ཅི་ཞིག་ཡིན། ཅི་དེ་ལྷའམ། འོན་ཏེ་ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅིའམ། ལྟོ་འཕྱེ་ཆེན་པོའམ། བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བའམ། རྒྱལ་པོ་ཆེན་པོའམ། བྱང་ཆུབ་སེམས་དཔའ་ཞེས་བྱ་བ་དེ་ཅི་ཞིག་ཡིན། རྣམ་ཐོས་ཀྱི་བུས་སྨྲས་པ། བུ་མོ་བྱང་ཆུབ་སེམས་དཔའ་ཞེས་བྱ་བ་དེ་ནི་ལྷ་ཡང་མ་ཡིན། ཀླུ་ཡང་མ་ཡིན། གནོད་སྦྱིན་ཡང་མ་ཡིན། དྲི་ཟ་ཡང་མ་ཡིན། ལྷ་མ་ཡིན་ཡང་མ་ཡིན། ནམ་མཁའ་ལྡིང་ཡང་མ་ཡིན། མིའམ་ཅི་ཡང་མ་ཡིན། ལྟོ་འཕྱེ་ཆེན་པོ་ཡང་མ་ཡིན། བརྒྱ་བྱིན་ཡང་མ་ཡིན། ཚངས་པ་ཡང་མ་ཡིན། འཇིག་རྟེན་སྐྱོང་བ་ཡང་མ་ཡིན། རྒྱལ་པོ་ཆེན་པོ་ཡང་མ་ཡིན་ཏེ། བུ་མོ་དེ་ནི་སེམས་ཅན་ཐམས་ཅད་ཀྱི་བསམ་པ་ཀུན་ཡོངས་སུ་རྫོགས་པར་བྱེད་པ་སྟེ།

དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །འདི་ནི་བསླངས་པ་ཐམས་ཅད་སྦྱིན་པར་བྱེད་དེ། ཡོངས་སུ་མི་གཏོང་བ་ཅི་ཡང་མེད་པས་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེ་ནས་བུ་མོ་དེ་འདི་སྙམ་དུ་སེམས་ཏེ། དེ་སྐད་གྲག་པ་ལས་ན་འདིས་བདག་ལ་གོས་འདི་སྦྱིན་པར་འགྱུར་རོ་སྙམ་ནས། དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་ཤིང་རྟ་དེ་ལས་བབས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་གང་ཁྱོད་ཀྱི་སྐུ་ལ་གསོལ་བའི་ན་བཟའ་འདི་བདག་ལ་སྩལ་དུ་གསོལ། དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །གལ་ཏེ་ཁྱོད་ནི་བྱང་ཆུབ་ལ་ཡང་ཞུགས་གྱུར་ན། །འཇམ་དབྱངས་ན་བཟའ་འདི་ནི་བདག་ལ་སྩལ་དུ་གསོལ། །སེར་སྣ་ཅན་གྱི་བྱང་ཆུབ་སེམས་དཔའ་མི་མཛེས་ཏེ། །དཔེར་ན་ཆབ་དང་བྲལ་ཞིང་སྐམས་པའི་ཀླུང་དང་མཚུངས། །འཇམ་དཔལ་གྱིས་སྨྲས་པ། གལ་ཏེ་བུ་མོ་ཁྱོད་ནི་བྱང་ཆུབ་ཞུགས་གྱུར་ན། །ཁོ་བོས་དེ་རིང་གོས་འདི་ཁྱོད་ལ་སྦྱིན་པར་བྱ། །གང་དག་གཡོ་བ་མེད་པར་བྱང་ཆུབ་སེམས་ལ་གནས། །དེ་དག་འདི་ན་ལྷར་བཅས་འཇིག་རྟེན་མཆོད་འོས་ཡིན། །བུ་མོས་སྨྲས་པ། བྱང་ཆུབ་ཅེས་བགྱི་ཚིག་གི་དོན་ནི་གང་ཞིག་ལགས། །དེ་ནི་གང་ལས་འཐོབ་ཅིང་སུ་ཞིག་སྩལ་བར་བགྱིད། །ཚོགས་རྣམས་གང་དག་ལ་ནི་ངེས་པར་བསྟེན་བགྱིས་ན། །མཁས་པ་མ་ལགས་མ་རྟོགས་རྣམས་ཀྱིས་རྟོགས་པར་འགྱུར། །འཇམ་དཔལ་གྱིས་སྨྲས་པ། སྲིང་མོ་བརྗོད་པ་མེད་པ་དང་། ཡི་གེ་མེད་པ་དང་། ཕུང་པོ་དང་། ཁམས་དང་། སྐྱེ་མཆེད་དག་ལས་རྣམ་པར་གྲོལ་བ་དང་། སྟོང་པ་དང་། མཚན་མ་དག་དང་བྲལ་བ་དང་། ཉོན་མོངས་པ་མེད་པ་དང་། ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་ནི་བྱང་ཆུབ་ཅེས་བྱའོ། །དེ་སྐད་ཅེས་སྨྲས་ནས།

ཡང་འཇམ་དཔལ་གཞོན་ནུར་གྱུར་པས་བུ་མོ་དེ་ལ་འདི་སྐད་ཅེས་སྨྲས་སོ། །སྲིང་མོ་ཁྱོད་བྱང་ཆུབ་ཏུ་སེམས་བསྐྱེད་ཅིག་དང་། ངས་ཁྱོད་ལ་གོས་འདི་སྦྱིན་ནོ། །བུ་མོས་སྨྲས་པ། འཇམ་དཔལ་བྱང་ཆུབ་ཅེས་བགྱི་བ་དེ་གང་ལགས། འཇམ་དཔལ་གྱིས་སྨྲས་པ། སྲིང་མོ་ཁྱོད་ཉིད་བྱང་ཆུབ་ཡིན་ནོ། །བུ་མོས་སྨྲས་པ། འཇམ་དཔལ་ཁྱོད་ཀྱིས་གསུངས་པའི་དོན་དེ་བདག་གིས་མ་འཚལ་ན་ཇི་ལྟར་བདག་བྱང་ཆུབ་ལགས། འཇམ་དཔལ་གྱིས་སྨྲས་པ། སྲིང་མོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཞིག་བཞུགས་པ་དེ་འདི་སྐད་དུ། འདི་ལྟར་ལུས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་ལུས་མཉམ་པ་ཉིད་དོ་ཞེས་ཆོས་སྟོན་ཏེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་འདི་ཇི་སྙམ་དུ་སེམས། ཁྱོད་ཀྱི་ལུས་འདི་ལ་ཕུང་པོ་དང་། ཁམས་དང་། སྐྱེ་མཆེད་མངོན་པར་གྲུབ་པ་ཡོད་དམ། དེ་ནས་བུ་མོ་དེས་བསྟན་པ་འདི་ཐོས་ནས་དེ་སྔོན་གྱི་དགེ་བའི་རྩ་བའི་རྒྱུ་མཐུན་པས་ཆོས་ལ་སྣང་བ་སྐྱེས་པར་གྱུར་ཏེ། དེས་སྣང་བ་ཐོབ་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །

འཇམ་དཔལ་དེ་ནི་དེ་ལྟ་ལགས་ཏེ། བདག་གི་ལུས༌འདི་ལ་ཕུང་པོ་དང་། ཁམས་དང་། སྐྱེ་མཆེད་དག་མངོན་པར་གྲུབ༌པ་མ་ལགས་སོ། །འཇམ་དཔལ་གྱིས་སྨྲས་པ། སྲིང་མོ་འདི་ཇི་སྙམ་དུ་སེམས། གཟུགས་ལ་སེམས་པའམ། རྣམ་པར་ཤེས་པ་ཡོད་དམ། བུ་མོས་སྨྲས་པ། འཇམ་དཔལ་དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མེད་དེ། སྲིང་མོ་དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་འདི་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་སེམས་པའམ། རྣམ་པར་ཤེས་པ་ཡོད་དམ། བུ་མོས་སྨྲས་པ། འཇམ་དཔལ་དེ་ནི་མ་མཆིས་སོ། །འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་མི་སེམས་ཤིང་རྣམ་པར་ཤེས་པ་མི་སེམས་སོ། །སྲིང་མོ་དེའི་ཕྱིར་རྣམ་པར་ཤེས་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་རྣམ་པར་ཤེས་པ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་གཟུགས་ནང་ངམ། ཕྱི་རོལ་ལམ། གཉིས་ཀ་མེད་པར་རམ། གཟུགས་འདི་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་། དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་ནུས་སམ། བུ་མོས་སྨྲས་པ། འཇམ་དཔལ་དེ་ནི་མ་ལགས་སོ། །

འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་ནང་ངམ། ཕྱི་རོལ་ལམ། གཉིས་ཀ་མེད་པར་རམ། བྱང་ཆུབ་དེ་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་མི་ནུས་ཏེ། སྲིང་མོ་དེའི་ཕྱིར་གཟུགས་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ནང་ངམ། ཕྱི་རོལ་ལམ། གཉིས་ཀ་མེད་པར་རམ། རྣམ་པར་ཤེས་པ་འདི་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་ནུས་སམ། བུ་མོས་སྨྲས་པ། འཇམ་དཔལ་དེ་ནི་མ་ལགས་སོ། །འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་ཀྱང་ནང་ངམ། ཕྱི་རོལ་ལམ། གཉིས་ཀ་མེད་པར་རམ། བྱང་ཆུབ་དེ་སྔོན་པོའམ། སེར་པོའམ། དམར་པོའམ། དཀར་པོའམ། ལེ་བརྒན་ནམ། ཤེལ་དང་དངུལ་གྱི་ཁ་དོག་གམ། ཡུལ་ན་གནས་པའམ། ཕྱོགས་ན་གནས་པ་ཞེས་བསྟན་པར་མི་ནུས་ཏེ། སྲིང་མོ་དེའི་ཕྱིར་རྣམ་པར་ཤེས་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །

བྱང་ཆུབ་མཉམ་པ་ཉིད་ཀྱིས་རྣམ་པར་ཤེས་པ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་ལྔ་ནི་སྒྱུ་མ་ལྟ་བུ་སྟེ། ཡོད་པ་མ་ཡིན་པ། ཕྱིན་ཅི་ལོག་ལས་སྐྱེས་ཤིང་ཡོད་པ་མ་ཡིན་པ། ཕྱིན་ཅི་ལོག་གིས་ཐ་སྙད་བཏགས་པའོ། །སྲིང་མོ་བྱང་ཆུབ་ཀྱང་སྒྱུ་མ་ལྟ་བུ་སྟེ། ཡོད་པ་མ་ཡིན་པ་ཕྱིན་ཅི་ལོག་གིས་ཐ་སྙད་བཏགས་པ་སྟེ། སྲིང་མོ་དེའི་ཕྱིར་སྒྱུ་མ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་སྒྱུ་མ་མཉམ་པ་ཉིད་དོ། །

སྒྱུ་མ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་སྒྱུ་མ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་ལྔ་ནི་རྨི་ལམ་ལྟ་བུ་སྟེ། ཤིན་ཏུ་མངོན་པར་མ་གྲུབ་པའོ། །སྲིང་མོ་བྱང་ཆུབ་ཀྱང་རྨི་ལམ་གྱི་རང་བཞིན་ཡིན་པས་ཤིན་ཏུ་མངོན་པར་མ་གྲུབ་པ་སྟེ། སྲིང་མོ་དེའི་ཕྱིར་རྨི་ལམ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་རྨི་ལམ་མཉམ་པ་ཉིད་དོ། །རྨི་ལམ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་རྨི་ལམ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་ལྔ་ནི་སྨིག་རྒྱུ་ལྟ་བུ་སྟེ། འཁྲུལ་པའི་ལས་ཀྱིས་བསྐྱེད་པའོ། །སྲིང་མོ་བྱང་ཆུབ་ཀྱང་སྨིག་རྒྱུའི་རང་བཞིན་ཏེ། ལས་ཀྱི་རྣམ་པར་སྨིན་པ་མེད་པའོ། །སྲིང་མོ་དེའི་ཕྱིར་སྨིག་རྒྱུ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །

ཕུང་པོ་མཉམ་པ་ཉིད་ཀྱིས་སྨིག་རྒྱུ་མཉམ་པ་ཉིད་དོ། །སྨིག་རྒྱུ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་སྨིག་རྒྱུ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་ལྔ་ནི་གཟུགས་བརྙན་ལྟ་བུ་སྟེ། འཕོ་བ་མེད་པའོ། །སྲིང་མོ་བྱང་ཆུབ་ཀྱང་གཟུགས་བརྙན་གྱི་རང་བཞིན་ཏེ། འཕོ་བ་མེད་པའོ། །སྲིང་མོ་དེའི་ཕྱིར་གཟུགས་བརྙན་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་གཟུགས་བརྙན་མཉམ་པ་ཉིད་དོ། །གཟུགས་བརྙན་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཟུགས་བརྙན་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །

སྲིང་མོ་གཞན་ཡང་ཕུང་པོ་ལྔ་ནི་མིང་ཙམ་སྟེ། མིང་དེ་ཡང་གཡོ་བ་མེད་པའོ། །སྲིང་མོ་བྱང་ཆུབ་ཀྱང་མིང་ཙམ་སྟེ། མིང་དེ་ཡང་གཡོ་བ་མེད་པའོ། །སྲིང་མོ་དེའི་ཕྱིར་གཡོ་བ་མེད་པ་མཉམ་པ་ཉིད་ཀྱིས་ཕུང་པོ་མཉམ་པ་ཉིད་དོ། །ཕུང་པོ་མཉམ་པ་ཉིད་ཀྱིས་གཡོ་བ་མེད་པ་མཉམ་པ་ཉིད་དོ། །གཡོ་བ་མེད་པ་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དོ། །བྱང་ཆུབ་མཉམ་པ་ཉིད་ཀྱིས་གཡོ་བ་མེད་པ་མཉམ་པ་ཉིད་དེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་རྣམས་ལ་བྱེད་པ་པོ་མེད་དེ། མ་བྱས་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་ངོ་བོ་ཉིད་མེད་དེ། ངོ་བོ་ཉིད་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་བྱུང་བ་མེད་དེ། མ་བྱུང་བའི་དོན་ནི་བྱང་ཆུབ་བོ། །ཕུང་པོ་རྣམས་ལ་རྟག་པ་ཉིད་མེད་དེ། མི་རྟག་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་བདེ་བ་ཉིད་མེད་དེ། སྡུག་བསྔལ་བའི་དོན་ནི་བྱང་ཆུབ་བོ། །ཕུང་པོ་རྣམས་ལ་སྡུག་པ་མེད་དེ། མི་སྡུག་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་བདག་མེད་དེ། བདག་མེད་པའི་དོན་ནི་བྱང་ཆུབ་བོ། །

སྲིང་མོ་གཞན་ཡང་ཕུང་པོ་རྣམས་ལ་མངོན་པར་གྲུབ་པ་མེད་དེ། མངོན་པར་མ་གྲུབ་པའི་དོན་ནི་བྱང་ཆུབ་བོ། །ཕུང་པོ་རྣམས་ནི་དབེན་པ་སྟེ། དབེན་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་གཟུང་བ་མེད་དེ། གཟུང་བ་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་གཞི་མེད་དེ། གཞི་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ལ་འོང་བ་དང་འགྲོ་བ་མེད་དེ། འོང་བ་དང་འགྲོ་བ་མེད་པའི་དོན་ནི་བྱང་ཆུབ་བོ། །ཕུང་པོ་རྣམས་ནི་ད་ལྟར་བྱུང་བ་ལ་མི་གནས་པ་སྟེ། ད་ལྟར་བྱུང་བ་ལ་མི་གནས་པའི་དོན་ནི་བྱང་ཆུབ་བོ། །

སྲིང་མོ་གཞན་ཡང་ཕུང་པོ་རྣམས་ནི་འཕགས་པ་རྣམས་ཀྱིས་ཐ་སྙད་ཡིན་པས་བྱང་ཆུབ་ཀྱང་འཕགས་པ་རྣམས་ཀྱི་ཐ་སྙད་དོ། །ཕུང་པོ་རྣམས་ནི་ཐ་སྙད་མེད་པའི་རང་བཞིན་ཅན་ཏེ། བྱང་ཆུབ་ཀྱང་ཐ་སྙད་མེད་པའོ། །ཕུང་པོ་ལྔའི་རང་བཞིན་གང་ཡིན་པ་དེ་ནི་དེ་བཞིན་གཤེགས་པས་ཐུགས་སུ་ཆུད་པའི་ཆོས་ཐམས་ཅད་ཀྱི་རང་བཞིན་ཏེ། དེ་ནི་བྱང་ཆུབ་ཅེས་བྱའོ། །སྲིང་མོ་དེ་ལྟར་ན་ཕུང་པོ་ལྔའི་རང་བཞིན་ནི་བྱང་ཆུབ་ཀྱི་རང་བཞིན་ནོ། །བྱང་ཆུབ་ཀྱི་རང་བཞིན་ནི་ཆོས་ཐམས་ཅད་ཀྱི་རང་བཞིན་ཏེ། སྲིང་མོ་ཕུང་པོ་ལྔའི་རང་བཞིན་གང་ཡིན་པ་དང་། བྱང་ཆུབ་ཀྱི་རང་བཞིན་གང་ཡིན་པ་དེ་ནི་སེམས་ཅན་ཐམས་ཅད་ཀྱི་རང་བཞིན་ཡིན་ཏེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཕུང་པོ་རྟོགས་པ་གང་ཡིན་པ་དེ་ཉིད་བྱང་ཆུབ་ཡིན་ཏེ། ཕུང་པོ་མ་གཏོགས་པར་རྟོགས་པ་ཡང་མེད་ལ། བྱང་ཆུབ་མ་གཏོགས་པར་ཡང་རྟོགས་པ་མེད་པས་དེ་ལྟར་རྟོགས་པ་གང་ཡིན་པ་དེ་བྱང་ཆུབ་ཅེས་བྱ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །

སྲིང་མོ་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། ཇི་ལྟར་སེམས་ཅན་ཐམས་ཅད་བྱང་ཆུབ་ཏུ་གཏོགས་པ་ལྟར། དེ་གཏོགས་པ་མེད་པར་བསྟན་པ་ནི་བྱང་ཆུབ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཁྱོད་ཀྱི་ལུས་འདི་ལ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ཁམས་བཞི་པོ་དག་མངོན་པར་གྲུབ་པ་དེ་ལ་སྲིང་མོ་སའི་ཁམས་ནི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །བྱང་ཆུབ་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །དེ་བཞིན་དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །བྱང་ཆུབ་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་ནོ། །ཤིན་ཏུ་ནམ་མཁའ་དང་མཚུངས་པའི་ཕྱིར་སའི་ཁམས་དང་བྱང་ཆུབ་མཉམ་མོ། །ཤིན་ཏུ་མེད་པའི་ཕྱིར་ཆུའི་ཁམས་དང་བྱང་ཆུབ་མཉམ་མོ། །ཤིན་ཏུ་མི་གཡོ་བའི་ཕྱིར་མེའི་ཁམས་དང་བྱང་ཆུབ་མཉམ་མོ། །ཤིན་ཏུ་བསྟན་དུ་མེད་པའི་ཕྱིར་རླུང་གི་ཁམས་དང་བྱང་ཆུབ་མཉམ་མོ། །སྲིང་མོ་སའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ་ཆུའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ་མེའི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །སྲིང་མོ་རླུང་གི་ཁམས་གང་ཡིན་པའི་ཁམས་དེ་ནི་དེ་བཞིན་གཤེགས་པས་མཁྱེན་ཏེ། མངོན་པར་རྫོགས་པར་ཐུགས་སུ་ཆུད་དོ། །

སྲིང་མོ་སའི་ཁམས་རྟོགས་པ་ནི་བྱང་ཆུབ་བོ། །སྲིང་མོ་དེ་བཞིན་དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་རྟོགས་པ་ནི་བྱང་ཆུབ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་སའི་ཁམས་ཀྱིས་ཆུའི་ཁམས་ཡང་དག་པར་མི་ཤེས་སོ། །ཆུའི་ཁམས་ཀྱིས་མེའི་ཁམས་ཡང་དག་པར་མི་ཤེས་སོ། །མེའི་ཁམས་ཀྱིས་རླུང་གི་ཁམས་ཡང་དག་པར་མི་ཤེས་སོ། །སྲིང་མོ་དེ་ལྟར་ན་ཁམས་ཀྱི་མིང་ཡོངས་སུ་ཤེས་པ་གང་ཡིན་པ་དེ་ནི་བྱང་ཆུབ་ཅེས་བྱ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་གང་ཁྱོད་ཀྱི་ལུས་འདི་ལ་མིག་མངོན་པར་གྲུབ་པ་དང་། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་མངོན་པར་གྲུབ་པ་དེ་ལ་སྲིང་མོ་མིག་ནི་སྟོང་པ་སྟེ། མིག་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །རྣ་བ་ནི་སྟོང་པ་སྟེ། རྣ་བ་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །སྣ་ནི་སྟོང་པ་སྟེ། སྣ་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །ལྕེ་ནི་སྟོང་པ་སྟེ། ལྕེ་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །ལུས་ནི་སྟོང་པ་སྟེ། ལུས་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །ཡིད་ནི་སྟོང་པ་སྟེ། ཡིད་སྟོང་པ་ཉིད་ཀྱི་རང་བཞིན་ནི་བྱང་ཆུབ་བོ། །

སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་མིག་སྟོང་པ་ཉིད་གང་ཡིན་པ་དེ་ནི་གཟུགས་སུ་འདོགས་པར་མི་བྱེད་དོ། །གཟུགས་སྟོང་པའི་གཟུགས་ཀྱི་ངོ་བོ་ཉིད་ནི་བྱང་ཆུབ་བོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་སྟོང་པ་ཉིད་གང་ཡིན་པ་དེ་ནི་ཆོས་སུ་འདོགས་པར་མི་བྱེད་དེ། ཆོས་སྟོང་པའི་ཆོས་ཀྱི་ངོ་བོ་ཉིད་ནི་བྱང་ཆུབ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་མིག་ནི་གཟུགས་མི་ལེན་ཏེ། བྱང་ཆུབ་ཀྱང་གཟུགས་མི་ལེན་ཏོ། །རྣ་བ་ནི་སྒྲ་མི་ལེན་ཏེ། བྱང་ཆུབ་ཀྱང་སྒྲ་མི་ལེན་ཏོ། །སྣ་ནི་དྲི་མི་ལེན་ཏེ། བྱང་ཆུབ་ཀྱང་དྲི་མི་ལེན་ཏོ། །ལྕེ་ནི་རོ་མི་ལེན་ཏེ། བྱང་ཆུབ་ཀྱང་རོ་མི་ལེན་ཏོ། །ལུས་ནི་རེག་བྱ་མི་ལེན་ཏེ། བྱང་ཆུབ་ཀྱང་རེག་བྱ་མི་ལེན་ཏོ། །ཡིད་ནི་ཆོས་མི་ལེན་ཏེ། བྱང་ཆུབ་ཀྱང་ཆོས་མི་ལེན་ཏོ། །སྲིང་མོ་དེ་ཅིའི་ཕྱིར་ཞེ་ན། མིག་གཟུགས་དང་བྲལ་བ་ནི་བྱང་ཆུབ་བོ། །ཡིད་ཆོས་དང་བྲལ་བའི་བར་དུ་ཡང་བྱང་ཆུབ་ཡིན་པའི་ཕྱིར་རོ། །སྲིང་མོ་དེ་ལྟར་ན་མིག་གི་རྣམ་པར་ཤེས་པའི་ཁམས་གང་ཡིན་པ་དེ་ནི་གཟུགས་ཀྱི་ཁམས་དང་མཚམས་སྦྱོར་བ་མེད་དེ། མིག་གི་རྣམ་པར་ཤེས་པའི་ཁམས་དང་གཟུགས་ཀྱི་ཁམས་སུ་བྲལ་བ་ནི་བྱང་ཆུབ་བོ། །རྣ་བའི་རྣམ་པར་ཤེས་པའི་ཁམས་གང་ཡིན་པ་དེ་ནི་སྒྲའི་ཁམས་དང་མཚམས་སྦྱོར་བ་མེད་དེ། རྣ་བའི་རྣམ་པར་ཤེས་པའི་ཁམས་དང་སྒྲའི་ཁམས་སུ་བྲལ་བ་ནི་བྱང་ཆུབ་བོ། །སྣའི་རྣམ་པར་ཤེས་པའི་ཁམས་གང་ཡིན་པ་དེ་ནི་དྲིའི་ཁམས་དང་མཚམས་སྦྱོར་བ་མེད་དེ། སྣའི་རྣམ་པར་ཤེས་པའི་ཁམས་དང་དྲིའི་ཁམས་སུ་བྲལ་བ་ནི་བྱང་ཆུབ་བོ། །ལྕེའི་རྣམ་པར་ཤེས་པའི་ཁམས་གང་ཡིན་པ་དེ་ནི་རོའི་ཁམས་དང་མཚམས་སྦྱོར་བ་མེད་དེ། ལྕེའི་རྣམ་པར་ཤེས་པའི་ཁམས་དང་རོའི་ཁམས་སུ་བྲལ་བ་ནི་བྱང་ཆུབ་བོ། །ལུས་ཀྱི་རྣམ་པར་ཤེས་པའི་ཁམས་གང་ཡིན་པ་དེ་ནི་རེག་བྱའི་ཁམས་དང་མཚམས་སྦྱོར་བ་མེད་དེ།ལུས་ཀྱི་རྣམ་པར་ཤེས་པའི་ཁམས་དང་རེག་བྱའི་ཁམས་སུ་བྲལ་བ་ནི་བྱང་ཆུབ་བོ། །ཡིད་ཀྱི་རྣམ་པར་ཤེས་པའི་ཁམས་གང་ཡིན་པ་དེ་ནི་ཆོས་ཀྱི་ཁམས་དང་མཚམས་སྦྱོར་བ་མེད་དེ། ཡིད་ཀྱི་རྣམ་པར་ཤེས་པའི་ཁམས་དང་ཆོས་ཀྱི་ཁམས་སུ་བྲལ་བ་ནི་བྱང་ཆུབ་སྟེ། སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་དེ་ལྟར་ན་བྱང་ཆུབ་དང་མིག་གི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང་གཟུགས་ཀྱི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང་མིག་གི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང་ཡིད་ཀྱི་ཁམས་ཀྱི་བར་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང་ཆོས་ཀྱི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །བྱང་ཆུབ་དང་ཡིད་ཀྱི་རྣམ་པར་ཤེས་པའི་ཁམས་དེ་ནི་གཉིས་སུ་མེད་དེ་གཉིས་སུ་དབྱེར་མེད་དོ། །སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་མིག་རྟོགས་པ་ནི་བྱང་ཆུབ་བོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་རྟོགས་པ་ནི་བྱང་ཆུབ་བོ། །མིག་གི་རང་བཞིན་ནི་སྟོང་པ་སྟེ། རང་བཞིན་སྟོང་པ་དེ་ནི་བྱང་ཆུབ་བོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རང་བཞིན་ནི་སྟོང་པ་སྟེ། རང་བཞིན་སྟོང་པ་དེ་ནི་བྱང་ཆུབ་བོ། །སྲིང་མོ་མིག་གི་རང་བཞིན་ནི་མ་ཆགས། མི་སྡང་། མ་རྨོངས་པ་སྟེ། འདོད་ཆགས་དང་ཞེ་སྡང་དང་གཏི་མུག་དང་བྲལ་བ་ནི་བྱང་ཆུབ་བོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རང་བཞིན་ནི་མ་ཆགས་པ། མི་སྡང་བ། མ་རྨོངས་པ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་བྲལ་བ་ནི་བྱང་ཆུབ་བོ། །སྲིང་མོ་མིག་ནི་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པ་སྟེ། བྱང་ཆུབ་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པ་སྟེ། བྱང་ཆུབ་ཀྱང་བདག་པོ་མེད་པ། བདག་གི་མེད་པ། ཡོངས་སུ་འཛིན་པ་མེད་པའོ། །སྲིང་མོ་མིག་ནི་སྐྱེས་པའི་ཆོས་དང་མཚུངས་པར་ལྡན་པ་ཡང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པ་ཡང་མ་ཡིན་ནོ། །སྲིང་མོ་བྱང་ཆུབ་ཀྱང་སྐྱེས་པའི་ཆོས་དང་མཚུངས་པར་ལྡན༌པ་ཡང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པ་ཡང་མ་ཡིན་ནོ། །སྲིང་མོ་དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་སྐྱེས་པའི་ཆོས་དང་མཚུངས་པར་ལྡན་པ་ཡང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པ་ཡང་མ་ཡིན་ནོ། །སྲིང་མོ་བྱང་ཆུབ་ཀྱང་སྐྱེས་པའི་ཆོས་དང་མཚུངས་པར་ལྡན་པ་ཡང་མ་ཡིན། བུད་མེད་ཀྱི་ཆོས་དང་མཚུངས་པར་ལྡན་པ་ཡང་མ་ཡིན་ནོ། །སྲིང་མོ་མིག་ནི། སྐྱེས་པའང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ་བྱང་ཆུབ་ཀྱང་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ་ཡིད་ཀྱི་བར་དུ་ཡང་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་ནོ། །སྲིང་མོ་བྱང་ཆུབ་ཀྱང་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་ནོ། །

སྲིང་མོ་དེ་ལྟར་མིག་གི་དེ་བཞིན་ཉིད་ནི་དེ་བཞིན་གཤེགས་པས་ཐུགས་སུ་ཆུད་དེ། དེ་བཞིན་ཉིད་རྟོགས་པ་ནི་བྱང་ཆུབ་བོ། །ཡིད་ཀྱི་དེ་བཞིན་ཉིད་ཀྱི་བར་དུ་ཡང་དེ་བཞིན་གཤེགས་པས་ཐུགས་སུ་ཆུད་དེ། དེ་བཞིན་ཉིད་རྟོགས་པ་ནི་བྱང་ཆུབ་བོ། །སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་ཁྱོད་ཀྱི་ལུས་འདི་ནི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན། ཤེད་ལས་སྐྱེས་པ་མ་ཡིན། ཤེད་བུ་མ་ཡིན། བྱེད་པ་པོ་མ་ཡིན། ཚོར་བ་པོ་མ་ཡིན། ཤེས་པ་པོ་མ་ཡིན། མཐོང་བ་པོ་མ་ཡིན། ཉན་པ་པོ་མ་ཡིན། སྣོམ་པ་པོ་མ་ཡིན། ཟ་བ་པོ་མ་ཡིན། རེག་པ་པོ་མ་ཡིན། རྣམ་པར་ཤེས་པ་པོ་མ་ཡིན་ནོ། །སྲིང་མོ་བྱང་ཆུབ་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། གསོ་བ་མ་ཡིན། གང་ཟག་མ་ཡིན། བདག་གི་མ་ཡིན། ཡོངས་སུ་འཛིན་པ་མ་ཡིན། བྱས་པ་མ་ཡིན། ཚོར་བ་མ་ཡིན། གཟུགས་མ་ཡིན། སྒྲ་མ་ཡིན། དྲི་མ་ཡིན། རོ་མ་ཡིན། རེག་མ་ཡིན། རྣམ་པར་རེག་པ་མ་ཡིན་ཏེ། སྲིང་མོ་དེ་ལྟ་བས་ན་ཆོས་ཐམས་ཅད་མཉམ་པ་ཉིད་ནི་བྱང་ཆུབ་ཅེས་བྱའོ། །སྲིང་མོ་གང་ཡང་ཁྱོད་ཀྱི་ལུས་ནི་གཡོ་བ་མེད་པ། བྱེད་པ་མེད་པ། རྟག་པ་མེད་པ་སྟེ། རྩྭ་དང་། ཤིང་དང་། ཤིང་ལྗོན་པ་དང་། རྩིག་པའི་ཚོགས་རྣམས་དང་ཁྱད་པར་མེད་ཅིང་ཐ་དད་དུ་དབྱེར་མེད་དོ། །སྲིང་མོ་གང་ཡང་ནང་གི་སའི་ཁམས་དང་ཕྱི་རོལ་གྱི་སའི་ཁམས་ནི་གཉིས་སུ་མེད་ཅིང་གཉིས་སུ་དབྱེར་མེད་དེ། འདི་ལྟར་མཚན་ཉིད་མེད་པར་མཚན་ཉིད་གཅིག་པར་དེ་བཞིན་གཤེགས་པས་ཤེས་རབ་དང་ཡེ་ཤེས་ཀྱིས་མངོན་པར་རྫོགས་པར་ཐུགས་སུ་ཆུད་དེ།

སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །སྲིང་མོ་གཞན་ཡང་སེམས་དང་ཡིད་དང་། རྣམ་པར་ཤེས་པའི་རྣམ་པར་རིག་པ་གང་གིས་སེམས་པ་དང་། རྣམ་པར་ཤེས་པའི་སེམས་དང་། ཡིད་དང་། རྣམ་པར་ཤེས་པའི་རྣམ་པར་རིག་པ་དེ་ནི་སྐྲ་ལ་གནས་པ་མ་ཡིན། སྤུ་ལ་གནས་པ་མ་ཡིན། ཤ་མདོག་ལ་གནས་པ་མ་ཡིན། པགས་པ་ལ་གནས་པ་མ་ཡིན། ཤ་ལ་གནས་པ་མ་ཡིན། ཁྲག་ལ་གནས་པ་མ་ཡིན། རུས་པ་ལ་གནས་པ་མ་ཡིན། ཆུ་བ་ལ་གནས་པ་མ་ཡིན། རྐང་ལ་གནས་པ་མ་ཡིན། ནང་ན་གནས་པ་མ་ཡིན། ཕྱི་རོལ་ན་གནས་པ་མ་ཡིན། གཉིས་ཀ་མེད་པ་ལ་གནས་པ་མ་ཡིན། མིག་ལ་གནས་པ་མ་ཡིན། རྣ་བ་ལ་གནས་པ་མ་ཡིན། སྣ་ལ་གནས་པ་མ་ཡིན། ལྕེ་ལ་གནས་པ་མ་ཡིན། ལུས་ལ་གནས་པ་མ་ཡིན། ཡིད་ལ་གནས་པ་མ་ཡིན་ཏེ། གནས་པ་མ་ཡིན། མི་གནས་པ་མ་ཡིན། རྒྱུན་ཆད་པ་མ་ཡིན། ཡུལ་ན་གནས་པ་མ་ཡིན། ཕྱོགས་ན་གནས་པ་མ་ཡིན། གཟུགས་མེད་པ། བསྟན་དུ་མེད་པ། རྣམ་པར་རིག་པ་མེད་པ། གཟུང་བ་མེད་པ། འདྲེ་བ་མེད་པ། གཞི་མེད་པ། དག་པ། གཙང་བ། འོད་གསལ་བ་སྟེ། སེམས་དང་། ཡིད་ཀྱི་རྣམ་པར་རིག་པ་དེ་ནི་ཀུན་ནས་ཉོན་མོངས་པ་མེད་པ། རྣམ་པར་བྱང་བ་མེད་པ་སྟེ། དེ་ནི་རང་བཞིན་གྱིས་རྣམ་པར་དག་ཅིང་འོད་གསལ་ལ་ལུས་མེད་པའི་ཕྱིར། ཀུན་ནས་ཉོན་མོངས་པ་མེད་ཅིང་རྣམ་པར་བྱང་བ་མེད་དོ། །སྲིང་མོ་དེ་ལྟར་ན་ཕུང་པོ་དང་། ཁམས་དང་། སྐྱེ་མཆེད་ཀྱི་རང་བཞིན་ནི་བྱང་ཆུབ་བོ། །བྱང་ཆུབ་ཀྱི་རང་བཞིན་ཡང་ཕུང་པོ་དང་ཁམས་དང་། སྐྱེ་མཆེད་རྣམས་སོ། །སྲིང་མོ་ཁྱོད་ཀྱི་ལུས་འདི་ལ་ཕུང་པོ་དང་། ཁམས་དང་། སྐྱེ་མཆེད་གང་དག་མངོན་པར་གྲུབ་པ་དེ་དག་ནི་བྱང་ཆུབ་སྟེ། བྱང་ཆུབ་གཞན་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་ཕུང་པོ་དང་། ཁམས་དང་། སྐྱེ་མཆེད་རྣམས་ལས་གཞན་མ་ཡིན་ཏེ། དེ་དག་ཉིད་བྱང་ཆུབ་ཡིན་པས་ཆོས་ཐམས་ཅད་མཉམ་པ་ཉིད་དུ་རྟོགས་པས་ནི་བྱང་ཆུབ་ཡིན་པའི་ཕྱིར་རོ། །སྲིང་མོ་དེའི་ཕྱིར་ངས་ཁྱོད་ལ་འདི་སྐད་དུ་ཁྱོད་ཉིད་བྱང་ཆུབ་བོ་ཞེས་སྨྲས་སོ། །འཇམ་དཔལ་གཞོན་ནུར་གྱུར་པས་བསྟན་པ་འདི་བཤད་པ་ན་ནམ་མཁའི་དཀྱིལ་ན་གནས་པའི་ལྷའི་བུ་ལྔ་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །

གང་དག་སྨད་འཚོང་མའི་བུ་མོ་གསེར་མཆོག་འོད་དཔལ་གྱི་ཕྱི་བཞིན་འབྲང་བའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་རྣམས་ལས་སྲོག་ཆགས་ཉིས་བརྒྱས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷ་དང་མི་དྲུག་ཅུ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །སྨད་འཚོང་མའི་བུ་མོ་གསེར་མཆོག་འོད་དཔལ་ཡང་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། ཡན་ལག་ལྔས་ཕྱག་འཚལ་ནས། འཇམ་དཔལ་གཞོན་ནུར་གྱུར་པའི་རྐང་པ་གཉིས་ལ་གཏུགས་ཏེ། སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་སོང་ནས་ཚངས་པར་སྤྱད་པ་དང་བསླབ་པའི་གཞི་རྣམས་ཡང་དག་པར་བླངས་ཏེ།

ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་འདི་སྐད་ཅེས་སྨྲས་སོ། །འཇམ་དཔལ་བདག་ཀྱང་ཁྱོད་ཀྱིས་རྗེས་སུ་བསྟན་པ་དང་། སེམས་ཅན་ཐམས་ཅད་ལ་སྙིང་བརྩེ་བ་དང་། སྙིང་རྗེས་སངས་རྒྱས་ཀྱི་གདུང་མི་གཅད་པ་དང་། ཆོས་ཀྱི་གདུང་མི་གཅད་པ་དང་། དགེ་འདུན་གྱི་གདུང་མི་གཅད་པའི་སླད་དུ་ཁྱོད་ཀྱིས་བསྟན་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །

དེ་བཞིན་དུ་ཆོས་རྟོགས་པར་བགྱི་བའི་སླད་དུ་སེམས་ཅན་ཐམས་ཅད་ལ་ཆོས་བསྟན་པར་ཡང་བགྱིའོ། །ཉེས་པར་བགྱིས་པའི་ལས་ཀྱི་སྒྲིབ་པ་ཡོངས་སུ་སྦྱང་བའི་སླད་དུ་ནོངས་པ་ལ་ནོངས་པར་བཤགས་པར་བགྱིའོ། །གང་ན་ཆོས་ཐམས་ཅད་ཞི་ཞིང་ཉེ་བར་ཞི་བར་མ་རྟོགས་ནས། ཚུལ་བཞིན་མ་ལགས་པ་ཡིད་ལ་བགྱིད་པ་སྔོན་དུ་འགྲོ་བ་དང་། ཕྱིན་ཅི་ལོག་གི་དབང་དུ་མཆིས་པ་དང་། རང་གི་ལུས་ལ་མངོན་པར་ཞེན་པས་འདོད་ཆགས་ཀྱི་སྦྱོར་བ་དང་ལྡན་པའི་སེམས་ཅན་རྣམས་ཀྱིས་ནི་ཆོས་རྣམས་ཀྱི་རང་བཞིན་ཉིད་མ་རྟོགས་སོ། །འཇམ་དཔལ་དེ་ལྟ་ལགས་མོད་ཀྱི་འོན་ཀྱང་གང་དག་འདོད་ཆགས་ཀྱི་སྦྱོར་བ་དང་ལྡན་པའི་སེམས་ཅན་དེ་དག་ཀྱང་ཆོས་རྣམས་ཀྱི་ཆོས་ཉིད་འདི་ཅི་འདྲ་བ་དེ་ཉིད་དང་ལྡན་ནོ། །བྱང་ཆུབ་སེམས་དཔའ་རྣམས་ནི་ལྡན་པའི་ཆོས་འདི་ལ་སློབ་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ཅིའི་སླད་དུ་ཞེ་ན། འཇམ་དཔལ་ཉོན་མོངས་པ་རྣམས་ནི་ཇི་ལྟར་མཆིས་པ་མ་ལགས་པ་ལ། ཀུན་བརྟགས་པ་ལས་འབྱུང་བར་དེ་ལྟར་ཀུན་བརྟགས་པ་ཡོངས་སུ་རྟོགས་ན་འགག་པར་འགྱུར་བས་གསོག་དང་འདྲ་བའི་སླད་དུའོ། །

འཇམ་དཔལ་ཇི་ལྟར་ཁྱོད་ཀྱིས་གསུངས་པའི་དོན་བདག་གིས་འཚལ་བ་ལྟར་ན། ཉོན་མོངས་པ་རྣམས་ནི་རང་བཞིན་མ་མཆིས་ཤིང་བྱུང་བ་མ་མཆིས་པས་སྤྲིན་གྱི་ཚོགས་དང་འདྲའོ། །ཉོན་མོངས་པ་རྣམས་ནི་སྐད་ཅིག་ལ་འཇིག་ཅིང་འཇུ་སྟེ་ཆུའི་ཆུ་བུར་དང་འདྲའོ། །ཉོན་མོངས་པ་རྣམས་ནི་ཤིན་ཏུ་མངོན་པར་གྲུབ་པ་མ་མཆིས་པ་སྟེ། རླུང་དང་འདྲའོ། །ཉོན་མོངས་པ་རྣམས་ནི་ཡུལ་ཐམས་ཅད་ལས་ཡང་དག་པར་འདས་པ་སྟེ། ནམ་མཁའི་རི་མོ་དང་འདྲའོ། །ཉོན་མོངས་པ་རྣམས་ནི་རིང་དུ་མི་གནས་པས་ཆུའི་རི་མོ་དང་འདྲའོ། །ཉོན་མོངས་པ་རྣམས་ནི་ཚུལ་བཞིན་མ་ལགས་པ་ཡིད་ལ་བགྱིད་པའི་འཇུག་པ་ལས་འབྱུང་བ་སྟེ། གནོད་སྦྱིན་དང་འབྱུང་པོ་འདྲའོ། །ཉོན་མོངས་པ་རྣམས་ནི་མ་མཆིས་པ་ལ་ཕྱིན་ཅི་ལོག་ཏུ་མཐོང་བ་ལས་བྱུང་བ་སྟེ། སྤྲིན་མར་དང་འདྲའོ། །ཉོན་མོངས་པ་རྣམས་ནི་ཀུན་བརྟགས་པ་ལས་བྱུང་བ་སྟེ། ཡང་དག་པ་མ་ལགས་པའོ། །ཉོན་མོངས་པ་རྣམས་ནི་ངར་འཛིན་པས་ལྷག་པར་ཆགས་པ་དང་འབྲེལ་བའོ། །ཉོན་མོངས་པ་རྣམས་ནི་བདག་གིར་འཛིན་པས་དངོས་པོར་ཡོངས་སུ་འཛིན་པའོ། །ཉོན་མོངས་པ་རྣམས་ནི་ལོག་པར་བསྐྱེད་པས་གློ་བུར་དུ་བྱུང་བའོ། །ཉོན་མོངས་པ་རྣམས་ནི་རྣམ་པར་རྟོག་པ་ལས་བྱུང་བས་མཚན་མའི་རྗེས་སུ་འབྲང་བ་དང་འདྲའོ། །ཉོན་མོངས་པ་རྣམས་ནི་ཁམས་སྣ་ཚོགས་ལ་མི་དཔྱོད་པའི་ཚུལ་གྱིས་བསྐྱེད་པ་སྟེ་སོ་སོར་མི་རྟོག་པའོ། །ཉོན་མོངས་པ་རྣམས་ནི་སེམས་དང་རྗེས་སུ་མཐུན་པས་བསྐྱེད་པ་སྟེ། ངེས་པར་མི་སེམས་པའོ། །ཉོན་མོངས་པ་རྣམས་ནི་བདག་དང་གཞན་ལ་མངོན་པར་ཞེན་པ་ལས་བྱུང་བ་སྟེ། ཡིད་ཆེས་པར་མི་བགྱི་བའོ། །ཉོན་མོངས་པ་རྣམས་ནི་ཕུང་པོ་དག་ལེན་པའོ། །ཉོན་མོངས་པ་རྣམས་ནི་ཁམས་རྣམས་ལ་རིལ་པོར་འཛིན་པའོ། །ཉོན་མོངས་པ་རྣམས་ནི་སྐྱེ་མཆེད་རྣམས་སོགས་པའོ། །ཉོན་མོངས་པ་རྣམས་ནི་མིང་དང་གཟུགས་ལ་རྣམ་པར་འབྱེད་པའོ། །ཉོན་མོངས་པ་རྣམས་ནི་ཚུལ་བཞིན་མ་ལགས་པ་ཡིད་ལ་བགྱིད་པ་དག་མི་རྟོགས་པའོ། །འཇམ་དཔལ་དེ་ལྟ་ལགས་མོད་ཀྱི་འོན་ཀྱང་ཉོན་མོངས་པ་རྣམས་ནི་བྱང་ཆུབ་ཀྱི་༌ཕུར་བུའི་གཞི་ལགས་སོ། །

དེ་ཅིའི་སླད་དུ་ཞེ་ན། བྱང་ཆུབ་ནི་གཡོ་བ་མ་མཆིས་པའི་སླད་དུའོ། །ཉོན་མོངས་པ་རྣམས་ནི་བྱང་ཆུབ་ཀྱི་ས་བོན་ཏེ། ཉོན་མོངས་པ་རྟོགས་པ་ཉིད་བྱང་ཆུབ་ལགས་སོ། །ཉོན་མོངས་པ་རྣམས་ནི་བྱང་ཆུབ་རྡོ་རྗེའི་གཞི་ལགས་སོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་དབྱེར་མ་མཆིས་པའི་ཚུལ་གྱིས་བྱང་ཆུབ་ནི་ཉོན་མོངས་པ་རྣམས་ཀྱིས་མི་ཕྱེད་པའི་སླད་དུའོ། །འཇམ་དཔལ་ཉོན་མོངས་པ་རྣམས་མཐོང་བ་ནི་བྱང་ཆུབ་སྟེ། བྱང་ཆུབ་ནི་ཡུལ་ཐམས་ཅད་ཀྱི་རྗེས་སུ་སོང་བའོ། །འཇམ་དཔལ་ཇི་ལྟར་བྱང་ཆུབ་རྣམ་པར་གནས་པ་མ་མཆིས་པ་དེ་ལྟར་ཉོན་མོངས་པ་རྣམས་ཀྱང་རྣམ་པར་གནས་པ་མ་མཆིས་པ་སྟེ། སྐྱེས་ནས་འཇིག་ཅིང་འཇུ་བས་མི་གནས་པའོ། །འཇམ་དཔལ་ཉོན་མོངས་པ་རྣམས་ནི་སེམས་ཀྱི་རང་བཞིན་ལགས་སོ། །དེ་ཅིའི་སླད་དུ་ཞེ་ན། འཇམ་དཔལ་སེམས་འདི་ནི་ཆགས་པའམ། སྡང་བའམ། རྨོངས་པ་ཞེས་སེམས་ཀྱི་རང་བཞིན་བསྟན་པར་མི་ནུས་ཏེ། འཇམ་དཔལ་ཇི་ལྟར་སེམས་བསྟན་པར་མི་ནུས་པ་དེ་བཞིན་དུ་ཉོན་མོངས་པ་རྣམས་ཀྱང་ཡུལ་ན་གནས་པའམ། ཕྱོགས་ན་གནས་པ་ཞེས་ཉོན་མོངས་པའི་རང་བཞིན་བསྟན་པར་མི་ནུས་པའི་སླད་དུའོ། །འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟ་ཇི་ལྟར་ཉོན་མོངས་པ་དེ་དག་རབ་ཏུ་རྟོགས་པ་དེ་ལྟ་དེ་ལྟར་དེ་འདོད་ཆགས་ལ་སྤྱོད་པའི་སེམས་ཅན་རྣམས་ཡོངས་སུ་སྨིན་པར་བགྱི་བ་ལ་སྐྱོ་བར་མི་འགྱུར་རོ། །ཞེ་སྡང་ལ་སྤྱོད་པ་རྣམས་ལ་མ་ལགས། གཏི་མུག་ལ་སྤྱོད་པ་རྣམས་ལ་མ་ལགས་ཏེ། ཆ་མཉམ་པ་ལ་སྤྱོད་པའི་སེམས་ཅན་རྣམས་ཡོངས་སུ་སྨིན་པར་བགྱི་བ་ལ་སྐྱོ་བར་མི་འགྱུར་རོ། །

འཇམ་དཔལ་ད་ལྟར་བདག་གི་འདོད་ཆགས་ཇི་ལྟ་བ་དེ་བཞིན་དུ་འདོད་ཆགས་ལ་སྤྱོད་པ་ཐམས་ཅད་ཀྱི་འདོད་ཆགས་ལ་བལྟ་བར་བགྱིའོ། །འཇམ་དཔལ་ད་ལྟར་བདག་གི་ཞེ་སྡང་ཇི་ལྟ་བ་དེ་བཞིན་དུ་ཞེ་སྡང་ལ་སྤྱོད་པ་ཐམས་ཅད་ཀྱི་ཞེ་སྡང་ལ་བལྟ་བར་བགྱིའོ། །འཇམ་དཔལ་ད་ལྟར་བདག་གི་གཏི་མུག་ཇི་ལྟ་བ་དེ་བཞིན་དུ་གཏི་མུག་ལ་སྤྱོད་པ་ཐམས་ཅད་ཀྱི་གཏི་མུག་ལ་བལྟ་བར་བགྱིའོ། །འཇམ་དཔལ་ད་ལྟར་བདག་གི་ཉོན་མོངས་པ་ཐམས་ཅད་ཇི་ལྟ་བ་དེ་བཞིན་དུ་ཉོན་མོངས་པ་ཐམས་ཅད་ལ་སྤྱོད་པའི་སེམས་ཅན་ཐམས་ཅད་ཀྱི་ཉོན་མོངས་པ་ལ་བལྟ་བར་བགྱིའོ། །འཇམ་དཔལ་འདི་ལྟ་སྟེ་དཔེར་ན། མེ་ནི་རྩྭ་དང་ཤིང་ཐམས་ཅད་ཀྱིས་འཇིགས་པ་མ་མཆིས་པའོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ཀྱི་མེ་ཡང་ཉོན་མོངས་པའི་རྩྭ་དང་ཤིང་ཐམས་ཅད་ཀྱིས་འཇིགས་པ་མ་མཆིས་པའོ། །འཇམ་དཔལ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ནི་མུན་པ་མུན་ནག་ཐམས་ཅད་དང་ལྷན་ཅིག་མི་གནས་སོ། །

འཇམ་དཔལ་དེ་བཞིན་དུ་འཕགས་པའི་ཤེས་རབ་ཀྱང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ་འདི་ལྟ་སྟེ་དཔེར་ན། རླུང་མར་ནི་ཤིང་ལྗོན་པ་དང་རི་ཐམས་ཅད་ལ་མི་ཆགས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་ཡུལ་ཐམས་ཅད་ལ་མི་ཆགས་སོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའི་ཁམས་ནི་སྲེག་པའི་བསྐལ་པ་ཐམས་ཅད་ཀྱིས་ཚིག་པར་མི་འགྱུར་རོ། །

འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་སྲེག་པའི་བསྐལ་པ་ཐམས་ཅད་ཀྱིས་ཚིག་པར་མི་འགྱུར་རོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནི་རྡུལ་དང་ན་བུན་དང་། སྤྲིན་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ་འདི་ལྟ་སྟེ་དཔེར་ན། ནམ་མཁའ་ནི་ས་དང་ལྷན་ཅིག་མི་གནས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ་འདི་ལྟ་སྟེ་དཔེར་ན། ཁབ་ལོང་ནི་ལྕགས་དང་ལྷན་ཅིག་མི་གནས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་དང་ལྷན་ཅིག་མི་གནས་སོ། །འཇམ་དཔལ་འདི་ལྟ་སྟེ་དཔེར་ན། རི་ཁོར་ཡུག་ནི་རླུང་ཐམས་ཅད་ཀྱིས་བསྐྱོད་པར་མི་ནུས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པ་ཐམས་ཅད་ཀྱིས་བསྐྱོད་པར་མི་ནུས་སོ། །

འཇམ་དཔལ་འདི་ལྟ་སྟེ་དཔེར་ན། དུད་འགྲོའི་སྐྱེ་གནས་སུ་སོང་བ་བྱ་ངང་པ་ཞེས་བགྱི་བ་ནི་འོ་མ་དང་ཆབ་བསྲེས་པ་ལས་འོ་མ་ཉིད་ནི་འཚལ་གྱི་ཆབ་ནི་མ་ལགས་སོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་འཕགས་པའི་ཤེས་རབ་དང་ཉོན་མོངས་པའི་འདྲེས་པ་དག་ལས་ཤེས་རབ་ཉིད་ནི་ལེན་གྱི་ཉོན་མོངས་པ་ནི་མ་ལགས་སོ། །འཇམ་དཔལ་འདི་ལྟ་སྟེ་དཔེར་ན། བྱང་གི་སྒྲ་མི་སྙན་གྱི་གླིང་ན་ཉེ་དུར་འབྲེལ་བའི་བུད་མེད་རྣམས་ལ་ཤིང་གི་ཡལ་ག་འདུད་པར་མི་བགྱིད་དོ། །འཇམ་དཔལ་དེ་བཞིན་དུ་དབང་པོ་ཡོངས་སུ་མ་སྨིན་པའི་སེམས་ཅན་རྣམས་ལ་བྱང་ཆུབ་སེམས་དཔའི་སྤྱོད་པ་དང་། འཕགས་པའི་ཤེས་རབ་དང་ཡེ་ཤེས་འདུད་པར་མི་བགྱིད་དོ། །འཇམ་དཔལ་ད་ལྟར་བདག་ནི་ཉོན་མོངས་པ་རྣམས་ཀྱིས་འཇིགས་པའམ། སྐྲག་པ་ཅི་ཡང་མ་མཆིས་སོ། །དེ་ཅིའི་སླད་དུ་ཞེ་ན། འཇམ་དཔལ་བདག་གིས་ཆོས་ཐམས་ཅད་ཀྱི་རང་བཞིན་དབེན་པར་རྟོགས་པའི་སླད་དུའོ། །འཇམ་དཔལ་བྱང་ཆུབ་སེམས་དཔའ་རྣམས་ནི་འཇིགས་པ་མ་མཆིས་པའི་གོ་ཆ་བགོས་པ་སྟེ། འཇམ་དཔལ་འདི་ལྟ་སྟེ་དཔེར་ན། གང་དགྲས་འཇིགས་པ་དེ་ནི་དཔའ་བོ་ཞེས་མི་བགྱིའོ། །འཇམ་དཔལ་དེ་བཞིན་དུ་གང་ཉོན་མོངས་པ་རྣམས་ཀྱིས་འཇིགས་པ་དེ་ཡང་བྱང་ཆུབ་སེམས་དཔའ་ཞེས་མི་བགྱིའོ། །འཇམ་དཔལ་འདི་ལྟ་སྟེ་དཔེར་ན། གང་དགྲས་བཅོམ་པ་དེ་ནི་དཔའ་བོ་ཞེས་མི་བགྱིའོ། །འཇམ་དཔལ་དེ་བཞིན་དུ་གང་ཉོན་མོངས་པ་རྣམས་ཀྱིས་བཅོམ་པ་དེ་ཡང་བྱང་ཆུབ་སེམས་དཔའ་ཞེས་མི་བགྱིའོ། །འཇམ་དཔལ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆུ་འདང་ཞེས་བགྱི་བ་ཆབ་ཀྱི་ནང་དུ་སྩལ་ན་གཤེར་བར་ཡང་མི་འགྱུར་ཞིང་ཆབ་ཀྱི་དྲི་མས་ཀྱང་མི་གོས་ལ། ཆབ་ཀྱི་རྙོག་པ་ཐམས་ཅད༌ཀྱང་རབ་ཏུ་དང་བར་བགྱིད་དོ། །འཇམ་དཔལ་དེ་བཞིན་དུ་འཕགས་པའི་ཤེས་རབ་ལ་སྤྱོད་པའི་བྱང་ཆུབ་སེམས་དཔའ་ཡང་ཉོན་མོངས་པའི་ནང་ན་གནས་ཀྱང་ཉོན་མོངས་པས་གཤེར་བར་ཡང་མི་འགྱུར་ཞིང་ཉོན་མོངས་པའི་དྲི་མས་ཀྱང་མི་གོས་ལ། ཉོན་མོངས་པའི་རྙོག་པ་ཐམས་ཅད་ཀྱང་རབ་ཏུ་ཞི་བར་བགྱིད་དོ། །

དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་བསྟན་པ་འདི་བཤད་ནས་ཡང་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའ་ཉོན་མོངས་པ་མ་མཆིས་པ་ལགས། འཇམ་དཔལ་གྱིས་སྨྲས་པ། སྲིང་མོ་བྱང་ཆུབ་སེམས་དཔའ་གང་གིས་ཉོན་མོངས་པ་སྐྱེ་བའམ་འགག་པར་མཐོང་ན། བྱང་ཆུབ་སེམས་དཔའ་དེ་ནི་ཉོན་མོངས་པ༌ཐམས་ཅད་མེད་པ་ཞེས་མི་བྱའོ། །སྲིང་མོ་འདི་ལྟ་སྟེ་དཔེར་ན། འབྲུ་མར་གྱི་སྒྲོན་མ་ལ་མུན་པ་མུན་ནག་སྣང་ན་འབྲུ་མར་གྱི་སྒྲོན་མ་ཞེས་མི་བྱའོ། །སྲིང་མོ་དེ་བཞིན་དུ་བྱང་ཆུབ་སེམས་དཔའ་གང་གིས་ཉོན་མོངས་པ་སྐྱེ་བའམ་འགག་པར་མཐོང་ན། བྱང་ཆུབ་སེམས་དཔའ་དེ་ནི་ཉོན་མོངས་པ་མེད་པ་ཞེས་མི་བྱའོ། །སྲིང་མོ་ཉོན་མོངས་པ་མེད་པ་ཞེས་བྱ་བ་ནི་སུ་གང་དུ་ཀུན་ནས་ཉོན་མོངས་པ་ཡང་མི་མཐོང་། རྣམ་པར་བྱང་བ་ཡང་མི་མཐོང་སྟེ། མཐོང་བ་དང་། མི་མཐོང་བ་དང་། སེམས་དང་ཡིད་དང་། རྣམ་པར་རིག་པ་དང་བྲལ་བ་ནི་ཉོན་མོངས་པ་མེད་པའོ། །སྲིང་མོ་གང་དང་གང་དུ་སེམས་དང་ཡིད་དང་། རྣམ་པར་རིག་པ་འཇུག་ན། ཐ་ན་མྱ་ངན་ལས་འདས་པར་སེམས་པ་ཡང་རུང་སྟེ། དེ་ཐམས་ཅད་ནི་ཉོན་མོངས་པའོ། །

དེ་ཅིའི་ཕྱིར་ཞེ་ན། ཉོན་མོངས་པ་མེད་པ་ལ་ནི་སེམས་སམ་སེམས་ལ་འཇུག་པ་མེད་པའི་ཕྱིར་ཏེ། གང་གིས་དགེ་བའམ་མི་དགེ་བའི་དམིགས་པ་ལ་སེམས་འཇུག་པ་དེ་དག་ཐམས་ཅད་ནི་མངོན་པར་འདུ་བྱེད་པའོ། །གང་མངོན་པར་འདུ་བྱེད་པ་དེ་ནི་འཁོར་བའོ། །གང་འཁོར་བ་དེ་ནི་འདུ་བྱེད་དོ། །འདུ་བྱེད་ཐམས་ཅད་ནི་འཁོར་བ་སྟེ། སྲིང་མོ་དེ་དག་ནི་ཉོན་མོངས་པ་ཡིན་ནོ། །སྲིང་མོ་ཉོན་མོངས་པ་ཞེས་བྱ་བ་དེ་ནི་སྦྱོར་བ་སྟེ། མིག་དང་གཟུགས་སུ་སྦྱོར་བ་ནི་ཉོན་མོངས་པའོ། །དེ་བཞིན་དུ་རྣ་བ་དང་། སྒྲ་དང་། སྣ་དང་། དྲི་དང་། ལྕེ་དང་། རོ་དང་། ལུས་དང་། རེག་བྱ་དང་། ཡིད་དང་། ཆོས་སུ་སྦྱོར་བ་ནི་ཉོན་མོངས་པའོ། །ཚུལ་ཁྲིམས་ལ་སྦྱོར་བ་ནི་ཉོན་མོངས་པའོ། །ཏིང་ངེ་འཛིན་ལ་སྦྱོར་བ་ནི་ཉོན་མོངས་པའོ། །ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ལ་སྦྱོར་བ་ནི་ཉོན་མོངས་པའོ། །རབ་ཏུ་དབེན་པ་ལ་སྦྱོར་བར་སེམས་པ་ནི་ཉོན་མོངས་པའོ། །སྲིང་མོ་ཉོན་མོངས་པ་མེད་པ་ཞེས་བྱ་བ་དེ་ནི་རྒྱུ་བ་མེད་པ་ཞེས་བྱ་བའི་ཚིག་བླ་དྭགས་སོ། །དེ་ནི་སྤྲོས་པ་མེད༌པ་ཞེས་བྱ་བའི་ཚིག་བླ་དྭགས་སོ། །དེ་ནི་རྩོལ་བ་མེད་པ་ཞེས༌བྱ་བའི་ཚིག་བླ་དྭགས་སོ། །ཀུན་དུ་འབྱུང་བ་མེད་པ་ཞེས༌བྱ་བའི་ཚིག་བླ་དྭགས་ཏེ། སྲིང་མོ་གྲངས་དང་གྲངས་མེད་པ་དང་བྲལ་བ་ནི་ཉོན་མོངས་པ་མེད་པ་ཉིད་དོ། །སྲིང་མོ་གཞན་ཡང་བྱང་ཆུབ་སེམས་དཔའ་གང་བདག་ལ་ཡང་ཉོན་མོངས་པ་མེད་ལ། གཞན་དག་ཉོན་མོངས་པ་ལས། རབ་ཏུ་ཐར་བ་ལ་ཡང་ཤིན་ཏུ་བརྩོན་པ་དེ་ནི་ཉོན་མོངས་པ་མེད་པའོ་ཞེས་དེ་བཞིན་གཤེགས་པས་གསུངས་ཏེ། གཞན་དག་ཉོན་མོངས་པ་ལས་རབ་ཏུ་ཐར་བར་བྱེད་པ་ནི་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་ལོ། །

བུ་མོས་སྨྲས་པ། འཇམ་དཔལ་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་གང་ལགས། འཇམ་དཔལ་གྱིས་སྨྲས་པ། སྟོང་པ་ཉིད་ལ་སོ་སོར་རྟོག་པའི་རྗེས་སུ་འཇུག་ཅིང་ལྟ་བ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང་། མཚན་མ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་མཚན་མ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང་། སྨོན་པ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་སྨོན་པ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང་། མངོན་པར་འདུ་བྱེད་པ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་མངོན་པར་འདུ་བྱེད་པ་ལ་སྤྱོད་པའི་སེམས་ཅན་རྣམས་ལ་སྙིང་རྗེ་བ་དང་། སྐྱེ་བ་མེད་ཅིང་འཆི་འཕོ་བ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་རྒ་བ་དང་ཤི་བར་འདུ་ཤེས་པའི་སེམས་ཅན་རྣམས་ལ་སྙིང་རྗེ་བ་དང་། སྐྱེ་བ་མེད་པ་ལ་སོ་སོར་རྟོག་པའི་རྗེས་སུ་འཇུག་ཅིང་སྐྱེ་བ་དང་འཇིག་པར་འདུ་ཤེས་པའི་སེམས་ཅན་རྣམས་ལ་སྙིང་རྗེ་བ་དང་། ཉན་ཐོས་སུ་ངེས་པ་ལ་སོ་སོར་རྟོག་པའི་རྗེས་སུ་འཇུག་ཅིང་ཉན་ཐོས་ཀྱི་འབྲས་བུ་ཐོབ་པ་ལས་ལྡོག་པ་དང་། རང་སངས་རྒྱས་སུ་ངེས་པ་ལ་སོ་སོར་རྟོག་པའི་རྗེས་སུ་འཇུག་ཅིང་རང་སངས་རྒྱས་ཀྱི་འབྲས་བུ་ཐོབ་པ་ལས་ལྡོག་པ་དང་། བྱང་ཆུབ་སེམས་དཔའི་སྐྱོན་མེད་པ་ལ་འཇུག་པ་སོ་སོར་རྟོག་པའི་རྗེས་སུ་འཇུག་ཅིང་སེམས་ཅན་ཐམས་ཅད་ལ་ཡང་སྙིང་རྗེ་བ་སྟེ། སྲིང་མོ་འདི་ནི་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་ལོ། །སྲིང་མོ་འདི་ལྟ་སྟེ་དཔེར་ན། རྒྱ་མཚོ་ཆེན་པོར་འཇུག་པ་ནི་སླའི། རིན་པོ་ཆེ་ཆེན་པོ་དག་ཐོགས་ཏེ་ལྡོག་པར་ནི་དཀའོ། །སྲིང་མོ་དེ་བཞིན་དུ་སྟོང་པ་ཉིད་ལ་སོ་སོར་རྟོག་པ་ནི་སླའི། ཐབས་ལ་མཁས་པ་དང་བྲལ་བས་ལྡོག་པར་ནི་དཀའོ། །མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱེད་པ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པ་དང་། ཉན་ཐོས་ཀྱི་སྐྱོན་མེད་པ་དང་། རང་སངས་རྒྱས་ཀྱི་སྐྱོན་མེད་པ་ལ་ཡང་སོ་སོར་བརྟག༌པར་ནི་སླའི། ཐབས་ལ་མཁས་པ་དང་བྲལ་བས་ལྡོག་པར་ནི་དཀའོ། །

