དཔལ་འབའ་རོམ་བཀའ་བརྒྱུད་ཀྱི་རྩ་གསུམ་སྒྲུབ་ཐབས་ཕྱོགས་བསྒྲིགས་གྲུབ་གཉིས་ནོར་བུའི་གཏེར་མཛོད།

ཐུན་མཚམས་རྣལ་འབྱོར་ལ་ཉེ་བར་མཁོ་བ་གསར་རྙིང་གི་གདམས་ངག་སྙིང་པོ་བསྡུས་པ་དགོས་པ་ཀུན་ཚང་། བློ་གྲོས་མཐའ་ཡས།

༄༅། །དཔལ་འབའ་རོམ་བཀའ་བརྒྱུད་ཀྱི་རྩ་གསུམ་སྒྲུབ་ཐབས་ཕྱོགས་བསྒྲིགས་གྲུབ་གཉིས་ནོར་བུའི་གཏེར་མཛོད་ལས་{ཉེར་མཁོའི་གསར་རྙིང་ཆོས་སྤྱོད་སྐོར་}བཞུགས་སོ། །

༄༅། །ཐུན་མཚམས་རྣལ་འབྱོར་ལ་ཉེ་བར་མཁོ་བ་གསར་རྙིང་གི་གདམས་ངག་སྙིང་པོ་བསྡུས་པ་དགོས་པ་ཀུན་ཚང་ཞེས་བྱ་བ་བཞུགས་སོ། །

གནས་སྐབས་བཞི་ཡི་འཁྲུལ་རྟོག་ནི། །ཡེ་ཤེས་ཆེན་པོའི་འཁོར་ལོར་ཤར། །སྐྱབས་གསུམ་ཀུན་འདུས་བླ་མ་རྗེར། །མི་ཕྱེད་སྙིང་ནས་གུས་པས་འདུད། །ཐེག་པའི་འཇུག་སྒོ་མཐའ་ཡས་ཤིང༌། །གང་ཟག་མོས་པའང་ཐ་དད་ཀྱང༌། །རང་འདྲའི་བློ་དམན་ཐ་མལ་བློ། །རྣལ་མའི་དོན་ལ་འདི་ལྟར་སྦྱོར། །དེའང་རང་རེ་ལས་དང་པོ་པ་རྣམས་ལ་མཉམ་རྗེས་མཚན་ཉིད་པ་མེད་པས་ཐབས་སྣ་ཚོགས་ཀྱིས་སྒོ་གསུམ་དགེ་བའི་ལམ་དུ་སྦྱོར་བར་བྱེད་དགོས། དེ་ལ་གྲུབ་ཐོབ་གོང་མ་རྣམས་ཀྱིས་མཛད་པའི་རི་ཆོས་དང་ཆོས་སྤྱོད་ཀྱི་རིགས་དང༌། མཁས་གྲུབ་ཁྱུང་པོ་རྣལ་འབྱོར་གྱི་ཉམས་ལེན་དྲུག་པ། འགྲོ་མགོན་གཙང་པ་རྒྱ་རས་ཀྱི་དགེ་སྦྱོར་བདུན་པ། རྒྱལ་བ་རྒོད་ཚང་བའི་

དམ་བཅའ་བཅུ་གཉིས་པ། ལ་སྟོད་གྲུབ་ཐོབ་ཤེས་རབ་མགོན་པོའི་གདམས་ངག་ཉེར་མཁོ་རྒྱལ་བ་དཀོན་མཆོག་ཡན་ལག་གིས་བསྡུས་པའི་ཆོས་སྤྱོད་རབ་གསལ། དཔལ་གཙུག་ལག་ཕྲེང་བའི་ཉིན་ཞག་ཕྲུག་གཅིག་གི་ཆོས་སྤྱོད་ལ་སོགས་པ་ལྟར་ཅི་ནུས་སུ་སློབ་དགོས་པ་ཡིན་ཀྱང་དེ་ལྟར་ཇི་བཞིན་མི་འཁྱོངས་པ་དག་གིས་རྣལ་འབྱོར་དུ་བྱ་བ་མདོར་བསྡུ་ན། མཉམ་བཞག་ཏུ་བསྐྱེད་རྫོགས་སྐབས་སུ་གང་བབས་པ་དེ་ཉིད་རྩེ་གཅིག་ཏུ་ཉམས་སུ་ལེན། རྗེས་ཐོབ་ཐུན་མཚམས་ཀྱི་བྱ་བར་རྒྱུད་དང་གྲུབ་པའི་མན་ངག་ལས་རྒྱས་བསྡུས་ཅི་རིགས་པ་འབྱུང་ཡང༌། རང་རེ་སྡོམ་པ་གསུམ་ཀའི་ཚུལ་ཁྲིམས་བླངས་ཤིང་དེའང་སྔགས་བླ་མེད་ལ་མོས་པས་ཞུགས་པ་དང༌། དེའང་གསར་རྙིང་གཉིས་ཀའི་ཚ་བྲོ་མྱང་བ་རྣམས་ཀྱི་དབང་དུ་བྱས་ཏེ། ཐོ་རངས་ལྡང་བའི་རྣལ་འབྱོར། དག་བྱེད་ཁྲུས་ཀྱི་རྣལ་འབྱོར། སྲུང་སྡོམ་གོ་ཆའི་རྣལ་འབྱོར། ཐུན་མཚམས་གཏོར་མའི་རྣལ་འབྱོར། བཟའ་
བཏུང་ཟས་ཀྱི་རྣལ་འབྱོར། འགྲོ་འདུག་སྤྱོད་ལམ་གྱི་རྣལ་འབྱོར། སྒྲིབ་སྦྱོང་ཉམས་སྐོང་གི་རྣལ་འབྱོར། ཟབ་མོ་ཚོགས་ཀྱི་རྣལ་འབྱོར། ཉལ་བ་གཉིད་ཀྱི་རྣལ་འབྱོར། འཆི་བསླུ་སྲུང་ཟློག་གི་རྣལ་འབྱོར། གཞན་དོན་ཕྲིན་ལས་ཀྱི་རྣལ་འབྱོར། ཐུན་མཚམས་ཆོས་སྤྱོད་ཀྱི་བྱ་བ། བསྔོ་སྨོན་ཟབ་མོའི་རྒྱས་གདབ་པ་སྟེ་བཅུ་གསུམ་དུ་ཤེས་པར་བྱའོ། །དེའང་ཐུན་སྔ་མ་གྲོལ་ནས་ཕྱི་མ་མ་ཚུགས་པའི་བར་སྐབས་རྣམས་སུ་སྒོ་གསུམ་ཐ་མལ་དང་རྣམ་གཡེང་དུ་མ་ཤོར་བར་དགེ་བའི་བྱ་བས་དུས་འདའ་དགོས་པས་ཐུན་མཚམས་ཀྱི་རྣལ་འབྱོར་ཅེས་བྱ་བ་ཉེར་མཁོ་རགས་པ་ཙམ་བསྡུས་པ་ཡིན་གྱི་གང་ཟག་དབང་པོ་དང་ཉམས་སུ་ལེན་བྱའི་ཁྱད་པར་གྱིས་མང་དུ་འགྱུར་རོ། །རྣལ་འབྱོར་བཅུ་གསུམ་པོ་དེའང་ཉམས་སུ་ལེན་ཚུལ་ཕྱི་ནང་གསང་བ་གསུམ་དུ་དབྱེར་ཡོད་ཅིང༌། དེའང་སྡོམ་པ་གསུམ་པོ་གཙོ་བོར་གང་ལ་ཉམས་ལེན་བྱེད་པ་དེ་དང་མཐུན་པར་སོ་སོར་སྦྱོར་དགོས་པ་ཡིན་ཀྱང༌། འདིར་ལག་ཏུ་བླང་བདེ་བའི་ཆེད་དུ་ཕལ་ཆེར་སྟབས་གཅིག་ཏུ་བཀོད་པར་བྱའོ། །

བཅུ་གཉིས་པ་ཐུན་མཚམས་ཆོས་སྤྱོད་ཀྱི་བྱ་བ།

༈ བཅུ་གཉིས་པ་ཐུན་མཚམས་ཆོས་སྤྱོད་ཀྱི་བྱ་བ་ནི། སྤྱིར་ཐུན་བར་ཐམས་ཅད་དུ་དལ་བར་མི་སྡོད་པར་ནུས་ན་བསྐྱེད་རྫོགས་ཉམས་ལེན་གང་བྱེད་པ་དེ་དང་མ་བྲལ་བར་བྱ། མི་ནུས་པའམ་ཚོགས་གསོག་ཅིང་སྒྲིབ་པ་སྦྱོང་བའི་ཆེད་དུ་གཞན་ནས་འབྱུང་བའི་ཆོ་ག་སྤྱི་དང་བྱེ་བྲག་མི་ཏྲ་ཛོ་ཀིའི་སཱཙྪ་ལྔ་མ་ལྟ་བུའི་ཆ་ོག་དང་ལྡན་པས་སཱཙྪ་གདབ་པ་དང༌། ཆོས་སྤྱོད་ཐམས་ཅད་ཀྱི་མན་ངག་རྟོགས་པའི་རྒྱུད་ལས། ཡི་གེ་འབྲི་མཆོད་སྦྱིན་པ་དང༌། །ཉན་དང་ཀློག་དང་འཛིན་པ་དང༌། །འཆད་དང་ཁ་ཏོན་བྱེད་པ་དང༌། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་གསུངས་པ་ལྟར་སྦྱོར་བ་བྱང་ཆུབ་ཀྱི་སེམས་དངོས་གཞི་སྐྱེ་བ་མེད་པ་རྗེས་བསྔོ་བས་ཟིན་པ་སྟེ། སྦྱོར་དངོས་རྗེས་གསུམ་ཚང་བའི་སྒོ་ནས་ཆོས་སྤྱོད་བཅུ་པོ་གང་རུང་ལ་སྐབས་ཇི་ལྟར་འོས་པ་ནན་ཏན་དུ་སྤྱད་པར་བྱ་སྟེ། དེ་ལ་བཀའ་དང་བསྟན་བཅོས་གདམས་ངག་ཚད་ལྡན་ཤླཽ་ཀ་གཅིག་ཡན་ཆད་འབྲི་བ་དང༌། སྐུ་གསུང་ཐུགས་རྟེན་ལ་མཎྜལ་དང་ཡན་ལག་བདུན་པ་སོགས་ཡིད་སྤྲུལ་དང་དངོས་སུ་ཅི་འབྱོར་བའི་མཆོད་པ་འབུལ་བ་དང༌། ཆོས་དང་ཟང་ཟིང་རང་གི་ནུས་

པས་གང་ལྕོགས་དོན་དུ་གཉེར་བ་ལ་སྦྱིན་པ་དང༌། གདམས་ངག་དང་ལུང་ཤླཽ་ཀ་གཅིག་ཡན་ཆད་ཀྱི་ཚིག་དོན་གཞན་ལས་ཉན་པ་དང༌། རྒྱལ་བའི་གསུང་རབ་མང་པོ་བཀླག་མ་ནུས་ཀྱང་ཕྱག་རྒྱ་ལྔའི་མདོ་དང༌། སྡུད་པ། མཚན་བརྗོད་ལྟ་བུ་རྣལ་འབྱོར་དང་ལྡན་པས་དུས་སུ་ཀློག་པ་དང༌། བསླབ་པ་གསུམ་དང་བྱང་ཆུབ་ཀྱི་སེམས་སྦྱོང་བ་སོགས་གསུང་རབ་ཀྱི་དོན་དང་ཚིག་མི་བརྗེད་པར་འཛིན་ཅིང་ཐ་ན་གླེགས་བམ་ཡང་མི་འདོར་བར་མཆོད་པའི་རྟེན་དུ་བཟུང་བ་དང༌། གོང་སྨོས་ཉན་པ་དེ་རྣམས་གཞན་ལ་ཕར་འཆད་པ་དང་མི་ནུས་ནའང་ཆོས་བཤད་པར་མོས་ལ་མདོ་སོགས་བཀླག་པ་དང༌། མདོ་རྒྱུད་གཟུངས་སྔགས་ལ་སོགས་པ་དུས་རྟག་ཏུ་ཁ་ཏོན་བྱེད་པ་དང༌། ཐོས་པའི་དོན་རྣམས་རྟོག་དཔྱོད་ཀྱིས་གཏན་ལ་དབབ་པའི་བསམ་པ་དང༌། དེའི་དོན་ཞི་ལྷག་གི་ཏིང་ངེ་འཛིན་སྒོམ་པ་ལ་བརྩོན་པ་རྣམས་ཏེ། དེའང་སྒོམ་པ་ཉམས་ལེན་གྱི་སྐབས་སུ་ནི་མཉམ་རྗེས་ཀུན་ཏུ་དེ་ཉིད་གཙོ་བོར་བྱེད་པ་ལས་སྤྲོས་བཅས་མང་པོ་མི་བྱ། དུས་གཞན་དུ་འཇིག་རྟེན་གྱི་གཡེང་བས་སྒོ་གསུམ་དོན་མེད་དུ་མི་བཏང་བར་འདི་དག་ལས་ཇི་ལྟར་ནུས་པ་བསྒྲུབ་པར་བྱ་དགོས་སོ། །ཕྱག་བྱ་བའི་ཚེ། ན་མོ་མཉྫུ་ཤྲཱི་ཡེ་སྭཱ་ཧཱ། ན་མཿསུ་ཤྲཱི་ཡེ་སྭཱ་ཧཱ། ན་མོཿཨུཏྟ་མ་ཤྲཱི་ཡེ་སྭཱ་ཧཱ། ཞེས་ལན་གསུམ་བརྗོད་པས་ཕྱག་གྲངས་མེད་དུ་འགྱུར་ཞིང་མཐོང་ལམ་གྱི་ཡེ་ཤེས་ཚེ་དེ་ཉིད་ལ་སྐྱེ་བར་གསུངས། ཡང་ན། ཨོཾ་ན་མོ་བྷ་ག་ཝ་ཏེ་རཏྣ་ཀེ་ཏུ་རཱ་ཛཱ་

ཡ། ཏ་ཐཱ་ག་ཏ་ཡ། ཨཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ་རཏྣ་བི་ཛ་ཡེ་སྭཱ་ཧཱ། ཞེས་པས་ཕྱག་བྱ་སྟེ་མཆོད་རྟེན་གཅིག་ལ་ཕྱག་བྱས་པས་མཆོད་རྟེན་བྱེ་བ་ལ་ཕྱག་བྱས་པར་འགྱུར་རོ། །ཡང་བསྐོར་བ་བྱ་བར་འདོད་ན། ས་གཞི་གསེར་གྱི་བྱེ་མ་བརྡལ་བའི་སྟེང་དུ་ཆུ་ཡན་ལག་བརྒྱད་ལྡན་གྱིས་གང་བའི་དབུས་སུ་པདྨའི་སྡོང་པོ་ཆེན་པོའི་སྟེང་དུ་ཟླ་བའི་གདན་ལ། བླ་མ་དང་སངས་རྒྱས་བྱང་སེམས་ཐམས་ཅད་བཞུགས་པ་ལ་ཕྱོགས་བཅུའི་རྒྱལ་བ་སྲས་བཅས་སྤྱན་དྲངས་པ་བསྟིམས་ནས་དེ་དག་ལ་བསྙེན་བཀུར་བའི་ཚུལ་གྱིས་བཤད་མ་ཐག་པའི་ཕྱག་འཚལ་བའི་སྔགས་དེའམ། ཡང་ན། ན་མོ་ད་ཤ་དིཀྟྲི་ཀཱ་ལ་སརྦ་རཏྣ་ཏྲ་ཡཱ་ཡ། ན་མཿཔྲ་དཀྵ་སུ་པྲ་དཀྵ་སརྦ་པཱ་པཾ་བི་ཤོ་དྷ་ནི་སྭཱ་ཧཱ། ཞེས་པ་བཟླ་བཞིན་དུ་བསྐོར་བ་བྱ་སྟེ། བསྐོར་བ་གཅིག་བྱས་པས་དཔག་ཏུ་མེད་པ་བྱས་པར་འགྱུར་རོ། །རྟེན་ལ་མཆོད་པ་འབུལ་བའི་ཚེ་མཆོད་པའི་སྤྲིན་གྱི་གཟུངས་སྔགས་དང༌། མེ་ཏོག་འབུལ་བའི་ཚེ་པུཥྤེ་ཀེ་ཏུའི་གཟུངས་སྔགས་

བཟླ། སྐུ་གསུང་ཐུགས་རྟེན་གྱི་རྡུལ་དང་གྲིབ་མ། མཆོད་པའི་རས་མ་སོགས་ལ་འགོད་དུ་མི་རུང་ཞིང་དབང་མེད་དུ་འགོད་དགོས་པ་བྱུང་ན། ཨོཾ་བཛྲ་བེ་གཱ་ཀྲ་མ་ཧཱུྃ། ཞེས་བརྗོད་ཅིང་ཡིད་ཀྱིས་མཁའ་ལ་བཏེགས་པར་བསམ་ནས་བསྐོར་བ་སོགས་བྱའོ། །གསུང་རབ་མདོ་རྒྱུད་ཀློག་པའི་ཚེ། རང་ཉིད་བསྟན་པའི་གཙོ་བོ་ཤཱཀྱ་ཐུབ་པའམ་ཡི་དམ་གང་མོས་སུ་བསྒོམ་གསུང་རབ་ཀྱི་སྒྲ་སེམས་ཅན་ཐམས་ཅད་ཀྱི་རྣ་བར་ཐོས་པས་དཀར་པོའི་ས་བོན་བཏབ་པར་བསམས་ལ། ཆོས་བཤད་པའི་ཚུལ་ལམ། ཡང་ན། མདུན་དུ་སངས་རྒྱས་བཞུགས་པ་ལ་ཆོས་ཉན་པའི་ཚུལ་ལམ། ཡང་ན། ཆོས་ཀྱི་དོན་རང་གིས་ཡིད་ལ་བྱེད་ཅིང་ཉམས་ལེན་གྱི་ཚུལ་ཏེ། དེ་རྣམས་གང་མོས་ཀྱིས་ཡུམ་རྒྱས་འབྲིང་བསྡུས་པའམ། ཤེར་སྙིང་ལ་སོགས་པའི་བཀའ་འདོན། དེ་ཙམ་ཡང་མ་གྲུབ་ན། མདུན་གྱི་ནམ་མཁར་ཨ་དཀར་པོ་གཅིག་བསྒོམས་ནས་ཀློག་པའི་ཚུལ་གྱིས་ཨ་བརྒྱ་སྟོང་སོགས་བགྲང༌། ཡང་ན་རང་གི་ལུས་ཨ་དཀར་པོ་སྣང་ལ་རང་བཞིན་མེད་པ་ཞིག་ཏུ་བསྒོམ། སེམས་གསལ་སྟོང་དུ་བཞག་ལ། དབུགས་ཁུག་གཅིག་ལ་ཨ་ཉི་ཤུ་རྩ་གཅིག་བགྲང༌། འཕྲོ་གཅོད་ན་ནམ་མཁའི་ཨ་རང་ལ་བསྟིམ། རང་ལུས་གསལ་སྟོང་དུ་གྱུར་པར་བསམ། སྐྱེ་མེད་ཀྱི་ངང་ལ་ཅུང་ཟད་བཞག །བསྔོ་བ་བྱ། དབུགས་ཁུག་གཅིག་ལ་ཨ་ཉི་ཤུ་རྩ་གཅིག་འདོན་པ་འདི་ནི་བསོད་ནམས་ཆེ། ལྟས་ངན་ཐམས་ཅད་བཟློག །དུས་མིན་འཆི་བ་ལ་སོགས་པ་མི་མཐུན་པའི་ཕྱོགས་ཐམས་ཅད་ཞི་བར་བྱེད་པའི་མན་ངག་ཡིན་པར་གསུངས་སོ། །

དུས་དྲན་བསྙེན་པ།

དེའང་སྤྱིར་སྒྲུབ་སྡེ་རྣམས་སུ་ཉིན་མཚན་གྱི་ཆ་ལ་གཙོ་བོར་ཐུན་ཆེན་པོ་བཞིར་བགོས་པའི་ནང་གསེས་ཐོར་ཐུན་ཏེ། ཐོ་རངས་ལྡང་བའི་རྣལ་འབྱོར་གྱི་རྗེས་སུ། ༈ དུས་དྲན་བསྟེན་པ་ནི། ཐོག་མར་རྟེན་གྱི་དྲུང་དུ་ཕྱག་འཚལ་ནས། སྟོན་པ་ཐུགས་རྗེ་ཆེན་པོ་དང་ལྡན་པ་བདག་ལ་དགོངས་སུ་གསོལ། བདག་དགེ་སློང་ཆེ་གེ་ཞེས་བགྱི་བས། དེ་རིང་གི་གནས་སྐབས་སུ་ཆོས་ལྡན་གྱི་བྱ་བ་དང་། གཞན་གྱི་དོན་དུ་གླུ་གར་དང་རོལ་མོ་ལ་སོགས་པ་བྱེད་དམ་བྱེད་དུ་གཞུག་པ་དང་། མེ་ལ་རེག་པ་དང་། རེག་ཏུ་འཇུག་པ་དང་། རིན་པོ་ཆེ་ལ་རེག་པ་དང་། རེག་ཏུ་འཇུག་པ་དང་། ས་བོན་གཞོམ་
པ་དང་། གཞོམ་དུ་འཇུག་པ་དང་། སྐྱེ་བ་གཅོད་པ་དང་། གཅོད་དུ་འཇུག་པ་དང་། ལག་ཉ་དང་། མཚམས་བཙོས་དང་། ཞག་ལོན་དང་། རྗེན་བཙོས་དང་། གསོག་འཇོག་བྱས་པ་ཟ་བ་དང་། བྱིན་ལེན་མ་བྱས་པར་ཟ་བ་དང་། བསྙེན་པར་མ་རྫོགས་པ་དང་ལྷན་གཅིག་ཏུ་འདོན་པ་དང་ཉལ་བ་ལ་སོགས་པ་མདོར་ན་དགེ་སློང་གི་ཁྲིམས་ཉིས་བརྒྱ་ལྔ་བཅུ་རྩ་གསུམ་ལས་དུས་དྲན་བསྟེན་དུ་རུང་བ་རྣམས་སྟོན་པ་ཐུགས་རྗེ་ཆེན་པོ་དང་ལྡན་པ་ཉིད་ཀྱིས་བདག་ལ་གནང་བར་མཛད་དུ་གསོལ།

ཚུལ་ཁྲིམས་རྣམ་དག་གི་གཟུངས།

༈ ཚུལ་ཁྲིམས་རྣམ་དག་གི་གཟུངས་ནི། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཨོཾ་ཨཱ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར་མ་ཧཱ་ཤུདྡྷ་ས་ཏྭ་པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ། ཨ་ཝ་ལོ་ཀི་ཏེ་ཧཱུྃ་ཕཊ་སྭཱ་ཧཱ། ལན་ཉེར་གཅིག །

ༀ་ཧྲཱིཿ་ཏྲཻ་ལོཀྱ་བི་ཛ་ཡ་ཨ་མོ་གྷ་པ་ཤ་ཨ་པྲ་ཏི་ཧ་ཏ་ཧྲཱིཿཧ་ཧཱུྃ་ཕཊ་སྭཱ་ཧཱ། ལན་གསུམ། བདག་སོགས་སེམས་ཅན་ཐམས་ཅད་ཀྱི་རྒྱུད་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཆོས་རྣམས་ཡོངས་སུ་རྫོགས་པར་གྱུར་ཅིག །ཉོན་མོངས་པས་ཚུལ་ཁྲིམས་འཆལ་བ་ལས་བྱུང་བའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པར་གྱུར་ཅིག །འཕགས་པ་དགྱེས་པའི་ཚུལ་ཁྲིམས་ཀྱི་སྐལ་བ་དང་ལྡན་པར་གྱུར་ཅིག །ཉོན་མོངས་པས་མི་བརྫི་བའི་རྣམ་པར་གྲོལ་བའི་བདེ་བ་ལ་གནས་པར་གྱུར་ཅིག །ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པ། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །
ཅེས་ཚུལ་ཁྲིམས་རྣམ་དག་གི་གཟུངས་འདིས་ནི་ཁྲིམས་འཆལ་གྱི་ཉེས་པ་དག་ཅིང་ཚེ་རབས་ཀུན་ཏུ་ཚུལ་ཁྲིམས་ཕུན་སུམ་ཚོགས་པར་འགྱུར་རོ། །

སྤྱི་བཤགས།

༈ རྨི་ལམ་ཚུན་དུ་ཉེས་པ་བྱུང་ཚད་སྤྱི་བཤགས་ནི། ནངས་མོར་བླ་མ་དཀོན་མཆོག་རྣམས་མངོན་སུམ་བཞིན་དུ་མདུན་གྱི་ནམ་མཁར་དཔང་པོའི་ཚུལ་དུ་བཞུགས་པར་མོས་ལ། བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། དགེ་འདུན་བཙུན་པ་རྣམས་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་ཚེ་འཁོར་བ་ཐོག་མ་མེད་པ་ནས་ཐ་མ་ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས་ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མ་མཆིས་པ་ལྔ་བགྱིས་པ་དང་། དེ་དང་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བ་བགྱིས་པ་དང་། བྱང་ཆུབ་སེམས་དཔའི་བསླབ་པ་དང་

འགལ་བ་བགྱིས་པ་དང་། གསང་སྔགས་ཀྱི་དམ་ཚིག་དང་འགལ་བ་བགྱིས་པ་དང་། དཀོན་མཆོག་གསུམ་ལ་གནོད་པ་བགྱིས་པ་དང་། དམ་པའི་ཆོས་སྤངས་པ་དང་། འཕགས་པའི་དགེ་འདུན་ལ་སྐུར་པ་བཏབ་པ་དང་། ཕ་དང་མ་ལ་མ་གུས་པ་བགྱིས་པ་དང་། མཁན་པོ་དང་སློབ་དཔོན་ལ་མ་གུས་པ་བགྱིས་པ་དང་། གྲོགས་ཚངས་པ་མཚུངས་པར་སྤྱོད་པ་རྣམས་ལ་མ་གུས་པ་བགྱིས་པ་ལ་སོགས་པ་མདོར་ན་མཐོ་རིས་དང་ཐར་པའི་གེགས་སུ་གྱུར་ཅིང་འཁོར་བ་དང་ངན་སོང་གི་རྒྱུར་འགྱུར་བའི་ཉེས་པ་དང་ལྟུང་བའི་ཚོགས་ཅི་མཆིས་པ་དེ་དག་ཐམས་ཅད་བླ་མ་རྡོ་རྗེ་འཛིན་པ་ཆེན་པོ་ལ་སོགས་པ་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་དགེ་འདུན་བཙུན་པ་རྣམས་ཀྱི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །དེ་ལྟར་མཐོལ་
ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི་མ་མཐོལ་མ་བཤགས་ན་དེ་དེ་ལྟར་དུ་མི་འགྱུར་བ་ལགས་སོ། །

ཐར་བསྡུས་སྡིག་སྒྲིབ་ཀུན་འཇོམས་བཀླག་ཐབས་དང་བཅས་པ། གཡུལ་ལས་རྣམ་པར་རྒྱལ་བ།

༈ ཐར་བསྡུས་སྡིག་སྒྲིབ་ཀུན་འཇོམས་བཀླག་ཐབས་དང་བཅས་པ་བཞུགས་སོ། །སྐྱབས་སེམས་ནི། བདག་སོགས་མཁའ་ཁྱབ་སེམས་ཅན་མ་ལུས་ཀུན། །བླ་མེད་དཀོན་མཆོག་གསུམ་ལ་སྐྱབས་སུ་མཆི། །འགྲོ་རྣམས་རྣམ་མཁྱེན་རྫོགས་བྱང་འཐོབ་བྱའི་ཕྱིར། །བདག་གིས་སྒོ་གསུམ་དགེ་ལ་བསྐུལ་བར་བྱ། །ཞིང་སྦྱང་ནི། ཐམས་ཅད་དུ་ནི་ས་གཞི་དག །གསེག་མ་ལ་སོགས་མེད་པ་ཡི། །ལག་མཐིལ་ལྟར་མཉམ་བཻ་ཌཱུརྱའི། །རང་བཞིན་འཇམ་པོར་གནས་གྱུར་ཅིག །ཚོགས་ཞིང་ནི། མདུན་གྱི་ནམ་མཁར་སེང་ཁྲི་པད་ཟླའི་དབུས། །འདྲེན་པ་བླ་མེད་ཤཱཀྱའི་རྒྱལ་པོ་ལ། །དུས་གསུམ་གཤེགས་པའི་རྒྱལ་བ་རྣམས་ཀྱིས་བསྐོར། །མདུན་དུ་འཕགས་བོད་པཎ་གྲུབ་རྒྱ་མཚོ་དང་། །གཡས་སུ་བྱང་སེམས་གཡོན་དུ་ཉན་རང་སྡེ། །

རྒྱབ་ཏུ་དམ་ཆོས་དཀོན་མཆོག་ངོ་བོ་ཉིད། །ཤེར་ཕྱིན་གླེགས་བམ་ཨཱ་ལི་ཀཱ་ལི་ཡི། །རང་སྒྲ་དང་བཅས་མཆོག་གསུམ་རྒྱ་མཚོའི་དྲུང་། །བདག་སོགས་ཁམས་གསུམ་ཕ་མ་སེམས་ཅན་ཀུན། །སྒོ་གསུམ་འཇུག་པ་གཅིག་ཏུ་དྲིལ་བ་ཡིས། །ལུས་ཀྱིས་ཕྱག་འཚལ་ངག་གིས་མདོ་ཚིག་བཀླག །ཡིད་ཀྱིས་དད་མོས་དག་པས་འདི་སྐད་དོ། །ན་མོ། ནམ་མཁའི་མཐར་ཐུག་ཞིང་ཁམས་རབ་འབྱམས་ཀྱི། །རིས་མེད་གདུལ་བྱའི་ཁམས་ལ་དགྱེས་བརྩེ་བའི། །དེ་བཞིན་གཤེགས་པ་དགྲ་བཅོམ་ཡང་དག་པར། །རྫོགས་པའི་སངས་རྒྱས་བཅོམ་ལྡན་འདས་པ་ནི། །མར་མེ་མཛད་དང་གསལ་རྒྱལ་བྱམས་པ་སོགས། །འདས་དང་མ་བྱོན་ད་ལྟར་བཞུགས་པ་ཡི། །རྒྱལ་བ་རྒྱ་མཚོའི་ཚོགས་ལ་ཕྱག་འཚལ་ལོ། །འཕགས་པ་གསུམ་གྱི་ཐུགས་ལ་མངའ་བ་ཡི། །སྤངས་དང་རྟོགས་པ་ཟབ་མོའི་བསྡུས་པ་དང་། །བདེ་

གཤེགས་རྣམས་ཀྱིས་ལེགས་པར་གསུངས་པ་ཡི། །མདོ་སྡེ་དབྱངས་བསྙད་ལུང་དུ་བསྟན་པ་དང་། །ཚིགས་བཅད་ཆེད་བརྗོད་གླེང་གཞི་རྟོགས་པ་བརྗོད། །དེ་ལྟ་བུ་བྱུང་སྐྱེས་རབས་ཤིན་ཏུ་རྒྱས། །རྨད་བྱུང་གཏན་ལ་ཕབ་པའི་སྡེ་ལ་སོགས། །གསུང་རབ་ལུང་གི་ཆོས་སྒོ་རབ་འབྱམས་བཅས། །དམ་ཆོས་དཀོན་མཆོག་རྣམས་ལ་ཕྱག་འཚལ་ལོ། །བླ་མེད་འཕགས་པའི་ས་ལ་བཞུགས་པ་ཡི། །འཇམ་དབྱངས་སྤྱན་གཟིགས་ཕྱག་རྡོར་ལ་སོགས་པའི། །རྒྱལ་སྲས་བྱང་ཆུབ་སེམས་དཔའི་ཚོགས་རྣམས་དང་། །ཉན་རང་དགྲ་བཅོམ་དང་བཅས་འཕགས་པའི་ཚོགས། །ཐེག་གསུམ་ཚོགས་སྦྱོར་ལམ་གྱིས་བསྡུས་པ་ཡི། །ཚོགས་ཞིང་དགེ་འདུན་རྣམས་ལ་ཕྱག་འཚལ་ལོ། །གཞན་ཡང་སྐུ་གདུང་རིང་བསྲེལ་མཆོད་རྟེན་སོགས། །ཕྱག་འོས་མ་ལུས་ཀུན་ལ་ཕྱག་འཚལ་ལོ། །དངོས་བཤམས་གཟུངས་རིག་མོས་སྟོབས་ཏིང་

འཛིན་འཕྲུལ། །ཡིད་སྤྲུལ་ཀུན་བཟང་སྨོན་ལམ་ལས་བྱུང་བའི། །ནམ་མཁའ་གང་བའི་མཆོད་སྤྲིན་རྒྱ་མཚོས་མཆོད། །ཁྱེད་རྣམས་མཚན་བསྒྲགས་ཕྱག་འཚལ་མཆོད་པའི་མཐུས། །བསྐལ་དུས་ཐོག་མེད་ནས་བཟུང་ད་བར་གྱི། །སྡིག་ལྟུང་དྲི་མའི་ཚོགས་རྣམས་དག་གྱུར་ནས། །བདག་དང་བདག་ལ་འབྲེལ་ཐོགས་འགྲོ་བ་ཀུན། །འཁོར་བ་ངན་སོང་འཇིགས་ལས་རྣམ་གྲོལ་ནས། །རྣམ་མཁྱེན་རྫོགས་བྱང་གོ་འཕང་ཐོབ་གྱུར་ཅིག །འཁྲུལ་པའི་སྣང་ངོར་མཆོག་གསུམ་ཐ་དད་ཀྱང་། །ཡང་དག་སྐྱབས་གནས་སངས་རྒྱས་ཉག་གཅིག་ཡིན། །རྨད་བྱུང་ཐབས་ལ་མཁས་པའི་བྱང་སེམས་རྣམས། །ཁམས་གསུམ་བགྲོད་པར་བྱ་བའི་ཆོས་བཅུ་དང་། །རྒྱལ་སྲས་སྤྱོད་པ་བཞི་ཚན་ཕྲག་ཉི་ཤུས། །ཚོགས་གཉིས་ཟུང་འཇུག་དོན་གཉིས་མཐར་ཕྱིན་ཤོག །ཀུན་རྫོབ་སྣང་ངོར་ཐེག་གསུམ་ཐ་དད་ཀྱང་། །ཡང་

དག་ཏུ་ན་ཐེག་ཆེན་འབའ་ཞིག་ཡིན། །ཕུང་ཁམས་སྐྱེ་མཆེད་རྟེན་ཅིང་འབྲེལ་འབྱུང་ཆོས། །བདེན་བཞི་བྱང་ཕྱོགས་ས་བཅུ་ལམ་མཆོག་ལྔ། །སྐུ་དང་ཡེ་ཤེས་བྲལ་སྨིན་ཡོན་ཏན་སོགས། །འཁོར་འདས་ལམ་གྱིས་བསྡུས་པའི་ཆོས་ཐམས་ཅད། །ཐ་སྙད་ཙམ་དུ་སྒྱུ་མ་རྨི་ལམ་བཞིན། །སོ་སོར་སྣང་བཞིན་ཡོད་པར་བཤད་ལགས་ཀྱང་། །ཡང་དག་ཏུ་ན་མ་སྐྱེས་མ་འགགས་པར། །ཟུང་འཇུག་མཉམ་པ་ཆེན་པོར་རོ་གཅིག་གོ། །སེང་གེའི་སྒྲ་ཡི་གཟུངས་སྔགས་འདི་ལྟ་སྟེ། །ན་མོ་བུདྡྷ་ཡ། ན་མོ་དྷརྨཱ་ཡ། ན་མཿསངྒྷ་ཡ། ཨ་དནྟི་དྷ་ར་ནི། ཏདྱ་ཐཱ། ཨཱ་ཀཱ་ཤ་ནི་བ་བི་ནི། སརྦ་དྷརྨཱ་ནི་བ་ནི། ཨི་ཤ་མ་ད་པི་པ་ཤ་ནི། བི་མ་ལ་སུ་པ་རི། དྷརྨཱ་ནི་ཥ་ན། བ་ར་རུ་ནི་ཙ་ཡ། ཏ་མ་ལེ། ཙ་ལེ། ཧུ་ལུ་ཧུ་ལུ། ཤི་བི་ཏེ། མནྟྲ་མནྟྲ་མནྟྲཿསྭཱ་ཧཱ། སྔགས་འདི་དུས་གཅིག་ལ་བརྒྱ་རྩ་བརྒྱད་བཟླས་ཤིང་། མཆོད་རྟེན་བདུན་ཕྲག་གསུམ་དུ་བསྐོར་བྱས་ན། ཕན་ཡོན་བསམ་མི་ཁྱབ་པར་མདོ་

ལས་གསུངས། ན་མོ། ཤར་ལ་སོགས་པའི་ཞིང་ཁམས་རབ་འབྱམས་ན། །བཞུགས་པའི་རྒྱལ་དང་རྒྱལ་བའི་སྲས་དག་དང་། །ལུང་དང་རྟོགས་པའི་ཆོས་ཚུལ་རྒྱ་མཚོའི་སྡེ། །གཞན་ཡང་ཉན་རང་འཕགས་དང་སོ་སྐྱེ་ཡིས། །བསྡུས་པའི་དགེ་འདུན་དཀོན་མཆོག་དང་བཅས་པའི། །བསླུ་མེད་དཀོན་མཆོག་གསུམ་ལ་ཕྱག་འཚལ་ལོ། །སྐྱབས་སུ་མཆིའོ་སྡིག་བཤགས་དཔང་པོ་མཛོད། །འཇིག་རྟེན་སྐྱོང་བའི་མཐུ་ཆེན་ཐམས་ཅད་དང་། །ས་ཆུ་མེ་རླུང་ནམ་མཁའ་རི་ཀླུང་དང་། །ལྗོན་ཤིང་སྤང་ལྗོངས་ཁོར་ཡུག་ལ་གནས་པའི། །མཁྱེན་སྤྱན་ལྡན་པ་རྣམས་ཀྱང་དགོངས་སུ་གསོལ། །དཔང་དུ་མཆིའོ་བརྩེ་བས་གཟིགས་སུ་གསོལ། །མུ་མཐའ་བྲལ་བ་སྲིད་པའི་ཁྱོན་འདི་རུ། །ལས་དང་ཉོན་མོངས་དབང་གིས་འཁོར་བ་ཡི། །བདག་སོགས་ཁམས་གསུམ་ཕ་མ་སེམས་ཅན་གྱིས། །ཚེ་རབས་འཁོར་བ་ཐོག་

མ་མེད་པ་ནས། །ད་ལྟའི་ལུས་ངན་འདི་ལ་ཐུག་བར་དུ། །བྱས་ཤིང་བསགས་པའི་སྡིག་པ་མི་དགེའི་ལས། །མི་དགེ་བཅུ་དང་མཚམས་མེད་དེ་ཉེ་ལྔ། །ལྕི་བ་བཞི་སོགས་རང་བཞིན་སྡིག་པའི་ལས། །བསྙེན་གནས་དགེ་བསྙེན་དགེ་ཚུལ་དགེ་སློང་དང་། །བྱང་ཆུབ་སེམས་དཔའི་སྡོམ་པས་བསྡུས་པ་ཡི། །བཅས་པ་འདུལ་བའི་ཁྲིམས་དང་འགལ་གྱུར་པའི། །མི་དགེའི་ལས་སུ་གྱུར་པ་ཅི་མཆིས་པ། །དངོས་སུ་བགྱིས་དང་བགྱིད་དུ་བསྩལ་བ་དང་། །གཞན་ལ་རྗེས་སུ་ཡི་རང་ཇི་སྙེད་དང་། །ཁྱད་པར་ཕ་མ་མཁན་པོ་སློབ་དཔོན་སོགས། །དྲིན་ཅན་རྣམས་ཀྱི་ཐུགས་དང་འགལ་གྱུར་དང་། །ངན་འགྲོ་འཁོར་བའི་གནས་སུ་སྐྱེ་འགྱུར་ལས། །དད་ཅན་དཀོར་རྫས་བག་མེད་རང་གར་སྤྱད། །ཤིན་ཏུ་འཇིགས་ཤིང་ཉེས་ཚབས་ཆེ་བ་ཡི། །མཆོག་གསུམ་ལས་འབྲས་མེད་ཅེས་ལོག་པར་བལྟས། །ཐེག་ཆེན་མཉམ་པ་

ཉིད་ཀྱི་མདོ་སྡེ་ལ། །ཡང་དག་མ་ཡིན་བདུད་ཀྱི་ཚིག་གོ་ཞེས། །ལོག་ལྟ་སྐུར་འདེབས་ཁྱད་གསོད་བྱས་པ་དང་། །བདུད་ཀྱི་ཚིག་ལ་ཡང་དག་སྒྲོ་འདོགས་ཤིང་། །བདེ་གཤེགས་བཀའ་ལ་ལོག་པའི་སྐུར་འདེབས་སོགས། །རང་རྒྱུད་དགེ་བའི་རྩ་བ་འཇོམས་བྱེད་ཅིང་། །ཕྱི་མ་མནར་མེད་དམྱལ་བར་སྐྱེ་བ་ཡི། །ཆོས་སྤངས་ལས་ངན་བསགས་པ་ཅི་མཆིས་པ། །ཀུན་ནས་སློང་བྱེད་ཉོན་མོངས་ཤེས་བྱ་དང་། །སྙོམས་འཇུག་བག་ཆགས་དྲི་མའི་སྒྲིབ་པར་བཅས། །སྔོན་ཚེ་སངས་རྒྱས་འོད་མི་འགྱུར་བ་ཡི། །སྤྱན་སྔར་རྒྱལ་བུ་དགེ་མཐོང་ཞེས་བྱ་དང་། །སུམ་སྟོང་པོ་ཡི་མི་ཡི་རྣམ་ཐར་བཞིན། །མཁྱེན་སྤྱན་ལྡན་པ་རྣམས་ཀྱི་སྤྱན་སྔ་རུ། །རབ་ཏུ་གནོང་ཞིང་འགྱོད་པའི་སེམས་ཀྱིས་ནི། །མི་འཆབ་མི་སྦེད་སྙིང་ནས་མཐོལ་ལོ་བཤགས། །བཟོད་གསོལ་དང་དུ་བཞེས་པ་ཆེར་མཛད་ནས། །བརྩེ་ཆེན་

ཐུགས་རྗེས་རྗེས་སུ་གཟུང་དུ་གསོལ། །སླན་ཆད་མི་བགྱིད་དམ་བཅའི་གོ་ཆ་བགོ། །མ་འོངས་སྐྱེ་བ་རྣམས་སུའང་དེ་འདྲ་བའི། །སྡིག་པའི་ལས་ངན་བགྱིད་པར་མ་གྱུར་ཅིག །དགེ་ལ་ཡི་རང་ཆོས་འཁོར་བསྐོར་བར་བསྐུལ། །མི་འདའ་བཞུགས་གསོལ་དགེ་ཚོགས་འགྲོ་ལ་བསྔོ། །ཕྱོགས་བཅུའི་རྒྱལ་བ་སྲས་དང་བཅས་པ་ཀུན། །བདག་གིས་ཡོན་སྦྱར་ཕྱག་མཆོད་ཕུལ་བའི་མཐུས། །མ་ལུས་པ་ཡི་སེམས་ཅན་ཇི་སྙེད་པ། །ཐེག་ཆེན་བླ་མེད་ས་བཅུ་མཐར་ཕྱིན་ནས། །ཀུན་ཀྱང་བདེ་གཤེགས་དགོངས་དོན་རྟོགས་གྱུར་ཅིག །འདིས་མཚོན་འཁོར་འདས་དུས་གསུམ་དགེ་བའི་ཚོགས། །སྲས་བཅས་རྒྱལ་བ་དགྱེས་པའི་སྐྱེས་སུ་འབུལ། །ཕ་མ་འགྲོ་དྲུག་སེམས་ཅན་མ་ལུས་པ། །ཐམས་ཅད་མངོན་སངས་རྒྱས་པའི་རྒྱུ་རུ་བསྔོ། །འཁོར་བ་དོང་ནས་སྤྲུགས་པའི་རྒྱུར་གྱུར་ཅིག །གཟུགས་སྐུ་གཉིས་ཀྱིས་འགྲོ་དོན་བྱེད་
པར་ཤོག །ཚོགས་ཞིང་མི་དམིགས་སྤྲོས་བྲལ་ངང་དུ་ཐིམ། །དགེ་བས་འགྲོ་ཀུན་ཤེར་ཕྱིན་མྱུར་འགྲུབ་ཤོག །ཏདྱ་ཐཱ། པཉྩནྡྲི་ཡ་ཨ་བ་བོ་དྷ་ནི་སྭཱ་ཧཱ། དཀོན་མཆོག་གསུམ་ལ་ཕྱག་འཚལ་ལོ། །ན་མཿསརྦ་ཏ་ཐཱ་ག་ཏ་ཧྲི་ད་ཡ་ཨ་ནུ་ག་ཏེ་ཨོཾ་ཀུ་རུཾ་གི་ནི་སྭཱ་ཧཱ། དེ་བཞིན་གཤེགས་པ་སྤྱི་ཡི་སྙིང་པོ་ཕན་ཡོན་བསམ་གྱིས་མི་ཁྱབ་པ་འདི་རྒྱུན་དུ་གདོན་པར་བྱའོ། །ཞེས་པ་འདིའང་ཟི་ལིང་ཁྲིམས་ཁང་དུ་འདུག་སྐབས་མོས་ལྡན་རྣམས་ཀྱིས་ཞལ་འདོན་བྱ་བའི་ཕྱིར་དང་། རང་ཡང་མདོ་སྡེ་འདི་ལ་མི་ཕྱེད་པའི་དད་པ་འབར་སྐབས་ཤིག་ཏུ། གཡུལ་ལས་རྣམ་པར་རྒྱལ་བས་བྲིས་པས་མདོ་སྡེ་རིན་པོ་ཆེ་ཀློག་པ་དང་མཉམ་སྟེ་འབྲེལ་ཚད་དོན་དང་ལྡན་པར་གྱུར་ཅིག །སརྦ་དཱ་མངྒ་ལཾ། དགེའོ།། །།

འཇམ་དབྱངས་སྨྲ་སེང་གསོལ་འདེབས། མཁས་གྲུབ་ཀརྨ་ཆགས་མེད།

༈ འཇམ་དབྱངས་སྨྲ་སེང་གསོལ་འདེབས་ནི། ན་མོ་ལོ་ཀེ་ཤྭ་ར་ཡ། དུས་གསུམ་སངས་རྒྱས་ཐམས་ཅད་ཀྱི། །གསུང་གི་བདག་ཉིད་བཅོམ་ལྡན་འདས། །པདྨ་རིགས་ཀྱི་བདག་པོ་སྟེ། །གསུང་གི་རྡོ་རྗེ་ཞེས་ཀྱང་བྱ། །འོད་དཔག་མེད་ལ་གསོལ་བ་འདེབས། །

དེ་དང་ངོ་བོ་དབྱེར་མེད་པའི། །སྲས་ཀྱི་ཐུ་བོའི་ཚུལ་བཟུང་བ། །བྱང་ཆུབ་སེམས་དཔའ་སེམས་དཔའ་ཆེ། །འཇམ་དཔལ་དམར་པོ་རལ་གྲི་འཛིན། །སྨྲ་བའི་སེང་གེར་གསོལ་བ་འདེབས། །ཤེས་རབ་ཡུམ་གྱི་ཚུལ་བཟུང་བ། །དུས་གསུམ་སངས་རྒྱས་ཐམས་ཅད་ཀྱི། །གསུང་གི་ལྷ་མོ་དབྱངས་ཅན་མ། །གངྒཱའི་ལྷ་མོ་ཞེས་ཀྱང་བྱ། །ངག་གི་ལྷ་མོར་གསོལ་བ་འདེབས། །གསོལ་བ་བཏབས་པའི་བྱིན་རླབས་ཀྱིས། །བདག་དང་བདག་གི་རྗེས་འཇུག་དང་། །མཐོང་ཐོས་དྲན་རེག་འགྲོ་བ་རྣམས། །མི་ཤེས་མུན་པ་རབ་བསལ་ནས། །ཤེས་རབ་རྩལ་ཁ་བྱེ་བར་ཤོག །སྐྱེ་བ་འདི་ནས་ཚེ་རབས་ཀུན། །ཤེས་རབ་འཆལ་བར་མི་འགྱུར་ཞིང་། །ཤེས་རབ་ཕུན་སུམ་ཚོགས་པར་ཤོག །རྒྱལ་བའི་གསུང་རབ་རྒྱ་མཚོ་ལ། །མི་བརྗེད་གཟུངས་ཀྱང་ཐོབ་པར་ཤོག །ཆོས་ཉིད་རྣམ་པར་དག་པ་དང་། །རྟེན་འབྲེལ་བསླུ་བ་མེད་པ་དང་། །
འཇམ་དཔལ་ཡབ་ཡུམ་ཐུགས་རྗེ་ཡིས། །སྨོན་ལམ་བཏབ་བཞིན་འགྲུབ་པར་ཤོག །ཅེས་པ་འདི་ནི་འཇམ་དབྱངས་དམར་པོའི་ཤེས་རབ་རིལ་བུ་རྫས་དང་འཁོར་ལོ་སོགས་རང་གིས་དཀའ་ཚེགས་ཆེན་པོས་སྒྲུབ་གྲྭ་པ་རྣམས་ལ་ཞག་ཉེར་གསུམ་གྱི་རིང་ཉིན་རེ་ཐུན་རེ་འུར་འདོན་བཅུག་པས། ཁོང་ཚོ་ཕལ་ཆེར་ལ་གཞུང་དང་མཐུན་པའི་རྨི་ལྟས་ལེགས་པར་བྱུང་འདུག་པས་རྣམ་གསུམ་འཛོམས་པའི་དུས་ཆེན་ཉིན་དངོས་གྲུབ་ལེན་ཆོག་གི་ཚུལ་དུ་རཱ་ག་ཨ་སྱས་གསོལ་བ་བཏབ་པའོ། །

འཇམ་དཔལ་སྨྲ་བའི་སེང་གེའི་སྒྲུབ་ཐབས། མཁས་གྲུབ་ཀརྨ་ཆགས་མེད།

༈ འཇམ་དཔལ་སྨྲ་བའི་སེང་གེའི་སྒྲུབ་ཐབས་བཞུགས་སོ། །དཀོན་མཆོག་གསུམ་འདུས་བླ་མ་འཇམ་དབྱངས་ལ། །དུས་རྣམས་རྟག་ཏུ་བདག་ནི་སྐྱབས་སུ་མཆི། །འགྲོ་བའི་དོན་དུ་བཅོམ་ལྡན་འཇམ་དཔལ་བསྒྲུབ། །སྟོང་པའི་ངང་ལས་པདྨ་ཟླ་བ་དང་། །སེང་གེ་སྔོན་པོའི་སྟེང་དུ་དྷཱིཿཡིག་ལས། །འོད་འཕྲོས་དོན་གཉིས་བྱས་ནས་ཚུར་འདུས་པས། །རང་ཉིད་འཇམ་དབྱངས་དམར་པོ་ཞལ་གཅིག་པ། །རལ་གྲི་པུ་སྟི་འཛིན་ཅིང་སྐྱིལ་ཀྲུང་བཞུགས། །

ཐུགས་ཀར་བྷྲཱུྃ་ལས་འཁོར་ལོ་རྩིབས་བཞི་དམར། །དེ་སྟེང་རལ་གྲི་སོར་བཞི་སྔགས་ཀྱིས་བསྐོར། །མདུན་དུ་ཧྲཱིཿལས་དབྱངས་ཅན་ལྷ་མོ་སྔོ། །བཞེངས་སྟབས་རལ་གྲི་པུ་སྟི་ཕྱག་ན་བསྣམས། །གཉིས་ཀ་དར་དང་རིན་ཆེན་དུ་མས་བརྒྱན། །ཡུམ་གྱི་ཐུགས་ཀར་པདྨ་འདབ་བཞིའི་སྟེང་། །རལ་གྲི་ཧྲཱིཿས་མཚན་སྔགས་ཀྱིས་བསྐོར་བའོ། །རང་འདྲའི་ཡེ་ཤེས་སྤྱན་དྲངས་རང་ལ་ཐིམ། །ཐུགས་ལས་འོད་འཕྲོས་སངས་རྒྱས་བྱང་སེམས་དང་། །པཎྜི་ཏ་ཡི་ཤེས་རབ་ཐམས་ཅད་དང་། །ཉན་རང་སོ་སྐྱེའི་ཤེས་རབ་ཐམས་ཅད་ནི། །འོད་ཀྱི་རྣམ་པར་བསྡུས་ནས་སྤྱི་བོར་ཐིམ། །སྡེ་སྣོད་གསུམ་དང་རྒྱུད་སྡེ་བཞི་པོ་ཡི། །ཆོས་རྣམས་བསྡུས་ནས་རང་གི་མགྲིན་པར་ཐིམ། །ཉི་ཟླ་ནོར་བུ་འབྱུང་བ་བཞི་ཡི་བཅུད། །བསྡུས་ནས་རང་གི་སྙིང་གར་ཐིམ་པར་གྱུར། །ཨོཾ་ཧྲཱིཿདྷཱི་མ་མེ་དཱི་པྃ་མཉྫུ་ཤྲཱི་མཱུྃ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷཱི་སྭཱ་ཧཱ། ཞེས་ཅི་

ནུས་བཟླས་ལ། མཐར། རང་ལས་སྤྲུལ་པའི་མཆོད་པའི་ལྷ་མོ་ནི། །ནམ་མཁའ་གང་བར་སྤྲུལ་ཏེ་ལྷ་ལ་མཆོད། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །རྒྱལ་སྲིད་བདུན་དང་བཀྲ་ཤིས་རྫས་རྟགས་བརྒྱད། །རི་རབ་གླིང་བཞི་ལྷ་མིའི་ལོངས་སྤྱོད་ཀུན། །བློ་ཡིས་བླངས་ཏེ་འཇམ་དཔལ་ཡབ་ཡུམ་མཆོད། །བདག་ལ་བཀའ་དང་བསྟན་བཅོས་ཐམས་ཅད་ཀྱི། །ཐོགས་མེད་མཁྱེན་པའི་ཤེས་རབ་མྱུར་དུ་སྩོལ། །སེང་ཁྲི་པདྨའི་གདན་སྟེང་ན། །རྒྱལ་བའི་སྲས་པོ་འཇམ་དཔལ་དབྱངས། །མདོག་དམར་རལ་གྲི་པུ་སྟི་འཛིན། །སྨྲ་བའི་སེང་གེ་ཕྱག་འཚལ་ལོ། །ཆུ་སྐྱེས་ཉི་ཟླའི་གདན་སྟེང་དུ། །སངས་རྒྱས་ཐམས་ཅད་བསྐྱེད་པའི་ཡུམ། །མདོག་སྔོན་རལ་གྲི་པུ་སྟི་འཛིན། །དབྱངས་ཅན་མ་ལ་ཕྱག་འཚལ་ལོ། །དེ་མིན་རྒྱུན་དུ་འདོན་པ་དང་། །སྔགས་དེ་བརྒྱ་ཕྲག་རེ་ཟུང་ཙམ། །གཏན་དུ་ཐུགས་དམ་བྱེད་གྱུར་ན། །དེ་ཡི་ཕན་ཡོན་རྒྱ་གཞུང་ལས། །སྔགས་ཀྱི་ཡིག་འབྲུ་

ཉི་ཤུ་གཅིག །བརྒྱ་ཡིས་མི་བརྗེད་གཟུངས་ཐོབ་འགྱུར། །སྟོང་གིས་སྒྲ་སྐད་ཀུན་ལ་མཁས། །ཁྲི་ཡིས་ཉིན་རེ་ཤོ་ལོ་ཀ །ལྔ་སྟོང་རེ་རེ་འཛིན་པར་ནུས། །ཡི་གེ་ཐམས་ཅད་ཐོགས་མེད་ཤེས། །བཀའ་དང་བསྟན་བཅོས་རྩོམ་པར་འགྱུར། །མངོན་པར་ཤེས་པ་འཆར་བ་དང་། །ཕྱི་ནས་ས་ཡི་དབང་ཕྱུག་ཆེ། །གལ་ཏེ་ལས་འཕྲོ་ཡོད་པ་ཡིས། །ཉི་མ་གཅིག་གིས་འགྲུབ་པར་འགྱུར། །འབྲིང་གིས་གཉིས་ཀྱིས་འགྲུབ་པར་འགྱུར། །ཐ་མ་གསུམ་གྱིས་འགྲུབ་བྱ་ནི། །ལས་འཕྲོ་མེད་ཀྱང་འགྲུབ་པ་ཡིན། །ཉི་མ་ཤར་དང་མེ་ཏོག་འཐུ། །ཞིང་རྨོས་སྣག་ཚ་འཐུང་བ་དང་། །ཉམས་དགའ་ཡི་གེ་འབྲི་ཀློག་དང་། །མཚོན་ཆ་པུ་སྟི་རྙེད་རྨིས་ན། །འཇམ་དབྱངས་འགྲུབ་པའི་རྟགས་ཡིན་གསུངས། །དེ་སྐད་རྒྱ་གར་པཎྜི་ཏ། །རྒྱ་གར་ཡུལ་གྱི་མི་རྒན་ནི། །ལོ་ནི་དགུ་བཅུ་གོ་དགུ་པ། །ཡི་གེ་ཡང་ནི་མི་ཤེས་པས། །ཞག་གཅིག་བསྒྲུབས་པས་འཇམ་དཔལ་མཇལ། །ལུས་ཀྱང་གཞོན་ནུ་ལོ་བརྒྱད་ཙམ། །རིག་པའི་གནས་ལྔ་ཐོགས་མེད་ཤེས། །པཎྜི་ཏ་ནི་མཁས་པར་གྱུར། །དེ་ལ་ཕ་གཅིག་དམ་པས་ཞུས། །རིམ་གྱིས་བརྒྱུད་དེ་ཀརྨ་པ། །དབང་ཕྱུག་རྡོ་རྗེས་མཛད་པ་ཡི། །གཅིག་ཤེས་ཀུན་གྲོལ་ནང་དུ་བཞུགས། །འཇམ་དཔལ་སྒྲུབ་པ་ཐམས་ཅད་ལ། །འདི་ལས་འགྲུབ་ཐག་ཉེ་བ་མེད། །འདི་ཉིད་འཇམ་དཔལ་ཤེས་རབ་ཀྱི། །རིལ་བུ་སྔགས་དུས་བདག་གིས་བསྒྲུབས། །སུས་ཟོས་ཕལ་ཆེར་མཁས་པར་གྱུར། །དེ་ཕྱིར་ད་ལམ་སྙིགས་དུས་སུ། །པདྨ་ཕྲིན་ལས་ཐུགས་དམ་དུ། །སྔགས་ཀྱི་བསྙེན་པ་ཅི་ལྕོགས་ཀྱིས། །ཡོན་
ཏན་ཤུགས་ལ་མཁས་པར་འགྱུར། །ཉན་ཐོས་འགྲོ་དོན་ཐུབ་པ་ཡི། །གེ་མོ་བླ་མ་ཞེས་བྱ་བ། །མཁས་པ་ཆེན་པོ་ཡོང་བར་ཤོག །དེ་སྐད་རཱ་ག་ཨ་སྱས་སྨྲས། །སརྦ་མངྒ་ལཾ། །

དཔལ་ཡེ་ཤེས་ཀྱི་ཡོན་ཏན་བཟང་པོ་ཞེས་བྱ་བའི་བསྟོད་པ། སློབ་དཔོན་རྡོ་རྗེ་མཚོན་ཆ།

༈ རྒྱ་གར་སྐད་དུ། ཤྲཱི་ཛྙཱ་ན་གུ་ཎ་ཕ་ལ་ནཱ་མ་སྟུ་ཏི། བོད་སྐད་དུ། དཔལ་ཡེ་ཤེས་ཀྱི་ཡོན་ཏན་བཟང་པོ་ཞེས་བྱ་བའི་བསྟོད་པ། བཅོམ་ལྡན་འདས་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་གི་བློ་གྲོས་སྒྲིབ་གཉིས་སྤྲིན་བྲལ་ཉི་ལྟར་རྣམ་དག་རབ་གསལ་བས། །ཇི་སྙེད་དོན་ཀུན་ཇི་བཞིན་གཟིགས་ཕྱིར་ཉིད་ཀྱི་ཐུགས་ཀར་གླེགས་བམ་འཛིན། །གང་དག་སྲིད་པའི་བཙོན་རར་མ་རིག་མུན་འཐུམས་སྡུག་བསྔལ་གྱིས་གཟིར་བའི། །འགྲོ་ཚོགས་ཀུན་ལ་བུ་གཅིག་ལྟར་བརྩེ་ཡན་ལག་དྲུག་ཅུའི་དབྱངས་ལྡན་གསུང་། །འབྲུག་ལྟར་ཆེར་སྒྲོག་ཉོན་མོངས་གཉིད་སློང་ལས་ཀྱི་ལྕགས་སྒྲོག་འགྲོལ་མཛད་ཅིང་། །མ་རིག་མུན་སེལ་སྡུག་བསྔལ་མྱུ་གུ་ཇི་སྙེད་གཅོད་མཛད་རལ་གྲི་བསྣམས། །གདོད་ནས་དག་
ཅིང་ས་བཅུའི་མཐར་སོན་ཡོན་ཏན་ལུས་རྫོགས་རྒྱལ་སྲས་ཐུ་བོའི་སྐུ། །བཅུ་ཕྲག་བཅུ་དང་བཅུ་གཉིས་རྒྱན་སྤྲས་བདག་བློའི་མུན་སེལ་འཇམ་པའི་དབྱངས་ལ་འདུད། །བརྩེ་ལྡན་ཁྱེད་ཀྱི་མཁྱེན་རབ་འོད་ཟེར་གྱིས། །བདག་བློའི་གཏི་མུག་མུན་པ་རབ་བསལ་ནས། །བཀའ་དང་བསྟན་བཅོས་གཞུང་ལུགས་རྟོགས་པ་ཡི། །བློ་གྲོས་སྤོབས་པའི་སྣང་བ་བསྩལ་དུ་གསོལ། །གང་ཚེ་བལྟ་བར་འདོད་པའམ། །ཅུང་ཟད་དྲི་བར་འདོད་ན་ཡང་། །མགོན་པོ་འཇམ་དབྱངས་དེ་ཉིད་ནི། །གེགས་མེད་པར་ཡང་མཐོང་བར་ཤོག །དཔལ་ཡེ་ཤེས་ཡོན་ཏན་བཟང་པོ་ཞེས་བྱ་བའི་བསྟོད་པ་སློབ་དཔོན་རྡོ་རྗེ་མཚོན་ཆས་མཛད་པ་རྫོགས་སོ།། །།

ཆོས་རྗེ་དཔལ་ལྡན་འབའ་རོམ་པའི་ཕྱག་ཆེན་ཆོས་དྲུག་ཟུང་གི་སྔོན་འགྲོའི་ངག་འདོན་ངེས་དོན་ལམ་བཟང་ཐར་པའི་ཐེམ་སྐས། བདེ་ཆེན་འབར་བའི་རྡོ་རྗེ།

༈ ཆོས་རྗེ་དཔལ་ལྡན་འབའ་རོམ་པའི་ཕྱག་ཆེན་ཆོས་དྲུག་ཟུང་གི་སྔོན་འགྲོའི་ངག་འདོན་ངེས་དོན་ལམ་བཟང་ཐར་པའི་ཐེམ་སྐས་ཞེས་བྱ་བ་བཞུགས་སོ། །ན་མོ་གུ་རུ་པུཎྱེ་བྷ་དྲ་ཡེ། ཆོས་ཉིད་གཞི་རྫོགས་ལམ་གྱིས་རབ་གསལ་ཞིང་། །ངེས་པ་དོན་གྱི་རིན་ཆེན་གྲུ་ཆར་འབེབས། །འགྲོ་ཁམས་ཕོངས་པའི་

མཚོ་ལས་སྒྲོལ་མཛད་པ། །མཆོག་གསུམ་འདུས་ཞལ་བླ་མར་གུས་པས་འདུད། །དེ་ཡང་འདིར་དཔལ་ལྡན་འབའ་རོམ་པའི་ཕྱག་ཆེན་སྔོན་འགྲོའི་ཁྲིད་རིམ་ལས་བསྒོམ་བྱ་སྙིང་པོར་དྲིལ་ཏེ་ངག་འདོན་ཁོལ་ཕྱུང་དུ་འགོད་པར་བགྱི་བ་ལ་གཉིས། ཐུན་མོང་དང་ཐུན་མོང་མ་ཡིན་པའོ། །དང་པོ་ལའང་བཞི། དལ་འབྱོར་རྙེད་དཀའ་བར་བསམ་པ། དེ་ཉིད་མི་རྟག་པར་ཤེས་པ། ལས་འབྲས་བསླུ་མེད་དུ་བསྟན་པ། སྲིད་པ་འཁོར་བའི་སྡུག་བསྔལ་ལ་གཞིག་པའོ། །དེ་ལས་དང་པོའི་ཁྲིད་ཀྱི་བསྒོམ་བྱ་ངག་འདོན་དུ་བགྱི་བ་ནི། འཇིག་རྟེན་འདི་ན་ཡིད་བཞིན་ནོར་བུ་ལས། །རྙེད་པར་བྱེ་བ་སྟོང་གིས་དཀའ་བའི་གནས། །དལ་འབྱོར་རྒྱུ་དཔེ་གྲངས་ཀྱིས་ཐོབ་དཀའ་བའི། །བསྐལ་པ་སྟོང་གི་བསོད་ནམས་མཐུས་གྲུབ་པ། །ཐོབ་འདི་ཆུད་ཟོས་མེད་པར་དོན་ཡོད་བྱ། །དེ་ལྟར་ཤེས་ནས་ངེས་པར་དགེ་ལ་བརྩོན། །ཞེས་བསྒོམ་པར་བྱའོ། །གཉིས་པ་ནི། སྣོད་བཅུད་འགྱུར་བའི་ཆོས་ཅན་སྒྱུ་མའི་འཕྲུལ། །ནམ་མཁའི་འགྱུར་ལྡོག་རྡོ་རྗེའི་གཟུགས་སྐུ་ཡང་། །མྱ་ངན་འདས་ཞེས་འཇིག་

རྟེན་འདིར་གྲགས་ན། །བདག་གི་ངན་སྐྱུགས་[ལྐུགས་]ཕུང་པོ་ཆུ་བུར་འདི། །ཅི་སྟེ་རྟག་པར་འགྱུར་ཞེས་མི་རྟག་བསྒོམ། །ཞེས་རྣམ་པ་ཀུན་ཏུ་མི་བརྗེད་པར་དྲན་པར་བྱའོ། །གསུམ་པ་ནི། ལས་ནི་ནམ་ཡང་བསླུ་བ་མེད་པ་སྟེ། །སྡིག་པའི་འབྲས་བུ་ངན་སོང་སྡུག་བསྔལ་དང་། །དགེ་བས་མངོན་མཐོ་བླ་མེད་ཐར་པ་འཐོབ། །གནས་སྐབས་སྡིག་སྤྱོད་འཇིག་རྟེན་ཀུན་གྱིས་སྨད། །དམ་པའི་ཆོས་སྤྱོད་ཕུན་སུམ་ཚོགས་པ་འགྲུབ། །མཐོང་ཆོས་ངེས་པ་འདི་ལ་ཡིད་ཆེས་བྱ། །ཞེས་བསྒོམ་པར་བྱའོ། །བཞི་པ་ནི། ཀྱེ་མ། རང་ཉིད་མཁས་ཤིང་གྲུང་པོ་ཡིན་སྙམ་ཡང་། །བློ་ནོར་གནས་སྐབས་མཐར་ཐུག་ཐམས་ཅད་དུ། །རང་ལ་གནོད་པ་བསྒྲུབས་པས་མི་ཚེ་སྐྱེལ། །ཕན་པའི་བྱ་བ་བླ་མེད་དམ་པའི་ཆོས། །འདི་བསྒྲུབ་དེ་ཙམ་གྲུབ་པར་གྱུར་ཏོ་ཞེས། །ཡིད་གཏད་མེད་པས་ད་ནི་བློ་ཐག་ཆོད། །ཅེས་དམ་པའི་ཆོས་བསྒྲུབ་པའི་བློ་ཐག་ལིང་གིས་ཆོད་པར་བྱའོ། །དེ་ལྟར་ཐུན་མོང་གི་སྔོན་འགྲོ་ཆོས་བཞི་

ཞེས་པ་འདི་ནི་ཐུན་མོང་ཞེས་གལ་ཆུང་ངུ་ཞིག་གི་སྐད་དོད་མ་ཡིན་ཞིང་། དམ་པའི་ཆོས་ཤིག་བསྒྲུབ་ཕན་ཆད་འདི་ཉིད་མེད་དུ་མི་རུང་ཞིང་ཆོས་ཀུན་གྱི་རྩ་བའི་རྨིང་གཞི་ལྟ་བུ་ཡིན་པས་ཤིན་ཏུ་གལ་ཆེ་བར་ཤེས་དགོས་སོ། །དེ་ནས་ལམ་ཐུན་མོང་མ་ཡིན་པ་རྒྱུ་མཚན་ཉིད་ཀྱི་ཐེག་པའི་སྙིང་པོ་གསང་བ་སྔགས་ཀྱི་ཐོག་མའི་ལམ་རིམ་ནང་གི་སྔོན་འགྲོ་བཞི་ནི། དེའང་བསླུ་མེད་ཀྱི་སྐྱབས་ཚོལ་བ། རང་རྒྱུད་ཀྱི་སྡིག་པ་སྦྱོང་བ། བསོད་ནམས་དང་ཡེ་ཤེས་ཀྱི་ཚོགས་རྫོགས་ཕྱིར་མཎྜལ་འབུལ་བ། བྱིན་རླབས་མྱུར་དུ་འཇུག་ཕྱིར་བླ་མའི་རྣལ་འབྱོར་སྙིང་ཕུར་དུ་བྱ་བ་དང་བཞིའོ། །དེ་ལས་དང་པོ་ཅི་བྱས་ཐར་པའི་ལམ་དུ་འགྲོ་བར་བྱེད་པ་སྐྱབས་འགྲོ་དང་། ཐེག་པ་ཆེན་པོར་སེམས་བསྐྱེད་པའི་བསྒོམ་དོན་ངག་འདོན་བྱ་བའི་རིམ་པ་ནི། མདུན་མཁར་ཡིད་སྤྲུལ་ཞིང་གི་བཀོད་པ་ནི། །ཕུན་ཚོགས་དབུས་སུ་སེང་ཁྲི་ལྔ་ཚོམ་གྱི། །དབུས་མར་བླ་མ་རྡོ་རྗེ་འཆང་ཆེན་ལ། །གྲུབ་ཐོབ་བཀའ་བརྒྱུད་བླ་མ་རྣམས་ཀྱིས་བསྐོར། །མདུན་དུ་ཡི་དམ་འཁོར་ལོ་སྡོམ་པ་ལ། །ཡི་དམ་རྒྱུད་སྡེའི་ལྷ་ཚོགས་ཀུན་གྱིས་བསྐོར། །གཡས་སུ་དུས་

གསུམ་ཕྱོགས་བཅུའི་སངས་རྒྱས་ལ། །བསྐལ་པ་བཟང་པོའི་སངས་རྒྱས་སྟོང་གིས་བསྐོར། །རྒྱབ་ཏུ་གསུང་རབ་དམ་པའི་ཆོས་མཆོག་རྣམས། །རང་སྒྲར་བཅས་ཏེ་འོད་ཟེར་སྤུངས་སེ་བཞུགས། །གཡོན་དུ་ཉེ་སྲས་དཔའ་བོ་རྣལ་འབྱོར་མ། །གྲུབ་ཐོབ་ཉན་རང་དགེ་འདུན་ཚོགས་དང་བཅས། །འོག་ཏུ་ཡེ་ཤེས་ཆོས་སྐྱོང་སྲུང་མ་རྣམས། །མེ་དཔུང་ཀློང་ན་བར་ཆད་བསལ་ཕྱིར་བཞུགས། །དེ་དག་རྣམས་ལ་དད་གསུམ་མོས་གུས་ཀྱིས། །ཁ་ཙམ་མ་ཡིན་སྙིང་ནས་སྐྱབས་སུ་མཆི། །ཞེས་གསལ་གདབ་ལ་སྐྱབས་འགྲོ་དངོས་ནི། ན་མོ། བདག་དང་མཁའ་མཉམ་འགྲོ་བ་ཐམས་ཅད་ཀུན། །སྒོ་གསུམ་མི་དགེའི་ལས་འདིའི་སྡིག་ལྕི་བས། །ངན་སོང་འཁོར་བ་འདི་ལས་དཀོན་མཆོག་གསུམ། །ཀུན་འདུས་བླ་མ་མཆོག་ལ་སྐྱབས་སུ་མཆི། །ཞེས་དོན་ཡིད་ལ་དྲན་བཞིན་པས་སྐྱབས་འགྲོ་གྲངས་ཅི་མང་ཕྱག་འཚལ་བ་བཅས་བསྒྲུབ་བོ། །རྗེས་འབྲེལ་སེམས་བསྐྱེད་པའི་ཆོ་ག་

ནི། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ལན་གསུམ་གྱིས་སྐྱབས་འགྲོ་དང་། ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །བདག་ཀྱང་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །ལན་གསུམ་གྱིས་སེམས་བསྐྱེད་བླང་ངོ། །དེ་ནས་རང་དགའ་བ་བསྒོམ་པ་ནི། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་དེང་གྱུར། །ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམ་སྟེ། །སྐྱོན་མེད་བཙུན་པའི་

རིགས་འདི་ལ། །རྙོག་པར་མི་འགྱུར་དེ་ལྟར་བྱ། །གཞན་དགའ་བ་བསྒོམ་དུ་གཞུག་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །སྨོན་ལམ་ནི། བྱང་ཆུབ་སེམས་ནི་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །བྱང་ཆུབ་སེམས་དང་མི་འབྲལ་ཞིང་། །བྱང་ཆུབ་སྤྱོད་ལ་གཞོལ་བ་དང་། །སངས་རྒྱས་རྣམས་ཀྱིས་ཡོངས་བཟུང་ཞིང་། །བདུད་ཀྱི་ལས་ཀྱང་སྤོང་བར་ཤོག །བྱང་ཆུབ་སེམས་དཔའ་རྣམས་ཀྱིས་ནི། །འགྲོ་དོན་ཐུགས་ལ་དགོངས་འགྲུབ་ཤོག །མགོན་པོ་ཡིས་ནི་གང་དགོངས་པ། །སེམས་ཅན་རྣམས་ལ་དེ་འབྱོར་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་

པར་ཤོག །བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །ཐུན་མཐར། སྐྱབས་ཡུལ་དཀོན་མཆོག་དགྱེས་ཤིང་བདག་ལ་ཐིམ། །དུས་ཀུན་འབྲལ་བ་མེད་པར་རྗེས་བཟུང་གྱུར། །ཅེས་བློ་ཐག་ཆོད་པར་བྱའོ། ། ༈ གཉིས་པ་སྡིག་སྒྲིབ་ཞི་བར་བྱེད་པའི་ཐབས་ཟབ་རྡོར་སེམས་སྒོམ་བཟླས་བྱ་བའི་ངག་འདོན་ནི། སྤྱི་བོར་བླ་མ་རྡོ་རྗེ་སེམས་དཔའ་དཀར། །རྡོ་རྗེ་དྲིལ་འཛིན་ལོངས་སྐུའི་ཆས་རྣམས་རྫོགས། །སྐྱིལ་ཀྲུང་པདྨ་ཟླ་བའི་གདན་ལ་རེག །འཛུམ་ཞིང་དགྱེས་པས་བདག་ལ་གཟིགས་པ་ཡི། །ཐུགས་ཀའི་པད་ཟླར་ཧཱུྃ་ལ་ཡིག་བརྒྱས་བསྐོར། །གནས་གསུམ་ཡིག་འབྲུ་གསུམ་གྱིས་རྒྱས་གདབ་གྱུར། །ཅེས་བསྒོམ་ཞིང་། དེ་ལས་བདུད་རྩི་བབས་པས་སྤྱི་བོ་ནས། །ཞུགས་ཤིང་ཕྱི་ནང་གསང་བའི་སྡིག་སྒྲིབ་སྦྱངས། །སླར་ཡང་བྱང་སེམས་བདུད་རྩིས་ལུས་གང་ནས། །སྐུ་གསུང་ཐུགས་ཀྱི་བྱིན་རླབས་

ཐོབ་པར་གྱུར། །པར་བསམ། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡཿཀུ་རུ་ཧཱུྃ་ཧ་ཧ་ཧ་ཧ་ཧོཿབྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་ཝ་མ་ཧཱ་ས་མ་ཡ་ས་ཏྭ་ཨཱ། ཞེས་ཡི་གེ་བརྒྱ་པ་དང་། ཨོཾ་བཛྲ་ས་ཏྭ་ཧཱུྃ། ཞེས་ཡིག་དྲུག་ཅི་ནུས་བགྲང་ཞིང་དམིགས་པ་ཡེངས་མེད་དུ་བརྩོན་པ་ཤིན་ཏུ་གལ་ཆེའོ། ། ༈ ཆོས་དྲུག་སྐབས་སུ། རང་གི་སྤྱི་བོར་པདྨ་ཉི་ཟླའི་སྟེང་། །རྡོར་སེམས་སྙེམས་མ་ཡབ་ཡུམ་སྐུ་མདོག་དཀར། །ཁྲོ་འཛུམ་བཞད་པའི་ཉམས་ཅན་ལང་ཚོ་འབར། །ཧེ་རུ་ཀ་ཡི་ཆ་བྱད་རྡོར་དྲིལ་འཛིན། །ཐུགས་ཀའི་པད་ཟླར་ཧཱུྃ་ལ་སོགས་སྔོན་ལྟར་རོ། །ཐུན་མཐའ་རྣམས་སུ། བླ་མ་རྡོ་རྗེ་སེམས་དཔའ་བདག་ལ་དགོངས་སུ་གསོལ། བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཚེ་རབས་འཁོར་བ་ཐོག་མ་མེད་

པ་ནས་ཐ་མ་ད་ལྟ་ལ་ཐུག་གི་བར་དུ་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་གི་དབང་གིས་ལུས་དང་ངག་དང་ཡིད་ཀྱི་སྒོ་ནས་སྡིག་པ་མི་དགེ་བ་བཅུ་བགྱིས་པ་དང་། མཚམས་མེད་པ་ལྔ་བགྱིས་པ་དང་། དེ་དང་ཉེ་བ་ལྔ་བགྱིས་པ་དང་། སོ་སོར་ཐར་པའི་སྡོམ་པ་དང་འགལ་བ་བགྱིས་པ་དང་། བྱང་ཆུབ་སེམས་དཔའི་བསླབ་པ་དང་འགལ་བ་བགྱིས་པ་དང་། གསང་སྔགས་ཀྱི་དམ་ཚིག་དང་འགལ་བ་བགྱིས་པ་དང་། དཀོན་མཆོག་གསུམ་ལ་གནོད་པ་བགྱིས་པ་དང་། དམ་པའི་ཆོས་སྤངས་པ་དང་། འཕགས་པའི་དགེ་འདུན་ལ་སྐུར་པ་བཏབ་པ་དང་། ཕ་དང་མ་ལ་མ་གུས་པ་བགྱིས་པ་དང་། མཁན་པོ་དང་སློབ་དཔོན་ལ་མ་གུས་པ་བགྱིས་པ་དང་། གྲོགས་ཚངས་པ་མཚུངས་པར་སྤྱོད་པ་རྣམས་ལ་མ་གུས་པ་བགྱིས་པ་ལ་སོགས་པ་མདོར་ན་མཐོ་རིས་དང་ཐར་པའི་གེགས་

སུ་གྱུར་ཅིང་འཁོར་བ་དང་ངན་སོང་གི་རྒྱུར་འགྱུར་བའི་ཉེས་པ་དང་ལྟུང་བའི་ཚོགས་ཅི་མཆིས་པ་དེ་དག་ཐམས་ཅད་བླ་མ་རྡོ་རྗེ་སེམས་དཔའི་སྤྱན་སྔར་མཐོལ་ལོ་བཤགས་སོ། །མི་འཆབ་བོ། །མི་སྦེད་དོ། །དེ་ལྟར་མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི་མ་མཐོལ་མ་བཤགས་ན་དེ་དེ་ལྟར་དུ་མི་འགྱུར་བ་ལགས་སོ། །ཞེས་བརྗོད་པ་དང་། ༈ ཆོས་དྲུག་སྐབས་སུ། དཔལ་རྡོ་རྗེ་སེམས་དཔའ་ཡབ་ཡུམ་སོགས་བརྗོད། དེ་ལྟར་བཤགས་ཚིག་དང་གསོལ་བ་དྲག་ཏུ་བཏབ་པས། བླ་མ་རྡོ་རྗེ་སེམས་དཔས་དགྱེས་པའི་འཛུམ་བག་དང་མདངས་ཕྱུངས་ཏེ། ཀྱེ་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉམ་ཆགས་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པ་ཡིན་ནོ་ཞེས་བདག་ལ་དབུགས་དབྱུང་སྩལ་བར་གྱུར་པར་བསམ་མོ། །དེ་ནས་ཐུན་བསྡུ་བ་ནི། རྡོ་རྗེ་སེམས་དཔའ་འོད་ཞུ་བདག་ལ་ཐིམ། །མཆོག་གི་སྐུ་གསུང་ཐུགས་དང་

དབྱེར་མེད་གྱུར། །ཅེས་མོས་པར་བྱ་བའོ། ། ༈ གསུམ་པ་བསོད་ནམས་དང་ཡེ་ཤེས་ཀྱི་ཚོགས་བསག་པར་བྱ་བ་མཎྜལ་འབུལ་བའི་ཁྲིད་ཀྱི་ངག་འདོན་ནི། སྒྲུབ་པའི་མཎྜལ་ཡོད་ན་ཚོམ་བུ་བཅས་སྟེགས་ཀྱི་ཁར་བཤམ་ལ། ཨོཾ་སུམྦྷ་ནི་སུམྦྷ་ནི་ཧུྃ་ཧཱུྃ་ཕཊ། ཨོཾ་གྲྀ་ཧྞ་གྲྀ་ཧྞ་ཧུྃ་ཧཱུྃ་ཕཊ། ཨོཾ་གྲྀ་ཧྞ་པ་ཡ་གྲྀ་ཧྞ་པ་ཡ་ཧུྃ་ཧཱུྃ་ཕཊ། ཨོཾ་ཨཱ་ན་ཡ་ཧོཿབྷ་ག་ཝན་བིདྱཱ་རཱ་ཛ་ཧུྃ་ཧཱུྃ་ཕཊ་ཀྱིས་བགེགས་ཕྲལ་ནས། མདུན་གྱི་མཎྜལ་ཞིང་ཁམས་ཡངས་པའི་དབུས། རིན་ཆེན་གཞལ་ཡས་མཛེས་ཁྲི་ལྔ་ཚོམ་གྱི། །དབུས་མར་བླ་མ་རྡོ་རྗེ་འཆང་ཆེན་ལ། །གྲུབ་ཐོབ་བཀའ་བརྒྱུད་བླ་མ་རྣམས་ཀྱིས་བསྐོར། །མདུན་དུ་ཡི་དམ་འཁོར་ལོ་སྡོམ་པ་ལ། །ཡི་དམ་རྒྱུད་སྡེའི་ལྷ་ཚོགས་ཀུན་གྱིས་བསྐོར། །གཡས་སུ་དུས་གསུམ་ཕྱོགས་བཅུའི་སངས་རྒྱས་ལ། །བསྐལ་པ་བཟང་པོའི་སངས་རྒྱས་སྟོང་གིས་བསྐོར། །རྒྱབ་ཏུ་གསུང་རབ་དམ་པའི་ཆོས་མཆོག་རྣམས། །རང་སྒྲར་བཅས་ཏེ་འོད་ཟེར་

སྤུངས་སེ་བཞུགས། །གཡོན་དུ་ཉེ་སྲས་དཔའ་བོ་རྣལ་འབྱོར་མ། །གྲུབ་ཐོབ་ཉན་རང་དགེ་འདུན་ཚོགས་དང་བཅས། །འོག་ཏུ་ཡེ་ཤེས་ཆོས་སྐྱོང་སྲུང་མ་རྣམས། །མེ་དཔུང་ཀློང་ན་བར་ཆད་བསལ་ཕྱིར་བཞུགས། །དེ་དག་རྣམས་ལ་བདག་སོགས་འགྲོ་ཀུན་གྱིས། །སྤྱོད་ལམ་མཐུན་པས་ཚོགས་གཉིས་བསག་པར་བགྱི། །ཞེས་གསལ་བཏབ་ལ། མཆོད་པའི་མཎྜལ་ལག་གཡོན་དུ་ཐོགས་ནས། ཨོཾ་བཛྲ་ས་ཏྭ་སོགས་ཡིག་བརྒྱ་ཚར་གཅིག་བརྗོད་པས་ལག་གཡས་རྡོ་རྗེའི་ཁུ་ཚུར་མེ་ཏོག་དང་བཅས་ཏེ་རྡུལ་གཡས་བསྐོར་གྱིས་ལན་གསུམ་ཕྱི་ཞིང་། ཚིག་རྗེས་དོན་དྲན་གྱིས་ཚོམ་བུ་སོ་བདུན་མ་ཕྱག་ལེན་ལྟར་འགོད་པར་བྱ་སྟེ། ཨོཾ་བཛྲ་བྷཱུ་མི་ཨཱཿཧཱུྃ། གཞི་རྣམ་པར་དག་པ་དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ། ཕྱི་ལྕགས་རིའི་ཁོར་ཡུག་གི་ར་བས་ཡོངས་སུ་བསྐོར་བའི་དབུས་སུ་རིའི་རྒྱལ་པོ་རི་བོ་མཆོག་རབ། ཤར་ལུས་འཕགས་པོ། ལྷོ་འཛམ་བུ་གླིང་། ནུབ་བ་ལང་སྤྱོད། བྱང་སྒྲ་མི་སྙན།

ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང་། འདོད་འཇོའི་བ། མ་རྨོས་པའི་ལོ་ཏོག །འཁོར་ལོ་རིན་པོ་ཆེ། ནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའི་བུམ་པ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། དབུས་སུ་ལྷ་དང་མི་ཡི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་རབ་འབྱམས་རྒྱ་མཚོའི་རྡུལ་གྱི་གྲངས་ལས་འདས་པ་མངོན་པར་བཀོད་དེ། བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་དཔའ་བོ་མཁའ་འགྲོ་ཆོས་སྐྱོང་

སྲུང་མའི་ཚོགས་དང་བཅས་པ་རྣམས་ལ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བྱིན་གྱིས་བརླབ་ཏུ་གསོལ། ཨོཾ་ཨཱཿཧཱུྃ། སྲིད་ཞིའི་མགོན་པོ་བླ་མ་སངས་རྒྱས་དང་། །ཆགས་བྲལ་དམ་ཆོས་ཚོགས་མཆོག་དགེ་འདུན་སྡེ། །རྩ་བ་གསུམ་གྱི་ལྷ་ཚོགས་ཐམས་ཅད་ལ། །གསེར་གྱི་ས་གཞི་རིན་ཆེན་རི་དང་གླིང་། །ལྷ་ཀླུ་མི་ཡི་ལོངས་སྤྱོད་ཕུན་སུམ་ཚོགས། །བློས་བླངས་འཇིག་རྟེན་འཁོར་ཡུག་བཀོད་ལེགས་དང་། །ཡིད་སྤྲུལ་ཀུན་བཟང་རྣམ་ཐར་རྒྱ་ཆེར་སྤེལ། །བདག་དང་འགྲོ་ཀུན་ཚོགས་གཉིས་རྫོགས་པའི་ཕྱིར། །བླ་མ་དཀོན་མཆོག་རྩ་བ་གསུམ་ལ་འབུལ། །བཞེས་ནས་ཐུགས་རྗེས་བྱིན་གྱིས་བརླབ་ཏུ་གསོལ། །བྷྲཱུྃ་རཏྣ་མཎྜལ་ཨཱཿཧཱུྃ། ཞེས་གྲངས་བསགས་ཏེ་ཅི་ནུས་སུ་འབུལ་བ་དང་། འབུམ་ཐེར་སོགས་ཀྱི་སྐབས། ཨོཾ་ཨཱཿཧཱུྃ། སྟོང་གསུམ་སྣོད་བཅུད་བཀོད་པ་མཐའ་ལས་འདས། །

རིགས་ལྔའི་ཞིང་ཁམས་ཞི་བའི་ལོངས་སྤྱོད་རྫོགས། །སེམས་ཉིད་སྣང་སྟོང་དབྱེར་མེད་དབྱིངས་དང་རིག །བློས་བླངས་ཕྱི་ནང་གསང་བའི་མཎྜལ་འབུལ། །སརྦ་མཎྜལ་པཱུ་ཛཿཧོ། ཞེས་གྲངས་བཟུང་ངོ་། །ཐུན་མཐར་ཚོགས་ཞིང་བསྡུ་བ་ནི། དེ་ལྟར་ཕུལ་བས་བདག་གཞན་ཚོགས་གཉིས་རྫོགས། །སྐྱབས་ཀྱི་མཆོག་རྣམས་རིམ་གྱིས་གཡོན་བསྐོར་དུ། །འོད་ཞུ་བླ་མའི་སྐུར་འདུས་བདག་ལ་ཐིམ། །སྐུ་གསུམ་མཆོག་གི་འབྲས་བུ་མྱུར་སྨིན་ཤོག །ཅེས་འདོན་བསྒོམ་བྱའོ། ། ༈ བཞི་པ་བླ་མའི་བྱིན་རླབས་དང་རྒྱལ་བའི་ཡོན་ཏན་རྒྱུད་ལ་འབྱོར་བར་བྱ་ཕྱིར། མངའ་བདག་མཻ་ཏྲི་པ་ཆེན་པོའི་མན་ངག་ལྟར་ཡང་གསང་ཨ་ཝ་དྷཱུ་ཏིའི་བླ་མའི་རྣལ་འབྱོར་བསྒོམ་བྱའི་ངག་འདོན་གྱི་རིམ་པ་ནི། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། ཞེས་སྟོང་པར་སྦྱངས་ལ། ཕྱི་ནང་སྣོད་བཅུད་རང་བཞིན་སྟོང་པ་ལས། །འབྱུང་བཞི་རི་རབ་པད་ཉི་འཇིགས་དུས་སྟེང་། །སྐད་ཅིག་རང་ཉིད་ལྷན་སྐྱེས་དཔའ་བོ་ནི། །

མཐིང་གསལ་རྡོ་རྗེ་དྲིལ་འཛིན་ལང་ཚོ་འབར། །རྡོ་རྗེ་རྣལ་འབྱོར་དམར་མོ་གྲི་ཐོད་འཛིན། །ཟུང་འཇུག་ཕྱག་དང་བརྐྱང་བསྐུམ་སྟབས་ཀྱིས་སྦྱོར། །ཧེ་རུ་ཀ་ཡི་ཆ་ལུགས་ཡོངས་སུ་རྫོགས། །སྐུ་ཡི་ནང་དབུས་རྩ་གསུམ་མཐིང་དཀར་དམར། །འཁོར་ལོ་ལྔ་དང་བཅས་པ་དྭངས་ཤེལ་ལ། །ཁ་དོག་ཚོན་གྱི་རི་མོ་གསལ་བ་བཞིན། །སྒྲིབ་མེད་ནམ་མཁའི་འཇའ་ཚོན་ལྟ་བུར་བསྒོམ། །དབུ་མའི་རྩེ་མོ་ནོར་བུའི་ལྟེ་བ་རུ། །གདོད་ནས་མཁའ་ཁྱབ་ཆོས་སྐུ་རྡོ་རྗེ་འཆང་། །མཐིང་གསལ་རྡོ་རྗེ་དྲིལ་བུ་ཐུགས་ཀར་བསྣོལ། །ལོངས་སྤྱོད་རབ་རྫོགས་སེང་ཁྲི་པདྨ་དང་། །ཟླ་སྟེང་འོད་ཟེར་ཕུང་པོའི་དབུས་སུ་གསལ། །སྙིང་དབུས་རྩ་བའི་བླ་མ་རྡོ་རྗེ་འཆང་། །སངས་རྒྱས་ཀུན་དངོས་མི་ཕྱེད་རྡོ་རྗེ་འཛིན། །མཐོན་མཐིང་ཡུམ་མཆོག་གསང་བ་ཡེ་ཤེས་དམར། །དར་དང་རུས་པ་རིན་ཆེན་སྣ་ཚོགས་བརྒྱན། །རྡོར་དྲིལ་གྲི་ཐོད་འཛིན་

