མཁའ་འགྲོའི་ཆོས་མཛོད་ཆེན་མོ་ལས་འཕགས་བོད་ཀྱི་སྐྱེས་ཆེན་མ་དག་གི་རྣམ་ཐར་ཕྱོགས་བསྒྲིགས་པདྨ་དཀར་པོའི་ཕྲེང་བ།

རྣམ་གྲངས་དང་པོ།

༄༅། །ཕུང་པོ་གཟན་དུ་བསྐྱུར་བའི་རྣམ་པར་བཤད་པ་ལས་མ་ཅིག་ལབ་ཀྱི་སྒྲོན་མའི་རྣམ་པར་ཐར་པ་མདོར་བསྡུས་པ་ཙམ་ཞིག་བཞུགས་སོ༔

ས་མ་ཡ༔ ཨོཾ་སྭ་སྟི༔ རྒྱལ་བའི་ཡུམ་ཆེན་རྡོར་འཆང་བསྟན་པའི་གཙོ༔ སྒྲོལ་མ་འཇམ་དཔལ་མི་ཕམ་མགོན་པོ་དང་༔ རྣལ་འབྱོར་འབིར་བ་སུ་ཀ་སུ་ཏི་མ༔ ཀླུ་སྒྲུབ་ཡབ་སྲས་ཐོགས་མེད་སྐུ་མཆེད་དང་༔ ཨརྱ་དྷེ་བ་དམ་པ་རིན་པོ་ཆེ༔ ཤཱཀྱ་ཡེ་ཤེས་བསོད་ནམས་གྲགས་པ་དང་༔ མ་ཅིག་ལབ་ཀྱི་སྒྲོན་མ་ལ་སོགས་པ༔ བཀའ་བརྒྱུད་དྲི་མེད་ཤེལ་འཕྲེང་ལྟར་གསལ་བ༔ རྩ་རྒྱུད་བླ་མ་མཆོག་གསུམ་ཡི་དམ་ལྷ༔ དཔའ་བོ་མཁའ་འགྲོ་ཆོས་སྐྱོང་སྲུང་མ་ལ༔ དེང་ནས་བརྩམས་ཏེ་བྱང་ཆུབ་མ་ཐོབ་པར༔ འགྲོ་རྣམས་དོན་དུ་སྒོ་གསུམ་གུས་ཕྱག་འཚལ༔ གདོང་དམར་ཡུལ་གྱི་གངས་ཅན་རི་ཡི་རྩེར༔ སྒྲོལ་མའི་སྤྲུལ་པ་ལབ་སྒྲོན་སེང་གེ་འགྱིང་༔ མཁྱེན་བརྩེ་གཉིས་དང་ཐུགས་རྗེའི་དཔའ་རྩལ་རྫོགས༔ མདོ་རྒྱུད་བསྟན་ཆོས་རྣམ་དག་གཡུ་རལ་རྒྱལ༔ གདུལ་དཀའ་འདུལ་བ་ནུས་པའི་མཆེ་སྡེར་རྣོ༔ ཐེག་ཆེན་ཡང་སྙིང་ང་རོ་ཡིས༔ བ་གླང་བ་ཡི་ཚོགས་བཞིན་དམན་འཆིང་རྣམས༔ ཟིལ་གྱིས་མནན་ནས་ལམ་བཟང་སྲོལ་ཆེན་བཏོད༔ རིན་ཆེན་མེ་ཤེལ་རྡུལ་ཚོན་ལེན་པ་བཞིན༔ བློ་ཆེན་སྐལ་ལྡན་སྐད་ཅིག་ཉིད་ལ་གྲོལ༔ མུན་གླིང་རྟ་བདུན་རྒྱལ་པོ་བརྒྱུག་པ་བཞིན༔ བོད་ཁམས་མུན་སེལ་སྒྲོན་མ་དེ་ལ་འདུད༔ མཆོག་གི་སྤྲུལ་སྐུ་གངས་ལྗོངས་ལབ་སྒྲོན་གྱི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ སྤྲུལ་པའི་གྲངས་སོགས་བྱེད་ལས་སྣ་ཚོགས་རྣམས༔ གྲངས་མེད་རྒྱལ་བས་གཞན་གཞལ་ཀྱང་བརྗོད་ལས་འདས༔ འོན་ཀྱང་ཐུབ་པའི་བསྟན་པ་ལ༔ མི་མཇེད་འཇིག་རྟེན་གྱི་ཁམས་འདིར་ནི༔ སྐུ་ཡི་སྤྲུལ་པ་བྱེ་བ་ཕྲག་བརྒྱ་ཡི༔ རེ་རེའི་མཛད་སྤྱོད་སྣ་ཚོགས་གྲངས་མང་ཡང་༔ ཁྱད་པར་གངས་ཅན་འདི་ཡི་སྤྲུལ་སྐུ་འདིའི༔ ཡོན་ཏན་གྲངས་མང་ཆུ་གཏེར་ཆེན་པོ་ལ༔ བླ་མ་རྣམས་དང་གསུང་རབ་བཀའ་དྲིན་གྱིས༔ ཆུ་གཏེར་ནང་ནས་ཆར་གྱི་འབྲུ་ཙམ་ཞིག༔ བདག་གིས་ཐོས་ཤིང་མཐོང་བས་འདིར་བཀོད་བྱ༔

དེ་ལ་ཡུམ་ཆེན་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་ངེས་དོན་དང་༔ གསང་སྔགས་བླ་ན་མེད་པའི་ནང་ནས༔ ཁྱད་པར་དུ་འཕགས་པའི་མ་རྒྱུད་བླ་ན་མེད་པ་དང་གཉིས༔ བཀའ་ནས་བྱུང་བའི་བྱུང་ཚུལ་དང་༔ བླ་མ་རིམ་པར་བརྒྱུད་པའི་རྣམ་གྲངས་གཅིག་སྔོན་དུ་འགྲོ་བ་དང་༔ དངོས་གཞི་ལ་མ་ཅིག་ལབ་ཀྱི་སྒྲོན་མའི་རྣམ་ཐར་མདོར་བསྡུས་པ་ཞིག༔ རྣམ་གྲངས་བཅྭོ་བརྒྱད་ཀྱིས་བསྟན་པ་དང་༔ རྗེས་སུ་རྣམ་གྲངས་གཉིས་ཀྱིས་མཇུག་བསྡུས་ནས་རྫོགས་པར་བྱེད་པ་ལ་རྣམ་གྲངས་ཉེར་གཅིག༔ སྔོན་འགྲོ་དངོས་གཞི་རྗེས་དང་གསུམ་དུ་འདུས་པའོ༔ དེ་ཡང་གངས་ཅན་རིའི་ཁྲོད་རྣམས་སུ༔ གྲགས་ཆེ་བའི་ཆོས་ལུགས་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་གྱི་བླ་མ་བརྒྱུད་པའི་ཐོག་མར་ཡུམ་ཆེན་མོ་འོང་དགོས་པའི་ལོ་རྒྱུས་འདི་ནི༔ བསྟན་པ་འདིའི་བསྟན་པ་མ་ཡིན་ཀྱང་༔ བླ་མ་བརྒྱུད་པའི་ཐོག་མར་ཡུམ་ཆེན་མོ་འོང་དགོས་པ་དང་༔ རྒྱུ་མཚན་དང་ལོ་རྒྱུས་སྣང་བ་རྣམས་འོག་ཏུ་སྐབས་ལ་བབས་པ་དེར་འཆད་ཅིང་བརྗོད་པས་འདིར་མི་བརྗོད་དོ༔ ཕྱག་རྒྱ་ཆེན་པོ་བདུད་ཀྱི་གཅོད་ཡུལ་ཞེས་བྱ་བ་འདི་ལ༔ མདོ་སྔགས་གཉིས་ཀྱི་ཕུག་ཐུག་པའི་སྟོན་པ་ནི་གཉིས་གཉིས་ཏེ༔ འོག་མིན་སྟུག་པོ་བཀོད་པའི་ཞིང་ཁམས་སུ༔ ཁ་སྦྱོར་ཡན་ལག་བདུན་ལྡན་གྱི་གནས་ནས༔ རྒྱལ་བ་རྡོ་རྗེ་འཆང་ཆེན་པོ་མཚན་དང་དཔེ་བྱད་ཡོངས་སུ་རྫོགས་པའི་ལོངས་སྐུའི་མཚན་ཉིད་དང་ལྡན་པ་དེ་ནི་ཉི་མའི་སྙིང་པོ་དང་འདྲ་བ་དེ་དང་༔ དེའི་སྤྲུལ་པའི་སྐུ་མཆོག་གི་མཚན་ཉིད་མཉམ་མེད་ཤཱཀྱའི་རྒྱལ་པོ་སྟེ༔ དེ་ནི་ཉི་མའི་ཟེར་དང་འདྲ་བའི་སྤྲུལ་པའི་སྐུ་མཆོག་ཆེན་པོ་དེ་ཉིད་དང་ལོངས་སྤྲུལ་གཉིས་ཏེ༔ རྒྱུ་གཅིག་ཀྱང་རྣམ་པར་སྣང་པའི་ལོངས་སྤྲུལ་དེ་གཉིས་ལས་བྱུང་བའི་མདོ་སྔགས་གཉིས་ཀྱི་དང་པོ་མདོ་ལུགས་ནི༔ སྤྲུལ་པའི་སྐུ་མཆོག་མཉམ་མེད་ཤཱཀྱའི་རྒྱལ་པོ་ནས་བརྒྱུད་པའི་རྒྱུད་འཛིན་ལ་བཞི་སྟེ༔ རྒྱལ་བ་ཤཱཀྱ་ཐུབ་པ༔ འཕགས་པ་འཇམ་དཔལ༔ ཀླུ་སྒྲུབ༔ རྒྱལ་སྲས་ཨརྱ་དྷེ་བ༔ དམ་པ་རིན་པོ་ཆེ༔ མ་ཅིག་ལབ་ཀྱི་སྒྲོན་མ་ནས་བརྒྱུད་པ་ནི་ཡུལ་སྟོང་པ་ཉིད་གཙོ་བོར་སྟོན་པའི་བརྒྱུད་པའོ༔

རྒྱལ་བ་ཤཱཀྱ་ཐུབ་པ་ནས་རྗེ་བཙུན་བྱམས་མགོན༔ ཐོགས་མེད་པ༔ དབྱིག་གཉེན་པ༔ དམ་པ་སངས་རྒྱས༔ ཤཱཀྱ་ཡེ་ཤེས༔ བསོད་ནམས་གྲགས་པ༔ མ་ཅིག་ལབ་ཀྱི་སྒྲོན་མ་ནས་བརྒྱུད་པ་ནི༔ ཡུལ་ཆེན་ཤེས་པ་གཙོ་བོར་སྟོན་པའི་བརྒྱུད་པ་ནི༔ རྒྱལ་བ་ཤཱཀྱ་ཐུབ་པ༔ འཇམ་དཔལ་འབིར་བ་པ༔ སུ་ཀ་སུ་ཏི་མ༔ བྲམ་ཟེ་ཨརྱ་དྷེ་བ་དམ་པ༔ རིན་པོ་ཆེ་མ་ཅིག་ལབ་ཀྱི་སྒྲོན་མ་ནས་བརྒྱུད་པ་ནི༔ ཡུལ་དང་ཡུལ་ཅན་དབྱེར་མེད་ཅིག་ཆར་དུ་སྟོན་པའོ༔ མཉམ་མེད་ཤཱཀྱ་ཐུབ་པ་ནས་རྗེ་བཙུན་སྒྲོན་མ༔ འཇམ་དཔལ༔ འབིར་བ་པ༔ སུ་ཀ་སི་ཏི་མ༔ བྲམ་ཟེ་ཨརྱ་དྷེ་བ༔ དམ་པ་སངས་རྒྱས༔ བསོད་ནམས་གྲགས་པ༔ མ་ཅིག་ལབ་ཀྱི་སྒྲོན་མ་ནས་བརྒྱུད་པ་ནི༔ མདོའི་དཀྱིལ་འཁོར་སྒྲུབ་ཅིང་མཆོད་པའི་བརྒྱུད་པ་དང་བཞི་པའོ༔ གསང་སྔགས་ཀྱི་བརྒྱུད་པ་ནི༔ རྡོ་རྗེ་འཆང་ཆེན་པོ་ནས་ལོངས་སྐུ་རྗེ་བཙུན་སྒྲོལ་མ་ལ༔ དེས་སྤྲུལ་སྐུ་ལབ་ཀྱི་སྒྲོན་མ་ལ་བརྒྱུད་པའོ༔ དེ་ཡང་ཕྱི་མཚན་ཉིད་ཐེག་པ་ཆེན་པོ་སྡེ་སྣོད་གསུམ་གྱི་ཡང་རྩེ་ཕ་རོལ་ཏུ་ཕྱིན་པའི་སྙིང་པོའི་དོན་གྱི་མན་ངག་འདི་སྟོན་པ་ལ༔ མཉམ་མེད་ཤཱཀྱ་ཐུབ་པ་ནས་བརྒྱུད་པའི་རིམ་པ་ལ་བཞི་དང་༔ རྒྱུད་སྡེ་བཞིའི་ཡང་རྩེ་བླ་ན་མེད་པའི་ནང་ནས་ཁྱད་པར་དུ་མ་རྒྱུད་བླ་ན་མེད་པ་འདི་ནི་རྒྱལ་བ་རྡོ་རྗེ་འཆང་ནས་བརྒྱུད་པའི་རིམ་པ་ལ་གཅིག་དང་ལྔ་ནི༔ བཀའ་ནས་བརྒྱུད་པའི་རིམ་པ༔ བཀའ་བརྒྱུད་ཀྱི་རྣམ་ཐར་ཤིན་ཏུ་བསྡུས་པ་ཞིག་སྔོན་དུ་འགྲོ་བ་སྟེ་རྣམ་གྲངས་དང་པོའོ༔

རྣམ་གྲངས་གཉིས་པ།

གཉིས་པ་དངོས་གཞི་ལ་རྣམ་གྲངས་བཅོ་བརྒྱད་ཡོད་པའི་དང་པོ་མ་ཅིག་ལབ་ཀྱི་སྒྲོན་མ་འདིས་ནི༔ ཐོག་མར་བོད་དུ་ཐུགས་བསྐྱེད་ནས་སྤྲུལ་པ་མར་འགྱེད་པའི་དུས་སུ་ཡང་དག་པར་རྫོགས་པའི་སངས་རྒྱས་ལོངས་སྤྱོད་རྫོགས་པའི་སྐུ༔ འཇའ་ལུས་འོད་ཀྱི་རང་བཞིན་ཅན༔ ཡེ་ཐོག་དང་པོའི་སངས་རྒྱས་འོད་མི་འགྱུར་པ་ཞེས་བྱ་བ༔ འོག་མིན་སྟུག་པོ་བཀོད་པའི་ཞིང་ཁམས་སུ་བཞུགས་པའི་དུས་ན༔ སངས་རྒྱས་དེའི་མཚན་ཉིད་ཀྱི་རྣམ་གྲངས་ནི་འདི་ལྟ་སྟེ༔ བསྟན་པ་འདིའི་སྔོན་རོལ་གྱི་ཡང་སྔོན་རོལ༔ བསྟན་པ་ཡང་སྔའི་སྔོན་རོལ༔ བསྟན་པ་དྲུག་གམ་དེ་ལས་ཀྱང་བསྟན་པ་བཅུ་གཉིས་ཀྱི་སྔོན་རོལ་གྱི་དུས་སུ༔ ཡེ་ཐོག་དང་པོའི་སངས་རྒྱས་འོད་མི་འགྱུར་བའི་ཡུམ་ཀུན་ཏུ་བཟང་མོའམ༔ ཤེས་རབ་གཙོ་མོར་སྟོན་པར་བྱེད་པའི་བདག་མོའམ༔ གཙོ་མོ་ནི་ཡེ་ནས་ཀ་དག་ལྷུན་གྲུབ་འདུས་མ་བྱས༔ སྨྲ་བསམ་བརྗོད་པའི་ཡུལ་ལས་འདས༔ དེ་ནི་རྗེ་བཙུན་རྡོ་རྗེ་རྣལ་འབྱོར་མའམ༔ རྗེ་བཙུན་རྡོ་རྗེ་ཕག་མོའམ༔ རྗེ་བཙུན་རྡོ་རྗེ་མཁའ་སྤྱོད་མའམ༔ རྗེ་བཙུན་རྡོ་རྗེ་བདག་མེད་མའམ༔ རྗེ་བཙུན་རྡོ་རྗེ་སྒྲོལ་མ་ཞེས་པའམ༔ དེ་རྣམས་ནི་དོན་དུ་གཅིག་ལ་མིང་གི་རྣམ་གྲངས་སོ་སོར་ཡིན་པ་ནི༔ འགྲོ་བའི་དོན་དུ་སེམས་ཅན་ཐམས་ཅད་ལ་ཐུགས་བསྐྱེད་ནས༔ གང་ལ་གང་འདུལ་གྱི་ཐབས་སུ་བསྟན་པ་ཡིན་ཞིང་༔ རྒྱུད་ཐ་དད་པ་ནི་མ་ཡིན་ནོ༔ མིང་ཇི་ལྟར་བཏགས་ཀྱང་༔ དོན་ལ་གཅིག་པས་ཡེ་ཐོག་དང་པོའི་སངས་རྒྱས་འོད་མི་འགྱུར་པའི་ཡུམ་ཀུན་ཏུ་བཟང་མོ༔ ཡེ་ཤེས་ཀྱི་ལྷ་མོ་དེ་ནི་དུས་རིང་པོ་ཞིག་གི་ཚེ་ན༔ མ་འགགས་ལྷུན་གྱིས་གྲུབ་པའི་ཕྲིན་ལས་ཀྱི་ལྷ་མོ་མཐིང་ག་ཞལ་གཅིག་ཕྱག་གཉིས་མ༔ ཁྲོ་མོ་ཡི་རྣམ་པ་ཅན་ཞིག་གི་སྐུར་གསལ་ལམ་མེ་བཞེངས་པ་དེ་ལ༔ རྡོ་རྗེ་སྒྲོལ་མ་ཞེས་བྱ་བ་ཞིག་མིང་གི་ཐ་སྙད་དུ་གྲུབ་པའོ༔

རྡོ་རྗེ་སྒྲོལ་མ་དེའི་ཐུགས་ཀ་ནས་འོད་ཟེར་ཁ་དོག་ལྔ་འབར་བ་ཞིག་འཕྲོས་ནས་མདུན་གྱི་ནམ་མཁའི་དབྱིངས་སུ་འཕྲོས་པ་ལས༔ ཐིག་ལེ་འོད་ཟེར་ལྔ་འབར་བ་གཉིས་བརྩེགས་པའི་སྟེང་དུ༔ ཐིག་ལེ་དམར་སེར་མུཾ་ཡིག་གི་མཚན་པ་ཞིག་ཏུ་གྱུར་ཏོ༔ མུཾ་ཡིག་ཐིག་ལེ་གསུམ་དང་བཅས་པ་ལ་འོད་ཟེར་འཕྲོས་པས༔ སྟོང་གསུམ་འཇིག་རྟེན་གྱི་ཁམས་མཐའ་ཡས་པ་རྣམས་ཁྱབ་པར་བྱས༔ ཕྱོགས་བཅུའི་ཞིང་ཁམས་མཐའ་ཡས་པ་རྣམས་ཁྱབ་པར་བྱས༔ སངས་རྒྱས་དང་བྱང་ཆུབ་སེམས་དཔའ་རྣམས་མཉེས་པར་བྱས༔ དེ་རྣམས་ཀྱི་ཐུགས་རྒྱུད་བསྐུལ༔ སྐུ་གསུང་ཐུགས་ཀྱི་བྱིན་རླབས་ནུས་པ་རྣམས་འོད་ཟེར་གྱི་ཚུལ་དུ་ཚུར་བསྡུས༔ ཐིག་ལེ་གསུམ་ལ་ཐིམ༔ ཡང་ཐིག་ལེ་གསུམ་ལས་འོད་ཟེར་འཕྲོས༔ དེ་རྣམས་འོད་དུ་འབར་བ་ལས༔ དཔག་ཚད་བྱེ་བའི་བར་དུ་ཁྱབ་པར་བྱས༔ དེ་ནས་ཐིག་ལེ་འོག་མ་དེ་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་སུ་གྱུར་པ་ནི༔ སྟོང་གསུམ་གྱི་སྟོང་ཆེན་པོ་རབ་འབྱམས་ཀྱི་ཚད་ལས་ཀྱང་ཆེར་ལྷག་པའི་དབུས་སུ༔ ཐིག་ལེ་བར་མ་དེ་འོད་དུ་ཞུ་བ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཀྱི་ཁང་པ་གྲུ་བཞི་སྒོ་བཞི༔ རྒྱན་རྟ་བབས་གདུགས་རི་དྭགས་ཆོས་འཁོར་དང་བཅས་པ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པའི་གཞལ་ཡས་ཁང་གི་དབུས་སུ་རིན་པོ་ཆེ་ལས་གྲུབ་པའི་སྣ་ཚོགས་པདྨ་འདབ་མ་བཅུ་པའི་ལྟེ་བར་ཕྱོགས་བཞི་མཚམས་བཞི་དང་བརྒྱད་དུ༔ སེང་གེ་བཞི་བཞི་བརྒྱད་གདོང་ཕྱིར་ཕྱོགས་པའི་སྟེང་དུ༔ རིན་པོ་ཆེ་སྣ་ཚོགས་ལས་གྲུབ་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ༔ ཐིག་ལེ་དམར་སེར་ཡོངས་སུ་གྱུར་པ་ལས༔ པདྨ་སེར་པོ་གསེར་ལྟར་སེར་བ༔ འདབ་མ་སྟོང་དང་ལྡན་པའི་ལྟེ་བར༔ ཟླ་བའི་དཀྱིལ་འཁོར་ཉ་གང་བ་ལྟ་བུའི་སྟེང་དུ༔ མུཾ་ཡིག་དམར་སེར་ཡོངས་སུ་གྱུར་པ་ལས༔ ལྷ་མོ་སེར་མོ་གསེར་བཙོ་མའི་མདོག་ལྟར་རབ་ཏུ་སེར་བ༔ ཞལ་གཅིག་ཕྱག་བཞི་མ༔ ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པ༔ ཕྱག་གཡས་ཀྱི་དང་པོ་ན་གསེར་གྱི་རྡོ་རྗེ་རྩེ་དགུ་པ༔ གཡོན་གྱི་དང་པོ་ན་སྟོང་ཕྲག་བརྒྱད་པའི་པོ་ཏི་བསྣམས་པ༔ འོག་མ་གཉིས་མཉམ་བཞག་གི་ཕྱག་རྒྱ་མཛད་པ༔ དར་དང་རིན་པོ་ཆེ་སྣ་ཚོགས་པས་བརྒྱན་པ༔ མཚན་དང་དཔེ་བྱད་ཀྱིས་སྤྲས་པ༔ སྣང་ལ་རང་བཞིན་མེད་པ་ནམ་མཁའི་འཇའ་ལྟར་གསལ་བ༔ འོད་དང་འོད་ཟེར་དཔག་ཏུ་མེད་པ་འཕྲོས་པས༔ དཔག་ཚད་སྟོང་ཕྲག་བརྒྱད་ཁྲིར་ཁྱབ་པའི་སྐུར་གྱུར་ཏོ༔ སེང་གེའི་འོག་གི་པད་འདབ་བཅུ་པོའི་སྟེང་དུ༔ སེང་གེ་དང་རིན་པོ་ཆེའི་ཁྲི༔ པདྨ་དང་ཟླ་བའི་གདན་ལ༔ ཐུགས་ལས་སྤྲུལ་པའི་སངས་རྒྱས་བཅུ་པོ་ནི༔ སངས་རྒྱས་ཀྱི་ངོ་བོ་སྟེ་རྣམ་པ་ཡང་དེ་ལྟར་དུ་བཞུགས་པའི་འཁོར་དུ༔ ས་བཅུའི་བྱང་ཆུབ་སེམས་དཔའ་བཅུ་རེས་བསྐོར་བའི་མཐར་ཡང་༔ སེམས་དཔའ་དང་སེམས་མ་དང་མཆོད་པའི་ལྷ་མོ་རྣམས་ཀྱིས་མཆོད་རྫས་ཀྱི་བྱེ་བྲག་དཔག་ཏུ་མེད་པས་མཆོད་པར་བྱེད་དོ༔

སྒོ་བཞིར་ཡང་འཕགས་སྐྱེས་པོ་ལ་སོགས་པའི་རྒྱལ་ཆེན་སྡེ་བཞི་དང་༔ གཞལ་ཡས་ཁང་གི་ཕྱི་རོལ་ཏུ་ཡང་མཆོད་པའི་ལྷ་མོ་རྣམས་དང་༔ དཔའ་བོ་དང་དཔའ་མོ་རྣམས་ལ་འཁོར་འབུམ་སྡེས་བསྐོར་བ་རྣམས་དང་༔ དེའི་ཕྱི་རོལ་ཏུ་བར་སྣང་ལ་སྤྲིན་ལ་གནས་པའི་ལྷའི་ཁྱེའུ་ཕོ་མོ་དཔག་ཏུ་མེད་པས༔ གླུ་གར་དང་རོལ་མོ་ལ་སོགས་པའི་མཆོད་པས་མཆོད་ཅིང་༔ མེ་ཏོག་གི་ཆར་ཕབ་པ་དང་༔ ཞིང་ཁམས་ཀྱི་མཐར་ཕྱོགས་སྐྱོང་དང་༔ ཞིང་སྐྱོང་ལ་སོགས་པའི་བསྟན་པ་སྐྱོང་བ་རྣམས་དང་༔ རང་རང་གི་འཁོར་དང་བཅས་པ་ཐམས་ཅད་ཀྱང་གཙོ་མོ་ལ་འདུད་པའི་ཚུལ་དུ་བཞུགས་པ་ནས་ཡོད་དོ༔ གཞལ་ཡས་ཁང་གི་ནང་དུ༔ ཆོས་ཀྱི་ཕུང་པོ་སྟོང་ཕྲག་བརྒྱད་བཅུ་རྩ་བཞིའི་ཡི་གེའི་རང་སྒྲ་རྣམས་བུང་བའི་ཚང་ཆེན་པོ་ལྟར་འུ་རུ་རུ་གྲགས་པ་ཡོད་དོ༔ ཞིང་ཁམས་ཀྱི་རྒྱ་ཁྱོན་ལ་འོད་ཟེར་ཁ་དོག་བརྒྱ་དང་ལྡན་པ་འབར་ཞིང་༔ རྒྱན་དང་ཁ་དོག་དབྱིབས་མི་འདྲ་བ་དུ་མ་བཀོད་ལེགས་པར་ཡོད་པ༔ ལྟ་བས་མི་ངོམས་ཤིང་མཛེས་ཤིང་ཡིད་དུ་འོང་བའི་ཞིང་དེ་ལ་ནི༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ཞེས་བྱའོ༔ ཞིང་ཁམས་དེའི་གཙོ་མོ་ནི༔ ཤེས་རབ་གཙོ་བོར་སྟོན་པའི་ཡེ་ཤེས་ཀྱི་ལྷ་མོ་ཡིན་པའི་ཕྱིར༔ སངས་རྒྱས་རྣམས་ཀྱི་ཡུམ་ཡིན་པས་ན༔ རྒྱལ་བའི་ཡུམ་ཆེན་མོ་ཞེས་སོ༔ ཡུམ་ཆེན་མོ་དེའི་ཞལ་ནས༔ མངོན་སུམ་དུ་ཆོས་གསུངས་པ་མ་ཡིན་ཀྱང་༔ ཐུགས་མཁྱེན་བརྩེ་ལས་བྱུང་བའི་སངས་རྒྱས་རྣམས་དང་༔ སྲས་མོ་ཡེ་ཤེས་ཀྱི་ལྷ་མོ་རྣམས་སྤྲོས་ཤིང་༔ འགྲོ་བ་སེམས་ཅན་ཐམས་ཅད་ཀྱི་རྒྱུད་བྱིན་གྱིས་བརླབས་པ་དང་༔ སྐུ་ལུས་ཀྱི་ཚིགས་བར་དང་༔ བ་སྤུ་ཡི་བུ་ག་ཐམས་ཅད་ནས་འོད་ཟེར་བྱེ་བ་ཁྲག་ཁྲིག་དུ་མ་འཕྲོས་པས༔ འགྲོ་བ་སེམས་ཅན་ཐམས་ཅད་ཀྱི་མ་རིག་པའི་མུན་པ་སེལ་བར་བྱེད་པ་དང་༔ སྐུའི་སྐྱེ་མཆེད་དང་གནས་ལྔ་ནས་སྐུ་གསུང་ཐུགས་དང་ཡོན་ཏན་འཕྲིན་ལས་ལ་སོགས་ཀྱིས༔ ཡེ་ཤེས་ཀྱི་ལྷ་མོ་མང་པོ་སྤྲོས་པའི་སྤྲུལ་པས༔ འཇིག་རྟེན་གྱི་ཁམས་མཐའ་ཡས་པ་ཁྱབ་པར་སེམས་ཅན་རྣམས་ལ་གང་ལ་གང་འདུལ་གྱི་སྒོ་ནས་ཆོས་སྟོན་ཅིང་༔ ཐབས་སྣ་ཚོགས་པའི་སྒོ་ནས་འགྲོ་བ་སེམས་ཅན་ཐམས་ཅད་ཀྱི་དོན་བྱེད་པ་ཡིན་ནོ༔

འཁོར་གྱི་སངས་རྒྱས་བཅུ་པོས་ནི༔ རང་རང་གི་འཁོར་བྱང་ཆུབ་སེམས་དཔའ་བཅུ་ལ་སོགས་པ་རྣམས་ལ་ཆོས་སྟོན་ཅིང་ཚོགས་སྐྱོང་བར་བྱེད་དོ༔ དེ་ལྟ་བུའི་སངས་རྒྱས་གཙོ་འཁོར་ཞིང་ཁམས་དང་བཅས་པ་ནི༔ འཕྲིན་ལས་ཀྱི་ལྷ་མོ་རྡོ་རྗེ་སྒྲོལ་མ་ཞེས་སམ༔ གཞི་ཀུན་ཏུ་བཟང་མོའི་ཐུགས་རྗེ་དང་སྨོན་ལམ་གྱི་མཐུས་ཅིག་ཆར་དུ་གྲུབ་པའོ༔ དེ་ནས་རྡོ་རྗེ་སྒྲོལ་མའི་ཐུགས་ཀ་ནས་ཧཱུྃ་མཐིང་ནག་ཅིག་འཕྲོས༔ ཡུམ་ཆེན་མོའི་ཐུགས་ཀར་ཕོག༔ ཐུགས་རྒྱུད་བསྐུལ༔ འོད་ཟེར་ཕྱིར་འཕྲོས༔ འཁོར་གྱི་སངས་རྒྱས་བཅུ་པོ་ཡི་ཐུགས་རྒྱུད་བསྐུལ༔ འོད་ཟེར་ཕྱིར་འཕྲོས༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་རྡོ་རྗེ་འཆང་གི་ཐུགས་རྒྱུད་བསྐུལ༔ འོད་ཟེར་ཕྱིར་འཕྲོས༔ འོག་མིན་གྱི་གནས་ནས་རྣམ་པར་སྣང་མཛད་དང་༔ གངས་ཆེན་མཚོ་རྒྱལ་གྱི་ཐུགས་རྒྱུད་བསྐུལ༔ ཡང་འོད་ཟེར་ཕྱིར་འཕྲོས༔ གཞན་ཡང་ཞིང་ཁམས་མཐའ་ཡས་པའི་སངས་རྒྱས་རྣམས་དང་ཕྱོགས་བཅུའི་སངས་རྒྱས་སྲས་དང་བཅས་པ་ཐམས་ཅད་ཀྱི་ཐུགས་རྒྱུད་བསྐུལ༔ ཡང་འོད་ཟེར་ཕྱིར་འཕྲོས༔ སེམས་ཅན་མཐའ་ཡས་པའི་སྒྲིབ་པ་སྦྱང་༔ རྒྱལ་བ་སྲས་དང་བཅས་པ་རྣམས་མཉེས་པར་བྱས༔ སྐུ་གསུང་ཐུགས་ཀྱི་བྱིན་རླབས་ནུས་མཐུ་རྣམས་འོད་ཟེར་གྱི་ཚུལ་དུ་ཚུར་རིམ་གྱིས་བསྡུས་ནས་ཡུམ་ཆེན་མོའི་ཐུགས་ཀར་ཐིམ་ཞིང་འོད་དུ་འབར་བ་ལས༔ རྡོ་རྗེ་སྔོན་པོ་རྩེ་གཅིག་པའི་ཡར་རྩེ་ཁ་ཊྭཱཾ་ག་དང་ལྟེ་བར་གྲི་གུག་གི་མཚན་པ་ཞིག་ཏུ་འཕྲོས༔

དེ་ཡོངས་སུ་གྱུར་པ་ལས་ལྷ་མོ་སྔོ་སངས་མ་ནམ་མཁའི་མདོག་འདྲ་བ་ཞལ་གཅིག་ཕྱག་བཞི་མ་ལོངས་སྤྱོད་རྫོགས་པའི་སྐུར་བཞེངས་པ་ཞིག་ཐུགས་ཀ་ནས་ཕྱིར་ཐོན་པས༔ ཕོ་བྲང་དེའི་མདུན་གྱི་ཐད་དུ་རང་གིས་སྤྲུལ་པའི་ཞིང་ཁམས་དང་གཞལ་ཡས་ཁང་གི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་མ་དང་རོའི་གདན་ལ་གར་སྟབས་ཀྱིས་བཞེངས་པ་དེ་ལ་ནི་རྡོ་རྗེ་དབྱིངས་ཀྱི་དབང་ཕྱུག་མ་ཞེས་སོ༔ པད་འདབ་བརྒྱད་ལ་མཁའ་འགྲོ་མ་བརྒྱད༔ སྟེང་དུ་མཁའ་འགྲོ་མ་སྔོན་མོ་ཞིག་སྟེ་མཁའ་འགྲོ་མ་གཙོ་འཁོར་བཅུ་བཞུགས་པའི་མཐར་ལྷ་མོ་དགུ་བཅུ་གོ་བརྒྱད་ཀྱིས་བསྐོར་བའི་མཐར་དཔའ་བོ་དང་དཔའ་མོ་མཁའ་འགྲོ་མའི་ཚོགས་ཀྱིས་བསྐོར་བར་གྱུར་ཏོ༔ རྡོ་རྗེ་དབྱིངས་ཕྱུག་མའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྤྲུལ་པ་མང་པོ་འགྱེད་ནས་འགྲོ་བ་སེམས་ཅན་ཐམས་ཅད་ཀྱི་དོན་མཛད་པ་ལས་ཐུགས་ཀྱི་སྤྲུལ་པ་ནི་མཁའ་འགྲོ་མ་མཐིང་ནག་རབ་ཏུ་ཁྲོས་པའི་ཆ་བྱད་ཅན་ཞལ་གཅིག་ཕྱག་གཉིས་གྲི་གུག་དང་ཐོད་ཁྲག་འཛིན་པ་དུར་ཁྲོད་ཀྱི་ཆས་བརྒྱད་ཀྱིས་བརྒྱན་ཅིང་ཕག་ཞལ་ནག་པོ་སྤྱི་བོར་རལ་པའི་དབུས་སུ་ཐོན་པ་ཞབས་གཉིས་བརྐྱང་བསྐུམ་གར་ཐབས་ཀྱིས་པདྨ་ཉི་མ་རོའི་གདན་ལ་བཞེངས་པ༔ འཁོར་མཁའ་འགྲོ་མ་སྡེ་བཞི་ལ་དཔའ་བོ་དང་དཔའ་མོ་མཁའ་འགྲོ་མའི་ཚོགས་དང་བཅས་པ་ནུབ་ཕྱོགས་ཨོ་རྒྱན་གྱི་དབུས་ཀྱི་སྟེང་གི་ཕོ་བྲང་དུ་བཞུགས་པ༔ དེ་ལ་ནི་མཁའ་འགྲོ་བདུད་འདུལ་མ་ཞེས་པའོ༔ བདུད་འདུལ་མ་དང་དབྱིངས་ཕྱུག་མ་གཉིས་ཀའི་སྤྲུལ་གཞིའམ་འབྱུང་གནས་ནི་ཡུམ་ཆེན་མོ་དང་༔ དེ་གསུམ་གའི་འབྱུང་གནས་ནི་རྡོ་རྗེ་སྒྲོལ་མ་དང་བཞི་པོ་འདི་ནི་ཐ་མལ་གང་གིས་ཀྱང་མཐོང་དུ་མི་བཏུབ་ཅིང་དབྱིངས་རང་བཞིན་རྣམ་པར་དག་པའི་ཞིང་རང་རང་གི་ཞིང་ཁམས་སུ་བཞུགས་པ་ལ་རྩ་བའི་མཁའ་འགྲོ་མ་བཞི་ཟེར་རོ༔

བདུད་འདུལ་མའི་ཐུགས་ཀྱི་སྤྲུལ་པ་ལ་མཁའ་འགྲོ་མ་སེར་མོ་ཞལ་གཅིག་ཕྱག་གཉིས་རིན་པོ་ཆེའི་རྒྱན་སྣ་ཚོགས་པས་བརྒྱན་པའི་གཙོ་འཁོར་ལྔ་ནུབ་ཕྱོགས་ཨོ་རྒྱན་གྱི་ཕོ་བྲང་དུ་བྱོན་པ་དེ་ལ་མཁའ་འགྲོ་མ་གསེར་མིང་གླིང་མ་ཞེས་སོ༔ གསེར་མིང་གླིང་མའི་ཐུགས་ཀའི་སྤྲུལ་པ་ལ་མཁའ་འགྲོ་མ་སྔོན་མོ་ཞིག་སྲིད་རྩེའི་འོག་མིན་དུ་བྱོན་ནས༔ གྱ་ནོམ་པ་སྣང་བ་ཤིན་ཏུ་མཐོང་བ༔ མི་གདུང་བ༔ མི་ཆེ་བ་དང་བཞི་དེ་རྣམས་ཀྱི་གནས་སུ་མར་བྱོན་ནས་གཟུགས་བསྒྱུར་ཏེ༔ གཙང་མའི་ལྷ་བཞི་དང་མཐུན་པར་མཛད་ནས་ལྷའི་འགྲོ་དོན་མཛད་དོ༔ མཁའ་འགྲོ་མ་སྔོན་མོའི་ཐུགས་ཀྱི་སྤྲུལ་པ་མཁའ་འགྲོ་མ་དམར་མོ་ཞིག་མར་འབྲས་བུ་ཆེ་བའི་གནས་ནས་གཙང་མ་རིས་ཀྱི་བར་དུ་རིམ་གྱིས་བྱོན་ནས་གཟུགས་ཁམས་ཀྱི་གནས་རིས་བཅུ་དྲུག་རྣམས་སུ་རང་རང་གི་རྣམ་ཐར་དང་མཐུན་པའི་འགྲོ་དོན་མཛད་དོ༔ མཁའ་འགྲོ་མ་དམར་མོའི་ཐུགས་ཀྱི་སྤྲུལ་པ་ལ་མཁའ་འགྲོ་མ་དཀར་མོ་ཞིག་མར་འདོད་པའི་ཁམས་དང་༔ གཞན་འཕྲུལ་དབང་བྱེད་དང་༔ འཕྲུལ་དགའ་དང་དགའ་ལྡན་གྱི་བར་དུ་མར་བྱོན་ནས་འགྲོ་དོན་མཛད་དོ༔ མཁའ་འགྲོ་མ་དཀར་མོའི་ཐུགས་ཀྱི་སྤྲུལ་པ་ལ་མཁའ་འགྲོ་མ་སེར་མོ་ཞིག་མར་བྱོན་ནས་མཐའ་བྲལ་དང་༔ སུམ་ཅུ་རྩ་གསུམ་པ་དང་རྒྱལ་ཆེན་སྡེ་བཞིའི་བར་དུ་བྱོན་ནས་འགྲོ་དོན་མཛད་དོ༔ མཁའ་འགྲོ་མ་སེར་མོའི་ཐུགས་ཀྱི་སྤྲུལ་པ་ལ་མཁའ་འགྲོ་མ་ལྗང་སེར་ཞིག་ནུབ་ཕྱོགས་ཨོ་རྒྱན་དུ་བྱོན་ནས་འགྲོ་དོན་རྒྱ་ཆེན་པོ་མཛད་དོ༔

དེ་ནས་འཇིག་རྟེན་མིའི་རྣམ་པ་དང་མཐུན་པར་སྤྲུལ་ཏེ་རྡོ་རྗེའི་གདན་ལ་སོགས་པའི་གནས་ཆེན་རྣམས་དང་༔ གནས་ཕྲན་རྣམས་སུ་བྱོན་ནས་མིའི་འགྲོ་དོན་གྲངས་མེད་པ་མཛད་དོ༔ མཁའ་འགྲོ་མ་ལྗང་སེར་གྱི་ཐུགས་ཀྱི་སྤྲུལ་པ་མཁའ་འགྲོ་མ་སེར་མོ་ཞིག་འདོད་ལྷའི་གཟུགས་དང་མཐུན་པར་སྤྲུལ་ཏེ་ལྷ་གཞོང་ཐོགས་དང་༔ འཕྲེང་ཐོགས་དང་༔ རྟག་མྱོས་དང་༔ རི་རྩེ་རྐེན་དང་༔ རྒྱལ་ཆེན་སྡེ་བཞི་དང་༔ སུམ་ཅུ་རྩ་གསུམ་པ་དང་འཐབ་བྲལ་གྱི་བར་དུ་བྱོན་ནས་ནོར་བུ་ཕུན་སུམ་ཚོགས་པའི་གནས་དང་༔ ཀུན་དྷ་ཧ་ལའི་གནས་དང་༔ བུདྡྷ་ཧ་ལའི་གནས་དང་ཧ་ལ་དལ་སྐྱོབ་ཀྱི་གནས་ལ་སོགས་པ་རྣམས་སུ་ལྷའི་འགྲོ་དོན་ཡུན་རིང་པོར་མཛད་དོ༔ སྔར་ཐོག་མར་རྡོ་རྗེ་ཕག་མོའམ་ཀུན་ཏུ་བཟང་མོ་ལས་ཀྱི་མཁའ་འགྲོ་མ་རྡོ་རྗེ་སྒྲོལ་མར་སྤྲུལ་ནས་ཡུམ་ཆེན་མོ་ལ་སོགས་པའི་སྤྲུལ་པ་རྣམས་དེང་སང་བོད་དུ་བྱོན་ནས་ལབ་ཀྱི་སྒྲོན་མ་ཞེས་པར་བྱུང་བས་ན་དམ་ཆོས་བདུད་ཀྱི་གཅོད་ཡུལ་གྱི་སྒོ་ནས་འགྲོ་དོན་འབྱུང་བའི་རྟེན་འབྲེལ་དང་དགོས་ཆེད་ཀྱི་རྒྱུ་མཚན་ཡིན་ཚུལ་དང་གླེང་གཞིའི་རྣམ་ཐར་དང་བཅས་པ་ནི་ཐོག་མར་རྡོ་རྗེར་ཕག་མོའམ་ཡེ་ཐོག་དང་པོའི་སངས་རྒྱས་འོད་མི་འགྱུར་བའི་ཡུམ༔ གཞི་ཀ་དག་ཀློང་ཡངས་ཀྱི་ཀུན་ཏུ་བཟང་མོས་འགྲོ་བའི་དོན་ལ་སྤྲུལ་པ་མར་འགྱེད་ནས་བྱོན་ཚུལ་དང་༔ སྤྲུལ་པའི་བརྒྱུད་ཚུལ་དང་སྤྲུལ་པའི་རྣམ་གྲངས་བསྡུས་པ་ཞིག་བཤད་ཟིན་པ་འདི་ནི་ཡེ་ཐོག་དང་པོའི་སངས་རྒྱས་ནས་སྤྲུལ་པ་མར་འགྱེད་ནས་བྱོན་ཚུལ་གྱི་རྣམ་བཤད་དག་སྣང་གི་རྣམ་གྲངས་ཏེ་རྣམ་གྲངས་དང་པོའི་སྦྱོར་བ་ལས་གཅིག་པའོ༔

ཡེ་ཤེས་ཀྱི་མཁའ་འགྲོ་མ་ལོངས་སྤྱོད་རྫོགས་པའི་སྐུར་བཞེངས་པའི་གསེར་གླིང་མ་ལ་ཐོག་མར་བཟུང་ནས་ཐ་མ་ལབ་སྒྲོན་གྱི་བར་ལ་སྐྱེ་བ་བརྒྱ་དང་བདུན་བཞེས་སོ་ཞེས་པ་འདི་ནི་བསྐལ་བཟང་འདིའི་སྔོན་རོལ་དང་བསྐལ་པ་འདི་ལས་བྱུང་བའི་གྲངས་ཀྱི་ཁྱད་པར་ནི་འདི་ལྟར་ཏེ༔ ཡེ་ཐོག་དང་པོའི་སངས་རྒྱས་འོད་མི་འགྱུར་བ་ཕྱིན་ཆོད་དང་སངས་རྒྱས་འཁོར་བ་འཇིག་གི་བསྟན་པའི་སྔོན་རོལ་ཡན་ཆད་དུ༔ སྐྱེ་བ་སུམ་ཅུ་ཐམ་པ་སོང་ངོ་༔ འཁོར་བ་འཇིག་གི་བསྟན་པ་ལ་ཉེར་གཉིས་སོང་༔ གསེར་ཐུབ་ཀྱི་བསྟན་པ་ལ་ཉེར་གཅིག་སོང་༔ འོད་སྲུང་གི་བསྟན་པ་ལ་ཉི་ཤུ་ཐམ་པ་སོང་༔ སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་བསྟན་པ་ལ་སྐྱེ་བ་བཅུ་བཞི་སོང་བ་དང་སྐྱེ་བ་བརྒྱ་དང་བདུན་པོ་འདི་ནི་སྐྱེ་རྒྱུད་གཅིག་དེད་པ་ཡང་མ་ཡིན༔ སྤྲུལ་པ་དུ་མ་མཛད་པ་ཐམས་ཅད་བགྲངས་བ་ཡང་མ་ཡིན༔ དེས་ན་དུས་གཅིག་ལ་སྤྲུལ་པ་ལྔ་མཛད་པའི་ལྔ་པ་དང་༔ བཞི་པ་དང་༔ གསུམ་པ་དང་༔ གཉིས་པ་དང་གཅིག་པ་སྟེ་ལྔ་པ་ནས་གཅིག་པའི་བར་རྣམས་ཐོག་མར་གསེར་གླིང་མ་ནས་བཟུང་སྟེ་ཐ་མ་ལབ་སྒྲོན་ཡན་ཆོད་དུ་སྐྱེ་བ་རྣམས་རྫོགས་སོ༔ ཡིན་པས་བགྲངས་བས་བརྒྱ་དང་བདུན་སོང་བའོ༔ དེ་རྣམས་ཀྱི་ལོ་གྲངས་ནི་རང་རང་གི་ལུགས་ཀྱི་ཉི་ཤུ་དང་བརྒྱ་དང་སྟོང་དང་ཁྲི་དང་འབུམ་ཕྲག་གི་བར་དུ་བཤད་པས་ཚེ་རིང་ཐུང་གི་ཁྱད་པར་ཆེ་བར་གསུངས༔ སངས་རྒྱས་བཅོམ་ལྡན་འདས་རྒྱལ་བ་ཤཱཀྱ་ཐུབ་པའི་བསྟན་པ་ལ་སྐྱེ་བ་བཅུ་བཞི་བཞེས་པའོ༔ སྐྱེ་བ་བཞི་པོ་འོག་ཏུ་སྐབས་ལ་བབས་དེར་འཆད་ཅིང་འདིར་མི་བརྗོད་དོ༔ སྐྱེ་བ་གསུམ་པོ་འདིར་འཆད་པ་འདི་ལྟར་ཏེ༔ སྔོན་ནོར་བུ་ཕུན་སུམ་ཚོགས་པའི་གླིང་དུ་འགྲོ་དོན་མཛད་པའི་ཚེ༔ ལྷ་མོ་སེར་མོ་གསེར་གྱི་མདོག་འདྲ་བ་དེས༔ དུས་གཅིག་ལ་སྐྱེ་བ་གསུམ་ལྡན་ཞིག་ཏུ་བཞེས་པ་ལ༔ དག་པའི་སྐྱེ་བ་གཅིག་མ་དག་པའི་སྐྱེ་བ་གཉིས་ཏེ༔ མ་དག་པའི་སྐྱེ་བ་བཞེས་ཚུལ་ནི༔ སྐྱེ་ཡུལ་ནི་མི་འདྲ་བ་ལ་འགྲོ་དོན་ནི་བོད་དུ་ལྷན་ཅིག་ཏུ་མཛད་པའི་སྐྱེ་བ་གཉིས་བོད་དུ་དུས་གཅིག་ལ་འཛོམས་པ་བོད་དུ་སྐྱེ་བ་བཞེས་པའི་ཐོག་མ་ཡིན་ནོ༔

དག་པའི་སྐྱེ་བ་ནི་བཅོམ་ལྡན་འདས་མ་རྡོ་རྗེ་ཕག་མོ་དམར་མོ་གཙོ་འཁོར་ལྔར་སྤྲུལ་ནས་ནུབ་ཕྱོགས་ཨོ་རྒྱན་གྱི་ལྷོ་ནུབ་མཚམས༔ དུར་ཁྲོད་ཆེན་པོ་བསིལ་བ་ཚལ་དུ་འཁོར་བྱེ་བ་འབུམ་ཕྲག་རྣམས་ལ་གསང་བའི་རྒྱ་མཚོ་ལ་སོགས་པའི་མ་རྒྱུད་བླ་ན་མེད་པའི་ཟབ་ཆོས་རྣམས་སྟོན་པར་མཛད་པ་དེ་ནི་གསུང་གི་སྤྲུལ་པའོ༔ མ་དག་པའི་སྐྱེ་བ་གཉིས་པོའི་གཅིག་ནི་བལ་པོའི་རྒྱལ་པོ་འོད་ཟེར་གོ་ཆ་ཞེས་བྱ་བའི་བུ་མོར་སྐྱེས་ནས་རྣམ་རིག་ཁྲིའི་རྗེ་བཙུན་མ་བལ་བཟའ་ཁྲི་བཙན་ཞེས་པར་གྲགས་ཏེ་དེ་ནི་སྐུའི་སྤྲུལ་པ་ཡིན་པ༔ དེ་ནི་སངས་རྒྱས་དངོས་ཉིད་བྱོན་པར་འདྲ་བའི་ཇོ་བོ་མི་བསྐྱོད་རྡོ་རྗེ་དང་སྒྲོལ་མ་དང་༔ བྱམས་པ་དང་སྤྱན་རས་གཟིགས་ལ་སོགས་པའི་རྟེན་ཁྱད་པར་ཅན་མང་རབས་རྣམས་གདན་དྲངས་ནས༔ འཕགས་པ་སྤྱན་རས་གཟིགས་དབང་ཕྱུག་གི་སྤྲུལ་པ་རྒྱལ་པོ་སྲོང་བཙན་སྒམ་པོའི་ཆུང་མར་བྱོན་ནས་འགྲོ་དོན་རྒྱ་ཆེན་པོ་བོད་དུ་མཛད་དོ༔ གཅིག་ནི་རྒྱ་ནག་གི་རྒྱལ་པོ་སེང་གེ་འོད་ཟེར་སེང་གེའི་བུ་མོར་སྐྱེས་ནས༔ རྣམ་རིག་འཕྲུལ་གྱི་རྗེ་བཙུན་མ་རྒྱ་བཟའ་དབོན་ཆུང་མ་ཞེས་བྱ་བར་གྲགས་པ་དེ་ནི༔ ཇོ་བོ་ཤཱཀྱ་མུ་ནེ་རང་ཉིད་ལ་སོགས་པའི་རྟེན་མང་རབས་སྤྱན་དྲངས་ནས༔ འཕགས་པ་སྤྱན་རས་གཟིགས་ཀྱི་སྤྲུལ་པ་རྒྱལ་པོ་སྲོང་བཙན་སྒམ་པོའི་ཆུང་མར་བྱོན་ནས༔ བོད་དུ་འགྲོ་དོན་མཐའ་ཡས་པར་མཛད་པ་དེ་ནི་ཐུགས་ཀྱི་སྤྲུལ་པ་ཡིན་ནོ༔

དེ་ནས་བལ་མོ་མཚོ་དང་རྒྱ་མོ་བཟའ་གཉིས་དུས་གཅིག་ལ་མཚམས་སྦྱོར་བའི་སྐྱེ་བ་ཕྱི་མ་བོད་དུ་སྐྱེས་པ་གཅིག་སྟེ༔ ཆོས་སྐུ་སྣང་བ་མཐའ་ཡས་ཀྱི་ཐུགས་ཀྱི་སྤྲུལ་པ༔ ཐོག་མའི་སངས་རྒྱས་འོད་མི་འགྱུར་བ་ཀུན་ཏུ་བཟང་མོའི་སྲས་པོ་སངས་རྒྱས་དངོས་ཉིད་མཚུངས་འདྲའི་ཨོ་རྒྱན་ཆེན་པོ་པདྨའི་རྒྱལ་པོས་གསང་སྔགས་ཀྱི་ལམ་ལ་ཁྲིད་པའི་ཡེ་ཤེས་ཀྱི་མཁའ་འགྲོ་མ་གསང་སྔགས་ཐམས་ཅད་ཀྱི་བདག་མོ༔ མཁའ་འགྲོ་མ་ཡེ་ཤེས་མཚོ་རྒྱལ་ཞེས་བྱ་བར་སྐྱེ་བ་བཞེས་ནས་པདྨའི་རྒྱལ་པོས་བྱིན་གྱིས་བརླབས་པས༔ བོད་ཁམས་ཁ་བ་ཅན་ལ་སོགས་པའི་འཛམ་བུའི་གླིང་བྱེ་བ་ཕྲག་བརྒྱར་འགྲོ་དོན་མཐའ་ཡས་པར་མཛད་དོ༔ མཁའ་འགྲོ་མ་ཡེ་ཤེས་མཚོ་རྒྱལ་གྱི་འགྲོ་དོན་རྫོགས་ནས་ཐུགས་འཕོས༔ སུམ་ཅུ་རྩ་གསུམ་གྱི་ལྷ་མོ་འོད་ཟེར་ཅན་ཞེས་བྱ་བར་སྐྱེ་བ་བཞེས་སོ༔ ལྷ་མོ་དེ་ནི་སྐུ་མདོག་ཤིན་ཏུ་དཀར་བ་གངས་རི་དང་འདྲ་བས་གངས་ཀྱི་ལྷ་མོ་ཡང་ཟེར་རོ༔ ལྷ་གཞན་ལས་ཆེར་ལྷག་ཅིང་འོད་འབར་ཞིང་གཟི་བརྗིད་ཆེ་བས་ལྷ་མོ་འོད་འཆང་མ་ཡང་ཟེར་རོ༔ ལྷ་མོ་གཟི་བརྗིད་ཅན་ཡང་ཟེར་རོ༔ མིང་གང་ལྟར་བཏགས་ཀྱང་ལྷ་མོ་འོད་ཟེར་ཅན་ཞེས་བྱ་བར་གྲགས་པས༔ དེ་ནི་འཁོར་འབུམ་ཕྲག་དུ་མ་དང་བཅས་པ་དེས་སུམ་ཅུ་རྩ་གསུམ་གྱི་ལྷ་རྣམས་ཀྱི་འགྲོ་དོན་དང་མི་ཡི་ཡུལ་དུ་ཡང་རྒྱ་གར་རྡོ་རྗེ་གདན་ལ་སོགས་པའི་བོད་ཀྱི་གནས་ཆེན་རྣམས་སུ་བྱོན་ནས་འགྲོ་དོན་རྒྱ་ཆེན་པོ་མཛད་དོ༔

དེ་ཡན་ཆད་ཀྱི་སྐྱེ་བ་བཞེས་ཚུལ་རྣམས་ནི་རྒྱུད་བུ་ཆུང་མཐའ་རྣམས་གསལ་བྱེད་ཀྱི་ཡིག་བཀྲ་ཆེན་མོའི་ནང་ནས་ཕལ་ཆེར་རྣམ་སྣང་བའི་ལུགས་དང་༔འགའ་ཞིག་ནི་སྐྱེས་རབས་འབྲིང་པོའི་ནང་ནས་བཏུས་པའི་ཡིག་ཆུང་རྣམ་སྣང་བའི་ལུགས་ལ་ཅི་ལྟ་བ་བཞིན་དུ་བཀོད་པ་ལགས་སོ༔ གསེར་གླིང་མ་ཡན་ཆད་ནི་དག་པ་ལྷའི་སྐྱེས་རབས་ཡིན་པར་གདའ་ལགས་སོ༔ འོག་མིན་གྱི་གནས་སུ་བཞུགས་པའི་མཁའ་འགྲོ་མ་སྐུ་མདོག་སྔོན་པོ་རྡོ་རྗེ་དབྱིངས་ཕྱུག་མ་མན་ཆད་དང་༔ ལྷ་མོ་འོད་འཆང་མ་ཡན་ཆད་རྣམས་ནི་རྣམ་པར་དག་པ་ལྷའི་སྐྱེས་རབས་དང་༔ མི་ལས་སྤྲུལ་པའི་སྤྲུལ་པ་འགྱེད་ཚུལ་གྱི་སྐྱེས་རབས་ཏེ་རྣམ་གྲངས་གཉིས་པའོ༔

རྣམ་གྲངས་གསུམ་པ།

དེ་ནས་ལྷ་མོ་འོད་འཆང་མ་གཟི་བརྗིད་ཅན་ཞེས་བྱ་བ་དེ་ཉིད་ལྷ་རྣམས་ཀྱི་འགྲོ་དོན་རྫོགས་པའི་དུས་ཀྱི་སྐབས་ལ་བབས་པ་དང་༔ དེ་ནས་རྒྱ་གར་དུ་སེར་སྐྱ་ཞེས་བྱ་བའི་གྲོང་ཁྱེར་ཆེན་པོ་ཞིག་ཡོད་དེ༔ གྲོང་ཁྱེར་དེའི་གྲོང་སྟོད་ནས་ཝ་ཆུ་བབས་པ༔ གྲོང་གི་རྐེད་པ་ན་སླེབས་ནས་སྐྱ་རབ་ཚུགས་པ་ཙམ་ཡོད༔ གྲོང་ཁྱེར་གྱི་པདྨ་རུ་སླེབས་ནས་གྲུ་དང་གཟིངས་འཇུག་དགོས་པ་ཡོད་དེ༔ དེ་འདྲ་བའི་གྲོང་ཁྱེར་ལྔ་བརྒྱ་ལ་དབང་བསྒྱུར་བར་བྱེད་པའི་རྒྱལ་པོ་ཞིག་ཡོད་དེ༔ རྒྱལ་པོ་དེ་ཡི་མཚན་ལ་ནི་དཔལ་དབང་ཕྱུག་འཕགས་པ་ཞེས་བྱ་བ་ཡང་ཟེར་རོ༔ ཤཱཀྱའི་རིགས་ཡིན་པས་ཤཱཀྱའི་རིགས་ཨའི་དབང་ཕྱུག་ཡང་ཟེར་རོ༔ རྒྱལ་པོ་དེ་ལ་ནི་བཙུན་མོ་ལྔ་བརྒྱ་ཡོད་ཀྱང་སྲས་ནི་གཅིག་ཀྱང་མེད་པས༔ མོ་པྲ་མཁན་དང་༔ རྩིས་མཁན་དང་བྲམ་ཟེར་བརྟགས་མཁན་རྣམས་ལ་མོ་པྲ་དང་༔ མོ་རྩིས་དང་ལྟས་རྣམས་བརྟགས་པས་མོ་པྲ་མཁན་རྣམས་ཀྱིས་མགྲིན་གཅིག་ཏུ་འདི་སྐད་ཅེས་སྨྲས་སོ༔ ད་ལོ་རྒྱལ་པོ་ཚང་གིས་དཀོན་མཆོག་ལ་མཆོད་པ་རྒྱ་ཆེན་པོ་ཕུལ་ཞིང་༔ ཡུལ་མི་དང་དགེ་འདུན་ལ་སྟོན་ཤིག་ཆེན་པོ་བྱེད་པ་དང་༔ ལྷ་ཀླུ་རྣམས་དང་ཡུལ་བདག་དང་༔ གནས་བདག་དང་དཀར་ཕྱོགས་སྐྱོང་བ་ལ་དགའ་བ་རྣམས་ལ་གསོལ་མཆོད་ཆེན་པོར་བྱེད་པ་དང་༔ གསོལ་བ་གདབ་པ་དང་སྨོན་ལམ་རྒྱ་ཆེར་གདབ་ན་བུ་ཞིག་བཙའ་བར་འགྱུར་རོ་ཞེས་ལུང་བསྟན་ཏོ༔

དེ་ནས་མོ་པྲ་མཁན་རྣམས་ཀྱིས་ལུང་བསྟན་པ་དེ་བཞིན་དུ་བྱས་པ་ལ༔ སྟོན་ཤིག་དང་མཆོད་པ་ཆེན་པོ་བྱས་པའི་གོང་དུ༔ ལྷ་མོ་འོད་འཆང་མ་ལ་འཁོར་ལྷ་མོ་འབུམ་ཕྲག་གིས་བསྐོར་བའི་ཚོགས་དང་བཅས་པ་དང་༔ གཞན་ཡང་གཟུགས་ཁམས་ཀྱི་ལྷ་རྣམས་དང་༔ འདོད་ཁམས་ཀྱི་ལྷ་ལ་སོགས་པའི་ལྷ་མོ་འབུམ་ཕྲག་མང་པོའི་ཚོགས་དང་བཅས་པ་རྣམས་རྒྱ་གར་དུ་གཟིགས་མོར་ནམ་མཁའ་ལ་བྱོན་པའི་ཚེ༔ རྒྱལ་པོ་དང་༔ བཙུན་མོ་དང་༔ བློན་པོ་དང་དགེ་འདུན་གྱི་སྡེ་དང་༔ ཡུལ་མི་ཚོགས་པ་རྣམས་དང་བཅས་པས་བདེན་སྟོབས་བརྗོད་པ་དང་༔ གསོལ་བ་གདབ་པ་དང་༔ སྨོན་ལམ་རྒྱ་ཆེར་བཏབ་པའི་སྟོབས་དང་རྟེན་འབྲེལ་ལས་ཀྱི་མཐུས༔ ལྷ་མོ་འོད་འཆང་མ་ལ་ལྟུང་བ་ཕོག་པས་ལྷ་མོའི་ལུས་ཀྱི་འོད་རྣམས་ཉམས་པ་ལ་སོགས་པའི་ལྟས་རྣམས་རིག་ནས་ལྷ་མོས་ཐུགས་བསྐྱེད་དེ༔ སྐུ་གསུང་ཐུགས་ཡོན་ཏན་འཕྲིན་ལས་དང་ལྔའི་སྤྲུལ་པ་དཔག་ཏུ་མེད་པ་མཛད་ནས་ཁམས་གསུམ་པོ་ཁྱབ་པར་བྱས་ཤིང་༔ གཞན་ཡང་ས་གཡོས་པ་དང་༔ ཐུག་ཆོམ་དང་ལྷ་མོ་རྣམས་ཀྱིས་རྔ་བོ་ཆེ་བརྡུང་བ་ལ་སོགས་པའི་རོལ་མོ་སྣ་ཚོགས་སྒྲོག་པ་དང་༔ མེ་ཏོག་སྣ་ཚོགས་ཀྱི་ཆར་ཕབ་པ་དང་༔ དེ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་རྣམས་བྱུང་བས་དེ་དང་མཉམ་དུ་ལྷ་མོའི་ཐུགས་ཀའི་འོད་ཟེར་ཁ་དོག་ལྔ་འབར་བའི་རྣམ་པས་རྒྱལ་པོའི་ཕོ་བྲང་དུ་བབས་པས་རྒྱལ་བློན་འཁོར་བཅས་རྣམས་ཉམས་དགའ་ཞིང་བག་དྲོ་བར་བྱུང་ངོ་༔ དེ་ནས་རྒྱལ་བློན་ཡུལ་མི་འཁོར་འབངས་དང་༔ དགེ་འདུན་གཉེན་སྡེ་དང་བཅས་པ་རྣམས་ཉམས་དགའ་བ་དང་༔ བག་དྲོ་བ་དང་༔ སྣང་བ་དྭངས་བའི་ངང་ནས་དགེ་ལེགས་དང་༔ བཀྲ་ཤིས་དང་སྨོན་ལམ་བརྗོད་ཅིང་འགྲུབ་པར་གཟིགས་སོ༔

དེ་ནས་ལྷ་དང་མིའི་འདུ་ཚོགས་རྣམས་ནི་སོ་སོར་གྱེས་ཤིང་དགེ་ལེགས་སུ་གྱུར་ཏོ༔ དེའི་ནུབ་མོ་ཐོ་རངས་ཀྱི་དུས་སུ་རྒྱལ་པོའི་བཙུན་མོ་གནང་ཆེན་མ་དཔའ་མོ་མཚོའི་ལུས་ལ་ལྷ་མོའི་ཐུགས་ཞུགས་ཏེ༔ ལྷ་མོའི་རིགས་ཡིན་པས་ལྷ་བཟའ་ལྷ་སྒྲོན་མ་ཡང་ཟེར་རོ༔ མིང་དྲང་པོ་ནི་དཔལ་མོ་མཚོ་ཟེར་རོ༔ དེ་ནས་རྒྱལ་པོ་དང་༔ བཙུན་མོ་དང་ནང་བློན་རྣམས་ལ་ཡོན་ཏན་གྱི་ལྟས་བསམ་གྱིས་མི་ཁྱབ་པ་མང་པོ་བྱུང་ངོ་༔ ཁྱད་པར་དུ་ཡང་བཙུན་མོ་ཉིད་ལ་ལུས་ཡང་བ་དང་༔ ནད་མེད་པ་དང་ཤེས་པ་གསལ་ཞིང་རྨི་ལམ་རྣོ་བ་དང་སྒྲིབ་པ་དག་པའི་རྟགས་ལ་སོགས་པའི་ཡོན་ཏན་མཐའ་ཡས་པ་རྣམས་ལུས་སེམས་ལ་མྱོང་བར་བྱུང་བས་ཡུམ་ཡང་ཐུགས་ཤིན་ཏུ་དགྱེས་པར་གྱུར་ཏེ༔ ལུས་སེམས་ལ་བདེ་བ་ཁྱད་པར་ཅན་རྒྱས་སོ༔ དེ་ནས་ཡུམ་གྱི་ལྷུམས་སུ་འཇའ་འོད་ཀྱི་གཞལ་ཡས་ཁང་དུ་ལྷ་མོའི་ཐུགས་ནི་མིའི་གཟུགས་སུ་སྤྲུལ་ཏེ་ཁམས་འཕེལ་ཞིང་༔ བསྐྱེད་རིམ་གྱི་ངང་དུ་བཞུགས་པ་ནི་ལྷ་ལས་བབས་ནས་མིའི་ལྷུམས་སུ་ཞུགས་པ་སྟེ་རྣམ་གྲངས་གསུམ་པའོ༔

རྣམ་གྲངས་བཞི་པ།

དེ་ནས་ཟླ་བ་བཅུ་རྫོགས་ནས་ཕག་ལོ་ཟླ་བ་དང་པོའི་ཚེས་བཅོ་ལྔའི་ནམ་ལངས་སྐྱ་སང་ངེ་བ་ལ་སྐར་མ་རྒྱལ་ལ་སྐུ་འཁྲུངས་སོ༔ དེའི་ཚེ་ན་ནམ་མཁའ་ནས་ལྷས་རྔ་བོ་ཆེ་བརྡུངས་བ་ལ་སོགས་པའི་ཡོན་ཏན་དང་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་ངོ་༔ དེ་ནས་བཙས་སྟོན་ཡང་རྒྱ་ཆེན་པོ་རྒྱ་གར་ཤར་ནུབ་ཏུ་གྲགས་ཆེ་བ་ཙམ་བྱས་སོ༔ རྒྱལ་བློན་འཁོར་འབངས་ཡུལ་མི་གཉེན་སྡེ་དང་བཅས་པ་ཐམས་ཅད་ཀྱིས་རྒྱལ་བུ་འདི་སྨོན་ལམ་གྱིས་གྲུབ་པའི་སྲས་ཡིན་པས༔ འདི་ལ་སྨོན་ལམ་གྲུབ་མཚན་དུ་གསོལ་དགོས་ཟེར་ནས༔ རྒྱལ་བུ་ལ་མཚན་དུ་སྨོན་ལམ་གྲུབ་གསོལ་ལོ༔ དེ་ནས་རྒྱལ་བུ་འཚོ་སྐྱོང་བ་རྣམས་དང་༔ སྲུང་འཁོར་བ་རྣམས་དང་མ་མ་རྣམས་ཀྱིས་རིམ་པར་བསྐྱངས་ཏེ༔ རྒྱལ་བུ་ནར་སོན་ནས་ལོ་གསུམ་ལོན་ནས་ཡི་གེའི་ཚོགས་ཐམས་ཅད་དང་༔ གཏོང་བ་དང་༔ ཚུལ་ཁྲིམས་དང་༔ མང་དུ་ཐོས་པ་དང་༔ དྲན་པ་དང་༔ ཤེས་རབ་དང་༔ བྱམས་པ་དང་༔ སྙིང་རྗེ་དང་དུལ་བའི་ངང་ཚུལ་གྱིས་ཡབ་ཡུམ་དང་འཁོར་འབངས་ཐམས་ཅན་ལ་སེམས་བརྩེ་བ་དང་༔ མོ་རྩིས་དང་༔ སྒྱུ་རྩལ་དང་༔ གཟའ་སྐར་དང་༔ ལྟས་བཟང་ངན་དང་༔ མི་དང་དུད་འགྲོའི་མཚན་རྟགས་དང་༔ བཟོ་རིག་དང་གསོ་བ་རིག་པ་ལ་སོགས་པའི་རིག་པའི་གནས་རྣམས་ལ་མཁས་ཤིང་ཡུལ་ཁམས་ཀུན་ལ་ཕན་ཐོགས་པ་དང་༔ བསོད་ནམས་ཕུན་སུམ་ཚོགས་པ་དང་༔ སྐྱེ་བོ་མང་པོའི་ཚོགས་ལ་ཡི་གེའི་ཚོགས་ཐམས་ཅད་ཀྱི་འབྲི་ཀློག་དང་གཞན་ཡང་རིག་པའི་ཚོགས་རྣམས་ཀྱང་བསླབ་པ་ལ་བརྩོན་ཞིང་ཕན་པ་དང་༔ བརྩེ་བའི་སེམས་ཀྱིས་འཁོར་སྡེའི་རིགས་ཐམས་ཅད་བསྐྱངས་བས་སྐྱེ་བོ་ཐམས་ཅད་ཀྱང་དགའ་མགུ་ཡི་རང་སྟེ༔ རྒྱལ་བུ་སྨོན་ལམ་དོན་གྲུབ་འདི་སངས་རྒྱས་ཀྱི་རྣམ་སྤྲུལ་ཞིག་ཡིན་པར་འདུག་ཟེར་སྐད་དོ༔

དེ་ནས་རྒྱལ་བུ་ལོ་བཅུ་ལོན་ནས་ཡབ་ཡུམ་གཉིས་ལ་འདི་སྐད་ཞུས་པས༔ ཀྱེ་རྒྱལ་པོ་ཡབ་ཡུམ་ལགས༔ ད་ནི་བདག་རབ་ཏུ་བྱུང་དགོས་ལགས་ཞེས་ཞུས་པས༔ རྒྱལ་པོ་ཡབ་ཡུམ་གྱིས་བཀའ་གནང་ནས་པཎྜི་ཏ་སི་ཏི་བྷ་ཏྲའི་དྲུང་དུ་རབ་ཏུ་བྱུང་བས་མཚན་དུ་དོན་གྲུབ་བཟང་པོ་བཏགས་སོ༔ བླ་མའི་དྲུང་དུ་ལོ་གསུམ་བསྡད་ནས་སྒྲ་ཚད་མ་དང་༔ ཕར་ཕྱིན་དང་༔ འདུལ་བ་དང་༔ མདོ་སྡེ་དང་མངོན་པའི་སྡེ་སྣོད་རྣམས་ལ་མཁས་པར་བསླབ་པས་བླ་མ་བས་ཀྱང་ལྷག་པར་མཁས་པར་བྱུང་ནས༔ བླ་མས་ཀྱང་རིག་ལྡན་ཞིག་ཡིན་པར་དགོངས་ནས་རྒྱུད་སྡེ་བཞི་ལ་བསླབ་པས༔ རྒྱུད་སྡེ་བཞི་ལ་ཡང་ཁྱད་པར་དུ་མཁས་པ་བྱུང་ཞིང་བླ་མའི་དྲུང་དུ་སྡེ་སྣོད་གསུམ་ལ་གསེ་གཤག་ལེགས་པར་བྱས༔ རྒྱུད་སྡེ་བཞི་ལ་དབྱེ་བསལ་མང་དུ་བྱས་ཤིང་༔ ཁྱད་པར་དུ་ཡང་ཐུགས་ལས་འཁྲུངས་པའི་རྟོགས་པ་རྣམས་ཕུལ་བས་བླ་མ་ཤིན་ཏུ་མཉེས་པས་དོན་གྲུབ་བཟང་པོ་ཁྱོད་ཀྱི་བླ་མ་ད་ངས་མི་ནུས་པར་འདུག༔ ཁྱོད་རང་འདི་ནས་བྱང་ཕྱོགས་ཟངས་གླིང་ཞེས་བྱ་བ་ན་གྷུ་རུ་རཏྣ་བྱ་བ་འཁོར་ལོ་བདེ་མཆོག་གི་གྲུབ་ཐོབ་ཆེན་པོ་ཡེ་ཤེས་ཀྱི་ཞལ་མངོན་སུམ་དུ་སྤྲུལ་ནུས་པ༔ སྡེ་སྣོད་མ་ལུས་པ་ཐུགས་སུ་ཆུད་ཅིང་ཡོན་ཏན་ཐམས་ཅད་ཀྱི་རྒྱན་དང་ལྡན་པ་ཞིག་བཞུགས་ནས་ཡོད༔ ཁྱོད་དེའི་དྲུང་དུ་སོང་ལ་ཆོས་ཐམས་ཅད་ཀྱི་སྒྲོ་འདོགས་ལེགས་པོར་ཆོད༔ ཁྱད་པར་དུ་ཡང་གསང་སྔགས་བླ་ན་མེད་པ་ཉམས་སུ་ལོངས་ལ་གྲུབ་པ་བརྙེས་པ་གྱིས་དང་༔ ཁྱོད་སེམས་ཅན་མང་པོ་ལ་ཕན་ཐོགས་པ་ཞིག་འདུག་གོ་གསུངས༔

དེ་ནས་དགུང་ལོ་བཅུ་གསུམ་གྱི་དུས་སུ་ཡབ་ཡུམ་གཉིས་ཀ་འདས་པས༔ དེ་ནས་མ་ཧེ་བཞོན་མ་ལྔ་བརྒྱ་དང་ལྔ་སྟོང་༔ མི་བཞོ་བ་ལྔ་སྟོང་དང་ལྔ་བརྒྱ༔ གཞན་མ་ལྔ་སྟོང་དང་ལྔ་བརྒྱ༔ གླང་པོ་ཆེ་ལྔ་སྟོང་དང་ལྔ་བརྒྱ༔ བ་ལང་ལྔ་སྟོང་དང་ལྔ་བརྒྱ༔ རྟ་མཆོག་ལྔ་སྟོང་དང་ལྔ་བརྒྱ༔ བང་འགྲོས་ལྔ་སྟོང་དང་ལྔ་བརྒྱ༔ གཞན་གྱི་བང་མཛོད་དང་ནོར་རྫས་ལ་སོགས་པ་རྣམས་གཅིག་ཀྱང་མ་ལུས་པ་ཡབ་ཡུམ་གཉིས་ཀྱིས་གཤེགས་རྫོངས་བྱས་སོ༔ བཙུན་མོ་རྣམས་དང་༔ བློན་པོ་རྣམས་དང་༔ ཡུལ་མི་འཁོར་འབངས་གཉེན་སྡེ་དང་བཅས་པ་རྣམས་ཀྱི་སོ་སོར་གང་འདོད་པའི་དགའ་བས་ཚིམ་པར་བྱས་སོ༔ ཕོ་བྲང་རྒྱལ་ས་སྡེ་འཁོར་དང་བཅས་པ་ཕ་སྤུན་འདོད་པ་ཆེ་བ་ཞིག་ལ་གཏད་ནས་ཐམས་ཅད་ཡི་རང་བར་བྱས་སོ༔

དེ་ནས་ཅི་ཡང་མེད་པར་བྱས་ནས་དོན་གྲུབ་བཟང་པོ་བྱང་ཕྱོགས་ཟངས་གླིང་ལ་དངོས་སུ་བྱོན་ནས༔ གྷུ་རུ་རཏྣ་ཞེས་བྱ་བའི་དྲུང་དུ་ཕྱིན་པས་བླ་མས་སྣོད་ལྡན་དུ་གཟིགས་ནས་ཡི་དམ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ནམ་མཁའ་ལ་མངོན་སུམ་དུ་སྤྲུལ་ཏེ་དབང་བཞི་ཡོངས་སུ་རྫོགས་པར་བསྐུར༔ ཡི་དམ་འཁོར་ལོ་བདེ་མཆོག་གི་དངོས་གྲུབ་ཐོབ༔ སངས་རྒྱས་ཀྱི་ཞིང་ཁམས་ཐམས་ཅད་བགྲོད་པ་ལ་ཐོགས་པ་མེད་པར་བྱུང་ནས་ལོ་གསུམ་བླ་མའི་དྲུང་དུ་བསྡད༔ མདོ་རྒྱུད་ཀྱི་ཆོས་ཐམས་ཅད་ལ་སྒྲོ་འདོགས་ལེགས་པར་ཆོད་པ་བྱས༔ ཁྱད་པར་དུ་གསང་སྔགས་བླ་ན་མེད་པའི་བསྐྱེད་རྫོགས་ལ་མཁས་ཤིང་གྲུབ་པ་བརྙེས་ཏེ༔ བླ་མའི་ཞལ་ནས་དོན་གྲུབ་བཟང་པོ་ཁྱོད་རྡོ་རྗེ་གདན་གྱི་བྱང་ཕྱོགས་ཀྱི་གླིང་དུ་སོང་དང་མུ་སྟེགས་པ་ཐམས་ཅད་འདུལ་དགོས་པ་ཡོད༔ ཁྱོད་མིན་པ་དེང་སང་རྒྱ་གར་ཤར་ནུབ་ཏུ་མུ་སྟེགས་པ་ལ་རྩོད་ནུས་པ་གཞན་སུ་ཡང་མི་འདུག་ཅེས་གསུངས༔ ལག་པ་བཞིན་དུ་དགེ་སྡིག་རྩ་བ་ཡིན་ཞེས་སོ༔ དེ་ནས་ཡོན་ཏན་ཐམས་ཅད་ཀྱི་གཞི་མ་དད་པ་ཡིན༔ དད་པ་ཡོད་ན་དཀར་པོའི་ཆོས་རྣམས་ཡོད༔ དད་པ་མེད་ན་དཀར་པོའི་ཆོས་རྣམས་མེད༔ དད་པ་འཕེལ་ན་དཀར་པོའི་ཆོས་རྣམས་འཕེལ༔ དད་པ་འགྲིབ་ན་དཀར་པོའི་ཆོས་རྣམས་འགྲིབ༔ དེས་ན་ཆོས་ཐམས་ཅད་ཀྱི་རྩ་བ་དད་པ་ལ་རག་ལས་སོ༔

དེ་ཡང་དད་པ་སྐྱེ་བའི་རྒྱུ་བཞི་ཡོད་དེ༔ དགེ་བའི་བཤེས་གཉེན་བསྟེན་པ་དང་གཅིག༔ གྲོགས་དད་པ་ཅན་དང་འགྲོགས་པ་དང་གཉིས༔ འཆི་བ་མི་རྟག་ལས་རྒྱུ་འབྲས་འཁོར་བའི་ཉེས་དམིགས་བསམ་པ་དང་གསུམ༔ མདོ་སྡེའི་ཆོས་ལ་ལྟ་བ་དང་བཞིའོ༔ དེ་ལ་དགེ་བའི་བཤེས་གཉེན་དོན་གྲུབ་བཟང་པོ་དགུང་ལོ་བཅུ་དྲུག་གི་དུས་སུ་རྡོ་རྗེ་གདན་གྱི་བྱང་ཕྱོགས་ངོས་སུ་བྱོན་ཏེ༔ པཎྜི་ཏ་ནང་པའི་སྡེ་ཚན་ལ་ལྔ་སྟོང་དང་ལྔ་བརྒྱ་ཙམ་འདུས་ནས་འདུག་པ་ལ་གཡས་གྲལ་བྱས་ནས་བསྡད༔ ཕྱི་པ་མུ་སྟེགས་པ་ལ་འབུམ་ཕྲག་ལྔ་དང་སྟོང་ཕྲག་ལྔ་བས་ལྷག་ཙམ་ཞིག་འདུག་པ་ལ་གཡོན་གྲལ་བྱས་སོ༔ དེ་ནས་ཟླ་བ་གཅིག་གི་རིང་ལ་རྩོད་པ་བྱས་པས༔ དོན་གྲུབ་བཟང་པོ་ལ་མུ་སྟེགས་པ་རྣམས་ཀྱིས་ཚིག་གཅིག་གིས་ཀྱང་རྒོལ་མ་ནུས་ནས་གླགས་མ་རྙེད་པས༔ མུ་སྟེགས་པ་ཐམས་ཅད་ཕམ་ནས་འབུམ་ཕྲག་ལྔ་པོ་དེ་ནང་པ་སངས་རྒྱས་པའི་སྡེ་ལ་ཚུད༔ དེ་རྗེས་ལྷག་མ་རྣམས་ཕྱིར་ལོག་སྟེ་སེམས་འགྱོད་པ་དང་བཅས་ས་མཐར་འཁྱམ་པར་སོང་ངོ་༔

མུ་སྟེགས་གཟི་ལྡན་ནག་པོ་ཞེས་བྱ་བ་མཐུ་ནུས་པ་དང་ལྡན་པ་རྫུ་འཕྲུལ་མཐའ་ཡས་པ་ཐོགས་པ་ཞིག་འདུག་པ་དེ་མ་ཐུལ་ནས་རྫུ་འཕྲུལ་གྱིས་ནམ་མཁའ་ལ་འཕུར་ཏེ་རི་རབ་ཀྱི་ཁོང་གསེང་ན་ཞུགས་ནས་པཎྜི་ཏ་དོན་གྲུབ་བཟང་པོའི་ཕྱིས་འབྱུང་བོད་དུ་འགྲོ་དོན་བྱེད་པའི་དུས་སུ་བསྟན་པ་ལ་གནོད་པར་དམ་བཅས་ཏེ་མཐུ་དང་ནུས་པས་དམོད་པ་བོར་བར་བྱས་སོ༔ དེ་ནས་ནང་པ་སངས་རྒྱས་པའི་བསྟན་པ་རྣམས་རྒྱས་པར་བྱས་ཏེ༔ རང་རང་གི་དགོན་གནས་རྣམས་སུ་སོང་ངོ་༔ པཎྜི་ཏ་དོན་གྲུབ་བཟང་པོ་ཡང་རྡོ་རྗེ་གདན་གྱི་གཙུག་ལག་ཁང་དུ་ལོ་བཞིར་བཞུགས་ནས་ཐུགས་དམ་སྐྱོང་བར་མཛད༔

དེ་ནས་དགུང་ལོ་ཉི་ཤུ་ལོན་ནས་རྟ་ལོ་ཟླ་དང་པོའི་ཚེས་བརྒྱད་ཀྱི་ནམ་ཐོ་རངས་ཁ་ལ་རྗེ་བཙུན་སྒྲོལ་མ་གཙོ་འཁོར་ཉི་ཤུ་རྩ་གཅིག་ནམ་མཁའ་ནས་བྱོན་ཏེ་པཎྜི་ཏ་དོན་གྲུབ་བཟང་པོ་སྒྲུབ་པ་མྱུར་དུ་གྱིས་དང་བོད་དུ་འགྲོ་དོན་ལ་མྱུར་དུ་འགྲོ་དགོས་པ་ཡོད་ཅེས་གསུངས་ནས་ལུང་བསྟན་པ་དང་༔ དོན་གྲུབ་བཟང་པོའི་ད་ནི་གནས་འགྲིམ་ཞིག་བྱེད་དགོས་དགོངས་ནས་བྱང་ཕྱོགས་ངོས་སུ་བྱོན་པས་རྡོ་རྗེ་གདན་གྱི་བྱང་ཕྱོགས་སུ་དུར་ཁྲོད་ཆེན་པོ་རོ་ལང་ཞེས་བྱ་བ་ཞིག་ཡོད་དེ༔ དེ་ན་ནི་སྟག་དང་༔ གཟིག་དང་༔ དོམ་དང་༔ དྲེད་དང་འཕར་བ་དང་༔ སྤྱང་ཀི་དང་༔ ལྕེ་སྤྱང་དང་༔ ཝ་དང་༔ རྦད་དང་༔ ཁྱི་དང་༔ གསའ་དང་༔ གསའ་རང་དང་༔ གུང་དང་༔ གཡུ་དང་༔ སྲེ་མོང་དང་༔ བྱ་རྒོད་དང་༔ འུག་པ་དང་༔ ཀང་ཀ་དང་༔ ཕོ་རོག་དང་༔ ཁྭ་ཏ་དང་༔ འུར་ཝ་དང་༔ ཤ་ཟ་དང་༔ མ་མོ་དང་༔ གཤིན་རྗེ་དང་༔ སྲིན་པོ་དང་༔ འབྱུང་པོ་དང་༔ ཕྲ་མེན་དང་༔ ཡི་དྭགས་དང་༔ དྲང་སྲོང་དང་༔ མཁའ་འགྲོ་དང་༔ ཤུགས་འགྲོ་དང་༔ ཞིང་སྐྱོང་དང་༔ མེ་སྒྲ་དང་༔ ཆུ་སྒྲ་དང་༔ རླུང་སྒྲ་ལ་སོགས་པ་རྣམས་ཀྱིས་ཧ་ཧ་དང་༔ ཧོ་ཧོ་དང་༔ ཧི་ཧི་དང་༔ སོད་སོད་དང་༔ རྒྱོབ་རྒྱོབ་དང་༔ ཟོ་ཟོ་དང་ཨ་ར་ལི་ཧོ༔ ཧ་ཧཱུཾ་ཕཊ༔ ཅེས་པའི་སྒྲ་མི་མཐུན་པ་སྣ་ཚོགས་པ་སྒྲོགས་ཤིང་༔ འཇིགས་ཤིང་ཡ་ང་བའི་དུར་ཁྲོད་ཆེན་པོ་དེར་བྱོན་ནས་ཉལ་ནས་བསྡད་པས་དེ་ཡི་ནུབ་མོ་ནམ་སྲོད་འཁོར་ཙམ་དུ་དུར་ཁྲོད་དེར་གནས་པའི་མཁའ་འགྲོ་མ་རུས་པའི་རྒྱན་དྲུག་དང་༔ གྲི་གུག་དང་ཐོད་ཁྲག་ཁ་ཊྭཱཾ་ཐོགས་པ་གཅིག་བྱུང་ནས༔ པཎྜི་ཏ་དོན་གྲུབ་བཟང་པོ་ཁྱོད་ང་ཡི་དུར་ཁྲོད་འདི་མིན་པ་ལ་ཉལ་ས་མ་རྙེད་པ་ཨེ་ཡིན༔ ཁྱོད་ངའི་དུར་ཁྲོད་འདིར་མ་འདུག་ངས་ཁྱོད་ཀྱི་མགོ་གཅོད༔ སྙིང་ཕྱུང་༔ ཡན་ལག་འབྲེག༔ མགོ་སྙིང་ཟ༔ ཀླད་པ་ལྡག་པ་ཡིན་ཟེར་ནས་ཆོ་འཕྲུལ་མི་འདྲ་བ་ཡ་མ་ཟུང་མང་པོ་བསྟན་པས༔ དོན་གྲུབ་བཟང་པོས་ཏིང་ངེ་འཛིན་གྱི་གཟིར་བས་མཁའ་འགྲོ་མའི་མ་བཟོད་ནས་སྲོག་སྙིང་ཕུལ་ཏེ་དམ་བཅས་སོ༔ དེའི་ཐོ་རངས་ཁར་ཡུམ་ཆེན་མོ་བདག་མེད་མ་ལྷ་མོ་བཅོ་ལྔ་བྱོན་ནས་བྱུང་སྟེ༔ རྣལ་འབྱོར་པ་ཁྱོད་པོ་ཏ་རིར་སོང་ལ་སྒྲུབ་པ་མྱུར་དུ་གྱིས་དང་༔ ཁྱོད་བོད་དུ་འགྲོ་དོན་ལ་འགྲོ་དགོས་པ་ཡོད་གསུངས་ནས༔ འཇའ་བཞིན་དུ་ཡལ་ནས་ཐལ་ལོ༔

དེ་ནས་དོན་གྲུབ་བཟང་པོའི་ཐུགས་དགོངས་ལ༔ ང་ལང་ཚོ་ཆུང་བས་སྒྲུབ་པ་མཐར་ཕྱིན་པ་ཞིག་བྱེད་དགོས་དགོངས་ཏེ་སྒྲུབ་པ་ལྷ་གང་ལ་བྱེད་ནས་མཐར་ཕྱིན་པ་འོང་ངམ་བསམས་ནས་ཐུགས་དགོངས་བཏང་བས༔ ད་བོད་དམུ་རྒོད་པས་འདུལ་བ་ཡང་དཀའ་བས་ལྷ་གང་གི་སྒོ་ནས་འདུལ་དགོས་པ་ཡང་མི་ཤེས་སྙམ་ཙ་ན༔ ནམ་པན་པུན་དུས་སུ་མ་ཧ་མ་ཡ་ལྷ་ལྔ་བྱོན་ནས་བྱུང་སྟེ༔ རྣལ་འབྱོར་པ་ཁྱོད་པོ་ཏ་རིའི་བྲག་ཕུག་བྷ་ཏྲ་ཡ་ནར་སོང་ལ༔ ཐུགས་སྒྲུབ་ནག་མོ་ལྷ་ལྔའི་སྒྲུབ་པ་གྱིས་དང་༔ མྱུར་དུ་བོད་དུ་འགྲོ་དོན་ལ་འགྲོ་དགོས་པ་ཡོད་པས་བརྩོན་འགྲུས་མྱུར་དུ་སྐྱེད་ཅིག་གསུངས་ནས་འོད་དུ་ཡལ་ནས་ཐལ་ལོ༔

དེ་ནས་ནམ་ལངས་ཙ་ན་དུར་ཁྲོད་ཀྱི་བདག་མོ་མཁའ་འགྲོ་མ་དེས༔ ངས་ཁྱོད་ཀྱི་ལམ་མཁན་བྱེད་དོ༔ པོ་ཏ་རིར་ད་འགྲོ་ཞིག་ཟེར་ནས༔ དུར་ཁྲོད་ཀྱི་མཁའ་འགྲོ་མ་དེ་དང་འགྲོགས་ནས༔ རྐང་མགྱོགས་ཀྱི་དངོས་གྲུབ་ཐོབ་ནས་སོང་བས་སྐད་ཅིག་ཉིད་ལ་ཐོགས་པ་མེད་པར་པོ་ཏ་རིའི་བྲག་ཕུག་བྷ་ཏྲ་ཡའི་ནང་དུ་ཕྱིན་པས༔ དེར་བཞུགས་ནས་རྗེ་བཙུན་མ་ཕག་མོ་ལྷ་ལྔའི་སྒྲུབ་པ་མཛད་པས་ཞག་བཅུ་བཞི་ནས་ཐུན་མོང་གི་དངོས་གྲུབ་ཐོབ༔ ཟླ་བ་གཅིག་ནས་ཐུགས་སྒྲུབ་ལྷ་ལྔའི་ཞལ་གཟིགས་ཏེ་ཡེ་ཤེས་གསང་བའི་དཀྱིལ་འཁོར་དུ་དབང་བཞི་ཡོངས་སུ་རྫོགས་པར་བསྐུར་ནས༔ བོད་དུ་འགྲོ་བ་འདུལ་བ་ལ་འགྲོ་དགོས་པ་ལ་སོགས་པའི་ལུང་བསྟན་མང་དུ་མཛད་ནས་འོད་དུ་ཞུ་ནས་རང་གི་སྙིང་ཁར་ཐིམ་པའི་ཚུལ་མཛད་དོ༔ དེ་ནས་ཟླ་བ་གཅིག་ནས་རྗེ་བཙུན་མ་སྒྲོལ་མ་བྱོན་ནས༔ སྒྲུབ་པ་མྱུར་དུ་གྱིས་དང་བོད་དུ་འགྲོ་དོན་ལ་འགྲོ་དགོས་པ་ཡོད་གསུངས་ནས༔ ལུང་བསྟན་མང་དུ་མཛད་ནས་རང་གི་སྙིང་ཁར་ཐིམ་ནས་བྱུང་ངོ་༔

དེ་ནས་ཡར་ངོའི་ཚེས་གསུམ་ལ་མགོན་པོ་ཚེ་དཔག་མེད་ལྷ་དགུ་བྱོན་ནས་ལུང་བསྟན་པ་དང་༔ རྗེས་སུ་གནང་བ་དང་བྱིན་གྱིས་རླབས་པ་མང་པོ་མཛད་ནས་རང་གི་སྙིང་ཁར་ཐིམ་ནས་བྱུང་ངོ་༔ ཚེས་བརྒྱད་ལ་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་རྣམས་བྱོན་ནས༔ ལུང་བསྟན་མང་དུ་མཛད་ནས་རྗེས་སུ་གནང་བ་དང་༔ བྱིན་གྱིས་བརླབས་པར་མཛད་ནས་སྙིང་ཁར་ཐིམ་ནས་བྱུང་ངོ་༔ ཚེས་བཅུ་ལ་པདྨ་བཛྲ་མཁའ་འགྲོ་མ་ཡི་ཚོགས་དང་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་བྱོན་ནས་ཆོས་ཀྱི་དྲི་བ་མང་དུ་མཛད་པ་ལ་མ་ཤེས་པ་ནི་གཅིག་ཀྱང་མ་བྱུང་ཞིང་༔ པདྨ་བཛྲ་གྱིས་རྟ་ཕག་གསང་བའི་དཀྱིལ་འཁོར་ཞལ་ཕྱེས་ནས་དབང་བཞི་ཡོངས་སུ་རྫོགས་པར་བསྐུར་ཏེ་ལུང་བསྟན་མང་དུ་བོད་དུ་མཛད་ནས་སྙིང་ཁར་ཐིམ་ནས་བྱུང་ངོ་༔

པདྨ་བཛྲ་གྱི་འཁོར་མཁའ་འགྲོ་མ་རྣམས་ཀྱིས་མཆོད་པ་ཕུལ་ཞིང་༔ བོད་དུ་འགྲོ་བ་འདུལ་བ་ལ་འགྲོ་དགོས་པར་གསོལ་བ་བཏབ་ནས་སྙིང་ཁར་ཐིམ་ནས་བྱུང་ངོ་༔ ཚེས་བཅུ་བཞིའི་ནམ་སྲོད་འཁོར་ཙམ་དུ་དཔལ་གསང་བ་འདུས་པའི་ཞལ་ནམ་མཁར་བྱོན་ནས་དབང་བསྐུར་བ་དང་ལུང་བསྟན་པར་མཛད་ནས་སྙིང་ཁར་ཐིམ་ནས་བྱུང་ངོ་༔ ནམ་ཕྱེད་ནས་དགྱེས་རྡོར་སྤྲུལ་པའི་ལྷ་དགུ་བྱོན་ནས༔ དབང་བསྐུར་བ་དང་རྗེས་སུ་གནང་བ་མང་དུ་མཛད་ནས་སྙིང་ཁར་ཐིམ་ནས་བྱུང་ངོ་༔ ནམ་ཕྱེད་ཡོལ་ནས་ཡི་དམ་འཁོར་ལོ་བདེ་མཆོག་གི་ལྷ་ཚོགས་རྣམས་བྱོན་ནས་དབང་བསྐུར་བ་དང་ལུང་བསྟན་པ་མང་དུ་མཛད་ནས་སྙིང་ཁར་ཐིམ་ནས་བྱུང་ངོ་༔ ནམ་ཐོ་རངས་ཁ་ལ་ཡི་དམ་རྡོ་རྗེ་འཇིགས་བྱེད་ཀྱི་དཀྱིལ་འཁོར་ལྷ་ཚོགས་རྣམས་བྱོན་ནས་དབང་བསྐུར་བ་དང་ལུང་བསྟན་ཐམས་ཅད་བོད་དུ་མཛད་ནས་སྙིང་ཁར་ཐིམ་ནས་བྱུང་ངོ་༔

ནམ་ལངས་སྔ་མ་ལ་མགོན་པོ་ཕྱག་དྲུག་པ་དང་རིགས་གསུམ་མགོན་པོ་རྣམས་བྱོན་ནས་རྗེས་སུ་གནང་བ་དང་ལུང་བསྟན་བོད་དུ་མཛད་ནས་སྙིང་ཁར་ཐིམ་ནས་བྱུང་ངོ་༔ ཉི་མ་རྩེ་ཤར་ཙམ་ན༔ བདེ་གཤེགས་འདུས་པ་སྒྲུབ་པ་བཀའ་བརྒྱད་ཀྱི་ལྷ་ཚོགས་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ནམ་མཁར་མངོན་སུམ་དུ་བྱོན་ནས་དབང་བསྐུར་བ་དང་༔ ལུང་བསྟན་པ་དང་རྗེས་སུ་གནང་བ་བོད་དུ་མཛད་ནས་རང་གི་སྙིང་ཁར་ཐིམ་ནས་བྱུང་ངོ་༔ དེ་ནས་མཁའ་འགྲོ་མ་རྣམས་ཀྱིས་བོད་དུ་འགྲོ་བ་འདུལ་བ་ལ༔ མྱུར་དུ་འགྲོ་དགོས་པར་རིམ་པ་བཞིན་དུ་བསྐུལ་ནས་བྱུང་ངོ་༔

ཚེས་བཅོ་ལྔ་ནས་ཐོ་རངས་ཁ་སྔ་མ་ལ་མཁའ་འགྲོ་མ་མཐིང་ནག་རུས་པའི་རྒྱན་དྲུག་ཐོགས་པ་ཁ་ཊྭཱཾ་ག་དང་གྲི་གུག་ཕྱར་བ་སྤྱི་བོར་ཕག་ཞལ་རལ་པའི་དབུས་སུ་ཐོན་པ་ཤིན་ཏུ་ཁྲོས་པའི་གཟུགས་ཅན་ཞིག་གིས་ཁ་ཊྭཱཾ་ག་སིལ་དི་རེ་བྱུང་ནས་རྣལ་འབྱོར་པ་ཁྱོད་ཀྱིས་བོད་དམུ་རྒོད་འདུལ་བ་ལ་འགྲོ་བའི་ཐུགས་བསྐྱེད་ཅིག་ངས་ཁྱོད་གསོད་པ་ཡིན་ནོ༔ རྣམ་ཤེས་ངའི་ཐུགས་ཀར་སྟིམས་ཤིག་ཅེས་གསུངས་ནས་ཁ་ཊྭཱཾ་གས་སྤྱི་བོར་བརྒྱབ་ནས་གྲི་གུག་གིས་སྙིང་ཁར་བརྡེགས་ནས་གསོད་པའི་ཚུལ་མཛད་པ་དང་དོན་གྲུབ་བཟང་པོའི་ཐུགས་ནི་མཁའ་འགྲོའི་ཐུགས་ཀར་བསྟིམས་ནས་དགུང་ལོ་ཉི་ཤུའི་དུས་ཀྱི་གདུང་ཡིན་པས་མི་ཉམས་པར་བྱིན་གྱིས་བརླབས་ཏེ༔ སྐུ་གཟི་བརྗིད་དང་ལྡན་པ་འདོམ་གང་ཙམ་དུ་འཇའ་འོད་ཀྱི་ནང་དུ་བཞུགས་སོ༔ ཐུགས་ནི་མཁའ་འགྲོ་མ་ལ་བསྟིམས་ཏེ་མཁའ་འགྲོ་མས་ལམ་མཁན་བྱས་ནས་ཐོགས་པ་མེད་པར་བོད་ཀྱི་ཡུལ་ཕྱི་དབྱེའི་གང་བར་དུ་སླེབས་ཏེ༔ རྟ་ལོ་ཟླ་བ་ལྔ་པའི་ཚེས་བཅོ་ལྔའི་ཐོ་རངས་ཁ་ལ་ཡུམ་གྱི་ལྷུམས་སུ་ཞུགས་སོ༔ དེའི་ཡུལ་དང་ཡབ་ཡུམ་ནི་ཡུལ་ལབ་ཕྱི་དབྱེའི་གང་བར་ངམ་ཤོད་བྱ་བའི་སྨད་དུ་གྲོང་ཁྱེར་མཚོ་མེར་བྱ་བའི་ཡུལ་ཆེན་པོ་ཞིག་ཡོད་དོ༔ ཡུལ་དེའི་རྗེ་བོ་ནི༔ མི་ཚན་ནི་འབྲོག་མི་ཡིན་པས་འབྲོག་མི་ཡང་ཟེར༔ དཔོན་པོ་ཡང་ཟེར༔ གཙོ་བོ་ཡང་ཟེར༔ ཁེར་གད་ཡང་ཟེར༔ ཇོ་བོ་ཡང་ཟེར༔ མཚན་དྲང་པོ་ནི་ཆོས་ཀྱི་རྒྱལ་པོ་ཟླ་བ་རྒྱན་ཟེར་ཏེ་དེ་ནི་ཡབ་ཡིན་ནོ༔ ཡུམ་གྱི་མཚན་ནི་ཕྱུག་ཚང་གི་བུ་མོ་འབུམ་ལྕམ་མ་བྱ་བ་ཡིན་ཏེ༔ ཕྱུག་ཚང་བཟའ་འབུམ་ལྕམ་མ་ཟེར་རོ༔

ཡབ་ཡུམ་དེ་གཉིས་ནི་རིགས་མཐོ་ཞིང་གཟུགས་ལེགས་པ་འབྱོར་པ་ཆེ་བ་ངང་ཚུལ་དལ་ཞིང་མི་སྡེ་འཁོར་འབངས་ལ་ཤིན་ཏུ་བྱམས་པ་ཅི་བྱེད་ཐམས་ཅད་ཆོས་དང་མཐུན་པར་སྤྱོད་ཅིང་༔ ཡོ་བྱད་ཐམས་ཅད་ཆོས་ལ་གཏོང་ཞིང་དཀོན་མཆོག་གསུམ་ལ་ལྷག་པར་དད་ཅིང་དགེ་འདུན་གྱི་ཞབས་ཏོག་ལ་རེམ་པ༔ རང་གིས་ཀྱང་ཆོས་ལ་སྤྱོད་ཅིང་ལུས་ངག་ཡིད་གསུམ་ཆོས་ལ་བསྐུལ་ནུས་པ་གཞན་ལ་ཡང་དེ་བཞིན་དུ་སློབ་ནུས་པའི་བྱང་ཆུབ་སེམས་དཔའི་རིགས་བཟང་ཤོས་ཀྱི་ཇོ་བོ་དང་ཇོ་མོ་གཉིས་ཡིན་པས་གྲོང་ཁྱེར་ཡང་ལྔ་བརྒྱ་ཙམ་ལ་དབང་བསྒྱུར་བ་ཡོད་དོ༔ དོན་གྲུབ་བཟང་པོའི་ཐུགས་ནི་ཡབ་ཡུམ་དེའི་ལྷུམས་སུ་ཞུགས་པའི་ཚེ༔ རྟ་ལོ་ཟླ་བ་ལྔ་པའི་ཚེས་བཅོ་ལྔའི་ནམ་ཐོ་རངས་ཁའི་དུས་སུ་ཡུམ་གྱི་རྨི་ལམ་དུ་མཁའ་འགྲོ་མ་ཡིན་ཟེར་བའི་བུ་མོ་དཀར་མོ་བཞིས་བུམ་པ་དཀར་པོ་བཞི་བཟུང་བ་བྱུང་ནས་ཡུམ་གྱི་ལུས་མགོ་མཇུག་ཐམས་ཅད་བཀྲུས་པས་ངང་སངས་ཀྱི་ཐལ་བ་རྨིས་སོ༔ ཡང་མཁའ་འགྲོ་མ་དཀར་མོ་དང་༔ སེར་མོ་དང་༔ དམར་མོ་དང་༔ ལྗང་མོ་དང་བདུན་བདུན་རེ་མང་པོས་ཡུམ་ལ་མེ་ཏོག་གཏོར་ཞིང་མཆོད་པ་དང་བསྟོད་ནས་ངེད་ཀྱི་ཡུམ་མ་མ་བཞུགས་པར་ཞུ་ཟེར་བ་རྨིས་སོ༔

ཡང་མཁའ་འགྲོ་མ་མཐིང་ནག་ཤིན་ཏུ་ཁྲོས་པའི་ཆ་བྱད་ཅན་རུས་པའི་རྒྱན་དྲུག་གིས་བརྒྱན་ཅིང་གྲི་གུག་དང་ཐོད་ཁྲག་ཁ་ཊྭཱཾ་འཕྱར་བ་གཅིག་ལ་འཁོར་མཁའ་འགྲོ་མ་སྔོན་མོ་ནམ་མཁའི་མདོག་འདྲ་བ་སྤྱི་བོར་ཕག་ཞལ་རལ་པའི་དབུས་སུ་ཐོན་པ་གྲི་གུག་དང་༔ ཐོད་ཁྲག་ཁ་ཊྭཱཾ་བསྣམས་པའི་མཁའ་འགྲོ་མ་བཞིས་བསྐོར་བའི་གཙོ་འཁོར་ལྔ་བྱུང་ནས་མཁའ་འགྲོ་མ་བཞི་པོ་དེ་སྔོན་རྒྱབ་གཡས་གཡོན་དུ་ལངས་ཏེ་འཇིགས་ཚུལ་བསྟན་ནས་བྱུང་ངོ་༔ དེ་ནས་དབུས་ཀྱི་མཁའ་འགྲོ་མ་གཙོ་མོ་མཐིང་ནག་དེ་ཁྲུ་གང་གི་ནམ་མཁའ་ལ་བཞེངས་ནས་གྲི་གུག་གིས་ཡུམ་གྱི་བྲང་གི་དཀྱིལ་དུ་གཤག་སྟེ༔ གཤགས་ནས་ཁྱོད་ཀྱི་མ་རིག་པའི་མུན་སྙིང་དེ་དྲངས་ནས་ངེད་རྣམས་ཀྱིས་ཟའོ་ཟེར་ནས་༔ གྲི་གུག་གིས་བྲང་དམར་ཕྱ་ལེ་ཕྱེས་ནས་སྙིང་དེ་ཁྲག་དམར་ཙ་ར་ར་འཛག་པ་དྲངས་ནས་མདུན་གྱི་མཁའ་འགྲོ་མ་གཙོ་མོ་དེའི་ཐོད་པར་བཅུག་སྟེ༔ གྲི་གུག་གིས་གཏུབས་ནས་གཙོ་མོ་ཐམས་ཅད་ཀྱིས་གསོལ་ནས་ཐལ༔ གཙོ་མོ་དེའི་ཕྱག་ཏུ་དུང་དཀར་གཡས་སུ་འཁྱིལ་བ་ཞིག་བསྣམས་ནས་འདུག་པ་དེ་འབུད་དོ༔ སྟོང་གསུམ་འཛམ་བུའི་གླིང་དུ་ཐོས་པ་ཙམ་དུ་གྲགས་པར་འདུག་གོ༔ དུང་དཀར་དེའི་ལྟེ་བ་ན་ཨ་དཀར་པོ་འོད་ཟེར་ལྔ་འབར་བ་ཞིག་འདུག་པ་དེ་འདི་ཁྱོད་ཀྱི་སྙིང་གི་ཚབ་ཏུ་བཏང་ངོ་ཟེར་ནས་སྙིང་གི་མལ་དུ་སྦས་ནས་བྱུང་ངོ་༔ གཙོ་མོའི་ཐུགས་ཀ་ནས་འོད་ཟེར་ཁ་དོག་ལྔ་བྱུང་ནས་ངའི་སྤྱི་བོར་ཐིམ༔ སྤྱི་བོ་ནས་སྙིང་གར་བྱུང་ངོ་༔ མཁའ་འགྲོ་མ་སྔོན་མོ་བཞིའི་འོད་ཀྱིས་ངའི་ལུས་ཐམས་ཅད་ཁྱབ་པར་བྱུང་ངོ་༔

དེ་ནས་མཁའ་འགྲོ་མ་སྔོན་མོ་བཞི་ནི་འོད་དུ་ཞུ་ནས་ནག་མོ་ལ་ཐིམ་ནས་ཐལ༔ གཙོ་མོ་ནག་མོ་ཉིད་ཀྱང་ནམ་མཁའ་འོད་ཀྱིས་གང་བའི་གསེབ་ཏུ་ཐིམ་ནས་ཐལ༔ དེ་རྣམས་ལ་ཡབ་ཡུམ་ཉིད་ཀྱང་བྲེད་པ་དང་ཡིད་མི་བདེ་བ་གང་ཡང་མ་བྱུང་ཞིང་༔ སྙིང་བཏོན་ཀྱང་ན་ཚ་དང་སྡུག་བསྔལ་ཡེ་ནས་མ་བྱུང་སྟེ་ཉམས་དགའ་བ་དང་ལུས་སེམས་བདེ་བ་དང་༔ ཤེས་པ་གསལ་བ་དང་སྔར་དང་མི་འདྲ་བའི་བདེ་བ་ཁྱད་པར་ཅན་མང་པོ་རྒྱས་པ་རྨིས་སོ༔ མནལ་སད་ཀྱང་བདེ་བ་དེ་ལྟ་བུའི་ངང་དུ་འདུག་གོ༔ དེའི་ཕྱིར་ནངས་ཉི་མ་རྩེ་ཤར་ཙམ་ན་གྲོང་ཁྱེར་དེ་ན་ཡོད་པའི་བུད་མེད་ཨ་སྨན་མ་བྱ་བ༔ ཚིག་དང་སྤྱོད་ལམ་ཆོ་ལེ་བ་སྨྲ་བ་ཞིག་ཡོད་པ་དེ་བྱུང་ནས༔ ངས་ད་ནངས་དཔོན་ཚང་ལ་རྨི་ལམ་བཟང་པོ་ངོམ་ཆོག་པ་ཞིག་རྨིས་པ་དེ་བསྐྱལ་འོང་པ་ཡིན་ཟེར་བ་དེར་ཁྱི་བཀག་ནས་ཤོག་ཅིག་བྱས་པས༔ མཆོད་ཁང་ཆེན་པོ་ཞིག་ཡོད་པའི་ནང་དུ་ཕྱིན་པ་དང་ང་ལ་རྨི་ལམ་བཟང་པོ་ངོམ་ཆོག་པ་ཞིག་བཤད་རྒྱུ་ཡོད༔ ཁྱེད་དཔོན་ཚང་ལ་མི་རབས་མང་པོ་ལ་ཉམས་པ་མེད་ཅིང་བསོད་ནམས་ནམ་མཁའ་དང་མཉམ་པ་ཞིག་འོང་བར་འདུག་ཟེར་ཏེ༔ ཇོ་མོ་ན་རེ༔ མདང་ང་རང་ཡང་ཐང་སྐྱིས་དུས་རྒྱུན་དང་མི་འདྲ་བའི་རྨི་ལམ་བཟང་པོ་ཞིག་བྱུང་བས་ལུས་སེམས་དང་སྣང་བ་ཐམས་ཅད་ད་ལྟ་ཡང་དགའ་ཞིང་བདེ་བ་ཞིག་ཡོད་པས༔ ཨ་སྨན་མ་འདི་ལ་རྨི་ལམ་ཅི་འདྲ་བ་ཞིག་བྱུང་སྙམ་ནས༔ དཔོན་ཚང་ལ་བྱོན་བྱས་ནས་གདན་དྲངས་པ་དང་ཨ་སྨན་མ་ལ་ཀ་བབ་བཟང་པོ་ཞིག་བྱིན་ནས་རྨི་ལམ་བཟང་པོ་ཡོད་ན་ད་ཤོད་ཅིག་བྱས་པས༔

ཨ་སྨན་མ་ན་རེ༔ མདང་གཉིད་ཡུན་རིང་ལ་གསལ་བའི་ཐོ་རངས་ཀྱི་དུས་སུ་རང་རེ་དཔོན་ཚང་གི་སྐུ་མཁར་འདི་དེ་སྔ་བས་སུམ་འགྱུར་གྱིས་མཐོ་ལ་གསེར་ཁྲི་འདི་ཡང་དེ་སྔ་བས་སུམ་འགྱུར་གྱིས་མཐོ་བ་ཞིག་འདུག་པའི་རྩེ་མོར༔ གསེར་གྱི་གདུགས་རིམ་པ་གསུམ་རང་འཁོར་དུ་སྒ་ར་ར་འཁོར་ཞིང་འདུག༔ དེའི་ཕྱོགས་བཞིར་དངུལ་གྱི་མེ་ལོང་ཟླ་བ་ཙམ་བཞི་རླུང་གིས་བསྐྱོད་ཅིང་འདུག་གོ༔ དེའི་འོད་ཀྱིས་ཡུལ་ཁམས་ཐམས་ཅད་དུ་གསལ་བ་ས་ལེ་བ་བྱེད་དོ༔ དེའི་ཕྱོགས་བཞིར་མཁའ་འགྲོ་མ་ཡིན་ཟེར་བའི་བུ་མོ་བཞིས་དུང་དཀར་ཆེན་པོ་རེ་རེ་ཕྱོགས་བཞིར་ཁ་གཏད་ནས་འབུད་བདོ་ཙ༔ གླིང་བཞིར་ཐོས་པ་ཙམ་དུ་སྐད་གྲགས་སོ༔ མཁར་གྱི་ཟུར་བཞི་ནས་བ་དན་དཀར་པོ་ཆེན་པོ་བཞི་རང་རང་གི་ཕྱོགས་ཕྱོགས་སུ་རླུང་གིས་གཡབ་ཅིང་སྐྱོད་པར་སྣང་ངོ་༔

མཁར་གྱི་པད་ཞབས་ཀྱི་མགུལ་དུ་མར་མེ་ཆེན་པོ་ཕྲེང་བ་ལྟར་ནམ་མཁའ་གཏད་མེད་པ་ལ་བསྐོར་ནས་འབར་ཞིང་འདུག་གོ༔ མར་མེ་འབར་བའི་འོད་ཀྱིས་འཛམ་བུའི་གླིང་ཐམས་ཅད་གསལ་བར་བྱེད་དོ༔ ནམ་མཁའ་ནས་འོད་ཟེར་ཁ་དོག་མི་འདྲ་བ་དཔག་ཏུ་མེད་པ་མང་པོ་མཁར་ལ་ཟུག་ནས་འདུག་གོ༔ མཁར་གྱི་ཕྱོགས་བཞི་ནས་ཉི་མ་བཞི་དུས་གཅིག་ལ་ཤར་ནས་འདུག་གོ༔ ཟུར་བཞི་ནས་དར་པོ་ཆེ་བཞི་ཡང་རླུང་གིས་ཕྱོགས་ཕྱོགས་སུ་བསྐྱོད་བདོ༔ ནམ་མཁའ་ནས་ལྷའི་བུ་དང་བུ་མོ་ཡིན་ཟེར་བའི་ཁྱེའུ་ཕོ་མོ་དཔག་ཏུ་མེད་པ་མང་པོས་མེ་ཏོག་སྣ་ཚོགས་ཀྱི་ཆར་བ་མང་པོ་མཁར་ལ་གཏོར་རོ༔