སྲིང་མོ་འདི་ལྟ་སྟེ་དཔེར་ན། གཡུལ་ངོ་ཆེན་པོར་འཇུག༌པར་ནི་སླའི། མ་སྨས་མ་ཉམས་པར་རྒལ་བར་ནི་དཀའོ། །སྲིང་མོ་དེ་བཞིན་དུ་རྣམ་པར་ཐར་པའི་སྒོ་གསུམ་དུ་ཡང་འཇུག༌པར་ནི་སླའི། ཐབས་ལ་མཁས་པ་དང་བྲལ་བས་ལྡོག་པར་ནི་དཀའོ། །བུ་མོས་སྨྲས་པ། འཇམ་དཔལ་ཐབས་ཞེས་བགྱི་བ་ཇི་ལྟ་བུ་ལགས། འཇམ་དཔལ་གྱིས་སྨྲས་པ། སྲིང་མོ་ཐབས་ཞེས་བྱ་བ་ནི་གང་ཕྱོགས་གཉིས་མི་སྤོང་བ་སྟེ། འདི་ལྟར་འཁོར་བའི་ཕྱོགས་དང་། མྱ་ངན་ལས་འདས་པའི་ཕྱོགས་སོ། །སྲིང་མོ་ཐབས་ཞེས་བྱ་བ་ནི་གང་སྒོ་གཉིས་སྟོན་པར་བྱེད་པ་སྟེ། འཁོར་བའི་སྒོ་དང་། མྱ་ངན་ལས་འདས་པའི་སྒོ་དང་། སྟོང་པ་ཉིད་ཀྱི་སྒོ་དང་། ལྟ་བ་ལས་རབ་ཏུ་ཐར་བའི་སྒོ་དང་། མཚན་མ་མེད་པའི་སྒོ་དང་། མཚན་མ་ལས་རྣམ་པར་ཐར་པའི་སྒོ་དང་། སྨོན་པ་མེད་པའི་སྒོ་དང་། བསམས་བཞིན་དུ་སྐྱེ་བའི་སྒོ་དང་། མངོན་པར་འདུ་བྱེད་པ་མེད་པའི་སྒོ་དང་། དགེ་བ་མངོན་པར་འདུ་བྱ་བའི་སྒོ་དང་། སྐྱེ་བ་མེད་པའི་སྒོ་དང་། སྐྱེ་བ་ཀུན་དུ་སྟོན་པའི་སྒོ་དང་། འབྱུང་བ་མེད་པའི་སྒོ་དང་། ཕུང་པོ་དང་། ཁམས་དང་། སྐྱེ་མཆེད་ཀྱི་སྒོ་དང་། སྐྱེ་བ་མེད་ཅིང་འགག་པ་མེད་པའི་སྒོ་དང་། སྐྱེ་བ་དང་འབྱུང་བའི་སྒོ་དང་། དབེན་པའི་སྒོ་དང་། སེམས་ཅན་ཡོངས་སུ་སྨིན་པར་བྱ་བའི་སྒོ་དང་། ཆོས་ཀྱི་དབྱིངས་ཀྱི་སྒོ་དང་། ཆོས་ཐམས་ཅད་སོ་སོར་སྲུང་བའི་སྒོ་དང་། ཉན་ཐོས་ཀྱི་ཐེག་པའི་སྒོ་དང་། བྱང་ཆུབ་སེམས་དཔའི་ལྷག་པའི་བསམ་པའི་སྒོ་དང་། རང་བྱང་ཆུབ་ཀྱི་སྒོ་དང་། སངས་རྒྱས་ཀྱི་ཆོས་མི་བརྗེད་པའི་སྒོ་སྟེ། སྲིང་མོ་བྱང་ཆུབ་སེམས་དཔའ་གང་སྒོ་གཉིས་ཉེ་བར་སྟོན་ཀྱང་། སྒོ་ཐམས་ཅད་ལ་ཡང་ཆགས་པ་མེད་པ་དེ་ནི་ཐབས་ལ་མཁས་པ་ཞེས་བྱའོ། །

དེ་བཞིན་དུ་འདོད་ཆགས་ཀྱི་སྒོ་དང་། འདོད་ཆགས་དང་བྲལ་བའི་སྒོ་དང་། ཞེ་སྡང་གི་སྒོ་དང་། ཞེ་སྡང་དང་བྲལ་བའི་སྒོ་དང་། གཏི་མུག་གི་སྒོ་དང་། གཏི་མུག་དང་བྲལ་བའི་སྒོ་དང་། ཉོན་མོངས་པའི་སྒོ་དང་། ཉོན་མོངས་པ་དང་བྲལ་བའི་སྒོ་དང་། འགྲོ་བ་ཐམས་ཅད་ཀྱི་སྒོ་དང་། འགྲོ་བ་མེད་པའི་སྒོ་སྟེ། སྲིང་མོ་འདི་ནི་བྱང་ཆུབ་སེམས་དཔའི་ཐབས་ལ་མཁས་པའོ། །བྱིས་པ་སོ་སོའི་སྐྱེ་བོ་ཐམས་ཅད་ཀྱི་སྤྱོད་པའི་སྒོ་དང་། སློབ་པ་དང་། མི་སློབ་པ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་སྤྱོད་པའི་སྒོ་གང་ཡིན་པ་དེ་གཉིས་ཤེས་པ་གང་ཡིན་པ་འདི་ནི་བྱང་ཆུབ་སེམས་དཔའི་ཐབས་ལ་མཁས་པ་ཞེས་བྱའོ། །ཡང་དེའི་ཚེ་ན་བཅོམ་ལྡན་འདས་བྱ་རྒོད་ཀྱི་ཕུང་པོའི་རིའི་ངོས་ཀྱི་སྨན༌ལྗོངས་ཞིག་ན་ཞབས་འབྲིང་བྱེད་པའི་དགེ་སྦྱོང་ཚེ་དང་ལྡན་པ་ཀུན་དགའ་བོ་དང་ཐབས་ཅིག་ཏུ་རིང་དུ་འཆགས་པས་འཆག་ཅིང་བཞུགས་སོ། །

དེར་བཞུགས་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འཇམ་དཔལ་ཁྱོད་ཀྱིས་བྱང་ཆུབ་སེམས་དཔའི་བརྩོན་འགྲུས་ཡང་དག་ཕུལ་དང་ཐབས་ལ་མཁས་པ་ཇི་སྐད་བསྟན་པ་དེ་ནི་དེ་བཞིན་ཏེ། ལེགས་སོ་ལེགས་སོ་ཞེས་བྱ་བ་བྱིན་པ་དང་། ལེགས་སོ་ཞེས་བྱ་བའི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དབྱངས་ཀྱིས་གོ་བར་གྱུར་ཅིང་། ལེགས་སོ་ཞེས་བྱ་བའི་སྒྲ་དེ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་པར་ཡང་གྱུར་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་མང་པོ་དག་ལེགས་སོ་ཞེས་བྱ་བའི་སྒྲ་དེས་བསྐུལ་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ཞེས་བགྱི་བའི་སྒྲ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་མཛད་པ་དེ་བཅོམ་ལྡན་འདས་ཀྱིས་སུ་ལ་སྩལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་དེ་ནི་འཇམ་དཔལ་གཞོན་ནུར་གྱུར་པ་ལའོ། །ལྷའི་བུ་རྣམས་ཀྱིས་གསོལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ༌དེ་ད་ལྟར་གང་ན་མཆིས།

བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་འཇམ་དཔལ་གཞོན་ནུར་གྱུར་པ་ནི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཤར་ཕྱོགས་ཀྱི་སྒོ་ན། སྨད་འཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་དང་། ལྷན་ཅིག་ཏུ་ཆོས་དང་ལྡན་པའི་གཏམ་ཟེར་ཞིང་འདུག་གིས་ལྷའི་བུ་དག་གང་དག་ཆོས་ཉན་པར་འདོད་པ་དག་ཀྱང་དེར་དེང་ཤིག །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་ཐམས་ཅད་ལྷན་ཅིག་ཏུ་འདུས་ནས། འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་སྟེ་ཕྱིན་པ་དང་། ལུས་རགས་པར་སྤྲུལ་ནས་མེ་ཏོག་གི་ཆར་རབ་ཏུ་ཕབ་སྟེ། མེ་ཏོག་གི་ཆར་དེས་རྒྱལ་པོའི་ཁབ་ཀྱི་ཁོ་ར་ཁོར་ཡུག་ཏུ་མེ་ཏོག་ཆལ་བར་བཀྲམ་པར་གྱུར་ཏོ། །དེ་ན་ལྷ་རྣམས་ཀྱིས་ཀྱང་མི་རྣམས་མཐོང་ཞིང་མི་རྣམས་ཀྱིས་ཀྱང་ལྷ་རྣམས་ཀྱང་མཐོང་སྟེ། ཕན་ཚུན་སྨྲ་བར་ནི་མི་བྱེད་དོ། །དེ་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་སྲོག་ཆགས་བརྒྱ་སྟོང་ཕྲག་མང་པོ་དག་མེ་ཏོག་དེ་དག་གིས་ཀྱང་བསྐུལ། ལྷའི་ལུས་རགས་པ་དེ་དག་གིས་ཀྱང་བསྐུལ་ནས། འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་ངོ་། །རྒྱལ་པོ་མ་སྐྱེས་དགྲ་ཡང་བུད་མེད་ཀྱི་ཚོགས་རྣམས་ཀྱིས་བསྐོར་ཏེ། དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་འཇམ་དཔལ་གཞོན་ནུར་གྱུར་པ་ག་ལ་བ་དེར་སོང་ནས། འཁོར་དེ་དང་། རྒྱལ་པོ་མ་སྐྱེས་དགྲ་དང་། རྒྱལ་པོ་དང་བློན་པོའི་བུ་རྣམས་དང་། ཚོང་དཔོན་དང་ཁྱིམ་བདག་གི་བུ་རྣམས་ཀྱིས་སྨད་འཚོང་མའི་བུ་མོ་གསེར་མཆོག་འོད་དཔལ་དེ་འདོད་ཆགས་ཀྱིས་ཉོན་མོངས་པའི་ཀུན་ནས་ལྡང་བ་དང་བྲལ་ཏེ། དབང་པོ་དང་སྤྱོད་ལམ་རབ་ཏུ་ཞི་ཞིང་དབང་པོ་མི་གཡེང་ལ་ངོ་ཚ་ཤེས་པ་དང་། དཔལ་གྱིས་ལེགས་པར་བརྒྱན་པར་མཐོང་ངོ་། །མཐོང་ནས་ཀྱང་དེ་ལ་ཕྱིན་ཆད་སུ་ཡང་འདོད་པའི་རྣམ་པར་རྟོག་པ་མི་སྐྱེ་བར་གྱུར་ཏོ། །

དེ་ནས་འཇམ་དཔལ་གཞོན་ནུར་གྱུར་པས་སྐྱེ་བོའི་ཚོགས་ཆེན་པོ་དེ་འདུས་པར་རིག་ནས། སྨད༌འཚོང་མའི་བུ་མོ་གསེར་མཆོག་འོད་དཔལ་ལ་འདི་སྐད་ཅེས་སྨྲས་སོ། །བུ་མོ་སྐྱེ་བོའི་ཚོགས་ཆེན་པོ་ཐམས་ཅད་ཀྱིས་ཁྱོད་མཐོང་ཡང་ཕྱིར་ཞིང་ཆགས་པ་མེད་ན། ཁྱོད་ཀྱིས་ཉོན་མོངས་པ་དེ་དག་གང་དུ་བཞག །བུ་མོས་སྨྲས་པ། འཇམ་དཔལ་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ནི་ཡེ་ཤེས་དང་རྣམ་པར་གྲོལ་བ་ལ་གནས་པ་དང་། ཆོས་ཀྱི་དབྱིངས་ལ་གནས་པ་སྟེ། དེ་དག་ཀྱང་མ་བསྐྱེད་པ་དང་། མ་བཀག་པ་དང་། མ་བསྒྱུར་བར་དེ་ལྟར་བདག་གིས་རྟོགས་སོ། །ཉོན་མོངས་པའི་རང་བཞིན་གང་ལགས་པ་དེ་ཡང་བདག་གིས་རྟོགས་ལགས་སོ། །འཇམ་དཔལ་གྱིས་སྨྲས་པ། བུ་མོ་ཉོན་མོངས་པའི་རང་བཞིན་དེ་གང་ཡིན། བུ་མོས་སྨྲས་པ། འཇམ་དཔལ་རྟོག་པ་མ་མཆིས་ཤིང་རྣམ་པར་རྟོག་པ་མ་མཆིས་པའི་རང་བཞིན་ནི་ཉོན་མོངས་པའི་རང་བཞིན་ལགས་སོ། །ཚུལ་བཞིན་མ་ལགས་པ་མ་སྐྱེས་པའི་རང་བཞིན་ནི་ཉོན་མོངས་པའི་རང་བཞིན་ལགས་སོ། །ཉོན་མོངས་པ་རྣམས་ནི་གློ་བུར་ཏེ། སྟོང་པ་ཉིད་རྟོགས་པ་དང་ལྷན་ཅིག་མི་གནས་སོ། །མཚན་མ་མེད་པ་དང་། སྨོན་པ་མེད་པ་ཤེས་པ་དང་ལྷན་ཅིག་མི་གནས་སོ། །རང་བཞིན་གྱིས་འོད་གསལ་བ་དང་ལྷན་ཅིག་མི་གནས་སོ། །

འཇམ་དཔལ་འདི་ལྟ་སྟེ་དཔེར་ན། དུག་དྲག་པོའི་སྦྲུལ་གདུག་པས་བལྟས་པ་ཙམ་གྱིས་སྐྱེ་བོ་འགུམ་པར་འགྱུར་བ་ལས་དེར་མི་ཞིག་གིས་དུག་ཐམས་ཅད་འཇིལ་བ་དང་། དུག་ཐམས་ཅད་རབ་ཏུ་ཞི་བར་བགྱིད་པའི་སྨན་གནོད་སེལ་ཅེས་བགྱི་བ་འཚལ་ཏེ་མཆིས་ནས། དེ་ནས་སྨན་དེ་བསྟན་མ་ཐག་ཏུ་སྦྲུལ་གདུག་པའི་དུག་དེ་མ་མཆིས་པར་བགྱིས་ནས་དེ་ལ་ཁྱེའུ་དང་བུ་མོ་རྣམས་བརྩེ་བས་རྩེ་ཞིང་། ཁྱེའུ་དང་བུ་མོ་དེ་དག་སྦྲུལ་གདུག་པ་དེ་དང་ལྷན་ཅིག་ཏུ་རྩེ་བར་བགྱིད་དེ། པང་པར་ལེན་ཅིང་གློ་ལ་སེ་རལ་ཕྲེང་དུ་བཏགས་ཏེ། རྒྱན་དུ་བགྱིས་ཀྱང་ཚིག་པར་མི་བགྱིད། ཟ་བར་མི་བགྱིད། སྡུག་བསྔལ་དུ་མི་བགྱིད་དོ། །འཇམ་དཔལ་དེ་བཞིན་དུ་བདག་ཀྱང་སྔོན་ཆོས་འདུལ་བ་མ་ཐོས་པས་ཚུལ་བཞིན་མ་ལགས་པ་ཡིད་ལ་བགྱིད་པ་ཕྱིན་ཅི་ལོག་ལ་ཉེ་བར་གནས་པའི་ཉོན་མོངས་པས་ཡོངས་སུ་བསྲེགས་པ་ན་འདོད་ཆགས་ཀྱིས་རང་གི་ལུས་ལ་ཆགས་ཤིང་རང་གི་གཟུགས་ལ་མངོན་པར་ཞེན་ཏེ། གཟུགས་དབུ་བ་ལྟ་བུར་སོ་སོར༌རྟོག་པར་མི་བགྱིད། ལུས་སྒྱུ་མའི་ཆོས་ཉིད་དུ་མ་འཚལ། དགའ་བའི་རྩེད་མོ་རྨི་ལམ་ལྟ་བུར་མ་འཚལ། འདོད་པའི་དགའ་བའི་རོ་མྱང་བ་སྦྲང་རྩིའི་ཐིགས་པ་ལྟ་བུར་མ་འཚལ། སྲོག་གི་དབང་པོ་ཟིལ་པའི་ཐིགས་པ་ལྟ་བུར་མ་འཚལ། འདུ་བྱེད་ཐམས་ཅད་མི་རྟག་པར་མ་འཚལ། ལུས་མི་སྡུག་པར་མ་འཚལ། འདུ་བྱེད་ཐམས་ཅད་ཤིན་ཏུ་སྡུག་བསྔལ་བར་མ་འཚལ་ཞིང་། ཆོས་ཐམས་ཅད་བདག་མ་མཆིས་པར་སོ་སོར་རྟོག་པར་མི་བགྱིད་དེ་བདག་ཀྱང་མུན་པ་མུན་ནག་གིས་བསྒྲིབས་ཤིང་། གཞན་ལ་ཡང་མུན་པར་བགྱིད། བདག་ཀྱང་བཅིངས་ཤིང་གཞན་ལ་ཡང་འཆིང་བར་བགྱིད་པ་ལས། འཇམ་དཔལ་གང་གི་ཚེ་བདག་གིས་ཁྱོད་ལས་ཆོས་དང་ལྡན་པའི་བཀའ་མཆིད་ཐོས་ཏེ། ཐོས་ནས་ཀྱང་མོས་ཤིང་མོས་ནས་ཀྱང་རྣམ་པར་གྲོལ་ཏེ་དེའི་སླད་དུ་བདག་ད་ལྟར་དང་སླན་ཆད་ཆགས་པའི་མིག་གིས་སུ་ལ་ཡང་ལྟ་བར་མི་བགྱིད་དོ། །

དེ་ཅིའི་སླད་དུ་ཞེ་ན། འཇམ་དཔལ་སྣང་བ་ནི་མུན་པ་དང་ལྷན་ཅིག་མི་གནས་སོ། །འཇམ་དཔལ་དེ་བཞིན་དུ་འདོད་ཆགས་དང་བྲལ་བ་ནི་སུ་ཡང་ཉོན་མོངས་པ་རྣམས་ལ་ཆགས་པ་མ་མཆིས་པའི་སླད་དུའོ། །དེ་ནས་ཡང་འཇམ་དཔལ་གཞོན་ནུར་གྱུར་པ་ལ་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་འདི་སྐད་ཅེས་སྨྲས་སོ། །ཀྱེ་མ་འཇམ་དཔལ་ལྷའི་འཁོར་དང་། མིའི་འཁོར་ཆེན་པོ་འདི་འདུས་ཀྱིས། གང་གིས་ལྷ་དང་མི་འདི་དག་གིས་ཉོན་མོངས་པའི་རང་བཞིན་དེ་དག་རྟོགས་ནས་སེམས་ཅན་རྣམས་ལ་སྙིང་རྗེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དེ་ལྟ་བུའི་ཆོས་ཀྱི་བཀའ་མཆིད་བགྱི་བར་ཁྱོད་སྤོབས་པར་མཛོད་ཅིག །འཇམ་དཔལ་གྱིས་སྨྲས་པ། སྲིང་མོ་ཉོན་མོངས་པའི་རང་བཞིན་ལ་ནི་མོས་པར་དཀའོ། །དེ་ཅིའི་ཕྱིར་ཞེ་ན། སྲིང་མོ་ཉོན་མོངས་པའི་རང་བཞིན་ནི་བྱང་ཆུབ་ཡིན་པའི་ཕྱིར་རོ། །སྲིང་མོ་འདི་ལྟ་སྟེ་དཔེར་ན། མེ་མ་སྦར་བ་ནི་སྲེག་པའི་བདག་ཉིད་མ་ཡིན་ནོ། །སྲིང་མོ་དེ་བཞིན་དུ་ཉོན་མོངས་པ་ཡང་ཡོངས་སུ་མ་བརྟགས་ན་འཁོར་བའི་བདག་ཉིད་མ་ཡིན་ནོ། །སྲིང་མོ་འདི་ལྟ་སྟེ་དཔེར་ན། མེ་སྦར་བ་ནི་སྲེག་པའི་བདག་ཉིད་ཡིན་ནོ། །

སྲིང་མོ་དེ་བཞིན་དུ་ཉོན་མོངས་པ༌ཡང་ཡོངས་སུ་བརྟགས་ན་འཁོར་བའི་བདག་ཉིད་ཡིན་ནོ། །སྲིང་མོ་འདི་ལྟ་སྟེ་དཔེར་ན། མེ་ནི་རྒྱུ་ཡོད་ན་འབར་རོ། །སྲིང་མོ་དེ་བཞིན་དུ་ཉོན་མོངས་པ་རྣམས་ཀྱང་ལྟ་བའི་ཀུན་ནས་ལྡང་བའི་རྒྱུ་ཡོད་ན་ཁམས་གསུམ་དུ་འབར་རོ། །སྲིང་མོ་འདི་ལྟ་སྟེ་དཔེར་ན། མེ་ནི་རྒྱུ་མེད་ན་མི་འབར་རོ། །སྲིང་མོ་དེ་བཞིན་དུ་ཉོན་མོངས་པ་རྣམས་ཀྱང་ལྟ་བའི་ཀུན་ནས་ལྡང་བའི་རྒྱུ་མེད་ན་ཁམས་གསུམ་དུ་མི་འབར་རོ། །སྲིང་མོ་འདི་ལྟ་སྟེ་དཔེར་ན། ལོ་སྟོང་དུ་འབར་བའི་མེ་ལ་ནི་སྐྱེ་བ་དང་འབྲི་བ་མེད་དོ། །

སྲིང་མོ་དེ་བཞིན་དུ་བསྐལ་པ་བརྒྱ་སྟོང་དུ་རྒྱུ་བའི་ཉོན་མོངས་པ་ལ་ཡང་སྐྱེ་བ་དང་འབྲི་བ་མེད་དོ། །སྲིང་མོ་འདི་ལྟ་སྟེ་དཔེར་ན། མེ་ཤི་བ་ལ་ནི་མེ་ཞེས་མི་གདགས་སོ། །སྲིང་མོ་དེ་བཞིན་དུ་ཉོན་མོངས་པ་ཞི་བ་ལ་ཡང་ཉོན་མོངས་པ་ཞེས་མི་གདགས་སོ། །སྲིང་མོ་འདི་ལྟ་སྟེ་དཔེར་ན། ནམ་མཁའ་གང་ལ་མེ་འབར་ཡང་ནམ་མཁའ་ནི་མེ་དེས་ཚིག་པར་མི་ནུས་སོ། །སྲིང་མོ་དེ་བཞིན་དུ་གང་རང་བཞིན་གྱིས་འོད་གསལ་བ་ལ་གློ་བུར་གྱི་ཉོན་མོངས་པ་བྱུང་ཡང་རང་བཞིན་གྱིས་འོད་གསལ་བ་དེ་ནི་གློ་བུར་གྱི་ཉོན་མོངས་པ་དེས་ཀུན་ནས་ཉོན་མོངས་པར་བྱེད་མི་ནུས་སོ། །སྲིང་མོ་འདི་ལྟར་ཡང་གཟུགས་ཀྱི་ལུས་ལ་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། མཚོ་བྲན་གྱི་ཆབ་ཀྱི་ནང་གི་ཆུ་ཟླ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ་ཕུང་པོ་རྣམས་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། དེ་བཞིན་གཤེགས་པའི་སྤྲུལ་པ་བཞིན་དུའོ། །

འཇམ་དཔལ་གྱིས་སྨྲས་པ། བུ་མོ་ཁམས་རྣམས་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། ཁམས་གསུམ་བསྐལ་པའི་མེས་བསྲེགས་པར་གྱུར་པ་དེ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ་སྐྱེ་མཆེད་རྣམས་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། མངོན་པར་འདུ་བྱ་བའི་ལས་མངོན་པར་འདུས་མ་བགྱིས་པ་བཞིན་དུའོ། །

འཇམ་དཔལ་གྱིས་སྨྲས་པ། བུ་མོ་འཁོར་འདི་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། འཁོར་འདི་ནི་སྟེང་གི་ནམ་མཁའི་མཚམས་བཞིན་དུའོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། བདག་གི་ཕ་དང་མ་གཉིས་ཀྱི་གཉིས་ཕྲད་པ་མ་མཆིས་པ་བཞིན་དུའོ། །

འཇམ་དཔལ་གྱིས་སྨྲས་པ། བུ་མོ་ང་ཇི་ལྟར་བལྟ་བར་བྱ། བུ་མོས་སྨྲས་པ། འཇམ་དཔལ་དཔེར་ན། ལོང་བ་གཟུགས་ལ་བལྟ་བ་བཞིན་དུའོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་ཆོས་འདི་དག་ཐོས་སམ། བུ་མོས་སྨྲས་པ། འཇམ་དཔལ་དཔེར་ན། སྒྱུ་མ་སྤྲུལ་པའི་རྣ་བའི་རྣམ་པར་རིག་པ་ལྟ་བུས་ཐོས་ལགས་སོ། །འཇམ་དཔལ་གྱིས་སྨྲས་པ། བུ་མོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དམ། བུ་མོས་སྨྲས་པ། འཇམ་དཔལ་བདག་ཉིད་བྱང་ཆུབ་ལགས་ཏེ། ཡང་འདོད་པར་མི་བགྱིད་དོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་སྦྱིན་པའི་ཕ་རོལ་ཏུ་ཕྱིན་པ་སྤྱད་དམ། བུ་མོས་སྨྲས་པ། འཇམ་དཔལ་བདག་གིས་ཉོན་མོངས་པ་ཐམས་ཅད་གཏན་དུ་ཡོངས་སུ་བཏང་བས་སྤྱད་ལགས་སོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་སམ། བུ་མོས་སྨྲས་པ། འཇམ་དཔལ་ནམ་མཁའ་ཡོངས་སུ་རྫོགས་པས་ཡོངས་སུ་རྫོགས་པར་བགྱིས་ལགས་སོ། །

འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་བཟོད་པའི་ཕ་རོལ་ཏུ་ཕྱིན་པ་བསྒོམས་སམ། བུ་མོས་སྨྲས་པ། འཇམ་དཔལ་སེམས་ཅན་ཐམས་ཅད་སྐྱེ་བ་མ་མཆིས་པ་དང་། འབྱུང་བ་མ་མཆིས་པས་བསྒོམས་ལགས་སོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བརྩམས་སམ། བུ་མོས་སྨྲས་པ། འཇམ་དཔལ་ཆོས་ཐམས་ཅད་ཐོབ་པར་བགྱི་བ་མ་མཆིས་པའི་ཚུལ་གྱིས་བརྩམས་ལགས་སོ། །

འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་བསམ་གཏན་གྱི་ཕ་རོལ་ཏུ་ཕྱིན་པ་ལ་གནས་སམ། བུ་མོས་སྨྲས་པ། འཇམ་དཔལ། ཆོས་ཀྱི་དབྱིངས་གནས་པ་མ་མཆིས་པའི་ཚུལ་གྱིས་བདག་གནས་ལགས་སོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་སམ། བུ་མོས་སྨྲས་པ། འཇམ་དཔལ་ལྷག་ཆད་མ་མཆིས་པར་ཡོངས་སུ་རྫོགས་པར་བགྱིས་ལགས་སོ། །འཇམ་དཔལ་གྱིས་སྨྲས་པ། བུ་མོ་ཁྱོད་ཀྱིས་བྱམས་པ་བསྒོམས་སམ། བུ་མོས་སྨྲས་པ། འཇམ་དཔལ་སེམས་ཅན་ཐམས་ཅད་མི་སྲིད་པའི་ཚུལ་གྱིས་བསྒོམས་ལགས་སོ། །འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔས་སྙིང་རྗེ་ཆེན་པོ་གང་ནས་བཙལ་བར་བྱ། བུ་མོས་སྨྲས་པ། འཇམ་དཔལ་བྱང་ཆུབ་སེམས་དཔས་སྙིང་རྗེ་ཆེན་པོ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་ལས་བཙལ་བར་བགྱིའོ། །

དེ་ཅིའི་སླད་དུ་ཞེ་ན། གལ་ཏེ་སེམས་ཅན་རྣམས་ཀྱི་ཉོན་མོངས་པ་མ་མཆིས་པར་གྱུར་ན། བྱང་ཆུབ་སེམས་དཔའ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བར་མི་འགྱུར་བའི་སླད་དུའོ། །འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔས་དགའ་བ་ག་ལས་བཙལ་བར་བྱ། བུ་མོས་སྨྲས་པ། ལྷག་པའི་བསམ་པ་དང་ལྡན་པའི་བྱང་ཆུབ་ཀྱི་སེམས་ལས་སོ། །འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔའི་བཏང་སྙོམས་ཅི་ཞིག་བྱེད། བུ་མོས་སྨྲས་པ། འཇམ་དཔལ་བྱང་ཆུབ་སེམས་དཔའི་བཏང་སྙོམས་ནི་སེམས་ཅན་ཐམས་ཅད་ལ་མི་སླུ་བ་ཡོངས་སུ་རྫོགས་པར་བགྱིད་པ་དང་། ཆོས་ཐམས་ཅད་ལ་འགལ་བ་མ་མཆིས་པར་ཉེ་བར་མཆི་བར་བགྱིད་པའོ། །

འཇམ་དཔལ་གྱིས་སྨྲས་པ། བུ་མོ་འགལ་བ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། གང་དག་མ་མཆིས་པའི་ཉོན་མོངས་པ་རྣམས༌སྤོང་བའི་སླད་དུ་བྱང་ཆུབ་ལ་རབ་ཏུ་ཞུགས་པ་དག་གོ །འཇམ་དཔལ་གྱིས་སྨྲས་པ། དེ་དག་གང་དང་འགལ། བུ་མོས་སྨྲས་པ། ཕས་ཀྱིས་རྒོལ་བ་ཐམས་ཅད་དང་ངོ་། །འཇམ་དཔལ་གྱིས་སྨྲས་པ། བུ་མོ་ཕས་ཀྱི་རྒོལ་བ་གང་དག་ཡིན། བུ་མོས་སྨྲས་པ། གང་དག་བཟོད་པའི་རློམ་སེམས་ཀྱིས་གཞན་ལ་རྒོལ་བ་དག་ལགས་སོ། །འཇམ་དཔལ་གྱིས་སྨྲས་པ། བུ་མོ་བཟོད་པ་ཞེས་བྱ་བ་ག་ལས་འོང་། བུ་མོས་སྨྲས་པ། འཇམ་དཔལ་སེམས་ཅན་ཐམས་ཅད་ཀྱིས༌ཐོ་བཙམ་པ་ལས་མཆིའོ། །དེ་ཅིའི་སླད་དུ་ཞེ་ན། ཐོ་བཙམ་པ་མ་མཆིས་ན་བཟོད་པ་ཅི་ཡང་མ་མཆིས་པའི་སླད་དུ་སྟེ། འཇམ་དཔལ་གང་ལ། སེམས་ཅན་ཐམས་ཅད་ཀྱིས༌ཐོ་བཙམ་པ་ན། འཁྲུག་པ་མ་མཆིས་ཤིང་གནོད་པ་མི་བགྱིད་པ་དེ་བཟོད་པ་བསྒོམ་པ་ལགས་སོ། །