ཅིང་ཟུང་འཇུག་སྦྱོར། །པདྨ་ཉི་ཟླའི་སྟེང་དུ་གསལ་བར་བསྒོམ། །དེ་སྟེང་དབུ་མའི་ནང་ནས་ཡས་རིམ་བཞིན། ། ༈ ཆོས་དྲུག་སྐབས། ཤུ་ནྱ་ཏཱ་སོགས་ཀོ྅་ཧཾ། ཞེས་སྟོང་པར་སྦྱངས་ལ། ཕྱི་ནང་སྣོད་བཅུད་རང་བཞིན་སྟོང་པ་ལས། །འབྱུང་བཞི་རི་རབ་པད་ཉི་འཇིགས་དུས་སྟེང་། །སྐད་ཅིག་རང་ཉིད་ལྷན་སྐྱེས་དཔའ་བོ་ནི། །མཐིང་གསལ་རྡོ་རྗེ་དྲིལ་འཛིན་ལང་ཚོ་འབར། །ཧེ་རུ་ཀ་ཡི་ཆ་ལུགས་ཡོངས་སུ་རྫོགས། །དབུ་མའི་རྩེ་མོ་ནོར་བུའི་ལྟེ་བ་རུ། །རྩ་བའི་བླ་མ་དཔལ་ལྡན་བདེ་བ་མཆོག །མཐིང་གསལ་བྲམ་ཟེ་ཁྲོ་ཚུལ་རྡོར་དྲིལ་འཛིན། །རུས་རྒྱན་ཐོད་སྐམ་སྟག་ཤམ་མགོ་ཕྲེང་དང་། །ཟླ་ཚེས་སྣ་ཚོགས་རྡོ་རྗེ་དར་དཔྱངས་སྤྲས། །ལྷན་སྐྱེས་དམར་མོ་གཉིས་མེད་མཉམ་པར་འཁྲིལ། །པད་ཉིའི་སྟེང་བཞུགས་དེ་ནས་ཡས་རིམ་བཞིན། །༧སྒྲུབ་བསྟན་སྣང་བྱེད་མ་ཏི་རཏྣ་ནི། །སྐུ་མདོག་དམར་སྨུག་བསྒྲེས་ཚུལ་ལྟ་

སྟངས་ཧུར། །ལྕང་ལོའི་ཟར་འཕྱང་རས་དཀར་བླ་གོས་གསོལ། །ས་གནོན་ཕྱག་རྒྱ་སྐྱིལ་ཀྲུང་ཕྱེད་པའི་སྟབས། །སྦས་པའི་རྣལ་འབྱོར་དབང་པོའི་མཚན་ཅན་ནི། །བསྒྲེས་ཉམས་གོས་དཀར་ཟླུམ་གསོལ་ལྕང་ལོ་གྲོལ། །རོལ་སྟབས་སེམས་ཉིད་ངལ་གསོའི་བཞུགས་སྟངས་མཛད། །གསང་བདག་རས་ཆུང་དངོས་སྣང་མངྒ་ལ། །སྒོམ་ཐག་ཨང་རག་རས་དཀར་བླ་གོས་དང་། །རྡོ་སྐྱིལ་མཉམ་བཞག་རས་ཞྭ་རྭ་གཟུགས་གསོལ། །དོན་བརྒྱུད་བཀའ་བབས་གདམས་པའི་མཛོད་འཆང་བ། །འཇིགས་མེད་ཆོས་ཀྱི་སེང་གེ་སྐུ་མདོག་དཀར། །པད་ཞྭ་ཟ་བེར་རས་དཀར་ཤམ་ཐབས་དང་། །ཆོས་གོས་གསོལ་ཞིང་ཕྱག་གཡས་རྡོ་རྗེ་ཕུར། །འཁོར་ལོས་མཚན་པ་བསྡིག་པའི་སྟབས་ཀྱིས་འཛིན། །ཕྱག་གཡོན་ཆོས་འཆད་ཕྱག་རྒྱས་པད་སྡོང་རྩེར། །ཟབ་གསང་ཤེས་རབ་རལ་གྲི་པོ་ཏིས་མཚན། །ཞབས་ཟུང་རོལ་སྟབས་

གཟི་བྱིན་འབར་བར་བཞུགས། །ཡེ་ཤེས་མཁའ་འགྲོ་ནམ་མཁའི་རྣལ་འབྱོར་མ། །དཀར་མོ་རྡོ་རྗེ་བདུད་རྩིའི་ཐོད་པ་བསྣམས། །བྱ་རྒོད་ཐུལ་པ་དར་གྱི་ལྡིང་བེར་མནབས། །བཅུ་དྲུག་ཉམས་ལྡན་ཉི་ཟླའི་སྟེང་དུ་གསལ། །དོན་བརྒྱུད་ཆོས་ཀྱི་རྗེ་བཙུན་བསོད་ནམས་བཟང་། །དམར་སྨུག་ཆོས་འཆད་མཉམ་བཞག་ཚེ་བུམ་བསྣམས། །གྲགས་པ་རྒྱལ་མཚན་དཀར་དམར་སྐྱབས་སྦྱིན་དང་། །མཉམ་བཞག་ཕྱག་རྒྱས་སྡེ་སྣོད་གླེགས་བམ་འཛིན། བིརྱ་ཤྲཱི་ས་གནོན་མཉམ་བཞག་རྒྱ། །སྔོ་བསང་ཞི་བའི་ལྟ་སྟངས་ཚུལ་དུ་བཞུགས། །བློ་གྲོས་རྡོ་རྗེ་ཕྱག་གཉིས་ས་གནོན་རྒྱ། །དམར་གསལ་སྐུ་ཤ་རྒྱས་ཤིང་བརྗིད་པའི་ཉམས། །དེ་དག་རབ་བྱུང་ཆོས་གོས་རྣམ་གསུམ་དང་། །སྒོམ་ཞྭ་སྨུག་དང་དམར་གསལ་སྣ་ཚོགས་གསོལ། །བྱང་ཆུབ་གཞོན་ནུ་སྔོ་བསང་བསྒྲེས་པའི་ཚུལ། །སྐྱབས་སྦྱིན་དར་ལྗང་རླུང་རས་

སྒོམ་ཞྭ་སྨུག །ལུས་མེད་རྡོ་རྗེ་གཞོན་ནུ་དཀར་དམར་མདངས། །རྡོ་རྗེ་ཐོད་ཆང་རས་གཟན་མཆིན་ཁ་བགོས། །འགྲོ་མགོན་རས་དཀར་སྐུ་མདོག་ཟླ་ལྟར་དཀར། །མཐང་གོས་དམར་པོ་རས་དཀར་བླ་གོས་འཆང་། །མན་ངག་གླེགས་བམ་པད་སྣོད་བདུད་རྩིས་གཏམས། །ཏི་ཤྲི་རས་པ་དཀར་སྔོན་ཆོས་འཁོར་རྒྱ། །མཐང་གོས་དམར་པོ་རླུང་རས་དཀར་པོ་གསོལ། །གསུམ་ཀས་ལྟ་བ་རབ་མཐོའི་པཎ་ཞྭ་མནབས། །ཐམས་ཅད་པད་ཟླར་སྐྱིལ་ཀྲུང་རོལ་པའི་སྟབས། །དེ་སྟེང་དར་མ་དབང་ཕྱུག་སྐུ་མདོག་དཀར། །ཆེ་བརྗིད་ཆོས་གོས་རྣམ་གསུམ་ཆོས་འཁོར་རྒྱ། །སྒོམ་ཞྭ་གསོལ་ཞིང་མི་གཡོ་སྐྱིལ་ཀྲུང་བཞུགས། །འཛམ་གླིང་གྲགས་པ་དྭགས་ཞུ་དགེ་སློང་ཆས། །མཉམ་བཞག་སྐྱིལ་ཀྲུང་ཞི་བའི་ལྟ་སྟངས་གཟིགས། །དེ་སྟེང་རིམ་བཞིན་མི་ལ་བླ་གོས་དཀར། །སྒོམ་ཐག་གསོལ་ཞིང་ངལ་གསོ་ཐོད་པ་བསྣམས། །

མར་སྟོན་ཧུར་བག་དམར་སྨུག་ཁྲོ་བོའི་ཚུལ། །གོས་དཀར་བེར་དམར་ཟླུམ་གསོལ་ས་གནོན་ཕྱག །༧ ཕྱག་ཆེན་སྐབས། མཻ་ཏྲི་དཀར་དམར་པཎྜི་ཏ་ཡི་ཆས། །ཕྱག་གཉིས་ཆོས་འཁོར་ཐོད་པ་བདུད་རྩི་བསྣམས། །དེ་སྟེང་ཤ་བ་རི་པ་མདའ་གཞུ་འཛིན། །ཐོར་ཚུགས་རུས་རྒྱན་དར་གྱི་ཨང་རག་གསོལ། །ཀླུ་སྒྲུབ་སྙིང་པོ་དགེ་སློང་གཙུག་ཏོར་ལྡན། །ཀླུ་བརྒྱད་རྒྱབ་ཡོལ་དཀར་དམར་ཆོས་འཆད་མཛད། །དེ་སྟེང་གྲུབ་པའི་སྤྱི་མེས་ས་ར་ཧ། །ཨག་ཚོམ་དབུ་སྐྲ་དཀར་ཞིང་ཐོར་ཚུགས་ལྡན། །རུས་རྒྱན་ཨང་རག་སྨྱུག་མའི་མདའ་སྲོང་ཚུལ། །དེ་སྟེང་རྒྱལ་བའི་སྲས་པོ་དགྲ་གཅན་འཛིན། །གསེར་མདོག་གཙུག་ཏོར་ལྡན་ཞིང་དགེ་སློང་ཆས། །ཆོས་གོས་གསུམ་གསོལ་རིན་ཆེན་པྲོག་ཞུ་བསྣམས། །བྱང་སེམས་བློ་གྲོས་རིན་ཆེན་སྐུ་མདོག་དཀར། །མཆོག་སྦྱིན་སྐྱབས་སྦྱིན་ལོངས་སྤྱོད་རྫོགས་པའི་ཆས། །

པདྨ་ཉི་ཟླ་རི་དྭགས་པགས་པ་སོགས། །རང་འཚམས་གདན་དང་འོད་ཀྱི་ཀློང་ན་བཞུགས། ། ༈ ཆོས་དྲུག་སྔོན་འགྲོའི་སྐབས་མར་སྟོན་མཚམས་སུ། ཛྙཱ་ན་སིདྡྷི་སྐུ་མདོག་དམར་ལ་སྨུག །ཁྲོ་རྔམ་ཞབས་གཡོན་བསྐྱང་ཚུལ་རོལ་པའི་སྟབས། །ཕྱག་གཡས་ས་གནོན་གཡོན་པས་ཐོད་ཆང་བསྣམས། །དཔལ་ལྡན་ཏཻ་ལོ་དཀར་གསལ་ཨ་ཙར་ཉམས། །མཛེས་སྡུག་ཞབས་གཡས་བསྐྱང་ཚུལ་རོལ་སྟབས་བཞུགས། །ཕྱག་གཉིས་གསེར་ཉའི་རྒྱུ་མ་འདྲེན་པའི་ཚུལ། །གཉིས་ཀ་གྲུབ་ཐོབ་རྣལ་འབྱོར་སྤྱོད་པའི་ཆས། །ཐོར་ཚུགས་རུས་རྒྱན་སྒོམ་ཐག་ཨང་རག་གསོལ། །གདོད་ནས་མཁའ་ཁྱབ་ཆོས་སྐུ་རྡོ་རྗེ་འཆང་། །མཐིང་གསལ་རྡོ་རྗེ་དྲིལ་བུ་ཐུགས་ཀར་བསྣོལ། །ལོངས་སྤྱོད་རབ་རྫོགས་སེང་ཁྲི་པདྨ་དང་། །ཟླ་སྟེང་འོད་ཟེར་ཕུང་པོའི་དབུས་སུ་གསལ། །ཕྱོགས་མཚམས་འཇའ་སྤྲིན་ནང་དུ་ཆོས་ཀྱི་རྗེ། །༧ ཕྱག་ཆེན་སྐབས། སྟེང་གི་

རྡོ་རྗེ་འཆང་ཆེན་མཐའ་བསྐོར་དང་། །རྩ་གསུམ་བར་མཚམས་རྣམས་སུ་ཆོས་ཀྱི་རྗེ། །༧ གཉིས་ཀར། དེ་བཞིན་གཤེགས་པ་མ་ཏི་རཏྣ་དང་། །སེང་གེ་འབུམ་པ་མགོན་པོ་ཡེ་ཤེས་ཞབས། །བསོད་ནམས་ཡེ་ཤེས་ཀུན་དགའ་སེང་གེ་དང་། །རིན་ཆེན་བཟང་པོ་བསོད་ནམས་དབང་ཕྱུག་དཔལ། །བཀྲ་ཤིས་དབང་ཕྱུག་ཆོས་ཀྱི་འོད་ཟེར་མཆོག །ཀུན་དགའ་སྙིང་པོ་ཀུན་དགའ་རྒྱ་མཚོ་དང་། །བསྟན་འཛིན་བཟང་པོ་ཀརྨ་ཡེ་ཤེས་ཞབས། །དོན་དམ་སྙིང་པོ་ཨཿཡུ་ཏིཥྛ་དང་། །ཚོགས་གཉིས་འོད་ཟེར་ལ་སོགས་ངེས་དོན་གྱི། །སྲས་དང་གྲུབ་[སྤྲུལ་]པའི་བརྒྱུད་པ་གསེར་གྱི་ཕྲེང་། །ཚར་དུ་དངར་བ་ཐམས་ཅད་མཚན་དཔེ་ལྡན། །མཛེས་འཛུམ་ཞྭ་ཁྲ་ཆོས་གོས་རྣམ་གསུམ་གསོལ། །རྡོར་དྲིལ་པུ་ཏི་ཐོད་ཆང་ཆོས་འཆད་མཛད། །དར་གྱི་ཕོ་ལོང་གདིང་བ་པད་ཟླ་སོགས། །རང་འཚམས་གདན་ལ་འོད་ཕུང་འབར་

བར་བཞུགས། །འོག་མིན་གནས་ནས་རང་འདྲ་སྤྱན་དྲངས་བསྟིམ། །བྱིན་རླབས་ཐུགས་རྗེའི་ནུས་པ་མཆོག་ཏུ་འབར། །དེ་དག་རྣམས་ལ་གདུང་ཤུགས་མོས་ཕྱག་དང་། །ཡིད་སྤྲུལ་ཀུན་ཏུ་བཟང་པོའི་མཆོད་པས་མཆོད། །རྟོག་ཚོགས་ཆོས་ཉིད་ཕུང་ཁམས་སྐྱེ་མཆེད་བཅས། །ཡེ་ཤེས་རོལ་པའི་འབྱོར་ཚོགས་ཇི་སྙེད་འབུལ། །དུས་གསུམ་མི་དགེའི་ལས་རྣམས་འགྱོད་པས་བཤགས། །འབྲལ་མེད་སྙིང་གི་དབུས་སུ་རྟག་བཞུགས་ནས། །འོད་གསལ་ཆོས་ཀྱི་འཁོར་ལོ་བསྐོར་བར་བསྐུལ། །བསམ་སྦྱོར་རྣམ་དག་དགེ་ལ་རྗེས་ཡི་རང་། །དེ་དག་བྱང་ཆུབ་མཆོག་གི་རྒྱུར་གྱུར་ཅིག །ཅེས་ཟག་པ་མེད་པའི་རྒྱུན་བཤགས་ཕུལ་ནས། སྙིང་ཁུང་རུས་པའི་གཏིང་ནས་ལྟེམ་ཀྱང་མེད་པར་གསོལ་བ་གདབ་པར་བྱ་སྟེ། ན་མོ་གུ་རུ། བདག་སྐྱེ་དང་ཚེ་རབས་ཐམས་ཅད་དུ། །ཐུགས་བརྩེ་བ་ཆེན་པོས་རྗེས་བཟུང་བའི། །འཁོར་མེད་ཀྱི་དྲིན་མཐའ་གསོབ་དཀའ་

ཡང་། ཡོན་ཏན་གྱི་ཆེ་བ་རྗེས་དྲན་ནས། །གདུང་ཤུགས་ཀྱི་མོས་གུས་བཟོད་མེད་འབར། །ཕ་ཐུགས་རྗེས་ཟུངས་ཤིག་རྡོ་རྗེ་འཆང་། །རྗེ་བྱང་སེམས་བློ་གྲོས་རིན་ཆེན་དང་། །མགོན་དགྲ་གཅན་ཟིན་གཉིས་ཀླུ་སྒྲུབ་ཞབས། །དཔལ་ཤ་བ་རི་དང་མཻ་ཏྲི་པ། །བདག་གདུང་ཤུགས་དྲག་པོས་གསོལ་བ་འདེབས། །མར་མི་དང་དྭགས་པོ་བྱིན་རླབས་ཅན། །རྗེ་དར་མ་དབང་ཕྱུག་ཏི་ཤྲི་རས། །རས་དཀར་དང་ལུས་མེད་རྡོ་རྗེའི་ཞབས། །བདག་གདུང་ཤུགས་དྲག་པོས་གསོལ་བ་འདེབས། །མཆོག་བྱང་ཆུབ་གཞོན་ནུ་བློ་གྲོས་མཚན། །རྗེ་བརྩོན་འགྲུས་དཔལ་དང་(གླང་)རླངས་རས་པ། །ཁྱེད་གྲུབ་པའི་ཁྱུ་མཆོག་གྲགས་པའི་མཚན། །བདག་གདུང་ཤུགས་དྲག་པོས་གསོལ་བ་འདེབས། །དཔལ་འགྲན་ཟླ་བྲལ་བའི་ཆོས་ཀྱི་རྗེ། །རྗེ་མ་ཏི་རཏྣ་བསོད་ནམས་བཟང་། །མཆོག་གྲུབ་པ་བརྙེས་པའི་ཁྱུ་རྣམས་

ལ། །བདག་གདུང་ཤུགས་དྲག་པོས་གསོལ་བ་འདེབས། །གནས་ཨོ་རྒྱན་གྱི་གཙོ་མོ་ཌཱ་ཀི་མར། །དོན་གཉིས་མེད་ནམ་མཁའི་རྣལ་འབྱོར་མཚན། །བྱིན་རླབས་ཀྱི་བརྒྱུད་པར་ཐུགས་བརྩེ་བས། །རྨི་ལམ་དུ་བརྡ་ཐབས་དང་རྟེན་འབྲེལ་གྱིས། །དོན་མ་ནོར་བའི་བརྒྱུད་པ་གཏད་མཛད་པ། །དཔལ་ཌཱ་ཀི་བདེ་སྐྱོང་བཟང་མོ་ལ། །བདག་གདུང་ཤུགས་དྲག་པོས་གསོལ་བ་འདེབས། །དོན་མ་རྒྱུད་མཁའ་འགྲོའི་སྙིང་ཁྲག་གི། །མཆོག་བྱིན་རླབས་བདུད་རྩིའི་མཛོད་འཆང་ཞིང་། །བཀའ་བབས་ཀྱི་གདམས་པའི་སྲོལ་འཛིན་པ། །དཔལ་འཇིགས་མེད་ཆོས་ཀྱི་སེང་གེ་ལ། །བདག་གདུང་ཤུགས་དྲག་པོས་གསོལ་བ་འདེབས། །དཔལ་གསང་བདག་དངོས་སྣང་མངྒ་ལ། །མཆོག་བརྟུལ་ཞུགས་གྲུབ་པ་དབང་པོའི་སྡེ། །མགོན་འཇམ་དབྱངས་བློ་གྲོས་རིན་ཆེན་ཞབས། །བདག་གདུང་ཤུགས་དྲག་པོས་གསོལ་བ་ཤོ་ལོ་ཀ་འདི་ཁ་

གསབ་ཞུས་པའོ། །མཆན། འདེབས། །གཤིས་རིག་ཁམས་ཆོས་ཉིད་སངས་རྒྱས་སུ། །དོན་མ་ནོར་རྗེན་པར་སྟོན་མཛད་པའི། །མགོན་མཆོག་གསུམ་རྩ་གསུམ་འདུས་གཟུགས་རྗེ། །རྒྱལ་ཀུན་ལས་བཀའ་དྲིན་ལྷག་པའི་དཔལ། །རྗེ་རྩ་བའི་བླ་མ་རྡོ་རྗེ་འཆང་། །བདག་གདུང་ཤུགས་དྲག་པོས་གསོལ་བ་འདེབས། །འདི་མན་ཆོས་རྗེ་རིན་པོ་ཆེའི་གསུང་རྡོ་རྗེའི་ཚིག་སྟེ། མི་རྨོངས་པའི་ཚིག་ལ་སྙན་པའི་ངག །ཡིད་དད་པའི་སེམས་ཀྱིས་གསོལ་བཏབ་མཐུས། །དཔལ་སངས་རྒྱས་བསྟན་པ་དར་བ་དང་། །ཆོས་རྒྱུན་དུ་གནས་པར་བྱིན་གྱིས་རློབས། །ཡུལ་དབེན་གནས་རྟག་ཏུ་བརྟེན་པ་དང་། །གནད་སྒྲུབ་པ་མཐའ་རུ་སྐྱེལ་བ་ཡིས། །རྒྱུད་ཐུལ་ནས་གཞན་སྣང་ཀུན་ཚིམ་ཞིང་། །དོན་འགྲོ་བ་འདྲེན་ནུས་བྱིན་གྱིས་རློབས། །བདེ་གསལ་ཉམས་རྒྱུད་ལ་སྐྱེ་བ་དང་། །རང་རིག་པའི་ངོ་བོ་ཤེས་པ་ཡིས། །དུས་ཉིན་མཚན་སྤྱོད་

ལམ་འབྲེལ་བ་དང་། །ངར་ངེས་ཤེས་ལྡན་པར་བྱིན་གྱིས་རློབས། །སྒོམ་ཉམས་ལེན་མཁན་པོ་རང་སར་གྲོལ། །སྟོང་རིག་རྗེན་ནང་ནས་འཆར་བ་དང་། །ཕྲ་རགས་པ་སྤུན་ཆ་རང་སར་དག །དོན་སྟོང་ཉིད་འགྱུར་མེད་བྱིན་གྱིས་རློབས། །ཉམས་སྣང་སྟོང་ཟུང་འཇུག་ནང་ནས་ཤར། །སེམས་རིག་བྱེད་ཤེས་པ་རང་སར་གྲོལ། །ཆོས་གཉུག་མའི་རྒྱལ་ས་རྒྱུན་དུ་ཟིན། །མཆོག་མཉམ་རྗེས་གཅིག་འདྲེས་བྱིན་གྱིས་རློབས། །ཉིན་མཚན་མོའི་རྨི་ལམ་གདོད་ནས་དག །བསྒོམ་བྱ་དང་སྒོམ་བྱེད་ཞེན་པ་བྲལ། །ལམ་འཁོར་འདས་ཆོས་རྣམས་གཅིག་ཏུ་འཛོམས། །འབྲས་སྐུ་བཞི་ལྷུན་གྲུབ་བྱིན་གྱིས་རློབས། །ཆོས་ཕྲིན་ལས་ཀུན་གྱི་ཆེ་བ་ཡིས། །གནས་འཁོར་བ་མཐའ་རུ་སྐྱེལ་བ་དང་། །ལས་ཆེད་དུ་མ་བྱས་ཀྱང་གཞན་སྣང་ཚིམ། །དེ་རྒྱུན་ཆད་མེད་པར་བྱིན་གྱིས་རློབས། །དོན་བརྒྱུད་པ་ལ་གསོལ་བཏབ་བྱིན་

རླབས་ཀྱིས། །བདག་ཅི་བྱེད་ཆོས་སུ་འགྲོ་བ་དང་། །ཅི་བསམ་པ་ཆོས་བཞིན་ལྷུན་གྲུབ་ནས། །དཔལ་སྐུ་ལྔ་དབྱེར་མེད་མྱུར་འགྲུབ་ཤོག །ཅེས་པ་དང་། ཆོས་དྲུག་སྐབས་ཟུར་ནས་འབྱུང་བའི་གསོལ་འདེབས་འཛུད། ན་མོ། དུས་གསུམ་རྒྱལ་དང་རྒྱལ་སྲས་འདུས་པའི་སྐུ། །རྩ་གསུམ་ཆོས་དང་དགེ་འདུན་མ་ལུས་པ། །ཀུན་འདུས་བརྒྱུད་པའི་བླ་མ་བྱིན་རླབས་ཅན། །རྒྱལ་བ་ཀུན་ལས་བཀའ་དྲིན་ལྷག་པ་ཡི། །སྐྱབས་ཀྱི་སྙིང་པོ་རྩ་བའི་བླ་མ་ལ། །མོས་གུས་གདུང་ཤུགས་དྲག་པོས་གསོལ་བ་འདེབས། །བྱིན་རླབས་ཐུགས་ཀྱི་ཀློང་ནས་དུས་འདིར་སྩོལ། །ལོང་མེད་དྲན་ཞིང་དགེ་སྡིག་བླང་དོར་བརྩོན། །དམ་ཚིག་ལ་གནས་ས་ལམ་རིམ་པར་རྫོགས། །འབྲས་བུ་བླ་མའི་ཐུགས་དང་དབྱེར་མེད་ཤོག །ལོང་སྐབས་དབེན་ཚེ། དྲིན་ཅན་རྩ་བའི་བླ་མ་ལ། །བཟོད་མེད་སྙིང་ནས་གསོལ་བ་འདེབས། །བདག་རྒྱུད་དམ་པའི་ཆོས་

དང་མཐུན། །འཁྲུལ་མེད་ངོ་བོ་རྟོགས་པར་མཛོད། །ཅེས་བརྒྱ་སྟོང་ཁྲི་འབུམ་སོགས་གྲངས་ཅི་མང་བསགས་ལ་རྒྱང་འབོད་གསོལ་འདེབས་མཐར། བྱིན་རླབས་དབང་བཞི་ལེན་པ་ནི། ངག་ཏུ། འཁོར་གྱི་བཀའ་བརྒྱུད་བླ་མ་ཐམས་ཅད་ཀུན། །སྟེང་ཕྱོགས་ཆོས་སྐུ་རྡོ་རྗེ་འཆང་ལ་འདུས། །དེ་ནས་རྩ་བརྒྱུད་བླ་མ་ཐོ་བརྩེགས་རྣམས། །རིམ་བཞིན་འོད་ཞུ་གཅིག་ལ་གཅིག་ཐིམ་མཐར། །བྱིན་རླབས་ཀུན་འདུས་བླ་མ་ཡབ་ཡུམ་ལ། །ཐིམ་མཐར་བླ་མའི་དཔྲལ་བའི་འོད་ཟེར་ནི། །དཀར་པོས་ལུས་ཀྱི་སྒྲིབ་བསལ་བུམ་དབང་ཐོབ། །འབྲས་བུ་སྤྲུལ་སྐུ་འགྲུབ་པའི་སྐལ་ལྡན་བྱས། །བླ་མའི་མགྲིན་པའི་འོད་དམར་རྩ་རླུང་སྦྱངས། །གསང་བའི་དབང་ཐོབ་ལོངས་སྐུའི་གོ་འཕང་བསྒྲུབས། །ཐུགས་ལས་འོད་མཐིང་འཕྲོས་པས་ཡིད་སྒྲིབ་སྦྱངས། །ཤེས་རབ་དབང་ཐོབ་ཆོས་སྐུའི་གོ་འཕང་བྱས། །སྐུ་དང་ལྟེ་བའི་གནས་ནས་འོད་སྣ་ཚོགས། །འཕྲོས་པས་ཆ་

སྙོམས་བག་ཆགས་དྲི་མ་སྦྱངས། །ཚིག་གི་དབང་ཐོབ་ངོ་བོ་ཉིད་ཀྱི་སྐུ། །སྐུ་བཞི་ཡོངས་རྫོགས་ཆེན་པོའི་གོ་འཕང་བྱས། །བླ་མའི་ཐུགས་དང་རང་སེམས་དབྱེར་མེད་པར། །བདེ་སྟོང་གཉིས་མེད་ངང་དུ་རོ་གཅིག་གྱུར། ། ༈ ཆོས་དྲུག་སྔོན་འགྲོའི་སྐབས། བླ་མ་ཧེ་རུ་ཀ་དཔལ་ཡབ་ཡུམ་གྱིས། །བདག་ལ་བརྩེ་བ་ཆེན་པོས་ཉེར་དགོངས་ནས། །ཐུན་མོང་མ་ཡིན་ཤིན་ཏུ་ཟབ་དབང་གིས། །སྟན་ཐོག་འདི་རུ་སྨིན་ཅིང་གྲོལ་བར་མཛོད། །ཅེས་པའིགསོལ་བཏབ་འཁོར་རྣམས་འོད་དུ་ཞུ། །བླ་མའི་སྐུར་ཐིམ་ཡབ་ཡུམ་སྦྱོར་མཚམས་ནས། །བྱང་སེམས་རྒྱུན་བབ་ཚངས་པའི་སྒོ་ནས་ཞུགས། །གཞི་དུས་བུམ་པའི་དབང་ཐོབ་ལུས་སྒྲིབ་དག །ལམ་དུས་བསྐྱེད་པའི་རིམ་པ་བསྒོམ་ལ་དབང་། །འབྲས་དུས་སྤྲུལ་སྐུ་ཐོབ་པའི་སྐལ་ལྡན་གྱུར། །སླར་ཡང་མོས་གུས་དྲག་པོས་བསྐུལ་བའི་མཐུས། །བདེ་བའི་ཉམས་

འབར་ཆགས་པའི་སྒྱུ་རྩལ་གྱིས། །རྩ་གསུམ་ལྷ་དང་དཔའ་བོ་མཁའ་འགྲོའི་ཚོགས། །སྤྱན་དྲངས་ཞལ་ཞུགས་བྱང་སེམས་བདུད་རྩིའི་རྒྱུན། །སྦྱོར་མཚམས་ནས་བབ་ཚངས་བུག་རྡོ་རྗེའི་ལྕེར། །བརྒྱུད་དེ་རྩ་གནས་ཀུན་ཁྱབ་བདེ་ཉམས་གཡོས། །གཞི་དུས་གསང་བའི་དབང་ཐོབ་ངག་སྒྲིབ་དག །ལམ་དུས་རླུང་སྔགས་བདག་བྱིན་བརླབ་ལ་དབང་། །འབྲས་དུས་ལོངས་སྐུ་འགྲུབ་པའི་སྐལ་ལྡན་གྱུར། །བླ་མའི་ཡུམ་ལས་ཡུམ་འཕྲོས་མཉམ་པར་སྦྱོར། །འདུ་ཤེས་གསུམ་གྱིས་དགའ་བཞིའི་འགྲོས་སྦྱངས་པས། །གཞི་དུས་ཤེར་དབང་ཐོབ་ཅིང་ཡིད་སྒྲིབ་དག །ལམ་དུས་གཞན་ལུས་བདེ་སྟོང་བསྒོམ་ལ་དབང་། །འབྲས་དུས་ཆོས་སྐུ་ཐོབ་པའི་སྐལ་ལྡན་གྱུར། །དེ་ནས་ལུགས་ལྡོག་འགྲོས་མཐར་བརྗོད་མེད་ཉམས། །མཐའ་བྲལ་སེམས་ཀྱི་དེ་ཉིད་ཕྱག་རྒྱ་ཆེ། །བླ་མའི་ཐུགས་དང་དབྱེར་མེད་ཤུགས་ཀྱིས་འདྲེས། །མ

་བཅོས་དེ་ཀར་བཞག་པས་ཆོས་སྐུར་གྲོལ། །གཞི་དུས་ཚིག་གི་དབང་ཐོབ་ཆ་སྙོམ་གྱི། །སྒྲིབ་དག་ལམ་དུས་ཕྱག་ཆེན་བསྒོམ་ལ་དབང་། །འབྲས་དུས་ངོ་བོ་ཉིད་སྐུའི་སྐལ་ལྡན་གྱུར། །མི་ཕྱེད་རྡོ་རྗེའི་བདག་ཉིད་ཧེ་རུ་ཀ །འཕོ་འགྱུར་འདུ་འབྲལ་མེད་པར་རོ་གཅིག་ཤོག །ཅེས་སྣང་གྲག་རྟོག་གསུམ་བླ་མའི་སྐུ་གསུང་ཐུགས་དང་དབྱེར་མེད་དུ་ཤེས་པའི་མཉམ་བཞག་དང་ལམ་ཁྱེར་ལ་བསླབ་པར་བྱའོ། །གཏུམ་མོ་འབར་འཛག་གི་དམིགས་པ་བདག་བསྐྱེད་ལ་བརྟེན་ནས་བསྒོམ་ཞིང་བདེ་སྟོང་གི་ཉམས་སྦར་ནས་དམིགས་རིམ་ལ་སྙིང་ཕུར་གཏད་ན་བསྐྱེད་རྫོགས་ཟུང་འཇུག་གི་ལམ་སྦྱོང་བ་ཡང་འདི་ཉིད་ཀྱིས་འགྲུབ་པར་འགྱུར་རོ། །དེ་ལྟ་བུས་ཚེ་འདི་ཉིད་ལ་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱེད་པ་ནི་བླ་མ་གོང་མ་རྣམས་ཀྱི་མན་ངག་ཞལ་གསུང་བསླུ་མེད་ཡིན་པས་དེ་ལྟར་ཉམས་སུ་ལེན་པ་ལ་ཐང་ལྷོད་མེད་ཅིང་ཡིད་ཆེས་དང་ལྡན་པས་བསྒྲུབ་ན་དལ་འབྱོར་རིན་པོ་ཆེ་འདི་དོན་དང་ལྡན་པར་འགྱུར་བས་རྗེས་འཇུག་གི་ཚོགས་རྣམས་ཀྱིས་ལྷུར་ལེན་པར་རིགས་སོ། ། ༈ སྨྲས་པ། རྒྱལ་དང་རྒྱལ་བའི་མྱུ་གུས་བཞེད་གཞུང་ལམ། །གྲུབ་པའི་སྤྱི་མེས་གསེར་རིའི་ཕྲེང་བ་ཡི། །ཐུགས་བཅུད་གང་གཱའི་སྙིང་པོ་བཻ་ཌཱུརྱ། །ཐུབ་བསྟན་ལྷུན་པོའི་བ་གམ་སྤོར་སྒྲེངས་པས། །འགྲོ་ཁམས་གཏན་བདེའི་ཕོངས་ལས་ཡོངས་གྲོལ་ཏེ། །ངེས་པ་དོན་གྱི་

ལང་ཚོ་རབ་རྒྱས་ཤིང་། །མཁྱེན་གཉིས་ཟེར་གྱི་འོད་གསལ་ཕྱག་རྒྱ་ཆེ། །མངོན་གྱུར་ཟུང་འཇུག་རྡོ་རྗེ་འཆང་འགྲུབ་ཤོག །སྐྱེས་སྦྱངས་ཡོན་ཏན་བུང་བ་རྩལ་ཞན་ཀྱང་། །དཔལ་ལྡན་འབའ་རོམ་སྲི་ཞུའི་འདབ་གཤོག་རྒྱས། །གྲུབ་མཆོག་པདྨོའི་བདུད་རྩི་རྟག་རོལ་བས། །ཟུང་འཇུག་དོན་གྱི་མགྲིན་གླུ་འབྱིན་འདི་རྨད། །ངེས་དོན་རྟག་ཟའི་ང་རོའི་རྗེས་འགྲོ་བས། །ལོག་སྒྲུབ་རྟོག་གེའི་སྨྲ་བ་སྐྱུངས་གྱུར་ཏེ། །དཔལ་ལྡན་འབའ་རོམ་ལྷུན་པོའི་གངས་ཁྲོད་དུ། །བརྟུལ་ཞུགས་ངེས་པའི་སྒྲ་ཆེན་སྒྲོགས་གྱུར་ཅིག །ཅེས་པ་འདིའང་རྗེ་འབའ་རོམ་པ་ཆེན་པོའི་སྲོལ་འཛིན། ༧དཔལ་ལྡན་སྐྱོ་བྲག་པ་ཆེན་པོའི་བརྒྱུད་པའི་ཕྲེང་འཛིན་དགེ་བཤེས་བླ་མ་དམ་པ་ཀརྨ་ཨ་ཛྙཱ་མ་ལ་མངྒ་ལ་དང་། ཉེ་གནས་ཀརྨ་དཱ་མ་ཀ་དེ་ཝོ་དཱ་ཡ་སོགས་བརྒྱུད་འཛིན་གྱི་སློབ་ཚོགས་རྣམས་ཀྱིས་བསྐུལ་བའི་བཞེད་སྐོང་སླད་དུ། ཀརྨ་མི་ཕམ་འཇིགས་མེད་ཆོས་ཀྱི་སེང་གེའམ་དཔལ་ཁྲག་འཐུང་དགའ་བའི་ཡེ་ཤེས་བདེ་ཆེན་འབར་བའི་རྡོ་རྗེ་སྟོབས་ལྡན་བདུད་འདུལ་གླིང་པ་རྩལ་གྱིས་གདན་ས་ཆེན་པོ་སྤྱི་འབྱམས་ཕུན་ཚོགས་མདོ་སྔགས་བཤད་སྒྲུབ་དར་རྒྱས་གླིང་གི་ཆོས་གྲྭར་ཐུན་མཚམས་རྣམས་སུ་ཤར་མར་སྨྲས་རིམ་བཞིན་ཀརྨ་འདུལ་བ་ལྷ་དར་ནས་ཡི་གེར་བཏབ་པ་འདིས་ཀྱང་ངེས་དོན་སྙིང་པོ་གསང་བ་ཟབ་མོའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་ཏེ་འགྲོ་ཀུན་ཆོས་དབྱིངས་གདོད་མའི་མགོན་པོའི་གོ་འཕང་མངོན་དུ་བྱེད་པའི་རྒྱུར་གྱུར་ཅིག །སརྦ་དཱ་ཤ་སུ་ཛ་ཡ།།

བླ་མ་རྒྱང་འབོད་ཀྱི་གསོལ་འདེབས་མོས་གུས་སྙིང་གི་གཟེར་འདེབས། འཇམ་མགོན་བློ་གྲོས་མཐའ་ཡས།

༈ བླ་མ་རྒྱང་འབོད་ཀྱི་གསོལ་འདེབས་མོས་གུས་སྙིང་གི་གཟེར་འདེབས་ཞེས་བྱ་བ་བཞུགས་སོ། །ན་མོ་གུ་ར་བེ། བླ་མ་རྒྱང་འབོད་ཀུན་ལ་གྲགས་ཆེའང་། བྱིན་རླབས་བསྐུལ་བའི་གནད་སྐྱོ་ཤས་ངེས་འབྱུང་གིས་བསྐུལ་བའི་མོས་གུས་ཁ་ཙམ་ཚིག་ཙམ་མ་ཡིན་པར་སྙིང་གི་དཀྱིལ། རུས་པའི་གཏིང་ནས་བསྐྱེད། བླ་མ་ལས་ལྷག་པའི་སངས་རྒྱས་གཞན་ན་མེད་པར་ཐག་ཆོད་པའི་ངེས་ཤེས་དང་ལྡན་པས་དབྱངས་རྟ་སྙན་པོས། བླ་མ་མཁྱེན་ནོ། །དྲིན་ཆེན་རྩ་བའི་བླ་མ་མཁྱེན་ནོ། །དུས་གསུམ་སངས་རྒྱས་ཀྱི་ངོ་བོ། །ལུང་རྟོགས་དམ་ཆོས་ཀྱི་འབྱུང་གནས། །འཕགས་ཚོགས་དགེ་འདུན་གྱི་མངའ་བདག །རྩ་བའི་བླ་མ་དེ་མཁྱེན་ནོ། །བྱིན་རླབས་ཐུགས་རྗེ་ཡི་གཏེར་ཆེན། །དངོས་གྲུབ་རྣམ་གཉིས་ཀྱི་འབྱུང་གནས། །ཕྲིན་ལས་ཅི་འདོད་ཀུན་སྩོལ་མཛད། །རྩ་བའི་བླ་མ་ཁྱེད༴ བླ་མ་འོད་དཔག་མེད་པ༴ སྤྲོས་བྲལ་ཆོས་སྐུའི་ཀློང་ནས་གཟིགས་ཤིག །བདག་སོགས་ལས་ངན་འཁོར་བར་འཁྱམས་རྣམས། །བདེ་

ཆེན་དག་པའི་ཞིང་དུ་དྲོངས་མཛོད། །བླ་མ་སྤྱན་རས་གཟིགས་དབང་༴ འོད་གསལ་ལོངས་སྐུའི་ཀློང་ནས་གཟིགས༴ རིགས་དྲུག་སྡུག་བསྔལ་རྩད་ནས་ཞི་ཞིང་། །ཁམས་གསུམ་འཁོར་བ་དོང་ནས་སྤྲུགས་མཛོད། །བླ་མ་པདྨ་འབྱུང་གནས༴ རྔ་ཡབ་པདྨ་འོད་ནས་གཟིགས༴ སྙིགས་དུས་སྐྱབས་མེད་བོད་འབངས་ཉམ་ཐག །ཐུགས་རྗེས་མྱུར་བ་ཉིད་དུ་སྐྱོབས་མཛོད། །བླ་མ་ཡེ་ཤེས་མཚོ་རྒྱལ༴ མཁའ་སྤྱོད་བདེ་ཆེན་གྲོང་ནས་གཟིགས༴ སྡིག་ལྡན་བདག་སོགས་སྲིད་པའི་མཚོ་ལས། །ཐར་པའི་གྲོང་ཁྱེར་ཆེན་པོར་སྒྲོལ་མཛོད། །བཀའ་གཏེར་བརྒྱུད་པའི་བླ་མ༴ ཟུང་འཇུག་ཡེ་ཤེས་ཀློང་ནས་གཟིགས༴ བདག་རྒྱུད་འཁྲུལ་པའི་མུན་ཁང་བརྟོལ་ནས། །རྟོགས་པའི་ཉི་མ་འཆར་བར་མཛོད་ཅིག །ཀུན་མཁྱེན་དྲི་མེད་འོད་ཟེར༴ ལྷུན་གྲུབ་འོད་ལྔའི་ཀློང་ནས་གཟིགས༴ ཀ་དག་དགོངས་པའི་རྩལ་ཆེན་རྫོགས་ནས། །

སྣང་བཞི་མཐའ་རུ་ཕྱིན་པར་མཛོད༴ མཉམ་མེད་ཇོ་བོ་ཡབ་སྲས༴ དགའ་ལྡན་ལྷ་བརྒྱའི་དབུས་ནས་གཟིགས༴ སྟོང་ཉིད་སྙིང་རྗེའི་སྙིང་པོ་ཅན་གྱི། །བྱང་སེམས་རྒྱུད་ལ་སྐྱེ་བར་མཛོད༴ གྲུབ་མཆོག་མར་མི་དྭགས་གསུམ༴ བདེ་ཆེན་རྡོ་རྗེའི་དབྱིངས་ནས་གཟིགས༴ བདེ་སྟོང་ཕྱག་ཆེན་མཆོག་དངོས་གྲུབ་ཅིང་། །ཆོས་སྐུ་སྙིང་དབུས་སད་པར་མཛོད༴ འཇིག་རྟེན་དབང་ཕྱུག་ཀརྨ་པ་མཁྱེན་ནོ། །མཁའ་ཁྱབ་འགྲོ་འདུལ་དབྱིངས་ནས་གཟིགས༴ ཆོས་ཀུན་བདེན་མེད་སྒྱུ་མར་རྟོགས་ནས། །སྣང་སེམས་སྐུ་གསུམ་འཆར་བར་མཛོད༴ བཀའ་བརྒྱུད་ཆེ་བཞི་ཆུང་བརྒྱད༴ རང་སྣང་དག་པའི་དབྱིངས་ནས་གཟིགས༴ གནས་སྐབས་བཞི་ཡི་འཁྲུལ་པ་སངས་ནས། །ཉམས་རྟོགས་མཐའ་རུ་ཕྱིན་པར་མཛོད༴ རྗེ་བཙུན་གོང་མ་རྣམ་ལྔ༴ འཁོར་འདས་དབྱེར་མེད་ཀློང་ནས་གཟིགས༴ རྣམ་དག་ལྟ་སྒོམ་སྤྱོད་གསུམ་

འབྲེལ་བས། །གསང་བའི་ལམ་མཆོག་བགྲོད་པར་མཛོད༴ མཉམ་མེད་ཤངས་པ་བཀའ་བརྒྱུད༴ རྣམ་དག་སངས་རྒྱས་ཞིང་ནས་གཟིགས༴ ཐབས་གྲོལ་ཉམས་ལེན་ཚུལ་བཞིན་འབྱོངས་ནས། །མི་སློབ་ཟུང་འཇུག་བརྙེས་པར་མཛོད༴ གྲུབ་ཆེན་ཐང་སྟོང་རྒྱལ་པོ༴ རྩོལ་མེད་ཐུགས་རྗེའི་ཀློང་ནས་གཟིགས༴ བདེན་མེད་རྟོགས་པའི་བརྟུལ་ཞུགས་གྲུབ་ནས། །རླུང་སེམས་རང་དབང་འདུ་བར་མཛོད༴ ཕ་གཅིག་དམ་པ་སངས་རྒྱས༴ ལས་རབ་གྲུབ་པའི་དབྱིངས་ནས་གཟིགས༴ བརྒྱུད་པའི་བྱིན་རླབས་སྙིང་ལ་ཞུགས་ནས། །རྟེན་འབྲེལ་ཕྱོགས་མེད་འཆར་བར་མཛོད༴ མ་གཅིག་ལབ་ཀྱི་སྒྲོན་མ༴ ཤེས་རབ་ཕར་ཕྱིན་ཀློང་ནས་གཟིགས༴ བདག་འཛིན་སྙེམས་བྱེད་རྩད་ནས་ཆོད་ཅིང་། །བདག་མེད་སྤྲོས་བྲལ་བདེན་མཐོང་མཛོད༴ ཀུན་མཁྱེན་དོལ་པོ་སངས་རྒྱས༴ རྣམ་ཀུན་མཆོག་ལྡན་དབྱིངས་ནས་

གཟིགས༴ འཕོ་བའི་དབུགས་རྣམས་དབུ་མར་འགགས་ནས། །འཕོ་བྲལ་རྡོ་རྗེའི་སྐུ་ཐོབ་མཛོད༴ རྗེ་བཙུན་ཏཱ་ར་ནཱ་ཐ༴ རྣམ་གསུམ་ཕོ་ཉའི་དབྱིངས་ནས་གཟིགས༴ རྡོ་རྗེའི་གསང་ལམ་གེགས་མེད་བགྲོད་ནས། །འཇའ་ལུས་མཁའ་སྤྱོད་འགྲུབ་པར་མཛོད༴ འཇམ་དབྱངས་མཁྱེན་བརྩེའི་དབང་པོ༴ མཁྱེན་གཉིས་ཡེ་ཤེས་དབྱིངས་ནས་གཟིགས༴ མི་ཤེས་བློ་ཡི་མུན་པ་སངས་ནས། །མཁྱེན་རབ་སྣང་བ་རྒྱས་པར་མཛོད༴ འོད་གསལ་སྤྲུལ་པའི་རྡོ་རྗེ༴ འཇའ་ཟེར་འོད་ལྔའི་ཀློང་ནས་གཟིགས༴ ཐིག་རླུང་སེམས་ཀྱི་དྲི་མ་དག་ནས། །གཞོན་ནུ་བུམ་སྐུར་བྱང་ཆུབ་མཛོད༴ པདྨ་མདོ་སྔགས་གླིང་པ༴ བདེ་སྟོང་འགྱུར་མེད་ཀློང་ནས་གཟིགས༴ རྒྱལ་དང་རྒྱལ་སྲས་དགོངས་པ་མཐའ་དག །བདག་གིས་ཡོངས་སུ་སྐོང་ནུས་མཛོད༴ ངག་དབང་ཡོན་ཏན་རྒྱ་མཚོ༴ དབྱིངས་ཡེ་ཟུང་འཇུག་ཀློང་ནས་

གཟིགས༴ སྣང་བའི་བདེན་འཛིན་ཧྲུལ་གྱིས་ཞིག་ནས། །གང་བྱུང་ལམ་དུ་ཁྱེར་ནུས་མཛོད༴ རྒྱས་སྲས་བློ་གྲོས་མཐའ་ཡས༴ བྱམས་དང་སྙིང་རྗེའི་ངང་ནས་གཟིགས༴ འགྲོ་ཀུན་དྲིན་ཅན་ཕ་མར་ཤེས་ནས། །གཞན་ཕན་སྙིང་ནས་སྒྲུབ་ནུས་མཛོད༴ པདྨ་གར་གྱི་དབང་ཕྱུག༴ བདེ་ཆེན་འོད་གསལ་དབྱིངས་ནས་གཟིགས༴ དུག་ལྔ་ཡེ་ཤེས་ལྔ་རུ་གྲོལ་ནས། །སྤང་ཐོབ་གཉིས་འཛིན་ཞིག་པར་མཛོད༴ བསྟན་གཉིས་གཡུང་དྲུང་གླིང་པ༴ སྲིད་ཞི་མཉམ་ཉིད་དབྱིངས་ནས་གཟིགས༴ མོས་གུས་རྣལ་མ་རྒྱུད་ལ་སྐྱེས་ནས། །རྟོགས་གྲོལ་དུས་མཉམ་ཆེན་པོར་མཛོད༴ འཇམ་དབྱངས་ཆོས་ཀྱི་བློ་གྲོས༴ གྲུབ་མཐའ་རྒྱ་མཚོའི་དབུས་ནས་གཟིགས༴ སྣང་སྲིད་བླ་མའི་དཀྱིལ་འཁོར་རྫོགས་ནས། །དག་པ་རབ་འབྱམས་འཆར་བར་མཛོད༴ དྲིན་ཅན་རྩ་བའི་བླ་མ༴ སྤྱི་གཙུག་བདེ་ཆེན་གནས་ནས་གཟིགས༴ རང་རིག་

ཆོས་སྐུའི་རང་ཞལ་མཇལ་ནས། །ཚེ་གཅིག་སངས་རྒྱས་འགྲུབ་པར་མཛོད༴ ཀྱེ་མ། བདག་འདྲའི་སེམས་ཅན་ལན་ངན་སྡིག་ཏོ་ཅན། །ཐོག་མེད་དུས་ནས་འཁོར་བར་ཡུན་རིང་འཁྱམས། །ད་རུང་སྡུག་བསྔལ་མཐའ་མེད་མྱོང་འགྱུར་བས། །སྐྱོ་ཤས་སྐད་ཅིག་ཙམ་ཡང་མ་སྐྱེས་པས། །བླ་མ་མཁྱེན་ནོ་ཐུགས་རྗེས་མྱུར་དུ་གཟིགས། །ངེས་འབྱུང་གཏིང་ནས་སྐྱེ་བར་བྱིན་གྱིས་རློབས། །དལ་འབྱོར་ཐོབ་ཀྱང་མི་ཚེ་སྟོང་ཟད་མཁན། །དོན་མེད་ཚེ་འདིའི་བྱ་བས་རྟག་ཏུ་གཡེང་། །དོན་ཆེན་ཐར་པ་སྒྲུབ་ལ་ལེ་ལོས་ཁྱེར། །ནོར་བུའི་གླིང་ནས་ལག་སྟོང་ལོག་གྱུར་པས། །བླ་མ་མཁྱེན་ནོ༴ མི་ལུས་དོན་ལྡན་འགྲུབ་པར་བྱིན༴ མ་ཤི་ས་སྟེང་ལུས་པ་གཅིག་ཀྱང་མེད། །ད་ལྟ་གཅིག་རྗེས་གཉིས་མཐུད་ཕ་རོལ་འགྲོ། །རང་ཡང་མྱུར་བ་ཉིད་དུ་འཆི་དགོས་ཀྱང་། །ཡུན་རིང་སྡོད་གྲབས་བྱེད་པའི་སྙིང་རུལ་པོ། །བླ་མ༴

ལོང་མེད་བློ་སྣ་ཐུང་བར༴ སྙིང་དུ་སྡུག་པའི་མཛའ་གཤེས་སོ་སོར་འབྲལ། །སེར་སྣས་བསགས་པའི་ནོར་རྫས་གཞན་གྱིས་སྤྱོད། །གཅེས་པའི་ལུས་ཀྱང་ཤུལ་དུ་བོར་ནས་སུ། །རྣམ་ཤེས་བར་དོར་གཏོལ་མེད་འཁོར་བར་འཁྱམས། །བླ་མ༴ ཅིས་ཀྱང་དགོས་མེད་རྟོགས་པར༴ འཇིགས་པའི་མུན་པ་ནག་པོས་སྔོན་ནས་བསུ། །ལས་ཀྱི་རླུང་དམར་དྲག་པོས་རྒྱབ་ནས་དེད། །མི་སྡུག་གཤིན་རྗེའི་ཕོ་ཉས་བརྡེག་ཅིང་བཙོག །བཟོད་དཀའ་ངན་འགྲོའི་སྡུག་བསྔལ་མྱོང་དགོས་ན། །བླ་མ༴ ངན་སོང་གཡང་ལས་ཐར་བར༴ རང་སྐྱོན་རི་བོ་ཙམ་ཡང་ཁོང་དུ་སྦས། །གཞན་སྐྱོན་ཏིལ་འབྲུ་ཙམ་ཡང་སྒྲོག་ཅིང་སྨོད། །ཡོན་ཏན་ཅུང་ཟད་མེད་ཀྱང་བཟང་པོར་རློམ། །ཆོས་པའི་མིང་བཏགས་ཆོས་མིན་ཁོ་ནར་སྤྱོད། །བླ་མ༴ རང་འདོད་ང་རྒྱལ་ཞི་བར༴ གཏན་ཕུང་བདག་འཛིན་འགོང་པོ་ཁོང་དུ་བཅུག །བསམ་ཚད་ཐམས་ཅད་ཉོན་

མོངས་འཕེལ་བའི་རྒྱུ། །བྱས་ཚད་ཐམས་ཅད་མི་དགེའི་འབྲས་བུ་ཅན། །ཐར་པའི་ལམ་དུ་ཕྱོགས་ཙམ་མ་ཕྱིན་པས། །བླ་མ༴ ངར་འཛིན་རྩད་ནས་ཆོད་པར༴ བསྟོད་སྨད་ཙམ་ལ་དགའ་དང་མི་དགའ་སྐྱེ། །ཚིག་ངན་ཙམ་ལ་བཟོད་པའི་གོ་ཆ་ཤོར། །ཉམ་ཐག་མཐོང་ཡང་སྙིང་རྗེའི་སེམས་མི་སྐྱེ། །སྦྱིན་ཡུལ་བྱུང་དུས་སེར་སྣའི་མདུད་པས་བཅིང་། །བླ་མ༴ སེམས་རྒྱུད་ཆོས་དང་འདྲེས་པར༴ འཁོར་བ་སྙིང་པོ་མེད་ལ་སྙིང་པོར་བཟུང་། །ལྟོ་གོས་ཕྱིར་དུ་གཏན་འདུན་ལིང་གིས་བོར། །མཁོ་རྒུ་ཚང་ཡང་དགོས་དགོས་ཕྱིར་ཕྱིར་མང་། །མི་བདེན་སྒྱུ་མའི་ཆོས་ཀྱིས་རང་སེམས་བསླུས། །བླ་མ༴ ཚེ་འདི་བློ་ཡིས་ཐོངས་བར༴ ལུས་སེམས་སྡུག་བསྔལ་ཕྲ་མོའང་མི་བཟོད་ཀྱང་། །ངན་འགྲོར་འགྲོ་ལ་མི་འཚེར་སྙིང་རྡོས་ཅན། །རྒྱུ་འབྲས་བསླུ་མེད་མངོན་སུམ་མཐོང་བཞིན་དུ། །དགེ་བ་མི་འགྲུབ་སྡིག་པའི་ཡོ་

ལང་འཕེལ། །བླ་མ༴ ལས་ལ་ཡིད་ཆེས་སྐྱེ་བར༴ དགྲ་ལ་སྡང་སེམས་གཉེན་ལ་ཆགས་སེམས་སྐྱེ། །བླང་དོར་གནས་ལ་གཏི་མུག་མུན་ལྟར་འཐོམ། །ཆོས་བཞིན་སྤྱོད་ཚེ་བྱིང་མུག་གཉིད་དབང་ཤོར། །ཆོས་མིན་སྤྱོད་ཚེ་དབང་པོ་གསལ་ཞིང་གྲུང་། །བླ་མ༴ ཉོན་མོངས་དགྲ་བོ་ཆོམ་པར༴ ཕྱི་ནས་བལྟས་ན་ཡང་དག་ཆོས་པའི་གཟུགས། །ནང་དུ་རང་སེམས་ཆོས་དང་མ་འདྲེས་པས། །སྦྲུལ་གདུག་བཞིན་དུ་ཉོན་མོངས་ཁོང་ན་སྦས། །རྐྱེན་དང་འཕྲད་ཚེ་ཆོས་པའི་མཚང་རྟགས་སྟོན། །བླ་མ༴ རང་རྒྱུད་རང་གིས་ཐུལ་བར༴ རང་སྐྱོན་ངན་པ་རང་གིས་མ་རྟོགས་པས། །ཆོས་པའི་གཟུགས་ཀྱིས་ཆོས་མིན་སྣ་ཚོགས་སྤྱོད། །ཉོན་མོངས་མི་དགེའི་ལས་ལ་ཤུགས་ཀྱིས་གོམས། །དགེ་བློ་ཡང་ཡང་བསྐྱེད་ཀྱང་ཡང་ཡང་ཆད། །བླ་མ༴ རང་སྐྱོན་རང་གིས་མཐོང་བར༴ ཞག་རེ་སོང་བཞིན་འཆི་ལ་ཕར་ཕར་ཉེ། །ཉིན་རེ་

ལོན་བཞིན་རང་རྒྱུད་ཕྱིར་ཕྱིར་གྱོང་། །བླ་མ་བསྟེན་བཞིན་མོས་གུས་རིམ་གྱིས་འགྲིབ། །མཆེད་ལ་བརྩེ་གདུང་དག་སྣང་ཇེ་ཆུང་སོང་། །བླ་མ༴ རྨུ་རྒོད་རང་རྒྱུད་ཐུལ་བར༴ སྐྱབས་འགྲོ་སེམས་བསྐྱེད་གསོལ་འདེབས་བྱས་ན་ཡང་། །མོས་གུས་སྙིང་རྗེ་གཏིང་ནས་མ་སྐྱེས་པས། །ཚིག་ཙམ་དབང་གྱུར་ཆོས་སྤྱོད་དགེ་སྦྱོར་རྣམས། །བྱས་ལོ་ཙམ་ལས་རྒྱུད་ཐོག་མ་ཁེལ་བས། །བླ་མ༴ ཅི་བྱས་ཆོས་སུ་འགྲོ་བར༴ བདག་བདེ་འདོད་ལས་སྡུག་བསྔལ་ཐམས་ཅད་འབྱུང་། །གཞན་ཕན་སེམས་ཀྱིས་སངས་རྒྱས་འགྲུབ་གསུངས་ཀྱང་། །སེམས་མཆོག་བསྐྱེད་ཅིང་རང་འདོད་ཕུག་ཏུ་བཅུག །གཞན་ཕན་ལྟ་ཅི་གཞན་གནོད་ཞོར་ལ་སྒྲུབ། །བླ་མ༴ བདག་གཞན་བརྗེ་བར་ནུས་པར༴ སངས་རྒྱས་དངོས་སྣང་བླ་མ་མི་རུ་བཟུང་། །གདམས་ཟབ་སྟོན་པའི་བཀའ་དྲིན་ངང་གིས་བརྗེད། །རང་འདོད་མ་བྱུང་ཚེ་ན་ཡི་

ཆད་བསྒོམ། །མཛད་སྤྱོད་རྣམས་ལ་ཐེ་ཚོམ་ལོག་ལྟས་བསྒྲིབས། །བླ་མ༴ མོས་གུས་འགྲིབ་མེད་འཕེལ་བར༴ རང་སེམས་སངས་རྒྱས་ཡིན་ཀྱང་ངོ་མ་ཤེས། །རྣམ་རྟོག་ཆོས་སྐུ་ཡིན་ཀྱང་དོན་མ་རྟོགས། །མ་བཅོས་གཉུག་མ་ཡིན་ཀྱང་སྐྱོང་མ་ནུས། །རབ་བབས་གནས་ལུགས་ཡིན་ཀྱང་ཡིད་མ་ཆེས། །བླ་མ༴ རང་སེམས་རང་སར་གྲོལ་བར༴ ཡོང་ངེས་འཆི་བ་སྙིང་ནས་དྲན་མ་ཐུབ། །ཕན་ངེས་དམ་ཆོས་ཚུལ་བཞིན་སྒྲུབ་མ་ནུས། །བདེན་ངེས་ལས་འབྲས་བླང་དོར་ཚུལ་བཞིན་མེད། །དགོས་ངེས་དྲན་ཤེས་མ་བརྟེན་གཡེང་བས་ཁྱེར། །བླ་མ༴ ཡེངས་མེད་དྲན་པས་ཟིན་པར༴ སྔོན་ལས་ངན་པས་སྙིགས་མའི་དུས་མཐར་སྐྱེས། །སྔར་བྱས་ཐམས་ཅད་སྡུག་བསྔལ་རྒྱུ་རུ་སོང་། །གྲོགས་ངན་རྣམས་ཀྱིས་སྡིག་པའི་གྲིབ་མས་གཡོགས། །དོན་མེད་གླེང་མོས་དགེ་སྦྱོར་གཡེང་བས་ཁྱེར། །བླ་མ༴ ཆོས་ལ་སྙིང་རུས་ནུས་པར༴

དང་པོར་བསམ་རྒྱུ་ཆོས་ལས་མེད་པ་ལ། །ཐ་མ་གྲུབ་འབྲས་འཁོར་བ་ངན་སོང་རྒྱུ། །ཐར་པའི་ལོ་ཏོག་མི་དགེའི་སད་ཀྱིས་བཅོམ། །གཏན་འདུན་ཉེས་པའི་རྨུ་རྒོད་བདག་འདྲ་རྣམས། །བླ་མ་མཁྱེན་ནོ་ཐུགས་རྗེས་མྱུར་དུ་གཟིགས། །དམ་ཆོས་མཐའ་རུ་ཕྱིན་པར་བྱིན་གྱིས་རློབས། །སྐྱོ་ཤས་གཏིང་ནས་སྐྱེ་བར༴ ལོང་མེད་བློ་སྣ་ཐུང་བར༴ འཆི་བ་སྙིང་ནས་དྲན་པར༴ ལས་ལ་ཡིད་ཆེས་སྐྱེ་བར༴ ལམ་ལ་བར་ཆད་མེད་པར༴ སྒྲུབ་ལ་བརྩོན་འགྲུས་ནུས་པར༴ རྐྱེན་ངན་ལམ་དུ་ལོང་བར༴ གཉེན་པོ་རང་ཚུགས་ཐུབ་པར༴ བཅོས་མིན་མོས་གུས་སྐྱེ་བར༴ གནས་ལུགས་རང་ཞལ་མཇལ་བར༴ རང་རིག་སྙིང་དབུས་སད་པར༴ འཁྲུལ་སྣང་གཞི་རྩ་ཆོད་པར༴ ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །གསོལ་བ་འདེབས་སོ་བླ་མ་རིན་པོ་ཆེ། །གདུང་བས་འབོད་དོ་དྲིན་ཅན་ཆོས་ཀྱི་རྗེ། །སྐལ་
དམན་བདག་ལ་རེ་ས་ཁྱེད་ལས་མེད། །ཐུགས་ཡིད་དབྱེར་མེད་འདྲེས་པར་བྱིན་གྱིས་རློབས། །ཚུལ་འདི་མོས་ལྡན་དགེ་སྦྱོང་འགའ་ཞིག་གིས་སྔ་སོར་ནས་བསྐུལ་ཡང་རིམ་ལུས་སུ་གྱུར་པ། ཉེ་ཆར་རིགས་ལྡན་ཆོས་མཛད་མ་བསམ་འགྲུབ་སྒྲོན་མ་དང་། དེ་བ་རཀྴི་ཏ་ཟུང་གིས་ནན་བསྐུལ་ངོར་སྙིགས་དུས་བླ་མའི་གཟུགས་བརྙན་འཛིན་པ་བློ་གྲོས་མཐའ་ཡས་ཀྱིས་རྫོང་ཤོད་བདེ་གཤེགས་འདུས་པའི་སྒྲུབ་གནས་ཆེན་པོར་བགྱིས་པ་དགེ་ལེགས་འཕེལ། །

གཏོར་མའི་རྣལ་འབྱོར་ལ་སྔ་དྲོ་བྱ་དགོས་པའི་ཆུ་གཏོར། མཁས་གྲུབ་ཀརྨ་ཆགས་མེད།

༈ གཏོར་མའི་རྣལ་འབྱོར་ལ་སྔ་དྲོ་བྱ་དགོས་པའི་ཆུ་གཏོར་ནི། གསར་རྙིང་རང་ལུགས་རྒྱས་བསྡུས་གང་རུང་བྱ་བ་ལས་ཟུར་དུ་སྨོས་མ་དགོས་ཀྱང་། རྒྱས་འབྲིང་རྣམས་མི་འགྲུབ་པས་ཤིན་ཏུ་བསྡུས་པ་ལ་མོས་ན། ཟན་རིལ་འབྲུ་སོགས་ལྡན་པའི་ཆུ་ཐེབ་གསུམ། ཆུ་གཙང་ཁོ་ན་བླུགས་པའི་ཐེབ་གཅིག་བཅས་འདུ་བྱས་ལ། སངས་རྒྱས་ཆོས་དང་སོགས། སྐད་ཅིག་རང་ཉིད་ཤཱཀྱ་ཐུབ། །མཆོག་གི་སྤྲུལ་སྐུའི་རྣམ་པར་གྱུར། །ལག་གཡས་རྡོ་རྗེ་རྩེ་གསུམ་པའི་ཕྱག་རྒྱ་བྱས་ལ། ཨོཾ་སརྦ་ཀ་རི་ཧཱུྃ། རིན་པོ་ཆེ་ལས་གྲུབ་པའི་སྣོད། །ཡངས་ཤིང་རྒྱ་ཆེ་རྣམས་ཀྱི་ནང་། །ཨོཾ་སརྦ་སིདྡྷི་ཧཱུྃ།

བཅུད་ནི་བདུད་རྩིའི་རང་བཞིན་གྱུར། །བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་ཀུན་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །འཇིག་རྟེན་ཁམས་ནི་མ་ལུས་པ། །དེ་དག་ཐམས་ཅད་ཅི་རིགས་པ། །ཐོགས་པ་མེད་པར་འབྱུང་བར་ཤོག །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། ཉེར་གཅིག་གམ་བདུན་སོགས་བརྗོད། བླ་མ་ཡི་དམ་དཀོན་མཆོག་སྲི་ཞུའི་མགྲོན། །ཆོས་སྐྱོང་སྲུང་མ་ཕྲིན་ལས་སྒྲུབ་པའི་མགྲོན། །རིགས་དྲུག་འགྲོ་བ་བྱམས་དང་སྙིང་རྗེའི་མགྲོན། །གདོན་བགེགས་ཤ་མཁོན་ལན་ཆགས་བུ་ལོན་མགྲོན། །དེ་དག་སོ་སོར་མཆོད་པས་མཉེས་གྱུར་ཅིག །སྦྱིན་པས་ཚིམས་ཤིང་སྒྲིབ་གཉིས་བྱང་གྱུར་ཅིག །དཀོར་སྒྲིབ་ལན་

ཆགས་ཐམས་ཅད་བསལ་གྱུར་ཅིག །ཀུན་ཀྱང་རྣམ་མཁྱེན་སངས་རྒྱས་ཐོབ་གྱུར་ཅིག ། ༈ ཨོཾ་ཨཱཿཧཱུྃ། མདུན་གྱི་ནམ་མཁར་སྤྱན་རས་གཟིགས༔ འཕགས་པ་རྡོ་རྗེ་སྙིང་པོ་ལ༔ སངས་རྒྱས་བྱང་སེམས་ཡི་དམ་ལྷ༔ མཁའ་འགྲོ་ཆོས་སྐྱོང་ཚོགས་ཀྱིས་བསྐོར༔ འོག་ཏུ་གདོན་བགེགས་རིགས་དྲུག་དང་༔ ཁྱད་པར་ལན་ཆགས་མགྲོན་ཀུན་གསལ༔ སྟོང་པའི་ངང་ལས་བྷྲཱུྃ་ཡིག་ལས༔ བྱུང་བའི་རིན་ཆེན་སྣོད་ཡངས་སུ༔ རང་ལུས་འོད་དུ་ཞུ་བ་ལས༔ གཏོར་མ་བདུད་རྩིའི་རྒྱ་མཚོར་བསམ༔ ཨོཾ་ཨཱཿཧཱུྃ་གིས་བྱིན་གྱིས་བརླབས༔ རང་སེམས་ཁ་སཪྤ་ཎིར་གྱུར༔ མཆོད་སྦྱིན་མགྲོན་ཀུན་མཆོད་པར་བསམ༔ སཾ་བྷ་ར་ཡི་སྔགས་ཀྱིས་ཕུལ༔ ཨོཾ། སྡིག་སྒྲིབ་ཐམས་ཅད་འཇོམས་མཛད་པའི༔ འཕགས་པ་རྡོ་རྗེ་སྙིང་པོ་དང་༔ སྐྱབས་གནས་མཆོད་འོས་རྒྱ་མཚོའི་ཚོགས༔ བདག་ལུས་བདུད་རྩིའི་གཏོར་མ་བཞེས༔ བྱིན་གྱིས་རློབས་ཤིག་སྡིག་

སྒྲིབ་སྦྱོངས༔ དངོས་གྲུབ་སྩོལ་ཅིག་བར་ཆད་སོལ༔ གདོན་བགེགས་འབྱུང་པོ་རིགས་དྲུག་དང་༔ ཁྱད་པར་ལན་ཆགས་མགྲོན་རྣམས་ཀུན༔ ཟག་མེད་བདུད་རྩི་འདི་གསོལ་ལ༔ ལན་ཆགས་བུ་ལོན་བྱང་བར་མཛོད། །གནོད་འཚེ་གདུག་རྩུབ་ཀུན་ཞི་ཞིང་༔ བྱང་ཆུབ་སེམས་དང་ལྡན་པར་ཤོག༔ མཐར་ནི་མཆོད་སྦྱིན་མགྲོན་དང་རྫས༔ དམིགས་མེད་སྟོང་པའི་ངང་ལ་བཞག༔ འདིས་ནི་ཚོགས་རྫོགས་འཆི་བ་བསླུ༔ སྡིག་སྒྲིབ་སྤྱི་དང་ཁྱད་པར་དུ༔ དཀོར་སྒྲིབ་ལན་ཆགས་ངན་པ་སྦྱངས༔ དེ་ཕྱིར་རྒྱུན་དུ་བརྩོན་པར་བྱ༔ ཞེས་སོ། །སྔ་མ་དང་གྲོལ་ན་ཛཾ་གཏོར་གྱི་གོང་དུ་བྱའོ༔ ཕྱི་དྲོའི་ཆ་ལ་བྱ་དགོས་པའི་གཏོར་མ་ནི་འོག་ཏུ་འཆད་པར་འགྱུར་ལ༔ སྔ་དྲོའི་ཆར་བསང་བྱ་བར་སྤྲོ་ན། གྲོང་སྔགས་པའི་ལུགས་ཀྱི་འདོན་བྱ་མང་པོ་ནི་རྣལ་འབྱོར་པ་ལ་དགོས་པ་མེད་པས། རིག་འཛིན་སྲོག་སྒྲུབ་ཀྱི་རི་བོ་བསང་མཆོད་ལྟ་བུ་གནད་དོན་དགོས་པ་ཅན་ཉུང་ངུས་ཆོག་ཤེས་པར་བྱའོ། །ཞེས་བསྔོ། ཐེབ་ཆ་གཅིག་ལ་ཛཾ་གཏོར་བསྡུས་པ་ནི། མདུན་དུ་པད་ཟླར་ཛཾ་ལས་ཛཾ་ལྷ་སེར། །ཤིང་འབྲས་ནེའུ་ལེ་

བསྣམས་ཤིང་རྒྱན་ལྡན་བཞུགས། །པད་ཉིར་ཧཱུྃ་ལས་ཛཾ་ནག་སྦྲུལ་རྒྱན་ཅན། །བཞེངས་སྟབས་ཕྱག་གཉིས་ཐོད་ཁྲག་ནེའུ་ལེ་བསྣམས། །གནས་གསུམ་འབྲུ་གསུམ་འོད་ཀྱིས་ཡེ་ཤེས་བསྟིམས། །དབང་ལྷས་དབང་བསྐུར་རིགས་བདག་དབུ་བརྒྱན་གྱུར། །རང་གི་ལག་མཐིལ་ཟླ་སྟེང་ཡིག་འབྲུ་ལྔ། །རིགས་ལྔ་ཞུ་བའི་བདུད་རྩིའི་ཆུ་རྒྱུན་གྱིས། །རྨ་དང་མེ་ཡི་ཟུག་རྔུ་ཞི་བར་གྱུར། །ཨོཾ་ཛམྦྷ་ལ་ཛ་ལེནྡྲཱ་ཡེ་སྭཱ་ཧཱ། ཞེས་དང་། ཨོཾ་ཨིནྡྲ་ནི་མུ་ཁཾ་བྷྲ་མ་རི་སྭཱ་ཧཱ། ཨོཾ་ཛམླུཾ་སྭཱ་ཧཱ། ཞེས་བརྗོད། ཨརྒྷཾ་སོགས། གནོད་སྦྱིན་ནོར་གྱི་བདག་པོར་ཕྱག་འཚལ་བསྟོད། །སེམས་ཅན་དབུལ་བའི་སྡུག་བསྔལ་ཞི་བར་མཛོད། །ཛཾ་སིདྡྷི་ཕ་ལ་ཨ་ལ་ལ་ཧོཿ ཞེས་གནས་དང་རྟེན་ལ་བསྟིམ། ཐེབ་གཅིག་ལ་ཆུ་སྦྱིན་ནི། རང་ཉིད་ཐུགས་རྗེ་ཆེན་པོར་གྱུར། །འཕགས་པ་སྤྱན་རས་གཟིགས་དབང་གི། །ཕྱག་ནས་བབས་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམས་

བྱས་ནས། །ཁྲུས་བྱས་རྟག་ཏུ་བསིལ་བར་ཤོག །ཨོཾ་མ་ཎི་པདྨེ་ཧཱུྃ། ཨོཾ་ཨཱཿཧྲཱིཿཧཱུྃ། ཞེས་དང་། སམྦྷ་ར་ལན་བདུན་བརྗོད་ལ་སེ་གོལ་གཅིག་གཏོགས། ཟན་འབྲུ་མེད་པའི་ཐེབ་ནང་ཆུ་ཐིགས་རེ་སྦྲེང་། སྔགས་རེ་བརྗོད། གཡོན་པའི་སེ་གོལ་རེ་གཏོགས་པ་ལན་བདུན་ཙམ་བྱས་ལ། ཨོཾ་ཛྭ་ལ་མི་དཾ་སརྦ་པྲེ་ཏེ་བྷྱཿསྭཱ་ཧཱ། ཕྱི་མ་འདི་ནི་ཟས་མ་ཟོས་སྔོན་རོལ་ཁོ་ནར་དགོས་སོ། །སྦྱིན་པ་འདི་ཡི་བསོད་ནམས་གང་། །དེ་དག་ཡི་དྭགས་ཕྱི་བཞིན་སོང་། །ཡི་དྭགས་འཇིག་རྟེན་རབ་འཇིགས་ལས། །དེ་ནི་མྱུར་དུ་ཐར་བར་ཤོག །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ཨོཾ་ཡེ་དྷརྨཱ་སོགས་དང་། སྦྱིན་པ་རྒྱ་ཆེན༴ བསོད་ནམས་འདི་ཡིས་སོགས་ཀྱིས་བསྔོ་སྨོན་བྱའོ། །རྒྱ་གར་བའི་ཕྱག་ལེན་རྒྱ་གཞུང་གི་ཁུངས་དང་འབྲེལ་བ་ནི་ཆབ་གཏོར་འཇམ་དཔལ་མ་དང་ཤཱཀྱ་ཐུབ་མ་གཉིས་ཡིན་ལ། སྔ་མ་ཅུང་ཟད་བྱ་དཀའ་ཞིང་ཕྱི་མ་འདི་སྟབས་བདེ་

བས། ཕྱག་ལེན་སོགས་རྣམ་པར་མ་དག་པའི་འདོན་བྱ་མང་པོ་ལས་འདི་ཙམ་ལག་ལེན་གཙང་དག་བྱུང་ན་ཕན་ཡོན་ཆེ་བ་དང་། ཛཾ་གཏོར་དང་ཆུ་སྦྱིན་ནི་སངས་རྒྱས་ཀྱི་སྤྱོད་པ་བཀའ་རྟགས་ཀྱི་ཕྱག་རྒྱ་ཡིན་པས་རྒྱལ་བའི་རྗེས་འཇུག་ཡིན་ཕྱིན་འདི་ཙམ་ཆགས་སུ་མི་རུང་བ་ཡིན་ནོ། ། ༈ ལན་ཆགས་གཏོར་མ་ནི། རང་ཉིད་སྐད་ཅིག་ཁ་སར་པ་ཎིར་གྱུར། །བྷྲཱུྃ་ལས་རིན་ཆེན་སྣོད་དུ་གཏོར་མ་ནི། །འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨཱཿཧཱུྃ། ལན་གསུམ། དཀོན་མཆོག་གསུམ་གྱི་བདེན་པའི་མཐུ་སྟོབས་ཀྱིས། །བདག་ཅག་དཔོན་སློབ་ཡོན་མཆོད་འཁོར་བཅས་ལ། །གནོད་པའི་ལན་ཆགས་འབྱུང་པོ་འདིར་ཁུག་ཅིག །ཊཱ་ཀི་ཧཱུྃ་ཛཿ བདེ་གཤེགས་རིན་ཆེན་མང་དང་གཟུགས་མཛེས་དང་། །འཇམ་ཀླས་འཇིགས་ཀུན་བྲལ་ལ་ཕྱག་འཚལ་ལོ། །བགེགས་ཆེན་བཞི་དང་སྟོང་ཕྲག་བརྒྱད་ཅུའི་གཤེད། །ནད་བདག་ཡམས་བདག་གོད་འདྲེ་གནོད་བྱེད་ཚོགས། །ལན་ཆགས་བདག་པོ་བདག་མོ་ཐམས་ཅད་
ལ། །ཤ་རིན་ཁྲག་ཚབ་གླུད་གཏོར་འདི་འབུལ་ལོ། །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ གླུད་གཏོར་འདི་ཡིས་མགུ་ཞིང་ཚིམ་གྱིས་ལ། །ཕྱིན་ཆད་ནམ་ཡང་གནོད་པ་མ་བྱེད་ཅིག །གནོད་བྱེད་བགེགས་རིགས་ལན་ཆགས་བདག་པོ་རྣམས། །སོ་སོ་རང་རང་གནས་སུ་གཤེགས་པར་གྱུར། །སརྦ་བྷཱུ་ཏ་གཙྪ། ཨ་རཱ་གས་སོ།། །།

ཟབ་དོན་རྡོ་རྗེ་མཁའ་འགྲོའི་ལས་ཚོགས་ཆུ་སྦྱིན་གྱི་རིམ་པ་ཚོགས་གཉིས་རབ་འཕེལ་ནམ་མཁའི་མཛོད་ཆེན། སྒྲུབ་དཔོན་ཨོ་རྒྱན་ཐེག་མཆོག

༈ ཟབ་དོན་རྡོ་རྗེ་མཁའ་འགྲོའི་ལས་ཚོགས་ཆུ་སྦྱིན་གྱི་རིམ་པ་ཚོགས་གཉིས་རབ་འཕེལ་ནམ་མཁའི་མཛོད་ཆེན་ཞེས་བྱ་བ་བཞུགས་སོ། །བླ་མ་དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །གང་གི་ཐུགས་རྗེའི་བྱིན་རླབས་བསིལ་ཟེར་གྱིས། །སྒྲིབ་གཉིས་ཚ་གདུང་སེལ་དང་མོས་ལྡན་གྱི། །རེ་འདོད་ཀུན་དཱའི་དགའ་ཚལ་བཞད་མཛད་པའི། །བླ་མ་མཆོག་དང་རྡོ་རྗེ་མཁའ་འགྲོར་འདུད། །དེ་ལས་གཞན་དོན་རླབས་ཆེན་གྱི། །རོལ་མཚོ་ནོར་བུ་དགེ་བ་ལས། །སྙིང་རྗེའི་དེད་དཔོན་བརྩོན་ཞུགས་ཏེ། །དགོས་འདོད་འབྱུང་བ་འདི་ན་སྤེལ། །འདིར་རྡོ་རྗེ་མཁའ་འགྲོའི་ལས་ཚོགས་ལས་བསོད་ནམས་ཚོགས་བསགས་

ཀྱི་རིམ་པ་ལས་ཆབ་གཏོར་གྱི་ཆོ་ག་ལག་ལེན་དང་བཅས་པ་གསལ་བར་བཀོད་པ་ལ། སྦྱོར་བ་དངོས་གཞི་རྗེས་གསུམ་ལས། དང་པོ་གང་དུ་བྱ་བའི་གཞི་གནས་གཙང་མར་བྱས་པའི་སར་གཏོར་སྣོད་རིན་པོ་ཆེའི་ཐེབ་བདུན་ནམ་དྲུག་གང་འཛོམས་དང་། ཆུ་འགྲམ་སོགས་ལ་མི་དགོས་ཀྱང་གནས་ཁང་སོགས་ས་དེར། སྣོད་དང་གཏོར་རིལ་ཏིང་ཤག་སོགས་འདུ་བྱས་ལ་སྟན་བདེ་བར་འཁོད་ནས། གཉིས་པ་འདི་ནངས་པར་ཟས་ལ་མ་རེག་པའི་གོང་དུ་ཞོག་ཆུ་གཙང་མ་སྡེར་རམ་ཁྱོར་པ་གང་རུང་གིས་འཛིན་ལ། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མཿས་མནྟ་སྥ་ར་ན་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ༔ ཡེ་ཤེས་སྐར་མདའི་སྔགས་ཀྱིས་ལན་བདུན་བསྔོ། དེ་ནས་སྐྱབས་སེམས་བྱ་བ་ནི། མདུན་མཁར་བླ་མ་ཐུགས་རྗེ་ཆེན་པོ་ལ་འཁོར་དཀོན་མཆོག་གསུམ་དང་རྩ་གསུམ་རྒྱ་མཚོས་བསྐོར་བ་བཞུགས་པར་གྱུར་པར་མོས། ན་མོ༔ སྐུ་གསུམ་བདག་ཉིད་ཆེན་པོ་བླ་མ་དང་༔ མ་ཆགས་པདྨའི་རིགས་མཆོག་སངས་རྒྱས་དཔལ༔ ཐེག་མཆོག་གསུང་རབ་བྱང་

སེམས་འཕགས་པའི་ཚོགས༔ ཀུན་ལ་བདག་གཞན་འགྲོ་རྣམས་སྐྱབས་སུ་མཆི༔ འགྲོ་ཀུན་མ་ལུས་སངས་རྒྱས་སར་འགོད་ཕྱིར༔ དང་པོར་བདག་ཉིད་བླ་མེད་བྱང་ཆུབ་བསྒྲུབ༔ བླ་མ་བདེ་གཤེགས་རྩ་གསུམ་རྒྱ་མཚོ་ལ༔ ཕྱག་འཚལ་མཆོད་འབུལ་མི་དགེའི་སྡིག་ལྟུང་བཤགས༔ མི་འདའ་བཞུགས་གསོལ་ཆོས་འཁོར་བསྐོར་བར་བསྐུལ༔ དགེ་ལ་ཡི་རང་བསོད་ནམས་འགྲོ་ལ་བསྔོ༔ རང་ཉིད་ཐུགས་རྗེ་ཆེན་པོ་ནི༔ ཁ་སརྤ་ཎི་སྐུ་མདོག་དཀར༔ ཞལ་གཅིག་ཕྱག་གཡས་མཆོད་སྦྱིན་དང་༔ གཡོན་པས་སྐྱབས་སྦྱིན་པད་དཀར་བསྣམས༔ ལོངས་སྤྱོད་རྫོགས་སྐུའི་ཆ་བྱད་ཅན༔ སེམས་དཔའི་སྐྱིལ་ཀྲུང་པད་ཟླར་བཞུགས༔ གདོད་ནས་དམ་ཡེ་དབྱེར་མེད་པ༔ མཆོད་སྦྱིན་ལས་ལ་འཇུག་པར་བསམ༔ དེ་ནས་ཆུ་གཙང་ཁོ་ན་བཤམས་ལ། ཨོཾ་བཛྲ་ཨ་མྲྀ་ཏ་སོགས་ལས་སྔགས་བརྗོད། སྭ་བྷཱ་ཝས་

སྦྱང་། ཨོཾ་ཨཱཿཧཱུྃ་གིས་བྱིན་བརླབ། དེ་ནས་ཆུ་སྦྲེང་ཞིང་། ཨོཾ་མ་ཎི་པདྨེ་ཧཱུྃ། ཨོཾ་ཛྭ་ལ་མི་དཾ་སརྦ་པྲེ་ཏེ་བྷྱ་སྭཱ་ཧཱ། ལན་བདུན་བརྗོད་ལ་སེ་གོལ་གཏོགས། ཨོཾ་ཨ་པྲ་ཏི་སུ་རུ་ཕུ་པ་ཡེ་སྭཱ་ཧཱ། སྔགས་ཀྱིས་ཀྱང་བསྔོས་ལ་བཤལ་ཆུ་བྱ། ཡང་སྔར་བཞིན་བཤམས་ལ་གཏོར་རིལ་བཅས་བསང་སྦྱང་བྱིན་རླབས་བྱས་ནས་དེ་ནས་དེ་བཞིན་གཤེགས་པ་བཞིའི་མཚན་བརྗོད། ཨོཾ། བདེ་གཤེགས་བཞི་ཡི་བྱིན་རླབས་ཡེ་ཤེས་ཆུས༔ འགྱུར་གེགས་ཟས་ལ་མི་དབང་ཀུན་ཚིམ་ནས༔ འདོད་ཡོན་ལྷ་མིའི་ཟས་ལ་སྤྱོད་པར་ཤོག༔ བྱིན་རླབས་རོ་ནུས་ལྡན་པའི་ལྷ་ཟས་ཆུས༔ ཕྱི་ནང་སྒྲིབ་ཅན་ལྟོ་བ་བདེ་བ་དང་༔ ཕྲ་ཉམས་མགྲིན་པའི་ནད་དང་བཀྲེས་པ་སེལ༔ ཟ་འདྲེ་གཤིན་ལྕགས་འཕྲོག་མ་ཡུལ་གདོན་ལ༔ མཁོ་དགུའི་ལོངས་སྤྱོད་ཟག་མེད་མཆོད་སྤྲིན་བསྔོ༔ སྔོན་གྱི་ལན་ཆགས་ད་ལྟའི་ཤ་མཁོན་སོགས༔ བུ་ལོན་འབྲེལ་བ་བཟང་ངན་གང་ཡོད་ལ༔ ཟག་མེད་ཡེ་ཤེས་བདུད་རྩིའི་ཆུ་སྦྱིན་

གྱིས༔ བྱམས་པའི་ལན་གསོལ་སྙིང་རྗེའི་དམིགས་མེད་སྦྱིན༔ དགའ་བས་ཤ་མཁོན་མགྲོན་རྣམས་མགུ་བར་སྤྱོད༔ ཨོཾ་བཛྲ་པ་ཎི་ཧཱུྃ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀེ་ཨོཾ་སམྦྷ་ར་སམྦྷ་ར་ཧཱུྃ། སྔགས་ལན་བདུན་བརྗོད། ཁྱད་པར་གནོད་སྦྱིན་ཀུན་ཏུ་གཏོགས་འདོད་དང་༔ ཝཱ་ར་ཧི་ཏ་འབྱུང་པོ་བྱེ་བའི་ཚོགས༔ ཀུན་ལ་ཟག་མེད་མཆོད་པ་འདི་འབུལ་ལོ༔ བཞེས་ནས་བུ་ལོན་ལན་ཆགས་བྱང་བ་དང་༔ ཤ་མཁོན་ལས་ངན་འབྲེལ་ཀུན་རྒྱུན་ཆད་ནས༔ བླ་མེད་ཐེག་ཆེན་འབྲས་བུར་སྤྱོད་པར་ཤོག༔ ཨོཾ་བཛྲ་པ་ཎི་ཧཱུྃ༔ ན་མཿསརྦ་ཏ་ཐཱ་ག་ཏ་སོགས་ལན་བདུན་བརྗོད། དེ་ནས་ཁྱད་པར་མགྲོན་བཞིར་ཆུ་གཙང་དཀར་གསུམ་ཟས་ཕུད་བཤམས་ལ། ཨོཾ་བཛྲ་ཨྲྀ་ཏ་སོགས། ཨོཾ་སྭ་བྷཱ་སོགས། དངོས་འཛིན་མཚན་མའི་བག་ཆགས་སྦྱངས༔ སྟོང་ཉིད་ངང་ལས་རིན་ཆེན་སྣོད༔ མཛེས་ཤིང་ཡིད་འོང་རྒྱ་ཆེ་བར༔ གཏོར་རྫས་འབྲུ་གསུམ་ཡི་གེ་

ལས༔ འོད་འཕྲོས་ཡེ་ཤེས་བདུད་རྩི་བཀུག༔ ཐིམ་ཞིང་ཞུ་བའི་ཁ་དོག་དང་༔ དྲི་རོ་ནུས་བཅུད་ཕུན་ཚོགས་པ༔ དམ་ཚིག་ཡེ་ཤེས་དབྱེར་མེད་པའི༔ ཟག་མེད་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ རང་གི་ཐུགས་ཀའི་འོད་ཟེར་གྱིས༔ མགྲོན་རིགས་མ་ལུས་སྤྱན་དྲངས་ནས༔ ནམ་མཁའ་ས་གཞི་བར་སྣང་ཀུན༔ ཁྱབ་ཅིང་དགྱེས་པར་བཞུགས་སུ་གསོལ༔ ཨོཾ་གུ་རུ་དེ་ཝ་ཌཱ་ཀི་ནི་དྷརྨཱ་པ་ལ་ཛྙཱ་ན་སརྦ་ལོ་ཀ་པ་ལ་ས་པཱ་རི་ཝ་ར་ཨེ་ཧྱ་ཧི་པདྨ་ཀཱ་མ་ལ་ཡ་སྟྭཾ༔ དངོས་དང་ཡིད་ཀྱིས་རྣམ་སྤྲུལ་པའི༔ ཞིང་གི་རྡུལ་སྙེད་ལུས་སྤྲུལ་ནས༔ དད་མོས་དང་བས་ཕྱག་འཚལ་ལོ༔ ཕྱི་ནང་གསང་བ་ཡང་དག་མཆོད༔ སྒོ་གསུམ་མི་དགེའི་སྡིག་ལྟུང་བཤགས༔ བསོད་ནམས་ཀུན་ལ་རྗེས་ཡི་རང་༔ རྒྱལ་དང་དེ་སྲས་མགོན་པོ་རྣམས༔ རྣམ་མཁྱེན་བྱང་ཆུབ་ཐོབ་ཕྱིར་བསྔོ༔ ཨོཾ་བཛྲ་ཨརྒྷཾ་སོགས། ཤབྟ་སརྦ་རཏྣ་

པཱུ་ཛ་ཏཱིཙྪ་ཧོ༔ བླ་མ་ཡི་དམ་དཔའ་བོ་མཁའ་འགྲོ་དང་༔ སངས་རྒྱས་བྱང་སེམས་དཀོན་མཆོག་སྲི་ཞུའི་མགྲོན༔ ཆོས་སྐྱོང་དཔལ་མགོན་དྲེགས་པ་སྡེ་བརྒྱད་དང་༔ དཀར་ཕྱོགས་ལྷ་ཀླུ་ཡུལ་ལྷ་གཞི་ཡི་བདག༔ མགོན་པོ་ཡོན་ཏན་མགྲོན་རིགས་བཅས་པ་ལ༔ མཆོད་སྦྱིན་བདུད་རྩིའི་གཏོར་མ་འདི་འབུལ་ལོ༔ ན་མཿསརྦ་ཏ་ཐཱ་ག་ཏ་སོགས་ལན་བདུན། ཚོགས་གཉིས་རབ་རྫོགས་བྱིན་རླབས་དངོས་གྲུབ་སྩོལ༔ རྟེན་འབྲེལ་ཕྱོགས་མེད་ལས་བཞིའི་ཕྲིན་ལས་ཀུན༔ ཐོགས་མེད་མྱུར་དུ་འགྲུབ་པར་མཛད་དུ་གསོལ༔ ཨོཾ་ཨཱཿཧཱུྃ༔ ཛམ་ལྷ་རིགས་ལྔ་རྣམ་སྲས་རྟ་བདག་བརྒྱད༔ སེམས་མ་ནོར་རྒྱུན་མ་དང་གྲོགས་མོ་བརྒྱད༔ ཀླུ་ཆེན་བརྒྱད་དང་གདེང་ཅན་ནོར་གྱི་བདག༔ ཀུན་ལ་དཀར་གསུམ་མངར་གསུམ་བདུད་རྩི་འབུལ༔ ན་མཿསརྦ་ཏ་ཐཱ་ག་ཏ་ཨ་བ་སོགས་ལན་བདུན། དབུལ་ཕོངས་