ནམ་མཁའ་དང་བར་སྣང་དང་མཁར་གྱི་ནང་ལ་སོགས་པ་རྣམས་སུ་རོལ་མོའི་སྒྲ་སྙན་དཔག་ཏུ་མེད་པ་མང་པོ་ཡང་གྲགས་སོ༔ ངས་ཀྱང་ཁང་གཉའ་ཡ་ཐ་འདི་ན་སྣང་བས་བུ་མོ་དུང་དཀར་འབུད་མི་དེ་ལ༔ འདི་ན་ཅི་བྱེད་པ་ཡིན་བྱས་པས་བུ་མོ་དེས་འདི་ན་ཡུམ་ཆེན་མོ་བཞུགས་པ་བྱེད་པ་ཡིན་ཟེར་རོ༔ མཆོད་ཁང་ནང་དུ་ཡང་རོལ་ཆ་མང་པོ་དི་རི་རི་གྲགས་པ་དང་ཡུམ་དེ་སུ་ལ་ཟེར་བ་ཡིན་བྱས་པས༔ ཡུམ་ཆོས་དབྱིངས་བཟང་མོ་ལ་ཟེར་བ་ཡིན༔ ད་ལྟ་པོ་ཏ་རི་ནས་འོང་བ་ཡིན་ཟེར་རོ༔ ད་ཡང་མཆོད་ཁང་ནང་དུ་ལྟ་འགྲོ་བས་རྙེད་དམ་བསམ་ནས་འགྲོ་བའི་བསམ་པ་བྱུང་ཙ་ན་སོང་ཟེར་རོ༔ གཞན་ཡང་རྨི་ལམ་བཟང་པོ་རྨིས་ཟེར་བ་མང་པོ་བྱུང་ངོ་༔

དཔོན་མོ་འབུམ་ལྕམ་མ་ཁོ་རང་གི་སྲས་མོ་ལོ་བཅུ་དྲུག་ལོན་པའི་འབུམ་མེ་བྱ་བ་ཞིག་ཡོད་པ་དེས་ཀྱང་༔ དེའི་ནུབ་མོ་ནམ་མཁའ་ནས་འོད་དཀར་པོ་ཉི་མ་ཙམ་ཞིག་མ་ཡི་པང་དུ་ཟུག་ནས་འདུག་པས་ཁྱིམ་དང་ཡུལ་ཁམས་ཐམས་ཅད་གསལ་བར་མངོན་སུམ་དུ་མཐོང་༔ ཡང་རྨི་ལམ་དུ་བུ་མོ་ལོ་བརྒྱད་པ་ཙམ་ཞིག་གིས་གསེར་གྱི་རྡོ་རྗེ་རྩེ་ལྔ་པ་ཞིག་བཟུང་ནས་བྱུང་སྟེ༔ ཨ་ཅེ་སྐུ་ཁམས་བདེའམ་ཟེར་བས་ཁྱོད་གང་ནས་འོང་བ་ཡིན་བྱས་པས༔ ང་པོ་ཏ་རི་ནས་འོང་བ་ཡིན་ཟེར༔ པོ་ཏ་རི་གང་ན་ཡོད་བྱས་པས་རྒྱ་གར་ན་ཡོད་ཟེར༔ ཁྱོད་སུ་ཡིན་བྱས་པས༔ ང་ཁྱོད་ཀྱིས་མི་ཤེས་པ་ཨེ་ཡིན༔ རྗེ་བཙུན་སྒྲོལ་མ་ཡིན་ཟེར་རོ༔ དེ་བདེན་ནམ་མི་བདེན་སྙམ་ནས༔ ད་བཟུང་ནས་བལྟ་དགོས་སྙམ་ཙ་ན༔ མའི་པང་དུ་བྲོས་ནས་ཐལ་ཙ་འོད་ལམ་མེ་མ་ལ་ཐིམ་ནས་ཐལ་ལོ༔ དེ་དང་མཉམ་དུ་མནལ་སད་པའོ༔ དེ་ལ་སོགས་པའི་ཡོན་ཏན་གྱི་ལྟས་བསམ་གྱིས་མི་ཁྱབ་པ་མང་པོ་བྱུང་ངོ་༔

ཡུམ་འབུམ་ལྕམ་ཡང་དགུང་ལོ་བཞི་བཅུ་ཞེ་བརྒྱད་ལ་བྱོན་ཀྱང་གཉེར་མ་མ་སོང་ཞིང་༔ གཞོན་ཤ་རྒྱས་ཤིང་བཀྲག་མདངས་དང་ལྡན་པར་བྱུང་བས༔ ཡུལ་མི་ཀུན་གྱིས་ན་རེ༔ ཇོ་མོ་འབུམ་ལྕམ་མ་འདི་ཆོས་ལ་དཀར་བས་ཆོས་བྱས་པའི་བྱིན་རླབས་ཀྱིས་༔ ད་ནི་ཕྱིར་གཞོན་ནས་བུ་མོ་འབུམ་མེ་དང་ཡུམ་སྲས་གཉིས་ལ་ཁྱད་པར་མི་འདུག་ཟེར་བ་བྱུང་ངོ་༔ ཡུམ་ཁོ་རང་ཡང་ལུས་ཡང་བ་དང་སྣང་སེམས་ཐམས་ཅད་བདེ་ཞིང་༔ རྨི་ལམ་དུ་ཡང་དག་སྣང་བསམ་གྱིས་མི་ཁྱབ་པ་མང་པོ་བྱུང་ངོ་༔ མཚན་མོ་ལ་ཡང་མེ་རི་བཀྱག་པ་བཞིན་དུ་ཡུམ་ས་ཕྱོགས་གར་བྱོན་ཀྱང་ཡུལ་སྣང་ཐམས་ཅད་སྒྲིབ་མེད་དུ་གསལ་ཝང་ཝང་མཐོང་བ་བྱུང་ངོ་༔

གཞན་གྱི་ལས་ལེགས་ཉེས་ཐམས་ཅད་ཀྱང་སྐབས་རེ་ལ་ཤེས་པ་བྱུང་བས་མི་ཐམས་ཅད་ཀྱིས་དཔོན་མོ་འབུམ་ལྕམ་མ་ད་ལོ་ནས་རྨི་ལམ་རྣོ་བར་འདུག་ཟེར་བ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་མ་མང་པོ་བྱུང་སྟེ༔ རྡོ་རྗེ་ཕག་མོ་ཀུན་ཏུ་བཟང་མོས་ཐོག་མར་འགྲོ་བའི་དོན་དུ་ཐུགས་བསྐྱེད་ནས༔ སྤྲུལ་པ་མར་འགྱེད་པའི་ཐུགས་ཀྱི་སྤྲུལ་པ་ལ་པཎྜི་ཏ་དོན་གྲུབ་བཟང་པོར་གྲགས་པ་དེ་བོད་དུ་འགྲོ་བའི་དོན་དུ་ཐུགས་བསྐྱེད་ནས༔ རྒྱ་གར་གྱི་པོ་ཏ་རི་ནས་ཐུགས་འཕོས་པས༔ བོད་ཀྱི་ཡུལ་ལབ་ཕྱི་དབྱེའི་གང་བར་ལྷ་གང་ངམ་ཤོད་ཀྱི་མཚོ་མེར་ཞེས་བྱ་བའི་གྲོང་ཁྱེར་ཆེན་པོའི་དབུས་སུ༔ མཁར་ཕོ་བྲང་རིན་ཆེན་ལྡན་ཞེས་བྱ་བའི་དབུས་སུ༔ ལྷ་ཁང་ལྷུན་གྲུབ་རྩེགས་རྒྱལ་ཞེས་བྱ་བའི་བདག་མོ༔ རིགས་ལྡན་པདྨ་མཁའ་འགྲོའི་སྤྲུལ་པ་ཕྱུག་ཚང་བཟའ་འབུམ་ལྕམ་མའི་ལྷུམས་སུ་ཞུགས་པའི་རྣམ་ཐར་ཏེ་རྣམ་གྲངས་བཞི་པའོ༔

རྣམ་གྲངས་ལྔ་པ།

དེ་ནས་ཡུམ་གྱི་ལྷུམས་སུ་འོད་ཀྱི་གཞལ་ཡས་ཁང་དུ་བསྐྱེད་རིམ་གྱི་ཚུལ་དུ་ཁམས་རྣམས་རིམ་པར་འཕེལ་ནས༔ ལུས་ངག་ཡོངས་སུ་རྫོགས་ཤིང་གྲུབ་སྟེ༔ ལུག་ལོ་ཟླ་བ་གཉིས་པའི་ཉི་ཤུ་ལྔ་ལོན་ནས་མའི་ལྷུམས་ནས་ཨ་བགྲང་བ་དང་༔ ཧ་རི་ནི་ས་བགྲང་བ་དང་༔ པ་ར་ག་ཏེ་བགྲང་པ་དང་༔ སངས་རྒྱས་ཐུབ་པའི་སྙིང་པོ་བགྲང་བ་དང་༔ ཚེ་དཔག་མེད་ཀྱི་སྙིང་པོ་བགྲང་བ་དང་༔ ཡི་གེ་དྲུག་པ་བགྲང་བ་དང་༔ འཁོར་ལོ་བདེ་མཆོག་གི་སྙིང་པོ་བགྲང་བ་དང་༔ བཀའ་བརྒྱད་བདེ་གཤེགས་འདུས་པའི་སྙིང་པོ་བགྲང་བ་དང་༔ ཡི་གེ་བརྒྱ་པ་བགྲང་བ་ལ་སོགས་པའི་གསང་སྔགས་གསར་རྙིང་ཐམས་ཅད་ཀྱི་སྙིང་པོ་བགྲང་བ་རྣམས་ཡུམ་གྱིས་ཚོར་བ་དུས་རྒྱུན་དུ་བྱུང་ངོ་༔

དེ་ནས་ཟླ་བ་གསུམ་པའི་ཚེས་གསུམ་གྱི་ནམ་ལངས་སྔ་མ་ལ་ཡུམ་གྱི་ལྷུམས་ནས་ཨ་མ་ཟེར་ཏེ་བོས་ནས་བྱུང་ངོ་༔ ང་ཡི་གོས་ནི་རས་གོས་གསར་པ་ལ་སྤོས་དང་གུ་གུལ་གྱིས་བདུག་ལ་དེ་དྲི་བཟང་གིས་སྦག་པར་གྱིས་ལ་ཚགས་གྱིས་ཤིག་ཟེར་བ་བྱུང་ངོ་༔ དེ་ནས་རས་དེ་བཞིན་དུ་བྱས་ནས་ཚགས་བྱས་ཏེ༔ ལུག་ལོ་ཟླ་བ་ལྔ་པའི་ཚེས་བཅོ་ལྔའི་ཐོ་རངས་ཁ་སྐྱ་རེངས་སྔ་མ་ཤར་བའི་དུས་སུ་སྐུ་འཁྲུངས་ཏེ༔ དྲི་བཟང་དང་སྤོས་དུད་ཀྱིས་ཁྱིམ་དང་ཡུལ་ཁམས་ཐམས་ཅད་ཁྱབ་པ་དང་༔ འཇའ་འོད་ཀྱིས་བར་སྣང་དང་ནམ་མཁའ་ཐམས་ཅད་ཁྱབ་པ་དང་༔ ཐུག་ཆོམ་པ་དང་༔ ས་གཡོ་བ་དང་རོལ་མོའི་སྒྲ་སྙན་མང་པོ་ནམ་མཁའ་ལ་གྲགས་པ་དང་༔ མེ་ཏོག་གི་ཆར་བབ་པ་དང་བྱ་རིགས་སྣ་ཚོགས་ཀྱིས་རང་རང་གི་སྐད་སྙན་མང་པོ་སྒྲོག་པ་དང་༔ གཞན་ཡང་གནམ་ས་གཉིས་ན་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་བས༔ ཡུལ་ཁམས་ཐམས་ཅད་ཀྱིས་ད་ནངས་དཔོན་ཚང་གི་ལྷ་རྣམས་ལ་མཆོད་པ་ཕུལ་བས་བྱིན་རླབས་ཀྱིས༔ མེ་ཏོག་གི་ཆར་དང་༔ འཇའ་འོད་དང་ནམ་མཁའ་ན་ཡང་སྒྲ་སྙན་མང་པོ་གྲགས་སྐད་ཟེར་རོ༔ དེར་ངོ་མཚར་བའི་ལྟས་མང་པོ་བྱུང་བས་སྲས་ངོ་མཚར་བ་ཅི་འདྲ་བ་ཞིག་འོང་ངམ་སྙམ་པ་ལ་བུ་མོ་མིག་གསུམ་ཡོད་པ་ཞིག་འདུག་སྟེ༔ སྐུ་འཁྲུངས་མ་ཐག་ནས་མདུང་གང་ཙམ་གྱི་ནམ་མཁའ་ལ་འཕགས་ནས༔ ཞབས་གཡས་བསྐུམ་གཡོན་བརྐྱང་རྡོ་རྗེ་ཕག་མོའི་བཞུགས་ལུགས་བྱས་ནས་སྤྱན་གསུམ་བར་སྣང་ལ་ཁྲ་ལེ་གཟིགས་ནས་ལྗགས་འདྲིལ་ཞིང་བཞུགས་སོ༔

དེ་ནས་ཐང་དུ་བབས་ནས་ཨ་མ་སྐུ་ཁམས་བདེའམ་ཟེར༔ སྐུ་འཁྲུངས་མ་ཐག་ནས་དབུ་སྐྲ་ཡང་ནག་ལ་སྣུམ་པ་རྣ་བ་ཁེབ་པ་ཙམ་འདུག་གོ༔ དཔྲལ་བ་ན་སྤྱན་གསུམ་ཧྲིག་ཧྲིག་དཀར་ནག་འབྱེད་པར་འདུག་གོ༔ སྐུ་ཤ་ཡང་དཀར་ལ་གསལ་ཞིང་འོད་ཟེར་ཁ་དོག་ལྔ་འབར་བ་དང་འཇའ་འོད་སྣ་ལྔ་གསལ་བའི་ནང་དུ་འདུག་གོ༔ དེ་ནས་ཨ་བགྲང་བ་དང་༔ པ་ར་ག་ཏེ་དང་༔ ཧ་རི་ནི་ས་དང་༔ ཤཱཀྱ་མུ་ནེ་དང་༔ པུཎྱེ་དང་༔ བོ་དྷི་ཙིཏྟ་དང་༔ ཨ་མི་དྷེ་བ་དང་༔ ཡི་གེ་དྲུག་མ་དང་ཡི་གེ་བརྒྱ་པ་ལ་སོགས་པའི་སྔགས་རིགས་རྣམས་བགྲངས་ཤིང་འདུག་གོ༔ དེ་ནས་ཕྱོགས་བཞི་ནས་གོམ་པ་གསུམ་རེ་འདོར་ནས་ཕཊཿདྲག་པོ་བགྲངས་ནས་བྱུང་ངོ་༔ ལྕེ་ཐོག་ཏུ་ཡང་ཡི་གེ་ཧྲཱིཿདམར་པོ་ཚ་ཚེག་དྲག་དང་བཅས་པ་ཞིག་གཡས་སྐོར་དུ་སྒ་ར་ར་འཁོར་ཞིང་འདུག་གོ༔ ཡི་གེ་དེ་ལ་འོད་ཟེར་ཁ་དོག་སྣ་ལྔ་འབར་ཞིང་འདུག་གོ༔ དཔྲལ་བའི་སྤྱན་དབུས་མའི་དཀྱིལ་དུ་ཨ་དཀར་པོ་བ་སྤུའི་བྲིས་པ་ཙམ་ཞིག་ལ་འོད་ཟེར་ཁ་དོག་སྣ་ལྔ་རྟ་རྔ་ཉག་མ་ཙམ་ལྔ་འཇའ་བཞིན་དུ་གཤིབ་ནས་ཡར་སྤྱི་གཙུག་ཏུ་སོང་བ་དང་༔ སྤྱི་གཙུག་ཏུ་འོད་དཀར་པོ་ཐེའུ་ཆུང་གི་མགོ་ཙམ་ཞིག་ལ་ཨ་དཀར་པོ་ཞིག་གི་མཚན་པ་ཞིག་འདུག་པ་ཨ་དེ་ལ་ཟུག་ནས་འདུག་གོ༔ ཕྱག་སོར་དང་ཞབས་སོར་རྣམས་ཀྱི་ཚིགས་བར་མ་ཆད་དུ་དྲ་བའི་འབྲེལ་ནས་འདུག་གོ༔ སེན་མོ་རྣམས་ཀྱང་ཅུང་ཟད་དམར་ལ་ཉ་ཕྱིས་ལྟར་འོད་ཁ་དོག་སྣ་ཚོགས་པ་འཇའ་བཞིན་དུ་གསལ་བར་འདུག་པ་ལ༔ ཨོཾ་ཨཱཿཧཱུཾ་གི་ཡི་གེ་གསུམ་རེ་འཆར་བར་འདུག་གོ༔ ཕྱག་མཐིལ་དང་ཞབས་མཐིལ་ཐམས་ཅད་མི་མཉམ་པ་མེད་པ་ལ་པདྨ་འདབ་བརྒྱད་དམར་པོ་རེ་རེས་མཚོན་པར་འདུག་གོ༔ གཞན་ཡང་མཚན་བཟང་པོ་སུམ་ཅུ་རྩ་གཉིས་རྣམས་ཚང་བར་འདུག་གོ༔

དེ་ནས་གསང་བ་དྲི་བཟང་གིས་སྦས་པས་བཀྲ་ཤིས་ནས༔ ཕུ་མོ་ཨ་ཅེ་འབུམ་མེས་པང་དུ་བླངས་ཏེ་ཕུ་མོའི་གདོང་ལ་ཅེ་རེ་བལྟས་ནས་ཨ་ཅེ་སྐུ་ཁམས་བདེའམ་ཟེར་རོ༔ དེ་ནས་ཡུད་ཙམ་རེ་ནས་ལྕེ་སྟེང་གི་ཧྲཱི་དེ་ཡང་ཕར་ལྕེ་ལ་ནུབ་ནས་མི་མངོན་པར་ཐལ་བ་དང་༔ མར་དཀར་དང་༔ རྒྱ་སྤོས་དང་རྒྱལ་མོ་ཀ་ར་གཉིས་སྦྱར་ནས་བྱིན་པས་ཟ་མ་འདོད་ནས་ཕྱིར་ཕྱུང་ནས་བྱུང་ངོ་༔ དེ་ནས་སྤྱན་གསུམ་ནམ་མཁའ་ལ་ཁྲ་ཟིམ་མེ་གཟིགས་ནས་འདུག་པ་དང་ཡུད་ཙམ་ཞིག་རེད་ནས་སྤྱི་བོའི་འོད་ཀྱང་མར་སྤྱི་བོར་ཐིམ་ནས་ཐལ༔ དཔྲལ་བའི་སྤྱན་གྱི་འོད་ལྔ་ཡང་ཕར་སྤྱན་ལ་ཐིམ་ནས་ཐལ༔ དེ་ནས་མགྲིན་པ་མར་ཅུང་ཟད་བཀུག་ནས་ཕུ་མོ་ཨ་ཅེ་འབུམ་མེའི་གདོང་ལ་ཧྲིག་གེར་གཟིགས་ནས་འདུག་གོ༔ ཡུད་ཙམ་ཞིག་རེད་ནས་རྐན་སྒྲ་ཐག་གེར་བརྡབས་ནས་བྱུང་བས་མར་དཀར་དང་རྒྱལ་མོ་ཀ་ར་གཉིས་སྦྱར་ནས་བྱིན་པས༔ ལེགས་པོར་གསོལ་ནས་ཐལ༔ དེ་ནས་སྐྱེ་པོ་ཤར་གྱིས་གནས་ནས་བྱུང་སྟེ༔ ཡུམ་ལ་བལྟས་ནས་ཞལ་འཛུམ་པར་མཛད་ནས་པ་ར་ག་ཏེ་དང་༔ མ་ཧ་མུ་ནེ་དང་༔ ཧ་རི་ནི་ས་དང་༔ ཧྲཱི་ཧ་ཧ་ཧཱུྃ་ཧཱུྃ་དང་༔ བོ་དྷི་ཙིཏྟ་དང་༔ ཡི་གེ་དྲུག་པ་དང་༔ ཨཱ་ལི་ཀཱ་ལི་དང་༔ ཡི་གེ་བརྒྱ་པ་དང་༔ གཞན་ཡང་ཨ་ལ་སོགས་པའི་སྔགས་རིགས་ཐམས་ཅད་ལ་ཚང་མར་ཚར་གཅིག་བགྲངས་ཏེ༔

དེ་ནས་ཕུ་མོ་ཨ་ཅེ་འབུམ་མེའི་པང་དུ་གཉིད་ནས་ཐལ་ལོ༔ ཡུམ་ལ་སྐུ་འཁྲུངས་བའི་དུས་སུ་ཡང་མ་གནོད་པར་བདེ་སྟོང་སྦྱོར་བའི་དུས་དང་ཁྱད་པར་མེད་པའི་དགའ་བདེ་རྒྱས་པར་བྱུང་ངོ་༔ དེའི་ཕྱིར་ནངས་ནམ་སྐྱ་ས་ལེ་གསལ་བ་དང་༔ ཕུ་མོ་འབུམ་མེའི་གདོང་ལ་ཅེ་རེ་བལྟས་ནས་འདུག་པས༔ འབུམ་མེས་མ་ལ་བོས་ཏེ་ཨ་མ་བུ་མོ་འདིས་ང་ལ་བལྟས་ནས་འདུག་ཙ༔ མིག་གསུམ་དང་མཛེས་པ་ལ་ངེད་རང་ཚང་ལ་བུ་མོ་འདི་འདྲ་བ་ཞིག་ཡོད་དོ་ཟེར་ནས་དགའ་ཚོར་ཆེན་པོར་བྱས་སོ༔ བུ་མོ་སྐུ་འཁྲུངས་བའི་དུས་སུ་ཡབ་ཆོས་ཟླ་དཔོན་གཡོག་རྣམས་ཡུལ་གཞན་དུ་དོན་གཉེར་ལ་བྱོན་ནས་དེར་མེད་པས་ད་ལྟ་ཆོས་ཟླ་དཔོན་གཡོག་རྣམས་འབྱོན་ཞིང་འདུག་ཟེར་བ་ཐོས་པས༔ འབུམ་མེས་ཨ་མ་བུ་མོ་འདི་ཡབ་ལ་སྦ་དགོས་ཟེར་ནས་བུ་མོ་རང་གི་རས་གོས་ནང་དུ་དྲིལ་ནས་མཆོད་ཁང་གི་སྒོ་སྐྱེས་ཀྱི་གྲིབ་ཏུ་སྦས་ནས་བཞག་གོ༔ དེ་ནས་ཡབ་མཆོད་ཁང་ནང་དུ་བྱོན་པ་དང་བུ་མོ་འབུམ་མེས་དཔོན་ཚང་ལགས་ཨ་མ་ལ་ནི་བུ་མོ་ངན་པ་མིག་གསུམ་ཡོད་པ་ཞིག་བཙས་ནས་བྱུང་སྟེ༔ ངེད་རྣམས་ཀྱིས་བོར་ནས་མེད་དོ་བྱས་པས༔ ཡབ་ཀྱིས་ན་རེ༔ དེ་མ་ཐང་བཟང་ཁ་རྩང་སོང་གིས་ལྟས་བཟང་པོ་དེ་རྣམས་བྱུང་བས་བུ་མོ་ལ་མིག་གསུམ་ཡོད་ཀྱང་བཟོད༔ འདིར་ཁྱེར་ལ་ཤོག་ཅིག་གསུངས༔

དེ་ནས་འབུམ་མེས་བུ་མོ་བླངས་ནས་ཡབ་ཀྱི་རྩར་ཁྱེར་བས་ཡབ་ཀྱིས་པང་དུ་བླངས་ནས༔ མཚན་རྟགས་རྣམས་ལེགས་པོར་བྱས་པས་བུ་མོ་འདིའི་མིག་དབུས་མ་འདིའི་དཀྱིལ་དུ༔ ཨ་དཀར་པོ་བ་སྤུའི་བྲིས་པ་ཙམ་ཞིག་འདུག༔ གཞན་ཡང་མཁའ་འགྲོ་མའི་མཚན་རྟགས་ཐམས་ཅད་ཚང་བར་འདུག་པས༔ བུ་མོ་འབུམ་མེ་ཁྱོད་ཀྱིས་བུ་མོ་འདི་སྒོར་མ་འཁྱེར་ལ་ཉ་ར་ལེགས་པོར་གྱིས་ཤིག༔ ཁྱོད་གྲོང་དུ་མ་རྒྱུགས་ལ་བུ་མོ་ལེགས་པོར་སྐྱོང་དང་འདི་ཅི་འདྲ་ཞིག་ཡིན་ཤེས་རྒྱུ་རང་མེད་པས་སྔོན་ཆད་ཀྱང་བོད་ན་མི་ལ་མིག་གསུམ་ཡོད་པའི་མི་སྐྱེས་ཟེར་བ་ཚོར་མ་མྱོང་༔

དེ་ཙ་ན་འདི་ནི་ཡང་ན་འོ་སྐོལ་གཉིས་ལ་གླགས་ཚོལ་བར་འོང་བའི་རྒྱལ་བསེན་གྱི་སྤྲུལ་པ་འཇིགས་སུ་རུང་བ་ཞིག་ཡིན་ངེས༔ ཡང་ན་ཡུམ་ཆེན་མོའི་སྤྲུལ་པ་འོ་སྐོལ་བོད་གངས་ཅན་པ་ལ་ཕན་ཐོགས་པ་ཞིག་ཡིན་ངེས་པས་ཇི་ལྟར་ཡིན་ཀྱང་ཟླ་བ་གསུམ་ན་རྟགས་ཤིག་འབྱེད་ནས་འོང་བ་ཡིན་པས་ཉ་ར་ལེགས་པོར་གྱིས་ལ་བྱས་ཤིང་བསྐྱངས་བས་ཞག་གསུམ་སོང་ནས་ཟླ་བ་གསུམ་གྱི་སྐྱེད་ཙམ་བྱུང་༔ ཟླ་བ་གསུམ་སོང་ནས་ལོ་གསུམ་གྱི་སྐྱེད་ཙམ་བྱུང་ངོ་༔ དེ་ལྟར་སྐྱེད་ཤིན་ཏུ་ཆེ་ཞིང་བསྐྱངས་བས་ལོ་གསུམ་ལོན་པ་དང་༔ ཡབ་ཀྱིས་ན་རེ༔ བུ་མོ་འདི་ལུས་ལ་ཡོད་པའི་དུས་སུ་སྒྲོན་མེ་ལ་སོགས་པ་རྣམས་རྨིས་པ་དང་བཙའ་བའི་དུས་སུ་ཡང་ཨ་ལ་སོགས་པའི་ལྟས་བཟང་པོ་རྣམས་འབྱུང་བས་འདི་ལ་ཨ་སྒྲོན་མིང་དུ་ཐོགས་ཤིག་ཟེར་རོ༔ ཡུམ་གྱི་བུ་མོ་འདི་ལ་སྒྲོན་མེ་ལ་སོགས་ཀྱི་ལྟས་བཟང་པོ་རྣམས་བྱུང་བས་སྒྲོན་ཚེ་མ་མིང་དུ་གདགས་དགོས་ཟེར་རོ༔

དེ་ནས་ཡུམ་གྱིས་ཡི་གེ་བསླབ་པས་བརྡ་བསྟན་པ་ཙམ་གྱིས་གཤར་ཡིག་ཐམས་ཅད་ལ་མཁས་པར་བྱུང་བ་དང་༔ དེ་ཕྱིན་ཆོད་ནས་ཨ་སྒྲོན་སྒྲོན་ཚེ་མས་ཀྱང་གཤར་ཡིག་གི་ཚོགས་ཐམས་ཅད་འདོན་པ་དང་༔ ཨ་བགྲང་བ་དང་༔ ག་ཏེ་བགྲང་བ་དང་༔ ཧ་རི་ནི་ས་བགྲང་བ་དང་༔ མཆོད་ཁང་གི་ལྷ་རྣམས་ལ་ཕྱག་འཚལ་བ་དང་༔ མཆོད་པ་འབུལ་བ་དང་༔ ཕྱག་དར་ལ་བརྩོན་པ་ལ་སོགས་པའི་ངོ་མཚར་བའི་བྱེད་ལས་སྣ་ཚོགས་པ་རྣམས་བྱེད་པ་བྱུང་ངོ་༔

དེ་ནས་ལོ་ལྔ་ལོན་ནས་ཁོང་རང་ཚོང་ལ་མཆོད་གནས་ཇོ་བོ་དམ་པ་ཞིག་ཡོད་པས་ཡི་གེ་དབུ་ཅན་ཐམས་ཅད་བསླབ་པ་དང་བརྡ་བསྟན་པ་ཙམ་གྱིས་ཤེས་པ་བྱུང་སྟེ༔ ལོ་བརྒྱད་ལོན་ནས་རྒྱ་བོད་གཉིས་ཀའི་ཡི་གེའི་ཚོགས་ཐམས་ཅད་ཀྱི་འབྲི་ཀློག་དང་༔ སྒྲོས་འདོགས་ཐམས་ཅད་ལ་མཁས་པ་དང་ཉིན་རེ་བཞིན་དུ་བརྒྱད་སྟོང་པ་དུམ་པ་གཉིས་རེ་ཉི་མ་དགོང་མོ་ནས་ཀློག་ཐོན་པ་བྱུང་ངོ་༔ དེ་ནས་མཆོད་གནས་ཇོ་བོ་དམ་པ་ན་རེ༔ དཔོན་མོ་འབུམ་ལྕམ་མ་ཁྱོད་ཀྱི་བུ་མོ་འདི་ནི་ཐ་མལ་རང་རྒྱུད་པ་ཞིག་མ་བྱུང་༔ ཡུམ་ཆེན་མོའི་སྤྲུལ་པའམ་ཡེ་ཤེས་ཀྱི་མཁའ་འགྲོ་མ་བཟང་མོ་ཞིག་ཡིན་པར་འདུག༔ ངས་ནི་བུ་མོ་འདིའི་ཤེས་རབ་ཀྱི་རྩིས་ནི་མི་ནོན་པར་འདུག༔ འདི་ཡི་ཤེས་རབ་ནི་ནགས་ཆེན་ལ་མེ་མཆེད་པ་བཞིན་དུ་རབ་ཏུ་འབར་བདོ་བས་འདི་ལ་ཤེས་རབ་སྒྲོན་མེ་མིང་དུ་ཐོགས་ཤིག་ཟེར་རོ༔ ཡུམ་གྱིས་སྔོན་ཡང་སྒྲོན་ཚེ་མ་མིང་བྱས་པས༔ དེ་ནས་སྒྲོན་ཚེ་མ་དང་ཤེས་རབ་སྒྲོན་དང་ཨ་སྒྲོན་ཞེས་པར་ཀུན་ལ་གྲགས་སོ༔ ཡུལ་མི་ཐམས་ཅད་ཀྱིས་ཇོ་མོ་འབུམ་ལྕམ་མ་ལ་བུ་མོ་མིག་གསུམ་ཡོད་པའི་ཀློག་མཁས་པ་ཞིག་འདུག་ཟེར་བ་ཐམས་ཅད་ཀྱིས་ཐོས་པས༔ དེར་རྣ་བས་ཐོས་ཚད་ཀྱི་མི་ཐམས་ཅད་གཟིགས་མོ་ལ་འོངས་བས་བུ་མོ་མཐོང་བས་ཐམས་ཅད་ཡིད་ཆགས་ཏེ་སྨོན་པ་དང་སྙན་པ་མཐའ་ཡས་པ་སྒྲོག་པ་བྱུང་ངོ་༔ དེ་ནས་ཡུལ་མི་ཀུན་གྱིས་ན་རེ༔ ཨ་སྒྲོན་ཤེས་རབ་སྒྲོན༔ སྒྲོན་ཚེ་མ་འདི་ནི་སངས་རྒྱས་ཀྱི་སྤྲུལ་པ་དངོས་ཡིན་པར་འདུག་ཟེར་ཞིང་ཐམས་ཅད་ཀྱིས་ཕྱག་འཚལ་བ་དང་༔ མཆོད་པ་འབུལ་བ་དང་བྱིན་རླབས་ཞུ་བ་བྱས་སོ༔

སྒྲོན་ཚེ་མ་འདི་ནི་དགུང་ལོ་གསུམ་ནས་བརྒྱད་ཀྱི་བར་ལ་ཡང་ནད་པ་དང་༔ རྐྱེན་ཆེན་དང་༔ སྲིད་ཆད་པ་དང་ཚེའི་བར་ཆད་བསོད་ནམས་ཉམས་པ་དང་འདོད་དོན་གང་འདོད་པ་ལ་སོགས་པ་རྣམས་ཀྱིས་རང་རང་གི་གང་འདོད་པའི་སྨོན་ལམ་ཞུས་པས་སྨོན་ལམ་གང་ཞུས་པ་ཐམས་ཅད་ཅི་ལྟ་བ་བཞིན་དུ་འགྲུབ་པར་བྱུང་ངོ་༔ དེ་ལ་སོགས་པའི་འགྲོ་བ་སེམས་ཅན་ཐམས་ཅད་ལ་ཕན་ཐོགས་བསམ་གྱིས་མི་ཁྱབ་པ་བྱུང་ངོ་༔ གཞན་དོན་ལ་བརྩོན་པའི་བརྩོན་འགྲུས་རྒྱ་ཆེན་མཛད་དོ༔ ཕུ་མོ་ཨ་ཅེ་འབུམ་མེ་ཡང་ཡི་གེའི་ཚོགས་ཐམས་ཅད་དང་༔ བཟོ་དང་གསོ་བ་ལ་སོགས་པ་ལ་མཁས་ཤིང་གཞན་དོན་ལ་བརྩོན་པ་རྒྱ་ཆེན་པོ་མཛད་དེ༔ ལོ་ཡང་ཉེར་བཞི་ལོན་ནས་དགེ་བཤེས་ཨ་སྟོན་བྱ་བ་ཞིག་ཡོད་པ་ལ་སྐྲ་སྤང་ནས་བཙུན་མ་བྱས་ཏེ༔ མིང་ཡང་སྟོན་མཚོ་རིན་ཆེན་འབུམ་བཏགས་སོ༔ སྡེ་སྣོད་གསུམ་གྱི་ཆོས་ལ་མཁས་པའི་གྲྭ་ཐོག་ཆོད་པ་ཞིག་བྱུང་ངོ་༔ དེ་ནས་མངའ་རིས་མངའ་བདག་གུ་གེ་རྒྱལ་པོ་ལས༔ སྟོན་ཤིག་ཆེན་པོ་ཞིག་བཤམས་པའི་དུས་སུ་དཔོན་ཚང་ཆོས་ཀྱི་ཟླ་བ་རྒྱལ་མཚན་དང་ཕྱུག་བཟའ་འབུམ་ལྕམ་མ་གཉིས་ལ་བུ་མོ་ཆུང་བ་མིག་གསུམ་དོད་པ་ཞིག་ཡོད་ཟེར་བ་དེ་འདིར་ཁྱེར་ལ་ཤོག་ཟེར་ནས་མངའ་བདག་གིས་ཞུ་བ་བཏང་བས༔ དེར་ཆོས་ཟླ་ཡབ་ཡུམ་དཔོན་གཡོག་ཉེར་གཉིས་གྱིས་སྒྲོན་ཚེ་མ་ཁྲིད་ནས་སོང་བས་མངའ་རིའི་མངའ་བདག་གུ་གེ་རྒྱལ་པོའི་ཡུལ་དུ་ཕྱིན་པས་མངའ་བདག་གིས་སྔར་བུ་མོའི་སྙན་པ་ཐོས་པའི་ཕྱིར༔ རྒྱལ་པོ་ཆོས་ཟླ་ཡབ་ཡུམ་རྣམས་ལ་བསུ་བ་དང་༔ ཇ་འདྲེན་བསམ་གྱིས་མི་ཁྱབ་པ་བྱས་སོ༔

དེ་ནས་མངའ་བདག་གིས་ཇོ་མོ་འབུམ་ལྕམ་མ་ལ་བུ་མོ་དེ་འདིར་ཁྲིད་ལ་ཤོག་གསུངས་པས༔ ཡུམ་གྱིས་སྒྲོན་ཚེ་མ་ཁྲིད་ནས་མངའ་བདག་གི་དྲུང་དུ་ཕྱིན་པས༔ མངའ་བདག་གིས་བུ་མོ་སྒྲོན་ཚེ་མའི་ལོ་རྒྱུས་དང་རྒྱུ་མཚན་ལ་སོགས་པ་རྣམས་ཞིབ་ཏུ་དྲིས་པས༔ འབུམ་ལྕམ་མ་ནི་བུད་མེད་ཡིན་པས་ཞེ་ཞུམ་དྲགས་པས་སྐད་འདར་བ་དང་༔ རྒྱལ་པོ་ནི་མངའ་ཐང་གཟི་བརྗིད་ཆེ་བས་ཞུ་བ་འབུལ་མ་ཕོད་པས༔ བུ་མོ་སྒྲོན་ཚེ་མས་མོ་རང་གི་ལོ་རྒྱུས་རྣམས་ཞིབ་ཏུ་ཕུལ་བས༔ མངའ་བདག་གི་དྲུང་དུ་རྒྱ་གར་གྱི་པཎྜི་ཏ་རྣམས་དང་དགེ་འདུན་པ་མང་ཆེན་བཞུགས་པ་རྣམས་དང་༔ རྒྱལ་ཕྲན་དང་དཔོན་སྐྱ་བཞུགས་པ་རྣམས་ཀྱིས་བུ་མོ་འདི་ནི་ངོ་དྲག་པ་དང་༔ མིག་གསུམ་དང་ན་ཆུང་ལ་སྨྲ་མཁས་པ་དང་༔ འདི་ཅི་འདྲ་ཞིག་ཡིན་ནའང་ཐ་མལ་གྱི་མི་དྲང་པོར་ནི་མ་ཡིན་པར་ཐག་ཆོད་ཟེར་སྐད་དོ༔ རྒྱལ་པོའི་ཞལ་ནས་ཁྱོད་ཀྱི་ཡི་གེ་འདྲ་བ་ཤེས་སམ་གསུངས་པས་སྒྲོན་ཚེ་མས་ངས་ཡི་གེ་ཤེས་ཟེར་ཏེ༔ འཕགས་པ་བསྡུས་པ་ཞིག་ལྟ་རུ་བཅུག་པས་སྐད་འགྱུར་མི་འདྲ་བ་གསུམ་གྱི་སྒོ་ནས་བཀླགས་པས་ཟན་ཆང་པ་གང་ཟ་བ་དང་མཉམ་དུ་ཐོན་པས༔ རྒྱལ་བློན་སྡེ་འཁོར་ཐམས་ཅད་ཀྱིས་ཡི་གེ་ལ་ཤིན་ཏུ་མཁས་པར་འདུག་ཟེར་རོ༔

དགེ་འདུན་པ་རྣམས་ཀྱིས་ཁྱོའི་སྒྲ་ཤེས་སམ༔ དོན་ཤེས་སམ་དྲིས་པས་སྒྲོན་ཚེ་མས་ངའི་སྒྲ་ཡང་ཤེས་ལ་དོན་ཡང་ཤེས་ཟེར་ནས་ཡི་གེའི་སྒྲ་དོན་དང་༔ ཚིག་གི་སྒྲ་དོན་དང་༔ དགོས་ཆེད་དང་༔ དབྱེ་བ་དང་དགོས་པའི་དོན་རྣམས་ལེགས་པོར་བཤད་པས་ཐམས་ཅད་ཡིད་ཆེས་ཏེ༔ བུ་མོ་འདི་ནི་རང་རྒྱུད་པ་ཞིག་མ་ཡིན་པ་ངེས་སོ༔ ཡེ་ཤེས་ཀྱི་མཁའ་འགྲོ་མ་ཞིག་ཡིན་པར་ཐག་ཆོད་དོ་ཟེར་སྐད་དོ༔

རྒྱལ་པོའི་ཞལ་ནས་བུ་མོ་འདིར་ཤོག་དང་ངས་མཚན་རྟགས་ལེགས་པོ་ཞིག་བྱེད་དོ་གསུངས་ནས༔ རྒྱལ་པོས་པང་དུ་བླངས་ཏེ་མཚན་རྟགས་རྣམས་ལེགས་པོར་མཛད་པས་དཔྲལ་བའི་སྤྱན་གྱི་དཀྱིལ་གྱི་ཨ་ལ་གཟིགས་ནས༔ གཞན་ཡང་མཁའ་འགྲོ་མའི་མཚན་རྟགས་རྣམས་རིམ་པར་གཟིགས་ནས་རྒྱལ་པོ་ཤིན་ཏུ་མཉེས་ཏེ༔ བུ་མོ་འདི་ལ་ཅི་མིང་གསུངས་པས་ཤེས་རབ་སྒྲོན་མེ་ཡང་ཟེར༔ ཨ་སྒྲོན་ཡང་ཟེར༔ སྒྲོན་ཚེ་མ་ཡང་ཟེར་སྨྲས་པས་རྒྱལ་པོའི་ཞལ་ནས་བུ་མོ་འདི་ལ་སྒྲོན་མེ་ལ་སོགས་པའི་མིང་དང་༔ ལབ་ཕྱིར་སྐུ་འཁྲུངས་པ་དང་དོན་མཚུངས་པས་བུ་མོ་འདི་ལ་ལབ་ཀྱི་སྒྲོན་མ་མིང་དུ་ཐོགས་དང་དེ་ལ་མིང་ཙམ་གྱིས་རྟེན་འབྲེལ་འགྲིག་ཅིང་༔ མིང་ཐོས་པ་ཙམ་གྱིས་ཀྱང་འགྲོ་བ་སེམས་ཅན་ཐམས་ཅད་ལ་ཕན་ཐོགས་པ་ཞིག་འོང་བར་འདུག་ཅེས་གསུངས་པ་དང་༔ པཎྜི་ཏ་རྣམས་དང་དགེ་འདུན་དཔོན་སྐྱ་རྣམས་དང་༔ ཁྲོམ་ཚོགས་འབུམ་ཚོ་གསུམ་ཙམ་འདུག་པ་ཐམས་ཅད་ཀྱིས་དེ་ལེགས་སོ་ཟེར་ནས་དེ་ཕྱིན་ཆོད་ནས་འཛམ་བུའི་གླིང་དུ་ལབ་ཀྱི་སྒྲོན་མ་ཞེས་པར་གྲགས་སོ༔ དེར་འདུས་པའི་ཁྲོམ་ཚོགས་རྣམས་ཀྱིས་ཀྱང་ལབ་སྒྲོན་མ་ཟེར་ཞིང་༔ ཐམས་ཅད་ཀྱིས་ལབ་སྒྲོན་མ་ལ་གཟིགས་མོ་བལྟས་པས་དེར་འདུས་པའི་ཚོགས་པ་རྣམས་ཀྱང་དགའ་ཞིང་མགུ་ནས༔ དད་ཅིང་མོས་པས་སྨོན་པ་རྒྱ་ཆེན་པོ་བྱས་སོ༔

དེ་ནས་མངའ་བདག་རྒྱལ་པོས་ལབ་སྒྲོན་གྱི་ན་བཟའ་དང་མཆིལ་ལྷམ་རྣམས་བརྗེས་ནས་ན་བཟའ་གསར་པ་ཕྱི་ནང་འཛོམས་པ་ཞིག་མཆིལ་ལྷམ་དང་བཅས་པ་གསོལ་ནས༔ རྙིང་པ་རྣམས་རྒྱལ་པོ་ཁོང་རང་གི་དད་རྟེན་ལ་བཞག་པ་དང་༔ དེ་ནས་རྒྱལ་པོ་ཆོས་ཟླ་ཡབ་ཡུམ་འཁོར་བཅས་ལ་རྟ་གསུམ་དང་༔ དེ་ལ་སོགས་པའི་སྣ་སྦོམ་སུམ་ཅུ་རྩ་གཅིག་གནང་བར་མཛད་ནས་འདི་གསུངས༔ ཁྱོད་དཔོན་གཡོག་རྣམས་ཀྱིས་བུ་མོ་ལབ་སྒྲོན་མ་འདི་གར་ཐོད་ཐོད་དུ་མ་བཏང་༔ མི་ངན་སྡིག་ཅན་དང་འཕྲད་ནས་གྲིབ་ཕོག་དོགས་ཡོད་པས་ཉ་ར་ལེགས་པོར་མཛོད་དང་༔ རང་རེ་བོད་གངས་ཅན་པ་ཐམས་ཅད་ལ་ཕན་ཐོགས་ངེས་པ་ཞིག་འདུག་ཅེས་གསུངས༔ དེ་ནས་རྒྱལ་པོ་ཡབ་ཡུམ་འཁོར་བཅས་རྣམས་མར་བྱོན་པས་ཡུལ་ངམ་ཤོད་མཚོ་མེར་གྱི་གཙུག་ལག་ཁང་དུ་ཕྱིན་པ་དང་༔ ལོ་ལྔའི་བར་དུ་ཡུམ་འབུམ་ལྕམ་མ་དང་༔ ལབ་སྒྲོན་མ་ཡུམ་སྲས་གཉིས་ཀ་སྒོ་བཅད་ནས་རྒྱས་འབྲིང་རྣམ་གསུམ་ལ་ཞལ་ཐོན་བྱེད་ཅིང་བཞུགས་པས༔ ལབ་སྒྲོན་མ་དགུང་ལོ་བཅུ་བཞེས་པའི་དུས་སུ་ཉིན་རེ་བཞིན་དུ་བརྒྱད་སྟོང་པ་དུམ་པ་བཞི་རེ་ཚར་བར་བྱུང་༔ དགུང་ལོ་བཅུ་གསུམ་བཞེས་ནས་ཉིན་རེ་བཞིན་དུ་དུམ་པ་བརྒྱ་རེ་ཚར་བར་བྱུང་ངོ་༔ དེ་ལ་སོགས་པའི་བློ་སྐྱེད་དང་དག་སྣང་ལྷའི་ཞལ་གཟིགས་དང་ལུང་བསྟན་མང་དུ་བྱུང་སྟེ༔ ལབ་ཕྱི་དབྱེའི་གང་བར་ངམ་ཤོད་མཚོ་མེར་གྲོང་ཁྱེར་གྱི་དབུས་སུ་མཁར་ར་ཕོ་བྲང་རིན་ཆེན་ལྷན་གྱིས་གད་འབྱམས་ཆེན་པོའི་ཤར་ཕྱོགས༔ གཟིམ་ཁང་གསལ་བ་ཁ་ཏོག་རྩེའི་འོད་འབར་ནང་དུ༔ རྒྱལ་བའི་ཡུམ་ཆེན་ལབ་ཀྱི་སྒྲོན་མ་སྐུ་འཁྲུངས་བའི་འཁྲུངས་ཚུལ་དང་༔ ཡབ་ཀྱིས་མཚན་བརྟག་ཚུལ་དང་༔ མངའ་བདག་གུ་གེ་རྒྱལ་པོས་མཁའ་འགྲོ་མའི་མཚན་བརྟག་ཚུལ་དང་༔ རྒྱལ་པོས་ལབ་སྒྲོན་དུ་མཚན་གསོལ་ཚུལ་ལ་སོགས་པ་སྟེ་ལབ་སྒྲོན་དགུང་ལོ་བཅུ་གསུམ་བར་གྱི་རྣམ་ཐར་ཏེ་རྣམ་གྲངས་ལྔ་པའོ༔

རྣམ་གྲངས་དྲུག་པ།

དེ་ནས་དགུང་ལོ་བཅུ་གསུམ་ལོན་པའི་དུས་སུ་ཡུམ་དྲུག་ཅུ་རེ་གཅིག་ལ་བྱོན་ནས་སྐུ་གཤེགས་ནས་མེ་ཏོག་གི་ཆར་དང་འཇའ་འོད་ཀྱི་གུར་ལ་སོགས་པའི་ཕྱི་ནང་གི་ལྟས་བཟང་པོ་མཐའ་ཡས་པ་རྣམས་བྱུང་ངོ་༔ དེ་ནས་སྲས་པོ་གཉིས་དང་སྲས་མོ་གཉིས་དང་བཞི་ཡབ་སྲས་ལྔ་པོས་སྟོན་ཤིག་དང་གཤེགས་རྫོངས་བསམ་གྱིས་མི་ཁྱབ་པར་བྱས་སོ༔ ཡུམ་མཁའ་འགྲོ་མ་རྣམས་ཀྱིས་བསུས་ནས་དག་པ་མཁའ་སྤྱོད་དུ་གཤེགས་སོ༔ དེ་ནས་ལབ་སྒྲོན་དགུང་ལོ་བཅུ་གསུམ་བཞེས་ནས༔ སྟོན་མཚོ་རིན་ཆེན་འབུམ་གྱིས་ཁྲིད་ནས་བླ་མ་ཨ་སྟོན་པའི་དྲུང་དུ་ཕྱིན་པས་བླ་མའི་ཞལ་ནས་འབུམ་མེ་ཁྱོད་ཀྱི་ནུ་མོ་འདི་ལ་མཁའ་འགྲོ་མའི་མཚན་རྟགས་ཐམས་ཅད་ཚང་ནས་འདུག་ཅིང་བུ་མོ་འདི་ཡི་གེ་ལ་མཁས་པར་གྲགས་པས༔ ཡི་གེ་དུམ་པ་ཞིག་ལྟ་བཅོལ་དགོས་གསུངས་ནས་བརྒྱད་སྟོང་པ་ཞིག་ཀློག་བཅོལ་བས༔ ནས་བྲེ་ལྔ་འཐག་པ་དང་མཉམ་དུ་བརྒྱད་སྟོང་པ་ཚར་གཅིག་ཐོན་ཏེ་བླ་མ་ཨ་སྟོན་པས་ཨ་ལ་ལ༔ བུ་མོ་འདིས་སྐད་འགྱུར་མང་པོ་མི་འདྲ་བ་བརྒྱད་ཀྱི་སྒོ་ནས་ཀློག་པར་འདུག་པས་འདི་ལ་ཀློག་མཁན་གྱི་དྲ་ཐོག་ཆོད་པ་ཞིག་བྱུང་ནས་འདུག༔ ད་འདི་ལ་དོན་བཤད་པར་བྱ་དགོས་ཞེས་གསུངས་པ་དང་༔ ལོ་གསུམ་ལ་སྟོན་པའི་དྲུང་དུ་ཨ་ཅེ་རིན་ཆེན་འབུམ་དང་ལྷན་དུ་བསྡད་པ་ལ༔ བླ་མ་ཨ་སྟོན་པའི་ཞལ་ནས་ཕ་རོལ་ཏུ་ཕྱིན་པ་དྲུག་ས་བཅུ་ལམ་ལྔའི་ཚུལ་དུ་འཆད་པས༔ དེ་ལ་ལབ་སྒྲོན་གྱིས་དོན་ཐམས་ཅད་གོ་སྟེ༔ སྡེ་སྣོད་གསུམ་གྱི་དོན་བཤད་པ་ལ༔ བླ་མ་སྟོན་པ་རྣམས་དང་༔ མཁས་བཙུན་དགེ་བའི་བཤེས་གཉེན་རྣམས་དང་༔ ཡོན་ཏན་ཐམས་ཅད་དང་ལྡན་པ་སུས་ཀྱང་ལབ་སྒྲོན་ལ་གླགས་མི་རྙེད་པར་བྱུང་བས༔ བླ་མ་ཨ་སྟོན་པའི་ཞལ་ནས་ཇོ་མོ་ལབ་སྒྲོན་མ་ཁྱོད་ཀྱི་སློབ་དཔོན་ད་ངས་མི་ནུས་པར་འདུག་པས༔ ད་ཁྱོད་རང་གཡོ་རུ་གྲྭ་ཐང་དུ་གྲའི་རྡོ་ཕོ་བྲང་ཆེན་མོ་ཞེས་བྱ་བ་ན་བླ་མ་གྲྭ་པ་མངོན་ཤེས་ཅན་ཞེས་བྱ་བ་མཁྱེན་པ་དང་ལྡན་པ༔ ཡོན་ཏན་ཐམས་ཅད་དང་ལྡན་ཞིང་སྡེ་སྣོད་ཐམས་ཅད་ལ་ཟབ་པར་མཁྱེན་པའི་སྟོན་པ་གཅིག་གིས་གྲྭ་པ་མང་པོ་སྐྱོང་ཞིང་འཆད་ཉན་བྱེད་པ་ཞིག་ཡོད་པས༔ ཁྱོད་དེར་སོང་ལ་སྡེ་སྣོད་ཕྱི་ནང་གསང་གསུམ་གྱི་སྒྲོ་འདོགས་ལེགས་པོར་ཆོད་ཅིག་ཅེས་གསུངས་པ་དང་༔

ལབ་སྒྲོན་དགུང་ལོ་བཅུ་དྲུག་བཞེས་པས་ཕུ་མོ་ཨ་ཅེ་འབུམ་མེ་དང་འགྲོགས་ནས་གྲྭ་ཐང་དུ་བྱོན་པས་བླ་མ་གྲྭ་པ་མངོན་ཤེས་ཅན་གྱི་དྲུང་དུ་ཕྱིན་པས་བླ་མའི་ཞལ་ནས་རིན་ཆེན་འབུམ་ཁྱོད་ཀྱི་ནུ་མོ་ཡི་གེ་ལ་མཁས་པ་ཞིག་ཡོད་ཟེར་བ་དེ་འདི་ཡིན་ནམ་གསུངས་པས༔ རིན་ཆེན་འབུམ་གྱིས་འདི་ཡིན་ལགས་ཞུས་པས༔ འོ་ན་ངའི་མཆོད་གནས་དང་གང་མཁས་ཤིག་ཚད་དགོས་གསུངས་པས་བླ་མ་གྲྭ་པ་ལ་རྒྱ་ཕར་ཕྱིན་དྲུག་འགྱུར་མཁན་ཞེས་བྱ་བའི་སྐད་འགྱུར་མི་འདྲ་བ་དྲུག་གི་སྒོ་ནས་འབུམ་བཀླགས་པས་ཉིན་རེ་བཞིན་དུ་འབུམ་དུམ་པ་བཞི་རེ་ཚར་བ་ཞིག་ཡོད་པས༔ གཙང་དབུས་གཉིས་ན་གྲགས་ཆེ་བའི་མཆོད་གནས་དེ་དང་ཇོ་མོ་ལབ་སྒྲོན་གཉིས་ཀ་ལྷན་ཅིག་ཏུ་ཁྲི་བརྩེགས་ཏེ༔ ཉིན་ཞིག་མཉམ་པོར་བཞག་ནས་འབུམ་ཀློག་བཅོལ་བས༔ རྒྱ་ཕར་ཕྱིན་དྲུག་འགྱུར་མཁན་གྱིས་དེ་ནུབ་ཉི་མར་རྒལ་བ་དང་མཉམ་དུ་པོ་ཏི་བཞི་ཚར་རོ༔ ལབ་སྒྲོན་གྱིས་དེའི་ཁནངས་ཉི་མ་རྩེ་ཤར་བ་ནས་འབུམ་ཀློག་སྟེ་སྒྲ་རེ་དང་དོན་རེ་སྤྲད་ནས་བླ་མ་ལ་ཕུལ་ཞིང་༔ སྐད་འགྱུར་མི་འདྲ་བ་བརྒྱད་ཀྱི་སྒོ་ནས་འབུམ་བཀླགས་པས༔

དེ་ནུབ་ཉི་མ་དགོང་མོ་ནས་འབུམ་དུམ་པ་བཅུ་གཉིས་པོ་གླེགས་ཐག་དང་བཅས་པ་ཚར་ཏེ༔ བླ་མ་གྲྭ་པའི་ཞལ་ནས་ཨ་ལ་ལ་ཇོ་མོ་ཆུང་ཆུང་ལབ་སྒྲོན་མ་འདི་ནི༔ རྒྱ་ཕར་ཕྱིན་དྲུག་འགྱུར་མཁན་བས་སྐད་འགྱུར་གཉིས་ཀྱི་ལྷག་ཅིང་ལྕེ་ལྡབ་ལ་ནི་རྒྱ་ཕར་ཕྱིན་དྲུག་འགྱུར་མཁན་ཉེ་སར་ཡང་མི་འདུག་པས་ད་ཇོ་མོ་དཔོན་ཆུང་མ་ལབ་སྒྲོན་འདི་ལ་ངའི་བླ་མཆོད་བྱེད་དགོས་གསུངས༔ འབུམ་མེ་ན་རེ༔ ཨ་སྒྲོན་ངེད་རང་གཉིས་སྒྲུབ་པ་བྱེད་ནས་མཁའ་སྤྱོད་དུ་ཨེ་འགྲོ་ཟེར་བ་ལ༔ ལབ་སྒྲོན་གྱི་ཞལ་ནས་ན་རེ༔ ང་ནི་སེམས་ཅན་ཐམས་ཅད་ཀྱི་དོན་རྒྱ་ཆེན་པོར་བྱེད་དགོས་པར་ཡོད་པས་ད་ལྟ་མི་འགྲོའོ༔ ཁྱོད་རང་མཁས་སྤྱོད་དུ་འགྲོ་བར་འདོད་ན་སྒྲུབ་པ་མྱུར་དུ་གྱིས་ལ་ཁམས་བདེ་བར་མཁའ་སྤྱོད་དུ་གཤེགས་དང་ངའི་འགྲོ་དོན་རྫོགས་ནས་དེར་མཁའ་སྤྱོད་དུ་འོང་གིས༔ དེ་ནས་ཁྱོད་དང་འཕྲད་པར་བྱེད་དོ་ཟེར་བ་དང་༔ སྟོན་མཚོ་རིན་ཆེན་འབུམ་གྱིས་སྒྲུབ་པ་ལོ་གསུམ་བྱས་པས་ཕུང་པོ་ལྷག་མ་མེད་པར་མཁའ་སྤྱོད་དུ་གཤེགས་སོ༔ བླ་མ་གྲྭ་པ་མངོན་ཤེས་ཅན་གྱིས་ལབ་སྒྲོན་སྣོད་ལྡན་དུ་གཟིགས་ནས་མདོ་མང་དང་༔ འབུམ་དང་༔ ཉི་ཁྲི་དང་༔ བརྒྱད་སྟོང་པ་དང་༔ མདོ་ཕྲན་མང་པོའི་ལུང་དང་དེ་རྣམས་ཀྱི་དོན་ཟབ་མོ་བཤད་པ་རྒྱ་ཆེན་པོ་མཛད་པས་ལབ་སྒྲོན་གྱིས་འབུམ་གྱི་འགྲེལ་ཆེན་དང་༔ ཉི་ཁྲིའི་འགྲེལ་ཆུང་ཡི་གེ་གཅིག་མ་ཡན་ཆོད་ཀྱི་དོན་རྣམས་བཤད་པ་ལ་མཁས་ཤིང་༔ ཉམས་རྟོགས་ཁྱད་པར་ཅན་རྣམས་རྒྱུད་ལ་སྐྱེ་བ་དང་༔ བླ་མ་ལ་རྟོགས་པ་ཕུལ་བས་བླ་མ་ཤིན་ཏུ་མཉེས་ཏེ་བླ་མའི་ཞལ་ནས་ཇོ་མོ་ཁྱོད་རྒྱས་འབྲིང་རྣམ་གསུམ་ཐུགས་སུ་ཆུད་ཅིང་མདོ་སྡེ་ལ་རང་དབང་ཐོབ་པར་འདུག༔ ངས་ནི་ཁྱོད་ཀྱི་དེ་ཙམ་བློ་ལ་ཆུད་པར་དཀའ་བར་གདའ་གསུངས༔

དེ་ནས་བླ་མས་ལི་བེར་དམར་སྨུག་པདྨ་རིས་སྦྱར་མ་གཅིག་ལ་ཕྱི་བྱས༔ ལིང་བེར་དཀར་པོ་གཅིག་ལ་ནང་བྱས་པའི་ཞྭ་མོ་ཞིག་བཟོས་པ་ལ༔ ཡར་ལ་པད་འདབ་བཅུ་བྱས་པ་ལ་གོས་ཆེན་ཁ་མ་མཉམ་པ་ལྔ་ལྔ་སྟེ༔ ཁ་དོག་སྣ་ལྔ་བྱས་པའི་རྒྱབ་ཏུ་ཁ་ལྔ༔ གཡས་གཡོན་དུ་ཁ་ལྔ་ལྔ་སྟེ༔ ཁ་བཅོ་ལྔ་བཏགས་ཏེ་དབུ་ལ་གསོལ་ཏེ༔ སྐུ་ལ་ཡང་ན་བཟའ་ཕྱི་ནང་ཆ་ཚང་བ་ཞིག་དང་༔ ཕྱིང་ལྷམ་ལེགས་པོ་ཞིག་དང་བཅས་པ་གསོལ་ལོ༔ གདན་འབོལ་སུམ་བརྩེགས་པའི་སྟེང་དུ་གྲུམ་ཙེ་གསར་པ་ཞིག་བཏིང་བའི་གདན་ལ་བཞུགས་པར་ཞུས་ནས༔ བླ་མ་གྲྭ་པའི་ཞལ་ནས་ད་དཔོན་ཆུང་མ་ངའི་བླ་མཆོད་བྱེད་ནས་ལོ་བཞིར་བཞུགས་པར་མཛོད་ཅེས་གསུངས་ཏེ༔ མི་ཚེ་གཅིག་ཏུ་བཞུགས་བཅོལ་ལོ༔ དེ་ནས་དར་ཞྭ་དེ་མནབས་པས་སྐེད་པ་ཡན་ཆད་དུ་ལྗང་དར་སྔོན་དམར་གྱིས་ཁེབ་ཅིང་དབུ་སྐྲ་ཡང་ཟིལ་བུ་ལ་སོགས་པ་འདབ་ནོན་ཅིང་༔ རྩེ་མོ་སྐེད་པར་སླེབ་པ་ལ༔ དེ་ལས་རིང་དུ་ཡང་མི་སྐྱེ་ཞིང་དགུང་ལོ་བཅུ་དྲུག་ནས་སྐྱེ་ཐག་ཆོད་པའི་ཚུལ་དང་༔ དབུ་སྐྲ་ཡང་དེའི་སྔོན་དང་༔ ཕྱི་དང་༔ གང་ལ་བཀྲུ་བ་དང་༔ བཤད་པ་དང་དེ་ལ་སོགས་པའི་སྐྲའི་ལས་བྱེད་མ་མྱོང་ཡང་༔ སྐྲ་ལ་ཆུན་བུ་དང་༔ ལིང་བ་དང་༔ འཕྱིང་བ་དང་གྲུག་པ་ལ་སོགས་པའི་སྐྱོན་མེད་ཅིང་བཤད་པ་ལྟར་སིལ་བུ་ཟིལ་ལི་ལི་བ་ཤིན་ཏུ་ནག་ཅིང་སྣུམ་ལ་འཇའ་འོད་ཆགས་པ་དང་༔ དར་སྔོ་དམར་རྣམས་འདྲེས་ནས་འཇའ་ཚོན་འཁྲིགས་པ་ལྟར་བཀྲག་དཔུང་ངེ་མཛེས་པར་འདུག་སྟེ༔ བླ་མའི་ཞལ་ནས་དཔོན་ཆུང་མ་ལབ་སྒྲོན་འདིའི་ཞྭ་ཆུང་འདི་གྱོན་ཙ་ན་ཤིན་ཏུ་མཛེས་པར་འདུག་གསུངས་པ་དང་༔

དེ་ལ་བརྟེན་ནས་ཁོང་རང་གི་གྲྭ་སྐོར་རྣམས་དང་ཡུལ་མི་གཉེན་སྡེ་ཐམས་ཅད་ཀྱིས་ཇོ་མོ་ཞྭ་ཆུང་མ་ཟེར་ཞིང་སྨོན་པ་བྱས་པས་དེ་ཕྱིན་ཆད་ནས་ཡུལ་ཁམས་ཐམས་ཅད་དུ་ཇོ་མོ་ཞྭ་ཆུང་མ་ཞེས་པར་གྲགས་སོ༔ དཔོན་ཆུང་མ་ལབ་སྒྲོན་ནི་ཚུལ་ཚགས་ཤིན་ཏུ་དམ་ཞིང་གཙང་སྦྲ་ཤིན་ཏུ་ཆེ་ཞིང་༔ ལུས་ངག་ཡིད་གསུམ་བསྙེན་ཞིང་བཙུན་ནས་བག་ཡོད་པའི་ངང་ཚུལ་དང་ལྡན་པར་དགེ་འདུན་གྱི་གྲལ་ལ་གནས་ཤིང་༔ ཡུལ་པའི་གསེབ་ཏུ་འགྲོ་མི་སྤྲོ་ཞིང་དགོན་པ་དང་རི་ཁྲོད་རྣམས་སུ་འདུག་པ་ལ་སྤྲོ་ཞིང་༔ རྟག་ཏུ་དགོན་པ་དང་རི་ཁྲོད་རྣམས་སུ་འདུག་པ་དང་༔ བླ་མ་དང་དགེ་འདུན་གྲྭ་སྡེ་རྣམས་ལ་ཤིན་ཏུ་གུས་ཤིང་དད་པ་བྱུང་ངོ་༔ དགེ་འདུན་གྲྭ་སྡེ་རྣམས་དང་རྒྱལ་ཁམས་གྱི་ཡུལ་མི་མཐོང་བ་དང་༔ ཐོས་པ་ཐམས་ཅད་ཀྱིས་ཀྱང་དཔོན་མོ་ཞྭ་ཆུང་མ་ལབ་སྒྲོན་ལ་དད་ཅིང་སྨོན་པ་དང་༔ སྙན་པ་མཐའ་ཡས་པ་གྲགས་པར་བྱུང་ངོ་༔ དེ་ནས་ལབ་སྒྲོན་གྱིས་བླ་མ་གྲྭ་པ་མངོན་ཤེས་ཅན་གྱི་བླ་མཆོད་ལོ་བཞི་བྱེད་པར་དམ་བཅས་ཏེ༔ བླ་མ་གྲྭ་པའི་མཆོད་ཁང་ནང་དུ་བཞུགས་པའི་ཚེ་ནངས་ཤིག་ཐོ་རངས་ཁ་ལ༔ མཁའ་འགྲོ་མ་སེང་གེའི་གདོང་པ་ཅན་ཞིག་བྱུང་ནས་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་ལགས༔ དམ་པ་སངས་རྒྱས་རིན་པོ་ཆེ་དེ་ནི་དག་པ་མཁའ་སྤྱོད་དུ་གཤེགས་ལ་ཁད་ནས་ཡོད་ཁྱེད་བློ་བདེ་བ་ཨེ་ཡིན༔ སེང་གེ་འདི་ལ་ཞོན་ལ་གཤེགས་ཤིག་ཟེར་ནས་ནམ་མཁའ་ནས་སེང་གེ་དཀར་མོ་ཞིག་ལ་མཁའ་འགྲོ་དེས་སྣ་ཁྲིད་ནས་འདུག་པས༔ ལབ་སྒྲོན་དེ་མ་ཐག་ཏུ་སེང་གེ་ལ་ཞོན་ནས་རྫུ་འཕྲུལ་གྱིས་ནམ་མཁའ་ལ་མཁའ་འགྲོ་མ་དེས་སྣ་དྲངས་ནས་བྱོན་པས་ཐོགས་པ་མེད་པར་བལ་པོར་སླེབ་ཏེ༔

དེ་ལ་རྒྱ་གར་ནས་དམ་པ་སངས་རྒྱས་རིན་པོ་ཆེ་དང་དམ་པ་ནག་ཆུང་བྱ་བ་གཉིས་ཡོད་པ་དེ་ཚུར་བོད་དུ་བྱོན་པ་ལ་བལ་པོར་སླེབས་པས༔ བལ་པོའི་ལུང་པ་ཞིག་ཏུ་ཕྱིན་པས་མི་ཕོ་མོ་ཐམས་ཅད་ནད་ཁམས་བཞིས་ཟིན་ནས་འདུག་པས༔ ཁོང་རྣམ་གཉིས་ཀྱིས་ཁྱེད་རྣམས་ལ་ནད་དྲག་པོ་འདི་འདྲ་ཅི་ལ་བྱུང་བ་ཡིན་བྱས་པས༔ དེ་རྣམས་ཀྱིས་ན་རེ༔ ངེད་ཚོའི་ལུང་ཕུ་ཡ་ཀི་ན་གླང་པོ་ཆེ་གཅིག་ཤི་ནས་དེའི་རོ་དེ་ཆུ་ནང་དུ་ལྷུང་ནས་ཡོད་པས༔ གླང་པོ་ཆེ་དེའི་ཁ་ཆུ་ཆུ་ནང་དུ་སོང་བ་དེ་ངེད་རྣམས་ཀྱིས་འཐུང་བས་འདི་ལྟར་བྱུང་བ་ཡིན་ཟེར་རོ༔ དེ་ནས་དམ་པ་རིན་པོ་ཆེ་ན་རེ༔ ངེད་རང་རྣམ་གཉིས་ཀྱིས་གླང་པོ་ཆེ་དེ་ཕར་ཁ་ལ་བསྐྱལ་ན་འཐད་དམ་ཟེར་ནས༔ དམ་པ་ནག་ཆུང་གིས་དེ་ལྟར་བྱས་ན་འཐད་དོ་ཟེར་རོ༔ དེ་ནས་དམ་པ་རིན་ཆེན་པོ་ཆེས་འོ་ན་ཁྱོད་གདམས་ངག་ལ་མཁས་པ་ཡིན་པས་གླང་པོ་ཆེ་ཕར་ཁ་ལ་སྐྱོལ་དང་༔ ངས་དེ་ཚེ་ཁྱེད་ཀྱི་རྩུད་པུའམ་ཙུད་པུ་ཉ་ར་བྱེད་ཟེར་བས༔ ནག་ཆུང་ན་རེ༔ ངས་དེ་མི་འོང་ལགས༔ ཁྱེད་འགྲོ་བ་སེམས་ཅན་ཐམས་ཅད་ཀྱི་དོན་ལ་བོད་དུ་བྱོན་པ་ཡིན་པས་ཁྱེད་ཀྱིས་གླང་པོ་ཆེ་ཕར་ཁར་སྐྱོལ་དང་ངས་དེ་ཚེ་ཁྱེད་ཀྱི་རྩུད་པུ་སྲུང་བར་བྱེད་ཟེར་བས༔ དམ་པ་སངས་རྒྱས་རིན་པོ་ཆེ་ན་རེ༔ འོ་ན་ངའི་རྩུད་པུ་འདི་བྱ་ཁྱི་ལ་ལོངས་སྤྱོད་དུ་མ་འཇུག་ལ༔ ཁྱོད་ཀྱིས་ཉ་ར་ལེགས་པོར་གྱིས་ཤིག་གསུངས་ནས༔ དམ་པ་རིན་པོ་ཆེའི་སྐུ་ལུས་ནི་དཀར་གསལ་མདངས་དང་ལྡན་པ་དབུ་སྐྲ་ཡང་ནག་ལ་སྣུམ་པ་སྐུ་རྒྱབ་ཁེབ་པ་མཚན་བཟང་པོ་སུམ་ཅུ་རྩ་གཉིས་ཀྱིས་སྤྲས་པ་སྐུ་ལྟ་བས་ཆོག་མི་ཤེས་པ་ཞིག་ཡོད་པ་དེ་ནི༔ ཞབས་རྡོ་རྗེའི་སྐྱིལ་མོ་ཀྲུང་དུ་སྐུ་གཟི་བརྗིད་དང་ལྡན་པ་ཁྲུ་གང་ཙམ་དུ་ནམ་མཁའ་ལ་འཕགས་ནས་བཞུགས་བཅོལ་ཏེ༔ ཐུགས་ནི་གླང་པོ་ཆེའི་གསོབ་ཏུ་ཞུགས་ནས་ཕར་ཁར་བསྐྱལ་བ་སྟེ༔

དེའི་ཚེ་དམ་པ་ནག་ཆུང་གིས་ཁོང་རང་གི་གསོབ་དེ་ལྟ་ན་མི་སྡུག་པ་ཞིག་ཡོད་པ་དེ་གན་རྐྱལ་དུ་ཧྲལ་ཏེ་འགྱེལ་ནས་བསྐུར་ཏེ༔ དམ་པ་སངས་རྒྱས་རིན་པོ་ཆེའི་གསོབ་ཏུ་བཞུགས་ཏེ༔ དམ་པའི་གདུང་རྒྱ་གར་དུ་ཁྱེར་ནས་སོང་བས་དམ་པ་ནག་ཆུང་བྱ་བྱེད་ནི་མང་༔ སྤྱོད་པ་ནི་ཤིན་ཏུ་རྩིང་༔ སྐུ་ལུས་ནི་ལྟ་ན་མི་སྡུག་པ་ཞིག་ཡོད་པས༔ རྒྱ་གར་བ་ཐམས་ཅད་ཀྱིས་ན་རེ༔ འདིའི་སྐུ་ལུས་ནི་དམ་པ་རང་དུ་འདུག་པས༔ སྤྱོད་པ་ནི་ནག་ཆུང་རང་འདུག་པས་འདིས་དམ་པའི་སྐུ་ལུས་ཐོབ་པར་བྱུང་བ་ནི་མིན་ནམ་ཟེར་སྐད་དོ༔ དེར་དམ་པ་སངས་རྒྱས་རིན་པོ་ཆེ་དེ་གླང་པོ་ཆེའི་གསོབ་ཕར་ཁར་བསྐྱལ་ནས་ཚུར་སླེབས་པས༔ དམ་པ་རང་གི་གདུང་མི་འདུག་པས་ཐུགས་དགོངས་ལེགས་པོར་བཏང་བས་ག་རེ་འགྲོ་བ་སེམས་ཅན་ཐམས་ཅད་ཀྱི་དོན་རྒྱ་ཆེན་པོ་བྱེད་པ་ལ་སེམས་ཅན་ཐམས་ཅན་དད་ཅིང་མོས་པར་བྱེད་པའི་རྟེན་ཞིག་དགོས་པས་མི་འདུག་པས༔ ད་ཁོང་གི་གསོབ་ལྟ་ན་མི་སྡུག་པ་འདིའི་ནང་དུ་ཞུགས་པས་འགྲོ་བ་སེམས་ཅན་གང་གིས་ཀྱང་དད་པ་དང་མོས་པ་མི་འོང་བས་ངས་ད་ལན་སེམས་ཅན་གྱི་དོན་མི་འོང་པར་འདུག་པས་ལན་ཅིག་ལ་དག་པ་མཁའ་སྤྱོད་དུ་འགྲོ་དགོས་དགོངས་ཙ་ན༔ དེ་མ་ཐག་ཏུ་མ་ཅིག་གི་ཐུགས་དགོངས་ལ་དམ་པ་རིན་པོ་ཆེ་འདི་ནི་དག་པ་མཁའ་སྤྱོད་དུ་གཤེགས་ན༔ སེམས་ཅན་ཐམས་ཅད་ཀྱི་སྐལ་པ་ཆད་པ་ཡིན་པས་མི་འོང་བར་འདུག༔ དེ་ལས་དམ་པ་སངས་རྒྱས་རིན་པོ་ཆེའི་སྐུ་གདུང་ལ་བསྟོད་པ་ཞིག་བྱས་ན་ནག་ཆུང་གི་གསོབ་ཏུ་ཐུགས་ཞུགས་ནས་འོང་དགོངས་ཏེ༔ དམ་པའི་སྐུ་ལ་བསྟོད་པ་འདི་མཛད་དོ༔ ཧཱུྃ་ནག་པོ་ཆེན་པོ་གཟི་མདངས་ཅན༔ སྐུ་སྟོད་སེང་ཆེན་འགྱིང་བ་འདྲ༔ དེ་བདུད་བཞི་ཟིལ་གྱིས་གནོན་པའི་བརྡ༔ རྐེད་པ་རྡོ་རྗེ་འཁྲུངས་པ་འདྲ༔ དེ་འཁྲུལ་གཞི་རྩད་ནས་ཆོད་པའི་བརྡ༔ སྐུ་སྨད་རྨ་བྱ་འཛུམ་པ་འདྲ༔ ཞེས་པ་ལ་སོགས་པའི་བསྟོད་པ་ཚར་གཅིག་མཛད་པས༔

དམ་པ་སངས་རྒྱས་རིན་པོ་ཆེས་ཐུགས་དགོངས་ལེགས་པོར་བཏང་སྟེ༔ ད་ང་རང་གི་གསོབ་ལྟ་ན་སྡུག་པ་སེམས་ཅན་ཐམས་ཅད་དད་ཅིང་མོས་པའི་རྟེན་ཁྱད་པར་ཅན་ཞིག་ཡོད་པ་དེ་ནི་མི་འདུག་སྟེ༔ དུས་གསུམ་གྱི་སངས་རྒྱས་ཐམས་ཅད་ཀྱི་ཡུམ་ཀུན་ཏུ་བཟང་མོ་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་འདིས་བསྟོད་པ་འདི་མཛད་ནས་བྱུང་བས༔ འདིའི་གསུང་འདི་བཟློག་པ་ཡེ་ནས་མི་རིག་གི་དགོངས་ནས་ནག་ཆུང་གི་གསོབ་ཏུ་དམ་པའི་ཐུགས་ཞུགས་ནས་བོད་དུ་བྱོན་པའོ༔ དེ་ནས་ཉི་མ་རྩེ་ཤར་ཙམ་དུ་ལབ་སྒྲོན་གནས་མལ་དུ་ཕེབས་ཏེ་འབུམ་ལ་ཞལ་ཐོན་མཛད་ཅིང་བཞུགས་པས་ཉིན་ཞིག་མི་ཀུན་གྱིས་ན་རེ༔ རྒྱལ་གྱི་ལྷ་ཁང་དུ་ཨ་ཙ་ར་ནག་པོ་ཞིག་ཕྱིན་ནས་རྒྱ་གར་གྱི་པོ་ཏ་རི་ཡི་བྲག་ཕུག་བྷ་ཏྲ་ཡ་ན་སྒོམ་པའི་པཎྜི་ཏ་དོན་གྲུབ་བཟང་པོ་འདིར་སྐྱེ་བ་བཞེས་ནས་ལབ་སྒྲོན་དུ་གྲགས་ཏེ༔ དེང་སང་གྲྭ་ཐང་ན་ཡོད་པ་ལ་མཇལ་དུ་འགྲོ་བ་ཡིན་ཟེར་བའི་མངོན་ཤེས་མཁྱེན་པ་བ་ཞིག་འདུག་ཟེར་སྐད་དོ༔

དེའི་ནུབ་མོ་ཇོ་མོ་ལབ་སྒྲོན་གྱི་རྨི་ལམ་དུ་མཁའ་འགྲོ་མ་དཀར་མོ་ཞིག་བྱུང་ནས་ཇོ་མོ་ལབ་སྒྲོན་མ་རྒྱ་གར་ནས་ཨ་ཙ་ར་ནག་པོ་ཞིག་བོད་འདིར་བྱོན་ནས་ཡོད་པས་སང་ཉི་མ་རྩེ་ཤར་དུ་ཁྱེད་ལ་མཇལ་དུ་འོང་བ་ཡོད་ཟེར་ནས་འོད་དུ་ཡལ་ནས་ཐལ་ལོ༔ དེ་ནས་ལབ་སྒྲོན་གྱི་ཐུགས་དགོངས་ལ་ག་རེ་ང་ལ་རྒྱ་གར་ནས་ཨ་ཙ་ར་མཇལ་དུ་འོང་བ་དེ་ཅི་ཡིན་ཨང་དགོངས་ཙ་ན་ཡང་མཁའ་འགྲོ་མ་དེར་བྱུང་ནས་ན་རེ༔ ཁྱོད་ཀྱི་མཚན་ནི་ཇོ་མོ་ལབ་སྒྲོན་མ་བྱ་བ་ཡིན༔ ཨ་ཙ་ར་དེ་དམ་པ་སངས་རྒྱས་བྱ་བ་ཡིན་ཟེར་ནས་ཡལ་ནས་ཐལ་ལོ༔

དེ་ནས་ལབ་སྒྲོན་མནལ་སངས་ཙ་ན་ཅི་ཡང་མི་སྣང་ངོ་༔ དེ་ནས་ལབ་སྒྲོན་གྱི་དགོངས་པ་ལ་རྨི་ལམ་འཁྲུལ་པ་ཡིན་ཀྱང་བདེན་པ་ཡང་མ་བཟུང་ཙམ་ཡོད་དེ་མཆི་དགོངས་ནས༔ དེའི་ཕྱིར་ནངས་ཉི་མ་རྩེ་ཤར་ཙམ་དུ་ལབ་སྒྲོན་སྒོ་ཕྱི་རོལ་ཏུ་བྱོན་ནས་གྲའི་རྡོ་འཕྲང་ཆེན་མོ་གནས་ལ་སྐོར་བ་མཛད་པས་ཨ་ཙ་ར་དང་ཐུག་སྟེ་མཇལ་བས་ལབ་སྒྲོན་གྱིས་ཕྱག་འཚལ་ཡང་ཕྱག་མ་བཞེས་ནས་དབུ་སྐྲ་གཏུག་རེས་མཛད་པ་དང་༔ ལབ་སྒྲོན་གྱིས་དམ་པ་སངས་རྒྱས་རིན་པོ་ཆེ་བོད་དུ་བྱོན་པ་ངོ་མཚར་ཆེ་ལགས་ཞུས་པས་དམ་པའི་ཞལ་ནས་ཡེ་ཤེས་ཀྱི་མཁའ་འགྲོ་མ་ལབ་ཀྱི་སྒྲོན་མ་ཁྱོད་བོད་དུ་འགྲོ་དོན་ལ་བྱོན་པ་དེ་ལས་ཀྱང་ངོ་མཚར་ཆེ་ལ་རྗེས་སུ་ཡི་རང་ངོ་ཞེས་གསུངས་པ་དང་༔ ཡང་ལབ་སྒྲོན་གྱིས་ཞུས་པ༔ ཀྱེ་དམ་པ་སངས་རྒྱས་རིན་པོ་ཆེ་ལགས༔ ངས་འགྲོ་དོན་ཇི་ལྟར་བགྱིས་ནས་སེམས་ཅན་གྱི་དོན་ཅི་བཞིན་འབྱུང་ལགས་ཞུས་པས་ཡང་དམ་པའི་ཞལ་ནས༔ བུ་མོ་ཁྱོད་མཚང་ཡུལ་ནས་ཐོན༔ མི་ཕོད་པ་ལ་རྫིས༔ མི་ནུས་པ་ལ་ཁུར༔ འཁྲི་བ་ཆོད༔ ཞེན་པ་ཐོང་གཉན་ས་འགྲིམ༔ སེམས་ཉིད་ནམ་མཁའ་ལྟར་ཤེས་པར་གྱིས༔ གཉན་ཁྲོད་དུ་སངས་རྒྱས་རང་སེམས་ལ་ཆོད་དང་༔ ཁྱོད་ཀྱི་བསྟན་པ་ནི་མཁའ་ལ་ཉི་མ་ཤར་བ་བཞིན་དུ་འོང་བ་ཡིན་གསུངས་པ་ལ་སོགས་པའི་ལུང་བསྟན་གནང་བ་མང་དུ་མཛད་ནས་དམ་པ་ཡང་ལ་སྟོད་དུ་བྱོན་ནོ༔ ལབ་སྒྲོན་ཡང་གནས་མལ་དུ་བྱོན་ནས་མཆོད་ཁང་ནང་དུ་བྱོན་ནས་འབུམ་ལ་ཞལ་ཐོན་མཛད་ཅིང་བཞུགས་སོ༔ དེ་ཡན་ཆད་ནི་བླ་མ་གྲྭ་པའི་བླ་མཆོད་དམ་བཅས་པ་དང་དམ་པའི་ལུང་བསྟན་མཛད་པ་ནི་ལབ་སྒྲོན་དགུང་ལོ་བཅུ་གསུམ་ནས་བཅུ་དྲུག་གི་བར་གྱི་རྣམ་ཐར་ཏེ་རྣམ་གྲངས་དྲུག་པའོ༔

རྣམ་གྲངས་བདུན་པ།

དེ་ནས་ཁྱི་ལོ་ཟླ་བ་གསུམ་པའི་ཚེས་བརྒྱད་ལ་ལབ་སྒྲོན་གྱིས་བླ་མ་གྲྭ་པའི་མཆོད་གནས་བྱས་ནས་མཆོད་ཁང་ནང་དུ་ཕར་ཕྱིན་ཀློག་པ་ལ་བཞུགས་པ་དང་༔ བྱི་བ་ལོ་ཟླ་བ་དང་པོའི་ཚེས་བརྒྱད་ཀྱི་ཉིན་པར༔ སྔ་དྲོ་ཉི་མ་རྩེར་དྲོས་པའི་དུས་སུ་སྐྱོ་ཟུར་པོ་ཆེ་ཤཱཀྱ་ཡེ་ཤེས་ཀྱི་དབོན་པོ་བསོད་ནམས་གྲགས་པ་ཞེས་བྱ་བ་ཕྱི་སྡེ་སྣོད་གསུམ་ལ་མཁས་པ༔ ནང་རྒྱུད་སྡེ་བཞི་ལ་མཁས་ཤིང་ནུས་པ་ཐོན་པ་གྲྭ་ཚན་བརྒྱ་ཕྲག་མང་པོ་སྐྱོང་བ་ཞིག་ཡོད་པ་དེས་འཇིག་རྟེན་གྱི་བྱ་བ་ཐམས་ཅད་དང་༔ ཆོས་ཉན་བཤད་དང་༔ འཁོར་དང་གྲྭ་ཚན་འགའ་ཞིག་ལ་སྐྱོ་བ་ཐུན་མོང་མ་ཡིན་པ་སྐྱེས་ནས༔ དེ་རྣམས་ལ་མ་ཆགས་པར་གཅིག་པུར་ཕྱོགས་མེད་དུ་རི་ཁྲོད་མཛད་པའི་སྐྱོ་སྟོན་བསོད་ནམས་བླ་མ་ཞེས་བྱ་བ་ཞིག་ཡོད་པ་དེར་བྱོན་ནས༔ ལབ་སྒྲོན་གྱི་མཆོད་ཁང་གི་གཟིགས་སྐར་གྱི་ཐད་དུ་བཞུགས་ནས་འདི་སྐད་གསུངས༔ དཔོན་མོ་ཆུང་ཆུང་ལབ་སྒྲོན་མ༔ ཁྱོད་ཕ་རོལ་ཏུ་ཕྱིན་པའི་ཚིག་ལ་མཁས་པར་འདུག་གོ༔ དེའི་དོན་ཤེས་སམ་གསུངས་པས་ལབ་སྒྲོན་གྱིས་དོན་ཤེས་བྱས་པས༔ འོ་ན་དོན་ཤོད་དང་གསུངས་པས་ལབ་སྒྲོན་གྱིས་ཕ་རོལ་ཏུ་ཕྱིན་པའི་ས་བཅུ་དང་ལམ་ལྔའི་རྣམ་བཞག་དང་༔ ལམ་བགྲོད་ཚུལ་དང་དོན་ཉམས་སུ་བླངས་ཚུལ་དང་མཐར་ཐུག་འབྲས་བུ་སངས་རྒྱས་ཐོབ་ཚུལ་རྣམས་ཞིབ་ཏུ་བཤད་པས༔ བླ་མ་བསོད་ནམས་གྲགས་པས་ཁྱོད་ཀྱིས་དོན་གོ་ཞིང་དོན་བཤད་པ་ལ་མཁས་པར་འདུག་སྟེ༔ དོན་རང་རྒྱུད་ལ་མ་སྐྱེས་པར་འདུག་པའི་ཕྱིར༔ ལབ་སྒྲོན་གྱིས་དོན་རང་རྒྱུད་ལ་སྐྱེས་བྱ་བ་དེ་ཅི་ལྟ་བུ་ཞིག་ཡིན་ཞུས་པས༔

བླ་མའི་ཞལ་ནས༔ ཇོ་མོ་ཁྱོད་ཀྱིས་ད་ལྟ་གསུངས་པ་དེ་རྣམས་ལ་གོ་བ་ཟེར་བ་ཡིན་ཏེ༔ ཆོས་ཐམས་ཅད་ཀྱི་དོན་ཟབ་མོ་ཅི་ལྟ་བ་བཞིན་དུ་ལེགས་པོར་ཤེས་ཤིང་གོ་བ་ནི་མ་ཡིན་ཞིང་རྒྱུད་ལ་སྐྱེས་པ་ནི་མ་ཡིན་ནོ༔ དོན་ཟབ་མོ་དེ་རང་གི་རྒྱུད་ལ་སྐྱེས་ནས་འོང་ཙམ་ན༔ སྔར་གྱི་བློའི་འཛིན་སྟེང་དེ་དང་མི་འདྲ་བའི་བློ་གསར་པ་ཞིག་དྲུང་ངེ་སྐྱེས་ནས་འོང་བ་ཡིན་ནོ༔ དེའི་དུས་སུ་འཛིན་པ་ཐམས་ཅད་དང་བྲལ་བའི་བློ་ཞིག་སྐྱེས་ནས་འཛིན་མེད་དུ་ཁྲོལ་ཁྲོལ་བྱ་བྱེད་ཐམས་ཅད་དང་བྲལ་ཏེ་བྱར་མེད་ཤེས་རབ་ཆེན་པོའི་མེ་ཆེན་རྒྱས་ནས་བདག་འཛིན་མ་རིག་པའི་མུན་པ་འཇོམས་པར་བྱེད་པ་ཡིན་ནོ༔ དོན་དེའི་རྩ་བ་རང་སེམས་ལ་ག་དར་ལེགས་པོར་ཆོད་ཅིག་ཅེས་གསུངས་ནས༔ བླ་མ་བསོད་ནམས་གྲགས་པ་ཕྱིར་བྱོན་པ་དང་ལབ་སྒྲོན་གྱིས་བླ་མས་ཇི་ལྟར་གསུངས་པ་དེ་བཞིན་དུ་ཆོས་ལ་ཞལ་ཐོན་མཛད་ཅིང་དོན་ལ་སེམས་པས་བདུད་ཀྱི་ལེའུ་ཡི་ནང་ནས་དོན་ཞིག་རྙེད་ཏེ༔ སྔར་དང་མི་འདྲ་བའི་རྟོགས་པ་ཁྱད་པར་ཅན་ཞིག་རྒྱུད་ལ་སྐྱེས་ནས་བློ་ཡི་སྤྲོས་པ་ཐམས་ཅད་དང་བྲལ་ནས་བདག་མཛིན་གྱི་མདུད་པ་གྲོལ་ཏེ༔ བདག་མེད་རྟོགས་པའི་ཤེས་རབ་ཀྱི་ཉི་མ་ཤར་བས་བདག་འཛིན་གྱི་མུན་པ་ཞེས་པའི་སྒྲ་ཡང་མི་གྲགས་པར་ཐལ་ལོ༔ དེར་བདག་འཛིན་ཆོད་པའི་རྟགས་སུ་སྔར་རྒྱན་གོས་བཟང་པོ་དང་༔ ཁ་དོག་བཀྲག་མདངས་དང་ལྡན་པ་ཅན་མིན་པ་མི་གྱོན་པ་ལ་ཕྱིས་སྤྲང་གོས་དང་དུག་པོ་ལ་སོགས་གང་རྩོགས་གྱོན་པ་ཞིག་བྱུང་བས་གོས་ཀྱི་སྲེད་པ་ཆོད་པའི་རྟགས་སོ༔

སྔར་གྲོགས་མཁན་སློབ་དང་བཙུན་པའི་གྲལ་མིན་པ་མི་འདུག་པ་ལ་ཕྱིས་མི་ནག་ཕོ་མོ་དང་༔ མཛེ་སྤྲང་ལ་སོགས་པ་གང་དང་ཡང་ལྷན་ཅིག་ཏུ་འདུག་པ་ཞིག་བྱུང་བས་དེ་ནི་གྲོགས་ཀྱི་སྲེད་པ་ཆོད་པའི་རྟགས་སོ༔ སྔར་དགོན་པ་དང་རི་ཁྲོད་མིན་པ་མི་འདུག་པ་ལ་ཕྱིས་ཡུལ་གྲོང་དང་༔ ལམ་འཕྲང་མཛེ་ཁང་ལ་སོགས་པ་གང་དུ་ཡང་འདུག་པ་ཞིག་བྱུང་བས་དེ་ནི་གནས་ཀྱི་ཞེན་པ་ཆོད་པའི་རྟགས་སོ༔ སྔར་དབྱེའི་གང་བ་ལ་སོགས་དང་ལྷ་ཆོས་ཀྱི་གཡོ་རུ་གྲ་ཐང་ལ་སོགས་རྣམས་སུ་འདུག་ཅིང་གཞན་དུ་མི་འགྲོ་བ་ལ་ཕྱིས་རྒྱལ་ཁམས་ཕྱོགས་མེད་དུ་འགྲོ་བ་ཞིག་བྱུང་བས་དེ་ནི་ཡུལ་གྱི་ཕྱོགས་རེས་ཞིག་པའི་རྟགས་སོ༔ སྔར་བཟའ་བ་དཀར་གསུམ་མངར་གསུམ་ལ་སོགས་པ་བཟང་པོ་གཙང་ཤས་ཅན་མིན་པ་མི་བཟའ་བ་ལ་ཕྱིས་ཤ་ཆང་སྒོག་གསུམ་མ་གཏོགས་པའི་བཟའ་བ་གཞན་ལ་བཟང་ངན་མེད་པར་ཟ་བ་ཞིག་བྱུང་བས་དེ་ནི་ཟས་ལ་སྙེམས་ཐག་ཆོད་པའི་རྟགས་སོ༔ སྔར་རང་ལ་གཞན་གྱིས་བསྟོད་བཀུར་ལ་སོགས་བྱེད་པ་དང་༔ བདེ་བ་བརྗོད་པ་ལ་དགའ་སྤྲོ་ཡོད་པ་ལ་ཕྱིས་རང་ལ་བཤད་འབར་དང་སྒྲོ་སྐུར་འདེབས་པ་དང་༔ སྡུག་བསྔལ་དང་མི་འདོད་པའི་ཕྱོགས་ཅི་བྱུང་ཡང་དེ་ལ་ཉམ་ང་དང་༔ ཞུམ་པ་མེད་པར་བདེ་སྡུག་དང་༔ ཉེ་རིང་དང་༔ ཆགས་སྡང་དང་བཟང་ངན་ཐམས་ཅད་ཆོས་ཉིད་ཀྱི་ཀློང་དུ་མཉམ་ནས་མི་བདེ་བ་གཅིག་ཀྱང་མེད་པ་ཞིག་བྱུང་ངོ་༔ དེས་ནི་འཇིག་རྟེན་ཆོས་བརྒྱད་གཏན་ནས་སྤངས་པའི་རྟགས་དང་ཡོན་ཏན་བརྒྱ་ཕྲག་བཅུ་གཉིས་རྫོགས་པ་དང་ཐོས་པར་མཛད་པའི་ཚུལ་ལོ༔ བླ་མ་གྲྭ་པ་མངོན་ཤེས་ཅན་གྱི་བླ་མཆོད་མཛད་པའི་དུས་སུ་སྐྱོ་སྟོན་བསོད་ནམས་བླ་མས་ཕར་ཕྱིན་གྱི་ངོ་སྤྲོད་མཛད་པ་དང་༔ དགུང་ལོ་བཅུ་དྲུག་ནས་ཉི་ཤུའི་བར་གྱི་རྣམ་ཐར་ཏེ་རྣམ་གྲངས་བདུན་པའོ༔

རྣམ་གྲངས་བརྒྱད་པ།

བླ་མ་གྲྭ་པའི་བླ་མཆོད་ལོ་བཞི་མཛད་པའི་ལོ་གྲངས་ཚང་ནས་ལབ་སྒྲོན་དགུང་ལོ་ཉི་ཤུ་ལ་བྱོན་ཏེ་སྟག་ལོ་ཟླ་བ་དང་པོའི་ཚེས་བཅུ་ལ་བླ་མ་གྲྭ་པ་མངོན་ཤེས་ཅན་གྱིས་ཆོས་བཏོན་ཚར་ནས་བླ་མས་གཏང་རག་གི་གནང་བ་མཛད་ཏེ༔ ལབ་སྒྲོན་གྱིས་གནང་བ་མ་བཞེས་ནས་བླ་མ་ལ་དབང་ཞིག་ཞུ་ལགས་བྱས་པས་བླ་མ་གྲྭ་པས་རྟེན་འབྲེལ་གྱིས་མཁྱེན་པར་མཛད་ནས་ཇོ་མོ་ཁྱེད་ལ་ངས་དབང་བསྐུར་མི་ནུས་པར་འདུག༔ ཁྱེད་ཀྱིས་དབང་བསོད་ནམས་བླ་མ་ལ་ཞུས་དང་སྔོན་གྱི་སྨོན་ལམ་གྱི་རྟེན་འབྲེལ་འགྲིག་ཅིང་དབང་ལ་བར་ཆད་མེད་ཅིང་དངོས་གྲུབ་ཐོབ་པ་ཡིན་གསུངས་ནས་ལུང་བསྟན་མཛད་པ་དང་༔ ཁལ་ཤ་བུབས་བདུན༔ གོས་ཡུག་དམར་པོ་གཅིག༔ གསེར་སྲང་གང་དེ་རྣམས་བསྐུར་ནས་བཏང་ངོ་༔ དེ་ནས་ཇོ་མོ་ལབ་སྒྲོན་མ་ནི་ལན་ཅིག་ཕ་མིང་གི་ཡུལ་དུ་བྱོན་པས་མིང་པོ་ཆེ་བ་ཤཱཀྱ་རྒྱལ་མཚན་ལ་བླ་མ་གྲྭ་པ་མངོན་ཤེས་ཅན་གྱིས་ལུང་བསྟན་མཛད་པས་ངས་བླ་མ་བསོད་ནམས་གྲགས་པ་ལ་དབང་ཞིག་ཞུ་འགྲོ་བ་ཡིན་པས་ང་ལ་དབང་ཡོན་ཞིག་སྐུར་འཚལ་བྱས་པས༔ ཤཱཀྱ་རྒྱལ་མཚན་གྱིས་ནས་ཁལ་སུམ་ཅུ་བསྐུར་བ་དང་༔ སྔོན་གྱི་ཤ་བུབས་དང་གོས་ཡུག་རྣམས་ཁྱེར་ནས་སྐྱོ་སྟོན་བསོད་ནམས་བླ་མའི་དྲུང་དུ་ཕྱིན་པས༔ ང་ལ་བླ་མ་གྲྭ་པས་ལུང་བསྟན་ནས་ཁྱོད་སྐྱོ་སྟོན་བསོད་ནམས་བླ་མའི་དྲུང་དུ་སོང་ལ་དབང་ཞིག་ཞུས་གསུངས་ནས་འོང་བ་ཡིན་པས་ང་ལ་དབང་ཞིག་གནང་དགོས་ལགས་ཞུས་པས༔

བསོད་ནམས་བླ་མས་ལབ་སྒྲོན་མ་དབང་གི་སྣོད་དང་ལྡན་པའི་རྟེན་འབྲེལ་ཡོད་པར་དགོངས་ནས་ཇོ་མོ་ལབ་སྒྲོན་འདིར་བྱོན་པར་ལེགས་དེ་འདྲ་བྱས་པས་ཆོག་ཅེས་གསུངས་ནས༔ གློག་ལྷ་སྐྱབས༔ བྱ་ཁྲོམ་པ་འཛིན་ལྷ་བཟོ༔ ཞང་སྟོན་འོད་ཟེར་འབར་དང་བཞི༔ དེ་བཞི་པོ་ནི་དམ་ཚིག་ནུས་པ་སྣོད་དང་ལྡན་པར་གཟིགས་ནས་ཕ་ཇོ་བཞི༔ ལབ་སྒྲོན་དང་ལྔ་ལ་གཡེའི་གང་བར་ལྷ་ཁང་དུ་དབང་བསྐུར་བར་བརྩམས་པ་ལ༔ དེ་ཡང་དམ་པ་རིན་པོ་ཆེ་ནས་བྱུང་བའི་མདོ་ལུགས་ཀྱི་ཆོས་དབང་སེམས་ལ་བསྐུར་བར་ཞེས་བྱ་བའི་ཏིང་ངེ་འཛིན་གྱི་དབང་བཞི་ངོ་སྤྲོད་དང་༔ ནམ་མཁའ་གོ་འབྱེད་ཀྱི་དབང་བཞི་ངོ་སྤྲོད་དང་༔ ནམ་མཁའ་གོ་འབྱེད་ཀྱི་ངོ་སྤྲོད་ཤིན་ཏུ་བྱིན་རླབས་ཆེ་བའི་དབང་བསྐུར་སྔོན་དུ་མཛད་ནས༔ ཡང་དམ་པ་རིན་པོ་ཆེ་ནས་བྱུང་བའི་སྒྱུ་འཕྲུལ་ཆེན་མོ་ཞེས་བྱ་བ་མ་ཧ་མ་ཡ་ལྷ་ལྔའི་དབང་བསྐུར་མཛད་པས་སྐར་མ་རྫོགས་ཙམ་ན་དབང་གི་ཡེ་ཤེས་དབབ་པའི་ཚེ་ན་ལབ་སྒྲོན་ལ་ཡེ་ཤེས་དབབ་ནས་ལུས་ཁྲུ་དོ་ཙམ་ས་ལ་མ་རེག་པར་ཞི་བའི་གར་ཐབས་ཉི་ཤུ་རྩ་བཞི་མཛད་ནས༔ སཾ་སྐྲྀ་ཏ་ལྷའི་སྐད་ཀྱིས་གསུང་དབྱངས་ཡན་ལག་དྲུག་ཅུ་རྩ་བཞི་མཛད་ནས༔ ཐུགས་ཆོས་ཉིད་ལ་ཐོགས་པ་མེད་པར་རྡོ་རྗེ་ལྟ་བུའི་ཏིང་ངེ་འཛིན་གྱི་ཉམས་དང་ལྡན་པ་ལ་ཤེས་རབ་ཐམས་ཅད་རྫོགས་ནས་ས་གཉིས་པ་ནས་བརྒྱད་པའི་བར་གྱི་རྟོགས་པ་སྐྱེས་པའི་ཚུལ་བསྟན་ནས༔ ཁང་པའི་གྱང་དང་རྩིགས་པ་ལ་ཐོགས་པ་མེད་པར་རླུང་ལྟར་དུ་ཕྱི་རོལ་ཏུ་བུད་ནས་ནམ་མཁའ་ལ་འཕུར་ཏེ༔ བྱང་ཕྱོགས་ངོས་སུ་བྱོན་པས་བྱང་ཕྱོགས་དེ་ན་ཤིང་སྡོང་པོ་གསེར་ལྷག་ཅན་ཞེས་བྱ་བའི་ཤིང་ཞིག་ཡོད་དེ་༔ ཤིང་དེའི་རྩ་བ་ནི་ཀླུ་ལ་ཐུག༔ རྩེ་མོ་ནི་དགུང་གི་ཉི་ཟླ་ལ་ཐུག་པ༔ ཡལ་ག་ནི་དཔག་ཚད་ཁྱབ་པ་ཞིག་ཡོད་དེ༔ ཤིང་དེའི་རྩ་བ་ན་ཆུ་མིག་འོད་པོ་གནམ་ཁོལ་བྱ་བའི་དུག་ཆུ་ནག་པོ་ཤིན་ཏུ་འཇིགས་པ་ཞིག་ཡོད་དེ༔ ཆུ་དེ་ལ་ཡར་མི་ལུས་སུམ་འགྱུར་ཙམ་ནམ་མཁའ་ལ་འཕྱུར་བ༔ ཆུ་མདའ་ལ་སྐྱ་རབ་ཀྱིས་ཚུགས་པ་ཙམ་ཡོད་པ༔ ཆུ་དང་ཤིང་དེའི་ཐད་དུ་ནམ་མཁའ་ལ་བྱ་འཕུར་བ་རྣམས་ཐང་དུ་ལྷུང་ནས་འོང་བའི་དུག་ཆུ་ནག་པོ་དེ་འདྲ་བ་ཞིག་ཡོད་དེ༔

དེ་ལ་ཀླུ་བཙན་དྲག་པོ་ཟླ་བ་སྐྱོང་བྱེད་ཞེས་བྱ་བ་ཤིན་ཏུ་གདུག་རྩུབ་ཅན་ཞིག་གནས་པས༔ ས་ཕྱོགས་དེར་མི་དང་སེམས་ཅན་གཅིག་ཀྱང་མི་གནས་ཤིང་ཉེ་མི་ཕོད་པ་ཞིག་ཡོད་དེ༔ ལབ་སྒྲོན་རྫུ་འཕྲུལ་གྱིས་ནམ་མཁའ་ལ་འཕུར་ནས་སྐུ་གཅེར་བུར་དེར་བྱོན་ནས་ཆུ་མིག་དེའི་དབུས་སུ་ཤིང་དེ་ལ་སྐུ་རྒྱབ་གཏད་ནས་ཞབས་གཉིས་གར་ཐབས་སུ་བཞུགས་ཏེ༔ ཀླུ་རྒྱལ་ཟླ་བ་སྐྱོང་མཛད་ཏིང་ངེ་འཛིན་གྱིས་གཟིར་བས་ཀླུ་རྒྱལ་གྱིས་ཆོ་འཕྲུལ་མི་འདྲ་བ་འཇིགས་སུ་རུང་བ་སྣ་ཚོགས་དུ་མ་བསྟན་ཀྱང་ལབ་སྒྲོན་ལ་གླགས་མ་རྙེད་ནས་ཡུལ་ཁམས་གཞན་དུ་བརྒྱུགས་ནས་ལྷ་འདྲེ་སྟོབས་ཆེན་རྣམས་དམག་ལ་བསྐུལ་ནས༔ ལྷ་འདྲེའི་དམག་དཔུང་ཐམས་ཅད་བསྡུས་ཏེ་ས་གཡོ་བ་དང་༔ ཐོག་འབེབ་པ་དང་༔ ས་བསྒྱུར་བ་དང་༔ ཆུ་བོ་འཕྱུར་བ་དང་༔ གནམ་འགྱུར་བ་དང་༔ རི་འགུལ་བ་དང་རི་རབ་ཚོགས་སོར་འཕེན་པ་དང་༔ ཁྲེལ་བའི་གད་རྒྱངས་སྒྲོགས་པ་དང་༔ སྟོང་གསུམ་གྱི་འཇིག་རྟེན་གྱི་ལྷ་འདྲེ་ཐམས་ཅད་ཀྱིས་ཀི་བསྭོ་ཆ་སྒྲ་འབེབས་པ་དང་༔ ནམ་མཁའ་དང་བར་སྣང་མེས་གང་༔ སྙིང་འདོན་པ་དང་༔ སྐེ་བྲེག་པ་དང་༔ མིག་འབྱིན་པ་དང་༔ ཤ་ཟ་བ་དང་༔ ཁྲག་འཐུང་བ་དང་༔ རུས་པ་མུར་བ་དང་༔ རྒྱུ་མ་འདྲེན་པ་དང་༔ ཀེང་རུས་འཁྲབ་པ་དང་དེ་ལ་སོགས་པའི་ཆོ་འཕྲུལ་འཇིགས་ཤིང་ཡ་ང་བ་དཔག་ཏུ་མེད་པ་བསྟན་ཀྱང་༔

ཇོ་མོ་ལབ་སྒྲོན་གྱིས་བེམ་རིག་ཕྲལ༔ དབྱིངས་རིག་བསྲེས་ནས་ལུས་པོ་ལྟོས་པ་མེད་པར་ལྷ་འདྲེ་རྣམས་ཀྱི་གཟན་དུ་བསྐྱུར་ཞིང་ཀླུ་རྒྱལ་གྱི་ཕོ་བྲང་དང་༔ ཡུལ་ཕྱོགས་དེ་ངོས་ཐམས་ཅད་ཤ་ཁྲག་གིས་དམར་ཉིལ་ལེ་བཀང་ནས་བཞག་པས་ཀླུ་རྒྱལ་དང་འདྲེ་དམག་ཐམས་ཅད་ཀྱིས་ལབ་སྒྲོན་ལ་གླགས་མ་རྙེད་ནས༔ ལྷ་འདྲེ་སྟོབས་ཆེན་ཐམས་ཅད་དང་གྲོས་ལ་དབང་བ་རྣམས་འདུས་ནས་གྲོས་བྱས་ཏེ་ན་རེ༔ སྔར་སངས་རྒྱས་གྲུབ་ཐོབ་ཇི་ལྟར་བྱུང་ཡང་ཡུལ་ཕྱོགས་འདིར་ཕུང་པོ་གཟན་དུ་བསྐྱུར་ནས་ཤ་ཁྲག་གིས་བཀང་བའི་ཆོས་ལུགས་མེད་པ་ལ༔ རྣལ་འབྱོར་མ་འདིས་བེམ་རིག་ཕྲལ་ནས་ཡུལ་ཕྱོགས་འདིར་ཤ་ཁྲག་གིས་བཀང་ནས་བྱུང་བས་ད་འདི་ལ་ཇི་ལྟར་བྱེད་ན་ཨང་༔ གཞན་མ་རྣམས་ལ་ནི་འོ་སྐོལ་ཚོས་བེམ་རིག་ཕྲལ་ནས་སྲོག་གཅོད་པ་ཡིན་པ་ལ༔ རྣལ་འབྱོར་མ་འདིས་ནི་བེམ་རིག་ནི་མོ་རང་གིས་ཕྲལ༔ སྲོག་ནི་མོ་རང་གིས་བཅད་ནས་ཤ་ཁྲག་ནི་འཕང་པ་མེད་པར་འོ་སྐོལ་ཚོ་ལ་སྦྱིན་པར་འདུག༔ འདིའི་ཤ་ཁྲག་ཟོས་པ་ལ་ཟད་པ་དང་མོ་ལ་གནོད་པ་ནི་མི་འདུག༔ སྲོག་གཅོད་རྒྱུ་ནི་མི་འདུག༔ འོ་སྐོལ་ཚོས་ཆོ་འཕྲུལ་ཇི་ལྟར་བསྟན་ཀྱང་རྣལ་འབྱོར་མ་འདི་ལ་གནོད་པ་དང་འཇིགས་པ་ནི་མི་འདུག་པས༔ ད་འདི་ལས་ཐུ་བའི་ཆོ་འཕྲུལ་འཇིགས་པ་ནི་རང་ཅག་རྣམས་ལ་སྟོན་རྒྱུ་མེད་ན༔ གཞན་གྱིས་འཇིགས་སྣང་དང་སྤྲུལ་པ་ཇི་ལྟར་བསྟན་ཀྱང་འདི་ལ་མི་འཇིགས་པར་འདུག་པས༔ ད་ནི་ཇི་ལྟར་བྱས་ཀྱང་རྣལ་འབྱོར་མ་འདི་མི་ཉམས་པར་རང་ཅག་རྣམས་ཉམས་པར་འདུག་པས་རང་ཅག་རྣམས་འདིས་བཏང་ནི་མི་ཉན་པར་འདུག་པས༔ ད་ནི་རང་ཅག་རྣམས་ཀྱིས་རྣལ་འབྱོར་མ་འདི་ལ་ཁས་ལེན་དང་དམ་བཅའ་དྲག་པོ་བྱས་པས་དྲག་ཟེར་ནས་ཁ་འཆམས་ཏེ༔ དེར་འཚོགས་པའི་ལྷ་འདྲེ་རྣམས་ཀྱིས་ལབ་སྒྲོན་ལ་གླགས་མ་རྙེད་ནས་དམ་བཅའ་དྲག་པོ་ཕུལ་ནས་སྲོག་སྙིང་ཕུལ་ཏེ༔

ཀླུ་རྒྱལ་ཟླ་བ་སྐྱོང་བྱེད་ལ་སོགས་པའི་ལྷ་འདྲེའི་དེད་དཔོན་རྣམས་ཀྱིས་དེ་ཕྱིན་ཆད་ནས་སེམས་ཅན་ལ་གནོད་པ་མི་བྱེད་པར་དམ་བཅས་ཤིང་༔ གདུག་སེམས་ཐམས་ཅད་སྤངས་ནས་དཔོན་མོ་ལབ་སྒྲོན་གྱི་བསྟན་པ་སྐྱོང་བར་ཁས་བླངས་ནས་དམ་བཅས་ཏེ༔ འདྲེའི་དམག་རྣམས་ཀྱང་དགའ་ཞིང་མགུ་བ་དང་ཡི་རང་ནས་སོ་སོར་གྱེས་ཏེ༔ ཀླུ་རྒྱལ་ཟླ་བ་སྐྱོང་མཛད་འཁོར་དང་བཅས་པ་རྣམས་ཞི་དུལ་དང་ལྡན་ཞིང་༔ ལབ་སྒྲོན་ལ་དད་པ་རྩོལ་མེད་དུ་ཐོབ་ནས་མཆོད་པའི་བྱེ་བྲག་སྣ་ཚོགས་པའི་ལབ་སྒྲོན་ལ་མཆོད་ནས་ལབ་སྒྲོན་གྱི་བཀའ་སྲུང་དུ་གྱུར་ཏོ༔ དེ་ནས་ནམ་གུང་ཅུང་ཟད་ཡོལ་ནས་འདུག་པས༔ མ་ཧ་མ་ཡ་ལྷ་ལྔ་མཐའི་ལྷ་མོ་རྣམས་དང་བཅས་པ་ནམ་མཁའ་ལ་བྱོན་ནས་བྱུང་སྟེ༔ དབང་བཞི་ཡོངས་སུ་རྫོགས་པར་བསྐུར་ནས་བྱུང་ངོ་༔ དེའི་རྗེས་སུ་རྗེ་བཙུན་མ་ཕག་མོ་ནག་མོ་ལྷ་ལྔ་བྱོན་ནས་བྱུང་སྟེ༔ དབང་བཞི་ཡོངས་སུ་རྫོགས་པར་བསྐུར་ནས་སྣང་སྲིད་མི་དང་མི་མིན་ཐམས་ཅད་དབང་དུ་བསྡུས་ལ༔ བླ་ན་མེད་པའི་བྱང་ཆུབ་ཀྱི་ལམ་ལ་བཀོད་པའི་ལས་ལ་མྱུར་དུ་བརྩོན་པར་གྱིས་ཤིག་གསུངས་ནས་ཡལ་ནས་ཐལ་ལོ༔ དེའི་རྗེས་སུ་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་རྣམས་ཀྱིས་སྐོར་བ་བྱས་ནས་ཕྱག་བརྐྱངས་ཏེ༔ མགྲིན་གཅིག་ཏུ་ཐམས་ཅད་ཀྱིས་བྱིན་གྱིས་རླབས་པར་མཛད་ནས་འདི་སྐད་གསུངས༔ རྣལ་འབྱོར་མ་ཁྱོད་ཀྱིས་གཉན་ཁྲོད་ཕྱོགས་མེད་དུ་འགྲིམ་པ་ལ་སེམས་ཅན་ཐམས་ཅད་ཀྱི་དོན་ལ་ཐུགས་བསྐྱེད་རྒྱ་ཆེན་པོར་མཛོད་ཅིག༔ ཁྱོད་སངས་རྒྱས་ཐོད་པའི་སྤྲུལ་པ་ཐོད་པ་བྷ་ཏྲ་ཡ་ཞེས་བྱ་བའི་རྣལ་འབྱོར་པ་ཞིག་སྔོན་གྱི་སྨོན་ལམ་གྱིས་མཐུན་པས༔

དེང་སང་རྒྱ་གར་ནས་བོད་འདིར་བྱོན་ནས་ཡོད་པས་ཁྱོད་དེ་དང་ཐབས་ཤེས་འགྲིགས་པར་གྱིས་ལ་གཉན་ཁྲོད་ཆུ་མིག་བརྒྱ་རྩ་བརྒྱད་དུ་འགྲོ་དོན་གྱིས་དང་༔ ཁྱོད་ཀྱི་བསྟན་པ་ནི་ནམ་མཁའ་ལ་ཉི་མ་ཤར་བཞིན་དུ་འོངས་ནས་ཕྱིར་མི་ལྡོག་པའི་ས་ནོན་པ་ཡིན་གསུངས་ནས་ལུང་བསྟན་མང་དུ་མཛད་ནས་འཇའ་ཡལ་བ་བཞིན་དུ་ཡལ་ནས་ཐལ་ལོ༔ དེ་ལ་སོགས་པའི་ལུང་བསྟན་དང་ཡོན་ཏན་མཐའ་ཡས་པར་ཐོབ་ཅིང་༔ ས་བཅུ་ཡི་རྟོགས་པ་དང་ཡོན་ཏན་རྒྱུད་ལ་སྐྱེས་པ་དང་ཐོབ་པའི་ཚུལ་མཛད་དོ༔ དེ་ཕྱིན་ཆད་ནས་ཆུ་མིག་འོད་པོ་གནམ་ཁོལ་གྱེན་དུ་འཕྱུར་བ་ཡང་ཞི་ནས་ཁྲུ་གང་ཙམ་ལས་འཕྱུར་མི་ནུས་པར་བྱུང་ངོ་༔ དེ་ནས་མདུང་གང་ཙམ་གྱིས་ནམ་མཁའ་ལ་འཇའ་ཚོན་སྣ་ལྔ་འཁྲིགས་པའི་ནང་དུ་ལབ་སྒྲོན་ནི་སྐུ་མདོག་ཤིན་ཏུ་དཀར་ལ་གསལ་བ༔ ཆུ་ཤེལ་དཀར་པོའི་མདོག་འདྲ་བའི་ཟླ་བའི་མདངས་ལྟར་ཤིན་ཏུ་དཀར་ལ་གསལ་ཞིང་་འོད་ཟེར་དུ་མ་འཕྲོ་བ་ཞིག་གྱུར་ནས༔ ཤིང་སྡོང་པོ་གསེར་ལྷག་ཅན་གྱི་རྩ་བའི་ཤར་ཕྱོགས་ངོས་སུ་མདུང་གང་ཙམ་གྱི་ནམ་མཁའ་ལ་གར་ཐབས་ལིང་ངེ་བཞུགས་ནས་ཌཱཀི་འབུམ་བསྐུལ་དང་༔ མཁའ་འགྲོ་འབུམ་བསྐུལ་དང་༔ མཛེས་མ་འབུམ་བསྐུལ་དང་༔ ཁྲོས་མ་འབུམ་བསྐུལ་དང་༔ དབང་སྡུད་འབུམ་བསྐུལ་ཆེན་མོ་རིགས་མི་འདྲ་བ་བརྒྱ་རྩ་བརྒྱད་དང་དེ་ལ་སོགས་པའི་འབུམ་བསྐུལ་དང་༔ དབང་སྡུད་དང་གསོལ་འདེབས་མང་དུ་མཛད་དོ༔