འཇམ་དཔལ་གྱིས་སྨྲས་པ། བུ་མོ་ཁོང་ཁྲོ་བ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ་གང་གིས་བསྐལ་པ་བརྒྱར་བསགས་པའི་དགེ་བའི་རྩ་བ་རྣམས་ལ་གནོད་པར་བགྱིད་པ་འདི་ནི་ཁོང་ཁྲོ་བ་ཞེས་བགྱིའོ། །འཇམ་དཔལ་གྱིས་སྨྲས་པ། བུ་མོ་ཁོང་ཁྲོ་བ་མེད་པ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ་གང་གིས་སེམས་ལ་ཞེ་འགྲས་པ་མ་མཆིས་ཤིང་ཡུལ་ཐམས་ཅད་ལ་གནོད་པ་མི་བགྱིད་པ་སྟེ། དེ་ནི་བཟོད་པ་ལགས་པར་རིག་པར་བགྱིའོ། །འཇམ་དཔལ་གྱིས་སྨྲས་པ། བུ་མོ་ཇི་ལྟར་ན་བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་ཡིན།

བུ་མོས་སྨྲས་པ། འཇམ་དཔལ་གང་ཆོས་ཐམས་ཅད་ལ་རྣམ་པར་འབྱེད་ཀྱང་མི་དམིགས་པ་ལགས་སོ། །འཇམ་དཔལ་གྱིས་སྨྲས་པ། བུ་མོ་ཇི་ལྟར་ན་བྱང་ཆུབ་སེམས་དཔའ་བདུད་ཕྱིར་རྒོལ་བ་བཅོམ་པ་ཡིན། བུ་མོས་སྨྲས་པ། གང་བདུད་ཐམས་ཅད་འདུལ་བར་བགྱིད་ཀྱང་ཉོན་མོངས་པ་མ་མཆིས་པ་སྟེ། དེ་ཅིའི་སླད་དུ་ཞེ་ན། འཇམ་དཔལ་བྱང་ཆུབ་སེམས་དཔའ་ནི་ཕུང་པོ་རྣམས་སྟོན་ཀྱང་ཕུང་པོའི་ཉོན་མོངས་པ་རྣམས་དང་ལྷན་ཅིག་མི་གནས་པ་དང་། འཇམ་དཔལ་བྱང་ཆུབ་སེམས་དཔའ་ནི་ཉོན་མོངས་པ་རྣམས་སྟོན་ཀྱང་རང་བཞིན་ཆོས་ཉིད་ཀྱིས་ཆགས་པ་མ་མཆིས་པ་དང་། འཇམ་དཔལ་བྱང་ཆུབ་སེམས་དཔའ་ནི་སེམས་ཅན་ཡོངས་སུ་སྨིན་པར་བགྱི་བའི་སླད་དུ། རྒ་བ་དང་འཆི་བ་སྟོན་ཀྱང་ཆོས་ཐམས་ཅད་ལ་འཆི་འཕོ་བ་དང་འགྲོ་བ་མ་མཆིས་པར་རབ་ཏུ་རྟོགས་པ་དང་། འཇམ་དཔལ་བྱང་ཆུབ་སེམས་དཔའ་ནི་ལྷའི་བུ་དག་སྟོན་ཀྱང་ཕྲག་དོག་དང་རློམ་སེམས་ཐམས་ཅད་དང་བྲལ་བའི་སླད་དུའོ། །འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔའ་ཇི་ལྟར་སེམས་ཅན་ཡོངས་སུ་སྨིན་པར་བྱེད། བུ་མོས་སྨྲས་པ། འཇམ་དཔལ་བྱང་ཆུབ་སེམས་དཔས་ཤེས་རབ་དང་ཐབས་ཡོངས་སུ་སྒོམ་པས་སེམས་ཅན་ཡོངས་སུ་སྨིན་པར་བགྱིད་དོ། །

འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔས་ཇི་ལྟར་སེམས་ཅན་ཐམས་ཅད་ཀྱི་དྲུང་དུ་གནས་པར་བྱ། བུ་མོས་སྨྲས་པ། འཇམ་དཔལ་རང་གི་སེམས་དང་ཤེས་པ་ཡོངས་སུ་སྒོམ་པས་བྱང་ཆུབ་སེམས་དཔས་སེམས་ཅན་ཐམས་ཅད་ཀྱི་དྲུང་དུ་གནས་པར་བགྱིའོ། །འཇམ་དཔལ་གྱིས་སྨྲས་པ། བུ་མོ་འཁོར་འདི་ནི་ཁྱོད་ལ་ཆོས་ཉན་པར་འདོད་དོ། །བུ་མོས་སྨྲས་པ། འཇམ་དཔལ་གང་དུ་བདག་དང་གཞན་གྱི་འདུ་ཤེས་འཇུག་པ་དེ་ནི་ཉན་པར་འཚལ་བ་མ་ལགས་ལ། གང་ལ་རྣ་བའི་རྣམ་པར་རིག་པས་རྣམ་པར་ཤེས་པ་འཇུག༌པ་ཡང་ཉན་པར་འཚལ་བ་མ་ལགས་སོ། །འཇམ་དཔལ་གྱིས་སྨྲས་པ། བུ་མོ་ཆོས་ཉན་པར་འདོད་པ་ཞེས་བྱ་བ་ཇི་ལྟ་བུ་ཡིན། བུ་མོས་སྨྲས་པ། འཇམ་དཔལ་གང་གི་ཚེ་རང་གི་ལུས་ལ་རྨི་ལམ་གྱི་མི་ལྟ་བུར་མོས་པ་དང་། ཆོས་སྟོན་པ་ལ་སྒྱུ་མའི་མི་ལྟ་བུར་མོས་པ་དང་། བསྟན་པའི་ཆོས་དེ་ལ་ཡང་བྲག་ཅའི་སྒྲ་སྐད་ལྟ་བུར་མོས་ཤིང་མོས་པ་དང་། རྣམ་པར་གྲོལ་བ་ལ་ཡང་གཉིས་སུ་མི་བགྱིད་པ་དེ་ཙམ་གྱིས་ན་ཆོས་ཉན་པར་འཚལ་བ་ལགས་སོ། །འཇམ་དཔལ་གྱིས་སྨྲས་པ། བུ་མོ་ཆོས་ཇི་ལྟར་མཉན་པར་བྱ།

བུ་མོས་སྨྲས་པ། ཆོས་ལ་སྟོན་པ་ལ་ནན་ཏན་བགྱིད་པས་ཆོས་མཉན་པར་བགྱིའོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་དང་། རང་གི་དགེ་བའི་རྩ་བ་བསགས་པའི་ཤེས་རབ་ཀྱིས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་དེ་ལྟ་དེ་ལྟར་ཆོས་བསྟན་པ་ན། འཁོར་དེ་ལས་སྲོག་ཆགས་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའི་ཐེག་པ་པ་སྔོན་དགེ་བའི་རྩ་བ་བསགས་པའི་ལྷ་དང་མི་ལྔ་བརྒྱས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །

སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །བུ་མོ་དེ་ཡང་ཆོས་ཉན་པའི་དགའ་བ་དང་། མཆོག་ཏུ་དགའ་བས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །དེས་བཟོད་པ་ཐོབ་ནས་འཇམ་དཔལ་གཞོན་ནུར་གྱུར་པའི་རྐང་པ་ལ་གཏུགས་ཏེ། འཇམ་དཔལ་ཐུགས་བརྩེ་བའི་སླད་དུ་བདག་རབ་ཏུ་དབྱུང་དུ་གསོལ། ཚུལ་བཞིན་མ་ལགས་པར་བསྐྱེད་པ། འཕགས་པ་མ་ལགས་པ། འཕགས་པའི་ཆོས་ལས་ཉམས་པར་བགྱིད་པའི་ལུས་འདི་ལས་ཐར་བར་མཛད་དུ་གསོལ་ཞེས་རབ་ཏུ་འབྱུང་བར་གསོལ་བ་བཏབ་བོ། །འཇམ་དཔལ་གྱིས་སྨྲས་པ། སྲིང་མོ་འདི་ལྟ་སྟེ། མགོའི་སྐྲ་འདྲེག་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། བུ་མོ་གང་སེམས་ཅན་ཐམས་ཅད་ཀྱི་ཉོན་མོངས་པ་གཅད་པའི་ཕྱིར་བརྩོན་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་པའི་ཕྱིར་རོ། །བུ་མོ་གང་གོས་ངུར་སྨྲིག་འཆང་བ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། བུ་མོ་གང་བདག་ཉིད་ཀྱང་བསླབ་པ་དང་། ཚུལ་ཁྲིམས་ཡང་དག་པར་བླངས་ལ། ཚུལ་ཁྲིམས་འཆལ་པའི་སེམས་ཅན་རྣམས་ཀྱང་ཚུལ་ཁྲིམས་ཀྱི་སྡོམ་པ་དང་། བརྟུལ་ཞུགས་ལ་ཡང་དག་པར་སྦྱོར་བར་བྱེད་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །

བུ་མོ་གང་བདག་ཉིད་དབེན་པར་གནས་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། བུ་མོ་གང་འགྲོ་བ་ལྔའི་འཁོར་བ་ན་རྣམ་པར་རྒྱུག་པའི་སེམས་ཅན་རྣམས་དབེན་པ་ཤེས་པ་ལ་འགོད་པར་བྱེད་པ་དེ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །ཁ་དོག་དང་གཟུགས་ཀྱི་རྟགས་དང་སྤྱོད་ལམ་གྱི་དབྱིབས་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་དང་གང་ཟག་གཞན་དག་ལ་བྱམས་པ་དང་སྙིང་རྗེའི་སེམས་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་དགེ་བའི་རྩ་བ་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་གྱི་དགེ་བའི་རྩ་བ་བསྐྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་ཡོངས་སུ་མྱ་ངན་ལས་འདའ་བའི་ལྷག་པའི་བསམ་པ་ལ་གུས་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་གཞན་ཡོངས་སུ་མྱ་ངན་ལས་བཟླ་བའི་ལྷག་པའི་བསམ་པར་གུས་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་ཉོན་མོངས་པ་ཞི་བར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཀྱི་ཉོན་མོངས་པ་ཞི་བར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་གི་སེམས་རྗེས་སུ་སྲུང་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཀྱི་སེམས་རྗེས་སུ་སྲུང་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བདག་ཐར་བར་བྱ་བ་ལ་བརྩོན་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་ཐར་བར་བྱ་བ་ལ་བརྩོན་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ་འཁོར་བས་སྐྱོ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སེམས་ཅན་ཐམས་ཅད་འཁོར་བ་ལས་གྲོལ་བར་བྱ་བ་ལ་དགའ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །

བུ་མོ་མྱ་ངན་ལས་འདའ་བ་ལ་དགའ་བ་ནི་བྱང་ཆུབ་སེམས་དཔའི་རབ་ཏུ་འབྱུང་བ་མ་ཡིན་གྱི། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པ་ནི་བྱང་ཆུབ་སེམས་དཔའི་རབ་ཏུ་འབྱུང་བ་ཡིན་ནོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་སེམས་ཅན་གཞན་དག་ལ་སྙིང་རྗེ༌ཆེ་བ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་འཁྲུལ་པ་ལ་སྐྱོན་དུ་མི་ལྟ་བ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་རྙེད་པ་ལ་ཕྲག་དོག་མེད་པ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་བདག་དང་གཞན་ལ་གདུང་བ་མེད་པ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་ལ་མི་སྨོད་པ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་ལ་སྟེན་པ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་གཞན་གྱི་ལྟུང་བ་མི་གླེང་བ་ཞེས་བྱ་བའི་ཚིག་བླ་དྭགས་སོ། །བུ་མོ་རབ་ཏུ་འབྱུང་བ་ཞེས་བྱ་བ་དེ་ནི་ཉེས་པ་ཐམས་ཅད་ལས་འབྱིན་པ་ཞེས་བྱ་བའི་ཚིག་བླ་དྭགས་སོ། །བུ་མོ་བྱང་ཆུབ་སེམས་དཔའི་རབ་ཏུ་འབྱུང་བ་ནི་གཞན་ལ་རག་ལས་པ་ཡིན་ཏེ། བྱང་ཆུབ་སེམས་དཔས་གཞན་ལ་རག་མ་ལས་པར་བྱའོ། །

བུ་མོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རག་ལས་པ་ལགས། འཇམ་དཔལ་གྱིས་སྨྲས་པ། བུ་མོ་རབ་ཏུ་འབྱུང་བ་ནི་ཚུལ་ཁྲིམས་ལ་རག་ལས་པ་ཡིན་ཏེ། ཚུལ་ཁྲིམས་འཆལ་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །བུ་མོ་རབ་ཏུ་འབྱུང་བ་ནི་ཏིང་ངེ་འཛིན་ལ་རག་ལས་པ་ཡིན་ཏེ། བརྗེད་ངེས་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །བུ་མོ་རབ་ཏུ་འབྱུང་བ་ནི་ཤེས་རབ་ལ་རག་ལས་པ་ཡིན་ཏེ། ཤེས་རབ་འཆལ་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །

བུ་མོ་རབ་ཏུ་འབྱུང་བ་ནི་རྣམ་པར་གྲོལ་བ་ལ་རག་ལས་པ་ཡིན་ཏེ། སེམས་རྣམ་པར་མ་གྲོལ་བ་ལ་ནི་རབ་ཏུ་འབྱུང་བ་ཅི་ཡང་མེད་དོ། །བུ་མོ་རབ་ཏུ་འབྱུང་བ་ནི་རྣམ་པར་གྲོལ་བའི་ཡེ་ཤེས་མཐོང་བ་ལ་རག་ལས་པ་ཡིན་ཏེ། རྣམ་པར་གྲོལ་བའི་ཡེ་ཤེས་མཐོང་བ་མེད་པ་ལ་ནི་རབ་ཏུ་འབྱུང་བ་ཅི་ཡང་མེད་དོ། །བུ་མོས་སྨྲས་པ། འཇམ་དཔལ་ཇི་ལྟར་ན་བྱང་ཆུབ་སེམས་དཔའི་རབ་ཏུ་འབྱུང་བ་གཞན་ལ་རག་ལས་པ་མ་མཆིས་པ་ལགས། འཇམ་དཔལ་གྱིས་སྨྲས་པ། བུ་མོ་བྱང་ཆུབ་སེམས་དཔའ་ནི་གཞན་གྱི་དྲིང་མི་འཇོག་པས་ན་གཞན་ལ་རག་ལས་པ་མེད་པ་སྟེ། རང་གི་ཀུན་ཤེས་པའི་ཡེ་ཤེས་ཀྱིས་འདིས་གང་ཅི་ཤེས་པ་དེ་བདག་གིས་ཀྱང་ཤེས་ལ། འདི་གང་ཅི་སྨྲ་བ་དེ་བདག་ཀྱང་སྨྲའོ་ཞེས་གཞན་དག་གི་ངོར་མི་ལྟ་བས་ན། གཞན་ལ་རག་ལས་པ་མེད་པ་ཡིན་ནོ། །

འཇམ་དཔལ་གཞོན་ནུར་གྱུར་པས་རབ་ཏུ་འབྱུང་བའི་ལེའུའི་ཆོས་ཀྱི་རྣམ་གྲངས་འདི་བཤད་པ་ན། ལེགས་པར་བཤད་པའི་ཕྱིར་བྱང་ཆུབ་སེམས་དཔའ་ལྔ་བརྒྱས་རང་རང་གི་གོས་དང་རྒྱན་ཐམས་ཅད་ལུས་ལས་ཕུད་དེ། འཇམ་དཔལ་གཞོན་ནུར་གྱུར་པ་ལ་ཕུལ་ནས་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་རབ་ཏུ་འབྱུང་བ་ལེགས་པར་བཤད་དེ། བདག་ཅག་རྣམས་ཀྱིས་ཀྱང་རབ་ཏུ་འབྱུང་བ་འདི་བསྒྲུབ་པར་བགྱིའོ། །

དེ་ནས་འཇམ་དཔལ་གཞོན་ནུར་གྱུར་པས་སྨད་འཚོང་མའི་བུ་མོ་གསེར་མཆོག་འོད་དཔལ་ལ་འདི་སྐད་ཅེས་སྨྲས་སོ། །བུ་མོ་ཁྱོད་རྟའི་ཤིང་རྟ་འདི་ལ་ཞོན་ལ། ཚོང་དཔོན་གྱི་བུ་འཇིགས་བྱིན་ལ་སྙིང་བརྩེ་བའི་ཕྱིར་ཡོངས་སུ་སྨིན་པར་གྱིས་ཤིག་དང་། དེ་ཉིད་ཀྱིས་ཁྱོད་རབ་ཏུ་འབྱུང་བ་དང་། བསྙེན་པར་རྫོགས་པར་འགྱུར་རོ། །དེ་ནས་སྐྱེ་བོ་ཕལ་པོ་ཆེ་དེ་དག་འདི་སྙམ་དུ་སེམས་ཏེ། འདོད་ཆགས་དང་བྲལ་བ་དང་། འདོད་ཆགས་དང་མ་བྲལ་བ་གཉིས་ལྷན་ཅིག་གནས་སུ་ཇི་ལྟར་རུང་སྙམ་མོ། །དེ་ནས་བུ་མོ་དེས་སྐྱེ་བོ་ཕལ་པོ་ཆེ་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས། སྐྱེ་བོ་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་འདོད་ཆགས་དང་བྲལ་བའི་བྱང་ཆུབ་སེམས་དཔའ་ནི་འདོད་ཆགས་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ། འདོད་ཆགས་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་ཞེ་སྡང་དང་བྲལ་བའི་བྱང་ཆུབ་སེམས་དཔའ་ནི་ཞེ་སྡང་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ་ཞེ་སྡང་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་གཏི་མུག་དང་བྲལ་བའི་བྱང་ཆུབ་སེམས་དཔའ་ནི་གཏི་མུག་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ་གཏི་མུག་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །

གྲོགས་པོ་དག་ཉོན་མོངས་པ་དང་བྲལ་བའི་བྱང་ཆུབ་སེམས་དཔའ་ནི་ཉོན་མོངས་པ་དང་བཅས་པའི་སེམས་ཅན་རྣམས་དང་ལྷན་ཅིག་གནས་ཀྱང་ཁ་ན་མ་ཐོ་བ་མེད་ལ་ཉོན་མོངས་པ་དང་བཅས་པའི་སེམས་ཅན་རྣམས་ཀྱང་འདུལ་བར་བྱེད་དོ། །གྲོགས་པོ་དག་འདི་ལྟ་སྟེ་དཔེར་ན། མ་ནི་བུ་དང་ལྷན་ཅིག་གནས་ཀྱང་ཆགས་པ་མེད་དོ། །གྲོགས་པོ་དག་དེ་བཞིན་དུ་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་དང་ལྷན་ཅིག་གནས་ཀྱང་ཆགས་པ་མེད་དོ། །གྲོགས་པོ་དག་འདི་ལྟ་སྟེ་དཔེར་ན། བཅིངས་པ་ལས་བཀྲོལ་བའི་མི་ནི་འདོད་ཆགས་ཀྱི་ཀུན་དུ་སྤྱད་པ་ལ་མི་སྤྱོད་དོ། །གྲོགས་པོ་དག་དེ་བཞིན་དུ་བྱང་ཆུབ་སེམས་དཔའ་ཡང་ཁམས་གསུམ་པ་དག་འཆིང་བ་དང་འོབས་ལྟ་བུར་འདུ་ཤེས་པས་ཆགས་པ་མེད་དོ། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་ཆོས་ཀྱི་འབབ་སྟེགས་སུ་ནི་ཞུགས། གཏིང་ནི་རྙེད། ཐང་ལ་ནི་ཕྱིན། མ་རིག་པའི་མུན་པ་དང་ནི་བྲལ་ཏེ། སྲིད་པའི་སྐྱོན་གྱི་ཉོན་མོངས་པ་འཇིགས་པར་ལྟ་བ་ནི་ལེགས་པར་མཐོང་ནས། འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཤིང་རྟ་ལ་ཞོན་ཀར་ཚིགས་སུ་བཅད་པ་འདི་དག་སྨྲས་སོ། །རང་བཞིན་རྣམ་དག་ཆགས་པས་མ་ཆགས་ཤིང་། །རྟག་ཏུ་བྱམས་སེམས་སྣང་བས་སྡང་བ་མེད། །ཤེས་རབ་སྣང་ཤར་གཏི་མུག་རྨོངས་བྲལ་བ། །ཉོན་མོངས་མེད་པར་ཤིང་རྟ་བཞོན་པར་བྱ། །གང་གིས་སྔོན་ཆད་བདག་ནི་རྒྱལ་གྱུར་ཅིང་། །ནོར་ཆགས་ཚོང་དཔོན་བུ་དང་ལྷན་ཅིག་ཏུ། །ཤིང་རྟར་ཞུགས་ནས་སྐྱེད་མོས་ཚལ་སོང་བ། །འདོད་པའི་རྣམ་རྟོག་དེ་དག་གང་དུ་སོང་། །ཇི་ལྟར་སྤྲིན་ཚོགས་སྟུག་པོས་ས་ཁེབས་ན། །ཉི་མའི་འོད་ཟེར་ལྷམ་མེ་ལྷན་ནེར་མིན། །འོན་ཀྱང་འོད་ཟེར་དེ་དག་གར་མི་འགྲོ། །སྤྲིན་གྱིས་བསྒྲིབས་པས་སྣང་བ་མེད་དུ་ཟད། །དེ་བཞིན་ཉོན་མོངས་བསྒྲིབས་པས་བྱིས་པ་ཀུན། །ཤེས་རབ་སྣང་ལ་བློ་སྐྱེ་མེད་པ་ཡང་། །ཤེས་རབ་ཡུལ་གང་ན་ཡང་གནས་པ་མེད། །ཉོན་མོངས་ཡོངས་སུ་ཤེས་པས་ཤེས་རབ་སྣང་། །ཉོན་མོངས་གང་ནས་འོང་བའང་མ་ཡིན་ཞིང་། །ཡུལ་གྱི་ཕྱོགས༌ཆར་འགྲོ་བའང་མ་ཡིན་ཏེ། །ཚུལ་བཞིན་མ་ཡིན་པ་ལས་ཉོན་མོངས་འབྱུང་། །ཚུལ་བཞིན་གྱིས་ནི་དེ་དག་འབྱུང་མི་འགྱུར། །བོར་བ་མེད་ཅིང་བླངས་པའང་ཡོད་མ་ཡིན། །བསྐྱེད་པ་མེད་ཅིང་བཀག་པའང་ཡོད་མ་ཡིན། །གཞན་ལ་མ་བྱིན་ཕྲོགས་པའང་མ་ཡིན་ཏེ། །ཆོས་མཉམ་ཉིད་ཀྱིས་བདག་ཀྱང་རྣམ་པར་དག །འབྲུ་མར་སྒྲོན་མ་མུན་པར་བྱུང་བ་ན། །མུན་པ་ཕྱོགས་སུ་འདོང་བ་མེད་པ་ལྟར། །ཤེས་རབ་ཀྱིས་ནི་མུན་པ་མེད་གྱུར་ན། །ཉོན་མོངས་ཟད་གྱུར་མེད་ཅིང་འབྱུང་བའང་མེད། །ཇི་ལྟར་སྨན་པས་ནད་པ་གསོ་བ་ན། །དེ་ཡི་ཁམས་ནི་འཇིག་པར་མི་བྱེད་ཀྱང་། །དེ་ཡི་གློ་བུར་ནད་ནི་ཞི་བར་འགྱུར། །ནད་རྣམས་གཞན་ཡང་འབྱུང་བ་མེད་པ་ལྟར། །དེ་བཞིན་སྨན་པའི་དམ་པ་འཇམ་དབྱངས་ཀྱིས། །རིགས་པའི་ཚུལ་མཁྱེན་སྦྱོར་བ་སྣ་ཚོགས་ཀྱིས། །སེམས་ཅན་ཉོན་མོངས་ཉེ་བར་ཞི་མཛད་ཀྱང་། །ཆོས་རྣམས་རྣམ་པར་འཇིག་པར་མཛད་པ་མེད། །ཕུང་པོ་འདི་དང་ཁམས་རྣམས་འདི་དག་དང་། །སྐྱེ་མཆེད་འདི་རྣམས་གཞན་དུ་འགྱུར་བ་མེད། །གང་དག་སྔོན་ཆད་ཉེས་ལྡན་དུག་བཅས་པ། །དེ་དག་དེ་ནི་དུག་མེད་འགྱུར་བ་མེད། །

དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས་ཚིགས་སུ་བཅད་པ་དེ་དག་སྨྲས་ནས། ཡང་འཇམ་དཔལ་གཞོན་ནུར་གྱུར་པའི་རྐང་པ་ལ་མགོ་བོས་ཕྱག་བྱས་ཏེ། ཡང་འཇམ་དཔལ་གཞོན་ནུར་གྱུར་པ་ལ་བསྐོར་བ་བྱས་ནས། ཚོང་དཔོན་གྱི་བུ་འཇིགས་བྱིན་དང་། ལྷན་ཅིག་ཏུ་ཤིང་རྟ་ལ་ཞོན་ཏེ། དེ་ལྟ་བུའི་འབྱོར་པ་ཉིད་ཀྱིས་སྐྱེད་མོས་ཚལ་གྱི་སར་སོང་ངོ་། །

འཇམ་དཔལ་གཞོན་ནུར་གྱུར་པས་ཀྱང་ཐམས་ཅད་དང་ལྡན་པའི་འཁོར་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་སོ། །ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས། དེ་དག་ལ་འདི་སྐད་ཅེས་སྨྲས་སོ། །གྲོགས་པོ་དག་གང་དག་ཆོས་ཉན་པར་དགའ་བ་རྣམས་དེ་ཡང་ཕྱི་དྲོའི་དུས་ཀྱི་ཚེ། དེ་བཞིན་གཤེགས་པའི་སྤྱན་སྔར་དེང་ཤིག །དེ་སྐད་ཅེས་སྨྲས་ནས། ས་ཕྱོགས་དེ་ནས་ལངས་ཏེ། རང་རང་གི་གནས་ག་ལ་བ་དེ་ལོགས་སུ་སོང་ངོ་། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་གཉིས་ལྷན་ཅིག་ཏུ་སྐྱེད་མོས་ཚལ་དུ་ཕྱིན་པ་དང་། དེར་མེ་ཏོག་གི་ཆལ་བར་བཀྲམ༌སྟེ་བདུག་པས་བདུགས། བླ་རེ་བྲེས་ནས་གདུགས་དང་། རྒྱལ་མཚན་དང་། བ་དན་སྣ་ཚོགས་ཀྱིས་ལེགས་པར་བརྒྱན་ཏེ། བཟའ་བཏུང་འབྱོར་པ་དག་ཀྱང་བཤམས་ནས། དགའ་བའི་རྩེད་མོ་དང་རྗེས་སུ་མཐུན་པའི་སིལ་སྙན་དང་། ཕེག་རྡོབ་པར་གླུ་དབྱངས་ལེན་པར་བྱེད་ཅིང་སྐྱེད་མོས་ཚལ་ན་གནས་པར་གྱུར་ཏོ། །

དེ་དག་གིས་ཟོས་ཤིང་འཐུངས་ནས་རབ་ཏུ་མྱོས་པར་གྱུར་པ་དང་། སྨད་འཚོང་མའི་བུ་མོ་གསེར་མཆོག་འོད་དཔལ། ཚོང་དཔོན་གྱི་བུ་འཇིགས་བྱིན་གྱི་པང་པར་སྔས་བཅས་ཏེ་ཉལ་ལོ། །དེ་ནས་བུ་མོ་དེས་མངོན་པར་ཤེས་པའི་སྟོབས་ཀྱིས་རང་གི་ལུས་རྙིས་པར་བསྟན་ནས། དེས་འཆི་བའི་འདུ་ཤེས་བསྐྱེད་དེ། དེའི་ལུས་ཐམས་ཅད་མི་སྡུག་པར་གྱུར་ནས། རོ་མྱགས་པ་འདྲ་བར་སྣང་ཞིང་དེའི་རྣ་བའི་བུ་ག་གཉིས་དང་། མིག་གི་དབང་པོ་དང་། སྣའི་ནང་ནས་མི་གཙང་བའི་དྲི་མི་ཞིམ་པ་དག་འབྱུང་ཞིང་བྱུང་ནས་ཀྱང་ལུས་ཐམས་ཅད་ལ་ཁྱབ་པར་གྱུར་ཏོ། །དེའི་ཁའི་ནང་ནས་ཀྱང་དྲི་མནམ་པོ་དག་བྱུང་སྟེ། དྲི་མནམ་པོ་དེ་དག་གིས་སྐྱེད་མོས་ཚལ་དེ་ཐམས་ཅད་ཀྱང་ཁྱབ་པར་གྱུར་ཏོ། །སྤུའི་ཁུང་བུ་ཐམས་ཅད་ནས་ཀྱང་ཁྲག་དང་རྣག་མནམ་པོ་དག་འཛག་གོ །ལྟོ་བ་དང་ལྟེ་བའི་དབུས་རྡོལ་བ་ནས་ཀྱང་མཚེར་པ་དང་རྒྱུ་མ་ཐམས་ཅད་བྱུང་ངོ་། །རྐུབ་དང་མདོམས་ནས་ཀྱང་བཤང་གཅི་དག་འབྱུང་ཞིང་འཛག་གོ །དེའི་སྤྱི་བོ་ནས༌ཀྱང་གླད་པ་འཛག་གོ །རྐང་ལག་གི་སོར་མོ་རྣམས་ལ་ཡང་སྦྲང་མ་སྔོན་པོ་དག་རྒྱུ་བར་གྱུར་ཏོ། །

དེ་ནས་ཚོང་དཔོན་གྱི་བུ་འཇིགས་བྱིན་གྱིས། བུ་མོ་དེའི་ལུས་ལ་དེ་ལྟ་བུའི་གནས་སྐབས་སུ་གྱུར་པ་དག་མཐོང་ངོ་། །མཐོང་ནས་ཀྱང་འཇིགས་སྐྲག་སྟེ་ཡི་ཆད་ཅིང་སྐྱབས་མེད་རྟེན་མེད་དཔུང་གཉེན་མེད་པར་གྱུར་ནས། སྐྱབས་ཚོལ་ཞིང་འཇིགས་པ་ཆེན་པོས་སྐྲག་པར་གྱུར་ནས་འདར་ཞིང་ཆོ་ངེས་འདེབས་པར་གྱུར་ཏོ། །དེ་འཇིགས་པ་ཆེན་པོ་སྐྱེས་པའི་རྒྱུ་ནི་གཉིས་ཏེ། སོ་སོའི་སྐྱེ་བོ་ཉིད་ཡིན་པ་དང་། འཇིགས་པའི་སྐྱོན་དེ་དག་མཐོང་བའོ། །བདག་རེ་ཞིག་ན། བུ་མོ་འདིའི་ལེ་ལན་གྱིས། རྒྱལ་པོ་མ་སྐྱེས་དགྲས་བསད་པར་འོང་ངོ་སྙམ་ནས། དེས་བུ་མོ་དེ་པང་པ་ནས་དོར་བ་དང་འབྲོས་པར་བཙལ་ནའང་མ་ནུས་སོ། །དེའི་འཁོར་ཐམས་ཅད་ཀྱིས་ཀྱང་འཇིགས་སུ་རུང་བའི་འཇིགས་པ་ཆེན་པོ་དེ་མཐོང་ནས་བྲོས་པར་གྱུར་ཏོ། །