རྒུད་སེལ་འབྲུ་ནོར་ལོངས་སྤྱོད་དང་༔ རྐང་འགྲོ་དཀོར་ནོར་ཟས་གོས་རིན་ཆེན་གཏེར༔ འབད་མེད་ཆར་བཞིན་རྟག་ཏུ་འབེབས་པར་མཛོད༔ སརྦ་སིདྡྷི་ཕ་ལ་ཧོ༔ ཨོཾ་ཨཱཿཧཱུྃ༔ བདུད་རྩིའི་རྒྱུན་གྱིས་འགྲོ་བ་རིགས་དྲུག་དང་༔ དབང་མེད་བར་དོར་འཁྱམས་པའི་སེམས་ཅན་ཀུན༔ འདོད་ཡོན་ཟག་པ་མེད་པའི་བདེ་བས་ཚིམ༔ ལྷན་སྐྱེས་འདྲེ་གདོན་ཟས་ནོར་ལན་ཆགས་བགེགས༔ ཚེ་སྲོག་ལུས་ཀྱི་ཤ་མཁོན་སྙེག་རྣམས་ལ༔ རང་མཐུན་བདུད་རྩིའི་མཆོད་སྦྱིན་འདི་འབུལ་ལོ༔ ན་མཿསརྦ་ཏ་ཐཱ་ག་ཏ་སོགས་ལན་བདུན། གནོད་སེམས་གདུག་རྩུབ་འཇིགས་སྐྲག་སྡུལ་བསྔལ་ཞི༔ བྱང་ཆུབ་སེམས་སྐྱེས་སྒྲིབ་པའི་རྒྱུ་དང་བྲལ༔ ཀུན་ཀྱང་རྣམ་མཁྱེན་སངས་རྒྱས་ཐོབ་པར་ཤོག༔ ཨོཾ་ཨཱཿཧཱུྃ༔ ལུས་ཀྱི་ནད་འདྲེ་སེམས་ཀྱི་སྡུག་བསྔལ་ཞི༔ འབྱུང་བ་ལོ་ཟླ་ཞག་དང་ཚེས་ཀྱི་བདག༔ དུས་ཀྱི་དབྱུག་གུ་དྲུག་ཅུ་

རྩ་བཞི་དང་༔ ཚེ་སྲོག་འཕྲོག་བྱེད་བདུད་བཞི་བགེགས་ཆེན་བཅུ༔ ཚེ་འཆི་སྲོག་བདག་གཤིན་རྗེ་བྱེ་བའི་དཔུང་༔ མ་ལུས་ཀུན་ལ་ཚེ་སྐྱིན་ལུས་ཀྱི་གླུད༔ སྲོག་དབུགས་མདངས་ཚབ་མཆོད་སྦྱིན་འདི་འབུལ་ལོ༔ ཨོཾ་ཡ་མནྟ་ཐ་ན་གུཾ་ཨ་མྲྀ་ཏེ་སྭཱ་ཧཱ༔ ན་མཿསརྦ་ཏ་ཐཱ་ག་ཏ་སོགས་ལན་བདུན། ཚེ་སྲོག་ལུས་ལ་གནོད་པ་མ་བྱེད་པར༔ ན་བ་གསོས་དང་འཆི་བ་མལ་ནས་སློངས༔ རྐུ་འཕྲོག་སོར་ཆུད་བཅིངས་ཁྲོལ་མནན་པ་ཁྱོགས༔ འཁོན་འགྲས་འགྲམ་འཁྲུགས་ཐུགས་འགལ་བཤགས་ཤིང་སྡོམ༔ གནོད་སེམས་གདུག་རྩུབ་ཞི་ནས་ཕན་སེམས་སྐྱེས༔ ཚེ་རིང་ནད་མེད་བདེ་སྐྱིད་ལྡན་པར་མཛོད༔ ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོགས་པ་གང་ཡིན་པ། །དགེ་སྦྱོང་ཆེན་པོ་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་

ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །མ་རྙེད་ཡོངས་སུ་མ་ཚང་བ། །གང་ཡང་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱེད་ཀྱིས་བཟོད་མཛད་རིགས། །དབྱངས་གསལ་ཡིག་བརྒྱ་ལན་གསུམ་བརྗོད། ཨོཾ་ཨཱཿཧཱུྃ༔ གཏོར་མགྲོན་ཡེ་ཤེས་ཚོགས་རྣམས་རང་ལ་ཐིམ༔ འཇིག་རྟེན་པ་ཀུན་རང་གནས་བཛྲ་མུ༔ འཕགས་པ་སྤྱན་རས་གཟིགས་དབང་གི། །ཕྱག་ནས་བབས་པའི་འོ་རྒྱུན་གྱིས། །ཡི་དྭགས་རྣམས་ནི་ཚིམ་བྱས་ཤིང་། །ཁྲུས་བྱས་རྟག་ཏུ་བསིལ་བར་ཤོག །གང་གིས་སྦྱིན་པ་གང་ལ་སྦྱིན། །སྦྱིན་པ་ཇི་ལྟར་མི་དམིགས་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་རྣམས་ལ་ཡོངས་རྫོགས་ཤོག །རྒྱལ་པོ་སྦྱིན་བདག་ཉིད་དང་ནི། །སེམས་ཅན་དབུལ་བ་གཞན་དག་རྣམས། །ཚེ་རིང་ནད་མེད་ལོངས་སྤྱོད་

ལྡན། །གཏན་དུ་བདེ་བ་ཐོབ་པར་ཤོག །དེ་ལྟར་ཆུ་ཡི་སྦྱིན་པ་འདིས། །ཆུ་དག་ཀུན་ཀྱང་ཚོགས་རྫོགས་ནས། །ཆུ་སྦྱིན་བྱས་པའི་སེམས་ཅན་རྣམས། །བདེ་བ་ཅན་དུ་སྐྱེ་བར་ཤོག །དེ་ཚེ་ཕྱག་རྒྱ་སེ་གོལ་གཏོགས་ཏིང་ཤག་འཁྲོལ་ལ། སྔོན་མཇུག་གི་བཤལ་ཆུ་སོགས་ཕྱག་ལེན་ལྷག་ཆད་མ་སོང་བ་མཐོང་བརྒྱུད་ལྟར་བྱའོ། །དེ་ལྟར་ཆུ་སྦྱིན་འབུམ་ཐེར་སོགས་ཀྱི་ཚེ་གོང་གི་ཡི་དྭགས་ཆུ་སྦྱིན་ཚན་གཉིས་ཀྱི་སྐབས་ཕྱག་རྡོར་སྔགས་དང་སྦྲེལ་བ་བདུན་ཏེ། དངོས་གཞི་མགྲོན་ཚན་བཞིའི་དངོས་ལ་ཁ་འབར་སྔགས་བདུན་ཚོ་བདུན། དེ་ཕྱིར་མགྲོན་ཚན་གསུམ་ལ་བདུན་གཉིས་རེ་བྱས་པས་ཆོག ཚར་རེ་ལ་བརྒྱ་ལྷག་འགྲོ་བས་གྲངས་འཛིན་ཚུལ་དེ་ལྟར་བྱ། ཞེས་པའང་སྒྲུབ་དཔོན་ཨོ་རྒྱན་ཐེག་མཆོག་ནས་འདི་ལྟར་དགོས་ཞེས་བསྐུལ་ངོར། སྙོམ་ལས་པ་ཀུན་བཟང་རྡོ་རྗེས་བྲིས་པ་འགྲོ་ཀུན་བདེ་དགེའི་དཔལ་ལ་སྤྱོད་པའི་རྒྱུར་གྱུར་ཅིག །སརྦ་མངྒ་ལཾ། །དགེའོ།། །།

སྤྱི་འབྱམས་གནས་བསྟོད། མཁས་གྲུབ་ཀརྨ་ཆགས་མེད།

༈ སྤྱི་འབྱམས་གནས་བསྟོད་ནི། ན་མོ་གུ་རུ་པདྨ་སམྦྷ་ཝ། ཧཱུྃ། གནས་རི་བོ་གར་མཛད་ཨོཾ་གྱི་ཚུལ། །ཨཱཿ སྐྱེ་མེད་ཆོས་སྐུའི་
ཡིག་འབྲུས་བརྒྱན། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །གནས་རྡོ་རྗེའི་བྲག་ལ་འབྲུ་དྲུག་བྱོན། །གསུང་ཡིག་དྲུག་མགོན་པོ་སྤྱན་རས་གཟིགས། །ལོངས་སྐུ་ཐུགས་རྗེ་ཆེན་པོ་ལ་གསོལ༴ རིགས་དྲུག་སྐྱེ་སྒོ་ཆོད་པར་བྱིན༴ གནས་སྤྱི་འབྱམས་ཨོ་རྒྱན་སྒྲུབ་པའི་ཕུག །གནས་དེ་ན་སྤྲུལ་པ་རྒྱུན་མི་འཆད། །སྤྲུལ་སྐུ་པདྨ་འབྱུང་གནས་ལ་གསོལ༴ ཚེ་ཡི་རིག་འཛིན་ཐོབ་པར་བྱིན༴ སྐུ་མི་ཟད་རྒྱན་གྱི་འཁོར་ལོའི་གནས། །སྐུ་རང་བྱོན་དང་སྐུ་ཚབ་མང་དུ་བཞུགས། །དུས་གསུམ་རྒྱལ་བའི་སྐུ་ལ༴ ལུས་ཀྱི་སྒྲིབ་པ་དག་པར་བྱིན༴ གསུང་མི་ཟད་རྒྱན་གྱི་འཁོར་ལོའི་གནས། །གསུང་ཡིག་འབྲུ་དང་ཤོག་སེར་དཔག་མེད་བྱོན། །དུས་གསུམ་རྒྱལ་བའི་གསུང་ལ་གསོལ༴ ངག་གི་སྒྲིབ་པ་དག་པར་བྱིན༴ ཐུགས་མི་ཟད་རྒྱན་གྱི་འཁོར་ལོའི་གནས། །

ཐུགས་མཆོད་རྟེན་དང་རིང་བསྲེལ་མང་དུ་བཞུགས། །དུས་གསུམ་རྒྱལ་བའི་ཐུགས་ལ༴ སེམས་ཀྱི་སྒྲིབ་པ་དག་པར་བྱིན༴ གནས་དག་པ་མཁའ་སྤྱོད་དང་གཉིས་སུ་མེད། །སྐུ་ཡིག་འབྲུ་དང་ཕྱག་མཚན་བསམ་མི་ཁྱབ། །ཡི་དམ་ཞི་ཁྲོ་རབ་འབྱམས་ལ་གསོལ༴ མཆོག་གི་དངོས་གྲུབ་ཐོབ་པར་བྱིན༴ གནས་སྒྲུབ་ཕུག་མཁའ་འགྲོའི་ཚོགས་ཁང་ན། །ལྷ་མཁའ་འགྲོ་ཆོས་སྐྱོང་སྤྲིན་ལྟར་འཁྲིགས། །གནས་གསུམ་དཔའ་བོ་མཁའ་འགྲོ་ལ་གསོལ༴ རྐྱེན་ངན་བར་ཆད་ཞི་བར་བྱིན༴ གནས་བདག་དང་ཞིང་སྐྱོང་སྲུང་མའི་ཚོགས། །རྐྱེན་ཕྱི་དང་ནང་གི་བར་ཆད་སོལ། །འཇིག་རྟེན་ཀུན་བདེ་ཞིང་སྐྱིད་པ་དང་། །བཀྲ་ཤིས་དང་བདེ་ལེགས་མཛད་དུ་གསོལ། །རིག་འཛིན་མཁའ་འགྲོ་བདེན་པའི་བྱིན་རླབས་ཀྱིས། །དེང་འདིར་གནས་ཀྱི་བཀའ་ཉན་ཚོགས་བཅས་ཀྱིས། །སྔོན་ཚེ་པདྨ་འབྱུང་གནས་
བཀའ་བཞིན་དུ། །རྟག་ཏུ་བསྲུང་ཞིང་སྐྱོབ་པའི་ལས་གྱིས་ཤིག །སྔགས་འཆང་རཱ་ག་ཨ་སྱས་གནས་འབྲེལ་བྱེད་སྐབས་བྲིས་པའོ།། །།

སྤྱི་འབྱམས་བསང་མཆོད་དངོས་གྲུབ་ཆར་འབེབས།

༈ སྤྱི་འབྱམས་བསང་མཆོད་དངོས་གྲུབ་ཆར་འབེབས་ཞེས་བྱ་བ་བཞུགས་སོ། །མཆོད་རྫས་བྱིན་གྱིས་བརླབ་པ་ནི། ཨོཾ་བཛྲ་ཨ་མྲྀ་ཏ༴ ཨོཾ་སྭ་བྷཱ་ཝ༴ བསང་རྫས་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་དྲི་བཟང་གི་མཆོད་པ། རྩི་ཤིང་སྣ་ཚོགས་ཀྱི་དུད་པ། ཞལ་ཟས་ཕྱེ་མར་གྱི་འོ་བསྐོལ། གསུར་གྱི་དུད་སྤྲིན་ཆེན་པོ། དུ་བ་ཡེ་ཤེས་ཀྱི་བདུད་རྩིས་ས་དང་བར་སྣང་ཐམས་ཅད་ཁྱབ་ཅིང་། གཟུགས་མཛེས་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ། བཟའ་བས་མི་ཟད་པ། བཏུང་བས་མི་ཟད་པ། རྒོལ་བས་མི་སྡིག་པ། རི་རྒྱལ་བས་དཔང་མཐོ་བ། རྒྱ་མཚོ་བས་གཏིང་ཟབ་

པ། ཞིང་རྡུལ་བས་གྲངས་མང་བ། ལྷོ་སྤྲིན་བས་རྔམས་འཐུག་པ། ཉི་ཟླ་བས་འོད་གསལ་བ། རྒྱ་ཁྱོན་ནམ་མཁའི་མཐའ་དང་མཉམ་པའི་མཆོད་པ། ནད་པ་གསོ་བའི་སྨན་པ། འཆི་བ་བསླུ་བའི་བདུད་རྩིའི་རྒྱ་མཚོ་ཆེན་པོར་གྱུར། ན་མཿསརྦ་ཏ་ཐཱ་ག་ཏ་བྷྱོ་བི༴ ཨོཾ་ཨཱཿཧཱུྃ་ཨོཾ་ཨ་ཀཱ་རོ༴ ཨོཾ་རུ་རུ༴ ཨོཾ་བཛྲ་ཨ་མྲྀ༴ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་སོགས་བརྗོད། དུ་བ་འདི་ཡི་ལྷ་མོ་སྐུ་མདོག་སྔོན་མོ་ཞལ་གཅིག་ཕྱག་གཉིས་མ། གཡས་པས་བདུད་རྩིའི་བུམ་པ་འཛིན་པ། གཡོན་པས་སྨན་གྱིས་གང་བའི་གཞོང་པ་འཛིན་པ། ཞལ་འཛུམ་བག་དང་ལྡན་པ། གཡས་བུམ་པའི་ནང་ནས་བདུད་རྩི་བྱུང་བས། ས་བདག་ཀླུ་གཉན་འགོ་བའི་ལྷ་ལ་སོགས་པ་ལ་ཁྲུས་བྱས། སྡིག་སྒྲིབ་ནད་གདོན་ཐམས་ཅད་ཕྱགས། འབག་བཙོག་ཐམས་ཅད་བདུད་རྩིས་བཀྲུས་ནས་དག་པར་བྱས། གཡོན་པའི་ནང་ནས་སྨན་དཔག་ཏུ་

མེད་པ་དྲི་བཟང་ཐུ་ལུ་ལུ་བྱུང་བས། ས་བདག་ཀླུ་གཉན་ཐམས་ཅད་ཀྱི་རྨུགས་པ་སངས་ནས་སངས་རྒྱས་ཀྱི་བཀའ་རྗེས་སུ་དྲན་ཏེ། བདག་ལ་ཅི་འདོད་པའི་སྡོང་གྲོགས་བྱེད་པར་གྱུར། གཞན་ཡང་ཕྱེ་མར་ནི་གངས་རི་ལྟར་སྤུངས་པ། ཕྱེ་དུད་ནི་སྤྲིན་ཕུང་ལྟར་གཏིབས་པ། དྲི་ཞིམ་གསུར་དུད་སྣ་ཚོགས་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་འདི་དག་བསྔོ་ཞིང་འབུལ་བའི་གནས་སུ་གྱུར་པ་ནི། ཨོཾ་ཨཱཿཧཱུྃ་ལན་གསུམ། ༈ ན་མོ་དཀོན་མཆོག་གསུམ་དང་རྩ་བ་གསུམ། །སྐྱབས་གནས་རྣམས་ལ་སྐྱབས་སུ་མཆི། །འགྲོ་ཀུན་བདེ་ལ་འགོད་པའི་ཕྱིར། །སྤྱི་འབྱམས་གནས་ལ་བསང་མཆོད་བྱ། །ཆོས་ཀུན་སྟོང་ཉིད་རྫོགས་པ་ཆེ། །དེ་ཡི་རང་མདངས་དྲན་རྫོགས་སུ། །རང་ཉིད་རྡོ་རྗེ་གྲོ་བོ་ལོད། །སྨུག་ནག་སྤྱན་གསུམ་ཨཾ་གཙིགས་བསྡམས། །ཐོར་ཚུགས་དར་དམར་ཅོད་པན་འཕུར། །ཕོད་ཁ་ཆོས་གོས་མགོ་ཕྲེང་

བརྒྱན། །རྡོ་རྗེ་ཕྱར་ཞིང་ཕུར་པ་གཟིར། །སྟག་མོའི་སྟེང་ན་མདོར་སྟབས་བཞུགས། །ཡེ་ནས་དམ་ཡེ་དབྱེར་མེད་པའི། །ཐུགས་སྲོག་ཧཱུྃ་ལས་འོད་འཕྲོས་པས། །བསང་མགྲོན་ཐམས་ཅད་སྤྱན་དྲངས་གྱུར། །༓ སྐུ་གསུམ་དག་པའི་ཞིང་ཁམས་ནས། །འཇིག་རྟེན་འདས་དང་མ་འདས་པའི། །ལྷ་སྲུང་ཐམས་ཅད་གཤེགས་སུ་གསོལ། །ནམ་མཁའ་བར་སྣང་ས་གཞི་ལ། །སྤྲིན་ཕུང་གཏིབས་ལྟར་གདན་ལ་བཞུགས། །དངོས་འབྱོར་ཡིད་ལས་སྤྲུལ་པ་ཡི། །ཀུན་བཟང་མཆོད་སྤྲིན་རྒྱ་མཚོས་མཆོད། །བསྟོད་དབྱངས་ཡན་ལག་དྲུག་ཅུས་བསྟོད། །དྷཾ་ལས་དུ་བའི་ལྷ་མོ་སྔོ། །མཛེས་སྡུག་དར་དང་རིན་ཆེན་བརྒྱན། །ཕྱག་གཡས་ཁྲུས་བུམ་ཉམས་སྒྲིབ་བཀྲུ། །གཡོན་པས་སྨན་གྱི་གཞོང་པ་ནས། །སྤོས་ཀྱི་དུད་སྤྲིན་སྟོང་གསུམ་ཁྱབ། །སྤོས་སྤྲིན་འཁྲིགས་པའི་དྲྭ་བ་ཡིས། །སངས་རྒྱས་ཞིང་ཀུན་

ཐམས་ཅད་ཁྱབ། །དུ་བའི་ཆ་ཤས་རེ་རེ་ལ། །བཀྲ་ཤིས་རྫས་རྟགས་རིན་ཆེན་བདུན། །འདོད་ཡོན་རྣམ་ལྔ་ཆར་དུ་འབེབས། །བཛྲ་དྷུ་པེས་བྱིན་བརླབས་ནས། །དེ་འདྲའི་ཡ་མཚན་བསང་མཆོད་འདིས། །སྣང་སྲིད་འཁོར་འདས་སྣོད་བཅུད་ཀུན། །ཀ་དག་གནས་སུ་བྱིན་རླབས་པའི། །དང་པོའི་སངས་རྒྱས་གདོད་མའི་མགོན། །ཆོས་སྐུ་ཀུན་བཟང་ཡབ་ཡུམ་བསང་། །འོག་མིན་ཆེན་པོའི་གནས་མཆོག་ལྔར། །ངེས་པ་ལྔ་ལྡན་རྟག་ཏུ་བཞུགས། །ཞི་ཁྲོ་རབ་འབྱམས་འཁོར་དང་བཅས། །གངས་ཆེན་མཚོ་རྒྱལ་རིགས་ལྔ་བསང་། །སྔོན་ཚེ་རྫོགས་ཆེན་ཆོས་འཁོར་བསྐོར། །གྲངས་མེད་འགྲོ་བ་བདེ་ལ་བཀོད། །སྐལ་མགོན་དྲུག་ཅུ་རྩ་གཉིས་དང་། །རྫོགས་ཆེན་སྟོན་པ་བཅུ་གཉིས༴ དབང་ཕྱུག་ཡབ་ཡུམ་དམ་ལ་བཏགས། །འཛམ་གླིང་གནས་ཀུན་བྱིན་གྱིས་བརླབས། །འཁོར་ལོ་སྡོམ་པ་ཡབ་དང་ཡུམ། །དྲུག་

ཅུ་རྩ་གཉིས་ལྷ་ཚོགས༴ བདུད་པོ་མ་ཊཾ་རུ་དྲ་བཏུལ། །རྒྱ་བོད་གནས་ཀུན་བྱིན་གྱིས་བརླབས། །ཡི་དམ་རྟ་ཕག་ཡབ་ཡུམ༴ སྐུ་ནི་བོད་དུ་མ་ཕེབས་ཀྱང་། །ཞལ་གྱི་འོད་ཟེར་བོད་དུ་སྤྲོས། །བོད་ཡུལ་གནས་ཀུན་བྱིན་གྱིས་བརླབས། །སྟོན་པ་ཤཱཀྱ་ཐུབ་པ༴ པོ་ཊ་ལ་ཡི་རྩེ་མོ་ནས། །སྐུ་ཡི་འོད་ཟེར་བོད་དུ་སྤྲོས། །བོད་ཡུལ་གནས་རྣམས་བྱིན་གྱིས་རླབས། །འཕགས་པ་སྤྱན་རས་གཟིགས་དབང༴ གནས་ཆེན་བརྒྱ་རྩ་གནས་ཕྲན་སྟོང་། །ཞབས་ཀྱིས་བཅགས་ཤིང་གཏེར་ཁ་སྦས། །བཀའ་སྲུང་བསྐོས་ཤིང་ལུང་བསྟན་མཛད། །གུ་རུ་པདྨ་འབྱུང་གནས༴ སྤྱི་འབྱམས་ཕུག་ཏུ་སྒྲུབ་པ་མཛད། །སེང་གེ་གནམ་མཆོང་གཏེར་ཁ་སྦས། །སྲིན་པོའི་ཀླད་པས་ཡི་གེ་བྲིས། །ཨོ་རྒྱན་རྗེ་འབངས་ཉེར་ལྔ༴ ཕྱི་ལྟར་བྲག་རི་ཡིག་འབྲུས་བརྒྱན། །ནང་ལྟར་དཀྱིལ་འཁོར་གཞལ་ཡས་ཁང་། །རྩ་གསུམ་ལྷ་ཚོགས་

རྟག་ཏུ་བཞུགས། །རྒྱུད་སྡེ་དྲུག་གི་ལྷ་ཚོགས༴ ཕྱི་ལྟར་རིན་ཆེན་བྲག་གི་དབྱིབས། །ནང་ལྟར་མཁའ་འགྲོའི་ཚོགས་ཁང་སྟེ། །གསང་བ་དག་པ་མཁའ་སྤྱོད་གནས། །གནས་གསུམ་དཔའ་བོ་མཁའ་འགྲོ༴ ཕྱི་ལྟར་ཆུ་ཤིང་གྲམ་པའི་ཁྲོད། །ནང་ལྟར་རབ་འཇིགས་དུར་ཁྲོད་གནས། །མ་མགོན་ཆོས་སྐྱོང་ཁྲོམ་དུ་འཚོགས། །བཀའ་སྲུང་དམ་ཅན་རྒྱ་མཚོ༴ གནས་སྒོ་གཏེར་སྒོ་ཀུན་གྱི་བདག །མི་སྔོན་སེང་གེའི་མགོ་བོ་ཅན། །གར་སྟབས་འཁྱུག་ཅིང་རྣལ་འབྱོར་སྐྱོང་། །ཞིང་སྐྱོང་མེ་རླུང་སེང་ཕྲུག༴ ཕྱི་ལྟར་དཀར་སེར་ནག་པའི་མཚོ། །ནང་ལྟར་རིན་ཆེན་ཕོ་བྲང་གསུམ། །གསང་བ་སྐུ་གསུང་ཐུགས་ཀྱི་གནས། །གནས་བདག་རྦ་ནག་དགེ་བསྙེན༴ བྱང་ཆུབ་སེམས་དཔའ་ནམ་མཁའི་སྙིང་། །འཇིག་རྟེན་འདས་ཀྱང་དྲེགས་པའི་ཚུལ། །ས་བརྒྱད་སེམས་དཔའ་བསྟན་སྲུང་ཆེ། །གནས་བདག་རྦ་ནག་དགེ་བསྙེན༴ སྨྱོ་ཁ་ཐང་ལྷ་

མཁར་ནག་དང་། །ཀླུ་བདུད་མགོ་དགུ་ཟླ་བའི་གདོང་། །སྐུ་ལྷ་མཁར་ནག་ཟུ་ར་སྐྱེས། །སྐུ་གཅིག་མཚན་བརྒྱད་ལྡན་པ༴ ངོ་བོ་གཅིག་ལ་གནས་གཞི་བརྒྱད། །གནས་གཞི་བརྒྱད་ལ་སྤྲུལ་པ་བརྒྱད། །ལྷ་ཀླུ་བདུད་སོགས་ཅི་ཡང་བརྫུ། །ཨོ་རྒྱན་བཀའ་ཡི་སྲུང་མ་བསང་། ། ༈ ཨོཾ་ཨཱཿཧཱུྃ། ཕྱི་སྣོད་ཀྱི་འཇིག་རྟེན་དྲི་མ་བསང་། །ཞིང་པདྨ་འོད་ཀྱི་རྣམ་པར་གྱུར། །ནང་བཅུད་ཀྱི་འགྲོ་བའི་དྲི་མ༴ ལུས་འཇའ་ལུས་རྡོ་རྗེ་ལྟ་བུར་གྱུར། །རྫས་འདོད་དགུའི་ལོངས་སྤྱོད་དྲི་མ༴ ཡིད་བསམ་པ་གང་འདོད་བདུད་རྩིར་གྱུར། །དེ་ཡར་ལ་སྐྱབས་གནས་དཀོན་མཆོག་མཆོད། །སྐྱབས་ཐུགས་རྗེས་འགྲོ་དྲུག་ཡོངས་ལ་ཁྱབ། །དགོས་འདིར་ཚོགས་བསམ་དོན་ཆོས་བཞིན་འགྲུབ། །དཔལ་བཀྲ་ཤིས་ཟླ་རྒྱས་ཡར་གྱི་ངོ་། །གནས་ཁམས་གསུམ་ཡོངས་ལ་ཁྱབ་པར་ཤོག །ཅེས་རྗེ་དབང་ཕྱུག་རྡོ་རྗེས་མཛད་པའོ། །

༈ སྡོམ་པ་དམ་ཚིག་ཚུལ་ཁྲིམས་དྲི་བསུང་གིས། །འཆལ་བའི་དྲི་མ་ཐམས་ཅད་བསངས་བྱས་ནས། །འཕགས་པའི་ཚོགས་རྣམས་དགྱེས་པའི་བྱིན་རླབས་ཀྱིས། །འགྲོ་ཀུན་ཚུལ་ཁྲིམས་དྲི་ངད་ལྡན་གྱུར་ཅིག །དཀར་པོ་དགེ་བཅུ་སྤྱོད་པའི་དྲི་བཟང་གིས། །སྡིག་སྤྱོད་མི་དགེའི་དྲི་མ་བསངས་བྱས་ཏེ། །དཀར་ཕྱོགས་ལྷ་ཀླུ་དགྱེས་པའི་ནུས་པ་ཡིས། །སྣོད་བཅུད་མ་ལུས་བདེ་སྐྱིད་ལྡན་གྱུར་ཅིག །ཡུལ་ལྷ་གཞི་བདག་གནས་པོ་ཐམས་ཅད་ཀྱང་། །ལྷག་བསམ་རྣམ་དག་དྲི་གསུར་འདིས་བསངས་པས། །ཕྲག་དོག་གདུག་རྩུབ་དྲི་ངད་སངས་གྱུར་ཅིག །བྱམས་དང་སྙིང་རྗེའི་དྲི་བཟང་གོས་གྱུར་ཏེ། །གཙང་ཞིང་གཙང་མའི་རྒྱུད་ཚོགས་ལས་བྱུང་བའི། །དགའ་དང་སྤྲོ་བའི་རྩོལ་བས་རབ་སྦྱར་ནས། །བསང་མཆོད་བདུག་སྤོས་ཟས་མཆོག་རྒྱ་ཆེན་པོས། །འདིར་ཚོགས་འབྱུང་པོ་མ་ལུས་ཚིམ་གྱུར་ཅིག །དེ་ཡི་མཐུ་

ལས་བདག་ཅག་འཁོར་བཅས་རྣམས། །མི་ནོར་ཕྱུགས་རྣམས་གོད་ཁ་ཡོངས་ལས་གྲོལ། །འབྱོར་པ་ཕུན་སུམ་ཚོགས་པ་འཕེལ་ཞིང་རྒྱས། །བསམ་དོན་ཆོས་བཞིན་འགྲུབ་པའི་དངོས་གྲུབ་སྩོལ། ། ༈ ༁ྃ༔ གནམ་ཆོས་རྒྱུན་བསང་ནི༔ བྷྲཱུྃཿགྱི་ཡི་གེ་དག་ལས་བྱུང་བ་ཡི༔ རིན་པོ་ཆེ་ཡི་སྣོད་ཀྱི་ནང་དུ་ནི༔ འདོད་པའི་ཡོན་ཏན་ལྔ་ལྡན་བསང་དུད་ཀྱིས༔ འཇིག་རྟེན་ཁྱབ་པ་འདི་དག་འབུལ་བའི་གནས༔ བླ་མ་ཡི་དམ་མཁའ་འགྲོ་ཆོས་སྐྱོང་ལ༔ འབུལ་ལོ་དགྱེས་པར་མཛོད་ལ་མཆོག་ཐུན་གྱི༔ དངོས་གྲུབ་སྩོལ་ལ་བྱིན་གྱིས་བརླབ་ཏུ་གསོལ༔ བརྟན་མ་བཅུ་གཉིས་མགུལ་ལྷ་བཅུ་གསུམ་དང་༔ སྣང་ཞིང་སྲིད་པའི་ལྷ་འདྲེ་ཐམས་ཅད་བསང་༔ ཁྱད་པར་ཡུལ་འདིའི་གཞི་བདག་ཐམས་ཅད་ལ༔ བསང་ཞིང་བརྔན་ནོ་བར་ཆད་ཞི་བར་མཛོད༔ མགར་བ་དམར་ནག་འཁོར་དང་བཅས་པ་ལ༔ བསང་ངོ་གསུར་གྱི་

མཆོད་པས་ནད་ཀུན་ཞི༔ མི་མཐུན་རྐྱེན་སོལ་མཐུན་རྐྱེན་བསྒྲུབ་ཏུ་གསོལ༔ བདག་ལ་ཁ་འཛིན་མཛོད་ལ་དངོས་གྲུབ་སྩོལ༔ ཕྱྭ་དང་གཡང་གི་དངོས་གྲུབ་བདག་ལ་སྩོལ༔ ཨོཾ་བཛྲ་དྷཱུ་པེ་པྲ་ཏཱིཙྪ་ཡེ་སྭཱ་ཧཱ༔ ཞེས་སྤྲུལ་སྐུ་མི་འགྱུར་རྡོ་རྗེ་ལ་ཨོ་རྒྱན་རིན་པོ་ཆེས་དངོས་སུ་གསུངས་སོ༔ ཀྱེ། དེ་རིང་དམེ་གྲིབ་ཐམས་ཅད་བསང་། །དེ་རིང་ནད་གྲིབ་ཐམས༴ དེ་རིང་བཙོག་གྲིབ༴ དེ་རིང་མཛེ་གྲིབ་ཐམས་ཅད༴ དེ་རིང་གནོད་གྲིབ་ཐམས་ཅད༴ དེ་རིང་ཉམས་གྲིབ་ཐམས་ཅད༴ དེ་རིང་ཡུག་གྲིབ་ཐམས་ཅད༴ དེ་རིང་གོས་གྲིབ་ཐམས་ཅད༴ དེ་རིང་ཟས་གྲིབ་ཐམས་ཅད༴ དེ་རིང་ཉམས་གྲིབ་སྐྱོན་རྣམས༴ གཤིན་པོའི་རོ་གྲིབ་ཕོག་པ༴ གསོན་པོའི་བང་གྲིབ་ཕོག་པ༴ མི་གཙང་ཉམས་གྲིབ་ཕོག་པ༴ བན་དེའི་བྱད་ཁ་ཕོག་པ༴ བོན་པོའི་ཕུར་ཁ་ཕོག་པ༴ ལྷ་སྲུང་གཉན་པོ་ཁྱེད་རྣམས་ཀྱིས། །བསམ་པ་སྒྲུབས་ལ་རེ་བ་སྐོངས། །བར་དུ་གཅོད་པའི་

དགྲ་བགེགས་ཐུལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་པ་འདི་ཀརྨ་པ་དབང་ཕྱུག་རྡོ་རྗེས་མཛད་པའོ། ། ༈ དཔལ་ལྡན་ལྷ་མོའི་བསང་མཆོད་ནི། ཀྱེ། དྲི་ཞིམ་བདུག་སྤོས་སྣ་ཚོགས་དང་། །ཤ་ཆེན་ཚིལ་ཆེན་གུ་གུལ་དང་། །ཤ་ལྔ་བདུད་རྩི་རྣམ་ལྔ་པོ། །བྱིན་གྱིས་བརླབས་པའི་དམ་ཚིག་རྫས། །མཐའ་ཡས་གསུར་དུད་བསང་མཆོད་ཀྱིས། །ལྷ་མིན་ཚར་གཅོད་མཛད་པ་ཡི། །དབང་ཕྱུག་ཨུ་མ་བཤོས་པའི་སྲས། །བསྟན་པ་སྲུང་བའི་དམ་ཚིག་ཅན། །མ་མགོན་ལྕམ་དྲལ་འཁོར་བཅས་བསང་། །བྷྱོ། སྲིད་ཞི་ཀུན་གྱི་དབང་ཕྱུག་མ། །དུད་སོལ་ལྷ་མོ་འཁོར་བཅས་བསང་། །སྨོན་ལམ་གཅིག་པའི་བཀའ་གཉན་མ། །ནམ་གྲུ་རེ་མ་འཁོར་བཅས༴ སྐུ་གསུང་ཐུགས་སྤྲུལ་མཁའ་འགྲོའི་ཚོགས། །འཁོར་དང་བཅས་པ་ཐམས་ཅད༴ གཡས་ན་དགྲ་བགེགས་འགུགས་བྱེད་མ། །དམར་མོ་གསུམ་པོ་འཁོར་

བཅས༴ གཡོན་ན་དགྲ་བགེགས་གསོད་བྱེད་མ། །ནག་མོ་གསུམ་པོ་འཁོར་བཅས༴ མདུན་ན་དམར་མོ་རྩ་མུན་ཏྲི། །བྱ་བྱེད་གསུམ་པོ་འཁོར་བཅས༴ ཕྱོགས་མཚམས་སྲུང་བར་བྱེད་པ་ཡི། །ཕྲ་མན་བརྒྱད་པོ་འཁོར་བཅས༴ དུར་བྱའི་གདོང་དང་ཕོ་ཉའི་ཚོགས། །སྒོ་བཞིའི་སྲུང་མ་ཐམས་ཅད༴ སྤྲུལ་པ་ཡང་སྤྲུལ་ཉིང་སྤྲུལ་གྱི། །ལྷ་མོ་དཀར་སེར་དམར་ལྗང་སོགས། །ནག་མོ་འབུམ་སྡེ་འཁོར་བཅས༴ དེ་ལྟར་བསང་བའི་ཡོན་ཏན་གྱིས། །རྣལ་འབྱོར་བདག་ཅག་འཁོར་བཅས་ཀྱི། །ཞི་རྒྱས་དབང་དྲག་མངོན་སྤྱོད་ཀྱི། །ལས་རྣམས་འགྲུབ་པའི་སྡོང་གྲོགས་མཛོད། ། ༈ ཛམ་ལྷ་རིགས་ལྔའི་བསང་མཆོད་བཞུགས་སོ། །ཀྱེ། རི་རབ་ལྷུན་པོའི་བྱང་ཕྱོགས་ལྕང་ལོ་ཅན། །རིན་ཆེན་སྣ་བདུན་བརྩེགས་པའི་གཞལ་ཡས་ནས། །ཛམ་ལྷ་རིགས་ལྔ་ལྷ་མོ་ནོར་རྒྱུན་མ། །འཁོར་བཅས་འདིར་གཤེགས་བསང་དང་མཆོད་པ་བཞེས། །

སྐུ་ཡི་ཛཾ་ལྷ་དཀར་པོ་འབྲུག་ལ་ཆིབས། །མཁའ་འགྲོ་སྡེ་བཞི་འཁོར་དང་བཅས་པ་ལ། །གཡུ་ཤུག་ཕྱེ་མར་གསུར་གྱི་དུད་པས་བསང་། །གསུང་གི་ཛཾ་དམར་ཞལ་གསུམ་ཕྱག་དྲུག་པ། །ཀུ་རུ་ཀུལླེ་ཡུམ་དང་བཅས་པ་ལ། །འབྲུ་སྣ་དར་ཟབ་དྲི་བཟང་དུད་པས༴ ཐུགས་ཀྱི་ཛམ་ནག་ཁྲོ་ཞིང་སྒེག་པའི་གཟུགས། །ནོར་ལྷ་མཆེད་བརྒྱད་འཁོར་དང་བཅས་པ་ལ། །དཀར་གསུམ་མངར་གསུམ་བསང་གི་མཆོད་པ་འབུལ། །ཡོན་ཏན་ཛམ་སེར་བཱི་ཛ་ནེའུ་ལེ་འཛིན། །ནོར་ལྷ་ཕོ་དགུ་མོ་དགུ་འཁོར་བཅས་ལ། །འབྲུ་སྣ་ཕྱེ་མར་བསང་གི་དུད་པས༴ ཕྲིན་ལས་ཛཾ་ཁྲ་ཕྱག་ན་ནེའུ་ལེ་འཛིན། །གནོད་སྦྱིན་བྱེ་བ་བདུན་འབུམ་འཁོར་བཅས་ལ། །འབྲུ་སྣ་དར་ཟབ་དྲི་བཟང་དུད་པས༴ ནོར་གྱི་བདག་པོ་ལྷ་མོ་ནོར་རྒྱུན་མ། །གསེར་མདོག་མཆོད་སྦྱིན་འབྲས་ཀྱི་སྙེ་མ་འཛིན། །མཆེད་ལྔ་འཁོར་དང་བཅས་ལ་བསང་

མཆོད་འབུལ། །ནོར་ལྷ་ཁྱེད་རྣམས་མཆོད་པའི་བྱིན་རླབས་ཀྱིས། །ལོ་ལེགས་ཕྱུགས་རྣམས་འཕེལ་བའི་དངོས་གྲུབ་སྩོལ། །གོད་འདྲེ་བསེ་རག་བཟློག་པའི་ཕྲིན་ལས་མཛོད། །ཅེས་རཱ་ག་ཨ་སྱས་བྲིས་པའོ། ། ༈ ཨོཾ་སྭ་སྟི། སྐྱབས་སེམས་སྔོན་དུ་སོང་ནས་བསང་སྦྱང་འདི་ལྟར་བྱ། སྟོང་པའི་ངང་ལས་རིན་ཆེན་སྣོད་མཆོག་ཏུ། །མི་ཟད་ནམ་མཁའི་མཛོད་ལྟར་འབྱམས་ཀླས་པའི། །ཡི་གེ་གསུམ་གྱི་ཡེ་ཤེས་བདུད་རྩིར་གྱུར། །དམ་ཅན་དམར་ནག་རྡོ་རྗེ་གཡུ་སྒྲོན་མ། །བཀྲ་ཤིས་ཚེ་རིང་འཁོར་བཅས་གཡར་དམ་གྱི། །གཉན་པོ་དྲན་ནས་མྱུར་དུ་འདིར་གཤེགས་ཤིག །མཆོད་གཏོར་འདི་བཞེས་དགོན་གནས་འདི་དག་ལ། །སྲུང་སྐྱོབས་སྡོང་གྲོགས་གཉན་པོ་མཛད་པ་དང་། །བླ་མའི་སྐུ་ཚེ་བརྟན་ཅིང་ཕྲིན་ལས་རྒྱས། །དགེ་འདུན་སྡེ་རྒྱས་ཆོས་སྤྱོད་གོང་དུ་འཕེལ། །ལས་བཞིའི་ཡོན་ཏན་ལྷུན་གྱིས་འགྲུབ་པ་དང་། །ཕྱོགས་དུས་ཀུན་ཏུ་

ཕུན་སུམ་ཚོགས་པར་མཛོད། །ཅེས་ཆགས་མེད་མཆོག་གི་སྤྲུལ་སྐུའི་དགོངས་བཞེད་བཞིན། ཀརྨ་པ་བདུད་ཚོགས་འདུལ་བའི་རྡོ་རྗེས་འོག་མིན་དཔལ་གྱི་མཚུར་ཕུ་ནས་བྲིས་པ་དགེ། ༈ སྔོན་ཚེ་རྒྱལ་བའི་ཞལ་མཐོང་རྫུ་འཕྲུལ་ཅན། །གངས་ཅན་སྲུང་མ་ཐང་ལྷ་གཉན་པོ་ལ། །རྟག་ཏུ་གུས་པས་མཆོད་ཅིང་བསྟོད་ལགས་ན། །སྲུང་སྐྱོབ་སྡོང་གྲོགས་ཡིད་བཞིན་འགྲུབ་པར་མཛོད། །ཅེས་ཀརྨ་པས་མཛད་པའོ། །བསྟན་སྲུང་ཆེན་པོ་རྨ་རྒྱལ་སྤོམ་རའི་བསང་མཆོད་ལ་འབྱོར་ན་བསང་གི་ཡོ་བྱད་ཚང་བ་དང་ཡི་དམ་གཞུང་གང་རུང་བསྐྱེད་ལ་འདི་སྐད་དོ། །ཀྱེ། བཀྲ་ཤིས་གཡང་དུ་ཆགས་པའི་ས། །གངས་ཅན་བོད་ཀྱི་ལྟེ་བ་ན། །ལྷ་གནས་སྤྲུལ་གཞི་རྡོ་རྗེ་གདན། །གང་གི་ཤར་ཕྱོགས་སྲུང་མ་ཆེ། །རྨ་རྒྱལ་སྤོམ་ར་འཁོར་བཅས་རྣམས། །དད་པས་འབོད་དོ་མྱུར་བར་བྱོན། །ཁྱོད་ལ་མཆོད་པའི་ཡོ་བྱད་ནི། །དྲི་ཞིམ་སྤོས་སྣ་རིན་ཆེན་ལྔ། །སྨན་དང་འབྲུ་མཆོག་ལྗོན་པས་བསང་། །བདུད་རྩི་སྤྲིན་ཆེན་ལྡན་པ་འདི། །རྡོ་རྗེ་

གསུམ་འགལ་དྲི་དག་ནས། །དགྱེས་བཞེས་བཅོལ་བའི་ཕྲིན་ལས་མཛོད། །ཅེས་རྨ་རྒྱལ་སྤོམ་རའི་བསང་འདི་རིག་འཛིན་ཐུགས་ཀྱི་རྡོ་རྗེས་སྤེལ་བའོ། ། ༈ ཀ་ཡེ་གསོན་དང་རྦ་ནག་དགེ་བསྙེན༴ ཞེས་པ་འདི་དཀར་གཏོར་གྱི་མཇུག་ཏུ་སྦྱར་བའོ། །དཀར་གཏོར་ནི། ཨོཾ་ཨཱཿཧཱུྃ་གིས་བྱིན་གྱིས་བརླབས་ནས་འདོན་རུང་སྟེ། རཱ་ག་ཨ་སྱས་གནས་འབྲེལ་མཛད་དུས་གནས་བདག་ལ་བསྟོད་པའོ། ། ༈ བདུད་ཀྱི་སྡེ་དཔོན་མཛད་ཙམ་ན། །མི་ནག་རྟ་ནག་དར་ནག་ཕྱར། །ཆོ་འཕྲུལ་འགྱེད་ཅིང་གཏེར་སྒོ་སྲུང་། །བདུད་པོ་ཟུ་ར་རྭ་སྐྱེས་བསང་། །རྦ་ནག་མཚོ་ལ་གནས་པའི་ཚེ། །མི་སྔོན་ལུས་ནི་རི་ཕྲན་ཙམ། །ཉ་ཡི་མགོ་བོ་གནམ་དུ་འཕྱོ། །གནས་བདག་དགེ་བསྙེན་ཆེན་པོ་བསང་། །ཁྱོད་ཀྱི་འཁོར་དུ་གཏོགས་པ་ཡི། །སྤྱི་འདུ་བྲག་དཀར་ཆབ་བསྟི་དང་། །གདོང་ལ་རེ་ཁྱམ་རྨོག་ཕོར་སོགས། །དཀར་པོ་ལྷ་ཡི་སྡེ་ཚོགས༴ རི་དམར་དགེ་བསྙེན་གཙོ་ཕུ་བྲག །གནམ་རྫོང་གུ་རུ་རི་བཀྲ་དང་། །ཤེལ་ཟོ་དུང་གི་

མཆོད་རྟེན་སོགས། །བཙན་དང་གཉན་གྱི་སྡེ་ཚོགས༴ རྒྱམ་རྒྱལ་སྐྱེར་རྩེ་ཤེ་ཁྲོམ་དང་། །མྱེ་མྱག་ལ་སོགས་ཤེ་ཁྲོམ་གསུམ། །བྲག་སེར་སྙིང་དེལ་རི་བཙུན་སོགས། །ཡུལ་ལྷ་གཞི་བདག་ཐམས་ཅད༴ ཨོཾ་ཆུ་ཀླུ་སྨན་དཀར་མོ་དང་། །ཡུལ་ཕྱོགས་འདི་ལ་གནས་པ་ཡི། །ས་བདག་ཀླུ་གཉན་ཐམས་ཅད་དང་། །ཡིད་ཀྱི་གཟུགས་ཅན་ཐམས་ཅད༴ གཞན་ཡང་སྤྱི་འབྱམས་སེང་གེ་བྲག །གནས་སྒོ་གཏེར་སྒོ་སྲུང་བ་ཡི། །གཟའ་སོགས་ལྷ་སྲིན་སྡེ་བརྒྱད་ཚོགས། །བཀའ་སྲུང་གཏེར་སྲུང་ཐམས་ཅད༴ དཀར་གསུམ་མངར་གསུམ་ཕུད་ཀྱིས་མཆོད། །ཇ་ཆང་འོ་ཞོའི་སྐྱེམས་ཀྱིས་མཆོད། །འབྲུ་སྣ་སྨན་སྣ་རིན་ཆེན་དང་། །དར་ཚོན་བལ་ཚོན་རྒྱན་ཆ་འབུལ། །བསང་དང་མཆོད་པ་འདི་འབུལ་བས། །མགྲོན་རྣམས་མཉེས་ཤིང་ཚིམ་གྱུར་ཅིག །ཐུགས་དང་འགལ་བ་ཐམས་ཅད་བཤགས། །ཕོག་ཐུག་

འགྲམ་འཁྲུགས་ཞི་གྱུར་ཅིག །ལྷ་སྲིན་འཁྲུགས་པ་ཞི་གྱུར་ཅིག །མ་མོའི་འཁྲུགས་པ་ཞི་གྱུར་ཅིག །ཀླུ་ཡི་ནད་རྣམས་ཞི་གྱུར་ཅིག །གྲིབ་དང་རྨུ་གབ་སངས་གྱུར་ཅིག །ཐམས་ཅད་བཀྲག་མདངས་གཟི་བརྗིད་འབར། །མཐུ་རྩལ་ནུས་པ་ལྡན་གྱུར་ཅིག །བདག་དང་ཡོན་བདག་ཁ་འཛིན་མཛོད། ། ༈ ཁ་འཛིན་བར་ཆད་ཀུན་སེལ་ནི། དཀོན་མཆོག་གསུམ་ལ་ཕྱག་འཚལ་ལོ། །བསང་གི་ཁ་འཛིན་བྱེད་འདོད་ན། ཀྱེ། སངས་རྒྱས་ཆོས་དང་དགེ་འདུན་མཆོད་བྱས་ནས། །གཞི་ལམ་འབྲས་བུ་ཡོན་ཏན་མཐར་ཕྱིན་ཤོག །བླ་མ་ཡི་དམ་མཁའ་འགྲོ་མཉེས་བྱས་ནས། །དངོས་གྲུབ་རྣམ་གཉིས་ཚེ་འདིར་ཐོབ་པར་ཤོག །འགྲོ་དྲུག་རིགས་དྲུག་གནས་སུ་མི་འཁྱམས་པའི། །ཐུབ་དྲུག་སངས་རྒྱས་སྟོང་གིས་ཁ་འཛིན་མཛོད། །འཇིགས་པ་བརྒྱད་དང་བཅུ་དྲུག་མི་ལྡང་བར། །འཕགས་པ་རིགས་གསུམ་མགོན་པོས༴ ནད་མུག་མཚོན་གསུམ་

གནོད་འཚེ་མི་འབྱུང་བར། །རྒྱུད་སྡེ་བཞི་ཡི་ལྷ་ཡིས༴ དུག་ལྔ་དུག་གསུམ་དགྲ་བགེགས་མི་འབྱུང་བར། །རིགས་ལྔ་སྐུ་གསུམ་ལྷ་ཡིས༴ མི་མཐུན་ཕྱོགས་ཀུན་ཞི་བར་བྱ་བའི་ཕྱིར། རྡོ་རྗེ་རིགས་ཀྱི་ལྷ་ཡིས༴ འབྱོར་དྲུག་མཐུན་རྐྱེན་མ་ལུས་རྒྱས་པའི་ཕྱིར། །རིན་ཆེན་རིགས་ཀྱི་ལྷ་ཡིས༴ མོས་པ་རྣམ་བཞི་ཁམས་གསུམ་དབང་སྡུད་ཕྱིར། །པདྨ་རིགས་ཀྱི་ལྷ་ཡིས༴ དགྲ་བགེགས་མ་རུང་ལོག་འདྲེན་བསྒྲལ་བའི་ཕྱིར། །ཀརྨ་རིགས་ཀྱི་ལྷ་ཡིས༴ ལས་བཞི་ལྷུན་གྲུབ་བསམ་པ་ཀུན་འགྲུབ་ཕྱིར། །དེ་བཞིན་རིགས་ཀྱི་ལྷ་ཡིས༴ རྣལ་འབྱོར་ཚེ་གཅིག་སངས་རྒྱས་ཐོབ་པའི་ཕྱིར། །ཞི་ཁྲོ་རབ་འབྱམས་རྣམས་ཀྱིས༴ རྒྱལ་བསྟན་སྲུང་ཞིང་བསྟན་དགྲ་བསྒྲལ་བའི་ཕྱིར། །ཆོས་སྐྱོང་ཕོ་མོ་རྣམས་ཀྱིས༴ དཀོར་ནོར་ལོངས་སྤྱོད་འཕེལ་རྒྱས་བརྟན་པའི་ཕྱིར། །ནོར་ལྷ་གཏེར་བདག་རྣམས་ཀྱིས༴ གཞི་བྱེས་ལམ་

གསུམ་འགྲོ་འདུག་གར་བྱེད་ཀྱང་། །ཕྱི་རྒྱུད་གཞི་བདག་རྣམས་ཀྱིས་ཁ་འཛིན་མཛོད། །བཀྲ་ཤིས་དཔལ་འབར་གཏན་བདེ་མྱུར་ཐོབ་ཤོག །རོལ་པའི་རྡོ་རྗེས་སོ། ། ༈ དེ་ནས་ལམ་ལྷ་བྱ་བ་ནི། ཀྱེ། རྩ་བརྒྱུད་བླ་མ་ཡི་དམ་ལྷ། །དཔའ་བོ་མཁའ་འགྲོ་ཆོས་སྐྱོང་ཚོགས། །བསླུ་མེད་སྐྱབས་གནས་དཀོན་མཆོག་གསུམ། །ཡུལ་ལྷ་གཞི་བདག་ཚོགས་བཅས་ལ། །ཞི་བ་བསང་གི་མཆོད་པ་འབུལ། །ཁྱེད་རྣམས་ཡེ་ཤེས་སྤྱན་དང་ལྡན། །བྱིན་རླབས་དངོས་གྲུབ་ཕྲིན་ལས་ཀུན། །བསླུ་མེད་སྩོལ་བའི་ལམ་ལྷ་ཡིན། །ལམ་ལྷ་མཛོད་ལ་འགལ་རྐྱེན་སོལ། །ཀུན་ཏུ་དགེ་བའི་སྡོང་གྲོགས་མཛོད། །ཀྱེ། ལམ་ལྷ་གཉན་པོ་ཁྱེད་རྣམས་ལ། །དྲི་ཞིམ་བསང་མཆོད་བདུད་རྩི་འབུལ། །བདག་ཅག་ས་ཕྱོགས་གར་འགྲོ་ཡང་། །ལ་ཆུ་འཕྲང་གསུམ་དག་ལས་སྒྲོལ། །འཇིགས་པའི་དགྲ་ཇག་ཆོམ་རྐུན་སྐྱོབ། །མྱ་ངན་ལམ་གོལ་ལམ་ལོག་ཏུ། །

སྐད་ཅིག་ཙམ་ཡང་མི་འཁྱམས་ཤིང་། །བདེ་ལྡན་བདེ་བའི་ལམ་བགྲོད་ནས། །ཉམ་ངའི་བར་ཆད་གཡུལ་ལས་རྒྱལ། །གནས་གྲོགས་ལོངས་སྤྱོད་ཕུན་སུམ་ཚོགས། །མཐུན་རྐྱེན་བཀྲ་ཤིས་འདོད་དོན་ཀུན། །བདེ་བླག་ཉིད་དུ་འགྲུབ་པར་མཛོད། །ཅེས་སོ། ། ༈ ཧྲཱིཿ དགེ་མཚན་རླུང་རྟ་སྙན་པའི་བ་དན་ཆེ། །འདོད་དགུ་ཀུན་འབྱུང་མཆོད་པའི་སྤྲིན་ཕུང་འདི། །གེ་སར་སྐྱེས་བུ་འཁོར་དང་བཅས་ལ་འབུལ། །བསམ་དོན་ཀུན་འགྲུབ་ཕྱོགས་ལས་རྣམ་རྒྱལ་མཛོད། །ཧཱུྃ། འགོ་བའི་ལྷ་ལྔ་སྐྱོབ་པའི་ལྷ་དགུ་དང་། །རང་དང་ཕ་མེས་སློབ་དཔོན་བརྒྱུད་བཅས་ཀྱི། །འགོ་བའི་ལྷ་མགོན་གཉན་པོ་མ་ལུས་པ། །གསོལ་ལོ་མཆོད་དོ་མགོན་སྐྱབས་སྡོང་གྲོགས་མཛོད། ། ༈ ཨོཾ་ཨཱཿཧཱུྃ། བླ་མར་བརྒྱུད་པ་འཁོར་དང་བཅས། །ཡི་དམ་ལྷ་ཚོགས་འཁོར༴ དཔའ་བོ་མཁའ་འགྲོ༴ ཆོས་སྐྱོང་སྲུང་མ༴ ནོར་ལྷ་གཏེར་བདག༴

ཡུལ་ལྷ་གཞི་བདག་འཁོར་བཅས་རྣམས། །བསང་རབ་མཆོད་པ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་བསྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་བསྲུང་། །དངོས་གྲུབ་ཀུན་གྱི་སྡོངས་གྲོགས་མཛོད། །དུས་མིན་འཆི་བའི་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་ནོར་འཕེལ་ཞིང་ཆོས་འཕེལ་བ། །བདེ་ལེགས་ཕུན་སུམ་ཚོགས་པ་ཡི། །ཡིད་ལ་འདོད་པ་ཀུན་འགྲུབ་མཛོད། ། ༈ དེ་ནས་ཁུ་ཡེ་བྱ་བ་ནི། ཀྱེ། རིག་འཛིན་བརྒྱུད་པའི་བྱིན་རླབས་དེ། །ཁུ་ཡེ་ཕྱྭ་དང་གཡང་དུ་ལེན། །ཡི་དམ་

ཞི་ཁྲོའི་དངོས་གྲུབ་དེ། །ཁུ་ཡེ༴ གནས་གསུམ་མཁའ་འགྲོའི་རྟེན་འབྲེལ་དེ། །ཁུ་ཡེ༴ ཡེ་ཤེས་འཇིག་རྟེན་སྲུང་མ་ཡི། །འཆི་མེད་ཚེ་ཡི་དངོས་གྲུབ་དེ། །ཁུ་ཡེ༴ རྐང་བཞི་ཕྱུགས་ཀྱི་དངོས་གྲུབ་དེ། །ཁུ་ཡེ༴ བང་མཛོད་འབྲུ་ཡི་ནས་གཡང་དེ། །ཁུ་ཡེ༴ རྨ་གཡང་ཟས་ཀྱི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །ཀྱེ། ཕྱྭ་སྐོར་དེ་ནི་ཀྱི་ལི་ལི། །ཕྱྭ་ཆགས་གཡང་ཆགས་རྒ་ར་ར། །ཕྱྭ་དེ་རི་ལ་མ་བྲོས་ཤིག །གཡང་དེ་སྒོ་ལ་མ་ཉམས་ཤིག །ཁུ་ཡེ་ཕུད་ཀྱིས་དགྲ་བླ་མཆོད། །བཀྲ་ཤིས་དཔལ་འབར་གཏན་བདེ་མྱུར་ཐོབ་ཤོག །༈ གསུར་བསྔོ་ཤིན་ཏུ་བསྡུས་པ་ནི། སྐྱབས་སེམས་སྔོན་དུ་སོང་ནས། འབག་བཙོག་ལ་སོགས་ཉེས་པ་བཤགས། །སྟོང་པར་གྱུར་པ་དེ་ཡི་ངང་། །བྷྲཱུྃ་ལས་གསུར་སྣོད་རྒྱ་ཆེའི་ནང་། །འདོད་ཡོན་ལྔ་ལྡན་རང་བཞིན་གྱུར། །ཨོཾ་ཨཱཿཧཱུྃ་ལན་གསུམ། ཨོཾ་ཨ་པྲ་ཏི་སུ་རུ་ཕུད་པ་ཡེ་སྭཱ་ཧཱ། ལན་བདུན། འདོད་ཡོན་ལྔ་

ལྡན་གསུར་མཆོད་འདི། །དྲི་ཟའི་རྒྱལ་པོ་རབ་ཏུ་དགའ། །མི་འམ་ཅི་ཡི་རྒྱལ་པོ་དང་། །ཟུར་ཕུད་ལྔ་སོགས་དྲི་ཟ་ཀུན། །ཁྱད་པར་སྐྱེ་འགྲོ་ཇི་སྙེད་པ། །སྔ་ལུས་བོར་ཞིང་ཕྱི་མའི་ལུས། །མ་ཐོབ་སྲིད་པ་བར་མ་དོར། །གནས་པའི་ཉམ་ཐག་ཚོགས་རྣམས་ལ། །འདོད་ཡོན་ཕུན་ཚོགས་ཐོབ་གྱུར་ཅིག །བར་དོ་ཡིན་པར་ངོ་ཤེས་ནས། །འཇིགས་སྐྲག་སྡུག་བསྔལ་ལས་གྲོལ་ཏེ། །རྒྱལ་བ་ལོངས་སྤྱོད་རྫོགས་པའི་སྐུར། །མངོན་པར་མྱུར་དུ་འཚང་རྒྱ་ཤོག །དེ་མ་ཐོབ་ཀྱང་མི་ཁོམ་གནས། །སྤངས་ཏེ་མཐོ་རིས་ལུས་ཐོབ་སྟེ། །དམ་པའི་ཆོས་ལ་སྤྱོད་པར་ཤོག །ཅེས་པ་གྲུབ་ཆེན་ངོར་བྲིས་པ་དགེ །མགྲོན་རྣམས་རང་རང་གནས་སུ་གཤེགས། །ཕུན་སུམ་ཚོགས་པའི་བཀྲ་ཤིས་ཤོག །དགེ་བས་བདག་སོགས་སེམས་ཅན་རྣམས། །པད་འབྱུང་ཉིད་དང་དབྱེར་མེདཤོག །རང་ཉིད་གྲོ་ལོད་ཧཱུྃ་ལ་ཐིམ། །གྱེན་རྫོགས་ཡལ་ནས་སྟོང་པ་
ཉིད། །རང་ཉིད་ཆོས་སྐུ་རྗེན་པར་བུད། །ཅེས་པ་རཱ་ག་ཨ་སྱས་གནས་འབྲེལ་མཛད་དུས་སྦྱར་རོ། །སྦྱིན་པ་རྒྱ་ཆེན་གྱུར་པ་འདི་ཡི་མཐུས། །འགྲོ་བ་འདི་དག་རང་བྱུང་སངས་རྒྱས་ཤོག །སྔོན་ཚེ་རྒྱལ་བ་རྣམས་ཀྱིས་མ་གྲོལ་བའི། །སྐྱེ་འགྲོའི་ཚོགས་རྣམས་སྦྱིན་པས་གྲོལ་གྱུར་ཅིག །རྩ་གསུམ་རབ་འབྱམས་དགྱེས་པའི་ཆར་ཆེན་པོས། །འགྲོ་བའི་སྡུག་བསྔལ་མཐའ་དག་རབ་ཞི་ནས། །བདེ་སྐྱིད་རྫོགས་ལྡན་གཞོན་ནུའི་ལང་ཚོ་ལྟར། །དྭགས་བརྒྱུད་བསྟན་པ་རྒྱས་པའི་བཀྲ་ཤིས་ཤོག །

གནམ་ཆོས་དཀར་གཏོར། སྤྲུལ་སྐུ་མི་འགྱུར་རྡོ་རྗེ།

༈ གནམ་ཆོས་དཀར་གཏོར་བཞུགས། ༁ྃ༔ གུ་རུ་དྷེ་ཝ་ཌཱ་ཀི་ནི༔ ཨ་ཀཱ་རོ་སོགས། ཧཱུྃ༔ སློབ་དཔོན་ཆེན་པོ་པདྨ་འབྱུང་གནས་ཀྱིས༔ བཀའ་དང་དམ་ཚིག་ལ་ནི་བཞག་པ་ཡི༔ དཔལ་ཆེན་མགོན་པོ་བདུན་ཅུ་རྩ་གཉིས་དང་༔ ཕྱི་ནང་གསང་བའི་ལྷ་སྲིན་སྡེ་བརྒྱད་དང་༔ དགེ་བསྙེན་དྲེགས་པའི་སྡེ་དཔོན་སུམ་ཅུ་དང་༔ སྔགས་བདག་དྲེགས་ཆེན་

བཅོ་བརྒྱད་འཁོར་དང་བཅས༔ ཡུལ་ཆེན་ཉི་ཤུ་རྩ་བཞིའི་ཞིང་སྐྱོང་དང་༔ གནས་ཀྱི་མཁའ་འགྲོ་སུམ་ཅུ་རྩ་གཉིས་དང་༔ གངས་ཅན་བོད་ཀྱི་བརྟན་མ་བཅུ་གཉིས་དང་༔ སྐྱོང་མ་དང་ནི་ཡ་མ་བཅུ་གཉིས་དང་༔ དགེ་བསྙེན་ཆེན་པོ་ཉི་ཤུ་རྩ་གཅིག་དང་༔ ཆོས་རྒྱལ་རྗེ་ཡི་མགུལ་ལྷ་བཅུ་གསུམ་དང་༔ སྲིད་པ་འདི་ཉིད་ཆགས་པའི་ལྷ་དགུ་དང་༔ སྐྱོབ་པར་བྱེད་པའི་ལྷ་ལྔ་བརྟེན་པའི་ལྷ༔ ཁྱད་པར་ཡུལ་ཕྱོགས་འདི་རུ་གནས་པ་ཡི༔ ཕ་རི་ཚུར་རི་གཡས་རི་གཡོན་རི་དང་༔ མདུན་རི་རྒྱབ་རི་མཚེར་ས་སྦྲ་ཁང་སོགས༔ གནས་པའི་ས་བདག་ཀླུ་གཉེན་གཞི་བདག་རྣམས༔ འདིར་གཤེགས་བརྒྱན་པའི་གཏོར་མ་འདི་བཞེས་ལ༔ བདག་ཅག་དཔོན་སློབ་ཡོན་མཆོད་འཁོར་བཅས་ལ༔ ཁ་འཛིན་སྡོང་གྲོགས་མེལ་ཚེ་སྐྱེལ་བསུ་དང་༔ མཐུན་རྐྱེན་རོགས་དན་སྒྲུབས་ལ་འགལ་རྐྱེན་སོལ༔ བཅོལ་བའི་ཕྲིན་ལས་མྱུར་དུ་བསྒྲུབ་པར་
མཛོད༔ ཨོཾ་སརྦ་ལོ་ཀ་པཱ་ལ་ས་པཱ་རི་ཝ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ ས་མ་ཡ༔ རྒྱ་རྒྱ་རྒྱ༔ ཁ་ཐཾ༔ གུ་ཧྱ༔ ཞེས་པ་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་པ་ཨོ་རྒྱན་གྱིས་གསུངས་སོ༔

འགྲོ་འདུལ་ཐུགས་རྗེ་ཆེན་པོའི་ལས་ཚོགས་ལས་རྒྱུན་གྱི་བསང་མཆོད་མགྲོན་རིགས་དགྱེས་པའི་དགའ་སྟོན།

༈ འགྲོ་འདུལ་ཐུགས་རྗེ་ཆེན་པོའི་ལས་ཚོགས་ལས་རྒྱུན་གྱི་བསང་མཆོད་མགྲོན་རིགས་དགྱེས་པའི་དགའ་སྟོན་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ནཱི་ཡེ། རང་གཞན་གྱི་དོན་གཉིས་ལྷུར་ལེན་པའི་གང་ཟག་གིས་སྔ་དྲོའི་ཆ་ལ་གཙང་སྦྲ་དང་ལྡན་པས། འཁན་ཤུག །འོམ་བུ། བལ་ལུ་སོགས་དྲི་བཟང་པོའི་ཤིང་རྩི། ཚིལ་ཞག་མར་སོགས་ཀྱི་རིགས་མ་འདྲེས་པའི་བཟའ་བཏུང་སྣ་ཚོགས་ལ་མྱོང་གྲོལ་བསྲེག་ཅིང་། གཙང་མའི་ཆབ་ཀྱིས་བྲན་ལ། དཀོན་མཆོག་གསུམ་དང་མཁའ་འགྲོ་ཆོས་སྐྱོང་ལ། །བདག་གཞན་སྒོ་གསུམ་གུས་པས་སྐྱབས་སུ་མཆི། །མཁའ་ཁྱབ་སེམས་ཅན་སངས་རྒྱས་སར་འགོད་ཕྱིར། །སྒོ་གསུམ་དགེ་ལ་བསྐུལ་ཞིང་བྱང་ཆུབ་བསྒྲུབ། །ལན་གསུམ། ཧྲཱིཿ འཁོར་འདས་ཆོས་ཀུན་རང་སེམས་གདོད་མའི་གཤིས། །ལྷུན་གྲུབ་རང་

གདངས་ཅིར་ཡང་སྣང་བའི་ཆ། །འཇའ་ཟེར་ཐིག་ལེའི་དྲྭ་བ་འཁྲིགས་པའི་དབུས། །པད་དཀར་ཟླ་རྒྱས་བརྩེགས་པའི་གདན་སྟེང་དུ། །རང་ཉིད་སྐད་ཅིག་འཕགས་མཆོག་སྤྱན་རས་གཟིགས། །དཀར་གསལ་ཞི་འཛུམ་ཞལ་གཅིག་ཕྱག་གཉིས་ཀྱི། །གཡས་པས་མཆོག་སྦྱིན་གཡོན་པས་པད་དཀར་འཛིན། །ལོངས་སྐུའི་ཆས་དང་སྙིང་རྗེ་ཆེན་པོའི་བརྡར། །རི་དྭགས་པགས་པས་ཕྲག་གཡོན་མཛེས་པར་བཀླུབས། །མཚན་དཔེའི་ཆ་རྫོགས་ཕྱེད་སྐྱིལ་སྟབས་ཀྱིས་བཞུགས། །གདོད་ནས་དམ་ཡེ་དབྱེར་མེད་ལྷུན་རྫོགས་ཀྱི། །ཐུགས་ཀའི་པད་ཟླར་ཧྲཱིཿམཐར་སྔགས་ཕྲེང་འཁོར། །འོད་འཕྲོས་དོན་གཉིས་ལྷུན་གྱིས་གྲུབ་པར་གྱུར། །ཨོཾ་མ་ཎི་པདྨེ་ཧཱུྃ་ཧྲཱིཿ ཅི་ནུས་མཐར། རྃ་ཡྃ་ཁྃ་གིས་མ་དག་དངོས་ཀུན་སྦྱང་། །སྟོང་པའི་ངང་ལས་བཛྲ་དྷུ་པེ་མ། །སྔོ་སངས་མཛེས་སྡུག་དར་དང་རིན་ཆེན་བརྒྱན། །

གར་སྟབས་དང་བཅས་ཕྱག་གཡས་ཁྲུས་བུམ་ལས། བདུད་རྩིའི་ཆར་བབས་མི་གཙང་མནོལ་འཐིབ་བཀྲུས། །གཡོན་པས་སྤོས་ཕོར་དུད་སྤྲིན་འཁྲིགས་པ་ལས། །འཁོར་འདས་མགྲོན་རིགས་དགྱེས་པའི་མཆོད་སྤྲིན་སྤྲོས། །ཟག་མེད་ནམ་མཁའ་མཛོད་ཀྱི་གཏེར་དུ་གྱུར། །ཨོཾ་བཛྲ་སྥ་ར་ན་ཁཾ། དེ་ནས་བསང་གཞུང་འགྲོ་འདུལ་ཐུགས་རྗེ་ཆེན་པོའི་ཐབ་ཆོག །ཀྱེ༔ སྲིད་པ་འབྱུང་བ་རིམ་བརྩེགས་ཀློང་༔ རི་རབ་མཆོག་གི་ཁ་ཁྱེར་སྟེང་༔ དཔག་བསམ་རྐང་འཐུང་ཤིང་གི་མཆོག༔ དཱེ་ཝ་དྷ་རུ་སྤོས་ཀྱི་ཤིང་༔ རི་བོ་ཆེན་པོ་བདུན་གྱི་ངོགས༔ ཙན་དན་ཨ་གར་མྱ་ངན་མེད༔ གསེར་ལོ་བལ་ཤུག་བུ་རམ་ཤིང་༔ ཐང་ལོ་བྲ་མ་ཉ་བྲིད་སྤེན༔ ལྷ་ཀླུ་མི་མིན་དགའ་བའི་ཤིང་༔ ག་པུར་གུར་གུམ་སྨན་སྤོས་རིགས༔ སྨན་ཤིང་སྤོས་མཆོག་བསྲེག་པའི་མེ༔ འབྲུ་རིགས་ཟས་སྣ་ཟག་མེད་ཀྱི༔ མྱོང་གྲོལ་བདུད་རྩི་

ཡོངས་སྦྱར་ནས༔ དུད་པ་བར་སྣང་སྤྲིན་ལྟར་གཏིབ༔ དྲི་མཆོག་ངད་པ་རླུང་བཞིན་གཡོ༔ འདོད་ཡོན་ཡིད་སྤྲུལ་རྡུལ་ལྟར་འཚུབ༔ ཡོ་བྱད་སྤྱན་གཟིགས་འཇའ་ལྟར་བྲེས༔ དཀོར་ནོར་སྲིད་ན་ཡོད་དགུ་ཚོགས༔ དེ་ལྟར་བསང་གི་མཆོད་པ་འདིས༔ མཆོད་འོས་མགྲོན་རིགས་སྤྱན་དྲངས་གྱུར༔ སརྦ་ཛྙཱ་ན་ལོ་ཀ་བཛྲ་ས་མཱ་ཛ༔ ཀྱེ༔ ཡེ་ཤེས་བསང་གི་མཆོད་སྤྲིན་འདིས༔ སྐུ་གསུམ་རྩ་བརྒྱུད་བླ་མ་བསང་༔ ཕྱི་དང་ནང་དང་གསང་བ་ཡི༔ ཡི་དམ་ལྷ་ཚོགས་ཐམས་ཅད་བསང་༔ གནས་ཡུལ་དུར་ཁྲོད་སྐྱོང་མཛད་པའི༔ མཁའ་འགྲོ་ཆོས་སྲུང་རྒྱ་མཚོ་བསང་༔ སྲིད་གསུམ་འདི་ན་མཐུ་ཆེ་བ༔ དཔལ་མགོན་དྲེགས་ཆེན་སྡེ་བརྒྱད་བསང་༔ མ་རྟོགས་འཁྲུལ་གྱུར་ཕ་མའི་ཚོགས༔ རིགས་དྲུག་སྙིང་རྗེའི་མགྲོན་རྣམས་བསང་༔ ལྷ་ཡང་མ་ཡིན་ལོངས་སྤྱོད་ཆུང་༔ མི་ཡང་མ་ཡིན་དཔལ་དང་ལྡན༔

འཐབ་མཁོན་བྱེད་པའི་ལྷ་མིན་འགྲོ༔ རྐྱེན་གྱིས་ལྷ་ཡང་སྡུག་བསྔལ་བྱེད༔ མི་རྣམས་གཟའ་སྐར་ཟེར་གྱིས་འདེབས༔ ཀླུ་ལ་བྱེ་ཚན་ཆར་སོགས་བསྙིལ༔ ནང་འཐབ་མཆི་མ་རྫིང་བུར་འཁྱིལ༔ འཐབ་མཁོན་ཕྲག་དོག་དུག་ཟེར་གྱིས༔ ཕྱི་སྣོད་འབྱུང་བ་ཉམས་པ་དང་༔ ནང་བཅུད་སྐྱེ་འགྲོ་རྒུད་པར་འགྱུར༔ ལས་ཀྱི་རྣམ་སྨིན་ངན་སོང་རྒྱུ༔ འཕགས་རྣམས་ཐུགས་རྗེས་དེ་བསལ་ཕྱིར༔ འབྱུང་བའི་ལོངས་སྤྱོད་ལ་བརྟེན་ནས༔ ཞི་བྱེད་བསམ་གཏན་ཆོ་ག་མཛད༔ འགྲན་སེམས་ཕྲག་དོག་གཡོ་བའི་དུག༔ འོད་གསལ་ཏིང་འཛིན་སྟོབས་ཀྱིས་བསང་༔ ལྷ་མིན་སྡུག་བསྔལ་བྲལ་ནས་ཀྱང་༔ ལས་དང་སྒྲིབ་པ་བྱང་གྱུར་ཅིག༔ ང་རྒྱལ་རྣམ་གཡེང་མགོ་བསྐོར་བདུད༔ རྟུལ་ཕོད་བརྩོན་འགྲུས་ཤུགས་ཀྱིས་བསང་༔ ལྷ་ཡི་སྒྲིབ་པ་བྱང་བར་གྱུར༔ སྐྱེ་རྒ་ན་འཆི་བྲེལ་ཕོངས་རྒྱུན༔ བསླབ་

གསུམ་ཚུལ་ཁྲིམས་དྲི་ཡིས་བསང་༔ མི་ཡི་སྒྲིབ་པ་བྱང་གྱུར་ཅིག༔ གཏི་མུག་རྨོངས་པར་འཐུམ་བྱེད་སྨག༔ རང་རིག་ཤེས་རབ་སྒྲོན་མེས་བསང་༔ དུད་འགྲོའི་ལས་སྒྲིབ་བྱང་བར་ཤོག༔ རློམ་སེམས་སེར་སྣས་བཅིང་བའི་ཞག༔ གཏོང་བ་དམིགས་མེད་ཐབས་ཀྱིས་བསང་༔ ཡི་དྭགས་ལས་ངན་བྱང་གྱུར་ཅིག༔ ཞེ་སྡང་མཁོན་འཛིན་གནོད་སེམས་མེ༔ བཟོད་མཆོག་བྱང་ཆུབ་སེམས་ཀྱིས་བསང་༔ དམྱལ་བའི་སྡུག་བསྔལ་ཞི་བར་ཤོག༔ བྱམས་དང་སྙིང་རྗེའི་ཕན་སེམས་ཀྱིས༔ ལུས་མེད་དགའ་བའི་བསང་མཆོད་འདིས༔ ལུས་ཅན་འགྲོ་ཀུན་བདེ་གྱུར་ཅིག༔ ཀྱེ༔ སྲིད་པའི་རྩེ་ནས་མནར་མེད་ཡན༔ མི་མཇེད་སྟོང་གསུམ་འཇིག་རྟེན་ན༔ གནས་པའི་ལྷ་ཀླུ་གཞི་བདག་ནི༔ ཕན་ཞིང་སྡོང་གྲོགས་བྱེད་ཀུན་བསང་༔ ཁྱད་པར་འཛམ་གླིང་མཐའ་དབུས་ལ༔ གནས་པའི་ས་བདག་ཡུལ་ལྷ་དང་༔

གནས་བདག་གཙུག་ལག་རྩིས་ཀྱི་ལྷ༔ ཕན་གནོད་མཐུ་རྩལ་ལྡན་ཀུན་བསང་༔ འཕགས་མཆོག་ཐུགས་རྗེས་སྐྱོང་བའི་ཡུལ༔ སྤྱན་རས་གཟིགས་དབང་སྲོང་བཙན་དང་༔ འཇིག་རྟེན་མགོན་པོ་པད་འབྱུང་གི༔ འདུལ་ཞིང་བོད་དང་བོད་ཆེན་ཡུལ༔ དགེ་བསྙེན་ཉེར་གཅིག་གཉེན་ཆེན་དྲུག༔ བསྟན་མ་སྐྱོང་མ་མིང་པོར་བཅས༔ སྐོར་གསུམ་རུ་གཞི་སྒང་དྲུག་གི༔ ས་བདག་གཞི་བདག་ཡུལ་ལྷ་བསང་༔ གླིང་དང་རྒྱལ་ཁམས་ཡུལ་འཁོར་དང་༔ གངས་རི་རྫ་སྤང་བྲག་རི་ལ༔ གནས་པའི་གཉན་ཆེན་ལྷ་བདུད་བཅས༔ འཁོར་དང་སྡེ་དཔུང་བཅས་པ་བསང་༔ ཐང་ཆེན་ཐང་ཕྲན་སྤང་གི་ལྗོངས༔ བྲག་ཕུག་གྲོག་མཁར་ནགས་ཀྱི་རི༔ ལྗོན་ཤིང་ཤིང་ཕྲན་འཐིབ་པོའི་ནགས༔ དེར་གནས་གཉན་རིགས་ཐེའུ་རང་བསང་༔ རྒྱ་མཚོ་མཚོ་ཆེན་མཚོ་ཕྲན་དང་༔ ཆུ་བོ་ཆུ་ཕྲན་ཆུ་

མིག་མཚོ༔ བཀོད་མ་རྫིང་བུ་ནེའུ་སེང་ལ༔ ཆུ་ལྷ་ཀླུ་རིགས་གནས་ཀུན་བསང་༔ སྐྱེད་མོས་ཚལ་དང་མེ་ཏོག་ལྗོངས༔ རི་ཕྲན་ཆུ་ཕྲན་ལམ་འཕྲང་ལ༔ རྒྱུ་དང་གནས་བཅས་བསྟོད་དང་གསོ༔ གཉན་ཕྲན་སྨན་མོར་བཅས་པ་བསང་༔ ས་བླ་ལྷ་གནས་བར་སྣང་གི༔ གཟའ་སྐར་ས་སྟེང་འགྲོ་བ་ལ༔ ཕན་གནོད་འབྱུང་ལྷ་ཕྱོགས་སྐྱོང་གདོན༔ ཡེ་ནས་སྲིད་པའི་ལྷ་དགུ་བསང་༔ འགོ་བའི་ལྷ་ལྔ་མཁར་དང་ཞིང་༔ ལྷ་ཐོ་ལྷས་དང་ར་བའི་ལྷ༔ ཕུགས་ལྷ་ཐབ་ལྷ་གྲུ་ཟམ་ལྷ༔ དགྲ་བླ་བཅུ་གསུམ་བཅས་པ་བསང་༔ སྲོག་ལུས་དབང་ཀླུང་བསྐྱེད་པའི་ལྷ༔ ཚེ་ལྷ་ལམ་ལྷ་རྟ་ནོར་ལྷ༔ ར་ལྷ་ལུག་ལྷ་ཚོང་མགྲོན་ལྷ༔ སྲུང་ལྷ་ཇག་ལྷ་ལ་སོགས་བསང་༔ ས་འོག་ས་བདག་བརྟན་མ་དང་༔ དབང་ཆེན་ས་འཛིན་ལྟོ་འཕྱེའི་རིགས༔ འབྱུང་བའི་ལྷ་དང་ཀླུ་ཆེན་བརྒྱད༔ ཀླུ་རིགས་བསྐལ་པའི་བྱེ་སྙེད་བསང་༔ ཕྱི་སྣོད་

ཁམས་ཀྱི་ལྷ་འདྲེ་བསང་༔ ནང་བཅུད་སྲོག་གིས་བསྡུས་ཀུན་བསང་༔ གཟུགས་མེད་སྟོང་གཟུགས་བག་ཆགས་བསང་༔ ཡིད་ལུས་སེམས་ཉིད་རྒྱུན་གྱི་རྟེན༔ གཏད་མེད་བར་དོའི་སེམས་ཅན་གྱི༔ འཁྲུལ་སྣང་འཇིགས་སྐྲག་སྣང་བ་ཀུན༔ ལྷ་སྔགས་ཏིང་འཛིན་བདེན་པས་བསང་༔ གཟུགས་བཟང་ལོངས་སྤྱོད་ཐོབ་པར་ཤོག༔ ཐོག་མེད་དུས་ཀྱི་ཕ་མ་སྟེ༔ ཟས་ནོར་སྦྱིན་དང་བརྐུས་འཕྲོག་པའི༔ ལེན་ལ་རེ་ཞིང་ཆགས་པ་ཡི༔ བུ་ལོན་བསྙག་རྣམས་དགའ་བ་དང་༔ བྱམས་པ་ཆེན་པོས་ཡོངས་སུ་བསང་༔ གནོད་སེམས་བསད་བཅད་བརྡུང་བརྡེགས་ཀྱིས༔ ཤ་མཁོན་ལུས་སྲོག་ལ་འཁུ་བའི༔ ནད་གདོན་དགྲ་ལ་སྙིང་རྗེ་དང་༔ བཏང་སྙོམས་བྱང་ཆུབ་སེམས་ཀྱིས་བསང་༔ སྟོང་ཕྲག་བརྒྱད་ཅུའི་བགེགས་རིགས་དང་༔ སུམ་བརྒྱ་དྲུག་ཅུའི་ཡེ་འགྲོགས་གདོན༔ རྐྱེན་ངན་ཉི་ཁྲི་

ཆིག་སྟོང་གི༔ སྣ་འདྲེན་བྱེད་པའི་བྱུར་གྱི་འདྲེ༔ གློ་བུར་དགུ་བཅུ་རྩ་གཅིག་གིས༔ དངོས་རྒྱུད་མ་རུངས་གནོད་བྱེད་རིགས༔ བཞི་བརྒྱ་རྩ་བཞིའི་ནད་འདྲེན་དང་༔ བར་ཆད་དུས་མིན་འཆི་བའི་བདུད༔ བྱམས་དང་སྙིང་རྗེའི་ཨ་མྲྀ་ཏ༔ ལྷ་སྔགས་སྨན་དང་རྫས་ཀྱིས་བསང་༔ ཟས་ཟ་འཇིག་རྟེན་བསྐྱེད་པའི་གདོན༔ དགེ་ལ་བར་གཅོད་བདུད་བཞིའི་དཔུང་༔ དུག་ལྔའི་སྡིག་ཆེན་བསགས་པའི་དགྲ༔ ཡེ་ཤེས་ལྔ་ཡི་མདངས་ཀྱིས་བསང་༔ ཀུན་གྱི་རྩ་བ་མ་རིག་སྒྲིབ༔ རང་རིག་རང་ངོ་ཤེས་པས་བསང་༔ ངར་འཛིན་བདག་གཞན་འཁྲུལ་བྱེད་པའི༔ ཀུན་རྟོག་སྒྲིབ་གཉིས་བུད་ཤིང་རྣམས༔ བདག་མེད་ཤེས་རབ་མེ་ཡིས་བསྲེགས༔ བསོད་ནམས་ཡེ་ཤེས་མཆོད་པའི་སྤྲིན༔ སྲིད་ཞི་དགྱེས་པར་ཚིམ་པས་བསང་༔ འབུལ་ལོ་འཁོར་འདས་མགྲོན་རིགས་ཀུན༔ བཞེས་ནས་རྣལ་འབྱོར་སྒྲུབ་པ་པོ༔

ཡོན་མཆོད་འཁོར་དང་བཅས་པ་ཡི༔ ནད་གདོན་རྐྱེན་ངན་བར་ཆད་ཞི༔ ཚེ་བསོད་སྟོབས་འབྱོར་མངའ་ཐང་སྤེལ༔ གདུལ་བྱའི་འགྲོ་དང་ལོངས་སྤྱོད་བསྡུ༔ བདག་འཛིན་དུག་ལྔའི་དགྲ་གདོན་སྒྲོལ༔ ཚོགས་ཆེན་དམ་པ་གཉིས་རྫོགས་ནས༔ མར་གྱུར་མཁའ་མཉམ་འགྲོ་བ་རྣམས༔ རྣམ་མཁྱེན་བྱང་ཆུབ་འཁོད་ཀྱི་བར༔ གཞན་དོན་རྒྱུན་མི་འཆད་པ་དང་༔ ངལ་བ་མེད་པར་འགྲོ་བའི་དོན༔ འཕགས་པའི་དགོངས་པ་བདག་གིས་བསྒྲུབ༔ ནམ་མཁའ་ཇི་སྲིད་བྱང་ཆུབ་སེམས༔ སྤྱན་རས་གཟིགས་དང་མཉམ་པར་ཤོག༔ ས་མ་ཡ༔ གཞན་ཡང་རང་རང་གི་ཡུལ་ལྷའི་བསང་སོགས་རྒྱས་བསྡུས་ཅི་རིགས་བཏང་མཐར། ཀྱེ། བདུད་རྩི་བསང་གི་མཆོད་སྤྲིན་འདིས། །འཁོར་འདས་མགྲོན་རིགས་མཉེས་ཤིང་ཚིམ། །སྣོད་བཅུད་མ་ལུས་བདེ་སྐྱིད་ལྡན། །སྡུག་བསྔལ་ཉེས་ཚོགས་ཀུན་ཞི་ཞིང་། །ཕན་བདེའི་དཔལ་

ཡོན་རབ་ཏུ་རྒྱས། །མོས་བཞིའི་སྣང་སྲིད་དབང་དུ་བསྡུས། །གནོད་བྱེད་དགྲ་བགེགས་ཐལ་བར་རློག །རྒྱལ་བསྟན་དར་རྒྱས་ཡུན་རིང་གནས། །བསྟན་འཛིན་ཐུགས་མཐུན་ཞབས་པད་བརྟན། །དགེ་འདུན་སྡེ་འཕེལ་ཐོས་བསམ་སྒོམ། །ཡར་ངོའི་ཟླ་ལྟར་ཁྱབ་པར་མཛོད། །སྙིགས་མའི་སྐལ་ངན་རང་སར་ཞི། །རྫོགས་ལྡན་དང་པོའི་དཔལ་ཡོན་གྱིས། །སྐྱེ་དགུ་མཐའ་དག་ཚིམ་ཞིང་དགྱེས། །བཀྲ་ཤིས་སྣང་བས་རྟག་ཁྱབ་མཛོད། །བདག་ཅག་ཡོན་མཆོད་ཐམས་ཅད་ཀྱིས། །གཞི་བྱེས་བྱ་བ་གང་བརྩམས་ཀྱང་། །ལེགས་སྤྲོད་ཉེས་བསྣོལ་བསམ་དོན་ཀུན། །འབད་མེད་ལྷུན་གྱིས་འགྲུབ་པར་མཛོད། །ཅེས་ཕྲིན་ལས་བཅོལ། ཀྱེ། སྣང་སྲིད་འཁོར་འདས་སྲིད་ཞིའི་ཁམས། །ལྷ་མི་ཀླུ་དང་གནོད་སྦྱིན་གྱི། །ཚེ་བསོད་དཔལ་འབྱོར་འབྲུ་ནོར་བཅུད། །ཆེ་བཙན་འཕེལ་ཕྱུག་མངའ་ཐང་སོགས། །སྣོད་

བཅུད་དགེ་མཚན་དྭངས་བཅུད་ཀུན། །ཁུ་ཡེ་ཕྱྭ་དང་གཡང་དུ་ལེན། །རྒྱལ་བསྟན་དར་ཞིང་རྒྱས་པ་དང་། །དགོས་འདོད་ཕུན་སུམ་ཚོགས་པར་ཤོག །མ་འབྱོར་མ་དག་ནོངས་པའི་ཆ། །གང་མཆིས་གདོད་མའི་དབྱིངས་སུ་བཤགས། །གང་བརྩམས་ལས་ཀུན་ལྷུན་གྲུབ་ཅིང་། །རྟག་ཏུ་སྲུང་ཞིང་སྐྱོབས་པར་མཛོད། །མགྲོན་རྣམས་དགྱེས་བཞིན་རང་གནས་གཤེགས། །ལྷར་སྣང་འོད་གསལ་དབྱིངས་སུ་ཐིམ། །སརྦ་ཛྙཱ་ན་ལོ་ཀ་བྷཱུ་ཏ་གཙྪ། བདག་ཅག་ཡོན་མཆོད་བསམ་དོན་ཀུན། །འབད་མེད་ལྷུན་གྱིས་འགྲུབ་པ་དང་། །བརྟན་གཡོ་ཀུན་གྱི་བཀྲ་ཤིས་ཀྱི། །དགེ་མཚན་དཔལ་དུ་འབར་བ་ཤོག །ཅེས་པ་འདི་ཡང་འཕགས་ནོར་བདུན་གྱིས་མངོན་པར་མཐོ་བ་ཀརྨ་བསྟན་འཕེལ་གྱིས་དུས་རིང་མོ་ནས་བསྐུལ་བ་དང་། སླར་ཡང་གཏེར་ཆེན་མཆོག་གི་སྤྲུལ་པའི་སྐུ་རིན་པོ་ཆེས་བཀའ་རྩལ་ཕེབས་པ་སྤྱི་བོར་བཀོད་དེ། མགོན་པོ་གང་གི་ཐུགས་རྗེའི་
གྲིབ་བསིལ་དུ་ངལ་འཚོ་བའི་རིག་འཛིན་གྱི་གཅུང་ཀརྨ་བཀའ་བརྒྱུད་བཀྲ་ཤིས་ཀྱིས་སྤྱི་འབྱམས་རི་ཁྲོད་དཔལ་རི་ཆོས་དབྱིངས་མཛོད་ནས་བྲིས་པ་དགེ་ལེགས་འཕེལ། །ཞལ་དྲོ།།

ཇ་མཆོད་ཁག་ཅིག

༈ ཇ་མཆོད་འདོད་ཡོན་ལྔ་ལྡན་ནི། ཨོཾ་ཨཱཿཧཱུྃ། འདོད་ཡོན་ལྔ་ལྡན་ཇ་ཡི་མཆོད་པ་འདི། །མཆོད་པར་འོས་པ་རྒྱ་མཚོས་མཆོད་པར་བཞེས། །བཀའ་བརྒྱུད་རིམ་པར་བྱོན་རྣམས༴ གསང་བ་ལུས་མེད་རྡོ་རྗེས༴ དྲིན་ཆེན་རྩ་བའི་བླ་མས༴ ཡི་དམ་རྒྱུད་སྡེ་བཞི་ཡིས༴ ཡུམ་མཆོག་རྡོ་རྗེ་ཕག་མོས༴ གནས་གསུམ་དཔའ་བོ་མཁའ་འགྲོས༴ ཆོས་སྐྱོང་མ་མགོན་ལྕམ་དྲལ༴ རྒྱུད་སྲུང་ལས་མགོན་དབུ་སྨུག༴ བསྟན་སྲུང་ཞལ་གཤིན་ཆོས་སྐྱོང༴ ཛམ་ལྷ་གཏེར་བདག་དགེ་བསྙེན༴ དཀར་ཕྱོགས་ཕྱོགས་སྐྱོང་གཞི་བདག་མཆོད་པར་བཞེས། །འདོད་ཡོན་བདུད་རྩིའི་མཆོད་པ་བཞེས་ནས་ཀྱང༌། །ལམ་གྱི་འགལ་རྐྱེན་བར་ཆད་ཀུན་སོལ་ལ། །བསོད་ནམས་ཡེ་ཤེས་ཚོགས་གཉིས་རབ་ཏུ་

འཕེལ། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཞེས་རཏྣའི་མིང་གིས་སྦྱར་བའོ། ། ༈ མ༵ཁྱེན་པས་ཤེས་བྱའི་ཁྱོན་ཀུན་སྒྲིབ་མེད་གཟིགས། །བ༵རྩེ་བས་འགྲོ་རྣམས་ཐར་པའི་གནས་སུ་སྒྲོལ། །ནུས༵་པས་གདུལ་དཀའི་སྐྱེ་བོ་འདུལ་མཛད་པ། །དར་མ་དབང་ཕྱུག་ཞལ་དུ་མཆོད་པ་འབུལ། །འཆ༵ད་པས་རྒྱལ་བའི་བསྟན་པ་ཉིན་མོར་བྱེད། །རྩོད༵་པས་གྲུབ་མཐའ་ངན་པ་ཚར་གཅོད་ཅིང༌། །རྩོམ༵་པས་འབའ་རོམ་བསྟན་པ་རྒྱས་མཛད་པ། །ཤེས་རབ་སེངྒེའི་ཞལ་དུ་མཆོད་པ་འབུལ། །ཐོ༵ས་པས་རིག་གནས་ཀུན་ལ་མ་རྨོངས་ཤིང༌། །བས༵མ་པས་དེ་དོན་ལེགས་པར་ཐུགས་སུ་ཆུད། །སྒོམ༵་པས་ཐབས་གྲོལ་ཉམས་ལེན་མཐའ་རུ་ཕྱིན། །ཤེས་རབ་བྱང་ཆུབ་ཞལ་དུ་མཆོད་པ་འབུལ། །འགྲོ་བའི་མགོན་པོ་བླ་མ་རྣམ་གསུམ་ལ། །ཟག་མེད་བདུད་རྩིའི་མཆོད་པ་ཕུལ་བའི་མཐུས། །