དེ་ནས་ནམ་ལངས་ནས་མཆེད་གྲོགས་རྣམས་ཀྱིས་བཙལ་བས་ཐག་རིང་པོ་ནས་མཐོང་སྟེ་ཀླུ་རྒྱལ་གདུག་རྩུབ་ཆེ་བས་རྩ་ན་འགྲོ་ནི་མ་ཕོད་པས་སྐད་མདའ་ཐོས་པར་ཙམ་བཏང་བས༔ དེ་མ་ཐག་ཏུ་ལབ་སྒྲོན་རྫུ་འཕྲུལ་གྱིས་ནམ་མཁའ་ནས་ཚུར་བྱོན་ནས་བྱུང་སྟེ་བླ་མའི་གཟིམ་ཁང་གི་སྒོར་སླེབས་ནས་མཆེད་གྲོགས་རྣམས་ཀྱིས་ཤ་གོན་སྒོར་ཁྱེར་ནས་གཏད་པས༔ ལབ་སྒྲོན་གྱིས་ཤ་གོན་རྐྱང་པ་མནབས་ནས་བླ་མའི་དྲུང་དུ་བྱོན་ནས་འདི་སྐད་སྨྲས་ནས་ཕྱག་འཚལ་བའོ༔ ཉོན་མོངས་མེད་ཅིང་གོས་མེད་གཅེར་བུ་ཡི༔ ཁྲེལ་མེད་ངོ་ཚ་བྲལ་བའི་ཕྱག་གཅིག་འཚལ༔ ངེས་པར་སྒྲིབ་པ་སེལ་མཛད་པའི༔ བླ་མ་རྣམས་ལ་ཕྱག་འཚལ་ལོ༔ མཐོ་རིས་འདྲེན་ལ་ཕྱག་འཚལ་ལོ༔ ངན་སོང་སྐྱོབ་ལ་ཕྱག་འཚལ་ལོ༔ ཞེས་གསུངས་ནས་ཕྱག་འཚལ་བས་མཆེད་གྲོགས་རྣམས་ཀྱིས་ན་རེ༔ མདང་གསུམ་དཔོན་ཆུང་ལབ་སྒྲོན་མས་དབང་གི་དངོས་གཞི་མ་ཐོབ་ཟེར་བ་ལ་བླ་མའི་ཞལ་ནས་མདང་སུམ་འདུས་བྱས་ཀྱི་དབང་དེ་ཁྱེད་ཚོར་ཐོབ༔ ཆོས་ཉིད་དོན་གྱི་དབང་དེ་ཇོ་མོར་ཐོབ་ནས་ཐལ་གསུངས༔ དེ་ནས་དངོས་གཞི་དབང་གི་དོན་དུ་གསོལ་བ་གདབས་ནས་མཎྜལ་ཕུལ་བའི་དུས་སུ་ལབ་སྒྲོན་གྱིས་བུམ་དབང་གི་ཡོན་དུ་མཎྜལ་འདི་ཕུལ་ལོ༔ ཕྱི་སྣང་བ་རྒྱན་གྱི་མཎྜལ་ལ༔ ནང་འབྱུང་བ་བཞི་ཡི་ཆག་ཆག་གདབ༔ རིགས་དྲུག་སེམས་ཅན་ཚོམ་བུར་བཀོད༔ ཟད་མེད་རིན་ཆེན་གཏེར་དང་བཅས༔ སྐྱབས་གནས་དམ་པ་དཀོན་མཆོག་དང་༔ བླ་མ་ཡི་དམ་མཁའ་འགྲོ་ལ༔ སྣང་བ་རྒྱན་གྱི་མཎྜལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ་ཞེས་ཕུལ་ལོ༔

དེ་ནས་གསང་དབང་གི་ཡོན་དུ་འདི་ཕུལ་ལོ༔ ནང་ཕུང་པོ་ལུས་ཀྱི་མཎྜལ་ལ༔ རང་བྱུང་ལྷན་སྐྱེས་ཆག་ཆག་གདབ༔ རྣམ་ཤེས་ཚོགས་བརྒྱད་ཚོམ་བུར་བཀོད༔ ཀུན་གཞི་རིན་ཆེན་གཏེར་དང་བཅས༔ སྐྱབས་གནས་དམ་པ་དཀོན་མཆོག་དང་༔ བླ་མ་ཡི་དམ་མཁའ་འགྲོ་ལ༔ ནང་ཕུང་པོ་ལུས་ཀྱི་མཎྜལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ་ཞེས་ཕུལ་ལོ༔ དེ་ནས་ཤེས་རབ་ཡེ་ཤེས་ཀྱི་དབང་གི་ཡོན་དུ་འདི་ཕུལ་ལོ༔ གསང་བ་ཆོས་ཉིད་ཀྱི་མཎྜལ་ལ༔ རང་རིག་འོད་གསལ་ཆག་ཆག་གདབ༔ འགག་མེད་ཉམས་མྱོང་ཚོམ་བུར་བཀོད༔ ཉམས་གསལ་སྟོང་བདེ་བའི་གཏེར་དང་བཅས༔ སྐྱབས་གནས་དམ་པ་དཀོན་མཆོག་དང་༔ བླ་མ་ཡི་དམ་མཁའ་འགྲོ་ལ༔ གསང་བ་ཆོས་ཉིད་མཎྜལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ དེ་ནས་ཚིག་དབང་གི་ཡོན་དུ་འདི་ཕུལ་ལོ༔ མཐའ་བྲལ་ཆོས་སྐུའི་མཎྜལ་ལ༔ ལོང་སྐུ་མཚན་དཔེའི་ཆག་ཆག་གདབ༔ སྤྲུལ་སྐུའི་མཆོག་རྣམས་ཚོམ་བུར་བཀོད༔ སྐུ་གསུམ་འགྲོ་དོན་གཏེར་དང་བཅས༔ སྐྱབས་གནས་དམ་པ་དཀོན་མཆོག་དང་༔ བླ་མ་ཡི་དམ་མཁའ་འགྲོ་ལ༔ དངོས་གཞི་དོན་གྱི་མཎྜལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཞེས་ཕྱི་ནང་གསང་གསུམ་གྱི་མཎྜལ་ཕུལ་བས་དབང་བཞི་ཡོངས་སུ་རྫོགས་པར་བསྐུར་ནས་གསང་སྔགས་ཀྱི་བསླབ་བྱ་རྣམས་ལེགས་པོར་བཤད་ནས་ལབ་སྒྲོན་གྱིས་གསང་སྔགས་ཀྱི་དམ་ཚིག་དང་སྡོམ་པའི་ཆོ་ག་དང་༔ བསྐྱེད་རྫོགས་ཀྱི་དོན་རྣམས་མ་ལུས་པ་ཐུགས་སུ་ཆུད་ནས༔ བླ་མ་བསོད་ནམས་གྲགས་པ་ལ་ལྷག་པར་མི་ཕྱེད་པའི་དད་པ་རྩོལ་མེད་དུ་ཐོབ་ནས་གསང་སྔགས་ཉན་པ་དང་༔ འཆད་པ་དང་༔ རྩོད་པ་དང་རྩོམ་པ་ལ་སོགས་པའི་གསང་སྔགས་ལ་དབང་བའི་ཚུལ་མཛད་དོ༔ ལབ་སྒྲོན་གྱིས་སྟག་ལོ་ཟླ་བ་དང་པོའི་ཚེས་བཅོ་ལྔ་ལ་སྐྱོ་སྟོན་བསོད་ནམས་བླ་མ་ལ་མ་ཧ་མ་ཡ་ལྷ་ལྔའི་དབང་ཞུས་ནས་གསང་སྔགས་ལ་འཇུག་ཅིང་དབང་བའི་ཚུལ་མཛད་པའི་ཚེ༔ བླ་མ་དང་མ་ཧ་མ་ཡ་དབྱེར་མི་ཕྱེད་པའི་སྒོ་ནས་དབང་བཞི་ཡོངས་སུ་རྫོགས་པ་ཐོབ་པས་མཆོག་གི་དངོས་གྲུབ་ཐོབ་པ་དང་ཡུམ་ཆེན་མོ་ལ་སོགས་པས་རྗེས་སུ་གནང་བ་དང་༔ ལུང་བསྟན་མང་པོ་ཐོབ་པ་དང་༔ བེམ་རིག་ཕྲལ་ནས་ཕུང་པོ་འདྲེ་རྣམས་ཀྱི་གཟན་དུ་བསྐྱུར་ཞིང་༔ ལུས་ཤ་ཁྲག་གི་གཏོང་བའི་སྒོ་ནས་ཀླུ་བཙན་ཟླ་བ་སྐྱོང་བྱེད་འདུལ་བ་དང་༔ ལབ་སྒྲོན་རང་གིས་ཆོས་ཀྱི་སྲོལ་བཏོད་ནས་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་གྱི་ཕྱི་ཙམ་སྟོན་པའི་ཐོག་མར་དང་༔ མ་ཅིག་གི་དགུང་ལོ་ཉི་ཤུའི་དུས་ཀྱི་རྣམ་ཐར་ཏེ་རྣམ་གྲངས་བརྒྱད་པའོ༔ སཱ་མཱ་ཡཱ༔

རྣམ་གྲངས་དགུ་པ།

དེ་ནས་བླ་མ་བསོད་ནམས་གྲགས་པ་ལ་དབང་ཞུ་ཚར་ནས་ཕ་ཇོ་བཞི་དང་༔ ལབ་སྒྲོན་དང་ལྔ་ནི་བླ་མའི་དྲུང་དུ་ཟླ་བ་གསུམ་བསྡད་ནས་སྔགས་ཀྱི་ཆོས་རྣམས་ཉན་ནོ༔ དེ་ནས་ཟླ་བ་བཞི་པའི་ཚེས་བཅུའི་ནངས་པར་ནས་བླ་མ་ཡང་ཡར་ལ་སྟོད་དུ་བྱོན༔ ཕ་ཇོ་བཞི་ཡང་རང་རང་གི་གནས་སུ་བྱོན༔ ལབ་སྒྲོན་ཡང་ཚོང་པ་དང་འགྲོགས་ནས་མར་འོངས་པས་བླ་མ་ཞྭ་དམར་བ་དང་མཇལ་ནས་ཆོས་ཤིག་ཞུ་ལགས་བྱས་པས་བླ་མས་ཨ་ལ་ལ་དེ་ལྟར་བྱེད་དོ་གསུངས༔ དེ་ནས་བྱམས་ཆོས་སྡེ་ལྔ་དང་སེམས་བསྐྱེད་ཀྱི་སྐོར་རྣམས་དང་སྒྲ་ཐལ་འགྱུར་གྱི་སྐོར་ལ་སོགས་པ་མང་དུ་གནང་ནས་ཐུགས་སུ་ཆུད་པར་མཛད་དོ༔ དེ་ནས་བླ་མ་སྦ་སྟོན་པ་ལ་བཀའ་རྫོགས་པ་ཆེན་པོ་ཨ་ཏི་ནུ་སྐོར་གསུམ་དང་༔ སངས་རྒྱས་མཉམ་སྦྱོར་དང་༔ རྒྱུད་བཅུ་བདུན་དང་༔ དགོངས་པ་ཟང་ཐལ་དང་༔ བདེར་གཤེགས་འདུས་པའི་སྐོར་ལ་སོགས་པ་རྣམས་མ་ལུས་པ་གསན་ནས་ཉམས་ལེན་དྲོད་ཚད་དང་བཅས་པ་ཐོབ་ནས་བཀའ་རྫོགས་པ་ཆེན་པོའི་ཆོས་སྐོར་རྣམས་མ་ལུས་པ་ཐུགས་སུ་ཆུད་པར་མཛད་དོ༔ བླ་མ་ཡར་སྟིང་པ་ལ་ཕྱག་རྒྱ་ཆེན་པོ་བརྡ་ཆོས་ཀྱི་སྐོར་རྣམས་དང་༔ ཆོས་དྲུག་གི་སྐོར་རྣམས་དང་༔ རྗེ་བཙུན་མའི་ཆོས་སྐོར་རྣམས་དང་༔ དཔལ་དུས་ཀྱི་འཁོར་ལོ་སྦྱོར་བ་ཡན་ལག་དྲུག་གི་སྐོར་རྣམས་དང་༔ མདོ་ཧ་སྐོར་གསུམ་དང་༔ ཀྲི་ཡ་ཕྱི་ནང་གི་སྐོར་རྣམས་དང་༔ ཡོ་གའི་ཆོས་སྐོར་རྣམས་མ་ལུས་པ་གསན་ནས་ཐུགས་སུ་ཆུད་པར་མཛད་དོ༔

དེ་ནས་བླ་མ་གྲྭ་པ་མངོན་ཤེས་ཅན་གྱི་མདུན་དུ་བྱོན་ནས་བྱམས་ཆོས་སྡེ་ལྔ་ལ་ག་དར་བཅད༔ དེ་ནས་བླ་མས་མར་དབུས་སུ་སོང་༔ ལར་ལྷ་སར་ཇོ་བོ་ལ་མཇལ་བར་གྱིས་གསུངས་ནས་ལུང་བསྟན་མཛད་དོ༔ དེ་ནས་ལབ་སྒྲོན་གྱིས་མཆོད་པའི་ཡོ་བྱད་དཔག་ཏུ་མེད་པ་རྣམས་དང་༔ གྲྭ་འཁོར་ལྔ་བརྒྱ་ཙམ་དང་བཅས་པ་བྱས་ནས་ལྷ་སར་བྱོན་ཏེ་ཇོ་བོ་ལ་མཆོད་པ་རྒྱ་ཆེན་པོ་བཀྱགས་པས་ནམ་མཁའ་ལ་འཇའ་འོད་ཀྱི་གུར་དང་མེ་ཏོག་གི་ཆར་དང་༔ ལྷའི་རྔ་བོ་ཆེ་བརྡུང་བ་ལ་སོགས་པའི་རོལ་མོའི་སྒྲ་སྙན་མང་པོ་གྲགས་པ་དང་༔ དེ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་བས༔ དེར་ལྷ་ས་སྐོར་གྱི་མི་རྣམས་དང་༔ གཞན་ཡང་རྣ་བས་ཐོས་ཚད་ཀྱི་མི་རྣམས་ལ་དད་པ་རང་དབང་མེད་པར་སྐྱེས་ནས་ཐམས་ཅད་ཀྱིས་ཆོས་ཞུ་བ་དང་༔ མཆོད་པ་འབུལ་བ་དང་གསོལ་བ་གདབ་པ་ལ་སོགས་པའི་གདུལ་བྱ་དང་གདུལ་ཞིང་དཔག་ཏུ་མེད་པ་བྱུང་ངོ་༔ དེ་ནས་ལབ་སྒྲོན་གྲྭ་ཐང་དུ་བྱོན་ནས་གནས་ལ་སྐོར་བ་མཛད་ཅིང་བཞུགས་པས་དམ་པ་རིན་པོ་ཆེ་འཕན་ཡུལ་གྱི་ཉི་ཕུག་ན་བཞུགས་པ་ལ༔ ནུབ་གཅིག་ཞིང་སྐྱོང་གི་མཁའ་འགྲོ་མ་ཞིག་བྱུང་ནས་ན་རེ༔ ཇོ་མོ་ལབ་སྒྲོན་མ་ནི་ད་ལྟ་གྲྭ་ཐང་ན་བཞུགས་ནས་ཡོད་ཟེར་བ་དང་༔

དེའི་ཕྱིར་ནངས་དམ་པ་རིན་ཆེན་གྲྭ་ཐང་དུ་བྱོན་པས་གྲྭ་ཐང་ཉིད་ལ་ལབ་སྒྲོན་གནས་ལ་སྐོར་བ་མཛད་པ་དང་འཕྲད་པས་ལབ་སྒྲོན་གྱིས་དམ་པ་རིན་པོ་ཆེ་ལ་ཕྱག་འཚལ་ནས༔ སེམས་ཅན་ཐམས་ཅད་བཙན་ཐབས་སུ་འགྲོ་བའི་གདམས་པ་ཞིག་ཞུ་ལགས་བྱས་པས༔ དམ་པ་རིན་པོ་ཆེས་ལབ་སྒྲོན་མ་ལ་བསྔགས་པ་བརྗོད་པས༔ ཤེས་རབ་བཞི་དང་ལྡན་པའི་མ༔ ཡུམ་ཆེན་ཐུགས་ཀྱི་སྤྲུལ་པ་ཡི༔ ཡེ་ཤེས་མཁའ་འགྲོ་ཆེན་མོ་ཁྱོད༔ རྣམ་ཐར་གསུམ་གྱི་སྒོ་འབྱེད་ནས༔ བདུད་ཀྱི་དཔུང་རྣམས་ཕམ་མཛད་མ༔ ལབ་ཀྱི་སྒྲོན་མ་ཁྱོད་ལ་ནི༔ བདག་དང་ལྷར་བཅས་འགྲོ་རྣམས་ཀྱིས༔ གུས་པས་ཕྱག་འཚལ་འགྲོ་དོན་དུ༔ བདག་ཀྱང་ཁྱོད་ལ་ཡི་རང་ཕུལ༔ ཁྱེད་ཀྱི་ཡོན་ཏན་འཕྲིན་ལས་རྣམས༔ བསམ་པ་བརྗོད་པའི་ཡུལ་ལས་འདས༔ ཐུགས་རྗེའི་རྩལ་གྱི་ལྕགས་ཀྱུ་ཡིས༔ སྙིགས་མའི་སེམས་ཅན་འགྲོ་བ་རྣམས༔ སྨིན་ཅིང་གྲོལ་བར་མཛད་ལགས་ཀྱང་༔ ཕྱི་རབས་དོན་དུ་ངས་ཀྱང་གདམས་པ་བཤད་ཅེས་གསུངས་ནས་ཇོ་མོ་མཁར་སྒོམ་དང་༔ ཇོ་མོ་ཆོས་མཚོ་དང་༔ ཇོ་མོ་ལབ་སྒྲོན་དང་གསུམ་ལ་ཕ་རོལ་ཏུ་ཕྱིན་པའི་བཀའ་བརྒྱུད་དོན་གྱི་མན་ངག་གི་སྒོ་ནས་ཆོས་དབང་སེམས་ལ་བསྐུར་བའི་ཏིང་ངེ་འཛིན་གྱི་དབང་བཞི་ཟབ་པའི་དོན་གྱི་གདམས་པ་དྲོད་ཚད་ཞལ་ཤེས་ནམ་མཁའ་སྒོ་འབྱེད་ཀྱི་ངོ་སྤྲོད༔ འཕོ་བའི་གདམས་པ་དང་བཅས་པ་ལ་ལྷག་ལུས་མེད་པར་གནང་ངོ་༔

ལབ་སྒྲོན་རང་ཉིད་ལ་ཞི་བྱེད་སྐོར་གསུམ་དང་གཅོད་གྲོལ་ཚོགས་དྲུག་གི་གདམས་པ་དང་༔ ཞི་བྱེད་ཧཱུྃ་སྐོར་དང་༔ དམར་ཁྲིད་ཧཱུྃ་སྐོར་དང་༔ ཕཊ་ཆོས་སྐོར་གསུམ་དང་༔ ཨུ་པ་ལའི་བརྡ་ཆོས་དང་༔ སྒྱུ་འཕྲུལ་ཆེན་མོའི་སྐོར་དང་༔ ཇོ་མོ་ཞལ་གཉིས་མ་དང་༔ བཀའ་བརྒྱུད་བླ་མའི་རྣམ་ཐར་ཟབ་ལམ་མ་དང་༔ འཕོ་བ་གྲོང་འཇུག་གི་གདམས་པ་རླུང་སེམས་འདྲེས་པའི་གནད་ལྷག་པའི་ལམ་ཞུག་མ་དང་༔ སྒྱུ་ལུས་དང་འོད་གསལ་དང་༔ རྨི་ལམ་དང་བར་དོའི་སྦྱང་ཚུལ་ཅིག་ཆར་དུ་སྟོན་པ་དང་༔ ཕྲ་ཐིག་མན་ངག་གི་སྐོར་རྣམས་དང་༔ འཁྲུལ་གཅོད་བཀའ་བརྒྱ་མའི་མན་ངག་རྣམས་དང་དུར་ཁྲོད་ཆེན་པོའི་དམིགས་བྱ་རྣམས་དང་གདན་ཐོག་གཅིག་ཏུ་གཅོད་པའི་གདམས་པ་བརྒྱ་དང་བཅས་པ་ལ་ལྷག་ལུས་མེད་པར་གནང་ནས་ལབ་སྒྲོན་གྱིས་དེ་རྣམས་ཐམས་ཅད་མ་ལུས་པར་ཐུགས་སུ་ཆུད་པར་མཛད་དོ༔ དེ་ནས་ལབ་སྒྲོན་གྱིས་དམ་པ་རིན་ཆེན་ལ་བསྟོད་པ་འདི་མཛད་དོ༔ ཕ་ཀུན་ཤེས་ཀུན་རིག་དམ་པ་པོ༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་ཀྱི་སྲས་མཆོག་འགྲོ་བའི་མགོན༔ སྤྲུལ་པའི་སྐུ་ལ་ཕྱག་འཚལ་ལོ་ཞེས་པ་ལ་སོགས་པའི་བསྟོད་པ་མཛད་དོ༔ ཡང་དམ་པ་རིན་པོ་ཆེའི་ཞལ་ནས་ཡེ་ཤེས་ཀྱི་མཁའ་འགྲོ་མ་ཆེན་མོ་དུས་གསུམ་གྱི་སངས་རྒྱས་ཐམས་ཅད་བསྐྱེད་པའི་ཡུམ༔ མ་རྒྱུད་མཁའ་འགྲོ་མ་ཐམས་ཅད་ཀྱི་གྲོལ་ཕུགས༔ ཤེས་རབ་ཡེ་ཤེས་གསང་བའི་བདེ་ཆེན་མ༔ བཅོམ་ལྡན་འདས་མ་རིག་པ་རྡོ་རྗེ་ཕག་མོ༔ བདག་མེད་གསང་ཆེན་མཁའ་འགྲོའི་གཙོ་མོ༔ ཆོས་དབྱིངས་འགྱུར་མེད་མཐིང་ནག་ཁྲོས་པའི་སྐུར་སྟོན་མ༔ མཁའ་འགྲོ་ཡོངས་ལ་དབང་བསྒྱུར་ཤེས་རབ་ཆེན་མོའི་གཙོ་མོ་མཆོག་ཏུ་གྱུར་པ་རྡོ་རྗེ་བདུད་འདུལ་མ་ཆེན་མོ་ཞེས་བྱ་བ་དེ་ཉིད་ནི་མཁའ་སྤྱོད་དག་པའི་ཞིང་ཁམས་ན་བཞུགས་ཀྱང་༔ སྨོན་ལམ་དང་རྟེན་འབྲེལ་གྱི་དབང་གིས་རྒྱ་གར་སེར་སྐྱའི་གྲོང་ཁྱེར་དུ་འགྲོ་བའི་དོན་ལ་དགོངས་ནས༔ ར་ཙ་ཤོ་ར་ཤྲྀ་ཨརྱའི་སྲས་སུ་སྐུ་འཁྲུངས་ནས་སྨོན་ལམ་དོན་གྲུབ་ཏུ་མཚན་ཐོགས་པ་དེ་བོད་དམུ་རྒོད་འདུལ་བའི་སྐབས་ལ་བབ་པར་སངས་རྒྱས་ཉིད་ཀྱིས་ལུང་བསྟན་པ་ནི༔

དེ་ཡང་མདོ་སྡེ་དྭངས་སྙིགས་འབྱེད་པའི་ལེའུ་བརྒྱད་ཅུ་རྩ་གཉིས་པ་ལ༔ སྙིགས་མ་རྩོད་པ་རྒྱས་པའི་དུས༔ བྱང་ཕྱོགས་ཁ་བ་ཅན་གྱི་ལྗོངས་སུ༔ རྒྱལ་བའི་ཡུམ་གྱི་ཐུགས་སྤྲུལ་ནི༔ སྒྲོན་མའི་མཚན་ཅན་འབྱུང་བར་འགྱུར༔ ཞེས་པ་དང་༔ འཇམ་དཔལ་རྩ་བའི་རྒྱུད་རྒྱས་པ་ལ༔ ང་ཡི་བསྟན་པའི་སྙིགས་མ་ལ༔ ཁ་བ་ཅན་ལྗོངས་བྱང་ཕྱོགས་སུ༔ ཡུམ་ཆེན་ཤེར་ཕྱིན་ཐུགས་སྤྲུལ་ནི༔ ལབ་ཀྱི་སྒྲོན་མ་ཞེས་བྱ་འབྱུང་༔ སྐྱེ་མེད་སྙིང་པོའི་དོན་སྟོན་ཞིང་༔ གྲོང་དང་གྲོང་ཁྱེར་རི་སུལ་དང་༔ དུར་ཁྲོད་བས་མཐའ་ཁྱབ་པར་ཉུལ༔ ཕྱིར་མི་ལྡོག་པའི་ས་འཐོབ་འགྱུར༔ དེ་ཡི་ཆོས་ནི་རྒྱས་པར་འགྱུར༔ ཞེས་པས་སངས་རྒྱས་བཅོམ་ལྡན་འདས་ཀྱིས་ལུང་བསྟན་པའི་པཎྜི་ཏ་དོན་གྲུབ་རིན་ཆེན་གྱི་གདུལ་བྱའི་སྐལ་བ་བོད་དུ་གྱུར་པ་དང་༔ ཁྱད་པར་དུ་ཡང་མུ་སྟེགས་ཀྱི་མཁའ་འགྲོ་མ་བཞི་བོད་དུ་སྐྱེ་བ་བཞེས་པ་དེས་བོད་ཐམས་ཅད་ལོག་པའི་ལམ་ལ་བསྒྱུར་དགོངས་པ་དང་༔ མུ་སྟེགས་མ་བཞི་འདུལ་པའི་དུས་ལ་བབ་པར་དགོངས་ནས༔ པཎྜི་ཏ་དོན་གྲུབ་རིན་ཆེན་ཡེ་ཤེས་ཀྱིས་མཁའ་འགྲོ་མ་བཞིར་སྤྲུལ་ནས་བོད་དུ་བྱོན་པ་ནི༔ ལ་སྟོད་ཀྱི་མ་ཅིག་ཞལ་མ་སྟེ༔ དེས་ནི་ལམ་འབྲས་ཀྱི་སྒོ་ནས་མུ་སྟེགས་མ་འདུལ་བ་ཡིན༔ འབྲི་ལྕམ་གྱི་ཞང་ལྕམ་འབྲོ་ཆུང་མ་སྟེ༔ དེས་ནི་རྫོགས་པ་ཆེན་པོའི་སྒོ་ནས་མུ་སྟེགས་མ་འདུལ་བ་ཡིན༔ སྣ་ནམ་གྱི་ཤེལ་བཟའ་སྒྲོན་ནེ་མ་དེས་ཕྱག་རྒྱ་ཆེན་བརྡ་ཆོས་བཞི་སྲོལ་གྱི་སྒོ་ནས་མུ་སྟེགས་མ་འདུལ་བ་ཡིན༔ ལ་སྟོད་ཀྱི་མ་ཅིག་ལབ་སྒྲོན་མ་དེས་བདུད་བཞི་རང་སར་གཅོད་པའི་ཕུང་པོ་གཅེས་འཛིན་བཏང་ནས་ཤ་ཁྲག་གཟན་དུ་བོར་བའི་སྒོ་ནས་མུ་སྟེགས་མ་འདུལ་བ་ཡིན༔ མ་ཅིག་ལབ་སྒྲོན་ནི་མཁའ་འགྲོ་མ་བཞི་ཀའི་གཙོ་མོ་ཡིན་ཏེ༔ ཡུམ་ཆེན་ཤེས་རབ་ཕར་ཕྱིན་གྱི་ཐུགས་ཀྱི་སྤྲུལ་པ་ཡིན་ཏེ༔ འདུལ་རྒྱུའི་མུ་སྟེགས་མ་བཞི་ནི༔ སྤར་ཕུའི་སྦལ་པ་དཀར་མོ་དང་གཅིག༔ སྟོད་ལུང་གི་འཆད་མོ་ནམ་མཁའ་དང་གཉིས༔ གཙང་གི་ཤེས་མོ་རྒྱལ་ལྕམ་དང་གསུམ༔ ལྷ་སྟེང་གི་ཞང་མོ་ལྷ་ཁྲིད་དང་བཞི་འདུལ་བ་ལ༔ ཕྱིས་ཡེ་ཤེས་ཀྱི་མཁའ་འགྲོ་མ་བཟང་མོ་རེ་རེ་བྱུང་བར་སྣང་ངོ་༔ དེ་རྣམས་དམ་པ་རིན་པོ་ཆེས་གྲ་ཐང་དུ་གསུངས༔ དེ་ནས་ལབ་སྒྲོན་ལ་སྟོད་ནས་མར་བྱོན་ནས༔ དབུས་ཁོག་ཏུ་ལོ་གསུམ་བཞུགས་པ་དང་༔ སྦྲུལ་ལོ་ཟླ་བ་དང་པོའི་ཚེས་གསུམ་ལ༔ ཡར་ལ་སྟོད་ཡབ་ཡུལ་ངོས་སུ་བྱོན་པ་དང་༔ བླ་མ་གྲྭ་པས་ལུང་བསྟན་པ་དང་༔ ཇོ་བོ་ལ་མཆོད་པ་འབུལ་བ་ལ་སོགས་པ་དང་༔ གྲ་ཐང་དུ་དམ་པ་རིན་པོ་ཆེས་ལུང་བསྟན་པ་ལ་སོགས་པ་ནི༔ ལབ་སྒྲོན་དགུང་ལོ་ཉི་ཤུ་ནས་ཉེར་གསུམ་བར་གྱི་རྣམ་ཐར་ཏེ་རྣམ་གྲངས་དགུ་པའོ༔ སཱ་མཱ་ཡཱ༔

རྣམ་གྲངས་བཅུ་པ།

དེ་ནས་ལབ་སྒྲོན་དགུང་ལོ་ཉེར་གསུམ་ལ་བྱོན་ནས༔ བླ་མ་གྲྭ་པ་མངོན་ཤེས་ཅན་ལ་མཇལ་དུ་ཕྱིན་པས༔ བླ་མ་གྲྭ་པ་མངོན་ཤེས་ཅན་ལ་ཡོན་བདག་མོ་ལྷ་མོ་སྒྲོན་ཞེས་བྱ་བའི་རབས་ཆད་ཕོ་མོ་འབྱོར་པ་ཆེ་བ་གཉིས་ཡོད་པས་བླ་མ་ལ་ཞུས་ནས༔ བླ་མ་ལགས༔ ཁྱེད་ཀྱི་མཆོད་གནས་དཔོན་ཆུང་ལབ་སྒྲོན་མ་དེ་ངེད་རྒན་རྒོན་གཉིས་ཀྱི་མཆོད་གནས་ཟླ་བ་གཅིག་མཛད་ནས་བཞུགས་པར་ཞུ༔ ངེད་གཉིས་ཀྱིས་ཟོག་དངོས་པོ་གང་ཡོད་ཐམས་ཅད་ཁོང་ལ་འབུལ་བའི་གཏོང་སྒོ་བྱེད༔ དེ་ཙ་ན་ཅིས་ཀྱང་མཆོད་གནས་མཛད་པའི་ཞུ་བ་འབུལ་བས་གནང་དགོས་ཟེར་བས༔ བླ་མའི་ཞལ་ནས་འོ་ན་དེ་ལྟར་བྱེད་པས་ཆོག་གསུངས་ནས༔ ལབ་སྒྲོན་ལ་འདི་སྐད་གསུངས༔ ཇོ་མོ་ལབ་སྒྲོན་མ་ཁྱེད་གཡེ་ཆུང་གི་གྲོང་དུ་ལྷ་མོ་སྒྲོན་མི་བཟའ་གཉིས་ཀྱི་བླ་མཆོད་བྱེད་པ་ལ་བྱོན་ལ༔ ཟླ་བ་གཅིག་བཞུགས་ལ་འབུམ་ཚར་སུམ་ཅུ་ཀློག་པར་མཛོད་དང་༔ ཁོང་གཉིས་ཀྱིས་དངོས་པོ་ཐམས་ཅད་ཁྱེད་ལ་འབུལ་བར་ཡོད་གསུངས་པས༔ ཡང་ལབ་སྒྲོན་བསོད་ནམས་བླ་མ་ལ་མཇལ་དུ་སོང་བས་ང་གཡེ་ཆུང་ན་ལྷ་མོ་སྒྲོན་གྱི་འབུམ་ཀློག་པ་ལ་འགྲོའམ་མི་འགྲོ་ལགས་ཞུས་པས༔ བསོད་ནམས་བླ་མའི་ཞལ་ནས་ཇོ་མོ་དེར་སོང་དང་སྔོན་གྱི་སྨོན་ལམ་གྱི་རྟེན་འབྲེལ་ཡོད་པས་འགྲོ་དོན་འབྱུང་བ་ཡོད་གསུངས་པ་དང་༔ བླ་མ་རྣམ་གཉིས་ཀྱིས་བཀའ་གནང་བས་ལབ་སྒྲོན་གྱི་དགོངས་པ་ལ༔ ད་ནི་གཡེ་ཆུང་དུ་འགྲོ་དགོས་སྙམ་པའི་ནུབ་ཐོ་རངས་ཁ་ལ་མཁའ་འགྲོ་མ་དམར་མོ་དཔྲལ་བ་ན་མིག་གཅིག་ཡོད་པ་ཞིག་བྱུང་ནས༔ ཇོ་མོ་རྒྱ་གར་ནས་འོང་བའི་ཐོད་པ་བྷ་ཏྲ་ཡ་ཞེས་བྱ་བའི་རྣལ་འབྱོར་པ་དེ་དང་ཁྱེད་གཉིས་ཐབས་ཤེས་འགྲིགས་པར་མཛོད་དང་༔ འགྲོ་དོན་རྒྱ་ཆེན་པོ་འོངས་ནས་ཕྱིར་མི་ལྡོག་པའི་ས་ནོན་པ་ཡིན་ཟེར་ནས་ཡལ་ནས་ཐལ་ལོ༔ ཡང་མཁའ་འགྲོ་མ་མཐིང་ནག་ཤིན་ཏུ་ཁྲོས་པའི་ཆ་བྱད་ཅན་གཅིག་བྱུང་ནས༔ ཇོ་མོ་སངས་རྒྱས་ཐོད་པའི་རྣམ་འཕྲུལ་ཐོད་པ་བྷ་ཏྲ་ཡ་ཞེས་བྱ་བའི་རྣལ་འབྱོར་པ་དེ་དང་ཁྱེད་གཉིས་ཐབས་ཤེས་འགྲིགས་པར་གྱིས་ལ་གསང་སྔགས་བླ་ན་མེད་པ་ལམ་དུ་བྱེད་པའི་ཆེད་དུ་སྙོམས་པར་འཇུག་ལ་རིགས་རྒྱུད་སྤེལ་དང་༔ ཁྱོད་ཀྱི་བསྟན་པ་ནི་ནམ་མཁའ་ལ་ཉི་མ་ཤར་བ་བཞིན་དུ་འོངས་ནས་དར་རྒྱས་སུ་འབྱུང་ཞིང་ས་བཅུའི་ཕ་རོལ་ཏུ་ཕྱིན་པ་ཐོབ་པ་ཡིན་ནོ༔ ཞེས་གསུངས་ནས་ནམ་མཁའ་ལ་ཡལ་ནས་ཐལ་ལོ༔ དེ་ནས་མནལ་སངས་ནས་བྱུང་ངོ་༔

དེའི་ཕྱིར་ནངས་ནམ་ལངས་ནས་གཡེ་ཆུང་དུ་སོང་ནས༔ དེ་ནུབ་བཙུན་མ་ཞིག་གི་རྩར་ཉལ་ནས་བསྡད་པས༔ ནམ་གུང་ཙམ་ལ་བུད་མེད་དཀར་མོ་བདུན་བྱུང་ནས༔ རྣལ་འབྱོར་མ་ཁྱོད་དང་རྒྱ་གར་གྱི་པཎྜི་ཏ་ཐོད་པ་བྷ་ཏྲ་ཡ་གཉིས་སྔོན་གྱི་སྨོན་ལམ་མཐུན་པས་ཁྱོད་སེམས་ཞུམ་པ་མེད་པར་ལས་ལ་སྤྱོད་ཅིག་ཅེས་བུད་མེད་བདུན་གས་མགྲིན་གཅིག་ཏུ་ཟེར་བ་དང་༔ ལབ་སྒྲོན་གྱི་དགོངས་པ་ལ་ལུང་བསྟན་འདི་རྣམས་ཅི་འདྲ་ཡིན་ཨང་༔ བདུད་ཀྱིས་བསླུ་བ་འདྲ་ཡང་ཨེ་ཡིན༔ བླ་མ་རྣམ་གཉིས་ཀྱིས་མ་མཁྱེན་པ་ཡིན་ནམ༔ མཁའ་འགྲོ་མ་བདུན་པོ་འདི་ལ་དྲི་བ་ཞིག་བྱེད་དགོས་སྙམ་ཙ་ན༔ བུད་མེད་བདུན་པོ་ཡལ་ནས་ཐལ་ལོ༔ དེ་ནས་མནལ་སངས་ནས་བྱུང་སྟེ༔ ཡང་ཐོ་རངས་ཁ་ལ་བུད་མེད་དཀར་མོ་ཞིག་གིས་དྲེལ་དཀར་མོ་ཞིག་ཞོན་ནས་བྱུང་སྟེ་འདི་སྐད་ཟེར་རོ༔ མ་ཅིག་གསང་ཆེན་ཡེ་ཤེས་ཀྱི་མཁའ་འགྲོ་མ༔ རྡོ་རྗེ་བདུད་འདུལ་མ་ཆེན་མོ་ང་ཁྱེད་བསུ་བ་ལ་འོང་བ་ཡིན་པས་མགྱོགས་པར་འབྱོན་འཚལ་ཟེར་བས༔ ལབ་སྒྲོན་གྱིས་ཁྱེད་སུ་ཡིན་གང་ནས་འོང་བ་ཡིན་བྱས་པས༔ བུད་མེད་དཀར་མོ་དེ་དྲེའུ་ལས་བབས་ནས་ལབ་སྒྲོན་ལ་ཕྱག་ལན་གསུམ་འཚལ་ནས་འདི་སྐད་ཟེར་རོ༔ མ་ཅིག་གསང་ཆེན་ཡེ་ཤེས་ཀྱི་མཁའ་འགྲོ་མ་ཆེན་མོ་ལགས༔ ང་ནི་དུང་སྐྱོང་གི་མཁའ་འགྲོ་མ་བྱ་བ་ཡིན༔ བླ་མ་ཐོད་པ་བྷ་ཏྲ་ཡའི་བཀའ་ཉན་མ་ཡིན་པས་ང་ཁྱེད་བསུ་བ་ལ་འོང་བ་ཡིན་ལགས༔ ཁྱེད་ནི་ངེད་ཀྱི་རྗེ་མོ་ཆེན་མོ་གསང་ཆེན་ཡེ་ཤེས་ཀྱི་ཡུམ་ཆེན་མོ་ཡིན་པས་མཁྱེན་པར་སྐད་ཟེར་རོ༔

ཡང་ལབ་སྒྲོན་གྱིས་ན་རེ༔ ཁྱོད་ཀྱི་བླ་མ་ཐོད་པ་བྷ་ཏྲ་ཡ་ཞེས་བྱ་བ་དེ་རིགས་རྒྱུད་གང་ཡིན༔ ཡུལ་གར་ཡོད་སྨྲས་པས༔ བུད་མེད་དཀར་མོ་དེ་ན་རེ༔ ང་ཡི་བླ་མ་ཐོད་པ་བྷ་ཏྲ་ཡ་ཞེས་བྱ་བའི་འཁྲུང་ཡུལ་ནི་རྒྱ་གར་གོ་པ་ལ་ཞེས་བྱ་བ་ཡིན༔ ཡབ་ནི་ཤཱཀྱ་བཙད་པོ་རད་ན་སི་ཏི་བྱ་བ་ཡིན༔ ཡུམ་ནི་ས་མ་ཏི་བྱ་བ་ཡིན༔ བླ་མ་ཁོ་རང་ནི་སངས་རྒྱས་ཐོད་པའི་སྤྲུལ་པ་བྷ་ཏྲ་ཡ་ཞེས་བྱ་བ་ཡིན་ཏེ༔ ཕྱི་སྡེ་སྣོད་གསུམ་དང་ནང་རྒྱུད་སྡེ་བཞི་མ་ལུས་པ་ཐུགས་སུ་ཆུད་ཅིང་༔ ཁྱད་པར་འཁོར་ལོ་བདེ་མཆོག་ལ་མངའ་བརྙེས་ནས༔ གྲུབ་པ་ཐོབ་རྣལ་འབྱོར་པ་ཆེན་པོ་ཡིན་ཏེ༔ ད་ལྟ་ཁྱེད་ལ་མཇལ་བའི་ཆེད་དུ་བོད་འདིར་བྱོན་ནས་གཡེ་ཆུང་ན་བཞུགས་ནས་ཡོད༔ ང་ཁྱེད་བསུ་བ་ལ་བཏང་བ་ཡིན་ཟེར་ནས་དྲེལ་དཀར་མོ་ལ་ཞོན་ནས་ད་ནི་མགྱོགས་པར་འབྱོན་པར་ཞུ་ཟེར་ནས་ཐལ་ལོ༔ དེ་ནས་ནམ་ལངས་སྔ་མ་ནས་ལབ་སྒྲོན་གཡེ་ཆུང་དུ་བྱོན་པས༔ ཉི་མ་ཕྱེད་ཙམ་རེད་ནས་ཤེལ་གྲང་བྱ་བའི་དགོན་པར་སླེབས་པས༔ དེ་ན་ནི་སྟོན་པ་ཤེས་རབ་འབུམ་ཞེས་བྱ་བའི་བཀའ་གདམས་པའི་དགེ་བཤེས་མཚན་ཉིད་དང་ལྡན་པ་སྡེ་སྣོད་གསུམ་ལ་རང་བྱན་བྱེད་པའི་མཁས་པ་ཆེན་པོ་གྲྭ་ཚན་སྟོང་ཕྲག་ལྷག་ཙམ་ལ་ཕར་ཕྱིན་གྱི་གཞུང་བཤད་བྱེད་པ་ཞིག་འདུག་པས༔ དེ་རྣམས་ཀྱི་ཐག་ཉེ་སར་སླེབ་པ་དང་༔ དགེ་བཤེས་མང་པོ་བྱོན་ནས་བྱུང་སྟེ་ལབ་སྒྲོན་གྱི་རྩར་ཕྱིན་པ་དང་༔

དགེ་བཤེས་གཅིག་གི་ན་རེ༔ ཇོ་མོ་ཁྱོད་རྒྱལ་པོ་ཆོས་ཀྱི་ཟླ་བ་རྒྱལ་མཚན་ལ་སྲས་མོ་མིག་གསུམ་ཡོད་པའི་ལབ་སྒྲོན་བྱ་བ་ཞིག་ཡོད་ཟེར་བ་དེ་ཡིན་ནམ་ཟེར་བས༔ ལབ་སྒྲོན་གྱིས་ང་ཡིན་སྨྲས་པས༔ དགེ་བཤེས་གཅིག་གི་ན་རེ༔ ལབ་སྒྲོན་མ་ཁྱོད་ཡེ་ཤེས་ཀྱི་མཁའ་འགྲོ་མ་དངོས་ཡིན་ཟེར་བར་གྲགས་ཤིང་༔ ཕར་ཕྱིན་ལ་ཤིན་ཏུ་མཁས་པར་གྲགས་པས༔ ད་ངེད་ཚོ་དང་ཕར་ཕྱིན་གྱི་བགྲོ་གླེང་དང་རྩོད་པ་བྱེད་དགོས་ཟེར་བས་ལབ་སྒྲོན་གྱིས་རྩོད་པ་བྱས་པས་ཆོག་སྨྲས་པས༔ དགེ་བཤེས་དེ་རྣམས་ཀྱི་ནང་ནས་གང་མཁས་པ་བདུན་དང་རྩོད་པ་བྱས་པས་དགེ་བཤེས་རྣམས་གྱིས་ལབ་སྒྲོན་ལ་ཚིག་གཅིག་གིས་ཀྱང་གླགས་མ་རྙེད་དེ༔ དགེ་བཤེས་མཁས་པ་གཅིག་གིས་ན་རེ༔ རྣལ་འབྱོར་མ་ཁྱོད་ཡུམ་ཆེན་མོའི་སྤྲུལ་པའམ་ཡེ་ཤེས་ཀྱི་མཁའ་འགྲོ་མ་དངོས་ཡིན་ཟེར་བར་གྲགས་པས་བདེན་པ་འདྲ་མོད༔ ད་ངེད་ཀྱི་བླ་མ་ལ་མཇལ་དུ་ཨེ་འགྲོ་ཟེར་བས་ལབ་སྒྲོན་གྱིས་བླ་མ་ལ་མཇལ་དུ་འགྲོ་བྱས་ནས་སོང་༔ དགེ་བཤེས་རྣམས་ཀྱིས་ད་རུང་ཡུད་ཙམ་ཞིག་ལ་མ་འབྱོན་ཟེར་བས་ལབ་སྒྲོན་གྱི་དགོངས་པ་ལ་ང་སྐྱེ་དམན་ཡིན་པས་ད་རུང་འགྲོ་ས་མེད་པ་ཨེ་ཡིན་སྙམ་ནས་དེར་བསྡད་པས༔ བཙུན་པ་མང་པོས་སྤོས་དུད་དང་རོལ་མོ་མང་པོ་དང་ངོ་མཚར་བའི་བསུ་བ་མང་པོ་བྱས་ནས་བྱུང་སྟེ༔ ལབ་སྒྲོན་ཡང་དེར་བྱོན་པས་བླ་མའི་མདུན་དུ་ཕྱིན་པས༔ ལབ་སྒྲོན་གྱིས་ཡར་གཟིགས་པས་བླ་མ་འཇམ་དཔལ་དམར་པོ་དངོས་སུ་མཐོང་ནས་ཕྱག་འཚལ་བས༔ བླ་མས་མར་གཟིགས་པས་ལབ་སྒྲོན་རྗེ་བཙུན་སྒྲོལ་མ་དངོས་སུ་ཞལ་གཟིགས་ནས་ཕྱག་མ་བཞེས་ཏེ༔ མ་ཅིག་སྒྲོལ་མ་བྱོན་ལགས་སམ་གསུངས་ནས་ཁྲི་ཐོག་ནས་ཐང་དུ་བཞེངས་ནས་ལྡང་བར་མཛད་དོ༔ དེ་ནས་བཞུགས་ཁྲིའི་མཆན་དུ་ཁྲིའུ་ཆུང་ཞིག་བརྩེགས་ནས༔

དེའི་སྟེང་དུ་གདན་འབོལ་སུམ་བརྩེགས་པའི་གདན་ལ་ལབ་སྒྲོན་བཞུགས་སུ་བཅོལ་ནས༔ བླ་མ་དང་ལབ་སྒྲོན་གཉིས་ཆོས་ཀྱིས་བགྲོ་གླེང་ཐོར་བུ་ཙམ་མཛད་པས༔ བླ་མས་ལབ་སྒྲོན་ལ་དག་སྣང་དཔག་ཏུ་མེད་པ་སྐྱེས་ནས་འདི་སྐད་གསུངས༔ དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ༔ ཆོས་ཐམས་ཅད་ཀྱི་གྲོལ་ཕུགས༔ རྡོ་རྗེ་བདུད་འདུལ་མ་ཁྱོད་ལ་བདག་ཀྱང་རྗེས་སུ་ཡི་རང་ངོ་ཞེས་གསུངས་སོ༔ དེ་ནས་ལབ་སྒྲོན་གྱིས་བླ་མ་ལ་ཆོས་འབྲེལ་ཞིག་ཞུ་ལགས་བྱས་པས༔ བླ་མས་ཁྱེད་ལ་མེད་པའི་ཆོས་གཞན་ཅི་ཡང་བདག་ལ་མེད་གསུངས་པས༔ ལབ་སྒྲོན་གྱིས་ཆོས་འབྲེལ་ཞུ་བ་ལ་གང་ཡང་རུང་ཞུས་པས༔ བླ་མས་འོ་ན་དེ་ལྟར་བྱེད་དོ་གསུངས་ནས་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལུགས་ལྡོག་གི་ཚུལ་དུ་ལེགས་པོར་བཤད་པས་ཞག་བདུན་གཉིས་བཅུ་བཞི་ལ་གསན་ཅིང་༔ རྟེན་གཏན་ལ་ཕབ་པར་བྱས་ནས་ཆོས་ཐམས་ཅད་རྟེན་འབྲེལ་ཙམ་དུ་གོ་བའི་ཚུལ་མཛད་ཅིང་༔ ཆོས་ཐམས་ཅད་རྟེན་འབྲེལ་གྱིས་རྣམ་བཞག་ཏུ་འཆད་པ་དང་༔ རྟེན་འབྲེལ་ལ་བརྟེན་ནས་གྲུབ་ཐོབ་མ་ཆེན་མོར་གྲགས་པར་བྱུང་ངོ་༔ དེ་ནས་ལབ་སྒྲོན་མ་གཡེ་ཆུང་ལ་བྱོན་པ་དང་༔ སྦྲུལ་ལོ་ཟླ་བ་གཉིས་པའི་ཚེས་གཅིག་ལ༔ ལབ་སྒྲོན་མ་གཡེ་ཆུང་དུ་ལྷ་མོ་སྒྲོན་གྱི་གནས་ཁང་དུ་ཕྱིན་པས་རྣལ་འབྱོར་པ་མིག་རྩ་དམར་ཆི་ལེ་བ་ཤ་མདོག་སྨུག་ཅིང་ཧུར་རེ་བ་ཞིག་གིས་ཡི་དམ་འཁོར་ལོ་བདེ་མཆོག་གི་དཀྱིལ་ཆོག་བླངས་ཤིང་འདུག་པས༔

རྣལ་འབྱོར་པ་དེ་ན་རེ༔ རྒྱ་གར་དུ་ཡུམ་འོ་མ་བརྒྱལ་བར་བྱོན་པ་ལགས་སམ་ཟེར་བས༔ ལབ་སྒྲོན་གྱིས་རྒྱ་སྐད་དུ་སྨྲས་ནས་རྣལ་འབྱོར་པ་རྒྱ་གར་ནས་བྱོན་པ་དབུ་མ་རྨོངས་ལགས་སམ་སྨྲས་ནས་ཁམས་འདྲི་ཕུལ་ལོ༔ དེ་ནས་རྒྱ་གར་གྱི་པཎྜི་ཏ་བྷ་ཏྲ་ཡ་ཡང་མིག་རྩེ་གཅིག་ཏུ་བཞུགས་ནས་ཆོ་ག་མཛད༔ ལབ་སྒྲོན་ཡང་མིག་རྩེ་གཅིག་ཏུ་བཞུགས་ནས་འབུམ་ཀློག་པར་མཛད༔ སྐབས་སྐབས་སུ་པཎྜི་ཏ་དང་ཆོས་ཀྱི་བགྲོ་གླེང་མཛད་པ་དང་༔ རྒྱ་གར་གྱི་ལོ་རྒྱུས་རྣམས་དྲི་བ་མཛད་དོ༔ དེ་ནས་སྦྲུལ་ལོ་ཟླ་བ་གཉིས་པའི་ཚེས་བཅུ་བདུན་གྱི་ཐོ་རངས་ཁ་ལ༔ མཁའ་འགྲོ་མ་སེང་གེའི་གདོང་པ་ཅན་ཞིག་བྱུང་ནས༔ ལབ་སྒྲོན་མ་ཁྱོད་རྣལ་འབྱོར་པ་འདི་དང་ཐབས་ཤེས་མཛོད་དང་༔ ཁྱོད་ཀྱི་བསྟན་པ་དར་རྒྱས་སུ་འབྱུང་ངོ་ཟེར་རོ༔ ཡང་རྣལ་འབྱོར་པ་ལ་ཡང་དེ་བཞིན་དུ་ལུང་བསྟན་བྱས་པས༔ དེ་ནས་ཚེས་བཅྭོ་བརྒྱད་ཀྱི་ནམ་སྲོད་ཡོལ་ཙམ་དུ༔ པཎྜི་ཏ་ལབ་སྒྲོན་གྱི་རྩར་བྱོན་ནས༔ ལབ་སྒྲོན་དང་གཉིས་པོ་ཐབས་ཤེས་ཀྱིས་སྙོམས་པར་འདུག་པས་དགའ་བ་བཞིའི་བདེ་བས་འོད་དུ་ཞུ་ནས༔ འོད་ཟེར་ལྔ་འབར་བས་དེའི་གསལ་ཆ་ཁང་པའི་མཐོང་ཁུང་ནས་ཤོད་ཁང་དུ་ཤར་བས༔ དེ་ཡོན་བདག་མོ་ལྷ་མོ་སྒྲོན་གྱིས་མཐོང་པས་ཁྱིམ་དང་ཁང་པའི་སྟེང་ཤོད་དང་ཡུལ་ཁམས་ཐམས་ཅད་འོད་ཀྱིས་གང་ནས་ཟླ་བ་ཤར་བ་ལྟར་འདུག་པས་ཡོན་བདག་མོའི་སྙམ་པ་ལ༔ ཇོ་མོའི་མདུན་དུ་མར་མེ་ཡོད་པ་དེ་ཁྱིམ་ལ་འབར་ནས་ཇོ་མོའི་མ་ཚོར་བ་རེད་སྙམ་ནས་ཐོག་ཁར་ལྟར་འོང་པས་འོད་ཁ་དོག་སྣ་ལྔའི་ཁྱིམ་གང་ནས་འདུག་པའི་དཀྱིལ་དུ་ཁྱད་པར་དུ་ཇོ་མོའི་མལ་ས་ན་འོད་དཀར་པོ་ཕུབ་ཙམ་གཉིས་ཁ་སྦྱོར་བའི་དཀྱིལ་དུ་ཉི་ཟླ་གཉིས་ཁ་སྦྱོར་ནས་འོད་སྒ་ར་ར་འཁོར་ཞིང་འབར་བའི་རྣམ་པ་མཐོང་སྟེ༔ བླ་མ་དང་ལབ་སྒྲོན་དང་ཁང་པའི་སྟེང་ཤོད་གྱི་རྣམ་པ་ཅི་ཡང་མ་མཐོང་ནས༔ འོད་ཀྱིས་གང་ནས་འདུག་པས་ཡོན་བདག་མོ་ཡང་བྲོད་ནས་ཐོག་ཁང་གི་ཕྱི་ལོགས་སུ་སོང་ནས་མིག་རྩེ་གཅིག་ཏུ་བསྡད་པས་མནལ་དུ་སོང་ངོ་༔ ཐོ་རངས་ཁ་མནལ་སངས་ནས་བལྟས་པས་ཁང་པ་དང་མིག་རྩེ་རྣམས་སྔར་བཞིན་མལ་དུ་འདུག༔

དེ་ནས་ཡོན་བདག་མོ་ཡང་ལང་ནས་ཤོད་ཁང་དུ་འགྲོ་དགོས་སྙམ་ཙ་ན༔ པཎྜི་ཏ་ལབ་སྒྲོན་གྱི་མཆོད་ཁང་ནས་ཚུར་བྱུང་ནས༔ ཁོ་རང་གི་མིག་རྩེའི་ནང་དུ་བྱོན་ནས་ཐལ་བས་ཡོན་བདག་མོས་སྙམ་པ་ལ༔ ག་རེ་དེ་ཅི་ཡིན་ན་ཨང་༔ པཎྜི་ཏ་དང་ལབ་སྒྲོན་གཉིས་ཐབས་ཤེས་འགྲིགས་པ་རེད་སྙམ་ནས་འོག་ཁང་དུ་སོང་སྟེ༔ མོ་རང་གི་མི་ལ་ཡང་མ་བཤད་ནས་ཤིན་ཏུ་གསང་སྟེ༔ ནམ་ལངས་ནས་ཡོན་བདག་མོས་ཇོ་མོ་ལ་བཞེས་པ་ཁྱེར་ནས་འདི་སྐད་ཞུས་སོ༔ ཇོ་མོ་དམ་ཚིག་གཙང་ཟེར་བ་དེ་མི་བདེན་པ་འདྲ་མོད༔ མདང་སོང་ཆོ་ག་མཁན་པོས་ཁྱེད་སུན་ཕྱུང་ནས་ཐལ་མོད༔ ང་ཡང་ཁང་པ་མར་མེས་འབར་བ་རེད་སྙམ་ནས༔ ཐོག་ཁར་ལྟ་འོང་བས་མཐོང་བྱས་པས༔ ལབ་སྒྲོན་གྱིས་ཚིགས་སུ་བཅད་པ་འདི་གསུངས་སོ༔ ལུང་བསྟན་ཕལ་ཆེར་བདུད་ཀྱིས་བསླུ་བ་ཡིན༔ ཕོ་མོ་གཉིས་འགྲོགས་རྐྱེན་ངན་བདུད་དང་འཕྲད༔ ཡོན་བདག་མོ་ཡང་ཁྲེལ་འདྲེས་དེད་ནས་འོང་༔ འགྲོ་བའི་དོན་ཡང་ཅི་ནུས་ཆ་མེད་དམ༔ ཞེས་གསུངས་སོ༔ དེ་ནས་ཅུང་ཟད་ཐུགས་ཞུམ་པར་མཛད་ནས་གསོལ་འཚལ་མཛད་དོ༔ དེ་ནས་པཎྜི་ཏ་ཡང་ཞག་བདུན་བཞུགས་ནས་གནས་འགྲིམ་ལ་བཞུད་དོ༔ ལབ་སྒྲོན་ནི་ཟླ་བ་གཅིག་མལ་དུ་བཞུགས་ནས༔ འབུམ་ཚར་སུམ་ཅུ་ཀློག་པར་མཛད་དོ༔ དེ་ནས་འབུམ་ཚར་སུམ་ཅུ་ཀློག་ཚར་ནས༔ ཡོན་བདག་མོ་ལྷ་མོ་སྒྲོན་མི་བཟའ་གཉིས་ཀྱིས་རྒྱུ་དངོས་པོ་མང་དུ་ཕུལ་བས་དེ་རྣམས་ཁྱེར་ནས་བླ་མ་གྲྭ་པ་མངོན་ཤེས་ཅན་གྱི་དྲུང་དུ་བསྐྱལ་ལོ༔

ཡོན་བདག་མོ་ལྷ་མོ་སྒྲོན་གྱིས་ཀྱང་པཎྜི་ཏ་དང་ལབ་སྒྲོན་གཉིས་ཀྱི་རྒྱུ་མཚན་ཡང་མོ་རང་གིས་མི་དང་གཞན་སུ་ལ་ཡང་མ་བཤད་དོ༔ དེ་ནས་ལབ་སྒྲོན་བླ་མ་གྲྭ་པའི་མདུན་དུ་ཕྱིན་ནས་འདི་སྐད་ཞུས་སོ༔ བླ་མ་ལགས༔ ད་ང་སྔར་དང་མི་འདྲ༔ གཡེ་ཆུང་ན་པཎྜི་ཏ་བྷ་ཏྲ་ཡ་ཟེར་བའི་ཆོ་ག་མཁན་པོ་གཅིག་གིས་ང་གནག་གིས་ཞུས་པས༔ བླ་མའི་ཞལ་ནས་ཇོ་དེས་ཨ་འུ་ཙི༔ འགྲོ་དོན་རྒྱ་ཆེན་པོ་འབྱུང་བའི་རྟེན་འབྲེལ་ཡོད་པས་ཁྱོད་ཀྱི་སེམས་ཞུམ་པ་མ་མཛད་གསུངས༔ ཡང་འབུལ་བ་རྣམས་ཁྱེར་ནས་སྐྱོ་སྟོན་བསོད་ནམས་བླ་མ་ལ་མཇལ་དུ་སོང་བས་བླ་མ་ལགས༔ ད་ང་སྔར་དང་མི་འདྲ་གཡེ་ཆུང་ན་སོང་ནས་ཐོད་པ་བྷ་ཏྲ་ཡ་ཞེས་བྱ་བའི་ཆོ་ག་མཁན་པོ་གཅིག་གིས་ང་གནག་གིས་ཞུས་པས༔ བླ་མའི་ཞལ་ནས་ཇོ་མོ་ཁྱོད་རབ་ཏུ་བྱུང་བ་ཡིན་ན་གནག་པ་ཡིན་ཏེ༔ ཁྱོད་རབ་ཏུ་བྱུང་བ་ནི་མ་ཡིན་པས་གནག་པར་མི་འགྱུར་ཞིང་༔ ཐོད་པ་བྷ་ཏྲ་ཡ་ཡང་རིགས་རྒྱུད་ངན་པ་ནི་མ་ཡིན་པས༔ ད་ནི་བྷ་ཏྲ་ཡ་དང་ལྷན་ཅིག་ཏུ་སྡོད་ལ་རིགས་རྒྱུད་སྤེལ་དང་འགྲོ་དོན་རྒྱ་ཆེན་པོ་ཡུན་རིང་དུ་གནས་ཤིང་དར་རྒྱས་ཕུན་སུམ་ཚོགས་པ་འབྱུང་བའི་རྟེན་འབྲེལ་ཡོད་པས༔ མདང་སོང་ང་ཡི་རྨི་ལམ་ཡང་བཟང་བ་དང་རྟེན་འབྲེལ་ཡང་བཟང་པོ་བྱུང་གསུངས༔

དེ་ནས་ལབ་སྒྲོན་གྱི་དགོངས་པ་ལ༔ ག་རེ་བླ་མ་རྣམ་གཉིས་ལུང་བསྟན་པ་དང་༔ གཞན་ཡང་ལུང་བསྟན་མང་དུ་བྱུང་བས་ད་ནི་ཐོད་པ་བྷ་ཏྲ་ཡ་དང་རྟེན་འབྲེལ་ཞིག་བསྒྲིག་པར་བྱ་དགོས་སྙམ་ནས༔ ལབ་སྒྲོན་དགུང་ལོ་ཉེར་གསུམ་ལ་བྱོན་པས༔ སྦྲུལ་ལོ་ཟླ་བ་གསུམ་པའི་ཚེས་བཅུ་ལ་ཐོད་པ་བྷ་ཏྲ་ཡ་དང་ལྷན་ཅིག་ཏུ་བཞུགས་ནས་ཁྱིམ་ཐབས་བཟུང་སྟེ་ཡབ་ཡུམ་གཉིས་མར་དབུས་ཁོག་ཏུ་བྱོན་ནས་བཞུགས་པས༔ དེ་ནས་རྒྱལ་ཁམས་ཀྱི་མི་སྡེ་ཐམས་ཅད་ཀྱིས་ཇོ་མོ་སྐལ་ལོག་མ་ཟེར་ཞིང་འབར་སོགས་ཆེན་པོ་བྱུང་བས༔ ལབ་སྒྲོན་གྱི་ད་ནི་ཐང་ཐེངས་གཅིག་མི་ཁ་འདི་བྱོལ་དགོས་དགོངས་ནས་མར་ཀོང་པོར་བྱོན་པའི་ལབ་སྒྲོན་དགུང་ལོ་ཉེར་བཞི་ལ་སྲས་ཤིག་འཁྲུངས་པས༔ ལབ་སྒྲོན་གྱིས་ན་རེ༔ ལུང་བསྟན་ཐམས་ཅད་ཀྱི་དོན་གྲུབ་པ་ཡིན་པས་བུ་འདི་ལ་མིང་དུ་གྲུབ་པེ་བཏགས་དགོས་གསུངས་ནས༔ སྲས་ཀྱི་མིང་ལ་གྲུབ་པེ་བཏགས་སོ༔ དེ་ནས་ཐོད་པ་བྷ་ཏྲ་ཡ་དང་ཁྱིམ་ཐབས་བཟུང་ནས་སྲས་འཁྲུངས་པས༔ ལ་སྟོད་དང་གཙང་དབུས་ཁམས་གསུམ་གྱི་མི་ཐམས་ཅད་ཀྱིས་ཇོ་མོ་སྐལ་ལོག་མ་ཟེར་ནས་འབར་སོགས་བསམ་གྱིས་མི་ཁྱབ་པ་བྱས་པས་ལབ་སྒྲོན་གྱིས་མི་ཁ་འདི་ཅིས་ཀྱང་བྱོལ་དགོས་དགོངས་ནས་དག་པོར་བྱོན་༔ དེ་ནས་ཉང་པོར་བྱོན་ནས་ཟླ་བ་གཅིག་བཞུགས༔ དེ་ནས་ཀོང་པོར་བྱོན་ནས་ལབ་སྒྲོན་དགུང་ལོ་ཉེར་བདུན་ལ་བྱོན་པས་ཡང་སྲས་ཤིག་འཁྲུངས་པས་དེ་ཡི་མིང་ལ་གྲུབ་པ་བཏགས་སོ༔ ལ་ལས་ཀོང་པོ་སྐྱབས་ཀྱང་ཟེར་རོ༔ དེ་ནས་ལབ་སྒྲོན་དགུང་ལོ་སུམ་ཅུ་ལ་བྱོན་པས་ཀོང་པོ་ང་ལའི་བཀྲ་ཏོ་མགོ་ལ་བྱོན་ནས་ཚོགས་འཁོར་ཆེན་པོ་ཞིག་མཛད་པས༔

དེའི་ཚེ་དཔའ་བོ་དང་མཁའ་འགྲོ་མ་རྣམས་སྤྲིན་དཔུང་ལྟར་དུ་འདུས་ཏེ༔ ཚོགས་འཁོར་ཚར་བའི་ནངས་པར༔ ནམ་སྐྱ་ས་ལེ་བ་ལ་སྲས་མོ་ཞིག་སྐུ་འཁྲུངས་པས་དེའི་མིང་ལ་གྲུབ་ཆུང་མ་བཏགས་ཏེ༔ ང་ལ་བཀྲ་ཏོ་མགོ་ན་མཁའ་འགྲོ་འདུས་པའི་སྐུ་འཁྲུངས་པས་སྤྲུལ་སྐུ་ལ་འདུས་མ་ཟེར་བ་གྲགས་ཆེ་བར་བྱུང་ངོ་༔ དེ་ནས་དགུང་ལོ་སུམ་ཅུ་སོ་བཞི་བྱོན་པས་ཡབ་ཡུམ་སྲས་འཁོར་ཐམས་ཅད་ཡར་དབུས་ཁོག་ལ་བྱོན་པས་འཕན་ཡུལ་གྱི་གླང་ཐང་དུ་བཞུགས་པ་ལ༔ བླ་མ་ཡི་དམ་མཁའ་འགྲོ་མ་རྣམས་ཀྱིས་གསང་སྔགས་བླ་ན་མེད་པ་ཉམས་སུ་ལེན་པའི་དོན་ཆེད་དུ་ལུང་བསྟན་པ་དང་༔ གསང་སྔགས་ཀྱི་ལམ་ལ་ཞུགས་ནས་ཁྱིམ་ཐབས་བཟུང་བ་དང་རིགས་རྒྱུད་སྤེལ་བ་ལ་སོགས་པའི་ལུང་བསྟན་པ་ནི༔ མ་ཅིག་དགུང་ལོ་ཉེར་གསུམ་ནས་སོ་བཞིའི་བར་གྱི་རྣམ་ཐར་ཏེ་རྣམ་གྲངས་བཅུ་པའོ༔ སཱ་མཱ་ཡཱ༔

རྣམ་གྲངས་བཅུ་གཅིག་པ།

དེ་ནས་མ་ཅིག་དགུང་ལོ་སོ་བཞི་ལ་བྱོན་ནས་འབྲུག་ལོ་ཟླ་ལྔ་པའི་ཚེས་བརྒྱད་ལ༔ ཀོང་པོ་ནས་ཡར་དབུས་ཁོག་ཏུ་བྱོན་ནས་ལྷ་སར་ཕྱིན་ཏེ་སྔར་མི་ཁ་ངན་པ་རྣམས་ཀྱང་ཅུང་ཟད་ཞི་ནས་འདུག་སྟེ༔ ད་རུང་ཡང་སྡེ་པ་དང་གྲྭ་ཚན་རྣམས་ནི་འདུས་པར་མ་གྱུར་ཏེ༔ མི་ནག་ཕོ་མོ་ཕལ་པ་འགའ་ཞིག་ནི་སྔར་གྱི་མནལ་གཞུང་དང་དད་སེམས་ཅུང་ཟད་བྱས་ནས་དགའ་སྤྲོ་དང་བཅས་པས་བཟའ་བཏུང་ལ་སོགས་པའི་མཐུན་རྐྱེན་ཅུང་ཟད་བྱུང་པས་ལྷ་ས་ཆོས་འཁོར་དེར་ཞག་པོ་ཁ་ཡར་ཞིག་བསྡད་པས༔ ཉིན་ཞིག་སྲས་མིང་སྲིང་རྣམས་ལྷ་སའི་ལྕང་ཐང་དུ་རྩེད་མོ་རྩེ་བ་ལ་སོང་ནས་ཤིང་ལ་འཛེགས་པས་བུ་མོ་ཤིང་ལ་བྲུལ་བས་མགོ་ལ་རྨ་བྱུང་ནས་ཁྲག་མང་དུ་བབས་པ་ལ༔ སྲས་ཆུང་བ་དང་མིང་སྲིང་གཉིས་ངུ་ཞིང་སྐད་དྲག་པོས་མ་ལ་བོས་པས་དེའི་ཚེ་ལྷ་ས་སྐོར་གྱི་ས་ཕྱོགས་དེ་རྣམས་སུ་གནས་པའི་བྱ་དང་བྱེའུ་ལ་སོགས་པའི་འདབ་ཆགས་ཐམས་ཅད་སྲས་མཆེད་ལྕམ་རྣམས་ཀྱི་རྩར་འདུས་ནས་རང་རང་གི་སྐད་སྣ་ཚོགས་པ་བཏོན་པ༔

དེའི་ཚེ་ན་བུ་མོའི་སྟེང་གི་ནམ་མཁའ་ལ་འཇའ་ཚོན་སྣ་ལྔའི་གུར་གདུགས་ཕུབ་པ་ལྟར་དུ་ཕུབ་ཙམ་གསུམ་སྟེང་ནས་སྟེང་དུ་བརྩེགས་ནས་གཡས་སྐོར་དུ་ཀྱི་ལི་ལི་འཁོར་ཞིང་འདུག་པ་དང་༔ མེ་ཏོག་ཁ་དོག་སྣ་ཚོགས་པ་དག་གིས་ཆར་ཁ་བ་ལྟར་དུ་བབས་པ་དང་༔ ཐུག་ཆོམ་དང་༔ ས་གཡོ་བ་དང་ནམ་མཁའ་ལ་རོལ་མོའི་སྒྲ་མང་པོ་དྲག་པ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་བས༔ ལྷ་ས་སྐོར་གྱི་མི་ཐམས་ཅད་དེར་འདུས་ནས་དད་པ་ཤུགས་དྲགས་པོ་སྐྱེས་ནས་བུ་མོའི་མགོ་ཡི་ཁྲག་ཐང་དུ་བོ་བའི་མལ་གྱི་ས་རྡོ་རྣམས་སུས་ཐོབ་བྱས་ནས་བསྡུས་པས་མི་རྣམས་ཀྱི་ལག་ཏུ་རིང་བསྲེལ་བདུན་བདུན་དང་༔ བཅུ་བཅུ་དང་ལྔ་ལྔ་དང་༔ གསུམ་རེ་ཙམ་དང་༔ གཉིས་རེ་དང་༔ རེ་རེ་དང་རྡོ་བ་རྣམས་ལ་ཡང་སྐུ་གཟུགས་ལ་སོགས་པ་མང་དུ་བྱུང་པས་སྔར་མི་དད་པའི་མི་ཐམས་ཅད་ཀྱང་དད་པ་རང་དབང་མེད་པར་སྐྱེས་ཏེ༔ དེ་ཕྱིན་ཆོད་ནས་སྙན་པ་དང་གྲགས་པ་མཐའ་ཡས་པས་ཡུལ་ཁམས་ཐམས་ཅད་ཁྱབ་པར་བྱུང་བས་དེའི་ཚེ་འཕན་ཡུལ་བ་རྣམས་ཀྱིས་ལབ་སྒྲོན་ཡབ་ཡུམ་རྣམས་གདན་དྲངས་ནས༔ འཕན་ཡུལ་གླང་ཐང་དུ་བཞུགས་པ་ལ་འགྲོ་དོན་དང་འབུལ་བ་དང་༔ བསྙེན་བཀུར་བསམ་གྱིས་མི་ཁྱབ་པ་བྱུང་བས་དེར་ལོ་གཅིག་བཞུགས་སོ༔ དེ་ནས་སྦྲུལ་ལོ་ཟླ་བ་གསུམ་པའི་ཚེས་བཅུ་ནས་བཅོ་ལྔའི་བར་དུ་མཁའ་འགྲོ་མ་རྣམས་ཀྱིས་རིམ་པ་བཞིན་དུ་ཡར་ལ་སྟོད་དུ་འབྱོན་པར་བསྐུལ་བ་དང་༔ དེ་ནས་མ་ཅིག་དགུང་ལོ་སོ་ལྔ་ལ་བྱོན་པའི་ཚེ༔ སྲས་ཆེ་བ་གྲུབ་པེ་ཡང་ལོ་བཅུ་གཉིས་ལོན་ནས་ཡོད་དེ༔ ལོ་གསུམ་ལོན་ནས་མི་སྡེའི་ར་རྣམས་བརྐུས་ཤིང་ཟོས་ནས་རི་ཉལ་ཁོ་ན་བྱས་ནས་ཁྲམ་པར་གྱུར་ནས་ཁྱིམ་དུ་མ་ཚུད་པས་ད་ལྟ་ཡང་ར་དང་རེའུ་རྣམས་བརྐུས་ནས་ཟ་ཞིང་ཁྱིམ་དུ་མི་འཁོར་ནས་རི་རྒྱུགས་ཁོ་ནར་བྱེད་ནས་ཁྲམ་པར་གྱུར་ནས་ཡོད་དོ༔

སྲས་འབྲིང་བ་གྲུབ་པ་ཡང་ལོ་དགུ་ལོན་པ་དང་སྲས་མོ་ཆུང་བ་ལ་འདུས་མ་ཡང་ལོ་དྲུག་ལོན་པ་དང་༔ ཡབ་སྲས་བཞི་པོ་གླང་ཐང་ན་བཞུགས་བཅོལ་ནས༔ མ་ཅིག་རང་ཉིད་འཁོར་བ་ལ་སྐྱོ་བ་སྐྱེ་བའི་ཚུལ་བསྟན་ནས་ཡར་ལ་སྟོད་ངོས་སུ་བྱོན་ནས་བླ་མ་བསོད་ནམས་གྲགས་པ་དང་མཇལ་བས་བླ་མ་ལ་ཕག་མོ་ཐུགས་སྒྲུབ་ལྷ་ལྔའི་དབང་ཞུས་པས༔ དེའི་ཚེ་ལབ་སྒྲོན་གྱིས་དབང་ཡོན་དུ་སྔོན་འགྲོ་ཡན་ལག་བརྒྱད་པ་འདི་ཕུལ་ལོ༔ རང་རིག་ཡེ་ཤེས་སྟོན་མཛད་པའི༔ བླ་མ་རྣམས་ལ་ཕྱག་འཚལ་ལོ༔ དངོས་གྲུབ་ངེས་པར་སྟེར་མཛད་པའི༔ ཡི་དམ་རྣམས་ལ་ཕྱག་འཚལ་ལོ༔ སྤང་རྟོགས་ཕུན་སུམ་ཚོགས་མཛད་པའི༔ སངས་རྒྱས་རྣམས་ལ་ཕྱག་འཚལ་ལོ༔ ཞི་གྱུར་འདོད་ཆགས་བྲལ་བ་ཡི༔ དམ་ཆོས་རྣམས་ལ་ཕྱག་འཚལ་ལོ༔ གང་ལ་ཕུལ་བའི་དོན་ཆེན་པོའི༔ དགེ་འདུན་རྣམས་ལ་ཕྱག་འཚལ་ལོ༔ བརྩེ་གདུང་བར་ཆད་སེལ་མཛད་པའི༔ མཁའ་འགྲོ་ཆོས་སྐྱོང་རྣམས་ལ་ཕྱག་འཚལ་ལོ༔ ཅི་སྲིད་བྱང་ཆུབ་མ་ཐོབ་པར༔ ཁྱེད་རྣམས་ལ་ནི་བདག་སྐྱབས་སོ༔ འདོད་ཡོན་ལྔ་པོ་མཆོད་པ་འབུལ༔ སྡིག་པ་མི་དགེ་སོ་སོར་བཤགས༔ འགྲོ་རྣམས་དགེ་ལ་རྗེ་ཡི་རང་༔ ཆོས་ཀྱི་འཁོར་ལོ་སྐོར་དུ་གསོལ༔ མྱ་ངན་མི་འདའ་བཞུགས་སུ་གསོལ༔ དགེ་བ་སེམས་ཅན་དོན་དུ་བསྔོ༔ འགྲོ་ཀུན་བྱང་ཆུབ་མྱུར་ཐོབ་ཤོག༔ ཅེས་པའི་ཡན་ལག་བདུན་པ་དེ་ཕུལ་བས་བླ་མ་ཡང་ཤིན་ཏུ་མཉེས་པ་དེའི་ཚེ་མཆེད་གྲོགས་ཀུན་གྱིས་ཀྱང་བློ་ལ་འཛིན་པར་བྱའོ༔

དེ་ནས་དབང་རྣམས་རྫོགས་པར་བསྐུར་ཏེ་བུམ་དབང་ནས་ཚིག་དབང་གི་བར་དུ་བླ་མ་ཉིད་ཕག་མོ་དངོས་སུ་ཞལ་གཟིགས་ཏེ༔ མ་ཅིག་གིས་ཀྱང་དབང་གི་དངོས་གྲུབ་རྣམས་ལེགས་པོར་ཐོབ་ཅིང་ཕག་མོའི་བསྐྱེད་རིམ་ལ་བརྟན་པ་ཐོབ་པའི་ཚུལ་མཛད་དོ༔ བླ་མས་ཀྱང་གསང་སྔགས་བླ་ན་མེད་པ་ཉམས་སུ་ལེན་པ་དང་༔ འཆད་པ་དང་༔ རྩོད་པ་དང་རྩོམ་པ་ལ་དབང་བའི་ལུང་ཕོག་ནས་གསང་མཚན་ལ་རྡོ་རྗེ་དབྱིངས་ཕྱུག་མ་བཏགས་ཏེ༔ དབང་གི་རྗེས་ཆོག་དང་བཅས་པ་རྫོགས་ནས་བླ་མའི་མདུན་དེར་ཞག་གསུམ་བཞུགས་སོ༔ དེ་ནས་མ་ཅིག་བླ་མ་གྲྭ་པ་མངོན་ཤེས་ཅན་ལ་མཇལ་དུ་བྱོན་པས་བླ་མ་ལ་རྟེན་འབྲེལ་ཡན་ལག་བཅུ་གཉིས་ཀྱི་སྒྲོག་གླེང་ཕུལ་ནས་བླ་མ་ཡང་ཤིན་ཏུ་མཉེས་ནས་བླ་མས་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལུགས་ལྡོག་གི་ཚུལ་དུ་བཤད་པ་དང་ཉམས་སུ་ལེན་ཚུལ་དང་༔ གོ་དོན་དང་གཏན་ལ་ཕབ་ཚུལ་དང་བཅས་པ་ལ་དེང་སང་གཙང་དབུས་གཉིས་ན་ཁྱོད་ལས་གྲགས་པ་སུ་ཡང་མེད་ཅིང་ཁྱོད་ནི་རྟེན་འབྲེལ་གྱི་གྲུབ་ཐོབ་མ་ཆེན་མོ་ཡིན་གསུངས༔

ཡང་མ་ཅིག་གིས་བླ་མ་ལགས༔ ང་ལ་སེམས་བསྐྱེད་ཀྱི་ཆོ་ག་གཅིག་གནང་བར་ཞུ་ལགས་བྱས་པས་བླ་མའི་ཞལ་ནས༔ ཇོ་མོ་ཁྱོད་ལ་སེམས་བསྐྱེད་ཀྱི་ཆོ་ག་ཕོག་དགོས་པ་མེད༔ ཁྱོད་རང་རྩོད་པ་ཐམས་ཅད་དང་བྲལ་བའི་ཆོས་བདག་མ་ཆེན་མོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྐྱེད་པའི་ཡུམ་ཆེན་མོ༔ མདོ་རྒྱུད་གཉིས་ལ་རང་དབང་ཐོབ་པའི་རྣལ་བྱོན་མ་ཆེན་མོ༔ གསང་སྔགས་ཐམས་ཅད་ལ་རང་དབང་ཐོབ་པའི་རྒྱལ་མོ་ཆེན་མོ༔ སེམས་ཅན་ཐམས་ཅད་ལ་བུ་བཞིན་དུ་བརྩེ་བའི་མ་མ་ཆེན་མོ༔ ཆོས་ཐམས་ཅད་ཀྱི་གྲོལ་ཕུགས་གཏེར་མཛོད་ཆེན་མོ་ཡིན་པས་ཁྱོད་ལ་སེམས་བསྐྱེད་ཀྱི་ཆོ་ག་འབོག་མི་དགོས་ཞིང་༔ ང་ནི་ཁྱོད་ཀྱི་དྲུང་དུ་ཟླ་བའི་འོག་གི་སྐར་མ་དང་འདྲ་སྟེ༔ འོན་ཀྱང་ང་ཁྱོད་ཀྱི་སློབ་དཔོན་གྱི་ཚུལ་དུ་བྱས་པས་རྟེན་འབྲེལ་འགྲིགས་པའི་ཕྱིར་དུ་ངས་སེམས་བསྐྱེད་ཀྱི་ཆོ་ག་སྦྱིན་པས་ཆོག་གསུངས་ནས་དཀྱིལ་འཁོར་བཞེངས་ཏེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་པ་དང་༔

དེ་ནས་བླ་མ་དང་དཀྱིལ་འཁོར་གྱི་ལྷ་ཚོགས་ཐ་མི་དད་པའི་མདུན་དུ་ལབ་སྒྲོན་མས་སེམས་བསྐྱེད་ཀྱི་ཆོ་ག་བླངས༔ དགེ་བསྙེན་ཡོངས་རྫོགས་ཀྱི་སྡོམ་པ་བླངས་པ་དང་བླ་མས་ཀྱང་ཆོ་ག་དང་སྡོམ་པ་རྣམས་ཅི་ལྟ་བ་བཞིན་དུ་ཕོག་པ་དེའི་ཚེ་ལབ་སྒྲོན་གྱིས་བླ་མ་སངས་རྒྱས་ཤཱཀྱ་ཐུབ་པ་དངོས་སུ་ཞལ་གཟིགས་ཏེ༔ དེའི་གཡས་འཇམ་དཔལ༔ གཡོན་དུ་སྤྱན་རས་གཟིགས༔ རྒྱབ་ཏུ་ཕྱག་ན་རྡོ་རྗེ་དང་སངས་རྒྱས་གཙོ་འཁོར་བཞི་པོར་དངོས་སུ་ཞལ་གཟིགས་ནས་ཕྱག་འཚལ་བས་བསྟོད་པ་འདི་མཛད་དོ༔ འཛམ་བུའི་ཆུ་གསེར་ལྟ་བུར་བརྗིད་པའི་སྐུ༔ མགོན་པོ་ཐམས་ཅད་མཁྱེན་ལ་ཕྱག་འཚལ་ལོ༔ གཞོན་ནུའི་ཚུལ་འཛིན་ཡོན་ཏན་ལྡན༔ འཇམ་དཔལ་དབྱངས་ལ་ཕྱག་འཚལ་ལོ༔ སྙིང་རྗེ་ངེས་པར་དགོངས་མཛད་པའི༔ སྤྱན་རས་གཟིགས་ལ་ཕྱག་འཚལ་ལོ༔ མཐུ་སྟོབས་ཆེན་པོས་གདུག་པ་འདུལ༔ རྡོ་རྗེ་འཛིན་ལ་ཕྱག་འཚལ་ལོ་ཞེས་ཕྱག་འཚལ་ཏེ༔ བླ་མ་དང་སངས་རྒྱས་དབྱེར་མེད་པས་སྡོམ་པའི་ལུང་ཕོག་པར་མཛད་པས༔ སངས་རྒྱས་དང་སྤྱན་རས་གཟིགས་གཉིས་ཀྱིས་ཕྱག་ན་རིལ་བ་རེ་རེ་བསྣམས་ནས་འདུག་པའི་ནང་ན་འོད་ཟེར་དཀར་པོའི་རྒྱུན་ངང་ན་ར་ར་བྱུང་ནས་ངའི་ལུས་ཐམས་ཅད་འོད་ཀྱིས་ཁྱབ་པར་བྱས༔ འཇམ་དཔལ་གྱིས་ཕྱག་གཡས་པས་རལ་གྲི་སྔོན་པོ་ནམ་མཁའི་མདོག་འདྲ་བ་འོད་ཟེར་ལྔ་འབར་བ་ཞིག་ངའི་སྙིང་ཁར་ལྡིང་ནས་བསད་པའི་ཚུལ་མཛད༔

ཕྱག་ན་རྡོ་རྗེས་ཕྱག་གཡས་པས་རྡོ་རྗེ་ནག་པོ་རྩེ་ལྔ་པ་ཞིག་ཕྱར་བ་ལ་རྡོ་རྗེའི་ར་ལ་མེའི་ཚྭ་ཚྭ་དཔག་ཏུ་མེད་པ་འཕྲོས་པས་བགེགས་ཐམས་ཅད་བསྲེགས་པར་མཛད་པ་ལ་སོགས་པའི་མཐོང་སྣང་བསམ་གྱིས་མི་ཁྱབ་པར་བྱུང་སྟེ༔ བྱང་ཆུབ་སེམས་ཀྱི་སྡོམ་པ་བླངས་བ་དང་དགེ་བསྙེན་མ་བྱས་པའི་ཚུལ་མཛད་པའོ༔ དེ་ནས་བླ་མ་ན་རེ༔ ཇོ་མོ་ལབ་སྒྲོན་མ་ཁྱོད་ད་འདི་ནས་མར་དབུས་སུ་སོང་ལ་དབུས་སྨད་དུ་རི་དམར་པོ་ཟངས་དམར་གྱི་མདོག་འདྲ་བ་ཞིག་ཡོད་པས་དེར་ཁྱོད་ཀྱི་གདུལ་བྱ་འཕེལ་ཞིང་འགྲོ་དོན་རྒྱ་ཆེན་པོ་འོང་བར་ཡོད་པས་ཁྱོད་དེར་སོང་ལ་གདུལ་བྱ་སྐྱོངས་ཤིག་ཅེས་གསུངས་ནས་ལུང་བསྟན་མཛད་པས༔ ཡང་མ་ཅིག་གིས་ཞུས་པས༔ ང་ད་རུང་ལ་སྟོད་དུ་དམ་པ་རིན་པོ་ཆེ་ལ་མཇལ་དུ་འགྲོ༔ དེ་ནས་དབུས་སྨད་དུ་འགྲོ་ལགས་ཞུས་པས༔ བླ་མས་འོ་ན་དེ་ལྟར་དུ་མཛོད་གསུངས༔ དེ་ནས་བླ་མ་གྲྭ་པའི་མདུན་དུ་ཞག་བཅུ་བཞི་བཞུགས་པ་དང་ཡར་ལ་སྟོད་དུ་བྱོན་ནས་ཡབ་ཡུལ་དུ་ཟླ་བ་དྲུག་བཞུགས་པས་གདུལ་བྱ་དང་འགྲོ་དོན་ཡང་དཔག་ཏུ་མེད་པ་བྱུང་༔ དེ་ནས་དིང་རི་བླ་འཁོར་དུ་བྱོན་པས་དམ་པ་རིན་པོ་ཆེས་ལབ་སྒྲོན་འོང་ཞིང་ཡོད་པར་མཁྱེན་ནས་དིང་རི་བ་རྣམས་ལ་ལབ་སྒྲོན་འབྱོན་ཞིང་འདུག་པས༔ ཐམས་ཅད་ཀྱིས་བསུ་བ་ལེགས་པོར་གྱིས་གསུངས་པས༔ དེར་དིང་རི་བ་རྣམས་ཀྱིས་སྤོས་དུད་དང་རྔ་དང་༔ དུང་དང་ཌཱ་མ་རུ་ལ་སོགས་པའི་རོལ་མོ་མང་པོས་ཐག་རིང་པོ་ནས་བསུ་བ་བྱས་སོ༔ དམ་པ་རིན་པོ་ཆེ་ཡང་སྒོ་རྒྱབ་ཏུ་བྱོན་ནས་ལབ་སྒྲོན་ལ་ཁམས་འདྲི་དང་དབུ་གཏུག་མཛད་དོ༔

དེ་ནས་མ་ཅིག་གིས་འབུལ་བ་ཐམས་ཅད་སྒོ་འགྲམ་དེ་ཉིད་དུ་བྱས་ནས༔ དིང་རི་བ་རྣམས་ཀྱིས་ཀྱང་མ་ཅིག་ལ་ཇ་འདྲེན་བྱས་སོ༔ དམ་པ་དང་ལབ་སྒྲོན་དཔོན་སློབ་གཉིས་ཀ་ལ་ཐམས་ཅད་ཀྱིས་ཕྱག་དང་བྱིན་བརླབས་ཞུས་ནས་ནང་དུ་གདན་དྲངས་ཏེ་དམ་པ་རིན་པོ་ཆེ་ཡང་ཁྲི་ཐོག་ལ་བཞུགས༔ མ་ཅིག་ཡང་གདན་འབོལ་སུམ་བརྩེགས་པའི་སྟེང་དུ་བཞུགས་ནས་དང་པོ་བླ་མ་རྣམ་གཉིས་ཀྱིས་ལུང་བསྟན་ཚུལ་དང་པཎྜི་ཏ་བྷ་ཏྲ་ཡ་དང་འཕྲད་ཚུལ་དང་༔ སྲས་མཆེད་ལྕམ་རྣམས་འཁྲུངས་ཚུལ་དང་དྭགས་པོ་དང་ཀོང་པོ་རྣམས་སུ་སོང་ཚུལ་དང་དེ་ནས་ཡར་ལ་བྱོན་ཚུལ་དང་༔ བླ་མ་གྲྭ་པས་དབུས་སྨད་དུ་ལུང་བསྟན་ཚུལ་ལ་སོགས་པ་དང་གཞན་ཡང་ཆོས་དང་མཐུན་པའི་ཞུས་གནང་ཞག་གསུམ་མཛད་དོ༔ དེ་ནས་མ་ཅིག་གིས་དམ་པ་རིན་པོ་ཆེ་ལ་ཞུས་པ༔ ང་ལ་གདམས་པ་ཟབ་མོ་ཁྱད་པར་ཅན་ཞིག་གནང་བར་ཞུ་ལགས་བྱས་པས་དམ་པ་རིན་པོ་ཆེའི་ཞལ་ནས༔ ཇོ་མོ་གདམས་པ་སྔར་བཤད་པ་དེ་རྣམས་ལས་ཟབ་པ་ང་ལ་མེད་དོ༔ འོན་ཀྱང་ཕ་རོལ་ཏུ་ཕྱིན་པའི་དོན་གྱི་ཟབ་ལམ་མདོ་ལས་དྲངས་པའི་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་རྣམས་དང་༔ འདས་མ་འོངས་ད་ལྟ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཉེ་བའི་སྲས་བརྒྱད་དང་༔ ཉན་ཐོས་ཆེན་པོ་མཆོག་བརྒྱད་དང་༔ རྒྱལ་པོ་ཆེན་པོ་སྡེ་བཞི་དང་མཆོད་པའི་ལྷ་མོ་མང་པོ་དང་བཅས་པའི་ཚོགས་ཀྱིས་བསྐོར་བའི་ཕོ་བྲང་ཆེན་པོ་ནས་སྤྱན་དྲངས་ནས༔ ཚོགས་དང་མཆོད་པ་འབུལ་ཞིང་བྱིན་རླབས་དབང་གིས་རྣལ་འབྱོར་བླངས་པས་ཚེའི་བར་ཆད་ལ་སོགས་པའི་རྐྱེན་བགེགས་ཐམས་ཅད་སེལ་ཞིང་༔ མཆོག་ཐུན་མོང་གཉིས་ཀྱི་དངོས་གྲུབ་ཐོབ་ནུས་པ་ཞིག་ཡོད་དོ་གསུངས་པས༔ མ་ཅིག་གིས་འོ་ན་དེ་བདག་ལ་གནང་བར་ཞུ་ཞུས་པས༔

དམ་པའི་ཞལ་ནས་དེ་ལྟར་བྱེད་པས་ཆོག་གསུངས་ནས༔ དཀྱིལ་འཁོར་དང་མཆོད་པ་རྒྱ་ཆེན་པོ་བཤམས་ནས་སྤོས་དུད་རོལ་མོ་དང་བཅས་པས་ཡེ་ཤེས་པའི་ལྷ་ཚོགས་ཐམས་ཅད་སྤྱན་དྲངས་ནས་དཀྱིལ་འཁོར་ལ་བསྟིམས་པས༔ མ་ཅིག་གིས་ཡུམ་ཆེན་མོ་ལ་སོགས་པའི་སྤྱན་དྲངས་པའི་ལྷ་ཚོགས་ཐམས་ཅད་དངོས་སུ་ཞལ་གཟིགས་པས་དེ་རྣམས་ལ་བྱིན་བརླབས་ཞུས་པས༔ ལྷ་ཚོགས་དེ་རྣམས་ཀྱིས་ལུང་བསྟན་མང་དུ་མཛད་དོ༔ དེ་ནས་མ་ཅིག་གིས་དམ་པ་རིན་པོ་ཆེ་ཉིད་འཇམ་དབྱངས་དམར་པོ་ལ་ཞལ་དངོས་སུ་གཟིགས་སོ༔ དེ་ལ་སོགས་པའི་ཡེ་ཤེས་པའི་ལྷ་ཚོགས་དཔའ་བོ་མཁའ་འགྲོ་དང་ཆོས་སྐྱོང་རྒྱལ་ཆེན་ལ་སོགས་པའི་མཐའ་ཡས་པ་རྣམས་དངོས་སུ་ཞལ་གཟིགས་ནས༔ མ་ཅིག་གིས་མཆོད་པ་རྒྱ་ཆེན་པོ་རྣམས་བློས་སྤྲུལ་ནས་ཕུལ་བས་ཚིགས་སུ་བཅད་པ་འདི་མཛད་དོ༔ སྟོང་གསུམ་རབ་འབྱམས་ཐམས་ཅད་ཀྱི༔ གཟུགས་སུ་སྣང་བ་ཐམས་ཅད་ཀུན༔ སྐུ་མཆོག་ཕྱག་རྒྱའི་མཆོད་པ་འབུལ༔ སྐུ་འགྱུར་བ་མེད་པའི་དངོས་གྲུབ་རྩོལ༔ སྟོང་གསུམ་རབ་འབྱམས་ཐམས་ཅད་ཀྱི༔ སྒྲ་རུ་གྲགས་པ་ཐམས་ཅད་ཀུན༔ གསུང་མཆོག་ཕྱག་རྒྱའི་མཆོད་པ་འབུལ༔ གསུང་འགགས་པ་མེད་པའི་དངོས་གྲུབ་རྩོལ༔ སྟོང་གསུམ་རབ་འབྱམས་ཐམས་ཅད་ཀྱི༔ ཡིད་ཀྱི་དྲན་རྟོག་ཐམས་ཅད་ཀུན༔ ཐུགས་མཆོག་ཕྱག་རྒྱའི་མཆོད་པ་འབུལ༔ ཐུགས་འཁྲུལ་པ་མེད་པའི་དངོས་གྲུབ་རྩོལ་ཞེས་པས་ཡིད་ཀྱི་སྤྲུལ་པ་དང་དངོས་སུ་འབྱོར་པ་ཡང་བཤམས་ནས་ཕུལ་བས༔ བླ་མ་ཡང་ཤིན་ཏུ་མཉེས་ནས་དབང་རྣམས་རྗེས་གནང་དང་བཅས་པ་ཡོངས་སུ་རྫོགས་པར་བསྐུར་བས༔

དེའི་སྒྲུབ་ཐབས་ལག་ལེན་དང་བཅས་པ་རྣམས་མ་ལུས་པ་ཐུགས་སུ་ཆུད་པར་མཛད་པ་དང་༔ བཀའ་བརྒྱུད་བླ་མའི་བྱིན་རླབས་ཀྱི་དབང་དང་གདམས་པ་ཟབ་མོ་ཐུན་མོང་མ་ཡིན་པའི་མན་ངག་དང་༔ ནང་རིག་པའི་དམར་ཁྲིད་དབུ་མའི་ལམ་དུ་ཞུགས་པའི་དོན་ཁྱད་པར་ཅན་དང་༔ ལུས་འཕྲུལ་འཁོར་ལ་གནས་ཤིང་རྩ་རླུང་ལས་སུ་རུང་བར་བྱེད་པ་ལ་སོགས་པའི་མན་ངག་མང་པོ་ཞུས་ནས་ཐུགས་སུ་ཆུད་པར་མཛད་དོ༔ དེ་ནས་དམ་པ་རིན་པོ་ཆེའི་མདུན་དུ་ཟླ་བ་གཅིག་དང་ཞག་བཅུ་གསུམ་བཞུགས༔ དེའི་ཚེ་བླ་མའི་སྐུའི་བསྟོད་པ་གཅིག་དང་༔ གནས་ཀྱི་བསྟོད་པ་ལ་སོགས་པའི་བརྩམ་ཆོས་མང་དུ་མཛད་དོ༔ དེ་ནས་དམ་པ་རིན་པོ་ཆེ་ཡང་མཉེས་ནས་ལབ་སྒྲོན་མ་ལ་འདི་སྐད་གསུངས་སོ༔ ཇོ་མོ་ཁྱོད་གཉན་ཁྲོད་བརྒྱ་དང་རྩ་བརྒྱད་བཅད་པ་དང་༔

དེ་ནས་མར་དབུས་སྨད་དུ་རི་གཉན་ཟངས་རི་འཁྱིལ་པའི་གནས་བདག་ལ་ཡོན་བདག་བྱེད་ནས༔ དེར་གདུལ་བྱ་བསྐྱང་ན་གདུལ་བྱ་དང་འགྲོ་དོན་ཤིན་ཏུ་རྒྱས་པར་འབྱུང་གསུངས་ནས་ལུང་བསྟན་མཛད་དོ༔ དེ་ནས་མ་ཅིག་མར་དབུས་སྨད་དུ་འབྱོན་པར་ཆས་པས་བླ་མས་སྐྱེལ་མའི་ཚུལ་དུ་སྨོན་ལམ་དང་རྟེན་འབྲེལ་གྱི་རྣམ་ཐར་དཔྱད་པ་དང་༔ འཕྲལ་གྱི་ཞལ་ཏ་དང་ཉམས་ཀྱི་མགུར་མ་དང་ཡིད་གཅུགས་པའི་ཐུགས་བརྩེ་བས་མཁའ་འགྲོའི་སྙིང་ཁྲག་སྙན་རྒྱུད་ཀྱི་མན་ངག་ཤིན་ཏུ་ཞིབ་ལ་རྒྱས་ཤིང་ཕྲ་བ་རྣམས་གནང་ནས་བླ་མ་དང་མ་ཅིག་ཕན་ཚུན་ཐུགས་དགྱེས་པར་ཡི་རང་སྟེ༔ མ་ཅིག་ལ་དིང་རི་བ་རྣམས་ཀྱིས་སྐྱེལ་མ་ཕུལ་ཞིང་སྨོན་ལམ་ཞུས་ནས་ཡི་རང་བར་གྱུར་ཏོ༔

དེ་ལྟར་མ་ཅིག་འཁོར་བ་ལ་སྐྱོ་བ་སྐྱེ་བའི་ཚུལ་དང་༔ མཁའ་འགྲོ་མ་རྣམས་ཀྱིས་ལུང་བསྟན་ནས་ཡར་ལ་སྟོད་དུ་བྱོན་ནས་བླ་མ་རྣམ་གཉིས་དང་མཇལ་ཚུལ་དང་༔ དབང་དང་བཀའ་ལུང་རྣམས་ཐོབ་ཚུལ་དང་༔ ལུང་བསྟན་རྣམས་མཛད་ཚུལ་དང་༔ ཡབ་ཡུལ་དུ་བྱོན་ནས་གཉེན་ཚན་རྣམས་ལ་གདུང་བའི་ཚུལ་གྱིས་ཆོས་ཀྱི་འབྲེལ་པ་བསྟན་ཚུལ་དང་༔ ལ་སྟོད་དིང་རིར་བྱོན་ནས་དམ་པ་རིན་པོ་ཆེས་དབང་དང་བྱིན་རླབས་ལུང་བསྟན་མང་པོ་མཛད་ཚུལ་ལ་སོགས་པ་སྟེ༔ མ་ཅིག་དགུང་ལོ་སོ་ལྔ་ནས་སོ་དྲུག་གི་མཐའི་བར་གྱི་རྣམ་ཐར་ཏེ་རྣམ་གྲངས་བཅུ་གཅིག་པའོ༔ སཱ་མཱ་ཡཱ༔

རྣམ་གྲངས་བཅུ་གཉིས་པ།

དེ་ནས་མ་ཅིག་དགུང་ལོ་སོ་དྲུག་གི་མཐར་དིང་རི་ནས་མར་བྱོན་ཏེ༔ གངས་རིའི་ཇོ་མོ་རྗེ་ཆེན་དང་༔ དགེ་བསྙེན་ཀུ་ལ་ཁ་རི༔ གཉན་ཆེན་ཐང་ལྷ༔ ཡར་ལེགས་ལ་སོགས་པའི་གངས་གཉན་པོ་བརྒྱ་དང་ཉི་ཤུ་རྩ་བརྒྱད་ཀྱི་འཁོར་རྣམས་དང་བཅས་པ་ལ་གཉན་ས་བཅས་ཤིང་མར་ལྷོ་མོན་ངོས་སུ་བྱོན་པའོ༔ དེ་ནས་མ་ཅིག་དགུང་ལོ་སོ་བདུན་ལུག་ལོ་དང་པོའི་ཟླ་བའི་ཚེས་གཅིག་ལ་ཟངས་རི་མཁར་དམར་དུ་ཕེབ་པའོ༔ དེ་ནས་མཁར་གྱི་བདག་མོ་ཇོ་མོ་ཆོས་མཚོ་བྱ་བ་ཞིག་འདུག་པ་དེ་ན་རེ༔ ཇོ་མོ་ལབ་སྒྲོན་མ་ཁྱེད་ངའི་གནས་འདིར་བཞུགས་དང་༔ ངའི་མཁར་འདི་ཁྱེད་ལ་བཞུགས་གནས་སུ་འབུལ་བ་དང་༔ ངས་ཞབས་ཏོག་དང་བསྙེན་བཀུར་ཡང་གང་འགྲུབ་བྱེད༔ ངའི་གནས་འདིའི་བདག་པོ་ལ་ཡང་གནས་བདག་ཟངས་རི་འཁྱིལ་པ་བྱ་བའི་བཟང་པོ་གཅིག་ཡོད་པས་ཁྱེད་ལ་རོགས་དན་དང་མཐུན་རྐྱེན་དཔག་ཏུ་མེད་པ་བྱེད་དུ་ཡོང་༔

མདང་ངའི་རྨི་ལམ་ལ་ཡང་ཁྱེད་འདིར་བཞུགས་དང་གདུལ་བྱ་དང་འགྲོ་དོན་མཐའ་ཡས་པ་འོང་བར་ཡོད་ཟེར་ནས་ཁས་ལེན་དང་དམ་བཅའ་དྲག་པོ་བྱས་སོ༔ དེ་ནས་མ་ཅིག་དེ་ནུབ་མཁར་གྱི་ནང་དེར་གཟིམས་ནས་བཞུགས་པས༔ ནམ་ཐོ་རངས་ཁ་ལ་མི་དམར་པོ༔ རྟ་དམར་པོ་ཞོན་པ༔ མདུང་དར་དམར་པོ་ཕྲག་ལ་ཕྱར་བ༔ དར་དམར་པོའི་ཐོད་བཅིང་པ་དང་༔ ན་བཟས་བཀླུབས་པའི་སྟེང་ན་བསེ་ཁྲབ་སྨུག་པོ་མནབས་ནས་གོ་ཆ་སྤྲད་པ༔ དཔའ་བརྗིད་དང་ལྡན་པའི་སྐྱ་དམར་པོ་བདུན་བྱུང་ནས་མ་ཅིག་གི་མདུན་དུ་རྟ་ལས་བབས་ནས་ཕྱག་དང་སྐོར་བ་ལན་གསུམ་བྱས་ནས་འདི་སྐད་ཟེར་རོ༔ ཇོ་མོ་ལབ་སྒྲོན་མ་ཁྱོད་ངའི་གནས་འདིར་བཞུགས་དང་ངས་ཁྱེད་ཀྱི་རོགས་དན་དང་མཐུན་རྐྱེན་བྱེད༔ ཁྱེད་ཀྱི་གདུལ་བྱ་ནི་ནམ་མཁའ་ལ་ཉི་མ་ཤར་བ་བཞིན་དུ་འོང་བ་ཡོད་ཟེར་བས༔

མ་ཅིག་གིས་ན་རེ༔ ཁྱེད་རྣམས་སུ་ཡིན་གང་ནས་འོང་བ་ཡིན་བྱས་པས༔ མི་དེ་རྣམས་ཀྱི་ནང་ནས་དཔོན་དེ་ན་རེ༔ ཇོ་མོ་ངེད་རྣམས་ཡ་ཏ་རི་དམར་པོ་འདིའི་བདག་པོ་ཡིན༔ ཟངས་རིགས་བཙན་རྒོད་འབར་བ་སྤུན་བདུན་ཟེར་བ་ཡིན་ཟེར་ནས༔ རྟ་ལ་ཞོན་ནས་དཔོན་གཡོག་རྣམས་རི་དེ་ལ་ཐིམ་ནས་ཐལ་སྙམ་ཙ་ན་མནལ་སངས་ནས་བྱུང་ངོ་༔ དེ་ནས་མ་ཅིག་གི་དགོངས་པ་ལ་ག་རེ་ལུང་བསྟན་འདི་རྣམས་ཅི་འདྲ་བ་ཡིན་ཨང་༔ ཐོད་པ་བྷ་ཏྲ་ཡ་ངེད་གཉིས་ཀྱི་ལུང་བསྟན་དང་ཨེ་མི་འདྲ༔ བདུད་ཀྱིས་བསླུ་བ་འདྲ་ཡང་ཨེ་ཡིན་སྙམ་ཙ་ན་༔ དེའི་ཕྱིར་ནུབ་ནམ་སྲོད་འཁོར་ཙམ་དུ་ཡང་མི་དེ་རྣམས་བྱུང་ནས་ངེད་རྣམས་ལ་སེམས་བསྐྱེད་ཀྱི་ཆོ་ག་གཅིག་གནོངས་ཟེར་བས་དེར་མ་ཅིག་གི་ཁོང་རྣམས་ལ་སེམས་བསྐྱེད་ཀྱི་ཆོ་ག་བྱིན་ནས་དགེ་བསྙེན་བྱས་ཏེ་ཁོང་རྣམས་ཀྱིས་ཀྱང་མ་ཅིག་གི་བསྟན་པ་སྐྱོང་བར་དམ་བཅས་ཏེ༔

དེ་ནས་མ་ཅིག་གིས་ལོ་གསུམ་དེར་བཞུགས་པའི་དམ་བཅའ་དང་ཞལ་བཞེས་མཛད་ནས་བཞུགས་སོ༔ དེ་ནས་ཇོ་མོ་ཆོས་མཚོ་དང་ཡོན་བདག་མོ་དར་སྒྲོན་བྱ་བ་ཞིག་འདུག་པས་གནས་བརྟན་གམ་གྲག་བྱ་བ་ཞིག་འདུག་པ་གསུམ་ལ་མོ་པྲ་མཁན་རྣམས་ཀྱིས་ལོ་གྲངས་དང་ཚེས་གྲངས་འདི་ལ་འཆི་ཟེར་བས༔ མ་ཅིག་ལ་དབང་ཟབ་པ་ཞིག་ཞུ་ལགས་ཟེར་ནས་དབང་གི་ཆས་ཀ་རྣམས་བྱིན་པ་དང་༔ མ་ཅིག་གིས་ཕག་མོ་ལྷ་ལྔའི་དབང་བརྒྱ་དང་ཚོགས་བརྒྱ་མཛད་པས་མོ་ངན་དང་༔ ལྟས་ངན་དང་༔ མཚན་མ་ངན་པ་རྣམས་འགྱུར་བའི་རྟགས་རྣམས་བྱུང་བས་དེ་ཉིད་རྣ་བའི་ཐོས་ཚད་ཀྱི་མི་ཐམས་ཅད་ཀྱིས་མ་ཅིག་ལབ་སྒྲོན་བྱིན་རླབས་ཆེ་བ་འདུག་ཟེར་བའི་སྙན་གྲགས་ཆེན་པོ་བྱུང་༔ དེ་ནས་ཟླ་བ་དེའི་ཚེས་བཅོ་ལྔའི་ཉི་མ་རྩེ་ཤར་ཙམ་ལ་གཞུ་སྙི་མོ་ཁུ་ནས་ཁུ་སྒོམ་ཆོས་ཀྱི་སེང་གེ་བྱ་བ་ཡིས༔ ཕྱི་སྡེ་སྣོད་གསུམ་ལ་མཁས་པའི་དགེ་བའི་བཤེས་གཉེན༔ ནང་ཐེག་པ་ཆེན་པོའི་ཆོས་ལ་ཡང་ཉམས་ལེན་བྱས་པའི་སྟོན་སྒོམ་ཁྱད་པར་དུ་འཕགས་པའི་ཆོས་སེང་བྱ་བ་ཞིག་ཡོད་པ་དེར་བྱོན་ནས་བྱུང་སྟེ༔ མ་ཅིག་ལ་ཆོས་ཀྱི་དྲི་བ་དང་རྩོད་པ་མང་དུ་བྱས་པས་མ་ཅིག་ལ་ཚིག་གཅིག་གིས་ཀྱང་གླགས་མ་རྙེད་ནས༔ ཆོས་སེང་གི་ན་རེ༔ ད་མ་ཅིག་ལ་ཆོས་འབྲེལ་ཞིག་ཞུ་ལགས་བྱས་ནས༔ ཆོས་དང་གདམས་ངག་ཞུས་ནས་དེ་ཕྱིན་ཆད་ནས་མ་ཅིག་གི་སློབ་མར་གྱུར་ཏོ༔

དེ་ནས་རིན་ཆེན་རྒྱན་ཉེར་གནས་སུ་ཡོད་པ་དང་༔ ཇོ་མོ་ཆོས་མཚོ་མ་དང་དཔོན་སློབ་བཞི་འཛོམས་པའོ༔ དེ་ནས་ཟླ་བ་བརྒྱད་པའི་ཚེས་བརྒྱད་ལ་དཔལ་ལྡན་རྒྱན་དང་བསོད་ནམས་རྒྱན་གཉིས་ཕྱིན་ནས་སློབ་མར་གྱུར་ཏོ༔ དེ་ནས་ཟླ་བ་དགུ་པའི་ཚེས་གཅིག་ལ་སྟོང་སྡེ་དག་གིས་དབང་ཕྱུག་བྱུང་ནས་ཆོས་གཏམ་དང་སྒྲོག་གླིང་ཕུལ་བས་མ་ཅིག་ལ་ཚིག་གཅིག་གིས་ཀྱང་གླགས་མ་རྙེད་ནས་སློབ་མར་གྱུར་ཏོ༔ དེ་ནས་ཟླ་བ་བཅུ་གཉིས་པའི་ཚེས་གཅིག་ལ་གྲོལ་སྡེ་རྒྱལ་བའི་འབྱུང་གནས་ཕྱིན་ནས་སློབ་མར་གྱུར་ཏོ༔ དེའི་ཕྱིར་ལོ་ཟླ་བ་དང་པོའི་ཚེས་བརྒྱད་ལ་རྩེ་སྟོན་དར་མ་དཔོན་སློབ་སུམ་ཅུ་ཙམ་བྱོན་ནས་མ་ཅིག་ལ་ཆོས་གཏམ་དང་སྒྲོག་གླེང་བྱ་དགོས་སྙམ་ཙ་ན༔ མ་ཅིག་གི་ཞལ་ནས་འོ་ལགས་སོ༔ ཁྱེད་རང་དཔོན་སློབ་རྣམས་འདིར་བྱོན་པ་ལེགས༔ ད་ཕྱག་རྒྱ་ཆེན་པོ་གཅོད་ལ་མཁས་པའི་རྣལ་འབྱོར་པ་རེ་བྱས་པས་དྲག་གསུངས་པས༔ སྟོན་པ་དཔོན་སློབ་རྣམས་ཀྱིས་དེ་ལྟར་ལགས་སོ་ཞུས་ནས་སློབ་མར་གྱུར་ཏོ༔ དེ་རྣམས་ནི་སྡེ་སྣོད་གསུམ་ལ་མཁས་པའི་དགེ་བའི་བཤེས་གཉེན་ཆེན་པོ་ཡིན་པས་མ་ཅིག་གི་སློབ་མ་མཆོག་ཏུ་གྱུར་པ་རེ་རེ་བྱུང་ངོ་༔ དེ་ནས་རིམ་པ་བཞིན་དུ་བུ་ཆེན་དུ་གྱུར་པ་མང་དུ་བྱུང་ངོ་༔ དེ་ནས་བླ་མ་ཡར་སྟེང་བ་དཔོན་སློབ་ཉི་ཤུ་རྩ་ལྔ་བྱོན་ནས་བྱུང་ངོ་༔ དེའི་རྒྱབ་ལ་ཤོ་པོ་ལོ་ཙཱ་བ་དཔོན་སློབ་བཅྭོ་བརྒྱད་བྱོན་ནས་བྱུང་༔ དེ་རྣམས་མདོ་རྒྱུད་གཉིས་ལ་ཤིན་ཏུ་མཁས་པའི་མཁས་བཙུན་དགེ་བའི་བཤེས་གཉེན་ཡོངས་སུ་གྲགས་པ་རྣམས་ཡིན་པས་མ་ཅིག་ལ་རྩོད་པ་དང་ཉམས་ཚད་བྱེད་པ་ལ་འོང་བ་ཡིན་པས་ཆོས་ཕྱི་ནང་གསང་གསུམ་གང་ལ་རྩོད་པ་བྱས་ཀྱང་༔ མ་ཅིག་ལ་ཚིག་གཅིག་གིས་ཀྱང་གླགས་མ་རྙེད་ནས་བླ་མ་དཔོན་སློབ་རྣམས་ཀྱིས་མ་ཅིག་ལ་དད་པ་རྩོལ་མེད་དུ་ཐོབ་ནས་ཆོས་ཞུས་པ་དང་ན་རེ༔ འདི་ནི་རྗེས་བཙུན་མ་དངོས་ཡིན་པར་འདུག་ཟེར་ཞིང་སྙན་པ་མཐའ་ཡས་བསྒྲགས་པར་བྱས་ནས༔ དེའི་ཕྱིན་ཆོད་ནས་ཐམས་ཅད་མ་ཅིག་གི་སློབ་མར་གྱུར་ཏོ༔