དེ་ནས་དེ་གཅིག་པུ་གྲོགས་མེད་པར་དེ་ན་ཤིན་ཏུ་འཇིགས་ཤིང་སྐྲག་ནས། བདག་འཇིགས་སྐྲག་པ་ཆེན་པོ་འདི་ལས་ཡོངས་སུ་ཐར་བར་བྱེད་པ་ལྷའམ། ཀླུའམ། གནོད་སྦྱིན་ནམ། དྲི་ཟའམ། ལྷ་མ་ཡིན་ནམ། ནམ་མཁའ་ལྡིང་འམ། མིའམ་ཅིའམ། ལྟོ་འཕྱེ་ཆེན་པོའམ། མིའམ། མི་མ་ཡིན་པའམ། དགེ་སྦྱོང་ངམ། བྲམ་ཟེ་སུ་ཡོད་སྙམ་སེམས་ཤིང་འདུག་གོ །ཚོང་དཔོན་གྱི་བུ་དེ་ཡང་དགེ་བའི་རྩ་བ་ཡོངས་སུ་མ་སྨིན་པས་འཇམ་དཔལ་གཞོན་ནུར་གྱུར་པས་བུ་མོ་དེ་ལ་ཆོས་བཤད་པ་དག་ཀྱང་མ་ཐོས་མི་ཤེས་སོ། །དེ་ནས་འཇམ་དཔལ་གཞོན་ནུར་གྱུར་པའི་བྱིན་གྱི་རླབས་ཀྱིས་སྐྱེད་མོས་ཚལ་དེའི་ཤིང་ལྗོན་པ་ཐམས་ཅད་ལས་ཚིགས་སུ་བཅད་པ་འདི་དག་བྱུང་ངོ་། །འཇིག་རྟེན་ཐམས་ཅད་ཡང་དག་མིན། །ཇི་ལྟར་སྒྱུ་མ་མཐོང་བ་བཞིན། །ཁྱེའུས་ཇི་ལྟར་མཐོང་གྱུར་པ། །ཆོས་རྣམས་རང་བཞིན་དེ་ཡིན་ནོ། །ཤ་དང་ཁྲག་གིས་བསྐུས་པ་ནི། །བྱིས་པ་རྣམས་ཀྱིས་འཁྲུལ་པ་སྟེ། །ཡང་དག་མིན་དེར་རྣམ་བརྟགས་ནས། །མི་མཁས་བྱིས་པ་ཆགས་པར་བྱེད། །ཇི་ལྟར་མི་མཁས་མི་ཞིག་ནི། །དྲི་ང༌སླ་ཙའི་བུམ་པ་ལ། །ཕྱི་རོལ་རི་མོ་བྲིས་པ་ཞིག །མགོ་ལ་ཁྱེར་ཏེ་སོང་བ་ལས། །འགྲོ་བ་དེ་ཡི་དེ་ཡང་ནི། །དེ་ལས་ལྷུང་སྟེ་ཆག་གྱུར་ནས། །དྲི་ང༌སླ་ཙ་མཐོང་གྱུར་ཏེ། །ཆགས་པ་མེད་ཅིང་འབྲོས་པ་ལྟར། །དེ་བཞིན་བྱིས་པ་མི་མཁས་པ། །བུད་མེད་རྣམས་ལ་ཡིད་ཞེན་ཅིང་། །ཁ་དོག་གཟུགས་དང་དབྱིབས་རྣམས་ལ། །བརྟགས་ནས་དེ་ལ་ཆགས་པར་བྱེད། །ལུས་ཀྱི་རང་བཞིན་གང་ཡིན་པ། །དེ་ལ་ཁྱེའུ་ཁྱོད་རབ་རྟོགས་ཤིག །དུར་ཁྲོད་རུལ་པའི་དྲི་ལ་ནི། །མཁས་པ་སུ་ཞིག་ཆགས་པར་འགྱུར། །ཡང་དག་མིན་ལ་འཇིགས་མེད་ཀྱིས། །ཁྱོད་ནི་འཇིགས་པར་མ་བྱེད་པར། །གང་ལ་ཁྱོད་སྔོན་བརྒྱལ་གྱུར་པའི། །ཆོས་རྣམས་ཀྱི་ནི་རང་བཞིན་ལྟོས། །ཆོས་ཀྱི་དམ་པ་སྟོན་མཛད་ཅིང་། །འཇིགས་གྱུར་འཇིགས་པ་སེལ་མཛད་པ། །ཤཱཀྱ་སེང་གེ་ཞེས་བྱ་བའི། །སྟོན་པ་ཡང་དག་བྱུང་བ་ཡོད། །འདོད་པ་མི་རྟག་མི་བརྟན་པ། །གློག་འོད་སྣང་བ་ཇི་བཞིན་ཏེ། །སྣང་ཡང་ཡང་དག་མ་ཡིན་པས། །མཁས་པ་དེ་ལ་ཆགས་པ་མེད། །ཇི་ལྟར་ཆུ་ནི་འཁྲུགས་པ་ལས། །དབུ་བ་རྡོས་པ་བྱུང་བ་ཡང་། །རྒྱུ་ཡི་སྦྱོར་ལས་སྐྱེས་པ་སྟེ། །དེ༌ལ་བྱེད་པ་པོ་ཡང་མེད། །དེ་བཞིན་མིང་དང་གཟུགས་རྣམས་ཀྱང་། །ལས་ཀྱི་སྦྱོར་ལས་སྐྱེས་པ་སྟེ། །རྒྱུ་ལས་བྱུང་བ་ཡིན་པས་ན། །བྱེད་པ་པོ་ནི་གང་ཡང་མེད། །ཁ་དོག་བཟང་པོ་གར་སོང་ཞིང་། །གང་གིས་ཁྱོད་འདིར་སྐྲག་པ་ཡི། །མི་གཙང་བ་ཡང་ག་ལས་འོངས། །ཁྱེའུ་ཁྱོད་དེ་ལ་མངོན་སུམ་གྱིས། །ཆོས་རྣམས་ཡུལ་ན་མི་གནས་ཤིང་། །དེ་དག་ཕྱོགས་ནས༌འོང་བ་མེད། །འོང་བ་མེད་ཅིང་འགྲོ་མེད་ཀྱང་། །དེ་དག་རང་བཞིན་སྟོན་པར་བྱེད། །འདི་ལ་བྱེད་པ་པོ་མེད་ཅིང་། །ཚོར་བ་པོ་ཡང་འདི་ལ་མེད། །བྱེད་མེད་ཚོར་བ་པོ་མེད་པའི། །ཆོས་རྣམས་སྒྱུ་འདྲ་དངོས་པོ་མེད། །རང་གི་ལུས་ལ་རྟོགས་ཤིག་དང་། །དེ་ཡང་འདི་དང་འདྲ་བས་ན། །ཁྱེའུ་ཁྱོད་གཞན་གྱི་ལུས་ཀྱིས་ནི། །འདིར་ཡང་སྐྲག་པར་མ་བྱེད་ཅིག །ཇི་ལྟར་རྨི་ལམ་རྨིས་པ་ན། །རྩེད་མོ་བྱེད་ཅིང་དགའ་བ་ལྟར། །དེ་བཞིན་དགའ་བའི་རྩེད་མོ་ཀུན། །རྨི་ལམ་རྩེད་མོ་བྱས་དང་འདྲ། །ཤཱཀྱ་སེང་གེའི་སྤྱན་སྔར་ནི། །ཁྱེའུ་ཁྱོད་འགྲོ་བར་གྱིས་ཤིག་དང་། །དེས་ནི་ཁྱེའུ་ཁྱོད་འཇིགས་དང་སྐྲག །རྩ་དང་བཅས་ཏེ་འབྱིན་པར་འགྱུར། །ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །ཇི་ལྟར་འདོད་པ་བཞིན་དུ་འགྲོ། །འཇིགས་གྱུར་འཇིགས་པ་སེལ་མཛད་ཅིང་། །སྐྱབས་མེད་སྐྱོབས་པའི་སངས་རྒྱས་དང་། །ཆོས་དང་ཚོགས་མཆོག་དགེ་འདུན་ལ། །དེར་ནི་སྐྱབས་སུ་འགྲོ་བར་གྱིས། །ལྷ་དང་དྲི་ཟ་མི་རྣམས་ལས། །གང་དག་དེ་ལ་སྐྱབས་སོང་བ། །འཇིགས་པ་ཀུན་ལས་ཐར་བར་འགྱུར། །བདེ་བ་རྙེད་པར་དཀའ་བ་མེད། །དེ་ནས་ཚོང་དཔོན་གྱི་ཁྱེའུ་དེས་ཚིགས་སུ་བཅད་པ་དེ་དག་ཐོས་ནས། དགའ་མགུ་ཞིང་ཡི་རངས་ཏེ། འཇིགས་སྐྲག་པ་དང་བྲལ་ནས་དགའ་བ་དང་། མཆོག་ཏུ་དགའ་བ་སྐྱེས་ཏེ། ཤི་བའི་རོ་མྱགས་པ་དེ་བོར་ནས་ནགས་ཁྲོད་དེ་ནས་བྱུང་ངོ་། །

དེ་ནས་བཅོམ་ལྡན་འདས་ཀྱིས་ཚོང་དཔོན་གྱི་བུ་དེ་གདུལ་བའི་དབང་གི་ཕྱིར་སྐུ་ལས་འོད་རབ་ཏུ་ཕྱུང་སྟེ། འོད་དེས་ཡུལ་མ་ག་དྷཱ་ཐམས་ཅད་སྣང་བས་ཁྱབ་པར་གྱུར་ཏོ། །ཁྱེའུ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་དཀྱིལ་འཁོར་འཆར་བ་དང་འདྲ་བ་གཟི་བརྗིད་དང་དཔལ་གྱིས་འབར༌བ། མཛེས་པ་དགའ་བར་བྱ་བ། དབང་པོ་ཞི་བ། ཐུགས་ཞི་བ། དུལ་བ་མཆོག་མཚུངས་པ་མེད་པ། དམ་པའི་མཆོག་བརྙེས་པ། གསེར་གྱི་མཆོད་སྡོང་ལྟར་མངོན་དུ་འབར་བ། གླང་པོ་ཆེ་ལྟར་དབང་པོ་ཐུལ་ཅིང་བསྲུངས་པ། མཚོ་ལྟར༌དྭངས་ཤིང་གསལ་ལ་རྙོག་པ་མེད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་ནས་ཆོས་སྟོན་ཅིང་བཞུགས་པར་རྒྱང་རིང་པོ་ནས་མཐོང་ངོ་། །དེའི་ལམ་བཀྲ་བ་བལྟ་ན་སྡུག་པ། རིན་པོ་ཆེའི་ལན་ཀན་བྲེས་པ། མེ་ཏོག་བཀྲམ་པ་ཞིག་ཀྱང་བྱུང་བར་གྱུར་ཏོ། །

ལྷའི་དབང་པོ་བརྒྱ་བྱིན་ཡང་ཁྱེའུ་དེའི་མདུན་དུ་འགྲེང་ནས་ཁྱེའུ་དེ་ལ་འདི་སྐད་ཅེས་སྨྲས་སོ། །ཁྱེའུ་ཁྱོད་ཀྱིས་དེ་བཞིན་གཤེགས་པ་མཐོང་ནས་སེམས་རབ་ཏུ་དང་བར་གྱུར་པ་ནི། རྙེད་པ་ལེགས་པར་རྙེད་པ་ཡིན་ནོ། །དེ་བཞིན་གཤེགས་པ་ཡང་ཁྱོད་ཉིད་ལ་དགོངས་ཀྱིས། ཁྱེའུ་ཁྱོད་ལམ་འདིར་ཞུགས་ལ་དེ་བཞིན་གཤེགས་པའི་སྤྱན་སྔར་སོང་ཤིག །དེ་ནས་ཁྱེའུ་དེ་ལྷའི་དབང་པོ་བརྒྱ་བྱིན་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་ངོ་། །དེ་ནས་ལྷའི་དབང་པོ་བརྒྱ་བྱིན་གྱིས་ཁྱེའུ་དེ་ལ། ཁྱེའུ༌ཁྱོད་ཀྱིས་མེ་ཏོག་འདི་དག་གིས་དེ་བཞིན་གཤེགས་པ་ལ་མངོན་པར་གཏོར་ཅིག་ཅེས་མེ་ཏོག་མན་དཱ་ར་བ་ཐུ་བ་གང་བྱིན་ནོ། །དེ་ནས་ཁྱེའུ་དེས་མེ་ཏོག་དེ་དག་བཅོམ་ལྡན་འདས་ལ་མངོན་པར་གཏོར་ཏོ། །གཏོར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆིའོ། །བདག་གི་དགེ་བའི་རྩ་བ་འདི་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །

བཅོམ་ལྡན་འདས་བདག་གིས་ཡུལ་གྱི་བཟང་མོ་རྒྱལ་པོས་ཐུགས་སུ་ཆུད་པ་གསེར་མཆོག་འོད་དཔལ་ཞེས་བགྱི་བ་ཞིག་དགའ་བར་རྩེ་བའི་སླད་དུ་སྐྱེད་མོས་ཚལ་དུ་ཁྲིད་པ་ལས། བཅོམ་ལྡན་འདས་དེ་མདོག་ཡལ་ཞིང་ལུས་མྱགས་ཏེ་ཉེ་དུའི་ཚོགས་ཐམས་ཅད་ཀྱིས་ཀྱང་སྤངས་ནས་བདག་ཀྱང་འཇིགས་པ་ཆེན་པོ་སྐྱེས་ན། བཅོམ་ལྡན་འདས་འདིའི་ལེ་ལན་གྱིས་བདག་རྒྱལ་པོས་བཀུམ་དུ༌མ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་མ་དོགས་ཤིག །སངས་རྒྱས་ལ་སྐྱབས་སུ་སོང་བ་རྣམས་ལ་འཇིགས་པ་ཕྱིས་མི་འབྱུང་བས། ངས་ཁྱོད་མི་འཇིགས་པས་མགྲོན་དུ་གཉེར་གྱིས་འཇིགས་པ་མ་བསྐྱེད་ཅིག །ཁྱེའུ་དེ་ལྟ་མོད་ཀྱི་གཞི་གང་ལས་འཇིགས་པ་དང་སྐྲག་པར་གྱུར་པའི་གཞི་དེ་ཡོངས་སུ་སྤོངས་ཤིག །གསོལ་པ་བཅོམ་ལྡན་འདས། འཇིགས་སྐྲག་པར་འགྱུར་བའི་གཞི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་འདོད་ཆགས་དང་ཞེ་སྡང་དང་། གཏི་མུག་ནི་འཇིགས་པ་དང་སྐྲག་པར་འགྱུར་བའི་གཞིའོ། །ངའོ་སྙམ་པའི་ང་རྒྱལ་ནི་གཞིའོ། །ལྟ་བའི་ཀུན་ནས་ལྡང་བ་ནི་གཞིའོ། །སྲེད་པས་ལྷག་པར་ཆགས་པ་ནི་གཞིའོ། །ངར་འཛིན་པ་དང་ང་ཡིར་འཛིན་པ་ནི་གཞིའོ། །དངོས་པོ་ལ་མངོན་པར་ཞེན་པ་ནི་གཞིའོ། །ཡོངས་སུ་འཛིན་པ་དང་རྩོད་པ་ནི་གཞིའོ། །འཇིག་ཚོགས་ལ་ལྟ་བའི་འཆིང་བ་ནི་གཞིའོ། །མི་རྟག་པ་ལ་རྟག་པར་འདུ་ཤེས་པ་ནི་གཞིའོ། །སྡུག་བསྔལ་བ་ལ་བདེ་བར་འདུ་ཤེས་པ་ནི་གཞིའོ། །མི་སྡུག་པ་ལ་སྡུག་པར་འདུ་ཤེས་པ་ནི་གཞིའོ། །བདག་མེད་པ་ལ་བདག་ཏུ་འདུ་ཤེས་པ་ནི་གཞིའོ། །ཕུང་པོ་རྣམས་ལ་ཡོངས་སུ་འཛིན་པའི་འདུ་ཤེས་ནི་གཞིའོ། །ཁམས་རྣམས་ལ་སོ་སོར་མི་རྟོག་པ་ནི་གཞིའོ། །སྐྱེ་མཆེད་རྣམས་ཡོངས་སུ་མི་ཤེས་པ་ནི་གཞིའོ། །ལུས་ལ་སྐྱོན་དུ་མི་ལྟ་བ་ནི་གཞིའོ། །སྲོག་ལ་མངོན་པར་དགའ་བ་ནི་གཞི་སྟེ། ཁྱེའུ་གཞི་དེ་དག་ལས་འཇིགས་པ་དང་སྐྲག་པ་འབྱུང་བས་དེ་དག་སྤང་བར་བྱའོ། །ཁྱེའུ་ཁྱོད་ཀྱིས་བུ་མོ་དེའི་ལུས་རྣམ་པར་ཞིག་པ་མཐོང་ངམ། གསོལ་པ། བཅོམ་ལྡན་འདས་བདག་གིས་མཐོང་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་འདུས་བྱས་ཐམས་ཅད་ནི་དེ་ལྟར་མི་རྟག་པ། སྡུག་བསྔལ་བ། བདག་མེད་པ། རྣམ་པར་འགྱུར་བའི་ཆོས་ཅན། མི་བརྟན་པ། ཐེར་ཟུག་མ་ཡིན་པ། བྱིས་པ་འདྲིད་པ། ལོག་པ་ལས་བྱུང་བ། གཡོ་བ་མེད་པ། རྣམ་པར་བསྒྲུབས་པ་སྟེ། མེད་པ་ལས་སྣང་བས་སྒྱུ་མ་ལྟ་བུའོ། །རོ་མྱང་བ་ཆུང་བས་རྨི་ལམ་ལྟ་བུའོ། །འཁྲུལ་པར་སྣང་བས་སྨིག་རྒྱུ་ལྟ་བུའོ། །གཟོད་མ་ནས་མ་སྐྱེས་པས་མིག་ཡོར་ལྟ་བུའོ། །ལས་ཀྱི་རྣམ་པར་སྨིན་པ་ཆུད་མི་ཟ་བའི་ཚུལ་གྱིས་གཟུགས་བརྙན་ལྟ་བུའོ། །འཕོ་བ་མེད་པའི་ཚུལ་གྱིས་ཆུ་ཟླ་ལྟ་བུའོ། །སྒྲ་མེད་པ་ལས་སྒྲར་གོ་བར་བྱེད་པས་བྲག་ཅ་ལྟ་བུའོ། །མངོན་པར་འདུ་བྱེད་པ་མེད་པའི་སྒོ་ཡིན་པས་གྲིབ་མའི་གཟུགས་ལྟ་བུའོ། །རང་བཞིན་གྱིས་ཡ་མ་བརླ་ཡིན་པས་ཆད་པ་སྟོང་པ་ལྟ་བུའོ། །གཟུང་དུ་མེད་པའོ། །རླུང་དང་མཚུངས་པའོ། །རྫུན་པའོ། །གཞི་མེད་པའོ། །གསོག་གོ །འགྲིབ་པ་མེད་པའོ། །རྫོགས་པ་མེད་པའོ། །ཁྱེའུ་དེ་ལྟར་ན་ཆོས་ཐམས་ཅད་བདག་པོ་མེད་པ་སྟེ། དེ་ལ་ཁྱོད་མངོན་པར་ཞེན་པར་མི་བྱའོ། །ཁྱེའུ་དེ་ཇི་སྙམ་དུ་སེམས། ཁྱོད་ཀྱི་འདོད་པ་དང་ལྡན་པའི་རྟོག་པ་དང་དཔྱོད་པ་གང་ཡིན་པ་དེ་དག་ཇི་ལྟར་མཐོང་། ཁྱེའུས་གསོལ་པ། བཅོམ་ལྡན་འདས་བྱིས་པ་སོ་སོའི་སྐྱེ་བོ་རྣམས་ཀྱི་འདོད་ཆགས་ནི་ཁ་དོག་དང་དབྱིབས་བཟང་པོ་ལས་ཡོངས་སུ་བརྟགས་པས་སྐྱེ་ལགས་སོ། །

དེ་ནི་འཕགས་པའི་ཆོས་འདུལ་བས་མི་གཙང་བ་ལ་སོགས་པར་སོ་སོར་བརྟགས་པས་མི་འབྱུང་སྟེ། བཅོམ་ལྡན་འདས་དེ་ལས་མི་རྟོག་ན་འདོད་ཆགས་ཀྱི་ཀུན་འབྱུང་བ་ཀུན་ཏུ་འབྱུང་བར་མི་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་ལེགས་སོ་ལེགས་སོ། །འདི་ལྟ་སྟེ། མི་རྟོག་ཅིང་རྣམ་པར་མི་རྟོག་པ་འདི་ནི་འདོད་ཆགས་ཀྱི་རང་བཞིན་ཡིན་ནོ། །ཁྱེའུ་ཁྱོད་ཀྱིས་བདག་ཏུ་ལྟ་བ་མེད་པ་དང་། གཞན་དུ་ལྟ་བ་མེད་པ་དང་། གཞན་དུ་ལྟ་བར་སྒྲོ་འདོགས་པ་མེད་པར་ཆོས་ལ་ཚུལ་བཞིན་དུ་སེམས་པར་བརྩོན་པར་བྱའོ། །ཁྱེའུས་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་ཆོས་ལ་ཚུལ་བཞིན་དུ་སེམས་པར་བརྩོན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་བྱང་ཆུབ་སེམས་དཔའ་ནི་འདོད་ཆགས་ཀྱི་རང་བཞིན་གྱིས༌བྱང་ཆུབ་ཡོངས་སུ་ཚོལ་ལོ། །ཁྱེའུ་དེ་བཞིན་དུ་བྱང་ཆུབ་སེམས་དཔའ་ནི་ཞེ་སྡང་གི་རང་བཞིན་དང་། གཏི་མུག་གི་རང་བཞིན་དང་། ཉོན་མོངས་པ་ཐམས་ཅད་ཀྱི་རང་བཞིན་གྱིས་བྱང་ཆུབ་ཡོངས་སུ་ཚོལ་ལོ། །ཁྱེའུ་ཇི་ལྟར་འདོད་ཆགས་དང་ཞེ་སྡང་དང་གཏི་མུག་དངོས་པོ་མེད་པ་དེ་ལྟར་ཆོས་ཐམས་ཅད་ལ་བྱང་ཆུབ་སེམས་དཔའི་ཤེས་པ་འཇུག་གོ །ཁྱེའུ་འདོད་ཆགས་དང་ཞེ་སྡང་དང་གཏི་མུག་རྣམས་ནི་རྩ་བ་མེད་པ། གནས་མེད་པ། གཞི་མེད་པ། བྱེད་པ་པོ་མེད་པ། ཚོར་བ་པོ་མེད་པ། ནང་དང་ཕྱི་རོལ་དབེན་པ། སྟོང་པ། བདག་དང་། སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་དང་བྲལ་བ་མཚན་མ་མེད་པ་སྟེ། མཚན་མར་རྟོག་པ་དང་བྲལ་བ། སྨོན་པ་མེད་པ། མངོན་པར་དགའ་བ་མེད་པ། དགའ་བ་དང་། སྲེད་པ་དང་བྲལ་བ། མངོན་པར་འདུ་བྱེད་པ་མེད་པ། རང་བཞིན་མེད་པའོ། །ཁྱེའུ་འདོད་ཆགས་དང་ཞེ་སྡང་དང་། གཏི་མུག་ཇི་ལྟ་བ་དེ་བཞིན་དུ་ཆོས་ཐམས་ཅད་ལ་བྱང་ཆུབ་སེམས་དཔའི་ཤེས་པ་འཇུག་གོ །ཁྱེའུ་གཞན་ཡང་ཚུལ་བཞིན་ལ་བརྩོན་པའི་བྱང་ཆུབ་སེམས་དཔའི་སེམས་བསྐྱེད་པ་ཐམས་ཅད་ནི་བྱང་ཆུབ་ཡིན་ནོ། །

དེ་ཅིའི་ཕྱིར་ཞེ་ན། སེམས་རྟོགས་པ་གང་ཡིན་པ་དེ་ནི་བསྟན་དུ་མེད་པ་དང་། སྨོན་པ་མེད་པ་དང་། རྣམ་པར་རིག་པ་མེད་པ་དང་། སྒྱུ་མའི་རང་བཞིན་ལྟ་བུ་དང་། ནང་མ་ཡིན་པ་དང་། ཕྱི་རོལ་མ་ཡིན་པ་དང་། གཞན་དང་ལྡན་པ་མ་ཡིན་པས་གཟུགས་མེད་པ་སྟེ། ཁྱེའུ་དེ་ཉིད་བྱང་ཆུབ་སེམས་དཔའི་བྱང་ཆུབ་ཡིན་ཏེ། ཁྱེའུ་བྱང་ཆུབ་སེམས་དཔས་རང་གི་སེམས་རྟོགས་པ་མ་གཏོགས་པར་ཁོང་དུ་ཆུད་པར་བྱ་བ་གཞན་ཅི་ཡང་མེད་དོ། །རང་གི་སེམས་རྟོགས་པ་གང་ཡིན་པ་དེ་ཉིད་སེམས་ཅན་ཐམས་ཅད་ཀྱི་སེམས་རྟོགས་པ་ཡིན་ནོ། །རང་གི་སེམས་དབེན་པས་སེམས་ཅན་ཐམས་ཅད་ཀྱི་སེམས་དབེན་ནོ། །རང་གི་སེམས་ཀྱི་རང་བཞིན་གྱིས་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་ནོ། །རང་གི་སེམས་རྣམ་པར་དག་པས་སེམས་ཅན་ཐམས་ཅད་ཀྱི་སེམས་རྣམ་པར་དག་གོ །རང་གི་སེམས་འདོད་ཆགས་དང་བྲལ་བས་སེམས་ཅན་ཐམས་ཅད་ཀྱི་སེམས་འདོད་ཆགས་དང་བྲལ་ལོ། །

རང་གི་སེམས་ལ་ཞེ་སྡང་མེད་པས་སེམས་ཅན་ཐམས་ཅད་ཀྱི་སེམས་ལ་ཞེ་སྡང་མེད་དོ། །རང་གི་སེམས་ལ་གཏི་མུག་མེད་པས་སེམས་ཅན་ཐམས་ཅད་ཀྱི་སེམས་ལ་གཏི་མུག་མེད་དོ། །རང་གི་སེམས་ལ་ཉོན་མོངས་པ་མེད་པས་སེམས་ཅན་ཐམས་ཅད་ཀྱི་སེམས་ལ་ཉོན་མོངས་པ་མེད་དོ། །དེ་ལྟར་རྟོགས་པ་གང་ཡིན་པ་དེ་ཐམས་ཅད་མཁྱེན་པའི་ཡེ་ཤེས་རྟོགས་པ་ཡིན་ནོ། །ཁྱེའུ་དེ་ལྟར་ཚུལ་བཞིན་ལ་བརྩོན་པའི་བྱང་ཆུབ་སེམས་དཔས་ནི་སེམས་ཅན་ཐམས་ཅད་ཀྱི་སེམས་ལ་རང་བཞིན་གྱིས་ཀུན་ནས་ཉོན་མོངས་པ་མེད་པར་རབ་ཏུ་ཤེས་སོ། །གང་གློ་བུར་གྱི་ཉོན་མོངས་པས་ཉེ་བར་ཉོན་མོངས་ཀྱང་སེམས་ཀྱི་རྒྱུད་ལ་ནི་ཉོན་མོངས་པར་འགྱུར་བ་ཡང་མེད་ལ། ཆོས་ཀྱི་རིགས་པའི་ལྷག་མཐོང་གིས་དེ་དག་དེ་ལ་ཡོངས་སུ་གདུང་བ་ཡང་མེད་དེ། དེས་བྱང་ཆུབ་སེམས་དཔའ་དེ་དག་གིས་གློ་བུར་གྱི་ཉོན་མོངས་པ་རྣམས་མཐོང་བས་ན་ཀུན་ནས་ཉོན་མོངས་པར་མི་འགྱུར་རོ། །བསྟན་པ་འདི་བཤད་པ་ན་ཚོང་དཔོན་གྱི་བུ་འཇིགས་བྱིན་ཆོས་རྣམས་ལ་རྗེས་སུ་མཐུན་པའི་བཟོད་པ་སྐྱེས་པར་གྱུར་ཏོ། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་གྱིས། ཚོང་དཔོན་གྱི་བུ་དེ་དུལ་བར་རིག་ནས། ལྷའི་བུ་མོ་ལྔ་བརྒྱ་ཙམ་གྱིས་ཡོངས་སུ་བསྐོར་ཏེ། སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་པ་དག་བྱེད་ཅིང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་འཇམ་དཔལ་གཞོན་ནུར་གྱུར་པས་ཚོང་དཔོན་གྱི་བུ་འཇིགས་བྱིན་ལ་འདི་སྐད་ཅེས་སྨྲས་སོ། །ཁྱེའུ་ཁྱོད་ཀྱིས་སྲིང་མོ་འདི་ཤེས་སམ། སྨྲས་པ། འཇམ་དཔལ་འཚལ་ལགས་སོ། །

འཇམ་དཔལ་གྱིས་སྨྲས་པ། ཇི་ལྟ་བུར་ཤེས། དེ་ནས་ཁྱེའུ་དེས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་དེ་སྨྲས་པ། གཟུགས་ནི་དབུ་བ་རྡོས་པ་འདྲ། །ཚོར་བ༌ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་ཤེས་སྒྱུ་མ་ལྟ་བུ་སྟེ། །ཡོངས་སུ་རྟོགས་པས་ཀུན་ཏུ་བསྐྱེད། །བྱིས་པས་ཡང་དག་མིན་བརྟགས་པ། །དེ་ལྟར་བདག་གིས་ཡོངས་སུ་འཚལ། །འདི་ལུས་མི་གཡོ་བེམས་པོ་སྟེ། །རྩྭ་དང་རྩིག་པ་ལྟ་བུ་ལགས། །རྣམ་ཤེས་བསྟན་དུ་མ་མཆིས་ཏེ། །དེ་ལྟར་བདག་གིས་ཡོངས་སུ་འཚལ། །འདི་ལ་སེམས་ཅན་བདག་མ་མཆིས། །སྲོག་དང་གང་ཟག་མ་མཆིས་ཏེ། །ལུས་འདི་བསགས་པ་ཙམ་ལགས་པར། །དེ་ལྟར་བདག་གིས་ཡོངས་སུ་འཚལ། །འདི་ལ་འདོད་ཆགས་སྡང་མ་མཆིས། །གཏི་མུག་འབྱུང་བའང་མ་མཆིས་ཏེ། །ཉོན་མོངས་མ་མཆིས་བདག་མ་མཆིས། །དེ་ལྟར་བདག་གིས་ཡོངས་སུ་འཚལ། །ཚུལ་བཞིན་མ་ལགས་བསླད་པ་འདི། །བྱིས་པ་རྣམས་ཀྱི་འཁྲུལ་པ་སྟེ། །མཁས་པ་དེ་ལ་མི་ཆགས་པར། །དེ་ལྟར་བདག་གིས་ཡོངས་སུ་འཚལ། །དཔེར་ན་འདི་ནི་ནགས་ཁྲོད་ན། །ཤི་བའི་རོ་ནི་མནམ་པ་བཞིན། །གཟུགས་འདི་རང་བཞིན་དེ་འདྲ་བར། །དེ་ལྟར་བདག་གིས་ཡོངས་སུ་འཚལ། །འདི་ནི་སྔོན་མཐར་མ་སྐྱེས་ཏེ། །ཕྱི་མཐར་འཆི་འཕོར་འགྱུར་མ་མཆིས། །ད་ལྟར་བྱུང་བ་མ་མཆིས་པར། །དེ་ལྟར་བདག་གིས་ཡོངས་སུ་འཚལ། །འདི་ཡིས་བདག་ནི་རྒྱལ་བ་ལས། །མི་གཙང་བ་ཡིས་བཀྲོལ་བས་ན། །འཇམ་དབྱངས་རྣམ་པ་ཇི་ལྟས་ཀྱང་། །འདི་ལ་ལན་གླན་རྔོ་མི་ཐོགས། །མི་འགུམ་འཆི་འཕོ་མ་མཆིས་ཀྱང་། །སེམས་ཅན་ཡོངས་སྨིན་བགྱི་སླད་དུ། །བདག་ནི་འཆི་བར་སྟོན་བགྱིད་པས། །སུ་ཞིག་བྱང་ཆུབ་ཚོལ་མི་བགྱིད། །ཇི་ལྟར་བདག་གིས་ཆགས་སྡང་དང་། །ཉོན་མོངས་ཐམས་ཅད་ཚུལ་བཞིན་མིན། །སེམས་ཅན་ཀུན་གྱི་མཚན་དེ་འདྲ། །འདི་ནི་ཆོས་རྣམས་ཆོས་ཉིད་ལགས། །

དེ་ནས་དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས། ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་བྱུང་ནས་ཚངས་པའི་འཇིག་རྟེན་གྱི་བར་དུ་སོང་སྟེ། འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས། སླར་ལོག་སྟེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་དང་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས།