བདག་སོགས་འདི་དང་ཚེ་རབས་ཐམས་ཅད་དུ། །འབྲལ་བ་མེད་པར་རྗེས་སུ་བཟུང་དུ་གསོལ། །ཞེས་མ་ཏི་རཏྣས་སོ། ། ༈ ཇ་མཆོད་དགེ་ལེགས་སྤྲིན་ཕུང་ཞེས་བྱ་བ་བཞུགས་སོ། །རྡོ་རྗེ་འཆང་ཆེན་གྲུབ་ཆེན་ས་ར་ཧ། །ཏཻ་ལོ་ནཱ་རོ་མར་པ་མི་ལ་རས། །དྭགས་པོ་འབའ་རོམ་ཏི་ཤྲི་རས་ལ་སོགས། །བཀའ་བརྒྱུད་བླ་མ་རྣམས་ལ་མཆོད་པ་འབུལ། །མདོ་རྒྱུད་མན་ངག་ལེགས་བཤད་ནོར་བུའི་མཛོད། །ཟབ་གསང་སྨིན་གྲོལ་རྒྱ་མཚོའི་མངའ་དབང་ཕྱུག །མཐའ་ཀླས་བསྟན་འགྲོ་ཡོངས་ཀྱི་མགོན་དཔུང་མཆོག །རྩ་བརྒྱུད་བླ་མ་རྣམས་ལ་མཆོད་པ་འབུལ། །མཆོག་ཏུ་མི་འགྱུར་བཅོམ་ལྡན་འཁོར་ལོ་སྡོམ། །རྣམ་ཀུན་སྟོང་ཉིད་ལྷན་སྐྱེས་རྟགས་ཀྱི་ལྷ། །ཟུང་འཇུག་གྲུབ་གཉིས་ཡིད་བཞིན་འཇོ་བའི་དཔལ། །ཡི་དམ་ལྷ་ཚོགས་རྣམས་ལ་མཆོད་པ་འབུལ། །ཆོས་ཉིད་ངང་ལས་ཞི་ཆགས་ཁྲོ་བོའི་གར། །མི་ཤིགས་

དྭངས་མའི་སྐུ་རུ་ལྷུན་གྲུབ་པས། །གཉིས་སྣང་བདུད་དགྲའི་གཡུལ་ལས་རྟག་རྒྱལ་བ། །མཁའ་འགྲོ་ཆོས་སྐྱོང་རྣམས་ལ་མཆོད་པ་འབུལ། །སྦྱིན་པ་མཐར་ཕྱིན་འདོད་དགུའི་དཔལ་གྱིས་འབྱོར། །མ་རིག་སེར་སྣའི་གདུང་བ་དབྱིངས་སུ་ཞི། །སྒྲུབ་པ་པོ་ལ་དངོས་གྲུབ་ཆར་འབེབས་པའི། །ནོར་ལྷ་གཏེར་བདག་རྣམས་ལ་མཆོད་པ་འབུལ། །རྩ་གསུམ་རིག་འཛིན་རྒྱལ་བའི་དཀྱིལ་འཁོར་ལ། །མཆོད་བསྟོད་དད་མོས་རྩེ་གཅིག་གསོལ་བཏབ་མཐུས། །སྐྱེ་ཀུན་འབྲལ་མེད་ཐུགས་བརྩེས་རྗེས་བཟུང་ནས། །རྣམ་གྲོལ་སྐུ་བཞིའི་གོ་སར་དབུགས་དབྱུང་གསོལ། །གནས་སྐབས་སུ་ཡང་འགལ་རྐྱེན་མཐའ་དག་ཞི། །མཐུན་རྐྱེན་ཚེ་དང་དཔལ་འབྱོར་རྒྱས་པ་དང་། །ཆོས་བཞིན་སྤྱོད་པའི་གྲོགས་དང་ལྷན་གཅིག་ཏུ། །བསམ་པའི་དོན་ཀུན་འགྲུབ་པར་བྱིན་གྱིས་རློབས། །སྐྱེ་བ་ཀུན་ཏུ་
ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པའང་སྐྱོ་བྲག་གསལ་བྱེད་སྤྲུལ་མིང་པས་འབའ་རོམ་གདན་ས་མཐིལ་དུ་སྦྱར་བ་དགེ།

སྔ་ཐུན་དུས་མཆོད་ཐམས་ཅད་ཀྱི་དབུར་དཀོན་མཆོག་གསུམ་ལ་ཕྱག་འཚལ་བའི་རྒྱུད།

༈ སྔ་ཐུན་དུས་མཆོད་ཐམས་ཅད་ཀྱི་དབུར་དཀོན་མཆོག་གསུམ་ལ་ཕྱག་འཚལ་བའི་རྒྱུད་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱའི་རྒྱལ་པོའི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་གཏུགས་ཏེ་གུས་པས་ཕྱག་འཚལ་ལོ། །ཞེས་པའི་ཚིག་མཚམས་རྣམས་ལ་ཕྱག་བྱའོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ཚེ། །ས་ཆེན་འདི་ལ་གོམས་པ་བདུན་བོར་ནས། །ང་

ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །མཚན་མཆོག་ལྡན་པ་དྲི་མེད་ཟླ་བའི་ཞལ། །གསེར་མདོག་འདྲ་བ་ཁྱོད་ལ་ཕྱག་འཚལ་ལོ། །རྡུལ་བྲལ་ཁྱོད་འདྲ་སྲིད་པ་གསུམ་མ་མཆིས། །མཉམ་མེད་མཁྱེན་ཆེན་ཁྱོད་ལ་ཕྱག་འཚལ་ལོ། །མི་མཆོག་འདུལ་བ་ཁ་ལོ་སྒྱུར་མཛད་ཅིང་། །ཀུན་སྦྱོར་འཆིང་བ་གཅོད་མཛད་དེ་བཞིན་གཤེགས། །དབང་པོ་ཞི་ཞིང་ཉེར་ཞི་ཞི་ལ་གནས། །མཉན་ཡོད་བཞུགས་པ་དེ་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་

གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་ཕྱག་འཚལ་ལོ། །ཞེས་དང་། སྤྲོ་ན། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་

པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་

གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་
སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །ཞེས་བཟང་སྤྱོད་ཀྱི་ཡན་ལག་བདུན་པའང་བྱའོ། །

དྭགས་པོ་བཀའ་བརྒྱུད་སྤྱི་ལ་གསོལ་བ་འདེབས་པ།

༈ དེ་ནས་དྭགས་པོ་བཀའ་བརྒྱུད་སྤྱི་ལ་གསོལ་བ་འདེབས་པ་ནི། རྡོ་རྗེ་འཆང་ཆེན་ཏེ་ལོ་ནཱ་རོ་དང་། །མར་པ་མི་ལ་ཆོས་རྗེ་སྒམ་པོ་པ། །རྒྱལ་ཚབ་སྒོམ་ཚུལ་དཔལ་ལྡན་དུས་གསུམ་མཁྱེན། །འགྲོ་བའི་མགོན་པོ་ཕག་གྲུ་རྡོ་རྗེ་རྒྱལ། །དཔལ་ལྡན་འབའ་རོམ་མཚུངས་མེད་ཏི་ཤྲི་རས། །ཚུལ་ཁྲིམས་སྙིང་པོས་རྗེས་བཟུང་ཞང་ཚལ་པ། །འབྲི་སྟག་ཁྲོ་གླིང་སྨར་ཡེལ་གཡའ་ཤུག་སོགས། །ཆེ་བཞི་ཡ་བརྒྱད་ཟུར་གཉིས་བརྒྱུད་འཛིན་པ། །ཟབ་ལམ་ཕྱག་རྒྱ་ཆེ་ལ་མངའ་བརྙེས་པའི། །མཉམ་མེད་འགྲོ་མགོན་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་

བཀའ་བརྒྱུད་བླ་མ་རྣམས། །བརྒྱུད་པ་འཛིན་ནོ་རྣམ་ཐར་བྱིན་གྱིས་རློབས། །ཞེན་ལོག་སྒོམ་གྱི་རྐང་པར་གསུངས་པ་བཞིན། །ཟས་ནོར་ཀུན་ལ་ཆགས་ཞེན་མེད་པ་དང་། །ཚེ་འདིའི་གདོས་ཐག་ཆོད་པའི་སྒོམ་ཆེན་ལ། །རྙེད་བཀུར་ཞེན་པ་མེད་པར་བྱིན་གྱིས་རློབས། །མོས་གུས་སྒོམ་གྱི་མགོ་བོར་གསུངས་པ་བཞིན། །མན་ངག་གཏེར་སྒོ་འབྱེད་པའི་བླ་མ་ལ། །རྒྱུན་དུ་གསོལ་བ་འདེབས་པའི་སྒོམ་ཆེན་ལ། །བཅོས་མིན་མོས་གུས་སྐྱེ་བར་བྱིན་གྱིས་རློབས། །ཡེངས་མེད་སྒོམ་གྱི་དངོས་གཞིར་གསུངས་པ་བཞིན། །གང་ཤར་རྟོགས་པའི་ངོ་བོ་སོ་མ་དེ། །མ་བཅོས་དེ་ཀར་འཇོག་པའི་སྒོམ་ཆེན་ལ། །བསྒོམ་བྱ་བློ་དང་བྲལ་བར་བྱིན་གྱིས་རློབས། །རྣམ་རྟོག་ངོ་བོ་ཆོས་སྐུར་གསུངས་པ་བཞིན། །ཅི་ཡང་མ་ཡིན་ཅིར་ཡང་འཆར་བ་ལ། །མ་འགགས་རོལ་པར་འཆར་བའི་སྒོམ་ཆེན་ལ། །འཁོར་འདས་དབྱེར་མེད་
རྟོགས་པར་བྱིན་གྱིས་རློབས། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་ཀུན་མཁྱེན་བན་སྒར་བ་འཇམ་དཔལ་བཟང་པོས་མཛད་པ་ལ་དགོས་དབང་གིས་ཁ་གསབ་བ་ཅན་ནོ། །

གསུར་མཆོད་མདོར་བསྡུས།

༈ སྔ་ཐུན་གྲོལ་འཕྲལ་འདོན་བྱ་ལ། གསུར་མཆོད་མདོར་བསྡུས་བཏང་བར་སྤྲོ་ན། ཟས་སྣ་མྱང་གྲོལ་དམ་རྫས་བསྲེས་པ་བསྲེགས་ལ་ཆབ་བྲན། སྐྱབས་སེམས་སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་བྱ། རང་ཉིད་ཐུགས་རྗེ་ཆེན་པོར་གྱུར། བསྲེག་རྫས་ཨོཾ་ཨཱཿཧཱུྃ་གསུམ་ལས༔ ཡེ་ཤེས་མཆོད་སྦྱིན་འཕྲོ་བར་བསམ༔ ཨོཾ་ཨཱཿཧཱུྃ། ལན་གསུམ། བསླུ་མེད་དཀོན་མཆོག་གསུམ་རྣམས་ལ༔ བསྲེག་

རྫས་བདུད་རྩིའི་མཆོད་པ་འབུལ༔ བདག་དང་སེམས་ཅན་བསྐྱབ་ཏུ་གསོལ༔ བླ་མ་ཡི་དམ་མཁའ་འགྲོ་ལ༔ བསྲེག་རྫས་བདུད་རྩིའི་མཆོད་པ་འབུལ༔ བདག་དང་སེམས་ཅན་བྱིན་གྱིས་རློབས༔ ཆོས་སྐྱོང་ཡུལ་ལྷ་གཞི་བདག་ལ༔ བསྲེག་རྫས་བདུད་རྩིའི་མཆོད་པ་འབུལ༔ བར་ཆད་སོལ་ལ་ཕྲིན་ལས་སྒྲུབས༔ ཕ་མས་གཙོར་བྱས་སེམས་ཅན་ལ༔ བསྲེག་རྫས་བདུད་རྩི་འདི་བསྔོས་པས༔ སྒྲིབ་དག་ཚོགས་གཉིས་རྫོགས་པར་ཤོག༔ བར་དོར་གནས་པའི་སེམས་ཅན་ལ༔ བསྲེག་རྫས་བདུད་རྩི་འདི་བསྔོས་པས༔ འཁྲུལ་སྣང་སྡུག་བསྔལ་ཞི་བར་ཤོག༔ ལན་ཆགས་དགྲ་བགེགས་ཐམས་ཅད་ལ༔ བསྲེག་རྫས་བདུད་རྩི་འདི་བསྔོས་པས༔ བུ་ལོན་ཤ་འཁོན་བྱང་བར་ཤོག༔ སྔོན་གྱི་རྒྱལ་བ་ཐམས་ཅད་ཀྱིས༔ སྦྱིན་པས་དོན་རྣམས་གྲུབ་པ་བཞིན༔ ཆོས་ཉིད་རྣམ་དག་བདེན་པ་ཡིས༔ སྨོན་ལམ་ཐམས་ཅད་འགྲུབ་

པར་ཤོག༔ ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་པར་ཤོག །ཁ་ཟས་བསྟབས་པ་འདི་ཡི་མཐུས། །འཁྲུལ་སྣང་འཇིགས་སྐྲག་ཐམས་ཅད་ཞི། །བར་དོ་རང་ངོ་འཕྲོད་གྱུར་ནས། །དག་པའི་ཞིང་དུ་སྐྱེ་བར་ཤོག །ན་མོ། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལས་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུ། །འདུས་བྱས་ཆོས་རྣམས་དེ་ལྟར་བལྟ། །

དམར་གསུར།

༈ དགོང་མོའི་ཆར་དམར་གསུར་ནི། ཤ་ཁྲག་ཕྱེ་ཕུར་སྦྱར་བ་བསྲེགས་ལ། རྃ་ཡྃ་ཁྃ། ཨོཾ་ཨཱཿཧཱུྃ་ལན་གསུམ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག༴ དེ་བཞིན་གཤེགས་པ་སྐུ་འབྱམས་ཀླས་ལ་ཕྱག༴ དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །སམྦྷ་ར་ལན་བདུན་གྱིས་བསྔོ། ཨོཾ༔ ཤ་ཁྲག་འབྲུ་སྨན་སྦྱར་བ་ཡི༔ གསུར་མཆོད་འདོད་ཡོན་ལྔ་ལྡན་འདི༔ བདག་ཅག་དཔོན་སློབ་འཁོར་བཅས་ཀྱི༔ ཚེ་དང་སྲོག་ལ་བར་གཅོད་པའི༔ འཆི་བདག་གཤིན་རྗེ་མ་མོའི་སྡེ༔ འབྱུང་པོ་ཤ་ཟ་གནོད་སྦྱིན་ཚོགས༔ སྲིན་པོ་དྲི་ཟ་ཡི་དྭགས་སོགས༔ མ་རུང་གདུག་པའི་སེམས་འཆང་བ༔ འཁོར་དང་བཅས་པ་ཀུན་ལ་བསྔོ༔ དགྱེས་ཤིང་མཉེས་ནས་རབ་ཚིམས་ཏེ༔ བུ་ལོན་ལན་ཆགས་བྱང་བ་དང་༔ ཁྲོས་ཤིང་འཁྲུགས་པའི་སེམས་ཀུན་ཞི༔ དུས་མིན་འཆི་བའི་འཇིགས་པ་དང་༔ ནད་དང་གནོད་པ་ཀུན་
ལས་ཐར༔ ཕན་དང་བདེ་བའི་སེམས་སྐྱེས་ནས༔ བཀྲ་ཤིས་ཕུན་སུམ་ཚོགས་པར་ཤོག༔ ཅེས་དང་འགྲུབ་ན་ཆོས་སྦྱིན་དང་བསྔོ་སྨོན་བྱའོ། །

གསུར་མཆོད་འཁོར་འདས་མགྲོན་རིགས་དགྱེས་པའི་མཆོད་སྤྲིན།

༈ འགྲོ་འདུལ་འཇིག་རྟེན་དབང་ཕྱུག་གི་ལས་ཚོགས་སྐོར་ལས༔ གསུར་མཆོད་འཁོར་འདས་མགྲོན་རིགས་དགྱེས་པའི་མཆོད་སྤྲིན་བཞུགས་སོ༔ ན་མོ་ལོ་ཀི་ཤྭ་ར་ཡེ། འདིར་འགྲོ་འདུལ་ཐུགས་རྗེ་ཆེན་པོའི་ལས་ཚོགས་གསུར་མཆོད་བྱ་བར་འདོད་ན། གཏེར་གཞུང་ལས། ལྷ་ཆེན་མི་མིན་གཟུགས་མེད་བཅས༔ འགྲོ་ལ་ཕན་པར་བྱ་བའི་སླད༔ མྱོང་གྲོལ་བྲན་པའི་གསུར་རྫས་ནི༔ དཀར་གསུམ་མངར་གསུམ་དྲི་ཡི་གསུར༔ བྱིན་རླབས་མགྲོན་ཀུན་ཚིམ་པར་བསྔོ༔ ཞེས་པ་ལྟར། ཟས་ཕུད་གཙང་མ་མར་ཁུ་འོ་མས་སྦྲུས་པ། རིན་ཆེན་དར་ཟབ་མངར་གསུམ་ཁྱད་པར་མྱོང་གྲོལ་སོགས་བསྲེས་པ་དུ་བ་མེད་པའི་མེར་ཆུ་གཙང་གིས་བྲན་ལ། ཐོག་མར་སྐྱབས་སུ་འགྲོ་བ་ནི། བདག་དང་འགྲོ་དྲུག་སེམས་ཅན་ཀུན། །མཆོག་གསུམ་རྗེ་ལ་སྐྱབས་མཆི་ནས། །མ་རྟོགས་འགྲོ་ལ་ཕན་པའི་སེམས། །ཉེ་རིང་མེད་པའི་དམ་བཅའ་བཟུང་། །འཇུག་པར་སྙིང་

སྟོབས་བསྐྱེད་པ་ནི། དེང་ནས་ཇི་སྲིད་སྙིང་པོའི་བར། །རང་འདོད་འདྲེས་པའི་དྲི་སྤངས་ནས། །གཞན་དོན་བསམ་པ་བརྟན་པོ་ཡིས། །འགྲོ་ཀུན་བདེ་ལ་ངེས་འགོད་དོ། །བདག་ཉིད་ལྷ་རུ་བསྐྱེད་པ་ནི། སྐད་ཅིག་མཁའ་ལས་སྤྲིན་རྡོལ་ལྟར། །ཕུང་ཁམས་འོད་ཀྱི་གཞལ་ཡས་དབུས། །རང་རིག་ཐིག་ལེ་བདེ་བ་ཆེ། །སྤྱན་རས་གཟིགས་དཀར་ལོངས་སྤྱོད་རྫོགས། །མཚན་དཔེ་མཛེས་སྡུག་ཞི་ཞིང་འཛུམ། །ཕྱག་བཞིའི་དང་པོས་ནོར་བུ་འཛིན། །འོག་མས་ཤེལ་ཕྲེང་པད་དཀར་བསྣམས། །ཕུང་ཁམས་རིགས་ཀྱི་རྟགས་རྫོགས་ཤིང་། །གདོད་ནས་དམ་ཡེ་དབྱེར་མེད་གྱུར། །སྙིང་རྗེའི་ངང་ནས་ཡིག་དྲུག་བསྒྲང་། ཨོཾ་མ་ཎི་པདྨེ་ཧཱུྃ། ཅི་ནུས་བཟླས་མཐར། རང་གི་ཐུགས་ལས་འབྲུ་གསུམ་འཕྲོས། །གསུར་རྫས་འབག་བཙོག་དྲི་མ་སྦྱངས། །ནམ་མཁའ་མཛོད་ཀྱིས་མཁའ་ཁྱབ་སྤེལ། །འབྲུ་གསུམ་སྟོབས་ཀྱིས་བདུད་རྩིར་བསྒྱུར། །མེ་ལ་

མཆོད་ཅིང་ཆུ་གཙང་བྲན། རྃ་ཡྃ་ཁྃ་གིས་བསང་། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧྃ་གིས་སྦྱང་། ཨོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུཏྒ་ཏེ་སྥ་ར་ན་ཨི་མཾ་ག་ག་ཎ་ཁཾ་སྭཱ་ཧཱ༔ ཞེས་སྤེལ་ཏེ། ཨོཾ་ལས་གསུར་སྣོད་ཐབ་དཀྱིལ་དབུས༔ མེ་ཉིད་མགྲོན་བཞི་ཀུན་གྱི་ཞལ༔ ཨཱཿཡིས་རྫས་རྣམས་ཟག་མེད་ཀྱི༔ རང་རང་ལོངས་སྤྱོད་བདུད་རྩིར་གྱུར༔ ཧཱུྃ་གིས་མགྲོན་རིགས་སྤྱན་དྲངས་ནས༔ མེ་དང་དབྱེར་མེད་དེ་ཡི་ཞལ༔ སྲེག་རྫས་ཕུལ་བས་མཉེས་པར་གྱུར༔ ཨོཾ་ཨཱཿཧཱུྃ༔ ལན་གསུམ། དཀོན་མཆོག་སྲི་ཞུའི་མགྲོན་རྣམས་ལ། །སྲེག་རྫས་ཀུན་བཟང་མཆོད་སྤྲིན་འབུལ། །ཚོགས་རྫོགས་སྒྲིབ་སྦྱངས་ཉམས་ཆག་བསྐང་། །མཆོག་དང་ཐུན་མོང་དངོས་གྲུབ་སྩོལ། །མགོན་པོ་ཡོན་ཏན་མགྲོན་རིགས་ལ། །སྲེག་རྫས་འདོད་ཡོན་སྤྲིན་ཕུང་འབུལ། །དམ་ཚིག་ཆག་ཉམས་འགལ་འཁྲུལ་

བཤགས། །བསམ་དོན་ཆོས་བཞིན་འགྲུབ་པར་མཛོད། །གཞན་ཡང་འགྲོ་བ་རིགས་དྲུག་དང་། །དབང་མེད་བར་དོའི་ཡིད་ལུས་ཀུན། །ཟག་མེད་དྲི་གསུར་མཆོད་པས་ཚིམས། །རང་རང་ལས་ངན་སྡུག་བསྔལ་དང་། །འཇིགས་སྐྲག་ཞི་ནས་བདེ་ཐོབ་གྱུར། །བགེགས་རིགས་ལན་ཆགས་མགྲོན་ཀུན་ལ། །ལན་ལ་རེ་ཞིང་ཆགས་འབྲས་བསྔོ། །གནོད་སེམས་བརྡུང་བརྡེགས་བསད་བཅད་ཀྱི། །ཤ་མཁོན་བུ་ལོན་བྱང་བར་ཤོག །སྔ་ལུས་བོར་ཞིང་ཕྱི་མའི་ལུས། །མ་ཐོབ་སྲིད་པར་འཁྱམས་པ་ལ། །དྲི་ཟ་གསུར་གྱིས་རབ་ཚིམས་ནས། །ལུས་རྟེན་བཟང་པོ་མྱུར་ཐོབ་ཤོག །ཅེས་དང་། ཨོཾ་མ་ཎི་པདྨེ་ཧཱུྃ༔ ཨ་པྲ་ཏི་སུ་རུ་ཕུ་པ་ཡེ་སྭཱ་ཧཱ༔ ཞེས་བསྔོས་ལ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ༔ དེ་བཞིན་གཤེགས་གཟུགས་མཛེས་དམ་པ་ལ་ཕྱག་འཚལ་ལོ༔ དེ་བཞིན་གཤེགས་པ་སྐུ་

འཇམ་ཀླས་ལ་ཕྱག་འཚལ་ལོ༔ དེ་བཞིན་གཤེགས་པ་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ༔ ཨོཾ་མ་ཎི་པདྨེ་ཧཱུྃ༔ ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ༔ གྲངས་བསགས་མཐར། དཀོན་མཆོག་རྩ་གསུམ་མཆོད་པས་མཉེས༔ བྱིན་གྱིས་རློབ་ཅིང་དངོས་གྲུབ་སྩོལ༔ མཁའ་འགྲོ་ཆོས་སྐྱོང་ཐུགས་དམ་བསྐང་༔ ལས་བཞིའི་ཕྲིན་ལས་མྱུར་འགྲུབ་མཛོད༔ རིགས་དྲུག་ཅི་འདོད་ལོངས་སྤྱོད་འཐོབ༔ མཁོ་དགུ་ཟད་མེད་སྤྱོད་པར་ཤོག༔ ལན་ཆགས་གདོན་བགེགས་ཚིམ་བྱས་ནས༔ བུ་ལོན་ཀུན་བྱང་བར་ཆད་ཞི༔ གཟུགས་མེད་བར་དོས་གཟུགས་བཟང་ཐོབ༔ འདོད་པ་ཀུན་འགྲུབ་ལས་ངན་གྱི༔ སྒྲིབ་བྱང་ས་ལམ་རབ་རྫོགས་ནས༔ ཀུན་ཀྱང་སངས་རྒྱས་མྱུར་ཐོབ་ཤོག༔ ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །

དེ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །རང་གི་ལུས་ལ་དཔེ་ལོངས་ལ། །གཞན་ལ་གནོད་པ་མ་བྱེད་ཅིག །དེ་ལྟར་ཆོས་དང་ཟང་ཟིང་གི། །སྦྱིན་པ་རྒྱ་ཆེན་འདི་ཡི་མཐུས། །འགྲོ་བ་རྣམས་ནི་སངས་རྒྱས་ཤོག །སྔོན་གྱི་རྒྱལ་བས་མ་གྲོལ་བ། །སྐྱེ་འགྲོའི་ཚོགས་རྣམས་གྲོལ་གྱུར་ཅིག །ཐམས་ཅད་ནམ་མཁའ་མཛོད་བཞིན་དུ། །ལོངས་སྤྱོད་ཆད་པ་མེད་པ་དང་། །རྩོད་པ་མེད་ཅིང་འཚེ་མེད་པ། །རང་དབང་དུ་ནི་སྤྱོད་པར་ཤོག །ཁ་ཟས་བསྟབ་པ་འདི་ཡི་མཐུས། །འཁྲུལ་སྣང་འཇིགས་སྐྲག་ཐམས་ཅད་ཞི། །བར་དོ་རང་ངོ་འཕྲོད་པ་དང་། །དག་པའི་ཞིང་དུ་སྐྱེ་བར་ཤོག །ཡིག་དྲུག་བགྲང་ཞིང་། དཀོན་མཆོག་རྩ་གསུམ་རང་ལ་
བསྟིམ། །གཞན་གྱི་མགྲོན་རྣམས་ཅི་བདེར་གཤེགས། །བཛྲ་མུཿ རང་ཉིད་ལྷར་སྣང་སྟོང་པ་ཉིད། །མི་དམིགས་ངང་དུ་མཉམ་པར་བཞག །ཕྱག་འཚལ་བ་སོགས། དགེ་བ་བསྔོའོ།། །།

དཀོན་མཆོག་གསུམ་རྗེས་སུ་དྲན་པའི་མདོ།

༈ གུང་ཚིགས་ལ་བབ་པའི་ཚེ། དཀོན་མཆོག་གསུམ་རྗེས་སུ་དྲན་པའི་མདོ་ནི། ཐམས་ཅད་མཁྱེན་པ་ལ་ཕྱག་འཚལ་ལོ། །འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་ནི་བསོད་ནམས་དག་གི་རྒྱུ་མཐུན་པ། དགེ་བའི་རྩ་བ་རྣམས་ཆུད་མི་ཟ་བ། བཟོད་པ་དག་གིས་རབ་ཏུ་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་

རྣམས་ཀྱིས་སྤྲས་པ། མཚན་རྣམས་ཀྱི་མེ་ཏོག་རྒྱས་པ། སྤྱོད་ཡུལ་རན་པར་མཐུན་པ། མཐོང་ན་མི་མཐུན་པ་མེད་པ། དད་པས་མོས་པ་རྣམས་ལ་མངོན་པར་དགའ་བ། ཤེས་རབ་ཟིལ་གྱིས་མི་ནོན་པ། སྟོབས་རྣམས་ལ་བརྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་བལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་འདྲེས་པ། སྡུག་བསྔལ་དག་ལས་རྣམ་པར་གྲོལ་བ། ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་

ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲིད་པ་ལས་གྲོལ་བ། ཆུ་བོ་ལས་བརྒལ་བ། ཡེ་ཤེས་ཡོངས་སུ་རྫོགས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་ས་ལ་བཞུགས་པ་སྟེ། འདི་དག་ནི་སངས་རྒྱས་བཅོམ་ལྡན་འདས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །དམ་པའི་ཆོས་ནི་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། བཅོམ་ལྡན་འདས་ཀྱིས་ཆོས་ལེགས་པར་གསུངས་པ། ཡང་

དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་སོ་སོ་རང་གིས་རིག་པར་བྱ་བ། བཅོམ་ལྡན་འདས་ཀྱིས་གསུངས་པའི་ཆོས་འདུལ་བ་ལ་ལེགས་པར་སྟོན་པ། ངེས་པར་འབྱུང་བ། རྫོགས་པའི་བྱང་ཆུབ་ཏུ་འགྲོ་བར་བྱེད་པ། མི་མཐུན་པ་མེད་ཅིང་འདུས་པ་དང་ལྡན་པ། བརྟེན་པ་ཡོད་པ། རྒྱུ་བ་བཅད་པའོ། །ཐེག་པ་ཆེན་པོའི་དགེ་འདུན་ནི་ལེགས་པར་ཞུགས་པ། རིགས་པར་ཞུགས་པ། དྲང་པོར་ཞུགས་པ། མཐུན་པར་ཞུགས་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་དཔལ་གྱི་ཞིང་། ཡོན་ཡོངས་སུ་སྦྱོང་བ་ཆེན་པོ། སྦྱིན་པའི་གནས་སུ་གྱུར་པ། ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་

རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །སངས་རྒྱས་ཡོན་ཏན་བསམ་མི་ཁྱབ། །ཆོས་ཀྱི་ཡོན་ཏན་བསམ་མི་ཁྱབ། །འཕགས་པའི་དགེ་འདུན་བསམ་མི་ཁྱབ། །བསམ་མི་ཁྱབ་ལ་དད་བྱས་པས། །རྣམ་པར་སྨིན་པའང་བསམ་མི་ཁྱབ། །རྣམ་དག་ཞིང་དུ་སྐྱེ་བར་ཤོག །ཕྱག་འཚལ་བ་དང་སོགས། ཞལ་ཟས་རོ་བརྒྱ་ལྡན་ཞིང་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །དེ་ནས་སྔགས་ཚན་ལྔ་པོ་

རྣམས་འདོན་བཞིན་པས་གཏོར་མ་ཟླུམ་པོ་ལྔ་ཚོམ་བཀོད། ཨོཾ་གུ་རུ་བཛྲ་ནཻ་ཝི་དྱ་ཨཱཿཧཱུྃ། ཨོཾ་སརྦ་བུདྡྷ་བོ་ངྷི་ས་ཏྭ་བྷྱོ་བཛྲ་ནཻ་ཝི་དྱ་ཨཱཿཧཱུྃ། ཨོཾ་ཀཱ་མ་དེ་ཝ་མཎྜ་ལ་བཛྲ་ནཻ་ཝི་དྱ་ཨཱཿཧཱུྃ། ཨོཾ་མཉྫུ་ཤྲཱི་བཛྲ་ནཻ་ཝི་དྱ་ཨཱཿཧཱུྃ། ཨོཾ་ཤྲཱི་ངྷརྨ་པཱ་ལ་བཛྲ་ནཻ་ཝི་དྱ་ཨཱཿཧཱུྃ། ཡང་སྔགས་རྣམས་བརྗོད་བཞིན་དུ་ཕྱོགས་གསུམ་ལ་ཆངས་བུ་གསུམ་བཞག །ཨོཾ་ཧ་རི་ཏེ་སྭཱ་ཧཱ། ཨོཾ་ཧ་རི་ཏེ་མ་ཧཱ་བཛྲ་ཡཀྵི་ཎི་ཧ་ར་ཧ་ར་སརྦ་པཱ་པཾ་ཡཀྵི་སྭཱ་ཧཱ། ཨོཾ་ཨ་གྲ་པིཎྜ་ཨ་ཤི་བྷྱཿསྭཱ་ཧཱ། དེ་ནས་ལོངས་སྤྱད་རྗེས་ལྷག་མའི་ཆངས་བུ་གཅིག་བཞག །སེ་གོལ་གཏོག །དེ་ནས་ཡོན་སྦྱོང་བ་ནི། ཧོ། བདག་ལུས་ཕུང་ཁམས་སྐྱེ་མཆེད་ནི། །གདན་གསུམ་ཚངས་པའི་ངོ་བོ་སྟེ། །དམ་པ་རིགས་བརྒྱའི་དཀྱིལ་འཁོར་དུ། །འགུལ་བསྐྱོད་ཐམས་ཅད་བདེ་བ་ཆེ། །རྡོ་རྗེའི་དམ་ཚིག་བླ་ན་མེད། །བྱང་ཆུབ་སེམས་ཀྱི་སྤྲིན་ཆེན་པོ། །གཉིས་མེད་མཉམ་པའི་ངང་དུ་རོལ། །རྣལ་འབྱོར་ལམ་གྱི་ཚོགས་རྫོགས་ཏེ། །ཟས་ཀྱི་སྒྲིབ་པ་མི་འགྱུར་བར། །

གཏན་པ་མེད་པའི་སྦྱིན་བདག་ཀྱང་། །ཐེག་ཆེན་འབྲས་བུར་སྤྱོད་པར་ཤོག །དེ་ནས་ལོངས་སྤྱད་ལ་ལྷག་མ་ཆངས་བུ་གཅིག་བཞག །ཨོཾ་ཨུཙྪིཥྚ་པིཎྜ་ཨ་ཤི་བྷྱཿསྭཱ་ཧཱ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ནས་འོད་ཀྱི་རྒྱལ་པོ་མེ་འོད་རབ་ཏུ་གསལ་བ་ལ་ཕྱག་འཚལ་ལོ། །ན་མཿས་མནྟ་པྲ་བྷ་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ། སམྱཀྶཾ་བུངྔྷ་ཡ། ཏདྱ་ཐཱ། ན་མོ་མཉྫུ་ཤྲཱི་ཡེ། ཀུ་མཱ་ར་བྷཱུ་ཏཱ་ཡ། བྷོ་ངྷི་ས་ཏྭ་ཡ། མ་ཧཱ་ས་ཏྭ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་ནི་རཱ་ལཾ་བྷེ་ནི་རཱ་བྷ་སེ། ཛཱ་ཡེ་ཛ་ཡ་ལ་བྷེ། མ་ཧཱ་མ་ཏེ། དཀྵེ་དཀྵེ་ཎི་མེ་པ་རི་ཤོ་ངྷ་ཡེ་སྭཱ་ཧཱ། གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་གིས་བདག་ལ་སྐོམ་བླུད་པ་དེ་དག་དང་། གང་གིས་བདག་ལ་རིམ་གྲོ་བྱས་པ་དང་། བཀུར་སྟི་བྱས་པ་དང་། བསྟི་སྟང་

བྱས་པ་དང་། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་དག་བདག་ལ་གཤེ་བར་བྱེད་པ་དང་། མི་བདེ་བར་བྱེད་པ་དང་། རྡེག་པ་དང་། མཚོན་གྱིས་འདེབས་པ་དང་། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་གྱུར་ཅིག །རང་ལུས་རྒྱལ་བའི་དཀྱིལ་འཁོར་དུ། །བཟའ་བ་ཕུལ་བའི་བསོད་ནམས་ཀྱིས། །ཁ་དོག་སྟོབས་དང་ལྡན་གྱུར་ཏེ། །རོ་བརྒྱ་ལྡན་པའི་ཟས་རྙེད་ནས། །བསམ་གཏན་ཟས་ཀྱིས་འཚོ་བར་ཤོག །བཏུང་བ་ཕུལ་བའི་བསོད་ནམས་ཀྱིས། །ཉོན་མོངས་བཀྲེས་སྐོམ་ཞི་བ་དང་། །སྦྱིན་སོགས་ཡོན་ཏན་ལྡན་པ་ཡིས། །སྐོམ་དད་མེད་པར་སྐྱེ་བར་ཤོག །གང་གིས་སྦྱིན་པ་གང་ལ་སྦྱིན། །སྦྱིན་

པ་ཇི་ལྟར་མི་དམིགས་པ། །སྦྱིན་པ་མཉམ་པ་དེ་ཉིད་ཀྱིས། །སྦྱིན་བདག་དེ་ལ་ཡོངས་རྫོགས་ཤོག །རྒྱལ་པོ་སྦྱིན་བདག་ཉིད་དང་ནི། །སེམས་ཅན་དམན་པ་གཞན་དག་ལ། །ཚེ་རིང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་པར་ཤོག །སྦྱིན་པ་རྒྱ་ཆེན་གྱུར་པ་འདི་ཡི་མཐུས། །འགྲོ་བའི་དོན་དུ་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་སྦྱིན་པས་གྲོལ་གྱུར་ཅིག །བསོད་ནམས་སྟོབས་ཆེན་འདི་ཡི་མཐུས། །སྦྱིན་བདག་འཁོར་དང་བཅས་རྣམས་ཀྱི། །ཚེ་འདིར་བསམ་པའི་དོན་འགྲུབ་ཅིང་། །བར་ཆད་ཞི་ནས་བཀྲ་ཤིས་པ། །བསམ་པ་ཆོས་བཞིན་འགྲུབ་པར་ཤོག །ཅེས་སོ། །ཁ་ཟས་ཀྱི་རྣལ་འབྱོར་དང་ལྡན་པ་ལ་ཕྱི་རོལ་གྱི་གཏོར་མ་དང་སྦྱིན་སྲེག་མེད་ཀྱང་ཆོག་ཅིང་། དེ་དག་ལས་ཀྱང་སྟོབས་ཆེ་བའི་ཚོགས་རྫོགས་པ་དང་། དཀོར་དང་སྐུ་གླུད་ཟོས་པ་ལ་སོགས་པའི་སྒྲིབ་པ་དང་ཉམས་ཆག་འདག །བཟའ་བ་
བུ་ལོན་དུ་མི་འགྱུར། མཆོག་ཐུན་མོང་གི་དངོས་གྲུབ་མྱུར་དུ་འགྲུབ་པ་སོགས་རྒྱུད་དང་གདམས་ངག་རྣམས་ལས་རྒྱ་ཆེར་གསུངས་སོ།། །།

འབའ་རོམ་བསྟན་པ་རྒྱས་སྨོན་ལྷ་ཡི་རྔ་སྒྲ། སྐྱོ་བྲག་མི་འགྱུར།

༈ འབའ་རོམ་བསྟན་པ་རྒྱས་སྨོན་ལྷ་ཡི་རྔ་སྒྲ་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ནི། ཚོགས་གཉིས་མཐར་ཕྱིན་ཕྱོགས་དུས་བདེ་བར་གཤེགས། །ཞི་བ་ཆགས་བྲལ་ལུང་དང་རྟོགས་པའི་སྡེ། །ཚོགས་ཀྱི་མཐར་ཐུག་དགེ་འདུན་འདུས་པའི་ཁྱུ། །བསླུ་མེད་རིན་ཆེན་རྣམ་གསུམ་དགོངས་སུ་གསོལ། །ཟག་མེད་འཇའ་ལུས་སྐུ་བརྙེས་བླ་མ་རྗེ། །གྲུབ་གཉིས་འདོད་འཇོ་བདེ་གཤེགས་ཞི་ཁྲོའི་ལྷ། །མཁའ་ལ་རིག་པའི་གར་མཁན་ཌཱ་ཀིའི་སྡེ། །རྩ་གསུམ་རྒྱལ་བ་རབ་འབྱམས་དགོངས་སུ་གསོལ། །ངོ་བོ་ཆོས་དབྱིངས་ཀ་ནས་དག་སྟོབས་དང་། །རང་བཞིན་སྣང་ཆ་རྣམ་པར་དག་སྟོབས་དང་། །ཐུགས་རྗེ་མ་འགག་ཅིར་ཡང་སྣང་སྟོབས་ཀྱིས། །རྣམ་དག་སྨོན་ལམ་འགྲུབ་པའི་དཔང་པོ་མཛོད། །དོན་དམ་ཆོས་ཉིད་

མཉམ་པ་ཆེན་པོའི་བདེན། །ཀུན་རྫོབ་སྣང་སྲིད་དག་པ་རབ་འབྱམས་མཐུ། །ལས་སྨོན་བསླུ་མེད་རྟེན་ཅིང་འབྲེལ་འབྱུང་གི། །བདེན་པས་སྨོན་པའི་དོན་འདི་འགྲུབ་གྱུར་ཅིག །དཀོན་མཆོག་རྩ་གསུམ་ཞི་ཁྲོ་རབ་འབྱམས་དང་། །ལྷ་དང་དྲང་སྲོང་རིག་པ་འཛིན་པ་སོགས། །བདེན་ཚིག་གྲུབ་པ་རྣམས་ཀྱི་བདེན་པའི་མཐུས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །ཐུབ་ཆེན་རྒྱལ་བའི་བཀའ་ཡི་བཅས་ཁྲིམས་ལས། །ནམ་ཡང་འདའ་བ་མེད་པའི་གོ་ཆ་ཡིས། །ཐོག་མཐའ་བར་དུ་དགེ་བའི་བཙུན་ཚུལ་གྱིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །མཚན་ཉིད་ལྡན་པའི་བཤེས་གཉེན་ལ་བསྟེན་ནས། །མདོ་རྒྱུད་མན་ངག་རིག་པའི་གཞུང་ལུགས་ལ། །མཁྱེན་པའི་འོད་ཕྲེང་ཕྱོགས་བརྒྱར་སྤྲོ་བ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །ཆོས་ཀྱི་

གྲགས་པའི་གཞུང་བཟང་ལ་བརྟེན་ནས། །བརྒལ་རྟགས་རྣོ་ངར་ལྡན་པའི་རལ་གྲི་ཡིས། །དྲེགས་ལྡན་ཕས་རྒོལ་འཇོམས་པའི་རིགས་ལམ་གྱིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །མཁྱེན་གཉིས་ལང་ཚོས་སྒེག་པའི་ཟློས་གར་གྱིས། །མདོ་རྒྱུད་མན་ངག་རིག་པའི་གཞུང་ལུགས་ཀུན། །ཇི་བཞིན་འགྲེལ་བའི་བློ་མཐུ་ཟླ་མེད་པས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །སྟོང་ཉིད་སྙིང་རྗེ་ཟུང་འཇུག་ལ་བརྟེན་ནས། །བཅོས་མིན་བྱང་སེམས་བདུད་རྩིའི་ཆར་ཆེན་པོས། །སྐལ་ལྡན་གདུལ་བྱའི་རེ་བ་སྐོང་བ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །བླ་མ་སྐུ་བཞིའི་རྒྱ་མཚོ་ལས་འོངས་པའི། །སྨིན་བྱེད་ཁ་འབབ་རྣམ་བཞིའི་ཆུ་རྒྱུན་གྱིས། །རྒྱལ་བ་སྐུ་བཞིའི་སྐྱེད་ཚལ་རྒྱས་པ་ཡིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །བསྐྱེད་རིམ་དག་པ་

རབ་འབྱམས་ལྷའི་འཁོར་ལོ། །རྫོགས་རིམ་ཅིར་སྣང་ཆོས་སྐུ་གདལ་བ་ཆེ། །ངག་རླུང་རྡོ་རྗེའི་སྔགས་སུ་དག་པ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །སྡེ་སྣོད་གསུམ་དང་རྒྱུད་སྡེ་ཆེན་པོ་བཞི། །ཐེག་པ་རིམ་དགུའི་གནད་དོན་མ་ལུས་པ། །འགལ་མེད་ཉམས་སུ་ལེན་པའི་ཐབས་མཁས་ཀྱིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །རྒྱུད་སྡེའི་ཡང་རྩེ་འཁོར་ལོ་བདེ་མཆོག་གི། །ཡང་བཅུད་ནཱ་རོའི་ཆོས་དྲུག་ལ་བརྟེན་ནས། །ཚེ་གཅིག་གྲུབ་པའི་རྒྱལ་སར་སྙེགས་པ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །མཁས་མཆོག་ནཱ་རོ་ཏ་པའི་གསེར་ཆོས་དང་། །མཻ་ཏྲིའི་ཕྱག་ཆེན་དཀར་པོ་གཅིག་ཐུབ་གཉིས། །ཐབས་དང་ཐབས་བྱུང་རྟོགས་པ་མངོན་གྱུར་པས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །མདོར་ན་ཆོས་རྗེ་དར་མ་

དབང་ཕྱུག་གི། །གསང་བ་ཟབ་མོའི་ཡོན་ཏན་ཇི་སྙེད་པ། །རྗེས་འཇུག་རྣམས་ལའང་ཇི་བཞིན་རྫོགས་པ་ཡིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །གནས་བརྟན་ཉེ་བར་འཁོར་གྱི་བཙུན་ཚུལ་དང་། །འཛམ་གླིང་མཛེས་རྒྱན་དྲུག་གི་མཁས་ཚུལ་དང་། །དབང་ཕྱུག་བཞད་པ་རྡོ་རྗེའི་གྲུབ་ཚུལ་གྱིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །འཆད་ན་དབྱིག་གི་གཉེན་གྱི་སྤོབས་པ་དང་། །རྩོད་ན་ཆོས་ཀྱི་གྲགས་པའི་རིག་རྩལ་དང་། །རྩོམ་ན་དཔའ་བོའི་གསུང་ལྟར་སྙན་པ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །རི་ཀུན་སྒོམ་པའི་ཁྱུ་ཡིས་འགེངས་པ་དང་། །གཞུང་ཀུན་བཤད་པའི་སྡེ་ཡིས་ཕྱུག་གྱུར་ཏེ། །འཁོར་ལོ་གཉིས་ཀྱིས་རྒྱལ་བསྟན་མཛེས་པ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །གང་ཡང་ཡིན་པ་བྲལ་བ་ལྟ་བའི་རྩལ། །གང་ཡང་

མིན་པ་བྲལ་བ་སྒོམ་པའི་རྩལ། །གར་ཡང་གཏད་སོ་བྲལ་བ་སྤྱོད་པའི་རྩལ། །གང་ལའང་རེ་དོགས་བྲལ་བ་འབྲས་བུའི་རྩལ། །བྱ་རྩོལ་བྲལ་བའི་རྩལ་ཆེན་རྫོགས་པ་ཡི། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །དཀོན་མཆོག་རྩ་གསུམ་ཞི་ཁྲོའི་ཐུགས་རྗེ་དང་། །བསླུ་མེད་བདེན་པ་གྲུབ་པའི་བདེན་ཚིག་དང་། །ལས་སྨོན་རྟེན་འབྱུང་བསླུ་བ་མེད་པའི་མཐུས། །སྨོན་ལམ་བཟང་པོའི་འབྲས་བུ་འགྲུབ་གྱུར་ཅིག །ཅེས་པ་འདིའང་རྟགས་མཚན་རྨི་ལམ་བཟང་པོས་རྒྱུ་བྱས། ཀརྨ་མཁྱེན་རབ་ཡེ་ཤེས་ཀྱིས་བཀྲ་ཤིས་པའི་ལྷ་རྫས་ཀྱིས་བསྐུལ་བས་རྐྱེན་བྱས་ཏེ་འོག་མིན་སེང་གེ་རྫོང་གི་ཡང་དབེན་འཕགས་མཆོག་ངག་གི་དབང་ཕྱུག་གི་སྐུ་བརྙན་གྱི་དྲུང་དུ། དུས་མཐའི་སེར་གཟུགས་སྐྱོ་བྲག་མི་འགྱུར་པས་བྲིས་པའི་དགེ་བས་ཇི་ལྟར་སྨོན་པ་དེ་བཞིན་འགྲུབ་པར་གྱུར་ཅིག །སརྦ་ལོ་ཀ་ཤྲཱི་སྭ་སྟི་བྷ་ཝནྟུ།།

ཕུང་པོ་གསུམ་པའི་མདོ།

༈ ཕུང་པོ་གསུམ་པའི་མདོ་བཞུགས་སོ། །སེམས་ཅན་ཐམས་ཅད་རྟག་པར་བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །རྡོ་རྗེ་སྙིང་པོ་རབ་ཏུ་འཇོམས་པ་ལ༴ རིན་ཆེན་འོད་འཕྲོ་ལ༴ ཀླུ་དབང་གི་རྒྱལ་པོ་ལ༴ དཔའ་བོའི་སྡེ་ལ༴ དཔལ་དགྱེས་ལ༴ རིན་ཆེན་མེ་ལ༴ རིན་ཆེན་ཟླ་འོད་ལ༴ མཐོང་བ་དོན་ཡོད་ལ༴ རིན་ཆེན་ཟླ་བ་ལ༴ དྲི་མ་མེད་པ་ལ༴ དཔལ་བྱིན་ལ༴ ཚངས་པ་ལ༴ ཚངས་པའི་བྱིན་ལ༴ ཆུ་ལྷ་ལ༴ ཆུ་ལྷའི་ལྷ་ལ༴ དཔལ་བཟང་ལ༴ ཙན་དན་དཔལ་ལ༴ གཟི་བརྗིད་མཐའ་ཡས་ལ༴ འོད་དཔལ་ལ༴ མྱ་ངན་མེད་པའི་དཔལ་ལ༴ སྲིད་མེད་ཀྱི་བུ་ལ༴ མེ་ཏོག་དཔལ་ལ༴ དེ་བཞིན་གཤེགས་པ་ཚངས་པའི་འོད་ཟེར་རྣམ་པར་རོལ་པ་མངོན་པར་མཁྱེན་པ༴ དེ་བཞིན་གཤེགས་པ་པདྨའི་འོད་ཟེར་རྣམ་པར་རོལ་པ་མངོན་པར་མཁྱེན་པ་ལ༴ ནོར་

དཔལ་ལ༴ དྲན་པའི་དཔལ་ལ༴ མཚན་དཔལ་ཤིན་ཏུ་ཡོངས་གྲགས་ལ༴ དབང་པོའི་ཏོག་གི་རྒྱལ་མཚན་གྱི་རྒྱལ་པོ་ལ༴ ཤིན་ཏུ་རྣམ་པར་གནོན་པའི་དཔལ་ལ༴ གཡུལ་ལས་ཤིན་ཏུ་རྣམ་པར་རྒྱལ་བ་ལ༴ རྣམ་པར་གནོན་པ་གཤེགས་པའི་དཔལ་ལ༴ ཀུན་ནས་སྣང་བ་བཀོད་པའི་དཔལ་ལ༴ རིན་ཆེན་པདྨ་རྣམ་པར་གནོན་པ་ལ༴ དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་པདྨ་ལ་རབ་ཏུ་བཞུགས་པ་རི་དབང་གི་རྒྱལ་པོ་ལ་ཕྱག་འཚལ་ལོ། །དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཏེ་འཚོ་ཞིང་བཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་

བ་འདི་དང་། སྐྱེ་བ་ཐོག་མ་དང་མཐའ་མ་མ་མཆིས་པ་ནས། འཁོར་བ་ན་འཁོར་བའི་སྐྱེ་གནས་ཐམས་ཅད་དུ་སྡིག་པའི་ལས་བགྱིས་པ་དང་། བགྱིད་དུ་སྩལ་བ་དང་། བགྱིས་པ་ལ་རྗེས་སུ་ཡི་རང་བའམ། མཆོད་རྟེན་གྱི་དཀོར་རམ་དགེ་འདུན་གྱི་དཀོར་རམ། ཕྱོགས་བཅུའི་དགེ་འདུན་གྱི་དཀོར་འཕྲོགས་པ་དང་། འཕྲོག་ཏུ་བསྩལ་བ་དང་། འཕྲོག་པ་ལ་རྗེས་སུ་ཡི་རང་བའམ། མཚམས་མ་མཆིས་པ་ལྔའི་ལས་བགྱིས་པ་དང་། བགྱིད་དུ་བསྩལ་བ་དང་། བགྱིས་པ་ལ་རྗེས་སུ་ཡི་རང་བའམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པ་ལ་ཞུགས་པ་དང་། འཇུག་ཏུ་བསྩལ་བ་དང་། འཇུག་པ་ལ་རྗེས་སུ་ཡི་རང་བའམ། ལས་ཀྱི་སྒྲིབ་པ་གང་གིས་བསྒྲིབས་ནས། བདག་སེམས་ཅན་དམྱལ་བར་མཆི་བའམ། དུད་འགྲོའི་སྐྱེ་གནས་སུ་མཆི་བའམ། ཡི་དྭགས་ཀྱི་ཡུལ་དུ་མཆི་བའམ། ཡུལ་མཐའ་འཁོབ་ཏུ་སྐྱེ་

བའམ། ཀླ་ཀློར་སྐྱེ་བའམ། ལྷ་ཚེ་རིང་པོ་རྣམས་སུ་སྐྱེ་བའམ། དབང་པོ་མ་ཚང་བར་འགྱུར་བའམ། ལྟ་བ་ལོག་པར་འཛིན་པར་འགྱུར་བའམ། སངས་རྒྱས་འབྱུང་བ་ལ་མཉེས་པར་མི་བགྱིད་པར་འགྱུར་བའི་ལས་ཀྱི་སྒྲིབ་པ་གང་ལགས་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་ཡེ་ཤེས་སུ་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པས་གཟིགས་པ། དེ་དག་གི་སྤྱན་སྔར་མཐོལ་ལོ་འཆགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་བ་འདི་དང་སྐྱེ་བ་ཐོག་མ་དང་མཐའ་མ་མ་མཆིས་པ་ནས་འཁོར་བ་ན། འཁོར་བའི་སྐྱེ་བ་གཞན་དག་ཏུ་སྦྱིན་པ་ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་ཟས་ཁམ་གཅིག་ཙམ་བསྩལ་

བའི་དགེ་བའི་རྩ་བ་གང་ལགས་པ་དང་། བདག་གིས་ཚུལ་ཁྲིམས་བསྲུངས་པའི་དགེ་བའི་རྩ་བ་གང་ལགས་པ་དང་། བདག་གིས་ཚངས་པར་སྤྱོད་པ་ལ་གནས་པའི་དགེ་བའི་རྩ་བ་གང་ལགས་པ་དང་། བདག་གིས་སེམས་ཅན་ཡོངས་སུ་སྨིན་པར་བགྱིས་པའི་དགེ་བའི་རྩ་བ་གང་ལགས་པ་དང་། བདག་གིས་བྱང་ཆུབ་མཆོག་ཏུ་སེམས་བསྐྱེད་པའི་དགེ་བའི་རྩ་བ་གང་ལགས་པ་དང་། བདག་གིས་བླ་ན་མེད་པའི་ཡེ་ཤེས་ཀྱི་དགེ་བའི་རྩ་བ་གང་ལགས་པ་དེ་དག་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ། བསྡོམས་ནས་བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་བླ་མའི་ཡང་བླ་མར་ཡོངས་སུ་བསྔོ་བས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་པ་དང་། ཇི་ལྟར་

མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །སྡིག་པ་ཐམས་ཅད་ནི་སོ་སོར་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་བསྐུལ་ཞིང་གསོལ་བ་འདེབས་སོ། །བདག་གིས་བླ་ན་མེད་པའི་ཡེ་ཤེས་ཀྱི་མཆོག་དམ་པ་ཐོབ་པར་གྱུར་ཅིག །མི་མཆོག་རྒྱལ་བ་གང་དག་ད་ལྟར་བཞུགས་པ་དང་། །གང་དག་འདས་པ་དག་དང་དེ་བཞིན་གང་མ་བྱོན། །ཡོན་ཏན་བསྔགས་པ་མཐའ་ཡས་རྒྱ་མཚོ་འདྲ་ཀུན་ལ། །ཐལ་མོ་སྦྱར་བར་བགྱིས་ཏེ་སྐྱབས་སུ་ཉེ་བར་མཆིའོ། །ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་དག་དང་། །གང་ཡང་ཡིད་ཀྱི་རྣམ་

གསུམ་པོ། །མི་དགེ་བཅུ་པོ་སོ་སོར་བཤགས། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དབང་གིས་བྱས་པ་དག །དེ་ཡིས་ལྟུང་བ་བཤགས་པ་འདི་བཏོན་པས། །དེ་དག་མ་ལུས་ཡོངས་སུ་བྱང་བར་གྱུར། །བདག་དང་སེམས་ཅན་ཀུན་གྱི་སྡིག་པའི་ལས། །ཉེས་པར་གྱུར་གང་མཐོལ་ཞིང་བཤགས་པར་བགྱི། །སླན་ཆད་ནམ་ཡང་བགྱིད་པར་མ་གྱུར་ཅིག །ལས་ཀྱི་སྒྲིབ་པའང་གཏན་དུ་ཟད་བྱེད་ཤོག །ཕྱག་འཚལ་བ་དང་མཆོད་ཅིང་བཤགས་པ་དང་། །
རྗེས་སུ་ཡི་རངས་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །ཕུང་པོ་གསུམ་པའི་མདོ་རྫོགས་སོ།། །།

ཞི་ཁྲོ་དགོངས་པ་ཀློང་ཡངས་སོགས།

༈ ཞི་ཁྲོ་དགོངས་པ་ཀློང་ཡངས་བཞུགས་སོ། །སྐྱབས་སེམས་ནི། ཧཱུྃ། མ་རིག་གཉིས་སྣང་རྟོག་ཚོགས་འཁྲུལ་པའི་འགྲོ། །རང་རིག་ཡེ་བརྡལ་ངང་དུ་སྐྱབས་སུ་མཆི། །མ་དག་འཆིང་སེམས་ཐ་མལ་རྟོག་ཚོགས་ཀུན། །དག་པ་རབ་འབྱམས་ཆེན་པོར་སེམས་བསྐྱེད་དོ། །བསྐྱེད་རིམ་ནི། ཧཱུྃ། མ་བཅོས་གཉུག་མའི་ངང་ཉིད་ལས། །མ་འགགས་རང་རྩལ་ཀུན་ཏུ་བཟང་། །རང་འོད་ཀུན་བཟང་ཡུམ་དང་འཁྲིལ། །ཡེ་གནས་ཆོས་སྐུའི་ངོ་བོར་བཞུགས། །ཐུགས་ཀར་འཇའ་ཟེར་ཐིག་ལེའི་ཀློང་། །ཞི་བ་བཞི་བཅུ་རྩ་གཉིས་ནི། །མ་བསྐྱེད་ཡེ་རྫོགས་ཆེན་པོར་གསལ། །མགྲིན་པ་ལོངས་སྤྱོད་འཁོར་ལོའི་དབུས། །གྲགས་སྟོང་གཞོམ་མེད་རྡོ་རྗེའི་སྒྲ། །ཨ་

ཡིག་རང་སྒྲ་བཅས་པ་གསལ། །དུང་ཁང་འཇའ་ཟེར་མེ་དཔུང་ཀློང་། །ཁྲག་འཐུང་དྲུག་ཅུའི་ལྷ་ཚོགས་རྣམས། །གར་དགུའི་ཉམས་ཀྱིས་རོལ་པར་བཞུགས། །ཚོགས་བསགས་ནི། ཧཱུྃ། ཀ་དག་ཆེན་པོའི་ངང་ཉིད་ལས། །རང་སྣང་དག་པའི་ལྷ་ཚོགས་རྣམས། །ཆུ་ཟླ་བཞིན་དུ་གནས་འདིར་བྱོན། །རང་སྣང་དག་པའི་ཀློང་དུ་བཞུགས། །རང་རིག་ངང་དུ་ཕྱག་འཚལ་ལོ། །རོལ་རྩལ་འགགས་མེད་མཆོད་པ་འབུལ། །རང་གྲོལ་གཉུག་མའི་ངང་དུ་བསྟོད། །བཟླས་པ་ནི། ཧཱུྃ། ཀུན་བཟང་ཐུགས་དབུས་ཙིཏྟའི་སྦུབས། །དཀར་འཇམ་རྩ་ཡི་སྔགས་ཕྲེང་གསལ། །རྒྱང་ཞགས་མེ་ལོང་དྭངས་མའི་ངོར། །སྣང་བཞིའི་འདུ་འཕྲོ་ཤ་ར་ར། །ཨཱཿ ཞེས་ཅི་མང་བཟླས། ཐུན་མཐའི་རྣལ་འབྱོར་ནི། ཧཱུྃ། འགགས་མེད་རོལ་པའི་ལྷ་ཚོགས་རྣམས། །སྐྱེ་མེད་ཆོས་སྐུའི་ཀློང་དུ་ཐིམ། །ཟུང་འཇུག་རོལ་པ་ཆེན་པོར་ལྡང་། །བཟའ་བ་ཚོགས་ཀྱི་འཁོར་

ལོར་རོལ། །བགོ་བ་ཞི་ཁྲོའི་ཆས་སུ་གྱོན། །འགུལ་སྤྱོད་རྡོ་རྗེའི་བྲོ་དང་གར། །སྨྲ་བརྗོད་རྡོ་རྗེའི་དབྱངས་སུ་ལེན། །རྐང་རྗེས་རྡུལ་ཚོན་ཚོམ་བུ་བཀོད། །སད་རྨི་གཉིད་མཐུག་སྙོམས་འཇུག་ཀུན། །འོད་གསལ་ཆེན་པོའི་འཁོར་ལོར་འབར། །དགེ་འདིས་གཉིས་སྣང་འཁྲུལ་པའི་འགྲོ། །ཟག་མེད་ཀློང་དུ་སངས་རྒྱས་ཤོག །ཅེས་པ་འདི་ལྟར་དགོས་ཞེས་ག་ཎ་བཛྲ་གྱི་ངོར། ཨཀྵ་རས་ཆོས་ཉིད་དགོངས་པའི་ཀློང་མཛོད་ནས་དག་པར་ཕབས་པ་ཤུ་བྷཾ།། །། ༈ ཨོཾ་ཨཱཿཧཱུྃ། དཀྱིལ་འཁོར་གཙོ་བོ་ཀུན་བཟང་ཡབ་ཡུམ་དང་། །རིགས་ལྔ་ཡབ་ཡུམ་སེམས་དཔའ་སེམས་མ་བརྒྱད། །སྒོ་བ་ཡབ་ཡུམ་འགྲོ་འདུལ་ཐུབ་ཆེན་དྲུག །ཆེ་མཆོག་ཁྲག་འཐུང་རིགས་ལྔ་ཡབ་ཡུམ་དང་། །གནས་ཡུལ་མ་མོ་སྒོ་སྐྱོང་དབང་ཕྱུག་བརྒྱད། །གཉུག་མའི་ལུས་ལ་ཡེ་ནས་རྫོགས་པ་ཡི། །ཞི་ཁྲོ་དམ་པ་རིགས་བརྒྱའི་ལྷ་ཚོགས་ལ། །མོས་གུས་གདུང་
ཤུགས་དྲག་པོས་གསོལ་བ་འདེབས། །བར་དོ་རང་ངོ་ཤེས་པར་ཐུགས་རྗེས་ཟུངས། །རིགས་དྲུག་སྐྱེ་སྒོ་ཆོད་པར་བྱིན་གྱིས་རློབས། །དག་པའི་ཞིང་ཁམས་མཆོག་ཏུ་ལམ་སྣ་དྲོངས། །ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཱཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ། འཿཨཿཤཿསཿམཿཧཿ ཞེས་པའང་མི་འགྱུར་པས་སོ། ། ༈ རྒྱལ་བ་རབ་འབྱམས་རྒྱ་མཚོའི་བདེན་མཐུ་ཡིས། །ནམ་ཞིག་ཚེ་འདིའི་སྣང་བ་ནུབ་པའི་ཚེ། །འབྱུང་བའི་གནས་གཅོད་དྲག་པོ་མི་འབྱུང་ཞིང་། །བར་དོ་འཁྲུལ་པའི་རང་སྣང་ངོ་ཤེས་ནས། །ཞིང་མཆོག་བདེ་བ་ཅན་དུ་སྐྱེ་བར་ཤོག །ཅེས་མཁའ་ཀློང་ཡངས་པས་སོ། །

ཞིང་སྒྲུབ་པདྨ་དྲྭ་བའི་རྒྱུན་ཁྱེར།

༈ ཞིང་སྒྲུབ་པདྨ་དྲྭ་བའི་རྒྱུན་ཁྱེར་བཞུགས། སྦྱོར་བ་སྐྱབས་སེམས་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་

ཤོག །ལན་གསུམ། དངོས་གཞི་སྣོད་བཅུད་སྦྱོང་བྱེད་སྤྱན་རས་གཟིགས་ཀྱི་བསྐྱེད་བཟླས་བྱ་བ་སྟེ། སྟོང་ལས་གནས་ཡུལ་བདེ་བ་ཅན་གྱི་དབུས། །པད་དཀར་ཟླ་བའི་གདན་ལ་རང་ཉིད་ནི། །སྤྱན་རས་གཟིགས་དཀར་ཞལ་གཅིག་ཕྱག་བཞི་པ། །དར་དང་རིན་ཆེན་རྒྱན་རྫོགས་སྐྱིལ་ཀྲུང་བཞུགས། །དང་པོའི་ཕྱག་གཉིས་ཐལ་སྦྱར་ནོར་བུ་འཛིན། །གཡས་འོག་ཤེལ་ཕྲེང་གཡོན་འོག་པད་དཀར་བསྣམས། །རིགས་བདག་འོད་དཔག་མེད་པའི་དབུ་རྒྱན་ཅན། །ཐུགས་ཀར་ཟླ་སྟེང་ཧྲཱིཿལ་ཡིག་དྲུག་འཁོར། །འོད་འཕྲོས་འགྲོ་དྲུག་སྤྱན་རས་གཟིགས་སུ་གྱུར། །ཐམས་ཅད་ཡིག་དྲུག་རང་སྒྲ་དི་རི་རི། །ཞེས་ཚིག་དོན་ཅི་ཤེས་བསྒོམས་ལ། ༀ་མ་ཎི་པདྨེ་ཧཱུྃ་ཧྲཱིཿགང་འོས་དང་། གཞན་ཡང་རིགས་བདག་གི་སྙིང་པོ། ༀ་ཨ་མི་དྷེ་ཝ་ཧྲཱིཿདང་། གཟུངས་སྔགས། ན་མོ་རཏྣ་ཏྲ་ཡ་ཡ། ན་མོ་བྷ་ག་ཝ་ཏེ། ཨ་མི་ཏ་བྷཱ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་ཨ་མི་ཏེ། ཨ་མི་ཏོདྦྷ་

ཝེ། ཨ་མི་ཏ་སཾ་བྷ་ཝེ། ཨ་མི་ཏ་བི་ཀྲཱནྟེ། ཨ་མི་ཏ་གཱ་མི་ནཱི། ག་ག་ན་ཀཱིརྟི་ཀ་རི་སརྦ་ཀླེ་ཤ་ཀྵ་ཡཾ་ཀ་རི་སྭཱ་ཧཱ། ཐུན་མཚམས་རྣམས་སུ་ཐོན་ནའང་ལེགས་པའི་ཡན་ལག་ཏུ་འགྱུར་རོ། །ཐུན་དང་ཐུན་མཚམས་ཀུན་ཏུ་འདི་ཚིག་གིས་གསལ་འདེབས་གལ་ཆེ་བ་ནི། ནང་བཅུད་སེམས་ཅན་ཐམས་ཅད་སྤྱན་རས་གཟིགས། །སྒྲ་གྲགས་ཐམས་ཅད་ཡི་གེ་དྲུག་མའི་སྔགས། །བདེན་པར་མ་གྲུབ་སྒྱུ་མ་རྨི་ལམ་བཞིན། །གནས་ཡུལ་འདི་ཡང་བདེ་ཆེན་ཞིང་ཁམས་དངོས། །དེ་རུ་བདག་ཅག་སྐྱེས་ནས་ཡོད་པ་ལྟར། །དགའ་སྤྲོ་དཔག་ཏུ་མེད་པས་འདུན་སྨོན་བྱ། །ཞེས་པའམ། ཡང་ན་གོང་གི་ཚིག་རྐང་ཕྱི་མ་དེ། དག་སྣང་དགའ་སྤྲོ་བསྒོམས་པས་ལས་སྒྲིབ་དག །ཅེས་ཁ་བསྒྱུར་བ་གང་མོས་བྱ། སྤྲོ་ན་འདིར་རྒྱུ་བཞི་ཚང་བའི་ཞིང་སྨོན་རྒྱས་པ་གཤར་བསྒོམ་ལ་ནན་ཏན་བྱ། བསྡུ་ན་གོང་གི་འཕྲོ་ནས། རང་ཉིད་སྤྱན་རས་གཟིགས་སྐུ་འོད་ཀྱི་གུར། །སྙིང་ག་ཆོས་ཀྱི་འཁོར་ལོའི་མཁའ་དབྱིངས་སུ། །བདེ་ཆེན་ཞིང་གི་གསལ་སྣང་བརྟན་པ་དང་། །འཆི་སྲིད་

དག་པའི་ཞིང་ཁམས་འགྲུབ་པར་སྨོན། །གཉིད་དང་སད་པ་ཀུན་ཏུ་དེ་ལ་དགའ། །ཞེས་རང་ཉིད་སྤྱན་རས་གཟིགས་ཀྱི་སྐུ་ཕྱི་ནི་འོད་ཀྱི་གུར་ལྟ་བུ་ལས་ནང་ཆ་བུ་དགུ་དང་རྩ་འཁོར་ལྟ་བུ་ནི་གཏན་ནས་བསྒོམ་མི་དགོས་ལ། ལུས་ནང་འོད་གུར་ལྟ་བུའི་སྙིང་ཁའི་ཐད་ཀྱི་ཁོང་སྟོང་པ་ཉིད་ཀྱི་དབུས་སུ་བདེ་ཆེན་ཞིང་ཁམས་བློ་ལ་འཆར་བདེ་མོ་ཞིག་དང་བླ་མ་འོད་དཔག་མེད་གཙོ་འཁོར་ལ་སེམས་དགའ་སྤྲོ་སེང་ངེ་བ་བསྒོམ་མོ། །ཡང་མཚན་མོ་ཉལ་བའི་དུས་སུའང་སྙིང་གའི་ཞིང་ཁམས་ལ་སེམས་དགའ་བའི་ངང་དུ་ཉལ། ནང་མོ་གཉིད་སད་མ་ཐག་ཕྱི་ནང་སྐྱེ་ཡུལ་གྱི་ཞིང་ཁམས་གསུམ་པོ་ཐམས་ཅད་དྲན་ཐུབ་ན་ཐམས་ཅད་དྲན། རེ་རེ་དྲན་ཐུབ་ན་རེ་རེ་དྲན། དེ་གསུམ་པོ་རང་སེམས་དག་པའི་སྣང་བ་གཅིག་ཡིན་པར་དྲན་ཐུབ་ན་གཅིག་ཏུ་དྲན་ཏེ་དད་པ་དག་སྣང་སྦྱོང་དགོས་ཏེ། མདོར་ན་ཚིག་གིས་གསལ་འདེབས་པ་ནི། སྐྱེ་ཡུལ་བདེ་ཆེན་ཞིང་དང་ཕྱི་ཡི་ཞིང་། །ནང་གི་ཞིང་ཁམས་གསུམ་པོ་གང་བདེ་དྲན། །གནད་ཀྱི་མན་ངག་གསུམ་པོ་འདི་གོམས་ན། །བདེ་བ་ཅན་དུ་སྐྱེ་ལ་དཀའ་ཚེགས་མེད། །ཅེས་བློ་ལ་ལེན་ནས་བསྒོམ་དགོས་སོ། །གོང་འོག་གི་ཞིང་སྦྱོང་

འདི་གསུམ་ལ་འདུན་པ་སྦྱོང་ཚེ་ཡིག་དྲུག་བཟླ་བ་ཞལ་རྒྱུན་ཡིན། ཐུན་མཐར། འདི་ལྟར་བསྒོམ་བཟླས་བགྱིས་པའི་བསོད་ནམས་ཀྱིས། །བདག་དང་བདག་ལ་འབྲེལ་ཐོག་འགྲོ་བ་ཀུན། །མི་གཙང་ལུས་འདི་བོར་བར་གྱུར་མ་ཐག །བདེ་བ་ཅན་དུ་བརྫུས་ཏེ་སྐྱེ་བར་ཤོག །སྐྱེས་མ་ཐག་ཏུ་ས་བཅུ་རབ་བགྲོད་ནས། །སྤྲུལ་པས་ཕྱོགས་བཅུར་གཞན་དོན་བྱེད་པར་ཤོག །ཅེས་དང་། བཟང་སྤྱོད་དང་བདེ་སྨོན་རྒྱས་བསྡུས་སོགས་ཐེག་པ་ཆེན་པོའི་བསྔོ་སྨོན་སྐབས་དང་སྦྱར་བས་གྲུབ་བོ། ། ༈ བདེ་ཆེན་ཞིང་དུ་སྐྱེ་བའི་སྨོན་ལམ་བསྡུས་པ་ནི། ཨེ་མ་ཧོ༔ ངོ་མཚར་སངས་རྒྱས་སྣང་བ་མཐའ་ཡས་དང་༔ གཡས་སུ་ཇོ་བོ་ཐུགས་རྗེ་ཆེན་པོ་དང་༔ གཡོན་དུ་སེམས་དཔའ་མཐུ་ཆེན་ཐོབ་རྣམས་ལ༔ སངས་རྒྱས་བྱང་སེམས་དཔག་མེད་འཁོར་གྱིས་བསྐོར༔ བདེ་སྐྱིད་ངོ་མཚར་དཔག་ཏུ་མེད་པ་ཡི༔ བདེ་བ་ཅན་ཞེས་བྱ་བའི་ཞིང་ཁམས་དེར༔ བདག་ནི་འདི་ནས་ཚེ་འཕོས་གྱུར་མ་ཐག༔ སྐྱེ་བ་གཞན་གྱིས་བར་མ་
ཆོད་པ་རུ༔ དེ་རུ་སྐྱེས་ནས་སྣང་མཐའི་ཞལ་མཐོང་ཤོག༔ དེ་སྐད་བདག་གིས་སྨོན་ལམ་བཏབ་པ་འདི༔ ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས༔ གེགས་མེད་འགྲུབ་པར་བྱིན་གྱིས་བརླབ་ཏུ་གསོལ༔ ཏདྱ་ཐཱ༔ པཉྩནྡྲི་ཡ་ཨཱ་ཝ་བོ་དྷ་ན་ཡེ་སྭཱ་ཧཱ༔ ཞེས་པ་འདི་ནི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་གསེར་འཕྱང་གི་ལོ་ས་ག་ཟླ་བའི་ཚེས་བདུན་ལ་གཙོ་འཁོར་རྣམས་ཀྱི་ཞལ་གཟིགས་པའི་ཚེ་སངས་རྒྱས་སྣང་བ་མཐའ་ཡས་ཀྱིས་དངོས་སུ་གསུངས་པའོ།། །།

གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་དགེ་བ་བསྔོ་བ་སོགས།

༈ གནམ་ཆོས་ཐུགས་ཀྱི་གཏེར་ཁ་སྙན་བརྒྱུད་ཟབ་མོའི་སྐོར་ལས་དགེ་བ་བསྔོ་བ་བཞུགས། ཕྱོགས་དུས་རྒྱལ་བ་སྲས་བཅས་དགོངས༔ ཚོགས་གཉིས་རྫོགས་ལ་རྗེས་ཡི་རང་༔ བདག་གིས་དུས་གསུམ་དགེ་བསགས་པ༔ དཀོན་མཆོག་གསུམ་ལ་མཆོད་པ་འབུལ༔ རྒྱལ་བའི་བསྟན་པ་འཕེལ་གྱུར་ཅིག༔ དགེ་བ་སེམས་ཅན་ཀུན་ལ་བསྔོ༔ འགྲོ་ཀུན་སངས་རྒྱས་ཐོབ་གྱུར་ཅིག༔ དགེ་རྩ་ཐམས་ཅད་གཅིག་

བསྡུས་ཏེ༔ བདག་གཞན་རྒྱུད་ལ་སྨིན་གྱུར་ཅིག༔ སྒྲིབ་གཉིས་དག་ནས་ཚོགས་རྫོགས་ཏེ༔ ཚེ་རིང་ནད་མེད་ཉམས་རྟོགས་འཕེལ༔ ཚེ་འདིར་ས་བཅུ་ནོན་གྱུར་ཅིག༔ ནམ་ཞིག་ཚེ་འཕོས་གྱུར་མ་ཐག༔ བདེ་བ་ཅན་དུ་སྐྱེ་གྱུར་ཅིག༔ སྐྱེས་ནས་པདྨོ་ཁ་བྱེ་སྟེ༔ ལུས་རྟེན་དེ་ལ་སངས་རྒྱས་ཤོག༔ བྱང་ཆུབ་ཐོབ་ནས་ཇི་སྲིད་དུ༔ སྤྲུལ་པས་འགྲོ་བ་འདྲེན་པར་ཤོག༔ ས་མ་ཡ༔ རྒྱ་རྒྱ་རྒྱ༔ སྤྲུལ་སྐུ་མི་འགྱུར་རྡོ་རྗེའི་གཏེར་མའོ།། །། ༈ བདེ་མཆོག་རང་སྲུང་ནི། ཨོཾ་མེ་དེ་ནཱི་བཛྲ་བྷནྡྷ་ཧཱུྃ། འོག་སྣ་ཚོགས་རྡོ་རྗེའི་ས་གཞི་གྲུ་བཞི་པར་གྱུར། ཨོཾ་བཛྲ་པྲ་ཀཱ་ར་ཧཱུྃ་བཾ་ཧཱུྃ། ལོགས་རྡོ་རྗེ་རྩེ་ལྔ་པ་དམར་པོའི་ར་བ་གྲུ་བཞི་པར་གྱུར། ཨོཾ་བཛྲ་པཉྫ་ར་ཧཱུྃ་བཾ་ཧཱུྃ། སྟེང་རྡོ་རྗེའི་གུར་གྲུ་བཞི་པ་རྡོ་རྗེ་རིན་པོ་ཆེའི་ཏོག་གིས་མཚན་པར་གྱུར། ཨོཾ་བཛྲ་བི་ཏཱ་ནཱ་ཧཱུྃ་ཁཾ་ཧཱུྃ། གུར་གྱི་ནང་དུ་རྡོ་རྗེའི་བླ་རེ་གྲུ་བཞི་པར་གྱུར། ཨོཾ་བཛྲ་ཤྭ་ར་ཛྭ་ལ་ཏྲཾ་སཾ་ཏྲཾ། སྟེང་དང་ཕྱི་རོལ་ཐམས་

ཅད་རྡོ་རྗེའི་མདའ་ཡི་དྲྭ་བ་མདེའུ་ཐམས་ཅད་རྡོ་རྗེ་རྩེ་ལྔ་པའི་རང་བཞིན་དུ་གྱུར། ཨོཾ་བཛྲ་ཛྭ་ལ་ཨ་ན་ལཱངྐ་ཧཱུྃ་ཧཱུྃ་ཧཱུྃ། ཡེ་ཤེས་ཀྱི་མེ་རི་ཁ་དོག་སྣ་ལྔ་གཡོན་དུ་འཁྱིལ་བའི་གུར་ཁང་དུ་གྱུར། ཨོཾ་ཡེ་དྷརྨཱ་ཧེ་ཏུ་པྲ་བྷ་ཝ་སོགས། སྲུང་བའི་འཁོར་ལོ་འདི་རྣམས་ཀྱང་སྲ་བ་བརྟན་པ་མཁྲེགས་པ་རྒྱུ་ཐམས་ཅད་རྡོ་རྗེ་ཕ་ལམ་ལས་གྲུབ་པ་སུས་ཀྱང་གཞོམ་གཞིག་མི་ནུས་པ་རླུང་བསེར་བུའང་མི་ཐར་བར་བསམ་པའོ། ། ༈ ཉལ་བ་གཉིད་ཀྱི་སྐབས་སྤྱི་ཙམ་དུ། སེང་གེའི་ཉལ་སྟབས་ཀྱིས་མགོ་བྱང་དུ་བསྟན་ལ་འཆི་བ་རྗེས་སུ་དྲན་པས་དཀོན་མཆོག་གསུམ་ལ་བློ་གཏོད་ཅིང་གསོལ་བ་བཏབ་ནས་དགེ་བའི་བྱ་བ་ལ་ལྡང་བ་དང་སྣང་བའི་འདུ་ཤེས་ཉེ་བར་བཞག་སྟེ། སངས་རྒྱས་ཆོས་ཀྱི་སྐུ་ཐོབ་པར་གྱུར་ཅིག་སྙམ་དུ་སེམས་བསྐྱེད་ནས་ཆོས་ཉིད་ནམ་མཁའ་ལྟ་བུའི་ངང་ལ་བློ་གནས་པར་བྱ། དེ་ལ་མི་གནས་ན་བླ་མའི་རྣལ་འབྱོར་རྒྱས་བསྡུས་གང་རུང་བསྒོམས་ཏེ་གཉིད་འོད་གསལ་དུ་ཐིམ་པའི་གསོལ་བ་དྲག་ཏུ་བཏབ་པས་བླ་མ་སྤྱི་བོ་ནས་བྱོན། སྙིང་འོད་ཀྱི་གུར་ཁང་ནང་དུ་རྡོ་རྗེ་འཆང་གི་སྐུ་ཤིན་ཏུ་ཕྲ་བར་བཞུགས་པའི་འོད་ཟེར་གྱིས་ལུས་ཀྱི་ནང་

གསལ་བར་མོས་པའི་ངང་ནས་གཉིད་ལོག །མངྒ་ལཾ་དགེའོ།། །།

དགོངས་གཏེར་སྒྲོལ་མའི་བརྒྱུད་འདེབས་ཨུཏྤལ་ཕྲེང་བ། མཉྫུ་གྷོ་ཥ།

དགོངས་གཏེར་སྒྲོལ་མའི་བརྒྱུད་འདེབས་ཨུཏྤལ་ཕྲེང་བ་ཞེས་བྱ་བ་བཞུགས་སོ། །ཆོས་སྐུ་ཤེར་ཕྱིན་བཅོམ་ལྡན་ཀུན་བཟང་མོ། །ལོངས་སྤྱོད་ཡོངས་རྫོགས་བཛྲ་ཝ་ར་ཧི། །སྤྲུལ་པའི་རྣམ་རོལ་རྗེ་བཙུན་སྒྲོལ་མ་ཡུམ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སངས་རྒྱས་གཉིས་པ་པདྨ་ཀ་ར་དང་། །གསང་སྔགས་མཛོད་འཛིན་ཌཱ་ཀི་འབུམ་གྱི་རྗེ། །བྱང་ཆུབ་སེམས་དཔའ་ལྷ་སྲས་རོལ་པ་རྩལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཟབ་གཏེར་སྒོ་འབྱེད་མཆོག་གྱུར་བདེ་ཆེན་གླིང་། །

བཀའ་བབས་བདུན་ལྡན་རྡོ་རྗེ་གཟི་བརྗིད་རྩལ། །རྒྱལ་བསྟན་གསལ་མཛད་པདྨ་གར་གྱི་དབང་། །གསོལ་བ་འདེབས་སོ༴ གཞན་ཡང་ཟབ་གཏེར་་སྨིན་གྲོལ་མཛོད་འཛིན་པའི། །རྩ་བརྒྱུད་བླ་མ་འཕགས་མ་མྱུར་མཛད་ལྷ། །རྩ་གསུམ་རྡོ་རྗེ་ཆོས་སྲུང་རྒྱ་མཚོ་ལ། །གསོལ་བ་འདེབས་སོ་༴ ངེས་པར་འབྱུང་བས་བློ་རྒྱུད་ཞིང་ས་བརླན། །བསླབ་གསུམ་དག་པའི་ལྗོན་འཁྲུངས་ཚར་དུ་དངར། །ཡེ་ཤེས་ཆེན་པོའི་འབྲས་བུ་གཡུར་ཟ་བའི། །དོན་གཉིས་ལྷུན་གྱིས་འགྲུབ་པར་མཛད་དུ་གསོལ། །ཅེས་པ་འདིའང་མཉྫུ་གྷོ་ཥས་བྲིས་པ་དགེ་ལེགས་འཕེལ། །

༁ྃ༔ དགོངས་གཏེར་སྒྲོལ་མའི་ཟབ་ཏིག་ལས་མཎྜལ་ཆོ་ག་ཚོགས་གཉིས་སྙིང་པོ།

༁ྃ༔ དགོངས་གཏེར་སྒྲོལ་མའི་ཟབ་ཏིག་ལས་མཎྜལ་ཆོ་ག་ཚོགས་གཉིས་སྙིང་པོ་བཞུགས་སོ༔

ན་མོ་གུ་རུ་ཨཱརྱ་ཏཱ་རེ་ཡེ། དུས་གསུམ་འདྲེན་པ་སྲས་བཅས་ལ། །ཐུགས་བསྐྱེད་ཕྲིན་ལས་རྨད་བྱུང་བ། །ཡུམ་གྱུར་སྒྲོལ་མ་ལ་བཏུད་ནས། །བྱ་སྤྱོད་དང་མཐུན་ཉམས་ལེན་བཤད། །དེའང་ཟབ་ཏིག་འདི་རྣམས་ཡང་ཟབ་སྙིང་པོ་བསྡུས་པ་ཡིན་པས་སྤྲོས་བཅས་མང་དུ་མི་དགོས་ཀྱང་། ཅུང་ཟད་སྤྲོས་པ་དང་། རྒྱུན་ཁྱེར་དུ་བྱ་བ་སྟེ་རྒྱས་བསྡུས་གཉིས་ལས། དང་པོ་ནི། རྗེ་བཙུན་སྒྲོལ་མའི་སྐུ་བརྙན་བྲིས་འབུར་སོགས་དཀོན་མཆོག་གི་རྟེན་གང་འཛོམས་མདུན་དུ་སྟེགས་བུ་གཙང་མར་ཆུ་གཙང་ཉེར་སྤྱོད། དཀར་ཟླུམ། བསང་ཆུ། མཆོད་པའི་མཎྜལ། འཐོར་ནས་སོགས་འདུ་བྱས། གྲུབ་ན་ཁྲུས་དང་གཙང་སྦྲའི་ཀུན་སྤྱོད་དང་ལྡན་པར་བྱ་ཞིང་། མི་ལྕོགས་ན་ཤ་ཆང་མ་འཐུང་བའི་སྔ་དྲོའི་

ཆ་ལྟ་བུར་སྲིད་ལས་ངེས་འབྱུང་དང་། བྱང་ཆུབ་སེམས་ཀྱི་ཀུན་སློང་དང་ལྡན་པས་སྐྱབས་སེམས་ནི། མདུན་གྱི་ནམ་མཁར་རྗེ་བཙུན་མ་མངོན་སུམ་དུ་བཞུགས་པར་མོས་ལ། ན་མོ། དཀོན་མཆོག་ཀུན་དངོས་རྗེ་བཙུན་མར། །བདག་སོགས་འགྲོ་ཀུན་སྐྱབས་སུ་མཆི། །བྱང་ཆུབ་སྨོན་པའི་སེམས་བསྐྱེད་ནས། །ཟབ་མོའི་ལམ་ལ་འཇུག་པར་བགྱི། །ཚོགས་བསགས་པ་ནི། རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །མེ་ཏོག་

བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་ཚོགས་ཀྱིས་བཞེས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོ་སྐྱེ་བོ་ལ་སོགས་པས། །དུས་གསུམ་དགེ་བ་ཅི་བསགས་པའི། །བསོད་ནམས་ལ་ནི་བདག་ཡི་རང་། །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོང་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་མཚོར་བྱིང་བ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་

ཅད་བྱང་ཆུབ་རྒྱུར་གྱུར་ནས། །རིང་པོར་མི་ཐོགས་འགྲོ་བ་ཡི། །འདྲེན་པའི་དཔལ་དུ་བདག་གྱུར་ཅིག །ཅེས་པའི་བར་བརྗོད། མཆོད་པ་བྱིན་རླབས་ནི། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཨོཾ་སྭ་བྷཱ་ཝ་སོགས། གནས་ཡུལ་པདྨོ་བཀོད་པའི་ཞིང་། །དབྱིབས་དང་རྒྱན་བཀོད་ཚད་མེད་པར། །ལྷ་རྫས་ཏིང་འཛིན་ལས་གྲུབ་པའི། །མཆོད་རྫས་བསམ་མི་ཁྱབ་པར་གྱུར། །ཨོཾ་བཛྲ་ཨརྒྷཾ་ནས་ཤབྡ་ཨཱཿཧཱུྃ། ཨོཾ་བཛྲ་སྥ་ར་ན་ཁཾ། དེ་ནས་ཐོག་མར་དཀོན་མཆོག་སྤྱི་ལ་ཕྱག་མཆོད་འབུལ་བ་ནི། ཕྱོགས་བཅུ་དུས་བཞི་རྒྱལ་བ་སྲས་དང་བཅས་པ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །

པདྨ་ཀཱ་མ་ལ་ཡ་སྟྭཾ། ཡན་ལག་བདུན་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །

མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་

སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །ཨོཾ་ཨཱཿཧཱུྃ༔ བདག་དང་མཐའ་ཡས་སེམས་ཅན་གྱི༔ ལུས་དང་

ལོངས་སྤྱོད་དགེ་ཚོགས་ཀུན༔ གླིང་བཞི་རི་རབ་ཉི་ཟླར་བཅས༔ ལྷ་མིའི་ལོངས་སྤྱོད་བསམ་མི་ཁྱབ༔ ཀུན་བཟང་མཆོད་པའི་སྤྲིན་ཕུང་ཆེ༔ རྒྱུན་མི་འཆད་པར་སྤྲུལ་བྱས་ཏེ༔ དཀོན་མཆོག་རིན་ཆེན་རྩ་བ་གསུམ༔ ཆོས་སྲུང་ནོར་ལྷ་རྒྱ་མཚོ་ལ༔ གུས་པས་རྟག་ཏུ་འབུལ་བར་བགྱི༔ བསོད་ནམས་ཚོགས་ཆེན་རབ་རྫོགས་ནས༔ ཡེ་ཤེས་སྣང་བ་རྒྱས་པར་ཤོག༔ ཨོཾ་གུ་རུ་དེ་ཝ་ཌཱ་ཀི་ནི་སརྦ་མཎྜལ་པཱུ་ཛ་མེ་གྷ་ཨཱ་ཧཱུྃ༔ ཞེས་མཎྜལ་ཕུལ། ན་མོ༔ སངས་རྒྱས་ཆོས་དང་དགེ་འདུན་དང་༔ བླ་མ་ཡི་དམ་མཁའ་འགྲོ་དང་༔ ཆོས་སྲུང་ནོར་ལྷ་གཏེར་གྱི་བདག༔ ཡེ་ཤེས་གཅིག་གི་ངོ་བོ་ལས༔ རང་བཞིན་མ་འགགས་ཅིར་ཡང་སྟོན༔ ཐུགས་རྗེ་ཕྲིན་ལས་རྨད་པོ་ཆེ༔ འགྲོ་ཀུན་སྐྱབས་དང་མགོན་གྱུར་པ༔ མཁྱེན་བརྩེའི་བདག་ཉིད་ཁྱེད་རྣམས་ལ༔ ཕྱག་འཚལ་སྙིང་ནས་སྐྱབས་སུ་མཆི༔ ལུས་

དང་ལོངས་སྤྱོད་མཆོད་པ་འབུལ༔ བདག་དང་མཐའ་ཡས་སེམས་ཅན་རྣམས༔ རྟག་ཏུ་ཐུགས་རྗེས་བསྐྱབ་མཛད་གསོལ༔ ནད་དང་གནོད་པ་ཞི་བ་དང་༔ ཚེ་དང་བསོད་ནམས་འཕེལ་བ་དང་༔ བསམ་པའི་དོན་རྣམས་མ་ལུས་ཀུན༔ ཆོས་བཞིན་འགྲུབ་པར་བྱིན་གྱིས་རློབས༔ ཞེས་འདོད་དོན་གསོལ། དེ་ནས་བྱེ་བྲག་ཏུ་རྗེ་བཙུན་མ་ལ་མཆོད་པ་ལན་གསུམ་འབུལ་ཞིང་བསྟོད་པའི་རྒྱུད་འདོན་པ་ནི། རང་ཉིད་སྐད་ཅིག་དྲན་རྫོགས་སུ༔ རྗེ་བཙུན་འཕགས་མའི་སྐུར་གསལ་བའི༔ ཐུགས་ཀར་ཟླ་སྟེང་ཏཱཾ་ལྗང་གུ༔ དེ་ལས་འོད་ཟེར་དཔག་ཡས་འཕྲོས༔ འཕགས་མ་རྣམ་འཕྲུལ་ཉེར་གཅིག་དང་༔ དཀོན་མཆོག་རྒྱ་མཚོའི་སྤྲིན་འཕྲོ་བ༔ མདུན་གྱི་ནམ་མཁར་སྤྱན་དྲངས་གྱུར༔ ཏཱཾ༔ སྐྱེ་མེད་འོད་གསལ་ཆོས་སྐུའི་དབྱིངས༔ འགགས་མེད་འཕགས་མའི་ཡེ་ཤེས་སྐུར༔ གང་འདུལ་སྒྱུ་འཕྲུལ་དྲྭ་བར་ཤར༔ ཚུར་གཤེགས་ཨཱརྱ་ཏཱ་རེ་ཛ༔