དེ་ནས་ཟླ་བ་གསུམ་པའི་ཚེས་བརྒྱད་ལ་གྲུབ་ཐོབ་ཆེན་པོ་ཕ་འཐིང་བ་དཔོན་སློབ་བརྒྱ་ཐམ་པ་བྱོན་ནས་བྱུང་སྟེ་མ་ཅིག་ལ་ཆོས་ཀྱི་དྲི་བ་དང་རྩོད་པ་མང་དུ་བྱས་པ་ལ༔ མ་ཅིག་གིས་ལན་མ་ཐེབ་པ་ནི་ཚིག་གཅིག་ཀྱང་མ་བྱུང་ཞིང་༔ ཁྱད་པར་དུ་ཡང་མ་ཅིག་གི་ཐུགས་ལ་འཁྲུངས་པའི་མྱོང་ཆོས་ཀྱི་རྟོགས་པ་དང་༔ རང་ལུགས་ཀྱི་ཆོས་སྲོལ་བཏོད་ཚུལ་རྣམས་ཞིབ་ཏུ་ཞུས་པས་བླ་མ་ཡང་ཤིན་ཏུ་མཉེས་ནས་འདི་སྐད་གསུངས༔ མ་ཅིག་ལྷ་མོ་སྒྱུ་འཕྲུལ་གྱི་སྤྲུལ་པ་ཁྱེད་བོད་དུ་བྱོན་ནས་གངས་ཅན་ཁྲོད་ཀྱི་མི་དང་མི་མ་ཡིན་པའི་སེམས་ཅན་ཐམས་ཅད་བདེ་བ་ལ་བཀོད་པར་བྱེད་པ་འདི་ནི་ངོ་མཚར་ཆེ་ལ་རྗེས་སུ་ཡི་རང་ངོ་༔ བདག་ཀྱང་ཁྱེད་ལ་ཕྱག་འཚལ་མཆོད་ཅིང་བསྟོད་པར་བྱ་ཞེས་གསུངས་ནས༔ གྲུབ་ཐོབ་ཕ་འཐིང་བས་དབུ་ཞྭ་ཕུད་ནས་ལབ་སྒྲོན་ལ་བསྟོད་པ་ཚར་ཅིག་མཛད་༔ འཁོར་གྲྭ་སློབ་རྣམས་ཀྱིས་མ་ཅིག་ལ་ཆོས་ཞུས་ནས་ཕལ་ཆེར་སློབ་མར་གྱུར་ཏོ༔ དེ་ནས་མ་ཅིག་གིས་བླ་མ་ལ་ཆོས་འབྲེལ་ཞིག་ཞུ་ལགས་བྱས་པས་བླ་མས་རྟེན་འབྲེལ་འགྲིག་པས་དེ་ལྟར་བྱ་ཆོག་གསུངས་ནས་མངོན་པ་གོང་འོག་གི་བཤད་པ་རྒྱས་པར་མཛད༔ ཕྱག་རྒྱ་ཆེན་པོ་སྙན་བརྒྱུད་དྲི་མེད་མེ་ལོང་སྐོར་གསུམ་ལ་སོགས་པའི་མན་ངག་ཁ་ཅིག་གནང་བས་མ་ཅིག་གིས་ཐུགས་སུ་ཆུད་པར་མཛད་དོ༔

དེ་ནས་བླ་མས་ཕྱི་རབས་ཀྱི་རྒྱུད་འཛིན་རྣམས་དང་འགྲོ་བ་སེམས་ཅན་རྣམས་ལ་ཕན་པའི་ཕྱིར་དུ༔ ཁྱེད་རང་གིས་ཆོས་སྲོལ་རྣམས་ཡི་གེ་རིས་སུ་བཏབ་པར་མཛོད་གསུངས་པ་དང་༔ སྔར་བླ་མ་དམ་པ་རིན་པོ་ཆེ་དང་༔ བླ་མ་གྲྭ་པ་དང་༔ བླ་མ་བསོད་ནམས་གྲགས་པ་དང་བླ་མ་རྣམ་གསུམ་གྱིས་ཀྱང་མ་ཅིག་གི་ཆོས་ལུགས་ཡི་གེ་རིས་སུ་བཏབ་པར་བསྐུལ་མ་མཛད་པ་དང་༔ བླ་མ་རྣམ་པ་བཞི་ཀས་བསྐུལ་བས་མ་ཅིག་གིས་ཕྱིས་འབྱུང་རྣམས་ཀྱི་དོན་ལ་དགོངས་ནས་རང་ལུགས་ཀྱི་ཆོས་སྲོལ་ཡི་གེ་རིས་སུ་བཀོད་པ་སྟེ༔ དེ་ལ་ལབ་སྒྲོན་གྱི་ཆོས་ལུགས་འདི་ནི་རྣམ་གྲངས་ལྔའི་ཁོངས་སུ་འདུས་པ་ཞིག་གསུངས་པ་ནི་འདི་ལྟར་རོ༔ ཆོས་སྤྱི་ཙམ་པའི་མིང་འདོགས་པ་དང་གཅིག༔ ཆོས་དེའི་སྲོལ་གསུམ་དུ་བསྟན་པ་དང་གཉིས༔ ཆོས་ཀྱི་སྲོག་ཡི་གེ་གསུམ་གྱིས་འཛིན་པ་དང་གསུམ༔ ཆོས་སྲོལ་གསུམ་ཁའི་མདོར་བསྡུས་གཟན་བསྐྱུར་གྱིས་བསྡུས་པ་དང་བཞི༔ ཆོས་དེ་ཉམས་ལེན་པའི་གནས་གཉན་ས་རི་ཁྲོད་ལ་བརྟེན་པ་དང་ལྔའོ༔

དེ་ལ་དང་པོ་མིང་ནི༔ ཕྱི་སྡེ་སྣོད་གསུམ་གྱི་ཡང་རྩེ་ཕ་རོལ་ཏུ་ཕྱིན་པ་དང་༔ ནང་རྒྱུད་སྡེ་བཞིའི་ཡང་རྩེ་བླ་ན་མེད་པ་དང་གཉིས་གཅིག་ཏུ་དྲིལ་བའི་ཆོས་ལུགས་འདི་ལ་མིང་གཅིག་ཏུ་དྲིལ་བ་ལ་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་ཞེས་བྱ་བར་གྲགས་སོ༔ གཉིས་པ་སྲོལ་གསུམ་ནི༔ མདོ་ལུགས་དང་སྔགས་ལུགས་གཉིས༔ མདོ་སྔགས་ཟུང་འཇུག་གི་ལུགས་དང་གསུམ་མོ༔ གསུམ་པ་ཡི་གེ་གསུམ་ནི༔ ཧ་དང་ཧཱུཾ་དང་ཕཊཿདང་གསུམ་ནི་སྲོག་ཅེས་སོ༔ བཞི་པ་གཟན་བསྐྱུར་ནི༔ བེམ་རིག་ཕྲལ་ནས་ཕུང་པོ་མཆོད་སྦྱིན་བྱེད་པའོ༔

ལྔ་པ་གནས་ནི༔ དུར་ཁྲོད་ལ་སོགས་པའི་ལྷ་འདྲེ་སྟོབས་ཆེན་གནས་སར་སོང་ནས་ཆོས་ཉིད་སྐྱེ་བ་མེད་པ་ཉམས་སུ་ལེན་པ་དང་ལྔ་ནི་མ་ཅིག་གི་ཆོས་ལུགས་ཡིན་ཏེ༔ ཁྱད་པར་ཉམས་སུ་ལེན་བྱ་ནི༔ ཆོས་ཀྱི་སྲོལ་མཛད་པ་ཡིན་པར་སྣང་ངོ་༔ སྲོལ་གསུམ་གྱི་དང་པོ་ཕ་རོལ་ཏུ་ཕྱིན་པའམ༔ མདོ་ལུགས་ཞེས་པས་ཡི་གེ་རིས་སུ་བཀོད་ཅིང་བརྩམ་པར་མཛད་པ་ལ༔ དེ་ཡང་མ་ཅིག་གིས་ཐོག་མར་རྒྱལ་བའི་བཀའ་ཕ་རོལ་ཏུ་ཕྱིན་པ་ལ་བརྟེན་ནས་བཀའ་ཐོག་ནས་གྲོལ་བའི་ཚུལ་མཛད་པས་ན༔ ཕ་རོལ་ཏུ་ཕྱིན་པ་རྒྱལ་བའི་བཀའ་བར་པ་ལ་བརྟེན་ནས་མདོ་ལུགས་ཀྱི་ཆོས་ཚན་བརྩམས་པ་སྟེ༔ བརྩམས་པ་དངོས་ཀྱི་ཡིག་ཚན་ལ་རྩ་བ་བཞི༔ ཡན་ལག་ཉེར་ལྔ་དེ་ཐམས་ཅད་ཀྱི་གཞུང་དོན་དང་༔ ཆོས་སྡེ་ཚན་སུམ་ཅུ་ཐམ་པ་མཛད་པའི་རྩ་བ་བཞི་ནི༔ ཕྱི་བཀའ་ཚོམས་ཆེན་མོ་ཞིབ་རྒྱས་སུ་བཤད་པ་དང་གཅིག༔ ནང་ལེའུ་ལག་མ་བུ་ངོ་སྤྲོད་དུ་གདམས་པ་དང་གཉིས༔ གསང་བ་བརྡ་ཆོས་ལ་བཟླ་བ་དང་གསུམ༔ དོན་ཁོང་སྒོམ་གནད་ཐེམས་སུ་བསྟན་པ་དང་བཞིའོ༔ ཡན་ལག་ཉེར་ལྔ་ལ༔ དང་པོ་བཀའ་ཚོམས་ལ་ཡན་ལག་གསུམ་སྟེ༔ དེ་ཡང་ཕྱི་བཀའ་ཚོམས་ཆེན་མོ་ཞེས་བྱ་བ་ནི་རྩ་བའི་ཡིག་སྣ་ཡིན་ལ༔ ཞིབ་རྒྱས་སུ་བཤད་པ་ཞེས་པ་ལ༔ ཡང་ཚོམས༔ ཉིང་ཚོམས༔ སྤྱི་ཆིངས་ཆེན་མོ་ཞེས་པ་དང་གསུམ་ནི་ཡན་ལག་གོ༔ གཉིས་པ་ལེའུ་ལག་ཅེས་པ་ནི་རྩ་བ་སྟེ༔

དེ་ལ་ཡང་ཡན་ལག་གསུམ་མོ༔ ཐུན་མོང་གི་ལེའུ་ལག༔ ཐུན་མོང་མ་ཡིན་པའི་ལེའུ་ལག༔ ཁྱད་པར་གྱི་ལེའུ་ལག་དང་གསུམ་མོ༔ མ་བུ་ངོ་སྤྲོད་དུ་གདམས་པ་ཞེས་པ་ལ་ཡང་ཡན་ལག་གསུམ༔ མ་ལྔ་པ་དང་བུ་ཉེར་གཅིག་དང་སྦས་པའི་གཟེར་བུ་བཅོ་ལྔ་དང་གསུམ་སྟེ༔ ནང་ལེའུ་ལག་གི་ཡན་ལག་དྲུག་གོ༔ གསུམ་པ་གསང་བ་བརྡ་ཆོས་ཞེས་པ་ཡང་རྩ་བ་སྟེ་དེ་ལ་ཡན་ལག་གསུམ༔ བེམ་རིག་ཕྲལ་བའི་བརྡ་དང་༔ སེམས་ཆོས་ཉིད་དུ་བསྲེ་བའི་བརྡ་དང་༔ ཆོས་རྣམས་ཟད་སར་སྐྱོལ་བའི་བརྡ་དང་གསུམ་མོ༔ ལ་བཟླ་བ་ཞེས་པ་ལ་ཡང་ཡན་ལག་བཞི་སྟེ༔ ལྟ་བ་ཟབ་པ་ལ་ཕྱོགས་ལྷུང་མེད་པ་ལ་བཟླ་བ་དང་༔ སྒོམ་པ་མིག་གཏད་ལས་གཞན་དུ་མི་ཡེངས་པར་ལ་བཟླ་བ་དང་༔ སྤྱོད་པ་ཕར་ཕྱིན་དྲུག་ལས་སྤང་བླང་མེད་པར་ལ་བཟླ་བ་དང་༔ འབྲས་བུ་ངོ་བོ་ཉིད་ཀྱི་དོན་ལ་རེ་དོགས་མི་མངའ་བ་ལ་བཟླ་བ་དང་བཞི་སྟེ༔ གསང་བ་བརྡ་ཆོས་ཀྱི་ཡན་ལག་བདུན་པའོ༔ བཞི་པ་དོན་ཁོང་རྒོལ་གནད་ཐེམས་སུ་བསྟན་པ་ནི་རྩ་བ་སྟེ༔ དེ་ཉིད་སོ་སོར་ཕྲལ་བ་ལ་ཡན་ལག་ཟེར་བས༔ དེའི་དང་པོ་དོན་གྱི་ལྟ་སྒོམ་གཉིས་བསྟན་པ་དང་༔ གཉིས་པ་ཁོང་རྒོལ་གྱི་གེགས་སེལ་བསྟན་པ་དང་༔ གསུམ་པ་གནད་ཀྱི་རྩལ་སྦྱོང་བསྟན་པ་དང་༔ བཞི་པ་ཐེབས་སུ་བོགས་འདོན་བསྟན་པ་དང་༔ ལྔ་པ་མཐར་ཐུག་གི་དགོངས་པ་བསྟན་པ་ནི༔ དོན་ཁོང་རྒོལ་ཞེས་པའི་ཡན་ལག་ལྔ་པའོ༔ རྩ་བ་བཞི་ལ་མ་གྱེས་པའི་ཡན་ལག་ལ་བཞི་སྟེ༔ ཆོས་ལུགས་ཐམས་ཅད་ཕྱོགས་གཅིག་ཏུ་དྲིལ་བའི་གནད་བསྟན་པ་དང་གཅིག༔ དེ་ཐམས་ཅད་ཀྱི་སྙིང་པོ་ཡང་དག་པའི་དོན་བསྟན་པ་གཉིས༔ ཇི་ལྟར་ཞུས་པ་ལ་ལན་བཏབ་པས་ལན་གྱི་སྐོར་བསྟན་པ་དང་གསུམ༔ མ་ཞུས་པ་བརྡའི་སྒོ་ནས་འཆད་པ་བརྡ་ཆོས་ཀྱི་སྐོར་བསྟན་པ་དང་བཞི་ཡང་ཡན་ལག་གོ༔ དེ་རྣམས་ནི་མི་འཆུག་པར་བྱ་བའི་ཕྱིར་དུ༔ ཆོས་ཚན་ཐམས་ཅད་ཀྱི་གཞུང་ཕྱོགས་གཅིག་ཏུ་བསྟན་པས་གཞུང་དོན་བསྟན་པ་ཞེས་བྱ་སྟེ་གཞུང་གཅིག་པའོ༔

དེ་ཡང་རྩ་བའི་དང་པོ་ལ་ཡན་ལག་གསུམ༔ གཉིས་པ་ལ་དྲུག༔ གསུམ་པ་ལ་བདུན༔ བཞི་པ་ལ་ལྔ༔ རྩ་བ་བཞི་མ་ཡིན་པའི་ཡན་ལག་བཞི་དང་༔ ཡན་ལག་ཉེར་ལྔ་དང་༔ རྩ་བ་བཞི་དང་དེ་ཐམས་ཅད་ཀྱི་གཞུང་དོན་དང་ལྔ་སྟེ༔ ཆོས་ཀྱི་སྡེ་ཚན་སུམ་ཅུ་པ་འདི་བརྩམས་པའི་སྐུལ་པ་པོ་ནི་བླ་མ་རྣམ་པ་བཞི་ཡིན༔ དུས་ནི་མ་ཅིག་དགུང་ལོ་སོ་བརྒྱད་ཀྱི་དུས་སུའོ༔ གནས་ནི་ཟངས་རི་མཁར་དམར་ཡིན༔ ཉན་པ་པོ་ནི་སྟོན་པ་རྣམ་གསུམ༔ ཡར་སྟིང་བ་དཔོན་སློབ༔ སྟོད་ལུང་པ་དཔོན་སློབ༔ ལོ་ཙཱ་བ་དཔོན་སློབ༔ ཆོས་ཀྱི་སེང་གེ་དཔོན་སློབ༔ སྲས་མོ་དཔལ་ལྡན་རྒྱན་ལ་སོགས་པའི་ལྔ་བརྒྱ་དང་ཉེར་བདུན་འཚོགས་པ་ལ་འཆད་ཅིང་༔ ཆོས་བརྩམས་པ་དང་བཅས་པ་ནི་སྤྲེལ་ལོ་ཟླ་བ་ལྔ་པའི་ཚེས་བརྒྱད་ནས་ཟླ་བ་བདུན་པའི་ཚེས་བརྒྱད་ལ་གྲུབ་པར་མཛད་པའི༔ ཡི་གེ་པ་ནི་སྟོང་སྡེ་ངག་གི་དབང་ཕྱུག་དང་༔ གྲོལ་སྡེ་རྒྱལ་བའི་འབྱུང་གནས་གཉིས༔ ཆོས་ཀྱི་སེང་གེ་ཡར་སྟིང་བ་དང་སྟོད་ལུང་བ་གཉིས་ཀྱི་གྲྭ་པ་གཉིས་དང་ལྔས་གྲུབ་པར་བྲིས་པའི་བསྟན་ཆོས་རྣམ་པར་དག་པ་འདི་ནི་མདོ་ལུགས་ཀྱི་ཆོས་སྡེ་ཚན་སུམ་ཅུ་པའོ༔ དེ་ལ་མདའ་ཚད་ཀྱི་ཤོག་གུ་བཞི་བརྒྱ་རེ་བྱས་པའི་གཞུང་འགྲེལ་ཆ་ལག་དང་བཅས་པ་ལ་པོ་ཏི་སུམ་ཅུ་ཐམ་པ་མཛད་པ་ལ༔ ཡུལ་འཁོར་སྲུང་དང་འཕགས་སྐྱེས་པོ་ལ་སོགས་པའི་རྒྱལ་ཆེན་སྡེ་བཞི་འཁོར་དང་བཅས་པ་རྣམས་ཀྱིས་ཀྱང་རྒྱུན་དུ་ཆོས་ཞུས་ནས་མ་ཅིག་གི་བསྟན་པ་སྐྱོང་བར་མཛད་དོ༔

བརྟན་མ་བཅུ་གཉིས་ཀྱིས་དངོས་སུ་མ་ཅིག་ལ་ཆོས་ཞུས་ནས༔ མ་ཅིག་གི་བཀའ་ཉན་ནས་བསྟན་པ་སྐྱོང་བར་དམ་བཅས་སོ༔ གཉན་ཆེན་ཐང་ལྷ་ཡར་ཞུར་དང་༔ འོད་དེ་གང་རྒྱལ་དང་༔ གངས་རིའི་ཇོ་མོ་རྗེ་ཆེན་དང་༔ ཀླུ་རྒྱལ་ཟླ་བ་སྐྱོང་མཛད་དང་༔ དགེ་བསྙེན་ཀུ་ལ་ཁ་རི་དང་ལྔ་པོ་དེས་མ་ཅིག་ལ་སེམས་བསྐྱེད་ཞུས་ཤིང་དགེ་བསྙེན་གྱི་སྡོམ་པ་བླངས་ནས་མ་ཅིག་གི་རྒྱུད་འཛིན་རྣམས་སྐྱོང་བར་ཁས་བླངས་ནས་མ་ཅིག་གི་མདུན་དུ་ཞག་ཉེར་གཅིག་གི་བར་དུ་སྐྱབས་འགྲོ་དང་སེམས་བསྐྱེད་ཀྱི་བསླབ་བྱ་རྣམས་ཉན་ནས་བསྡད་དོ༔

ཞིང་སྐྱོང་གི་མཁའ་འགྲོ་མ་བདུན་དུས་རྟག་ཏུ་མ་ཅིག་གི་མདུན་དུ་འདུག་པ་ཕལ་པ་མང་པོས་མཐོང་ངོ་༔ དེ་ནས་མ་ཅིག་གི་མདུན་དུ་རྒྱ་བོད་གཉིས་ཀྱི་ལོ་ཙཱ་ལ་མཁས་པའི་ཤོ་པོ་ལོ་ཙཱ་བ་ལ་སོགས་པའི་ལོ་ཙཱ་བ་མང་པོ་འདུས་པ་དང་༔ སྒྲ་དང་ཕར་ཕྱིན་དང་ཚད་མ་ལ་མཁས་པའི་དགེ་བའི་བཤེས་གཉེན་ཡང་ལྔ་སྟོང་དང་ལྔ་བརྒྱ་ལྷག་ཙམ་དུས་རྒྱུན་དུ་འཚོགས་ཤིང་འདུག་པས་མ་ཅིག་གི་སྐུ་བསོད་དང་སྙན་གྲགས་ནི་མདོ་དབུས་ཁམས་སུ་འབྲུག་ལྟར་ཁྱབ་པར་གྲགས་སོ༔ དེ་ལྟར་མ་ཅིག་ལ་དམ་པ་རིན་པོ་ཆེ་ལ་སོགས་པའི་བླ་མ་རྣམས་ཀྱིས་ལུང་བསྟན་པའི་གནས་སུ་གདུལ་བྱ་སྐྱོང་བའི་ཆེད་དུ་ལ་སྟོད་དིང་རི་ནས་མར་བྱོན་ནས་གཉན་ཆེན་བརྒྱ་རྩ་བརྒྱད་ལ་སོགས་འདུལ་བར་མཛད་ཅིང་༔ ཟངས་རི་མཁར་དམར་དུ་བྱོན་ནས་བུ་ཆེན་རྣམས་འཚོགས་པ་དང་གདུལ་བྱ་སྐྱོང་ཞིང་མདོ་ལུགས་ཀྱི་ཆོས་རྣམས་བརྩམས་པ་ནི༔ མ་ཅིག་དགུང་ལོ་སོ་དྲུག་ནས་སོ་བརྒྱད་ཀྱི་མཐའི་བར་གྱི་རྣམ་ཐར་ཏེ་རྣམ་གྲངས་བཅུ་གཉིས་པའོ༔ སཱ་མཱ་ཡཱ༔

རྣམ་གྲངས་བཅུ་གསུམ་པ།

དེ་ནས་མ་ཅིག་དགུང་ལོ་སོ་བརྒྱད་ནས་བཞི་བཅུའི་བར་ལ་ཟངས་རི་མཁར་དམར་དུ་གདུལ་བྱ་སྐྱོང་བར་མཛད་ཅིང་བཞུགས་པས༔ དགུང་ལོ་བཞི་བཅུ་ལ་བྱོན་ནས་ཁྱི་ལོ་ཟླ་བ་དང་པོའི་ཚེས་བཅུ་ལ་འཆིང་ཕུག་གི་གྲུབ་གནས་ཕུག་བཟང་དུ་བྱོན་ནས་སྒྲུབ་པ་མཛད་དོ༔ དཔལ་ལྡན་རྒྱན་དང་༔ བསོད་ནམས་རྒྱན་དང་༔ འབུམ་ཚོ་རིན་ཆེན་རྒྱན་དང་གསུམ་མ་གཏོགས་པར་གཞན་གྱི་རྒྱུ་འགྲུལ་བཅད་ནས་མཚམས་དམ་པོར་མཛད་དོ༔

དེ་ནས་མ་ཅིག་དགུང་ལོ་ཞེ་གཅིག་ནས་དཔྱིད་ཟླ་ཐ་ཆུང་གི་ཚེས་བརྒྱད་ཀྱི་ནུབ་མོ་ནམ་གུང་ཡོལ་ཙམ་དུ་རྗེ་བཙུན་མ་སྒྲོལ་མ་ཉི་ཤུ་རྩ་གཅིག་ལ་འཁོར་མཁའ་འགྲོ་མ་འབུམ་ཕྲག་གིས་བསྐོར་ནས་ནམ་མཁར་བྱོན་ནས་བྱུང་སྟེ༔ གསང་སྔགས་ཀྱི་རྒྱུད་ཆེན་པོ་ཨུ་དུམ་ཝ་ར་དང་དུག་ལྔ་ཀླུ་འདུལ་དང་༔ ཐུགས་བཅུད་མ་རིག་མུན་སེལ་དང་གསུམ་གྱི་སྒོ་ནས་དབང་རྣམས་རིམ་པར་བསྐུར་ཞིང་དུག་ལྔ་ཀླུ་འདུལ་གྱི་རྒྱུད་ནས་སངས་རྒྱས་རིགས་ལྔ་རེ་རེའི་སྒོ་ནས་དབང་བཞི་ཡོངས་སུ་རྫོགས་པ་རེ་རེ་བསྐུར་བས༔ རིགས་ལྔ་ཀའི་སྦྱོར་ཡུམ་སྒྲོལ་མ་ཉིད་ཀྱི་མཛད་ཅིང་ལུང་བསྟན་འདི་སྐད་གསུངས༔ རྣལ་འབྱོར་མ་དུག་ལྔ་ཞི་ཞིང་ཀླུ་ལྔ་འདུལ་ནས༔ ཡེ་ཤེས་ལྔ་མངོན་དུ་གྱུར་པའི་རིགས་ལྔའི་དབང་ཟབ་མོ་འདི་སེམས་ཅན་ཐམས་ཅད་ལ་ཕན་ཐོགས་པར་བྱ་བའི་ཕྱིར་དུ༔ རྣལ་འབྱོར་མ་ཁྱེད་ལ་དབང་འདི་འབོག་པའི་སྐལ་པ་དང་ལྡན་པས༔ རྣལ་འབྱོར་མ་ཁྱོད་ཀྱིས་གསང་སྔགས་ཨུ་དུམ་ཝ་ར་དང་༔ དུག་ལྔ་ཀླུ་འདུལ་དང་༔ ཐུགས་བཅུད་མ་རིག་མུན་སེལ་དང་གསུམ་ལས༔ དེ་གསུམ་ཉམས་སུ་ལེན་པའི་ནང་གི་ཟབ་ཆོས་གྱིས་ལ༔ གསང་སྔགས་ཀྱི་ཉིང་ཁུ་ཆོས་འདི་གསུམ་གྱི་བསྐྱེད་རྫོགས་སྲོལ་དུ་ཞུགས་ལ༔ རང་རྒྱུད་གྱོང་པོ་སྨིན་པར་གྱིས་དང་༔

ད་ནས་བཟུང་སྟེ་རྒྱུད་པ་བཅུའི་བར་དུ་མུ་ཏིག་གི་ཕྲེང་བ་ལྟར་དུ་རྣམ་པར་དག་པ་རྣམས་འོང་བའི་མཐར༔ གསང་སྔགས་ཀྱི་ཆོས་ནམ་མཁའི་དབྱིངས་སུ་ཐིམ་ནས༔

དེ་ནས་བསྐྱེད་རྫོགས་མེད་པར་གྱུར་ཀྱང་རྣལ་འབྱོར་མ་ཁྱོད་རང་གསང་སྔགས་དང་༔ རིག་སྔགས་དང་༔ གཟུངས་སྔགས་དང་གསུམ་གྱི་གཙོ་མོ་བདག་མོ་ཆེན་མོར་ད་ལྟ་ངས་མངའ་གསོལ་ནས་དཀྱིལ་འཁོར་གྱི་གཙོ་མོར་བཞུགས་ཤིང་གསང་བའི་མཁའ་འགྲོ་མ་མཐིང་ག་རྡོ་རྗེ་རིགས་ཀྱི་ཌཱ་ཀི་མ༔ ཡེ་ཤེས་ཆེན་མོ་རྡོ་རྗེ་བདུད་འདུལ་མ་མཁའ་འགྲོ་མ་ཐམས་ཅད་ལ་དབང་བསྒྱུར་བའི་རྡོ་རྗེ་དབྱིངས་ཀྱི་དབང་ཕྱུག་མ་ཆེན་མོ་ཁྱེད་ཀྱིས་ཡབ་ཧེ་རུ་ཀ་སྦས་པའི་ཚུལ་གྱིས་ཁ་ཊྭཱཾ་ག་ལ་བརྟེན་ནས་གསང་བའི་བརྟུལ་ཞུགས་བསྐྱེད་ལ༔ སེམས་ཅན་སྐལ་བ་དང་ལྡན་པ་རྣམས་དཀྱིལ་འཁོར་དུ་བཅུག་ནས་སྨིན་ཅིང་གྲོལ་བར་གྱིས་ཤིག་ཅེས་གསུངས་སོ༔ དེ་ནས་མ་ཅིག་གིས་སངས་རྒྱས་རིགས་ལྔ་ལ་བསྟོད་པ་རེ་རེ་མཛད༔ སྒྲོལ་མ་ཉི་ཤུ་རྩ་གཅིག་ལ་བསྟོད་པ་ཤོ་ལོ་ཀ་ཉི་ཤུ་རྩ་གཅིག་མཛད་ནས་འདི་སྐད་ཞུས་སོ༔ རྗེ་བཙུན་མ་ཆེན་མོ་ལགས༔ ཁྱེད་ཀྱིས་བདག་ལ་བརྩེ་བ་ཆེན་པོ་མཛད་པའི་ཐུགས་བསྐྱེད་ནས་དབང་བསྐུར་བ་དང་༔ བྱིན་གྱིས་བརླབས་པའི་ནུས་པ་ཐུན་མོང་མ་ཡིན་པ་གནང་བས༔ ང་འདྲའི་སྐྱེ་དམན་བླུན་རྨོངས་ཉམ་ཆུང་ཡང་༔ ད་ནི་ཁྱེད་ཀྱི་བཀའ་དྲིན་གྱིས་འགྲོ་བའི་དོན་ཡང་འབྱུང་བ་ཡིན་སྙམ་པའི་བློ་བསྐྱེད་པ་ཙམ་ཡོད་མོད་ཀྱང་ད་རུང་ཁྱོད་ཀྱིས་རྗེས་སུ་བཟུང་དུ་གསོལ་ཞུས་པས༔

རྗེ་བཙུན་སྒྲོལ་མ་ཞལ་མཛུམ་པར་མཛད་དེ་འཁོར་གྱི་མཁའ་འགྲོ་མ་རྣམས་ལ་དལ་ཅིག་གཟིགས་པར་མཛད་ནས་འདི་གསུངས་སོ༔ རྣལ་འབྱོར་མ་ཁྱོད་སེམས་ཞུམ་པར་མ་མཛད་ཅིག༔ ཁྱོད་ཀྱིས་སྔར་ལམ་གྱི་དུས་སུ་ན་སྡེ་སྣོད་གསུམ་དང་རྒྱུད་སྡེ་བཞི་ལ་སྦྱོར་བ་མཐའ་ཡས་པར་མཛད་པས་དོན་གྱིས་མཐར་ཕྱིན་པ་ཡིན་པས༔ ངས་ད་ལྟ་ཁྱོད་ལ་བརྡ་བསྟན་པའི་ཚུལ་བྱེད་པ་ཡིན་པས་གོ་བར་གྱིས་ཤིག༔ ཁྱོད་ནི་ཡུམ་ཆེན་མོའི་སྤྲུལ་པ་ང་ཉིད་དང་དབྱེར་མེད་པའི་ཡེ་ཤེས་ཀྱི་མཁའ་འགྲོ་མ་ཆེན་མོ་རྡོ་རྗེ་དབྱིངས་ཕྱུག་མ་ཆེན་མོ་བྱ་བ་ཡིན་པས་ཤེས་བྱའི་མཚན་ཉིད་ལ་ལྟོས་པའི་དམ་ཆོས་ཐམས་ཅད་ཀྱི་གྲོལ་ཕུགས་ཁྱོད་རང་ཡིན་པའི་དོན་ལ་རྣལ་འབྱོར་མ་ཁྱོད་བློ་མ་ཞུམ་པར་སེམས་རྒྱ་ཆེན་པོ་བསྐྱེད་ཅིག་ཅེས་གསུངས་སོ༔

ཡང་མ་ཅིག་གིས་ཞུས་པ༔ རྗེ་བཙུན་ཆེན་མོ་ལགས༔ ང་ཡུམ་ཆེན་མོའི་ཐུགས་ཀྱི་སྤྲུལ་པ་ཁྱེད་དང་དབྱེར་མེད་པས་ངའི་རྒྱུ་མཚན་གང་ལྟར་མཆིས་ལགས༔ དམ་ཆོས་ཐམས་ཅད་ཀྱི་གྲོལ་ཕུགས་ང་ལ་བྱུང་ཚུལ་ཇི་ལྟར་མཆིས་ལགས༔ ཡུམ་ཆེན་མོ་ཞེས་བྱ་བ་དེ་ད་ལྟ་གནས་གང་དུ་བཞུགས་ལགས་ཞེས་ཞུས་པས༔ ཡང་རྗེ་བཙུན་སྒྲོལ་མས་ཞལ་ནས་འཛུམ་པ་མཛད་ནས་འདི་སྐད་གསུངས༔ རྣལ་འབྱོར་མ་ཁྱོད་ཀྱིས་འདས་པ་དེ་རྣམས་མཁྱེན་མོད་ཀྱང་མི་མཁྱེན་པའི་ཚུལ་མཛད་པར་འདུག་པས་འོན་ཀྱང་ལེགས་པོར་ཉོན་དང་ངས་བཤད་པའི་ཚུལ་བྱེད་དོ༔

སྤྱིར་ཡུམ་ཆེན་མོ་ཞེས་བྱ་བ་ནི་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་ཅེས་པ་དང་བདག་མེད་པའི་ཤེས་རབ་སྟོང་པ་ཉིད་ཅེས༔ ཆོས་ཀྱི་དབྱིངས་རང་བཞིན་རྣམ་པར་དག་པའི་ངོ་བོ་སྒྲིབ་གཡོགས་ཐམས་ཅད་དང་བྲལ་བའི༔ དོན་དམ་པའི་ཆོས་ཉིད་དེ་ལ་བྱང་ཆུབ་སེམས་དཔའ་དང་སེམས་མ་དང་སངས་རྒྱས་ཐམས་ཅད་བསྐྱེད་པའི་ཡུམ་ཟེར་ཏེ༔ འོན་ཀྱང་སྒོས་ཁྱད་པར་དུ་སེམས་ཅན་ཐམས་ཅད་ཀྱི་བསོད་ནམས་བསགས་ཤིང་མཆོད་པའི་ཡུལ་དུ་གྱུར་པའི་གཟུགས་སྐུའི་ཡུམ་ཆེན་མོ་ཞེས་བྱ་བ་ཞིག་ཡོད་པ་དེ་ནི་སེམས་ཅན་ཐམས་ཅད་ཀྱི་དོན་དུ༔ ང་ཉིད་རྡོ་རྗེ་སྒྲོལ་མའི་ཐུགས་ཀ་ནས་འོད་ཟེར་འཕྲོས་པས་ངས་སྨོན་པའི་མདུན་པ་དྲག་པོས་གསོལ་བ་གདབས་པས་སྨོན་ལམ་དང་ཐུགས་རྗེའི་ཤུགས་ལས་ཆོས་ཉིད་སྟོང་པའི་རང་མདངས་ལས་འོད་ཀྱི་ཐིག་ལེ་དམར་སེར་མུཾ་ཡིག་གི་མཚན་པ་འོད་དུ་འབར་བ་ལས༔

ཡུམ་ཆེན་མོ་གསེར་བཙོ་མའི་མདོག་ཅན་ཞལ་གཅིག་ཕྱག་བཞི་མ་ཞབས་གཉིས་རྡོ་རྗེའི་སྐྱིལ་མོ་ཀྲུང་དུ་བཞུགས་པ་མཚན་དང་དཔེ་བྱད་ཀྱིས་ཡོངས་སུ་བརྒྱན་པའི་སྐུ་དྲང་པོར་བསྲིངས་ཤིང་བཞུགས་པ་ལ༔ སྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་སེམས་མ་རྣམས་ཀྱིས་བསྐོར་ནས༔ འོག་མིན་སྟུག་པོ་བཀོད་པའི་ཞིང་ཁམས་ཤིན་ཏུ་རྣམ་པར་དག་ཅིང་ཆེར་དག་པའི་གནས་ཀྱི་མཆོག་ཏུ་གྱུར་པའི་ཕོ་བྲང་དེར་བཞུགས་ནས་ཡོད་དོ༔ ཡུམ་ཆེན་མོ་དེའི་ཐུགས་ཀྱི་སྤྲུལ་པ་ལ༔ རྡོ་རྗེ་དབྱིངས་ཕྱུག་མ་ཞེས་བྱ་བའི་ཁྲོ་མོ་མཐིང་ནག་ཞལ་གཅིག་ཕྱག་བཞི་མ་ལོངས་སྐུའི་མཚན་དང་དཔེ་བྱད་ཀྱིས་སྤྲས་པས་དུར་ཁྲོད་ཀྱི་ཆས་བརྒྱད་ཀྱིས་རབ་ཏུ་བརྒྱན་པ་ཞིག་བྱུང་ངོ་༔

རྡོ་རྗེ་དབྱིངས་ཕྱུག་མའི་ཐུགས་ཀྱི་སྤྲུལ་པ་ལས༔ རྡོ་རྗེ་བདུད་འདུལ་མ་ཞེས་བྱ་བའི་ལྷ་མོ་མཐིང་ནག་ཞལ་གཅིག་ཕྱག་གཉིས་མ་སྤྱི་བོར་ཕག་ཞལ་རལ་པའི་དབུས་སུ་ཐོན་པ༔ མཁའ་འགྲོ་མ་ཐམས་ཅད་དབང་དུ་སྡུད་ཅིང་སྲིད་པ་གསུམ་པོ་ཟིལ་གྱིས་ནོན་པ༔ དྲེགས་པ་ཅན་ཐམས་ཅད་ལས་ལ་བཀོལ་བར་བྱེད་པ་དེ་ནི༔ དམ་ཆོས་ཐམས་ཅད་ཀྱི་གྲོལ་ཕུགས་འབྱུང་བའི་མཁའ་འགྲོ་མ་ཡིན་ནོ༔ རྡོ་རྗེ་བདུད་འདུལ་མ་དེས་ནི་འགྲོ་བ་སེམས་ཅན་ཐམས་ཅད་ཀྱི་དོན་དུ་གང་ལ་གང་འདུལ་གྱི་ཐབས་སྣ་ཚོགས་སྟོན་པའི་ཕྱིར་དུ་ཐ་མལ་པའི་སྐྱེ་བ་མང་པོ་བཞེས་ནས༔ དེའི་ཚེ་ཡང་གསུང་རབ་མཐའ་ཡས་པ་ལ་བློ་སྦྱངས་ནས་འགྲོ་བའི་དོན་དཔག་ཏུ་མེད་པ་མཛད་པའི་མཐར་བོད་འདིར་ལབ་སྒྲོན་མ་ཁྱོད་ཉིད་ཡིན་ནོ་ཞེས་གསུངས་སོ༔

ཡང་མ་ཅིག་གིས་ཞུས་པ་རྗེ་བཙུན་ཆེན་མོ་ལགས༔ ཁྱེད་ཀྱིས་གསུངས་པ་དེ་རྣམས་ད་ནི་ངའི་ཡིད་ལ་ཤར་ནས་བྱུང་ལགས༔ ཁྱེད་ཀྱིས་བདག་ལ་གནང་བའི་གསང་སྔགས་ཀྱི་ཆོས་འདི་རྣམས་འཆད་ཆོས་བྱེད་ནས་དར་རྒྱས་སུ་འགྲོ་ནས་འགྲོ་བའི་དོན་རྒྱ་ཆེན་པོ་འབྱུང་བ་ལགས་སམ་ཞུས་པས༔ ཡང་རྗེ་བཙུན་སྒྲོལ་མའི་ཞལ་ནས༔ རྣལ་འབྱོར་མ་ངས་བཤད་པའི་གསང་སྔགས་བླ་ན་མེད་པའི་ཟབ་ཆོས་འདི་རྣམས་ལ་སྤྱིའི་འཆད་ཆོས་བྱེད་མི་འོང་ངོ་༔ འདི་ནི་སྦས་པའི་ཚུལ་གྱིས་ཉམས་སུ་ལེན་ཞིང་ཅིག་རྒྱུད་དུ་བྱས་ནས་སེམས་ཅན་སྐལ་བ་དང་ལྡན་པ་རེ་རེ་ཙམ་སྨིན་ཅིང་གྲོལ་བར་བྱེད་དགོས་སོ༔ ཁྱད་པར་དུ་ཆོས་ཀྱི་དར་ཆ་ནི༔ ངས་བསྟན་པའི་ཕྱག་རྒྱ་བཞིའི་དོན་གྱི་ཐབས་ཁྱད་པར་ཅན་དང་ཕ་རོལ་ཏུ་ཕྱིན་པའི་སྙིང་པོའི་དོན་གྱི་ལྟ་བ་དང་གཉིས་མེད་དབྱེར་མེད་གཅིག་ཏུ་དྲིལ་ལ་འགྲོ་བའི་དོན་གྱིས་དང་༔ ཐུབ་པ་ཉིད་ཀྱིས་ལུང་བསྟན་པ་བཞིན་དུ་རྩོད་ལྡན་གྱི་དུས་འདིར་གངས་ཅན་ལྗོངས་ཀྱི་མི་དང་འབྱུང་པོ་མི་མ་ཡིན་ཐམས་ཅད་ཁྱོད་ཀྱིས་འདུལ་བའི་སྐལ་བ་དང་ལྡན་ཞིང་དུས་ལ་བབས་པ་ཡིན་པས་རྣལ་འབྱོར་མ་ཁྱོད་སེམས་རྒྱ་མ་ཆུང་དང་༔ ཁྱོད་ཀྱི་བསྟན་པ་ནི་དར་ཞིང་རྒྱས་ལ་འགྲོ་དོན་ཡུན་རིང་དུ་འབྱུང་ངོ་ཞེས་གསུངས་པ་དང་༔ སྒྲོལ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་སྤྲོས་ནས་སྟེང་འོག་ཕྱོགས་མཚམས་ཐམས་ཅད་དུ་ཁྱབ་པར་བྱས༔ དེ་ནས་འོད་ཟེར་ཚུར་འདུས་ནས་མ་ཅིག་གི་སྙིང་ཁར་ཐིམ་པར་མཛད་དོ༔

དེ་ནས་རྗེ་བཙུན་སྒྲོལ་མ་མཁའ་འགྲོའི་ཚོགས་དང་བཅས་པ་རྣམས་ནམ་མཁའ་འོད་ཀྱིས་གང་བ་ལ་ཐིམ་ནས་ཐལ་སྙམ་ཙ་ན༔ ནམ་མཁའ་བུན་ནེ་གསལ་ནས་འདུག་གོ༔ དེ་ནས་དེའི་ལོ་ལ་འཆིང་ཕུག་གི་ཕུག་བཟང་དུ་བཞུགས༔ དེའི་ཕྱིར་ལོ་དགུང་ལོ་བཞི་བཅུ་ཞེ་གཉིས་བཞེས་པའི་ཟླ་བ་དང་པོའི་ཚེས་བཅུ་ལ་ཟངས་རི་མཁར་དམར་དུ་བྱོན་པའི་ལམ་དུ་མགོན་པོ་ནག་པོ་དར་ནག་གི་རལ་ཁ་གྱོན་པ་གཅིག་དང་ཆོས་སྐྱོང་བྲག་ལྷ་མགོན་པོ་དང་གཉིས་ལ་རང་རང་གི་འཁོར་གྱིས་བསྐོར་བ་དང་༔ རིགས་བཞིའི་མཁའ་འགྲོའི་ཚོགས་རྣམས་དང་༔ བརྟན་མ་བཅུ་གཉིས་དང་ཟངས་རིའི་བཙན་རྒོད་གནས་བདག་རྣམས་དང་བཅས་པས་བསུ་བ་བྱས་ནས་བྱུང་པ་དང་༔ ཟངས་རིའི་རི་པ་དང་དགོན་པ་དང་ཡུལ་མི་རྣམས་དང་བཅས་པས་བསུ་བ་བྱས་པས༔ ནམ་མཁའ་ལ་འཇའ་འོད་ཀྱི་གུར་དང་༔ མེ་ཏོག་གི་ཆར་བབ་པ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་ངོ་༔

དེ་ནས་ཟངས་རི་མཁར་དམར་དུ་ཕེབས་ནས་ཇོ་མོ་ཆོས་མཚོ་དང་དཔལ་ལྡན་རྒྱན་ལ་སོགས་པའི་བུ་མོ་བཞི་དང་ཁུ་སྒོམ་ཆོས་ཀྱི་སེང་གེ་དང་ལྔ་ལ་མཁའ་འགྲོ་གནས་འགྱུར་ལྷ་བཅུའི་དབང་བརྒྱ་དང་ཚོགས་བརྒྱ་མཛད༔ གཏོར་མ་རིན་ཆེན་སྤུང་པའི་དབང་བརྒྱ་དང་༔ ལྷའི་རྗེས་གནང་སྦྱིན་སྲེག་དང་བཅས་པ་རྣམས་གནང་ནས༔ རྗེ་བཙུན་སྒྲོལ་མ་ལ་ཐོབ་པའི་ཆེ་བ་དང་༔ གསང་སྔགས་ཀྱི་ཆོས་གཞན་ལས་ཟབ་པའི་ཆེ་བ་དང་༔ དམ་ཚིག་དང་སྡོམ་པ་ཆེ་བ་རྣམས་ཁོང་ཚོ་ལ་གསུངས་ཤིང་ཆོས་ཉན་པ་པོ་སྤྱི་ལ་ཡང་ཕར་ཕྱིན་གྱི་བཤད་པ་རྒྱས་པར་མཛད་དོ༔

དེ་ནས་དགུང་ལོ་བཞི་བཅུ་ཞེ་གཉིས་ལ་བྱོན་པའི་བྱི་བ་ལོ་ཟླ་བ་བཅུ་པའི་ཚེས་གསུམ་གྱི་ནུབ་མོ་མ་ཅིག་གི་རྣལ་ལམ་དུ༔ ས་ཕྱོགས་ཤིན་ཏུ་ཡངས་པ་རྣམ་པར་དག་ཅིང་མེ་ཏོག་སྣ་ཚོགས་ཀྱིས་བརྒྱན་པའི་ཚལ་ཞིག་ཏུ་ཕྱིན་ཏེ༔ མེ་ཏོག་ཁ་དོག་སྣ་ཚོགས་པའི་འདབ་མ་སྟོང་དང་ལྡན་པ་གཅིག་གི་སྟེང་དུ་སྐྱོ་སྟོན་བསོད་ནམས་བླ་མ་སྐུ་མདོག་དཀར་པོ་འཇའ་འོད་ཀྱི་རང་བཞིན་ཅན་ཞིག་ཏུ་བཞུགས་ནས་འདུག༔ དེའི་སྤྱི་བོར་དམ་པ་རིན་པོ་ཆེ་བཞུགས་ནས་འདུག༔ དམ་པའི་སྤྱི་བོར་རྡོ་རྗེ་འཆང་ཆེན་པོ་བཞུགས་ནས་འདུག༔ དེའི་གཡས་སུ་འཇམ་དཔལ་དམར་པོ༔ གཡོན་དུ་བྲམ་ཟེ་ཨརྱ་དྷེ་བ༔ རྒྱབ་ཏུ་སུ་ཀ་སུ་ཏི་མ༔ མདུན་དུ་རྗེ་བཙུན་སྒྲོལ་མ་དེ་རྣམས་ལོངས་སྐུའི་མཚན་དང་དཔེ་བྱད་ཀྱིས་སྤྲས་པ་སྣང་ལ་རང་བཞིན་མེད་པར་བཞུགས་འདུག་པས་དེ་རྣམས་ཀྱིས་བདག་ལ་བྱིན་གྱིས་རླབས་ཤིང་སྐུ་གསུང་ཐུགས་ཀྱི་དངོས་གྲུབ་རྩོལ་བ་དང་༔ ལུང་གིས་རྗེས་སུ་གནང་བར་མང་པོ་མཛད་དོ༔ ང་ཡི་ཕྱོགས་བཞིར་མཁའ་འགྲོ་མ་དཀར་མོ་བཞིས་དུང་དཀར་བཞི་ཕྱོགས་ཕྱོགས་སུ་ཁ་གཏད་ནས་འབུད་བདོ་ཙ༔ གླིང་བཞིར་ཐོས་པ་ཙམ་དུ་གྲགས་སྙམ་པ་བྱུང་ཙ༔ དེ་མ་ཐག་ཏུ་རྣལ་སངས་ནས་བྱུང་ངོ་༔ དེའི་ཕྱིར་ནངས་ཉི་མ་རྩེ་ཤར་དུས་སུ་སྲས་ཆུང་བ་དང་སྲས་མོ་གཉིས་ཡབ་ཀྱིས་བསྐྱལ་ནས་བྱུང་སྟེ༔ ཟངས་རི་མའི་མདུན་དུ་ཕྱིན་པ་དང་༔ སྲས་མཆེད་ལྕམ་གཉིས་ཀྱིས་མ་ཅིག་ལ་ཕྱག་འཚལ་ནས་བྱིན་བརླབ་དང་སྨོན་ལམ་ཞུ་བར་བྱས༔ ཡབ་ཀྱིས་མ་ཅིག་ལ་ཁམས་འདྲི་མཛད༔ མ་ཅིག་ཡང་ཁྲི་ཐོག་ནས་བཞེངས་ནས་ལྡང་བ་དང་གུས་པར་མཛད༔ ཡབ་སྲས་གསུམ་ཀ་ལ་ཟངས་རི་བ་རྣམས་ཀྱིས་ཕྱག་འཚལ་བ་དང་བྱིན་རླབས་ཞུ་བར་བྱས་སོ༔

དེ་ནས་ཡབ་ཞག་པོ་ཉི་ཤུ་རྩ་གཅིག་ལ་ཟངས་རིར་བཞུགས་པ་ལ་ཟངས་རི་བ་རྣམས་ཀྱིས་དབང་དང་རྗེས་གནང་ལ་སོགས་པའི་ཆོས་འབྲེལ་མང་དུ་ཞུས་སོ༔ ཡབ་ཡུམ་གཉིས་ཀྱིས་ཀྱང་སོ་སོའི་རྟོགས་པ་བསྡུར་རེས་དང་ཆོས་ཀྱི་གསུང་གླེང་མང་དུ་མཛད་དོ༔ དེ་ནས་ཡབ་ཀྱིས་གསུངས་པ༔ མ་ཅིག་ལགས་ཁྱེད་ཀྱིས་གསང་སྔགས་ཀྱི་ཆོས་སྲོལ་བཏོད་པ་དང་༔ ཕྱི་འབྱུང་གི་རྒྱུད་འཛིན་རྣམས་ཀྱི་དོན་དུ་ཁྱེད་རང་གི་ཆོས་སྲོལ་ཐམས་ཅད་དཔེ་ཆ་ལ་བཀོད་པར་མཛོད་ཅིག་གསུངས་ནས༔ དཔེ་ཆ་བརྩམ་པར་བསྐུལ་བས་མ་ཅིག་གི་ཞལ་ནས༔ རྗེས་སུ་ནམ་ཁོམ་པའི་ཚེ་ལ་དེ་ལྟར་བྱའོ་གསུངས་ནས་དཔེ་ཆ་བརྩམ་པར་ཞལ་བཞེས་མཛད་དོ༔ དེ་ནས་ཡབ་ཡུམ་གཉིས་ཀྱིས་སོ་སོའི་འདོད་ཡོན་གྱི་སྨོན་ལམ་རེ་རེ་བཏབ་ནས་ཁམས་བཟང་གི་མགུར་མ་རེ་རེ་མཛད་ནས༔ དེ་ནས་བྱི་བ་ལོ་ཟླ་བ་བཅུ་པའི་ཚེས་གཅིག་ལ་ཡབ་ཐོད་པ་བྷ་ཏྲ་ཡ་རྒྱ་གར་དུ་འབྱོན་པ་ལ་ཆས་པ་དང་མ་ཅིག་གྲྭ་འཁོར་བརྒྱ་ལྷག་ཙམ་ཞིག་གིས་ལྷ་ས་བར་དུ་སྐྱེལ་མ་མཛད་དོ༔ དེ་ནས་རྣལ་འབྱོར་པ་བདུན་གྱིས་བལ་ཡུལ་དུ་བསྐྱལ་ནས་ཡབ་ཐོད་པ་བྷ་ཏྲ་ཡ་རྒྱ་གར་དུ་བྱོན་པའོ༔

དེ་ནས་སྲས་ཆེ་བ་གྲུབ་པེ་ནི་ལོ་གསུམ་ལོན་ནས་ཁྲམ་པར་གྱུར་ཏེ༔ ཡུལ་པའི་ར་ལ་སོགས་རྣམས་བརྐུས་ནས་ཟོས་ཤིང་ད་ལྟ་ཡང་དབུས་ཁོག་སྟོད་སྨད་དུ་ཡོད་པས་མ་ཅིག་གིས་མངའ་འོག་ཏུ་མ་ཚུད་དོ༔ སྲས་ཆུང་བ་གྲུབ་པ་ནི་ལོ་བཅུ་དྲུག་ལོན་ནས་ཡབ་ཀྱི་ལུགས་ཀྱི་འཁོར་ལོ་བདེ་མཆོག་དང་མཚོ་སྐྱེས་རྡོ་རྗེ་དང་མི་འཁྲུགས་པའི་ཆོས་སྐོར་དང་༔ རྡོ་རྗེ་རྣམ་པར་འཇོམས་གསར་པའི་སྒྲུབ་ཐབས་དང་༔ རྟེན་འབྲེལ་ནག་པོ་ལྕགས་རར་ཅན་གྱི་སྒྲུབ་ཐབས་རྣམས་ཤེས་སོ༔ སྲས་མོ་ལ་འདུས་མ་ཡང་ལོ་བཅུ་གཉིས་ལོན་པས་རྗེ་བཙུན་མ་དམར་མོའི་སྒྲུབ་ཐབས་དང་སྤྱན་རས་གཟིགས་ཁ་སར་པ་ཎིའི་སྒྲུབ་ཐབས་དང་༔ འབུམ་དང་ཉི་ཁྲི་དང་བརྒྱད་སྟོང་པ་ལ་སོགས་པའི་ཡི་གེ་མཐའ་དག་ལ་རྒྱ་བོད་གཉིས་ཀྱི་ཡི་གེའི་ཚོགས་ཐམས་ཅད་ལ་ཤིན་ཏུ་མཁས་པར་ཤེས་སོ༔ དེ་ནས་སྲས་གྲུབ་པ་ལ་ནད་སྨྱོ་བརྒྱལ་དྲག་པོ་གཅིག་གིས་ཟིན་ནས་བྱུང་སྟེ༔ ཐམས་ཅད་ཀྱིས་གྲུབ་སྨྱོན་ཟེར་བ་བྱུང་ངོ་༔ དེ་ནས་མ་ཅིག་གིས་ཉོན་མོངས་པ་དང་ནད་རྐྱེན་ལ་སོགས་པའི་སྡུག་བསྔལ་ཐམས་ཅད་ཞི་བར་བྱེད་པའི་ཉེར་ཞི་རིན་ཆེན་སྒྲོན་མེ་ཞེས་བྱ་བའི་གདམས་པ་ཐུན་མོང་མ་ཡིན་པ་ཞིག་གནང་ནས༔ ཟངས་རིའི་འོག་ཏུ་དུར་ཁྲོད་ཅིག་ཡོད་པ་དེར་ཞག་བདུན་ཉལ་ནས་སྒོམ་དུ་བཅུག་པས་གྲུབ་པའི་ནད་སྨྱོ་བརྒྱལ་ཞི་ནས་རྟོགས་པ་ཁྱད་པར་ཅན་རྒྱུད་ལ་སྐྱེས་ནས་ཉེར་ཞི་རིན་ཆེན་སྒྲོན་མེའི་གདམས་པ་མ་ལུས་པ་ཐུགས་སུ་ཆུད་ཅིང་༔ མ་ཅིག་གི་ཆོས་ལུགས་གཞན་ལས་ཁྱད་པར་དུ་ལྷག་པའི་ལྷག་ཆོས་སུ་མཐོང་ནས་ངེས་ཤེས་གཏིང་ནས་འཁྲུངས་པས་དད་པ་རྩོལ་མེད་དུ་སྐྱེས་སོ༔ དེ་ནས་ལ་སྟོད་དིང་རི་ནས་དམ་པ་སངས་རྒྱས་རིན་པོ་ཆེ་ཟངས་རིར་གདན་དྲངས་ནས་དམ་པའི་དྲུང་དུ་སྲས་གྲུབ་པ་རབ་ཏུ་བྱུང་བས་ཟངས་རི་བ་ལ་ཆོས་སྟོན་ཡང་རྒྱ་ཆེན་པོ་བྱས་པ་དང་༔ མ་ཅིག་གི་ཞལ་ནས་དམ་པ་རིན་པོ་ཆེ་ལགས་ཁོ་རབ་ཏུ་བྱུང་བའི་སྡོམ་པ་དེ་ཁྱོས་གནོངས་དང་མིང་དེ་ངས་འདོགས་དགོས་པ་ཡོད་གསུངས་པས༔ དམ་པའི་ཞལ་ནས་དེའི་རྒྱུ་མཚན་ཇི་ལྟར་ལགས་གསུངས་པས༔

མ་ཅིག་གི་ཞལ་ནས་ཁོའི་མིང་དེ་ངས་འདོགས་དགོས་པའི་རྟེན་འབྲེལ་ཡོད་པས་ཁོ་ཡི་ཕ་དེ་སངས་རྒྱས་ཐོད་པའི་རྣམ་འཕྲུལ་ཐོད་པ་བྷ་ཏྲ་ཡ་ཡིན་པས་དེ་ལ་འདྲ་བའི་མིང་ཞིག་འདོགས་དགོས་པ་དང་གཅིག༔ ཁོ་ནད་སྨྱོ་བརྒྱལ་གྱིས་ཟིན་ནས་བྱུང་བས་དེ་ལ་འདྲ་བའི་མིང་ཞིག་འདོགས་དགོས་པ་དང་གཉིས༔ ད་ཁོའི་ནད་སོས་ནས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་ཁྱེད་ལྟ་བུ་དང་མཇལ་ནས་ཁོ་རབ་ཏུ་བྱུང་བ་ཐོབ་པས༔ ད་ཁོའི་བསམ་པ་ཐམས་ཅད་འགྲུབ་ནས་ཡོད་པས་མིང་འདི་གསུམ་བསྡོམ་པ་ལ་ཁོ་ལ་ཐོད་སྨྱོན་བསམ་འགྲུབ་མིང་དུ་འདོགས་དགོས་པ་དང་ངའི་སྔགས་ཀྱི་ཆོས་རྒྱུད་འཛིན་པ་ཡང་ཁོ་ལ་འོང་བ་ཡོད་པ་དང་༔ ལར་ཡང་ཁོ་མཆོག་གི་སྣོད་ལྡན་ཞིག་ཡིན་པར་སྣང་བས་ཁོ་འོང་བའི་ནུབ་མོ་ང་ཡི་རྨི་ལམ་དུ་མཁའ་འགྲོ་མ་དཀར་མོ་བཞིས་དུང་དཀར་བཞི་ཕྱོགས་སུ་ཁ་གཏད་ནས་འབུད་བདོ་ཙ༔ གླིང་བཞིར་ཐོས་པ་ཙམ་དུ་གྲགས་སྙམ་པ་བྱུང་ཙ་ན༔ དེའི་ཕྱིར་ནངས་ཉི་མ་རྩེ་ཤར་ལ་ཁོ་ཕྱིན་ནས་བྱུང་གསུངས་སོ༔ དེ་ནས་དམ་པ་རིན་པོ་ཆེས་ཐོད་སྨྱོན་བསམ་འགྲུབ་ལ་ཁོང་རང་གི་ཐུགས་དམ་འཇམ་དཔལ་གྱི་རྗེས་གནང་དང་རྗེ་བཙུན་མ་ཕག་མོ་ལྷ་ལྔ་དང་མ་ཧ་མ་ཡ་ལྷ་ལྔའི་དབང་རྣམས་རྫོགས་པར་བསྐུར༔ བླ་མའི་རྣལ་འབྱོར་ཟབ་ལམ་མ་དང་གཞུང་གྲོལ་ཚོགས་དྲུག་གི་གདམས་པ་རྣམས་ལྷག་ལུས་མེད་པར་གནང་ནས་མ་ཅིག་གི་བསྟན་པ་འཛིན་ཅིང་འགྲོ་བའི་དོན་འབྱུང་བ་ལ་སོགས་པའི་ལུང་བསྟན་མང་པོ་མཛད་དོ༔

དེ་ནས་དམ་པ་རིན་པོ་ཆེ་ལ་འབུལ་བ་རྒྱ་ཆེན་པོ་བྱས་ནས་ལ་སྟོད་དིང་རི་ལ་བྱོན་ནོ༔ སྲས་གྲུབ་པ་ཡང་དེ་ཕྱིན་ཆོད་ནས་འཛམ་བུའི་གླིང་དུ་ཐོད་སྨྱོན་བསམ་འགྲུབ་ཏུ་གྲགས་སོ༔ དེ་ནས་ཐོད་སྨྱོན་བསམ་འགྲུབ་ཀྱིས་དམ་པ་རིན་པོ་ཆེ་དང་༔ མ་ཅིག་གཉིས་ལ་དད་པ་རྩོལ་མེད་དུ་སྐྱེས་ནས་ང་ཡི་ཕ་ནི་དམ་པའོ༔ མ་ནི་ལབ་སྒྲོན་ཡིན་ཟེར་ནས་ཕ་དམ་པ་ལ་གསོལ་བ་འདེབས༔ མ་ལབ་སྒྲོན་ལ་གསོལ་བ་འདེབས་ཟེར་ཞིང་ཞག་གཅིག་ལ་ཐུན་དྲུག་ཏུ་བརྒྱ་རྩ་བརྒྱད་རེ་བཟླས་པས་གཞན་ཐམས་ཅད་ཀྱིས་ཀྱང་དེ་ལྟར་དུ་གསོལ་བ་བཏབ་པས༔ དེ་ལ་ལྟོས་ནས་དེའི་ཕྱིན་ཆོད་ནས་ཕ་དམ་པ་དང་མ་ལབ་སྒྲོན་ཞེས་པ་འཛམ་བུའི་གླིང་དུ་གྲགས་སོ༔ དེ་ནས་ཐོད་སྨྱོན་བསམ་འགྲུབ་ལ་མ་ཅིག་གིས་ཕ་རོལ་ཏུ་ཕྱིན་པའི་མདོ་ལུགས་ཀྱི་ཆོས་དབང་སེམས་ལ་བསྐུར་བ་ཞེས་བྱ་བའི་ཏིང་ངེ་འཛིན་གྱི་དབང་བཞི་ནམ་མཁའ་གོ་འབྱེད་ཀྱི་ངོ་སྤྲོད་འཕོ་བའི་གདམས་པ་ཞལ་ཤེས་དམར་ཁྲིད་དང་བཅས་པ་རྣམས་མ་ལུས་པ་གནང་ནས༔ དེ་ནས་ཕྱོགས་བཅུའི་སངས་རྒྱས་གནས་འགྱུར་གྱི་དབང་བརྒྱ་དང་༔ མ་རྒྱུད་མཁའ་འགྲོ་གནས་འགྱུར་གྱི་དབང་བརྒྱ་དང་༔ གཏོར་མ་རིན་ཆེན་སྤུང་པའི་དབང་བརྒྱ་དང་དབང་སུམ་བརྒྱ་རྗེས་གནང་དང་བཅས་པ་རྣམས་གནང་ནས་སྨིན་པར་བྱས༔ དེའི་བསྐྱེད་རིམ་ལ་བསླབ་ཅིང་སྦྱངས་པས་ཟླ་བ་བཞི་ནས་བརྟན་པ་ཐོབ༔ རྫོགས་རིམ་ལ་བསླབ་ཅིང་སྦྱངས་པས་ཟླ་བ་གསུམ་ནས་དྲོད་ཚད་ཐོབ་སྟེ༔ བསྐྱེད་རྫོགས་ལ་ནུས་པ་ཐོན་པར་བྱུང་ངོ་༔ དེ་ནས་ཕྱག་རྒྱ་ཆེན་པོའི་གཅོད་ཀྱི་སྐོར་མ་ལུས་པར་གནང་བས་གཅོད་ཀྱི་སྐོར་རྣམས་མ་ལུས་པ་ཐུགས་སུ་ཆུད་ཅིང་ནུས་པ་ཐོན་པར་མཛད་དོ༔

སྲས་ཆེ་བ་གྲུབ་པེ་ནི་གླང་ཐང་བ་ཨར་རྦ་མགོ་ཡག་ཅེས་བྱ་བའི་བཙན་དར་ཅན་གཅིག་གི་བུ་མོ་སྒྲོལ་མ་མཚོ་ཞེས་བྱ་བ་ཞིག་ཡོད་པ་དེ་ཆུང་མར་བླངས་ནས་ད་ལྟ་ཡང་ཁྲམ་པའི་ཚུལ་དུ་ཡོད་པས་མི་ཐམས་ཅད་ཀྱིས་གྲུབ་པེ་ར་དགྲ་ཟེར་ཞིང་ཡོད་པས་ཆོས་ལ་མ་ཚུད་དོ༔ སྲས་མོ་ལ་འདུས་མས་ནི་སློབ་གཉེར་དང་འགྲོ་དོན་ལ་ཤིན་ཏུ་བརྩོན་ཞིང་དུས་རྒྱུན་དུ་མ་ཅིག་གི་མདུན་དུ་བཞུགས་སོ༔ དེ་ལྟར་མ་ཅིག་ཟངས་རི་ནས་འཆིང་ཕུར་བྱོན་ནས་སྒྲུབ་པ་མཛད་པའི་ཚེ༔ རྗེ་བཙུན་སྒྲོལ་མས་གསང་སྔགས་ཀྱི་ཆོས་རྣམས་གནང་ཞིང་ལུང་བསྟན་པ་དང་སྒྲུབ་པ་ཚར་ནས་ཟངས་རིར་བྱོན་ནས༔ སྣོད་ལྡན་གྱི་སློབ་མ་ལ་དབང་བསྐུར་ཞིང་སྔགས་ཆོས་རྣམས་གནང་ཞིང་ལུང་བསྟན་པ་དང་སྒྲུབ་པ་ཚར་ནས་ཟངས་རིར་བྱོན་ནས་སྣོད་ལྡན་གྱི་སློབ་མ་ལ་དབང་བསྐུར་ཞིང་སྔགས་ཆོས་འཆད་པ་དང་༔ ཡབ་ཡུམ་སྲས་འཁོར་རྣམས་མཇལ་ནས་སྲས་ཅུང་པོ་སྨིན་ཅིང་གྲོལ་བ་མཛད་པའི་བར་གྱི་མ་ཅིག་དགུང་ལོ་བཞི་བཅུ་ནས་ཞེ་གསུམ་བར་གྱི་རྣམ་ཐར་ཏེ་རྣམ་གྲངས་བཅུ་གསུམ་པའོ༔

རྣམ་གྲངས་བཅུ་བཞི་པ།

དེ་ནས་མ་ཅིག་དགུང་ལོ་ཞེ་གསུམ་གྱི་དུས་སུ་སྲས་ཐོད་སྨྱོན་བསམ་འགྲུབ་དགུང་ལོ་བཅུ་བདུན་བཞེས་པས་མ་ཅིག་གི་དགོངས་པ་ལ་ད་ནི་སྲས་ཐོད་སྨྱོན་བསམ་འགྲུབ་ཀྱི་སྒྲུབ་པ་ཞིག་བྱེད་པའི་རྟེན་འབྲེལ་ཤམ་པོའི་གངས་ལ་ཡོད་དོ་གསུངས་ནས༔ སྲས་ཐོད་སྨྱོན་བསམ་འགྲུབ་ལ་གྲོགས་པོ་རྣལ་འབྱོར་པ་ནུས་པ་ཐོན་པ་གསུམ་དང་༔ ཁུ་སྒོམ་ཆོས་ཀྱི་སེང་གེ་དང་༔ དཔལ་ལྡན་རྒྱན་དང་༔ དེ་རྣམས་ནི་སྨིན་ཅིང་གྲོལ་བར་མཛད་པས་དག་པའི་སྒྱུ་ལུས་ཀྱི་དྲོད་ཚད་ཐོབ་ནས་འདོད་ཡོན་གྱི་ཟས་གོས་མེད་ཀྱང་གཏུམ་མོའི་བདེ་དྲོད་དང་ཏིང་ངེ་འཛིན་གྱི་ཟས་གོས་གྱིས་འཚོ་བར་གྱུར་ཏོ༔ དེ་ནས་གླང་ལོ་ཟླ་བ་བདུན་པའི་ཚེས་བཅུ་ལ་ཟངས་རི་ནས་ཆས་ཏེ་ཐོད་སྨྱོན་བསམ་འགྲུབ་དཔོན་སློབ་རྣམས་ཤམ་པོའི་གངས་ལ་བྱོན་པའོ༔

མ་ཅིག་རྗེས་སུ་བཞུགས་ནས་ཟླ་བ་བརྒྱད་པའི་ཚེས་བརྒྱད་ཀྱི་ནངས་པར་ཐོ་རངས་ཁ་སྔ་མ་ལ་རྫུ་འཕྲུལ་གྱིས་ནམ་མཁའ་ལ་གཤེགས་ནས་ཉི་མ་རྩེ་ཤར་བ་དང་མཉམ་དུ་ཤམ་པོའི་གངས་ཕུག་མོ་ཆེར་བྱོན་ནས་ཚོགས་ཀྱི་འཁོར་ལོ་རྒྱ་ཆེན་པོར་བཤམ་ཚར་བ་དང་༔ དེ་ནས་ཉི་མ་རྩེ་དྲོས་ཙམ་ལ་སྲས་ཐོད་སྨྱོན་བསམ་འགྲུབ་དཔོན་སློབ་རྣམས་ཕྱི་ནས་བྱུང་པས༔ མ་ཅིག་གི་ཞལ་ནས་ཁྱེད་དཔོན་སློབ་རྣམས་ཐང་མ་ཆད་དམ་གསུངས་པས༔ ཐོད་སྨྱོན་གྱིས་ན་རེ༔ ངེད་རྣམས་ཐང་མ་ཆད་པར་བྱུང་ལགས༔ མ་ཅིག་སྔོན་དུ་མ་བྱོན་པ་ལ་ད་ལྟ་འདིར་ཕེབས་ནས་འདུག་པས་ཐུགས་འདོགས་ཆེ་བ་ལགས་སོ་ཟེར་སྐད་དོ༔ དེ་ནས་མ་ཅིག་གིས་སྲས་ལ་བཀའ་བརྒྱུད་བླ་མའི་བྱིན་རླབས་དབང་མོ་ཆེ་དང་༔ རིགས་ལྔའི་དབང་མོ་ཆེ་དང་༔ ཕག་མོ་གསང་སྒྲུབ་ལྷ་ལྔའི་དབང་རྣམས་རྫོགས་པར་བསྐུར་ཏེ༔ སྙན་བརྒྱུད་ཀྱི་ཁང་རྣམས་ཐམས་ཅད་བཀྲོལ་ནས༔ གདམས་པ་རྣམས་མ་ལུས་པར་གནང་པ་དང་དེར་དཔའ་བོ་དང་མཁའ་འགྲོ་མ་རྣམས་དཔག་ཏུ་མེད་པ་འདུས་པ་དང་འཇའ་འོད་ཀྱི་གུར་དང་༔ མེ་ཏོག་གི་ཆར་བབ་པ་དང་༔ ནམ་མཁའ་ལ་རོལ་མོའི་སྒྲ་སྙན་མང་པོ་གྲགས་པ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ངོ་༔ དེ་ནས་མ་ཅིག་ཡང་ཞག་བདུན་དེར་བཞུགས་ནས་གནས་དང་ཕུག་པ་རྣམས་བྱིན་གྱིས་རླབས་པར་མཛད༔ ཤམ་པོའི་གནས་བདག་ལ་བཀའ་བསྒོ་མཛད་ནས་གནས་བདག་གིས་ཀྱང་སྲས་ཀྱི་སྒྲུབ་པ་ལ་བར་ཆད་མི་བྱེད་ཅིང་སྒྲུབ་པའི་གྲོགས་བྱེད་པར་དམ་བཅས་པ་དང་༔ པདྨའི་རིགས་ཀྱི་མཁའ་འགྲོ་དྲི་མེད་མ་ཞེས་བྱ་བ་གཅིག་ལ་ཁྱོད་ཀྱིས་ངའི་སྲས་འདི་ལ་འཚོ་བ་སྦྱོར་བའི་ཡོན་བདག་གྱིས་ཤིག་གསུངས་ནས་བཀའ་གནང་བར་མཛད་པས༔ མཁའ་འགྲོ་དྲི་མེད་མས་ཀྱང་ཡོན་བདག་བྱེད་པར་ཁས་བླངས་ནས༔

དེ་ནས་མ་ཅིག་གིས་སྲས་ལ་གསུངས་པ༔ ཐོད་སྨྱོན་བསམ་འགྲུབ་ཁྱོད་ལོ་བཅུ་གསུམ་གྱི་བར་ལ་ཕུག་པ་འདིའི་ནང་ན་བསྒྲུབ་པ་གྱིས་ལ༔ ཕུང་པོ་ཁམས་དང་སྐྱེ་མཆེད་ཐམས་ཅད་ལྷའི་ཕོ་བྲང་དུ་གྱུར་ཅིང་༔ དག་སྣང་སངས་རྒྱས་ཀྱི་ཞིང་ཁམས་ལ་བློ་འབྱོང་ཞིང་བརྟན་པ་ཐོབ་པར་གྱིས་དང་༔ དེའི་ཚེ་ལ་ཁྱོད་ལ་འཚོ་བ་སྦྱོར་བའི་ཡོན་བདག་གཅིག་ཀྱང་འདིར་བསྐོས་ནས་ཡོད་དོ་གསུངས་པ་དང་༔ ཐོད་སྨྱོན་གྱིས་ན་རེ༔ འོ་ན་མ་ཅིག་ལགས་ངས་སྒྲུབ་པ་བྱེད་པའི་ཚེ་ལ༔ རང་རེ་མ་ཅིག་གིས་གསང་སྔགས་ཀྱི་བསྐྱེད་རྫོགས་ཀྱི་ཆོས་སྲོལ་ཐམས་ཅད་ཡི་གེ་ལ་བཀོད་པ་མཛོད་དང་༔ ད་ཕྱིན་ཆད་ངས་ཀྱང་ཚིག་གིས་མཁས་པར་བྱེད་ཅིང་ཁྱད་པར་དུ་ཡང་ཕྱིས་འབྱུང་གི་དུས་སུ་རྒྱུད་འཛིན་གྱི་སློབ་མ་རྨོངས་པ་རྣམས་ཀྱི་དོན་དུ་དགོས་ཆེད་ཆེ་བས་ཐུགས་མ་ཡེངས་པར་སྔགས་ཆོས་ཀྱི་དཔེ་ཆ་བཀོད་པ་མཛོད་འཚལ་ཞུས་པས༔ མ་ཅིག་གི་ཞལ་ནས་ཁྱོད་ཀྱིས་བསྒྲུབ་པ་རེམ་ལ་གྱིས་དང་ངས་དེ་ལྟར་བྱེད་དོ་གསུངས་ནས་ཐོད་སྨྱོན་བསམ་འགྲུབ་བྲག་ཕུག་གི་ནང་དུ་བྱོན་ནས་རྩ་ཀུ་ཤའི་གདན་ལ་ལུས་རྣམ་སྣང་གི་ཆོས་བདུན་དང་ལྡན་ནས་བཞུགས་ཏེ༔ མ་ཅིག་གིས་བྲག་ཕུག་གི་སྒོ་བྲག་གིས་བཅད་ནས་ཅི་ཡང་མི་མཐོང་བར་བྱས་ཏེ་མ་ཅིག་གིས་སྨོན་ལམ་དང་བཀྲ་ཤིས་བརྗོད་ནས༔ མ་ཅིག་འཁོར་བཅས་རྣམས་ཟངས་རིར་བྱོན་པའོ༔

དེ་ནས་ཟླ་བ་གསུམ་རེད་པ་དང་ཐོད་སྨྱོན་བསམ་འགྲུབ་ལ་བཀྲེས་པའམ་སྐོམ་པའི་སྣང་བ་ཞིག་བྱུང་བས་ཐོད་སྨྱོན་གྱི་བསམ་པ་ལ་ང་ལ་མ་ཅིག་གིས་འཚོ་བ་སྦྱོར་བའི་ཡོན་བདག་ཅིག་ཡོད་གསུངས་པ་ནི་མི་སྣང་སྟེ༔ གནས་འདི་ཡང་མ་ཅིག་གིས་བྱིན་གྱིས་བརླབས་པའི་གནས་ཡིན་ཞིང་༔ ང་ཡང་མ་ཡི་བྱིན་རླབས་ཞུགས་ཟིན་ཡིན་པས་ཏིང་ངེ་འཛིན་གྱི་ཟས་ལ་བརྟེན་པས་ཆོག་པས་ང་ལྟོག་ནས་འཆི་བ་ནི་མི་འོང་སྙམ་ནས་ཡོད་ཙ༔ དེ་མ་ཐག་ཏུ་བྲག་ཕུག་གི་སྒོ་ངོས་ནས་གསལ་ཆ་ཉི་མའི་སྲ་མདའ་འདྲ་བ་ཞིག་འོད་ཀྱུ་རེ་བའི་རྒྱུད་ལས་བུད་མེད་དམར་མོ་གཟི་བརྗིད་དང་ལྡན་པ་ཞིག་གིས་བདུད་རྩི་ཡིན་ཟེར་ནས་ཞལ་བུ་གང་བཟུང་ནས་བྱུང་སྟེ༔ སྒྲུབ་པ་པོ་འདི་གསོལ་ནས་སྒྲུབ་པ་རེམ་ལ་གྱིས་ལ་མཐར་ཕྱིན་པ་མཛོད་ཅིག་ཟེར་བས༔ ཐོད་སྨྱོན་གྱིས་བདུད་རྩི་བླངས་ནས་འཐུང་བས་རོ་མཆོག་བརྒྱ་དང་ལྡན་ཞིང་ལུས་སེམས་ཐམས་ཅད་བདེ་བས་རྒྱས་ནས་འཇིག་རྟེན་གྱི་ཟས་ལ་སྲེད་པ་མེད་པར་ཐལ་ཏེ༔

དེར་ཐོད་སྨྱོན་གྱི་དགོངས་པ་ལ་མཁའ་འགྲོ་མ་འདི་མ་ཅིག་གི་སྤྲུལ་པ་འདྲ་བ་ཞིག་ཨེ་ཡིན༔ གང་ལྟར་ཡིན་ཀྱང་ཡེ་ཤེས་ཀྱི་མཁའ་འགྲོ་མ་གཅིག་ཡིན་པར་འདུག་པས་ངས་འདི་ལ་སྒྲུབ་པའི་དྲོད་ཚད་ཅིག་བཤད་དགོས་བསམ་ཙ་ན༔ མཁའ་འགྲོ་མ་དེ་ན་རེ༔ ང་མ་ཅིག་གིས་ཁྱེད་ལ་འཚོ་བ་སྦྱོར་བའི་ཡོན་བདག་གྱིས་གསུངས་པ་ཡིན༔ ང་ཁྱོད་ཀྱི་སློབ་དཔོན་དུ་མ་ཡིན་པས་སྒྲུབ་པའི་དྲོད་རྟགས་ང་ལ་མ་བཤད༔ ཆོས་ཉིད་སེམས་ལ་སྦོས༔ ད་རུང་ཁྱོད་ཀྱི་སེམས་ལ་འཁུ་འཕྲིག་འདུག་པས་ལྟ་རྟོག་སེམས་ལ་གྱིས༔ དམར་ཐག་རིག་པ་ལ་ཆོད༔ ལྟ་སྤྱོད་ཟུང་འཇུག་ཏུ་གྱིས༔ དུ་མ་རོ་གཅིག་ཏུ་བསྲེས་ཟེར་ནས་མི་སྣང་བར་ཐལ་སྐད་དོ༔ དེ་ཕྱིན་ཆད་ནས་ཕུང་པོ་ཁམས་དང་སྐྱེ་མཆེད་དང་ཡུལ་སྣང་ཐམས་ཅད་ཡེ་ཤེས་ལྷའི་ཞིང་ཁམས་སུ་སྣང་ཞིང་ཐུགས་ནི་ཡི་དམ་གྱི་ལྷ་དང་དབྱེར་མེད་པའི་འོད་གསལ་དང་བདེ་སྟོང་གི་ཏིང་ངེ་འཛིན་ལས་གཞན་དུ་མི་ཡེངས་བར་གྱུར་ཏོ༔

དེ་ནས་མ་ཅིག་དགུང་ལོ་བཞི་བཅུ་ཞེ་བཞི་ལ་བྱོན་པས་སྟག་ལོ་ཟླ་བ་བཞི་པའི་ཚེས་གཅིག་ལ་གསང་སྔགས་ཀྱི་དཔེ་ཆ་བརྩམས་པར་མཛད་པ་ལ༔ དེ་ཡང་རྗེ་བཙུན་སྒྲོལ་མས་གནང་བའི་རྒྱུད་ཆེན་པོ་གསུམ་ལ༔ དཀྱིལ་འཁོར་ལྷའི་སྒྲུབ་ཐབས་གསུམ་བྱུང་བའི་དང་པོ་ལ༔ རྒྱུད་ཆེན་པོ་ཨུ་དུམ་ཝ་ར་ཞེས་བྱ་བ་ལ༔ རྡོ་རྗེ་འཆང་གཅིག་པུའི་སྒྲུབ་ཐབས་ལས་མ་བྱུང་ཡང་ཡུམ་ཆེན་མོ་དང་མ་ཅིག་རང་ཡན་ཆད་ཀྱི་བླ་མ་བཅུའི་སྒྲུབ་ཐབས་མཛད་དོ༔ རྒྱུད་ཆེན་པོ་དུག་ལྔ་ཀླུ་འདུལ་ལས་རྒྱལ་བ་རིགས་ལྔའི་སྒྲུབ་ཐབས་ལས་མ་བྱུང་ཡང་༔ མ་ཅིག་གིས་འཇམ་དཔལ་སྤྱན་རས་གཟིགས་ཕྱག་ན་རྡོ་རྗེ་དང་གསུམ༔ འདས་པའི་སངས་རྒྱས་མར་མེ་མཛད༔ མ་འོངས་པའི་རྒྱལ་བ་བྱམས་པ་དང་ལྔ་བསྣན་ནས༔ རྒྱལ་བ་རིགས་ལྔ་དང་བཅུའི་སྒྲུབ་ཐབས་མཛད་པ་ལ༔ ཕྱོགས་བཅུའི་སངས་རྒྱས་ཀྱི་སྒྲུབ་ཐབས་ཟེར་ལ༔ མིང་ཡང་དཀོན་མཆོག་འབྱུང་གནས་ལ་སོགས་ཕྱོགས་བཅུའི་སངས་རྒྱས་ཀྱི་མིང་བརྗོད་པའོ༔ རྣམ་པ་ཡང་ཕྱོགས་བཅུའི་སངས་རྒྱས་ཅི་ལྟ་བ་བཞིན་དེ་ཉིད་ཡིན་པས་ན༔ ཕྱོགས་བཅུའི་སངས་རྒྱས་ཀྱི་སྒྲུབ་ཐབས་ཞེས་བྱ་བ་མཛད་པའོ༔

རྒྱུད་ཆེན་པོ་མ་རིག་མུན་སེལ་ལ༔ རྡོ་རྗེ་དབྱིངས་ཀྱི་དབང་ཕྱུག་མ་ལྷ་བཅུ་དང་ཕག་མོ་ལྷ་ལྔ་མ་གཉིས་ཀྱི་སྒྲུབ་ཐབས་བྱུང་པ་ནི༔ རང་རང་གི་རྒྱུད་ནས་བྱུང་བ་བཞིན་ཡིན་ལ༔ མ་ཅིག་གིས་གོལ་དུ་མཛད་པ་ནི་ཅུང་ཟད་ཙམ་ཡང་མེད་དོ༔ རྡོ་རྗེ་དབྱིངས་ཕྱུག་མ་ལྷ་བཅུ་དང་ཕག་མོ་ལྷ་ལྔའི་སྒྲུབ་ཐབས་འདི་གཉིས་ལ་ནི༔ བསྐྱེད་རྫོགས་ཅི་ལྟ་བ་བཞིན་དུ་ཡོད་ལ༔ བླ་མ་བཅུ་དང་སངས་རྒྱས་བཅུ་ལ་ནི་བསྐྱེད་རྫོགས་ཅི་ལྟ་བ་བཞིན་མེད་ཀྱང་༔ ལྷའི་རྣལ་འབྱོར་སྒོམ་པ་དང་༔ གསལ་གདམས་པ་དང་བསྡུ་བའི་རིམ་པ་རྣམས་ལ་བསྐྱེད་རྫོགས་ཀྱི་ཐ་སྙད་འདོགས་པ་ཙམ་ཡོད་ལ༔ འོན་ཀྱང་རྫོགས་རིམ་ཁྲིད་ཀྱི་རིམ་པ་ནི་ཟབ་ལ་རྒྱ་ཆེ་བར་ཡོད་དོ༔ དེ་ཡང་བཀའ་བརྒྱུད་བླ་མ་བཅུའི་སྒྲུབ་ཐབས་ལ༔ བསྐྱེད་རིམ་མུ་ཏིག་ཕྲེང་མཛེས་ཞེས་བྱ་བ་ལ་ཤོ་ལོ་ཀ་ཉིས་བརྒྱ་དང་དྲུག་ཅུ་རེ་གཉིས་ཡོད་དོ༔ རྫོགས་རིམ་མཐའ་གཉིས་མུན་སེལ་ཉི་མའི་འོད་ཟེར་ཞེས་བྱ་བ་ལ༔ ཤོ་ལོ་ཀ་ཉིས་བརྒྱ་དང་བདུན་ཅུ་དོན་གཉིས་ཡོད་པ་ཚེག་བར་བཅུ་གསུམ་མ་ཡིན་ནོ༔ རྫོགས་རིམ་ཁྲིད་ཀྱི་རིམ་པ་ལ༔ ཕྱག་རྒྱ་ཆེན་པོ་རང་རིག་གསལ་བྱེད་ཅེས་པ་ལ་མ་བུ་གསུམ་ཡོད་དོ༔ སངས་རྒྱས་བཅུའི་སྒྲུབ་ཐབས་ལ་བསྐྱེད་རིམ་ཡེ་ཤེས་སྒྲོན་མེ་ཞེས་བྱ་བ་ལ་ཤོ་ལོ་ཀ་བརྒྱ་དང་བརྒྱད་ཅུ་གྱ་གཉིས་ཡོད་དོ༔ རྫོགས་རིམ་གསལ་བྱེད་རིམ་གསུམ་ཟབ་ལམ་མཐར་ཕྱིན་ཅེས་བྱ་བ་ལ་ཤོ་ལོ་ཀ་བརྒྱ་དང་ལྔ་ཡོད་པ་ལ་ཡང་ཚེག་བར་བཅུ་གསུམ་མ་ཡིན་ནོ༔

རྫོགས་རིམ་ཁྲིད་ཀྱི་རིམ་པ་ལ་རྟོག་པ་ལམ་ཁྱེར་དམིགས་སྐོར་བཅུ་དྲུག་པ་མ་བུ་གསུམ་ཡོད་དོ༔ རྡོ་རྗེ་དབྱིངས་ཕྱུག་མ་ལྷ་མོ་བཅུའི་སྒྲུབ་ཐབས་ལ་བསྐྱེད་རིམ་རིན་པོ་ཆེའི་ལྗོན་ཤིང་ཞེས་བྱ་བ་ལ་ཤོ་ལོ་ཀ་སྟོང་དང་ལྔ་བཅུ་ཡོད༔ རྫོགས་རིམ་རྡོ་རྗེའི་ཕྲ་ཐིག་ཅེས་བྱ་བ་ལ་ཤོ་ལོ་ཀ་ལྔ་སྟོང་དང་དྲུག་ཅུ་ཡོད༔ རྫོགས་རིམ་ཁྲིད་ཀྱི་རིམ་པ་ལ་རིག་པ་གཅེར་མཐོང་ཞེས་བྱ་བ་ལ་མ་བུ་གསུམ་ཡོད༔ དེའི་མན་ངག་ཡང་ཐིག་མེ་ལོང་སྐོར་གསུམ་ཞེས་བྱ་བ་ལ་ཤོ་ལོ་ཀ་སྟོང་དང་ཉི་ཤུ་ཡོད་པ་དེ་ཐམས་ཅད་ཀྱང་ཚེག་བར་བཅུ་གསུམ་མ་ཡིན་ནོ༔

ཕག་མོ་ལྷ་ལྔ་མའི་སྒྲུབ་ཐབས་ལ་བསྐྱེད་རིམ་ནོར་བུའི་གཏེར་མཛོད་ཅེས་བྱ་བ་ལ་ཤོ་ལོ་ཀ་བདུན་བརྒྱ་དང་ལྔ་ཡོད༔ རྫོགས་རིམ་རིག་པ་གཅེར་མཐོང་ཞེས་བྱ་བ་ལ་ཤོ་ལོ་ཀ་སྟོང་དང་སུམ་བརྒྱ་དང་བདུན་ཅུ་ཡོད་པ་ལ་ཡང་ཚེག་བར་བཅུ་གསུམ་མ་ཡིན་ནོ༔ རྫོགས་རིམ་ཁྲིད་ཀྱི་རིམ་པ་ལ་ཡང་རིག་པ་གཅེར་མཐོང་ཡིན་ནོ༔ རིམ་ལྔ་དམར་ཁྲིད་གསང་སྐོར་ཞེས་བྱ་བ་ཡང་ཚེག་བར་བཅུ་གསུམ་མ་ཡིན་ནོ༔ དེ་ལྟར་གསང་སྔགས་ཀྱི་བསྐྱེད་རྫོགས་བརྩམས་པ་དང་༔ རྒྱུད་ཆེན་པོ་གསུམ་ཡང་ཡི་གེར་བཀོད་པ་དང་བཅས་པའི་དུས་ནི༔ མ་ཅིག་དགུང་ལོ་ཞེ་བཞི་སྟག་ལོ་ཟླ་བ་བཞི་པའི་ཚེས་གཅིག་ནས་སྦྲུལ་ལོ་ཟླ་བ་བཅུ་པའི་ཚེས་བཅོ་ལྔ་ལ་གྲུབ་པར་མཛད་པ་ནི་མ་ཅིག་དགུང་ལོ་ཞེ་བདུན་བཞེས་པའོ༔ དེ་ཡང་གསང་སྔགས་མ་ཡིན་པའི་བསྟན་ཆོས་གཞན་རྣམས་ནི་གཙོ་བོར་འཆད་ཅིང་༔ ཐབས་སྣ་ཚོགས་པའི་སྒོ་ནས་གཞན་དོན་ལ་བརྩོན་པ་རྒྱ་ཆེན་པོ་མཛད་པའི་ཞོར་ལ༔ གསང་སྔགས་ཀྱི་ཆོས་རྣམས་ནི་གསང་ཞིང་སྦས་ནས་བརྩམས་པ་ལ༔ ལོ་གསུམ་གྱི་བར་ལ་མ་ཟིན་པ་སྟེ་དེ་ལྟར་ལགས་སོ༔

དེ་ལྟར་མ་ཅིག་དགུང་ལོ་བཞི་བཅུ་ཞེ་བདུན་ལ༔ གསང་སྔགས་ཀྱི་ཆོས་ཐམས་ཅད་བརྩམས་ནས་གྲུབ་པར་མཛད་པའི་གནས་ནི་ཟངས་རིར་མཁར་དམར་ཡིན་ནོ༔ ཞུ་བ་པོ་ནི་ཐོད་སྨྱོན་བསམ་འགྲུབ་དང་༔ ཐོད་པ་བྷ་ཏྲ་ཡ་ཡབ་སྲས་གཉིས་ཡིན་ནོ༔ ཉན་པ་པོ་ནི་གང་པ་རྨུགས་སོང་གཅིག་པུ་ཡིན་ནོ༔ སྲས་མོ་རྒྱན་བཞིས་རྒྱབ་ཉན་བྱས་པ་དང་༔ ཁུ་སྒོམ་ཆོས་ཀྱི་སེང་གེས་ཡི་གེས་སྡེབ་སྦྱོར་དང་༔ འབྲུ་བཅོས་ལ་སོགས་པའི་ཡིག་གཉེར་མཛད་པ་དང་༔ ཡི་གེ་པ་བཞི་དང་བཅུ་ནི་རྒྱུད་རེ་རེ་བཞིན་དུ་ལྷ་ཡང་བཅུ་རེ་ཡོད་པ་དང་༔ དོན་མཚུངས་པ་དང་དོན་མཐུན་གྱིས་རྟེན་འབྲེལ་འགྲིག་པ་དང་བཅས་པ་གསང་སྔགས་ཀྱི་བསྐྱེད་རྫོགས་རྣམས་ལེགས་པོར་གྲུབ་པའོ༔

དེ་ནས་མཁའ་འགྲོ་དྲི་མེད་མས་ཀྱང་ལོ་གསུམ་རེ་རེ་ནས་སྲས་ཐོད་སྨྱོན་བསམ་འགྲུབ་ལ་སྔར་བཞིན་དུ་བདུད་རྩི་ཞལ་བུ་གང་རེ་དྲངས་ནས་འཚོ་བ་སྤྲད་པར་གྱུར་ཏོ༔ དེ་ནས་ལོ་ལྔ་ལོན་པ་དང་མ་ཅིག་གིས་སྔར་རྒྱུས་ཡོད་པའི་རྣལ་འབྱོར་པ་ཞིག་ལྟར་བཏང་ནས༔ ཁྱོད་སོང་ལ་ཐོད་སྨྱོན་བསམ་འགྲུབ་ཤི་ནས་ཨེ་འདུག་ལྟོས་ལ་ཤོག་གསུངས་པས༔ དེར་རྣལ་འབྱོར་པ་རླུང་ཤུགས་ཀྱི་སྟོབས་ཀྱིས་སོང་བས་སྐད་ཅིག་ཉིད་ལ་ཤམ་པོའི་གངས་ཕུག་མོ་ཆེའི་སྒོ་ཁར་ཕྱིན་པས༔ དེར་རྣལ་འབྱོར་པ་ཕུག་པའི་སྒོ་ཁར་ཡུད་ཙམ་ཞིག་ཉན་ནས་བསྡད་པས་ཅི་ཡང་མི་གྲག་པ་དང་རྣལ་འབྱོར་པས་ཐོད་སྨྱོན་བསམ་འགྲུབ་ཤི་བ་ཨེ་མ་ཡིན་སྙམ་ནས་ཐོད་སྨྱོན་བྱས་ནས་བོས་པས་ཨ་ཟེར་བ་གྲག་གོ༔ ཁྱོད་མ་འཁྱག་གམ༔ མ་ལྟོག་གམ༔ ཟུག་པ་མ་བྱུང་ངམ༔ ང་མ་ཅིག་གིས་ལྟར་བཏང་བ་ཡིན་བྱས་པས༔

ཐོད་སྨྱོན་བསམ་འགྲུབ་ཀྱིས་ན་རེ༔ ཁྱེད་འདིར་བྱོན་པ་འོ་མ་བརྒྱལ་བ་ལགས་སམ༔ ཨ་མ་སྐུ་ཁམས་བཟང་པོར་བཞུགས་ནས་ཨེ་ཡོད་ཟེར་བས༔ རྣལ་འབྱོར་པས་མ་ཅིག་ཉིད་དང་ཟངས་རི་བ་རྣམས་སྐུ་ཁམས་བཟང་བར་བཞུགས་ནས་ཡོད༔ ཁྱེད་སྐུ་ཁམས་བཟང་པོར་གསུང་བྱོན་པར་ངོ་མཚར་ཆེ་ལ་རྗེས་སུ་ཡི་རང་བྱས་པས༔ ཐོད་སྨྱོན་གྱིས་ན་རེ༔ མ་ཅིག་ཉིད་དང་ཟངས་རི་བ་རྣམས་སྐུ་ཁམས་བཟང་བ་དེ་རེ་དགའ་མོད༔ ང་ཏིང་ངེ་འཛིན་ཟས་སུ་ཟ་བ་ལ་ཟས་ཀྱི་སྲེད་པ་དང་བྲལ་ནས་ཐལ༔ གཏུམ་མོ་གོས་སུ་གྱོན་པ་ལ་གོས་ཀྱི་སྲེད་པ་དང་བྲལ་ནས་ཐལ༔ ཡུལ་སྣང་གྲོགས་སུ་འཆར་བ་ལ་གྲོགས་ཀྱི་སྲེད་པ་དང་བྲལ་ནས་ཐལ༔ བལྟས་པས་སངས་རྒྱས་ཀྱི་ཞིང་ཁམས་རྣམས་འབད་རྩོལ་མེད་པར་མཐོང་བ་ལ་ཐ་མལ་ཡུལ་སྣང་ཐམས་ཅད་ཀྱི་འདོད་ཞེན་སྲེད་པ་དང་བྲལ་ནས་ཐལ༔ དེའི་ཕྱིར་ན་ང་ལ་ཚུགས་དང་མི་ཚུགས་ཀྱི་ཐ་སྙད་ཅི་ཡང་མི་འདུག་གོ་ཞེས་ཟེར་བས༔ རྣལ་འབྱོར་པ་ན་རེ༔ ཁྱེད་ལ་དེ་ཙམ་གྱི་དམིགས་པའི་བོགས་འདོན་གྱི་ཡོན་ཏན་ཆེན་པོ་ཐོབ་པར་འདུག་པས་ངོ་མཚར་ཆེ་ཞིང་ཐུགས་དགོངས་དགའ་རབ་ཏུ་གདའ་བ་ལགས་སོ༔ ད་རུང་ཡང་ལོ་ལྔའི་བར་ལ་སྐུ་ཁམས་བཟང་ཞིང་ཐུགས་དམ་འཕེལ་བར་བཞུགས་འཚལ་ཞུས་པས༔ ཐོད་སྨྱོན་གྱིས་ན་རེ༔ མ་ཅིག་དང་ཁྱེད་ཟངས་རི་བ་རྣམས་སྐུ་ཁམས་བཟང་བ་དང་༔ སྐུ་མཚམས་པ་ཐུགས་དམ་འཕེལ་ཞིང་བཞུགས་པ་ནི་ངོ་མཚར་ཆེ་བ་ལགས་སོ༔ མ་ཅིག་གི་བསྟན་པ་དང་གདུལ་བྱ་རྣམས་འབྲུག་ལྟར་དུ་གྲགས་པ་དང་༔ གསང་སྔགས་ཀྱི་བསྐྱེད་རྫོགས་རྣམས་ཡི་གེ་བཀོད་ནས་གྲུབ་པར་མཛད་པ་ནི་རབ་ཏུ་དགའ་བ་ལགས་སོ༔ ད་རུང་ཡང་གདུལ་བྱ་རྣམས་ལ་ཐུགས་ཁུར་མཛད་ཅིང་བསྟན་པ་རྒྱས་པར་མཛད་པ་དང་༔ སྐུ་ཁམས་ཀྱང་འཚོ་བར་བཞུགས་པ་དང་༔ ངའི་སྒྲུབ་པ་ལ་ཡང་བར་ཆད་མེད་པར་མཛད་པའི་ཐུགས་འདོགས་ཞུ་བ་ལགས་པས་ཁྱེད་ཀྱིས་དགོངས་མཛོད་ཅིག༔ བདག་གིས་ཀྱང་ད་རུང་ལོ་ལྔའི་བར་ལ་བཀའ་བཞིན་དུ་བསྒྲུབ་པ་ལགས་སོ༔

ཁྱེད་ཀྱང་འདིར་འབྱོན་པས་ཐུགས་འདོགས་ཤིན་ཏུ་ཆེ་བས་ད་ནི་འོ་མ་བརྒྱལ་བར་འགྲོ་དོན་གྱི་ངང་ནས་ཟངས་རིར་འབྱོན་འཚལ་ཞེས་གསུངས་ནས་ཅི་ཡང་མི་སྨྲ་བ་བཞུགས་སོ༔ རྣལ་འབྱོར་པས་ཀྱང་དེ་ལྟར་བགྱིད་འཚལ་བ་ལགས་སོ་ཞེས་ཞུས་ནས་ཕྱིར་ལོག་སྟེ༔ ཞག་མང་དུ་མ་ལོན་པར་ཟངས་རིར་མའི་དྲུང་དུ་ཕྱིན་པ་དང་༔ མའི་མདུན་དུ་ཐོད་སྨྱོན་གྱི་ལོ་རྒྱུས་རྣམས་ཞིབ་ཏུ་ཞུས་པས་མ་ཅིག་ཀྱང་ཤིན་ཏུ་དགྱེས་ནས་ཁོ་ལ་དེ་ཙམ་གྱི་ནུས་པ་གཅིག་ཡོད་པ་ཡིན་གསུངས༔ དེ་ལྟར་མ་ཅིག་གི་གདུལ་བྱ་དང་བསྟན་པ་ནི་ནམ་མཁའ་དང་མཉམ་སྟེ༔ རྩང་དབུས་ཁམས་གསུམ་གྱི་མངའ་རིས་མན་ཆད་བལ་པོ་ཚུན་ཆད༔ རྒྱ་ནག་ཡན་ཆད༔ ཧོར་ཡུལ་ཚུན་ཆད་ཀྱི་བླ་མ་གདུགས་ཐོག་མན་ཆད་དང་དགེ་བཤེས་གྲྭ་ཚན་གདིང་ལྷུང་ཐོགས་པ་འབུམ་ཕྲག་གསུམ་ཙམ་དུས་རྒྱུན་མར་འཁོར་བར་བྱུང་ངོ་༔ དེ་རྣམས་ཀྱི་ནང་ནས་ཀྱང་དགེ་བའི་བཤེས་གཉེན་གདུགས་ཐོགས་ནས་གྲྭ་ཚན་སྟོང་ཕྲག་ཙམ་བསྐོར་བའི་མཁས་བཙུན་འཆད་ཉན་བྱེད་ནུས་པ་ཡང་སྟོང་དང་ལྔ་བརྒྱ་ཙམ་བྱུང་༔

དེ་རྣམས་ཀྱི་ནང་ནས་ཀྱང་མ་ཅིག་རང་དང་འགྲོ་དོན་མཉམ་པའི་སེང་གེའི་མཚན་ཅན་བཞི་བྱུང་༔ མ་ཅིག་རང་དང་དགོངས་པ་མཉམ་པའི་བུ་མོ་རྒྱན་ནེ་མ་ལ་སོགས་པའི་བུ་མོ་ཆེན་མོ་བཞི་བྱུང་༔ མ་ཅིག་རང་དང་འཆད་རྩོད་མཉམ་པའི་ཁུ་སྒོམ་ཆོས་ཀྱི་སེང་གེ་དང་༔ སྟོང་སྡེ་དང་གྲོལ་སྡེ་ལ་སོགས་པའི་སྟོན་པ་བརྒྱ་བྱུང་༔ གཞན་ཡང་མིའི་རྒྱལ་པོ་དཔོན་སྐྱ་རྣམས་དང་༔ བློན་པོ་རྣམས་དང་༔ ཧོར་འདྲ་རྣམས་དང་༔ བཙུན་མོ་རྣམས་དང་༔ སྐྱེ་བོ་ཕོ་མོ་རྣམས་དང་མཛེ་སྤྲང་ཡན་ཆད་རྣམས་ནི་གྲངས་དང་མཐའ་དང་མུ་མེད་པའི་བཟང་དགུ་ཡིས་གཏུགས༔ ངན་དགུ་ཡི་རྟེན་གནས་བྱེད་པ་བྱུང་ཞིང་དེ་ལྟ་བུའི་འཁོར་བཟང་ངན་མེད་པ་ལ་འབུམ་ཕྲག་བཅུ་གསུམ་ཙམ་དུས་རྒྱུན་མར་འཁོར་བར་བྱུང་ཞིང་༔ བལ་པོའི་ཡུལ་ནས་ཀྱང་ཐམས་ཅད་ཆོས་ཞུ་བ་ལ་འོང་བའི་སྐུ་བསོད་དང་ཆོས་ཀྱི་འཆད་ཉན་དང་༔ འཆད་རྩོད་རྩོམ་གསུམ་གྱི་སྙན་པ་ནི་ནམ་མཁའི་འབྲུག་ལྟར་དུ་གྲགས་ཤིང་ཡོད་པས༔ དེའི་སྙན་པ་ནི་བལ་པོ་ནས་རྒྱ་གར་དུ་ཁྱབ་པར་གྲགས་སོ༔ དེ་ལྟར་སྲས་ཐོད་སྨྱོན་བསམ་འགྲུབ་གངས་ཕུག་མོར་ཆེར་སྒྲུབ་པ་ལ་བཞུགས་པ་དང་༔ མ་ཅིག་གིས་ཟངས་རིར་གདུལ་བྱ་སྐྱོང་ཞིང་གསང་སྔགས་ཀྱི་གསུང་རབ་བརྩམས་པ་དང་༔ ཐོད་སྨྱོན་བསམ་འགྲུབ་ཀྱིས་སྒྲུབ་པའི་དྲོད་ཚད་ཉུལ་བ་དང་དྲོད་ཚད་འབྲིང་པོ་ཐོབ་པ་དང་༔ མ་ཅིག་གིས་དགུང་ལོ་བཞི་བཅུ་ཞེ་བདུན་ནས་ལྔ་བཅུ་ང་གཅིག་གི་བར་གྱི་རྣམ་ཐར་ཏེ་རྣམ་གྲངས་བཅུ་བཞི་པའོ༔ སཱ་མཱ་ཡཱ༔

རྣམ་གྲངས་བཅོ་ལྔ་པ།

དེ་ནས་མ་ཅིག་གི་སྙན་པ་ནི་བལ་པོ་ནས་རྒྱ་གར་དུ་ཁྱབ་པས་རྒྱ་གར་བ་ཐམས་ཅད་བློ་མ་བདེ་ནས་རྒྱ་གར་རྡོ་རྗེ་གདན་དུ་ཆོས་ཀྱི་རྒྱལ་པོའི་དྲུང་དུ་རྒྱ་གར་ཤར་ནུབ་ཀྱི་པཎྜི་ཏ་རྣམས་དང་༔ དགེ་འདུན་གྲྭ་ཚན་གྱི་སྡེ་རྣམས་དང་༔ རྒྱ་གར་ཤར་ནུབ་ཀྱི་རྒྱལ་པོ་དང་རྒྱལ་ཕྲན་གྱི་ཚོགས་རྣམས་དང་བཅས་པ་ཐམས་ཅད་རྒྱ་གར་རྡོ་རྗེ་གདན་དུ་འདུས་ཏེ༔ རྒྱ་གར་ཆོས་ཀྱི་རྒྱལ་པོ་དང་པཎྜི་ཏ་རྣམས་གྲོས་བྱས་ཏེ་འདི་སྐད་སྨྲས་སོ༔

ན་རེ༔ སྔོན་སངས་རྒྱས་ཐམས་ཅད་ཀྱི་འབྱུང་གནས་དང་༔ སྡེ་སྣོད་གསུམ་རྒྱུད་སྡེ་བཞི་ལ་སོགས་པའི་ཆོས་ཐམས་ཅད་ཀྱི་འབྱུང་ཁུངས་དང་འབྱུང་གནས་ཐམས་ཅད་ངེད་རང་རྒྱ་གར་འདི་ཡིན་པས༔ འདི་ནས་ལོ་པཎ་མཁས་གྲུབ་རྣམས་ཀྱིས་བསྒྱུར་ནས་བོད་དུ་ཁྱེར་ནས་འགྲོ་བ་མ་གཏོགས་པ༔ དེ་སྔ་ཕན་ཆད་ལ་བོད་རང་ལ་བོད་ཆོས་ཞེས་བྱ་བ་གྲགས་པ་འོང་མ་མྱོང་པ་ལ་དེང་སང་བོད་དུ་ཕྱི་སྡེ་སྣོད་གསུམ་གྱི་མདོ་ཕ་རོལ་ཏུ་ཕྱིན་པ་དང་༔ ནང་རྒྱུད་སྡེ་བཞིའི་སྔགས་བླ་ན་མེད་པ་གཉིས་ཅིག་ཆར་དུ་བསྡེབས་ནས་མདོ་སྔགས་གཉིས་ཟུང་དུ་འཇུག་པ་ལས་ནད་བརྒྱ་གདུལ་བའི་སྨན་ཞིག༔ གདོན་བརྒྱ་འདུལ་བའི་གཉེན་པོར་གྱུར་པ་འབྲས་བུ་ཕྱི་དུས་ལ་མི་རེ་ནས་ཚེ་འདི་ཡི་འགལ་རྐྱེན་ཐམས་ཅད་ལམ་དུ་སློང་ཞིང་ཚེ་གཅིག་ལུས་གཅིག་ལ་སངས་རྒྱས་ཐོབ་པའི་གདམས་པ༔ མིང་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་ཞེས་བྱ་བའི་ཆོས་སྲོལ་ཆེན་པོར་བཏོད་ནས་དེང་སང་བལ་པོ་མན་ཆད་ཀྱི་བོད་ཁམས་ཁ་བ་ཅན་ཐམས་ཅད་ལ་ཕྱག་རྒྱ་ཆེན་པོ་གཅོད་ཅེས་བྱ་བ་གྲགས་ནས་ཉམས་སུ་ལེན་ཞིང་བོད་ཁམས་ཐམས་ཅད་ལ་དབང་བསྒྱུར་བར་བྱེད་ནས༔ ནད་རིགས་བཞི་བརྒྱ་རྩ་བཞི་དང་༔ གདོན་རིགས་སྟོང་ཕྲག་བརྒྱ་ཅུའི་མི་ཚུགས་པའི་ཆོས་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་ཞེས་བྱ་བའི་དམ་ཆོས་དེ་འདྲ་བ་ཞིག་དར་བར་གྲགས་སོ༔

དམ་ཆོས་དེ་འཆད་པ་པོ་ནི་ཡུམ་ཆེན་མོའི་སྤྲུལ་པ་ཡིན་ཟེར་བའི་བུད་མེད་མིག་གསུམ་ཡོད་པ་ཞིག་གིས་འཆད་རྩོད་རྩོམ་གསུམ་བྱེད་པ་གྲགས་པས༔ འདི་ཡི་སྙན་གྲགས་དང་གདུལ་ཞིང་འདི་ཙམ་ཆེ་ལུགས་དང་མིག་གསུམ་ཡོད་ལུགས་དང་གང་ལྟར་ཡིན་ཀྱང་༔ འདི་ཡང་ན་ཡུམ་ཆེན་མོའི་སྤྲུལ་པ་ཞིག་ཡིན་པར་ངེས༔ ཡང་ན་བདུད་དང་རྒྱལ་བསེན་གཉིས་ཀྱི་སྤྲུལ་པ་སྔོན་མ་ཏྲཾ་རུ་ཏྲ་ཐར་པ་ནག་པོ་འདྲ་བའི་འཇིགས་སུ་རུང་བ་ཞིག་ཡིན་ངེས་པས༔ ད་འདི་འདུལ་བ་ཡང་དཀའ་ཞིང་འདུལ་བའི་གཉེན་པོ་གང་དགོས་ཀྱང་མི་ཤེས་པས་སྔར་སངས་རྒྱས་ཞལ་བཞུགས་དུས་དང་མི་འདྲ་བས་ད་བུད་མེད་འདིའི་རྩར་བཅད་ནས་མ་བཏུལ་ན༔ འདི་ཡུམ་ཆེན་མོའི་སྤྲུལ་པ་ཞིག་ཡིན་ན་ནི༔ བོད་མཐའ་འཁོབ་ཆོས་མ་དར་བའི་ཡུལ་མུན་པའི་སྨག་རུམ་ཡིན་ཞིང་སངས་རྒྱས་ཀྱིས་ཀྱང་ཞབས་ཀྱིས་མ་བཅག་པའི་ཡུལ་ཡིན་པས་འདི་སྐུ་ཡལ་ནས་འགྲོ་བ་ཡིན་པས༔ རྒྱ་གར་འདི་སངས་རྒྱས་ཐམས་ཅད་ཀྱི་འབྱུང་གནས༔ ཆོས་ཐམས་ཅད་ཀྱི་འབྱུང་ཁུངས་ཡིན་པས་རྒྱ་གར་འདི་ན་གདན་དྲངས་ནས༔ དེ་ནས་ལོ་ཙཱ་བ་རྣམས་ལ་ཕར་ལ་བསྒྱུར་འཇུག་དགོས་མ་གཏོགས་པ་བོད་རང་ལ་ཆོས་དེ་ཙམ་ལོངས་སྤྱོད་དུ་འཇུག་ལས་མེད༔ རྒྱལ་བསེན་གཉིས་ཀྱི་སྤྲུལ་པ་བདུད་འཇིགས་སུ་རུང་བ་ཞིག་ཡིན་ན༔ བུད་མེད་འདིས་དང་པོ་བོད་བརླབས༔ དེ་ནས་བལ་པོ་བརླག༔ དེ་ནས་རྒྱ་གར་འདིར་བསྒྱུར་ཏེ་འཇོམས་ནས་འོང་བ་ཡིན་པས༔ བུད་མེད་འདིའི་རྩད་བཅད་པ་ལ་མགྱོགས་པར་འགྲོ་དགོས་ཟེར་ནས་ཐམས་ཅད་ཁ་འཆམས་ཏེ༔ ད་སུ་རུང་རུང་གང་ཐོད་ཐོད་སོང་བས་མི་ཉན་པས༔ བུད་མེད་མཐུ་ཆེན་དེའི་རྩར་ཕྱིན་ནས་ཁ་ཕྱིར་རྗེས་སུ་ལོག་ཏུ་མི་སྟེར་བས༔ རྒྱ་གར་ཤར་ནུབ་འདི་ནས་མཁས་ཤིང་གྲུབ་པ་བརྙེས་པ་རླུང་སེམས་ལ་རང་དབང་ཐོབ་པ་རྫུ་འཕྲུལ་གྱིས་ནམ་མཁའ་ལ་གཤེགས་ནུས་པ་གསུམ་འགྲོ་དགོས་ཟེར་ནས་གྲོས་མཐུན་པ་དང་༔

དེ་ནས་རྒྱ་གར་གྱི་རྒྱལ་བྱེད་ཚལ་ཞེས་བྱ་བ་ནས་རྣལ་འབྱོར་པ་མདོ་རྒྱུད་གཉིས་ལ་མཁས་ཤིང་གྲུབ་པ་བརྙེས་པ་རྫུ་འཕྲུལ་གྱི་སྟོབས་མཐའ་ཡས་པ་སྟོན་ནུས་པའི་པཎྜི་ཏ་ཆེན་པོ་གསུམ་འདུག་པས༔ བྱ་ལོ་ཟླ་བ་བཅུ་གཉིས་པའི་ཚེས་གཅིག་ལ་རྒྱ་གར་རྡོ་རྗེ་གདན་ནས་ནམ་ལངས་སྐྱ་ས་ལེ་བ་ལ་ཁྲ་ཧོར་པས་གོང་སྲང་འགྲིམ་པ་ལྟར་རྫུ་འཕྲུལ་གྱིས་ནམ་མཁའ་ལ་འཕུར་ནས་བྱོན་པས་ཟངས་རི་མཁར་དམར་དུ་ཉི་མ་རྩེ་ཤར་བ་དང་མཉམ་དུ་སླེབས་པས༔ དེར་རྣལ་འབྱོར་པ་གསུམ་ཟངས་རིའི་བླ་དབྱེར་བཞུགས་པས༔ མ་ཅིག་གི་གསོལ་ཇ་མ་བསོད་ནམས་རྒྱན་གྱིས་གཟིགས་སྐར་གྱི་ཁ་ནས་བལྟས་པས་མཐོང་སྟེ༔ མ་ཅིག་གི་དྲུང་དུ་ཞུས་པས༔ ཀྱེ་མ་ཅིག་ལགས༔ ད་ནངས་རང་རེའི་བླ་དབྱེ་འདི་ན་སྔོན་ཆད་མཐོང་མ་མྱོང་བའི་མི་ཤ་མདོག་སྔོ་ལ་མིག་ཁུང་དུ་ཟབ་པ་སྣ་ཟོར་བ་གདོང་པ་ཉག་པའི་ཧུར་ཧུར་བ་དར་ནག་པོའི་སྟོད་གཡོགས་བྱས་པ་གསུམ་འདུག་པས་རང་རེ་བོད་ཁམས་འདིའི་མི་ནི་མ་རེད༔ མངའ་རིས་དང་བལ་པོ་ལ་སོགས་པའི་མི་ཡང་མ་རེད༔ འདི་གསུམ་གང་ནས་འོང་པ་ཡིན་ལགས་ཞུས་པས༔