དེ་ནས་དེའི་ཚེ་ཚིགས་སུ་བཅད་པ་འདི་དག་ཀྱང་གསོལ་ཏོ། །རྣམ་འདྲེན་འཇིག་རྟེན་མཁྱེན་ལ་ཡ་མཚན་མི་མངའ་བས། །སྟོན་པ་རྒྱུ་མ་མཆིས་པར་འཛུམ་པ་མི་མཛད་ན། །འདི་ལྟར་ཁྱོད་ནི་འཛུམ་པར་མཛད་པར་གྱུར་པ་ཡི། །ཁྱོད་ཀྱི་འཛུམ་པའི་རྒྱུ་ནི་བདག་ཅག་ཤིན་ཏུ་འཚལ། །རྒྱལ་བའི་ཞལ་འཛུམ་མཛད་པར་གྱུར་པ་མཐོང་ནས་ནི། །ལྷར་བཅས་འགྲོ་བ་འདི་དག་ཐེ་ཚོམ་སྐྱེས་པར་གྱུར། །ཐེ་ཚོམ་གྱུར་པ་རྣམས་ཀྱི་སོམ་ཉི་བསལ༌སླད་དུ། །མི་དབང་འཛུམ་པ་མཛད་པའི་རྒྱུ་ནི་བསྟན་དུ་གསོལ། །གང་གིས་དེ་རིང་ཆོས་རྣམས་ལ་ནི་ཡིད་བཞག་གམ། །ཆོས་ཉིད་དུ་ནི་རྒྱལ་བ་ལ་ལས་མཐོང་གྱུར་ཏམ། །སངས་རྒྱས་བསྔགས་པའི་མཆོད་པ་གང་གིས་དེང་བགྱིས་སམ། །བདག་ཅག་དེ་དག་ཉན་པར་འཚལ་ལོ་མི་ཡི་གཙོ། །གང་གིས་དེ་རིང་བདུད༌རྣམས་བཞོན་དང་བཅས་བཅོམ་མམ། །གང་གིས་སྟོན་པའི་ཐུགས་ནི་དེ་རིང་དགྱེས་བགྱིས་སམ། །གང་གིས་དེ་རིང་འདུས་བྱས་རྣམས་ཀྱི་གཏིང་རྟོགས་སམ། །དེ་དག་ཉན་པར་འཚལ་གྱིས་ཐེ་ཚོམ་བསལ་དུ་གསོལ། །འདྲེན་པ་འཛུམ་པ་མཛད་པའི་རྒྱུ་ནི་མཉན་སླད་དུ། །འགྲོ་བ་ཐམས་ཅད་ཐལ་མོ་སྦྱར་བ་བགྱིས་ཏེ་སྡོད། །རྐང་གཉིས་རྣམས་ཀྱི་གཙོ་བོ་ཐུགས་རྗེ་བསྐྱེད་མཛོད་ལ། །ཐེ་ཚོམ་གྱུར་པ་རྣམས་ཀྱི་ཡིད་གཉིས་བསལ་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་སྨད་འཚོང་མའི་བུ་མོ་གསེར་མཆོག་འོད་དཔལ་ཞེས་བྱ་བ་འདི་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྨད་འཚོང་མའི་བུ་མོ་གསེར་མཆོག་འོད་དཔལ་འདི་ནི་སྔོན་འཇམ་དཔལ་གཞོན་ནུར་གྱུར་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ། འདིས་དེ་ལས་ཐོས་ནས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ་ཁྱོད་ཀྱིས་ཚོང་དཔོན་གྱི་བུ་འཇིགས་བྱིན་ཞེས་བྱ་བ་འདི་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །

བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ནི་ངས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ༌བཅུག་སྟེ། འདིས་ཀྱང་ང་ལས་ཆོས་ཐོས་ནས་ཆོས་རྣམས་ལ་རྗེས་སུ་མཐུན་པའི་བཟོད་པ་ཐོབ་པར་གྱུར་ཏོ། །ཀུན་དགའ་བོ་སྨད་འཚོང་མའི་བུ་མོ་གསེར་མཆོག་འོད་དཔལ་འདི་ནི་བསྐལ་པ་འབུམ་ཕྲག་དགུ་བཅུ་རྩ་གཉིས་འདས་པའི་འོག་ཏུ་བསྐལ་པ་རིན་ཆེན་འབྱུང་བ་ཞེས་བྱ་བ་ལ། འཇིག་རྟེན་གྱི་ཁམས་རིན་ཆེན་ཅན་ཞེས་བྱ་བར་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་ཅེས་བྱ་བར་འགྱུར་རོ། །ཀུན་དགའ་བོ་འཇིག་རྟེན་གྱི་ཁམས་དེའི་སེམས་ཅན་རྣམས་ཀྱི་ལོངས་སྤྱོད་དང་། ཉེ་བར་སྤྱོད་པ་ནི་སུམ་ཅུ་རྩ་གསུམ་གྱི་ལྷ་རྣམས་ཅི་འདྲ་བ་དེ་འདྲ་བར་འགྱུར་རོ། །དེ་ན་བྱང་ཆུབ་སེམས་དཔའ་རིན་པོ་ཆེ་དག་མ་གཏོགས་པར་རིན་པོ་ཆེ་གཞན་འབྱུང་བར་མི་འགྱུར་རོ། །དེ་བཞིན་གཤེགས་པ་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ཚོང་དཔོན་གྱི་བུ་འཇིགས་བྱིན་འདི་ཡང་བྱང་ཆུབ་སེམས་དཔའ་ཡོན་ཏན་རིན་ཆེན་འོད་ཅེས་བྱ༌བར་གྱུར་ཏེ། དེ་བཞིན་གཤེགས་པ་དེའི་ཆོས་ཀྱི་མཛོད་འཛིན་པར་བྱེད་དོ། །གང་གི་ཚེ་དེ་བཞིན་གཤེགས་པ་རིན་ཆེན་འོད་ཡོངས་སུ་མྱ་ངན་ལས༌འདའ་བར་འགྱུར་བ་དེའི་ཚེ། བྱང་ཆུབ་སེམས་དཔའ་ཡོན་ཏན་རིན་ཆེན་འོད་དེ་ལ། བྱང་ཆུབ་སེམས་དཔའ་ཡོན་ཏན་རིན་ཆེན་འོད་འདི་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འོད་འཕྲོ་ཞེས་བྱ་བར་འགྱུར་རོ། །

དེའི་སངས་རྒྱས་ཀྱི་ཞིང་བཀོད་པ་ཡང་ངའི་ཅི་འདྲ་བ་དེ་འདྲ་བར་འགྱུར་རོ་ཞེས་ལུང་སྟོན་པར་འགྱུར་རོ། །སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་གཉིས་ལུང་བསྟན་མ་ཐག་ཏུ་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཤིང་འཇིག་རྟེན་དུ་སྣང་བ་ཆེན་པོས་ཁྱབ་པར་གྱུར་ཏོ། །ལུང་བསྟན་པ་བཤད་པ་འདི་བསྟན་པ་ན་སྲོག་ཆགས་བརྒྱ་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བཀོད་པ་ཆེན་པོའི་སྒོའི་ལེའུ་ཞེས་བྱ་བར༌ཟུང་ཤིག ། འཇམ་དཔལ་རྣམ་པར་རོལ་པ་ཞེས་བྱ་བར་ཡང༌ཟུང་ཤིག །སྨད་འཚོང་མའི་བུ་མོ་གསེར་མཆོག་འོད་དཔལ་བཏུལ་བ་ཞེས་བྱ་བར༌ཡང་ཟུང་ཤིག །

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང་། སྨད་འཚོང་མའི་བུ་མོ་གསེར་མཆོག་འོད་དཔལ་དང་། ཚོང་དཔོན་གྱི་བུ་འཇིགས་བྱིན་དང་། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཐམས་ཅད་དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།

ཀླུའི་རྒྱལ་པོ་རྒྱ་མཚོའི་བུ་མོ་རིན་ཆེན་སྣ་ཚོགས་ཅན་དང་ཉན་ཐོས་འོད་སྲུང་ཆེན་པོ་གཉིས་ཀྱིས་སྐྱེས་པ་དང་བུད་མེད་ཀྱི་རྟེན་ལ་སངས་རྒྱས་ཐོབ་པ་ལ་ཁྱད་པར་ཡོད་མེད་ཀྱི་སྐོར་སོགས་ཟབ་མོའི་གཏམ་གྱི་དྲི་བ་དང་དྲིས་ལན་མཛད་པའི་ཚུལ། ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས་བཏུས།

དེ་ནས་ཀླུའི་རྒྱལ་པོ་རྒྱ་མཚོའི་བུ་མོ་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱི་ཚ་མོ་རིན་ཆེན་སྣ་ཚོགས་ཅན་ཞེས་བྱ་བ་དེས། ཀླུའི་བུ་མོ་ཁྲི་དང་ལྷན་ཅིག་ཏུ་ལག་པ་གཡས་པས་མུ་ཏིག་གི་ཕྲེང་བ་བླངས་ནས་བཅོམ་ལྡན་འདས་ལ་མིག་མི་འཛུམ་པར་བལྟ་སྟེ། ཕྱག་འཚལ་ཞིང་འདུག་པར་གྱུར་ཏོ། །

དེ་ནས་བུ་མོ་རིན་ཆེན་སྣ་ཚོགས་ཅན་དང་ཀླུའི་བུ་མོ་ཁྲི་པོ་དེ་དག་གིས་བཅོམ་ལྡན་འདས་ཀྱི་སྐུ་ལ་མུ་ཏིག་གི་ཕྲེང་བ་དེ་དག་གསོལ་ནས་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ལྷན་ཅིག་ཏུ་མཐུན་ཞིང་ཡང་དག་པར་དགའ་བ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བདག་ཅག་ཀྱང་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཅིག །ད་ལྟར་གྱི་དེ་བཞིན་གཤེགས་པ་ཇི་ལྟ་བ་བཞིན་དུ་འདི་འདྲ་བར་ཆོས་ཀྱང་སྟོན་པར་གྱུར་ཅིག །དགེ་འདུན་ཡང་སྲུང་བར་གྱུར་ཅིག །དེ་ནས་ཚེ་དང་ལྡན་པ་འོད་སྲུང་ཆེན་པོས་ཀླུའི་བུ་མོ་དེ་ལ་འདི་སྐད་ཅེས་སྨྲས་སོ། །བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་བུད་མེད་ཀྱི་ལུས་ཀྱིས་མངོན་པར་རྫོགས་པར་འཚང་རྒྱ་བར་མི་ནུས་ཏེ་འགྲུབ་པར་དཀའོ། །དེ་ནས་བུ་མོ་རིན་ཆེན་སྣ་ཚོགས་ཅན་གྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་བུད་མེད་ཀྱི་ལུས་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ལ་ལྷག་པའི་བསམ་པ་ལ་ཞུགས་པ་ལ་ཡང་། བྱང་ཆུབ་འགྲུབ་དཀའ་བ་མ་མཆིས་སོ། །བྱང་ཆུབ་སེམས་དཔའི་བྱང་ཆུབ་ནི་སེམས་བསྐྱེད་པ་ལ་རག་ལས་ཏེ། བྱང་ཆུབ་ཏུ་སེམས་བསྐྱེད་མ་ཐག་ཏུ་སངས་རྒྱས་ཀྱི་ཆོས་ཐམས་ཅད་བཟུང་བར་འགྱུར་རོ། །

བཙུན་པས་གང་འདི་སྐད་དུ་བུད་མེད་ཀྱི་ལུས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །ཞེས་གསུངས་པ་དེ་ནི་སྐྱེས་པའི་ལུས་ཀྱིས་ཀྱང་མངོན་པར་རྫོགས་པར་འཚང་རྒྱ་བར་མི་ནུས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་འདི་སྐད་དུ་མིག་ནི་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་ནོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ནི་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་ནོ་ཞེས་གསུངས་པའི་ཕྱིར་རོ། །བཙུན་པ་འོད་སྲུང་ཆེན་པོ་དེ་ཅིའི་སླད་དུ་ཞེ་ན། མིག་ནི་སྟོང་པ་སྟེ། སྟོང་པ་གང་ལགས་པ་དེ་ལ་ནི་བུད་མེད་ཀྱང་མ་མཆིས། སྐྱེས་པ་ཡང་མ་མཆིས་པའི་སླད་དུའོ། །བཙུན་པ་འོད་སྲུང་ཆེན་པོ་དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ནི་སྟོང་པ་སྟེ། སྟོང་པ་གང་ལགས་པ་དེ་ལ་ནི་བུད་མེད་ཀྱང་མ་མཆིས། སྐྱེས་པ་ཡང་མ་མཆིས་པའི་སླད་དུའོ། །བཙུན་པ་དེ་ལ་མིག་ཁོང་དུ་ཆུད་པ་གང་ལགས་པ་དེ་ནི་བྱང་ཆུབ་ལགས་སོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཁོང་དུ་ཆུད་པ་གང་ལགས་པ་དེ་ནི་བྱང་ཆུབ་ལགས་སོ། །བྱང་ཆུབ་གང་ལགས་པ་དེ་ལ་ནི་བུད་མེད་ཀྱི་ཆོས་རྣམས་སམ། སྐྱེས་པའི་ཆོས་རྣམས་མ་མཆིས་སོ། །བཙུན་པ་འོད་སྲུང་ཆེན་པོ་དེ་ལྟ་བས་ན་བྱང་ཆུབ་ཀྱི་ངོ་བོ་ཉིད་གང་ལགས་པ་དེ་ནི་བདག་གི་ངོ་བོ་ཉིད་ཀྱང་དེ་ལགས་སོ། །སྨྲས་པ། བུ་མོ་ཅི་ཁྱོད་བྱང་ཆུབ་ཡིན་ནམ། སྨྲས་པ། གནས་བརྟན་དང་བདག་ཅག་གཉིས་ཀ་ཡང་བྱང་ཆུབ་ལགས་སོ། །སྨྲས་པ། བུ་མོ་ཁོ་བོ་ནི་བྱང་ཆུབ་མ་ཡིན་གྱི་ཁོ་བོ་ནི་ཉན་ཐོས་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ་ཁྱོད་སུས་བཏུལ། སྨྲས་པ། བུ་མོ་ཁོ་བོ་ནི་དེ་བཞིན་གཤེགས་པས་བཏུལ་ཏོ། །

སྨྲས་པ། གནས་བརྟན་གལ་ཏེ་དེ་བཞིན་གཤེགས་པས་བཏུལ་ན་གལ་ཏེ་དེ་བཞིན་གཤེགས་པ་མངོན་པར་རྫོགས་པར་སངས་མ་རྒྱས་སུ་ཟིན་ན། དེ་བཞིན་གཤེགས་པས་གནས་བརྟན་གདུལ་བར་སྤྱོད་དམ། བུ་མོ་དེ་ནི་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ་དེ་ལྟ་བས་ན་ཁྱོད་ཉིད་ཀྱང་བྱང་ཆུབ་ལགས་ཏེ། བྱང་ཆུབ་མ་ལགས་པའི་ཆོས་ཅི་ཡང་མ་མཆིས་སོ། །སྨྲས་པ། བུ་མོ་ཅི་མཚམས་མེད་པ་རྣམས་ཀྱང་བྱང་ཆུབ་ཡིན་ནམ། སྨྲས་པ། བཙུན་པ་དེ་དེ་བཞིན་ཏེ། མཚམས་མེད་པ་རྣམས་ཀྱང་བྱང་ཆུབ་ལགས་སོ། །དེ་ཅིའི་སླད་དུ་ཞེ་ན། བྱང་ཆུབ་ནི་མཚམས་མེད་པའི་རང་བཞིན་ཅན་ལགས་ཏེ། མཚམས་མེད་པའི་ཆོས་ཀྱི་སྟོང་པ་ཉིད་ཀྱི་རང་བཞིན་གང་ལགས་པ་དེ་ནི་བྱང་ཆུབ་ལགས་ལ། སྟོང་པ་ཉིད་ཀྱི་ཆོས་ཀྱི་རང་བཞིན་གང་ལགས་པ་དེ་ནི་བྱང་ཆུབ་ལགས་པའི་སླད་དུའོ། །བཙུན་པ་དེ་ལྟར་ན་མཚམས་མེད་པ་ཁོང་དུ་ཆུད་པ་ལས་བྱང་ཆུབ་འབྱུང་ངོ་། །བཙུན་པ་བྱང་ཆུབ་མ་ལགས་པ་གང་ལགས་པ་དེ་ནི་མ་མཆིས་ཏེ། གལ་ཏེ་ཆོས་འགའ་ཞིག་དང་མི་ལྡན་ན་ནི་མ་ལགས་ཀྱི། ཆོས་ཐམས་ཅད་མཉམ་པ་ཉིད་དང་ལྡན་པ་དེ་ནི་བྱང་ཆུབ་ལགས་སོ། །སྨྲས་པ། བུ་མོ་ཁྱོད་ཀྱི་སྤོབས་པ་འདི་སུས་བྱིན། སྨྲས་པ། གནས་བརྟན་གྱིས་སྩལ་ཏོ། །དེ་ཅིའི་སླད་དུ་ཞེ་ན། གལ་ཏེ་གནས་བརྟན་གྱིས་མ་སྨྲས་ན་བདག་གི་སྤོབས་པ་འདི་སྐྱེ་བར་མི་འགྱུར་བའི་སླད་དུའོ། །

བཙུན་པ་དཔེར་ན་གལ་ཏེ་མ་སྨྲས་ན་བྲག་ཅའི་སྒྲ་འབྱུང་བར་མི་འགྱུར་བ་དེ་བཞིན་དུ་བཙུན་པ་འོད་སྲུང་ཆེན་པོ་བྱང་ཆུབ་སེམས་དཔའ་རྣམས་ནི་མ་དྲིས་ཀྱི་བར་དུ་སྤོབས་པ་སྐྱེ་བར་མི་འགྱུར་རོ། །སྨྲས་པ། བུ་མོ་ཁྱོད་ཀྱིས་དེ་བཞིན་གཤེགས་པ་ཇི་སྙེད་ལ་བསྙེན་བཀུར་བྱས། སྨྲས་པ་གནས་བརྟན་གྱིས་ཉོན་མོངས་པ་ཇི་སྙེད་སྤངས་པ་སྙེད་ལའོ། །སྨྲས་པ། བུ་མོ་ཁོ་བོའི་ཉོན་མོངས་པ་རྣམས་ནི་སྤངས་པ་མེད་དོ། །སྨྲས་པ། བཙུན་པ་ཉོན་མོངས་པ་དང་བཅས་པ་ལགས་སམ། སྨྲས་པ། ཁོ་བོ་ནི་ཉོན་མོངས་པ་དང་བཅས་པ་ཡང་མ་ཡིན། ཉོན་མོངས་པ་རྣམས་སྤངས་པ་ཡང་མ་ཡིན་ནོ། །སྨྲས་པ། ཅི་བཙུན་པ་ཁྱོད་ཀྱིས་ཉོན་མོངས་པ་རྣམས་བཞག་གམ། སྨྲས་པ། བསྐྱེད་པ་ཡང་མེད། འགག་པར་བྱས་པ་ཡང་མེད། བཞག་པ་ཡང་མེད་དེ། དེ་བཞིན་ཉིད་ཇི་ལྟ་བ་བཞིན་དུ་ཤེས་སོ། །སྨྲས་པ། ཅི་དེ་བཞིན་ཉིད་ཤེས་པར་བགྱི་བ་ཞིག་ལགས་སམ་སྨྲས་པ་དེ་ནི་མ་ཡིན་ནོ། །སྨྲས་པ། འོ་ན་ཅིའི་སླད་དུ་དེ་བཞིན་ཉིད་ཇི་ལྟ་བ་དེ་བཞིན་དུ་ཉོན་མོངས་པ་ཤེས་སོ་ཞེས་གསུངས། གལ་ཏེ་མཁྱེན་ན་ནི་དེ་བཞིན་ཉིད་མ་ལགས་སོ། །ཇི་སྟེ་མི་མཁྱེན་ན་ནི་དེ་ལྟ་ན་བཙུན་པ་བྱིས་པ་སོ་སོའི་སྐྱེ་བོ་ཐམས་ཅད་དང་མི་ཤེས་པ་ཅན་དུ་མཚུངས་སོ། །སྨྲས་པ། བུ་མོ་ཁྱོད་ཀྱི་ཚིག་ཐམས་ཅད་ནི་གཞན་གྱི་ཚིག་གཅོད་པར་བྱེད་པའོ། །སྨྲས་པ། བདག་ནི་ཚིག་གཅོད་པར་ཡང་མི་བགྱིད། བསྒྲུབ་པར་ཡང་མི་བགྱིད་དོ། །དེ་ཅིའི་སླད་དུ་ཞེ་ན། ཆོས་ཀྱི་དབྱིངས་ནི་གཅད་དུ་མ་མཆིས་པ་ལགས་ལ། ཚིག་ཐམས་ཅད་ནི་ཆོས་ཀྱི་དབྱིངས་སུ་ཡང་དག་པར་འདུ་བའི་སླད་དུའོ། །སྨྲས་པ། གང་ཁྱོད་ཀྱིས་བདག་བྱིས་པ་སོ་སོའི་སྐྱེ་བོ་ཐམས་ཅད་དང་མཉམ་སྟེ་བཞག་པ་དེ་ཁྱོད་འགྱོད་པར་མི་འགྱུར་རམ། སྨྲས་པ། བཙུན་པ་འོད་སྲུང་ཆེན་པོ་གལ་ཏེ་བདག་གིས་གནས་བརྟན་ཡང་ཐ་དད་ལ་བྱིས་པ་སོ་སོའི་སྐྱེ་བོ་ཐམས་ཅད་ཀྱང་ཐ་དད་པར་བཞག་པ་ནི་དེ་ལྟར་བདག་འགྱོད་པར་འགྱུར་བ་ཞིག་ན་གང་གི་སླད་དུ་བདག་གིས་གནས་བརྟན་བྱིས་པ་སོ་སོའི་སྐྱེ་བོ་ཐམས་ཅད་དང་ཐ་མི་དད་པར་བཞག་པ་དེས་ན་བདག་འགྱོད་པར་མི་འགྱུར་རོ། །

བཙུན་པ་མཚུངས་ཞེས་བགྱི་བ་དེ་ནི་ཆོས་ཐམས་ཅད་ཐ་དད་པ་མ་མཆིས་པ་དང་། ནམ་མཁའ་དང་མཚུངས་པ་ཉིད་ཀྱི་ཚིག་བླ་དྭགས་ལགས་སོ། །སྨྲས་པ། བུ་མོ་ཅི་ཁྱོད་སོ་སོའི་སྐྱེ་བོ་རྣམས་དང་མཚུངས་སམ་འོན་ཏེ་འཕགས་པ་རྣམས་དང་མཚུངས། སྨྲས་པ། བཙུན་པ་བདག་ནི་སོ་སོའི་སྐྱེ་བོ་རྣམས་དང་མཚུངས་པ་ཡང་མ་ལགས། འཕགས་པ་རྣམས་དང་མཚུངས་པ་ཡང་མ་ལགས་སོ། །དེ་ཅིའི་སླད་དུ་ཞེ་ན། གལ་ཏེ་བདག་སོ་སོའི་སྐྱེ་བོ་རྣམས་དང་མཚུངས་ན་ནི་བདག་ནི་བྱང་ཆུབ་སེམས་དཔའི་སྤྱོད་པ་དོན་མ་མཆིས་པར་འགྱུར་རོ། །ཇི་སྟེ་འཕགས་པ་རྣམས་དང་མཚུངས་ན་ནི་ཉན་ཐོས་རྣམས་དང་མཚུངས་པར་འགྱུར་ཏེ། དེ་ལྟ་ན་ནི་བདག་སངས་རྒྱས་ཀྱི་ཆོས་རྣམས་ལས་ཡོངས་སུ་ཉམས་པར་འགྱུར་རོ། །སྨྲས་པ། བུ་མོ་གལ་ཏེ་ཁྱོད་སོ་སོའི་སྐྱེ་བོ་རྣམས་དང་ཡང་མི་མཚུངས་འཕགས་པ་རྣམས་དང་ཡང་མི་མཚུངས་ན། ཅི་ཁྱོད་སངས་རྒྱས་ཀྱི་ཆོས་རྣམས་དང་མཚུངས་སམ། སྨྲས་པ། བཙུན་པ་འོད་སྲུང་ཆེན་པོ་བདག་ནི་ད་གཟོད་སངས་རྒྱས་ཀྱི་ཆོས་རྣམས་དང་མཚུངས་པ་མ་ལགས་སོ། །དེ་ཅིའི་སླད་དུ་ཞེ་ན། བདག་ནི་ཐོག་མ་ནས་ཀྱང་སངས་རྒྱས་ཀྱི་ཆོས་རྣམས་དང་མཚུངས་སོ། །

སྨྲས་པ། བུ་མོ་གལ་ཏེ་ཁྱོད་སངས་རྒྱས་ཀྱི་ཆོས་རྣམས་དང་མཚུངས་ན། ཅི་སངས་རྒྱས་ཀྱི་ཆོས་དེ་དག་ཁྱོད་ལ་ཡོད་དམ། སྨྲས་པ། གནས་བརྟན་ཅི་སངས་རྒྱས་ཀྱི་ཆོས་སུ་གདགས་པ་འདས་པའམ། མ་འོངས་པའམ། ད་ལྟར་བྱུང་བའམ། ཡུལ་ན་གནས་པའམ། ཕྱོགས་ན་གནས་པའམ། སྔོན་པོའམ། སེར་པོའམ། དམར་པོའམ། དཀར་པོའམ། བཙོད་ཀའམ། ཤེལ་གྱི་ཁ་དོག་གམ། དངུལ་གྱི་ཁ་དོག་ལྟ་བུ་ལགས་སམ། སྨྲས་པ། བུ་མོ་སངས་རྒྱས་ཀྱི་ཆོས་རྣམས་གདགས་པ་ནི་ཁ་དོག་དང་། དབྱིབས་ཀྱི་སྒོ་ནས་བསྟན་པར་མི་ནུས་སོ། །

སྨྲས་པ། བཙུན་པ་གལ་ཏེ་སངས་རྒྱས་ཀྱི་ཆོས་རྣམས་གདགས་སུ་མ་མཆིས་པ་དང་། གདགས་སུ་མི་རུང་བ་ལགས་ན་ཅིའི་སླད་དུ་བདག་ལ་ཚོར་བར་མཛད། སྨྲས་པ། བུ་མོ་འོ་ན་སངས་རྒྱས་ཀྱི་ཆོས་གང་ལས་བཙལ་བར་བྱ། སྨྲས་པ། ལྟ་བའི་རྣམ་པ་དྲུག་ཅུ་རྩ་གཉིས་ལས་བཙལ་བར་བགྱིའོ། །སྨྲས་པ། ལྟ་བའི་རྣམ་པ་དྲུག་ཅུ་རྩ་གཉིས་ཀྱང་གང་ལས་བཙལ་བར་བྱ། སྨྲས་པ། དེ་བཞིན་གཤེགས་པའི་རྣམ་པར་གྲོལ་བ་ལས་བཙལ་བར་བགྱིའོ། །སྨྲས་པ། དེ་བཞིན་གཤེགས་པའི་རྣམ་པར་གྲོལ་བ་གང་ལས་བཙལ་བར་བྱ། སྨྲས་པ། མཚམས་མེད་པ་ལྔ་ལས་བཙལ་བར་བགྱིའོ། །སྨྲས་པ། མཚམས་མེད་པ་ལྔ་ཡང་གང་ལས་བཙལ་བར་བྱ། སྨྲས་པ། གནས་བརྟན་འོད་སྲུང་ཆེན་པོའི་རྣམ་པར་གྲོལ་བའི་ཡེ་ཤེས་མཐོང་བ་ལས་བཙལ་བར་བགྱིའོ། །

སྨྲས་པ། བུ་མོ་ཁྱོད་ཀྱི་གཏམ་འདི་འདྲ་བ་དེ་ཇི་ལྟ་བུ་ཞིག །སྨྲས་པ། བཙུན་པ་གཏམ་འདི་ནི་མ་བཅིངས་མ་གྲོལ་བའི་གཏམ་ལགས་སོ། །བླང་དུ་མ་མཆིས་ཤིང་དོར་དུ་མ་མཆིས་ཏེ་རང་བཞིན་གྱིས་ཡོངས་སུ་དག་པའི་གཏམ་ལགས་སོ། །ཆོས་ཐམས་ཅད་ཐ་དད་པ་མ་མཆིས་པའི་གཏམ་ལགས་སོ། །སྨྲས་པ། བུ་མོ་འདི་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་དང་མཐུན་པ་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ་དེ་ནི་མེད་དེ། འདི་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་དང་མཐུན་པ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་བརྗོད་དུ་མ་མཆིས་པ་བསྙད་དུ་མ་མཆིས་པ་ལགས་པའི་སླད་དུའོ། །

བཙུན་པ་འོད་སྲུང་ཆེན་པོ་བཤད་པའི་དངོས་པོ་གང་ལགས་པ་དེ་དག་ཐམས་ཅད་ནི་སྒྲས་རྣམ་པར་དབྱེ་བ་ལགས་ལ། བྱང་ཆུབ་གང་ལགས་པ་དེ་ནི་དོན་དམ་པར་སྒྲས་བརྡ་སྤྲད་པར་མི་ནུས་པ་ལགས་སོ། །བཙུན་པ་བྱང་ཆུབ་ཅེས་བགྱི་བ་འདི་ནི་ཉེ་བར་ཞི་བའི་གཞི་ལགས་སོ། །འདི་ནི་ཡི་གེ་མ་མཆིས་པའི་གཞི་ལགས་སོ། །འདི་ནི་ཇི་ལྟ་བ་བཞིན་གྱི་གཞི་ལགས་སོ། །འདི་ནི་གཞི་མ་མཆིས་པའི་གཞི་ལགས་སོ། །སྨྲས་པ། བུ་མོ་གལ་ཏེ་བྱང་ཆུབ་ཀྱི་མཚན་ཉིད་དེ་ལྟ་བུ་ཡིན་ན། དེ་ཇི་ལྟར་མངོན་པར་རྫོགས་པར་འཚང་རྒྱ་བར་འགྱུར། སྨྲས་པ། བཙུན་པ་འོད་སྲུང་ཆེན་པོ་ལུས་དང་སེམས་ཀྱིས་མངོན་པར་རྫོགས་པར་འཚང་རྒྱ་བར་མི་འགྱུར་རོ། །དེ་ཅིའི་སླད་དུ་ཞེ་ན། བྱང་ཆུབ་ནི་ལུས་དང་སེམས་ཀྱི་ངོ་བོ་ཉིད་ཁོ་ན་ལགས་ཏེ། ངོ་བོ་ཉིད་ཀྱིས་ངོ་བོ་ཉིད་མངོན་པར་རྫོགས་པར་འཚང་རྒྱ་བར་མི་འགྱུར་རོ། །སྨྲས་པ། བུ་མོ་ཅི་ཁྱོད་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རམ། སྨྲས་པ། བདག་ཉིད་བྱང་ཆུབ་ལགས་ཏེ། བྱང་ཆུབ་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་ལགས་སོ། །སྨྲས་པ། བུ་མོ་གལ་ཏེ་ཁྱོད་ཉིད་བྱང་ཆུབ་ཡིན་ན། ཅི་ཁྱོད་ཀྱི་འཁོར་ལོ་སྐོར་རམ། སྨྲས་པ། བདག་ནི་ཆོས་ཀྱི་འཁོར་ལོ་སྐོར་ལགས་སོ། །

སྨྲས་པ། ཁྱོད་ཀྱི་ཆོས་ཀྱི་འཁོར་ལོ་སྐོར་བ་ཇི་ལྟ་བུ་ཞིག །སྨྲས་པ། འཁོར་ལོ་དེ་ནི་རྟེན་ཐམས་ཅད་དང་བྲལ་བའི་སླད་དུ་མི་གཡོ་བ་ལགས་སོ། །འཁོར་ལོ་དེ་ནི་ཆོས་ཀྱི་དབྱིངས་ལ་གནས་པའི་ཚུལ་གྱིས་གནས་པ་མ་མཆིས་པ་ལགས་སོ། །འཁོར་ལོ་དེ་ནི་བྲལ་བ་མ་མཆིས་པའི་ཚུལ་གྱིས་དེ་བཞིན་ཉིད་ལགས་སོ། །འཁོར་ལོ་དེ་ནི་ཡང་དག་པའི་མཐའ་ལ་གནས་པས་མི་གནས་པ་ལགས་སོ། །འཁོར་ལོ་དེ་ནི་གནས་ཐམས་ཅད་ལས་བྱུང་བ་མ་ལགས་པས་གནས་མ་མཆིས་པ་ལགས་སོ། །འཁོར་ལོ་དེ་ནི་ཆོས་ཐམས་ཅད་ཀྱི་མཉམ་པ་ཉིད་ཀྱི་རྗེས་སུ་སོང་བས་གཉིས་སུ་མ་མཆིས་པ་ལགས་སོ། །འཁོར་ལོ་དེ་ནི་གཅིག་དང་ཐ་དད་པ་མི་དམིགས་པས་ཐ་དད་པ་མ་ལགས་སོ། །འཁོར་ལོ་དེ་ནི་སྒྲ་དང་སྐད་དང་ཚིག་གི་ལམ་ཐམས་ཅད་རོ་གཅིག་པས་བརྗོད་དུ་མ་མཆིས་པ་ལགས་སོ། །འཁོར་ལོ་དེ་ནི་ཤིན་ཏུ་ཀུན་ནས་ཉོན་མོངས་པ་ཅན་མ་ལགས་པས་རྣམ་པར་དག་པ་ལགས་སོ། །འཁོར་ལོ་དེ་ནི་ཆད་པ་དང་རྟག་པ་མི་དམིགས་པས་ཡོད་པ་ཡོངས་སུ་ཆད་པ་མ་ལགས་སོ། །འཁོར་ལོ་དེ་ནི་རྒྱུ་དང་རྐྱེན་ཤིན་ཏུ་བརྟགས་པས་འགལ་བ་མ་མཆིས་པ་ལགས་སོ། །འཁོར་ལོ་དེ་ནི་བདེན་པ་ལགས་སོ། །འཁོར་ལོ་དེ་ནི་མི་སྐྱེ་མི་འགག་པ་ལགས་སོ། །འཁོར་ལོ་དེ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལགས་སོ། །བཙུན་པ་འོད་སྲུང་ཆེན་པོ་འཁོར་ལོ་དེ་འདྲ་བ་གང་ལགས་པ་དེའི་བསྐོར་བ་ཅི་འདྲ་བ་ཞིག་ལགས། སྨྲས་པ། བུ་མོ་ཁྱོད་ཀྱི་བསྟན་པ་འདི་འདྲ་བ་ལགས་ན། ཁྱོད་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །

སྨྲས་པ། གང་གི་ཚེ་གནས་བརྟན་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ། བདག་ཀྱང་མངོན་པར་རྫོགས་པར་འཚང་རྒྱ་བར་འགྱུར་ལགས་སོ། །སྨྲས་པ། ཁོ་བོ་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ནི་གནས་མེད་སྐབས་མེད་དོ། །སྨྲས་པ། དེ་དེ་ལྟ་ལགས་ཏེ། བྱང་ཆུབ་ནི་གནས་མ་མཆིས་པ་ལ་གནས་པ་སྟེ། དེ་ནི་སུས་ཀྱང་མངོན་པར་རྫོགས་པར་འཚང་རྒྱ་བར་མི་ནུས་ལགས་སོ། །བུ་མོ་དེས་བསྟན་པ་འདི་བཤད་པ་ན། བྱང་ཆུབ་སེམས་དཔའ་ལྔ་བརྒྱས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བཅོམ་ལྡན་འདས་ཀྱིས་ཀྱང་བུ་མོ་དེ་ལ་ལེགས་སོ་ཞེས་བྱ་བ་བྱིན་ཏེ། བུ་མོ་ལེགས་སོ་ལེགས་སོ། །ཁྱོད་ཀྱིས་ཆོས་བསྟན་པ་འདི་ལེགས་པར་སྨྲས་སོ། །དེ་ནས་འཁོར་དེའི་ནང་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་ཁ་ཅིག་འདི་སྙམ་དུ་སེམས་ཏེ། བུ་མོ་འདི་ཡུན་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་སྙམ་པ་དང་། བཅོམ་ལྡན་འདས་ཀྱིས་དེ་དག་གི་བསམ་པ་ཐུགས་སུ་ཆུད་ནས་དགེ་སློང་དེ་དག་ལ་བཀའ་སྩལ་པ། དགེ་སློང་དག་བུ་མོ་རིན་ཆེན་སྣ་ཚོགས་ཅན་འདི་ནི་བསྐལ་པ་གྲངས་མེད་པ་སུམ་བརྒྱ་ན་བསྐལ་པ་རྣམ་པར་སྦྱོང་བ་ཞེས་བྱ་བ་ལ། འཇིག་རྟེན་གྱི་ཁམས་སྣང་བ་ཅན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་རྣམ་པར་གཟིགས་ཞེས་བྱ་བར་འགྱུར་རོ། །

འཇིག་རྟེན་གྱི་ཁམས་སྣང་བ་ཅན་དེ་ཡང་དེ་བཞིན་གཤེགས་པ་དེའི་འོད་ཀྱིས་རྟག་ཏུ་སྣང་བར་འགྱུར་རོ། །ཞབས་འབྲིང་བ་བྱང་ཆུབ་སེམས་དཔའ་ནི་བྱེ་བ་ཕྲག་དགུ་བཅུ་རྩ་གཉིས་སུ་འགྱུར་རོ། །དེའི་ཚེའི་ཚད་ནི་བར་གྱི་བསྐལ་པ་བཅུར་འགྱུར་རོ། །དེ་ནས་ཀླུའི་བུ་མོ་ཁྲི་པོ་དེ་དག་གིས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་ཚེ་དེ་བཞིན་གཤེགས་པ་ཀུན་ཏུ་རྣམ་པར་གཟིགས་དེས་བྱང་ཆུབ་བརྙེས་པ་དེའི་ཚེ། བདག་ཅག་འཇིག་རྟེན་གྱི་ཁམས་དེར་སྐྱེ་བར་གྱུར་ཅིག་ཅེས་གསོལ་ནས། དེ་དག་ཀྱང་བཅོམ་ལྡན་འདས་ཀྱིས་འཇིག་རྟེན་གྱི་ཁམས་དེར་སྐྱེ་བར་ལུང་བསྟན་ཏོ།། །།

མིའམ་ཅིའི་བུ་མོ་བརྒྱད་ཁྲི་བཞི་སྟོང་གིས་སངས་རྒྱས་ལ་མཆོད་པ་ཕུལ་ཞིང་སྟོན་པས་དེ་དག་ལ་བུད་མེད་ཀྱི་ལུས་རྟེན་ལས་ལོག་སྟེ་སྐྱེས་པར་གྱུར་ནས་སངས་རྒྱས་པའི་ཆོས་བཅུ་གསུངས་ཚུལ། མིའམ་ཅིའི་རྒྱལ་པོ་སྡོང་པོས་ཞུས་པའི་མདོ་ལས་བཏུས།

དེ་ནས་མིའམ་ཅིའི་རྒྱལ་པོ་སྡོང་པོའི་སླས་མིའམ་ཅི་མོ་བརྒྱད་ཁྲི་བཞི་སྟོང་མུ་ཏིག་ཁ་དོག་སྣ་ཚོགས་ཀྱི་དོ་ཤལ་ཐོགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཇི་ལྟར་ཐོགས་པའི་མུ་ཏིག་གི་དོ་ཤལ་དེ་དག་གིས་བཅོམ་ལྡན་འདས་ལ་མངོན་པར་བཀབ་བོ། །མུ་ཏིག་གི་དོ་ཤལ་དེ་དག་ཕུལ་མ་ཐག་ཏུ་སངས་རྒྱས་ཀྱི་མཐུས་དེ་དག་བཅོམ་ལྡན་འདས་ཀྱི་དབུ་གཙུག་གི་དྲང་ཐད་ཀྱི་སྟེང་གི་བར་སྣང་ལ་མུ་ཏིག་གི་དོ་ཤལ་གྱི་ཁང་པ་བརྩེགས་པ་བརྒྱད་ཁྲི་བཞི་སྟོང་དུ་གྱུར་ཏེ། ཁང་པ་བརྩེགས་པ་དེ་དག་ཐམས་ཅད་ཀྱང་གྲུ་བཞི་ལྷམ་པ། ཀ་བ་བཞི་ཟུག་པ། ཆ་མཉམ་པ། ངོས་ཤིན་ཏུ་རྣམ་པར་ཕྱེ་བ་ཤ་སྟག་གོ །ཁང་པ་བརྩེགས་པ་དེ་དག་ནི་རིན་པོ་ཆེས་སྤྲས་པའི་ཁྲི་རྩ་བ་ཡང་རིན་པོ་ཆེ་ལས་བྱས་པ། ལྷའི་རས་བཅོས་མའི་ཟུང་དུ་མ་བཀྲམ་པ་དག་བྱུང་བར་གྱུར་ཏོ། །

ཁྲི་དེ་དག་ཐམས་ཅད་ལ་ཡང་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ་དག་བཞུགས་པར་ཀུན་ཏུ་སྣང་ངོ་། །དེ་ནས་མིའམ་ཅི་མོ་བརྒྱད་ཁྲི་བཞི་སྟོང་གིས་བཅོམ་ལྡན་འདས་ཀྱི་ཆོ་འཕྲུལ་འདི་ལྟ་བུ་འདི་མཐོང་ནས། ཚིམ་ཞིང་མགུ་སྟེ་ཡིད་རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་བྱང་ཆུབ་ཏུ་སེམས་བསྐྱེད་ནས་དགའ་ཞིང་མཆོག་ཏུ་དགའ་སྟེ་དད་པ་ཐོབ་ནས། ཐམས་ཅད་ཀྱིས་སྒྲ་སྐད་དང་དབྱངས་གཅིག་ཏུ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །

བླ་ན་མེད་པའི་དགྲ་བཅོམ་མཆོག་གསུང་བ། །དོན་དགོངས་མཚུངས་པ་མ་མཆིས་བསམ་མི་ཁྱབ། །དོན་དང་ཆོས་དང་འདུལ་བ་རབ་བསླབས་པ། །སེམས་ཅན་མཆོག་ལ་མགོ་བོས་ཕྱག་འཚལ་ལོ། །འདོད་ཆགས་ཞེ་སྡང་གཏི་མུག་ཐ་བ་འཇིག །དགོན་པར་བཞུགས་དགྱེས་བསྙེངས་པ་མི་མངའ་བ། །རིན་ཆེན་མཛོད་དང་རིན་ཆེན་སྟོན་པ་པོ། །བཅོམ་ལྡན་རྒྱལ་པོའི་རྒྱལ་ལ་ཕྱག་འཚལ་ལོ། །སྤྱན་སྔར་དྲི་བྲལ་ཉོན་མོངས་མི་མངའ་བ། །ས་ཡི་དབང་པོ་ཕ་རོལ་དགྲ་འཇོམས་པ། །པད་མོ་ལྟ་བུར་སྲིད་གསུམ་མི་གོས་པ། །བདེ་གཤེགས་མཆོག་བརྙེས་ཁྱོད་ལ་ཕྱག་འཚལ་ལོ། །འགྲོ་བའི་ནང་ན་མིག་དང་འདྲར་སྤྱོད་ཅིང་། །ཉི་ཟླ་འདི་ཡི་འོད་ནི་སྤ་བཀོང་བ། །འཁོར་ལོས་སྒྱུར་བའི་རིགས་སུ་རྒྱལ་པོར་སྐྱེས། །འཁོར་ལོ་མཚན་མངའ་ཁྱོད་ལ་ཕྱག་འཚལ་ལོ། །མིང་དང་གཟུགས་ལ་ནམ་ཡང་མི་ཆགས་ཤིང་། །མགོན་དང་དཔུང་དང་སྐྱབས་དང་དཔུང་གཉེན་གྱུར། །ཁྱོད་དང་མཚུངས་མེད་ལྷག་པ་ག་ལ་ཞིག །མཐའ་ཡས་དབྱངས་ལ་མགོ་བོས་ཕྱག་འཚལ་ལོ། །བརྙེས་དང་མ་བརྙེས་ནམ་ཡང་ཆགས་མི་མངའ། །འཇིག་རྟེན་ཆོས་རྣམས་ཟིལ་གྱིས་མནན་ཏེ་བཞུགས། །ཆགས་སྲེད་འཁྲི་ཤིང་དྲ་བ་གྲོལ་མཛད་པ། །བཅོམ་ལྡན་འཇིག་རྟེན་མགོན་ལ་ཕྱག་འཚལ་ལོ། །དུལ་བ་ཐུགས་ནི་རྟག་ཏུ་མཉམ་པར་གཞག །ཉོན་མོངས་བསྲེགས་ཏེ་སྟོབས་བཅུས་རབ་བཞུགས་ཤིང་། །འགྲོ་ལ་ཟང་ཟིང་མི་མངའ་སྦྱིན་སྩོལ་པ། །སྦྱིན་པའི་གནས་ལ་མགོ་བོས་ཕྱག་འཚལ་ལོ། །སྨྲ་མཆོག་དམ་པ་མཚན་གྱི་འོད་འཕྲོས་པ། །ལམ་ལོག་ཕྱིན་ཅི་ལོག་ནི་རྣམ་པར་སྤངས། །འཇམ་ཞིང་སྣུམ་ལ་སྙན་པའི་གསུང་གསུང་པ། །སྲིད་པ་གསུམ་ལས་འཕགས་ལ་ཕྱག་འཚལ་ལོ། །མི་མཆོག་གདུང་བས་གདུངས་པ་མི་མངའ་བ། །རྫུ་འཕྲུལ་གྱིས་ནི་བྱེ་བའི་ཞིང་དུ་གཤེགས། །འགྲོ་བ་རབ་ཏུ་སྒྲོལ་བའི་གྲུ་མཛད་པ། །བཅོམ་ལྡན་བྲན་འདྲ་ཁྱོད་ལ་ཕྱག་འཚལ་ལོ། །བཅོམ་ལྡན་བརྩོན་འགྲུས་དག་ལ་སྟོན་མཛད་པ། །ཆགས་ཤིང་ཞེན་པའི་འགྲོ་དང་མངོན་ཤེས་དྲུག །ལྡན་ཞིང་མཁས་པའི་ཉན་ཐོས་རྣམས་ཀྱང་འགྲེལ། །འགྲོ་དྲུག་ཉེ་གཤེགས་ཁྱོད་ལ་ཕྱག་འཚལ་ལོ། །གསེར་གྱི་ཁ་དོག་འདྲ་ལ་ཕྱག་འཚལ་ལོ། །ཞི་གནས་དབང་པོ་དུལ་ལ་ཕྱག་འཚལ་ལོ། །སྟོན་གྱི་ཟླ་འདྲའི་ཞལ་ལ་ཕྱག་འཚལ་ལོ། །མི་མཆོག་ཡོན་ཏན་མངའ་ལ་ཕྱག་འཚལ་ལོ། །ཉོན་མོངས་བསྲེགས་ཤིང་བསྙེངས་པ་མི་མངའ་བ། །སྐྱེ་དགུ་འདི་དག་བསྒྲལ་དཀའ་ཆུ་བཞི་སྒྲོལ། །བསྒོམས་ཤིང་དབང་པོ་ཐུལ་བའི་བཅོམ་ལྡན་འདས། །ཁྱོད་ལ་སྐྱབས་སུ་མཆི་བར་མཆིད་ཀྱིས་འཚལ། །ཐུབ་པས་སྦྱིན་པ་བསམ་གྱིས་མི་ཁྱབ་སྩལ། །བསླངས་ན་དབང་པོ་དགྱེས་པར་རབ་འགྱུར་བ། །ཕ་རོལ་དག་ལ་སྦྱིན་པ་མཆོག་སྩོལ་བ། །གཏོང་དཔའ་བཅོམ་ལྡན་ཁྱོད་ལ་ཕྱག་འཚལ་ལོ། །སེམས་ཅན་ང་རྒྱལ་རྒྱགས་ཁེངས་གཏི་མུག་པ། །རྒྱུ་དང་རྐྱེན་དང་བྱ་བ་འགལ་བགྱིད་རྣམས། །འཕགས་པ་བླ་ན་མེད་པའི་ལམ་མཆོག་ལ། །རྣམ་པར་འདྲེན་པ་ཆེན་པོ་ཁྱོད་ཀྱིས་བཀོད། །ཕུང་པོ་རང་བཞིན་གྱིས་ནི་སྟོང་མཁྱེན་ནས། །ལས་དང་ཉོན་མོངས་ཟིལ་གྱིས་མནན་ཏེ་བཞུགས། །འདྲེན་པ་འགྲོ་བ་རྣམས་ཀྱི་སོམ་ཉི་གཅོད། །བཅོམ་ལྡན་དུས་གསུང་ཁྱོད་ལ་ཕྱག་འཚལ་ལོ། །བདེན་པའི་ཆོས་ལ་དགྱེས་ཤིང་མཉམ་པར་བཞག །ཆོས་རྣམས་ཀུན་ལ་མངའ་དབང་ཕ་རོལ་ཕྱིན། །བླ་ན་མེད་པ་ཁ་ལོ་སྒྱུར་བ་མཆོག །བཅོམ་ལྡན་དེད་དཔོན་ཁྱོད་ལ་ཕྱག་འཚལ་ལོ། །འཆོས་པ་མི་མངའ་གཡོ་སྒྱུ་རྣམས་དང་བྲལ། །བདུད་ཀྱི་སྡེ་རྣམས་འཇོམས་པའི་སྟོབས་པོ་ཆེ། །མི་མཆོག་ལམ་དང་ལམ་མ་ལགས་ལ་མཁས། །རླུང་དམར་ལྟ་བུར་ཅི་ལའང་ཆགས་མི་མངའ། །གཟིར་བར་གྱུར་གསལ་ཕ་རོལ་ཤིན་ཏུ་གནས། །ཐུབ་པ་བས་མ་འཚལ་བའི་བང་མཛོད་མངའ། །སྤྱད་པ་སྤྱོད་པའི་ཚེ་ན་གང་གཱ་ཡི། །བྱེ་མ་སྙེད་ཀྱི་མི་མཆོག་རྣམས་ལ་མཆོད། །མཐུ་བརྙེས་མི་གཡོ་བསམ་གྱིས་མི་ཁྱབ་པ། །ཆགས་པའི་སྐྱོན་མི་མངའ་ཞིང་ཐང་ལ་བཞུགས། །གནས་ན་བཞུགས་པའི་རྒྱལ་བ་རྣམས་ཀྱིས་བསྟེན། །དེ་སླད་མི་རྣམས་མཆོག་ལ་ཕྱག་འཚལ་ལོ། །སྐྱེ་དང་ན་དང་རྒ་ཤི་རྣམ་པར་སྤངས། །ཚེ་རབས་བྱེ་བ་བསམ་མི་ཁྱབ་པ་དགོངས། །བཅོམ་ལྡན་འདས་ཀྱི་མཁྱེན་པའི་གདུགས་འོད་ཀྱིས། །འཇིགས་པ་ཆེན་པོའི་དྲ་བ་རབ་ཏུ་འདྲལ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །ཕྱག་དང་ཞབས་ལ་བཀྲ་ཤིས་མཚན་མངའ་ཞིང་། །བཀྲ་ཤིས་བགྱིད་ལས་འཇམ་པའི་རན་སློང་བ། །བཅོམ་ལྡན་བཀྲ་ཤིས་མཛད་ལ་ཕྱག་འཚལ་ལོ། །གཟུངས་རྣམས་ལ་ནི་དབང་གི་ཕ་རོལ་ཕྱིན། །ཟང་ཟིང་མི་མངའ་ཆོས་ཀྱི་སྦྱིན་པ་སྩོལ། །ཐུབ་པ་ཆོས་ཀྱི་རྔ་ནི་རབ་བརྡུངས་པ། །ཆོས་རྗེ་བཅོམ་ལྡན་ཁྱོད་ལ་ཕྱག་འཚལ་ལོ། །ཤཱཀྱའི་རིགས་དུས་རྒྱལ་པོའི་ལས་བྱུང་བ། །དབང་པོ་ཞི་ཞིང་ཐུགས་ཀྱང་རབ་ཏུ་ཞི། །སྟོན་པ་སྲིད་གསུམ་འཇིག་རྟེན་རྣམ་གཟིགས་པ། །བདེ་གཤེགས་ཞི་ཐུགས་ཁྱོད་ལ་ཕྱག་འཚལ་ལོ། །བདུད་རྣམས་དཔུང་དང་བཅས་པས་རྣོ་བ་ཡི། །རལ་གྲི་ཐོགས་ནས་བྱང་ཆུབ་དྲུང་ལྷགས་ཀྱང་། །ཁྱོད་ཀྱི་བ་སྤུ་ཙམ་ཡང་མ་གཡོས་ཏེ། །བཅོམ་ལྡན་རི་རབ་མཚུངས་ལ་ཕྱག་འཚལ་ལོ། །མི་ཡི་དམ་པ་བཟོད་པའི་ཕ་རོལ་ཕྱིན། །སྐུ་རྣམས་ཀུན་ལ་ནོངས་པ་བགྱིས་ཀྱང་བཟོད། །ཡང་འབྱུང་བ་དང་སྐྱེ་དང་འཆི་བས་དཔའ། །བཟོད་གསུང་བཅོམ་ལྡན་ཁྱོད་ལ་ཕྱག་འཚལ་ལོ། །མཐུ་བརྙེས་བདེ་བར་གཤེགས་པ་མི་གཡོ་བ། །གནས་དང་གནས་མིན་མཁས་པ་བསྙེངས་མི་མངའ། །ཁྱོད་ཀྱིས་སེམས་ཅན་མང་པོ་བྱང་ཆུབ་བཀོད། །ཆོས་གནས་རྒྱལ་བ་ཁྱོད་ལ་ཕྱག་འཚལ་ལོ། །འདུས་བགྱིས་ཉམ་ཆུང་སྙིང་པོ་མེད་པར་མཁྱེན། །སྐྱེ་བའི་ཚོགས་ནི་ཉུང་བ་མ་ལགས་སེལ། །ཁྱོད་ཀྱི་མཁྱེན་པ་སྲིད་གསུམ་ཁྱད་པར་འཕགས། །ཡེ་ཤེས་ཕ་རོལ་ཕྱིན་ལ་ཕྱག་འཚལ་ལོ། །སེམས་ཅན་ལོང་བ་སྡུག་བསྔལ་མགོན་མེད་པ། །དེ་དག་ཁྱོད་ཀྱིས་དཀོན་མཆོག་གསུམ་ཚིམ་བགྱིས། །ཁྱོད་ནི་བདུད་དཔུང་བཅས་པ་སྐྲག་མཛད་པ། །བཅོམ་ལྡན་མགོན་གྱུར་ཁྱོད་ལ་ཕྱག་འཚལ་ལོ། །སྟོབས་དང་བསམ་གཏན་དང་ནི་དབང་པོ་བསྒོམས། །ཁྱོད་ཀྱིས་བདུད་ནི་དཔུང་དང་བཅས་པ་བཅོམ། །སྲིད་པ་རྣམས་ཀྱི་ནང་ན་མཆོག་གྱུར་པ། །ཐུབ་པ་དབང་པོ་བསྒོམས་ལ་ཕྱག་འཚལ་ལོ། །དད་པའི་རྩ་བ་རྒྱ་ཆེན་ཆོས་བསྟན་པ། །མཚུངས་མེད་བྱང་ཆུབ་ལ་ནི་ཆགས་མི་མངའ། །གྲིབ་མ་ལྟ་བུར་མཁྱེན་ནས་བདེ་གསུངས་པ། །བཅོམ་ལྡན་གདུགས་འདྲ་ཁྱོད་ལ་ཕྱག་འཚལ་ལོ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །འཕགས་པའི་འཁོར་ལོ་རྨི་འདྲ་རབ་ཏུ་བསྐོར། །འདུས་བགྱིས་ཡང་དག་ཏུ་ནི་རྨི་ལམ་འདྲར། །མཁྱེན་ནས་སེམས་ཅན་མང་པོ་དྲན་པར་མཛད། །ཁྱོད་ཀྱི་ལྗགས་མཆོག་དག་པ་དྲི་མི་མངའ། །ལྗགས་ཀྱིས་རང་གི་ཞལ་གྱི་དཀྱིལ་འཁོར་ཁེབས། །ལྗགས་ནི་པད་མ་འདབ་མ་བརྒྱ་ལྟ་བུ། །ལྗགས་སྐྱོན་མི་མངའ་ཁྱོད་ལ་ཕྱག་འཚལ་ལོ། །སྲིད་གསུམ་ཀུན་ལ་ཆགས་པ་མི་མངའ་བ། །འགྲོ་བ་རྣམས་ལ་འདོད་པའི་སྐྱོན་མི་གསུང་། །འདོད་པའི་ཆགས་བྲལ་སྨད་པ་མ་ལགས་པ། །བྱང་ཆུབ་མཆོག་ལ་སྲོག་ཆགས་མོས་པར་མཛད། །ཉོན་མོངས་དགྲ་དང་སྡིག་པའི་དགྲ་སྤངས་པ། །སེར་སྣའི་འདོད་ཆགས་བྲལ་ཞིང་ཆགས་མི་མངའ། །མི་ཡི་དམ་པ་གསེར་ལྟར་དཔལ་སྟུག་པ། །ཁྱོད་ཀྱི་མཚན་དང་གྲགས་པ་ཆུབ་པར་གྲགས། །གནས་དང་དབང་པོ་རྣམ་པར་འབྱེད་ལ་མཁས། །འདི་ན་བཞུགས་ཤིང་འགྲོ་བའི་མིག་ཏུ་གྱུར། །གནས་དང་ཡིག་འབྲུ་ཚིག་གི་དོན་བསླབས་པས། །ཁྱོད་ཀྱིས་ཆུ་བོ་བཞི་ལ་ཟམ་པ་བཏགས། །གླང་པོ་རིན་ཐང་མ་མཆིས་སྦྱིན་པ་མཛད། །འདྲེན་པ་མི་དང་ལྷ་རྣམས་སྒྲོལ་བ་པོ། །ཁྱོད་ཀྱི་ཡོན་ཏན་མཐའ་མ་མི་རྙེད་དེ། །མགོན་པོ་ཁྱོད་ལ་བདག་ནི་ཐལ་མོ་སྦྱར། །མི་ཡི་མཆོག་ལ་རྡུལ་ནི་སྦྱིན་བྱིན་པས། །མི་མཇེད་འཛམ་བུའི་རྒྱལ་པོར་གྱུར་ལགས་ན། །འདིར་ནི་དབང་པོ་དང་བས་ཐལ་སྦྱར་ནས། །སྐྱབས་སུ་ཉེ་བར་མཆི་བ་སྨོས་ཅི་འཚལ། །ཕུང་པོ་གསོག་སྟེ་ཉམ་ཆུང་སྙིང་པོ་མེད། །སྟོང་པ་སྒྱུ་མ་ཆུ་ཟླ་འདྲ་བར་ནི། །གཽ་ཏམ་ཁྱོད་ཀྱིས་དེ་དག་ཡང་དག་མཁྱེན། །ཕུང་པོ་ཁམས་མཁས་ཁྱོད་ལ་ཕྱག་འཚལ་ལོ། །སྲེད་པའི་སྲད་བུས་དམ་དུ་མདུད་བོར་ཏེ། །སྲིད་པའི་འགྲོ་བར་དྲ་བར་རབ་གྲགས་པ། །སྲིད་པར་འགྲོ་བ་རྣམས་ཀྱི་དྲ་བ་དེ། །བདེ་གཤེགས་ཁྱོད་ཀྱི་མཁྱེན་པའི་འོད་ཀྱིས་དྲལ། །ཚངས་པའི་སྒྲ་སྐད་ལྟ་བུའི་གསུང་བརྗོད་པ། །ཤོ་བེ་མ་ལགས་མི་འགྱུར་འདྲིད་མ་ལགས། །ཕུན་ཚོགས་གསུང་དེ་དེ་དག་ཐོས་ནས་ནི། །ཐལ་མོ་སྦྱར་ཏེ་སྐྱབས་སུ་ཉེ་བར་མཆི། །ཕྱག་གི་མཐིལ་གྱིས་ས་འདིར་རེག་པ་ན། །ནགས་ཚལ་བཅས་པར་རྣམ་པ་དྲུག་གཡོས་ཀྱང་། །འདིར་ནི་གཞན་ལ་གནོད་པར་འགྱུར་མ་མཆིས། །བདུད་ཕྱོགས་དགྲ་བཅོམ་ཁྱོད་ལ་ཕྱག་འཚལ་ལོ། །ལྷ་ཡི་རྒྱལ་པོ་ཆེ་དང་མཁས་པ་གང་། །ཁྱོད་ཀྱི་ཆོས་དོན་གཉེར་ཞིང་མཆིས་པ་རྣམས། །དེ་དག་སོ་སོར་ཆོས་བསྟན་ཐོས་ནས་སུ། །ཞབས་གཉིས་ལ་ནི་རབ་ཏུ་གཏུགས་པར་བགྱིད། །

དེ་ནས་མིའམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་བུད་མེད་ཀྱི་དངོས་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ན། ཇི་ལྟར་བདག་ཅག་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་འཐོབ་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུའི་ཆོས་དེ་བཅོམ་ལྡན་འདས་ཀྱིས་བདག་ཅག་ལ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་སྡོང་པོའི་སླས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང་། ཇི་ལྟར་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་འཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་ངས་ཁྱོད་ལ་བཤད་པར་བྱའོ། །མིའམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་ཆོས་གཅིག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་ཏེ། ཆོས་གཅིག་པོ་དེ་གང་ཞེ་ན། འདི་ལྟ་སྟེ། ལྷག་པའི་བསམ་པས་བྱང་ཆུབ་ཏུ་སེམས་བསྐྱེད་པ་དང་། ཐམས་ཅད་མཁྱེན་པའི་སེམས་བསྐྱེད་པ་དང་། མི་མཉམ་པ་དང་མཉམ་པའི་སེམས་བསྐྱེད་པ་དང་། འཇིག་རྟེན་གསུམ་ལས་ཁྱད་པར་དུ་འཕགས་པའི་སེམས་བསྐྱེད་པ་དང་། དགེ་བའི་རྩ་བ་ཐམས་ཅད་ལ་བརྗེད་པ་མེད་པའི་སེམས་བསྐྱེད་པ་སྟེ། སྲིང་མོ་དག་ཆོས་གཅིག་པོ་འདི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ཐོབ་པར་འགྱུར་རོ། །

སྲིང་མོ་དག་གཞན་ཡང་ཆོས་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ཐོབ་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། ཕྲག་དོག་མེད་པ་དང་། སེར་སྣ་མེད་པ་སྟེ། སྲིང་མོ་དག་ཆོས་འདི་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་གསུམ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

གསུམ་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་གསུམ་ཡོངས་སུ་དག་པ་དང་། ངག་གི་སྡོམ་པ་བཞི་ཡོངས་སུ་དག་པ་དང་། ཡིད་ཀྱི་སྡོམ་པ་གསུམ་ཡོངས་སུ་དག་པ་སྟེ། སྲིང་མོ་དག་ཆོས་གསུམ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བཞི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

བཞི་གང་ཞེ་ན། འདི་ལྟ་སྟེ། གཡོ་མེད་པར་སྦྱིན་པ་སྦྱིན་པ་དང་། གཡོ་མེད་པར་བསླབ་པའི་གནས་འཛིན་པ་དང་། གཡོ་མེད་པར་ཚུལ་ཁྲིམས་སྟེན་པ་དང་། གཡོ་མེད་པར་ཆོས་ཉན་པ་སྟེ། སྲིང་མོ་དག་ཆོས་བཞི་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་ལྔ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

ལྔ་གང་ཞེ་ན། འདི་ལྟ་སྟེ། ཆོས་དོན་དུ་གཉེར་བ་དང་། ཆོས་ཐོས་ནས་ཚུལ་བཞིན་དུ་སོ་སོར་རྟོག་པ་དང་། བསམ་པ་ཐག་པ་ནས་བུད་མེད་ཀྱི་དངོས་པོ་ལ་སྨོད་པ་དང་། རྟག་པར་རྒྱུན་དུ་སྐྱེས་པའི་ལུས་འཐོབ་པར་སེམས་སྐྱེད་པ་དང་། ཇི་སྐད་སྨྲས་པ་དེ་བཞིན་དུ་བྱེད་པ་སྟེ། སྲིང་མོ་དག་ཆོས་ལྔ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་དྲུག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ། སྐྱེས་པའི་དངོས་པོ་ཐོབ་པར་འགྱུར་རོ། །

དྲུག་གང་ཞེ་ན། འདི་ལྟ་སྟེ། དྲང་བ་དང་། མཉེན་པ་དང་། སྒྱུ་མེད་པ་དང་། གཡོ་མེད་པ་དང་། བསྩལ་བ་མེད་པ་དང་། བཅོས་པ་མེད་པ་སྟེ། སྲིང་མོ་དག་ཆོས་དྲུག་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བདུན་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