བདག་དང་འགྲོ་ལ་ཐུགས་བརྩེའི་ཕྱིར༔ ཉིད་ཀྱི་རྫུ་འཕྲུལ་མཐུ་ཡིས་ནི༔ ཇི་སྲིད་མཆོད་པ་བདག་བགྱིས་པ༔ དེ་སྲིད་བཅོམ་ལྡན་བཞུགས་སུ་གསོལ༔ པདྨ་ཀཱ་མ་ལ་ཡ་སྟྭཾ༔ ཨོཾ༔ དངོས་འབྱོར་ཡིད་ལས་བྱུང་བ་ཡི༔ ཀུན་ཏུ་བཟང་པོའི་མཆོད་སྤྲིན་གྱིས༔ ཆོས་དབྱིངས་རྒྱས་པར་བཀང་བྱས་ཏེ༔ འཕགས་མ་སྒྲོལ་མ་འཁོར་བཅས་མཆོད༔ ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ༔ ཞེས་སྤྱན་དྲངས་ཤིང་མཆོད་པ་སྤྱིར་འབུལ། ཨོཾ་ཨཱཿཧཱུྃ༔ ཁམས་གསུམ་སྣོད་བཅུད་དཔལ་འབྱོར་དང་༔ བདག་ལུས་ལོངས་སྤྱོད་དགེ་ཚོགས་ཀུན༔ ཐུགས་རྗེའི་བདག་ཉིད་རྣམས་ལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཨོཾ་སརྦ་ཏ་ཐཱ་ག་ཏ་རཏྣ་མཎྜལ་པཱུ་ཛ་ཧོཿ ཞེས་མཎྜལ་བྱེ་བྲག་ཏུ་ཕུལ་ནས། བསྟོད་པའི་རྒྱལ་པོའི་རྒྱུད་ཕྱག་འཚལ་ཉེར་གཅིག་ཚར་གཉིས་བརྗོད། ཨོཾ། དངོས་འབྱོར་ཡིད་ལས་བྱུང་བ་ཡི༔ ཀུན་

ཏུ་བཟང་པོའི་མཆོད་སྤྲིན་གྱིས༔ ཆོསདབྱིངས་རྒྱས་པར་བཀང་བྱས་ཏེ༔ འཕགས་མ་སྒྲོལ་མ་འཁོར་བཅས་མཆོད༔ ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ༔ ཞེས་སྤྱན་དྲངས་ཤིང་མཆོད་པ་སྤྱིར་འབུལ། ཨོཾ་ཨཱཿཧཱུྃ༔ ཁམས་གསུམ་སྣོད་བཅུད་དཔལ་འབྱོར་དང་༔ བདག་ལུས་ལོངས་སྤྱོད་དགེ་ཚོགས་ཀུན༔ ཐུགས་རྗེའི་བདག་ཉིད་རྣམས་ལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཨོཾ་སརྦ་ཏ་ཐཱ་ག་ཏ་རཏྣ་མཎྜལ་པཱུ་ཛ་ཧོཿ ས་མཆོད་པ་དང་། མཎྜལ་ཕུལ་ནས། ཕྱག་གཡས་མཆོག་སྦྱིན་ཕྱག་རྒྱ་ཉིད༔ སྐྱབས་སྦྱིན་ཕྱག་རྒྱར་གྱུར་པའི་འོག༔ བདག་དང་བསྲུང་བྱ་ཀུན་ཚུད་ནས༔ འཇིགས་པ་ཀུན་ལས་དབུགས་དབྱུང་གྱུར༔ ཅེས་མོས་ལ་ཕྱག་འཚལ་ཉེར་གཅིག་ཚར་གསུམ་བརྗོད། ཡང་མཆོད་པ་དང་མཎྜལ་ཕུལ། ཨོཾ༔ དངོས་འབྱོར་ཡིད་ལས་བྱུང་བ་ཡི༔ ཀུན་ཏུ་བཟང་པོའི་མཆོད་སྤྲིན་གྱིས༔ ཆོས་དབྱིངས་རྒྱས་

པར་བཀང་བྱས་ཏེ༔ འཕགས་མ་སྒྲོལ་མ་འཁོར་བཅས་མཆོད༔ ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱ༔ ཞེས་སྤྱན་དྲངས་ཤིང་མཆོད་པ་སྤྱིར་འབུལ། ཨོཾ་ཨཱཿཧཱུྃ༔ ཁམས་གསུམ་སྣོད་བཅུད་དཔལ་འབྱོར་དང་༔ བདག་ལུས་ལོངས་སྤྱོད་དགེ་ཚོགས་ཀུན༔ ཐུགས་རྗེའི་བདག་ཉིད་རྣམས་ལ་འབུལ༔ བཞེས་ནས་བྱིན་གྱིས་བརླབ་ཏུ་གསོལ༔ ཨོཾ་སརྦ་ཏ་ཐཱ་ག་ཏ་རཏྣ་མཎྜལ་པཱུ་ཛ་ཧོཿ ཞེས་མཎྜལ་ཕུལ་ནས། སྐུ་ལས་བདུད་རྩིའི་ཆུ་རྒྱུན་བབས༔ རང་དང་བསྲུང་བྱའི་སྤྱི་བོ་ནས༔ ཞུགས་ཏེ་ལུས་ཀུན་གང་བ་ཡིས༔ བྱིན་རླབས་མ་ལུས་ཞུགས་པར་གྱུར༔ ཅེས་མོས་ལ་ཕྱག་འཚལ་ཉེར་གཅིག་ཚར་བདུན་ཕན་ཡོན་བཅས་བརྗོད། གཏོར་མ་ཨ་མྲྀ་ཏས་སྦྱངས། སྟོང་པའི་ངང་ལས་ཨོཾ་ཡིག་ལས༔ རིན་ཆེན་སྣོད་མཆོག་ཡངས་པའི་ནང་༔ འབྲུ་གསུམ་ལས་བྱུང་གཏོར་མ་ནི༔ ཟག་མེད་ཡེ་ཤེས་བདུད་རྩིར་གྱུར༔ ཨོཾ་ཨཱཿཧཱུྃ༔

ལན་གསུམ། ཨོཾ་ཨཱརྱ་ཏཱ་རེ་ས་པཱ་རི་ཝ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་གཙོ་མོ་དང་། ཨ་ཀཱ་རོ་ལན་གསུམ་གྱིས་མགྲོན་རྣམས་ཐམས་ཅད་ལ་ཕུལ། ཨོཾ༔ མཆོད་སྦྱིན་གཏོར་མ་དམ་པ་འདི༔ ཡེ་ཤེས་ཆེན་པོས་རྗེས་དགོངས་ལ༔ བདེ་བ་ཆེན་པོར་བཞེས་ནས་ཀྱང་༔ དངོས་གྲུབ་མ་ལུས་བསྩལ་དུ་གསོལ༔ ཞེས་འདོད་དོན་གསོལ། ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་སོགས་ཀྱིས་མཆོད། ཨོཾ༔ སྣང་བ་མཐའ་ཡས་པདྨའི་རིགས༔ འཇིག་རྟེན་དབང་ཕྱུག་ཞལ་ལས་བྱུང་༔ སངས་རྒྱས་ཀུན་གྱི་ཕྲིན་ལས་བདག༔ འཕགས་མ་སྒྲོལ་མར་ཕྱག་འཚལ་བསྟོད༔ བསྟོད་པར་འོས་པ་སོགས་ཀྱིས་བསྟོད། ཐལ་མོ་སྦྱར་ལ། རྗེ་བཙུན་འཕགས་མ་འཁོར་དང་བཅས། །དམིགས་མེད་ཐུགས་རྗེས་བརྩེར་དགོངས་ལ། །བདག་གིས་ཇི་ལྟར་གསོལ་བའི་དོན། །གེགས་མེད་འགྲུབ་པར་བྱིན་གྱིས་རློབས། །སངས་རྒྱས་བསྟན་པ་དར་ཞིང་རྒྱས། །

བསྟན་འཛིན་ཐུགས་མཐུན་ཞབས་པད་བརྟན། །ཉེར་འཚེའི་བར་ཆད་ཀུན་ཞི་ཞིང་། །བཤད་སྒྲུབ་ཕྲིན་ལས་འཕེལ་བར་མཛོད། །ནད་མུག་འཁྲུགས་རྩོད་ཞི་བ་དང་། །ཆོས་ལྡན་དཔལ་འབྱོར་གོང་དུ་འཕེལ། །ཆོས་སྐྱོང་རྒྱལ་པོའི་མངའ་ཐང་རྒྱས། །རྒྱལ་ཁམས་མཐའ་དབུས་བདེ་བར་མཛོད། །འཇིགས་པ་བཅུ་དྲུག་དུས་མིན་འཆི། །རྨི་ལམ་མཚན་ལྟས་ངན་པ་དང་། །འཁོར་བ་ངན་སོང་སྡུག་བསྔལ་སོགས། །གནས་སྐབས་མཐར་ཐུག་འཇིགས་ལས་སྐྱོབ། །ཚེ་བསོད་དབང་ཐང་ཉམས་རྟོགས་འཕེལ། །མི་དགེའི་རྟོགས་པ་མི་འབྱུང་ཞིང་། །བྱང་ཆུབ་སེམས་གཉིས་རྩོལ་མེད་སྐྱེས། །བསམ་དོན་ཆོས་བཞིན་འགྲུབ་པར་མཛོད། །འདི་ནས་བྱང་ཆུབ་སྙིང་པོའི་བར། །བུ་གཅིག་པོ་ལ་མ་བཞིན་དུ། །འབྲལ་མེད་ཐུགས་རྗེའི་སྤྱན་གྱིས་གཟིགས། །ཉིད་དང་དབྱེར་མེད་

མཛད་དུ་གསོལ། །ཞེས་འདོད་པའི་དོན་ལ་གསོལ་བ་ཁྱད་པར་དུ་བཏབ་ཅིང་ཐུགས་དམ་བསྐུལ་ནས། མདུན་བསྐྱེད་འོད་ཞུ་རང་ལ་ཐིམ༔ དབྱེར་མེད་ཉིད་དུ་བྱིན་བརླབས་པས༔ རང་ཉིད་འཕགས་མ་སྒྲོལ་མའི་སྐུ༔ སྣང་ལ་རང་བཞིན་མེད་པར་གྱུར༔ ཅེས་རང་ཉིད་འཕགས་མའི་གསལ་སྣང་དང་ང་རྒྱལ་ལ་སེམས་བཟུང་སྟེ་ཡི་གེ་བཅུ་པའི་བཟླས་པ་ཅི་འགྲུབ་མཐར། ཡིག་གེ་བརྒྱ་པ་དང་། མ་རྙེད་ཡོངས་སུ་མ་ཚང་སོགས་བརྗོད་ལ་ནོངས་པ་བཤགས། ཨོཾ། ཁྱེད་ཀྱིས་སེམས་ཅན་སོགས་དང་། བཛྲ་མུཿ བརྗོད་ལ་མགྲོན་ཐབས་ཀྱི་ལྷ་རྣམས་གཤེགས། ལྷ་དང་རང་སེམས་དབྱེར་མེད་པ༔ ཆོས་དབྱིངས་གཉུག་མའི་ངང་དུ་བཞགཿ ཅེས་གནས་ལུགས་ཀྱི་ལྟ་བ་བསྐྱང་། དགེ་བ་འདི་ཡིས་མྱུར་དུ་བདག༔ འཕགས་མ་སྒྲོལ་མ་སོགས་བསྔོ་སྨོན་བྱ། ཡིད་བཞིན་ནོར་དང་བུམ་པ་བཟང་པོ་ལྟར། །བསམ་པའི་དོན་ཀུན་ཐོགས་མེད་སྩོལ་མཛད་པ། །རྗེ་བཙུན་སྒྲོལ་མ་རྒྱལ་བ་སྲས་བཅས་ཀྱིས། །མི་འབྲལ་ཐུགས་

རྗེས་སྐྱོང་བའི་བཀྲ་ཤིས་ཤོག །ཅེས་སོགས་ཤིས་པ་བརྗོད་ལ་མེ་ཏོག་འཐོར་རོ། །གཉིས་པ་རྒྱུན་ཁྱེར་བྱ་བའི་ཚེ། འཕགས་མའི་རྟེན་འཛོམས་ན་ལེགས། མ་འཛོམས་ན་ཡིད་ཀྱིས་བསྒོམ་པས་འཐུས། མཎྜལ་དང་མཆོད་པ་བཤམས་ལ་གོང་དུ་སྨོས་པའི། མདུན་གྱི་ནམ་མཁར་སོགས་ནས་སྐྱབས་སེམས་དང་མཆོད་པ་བྱིན་རླབས་བར་བཏང་། དཀོན་མཆོག་སྤྱི་མཆོད་མི་དགོས་པས། རང་ཉིད་སྐད་ཅིག་དྲན་རྫོགས་སུ༔ རྗེ་བཙུན་འཕགས་མའི་སྐུར་གསལ་བའི༔ སོགས་ནས། མཆོད་པ་དང་མཎྜལ། བསྟོད་པ་ལན་གསུམ་བསྐྱར་བའི་ཕྱི་མ་ཕྱག་འཚལ་ཉེར་གཅིག་གམ་བདུན་ཕན་ཡོན་དང་བཅས་པའི་མཐར༔ སྤྲོ་ན། རྗེ་བཙུན་འཕགས་མ་འཁོར་དང་བཅས། །སོགས་འདོད་གསོལ་གྲུབ་ན་བྱ། མ་བྱས་ཀྱང་ཆོག་མདུན་བསྐྱེད་འོད་ཞུ་སོགས་ནས་བཟླས་པ་ནོངས་བཤགས་བར་སྔར་ལྟར་ལ། གཤེགས་གསོལ་སོགས་མི་དགོས། ལྷ་དང་རང་སེམས་སོགས། དགེ་བསྔོ་ཤིས་བརྗོད་བཅས་ཀྱིས་གྲུབ་བོ། །དགེའོ།། །།

འགྲོ་འདུལ་འཇིག་རྟེན་དབང་ཕྱུག་གི་ལས་ཚོགས་སྐོར་ལས་སྒོ་བཞིའི་སྒྲོལ་མའི་སྐབས་སུ་གསུངས་པའི་མཎྜལ་གྱི་ཆོ་ག་འདོད་དགུ་མཆོག་སྩོལ་དཔག་བསམ་ཤིང་མཆོག

༄༅། །འགྲོ་འདུལ་འཇིག་རྟེན་དབང་ཕྱུག་གི་ལས་ཚོགས་སྐོར་ལས་སྒོ་བཞིའི་སྒྲོལ་མའི་སྐབས་སུ་གསུངས་པའི་མཎྜལ་གྱི་ཆོ་ག་འདོད་དགུ་མཆོག་སྩོལ་དཔག་བསམ་ཤིང་མཆོག་བཞུགས་སོ། །

ཆོས་སྐུའི་མཁའ་དབྱིངས་བསོད་ནམས་དཔག་ཏུ་མེད། །ལོངས་སྐུའི་ཉི་འོད་འཕགས་མཆོག་མིག་མི་འཛུམ། །སྤྲུལ་སྐུ་ཐུགས་རྗེ་མྱུར་མ་ཟླ་བའི་འོད། །འཕགས་མ་ཨརྱ་ཏཱ་རེ་སྤྱི་བོར་མཆོད། །གང་གི་བྱིན་རླབས་སྤྲིན་ཕུང་ལས། །ལེགས་འོངས་ཐུགས་རྗེའི་བདུད་རྩིའི་ཆར། །འགྲོ་ཁམས་འཛིན་མའི་ཁྱོན་རྣམས་ལ། །དངོས་གྲུབ་དགེ་མཚན་སྨིན་མཛད་གསོལ། །དེ་ལ་འདིར་འཕགས་པ་ཐུགས་རྗེ་ཆེན་པོ་འགྲོ་འདུལ་སྤྱན་རས་གཟིགས་ཀྱི་ལས་ཚོགས་ལས་བྱུང་བའི་འཕགས་མ་སྒྲོལ་མ་འཁོར་བཅས་ལ་མཎྜལ་འབུལ་ཞིང་འདོད་དོན་གསོལ་བའི་ཚུལ་གྱིས་སྐབས་དབྱེ་བ་ལ། གཏེར་གཞུང་ལས། འཕགས་མ་འཁོར་བ་ལས་སྒྲོལ་མ༔ ཡུམ་མཆོག་ཡི་གེ་དྲུག་མ་ཡིས༔ འཇིགས་པ་ཀུན་ལས་སྐྱོབ་པའི་ཐབས༔ རྟེན་དང་མཆོད་པ་བཀོད་ལེགས་བཀྲམ༔ བསོད་ནམས་ཉེ་བར་བསགས་པ་སྟེ༔ བྱིན་རླབས་འཇུག་བྱའི་རྟེན་བསྐྱེད་ནས༔ ཡེ་ཤེས་འཕགས་མ་སྤྱན་དྲངས་བྱ༔

བསྙེན་ཕྱིར་ཡན་ལག་བདུན་གྱིས་མཆོད༔ སྒྲུབ་ཕྱིར་བསྙེན་ཅིང་བསྟོད་ཚོགས་འབུལ༔ འདོད་པའི་དོན་ལ་གསོལ་བ་གདབ༔ རིམ་པ་དེ་དག་སོ་སོ་རུ༔ གཉིས་གཉིས་བུ་ཡི་ཕོངས་པ་སེལ༔ གསུམ་གསུམ་ནོར་གྱི་དབུལ་བ་བྲལ༔ བདུན་བདུན་བསྒྲུབས་ན་འདོད་དོན་ཀུན༔ ཐམས་ཅད་ཡིད་བཞིན་འགྲུབ་པར་འགྱུར༔ ཞེས་གསུངས་པ་ལྟར། སྦྱོར་བ་དང་དངོས་གཞི་རྗེས་ཀྱི་རིམ་པ་གསུམ་ལས། དང་པོ་བཤམ་འདོན་གཉིས་ཀྱི་སྦྱོར་བ་ལས། ཐོག་མར་ཡིད་དང་མཐུན་པའི་གནས་གཙང་ཞིང་དགེ་བར་སྟེགས་ཀྱི་ཁར་འཕགས་མའི་སྐུ་བརྙན་རབ་གནས་དང་ལྡན་པའི་མདུན་དུ་རིན་པོ་ཆེའི་མཎྜལ་དྲི་མ་མེད་པར་དྲི་བཟང་གིས་བགོ་ཞིང་། མཎྜལ་འབུལ་རྒྱུ་འབྲུ་དང་རིན་པོ་ཆེ་སྨན་སྣ་སོགས་དྲི་དང་སྤོས་ཆབ་ཀྱིས་སྦགས་པ་ཟུར་དུ་བཞག །ཉེར་སྤྱོད་རྣམ་པ་བདུན་གྱིས་གཡས་སུ་བསྐོར། ལུགས་སྤྱི་དང་མཐུན་པའི་འཕགས་མའི་མཆོད་གཏོར་དང་། ཁྱད་པར་དཀར་གསུམ་ལས་

བཟོས་པའི་ལྷ་མོའི་གཏོར་འབུལ། གཞན་ཡང་ཆོས་སྐྱོང་སྤྱི་དང་རིགས་དྲུག་གཞི་བདག་དང་བཅས་པའི་གཏོར་འབུལ་བྱེད་པར་སྤྲོ་ན་བཤམས། རང་གི་མདུན་དུ་མེ་ཏོག རྡོར་དྲིལ། རོལ་མོ། བསང་ཆུ་སོགས་མཁོ་བའི་ཡོ་བྱད་ཚོགས་པར་བྱའོ། །གཉིས་པ་ནི། ཚད་མེད་ཀྱི་སྙིང་རྗེ་དང་གཞན་ཕན་གྱི་བསམ་པ་བརྟན་པོའི་ངང་ནས་འདི་སྐད་དོ། །མདུན་གྱི་ནམ་མཁར་བླ་མ་དཀོན་མཆོག་རྩ་བ་གསུམ་གྱི་ལྷ་ཚོགས་ཐམས་ཅད་སྤྲིན་ཕུང་གཏིབ་པ་ལྟར་བཞུགས་པའི་དྲུང་དུ་བདག་གཞན་སེམས་ཅན་རྣམས་ཀྱིས་འདུན་པ་རྩེ་གཅིག་པས་སྐྱབས་སུ་འགྲོ་བར་བྱའོ། །ན་མོ༔ སྐུ་གསུམ་བདག་ཉིད་ཆེན་པོ་བླ་མ་དང་༔ མ་ཆགས་པདྨའི་རིགས་མཆོག་སངས་རྒྱས་དཔལ༔ ཐེག་མཆོག་གསུང་རབ་བྱང་སེམས་འཕགས་མའི་ཚོགས༔ ཀུན་ལ་བདག་གཞན་འགྲོ་རྣམས་སྐྱབས་སུ་མཆི༔ འགྲོ་ཀུན་མ་ལུས་སངས་རྒྱས་སར་འགོད་ཕྱིར༔ དང་པོར་བདག་ཉིད་བླ་མེད་བྱང་ཆུབ་བསྒྲུབ༔ ཅེས་སྐྱབས་འགྲོ་སེམས་

བསྐྱེད་ལན་གསུམ་དང་། ལས་ཐམས་ཅད་པའི་སྔགས་ཀྱིས་བསང་ཆུ་ནུས་ལྡན་དུ་བསྒྲུབ། ཨ་མྲྀ་ཏས་བསང་། སྭ་བྷཱ་ཝས་སྦྱང་། མཆོད་རྫས་དང་ཡོ་བྱད་ཀྱི་དངོས་འཛིན་བག་ཆགས་ཐམས་ཅད་སྟོང་པར་གྱུར། སྟོང་པའི་ངང་ལས་འཁོར་ཡུག་ས་གཞི་འདི་དག་བདེ་བ་ཅན་གྱི་ཞིང་གི་བཀོད་པ་ལྟ་བུ། ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ་མཛེས་ཤིང་ཡིད་དུ་འོང་བར་གྱུར་པའི་དབུས་སུ་མཆོད་རྫས་ཐམས་ཅད་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་བསམ་གྱིས་མི་ཁྱབ་པ། རྒྱུ་འཇིག་རྟེན་ལས་འདས་པའི་དགེ་བ་ལས་གྲུབ་པ། ངོ་བོ་བཟང་ཞིང་གཙང་བ། ཡུལ་ནམ་མཁའི་མཐར་ཁྱབ་པ། དུས་འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་མི་འཆད་པར་སྐྱབས་གནས་དཀོན་མཆོག་རྒྱ་མཚོའི་སྤྱན་ལམ་དུ་འབྱུང་བར་གྱུར་ཅིག །ཨོཾ་ན་མོ་བྷ་ག་ཝ་

ཏེ་བཛྲ་ས་ར་པྲ་མརྡྷ་ན་ཡེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲ། མ་ཧཱ་ཏེ་ཛྭ་བཛྲ། མ་ཧཱ་བིདྱ་བཛྲ། མ་ཧཱ་བོ་དྷི་ཙིཏྟ་བཛྲ། མ་ཧཱ་བོ་དྷི་མནྚོ་པ་སཾ་ཀྲ་མ་ན་བཛྲ། སརྦ་ཀརྨ་ཨ་ཝ་ར་ཎ་བི་ཤོ་དྷ་ནི་བཛྲེ་སྭཱ་ཧཱ༔ མཆོད་པའི་སྤྲིན་གྱི་གཟུངས་ཀྱིས་མཆོད་རྫས་རྣམས་བྱིན་བརླབས་ཏེ། ཨོཾ་བཛྲ་དྷརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ་པྲ་ཙ་ལི་ནི་ཏེ། པྲཛྙཱ་པཱ་ར་མི་ཏ་ནཱ་ད་སམྦྷ་ཝ་ཏེ། བཛྲ་དྷརྨཱ་ཧྲྀ་ད་ཡ་ནི། སནྟོ་ཥ་ཎི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། ཞེས་ལྷ་རྣམས་ཐུགས་རྒྱུད་བསྐུལ་ནུས་པར་བྱིན་བརླབ་པར་མོས་ལ་རོལ་མོ་སྒྲོགས། འབྲུ་རིགས་མེ་ཏོག་གི་ཕྲེང་བ་ལྷ་རྣམས་གང་ལ་ཕོག་པའི་ཐུགས་རྒྱུད་བསྐུལ་ནུས་པར་བྱིན་བརླབས་པར་མོས་ལ་མེ་ཏོག་སྙེམ་པར་བཅངས་ཏེ། ཨོཾ་ན་མོ་བྷ་ག་ཝ་ཏེ་པུཥྤེ་ཀེ་ཏུ་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་པུཥྤེ་པུཥྤེ་མ་ཧཱ་པུཥྤེ། པུཥྤེ་ཨུདྦྷ་ཝེ། པུཥྤེ་སམྦྷ་ཝེ། པུཥྤ་ཨ་ཝ་ཀིརྞེ་སྭཱ་ཧཱ། ཞེས་

ལན་བདུན་གདབ་པར་བྱའོ། །གཉིས་པ་དངོས་གཞི་ལ། སྤྱི་དང་བྱེ་བྲག་གསུམ་གྱི་དང་པོ་དཀོན་མཆོག་སྤྱིར་འབུལ་བ་ནི། མདུན་ཕྱོགས་མཆོད་པའི་སྤྲིན་ཕུང་རྒྱ་མཚོ་འཁྲིགས་པའི་ནམ་མཁར་རིན་པོ་ཆེ་སྣ་ཚོགས་པའི་ཁྲི་དར་ཟབ་དང་པདྨ་ཉི་ཟླ་བརྩེགས་པའི་གདན་ཡངས་ཤིང་རྒྱ་ཆེ་བ་མཛེས་ཤིང་མངོན་པར་བཀྲ་བས་རབ་ཏུ་གཏམས་པར་གྱུར། སྙིང་གའི་འོད་ཟེར་དང་མོས་གུས་དྲག་པོའི་ཤུགས་ཀྱིས་འོག་མིན་སོགས་ཕྱོགས་བཅུའི་ཞིང་རབ་འབྱམས་ནས་རྒྱལ་བ་སྲས་དང་སློབ་མར་བཅས་པ་ཐམས་ཅད་སྐད་ཅིག་གིས་སྤྱན་དྲངས་ཏེ་མདུན་དུ་གཤེགས་པར་གྱུར་སྙམ་སྟེ་སྤོས་དང་རོལ་མོ་བཅས། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེའི་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །

བཛྲ་ས་མཱ་ཛཿས་སྤྱན་དྲངས། ཇི་ལྟར་བལྟམས་པ་ཙམ་ཉིད་དུ། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གི་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ་སྭཱ་ཧཱ༔ ཞེས་སྐུ་ཁྲུས་གསོལ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ཨོཾ་སརྦ་ཏ་ཐཱ་ག་ཏ་ཀ་ཡ་བི་ཤོ་དྷ་ན་ཡེ་སྭཱ་ཧཱ། ཞེས་སྐུ་ཕྱི། སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་གྱུར་པ། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝསྟྲ་པྲ་ཏཱིཙྪ་སྭཱ་ཧཱ༔ ཞེས་ན་བཟའ་ཕུལ་ལ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་པར་ལྡན། །བདག་གི་མཆོད་ཡོན་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །སྟོང་གསུམ་ཀུན་ཏུ་

མཉམ་པ་ཡི། །པདྨ་འདབ་བརྒྱད་གེ་སར་བཅས། །བདེ་ཞིང་ཡངས་པ་འབུལ་ལགས་ན། །ཅི་བདེ་བར་ནི་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་པདྨ་ཀཱ་མ་ལ་ཡ་སྟྭཾ། ཞེས་གདན་འབུལ། ཡན་ལག་བདུན་མ་འབུལ་བར། ཐོག་མར་ཕྱག་དང་བཅས། ཨོཾ་ན་མོ་མཉྫུ་ཤྲཱི་ཡེ། ན་མོ་སུ་ཤྲཱི་ཡེ། ན་མོ་ཨུཏྟ་མ་ཤྲཱི་ཡེ་སྭཱ་ཧཱ། ཨོཾ་ན་མོ་བུདྡྷ་ཡ། ན་མོ་དྷརྨཱ་ཡ། ན་མོ་སངྒ་ཡ། ལན་གསུམ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་

ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་སྒྲོལ་བ། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །

བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་མ། །སྒྲོལ་མ་ཡུམ་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །ཚོམ་བུའི་འདུ་འགོད་དང་བཅས། ཨོཾ་ཨཱཿཧཱུྃ། བསོད་ནམས་ཞིང་གྱུར་མཆོག་རྣམས་དགོངས་སུ་གསོལ། །མཐའ་ཡས་ནམ་མཁར་འབྱུང་བ་རིམ་བརྩེགས་དབུས། །རིན་ཆེན་ལྷུན་པོ་གསེར་རི་རོལ་མཚོ་དང་། །གླིང་བཞི་གླིང་ཕྲན་འཁོར་ཡུག་ལྕགས་རི་བཅས། །སྣོད་ཀྱི་མཎྜལ་བཟང་པོ་འདི་འབུལ་ལོ། །རྣམ་རྒྱལ་ཁང་བཟང་ཁྲི་མཆོག་དཔག་བསམ་ཤིང་། །གཏེར་གྱི་བུམ་བཟང་འདོད་པ་འཇོ་བའི་བ། །མ་རྨོས་ལོ་

ཏོག་རིན་ཆེན་རི་དང་ཚལ། །ཡན་ལག་བརྒྱད་ལྡན་རྫིང་བུ་བདུད་རྩིའི་ཆུ། །ཕུན་ཚོགས་རྟེན་གཞི་བཟང་པོའི་མཎྜལ་འབུལ། །བཀྲ་ཤིས་རྟགས་བརྒྱད་རྒྱལ་སྲིད་རིན་ཆེན་བདུན། །ཉེ་བའི་རིན་ཆེན་ལྷ་མི་ཀླུ་ཡི་ནོར། །སྲིད་ཞིའི་ལོངས་སྤྱོད་དཔལ་འབྱོར་ཐམས་ཅད་ཀུན། །རིན་ཆེན་མཎྜལ་གཅིག་ཏུ་བསྡུས་ནས་ཀྱང་། །དེ་དག་རྡུལ་སྙེད་བྱེ་བར་སྤྲུལ་བྱས་ནས། །ཞིང་གི་དམ་པ་མཆོག་ལ་འབུལ་བར་བགྱི། །གནས་ཡུལ་བུ་དང་ཆུང་མ་འབངས་འཁོར་བྲན། །རིན་ཆེན་འབྲུ་ནོར་ལོངས་སྤྱོད་ཅི་མཆིས་དང་། །བདག་ལུས་ཕུང་ཁམས་སྐྱེ་མཆེད་སེམས་ཀྱི་ཁམས། །ཚོགས་དྲུག་བདེ་དང་སྡུག་བསྔལ་ཐམས་ཅད་ཀུན། །རྣམ་དག་སྲིད་ཞིའི་དཔལ་དུ་སྤྲུལ་ནས་ཀྱང་། །བླ་མ་རྒྱལ་བ་སྲས་བཅས་ཚོགས་རྣམས་ལ། །མོས་བློས་ཚོགས་ཆེན་རྫོགས་པའི་མཎྜལ་འབུལ། །བཞེས་ནས་ཐུགས་རྗེས་བྱིན་

གྱིས་བརླབ་ཏུ་གསོལ། །སརྦ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ན་ས་མ་ཡེ་ཨཱཿཧཱུྃ། ཞེས་མཎྜལ་འབུལ་ཞིང་། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་བདུག་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པར་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །ཨོཾ་བཛྲ་ཨརྒྷཾ་སོགས་ནས་ཤབྡའི་བར་གྱིས་མཆོད་ཅིང་རོལ་མོ་བྱ། སྤྲོ་ན། རིན་ཆེན་སེམས་བཟུང་ཡང་སྦྱར། སྡིག་བཤགས་སོགས་ཡན་ལག་ལྷག་མ་ནི། འདོད་ཆགས་ཞེ་སྡང་

གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །

རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །དེ་ནས། དཀོན་མཆོག་གསུམ་གྱི་བྱིན་རླབས་དང་། །འཕགས་པ་ཀུན་གྱི་ཐུགས་རྗེ་དང་། །ཆོས་ཉིད་དག་པའི་མཐུ་དང་ནི། །བསམ་པ་སྦྱོར་བ་དག་པ་ཡིས། །ཁམས་གསུམ་རྒྱུད་ལྔ་གནས་བཞི་ན། །གཟུགས་ཅན་གཟུགས་ཅན་མ་ཡིན་དང་། །འདུ་ཤེས་མེད་དང་ཡོད་མིན་དང་། །སེམས་ཅན་རིགས་རྣམས་ཇི་སྙེད་པ། །སོ་སོའི་སྐྱེ་བོ་རྟོགས་པའི་ས། །སྡུག་བསྔལ་ཐམས་ཅད་མྱུར་སྤང་སྟེ། །འཕགས་ལམ་བདེ་བ་མྱ་ངན་འདས། །ངེས་པར་ལེགས་པར་རྟོགས་གྱུར་ཅིག །འཕགས་ལམ་བརྙེས་པ་ཐམས་ཅད་ཀྱིས། །གོང་མའི་ཡོན་ཏན་མཆོག་ཐོབ་ཅིང་། །བླ་མེད་རྫོགས་པའི་བྱང་ཆུབ་ཀྱི། །བདེ་བ་མཆོག་ལ་གཞོལ་གྱུར་ཅིག །ཅེས་འདོད་དོན་

གསོལ། གཉིས་པ་ཁྱད་པར་རྗེ་བཙུན་མ་འཁོར་དང་བཅས་པར་ལན་གསུམ་དུ་མཆོད་ཅིང་བསྟོད་པའི་དང་པོ་ནི། མདུན་རྟེན། ཨོཾ་བཛྲ་ཨ་མྲྀ་ཏ་སོགས་ཀྱིས་བསང་། ཨོཾ་སྭ་བྷཱ་ཝ་སོགས་ཀྱིས་སྦྱང་། སྣང་ཡུལ་ཆོས་རྣམས་སྟོང་པར་གྱུར༔ སྟོང་ལས་པད་དཀར་ཟླ་བ་ནི༔ རབ་ཏུ་རྒྱས་པ་ལྔ་ཚོམ་གྱི༔ དབུས་དང་ཕྱོགས་བཞི་འདབ་མར་བཅས༔ སོ་སོའི་ལྟེ་བར་ཏཱྃ་ཡིག་ལས༔ འོད་ཀྱི་འཕྲོ་འདུས་དོན་གཉིས་བྱས༔ ཚུར་འདུས་ཐིམ་ཞིང་ཡོངས་གྱུར་ལས༔ དབུས་སུ་རྗེ་བཙུན་སྒྲོལ་མ་ནི༔ མཐོན་ཀའི་མདངས་འཚེར་ཞི་འཛུམ་སྒེག༔ མཆོག་སྟེར་སྐྱབས་སྦྱིན་ཕྱག་རྒྱ་ཡིས༔ གསེར་སྔོ་ཆུ་སྐྱེས་པདྨ་བསྣམས༔ ལྷ་མོའི་ཆ་བྱད་ཟུར་ཕུད་གཡོ༔ གཡས་བརྐྱང་སྟབས་ཀྱིས་གདན་ལ་རོལ༔ དྲི་མེད་ཟླ་བའི་རྒྱབ་ཡོལ་མངའ༔ ཤར་དུ་ཞི་མཛད་སྒྲོལ་མ་དཀར༔ ཕྱག་གཉིས་མཆོག་སྦྱིན་ཁྲུས་ཀྱི་བུམ༔ པདྨ་སྨན་གྱི་རྒྱལ་པོས་མཚན༔ ཆ་ལུགས་རྒྱན་རྣམས་

གཙོ་མོར་མཚུངས༔ ལྷོ་རུ་ཡིད་བཞིན་འཁོར་ལོ་ནི༔ དཀར་སེར་ཞི་འཛུམ་ཕྱག་གཉིས་ཀྱིས༔ མཆོག་དང་སྐྱབས་སྦྱིན་ཕྱག་རྒྱ་མཛད༔ ཟུར་ཕུད་གཡོ་ཞིང་དར་ལི་དང་༔ རིན་ཆེན་ཚོགས་རྣམས་སྐུ་ལ་བརྒྱན༔ ཡེ་ཤེས་སྤྱན་བདུན་མངོན་པར་བཀྲ༔ སྐྱིལ་མོ་ཀྲུང་གིས་པད་ཟླར་བཞུགས༔ དྲི་མེད་ཟླ་བཞིན་རྒྱབ་ཡོལ་མཛེས༔ ནུབ་ཏུ་མྱུར་མ་རིག་བྱེད་མ༔ དམར་གསལ་ཆགས་པའི་འཛུམ་བག་སྒེག༔ ཕྱག་གཉིས་པདྨའི་མདའ་གཞུ་བཀང་༔ དར་དང་ཨུཏྤལ་པདྨས་བརྒྱན༔ ཞབས་གཉིས་པདྨའི་རོལ་སྟབས་བཞུགས༔ དཔག་བསམ་ཤིང་ལ་སྐུ་རྒྱབ་བརྟེན༔ བྱང་དུ་ཇོ་མོ་ཁྲོ་གཉེར་ཅན༔ ལྗང་གསལ་ཞི་མ་ཁྲོས་པའི་ཉམས༔ ཕྱག་གཉིས་ལྕགས་ཀྱུ་ཞགས་པ་བསྣམས༔ དར་དང་རིན་ཆེན་སྣ་ཚོགས་བརྒྱན༔ འཇིག་རྟེན་བདུན་པོ་སྐྱོང་བའི་ཚོགས༔ གཡས་བསྐུམ་གཡོན་བརྐྱང་ཞབས་

ཀྱིས་མནན༔ ཕྱི་རོལ་འདབ་མ་བཅུ་དྲུག་ལ༔ བར་ཆད་སེལ་དང་འཇིགས་པ་སྐྱོབ༔ འབྲུ་ནོར་སྤེལ་དང་དོན་ཉམས་སེལ༔ འཇིགས་བརྒྱད་སྐྱོབས་པའི་སྒྲོལ་མ་རྣམས༔ འོད་དང་འོད་ཟེར་འབར་བའི་ཀློང་༔ རྒྱན་དང་ཆ་ལུགས་རྫོགས་པར་གསལ༔ ཀུན་གྱི་གནས་གསུམ་འབྲུ་གསུམ་མཚན༔ རང་རང་ཐུགས་དབུས་པད་ཟླའི་སྟེང་༔ ཏཱྃ་ཡིག་རིགས་ཀྱི་ཁ་དོག་ལས༔ འོད་འཕྲོས་མི་འཇེད་སྟོང་གི་གནས༔ པོ་ཊ་ལ་ཡི་གནས་རྣམས་ནས༔ འཕགས་མ་འཁོར་བཅས་སྤྱན་དྲངས་གྱུར༔ སྤོས་རོལ་དབྱངས་དང་བཅས། ཏཱྃཿ པོ་ཊ་ལ་ཡི་གནས་མཆོག་ནས༔ ཏཱྃ་ཡིག་ལྗང་ཁུ་ལས་འཁྲུངས་ཤིང་༔ ཏཱྃ་ཡིག་འོད་ཀྱིས་འགྲོ་བ་སྒྲོལ༔ སྒྲོལ་མ་འཁོར་བཅས་གཤེགས་སུ་གསོལ༔ ཨོཾ་ཨརྱ་ཏཱ་རེ་ས་པཱ་རི་ཝ་ར་ཨེ་ཧྱ་ཧི། བཛྲ་ས་མཱ་ཛཿ དམ་ཚིག་པ་དང་ཡེ་ཤེས་གཉིས་སུ་མེད་པར་གྱུར། པདྨ་ཀཱ་མ་ལ་ཡ་སྟྭཾ། ཞེས་གདན་

འབུལ། དེ་ནས་བདུན་རྣམ་དག་འབུལ་བའི་ཐོག་མར་གུས་ཕྱག་དང་བཅས། ཨོཾ་ན་མོ་མཉྫུ་ཤྲཱི་ཡེ། སོགས་ལན་གསུམ་དང་། ལྷ་དང་ལྷ་མིན་ཅོད་པན་སོགས་ལན་གཉིས་དང་། རྗེ་བཙུན་འཕགས་མ་སྒྲོལ་མ་དང་། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་བཅས་ཐམས་ཅད་ལ། །ཀུན་ནས་དང་བས་ཕྱག་འཚལ་ལོ། །དེ་ནས་མཎྜལ་རྒྱས་པར་གོང་གི་ཨོཾ། བསོད་ནམས་ཞིང་གྱུར་སོགས་དང་། བསྡུ་ན། ཨོཾ༔ བཅོམ་ལྡན་འཕགས་མ་སྒྲོལ་མའི་ལྷ་ཚོགས་ལ༔ དངོས་འབྱོར་ལུས་དང་ལོངས་སྤྱོད་འབྱོར་རྒུའི་ཚོགས༔ བློས་བླངས་འཁོར་ཡུག་རི་གླིང་སྟོང་གསུམ་གྱི༔ སྣོད་བཅུད་བཀོད་པ་ཡིད་སྤྲུལ་མཆོད་པའི་ལྷ༔ བཀྲ་ཤིས་རྫས་རྟགས་རྒྱལ་སྲིད་རིན་ཆེན་རིགས༔ ལྷ་མིའི་ལོངས་སྤྱོད་གཞན་འཕྲུལ་དཔལ་ལྟར་འཕྲོ༔ ཚོགས་ཆེན་མཎྜལ་བཟང་པོ་གུས་པས་འབུལ༔ ཚེ་དང་བསོད་ནམས་ཡེ་ཤེས་དངོས་གྲུབ་

སྩོལ༔ སརྦ་མཎྜལ་པཱུ་ཛ་པྲ་ཏཱིཙྪ་ཧོཿ ཞེས་མཆོད་པ་འབུལ་བར། ཨོཾ། བཅོམ་ལྡན་འཕགས་མ་སྒྲོལ་མའི་ལྷ་ཚོགས་ལ། །བརྒྱད་ལྡན་ཡོན་ཆབ་བཟང་པོ་སྐོམ་གྱི་གསོས། །ཆུ་དང་འདག་ཆལ་ཁྲུས་ཆབ་ཞབས་བསིལ་རྒྱུན། །མཛེས་ལེགས་ཁ་དོག་བཀྲ་བའི་མེ་ཏོག་རིགས། །རང་བྱུང་ངད་ལྡན་སྦྱར་བའི་དྲི་མཆོག་འཐུལ། །འོད་འབར་སྣང་གསལ་ཉི་ཟླའི་མདངས་ལྟར་འཚེར། །བྱུག་པ་དྲི་ཡི་རེག་བྱ་འཇམ་ལ་བདེ། །ཁ་དོག་དྲི་རོ་ནུས་བཅུད་སྟོང་ལྡན་བཤོས། །སྣ་ཚོགས་གླུ་དབྱངས་སྙན་པའི་རོལ་མོ་འཁྲོལ། །ཞིང་རྡུལ་གྲངས་ཀྱི་མཆོད་བྱེད་ལྷ་མོར་བཅས། །འབུལ་ལོ་ཚེ་དབང་མཆོག་གི་དངོས་གྲུབ་སྩོལ། །ཨོཾ་ཨརྱ་ཏཱ་རེ་ས་པཱ་རི་ཝ་ར་ཨརྒྷཾ་སོགས་ཤབྟ་པྲ་ཏཱིཙྪ་སྭཱ་ཧཱ། བསྡུ་ན། མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་

ཚོགས་ཀྱིས་བཞེས་སུ་གསོལ། །ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་ནས་ཤབྟ་བར་གྱིས་མཆོད། ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །ཉན་ཐོས་རང་རྒྱལ་བྱང་ཆུབ་སེམས། །སོ་སོའི་སྐྱེ་བོ་ལ་སོགས་པས། །དུས་གསུམ་དགེ་བ་ཅི་བསགས་པའི། །བསོད་ནམས་ལ་ནི་བདག་ཡི་རང་། །སེམས་ཅན་རྣམས་ཀྱི་བསམ་པ་དང་། །བློ་ཡི་བྱེ་བྲག་ཇི་ལྟ་བར། །ཆེ་ཆུང་ཐུན་མོང་ཐེག་པ་ཡི། །ཆོས་ཀྱི་འཁོར་ལོ་བསྐོར་དུ་གསོལ། །འཁོར་བ་ཇི་སྲིད་མ་སྟོང་བར། །མྱ་ངན་མི་འདའ་ཐུགས་རྗེ་ཡིས། །སྡུག་བསྔལ་རྒྱ་ཚོར་བྱིངས་པ་ཡི། །སེམས་ཅན་རྣམས་ལ་གཟིགས་སུ་གསོལ། །བདག་གིས་བསོད་ནམས་ཅི་བསགས་པ། །ཐམས་ཅད་བྱང་ཆུབ་རྒྱུར་གྱུར་ཏེ། །རིང་པོར་མི་ཐོགས་འགྲོ་

བ་ཡི། །འདྲེན་པའི་དཔལ་དུ་བདག་གྱུར་ཅིག །ཅེས་པས་ཡན་ལག་ལྷག་མ་རྣམས་ཕུལ་ནས། བདག་གིས་ཚེ་རབས་ཀུན་ཏུ་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱི་ཕྲིན་ལས་མ། །སྔོ་ལྗང་ཞལ་གཅིག་ཕྱག་གཉིས་མྱུར་ཞིང་དཔའ། །ཡུམ་གྱུར་ཨུཏྤལ་བསྣམས་ལ་ཕྱག་འཚལ་བསྟོད། །སྟོན་ཟླ་ཉ་གང་རྒྱས་པའི་ཞལ༔ མདངས་ལྡན་སྐར་མ་སྟོང་འཚོགས་པའི༔ རབ་ཏུ་བྱེ་བའི་འོད་འཕྲོ་མ༔ ཡིད་བཞིན་འཁོར་ལོར་རབ་ཏུ་བསྟོད༔ སྙིང་རྗེ་ཆེན་པོའི་ལང་ཚོར་ལྡན༔ མཛེས་སྒེག་མཐོ་རིས་ཡིད་འཕྲོག་ཅིང་༔ བྱམས་པས་ངན་འགྲོར་བུ་བཞིན་བརྩེ༔ འཕགས་མ་ལྷ་མོ་རྣམས་ལ་བསྟོད༔ ཅེས་པས་བསྟོད། དེ་ནས་སྒྲུབ་པར་བསྙེན་ཅིང་བསྟོད་ཕྱག་འབུལ་བ་གཉིས་ཀྱི་དང་པོར། ཐུགས་དབུས་ཟླ་བར་ཏཱྃ་ཡིག་ལ༔ རང་མདོག་སྔགས་ཕྲེང་གཡོན་དུ་བཀོད༔ བཟླས་པས་འོད་ཟེར་ཕྱོགས་བཅུར་འཕྲོས༔ རྒྱལ་བ་ཀུན་མཆོད་

བྱིན་རླབས་བསྡུས༔ མཆོག་ཐུན་དངོས་གྲུབ་ཡིད་བཞིན་འགྲུབ༔ ནད་གདོན་སྡིག་སྒྲིབ་བར་ཆད་ཞི༔ འཇིགས་པ་ཀུན་ལས་སྐྱོབས་པ་དང་༔ དབུལ་བའི་སྒྲིབ་བསལ་འབྲུ་ནོར་སྨན༔ ལོངས་སྤྱོད་ཚེ་བསོད་དཔལ་འབྱོར་རྒྱས༔ རིགས་ཀྱིས་ཕོངས་དང་དོན་ཉམས་བསལ༔ མོས་བཞི་གང་འདོད་དབང་དུ་བསྡུས༔ དྲེགས་ཀུན་ཟིལ་གནོན་དགྲ་དང་བགེགས༔ རྡུལ་དུ་བརླག་ཅིང་བསྲུང་བར་བསྒོམ༔ རྩ་བསྙེན། ཨོཾ་ཏཱ་རེ་ཏུཏྟཱ་རེ་ཧཱུྃ་སྭཱ་ཧཱ༔ ཡང་དྲིལ་ཟབ་གནད། ཨོཾ་ཏཱ་རེ་ཏཱྃ་སྭཱ་ཧཱ༔ བརྒྱ་རྩ་གཉིས་བཞི་བཟླས། གཞན་ཡང་སྲིད་ཀྱི་དངོས་གྲུབ་འབྱུང་བར་འདོད་ན། ཨོཾ་ཏཱ་རེ་ཏུཏྟཱ་རེ་པུ་ཏྲ་སིདྡྷི་ཧཱུྃ་སྭཱ་ཧཱ༔ འཇིགས་པའི་ཚོགས་ཐམས་ཅད་ཞི་བ་དང་བསྲུང་བར། ཨོཾ་ཏཱ་རེ་ཏུཏྟཱ་རེ་ཏུ་རེ་ཕཊ་སྭཱ་ཧཱ༔ ནད་དང་དབུལ་ཕོངས་ཀྱི་འཇིགས་པ་བསལ་བའི་ཕྱིར། ཨོཾ་ཏཱ་རེ་ཏཱ་རེ་ཕཊ་སྭཱ་ཧཱ༔ ཨོཾ་ཏཱ་རེ་ཏུཏྟཱ་རེ་ཧ་ར་ཧ་ར་སྭཱ་ཧཱ༔ མི་མཐུན་གནོད་པ་ལས་སྲུང་ཞིང་མོས་བཞི་དབང་དུ་བསྡུ་བའི་

ཕྱིར། ཨོཾ་ཏཱ་རེ་ཏུཏྟཱ་རེ་ཧཱུྃ་ཧཱུྃ་ཧཱུྃ་སྭཱ་ཧཱ༔ དགྲ་བགེགས་འབྱུང་པོ་འདུལ་ཞིང་དབང་དུ་བྱ་བ་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་བྷྱ་ཡ་ཧཱུྃ་ཧཱུྃ་ཕཊ༔ ཅེས་ལས་དམིགས་བསལ་གྱི་སྐབས་སུ། རྩ་བསྙེན་གྱི་ཕྱེད་ཆ་ལས་སྔགས་སྐབས་སུ་གང་བབ་བཏགས་ཏེ་གོང་གི་རྣམ་གྲངས་བཟླས་མཐར་ཐལ་མོ་སྦྱར་ཏེ། བཅོམ་ལྡན་འཕགས་མའི་ཚོགས་རྣམས་ལ༔ རྩེ་གཅིག་གདུང་བས་གསོལ་བ་འདེབས༔ སྙིང་རྗེའི་ཐུགས་དམ་དུས་མ་གཡེལ༔ མྱུར་དུ་བྱམས་པའི་ཕྱག་སྐྱོང་ལ༔ འཁྲུལ་སྣང་བདག་གཞན་ལུས་དང་སེམས༔ འཇིགས་ཆེན་འདི་ལས་བསྐྱབ་པ་དང་༔ སྡུག་བསྔལ་ཉོན་མོངས་འདི་ཉིད་ལས༔ མྱུར་དུ་གྲོལ་བར་མཛད་དུ་གསོལ༔ ཞེས་འདོད་དོན་གསོལ། གཉིས་པ་བསྟོད་ཕྱག་འབུལ་བར། རང་ཉིད་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོ་སྤྲུལ་སྐུའི་ཆ་བྱད་ཅན་བྱང་ཆུབ་མཆོག་གི་ཕྱག་རྒྱ་མཛད་པར་གསལ་བའི་ལྗགས་པདྨའི་འདབ་མ་གསུང་དབྱངས་ཀྱི་ཡན་ལག་

རྒྱ་མཚོའི་སྒྲ་ཡིས་འཕགས་མ་མྱུར་མ་དཔའ་མོའི་ཡོན་ཏན་རྣམས་རྗེས་སུ་དྲན་པའི་སྒོ་ནས་བསྟོད་པར་གྱུར་སྙམ་སྟེ། རྒྱས་པར་ཕྱག་འཚལ་ཉེར་གཅིག་གཉིས་སམ་བཞི་བརྗོད། བསྡུ་ན། ཨོཾ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་མྱུར་མ་དཔལ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་བྱ་བ་ལས་ནི་བྱུང་མ། །ཕྱག་འཚལ་ས་གཞི་སྐྱོང་བའི་ཚོགས་རྣམས། །ཐམས་ཅད་འགུག་པར་ནུས་པ་ཉིད་མ། །ཁྲོ་གཉེར་གཡོ་བའི་ཡི་གེ་ཧཱུྃ་གིས། །ཕོངས་པ་ཀུན་ལས་རྣམ་པར་སྒྲོལ་མ། །ཞེས་གོང་གི་རྣམ་གྲངས་ཀྱིས་བསྟོད་ཅིང་། ཐལ་མོ་མེ་ཏོག་དང་བཅས་འདོད་དོན་སྤྱིར་གསོལ་བ་ནི། སྙིང་རྗེའི་བདག་ཉིད་འཕགས་མཆོག་སྤྱན་རས་གཟིགས། །འགྲོ་ལ་བྱམས་པའི་མཐུ་ཡིས་ཐུགས་ལས་འཁྲུངས། །དྲན་པ་ཙམ་གྱིས་ཡིད་ཀྱི་གདུང་སེལ་བ། །ལྷ་མོ་

ཡེ་ཤེས་ཟླ་བ་ཁྱོད་ལ་འདུད། །ཁྱེད་ཀྱི་ཐུགས་བསྐྱེད་ནམ་མཁའི་ཕ་མཐར་སོན། །འགྲོ་བའི་རེ་སྐོང་འདོད་དགུ་སྦྱིན་མཛད་མ། །འཕགས་མ་སྒྲོལ་མ་མྱུར་མ་དཔའ་མོ་སྟེ། །སྔོན་གྱི་སྨོན་ལམ་དུས་འདིར་འགྲུབ་པར་མཛོད། །རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །བདག་དང་མཐའ་ཡས་སེམས་ཅན་ཐམས་ཅད་ཀྱི། །སྒྲིབ་གཉིས་བྱང་ཞིང་ཚོགས་གཉིས་མྱུར་རྫོགས་ནས། །རྫོགས་པའི་སངས་རྒྱས་ཐོབ་པར་མཛད་དུ་གསོལ། །དེ་མ་ཐོབ་ཀྱི་ཚེ་རབས་ཀུན་ཏུ་ཡང་། །ལྷ་དང་མི་ཡི་བདེ་བའི་མཆོག་ཐོབ་ནས། །ཐམས་ཅད་མཁྱེན་པ་སྒྲུབ་པར་བྱེད་པ་ལ། །བར་ཆད་གདོན་བགེགས་རིམས་དང་ནད་ལ་སོགས། །དུས་མིན་འཆི་བར་གྱུར་པ་སྣ་ཚོགས་དང་། །རྨི་ལམ་ངན་དང་མཚན་མ་ངན་པ་དང་། །འཇིགས་པ་བརྒྱད་སོགས་ཉེ་བར་འཚེ་བ་རྣམས། །མྱུར་དུ་ཞི་ཞིང་མེད་པར་མཛད་དུ་

གསོལ། །འཇིག་རྟེན་འཇིག་རྟེན་ལས་ནི་འདས་པ་ཡི། །བཀྲ་ཤིས་བདེ་ལེགས་ཕུན་སུམ་ཚོགས་པ་རྣམས། །འཕེལ་ཞིང་རྒྱས་པའི་དོན་ཀུན་མ་ལུས་པ། །འབད་མེད་ལྷུན་གྱིས་གྲུབ་པར་མཛད་དུ་གསོལ། །སྒྲུབ་ལ་བརྩོན་ཞིང་དམ་ཆོས་འཕེལ་བ་དང་། །རྟག་ཏུ་ཁྱེད་སྒྲུབ་ཞལ་མཆོག་མཐོང་བ་དང་། །སྟོང་ཉིད་དོན་རྟོགས་བྱང་སེམས་རིན་པོ་ཆེ། །ཡར་ངོའི་ཟླ་ལྟར་འཕེལ་ཞིང་རྒྱས་པར་མཛོད། །ཁྱད་པར་སྲིད་འཕེལ་བར་འདོད་ན། སྙིགས་མའི་འགྲོ་ལ་ཕན་བཞེད་རྒྱལ་བའི་སྲས། །རིག་འཛིན་འཕགས་པའི་གདུང་རྒྱུད་གསེར་གྱི་ཕྲེང་། །མི་ཉམས་འཕྱུག་མེད་བློ་གྲོས་མཁྱེན་རྩལ་ལྡན། །མཚན་དཔེའི་ལུས་རྫོགས་སྐུ་ཚེ་མཛད་ཕྲིན་ཅན། །ཚར་དུ་དངར་བས་འགྲོ་བའི་དོན་མཛད་ཕྱིར། །མཆོག་དང་སྐྱེ་བ་སྤྲུལ་སྐུ་འཕེལ་མཛད་གསོལ། །རྒྱལ་རིགས་ལྷུན་པོ་རྗེ་རིགས་སཱ་ལའི་ལྗོན། །

བསོད་ནམས་སྤེལ་མཛད་འབྱོར་ལྡན་ཁྱིམ་བདག་བཅས། །བསྟན་པའི་སྲི་ཞུ་འགྲོ་ལ་ཕན་བགྱིད་སླད། །རིགས་རུས་མི་འཆོལ་ཡ་རབས་ལྷ་ཡི་སྲས། །སྟོབས་རྩལ་ལངས་ཚོ་ལོངས་སྤྱོད་དཔལ་གྱིས་ཕྱུག །རྣམ་དཀར་སེམས་ལྡན་སྐྱེད་ཆེ་གཏོང་ཕོད་དང་། །སྙིང་སྟོབས་ལྡན་པའི་ཁྱེའུ་སྤེལ་བར་མཛོད། །འབངས་རིགས་ཕལ་པའི་མི་ཁྱིམ་ཐམས་ཅད་ཀུན། །དམངས་པོར་མི་འགྱུར་འཕེན་པོ་བུ་ཡིས་ཕྱུག །ཡ་རབས་རིགས་ཀྱི་བརྒྱུད་པ་འཕེལ་མཛད་གསོལ། །རྐང་བཞི་འཕེལ་བར་འདོད་ན། རྐང་གཉིས་འགྲོ་བའི་གསོས་གྱུར་གཡུང་དྭགས་རིགས། །ཞོན་པ་རྟ་དྲིལ་བཀོལ་སྤྱོད་མཛོ་ཁལ་གླང་། །རྐང་ཕྲན་ར་ལུག་བ་དང་བོང་བུའི་ཚོགས། །འཕེལ་སྐྱེད་རིགས་ཀྱི་ཚོགས་རྣམས་འབྲུ་མཆོག་ལྟར། །ཟད་པ་མེད་པར་གྲངས་མེད་སྤེལ་བ་དང་། །དེ་དག་སྐྱེད་ཆེ་ལུས་སྟོབས་མདངས་དང་ལྡན། །ས་སྟེང་ཡོངས་

སུ་ཁེངས་པར་མཛད་དུ་གསོལ། །ཟས་ནོར་འཕེལ་བར་འདོད་ན། གནས་སྐབས་རིན་ཆེན་ཟས་ནོར་དར་ཟབ་དང་། །འབྲུ་རིགས་དཀོར་ནོར་ཆ་སྤྱད་རྐང་བཞི་ཕྱུགས། །ལྷ་ཀླུ་མི་ཡི་དཔལ་འབྱོར་མ་རྨོས་འབྲུ། །དཔག་བསམ་ཤིང་ལྟར་གང་འདོད་འཕྲུལ་དགའི་དཔལ། །རབ་ཏུ་འཕེལ་ཞིང་རྒྱས་པར་མཛད་དུ་གསོལ། །སྐྱེ་འགྲོ་ཀུན་ཀྱང་ཕ་མ་རང་རང་ལ། །གནོད་པར་བྱེད་པའི་རིགས་རྒྱུད་མི་འབྱུང་བར། །ཕན་བྱེད་དགེ་བའི་རྒྱུད་རྣམས་རབ་འཕེལ་ཞིང་། །ཐེག་ཆེན་ཆོས་ཀྱི་སྣོད་དུ་འགྱུར་བར་མཛོད། །རྣམ་དག་བསམ་པ་དགེ་བའི་སྨོན་ལམ་འདི། །དུས་འདིར་འགྲུབ་པར་མཛོད་ཅིག་འཕགས་མ་ཡུམ། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་

ཐོབ་ཤོག །བདག་གིས་ཚེ་རབས་ཀུན་ཏུ་བསྒྲུབས་པའི་ལྷ། །དུས་གསུམ་སངས་རྒྱས་ཀུན་གྱིས་ཕྲིན་ལས་མ། །སྔོ་ལྗང་ཞལ་གཅིག་ཕྱག་གཉིས་མྱུར་ཞིང་དཔའ། །ཡུམ་གྱུར་ཨུཏྤལ་བསྣམས་མའི་བཀྲ་ཤིས་ཤོག །རྒྱལ་ཡུམ་སྒྲོལ་མ་ཁྱེད་སྐུ་ཅི་འདྲ་སོགས་ནས་བཀྲ་ཤིས་འཕེལ་བར་མཛད་དུ་གསོལ། །ཚར་གཉིས་པར་མཆོད་ཁ་གསོས་ཤིང་མཆོད་པའི་སྤྲིན་གཟུངས་ཀྱིས་བྱིན་བརླབ། ཏཱྃཿ པོ་ཊ་ལ་ཡི་གནས་མཆོག་སོགས་ཡེ་ཤེས་པ་སྤྱན་དྲངས་པ་ནས་དབུ་བརྩམ་སྔ་མ་ཇི་ལྟ་བ་ལས། ཕྱག་འཚལ་སྐབས་སུ། ལྷ་དང་ལྷ་མིན་སོགས་ལན་གསུམ་དང་། བསྙེན་པའི་སྐབས་སུ་རྩ་སྔགས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཨོཾ་ཏཱ་རེ་ཏཱྃ་སྭཱ་ཧཱ༔ བརྒྱ་རྩ་གསུམ་མམ་དགུ་ཟླ། ལོངས་སྤྱོད་འཕེལ་བར་འདོད་ན། ཨོཾ་ཏཱ་རེ་ཏུཏྟཱ་རེ་ཏུ་རེ་ཛམྦྷེ་མོ་ཧེ་དྷ་ནཱྃ་མེ་དྷི་ཧྲཱིཿསྭཱ་ཧཱ༔ ནོར་འཕེལ་བར་འདོད་ན། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་བཱ་སུ་སིདྡྷི་ཧཱུྃ་སྭཱ་ཧཱ། རྩ་སྔགས་ཀྱི་ཆ་ཕྱེད་ལས་སྔགས་བཏགས་ཏེ་བཟླ། བསྟོད་ཕྱག་སྐབས་སུ་རྒྱས་པར་ཕྱག་འཚལ་ཉེར་

གཅིག་གམ། བསྡུ་ན། ཨོཾ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་མྱུར༴ སྤྱན་ནི༴ འཇིག་རྟེན༴ གེ་སར༴ ཕྱག་འཚལ་སྟོན་ཀའི༴ གང་བ་བརྒྱ་ནི༴ སྐར་མ་སྟོང༴ རབ་ཏུ་ཕྱེ་བའི༴ ལན་གསུམ་མམ་དགུ་བརྗོད་ཅིང་སྔར་བཞིན་འདོད་དོན་གསོལ། ཚར་གསུམ་པར་མཆོད་ཁ་སླར་ཡང་གསོས་ཤིང་མཆོད་པའི་སྤྲིན་གཟུངས་ཀྱིས་མཆོད་བྱིན་བརླབས་ཏེ་ཡེ་ཤེས་པ་སྤྱན་དྲངས་སྟེ་སྔ་མ་ཇི་ལྟ་བ་ལས། ཕྱག་འཚལ་སྐབས་སུ་ལྷ་དང་ལྷ་མིན་སོགས་ལན་བདུན་དང་། བསྙེན་པའི་སྐབས་སུ་གོང་གི་རྩ་སྔགས་བདུན་བརྒྱའམ། བརྒྱ་ཕྲག་ཞེ་དགུ་བཟླ། ཚེ་རིང་བར་འདོད་ན། ཨོཾ་ཏཱ་རེ་ཏུཏྟཱ་རེ་ཏུ་རེ་བདག་དོན་ཡིན་ན་མ་མ་དང་། གཞན་དོན་ཡིན་ན་དཱ་ན་པ་ཏི་ཨཱཿཡུ་པུཎྱེ་ཛྙཱ་ན་པུཥྚིཾ་ཀུ་རུ་སྭཱ་ཧཱ། ཞེས་རྩ་སྔགས་ཀྱི་ཕྱེད་ཆར་ཚེ་ཤམ་བཏགས་ཏེ་བཟླ། གཞན་ཡང་སྤྲོ་ན་སྒྲོལ་མ་ལས་ཐམས་ཅད་པའི་གཟུངས། ན་མོ་རཏྣ་ཏྲ་ཡཱ་ཡ། ན་མཿཨརྱ་ཨ་བ་ལོ་ཀི་ཏེ་ཤྭ་ར་ཡ། བོ་དྷི་ས་ཏྭ་ཡ། མ་ཧཱ་ས་ཏྭ་ཡ། མ་ཧཱ་ཀཱ་རུ་ཎི་ཀ་ཡ། ཏདྱ་

ཐཱ། ཨོཾ་ཏཱ་རེ་ཏུཏྟཱ་རེ་ཏུ་རེ་སརྦ་དུཥྚཾ་པྲ་དུཥྚཾ་མ་མ་ཀྲྀ་ཏེ་ཛཾ་བྷ་ཡ་སྟཾ་བྷ་ཡ་མོ་ཧ་ཡ་བྷནྡྷ་ཡ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སརྦ་དུཥྚཾ་སྟཾ་བྷ་ནི་ཏཱ་རེ་སྭཱ་ཧཱ། ཞེས་བདུན་ནམ་ཉེར་གཅིག་བཟླ། བསྟོད་ཕྱག་སྐབས་སུ་རྒྱས་ན་ཕྱག་འཚལ་ཉེར་གཅིག་གམ། བསྡུ་ན། ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི། །སོར་མོས་ཐུགས་ཀར་རྣམ་པར་བརྒྱན་མ། །མ་ལུས་ཕྱོགས་ཀྱི་འཁོར་ལོས་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུགས་མ། །ཕྱག་འཚལ་ཟླ་བའི་དུམ་བུས་དབུ་བརྒྱན། །བརྒྱན་པ་ཐམས་ཅད་ཤིན་ཏུ་འབར་མ། །རལ་པའི་ཁྲོད་ན་འོད་དཔག་མེད་ལས། །རྟག་པར་ཤིན་ཏུ་འོད་རབ་མཛད་མ། །ཕྱག་འཚལ་དེ་ཉིད་གསུམ་རྣམས་བཀོད་པས། །ཞི་བའི་མཐུ་དང་ཡང་དག་ལྡན་མ། །གདོན་དང་རོ་ལངས་གནོད་སྦྱིན་ཚོགས་རྣམས། །འཇོམས་པ་ཏུ་རེ་རབ་མཆོག་ཉིད་མ། །ཞེས་ལན་བདུན་ནམ་ཞེ་དགུ་བརྗོད་ཅིང་། ལྷ་མོ་ལ་གུས་

སོགས་ཕན་ཡོན་དང་བཅས་སྔར་བཞིན་འདོད་དོན་གསོལ་བར་བྱའོ། ། ༈ གསུམ་པ་ལས་བྱེ་བྲག་ཏུ་སྒྲུབ་པ་ལ། འཇིགས་བརྒྱད་ཞི་བར་འདོད་ན་བསྙེན་པའི་སྐབས་སུ། གཙོ་མོ་དང་ཞི་བའི་སྒྲོལ་མ་སོགས་ལྷ་མོ་རྣམས་ཀྱིས་ཕྱག་ཡོན་ཨུཏྤལ་གྱི་ལྟེ་བར་འཇིགས་ཚོགས་རང་རང་ཞི་བའི་ཕྱག་མཚན་གསལ་བའི་འོད་ཀྱིས་མི་མཐུན་པ་དེ་དག་ཞི་བར་བསམ་ཞིང་རིག་སྔགས་རྒྱལ་མོའི་བྱིན་རླབས་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་བྷྱ་ཡ་ཧུྃ་ཧཱུྃ་ཕཊ། བཟླས་གྲངས་འདི་ལ་བཟུང་ཞིང་བསྟོད་ཕྱག་སྐབས་སུ། ཨོཾ། རྗེ་བཙུན་མ༴ ཕྱག་འཚལ་སྒྲོལ་མ༴ སྤྱན་ནི་སྐད༴ འཇིག་རྟེན༴ གེ་སར་བྱེ་བ༴ ཕྱག་འཚལ་བརྒྱ་བྱིན༴ རླུང་ལྷ༴ འབྱུང་པོ༴ གནོད་སྦྱིན༴ ཕྱག་འཚལ་ཏྲཊ་ཅེས༴ ཕ་རོལ་འཁྲུལ་འཁོར༴ གཡས་བསྐུམ༴ མེ་འབར་འཁྲུགས༴ ཕྱག་འཚལ་ལྷ་ཡི༴ རི་དྭགས་རྟགས་ཅན༴ ཏཱ་ར་གཉིས༴ དུག་རྣམས༴ ཕྱག་འཚལ་དེ་ཉིད༴ ཞི་བའི༴ གདོན་དང༴ འཇོམས་པ་ཏུ་རེ་རབ་མཆོག་ཉིད་མ། །ཞེས་མཎྜལ་གཞུང་གི་རྗེ་བཙུན་མ་

མཆོད་ཅིང་བསྟོད་པའི་ཆོ་ག་ཚར་གསུམ་ཀར་དེ་ཉིད་ཁོ་ན་རྣམ་གྲངས་སྔ་མ་བཞིན་དུ་གཙོ་བོར་བཟུང་། དེ་བཞིན་རྨི་ལམ་ངན་པ་དང་རྩོད་པ་ཞི་བར་འདོད་ན། བསྙེན་པའི་སྐབས་སུ། འཕགས་མ་འཁོར་དང་བཅས་པའི་ཐུགས་སྲོག་སྔགས་ཕྲེང་དང་། ཕྱག་མཚན་ལས་འོད་ཟེར་འཕྲོས་ཏེ་རྩོད་ཅིང་འཐབ་པའི་གདུག་སེམས་དང་། རྨི་ལམ་ངན་པ་གཏོང་བའི་གདོན་དང་བྱད་ཕུར་ཐམས་ཅད་བསྲེག་གཏོར་སྦྱང་བར་བསམ་ཞིང་རིགས་སྔགས་ཀྱི་རྒྱལ་མོའི་བྱིན་བརླབས་ལ་མོས་གུས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་ཏྲཊ་ཕཊ་སྭཱ་ཧཱ། བཟླས་གྲངས་འདི་ལ་བཟུང་ཞིང་བསྟོད་ཕྱག་སྐབས་སུ། ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་མི་འམ༴ ཀུན་ནས༴ རྩོད་དང་རྨི་ལམ་ངན་པ་སེལ་མ། །འབྱིན་འཇུག་སྔ་མ་ལྟར་བྱ། དེ་བཞིན་ནད་རིམས་སེལ་བར་འདོད་ན་ཞི་བའི་སྒྲོལ་མ་གཙོ་བོར་གྱུར་པའི་ལྷ་མོ་རྣམས་ཀྱིས་ཕྱག་མཚན་ཨ་རུ་ར་དང་སྨན་གྱི་བུམ་པ་ལས་འཕྲོས་པའི་འོད་དང་། བདུད་རྩིའི་ཆུ་རྒྱུན་གྱིས་ནད་རིམས་ཐམས་ཅད་བསལ་བར་བསམ་ཞིང་རིག་སྔགས་ཀྱི་རྒྱལ་མོ་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་ཧ་ར་ཧ་ར་སྭཱ་ཧཱ། བཟླས་

གྲངས་འདི་ལ་བཟུང་ཞིང་། བསྟོད་ཕྱག་སྐབས་སུ། ཕྱག་འཚལ་ཉི་མ་ཟླ་བ་རྒྱས༴ སྤྱན་གཉིས༴ ཧཱ་ར་གཉིས་བརྗོད༴ ཤིན་ཏུ་དྲག་པོའི་རིམས་ནད་སེལ་མ། །ཚུལ་རྣམས་སྔ་མ་ལྟར་གྱིས་ཤེས་པར་བྱའོ། །ཕ་རོལ་གཟུགས་ཅན་གཟུགས་མེད་ཐམས་ཅད་ཆོས་བཞིན་དབང་དུ་བསྡུ་བར་འདོད་ན། སྒྲོལ་མ་དམར་མོ་གཙོ་བོར་གྱུར་པའི་ལྷ་མོ་རྣམས་ཀྱིས་ལྕགས་ཀྱུ་སོགས་ཕྱག་མཚན་ཐམས་ཅད་ལས་འོད་དམར་གློག་གི་ཞགས་པ་ལྟ་བུ་དཔག་ཏུ་མེད་པ་འཕྲོས་ཏེ་གང་ལ་བྱ་བའི་དམིགས་ཡུལ་དེ་དག་མོས་བཞིས་དབང་དུ་བསྡུ་བར་བསམ་ཞིང་རིགས་སྔགས་ཀྱི་རྒྱལ་མོ་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་ཧཱུྃ་ཧཱུྃ་ཧཱུྃ་སྭཱ་ཧཱ། བཟླས་གྲངས་འདི་ཉིད་ལ་བཟུང་ཞིང་བསྟོད་ཕྱག་སྐབས་སུ། ཕྱག་འཚལ་ཏུཏྟཱ་རེ་ཧཱུྃ་ཡི༴ འདོད་དང་ཕྱོགས༴ འཇིག་རྟེན་བདུན་པོ༴ ལུས་པ་མེད༴ ཕྱག་འཚལ་རབ་ཏུ་དགའ༴ དབུ་རྒྱན༴ བཞད་པ༴ བདུད་དང་འཇིག་རྟེན་དབང་དུ་མཛད་མ། །ཞེས་སྔ་མ་ལྟར་དང་། བདུད་དང་འབྱུང་པོ་འདུལ་བར་འདོད་ན། སྒྲོལ་མ་ཁྲོ་གཉེར་ཅན་གཙོ་བོར་གྱུར་པའི་

ལྷ་མོ་རྣམས་ཀྱི་ཕྱག་མཚན་གྱི་འོད་ཟེར་རྣོ་ངར་ཤུགས་དང་ལྡན་པ་འཕྲོས་ཤིང་། ཕྱག་ཞབས་ཀྱི་མཐིལ་བཞི་ས་ལ་བརྡབ་པ་ཙམ་གྱིས་དགྲ་བགེགས་འབྱུང་པོ་གདུག་པ་ཅན་ཐམས་ཅད་རྡུལ་དུ་བརླགས་པར་བསམ་སྟེ་རིག་སྔགས་ཀྱི་རྒྱལ་མོ་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་ཏུ་རེ་ཧཱུྃ་སྭཱ་ཧཱ། བཟླས་གྲངས་འདི་ཉིད་ལ་བཟུང་ཞིང་། བསྟོད་ཕྱག་སྐབས་སུ། ཕྱག་འཚལ་ཏུ་རེ་འཇིགས་པ༴ བདུད་ཀྱི་དཔའ་བོ༴ ཆུ་སྐྱེས་ཞལ༴ དགྲ་བོ་ཐམས་ཅད༴ ཕྱག་འཚལ་བསྐལ༴ འབར་བའི༴ གཡས་བརྐྱང༴ དགྲ་ཡི་དཔུང༴ ཕྱག་འཚལ་ས་བཞི༴ མཐིལ་གྱིས་བསྣུན༴ ཁྲོ་གཉེར་གཡོ༴ རིམ་པ་བདུན༴ ཕྱག་འཚལ་ཀུན་ནས༴ དགྲ་ཡི་ལུས༴ ཡི་གེ་བཅུ་པའི༴ རིག་པ་ཧཱུྃ་ལས་སྒྲོལ་མ་ཉིད་མ། །ཞེས་སྔ་མ་ཇི་ལྟ་བ་བཞིན་ཤེས་པར་བྱ། སྡིག་སྒྲིབ་ཞི་བར་འདོད་ན། ཞི་བའི་སྒྲོལ་མ་གཙོ་བོར་གྱུར་པའི་ལྷ་མོ་རྣམས་ཀྱི་སྐུ་དང་ཕྱག་གི་བུམ་པ་ལས་བདུད་རྩིའི་ཆུ་རྒྱུན་བྱུང་བས་བདག་གཞན་སེམས་ཅན་ཐམས་ཅད་སྡིག་སྒྲིབ་ཉེས་ལྟུང་མ་ལུས་པ་ལྷག་མ་མེད་པར་བཀྲུས་ཤིང་དག་པར་བསམ་

སྟེ་རིག་སྔགས་རྒྱལ་མོ་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་སརྦ་པཱ་པཾ་ཤནྟིཾ་ཀུ་རུ་སྭཱ་ཧཱ། བཟླས་གྲངས་འདི་ཉིད་ལ་བཟུང་ཞིང་། བསྟོད་ཕྱག་སྐབས་སུ། ཕྱག་འཚལ་བདེ་མ་དགེ་མ༴ མྱ་ངན་འདས་ཞི༴ སྭཱ་ཧཱ་ཨོཾ་དང༴ སྡིག་པ་ཆེན་པོ་འཇོམས་པར་ཉིད་མ། །ཞེས་པའི་བསྟོད་པ་གོང་བཞིན་དང་། མཆོག་ཏུ་བླ་ན་མེད་པ་ཡུམ་གྱི་གོ་འཕང་ཐོབ་པར་འདོད་ན། སེང་ལྡིང་ནགས་ཀྱི་སྒྲོལ་མ་གཙོ་བོར་གྱུར་པའི་ལྷ་མོ་རྣམས་ཀྱི་སྐུ་ཡི་གནས་ལྔ་དང་། ཕྱག་མཚན་ལས་འོད་ཟེར་ཁ་དོག་སྣ་ཚོགས་འཕྲོས་པས་བདག་གཞན་སེམས་ཅན་ཐམས་ཅད་ཀྱི་གནས་སྐབས་དང་མཐར་ཐུག་གི་ས་ལམ་བར་ཆད་ཐམས་ཅད་སྦྱང་། རྗེ་བཙུན་མའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་རྒྱུད་ལ་ཞུགས་ཏེ་འཕགས་མའི་ཡེ་ཤེས་ཡོན་ཏན་མཆོག་དང་སྐལ་པ་མཉམ་པར་བསམ་ཞིང་རིག་སྔགས་ཀྱི་རྒྱལ་མོ་ལ་དད་མོས་རྩེ་གཅིག་པས། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། བཟླས་གྲངས་འདི་ཉིད་ལ་བཟུང་ཞིང་བསྟོད་ཕྱག་སྐབས་སུ། ཨོཾ། རྗེ་བཙུན་མ་འཕགས་མ་སྒྲོལ་མ་ལ་ཕྱགའཚལ་ལོ། །ཕྱག་འཚལ་ཏཱ་རེ་མྱུར་མ་

དཔའ་མོ། །ཏུཏྟཱ་རེ་ཡིས་འཇིགས་པ་སེལ་མ། །ཏུ་རེས་དོན་ཀུན་སྦྱིན་པའི་སྒྲོལ་མ། །སྭཱ་ཧཱ་ཡི་གེ་ཁྱོད་ལ་འདུད་དོ། །ཕྱག་འཚལ་སྒྲོལ་མ་མྱུར་མ༴ སྤྱན་ནི༴ འཇིག་རྟེན༴ གེ་སར་བྱེ་བ༴ ཕྱག་འཚལ་སྟོན༴ གང་བ་བརྒྱ༴ སྐར་མ་སྟོང༴ རབ་ཏུ་ཕྱེ༴ ཕྱག་འཚལ་གསེར༴ པདྨས་ཕྱག༴ སྦྱིན་པ་བརྩོན༴ བཟོད་པ་བསམ༴ ཕྱག་འཚལ་དེ་བཞིན༴ མཐའ་ཡས༴ མ་ལུས་ཕ་རོལ༴ རྒྱལ་བའི་སྲས་ཀྱིས་ཤིན་ཏུ་བསྟེན་མ། །གཞན་ཡང་འདི་དག་གིས་མཚོན་ཏེ་སྔགས་དང་དམིགས་པའི་འཕྲོ་འདུ་བསྟོད་གསོལ་གྱི་ཁྱད་པར་ཙམ་གྱིས་གང་འདོད་པའི་ལས་ཐམས་ཅད་ཐོགས་མེད་དུ་སྒྲུབ་པར་ནུས་པས་བློ་གྲོས་དང་ལྡན་པ་རྣམས་ཀྱིས་རིག་པའི་མདའ་ཡིས་བསྣུན་པར་བྱའོ། ། ༈ གསུམ་པ་རྗེས་ཀྱི་བྱ་བར་གཏོར་འབུལ་དང་། རྗེས་ཆོག་དངོས་གཉིས་ཀྱི་དང་པོར་འདས་གཏོར་ནི། ཨོཾ་བཛྲ་ཨ་མྲྀ་ཏས་བསང་། ཨོཾ་སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཡི་གེ་འབྲུ་

གསུམ་འོད་དུ་ཞུ་བ་ལས་བྱུང་བའི་ལྷ་རྫས་ཀྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་དང་ཧ་ཧོ་ཧྲཱིཿཡིས་བྱིན་བརླབ། ཁ་དོག་དྲི་རོ་ནུས་པ་ཕུན་སུམ་ཚོགས་པ་དང་ལྡན་པར་གྱུར། སྐྱབས་གནས་དཀོན་མཆོག་རྒྱ་མཚོ་དང་། རྗེ་བཙུན་འཕགས་མ་རྣམས་ཀྱི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་གསོལ་བས་ཐུགས་ཀྱི་རྒྱུད་རབ་ཏུ་ཚིམ་ཞིང་དགྱེས་པར་གྱུར་སྙམ་སྟེ། ཨོཾ་སརྦ་བུདྡྷ་བོ་དྷི་ས་ཏྭ་ཨརྱ་ཏཱ་རེ་ས་པཱ་རི་ཝ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་ཕུལ། ཨོཾ་ཨརྱ་ཏཱ་རེ་ས་པཱ་རི་ཝ་ར་བཛྲ་ཨརྒྷཾ་སོགས་ནས་ཤབྟ་པྲ་ཏཱིཙྪ་སྭཱ་ཧཱ། ཞེས་ཉེར་སྤྱོད་ཀྱིས་མཆོད། ལྷ་དང་ལྷ་མིན་ཅོད་སོགས་ནས་ཡུམ་ལ་ཕྱག་འཚལ་བསྟོད། །བཅོམ་ལྡན་བདེ་གཤེགས་སྲས་དང་བཅས། །རྗེ་བཙུན་འཕགས་མ་འཁོར་བཅས་ཀྱིས། །མཆོད་སྦྱིན་གཏོར་མ་འདི་བཞེས་ལ། །

རྣལ་འབྱོར་བདག་སོགས་ནས་འདོད་པ་ཀུན་འགྲུབ་མཛོད། །ཅེས་ཕྲིན་ལས་བཅོལ། ཆོས་སྐྱོང་གི་གཏོར་མ་གོང་བཞིན་བྱིན་བརླབ། ཐུགས་ཀའི་འོད་ཀྱིས་ལྷ་གནས་འོག་མིན་དང་པོ་ཊ་ལ་སོགས་རང་རང་གི་གནས་རྣམས་ནས་གྲུབ་པའི་ལྷ་མོ་ཙརྩི་ཀ་སོགས་དམ་ཅན་སྲུང་མའི་ཚོགས་ཐམས་ཅད་སྤྱན་དྲངས་བཛྲ་ས་མ་ཛཿ ཞེས་སྤྱན་དྲངས། ཨོཾ་ཤྲཱི་དེ་ཝི་ཙརྩི་ཀ་སརྦ་དྷརྨཱ་པ་ལ་ཨི་དམ་བ་ལྟིཾ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། ཨོཾ་བཛྲ་ཨརྒྷཾ་སོགས་ཀྱིས་མཆོད། ཡུམ་གྱུར་མྱུར་མ་དཔའ་མོ་ཡི། །བཀའ་ཡི་སྲུང་མ་ཀུན་ལ་བསྟོད། །མཆོད་པ་དམ་པ་འདི་བཞེས་ལ། །སངས་རྒྱས་བསྟན་པ་སྐྱོང་བ་དང་། །བདག་ཅག་རྣལ་འབྱོར་ཡོན་མཆོད་ཀྱི། །བསམ་པ་ཡིད་བཞིན་འགྲུབ་པ་དང་། །འགྲོ་ཀུན་བདེ་ལ་སྤྱོད་པར་ཤོག །གཤེགས་སམ་རྟེན་ལ་གཉིས་མེད་བཞུགས། །རྟག་ཏུ་སྲུང་སྐྱོབ་དམ་པ་མཛོད། །ཅེས་ཕྲིན་ལས་བཅོལ། སྤྲོ་ན་རིགས་

དྲུག་གི་གཏོར་མ། ཨོཾ་ཨཱཿཧཱུྃ། ལན་གསུམ་གྱིས་བྱིན་བརླབ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །དེ་བཞིན་གཤེགས་པ་གཟུགས་མཛེས་དམ་པ་ལ༴ དེ་བཞིན་གཤེགས་པ་སྐུ་འབྱམས་ཀླས་ལ༴ དེ་བཞིན་འཇིགས་པ་ཐམས་ཅད་ཡོངས་སུ་བྲལ་བ་ལ་ཕྱག་འཚལ་ལོ། །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། ལན་གསུམ་གྱིས་བསྔོ། མཆོད་སྦྱིན་འདོད་ཡོན་ལྔ་ལྡན་འདི། །ལན་ཆགས་སྙིང་རྗེ་རིགས་དྲུག་མགྲོན། །གནོད་བྱེད་བགེགས་རིགས་འབྱུང་པོ་ལ། །ཤ་མཁོན་བུ་ལོན་སྦྱང་ཕྱིར་འབུལ། །ཀུན་ཀྱང་གནོད་པའི་སེམས་སྤངས་ནས། བྱང་ཆུབ་སེམས་དང་ལྡན་པར་ཤོག །གཏོར་མ་སྒོར་ཕུལ་ཞིང་། ཡེ་དྷརྨ་ཧེ་ཏུ་པྲ་བྷཱ་ཝ་སོགས་ཆོས་སྦྱིན་བྱ། སརྦ་བྷཱུ་ཏ་གཙྪཿས་རང་གནས་སུ་གཤེགས། སྲིད་ལ་ཕན་ཕྱིར་ཡིན་ན་བྱིན་རླབས་སོགས་གཞན་གོང་ལྟར་ལ། མཆོད་སྦྱིན་གླུད་ཀྱི་གཏོར་མ་འདིས། །རིགས་

དང་སྲིད་ལ་བར་གཅོད་པའི། །རྒབ་འདྲེ་དམངས་འདྲེ་ཕོ་མོ་དང་། །སྲི་རྐྱེན་ཡུལ་འདྲེ་ཐམས་ཅད་ལ། །བསྔོས་པ་བཞིན་དུ་ཐོབ་ནས་ཀྱང་། །ཅི་འདོད་འབྱུང་ཞིང་རེ་བ་གང་། །ཕན་སེམས་ལྡན་པས་གཞན་དུ་དེངས། །བླ་མེད་བྱང་ཆུབ་སྤྱོད་པར་ཤོག །བགེགས་གཏོར་དོར་ཞིང་ཆོས་སྦྱིན་བཅས་ཏེ་གཤེགས། གལ་ཆེ་ན། ཨོཾ་སུཾ་བྷ་ནི་སོགས་དྲག་སྔགས་བརྗོད་ཅིང་ཡུངས་ཐུན་བྲབ་གུ་གུལ་འཚུབ་འཁྱིལ་དུ་བདུག་སྟེ་བགེགས་བསྐྲད། ཨོཾ་བཛྲ་རཀྵ་རཀྵ། ཞེས་སྲུང་བའི་གུར་དུ་དམིགས་བྱ་བཅུག དེ་ནས་གཞི་བདག་གཏོར་མ་སྔ་མ་ལྟར་འབྲུ་གསུམ་གྱིས་བྱིན་བརླབ། གཤེགས་བཞིའི་མཚན་དང་སམྦྷ་རའི་སྔགས་ཀྱིས་ལན་གསུམ་བསྔོས་ལ། ས་བླ་ས་སྟེང་ས་འོག་གི། །གཞི་གནས་ཡུལ་གྱི་བདག་པོ་ལ། །གཙང་སྦྱར་མཆོད་སྦྱིན་འདི་འབུལ་བས། །ནད་མེད་ཚེ་རིང་འཇིག་རྟེན་བདེ། །ཆར་ཆུ་དུས་འབེབས་ལོ་ཕྱུག་ལེགས། །བཙའ་སད་སེར་བ་འབུ་སྲིན་དང་། །འབྱུང་འཁྲུགས་དུས་ཀྱི་རྒུད་པ་སོལ། །

ཀུན་ཀྱང་དམ་པའི་ཆོས་ལ་སྤྱོད། །འཇིག་རྟེན་དགེ་བའི་ཕྲིན་ལས་མཛོད། །གཏོར་མ་གཙང་སར་ཕུལ། ཡེ་དྷརྨཱ་སོགས་ཀྱིས་ཆོས་སྦྱིན་བྱ། སརྦ་བྷུ་མི་པཱ་ཏི་གཙྪཿས་རང་གནས་སུ་གཤེགས་པར་བྱའོ། །གཉིས་པ་རྗེས་ཆོག་ལ། མཆོད་ཁ་གསོས་ཏེ་མཆོད་པའི་སྤྲིན་གཟུངས་ཀྱིས་བྱིན་བརླབ། མེ་ཏོག་བདུག་སྤོས་མར་མེ་དྲི་སོགས་ནས་བཞེས་སུ་གསོལ། །ཨོཾ་ཨཱརྱ་ཏཱ་རེ་ས་པཱ་རི་ཝ་ར་ཨརྒྷཾ་སོགས་ནས་ཤབྟ་པྲ་ཏཱིཙྪ་སྭཱ་ཧཱ། ཞེས་མཆོད་ཅིང་། ཕྱག་འཚལ་ཉེར་གཅིག་གམ། བསྡུ་ན། ལྷ་དང་ལྷ་མིན་སོགས་ཀྱིས་བསྟོད། ཐལ་མོ་སྦྱར་བཞིན། མ་འབྱོར་པ་དང་ཉམས་པ་སོགས་ནས་བཟོད་པར་མཛད་དུ་གསོལ། །ཡིག་བརྒྱ་ལན་གསུམ་བཅས་ཏེ་ནོངས་པ་བཤགས། ཨོཾ། ཁྱེད་ཀྱི་སེམས་ཅན་དོན་ཀུན༴ རྗེས་སུ་མཐུན༴ སངས་རྒྱས་ཡུལ༴ སེམས་ཅན་རྣམས་ཀྱི་དོན༴ སླར་ཡང་འབྱོན༴ བཛྲ་མུཿ ཞེས་ཡེ་ཤེས་པ་གཤེགས་པའམ། རྟེན་ཡོད་ན། ཡེ་ཤེས་པ་རྣམས་རྟེན་ལ་གཉིས་མེད་དུ་བཞུགས་པར་གྱུར། ཨོཾ་སུ་པྲ་

ཏིཥྛ་བཛྲ་ཡེ་སྭཱ་ཧཱ། ཞེས་བརྟན་པར་བཞུགས། དམ་ཚིག་པ་རྣམས་བྱིན་གྱིས་བརླབ་ཕྱིར་རང་ལ་ཐིམ་པས་འཕགས་མ་མཆོག་དང་གོ་འཕང་མཉམ་པར་གྱུར་སྙམ་ཞིང་། དགེ་བ་འདི་ཡིས་མྱུར་དུ༴ འཕགས་མ་སྒྲོལ་མ༴ འགྲོ་བ༴ དེ་ཡི་ས་ལ་འགོད་པར་ཤོག །ཅེས་སོགས་བསྔོ་སྨོན་གྱིས་རྒྱས་གདབ། སྟོན་མཆོག་དམ་པ་ལྷ་མིའི་མཆོད༴ སངས་རྒྱས་ཕྱག་འཚལ༴ སེམས་ཅན༴ དེ་དག༴ ཞི་བ་ཆགས་བྲལ༴ ཆོས་ལ༴ སེམས་ཅན༴ དེ་དག༴ ཚོགས་ཀྱི་དམ་པ༴ དགེ་འདུན༴ སེམས༴ དེ་དག་ཐམས་ཅད་དེང་འདིར་བདེ་ལེགས་ཤོག །བདག་གིས་ཚེ་རབས་སྔོན་ནས་བསྒྲུབ་པའི་ལྷ། །དུས་གསུམ༴ སྔོ་ལྗང༴ ཡུམ་གྱུར་ཨུཏྤལ་བསྣམས་མའི་བཀྲ་ཤིས་ཤོག །འབྱུང་པོ་གང་དག་འདིར་ནི་ལྷགས་གྱུར་ཏེ། །སའམ་འོན༴ སྐྱེ་དགུ་རྣམས༴ ཉིན་དང་མཚན་དུ་ཆོས་ལ་སྤྱོད་པར་ཤོག །འདིར་ནི་རྒྱལ་བ༴ ཤིན་ཏུ༴ བདེན་པ༴