མ་ཅིག་གི་ཞལ་ནས་འདི་གསུམ་རྒྱ་གར་གྱི་རྐང་མགྱོགས་པ་ཡིན་ལས་ཆེ༔ རྒྱ་གར་བ་ཐམས་ཅད་ང་དང་ངའི་ཆོས་ལུགས་ལ་ཡིད་མ་ཆེས་ནས་ཞག་སྔོན་ནས་རྒྱ་གར་རྡོ་རྗེ་གདན་དུ་ཐམས་ཅད་འདུས་ནས་གྲོས་འཆམས་ཏེ་ངའི་རྩད་གཅོད་པ་དང་༔ ངའི་ཆོས་ལུགས་ཀྱི་རྩད་གཅོད་པ་ལ་རྣལ་འབྱོར་པ་འདི་གསུམ་ནི་མཁས་ཤིང་གྲུབ་པ་བརྙེས་པ་མདོ་རྒྱུད་གཉིས་ལ་མཁས་པའི་པཎྜི་ཏ་ཡིན་པས༔ ད་ནངས་ནམ་ལངས་སྐྱ་ས་ལེ་བ་ལ་རྒྱ་གར་རྡོ་རྗེ་གདན་ནས་རྫུ་འཕྲུལ་གྱིས་ནམ་མཁའ་ལ་འཕུར་ནས་ཁྲ་ཧོར་པས་གོང་སྲང་འགྲིམ་པ་ལྟར་བྱས་ནས་འོང་པ་ཡིན་པས༔ ད་ལྟ་འདིར་ཕེབ་པ་ཡིན་པས་ད་ཁྱེད་བུ་མོ་གསུམ་གྱིས་མཆོད་པ་ལེགས་པོར་ཤོམས༔ དེ་ནས་གདན་བཟང་པོ་ཤོམས་ལ་ཐོག་ཁར་སྤྱན་དྲོངས་གསུངས་པས༔

དེ་ནས་གདན་འབོལ་སུམ་བརྩེགས་པ་དང་མཆོད་པ་རྣམས་ཀྱང་ལེགས་པོར་བཤམས་ནས༔ བསོད་ནམས་རྒྱན་མས་རྣལ་འབྱོར་བ་གསུམ་ལ་ནང་དུ་འབྱོན་པར་ཞུ་བྱས་པས་ཅི་ཡང་མི་གོ་ནས་ཧུར་རེ་འདུག་པ་དང་༔ མ་ཅིག་ལ་ཅི་ཡང་མི་གོ་བ་འདུག་ལགས་ཞུས་པས༔ མ་ཅིག་གི་ཞལ་ནས་ཁྱེད་གསུམ་གྱིས་སྐད་བཏང་བས་མི་གོ༔ ལག་བརྡ་གྱིས་གསུངས་པས་དེས་ལག་བརྡ་བྱས་པས༔ ཨ་ཙ་ར་གསུམ་པོ་ཡང་ཐོག་ཁར་བྱོན་ནས་གདན་འབོལ་གྱི་སྟེང་དུ་བཞུགས་པ་ལ༔ མ་ཅིག་གི་ཞལ་ནས་རྒྱ་སྐད་དུ་སྨྲས་ནས༔ རྒྱ་གར་གྱི་ལོ་རྒྱས་རྣམས་ཞིབ་ཏུ་དྲིས་པས༔ ཨ་ཙ་ར་གསུམ་གྱིས་དྲིས་པའི་ལན་རྣམས་ལེགས་པོར་བཏབ་ནས༔ ཁྱོད་བོད་དུ་སྐྱེས་པའི་བུད་མེད་ཅིག་གིས་ངེད་རྒྱ་སྐད་ཤེས་པ་ཅི་ཡིན་ཟེར་བས༔ མ་ཅིག་གི་ཞལ་ནས༔ སྔར་ང་རྒྱ་གར་དུ་ལན་མང་པོ་སྐྱེས་པས་ད་ལྟ་ཡང་རྒྱ་སྐད་དུ་སྨྲ་ཤེས་པ་ཡིན་གསུངས་པས༔ ཨ་ཙ་ར་གསུམ་གྱིས་ན་རེ༔ ཁྱོས་སྐྱེ་བ་དྲན་པ་ཨེ་ཡིན་ཟེར་བས༔ མ་ཅིག་གི་ཞལ་ནས༔ ངས་སྐྱེ་བ་སྔ་ཕྱི་གཉིས་ད་ལྟ་དང་གསུམ་གྱི་བྱ་བ་བྱས་ཚད་ཐམས་ཅད་ད་ལྟ་བཞིན་དུ་དྲན་གསུངས་པས༔ ཨ་ཙ་ར་གསུམ་གྱིས་ན་རེ༔ འོ་ན་ཁྱོད་ཀྱིས་སྐྱེ་བ་འདི་ཕྱི་བར་གསུམ་ཐམས་ཅད་དྲན་ན་ཤོད་དང་ཟེར་བ་ལ༔

མ་ཅིག་གིས་ཐུགས་དགོངས་ལེགས་པོར་བཏང་ནས༔ ང་ཨ་ཙ་ར་འདི་གསུམ་དང་རྒྱ་སྐད་དུ་སྨྲས་ནས་གཏམ་ན་ལས་སླ་སྟེ༔ ངའི་བུ་སློབ་འདི་ཚོས་ཀྱང་མི་གོ༔ མ་འོངས་དུས་སུ་རྒྱུད་འཛིན་གྱི་བུ་སློབ་རྣམས་དང་བོད་གངས་ཅན་ཁྲོད་པ་རྣམས་གྱིས་ཀྱང་མི་གོ་སྟེ༔ ལར་ཡང་རྒྱ་གར་བ་ཐམས་ཅད་བོད་འདིར་ང་ལ་ཐོ་འཚམས་པ་དང་ཉམས་ལེན་པ་དང་ཆོས་ཀྱི་རྩོད་པ་ལ་ཕྱིན་ཀྱང་༔ ངས་ཨ་ཙ་ར་འདི་གསུམ་དང་ཆོས་ཀྱི་རྩོད་པ་བྱེད་པ་ལ་མི་དཀའ་སྟེ༔ བོད་ཁམས་ཐམས་ཅད་ལ་ཚོར་བའི་སྐྱེ་བ་བཤད་པ་དང་༔ ཆོས་དང་ཚིག་གི་ཐ་སྙད་རྒྱ་གར་དང་བལ་བོད་གསུམ་ག་ལ་གོ་ཆོད་པ་ཞིག་བྱེད་པའི་དུས་ལ་ད་ལྟ་བབས་པར་འདུག་དགོངས་ནས༔ ཨ་ཙ་ར་གསུམ་ལ་བྲང་ཁང་ཕྱེས་ནས་ཀ་ཆ་དང་བཅས་པ་སྤྲད་ནས་བཞུགས་བཅོལ་ནས༔ དེ་ནས་གཙང་དབུས་ཁམས་གསུམ་མངའ་རིས་བལ་པོ་ཧོར་ཡུལ་རྒྱ་ནག་ཡན་ཆོད་དུ་རྐང་མགྱོགས་པ་བཞི་བཏང་ནས༔ མ་ཅིག་ལ་རྒྱ་གར་ནས་ཆོས་ཀྱི་རྩོད་པ་བྱེད་མི་རྣམས་ཕྱིན་ནས་ཡོད་པས་ཆོས་ཀྱི་རྩོད་པ་བྱེད་པ་དང་མ་ཅིག་གི་སྐྱེ་བ་སྔ་ཕྱི་ད་ལྟ་བར་གསུམ་ག་བཤད་རྒྱུ་ཡིན་པས་དེར་འོང་འདོད་པ་ཡོད་ན༔ ཟླ་བ་གསུམ་གྱི་ཆས་ཀ་ཁྱེར་ལ་ཟངས་རིར་ཤོག་ཅིག་སྨྲས་ནས་བང་ཆེན་བཏང་བས༔ དེ་ནས་རྒྱ་དབུས་ཁམས་གསུམ་ཐམས་ཅད་འདུས་ཏེ་རྒྱལ་པོ་དང་དཔོན་སྐྱ་ལ་སོགས་པའི་ཁྲོམ་འཚོགས་འབུམ་ཕྲག་བཅུ་བདུན་ཙམ་འདུས་ནས་བྱུང་ངོ་༔

དེ་རྣམས་ཀྱི་ནང་ནས་ཀྱང་དགེ་བའི་བཤེས་གཉེན་ཁྲི་ཚོ་བདུན་ཙམ་འདུས་ནས་འདུག༔ དེ་རྣམས་ཀྱི་ནང་ནས་ཀྱང་གདུགས་ཐོགས་པ་སྟོང་ཕྲག་ལྷག་ཙམ་བཞུགས་ནས་འདུག༔ དེ་རྣམས་ཀྱི་ནང་ནས་ཀྱང་རྒྱ་བོད་གཉིས་ཀྱི་ལོ་ཙཱ་ལ་ཤིན་ཏུ་མཁས་པའི་ལོ་ཙཱ་བ་ཆེན་པོ་བཞི་འདུས་ནས་འདུག་པས༔ ཚོགས་པ་དེ་རྣམས་སྤྱི་དང་ཁྱད་པར་དུ་དགེ་འདུན་པའི་ཚོགས་པ་རྣམས་དང་བཅས་པ་ལ་མ་ཅིག་གིས་རྒྱུ་ཟས་ཀྱི་གཏོང་སྒོ་དང་ཆོས་སྟོན་ཡང་རྒྱ་ཆེན་པོ་བྱས་པ་དང་༔ ཁྱི་ལོ་ཟླ་བ་དང་པོའི་ཚེས་བརྒྱད་ལ་ལོ་ཙཱ་བ་བཞི་པོས་བསྒྱུར་ཏེ༔ ཨ་ཙ་ར་གསུམ་དང་མ་ཅིག་གཉིས་ལ་ཁྲི་མཉམ་པོར་བརྩེགས་ནས་བཞུགས་ཏེ༔ དེར་ཆོས་མདོ་རྒྱུད་གཉིས་གང་ལ་རྩོད་པ་དང་སྒྲོག་གླེང་བྱས་ཀྱང་ཨ་ཙ་ར་གསུམ་གྱིས་མ་ཅིག་ལ་ཚིག་གཅིག་གིས་ཀྱང་གླགས་མ་རྙེད་པ་དང་༔ དེར་ཨ་ཙ་ར་གསུམ་གྱིས་ན་རེ༔ ཆོས་ཐམས་ཅད་རྒྱ་གར་ནས་བོད་དུ་དར་ནས་འོང་བ་མ་གཏོགས་པ་རྒྱ་གར་ནས་ལོ་ཙཱ་བས་མ་བསྒྱུར༔ བོད་ཆོས་ནི་དེ་སྔ་ཕན་ཆད་ལ་བོད་དུ་གྲགས་མ་མྱོང་པ་ལ་ད་ལྟ་ཁྱོད་ཀྱི་ཆོས་ལུགས་འདི་ཅི་འདྲ་བ་ཞིག་ཡིན་ཟེར་བས༔

མ་ཅིག་གི་ཞལ་ནས༔ ཁྱེད་རྣམ་གསུམ་གྱིས་གསུངས་པ་དེ་བདེན༔ ང་ད་ལྟ་བོད་དུ་སྐྱེས་པའི་རྒན་མོ་ཡིན་པས་ཨ་ཀྱང་ཆེ་སྟེ༔ ད་ཁྱེད་རྣམ་གསུམ་རྒྱ་གར་ནས་བྱོན་ཟིན་ཡིན་པས་རྒྱ་གར་རྡོ་རྗེ་གདན་དུ་སྔོན་སངས་རྒྱས་གང་བྱོན༔ ཆོས་ཀྱི་འཁོར་ལོ་གང་བསྐོར༔ རྒྱལ་ཁྲིམས་དང་ཆོས་ཁྲིམས་དར་ནུབ་ཅི་ལྟ་བུ་བྱུང་༔ ད་སངས་རྒྱས་གང་འབྱོན་ཆོས་ཀྱི་འཁོར་ལོ་གང་བསྐོར༔ རྒྱལ་ཁྲིམས་དང་ཆོས་ཁྲིམས་གྱི་དར་ནུབ་ཇི་ལྟར་བྱུང་༔ ད་ལྟ་མཉམ་མེད་ཤཱཀྱ་ཐུབ་པའི་བསྟན་པ་འདི་ལ་ལོ་ཅི་ཙམ་གནས༔ སྔོན་དུ་རྒྱལ་ཁྲིམས་དང་ཆོས་ཁྲིམས་ལ་དར་ནུབ་ཅི་ལྟ་བུ་བྱུང་༔ ད་རྒྱལ་ཁྲིམས་དང་ཆོས་ཁྲིམས་གཉིས་ཀྱི་དར་ནུབ་ཅི་ལྟ་བུ་འབྱུང་༔ སྔོན་སངས་རྒྱས་བྱོན་པ་དང་ད་སངས་རྒྱས་འབྱོན་པ་རྣམས་ཀྱིས་ཚེ་ལོ་ཅི་ཙམ་ཐུབ༔ དེ་རྣམས་ཀྱི་བསྟན་པ་ལ་ཡུན་རིང་ཐུང་ཅི་ཙམ་གནས༔ དེ་རྣམས་ཁྱེད་རྣམ་གསུམ་གྱིས་གསལ་པོར་གསུང་འཚལ་ཞེས་གསུངས་པས༔

ཨ་ཙ་ར་གསུམ་གྱིས་ན་རེ༔ ངས་སྔོན་ཆད་སངས་རྒྱས་གང་བྱོན་དང་༔ ཆོས་ཀྱིས་འཁོར་ལོ་གང་བསྐོར་དང་༔ གདུལ་བྱ་སྐྱོང་ཚུལ་རྣམས་དང་༔ ཚེ་ལོ་ཅི་ཐུབ་དང་༔ བསྟན་པ་ཡུན་རིང་ཐུང་ཅི་ཙམ་གནས་དང་༔ རྒྱལ་ཁྲིམས་དང་ཆོས་ཁྲིམས་ཀྱི་དར་ནུབ་ཅི་ལྟ་བུ་འབྱུང་ཚུལ་རྣམས་དང་༔ ད་ཕྱིན་འབྱུང་གི་དུས་སུ་དར་ནུབ་ཅི་ལྟ་བུ་འབྱུང་ཚུལ་གྱི་འདས་མ་འོངས་ད་ལྟ་གསུམ་གའི་འབྱུང་ཚུལ་རྣམས་མི་ཤེས༔ ཁྱོད་ཡུམ་ཆེན་མོའི་སྤྲུལ་པ་ཡིན་ཟེར་བས་ཁྱོད་རྒྱ་གར་དུ་སྔོན་སངས་རྒྱས་གང་བྱོན༔ ད་གང་འབྱོན་རྒྱལ་ཁྲིམས་དང་ཆོས་ཁྲིམས་གྱི་དར་ནུབ་འབྱུང་ཚུལ་ཐམས་ཅད་དང་འདས་མ་འོངས་ད་ལྟ་གསུམ་ག་ཤེས་ན་ཤོད་དང་ཟེར་བ་ལ༔ དེ་ནས་ཁྲི་ཆེན་པོ་གཉིས་བརྩེགས་ནས༔ གཅིག་གི་སྟེང་དུ་མ་ཅིག་བཞུགས༔ གཅིག་གི་སྟེང་དུ་ཨ་ཙ་ར་གསུམ་བསྡད་ནས་ལོ་ཙཱ་བ་བཞི་པོས་བསྒྱུར་ཅིང་ཅོག་ཅོག་བྱས་ནས༔ མ་ཅིག་གིས་ཉི་མ་བདུན་ལ་བཤད་པས་ཀྱང་༔ ཨ་ཙ་ར་གསུམ་གྱིས་ན་རེ༔ ད་ཁྱོད་རང་གི་ཆོས་ལུགས་འདི་ཡི་རྒྱུ་མཚན་ཡིན་ལུགས་དང་འབྱུང་ཁུངས་དང་སྐྱེ་བ་དྲན་ཟེར་བ་རྣམས་ཀྱང་གསལ་པོར་ཤོད་དང་ཟེར་བ་ལ་མ་ཅིག་གི་ཞལ་ནས༔

འོ་འདིར་འཚོགས་པའི་ཁྲོམ་པ་རྣམས་ལེགས་པོར་ཉོན་དང་༔ རྒྱ་གར་ཤར་ནུབ་ཀྱི་རྒྱལ་པོ་རྣམས་དང་༔ པཎྜི་ཏ་རྣམས་དང་༔ དགེ་འདུན་གྲྭ་སྡེ་ཐམས་ཅད་ཀྱིས་ང་ཡི་ཆོས་ལ་ཡིད་མ་ཆེས་པ་དང་༔ ང་ལ་ཡང་ཡིད་མ་ཆེས་ནས་རྒྱ་གར་ཤར་ནུབ་ཐམས་ཅད་རྡོ་རྗེ་གདན་དུ་འདུས་ནས་གྲོས་བྱས་ཏེ༔ ངའི་རྩད་གཅོད་པ་དང་ངའི་ཆོས་ལུགས་ཀྱི་རྩད་གཅོད་པ་ལ་མཁས་ཤིང་གྲུབ་པ་བརྙེས་པའི་པནྜི་ཏ་འདི་གསུམ་རྒྱ་གར་རྡོ་རྗེ་གདན་ནས་ནམ་སྐྱ་ས་ལེ་བ་ལ་ཁྲ་ཧོར་པས་གོང་སྲང་འགྲིམ་པ་ལྟར་རྫུ་འཕྲུལ་གྱིས་ནམ་མཁའ་ལ་འཕུར་ནས་འོང་པས་ངའི་བླ་དབྱེ་འདི་ན་ཉི་མ་རྩེ་ཤར་བ་དང་མཉམ་དུ་ཕྱིན་ནས་བྱུང་པ་ཡིན༔ ད་ཁོང་རྣམས་ཀྱིས་ང་ལ་ཁྱོད་ཀྱི་ཆོས་འདིའི་རྒྱུ་མཚན་དང་སྐྱེ་བ་དྲན་ཟེར་བ་རྣམས་ཤོད་དོ་ཟེར་བ་ཡིན་པས༔ ངའི་ཆོས་འདིའི་ལོ་རྒྱུས་མ་བཤད་ན་རྒྱ་གར་བ་ཐམས་ཅད་ཨ་ཀྱང་ཡང་ཆེ་སྟེ༔ ཁྱེད་ངའི་བུ་སློབ་རྣམས་དང་འདིར་འཚོགས་པའི་ཁྲོམ་པ་རྣམས་དང་མ་འོངས་པའི་རྒྱུད་འཛིན་གྱི་སློབ་མ་རྣམས་དང་༔

སྤྱིར་ཡང་བོད་གངས་ཅན་ཁྲོད་པ་ཐམས་ཅད་ཀྱིས་ངའི་གདམས་ངག་ལ་ཡིད་མི་ཆེས་པ་འོང་ཞིང་༔ ངའི་སྐྱེ་བ་མ་བཤད་ན་ང་ལ་ཡིད་མི་ཆེས་པ་འོང་བ་ཡིན་པས་ཁྱེད་འདིར་འཚོགས་པ་རྣམས་ཐམས་ཅད་ཉོན་དང་གསུངས་ནས༔ དང་པོར་སངས་རྒྱས་བཅོམ་ལྡན་འདས་ཀྱི་བཀའ་རྒྱས་འབྲིང་བསྡུས་གསུམ་ལ་གཟིགས་རྟོགས་མཛད་ནས་བཀའ་ཐོག་ནས་གྲོལ་བའི་ཚུལ་གྱིས་བཀའ་བར་པ་ལ་བརྟེན་ནས་གཅོད་བཀའ་ཚོམས་ཆེན་མོ་བརྩམས་པས༔ དེ་ལྟར་བཀའ་ཚོམས་ཆེན་མོའི་སྐོར་རྣམས་མ་ལུས་པར་བཤད༔ བླ་མ་རྣམས་ལ་ཞུས་པའི་ཆོས་རྣམས་ཀྱི་བརྒྱུད་ཚུལ་དང་བཅས་ཡང་མ་ལུས་པར་བཤད༔ མ་ཅིག་རང་ཉིད་ཀྱི་ཐུགས་ལས་འཁྲུངས་པའི་མྱོང་ཆོས་རྣམས་དང་༔ ཟུང་འཇུག་གི་སྐོར་རྣམས་མ་ལུས་པ་བཤད༔ རྗེ་བཙུན་སྒྲོལ་མ་ལ་སོགས་པའི་ཡི་དམ་གྱི་ལྷ་རྣམས་ཀྱིས་གནང་བའི་ཆོས་རྣམས་དང་༔ ལུང་བསྟན་མཛད་ཚུལ་རྣམས་ལ་ཡང་ཐོར་རེ་བ་ཞིག་བཤད༔ སྐྱེ་བ་དྲན་ཚུལ་རྣམས་ལ་ཡང་རྗེ་བཙུན་སྒྲོལ་མས་ཐུགས་བསྐྱེད་ནས་ཡུམ་ཆེན་མོའི་ཐུགས་ཀ་ནས་སྤྲུལ་པ་འགྱེད་ཚུལ་དང་༔ སྤྲུལ་པ་ལས་རྡོ་རྗེ་དབྱིངས་ཕྱུག་མ་དང་༔

དེའི་ཐུགས་སྤྲུལ་རྡོ་རྗེ་བདུད་འདུལ་མ་དང་༔ དེའི་ཐུགས་སྤྲུལ་གསེར་གླིང་མ་ནས་བཟུང་སྟེ་ད་ལྟ་ལབ་སྒྲོན་ང་ཉིད་ཡན་ཆད་དུ་སྐྱེ་བ་བརྒྱ་དང་བདུན་བཞེས་ཚུལ་རྣམས་རྒྱས་པར་བཤད་པ་དང་འདི་སྐད་གསུངས༔ ང་སྐྱེ་བ་འདི་ཡི་སྔོན་རོལ་དུ་རྒྱ་གར་སེར་སྐྱའི་གྲོང་ཁྱེར་དུ་སྐུ་འཁྲུངས་པའི་པཎྜི་ཏ་དོན་འགྲུབ་རིན་ཆེན་ཞེས་བྱ་བར་གྲགས་པ་དེ་ནི་དགུང་ལོ་ཉི་ཤུ་བཞེས་པའི་དུས་སུ༔ པོ་ཏ་རིའི་བྲག་ཕུག་བཟང་པོ་དཔལ་ཞེས་བྱ་བར་རྗེ་བཙུན་སྒྲོལ་མས་བྱིན་གྱིས་བརླབས་པའི་ཕུག་པར༔ སྔར་ངའི་སྐུ་གདུང་དེ་ནི་སྐུ་གཟི་བརྗིད་དང་ལྡན་པར་བཀྲག་མདངས་མ་ཉམས་པ་ལ་གཞོན་ཤ་རྒྱས་པའི་ལང་ཚོ་དང་ལྡན་པ་ལ༔ སྐུ་འདོམ་གང་ཙམ་གྱིས་ནམ་མཁའ་ལ་དཔག་ནས་འཇའ་འོད་ཀྱི་ནང་དུ་ད་ལྟ་ཡང་བཞུགས་ནས་ཡོད༔ དེ་ལ་ཙནྡན་དཀར་པོའི་མེ་སྦར་ནས་སྦྱོང་ན༔ དྲི་བཟང་གིས་ཡུལ་ཁམས་ཐམས་ཅད་ཁྱབ་པ་དང་ནམ་མཁའ་ལ་རོལ་མོ་སྣ་ཚོགས་པའི་སྒྲ་སྙན་དཔག་ཏུ་མེད་པ་གྲགས་པ་དང་༔ རིན་པོ་ཆེ་སྣ་ཚོགས་པའི་རྒྱུ་ལས་གྲུབ་པའི་གདུགས་ལ་སོགས་པའི་མཆོད་རྫས་སྣ་ཚོགས་དང་༔ འཇའ་ཚོན་ཁ་དོག་སྣ་ཚོགས་པའི་གུར་དང་བླ་རེ་རྣམས་གདུང་གྲབ་གཤིབ་པ་ལྟར་བར་སྣང་ཐམས་ཅད་གང་ཞིང་༔ མེ་ཏོག་ཁ་དོག་སྣ་ཚོགས་པའི་ཆར་ཆེན་པོ་འབབ་པ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ངོ་༔ ཁྱད་པར་དུ་ཡང་གདུང་ལ་སྐུ་གཟུགས་ལ་སོགས་པའི་རྟེན་ངོ་མཚར་ཅན་འདི་འདྲ་བྱུང་ངོ་༔ ངའི་མགོ་བོ་དུང་ཁང་ལ་རྣམ་པར་སྣང་མཛད་ཀྱིས་གཙོ་བྱས་པའི་རྒྱལ་བ་རིགས་ལྔ་ལ་ཡུམ་མ་མ་ཀི་ལ་སོགས་པའི་ལྷ་མོ་ལྔས་ཡབ་ཡུམ་འཁྲིལ་སྦྱོར་དུ་གནས་ནས་ཡབ་ཡུམ་བཅུ་པོ་བཞེངས་ཐབས་སུ་འབུར་དུ་དོད་ནས་འབྱོན་ནས་འོང་ངོ་༔ སྒལ་ཚིགས་ཉེར་བརྒྱད་ལ་རྣམ་པར་རྒྱལ་བའི་མཆོད་རྟེན་རེ་རེ་འབྱོན་ནས་འོང་ངོ་༔ སོ་རྣམས་ལ་དུང་དཀར་གཡས་འཁྱིལ་རེ་རེ་འབྱོན་ནས་འོང་ངོ་༔ མན་མཁས་ལ་ཨ་དཀར་པོ་རང་ཆས་སུ་འབྱོན་ནས་འོང་ངོ་༔

ཨ་ཆེན་དང་པོ་ལ་ཡུམ་ཆེན་མོ་འབྱོན་ནས་འོང་ངོ་༔ སྐེད་ཚིགས་ལ་རིགས་གསུམ་གྱི་མགོན་པོ་འབྱོན་ནས་འོང་ངོ་༔ དཔལ་ཁ་གཉིས་ལ་སྒྲོལ་མ་དཀར་ལྗང་གཉིས་འབྱོན་ནས་འོང་ངོ་༔ མགྲིན་པར་འོད་དཔག་མེད་ཀྱི་སྐུ་ཚོན་གང་པ་ཞིག་འབྱོན་ནས་འོང་ངོ་༔ བྲང་གི་དཀྱིལ་དུ་རྡོ་རྗེ་འཆང་གི་སྐུ་ཚོན་གང་པ་ཞིག་འབྱོན་ནས་འོང་༔ སྙིང་ལ་ཤཱཀྱ་ཐུབ་པའི་སྐུ་ཚོན་གང་པ་ཞིག་འབྱོན་ནས་འོང་ངོ་༔ གཞན་ཡང་སྐུ་གཟུགས་དང་ཡི་གེ་ལ་སོགས་པ་ལ་བསམ་གྱིས་མི་ཁྱབ་པ་འབྱོན་ནས་འོང་༔ རུས་པ་ལྷག་མ་རྣམས་ལ་རིང་བསྲེལ་ཁ་དོག་སྣ་ཚོགས་པ་གྲངས་ལས་འདས་པ་འབྱུང་ངོ་༔ གདུང་ཤ་རི་རམ་གྱི་རིང་བསྲེལ་སྲན་ཆེན་གྱི་འབྲུ་མ་ཙམ་ལ་རྒྱ་གར་གྱི་མ་ག་དྷའི་བྲེའི་ཁལ་གཅིག་དང་བྲེ་གང་འབྱོན་ནས་འོང་༔ རྟེན་དེ་རྣམས་ལ་ངས་ད་ལྟ་ཇི་ལྟར་བཤད་པ་བཞིན་དུ་འབྱོན་ནས་འོང་བར་ཡོད་པས་དེ་རྣམས་ལ་ལྷག་ཆད་མེད་པར་ཅི་ལྟ་བ་བཞིན་དུ་བྱོན་ནས་མ་བྱུང་ན༔ ངས་ད་ལྟ་བཤད་པའི་གདམས་པ་འདི་རྣམས་ཀྱང་རྫུན་ཡིན་ལ༔ ང་ཡང་བསླུ་བ་ཅན་ཞིག་ཡིན་པར་ཐག་ཆོད་པས་ཁྱེད་པཎྜི་ཏ་གསུམ་གྱིས་ངའི་གདམས་པ་དེ་རྣམས་ཀྱི་རྩད་ལེགས་པར་བཅད་མཛོད་དང་རྟགས་ཤིག་སྟོན་ནས་འོང་བར་ཡོད་དོ༔ ད་ནི་ངས་ཀྱང་འགྲོ་དོན་གྱི་ཕྱེད་ཙམ་རྫོགས་ནས་ཡོད༔ ལོ་ཡང་ལྔ་བཅུ་ང་གཉིས་ལ་ཕྱིན་ནས་ཡོད་པས་དགུ་བཅུ་གོ་དགུ་ནས་ལན་ཅིག་འོག་མིན་གྱི་གནས་སུ་འཕོ་ཚུལ་སྟོན་དགོས་པས༔ ཁྱེད་པཎྜི་ཏ་གསུམ་གྱིས་ཐུགས་ཁུར་ཆེན་པོ་ཞིག་མཛོད་ཅིག་ཅེས་གསུངས་པ་དང་༔

དེར་འཚོགས་པ་ཐམས་ཅད་ཀྱིས་མ་ཅིག་གི་ཆོས་ལུགས་ཐམས་ཅད་དང་སྐྱེས་རབས་ཀྱི་ལོ་རྒྱུས་དང་གླེང་གཞིའི་གདམས་པ་ལ་ཡིད་ཆེས་ཤིང་ཐམས་ཅད་ཀྱིས་ཐེ་ཚོམ་དང་ཡིད་གཉིས་སེལ་ཞིང་སྒྲོ་འདོགས་ངེས་པར་ཆོད་པར་བྱུང་བས༔ དེར་འཚོགས་པའི་ཁྲོམ་པ་ཐམས་ཅད་ཀྱིས་དམ་པ་རིན་པོ་ཆེ་ལ་ཞུ་བ་ཕུལ་ནས༔ དམ་པ་སངས་རྒྱས་རིན་པོ་ཆེ་ལགས༔ ཁྱེད་བོད་ལ་ཐུགས་བརྩེ་བ་ཤིན་ཏུ་ཆེ་བས་བོད་གངས་ཅན་ཁྲོད་པ་རྣམས་ཀྱི་དོན་ཆེད་དུ༔ རྒྱ་གར་གྱིས་པཎྜི་ཏ་འདི་གསུམ་དང་ལྷན་ཅིག་ཏུ་འགྲོགས་ལ་རྒྱ་གར་དུ་བྱོན་མཛོད་ལ༔ མ་ཅིག་གི་གདུང་སྦྱོང་པ་ལ་རྟེན་ངོ་མཚར་ཅན་མང་པོ་འབྱོན་གསུངས་པ་ལ༔ རྟེན་དེ་རྣམས་ཀྱི་ནང་ནས་གང་བཟང་བ་ཞིག་བོད་འདིར་གདན་དྲངས་ནས་འབྱོན་པར་ཐུགས་ལ་འདོགས་པ་ཞུ་ཞུས་པས༔ དམ་པ་རིན་པོ་ཆེའི་ཞལ་ནས་དེ་ལྟར་བྱེད་དོ་གསུངས་ནས་ཞལ་བཞེས་མཛད་དོ༔ དེ་ནས་དམ་པ་རིན་པོ་ཆེ་རྒྱ་གར་གྱི་པཎྜི་ཏ་རྐང་མགྱོགས་པ་གསུམ་དང་ལྷན་ཅིག་ཏུ་འགྲོགས་ནས་རྒྱ་གར་དུ་བྱོན་པའོ༔ དེ་ནས་ཟླ་བ་གཉིས་པའི་ཚེས་བཅུ་དྲུག་ལ་ཚོགས་པ་རྣམས་ཀྱང་སོ་སོར་གྱེས་ནས་སོང་ངོ་༔ དམ་པ་རིན་པོ་ཆེ་ཡང་རྐང་མགྱོགས་པ་གསུམ་དང་འགྲོགས་ཏེ༔ ལ་སྟོད་པ་རྣམས་དང་བལ་པོ་པ་རྣམས་དང་ལྷན་ཅིག་ཏུ་འགྲོགས་ནས་བྱོན་པས་དེར་ལ་སྟོད་ནས་བལ་པོར་སླེབ་པ་དང་༔ བལ་པོའི་རྣལ་འབྱོར་པ་གསུམ་དང་བདུན་བྱས་ནས་རྒྱ་གར་དུ་ཕྱིན་པས༔

དེ་ནས་རྒྱ་གར་རྡོ་རྗེའི་གདན་དུ་རྒྱ་གར་ཆོས་ཀྱི་རྒྱལ་པོའི་དྲུང་དུ་པཎྜི་ཏ་རྣམས་བསྡུས་ནས་སྔར་མ་ཅིག་གི་ལོ་རྒྱུས་རྣམས་རྒྱས་པར་བཤད་པས༔ དེར་རྒྱ་གར་ཤར་ནུབ་ཀྱི་པཎྜི་ཏ་ཐམས་ཅད་དང་དགེ་འདུན་གྲྭ་སྡེ་རྣམས་རྒྱ་གར་རྡོ་རྗེའི་གདན་དུ་འདུས་ནས་གྲོས་འཆམས་ཏེ༔ ན་རེ༔ བུད་མེད་དེའི་རྩད་དེ་མགྱོགས་པར་བཅད་དགོས༔ བུད་མེད་དེའི་གདུལ་ཞིང་དེ་ཙམ་ཆེ་ལུགས་དང་སྐྱེ་བ་དྲན་ཟེར་ལུགས་དང་ཆོས་ཀྱི་འཆད་ཉན་བྱེད་ལུགས་དེ་ལ་བརྟགས་ནས་ཡང་ན་ཡུམ་ཆེན་མོའི་སྤྲུལ་པ་དངོས་སུ་ཡིན་པར་འདུག༔ ཡུམ་ཆེན་མོའི་སྤྲུལ་པ་ཡིན་ན༔ བོད་མཐའ་འཁོབ་ཆོས་མ་དར་བའི་ཡུལ་ཡིན་པས༔ སྐུ་ཡལ་འགྲོ་བ་ཡིན༔ བོད་རང་ལ་ཆོས་དེ་ཙམ་ལོངས་སྤྱོད་དུ་བཅུག་ལས་ཀྱང་མེད་པས༔ ངེད་རང་རྒྱ་གར་འདིར་ཆོས་ཐམས་ཅད་ཀྱི་འབྱུང་གནས་ཡིན་པས་འདིར་སྤྱན་འདྲེན་དགོས་ཟེར༔ བདུད་དང་རྒྱལ་བསེན་གཉིས་ཀྱི་སྤྲུལ་པ་ཞིག་ཡིན་ན་ནི༔ འོ་སྐོལ་ཚོ་མགོ་བསྐོར་ནས་བཏང་བ་ཡང་ཨེ་ཡིན་པས༔ དེའི་རྩད་ལེགས་པོར་བཅད་དགོས་ཟེར་ནས་ཐམས་ཅད་ཁ་འཆམ་པ་དང་༔ དེ་ནས་པཎྜི་ཏ་ལྔ་བཅུ་དང་དགེ་འདུན་པ་ལྔ་བརྒྱ་དང་ལྔ་བཅུ་ང་གཉིས་ཀྱིས་མཆོད་པའི་ཡོ་བྱད་དཔག་ཏུ་མེད་པ་ཐོགས་ནས་པོ་ཏ་རིའི་བྲག་ཕུག་བྷ་ཏྲ་ཡ་ནར་བྱོན་ནས་གཟིགས་པར་མཛད་པས༔ པཎྜི་ཏ་དོན་འགྲུབ་རིན་ཆེན་གྱི་གདུང་ནི་ལང་ཚོ་དར་ལ་བབ་པ་སྐུ་གཟི་བརྗིད་དང་ལྡན་པར་འདོམ་གང་ཙམ་གྱི་ནམ་མཁའ་ལ་དཔག་ནས་འཇའ་ཚོན་སྣ་ཚོགས་འཁྲིགས་པའི་ནང་དུ་གཞོན་ཤ་རྒྱས་པ་དང་བཅས་ནས་འོད་དཔུང་ངེ་བཞུགས་ནས་འདུག་པས༔

པཎྜི་ཏ་རྣམས་ཀྱིས་གཟིགས་མ་ཐག་ཏུ་རབ་ཏུ་དགའ་སྟེ༔ ལ་ལ་ནི་ཉམས་དགའ་བ་དང་༔ ལ་ལ་ནི་སེམས་གཡོ་བ་དང་༔ ལ་ལ་ནི་བ་སྤུ་གཡེང་བ་དང་༔ ལ་ལ་ནི་མཆི་མ་འཁྲུག་པ་དང་༔ ལ་ལས་ཕྱག་འཚལ་བ་དང་༔ ལ་ལས་ནི་མཆོད་པ་འབུལ་བ་དང་༔ ལ་ལས་ནི་གསོལ་བ་གདབས་པ་དང་༔ ལ་ལ་ནི་ཉམས་འབར་བ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ངོ་༔ དེ་ནས་པཎྜི་ཏ་དེ་རྣམས་དང་དགེ་འདུན་པ་རྣམས་ཀྱིས་ཕྱག་འཚལ་ཞིང་མཆོད་པ་ཕུལ་ནས་མགྲིན་གཅིག་ཏུ་སྐུ་གསུང་ཐུགས་ཀྱི་བསྟོད་པ་ལེགས་པོར་མཛད་ནས་དོན་འགྲུབ་བཟང་པོའི་གདུང་ནི་ཙནྡན་དཀར་པོའི་མེ་ལ་སྦྱོང་པས་དྲི་བཟང་གིས་ཡུལ་ཁམས་ཐམས་ཅད་ཁྱབ་པ་ལ་སོགས་པའི་མ་ཅིག་གི་ཞལ་ནས་ཇི་ལྟར་གསུང་པ་བཞིན་དུ་བྱུང་པས༔ དེ་ནས་མེའི་ཚ་རེག་ཡལ་མ་ཐག་ནས་བལྟས་པས་མ་ཅིག་གི་ཞལ་ནས་ཇི་ལྟར་གསུང་པ་བཞིན་དུ་ལྷག་ཆད་དང་ནོར་འཁྲུལ་མེད་པར་བྱུང་པས༔ ཞག་བདུན་གྱི་བར་ལ་མཆོད་པ་ཕུལ་ནས༔ དེ་ནས་སྐུ་གཟུགས་ལ་སོགས་པའི་རྟེན་རྣམས་མ་ལུས་པར་རྡོ་རྗེའི་གདན་དུ་གདན་དྲངས་ནས༔ དེ་ནས་རྒྱ་གར་ཤར་ནུབ་ཀྱི་པཎྜི་ཏ་རྣམས་དང་༔ རྒྱལ་པོ་རྣམས་དང་༔ བློན་པོ་རྣམས་དང་༔ དགེ་འདུན་གྲྭ་སྡེ་རྣམས་དང་༔ ཡུལ་མི་སྡེ་འཁོར་དང་བཅས་པ་རྣམས་ལ་རྟེན་རྣམས་མ་ལུས་པ་ངོམ་པས་ཐམས་ཅད་ལ་དད་པ་རྩོལ་མེད་དུ་རང་དབང་མེད་པར་སྐྱེས་པ་དང་༔ གནམ་ས་གཉིས་ནས་ཀྱང་འཇའ་འོད་ཀྱི་གུར་དང་༔ མེ་ཏོག་གི་ཆར་པ་དང་༔ ལྷའི་རྔ་བོ་ཆེ་བརྡུང་བ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་བ་དང་༔ དེ་ནས་པཎྜི་ཏ་རྣམས་དང་དགེ་འདུན་གྲྭ་སྡེ་རྣམས་དང་༔

རྒྱལ་བློན་ཡུལ་མི་འཁོར་འབངས་དང་བཅས་པ་རྣམས་ཀྱིས་མ་ཅིག་ལ་ཡིད་ཆེས་ཏེ་ཐེ་ཚོམ་སེལ་ནས་དད་པ་རྩོལ་མེད་དུ་སྐྱེས་ནས་འདི་སྐད་སྨྲས་སོ༔ ན་རེ་མ་ཅིག་དེ་ནི་ཡུམ་ཆེན་མོ་དངོས་ཡིན་པར་འདུག་པས་བོད་མཐའ་འཁོབ་ཆོས་མ་དར་བ་དང་༔ སངས་རྒྱས་ཀྱིས་ཞབས་མ་བཅག་པའི་སྨག་རུམ་ཡིན་པས་བོད་ལ་ཆོས་ཀྱི་སྣོད་མེད་པ་དང་༔ མ་ཅིག་ཀྱང་སྐུ་ཡལ་ནས་འགྲོ་བ་ཡིན་པ་དང་༔ བོད་རང་ལ་ཡང་ཆོས་དེ་ཙམ་ལོངས་སྤྱོད་དུ་བཅུག་ལས་མེད་པ་དང་༔ རྒྱ་གར་འདི་སངས་རྒྱས་ཐམས་ཅད་ཀྱི་འབྱུང་གནས༔ ཆོས་ཐམས་ཅད་ཀྱི་འབྱུང་ས་ཡིན་པས༔ མ་ཅིག་རྒྱ་གར་འདིར་སྤྱན་འདྲེན་དགོས་ཟེར་ནས༔ ཐམས་ཅད་ཁ་འཆམ་པ་དང་༔ དེ་ནས་མ་ཅིག་གི་སྐུ་གདུང་གི་རྟེན་རྣམས་ཆ་བགོས་ཏེ༔ དབུའི་རིགས་ལྔ་ཡབ་ཡུམ་འཁྲིལ་སྦྱོར་གྱི་རྟེན་དེ་རྡོ་རྗེ་གདན་དུ་བཞུགས་བཅོལ༔ ཨ་ཆེན་དང་པོའི་ཡུམ་ཆེན་མོའི་སྐུ་དང་༔ ཤ་རི་རམ་གྱི་མཆོད་རྟེན་གདུང་མཆོག་བདུན༔ རྒྱ་གར་ཆོས་ཀྱི་རྒྱལ་པོའི་ཕྱག་བཞེས་མཛད༔ བྲང་གི་དཀྱིལ་དུ་རྡོ་རྗེ་འཆང་གི་སྐུ་བྱོན་པ་དེ་རྐང་མགྱོགས་པ་གསུམ་ལ་བྱིན་ནས་རྒྱལ་བྱེད་ཚལ་དུ་བཞུགས་བཅོལ༔ དེ་ཤུལ་གྱི་རྟེན་རྣམས་ནི་རྒྱ་གར་ཤར་ནུབ་ཀྱི་པཎྜི་ཏ་རྣམས་དང་༔ དགེ་འདུན་གྲྭ་སྡེ་རྣམས་དང་རྒྱལ་བློན་འཁོར་འབངས་རྣམས་ཀྱིས་ཆ་བགོས་ནས་སོ་སོར་བདག་དུ་བཟུང་བར་མཛད༔ ཐུགས་ལས་བྱོན་པའི་ཤཱཀྱ་ཐུབ་པའི་སྐུ་དེ་ནི༔ ཕ་དམ་པའི་ཕྱག་ཏུ་བཞེས་པར་མཛད་ནས་བོད་དུ་གདན་དྲངས་ནས་བྱོན་ཏེ༔ དེ་ནས་སྔར་གྱི་རྣལ་འབྱོར་པ་གསུམ་ལ་གཅིག་བསྣན་ནས་བཞི་བྱས་ཏེ༔ མ་ཅིག་གདན་འདྲེན་པ་ལ་བཏང་པས༔ དམ་པ་སངས་རྒྱས་རིན་པོ་ཆེ་དང་ལྔ་བྱས་ནས་ཚུར་བོད་དུ་བྱོན་པས་ཟླ་བ་བཅུ་གཅིག་པའི་ཚེས་བཅུ་ལ་ཟངས་རི་མཁར་དམར་དུ་མ་ཅིག་གི་དྲུང་དུ་ཕྱིན་པས༔

དེ་ནས་རྣལ་འབྱོར་པ་བཞི་པོས་མ་ཅིག་ལ་ཕྱག་རྩོལ་མེད་དུ་འཚལ་ཏེ༔ སྐོར་བ་ལན་གསུམ་བྱས་ནས་མཆོད་པ་ཕུལ་ནས་པུས་མོ་བཙུགས་ཐལ་མོ་སྦྱར་ནས་ཞུས་པ༔ ཀྱེ་མ་ཅིག་ལགས༔ ཁྱེད་ནི་དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ༔ ཆོས་ཐམས་ཅད་ཀྱི་གྲོལ་ཕུགས༔ གསང་སྔགས་ཐམས་ཅད་ཀྱི་གཏེར་མཛོད༔ དམ་ཆོས་ཐམས་ཅད་ཀྱི་བདག་མོ༔ ཡུམ་ཆེན་ཀུན་ཏུ་བཟང་མོའི་ཐུགས་ཀྱི་སྤྲུལ་པ་རྗེ་བཙུན་སྒྲོལ་མའམ་རྡོ་རྗེ་ཕག་མོ་ཀུན་ཏུ་བཟང་མོ་དངོས་ཡིན་པར་འདུག་པས༔ ངོ་མཚར་ཤིན་ཏུ་ཆེ་བ་ལགས་སོ༔ མ་ཅིག་གི་ཞལ་ནས་ཇི་ལྟར་གསུངས་པ་རྣམས་ལ་ལྷག་ཆད་དང་ནོར་འཁྲུལ་ཆ་ཤས་ཙམ་ཡང་མེད་པར་འདུག་ལགས༔ མ་ཅིག་གི་སྐུ་གདུང་ལ་བྱོན་པའི་རྟེན་རྣམས་ཀྱི་ནང་ནས་ཀྱང་ཁྱད་པར་མཆོག་ཏུ་གྱུར་པའི་སྐུ་གཟུགས་གཉིས་བྱོན་ནས་འདུག་སྟེ༔ ཐུགས་ཀའི་གདུང་རུས་ལ་བྱོན་པའི་རྡོ་རྗེ་འཆང་ཆེན་པོའི་སྐུ་དེ་ནི་ངེད་རྐང་མགྱོགས་པ་གསུམ་གྱི་དད་རྟེན་ལ་ཞུས༔

དེང་སང་རྒྱལ་བྱེད་ཚལ་དུ་བཞུགས་ནས་ཡོད་ལགས༔ ཐུགས་ལས་བྱོན་པའི་ད་ལྟའི་མཉམ་མེད་ཤཱཀྱ་ཐུབ་པའི་སྐུ་དེ་ནི་དམ་པ་སངས་རྒྱས་རིན་པོ་ཆེས་འདིར་གདན་དྲངས་ནས་ཡོད་ལགས་ཞེས་ཞུས་པ་དང་༔ དེ་ལ་སོགས་པའི་སྔར་གདུང་ལ་ལྟར་སོང་ཚུལ་དང་༔ གདུང་མཐོང་ཚུལ་དང་༔ རྟེན་རྣམས་བྱོན་ཚུལ་དང་རྟེན་རྣམས་ཆ་བགོས་ཚུལ་ལ་སོགས་པའི་ལོ་རྒྱུས་རྣམས་ཞིབ་ཏུ་ཞུས་པས༔ མ་ཅིག་གིས་ཀྱང་དེའི་ལན་རྣམས་ལེགས་པོར་གསུངས་ནས༔ གསུང་གླེང་ཞིབ་ཏུ་མཛད་དོ༔

དེ་ནས་དེར་འཚོགས་པ་རྣམས་ལ་ཤཱཀྱ་ཐུབ་པའི་སྐུ་དེ་ངོམ་ཞིང་ཐམས་ཅད་ཀྱིས་བྱིན་རླབས་ཞུས་པ་དང་༔ དེ་ནས་ཤཱཀྱ་ཐུབ་པའི་སྐུ་དེ་ལྷ་ས་ལ་སོགས་པའི་མདོ་དབུས་ཁམས་གསུམ་དུ་བསྟན་ཞིང་བྱིན་རླབས་མཛད་པ་དང་༔ དེ་ནས་དམ་པ་རིན་པོ་ཆེའི་ཞལ་ནས་ད་ནི་མ་ཅིག་གི་ཐུགས་ལ་བྱོན་པའི་རྟེན་མཆོག་ཁྱད་པར་ཅན་འདི༔ ངེད་ཐམས་ཅད་ཀྱི་རྟེན་བྱེད་དགོས་གསུངས་ནས་ལ་སྟོད་དིང་རིར་གདན་དྲངས་ནས་དམ་པ་སངས་རྒྱས་རིན་པོ་ཆེ་ཡང་ལ་སྟོད་དིང་རིར་བྱོན་ནས་དེང་སང་ཡང་ལ་སྟོད་དིང་རིར་བཞུགས་ནས་ཡོད་དོ༔ དེ་ནས་རྣལ་འབྱོར་པ་བཞི་པོས་ཀྱང་མ་ཅིག་ལ་རྒྱ་གར་བ་རྣམས་ཀྱིས་ཞུ་བ་བསྐུར་ཚུལ་དང་རྒྱ་གར་དུ་འབྱོན་དགོས་ཚུལ་གྱི་ཞུ་བ་ནན་ཏན་དུ་ཕུལ་བས༔

མ་ཅིག་གི་ཞལ་ནས་ང་ད་ལན་ལུས་ཐོག་འདི་ལ་རྒྱ་གར་དུ་མི་ཕྱིན༔ གལ་ཏེ་ཕྱིན་ཀྱང་འགྲོ་དོན་རྒྱ་ཆུང་བས་ང་ད་ལན་གདུལ་བྱའི་སྐལ་བ་བོད་འདིར་རང་འདུལ་བའི་དུས་ལ་བབ་པར་འདུག་པས༔ ད་ལྟའི་དུས་ཀྱི་སྐབས་འདིར་ཡིན་པས་ངའི་ལུས་ཐོག་འདི་ལ་རྒྱ་གར་དུ་མི་ཕྱིན་པས༔ ཁྱེད་རྒྱ་གར་བ་དེ་སངས་རྒྱས་ཐམས་ཅད་ཀྱི་འབྱུང་གནས་དང་ཆོས་ཐམས་ཅད་ཀྱི་འབྱུང་གནས་ཡིན་ཞིང་༔ ཆོས་ཐམས་ཅད་ཁྱེད་རྒྱ་གར་ནས་བོད་འདིར་ལོ་ཙཱ་བ་རྣམས་ཀྱིས་བསྒྱུར་ནས་འོང་དགོས་པར་འདུག་པ་མ་གཏོགས་པ༔ བོད་ནས་བོད་ཆོས་ཕར་ལ་རྒྱ་གར་དུ་དེ་སྔ་ཕན་ཆད་ལ་དར་བ་མེད་ཀྱང་༔ ང་སྐྱེ་བ་མང་པོ་ལ་རྒྱ་གར་དུ་སྐྱེས་པས་ཁྱེད་རྒྱ་གར་བ་རྣམས་ཀྱིས་ང་ལ་ཆོས་འབྲེལ་མང་དུ་ཡོད་པས༔

དེའི་ཕྱིར་དུ་ང་ད་ལྟ་བོད་འདིར་སྐྱེས་ཀྱང་དེ་སྔ་ཕན་ཆད་ལ་ཁྱེད་རྒྱ་གར་དུ་གྲགས་མ་མྱོང་པའི་དམ་ཆོས་ཕྱག་རྒྱ་ཆེན་པོ་གཅོད་ཅེས་བྱ་བ་འཆད་པ་འདི་ནི༔ སྤྲང་མོ་ང་ཡི་ཆོས་ལུགས་བོད་གངས་ཅན་ཁྲོད་དུ་གྲགས་ཤིན་ཏུ་ཆེ་བ་ཡིན་པས་ཁྱེད་རྒྱ་གར་བ་རྣམས་ལ་ཡང་གཟིགས་ཕུལ་གཅིག་བྱེད་དགོས་གསུངས་ནས༔ མ་ཅིག་གི་ཐུགས་ལ་འཁྲུངས་པའི་མྱོང་ཆོས་ཁྱད་པར་ཅན་རྣམས་རྒྱ་གར་དུ་བསྐུར་བ་མཛད་པ་ལ་ཐོག་མར་སངས་རྒྱས་བཅོམ་ལྡན་འདས་ཀྱི་བཀའ་ཕ་རོལ་ཏུ་ཕྱིན་པའི་མདོ༔ བཀའ་རྒྱས་འབྲིང་བསྡུས་གསུམ་ལ་གཟིགས་རྟོག་མཛད་པས་བདུད་ཀྱི་ལེའུ་སྐབས་ལ་བབ་པའི་ཚེ་ན༔ གཟུགས་ནས་རྣམ་མཁྱེན་གྱི་བར་དུ་གང་ལ་ཆགས་ན་བདུད་ཀྱི་ལས་སུ་རིག་པར་བྱའོ་ཞེས་པ་ལ་སོགས་པ་དང་༔ གཟུགས་ནི་དཀར་པོ་དང་༔ སེར་པོ་དང་༔ དམར་པོ་དང་༔ སྔོན་པོ་དང་༔ ལྗང་གུ་དང་ལེབ་བརྒན་ཡང་མ་ཡིན་ནོ༔ ཞེས་པ་ལ་སོགས་པ་དང་གཟུགས་ནི་གང་ནས་ཀྱང་འོང་བ་མེད་པ་གང་དུ་ཡང་འགྲོ་བ་མེད་པ༔ གར་ཡང་གནས་པ་གྱུར་པ་མེད་དོ་ཞེས་པ་ལ་སོགས་པ་དང་༔ ཆོས་ཐམས་ཅད་མཉམ་པ་ཉིད་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་མཉམ་པ་ཉིད་དོ་ཞེས་པ་ལ་སོགས་པ་གཟིགས་ནས་གྲོལ་བའི་ཚུལ་མཛད་པས༔ བདུད་བཞི་རང་སར་གྲོལ་བའི་ཉམས་ཁྱད་པར་ཅན་རྒྱུད་ལ་སྐྱེས་པའི་མྱོང་ཆོས་ཤིན་ཏུ་ཟབ་པའི་མན་ངག༔ མ་ཅིག་གིས་མཛད་པ་ལ་བཀའ་ཚོམས་ཆེན་མོ༔ ཡང་ཚོམས་ཆེན་མོ༔ ཉིང་ཚོམས་ཆེན་མོ་ལེའུ་ལག་གནད་ཐེམ༔ ཁོང་རྒོལ་གསང་བ་བརྡ་ཆོས་ལ་བཟླ་སྐོར་གསུམ༔ གཞི་སློང་ལམ་སློང་ཁྱད་པར་གྱི་མན་ངག་ལ་ཆོས་ཚན་བརྒྱ་དང་བཅྭོ་བརྒྱད་རྒྱ་གར་དུ་བསྐུར་ནས་རྒྱ་གར་བ་ཐམས་ཅད་ཀྱིས་མ་ཅིག་གི་ཆོས་ལུགས་ལ་ཡིད་ཆེས་ནས་རྒྱ་གར་བ་ཐམས་ཅད་ཀྱིས་ཉམས་སུ་བླངས་པས་རྒྱ་གར་དུ་གཅོད་ཅེས་བྱ་བར་གྲགས་ཏེ༔ བོད་ཆོས་རྒྱ་ལ་དར་བར་བྱས་སོ༔ དེ་ནས་མ་ཅིག་གི་ཞལ་ནས་རྒྱ་ཆོས་བོད་ལ་དར་བ་ནི་ཀུན་གྱི་ལུགས་ཡིན་ཏེ༔ བོད་ཆོས་རྒྱ་ལ་དར་བ་ནི་ཁོ་མོ་ཙམ་ཞེས་གསུངས་སོ༔

དེ་ནས་རྒྱ་བོད་གཉིས་ཀས་མ་ཅིག་ལ་དད་པ་རྩོལ་མེད་དུ་ཐོབ་ཅིང་སྒྲོ་སྐུར་དང་བཤད་འབར་བྱེད་མི་རྣམས་ཀྱང་ཐེ་ཚོམ་གྱི་སྙེམས་ཐག་ཆོད་ནས་མ་ཅིག་ལ་འདུན་པ་དང་༔ དམ་ཆོས་བདུད་ཀྱི་གཅོད་ཡུལ་ཞེས་བྱ་བ་ནི་རྒྱ་བོད་གཉིས་ཀ་ལ་དར་ཞིང་གྲགས་ཆེ་བར་མཛད་པའོ༔ མ་ཅིག་གིས་རྒྱ་གར་བ་དང་ཆོས་ཀྱི་རྩོད་པ་མཛད་པས་རྩོད་པ་ལས་རྒྱལ་བ་དང་༔ བོད་ཆོས་རྒྱ་ལ་དར་བར་མཛད་པ་ནི་མ་ཅིག་དགུང་ལོ་ང་གཅིག་ནས་ང་གཉིས་ཀྱི་བར་གྱི་རྣམ་ཐར་ཏེ་རྣམ་གྲངས་བཅོ་ལྔ་པའོ༔ སཱ་མཱ་ཡཱ༔

རྣམ་གྲངས་བཅུ་དྲུག་པ།

དེ་ནས་མ་ཅིག་དགུང་ལོ་ལྔ་བཅུ་ང་གཉིས་ནས་ང་དྲུག་གི་བར་དུ་ཆོས་ཉན་བཤད་དང་བཅས་པས་གདུལ་བྱ་རྣམས་ལེགས་པོར་སྐྱོང་བར་མཛད་པ་དང་༔ དེ་ནས་ཤ་ཐུད་མར་གསུམ་ལ་སོགས་པའི་བཟའ་བའི་བྱེ་བྲག་ཁལ་བརྒྱ་ལྔ་བཅུ་ང་ལྔ་བཀལ་ནས་སྲས་མོ་རྒྱན་ནེ་མ་དང་༔ བསོད་ནམས་རྒྱན་དང་༔ དཔལ་ལྡན་རྒྱན་དང་༔ འབུམ་ཚོ་རིན་ཆེན་རྒྱན་དང་བཞིའི་མགོ་བྱས་པའི་རྣལ་འབྱོར་མ་བདུན་དང་བུད་མེད་བརྒྱ་དང་བཅུ་གསུམ་ཞྭ་དམར་བས་གཙོ་བྱས་པའི་དགེ་འདུན་པའི་གྲྭ་ཚན་བརྒྱ་དང་ལྔ་བཅུ༔ མི་ནག་པ་ལྔ་བཅུ་དང་སུམ་བརྒྱ་ལ་ཞལ་ཏ་མཛད་ནས་སྟག་ལོ་ཟླ་བ་གཉིས་པའི་ཚེས་བཅོ་ལྔ་ལ་གངས་ཕུག་མོ་ཆེར་བརྫངས་བས་ཞག་ཉི་ཤུ་རྩ་ལྔ་ལོན་པ་དང་༔

ཟླ་བ་གསུམ་པའི་ཚེས་ལྔའི་ཐོ་རངས་ཁ་སྔ་མ་ལ་མ་ཅིག་སེང་གེ་དཀར་མོ་གཅིག་ལ་བཅིབས་ནས༔ རིགས་བཞི་མཁའ་འགྲོའི་ཚོགས་ལ་སོགས་པའི་མཁའ་འགྲོ་མ་འབུམ་སྡེ་ཡི་ཚོགས་དང་བཅས་པས་བསྐོར་ནས་རྫུ་འཕྲུལ་གྱིས་ནམ་མཁའ་ལ་གཤེགས་ནས་ནུབ་ཕྱོགས་ཨོ་རྒྱན་དུ་བྱོན་ནས་ཚོགས་ཀྱི་འཁོར་ལོ་བསྐོར་ནས་ཞག་གསུམ་བཞུགས༔ ཨོ་རྒྱན་གྱི་དཔའ་བོ་དཔའ་མོ་མཁའ་འགྲོ་མ་ཡི་ཚོགས་དང་བཅས་པས་བསྐོར་ནས་ལྷ་གནས་ནོར་བུ་ཕུན་སུམ་ཚོགས་པའི་གླིང་དུ་བྱོན་ནས་གསང་སྔགས་ཀྱི་རྒྱུད་ཨུ་དུམ་ཝ་ར་བཤད༔ དབང་གི་ཆོ་ག་དང་ཚོགས་ཀྱི་འཁོར་ལོ་བསྐོར་ཏེ༔ ཞག་བདུན་བཞུགས་ནས་ལྷ་སྐལ་བ་དང་ལྡན་པ་རྣམས་གྲོལ་བར་མཛད་དོ༔ དེ་ནས་ནོར་བུ་ཕུན་སུམ་ཚོགས་པའི་གླིང་གི་ལྷ་རྣམས་དང་བཅས་པས་བསྐོར་ནས༔ ཡུལ་འཁོར་སྲུང་ལ་སོགས་པའི་རྒྱལ་ཆེན་སྡེ་བཞིའི་གནས་སུ་ཉིན་ཞག་རེ་རེ་བཞུགས་ནས་ཆོས་སྟོན་མཛད་དོ༔

དེ་ནས་རྒྱལ་པོ་ཆེན་པོ་སྡེ་བཞིའི་དཔུང་ཚོགས་དང་བཅས་པས་བསྐོར་ནས་ནམ་མཁའི་དབྱིངས་ནས་མར་བྱོན་པས༔ ཚེས་བཅོ་ལྔའི་ཉི་མ་རྩེ་ཤར་བ་དང་མཉམ་དུ་གངས་ཕུག་མོ་ཆེར་ཆགས་ཕེབས་སོ༔ དེའི་ཚེ་ན་མ་ཅིག་དཔའ་བོ་མཁའ་འགྲོ་མའི་ཚོགས་ཀྱིས་བསྐོར་བ་དང་བཅས་པ་རྣམས་ནམ་མཁའ་སྤྲིན་གྱི་མཐོང་བར་ནས་མར་བྱོན་པས༔ སྲས་ཐོད་སྨྱོན་བསམ་འགྲུབ་ཀྱིས་ཕུག་པའི་ནང་ནས་མཐོང་བས་ལོང་པས་ལྡང་བར་བྱས་སོ༔

དེ་ནས་མ་ཅིག་གིས་བྲག་ཕུག་གི་སྒོ་ཤག་སྟེ་ཕྱེས་པ་དང་༔ སྒྲུབ་པ་པོ་སྒྲུབ་པ་མཐར་ཕྱིན་ནས་ཨེ་ཡོད་གསུངས་པས༔ ཐོད་སྨྱོན་བསམ་འགྲུབ་ཀྱིས་ན་རེ༔ མ་ཅིག་འཁོར་བཅས་ནམ་མཁའ་ནས་བྱོན་པ་སྐུ་ཁམས་བདེ་ལགས་སམ༔ ངས་ཀྱང་སྒྲུབ་པའི་དྲོད་ཚད་བར་མ་ཙམ་ལ་ཕྱིན་ནས་ཡོད་ལགས་ཞུས་ནས༔ ཉམས་ལེན་གྱིས་དྲོད་རྟགས་ཕུལ་བས་མ་ཅིག་ཀྱང་ཤིན་ཏུ་མཉེས་ནས་འདི་སྐད་གསུངས་སོ༔ ང་ནམ་མཁའ་ནས་འོང་བ་ཁྱོས་ཕུག་པའི་ནང་ནས་མཐོང་བ་ཡིན་ནམ༔ ཡང་ན་ཁྱོད་ཀྱིས་ཡིད་ལ་ཤར་བ་ཡིན་ནམ་གསུངས་པས༔

ཐོད་སྨྱོན་གྱིས་ན་རེ༔ ངས་ཡུལ་སྣང་ཐམས་ཅད་སྒྱུ་མ་བཞིན་དུ་རྟོགས་པས་ང་ལ་ཡུལ་གྱིས་མི་བསྒྲིབ་པས་ཁོང་ཁོལ་པ་རྣམས་ཀྱང་མིག་རྒྱང་གང་ནས་བྱུང་བ་མཐོང་༔ ཁྱོད་མ་ཅིག་ཀྱང་དཔའ་བོ་དཔའ་མོ་མཁའ་འགྲོའི་ཚོགས་ཀྱིས་བསྐོར་ནས་རྒྱལ་ཆེན་སྡེ་བཞིའི་གནས་ནས་བྱོན་ནས་བྱུང་བ་མཐོང་ཞེས་ཟེར་རོ༔ སྲས་མོ་རྒྱན་ནེ་མ་ཕུག་པའི་སྒོར་ཕྱིན་པ་ལ་ཐོད་སྨྱོན་གྱིས་ཨ་མ་ནི་དཔའ་བོ་དཔའ་མོ་མཁའ་འགྲོའི་ཚོགས་ཀྱིས་བསྐོར་བ་ལ༔ རྒྱལ་ཆེན་སྡེ་བཞིའི་དཔུང་གིས་བསྐོར་ནས་སང་ཉི་མ་རྩེ་ཤར་ཙམ་ལ་འདིར་སླེབས་པར་འདུག་སྨྲས་པ་ལ་སོགས་པའི་གཏམ་མང་དུ་བྱུང་ཟེར་སྐད་དོ༔ དེ་ནས་མ་ཅིག་གིས་རྒྱུད་རིན་པོ་ཆེ་སྤུང་པའི་དཀྱིལ་འཁོར་ཆེན་མོ་བཞེངས་ནས་སྲས་ཐོད་སྨྱོན་བསམ་འགྲུབ་དང་གང་པ་རྨུགས་སངས་དང་༔ སྲས་མོ་རྒྱན་བཞི་དང་ཁུ་སྒོམ་ཆོས་ཀྱི་སེང་གེ་དང་བདུན་ལ་རྒྱུད་རིན་པོ་ཆེ་སྤུངས་པའི་དབང་བཞི་ཡོངས་སུ་རྫོགས་པར་བསྐུར༔ ཚོགས་ཀྱི་འཁོར་ལོ་བརྒྱ་རྩ་བརྒྱད་མཛད༔ ཁྲོམ་ཚོགས་ཀྱང་སྟོང་ཕྲག་གསུམ་ལྷག་ཙམ་འདུག་པ་རྣམས་ལ་ཡང་དག་པར་སྣང་བ་བསམ་གྱིས་མི་ཁྱབ་པ་བྱུང་ངོ་༔ སྲས་མོ་རྒྱན་བཞིའི་ཡང་མ་ཅིག་ཉིད་དཀྱིལ་འཁོར་གྱི་གཙོ་མོར་མཐོང་བས༔ ཕྱོགས་བཞི་མཚམས་བཞི་དང་བརྒྱད་དུ་མཁའ་འགྲོ་མ་བརྒྱད༔ སྟེང་དུ་མཁའ་འགྲོ་མ་གཅིག་དང་གཙོ་འཁོར་བཅུ་ལ་དངོས་སུ་མཐོང་༔

གཞན་ཡང་ནམ་མཁའ་ལ་འཇའ་འོད་ཀྱི་གུར་དང་༔ མེ་ཏོག་སྣ་ཚོགས་ཀྱི་ཆར་བབ་པ་དང་༔ རོལ་མོའི་སྒྲ་སྙན་མང་པོ་ནམ་མཁའ་ལ་གྲག་པ་དང་༔ སྤྲིན་ཁ་དོག་སྣ་ཚོགས་མི་འདྲ་བ་དུ་མ་རྣམས་ལིང་ངེ་ཤིན་ཏུ་གསལ་བར༔ བར་སྣང་དམར་སེར་ཆགས་ནས་འདུག་པ་ལ་སྦྲང་ཆར་ཟིམ་བུ་ཟི་ལི་ལི་བབས་ནས་བྱུང་བའི་སྟོབས་ཀྱིས་ཉི་མའི་ཚ་གདུང་སེལ་ཞིང་ས་གཞི་ལ་ཡང་གཤེར་མ་ཡིན་པས་སྣུམ་ཆགས་པ་དང་༔ རླངས་པ་སྲབ་བུ་ཁ་དོག་སྣ་ཚོགས་པ་ཁྲ་མེར་རེ་རེ་འོད་ཀྱི་རང་བཞིན་ཅན༔ སྨིག་རྒྱུ་འཁྲིག་པ་ལྟ་བུ་འཁྲིགས་པ་དང་༔ དེ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་རྣམས་ཡུལ་ཕྱོགས་དེ་སྐོར་ཐམས་ཅད་ཀྱིས་མཐོང་ངོ་༔ དེ་ལ་ཐམས་ཅད་ཀྱིས་དད་ཤུགས་དྲག་པོ་རྩོལ་མེད་དུ་སྐྱེས་སོ༔ དེའི་ཚེ་ན་སྲས་ཐོད་སྨྱོན་བསམ་འགྲུབ་ཀྱི་མགོ་བོ་ན་ནས་ཅུང་ཟད་ཅིག་སྨྱོས་པས༔ རྣལ་མ་ཁད་ལྟར་དུ་ཡུད་ཙམ་ཞིག་ལ་དྲན་པ་མེད་པར་གྱུར་ཏོ༔ དེ་ནས་རྣལ་སད་པ་ལྟར་དུ་སོང་ནས་ཁམས་དང་དབང་པོ་ཤིན་ཏུ་གསལ་ཞིང་དྭངས་བ་ཞིག་བྱུང་ནས་བལྟས་པས་མདུན་གྱི་ནམ་མཁར་མདུང་གང་ཙམ་གྱི་སྟེང་ན༔ སྤྲིན་ཁ་དོག་སྣ་ཚོགས་པ་འོད་ཀྱི་རང་བཞིན་ཅན་ཕྱིང་པ་ཙམ་ཞིག་མཐུག་ལིང་ངེ་འདུག་གོ༔ སྤྲིན་དེའི་སྟེང་ན་འོད་ཀྱི་སྦུ་གུ་ཁང་པའི་གད་ཁ་ཐུང་ངུ་ཙམ་ཞིག་འདུག་པའི་རྩེ་མོར༔ སྣ་ཚོགས་པདྨ་འདབ་མ་བརྒྱད་པའི་ལྟེ་བར༔ ངོ་བོ་མ་ཅིག་ལ་རྣམ་པ་ནི་རྡོ་རྗེ་དབྱིངས་ཕྱུག་མ་སྐུ་མདོག་སྔོན་མོ་ཞལ་གཅིག་ཕྱག་བཞི་མ་སྐུ་ལ་དུར་ཁྲོད་ཀྱི་ཆས་བརྒྱད་ཀྱིས་རབ་ཏུ་བརྒྱན་ནས་ཞབས་གཉིས་བརྐྱང་བསྐུམ་གྱི་གར་ཐབས་ཀྱིས་བཞེངས་ནས་འདུག༔

དེའི་སྟེང་དུ་མཁའ་འགྲོ་མ་མཐིང་ག༔ ཤར་དུ་མཁའ་འགྲོ་མ་དཀར་མོ༔ ལྷོར་རུ་མཁའ་འགྲོ་མ་སེར་མོ༔ ནུབ་ཏུ་མཁའ་འགྲོ་མ་དམར་མོ༔ བྱང་དུ་མཁའ་འགྲོ་མ་ལྗང་མོ་ཤར་ལྷོར་དཀར་སེར༔ ལྷོ་ནུབ་ཏུ་དམར་སེར༔ ནུབ་བྱང་དུ་དམར་ལྗང་༔ བྱང་ཤར་དུ་དཀར་ལྗང་༔ དེ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་དང་ལྡན་པ་གྲི་གུག་དང་ཐོད་ཁྲག་བསྣམས་ཤིང་༔ ཁ་ཊྭཱཾ་ག་ལ་འཁྱུད་ནས་ཞབས་གཉིས་བརྐྱང་བསྐུམ་གྱི་གར་ཐབས་སུ་བཞེངས་པ་སྣང་ལ་རང་བཞིན་མེད་པ་འོད་ཀྱི་རང་བཞིན་ཅན༔ འོད་ཟེར་དུ་མ་འཕྲོ་བ་རྣམས་ཀྱིས་བསྐོར་ནས་བཞུགས་ནས་འདུག༔ དེ་རྣམས་ཀྱི་སྟེང་གི་མདུང་གང་ཙམ་དུ་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་རྣམས་ཀྱིས་བསྐོར་ནས་བཞུགས་ནས་འདུག༔ དེའི་སྟེང་དུ་མདུང་གང་ཙམ་གྱི་སོ་ན་རྡོ་རྗེ་འཆང་ལ་རྩ་རྒྱུད་ཀྱི་བླ་མ་རྣམས་ཀྱིས་བསྐོར་ནས་བཞུགས་ནས་འདུག༔ རྡོ་རྗེ་འཆང་གི་གཡོན་ཕྱོགས་ཀྱི་ཐད་རིང་བ་གཅིག་ན༔ སངས་རྒྱས་ཤཱཀྱ་ཐུབ་པ་ལ་ཉན་ཐོས་ཆེན་པོ་དགྲ་བཅོམ་པ་རྣམས་ཀྱིས་བསྐོར་ནས་བཞུགས་ནས་འདུག༔ ཤཱཀྱ་ཐུབ་པའི་གཡོན་ཕྱོགས་སུ་སངས་རྒྱས་འོད་དཔག་མེད་ལ་ཉེ་བའི་བྱང་ཆུབ་སེམས་དཔའ་བརྒྱད་དང་བྱང་ཆུབ་སེམས་དཔའི་དགེ་འདུན་རྣམས་ཀྱིས་བསྐོར་ནས་བཞུགས་ནས་འདུག༔

གཞན་ཡང་སངས་རྒྱས་རེ་རེ་ལ་ཡང་རང་རང་གི་འཁོར་སངས་རྒྱས་བཅུ་རེས་བསྐོར་བ་ལ་ཡང་ས་བཅུའི་བྱང་ཆུབ་སེམས་དཔའ་བརྒྱད་རེས་བསྐོར་ནས་བཞུགས་ནས་འདུག༔ དེ་རྣམས་ཀྱི་མཐར་དཔའ་བོ་དང་དཔའ་མོ་དང་༔ མཁའ་འགྲོ་དང་༔ ཤུགས་འགྲོ་དང་༔ བསྟན་སྲུང་དང་༔ ཕྱོགས་སྐྱོང་དང་ཞིང་སྐྱོང་ལ་སོགས་པའི་མཐའ་ཡས་པ་རྣམས་ཀྱིས་བསྐོར་ནས་བཞུགས་ནས་འདུག༔ རྡོ་རྗེ་འཆང་གི་གཡས་ཕྱོགས་སུ་འཁོར་ལོ་བདེ་མཆོག༔ སངས་རྒྱས་ཐོད་པ༔ གཤིན་རྗེ་གཤེད་དམར་པོ་ལ་སོགས་པའི་གསང་སྔགས་བླ་མེད་ཀྱི་ལྷ་ཚོགས་རྣམས་ཀྱིས་བསྐོར་ནས་བཞུགས་ནས་འདུག༔

དེ་རྣམས་ཀྱི་མཐའ་སྐོར་དུ་རང་རང་གི་བསྟན་པ་སྲུང་བའི་དམ་ཅན་སྲུང་མ་མཐའ་ཡས་པས་བསྐོར་ནས་བཞུགས་ནས་འདུག༔ རྡོ་རྗེ་འཆང་གི་མདུན་ཕྱོགས་སུ་ཁྲོས་མ་ནག་མོ་ལྷ་ལྔ་དང་གསང་བ་ཆེན་མོ་མ་ཧ་མ་ཡ་དང་རྡོ་རྗེ་ཕག་མོ་ལྷ་ལྔའི་དཀྱིལ་འཁོར་ལ་སོགས་པ་རྣམས་ལ་རང་རང་གི་འཁོར་གྱིས་བསྐོར་བ་དང་༔ དེ་ལ་མཁའ་འགྲོ་མ་འབུམ་སྡེའི་ཚོགས་ཀྱིས་བསྐོར་ནས་བཞུགས་ནས་འདུག༔ རྡོ་རྗེ་འཆང་གི་རྒྱབ་ཕྱོགས་སུ་འོད་ཁ་དོག་སྣ་ཚོགས་པ་འཇའ་ཚོན་ལྟ་བུའི་འཁོར་ལོ་ལུ་གུ་རྒྱུད་མང་པོ་འབྲེལ་ནས་འདུག་པའི་འོད་ཀྱི་ཐིག་ལེ་རེ་རེའི་ནང་དུ་སངས་རྒྱས་ཀྱི་སྐུ་གསེར་གྱི་མདོག་ཅན་རེ་རེ་བཞུགས་ནས་འདུག་པའི་དབུའི་སྟེང་དུ་གསེར་གྱི་གདུགས་གསུམ་རེ་འཁོར་ཞིང་འདུག་གོ༔ མ་ཅིག་མཁའ་འགྲོ་ལྷ་བཅུའི་འོག་ཏུ་རྒྱལ་པོ་ཆེན་པོ་སྡེ་བཞི་ལ་རང་རང་གི་འཁོར་གྱིས་བསྐོར་ནས་བཞུགས་ནས་འདུག༔ དེ་རྣམས་ཀྱི་མཐར་ཕྱོགས་སྐྱོང་བཅུ་ལ་རང་རང་གི་འཁོར་གྱིས་བསྐོར་ནས་བཞུགས་ནས་འདུག༔ དེ་རྣམས་ཀྱིས་སྤྲིན་གྱི་གསེབ་དུ་གསལ་པོར་མཐོང་བས་ཐོད་སྨྱོན་གྱི་བསམ་པ་ལ༔ ལྷ་ཚོགས་ཀྱི་འདི་རྣམས་ཐམས་ཅད་མ་ཅིག་སྤྲུལ་པ་ཡིན་ནམ༔ ཡང་ན་མ་ཅིག་གིས་ལྷ་ཚོགས་འདི་རྣམས་སྤྱན་དྲངས་པ་ཡིན་ནམ༔ ཡང་ན་སངས་རྒྱས་ཀྱི་ཞིང་ཁམས་ཐམས་ཅད་འདིར་ཡོད་པ་ལ༔ དེ་སྔ་ཕན་ཆད་ལ་ངས་མ་མཐོང་བ་ཨེ་ཡིན༔ མ་ཅིག་ལ་དྲི་དགོས་སྙམ་ཙ་ན༔ སྲས་མོ་རྒྱན་བཞིས་ཚོགས་བསྟབ་ཅིང་གར་བྱེད་ནས་ལུས་གྲུ་གང་ཙམ་ས་ལ་མ་རེག་པ་ལ༔ གསུང་དབྱངས་ཡན་ལག་དྲུག་བཅུའི་དབྱངས་དང་བཅས་ནས་ལྷ་ཚོགས་རྣམས་ལ་མཆོད་པ་འབུལ་ཞིང་འདི་སྐད་དོ༔

ཨེ་མ་རྗེ་བཙུན་ཟིལ་ནོན་ཁྱེད༔ དཔའ་བོ་རྟ་མཆོག་སྤྲུལ་པ་སྟེ༔ མཁའ་འགྲོ་རྒྱ་མཚོའི་འཁོར་དང་བཅས༔ གྲུབ་ཐོབ་བརྒྱད་ཀྱིས་བྱིན་རླབས་པས༔ དཔའ་བོ་དཔའ་མོའི་ཚོགས་དང་བཅས༔ ཚོགས་ལ་མངའ་བས་ཚོགས་ལ་རོལ་ཞེས་བཞི་ཀས་མགྲིན་གཅིག་ཏུ་སྨྲ་ཞིང་འདུག་པས༔ དེའི་ཚེ་ངའི་རྒྱབ་ཕྱོགས་ཀྱི་ནམ་མཁའ་ནས་འོད་ཆེན་པོ་ཞིག་ཤར་ཏེ་ངའི་མདུན་དུ་བབས་ནས་བྱུང་སྟེ༔ ཡར་ལ་བལྟས་པས་ནམ་མཁའ་ལ་སྤྲིན་ཁ་དོག་སྣ་ཚོགས་འཁྲིགས་པའི་གསེབ་ན་ཀླུ་སྒྲུབ་ཡབ་སྲས༔ ལུ་ཧི་པ་མཚོ་སྐྱེས་རྡོ་རྗེ༔ གུ་གུལ་པ་སངས་རྒྱས་ཡེ་ཤེས༔ དམ་པ་སངས་རྒྱས༔ འཇམ་དཔལ་བཤེས་གཉེན༔ འབིར་བར་པ་དགའ་རབ་རྡོ་རྗེ༔ བྷི་མ་ལ་མི་ཏྲ༔ ཤྲཱི་སིང་ཧ༔ པདྨ་བཛྲ་ལ་སོགས་པའི་གྲུབ་ཐོབ་རྣམས་དང་རིག་འཛིན་བསམ་གྱིས་མི་ཁྱབ་པ་མང་པོ་རུས་པའི་རྒྱན་གྱིས་བརྒྱན་ནས༔ སྤྲིན་གྱི་གསེབ་ཏུ་གསལ་པོར་བཞུགས་ནས་འདུག་པར་མཐོང་བས༔ དེ་ནས་ཚོགས་འཁོར་དང་དཀྱིལ་འཁོར་གྱི་རྗེས་ཆོག་དང་བཅས་པ་རྣམས་ཚར་ནས༔ ལྷ་ཚོགས་རྣམས་ཀྱང་སྤྲིན་ལ་ཐིམ་ནས་ཐལ༔ སྤྲིན་ཀྱང་འོད་དུ་ཡལ་ནས་ནམ་མཁའ་ལ་ཐིམ་ནས་ཐལ་ཏེ༔ ཅི་ཡང་མི་སྣང་བར་གྱུར་ཏོ༔ དེ་ནས་མ་ཅིག་གིས་གཅོད་གྱི་ངེས་དོན་ཚིག་གསལ་གསུངས་ཏེ༔

དེའི་རྗེས་སུ་སྔགས་ཀྱི་རྣམ་བཤད་ཆེན་མོ་བརྩམས་པ་ལ༔ གཞུང་འགྲེལ་གཉིས་ཀྱི་གཞུང་ལ༔ རྩ་ཚིག་བརྒྱད་ཀྱིས་བསྟན་པ་ལ༔ དེ་ལ་བཤད་སྲོལ་སུམ་ཅུ་སོ་གཉིས་ཀྱིས་བཤད་པ་ལ༔ མདའ་ཚད་ཀྱི་ཤོག་གུ་བཞི་བརྒྱ་དང་བཞི་བཅུ་ཡོད་པ་ལ་མིང་རྡོ་རྗེའི་རྫོང་བརྒྱད་ཅེས་ཟེར་རོ༔ འགྲེལ་པ་ལ་ཤོག་གུ་བཞི་བརྒྱ་དང་བཞི་བཅུ་ཞེ་བརྒྱད་ཡོད་པ་ལ་མིང་སྒྲོན་གསལ་ཞེས་ཟེར་རོ༔ གཞུང་འགྲེལ་གཉིས་ཀ་ལ་རྡོ་རྗེའི་རྫོང་བརྒྱད་སྒྲོན་གསལ་ཞེས་ཟེར་རོ༔ སྔགས་ཀྱི་རྣམ་བཤད་ཆེན་མོ་འདི་ནི་རྗེ་བཙུན་སྒྲོལ་མས་གནང་བའི་རྒྱུད་ཆེན་པོ་གསུམ་དང་༔ དམ་པ་སངས་རྒྱས་རིན་པོ་ཆེ་དང་བསོད་ནམས་གྲགས་པ་ནས་བྱུང་བའི་སྔགས་ཆོས་རྣམས་ལ་བརྟེན་ནས་གསང་སྔགས་སྤྱིའི་དོན་མཐུན་དང་བཅས་པ་རྣམས་ཞག་བཅུ་དྲུག་ནས་གྲུབ་པར་མཛད་པའི་དུས་ནི༔ མ་ཅིག་དགུང་ལོ་ལྔ་བཅུ་ང་བདུན་གྱི་དུས་ཡིན༔ གནས་ནི་ཤམ་པོའི་གངས་ཕུག་མོ་ཆེ་ཡིན༔ ཞུ་བ་པོ་ནི་སྲས་ཐོད་སྨྱོན་བསམ་འགྲུབ་དང་མཚན་ལྡན་གང་པ་རྨུགས་སངས་གཉིས་ཡིན༔ འཕགས་སྐྱེས་པོ་ལ་སོགས་པའི་རྒྱལ་ཆེན་སྡེ་བཞིའི་ཡང་བསྐུལ་བ་པོ་མཛད་དོ༔ དེ་ནས་ཁྲོམ་ཚོགས་སྤྱི་རྣམས་ནི་སོ་སོར་གྱེས༔ ཆོས་ཉན་པ་པོ་ནི་བརྒྱ་དང་བདུན༔ ཞུ་བ་པོ་ནི་དྲུག་དང་༔ ཡི་གེ་པ་ནི་བརྒྱད་བྱུང་བ་དང་༔ ཐམས་ཅད་ལ་བརྒྱ་དང་ཉེར་གཅིག་འདུག་གོ༔ ཡི་གེ་པ་ནི་ཆོས་ཀྱི་སེང་གེ༔ རྡོ་རྗེ་སེང་གེ༔ གང་པ་རྨུགས་སངས༔ སྟོན་པ་རིན་ཆེན་རྒྱལ་མཚན༔ བུ་མོ་རྒྱན་བཞི་དང་བརྒྱད་དེ་རྩ་ཚིག་བརྒྱད་དང་ཐབས་ཤེས་ཀྱི་རྟེན་འབྲེལ་གྱི་ཆ་ལ་བརྟེན་ནས་གྲུབ་པར་མཛད་དོ༔ ཆོས་ཚར་བའི་ཉིན་པར་ཚོགས་འཁོར་ཆེན་པོ་ཞིག་མཛད་པའི་ཚོགས་གྲལ་དུ༔

སྲས་ཐོད་སྨྱོན་བསམ་འགྲུབ་ཀྱིས་མ་ཅིག་ལ་ཞུས་པ་ཀྱེ་མ་ཅིག་ལགས༔ རང་རེ་མ་ཅིག་ལ་མི་ཐམས་ཅད་ཀྱིས་མཐོང་ལུགས་མི་འདྲ་བ་སྣ་ཚོགས་ལ་མཐོང་བར་སྣང་བ་དང་༔ བུ་མོ་རྒྱན་བཞི་དང་ངས་ཀྱང་ཡེ་ཤེས་ཀྱི་དཀྱིལ་འཁོར་ལ་དངོས་སུ་མཐོང་བ་དང་༔ གཞན་ཡང་ཕ་རྒྱུད་མ་རྒྱུད་ལ་སོགས་པའི་ལྷ་ཚོགས་རྣམས་དང་དཔའ་བོ་དཔའ་མོ་མཁའ་འགྲོའི་ཚོགས་རྣམས་དང་༔ རྒྱལ་ཆེན་སྡེ་བཞི་དང་བསྟན་སྲུང་ཕྱོགས་སྐྱོང་ལ་སོགས་པ་རྣམས་དང་༔ ལུ་ཧི་པ་ལ་སོགས་པའི་གྲུབ་ཆེན་རྣམས་དང་༔ རྡོ་རྗེ་འཆང་ལ་སོགས་པའི་རྩ་རྒྱུད་ཀྱི་བླ་མ་རྣམས་དང་དེ་ལ་སོགས་པའི་མཐོང་སྣང་བསམ་གྱིས་མི་ཁྱབ་པ་མང་པོ་བྱུང་བས་འདི་རྣམས་མ་ཅིག་ཉིད་ཀྱིས་སྤྲུལ་པ་ཡིན་ནམ༔ ཡང་ན་མ་ཅིག་ཉིད་ཀྱིས་ལྷ་ཚོགས་འདི་རྣམས་སྤྱན་དྲངས་པ་ཡིན་ནམ༔ ཡང་ན་སྒྲིབ་པ་དག་པ་རྣམས་ཀྱིས་གང་དུ་ལྷ་ཚོགས་འདི་འདྲ་མཐོང་བ་ཡིན་ནམ༔ ཡང་ན་སངས་རྒྱས་ཀྱི་ཞིང་ཁམས་ཐམས་ཅད་འདིར་ཡོད་པ་ཡིན་ནམ་ལགས་ཞུས་པས༔ མ་ཅིག་གི་ཞལ་ནས་འདི་སྐད་གསུངས༔ བུ་ཤེས་རབ་རིག་ལྡན་ལས་འཕྲོ་ཅན༔ འདི་ལྟར་ཡིན་ནོ་ཡིད་ལ་ཟུངས༔ སངས་རྒྱས་ཞིང་ཁམས་མཐོང་བ་དེ༔ ཉོན་མོངས་སྒྲིབ་པ་བྲལ་བ་ཡིན༔ ཉོན་མོངས་ཀྱི་སྒྲིབ་པ་བྲལ་བ་ན༔ སངས་རྒྱས་ཀྱི་ཞིང་ཁམས་གར་ཡང་མཐོང་༔ དཔེར་ན་ཆུ་སྣོད་གང་དུ་གནས་པ་ལ༔ ཟླ་བའི་གཟུགས་བརྙན་འཆར་རོ་བུ༔ ང་ཉིད་གང་དུ་གནས་གྱུར་ཀྱང་༔ ཡི་དམ་ལྷ་ཚོགས་འཁོར་བ་ཡིན༔ དྲི་ལྡན་པདྨའི་ཚལ་རབ་རྒྱས་པ་ན༔ གཟི་ལྡན་བུང་བའི་ཚོགས་རྣམས་རང་བཞིན་འཁོར༔ དེ་བཞིན་ང་ཉིད་གང་དུ་གནས་གྱུར་ཀྱང་༔ ཡི་དམ་རྒྱུད་སྡེའི་ལྷ་ཚོགས་མ་ལུས་འཁོར༔ ང་ཉིད་ཡེ་ཤེས་དབྱིངས་ཀྱི་ལྷ་མོ་ཡིན༔ འདོད་པར་སྤྲུལ་ན་ལྷ་ཚོགས་ང་ལ་འབྱུང་༔ ས་གཞི་གཤེར་དང་དྲོད་ཀྱིས་བསྐུལ་བ་ན༔ ལོ་ཐོག་རྩི་བཅུད་འབྱུང་ངོ་རིགས་ཀྱི་བུ༔ ང་ཉིད་ཡེ་ཤེས་ལྷ་མོ་སྒྱུ་འཕྲུལ་ཡིན༔ ང་ཕྱི་ལྟར་རྒྱལ་བའི་ཡུམ་ཆེན་ཡིན༔ ནང་ལྟར་རྗེ་བཙུན་སྒྲོལ་མ་ཡིན༔ གསང་ལྟར་རྡོ་རྗེ་ཕག་མོ་ཡིན༔ དབྱིངས་ལྟར་ཀུན་ཏུ་བཟང་མོ་ཡིན༔ ཐུབ་བསྟན་ཐོག་མར་ཀུན་ཏུ་བཟང་མོ་གང་གའི་ལྷ་མོ་ཡིན༔ བར་དུ་མཁའ་འགྲོ་བདེ་བའི་དངོས་གྲུབ་ཡིན༔ ཕྱིས་འབྱུང་བོད་དུ་ཡེ་ཤེས་མཚོ་རྒྱལ་ཡིན༔ ད་ལྟ་ང་ཉིད་ཡིན་ནོ་རིགས་ཀྱི་བུ༔ དེ་ལས་ཞིབ་པར་བཤད་མི་ལོང་༔ ཞེས་གསུངས་པས༔ ཡང་ཐོད་སྨྱོན་གྱིས་ཞུས་པས༔ ཀྱེ་མ་ཅིག་ལགས༔ ཁྱེད་དེ་ལྟ་བུའི་ཡེ་ཤེས་ཀྱི་མཁའ་འགྲོ་མ་ཆེན་མོ་སངས་རྒྱས་ཐམས་ཅད་བསྐྱེད་པའི་ཡུམ་ཆེན་མོ་དེ་ལ་སྐུ་མདོག་དང་ཡོན་ཏན་འཕྲིན་ལས་ཀྱི་སྤྲུལ་པ་ནི༔ ཡུལ་ཕྱོགས་འདི་ཉིད་མ་ཡིན་པའི་ཡུལ་གཞན་དུ་ཡང་ཨེ་ཡོད་ཞུས་པས༔ ཡང་མ་ཅིག་གི་ཞལ་ནས་བུ་ཉོན་དང་ང་ཡི་སྤྲུལ་པ་ནི་ཡུལ་ཕྱོགས་གཞན་དུ་ཡང་ང་ཉིད་ཅི་ལྟ་བ་བཞིན་དུ་ཡོད་དོ༔ དེ་ནས་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པའི་སྙིགས་མ་ལ༔ འཛམ་གླིང་བྱེ་བ་ཕྲག་བརྒྱའི་བྱང་ཕྱོགས་སུ་བོད་ཁམས་ཀྱང་བྱེ་བ་ཕྲག་བརྒྱ་བྱུང་ནས་གངས་རིའི་ལྗོངས་སུ་ཐུབ་པ་ཉིད་ཀྱིས་ལུང་བསྟན་པའི་འཕགས་པ་སྤྱན་རས་གཟིགས་དབང་ཕྱུག་གི་སྤྲུལ་པ་རྒྱལ་པོ་སྲོང་བཙན་སྒམ་པོ་ཡང་བྱེ་བ་ཕྲག་བརྒྱ་བྱུང་ལ༔ ང་ཉིད་ཡང་བྱེ་བ་ཕྲག་བརྒྱ་བྱུང་ནས་གཟུགས་ཅན་དང་གཟུགས་མེད་ཀྱི་སེམས་ཅན་གང་ལ་ཡང་གནོད་པ་བྱེད་མི་རྣམས་དང་ཁྱད་པར་ཡང་སེམས་ཅན་མ་རུངས་པ་གདུག་པ་ཅན་རྣམས་འདུལ་བའི་དུས་ལ་བབས་པའི་ཕྱིར་དུ༔ དམ་ཆོས་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་ཞེས་བྱ་བ་བསྟན་ནས༔ འགྲོ་བ་བཟང་ངན་མེད་པ་ཐམས་ཅད་ཀྱི་དོན་བྱེད་པ་ཡིན་ཅིང་སྙིགས་མ་ལྔ་པོ་བདོ་བའི་དུས་སུ་ཡང་༔ སངས་རྒྱས་བཅོམ་ལྡན་འདས་ཉིད་ཀྱིས་ལུང་བསྟན་པ་བཞིན་དུ༔ རྣལ་འབྱོར་མ་ངའི་ཆོས་ལུགས་ཀྱིས་བོད་གངས་ཅན་ཁྲོད་པ་ཐམས་ཅད་འདུལ་བའི་དུས་ལ་བབ་པ་འདི་རང་ཡིན་ནོ༔ སྐལ་ལྡན་རིགས་ཀྱི་བུ་ཞེས་གསུངས་སོ༔

དེ་ནས་ཚོགས་འཁོར་ཚར་ནས་བསྔོ་བ་སྨོན་ལམ་བཀྲ་ཤིས་དགེ་ལེགས་དང་བཅས་པ་རྣམས་ལེགས་པོར་གྲུབ་པར་མཛད་པ་དང་༔ མ་ཅིག་འཁོར་བཅས་རྣམས་ཟངས་རི་མཁར་དམར་བྱོན་ནས་ས་དཀར་ལོགས་ཀྱི་ནེལ་ཐང་དུ་ཟླ་བ་གཅིག་དང་ཞག་མ་བདུན་བཞུགས་ནས༔ ཆོས་སྤྱི་ཙམ་པའི་བཤད་པ་རྒྱས་པར་མཛད་པ་དང་༔ དེ་ནས་ཕ་རོལ་ཏུ་ཕྱིན་པའི་མདོ་ལུགས་ཀྱི་རྣམ་བཤད་ཆེན་མོ་བརྩམས་པར་མཛད་པ་ལ༔ གཞུང་འགྲེལ་གཉིས་ཏེ༔ གཞུང་ལ་མདའ་ཚད་ཀྱི་ཤོག་གུ་བརྒྱ་དང་དྲུག་ཅུ་རེ་དྲུག་ཡོད་པ་ལ་མིང་དྲི་མེད་ཟླ་མདངས་ཞེས་སོ༔ འགྲེལ་པ་ལ་ཤོག་གུ་དྲུག་བརྒྱ་དང་དྲུག་ཅུ་ཡོད་པ་ལ་མིང་མ་རིག་མུན་སེལ་ཞེས་ཟེར་ཏེ༔ གཞུང་འགྲེལ་གཉིས་ཀའི་མིང་བསྡོམ་པ་ལ་ཟླ་འོད་མུན་སེལ་ཞེས་ཟེར་རོ༔ མདོའི་རྣམ་བཤད་ཆེན་མོ་འདི་བརྩམས་པའི་དུས་ནི༔ མ་ཅིག་དགུང་ལོ་ང་བདུན་གྱི་དུས་ཡིན༔ གནས་ནི་ས་དཀར་ལོགས་ཡིན༔ ཞུ་བ་པོ་ནི་སྟོན་པ་རྣམ་པ་བཞི་ཡིན༔ ཁུ་སྒོམ་ཆོས་ཀྱི་སེང་གེ༔ མལ་གྲོལ་བ་དང་དྲུག་ཡིན་ཏེ༔ ཡི་གེ་པ་ཡང་དེ་དྲུག་གིས་བྲིས་ནས་གྲུབ་པར་མཛད་པ་དང་༔ ཚོགས་འཁོར་ཆེན་པོ་ཞིག་མཛད་པས་མི་ཐམས་ཅད་ལ་དག་པའི་སྣང་བ་བསམ་གྱིས་མི་ཁྱབ་པ་བྱུང་ངོ་༔

མི་སྡེ་ཀུན་གྱིས་ཀྱང་འབུལ་བ་དཔག་ཏུ་མེད་པ་བྱུང་བ་རྣམས་ལྷ་སར་བསྐུར་ནས་ཇོ་བོ་ལ་མཆོད་པ་ཆེན་པོ་བཀྱག་གོ༔ དེ་ནས་ཞྭ་དམར་བ་དཔོན་སློབ་ལྔ་བཅུ་ཙམ་ཞིག་ལྷ་སར་བྱོན༔ མ་ཅིག་འཁོར་བཅས་རྣམས་ལྷོ་བྲག་ཏུ་བྱོན་ནས་འབྲུག་ཐང་དུ་ཟླ་བ་དགུར་བཞུགས་ནས༔ རིན་པོ་ཆེའི་རྒྱ་མདུད་མ་དང་དམ་ཚིག་ཉི་ཤུ་རྩ་གཅིག་དང་༔ རྟེན་འབྲེལ་ཡན་ལག་བཅུ་གཉིས་དང་གསུམ་ལ་བཤད་པ་རྒྱས་པར་མཛད་དོ༔ ནང་རིག་པའི་དམར་ཁྲིད་ལ་སོགས་པའི་ཆོས་ཚན་མང་དུ་བཤད་པར་མཛད༔ ཞིབ་པོ་ཧུར་ཐོན་གྱིས་མཐོང་ལམ་ཐོབ་པ་ལ་སོགས་པའི་སློབ་མ་བརྒྱ་ལ་ཕན་ཐོགས་ནས་གཞན་ཕན་ནུས་པ་ཁོ་ན་བྱུང་ངོ་༔ ཟླ་འོད་མུན་སེལ་མ་བཏུས་ནས་ཉམས་ཁྲིད་ཟླ་ཟེར་མ་མཛད་དོ༔ དེ་ནས་མདོ་སྔགས་ཟུང་འཇུག་གི་རྣམ་བཤད་ཆེན་མོ་བརྩམས་པར་མཛད་པ་ལ༔ དེ་ཡང་གཞུང་འགྲེལ་གཉིས་ཏེ༔ གཞུང་ལ་ཤོག་གུ་ཉིས་བརྒྱ་དང་སུམ་ཅུ་ཡོད༔ འགྲེལ་པ་ལ་བདུན་བརྒྱ་དང་དྲུག་ཅུ་རེ་ལྔ་ཡོད་པ་ལ༔ གཞུང་འགྲེལ་གཉིས་ཀའི་མིང་ལ་གསལ་བྱེད་མཐའ་གཉིས་ཟིལ་ནོན་ཞེས་ཟེར་རོ༔ མདོ་སྔགས་ཟུང་གིས་རྣམ་བཤད་ཆེན་མོ་དེ་བརྩམས་པའི་དུས་ནི་མ་ཅིག་དགུང་ལོ་ང་བདུན་གྱི་དུས་ཡིན༔ གནས་ནི་ལྷོ་བྲག་གི་བྲག་འབྲུག་ཐང་ཡིན༔ ཞུ་བ་པོ་ནི་སྟོང་སྡེ་ངག་གི་དབང་ཕྱུག་དང་༔ གྲོལ་སྡེ་རྒྱལ་བའི་འབྱུང་གནས་དང་གཉིས༔ དཔལ་ལྡན་རྒྱན་དང་གསུམ༔ ཁུ་སྒོམ་ཆོས་ཀྱི་སེང་གེ་དང་བཞིའོ༔ ཡི་གེ་པ་ནི་སྟོན་པ་རྣམ་པ་བཞི༔ སྲས་མོ་རྒྱན་བཞི་ཆོས་ཀྱི་སེང་གེ༔ རྡོ་རྗེ་སེང་གེ༔ གང་པ་རྨུགས་སངས༔ སྐྱེ་མེད་ཟང་ཐལ་དང་བཅུ་གཉིས་ཀྱིས་གྲུབ་པར་མཛད་དོ༔ སྔགས་ཀྱི་རྣམ་བཤད་དང་༔ མདོའི་རྣམ་བཤད་དང་༔ མདོ་སྔགས་ཟུང་གི་རྣམ་བཤད་དང་གསུམ་གྱི་ས་བཅད་རྣམས་དང་བསྡུས་དོན་གསུམ་ནི་རྗེ་བཙུན་ཟིལ་གནོན་ཅེས་སམ་ཐོད་སྨྱོན་བསམ་འགྲུབ་ཀྱིས་མཛད་པར་འདུག་གོ༔

དེ་ནས་ཆོས་ཚན་རྣམས་བཤད་ཚར་ནས་སྲས་ཐོད་སྨྱོན་བསམ་འགྲུབ་དང་༔ གང་པ་རྨུགས་སངས་དཔོན་སློབ་ལྔ་གངས་ཕུག་མོ་ཆེར་བཞུད་དོ༔ མ་ཅིག་འཁོར་བཅས་རྣམས་ཟངས་རི་མཁར་དམར་དུ་བྱོན་ནོ༔ དེ་ནས་ཐོད་སྨྱོན་བསམ་འགྲུབ་དཔོན་སློབ་རྣམས་གངས་ཕུག་མོ་ཆེར་བྱོན་ནས༔ ཟླ་བ་གསུམ་རེད་པའི་ནུབ་ཅིག་རྨི་ལམ་དུ་བུད་མེད་འོད་ཟེར་ཁ་དོག་སྣ་ལྔ་འབར་བ་ཞིག་བྱུང་ནས་འདི་སྐད་ཟེར་རོ༔ རྣལ་འབྱོར་པ་ཁྱོད་ཀྱིས་མ་ཅིག་ལབ་སྒྲོན་མའི་ཆོས་སྐོར་ལ་མ་ཤེས་པ་ཡོད་དམ་ཟེར་བས༔ ཐོད་སྨྱོན་བསམ་འགྲུབ་ཀྱིས་ན་རེ༔ ངས་མ་ཅིག་གི་ཆོས་ལུགས་ལ་མ་ཤེས་པ་གཅིག་ཀྱང་མེད་སྨྲས་པས༔ བུད་མེད་དེ་ན་རེ༔ རྣལ་འབྱོར་པ་ཁྱོད་ཀྱིས་མ་ཅིག་ལབ་ཀྱི་སྒྲོན་མའི་ཆོས་ལུགས་སྤྱི་ལ་མཁས་ཤིང་ཁྱད་པར་དུ་ཡང་གསང་སྔགས་ཀྱི་ཆོས་ལ་མཁས་ཤིང་གྲུབ་པ་ཐོབ་པར་འདུག་སྟེ༔ ད་རུང་མ་ཅིག་གི་ཆོས་སྲོལ་གསུམ་ཁའི་མདོ་དོན་ཉམས་སུ་ལེན་བྱའི་རྩ་བ་ཕུང་པོ་གཟན་དུ་བསྐྱུར་ནས་ལུས་ཀྱི་མཆོད་སྦྱིན་བྱེད་ཚུལ་ལ་ད་ལྟ་རྩད་དར་ལེགས་པོར་ཆོད་ཅིག༔ ཁྱོད་ཟངས་རི་མཁར་དམར་དུ་སོང་ཞིག་ཟེར་ནས་འོད་དུ་ཡལ་ནས་ཐལ་ལོ༔

དེ་ནས་ཐོད་སྨྱོན་བསམ་འགྲུབ་ཀྱིས་དགོངས་པ་ལ༔ བུད་མེད་འདི་མ་ཅིག་གི་སྤྲུལ་པ་གཅིག་ཡིན་ནམ༔ ད་རུང་ངས་མ་ཅིག་གི་ཆོས་ལུགས་ལ་ཕུང་པོ་ལུས་ཀྱི་མཆོད་སྦྱིན་བྱེད་ཚུལ་ལ་མ་ཤེས་པ་ཞིག་འདུག་པ་སྟེ༔ ད་ལྟ་མ་ཅིག་ལ་ཞུ་འགྲོ་དགོས་སྙམ་ནས༔ ཐོད་སྨྱོན་བསམ་འགྲུབ་དཔོན་སློབ་རྣམས་ཟངས་རི་མཁར་དམར་དུ་བྱོན་པས༔ མ་ཅིག་གིས་ཕག་མོ་ལྷ་ལྔའི་དབང་མཛད་པ་དང་ཐུག་པས༔ ཐོད་སྨྱོན་གྱིས་མ་ཅིག་ཕག་མོ་ལྷ་ལྔ་དངོས་སུ་ཞལ་གཟིགས་ནས་རྡོ་རྗེ་ཕག་མོ་དམར་མོའི་ཌཱ་ཀི་འབུམ་བསྐུལ་མཛད་དོ༔

དེའི་ཚེ་སྲས་མོ་རྒྱན་བཞིས་ཀྱང་མ་ཅིག་ཕག་མོར་མཐོང་བའི་ཕྱོགས་བཞིར་འོད་དཀར་པོ༔ སེར་པོ༔ དམར་པོ༔ ལྗང་གུ་མེ་ལོང་ཙམ་བཞི་འབར་བའི་རྣམ་པར་མཐོང་༔ དེ་ནས་དབང་ཚར་བའི་ཕྱིར་ནངས་ཉི་མ་རྩེ་ཤར་ཙམ་དུས་སུ་མ་ཅིག་གི་ཞལ་ནས་ཐོད་སྨྱོན་ཁྱེད་དཔོན་སློབ་རྣམས་འདི་ན་ཅི་ལ་འོང་པ་ཡིན་གསུངས་པས༔ ཐོད་སྨྱོན་གྱིས་ན་རེ༔ ངེད་དཔོན་སློབ་རྣམས་བུད་མེད་ལུས་ལ་འོད་ཁ་དོག་སྣ་ཚོགས་འཕྲོ་བ་ཞིག་གིས་ལུས་མཆོད་སྦྱིན་གྱི་བྱེད་ཚུལ་ཞུ་བ་ལ་སོང་ཟེར་ནས་འོང་བ་ཡིན་ལགས་ཞུས་པས༔ མ་ཅིག་གི་ཞལ་ནས༔ དེ་ཞིང་སྐྱོང་གི་མཁའ་འགྲོ་མ་སྣ་ཚོགས་གཟུགས་ཅན་ཞེས་བྱ་བ་ཡིན་ཏེ༔ འདིར་བྱུང་ནས་ཐོད་སྨྱོན་བསམ་འགྲུབ་དཔོན་སློབ་རྣམས་འོང་ཞིང་ཡོད་ཟེར་བ་བྱུང་གསུངས༔ དེ་ནས་ཐོད་སྨྱོན་བསམ་འགྲུབ་དང་སྲས་མོ་རྒྱན་བཞིས་སྔར་མ་ཅིག་ཕག་མོར་མཐོང་ཚུལ་རྣམས་ཞིབ་ཏུ་ཞུས་པས༔ མ་ཅིག་གི་ཞལ་ནས༔ ང་ཕྱི་ལྟར་རྒྱལ་བའི་ཡུམ་ཆེན་ཡིན༔ ནང་ལྟར་རྗེ་བཙུན་སྒྲོལ་མ་ཡིན༔ གསང་ལྟར་རྡོ་རྗེ་ཕག་མོ་ཡིན༔ དབྱིངས་ལྟར་རྡོ་རྗེ་བདག་མེད་ཡིན༔ འཁོར་གྱི་མཁའ་འགྲོ་བཞི་པོ་ཡང་༔ ང་ཉིད་ཡིན་ནོ་སྐལ་ལྡན་ཀུན༔ ང་ཕྱི་ལྟར་འབྱུང་བ་ལྔ་རུ་གསལ༔ ནང་ལྟར་ཡེ་ཤེས་མཁའ་འགྲོ་ལྔ༔ གསང་ལྟར་ཡི་གེ་རྣམ་པ་ལྔ༔ ང་ས་ནི་སངས་རྒྱས་མཁའ་འགྲོ་ཡིན༔ ཆུ་ནི་རིན་ཆེན་མཁའ་འགྲོ་ཡིན༔ མེ་ནི་པདྨ་མཁའ་འགྲོ་ཡིན༔ རླུང་ནི་ལས་ཀྱི་མཁའ་འགྲོ་ཡིན༔ ནམ་མཁའ་དབྱིངས་ཕྱུག་ང་ཉིད་ཡིན༔ དེ་ལྟར་འབྱུང་བ་ལྔ་པོ་ཡང་༔ ང་ཉིད་ཡིན་ནོ་སྐལ་ལྡན་ཀུན༔ གཙོ་འཁོར་ལྔ་པོ་འབྱུང་བ་ལྔ༔ སངས་རྒྱས་མཁའ་འགྲོ་སྐུ་མདོག་དཀར༔ རིན་ཆེན་མཁའ་འགྲོ་སྐུ་མདོག་སེར༔ པདྨ་མཁའ་འགྲོ་སྐུ་མདོག་དམར༔ ལས་ཀྱི་མཁའ་འགྲོ་སྐུ་མདོག་ལྗང་༔ ང་ཉིད་ཕག་མོ་སྐུ་མདོག་མཐིང་༔ གཙོ་བོ་ལྔ་པོ་མཁའ་འགྲོ་ལྔ༔ ང་ཉིད་ཡིན་ནོ་སྐལ་ལྡན་ཀུན༔ སངས་རྒྱས་མཁའ་འགྲོ་ཧ་ཡིག་དཀར༔ རིན་ཆེན་མཁའ་འགྲོ་རི་ཡིག་སེར༔ པདྨ་མཁའ་འགྲོ་ནི་ཡིག་དམར༔ ལས་ཀྱི་མཁའ་འགྲོ་ས་ཡིག་ལྗང་༔ ང་ཉིད་བཾ་ཡིག་མཐིང་ག་སྟེ༔ གཙོ་བོ་ལྔ་པོ་ཡི་གེ་ལྔ༔ ང་ཉིད་ཡིན་ནོ་སྐལ་ལྡན་ཀུན༔ ཞེས་གསུངས་སོ༔ ཡང་མ་ཅིག་གི་ཞལ་ནས༔ ང་ཉིད་གཙོ་འཁོར་ལྔ་པོ་ཡང་༔ ཕྱི་ལྟར་སྐུ་ལྔའི་རང་བཞིན་ལ༔ ནང་ལྟར་སྟེང་མཚམས་མཁའ་འགྲོ་ལྔ༔ གསང་བ་ལྟར་ན་ཡེ་ཤེས་ལྔ༔ སངས་རྒྱས་མཁའ་འགྲོ་ཆོས་ཀྱི་སྐུ༔ རིན་ཆེན་མཁའ་འགྲོ་ལོངས་སྤྱོད་རྫོགས༔ པདྨ་མཁའ་འགྲོ་སྤྲུལ་པའི་སྐུ༔ ལས་ཀྱི་མཁའ་འགྲོ་ངོ་བོ་ཉིད༔ ང་ཉིད་མངོན་པར་བྱང་ཆུབ་སྐུ༔ གཙོ་འཁོར་ལྔ་པོ་སྐུ་ལྔར་གསལ༔ ང་ཉིད་ཡིན་ནོ་སྐལ་ལྡན་ཀུན༔ དམ་ཚིག་མཁའ་འགྲོ་དཀར་སེར་གཟུགས༔ ལྷ་ཚོགས་མཁའ་འགྲོ་དམར་སེར་གཟུགས༔ ཐམས་ཅད་མཁའ་འགྲོ་དམར་ལྗང་གཟུགས༔ འཇིག་རྟེན་མཁའ་འགྲོ་དཀར་ལྗང་གཟུགས༔ བདེ་གཤེགས་མཁའ་འགྲོ་ནམ་མཁའི་གཟུགས༔ གཙོ་འཁོར་ལྔ་པོ་སྣ་ཚོགས་གཟུགས༔ ང་ཉིད་ཡིན་ནོ་སྐལ་ལྡན་ཀུན༔ སངས་རྒྱས་མཁའ་འགྲོ་མེ་ལོང་ཉིད༔ རིན་ཆེན་མཁའ་འགྲོ་མཉམ་པ་ཉིད༔ པདྨ་མཁའ་འགྲོ་སོར་རྟོགས་ཉིད༔ ལས་ཀྱི་མཁའ་འགྲོ་བྱ་གྲུབ་ཉིད༔ ང་ཉིད་ཆོས་དབྱིངས་ཡེ་ཤེས་ཏེ༔ གཙོ་བོ་ལྔ་པོ་ཡེ་ཤེས་ལྔ༔ ང་ཉིད་ཡིན་ནོ་སྐལ་ལྡན་ཀུན༔ སྐུ་གསུང་ཐུགས་དང་ཡོན་ཏན་འཕྲིན་ལས་སྐུ་ནི་སངས་རྒྱས་མཁའ་འགྲོ་ཡིན༔ གསུང་ནི་པདྨ་མཁའ་འགྲོ་ཡིན༔ ཐུགས་ནི་རྡོ་རྗེ་མཁའ་འགྲོ་ཡིན༔ ཡོན་ཏན་རིན་ཆེན་མཁའ་འགྲོ་ཡིན༔ འཕྲིན་ལས་ལས་ཀྱི་མཁའ་འགྲོ་ཡིན༔ ང་ཉིད་གཙོ་འཁོར་ལྔ་ལས་གྲུབ༔ ལྟ་སྒོམ་སྤྱོད་འབྲས་དམ་ཚིག་ལྔ༔ ང་ཉིད་ཕག་མོའི་ལྟ་བ་སྟེ༔ སྒོམ་པ་སངས་རྒྱས་མཁའ་འགྲོ་མ༔ སྤྱོད་པ་པདྨ་མཁའ་འགྲོ་མ༔ འབྲས་བུ་རིན་ཆེན་མཁའ་འགྲོ་མ༔ དམ་ཚིག་ལས་ཀྱི་མཁའ་འགྲོ་མ༔ གཙོ་འཁོར་ལྔ་པོ་ཉམས་ལེན་མཆོག༔ ང་ཉིད་ཡིན་ནོ་སྐལ་ལྡན་ཀུན༔ ཐ་མལ་བུད་མེད་ལབ་སྒྲོན་ང་༔ ཕུང་པོ་ལྔ་པོ་སངས་རྒྱས་ལྔ༔ གཟུགས་ཕུང་རྣམ་པར་སྣང་མཛད་ཡིན༔ ཚོར་བ་རིན་ཆེན་འབྱུང་ལྡན་ཡིན༔ འདུ་ཤེས་སྣང་བ་མཐའ་ཡས་ཡིན༔ འདུ་བྱེད་དོན་ཡོད་གྲུབ་པ་ཡིན༔ རྣམ་ཤེས་རྡོ་རྗེ་སེམས་དཔའ་ཡིན༔ དེ་ལྟར་རྒྱལ་བ་རིགས་ལྔ་རྣམས༔ ང་ཉིད་ཡིན་ནོ་སྐལ་ལྡན་ཀུན༔ བྱ་གྲུབ་བྱམས་སེམས་མཁའ་འགྲོ་ལྔ༔ བྱམས་སེམས་མཁའ་འགྲོ་བཅོ་ལྔ་ལ༔ ཤ་རུས་སངས་རྒྱས་མཁའ་འགྲོ་ཡིན༔ དྲོད་ནི་རིན་ཆེན་མཁའ་འགྲོ་ཡིན༔ ཁྲག་ནི་པདྨ་མཁའ་འགྲོ་ཡིན༔ དབུགས་ནི་ལས་ཀྱི་མཁའ་འགྲོ་ཡིན༔ རྣམ་ཤེས་རྡོ་རྗེ་མཁའ་འགྲོ་ཡིན༔ དེ་ལྟར་ཐ་མལ་བུད་མེད་ལབ་སྒྲོན་ང་༔ སངས་རྒྱས་ཡབ་ལྔ་ཡུམ་ལྔ་དང་༔ དཔའ་བོ་དཔའ་མོ་མཁའ་འགྲོ་དང་༔ ཡེ་ཤེས་དཔལ་མགོན་མ་ལུས་རྣམས༔ བཞུགས་སམ་འདུས་པའི་ཕོ་བྲང་ནི༔ ང་ཉིད་ཡིན་ནོ་སྐལ་ལྡན་ཀུན༔ དཔེར་ན་རྟེན་བྱེད་ས་གཞི་ལ༔ རྩི་བཅུད་འདོད་དགུ་འབྱུང་བ་བཞིན༔ ང་ཡི་ཕུང་ཁམས་སྐྱེ་མཆེད་རྣམས༔ ལྷ་དང་ལྷ་མོའི་རང་བཞིན་ཡིན༔ དཔེར་ན་རྩི་བཅུད་མེ་ཏོག་ལ༔ བུང་བའི་ཚོགས་རྣམས་རང་བཞིན་འདུས༔ དེ་བཞིན་ང་ཉིད་གར་གནས་ཀྱང་༔ ལྷ་ཚོགས་སྤྲིན་བཞིན་འདུས་པ་ཡིན༔ ཤེས་པར་གྱིས་ཤིག་རིག་པ་ཅན༔