བདུན་གང་ཞེ་ན། འདི་ལྟ་སྟེ། སངས་རྒྱས་ཀྱི་སྐུ་ཐོབ་པར་བྱ་བའི་ཕྱིར་སངས་རྒྱས་རྗེས་སུ་དྲན་པ་དང་། སངས་རྒྱས་ཀྱི་ཆོས་ཐོབ་པར་བྱ་བའི་ཕྱིར་ཆོས་རྗེས་སུ་དྲན་པ་དང་། རང་གིས་ཕྱིར་མི་ལྡོག་པའི་དགེ་འདུན་བསྡུ་བའི་ཕྱིར་དགེ་འདུན་རྗེས་སུ་དྲན་པ་དང་། སྨོན་ལམ་ཡོངས་སུ་དག་པར་བྱ་བའི་ཕྱིར་ཚུལ་ཁྲིམས་རྗེས་སུ་དྲན་པ་དང་། ཉོན་མོངས་པ་ཐམས་ཅད་ཡོངས་སུ་དོར་བའི་ཕྱིར་གཏོང་བ་རྗེས་སུ་དྲན་པ་དང་། བྱང་ཆུབ་ཀྱི་སེམས་རྣམ་པར་དག་པར་བྱ་བའི་ཕྱིར་ལྷ་རྗེས་སུ་དྲན་པ་དང་། དེ་དག་དགྲོལ་བའི་ཕྱིར་སེམས་ཅན་ཐམས་ཅད་ལ་སེམས་པ་སྟེ། སྲིང་མོ་དག་ཆོས་བདུན་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བརྒྱད་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། ཟས་ལ་སྲེད་པ་མ་ཡིན་པ་དང་། སྐོམ་ལ་སྲེད་པ་མ་ཡིན་པ་དང་། མེ་ཏོག་དང་། སྤོས་དང་ཕྲེང་བ་དང་། བྱུག་པ་དང་། ཕྱེ་མ་ལ་སྲེད་པ་མ་ཡིན་པ་དང་། སྐྱེད་མོའི་ཚལ་དུ་འགྲོ་བར་སྲེད་པ་མ་ཡིན་པ་དང་། རྒོད་པ་དང་འཇོ་བ་ལ་སྲེད་པ་མ་ཡིན་པ་དང་། གླུ་དང་གར་དང་རོལ་མོའི་དབྱངས་སྒྲ་ལ་སྲེད་པ་མ་ཡིན་པ་དང་། དགའ་བ་དང་རྩེ་བ་ལ་སྲེད་པ་མ་ཡིན་པ་དང་། རྣ་བ་དང་། སྒྲ་དང་། སྣ་དང་། དྲི་དང་། ལྕེ་དང་། རོ་དང་། ལུས་དང་། རེག་ལ་དགའ་བ་ལ་སྲེད་པ་མ་ཡིན་པ་སྟེ། སྲིང་མོ་དག་ཆོས་བརྒྱད་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་དགུ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

དགུ་གང་ཞེ་ན། འདི་ལྟ་སྟེ། ཆད་པར་ལྟ་བ་མ་ཡིན་པ་དང་། རྟག་པར་ལྟ་བ་མ་ཡིན་པ་དང་། བདག་ཏུ་སྨྲ་བ་མ་ཡིན་པ་དང་། སེམས་ཅན་དུ་སྨྲ་བ་མ་ཡིན་པ་དང་། སྲོག་ཏུ་སྨྲ་བ་མ་ཡིན་པ་དང་། གང་ཟག་ཏུ་སྨྲ་བ་མ་ཡིན་པ་དང་། འབྱུང་བར་ལྟ་བ་མ་ཡིན་པ་དང་། འཇིག་པར་ལྟ་བ་མ་ཡིན་པ་དང་། རྒྱུ་དང་རྐྱེན་ལ་འཇུག་པ་ལ་མཁས་པ་ཡིན་ཏེ། སྲིང་མོ་དག་ཆོས་དགུ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བཅུ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་བྱམས་པར་གནས་པ་དང་། གཞན་གྱི་ལོངས་སྤྱོད་ལ་བརྣབ་སེམས་མི་སྐྱེད་པ་དང་། སྐྱེས་པའི་སེམས་སུ་ཡིད་ལ་བྱེད་པ་སྐྱེད་པ་དང་། སྲོག་གི་ཕྱིར་ཡང་རྫུན་གྱི་ཚིག་མི་སྨྲ་བ་དང་། ཕྲ་མའི་ཚིག་མི་སྨྲ་བ་དང་། ཞེ་གཅོད་པའི་ཚིག་མི་སྨྲ་བ་དང་། ཚིག་ཀྱལ་པ་མི་སྨྲ་བ་དང་། ཕ་རོལ་པོ་དགའ་ཞིང་རྩེ་བ་ལ་ཕྲག་དོག་མེད་པ་དང་། གནོད་སེམས་ཀྱི་བག་ལ་ཉལ་མངོན་པར་མི་སྒྲུབ་པ་དང་། ཡང་དག་པར་ལྟ་བ་དང་ལྡན་པར་འགྱུར་བ་དང་རྣམ་པར་སྨིན་པ་ལ་རེ་བ་མེད་པ་སྟེ། སྲིང་མོ་དག་ཆོས་བཅུ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །

སྲིང་མོ་དག་གཞན་ཡང་བུད་མེད་ཟབ་མོ་ལ་མོས་པ་ཡིན་ཏེ། དེ་གཟུགས་ལ་དབུ་བ་རྡོས་པ་ལྟ་བུར་སོ་སོར་རྟོག་ཀྱང་གཟུགས་ཀྱིས་རྒྱགས་ཤིང་མྱོས་པར་མི་འགྱུར་བ་དང་། ཚོར་བ་ལ་ཆུའི་ཆུ་བུར་ལྟ་བུར་སོ་སོར་རྟོག་ཀྱང་བདེ་བའི་ཚོར་བ་ལ་རྗེས་སུ་ཆགས་པ་མེད་པ་དང་། སྡུག་བསྔལ་གྱི་ཚོར་བ་ལ་ཁོང་ཁྲོ་བར་མི་འགྱུར་བ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བའི་ཀུན་ཏུ་གཏི་མུག་པར་མི་འགྱུར་བ་དང་། འདུ་ཤེས་ལ་སྨིག་རྒྱུ་ལྟ་བུར་སོ་སོར་རྟོག་ཅིང་བུད་མེད་ཀྱི་འདུ་ཤེས་མི་སྐྱེད། སྐྱེས་པའི་འདུ་ཤེས་མི་སྐྱེད་པ་དང་། འདུ་བྱེད་རྣམས་ལ་ཆུ་ཤིང་གི་ཕུང་པོ་ལྟ་བུར་སོ་སོར་རྟོག་སྟེ། འདུ་བྱེད་ཐམས་ཅད་ལ་སྙིང་པོ་མེད་པར་རྟོགས་ནས་འདུ་བྱེད་ཐམས་ཅད་ལ་མི་གནས་ཤིང་དེ་ལ་ཆགས་པ་མི་སྐྱེད་པ་དང་། རྣམ་པར་ཤེས་པ་ལ་སྒྱུ་མ་ལྟ་བུར་སོ་སོར་རྟོག་སྟེ། སེམས་དང་ཡིད་དང་རྣམ་པར་རིག་པ་དེ་སྒྱུ་མ་བྱས་པ་བཞིན་དུ་རྟོགས་ནས་ཆོས་ཐམས་ཅད་ལ་ཆགས་པ་མེད་ཞེ་སྡང་མེད་གཏི་མུག་མེད་པ་དང་། ལུས་ལ་འབྱུང་བ་ཆེན་པོ་བཞི་དང་ལྡན་པར་སོ་སོར་རྟོག་སྟེ། འདི་ལྟ་སྟེ། སའི་ཁམས་དང་ལྡན་པ་དང་། ཆུའི་ཁམས་དང་ལྡན་པ་དང་། མེའི་ཁམས་དང་ལྡན་པ་དང་། རླུང་གི་ཁམས་དང་ལྡན་པར་ལུས་ལ་སོ་སོར་རྟོག་གོ །ལུས་འདི་ནི་བསྡུས་པ་རྩྭ་དང་། ཤིང་དང་། བོང་བ་དང་། རྩིག་པ་དང་། མིག་ཡོར་ལྟ་བུ་སྟེ། འདི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་གྱི་ཕྱིན་ཅི་ལོག་སྔོན་དུ་སོང་བས་རྒྱུ་དང་བྱ་བ་དང་། ལས་ཀྱི་བྱུང་བའོ། །གཞན་ཡང་བུད་མེད་མིག་ལ་ཁ་ཟས་ལས་སྐྱེས་པ་ཤའི་གོང་བུ་ངོ་བོ་ཉིད་ཀྱིས་སྟོང་པ་རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་དང་། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་ངོ་བོ་ཉིད་ཀྱིས་སྟོང་པ་དང་། རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པའོ། །

གཞན་ཡང་བུད་མེད་ལུས་ལ་གཟུགས་བརྙན་ལྟ་བུར་འཇུག་པ་དང་། ངག་ལ་བྲག་ཅ་ལྟ་བུར་འཇུག་པ་དང་། སེམས་ལ་སྒྱུ་མ་ལྟ་བུར་འཇུག་པའོ། །སྲིང་མོ་དག་ཆོས་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་མིའམ་ཅིའི་རྒྱལ་པོ་སྡོང་པོའི་སླས་དེ་དག་ཐམས་ཅད་ཀྱིས་བཅོམ་ལྡན་འདས་ལས་བུད་མེད་ཀྱི་དངོས་པོ་ལས་སྒྱུར་བའི་ཆོས་ཀྱི་རྣམ་གྲངས་འདི་ཐོས་ནས་ཚིམ་ཞིང་མགུ་སྟེ། ཡི་རངས་ཤིང་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །དྲི་མེད་དྲི་བྲལ་དྲི་མ་གཅོད་མཛད་པ། །རྡུལ་མེད་རྡུལ་བྲལ་ལྷག་པའི་གཟི་བརྗིད་མངའ། །པད་མའི་འདབ་འདྲའི་སྤྱན་དང་མཛེས་པའི་ཐུགས། །དྲི་མེད་ཟླ་ཞལ་ཁྱོད་ལ་ཕྱག་འཚལ་ལོ། །དགའ་མཛད་ཞི་མཛད་ཉོན་མོངས་གཅོད་མཛད་པ། །དགའ་བ་སྟོན་པ་རྟག་ཏུ་དགོན་པར་དགྱེས། །རིན་ཆེན་འབྱུང་གནས་རིན་ཆེན་མཛོད་མངའ་བ། །ཡོན་ཏན་མཆོག་མངའ་ཁྱོད་ལ་ཕྱག་འཚལ་ལོ། །ཕ་རོལ་གཤེགས་པ་གཞན་གྱི་ཚོགས་རྣམས་འཇོམས། །པད་མ་ལྟ་བུར་སྟོང་མཆོག་བཀའ་མཆིད་གསུང་། །ལམ་མཆོག་སྩོལ་ཅིང་དམ་པའི་དོན་སྟོན་པ། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །ཆུ་བོ་བཞི་རྒལ་བདེན་བཞིའི་བཀའ་མཆིད་གསུང་། །ས་ལ་རྒྱུ་བ་འདི་ལ་མིག་སྩོལ་བ། །འཁོར་ལོ་མཆོག་གི་མཚན་ནི་སྟོང་མངའ་བ། །རྡུལ་མེད་ཕན་མཛད་ཁྱོད་ལ་ཕྱག་འཚལ་ལོ། །ཉོན་མོངས་རྡུལ་བསལ་དམ་པ་མཐུ་བོ་ཆེ། །མགོན་པོ་འགྲོ་ལ་མཆོག་གི་དོན་མཛད་པ། །བདུད་ཀྱི་དཔུང་རྣམས་སྟོབས་མེད་འཇིག་མཛད་པ། །བཅོམ་ལྡན་སྟོབས་བཅུ་ཁྱོད་ལ་ཕྱག་འཚལ་ལོ། །སྲེད་པའི་འཁྲི་ཤིང་གཅོད་མཛད་མཉམ་པ་མེད། །བརྙེས་པ་དག་དང་མ་བརྙེས་མཚུངས་མཉམ་ཐུགས། །འཇིག་རྟེན་མཐར་འབྱིན་སྣང་བའི་སྒྲོན་མཛད་པ། །རྒྱ་མཚོ་ལྟ་བུ་ཁྱོད་ལ་ཕྱག་འཚལ་ལོ། །དུལ་ཞིང་སྟོབས་བཅུ་ཆེན་པོ་དམ་པ་མངའ། །སྦྱིན་པ་སྩོལ་ཅིང་རྟག་ཏུ་གཏོང་ལ་དགྱེས། །དུལ་བ་ཞི་གནས་ཡོན་ཏན་ཕ་རོལ་ཕྱིན། །ཉོན་མོངས་རྡུལ་བསལ་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་ཀུན་ལ་དམ་པ་སྩོལ། །སྐྱེ་བོའི་འདྲེན་པ་ལྷ་ཡི་མཆོག་པས་མཆོག །བྱམས་དང་སྟོབས་དང་བཟོད་ལ་ངེས་པར་དགྱེས། །མཆོད་འོས་བདེ་གཤེགས་ཁྱོད་ལ་ཕྱག་འཚལ་ལོ། །མར་མེ་ལྟ་བུ་དྲི་མེད་ཟླ་བ་འདྲ། །ཕྱི་ནང་ཉོན་མོངས་དྲི་མ་གཅོད་མཛད་པ། །ཉོན་མོངས་སྤངས་པ་ཡོན་ཏན་བསོད་ནམས་གཏེར། །ཞི་བ་ཐུགས་ཞི་ཁྱོད་ལ་ཕྱག་འཚལ་ལོ། །དད་པ་སྩོལ་བ་དགེ་སྦྱོང་ཞི་མཛད་པ། །སྟོན་པ་སྐྱེ་མཆེད་དྲུག་ལས་ཐར་མཛད་པ། །རྗེས་སུ་དྲན་དྲུག་ཤིན་ཏུ་ཡོངས་དག་དྲན། །རྒྱལ་བ་དགེ་སྦྱོང་རྒྱལ་ལ་ཕྱག་འཚལ་ལོ། །འདོམ་གང་འོད་ནི་གསེར་གྱི་ཁ་དོག་བལྟ། །གསུང་སྙན་དམ་པ་རྣམ་པར་དག་པའི་དབྱངས། །བཅོམ་ལྡན་གང་ཟག་དམ་པ་སྐྱེས་བུ་མཆོག །སྲིད་གསུམ་ཞི་མཛད་ཁྱོད་ལ་ཕྱག་འཚལ་ལོ། །ཤེས་རབ་མུན་པ་མ་མཆིས་ཕ་རོལ་གཤེགས། །རྟག་ཏུ་དཀའ་ཐུབ་བརྟུལ་ཞུགས་རབ་ཏུ་སྤྱོད། །དེ་བཞིན་ཁོ་ན་གཞན་མིན་དེ་བཞིན་གསུང་། །མུན་པར་སྒྲོན་མ་འཛིན་ལ་ཕྱག་འཚལ་ལོ། །བདེ་གཤེགས་གྲགས་ལྡན་ཡོན་ཏན་བས་མ་འཚལ། །དེ་བཞིན་ཉིད་ཀྱི་ཆོས་ཀྱི་གནས་སྟོན་པ། །ཡོན་ཏན་བརྗོད་པ་མཐོང་ཞིང་གྲགས་བསྒྲགས་པས། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །བསྔགས་ལ་གནས་ཤིང་བརྟུལ་ཞུགས་དཀའ་ཐུབ་འཕགས། །ཁེངས་དང་ང་རྒྱལ་རྒྱགས་པ་གཅོད་མཛད་པ། །ཡེ་ཤེས་འབྱུང་གནས་རྡུལ་བྲལ་བློ་གྲོས་མཆོག །སྐྱེ་བོ་མཐར་ཕྱིན་ཁྱོད་ལ་ཕྱག་འཚལ་ལོ། །ཀ་ལ་པིང་ཀ་ཚངས་དབྱངས་ཐུགས་རྗེ་ཅན། །འདོད་པ་རྩོད་བགྱིད་དྲི་མ་སེལ་མཛད་པ། །ཕུང་པོ་ཡོངས་མཁྱེན་མཁས་པ་བདེ་བར་གཤེགས། །ཡོན་ཏན་ཚོགས་མཆོག་མངའ་ལ་ཕྱག་འཚལ་ལོ། །ཡོན་ཏན་སྟོན་པ་ཡོན་ཏན་བསྟོད་མཆོད་པ། །ཟབ་མོ་བལྟ་དཀའ་ཤིན་ཏུ་རྟོགས་པར་དཀའ། །འཛུམ་ཞལ་ཟླ་འདྲ་གསོང་པོར་གསུང་མཛད་པ། །བདུད་སྟོབས་འཇོམས་མཛད་ཁྱོད་ལ་ཕྱག་འཚལ་ལོ། །མཉམ་ཐུགས་ཁ་ལོ་སྒྱུར་བ་རབ་དུལ་ཐུགས། །ཀུན་གྱིས་མངོན་བསྟོད་མཉམ་པའི་ལམ་ལ་གནས། །ཐུབ་པ་མཆོག་གསུང་བདེན་པའི་བཀའ་མཆིད་ཅན། །བདེ་གཤེགས་མཉམ་ཐུགས་ཁྱོད་ལ་ཕྱག་འཚལ་ལོ། །ལམ་སྩོལ་སྙན་པ་ཤིན་ཏུ་འཇམ་པའི་དབྱངས། །བདུད་ཀྱི་སྡེ་མང་འཇོམས་མཛད་ང་རྒྱལ་དང་། །ལྷག་པའི་ང་རྒྱལ་མི་མངའ་ཚུལ་མི་འཆོས། །ཐུབ་པ་དགེ་སྦྱོང་རྒྱལ་ལ་ཕྱག་འཚལ་ལོ། །སྟོབས་དང་མཐུ་དང་བརྩོན་འགྲུས་བསམ་གཏན་དགྱེས། །རྟག་ཏུ་འདོད་ཆགས་སྐྱོན་དང་རབ་རིབ་བྲལ། །བདེ་བར་གཤེགས་པ་མི་གཡོ་གནས་ལ་ཞུགས། །སྟོབས་བཅུ་མཆོག་མངའ་ཁྱོད་ལ་ཕྱག་འཚལ་ལོ། །ཕྱག་དང་ཞབས་ནི་དྲི་མེད་དྲ་བས་འདྲེལ། །སྐྱེ་དང་རྒ་དང་འཆི་བ་མི་མངའ་བ། །རྒྱལ་བར་འོས་པ་འགྲོ་བ་ཀུན་ལས་རྒྱལ། །ནམ་མཁའ་མཉམ་ཐུགས་ཁྱོད་ལ་ཕྱག་འཚལ་ལོ། །དེ་ནས་མིའམ་ཅིའི་རྒྱལ་པོ་སྡོང་པོའི་སླས་མིའམ་ཅིའི་བུ་མོ་བརྒྱད་ཁྲི་བཞི་སྟོང་པོ་དེ་དག་གིས་བཅོམ་ལྡན་འདས་ཀྱི་ཞབས་ལ་གཏུགས་པ་དང་། བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་མཁྱེན་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །

འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་ཁ་དོག་སྣ་ཚོགས་བྱུང་སྟེ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་དངུལ་གྱི་ཁ་དོག་ལྟ་བུའོ། །དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པར་འོད་ཀྱིས་ཁྱབ་པར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཉི་མ་དང་ཟླ་བའི་འོད་མོག་མོག་པོར་བྱས་ཏེ། སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །

དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ་ཞེ་ས་དང་བཅས་ཤིང་གུས་པ་དང་བཅས་པར་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཚིགས་སུ་བཅད་པ་མངོན་པར་བསྒྲུབ་པ་འདིས་བཅོམ་ལྡན་འདས་ལ་འཛུམ་པ་མཛད་པའི་དོན་ཞུས་པ། བདེ་བར་གཤེགས་པ་ཅི་སླད་འཛུམ་སྟོན་པ། །ཟླ་བ་དྲི་མ་མེད་ཞལ་ཁྱོད་ལ་ཞུ། །དྲི་མེད་གཟི་བརྗིད་མངའ་བ་ཁྱོད་ལ་ཞུ། །གསེར་གྱི་ཁ་དོག་ལྟ་བུ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །དམ་པའི་གཟུགས་རྣམས་མངའ་བ་ཁྱོད་ལ་ཞུ། །འགྲོ་བ་རྣམས་ཀྱི་དོན་མཛད་ཁྱོད་ལ་ཞུ། །ལྷ་དང་མི་རྣམས་ཀྱིས་མཆོད་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྦྱིན་དང་དུལ་ལ་དགྱེས་པ་ཁྱོད་ལ་ཞུ། །ཚུལ་ཁྲིམས་ཡོངས་དག་གྱུར་པ་ཁྱོད་ལ་ཞུ། །བཟོད་པའི་སྟོབས་དང་སྟོབས་སྩོལ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བརྩོན་འགྲུས་སྟོབས་དང་མཐུ་མངའ་ཁྱོད་ལ་ཞུ། །བསམ་གཏན་མངོན་ཤེས་དགྱེས་པ་ཁྱོད་ལ་ཞུ། །ཤེས་རབ་ནམ་མཁའ་མཉམ་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །རྟག་ཏུ་བྱམས་པའི་ཐུགས་ཅན་ཁྱོད་ལ་ཞུ། །རྟག་ཏུ་ཐུགས་རྗེ་ལྡན་པ་ཁྱོད་ལ་ཞུ། །དགའ་དང་བཏང་སྙོམས་དགྱེས་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྲིད་པ་གསུམ་པོ་མཐར་འབྱིན་ཁྱོད་ལ་ཞུ། །སྤྱན་གསུམ་དྲི་མ་མི་མངའ་ཁྱོད་ལ་ཞུ། །བདུད་རྩི་ཆོས་རྣམས་གསུང་བ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བདུད་རྣམས་ཐ་མར་འབྱིན་པ་ཁྱོད་ལ་ཞུ། །ངན་པའི་ཚོགས་རྣམས་འཇོམས་པ་ཁྱོད་ལ་ཞུ། །བདེན་པ་དམ་པ་གཟིགས་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྟོབས་བཅུ་དམ་པ་མངའ་བ་ཁྱོད་ལ་ཞུ། །ཐེ་ཚོམ་དག་ནི་གཅོད་མཛད་ཁྱོད་ལ་ཞུ། །ཡོན་ཏན་སྟོང་གིས་བརྒྱན་པ་ཁྱོད་ལ་ཞུ། །དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་མིའམ་ཅིའི་རྒྱལ་པོ་སྡོང་པོའི་སླས་རྣམས་ང་ལས་དགེ་བའི་རྩ་བ་བསྐྱེད་དོ། །བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། བུད་མེད་ཀྱི་དངོས་པོ་ལས་བསྒྱུར་ཞིང་སྐྱེས་པའི་དངོས་པོ་ཐོབ་པར་བྱ་བའི་ཕྱིར་ངའི་རྐང་པ་གཉིས་ལ་གཏུགས་པ་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་མིའམ་ཅིའི་སླས་བརྒྱད་ཁྲི་བཞི་སྟོང་པོ་དེ་དག་གིས་བསམ་པ་ཐག་པ་ནས་དགེ་བའི་རྩ་བ་བསྐྲུན་པ་འདིས་འདི་ནི་ཤི་འཕོས་ནས་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ཐོབ་ནས་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ལྷན་ཅིག་ཏུ་སངས་རྒྱས་བཅོམ་ལྡན་འདས་རྣམས་ཀྱི་རྫོགས་པའི་བྱང་ཆུབ་འདི་ཀུན་འགྲོ་བ་བྱེད་པར་འགྱུར་རོ། །བྱམས་པ་དེ་བཞིན་གཤེགས་པ་བྱང་ཆུབ་ཐོབ་པ་ན་མཉེས་པར་བྱེད་ཅིང་དམ་པའི་ཆོས་ཀྱང་ཀུན་བགྲོ་བ་བྱེད་པར་འགྱུར་རོ། །བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལ་ཡང་རིམ་གྱིས་མཉེས་པར་བྱེད་པར་འགྱུར། དེ་དག་གིས་དམ་པའི་ཆོས་ཀྱང་ཀུན་བགྲོ་བ་བྱེད་པར་འགྱུར། འཛིན་པར་འགྱུར་རོ། །

དེ་དག་རིམ་གྱིས་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་བསྒྲུབ་པར་བྱ་བ་ཐམས་ཅད་ཀུན་ཏུ་རྫོགས་པར་བྱས་ནས། གང་གི་ཚེ་མིའམ་ཅིའི་རྒྱལ་པོ་སྡོང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་དེ་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་ཏེ། དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་འགྱུར་རོ། །ཞེས་གསུངས་སོ།། །།

ལྷ་མོ་མི་འཆི་བ་ཞེས་བྱ་བ་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་འཁོར་དག་ལ་རང་ཉིད་གང་དུ་སངས་རྒྱས་པའི་ཞིང་གི་བཀོད་པ་བསྟན་པའི་ཚུལ། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བཏུས།

དེ་ནས་ག་ཡ་མགོའི་རི་ལ་གནས་པའི་ལྷ་མོ་མི་འཆི་བ་ཞེས་བྱ་བ་དཔུང་དང་བཅས་འཁོར་དང་བཅས་ཏེ་འཁོར་འདུས་པ་དེ་ཉིད་དུ་འདུས་ཤིང་འདུག་འདུག་པ་ལས་དེ་སྟན་ལས་ལངས་ནས་བདག་གི་གནས་སུ་སོང་སྟེ། བཅོམ་ལྡན་འདས་ཀྱི་མཆོད་པ་བླངས་ནས། ཕྱིར་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། བཅོམ་ལྡན་འདས་ལ་བཀུར་སྟི་བྱས། བཙུན་པ་བྱས། རི་མོ་བྱས། མཆོད་པ་བྱས། བསྟི་སྟང་བྱས། རིམ་གྲོ་བྱས་སོ། །བཀུར་སྟི་དང་། བཙུན་པ་དང་། རི་མོ་དང་། མཆོད་པ་དང་། བསྟི་སྟང་དང་། རིམ་གྲོ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

བཅོམ་ལྡན་འདས་ཚེ་རབས་གཞན་དེ་དང་དེ་དག་ལ་ག་ཡ་མགོའི་རི་འདི་ཉིད་དུ་ཆོས་ཀྱི་རྣམ་གྲངས་འདི་སངས་རྒྱས་སྟོང་ཕྲག་བདུན་ཅུ་རྩ་གཉིས་ཀྱིས་དོན་འདི་ཉིད་དག་དང་། ཚུལ་འདི་ཉིད་དག་དང་། ཚིག་དང་ཡི་གེ་འདི་ཉིད་དག་གིས་བསྟན་པ་བདག་གིས་མངོན་པར་དྲན་ནོ། །བཅོམ་ལྡན་འདས་ཀྱིས་བཀའ་སྩལ་པ། མི་འཆི་བ་དེ་ལྟར་ཁྱོད་ཀྱིས་དཀོན་མཆོག་འབྱུང་བ་དེ་ལྟ་བུ་ཐོས་པར་གྱུར་པ་ནི་ཁྱོད་ཀྱིས་ཐོབ་པར་བྱ་བ་ལེགས་པར་ཐོབ་བོ། །དེ་ནས་འཁོར་དེར་ཚོགས་པའི་ནང་ན་ལྷའི་བུ་ཁ་ཅིག་འདི་སྙམ་དུ་སེམས་པར་གྱུར་ཏེ། ལྷ་མོ་འདིས་དེ་སྲིད་ཅིག་ནས་ཆོས་ཀྱི་རྣམ་གྲངས་འདི་ཐོས་ནས་དེ་སྙེད་ཀྱི་དེ་བཞིན་གཤེགས་པ་མང་པོ་ལ་བསྙེན་བཀུར་བྱས་ཀྱང་། འདིས་བུད་མེད་ཀྱི་ལུས་ལས་མ་བསྒྱུར་སྙམ་པ་དང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྲིབ་པ་ཐམས་ཅད་རྣམ་པར་སེལ་བས། ལྷའི་བུ་དེ་དག་གི་སེམས་ཀྱི་རྟོག་པ་སེམས་ཀྱིས་ཡོངས་སུ་ཤེས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་དེ་ལྟར་ལྷ་མོ་མི་འཆི་བ་འདིས་ཆོས་ཀྱི་རྣམ་གྲངས་འདི་ལྟར་རྫུ་འཕྲུལ་ཆེ་བ་ཐོབ་ལ། དེ་བཞིན་གཤེགས་པ་དེ་སྙེད་དུ་མང་བ་ཞིག་བསྙེན་བཀུར་བགྱིས་ན། ཅིའི་རྒྱུ་ཅིའི་རྐྱེན་གྱིས་འདིས་བུད་མེད་ཀྱི་ལུས་ལས་མ་བསྒྱུར།

བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་སེམས་ཅན་གྱི་དོན་ནི་རྒྱུའོ། །སེམས་ཅན་གྱི་དོན་ནི་རྐྱེན་ཏོ། །དེ་ཅིའི་ཕྱིར་ཞེ་ན། རིགས་ཀྱི་བུ་ལྷ་མོ་མི་འཆི་བ་ནི་རྣམ་པར་ཐར་པ་བསམ་གྱིས་མི་ཁྱབ་པ་ལ་གནས་པ། རྫུ་འཕྲུལ་ཆེ་བ། མཐུ་ཆེ་བ་སྟེ། རིགས་ཀྱི་བུ་ལྷ་མོ་མི་འཆི་བས་གང་ཡང་དག་པར་ལེན་དུ་བཙུད་པ་དང་། གཟེངས་བསྡོད་པ་དང་། བྱང་ཆུབ་ཏུ་སེམས་བསྐྱེད་པ་ལས་ཡོངས་སུ་མྱ་ངན་ལས་འདས་པའི་སངས་རྒྱས་ནི་བགྲང་བ་ལས་འདས་པ་ཞིག་ངས་མངོན་པར་ཤེས་ཏེ།

རིགས་ཀྱི་བུ་དེ་ལྟར་ན་ལྷ་མོ་མི་འཆི་བ་ནི་རྫུ་འཕྲུལ་ཆེ་བ། མཐུ་ཆེ་བ་སྟེ། རིགས་ཀྱི་བུ་ལྷ་མོ་མི་འཆི་བ་འདི་ནི་བསྐལ་བ་བཟང་པོའི་སངས་རྒྱས་རྣམས་ལ་བསྙེན་བཀུར་བྱས་ནས། སངས་རྒྱས་ཀྱི་ཞིང་འདི་ཉིད་དུ་མངོན་པར་རྫོགས་པར་འཚང་རྒྱ་བར་འགྱུར་ཏེ། མངོན་པར་རྫོགས་པར་སངས་རྒྱས་ནས་ཀྱང་མི་འཆི་བ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །དེ་ནས་བཅོམ་ལྡན་འདས་ཀྱིས་ལྷ་མོ་མི་འཆི་བ་ལ་བཀའ་སྩལ་པ། མི་འཆི་བ་ཁྱོད་ཀྱིས་རང་གི་སངས་རྒྱས་ཀྱི་ཞིང་སྟོན་ཅིག །

དེ་ནས་ལྷ་མོ་མི་འཆི་བ་གཟུགས་ཐམས་ཅད་ཡོངས་སུ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏེ། ལྷ་མོ་མི་འཆི་བ་གཟུགས་ཐམས་ཅད་ཡོངས་སུ་སྟོན་པའི་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེའི་ཚེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལག་མཐིལ་ལྟ་བུར་མཉམ་ཞིང་བཻཌཱུརྱའི་གཞིར་སྣང་བར་གྱུར་ཏེ། རི་ནག་པོ་མེད་ཅིང་ཤིང་ཐ་མལ་པ་མེད་ལ། གནས་དག་ན་ཡང་དཔག་བསམས་ཀྱི་ཤིང་ཤ་སྟག་སྣང་བར་གྱུར་ཏོ། །

གནས་གནས་དག་ན་ཆུ་མིག་དང་། མཚེའུ་དང་། ལྟེང་ཀ་དང་། རྫིང་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ་དག་སྣང་བར་གྱུར་ཏོ། །མི་ཕལ་བ་མེད་པར་སྣང་བར་གྱུར་ཏོ། །དེ་ན་བུད་མེད་ཀྱི་སྒྲ་ཡང་མི་གྲག་པར་གྱུར་ཏོ། །གནས་དང་གནས་དག་ན་པདྨ་ཤིང་རྟའི་འཁོར་ལོ་ཙམ་དག་སྣང་བར་གྱུར་ཏེ། པདྨ་དེ་དག་ལ་ཡང་བྱང་ཆུབ་སེམས་དཔའི་གཟུགས་སྐྱིལ་མོ་ཀྲུང་དུ་འཁོད་པ་ཤ་སྟག་སྣང་བར་གྱུར་ཏོ། །

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཆི་བ་དེ་ཡང་བྱང་ཆུབ་སེམས་དཔའ་དེ་དག་ལ་ཆོས་སྟོན་པར་སྣང་སྟེ། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མས་མདུན་དུ་བདར་ཏེ། འདི་ལྟར་ཆོས་ཉིད་འདི་ཁོ་ན་བརྩམས་ནས་ཆོས་སྟོན་པར་སྣང་བར་གྱུར་ཏོ། །

དེ་ནས་ལྷ་མོ་མི་འཆི་བ་ཡང་ཏིང་ངེ་འཛིན་དེ་ལས་ལངས་ཏེ། བཅོམ་ལྡན་འདས་ལ་ལན་གསུམ་དུ་གཡས་ཕྱོགས་སུ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ།། །།