དེང་ཀུན་འཇིགས་པ་ཆེ་ལས་ཐར་གྱུར་ཅིག །ཅེས་མེ་ཏོག་གི་ཆར་བསྙིལ་ཞིང་བཀྲ་ཤིས་ཀྱི་སྣང་བས་ཡོངས་སུ་ཁྱབ་པར་བྱའོ། །གང་གི་ཐུགས་རྗེའི་བསིལ་ཟེར་གྱིས། །ཉོན་མོངས་ཚ་གདུང་སེལ་བ་དང་། །ཡེ་ཤེས་སྣང་བ་རྒྱས་མཛད་མ། །འཕགས་མས་རྗེས་སུ་སྐྱོང་གྱུར་ཅིག །ཅེས་པའང་དཔལ་གྱི་ནང་ཆེན་རྒྱལ་ཁབ་ཆེན་པོར་ལྷ་སྲས་རིན་པོ་ཆེ་བསྙུང་བའི་སྐུ་རིམ་ཆེད་གཉེར་དུ་སྒྲུབ་སྐབས་མོས་ལྡན་ཀརྨ་བློ་གྲོས་རབ་བརྟན་གྱིས་ཡང་ཡང་བསྐུལ་བར་བརྟེན་ནས་ལྷའི་བླ་མ་རྒྱལ་སར་ཕེབས་པའི་ཉིན་མོར་རང་གཏེར་གཞུང་གི་དགོངས་པ་རྩ་བར་བཟུང་། སྔོན་བྱོན་འཕགས་བོད་གྲུབ་བརྙེས་རྣམས་ཀྱི་བཞེད་སྲོལ་གྱིས་ཟུར་བརྒྱན་ཏེ། བདེ་ཆེན་འབར་བའི་རྡོ་རྗེས་ངག་ནས་སྨོས་རིམ་བཞིན་བསྐུལ་བ་པོ་ཉིད་ཀྱི་ཡི་གེར་བཏབ་པ་འདིས་ཀྱང་བསྟན་འགྲོའི་དོན་བླ་ན་མེད་པ་འགྲུབ་པའི་རྒྱུར་གྱུར་ཅིག །སརྦ་ཛ་ག་ཏཾ།། མ་ཕྱི་སྔ་མར་གབ་འཁྲུགས་དང་ཡིག་ནོར་གྱི་ཆ་ཅུང་ཟད་འདུག་པ་ལ། སླད་ནས་གཏེར་ཆེན་བླ་མ་རྗེའི་བཀའ་ལུང་དད་པས་གཙུག་ཏུ་བཀོད་དེ་སློབ་འབངས་བཀའ་བརྒྱུད་བཀྲ་ཤིས་ཀྱིས་སུག་བྲིས་སུ་བསྟར་བ་དགེ་བར་གྱུར་ཅིག །

བདེ་ཆེན་ཡེ་ཤེས་མཁའ་འགྲོ་མཁའ་སྤྱོད་དཀར་མོའི་བཞུགས་གར་ནག་འགྲོས་སུ་བཀོད་པ་བློ་གསར་འཇུག་བདེ།

གསང་ཐིག་སྙིང་པོའི་སྐོར་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་སྒྲུབ་ཐབས། མཆོག་གྱུར་བདེ་ཆེན་གླིང་པ།

༁ྃ༔ གསང་ཐིག་སྙིང་པོའི་སྐོར་ལས༔ རྡོ་རྗེ་གཞོན་ནུ་ཕྱག་རྒྱ་གཅིག་པའི་སྒྲུབ་ཐབས་བཞུགས་སོ༔

ན་མོ་བཛྲ་ཀུ་མཱ་རཱ་ཡ༔ དཔལ་ཆེན་རྡོ་རྗེ་གཞོན་ནུ་ཡི༔ ཕྲིན་ལས་སྙིང་པོར་བསྡུས་པ་ནི༔ སྐྱབས་ཡུལ་ཐམས་ཅད་མདུན་དུ་བསྒོམ༔ བླ་མ་དཀོན་མཆོག་གསུམ་རྣམས་དང་༔ ཧེ་རུ་ཀ་དང་མཁའ་འགྲོ་མ༔ སྐྱབས་ཡུལ་རྒྱ་མཚོ་ཁྱེད་རྣམས་ལ༔ བྱང་ཆུབ་བར་དུ་སྐྱབས་སུ་མཆི༔ སེམས་ཅན་ཀུན་གྱི་དོན་གྱི་ཕྱིར༔ རྫོགས་པའི་སངས་རྒྱས་ཐོབ་འདོད་ལ༔ བར་དུ་གཅོད་པའི་བདུད་འདུལ་ཕྱིར༔ དཔལ་ཆེན་གོ་འཕང་ཐོབ་པར་བྱ༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆེན་སྔོན་པོ་འབར་བ་ནི༔ ནམ་མཁའི་དཀྱིལ་ནས་ཐིགས་པ་ཤར༔ ཧཱུྃ་གི་

འོད་ཟེར་ཕྱོགས་བཅུར་འཕྲོས༔ སྣང་སྲིད་ཕུར་བུའི་ཞིང་ཁམས་གྱུར༔ མཐིང་ནག་ཨེ་ཡི་ཀློང་དཀྱིལ་དུ༔ བྲག་ཆེན་པད་ཉི་ལྷ་ཆེན་སྟེང་༔ ཧཱུྃ་ཡིག་ཡོངས་སུ་གྱུར་པ་ལས༔ རྡོ་རྗེ་མཐིང་ནག་ཧཱུྃ་གིས་མཚན༔ འོད་ཟེར་མཆོག་ཏུ་འབར་བ་ལས༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པ༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་མཐིང་ཞལ༔ དྲག་པོའི་སྤྱན་དགུ་ཕྱོགས་བཅུར་བསྒྲད༔ ཞལ་གདངས་ལྗགས་འདྲིལ་མཆེ་གཙིགས་ཤིང་༔ ཨཱ་རལླི་ཡི་སྒྲ་

ཆེན་སྒྲོགས༔ སྨ་ར་སྨིན་མ་མེ་ལྟར་འབར༔ དབུ་སྐྲ་གྱེན་འཁྱིལ་སྐྲ་གསེབ་ཏུ༔ རྡོ་རྗེ་ཕྱེད་པས་མཚན་པ་ཡི༔ ལྟེ་བར་བླ་མ་མི་བསྐྱོད་པ༔ གཡས་པ་དང་པོས་རྩེ་དགུ་དང་༔ བར་པས་རྩེ་ལྔ་ཕྱོགས་བཅུར་གཟིར༔ གཡོན་པ་དང་པོས་མེ་ཕུང་དང་༔ བར་པས་ཁ་ཊྭཱཾ་རྩེ་གསུམ་འཛིན༔ ཐ་མས་རི་རབ་ཕུར་བུ་བསྒྲིལ༔ རྡོ་རྗེ་རིན་ཆེན་གཤོག་པ་གདེངས༔ གླང་ཆེན་ཞིང་ལྤགས་སྟོད་དུ་གསོལ༔ སྟག་གི་པགས་པའི་ཤམ་ཐབས་མཛད༔ ཐོད་ཕྲེང་ཚར་གསུམ་དོ་ཤལ་དང་༔ ཐོད་སྐམ་རྣམས་ཀྱིས་དབུ་བརྒྱན་ཅིང་༔ རིན་པོ་ཆེ་ཡི་རྩེ་བྲན་དང་༔ སྦྲུལ་རིགས་ལྔ་ཡི་ཆུན་པོས་བརྒྱན༔ ཁྲག་ཞག་ཐལ་བ་རྣམས་ཀྱིས་བྱུགས༔ རུས་པའི་རྒྱན་དྲུག་ལ་སོགས་པའི༔ དཔལ་གྱི་ཆས་བཅུ་སྐུ་ལ་རྫོགས༔ ཞབས་བཞི་རོལ་པའི་སྟབས་ཀྱིས་འགྱིང་༔ དེ་ཡི་པང་དུ་སྦྱོར་བའི་ཡུམ༔ འཁོར་ལོ་རྒྱས་འདེབས་མཐིང་ནག་འབར༔ གཡས་པས་

ཨུཏྤལ་ཡབ་མགུལ་འཁྱུད༔ གཡོན་པས་ཐོད་ཁྲག་ཡབ་ལ་སྟོབ༔ ལང་ཚོ་རྒྱས་པའི་འགྱུར་བག་ཅན༔ ཕྱག་རྒྱ་ལྔ་ཡི་རྒྱན་འཆང་ཞིང་༔ གཡོན་བསྐུམ་ཡབ་ཀྱི་སྐེད་ལ་འཁྲིལ༔ གཡས་བརྐྱང་བདེ་བ་ཆེན་པོར་སྦྱོར༔ སྤྱི་བོར་ཨོཾ་ཧཱུྃ་ཏྲཱྃ་ཧྲཱིཿཨཱཿ ཡེ་ཤེས་ལྔ་ཡི་བདག་ཉིད་ཅན༔ གནས་གསུམ་ཨོཾ་ཨཱཿཧཱུྃ་གིས་མཚན༔ སྐུ་གསུང་ཐུགས་སུ་བྱིན་གྱིས་རླབས༔ ཡབ་ཀྱི་གསང་གནས་ཧཱུྃ་ཡིག་ལས༔ རྡོ་རྗེའི་ལྟེ་བར་ཧཱུྃ་གིས་མཚན༔ ཡུམ་གྱི་མཁའ་གསང་པྃ་ཡིག་ལས༔ པདྨར་ཉི་མ་ཨཾ་གིས་མཚན༔ བདེ་བ་ཆེན་པོའི་དབྱིངས་སུ་རོལ༔ བ་སྤུ་རྡོ་རྗེ་ཕྱེད་པ་དང་༔ སྣ་ཚོགས་རྡོ་རྗེའི་གོ་ཁྲབ་གསོལ༔ ཕུར་བུའི་ཚྭ་ཚྭ་སྐར་ལྟར་འཁྲུགས༔ ཐུགས་ཀར་འོད་ཀྱི་གུར་ཁྱིམ་དབུས༔ པདྨ་ཉི་ཟླའི་གདན་སྟེང་དུ༔ ཡེ་ཤེས་སེམས་དཔའ་རྡོ་རྗེ་སེམས༔ དཀར་གསལ་རྡོ་རྗེ་དྲིལ་བུ་འཛིན༔ སྙེམས་མ་གྲི་ཐོད་འཛིན་དང་འཁྲིལ༔ སྐྱིལ་

ཀྲུང་བཞུགས་པའི་སྲོག་གི་གོར༔ རིན་ཆེན་ཆ་བརྒྱད་ཉི་ཟླའི་སྟེང་༔ རྡོ་རྗེ་སྔོན་པོའི་ལྟེ་བ་ལ༔ ཉི་མའི་སྟེང་དུ་ཧཱུྃ་མཐིང་ག༔ མཐའ་བསྐོར་འབྲུ་དགུ་རང་སྒྲར་བཅས༔ དེ་ལས་འོད་ཟེར་རབ་འཕྲོས་པས༔ ཕྱོགས་བཅུའི་རྒྱལ་བ་ཐམས་ཅད་ཀྱི༔ སྐུ་གསུང་ཐུགས་ལ་མཉེས་མཆོད་ཕུལ༔ སྐུ་གསུང་ཐུགས་ཀྱི་བྱིན་རླབས་རྣམས༔ ཨོཾ་དཀར་ཨཱཿདམར་ཧཱུྃ་མཐིང་ནི༔ དཔག་ཏུ་མེད་པ་སྤྱན་དྲངས་ཏེ༔ རང་གི་གནས་གསུམ་ཐིམ་པ་ཡིས༔ དབང་བསྐུར་བྱིན་རླབས་དངོས་གྲུབ་ཐོབ༔ བདེ་གཤེགས་བླ་མ་མཉེས་པར་བྱས༔ མཆེད་དང་ལྕམ་དྲལ་ཉམས་ཆག་བསྐངས༔ མཁའ་འགྲོ་ཆོས་སྐྱོང་འཁོན་པ་སྦྱངས༔ དྲེགས་པ་ཐམས་ཅད་ལས་ལ་བཙུད༔ བདུད་དང་དམ་སྲི་ཐལ་བར་བརླགས༔ འགྲོ་བའི་སྒོ་གསུམ་སྒྲིབ་པ་སྦྱངས༔ སྣང་བ་ཐམས་ཅད་ལྷ་ཡི་སྐུ༔ གྲགས་པ་ཐམས་ཅད་སྔགས་ཀྱི་སྒྲ༔ དྲན་རྟོག་ཡེ་ཤེས་རོལ་པར་བསྒོམ༔

རང་གི་སེམས་ཉིད་འདི་དག་ནི༔ རྡོ་རྗེ་གཞོན་ནུ་ཉིད་དུ་བལྟ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བཾ་ཧཱུྃ་ཕཊ༔ ཅེས་བཟླས་ཐུན་མཚམས་གཏོར་མ་འབུལ༔ སྐབས་སུ་དཔལ་གྱི་གཏོར་མ་ནི༔ ལྷ་རུ་བསྒོམས་ལ་དབང་བླངས་ཏེ༔ དེ་ཡང་དང་པོ་མེ་ཏོག་འབུལ༔ བླ་མ་དཔལ་ཆེན་ཧེ་རུ་ཀ༔ རྡོ་རྗེ་གཞོན་ནུ་ཡབ་ཡུམ་གྱིས༔ བདག་ལ་བྱིན་གྱིས་བརླབས་ནས་ཀྱང་༔ སྐུ་གསུང་ཐུགས་ཀྱི་དབང་མཆོག་སྩོལ༔ ཞེས་གསོལ་རང་ཉིད་ལྷ་རུ་བསྒོམ༔ གཏོར་མ་ལྷ་ཡི་གནས་གསུམ་ནས༔ འོད་ཟེར་དཀར་དམར་མཐིང་གསུམ་འཕྲོས༔ རང་གི་གནས་གསུམ་ཐིམ་པ་ཡིས༔ སྒོ་གསུམ་སྒྲིབ་པ་མ་ལུས་སྦྱངས༔ སྐུ་གསུང་ཐུགས་ཀྱི་དབང་ཐོབ་བསམ༔ ཧཱུྃ༔ གཏོར་སྣོད་མཐིང་ནག་གྲུ་གསུམ་འབར་བའི་དབྱིངས༔ གཏོར་མའི་ངོ་བོ་དཔལ་ཆེན་ཧེ་རུ་ཀ༔ བཅོམ་ལྡན་རྡོ་རྗེ་གཞོན་ནུ་ཁྲོ་བོའི་རྒྱལ༔ ཡུམ་མཆོག་སྒྲོལ་མ་འཁོར་ལོ་རྒྱས་འདེབས་མ༔ བདུད་འདུལ་ཁྲོ་བཅུ་ཡབ་ཡུམ་ཁྲ་ཐབས་དང་༔

སྲས་མཆོག་སྒོ་སྐྱོང་སྲུང་མའི་ཚོགས་རྣམས་ཀྱིས༔ དུས་འདིར་ཐུགས་དམ་གཉེན་པོའི་སྒོ་ཕྱེས་ལ༔ གཟི་བརྗིད་སྐུ་ཡི་དབང་མཆོག་ལུས་ལ་སྩོལ༔ ལུས་ཀྱི་ནད་གདོན་སྡིག་སྒྲིབ་བར་ཆད་སོལ༔ འཇའ་ལུས་རྡོ་རྗེའི་སྐུ་རུ་འགྲུབ་པར་མཛོད༔ ཚངས་དབྱངས་གསུང་གི་དབང་མཆོག་ངག་ལ་སྩོལ༔ ངག་སྒྲིབ་ངག་མནན་དིག་ལྐུགས་བསལ་བ་དང་༔ དྲག་སྔགས་མཐུ་ཡི་དངོས་གྲུབ་བསྩལ་དུ་གསོལ༔ སྤྲོས་བྲལ་ཐུགས་ཀྱི་དབང་མཆོག་སེམས་ལ་སྩོལ༔ ཡིད་སྒྲིབ་སྨྱོ་འབོག་བརྒྱལ་ནད་ཞི་བ་དང་༔ བདེ་ཆེན་ཐུགས་ཀྱི་དངོས་གྲུབ་བསྩལ་དུ་གསོལ༔ གཞན་ཡང་བྱད་ཁ་རྦོད་གཏོང་བཟློག་པ་དང་༔ གདུག་ཅིང་སྡང་སེམས་ལྡན་པ་ཚར་ཆོད་ལ༔ ཚེ་བསོད་དཔལ་འབྱོར་རྒྱས་པར་མཛད་དུ་གསོལ༔ སྔགས་མཐར་ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཨ་བྷི་ཥིཉྩ་ཧོཿ ཞེས་པས་དབང་བླང་གཏོར་འབུལ་ནི༔ རྃ་ཡྃ་ཁྃ་གིས་གཏོར་མ་

བསྲེགས་གཏོར་བཀྲུས༔ སྟོང་པའི་ངང་ལས་རླུང་མེ་ཐོད་སྒྱེད་སྟེང་༔ བྷྲཱུྃ་ལས་བྷཉྫ་ཡངས་ཤིང་རྒྱ་ཆེའི་ནང་༔ གོ་ཀུ་ད་ཧ་ན་ལས་ཤ་ལྔ་དང་༔ བི་མུ་མ་ར་ཤུ་ལས་བདུད་རྩི་ལྔ༔ ཁ་ཆོད་ཉི་མ་ཟླ་བ་རྡོ་རྗེས་མཚན༔ མེ་རླུང་སྦྱོར་བས་བདུད་རྩི་ཞུ་ཞིང་ཁོལ༔ རླངས་པས་འཁོར་འདས་དྭངས་མའི་བཅུད་རྣམས་འདུས༔ རིགས་ལྔ་ཡབ་ཡུམ་སྐུར་གྱུར་བདེ་ཆེན་སྦྱོར༔ ཁ་ཆོད་བཅས་པ་བྱང་ཆུབ་སེམས་སུ་ཞུ༔ དམ་ཚིག་ཡེ་ཤེས་བདུད་རྩིར་གཉིས་མེད་འདྲེས༔ འདོད་ཡོན་མཆོད་སྤྲིན་ནམ་མཁའ་གང་བར་གྱུར༔ ཨོཾ་ཨཱཿཧཱུྃ་ཧོཿ ལག་པ་གཡས་ཕྱར་གཡོན་གདེངས་ཤིང་༔ མཐེབ་མཛུབ་སྦྲེལ་བའི་ཕྱག་རྒྱས་བརླབ༔ ཧཱུྃ༔ ཆོས་ཀྱི་དབྱིངས་ཀྱི་ཕོ་བྲང་ནས༔ བཅོམ་ལྡན་རྡོ་རྗེ་གཞོན་ནུ་དང་༔ སྲུང་མ་དམ་ཅན་འཁོར་དང་བཅས༔ སྲིད་པའི་ཕུར་བུ་བསྒྲུབ་པ་དང་༔ དབང་དང་དངོས་གྲུབ་སྩོལ་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔

ཡེ་ཤེས་ཁྲོ་བོ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ བཛྲ་ས་མཱ་ཛ༔ ཧཱུྃ༔ བླ་མེད་མཆོག་གི་མཆོད་པ་དམ་པ་ནི༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡིས་རབ་བརྒྱན་ཏེ༔ ཐུགས་དམ་བཞིན་དུ་ཅི་བདེར་བཞེས་སུ་གསོལ༔ ཨོཾ་ཤྲཱི་བཛྲ་ཀུ་མཱ་ར་དྷརྨ་པཱ་ལ་ས་པཱ་རི་ཝ་ར་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤབྟ་པྲ་ཏཱིཙྪ་ཡེ་སྭཱ་ཧཱ༔ མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ མ་ཧཱ་རཀྟ་ཁ་རཾ་ཁཱ་ཧི༔ ཨོཾ་བཛྲ་ཀཱི་ལི་ཀཱི་ལ་ཡ་ས་པཱ་རི་ཝ་ར་ཨི་དཾ་བ་ལིཾ་གྲྀ་ཧྣནྟུ༔ མ་མ་སརྦ་སིདྡྷི་མྨེ་པྲ་ཡཙྪ༔ ཨོཾ་བཛྲ་ཀཱི་ལི་ཀཱི་ལ་ཡ་དྷརྨ་པཱ་ལ་ས་པཱ་རི་ཝ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ ཧཱུྃ༔ ཐབས་ཀྱིས་སྤྱོད་པའི་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་པའི༔ ཕུར་པ་ཕྲིན་ལས་ལྷ་ལ་ཕྱག་འཚལ་བསྟོད༔ ཧཱུྃ༔ མ་བཅོས་སྤྲོས་མེད་དེ་བཞིན་

ཉིད་དབྱིངས་ལས༔ བདེ་ཆེན་ལྷུན་གྲུབ་འབར་བའི་སྐུར་བཞེངས་པ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་༔ ཡུམ་མཆོག་སྒྲོལ་མ་འཁོར་ལོ་རྒྱས་འདེབས་མ༔ རྡོ་རྗེ་ཕུར་བུའི་རིག་པ་འཛིན་རྣམས་དང་༔ ཁྲོ་བཅུ་ཡབ་ཡུམ་ཟ་བྱེད་གསོད་བྱེད་ཚོགས༔ སྲས་མཆོག་ཉེར་གཅིག་ཁྲོ་མོ་སྒོ་མ་བཞི༔ ཤྭ་ན་བདག་ཉིད་ས་བདག་སྐྱེས་བུའི་ཚོགས༔ ཕུར་པའི་སྲུང་མ་དམ་ཅན་རྒྱ་མཚོར་བཅས༔ མི་མངོན་དབྱིངས་ནས་གནས་འདིར་སྐུར་བཞེངས་ལ༔ དམ་རྫས་ཕྱི་ནང་གསང་བའི་མཆོད་པ་དང་༔ བདུད་རྩི་རཀྟ་གཏོར་མའི་མཆོད་པ་བཞེས༔ བདག་ཅག་དཔོན་སློབ་ཡོན་མཆོད་འཁོར་བཅས་རྣམས༔ སྒོ་གསུམ་ལོངས་སྤྱོད་བཅས་པ་སྲུང་བ་དང་༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ནད་གདོན་བར་ཆད་ཐམས་ཅད་ཞི་བ་དང་༔ ཚེ་བསོད་དཔལ་འབྱོར་ཐམས་ཅད་རྒྱས་པ་དང་༔ ཁམས་

གསུམ་སྲིད་གསུམ་དབང་དུ་སྡུད་པ་དང་༔ དགྲ་བགེགས་ཐལ་བར་བརླག་པའི་ཕྲིན་ལས་མཛོད༔ བྱད་ཁ་ཕུར་ཁ་ཐམས་ཅད་བཟློག་ཏུ་གསོལ༔ བཀྲ་ཤིས་བདེ་ལེགས་འབྱུང་བར་མཛད་དུ་གསོལ༔ ཞེས་བཅོལ་ཡེ་ཤེས་རང་ལ་བསྟིམ༔ འཇིག་རྟེན་པ་རྣམས་རང་གནས་གཤེགས༔ འདིས་ནི་བར་ཆད་ཐམས་ཅད་ཞི༔ བསམ་པ་ཐམས་ཅད་འདི་ཡིས་འགྲུབ༔ དེ་ཕྱིར་འདི་ལ་བརྩོན་པར་གྱིས༔ ཟབ་མོའི་གདམས་པ་འདི་ཉིད་ཀྱང་༔ མ་འོངས་དོན་དུ་གཏེར་དུ་སྦས༔ ལས་ཅན་ཞིག་དང་འཕྲད་པར་ཤོག༔ ས་མ་ཡ་རྒྱ་རྒྱ༔ སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པས་ཙཱ་འདྲ་རིན་ཆེན་བྲག་ནས་སྤྱན་དྲངས་ཏེ་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་གཏན་ལ་ཕབ་པའི་ཡིག་བྲིས་པདྨ་གར་གྱི་དབང་ཕྱུག་གིས་བགྱིས་པ་དགེ་ལེགས་འཕེལ༔

གསང་ཐིག་སྐོར་གསུམ་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་ཚོགས་མཆོད་ཕྲིན་ལས་བཅུད་ཐིག །བསྟན་གཉིས་གཡུང་དྲུང་གླིང་པ།

༁ྃ༔ གསང་ཐིག་སྐོར་གསུམ་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་ཚོགས་མཆོད་ཕྲིན་ལས་བཅུད་ཐིག་ཅེས་བྱ་བ་བཞུགས་སོ༔

གྲུབ་མཆོག་ཀུན་གྱི་ཐུགས་དམ་ལྷ། །བདུད་འདུལ་ཁྲོ་བོ་ཆེན་པོ་ལ། །གུས་པས་ཕྱག་བྱས་ཚོགས་མཆོད་ཚུལ། །ཉུང་ངུར་འབྲི་ལ་དགེ་ལེགས་སྩོལ། །ལྷ་འདི་ལ་ཚོགས་མཆོད་འབུལ་བར་འདོད་ཅིང་ཕྲིན་ལས་རྒྱས་པ་བློས་མི་ལྕོགས་པ་དག་གིས། དཔལ་གཏོར་སྨན་རཀ་ཕྱི་མཆོད་ཚོགས་ཀྱི་རྫས་ཅི་འབྱོར་པ་བཤམས་ལ། གཏེར་གཞུང་གི་བདག་བསྐྱེད་བཟླས་པ་ཅི་འགྲུབ་བྱས་ནས་མཐར་དབང་ལེན་འགྲུབ་མིན་གང་བདེས་ཆོག །དེ་ནས་གཏོར་མ་བྲན་ལ་གཏོར་འབུལ་ཕྲིན་བཅོལ་བཅས་གྲུབ་པ་དང་། ཚོགས་རྫས་ཆུ་ཆང་ནང་མཆོད་ཀྱིས་སྦྱངས་ལ། ཧཱུྃ༔ རང་བྱུང་རིག་པའི་ཡེ་ཤེས་ཀྱིས༔ རྃ་ཡྃ་ཁྃ་གིས་

དངོས་འཛིན་སྦྱངས༔ བྷྲཱུྃ་ལས་དབྱིངས་ཀྱི་ཀ་པཱ་ལར༔ ཨོཾ་ཧཱུྃ་ཏྲཱྃ་ཧྲཱིཿཨཱཿརྣམས་ཀྱིས༔ བདེ་གཤེགས་རིགས་ལྔའི་དམ་ཚིག་རྫས༔ ཁ་དོག་དྲི་རོ་ནུས་པར་ལྡན༔ ཨོཾ་ག་ཎ་ཙཀྲ་ཀཱ་མ་གུ་ཎ་ཧཱུྃ་ཧྲཱིཿཋཱ༔ ཚོགས་ཞིང་སྤྱན་འདྲེན་པ་ནི། ཧཱུྃ༔ ཆོས་ཀྱི་དབྱིངས་ཀྱི་ཕོ་བྲང་ནས༔ བཅོམ་ལྡན་རྡོ་རྗེ་གཞོན་ནུ་དང་༔ སྲུང་མ་དམ་ཅན་འཁོར་དང་བཅས༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་སྩོལ་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ རྟགས་དང་

མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ བཛྲ་ས་མཱ་ཛ༔ མཆོད་པ་ནི། ཧཱུྃ༔ ཡེ་ཤེས་ལྔ་ཡི་ཆོ་འཕྲུལ་ལས༔ འདོད་ཡོན་མཆོད་སྤྲིན་བསམ་མི་ཁྱབ༔ བསོད་ནམས་ཡེ་ཤེས་ཚོགས་རྫོགས་ཕྱིར༔ དཀྱིལ་འཁོར་ལྷ་ཚོགས་རྣམས་ལ་འབུལ༔ ག་ཎ་ཙཀྲ་པཱུ་ཛ་ཧོ༔ སྐབས་འདིར་སྐོང་བ་སྤྲོ་ན། ཧཱུྃ༔ མ་བཅོས་སྤྲོས་མེད་དེ་བཞིན་ཉིད་དབྱིངས་ལས༔ བདེ་ཆེན་ལྷུན་གྲུབ་འབར་བའི་སྐུར་བཞེངས་པ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་༔ ཡུམ་མཆོག་སྒྲོལ་མ་འཁོར་ལོ་རྒྱས་འདེབས་མ༔ རྡོ་རྗེ་ཕུར་བུའི་རིག་པ་འཛིན་རྣམས་དང་༔ ཁྲོ་བཅུ་ཡབ་ཡུམ་ཟ་བྱེད་གསོད་བྱེད་ཚོགས༔ སྲས་མཆོག་ཉེར་གཅིག་ཁྲོ་མོ་སྒོ་མ་བཞི༔ ཤྭ་ན་བདག་ཉིད་ས་བདག་སྐྱེས་བུའི་ཚོགས༔ ཕུར་པའི་སྲུང་མ་དམ་ཅན་རྒྱ་མཚོར་བཅས༔ མི་མངོན་དབྱིངས་ནས་གནས་འདིར་སྐུར་བཞེངས་ལ༔ དམ་རྫས་ཕྱི་ནང་

གསང་བའི་ཚོགས་མཆོད་དང་༔ བདུད་རྩི་རཀྟ་གཏོར་མའི་མཆོད་པ་བཞེས༔ ཐུགས་དམ་གཉན་པོ་ཆོས་ཀྱི་དབྱིངས་སུ་བསྐང་༔ དམ་ཚིག་ཉམས་ཆག་འགལ་འཁྲུལ་མཐོལ་ཞིང་བཤགས༔ བདག་ཅག་དཔོན་སློབ་ཡོན་མཆོད་འཁོར་བཅས་ཀྱི༔ སྒོ་གསུམ་ལོངས་སྤྱོད་བཅས་པ་སྲུང་བ་དང་༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ ནད་གདོན་བར་ཆད་ཐམས་ཅད་ཞི་བ་དང་༔ ཚེ་བསོད་དཔལ་འབྱོར་ཐམས་ཅད་རྒྱས་པ་དང་༔ ཁམས་གསུམ་སྲིད་གསུམ་དབང་དུ་སྡུད་པ་དང་༔ དགྲ་བགེགས་ཐལ་བར་བརླག་པའི་ཕྲིན་ལས་མཛོད༔ བྱད་ཁ་ཕུར་ཁ་ཐམས་ཅད་ཟློག་ཏུ་གསོལ༔ བཀྲ་ཤིས་བདེ་ལེགས་འབྱུང་བར་མཛད་དུ་གསོལ༔ ཚར་གྲངས་ལྟ་བུ་ཤིན་ཏུ་བསྡུ་སྐབས་སྐོང་བ་འདི་མ་བྱས་ཀྱང་ཆོག །བཤགས་པ་ནི། ཧཱུྃ༔ ཐོག་མེད་དུས་ནས་ད་ལྟའི་བར༔ མ་རིག་ལུས་དང་ངག་སེམས་

ཀྱིས༔ བག་མེད་སྤྱོད་པས་དམ་འགལ་བ༔ ཚོགས་ཀྱི་འཁོར་ལོས་བསྐང་ཞིང་བཤགས༔ ས་མ་ཡ་ཤུདྡྷེ་ཨ༔ བསྒྲལ་བ་ནི། ཧཱུྃ༔ མ་རིག་གཉིས་འཛིན་དགྲ་དང་བགེགས༔ རྣམ་ཐར་གསུམ་གྱི་ཨེ་དབྱིངས་སུ༔ ཡེ་ཤེས་ཕུར་པའི་མཚོན་གྱིས་བསྒྲལ༔ ལྷ་ཚོགས་རྣམས་ཀྱི་ཞལ་དུ་བསྟབ༔ མ་ཏྲཾ་རུ་དྲ་མཱ་ར་ཡ་མཱཾ་ས་རཀྟ་ཀིཾ་ནི་རི་ཏི་ཁ་རཾ་ཁཱ་ཧི༔ གལ་ཏེ་ཡུན་ཐུང་ངུས་ཚར་གྲངས་གསག་དགོས་པ་བྱུང་ན། ཨོཾ་ཨཱཿཧཱུྃ༔ ཨོཾ་བཛྲ་ཀཱི་ལི་ཀཱི་ལ་ཡ་ས་པཱ་རི་ཝ་ར་མ་ཧཱ་ག་ཎ་ཙཀྲ་པཱུ་ཛ་ཁ་ཁ་ཁཱ་ཧི་ཁཱ་ཧི༔ ཧཱུྃ༔ དཔལ་ཆེན་འཁོར་དང་བཅས་རྣམས་ཀྱིས༔ མཆོད་པ་རྒྱ་མཚོ་འདི་བཞེས་ཤིག༔ ཉམས་ཆག་རྒྱ་མཚོ་མ་ལུས་བཤགས༔ ཐུགས་དམ་རྒྱ་མཚོ་མ་ལུས་བསྐང་༔ དངོས་གྲུབ་རྒྱ་མཚོ་བསྩལ་དུ་གསོལ༔ ཕྲིན་ལས་རྒྱ་མཚོ་མ་ལུས་སྒྲུབས༔ ཞེས་པ་ལ་གྲངས་གཟུང་ངོ་། །དེ་ནས་བརྡའི་འབུལ་ལེན་བཅས་ཚོགས་ལ་རོལ། ལྷག་མ། ཨོཾ་ཨཱཿཧཱུྃ༔ དཔལ་

གྱི་བཀའ་ཉན་དམ་ཚིག་ཅན༔ ལྷག་མའི་གཏོར་མ་འདི་བཞེས་ལ༔ སྔོན་ཚེ་དཔལ་གྱི་བཀའ་ལུང་བཞིན༔ བཅོལ་པའི་ཕྲིན་ལས་འགྲུབ་པར་མཛོད༔ ཨུཙྪིཥྚ་བ་ལིཾ་ཏ་ཁཱ་ཧི༔ དེས་ཚོགས་ཀྱི་ཕྲིན་ལས་གྲུབ་ཅིང་། རྗེས་མཆོད་བསྟོད་ནི། ཨོཾ་ཤྲཱི་བཛྲ་ཀུ་མཱ་ར་དྷརྨ་པཱ་ལ་ས་པཱ་རི་ཝ་ར་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤབྡ་པྲ་ཏཱིཙྪ་སྭཱ་ཧཱ༔ མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁ་རཾ་ཁཱ་ཧི༔ ཧཱུྃ༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་པའི༔ ཕུར་པ་ཕྲིན་ལས་ལྷ་ལ་ཕྱག་འཚལ་བསྟོད༔ ཡིག་བརྒྱ་དང་། མ་རྙེད་ཡོངས་སུ་སོགས་ཀྱིས་ནོངས་པ་བཤགས། ཧཱུྃ༔ དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་ཀྱིས༔ བདེ་ཆེན་གསང་བའི་མཁའ་ཀློང་ནས༔ མཆོག་དང་ཐུན་མོང་དངོས་གྲུབ་སྩོལ༔ རྩ་སྔགས་མཐར། ཀཱ་ཡ་ཝཱ་ཀ་ཙིཏྟ་སརྦ་

སིདྡྷི་ཧཱུྃ༔ ཞེས་དངོས་གྲུབ་བླང་། ཧཱུྃ༔ སྣང་སྲིད་ཕུར་བུའི་དཀྱིལ་འཁོར་རྣམས༔ ཐུགས་ཀྱི་ཐིག་ལེ་ཆེན་པོར་ཐིམ༔ དཔལ་ཆེན་པོ་ཡི་དབྱིངས་ཉིད་ལས༔ སྐུ་གསུང་ཐུགས་ཀྱི་དཀྱིལ་འཁོར་གསལ༔ ཞེས་བསྡུ་ལྡང་བྱ། གཙྪ་གཙྪ་སྭ་བྷཱ་ཝཱ་ནཱཾ། ཞེས་མགྲོན་ཐབས་འཇིག་རྟེན་པ་གཤེགས། ཧཱུྃ༔ མི་གནས་ཡེ་ཤེས་དཀྱིལ་འཁོར་དུ༔ སྐུ་གསུང་ཐུགས་སུ་ལྷུན་གྲུབ་ནས༔ རྡོ་རྗེ་གཞོན་ནུའི་གོ་འཕང་ཐོབ༔ འགྲོ་བ་ཀུན་གྱི་དཔལ་དུ་ཤོག༔ ཧཱུྃ༔ རིག་འཛིན་རྩལ་འཆང་བྱིན་རླབས་ཀུན་གྱི་བདག༔ སྲིད་པའི་ཕུར་བུ་དངོས་གྲུབ་ཀུན་གྱི་གཏེར༔ མ་མོ་མཁའ་འགྲོ་མྱུར་མགྱོགས་ཕྲིན་ལས་ཅན༔ ཕུར་པའི་དཀྱིལ་འཁོར་ལྷ་ཡི་བཀྲ་ཤིས་ཤོག༔ ཅེས་བསྔོ་སྨོན་དང་ཤིས་པ་བརྗོད་པས་དགེ་ལེགས་སུ་བྱའོ། །དཔལ་ཆེན་དགྱེས་པའི་ཉི་འོད་ཀྱིས། །ལྷ་མིན་མུན་ཚོགས་རབ་བསལ་ནས། །གནས་སྐབས་མཐར་ཐུག་གྲུབ་གཉིས་ཀྱི། །དགེ་མཚན་ རྒྱས་པའི་དཔལ་དུ་ཤོག །ཅེས་པའང་ཉེ་བར་གནས་པ་

ཀརྨ་ནོར་འཕེལ་ནས་དོན་དུ་གཉེར་བའི་ངོར། འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་གཏེར་གཞུང་རྣམས་ཀྱི་དགོངས་པ་བསྡེབས་པ་དགེ་ལེགས་འཕེལ།། །།

དཔལ་ཆེན་རྡོ་རྗེ་གཞོན་ནུའི་གསང་སྒྲུབ་མཚོ་རྒྱལ་གོང་ཁུག་མའི་བརྒྱུད་པའི་གསོལ་འདེབས་བདུད་ལས་རྣམ་རྒྱལ། བདེ་ཆེན་འབར་བའི་རྡོ་རྗེ།

༁ྃ༔ དཔལ་ཆེན་རྡོ་རྗེ་གཞོན་ནུའི་གསང་སྒྲུབ་མཚོ་རྒྱལ་གོང་ཁུག་མའི་བརྒྱུད་པའི་གསོལ་འདེབས་བདུད་ལས་རྣམ་རྒྱལ་ཞེས་བྱ་བ་བཞུགས་སོ༔༄༅༔ ཡི་དམ་དཔལ་ཆེན་འདུས་པ་ལས་ཕྲིན་ལས་སྙིང་པོའི་སྔོན་འགྲོའི་རིམ་པ་བཞུགས་སོ༔

ན་མོ༔ཤྲཱི་བཛྲ་ཀུ་མ་ར་ནཱ་མ་ཡེ༔ ཆོས་སྐུ་ཀུན་བཟང་ལོངས་སྐུ་རྡོ་རྗེ་སེམས༔ སྤྲུལ་སྐུ་རིག་འཛིན་རོ་ལངས་བདེ་བ་རྩལ༔ ཤྲཱི་སེང་ཧ་པདྨ་འབྱུང་གནས་ལ༔ གསོལ་བ་འདེབས་སོ་བདུད་ལས་རྣམ་རྒྱལ་ཤོག༔ ཡེ་ཤེས་མཚོ་རྒྱལ་སངས་རྒྱས་ཡེ་ཤེས་ཞབས༔ ཟབ་མོའི་སྟོན་པ་ཆོས་བདག་བརྒྱུད་པར་བཅས༔ བརྒྱུད་གསུམ་ཕུར་བུ་གྲུབ་པའི་རིག་འཛིན་ལ༔ གསོལ་བ༴ དུས་བབས་སྟོན་པ་ལྷ་དང་གཉིས་མེད་པ༔ ཁྲག་འཐུང་བདེ་ཆེན་འབར་བའི་རྡོ་རྗེ་དང་༔ སྨིན་གྲོལ་བརྒྱུད་འཛིན་སྲས་སློབ་ཆོས་ཀྱི་

བདག༔ གསོལ་བ༴ རྡོ་རྗེ་གཞོན་ནུ་ཁྲོ་བཅུ་ཡབ་ཡུམ་དང་༔ སྲས་མཆོག་ཉེར་གཅིག་ཟ་གསོད་སྒོ་མ་བཞི༔ ཡི་དམ་དཀྱིལ་འཁོར་གསུམ་གྱི་འཁོར་ལོ་ལ༔ གསོལ་བ༴ མ་རྟོགས་གཟུང་འཛིན་མཚན་མའི་ཕུར་བུས་འབིགས༔ སྲིད་པ་རྡོ་རྗེ་གཞོན་ནུའི་ཕྱག་རྒྱར་ཤར༔ དབྱིངས་རིག་བདེ་ཆེན་འདུ་འབྲལ་མེད་པར་རྟོགས༔ ཚེ་འདིར་རང་རིག་རྡོ་རྗེ་འཆང་ཐོབ་ཤོག༔ ཅེས་པའང་བློ་གྲོས་རབ་བརྟན་འདོད་དོན་བཞིན་འབར་བའི་རྡོ་རྗེས་སྤེལ་བ་དགེའོ།། ༈ དཀར་གཏོར་ནི། རྃ་ཡྃ་ཁྃ། ༀ་ཨཱཿཧཱུྃ་ལན་གསུམ། བྷཱུ་མི་པ་ཏི་ས་པཱ་རི་

ཝ་ར་བཛྲ་ས་མཱ་ཛཿ བྷཱུ་མི་པ་ཏི་ས་པཱ་རི་ཝ་ར་ༀ་ཨ་ཀཱ་རོ་སོགས། ཧཱུྃ། ས་ལ་དབང་བ་བརྟན་མ་ཡུལ་གཞིའི་བདག །དཀར་ཕྱོགས་སྐྱོང་བའི་ལྷ་ཀླུ་དམ་ཚིག་ཅན། །གཉུག་མར་གནས་དང་གློ་བུར་ལྷག་པའི་ཚོགས། །ཀུན་ལ་མཆོད་སྦྱིན་གཙང་སྦྱར་འདི་ཕུལ་བས། །བདག་གིས་བླ་མེད་བྱང་ཆུབ་བསྒྲུབ་པ་ལ། །འགལ་རྐྱེན་མ་བྱེད་ཕན་པའི་སྡོངས་གྲོགས་མཛོད། །སརྦ་བྷུ་མི་པ་ཏི་གཙྪ༔ གཤེགས་པར་བྱའོ། །ཞེས་འབར་བའི་རྡོ་རྗེས་སོ། །

སྐྱབས་ཡུལ་གསལ་གདབ་ནི། སྐྱབས་ཡུལ་ཕྱོགས་བཅུའི་མཆོག་གསུམ་རྒྱ་མཚོ་དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་ལྷ་ཚོགས་ཀྱི་རྣམ་པར་རོལ་པ་མདུན་གྱི་ནམ་མཁར་སད་པར་གྱུར༔ ཅེས་གསལ་གདབ་བོ།། ༈ དཔལ་ཆེན་ཡི་དམ་ལྷ་རྣམས་ཀྱི༔ སྔོན་འགྲོ་སྦྱོར་བའི་རིམ་པ་ནི༔ སྤྱི་དང་མཐུན་པར་འདུ་བྱས་ལ༔ དང་པོ་རང་གཞན་སྐྱབས་སུ་འགྲོ༔ ན་མོ༔ འདི་ནས་བཟུང་སྟེ་བྱང་ཆུབ་སྙིང་པོའི་བར༔ བདག་གཞན་འགྲོ་ཀུན་འཁོར་བའི་སྡུག་བསྔལ་ལས༔ ཐར་འདོད་བླ་མ་དཀོན་མཆོག་རྩ་གསུམ་ལྷར༔ དད་མོས་གདུང་ཤུགས་དྲག་པོས་སྐྱབས་སུ་མཆི༔ ཡུལ་མཆོག་སྤྱན་སྔར་སེམས་བསྐྱེད་ལེན༔ དེང་ནས་མཁའ་ཁྱབ་འགྲོ་བའི་དོན་བགྱིད་ཕྱིར༔ བདག་གིས་ཡི་དམ་དཔལ་ཆེན་གོ་འཕང་བསྒྲུབ༔ བར་དུ་མ་དང་བུ་ཡི་འདུ་ཤེས་ཀྱིས༔ འགྲོ་ཀུན་བདེ་བ་མཆོག་ལ་འགོད་པར་བྱ༔ གཞན་ཡང་ཚོགས་བསགས་རིམ་པར་འབད༔ དཀོན་མཆོག་གསུམ་

ལ་ཕྱག་འཚལ་མཆོད་པ་འབུལ༔ མི་དགེའི་སྡིག་བཤགས་དགེ་ལ་རྗེས་ཡི་རང་༔ བཞུགས་པར་གསོལ་འདེབས་ཆོས་འཁོར་བསྐོར་བར་བསྐུལ༔ དགེ་ཀུན་དམིགས་མེད་བྱང་ཆུབ་ཆེན་པོར་བསྔོ༔ སྐྱབས་ཡུལ་རང་ཐིམ་བྱིན་བརླབས་གྱུར༔ བར་ཆད་བགེགས་ལ་བཀའ་བསྒོ་ཕྱིར༔ བྱིན་གྱིས་བརླབས་པའི་འདོད་ཡོན་བསྔོ༔ ཧཱུྃ༔ ཉོན་མོངས་མ་རིག་རྣམ་རྟོག་འཁྲུལ་པའི་བགེགས༔ ཀུན་བཏགས་ལྷ་འདྲེ་དམ་སྲི་གདོན་ཚོགས་རྣམས༔ འདོད་ཡོན་ལྔ་ལྡན་གླུད་གཏོར་ཆངས་བུ་འདི༔ བསྔོ་བས་ལོངས་ལ་ཕྱོགས་མེད་ཕ་མཐར་སོང་༔ འདས་ན་བརླག་པར་འགྱུར་བས་མྱུར་དུ་དེངས༔ ཧཱུྃ་མ་ཧཱ་ཀྲོ་དྷ་ཛྭ་ལ་མཎྜལ་ཧ་ལ་ཧ་ལ་ཧཱུྃ་ཧཱུྃ་ཧཱུྃ་སརྦ་དུཥྚཾ་མཱ་ར་ཡ་ཕཊ༔ མཚམས་གཅོད་སྲུང་བའི་འཁོར་ལོ་བསྒོམ། ཧཱུྃ༔ ཐུགས་ཀའི་ཧཱུྃ་ཡིག་སྤྲིན་ལས་ཁྲོ་བོའི་གུར༔ ཕྱག་མཚན་ལྔ་ཡི་ར་བ་གུར་བླ་བྲེ༔ འཚུབ་ཅིང་འཁྱིལ་བའི་ཡེ་ཤེས་མེ་ཡིས་མཚམས༔ རིས་

མེད་ཁྱབ་བརྡལ་ཡེ་སྲུང་ལྷུན་གྱིས་གྲུབ༔ ཨོཾ་བཛྲ་ཛྙཱ་ན་རཀྵ་ཀུ་རུ་ཧཱུྃ༔ བརྡའ་སྒོ་དབྱེ་དང་ཕྱག་འཚལ་བཤགས༔ ཨཱ༔ རང་གསལ་སྒོ་དབྱེ་རང་རིག་ལྷ་དང་མཇལ༔ འཕོ་འགྱུར་མེད་པར་ཕྱག་འཚལ་མ་རྟོགས་ནོངས༔ མི་དམིགས་སྤྲོས་བྲལ་ཀ་དག་ཀློང་དུ་བཤགས༔ སྐད་ཅིག་འདུ་འབྲལ་མེད་པའི་དམ་བཅའ་བཟུང་༔ པྲ་ཝེ་ཤ་ན་མ་ཧོ༔ ས་མ་ཡ་བི་ཤུདྡྷེ་ཨཱཿ བདག་གནས་ཡོ་བྱད་བྱིན་ཆེན་འབེབས༔ ཧཱུྃ༔ ཆོས་སྐུའི་དབྱིངས་ནས་གཟུགས་ཀྱི་སྐུར་བཞེངས་པའི༔ སྐུ་གསུང་ཐུགས་ཀྱི་བྱིན་རླབས་རྨད་པོ་ཆེ༔ སྣོད་བཅུད་བདག་གནས་ཡོ་བྱད་ཐམས་ཅད་ཀུན༔ ཡེ་ཤེས་འཁོར་ལོ་ཆེན་པོར་བྱིན་རློབས་ཤིག༔ ཨོཾ་སརྦ་ཛྙཱ་ན་ཨ་དྷིཥྛ་ན་ཨཱ་བེ་ཤ་ཡ་ཛ་ཧོཿ ཕྱི་ནང་གསང་མཆོད་ཡོངས་སུ་བརླབ༔ ཧཱུྃ༔ ཡི་གེ་ལྷ་དང་ཡེ་ཤེས་འཕྲོ་འདུ་ཡིས༔ སྣོད་བཅུད་བདུད་རྩིའི་རྒྱ་མཚོར་ཨོཾ་ཨཱཿཧཱུྃ༔ གིརྟི་ཁྲོ་མོའི་སྟོབས་ཀྱིས་དམར་

ཆེན་ཁྲག༔ རཀྟའི་རྒྱ་མཚོ་གསལ་སྟོང་རྦ་ཀློང་འཁྱིལ༔ ཧཱུྃ་ཧཱུྃ་ཧཱུྃ༔ འཇིག་རྟེན་ལྷ་མིའི་ཟས་མཆོག་རི་ལྟར་སྤུངས༔ ཡེ་ཤེས་འདོད་ཡོན་ལྷུན་པོའི་ལྟོས་དང་མཉམ༔ བྷྲཱུྃ་ཧཱུྃ་ཧ་ཧོ་ཧྲཱིཿ ཨཱཿ སྣོད་བཅུད་རྣམ་དག་ཕྱི་ནང་གསང་བ་ཡི༔ མཚན་ལྡན་སྦྱོར་སྒྲོལ་ཡུལ་དང་མཆོད་པའི་རྫས༔ ཀུན་བཟང་རྣམ་ཐར་རྒྱས་ཤིང་འཕྲོ་བར་གྱུར༔ ཨོཾ་ཨཱཿཧཱུྃ༔ བཛྲ་སྥ་ར་ཎ་ཁཾ༔ རང་རིག་རང་གསལ་དམ་བཅའ་བཟུང་༔ ཧཱུྃ༔ འབྱུང་བ་སྣོད་བཅུད་ཡེ་ནས་ཞིང་ཁམས་དང་༔ གཞལ་ཡས་ཕུང་ཁམས་ལུས་ནི་དམ་ཚིག་ལྷ༔ སེམས་ཉིད་ཉོན་མོངས་རང་བཞིན་ཡེ་ཤེས་པ༔ ཡིན་ལ་ཡིན་བཞིན་ཇི་སྲིད་མི་བཏང་བཟུང་༔ བཛྲ་ས་མ་དྷི་ཧཱུྃ༔ དེ་དག་སྔོན་འགྲོའི་རིམ་པའོ༔ ས་མ་ཡ༔ འབར་བའི་རྡོ་རྗེའི་གཏེར་མའོ།། །།

དཔལ་ཆེན་རྡོ་རྗེ་གཞོན་ནུའི་གསང་སྒྲུབ་ཕྲིན་ལས་ལམ་ཁྱེར་སྙིང་པོ་ཀུན་འདུས་མཚོ་རྒྱལ་གོང་ཁུག་མ། བདེ་ཆེན་འབར་བའི་རྡོ་རྗེ།

༁ྃ༔ དཔལ་ཆེན་རྡོ་རྗེ་གཞོན་ནུའི་གསང་སྒྲུབ་ཕྲིན་ལས་ལམ་ཁྱེར་སྙིང་པོ་ཀུན་འདུས་མཚོ་རྒྱལ་གོང་ཁུག་མ་བཞུགས་སོ༔

དཔལ་ཆེན་རྡོ་རྗེ་གཞོན་ནུ་ཡི༔ གསང་བའི་སྒྲུབ་ཐབས་ཟབ་མོ་བསྟན༔ སྤྲོས་མེད་ཚུལ་གྱིས་ཉམས་ལེན་བྱ༔ སྦྱོར་བ་ཚོགས་བསགས་སྔོན་སོང་ནས༔ བདག་ཉིད་ལྷ་ཡི་རྣལ་འབྱོར་བསྒོམ༔ ཧཱུྃ༔ སྟོང་ཉིད་རྡོ་རྗེ་སྙིང་རྗེས་ཤུགས་ཀྱིས་ཁྲོས༔ ཞེ་སྡང་སྣང་བའི་ཀུན་རྟོག་གཟུང་འཛིན་གཅོད༔ འབར་བའི་མཚོན་ཆེན་སྔོན་པོ་ཧཱུྃ་གིས་མཚན༔ གཉིས་མེད་སྲིད་ཞིའི་སྲོག་སྒོར་ལམ་གྱིས་ཤར༔ འོད་ཀྱིས་སྣོད་བཅུད་དངོས་མཚན་བག་ཆགས་སྦྱངས༔ དག་པ་རྡོ་རྗེའི་དུར་ཁྲོད་འབར་བའི་དབུས༔ ཕ་ལམ་བྲག་ཆེན་པད་ཉི་བདུད་བཞི་དང་༔ ལྷ་ཆེན་

ཕོ་མོ་བྱི་ཆིངས་བསྣོལ་བའི་སྟེང་༔ རྒྱུ་ཡི་ཕྱག་མཚན་ཡི་གེའི་འཕྲོ་འདུ་ཡིས༔ མི་བསྐྱོད་ངོ་བོ་དཔལ་ཆེན་ཁྲོ་བོའི་རྒྱལ༔ རྡོ་རྗེ་གཞོན་ནུ་མཐིང་ནག་ཞལ་གསུམ་པ༔ དཀར་དམར་སྐུ་གསུམ་ཐེག་དགུའི་ཡེ་ཤེས་སྤྱན༔ རྒྱུད་དྲུག་འཇོམས་པའི་འཐོར་རླུང་ཤངས་ནས་འབུད༔ ཁམས་གསུམ་གསོལ་བའི་ཞལ་གདངས་ཉོན་མོངས་དྲུག༔ ཟ་བྱེད་ཕ་རོལ་ཕྱིན་པའི་མཆེ་བ་རྔམ༔ མངོན་ཤེས་སྙན་ལ་ཐེག་གསུམ་སྒྲོགས་པའི་ལྗགས༔ མ་འདྲེས་བཅོ་བརྒྱད་སྨར་སྨིན་བྱང་ཕྱོགས་ཆོས༔ སྨར་ཆུན་ཀུན་

ཀྱང་ཡེ་ཤེས་མེ་རུ་འབར༔ བྱེ་བ་ཐེར་འབུམ་དབུ་སྐྲ་དུས་གསུམ་གྱི༔ རྟོག་ཚོགས་དག་ཕྱིར་འབར་འཆིང་ལྕང་ལོར་གྲོལ༔ རྡོ་རྗེ་རིགས་ཀྱི་གཙུག་ཏོར་མི་བསྐྱོད་མཚན༔ ཡེ་ཤེས་རིགས་དྲུག་ཕྱག་ནི་རྣམ་པར་འགྱུར༔ དང་པོས་རྩེ་དགུའི་ས་དགུ་ཟིལ་གྱིས་གནོན༔ ཡེ་ཤེས་མེ་ཕུང་འཁོར་བའི་ལས་ཉོན་བསྲེགས༔ བར་པས་རྡོ་རྗེ་རྩེ་ལྔས་དུག་ལྔ་འཇོམས༔ ཁ་ཊྭཱཾ་ཁམས་གསུམ་རུ་དྲའི་སྡེ་ཚོགས་འདུལ༔ མཐའ་གཉིས་རི་རབ་ཕུར་བུས་སྲིད་གསུམ་སྒྲོལ༔ དུར་ཁྲོད་ཆས་བརྒྱད་འཕགས་ལམ་ཡན་ལག་རྫོགས༔ དཔལ་གྱི་ཆས་བཅུ་སྟོབས་བཅུའི་ཕ་རོལ་སོན༔ འབར་བའི་དབུ་རྒྱན་སྙན་མགུལ་ལྷུ་ཚིགས་སོགས༔ སྐུ་ལ་སྤྲས་ཤིང་འཁོར་ལོ་རྒྱས་འདེབས་ཡུམ༔ ཁམས་གསུམ་སྒྲོལ་མཛད་ཨུཏྤལ་དུང་ཁྲག་སྟོབ༔ ཁྲོ་མོ་འབར་བའི་ཆས་ལྡན་སྐུ་ལ་འཁྲིལ༔ ཚད་མེད་བསྡུ་བཞིའི་ཞབས་ཀྱིས་ལྷ་ཆེན་

སྟེང་༔ སྲིད་ཞིར་ཆགས་ཐོགས་མེད་པའི་བརྐྱང་བསྐུམ་རོལ༔ ཡེ་ཤེས་མེ་སྤྲིན་འབར་བའི་ཀློང་དུ་གསལ༔ སྤྲུལ་པའི་ཡེ་ཤེས་ཁྱུང་ཆེན་ཀླད་ན་ལྡིང་༔ སྤྱི་བོར་ཧཱུྃ་ཀཱ་ར་དང་སྒྲ་འབྱིན་ཡུམ༔ དཔྲལ་བར་རྣམ་པར་རྒྱལ་དང་རྡོ་རྗེ་སྙེམས༔ དཔུང་གཡས་གཤིན་རྗེའི་གཤེད་དང་དུར་ཁྲོད་བདག༔ མགྲིན་པར་པདྨ་དབང་ཆེན་རྡོ་རྗེ་གཏུམ༔ སྲིད་ལྟེར་བདུད་རྩི་འཁྱིལ་དང་རླུང་འབྱིན་མ༔ དཔུང་གཡོན་དབྱུག་པ་སྔོན་པོ་སྡེར་མོ་ཡུམ༔ ལྟེ་བར་མི་གཡོ་རྡོ་རྗེ་གཏུན་ཁུང་མ༔ བརླ་གཡས་གཞན་གྱིས་མི་ཐུབ་མདའ་སྙེམས་ཡུམ༔ བརླ་གཡོན་ཁམས་གསུམ་རྣམ་རྒྱལ་གསོད་བྱེད་མ༔ གསང་བར་སྟོབས་པོ་ཆེ་དང་སྤྱོད་བྱེད་ཡུམ༔ སྣ་ཚོགས་མདོག་ཅན་ཁྲོ་གཏུམ་དུར་ཁྲོད་ཆས༔ རང་རང་ཕྱག་མཚན་གཡས་དང་ཕུར་བུ་གཡོན༔ གནས་རྣམས་ཐད་ཀྱི་ཕྱི་རོལ་གཡས་གཡོན་ནས༔ སྤྲུལ་པའི་

ཁྲ་ཕྱག་ཟ་གསོད་རྡུལ་ལྟར་འཁྲུགས༔ གནས་ལྔའི་སྐུ་ཡི་བ་སྤུའི་བུ་ག་ནས༔ སྲས་མཆོག་ཁྲོ་བོའི་ཚྭ་ཚྭ་སྐར་ལྟར་འཕྲོ༔ ཡན་ལག་མཐིལ་བཞི་སྒོ་མ་གདོང་ཅན་བཞི༔ ཕྱི་རོལ་ཤྭ་ན་ཕུར་སྲུང་དམ་ཅན་ཚོགས༔ ཕྲིན་ལས་ཐོགས་མེད་རླུང་དང་གློག་བཞིན་མྱུར༔ ཀུན་ཀྱང་སྣང་ལ་རང་བཞིན་མ་གྲུབ་པར༔ དངོས་མིན་མངོན་སུམ་བར་སྣང་འཇའ་ལྟར་གསལ༔ རྒྱལ་བའི་བྱིན་རླབས་གནས་གསུམ་ཨོཾ་ཨཱཿཧཱུྃ༔ རིགས་ལྔས་དབང་བསྐུར་གནས་ལྔར་འབྲུ་མཆོག་བཅུའི༔ རྒྱས་གདབ་དྲི་སྦྱངས་ཕུང་པོ་ཉོན་མོངས་ཁམས༔ ཡེ་ཤེས་ལྔར་བྱས་མི་བསྐྱོད་དབུ་ལ་བརྒྱན༔ ཐུགས་སྲོག་འོད་ཀྱིས་འོག་མིན་ཕྱོགས་བཅུའི་ཞིང་༔ འབར་བའི་དུར་ཁྲོད་རྣམས་ནས་དཔལ་ཆེན་པོའི༔ དཀྱིལ་འཁོར་ལྷ་ཚོགས་སྤྱན་དྲངས་དབྱེར་མེད་ཐིམ༔ ཧཱུྃ༔ ཆོས་དབྱིངས་རོལ་པ་འོག་མིན་ཞིང་ཁམས་ནས༔ སྐྱེ་མེད་

སྐྱེ་བའི་ཆོ་འཕྲུལ་དཔལ་ཆེན་ལྷ༔ མ་གཡེལ་ཐུགས་དམ་གཉེན་པོ་རྗེས་དགོངས་ལ༔ སྲིད་པ་ཕུར་བུ་བསྒྲུབ་ཕྱིར་གཤེགས་སུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་ས་པཱ་རི་ཝ་ར་བཛྲ་ས་མ་ཡ་ཛ༔ ཛཿཧཱུྃ་བྃ་ཧོ༔ བཛྲ་ན་མ་ཧཿ ཏིཥྛ་ལྷན༔ ཧཱུྃ༔ དུར་ཁྲོད་རོལ་པའི་ཞིང་ཁམས་བཀོད་ལེགས་འདིར༔ ལྷ་རྫས་ཕྱི་ཡི་ཉེར་སྤྱོད་ཚར་དུ་དངར༔ དྲག་པོའི་འདོད་ཡོན་ཁྲག་འཐུང་དགྱེས་པའི་རྫས༔ སྨན་རཀ་གཏོར་མ་བསྒྲལ་བྱ་ཞིང་གི་རྟེན༔ སྒྲོལ་བྱེད་མངོན་སྤྱོད་སྤྱན་གཟིགས་དགའ་བ་བཞིའི༔ སྦྱོར་ཡུལ་མཚན་ལྡན་གར་དང་སྤྲོས་པའི་མཐའ༔ དབྱེར་མེད་ཟུང་འཇུག་དེ་ཁོ་ན་ཡིས་མཆོད༔ ཨོཾ་བཛྲ་ཨརྒྷཾ་པཱདྱཾ་སོགས།ཤབྟ་པྲ་ཏཱིཙྪ་པཱུ་ཛ་ཧོ༔ བཛྲ་རཱུ་པ་ཤབྟ་གནྡྷེ་རཱ་ས་སྤརྴེ་པཱུ་ཛ་པཉྩ་རཀྟ་བ་ལིང་ཏ་ཏ་ན་ག་ན་མ་ཧཱ་སུ་ཁ་དྷརྨ་དྷཱ་ཏུ་ཨཱཿཧོ༔ ཧཱུྃཿ ཆོས་དབྱིངས་ཀློང་ནས་འབར་བ་ཆེན་པོའི་

སྐུ༔ རྡོ་རྗེ་གཞོན་ནུ་འཁོར་ལོ་རྒྱས་འདེབས་ཡུམ༔ སྟོབས་བཅུ་ཁྲོ་རྒྱལ་དགེ་བཅུ་ཁྲོ་མོའི་ཚོགས༔ སྐུ་ལྔའི་སྲས་མཆོག་སྒོ་མར་བཅས་ལ་བསྟོད༔ དཔལ་གྱི་དཀྱིལ་འཁོར་གར་དགུའི་རོལ་པའི་ལྷ༔ རྡོ་རྗེ་ཕྲ་མེན་ཚོགས་དང་ཤྭ་ན་བཞི༔ རེ་ཏི་བསྭེ་མོ་གིང་ཆེན་སྲུང་མར་བཅས༔ རྡོ་རྗེ་ཕུར་པའི་དཀྱིལ་འཁོར་ལྷ་ལ་བསྟོད༔ ཐུགས་མཆོག་ཙིཏྟ་ཟུར་བརྒྱད་པ༔ འོད་ཀྱི་རང་བཞིན་དེ་ཡི་དབུས༔ པད་ཟླར་མི་བསྐྱོད་རྡོར་སེམས་དཀར༔ ཡུམ་བཅས་ལོངས་སྤྱོད་རྫོགས་སྐུའི་ཆས༔ ཐུགས་དབུས་ཉི་མར་ཧཱུྃ་མཐིང་ལ༔ རྩ་སྔགས་གཡས་བསྐོར་ཤིན་ཏུ་གསལ༔ རང་སྒྲ་སྒྲོགས་ཅིང་འཁོར་བའི་འོད༔ འཕྲོས་པས་རྒྱལ་མཆོད་བྱིན་ནུས་བསྡུས༔ སླར་འཕྲོས་སྣོད་ཀྱི་རྒུད་པ་བསལ༔ བཅུད་ཀྱི་སེམས་ཅན་ལས་སྒྲིབ་སྦྱངས༔ དཀོན་མཆོག་རྩ་གསུམ་ཐུགས་དམ་བསྐུལ༔ མ་མོ་མཁའ་འགྲོ་དབང་

དུ་བསྡུས༔ སྲུང་མ་དམ་ཅན་བྲན་དུ་བཀོད༔ དྲེགས་ཚོགས་ཚར་བཅད་ནུས་རྩལ་བསྡུས༔ སྣང་གྲགས་རྟོག་པ་ལྷ་དང་སྔགས༔ ཡེ་ཤེས་མཆོག་གི་རོལ་པར་བལྟ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བཾ་ཧཱུྃ་ཕཊ༔ བསྙེན་སྒྲུབ་ལས་སྦྱོར་དམིགས་པ་བྱ༔ ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ་ཛ་ཡེ་བི་ཛ་ཡེ་ཨ་ཛི་ཏི་ཨ་པ་ར་ཛི་ཏེ་མཱ་ར་སེ་ན་པྲ་མཱརྡྷ་ན་ཡེ་སརྦ་བིགྷྣན་བཾ་ཧཱུྃ་ཕཊ༔ སྐབས་སུ་གཞི་སྙིང་ཆིག་དྲིལ་བཟླ༔ སྣང་བའི་གཟུང་འཛིན་སྟོང་པས་གཅོད༔ སྲིད་བཅུད་ལྷ་སྔགས་འཁོར་ལོར་བལྟ༔ ཟག་མེད་ཐིག་ལེ་བདེ་བ་ཆེ༔ རང་རིག་ཀ་དག་གཏིང་གསལ་ངང་༔ ཐམས་ཅད་བསལ་བཞག་བྲལ་བར་སྤྱོད༔ རྡོ་རྗེ་གཞོན་ནུ་ཚེ་འདིར་འགྲུབ༔ ཐུན་མཚམས་བར་ཆད་སེལ་བ་དང་༔ དངོས་གྲུབ་ཐོབ་ཕྱིར་གཏོར་མ་འབུལ༔ ཤ་ཁྲག་བཤོས་བུ་ཟས་སྣ་བསགས༔ སྨན་འབྲུ་རིན་ཆེན་སྦྱར་བ་བཤམ༔ རྃ་ཡྃ་ཁྃ༔ ཨོཾ་ཨཱཿཧཱུྃ༔ ན་མཿསརྦ་ཏ་ཐཱ་ག་ཏ་བྷྱོ་སོགས་ཀྱིས་བསང་སྦྱང་སྔགས་རྒྱས་བྱིན་གྱིས་བརླབ༔ ཨོཾ་ཤྲཱི་བཛྲ་ཀུ་མ་ར་དྷརྨ་པཱ་ལ་

ས་པཱ་རི་ཝ་ར་བཛྲ་ས་མཱ་ཛཿ ས་མ་ཡ་ཧཱུྃཿ ཏིཥྛ་ལྷན༔ གཏོར་མགྲོན་སྔགས་ཀྱིས་སྤྱན་དྲངས་ནས༔ ལྗགས་མཚོན་ཆའི་སྦུ་གུས་གཏོར་མའི་བཅུད་དྲངས་ཏེ་གསོལ་བས་དགྱེས་ཤིང་ཚིམ་ནས་འདོད་པའི་དོན་གང་བཅོལ་ཐོགས་མེད་དུ་མཛད་པར་གྱུར༔ ཨོཾ་ཤྲཱི་བཛྲ་ཀུ་མ་ར་ས་པཱ་རི་ཝ་ར་གྲྀ་ཧྣན་ཏུ་བ་ལིང་ཏ་ཁ་ཁ་ཁཱ་ཧི༔ མ་མ་རཀྵནྟུ་སརྦ་སིངྡྷིམྨེ་པྲ་ཡཙྪནྟུ་སྭཱ་ཧཱ༔ ཨོཾ་བཛྲ་ཀཱི་ལི་ཀཱི་ལ་ཡ་དིཔྟ་ཙཀྲ་ས་པཱ་རི་ཝ་ར་གྲྀ་ཧྣན་ཏུ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ མ་མ་རཀྵནྟུ་སརྦ་སིངྡྷིམྨེ་པྲ་ཡཙྪནྟུ་སྭཱ་ཧཱ༔ ཨོཾ་ཤྲཱི་བཛྲ་ཀྲོ་དྷ་ད་ཤ་ཀྲོ་དྷི་ས་པཱ་རི་ཝ་ར་གྲྀ་ཧྣན་ཏུ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ མ་མ་རཀྵནྟུ་སརྦ་སིངྡྷིམྨེ་པྲ་ཡཙྪནྟུ་སྭཱ་ཧཱ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་དྷརྨ་པཱ་ལ་ས་པཱ་རི་ཝ་ར་གྲྀ་ཧྣན་ཏུ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ མ་མ་རཀྵནྟུ་སརྦ་སིངྡྷིམྨེ་པྲ་ཡཙྪནྟུ་སྭཱ་ཧཱ༔ སྔགས་དང་ཕྱག་རྒྱས་ལན་གྲངས་འབུལ། མ་ཧཱ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔

ཨརྒྷཾ་པཱདྱཾ་ནས་ཤབྟ་པྲ་ཏཱིཙྪ་སྭཱ་ཧཱ༔ སྨན་རཀ་ཉེར་སྤྱོད་རྣམས་ཀྱིས་མཆོད༔ བསྟོད་ཅིང་ཕྲིན་ལས་གསོལ་བར་བྱ༔ ཧཱུྃ༔ དབྱིངས་ནས་ཡེ་ཤེས་འབར་བའི་སྐུར་སྟོན་པ༔ རྡོ་རྗེ་གཞོན་ནུ་འཁོར་ལོ་རྒྱས་འདེབས་ཡུམ༔ ཁྲོ་བཅུ་ཡབ་ཡུམ་སྲས་མཆོག་སྒོ་མ་བཞི༔ འབར་བ་དཔལ་གྱི་དཀྱིལ་འཁོར་ལྷ་ལ་བསྟོད༔ སྙིང་རྗེའི་ཤུགས་ཀྱིས་མ་རུངས་བདུད་ལ་ཁྲོས༔ ཐུགས་རྗེས་མཐུ་ཡིས་ལྷ་རྣམས་ཟིལ་གྱིས་གནོན༔ དྲག་གཏུམ་རྩལ་གྱིས་འཇིག་རྟེན་ཐལ་བར་བརླག༔ མ་ཧཱ་ཀཱ་ལ་ཤྭ་ནར་ཕྱག་འཚལ་བསྟོད༔ ཤེས་བཅུའི་དབྱིངས་དང་ཡེ་ཤེས་རོལ་པ་ལས༔ ཁྲོས་འཁྲུགས་དྲག་ཏུ་ཁྲོས་པའི་སེང་ཧ་བཅུ༔ གཏུམ་དྲག་ཁྲོ་མོ་མི་བསྲུན་ཁྱི་ཞལ་བཅུ༔ ཕྲ་མེན་ཁྲོ་བཅུ་སྲས་དང་བཅས་ལ་བསྟོད༔ རལ་པའི་གསེབ་དང་སྐུ་ཡི་གནས་རྣམས་ནས༔ སྤྲུལ་པའི་ཟ་གསོད་ཁྲོ་ཆུང་སེར་ལྟར་འབེབས༔ རྣོ་ངར་མཚོན་ཆས་

དྲེགས་ཚོགས་སྲོག་རྩ་གཅོད༔ ཐུགས་རྗེ་ཐབས་མཁས་ཤྭ་ནའི་ཚོགས་ལ་བསྟོད༔ ཡང་སྤྲུལ་མ་མོ་ཤྭ་ན་མཆེད་བཞི་དང་༔ བདག་ཉིད་མ་བཞི་ས་བདག་བསྭེ་མོ་བཞི༔ སྐྱེས་བུ་གིང་བཞི་དབང་ཕྱུག་དགེ་བསྙེན་བཅས༔ སྐུ་གསུང་ཐུགས་ཀྱི་རོལ་པ་རྣམས་ལ་བསྟོད༔ ཉིང་སྤྲུལ་ཁྱི་སྤྱང་བྱ་གཅན་དྲེགས་པའི་ཚོགས༔ མོན་པ་ཤན་པ་ལྷ་དང་འབྱུང་པོར་བཅས༔ རྡོ་རྗེ་ཕུར་པའི་སྲུང་མ་ཐམས་ཅད་ལ༔ སྒོ་གསུམ་རབ་ཏུ་དང་བས་བདག་བསྟོད་དོ༔ བདག་ཅག་རིག་འཛིན་བསྟན་དང་བླ་མར་བཅས༔ སྲུང་ཞིང་སྐྱོབ་མཛད་རྟག་ཏུ་འགོ་བའི་ལྷ༔ ཡེ་ཤེས་འཇིག་རྟེན་རྡོ་རྗེ་ཕྲ་མེན་ཚོགས༔ དམ་ཚིག་གཉན་པོའི་མཆོད་གཏོར་འདི་བཞེས་ལ༔ དུས་རྣམས་རྟག་ཏུ་མི་འབྲལ་སྲུང་སྐྱོབས་མཛོད༔ ནད་མཚོན་མུ་གེ་དུས་འཁྲུག་བར་ཆད་རྐྱེན༔ བཙའ་སད་སེར་བ་ལོ་ནད་འབྱུང་བ་འཁྲུགས༔ སྣོད་བཅུད་རྒུད་པ་

ཞི་བའི་ཕྲིན་ལས་མཛོད༔ སྐུ་གསུམ་བདེ་ཞིང་ཚེ་བསོད་སྙན་གྲགས་དཔལ༔ འབྲུ་ནོར་ལོངས་སྤྱོད་རྟ་ཕྱུགས་རྐང་འགྲོ་སོགས༔ འཁོར་དང་ལེགས་ཚོགས་སྤེལ་བའི་ཕྲིན་ལས་མཛོད༔ ཡེ་ཤེས་ཡོན་ཏན་མཁྱེན་བརྩེ་ནུས་མཐུ་རྩལ༔ མཆོག་དམན་འགྲོ་བ་མོས་བཞིའི་སྣང་བ་དང་༔ འདོད་རྒུ་དབང་དུ་སྡུད་པའི་ཕྲིན་ལས་མཛོད༔ གཟུགས་ཅན་དགྲ་ཇག་ཆོམ་རྐུན་གཅན་གཟན་དང་༔ གཟུགས་མེད་བགེགས་དང་གློ་བོར་ཡེ་འདྲོགས་གདོན༔ མི་མཐུན་གནོད་པ་སྒྲོལ་བའི་ཕྲིན་ལས་མཛོད༔ ཚེ་འདིར་རྡོ་རྗེའི་སྲུང་མས་རྟག་ཏུ་སྐྱོབས༔ བར་དོར་དཔལ་གྱི་ལྷ་ཚོགས་ཞལ་མཐོང་ནས༔ ཕྱི་མ་འོག་མིན་ཞིང་དུ་སྐྱེལ་མཛད་གསོལ༔ མདོར་ན་སྐྱེ་བ་ཚེ་རབས་ཀུན་ཏུ་ཡང་༔ འདྲེན་པ་གཞན་གྱིས་དྲིང་ལ་མ་བཞག་པར༔ རྡོ་རྗེ་དཔལ་གྱི་ཐུགས་རྗེས་རྟག་འཚོ་ཞིང་༔ ཧེ་རུ་ཀ་དཔལ་

མཆོག་ཏུ་འགྲུབ་པར་མཛོད༔ ཅེས་གསོལ་ཕྲིན་ལས་ཡང་ཡང་བཅོལ༔ གཏོར་མགྲོན་ཡེ་ཤེས་པ་རྣམས་བརྟན་བཞུགས་གསོལ༔ འཇིག་རྟེན་པ་ཀུན་རང་གནས་བདེ་བར་གཤེགས༔ དམ་ཚིག་སྣོད་བཅུད་དཀྱིལ་འཁོར་རང་ལ་བསྡུ༔ རང་ཡང་ཐུགས་སྲོག་དེ་ཉིད་ནཱ་དར་ཡལ༔ མི་དམིགས་སྟོང་ཉིད་ཆོས་སྐུ་ཁྱབ་བརྡལ་ཆེ༔ སླར་ཡང་ཟུང་འཇུག་རྡོ་རྗེའི་གཟུགས་ཀྱི་སྐུ༔ དཔལ་ཆེན་ཡབ་ཡུམ་སྐུར་གསལ་གནས་གསུམ་དུ༔ འབྲུ་གསུམ་རྒྱས་གདབ་རྡོ་རྗེའི་གོ་ཆ་བགོ༔ གཞོམ་མེད་གསང་གསུམ་འགྲོ་དོན་བྱེད་པར་གྱུར༔ བསྐྱེད་སྔགས་དཀྱིལ་འཁོར་གསུམ་གྱི་ཕྲིན་ལས་སྒྲུབ༔ རྫོགས་པ་སྙིང་རྗེས་ཐབས་དང་རྩ་ཐིག་རླུང་༔ ཕུར་བཞིའི་དགོངས་སྤྱོད་མངོན་གྱུར་གདིང་ཚད་ལོང་༔ ཐལ་འབྱིན་དབྱིངས་རིག་མཐར་ཕྱིན་འགྲུབ་པར་ཤོག༔ བརྒྱུད་གསུམ་བླ་མའི་བྱིན་རླབས་ཐུགས་རྗེའི་སྤྲིན༔ རྡོ་རྗེ་གཞོན་

ནུའི་གྲུབ་གཉིས་མཆོག་ཆར་འབེབས༔ མཁའ་འགྲོའི་ཕྲིན་ལས་འདོད་རྒུའི་ལོ་ཏོག་འཁྲུངས༔ མཆོག་ཐུན་འབྲས་བུ་སྨིན་པའི་བཀྲ་ཤིས་ཤོག༔ གུ་རུ་པདྨའི་མན་ངག་འདི༔ སྙིང་ཁྲག་ལྟ་བུའི་གདམས་ཟབ་ཡིན༔ ཐུགས་རྗེས་བརྩེ་བས་བདག་ལ་གནང་༔ ཐུན་མོང་གཞན་དུ་ཡོད་མ་ཡིན༔ བདག་གི་གོང་ཁུག་མགུལ་པར་འཆང་༔ སླད་ནས་མ་འོངས་དོན་འགྲུབ་ཕྱིར༔ བཀའ་རྒྱས་གདབ་སྟེ་གཏེར་དུ་སྦས༔ ཐུགས་ཀྱི་སྲས་དང་འཕྲད་ནས་ཀྱང་༔ ཀུན་ལ་ཕན་པ་རྒྱ་ཆེན་ཤོག༔ ས་མ་ཡ༔ རྒྱ་རྒྱ་རྒྱ༔ བདེ་ཆེན་འབར་བའི་རྡོ་རྗེའི་གཏེར་མ་ཤིན་ཏུ་ཟབ་རྒྱ་དང་ལྡན་པ་ལགས་སོ།། །།

ཡི་དམ་དཔལ་ཆེན་ལྷ་རྣམས་ཀྱི་ཕྲིན་ལས་སྙིང་པོའི་མཇུག་ཆིངས། བདེ་ཆེན་འབར་བའི་རྡོ་རྗེ།

༁ྃ༔ ཡི་དམ་དཔལ་ཆེན་ལྷ་རྣམས་ཀྱི་ཕྲིན་ལས་སྙིང་པོའི་མཇུག་ཆིངས་བཞུགས་སོ༔

དཔལ་ཆེན་ཆེ་མཆོག་ལྷ་རྣམས་ཀྱི༔ ཕྲིན་ལས་མཇུག་གི་བྱ་བ་ལ༔ བསོད་ནམ་ཚོགས་ཀྱི་འཁོར་ལོ་ནི༔ བཟའ་བཏུང་འོས་པ་ཚང་ཚད་བཤམ༔ ༀ་ཨཱཿབིགྷྣན་ཏ་ཀྲི་ཏ་སརྦ་དུཥྚཾ་ཨུ་ཙ་ཊ་ཡ་ཕཊ༔ བགེགས་བསྐྲད། རྃ་ཡྃ་ཁྃ་གིས་བསང་༔ པདྨ་བྷནྡྷར་ཚོགས་རྫས་ཤ་ལྔ་དང་༔ བདུད་རྩིའི་རང་བཞིན་ཡེ་ཤེས་ལྔ་ཡི་རྒྱུན༔ སྦྱོར་སྒྲོལ་ཟག་མེད་ཐབས་ཤེས་བདེ་བའི་འཕྲུལ༔ འཕྲོ་འདུའི་འཁོར་འདས་དྭངས་བཅུད་བདུད་རྩིར་གྱུར༔ ཨོཾ་ཨཱཿཧཱུྃ༔ བྱིན་རླབས་ཚོགས་ཞིང་སྤྱན་འདྲེན་ནི༔ ཧཱུྃ༔ ཆོས་དབྱིངས་རོལ་པ་མེ་རི་འབར་བ་ན༔ རྒྱལ་བ་རབ་

འབྱམས་རྒྱལ་སྲས་བླ་མ་དང་༔ དཔལ་ཆེན་ཞི་དང་ཁྲོ་བོ་ཁྲོ་མོའི་ཚོགས༔ བཀའ་སྡོད་དམ་ཅན་རྒྱ་མཚོའི་ཚོགས་དང་བཅས༔ ཟག་མེད་འདོད་ཡོན་ཚོགས་མཆོད་བཞེས་སླད་དུ༔ མྱུར་དུ་འདིར་གཤེགས་ཚོགས་ཁང་གཞལ་ཡས་ཀྱི༔ བཀོད་པ་ཚད་མེད་འདིར་བཞུགས་འདོད་ཡོན་ལྔ༔ དགྱེས་དགུའི་མཆོད་པ་འདི་ལ་ད་རོལ་ཅིག༔ གུ་རུ་ཀ་མ་དཱེ་ཝ་ས་པཱ་རི་ཝ་ར་བཛྲ་ས་མ་ཛ༔ ས་མ་ཡ་སྟྭཾ༔ འདོད་ཡོན་སྤྲོ་ཞིང་ཚོགས་ཕུད་འབུལ༔ ཧཱུྃ༔ ཡེ་ཤེས་རོལ་པའི་ཚོགས་ཁང་ཆེན་པོ་འདིར༔ ཟག་མེད་འདོད་ཡོན་

བཟའ་བཅའ་རི་ལྟར་སྤུངས༔ རྨད་བྱུང་བཏུང་བའི་བདུད་རྩི་ལོངས་སྤྱོད་རྫས༔ ཚོགས་ཀྱི་མཆོད་པ་དཀྱིལ་འཁོར་ལྷ་ལ་འབུལ༔ སརྦ་ག་ཎ་ཙཀྲ་པཱུ་ཛ་ཧོ༔ བར་པས་མཆོད་པ་བསྐང་ཞིང་བཤགས༔ ཨཱཿ ངོ་མཚར་ཚོགས་ཀྱི་ལོངས་སྤྱོད་དཔག་མེད་འདིས༔ དཀྱིལ་འཁོར་ལྷ་ཚོགས་ཐུགས་དམ་བསྐང་བའི་མཐུས༔ དམ་ཚིག་ཉམས་ཆག་འགལ་འཁྲུལ་ཉེས་ལྟུང་ཀུན༔ བྱང་དག་ཚངས་པར་མཛད་ནས་དངོས་གྲུབ་སྩོལ༔ ས་མ་ཡ་བི་ཤུདྡྷེ་ཨཱཿ ཙམ་པོ་བ་ཡི་བསྒྲལ་སྟོབ་ནི༔ ཧཱུྃ༔ དཔལ་ཆེན་ཁྲག་འཐུང་ལྷ་ཚོགས་དུས་ལ་བབས༔ དམ་ཉམས་དགྲ་བགེགས་འཇིག་རྟེན་གར་གནས་ཀྱང་༔ ཕོ་ཉ་ཕྱག་རྒྱ་བཞི་ཡིས་མྱུར་དུ་ཁུག༔ དམིགས་པའི་རྟེན་ལ་གཉིས་སུ་མེད་པར་གྱུར༔ ཛཿཧཱུྃ་བྃ་ཧོ༔ ཧཱུྃ༔ ཡེ་ཤེས་ཐབས་ཀྱི་སྤྲུལ་པ་སྲས་མཆོག་གིས༔ སྒྲིབ་སྦྱངས་ཚེ་བསོད་བསྡུས་ནས་གནས་ངན་བསྒྲལ༔ རྟེན་བཞིའི་ཤ་ཁྲག་

བདུད་རྩིར་སྦར་བ་འདི༔ འབར་བ་དཀྱིལ་འཁོར་ལྷ་ཚོགས་ཞལ་དུ་བསྟབ༔ ཨོཾ་བཛྲ་ཀཱི་ལི་ཀཱི་ལ་ཡ་ཨ་བྷྲཱུྃ་ཧཱུྃ་ཕཊ༔ དགྲ་བགེགས་སརྦ་ཤ་ཏྲུན་མཱ་ར་ཡ་མཾ་ས་རཀྟ་ཀིང་ནི་རི་ཏི་ཁཱ་ཧི༔ ཞལ་དུ་བསྟབས་ནས་རྣལ་འབྱོར་རྣམས༔ ཚོགས་ལ་རོལ་ཕྱིར་འབུལ་ལེན་བྱ༔ ཧོ༔ དམ་ཚིག་མཆོག་ནི་འདུ་འབྲལ་མེད༔ རོ་མཉམ་མཆོད་པ་བཞེས་སུ་གསོལ༔ ཨ་ཧོ་མ་ཧཱ་སུ་ཁ་ཨ་ལ་ལ་ཧོ༔ ལྷག་མའི་དམ་ཚིག་གནས་གསུམ་བསྲེ༔ ཧཱུྃ༔ ཕུད་ཀྱིས་ལྷ་རྣམས་མཆོད་ཅིང་ཐུགས་དམ་བསྐང་༔ ཚོགས་ཀྱི་སློབ་དཔོན་མཆེད་ལྕམ་ཞལ་བསྲོས་ཚིམ༔ ལྷག་མ་དམ་ཚིག་གནས་བསྲེ་ཞལ་ཕྲུས་བསྟབ༔ འདོད་ཡོན་ཡེ་ཤེས་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱི༔ ལྷག་མགྲོན་སྤྱན་དྲངས་ལྷག་མ་བསྔོ༔ བྷྱོ༔ དཔལ་ཆེན་ཁྲག་འཐུང་ཆེན་པོའི་བཀའ་ཉན་ཅིང་༔ ཕྱི་རོལ་དཀྱིལ་འཁོར་མུ་རན་སྐྱོང་མཛད་པའི༔ དབང་ཕྱུག་མ་མོ་གིང་དང་ལངྐའི་

ཚོགས༔ ཐམས་ཅད་བཀའ་ཡི་ཕ་འབབ་འདི་ལོངས་ལ༔ དངོས་གྲུབ་སྒྲུབ་པའི་གྲོགས་དང་མཐུན་རྐྱེན་མཛོད༔ མི་མཐུན་བར་ཆད་རྐྱེན་སོལ་དགྲ་བགེགས་སྒྲོལ༔ དམ་སྲི་འབྱུང་པོ་ཐལ་བ་རྡུལ་དུ་རློགས༔ མོས་བཞིའི་སྣང་བ་འབྲུ་ནོར་ལོངས་སྤྱོད་བསྡུས༔ ཚེ་བསོད་དཔལ་འབྱོར་སྙན་གྲགས་ཡོན་ཏན་རྒྱས༔ དུས་ངན་གཡོ་འཁྲུགས་ནད་རིམས་མུ་གེ་བཟློག༔ མྱུར་མགྱོགས་ཕྲིན་ལས་གཉེན་པོ་ད་མཛོད་ཅིག༔ སརྦ་ཌཱ་ཀ་ཌཱ་ཀི་ནཱི་མ་མ་རཀྵ་ཨུཙྪིཥྚ་ཁ་ཁ་ཁཱ་ཧི༔ དེ་དག་ཚོགས་ཀྱི་ལས་རིམ་མོ༔ ཐ་ཚིག་ཆད་ཐོ་བསྒྲག་པ་ནི། ཧཱུྃ་བྷྱོ༔ དུས་གསུམ་སྤྲོས་པ་བྲལ་བ་དབྱིངས་ཀྱི་དུས༔ སྔོན་ཚེ་བར་དང་ཐ་མ་ད་ལྟའི་ཚེ༔ ཕུན་ཚོགས་ལྔ་ལྡན་འདུས་པའི་དུས་རྣམས་སུ༔ དབྱིངས་ཀྱི་སྲུང་མ་དཔའ་བོ་མཁའ་འགྲོ་དང་༔ ཕྱི་ནང་བཀའ་དང་གཏེར་སྲུང་རྒྱ་མཚོའི་ཚོགས༔ དཀར་ཕྱོགས་སྐྱོང་བའི་གཞི་གནས་ཡུལ་གྱི་

བདག༔ མ་ལུས་འཁོར་དང་བཅས་པ་ཐམས་ཅད་ཀྱིས༔ དམ་རྫས་བརྒྱན་པའི་གཏོར་མ་འདི་བཞེས་ལ༔ བཞེས་ནས་བརྒྱུད་གསུམ་བླ་མ་རིག་འཛིན་དང་༔ བཀའ་བབས་ལས་ཅན་སྟོན་པ་སྲས་སློབ་ཀྱི༔ སྤྱན་སྔར་དམ་བཅས་ཞལ་བཞེས་ཇི་བཞིན་དུ༔ དམ་ལས་མ་འདའ་སངས་རྒྱས་བསྟན་པ་སྲུངས༔ ཡམས་ནད་རིམས་ནད་མཚོན་འཁྲུགས་སྐལ་ངན་ཞི༔ ཚེ་དབང་ལོངས་སྤྱོད་སྤེལ་ལ་འདོད་དགུ་བསྡུས༔ འཁྲུགས་རྩོད་མ་རུངས་བདུད་དགྲའི་གཡུལ་ངོ་བཟློག༔ བདག་འཁོར་ལོངས་སྤྱོད་རྐྱེན་ངན་བར་ཆད་སྲུངས༔ ཇི་ལྟར་ཁས་བླངས་དམ་ལས་མ་འདའ་བར༔ བཅོལ་བའི་ཕྲིན་ལས་མྱུར་དུ་འགྲུབ་པར་མཛོད༔ བཤལ་ཆུ་བདུད་རྩིས་བསྟན་མ་མཆོད༔ ཧཱུྃ༔ བལ་ཡུལ་བོད་ཀྱི་ཚ་བའི་རོང་རྣམས་སུ༔ ཕྱི་ནང་སོ་ཁ་སྲུང་བའི་དམ་ཚིག་ཅན༔ བསྟན་མ་སྐྱོང་མ་ཡ་མའི་ཚོགས་བཅས་

རྣམས༔ དམ་ཚིག་བདུད་རྩིའི་བཤལ་ཆུ་འདི་བཞེས་ལ༔ མི་ཕྱུགས་དལ་ཡམས་བར་ཆད་རྐྱེན་ངན་ཞི༔ ཚེ་ནོར་འབྲུ་ཕྱུགས་རྒྱས་ཤིང་འདུ་བ་དང་༔ ལོ་དགྲ་དུས་འཁྲུགས་གཅན་གཟན་གནོད་པ་སྲུངས༔ དགྲ་གདོན་ཇག་རྐུན་ཐལ་བ་རྡུལ་དུ་རློག༔ བོད་ཡུལ་སོ་ཁ་སྲུང་བའི་ཕྲིན་ལས་མཛོད༔ མ་མ་ཧྲིང་ཧྲིང་ཏིཥྛནྟུ་བ་ལིངྟ་ཁཱ་ཧི༔ སརྦ་སིདྡྷི་རཀྵནྟུ་སྭཱ་ཧཱ༔ ལས་མཐའ་མནན་དང་རྟ་བྲོ་བརྡུང་༔ ཧཱུྃ༔ དཔལ་གྱི་སྤྲུལ་པས་མི་སྲུན་བདུད་དགྲ་བཀུག༔ རིམ་དགུ་འབྱུང་བའི་འོག་གཞིར་གཤིན་རྗེར་གཏད༔ གཏོར་སྣོད་རི་རབ་འབར་བས་དྲག་ཏུ་མནན༔ ཁྲོ་བོའི་བྲོ་ར་གཡས་སུ་བརྗིད་པར་བརྡུང་༔ ཁྲོ་མོའི་བྲོ་ར་གཡོན་དུ་འཁོར་མར་འཁྲབ༔ ཞི་བའི་གླུ་དབྱངས་རྡོ་རྗེའི་རྒྱ་ཡིས་གདབ༔ བྱང་སེམས་མ་སྐྱེས་བར་དུ་མ་ལྡང་ཞིག༔ གནོད་བྱེད་སརྦ་ཤ་ཏྲུཾ་ཛཿ མཱ་ར་ཡ༔ ཨོཾ་ལཱཾ༔ ཨཱ་ལཾ༔ ཧཱུྃ་ལཱཾ༔ སྟམ་བྷ་ཡ་ལཾ་ནན༔