དེ་ནས་ཐོད་སྨྱོན་བསམ་འགྲུབ་ཀྱིས་མ་ཅིག་གི་མདུན་དུ་པུས་མོ་བཙུགས༔ ཐལ་མོ་སྦྱར་ནས་ཞུས་པ༔ ཀྱེ་མ་རྒྱལ་བའི་ཡུམ་ཆེན་གྱི༔ ཐུགས་སྤྲུལ་ལབ་ཀྱི་སྒྲོན་མ་ཁྱེད༔ མ་དག་སེམས་ཅན་སྣང་ངོས་སུ༔ ཐ་མལ་བུད་མེད་ལབ་སྒྲོན་མཐོང་༔ དག་སྣང་སངས་རྒྱས་ངོ་བོ་ལ༔ རྡོ་རྗེ་ཕག་མོ་ཉིད་དུ་མཐོང་༔ སངས་རྒྱས་རིགས་ལྔ་ཡབ་ཡུམ་དང་༔ དཔའ་བོ་དཔའ་མོ་མཁའ་འགྲོའི་ཚོགས༔ བྱེ་བ་དཔག་མེད་འཕྲོ་ཞིང་འདུས༔ གང་འདུལ་ཐབས་མཁས་འཕྲིན་ལས་ཀྱིས༔ གྲངས་མེད་འགྲོ་བ་འདྲེན་མཛད་མ༔ གངས་ཅན་ཁྲོད་འདིར་སྙིགས་མའི་དུས༔ བཀའ་དྲིན་ཆེ་བའི་ཡུམ་ཆེན་མ༔ བདག་ནི་སྒོ་གསུམ་གུས་ཕྱག་འཚལ༔ སྨོན་ལམ་ལས་དང་རྟེན་འབྲེལ་གྱིས༔ བདག་ཀྱང་ཁྱེད་ཀྱི་སྲས་སུ་གྱུར༔ ཐེག་ཆེན་གཅོད་ཀྱི་བསྟན་ལ་འཇུག༔ དམ་ཆོས་བདུད་ཀྱི་གཅོད་ཡུལ་འདི༔ མ་ཡིས་ཇི་ལྟར་གསུངས་པ་བཞིན༔ སྤར་ཟིན་བྱས་ནས་ཉམས་སུ་བླངས༔ རྟགས་དང་དྲོད་ཚད་གཉིས་ཀ་ལ༔ བརྟན་ཐོབ་བྱུང་བ་མ་ཡི་དྲིན༔ ཡང་ཡང་དྲན་ནོ་བྱིན་གྱིས་རློབས༔ དྲིན་ལན་མཐའ་མེད་མ་ཅིག་གིས༔ དགོངས་པ་ཐུགས་ཀྱི་སྒོ་ཕྱེས་ནས༔ གདམས་པ་གསུང་གི་ཟབ་ཆོས་རྣམས༔ ལུས་པ་མེད་པ་གནང་ལགས་ཀྱང་༔ ད་རུང་བཀའ་དྲིན་ཞུ་བ་ལགས༔ ཞིང་སྐྱོང་མཁའ་འགྲོས་ལུང་བསྟན་པས༔ ལུས་ཀྱི་མཆོད་སྦྱིན་བྱེད་ཚུལ་རྣམས༔ སྒྲིབ་མེད་གསལ་པོར་གནང་བར་ཞུ༔ བདག་དང་བདག་འདྲའི་འགྲོ་ཀུན་གྱི༔ ཡིད་གུས་བློ་བརྟན་དང་བས་ཉན༔ ཉན་བློ་གཞན་དོན་ཆེད་དུ་ལགས༔ ཞེས་ཞུས་པས༔

ཡང་མ་ཅིག་གི་ཞལ་ནས༔ བུ་དད་བརྩོན་ཤེས་རབ་ལྡན་པ་ཡིས༔ རིག་པ་ལས་འཕྲོ་སྐལ་བ་ཅན༔ མཚུངས་མེད་སྐྱེས་བུ་དམ་པ་ཁྱོད༔ དམ་ཆོས་བདུད་རྩིའི་ཆུ་རྒྱུན་ལ༔ ངོམས་མེད་འཐུང་བ་ངོ་མཚར་ཆེ༔ ཁྱད་པར་དམ་ཆོས་གཅོད་ཡུལ་གྱི༔ ལུས་ཀྱི་མཆོད་སྦྱིན་བྱེད་ཚུལ་རྣམས༔ ཞུ་བ་ནན་ཏན་ཆེ་བ་དེ༔ ཐེག་པ་གོང་མའི་ཁྱད་ཆོས་ཡིན༔ ལེགས་སོ་རྗེས་སུ་ཡི་རང་ངོ་༔ མ་ཡེངས་གུས་པས་ཉོན་ཅིག་དང་༔ ལུས་ཀྱི་མཆོད་སྦྱིན་བྱེད་ཚུལ་རྣམས༔ སྔར་ནས་བཤད་པ་ཡིན་མོད་ཀྱང་༔ ད་རུང་ལུས་ཀྱི་མཆོད་སྦྱིན་གྱི༔ གོ་རིམ་དམིགས་པའི་བྱེད་ཚུལ་རྣམས༔ ཞིབ་པར་བཤད་ཀྱིས་ཡིད་ལ་ཟུངས༔ ཞེས་གསུངས་ནས་ཕུང་པོ་གཟན་དུ་བསྐྱུར་བའི་རྣམ་བཤད་ཆེན་མོ་བརྩམས་པར་མཛད་དོ༔ དེ་ལྟར་སྲས་ཐོད་སྨྱོན་བསམ་འགྲུབ་ཀྱིས་སྒྲུབ་པའི་ལོ་གྲངས་ཀྱི་དམ་བཅའ་ཚང་ནས་བསྒྲུབ་ཕུག་གི་སྒོ་ཕྱེས་པ་དང་༔ རྒྱུད་ཆེན་པོ་གསུམ་གྱི་དབང་བསྐུར་ཞིང་༔ གསང་སྔགས་ཀྱི་རྣམ་བཤད་ཆེན་མོ་བརྩམས་པ་དང་༔ མདོ་ལུགས་ཀྱི་རྣམ་བཤད་ཆེན་མོ་བརྩམས་པ་དང་༔ མདོ་སྔགས་ཟུང་གི་རྣམ་བཤད་ཆེན་མོ་གསལ་བྱེད་ཉི་མའི་འོད་ཟེར་མཐའ་གཉིས་ཟིལ་ནོན་ཅེས་བྱ་བ་ལ་སོགས་བརྩམས་པར་མཛད་ཅིང་༔ ཞོར་ལ་ཆོས་གཞན་གྱི་ཡང་འཆད་ཉན་དང་བཅས་པ་མཛད་ནས༔ གདུལ་བྱ་སྐྱོང་བར་མཛད་ཅིང་འགྲོ་བ་ལ་ཕན་ཐོགས་མཐའ་ཡས་པར་བྱུང་ཞིང་༔ ཕུང་པོ་གཟན་དུ་བསྐྱུར་བའི་རྣམ་པར་བཤད་པ་བརྩམས་པར་མཛད་པ་ནི༔ མ་ཅིག་དགུང་ལོ་ང་དྲུག་ནས་ང་བདུན་བར་གྱི་རྣམ་ཐར་ཏེ་རྣམ་གྲངས་བཅུ་དྲུག་པའོ༔ སཱ་མཱ་ཡཱ༔

རྣམ་གྲངས་བཅུ་བདུན་པ།

དེ་ནས་མ་ཅིག་དགུང་ལོ་ང་བདུན་ཡོས་བུ་ལོ་ཡི་དབྱར་ཟླ་ཐ་ཆུང་གི་ཚེས་བཅོ་ལྔ་ལ་མགོ་བཙུགས་ནས༔ ཕུང་པོ་གཟན་དུ་བསྐྱུར་བའི་རྣམ་བཤད་ཆེན་མོ་བརྩམ་པར་མཛད་པ་ལ༔ དེ་ལ་ལེའུ་བཅུ་གཉིས་ཀྱི་ཚུལ་དུ་བརྩམས་པར་མཛད་ནས་བཤད་པ་ལ༔ ཆོས་ཀྱི་གཞུང་ཙམ་དུ་ཕྱིན་པ་དང་༔ ཉིན་ཞིག་ནམ་མཁའ་དྭངས་ཤིང་ཉི་མ་དྲོ་བ་དང་༔ བསེར་བུ་ཅུང་ཟད་བསིལ་བ་ཞིག་བྱུང་བའི་སྔ་དྲོ་ཉི་མ་ཕྱེད་དྲོས་ཀྱི་དུས་སུ༔ རྣལ་འབྱོར་པ་ཧུར་རེ་བ་བློ་སྣ་ཐུང་སང་ངེ་བ་ཞིག་གིས་ཁྱི་ལྤགས་ཀྱི་ཐུལ་པ་ཁྲ་ཉེ་ལེ་བ་ཞིག་གྱོན་ཟིན༔ མི་ལྤགས་ཀྱི་གཡང་གཞི་ཞིག་ཕྲག་ལ་ཁུར༔ དབྱི་དཀར་ཀྱི་རྐྱལ་པ་གཅིག་རྒྱབ་ཏུ་ཁུར༔ རི་དྭགས་ཀྱི་གཙོས་རུ་ངར་མ་གཅིག་ལག་ཏུ་བཟུང་༔ རྐྱང་གི་རྔོག་མ་ཞིག་ཐོད་དུ་བཅིང་༔ ཁམས་རགྴའི་ཕྲེང་བ་ཞིག་ལག་ཏུ་བགྲངས་ཤིང་༔ འཇམ་དཔལ་དམར་པོའི་སྙིང་པོ་གྱེར་གླུ་བྱེད་ཅིང་བྱུང་པས༔ ཐོགས་པ་མེད་པར་མ་ཅིག་གི་དྲུང་དུ་བྱུང་ནས་ཕྱག་འཚལ་ཏེ་ཁམས་འདྲི་ཕུལ་ལོ༔ དེ་ནས་མ་ཅིག་གི་ཞལ་ནས་ཁྱེད་བྱོན་པ་ལགས་སམ༔ ཁ་བས་འོ་བརྒྱལ་མ་གཏད་དམ༔ ཁྱེད་ཀྱི་ཕྱིང་ལྷམ་གཡང་ལ་ཤོར་རམ་ཞེས་གསུངས་པས༔ རྣལ་འབྱོར་པ་དེ་ལྷག་པར་ཡང་དད་པ་རྩོལ་མེད་དུ་སྐྱེས་ནས་མཆི་མ་འཁྲུགས་ཤིང་ཕྱག་མང་པོ་རྩོལ་མེད་དུ་འཚལ་ནས༔ མ་ཅིག་ལ་འོ་དོད་འབོད་ཅིང་གསོལ་བ་དྲག་ཏུ་བཏབ་པས༔ མ་ཅིག་གི་ཞལ་ནས༔ ཞིག་པོ་ཉི་མ་སེང་གེ་ད་བཞུགས་ཤིག་གསུངས་པ་དང་༔

དེ་ནས་ཁམས་འདྲི་བྱས་ཏེ༔ ཁྱེད་གང་ནས་བྱོན་པ་ཡིན༔ ཁྱེད་ལ་མིང་ཅི་སྐད་བྱ་བ་ཡིན་གསུངས་ནས་དྲིས་པས༔ རྣལ་འབྱོར་པ་དེ་ལ་བསྡད་ནས་མཆི་མ་ཕྱིས་ནས༔ ངའི་ཡུལ་ནི་ལ་སྟོད་ཀྱི་ཡང་སྟོད་འཕེན་དྲུག་ཅེས་བྱ་བ་ཡིན༔ ང་རང་ལ་སེང་གེ་རྡོ་རྗེ་ཡང་ཟེར༔ ཉི་མ་སེང་གེ་ཡང་ཟེར་བ་ཡིན༔ ཆུང་ངུ་དུས་ན་འཕགས་པ་འཇམ་དཔལ་ལ་ལྷ་སྐལ་བྱས་ནས་བསྙེན་སྒྲུབ་ལོ་བཅུ་གསུམ་ལ་བྱས་པས་ནུས་པ་ཡང་བཟང་པོ་ཐོན་ནས་རླུང་སེམས་སྦྱོང་བའི་སྐབས་གཅིག་ན༔ རྔོན་པར་འགའ་བྱུང་ནས་བཅིང་བརྡུངས་བྱས་པས་དེའི་རྐྱེན་བྱས་ནས་སེམས་གེགས་ཆེན་པོ་བྱུང་བས༔ བྱིན་རླབས་དང་ནུས་པ་ཆེ་ཟེར་བ་དང་མན་ངག་ལ་མཁས་པ་ཡིན་ཟེར་བ་སུས་བཅོས་ཀྱང་ང་ཡི་སེམས་གེགས་ནུས་པ་སུ་ཡང་མ་བྱུང་བས༔ མ་ཅིག་ལབ་སྒྲོན་བྱིན་རླབས་དང་ནུས་པ་ཆེ་བར་འདུག་ཟེར་བའི་སྙན་པར་ཐོས་པས་ཟླ་བ་བཞིའི་ལམ་ལ་བཅད་ནས་འོང་སྟེ༔ ཟླ་བ་གཉིས་ལ་ཁ་བ་འབོག་དགོས་བྱུང་བས༔ ཉིན་ཞིག་བྲག་ལམ་ཞིག་ལ་མ་ཐོན་པས༔ ཕྱིང་ལྷམ་ཞིག་ཡོད་པ་ཡང་གཡང་ལ་ཤོར་བས་དེ་ཕྱིན་ཆད་ནས་རྐང་པའི་མཛུབ་མོ་རྣམས་ཀྱང་ཕྱིད་ནས་ཐལ་ཏེ༔ ཕར་ཆེར་ཆད་ནས་ཐལ་ནས་ད་སོས་ཐུབ་པ་མེད༔ མ་ཅིག་རང་ལ་མོས་པ་བྱས་ནས་འོང་ཚུན་ཆད་ལ་སེམས་ཟུག་ཆེན་པོ་ཙམ་ཡང་མ་བྱུང་ལགས༔ དེ་རིང་ཕ་ཀི་ནས་གནས་འདི་མཐོང་ནས་སེམས་ཟུག་ཡེ་ནས་མ་བྱུང་ལགས༔ ད་ལྟ་མ་ཅིག་གི་མདུན་འདིར་ཕྱིན་ནས་སེམས་ཟུག་ཐམས་ཅད་ཞི་ནས་སེམས་ལ་དགའ་བདེ་དཔག་ཏུ་མེད་པ་སྐྱེས་པ་དང་༔ ད་ལྟ་ལུས་སེམས་ཁྱད་པར་དུ་ཡང་བདེ་ཞིང་སེམས་འཛིན་ཐམས་ཅད་དང་བྲལ་བའི་གསལ་སྟོང་ས་ལེ་བ༔ ཡི་དམ་གྱི་ལྷ་དང་དབྱེར་མེད་པའི་བདེ་གསལ་ཤིག་གེ་བ༔ སེམས་རང་མལ་དུ་གནས་པ་འདི་འདྲ་བ་ཞིག་སྔར་ཡང་ཡོད་པ་ཡིན་ཙ༔ དེ་སྔ་ཕན་ཆོད་ལ་སེམས་ཟུག་མ་ཞི་བས༔ མི་ཐམས་ཅད་ཀྱིས་སྨྱོན་པ་ཕོ་སྨྱོན་སེང་གེ་ཟེར་བར་བྱུང་ལགས༔ ད་ནི་རང་སེམས་རྙེད་པ་འདི་རང་ཡིན་ནོ་ཟེར་བས༔

ཡང་མ་ཅིག་གི་ཞལ་ནས་ན་རེ༔ ཁྱོད་ང་ལ་དད་པ་བྱས་ནས་ཉི་མ་གཅིག་ཚུར་ལ་བྱུང་ནས་དེ་ནུབ་གད་ཕུག་སྐྱ་མོར་ཉལ་བའི་ནུབ་མོ་ནས་ངས་ཁྱོད་ཀྱི་གེགས་སེལ་བྱས་པ་ཡིན་གསུངས་པ་དང་༔ དེ་ནས་ཕྱི་དྲོ་ཆོས་ཐུན་ཚར་བ་དང་རྣལ་འབྱོར་པ་ལ་བཟའ་བ་མང་པོ་ཞིག་བྱིན་ནས་འདི་སྐད་གསུངས༔ རྣལ་འབྱོར་པ་ཁྱོད་དོ་ནུབ་སྤྱི་ཁང་དུ་ཉོལ་ལ་སྡོད་དང་༔ སང་ནངས་པར་ཉི་མ་རྩེ་ཤར་བ་དང་ཁྱོད་ཀྱི་གྲོགས་པོ་གཉིས་ཡོང་བར་ཡོད་པས༔ དེར་ཁྱེད་གསུམ་ལ་དམིགས་པ་ལྷན་ཅིག་ཏུ་བསྟན་ནས་བསླབ་བྱ་རྣམས་ཀྱང་སློབ་གསུངས་པ་དང་༔ དེ་ནས་རྡོ་རྗེ་སེང་གེ་ཡང་དེ་ནུབ་སྤྱི་ཁང་དུ་ཉལ་ནས་བསྡད་པས༔ ནངས་པར་ཉི་མ་རྩེ་ཤར་བ་དང་བླ་དབྱེའི་དཀྱིལ་དུ་རྣལ་འབྱོར་པ་བལ་ཐུལ་སྐྱ་ཉི་ལེ་བ་གྱོན་པ་བལ་གྱི་དྲ་བ་རྒྱབ་ཏུ་ཁུར་བ༔ མི་རྐང་གི་གླིང་བུ་རྐེད་དུ་བཅུག་པ༔ རི་དྭགས་གཉན་གྱི་རྭ་ཅོ་ལྟོ་ཕོར་ལ་ཐོགས༔ རྩྭའི་ཞྭ་མོ་མགོ་ལ་གྱོན་པ༔ ལག་ན་བལ་གྱི་ལི་ཁྲི་ཐོགས་ནས་མིག་མཐོ་མཐོར་ལྟ་བ་ཞིག་དང་༔ ཡང་རྣལ་འབྱོར་པ་རེ་བའི་ཐུལ་པ་ལ་རྔ་མ་ནག་པོའི་ཤམ་ལྷུབ་ལྷུབ་བཏགས་ནས་གྱོན་པ༔ མགོ་ལ་རེ་བའི་ཞྭ་མོ་ནག་པོ་ལ་རྔ་མ་ནག་པོའི་ཤམ་བཏགས་ནས་གྱོན་པ༔ རྒྱབ་ན་རས་ཀྱི་སླུད་བུ་ཁུར་བ༔ ལག་ན་བ་མན་གྱི་རྭ་ཅོ་ལྟོ་ཕོར་ལ་ཐོགས་པ༔ ཨ་ག་རུ་ནག་པོའི་ཌཱ་མ་རུ་མཆན་ཁུང་དུ་བཏགས་པ༔ ཁྱི་ཤིང་ནག་པོའི་དབྱུག་པ་ལག་ཏུ་ཐོགས་པ་ཞིག་དང་༔ རྣལ་འབྱོར་པ་དེ་གཉིས་བླ་དབྱེ་ཕྱིན་ནས་འདུག་པས༔ རིན་ཆེན་རྒྱན་གྱིས་གཟིགས་སྐར་དུ་བལྟས་པས་མཐོང་སྟེ༔ མ་ཅིག་གི་མདུན་དུ་ཞུས་པས༔

ཀྱེེ་མ་ཅིག་ལགས༔ རང་རེའི་བླ་དབྱེ་འདི་ན་རྣལ་འབྱོར་པ་མིག་མཐོ་མཐོར་ལྟ་བའི་བལ་ཐུལ་གྱོན་པ་ཞིག་དང་༔ ཡང་རྣལ་འབྱོར་པ་རེ་བ་ནག་པོའི་གོས་ལ་རེ་བ་ནག་པོའི་ཤམ་བཏགས་ནས་གྱོན་པ་ཞིག་གིས་ཆ་ལུགས་མི་འདྲ་བ་རེ་རེ་བྱས་ནས་ཕྱིན་ནས་འདུག་པས་འདི་གཉིས་གང་ནས་འོང་བ་ཡིན་ལགས་ཞུས་པས༔ ཡང་མ་ཅིག་གི་ཞལ་ནས་ན་རེ༔ བལ་ཐུལ་གྱོན་པའི་རྣལ་འབྱོར་པ་དེ་ནི་བྱང་སྟོད་ཀྱི་ཕྱི་བྱང་རྨ་ཐོང་ཞེས་བྱ་བ་ནས་འོང་པ་ཡིན༔ དེ་ཡང་ཁམས་འདུས་པ་གཅིག་ཡིན་པས་སྨྱོན་པ་རང་སྣང་ཡང་ཟེར༔ བལ་པོ་ཡེ་ཤེས་སེང་གེ་བྱ་བ་ཡིན་པས་ཟླ་བ་དྲུག་གི་ལམ་ལ་བཅད་ནས་འོང་པ་ཡིན༔ རེ་ཐུལ་གྱོན་པ་དེ་ནི་རྗེ་བཙུན་ཟིལ་ནོན་ཡང་ཟེར་ཏེ༔ རྒྱལ་བ་རིན་ཆེན་ཡང་ཟེར༔ ཕོ་སྨྱོན་སེང་གེ་བྱ་བ་ཡིན་པས་ཀོང་པོ་ནས་ཡར་ལ་འོང་བ་ཡིན༔ ཁོང་གཉིས་མདང་གནས་མལ་དུ་འཕྲད་པ་ཡིན་གསུངས༔ དེ་ནས་མ་ཅིག་གིས་ཆོས་འཆད་པ་ལ་གློ་སྐར་དུ་བྱོན་པས་ཆོས་ཉན་པ་པོ་རྣམས་ཀྱང་དེར་འཚོགས་པ་དང་༔ རྣལ་འབྱོར་པ་གཉིས་ཀྱང་དེར་ཕྱིན་ནས་མ་ཅིག་དང་མཇལ་བས་ཞུ་གནང་ཞིབ་ཏུ་མཛད་པ་དང་༔ དེ་ནས་སེང་གེ་རྡོ་རྗེ་དང་ཁོང་རྣམ་པ་གསུམ་ལ་བླ་མའི་རྣལ་འབྱོར་ཟབ་ལམ་མ་དང་ནམ་མཁའ་གོ་འབྱེད་ཅེས་སམ་རྫས་གྲུབ་འཕོ་བའི་ལུང་བསྟན་མཛད་ནས༔ ད་ཁྱེད་གསུམ་ལ་དམིགས་པ་ཆོས་ཐུན་འདི་ཚར་ནས་བསྟན་གསུངས་པ་དང་༔ དེ་ནས་ཆོས་ཐུན་ཚར་ནས་ཁོང་གསུམ་ལ་དམིགས་པ་བསྟན་པས་ཁྱེད་སོ་སོས་གེགས་སེལ་ནས་གྲུབ་ཐོབ་པའི་རྣལ་འབྱོར་པ་རྫུ་འཕྲུལ་ལ་ཐོགས་པ་མེད་པ་གསུམ་བྱུང་ངོ་༔

དེ་ནས་མ་ཅིག་གི་ཞལ་ནས་ན་རེ༔ དེ་རིང་ནས་ཁྱེད་རྣམ་པ་གསུམ་ཡང་ང་ཡི་ཆོས་ལུགས་ལ་འཇུག་པ་ཡིན་པས༔ ཁྱེད་གསུམ་པོའི་གོས་དང་ཆ་ལུགས་རེ་ཟུང་ཙམ་རེ་སྤང་དགོས་པས༔ ཁྱེད་སེང་གེ་རྡོ་རྗེའི་ཁྱི་ཐུལ་དེ་དང་༔ མིའི་ལྤགས་པ་དེ་དང་༔ གཙོས་རུ་ངར་མ་དེ་དང་འདི་གསུམ་པོ་གཏན་ནས་སྤང་དགོས་པས༔ ཁྱིའི་ལྤགས་པ་འདི་ནི་ཉེས་པ་མང་པོ་དང་ལྡན་པས་སྐད་ཅིག་ཀྱང་རྩར་ཉེ་མི་རུང་ངོ་༔ མིའི་ལྤགས་པ་འདི་ནི་དགོས་པའི་དུས་ཤིག་ཀྱང་ཡོད་དེ༔ གདམས་པ་ཐོབ་ནས་སྙེམས་རྩ་མ་ཆོད་ཀྱི་བར་དུ་སྦ་བར་གྱིས༔ གདམས་པ་ཟབ་མོ་ཐོབ་ཅིང་སྙེམས་རྩ་ཆོད་ནས་ཀྱང་༔ དེར་བུ་མོ་མཚན་བཟང་ལོ་བརྒྱད་པ་ནས་བཅུ་དྲུག་གཉིས་ཀྱི་བར་དང་༔ སྐྱེས་པ་དར་མ་གྲི་ཁར་བསད་པའི་ལྤགས་པ་རྣམས་ནི་ལྟོས་མེད་ཀྱི་སྤྱོད་པ་བྱེད་པའི་རྫས་ལ་འཆང་དུ་རུང་ཡང་ཕ་རོལ་པོ་གཞན་གྱི་ཡིད་ལ་མི་འདོད་པའི་ཕྱིར་དུ༔ ཕ་རོལ་པོ་གཞན་ལ་མི་སྟོན་ནས་གསང་དགོས་ཏེ་སྦ་བར་གྱིས་ལ་ཆོངས༔ གཙོས་རུ་འདི་ནི་དྲག་པོའི་རྫས་ལ་གཅིག་ཆོག་ཡིན་པས༔ ཕ་རོལ་པོ་གཞན་ལ་མི་འདོད་པའི་ཕྱིར་དུ་འཆང་དུ་མི་རུང་བས་སྤང་བར་བྱ༔ རྐྱང་གི་རྔོག་མ་འདི་ནི་གྲིབ་དང་མིག་ལ་ཁ་བའི་གནོད་པ་འབྱུང་བ་རྣམས་བསྲུང་བས་འཆང་དུ་རུང་སྟེ༔ རབ་ཏུ་བྱུང་བ་ཡིན་ན་ནི་འཆང་མི་རུང་པས་ཆོས་རར་གནས་ཚེ་རེ་ཞིག་སྐུང་འཐད་གསུངས་སོ༔ རྒྱལ་བ་རིན་ཆེན་གྱི་རེ་ཐུལ་དང་མགོ་ལ་གྱོན་པའི་རེ་ཞྭ་འདི་ནི་ཁྱེད་རང་ཡུལ་གྱི་ཆ་ལུགས་ལྟ་བུ་ཡིན་ཀྱང་རེ་བ་འདི་ནི་ཕྱི་པ་མུ་སྟེགས་པའི་བདུད་གོས་ནག་པོ་ཡིན་པས་ནང་པ་སངས་རྒྱས་བཅོམ་ལྡན་འདས་ཀྱི་བསྟན་པ་དང་འགལ་བས་གྱོན་དུ་མི་བཏུབ་པས་རེ་བ་འདི་ལ་འོག་གདན་བཟོ་རུ་བཏུབ་པས་འོག་གདན་གྱིས་གསུངས༔ ཁྱི་ཤིང་ནག་པོའི་འཁར་བ་འདི་ནི་སྒྲིབ་ཤིང་ཡིན་པས་ལན་ཅིག་ཕར་ལ་སྐུང་གསུངས༔ ཨ་ག་རུའི་ཌཱ་མ་རུ་འདི་ནི་བོད་ན་དཀོན་པའི་མཆོད་རྫས་ཕུན་སུམ་ཚོགས་པ་རྙེད་པར་དཀའ་བའི་ལྷ་རྫས་ཡིན་པས་ཁྱོད་བསོད་ནམས་དང་ལྡན་པ་ཡིན་པས་ལེགས་པར་དཀྲོལ་ཅིག་གསུངས༔

ལྟོ་ཕོར་བ་མན་གྱི་ཞལ་བུ་འདི་ནི་བྷནྡྷ་བཅུད་དང་ལྡན་པ་ཡིན་ཏེ་ཤིན་ཏུ་ལེགས་ཤིང་ཡོན་ཏན་མང་པོ་དང་ལྡན་པས་ཁྱད་པར་ངའི་ཆོས་ལུགས་དང་མཐུན་པས་ཉ་ར་གྱིས་གསུངས༔ ཡེ་ཤེས་རང་སྣང་གི་བལ་ཐུལ་འདི་ནི་ཤིན་ཏུ་ལེགས་པས་ལེགས་པོར་གྱོན༔ གཉན་གྱི་རྭ་ཅོ་འདི་ནི་རྫས་ངན་པ་ཡིན་པས་སྤོངས་ཤིག་གསུངས༔ ལར་ཡང་ངའི་ཆོས་ལུགས་ལ་ཕ་རོལ་པོ་གཞན་ལ་གནོད་པའི་ཆས་ཀ་གང་དང་གང་ཡིན་པ་ཐམས་ཅད་དང་༔ ཁྱད་པར་དུ་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་དང་འགལ་བའི་ཆ་ལུགས་ངན་པ་གང་ཡིན་པ་ཐམས་ཅད་སྤང་བར་བྱའོ༔ ལར་ཡང་སྤྲང་མོ་ང་རང་དགེ་བསྙེན་གྱི་ཆ་ལུགས་རྣལ་འབྱོར་མ་ཡིན་པས་བྱང་ལུགས་ཀྱི་གཡང་དུག་ལིང་བ་དང་༔ ཕྱིང་པ་དང་༔ སྣམ་བུ་དང་༔ རས་དང་༔ རས་ཆེན་དང་དེ་རྣམས་ནི་ཁ་དོག་མ་བསྒྱུར་ཀྱང་ཆོག་ཅིང་༔ ཕྱིང་ལྷམ་གྱི་རྐང་པ་ལྕིབ་པ་དང་༔ ལྟོ་ཕོར་བ་མན་གྱི་རྭ་ཅོ་ལ་བྱེད་པ་ནི་སྤྲང་མོ་ང་ཡི་ཆོས་ལུགས་ཡིན་པས་ཁྱེད་ཕྱི་རབས་པའི་བུ་སློབ་ངའི་རྗེས་སུ་འཇུག་པ་རྣམས་ཀྱིས་ཀྱང་རས་དང་ཕྱིང་པ་དང་སྣམ་བུ་རྣམས་ནི་ཁ་དོག་དམར་སེར་དུ་བསྒྱུར་ནས་གྱོན་ན་ཡང་ལེགས་པས༔ སངས་རྒྱས་བཅོམ་ལྡན་འདས་ཀྱི་བསྟན་པ་དང་མཐུན་པ་ལེགས་སོ༔ ཁ་དོག་མ་བསྒྱུར་ཀྱང་ཆོག་པས་སྤྲང་མོ་ངས་ཆོས་ལུགས་དང་མཐུན་པས་ཆོག་གོ༔

གཅན་གཟན་གྱི་པགས་པ་དང་གོས་ལྷམ་དང་ཁྱད་པར་དུ་ཁྱིའི་ལྤགས་པ་ནི་སྤང་བྱའི་གཙོ་བོ་ཡིན་པས༔ སེང་གེ་རྡོ་རྗེའི་ཁྱི་ལྤགས་དེ་ནི་གཙང་པོའི་འགྲམ་དུ་ཁྱེར་ལ་བྱེ་མའི་གཏིབ་ཞབས་སུ་ནོན་ལ་ཞོག་དང་ཁྱི་ལྤགས་ཀྱི་གཉེན་པོ་བྱེ་མ་ཡིན་པས་དེས་ཐུབ་པ་ཡིན་གསུངས༔ ཁོང་སེང་གེ་རྡོ་རྗེ་དང་རྒྱལ་བ་རིན་ཆེན་གཉིས་ལ་ཕྱིང་ཐུལ་རེ་རེ་གཏོད༔ ཡེ་ཤེས་རང་སྣང་དང་སེང་གེ་རྡོ་རྗེ་གཉིས་ལ་བ་མན་གྱི་ཞལ་བུ་རེ་རེ་གཏོད༔ ཁོང་གསུམ་ཁ་ལ་ཕྱིང་ལྷམ་རེ་རེ་གཏོད་གསུངས་ནས་དེ་ལྟར་དུ་བྱས་སོ༔ དེ་ནས་ཁུ་སྒོམ་ཆོས་ཀྱི་སེང་གེས་ཞུས་པ༔ ཀྱེ་མ་ཅིག་ལགས༔ སྤྱིར་གཅན་གཟན་གྱི་པགས་པ་ལ་ཉེས་པ་ཡོད་ཅིང་ཁྱད་པར་དུ་ཁྱིའི་ལྤགས་པ་ལ་ཉེས་པ་མང་པོ་ཡོད་གསུངས་པའི་ཉེས་པ་རྣམས་གསལ་པོར་གསུང་འཚལ་ཞུས་པས༔ མ་ཅིག་གི་ཞལ་ནས་བུ་སློབ་ཀུན་ཉོན་དང་སྤྱིར་གཅན་གཟན་ཁ་ཅིག་གི་ལྤགས་པ་ནི་རྫས་ངན་པ་མ་རུངས་པ་ཡིན་པས་འཆང་དུ་མི་རུང་༔ ལ་ལ་ནི་འཇིག་རྟེན་པ་ཀུན་གྱི་འདོད་དོན་ཡིན་པས་རློམ་སེམས་དང་སེར་སྣ་དང་མཚོན་སྒྲིབ་ཀྱི་དྲི་མ་དང་བཅས་པའི་ཉེས་པ་མང་དུ་ཡོད་པས་འཆང་དུ་མི་རུང་༔ ཁ་ཅིག་གཅན་གཟན་ཁྲོ་བོ་རྣམས་ཀྱི་ལྤགས་པ་ནི་གསང་སྔགས་བླ་མེད་ཐེག་པ་ཆེན་པོའི་ལྷ་རྫས་ཁྱད་པར་དུ་འཕགས་པ་ཡིན་ཏེ༔ འོན་ཀྱང་གཅན་གཟན་ཁྲོ་བོ་རྣམས་ཡིན་ཀྱང་༔ གནོད་སེམས་དང་དུས་རྒྱུན་པར་འགྲོགས་པར་ལྤགས་པ་གྱོན་ན་ནི་སྤྱིར་སངས་རྒྱས་བཅོམ་ལྡན་འདས་ཀྱི་བསྟན་པ་དང་འགལ་ཆ་ཆེ་ལ༔ ཁྱད་པར་དུ་འཇིག་རྟེན་པ་ཀུན་དང་ཡང་མཐུན་སྣང་དུ་མི་འགྲུབ་ཅིང་༔ ཁྱད་པར་དུ་ངའི་ཆོས་ལུགས་དང་འགལ་ཆ་ཤིན་ཏུ་ཆེ་བས་ང་ཡི་ཆོས་ལུགས་ཀྱི་གཙོ་བོ་ནི་བྱམས་སྙིང་རྗེ་བྱང་ཆུབ་ཀྱི་སེམས་ལ་བྱེད་པ་ཡིན་པས༔

ངའི་ཆོས་ལུགས་འཛིན་པ་རྣམས་ཀྱིས་གཅན་གཟན་གྱི་ལྤགས་པ་གྱོན་ན་ནི༔ པགས་པ་གྱོན་མཁན་ཁོ་རང་ལ་ཡང་དྲེགས་པ་སྐྱེ་ལ༔ ཕ་རོལ་པོ་གཞན་གྱི་བློ་ལ་ཡང་མི་འདོད་ནས་བྱམས་སེམས་ཀྱི་གེགས་སུ་འགྱུར་བ་ཡིན་པས་གཅན་གཟན་གྱི་ལྤགས་པ་ཅི་ནས་ཀྱང་སྤང་དགོས་སོ༔ འོན་ཀྱང་བདག་འཛིན་དང་བྲལ་ནས་བདག་འཛིན་མེད་པའི་ལྟ་བ་རྣམ་དག་དང་ལྡན་ནས་རང་དོན་ཀྱི་དྲི་མས་མ་གོས་ནས་གཞན་དོན་ཁོ་ན་ལ་བློ་ཚིམ་པ་མེད་པའི་ཡོན་ཏན་རྒྱས་པའི་དོན་ཆེན་པོ་འགྲུབ་ཅིང་༔ རང་གཞན་གྱི་དོན་དེ་གཉིས་ལ་གྲུབ་པ་ཐོབ་ནས་བརྟུལ་ཞུགས་ཀྱི་སྤྱོད་པ་སྣ་ཚོགས་པས་འགྲོ་བའི་དོན་དཔག་ཏུ་མེད་པ་བྱེད་ནུས་པའི་གང་ཟག་གཅིག་གིས་གཅན་གཟན་གྱི་ལྤགས་པ་གྱོན་ཀྱང་རུང་སྟེ༔ དེ་ཡང་གང་ཟག་ཁོ་རང་ལ་སྐྱོན་མི་འགྱུར་ཡང་ཕ་རོལ་པོ་གཞན་གྱི་བློ་ལ་མི་འདོད་པས་གཞན་སྣང་འདུལ་བའི་རྟེན་འབྲེལ་ལ་དགོས་པ་བྱུང་ན་མ་གཏོགས་པ་གཅན་གཟན་གྱི་ལྤགས་པ་སྤང་དགོས་སོ༔ དེ་ལྟར་གང་ཟག་ནུས་པ་དང་ལྡན་པ་མ་ཡིན་པའི་གང་ཟག་ལས་དང་པོ་བ་ཐར་པ་དོན་དུ་གཉེར་བ་རྣམས་ཀྱིས་གཅན་གཟན་གྱི་ལྤགས་པ་ཤིན་ཏུ་ནས་སྤང་དགོས་ཏེ༔ མདོར་ན་བྱང་ཆུབ་ཀྱི་སེམས་འཆོར་བས་ཐར་བའི་གེགས་སུ་འགྱུར་བ་དང་༔ གཞན་ཡང་སྐྱོན་ཕལ་པ་མང་དུ་ཡོད་པས་གཅན་གཟན་གྱི་ལྤགས་པ་སྤང་དགོས་སོ༔ དེ་ལ་ཁྱད་པར་ཡང་ཁྱིའི་ལྤགས་པ་ལ་སྐྱོན་ཆེ་བར་གདའ་སྟེ༔ ཉེས་པ་དགུ་དང་ལྡན་པས་ཤིན་ཏུ་ནས་སྤང་དགོས་ཏེ༔

དེ་ཡང་ཉེས་པ་དགུ་ནི་འདི་ལྟར་རོ༔ ལས་ཀྱིས་མནར་བའི་ལས་ངན་པ་ཁྱི་ལ་སྐྱེས་པས་ལས་ཀྱི་སྒྲིབ་པ་ངན་པའི་དབང་གིས་ཡེ་ཤེས་པའི་ལྷ་མི་འཁོར་བའི་ཉེས་པ་དང་གཅིག༔ དྲི་མ་ངན་པས་དཔའ་བོ་མཁའ་འགྲོ་དང་དཔལ་མགོན་ཆོས་སྐྱོང་རྣམས་མི་འཁོར་བའི་ཉེས་པ་དང་གཉིས༔ དྲི་མ་ངན་པས་མནབ་ཁུས་གཙང་མ་རིས་མགྲོན་རྣམས་མི་འཁོར་བའི་ཉེས་པ་དང་གསུམ༔ མི་གཙང་བའི་རྫས་ངན་པ་ཡིན་པས་གང་དང་འཕྲད་ཚད་ཐམས་ཅད་མནོལ་ཐུབ་ཅིང་ཉམས་པར་འགྱུར་པའི་སྟོབས་ཀྱིས་ས་བདག་དང་༔ གཞི་བདག་དང་༔ ཡུལ་བདག་དང་༔ གནས་བདག་དང་གྲོང་བདག་ལ་སོགས་པའི་དཀར་ཕྱོགས་ལ་དགའ་བ་རྣམས་ཀྱིས་མི་འདོད་ཅིང་མི་དགའ་ནས་ཁྲོ་ཞིང་འཁྲུགས་ནས་ཐམས་ཅད་ལ་གནོད་པ་སྐྱེལ་བའི་ཉེས་པ་དང་བཞི༔ དུག་ངན་པའི་རླངས་པས་སྦྲང་བུ་དང་སྲིན་བུ་ཕྲའུ་ཕལ་པ་རྣམས་འཆི་བའི་ཉེས་པ་དང་ལྔ༔ བཤུལ་ངན་པའི་དྲི་མས་མི་ཡ་རབས་རྣམས་ཀྱིས་ཞེན་པ་ལོག་ཅིང་ཐམས་ཅད་ཀྱི་ཡིད་ལ་མི་འདོད་པའི་ཉེས་པ་དང་དྲུག༔ གྲོང་ཡུལ་གྱི་ཁྱི་ཐམས་ཅད་ཀྱིས་མཐོང་ཞིང་དྲི་མ་ཚོར་བ་ཙམ་གྱིས་སྐྲག་ཅིང་སྔངས་ཡར་དུ་བྲོས་པ་དང་སྡང་བའི་ཉེས་པ་དང་བདུན༔ ནང་པ་སངས་རྒྱས་བཅོམ་ལྡན་འདས་ཀྱི་བསྟན་པ་དང་འགལ་ཞིང་བསྟན་པའི་གྲལ་མི་ཚུད་པའི་ཉེས་པ་དང་བརྒྱད༔ ཁྱད་པར་དུ་ང་ཡིས་བསྟན་པ་དང་འགལ་ཞིང་ང་ཡིས་ཆོས་ལུགས་དང་མི་མཐུན་ནས༔ ཐར་པ་བྱང་ཆུབ་བསྒྲུབ་པའི་གེགས་སུ་གྱུར་པའི་ཉེས་པ་དང་དགུའོ༔

དེ་ལྟ་བུའི་ཉེས་སྐྱོན་ཆེ་བས་ཁྱིའི་ལྤགས་པ་ནི་ངེས་པར་དུ་སྤང་དགོས་སོ་བུ་སློབ་ཀུན་ཞེས་གསུངས་སོ༔ དེ་ནས་ཆོས་ཀྱི་སེང་གེ་ལ་སོགས་པའི་ཆོས་ཉན་པ་པོ་འཁོར་བུ་སློབ་རྣམས་ཀྱང་རེ་བ་དང་ཁྱི་ལྤགས་ལ་སོགས་པའི་ཉེས་པར་སྐྱོ་ནས་དེ་ཕྱིན་ཆད་ནས་རེ་བ་དང་ཁྱི་ལྤགས་ལ་སོགས་པའི་ཆས་ངན་པ་རྣམས་སྤང་བ་ལ་དགའ་མགུ་ཡི་རང་སྟེ༔ ཕུང་པོ་གཟན་དུ་བསྐྱུར་བའི་རྣམ་པར་བཤད་པར་ཉན་པ་ལ་ལྷག་པར་ཡང་གུས་པར་གྱུར་ཏོ༔ དེ་ནས་མ་ཅིག་གིས་ཕུང་པོ་གཟན་དུ་བསྐྱུར་བའི་རྣམ་བཤད་ཆེན་མོ་བརྩམས་པ་ལ་ལེགས་པར་གྲུབ་པ་དང་༔ དེའི་ཞོར་ལ་རྡོ་རྗེ་དབྱིངས་ཕྱུག་མ་ལྷ་མོ་བཅུའི་སྒྲུབ་ཐབས་རིན་པོ་ཆེའི་ཕྲེང་བ་ཞེས་བྱ་བ་དང་༔ དེའི་དཀྱིལ་ཆོག་གསལ་བྱེད་རིན་ཆེན་སྤུང་པ་ཞེས་བྱ་བ་དང་༔ བཀའ་བརྒྱུད་གནས་འགྱུར་བླ་མ་བཅུའི་སྒྲུབ་ཐབས་དང་༔ དེའི་དཀྱིལ་ཆོག་དང་༔ ཕྱོགས་བཅུའི་སངས་རྒྱས་གནས་འགྱུར་གྱི་སྒྲུབ་ཐབས་དང་༔ དེའི་དཀྱིལ་ཆོག་དང་གཉིས་པོ་ནི༔ རྡོ་རྗེ་དབྱིངས་ཕྱུག་མ་ལྷ་མོ་བཅུ་སྒྲུབ་པའི་དཀྱིལ་འཁོར་དེ་ལ་ལྟོས་དགོས་ཤིང་༔ བླ་མ་བཅུ་དང་སངས་རྒྱས་བཅུ་ལ་ནི་རང་རང་ལ་སྒྲུབ་ཐབས་ཁ་ལོང་བ་མེད་དོ༔ ཕག་མོ་ལྷ་ལྔ་མ་ལ་ཕྱི་སྒྲུབ་དཀར་མོ་དང་གསང་སྒྲུབ་དམར་མོ་དང་ནང་སྒྲུབ་ནག་མོ་དང་གསུམ་བྱུང་བ་ལ༔ དེ་ལ་དཀར་མོ་སྐུའི་སྒྲུབ་ཐབས་དང་༔ དམར་མོ་གསུང་གི་སྒྲུབ་ཐབས་དང་༔ ནག་མོ་ཐུགས་ཀྱི་སྒྲུབ་ཐབས་དང་གསུམ་བྱུང་བ་ལ་ཡང་༔ འདི་གསུམ་ལ་ནི་སོ་སོའི་སྒྲུབ་ཐབས་དང་དཀྱིལ་ཆོག་དང་ཞི་རྒྱས་དབང་དྲག་གི་སྦྱིན་སྲེག་དང་ལས་བཞིའི་མེ་མཆོད་ལས་ཁ་ཚར་དང་བཅས་པ་མཛད་པའོ༔ ཆོས་ཚན་དེ་རྣམས་ཀྱི་ཞུ་བ་པོ་ནི་རྗེ་བཙུན་ཆེན་པོ་ཟིལ་ནོན་ཞེས་སམ་སྲས་ཐོད་སྨྱོན་བསམ་འགྲུབ་དང་༔ སངས་རྒྱས་ཡོན་ཏན་ཞེས་སམ༔ གང་པ་རྨུགས་སངས་དང་ཆོས་ཀྱི་སེང་གེ་ཞེས་སམ་ཁུ་སྒོམ་ཆོས་ཀྱི་སེང་གེ་དང་གསུམ༔ རྣལ་འབྱོར་པ་རྡོ་རྗེ་སེང་གེ་དང་བཞི༔

སྲས་མོ་རྒྱན་ནེ་མ་དང་༔ དཔལ་ལྡན་རྒྱན་དང་བསོད་ནམས་རྒྱན་དང་འབུམ་ཚོ་རིན་ཆེན་རྒྱན་དང་བཞི་སྟེ་དཔོན་སློབ་བརྒྱད་ཀྱིས་ཡི་གེ་པ་ཡང་མཛད་པ་དང་༔ ཁྱད་པར་དུ་ཡང་བསྐུལ་པ་པོ་ནི༔ སྲས་ཐོད་སྨྱོན་བསམ་འགྲུབ་དང་༔ གང་པ་རྨུགས་སངས་དཔོན་སློབ་གཉིས་ཀྱིས་གཙོ་བོར་མཛད་ནས་བསྐུལ་ཏེ་ཆོས་ཚན་དེ་རྣམས་གྲུབ་པར་མཛད་པའི་གནས་ནི་ཟངས་རི་མཁར་དམར་ཡིན༔ དུས་ནི་མ་ཅིག་དགུང་ལོ་ང་བདུན་ནས་ང་བརྒྱད་ཀྱི་དུས་སུ་ཟླ་བ་དང་པོའི་ཚེས་གསུམ་ལ་གྲུབ་པར་མཛད་པའོ༔ དེ་ལྟར་མ་ཅིག་གི་ཆོས་ལུགས་ལ་སྤྱི་དང་བྱེ་བྲག་གཉིས་ཀྱི་དབྱེ་བ་ལ༔ སྤྱི་ནི་ཕྱག་རྒྱ་ཆེན་པོ་བདུད་ཀྱི་གཅོད་ཡུལ་མིང་དུ་བཏགས་པ་སྟེ༔ བེམ་རིག་བྲལ་ནས་ལུས་ཤ་ཁྲག་ལ་མཆོད་སྦྱིན་བྱེད་ནས་ཕཊ་བརྗོད་པ་ལ་ཆོས་སྤྱི་ཙམ་གྱིས་མིང་ཞེས་སོ༔ གཉིས་པ་བྱེ་བྲག་ལ་ཡང་བྱེ་བྲག་ཆེན་པོ་ཞེས་སམ༔ གཞུང་ཀྲིག་ཆེན་དང་༔ བྱེ་བྲག་ཆུང་ངུ་ཞེས་སམ༔ ཁ་འཐོར་ཀྲིག་མེད་དང་གཉིས་བྱུང་པ་ལ༔ དེ་ལ་བྱེ་བྲག་ཆེན་པོ་ནི༔ ཆོས་སྲོལ་གསུམ་དང་གསང་སྔགས་ཀྱི་བསྐྱེད་རྫོགས་རྣམས་དང་༔ གསང་སྔགས་ཀྱི་རྣམ་བཤད་ཆེན་མོ་དང་༔ མདོའི་རྣམ་བཤད་ཆེན་མོ་དང་༔ མདོ་སྔགས་ཟུང་གི་རྣམ་བཤད་ཆེན་མོ་དང་༔ དེ་རྣམས་ནི་གཞུང་ཀྲིག་ཀ་དང་བཅས་པའི་ཆ་ལག་ཚང་བ་རེ་ཡོད་པ་ལ༔ གཞུང་ཀྲིག་ཆེན་ཞེས་སམ༔ དེ་ལ་བྱེ་བྲག་ཆེན་མོ་ཟེར་རོ༔

གཉིས་པ་བྱེ་བྲག་ཆུང་ངུ་ཁ་འཐོར་བ་ནི༔ ཆོས་སྲོལ་གསུམ་ཀ་ལ་སོ་སོར་རྟོགས་པའི་བྱེ་བྲག་ཆུང་ངུ་ཡིན་ཏེ༔ དེ་ལ་སྡེ་ཚན་སོ་སོར་སྟོན་པ་ལ༔ དང་པོ་ནི་སྒྱུ་འཕྲུལ་ཆེན་མོ་རིག་པའི་རྩལ་འདོན་ནང་རིག་པའི་དམར་ཁྲིད་བླ་མའི་རྣལ་འབྱོར་ཟབ་ལམ་མ༔ འཕོ་བ་ལྷག་པའི་ལམ་ཞུགས་མ༔ འཇམ་དཔལ་ལ་སོགས་རིགས་གསུམ་མགོན་པོ་ལ་བརྟེན་པའི་དམིགས་པ་སྐོར་གསུམ༔ སྤྱན་རས་གཟིགས་སྒོམ་པའི་སྙིང་རྗེ་སྐོར་གསུམ་དང་༔ རྡོ་རྗེའི་ཚིག་རྐང་ལས་བཞི་ཡི་སྦྱོར་བ་ཞེས་པ་དང་༔ དེ་རྣམས་ནི་སྔགས་ལུགས་ལ་གཏོགས་པའི་རགས་རྩིས་ཙམ་ཡིན་ནོ༔ ཡང་གདམས་པ་གསུང་གི་ཤོག་དྲིལ་དང་༔ ཞལ་གདམས་ཐུགས་ཀྱི་བདུད་རྩི༔ སྙིང་གཏམ་གནད་ཀྱི་ཐེམ་པ༔ དགོས་འདོད་བཅུད་ཀྱི་སྙིང་པོ༔ དམར་ཁྲིད་དོན་གྱི་མན་ངག༔ སྲོ་མ་གཡས་ཁུག་དང་གཡོན་ཁུག༔ འཁྲུལ་གཅོད་བཀའ་བརྒྱ་མ༔ རིན་ཆེན་སྒྲོན་མེ༔ རིན་པོ་ཆེའི་རྒྱ་མདུན་མ༔ ལྟོས་གཡོས་ཆེན་མོ༔ དོན་གསལ་རིན་ཆེན་ཕྲེང་བ༔ གསང་བ་ཡེ་ཤེས་སྒྲོན་མེ༔ ངེས་དོན་ཚིག་གསལ༔ རིག་པ་དྲི་མེད་མེ་ལོང་སྐོར་གསུམ༔ དུར་ཁྲོད་ཆེན་པོ་གསང་གཅོད་ཀྱི་སྐོར་ལ་རྣམ་པ་བཞི༔ རྩ་བ་གསུམ༔ དེའི་ཡན་ལག་གསུམ༔ ཉོན་མོངས་པ་དྲུག་གདན་ཐོག་གཅིག་ཏུ་གཅོད་པའི་གདན་ཐོག་གཅིག་མའི་སྐོར་ལ་དྲུག༔ ཞི་བྱེད་དམར་ཁྲིད་ཧུཾ་སྐོར༔ སྙན་བརྒྱུད་ནོར་བུའི་གཏེར་མཛོད་ཀྱི་སྐོར༔ དེ་རྣམས་ནི་མདོ་སྔགས་ཟུང་འཇུག་ལ་རྟོགས་ཤིང་ཟུང་གིས་ཉམས་ལེན་དངོས་ཀྱང་དེ་རྣམས་ཡིན་ནོ༔ ཡང་ཟླ་བའི་འོད་ཟེར་མ་དང་ལྟ་བ་ཁྱུང་ཆེན༔ ལྟ་བའི་ཁྲིད་ཡིག་དང་དུག་ལྔ་ནད་སེལ་གྱི་གདམས་པ༔ དུག་གསུམ་རྩད་གཅོད་ཀྱི་གདམས་པ་མ་རིག་མུན་སེལ་གྱི་གདམས་པ༔ རིག་པ་གཅེར་མཐོང་གི་གདམས་པ་དེ་རྣམས་ནི་མདོ་ལུགས་ལ་གཏོགས་པའི་ཆོས་ཚན་ཡིན་ནོ༔ དེ་ཡན་ཆད་ནི་གཞུང་སོ་སོའི་སྲོལ་དུ་གཏོགས་པའི་ཆོས་ཚན་ཡིན་ལ༔ འདི་མན་ཆད་ནི་བྱེ་བྲག་ཐུན་མོང་པ་ཞེས་པ་ལ་ཡང་ཚ་གྲང་ནད་ཀྱི་ཤན་འབྱེད་གསལ་བྱེད་སྒྲོན་མ༔ བར་ཆད་རྐྱེན་གྱི་གེགས་སེལ་རྡོ་རྗེའི་ཐོག་མདའ༔ སྡིག་སྦྱོང་ཡེ་ཤེས་ཆུ་རྒྱུན་བཟང་ངན་རྟོག་དཔྱོད་ཕག་སྣ༔ མཐའ་གཏད་རང་གནད་འཁོར་ལོ༔ ནད་སེལ་ཉེར་ཞི་ཆེ་ཆུང་༔ རྐྱེན་སེལ་དྲག་སྔགས་ཆེ་ཆུང་༔ མཛེ་གཅོད་རིན་ཆེན་ཕྲེང་བ༔ བྱད་གཅོད་གསེར་གྱི་འཁོར་ལོ༔ དུར་གཅོད་གེགས་མདུད་བཀྲོལ་བའི་མན་ངག༔ ཚེ་བསྲིང་རྡོ་རྗེའི་རྫོང་ཆེན༔ བསྟན་དགྲ་བསྒྲལ་བའི་མན་ངག་གནམ་ལྕགས་ཀྱི་ཐོག་མདའ༔ འཆི་བསླུ་བླུ་དམར་གཏད་གཤིན་རྗེའི་གདོང་བཟློག༔ ས་གཅོད་གསེར་གྱི་མིག་གསལ༔ ཟིལ་གནོན་སེང་གེ་དཔལ་འབར༔ ཐོག་བབ་ཀླུ་ཚང་ཁྱུང་ཞུགས༔ ནད་དབབ་མེ་ཆུའི་འཁོར་ལོ༔ རོ་གཅོད་རྡོ་རྗེའི་རྩལ་སྦྱོང་༔ གསང་བ་དྲག་གཅོད་དམར་མོ༔ དམིགས་ཐུན་གནམ་ལྕགས་ཐོག་མདའ༔ དེ་ལ་སོགས་པའི་གཞན་ཡང་རྐང་གཉིས་པ་དང་རྐང་བཞི་པ་ལ་སོགས་པའི་འགྲོ་བ་རྣམས་དང་༔ ལོ་ཐོག་དང་བཅས་པ་ལ་སྤྱི་སྒོས་ཀྱི་གནོད་པ་བྱུང་བ་རྣམས་ལ་སོ་སོ་ཡི་སྒོ་ནས་སྲུང་བའི་ཐབས་སྣ་ཚོགས་མཛད་པའི་དགོས་དམིགས་དང་བཅས་པ་དེ་རྣམས་ལ་ནི་གནས་དང་དུས་ཀྱི་ངེས་པ་མེད་ཅིང་༔ ཞུ་བ་པོ་ལ་ཡང་ངེས་པ་མེད་ཅིང་རང་རང་གི་རྐྱེན་གྱིས་དེད་པ་རྣམས་ཡིན་པས་ཡི་གེ་པ་ལ་ཡང་ངེས་པ་མེད་དོ༔ བྱེ་བྲག་ཆུང་ངུ་ཁ་འཐོར་བ་འདི་རྣམས་ནི་གང་ཟག་བློ་རྨོངས་པ་དང་༔ གཞུང་མི་ཆུན་པ་དང་དབང་དང་རྗེས་གནང་དང་ལུང་ཙམ་ཡང་མ་ཐོབ་པས་ཟབ་ཆོས་གཞུང་ཆེན་པོ་རྣམས་ཉམས་སུ་ལེན་དུ་མི་བཏུབ་པ་ནི༔ གང་ཟག་རྐྱེན་གྱིས་དེད་པ་རྣམས་ཀྱི་སོ་སོའི་ངོས་སྐལ་གྱི་དམིགས་པ་དང་གདམས་ངག་སྐོར་རེ་ཙམ་ཡིན་པའི་ཕྱིར་དུ་ཁ་འཐོར་བ་ཞེས་ཟེར་རོ༔ ཁ་འཐོར་གྱི་དམིགས་པ་ཕལ་ཆེར་འགའ་ཞིག་ལ་ནི༔ ཆོས་ཀྱི་མིང་མི་འདོགས་པས་ཡི་གེ་ལ་ཡང་མ་ཐེབ་པ་མང་ཞིང་༔ འདི་ཙམ་ཡོད་ཅེས་གྲངས་ཀྱིས་ཆོད་པ་དཀའ་བས་གཅོད་ཁ་འཐོར་བ་ནི་ཤིང་བུ་དང་༔ རྡེའུ་དང་དྲོ་ཤུན་དང་རས་ལ་སོགས་པ་རྣམས་ལ་ཡང་བྲིས་ནས་བཏང་བས་ཐམས་ཅད་བརྗོད་པས་མཐའི་རྒྱ་མཚོ་དང་འདྲ་སྟེ༔ གྲངས་ཀྱིས་མི་རྙེད་ལ་འདིར་བགྲང་བ་རྣམས་ནི་ཁ་འཐོར་གྲགས་ཆེ་བ་ཡི་རགས་རྩིས་པ་ཙམ་ཡིན་ནོ༔

ཁ་འཐོར་གྱི་དམིགས་སྐོར་འགའ་ཞིག་ནི་མ་ཅིག་གིས་གཞན་ལས་ཐོས་པ་དང་གཞན་གྱི་ཆོས་ལ་ལྟོས་པ་གང་ཡང་མ་ཡིན་པས༔ མ་ཅིག་ཉིད་ཀྱི་ཐུགས་ལ་འཁྲུངས་པའི་མྱོང་ཆོས་རྣམས་ཡིན་པས་ཁ་འཐོར་ཉམས་ཀྱི་གཅོད་ཅེས་ཟེར་རོ༔ ཕུང་པོ་གཟན་དུ་བསྐྱུར་བའི་རྣམ་བཤད་ཆེན་མོ་དང་༔ དམ་ཚིག་ཉི་ཤུ་རྩ་གཅིག་པ་དང་ས་གཅོད་དང་༔ ཕཊ་ཆོས་སྐོར་གསུམ་དང་ལུས་ཚོགས་དང་བླ་མའི་རྣལ་འབྱོར་ཐུན་མོང་པ་དང་དྲུག་པོ་འདི་ནི༔ མ་ཅིག་གི་རྒྱུད་འཛིན་པ་ཐམས་ཅད་ཀྱི་ཐུན་མོང་གི་ཆོས་ཡིན་ལ་ཕུང་པོ་གཟན་བསྐྱུར་དང་༔ ཕཊ་རྐྱང་གཉིས་ནི་མ་ཅིག་ལ་གསོལ་བ་གདབ་ཚད་ཐམས་ཅད་ཀྱི་སྤྱི་ཆོས་ཆེན་མོ་ཡིན་ནོ༔ དེ་ལྟར་མ་ཅིག་གི་ཞལ་ནས་གསུངས་པའི་ཆོས་ཚན་རྣམས་གྲངས་སུ་བཅད་ན་སྔགས་ལུགས་ལ་ལྟོས་པའི་ཆོས་ཚན་བདུན༔ ཟུང་འཇུག་ལ་ལྟོས་པའི་སྡེ་ཚན་བཅྭོ་བརྒྱད༔ མདོ་ལུགས་ལ་ལྟོས་པའི་སྡེ་ཚན་ཉི་ཤུ༔ ཐམས་ཅད་ཀྱི་ཐུན་མོང་ལ་ལྟོས་པའི་སྡེ་ཚན་དྲུག་དང་༔ སྤྱིར་གྱི་ཆོས་སྡེ་ཚན་ལྔ་བཅུ་ང་བདུན་ཡོད་པར་སྣང་བ་ནི༔ མ་ཅིག་གི་ཞལ་ནས་གསུངས་པའི་ཆོས་སྤྱིའི་རྣམ་གྲངས་ཡིན་པས་ཆོས་སྡེ་ཚན་དེ་རྣམས་ལ་རེ་རེ་ལ་ཡང་རང་རང་གི་ལུགས་ཀྱི་ཆ་ལག་ཚང་བའི་མདའ་ཚད་ཀྱི་ཤོག་གུ་བཞི་བརྒྱ་རེ་བྱས་པའི་པོ་ཏི་བཞི་བཅུ་ཞེ་གཉིས་རེ་དང་༔ བཞི་བཅུ་རྩ་གཅིག་རེ་དང་༔ སུམ་ཅུ་རེ་དང་༔ ཉི་ཤུ་རེ་དང་༔ བཅྭོ་བརྒྱད་རེ་དང་༔ བཅུ་རེ་དང་༔བདུན་རེ་དང་༔ ལྔ་རེ་དང་༔ གསུམ་རེ་དང་མདོར་ན་པོ་ཏི་བརྒྱད་ཅུ་རྩ་བཞི་བ་ཚན་པ་གཉིས་བྱུང་བར་འདུག་པས༔

དེ་རྣམས་ནི་གཞུང་ཀྲི་ཀ་ཆེན་མོ་བཞི་ལ་ལྟོས་པའི་རགས་རྩིས་པ་རྣམས་ཡིན་པར་འདུག་གོ༔ ཁ་འཐོར་བ་ནི་གོང་དུ་བཤད་པ་ལྟར་འདིར་བགྲང་བས་གྲངས་ཀྱིས་མི་ལང་སྟེ༔ དཔེར་ན་རྟ་མོག་རོའི་སྤུ་དང་འདྲའོ༔ དེ་ཡང་རྟ་མོག་རོ་ཞེས་པ་ནི་ནམ་མཁའི་མཐའ་ལ་ཟེར་བ་ཡིན་པས༔ ནམ་མཁའི་མཐའ་ལ་ཆོད་པའི་དཔེ་མེད་པས་དེ་བཞིན་དུ་མ་ཅིག་གི་ཞལ་ནས་གསུངས་པའི་དམ་ཆོས་ཕྱག་རྒྱ་ཆེན་པོ་གཅོད་ཅེས་བྱ་བ་འདི་ཡི་མཐའ་ནི་རྙེད་པར་དཀའ་བར་སྣང་ངོ་༔ དེ་ལྟར་ཕུང་པོ་གཟན་དུ་བསྐྱུར་བའི་རྣམ་པར་བཤད་པ་བརྩམ་པར་མཛད་པ་དང་༔ ལ་སྟོད་འཕན་དྲུག་གི་ཉི་མ་སེང་གེ་འདུལ་བ་དང་༔ བྱང་རྨ་ཐང་གི་སྨྱོན་པ་རང་སྣང་བལ་པོ་ཡེ་ཤེས་སེང་གེ་འདུལ་བ་དང་༔ རྐང་པོའི་རྗེ་བཙུན་ཟིལ་ནོན་ཕོ་སྨྱོན་སེང་གེ་འདུལ་བ་དང་༔ གཅོད་ཁ་འཐོར་གྱི་དཔེ་ཆ་བརྩམས་པ་དང་༔ དམིགས་པ་མན་ངག་ཕྲན་བུ་རྣམས་མཛད་ཅིང་གཞན་ཕན་མཐའ་ཡས་པ་བསྒྲུབས་ནས་གདུལ་བྱ་སྐྱོང་བར་མཛད་པ་ནི༔ མ་ཅིག་དགུང་ལོ་ང་བདུན་ནས་དྲུག་ཅུ་རེ་དྲུག་བར་གྱིས་རྣམ་ཐར་ཏེ་རྣམ་གྲངས་བཅུ་བདུན་པའོ༔ སཱ་མཱ་ཡཱ༔

རྣམ་གྲངས་བཅོ་བརྒྱད་པ།

དེ་ནས་མ་ཅིག་དགུང་ལོ་དྲུག་ཅུ་རེ་དྲུག་བྱི་བ་ལོ་ཟླ་བ་བཞི་པའི་ཚེས་གཉིས་ལ༔ སྲས་ཆེ་བ་གྲུབ་པེ་མ་ཅིག་གི་མདུན་དུ་མཇལ་བ་ལ་ཟངས་རིར་བྱོན་པས༔ དེ་ཡང་སྲས་གྲུབ་པེ་ནི་དགུང་ལོ་བཞི་བཅུ་ཞེ་གཉིས་ཀྱི་དུས་སུ་ཁྲམ་པ་བཅུ་གཉིས་དང་འགྲོགས་ནས་འོང་སྟེ༔ ནུབ་ཆོས་ལུང་གི་ཡང་དགོན་རྩེ་འདུས་ཡང་དབེན་ཁྲ་མོ་ཞེས་བྱ་བ་ན༔ གཤིན་རྗེ་འཆར་ཁ་ནག་པོ་ལ་སྒྲུབ་པ་བྱེད་ནས་ནུས་པ་ཐོན་པའི་སྔགས་པ་མི་བཅུ་གཉིས་ཡོད་པ་ལ༔ གཏོར་ཆུ་འགེལ་བའི་གླང་བུ་ནག་པོ་གྲུས་ཚིགས་བཅུ་གཉིས་ལོན་པ་ཞིག་ཡོད་པས་ཟླ་བ་བཅུ་གཉིས་པའི་ཉི་ཤུ་གཉིས་ཀྱི་ནུབ་མོ་ལ་ར་དགྲ་གྲུབ་པེས་མགོ་བྱས་པའི་ཁྲམ་པ་མི་བཅུ་གཉིས་འོངས་ནས་གླང་བུ་འཕྲོག་ནས་འོང་སྟེ༔ ནུབ་ཆོས་ལུང་གི་ལུང་པའི་ཕུ་རུ་བསད་པས༔ དེའི་ཚེ་ན་གླང་བུས་འབུ་སྐད་ཆེན་པོ་བཏོན་པས་ས་འོག་ཏུ་ཡང་འབུ་སྐད་ཆེན་པོ་དི་རི་རི་གྲགས་པས༔ ཁྲམ་པ་རྣམས་ནི་བྲེད་ནས་འདར་ཞིང་སྔངས་བར་གྱུར་ཏོ༔ སྲས་གྲུབ་པེ་ཡང་ནི་སྙིང་རྗེ་ཚད་མེད་པ་ཞིག་ཐུགས་ལ་འཁྲུངས་སོ༔ དེར་ཁྲམ་པ་རྣམས་ནི་གླང་ཤས་རྐྱེན་བྱས་ཏེ༔ དེ་ཉིན་ནས་ནད་དང་རྐྱེན་ཞུགས་པས་ལྟས་ངན་སྣ་ཚོགས་པ་བྱུང་བས༔ ཟླ་བ་གཉིས་ཚུན་ལ་ཁྲམ་པ་མི་བཅུ་གཅིག་པོ་ཐམས་ཅད་ཤི་ནས་གཅིག་ཀྱང་མ་ལུས་པས་དེའི་ཤུལ་གྱི་མི་རྣམས་ཀྱང་བྲེད་ཅིང་སྔངས་བར་གྱུར་ཏོ༔ དེའི་ཚེ་ན་ར་དགྲ་གྲུབ་པེ་འཆི་མ་ཐུབ་པས་སྔགས་པ་རྣམས་ཀྱིས་ཀྱང་ར་དགྲ་གྲུབ་པེ་འདིར་ཁུག་ཅིག་ཟེར་ཞིང་ཐམས་ཅད་ཀྱིས་ཉིན་མཚན་མེད་པ་ལ་སྲུང་བ་དང་བཟློག་པ་ལ་འབད་པར་བྱས་སོ༔

དེ་ནས་སྲས་གྲུབ་པེས་རྩམ་པ་ཁལ་རྒྱབ་གཉིས་ཤ་མར་ཐུད་གསུམ་ཁལ་རྒྱབ་གཉིས༔ གཞན་ཡོ་བྱད་ཁལ་རྒྱབ་གཉིས་དང་༔ ཁལ་རྒྱབ་དྲུག་བཀལ་ནས་གཡོག་པོ་མི་གསུམ་དང་དཔོན་གཡོག་བཞི་བྱས་ནས་ཟངས་རི་མཁར་དམར་དུ་མ་ཅིག་གི་དྲུང་དུ་བྱོན་པས༔ དེའི་ནུབ་མོ་རྒྱན་ནེ་མའི་རྨི་ལམ་དུ་ན་རེ༔ ཀྱེ་མ་ཅིག་ལགས༔ མདང་བུད་མེད་དཀར་མོ་ཞིག་བྱུང་ནས་སྲས་གྲུབ་པེ་འོང་ཞིང་ཡོད་ཟེར་བར་རྨིས་ཟེར་བས་མ་ཅིག་གི་ཞལ་ནས༔ བསྟན་དགྲ་དམ་ཉམས་དེ་ནངས་པར་འོང་བར་ཡོད་པས་ཁྱེད་རྣམས་གཅིག་ཀྱང་བླ་དབྱེ་མ་བལྟ༔ ཁལ་མ་འཕོག༔ རོགས་སུས་མ་བྱེད་གསུངས་པས༔ དཔལ་ལྡན་རྒྱན་གྱིས་ཁལ་མ་ཡོད་པ་ཨེ་ཡིན་ལགས་ཞུས་པས༔ མ་ཅིག་གི་ཞལ་ནས་ཁལ་མ་དྲུག་ཡོད༔ མི་རྐང་གཤར་བཞི་ཡོད་པས་ཁྱེད་རྣམས་སུ་ཡང་དེར་མ་འགྲོ༔ གཞན་ཟངས་རི་བ་རྣམས་ལ་ཡང་དེ་ལྟར་དུ་སྨྲོས་ཤིག་གསུངས༔ དེ་ནས་ཉི་མ་རྩེ་དྲོས་ཙམ་ལ་སྲས་གྲུབ་པེ་དཔོན་གཡོག་རྣམས་ཕྱི་ནས་བྱུང་སྟེ་ཞག་མ་བདུན་གྱིས་བར་ལ་ཟངས་རི་བ་རྣམས་སུས་ཀྱང་མ་བལྟས་སོ༔ དེ་ནས་ཞག་བདུན་གྱི་ནངས་པར་སྲས་གྲུབ་པེ་ཡང་མ་ཅིག་གི་མདུན་དུ་མཇལ་བས་ཕྱག་ལན་གསུམ་འཚལ་ནས་ཞུས་པ༔ ཀྱེ་མ་ཅིག་ལགས༔ སྔར་ཁྲམ་པ་རྣམས་དང་འགྲོགས་ནས་སོང་སྟེ༔ སྔགས་པ་རྣམས་ཀྱི་གླང་བརྐུས་ནས་ཟོས་རབས་དང་༔ སྔགས་པ་རྣམས་ཀྱིས་མཐུ་བྱས་ནས་རོགས་ཟླ་བོ་རྣམས་ཤི་རབས་དང་༔ ཁོ་ལ་ཡང་ལྟས་ངན་པ་བྱུང་ལུགས་ལ་སོགས་པ་རྣམས་རྒྱས་པར་ཞུས་པས༔ མ་ཅིག་གི་ཞལ་ནས་ན་རེ༔ ར་དགྲ་ཁྱོད་ཤི་འཕྱིས་པ་ཡིན༔ འོན་ཀྱང་འདིར་ཕྱིན་ནས་འདུག་པས་ད་འོག་ཁང་དུ་སོང་ལ་གནས་སྤྱི་ལ་སྐོར་བ་གྱིས༔ ནུབ་མོ་གྲྭ་ཁང་དུ་ཉོལ་ལ་ཞག་བདུན་གྱི་བར་ལ་འདིར་མ་འོང་དང་དེ་ནས་དམིགས་པ་བསྟན་གསུངས་པ་དང་༔ གྲུབ་པེས་དེ་ལྟར་ལགས་སོ་ཞུས་ནས་འོག་ཁང་དུ་བྱོན་ནས་དཔོན་གཡོག་བཞི་པོས་ཉིན་མོ་གནས་ལ་སྐོར་བ་བྱས༔ ནུབ་མོ་གྲྭ་ཁང་དུ་ཉལ་བ་བྱས་ཤིང་བཞུགས་སོ༔

དེ་ནས་བྱི་བ་ལོ་དབྱར་ཟླ་ར་བའི་ཚེས་བཅོ་ལྔའི་ནངས་སྔ་མོ་ལ་མ་ཅིག་གི་ཞལ་ནས་བུ་མོ་བཞི་ལ་གསུངས་པ༔ ཁྱེད་བུ་མོ་བཞི་པོས་གནས་ཁང་འདི་ལ་ཕྱག་དར་ལེགས་པོར་གྱིས༔ མཆོད་པའི་ཡོ་བྱད་དང་ཚོགས་འཁོར་རྒྱས་པར་ཤོམས་ཚོགས་ཀྱི་ཆོ་ག་འདོན་མི་བཞི་བཅུ་ཞེ་གཉིས་བྱོན་གྱིས༔ གཞན་མ་རྣམས་ཀྱང་ཚོགས་གྲལ་དུ་བྱོན་གྱིས་ལ་བརྡ་ཐོང་གསུངས༔ དེ་ནས་སྲས་གྲུབ་པེ་དཔོན་གཡོག་བཞི་ལ་མདོ་ལུགས་ཀྱི་ཏིང་ངེ་འཛིན་གྱི་དབང་བཞི་གཏོར་དབང་དང་བཅས་པ་རྣམས་མ་ལུས་པ་གནང་ནས་གྲུབ་པེས་ཁལ་མ་དྲུག་པོ་རྒྱབ་དང་བཅས་པ་དང་༔ གཞན་ཡང་དངོས་པོ་གང་ཡོད་རྣམས་ཟངས་རི་བ་རྣམས་ལ་གཏོང་སྒོ་བྱས༔ བུ་ཚ་གསུམ་པོ་ཡང་སྟོང་སྡེ་ངག་གི་དབང་ཕྱུག་ལ་གཏད་ནས་སློབ་གཉེར་ལ་འཇུག་པར་བྱས་སོ༔ དེ་ནས་སྲས་གྲུབ་པེ་ལ་དྲག་པོའི་ངན་སྔགས་བཟློག་པའི་དམིགས་པ་བསྟན་པས་ཞག་བཅུ་གཉིས་ནས་དམིགས་པ་ཆུན་པས༔ དེ་སྔར་གྱི་གླང་བརྐུས་པའི་མལ༔ སྔགས་པ་རྣམས་ཀྱི་ཐད་དུ་སོང་ནས་དམིགས་པ་གཅུན་པས་ཟླ་བ་གཅིག་དང་ཞག་བཅུ་གཉིས་སོང་ནས་སྔགས་པའི་དཔོན་དེ་ཀུམ་མོ༔ དེ་ནས་ཞག་གཉིས་རེ་སོང་ནས་སྔགས་པ་རེ་རེ་ཀུམ་སྟེ༔ ཟླ་བ་གཉིས་ནས་སྔགས་པ་བཅུ་གཉིས་པོ་ཐམས་ཅད་ཀུམ་པས་སྔགས་པའི་དབེན་ཁང་སྟོང་པར་གྱུར་ཏོ༔

དེ་ནས་གྲུབ་པེ་ཟངས་རིར་བྱོན་པས་རྒྱལ་ཁམས་ཀྱི་མི་ཐམས་ཅད་ཀྱིས་མཐུ་ཆེན་ར་དགྲ་ཟེར་བའི་གྲག་པ་ཆེན་པོ་མདོ་དབུས་ཁམས་གསུམ་ལ་ཁྱབ་པས༔ གྲུབ་པེ་མ་ཅིག་གི་དྲུང་དུ་ཕྱིན་ནས་གཅོད་དྲག་སྔགས་རིང་མོ་ཉམས་སུ་བླང་ཚུལ་རྣམས་ཞིབ་ཏུ་ཞུས་པས༔ མ་ཅིག་གི་ཞལ་ནས་དམིགས་པ་ཧ་ཅང་དྲག་ཐལ་བ་ཡིན་གསུངས་ནས་དེ་ནས་སྲས་གྲུབ་པེ་ལ་འདི་གསུངས༔ ད་ཁྱོད་ཀྱིས་དྲག་སྔགས་རིང་མོའི་དམིགས་པ་ངན་པ་རྣམས་ཞི་བར་བྱེད་པའི་ཕྱིར་དུ་ཞི་བྱེད་དྲག་སྔགས་རིང་མོ་ཞེས་བྱ་བའི་དམིགས་པ་འདི་གཅུན་ལ༔ སྔགས་པ་སྡིག་ཅན་རྣམས་ཀྱི་སྡིག་པ་དག་པར་གྱིས་གསུངས་ནས་ཞི་བྱེད་དྲག་སྔགས་རིང་མོ་ཞེས་བྱ་བའི་དམིགས་པ་རྣམས་གནང་ནས༔ ཟངས་རིའི་འོག་ཏུ་དུར་ཁྲོད་རོ་གླིང་བྱ་བ་ཞིག་ཡོད་པ་དེར་བཞུགས་ནས་དམིགས་པ་གཅུན་པས༔ ཟླ་བ་གཉིས་ནས་སྔགས་པ་སྡིག་ཆེན་རྣམས་ཀྱི་སྡིག་པ་དག་ནས་དག་པ་མཁའ་སྤྱོད་དུ་དྲངས་བའི་རྟགས་མངོན་སུམ་དུ་བྱུང་ངོ་༔ གྲུབ་པེ་ཁོ་རང་ལ་ཡང་ཉམས་དང་རྟོགས་པ་ཁྱད་པར་ཅན་ཐུགས་ལ་འཁྲུངས་པས༔ དེ་ནས་མ་ཅིག་གི་མདུན་དུ་ཕྱིན་ནས་དེ་ལྟར་ལོ་རྒྱུས་ཞིབ་ཏུ་ཞུས་པས་མ་ཅིག་གི་ཞལ་ནས༔ དེ་ལྟར་བྱུང་བའི་ངོ་མཚར་ཆེ་གསུངས་ནས་ཟངས་རི་བ་རྣམས་བསྡུས་ནས་ཆོས་སྟོན་རྒྱ་ཆེན་པོ་མཛད་དོ༔ དེ་ནས་སྲས་གྲུབ་པེ་ལ་ཁྱིམ་པའི་ལུགས་ཀྱི་དགེ་བསྙེན་གྱི་སྡོམ་པ་ཕོག་ནས༔ ད་ནི་གྲུབ་པེ་ཁྱོད་དགྲ་སྔགས་པ་ལས་རྒྱལ་ཞིང་༔ བདུད་བཞི་ལས་ཀྱང་རྒྱལ་བ་ཞིག་འོང་བ་ཡོད་པས་ཁྱོད་ལ་རྒྱལ་བ་མིང་དུ་འདོགས་དགོས་པ་དང་གཅིག༔ རང་གཞན་གཉིས་ཀའི་དོན་འབད་མེད་ལྷུན་གྲུབ་ཏུ་འབྱུང་བ་ཞིག་འོང་བར་ཡོད་པས༔ ཁྱོད་ལ་དེ་རིང་ནས་རྒྱལ་བ་དོན་འགྲུབ་མིང་དུ་བཏགས་དགོས་དང་རྟེན་འབྲེལ་འགྲིགས་ཤིང་༔ མིང་འདི་ཐོས་པ་ཙམ་གྱིས་ཀྱང་སེམས་ཅན་ལ་ཕན་ཐོགས་མཐའ་ཡས་པ་འོང་བར་ཡོད་པས་དེ་རིང་ཕྱིན་ཆད་ནས་རྒྱལ་བ་དོན་འགྲུབ་མིང་དུ་ཐོགས་ཤིག་གསུངས་པས༔

དེ་ཕྱིན་ཆད་ནས་འཛམ་བུའི་གླིང་དུ་སྲས་མཆོག་རྒྱལ་བ་དོན་འགྲུབ་ཅེས་བྱ་བར་གྲགས་སོ༔ དེ་ནས་སྲས་རྒྱལ་བ་དོན་འགྲུབ་ལ་བཀའ་བརྒྱུད་བླ་མའི་གནས་འགྱུར་གྱི་བྱིན་རླབས་དབང་མོ་ཆེ་རྒྱས་པར་མཛད༔ བཀའ་བརྒྱུད་དོན་གྱི་མན་ངག་གི་སྙན་བརྒྱུད་ཀྱི་ཁུངས་ཐམས་ཅན་བཀྲོལ་ནས་གདམས་པ་ཐམས་ཅད་མ་ལུས་པར་གནང་ནས་གསུངས་པ་ད་ཁྱོད་རྒྱལ་བ་དོན་འགྲུབ་ཀྱིས་ང་ལ་དད་པ་རྩོལ་མེད་དུ་ཐོབ་ཅིང་༔ དེ་རིང་ཕྱིན་ཆད་ནས་ངའི་བསྟན་པ་ལ་འཇུག་པ་ཡིན་པས་ངའི་ཆོས་ལུགས་ཀྱི་བསླབ་བྱ་དང་དམ་ཚིག་ཉི་ཤུ་རྩ་གཅིག་པ་རྣམས་བསྲུང་དགོས་པས་ངས་ཁྱོད་ལ་བསླབ་བྱ་རྣམས་བཤད་ཙ༔ ཁྱེད་སྟོང་སྡེ་ངག་གི་དབང་ཕྱུག་དང་གྲོལ་སྡེ་རྒྱལ་བའི་འབྱུང་གནས་གཉིས་ཀྱིས་ཡི་གེ་ལ་ཐོབ་ལ་བྱིན་མཛོད་དང་༔ ཁོས་ཡི་གེ་མི་ཤེས་ཀྱང་ཟླ་བོ་རྣམས་ལ་འདོན་དུ་འཇུག་པས་ཁོ་ལ་གསལ་འདེབས་འོང་བ་ཡིན་གསུངས་ནས་དམ་ཚིག་ཉི་ཤུ་རྩ་གཅིག་པའི་བསླབ་བྱ་རྣམས་རྒྱས་པར་བཤད་ནས༔ ཡི་གེ་ལ་བཀོད་ནས་སྲས་རྒྱལ་བ་དོན་འགྲུབ་ལ་གཏད་པས་སྲས་ཀྱིས་ཤིན་ཏུ་གཅེས་པར་མཛད་ནས་ཐུགས་ཉམས་སུ་བཞེས་པའོ༔ དེ་ལྟར་མདོ་ལུགས་ཞེས་སམ་ཕ་རོལ་དུ་ཕྱིན་པ་དང་མདོ་སྔགས་ཟུང་གི་གདམས་པ་ཐམས་ཅད་མ་ལུས་པར་ཐུགས་སུ་ཆུད་པར་མཛད་དེ༔ དེ་ནས་མ་ཅིག་གི་ཞལ་ནས་རྒྱལ་བ་དོན་འགྲུབ་ཁྱོད་ཀྱིས་ད་ནི་སྒྲུབ་པ་ཞིག་གྱིས་གསུངས་པས༔

དེ་ནས་རྒྱལ་བ་དོན་འགྲུབ་ཀྱིས་ནུབ་ཆོས་ལུང་གི་པདྨ་༔ སྔར་གླང་བསད་པའི་མལ་དུ་སོང་ནས་གཞིའི་དམ་ཚིག་དྲུག་གི་གདམས་པ་རྣམས་ཉམས་སུ་བླངས་ནས་ལོ་གཅིག་བཞུགས༔ གླང་ལུང་གི་སྐད་དུ་ལམ་གྱི་དམ་ཚིག་བཅུ་དང་སྦྱར་ནས་ལོ་གཅིག་བཞུགས༔ གླང་ལུང་གི་ཕུག་ཏུ་འབྲས་བུའི་དམ་ཚིག་ལྔ་དང་སྦྱར་ནས་ལོ་གཅིག་བཞུགས༔ ནུབ་ཆོས་ལུང་དུ་ལོ་གསུམ་བཞུགས་པ་དང་༔ སྔར་མ་ཅིག་གི་དྲུང་དུ་ལོ་གཅིག་གཉིས་བཞུགས་པ་དང་ལོ་ལྔ་སྟེ༔ ལོ་བཞི་བཅུ་ཞེ་བདུན་ནས་གྲུབ་པ་ཐོབ་སྟེ༔ ནང་དུ་ཆོས་ཉིད་ཀྱི་བདེན་པ་མངོན་སུམ་དུ་མཐོང་༔ ཐུགས་མཁྱེན་པ་གཉིས་ལ་ཐོགས་པ་མི་མངའ་བར་ངག་རྡོ་རྗེའི་གླུ་མཛོད་རྡོལ་ནས་འཆད་རྩོད་རྩོམ་གསུམ་ལ་ཐོགས་པ་མི་མངའ་བར༔ ཕྱི་རུ་སྐུ་ནི་དག་སྣང་སྒྱུ་མ་ལྟ་བུར་གྱུར་ཅིང་༔ ཡུལ་སྣང་ཐམས་ཅད་དག་སྣང་བདེན་མེད་སྟོང་པའི་གཟུགས་བརྙན་དུ་ཤར་ནས་རི་བྲག་ཆུ་གསུམ་ལ་ཐོགས་པ་མེད་པར་ཟང་ཐལ་དུ་འགྲོ་ནུས་པ་ལ་སོགས་པའི་གྲུབ་རྩལ་མཐའ་ཡས་པ་སྟོན་པའི་ཡོན་ཏན་གྱི་སྙན་པ་དང་གྲགས་པ་ནི་རྩང་དབུས་ཁམས་གསུམ་ལ་སོགས་པ་འཛམ་བུའི་གླིང་དུ་འབྲུག་ལྟར་དུ་ཁྱབ་ཅིང་བཟང་དགུའི་གཏུག་ས༔ ངན་དགུའི་རྟེན་གནས༔ འགྲོ་བ་མཐོང་ཐོས་འདྲེན་པའི་འདྲེན་མཆོག་དམ་པ་དཔག་ཏུ་མེད་པར་གྱུར་ཏོ༔

དེ་ནས་རྒྱལ་བ་དོན་འགྲུབ་ཀྱིས་གྲུབ་པ་ཐོབ་པའི་དགའ་སྟོན་ཆེན་པོ་བྱས་པ་ལ༔ མ་ཅིག་ནུབ་ཆོས་ལུང་དུ་བྱོན་ནས་སྦྲུལ་ལོ་ཟླ་བ་འབྲིང་པོའི་ཚེས་གཅིག་ནས་དབྱར་ཟླ་འབྲིང་པོའི་ཚེས་བཅུ་དྲུག་གི་བར་དུ་ཚོགས་འཁོར་རྒྱ་ཆེན་པོ་མཛད་དེ༔ བལ་པོ་ཚུན་ཆད་མངའ་རིས་མན་ཆད་ཀོང་པོ་ཡན་ཆད་ཀྱི་མ་ཅིག་གི་བུ་སློབ་རྣམས་ལ་དེར་མ་འདུས་པ་ནི་གང་ཡང་མེད་པ་ལ༔ སྤྱིར་ཁྲོམ་ཚོགས་འབུམ་ཁྲག་བཞི་ལྷག་ཙམ་འདུས་ནས་འདུག༔ སྒོས་སུ་ཡང་མ་ཅིག་གི་རྒྱུད་འཛིན་དངོས་ལ་སྟོང་དང་ལྔ་བརྒྱ་དང་སུམ་ཅུ་ཙམ་བྱུང་བའི་ནང་ནས་ཆོད་ཚད་ཆེན་པོ་ཞེས་སམ༔ ས་བརྒྱད་པ་ཐོབ་པའི་རྣལ་འབྱོར་པ་བཞི་འདུག༔ ཆོད་ཚད་འབྲིང་པོ་ཞེས་སམ་ས་དྲུག་པ་ཐོབ་པའི་རྣལ་འབྱོར་པ་བཅུ་བཞི༔ ཆོད་ཚད་ཆུང་ངུ་ཞེས་སམ་ས་གཅིག་པ་ཐོབ་པའི་རྣལ་འབྱོར་པ་དྲུག་ཅུ་རེ་བཞི་འདུག་པ་དང་༔ རྣལ་འབྱོར་པ་བརྒྱད་ཅུ་གྱ་གསུམ་དང་སྲས་མོ་རྒྱན་བཞི་ལ་སོགས་པའི་བུ་སློབ་ལ་བུད་མེད་མཐོང་ལམ་ཐོབ་པ་ཉི་ཤུ་རྩ་དྲུག་དང་༔ གྲུབ་ཐོབ་ཕོ་མོ་བརྒྱ་དང་བརྒྱད་འདུག་པ་ལ༔

མ་ཅིག་ཡུམ་སྲས་གྲྭ་སློབ་རྣམས་ཤིན་ཏུ་ཚོགས་པ་རྒྱས་པའི་ཚེ༔ སྲས་རྒྱལ་བ་དོན་འགྲུབ་ཀྱིས་རྩལ་བསྟན་པ་ནི༔ དཔྱིད་ཟླ་ཐ་ཆུང་གི་ཚེས་བཅོ་ལྔའི་ཉི་མ་ཕྱེད་ཡོལ་ཙམ་དུ་མེ་ཏོག་པདྨ་དཀར་པོ་འདབ་མ་བརྒྱད་པ་ཁྲུ་སྐོར་ཙམ་ལ༔ ཡུ་བ་ནི་སྡོང་པོ་མི་ལུས་ཙམ་ཡོད་པ་བརྒྱ་བར་སྤྲུལ་ནས༔ མེ་ཏོག་པདྨ་རེ་རེའི་སྟེང་དུ་སྲས་རྒྱལ་བ་དོན་འགྲུབ་ཡང་ཁོང་དང་འདྲ་བ་བརྒྱ་སྤྲུལ་ནས་བཞུགས༔ དེའི་དབུ་ཐོག་ཏུ་འཕགས་པ་སྤྱན་རས་གཟིགས་དབང་ཕྱུག་ཞལ་གཅིག་ཕྱག་བཞི་པ་བརྒྱར་སྤྲུལ་ནས་བཞུགས༔ དེའི་དབུ་ཐོག་ཏུ་སངས་རྒྱས་འོད་དཔག་མེད་བརྒྱར་སྤྲུལ་ནས་བཞུགས་པར་མཛད་དེ༔ དེ་ལ་ལས་དག་པ་རྣམས་ཀྱིས་མེ་ཏོག་དང་རྒྱལ་བ་དོན་འགྲུབ་བརྒྱ་པོ་ལྷ་དང་བཅས་པ་རྣམས་ཅི་ལྟ་བ་བཞིན་དུ་མཐོང་ངོ་༔ ཡང་ལ་ལས་ལྷ་ཚོགས་རྣམས་མ་མཐོང་༔ མེ་ཏོག་བརྒྱ་པོ་དང་རྒྱལ་བ་དོན་འགྲུབ་བརྒྱ་པོ་རྣམས་མཐོང་སྟེ༔ རྒྱལ་བ་དོན་འགྲུབ་བརྒྱ་པོ་མཐོང་༔ ཡང་ལ་ལས་རྒྱལ་བ་དོན་འགྲུབ་བརྒྱ་པོ་ལ་སོགས་རྣམས་ཅི་ཡང་མ་མཐོང་སྟེ༔ རྒྱལ་བ་དོན་འགྲུབ་ཁོ་རང་གཅིག་པོ་མཐོང་༔ ཡང་ལ་ལས་འོད་ལྷོ་འུར་འདྲ་བས་བསྒྲིབས་ནས་ཅི་ཡང་མ་མཐོང་བ་ལ་སོགས་པའི༔ མཐོང་ལུགས་མི་འདྲ་བ་སྣ་ཚོགས་དུ་མ་བྱུང་ཞིང་སྲས་རྒྱལ་བ་དོན་འགྲུབ་ཀྱིས་གྲུབ་རྩལ་བསྟན་བའི་སྙན་གྲགས་ནི་འབྲུག་ལྟར་དུ་ཁྱབ་ནས་རྩང་དབུས་ཁམས་གསུམ་རྒྱ་བོད་ཐམས་ཅད་ཀྱིས་སངས་རྒྱས་དངོས་སུ་བྱོན་པ་ཙམ་གྱི་འདུ་ཤེས་དང་༔ དད་པ་རྩོལ་མེད་དུ་སྐྱེས་སོ༔

དེ་ལྟར་སྲས་མཆོག་རྒྱལ་བ་དོན་འགྲུབ་ཀྱིས་ལྷ་ཇོ་བོ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཞལ་གཅིག་ཕྱག་བཞི་པ་དུས་རྒྱུན་དུ་བསྒོམས་པས༔ སྤྱན་རས་གཟིགས་ལ་གྲུབ་པ་ཐོབ་ནས༔ ཉིན་ཞག་ཕྲུགས་གཅིག་ལ་ཐུན་བརྒྱད་དུ༔ ཐུན་རེ་ལ་ཡང་ཡི་གེ་དྲུག་པ་སྟོང་ཚོ་ལྔ་རེ་མ་ཆག་པར་འདོན་པའི་དམ་ཚིག་མ་ཅིག་གི་མདུན་དུ་ཁས་བླངས་ནས་མ་ཅིག་གི་དམ་ཚིག་ཉི་ཤུ་རྩ་གཅིག་པའི་བསླབ་བྱ་རྣམས་གསུངས་པ་ལ༔ སེལ་མ་ཞུགས་པར་མཛོད་གསུངས་པས༔ སྲས་ཀྱིས་ཀྱང་དེ་ལྟར་བཀའ་བཞིན་དུ་བསྒྲུབ་པར་མཛད་དོ༔ དེ་ནས་ཚེས་པ་བཅྭོ་བརྒྱད་ནས་ཚོགས་པ་སྤྱི་རྣམས་ཀྱང་སོ་སོར་བྱེར་ཏེ༔ མ་ཅིག་གི་རྒྱུད་འཛིན་སློབ་མ་རྣམས་ལམ་དུ་ཞུགས་ནས་འདུག་པས་སྲས་རྒྱལ་བ་དོན་འགྲུབ་ཀྱིས་མ་ཅིག་ལ་འདི་སྐད་ཅེས་སོ༔ ཀྱེ་མ་ཅིག་ལགས༔ རང་རེ་མ་ཅིག་གི་དེ་སྔ་ཕན་ཆད་ཀྱི་བུ་སློབ་རྣམས་ལ་གྲུབ་ཐོབ་ཕོ་མོ་འདི་ཙམ་ཞལ་འཛོམ་པའི་ངོ་མཚར་ཆེ་ཞིང་དགེ་བ་ལགས༔ ད་འདི་ནས་སོ་སོར་གྱེས་པའི་རྗེས་ལ་འདི་ལྟར་ཐམས་ཅད་ཞལ་འཛོམ་པ་ཡང་དཀའ་ལ༔ ཡུམ་ཉིད་ཀྱང་སྐུ་ནས་ལ་བྱོན་ཞིང་འགྲོ་དོན་ཡང་རྫོགས་ལ་ཁད་ཡིན་པས༔ ད་ལྟ་ཐམས་ཅད་ཞལ་འཛོམས་པ་འདི་ནས་བཟུང་སྟེ་མཐར་ཐུག་བྱང་ཆུབ་ཆེན་པོ་མ་ཐོབ་ཀྱི་བར་དུ་ཡུམ་ཉིད་ཀྱིས་ཐུགས་རྗེས་ངེས་པར་དུ་འཛིན་པའི་སྨོན་ལམ་དང་ཐུགས་བཞེས་མཛད་པར་ཞུ༔ ད་རང་རེ་མ་ཅིག་གི་བསྟན་པའི་མཐར་མུ་སྟེགས་ཀྱིས་དམོད་པ་བོར་བས་ཆོས་ལོག་ཅིག་འབྱུང་གསུངས་པ་དེ་ལ་ད་ལྟ་རང་རེ་ཡུམ་སྲས་རྣམས་ཀྱིས་དཀོན་མཆོག་གསུམ་གྱི་བདེན་པ་བདར་བ་དང་༔ སྨོན་ལམ་གྱི་སྟོབས་བརྗོད་ན་བཟློག་པར་ནུས་སམ༔

དེ་ལྟར་བཟློག་པར་མི་ནུས་ན༔ མ་འོངས་ཆོས་ལོག་འབྱུང་བའི་དུས་སུ༔ ད་ལྟའི་ཁུ་སྒོམ་ཆོས་ཀྱི་སེང་གེ་འདི་འབྱུང་གསུངས་པས༔ ཁུ་སྒོམ་ཆོས་ཀྱི་སེང་གེ་ཡུལ་གང་དུ་འབྱུང་༔ ཚུལ་ཅི་ལྟ་བུར་འབྱུང་༔ སྤྱོད་ལམ་ཇི་ལྟར་བྱེད་ནས་འབྱོན༔ ཐབས་གང་ལྟར་དུ་བྱས་ནས་ཆོས་ལོག་སེལ་དགོས་པ་རྣམས་དང་༔ ཆོས་ལོག་འབྱུང་བའི་དུས་སུ༔ ཆོས་ལོག་སེལ་བའི་དཔེ་ཆ་མི་འཆུག་པ་ཅི་ལྟ་བུ་འབྱུང་བ་དང་༔ ཕྱག་རྒྱ་ཆེན་པོ་གཅོད་ཅེས་བྱ་བ་འདི་ལ་སྤུ་རིས་སུ་དབྱེ་ན་གྲངས་དང་མིང་ཅི་ཙམ་ཞིག་ཡོད་པ་དང་༔ ད་ལྟ་འདིར་བཞུགས་པའི་བུ་ཆེན་རྣམས་ནི་ཞིང་ཁམས་གང་དུ་སྐྱེས་ནས༔ འགྲོ་དོན་ཅི་ལྟ་བུ་འབྱུང་ཚུལ་དང་༔ དེ་རྣམས་རང་རེ་ཡུམ་སྲས་རྣམས་ཞལ་འཛོམ་པའི་གང་འདིར་གསལ་པོར་ཐུགས་ལ་འདོགས་པར་ཞུ་ཞེས་ཞུས་པས༔ དེ་ནས་མ་ཅིག་གིས་སྤྱན་གསུམ་ནམ་མཁའ་ལ་ཧྲིག་གེར་གཟིགས་ནས་སྐུ་འདོམ་གང་ཙམ་གྱི་ནམ་མཁའ་ལ་འཕགས་ནས་བཞུགས་པ་དང་༔ ཞལ་འཛུམ་པར་མཛད་ནས་འདི་སྐད་གསུངས༔ བུ་སྦྱོང་བའི་ལས་སད་སྐལ་བ་ཅན༔ སྐྱེས་བུ་དད་བརྩོན་རིག་པ་ཅན༔ ཁྱོད་ཀྱིས་དྲི་བ་བྱེད་ལུགས་ལེགས༔ ཇི་ལྟར་ཁྱོད་ཀྱིས་ཟེར་བ་བཞིན༔ ངས་ཀྱང་འགྲོ་དོན་རྫོགས་ལ་ཁད༔ ད་ནི་ཡུན་རིང་མི་སྡོད་པར༔ དག་པ་མཁའ་སྤྱོད་གནས་སུ་འགྲོ༔ ཁྱེད་བུ་སློབ་གྲྭ་འཁོར་ཐམས་ཅད་ཀུན༔ ད་ལན་འདི་འདྲ་འཛོམ་པ་དཀའ༔ བཀྲ་ཤིས་སྨོན་ལམ་འདེབས་པ་དང་༔ མ་འོངས་ཆོས་ཁྲིམས་འཆུག་རྟགས་རྣམས༔ ལུང་བསྟན་བཤད་པའི་དུས་རྣམས་ཀྱང་༔ ད་ལྟ་ཡིན་པས་ལེགས་པར་ཉོན༔ ངས་ཀྱང་རྒྱས་པར་བཤད་པར་བྱ༔ ཞེས་གསུངས་ནས་ཁྱེད་བུ་སློབ་རྣམས་ཀྱང་ལེགས་པར་ཉོན་དང་ངས་ཆོས་སྤྱོད་དང་ཉམས་ལེན་གྱི་རིམ་པ་ནི་འདི་ལྟར་བྱེད་པ་ཡིན་ནོ༔ ཉིན་ཞག་ཕྲུགས་གཅིག་ལ༔ ཐུན་བརྒྱད་དམ་དྲུག་ཏུ་རྣམ་གྲངས་བཅུ་མ་ཆག་པར་བྱ་བ་ནི་འདི་ལྟར་བྱེད་པ་ཡིན་པས༔ ཁྱེད་ང་ཡིས་རྗེས་སུ་འཇུག་པའི་བུ་སློབ་རྣམས་ཀྱང་འདི་ལྟར་མཛོད་ཅིག༔ འཆི་བ་མི་རྟག་པ་ཐམས་ཅད་དེ་བཞིན་རང་ཡིན་ནོ་སྙམ་པ་དང་༔ ལས་དགེ་སྡིག་གཉིས་ལ་རྩིས་བགྲང་བྱེད་པ་དང་༔ འཁོར་བ་སྤྱི་དང་བྱེ་བྲག་དང་ཁྱད་པར་ངན་སོང་གསུམ་གྱི་སྡུག་བསྔལ་མཐོང་བར་བྱེད་པ་དང་༔ དེ་རྣམས་ལ་དུས་རྒྱུན་དུ་བསམ་བློ་ཡང་ཡང་དུ་གཏང་བར་བྱེད་པ་དང་གཅིག༔ གཉན་ས་རི་ཁྲོད་དུ་དུས་རྟག་ཏུ་འདུག་ཅིང་ལུས་ཀྱིས་མཆོད་སྦྱིན་བྱེད་པ་དང་༔ ཚེ་འདིའི་བྱ་བ་ལ་སྐད་ཅིག་ཀྱང་བློ་མི་འཇུག་པར་སེམས་པ་དང་གཉིས༔ བྱམས་སྙིང་རྗེ་བྱང་ཆུབ་ཀྱི་སེམས་གསུམ་དང་སྐད་ཅིག་ཀྱང་མི་འབྲལ་བར་སེམས་པ་དང་གསུམ༔ བླ་མའི་རྣལ་འབྱོར་ཟབ་ལམ་མ་ལ་ཐུན་དྲུག་དང་ནམ་མཁའ་གོ་འབྱེད་རྫས་གྲུབ་འཕོ་བ་ལ་ཐུན་ཉེར་གཅིག་རེ་བྱེད་པ་དང་བཞི༔ ཡི་དམ་ལྷའི་སྙིང་པོ་བརྒྱ་རྩ་རེ་འདོན་པ་དང་༔ ཡི་གེ་དྲུག་པ་བརྒྱ་རྩ་རེ་འདོན་པ་དང་༔ རླུང་འགྲོ་འོང་གནས་གསུམ་ཡི་གེ་གསུམ་གྱིས་བཟླས་པ་བྱེད་པ་དང་ལྔ༔ འཇམ་དཔལ་གྱི་གཏོར་མ་དང་ཕ་རོལ་དུ་ཕྱིན་པའི་གཏོར་མ་དང་༔ གཏོར་མ་བརྒྱ་རྩ་ལྷག་མ་དང་བཅས་པ་ལ༔ ཉིན་རེ་བཞིན་དུ་ཚར་གསུམ་རེ་བཏང་བ་དང་དྲུག༔ ཟླ་བ་རེ་རེ་བཞིན་དུ་ཚེས་གཅིག་དང་༔ ཚེས་བཅུ་དང་༔ ཉི་ཤུ་ལྔ་དང་༔ བཅུ་བཞི་དང་༔ བཅྭོ་བརྒྱད་དང་༔ གནམ་གང་དང་༔ ཚེས་བརྒྱད་དང་༔ ཚེས་བཅོ་ལྔ་དང་བརྒྱད་པོ་འདི་ལ་ཤ་ཆང་གཙང་མ་དང་༔ རྩམ་པ་གཙང་མ་དང་དཀར་གསུམ་མངར་ལ་སོགས་པའི་བྱེ་བྲག་ཚོགས་ཆེན་ལ་ཚོགས་འཁོར་རྒྱས་པ་རེ་བྱེད་པ་དང་༔ ཞི་བའི་སྦྱིན་སྲེག་རྒྱས་པ་རེ་བྱེད་པ་དང་༔ མར་མེ་བརྒྱ་རེ་དང་༔ ཐ་ན་ཡང་དེ་རྣམས་ལ་ཚན་པ་བདུན་རེ་བྱེད་པ་དང་བདུན༔ ཉིན་རེ་བཞིན་དུ་ལུས་ཚོགས་ཚར་བདུན་རེ་དང་༔ ཕྱག་བདུན་རེ་དང་༔ སྐོར་བ་བདུན་རེ་དང་༔ ཚ་ཚ་བདུན་རེ་དང་༔ ལྟུང་བཤགས་ཚར་བདུན་རེ་དང་༔ ཟབ་མདོ་ཚར་བདུན་རེ་དང་༔ སྒྲོལ་མ་ཚར་བདུན་རེ་དང་དེ་རྣམས་ལ་མ་ཆག་པར་བྱེད་པ་དང་བརྒྱད༔ ཤ་ཆང་སྒོག་གསུམ་གཏན་ནས་སྤང་ཞིང་མི་འཆང་བ་དང་དགུ༔ རྫས་ཐུན་དང་དྲག་སྔགས་དང་དྲག་པོའི་ཐེམ་ལ་ལེན་པའི་སྒོ་ནས་ལྷ་འདྲེ་གདུག་པ་ཅན་རྣམས་མི་བསྲེག་མི་གཟིར་མི་བརྡུང་ཞིང་ཡལ་བར་ཡང་མི་དོར་ནས་ལུས་ཤ་ཁྲག་དྲོན་མོས་ལྷ་འདྲེ་གདུག་པ་ཅན་རྣམས་སྐྱོང་ཞིང་བུ་བཞིན་དུ་གཅེས་པར་སྐྱོང་བ་དང་བཅུ་པོ་འདི་ནི་ངའི་དགེ་སྦྱོར་གྱི་གཙོ་བོ་གཞུང་ཤིང་གི་དམ་བཅའ་ཡིན་པས༔ ངའི་རྗེས་སུ་འཇུག་པའི་བུ་སློབ་རྣམས་ཀྱང་དོན་བཅུ་པོ་འདི་སྲོག་ལ་བབ་ཀྱང་སྲུང་དགོས་སོ༔ མ་བསྲུང་ན་ང་དང་འགལ་ཞིང་དམ་ཚིག་ཉམས་པར་འགྱུར་པས་དོན་བཅུ་པོ་འདི་བརྩོན་པར་སྲུང་དང་༔ ང་དང་མི་འབྲལ་འགྲོགས་པ་ཡིན་ནོ་བུ་སློབ་ཀུན་ཞེས་གསུངས་སོ༔

མ་ཅིག་གི་ཞལ་ནས་ལུས་སྲོག་ལོངས་སྤྱོད་ཁ་རྗེ་ཀུན༔ གཞན་དོན་སེམས་ཕྱིར་བཏང་བ་ན༔ ང་དང་ནམ་ཡང་མི་འབྲལ་བར༔ འགྲོགས་པ་ཡིན་ནོ་བུ་སློབ་ཀུན༔ སྣང་སྲིད་ལྷ་འདྲེ་གདུག་པ་ཅན༔ བུ་བས་གཅེས་པར་བརྩེ་བར་བསམ༔ རབ་ཏུ་གདུངས་པས་འཁོར་དུ་བསྐོར༔ ཤ་ཁྲག་དྲོན་མོས་རྟག་ཏུ་སྐྱོངས༔ བྱམས་དང་སྙིང་རྗེའི་ལྕགས་ཀྱུ་ཡིས༔ ནམ་ཡང་མི་གཏོང་འགྲོགས་པ་དང་༔ ལྷག་བསམ་རྣམ་དག་བྱམས་སེམས་ཀྱིས༔ དམ་པའི་ཆོས་ཀྱི་འབྲེལ་བ་ཡི༔ གྲོལ་ནས་བདེ་ལ་བཀོད་པ་དང་༔ ལྷ་འདྲེ་འགྲོ་དོན་མཐའ་ཡས་པ༔ བརྩོན་འགྲུས་དྲག་པོས་བྱས་པ་ན༔ ཁྱེད་བུ་སློབ་གང་ཡིན་དེ་དག་ཀུན༔ ང་དང་ནམ་ཡང་མི་འབྲལ་བར༔ འགྲོགས་པ་ཡིན་ནོ་བུ་སློབ་ཀུན་ཅེས་གསུངས་པ་དང་༔ ང་དང་མི་འབྲལ་འགྲོགས་པར་འདོད་ན༔ ངས་ཇི་ལྟར་བཤད་པ་དེ་བཞིན་དུ་གོ་བར་གྱིས་ཤིག་བུ་སློབ་ཀུན་ཞེས་གསུངས་སོ༔ ད་ནི་ང་ཡི་བསྟན་པ་ལ་ཆོས་ལོག་འོང་བའི་རྒྱུ་མཚན་རྣམས་བཤད་པས་ཁྱེད་བུ་སློབ་རྣམས་ལེགས་པར་ཉོན་དང་འདི་ལྟར་འབྱུང་གི༔ སྔར་སངས་རྒྱས་བཅོམ་ལྡན་འདས་ཞལ་བཞུགས་པའི་དུས་སུ་ང་ལྷའི་ཡུལ་ནོར་བུ་ཕུན་སུམ་ཚོགས་པའི་གླིང་ཞེས་བྱ་བ་ཞིག་ན་ལྷའི་འགྲོ་དོན་བྱེད་ཅིང་ཡོད་པས་ང་ལ་ལྷ་མོ་བདུན་གྱིས་འཁོར་གྱིས་བསྐོར་ནས་མེ་ཏོག་དང་རིན་པོ་ཆེ་ལ་སོགས་པའི་མཆོད་རྫས་མང་པོ་ཐོགས་ནས༔ སངས་རྒྱས་བཅོམ་ལྡན་འདས་ལ་ཕྱག་འཚལ་བ་དང་མཆོད་པ་འབུལ་བའི་ཕྱིར་དུ་རྒྱ་གར་དུ་འོང་ནས༔ བཅོམ་ལྡན་འདས་ལ་མེ་ཏོག་ལ་སོགས་པ་མཆོད་ནས་མགོ་བོས་ཞབས་ལ་གཏུགས་ནས་ཕྱག་འཚལ་ཏེ༔ སྐོར་བ་ལན་གསུམ་བྱས་ནས་མདུན་དུ་འཁོད་པ་ལ༔

བཅོམ་ལྡན་འདས་ཀྱི་ཞལ་ནས་གསུངས་པ༔ ལྷ་མོ་ཁྱོད་འདི་ན་འོང་བ་ཤིན་ཏུ་ལེགས་སོ༔ ང་ཡོངས་སུ་མྱ་ངན་ལས་འདས་པའི་དུས་རིང་པོ་ཞིག་ནས༔ རྒྱ་གར་རྡོ་རྗེའི་གདན་འདི་ན་མུ་སྟེགས་པ་རྣམས་ཁ་འཕྱོ་ནས་འོང་བར་ཡོད་པས༔ དེའི་དུས་སུ་རྒྱ་གར་ཤར་ནུབ་འདི་ན་ཁྱོད་མིན་པ་མུ་སྟེགས་པ་འདུལ་ཐུབ་པ་སུ་ཡང་མི་འོང་བས་ཁྱོད་ཀྱིས་མུ་སྟེགས་པ་འདུལ་དགོས་ཤིང་༔ དེ་ནས་མ་འོངས་པའི་དུས་སུ་ཡང་བོད་གངས་ཅན་གྱི་ཁྲོད་དུ་འབྱུང་པོ་མི་དང་མི་མ་ཡིན་གདུག་པ་ཅན་ཐམས་ཅད་ཁྱོད་ཀྱིས་འདུལ་བའི་སྐལ་བ་ཡོད་པས༔ ད་ལྟ་འདིར་སྨོན་ལམ་ལེགས་པོར་ཐོབ་ཅིག་ཅེས་བཀའ་སྩལ་པ༔ ངས་ཞུས་པ༔ བདག་བློ་ཞུམ་པས་དེ་ལྟར་མི་ནུས་ལགས་ཞུས་པས་བཅོམ་ལྡན་འདས་ཀྱིས་བཀའ་མ་གནང་སྟེ༔ གནས་བརྟན་རབ་འབྱོར་གྱིས་ན་རེ༔ སྨོན་ལམ་ཐོབ་དང་བདག་གིས་སྨོན་ལམ་གྱི་གྲོགས་བྱེད་དོ་ཞེས་གསུངས་པས༔ དེ་ནས་ལྷ་མོས་སངས་རྒྱས་ཀྱི་མདུན་དུ་པུས་མོ་བཙུགས་ཐལ་མོ་སྦྱར་ནས༔ མུ་སྟེགས་པ་རྣམས་འདུལ་བའི་སྨོན་ལམ་བརྒྱ་རྩ་བརྒྱད་བཏབ་པའི་སྐབས་སུ་བྱ་གཅན་གཅིག་གིས་ཕུག་རོན་ཞིག་བཀར་ནས་ངའི་མདུན་དུ་ཕོག་ནས་བྱུང་བས་ངས་བྱ་གཅན་དང་ཕུག་རོན་གཉིས་བཤུག་པས༔ དེའི་ཚེ་ཨ་ལི་ནག་པོ་ཞིག་བྱུང་ནས་ཕུག་རོན་བསུབ་པས༔ ངས་ཨ་ལི་དང་ཕུག་རོན་གཉིས་བཤུག་པས་ལི་ལིས་ངའི་ལག་མགོ་བྲད་ནས་བྱུང་པས༔ ངས་ཨ་ལིའི་རྣ་རྡོག་ལ་སེ་གོལ་ཞིག་བཏབ་པས་ཨ་ལི་བརྒྱལ་དུ་ཐལ་ལོ༔ དེའི་ཚེ་ན་ཕུག་རོན་སྐྱབས་ཀྱང་བདག་གི་སྨོན་ལམ་གྱི་བར་ཆད་པས༔ སངས་རྒྱས་བཅོམ་ལྡན་འདས་ཀྱི་ཞལ་ནས་ལྷ་མོ་ཁྱོད་ཀྱིས་རྒྱ་གར་རྡོ་རྗེ་གདན་དུ་མུ་སྟེགས་པ་ཐམས་ཅད་ཐུལ་བར་འདུག་སྟེ༔ ཕྱི་འབྱུང་གི་དུས་སུ་བོད་གངས་ཅན་གྱི་ཁྲོད་དུ་འབྱུང་པོ་མི་དང་མི་མ་ཡིན་པ་གདུག་པ་ཅན་ཐམས་ཅད་འདུལ་ནས་འགྲོ་བ་སེམས་ཅན་ཐམས་ཅད་ཀྱི་དོན་མཐའ་ཡས་པ་བྱེད་པའི་དུས་སུ་ཁྱོད་ཀྱི་བསྟན་པའི་ཆ་སྨད་དུ་མུ་སྟེགས་ཀྱིས་གནོད་པ་ཞིག་འོང་ནས་ཆོས་ལོག་ཅིག་འོང་བར་འདུག་གསུངས༔ ཡང་ལྷ་མོས་ཞུས་པ༔ དེ་མི་འབྱུང་བར་གསོལ་ལགས་ཞུས་པས༔ བཅོམ་ལྡན་འདས་ཀྱི་ཞལ་ནས་རྟེན་འབྲེལ་ལས་ཀྱི་གནོད་པ་འོང་བ་ལ་མི་འབྱུང་བའི་ཐབས་དང་མི་ལྡན་ནོ་ཞེས་གསུངས་སོ༔ དེ་ནས་སངས་རྒྱས་ཀྱི་གནས་བརྟན་རབ་འབྱོར་ལ་དལ་ཅིག་གཟིགས་པ་མཛད་པས་རབ་འབྱོར་གྱིས་དལ་ཅིག་ལ་ཅི་ཡང་མི་སྨྲ་བར་སེམས་སོ༔ དེ་ནས་མུ་སྟེགས་ཝ་ཚོགས་སེང་གེའི་སྒྲ་ནི་རབ་ཏུ་བཅོམ་ཞེས་གསུངས་པས་ཡང་སངས་རྒྱས་བཅོམ་ལྡན་འདས་ཀྱི་ཞལ་ནས་ལྷ་མོ་རང་རེ་ཡུམ་སྲས་རྣམས་ཀྱིས་ལན་ཅིག་ལ་བཟློག་པར་མི་ནུས་པར་འདུག་སྟེ༔ མ་འོངས་ཆོས་ལོག་འབྱུང་བའི་དུས་སུ་སེང་གེའི་མིང་ཅན་གཅིག་གིས་བཟློག་པ་འདུག་གསུངས་པས༔ ད་ལྟ་ངའི་རྒྱུད་འཛིན་གྱི་བུ་སློབ་རྣམས་ཀྱི་ནང་ནས་སེང་གེའི་མིང་ཅན་གྲུབ་པ་ཐོབ་པ་གསུམ་དང་གྲུབ་པ་མ་ཐོབ་ཀྱང་ཡོན་ཏན་ཤིན་ཏུ་ཆེ་བའི་ཁུ་སྒོམ་ཆོས་ཀྱི་སེང་གེ་དང་བཞི་འདུག་པ་ལ༔ མ་འོངས་དུས་སུ་ཆོས་ལོག་གང་གིས་སེལ་རྟེན་འབྲེལ་བརྟགས་པས༔ ཁུ་སྒོམ་ཆོས་ཀྱི་སེང་གེས་ཆོས་ལོག་སེལ་བའི་རྟེན་འབྲེལ་འགྲིགས་པ་བྱུང་བས༔ དེ་ཡང་མ་འོངས་ཆོས་ལོག་འབྱུང་བའི་དུས་སུ་ད་ལྟའི་ཁུ་སྒོམ་ཆོས་ཀྱི་སེང་གེ་འདི་ནི་ཁམས་ཀྱི་སྨད་སྨར་གཞོང་ཞེས་བྱ་བར་སྐྱེས་ནས་སྦས་པའི་ཚུལ་འཛིན་དམན་པའི་ལས་སྤྱོད་ཅན་ཁྱིམ་ཐབ་དང་ལྡན་པར་འོང་ནས་ཆོས་ལོག་ངེས་པར་དུ་མཐའ་ནས་སེལ་བའི་རྟེན་འབྲེལ་ཡོད་ཅིང་ཆོས་སེང་འབྱུང་ཚུལ་དེ་ལྟར་ཡིན་ནོ་ཞེས་གསུངས་སོ༔

ད་ནི་ངའི་བསྟན་པ་ལ་གནོད་པ་བྱེད་པའི་མུ་སྟེགས་གཟིགས་ལྡན་ནག་པོ་ཞེས་བྱ་བའི་མུ་སྟེགས་ཀྱི་སྟོན་པ་ཤིན་ཏུ་མཐུ་སྟོབས་ཆེ་བའི་སྤྲུལ་པ་ལ་མུ་སྟེགས་ཀྱི་སྟོན་པ་བདུད་ཕོ་མོ་མ་རུངས་པ་འདི་འདྲ་གཉིས་འབྱུང་ངོ་༔ དེ་ཡང་འདི་ནས་མི་ལོ་ལྔ་བཅུ་རྩ་ལྔ་སོང་པ་དང་༔ ང་འོག་མིན་གྱི་གནས་སུ་གནས་འཕོ་ཚར་ནས་མི་ལོ་ཉི་ཤུ་རྩ་ལྔ་སོང་བ་དང་༔ རྒྱ་གར་ཁ་ཆེའི་གྲོང་ཁྱེར་བརྟན་པ་ཞེས་བྱ་བ་གཅིག་ན༔ མི་བདག་མེད་པའི་བུད་མེད་སྨད་འཚོང་མ་བཟང་སྐྱིད་བྱ་བ་ཞིག་ལ་བུ་གཅིག་བཙས་ནས་འོང་སྟེ༔ བུ་དེའི་དཔྲལ་བ་ན་ཕག་གི་གཟུགས་ཤ་མཚན་ནག་པོ་ཞིག་དོད་ནས་འོང་སྟེ༔ རྒྱ་གར་ན་ཕག་གི་མིང་ལ་འབའ་ར་ཟེར་བ་ཡིན་པས་བུ་དེའི་ཐོད་པ་ན་འབའ་ར་དོད་ནས་འདུག་པས་ཐམས་ཅད་ཀྱིས་བུ་འདི་ལ་ཐོད་པ་འབའ་ར་ཐོགས་ཟེར་ནས་ཐམས་ཅད་ཀྱིས་ཐོད་པ་འབའ་ར་མིང་དུ་འདོགས་པར་བྱེད་དོ༔ དེ་ནས་བུ་དེ་ནར་ཕྱིན་ནས་སྟོད་མངའ་རིས་ཕྱོགས་ནས་མར་འོང་སྟེ༔ ང་བོད་གངས་ཅན་གྱི་ཁྲོད་དུ་མ་ཅིག་ལབ་ཀྱི་སྒྲོན་མའི་སྲས་ཐོད་སྨྱོན་བསམ་འགྲུབ་ཀྱི་སྐྱེ་བ་ཡིན་པས༔ ང་ལ་ཐོད་པ་འབའ་ར་ཞེས་སམ་དྲེགས་པ་ཟིལ་ནོན་ཟེར་བ་ཡིན་པས༔ ང་ཕྱག་རྒྱ་ཆེན་པོ་གཅོད་ལ་མཁས་པ་ཡིན༔ སྣང་སྲིད་གདུག་པ་ཅན་ཐམས་ཅད་ཚར་གཅོད་པའི་ལས་ཐབས་ལ་མཁས་པ་ཡིན་ཟེར་ནས་དུས་མ་ཡིན་པ་ལ་ཡང་ཁྲག་ཐབ་དང་༔ དུག་ཐབ་དང་༔ རྫས་ཐབ་དང་༔ སྔོ་ཐབ་དང་ཕྱུར་ལུད་བཏང་བ་ལ་སོགས་པའི་ཐབས་སྣ་ཚོགས་པས་བཟློག་ཅིང་༔ གཞོབ་ཆེན་དང་གསུར་ཆེན་དང་ངན་ཐབས་སྣ་ཚོགས་པ་བྱེད་ཅིང་བལ་བོད་གཉིས་ཀྱི་ས་མཚམས་ནས་ཚུར་ལ་འོངས་ནས་ལོག་ཆོས་མཐའ་ཡས་པ་བྱེད་པར་འབྱུང་ངོ་༔

མུ་སྟེགས་ཀྱི་སྤྲུལ་པ་བདུད་ཕོ་དེ་ནི་ཧོར་ནག་གི་ཡུལ་མཐའ་འཁོབ་ལྗོང་བཀྲ་ཞེས་བྱ་བའི་གྲོང་ཁྱེར་གཅིག་ཏུ་ཡང་མི་བདག་མེད་པའི་བུད་མེད་སྨད་འཚོང་མ་ཞིག་ལ་བུ་མོ་གཅིག་བཙས་ནས་འོང་སྟེ༔ བུ་མོ་དེའི་པགས་པ་ནི་མདོག་ཤིན་ཏུ་དཀར་ལ་གཟུགས་དང་བྱད་བཞིན་ཡང་ཤིན་ཏུ་ལེགས་པ་དཔྲལ་བ་ན་ཡུལ་བདག་ཅོག་ལ་ཚལ་གྱི་གཟུགས་དམར་པོ་མི་རྟ་གཉིས་ཤ་མཚན་དུ་དོད་ནས་འོང་བ་ལ༔ བུ་མོ་དེའི་མ་དེ་ན་རེ༔ ངའི་བུ་མོ་འདི་ནི་ཅོག་ལ་ཟོ་དོར་གྱིས་བྱིན་པའི་བུ་མོ་ཡིན༔ མིའི་བུ་མོ་མིན་པས་འདི་ལ་ཅོག་ལ་ཟོ་དོར་སྒྲོན་མིང་དུ་བཏགས་དགོས་ཟེར་རོ༔

བུ་མོ་དེས་ན་རེ༔ ང་བོད་གངས་ཅན་གྱི་ཁྲོད་དུ་མ་ཅིག་ལབ་ཀྱི་སྒྲོན་མའི་སྐྱེ་བ་ཕྱི་མ་ཡིན་པས་ཕྱག་རྒྱ་ཆེན་པོ་གཅོད་ལ་མཁས་པ་ཡིན་ཟེར་ནས་ཁ་ནས་ཕཊ་སྒྲ་དྲག་པོ་འདོན་པར་བྱེད་དོ༔ བུ་མོ་ཡི་གཟུགས་ཤིན་ཏུ་ལེགས་པས་ཡུལ་མི་དང་དཔོན་སྐྱ་རྣམས་ཀྱིས་རྩོད་པར་བྱེད་ནས་བསླངས་ཀྱང་བུ་མོ་གནས་ལ་མི་ཆགས་ནས་བཙུན་མ་བྱེད་ཟེར་ནས་སྐྲ་སྤང་སྟེ༔ རས་དཀར་པོའི་ཤམ་ཐབས་དང་རྒྱན་གོས་བཟང་པོ་གྱོན་ནས༔ རྣ་བ་ལ་གསེར་གྱི་སྒོར་མོ་རྣ་ཆ་ལ་བཏགས་ནས་ལུས་ལ་རྒྱན་སྣ་ཚོགས་པས་བརྒྱན་པས་ཁ་ནས་ཕཊ་སྒྲ་འདོན་ཞིང་ལ་སྟོད་ཏེ་ཙེ་ནས་མར་ལ་འོང་ནས་དེ་ནས་རིམ་གྱིས་མར་ལ་འོང་སྟེ༔ བལ་བོད་གཉིས་ཀྱི་མཚམས་སུ་ཕྱིན་པ་དང་༔ བདུད་ཐོད་པ་འབའ་ར་དང་གཉིས་འཕྲད་སོར་བྱེད་ནས༔ ལ་སྟོད་རྩང་གི་ཕྱོགས་ནས་མར་ལ་འོང་སྟེ༔ དེ་ནས་མར་ལ་ལྷ་སར་འོང་ནས༔ ཆགས་པའི་དབང་གིས་སྐྱེས་པ་མཐའ་ཡས་པ་བསྡུས་ནས་ཆགས་པ་སྤྱོད་དུ་འཇུག་ནས་ངས་ལུས་ཀྱིས་སྦྱིན་པ་བཏང་བ་ཡིན་ཟེར་ནས༔ ཐམས་ཅད་ལོག་པའི་ལམ་ལ་སྦྱོར་བར་བྱེད་ནས་ལོག་ཆོས་མཐའ་ཡས་པ་བརྩམས་པར་མཛད་བྱེད་དེ༔ འཇིག་རྟེན་པའི་མི་ཐམས་ཅད་མི་དགེ་བ་སྣ་ཚོགས་པའི་ལས་ལ་སྦྱོར་ནས༔ དུས་མ་ཡིན་པ་ལ་ཡང་ཁྲག་ཐབ་དང་༔ དུག་ཐབ་དང་༔ གཞོབ་ཆེན་དང་༔ གསུར་ཆེན་དང་༔ འཕྱུར་ལུད་བཏང་བ་དང་རྐང་གླིང་ལ་རྭ་ཅོ་སྤྲད་ནས་འབུད་པ་དང་ཁྱིའི་ལྤགས་པ་ལུས་ལ་འཆང་བ་ལ་སོགས་པའི་ཆས་ངན་པ་མ་རུངས་པ་སྣ་ཚོགས་པ་ལུས་ལ་འཆང་ནས་ངས་དྲག་པོའི་གཅོད་བྱེད་པ་ཡིན་ཟེར་ནས་མི་དགེ་བ་སྣ་ཚོགས་པ་བསྒྲུབས་ནས་ངའི་བསྟན་པ་ལ་གནོད་པའི་ལས་དང་སྤྱོད་པ་ངན་པ་མཐའ་ཡས་པ་བྱེད་པ་འབྱུང་བས་འཛམ་བུའི་གླིང་པའི་མི་ཐམས་ཅད་ཀྱིས་འདི་མ་ཅིག་ལབ་ཀྱི་སྒྲོན་མའི་སྐྱེ་བ་ཡིན་པར་འདུག་ཟེར་ནས་བོད་གངས་ཅན་ཁྲོད་པ་ཐམས་ཅད་ཀྱིས་ང་ཡིན་པར་སེམས་སོ༔ དོན་མེད་མཁས་བཙུན་དགེ་བཤེས་རྣམས་ཀྱིས་སྐུར་པ་ངན་པ་ང་ལ་འདེབས་པ་འོང་༔ ངའི་ཆོས་ལུགས་འདི་ལ་ད་ལྟ་གཏེར་འོག་ཏུ་མ་སོང་པ་རྣམས་ལ་ནི་བདུད་ཕོ་མོ་དེ་གཉིས་ཀྱིས་བསླད་ནས་བཟང་ངན་ཕྱེ་རྒྱུ་མེད་པར་རྟ་སྤུ་དང་བ་སྤུ་འདྲེས་པའམ་ཁྱི་ར་ཕག་གསུམ་འདྲེས་པའམ་ཁྱི་ནག་པོ་བསྐྱུག་པའི་སྐྱུག་པ་བཞིན་དུ་འདྲེས་ནས་འོང་ངོ་༔ བདུད་ཕོ་མོ་དེ་གཉིས་འདུལ་བ་ལ༔ ཐོད་སྨྱོན་བསམ་འགྲུབ་དང་ངེད་མ་བུ་གཉིས་འོང་སྟེ༔ དེ་ཡང་ཐོད་སྨྱོན་བསམ་འགྲུབ་ནི་དག་པའི་སྒྱུ་ལུས་འོད་གསལ་ཆེན་པོ་ལམ་དུ་བྱེད་ནས་འཇའ་ལུས་འོད་དུ་ཡལ་ནས་འོག་མིན་གྱི་གནས་སུ་སངས་རྒྱས་པ་ཡིན་ཀྱང་སྤྲུལ་པ་ཆ་གཅིག་དཔོན་ཚེ་དབང་རྒྱལ་གྱི་སྲས་སུ་སྐྱེས་ནས་མིང་ཡང་ཐོད་སྨྱོན་བསམ་འགྲུབ་དུ་གྲགས་ནས་འོང་སྟེ༔ བལ་ཡུལ་གྱི་ཡར་མོ་ཐང་སྟོད་དུ་བདུད་ཐོད་པ་འབའ་ར་འདུལ་བར་བྱེད་དོ༔ ངས་ཀྱང་འཇིག་རྟེན་མི་ཡུལ་གྱི་འགྲོ་དོན་རེ་ཞིག་རྫོགས་ནས་སྐྱེ་མེད་ཆོས་ཀྱི་སྐུ་ལ་གནས་པ་ཡིན་ཏེ༔ སྤྲུལ་པ་ཆ་གཅིག་ཐོད་སྨྱོན་བསམ་འགྲུབ་ཀྱི་བུ་མོར་སྐྱེས་ནས་མིང་ཡང་ལེན་ཐོ་མ་ཞེས་བྱ་བར་གྲགས་ནས་འོང་སྟེ་མོན་བུམ་ཐུན་མོང་གི་ཕྱོགས་སུ་ཧོར་མོ་ཅོག་ལ་སྒྲོན་འདུལ་བར་བྱེད་དོ༔

དེ་ནས་ནི་ནམ་ཞིག་གི་དུས་སུ་རྒྱལ་ཁྲིམས་དང་ཆོས་ཁྲིམས་འཆུག་ཅིང་༔ སྙིགས་མ་ལྔ་བདོ་བ་ནས་བཟུང་སྟེ་སངས་རྒྱས་བཅོམ་ལྡན་འདས་ཀྱི་བསྟན་པ་མ་རྫོགས་ཀྱི་བར་དུ་བདུད་ཀྱི་སྤྲུལ་པ་ཆེན་པོ་དེ་འདྲ་བ་ནི་མི་འོང་སྟེ༔ འདྲ་མིན་གྱི་ལོག་ཆོས་དུམ་པ་རེ་རྩོམ་པ་དང་ཆ་ལུགས་ངན་པ་མི་འདྲ་བ་སྣ་ཚོགས་དུ་མ་བྱེད་པ་ནི་མང་དུ་འབྱུང་ངོ་༔ ཞེས་གསུངས་པ་ལ་སོགས་པའི་མ་འོངས་པར་ལུང་བསྟན་པ་མང་དུ་མཛད་ནས་ནི༔ ཕྱག་རྒྱ་ཆེན་པོ་གཅོད་ཅེས་བྱ་བ་འདི་ནི་སྤུ་རིས་སུ་དབྱེ་ནས་བཤད་པས་དེ་ཟུང་བརྒྱད་ཡ་བཅུ་དྲུག་ཏུ་གྲགས་པས༔ དེ་ལ་དང་པོ་ཕ་རྒྱུད་མ་རྒྱུད་གཉིས༔ ས་ཆོས་གནམ་ཆོས་གཉིས༔ བོད་ཆོས་རྒྱ་ཆོས་གཉིས༔ གཞུང་ཀྲིག་ཆེན་དང་ཁ་འཐོར་ཀྲིག་མེད་གཉིས༔ མདོ་ལུགས་དང་སྔགས་ལུགས་གཉིས༔ ཟུང་འཇུག་དང་ཁ་འཐོར་གཉིས༔ བཀའ་མ་དང་གཏེར་མ་གཉིས༔ བཀའ་དང་བསྟན་བཅོས་གཉིས་ཟུང་བརྒྱད་དང་ཡ་བཅུ་དྲུག་པོ་འདི་ལ་མ་ལྟོས་པའི་གཞན་ནས་བྱུང་བའི་ཆོས་ལུགས་ནི་གཏན་ནས་མེད་དོ་བུ་སློབ་ཀུན་ཅེས་གསུངས་སོ༔

དེ་ནས་བུ་སློབ་གཞན་མ་རྣམས་ནི་སོ་སོར་བྱེར་ནས་མ་ཅིག་འཁོར་བཅས་རྣམས་མལ་དུ་བཞུགས་པ་དང་༔ དེའི་ཕྱིར་ལོ་སོས་ཀར་སོང་བ་དང་མ་ཅིག་འཁོར་བཅས་རྣམས་ཟངས་རིར་ངོས་སུ་བྱོན་ནས༔ ཟངས་རི་དང་གླང་ལུང་གཉིས་ཀྱི་བར་དུ་གཉན་ཁྲོད་དུ་གཅིག་ཏུ་བཞུགས་པས་ཉིན་ཞིག་ཡུལ་པའི་ཕྱོགས་སུ་སྐྱོ་བསང་དང་གཟིགས་མོ་ལ་བྱོན་ནས་ལམ་ཟུར་ཞིག་ཏུ་བཞུགས་ནས་ཡོད་ཙ་ན༔ བཙུན་པ་གཞོན་ནུ་ཆོས་གོས་བཟང་པོ་གྱོན་པ་ཞིག་གིས་བལ་གྱི་དྲ་བ་དམར་པོ་ཞིག་རྒྱབ་ཏུ་ཁུར༔ པན་ཞུ་སེར་པོ་ཞིག་མགོ་ལ་གྱོན༔ པོ་ཏི་རྒྱབ་ཏུ་ཁུར༔ ཆོས་གོས་ཞིག་ཕྲག་ལ་བཀལ་ནས་འགྲོས་སྟབས་གཟབ་ཞིང་བྱུང་བས་མ་ཅིག་གིས་མདུན་དུ་དེར་ཕྱིན་ནས་འདི་སྐད་ཟེར་རོ༔ རྣལ་འབྱོར་མ་རྒན་མོ་ཁྱོད་གང་ནས་འོང་པ་ཡིན༔ ད་གར་འགྲོ་ཕ་མ་དང་རིགས་རྒྱུད་སུ་ཡིན༔ རི་སྟོང་འདི་ནས་ཅི་ལ་བསྡད་པ་ཡིན༔ ཤེས་པ་དང་ཐོས་པ་ཅི་ཤེས་ཟེར་བ་ལ༔ མ་ཅིག་གི་ཞལ་ནས་ང་ལ་འོང་ས་དང་འགྲོ་ས་འདུག་གནས་ཅི་ཡང་མེད༔ ཕ་མ་དང་རིགས་རུས་འབྱུང་ཁུངས་མེད་ཅེས་པ་དང་ཐོས་པ་ཁབ་ཙམ་ཡང་མེད༔ རི་སྟོང་འདི་ན་སྣང་བ་གདོང་དེད་བྱེད་ཅིང་བསྡད་པ་ཡིན༔ ཁྱེད་བཙུན་པ་གཞོན་ནུ་ལང་ཚོ་དང་ལྡན་པ་གཅིག་འདུག་པས་སུ་ཡིན་གང་ནས་བྱོན་པ་ཡིན༔ ད་གར་འབྱོན་གསུངས་པས་བཙུན་པ་དེ་ན་རེ༔ ང་མཁས་པ་གཉེན་ཆུང་ལོ་ཙཱ་བ་བྱ་བ་ཡིན༔ རྒྱ་གར་གྱི་ཡུལ་དུ་ལན་གསུམ་སོང་༔ སྒྲོ་འདོགས་མ་ལུས་པ་ཐམས་ཅད་བཅད་དེ་སོང་རྒྱ་གར་ནས་འོང་བ་ཡིན་པས༔ ད་ལྟ་བོད་འདིར་ཕྱིན་པ་ཡིན༔ ཁྱོད་ཀྱིས་མ་ཚོར་བ་རྣ་བ་བཅད་པ་ཨེ་ཡིན༔ ད་ང་འགྲོ་བ་སེམས་ཅན་གྱི་དོན་བྱེད་པ་ལ་འགྲོ་བ་ཡིན༔ ཁྱོད་ལ་ཕ་མ་དང་རིགས་རུས་མེད་ན་རྫུས་སྐྱེས་ཨེ་ཡིན༔ རི་སྟོང་དུ་འདུག་ཅིང་འོང་ས་དང་འགྲོ་ས་མེད་ན་འདྲེ་ཨེ་ཡིན༔ ཤེས་པ་དང་ཐོས་པ་མེད་ན་རོ་ཨེ་ཡིན་ཟེར་ནས་ཁྲོས་ནས་བྱུང་བ་ལ༔

མ་ཅིག་གིས་དགོངས་པ་ལ་འདི་མཁས་པ་གཉེན་ཆུང་ལོ་ཙཱ་བ་ཟེར་བ་ཞིག་གྲགས་པ་དེ་འདི་ཡིན་པ་འདྲ༔ ཁོ་རྒྱ་གར་དུ་སོང་ཟེར་ཡང་ངས་སེམས་ཅན་གྱི་འགྲོ་དོན་བྱེད་ཟེར་ནས་ང་རྒྱལ་སྐྱེས་ནས་འདུག་སྟེ་ཡོན་ཏན་རྒྱུད་ལ་མ་སྐྱེས་པ་འདི་སྙིང་རེ་རྗེ་དགོངས་ནས་འདི་སྐད་གསུངས༔ ངའི་ཕ་མ་ཐབས་དང་ཤེས་རབ་ཡིན༔ འོང་ས་འགྲོ་ས་ཆོས་ཉིད་ཡིན༔ ཤེས་པ་ཐོས་པ་སྙན་བརྒྱུད་ཡིན༔ དམ་ཆོས་བདུད་ཀྱི་གཅོད་ཡུལ་ཡིན༔ འདུག་ས་གཉན་ས་རི་ཁྲོད་ཡིན༔ འཁོར་འདབ་མཛེ་ལོང་སྤང་གསུམ་ཡིན༔ ཡོན་བདག་སྣང་སྲིད་ལྷ་འདྲེ་ཡིན༔ ང་རང་ལབ་ཀྱི་སྒྲོན་མ་ཡིན༔ ཁྱོད་མཁས་པ་གཉེན་ཆུང་ལོ་ཙཱ་བ༔ རྒྱ་གར་གྱི་ཡུལ་ནས་བྱོན་པ་སྐད༔ མཁས་འདོད་ཀྱི་པཎ་ཞུ་དེ་མགོ་ལ་གྱོན༔ ང་རྒྱལ་གྱི་དྲ་ཆུང་དེ་རྒྱབ་ཏུ་ཁུར༔ ཁ་ལྟའི་སེར་གོས་དེ་ལུས་ལ་གྱོན༔ ལུང་མེད་ཀྱི་པོ་ཏི་དེ་རྒྱབ་ཏུ་ཁུར༔ འཕྱོར་འདོད་ཀྱི་ཆོས་གོས་དེ་ཕྲག་ལ་བཀལ༔ ནེ་ཙོའི་ཆོས་བཤད་དེ་ཁ་ནས་འདོན༔ ཐ་སྙད་ཀྱི་ཚིག་འབྲེལ་དེ་སེམས་ལ་འཕྲང་༔ ཚུལ་འཆོས་གོམ་པའི་འགྲོ་སྟབས་གཟབ་པ་དེ༔ རང་རྒྱུད་གྱོང་པོར་སོང་པ་ཡིན༔ སེམས་ཅན་དོན་བྱེད་ཟེར་བ་ཀུན༔ ཨ་ཧ་ཧ་གསུངས་པས༔ གཉེན་ཆུང་ལོ་ཙཱ་བས་ཅི་ཡང་མ་སྨྲས་ནས་ཡུན་རིང་ཞིག་ནས་བལྟས་ནས་བསྡད་པ་དང་༔ ཁྱོད་ལབ་ཀྱི་སྒྲོན་མ་བྱ་བ་དེ་ཡིན་ན་རྒྱ་གར་བྱ་རྒོད་ཕུང་པོའི་རི་ལ་ལྕགས་ཀྱི་པར་བུ་སྲུབ་མེད་པ་ཞིག་རྡོལ་བ་དེ་པཎྜི་ཏ་དོན་འགྲུབ་བཟང་པོའི་སྐྱེ་བ་ཕྱི་མ་ལ༔ དེང་སང་བོད་དུ་ལབ་ཀྱི་སྒྲོན་མ་ཞེས་བྱ་བ་འབྱུང་ནས་ལྕགས་ཀྱི་པར་བུ་ཁ་ཕྱེ་བ་ཡིན་ཟེར་བའི་ཁ་བྱང་འདུག་པ་དེ་ཁྱོད་ཀྱིས་ཆ་ཡོད་དམ་ཟེར་བས་མ་ཅིག་གི་ཞལ་ནས་དེར་ང་ཆ་ཡོད༔ ད་ཁྱེད་འབྱོན་མི་རང་བཞིན་ངེད་ཀྱི་གཉན་ཁྲོད་དུ་འབྱོན་དང་དེ་ནས་ངས་དེའི་ལོ་རྒྱུས་རྣམས་བཤད་གསུངས་ནས་གཉེན་ཆུང་ལོ་ཙཱ་བ་དང་དཔོན་སློབ་གཉིས་མ་ཅིག་གི་གནས་མལ་གཉན་ཁྲོད་དུ་བྱོན་ནས་ལོ་ཙཱ་བ་ལ་འཚོ་བ་དྲངས་པ་དང་༔

དེ་ནས་མ་ཅིག་གི་ཞལ་ནས་འདི་སྐད་གསུངས༔ སྔར་ང་རྒྱ་གར་ནས་ལན་མང་དུ་སྐྱེས་པའི་ཐ་མ་ལ༔ དུས་གཅིག་གི་ཚེ་ན་རྒྱ་གར་བྱ་རྒོད་ཕུང་པོའི་རི་བོའི་བྱང་ཕྱོགས་ངོས་སུ༔ ལ་ཆས་གཡོགས་པའི་ལྕགས་ཀྱི་པར་བུ་སྲུབ་མེད་པ་གཅིག་གི་ནང་དུ་ཕྱག་རྒྱ་ཆེན་པོ་གཅོད་ཀྱི་སྐོར་རྣམས་ཤོག་སེར་གྱི་ངོས་ལ་མཚལ་དཀར་གྱིས་སཾ་སྐྲྀ་ཏའི་སྐད་དུ་བྲིས་ནས་ཡོད་པ་ཡིན༔ ལྕགས་ཀྱི་པར་བུ་དེ་རྡོལ་ཙ་ན་ང་ཡང་བོད་འདིར་འགྲོ་དོན་གྱི་དུས་ལ་བབ་ཅིང་དཀྱིལ་ལ་ཕྱིན་པ་ཡིན༔ ད་ཁྱེད་ལོ་ཙཱ་བ་ཐུགས་བསྐྱེད་མི་ཆུང་ན་རྒྱ་གར་དུ་བྱོན་ལ་པར་བུ་ཁྱེར་ལ་ཤོག་དང་ངས་པར་བུ་ཁ་ཕྱེ་ནས་དཔེ་ཆ་རྣམས་གཟིགས་ཕུལ་བྱེད་གསུངས་པས༔ དེ་ནས་མཁས་པ་གཉེན་ཆུང་ལོ་ཙཱ་བས་དམ་པ་སངས་རྒྱས་རིན་པོ་ཆེ་ལ་ཞུ་བ་ཕུལ་བས་དམ་པ་སངས་རྒྱས་རིན་པོ་ཆེས་རྐང་མགྱོགས་ཀྱི་དངོས་གྲུབ་ཐོབ་པས་རྫུ་འཕྲུལ་གྱི་སྟོབས་ཀྱིས་རྒྱ་གར་དུ་བྱོན་ནས་ཞག་བཅུ་གསུམ་ནང་ནས་ལྕགས་ཀྱི་པར་བུ་བསྣམས་ནས་ཚུར་ལ་སླེབས་པས༔ པར་བུ་མ་ཅིག་གི་ཕྱག་ཏུ་ཕུལ་བས་མ་ཅིག་གིས་པར་བུ་ཁ་ཕྱེས་པས་སྔར་མ་ཅིག་གིས་ཇི་ལྟར་གསུངས་པ་བཞིན་དུ་ཆད་ལྷག་དང་ནོར་འཁྲུལ་མེད་པར་འདུག་པས༔

དེ་ནས་དམ་པ་སངས་རྒྱས་རིན་པོ་ཆེ་དང་གཉེན་ཆུང་ལོ་ཙཱ་བ་དང་༔ བུ་ཆེན་བཅུ་བཞི་ལ་སཾ་སྐྲྀ་ཏ་ཡི་སྐད་དུ་གསུངས་ཤིང་བོད་སྐད་དུ་ཡང་ཐམས་ཅད་ལ་གསུངས་པ་དང་༔ དེ་ནས་ཤོག་དྲིལ་ཞིག་དམ་པ་རིན་པོ་ཆེ་ལ་གཏད་ནས་དམ་ཆོས་འདིའི་བདག་པོ་ནི་ཁྱེད་དམ་པ་སངས་རྒྱས་དང་ཨརྱ་དྷེ་བ་གཉིས་ཡིན་པས་ཁྱེད་དམ་པ་སངས་རྒྱས་རིན་པོ་ཆེའི་དཔེ་ཆ་འདི་སྤེལ་ལ་བཤད་མཛོད་ཅིག་གསུངས༔ ཤོག་དྲིལ་གཅིག་ལོ་ཙཱ་བ་ལ་བསྐུར་ནས་དཔེ་ཆ་འདི་ཁྱེད་ལོ་ཙཱ་བས་རྒྱ་གར་དུ་ཁྱེར་ལ་ཨརྱ་དྷེ་བ་ལ་གཏོད༔ ཁྱེད་ལོ་ཙཱ་བ་འོ་བརྒྱལ་ཡང་རྒྱ་གར་དུ་བྱོན་འཚལ་གསུངས༔

དེ་ནས་དམ་པ་སངས་རྒྱས་རིན་པོ་ཆེའི་ཤོག་དྲིལ་ཞལ་ཕྱེས་ནས་བཤད་པས་ཆོས་བཀའ་གཉན་པའི་སྟོབས་ཀྱིས་དམ་པ་སངས་རྒྱས་རིན་པོ་ཆེ་ལ་ཤངས་མཚལ་ཉིན་མཚན་བདུན་ལ་བྱུང་བས་མ་ཅིག་གིས་གཟན་སྐྱུར་དང་ལས་ཚོགས་མང་དུ་མཛད་པས་དེར་ཤངས་མཚལ་ཆད་པ་དང་མན་ངག་བཤད་ཅིང་ལ་སྟོད་དུ་བྱོན་ནོ༔ དེ་ནས་གཉེན་ཆུང་ལོ་ཙཱ་བ་ཡང་རྒྱ་གར་དུ་བྱོན་ནས་ཆོས་པར་བུ་དང་བཅས་པ་ཨརྱ་དྷེ་བ་ལ་གཏད་ནས་དེ་ནས་ཚུར་བོད་དུ་བྱོན་ནས་འོང་སྟེ༔ མ་ཅིག་འཁོར་བཅས་རྣམས་ཟངས་རིར་མཁར་དམར་དུ་བཞུགས་པ་དང་མཇལ་བས་དེར་མ་ཅིག་གི་མདུན་དུ་ཨརྱ་དྷེ་བ་དང་མཇལ་ཚུལ༔ ཆོས་པར་བུ་གཏད་ཚུལ་ལ་སོགས་པ་རྣམས་ཞིབ་ཏུ་ཞུས་པས༔ དེ་ནས་ལོ་ཙཱ་བས་མ་ཅིག་ལ་དད་པ་རྩོལ་མེད་དུ་སྐྱེས་ནས་ཞབས་སྤྱི་བོར་བཏུད་ནས་ཞུས་པ༔ ཀྱེ་མ་ཅིག་ལགས་ཁྱེད་ཀྱིས་པར་བུའི་གཏེར་ཆོས་འདི་ནི་ཐུག་ས་གང་ཡིན་ལགས༔ རྒྱུད་པ་གང་ནས་བརྒྱུད་པ་ཡིན་ལགས་ཞུས་པས༔

མ་ཅིག་གི་ཞལ་ནས་རྒྱུད་པའི་ཐུག་པ་མེད༔ ཆོས་བདག་ང་རང་ཡིན༔ གཏེར་དུ་སྦ་མི་ཡང་ང་རང་ཡིན༔ བཅོམ་ལྡན་འདས་ཤཱཀྱའི་རྒྱལ་པོ་གསང་སྔགས་ཐེག་ཆེན་གྱི་ལམ་ལ་ཁྲིད་མི་ཡང་ང་རང་ཡིན༔ དགའ་བ་བཞི་བསྐྱེད་པའི་གཙོ་མོ་རྡོ་རྗེ་ཕག་མོ་ཡང་ང་རང་ཡིན་ཞེས་གསུངས་སོ༔ དེ་ནས་གཉེན་ཆུང་ལོ་ཙཱ་བས་མདོ་ལུགས་ཀྱི་གདམས་པ་རྣམས་མ་ལུས་པར་ཞུས་ནས་ཉམས་སུ་བླངས་པས་དུག་ལྔའི་དགྲ་བདེ་བླག་ཏུ་ཐུལ་ནས་ཉམས་དང་རྟོགས་པ་ཁྱད་པར་ཅན་རྒྱུད་ལ་སྐྱེས་ནས༔ ཆོས་ཉིད་ཀྱི་བདེན་པ་མངོན་སུམ་དུ་མཐོང་བས་མ་ཅིག་གི་ཆོས་ལུགས་ལ་ཡིད་ལྷན་གྱིས་ཆེས་ནས་ཆོས་ལུགས་གཞན་ལས་ཁྱད་པར་དུ་འཕགས་པར་མཐོང་ནས་འདི་སྐད་ཞུས་སོ༔ ཀྱེ་མ་ཅིག་ལགས༔ རང་རེ་མ་ཅིག་གི་ཆོས་ལུགས་འདི་ལ་ཚེ་འདི་ལ་ཡང་འགལ་རྐྱེན་དང་༔ བྱད་ཁ་དང་༔ རྦོད་གཏོང་དང་༔ ནད་གདོན་དང་དགྲ་བགེགས་ཀྱི་གནོད་པ་ཐམས་ཅད་ལ༔ ཚེ་སྒྲུབ་དང་༔ སྲུང་བཟློག་དང་༔ སྨན་སྦྱར་དང་གསང་གནད་ལ་སོགས་ཅི་ཡང་མི་དགོས་ཤིང་རང་བཞིན་དུ་ཞི་བ་དང་ཚེ་གཅིག་ལུས་གཅིག་ལ་སངས་རྒྱས་ཐོབ་པར་ངེས་པའི་ཆོས་ལུགས་འདི་ནི་གཞན་གྱི་ཆོས་ལུགས་གང་ལས་ཀྱང་མཆོག་ཏུ་གྱུར་པ་ལགས་སོ་ཞེས་ཞུས་པས༔

ཡང་མ་ཅིག་གི་ཞལ་ནས་བྱད་བཟློག་ཚེ་སྒྲུབ་སྨན་སྦྱར་རྣམས་མི་དགོས་ཁྱད་པར་འཕགས་པ་ཡིན༔ འདྲེ་རྣམས་བྲན་དུ་བཀོལ་བ་ཡིན༔ དགྲ་རྣམས་གཉེན་དུ་ཆོད་པ་ཡིན༔ ཁམས་གསུམ་འཁོར་བའི་ཟིལ་གནོན་ཡིན༔ ཐར་པ་བགྲོད་པའི་ཐེམ་སྐས་ཡིན༔ བཙན་ཐབས་གྲོལ་བའི་གདམས་པ་ཡིན༔ བླ་མ་དམ་པའི་དགོངས་པ་ཡིན༔ རྒྱུད་སྡེ་བཞི་ཡི་ཉིང་ཁུ་ཡིན༔ མདོ་རྒྱུད་ཀུན་ཀྱི་དོན་བསྡུས་ཡིན༔ ཕལ་དང་ཕལ་གྱི་སྤྱོད་ཡུལ་མིན༔ ཧྲིལ་གྱིས་དྲིལ་ཞིང་བསྡུས་པ་ན༔ ལྟ་སྒོམ་རྣམ་རྟོག་གསེབ་ཏུ་ཆོད༔ ལྷི་གེའི་སྐམ་ཐག་ཆུ་ལ་ཆོད༔ མེས་ཚིག་མེ་ལ་རབ་མདའ་བཟློག༔ ཚ་ནད་མེ་ལ་བསྟན་ན་གྲོལ༔ གྲང་བའི་ནད་ལ་ཆུ་གྲང་རྩི༔ སེམས་ཉིད་ཕུ་ཐག་མ་ཆོད་པར༔ ཡིན་སྙམ་སྒོམ་པའི་སྒོམ་པ་དེ༔ རི་བོང་མགོ་ཡི་རྭ་དང་འདྲ༔ རྡོ་དང་རུས་པ་མ་འཕྲད་པ༔ རུས་པ་ཆག་པ་ག་ལ་འགྱུར༔ ལྟོག་པས་ཟས་སྐོམ་མ་ཟོས་ན༔ གཡོ་ལུགས་མཁས་ཀྱང་ཅི་ལ་ཕན༔ རང་སེམས་རང་གིས་མ་བསྒོམ་ན༔ བསྒོམ་སྒོམ་པ་གཅིག་སུ་ཡིས་གཏད༔ རང་དོན་རང་ལ་མ་རྙེད་ན༔ གཞན་དུ་ཚོལ་བ་བླུན་པོ་ཡིན༔ སྙིང་རུས་གྱིས་ལ་སེམས་ལ་ལྟོས༔ གསོལ་བ་ཐོབ་ཅིང་གཉན་ས་འགྲིམ༔ ཚོགས་སོག་ཤ་ཁྱེར་ཁྲག་ཁྱེར་གྱིས༔ ངས་ཟེར་དེ་ཚོ་ཉན་སྤྱོད་ན༔ འཁོར་བ་མི་འཁྱམས་གན་ཁུར་བྱེད༔ ཁྱེད་བུ་སློབ་གང་ཡིན་དེ་དག་ཀུན་ཅེས་གསུངས་པས༔ མཁས་པ་གཉེན་ཆུང་ལོ་ཙཱ་བ་ཡི་རངས་ནས་འདི་སྐད་སྨྲས་སོ༔ མཆིམས་ཕུའི་གཉེན་ཆུང་ལོ་ཙཱ་ང་༔ རྒྱ་གར་གྱི་ཡུལ་དུ་ལན་གསུམ་ཕྱིན༔ སྒྲོ་འདོགས་མ་ལུས་ཐམས་ཅད་བཅད༔ སྒྲ་བསྒྱུར་སྐད་འགྱུར་མང་དུ་བསླབས༔ སྡེ་སྣོད་གསུམ་ལ་ཕུགས་སུ་བཅད༔ མཁས་པ་ཡིན་སྙམ་ང་རྒྱལ་སྐྱེས༔ དུག་ལྔ་མ་ཐུལ་ཇེ་རྒྱས་ཐལ༔ བདག་འཛིན་མ་ཆོད་ཇེ་རགས་ཐལ༔ ཉོན་མོངས་མ་ཞི་ཇེ་འཕེལ་ཐལ༔ ད་ལྟ་བོད་ཀྱི་ཡུལ་དུ་ཕྱིན༔ བདག་འཛིན་ཟངས་རིས་དགོན་དུ་ཆོད༔ གདམས་པ་མཁའ་འགྲོའི་སྙིང་ཁྲག་དེ༔ བོད་ཀྱི་རྒན་མོ་གཅིག་ལས་ཐོབ༔ འབད་རྩོལ་མ་དགོས་དུག་ལྔ་ཐུལ༔ བདག་མེད་གནས་ལུགས་མངོན་དུ་གྱུར༔ སང་ཉིན་འཆི་ཡང་ང་རེ་བྲོད༔ ཅེས་གསུངས་ནས་གཉེན་ཆུང་ལོ་ཙཱ་བས་ནང་དུ་ཆོས་ཉིད་ཀྱི་བདེན་པ་མཐོང་༔

ཕྱིའི་ཡུལ་སྣང་ཐམས་ཅད་སྒྱུ་མ་ལྟ་བུར་རྟོགས༔ ངག་རྡོ་རྗེའི་གླུ་མཛོད་རྡོལ༔ ཡོན་ཏན་ཐམས་ཅད་མ་ལུས་པར་རྫོགས་ནས་ཕྱིས་བཀྲ་ཤིས་གླང་ལུང་དུ་སྲས་མཆོག་རྒྱལ་བ་དོན་འགྲུབ་ཀྱི་རྒྱུད་པ་བཟུང་ནས་གྲྭ་པ་ཧར་སྟོན་ཞེས་བྱ་བར་གྲགས་སོ༔ དེ་ལྟར་མ་ཅིག་གི་བུ་སློབ་རྣམས་ཀྱི་ནང་ནས་མདོ་རྒྱུད་གཉིས་ཀྱི་བཀའ་བསྟན་ཆོས་དང་༔ མ་ཅིག་གི་ཆོས་ལུགས་དང་བཅས་པ་ལ་མཁས་པའི་རྩེ་སྟོན་དར་མ་ལ་སོགས་པའི་མཁས་པ་ཆེན་པོ་བརྒྱད་འདུག༔ མ་ཅིག་ཉིད་ཀྱི་ཆོས་ལུགས་སྲོལ་གསུམ་ལ་སོགས་པ་ཐམས་ཅད་ལ་མཁས་པ་ནི༔ སྲས་ཐོད་སྨྱོན་བསམ་འགྲུབ་དང་ཁུ་སྒོམ་ཆོས་ཀྱི་སེང་གེ་དང་གཉིས་འདུག་གོ༔ སྲས་རྒྱལ་བ་དོན་འགྲུབ་དང་སྟོན་པ་དར་མ་དང་རིན་ཆེན་རྒྱལ་མཚན་ལ་སོགས་པའི་སྟོན་པ་བཞི་དང་དྲུག༔ ཆོས་ཀྱི་སེང་གེ་ལ་སོགས་པ་དང་བདུན༔ ཉི་མ་སེང་གེ་ལ་སོགས་པའི་སེང་ཆེན་གསུམ་སྲས་མོ་རྒྱན་བཞི་དང་བཅུ་དྲུག་པོ་ནི་མ་ཅིག་གི་ནང་འདུག་ཡིན་པས་ན༔ མ་རང་དང་མཉམ་པའི་སྲས་བཅུ་དྲུག་གོ་ཞེས་སོ༔ དེ་ལ་སོགས་པའི་སྦྱོར་ལམ་ཐོབ་པ་ལ་སྟོང་དང་སུམ་བརྒྱ་དང་དྲུག་ཅུ་ཙམ་བྱུང་༔ ཚོགས་ལམ་ལ་ཞུགས་པ་ནི་འབུམ་ཁྲག་བཅུ་དྲུག་ཙམ་བྱུང་༔ གཞན་ཡང་མཛེ་སྨིན་པ་བཞི་བརྒྱ་དང་སུམ་ཅུ་ཙམ་སོས་པར་བྱུང་༔ སྲས་ཀྱི་ཤ་ཚད་ལ་ཕྱིན་པ་ལ་སོགས་པའི་ནད་དང་རྐྱེན་གྱིས་ཉེས་པ་ནི་བསམ་གྱིས་མི་ཁྱབ་སྟེ༔ མཐའ་དང་གྲངས་ལས་འདས་པ་ལ་ཕན་ཐོགས་པར་བྱུང་༔ སྤྱིར་མ་ཅིག་གི་མདུན་དུ་དུས་རྒྱུན་མར་དགེ་བའི་བཤེས་གཉེན་གདིང་ལྷུང་ཐོགས་པ་འབུམ་ཕྲག་བཅུ་གསུམ་ཙམ་རེ་བྱུང་ངོ་༔

དེ་ལྟར་མ་ཅིག་དགུང་ལོ་དགུ་བཅུ་གོ་དགུའི་བར་དུ་བོད་དུ་གདུལ་བྱ་བསྐྱངས་བར་མཛད་དོ༔ དེ་ལྟ་བུའི་མ་ཅིག་ལབ་ཀྱི་སྒྲོན་མ་དེ་ཉིད་དགུང་ལོ་བཅུ་གསུམ་གྱི་དུས་སུ་ཡུམ་འདས་པས་མཁའ་སྤྱོད་དུ་གཤེགས་སོ༔ བཅུ་དྲུག་གི་དུས་སུ་ཡབ་འདས་པས་རྒྱ་གར་དུ་འཁྲུངས་ནས་སེམས་ཅན་གྱི་དོན་མཐའ་ཡས་པ་བྱེད་ནུས་པའི་པཎྜི་ཏ་ཆོས་ཀྱི་རྒྱལ་པོ་ཞེས་བྱ་བར་བྱུང་ངོ་༔ ཉི་ཤུའི་དུས་སུ་ཨ་ཅེ་འབུམ་མེ་ཕུང་པོ་ལྷག་མ་མེད་པར་མཁའ་སྤྱོད་དུ་གཤེགས་ནས་ཡུམ་དང་མཇལ་ནས་སྟབས་གཅིག་ཏུ་བཞུགས་སོ༔ མིང་པོ་ཆེ་བ་ཤཱཀྱ་རྒྱལ་མཚན་ནི་མཁས་པའི་གྲ་ཐོག་ཆོད་ནས་གྲ་སྐྱོང་མཛད་པ་དང་༔ གསང་སྔགས་ལ་གྲུབ་པ་བརྙེས་ནས་དག་པའི་སྒྱུ་ལུས་ཀྱི་དྲོད་ཚད་ཐོབ་པར་བྱུང་ངོ་༔

ཆུང་བ་ཁྲི་སྡེ་དཔལ་འོད་བྱ་བ་དེ་ནི་ཡབ་ཀྱི་མལ་དུ་གདུལ་བྱ་བསྐྱངས་ཤིང་སངས་རྒྱས་ཀྱི་བསྟན་པ་ལ་ཞབས་ཏོག་ལ་བརྩོན་པ་དང་བསོད་ནམས་དར་རྒྱས་ཕུན་སུམ་ཚོགས་པ་བྱུང་ངོ་༔ དེ་ལྟ་བུའི་གདུལ་བྱ་དང་འགྲོ་དོན་མཐའ་ཡས་པར་མཛད་པའོ༔ དེ་ནས་མ་ཅིག་དགུང་ལོ་དགུ་བཅུ་གོ་དགུ་ལ་བྱོན་ཏེ༔ དགུང་སྙིང་ནི་ལུག་ཡིན་པས་གཤེགས་པའི་ལོ་ནི་ཁྱིའི་ལོ༔ ལོ་ཐོག་རྣམས་ཀྱང་སྐྱ་ས་ལེ་བ་ཡོད་པའི་དུས་སུ་རམ་ཟླ་ཡི་ཚེས་བཅུ་ལ་བབ་པའི་ཉི་མ་རྩེ་ཤར་གྱི་དུས་སུ་མ་ཅིག་གི་ཞལ་ནས་ང་ཡང་ན་ནས་བྱུང་༔ ད་ཉི་མ་ལྔ་ཡི་ཉིན་པར་འཆི་བ་ཡིན་གསུངས༔ དེ་ནས་སྲས་རྒྱལ་བ་དོན་འགྲུབ་ཀྱིས་མ་ཅིག་གིས་ཇི་ལྟར་སྙུངས་ཞུས་པས་མ་ཅིག་སྐུ་གཟི་བརྗིད་མདངས་དང་ལྡན་པར་འདོམ་གང་ཙམ་དུ་ནམ་མཁའ་ལ་འཕགས་ནས་འདི་སྐད་དུ་གསུངས་སོ༔ ང་སྐྱེ་མེད་ཀྱི་ངང་ནས་འགགས་མེད་ན༔ མ་བཅོས་ངང་ནས་གཉུག་མ་ན༔ གཞི་མེད་ངང་ནས་རྩ་བྲལ་ན༔ ལྟ་བའི་ངང་ནས་མཐའ་བྲལ་ན༔ སྒོམ་པའི་ངང་ནས་བློ་འདས་ན༔ སྤྱོད་པའི་ངང་ནས་ཤུགས་འབྱུང་ན༔ དམ་ཚིག་ངང་ནས་དྲི་མེད་ན༔ འབྲས་བུའི་ངང་ནས་ལྷན་སྐྱེས་ན༔ འཁོར་བའི་རང་བཞིན་མྱང་འདས་ན༔ ཀུན་རྫོབ་ངང་ནས་དོན་དམ་ན༔ སྣང་བའི་ངང་ནས་སྟོང་པ་ན༔ དྲན་མེད་ངང་ནས་ཡེངས་མེད་ན༔ གང་ཤར་ངང་ནས་རང་གྲོལ་ན༔ མཉམ་བཞག་ངང་ནས་རྗེས་ཤེས་ན༔ དོན་དམ་ངོ་བོ་སྟོང་ཉིད་ཁྱབ་བརྡལ་ན༔ ད་ན་བས་མི་ཚད་གཟེར་ཡང་གཟེར༔ ཕྱག་རྒྱ་ཆེན་པོས་རྒྱབ་ནས་གཟེར༔ རྫོགས་པ་ཆེན་པོས་མདུན་ནས་གཟེར༔ དབུ་མ་ཆེན་པོས་དབུས་ནས་གཟེར༔ རང་རིག་ལྟ་བས་ཐད་ནས་གཟེར༔ སྐྱེ་མེད་ངང་ལ་འགགས་མེད་གཟེར༔ སྐྱེ་ཤིའི་མཚན་མ་རང་སར་གྲོལ་ཞེས་གསུངས་སོ༔

དེ་ནས་སྲས་རྒྱལ་བ་དོན་འགྲུབ་ཀྱིས་ཆིབས་ལ་བསྐྱོན་ནས་དབྱེ་ཆུང་གླང་ལུང་དུ་གདན་དྲངས་ནས་གཉན་ཁྲོད་དུ་མཛད་དེ་གུར་ལ་བརྟེན་ནས་བཞུགས་སོ༔ དེ་ནས་སྲས་རྒྱལ་བ་དོན་འགྲུབ་ཀྱིས་ཡུམ་སྐུ་མི་འཚེར་བ་མཁྱེན་ནས་མ་ཅིག་དགོངས་པ་ཇི་ལྟར་གཤེགས་ལགས༔ ད་རུང་སྐུ་རིམ་འདྲ་བ་བྱས་ན་འཐད་དམ་ཞེས་ཞུས་པས་ཡང་མ་ཅིག་གི་ཞལ་ནས༔ ཀྱེ་ཧོ་འདིར་འཚོགས་བུ་སློབ་ཀུན༔ མ་ཡེངས་ཡིད་ཀྱི་དྲན་པས་ཟུངས༔ ང་ལ་གནོད་པའི་གདོན་འདྲེ་གསུམ་ཡོད༔ ཕོ་གདོན་མོ་གདོན་སྤྱི་གདོན་གསུམ༔ ཕོ་གདོན་ཆོས་སྐུ་ཀུན་བཟང་གདོན༔ མོ་གདོན་ཡུམ་ཆེན་ཤེར་ཕྱིན་གདོན༔ སྤྱི་གདོན་ཕྱོགས་བཅུའི་སངས་རྒྱས་གདོན༔ རུས་འདྲེ་རིགས་ལྔ་བདེ་གཤེགས་གདོན༔ གདོན་པས་མི་ཚད་འཆི་ཡང་འཆི༔ སྐྱེ་མེད་ཆོས་སྐུའི་ངང་ལས་འཆི༔ འགགས་མེད་ལོངས་སྐུའི་ངང་ལ་འཆི༔ ལྷུན་གྲུབ་སྤྲུལ་སྐུའི་ངང་ལ་འཆི༔ མཐའ་བྲལ་ལྟ་བའི་ངང་ལས་འཆི༔ བློ་འདས་སྒོམ་པའི་ངང་ལས་འཆི༔ ཤུགས་འབྱུང་སྤྱོད་པའི་ངང་ལས་འཆི༔ དམ་ཚིག་དྲི་མེད་ངང་ལ་འཆི༔ ལྷུན་གྲུབ་འབྲས་བུའི་ངང་ལས་འཆི༔ དོན་ངོ་བོ་སྨྲ་བསམ་བརྗོད་མེད་འཆི་ཞེས་གསུངས་སོ༔

ཡང་མ་ཅིག་གི་ཞལ་ནས་རྒན་མོ་ང་ནི་འདི་ལྟར་འཆི༔ དུག་གསུམ་སྐུ་གསུམ་ཐུགས་སུ་འཆི༔ དུག་ལྔ་ཡེ་ཤེས་ལྔ་རུ་འཆི༔ ལྟ་བ་ཆོས་ཉིད་ཀློང་དུ་འཆི༔ སྒོམ་པ་ལྷུན་གྲུབ་ངང་ནས་འཆི༔ སྤྱོད་པ་མ་འགགས་ཤུགས་འབྱུང་འཆི༔ ཕུང་པོ་རྒྱལ་པ་རིགས་ལྔ་འཆི༔ ཁམས་ལྔ་རིགས་ཀྱི་ཡུམ་ལྔ་འཆི༔ ཚོགས་དྲུག་ཐུབ་པ་དྲུག་ཏུ་འཆི༔ ཚོགས་བརྒྱད་སེམས་དཔའ་བརྒྱད་དུ་འཆི༔ ཡུལ་བརྒྱད་སེམས་མ་བརྒྱད་དུ་འཆི༔ ཀུན་གཞི་ཆོས་ཉིད་ཀློང་དུ་འཆི༔ སེམས་ཉིད་སྐྱེ་བ་མེད་པར་འཆི༔ འགྱུ་བ་དྲན་བསམ་བྲལ་བར་འཆི༔ ལུས་ནི་གསལ་སྟོང་སྐུ་རུ་འཆི༔ ངག་ནི་གྲག་སྟོང་གསུང་དུ་འཆི༔ ཡིད་ནི་དྲན་སྟོང་ཆོས་སུ་འཆི༔ རིག་པ་ཀ་དག་སྐྱེ་མེད་འཆི༔ འཆི་དུས་བཅོ་ལྔའི་ཉི་ཤར་ཡིན༔ འགྲོ་ས་དག་པ་མཁའ་སྤྱོད་དང་༔ ཕྱོགས་བཅུའི་ཞིང་ཁམས་རབ་འབྱམས་ཡིན༔ རྒན་མོ་ང་ལ་འདུན་པ་དང་༔ གདམས་པ་འདི་ལ་མོས་པ་ན༔ བར་དོ་མི་མཐོང་ང་རང་ཀན༔ ཁྱེད་བུ་སློབ་གང་ཡིན་དེ་དག་ཀུན༔ མ་ཡེངས་ཐུགས་ལ་དེ་ལྟར་ཞོག་ཅེས་གསུངས་སོ༔

དེ་ནས་བསོད་ནམས་རྒྱན་མས་ཞུས་པ༔ ཀྱེ་མ་ཅིག་ལགས༔ ཡུམ་ཞིང་ཁམས་ནས་ཞིང་ཁམས་སུ་གཤེགས་པས༔ ད་ཤུལ་དུ་མཆིས་པའི་ངེད་བུ་སློབ་རྣམས་ཀྱི་གོ་བདེ་ལ་ཚིག་ཉུང་བ་དོན་འདུས་པ་བློ་གསལ་བ་ཞིག་ཐུགས་ལ་འདོགས་པར་ཞུ་ཞུས་པས༔ ཡང་མ་ཅིག་གིས་སྐུ་དྲང་པོར་བསྲངས༔ ཐུགས་ཆོས་ཉིད་ལ་གཡོ་བ་མེད་པར་མཛད་ནས་འདི་སྐད་གསུངས༔ ཀྱེ་བུ་སློབ་ཀུན་ཉོན་དང་༔ རིག་པ་ཁྱབ་བརྡལ་གཞི་མ་འདི༔ ཀ་དག་ལྷུན་གྲུབ་འདུས་མ་བྱས༔ རང་བྱུང་འོད་གསལ་སྒྲིབ་གཡོགས་མེད༔ བདེ་ཆེན་བྱང་ཆུབ་སེམས་ལ་འདུད༔ རྒན་མོ་ང་ཡི་གདམས་པ་འདི༔ རྒྱུད་སྡེ་བཞི་ཡི་སྙིང་པོ་ཡིན༔ དུས་གསུམ་སངས་རྒྱས་དགོངས་པ་ཡིན༔ ཐེག་པ་དགུ་ཡི་དགོངས་འདྲིལ་ཡིན༔ སྡེ་སྣོད་གསུམ་གྱི་ཉིང་ཁུ་ཡིན༔ མ་དང་མཁའ་འགྲོའི་སྙིང་ཁྲག་ཡིན༔ གཅོད་རྒྱུད་ཀུན་གྱི་རྒྱལ་པོ་ཡིན༔ ཐེག་ཆེན་ལྟ་བའི་ལ་དོན་ཡིན༔ དམིགས་མེད་སྒོམ་པའི་གཟེར་འདེབས་ཡིན༔ འགག་མེད་སྤྱོད་པའི་རྩལ་སྦྱོང་ཡིན༔ ཉམས་ལེན་དམ་ཚིག་མདུང་འདོན་ཡིན༔ མཐར་ཕྱིན་འབྲས་བུའི་ལ་བཟླ་ཡིན༔ མན་ངག་ཀུན་གྱི་ཡང་སྙིང་ཡིན༔ དགོངས་པ་ཀུན་གྱི་མཐར་ཐུགས་ཡིན༔ ལྟ་སྒོམ་ཀུན་གྱི་སྒྲོན་མེ་ཡིན༔ དམིགས་པ་ཀུན་གྱི་གཟེར་བུ་ཡིན༔ མ་རྒྱུད་ཌཱ་ཀིའི་སྲོག་སྙིང་ཡིན༔ བཀའ་བརྒྱུད་བླ་མའི་གདམས་ངག་ཡིན༔ རྟོགས་ལྡན་རྣམས་ཀྱི་ཉམས་ཁྲིད་ཡིན༔ སྒོམ་ལམ་པ་ཡི་མཐུན་འགྱུར་ཡིན༔ མ་རིག་གསལ་བའི་སྒྲོན་མེ་ཡིན༔ བཀའ་སྒྲོམ་འབྱེད་པའི་ལྡེ་མིག་ཡིན༔ སྦས་པ་ཕྱུང་པའི་གསལ་བྱེད་ཡིན༔ སྡོམ་པ་བཤིག་པའི་སིལ་བུ་ཡིན༔ མན་ངག་སྤྲོས་པའི་གཏེར་ཆེན་ཡིན༔ ཚིག་དོན་གསལ་བའི་ཉི་ཟླ་ཡིན༔ བཀའ་རྒྱ་ཆེ་བའི་ནམ་མཁའ་ཡིན༔ ལུང་རིགས་མང་བའི་གཟའ་སྐར་ཡིན༔ མི་འགྱུར་བརྟན་པའི་ས་གཞི་ཡིན༔ དགོངས་པ་དག་པའི་གསེར་གླིང་ཡིན༔ དགོས་འདོད་འབྱུང་བའི་ནོར་བུ་ཡིན༔ ནད་བརྒྱ་སེལ་བའི་སྨན་གཅིག་ཡིན༔ གདོན་བརྒྱ་འདུལ་བའི་གཉེན་པོ་ཡིན༔ དུག་ལྔ་འདུལ་བའི་ཡེ་ཤེས་ཡིན༔ འཕྲུལ་གཅོད་ཤེས་རབ་རལ་གྲི་ཡིན༔

ཡང་རྒྱ་ཆོད་པའི་ཁྱུང་ཆེན་ཡིན༔ དཔའ་རྩལ་ཆེ་བའི་སེང་གེ་ཡིན༔ སྟོབས་དང་ལྡན་པའི་གླང་ཆེན་ཡིན༔ ཟུག་རྔུ་སྦྱོང་པའི་མགོན་སྐྱབས་ཡིན༔ དམིགས་པ་རྣོ་བའི་སྤུ་གྲི་ཡིན༔ ཚོང་པ་རིན་ཆེན་ཕུང་པོ་ཡིན༔ དཔེར་ན་ནོར་བུ་ཐོགས་པའི་མིས༔ ལོངས་སྤྱོད་འདོད་དགུ་ལྷུན་གྲུབ་འབྱུང་༔ དེ་ཡི་ཕྱིར་ན་གཅོད་ཅེས་བྱ༔ ཚོགས་དྲུག་ལྷུག་པར་ཐོགས་བཅས་གཅོད༔ ཕན་གནོད་མེད་པས་ཐོགས་མེད་གཅོད༔ རང་འབྱུང་ཤེས་པས་དགའ་བྲོད་གཅོད༔ རང་གྲོལ་ཤེས་པས་སྙེམས་བྱེད་གཅོད༔ རེ་བ་མེད་པའི་སངས་རྒྱས་གཅོད༔ དོགས་པ་མེད་པའི་འཁོར་བ་གཅོད༔ ཉམ་ང་མེད་པའི་འདྲེ་གདོན་གཅོད༔ འཛེམ་དོགས་མེད་པའི་ནད་ཡམས་གཅོད༔ འཇིག་རྟེན་འཁོར་བའི་འཁྲུལ་སྣང་གཅོད༔ སྤྲོས་བཅས་སྟོན་པའི་བློ་ལ་གཅོད༔ སྤྲོས་མེད་སྒོམ་ཆེན་གྱི་ཉམས་ལ་གཅོད༔ སྤྲོས་བྲལ་ལྟ་བའི་ཕྱོགས་འཛིན་གཅོད༔ དམིགས་མེད་སྒོམ་པའི་བྱིང་རྒོད་གཅོད༔ འགག་མེད་སྤྱོད་པའི་བླང་དོར་གཅོད༔ མངོན་འགྱུར་འབྲས་བུའི་རེ་དོགས་གཅོད༔ དེ་ལྟར་ཆོད་པའི་རྣལ་འབྱོར་པས༔ རྟོག་པ་བྲལ་བའི་ལྟ་བ་རྟོགས༔ བྱིང་རྒོད་སངས་བས་སྒོམ་པ་ཤར༔ ཤུགས་འབྱུང་རང་གྲོལ་སྤྱོད་པ་སྐྱོང་༔ སྤང་བླང་མེད་པས་དམ་ཚིག་དག༔ འདོད་པ་ཟད་པས་སངས་རྒྱས་འགྲུབ༔ བསྒྲུབ་བྱ་བྲལ་བས་ལྷ་ཚོགས་གསལ༔ རྩ་རླུང་འབྱུང་བས་འདུ་བ་ཞི༔ ཐིག་ལེ་འཕེལ་བས་མ་ཚོགས་འདུ༔ ཆོས་ཟད་སྟེང་དུ་ཆོས་སྐྱོང་འཁོར༔ སྟེང་འོག་བར་གསུམ་དབང་དུ་འདུ༔ སྡེ་བརྒྱད་ཚོགས་རྣམས་འཁོར་དུ་འོང་༔ ཡོན་བདག་སྣང་སྲིད་ལྷ་འདྲེས་བྱེད༔ དངོས་གྲུབ་མ་སྲིང་མཁའ་འགྲོས་སྟེར༔ བདག་དོན་འགྲུབ་ནས་གཞན་དོན་འཕེལ༔ རྣམ་རྟོག་སངས་ནས་ཡེ་སངས་རྒྱས༔ མི་རྟོགས་ལྟ་བའི་གདེང་དང་ལྡན༔ འཁོར་འདས་གཉིས་ལ་ཁྱད་པར་མེད༔ དེ་ལྟར་གདམས་པའི་ཁྱད་ཆོས་འདི༔ རྒན་མོ་ང་ཡི་ཆོས་ལུགས་ཡིན༔ ཁྱེད་རྗེས་སུ་འཇུག་པའི་བུ་སློབ་ཀུན༔ མ་ཡེངས་དེ་ལྟར་ཉམས་སུ་ལོང་༔ བར་དོ་མི་མཐོང་ང་རང་ཀན་ཞེས་གསུངས་སོ༔ ཡང་རྒྱལ་བ་དོན་འགྲུབ་ཀྱིས་ཀྱེ་མ་ཅིག་ལགས༔

དེ་ལྟར་གསུངས་པ་ལ་དུམ་པ་རེ་གོ་བས་ཐུགས་ལ་བཏགས་ཀྱིས༔ ད་རུང་ཡང་ངེད་ཤུལ་དུ་མཆིས་པའི་བུ་སློབ་རྣམས་ལ༔ ཚིག་ཉུང་ལ་དོན་འདུས་པ་གཅིག་ཐུགས་ལ་ཐོགས་གྱིས་ཞུས་པས༔ ཡང་མ་ཅིག་གི་ཞལ་ནས་བཀའ་བཀྱོན་བརྒྱད་ཀྱི་ཞལ་ཆེམས་འདི་གསུངས་སོ༔ ཀྱེ་ཧོ་འདིར་ཚོགས་བུ་སློབ་ཀུན༔ མ་ཡེངས་ཡིད་ཀྱི་དྲན་པས་ཟུངས༔ ཆོས་པ་རྣམས་ཀྱང་ཆོས་ཀྱིས་འཆིང་༔ གཅོད་ཡུལ་འདོད་པ་མང་ལགས་ཀྱང་༔ ཚེ་འདིར་ཁེ་དྲེགས་མ་ཆོད་པས༔ སྐྱེ་ཤི་འཇིག་པ་མ་བྱུང་ན༔ གཉན་ས་འགྲིམ་པ་མང་ལགས་ཀྱང་༔ གནས་སུ་ཕྱིན་པ་མ་བྱུང་ན༔ སེར་མོ་ཆག་པ་མང་ལགས་ཀྱང་༔ འདུ་བ་འཛིན་པ་མ་བྱུང་ན༔ སྙེམས་ཐག་ཆོད་པ་མང་ལགས་ཀྱང་༔ ཉོན་མོངས་ཆོད་པ་མ་བྱུང་ན༔ འདྲེ་བདུད་ཆོད་པ་མང་ལགས་ཀྱང་༔ དངོས་འཛིན་ཆོད་པ་མ་བྱུང་ན༔ ངན་རྟོག་ཆོད་པ་མང་ལགས་ཀྱང་༔ བཟང་རྟོག་ཆོད་པ་མ་བྱུང་ན༔ མཛེ་པོ་སོས་པ་མང་ལགས་ཀྱང་༔ དུག་ལྔའི་ནད་སོས་མ་བྱུང་ན༔ ཕ་ཡུལ་སྤང་པ་མང་ལགས་ཀྱང་༔ གཟུང་འཛིན་སྤང་པ་མ་བྱུང་ན༔ རྒན་མོ་ང་ཡིས་ཆོས་བཤད་ཀྱང་༔ ཉལ་དུ་མ་བཏུབ་ཉལ་མ་ནུས༔ བློ་བདེར་ཉལ་བའི་ཆོས་ཡོད་དེ༔ ཁྱེད་སློབ་མ་རྣམས་ལ་ཡིད་མ་ཆེས༔ མི་ཚེ་འདི་ལ་མངོན་ཞེན་ནས༔ འཇིག་རྟེན་ཕྱི་མའི་སྨོན་ལམ་འདེབས༔ ཕྱི་མའི་དོན་བྱེད་ཟེར་ནས་ཀྱང་༔ ད་ལྟ་ཆགས་སྡང་མེ་ལྟར་འབར༔ འདོད་པས་ནང་ནས་བཅིངས་ནས་ཀྱང་༔ ཕ་རོལ་གཞན་ལ་ཆོས་སྐད་བྱེད༔ སེམས་དོན་མི་བསྒོམ་ཚིག་སློབ་དགའ༔ རང་དོན་མ་འགྲུབ་གཞན་དོན་བྱེད༔ དམ་ཆོས་སྙིང་ནས་མི་བསྒྲུབ་ནས༔ ཕ་རོལ་ཆེ་འདོད་ཆོས་སྐད་སྨྲ༔ ནམ་འཆི་ཅི་དྲག་མི་བསམ་ནས༔ ཕྱི་ཆས་བསོག་འཇོག་འདུག་ཆས་བྱེད༔ མི་ཚེ་ལོང་མེད་མི་བསམ་ནས༔ ཚེ་འདིར་རྟག་པར་འཛིན་ཡུལ་བྱེད༔ འཆི་དུས་ཅི་འོང་མི་བསམས་ནས༔ ད་ལྟ་གད་རྒྱངས་བག་མེད་བྱེད༔ ཤི་ནས་གར་འགྲོ་མི་བསམས་ནས༔ ད་ལྟ་བྱིས་པའི་སྤྱོད་བཞིན་བྱེད༔ དེ་ལ་གདམས་པ་བསྟན་གྱུར་ཀྱང་༔ རྒན་མོ་ང་ནི་ཡིད་མ་ཆེས༔ ད་གཅིག་པུར་འདུག་པའི་དུས་ལ་བབས༔ ལྐུག་པ་བཞིན་དུ་འདུག་ལ་དགའ༔ བཀའ་བཀྱོན་བརྒྱད་ཀྱི་གདམས་པ་འདི༔ ཕྱི་རབས་རྗེས་སུ་འཇུག་པའི་ཁྱེད༔ བུ་སློབ་རྣམས་ཀྱིས་ཐུགས་ལ་ཞོག་ཅེས་གསུངས་སོ༔ ཡང་མ་ཅིག་གི་ཞལ་ནས་ཁྱེད་རྗེས་སུ་འཇུག་པའི་བུ་སློབ་ཀུན༔ མ་ཡེངས་སེམས་ཀྱི་དྲན་པས་ཟུངས༔ བདུད་གཅོད་འདྲེ་ལ་བཅད་ནས་ཀྱང་༔ རློམ་སེམས་བདུད་དང་འགྲོག་པ་ཡི༔ བདུད་གཅོད་འདིས་ཀྱང་མི་འོང་ན༔ བླ་མའི་བཀའ་དྲིན་ཁྱད་བསད་ནས༔ དྲིན་ལན་བརྗོད་ནས་རང་ཆེ་བསྒྲུབས༔ བྱིན་རླབས་འདིས་ཀྱང་མི་འོང་ན༔ བཀའ་ལུང་མན་ངག་ཁྱད་བསད་ནས༔ རིག་པ་མེ་ཐུང་གདམས་ངག་འདེབས༔ དམུ་བཟོ་འདིས་ཀྱང་མི་འོང་ནས༔ རང་བདུད་ནང་ནས་བཞག་ནས་ཀྱང་༔ བདུད་གཅོད་གཞན་ནས་ཚོལ་བ་ཡི༔ གདམས་ངག་འདིས་ཀྱང་མི་འོང་ན༔ སངས་རྒྱས་རང་ལ་བཞག་ནས་ཀྱང་༔ ཡིད་ཀྱིས་མཉམ་པར་བཞག་པ་ཡི༔ ཞི་གནས་འདིས་ཀྱང་མི་འོང་ན༔ རང་གྲོལ་གདམས་ངག་མི་ཤེས་པས༔ རྣམ་རྟོག་བཙན་གཅོད་བྱེད་པ་ཡི༔ ཉམས་ལེན་འདིས་ཀྱང་མི་འོང་ན༔ རང་སེམས་འདྲེ་རུ་བཟུང་ནས་ཀྱང་༔ དྲག་སྔགས་གཞན་དུ་བྱེད་པ་ཡི༔ འདྲེ་འདུལ་འདིས་ཀྱང་མི་འོང་ན༔ རང་ལ་བྱིན་གྱིས་མ་བརླབས་པས༔ གཞན་ལ་བྱིན་རླབས་བྱེད་པ་ཡི༔ ཉམས་ལེན་འདིས་ཀྱང་མི་འོང་ན༔ རིག་པ་རང་གནས་མི་ཤེས་པས༔ སེམས་ཀྱིས་སེམས་ཉིད་ཚོལ་བ་ཡི༔ གཏི་མུག་འདིས་ཀྱང་མི་འོང་ན༔ ཚེ་འདིར་སངས་རྒྱས་ཐོབ་འདོད་ཀྱང་༔ ལྟ་སྒོམ་ཡིད་ཡུལ་དྲན་པ་ཙམ༔ ཕྱི་དུས་འདིས་ཀྱང་མི་འོང་ན༔ ལྟ་སྒོམ་བློ་ལས་འདས་ཟེར་ཞིང་༔ དངོས་པོ་རང་ཁར་འཛིན་པ་ཡི༔ ཁ་ལྟ་འདིས་ཀྱང་མི་འོང་ན༔ གཉིས་མེད་དོན་རྟོགས་ཟེར་ནས་ཀྱང་༔ གཉིས་འཛིན་ཞེན་པས་བཅིངས་པ་ཡི༔ ཐེ་ཚོམ་འདིས་ཀྱང་མི་འོང་ན༔ མཚན་མའི་ཚིག་ལ་ཞེན་ནས་ཀྱང་༔ ཁོང་པར་སྙིང་རྗེ་མེད་པ་ལ༔ ཁོང་སྟོང་འདིས་ཀྱང་མི་འོང་ན༔ རིག་པ་བཙོན་དུ་བཟུང་ནས་ཀྱང་༔ ཞི་གནས་སྟུག་པོ་སྒོམ་པ་ཡི༔ བླུན་སྒོམ་འདིས་ཀྱང་མི་འོང་ན༔ སྟོང་པ་ཙམ་ཞིག་བློར་བཞག་ནས༔ འདོད་ཡོན་རང་ཁར་བསྒྲུབ་པ་ཡི༔ སྟོང་ལྟ་འདིས་ཀྱང་མི་འོང་ན༔ རང་དོན་སྙིང་ཐག་མ་ཆོད་པའི༔ བླ་མ་བཟང་པོའི་ཁ་སྐད་ཀྱི༔ ཆོས་སྐད་འདིས་ཀྱང་མི་འོང་ན༔ རང་གཞན་ཕྱོགས་མེད་མི་ཤེས་པའི༔ ཕྱོགས་འཛིན་གཅིག་སྡོམ་སྤྲང་བ་ཡི༔ བྱ་བཏང་འདིས་ཀྱང་མི་འོང་ན༔ བར་དོ་འདི་ལ་མ་ཆོད་པའི༔ ད་གཟོད་བར་དོ་ཆོད་འདོད་པའི༔ རེས་འཇོག་འདིས་ཀྱང་མི་འོང་ན༔ རང་གིས་ཡེ་ནས་མ་རྟོགས་པའི༔ སངས་རྒྱས་གསར་བུ་འདོད་པ་ཡི༔ འབྲས་བུ་འདིས་ཀྱང་མི་འོང་ན༔ འཁོར་བར་རང་གྲོལ་མི་ཤེས་པས༔ ལོགས་སུ་མྱང་འདས་ཚོལ་བ་ཡི༔ གོ་ལོ་འདིས་ཀྱང་མི་འོང་ན༔ ལུང་ཡོད་གདམས་ངག་མི་དྲན་པའི༔ འཆི་ཁར་ལམ་སྣ་ཟིན་རེ་བའི༔ རེས་འཇོག་འདིས་ཀྱང་མི་འོང་ན༔ རང་སེམས་ནོར་བུ་མ་ཤེས་ནས༔ ལྷ་ལ་དངོས་གྲུབ་རེ་བ་ཡི༔ གདམས་ངག་འདིས་ཀྱང་མི་འོང་ན༔ རྒན་མོ་ང་ཡི་དབྱངས་ཆུང་འདི༔ ཁྱེད་བུ་སློབ་རྣམས་ཀྱིས་ཡིད་ལ་ཞོག༔ ཅེས་གསུངས་སོ༔

ཡང་སྲས་རྒྱལ་བ་དོན་འགྲུབ་ཀྱིས༔ ཀྱེ་མ་ཅིག་ལགས༔ ཡུམ་ཞིང་ཁམས་སུ་བྱོན་ནས་བདག་གིས་སྤྱོད་ལམ་ཇི་ལྟར་བགྱི་ཞུས་པས༔ མ་ཅིག་གི་སྐུ་གཟི་བརྗིད་དང་ལྡན་པ་ཁྲུ་གང་ཙམ་དུ་འཕགས་ནས༔ ཀྱེ་ཧོ་འདིར་འཚོགས་སྐལ་ལྡན་བུ་སློབ་ཀུན༔ མ་ཡེངས་སེམས་ཀྱི་དྲན་པས་ཟུངས༔ འདི་ལྟར་ཡིད་ལ་ཟུངས་ཤིག་བུ༔ གཉན་ས་རི་ཁྲོད་འགྲིམ་ཙ་ན༔ ལྟ་བ་གདིང་གིས་ཆོད་ཅིག་བུ༔ གདོན་གནོད་སྦྱིན་ཆོ་འཕྲུལ་བྱུང་ཙ་ན༔ ཕུང་པོ་གཟན་དུ་སྐྱུར་ཅིག་བུ༔ ལུས་ལ་ན་ཚ་བྱུང་ཙ་ན༔ རིག་པ་རྟེན་དང་ཕྲོལ་ཅིག་བུ༔ གཡའ་རི་གངས་ཁྲོད་འགྲིམ་ཙ་ན༔ རོ་སྙོམས་ཀྱི་སྤྱོད་པ་གྱིས་ཤིག་བུ༔ རང་ཉིད་གཅིག་པུར་འདུག་ཙ་ན༔ མ་ཡེངས་དོན་ལ་ལྟོས་ཤིག་བུ༔ རིག་པ་འཕྲོ་རྒོད་བྱུང་ཙ་ན༔ དེ་ཉིད་རྩ་བ་ཆོད་ཅིག་བུ༔ དགེ་སྦྱོར་བྱེད་ཁ་འཚེར་བ་ན༔ གནས་ལུགས་ཀྱི་ཐོག་ཏུ་ཞོག་ཅིག་བུ༔ རང་ཉིད་གཅིག་པུར་འདུག་ཙ་ན༔ བྱིང་རྨུག་འཐིབ་གསུམ་བྱུང་ཙ་ན༔ སེམས་ཉིད་ནམ་མཁར་བསྲེས་ཤིག་བུ༔ ཉམས་ལེན་ལ་ཐེ་ཚོམ་བྱུང་ཙམ་ན༔ གོང་མའི་ཞལ་གདམས་ལ་ལྟོས་ཤིག་བུ༔ གེགས་དང་གོལ་ས་བྱུང་བ་ན༔ མཆེད་གྲོགས་ལ་ག་དར་ཆོད་ཅིག་བུ༔ འཇིགས་པའི་ས་རུ་ཉལ་ཙམ་ན༔ སེམས་ཀྱིས་འཁུ་འཕྲིག་ཆོད་ཅིག་བུ༔ ལྷ་འདྲེ་ཆོ་འཕྲུལ་བྱུང་ཙམ་ན༔ ཉམས་ལེན་གྱི་གྲོགས་སུ་ཁྱེར་ཅིག་བུ༔ སྙེམས་དང་རྟོགས་པ་བྱུང་ཙམ་ན༔ སླར་ལ་ཐོག་འགེལ་གྱིས་ཤིག་བུ༔ མི་གཙང་མགོ་འཛེམ་བྱུང་ཙམ་ན༔ མཛེ་པོ་ཡི་མཆན་དུ་ཉོལ་ཅིག་བུ༔ སེམས་ཉིད་ལྟ་བ་གཅོད་ཙམ་ན༔ ལྷ་འདྲེ་རང་སར་གྲོལ་ཅིག་བུ༔ སྒོམ་པ་ཉམས་སུ་ལེན་ཙ་ན༔ རྣམ་རྟོག་ལ་ཐོག་བརྫིས་གྱིས་ཤིག་བུ༔ རྟོག་མེད་སྤྱོད་པ་བྱེད་ཙ་ན༔ མཛེ་ཀླད་དྲོན་མོ་འཐུངས་ཤིག་བུ༔ སྐུ་གསུམ་གྱི་འབྲས་བུ་ཚོལ་ཙ་ན༔ ཐེ་ཚོམ་གྱི་མདུད་པ་གྲོལ་ཅིག་བུ༔ རྐྱེན་ངན་གྲོགས་སུ་འཁྱེར་ཙམ་ན༔ ལྟས་ངན་གཡང་དུ་ལོངས་ཤིག་བུ༔ རྒྱལ་ཁམས་ཕྱོགས་མེད་འགྲིམ་ཙམ་ན༔ ཕ་ཡུལ་གྱི་འཁྲི་བ་ཆོད་ཅིག་བུ༔ འཁོར་དུ་མཛེ་སྤྲང་གིས་བསྐོར་ཙམ་ན༔ བྱམས་དང་སྙིང་རྗེ་སྒོམས་ཤིག་བུ༔ ཡིད་ཆེས་གཙོ་བོར་འཛིན་ཙམ་ན༔ ཐེ་ཚོམ་གྱི་མདུད་པ་ཁྲོལ་ཅིག་བུ༔ སྤྱོད་ལོག་གཡང་ལ་བསྐྱུར་ཙམ་ན༔ ཕྱོགས་ངན་ཐོགས་ཤིག་ཟས་ངན་ཟོས་ཤིག་བུ༔ རིགས་དྲུག་གཡང་ལ་བསྐྱུར་ཙམ་ན༔ བདུད་བཞི་ཡི་དཔུང་རྣམས་འཇོམས་ཤིག་བུ༔ གནས་ལུགས་སྟེང་དུ་འཇོག་ཙམ་ན༔ གཉིས་མེད་རང་སར་གྲོལ་ཅིག་བུ༔ ཡུལ་ལ་ཞེན་ཆགས་བྱུང་ཙམ་ན༔ རོ་སྙོམས་ཀྱི་ལྡོམ་བུ་གྱིས་ཤིག་བུ༔ ཕྱི་ཆས་བསོག་འཇོག་དྲན་ཙམ་ན༔ ལོང་མེད་རྒྱུད་ལ་སྒོམས་ཤིག་བུ༔ དྲིན་ཆེན་བླ་མ་དྲན་ཙམ་ན༔ འབྲལ་མེད་སྤྱི་བོར་སྒོམས་ཤིག་བུ༔ མཆེད་གྲོགས་ཆོས་མཛད་མཐོང་ཙམ་ན༔ དག་སྣང་ཕྱོགས་མེད་གྱིས་ཤིག་བུ༔ ཕ་རོལ་འཆི་བ་མཐོང་ཙམ་ན༔ རང་ཡང་ནམ་མཆི་སྒོམས་ཤིག་བུ༔ སེམས་ཅན་ཉམ་ཐག་མཐོང་ཙ་ན༔ ཨ་ཙ་མ་ན་སྒོམས་ཤིག་བུ༔ ཟས་ནོར་ལོངས་སྤྱོད་མཐོང་ཙམ་ན༔ རྩྭ་མགོའི་ཟིལ་པ་སྒོམས་ཤིག་བུ༔ སྐྱེ་རྒ་ན་འཆི་མཐོང་ཙམ་ན༔ རང་ཡང་འདི་བཞིན་སྒོམས་ཤིག་བུ༔ དུར་ཁྲོད་ཀྱི་ཀེང་རུས་མཐོང་ཙམ་ན༔ ཐམས་ཅད་འདི་བཞིན་སྒོམས་ཤིག་བུ༔ ཁ་ཟས་ཞིམ་ལྟོ་དྲན་ཙམ་ན༔ སྙིང་རྗེ་མེད་པར་སྒོམས་ཤིག་བུ༔ ཕ་རོལ་གྱིས་བསྟོད་བཀུར་བྱས་ཙམ་ན༔ རང་ཉིད་དམན་ས་ཟུངས་ཤིག་བུ༔ དགེ་སྦྱོར་ཡོན་ཏན་འཕེལ་བ་ན༔ དམ་བཅའ་ཡང་ཡང་གྱིས་ཤིག་བུ༔ གནས་ལ་ཞེན་ཆགས་བྱུང་ཙམ་ན༔ རི་དྭགས་ཀྱི་སྤྱོད་པ་གྱིས་ཤིག་བུ༔ བདེ་སྟོང་ཉམས་སུ་མྱོང་འདོད་ན༔ ལས་ཀྱི་ཕྱག་རྒྱ་བསྟེན་ཅིག་བུ༔ ཐམས་ཅད་སྒྱུ་མའི་རང་བཞིན་ལ༔ རྟག་འཛིན་རྡུལ་ཙམ་མེད་དོ་བུ༔ སྤྱིར་སྣང་ཞིང་སྲིད་པའི་ཆོས་རྣམས་ཀུན༔ ངོ་བོ་སེམས་སུ་འདུས་ཤིག་བུ༔ རྒན་མོ་ང་ཡི་དབྱངས་ཆུང་འདི༔ ཁྱེད་བུ་སློབ་རྣམས་ཀྱིས་ཐུགས་ལ་ཞོག༔ ངས་ནི་སུ་ལ་ཅི་མ་བསླབས༔ ཁྱོས་ཀྱང་སུ་ལ་ཅི་མ་སློབས༔ བསླབ་པས་མི་ལོབ་སྐྱུར་དང་གསལ༔ རྒན་མོ་ང་ཡི་ཆོས་བཤད་ཀྱང་༔ དེ་རིང་ཕྱིན་ཆད་དེ་ཙམ་བྱེད༔ ལར་ཐམས་ཅད་སྐྱེས་ནས་འཆི་བ་ལ༔ ཀུན་ཀྱང་མི་རྟག་འདི་བཞིན་ནོ༔ སྐྱེ་ཤི་ཉི་མ་ཤར་ནུབ་འདྲ༔ ཀུན་ལ་འོང་བ་ཐུབ་པས་གསུངས༔ རྒན་མོ་ང་ཡང་ལན་ཅིག་ཏུ༔ དག་པ་མཁའ་སྤྱོད་གནས་སུ་འགྲོ༔ ཁྱེད་བུ་སློབ་རྣམས་ཀྱིས་ཐུགས་ལ་དེ་ལྟར་ཞོག༔ ཅེས་གསུངས་སོ༔ དེ་ནས་ཁྱིའི་ལོ་ལ་ནམ་ཟླ་ནི་ལོ་སྐྱ་ཙམ་མེ་བ་ཡོད་པའི་དུས་ཡིན་པས༔ དེའི་ལོ་ལ་གླང་ལུང་གི་སྟོད་སྨད་ཕུ་མདའ་དང་ཟངས་རིའི་སྟོད་སྨད་ཕུ་མདའ་ཐམས་ཅད་དུ་ཉིན་མཚན་མེད་པ་ལ༔ ནམ་མཁའ་ལ་འཇའ་འོད་ཀྱི་གུར་དང་མེ་ཏོག་གི་ཆར་འབབ་པ་དང་༔ ལྷའི་རྔ་བོ་ཆེ་རྡུང་བ་ལ་སོགས་པའི་རོལ་མོའི་སྒྲ་སྙན་མང་པོ་གྲགས་པ་དང་ནམ་མཁའ་ལ་ཡང་སྤྲིན་ཁ་དོག་མི་འདྲ་བ་སྣ་ཚོགས་དུ་མ་ལ་གདུགས་འདྲ་བ་དང་༔ རྒྱལ་མཚན་འདྲ་བ་དང་༔ བ་དན་འདྲ་བ་དང་༔ བླ་བྲེ་འདྲ་བ་དང་༔ ཕྱེ་མ་ཕུར་མ་འདྲ་བ་དང་༔ དཔལ་བེའུ་འདྲ་བ་དང་༔ འཁོར་ལོ་འདྲ་བ་དང་༔ ནོར་བུ་འདྲ་བ་དང་༔ དར་པོ་ཆེ་འདྲ་བ་དང་༔ དུང་འདྲ་བ་དང་མེ་ཏོག་འདྲ་བ་དང་༔ རྡོ་རྗེ་འདྲ་བ་དང་༔ དྲིལ་བུ་འདྲ་བ་དང་༔ གསེར་ཉ་འདྲ་བ་དང་༔ མཆོད་རྟེན་འདྲ་བ་དང་༔ གསེར་འཕྲུ་འདྲ་བ་དང་༔ རྔ་བོ་ཆེ་འདྲ་བ་དང་༔ སེང་གེ་འདྲ་བ་དང་༔ ཁྱུང་ཆེན་ནམ་མཁའ་ལ་ལྡིང་བ་འདྲ་བ་དང་༔ ལྗོན་ཤིང་འདྲ་བ་དང་༔ ལྷ་བཤོས་འདྲ་བ་དང་༔ མཁར་རྔ་འདྲ་བ་དང་༔ ཆ་ལང་འདྲ་བ་དང་༔ གཞན་ཡང་མཆོད་རྫས་མི་འདྲ་བ་སྣ་ཚོགས་དུ་མ་བསམ་གྱིས་མི་ཁྱབ་པ་ནམ་མཁའ་ལ་ཁྲ་ཆི་ལེ་བ་ཉིན་མཚན་མེད་པར་རྒྱུན་དུ་གནས་པ་དང་༔ རི་མགོ་ཐམས་ཅད་དུ་ཡང་འཇའ་འོད་ཁ་དོག་མི་འདྲ་བ་སྣ་ཚོགས་དུ་མ་འཁྲིགས་ནས་ཁྲ་ཤིག་ཤིག་ཤར་བ་བྱུང་ངོ་༔ ས་རྡོ་རྣམས་ཀྱི་ཐོག་ཏུ་ཡང་འཇའ་འོད་ཁ་དོག་མི་འདྲ་བ་སྣ་ཚོགས་དུ་མ་ལ་མཆོད་རྫས་དང་སྐུ་གཟུགས་མི་འདྲ་བ་སྣ་ཚོགས་དུ་མ་འོད་ལམ་ལམ་འཆར་བ་བྱུང་ངོ་༔ རིའི་ཞོལ་མན་ཆད་དུ་ཆར་མ་ཡིན་པའི་ས་ལ་སྣུམ་ཆགས་པ་དང་ནམ་ཟླ་ཡང་དྲོད་བབ་པ་བཞིན་དུ་དྲོ་ཆི་ལེ་བ་བྱུང་ངོ་༔ ནམ་མཁའ་དྭངས་པའི་ནང་ནས་ལྷོ་འུར་འཁྲིགས་པ་བཞིན་དུ་བག་དྲོ་ཆི་ལེ་བ་སྣང་བ་དྭངས་སང་ངེ་བ་ཉམས་ཡང་དགའ་ཏིང་ངེ་བ་རིག་པ་ཡང་སྐྱོ་ཕྱོད་དེ་བ་རེད་ནས་བྱུང་ངོ་༔ སྤྱིར་ཡང་བོད་ཁམས་སུ་བཀྲ་ཤིས་པའི་རྟགས་བརྒྱད་དང་༔ གནམ་ས་གཉིས་ན་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་བས་རྒྱལ་ཁམས་ཀྱི་མི་ཐམས་ཅད་ཀྱིས་ན་རེ༔ ད་ལོ་གནམ་ས་གཉིས་ན་བཀྲ་ཤིས་པའི་རྟགས་བརྒྱད་དང་ངོ་མཚར་བའི་ལྟས་བསམ་གྱིས་མི་ཁྱབ་པ་འདི་འདྲ་བྱུང་བས་འདི་རྣམས་ཅི་ཡིན་ན་ཨང་ཟེར་བ་བྱུང་ངོ་༔ ཡུམ་ཞིང་ཁམས་སུ་གཤེགས་པ་ནི་སུས་ཀྱང་མ་ཚོར་རོ༔

དེ་ནས་སྲས་རྒྱལ་བ་དོན་འགྲུབ་ཀྱིས་ཡུམ་སྐུ་མི་འཚོ་བ་མཁྱེན་ནས་མ་དགོངས་པ་ཇི་ལྟར་གཤེགས་ལགས་ཞུས་པས༔ མ་ཅིག་གིས་སྐུ་གཟི་མདངས་དང་ལྡན་པར་མཛད་ནས་འདི་སྐད་གསུངས༔ ང་སྐྱེ་མེད་ཀྱི་ངང་ནས་འགགས་མེད་འཆི༔ སྐྱེ་ཤི་ཡི་མཚན་མ་རང་སར་གྲོལ༔ བདག་ལ་གཤེགས་པའི་གཤེགས་ཤུལ་མེད༔ མཐའ་བྲལ་ལྟ་བའི་ངང་ལ་འཆི༔ བློ་འདས་སྒོམ་པའི་ངང་ལ་འཆི༔ ཤུགས་འབྱུང་སྤྱོད་པའི་ངང་ལ་འཆི༔ དམ་ཚིག་དྲི་མེད་ངང་ལ་འཆི༔ ལྷུན་གྲུབ་འབྲས་བུའི་ངང་ལ་འཆི༔ དོན་ངོ་བོ་སྨྲ་བསམ་བརྗོད་མེད་འཆི༔ བདག་ལ་གཤེགས་པའི་གཤེགས་ཤུལ་མེད༔ འོན་ཀྱང་མོས་བློས་བཏགས་པ་ཙམ༔ དམིགས་མེད་ངང་ནས་རང་གྲོལ་ནས༔ ལྷམ་མེ་ལྷན་ནེ་ཙམ་དུ་འགྲོ༔ བདག་ལ་གཤེགས་པའི་གཤེགས་ཤུལ་མེད་ཅེས་གསུངས་ནས༔ ངས་ཐོག་མ་གསེར་གླིང་མ་ནས་བཟུང་སྟེ་ད་ལྟར་ཡན་ཆད་དུ་སྐྱེ་བ་བརྒྱ་དང་བདུན་ལ་འགྲོ་དོན་ཡུན་རིང་པོར་བྱས་པས་སྤྲུལ་པ་ཡང་མི་འདྲ་བ་དུ་མ་དང་མཐོང་ལུགས་ཡང་མི་འདྲ་བ་སྣ་ཚོགས་དུ་མ་ལ་མཐོང་བ་ཡིན་པས་དེ་ཅིའི་ཕྱིར་ཞེ་ན༔ ང་སངས་རྒྱས་ཡིན་ཆོས་ཡིན་དགེ་འདུན་ཡིན་པས་ང་ལ་སྐུར་བ་བཏབ་ན་ཕྱོགས་བཅུའི་སངས་རྒྱས་ལ་སྐུར་བ་བཏབ་པ་ཡིན༔ ཆོས་ལ་སྐུར་པ་བཏབ་པ་ཡིན༔ དགེ་འདུན་ལ་སྐུར་བ་བཏབ་པ་ཡིན༔ ང་ལ་དད་ཅིང་མོས་པ་བྱས་ན༔ ཕྱོགས་བཅུའི་སངས་རྒྱས་ལ་མོས་པ་བྱེད་པ་ཡིན༔ ཆོས་ལ་མོས་པ་བྱེད་པ་ཡིན༔ དགེ་འདུན་ལ་མོས་པ་བྱེད་པ་ཡིན༔

ད་ཡང་དགུ་བཅུ་གོ་དགུའི་བར་དུ་འགྲོ་དོན་ཡུན་རིང་དུ་བྱས་པས་ད་ནི་རེ་ཞིག་ལ་འགྲོ་དོན་ཡང་རྫོགས་ཟིན་ཡིན་པས་ང་འཇིག་རྟེན་མིའི་ཡུལ་དུ་ད་ལན་ལས་མངོན་མཚན་ཅན་གྱི་སྐྱེ་བ་ཡང་མི་ལེན་ལ་ད་ལྟ་ཡང་སྐུ་གདུང་དང་རིང་བསྲེལ་ཡང་མི་འབྱུང་ངོ་༔ ང་ཡི་སྤྲུལ་པ་ནི་འཛམ་བུའི་གླིང་འདིར་གྲངས་མེད་པར་འབྱུང་ངོ་༔ ད་ལན་ང་ལ་འཆི་བའི་འཆི་ཤུལ་ཡང་མེད་དོ༔ འོན་ཀྱང་ཁྱེད་སློབ་མ་རྣམས་ཀྱིས་མཐོང་ལུགས་མི་འདྲ་བ་དུ་མ་ལ་མཐོང་ནས་འོང་ངོ་༔

དེ་ཡང་ལས་དག་པ་དང་མ་དག་པ་གཉིས་ཀྱི་མཐོང་ལུགས་འོང་བས་བུ་ཁྱོད་ཀྱི་ཤེས་པར་གྱིས་ཤིག༔ ཅེས་གསུངས་ནས་ཡང་འདི་སྐད་གསུངས༔ སྐལ་ལྡན་བུ་ཁྱོད་སྙིང་ལ་ཞོག༔ ང་ཡི་གདམས་ངག་གཅོད་ཡུལ་འདི༔ དམ་ཆོས་ཕྱག་རྒྱ་ཆེན་པོ་ཡིན༔ ཕྱག་རྒྱ་ཆེ་ལ་བསྟན་དུ་མེད༔ བསྟན་དུ་མེད་ཀྱང་འདི་ལྟར་རོ༔ ཕྱག་ཅེས་སྟོང་པའི་རང་བཞིན་ལ༔ རྒྱ་ཞེས་འཁོར་བའི་རྒྱ་ལས་གྲོལ༔ ཆེན་པོ་ཟུང་འཇུག་གཉིས་མེད་ཡིན༔ གདོད་ནས་ལྷན་ཅིག་སྐྱེས་པ་འདི༔ དཔེར་ན་ནམ་མཁའ་སྟོང་པ་ལ༔ གང་གིས་གང་ལ་བརྟེན་ནས་གདབ༔ དེ་བཞིན་རང་གི་སེམས་ཉིད་འདི༔ གང་གི་གང་ལ་རྟེན་ཡུལ་མེད༔ མ་བཅོས་གཉུག་མར་ལྷོད་ལ་ཞོག༔ བཅིངས་པ་དག་ནི་ཀློད་ནས་ཀྱང་༔ གྲོལ་ནས་གྲོལ་བ་ཐེ་ཚོམ་མེད༔ དཔེར་ན་ནམ་མཁའི་དཀྱིལ་ལ་བལྟས་ཙ་ན༔ མཐོང་བ་ཐམས་ཅད་འགག་པར་འགྱུར༔ དེ་བཞིན་རང་གི་སེམས་ཉིད་འདི༔ སེམས་ཀྱིས་སེམས་ལ་བལྟས་གྱུར་ཀྱང་༔ རྣམ་རྟོག་ཚོགས་འགག་བྱང་ཆུབ་འཐོབ༔ དཔེར་ན་ནམ་མཁའི་སྤྲིན་ཚོགས་རྣམས༔ ནམ་མཁའ་རང་ལ་དེངས་པའོ༔ གར་ཡང་མ་སོང་སོང་པ་མེད༔ གང་དུ་མི་གནས་གནས་པ་མེད༔ དེ་བཞིན་སེམས་ཀྱི་རྟོག་ཚོགས་ཀྱང་༔ སེམས་ཀྱི་སེམས་ལ་བལྟས་པ་ན༔ སེམས་ཀྱི་རྟོགས་པའི་རྦ་རླབས་དོང་༔ དཔེར་ན་ནམ་མཁའ་སྟོང་པ་ལ༔ ཁ་དོག་གཟུགས་བརྙན་དབྱིབས་ལས་འདས༔ དེ་བཞིན་རང་གི་སེམས་ཉིད་ཀྱང་༔ གཟུགས་དང་ཁ་དོག་དབྱིབས་ལས་འདས༔ དཔེར་ན་ཉི་མའི་སྙིང་པོ་དེ༔ སྐལ་པའི་མུན་པས་བསྒྲིབ་མི་ནུས༔ དེ་བཞིན་རང་སེམས་རྟོགས་གྱུར་ན༔ སྐལ་པའི་འཁོར་བས་བསྒྲིབ་མི་ནུས༔ དཔེར་ན་ནམ་མཁའ་སྟོང་པ་ལ༔ མིང་དང་ཐ་སྙད་བཏགས་གྱུར་ཀྱང་༔ འདི་འདྲ་ཞེས་བྱ་བརྗོད་དུ་མེད༔ དེ་བཞིན་རང་སེམས་འོད་གསལ་འདི༔ སེམས་ཀྱི་མཚན་ཉིད་བརྗོད་གྱུར་ཀྱང་༔ འདི་འདྲ་གྲུབ་ཅེས་ཐ་སྙད་བྲལ༔ དེ་ལྟར་སེམས་ཀྱི་མཚན་ཉིད་ནི༔ གདོད་ནས་ནམ་མཁའ་སྟོང་པ་འདྲ༔ དེ་ལྟར་རང་སེམས་རྟོགས་གྱུར་ན༔ ཆོས་རྣམས་མ་ལུས་དེ་རུ་འདུས༔ རྣམ་རྟོག་སྤང་པའི་ཕ་རོལ་ན༔ ཆོས་སྐུ་བྱ་བ་ལོགས་ན་མེད༔ དུག་ལྔ་སྤང་པའི་ཕ་རོལ་ན༔ ཡེ་ཤེས་ལྔ་པོ་ལོགས་ན་མེད༔ དུག་གསུམ་སྤང་པའི་ཕ་རོལ་ན༔ སྐུ་གསུམ་བྱ་བ་ལོགས་ན་མེད༔ རང་སེམས་སྤང་པའི་ཕ་རོལ་ན༔ སངས་རྒྱས་བྱ་བ་ལོགས་ན་མེད༔ འཁོར་བ་སྤང་པའི་ཕ་རོལ་ན༔ མྱང་འདས་བྱ་བ་ལོགས་ན་མེད༔ འགྱུ་བ་སྤང་པའི་ཕ་རོལ་ན༔ ཐབས་ཞེས་བྱ་བ་ལོགས་ན་མེད༔ གནས་པ་སྤང་པའི་ཕ་རོལ་ན༔ ཤེས་རབ་བྱ་བ་ལོགས་ན་མེད༔ བདེ་བ་སྤང་པའི་ཕ་རོལ་ན༔ ཐབས་ཞེས་བྱ་བ་ལོགས་ན་མེད༔ སྟོང་པ་སྤང་པའི་ཕ་རོལ་ན༔ ཤེས་རབ་བྱ་བ་ལོགས་ན་མེད༔ རང་སེམས་སྤང་པའི་ཕ་རོལ་ན༔ གཉན་ས་བྱ་བ་ལོགས་ན་མེད༔ དགེ་སྡིག་སྤང་པའི་ཕ་རོལ་ན༔ ལྷ་འདྲེ་བྱ་བ་ལོགས་ན་མེད༔ ཚོགས་དྲུག་སྤང་པའི་ཕ་རོལ་ན༔ རིགས་དྲུག་བྱ་བ་ལོགས་ན་མེད༔ ཚོགས་བརྒྱད་སྤང་པའི་ཕ་རོལ་ན༔ སྡེ་བརྒྱད་བྱ་བ་ལོགས་ན་མེད༔ འགྱུ་དྲན་སྤང་པའི་ཕ་རོལ་ན༔ ཆོ་འཕྲུལ་བྱ་བ་ལོགས་ན་མེད༔ མཉམ་བཞག་སྤང་པའི་ཕ་རོལ་ན༔ ཐུན་བཞིའི་དགེ་སྦྱོར་ལོགས་ན་མེད༔ རྣམ་རྟོག་ཆོད་པའི་ཕ་རོལ་ན༔ གཅོད་ཅེས་བྱ་བ་ལོགས་ན་མེད༔ དྲན་ཤེས་རིག་པའི་ཕ་རོལ་ན༔ ཚར་ཚད་བྱ་བ་ལོགས་ན་མེད༔ རང་སེམས་རྟོགས་པའི་ཕ་རོལ་ན༔ ཆོད་ཚད་བྱ་བ་ལོགས་ན་མེད༔ ལུས་ཀྱི་བྱ་བྱེད་ཀུན་སྤངས་ལ༔ སོག་ཕོན་ཐག་པ་ཆད་བཞིན་སྡོད༔ ངག་གི་སྨྲ་བརྗོད་ཀུན་སྤངས་ལ༔ པི་ཝང་རྒྱུན་ཐག་ཆད་བཞིན་སྡོད༔ ཡིད་ལ་ཅི་ཡང་མི་བསམ་པ༔ དེ་ཉིད་ཕྱག་རྒྱ་ཆེན་པོ་ཡིན༔ རྒན་མོ་ང་ཡི་ཆོས་ལུགས་ལ༔ དེ་ལས་བྱ་རྒྱུ་ཅི་ཡང་མེད༔ ཀྱེ་ཧོ་འདིར་ཚོགས་བུ་སློབ་དད་ལྡན་ཀུན༔ རང་ལུས་མི་རྟག་ལ་ཁའི་བྱ་སྒྲོ་འདྲ༔ རང་སེམས་སྟོང་པ་ནམ་མཁའི་དཀྱིལ་ལྟར་གསལ༔ དེའི་ངང་ལ་མ་བཅོས་ཀློད་ལ་ཞོག༔ སེམས་ལ་གཏད་སོ་མེད་ན་ཕྱག་རྒྱ་ཆེན་པོའོ༔ དེ་ལ་གོམས་ཤིང་འདྲིས་ན་སངས་རྒྱས་ས་རུ་སླེབ༔ སྔགས་སྒྲུབ་གཏོར་མའི་ལས་ལ་བརྩོན་པ་དང་༔ འདུལ་བ་ལ་སོགས་སྡེ་སྣོད་ཆོས་རྣམས་ཀུན༔ རང་རང་གཞུང་ལུགས་གྲུབ་མཐའ་འཛིན་འདོད་ཀྱང་༔ རང་སེམས་ཕྱག་རྒྱ་ཆེན་པོ་རྟོགས་མི་འགྱུར༔ རང་འདོད་འཛིན་པས་རང་སེམས་འོད་གསལ་བསྒྲིབ༔ རྟོགས་པས་སྲུང་སྡོམ་དམ་ཚིག་དོན་ལས་ཉམས༔ ཡིད་ལ་མི་བྱེད་ཞེ་འདོད་ཀུན་དང་ཕྲོལ༔ རང་བྱུང་རང་ཞི་ཆུ་ཡི་རྦ་རླབས་བཞིན༔ མི་བསམ་མི་གནས་གདོད་ནས་རྣམ་པར་དག༔ དམ་ཚིག་མི་འདའ་མུན་པའི་སྒྲོན་མེ་ཡིན༔ ཞེ་འདོད་འཛིན་བྲལ་མཐའ་ལ་མི་གནས་ན༔ སྡེ་སྣོད་ལ་སོགས་རྒྱུད་སྡེའི་ཆོས་རྣམས་ཀུན༔ མ་ལུས་སྐད་ཅིག་ཉིད་ལ་རྟོགས་པར་འགྱུར༔ ལམ་འདིར་མོས་ན་འཁོར་བའི་མཐའ་ལས་ཐར༔ ལམ་འདིར་ཞུགས་ན་ཉོན་མོངས་སྡུག་བསྔལ་འཇོམས༔ དོན་འདི་བསྒྲུབ་ན་བླ་མེད་བྱང་ཆུབ་འཐོབ༔ ལམ་འདིར་མི་མོས་བླུན་པོ་གླང་བུ་ཡིན༔ ལམ་འདིར་མི་ཞུགས་དམུས་ལོང་མིག་མེད་ཡིན༔ འཁོར་བ་སྡུག་བསྔལ་རྒྱ་མཚོ་ཐར་མེད་མྱོང་༔ སྡུག་བསྔལ་མི་ཟད་བླུན་པོ་སྙིང་རེ་རྗེ༔ འཁོར་བ་སྡུག་བསྔལ་གནས་ནས་ཐར་འདོད་ན༔ བླ་མ་མཁས་བཙུན་བཤེས་གཉེན་རྟག་ཏུ་བསྟེན༔ མོས་གུས་གསོལ་འདེབས་ཞབས་ཏོག་མན་ངག་ཞུས༔ བླ་མས་ཅི་གསུངས་ཚད་མར་བཀའ་བཞིན་བསྒྲུབ༔ བྱིན་རླབས་སྙིང་ལ་ཞུགས་ནས་རང་སེམས་མཐོང་བར་འགྱུར༔ ཨེ་མ་འཁོར་བའི་ཆོས་ལ་སྙིང་པོ་མེད༔ སྡུག་བསྔལ་དར་རྒྱལ་ཡུན་རིང་མྱོང་པའི་རྒྱུ༔ ཚེ་འདི་ཡང་ཡེངས་ཟད་པ་མ་ཚོར་རམ༔ ཆོས་ལུང་ཡོད་དུ་བཞག་ན་སྐལ་བ་ཆད༔ ཆོས་ད་བྱེད་ཀྱི་ངང་ལ་མི་ཚེ་ཟད༔ བཙན་ཐབས་སུ་ཤི་ན་ཅི་བྱེད་ན༔ ད་ལྟ་འབད་ནས་མ་བསྒོམས་ན༔ སང་ཤི་དུས་དམ་ཆོས་སུ་ཡིས་གཏད༔ རང་གིས་དཀའ་སྤྱད་མ་བྱས་ན༔ གཞན་གྱིས་ཆོས་བྱས་ཅི་ལ་ཕན༔ དཔེར་ན་སྤྲང་པོའི་རྨི་ལམ་བཞིན༔ མདང་སོང་ཟས་ནོར་ལོངས་སྤྱོད་རྨིས༔ གཉིད་སད་བྱ་ལམ་རྗེས་མེད་འདྲ༔ འཇིག་རྟེན་འདུས་བྱས་ཐམས་ཅད་ཀུན༔ དཔེར་ན་དེ་དང་འདྲ་བའོ༔ ད་ལྟ་རང་དབང་ཡོད་པའི་ཚེ༔ སྙིང་པོ་ཡོད་པའི་སེམས་དོན་ལྟོས༔ བལྟས་པས་ཅི་ཡང་མཐོང་པ་མེད༔ མ་མཐོང་བ་དེ་ཉིད་མཐོང་བ་ཡིན༔ གཟུང་འཛིན་ཀུན་ལས་འདས་ན་ལྟ་བའི་མཆོག༔ ཡེངས་པ་མེད་ན་སྒོམ་པའི་མཆོག༔ བྱ་རྩོལ་མེད་ན་སྤྱོད་པའི་མཆོག༔ རེ་དོགས་མེད་ན་འབྲས་བུའི་མཆོག༔ དམིགས་གཏད་མེད་ན་ལྟ་བའི་མཆོག༔ བློ་ལས་འདས་ན་སྒོམ་པའི་མཆོག༔ བྱར་མེད་དུ་སྐྱོང་བ་སྤྱོད་པའི་མཆོག༔ མཐའ་ལས་འདས་པ་འབྲས་བུའི་མཆོག༔ དེ་དོན་རྟོགས་ན་བྱང་ཆུབ་ཐོབ༔ ལམ་དེར་ཞུགས་ན་བཙན་ས་ཟིན༔ ཕྱི་ནང་བར་གསུམ་སྒྲོ་འདོགས་ཆོད༔ ཐེག་པ་གོང་འོག་ཆོས་རྣམས་གོ༔ ཉོན་མོངས་བརྒྱད་ཁྲི་བཞི་སྟོང་འཇོམས༔ ཚར་སློངས་ཆོད་གསུམ་དུས་གཅིག་རྫོགས༔ འཁོར་བའི་རྒྱ་མཚོ་བརྒལ་བའོ༔ རྒན་མོ་ང་ཡི་གདམས་ངག་ལ༔ དེ་ལས་ཟབ་པ་སྟོན་རྒྱུ་མེད༔ ཅེས་གསུངས་སོ༔