གཏོར་གཞོང་ཡར་བཟེད་མེ་ཏོག་འཐོར༔ དེ་ནས་དངོས་གྲུབ་བླང་བར་བྱ༔ རང་རང་རྩ་སྔགས་བརྗོད་པའི་མཐར༔ སྐུ་གསུང་ཐུགས་རྟེན་སྤྱི་བོར་བླང་༔ དངོས་གྲུབ་བདུད་རྩི་ངག་ཏུ་མྱོང་༔ ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཛཿ ཀརྨ་སིདྡྷི་ཧོ༔ གཏང་རག་མཆོད་བསྟོད་ནོངས་པ་བཤགས༔ ཡེ་ཤེས་རང་གནས་གཤེགས་པའམ༔ རྟེན་ལ་བཞུགས་སོགས་སྐབས་དང་བསྟུན༔ སྣོད་བཅུད་ཚུར་འདུས་དམ་ཚིག་དཀྱིལ་འཁོར་ལ༔ དེ་ཡང་འཁོར་རྣམས་གཙོ་དང་གཙོ་བོ་ཉིད༔ ཐུགས་སྲོག་ཧཱུྃ་དང་ཧཱུྃ་ཡང་རིམ་པར་རྫོགས༔ ནཱ་ད་མི་དམིགས་ཁྱབ་བརྡལ་ངང་དུ་བཞག༔ ཨ་ཨ་ཨཱ༔ སླར་ཡང་སྐད་ཅིག་མཁའ་ལ་འཇའ་ཤར་ལྟར༔ གཙོ་བོའི་སྐུར་གསལ་གནས་གསུམ་ཡིག་འབྲུས་སྲུང་༔ རྡོ་རྗེའི་གོ་བགོས་གཞོམ་གཞིག་བྲལ་བའི་སྐུ༔ ནམ་མཁའ་ཇི་སྲིད་འགྲོ་བའི་དོན་བྱེད་གྱུར༔ ཕཊ༔ ཨོཾ་ཨཱཿཧཱུྃ༔ བསྡུ་ལྡང་རྒྱུན་སྤྱོད་སྨོན་ལམ་བྱ༔ སྤྱོད་ལམ་གཟུགས་སྣང་

ལྷ་དང་སྒྲ་གྲགས་སྔགས༔ དྲན་རྟོག་ཏིང་འཛིན་ཐུགས་ཀྱི་རོལ་པ་ལ༔ དབྱིངས་དང་ཡེ་ཤེས་དབྱེར་མེད་ཟུང་འཇུག་ཀློང་༔ རྡོ་རྗེའི་རྣལ་འབྱོར་ཡོངས་སུ་གྲུབ་པར་ཤོག༔ ཧོ༔ དུས་གསུམ་བསགས་པའི་དགེ་ཚོགས་མ་ལུས་དང་༔ དཔལ་ཆེན་རོལ་པའི་བསྐྱེད་སྔགས་རྫོགས་པའི་མཐུས༔ སྒོ་གསུམ་རྡོ་རྗེ་གསུམ་དུ་ཡོངས་སྨིན་ནས༔ གདུལ་བྱའི་འགྲོ་རྣམས་སྒྲོལ་བའི་དཔལ་དུ་ཤོག༔ ཤིས་པ་བརྗོད་ཅིང་མེ་ཏོག་འཐོར༔ བརྒྱུད་གསུམ་བླ་མའི་བྱིན་རླབས་ཐུགས་རྗེའི་སྤྲིན༔ རྡོ་རྗེ་གཞོན་ནུས་གྲུབ་གཉིས་ཆོས་ཆར་འབེབས༔ མཁའ་འགྲོའི་ཕྲིན་ལས་འདོད་དགུའི་ལོ་ཏོག་འཁྲུངས༔ མཆོག་ཐུན་འབྲས་བུ་སྨིན་པའི་བཀྲ་ཤིས་ཤོག༔ དེ་ལྟར་རྗེས་ཀྱི་བྱ་བ་ནི༔ ཕྲིན་ལས་མཇུག་གི་རིམ་པའོ༔ མངོན་རྟོགས་ཕྲིན་ལས་ཐམས་ཅད་ཀྱི༔ ཉམས་ལེན་རྣལ་འབྱོར་བྱེད་པའི་ཚེ༔ སྦྱོར་བ་འདི་ཉིད་ངེས་པར་དགོས༔ ས་མ་ཡ༔ རྒྱ་རྒྱ་རྒྱ༔ འབར་བའི་རྡོ་རྗེའི་གཏེར་མའོ། །དགེའོ།། །།

གསང་ཐིག་སྙིང་པོའི་སྐོར་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་ལྷ་ཁྲིད་རབ་གསལ་ཁྲག་འཐུང་དགྱེས་པའི་གད་རྒྱངས། ཀརྨ་དྲི་མེད་བློ་གྲོས།

༄༅། །གསང་ཐིག་སྙིང་པོའི་སྐོར་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་ལྷ་ཁྲིད་རབ་གསལ་ཁྲག་འཐུང་དགྱེས་པའི་གད་རྒྱངས་བཞུགས་སོ། །

ན་མོ་བཛྲ་ཀུ་མཱ་ར་ཡེ། མཆོག་ཏུ་མི་འགྱུར་ཆོས་ཀྱི་དབྱིངས་ནི་མཐའ་དང་བྲལ། །བདེ་ཆེན་ཡེ་ཤེས་ཁ་སྦྱོར་དཀྱིལ་འཁོར་ཀུན་བདག་གཙོ། །དམིགས་མེད་སྙིང་རྗེས་འགྲོ་ཀུན་རྗེས་སུ་བཟུང་བའི་ཕྱིར། །ཞིང་བཅུ་སྒྲོལ་མཛད་ཧེ་རུ་ཀཿདཔལ་དེ་ལ་འདུད། །ཅེས་དཀྱིལ་འཁོར་ཀུན་གྱི་ཁྱབ་བདག་བླ་མ་མཆོག་དང་དཔལ་ཆེན་པོ་རྡོ་རྗེ་གཞོན་ནུ་དབྱེར་མེད་པར་ཕྱག་འཚལ་ཞིང་གསོལ་བ་འདེབས་པ་སྔོན་དུ་འགྲོ་བས། གསང་ཐིག་སྙིང་པོའི་སྐོར་ལས་རྡོ་རྗེ་གཞོན་ནུ་ཕྱག་རྒྱ་གཅིག་པའི་བསྐྱེད་རྫོགས་སྤྲོས་མེད་རྒྱུན་གྱི་ཉམས་ལེན་ལྟ་བུའི་རེག་ཟིག་མདོར་བསྡུས་འབྲི་བ་ལ། ཐོག་མར་དད་བརྩོན་ཤེས་རབ་གསུམ་གྱི་སྒོ་ནས་སྔོན་འགྲོའི་རིམ་པ་རྒྱུད་ལ་འབྱོར་བ་གལ་པོ་ཆེ་ཡིན་ཞིང་། མདུན་དུ་རང་ལ་གསང་སྔགས་སྟོན་པའི་བླ་མ་དང་རྡོ་རྗེ་གཞོན་ནུ་གཙོ་འཁོར་དཔའ་བོ་

མཁའ་འགྲོ་སྤྲིན་གཏིབས་པ་ལྟར་སྐྱབས་ཡུལ་བསྒོམ་ཡང་ཆོག །ཡུལ་གྱི་ཡོན་ཏན་སོགས་དྲན་ཅིང་གདུང་ཤུགས་དང་བཅས་པས་ཚིག་དོན་དྲན་ན་འཐུས། གསར་རྙིང་གི་སྔོན་འགྲོ་སྤྱི་འགྲེས་རྒྱུད་སྦྱངས་ཟིན་པའི་དབང་དུ་བཏང་ནས། སྐྱབས་ཡུལ་སྤྲོས་བཅས་བསྒོམ་མི་དགོས། རྡོ་རྗེ་གཞོན་ནུ་ལ་ཐམས་ཅད་འདུས་ཤིང་འདིར་རྡོ་རྗེ་ཐེག་པ་གཞི་འབྲས་དབྱེར་མེད་འབྲས་བུའི་ངོ་བོ་སྣང་སྟོང་ཟུང་འཇུག་ཆོས་སྐུར་བལྟ་ཞིང་སྒོམ་པར་བྱེད་པ་ཡིན་ཏེ། བང་མཛོད་འཕྲུལ་ལྡེ་ལས། འབྲས་བུ་རྡོ་རྗེ་ཐེག་པ་ནི། །ཕྱག་རྒྱའི་དཀྱིལ་འཁོར་ལམ་བྱས་ནས། །འབྲས་བུ་དེ་ཉིད་ལམ་དུ་ཁྱེར། །རང་གི་ལུས་ངག་ཡིད་གསུམ་ནི། །སྐུ་གསུང་ཐུགས་ཀྱི་རྡོ་རྗེར་སྦྱོར། །དེ་རིག་རྡོ་རྗེ་ཐེག་པར་བཏགས། །ཞེས་གསུངས་པ་ལྟར། དོན་དམ་ངོ་བོ་ཉིད་ཀྱི་སྐྱབས་

འགྲོ་དང་སེམས་བསྐྱེད་པའོ། །ཕྱིའི་བླ་མ་བཞིའམ་དྲུག་སོགས་ལ་ཡིད་ཆེས་ཀྱི་དད་པ་བརྟན་པོས་ལམ་གྱི་རྩ་བ་བཤེས་གཉེན་བསྟེན་ཚུལ་མདོ་རྒྱུད་བསྟན་བཅོས་ཀུན་དང་། རྒྱ་བོད་གྲུབ་ཐོབ་གོང་མའི་རྣམ་ཐར་ལ་བསམ་གཞིག་བྱས་ཏེ་རང་རྒྱུད་ལ་སྦྱར། འདིར་ནི་སྐྱེ་འགག་གཉིས་མེད་ངོ་བོ་ཟུང་འཇུག་རང་རིག་དོན་གྱི་བླ་མ་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་སྣ་ཚོགས་སུ་འཆར་བ་སྤྲུལ་སྐུ་སྟེ་སྐུ་གསུམ་གྱི་བདག་ཉིད་ཀྱི་བླ་མ་མཐར་ཐུག་གི་སྐྱབས་གཅིག་པུ་རང་རིག་དོན་གྱི་ངོ་བོར་ཤེས་པ་དང་། ཧེ་རུ་ཀ་ཞེས་ཁྲག་འཐུང་སྟེ་ཡི་དམ་དང་། དེའང་ཕྱི་ཀུན་བརྟགས་ཀྱི་ཡི་དམ་ཞི་བ་དང་ཁྲོ་བོ་སོགས་དཀྱིལ་འཁོར་རབ་འབྱམས། ནང་ལྟར་དུ་དུག་ལྔ་ཡེ་ཤེས་ལྔ། ཕུང་པོ་ལྔ་རྒྱལ་བ་རིགས་ལྔ། ཁམས་ལྔ་ཡུམ་ལྔ་སོགས་རང་ལུས་རྒྱལ་བའི་དཀྱིལ་འཁོར་དུ་དག་པ་དང་། གསང་བ་རང་རིག་རང་རྩལ་སྣང་གྲགས་ལྷའི་ངོ་བོ་སྟོང་པའི་རང་རྩལ་འགགས་མེད་དུ་ཤར་བ་དེ་ཀའོ། །མཁའ་འགྲོ་ལ་ཕྱིའི་མཁའ་འགྲོ་ཡུལ་ཉེར་བཞིའི་ཡེ་ཤེས་དང་ལས་ལས་གྲུབ་པ་དང་། ནང་གི་མཁའ་འགྲོ་འཁོར་ལོ་ལྔར་གནས་པའི་རྩ་ཐིག་རླུང་གསུམ། གསང་བ་རིག་རྩལ་མ་འགགས་པ་ཐབས་ཀྱི་ཆ་ཐམས་ཅད་དཔའ་བོ།

ཤེས་རབ་ཀྱི་ཆ་རང་བཞིན་སྟོང་པ་ཟུང་འཇུག་བདེ་བ་ཆེན་པོ་དཔའ་མོའི་ཚུལ་ལོ། །སྐྱབས་ཡུལ་རྒྱ་མཚོ་ཞེས་པ་ནི་མང་ཚིག་སྟེ་ཡོད་དོ་ཅོག་རྣམས་ལ། བྱང་ཆུབ་བར་དུ་ཞེས་པ། བྱང་ཆུབ་ཐོབ་ནས་སྐྱབས་མི་དགོས་པ་མ་ཡིན་ཡང་། མཐར་ཐུག་གི་སྐྱབས་སེམས་ཉིད་ཆོས་སྐུ་མངོན་པ་གྱུར་པ་ཡིན་པས་སྐྱབས་ཡུལ་དང་ཤེས་པ་ཡུལ་ཅན་དུ་མི་གནས་པའི་ཕྱིར་རོ། །དཔེར་ན་རྒྱལ་པོའི་ལྕགས་རི་ནས་ཕོ་བྲང་དུ་འགྲོ་འདོད་ན། ཕོ་བྲང་དུ་སླེབས་ཟིན་པའི་ཚེ་སླར་འགྲོ་མི་དགོས་པ་བཞིན་ནོ། །སེམས་ཅན་ཀུན་གྱི་དོན་བྱ་བའི་ནུས་པ་ད་ལྟ་བདག་ལ་མེད་པས་དེའི་ཕྱིར་དུ་རྫོགས་པའི་སངས་རྒྱས་ཀྱི་གོ་འཕང་འཐོབ་པར་བྱ། དེའི་ཆེད་དུ་བར་གཅོད་ཀྱི་བདུད་འདུལ་བའི་ཕྱིར། ཞེས་པ་བདུད་བཞི་སྟེ། འཆི་བདག་གི་བདུད། ཕུང་པོའི་བདུད། ཉོན་མོངས་པའི་བདུད། ལྷའི་བུའི་བདུད་རྣམས་འདུལ་བའི་ཕྱིར་དཔལ་ཆེན་ཧེ་རུ་ཀའི་གོ་འཕང་ཐོབ་པར་བྱ་ཞེས་པའི་དོན་ཏེ། དེའང་བར་གཅོད་ཀྱི་བདུད་ཐམས་ཅད་བསྡུ་ན། ཆོས་དང་གང་ཟག་གི་བདག་གཉིས་སུ་འདུས། སྤྱིར་ཆོས་ཐམས་ཅད་ཁམས་བཅོ་བརྒྱད་ལ་འདུས་ཤིང་། དེའང་བསྡུ་ན་སྐྱེ་མཆེད་བཅུ་གཉིས་ལ་འདུས། དེའང་བསྡུ་ན་ཕུང་པོ་ལྔར་འདུས་ལ། གང་ཟག་གི་

བདག་ནི་ངའོ་སྙམ་པའི་ངར་འཛིན། ཆོས་ཀྱི་བདག་ནི་ཕུང་པོ་ལྔས་བསྡུས་པའི་ཆོས་ཐམས་ཅད་བདེན་པར་འཛིན་པ་ཡིན་ནོ། །དེའང་བདག་མེད་ཅེས་པ། གཞི་གང་ཟག་གི་སྟེང་དུ་མེད་པ་གང་ཟག་གི་བདག་མེད། མིག་རྣ་སོགས་ཆོས་ཀྱི་སྟེང་དུ་མེད་པ་ཆོས་ཀྱི་བདག་མེད་པ་ཡིན་ནོ། །བདག་གཉིས་སུ་འཛིན་པ་ནི་འཁོར་བར་འཆིང་བའི་མ་རིག་པ་ཡིན་ཏེ། ཆོས་ཀྱི་བདག་འཛིན་ལ་བརྟེན་ནས་གང་ཟག་གི་བདག་འཛིན་མ་རིག་པ་འབྱུང་། དེ་ལས་འདུ་བྱེད་སོགས་ཐམས་ཅད་འབྱུང་། མ་རིག་པ་དེ་ལྡོག་ན་གཟུང་འཛིན་གཉིས་ཀ་སྟོངས་ཏེ་ཆོས་དབྱིངས་བསྟོད་པ་ལས། བདག་མེད་རྣམ་པ་གཉིས་མཐོང་ན། །སྲིད་པའི་ས་བོན་འགགས་པར་འགྱུར། །ཞེས་གསུངས་པ་ལྟར། བདུད་ཐམས་ཅད་བདག་མེད་རྟོགས་པའི་ཤེས་རབ་ཀྱིས་བཅོམ་པའི་དོན་ཤེས་པ་གལ་ཆེ། དངོས་གཞི་ཏིང་འཛིན་གསུམ་པོ་འདི་གོ་དཀའ་ཞིང་གལ་ཆེ་བས་རང་གིས་ཤེས་ཚོད་ཙམ་རྒྱས་པར་བཤད་ན། ངོ་བོ་རང་བཞིན་ཆོས་ཀྱི་སྐུ། ངེས་ཚིག་ནི། དེ་མ་ནོར་བཞིན་མ་བཅོས་པ་ཉིད་ཀྱི་ཐོག་ཏུ་རང་བབས་སུ་གནས་པའི་ཏེང་ངེ་འཛིན། ངོ་བོ་སྟོང་པ། རང་བཞིན་གསལ་བ། འཛིན་རྟོག་མེད་པའི་སྟོང་གསལ་གྱི་ངང་ལ་མ་ཡེངས་པ་ནི་ཆོས་སྐུ་དེ་བཞིན་ཉིད་ཀྱི་ཏིང་ངེ་

འཛིན་ཡིན་ལ། གཞུང་གི་ཚིག་རིས་རྡོ་རྗེ་ཞེས་པས་བསྟན་ཏེ། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །ཅེས་དང་། བཤད་རྒྱུད་མེ་ལོང་ལས། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་པ་ཐ་དད་མེད་པའི་རང་བཞིན་དེ་ཇི་ལྟ་བུ་ཡིན་ཞེ་ན། རྩ་ཤེས་ལས། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་པ་ཉིད། །རང་བཞིན་གཞན་དུ་འགྱུར་བ་ནི། །ནམ་ཡང་འཐད་པ་མ་ཡིན་ནོ། །ཞེས་སོ། དེ་ལྟ་བུ་ལ་དགོས་ཆེད་ཅི་ཡོད་ཅེ་ན། སེམས་ཅན་ཐམས་ཅད་ཡེ་ནས་འཁྲུལ་ཏེ་མ་རིག་པས་བདག་ཏུ་བཟུང་ནས་འཁོར་བར་འཁྱམས་པ་ཡིན་པས། དེ་ཡི་གཉེན་པོར་སྟོང་གསལ་འཛིན་མེད་ཡེངས་མེད་སྤྲོས་བྲལ་ཆོས་སྐུ་བསྒོམ་པ་གསང་སྔགས་འབྲས་བུ་ལམ་བྱེད་ཡིན་པས། ཆོས་སྐུའི་ངང་ལས་གཟུགས་སྐུ་གཉིས་འབྱུང་བའི་ཕྱིར་རོ། །གཉིས་པ་ཀུན་སྣང་གི་ཏེང་ངེ་འཛིན་ནི། ངོ་བོ་སྙིང་རྗེ་ཆེན་པོ། ངེས་ཚིག་ནི་སྟོང་པ་ཉིད་ཀྱི་དོན་མ་རྟོགས་པའི་འགྲོ་བ་ལ་སྙིང་རྗེ་ཆེན་པོའི་སྣང་བ་ཤར་བ། དགོས་ཆེད་ནི། དེ་བཞིན་ཉིད་སྤྲོས་བྲལ་ངོ་བོ་སྟོང་པ་དང་། རྒྱུའི་ཏིང་ངེ་འཛིན། མཚན་བཅས་ཡིག་འབྲུར་སྣང་བ་ཉིད་སྙིང་རྗེས་མཚམས་སྦྱར་བ། སྟོང་ཉིད་ངང་ལས་སྙིང་རྗེའི་སྙིང་པོ་སྒྱུ་

མའི་ཆོ་འཕྲུལ་ཡི་གེར་འབྱུང་བས་དགོས་ཆེད་དོ། གཞུང་གི་ཚིག་ནི། ཁྲོས་པས་ཞེ་སྡང་གཅོད་ཅེས་པས་བསྟན་ཏེ། ཁྲོས་པ་ནི་སྙིང་རྗེ་སྟེ་ཐུགས་རྗེའི་ཡུལ་ཞིང་བཅུ་ལ་སྙིང་རྗེ་ཆེར་ཁྲོས་པས་ཞེ་སྡང་ཚུལ་གྱིས་ཞེ་སྡང་འཇོམས་པ་སྟེ། ངོ་མཚར་ངན་འགྲོ་ཐར་པའི་ཐབས། །ཞེས་པས་ལས་ངན་གྱི་འབྲས་བུས་ངན་སོང་དུ་འགྲོ་ངེས་པ། སྙིང་རྗེ་ཆེན་པོས་རྗེས་སུ་བཟུང་བའོ། །གསུམ་པ་རྒྱུ་ཡི་ཏིང་ངེ་འཛིན་ལ་ངོ་བོ་ནི། ཐོལ་སྐྱེས་ཀྱི་རིག་པ་དེ་ཉིད་དོ། །ངེས་ཚིག་ནི། རྟེན་གཞལ་ཡས་ཁང་། བརྟེན་པ་ལྷ་དང་བཅས་བསྐྱེད་པའི་རྒྱུའོ། །དགོས་ཆེད་ནི་དཀྱིལ་འཁོར་ལྷ་ཚོགས་བསྐྱེད་པའི་ཕྱིར་རོ། །གཞུང་གི་ཚིག །མཚོན་ཆེན་སྔོན་པོ་འབར་བ་ནི༔ ནམ་མཁའི་དཀྱིལ་ནས་ཐིག་པ་ཤར༔ ཞེས་པས་བསྟན་ཏེ། སྟོང་པ་ཉིད་དང་སྙིང་རྗེ་ཆེན་པོས་མཚོན་པའི་ཧཱུྃ་ཡིག་མཐིང་ནག་མི་འགྱུར་བའི་ཐིག་ལེ་ཆེན་པོ་སྟེ། དེ་ཡང་རང་གི་རིག་པ་ཧཱུྃ་དུ་གསལ་བའི་ང་རྒྱལ་བརྟན་པོ་བསྒོམ་པ་དཔེར་ན་ཆོས་དབྱིངས་ཀྱི་ནམ་མཁར་ཟླ་བ་ལྡིང་བ་ལྟར་བསྒོམ་མོ། །དེ་ཡང་ཧཱུྃ་ཞེས་པའི་ཧའི་སྒྲ་ལས། ཧ་གྲ་ཧ་ཀ་ནི་གཟུང་བ། ཧ་གྲ་ཧ་ཙ་ནི་འཛིན་པ། ཞབས་ཀྱུའི་ཨུ་ལ་ཤ་རྒྱན་བྱིན་པས་ཤཱུ་ནྱ་ཏ་སྟེ་སྟོང་པ། ཀླད་ཀོར་མ་ནི། མ་ནོ་ཏ་ཞེས་པ་ཡིད། དེ་ལྟར་ན་གཟུང་བ་དང་འཛིན་

པས་སྟོང་པའི་ཡིད་ཅེས་པ་རྒྱུའི་ས་བོན་ཧཱུྃ། དེ་ལས་འོད་ཟེར་ཕྱོགས་མཚམས་བརྒྱད་སྟེང་འོག་གཉིས་དང་བཅུར་འཕྲོས་པས་ཕྱི་སྣོད་ཀྱི་འཇིག་རྟེན་སྣང་སྲིད་ཐམས་ཅད་རྡོ་རྗེ་ཕུར་བུའི་ཞིང་ཁམས་སུ་དམིགས་པ་ཙམ་ལས་གཞལ་ཡས་ཁང་སྤྲོས་བཅས་བསྒོམ་མི་དགོས་ཤིང་། དེ་ལྟར་ཕྱི་སྣོད་གཞལ་ཡས་ཁང་དུ་ལམ་གྱིས་གསལ་བའི་དབུས་སུ་གྲུ་གསུམ་མཐིང་ནག་ཨེ་དེ་ཉིད་གདན་ཐབ་མཐིང་གསལ་འོད་ཀྱི་རང་བཞིན་ཁ་ཁྱེར་ར་བ་ལྟ་བུ་སྐུའི་པུས་མོའི་ཐད་དུ་སླེབས་ཙམ་བསྒོམ་པའམ། ཡང་ན་མཐིང་ནག་གྲུ་གསུམ་ཡངས་ཤིང་རྒྱ་ཆེ་བ་རྩ་བ་ཕྲ་བ་ཐུར་དུ་ཟུག་ཅིང་གདེངས་ཀ་ཆེ་བ་གྱེན་དུ་བསྟན་པ་ཟུར་གཅིག་མདུན་དུ་བསྟན་ནམ། ཡང་ན་ཟུར་གཅིག་རྒྱབ་ཏུ་བསྟན་པའི་མདུན་གྱི་ལོགས་ལ་སྒོ་ཁྱུད་དང་བཅས་པའི་ལྟེ་བར་རྡོ་རྗེའི་བྲག་ཆེན་བཻ་ཌཱུརྱ་མཐིང་གསལ་འོད་ཀྱི་རང་བཞིན་གྲུ་གསུམ་གྱི་ལྟེ་བར། སྣ་ཚོགས་པདྨ་འདབ་མ་འབུམ་ལྡན་བརྡལ་བའི་དབུས་སུ་ཉི་མའི་དཀྱིལ་འཁོར་གྱི་སྟེང་དུ། ལྷ་ཆེན་པོ་ནག་པོ་ཁ་སྦུབ། ཨུ་མ་དམར་མོ་གན་རྐྱལ་གཅེར་བུ་རྒྱན་མེད་པ་ལག་གཉིས་ཐལ་སྦྱར་བསྒོམ་ཡང་རུང་ལ། ཡང་ན་གཡས་སུ་ལྷ་ཆེན་མ་ཧཱ་དེ་བ་ནག་པོ་ཁྲོས་ཉམས་རལ་པ་དམར་སེར་གཡས་རྩེ་གསུམ་གཡོན་ཐོད་

ཁྲག་སྟག་ཤམས་ཅན་ཁ་སྦུབ་ཏུ་འགྱེལ་བ། གཡོན་དུ་ཨུ་མ་དམར་མོ་ཆགས་ཉམས་གཡས་རྩེ་གསུམ་དང་གཡོན་ཐོད་ཁྲག་གཟིག་ཤམ་ཅན་གན་རྐྱལ་དུ་འགྱེལ་བ། དེའི་སྟེང་དུ་ཧཱུྃ་ཡོངས་སུ་གྱུར་པ་ལས་རྡོ་རྗེ་མཐིང་ནག་གི་ལྟེ་བ་ཧཱུྃ་ཡིག་གིས་མཚན་པ་དེ་ལས་འོད་ཟེར་མཆོག་ཏུ་འབར་ཞིང་འཕྲོས་པ་ཙམ་གྱིས་རྒྱལ་བ་རྣམས་མཆོད། སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་སྦྱངས་ཤིང་འོད་ཟེར་ཚུར་འདུས་པའི་ངང་དེ་ཁོ་ན་ཉིད་ཀྱི་རྡོ་རྗེ་ཆོས་དབྱིངས་ཡེ་ཤེས་སུ་གདོད་མ་ནས་གནས་པ་ལས་གཏུམ་ཆེན་འབར་བའི་ཁྲོ་བོ་ཆེན་པོ་མི་བཟད་པ་སྟེ། མི་སྡུག་པ་སོགས་གར་གྱི་ཉམས་དགུས་སྒེག་པ། ཁྲོ་བོའི་ཉམས་ཐམས་ཅད་མི་ཟད་རྒྱན་གྱི་འཁོར་ལོར་རྫོགས་པ་སྟེ། ཆོས་ཉིད་འགྱུར་བ་མེད་པའི་ཕྱིར་སྐུ་མདོག་ཐིང་ནག སྐུ་གསུམ་མཚོན་པའི་ཕྱིར་ཞལ་གསུམ། དབུས་མཐིང་ག་ཆོས་སྐུ། གཡོན་དམར་བ་ལོངས་སྐུ། གཡས་དཀར་བ་སྤྲུལ་སྐུ། ༧ ཡང་ན་གཡས་དཀར་བ་སྐུ། གཡོན་དམར་བ་གསུང་། དབུས་མཐིང་ག་ཐུགས་མཚོན་པའི་དག་པ་སྦྱར་ནའང་རུང་། མཆན། ཕར་ཕྱིན་དྲུག་མཚོན་པའི་ཕྱིར་ཕྱག་དྲུག །དྲག་པོར་ཁྲོས་པའི་སྤྱན་དགུ་ཕྱོགས་བཅུར་བསྒྲད་ཅིང་གཟེར་བ་ཐེག་པ་དགུའམ་ཡེ་ཤེས་དགུ་མཚོན། རབ་ཏུ་རྔམ་པའི་ཞལ་གསུམ་གདངས་ཤིང་ལྗགས་དམར་གློག་ལྟར་འཁྱུག་

ཅིང་འདྲིལ་བ། རབ་དཀར་གངས་རི་ལྟ་བུའི་མཆེ་བ་བཞི་གཙིགས་པ། ཨཱ་ར་ལི་ཡི་སྒྲ་ཆེན་སྒྲོགས་པ་སྟེ། བཛྲ་ཨཱ་ར་ལི་ཞེས་པའི་སྔགས་དོན་རྙོགས་པ་མེད་པ་དང་། རྡོ་རྗེ་རིང་ཕུར་དང་རྩིབས་ཕུར་ཞེས་སྤྱོད་པ་ཐམས་ཅད་ལ་ཐོགས་པ་མེད་པར་རོལ་པའི་དོན་ཡིན་པར་བཤད་པ་དང་། རྡོ་རྗེ་དགྲ་འཇོམས་སུ་ཞ་ལུ་ལོ་ཙཱས་བསྒྱུར་བའི་ཕྱི་མ་ལྟར་འཐད་པར་སེམས། སྨ་ར་དང་ཨག་ཚོམ་སྨིན་མ་དམར་སེར་མེ་ལྕེ་ལྟར་འབར་བ་འཁྲུག་ཅིང་རྔམ་པ། དབུ་སྐྲ་དམར་སེར་གྱེན་དུ་འཁྱིལ་བ་གཙུག་ཏུ་བཅིངས་ཤིང་ལྷག་མ་གྱེན་དུ་བརྫེས་པ། དབུ་སྐྲའི་གསེབ་གཙུག་ཏོར་གྱི་རྩེར་རྡོ་རྗེ་མཐིང་ག་འོད་ཀྱི་རང་བཞིན་གྱི་ལྟེ་བར་རིན་པོ་ཆེའི་ཁྲི་ཕྱོགས་བཞི་ནས་གླང་པོ་ཆེ་བྱུང་སྟེ་བརྒྱད་ཀྱིས་བཏེགས་པའི་ཁྲིའི་སྟེང་དུ་པད་ཉི་ཟླ་བ་ལ་མི་བསྐྱོད་པ་ཡབ་རྐྱང་། ལྷ་རྣམས་རྒྱན་མེད་པ་བསྒོམ་ཀྱང་རུང་། མཆན། ལོངས་སྐུའི་ཆ་བྱད་ཅན་གཡས་ས་གནོན་གཡོན་མཉམ་བཞག་གི་སྟེང་དུ་རྡོ་རྗེ་སྔོན་པོ་རྩེ་ལྔ་པ་འཛིན་པ་བསྒོམ། ཡུམ་གྱི་དབུའི་གཙུག་ཏོར་རྩེར་དབུ་སྐྲའི་གསེབ་ཏུ་སྤྱན་མ་མཐིང་གསལ་ལོངས་སྐུའི་ཆ་བྱད་ཅན་གཡས་ས་གནོན་མཉམ་བཞག་གི་སྟེང་རྡོ་རྗེ་འཛིན་པ་དང་གླང་པོའི་ཁྲི་སོགས་སྔ་མ་ལྟར་བསྒོམ། ཕྱག་དྲུག་གི་གཡས་པ་དང་པོས་རྡོ་

རྗེ་རྩེ་དགུ་རྭ་གདེང་ཕྱར་བས་ས་དགུའི་རྟོག་པ་ཐམས་ཅད་གཞོམ་པའི་བརྡ། དེ་ཡང་ཁམས་གསུམ་ས་དགུ་ཞེས། ལྟུང་བ་ཡོད་པ་དམྱལ་བའི་ས། །ཡི་དྭགས་བྱོལ་སོང་བྱིང་གི་ས། །བསོད་ནམས་གྲུབ་པ་མི་ཡི་ས། །ཀུན་ཏུ་གཡོ་བ་རླུང་གི་ས། །མཐོ་རིས་གོ་འཕང་ལྷ་ཡི་ས། །མཚན་གྱིས་བསྟན་པ་སྤྲིན་གྱི་ས། དྲི་མེད་ཡེ་ཤེས་ངད་ལྡན་ས། །མིང་གིས་མཚན་པ་སྐྱེ་མེད་ས། །ཞེས་སྔ་འགྱུར་བ་འགའ་ཞིག་གིས་བཤད་པ་ཡོད་མོད་ཀྱང་། ཡོངས་གྲགས་ས་བཅུ་པ་ཕྱིན་ཆད་ཀྱི་རྟོགས་པ་ལ་སྦྱོར་ན་འཐད་ཆེ་བར་གསུངས་སོ། །བར་པས་རྡོ་རྗེ་རྩེ་ལྔ་ཕྱོགས་མཚམས་སྟེང་འོག་ཐམས་ཅད་དུ་གཟིར་བས་ཉོན་མོངས་དུག་ལྔའི་རྟོག་པ་ཐམས་ཅད་ཡེ་ཤེས་ལྔར་དག་པའི་བརྡའོ། །གཡོན་པ་དང་པོས་སྡིགས་མཛུབ་དང་བཅས་མེ་དཔུང་འབར་བ་བསྣམས་པས་མ་རིག་པའི་མུན་པ་བསྲེག་པའི་བརྡའོ། །བར་པས་ཁ་ཊྭཱཾ་རྩེ་གསུམ་འཛིན་པ་དུག་གསུམ་དབྱིངས་སུ་བསྒྲལ་བའི་བརྡ། ཐ་མས་རི་རབ་ཕུར་བུ་བསྒྲིལ་བ་སྟེ། མཚན་མའི་ཡུལ་རྟག་ཆད་བདག་མཚན་གཞི་གང་ལ་བཏབ་ཀྱང་མི་འགྱུར་བའི་བདེ་བ་ཆེན་པོའི་ས་ལ་མཐར་ཕྱིན་པར་སྦྱོར་བ་སྟེ། དེའང་སྲིད་པའི་ཕུར་བུ་ཞེས་པ་སྲིད་པ་གསུམ་ལྷའི་དཀྱིལ་འཁོར་དུ་རྫོགས་པ་སྟེ། རྒྱ་མདུད་སྟེང་མ་

གཟུགས་མེད་ཁམས། ཆང་ཟུང་འདབ་མ་བཅུ་དྲུག་དང་རྒྱ་མདུད་འོག་མ་གཟུགས་ཁམས། ཆུ་སྲིན་རྔམ་ཞལ་དང་དབལ་འདོད་ཁམས་ལ་སྦྱར་བ། རི་རབ་ཕུར་བུ་སྟེ་སྲིད་པ་གསུམ་པོ་དེའང་སྐུ་གསུང་ཐུགས་ཀྱི་རང་བཞིན་སྐུ་གསུམ་གྱི་དཀྱིལ་འཁོར་རོ། །ཐུགས་ཀྱི་ཕུར་གཅིག་རྒྱུད་ཀྱི་དགོངས་འགྲེལ་ལས། རྩི་ཤིང་ལ་སོགས་སྲིད་པ་ཀུན༔ སྣང་བའི་ཡུལ་དུ་ཕུར་པའི་དབྱིབས༔ རང་བཞིན་ཉིད་དུ་གནས་པའོ༔ ཞེས་གསུངས་སོ། །དེའང་ཡང་དག་སྦྱར་བ་རྒྱུད་ཀྱི་དགོངས་འགྲེལ་ལས། དུག་གསུམ་གསོལ་ཕྱིར་ཞལ་གསུམ་བསྟན༔ རྒྱུད་དྲུག་སྒྲོལ་ཕྱིར་ཕྱག་དྲུག་གིས༔ ཤེས་བྱའི་སྒྲིབ་གཅོད་རྩེ་དགུ་གདེང་༔ དུག་ལྔ་འཇོམས་ཕྱིར་རྩེ་ལྔ་འཕེན༔ དུག་གསུམ་སྒྲོལ་བའི་ཁ་ཊྭཱྃ་འཛིན༔ རྣམ་རྟོག་འཇོམས་པའི་སྡིགས་མཛུབ་མཛད༔ གདུག་པ་སྒྲོལ་ཕྱིར་ཕུར་བུ་བསྒྲིལ༔ ཞེས་གསུངས་པ་ལྟར་ཤེས་པར་བྱའོ། །ལག་གཡས་མི་བསྐྱོད་པ། ལག་གཡོན་རིན་འབྱུང་གི་རང་བཞིན་དུ་གནས་པས་ན་གཡས་རྡོ་རྗེའི་གཤོག་པ་མི་བསྐྱོད་པའི་རང་བཞིན་དང་། གཡོན་རིན་པོ་ཆེའི་གཤོག་པ་རིན་འབྱུང་གི་རང་བཞིན་དུ་གནས་པའི་ཕྱིར། རྡོ་རྗེ་རིན་ཆེན་གཤོག་པ་གདེང་༔ ཞེས་པའོ། །ཡང་ན་གཡས་སྤུ་གྲིའི་གཤོག་པ་རྡོ་རྗེའི་ཐིལ་

ཕྲན་ཅན། གཡོན་ཆུ་གྲིའི་གཤོག་པ་རིན་པོ་ཆེའི་ཐིལ་ཕྲན་ཅན་བསྒོམ་ཀྱང་རུང་ངོ་། བརྒྱ་བྱིན་དང་དེ་ཡི་ཞོན་པ་གླང་པོ་ཆེ་བརྟུལ་བའི་གླང་ཆེན་གྱི་ཀོ་རློན། ཚངས་པ་ཆེན་པོ་བསྒྲལ་བའི་ཞིང་ཆེན་གྱི་ལྤགས་པ་སྟོད་དུ་གསོལ་བ། གཟའ་ཆེན་ཉི་མའི་བུ་མོ་སྟག་གདོང་སྤྱན་གཅིག་མ་བཏུལ་བའི་སྟག་གི་ལྤགས་པའི་ཤམ་ཐབས་མཛད་པ། རུ་དྲ་སྡེ་གསུམ་བསྒྲལ་བའི་ཐོད་པ་སྐམ་རློན་རྙིང་གསུམ་གྱི་ཕྲེང་བ་ཚར་གསུམ་གྱིས་དོ་ཤལ་བྱས་པ། ཕུར་པ་རོག་ལུགས་སོགས་འགའ་ཞིག་ཏུ། ཐོད་སྐམ་དབུ་རྒྱན། ཐོད་རློན་དོ་ཤལ། ཚལ་བུས་ཕྱག་ཞབས་ཀྱི་གདུབ་བུར་བཞེད་པའང་ཡོད། གཏེར་གཞུང་འདི་ནི་སྔ་མ་ཁོ་ནའོ། །ཐོད་པ་སྐམ་པོ་ལྔའི་ཅོད་པན་རྣམས་རྒྱུ་མའི་ཁོང་གསེང་གིས་སྦྲེལ་བས་དབུ་ལ་བརྒྱན་ཅིང་། དེ་ཡང་ཐོད་སྐམ་རྣམས་ཕྱི་ཐོད་པའི་རྣམ་པ་ལ་ནང་ཁང་བུར་གྱུར་པའི་དབུས་ཞལ་ལ་བཛྲ་ཧེ་རུ་ཀ་གཙོ་བོར་བཞུགས་པའི་ཁྲག་འཐུང་རིགས་ལྔ་ཡབ་རྐྱང་། གཡས་པ་རྣམས་རང་རྟགས་ཀྱི་ཕྱག་མཚན་དང་། གཡོན་ཐོད་ཁྲག་དཔལ་དང་དུར་ཁྲོད་ཀྱི་ཆས་སོགས་སྤྱི་འགྲེ་ལྟར་རམ། ཡང་ན་རྒྱན་མེད་པར་བསྒོམ་ཀྱང་རུང་། གཡས་ཞལ་ལ་བུདྡྷ་ཧེ་རུ་ཀ་གཙོ་བོ་དང་། གཡོན་ཞལ་ལ་པདྨ་ཧེ་རུ་ཀ་གཙོ་བོ་བྱས་ནས་གོ་འཕོ་ཚུལ་ཤེས་པར་

བྱ། ཡུམ་གྱི་ཐོད་སྐམ་ནང་དུ་བཛྲ་ཀྲོ་དྷཱི་གཙོ་བོར་གྱུར་པའི་ཁྲག་འཐུང་ཡུམ་ལྔ། རིན་པོ་ཆེའི་རྩེ་བྲན་རྣམས་ཀྱི་ནང་དུ་ཞི་བ་རིགས་ལྔ། དབུས་ཞལ་ལ་མི་བསྐྱོད་པ། གཡས་སུ་རྣམ་སྣང་། གཡོན་དུ་སྣང་མཐའ་སོགས་སྔ་མ་ལྟར་རྒྱན་གོས་སོགས་གང་བདེ་བསྒོམ། ཡུམ་གྱི་རྩེ་བྲན་ནང་དུ་སྤྱན་མ་སོགས་ཡུམ་ལྔ་བསྒོམ། ཐོད་སྐམ་བཤད་པའི་ཞོར་དུ་བསྒོམ་བྱའི་ས་ཁོངས་ཀྱི་ཞི་ཁྲོ་རིགས་ལྔ་ཡབ་ཡུམ་འདིར་བཤད་པ་ཙམ་ལས། བསྒོམ་རྒྱུ་དངོས་དབང་ལྷ་སྤྱན་འདྲེན་འོག་ནས་འབྱུང་བའི་སྐབས་སུ་བསྒོམ་དགོས། མོས་སྒོམ་བསྡུས་པའི་སྐབས་སུ་ཐོད་སྐམ་ལྔ་པོ་རྣམས་རིགས་ལྔའི་ངོ་བོ་ཡིན་པར་བསམ་པས་མཐུས། ཀླུ་རྒྱལ་གདུག་པ་ཅན་བཏུལ་ནས་སྦྲུལ་རིགས་ལྔའི་ཆུན་པོས་བརྒྱན་པ་སྟེ། དེ་ཡང་རྒྱལ་རིགས་དཀར་པོས་དབུ་རྒྱན། རྗེ་རིགས་སེར་པོས་སྙན་རྒྱན། བྲམ་ཟེ་དམར་པོས་སེ་མོ་དོ། གདོལ་པ་ནག་པོས་མགུལ་ཆུན། དམངས་རིགས་ལྗང་གུའི་གདུ་བུ་དང་སྐ་རགས་དོ་ཤལ་བྱས་པ་སོགས་སྒྱུ་འཕྲུལ་ལས་བཤད་པ་ལྟར་རམ། ཡང་ན་གཞན་སྔ་མ་ལྟར་ལ་ཁྱད་པར། བྲམ་ཟེ་དམར་ཁྲའི་ཅོད་པན་ཏེ་སྐྲ་ཆིངས། དམངས་རིགས་ལྗང་གུའི་ཕྱག་ཞབས་ཀྱི་གདུ་བུ། གདོལ་པ་ནག་པོས་སྐ་རགས་ཏེ་ལྔ། ཞི་ཁྲོའི་

བཀའ་བཤད་ལ་དཔྱད་པ་སྐྱ་རེངས་དང་པོ་ལས་བཤད་པ་གཉིས་གང་བྱས་ཀྱང་རུང་། འཇིགས་བྱེད་ཆེན་པོའི་དུར་ཁྲོད་ཀྱི་བདག་རུ་དྲ་བཏུལ་བའི་ཆས་རྣམས་དཔའ་རྟགས་སུ་འཕྲོགས་ནས་སྐུ་ལ་གསོལ་བ་ནི། དུར་ཁྲོད་ཀྱི་ཆས་བརྒྱད་པོ་ཡིན་ལ། དེ་ཡང་། ཁྲག་ཞག་ཐལ་བ་རྣམས་ཀྱིས་བྱུག༔ ཅེས་པ་ལ། རུ་དྲའི་ཆུང་མར་མ་ཆགས་ཐབས་ཀྱིས་རོལ་པས་དབང་དུ་བསྡུས་ནས་མཁུར་ཚོས་གཉིས་དང་སྣའི་ཟུར་ཏེ་འབུར་གསུམ་ལ་རཀྟའི་ཐིག་ལེ། དབང་མོ་ཉེར་བརྒྱད་དབང་དུ་བསྡུས་པའི་ཨོག་མར་ཞག་གི་ཟོ་རེས་གསུམ། སྲིན་མོ་ཉེར་བཞི་མ་ལ་སོགས་པ་བཏུལ་བའི་ཐལ་ཆེན་གྱི་ཚོམ་བུ་དཔྲལ་བར་རྩེ་གསུམ་པའི་དབྱིབས་སུ་བྱུགས་པ། རུས་པའི་རྒྱན་དྲུག་ཕར་ཕྱིན་དྲུག་ལ་སྦྱར་ཏེ། སྤྱི་བོར་རུས་པའི་འཁོར་ལོ་དྲྭ་མིག་སོ་གཉིས། སྐྲ་ཐམས་ཅད་དྲྭ་མིག་ནས་གཟེངས་པ། ཐོད་སྐམ་ལྔའི་དབུ་རྒྱན་ལས་བྱུང་བའི་རུས་པའི་དྲྭ་བ་དང་དྲྭ་ཕྱེད། སྙན་གཉིས་ལ་རུས་པའི་ཨ་ལོང་གཉིས། མགུལ་དུ་རུས་པའི་མགུལ་རྒྱན་དྲྭ་མིག་བཅུ་དྲུག་པ། དཔུང་པ། མཁྲིག་མ། ཞབས་རྣམས་ལ་རུས་པའི་གདུ་བུ། སྐེད་པར་སྐེད་རྒྱན་རུས་པའི་དྲྭ་མིག་དྲུག་ཅུ་རྩ་བཞི་པ། ཚངས་སྐུད་དམ་ཐལ་བ་ཞེས་པ། རྒྱ་གར་དུ་མུ་སྟེགས་བླ་མ་བྱེད་པ་རྣམས་བ་གླང་གི་

ལྕི་བའི་ཐལ་བ་བྱུགས་པའི་སྟེང་དུ། སྐུད་པ་ལྟ་བུ་ཞིག་གྱོན་པ་དེ་ཚངས་པ་མི་བརྗེད་དྲན་རྟེན་དང་དམ་ཚིག་ཡིན་ཟེར་བ་དེ་དག་འདུལ་ཕྱིར་ཧེ་རུ་ཀའི་སྐུ་སྟོད་ལ་ཐལ་ཆེན་གྱིས་རི་མོ་བྲིས་པའི་སྟེང་དུ་རོ་སྐྲ་དང་རུས་པའི་ཕྲེང་བ་སེ་རལ་ཁ་གཉིས་སུ་བསྣོལ་མར་གྱོན་པར་བཤད་པ་དང་། ཡང་ན་མདུན་རྒྱབ་གཉིས་སུ་མདོ་གནོན་རུས་པའི་འཁོར་ལོ་རྩིབས་བཞི་པ་ལ་སྦྲེལ་བའི་རུས་པའི་ཕྲེང་བ་བཅས་རྒྱན་དྲུག །རྒྱུ་དུག་ལྔ་སེར་སྣ་དང་དྲུག །ལམ་ཕར་ཕྱིན་དྲུག་ཏུ་དག་པ་མཚོན་ཏེ། དེ་ཡང་རུས་པའི་འཁོར་ལོ་ཤེས་རབ་ཕར་ཕྱིན། སྙན་ཆ་ཚུལ་ཁྲིམས་ཕར་ཕྱིན། མགུལ་རྒྱན་བཟོད་པའི་ཕར་ཕྱིན། སྐ་རགས་བརྩོན་འགྲུས་ཕར་ཕྱིན། ཚངས་སྐུད་དམ་སེ་རལ་ཁ་བསམ་གཏན་ཕར་ཕྱིན། ཕྱག་ཞབས་ཀྱི་གདུ་བུ་སྦྱིན་པའི་ཕར་ཕྱིན་མཚོན། འབྲས་བུའི་སྐབས་སུ་རིགས་དྲུག་ཏུ་མཚོན་པ་ཡིན་ནོ། །དཔལ་དང་དུར་ཁྲོད་ཀྱི་ཆས་རྣམས་ལ་བགྲང་ཚུལ་ངོས་འཛིན་མི་འདྲ་བ་མང་དུ་ཡོད་དེ། བཀའ་བརྒྱད་སྒྲུབ་ཁོག་ལས། ཡེ་ཤེས་ལྔ་ལྡན་ཐོད་པའི་དབུ་རྒྱན། ༡ཐེག་མཆོག་དོན་སྟོན་གླང་ཆེན་ཀོ་རློན། ༢འཁོར་བ་མེ་སྤོང་མི་ལྤགས་གཡང་གཞི། ༣ཞེ་སྡང་ཉིད་འཇོམས་སྦྲུལ་ནག་ཆུན་པོ། ༤ཕྲིན་ལས་རྣམ་བཞི་ལྷུན་གྲུབ་སྟག་

ཤམ། ༥འཁོར་བའི་བཅུད་ལེན་ཞག་གི་ཟོ་རེས། ༦ཆགས་པ་དབང་སྡུད་རཀྟའི་ཐིག་ལེ། ༧སྐྱེ་འཆི་རྩད་གཅོད་ཐལ་ཆེན་ཚོམ་བུ། ༨སྐུ་གསུམ་ལྷུན་གྲུབ་ཐོད་ཕྲེང་ཚར་གསུམ། ༩ཅིས་ཀྱང་མི་ཤིགས་རྡོ་རྗེའི་གོ་ཁྲབ། ༡༠མ་རིག་ནགས་བསྲེག་ཡེ་ཤེས་མེ་དཔུང་། ཞེས་པ་སྟེ། དོན་དུར་ཁྲོད་ཀྱི་ཆས་བརྒྱད་ཀྱི་སྟེང་དུ་རྡོ་རྗེའི་གོ་ཁྲབ་དང་མེ་དཔུང་བགྲང་བས་བཅུར་གསུངས། ཡང་ན་དུར་ཁྲོད་ཆས་བརྒྱད་ཀྱི་སྟེང་དུ། གསལ་བ་མེའི་ཆས། ཟིལ་གནོན་གཤོག་པའི་ཆས་དང་བཅུ། ཡང་དག་གི་རྒྱུད་རྣམས་ལས་བཤད་ཅེས་གཏེར་ཆེན་རིན་པོ་ཆེ་མཆོག་གི་ཞལ་སྔ་ནས་གསུངས་ཤིང་མཁས་གྲུབ་རྩེ་ལེ་རིན་པོ་ཆེ་ནས་ཀྱང་དེ་ལྟར་བཞེད་ལ། སྒྱུ་འཕྲུལ་ལས། དུར་ཁྲོད་ཆས་བརྒྱད། དཔལ་གྱི་ཆས་བརྒྱད། གསལ་བའི་རྒྱན་གཉིས་ཞེས་བཤད་དོ། །དེ་ཡང་ཞིང་ཆེན་གཡང་གཞི་བྱང་ཆུབ་སེམས་ཀྱི་རྒྱན། །གླང་ཆེན་ཀོ་རློན་སྟོབས་ཆེན་མཆོག་གི་རྒྱན། །སྟག་གི་ཤམ་ཐབས་དཔའ་བརྟུལ་བྱ་བྱེད་རྒྱན། །སྦྲུལ་ནག་ཆུན་པོ་མཉེན་ལྕུགས་འཁྲིལ་བའི་རྒྱན། །ཐོད་པ་ཚར་གསུམ་སྐུ་གསུམ་བརྙེས་པའི་རྒྱན། །རཀྟ་ཐུགས་རྗེ་ཆགས་པའི་རྒྱན། །ཐལ་བ་འདུ་བྱེད་ཕྲིན་ལས་རྒྱན། །ཞག་ཆེན་དོན་དམ་བཅུད་ཀྱི་རྒྱན། །ཞེས་དང་། དཔལ་ཆེན་པོའི་སྐུ་ལ་ཡེ་

ནས་རང་ཆས་སུ་གནས་པའི་དཔལ་གྱི་ཆས་བརྒྱད་ནི། ༡དབུ་སྐྲ་གྱེན་བརྗེས་འཁོར་བ་རུ་ལྡོག་ཆས། །༢རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །༣མཐིང་དམར་ཅོད་པན་རྟག་ཆད་ཟིལ་གནོན་ཆས། །༤སྤྱི་གཙུག་རྡོ་རྗེ་ལྷག་པར་རིག་པའི་ཆས། །༥དབང་གི་བསེ་ཁྲབ་གཟི་འབར་བགྲོད་པའི་ཆས། །༦གཉིས་མེད་སྦྱོར་བ་ཤེས་རབ་ཡུམ་གྱི་ཆས། །༧གནོད་གདུག་ཟློག་བྱེད་དཔའ་བོ་ལྕགས་ཀྱི་ཆས། །༨ཉོན་མོངས་སྲེག་བྱེད་ཡེ་ཤེས་མེ་ཡི་ཆས། །ཞེས་དང་། གཡུང་སྟོན་བཛྲ་ཤྲཱིའི་ཊི་ཀར། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཟུང་འབྲེལ་ཉི་ཟླའི་ཆས། །གདུག་པ་ཅན་སྲེག་ཡེ་ཤེས་མེ་ཡི་ཆས། །སྐྱེ་འཆི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེ་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་སློག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་ཟློག་བྱེད་རྒྱ་གྲམ་ལྕགས་ཀྱི་ཆས། །ཞེས་དང་། གསལ་བའི་རྒྱན་གཉིས་ནི། སྙན་གོང་གཡས་གཡོན་གཉིས་སུ་ཉི་ཟླའམ། ཡང་ན་ལྷ་རྗེ་རོག་གི་ཉི་ཟླའི་ཕྲེང་བ་དང་། གཞན་ཡང་བདེ་འདུས་རྩ་རྒྱུད་ཁྲོ་བོ་མངོན་འབྱུང་གི་རྒྱུད་ལས། དཔལ་གྱི་ཆས་བཅུ་ཞེས་མི་འདྲ་བའང་ཡོད། འདིར་

རིག་འཛིན་མཆོག་གི་གཏེར་བྱོན་ཐུགས་སྒྲུབ་བར་ཆད་ཀུན་སེལ་གྱི་གཏེར་གཞུང་ལས། དུར་ཁྲོད་ཀྱི་ཆས་བརྒྱད་དང་དཔལ་གྱི་ཆས་བརྒྱད་སོ་སོར་མ་བཤད་དེ། ཡང་གཏེར་གཞུང་ལས། དུག་གསུམ་རྣམ་དག་བགོ་བའི་གོས་གསུམ་དང་༔ སྐྱེ་འགག་འགྱུར་མེད་བྱུགས་པའི་རྩི་གསུམ་དང་༔ འཁོར་འདས་དབྱེར་མེད་ཐོད་པའི་རྒྱན་གཉིས་དང་༔ རྔམ་བརྗིད་དུར་ཁྲོད་དྲག་པོའི་ཆས་རྣམས་སོ༔ ཞེས་གསུངས་པ་དང་། དཔལ་ཆས་ལ། ཆེ་བཙན་འགྲན་ཟླ་བྲལ་བའི་གདན་ཁྲི་དང་༔ ཡེ་ཤེས་དཔག་ཏུ་མེད་པའི་མེ་དཔུང་འབར༔ ཉོན་མོངས་འཆིང་བས་མ་གོས་སྦྲུལ་གྱིས་བརྒྱན༔ འགྲོ་དོན་ཐོགས་པ་མེད་པའི་གཤོག་པ་གསུམ༔ གདུལ་བྱའི་རེ་བ་སྐོང་བའི་དར་དཔྱངས་དང་༔ ཕ་རོལ་ཕྱིན་དྲུག་རྫོགས་པའི་རུས་རྒྱན་དྲུག༔ རྣམ་རྟོག་དབྱིངས་ཀྱི་རྒྱན་གྱུར་རིན་ཆེན་ཕྲེང་༔ གདུག་པ་ཀུན་འདུལ་ཁྱུང་གིས་དབུ་ཡང་བརྒྱན༔ གར་དགུའི་རོལ་མཛད་དཔལ་གྱི་ཆས་ཞེས་གསུངས་པ་ལྟར་བསྒོམ་པའམ། ཡང་ན་གསང་ཐིག་དངོས་ཀྱི་གཏེར་གཞུང་གི་དགོངས་པ་ནི། དུར་ཁྲོད་ཆས་བརྒྱད་ཀྱི་སྟེང་དུ་རྡོ་རྗེའི་གཤོག་པ་དང་། རུས་པའི་རྒྱན་དྲུག་རྩིས་པས་བཅུ་དངོས་སུ་བསྟན་ཅིང་། ཡང་ན། རུས་པའི་རྒྱན་དྲུག་ལ་སོགས་པའི༔ ཞེས་སོགས་ཁོ་

ནས་དཔལ་ཆས་བསྟན་པར་འཆད་ཀྱང་རུང་ངོ་། །འདིར་ནི་སོགས་ཁོངས་ལ། ཨུཏྤ་ལ་དང། ཉི་ཟླས་སྙན་གོང་བརྒྱན་པ། གསང་ཁེབས་དར་སྣ་ལྔའམ། དར་ལྗང་གུ་ལ་ཕུར་པ་གསུམ་བཏགས་པ་འཕྱང་ཞིང་། སྟ་ཟུར་གཉིས་ནས་དར་དཔྱངས་གསུམ་གསུམ་འཕྱང་བ་། ཆུ་སྲིན་གྱི་ཁས་དཔུང་ལྷུ་རྣམས་དང་སྐུ་སྨད་བརྒྱན་པ་ནི། གཡས་གཡོན་རྒྱབ་དབུས། མཆན། ཆུ་སྲིན་གྱིས་འཛིན་ཤེས་ལ་གཏོང་མི་ཤེས་པའི་དཔེ་ལྟར། ཐུགས་རྗེས་སེམས་ཅན་ཐམས་ཅད་རྗེས་སུ་བཟུང་སྟེ་བཏང་མི་ཤེས་པ་མཚོན་པའི་བརྡའོ། །ཞབས་བཞི་གཡས་བསྐུམ་གཡོན་བརྐྱང་བའི་རོལ་སྟབས་ཀྱིས་འགྱིང་བ་ནི་བདུད་བཞིའི་གཡུལ་ལས་རྒྱལ་ཞིང་བསྡུ་བ་བཞིའི་ཕྲིན་ལས་ཀྱིས་འགྲོ་རྣམས་འདྲེན་པའི་བརྡའོ། །དེ་ཡི་པང་དུ་ཤེས་རབ་ཀྱི་སྣང་ཆ་སྦྱོར་བའི་ཡུམ་ཆེན་འཁོར་ལོ་རྒྱས་འདེབས་མ་མཐིང་ནག་འབར་བ་ཆེན་མོ་ཆོས་སྐུ་ཐིག་ལེ་ཉག་གཅིག་མཚོན་པའི་ཕྱིར་ཞལ་གཅིག །ཐབས་ཤེས་གཉིས་མཚོན་པའི་ཕྱིར་ཕྱག་གཉིས་ཀྱི་གཡས་པས་མེ་ཏོག་ཨུཏྤལ་སྔོན་པོ་བསྣམས་ནས་ཡབ་ཀྱི་མགུལ་དུ་འཁྱུད་པ་དང་། གཡོན་པས་ཐོད་པ་ཁྲག་གིས་གང་བ་ཡབ་ཀྱི་ཞལ་ལ་སྟོབ་པ་བརྒྱད་གཉིས་ལོན་པའི་ལང་ཚོ་ལྟར་རྒྱས་པའི་འགྱུར་བག་ཅན་ནམ་འཁྲིལ་བག་

ཆགས་པ་སྟེ་སྐུ་ཤ་རྒྱས་ཤིང་གསེར་སོགས་རིན་པོ་ཆེ་བྱི་དོར་བྱས་མ་ཐག་པ་ལྟ་བུའོ། །ཐལ་བ་སྤངས་པའི་ཕྱག་རྒྱ་ལྔ་ཡི་རྒྱན་འཆང་ཞིང་ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་བ། ཞབས་གཡས་བརྐྱང་བའི་སྟབས་ཀྱིས་བདེ་བ་ཆེན་པོའི་དབྱིངས་སུ་སྦྱོར་བ་སྟེ་ཞབས་གཉིས་བདེན་པ་གཉིས་ཀྱིས་འཁོར་འདས་ཟིལ་གྱིས་གནོན་པ་མཚོན། གཏེར་གཞུང་གི་དངོས་བསྟན་དུ་རུས་པའི་ཕྱག་རྒྱ་ལྔ་ཙམ་ལས་གསལ་ཁ་མེད་པས་བསྡུས་ན་དེས་ཀྱང་ཆོག་ལ། རྒྱས་ན་གྲུབ་དབང་ཀུན་མཁྱེན་རིན་པོ་ཆེའི་གསུངས་པ་ལྟར། དེ་ལས་ཡུམ་རྣམས་ལ་སྟག་ཤམ་གྱི་དོད་དུ་གཟིག་ཤམ་བྱེད་པ་ཙམ་མ་གཏོགས་གཞན་འདྲའོ་ཞེས་གསུངས་པས་སོ། །དབང་ལྷ་རིགས་ལྔ་འཁོར་བཅས་ནམ་མཁའ་གང་བ་སྤྱན་དྲངས་ཤིང་། ཡེ་ཤེས་ཀྱི་བདུད་རྩིའི་ཆུ་རྒྱུན་གྱིས་དབང་བསྐུར་སྐུ་གང་དྲི་མ་དག་ཆུའི་ལྷག་མ་ཡར་ལུད་པ་ལས་རིགས་ལྔས་དབུ་བརྒྱན་ཚུལ་སོགས་གོང་དུ་སོང་བ་ལྟར་བསྒོམ་ཞིང་། འབྲིང་དུ་རིགས་ལྔའི་ཕྱག་མཚན་དང་། བསྡུས་ན་སྤྱི་བོར་ཨོཾ་ཧཱུྃ་ཏྲཱྃ་ཧྲཱིཿ ཨཱཿསོགས་ཀྱི་ཡིག་འབྲུ་བསྒོམ་ཀྱང་རུང་། དེ་ཡང་རྒྱས་བསྡུས་གང་ལའང་ཡེ་ཤེས་ལྔའི་བདག་ཉིད་ཅན་དུ་བསྒོམ་པའོ། །གནས་གསུམ་དུ་སྐུ་གསུང་ཐུགས་ཀྱི་བདག་ཉིད་ཡབ་ཀྱི་སྤྱི་

བོར་རྣམ་སྣང་། མགྲིན་པར་སྣང་མཐའ། ཐུགས་ཀར་མི་བསྐྱོད་པ་དང་། ཡུམ་ལ་སྤྱི་བོར་དབྱིངས་ཕྱུག་མ། མགྲིན་པར་གོས་དཀར། ཐུགས་ཀར་སྤྱན་མ་བསྒོམ་པའམ། བསྡུ་ན་ཡབ་ཡུམ་གཉིས་ཀའི་གནས་གསུམ་དུ་ཨོཾ་ཨཱཿཧཱུྃ་གི་ཡིག་འབྲུ་གསུམ་གྱིས་མཚན་པར་བསྒོམ་པའོ། །དེ་ཡང་སྐུ་མཚན་དང་དཔེ་བྱད་ཀྱིས་བརྒྱན་པ། གསུང་ཚངས་དབྱངས་ཡན་ལག་དྲུག་ཅུ་རྩ་བཞི། ཐུགས་གཉིས་སུ་མེད་པའི་ཡེ་ཤེས་སུ་བྱིན་གྱིས་བརླབ་པའོ། །ཡབ་ཀྱི་གསང་གནས་ཧཱུྃ་ཡིག་ཡོངས་གྱུར་པ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་ཡིག་གིས་མཚན་པའི་ཧཱུྃ་མགོ་ཡུམ་ལ་བསྟན་པ། ཡུམ་གྱི་མཁའ་གསང་པྃ་ཡིག་ཡོངས་སུ་གྱུར་པ་ལས་པདྨ་དམར་པོ་འདབ་མ་བཞི་པའི་ལྟེ་བར་ཉི་མའི་སྟེང་དུ་དངོས་གྲུབ་ཐམས་ཅད་བསྡུ་བའི་བདག་ཉིད་ཡི་གེ་ཨྃ་ཡིག་དམར་པོས་མཚན་པ་ཐེག་ལེ་ནཱ་ད་ཟུང་དུ་འབྲེལ་ཞིང་བདེ་བ་ཆེན་པོའི་དབྱིངས་སུ་རོལ་བས་ས་ལམ་ཐམས་ཅད་དུས་གཅིག་ཏུ་རྫོགས་པ། བ་སྤུ་བྱེ་བ་ས་ཡ་རྡོ་རྗེ་ཕྱེད་པའི་རང་བཞིན་དང་། སྣ་ཚོགས་རྡོ་རྗེའི་གོ་ཁྲབ་གསོལ༔ ཞེས་པ་དཔལ་ཆས་སྐབས་སུ་རྡོ་རྗེའི་སློག་པ་ཞེས་པ་དང་། དབང་གི་བསེ་ཁྲབ། རྒྱ་གྲམ་ལྕགས་ཀྱི་ཆས་ཞེས་གསུངས་པ་ནི། སྐུ་སྟོད་ལ་སྣ་ཚོགས་རྡོ་རྗེའི་

གོ་ཁྲབ། སྐུ་སྐེད་ལ་དབང་གི་བསེ་ཁྲབ་དམར་པོ། སྐུ་སྨད་ལ་རྒྱ་གྲམ་ལྕགས་ཁྲབ་ནག་པོ་སྟེ། དོན་ཁྲབ་ལྟ་བུ་གསུམ་དུ་གནས་པ་ལ་དག་པ་སྦྱར་བ་ཙམ་མ་གཏོགས་ལྕགས་བསེ་སོགས་ཐེར་ཟུག་ག་ལ་ཡིན་ཏེ་ཡེ་ཤེས་རང་སྣང་ལས་གྲུབ་པ་ཁོ་ནའོ། །ཕུར་བུའི་ཚྭ་ཚྭ་ཞེས་པ་ནི། ལྕགས་སྲེག་ལ་ཐོ་བ་བརྡེག་པ་ན་མེའི་རྡུལ་འཕྲོ་བ་དེ་བཞིན་དུ་སྐར་ལྟར་འཁྲུགས་པ་སྟེ་བར་མེད་གྲངས་མེད་ལྟ་བུར་འཕྲོ་བའོ། །ཐུགས་ཀར་འོད་ཀྱི་གུར་ཁྱིམ་མཐིང་གའི་དབུས་སུ་པདྨ་དང་ཉི་ཟླའི་གདན་གྱི་སྟེང་དུ་ཡེ་ཤེས་སེམས་དཔའ་རྡོ་རྗེ་སེམས་དཔའ་སྐུ་མདོག་དཀར་གསལ་རྡོ་རྗེ་དང་དྲིལ་བུ་འཛིན་ཅིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་པང་དུ་ཡུམ་རྡོ་རྗེ་སྙེམས་མ་དཀར་མོ་གཡས་གྲི་གུག་དང་གཡོན་ཐོད་པ་འཛིན་པས་འཁྲིལ་ཞིང་སྦྱོར་བ། ཡུམ་བརྟུལ་ཞུགས་ཀྱི་སྐྱིལ་མོ་ཀྲུང་སྟེ་པདྨའི་སྐྱིལ་ཀྲུང་གིས་བཞུགས་པའི་ཡབ་ཀྱི་ཐུགས་ཀར་སྲོག་གི་གོ་སར་རིན་ཆེན་ཆ་བརྒྱད་པ་སྟེ་ཟུར་བརྒྱད་པ་མཐིང་གསལ། འདིར་ཕུར་པ་རྒྱུད་ལུགས་སུ་ལེབ་ཆགས་ཡིན་ཅིང་། ཕུར་པ་ལུང་ལུགས་ལ་ཟུར་བརྒྱད་སྨུག་པོ་གུར་ཐབས་སུ་བཤད། རིན་ཆེན་ཆ་བརྒྱད་གདན་ཐབ་ཀྱི་སྟེང་དེར་ཉི་མ་དམར་པོ། དེའི་སྟེང་ཟླ་བ་དཀར་པོའི་སྟེང་དུ་རྡོ་རྗེ་སྔོན་པོ་རྩེ་དགུ་

པའི་ལྟེ་བར་ཉི་མའི་སྟེང་དུ་ཧཱུྃ་ཡིག་གི་མཐའ་བསྐོར་དུ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཞེས་པའི་ཡིག་འབྲུ་རྣམས་ལྗང་ལ་དམར་འོད་ཆགས་པ་མདུན་ནས་བརྩམས་ཏེ་ཞལ་ནང་བསྟན་གཡས་བསྐོར་དུ་བཀོད་དོ། །བསྙེན་པའི་སྐབས་སུ་མི་གཡོ་བ་ཟླ་བ་སྐར་ཕྲེང་ལྟ་བུ་དང་། ཉེ་བསྙེན་སྐབས་སུ་འཁོར་བ་མགལ་མེ་ཀླད་ལ་བསྐོར་བ་ལྟ་བུ། སྒྲུབ་པའི་སྐབས་སུ་འོད་ཟེར་སྤྲོ་བསྡུ་དང་བཅས་རྒྱལ་པོའི་ཕོ་ཉ་བྲན་མངགས་ལྟ་བུ། སྒྲུབ་ཆེན་ལས་སྦྱོར་དངོས་གྲུབ་ལེན་པའི་སྐབས་སུ་བུང་བ་ཚང་ཞིག་ལྟ་བུ་སོགས་བསྙེན་སྒྲུབ་ཀྱི་ཟིན་བྲིས་བསྟན་འཛིན་བྱང་ཆུབ་ཉི་མས་མཛད་པ་བླ་མའི་ཞལ་ལུང་ལྟར་དང་། བསྙེན་སྒྲུབ་གཅིག་དྲིལ་གྱི་ཟིན་ཐོ་རབ་གསལ་འཕྲུལ་གྱི་མེ་ལོང་གཉིས་ལས་ཤེས་པར་བྱ། རྒྱུན་ཁྱེར་ལ་འཁོར་ཞིང་འོད་ཟེར་སྤྲོ་བསྡུ་སོགས་བྱ་སྟེ་བསྙེན་སྒྲུབ་གཅིག་དྲིལ་ལྟ་བུ་ཡིན་ནོ། །བསྙེན་སྒྲུབ་སྐབས་སུ་སྐུ་གསུང་ཐུགས་ཀྱི་བཟླས་པ་བྱ་ཚུལ་བསྙེན་ཡིག་གཉིས་ལས་ཤེས་པར་བྱ་ཞིང་། གསུང་གི་བཟླས་པའི་སྐབས་སུ་འགོག་བཟླས་གསུམ་སྟེ། དབྱིབས་ལ་འགོག་པ། སྒྲ་ལ་འགོག་པ། དོན་ལ་འགོག་པའོ། །དང་པོ་ནི། ཡིག་འབྲུའི་གཟུགས་ཁོ་ན་གསལ་འདེབས་ཏེ་དམིགས་པ་རྩེ་གཅིག་ཏུ་འཛིན་པའོ། །གཉིས་པ་

ནི། ཡི་གེ་དང་སྒྲ་གདངས་ཁོ་ན་ལ་སེམས་འཛིན་པའོ། །གསུམ་པ་ནི། སྔགས་ཀྱི་དོན་ལ་རྩེ་གཅིག་ཏུ་འཛིན་པའོ། །སྔགས་ཀྱི་དོན་ནི། ངེས་པར་འབྱུང་བ་ཕྱི་མའི་རྒྱུད་ལས། ཨོཾ་ནི་ཡེ་ཤེས་རྣམ་པ་ལྔ། །བཛྲ་ཡེ་ཤེས་རྡོ་རྗེ་ཡིན། །ཀཱི་ལི་ཀཱི་ལ་ཡ་དང་ལྔ། །རང་བཞིན་དག་པའི་ཕུར་པའོ། །སརྦ་བིགྷྣན་ཐམས་ཅད་བགེགས། །བམ་གྱིས་གནོན་ཞིང་ཧཱུྃ་གིས་བསྡུས། །ཕཊ་ཀྱིས་མི་གནས་སྲེག་པར་བྱེད། །ཅེས་པ་ལྟར་རོ། །རྒྱུན་ཁྱེར་ལྟ་བུར་ཛབ་དགོངས་དམིགས་པའི་འཕྲོ་འདུ་གཞུང་གི་དངོས་བསྟན་ལྟར་ནི། ཀཱི་ལ་ཡའི་སྔགས་ཕྲེང་འཁོར་ཞིང་རང་སྒྲ་སྒྲོགས་པ་དེ་ལས་འོད་ཟེར་དཀར་པོ་འཕྲོས་པས་རྒྱལ་བ་ཐམས་ཅད་ལ་སྐུ་མཉེས་པའི་མཆོད་པ་ཕུལ། སྐུའི་བྱིན་རླབས་ཐམས་ཅད་ཨོཾ་དཀར་པོའི་རྣམ་པར་བསྡུས་ནས་རང་གི་དཔྲལ་བར་ཐིམ་པས་སྐུའི་དངོས་གྲུབ་ཐམས་ཅད་ཐོབ་པར་བསམ། དེ་བཞིན་དུ་འོད་ཟེར་དམར་པོ་འཕྲོས་པས་གསུང་མཉེས་པའི་མཆོད་པ་ཕུལ། གསུང་གི་བྱིན་རླབས་ཐམས་ཅད་ཨཱཿདམར་པོའི་རྣམ་པར་བསྡུས་ནས་རང་གི་མགྲིན་པར་ཐིམ་པས་གསུང་གི་དངོས་གྲུབ་ཐམས་ཅད་ཐོབ་པར་བསམ། ཡང་འོད་ཟེར་མཐིང་ག་འཕྲོས་པས་ཐུགས་མཉེས་པའི་མཆོད་པ་ཕུལ། ཐུགས་ཀྱི་བྱིན་རླབས་ཐམས་

ཅད་ཧཱུྃ་མཐིང་གའི་རྣམ་པར་བསྡུས་ནས་རང་གི་སྙིང་གར་ཐིམ་པས་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསམ། འདི་ཡང་རྒྱས་པའི་སྐབས་སུ་འོད་ཟེར་ལས་མཆོད་པའི་ལྷ་མོ་དཔག་མེད་སྤྲུལ་ཏེ། རྒྱལ་བ་ཐམས་ཅད་ལ་སྐུ་མཉེས་པའི་མཆོད་པ་འདོད་ཡོན་རྣམ་ལྔ། གསུང་མཉེས་པའི་མཆོད་པ་སྨན་རཀ་གཏོར་གསུམ། ཐུགས་མཉེས་པའི་མཆོད་པ་སྦྱོར་སྒྲོལ་གཉིས་ཀྱིས་མཆོད་དེ། རྒྱལ་བ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་རྣམ་སྣང་འོད་དཔག་མེད་མི་བསྐྱོད་པའི་རྣམ་པར་སྤྱན་དྲངས་ཏེ་གནས་གསུམ་དུ་བསྟིམ་མོ། །ཡང་འོད་ཟེར་སྣ་ཚོགས་པ་འཕྲོས་འཕགས་པ་རྣམས་མཆོད་ཅིང་བདེ་གཤེགས་བླ་མ་རྒྱལ་བ་སྲས་བཅས་མཉེས་པར་བྱས། མཆེད་དང་ལྕམ་དྲལ་རྣམས་ཀྱི་དམ་ཚིག་ཉམས་ཆག་བསྐང་། མཁའ་འགྲོ་ཆོས་སྐྱོང་རྣམས་མཁོན་པ་སྦྱངས་ཤིང་ཕྲིན་ལས་ལ་བསྐུལ། དྲེགས་པའི་སྡེ་དཔོན་སུམ་ཅུ་ལ་སོགས་པའི་དྲེགས་པ་ཐམས་ཅད་རྒྱལ་བའི་བསྟན་པ་སྲུང་བའི་ལས་ལས་མི་གཡེལ་བར་བཀའ་བསྒོས་ཤིང་དམ་འོག་ཏུ་བཙུད། བདུད་དང་དམ་སྲི་སོགས་བྱང་ཆུབ་ལ་བར་དུ་གཅོད་པ་ཐམས་ཅད་ཐལ་བར་བརླག འགྲོ་བ་རིགས་དྲུག་གི་སྒོ་གསུམ་གྱི་སྒྲིབ་གཉིས་བག་ཆགས་དང་བཅས་

པ་སྦྱངས་ཤིང་རྡོ་རྗེ་གཞོན་ནུའི་གོ་འཕང་ལ་བཀོད། སྣང་བ་ཐམས་ཅད་རྡོ་རྗེ་གཞོན་ནུའི་སྐུ། གྲགས་པ་ཐམས་ཅད་ཀཱི་ལ་ཡའི་རང་སྒྲ། དྲན་རྟོག་ཐམས་ཅད་ཡེ་ཤེས་ཀྱི་རོལ་པ། མདོར་ན་རང་ཉིད་ཀྱི་སྒོ་གསུམ་དང་རྡོ་རྗེ་གཞོན་ནུའི་གསང་གསུམ་དབྱེར་མེད། སྣང་སྲིད་སྣོད་བཅུད་ཐམས་ཅད་རྡོ་རྗེ་གཞོན་ནུའི་སྐུ་གསུང་ཐུགས་ཀྱི་དཀྱིལ་འཁོར་དུ་བསྒོམ་སྟེ། བཟླས་བྱའི་སྔགས་བསྙེན་སྒྲུབ་གཅིག་དྲིལ་ནི། བཀའ་བརྒྱད་ཞི་ཁྲོ་རྩ་རྒྱུད་ལས། ཐོག་མར་ཨོཾ་དང་ཕཊ་བཞག་ནས༔ བར་ནས་བཅུ་གཉིས་གྲངས་མཛེས་པ༔ ཞེས་དང་། བཀའ་བརྒྱད་ཕྱི་མ་སྔགས་ཀྱི་རྒྱུད་ལས། རྡོ་རྗེ་གཞོན་ནུའི་ང་རྒྱལ་གྱིས༔ རྣལ་འབྱོར་རིག་པས་རྟག་བཟླས་ན༔ གསང་སྔགས་བྱིན་རླབས་དངོས་གྲུབ་དང་༔ ལོག་འདྲེན་སྒྲོལ་བའི་སངས་རྒྱས་མཐུ༔ ཐོབ་པར་འགྱུར་བ་ཐེ་ཚོམ་མེད༔ ཅེས་དང་། བཟླ་བྱའི་སྔགས་དེའང་གྲུབ་པ་བཞིའི་རང་བཞིན་ཅན་ཏེ། དེ་ཡང་ཡི་གེ་ཧཱུྃ་ལྟ་བུ་གཅིག་ཁོ་ན་ལ་མཚོན་ན། ངོ་བོ་ཧཱ་ཨུ་མ་གསུམ་འདུས་པ། རང་བཞིན་གྲུབ་པ་བཞི་སྟེ། ཧཱུྃ་གི་ངོ་བོ་ཆོས་དབྱིངས་ཡེ་ཤེས་གདོད་མ་ནས་གནས་པ་ཆོས་ཉིད་ངོ་བོ་ཉིད་ཀྱིས་གྲུབ་པ། རྣམ་པ་ཧཱུྃ་ཡིག་ཏུ་སྣང་བ་ཆོས་ཅན་རང་བཞིན་གྱིས་གྲུབ་པ། དེ་ལ་ཐུགས་རྡོ་རྗེ་སྒྲུབ་པའི་ནུས་མཐུ་

དང་ལྡན་པ་མཐུས་གྲུབ་པ། དེ་ཉིད་སྟོན་པ་རྡོ་རྗེ་འཆང་གི་ཐུགས་རྡོ་རྗེའི་ས་བོན་བྱིན་གྱིས་བརླབས་པས་གྲུབ་པ། དེ་ལྟར་གྲུབ་པ་བཞི་ལ་བརྟེན་ནས་ཧཱུྃ་ཞེས་བཟླས་པས་ཐུགས་རྡོ་རྗེ་འགྲུབ་པའི་ཉེར་ལེན་དུ་གྱུར་པ་ནི་སྔགས་ཀྱི་བྱེད་ལས་སོ། །དེ་ལྟར་གསང་ཐིག་ཕུར་པའི་རྒྱུན་ཁྱེར་གྱི་བསྐྱེད་རིམ་ལྷ་ཁྲིད་རྣམ་པར་བཤད་པའི་རེག་ཟིག་མདོར་བསྡུས་པ་འདི་ནི། མཚོ་སྐྱེས་རྒྱལ་བ་གཉིས་པ་དང་རྣམ་དབྱེར་མ་མཆིས་པ་གཏེར་ཆེན་མཆོག་གྱུར་གླིང་པའི་ཞལ་སྔ་ནས་འདི་ཡི་ཁྲིད་རིམ་རྒྱས་བསྡུས་སྔ་ཕྱིར་ལན་མང་དུ་ཐོབ་ཅིང་། དེའི་ཚེ་བཀའ་གནད་མི་བརྗེད་ཐོ་ཆུང་གཉིས་ཙམ་བྲིས་ཤིང་། གྲྭ་ཚང་གི་ཚོགས་སུ་བདག་བསྐྱེད་རྒྱུན་ཁྱེར་གསུངས་པའི་སྐབས་མོས་པ་ལམ་བྱེད་ཀྱི་བག་ཆགས་བཞག་ནས། སྒོམ་ཚུལ་རྣམས་སྙན་སྒྲོན་ལན་མང་ཞུས་པ་རང་རིག་བློ་གྲོས་དམན་པས་བརྗེད་པར་དོགས་ཏེ་ཡི་གེའི་རེས་སུ་བྲི་བར་སེམས་ཀྱང་མཁས་གྲུབ་གཞན་དོན་མཐའ་ཡས་པས། ཆོས་ལ་དབང་ཟར་འགྲོ་བས་ཡིག་ཆ་འདྲ་མོ་འབྲི་བར་མི་འོས་གསུངས་པས་བླ་མའི་ཞབས་ཏོག་ཡིན་ཁུལ་དང་། རང་གི་ཟས་གོས་ཀྱི་གཡེང་བ་སྣ་ཚོགས་ཀྱི་རང་བཞིན་དུ་ལུས་ཤིང་། སྔ་ཕྱི་ལན་མང་དུ་མགོན་བླ་ཟུར་མང་རྟོགས་ལྡན་འཕགས་མཆོག་གིས་ཀྱང་དེ་ལྟར་འབྲི་སྐབས་བྱུང་ན་ཞེས་ཡང་ཡང་གསུངས་པ་དང་། ཁྱད་པར་རིམ་གཉིས་ཟབ་མོ་སྔགས་ཀྱི་རྣལ་འབྱོར་པ་གླིང་ངག་དབང་ལྷུན་གྲུབ་ཀྱིས་

གསུང་བསྐུལ་ནན་ཆེར་བྱུང་བ་ལྡོག་ཏུ་མ་ཕོད་པར། གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་བདེ་ཆེན་མཆོག་གྱུར་གླིང་པའི་ཞབས་རྡུལ་སྤྱི་བོར་ཕོག་པའི་སྙོམ་ལས་མཁན་རྒྱལ་ཁམས་ཀུན་ཏུ་རྒྱུ་བའི་གསོ་སྦྱོང་པ་། ཀརྨ་དྲི་མེད་བློ་གྲོས་སུ་འབོད་པས་ཡེར་ཕུག་ནམ་རྫོང་འགྱུར་མེད་གླིང་ནས་དབུ་བརྩམས་ཏེ། ས་སྤྱོད་གསུང་གི་འཁོར་ལོ་འོག་མིན་ཀརྨའི་གཙུག་ལག་གཡེར་མོ་ཆེའི་ཤར་ལྷོའི་སྤྱིལ་པོ་ནས་བྲིས་པ་འབྲེལ་ཚད་དོན་དང་ལྡན་ཞིང་། ཐོག་མ་མེད་པའི་དུས་ནས་གོམས་པའི་མ་དག་པའི་སྣང་ཞེན་གཞིག་པའི་ཆེད་དུ་དག་པ་ལྷའི་སྣང་བ་བརྟན་པོ་ལ་གོམས་ནས་དཔལ་ཧེ་རུ་ཀའི་གྲོང་ཁྱེར་དུ་འཇུག་པར་གྱུར་ཅིག །མངྒ་ལཾ་དགེའོ།། །།

ཚེ་དཔག་གསོལ་འདེབས་འཆི་མེད་དཔལ་སྦྱིན། སི་ཏུ་པདྨ་ཉིན་བྱེད་དབང་པོ།

ཚེ་དཔག་གསོལ་འདེབས་འཆི་མེད་དཔལ་སྦྱིན་བཞུགས་སོ། །ན་མོ་གུ་རུ་ཨཱཿཡུར་ཛྙཱ་ན་སིདྡྷི་ཧཱུྃ། རྒྱལ་བ་ཡོན་ཏན་མཐའ་བྲལ་ཡེ་ཤེས་ཀྱི། །འོད་ཀྱི་སྣང་བ་དཔག་མེད་ཚེ་མཐའ་ཡས། །དཀྱིལ་འཁོར་ལྷ་ཚོགས་རབ་འབྱམས་རྒྱ་མཚོ་ལ། །གསོལ་འདེབས་འཆི་མེད་རྡོ་རྗེའི་གྲུབ་གཉིས་སྩོལ། །དུས་གསུམ་བདེ་གཤེགས་ཐུགས་རྗེའི་གཏེར་ཆེན་པོ། །སངས་རྒྱས་གཉིས་པ་གུ་རུ་པདྨ་འབྱུང་། །ཡུམ་ཆེན་ཌཱ་ཀིའི་གཙོ་མོ་མནྡ་ར། །གསོལ་འདེབས་འཆི་མེད་རྡོ་རྗེའི་གྲུབ་གཉིས་སྩོལ། །བདེ་ཆེན་དགྱེས་སྡེ་གསང་

སྔགས་བསྡུ་བ་པོ། །མ་གཅིག་མཚོ་རྒྱལ་མངའ་བདག་མུ་ཁྲི་བཙན། །དངོས་སྣང་བདུད་འདུལ་མི་འགྱུར་རྡོ་རྗེ་ལ། །གསོལ་འདེབས་འཆི་མེད་རྡོ་རྗེའི་གྲུབ་གཉིས་སྩོལ། །གང་འདུལ་རྣམ་དག་སྤྲུལ་པའི་ཞིང་ཁམས་སུ། །སྣ་ཚོགས་ཐབས་ཀྱིས་འཁོར་བ་དོང་ནས་སྤྲུགས། །བཀའ་བབས་ཆོས་བདག་བརྒྱུད་པའི་བླ་མ་ལ། །གསོལ་འདེབས་འཆི་མེད་རྡོ་རྗེའི་གྲུབ་གཉིས་སྩོལ། །མཁའ་སྤྱོད་ས་སྤྱོད་གནས་ཡུལ་དུར་ཁྲོད་ཚལ། །མཁའ་འགྲོ་ཆོས་སྐྱོང་སྲུང་མ་དགེ་བསྙེན་སོགས། །དམ་ལ་

གནས་ཤིང་བཀའ་ཡི་བྱ་ར་བ། །གསོལ་འདེབས་ཚེ་བདུད་བར་ཆད་ཞི་བར་གཛོད། །དེ་ལྟར་གསོལ་བཏབ་བྱིན་བརླབས་མཐུ་དཔལ་གྱིས། །དྲང་ངེས་ཆོས་ཀྱི་རིང་ལུགས་རྒྱལ་མཚན་གང་། །མི་ནུབ་སྲིད་རྩེར་ཀུན་ཁྱབ་དེ་འཛིན་གྱི། །སྐྱེས་མཆོག་བླ་མའི་སྐུ་ཚེ་བརྟན་པར་ཤོག །དགེ་འདུན་འདུས་པ་དར་རྒྱས་ཐོས་བསམ་སྒོམ། །བསླབ་གསུམ་གཞི་བརྟན་རྒྱལ་ཁམས་བདེ་ཞིང་དགེ །རྫོགས་ལྡན་སྐལ་བཟང་འདོད་པ་འཇོ་བཞིན་པར། །ཆོས་མིན་ཚར་གཅོད་རྗེས་སུ་འཛིན་པར་ཤོག །སྒྲུབ་པའི་རྣལ་འབྱོར་དྭངས་མའི་སྐུ་བརྙེས་ཤིང་། །འཕོ་བྲལ་དགའ་བདེ་ཨེ་ཝཾ་ཟུང་འཇུག་ཀློང་། །ཆོས་ཀུན་དྷུ་ཏིར་དག་ནས་སྐྱེ་མེད་ཀྱི། །རང་བྱུང་གདོད་མའི་སངས་རྒྱས་ཉིད་གྱུར་ཅིག །ཅེས་པ་འདི་སི་ཏུ་པདྨ་ཉིན་བྱེད་དབང་པོས་སྤེལ་བ་ཛ་ཡནྟུ།། །།

གསང་སྒྲུབ་ཚེ་སྒྲུབ།

༁ྃ༔ གནས་མཆོག་སྤྱི་འབྱམས་བྲག་ངོས་ནས༔ ཟླ་བདུན་བརྐོས་པའིི་ཤོག་སེར་གྱི༔ གསང་སྒྲུབ་ཚེ་སྒྲུབ་ཨེ་མ་ཧོ༔ མི་འགྱུར་རྡོ་རྗེ་བདག་གིས་བཏོན༔ སུས་ཀྱང་བསྲེ་སླད་མ་བསྲེ་ཞིག༔ ས་མ་ཡ༔ རྒྱ་རྒྱ་རྒྱ༔

དང་པོ་བགེགས་ལ་གཏོར་མ་སྦྱིན་པ་ནི༔ གླུད་གཟུགས་དབང་པོ་ཚང་བ་ལ་ཆངས་བུ་ཏིང་ལོ་མར་མེ་བྱས་ལ་འདི་ལྟ་སྟེ༔ ཧཱུྃ་བྷྱོ༔ ང་ནི་པདྨ་བཛྲ་ཡབ་ཡུམ་སྐུ༔ སྐུ་ལས་བདུད་རྩི་བབ་པས་གླུད་ལ་ཐིམ༔ གླུད་རྫས་ཡེ་ཤེས་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ་གི་ཡེ་གེས་བྱིན་བརླབས་གྱུར༔ ཅེས་བདུད་རྩིས་བྱིན་བརླབས་ནས༔ ན་མོ༔ དཀོན་མཆོག་གསུམ་གྱི་བདེན་པ་དང་༔ ཏིང་འཛིན་ལྷ་སྔགས་བདེན་པའི་མཐུས༔ བྱང་ཆུབ་སྒྲུབ་ལ་བར་ཆད་བགེགས༔ རང་དབང་མེད་པར་འདིར་ཁུག་ཅིག༔ གླུད་གཟུགས་འདི་དང་དབྱེར་མེད་གྱུར༔ སརྦ་བིགྷྣན་ཨཾ་ཀུ་ཤ་ཛཿ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སཾ་བྷ་ར་སཾ་བྷ་ར་ཧཱུྃ༔ ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་ནས་ཁཾ་སྭཱ་ཧཱ༔ ཧཱུྃ༔ ཉོན་ཅིག་ལོག་འདྲེན་བགེགས་ཀྱི་ཚོགས་རྣམས་ཉོན༔ སྔོན་གྱི་ལས་དང་འཕྲལ་གྱི་རྐྱེན་ལ་སོགས༔ བྱུང་གྱུར་བགེགས་ཀྱི་ཚོགས་རྣམས་

ཐམས་ཅད་ལ༔ དམ་རྫས་གླུད་གཏོར་ཟས་སྣ་མཆོད་པ་འབུལ༔ མར་མེ་ཏིང་ལོ་ཆངས་བུ་མཆོད་པ་འབུལ༔ གླུད་གཟུགས་ཡས་སྟགས་སྣ་ཚོགས་མཆོད་པ་འབུལ༔ བཀའ་ཡི་ཕ་འབབ་གླུད་གཏོར་འདི་ལོངས་ལ༔ སྒྲུབ་ལ་བར་དུ་མ་གཅོད་རང་གནས་སུ༔ མྱུར་དུ་དེངས་ཤིག་ལོག་འདྲེན་བགེགས་ཀྱི་ཚོགས༔ ཕྱོགས་མེད་ཕྱོགས་བྲལ་གནས་སུ་ཕྱིར་དེངས་ཤིག༔ སརྦ་བིགྷྣན་ཨུ་ཙ་ཊ་ཡ་ཕཊ༔ ཅེས་བགེགས་གཏོར་ཕྱི་རོལ་དུ་དོར༔ རྔ་དུང་རོལ་མོ་ལྡིར༔ གུ་གུལ་ཤ་ཆེན་སྤོས་བསྲེགས༔ ཡུངས་དཀར་ནག་གིས་བྲབ༔ དར་ནག་གཡུགས༔ ཕཊ་སྒྲ་དྲག་པོ་བརྗོད༔ དེ་ལྟར་བགེགས་གཏོར་གྱི་རིམ་པ་གྲུབ་ནས༔ ༈ ལས་རིམ་དགུ་པ་གནས་བདག་ལ་གཏོར་མ་སྦྱིན་པ་ནི་འདི་ལྟ་སྟེ༔ ༀ་ཨཱཿཧཱུྃ༔ རིན་ཆེན་སྣོད་མཆོག་གཏོར་གཞོང་ཡངས་པའི་ནང་༔ བྷྲཱུྃ་ལས་གཏོར་མ་རོ་བརྒྱ་ལྡན་པ་ཡི༔ ཞལ་ཟས་འདོད་ཡོན་ཟག་མེད་བདུད་རྩིར་གྱུར༔ ༀ་ཨཱཿཧཱུྃ༔ ལན་གསུམ་གྱིས་བྱིན་བརླབས་ནས༔