དེ་ནས་ཁྱིའི་ལོ་རམ་ཟླའི་ཚེས་བཅོ་ལྔའི་ནངས་པར་རིའི་རྩེ་ལ་ཉི་ཟླ་སེར་ལྷག་སྟེ་ཤར་བ་དང་མཉམ་དུ༔ མ་ཅིག་གི་ཞལ་ནས་ཁྱེད་བུ་སློབ་ཐམས་ཅད་འདིར་འདུས་དང་དཔའ་བོ་དང་མཁའ་འགྲོ་མ་རྣམས་དགྱེས་པའི་ཚོགས་འཁོར་བཟང་པོ་གཅིག་བཤམས༔ ངས་ནི་ལོ་དགུ་བཅུ་གོ་དགུའི་བར་ལ་འགྲོ་དོན་རྒྱ་ཆེར་བྱས་ནས་ཡོད༔ ད་ནི་དག་པ་མཁའ་སྤྱོད་ཀྱི་གནས་སུ་འགྲོ་བ་ཡིན་གསུངས་ནས་སྐུ་ལུས་དཀར་དམར་གྱི་མདངས་ཆགས་པ་ཉི་ཟླའི་འོད་ཟེར་འཕྲོ་བ་ལྟ་བུར་མཛད་ནས༔ སྐུ་ཁྲུ་གང་ཙམ་དུ་ནམ་མཁའ་ལ་དཔག་ནས་འདི་སྐད་གསུངས༔ ང་དམ་ཆོས་སྐྱེ་མེད་གཅིག་ཆོད་ཡིན༔ གདམས་ངག་གཞན་ལས་ཁྱད་པར་འཕགས༔ བྱིན་རླབས་ལུས་སེམས་འཕོ་བ་འདི༔ འཕོ་བ་གཞན་ལས་ཁྱད་པར་འཕགས༔ ཕུང་པོ་ལུས་ཀྱི་མཆོད་སྦྱིན་འདི༔ སྟོན་མོ་གཞན་ལས་ཁྱད་པར་འཕགས༔ དབེན་གནས་གཉན་ས་རི་ཁྲོད་འདི༔ དགོན་པ་གཞན་ལས་ཁྱད་པར་འཕགས༔ འཁོར་དུ་སྣང་སྲིད་ལྷ་འདྲེས་བསྐོར༔ ཡོན་བདག་གཞན་ལས་ཁྱད་པར་འཕགས༔ ཉམས་ལེན་རེ་དོགས་མཐའ་བྲལ་འདི༔ དགེ་སྦྱོར་གཞན་ལས་ཁྱད་པར་འཕགས༔ སྤྱོད་པ་མ་འགག་རོ་སྙོམས་འདི༔ སྤྱོད་ལམ་གཞན་ལས་ཁྱད་པར་འཕགས༔ དོན་ངོ་བོ་སྨྲ་བསམ་བརྗོད་མེད་འདི༔ ཆོས་སྤྱོད་གཞན་ལས་ཁྱད་པར་འཕགས༔ ང་རང་ལབ་ཀྱི་སྒྲོན་མ་འདི༔ མི་མོ་གཞན་ལས་ཁྱད་པར་འཕགས༔ ད་ལྟ་སྐྱེ་མེད་ཀྱི་ངང་ལ་འཆི༔ འཆི་ལུགས་གཞན་ལས་ཁྱར་པར་འཕགས༔ ཞེས་གསུངས་ནས་སྐུ་ལུས་ལིང་ལིང་ལན་གསུམ་འཕག་སྟེ༔ སྐུ་འདོམ་གང་ཙམ་གྱི་ནམ་མཁའ་ལ་གར་ཐབས་ལིངས་སེ་བཞུགས་ནས་འདི་སྐད་གསུངས་སོ༔ སེམས་ཉིད་མཐོང་བའི་མཐོང་བ་འདི༔ མཐོང་བ་གཞན་གྱིས་དོ་ཟླ་མིན༔ རྒྱུ་མེད་རང་བཞིན་བྲལ་བ་མཐོང་༔ སྐྱེ་མེད་རྟོགས་པའི་ཉམས་མྱོང་འདི༔ སྐྱེ་འགག་གནས་གསུམ་བྲལ་བར་རྟོགས༔ རྟོགས་པ་གཞན་གྱིས་དོ་ཟླ་མིན༔ དྲན་དུ་མེད་པའི་ཉམས་མྱོང་འདི༔ བརྗོད་མེད་དོན་ཞིག་ཉམས་སུ་མྱོང་༔ ཉམས་མྱོང་གཞན་གྱིས་དོ་ཟླ་མིན༔ འགྱུར་མེད་ཐོབ་པའི་འབྲས་བུ་འདི༔ རྒྱུ་མེད་སྐུ་གསུམ་མངོན་དུ་ཐོབ༔ འབྲས་བུ་གཞན་གྱིས་དོ་ཟླ་མིན༔ རེ་དོགས་མཐའ་བྲལ་གྱི་ཆོས་སྐུ་འདི༔ འཁོར་འདས་གཉིས་མེད་ཀྱི་ངང་དུ་རྟོགས༔ སྐུ་གཟུགས་གཞན་གྱིས་དོ་ཟླ་མིན༔ སྒྱུ་ལུས་བོར་བའི་སྲུང་བ་འདི༔ སྲུང་བ་གཞན་གྱིས་དོ་ཟླ་མིན༔ ད་ནི་སྒྱུ་ལུས་ཞིག་ཀྱང་ཉམ་ང་མེད་གསུངས་ནས་དྲག་ཤུགས་དང་ལྡན་པའི་ཕཊ༔ ལན་གསུམ་གསུངས་པ་དང་༔ གཞི་ཆོས་ཉིད་ལ་གཡོ་བ་མེད་པའི་ངང་ནས༔ ཐུགས་སྤྱི་བོར་ཚངས་པའི་བུ་ག་ནས་ནམ་མཁའ་གཏད་མེད་པ་ལ་འཇའ་འོད་ཀྱི་ནང་དུ་ཡར་ལ་རྒྱངས་ཏེ་ཆོས་ཀྱི་ངང་ལ་གཤེགས་སོ༔ དེའི་ཚེ་སྲས་ཐོད་སྨྱོན་བསམ་འགྲུབ་ཀྱིས་ཡར་ལ་གཟིགས་པས་ནམ་མཁའ་ལ་སྤྲིན་དཀར་པོ་ཁ་དོག་སྣ་ལྔ་ཚང་པ་གཅིག་ལིང་ངེ་འདུག༔ སྤྲིན་དེའི་གསེབ་ཏུ་རང་བཞིན་ལྷུན་གྱིས་གྲུབ་པའི་འཇའ་འོད་ཀྱི་རྣམ་པ་ལ་རིན་པོ་ཆེ་སྣ་ཚོགས་པའི་ཁྲི་ཡངས་ཤིང་རྒྱ་ཆེ་བ་དར་དང་རིན་པོ་ཆེ་སྣ་ཚོགས་པས་བརྒྱན་པ་གཅིག་འདུག༔

དེའི་སྟེང་དུ་སྣ་ཚོགས་པདྨ་འདབ་མ་བརྒྱད་པ་མུ་ཁྱུད་རིམ་པ་གསུམ་དང་ལྡན་པ་གཅིག་འདུག༔ དེའི་དབུས་ཀྱི་པད་འདབ་ཀྱི་སྟེང་དུ་མ་ཅིག་ལབ་ཀྱི་སྒྲོན་མ་སྐུ་མདོག་སྔོ་ལ་དྭངས་པའི་མདངས་ཆགས་པ་ཞལ་གཅིག་ཕྱག་བཞི་པ་སྤྱན་གསུམ་འཛུམ་ཁྲོའི་རྣམ་པ་ཅན་ཕྱག་གཡས་ཀྱི་དང་པོ་ན་ཌཱ་མ་རུ་བསྣམས་པ༔ གཡོན་གྱི་དང་པོ་ན་དངུལ་དཀར་གྱི་དྲིལ་བུ་བསྣམས་པ༔ གཡས་ཀྱི་འོག་མ་ན་གྲི་གུག་བསྣམས་ཞིང་གཡོན་གྱི་འོག་མ་ན་ཐོད་ཁྲག་བསྣམས་ནས་ཐུགས་ཀར་སྟེང་འོག་ཏུ་བསྣོལ་པ༔ ཐོད་པ་སྐམ་རློན་རྙིང་པ་གསུམ་གྱིས་མགུལ་པ་བརྒྱན་པའི་ཁ་ཊྭཱཾ་ག་གྲུ་མོ་གཡོན་པའི་མཆན་ཁུང་དུ་བཅུག་པ༔ སྐུ་ལ་དར་དང་རུས་པ་དང་རིན་པོ་ཆེའི་རྒྱན་སྣ་ཚོགས་པས་བརྒྱན་ཞིང་༔ དབུ་ལ་ཐོད་སྐམ་དང་རིན་པོ་ཆེའི་རྩེ་ཕྲན་ལྔས་བརྒྱན་པ་དང་༔ སྐུ་ལ་དུར་ཁྲོད་ཀྱི་ཆས་བརྒྱད་ཀྱིས་རབ་ཏུ་བརྒྱན་ནས་གར་དགུའི་ཉམས་དང་ལྡན་ནས་ཞབས་གཉིས་བརྐྱང་བསྐུམ་གྱིས་གར་ཐབས་ལིངས་སེ་བཞུགས་ནས༔ དེའི་མདུན་དུ་སངས་རྒྱས་མཁའ་འགྲོ་མ་སྐུ་མདོག་དཀར་མོ༔ གཡས་སུ་རིན་ཆེན་མཁའ་འགྲོ་མ་སྐུ་མདོག་སེར་མོ༔ རྒྱབ་ཏུ་པདྨ་མཁའ་འགྲོ་མ་སྐུ་མདོག་དམར་མོ༔ གཡོན་དུ་ལས་ཀྱི་མཁའ་འགྲོ་མ་སྐུ་མདོག་ལྗང་གུ༔ ཤར་ལྷོར་དམ་ཚིག་མཁའ་འགྲོ་མ་སྐུ་མདོག་དཀར་སེར༔ ལྷོ་ནུབ་ཏུ་སྣ་ཚོགས་མཁའ་འགྲོ་མ་སྐུ་མདོག་དམར་སེར༔ ནུབ་བྱང་དུ་ཐམས་ཅད་མཁའ་འགྲོ་མ་སྐུ་མདོག་དམར་ལྗང་༔ བྱང་ཤར་དུ་འཇིག་རྟེན་མཁའ་འགྲོ་མ་སྐུ་མདོག་དཀར་ལྗང་༔ སྟེང་དུ་བདེ་གཤེགས་མཁའ་འགྲོ་མ་སྐུ་མདོག་སྔོན་མོ་གཅིག་ལ་འཁོར་མཁའ་འགྲོ་མ་རིགས་བཞིས་བསྐོར་བའི་གཙོ་འཁོར་ལྔ་འདུག་པ་ལ་རྒྱན་ཆ་ལུགས་དང་མཚན་ཉིད་ཐམས་ཅད་ཡོངས་སུ་རྫོགས་པ་གཙོ་མོ་དང་མཚུངས་པར་བཞུགས་ནས་འདུག༔

དེའི་སྟེང་དུ་མདུང་གང་ཙམ་དུ་རིན་པོ་ཆེ་སྣ་ཚོགས་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་ཡུམ་ཆེན་མོ་ལ་སྲས་ཕྱོགས་བཅུའི་སངས་རྒྱས་རྣམས་ཀྱིས་བསྐོར་ནས་བཞུགས་ནས་འདུག༔ དེའི་སྟེང་མདུང་གང་ཙམ་དུ་སེང་གེ་བཞི་ཁ་ཕྱིར་ཕྱོགས་པའི་ཁྲིའི་སྟེང་དུ་སངས་རྒྱས་ཤཱཀྱ་ཐུབ་པ་ལ་ཉེ་བའི་སྲས་བརྒྱད་དང་ཉན་ཐོས་ཆེན་པོ་རྣམས་དང་གནས་བརྟན་ཆེན་པོ་བཅུ་དྲུག་ལ་སོགས་པ་རྣམས་ཀྱིས་བསྐོར་ནས་བཞུགས་ནས་འདུག༔ དེའི་ཕྱིར་རིམ་མུ་ཁྱུད་ལ་སེང་གེ་དང་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་སྟེང་དུ་སངས་རྒྱས་སྟོང་རྩ་གཉིས་ལ་རང་རང་གི་འཁོར་གྱིས་བསྐོར་ནས་བཞུགས་ནས་འདུག༔ དེའི་སྟེང་དུ་མདུང་གང་ཙམ་དུ་དར་དང་རིན་པོ་ཆེ་སྣ་ཚོགས་པའི་ཁྲིའི་སྟེང་དུ་རྡོ་རྗེ་འཆང་ལ་ཏེ་ལོ་པ༔ ན་རོ་པ༔ གུ་གུ་རི་པ༔ པདྨ་འབྱུང་གནས༔ ལུ་ཧི་པ༔ ས་ར་ཧ༔ འབིར་བ་པ༔ སུ་ཀ་སུ་ཏི་མ༔ ཨརྱ་དྷེ་བ༔ ཀླུ་གྲུབ་ཡབ་སྲས༔ དམ་པ་སངས་རྒྱས༔ བསོད་ནམས་བླ་མ་ལ་སོགས་པའི་རྒྱ་བོད་ཀྱི་གྲུབ་ཆེན་དཔག་ཏུ་མེད་པས་བསྐོར་ནས་བཞུགས་ནས་འདུག༔ རྡོ་རྗེ་འཆང་གི་མདུན་ཕྱོགས་སུ་ནམ་མཁའ་ལ་རིན་པོ་ཆེ་སྣ་ཚོགས་པའི་ཁྲི་ཡངས་ཤིང་རྒྱ་ཆེ་བའི་སྟེང་དུ་ཆོས་སྐུ་ཀུན་ཏུ་བཟང་པོ་ཡབ་ཡུམ་ལ་རིགས་ལྔའི་སངས་རྒྱས་རྣམས་དང་བཅོམ་ལྡན་འདས་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱིས་བསྐོར་ནས་འདུག༔

དེའི་མདུན་ཕྱོགས་སུ་དཔལ་རྡོ་རྗེ་སེམས་དཔའ་དང་༔ དགའ་རབ་རྡོ་རྗེ་དང་༔ འཇམ་དཔལ་བཤེས་གཉེན་དང་༔ ཤྲཱི་སིང་ཧ་དང་༔ པདྨ་བཛྲ་དང་༔ བྷི་མ་ལ་མི་ཏྲ་དང་ཨིནྡྲ་བྷོ་ཏི་ལ་སོགས་པའི་གྲུབ་ཐོབ་རིག་འཛིན་བརྒྱད་ཅུས་བསྐོར་ནས་འདུག༔ རྡོ་རྗེ་འཆང་གི་གཡས་ཕྱོགས་སུ་དཔལ་གསང་བ་འདུས་པ་ལ་སོགས་པའི་ཕ་རྒྱུད་ཀྱི་ལྷ་ཚོགས་ཐམས་ཅད་ཀྱང་བཀྲ་དཔུང་ངེ་བཞུགས་ནས་འདུག༔ རྡོ་རྗེ་འཆང་གི་གཡོན་ཕྱོགས་སུ་མ་ཧ་མ་ཡ༔ ཀྱེ་པ་རྡོ་རྗེ༔ འཁོར་ལོ་བདེ་མཆོག་ལ་སོགས་པའི་མ་རྒྱུད་ཀྱི་ལྷ་ཚོགས་ཐམས་ཅད་བཀྲ་དཔུང་ངེ་བཞུགས་ནས་འདུག༔ ལྷ་ཚོགས་དེ་རྣམས་ཀྱང་མ་འདྲེས་པར་སོ་སོར་འཇའ་འོད་ཀྱི་རྣམ་པར་གསལ་བར་འདུག༔ དེ་རྣམས་ཀྱི་ཕྱི་རིམ་དུ་ཡང་དཔའ་བོ་དང་༔ དཔའ་མོ་དང་༔ མཁའ་འགྲོ་དང་༔ ཤུགས་འགྲོ་དང་༔ རྒྱལ་པོ་ཆེན་པོ་སྡེ་བཞི་དང་༔ ཕྱོགས་སྐྱོང་དང་༔ ཞིང་སྐྱོང་དང་༔ ཕྲ་མེན་དང་༔ བསྟན་སྲུང་དང་༔ དམ་ཅན་རྒྱ་མཚོའི་ཚོགས་དང་བཅས་པ་རྣམས་བཀྲ་དཔུང་ངེ་བཞུགས་ནས་འདུག་པར་མཐོང་བས་སྲས་ཐོད་སྨྱོན་བསམ་འགྲུབ་ཀྱིས་སྤྱི་གཙུག་རྒྱན་བཞུགས་མའི་གསོལ་འདེབས་གཅིག་མཛད་དོ༔ དེ་ལ་ལས་དག་པ་རྣམས་ཀྱིས་སྲས་ཐོད་སྨྱོན་བསམ་འགྲུབ་ཀྱིས་ཇི་ལྟར་མཐོང་བ་དེ་བཞིན་དུ་མངོན་སུམ་དུ་མཐོང་༔ ཡང་ལ་ལས་ལྷ་ཚོགས་གཞན་རྣམས་མ་མཐོང་མ་ཅིག་གཙོ་འཁོར་དང་སྤྲུལ་སྐུའི་སངས་རྒྱས་རྣམས་མཐོང་༔ ལ་ལས་སངས་རྒྱས་རྣམས་ཡང་མ་མཐོང་༔ མ་ཅིག་གཙོ་འཁོར་རྣམས་གསལ་བ་མཐོང་༔ ལ་ལས་མ་ཅིག་གཙོ་འཁོར་ཡང་མ་མཐོང་འཇའ་འོད་དང་ནམ་མཁའ་ལ་སྒྲ་སྙན་མང་པོ་གྲག་པ་རྣམས་ཐོས༔ ལ་ལས་སྒྲ་སྙན་ཡང་མ་ཐོས་འཇའ་འོད་དང་མེ་ཏོག་གི་ཆར་བབས་པ་རྣམས་མཐོང་༔ ཡང་ལ་ལས་དེ་རྣམས་ཅི་ཡང་མ་མཐོང་བས༔ མུན་པ་འཁྲིགས་པ་ལྟར་དུ་ནག་ཐིབས་སེ་བསྡད་པ་ལ་སོགས་པའི་མཐོང་ལུགས་མི་འདྲ་བ་དུ་མ་བྱུང་ངོ་༔

དེ་ནས་གདུང་ཕྱིར་ལ་ཁྲི་ཐོག་ཏུ་བབས་ཏེ་ནས་བྲེ་ལྔའི་ཟན་ཙམ་ཞིག་རེད་ནས་སྣང་ངོ་༔ དེ་ནས་ཞག་གསུམ་གྱི་རིང་ལ་གདུང་མཆོད་བཟུང་སྟེ༔ དཔལ་གསང་བ་འདུས་པ་ལ་སོགས་པའི་དཀྱིལ་འཁོར་བརྒྱ་རྩ་བརྒྱད་བཞེངས་ནས་མཆོད་པ་ཕུལ་བས་མེ་ཏོག་གི་ཆར་པ་དང་ནམ་མཁའ་ལ་རོལ་མོའི་སྒྲ་སྙན་མང་པོ་ཉིན་མཚན་མེད་པར་གྲག་པ་དང་༔ འཇའ་འོད་ཀྱི་གུར་དང་བྱ་རིགས་སྣ་ཚོགས་ཀྱི་རང་སྐད་ཀྱིས་སྒྲ་སྙན་མང་པོ་སྒྲོགས་པ་དང་༔ ས་གཡོ་བ་དང་ཐུག་ཆོམ་དང་ཆུ་བོ་འཕྱུར་བ་དང་དེ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་མང་པོ་བྱུང་ངོ་༔ དེ་ནས་ཚེས་བཅུ་དྲུག་གི་ནངས་པར་སློབ་མ་རྣམས་ཀྱིས་གདུང་ཞལ་བལྟས་པས་ལས་དག་པ་དང་མ་དག་པའི་ཁྱད་པར་གྱིས་ལ་ལས་མཆོད་རྟེན་ཞིག་འདུག་ཟེར༔ ལ་ལས་བུམ་པ་གཅིག་འདུག་ཟེར༔ ལ་ལས་རྡོ་རྗེ་ཞིག་འདུག་ཟེར༔ ལ་ལས་དྲིལ་བུ་ཞིག་འདུག་ཟེར༔ ལ་ལས་འཁོར་ལོ་ཞིག་འདུག་ཟེར༔ ལ་ལས་གདུགས་ཤིག་འདུག་ཟེར༔ ལ་ལས་རྒྱལ་མཚན་ཞིག་འདུག་ཟེར༔ ལ་ལས་བ་དན་ཞིག་འདུག་ཟེར༔ ལ་ལས་རྔ་ཡབ་ཅིག་འདུག་ཟེར༔ ལ་ལས་དཔལ་བེའུ་ཞིག་འདུག་ཟེར༔ ལ་ལས་དུང་ཞིག་འདུག་ཟེར༔ ལ་ལས་ནོར་བུ་ཞིག་འདུག་ཟེར༔ ལ་ལས་ཕ་བོང་ཞིག་འདུག་ཟེར༔ ལ་ལས་རླུང་ཞིག་འདུག་ཟེར༔ ལ་ལས་མེ་དཔུང་ཞིག་འདུག་ཟེར༔ ལ་ལས་ཆུ་མིག་ཅིག་འདུག་ཟེར༔ ལ་ལས་ཚ་ཚ་ཞིག་འདུག་ཟེར༔ ལ་ལས་མེ་ཏོག་གཅིག་འདུག་ཟེར༔ ལ་ལས་འོད་ཆེན་པོ་གཅིག་འདུག་ཟེར༔ ལ་ལས་མར་མེ་ཞིག་འདུག་ཟེར༔ ལ་ལས་རལ་གྲི་ཞིག་འདུག་ཟེར༔ ལ་ལས་ཅི་ཡང་མི་འདུག་ཟེར་བ་ལ་སོགས་པའི་མཐོང་ལུགས་མི་འདྲ་བ་སྣ་ཚོགས་དུ་མ་བྱུང་ངོ་༔

དེ་རྣམས་ནི་ལས་དག་མ་དག་གི་ཁྱད་པར་དང་༔ བཀྲ་ཤིས་པའི་རྟགས་བརྒྱད་དུ་མཐོང་བར་བྱུང་ངོ་༔ དེ་ནས་མ་ཅིག་གི་གདུང་སྦྱོང་བར་འདུག་པས་སློབ་མ་རྣམས་ཁ་མ་འཆམས་ཏེ༔ ལ་ལས་གཟིམ་མལ་དུ་སྦྱོང་དགོས་ཟེར༔ ལ་ལས་གླང་ལུང་གི་ཕུ་རུ་སྦྱོང་དགོས་ཟེར༔ ལ་ལས་གླང་ལུང་གི་སྐེད་པར་སྦྱོང་དགོས་ཟེར༔ ལ་ལས་གླང་ལུང་གི་སྨད་དུ་སྦྱོང་དགོས་ཟེར༔ ལ་ལས་སྐུ་གདུང་ཧྲིལ་བུ་ལ་འཇོག་དགོས་ཟེར་བ་ལ་སོགས་པའི་ཁ་མ་འཆམས་ཏེ༔ ནམ་མཁའ་ནས་གཟུགས་མེད་པའི་སྒྲ་སྙན་པོ་གཅིག་གིས་འདི་སྐད་ཟེར་རོ༔ ཨེ་མ་འཇིག་རྟེན་མི་རྣམས་ཀུན༔ དལ་འབྱོར་མི་ལུས་ཐོབ་ནས་ཀྱང་༔ དམ་ཆོས་སྙིང་ནས་མ་བསྒྲུབས་ན༔ འཇིག་རྟེན་བྱ་གཞག་ཅི་མཁས་ཀྱང་༔ རྟུག་པའི་བཙོ་གཡོ་བྱས་དང་འདྲ༔ རྣམ་ཤེས་དྲན་རིག་གསལ་བའི་དུས༔ དགེ་སྡིག་གི་རྩིས་བགྲང་མ་བྱས་ན༔ དཔའ་རྩལ་ཕོ་ཤེད་ཆེ་གྱུར་ཀྱང་༔ གཅན་ཟན་ལུང་སྟོང་འགྲིམ་པ་འདྲ༔ བླ་མ་མཁས་བཙུན་རྙེད་པའི་དུས༔ ཞབས་ཏོག་དང་གདམས་ངག་མ་ཞུས་ན༔ དད་པ་མོས་གུས་ཡོད་ཟེར་ཀྱང་༔ ལོང་བས་འཐོམ་འགྲོས་བྱས་པ་འདྲ༔ བསྟན་པ་དར་རྒྱས་འཛོམས་པའི་དུས༔ བྱང་ཆུབ་ཀྱི་ཐར་ལམ་མ་བཙལ་ན༔ བསམ་མེད་ཕྲུ་གུ་འབྱིལ་པ་འདྲ༔ ནམ་མཁའི་འཇའ་ལ་བལྟས་པ་འདྲའི༔ དམ་ཆོས་ཐང་མ་བདལ་པའི་དུས༔ རང་དོན་སྙིང་པོ་མ་བླངས་ན༔ གོ་མེད་བླུན་པོའི་མི་ཞིག་གིས༔ རིན་ཆེན་གླིང་ནས་སྟོང་ལོག་བྱས་པ་འདྲ༔ སྐྱིད་བརྒྱགས་ཕུན་སུམ་ཚོགས་པའི་དུས༔ ཡར་མཆོད་མར་སྦྱིན་མ་བཏང་ན༔ ཟས་ནོར་ལོངས་སྤྱོད་བཟང་གྱུར་ཀྱང་༔ ཆུ་རྡོ་དར་གྱིས་བཏུམ་པ་འདྲ༔ དབང་པོ་རྣམ་ལྔ་གསལ་བའི་དུས༔ རང་སེམས་སངས་རྒྱས་མ་ཤེས་ན༔ འདུས་བྱས་དྲེགས་པའི་ཆོས་རྣམས་ཀུན༔ ཡུད་ཙམ་ངལ་ཞིག་གསོས་པ་འདྲ༔ དབང་བསྐུར་གདམས་ངག་ཐོབ་ནས་ཀྱང་༔ དམ་ཚིག་ཚུལ་བཞིན་མ་བསྲུང་ན༔ ལོང་གཡོག་བྲལ་བའི་ལོང་བ་ཞིག༔ མུ་མེད་མཐའ་ལ་མཆོང་བ་འདྲ༔ སངས་རྒྱས་བསྟན་པ་མ་བསམ་ན༔ སེར་ཆགས་ཡང་ལ་སྨད་པ་ན༔ བསྐལ་པ་ཆགས་པའི་མུན་གླིང་ན༔ སྣང་གསལ་སྒྲོན་མེ་བསད་པ་འདྲ༔ མན་ངག་ཟབ་མོ་རྙེད་པའི་དུས༔ རང་གིས་ཉམས་སུ་མ་བླངས་ན༔ རང་སེམས་ངོ་ཤེས་ཟེར་གྱུར་ཀྱང་༔ མ་མཐོང་ཕྱོགས་རིས་ཚོར་བ་འདྲ༔ ཉམས་རྟོགས་རྒྱུད་ལ་མ་སྐྱེས་ན༔ ལྟ་བ་མཐོན་པོ་ཡོད་ཟེར་ཡང་༔ རང་གིས་དངོས་པོ་མ་མཐོང་བའི༔ རྫུན་མའི་མི་དང་ལབ་པ་འདྲ༔ དྲན་མེད་ཡེངས་མེད་མ་བསྐྱངས་ན༔ མཚམས་དང་སྨྲ་བཅད་བྱས་ཟེར་ཡང་༔ སྒོམ་ཆེན་མིང་གིས་བཏགས་པ་ཙམ༔ ལ་ཁའི་ཐོ་ཡོར་བརྩེགས་པ་འདྲ༔ འདི་ཕྱི་དགེ་སྡིག་བཞི་པོ་ལ༔ རྩིས་བགྲང་འདོར་ལེན་མ་བྱས་ན༔ དད་མོས་ཚོགས་བསོག་བྱེད་ཟེར་ཡང་༔ ལུང་སྟོང་ནང་གི་ཀི་འདེབས་འདྲ༔ རང་སེམས་གདོད་ནས་མཐའ་བྲལ་འདི༔ གཏིང་ནས་རྩ་བ་མ་ཆོད་ན༔ སངས་རྒྱས་ས་ལ་སླེབ་འདོད་ཀྱང་༔ ཞ་བོས་རི་དྭགས་མཐོང་བ་འདྲ༔ བློ་ཟད་ཆོས་ཟད་ཚེ་ཟད་གསུམ༔ འདི་གསུམ་མཐའ་རུ་མ་བསྐྱལ་ན༔ སྟོང་སྐད་མཐོན་པོ་སྨྲས་གྱུར་ཀྱང་༔ རྒྱ་མཚོའི་ཁ་ཡི་ལྦུ་བ་འདྲ༔ རང་གི་སེམས་རྒྱུད་གྱོང་པོ་འདི༔ ངེས་པར་ནང་ནས་མ་དུལ་ན༔ གཞན་ལ་ཆོས་བཤད་སྒྲོགས་གླིང་རྣམས༔ ནེ་ཙོའི་ཁ་ཡི་ཆོས་འདོན་འདྲ༔ ཡུམ་ཆེན་ཐུགས་སྤྲུལ་ལབ་སྒྲོན་གྱིས༔ དམ་ཆོས་ཐང་མ་བདལ་བའི་དུས༔ རང་དོན་སྐལ་བ་མི་ལེན་པའི༔ ད་ལྟར་གདུང་ལ་རྩོད་པ་རྣམས༔ མི་རོ་གསེར་ཆུས་བྱུག་པ་འདྲ༔ གདུང་ལ་མ་རྩོད་མལ་སར་སྦྱོང་༔ ཞེས་གསུངས་པ་ཞིག་བྱུང་པས་དེ་ནས་གདུང་གཟིམས་མལ་དུ་སྦྱོང་བར་བརྩམས་པས༔ གདུང་ཁང་ལ་ས་རྡོ་མ་བརྩེགས་ཏེ༔ གསེར་དངུལ་དང་༔ གཡུ་དང་༔ བྱུ་རུ་དང་༔ དུང་དང་༔ ཤེལ་དང་༔ མཆོང་དང་༔ མུ་ཏིག་དང་༔ མུ་མེན་དང་༔ དར་དང་༔ གོས་ཆེན་དང་༔ ཟ་འོག་དང་༔ འཕྲུག་དང་རས་ལ་སོགས་པ་དར་ཟབ་སྣ་ཚོགས་པ་དང་རིན་པོ་ཆེ་སྣ་ཚོགས་དང་༔ ཏིལ་དང་༔ འབྲས་དང་༔ གྲོ་དང་ནས་ལ་སོགས་པའི་འབྲུ་རིགས་སྣ་ཚོགས་པ་དང་༔ ཟངས་དང་༔ ཁྲབ་དང་རལ་གྲི་ལ་སོགས་པའི་གོ་མཚོན་སྣ་ཚོགས་པ་དང་རིན་པོ་ཆེ་སྣ་ཚོགས་པའི་བརྩེགས་པ་ཆེན་པོ་བྱས་ཏེ༔ སྤུར་ཁང་གི་ལོགས་རེ་རེ་ལ་འདོམ་པ་བཞི་རེ་བྱས་སོ༔

དེ་ནས་གདུང་འདྲེན་པ་བརྩམས་པས་སྐུ་གདུང་ལ་སུས་ཀྱང་འཇུ་མ་ཕོད་ནས་ལུས་པས༔ ཚེས་བཅུ་བདུན་གྱི་ཐོ་རངས་ཁ་ལ་མཁའ་འགྲོ་མ་སེང་གེའི་གདོང་པ་ཅན་འཁོར་མཁའ་འགྲོ་མ་བཞིས་བསྐོར་བའི་གཙོ་འཁོར་ལྔ་འོད་ཟེར་ཁ་དོག་སྣ་ལྔ་ཉི་མའི་སྲབ་མདའ་འདྲ་བ་འོད་ཀྱི་རེ་བ་ཞིག་གི་རྒྱུད་ལ་བྱུང་ནས་རྒྱལ་བའི་ཡུམ་ཆེན་ལབ་ཀྱི་སྒྲོན་མ་ལ་གསོལ་བ་འདེབས་ཟེར་བའི་དབྱངས་སྒྲ་དི་རི་རི་མགྲིན་གཅིག་བྱས་ནས༔ མཁའ་འགྲོ་མ་གཙོ་འཁོར་ལྔ་པོ་དེས་གདུང་སྤུར་ཁང་ནང་དུ་གདན་དྲངས་ནས་འཇའ་འོད་ཀྱི་རྒྱུད་ལ་གསོལ་འདེབས་ཀྱི་དབྱངས་སྒྲ་དི་རི་རི་བྱེད་ཅིང་ནམ་མཁའ་ལ་ཐིམ་ནས་ཐལ་ལོ༔

དེ་ནས་དཔལ་གསང་བ་འདུས་པའི་དཀྱིལ་འཁོར་ལ་སོགས་པའི་ཕ་རྒྱུད་ཀྱི་དཀྱིལ་འཁོར་དང་མ་ཧ་མ་ཡ་དང་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དང་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་མ་རྒྱུད་ཀྱི་དཀྱིལ་འཁོར་བརྒྱ་རྩ་བརྒྱད་བཞེངས་ནས༔ གདུང་ལ་འོད་ཕུལ་བར་བརྩམས་པས་སྐུ་གདུང་གཅེས་དྲགས་པས་སུས་ཀྱང་འོད་ཕུལ་མ་ཕོད་པས༔ ཚེས་བཅྭོ་བརྒྱད་ཀྱི་ཉི་མ་རྩེ་ཤར་བ་དང་མཉམ་དུ་ཤར་ཕྱོགས་ཀྱི་ནམ་མཁའ་ལ་འཇའ་ཚོན་སྣ་ལྔ་འཁྲིགས་པའི་ནང་ནས་མཁའ་འགྲོ་མ་སྐུ་མདོག་སྔོན་མོ་རུས་པའི་རྒྱན་དྲུག་དང་༔ དུར་ཁྲོད་ཀྱི་ཆས་བརྒྱད་ཀྱིས་བརྒྱན་པའི་གཙོ་འཁོར་ལྔ་བྱུང་ནས་མགྲིན་གཅིག་དུ༔ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ རྒྱལ་བའི་ཡུམ་ཆེན་ལབ་ཀྱི་སྒྲོན་མ་ལ་གསོལ་བ་འདེབས་ཟེར་བའི་དབྱངས་སྒྲ་དི་རི་རི་བྱེད་ཅིང་ཡེ་ཤེས་ཀྱི་མེ་འོད་ཧྲི་ལེ་བ་ཞིག་ཤར་ཕྱོགས་ཀྱི་གདུང་སྒོ་ནས་ཕུལ་ཏེ༔ གསོལ་འདེབས་ཀྱི་དབྱངས་བྱེད་ཅིང་ནམ་མཁའ་ལ་ཐིམ་ནས་ཐལ་ལོ༔ དེ་ནས་ཐུགས་ཀ་འོད་ཀྱི་གའུ་ནས་མེ་བྱུང་སྟེ༔ སྐུའི་དབྱིབས་བརྒྱུད་ནས་སྤྱི་བོར་ཚངས་པའི་བུ་ག་ནས་མེ་དཀར་ཧྲི་ལེ་བྱུང་ངོ་༔ དེ་ནས་གདུང་སྦྱོང་པའི་རྣམ་པར་ཇི་ལྟར་བྱས་ཀྱང་༔ གདུང་གི་དངོས་པོ་དང་གསུར་དུད་ལ་སོགས་པ་ཅི་ཡང་མ་བྱུང་ཞིང་༔ ཡུལ་ཁམས་ཐམས་ཅད་སྤོས་དུད་ཀྱིས་ཁྱབ་པ་དང་༔ དྲི་བཟང་པོ་སི་ལེའི་དྲི་མ་ལྟར་ཁམས་དྭངས་སང་ངེ་བས་ཁྱབ་པར་བྱུང་ངོ་༔ ནམ་མཁའ་ལ་ཡང་འཇའ་འོད་ཀྱི་གུར་ཁང་དང་མེ་ཏོག་ཁ་དོག་སྣ་ཚོགས་པའི་ཆར་དང་༔ ལྷའི་རྔ་བོ་ཆེ་རྡུང་བ་ལ་སོགས་པའི་རོལ་མོ་ཡི་སྒྲ་སྙན་སྣ་ཚོགས་དཔག་ཏུ་མེད་པ་གྲག་པ་དང་༔ ལྷའི་ཁྱེའུ་ཕོ་མོ་ཡིན་ཟེར་བའི་སྤྲིན་ཁ་དོག་སྣ་ཚོགས་པའི་གསེབ་ནས༔ ཁྱེའུ་ཕོ་མོ་ལོ་བཅོ་ལྔ་ལོན་པ་ཙམ་རྒྱན་སྣ་ཚོགས་པས་བརྒྱན་པ་དཔག་ཏུ་མེད་པ་བྱུང་ནས༔ མཆོད་རྫས་སྣ་ཚོགས་དུ་མ་ཐོགས་ནས་མཆོད་པའི་དབྱངས་དཔག་ཏུ་མེད་པ་བྱེད་ཅིང་གདུང་ལ་མཆོད་པ་ཕུལ་ནས་གར་སྣ་ཚོགས་པ་བྱེད་ཅིང་སྤྲིན་ལ་ཐིམ་པར་བྱུང་ངོ་༔

དེ་ནས་རྒྱལ་བ་དོན་འགྲུབ་ལ་སོགས་པའི་བུ་ཆེན་རྣམས་དང་བུ་མོ་བསོད་ནམས་རྒྱན་ལ་སོགས་པའི་རྣལ་འབྱོར་མའི་ཚོགས་རྣམས་ཀྱིས་གསེར་དང་༔ དངུལ་དང་༔ གཡུ་དང་༔ བྱུ་རུ་དང་༔ དུང་དང་༔ ཤེལ་དང་༔ མཆོང་དང་མུ་ཏིག་ལ་སོགས་པའི་རིན་པོ་ཆེ་སྣ་ཚོགས་དང་༔ དར་དང་༔ རས་དང་གོས་ཆེན་ལ་སོགས་པའི་དར་ཟབ་སྣ་ཚོགས་པ་དང་༔ ཀ་ར་དང་༔ བུ་རམ་དང་༔ སྦྲང་རྩི་དང་འབྲས་ལ་སོགས་པའི་བཟའ་བའི་བྱེ་བྲག་སྣ་ཚོགས་པ་དང་མར་ཁུ་གསེར་སྐྱོགས་རེ་རེ་ཐོགས་ནས་སྲས་རྒྱལ་བ་དོན་འགྲུབ་ཀྱིས་མ་ཅིག་ལ་སྐུ་བཞི་དབྱེར་མེད་ཀྱི་བསྟོད་པ་འདི་མཛད་པའི་རམ་འདེགས་བུ་སློབ་ཐམས་ཅད་ཀྱིས་མཛད་དོ༔ ཀྱེ་མ་རིག་པ་གཞི་ནས་ཤར་བའི་མ༔ སྙེམས་ཐག་གཏིང་ནས་ཆོད་པའི་མ༔ ལུས་སྲོག་གཟན་དུ་བོར་བའི་མ༔ མས་དབྱིངས་ནས་བྱིན་གྱིས་བརླབ་ཏུ་གསོལ༔ མ་མདོ་རྒྱུད་ཀྱི་དགོངས་པ་ཐུགས་སུ་ཆུད༔ ལབ་ཀྱི་སྒྲོན་མའི་སྐུ་ལ་ཕྱག་འཚལ་བསྟོད༔ མ་རང་བཞིན་རྣམ་དག་ཐུགས་སུ་ཆུད༔ ཐུགས་ནི་དབྱིངས་དང་མཚུངས་པས་ཁྱབ༔ ཐོག་མཐའ་གཉིས་པོ་གཞི་ནས་དག༔ བདག་ཏུ་འཛིན་པ་རང་སར་གྲོལ༔ མ་ངོ་བོ་ཉིད་ཀྱི་སྐུ་ལ་ཕྱག་འཚལ་ལོ༔ མ་ཤེས་རབ་ནམ་མཁའི་དབྱིངས་ནས་ཤར༔ སྤྱོད་ལམ་རྣམ་རྟོག་མི་མངའ་བས༔ སྙེམས་བྱེད་ཉམ་ང་གཞི་ལ་དག༔ རྣམ་རྟོག་མཚན་མ་རང་སར་གྲོལ༔ མ་ཆོས་ཀྱི་སྐུ་ལ་ཕྱག་འཚལ་བསྟོད༔ མ་མངོན་ཤེས་དྲུག་པོ་ཤེས་བྱ་མཁྱེན༔ ཟག་མེད་བདེ་སྟོང་རྒྱུད་ལ་སྐྱེས༔ སྒོམ་མཚན་མར་འཛིན་པ་གཞི་ལ་དག༔ སྣང་སྲིད་ལྷ་འདྲེ་རང་སར་གྲོལ༔ མ་ལོངས་སྤྱོད་རྫོགས་པའི་སྐུ་ལ་ཕྱག་འཚལ་བསྟོད༔ མ་སྐྱེ་བ་བུད་མེད་ལུས་སྤྲུལ་ནས༔ དོན་བཟང་ངན་མེད་པར་འགྲོ་དོན་མཛད༔ ཆགས་སྡང་གཉིས་པོ་གཞི་ལ་དག༔ ཟོག་ཟོག་གཉིས་པོ་རང་སར་གྲོལ༔ མ་སྤྲུལ་པའི་སྐུ་ལ་ཕྱག་འཚལ་བསྟོད་ཅེས་བསྟོད་པའོ༔

ཡང་མར་ཁུ་གསེར་སྐྱོགས་གང་དང་མཆོད་རྫས་རྣམས་ཐོགས་ནས༔ གདུང་ཁང་གི་ལྷོ་སྒོ་ནས་སྐུ་ལྔའི་བསྟོད་པ་འདི་མཛད་དོ༔ ཀུན་གྱིས་མ་ཅིག་ཇོ་མོ་ནི༔ མ་སྒྲིབ་པ་བྱང་ནས་སྟོང་ཉིད་རྟོགས༔ མ་ཤེས་རབ་ཅན་ལ་ཕྱག་འཚལ་བསྟོད༔ མ་ལུས་སེམས་ཕྲལ་ནས་གཅེས་འཛིན་ཐོང་༔ མ་གདམས་ངག་ཅན་ལ་ཕྱག་འཚལ་བསྟོད༔ མ་དུར་ཁྲོད་འགྲིམ་ཡང་ཉམ་ང་མེད༔ མ་ཉམས་རྟོགས་ཅན་ལ་ཕྱག་འཚལ་བསྟོད༔ མ་སྙེམས་ཐག་ཆོད་པས་བདུད་རྣམས་ཞི༔ མ་ནུས་པ་ཅན་ལ་ཕྱག་འཚལ་བསྟོད༔ མ་བདུད་རྣམས་ཞི་བས་ཡེ་ཤེས་འཕེལ༔ མ་རྟོགས་ཚད་ཅན་ལ་ཕྱག་འཚལ་བསྟོད༔ མ་སྟོང་ཉིད་རྟོགས་ནས་ས་རྣམས་ནོན༔ མ་ཚོགས་གཉིས་རྫོགས་ལ་ཕྱག་འཚལ་བསྟོད༔ མ་གདམས་ངག་བཀའ་དང་མཐུན་པར་སྟོན༔ མ་ལུང་སྟོན་རྫོགས་ལ་ཕྱག་འཚལ་བསྟོད༔ མ་ཉམས་མགུར་བཞེས་པས་ཡེ་ཤེས་སྐྱེ༔ མ་བྱིན་རླབས་ཅན་ལ་ཕྱག་འཚལ་བསྟོད༔ མ་ཞབས་ཏོག་མེད་ཀྱང་གདམས་ངག་སྟོན༔ མ་ཐུགས་རྗེ་ཅན་ལ་ཕྱག་འཚལ་བསྟོད༔ ཡང་མར་ཁུ་དང་མཆོད་རྫས་ཐོགས་ནས་ནུབ་སྒོ་ནས་བསྟོད་པ་འདི་མཛད་དོ༔ ཀུན་གྱིས་མ་ཅིག་ཇོ་མོ་ནི༔ མ་ངན་སོང་འཁོར་བའི་བདུད་ལས་ཐར༔ ངན་འགྲོའི་ཕྱོགས་ཀྱི་བདུད་ལས་ཐར༔ མ་མཐོ་རེས་འགྲིམ་ལ་ཕྱག་འཚལ་བསྟོད༔ མ་བདེ་འགྲོའི་གནས་ལ་མི་ཞེན་པས༔ བདེ་བའི་ལས་རྣམས་དབྱིངས་སུ་གྲོལ༔ ལྷ་མི་འཁོར་བའི་བདུད་ལས་ཐར༔ མ་ཐར་ལམ་བགྲོད་ལ་ཕྱག་འཚལ་བསྟོད༔ མ་ལོག་འདྲེ་བགེགས་ཀྱི་མི་འཇིགས་པའི༔ འདྲེ་གདོན་རང་སྣང་གི་སེམས་སུ་ཤེས༔ གདོན་གནོད་སྦྱིན་ཕོ་མོའི་བདུད་ལས་ཐར༔ མ་བར་ཆད་སེལ་ལ་ཕྱག་འཚལ་བསྟོད༔ ཡང་མར་ཁུ་དང་མཆོད་རྫས་རྣམས་ཐོགས་ནས་བྱང་སྒོ་ནས་བསྟོད་པ་འདི་མཛད་དོ༔

ཀུན་གྱིས་མ་ཅིག་ཇོ་མོ་ནི༔ མ་དང་པོར་ལུས་སེམས་བསྐྱེད་པའི་མ༔ བར་དུ་གདམས་ངག་སྟོན་པའི་མ༔ ཐ་མ་ལམ་སྣ་འདྲེན་པའི་མ༔ མ་བཀའ་དྲིན་ཅན་ལ་ཕྱག་འཚལ་བསྟོད༔ མ་ལུས་སྲོག་གཟན་དུ་བོར་བའི་མ༔ རིག་པ་གཞི་ལ་ཤར་བའི་མ༔ མ་དབྱིངས་ལ་གཤེགས་བཞུགས་མི་མངའ་ཡང་༔ བུ་ད་རུང་སྙེམས་ཐག་མ་ཆོད་པ༔ མ་བཞུགས་པའི་ཚེ་ལ་དགའ་མ་ཚོར༔ གཤེགས་པའི་ཚེ་ན་སྙིང་མ་དགའ༔ མ་ཤཱཀྱ་ཐུབ་པའི་བསྟན་པ་ལ༔ མ་ཅིག་སྤྲུལ་པའི་སྐུ་རུ་བྱོན༔ མ་རིག་པ་ནང་ནས་ཤར་བའི་མ༔ བློ་ཡི་སྙེམས་ཐག་ཆོད་པའི་མ༔ མ་བཞུགས་ནས་བྱིན་གྱིས་བརླབ་ཏུ་གསོལ༔ མས་ལུས་ལ་བདེ་བ་བསྐྱེད་དུ་གསོལ༔ ངག་ལ་ནུས་པ་བསྐྱེད་དུ་གསོལ༔ སེམས་ལ་རྟོགས་པ་བསྐྱེད་དུ་གསོལ༔ ཀ་དག་སྐྱེ་མེད་རྟོགས་པར་བྱིན་གྱིས་རློབས་ཅེས་མཆོད་ཅིང་བསྟོད་དོ༔ གཞན་ཡང་སྲས་རྒྱལ་བ་དོན་འགྲུབ་ཀྱིས་ཕ་རོལ་ཕྱིན་དྲུག་གི་བསྟོད་པ་དང་༔ དགོངས་སྤྱོད་མ་ལ་སོགས་པའི་བསྟོད་པ་མི་འདྲ་བ་བརྒྱ་རྩ་བརྒྱད་མཛད་དོ༔ བུ་ཆེན་གཞན་མ་རྣམས་ཀྱིས་ཀྱང་སྒོ་བཞིའི་བསྟོད་པ་མི་འདྲ་བ་མང་དུ་མཛད་དོ༔

གང་པ་རྨུགས་སངས་དང་གཉེན་ཆུང་ལོ་ཙཱ་བ་ལ་སོགས་པའི་བུ་ཆེན་རྣམས་ཀྱིས་ཀྱང་༔ བསྟོད་ཕྱག་རིང་མོ་ལ་སོགས་པའི་བསྟོད་པ་བསམ་གྱིས་མི་ཁྱབ་པ་མཛད་དོ༔ དེ་ནས་སྤུར་སྦྱོང་པའི་མེ་ལྕེ་རྣམས་ནི་རྡོ་རྗེ་འདྲ་བ་དང་༔ དྲིལ་བུ་འདྲ་བ་དང་༔ འཁོར་ལོ་འདྲ་བ་དང་༔ གདུགས་འདྲ་བ་དང་༔ རྒྱལ་མཚན་འདྲ་བ་དང་༔ བ་དན་འདྲ་བ་དང་༔ བླ་བྲེ་འདྲ་བ་དང་༔ ཕྱེ་ཕུར་འདྲ་བ་དང་༔ མཆོད་རྟེན་འདྲ་བ་དང་༔ དཔལ་བེའུ་འདྲ་བ་དང་༔ དུང་དཀར་འདྲ་བ་དང་༔ མེ་ཏོག་འདྲ་བ་དང་༔ དར་པོ་ཆེ་འདྲ་བ་དང་དེ་ལ་སོགས་པའི་མཆོད་རྫས་སྣ་ཚོགས་དུ་མ་འདྲ་བ་ལ༔ ཁ་དོག་སྣ་ཚོགས་སུ་འབར་བར་བྱུང་ངོ་༔ དུ་བ་རྣམས་ནི་འཇའ་ཚོན་སྣ་ལྔའི་རང་བཞིན་ཅན་ལ་གདུགས་ལྟར་དུ་ཕུབ་པ་དང་༔ ཡར་ལ་མཆོད་རྟེན་ལྟར་དུ་བརྩེགས་པ་དང་༔ བླ་བྲེ་ཕུབ་པ་འདྲ་བ་ལ་སོགས་པའི་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང་ངོ་༔ དེ་ནས་སློབ་མ་རྣམས་ཀྱིས་ཕྱག་འཚལ་བ་དང་༔ མཆོད་པ་འབུལ་བ་དང་༔ གསོལ་བ་དྲག་ཏུ་བཏབ་ཅིང་མཆི་མ་ཕྱུང་པས༔ སྤུར་ཁང་གི་ཐོག་ཏུ་ཐུགས་ལྗགས་སྤྱན་གསུམ་འབྲེལ་མར་བྱོན་ནས་བྱུང་སྟེ་དེ་ལ་ཐམས་ཅད་ཀྱིས་མཆོད་པ་ཕུལ་ཞིང་གསོལ་བ་དྲག་ཏུ་བཏབ་པས་སྤྱན་གཉིས་པོ་ལ་རིན་པོ་ཆེ་སྣ་ཚོགས་ལས་གྲུབ་པའི་ཁྲི་ཡོངས་སུ་རྫོགས་པ་འཇའ་འོད་ཀྱི་རྣམ་པ་ཅན་ཞིག་བྱུང་ངོ་༔ དེའི་སྟེང་དུ་ལྗགས་དེ་ལ་སྣ་ཚོགས་པདྨ་འདབ་མ་བཞི་པ་ཁ་དོག་སྣ་ལྔ་ལྡན་པ་འཇའ་འོད་ཀྱི་རྣམ་པ་ཅན་ཞིག་བྱུང་ངོ་༔ དེའི་དབུས་ཀྱི་པད་འདབ་ཀྱི་སྟེང་དུ་ཐུགས་དེ་ལ་བཾ་ཡིག་མཐིང་ག་འོད་ཟེར་ཁ་དོག་ལྔ་འབར་བར་ཞིག་བྱུང་ངོ་༔ བཾ་ཡིག་དེ་ལ་གསོལ་བ་དྲག་ཏུ་བཏབ་པ་དང་བཾ་ཡིག་དེ་ཡོངས་སུ་གྱུར་པ་ལས་མ་ཅིག་སྐུ་མདོག་མཐིང་ག་ཞལ་གཅིག་ཕྱག་བཞི་སྤྱན་གསུམ་ཁྲོ་འཛུམ་དང་ལྡན་པ་རུས་པའི་རྒྱན་དྲུག་དང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ༔ སྐུ་མཁྱུད་གང་པ་ཙམ་ཞིག་བྱུང་ངོ་༔

དེའི་གནས་ལྔ་ནས་འོད་ཟེར་ཁ་དོག་སྣ་ལྔ་བྱུང་ནས་ཕྱོགས་བཞིའི་པད་འདབ་བཞི༔ སྟེང་དང་ལྔ་ལ་འཕྲོས་པས་ཡི་གེ་ལྔ་བྱུང་ངོ་༔ དེ་ལ་མདུན་གྱི་པད་འདབ་ཀྱི་སྟེང་དུ་ཧ་ཡིག་དཀར་པོ་གཡས་ཀྱི་པད་འདབ་ཀྱི་སྟེང་དུ་རི་ཡིག་སེར་པོ༔ རྒྱབ་ཀྱི་པད་འདབ་ཀྱི་སྟེང་དུ་ནི་ཡིག་དམར་པོ༔ གཡོན་གྱི་པད་འདབ་ཀྱི་སྟེང་དུ་ས་ཡིག་ལྗང་གུ༔ སྟེང་གི་ནམ་མཁའ་ལ་ཨ་མཐིང་ག་འོད་ཟེར་ལྔ་འབར་བ་གཅིག་དང་ཡི་གེ་ལྔ་བྱུང་ངོ་༔ དེ་ལ་ལ་ལས་ཕྱག་འཚལ་ལ་ལས་མཆོད་པ་ཕུལ༔ ལ་ལས་གསོལ་བ་གདབ༔ ལ་ལས་བསྟོད་པ་བྱས༔ ལ་ལས་མཆི་མ་ཕྱུང་ཞིང་གསོལ་བ་གདབ་པས༔ གཙོ་འཁོར་དྲུག་པོ་གདན་ཁྲི་དང་བཅས་པ་ཇེ་མཐོ་ཇེ་མཐོ་ལ་སྤྲིན་གྱི་གསེབ་ཏུ་མི་མངོན་པར་འགྲོ་ལ་ཁད་པ་དང་༔ སྲས་ཐོད་སྨྱོན་བསམ་འགྲུབ་ཀྱིས་སྤྱི་གཙུག་རྒྱན་བཞུགས་མ་ཞེས་བྱའི་གསོལ་འདེབས་ཅིག་མཛད་པའི་རམ་འདེབ་བུ་སློབ་ཐམས་ཅད་ཀྱིས་མཛད་པས་ཡང་མ་ཅིག་གཙོ་འཁོར་རྣམས་ནམ་མཁའ་ནས་ཚུར་ལ་གསལ་པོར་བྱུང་སྟེ༔ བུ་སློབ་རྣམས་ཀྱི་ཐད་དུ་འཇའ་འོད་ཀྱི་ནང་དུ་གནས་ནས་འདི་སྐད་གསུངས༔ ཀྱེ་ཧོ་འདིར་འཚོགས་བུ་སློབ་ཀུན༔ མ་ཡེངས་ཡིད་ཀྱི་དྲན་པས་ཟུངས༔ ཆོས་སྐུ་སྐྱེ་མེད་ཀྱི་ངང་ནས་གནས་པ་དང་༔ ཞི་གནས་མཐོན་པོའི་རྫིང་ལ་ཞེན་པ་གཉིས༔ མ་ནོར་རྟོགས་ཤིག་བུ་སློབ་ཀུན༔ ཐ་མལ་གྱི་ཤེས་པ་གཏན་ཕེབས་དང་༔ ཉོན་མོངས་དུག་ལྔ་འཕྲོ་འདུ་གཉིས༔ མ་ནོར་རྟོགས་ཤིག་བུ་སློབ་ཀུན༔ མ་འགག་ཆོས་སྐུའི་རང་རྩལ་དང་༔ འཐད་འཐད་ཀྱིས་བློ་བཟོ་བྱས་པ་འདྲ༔ མ་ནོར་རྟོགས་ཤིག་བུ་སློབ་ཀུན༔ འགྲོ་དོན་ཆོས་འཁོར་སྐོར་བ་དང་༔ ཟ་འདོད་རྫུན་མགོ་སྐོར་བ་གཉིས༔ མ་ནོར་རྟོགས་ཤིག་བུ་སློབ་ཀུན༔ ལས་ཀྱི་ཕྱག་རྒྱ་བརྟེན་པ་དང་༔ ཉོན་མོངས་འདོད་པས་གདུང་བ་གཉིས༔ མ་ནོར་རྟོགས་ཤིག་བུ་སློབ་ཀུན༔ ཡི་དམ་ལྷ་ཡི་ལུང་བསྟན་དང་༔ ས་བླ་འབྱུང་པོའི་ལྟག་འབོད་གཉིས༔ མ་ནོར་རྟོགས་ཤིག་བུ་སློབ་ཀུན༔ དུས་གསུམ་ས་ལེ་མཁྱེན་པ་དང་༔ འགོང་པོ་སྙིང་ལ་ཞུགས་པ་གཉིས༔ མ་ནོར་རྟོགས་ཤིག་བུ་སློབ་ཀུན༔ མ་དང་མཁའ་འགྲོའི་ལུང་བསྟན་དང་༔ རྒྱལ་བསེན་འབྱུང་པོའི་ཆོ་འཕྲུལ་གཉིས༔ མ་ནོར་རྟོགས་ཤིག་བུ་སློབ་ཀུན༔ ལབ་སྒྲོན་ཆོས་འཁོར་བསྐོར་བ་དང་༔ གཟི་ལྡན་ནག་པོའི་ལོག་ཆོས་གཉིས༔ མ་ནོར་རྟོགས་ཤིག་བུ་སློབ་ཀུན༔ ཉམས་རྟོགས་ནང་ནས་སྐྱེས་པ་དང་༔ བླ་མ་བཟང་པོའི་ཁ་སྐད་གཉིས༔ མ་ནོར་རྟོགས་ཤིག་བུ་སློབ་ཀུན༔ སྣང་བ་དཔེར་འདྲེན་ཤེས་པ་དང་༔ མཁས་འདོད་ཀྱིས་དཔེ་ལ་བལྟས་པ་གཉིས༔ མ་ནོར་རྟོགས་ཤིག་བུ་སློབ་ཀུན༔ སྙན་རྒྱུད་ཀྱི་ཞལ་གདམས་ཐོབ་པ་དང་༔ གཞན་གྱི་ཁ་ཟག་སྐྱུག་པ་གཉིས༔ མ་ནོར་རྟོགས་ཤིག་བུ་སློབ་ཀུན༔ ཀ་དག་རང་བྱུང་གི་ཐུགས་ལྗགས་དང་༔ ལས་ངན་བསླུ་བའི་རིང་བསྲེལ་གཉིས༔ མ་ནོར་རྟོགས་ཤིག་བུ་སློབ་ཀུན༔ ཡེ་ཤེས་མཁའ་འགྲོའི་ཞལ་སྟོན་དང་༔ མ་མོ་ཌཱ་ཀིའི་ཆོ་འཕྲུལ་གཉིས༔ མ་ནོར་རྟོགས་ཤིག་བུ་སློབ་ཀུན༔ ཡུམ་ཆེན་ཐུགས་སྤྲུལ་ལབ་སྒྲོན་གྱི༔ འགྲོ་དོན་རེ་ཞིག་རྫོགས་པ་ལ༔ ཐུགས་ལྗགས་རིང་བསྲེལ་འབྱུང་དོན་མེད༔ འོན་ཀྱང་དད་མོས་ཤུགས་བསྐྱེད་ནས༔ ཁྱོད་ཐོད་སྨྱོན་གྱི་གཙོས་བྱས་བུ་སློབ་ཀྱིས༔ གསོལ་བ་ཡང་ཡང་བཏབ་བཏབ་པས༔ ལབ་སྒྲོན་བདག་གིས་ཞལ་སྟོན་ནོ༔ གསོལ་བ་ཐོབ་ཅིང་གཉན་ས་འགྲིམ༔ བར་དོ་མི་མཐོང་ང་རང་ཀན་ཞེས་གསུངས་སོ༔

དེ་ནས་ཡར་ལ་ཇེ་མཐོ་ཇེ་མཐོ་ལ་སྤྲིན་གྱི་གསེབ་ཏུ་མི་མངོན་པར་ཐལ་བ་དང་༔ ཡང་སྲས་རྒྱལ་བ་དོན་འགྲུབ་ཀྱིས་དགོངས་སྤྱོད་མའི་གསོལ་འདེབས་ཅིག་མཛད་པས༔ མཁས་པ་གཉེན་ཆུང་ལོ་ཙྭ་བས་ངས་མ་ཅིག་ལ་ལྟ་སྒོམ་སྤྱོད་པའི་ངོ་སྤྲོད་གཅིག་ཀྱང་ཞུ་མ་འཕྲོད་ཟེར་བ་ལ༔ ཡང་སྤྲིན་གྱི་མཐོང་བར་ནས་མ་ཅིག་གཙོ་འཁོར་རྣམས་ཚུར་གསལ་བར་མངོན་ནས་འདི་སྐད་གསུངས་སོ༔ ང་ཕྱི་ལྟར་རྒྱལ་བའི་ཡུམ་ཆེན་ཡིན༔ ནང་ལྟར་རྡོ་རྗེ་ཕག་མོ་ཡིན༔ གསང་བ་ཀུན་ཏུ་བཟང་མོ་ཡིན༔ ང་རང་ལབ་ཀྱི་སྒྲོན་མ་ཡིན༔ ང་ཡི་ཐུགས་ནི་རྡོ་རྗེ་མཁའ་འགྲོ་ཡིན༔ སྐུ་ནི་སངས་རྒྱས་མཁའ་འགྲོ་ཡིན༔ གསུང་ནི་པདྨ་མཁའ་འགྲོ་ཡིན༔ ཡོན་ཏན་རིན་ཆེན་མཁའ་འགྲོ་ཡིན༔ ཕྲིན་ལས་ལས་ཀྱི་མཁའ་འགྲོ་ཡིན༔ རིགས་ཀྱི་ཡུམ་ལྔ་ང་རང་ཡིན༔ ངའི་རྣམ་ཤེས་རྡོ་རྗེ་སེམས་དཔའ་ཡིན༔ ཚོར་བ་རིན་ཆེན་འབྱུང་ལྡན་ཡིན༔ འདུ་ཤེས་སྣང་བ་མཐའ་ཡས་ཡིན༔ འདུ་བྱེད་དོན་ཡོད་གྲུབ་པ་ཡིན༔ ཕུང་པོ་རྣམ་པར་སྣང་མཛད་ཡིན༔ སངས་རྒྱས་རིགས་ལྔ་ང་རང་ཡིན༔ ངའི་ས་ཁམས་སངས་རྒྱས་མཁའ་འགྲོ་ཡིན༔ ཆུ་ཁམས་རིན་ཆེན་མཁའ་འགྲོ་ཡིན༔ མེ་ཁམས་པདྨ་མཁའ་འགྲོ་ཡིན༔ རླུང་ཁམས་ལས་ཀྱི་མཁའ་འགྲོ་ཡིན༔ ནམ་མཁའ་རྡོ་རྗེ་མཁའ་འགྲོ་ཡིན༔ མཁའ་འགྲོ་སྡེ་ལྔ་ང་རང་ཡིན༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་གསུང་ཐུགས་ཀྱི་ངོ་བོ་ནི༔ ང་ཉིད་ཡིན་ནོ་སྐལ་ལྡན་ཀུན་ཅེས་གསུངས་སོ༔

ཡང་ཡུམ་གྱི་ཞལ་ནས༔ ཀུན་གཞི་བྱང་ཆུབ་སེམས་ཉིད་འདི༔ མཐའ་དང་བྲལ་ན་ལྟ་བ་ཡིན༔ སྣང་སེམས་དབྱེར་མེད་སྒོམ་པ་ཡིན༔ གཟའ་གཏད་བྲལ་ན་སྤྱོད་པ་ཡིན༔ འཁྲུལ་སྣང་དག་ན་དམ་ཚིག་ཡིན༔ རྫུན་ཁུང་རྡིབ་ན་འབྲས་བུ་ཡིན༔ དམིགས་གཏད་བྲལ་ན་ལྟ་བ་ཡིན༔ སྒོམ་འདོད་བྲལ་ན་སྒོམ་པ་ཡིན༔ ཉེས་སྐྱོན་གྱིས་མ་གོས་ན་སྤྱོད་པ་ཡིན༔ ངོ་ལྐོག་མེད་ན་དམ་ཚིག་ཡིན༔ རེ་དོགས་མེད་ན་འབྲས་བུ་ཡིན༔ འཁོར་འདས་གཉིས་མེད་ལྟ་བ་ཡིན༔ ཟག་མེད་བདེ་ཆེན་སྒོམ་པ་ཡིན༔ མ་འགགས་ཟང་ཐལ་སྤྱོད་པ་ཡིན༔ གདོད་ནས་རྣམ་དག་དམ་ཚིག་ཡིན༔ རང་སེམས་རྟོགས་ན་འབྲས་བུ་ཡིན༔ རང་སེམས་གདོད་ནས་མཐའ་བྲལ་འདི༔ རང་བཞིན་ཤེས་ན་ལྟ་བ་ཡིན༔ ངོ་བོ་མཐོང་ན་སྒོམ་པ་ཡིན༔ མཚན་ཉིད་ཤེས་ན་སྤྱོད་པ་ཡིན༔ དབྱེར་མེད་ཤེས་ན་དམ་ཚིག་ཡིན༔ མངོན་དུ་གྱུར་པ་འབྲས་བུ་ཡིན༔ ཆོས་རྣམས་སེམས་སུ་ཤེས་ན་ལྟ་བ་ཡིན༔ དུ་མ་རོ་གཅིག་རྟོགས་པ་སྒོམ་པ་ཡིན༔ ཚོགས་དྲུག་ལྷུག་པ་ཤར་ན་སྤྱོད་པ་ཡིན༔ རྟོག་པ་མཁའ་ལྟར་དག་ན་དམ་ཚིག་ཡིན༔ གཅིག་ཤེས་ཀུན་ལ་མཁས་ན་འབྲས་བུ་ཡིན༔ ཆོས་སྐུ་མཁའ་ལྟར་དག་ན་ལྟ་བ་ཡིན༔ སྣང་སྲིད་སེམས་སུ་ཤེས་ན་སྒོམ་པ་ཡིན༔ སེམས་འཛིན་སྤྲོས་པ་ཞི་ན་སྤྱོད་པ་ཡིན༔ དགེ་སྡིག་ཁྱད་མེད་དུ་ཤེས་ན་དམ་ཚིག་ཡིན༔ ཐམས་ཅད་བྱར་མེད་དུ་གོ་ན་འབྲས་བུ་ཡིན༔ ལྟ་སྒོམ་སྤྱོད་པའི་རྣམ་བཤད་འདི༔ ལབ་སྒྲོན་ང་ཡི་གདམས་ངག་ཡིན༔ མ་བརྗེད་སྙིང་གི་དཀྱིལ་དུ་ཞོག༔ གཉན་ས་འགྲིམ་ལ་ཉམས་སུ་ལོང་༔ བར་དོ་མི་མཐོང་ང་རང་ཀན་ཞེས་གསུངས་སོ༔ ཡི་དམ་དཀྱིལ་འཁོར་གྱི་ལྷ་ཚོགས་རྣམས་དང་༔ དཔའ་བོ་དང་མཁའ་འགྲོ་མ་རྣམས་སྤྲིན་ལྟར་དུ་གཏིབས་ནས་བསུས་ཏེ༔ རོལ་མོ་ཡི་སྒྲ་དཔག་ཏུ་མེད་པ་དང་༔ མཆོད་པའི་དབྱངས་དང་བཅས་པས་ཆོས་སྐུ་ལབ་ཀྱི་སྒྲོན་མ་ལ་གསོལ་བ་འདེབས༔ ལོང་སྐུ་ལབ་ཀྱི་སྒྲོན་མ་ལ་གསོལ་བ་འདེབས༔ སྤྲུལ་སྐུ་ལབ་ཀྱི་སྒྲོན་མ་ལ་གསོལ་བ་འདེབས་ཟེར་བའི་དབྱངས་སྒྲ་དི་རི་རི་ཐོས་པ་ཙམ་དུ༔ སྤྲིན་གྱི་གསེབ་ཏུ་ཐིམ་ནས་མི་མངོན་པར་ཐལ་ལོ༔ སྤྲིན་ཡང་ནམ་མཁའ་ལ་ཐིམ་ནས༔ ནམ་མཁའ་དྭངས་པའི་ངང་ལ་ཅི་ཡང་མི་སྣང་བར་གྱུར་ཏོ༔

གདུང་སྦྱོང་བའི་མལ་དུ་ཡང་མེ་དང་༔ ཐལ་བ་དང་༔ སོལ་བ་དང་༔ རྡོ་བ་ལ་སོགས་པའི་རྗེས་ཡང་མེད་པར་དག་པ་མཁའ་སྤྱོད་ཀྱི་གནས་སུ་གཤེགས་ནས་རྗེས་ཀྱང་མི་སྣང་ངོ་༔ དེ་ནས་དེར་འཚོགས་པའི་བུ་སློབ་རྣམས་ལ་ཟླ་བ་གཅིག་གི་རིང་ལ་ཉིན་མཚན་མེད་པར་སྣང་བར་འགྱུར་ཏེ༔ བཟའ་བཏུང་གི་ལོངས་སྤྱོད་ཀྱང་བྱེད་མ་དགོས་པ་ལ༔ དང་ཁ་མེར་ཆི་ལེ་བ༔ ཁམས་དྭངས་སང་སང་བ་བྱུང་ངོ་༔ ཕར་ཆེར་ཏིང་ངེ་འཛིན་ལ་ཡེངས་པ་དང་ལ་ལ་ནི་རོལ་མོའི་སྒྲ་དང་མཆོད་པའི་དབྱངས་རྣམས་ལ་ཆགས་ནས་ཡེངས་པ་དང་༔ ལ་ལ་ནི་ཉམས་འབར་བ་དང་༔ བྲོ་གར་དང་གླུ་དབྱངས་གི་ངང་དུ་སོང་ནས་ནམ་ཟླ་གར་སོང་ཡང་མ་ཚོར་བ་བྱུང་ངོ་༔ སྔར་གྱི་གནམ་ས་གཉིས་ན་ངོ་མཚར་བའི་ལྟས་དེ་རྣམས་ནི་ལོ་གསུམ་གྱི་བར་ལ་རྒྱུན་མ་ཆད་པར་བྱུང་ངོ་༔ ལོ་ཡག་པ་དང་ནད་མུག་མཚོན་གསུམ་ཆད་པ་ལོ་བཅུ་གསུམ་ལ་བྱུང་ངོ་༔ དབྱར་དགུན་མེད་པར་ཆར་བབ་པ་ལོ་གསུམ་ལ་བྱུང་ངོ་༔ སྤྱིར་ཡང་བོད་དང་དྭགས་རྐོང་གི་ཕྱོགས་སུ་ལོ་ཡག་པ་དང་ཆོས་གྲྭ་དང་རྟེན་གསུམ་མང་བ་བྱུང་ངོ་༔ ཁྱད་པར་དུ་ཡང་བོད་ཁམས་འདིར་མ་འོངས་པའི་དུས་ན་རྒྱལ་བསེན་གདུག་པ་ཅན་རྣམས་ཁ་འཕྱུར་ནས་སེམས་ཅན་ཉམ་ཐག་པ་རྣམས་ཀྱི་སྲོག་ལ་འཚེ་བར་བྱེད་པ་ལ༔ དེ་འདུལ་བའི་གཉེན་པོར་དམ་ཆོས་བདུད་ཀྱི་གཅོད་ཡུལ་འདིས་འདུལ་བའི་སྐལ་བ་བྱུང་ངོ་༔ དེ་ནས་རིམ་པ་བཞིན་དུ་ཡུམ་སྲས་རྣམས་ཀྱི་གདུང་རྟེན་རྣམས་ཀྱང་ཟངས་རི་མཁར་དམར་དུ་བཞེངས་ནས་ཡོད་དོ༔ སཱ་མཱ་ཡཱ༔ རྒྱ་རྒྱ་རྒྱ༔

མ་ཅིག་གི་ཡུམ་འབུམ་ལྕམ་མ་དང་༔ ཨ་ཅེ་འབུམ་མེ་དང་༔ ཇོ་མོ་ཆོས་མཚོ་དང་༔ སྲས་མོ་རྒྱན་བཞི་དང་བདུན་ནི༔ སྔོན་མ་ཅིག་ལྷ་ཡུལ་ནས་རྒྱ་གར་དུ་སངས་རྒྱས་བཅོམ་ལྡན་འདས་ལ་མཇལ་ཕྱིན་པའི་དུས་སུ་འཁོར་གྱི་ལྷ་མོ་བདུན་པོ་ཡིན་པར་འདུག་གོ༔ སྲས་རྒྱལ་བ་དོན་འགྲུབ་འདུལ་ནས་གྲུབ་པ་ཐོབ་པ་ལ་སོགས་པ་དང་མཁས་པ་གཉེན་ཆུང་ལོ་ཙཱ་བ་འདུལ་ནས་གྲུབ་པར་ཐོབ་པ་ལ་སོགས་ནས༔ མཐར་གདུལ་བྱ་རྫོགས་པ་ནི་མ་ཅིག་དགུང་ལོ་དྲུག་ཅུ་རེ་དྲུག་ནས་དགུ་བཅུ་གོ་དགུའི་བར་གྱི་རྣམ་ཐར་ཏེ་དངོས་གཞིའི་རྣམ་ཐར་རྫོགས་པ་ནི་རྣམ་གྲངས་བཅྭོ་བརྒྱད་པ་རྫོགས་སོ།། །།སཱ་མཱ་ཡཱ༔ རྒྱ་རྒྱ་རྒྱ༔

༈ མ་ཅིག་གི་རྣམ་གྲངས་བཅྭོ་བརྒྱད་པ་རྫོགས་པ་དང་༔ དེ་ནས་སྲས་ཀྱི་རྣམ་ཐར་བསྡུས་པར་ཙམ་ཞིག་བརྗོད་པ་ལ༔ དེ་ཡང་སྲས་མཆེད་ལྕམ་གསུམ་གྱི་གདུང་རུས་ནི༔ རྒྱ་གར་བྲམ་ཟེའི་རིགས་ཡིན་ཏེ༔ ཡབ་བྲམ་ཟེའི་རིགས་ཡིན་ནོ༔ ཁ་ཅིག་གིས་ཤཱཀྱའི་རིགས་ཡིན་ཟེར་བ་ཡང་ཡོད་དོ༔ དེ་ལ་རྒྱལ་བ་དོན་འགྲུབ་ཀྱི་དགུང་སྙིང་ནི་རྟ་ཡིན༔ ཐོད་སྨྱོན་བསམ་འགྲུབ་བྱ་ལོ་བ་ཡིན༔ སྲས་མོ་ལ་འདུས་མ་ནི་བྱི་བ་ལོ་པ་ཡིན༔ མ་རང་ཉིད་ནི་དགུང་སྙིང་ལུག་ཡིན་པས་ཁྱི་ལོ་ལ་གཤེགས་སོ༔ སྲས་རྒྱལ་བ་དོན་འགྲུབ་ལ་སྲས་གཉིས་བྱུང་སྟེ༔ སྲས་ཆེ་བ་ནི་སྒྲོན་མ་མཚོའི་སྲས་ཡིན་ཏེ༔ དེ་ལ་དབོན་སྔོན་ཡང་ཟེར༔ བཙན་པོ་ཁུ་བྱུག་ཡང་ཟེར༔ མཚན་དྲང་པོ་ནི་ཚེ་དབང་རྒྱལ་ཞེས་པར་གྲགས་སོ༔ སྲས་ཆུང་བ་ནི་པདྨ་མཚོའི་སྲས་ཡིན་ཏེ༔

དེ་ལ་ཆུང་ངུའི་དུས་སུ་ཁམས་འབུ་ཡག་ལེགས་མཚན་པས་ཕྱིས་རབ་ཏུ་བྱུང་བའི་མཚན་ལ་བསོད་ནམས་རིན་ཆེན་ཞེས་པར་གསོལ་ཏེ༔ བསོད་ནམས་རིན་ཆེན་བྱ་བ་ནི་གྲགས་ཆུང་ལ༔ ཁམས་འབུ་ཡག་ལེགས་ཞེས་པ་ནི་ཐམས་ཅད་ལ་གྲགས་ཆེ་བར་བྱུང་ངོ་༔ དེ་ནི་ཡོན་ཏན་ཐམས་ཅད་ཀྱི་རྒྱན་དང་ལྡན་ཞིང་༔ འགྲོ་དོན་ཡང་མཐའ་ཡས་པ་བྱུང་ཞིང་ཡབ་ཀྱི་ཆོས་རྒྱུད་འཛིན་ནས༔ ཕྱིས་བཀྲ་ཤིས་གླང་ལུང་དུ་སྒྲུབ་པ་མཐར་སྐྱོལ་ནས་ཡབ་ཀྱི་གདན་ས་བསྐྱངས་ནས་གཤེགས་སོ༔ སྲས་ཚེ་དབང་རྒྱལ་ནི་ཁྱིམ་པ་ཡིན་ཏེ༔ སྐྱོ་བཟའ་མ་གཅིག་ཆུང་མ་ལ་བླང་པ་ལ༔ མིང་ལ་དབོན་མོ་ཡང་ཟེར༔ ཇོ་མོ་ཡང་ཟེར༔ ཕྱིས་བཙུན་མ་བྱས་པས་སྐྱོ་དགེ་མ་ཡང་ཟེར༔ མིང་དྲང་པོར་ལ་དགེ་འདུན་མཚོ་ཟེར་རོ༔ ཚེ་དབང་རྒྱལ་ནི་རབ་བྱུང་གི་ཆ་ལུགས་ཡིན་པས༔ ཚེ་དབང་རྒྱལ་ཟེར་བ་མེད་ཅིང་བླ་མ་དབོན་སྔོན་ཚང་ཞེས་པར་གྲགས་སོ༔ ཚེ་དབང་རྒྱལ་ལ་སྲས་པོ་གཅིག་བྱུང་པ་ལ་མིང་ཐོད་སྨྱོན་བསམ་འགྲུབ་ཏུ་བཏགས་ཏེ༔ སྔར་ཨ་མྱེ་ཐོད་སྨྱོན་བསམ་འགྲུབ་ཀྱི་སྐྱེ་བ་ཡིན་པས་མ་ཅིག་ཉིད་ཀྱི་སྐྱེས་རབས་ཆེན་མོ་དང་གླེང་གཞི་གོང་འོག་རྣམས་དང་ཕྱི་མ་རྒྱུད་བུ་ཆུང་གི་གླེང་གཞི་རྣམས་སུ་གསལ་བས་མིང་ཡང་ཨ་མྱེ་ཐོད་སྨྱོན་བསམ་འགྲུབ་ཀྱི་མིང་ཐོགས་པ་ནི་མ་ཅིག་ཉིད་ཀྱི་ལུང་བསྟན་ཆེ་ཆུང་འབྲིང་གསུམ་ཐམས་ཅད་ལ་གསལ་ལོ༔ དེ་ལྟར་མ་ཅིག་ཉིད་ཀྱིས་སྲས་ཐོད་སྨྱོན་བསམ་འགྲུབ་ཀྱི་སྐྱེ་བ་ཕྱི་མ་ནི༔ ཁོང་རང་གི་ཚ་བོ་ཚེ་དབང་རྒྱལ་ཀྱི་སྲས་པོར་སྐྱེས་ནས༔ མིང་ཡང་ཐོད་སྨྱོན་བསམ་འགྲུབ་ཏུ་གྲགས་པ་དེ་ནི༔ སྔོན་མ་ཅིག་གི་སྲས་སུ་གྱུར་དུས་སུ་རྟེན་དགེ་སློང་ཡིན་ཏེ༔ ད་ལན་བདུད་ཐོད་པ་འབར་ར་འདུལ་བའི་ཆེད་དུ་ཁྱིམ་པའི་ཚུལ་བཟུང་ནས༔ བལ་པོའི་ཡུལ་ནས་འདོགས་པ་སྤྱི་རུང་བའི་སྲས་མོ་བལ་མོ་བཟའ་རིན་ཆེན་སྒྲོན་བྱ་བ་གཅིག་ཆུང་མར་བླང་བའོ༔

དེ་ནས་ཐོད་སྨྱོན་བསམ་འགྲུབ་དཔོན་སློབ་རྣམས་བལ་པོའི་ཡུལ་དུ་བྱོན་ནས༔ བདུད་ཐོད་པ་བྷ་ར་བཏུལ་ནས་ཡར་ལ་བྱོན་པའི་ལམ་དུ༔ སྔར་ཨ་མྱེ་རྒྱལ་བ་དོན་འགྲུབ་ཀྱིས་དགྲ་ཡ་སྔགས་པ་རྣམས་ཤི་བའི་ཤུལ་གྱི་མི་ཆོས་པ་རྣམས་ཀྱི་དམགས་མང་རབ་བསགས་ནས༔ ཐོད་སྨྱོན་དཔོན་སློབ་རྣམས་ལ་རྩོད་པ་བྱས་པས་ཐོད་སྨྱོན་བསམ་འགྲུབ་ཀྱིས་ཡང་རང་ཕྱོགས་དམགས་མང་རབ་བསགས་ནས་རྩོད་པ་བྱས་པས༔ དེར་དགྲ་ཡ་རྣམས་ཕམ་ནས་ཐོད་སྨྱོན་བསམ་འགྲུབ་དཔོན་སློབ་རྣམས་རྒྱལ་བ་དང་༔ དེ་ནས་འདུན་མ་བྱས་པས་ལན་མ་ལན་གྱི་ཞལ་ལྕེ་གཏམ་པའི་སྐབས་སུ་གཞི་ན་རིན་ཆེན་སྒྲོན་མ་ལ་བུ་མོ་ཞིག་བཙས་ནས་ཡོད་ཟེར་བ་ཐོས་པས་ཡབ་ཐོད་སྨྱོན་གྱིས་ན་རེ༔ བུ་མོ་དེ་ལ་ལེན་ཐོ་མ་མིང་དུ་ཐོགས་ཤིག་གསུངས༔ དེ་ཕྱིན་ཆོད་ནས་བུ་མོ་ལ་ལེན་ཐོ་མ་ཞེས་པར་གྲགས་སོ༔ དེ་ནས་བུ་མོ་ལོ་བཅུ་དྲུག་ལོན་ནས་མཉམ་མེད་རྡོ་རྗེ་རྒྱལ་མཚན་བྱ་བའི་མཁས་བཙུན་གཅིག་ཡོད་པའི་དྲུང་དུ་རབ་ཏུ་བྱུང་ནས་བཙུན་མ་བྱས་པས་མིང་ལ་རྡོ་རྗེ་སྒྲོན་ཞེས་པར་བཏགས་སོ༔ རྡོ་རྗེ་སྒྲོན་ནི་མ་ཅིག་གིས་སྐྱེ་བ་ཕྱི་མ་ཡིན་པར་ལུང་བསྟན་ཐམས་ཅད་ལས་གསལ་ལོ༔ རྡོ་རྗེ་སྒྲོན་དགུང་ལོ་བཅུ་དྲུག་གི་དུས་སུ་རབ་ཏུ་བྱུང་ནས་ཧོར་མོ་ཅོག་ལ་སྒྲོན་འདུལ་བར་མཛད་ནས་ཕྱིས་བལ་པོ་དང་མོན་དང་བོད་གསུམ་གྱི་སོ་མཚམས་བལ་པོ་ལ་ཐག་ཉེ་བའི་རྡོ་རྗེའི་གུར་ཁང་བྱ་བའི་བྲག་རི་རྡོ་རྗེ་འདྲ་བ་གཅིག་ཡོད་པ་དེར་བསྒྲུབ་པ་མཛད་ནས་གདུལ་བྱ་སྐྱོང་བར་མཛད་དོ༔

ཐོད་སྨྱོན་བསམ་འགྲུབ་དང་༔ རིན་ཆེན་སྒྲོན་གཉིས་ལ་སྲས་མིང་སྲིང་གསུམ་ཡོད་པ་ལ༔ ཆེ་བ་ལ་ལེན་ཐོ་མ་རྡོ་རྗེ་སྒྲོན་བྱ་བར་གྲགས་སོ༔ ཆུང་བ་གཉིས་ནི་སྲས་པོ་ཡིན་ཏེ༔ གཉིས་ཀ་ཁྱིམ་པ་ཡིན་པ་དང་༔ ཐོད་སྨྱོན་བསམ་འགྲུབ་དང་ཡབ་སྲས་གསུམ་ཀ་བལ་པོའི་ཡུལ་དུ་བྱོན་ནས་ཐོད་སྨྱོན་ཁོ་རང་ནི་བལ་པོ་ཤིང་ཀི་རི་ཞེས་བྱ་བར་བཞུགས་སོ༔ སྲས་འབྲིང་བ་ནི་ཕར་འཐིལ་དུ་བཞུགས་སོ༔ སྲས་ཆུང་བ་ནི་སྔར་མ་ཅིག་གིས་ཡབ་ཡུལ་དུ་གདན་དྲང་ནས་བཞུགས་སོ༔ དམ་པ་སྟོན་ཆུང་ནི་རྒྱ་གར་ཁ་ཆེའི་ཡུལ་དུ་བྱོན་ནོ༔ སྐྱེ་མེད་འོད་གསལ་ནི་མངའ་རིས་ལ་བྱོན་ནོ༔ དབོན་སྔོན་ཚེ་དབང་རྒྱལ་ཁོ་རང་ནི་ཕྱིས་ལྷོ་བྲག་ཏུ་བྱོན་ནོ༔ ཁམས་འབུ་ཡག་ལེགས་ནི་ཟངས་རི་མཁར་དམར་དང་གླང་ལུང་ལ་སོགས་དབུས་སྨད་དུ་བཞུགས་ཤིང་༔ ཕྱིས་པོ་ཏ་རི་ནས་ཕུང་པོ་ལྷག་མེད་དུ་གཤེགས་སོ༔ མ་ཅིག་གི་སྲས་མོ་རྒྱལ་མཚན་མ་ཡང་ཟེར༔ ལ་འདུས་མ་ཞེས་བྱ་བ་དེ་ནི་མོན་བུམ་ཐོང་སྐོར་དང་ཉང་པོ་དང་དྭགས་པོ་ལ་སོགས་པ་ལ་བཞུགས་ཤིང་༔ ཕྱིས་ཟངས་རི་མཁར་དམར་ནས་མཁའ་སྤྱོད་དུ་གཤེགས་སོ༔ མ་ཅིག་གི་སྲས་ཐོད་སྨྱོན་བསམ་འགྲུབ་ནི༔ གངས་ཕུག་མོ་ཆེ་ནས་འཇའ་ལུས་འོད་དུ་ཡལ་བའོ༔ རྒྱལ་བ་དོན་འགྲུབ་ནི་གླང་ལུང་དུ་སྐུ་ཡལ་ཏེ་གདུང་སྦྱོང་པས་སྐུ་གཟུགས་དང་ཐུགས་ལྗགས་སྤྱན་གསུམ་དང་༔ ཤ་རི་རམ་ལ་སོགས་པའི་རིང་བསྲེལ་དང་རྟེན་མཐའ་ཡས་པ་བྱོན་ནོ༔

ཡུམ་སྲས་བཞི་ཀའི་གདུང་རྟེན་རྣམས་ཟངས་རི་མཁར་དམར་དུ་བཞེངས་ནས་ཡོད་དོ༔ ཕར་འཐིལ་དང་ལ་ཕྱི་བ་གཉིས་ལ་ཡང་སྲས་པོ་ལྔ་རེ་བྱུང་བ་རྣམས་ལ་ཡང་ཡོན་ཏན་དང་ནུས་པ་དང་འགྲོ་དོན་ཡང་མཐའ་ཡས་པ་བྱུང་ཞིང་༔ ཕྱིས་མ་ཅིག་གི་རྒྱུད་པའི་མི་རིགས་ཐམས་ཅད་ཕར་རྒྱ་གར་གྱི་ཕྱོགས་སུ་འདུས་ནས་སོང་སྟེ་བོད་འདིར་གཅིག་ཀྱང་མེད་དོ༔ སྲས་རྒྱུད་རྣམས་ཀྱི་རྣམ་ཐར་ལ་འདི་ལས་ཞིབ་པ་མང་དུ་ཡོད་དེ་ཡི་གེར་འཇིགས་པས་མ་བྲིས་སོ༔ སྲས་རྒྱུད་ཀྱི་རྣམ་ཐར་བསྡུས་པ་འདི་ནི་རྗེས་ཀྱི་རྣམ་ཐར་བསྡུས་པ་ཡིན་ཞིང་༔ རྗེས་ཀྱི་རྣམ་ཐར་གཉིས་པའི་དང་པོའོ༔ རྗེས་ཀྱི་རྣམ་ཐར་གཉིས་པ་ལ་སྲས་རྒྱུད་ཀྱི་རྣམ་ཐར་རྫོགས་ནས་གཉིས་པ་ནི་མ་ཅིག་མན་ཆད་སློབ་རྒྱུད་ཀྱི་རྣམ་ཐར་ཅུང་ཟད་གཅིག་བརྗོད་པ་ལ༔ དེ་ཡང་མ་ཅིག་ལ་གྲུབ་པ་ཐོབ་པའི་རྣལ་འབྱོར་ཕོ་མོ་བརྒྱ་དང་བརྒྱད་ལ་སོགས་པའི་བུ་སློབ་མང་དུ་ཡོད་ཀྱང་མ་ཅིག་གི་ཆོས་སྲོལ་གསུམ་འཛིན་པའི་རྒྱུད་འཛིན་ལ་གསུམ་ལས་མེད་དེ༔ དེ་ལ་མདོ་ལུགས་ཀྱི་རྒྱུད་འཛིན་ནི་རྒྱལ་བ་དོན་འགྲུབ༔ སྔགས་ལུགས་ཀྱི་རྒྱུད་འཛིན་ཐོད་སྨྱོན་བསམ་འགྲུབ༔ མདོ་སྔགས་ཟུང་གི་རྒྱུད་འཛིན་ནི་ཁུ་སྒོམ་ཆོས་ཀྱི་སེང་གེ་དང་གསུམ་མོ༔ དེ་ལ་རྒྱལ་བ་དོན་འགྲུབ་ལ་རྒྱུད་འཛིན་གསུམ་ཡོད་དེ༔ བཤད་རྒྱུད་འཛིན་པ་གཉིས་སྒྲུབ་རྒྱུད་འཛིན་པ་གཅིག་དང་གསུམ་མོ༔ དེ་ལ་བཤད་རྒྱུད་འཛིན་པ་ནི་མཁས་པ་གཉེན་ཆུང་ལོ་ཙཱ་བ་ཞེས་སམ༔ གྲྭ་པ་ཧར་སྟོན་དང་སངས་རྒྱས་སྣང་ཞིག་བྱ་བ་གཉིས་ཡིན་ནོ༔ སྒྲུབ་རྒྱུད་འཛིན་པ་ནི༔ ཁོ་རང་གི་སྲས་ཁམས་འབུ་ཡག་ལེགས་གཅིག་པུའོ༔ དེ་ནས་གཉེན་ཆུང་ལོ་ཙཱ་བས་དཔལ་ཆེན་འོད་ཟེར་ལ་གནང་ངོ་༔ དེས་ཆོས་དབྱིངས་རྡོ་རྗེ་ལ་གནང་ནས་བརྒྱུད་པའོ༔ སངས་རྒྱས་སྣང་ཞིག་གིས་རྡོ་རྗེ་རྒྱལ་མཚན་ལ་གནང་༔ དེས་མཁས་གྲུབ་ཆེན་པོ་ཉི་མ་སེང་གེ་ལ་གནང་ནས་རིམ་པར་བརྒྱུད་པའོ༔ ཁམས་འབུ་ཡག་ལེགས་ཀྱིས་རིན་ཆེན་སེང་གེ་ལ་གནང་དེས་འཁྲུལ་ཞིག་ཁམས་པ་ལ་གནང་ནས་རིམ་པར་བརྒྱུད་པའོ༔ ཡང་གཉེན་ཆུང་ལོ་ཙཱ་བས་རྡོ་རྗེ་སེང་གེ་ལ་གནང་༔ དེས་བརྩོན་འགྲུས་སེང་གེ་ལ་གནང་༔ དེས་མར་པ་ཡེ་ཤེས་རྡོ་རྗེ་ལ་གནང་ནས་རིམ་པར་བརྒྱུད་པ་དང་དེ་རྣམས་ནི་མདོ་ལུགས་ཀྱིས་རྒྱུད་པའོ༔ རྗེ་བཙུན་ཐོད་སྨྱོན་བསམ་འགྲུབ་ལ་ནི་རྒྱུད་འཛིན་གང་པ་རྨུགས་སངས་གཅིག་པུ་ལས་མེད་དོ༔

དེ་གང་པ་རྨུགས་སངས་ལ་རྒྱུད་འཛིན་གསུམ་བྱུང་སྟེ༔ གང་པ་ལྷུན་གྲུབ༔ སངས་རྒྱས་བསྟན་སྲུང་༔ རྡོ་རྗེ་རྒྱལ་མཚན་དང་གསུམ་མོ༔ སྔགས་ཀྱི་བཤད་སྒྲུབ་གཉིས་ཀའི་རྒྱུད་པ་རྣམས་ནི༔ གྲུབ་ཆེན་ཀརྨ་པ་ནས་བརྒྱུད་པ་སྟེ༔ དཀྱིལ་འཁོར་མཆོད་ཅིང་སྒྲུབ་པ་དང་ཚོགས་དང་དབང་རྣམས་ཀྱི་བརྒྱུད་པ་ཡིན་ནོ༔ ཡང་གྲགས་པ་རྒྱལ་མཚན་ནས་ཉང་པ་བློ་གྲོས་ལ་བརྒྱུད་པ་ནི༔ སྒྲུབ་རྒྱུད་པ་ཁོ་ན་ཡིན་ཏེ་སྔགས་ཀྱི་རྒྱུད་པ་ཡིན་ནོ༔ ཁུ་སྒོམ་ཆོས་ཀྱི་སེང་གེ་ལ་རྒྱུད་འཛིན་གསུམ་བྱུང་སྟེ༔ དོལ་པ་ཟང་ཐལ༔ རྒྱ་ནག་གཅེར་བུ༔ སངས་རྒྱས་གཉན་སྟོན༔ དེས་བརྩོན་འགྲུས་སེང་གེ་ལ་བརྒྱུད་པ་ནི་བཤད་རྒྱུད་རྣམ་དག་གི་རྒྱུད་པ་ཡིན་ནོ༔ ཡང་རྒྱལ་སྲས་ཞིག་པོ༔ དེས་རིན་ཆེན་སེང་གེ་ལ་བརྒྱུད་པ་དང་༔ ཡང་འཇམ་དབྱངས་མགོན་པོ༔ དེས་གཞོན་ནུ་བཟང་པོ་ལ་བརྒྱུད་པ་དང་༔ བརྒྱུད་པ་ཕྱི་མ་འདི་གཉིས་ནི་སྒྲུབ་རྒྱུད་པ་ཁོ་ན་ཡིན་ཏེ་མདོ་སྔགས་ཟུང་གི་བརྒྱུད་པའོ༔

རྒྱལ་བ་དོན་འགྲུབ་ཀྱི་མཛད་ཆོས་རྣམས་ནི་ཡི་གེ་མི་ཤེས་པ་དང་རྒན་ཞུགས་ཡིན་པའི་ཕྱིར་དུ༔ མ་ཅིག་གིས་བསྟོད་པ་རྣམས་མཛད་པ་ཡིན་པས་ཕ་རོལ་ཕྱིན་དྲུག་གི་སྒོ་ནས་བསྟོད་པ་མི་འདྲ་བ་བཞི་མཛད༔ དེ་ལ་སོགས་པའི་ཡོན་ཏན་བཅུ་གཉིས་ཀྱི་བསྟོད་པ༔ ངོ་མཚར་ལྔའི་བསྟོད་པ༔ དྲིན་ལན་ལན་གྱི་བསྟོད་པ༔ མཚན་བཀྲ་ཡོན་ཏན་གྱི་བསྟོད་པ༔ འཕྲིན་ལས་མཐུ་རྩལ་གྱི་བསྟོད་པ༔ ཞི་བདེ་བཤེས་གཉེན་སྐུའི་བསྟོད་པ༔ གསུང་དབྱངས་ཡན་ལག་དྲུག་ཅུའི་བསྟོད་པ༔ ཐུགས་མཁྱེན་བརྩེ་ཡེ་ཤེས་ལྔའི་བསྟོད་པ༔ སྐུ་གསུམ་དྲི་མེད་ཀྱི་བསྟོད་པ༔ སྐུ་ལྔ་ཡོངས་རྫོགས་ཀྱི་བསྟོད་པ༔ རྒྱལ་བ་གཉིས་མེད་ཀྱི་བསྟོད་པ༔ མཚན་དང་དཔེ་བྱད་ཀྱི་བསྟོད་པ༔ བྱིན་རླབས་ནུས་པ་བཀའ་དྲིན་གྱི་བསྟོད་པ༔ ཡོན་ཏན་སྣ་ཚོགས་ཀྱི་བསྟོད་པ༔ རྣམ་ཐར་སྒོ་གསུམ་གྱི་བསྟོད་པ༔ གདུལ་བྱ་གང་ལ་གང་འདུལ་གྱི་ཐབས་ལ་ཐ་མལ་བུད་མེད་ཀྱི་ལུས་འཛིན་པ་ལ་ཡོན་ཏན་གྱི་བསྟོད་པ༔ སྒོ་བཞིའི་བསྟོད་པ་དེ་འདྲ་བའི་བསྟོད་པ་ལྔ་དགོངས་སྤྱོད་མ་རིག་མི་འདྲ་བ་བརྒྱད་ཅུ་ཐམ་པ་མཛད་དོ༔ འཁྲུལ་བཤགས་ལ་སོགས་པའི་བཤགས་པ་མི་འདྲ་བ་སུམ་ཅུ་མཛད་དོ༔ དེ་ལ་སོགས་པའི་བསྟོད་འབུམ་པོ་ཏི་གསུམ་ཐམ་པ་མཛད་དོ༔ ཐོད་སྨྱོན་བསམ་འགྲུབ་ཀྱི་མཛད་ཆོས་ལ༔ སོ་སོའི་འགྲེལ་པ་ལ་པོ་ཏི་ཆེན་པོ་གསུམ༔ བསྐྱེད་རྫོགས་རྣམས་ལ་འགྲེལ་ཆུང་གསལ་པོ་རེ་རེ༔ མཁའ་འགྲོ་བརྒྱ་རྩའི་སྒྲུབ་ཐབས་དང་ལྷ་སུམ་ཅུ་མ་རྣམས་ལ་གསལ་བར་མཛད་པ་དང་སྔགས་ཀྱི་རྣམ་བཤད་ཆེན་མོའི་གསལ་གདབ༔ རྣམ་བཤད་གསལ་བའི་མེ་ལོང་ཞེས་པ་དང་༔ གཞན་ཡང་སྔགས་སྡེའི་སྐོར་མང་དུ་མཛད་དོ༔ ཁུ་སྒོམ་ཆོས་ཀྱི་སེང་གེའི་མཛད་ཆོས་ལ་མཐའ་གཉིས་མུན་སེལ་ལ་སོགས་པ་དང་༔ ཟུང་འཇུག་དང་མདོ་ལུགས་ཤས་ཆེ་བའི་དཔེ་ཚན་རྣམས་ལ་པོ་ཏི་ཉི་ཤུ་རྩ་ལྔ་མཛད་དོ༔ དེ་མན་ཆོད་ཀྱི་རྒྱུད་འཛིན་རྣམས་ཀྱི་ཡང་སོ་སོའི་མཛད་ཆོས་མང་དུ་སྣང་བ་དང་མ་ཅིག་གི་རྒྱུད་འཛིན་གསུམ་པོ་མན་ཆོད་ཀྱི་རྒྱུད་པ་རྣམས་ལ་ནི༔ འདིར་བགྲང་བ་རྣམས་ལ་ཡང་རང་རང་གི་རྣམ་ཐར་ལེགས་པ་རྣམས་ཡོད་པར་སྣང་སྟེ་འདིར་བྲིས་པ་མ་ལོང་པས་རེ་ཞིག་ཏུ་བཞུགས་པ་ལགས༔ འདིར་མ་ཅིག་གི་རྒྱུད་འཛིན་སློབ་མ་རྣམས་ཀྱི་རྣམ་ཐར་ཅུང་ཟད་ཅིག་བརྗོད་པ་འདི་ནི༔ རྗེས་ཀྱི་རྣམ་ཐར་གཉིས་ཀྱི་ཐ་མ་སྟེ་རྣམ་གྲངས་གཉིས་པའོ༔ སྐྱེས་རབས་སྔོན་འགྲོ་དངོས་གཞི་རྗེས་དང་གསུམ་གྱི་རྣམ་གྲངས་ཉི་ཤུ་རྩ་གཅིག་གི་ཁོག་ཏུ་བསྡུས་པ་རྫོགས་སོ༔ སཱ་མཱ་ཡཱ༔ རྒྱ་རྒྱ་རྒྱ༔

གཤོག་ཐོག་ར་དང་ནོར་བུ་མཆུ་སྡེར་རྣལ་འབྱོར་པས་ཀླུ་བདུད་འདུལ་ཕྱིར་སྦྲུལ་གདུག་གསོད་པར་མཐོང་ནས་ནི༔ ར་དང་ནོར་བུ་མཆུ་སྡེར་མི་ཐོགས་གཤོག་ཐོགས་འགས༔ ལྟོ་ཕྱིར་འབུ་སྲིན་བསད་པས་ཀླུ་བདུད་འདུལ་བ་མིན༔ དེ་བཞིན་སྐལ་ལྡན་རིག་རྩལ་ཤེས་རབ་ལྡན་པ་ཡི༔ དུག་ལྔ་དམར་ལེན་བྱེད་པ་མ་ཡི་ཆོས་སྲོལ་ཡིན༔ དེ་ཉིད་མཐོང་ནས་སྐལ་དམན་ཐོས་ཆུང་བློ་རྨོངས་འགས༔ དུག་ལྔ་རང་ཁར་སྤྱོད་པ་མ་ཡི་ཆོས་སྲོལ་མིན༔ གཤོག་སྒྲ་ཟིར་ཟིར་སྦྲང་མའི་ཚོགས་རྣམས་མང་ལགས་ཀྱང་༔ དྲི་བཟང་མདངས་ལྡན་པདྨའི་བཅུད་འདི་ལེན་པ་ནི༔ མདུང་འཛིན་སྟག་ཤམ་ལྡན་པ་གཅིག་པུ་མ་གཏོགས་པ༔ སྦྲང་ཚོགས་གཞན་རྣམས་མི་གཙང་དྲི་ངན་སྤྱོད་པ་བཞིན༔ ཕཊཿསྒྲ་ཏིར་ཏིར་གཅོད་མཁན་ཁས་ལེན་མང་ལགས་ཀྱང་༔ མའི་ཆོས་ལུགས་མདོ་རྒྱུད་སྙིང་པོའི་ལམ་བཟང་འདི༔ མཐོང་བས་སྐལ་ལྡན་ཤེས་རབ་ཅན་ཞིག་མ་གཏོགས་པ༔ དམུས་ལོང་གཞན་རྣམས་ལོག་པའི་ལམ་དུ་ཞུགས་པ་ལ༔ ཐེག་ཆེན་གཅོད་ཡུལ་ལམ་བཟང་ཞུགས་པ་མིན༔ མཁའ་ལྡིང་རྣམས་ཀྱང་མཁའ་ལ་བགྲོད་གྱུར་ཀྱང་༔ མཐར་ནི་རང་རྩལ་ཉམས་པས་སླར་ལ་ལྡོག་གྱུར་པ༔ ནམ་མཁའི་མཐའ་ལ་ཐུག་ནས་ལྡོག་གྱུར་མ་ལགས་བཞིན༔ མ་ཡི་རྣམ་ཐར་བརྗོད་པ་དེ་ལྟར་མང་ལགས་ཀྱང་༔ གངས་ཅན་ཆོས་ལུགས་ཕྱག་རྒྱ་ཆེན་པོའི་གཅོད་ཡུལ་གྱི༔ བཀའ་ནས་བརྒྱུད་པའི་བླ་རྣམ་གྱི་རིམ་པ་ནི༔ དྲི་མེད་སྐྱོན་བྲལ་ཤེལ་ཕྲེང་ལྟ་བུའི་རྣམ་ཐར་བརྗོད་པ་མ་ལགས་རྒྱུད་རིམ་བཀོད་པའོ༔

ཁྱད་པར་གངས་ཅན་ལབ་སྒྲོན་རྣམ་ཐར་བརྗོད་སྤྲོ་ཡང་༔ རྣམ་ཐར་ཡོན་ཏན་རབ་འབྱམས་རྡུལ་གྱི་གྲངས་འདས་ལ༔ བློ་ཆུང་བློ་རྨོངས་བདག་གིས་རྟོགས་དཀའ་ཡང་༔ དད་གུས་སྒོ་བསྐྱེད་ཕྲ་རྡུལ་ཙམ་ཞིག་འདིར་བཀོད་ལ༔ གོང་འོག་འཁྲུགས་སྡེབ་སྦྱོར་མ་ལེགས་ཉེས་མཆིས་གང་༔ བླ་མ་རྣམས་དང་མ་ཅིག་མཁའ་འགྲོའི་ཚོགས་ལ་བཤགས༔ ཅུང་ཟད་ལེགས་ཆ་ཡོད་ན་དེའི་དགེ་བ་དེས༔ འགྲོ་རྣམས་དོན་བསྔོ་སངས་རྒྱས་མྱུར་ཐོབ་ཤོག༔ དེ་ལྟར་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་རྒྱུད་རིམ་དང་༔ ཁྱད་པར་དུ་ཡང་མ་ཅིག་ལབ་ཀྱི་སྒྲོན་མའི་རྣམ་ཐར་མདོར་བསྡུས་པ་གཅིག་བརྗོད་པ་རྫོགས་པ་འདི་ནི༔ མ་ཅིག་གིས་མཛད་པའི་གཟན་བསྐྱུར་གྱི་རྣམ་བཤད་ཆེན་མོ་དོན་གསལ་བྱེད་ཀྱི་སྟོད་དུ༔ མ་ཅིག་གི་རྣམ་ཐར་མདོར་བསྡུས་པ་ཞིག་སྣང་བ་དེ་ཉིད་ལ་གཞི་བྱས་ནས༔ གཞན་དུ་ཡང་གསལ་སྒྲོན་དང་མཐའ་རྣམས་གསལ་བའི་ཡིག་བཀྲ་དང་དམ་ཚིག་ཉི་ཤུ་རྩ་གཅིག་པ་དང་གཅོད་ཀྱི་ལོ་རྒྱུས་ཆེན་མོ་དང་རྣམ་ཐར་བསྡུས་དོན་ལྔ་པ་དང་དེ་རྣམས་ཀྱི་ནང་ནས་གང་སྣང་བའི་དགོས་ཚོད་ཙམ་གྱིས་ཁ་བསྐང་བ་དང་༔ གཞན་ཡང་ཤོག་དྲིལ་ཕྱོགས་ཙམ་མཐོང་བ་དང་བླ་མ་རྣམས་ཀྱི་ཞལ་ནས་ཀྱང་མ་ཅིག་གི་རྣམ་ཐར་ཡིན་ངེས་པའི་ཅུང་ཟད་ཙམ་རེ་ཐོས་པ་དང་༔ རྒྱུད་ཕྱི་མ་རྡོ་རྗེ་སྒྲོན་གྱིས་མ་ཅིག་གི་རྣམ་ཐར་ཐུན་མོང་མ་ཡིན་པར་བཀོད་ནས་གཏེར་ལ་སྦས་པ་དང་༔

དེ་རྣམས་ཕྱོགས་གཅིག་ཏུ་བསྡེབས་ནས་མང་ཉུང་རན་ཚོད་ཙམ་ཞིག་འགྲིག་ཆོག་ཏུ་བཀོད་པ་ལ་གོང་འོག་མ་འགྲིག་པ་དང་༔ སྡེབ་སྦྱོར་མ་ལེགས་པ་ལ་སོགས་མཆིས་ན་བདག་འཇུག་པར་མཆིས་ལ་ཐོས་པ་ཆུང་ཞིང་བློ་སྦྱོང་ཅན་གྱི་རྟེན་ལ་ཕབ་པ་ལགས་པས༔ མཁས་པ་རྣམས་ཐུགས་ཀྱིས་མི་བཅའ་བར་བཟོད་པར་གསོལ༔ མི་ཤེས་བཞིན་དུ་བརྩམ་པར་འདོད་པ་ནི༔ མ་ཅིག་ལ་དད་པ་རྩོལ་མེད་དུ་སྐྱེས་པས་བརྩམས་པ་ལགས་པས་རྩོལ་བ་རང་དགེ༔ འདི་བརྩམས་དགེ་བས་བདག་གཞན་འགྲོ་བ་མ་ལུས་ཀུན༔ འདི་ནས་བཟུང་སྟེ་དུས་རྣམས་ཐམས་ཅད་དུ༔ བླ་མེད་ཐེག་ཆེན་བྱང་ཆུབ་སྙིང་པོའི་ཆོས་རྣམས་ལ༔ འགལ་རྐྱེན་མེད་པར་རྟག་ཏུ་བརྩོན་པར་སྤྱོད་པར་ཤོག༔ བཀའ་བརྒྱུད་བླ་མའི་རྣམ་ཐར་དྲི་མེད་ཤེལ་འཕྲེང་འདིར་བཀོད་ཀྱིས༔ འཕྲིན་ལས་ཐུགས་རྗེའི་འོད་ཟེར་ཕྱོགས་བཅུར་འགྱེད་པ་ནི༔ རྟ་བདུན་རྒྱལ་པོ་མཁའ་ལ་རྒྱུ་བའི་འོད་ཟེར་ལྟར༔ རབ་འབྱམས་གྲངས་འདས་ཞིང་ཀུན་བདེ་སྐྱིད་བཀྲ་ཤིས་ཤོག༔ དམ་ཆོས་འདི་ཡི་སྣོད་རུང་སློབ་མ་ནི༔ བླ་མ་ལ་གུས་སྐྱེ་ཤིའི་འཇིགས༔ ཚེ་འདིར་འཇིག་རྟེན་བྱ་གཞག་རྒྱབ་ཏུ་བོར༔ རྟག་ཏུ་རི་ཁྲོད་དགོན་པ་དང་དུ་ལེན༔ འཚོ་བ་བྱ་ཚོལ་དཀའ་ཐུབ་བཅུད་ལེན་བྱེད༔ བླ་མ་མཆེད་གྲོགས་བཤེས་གཉེན་རྟག་ཏུ་བརྟེན༔ གནས་ལ་ངེས་མེད་རི་དྭགས་སྤྱོད་བཞིན་བྱེད༔ ལྟོ་གོས་གཉིས་ལ་གྱོང་སྐུར་འཕྲལ་མཁོ་ཙམ་ལ་བརྟེན༔ བླ་མའི་ཞལ་གདམས་དམ་ཆོས་བདུད་རྩིའི་ཆུ་ལ་ངོམ་མེད་འཐུང་༔ ཚེ་གཅིག་སྒྲུབ་པ་དཀའ་སྤྱད་མཐའ་རུ་སྐྱོལ༔ ཁྱད་པར་དམ་ཆོས་འདི་ཡི་ཕྱོགས་ལ་མོས་ཤིང་འདུན་པ་དང་༔ གཉན་ས་རི་ཁྲོད་འགྲིམས་ཤིང་སྒྱུ་ལུས་ཚོགས་མཆོད་འབུལ༔ ནམ་འཆི་ཆ་མེད་མི་རྟག་རྒྱུན་དུ་བསྒོམས༔ ལུས་སྲོག་ལྟོས་མེད་དམ་ཆོས་ཕྱིར་དུ་བཏང་༔ དེས་སོགས་ཡོན་ཏན་ཚང་བའི་སློབ་མ་ལ༔ ཞལ་གདམས་བཀའ་བརྒྱ་ཡིག་རིས་བཅས་པ་བསྟན༔

དེ་ལས་བཟློག་པའི་དམ་ཉམས་སློབ་མ་ནི༔ སློབ་དཔོན་གསང་ནས་རང་ཆེ་བསྒྲུབས༔ བླ་མའི་ཡོན་ཏན་སྐྱོན་དུ་བརྟགས༔ དཔེ་འཁྱར་བསགས་ནས་མཁས་པར་བྱེད༔ ལུང་མེད་དཔེ་ཆས་ཆོས་བཤད་བྱེད༔ བླ་མའི་གདམས་ངག་ཟོང་དུ་བཙོང་༔ རི་ཁྲོད་དགོན་པ་རྒྱབ་ཏུ་བོར༔ བླ་མ་མཆེད་གྲོགས་ཐབས་ཀྱིས་སྤངས༔ ཟབ་ཆོས་མཐོང་ན་ཕྱི་བཤོལ་བྱེད༔ མི་ནག་ཕོ་མོ་ཐབས་ཀྱིས་བསླུས༔ མ་མཐོང་བ་ཡིས་མཐོང་ལོ་བྱེད༔ མ་མཇལ་བ་ཡིས་མཇལ་ལོ་བྱེད༔ མཁས་པ་མཐོང་ན་ཐབས་ཀྱིས་བྱོལ༔ ཡོན་ཏན་ཅན་ལ་སྐུར་བ་བཏབ༔ ཞབས་ཏོག་མི་བྱེད་མི་ཁ་བཀྲམ༔ སྒྲུབ་པ་མི་བྱེད་ཁས་ལེན་མང་༔ ངོས་དགའ་གསར་འགྲོགས་ཨ་རྒུ་མཁས༔ ཕྱི་ཐག་ཐུང་ཞིང་གཞུང་ངན་པོ༔ དམ་ཉམས་རྒྱུད་གྱོང་ལྟ་ངན་པོ༔ མི་རྩིས་མེད་པར་རང་རྩིས་ཅན༔ དོན་མ་རྟོགས་པའི་ཁ་རྒྱང་ཅན༔ གདེང་མེད་རླུང་ཁྱེར་འཕྱོར་སྐད་ཅན༔ དེས་སོགས་སྐྱོན་རྣམས་ཚང་བ་ཡི༔ སློབ་མ་དེ་འདྲ་བྱུང་གྱུར་ན༔ དམ་ཆོས་འདི་ཉིད་རྣ་བར་བསྒྲག་པར་མི་བྱའོ༔ གལ་ཏེ་དེ་ལ་གདམས་པ་བསྟན་གྱུར་ན༔ ཡེ་ཤེས་མགོན་པོ་ལག་དྲུག་ལ་སོགས་ཆོས་སྐྱོང་དང་གཟའ་བདུད་གདོང་རྒུ་ལ་སོགས་སྡེ་བརྒྱད་ཚོགས༔ མཁའ་འགྲོ་ཆོས་སྐྱོང་རྣམས་ཀྱིས་ཆད་པ་ཆོད༔ སཱ་མཱ་ཡཱ༔

ཞེས་པ་མ་ཅིག་གིས་རྣམ་ཐར་དྲི་མེད་ཤེལ་འཕྲེང་ཞེས་བྱ་བ་འདི་ནི་མ་ཅིག་ལ་ཅུང་ཟད་མོས་པའི་ཀུན་སྤངས་ཀྱི་མིང་ཅན་བརྩོན་འགྲུས་སེང་གེ་པས༔ ཆུ་ཕོ་རྟ་ཡི་ལོ་སྟག་ཟླ་ར་བའི་ནང་དུ་གཏན་ལ་ཕབ་པས་དགེ་ལེགས་སུ་གྱུར་ཅིག༔ གངས་ཅན་འགྲོ་དང་ཕ་མས་ཐོག་དྲངས་འགྲོ་བ་མ་ལུས་དོན་ཀུན་བསྔོ༔ འགྲོ་ཀུན་ཕྱག་རྒྱ་ཆེན་པོའི་མཆོག་ཐོབ་ཤོག༔ བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག༔ དམ་ཆོས་འདི་བཞེངས་དགེ་བའི་རྩ་བ་དེས༔ ཕ་མས་གཙོ་བྱས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བསྔོ་བར་བགྱིའོ༔ དེ་རྣམས་ཐམས་ཅད་རྗེ་བཙུན་ལབ་ཀྱིས་སྒྲོན་མའི་འཁོར་གྱི་ཐོག་མར་སྐྱེ་བར་ཤོག༔ འགྲོ་དྲུག་སེམས་ཅན་ཐམས་ཅད་ཀ་དག་ས་ཐོབ་ཤོག༔ སཱ་མཱ་ཡཱ༔ རྒྱ་རྒྱ་རྒྱ༔ མ་ཅིག་ལབ་ཀྱིས་སྒྲོན་མའི་རྣམ་ཐར་འདི་ཡི་བརྒྱུད་པ་ནི༔ ཡུམ་ཆེན་མོ༔ ཤཱཀྱ་ཐུབ་པ༔ འཇམ་དཔལ་སྨྲ་བའི་སེང་གེ༔ རྗེ་བཙུན་སྒྲོལ་མ༔ སུ་ཀ་སུ་ཏི༔ ཨརྱ་དྷེ་བ༔ དམ་པ་སངས་རྒྱས༔ མ་ཅིག་ལབ་སྒྲོན༔ གཏེར་སྟོན་བརྩོན་འགྲུས་སེང་གེ༔ སྒོ་གཅོད་ཉི་ཟླ་རྒྱལ་མཚན༔ མོན་གཅོད་བརྩོན་འགྲུས་སེང་གེ༔ མཐའ་བཞི་ཀུན་དགའ་སེང་གེ༔ དེས་བདག་ནམ་མཁའ་བློ་གྲོས་ལ་གདམས་པའོ༔ ཌཱ་ཀི་རྒྱ༔ ཤོག་སེར་གྱི་བུ་ཚའོ༔ འདིར་ཚན་གྲངས་ཁ་དབྱངས་ཀྱི་མཆན་དུ་ཡིན་ཏེ་པོ་ཏི་ཆེ་ཆུང་གི་རྒྱུ་ལ་སོང་བས་འདིར་མི་འགྲིགས་པའི་ནོར་འཁྲུལ་འགལ་བ་སོང་ན་སྐུ་གསུང་ཐུགས་ལ་མཐོལ་ལོ་བཤགས། མ་ཅིག་ལབ་ཀྱི་སྒྲོན་མའི་རྣམ་ཐར་འདིའི་མ་དཔེ་ཡིག་རྙིང་མི་གསལ་བས་གོང་འོག་མི་འགྲིག་པ་དང་ཆད་ལྷག་སོགས་ཡོད་སྙམ།