ཧཱུྃ༔ སྟེང་གི་ལྷ་དང་འོག་གི་ཀླུ༔ ས་བདག་ཀླུ་གཉེན་ཐམས་ཅད་དང་༔ ལྷ་སྲིན་སྡེ་བརྒྱད་འཁོར་བཅས་རྣམས༔ གནས་འདིར་སྤྱན་འདྲེན་གཤེགས་སུ་གསོལ༔ འདིར་གཤམས་པདྨའི་གདན་ལ་བཞུགས༔ དངོས་འབྱོར་ཡིད་སྤྲུལ་མཆོད་པ་འབུལ༔ ཕྱི་ནང་གསང་གསུམ་མཆོད་པས་མཆོད༔ འཇིག་རྟེན་སྐྱོང་བ་ཁྱོད་ལ་བསྟོད༔ སྔོན་ཚེ་ཤཱཀྱའི་རྒྱལ་པོ་དང་༔ བཅོམ་ལྡན་ཕྱག་ན་རྡོ་རྗེ་དང་༔ རིག་འཛིན་པདྨ་བཛྲ་གྱིས༔ བཀའ་བསྒོས་དམ་ཚིག་དྲན་མཛོད་ལ༔ བཀའ་ཡི་གཏོར་མ་འདི་བཞེས་ཤིག༔ ཕུད་སྐྱེམས་མཆོད་གཏོར་འདི་ལོངས་ལ༔ སྒྲུབ་པའི་སྡོངས་གྲོགས་མཛད་དུ་གསོལ༔ ཡིད་ལ་གང་བསམ་འགྲུབ་པར་མཛོད༔ ཨ་ཡ་མ་དུ་རུ་ཙ་ཤ་ནཱ་ཨི་དཾ་བ་ལྟིཾ་པཱུ་ཛ་ཁཱ་ཧི༔ ཞེས་བརྗོད་ལ་གཏོར་མ་གཙང་མའི་གནས་སུ་བསྐྱལ་ལོ༔

ནམ་མཁའི་སྙིང་པོའི་ཚེ་སྒྲུབ་བཞུགས༔ དི།རྨརྒྱི།འི།ཏི།ཤརྦི།༔ ཡེ་གདོད་ཉིད་ནས་རྣམ་དག་ཆོས་ཀྱི་སྐུ༔ ཡེ་ཤེས་ལྔ་ཡི་རང་གཟུགས་ལྷན་ཅིག་སྐྱེས༔ རྒྱལ་བ་ཀུན་འདུས་བླ་མ་ཧེ་རུ་ཀ༔ པདྨ་སམ་བྷ་གང་དེ་རྒྱལ་གྱུར་ཅིག༔ ཆོས་རྣམས་ཀུན་གྱི་དོན་བསྡུས༔ སློབ་དཔོན་པདྨའི་ཐུགས་བཅུད༔ མ་མོ་མཁའ་འགྲོའི་སྙིང་ཁྲག༔ ནམ་མཁའི་སྙིང་པོའི་ཆོས་སྐལ༔ ཚེ་སྒྲུབ་འཆི་མེད་བཙན་རྫོང་༔ གསང་སྒྲུབ་རྡོ་རྗེ་ཕ་ལམ༔ ཟབ་དོན་འདི་ཡི་བྱེད་ལས༔ དབེན་པའི་གནས་སུ་མཎྜལ༔ ཟླ་གམ་སྟེང་དུ་དཀྱིལ་འཁོར༔ པདྨ་དམར་པོ་འདབ་བརྒྱད༔ ལྟེ་བར་ལྕགས་ཀྱུ་དམར་པོའི༔ ལྟེ་བར་ཧྲཱིཿཡིག་དམར་པོ༔ འདབ་བརྒྱད་ཧྲཱིཿབརྒྱད་དེ་སྟེང་༔ དཔལ་གཏོར་ནོར་བུ་འབར་བ༔ མཐའ་མར་མཆོད་པ་སྣ་ཚོགས༔ སྨན་རཀ་ཚོགས་གཏོར་བཀོད་ནས༔ ལེ་ལོ་བག་ཉལ་སྤངས་ནས༔ རིག་པ་ངར་དང་ལྡན་པས༔ ས་ལེ་སེང་ངེ་ལམ་མེ༔ ཧྲིག་གེ་རྗེན་ནེར་འདི་ལྟར༔ མོས་བློ་ལྡན་པས་

བསྒོམ་མོ༔ རྔ་དུང་རོལ་ཆས་ལྡིར་ཏེ༔ སྤོས་བདུག་ཡུངས་ཀར་བྲབ་བོ༔ དང་པོ་སྲུང་འཁོར་བསྒོམ་པ༔ ཧྲཱིཿ སྣང་སྲིད་ལྷ་ཡི་ཕོ་བྲང་འབར༔ མཚོན་ཆ་མེ་དཔུང་ཁྲོ་ཚོགས་འཁྲུགས༔ བགེགས་ཚོགས་ཤ་ཁྲག་དམར་ཉིལ་གཏུབ༔ མིང་ཡང་གྲགས་པ་མེད་ཏ་རེ༔ ཧཱུྃ་ཧཱུྃ་ཧཱུྃ༔ གཉིས་པ་སྐྱབས་སུ་འགྲོ་བ་དང་༔ སེམས་བསྐྱེད་བྱང་ཆུབ་བསྒྲུབ་པ་ནི༔ ཧྲཱིཿ དུས་གསུམ་རྒྱལ་བའི་དཀྱིལ་འཁོར་ལ༔ སྒོ་གསུམ་གུས་པས་སྐྱབས་སུ་མཆི༔ བདག་དང་དུས་གསུམ་སེམས་ཅན་རྣམས༔ བདེ་ལྡན་སངས་རྒྱས་མྱུར་ཐོབ་ཤོག༔ ཧཱུྃ་ཧཱུྃ་ཧཱུྃ༔ བྱིན་འབེབས་ཏིང་འཛིན་བསྒོམ་པ་ནི༔ ཧྲཱིཿ སྣང་སྲིད་ལྷ་ཡི་དཀྱིལ་འཁོར་ལ༔ འཛིན་མེད་རང་གྲོལ་བྱིན་ཕོབ་ཅིག༔ འཁོར་འདས་བདེན་མེད་སྒྱུ་མའི་གཟུགས༔ ཀློང་ཡངས་དབྱིངས་སུ་རང་གྲོལ་ནས༔ དབྱིངས་རིག་ཡེ་དག་སྤྲོས་བྲལ་ཀློང་༔ བརྗོད་མེད་རང་རིག་ཏིང་འཛིན་གསལ༔ ཧཱུྃ་ཧཱུྃ་ཧཱུྃ༔ གསལ་སྟོང་ལྷ་སྐུ་བསྒོམ་པ་ནི༔ ཧྲཱིཿ ཧེ་རུ་ཀ་ཡི་ཆོ་

འཕྲུལ་ལས༔ ཀློང་ཡངས་ཆེན་པོའི་ཕོ་བྲང་བརྡལ༔ མཉམ་ཉིད་ཆེན་པོའི་རང་བཞིན་ལས༔ རང་རིག་ཧྲཱིཿདམར་གསལ་འོད་ཞུ༔ ཡོངས་གྱུར་རྟ་མཆོག་ཧེ་རུ་ཀ༔ དམར་གསལ་ཞལ་གཅིག་ཕྱག་གཉིས་པ༔ རྩ་ཞལ་དམར་པོ་ཁྲོས་རྔམ་བརྗིད༔ སྤྱན་གསུམ་ཞལ་གདངས་མཆེ་བ་གཙིགས༔ སྨིན་མ་ཨག་ཚོམ་དབུ་སྐྲ་འབར༔ ཐོད་སྐམ་དར་དཔྱངས་དབུ་ལ་རྒྱན༔ སྤྱི་བོར་རྟ་མགོ་ལྗང་ནག་ཞུར༔ རྟ་སྐད་ཙེར་ཙེར་དྲེགས་ཟིལ་གནོན༔ ཕྱག་གཡས་པདྨའི་དབྱུག་ཐོ་ཕྱར༔ གཡོན་པས་སྡིགས་མཛུབ་ཐོག་སེར་འབེབས༔ སྐུ་ལ་རུས་རྒྱན་མགོ་ཕྲེང་སྦྲུལ༔ སྟག་ཤམ་རིན་ཆེན་ཕྲེང་བས་བརྒྱན༔ ཞབས་གཉིས་འདོར་སྟབས་སྡེ་བརྒྱད་བརྫིས༔ སྐུ་ལས་ཡེ་ཤེས་མེ་རི་འབར༔ རང་འདྲའི་སྤྲུལ་པ་བརྒྱད་ཀྱིས་བསྐོར༔ གསལ་སྟོང་མེ་འོད་ལྟ་བུར་བསྒོམ༔ ཐུགས་ཀར་དཀྱིལ་འཁོར་གྲུ་བཞི་

པ༔ སྒོ་བཞི་རྟ་བབས་བཞི་ལྡན་དབུས༔ པདྨ་ཟླ་བའི་གདན་སྟེང་དུ༔ ཧྲཱིཿདམར་ལས་བྱུང་ཚེ་དཔག་མེད༔ ཞི་དམར་ཞལ་གཅིག་ཕྱག་མཉམ་བཞག༔ ཚེ་བུམ་སྐུ་ལ་རིན་ཆེན་བརྒྱན༔ དར་ལའི་སྟོད་གཡོགས་སྨད་གཡོགས་ཞབས༔ རྡོར་སྐྱིལ་ལམ་མེར་བཞུགས་པར་གསལ༔ རང་འདྲའི་སྤྲུལ་པ་བརྒྱད་ཀྱིས་བསྐོར༔ དེ་ལྟར་ཤེས་རབ་དཀྱིལ་འཁོར་བསྒོམ༔ ཀླད་པ་དུང་ཁང་དབུས་སུ་ནི༔ དཀྱིལ་འཁོར་གྲུ་བཞི་སྒོ་བཞི་པ༔ རྟ་བབས་བཞི་ལྡན་དེ་ཡི་དབུས༔ པདྨ་དཀར་པོ་འདབ་བརྒྱད་སྟེང་༔ ཧྲཱིཿདཀར་ལས་བྱུང་ཚེ་དཔག་མེད༔ དཀར་གསལ་ཞི་ཞལ་ཕྱག་ཚེ་བུམ༔ མཉམ་བཞག་ཞབས་གཉིས་རྡོར་སྐྱིལ་སྟེང་༔ རྒྱན་ལྡན་ལོངས་སྤྱོད་རྫོགས་པའི་སྐུ༔ རང་འདྲའི་སྤྲུལ་པ་སུམ་ཅུས་བསྐོར༔ དེ་ལྟར་ཐབས་ཀྱི་དཀྱིལ་འཁོར་བསྒོམ༔ མགྲིན་པར་ཆོས་འབྱུང་བསྣོལ་མ་དམར༔ དེ་དབུས་པད་

འདབ་བཅུ་དྲུག་སྟེང་༔ ཧྲཱིཿལས་རྡོ་རྗེ་ཕག་མོ་དམར༔ ཞལ་གཅིག་ཕྱག་གཉིས་རྩ་ཞལ་ཁྲོས༔ སྤྱི་བོར་ཕག་ཞལ་ནག་པོ་ངུར༔ གྲི་ཐོད་ཁ་ཊྭཱཾ་ཕྱག་ན་བསྣམས༔ དྲག་པོའི་རྒྱན་གསོལ་ཞབས་གར་སྟབས༔ རང་འདྲའི་སྤྲུལ་པ་བཅུ་དྲུག་བསྐོར༔ དེ་ལྟར་ཟུང་འཇུག་དཀྱིལ་འཁོར་བསྒོམ༔ ལྟེ་བར་ཆོས་འབྱུང་གྲུ་གསུམ་དབུས༔ པདྨ་ཉི་རོའི་སྟེང་དུ་ཧཱུྃ༔ ལས་བྱུང་མ་ཧཱ་ཀཱ་ལ་ནག༔ དྲག་པོའི་ཞལ་ཁྲོས་ཕྱག་གཉིས་ཀྱིས༔ གྲི་ཐོད་སྐུ་ལ་བེར་ནག་གསོལ༔ ཞབས་གཉིས་འདོར་སྟབས་ལོག་འདྲེན་མནན༔ རང་འདྲའི་སྤྲུལ་པ་དྲུག་ཅུས་བསྐོར༔ དེ་ལྟར་བགེགས་འཇོམས་དཀྱིལ་འཁོར་བསྒོམ༔ དེ་ལྟར་གསལ་བའི་ཐུགས་ཀ་ནས༔ འོད་འཕྲོས་ནུབ་ཕྱོགས་བདེ་ཆེན་ནས༔ ཡེ་ཤེས་སེམས་དཔའ་སྤྱན་དྲངས་ནས༔ རང་ལ་སིབ་སིབ་ཐིམ་པར་བསྒོམ༔ དབང་བསྐུར་བྱིན་གྱིས་བརླབས་པར་

གྱུར༔ ཛཿཧཱུྃ་བྃ་ཧོཿ ཨངྐུ་ཤ་ཛ༔ སྤྱན་འདྲེན་གདན་འབུལ་མཆོད་བསྟོད་ནི༔ ཧྲཱིཿ བདེ་བ་ཅན་དང་ཨོ་རྒྱན་ཡུལ༔ དག་པའི་ཞིང་ཁམས་ཐམས་ཅད་ནས༔ ཚེ་དང་ཡེ་ཤེས་འོད་དཔག་མེད༔ ཡུམ་མཆོག་རྡོ་རྗེ་ཕག་མོ་དང་༔ དབང་ཆེན་རྟ་མཆོག་ཧེ་རུ་ཀ༔ བདུད་འདུལ་མ་ཧཱ་ཀཱ་ལ་སོགས༔ ཡེ་ཤེས་པ་དང་དམ་ཚིག་པའི༔ ལྷ་ཚོགས་འཁོར་བཅས་གནས་འདིར་བྱོན༔ ཧཱུྃ་ཧཱུྃ་ཧཱུྃ༔ ངར་དང་ལྡན་པའི་སྒྲས་འབོད་དོ༔ ཧྲཱི༔ འདིར་བྱོན་ཚེ་ཡི་ལྷ་ཚོགས་རྣམས༔ རྩ་འཁོར་བཞི་ཡི་གདན་ལ་བཞུགས༔ ཧཱུྃ་ཧཱུྃ་ཧཱུྃ༔ ཞེས་པས་གདན་འབུལ༔ ཧྲཱི༔ ཚེ་ལྷ་འཁོར་བཅས་ཁྱེད་རྣམས་ལ༔ ཕུང་ཁམས་སྐྱེ་མཆེད་མཆོད་པ་འབུལ༔ ཧཱུྃ་ཧཱུྃ་ཧཱུྃ༔ ཞེས་པས་ནང་གི་མཆོད་པ་འབུལ༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་ལ༔ དུག་གསུམ་དུག་ལྔའི་མཆོད་པ་འབུལ༔ ཧཱུྃ་ཧཱུྃ་ཧཱུྃ༔ ཞེས་པས་གསང་བའི་མཆོད་པ་འབུལ༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་ལ༔ ཤ་ལྔ་བདུད་རྩི་ལྔ་མཆོད་འབུལ༔

ཧཱུྃ་ཧཱུྃ་ཧཱུྃ༔ ཞེས་པས་རྫས་ཀྱི་མཆོད་པ་འབུལ༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་ལ༔ གཟུགས་སྒྲ་དྲི་རོ་རེག་བྱ་འབུལ༔ ཧཱུྃ་ཧཱུྃ་ཧཱུྃ༔ ཞེས་འདོད་ཡོན་མཆོད་པ་འབུལ༔ ཧྲཱིཿ རྡོ་རྗེ་ཚེ་ཡི་ལྷ་ཚོགས་ལ༔ ཚོགས་གཏོར་སྨན་རཀ་གཏོར་མ་འབུལ༔ ཧཱུྃ་ཧཱུྃ་ཧཱུྃ༔ ཞེས་པས་སྨན་རཀ་ཚོགས་གཏོར་འབུལ༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་རྣམས༔ ཐུགས་དམ་གཉན་པོ་བསྐང་གྱུར་ཅིག༔ ཧཱུྃ་ཧཱུྃ་ཧཱུྃ༔ ཞེས་པས་ཐུགས་དམ་བསྐང་༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་ལ༔ དམ་ཚིག་ཉམས་ཆག་མཐོལ་ལོ་བཤགས༔ ཧཱུྃ་ཧཱུྃ་ཧཱུྃ༔ ཞེས་བརྗོད་པས་ཉམས་ཆག་བཤགས༔ ཧྲཱི༔ རྡོ་རྗེ་ཚེ་ཡི་ལྷ་ཚོགས་རྣམས༔ སངས་རྒྱས་ཀུན་འདུས་ཁྱོད་ལ་བསྟོད༔ ཧཱུྃ་ཧཱུྃ་ཧཱུྃ༔ ཞེས་བརྗོད་པས་བསྟོད༔ དེ་ནས་འཛབ་དབྱངས་གནད་འབེབས་བྱ༔ ཧྲཱི༔ རྒྱལ་བ་ཀུན་གྱི་ཐུགས་གསང་བ༔ སྙིང་པོ་འབྱུང་བ་བཞི་ཡི་བཅུད༔ བདག་གི་ལུས་ལ་སིབ་སིབ་ཐིམ༔ འཆི་མེད་དངོས་གྲུབ་ཐོབ་པར་བསམ༔ ལྷ་རྣམས་

ཐུགས་ཀར་སྔགས་ཕྲེང་གསལ༔ དྲག་ཏུ་འཁོར་བས་ཚེ་དབང་བསྡུས༔ ༀ་ཨཱཿཧཱུྃ་ཨ་མི་ཏ་བྷ་ཧྱ་གྷྲྀ་ཝ་བཻ་རོ་ཙ་ནཱི་ཨཱཿཡུ་སིདྡྷི་ཛཿཧཱུྃ་བྃ་ཧོཿ ཞེས་བརྗོད་པས་སྣང་སྲིད་འབྱུང་བཞིའི་གཟུགས་ཅན་གཟུགས་མེད་ཀྱི་ཚེ་བསོད་ནམས་ཐམས་ཅད་རང་ལ་བསྟིམ་མོ༔ དེ་ནས་གནད་ལ་འབེབས་པ་ནི༔ གཏོར་མ་ལག་ཏུ་བླངས་ཏེ༔ རང་གི་སྤྱི་བོར་བཞགས་ནས་འདི་སྐད་དོ༔ ཧྲཱིཿ རང་གི་རང་རིག་གསལ་བ་ནི༔ ཡེ་ནས་མ་བཅོས་དམ་ཚིག་སེམས༔ དེ་ལས་འཁྲུལ་ཆ་དག་པ་ནི༔ གདོད་མའི་མགོན་པོ་ཡེ་སངས་རྒྱས༔ ཡེ་ཤེས་སེམས་དཔའ་ཚེ་དཔག་མེད༔ དམ་ཡེ་སྣང་རིག་དཀྱིལ་འཁོར་འདིར༔ ཚེ་ལྷའི་དཀྱིལ་འཁོར་གཤེགས་ནས་ཀྱང་༔ དབང་བསྐུར་བདག་རྒྱུད་བྱིན་གྱིས་རློབས༔ དུག་གསུམ་བདེ་སྟོང་གསལ་བ་ཡི༔ དངོས་སྣང་ཡེ་དག་དབང་ཐོབ་ཤོག༔ དུག་ལྔ་རང་མཐོང་རང་གྲོལ་བའི༔ འཛིན་མེད་སྤྲོས་བྲལ་དབང་ཐོབ་ཤོག༔ ཐམས་ཅད་ཡེ་དག་སྤྲོས་བྲལ་ངང་༔

ཀློང་ཡངས་བྱ་བྲལ་དབང་ཐོབ་ཤོག༔ སྐུ་གསུམ་ཡེ་ནས་རྫོགས་པ་ཡི༔ བདེ་གསལ་མི་རྟོག་དབང་ཐོབ་ཤོག༔ དུག་ལྔ་ཡེ་ནས་དག་པ་ཡི༔ ཡེ་ཤེས་ལྔ་ཡི་དབང་ཐོབ་ཤོག༔ ཁམས་ལྔ་ཡེ་ནས་དག་པ་ཡི༔ སྐུ་ལྔ་ཡེ་ཤེས་དབང་ཐོབ་ཤོག༔ ཆགས་བྲལ་ལུས་མེད་ཡེ་ཤེས་གཟུགས༔ ལུས་མེད་གདོས་བོར་དབང་ཐོབ་ཤོག༔ ཀུན་རྫོབ་ཆོས་ཀུན་ཡེ་དག་པའི༔ དངོས་སྣང་བདེན་མེད་དབང་ཐོབ་ཤོག༔ དོན་དམ་བདེན་མེད་རང་གྲོལ་བའི༔ འཛིན་མེད་སྤྲོས་བྲལ་དབང་ཐོབ་ཤོག༔ ཐམས་ཅད་ཡེ་དག་ཀུན་བཟང་ཀློང་༔ སྨྲ་བསམ་བརྗོད་མེད་དབང་ཐོབ་ཤོག༔ ཚེ་ཡང་དེ་ཡི་དཀྱིལ་དུ་འཛུགས༔ ཚེ་དཔལ་བསོད་ནམས་བརྟན་པར་ཤོག༔ ཚེ་ལྷའི་སྐུ་གསུང་ཐུགས་ཡོན་ཏན༔ ཕྲིན་ལས་ཡོངས་རྫོགས་དབང་ཐོབ་ཤོག༔ སྐྱེ་བ་འདི་ནས་ཚེ་རབས་ཀུན༔ ཚེ་དཔག་མེད་དང་དབྱེར་

མེད་ཤོག༔ ༀ་ཨཱ༔ཧཱུྃ་ཨ་མི་ཏ་བྷ་ཧྱ་གྷྲྀ་ཝ་བཻ་རོ་ཙ་ནི་ཨཱཿཡུ་སིདྡྷི་ཛཿཧཱུྃ་བཾ་ཧོཿ ཞེས་གཏོར་མ་སྐུ་འབག་ཡི་གེས་སྤྱི་བོར་དབང་བསྐུར་ལ༔ རང་གི་ལུས་ངག་ཡིད་གསུམ་ཡེ་གདོད་མ་ནས༔ སྐུ་གསུམ་གྱི་རང་བཞིན་དུ་ཐག་བཅད་ལ༔ སྤྱོད་ལམ་ཐམས་ཅད་དུ་ཚེ་ལྷའི་ཏིང་འཛིན་དང་མ་བྲལ་བར་བྱའོ༔ འདི་ཡི་ལོ་རྒྱུས་ནི་དཔལ་བསམ་ཡས་སུ་པདྨ་སཾ་བྷ་དེ་ཉིད་ཐུགས་སྲས་གནུབས་ནམ་མཁའི་སྙིང་པོ་བདག་གིས་སློབ་དཔོན་ལ་གཡུ་ཡི་མཎྜལ་ཕུལ་ཏེ༔ གསོལ་བ་བཏབ་པའི་བཀའ་དྲིན་དུ་གནང་བ་འདི༔ བདག་གིས་རང་དབང་ཆུབ་པར་བྱས་ཏེ༔ དབང་འབྱོར་བའི་ནུས་རྟགས་ནི༔ ཕྱིས་རྒྱལ་པོ་གླང་དར་མས་འཇིགས་པའི་དགྲ་སྡང་བར་བྱས་པས༔ གཏོར་རྫས་ཡང་མ་རྙེད་པས༔ དྲི་ཆུ་གཏོར་རྫས་སུ་བཤམས་པས༔ ཚེ་ལྷའི་དཀྱིལ་འཁོར་བདག་གི་མདུན་དུ་ལྷགས་ཏེ༔ འོད་ཟེར་དྲི་ཆུ་ལ་ཕོག་པས་ཁྲོ་ཆུ་ཁོལ་མ་དང་ཐོག་སེར་དུ་གྱུར་ཏེ༔ རྒྱལ་པོ་ཡང་འཇིགས་པར་བྱས༔ སྡིག་བློན་རྣམས་བརྒྱལ་ཏེ༔ དགེ་སློང་བདག་ལ་འཚེ་བར་མ་ནུས་སོ༔ ཧཱུྃ་སྒྲ་བསྒྲགས་པས་གཞན་སེམས་ཕམ་པར་གྱུར་ཏོ༔ ནམ་མཁའི་སྙིང་པོ་བདག་གིས་ཨོ་རྒྱན་ལ་ཞུས་པས༔ ང་ཡིས་བཤད་མི་ནུས་ཁོང་གི་སྐུ་ཚབ་ལ་དྲིས་གསུངས༔ དེ་རིང་ང་ར་ས་འཕྲུལ་སྣང་དུ་རབ་གནས་ལ་འགྲོ་དགོས་གསུངས་པས༔ དེར་དྲིས་པས་སྐུ་ཚབ་ཀྱིས་ཇི་ལྟར་གསུངས་པའི་ཚིག་བཅོས་བསླད་མེད་པར་གཏན་ལ་ཕབ་པ༔ མ་འོངས་སྐལ་ལྡན་གཅིག་དང་འཕྲད་

པར་ཤོག༔ བཀའ་གཉན་རྒྱ༔ དམ་ཚིག་གསང་རྒྱ༔ གཞན་ལ་སྤེལ་རྒྱ༔ ས་མ་ཡ༔ རྒྱ་རྒྱ་རྒྱ༔ ཨྀཐི༔ མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་གཏེར་མ་བསླད་མེད་པའོ།།

ནམ་མཁའི་སྙིང་པོའི་ཚེ་སྒྲུབ་ཀྱི་ཚེ་འགུགས་ཚེ་གཡང་དཔལ་བེའུ་ཆད་པ་མེད་པའི་རྒྱུན་བཟང་བཞུགས། པདྨ་རྣམ་པར་རྒྱལ་བ།

ནམ་མཁའི་སྙིང་པོའི་ཚེ་སྒྲུབ་ཀྱི། །ཚེ་འགུགས་ཚེ་གཡང་དཔལ་བེའུ། །ཆད་པ་མེད་པའི་རྒྱུན་བཟང་བཞུགས། །ཚེ་འགུགས་པ་ནི་མདའ་དར་གཡབ་ཅིང་། ཧཱུྃ་ཧྲཱིཿ སྣང་སྲིད་ཟླ་གམ་དབང་གི་དཀྱིལ་འཁོར་ནས། །སྣང་བ་མཐའ་ཡས་རྟ་མཆོག་ཧེ་རུ་ཀ །སྣང་སྟོང་སྐུ་ཡི་སྤྲུལ་བསྒྱུར་མཐའ་ཡས་པས། །སྣང་བཅས་སྣང་མེད་ཚེ་ཡི་བཅུད་རྣམས་བསྡུས། །ཧ་ཡ་གྷྲྀ་ཝ་ཨཱཿཡུ་སིདྡྷི་ཧཱུྃ། །བདེ་ཆེན་འཁོར་ལོ་སྐུ་ཡི་དཀྱིལ་འཁོར་ནས། །བདེ་མཆོག་སྐུ་ཡི་ལྷ་ཚོགས་སྐུ་བཞེངས་ལ། །བདེ་བ་ཆེན་པོའི་སྤྲུལ་བསྒྱུར་སྣ་ཚོགས་ཀྱིས། །བདེ་ཆེན་ཐིག་ལེ་

ཚེ་ཡི་བཅུད་རྣམས་བསྡུས། །ཏ་ཐཱ་ག་ཏ་ཨཱཿཡུ་སིདྡྷི་ཧཱུྃ། །ལོངས་སྤྱོད་འཁོར་ལོ་གསུང་གི་དཀྱིལ་འཁོར་ནས། །ལོངས་སྐུ་མཁའ་འགྲོའི་ལྷ་ཚོགས་སྐུ་བཞེངས་ལ། །ལོངས་སྤྱོད་རབ་རྫོགས་སྤྲུལ་བསྒྱུར་མཐའ་ཀླས་པས། །རླུང་ལྔའི་རང་མདངས་ཚེ་ཡི་བཅུད་རྣམས་བསྡུས། །བཻ་རོ་ཙ་ནཱི་ཨཱཿཡུ་སིདྡྷི་ཧཱུྃ། །ཆོས་ཀྱི་འཁོར་ལོ་ཐུགས་ཀྱི་དཀྱིལ་འཁོར་ནས། །ཆོས་སྐུ་སྣང་བ་མཐའ་ཡས་སྐུ་བཞེངས་ལ། །སོར་རྟོགས་ཡེ་ཤེས་སྒྱུ་འཕྲུལ་སྣ་ཚོགས་ཀྱིས། །དེ་ཁོ་ན་ཉིད་ཚེ་ཡི་བཅུད་རྣམས་བསྡུས། །ཨ་མི་ཏ་བྷ་ཨཱཿཡུ་སིདྡྷི་ཧཱུྃ། །སྤྲུལ་པའི་འཁོར་ལོ་ཡོན་ཏན་དཀྱིལ་འཁོར་ནས། །བདུད་འདུལ་མགོན་པོའི་ལྷ་ཚོགས་སྐུ་བཞེངས་ལ། །ཕྲིན་ལས་བཞི་ཡི་རྣམ་རོལ་དཔག་མེད་ཀྱིས། །ཤ་ཁྲག་དྲོད་དབུགས་སེམས་ཀྱི་བཅུད་རྣམས་བསྡུས། །མ་ཧཱ་ཀཱ་ལ་ཨཱཿཡུ་སིདྡྷི་ཧཱུྃ། །གཉུག་མ་རྡོ་རྗེ་ལུས་ཀྱི་དཀྱིལ་

འཁོར་ནས། །དཔའ་བོ་མཁའ་འགྲོའི་ལྷ་ཚོགས་སྐུ་བཞེངས་ལ། །སྤྲུལ་པ་ཡང་སྤྲུལ་བསམ་ཡས་མཁའ་ཁྱབ་ཀྱིས། །ལས་བཞི་འབད་མེད་ལྷུན་གྲུབ་ཚེ་བཅུད་བསྡུས། །ཛ་ཧཱུྃ་བྃ་ཧོཿཨཱཿཡུ་སིདྡྷི་ཧཱུྃ། །མདོར་ན་རྒྱལ་བའི་སྐུ་གསུང་ཐུགས་གསུམ་གྱིས། །སྒོ་གསུམ་རྡོ་རྗེ་གསུམ་དུ་རྒྱས་གདབ་ནས། །རྩ་དག་རླུང་ཐིམ་ཐིག་ལེ་འཕོ་མེད་བརྟན། །འགྱུར་མེད་ཡོངས་གྲུབ་ཚེ་དབང་མཐར་ཕྱིན་ཤོག། །ༀ་ཨཱཿཧཱུྃ་ཧྲཱིཿཨཱཿཡུ་སིདྡྷི་ཧཱུྃ། །རིག་འཛིན་རྩ་བརྒྱུད་བླ་མས་བྱིན་གྱིས་རློབས། །ཡི་དམ་ཞི་ཁྲོའི་ལྷ་ཚོགས་དངོས་གྲུབ་སྩོལ། །གནས་གསུམ་མཁའ་འགྲོའི་ཚོགས་ཀྱིས་བར་ཆད་སོལ། །ཆོས་སྐྱོང་དམ་ཅན་རྒྱ་མཚོས་ཕྲིན་ལས་སྒྲུབས། །ཚེ་དབང་རིག་པ་འཛིན་པའི་སྐུ་བརྙེས་ནས། །ཚེ་དཔག་མེད་པའི་ངོ་བོར་སངས་རྒྱས་ནས། །རང་གཞན་དོན་གཉིས་ལྷུན་གྲུབ་བཀྲ་ཤིས་ཤོག །ཤྲཱི་སྭ་

སྟི་ཨཱཿཡུ་སིདྡྷི་ཧཱུྃ། །སྤྱི་འབྱམས་ཉི་ཟླ་ཕུག་ཏུ་ནམ་སྙིང་ཚེ་སྒྲུབ་འདོན་སྐབས་ལོ་བདུན་ཅུ་དོན་དགུ་ཐུབ་པའི་རྨིས་ལྟས་བྱུང་བས་བན་རྒན་རཏྣས་གང་དྲན་བྲིས་པ་བརྒྱ་དང་བཅུ་ཕྲག་གསུམ་གྱི་བཀྲ་ཤིས་དཔལ་འབར་མི་འགྱུར་ལྷུན་གྲུབ་ཨི་ཝཾ་མཱ་ཡཱ་ཏིཥྛ་བཛྲ་ས་མ་ཡ་ཧོ། །མངྒ་ལཾ། དགེའོ།། །། ༈ རྗེས་ཆོག་ནི༔ དང་པོ་མཆོད་པ་ནི༔ ཧྲཱིཿ བཛྲ་ཨཱཿཡུ་ཨ་མི་ཏ་བྷ་ས་པཱ་རི་ཝ་ར་བཛྲ་ཨརྒྷཾ་སོགས། བསྟོད་པ་ནི༔ ༀ་ཨཱཿཧཱུྃ༔ ཚེ་དང་ཡེ་ཤེས་འོད་དཔག་མེད༔ སངས་རྒྱས་ཀུན་འདུས་བཅོམ་ལྡན་འདས༔ ཡབ་ཡུམ་སྲས་དང་བཙུན་མོར་བཅས༔ འཁོར་དང་བཅས་ལ་ཕྱག་འཚལ་བསྟོད༔ མ་འབྱོར་པ་དང་ཉམས་པ་དང་༔ གང་ཡང་སོགས་ནས་བཟོད་པར་གསོལ༔ ༀ་བཛྲ་ས་ཏྭ་སོགས། ཧཱུྃ༔ རྟེན་དང་གཏོར་མའི་ལྷ་ཚོགས་རྣམས༔ ༼གཉིས་མེད་ངང་དུ་བརྟན་པར་བཞུགས༔༽ སླར་ཡང་རང་ལ་ཐིམ་པར་གྱུར༔ ལུས་སྣང་ལྷ་སྐུ་མཐའ་ནས་ཡལ༔ སྐྱེ་མེད་ཡི་གེ་ཧྲཱིཿལ་ཐིམ༔ ཧྲཱིཿཡང་འོད་ཞུ་ཐིག་ལེར་

གྱུར༔ ཐིག་ལེ་ཁྱབ་བརྡལ་ཀློང་དུ་ཡལ༔ བརྗོད་མེད་ཡེ་ཤེས་གཉུག་མའི་སེམས༔ ཡེངས་མེད་རིག་རྩལ་མངོན་གྱུར་ཤོག༔ ཧཱུྃ༔ ཆོས་དབྱིངས་སྐྱེ་མེད་དཀྱིལ་འཁོར་དུ༔ བཅོམ་ལྡན་ཀུན་བཟང་ཡབ་ཡུམ་གྱིས༔ ཡེ་ཤེས་ལྔ་ཡི་སྤྲུལ་བསྒྱུར་འགྱེད༔ འཕོ་འགྱུར་མེད་པའི་བཀྲ་ཤིས་གང་༔ དེང་འདིར་འགྲོ་ལ་འཆར་གྱུར་ཅིག༔ ཧཱུྃ༔ མ་འགགས་རང་གསལ་ཀློང་ཡངས་ནས༔ རྒྱལ་བ་རབ་འབྱམས་ཆོས་སྒོ་གང་༔ སྐྱི་མེད་ཆོས་སྒོའི་ཡི་གེ་ཤར༔ འཁོར་འདས་ཀུན་ཁྱབ་བཀྲ་ཤིས་གང་༔ དེང་འདིར་འགྲོ་ཀུན་ཁྱབ་གྱུར་ཅིག༔ ཧཱུྃ༔ རྙེད་དཀའི་དལ་འབྱོར་དོན་ལྡན་པ༔ དཔག་པར་དཀའ་བའི་ཕ་རོལ་ཕྱིན༔ གཞལ་དུ་མེད་པའི་ས་ལམ་བསྒྲོད༔ གཞོམ་ཞིག་བྲལ་བའི་བཀྲ་ཤིས་གང་༔ དེང་འདིར་འགྲོ་ཀུན་སྨིན་གྱུར་ཅིག༔ ཧཱུྃ༔ སྣང་སྲིད་དཀྱིལ་འཁོར་རབ་འབྱམས་གང་༔ བདེ་

ལེགས་ཡོན་ཏན་དཔལ་དང་ལྡན༔ འབད་མེད་ལྷུན་གྲུབ་ཡིད་བཞིན་ནོར༔ དགོས་འདོད་ཀུན་འབྱུང་བཀྲ་ཤིས་གང་༔ དེང་འདིར་རིགས་དྲུག་ཁྱབ་གྱུར་ཅིག༔ ཧཱུྃ༔ རང་རིག་རིག་པའི་ངོ་བོ་སྟོང་༔ མ་འགགས་འགག་མེད་ཅིར་ཡང་འཆར༔ སྟོང་གསལ་དྲན་རིག་མཁའ་ལྟར་དག༔ ཤར་གྲོལ་དུས་མཉམ་དབྱིངས་རིག་འདྲེས༔ བརྗོད་མེད་ཡེ་ཤེས་ཉི་ལྟར་ཤར༔ དེང་འདིར་འགྲོ་དྲུག་གསལ་གྱུར་ཅིག༔ འགྱུར་བ་མེད་པར་བརྟན་གྱུར་ཅིག༔ ཐབས་ཀྱི་བཀྲ་ཤིས་ཟླ་ལྟར་གསལ༔ ཤེས་རབ་བཀྲ་ཤིས་ཉི་ལྟར་ཤར༔ ལས་ཉོན་མུན་ཁྱབ་གསལ་གྱུར་ཅིག༔ ཆོས་དབྱིངས་བཀྲ་ཤིས་མཁའ་ལྟར་དག༔ འཆི་བ་མེད་པར་གནས་གྱུར་ཅིག༔ ༀ་ཨཱཿཧཱུྃ་བཛྲ་མངྒ་ལཾ་ཏིཥྛ་ཏིཥ་ཋ་ཏིཥ་ཋ་བྷཱུྃ༔

ནམ་སྙིང་ཚེ་སྒྲུབ་ཀྱི་ཚོགས་འཁོར་འཆི་མེད་དགའ་སྟོན་བཞུགས་སོ། །ནམ་སྙིང་ཚེ་སྒྲུབ་ཀྱི་ཚོགས་འཁོར་ཅུང་ཟད་སྤྲོས་པ་ལ་དགའ་ན། རང་ཉིད་ཡི་དམ་གྱི་ཐུགས་ཀ་ནས་རྃ་ཡྃ་ཁྃ་འཕྲོས་པས་ཚོགས་རྫས་ཀྱི་ཞེན་སྣང་ཐམས་ཅད་བསྲེགས་གཏོར་བཀྲུས་ནས། ཚོགས་གཞོང་འདོད་འབྱུང་བྷནྡྷའི་སྣོད་དུ་ཚོགས་རྫས་རྣམས་རིགས་ལྔ་ཡབ་ཡུམ་ཟུང་འཇུག་བདེ་བ་ཆེན་པོར་འོད་དུ་ཞུ། ཤ་ལྔ་བདུད་རྩི་ལྔ་ཡི་དྭངས་བཅུད་བདེ་ཆེན་གྱི་ཚོགས་རྫས་གནམ་ས་གང་བས་འཁོར་འདས་ཀྱི་ཚེ་བཅུད་ཐམས་ཅད་དབང་དུ་བསྡུ་བའི་

རྫས་སུ་བྱིན་གྱིས་བརླབ་པར་གྱུར། རྃ་ཡྃ་ཁྃ། ༀ་ཨཱཿཧཱུྃ་ལན་གསུམ། ཚོགས་རྫས་མཆོད་པའི་ལྷ་མོ་ནམ་མཁའ་གང་བས་ཚེ་ལྷའི་དཀྱིལ་འཁོར་ཁ་བ་བུ་ཡུག་འཚུབས་པ་ལྟར་བདག་མདུན་བུམ་པའི་དཀྱིལ་འཁོར་དུ་ཐིམ་པ་རྣམས་ལ་ཕྱི་ནང་གསང་བའི་མཆོད་པ་ཕུལ་བས། ཚེ་དང་ཡེ་ཤེས་ཀྱི་བདུད་རྩི་ཆར་ལྟར་བབས་ཏེ་རང་ལུས་ཡོངས་སུ་གང་བར་གྱུར། ཞེས་གསལ་འདེབས་ལ། ཧྲཱི༔ འཆི་མེད་ཚེ་ཡི་ཞིང་ཁམས་ནས། །རྡོ་རྗེ་ཚེ་ཡི་ལྷ་ཚོགས་རྣམས། །སྣང་སྲིད་ཚོགས་ཀྱི་འཁོར་ལོ་རུ། །སྤྱན་འདྲེན་བྱིན་ཆེན་དབབ་ཏུ་གསོལ། །ཨོཾ་བཛྲ་ས་མ་ཡ་ཛ་ཛཿ ཞེས་སྤྱན་དྲངས་ཏེ། ཧྲཱིཿ འཆི་མེད་འོད་ཀྱི་ལང་ཚོ་ཅན། །སྣང་སྲིད་ཚེ་ལྷའི་དཀྱིལ་འཁོར་ལ། །བདེ་ཆེན་རིག་མའི་སྤྲིན་ཕུང་གིས། །འདོད་ཡོན་ཕྱི་ཡི་ཚོགས་མཆོད་འབུལ། །བདུད་རྩི་ལྔ་དང་ཤ་ཆེན་ལྔ། །རཀྟ་ནང་གི་ཚོགས་མཆོད་འབུལ། །འཁོར་འདས་

ཡོངས་རྫོགས་རིག་པའི་ཀློང་། །ཟང་ཐལ་གསང་བའི་ཚོགས་མཆོད་འབུལ། །སྐྱེ་འཆི་བགྲེས་རྒུད་མེད་པ་རུ། །སྐུ་གསུང་ཐུགས་ཀྱིས་བྱིན་གྱིས་རློབས། །མ་ཧཱ་ག་ཎ་ཙཀྲ་པཱུ་ཛ་ཁཱ་ཧི། ཞེས་ཚོགས་ཕུད་འབུལ། ༀ་ཨཱཿཧཱུྃ། འཇའ་ལུས་ཆོས་སྐུའི་ཞིང་ཁམས་ནས། །སྣང་མཐའ་ཡབ་ཡུམ་ཐུགས་དམ་བསྐང་། །འཆི་མེད་ལོངས་སྐུའི་ཞིང་ཁམས་ནས། །འཕགས་པ་ཡབ་ཡུམ་ཐུགས་དམ་བསྐང་། །པདྨ་དྲྭ་བའི་ཞིང་ཁམས་ནས། །པད་འབྱུང་ཡབ་ཡུམ་ཐུགས་དམ་བསྐང་། །སྐྱེ་འཆི་མེད་པའི་ཞིང་ཁམས་ནས། །ནམ་སྙིང་ཡབ་ཡུམ་ཐུགས་དམ་བསྐང་། །བརྟུལ་ཞུགས་གྲུབ་པའི་གནས་མཆོག་ནས། །མི་འགྱུར་རྡོ་རྗེའི་ཐུགས་དམ་བསྐང་། །བྱིན་རླབས་རྒྱ་མཚོའི་འབྱུང་གནས་ནས། །རིག་འཛིན་བརྒྱུད་པའི་ཐུགས་དམ་བསྐང་། །བདུད་འདུལ་དཔལ་གྱི་ཕོ་བྲང་ནས། །རྟ་ཕག་ཡབ་ཡུམ་ཐུགས་དམ་

བསྐང་། །རྩ་འཁོར་བཞི་ཡི་དཀྱིལ་འཁོར་ནས། །ཐབས་ཤེས་ཟུང་འཇུག་ཚེ་ཡི་ལྷ། །བདུད་འདུལ་མགོན་པོའི་ཐུགས་དམ་བསྐང་། །ལས་བཞི་གྲུབ་པའི་གནས་མཆོག་ནས། །མཁའ་འགྲོ་ཆོས་སྐྱོང་ཐུགས་དམ་བསྐང་། །དགོངས་པའི་རྩལ་བདུན་སྐྱོང་མཛད་པ། །གཏེར་བདག་སྲུང་མའི་ཐུགས་དམ་བསྐང་། །ཕྱི་ལྟར་སྣང་སྲིད་དག་པས་བསྐང་། །ནང་ལྟར་རྩ་རླུང་ཐིག་ལེས་བསྐང་། །ཐབས་དང་ཤེས་རབ་བདུད་རྩིས་བསྐང་། །གསང་བ་དགའ་བཞིའི་ཡེ་ཤེས་དང་། །ཡང་གསང་ཆོས་ཉིད་ཟད་པས་བསྐང་། །བསྐང་གྱུར་ཚེ་དབང་ཡེ་ཤེས་སྩོལ། །ཧོ། བྱམས་པའི་སྤྱན་ལྡན་ཚེ་ཡི་ལྷ་ཚོགས་དགོངས། །བདག་ཅག་རང་སྣང་དབང་དུ་མ་གྱུར་པས། །དཀོན་མཆོག་རྩ་བ་གསུམ་གྱི་སྤྱན་ལམ་དུ། །སྡོམ་གསུམ་བཅས་མཚམས་འདས་པ་མཐོལ་ལོ་བཤགས། །མཆེད་ལྕམ་རིག་པ་འཛིན་པའི་སྤྱན་

ལམ་དུ། །བྱམས་པའི་བརྩེ་གདུང་རལ་བ་མཐོལ་ལོ་བཤགས། །ཁམས་གསུམ་ཕ་མ་རྣམས་ཀྱི་སྤྱན་ལམ་དུ། །སྙིང་རྗེའི་དཔྱངས་ཐག་ཆད་པ་མཐོལ་ལོ་བཤགས། །གནས་ལུས་ལོངས་སྤྱོད་དགེ་བའི་རྩ་བ་ཀུན། །བདེ་སྟོང་ཚོགས་ཀྱི་མཆོད་པ་ཕུལ་ཏེ་བཤགས། །ཚེ་འདིར་ཚེ་དབང་མཆོག་གི་དངོས་གྲུབ་ལ། །འགལ་རྐྱེན་ནད་གདོན་བར་ཆད་ཞི་བ་དང་། །མཐུན་རྐྱེན་ཚངས་པ་མཆོག་གི་དངོས་གྲུབ་སྩོལ། །ༀ་བཛྲ་ས་ཏྭ་ཨ། ཞེས་བཤགས་པ་ཕུལ། ཧྲཱིཿ རྡོ་རྗེ་ཚེ་ཡི་ཕོ་ཉ་རྣམས། །ཚེ་དབང་མཆོག་གི་བར་ཆད་སྒྲོལ། །དུག་གསུམ་སྦྱོང་བའི་ཤ་ཁྲག་རུས། །འཆི་མེད་ཚེ་ལྷའི་ཞལ་དུ་བསྟབ། །དགྲ་བགེགས་ཨཾ་ཀུ་ཤ་ཛཿ ནྲྀ་ཏྲི་ཤ་ཏྲུན་མཱ་ར་ཡ་ཕཊཿབ་ལྟིཾ་ཁཱ་ཧི། ཞེས་བསྒྲལ་བསྟབ་བྱའོ། དེ་ནས་ཚོགས་གླུ་ནི། ཨ་ལ་ལ་ཧོ་སྐུ་གསུམ་འོད་གསལ་གྱི་ཞིང་ནས། །བདེ་ཆེན་ཚོགས་ཀྱི་འཁོར་ལོའི་འདུ་བ་ལ་

རོལ་བའི། །རྩ་གསུམ་རིག་འཛིན་དགྱེས་པའི་བྱིན་ཆེན་རེ་ཕོབས་དང་། །བློ་གསལ་ང་ཚོ་ཐར་པའི་ལམ་བཟང་ལ་འཇུག་ཡོང་། །ཨ་ལ་ལ་ཧོ་ཉིན་མཚན་འོད་གསལ་གྱི་ཀློང་ནས། །དམ་ཚིག་འདུ་འབྲལ་མེད་པའི་ཚོགས་འཁོར་ལ་དགྱེས་པ། །མཆེད་ལྕམ་སྣང་བ་དག་པའི་སྒོམ་སྒྲུབ་ལ་རེམས་དང་། །བློ་གསལ་ང་ཚོ་སྲིད་པའི་རྒྱ་མཚོ་ལས་བརྒལ་ཡོང་། །ཨ་ལ་ལ་ཧོ་གཞི་གནས་འོད་གསལ་གྱི་དབྱིངས་ནས། །དག་སྣང་འབྲལ་བ་མེད་པའི་ཚོགས་འཁོར་ལ་སྤྲོ་བ། །ཨ་མ་ཁམས་གསུམ་སེམས་ཅན་དད་མོས་ལ་སྤྱོད་དང་། །བློ་གསལ་ང་ཚོས་སྙིང་རྗེའི་དཔྱངས་ཐག་ལ་རེམས་ཡོང་། །རིང་པོ་བསྒུག་ཡུན་མི་བསྲིང་གསང་ཆེན་གྱི་མྱུར་ལམ། །ཚེ་ལུས་གཅིག་ལ་གྲོལ་བའི་རྟེན་འབྲེལ་རེ་སྒྲིགས་ཤོག །ཧོ། ཚོགས་ཀྱི་མཆོད་པ་རྒྱན་དུ་རོལ། ཞེས་དང་། ཨ་ལ་ལ་ཧོ། ཞེས་སློབ་དཔོན་གྱིས་ལེན། དེ་ནས་

ཚོགས་ལྷག་རྣམས། ༀ་ཨཱཿཧཱུྃ་གིས་བྱིན་བརླབས་ལ། ཧོ། དང་པོ་ཕུད་ཀྱིས་ལྷ་ཚོགས་མཆོད། །བར་དུ་ཚོགས་ཀྱིས་བསྐང་ཞིང་བཤགས། །ཐ་མ་ལྷག་མའི་འདོད་ཡོན་གྱིས། །ལྷག་མ་དབང་རྣམས་མཉེས་གྱུར་ཅིག །ༀ་ཨུཙྩིཥྚ་བྷཀྵ་ཁཱ་ཧི། ཞེས་ཕུལ་ལོ། །ཡང་ཚོགས་བརྒྱ་དང་ཁྲི་ཚོགས་སྟོང་ཚོགས་སོགས་བསག་ན། བྱིན་རླབས་རྒྱས་པ་དང་མཆོད་ལྷ་སྤྲོ་བ་དང་བཅས་ཚར་དང་པོ་དང་། སྐབས་སྐབས་སུ་འདོན་པས་གསལ་འདེབས། གཞུང་དུ། ༀ་ཨཱཿཧཱུྃ། ལན་རེས་བྱིན་བརླབས་ཏེ། ཧྲཱིཿ འདིར་བྱོན་ཚེ་ཡི་ལྷ་ཚོགས་རྣམས༔ རྩ་འཁོར་བཞི་ཡི་གདན་ལ་བཞུགས༔ ཧཱུྃཧཱུྃ་ཧཱུྃ༔ ཞེས་སྤྱན་དྲངས་ལ༔ ཧྲཱིཿ རྡོ་རྗེ་ཚེ་ཡི་ལྷ་ཚོགས་ལ༔ ཚོགས་གཏོར་སྨན་རཀ་གཏོར་མ་འབུལ༔ ཧཱུྃ་ཧཱུྃ་ཧཱུྃ༔ དང་པོའོ༔ ཧྲཱིཿ རྡོ་རྗེ་ཚེ་ཡི་ལྷ་ཚོགས་རྣམས༔ ཐུགས་དམ་གཉེན་པོ་བསྐང་གྱུར་ཅིག༔ ཧཱུྃ་ཧཱུྃ་ཧཱུྃ༔ ཧྲཱིཿ རྡོ་རྗེ་ཚེ་ལྷ་འཁོར་བཅས་ལ༔ དམ་ཚིག་ཉམས་ཆག་མཐོལ་ལོ་བཤགས༔ ཧཱུྃ་ཧཱུྃ་ཧཱུྃ༔ ཞེས་

བར་པ་འབུལ༔ ཧྲཱིཿ རྡོ་རྗེ་ཚེ་ཡི་ཕོ་ཉ་རྣམས༔ ཚེ་དབང་མཆོག་གི་བར་ཆད་སྒྲོལ༔ ཧཱུྃ་ཧཱུྃ་ཧཱུྃ༔ དགྲ་བགེགས་ཨངྐུ་ཤ་ཛཿ ས་བཀུགས༔ ནྲྀ་ཏྲི་ཤ་ཏྲུན་མཱ་ར་ཡ་ཕཊ༔ ཅེས་བསྒྲལ་ཞིང་སྤར༔ བ་ལྟིཾ་ཁཱ་ཧིཿ ཞལ་བསྟབ་བྱའོ། ༀ་ཨཱཿཧཱུྃ་ཨུཙྪིཥྚ་བྷཀྵ་ཁཱ་ཧི། ཞེས་ལྷག་མ་བསྔོ། སླར་ཡང་འབྲུ་གསུམ་གྱིས་བྱིན་བརླབས་ཏེ་འདི་བར་ཚར་གྲངས་བསོག །འདི་ནི་རྩ་བ་རྡོ་རྗེའི་ཚིག་ལ་གཞན་ནས་རྡོ་རྗེའི་སྔགས་འབྲུ་འགའ་རེ་བླངས་པས་ཟུར་བརྒྱན་པ་ཙམ་ཡིན། འདི་བསྙེན་པའི་མཐའ་ནས་བསགས་ཀྱང་རུང་ལ་གཞུང་གསལ་ལྟར་དུ་འཛུད་ཀྱང་རུང་ངོ་། ཆོ་གའི་འཇུག་ཏུ་བཀྲ་ཤིས་སྟབས་བདེ་དགོས་ན། ཧྲཱིཿ འཆི་མེད་ཡུམ་ལྔའི་ཞིང་ཁམས་ནས། །སྐྱེ་འཆི་མེད་པའི་ཡེ་ཤེས་ལྔ། །སྣང་མེད་ཡིད་ཀྱི་ཐིག་ལེ་རུ། །བགྲེས་རྒུད་མེད་པའི་བཀྲ་ཤིས་ཤོག །འོད་ལུས་དག་པའི་ཞིང་ཁམས་ནས། །སྐྱེ་འཆི་མེད་པའི་རིགས་ལྔ་ཡུམ། །ཕྱེད་སྣང་ངག་གི་ཐིག་ལེ་རུ། །བགྲེས་རྒུད་མེད་པའི་བཀྲ་ཤིས་ཤོག །རིག་འཛིན་གྲུབ་པའི་ཞིངས་

ཁམས་ནས། །སྐྱེ་འཆི་མེད་པའི་རིག་འཛིན་རྣམས། །སྣང་བ་ལུས་ཀྱི་ཐིག་ལེ་རུ། །བགྲེས་རྒུད་མེད་པའི་བཀྲ་ཤིས་ཤོག །བསྐྱེད་རྫོགས་དག་པའི་ཞིང་ཁམས་ནས། །སྐྱེ་འཆི་མེད་པ་ཚེ་ཡི་ལྷ། །བདག་ཅག་དཔོན་སློབ་འཁོར་བཅས་ལ། །བགྲེས་རྒུད་མེད་པའི་བཀྲ་ཤིས་ཤོག །ཛ་ཡ་ཛ་ཡ་སུ་ཛ་ཡ། །ཞེས་པའང་མཁྱེན་བརྩེ་ནུས་ལྡན་ཨརྨེ་རིག་འཛིན་རྣམ་རྒྱལ་གྱིས་གསུང་བསྐུལ་ལྟར་པདྨ་རྣམ་པར་རྒྱལ་བས་འདུས་གསལ་དུ་བསྡེབས་པ་དགེ་ཞིང་བཀྲ་ཤིས་པར་གྱུར་ཅིག །མངྒ་ལཾ།། །།

ནམ་སྙིང་ཚེ་སྒྲུབ་ཀྱི་ཟིན་བྲིས་སྒོམ་དོན་ཁ་གསལ་སྒོ་འབྱེད་བདེ་དོན་སྙིང་པོ། མཁན་པོ་ཀརྨ་རཏྣ།

༄༅། །ནམ་སྙིང་ཚེ་སྒྲུབ་ཀྱི་ཟིན་བྲིས་སྒོམ་དོན་ཁ་གསལ་སྒོ་འབྱེད་བདེ་དོན་སྙིང་པོ་བཞུགས་སོ། །

ༀ་སྭ་སྟི་སིདྡྷི། འགྱུར་མེད་ཡོངས་གྲུབ་ཡེ་ཤེས་མཆོག་གི་སྐུ། །ལྔ་ལྡན་ལོངས་སྤྱོད་རྫོགས་སྐུ་དཀྱིལ་འཁོར་གཙོ། །གང་འདུལ་མོས་པའི་སྐུར་བཞེངས་སྤྲུལ་པའི་སྐུ། །སྐུ་གསུམ་དབྱེར་མེད་རྒྱ་མཚོར་གུས་ཕྱག་འཚལ། །དེ་ཡང་མཆོད་པར་བརྗོད་ཅིང་ལས་སུ་བྱ་བ་ནམ་སྙིང་ཚེ་སྒྲུབ་ཀྱི་དམིགས་པའི་ཟིན་ཐོ་ལ་དང་པོ་སྲུང་འཁོར་མཚན་བཅས་དང་མཚན་མེད་གཉིས་ལས་དང་པོ་ནི། ཧྲཱིཿ ཞེས་སྟོང་ཉིད་སྙིང་རྗེ་ཟུང་འཇུག་གི་ངང་ནས་མཚོན་ཆ་མེ་དཔུང་ཁྲོ་ཚོགས་སྤྲོ་ཞིང་བགེགས་ཚོགས་ཚར་གཅོད་པ། བསྐྱེད་རིམ་དང་འབྲེལ་བའི་དུག་ལྔ་དུག་གསུམ་ཀློང་ཡངས་ཆེན་པོར་མཚམས་བཅད་པ་ནི། ཇི་སྐད་དུ་ཡང་། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་བཅད་པར་བྱ། །ཞེས་གསུངས་པ་ལྟར་མཚན་

མེད་རྫོགས་རིམ་དེ་ཁོ་ན་ཉིད་ཀྱི་རྒྱས་གདབ་པ་ལ། སྐྱབས་སེམས་གཞུང་ལྟར་གྱེར་བསྒོམ་བྱ། བྱིན་འབེབས་ནི་སྣང་སྲིད་ལྷ་ཡི་དཀྱིལ་འཁོར་ཡེ་གདོད་ལྷུན་གྲུབ་ཏུ་ཤེས་པའི་ཧཱུྃ་གསུམ་ནི་ཡིད་ཡུལ། སྣང་ཡུལ། ཞེན་ཡུལ་མཁའ་ལྟར་དག་པའི་དོན་ནོ། །ལྷར་བསྐྱེད་པ་ནི། རང་རིག་ཆོས་སྐུའི་ངང་ལས་འགགས་མེད་ཡི་དམ་ལྷ་ཚོགས་བསྐྱེད་པའི་ཚུལ་ནི། བདག་མདུན་ཆིག་རྫོགས་ཀྱི་རྟེན་ལས་གཞུང་ལྟར་སྒོམ་པའི་ཐུགས་ཀར་གཞལ་ཡས་གྲུ་བཞི་སྒོ་བཞི་རྟ་བབས་བཞི་ལྡན་ཞི་དྲག་འདྲེས་མའི་དཀྱིལ་འཁོར་འཛམ་བུ་ཆུ་གསེར་གྱི་ཐོག་ཁེབ་རིགས་ཀྱི་རང་རྟགས་པདྨ་འབར་བས་མཚན་པའི་དབུས་སུ་སྣ་ཚོགས་པདྨ་འདབ་བརྒྱད་ཀྱི་ལྟེ་བར་རྨ་བྱ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་པདྨ་ཉི་མ་ཟླ་བའི་གདན་ལ་གཙོ་བོ་ཚེ་དཔག་མེད་

དམར་པོ་གཞུང་ལྟར་དང་། འདབ་མ་བརྒྱད་ཀྱི་སྟེང་པདྨ་ཉི་ཟླའི་གདན་ལ་ཚེ་དཔག་མེད་བརྒྱད་གཙོ་བོ་ལྟར་བསྒོམ། སྟོང་ར་རྟེན་དམར་པོའི་ཀླད་པ་དུང་ཁང་གི་ནང་དུ་གཞལ་ཡས་ཁང་སྔ་མ་ལྟར་གསལ་བའི་དབུས་སུ་པདྨ་དཀར་པོ་འདབ་མ་སུམ་ཅུའི་ལྟེ་བར་རྨ་བྱའི་ཁྲི་པདྨ་ཉི་ཟླའི་གདན་ལ་ཚེ་དཔག་མེད་དམར་པོ་འཁོར་རང་འདྲ་སུམ་ཅུས་བསྐོར་བ། མགྲིན་པར་ཆོས་འབྱུང་བསྣོལ་མ་འོད་ཀྱི་རང་བཞིན་གྱི་དབུས་སུ་པད་འདབ་དམར་པོ་བཅུ་དྲུག་གི་ལྟེ་བར་རྡོ་རྗེ་ཕག་མོ་ཞལ་གཉིས་ཕྱག་གཉིས་མ་ལ་འཁོར་རང་འདྲ་བཅུ་དྲུག་གིས་བསྐོར་བ་དང་། ཟུང་འཇུག་གི་དཀྱིལ་འཁོར་ནི་སྤྱི་བོར་ཐབས། སྙིང་ག་ཤེས་རབ། མགྲིན་པར་ཐབས་ཤེས་ཟུང་འཇུག་གི་རང་བཞིན་ནོ། །སྟོང་རའི་ལྟེ་བར་བགེགས་འཇོམས་ཀྱི་དཀྱིལ་འཁོར་ནི། མེ་དཔུང་དམར་ནག་འབར་བའི་ཀློང་དུ་ཆོས་འབྱུང་མཐིང་ག་གྲུ་གསུམ་བསླངས་ཐབས་ཀྱི་རྩེ་མོའི་ནང་ནས་སྐྱེས་པའི་པད་འདབ་མཐིང་ག་དྲུག་ཅུའི་ལྟེ་བར་པདྨ་ཉི་མ་རོ་ཡི་གདན་ལ་མགོན་པོ་བེར་ནག་ཅན་ལ་འཁོར་རང་འདྲ་དྲུག་ཅུས་བསྐོར་བ། སྤྱན་འདྲེན་ནི། གཞུང་ལྟར། བདེ་བ་ཅན་དང་ཨོ་རྒྱན་ཡུལ་སོགས་ཞིང་ཁམས་རབ་འབྱམས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་ཤིང་།

ཧཱུྃ་ངར་དང་ལྡན་པ་གསུམ་གྱིས་སྐུ་གསུང་ཐུགས་ཀྱི་རྒྱུད་བསྐུལ་ཞིང་དབང་བསྐུར་བྱིན་གྱིས་བརླབས་ནས་དབྱེར་མེད་དུ་གྱུར་པར་བསྒོམ་ལ་ཛཿཧཱུྃ་བྃ་ཧོཿ ཨཾ་ཀུ་ཤས་རྒྱས་གདབ། གདན་འབུལ་སྐབས་ཀྱི་ཧཱུྃ་གསུམ་ནི་དམ་ཚིག་ཡེ་ཤེས་དབྱེར་མེད་སྐྱེ་མེད་འགགས་མེད་མཐའ་བྲལ་གྱི་ངང་ལ་གནས་པའི་མཐའ་ཡིན། མཆོད་པའི་སྐབས་ཧཱུྃ་གསུམ་ནི་མཆོད་བྱ་མཆོད་བྱེད་མཆོད་ཡུལ་གསུམ་མི་དམིགས་པ་འཁོར་གསུམ་རྣམ་དག་གི་མཆོད་པའོ། །གསང་མཆོད་སྐབས་ཀྱི་ཧཱུྃ་གསུམ་ནི་དུག་ལྔ་ཡེ་ཤེས་ལྔ། དུག་གསུམ་སྐུ་གསུམ་གྱི་ཀློང་དུ་དག་པའོ། །རྫས་མཆོད་སྐབས་ཀྱི་ཧཱུྃ་གསུམ་ནི། གཙང་རྨེའི་རྣམ་རྟོག་རྣམ་ཐར་སྒོ་གསུམ་གྱི་རང་བཞིན་དུ་དག་པའོ། །འདོད་ཡོན་མཆོད་པའི་སྐབས་ཀྱི་ཧཱུྃ་གསུམ་ནི། འདོད་ཡོན་ལྔ་མཆོད་ཕུལ་བས་ཐུགས་རྒྱུད་ཟག་མེད་བདེ་སྟོང་དབྱེར་མེད་ཀྱི་མཉེས་པའོ། །ཚོགས་གཏོར་འབུལ་སྐབས་ཀྱི་ཧཱུྃ་གསུམ་ནི། དུག་གསུམ་རྣམ་དག་རྫས་ཀྱི་མཆོད་པའོ། །བསྐང་བའི་སྐབས་ཀྱི་ཧཱུྃ་གསུམ་ནི། ལུས་ངག་ཡིད་གསུམ་སྐུ་གསུང་ཐུགས་སུ་དག་པའོ། །བཤགས་པའི་སྐབས་ཀྱི་ཧཱུྃ་གསུམ་ནི། འཁོར་གསུམ་འཛིན་མེད་ཀྱི་བཤགས་པའོ། །བསྟོད་པའི་སྐབས་ཀྱི་ཧཱུྃ་གསུམ་ནི། གསང་བ་

གསུམ་གྱི་ཡོན་ཏན་ལ་བསྟོད་པའོ། །གནད་འབེབས་སྔགས་འཁོར་ནི། འོད་ཟེར་འཕྲོ་འདུས་སྣང་སྲིད་འཁོར་འདས་ཀྱི་ཚེ་བཅུད་བསྡུས་ནས་རང་ལ་བསྟིམ་ཞིང་གཅིག་ཏུ་བསྲེ། གཞི་གནད་འདི་འདྲ་སྟེ། སྙིང་གའི་ཚེ་དཔག་མེད་ཀྱི་ཐུགས་ཀར་པདྨ་དམར་པོ་འདབ་མ་བརྒྱད་པའི་སྟེང་དུ་ཧྲཱིཿཡིག་དམར་པོའི་མཐར་སྔགས་ཕྲེང་པདྨ་རཱ་གའི་ཕྲེང་བ་ལྟར་འོད་ཟེར་ཁ་དོག་ལྔ་དང་ལྡན་པ་གཡོན་དུ་བཀོད་ནས་གཡས་སུ་ཀྱི་ལི་ལི་འཁོར་བར་བསྒོམ་ཞིང་། དང་པོ་རྩ་སྔགས་ཅུང་ཟད་བཟླས་ནས་སྙིང་ཁའི་རྩ་ལྷ་སྔགས་འཁོར་གསལ་བཏབ། ཡང་སྔགས་འཁོར་ལས་འོད་ཟེར་ཁ་དོག་སྣ་ལྔ་འཕྲོས་ཞལ་ནས་ཐོན། སྤྱི་བོའི་ཚེ་དཔག་མེད་ལ་ཕོག །ཐུགས་ཀར་ཟླ་བའི་སྟེང་དུ་ཧྲཱིཿ དཀར་གསལ་གྱི་ཐ་མ་ལ་སྔགས་ཕྲེང་དཀར་ལ་གསལ་ཞིང་སྣུམ་འོད་དང་ལྡན་པ་འཕྲོས་གཡས་སུ་ཀྱི་ལི་ལི་འཁོར་བར་བསམས་ལ་སྔགས་བཟླའོ། །ཡང་སྤྱི་བོ་མགྲིན་པ་སྙིང་གའི་ལྷ་ཚོགས་རྣམས་ལས་འོད་ཟེར་འཕྲོས་ཕྱོགས་བཅུའི་ཞིང་ཁམས་རང་འབྱམས་རྣམས་ལ་ཕོག །འོད་ཟེར་ལས་རང་སྣང་སྤྲུལ་པའི་ལྷ་མོ་ཕྱག་ན་གཟུགས་སྒྲ་དྲི་རོ་རེག་བྱ་ལ་སོགས་པ་མཆོད་པའི་ཡོ་བྱད་དཔག་ཏུ་མེད་པས་ཞིང་ཁམས་རྣམས་མཆོད་པས་ལྷ་ཚོགས་རྣམས་དགྱེས་ནས་སྐུ་གསུམ་

ཚེ་ཡི་ལྷ་ཚོགས། གསུང་སྔགས་ཕྲེང་དབྱངས་ཡིག་དང་བཅས་པ་ཡི་གེ་དཀར་དམར་མཐིང་གསུམ། ཐུགས་ཕྱག་མཚན་དང་འོད་ཟེར་སྣ་ལྔའི་ཚུལ་དུ་བདག་མདུན་ལྷ་ཚོགས་ལ་ཐིམ་པས་ཆུ་ལ་ཆུ་བཞག་པ་ལྟར་དམ་ཡེ་དབྱེར་མེད་དུ་འདྲེས་པར་བསམས་ལ་སྔགས་བཟླས། དེའང་ལས་བྱང་གཞུང་གི་ཧྲཱིཿརྣམས་དང་ཧཱུྃ་གསུམ་སྦྲེལ་རྣམས་ནི། ཧྲཱིཿཡེ་ཤེས་སྙིང་པོའི་དོན་རྟོགས་པ་ནི་ཚེ་ལྷ་ལྔ་ཡི་སྲོག་སྔགས་དང་། ཧཱུྃ་ནི་སྣང་སྲིད་འཁོར་འདས་ཐམས་ཅད་གཅིག་ཏུ་བསྡུས་པའི་སྒྲ་སྟེ། ཧྲཱིཿདང་ཧཱུྃ་གིས་སྣང་སྲིད་ཐེམ་མེར་གང་ནས་དུག་ལྔའི་སྡིག་སྒྲིབ་རྣམས་ཀྱང་སྐད་ཅིག་ལ་དག་ནས་སྣང་སྲིད་དབྱེར་མེད་དུ་འདྲེས་པར་བསམ། ཡང་སྔགས་ཕྲེང་ལས་འོད་ཟེར་ཁ་དོག་སྣ་ལྔ་འཕྲོས་རིགས་དྲུག་སྲིད་པའི་གྲོང་ཁྱེར་རྣམས་ལ་ཕོག་པས་དེ་དག་རྣམས་ཀྱིས་ཚེ་རབས་ཐོག་མ་མེད་པ་ནས་དུག་ལྔ་དུག་གསུམ་གྱི་སྒོ་ནས་བསགས་པའི་སྡིག་སྒྲིབ་ཐམས་ཅད་བ་མོ་ལ་ཉི་ཟེར་ཕོག་པ་ལྟར་དག །དེ་དག་རྣམས་ཀྱི་ཚེ་བསོད་ཐམས་ཅད་འོད་ཟེར་གྱི་རྣམ་པར་ཚུར་སྡུད། རང་ཉིད་ལ་ཐིམ་པས་སྐྱེ་འཆི་དང་བྲལ་བའི་ཚེ་བཅུད་འདུས་པར་བསམ། དེ་ནས་སྙིང་ཁའི་ཚེ་དཔག་མེད་ཀྱི་ཐུགས་ཀར་སྔགས་ཕྲེང་ལས་འོད་ཟེར་འཕྲོས་ལྟེ་བ་

ནས་ཐོན་ཏེ་ལྟེ་བའི་རྩ་འཁོར་གྱི་མགོན་པོའི་ཐུགས་ཀའི་ཧཱུྃ་ལ་ཐིམ་པས་ཐུགས་དམ་གྱི་བརྒྱུད་བསྐུལ། ཧཱུྃ་གི་མཐར་འོད་ཟེར་ལྗང་ནག་གཡས་སུ་ཀྱི་ལི་ལི་འཁོར་བ་ལས་འོད་འཕྲོས་རྩ་འཁོར་གྱི་མགོན་པོ་རྣམས་ལ་ཕོག་པས། ཐམས་ཅད་ཁྲོས་འཁྲུག་རྔམ་པའི་ཆ་ལུགས་དང་ལྡན་པ། རང་འོད་ཡེ་ཤེས་ལྔ་དང་འོད་ཟེར་སྣ་ལྔར་འཕྲོ་བས་སྣང་སྲིད་འཁོར་འདས་ཐམས་ཅད་ཐེམ་མེར་གང་སྟེ། བདག་དང་བསྲུང་བྱའི་ལུས་ངག་ཡིད་གསུམ་ཚེ་སྲོག་ལ་བར་དུ་གཅོད་པར་བྱེད་པའི་གཟུགས་ཅན་གཟུགས་མེད་ཐམས་ཅད་སྐེ་ལུས་གྲི་གུག་གིས་བྲེག་སྟེ་ཤ་ཁྲག་དམར་ཉིལ་གྱིས་བཏང་ཏེ་གྲི་གུག་གི་རྩེ་ནས་ཡེ་ཤེས་ལྔའི་མེ་དཔུང་འཕྲོས་མ་དག་ཐམས་ཅད་བསྲེག །དག་པ་ཡེ་ཤེས་ཀྱི་ཆ་དང་། ཚེ་བསོད་སྟོབས་འབྱོར་ནུས་མཐུ་ཐམས་ཅད་རང་ལ་ཐིམ། ཤ་ཁྲག་བདུད་རྩིར་བསྒྱུར་ནས། གྲི་གུག་གིས་ཐོད་པར་བླུག་ནས་ལྗགས་ཀྱི་སྦུ་གུའི་གསོལ་ནས་ཐམས་ཅད་དགྱེས་ནས་ཧ་ཧ་ཧི་ཧིའི་གད་རྒྱངས་དང་བཅས་ཏེ། རང་སྣང་འོད་ཟེར་ཁ་དོག་སྣ་ཚོགས་དང་ཁྲོ་ཚོགས་ཐམས་ཅད་སྐད་ཅིག་གིས་ཚུར་བསྡུས་ནས་བདག་བསྐྱེད་ལ་ཐིམ་པར་བསམ། ལྷ་ཚོགས་རྣམས་ཀྱང་སྟོབས་དང་གཟི་བརྗིད་རབ་ཏུ་རྒྱས། སྐུ་གར་སྟབས། གསུང་སྔགས་སྒྲ། ཐུགས་

བདེ་སྟོང་རོལ་པའི་ངང་ནས། སྤྱི་བོའི་རྟ་མགོ་ལྗང་ནག་དེ་ལན་གསུམ་འཚེར་བས་སྣང་སྲིད་འཁོར་འདས་ཐམས་ཅད་དག་པའི་ཞིང་ཁམས་ཆེན་པོར་གྱུར་པའི་སྒྲ་དེ་ལ་དགྱེས་ནས་སྨྲ་བསམ་བརྗོད་མེད་ཀྱིས་རོལ་པས་སྐད་ཅིག་ལ་མར་བྱོན་ནས་མཚོ་ལ་ཆར་བབ་པ་ལྟར་དབྱེར་མེད་དུ་འདྲེས། མ་དག་རིགས་དྲུག་སྲིད་པའི་གྲོང་ཁྱེར་དང་བཅས་པ་ཤིགས་ཀྱིས་བཤིགས་ནས་གཉིས་འཛིན་འཁྲུལ་པའི་དུག་ལྔ་དུག་གསུམ་ཚོགས་དྲུག་བགེགས་དཔུང་དང་བཅས་པ་ཐམས་ཅད་རང་བཞིན་ཉིད་ཀྱི་ངང་དུ་རྟ་སྐད་བསྒྲགས་པས་ཡ་ཀི་ཀུན་ཏུ་བཟང་པོ་མན་ཆད། མ་ཀི་ན་རག་དམྱལ་ཁམས་ཡན་ཆད་ཡེ་ཤེས་ཀྱི་ཆ་ཐམས་ཅད་སྐད་ཅིག་གཅིག་ལ་ཆུ་ལ་ཆུ་བཞག་ལྟར་དབྱེར་མེད་དུ་འདྲེས། མཉམ་ཉིད་ཀ་དག་ཀློང་ཡངས་ཆེན་པོའི་ངང་དུ་གཟུང་འཛིན་མཐའ་དང་བྲལ་བའི་རོལ་པས་རང་སེམས་བཅོས་བསླད་མེད་པར་སོ་མ་རང་བབས་སུ་བཞག་པའི་ངང་ནས་དལ་བྲེལ་རན་པའི་སྔགས་བཟླས་པའོ། །དབང་གི་ཕྱག་ལེན་པདྨ་ཉིད་བྱེད་དང་། རྟ་མགྲིན་མགོན་པོའི་ཡིག་ཆ་ལྟར་ཤེས་པར་བྱའོ། །ཡོངས་དགེ་གཏེར་ཆེན་ཉིད་ཀྱིས་མཛད་པའི་ཟིན་བྲིས་འཆི་མེད་མཆོག་གྱུར་མྱུར་འགྲུབ་ཨ་ཏི་ཡོ་གའི་དགོངས་པ་གོ་དཀའ་བས་བསྒོམ་དོན་ཁ་གསལ་

གོ་བདེ་སྙིང་པོ་དྲིལ་བ་འདི་ལྟར་བྲིས་ཤིག་ཅེས། འཛི་སྒར་མཆོག་སྤྲུལ་ཀརྨ་བསོད་ནམས་ཡེ་ཤེས་ཆོས་འཕེལ་རྒྱ་མཚོའི་བཀའ་གསུངས་སྤྱི་བོར་ཕེབས་པ་གཙུག་ཏུ་མཆོད་ནས་གཏེར་སློབ་མཁན་པོ་ཀརྨ་རཏྣས་བགྲང་བྱ་དོན་དྲུག་ལོར་བཀོད་པ་ཡི་གེ་པ་ནི་རང་གི་ཉེ་གནས་ཨ་མོ་གྷཱ་བཛྲ་གྱིས་བགྱིས་པ་བསྟན་འཛིན་གྱི་སྐྱེས་བུ་དམ་པ་རྣམས་སྐུ་ཚེ་བརྟན་ཅིང་མཛད་ཕྲིན་འཕེལ་ཞིང་རྒྱས་པའི་རྒྱུར་གྱུར་ཅིག །ཤུ་བྷཾ། མངྒ་ལཾ།།

རྫོགས་པ་ཆེན་པོ་དཀོན་མཆོག་སྤྱི་འདུས་ཀྱི་བརྒྱུད་པའི་གསོལ་འདེབས་ཡིད་བཞིན་གཏེར་སྦྱིན། རིག་འཛིན་འཇའ་ཚོན་སྙིང་པོ།

རྫོགས་པ་ཆེན་པོ་དཀོན་མཆོག་སྤྱི་འདུས་ཀྱི་བརྒྱུད་པའི་གསོལ་འདེབས་ཡིད་བཞིན་གཏེར་སྦྱིན་ཞེས་བྱ་བ་བཞུགས་སོ། །གུ་རུ་པདྨ་སིདྷི་ཧཱུྃ་ཧྲཱིཿ གདོད་ནས་བྱང་ཆུབ་སྤྲོས་བྲལ་བདེ་བ་ཆེ། །ཀུན་བཟང་འོད་དཔག་མེད་ལ་གསོལ་བ་འདེབས། །ཚད་མེད་ཐུགས་རྗེའི་གཏེར་ཆེན་ཀུན་ཏུ་རྒྱས། །འཕགས་མཆོག་ནམ་མཁའི་རྒྱལ་པོར་གསོལ་བ་འདེབས། །རྒྱལ་ཀུན་ཡེ་ཤེས་ཕྲིན་ལས་གཅིག་བསྡུས་པ། །སངས་རྒྱས་པདྨ་འབྱུང་གནས་ལ་གསོལ་བ་འདེབས། །བདེ་ཆེན་གཉུག་མའི་ཆོས་དབྱིངས་ཞིང་གི་

བདག །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །དྲི་མེད་འོད་གསལ་རྒྱས་པའི་རང་གཟུགས་ཉིད། །རིག་འཛིན་འཇའ་ཚོན་སྙིང་པོར་གསོལ་བ་འདེབས། །ཐོགས་མེད་ཟང་ཐལ་བརྟུལ་ཞུགས་སྤྱོད་པའི་དཔལ། །རིག་འཛིན་བདུད་འཇོམས་རྡོ་རྗེར་གསོལ་བ་འདེབས། །རྒྱུན་མཐའི་སར་བཞུགས་བྱང་སེམས་འགྲོ་བའི་མགོན། །རིག་འཛིན་ཀློང་གསལ་སྙིང་པོར་གསོལ་བ་འདེབས། །སྲིད་ཞིའི་སྤྱི་དཔལ་ཀུན་བཟང་རྒྱུ་འཕྲུལ་གར། །པདྨ་བདེ་ཆེན་གླིང་པར་གསོལ་བ་འདེབས། །སྙིགས་དུས་འགྲོ་འདུལ་རྒྱལ་བའི་ཕྲིན་ལས་པ། །རིག་འཛིན་ཚེ་དབང་ནོར་བུར་གསོལ་བ་འདེབས། །གངས་ཅན་མགོན་པོའི་རྣམ་འཕྲུལ་ཐམས་ཅད་མཁྱེན། །བཀའ་བརྒྱུད་ཕྲིན་ལས་ཤིང་རྟར་གསོལ་བ་འདེབས། །པདྨའི་རྒྱལ་ཚབ་འགྲོ་འདུལ་རིགས་སྔགས་འཆང་། །རྡོ་རྗེ་དྲག་པོ་རྩལ་ལ་

གསོལ་བ་འདེབས། །ལུང་བསྟན་མཆོག་བརྙེས་ས་བཅུའི་དབང་ཕྱུག་ཆེ། །པདྨ་ཉིན་བྱེད་དབང་པོར་གསོལ་བ་འདེབས། །བཻ་རོའི་རྣམ་འཕྲུལ་བཀའ་བབ་ལུང་མཆོག་ཐོབ། །པདྨ་གར་དབང་རྩལ་ལ་གསོལ་བ་འདེབས། །བདག་རྒྱུད་སྨིན་གྲོལ་མཛད་པའི་བཀའ་དྲིན་ཅན། །འདྲེན་མཆོག་རྩ་བའི་བླ་མར་གསོལ་བ་འདེབས། །ཡི་དམ་དཀྱིལ་འཁོར་རྒྱ་མཚོའི་གཙོ་བོ་མཆོག །གུ་རུ་ཞི་དང་དྲག་པོར་གསོལ་བ་འདེབས། །གནས་གསུམ་མཁའ་འགྲོ་ཡོངས་ཀྱི་སྤྱི་དཔལ་ཆེ། །ཌཱ་ཀི་སེང་ཧ་མུ་ཁར་གསོལ་བ་འདེབས། །དེ་ལྟར་བླ་སྒྲུབ་དཀོན་མཆོག་སྤྱི་འདུས་ཀྱི། །རྩ་བརྒྱུད་བླ་མ་ཡི་དམ་མཁའ་འགྲོ་མར། །རྩེ་གཅིག་གསོལ་བ་བཏབ་མཐུས་རྣལ་འབྱོར་བདག །དུས་འདི་ནས་བརྩམ་སྐྱེ་བ་ཇི་སྲིད་དུ། །དད་གུས་ཤེས་རབ་ལས་འབྲས་ཡིད་ཆེས་ལྡན། །དམ་པས་རྗེས་བཟུང་

དབང་ཁྲིད་གདམས་པ་རྫོགས། །དམ་ཚིག་རྣམ་དག་བསྐྱེད་རྫོགས་ཡོན་ཏན་ལྡན། །མཐོང་ཐོས་དྲན་རེག་འགྲོ་ཀུན་ཐར་ལམ་ལ། །འདྲེན་པའི་བྱེད་པོར་བདག་ཉིད་འགྱུར་བ་དང་། །མཐར་ཐུག་རང་དོན་ཆོས་ཀྱི་སྐུར་གྲོལ་ནས། །གཞན་དོན་གཟུགས་སྐུ་རྒྱུན་མི་འཆད་པ་ཡིས། །ནམ་མཁའི་མཐའ་ཀླས་འགྲོ་བ་འདྲེན་བྱེད་པ། །མགོན་པོ་འོད་དཔག་མེད་དང་མཚུངས་པར་ཤོག །དེ་ལྟར་བླ་སྒྲུབ་གསོལ་འདེབས་ཡིད་བཞིན་གཏེར་སྦྱིན་ཞེས་པ་འདིའང་ས་ཕོ་རྟའི་ལོ་ཆོ་འཕྲུལ་ཟླ་བའི་དམར་ཕྱོགས་གང་བ་ལ། བོད་ཡུལ་དབུས་འགྱུར་བསམ་ཡས་ལྷུན་གྱིས་གྲུབ་པའི་ཁང་འདབས་སུ་རིག་འཛིན་ཚེ་དབང་ནོར་བུས་སྡོམ་རང་རྗེ་འབངས་དད་པ་ཅན་གྱིས་བསྐུལ་ངོར་བརྗོད་པ་དགེའོ། །མངྒ་ལཾ།

ཧྲཱིཿ མ་བཅོས་ལྷུན་གྲུབ་ཀ་དག་རང་བྱུང་ལས། །ཅིར་ཡང་ཤར་བའི་རིག་རྩལ་སྒྱུ་འཕྲུལ་ནི། །གསང་སྔགས་རྙིང་མའི་བསྟན་འཛིན་བང་རི་བ། །ཨོ་རྒྱན་ལས་འཕྲོ་གླིང་པར་གསོལ་བ་འདེབས། །དང་པོ་མདོ་རྒྱུད་མན་ངག་ལེགས་པར་སྦྱངས། །བར་དུ་བསྐྱེད་རྫོགས་དབྱེར་མེད་སྒྲུབ་པ་བཙུགས། །ཡང་དག་དོན་གྱི་རབ་འབྱམས་བང་རི་བ། །རིག་འཛིན་འཇའ་ཚོན་སྙིང་པོར་གསོལ་བ་འདེབས། །རྒྱལ་དབང་པདྨའི་ཡང་སྤྲུལ་དགེ་སྦྱོང་ཚུལ། །བསྐལ་དུས་སྙིགས་མའི་འགྲོ་བའི་དཔལ་དུ་ཤར། །བདག་འཛིན་རུ་ཏྲ་འཇོམས་པའི་བང་རི་བ། །སྔགས་འཆང་ཧཱུྃ་ནག་མེ་འབར་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །གནས་སྐབས་མཐར་ཐུག་དངོས་གྲུབ་ཆར་འབེབ་ཅིང་། །མཁྱེན་རྩེ་ནུས་ལྡན་འཇའ་ལུས་འོད་ཕུང་གྱུར། །བདག་གཞན་

དཀྱིལ་འཁོར་གཅིག་ཏུ་འགྲུབ་པར་ཤོག །ཁོ་བོ་རིག་འཛིན་འཇའ་ཚོན་སྙིང་པོའི་གསོལ་འདེབས་འདི་ལ་ཉིན་རེ་ཚར་དྲུག་གམ་ལྔའམ་གསུམ་མམ་ཚར་རེ་མ་ཆགས་པར་བཏོན་ན་ངན་སོང་གསུམ་དུ་མི་འགྲོ། ཀོང་པོ་གཙང་སྦུག་ཏུ་རིག་འཛིན་འཇའ་ཚོན་སྙིང་པོས་སྦྱར་བའོ།།

བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཀྱི་ལས་བྱང་དོན་གསལ་ཁྱེར་བདེར་བསྒྲིགས་པ་ཕྲིན་ལས་ཀུན་ཁྱབ། པདྨ་གར་དབང་ཕྲིན་ལས།

༁ྃ༔ བཀའ་རྫོགས་པ་ཆེན་པོ་ཡང་ཟབ་དཀོན་མཆོག་སྤྱི་འདུས་ཀྱི་ལས་བྱང་དོན་གསལ་ཁྱེར་བདེར་བསྒྲིགས་པ་ཕྲིན་ལས་ཀུན་ཁྱབ་ཅེས་བྱ་བ་བཞུགས་སོ༔

ཀུན་ཁྱབ་རང་བྱུང་འོད་གསལ་ཆོས་ཀྱི་སྐུ། །ལྷུན་གྲུབ་བདེ་ཆེན་རྣམ་སྣང་ལོངས་སྤྱོད་རྫོགས། །གང་འདུལ་སྒྱུ་འཕྲུལ་དྲྭ་བ་སྤྲུལ་པའི་གར། །དཀོན་མཆོག་སྤྱི་འདུས་མ་ཧཱ་གུ་རུར་འདུད། །ཟབ་ཆོས་མཆོག་འདིས་རྒྱལ་ཁམས་ཕལ་ཆེར་ཁེངས། །ལུགས་གཅིག་རྣམ་པར་བཞག་ཏུ་མ་མཆིས་ཀྱང་། །བླ་མའི་བཀའ་དང་རང་གི་མོས་པ་བཞིན། །དོན་གསལ་ཁྱེར་བདེའི་ལས་བྱང་བཀླག་ཆོག་བསྡེབ། །གུ་རུ་ཟ་ཧོར་མའི་སྒྲུབ་ཐབས་ཕྱིས་བྱོན་ཐམས་ཅད་ཀྱི་ཕྱི་མོའི་ཤིང་རྟར་གྱུར་ཅིང་། གཏེར་སྟོན་ཉིད་ཆོས་འདི་ལས་སྣང་གཞི་ཟད་སར་འཁྱོལ་བའི་དབང་གིས་བྱིན་རླབས་དང་ཕྲིན་ལས་བོད་ཀྱི་གཏེར་བྱོན་ཙམ་ལ་འགྲན་ཟླ་དང་བྲལ་བ་ཡང་ཟབ་བླ་མའི་སྒྲུབ་པ་དཀོན་མཆོག་སྤྱི་འདུས་ཀྱི་ཕྲིན་ལས་བྱ་བ་ལ་གཉིས། རྒྱས་པ་དང་བསྡུས་པའོ། །དང་པོ་ནི། སྒྲུབ་པ་དང་དབང་བསྐུར་སོགས་ཀྱི་དུས་དང་འབྲེལ་བའི་དཀྱིལ་འཁོར་བུམ་པ་དབང་རྫས་ཕྱི་མཆོད་བསྐོར་ཏེ་བཤམས་པ་སོགས་

བྱས་ལ། འོག་ཏུ་སྨོས་པའི་ལས་བྱང་མཐར་ཆགས་སུ་བཏང་ཞིང་། གལ་ཏེ་དྲག་སེང་གི་གཏོར་ཟློག་ལྟ་བུ་དང་འབྲེལ་ན་དེ་དག་གི་བསྐུལ་པ་དང་གདབ་ཁ་ཟོར་ལས་སོགས་སྦྱོར་ཚུལ་སྒམ་པོ་ལུགས་དང་ཆགས་མེད་ཞབས་ཀྱིས་གསུངས་པ་ལྟར་བྱའོ། །གཉིས་པ་ནི། བསྙེན་སྒྲུབ་ཀྱི་ཐུན་ཕྱི་མ་རྣམས་དང་རྒྱུན་ཁྱེར་ལྟ་བུ་ལ། སྔོན་གཏོར། སྨན་མཆོད། ཕྲིན་ལས་བཞི་སྒྲུབ། ཚོགས་རྗེས་འབྲེལ་བཅས་བོར། ཤིན་ཏུ་བསྡུ་ན་བརྒྱུད་འདེབས། སྲུང་འཁོར། སྐྱབས་སེམས། ཡན་ལག་བདུན་པ་ཙམ་ལས་སྔོན་འགྲོ་གཞན་རྣམས་ཀྱང་མི་བྱ་བར་མཆོད་པ་བྱིན་རླབས་ལ་འཇུག་ཀྱང་ཆོག་ཅིང་། ཚེ་སྒྲུབ་དྲག་སེང་བཅས་སྦྱོར་མིན་སྐབས་དང་བསྟུན། ཚེས་བཅུའི་དུས་མཆོད་ལྟ་བུར་ནི་རྒྱས་བསྡུས་གང་བྱེད་དལ་ཁོམ་དང་བསྟུན་པ་ལས་སྤར་ཁབ་རང་མི་དགོས་སོ། །གང་ལྟར་སྦྱོར་བ་གོང་དུ་གུ་རུ་རིན་པོ་ཆེའི་སྣང་བརྙན་བྲིས་འབུར། འདི་ཉིད་ཀྱི་གླེགས་བམ། རྡོ་རྗེ་བདེ་སྐྱོང་དམ་ཚིག་གི་རྟེན་

དུ་བསྒྲུབ་པས་མཚོན། སྐུ་གསུང་ཐུགས་ཀྱི་རྟེན་གང་འཛོམས་བཀྲམ་པའི་མདུན་དུ་སྟེགས་གཙང་མར་སྒམ་པོའི་ལུགས་སམ་རང་ལུགས་གང་བདེའི་བླ་མའི་གཏོར་མ་རྒྱན་སྤྲོས་ཅན། དེའི་གཡས་གཡོན་དུ་སྨན་རཀ །དེའི་མདུན་ཆུ་གཉིས་ཉེར་སྤྱོད་ཕྲེང་ཚར་དུ་བཤམས། རྒྱས་པར་སྤྲོ་ན་དྲག་སེང་གཏོར་མ་བླ་གཏོར་གཡས་གཡོན་དུ་བཞག །གཏེར་སྲུང་འབུལ་གཏོར་བསྡུས་པ་དཀར་དམར་གཉིས། བགེགས་གཏོར་ཤ་གཟུགས་མ། ཚོགས་དང་ཆད་བརྟན་སོགས་ཉེར་མཁོའི་ཡོ་བྱད་རྣམས་ཚོགས་པར་བྱའོ། །དངོས་གཞིའི་ཕྲིན་ལས་ལ་གསུམ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དང་པོ་ལའང་བདུན་ལས། ཐོག་མར་བགེགས་བསྐྲད་པ་ནི། རང་ཉིད་སྐད་ཅིག་གིས་དབང་ཆེན་རྟ་མགྲིན་འབར་བའི་ཉམས་དང་ལྡན་པའི་སྐུར་གྱུར། ༀ་ཧྲཱིཿཔདྨནྟ་ཀྲི་ཏ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ བགེགས་གཏོར་བྲན་ལ། རྃ་ཡྃ་ཁྃ། བགེགས་གཏོར་མི་དམིགས་སྟོང་པའི་ངང་ཉིད་ལས༔ རིན་ཆེན་སྣོད་དུ་བདུད་རྩིའི་རྒྱ་མཚོར་གྱུར༔ སྲེག་སྦྱོང་གཏོར་བ་རྃ་ཡྃ་ཁྃ་གསུམ་འཕྲོས༔ ༀ་

ཨཱཿཧཱུྃ་གིས་འདོད་ཡོན་དཔག་མེད་གྱུར༔ ༀ་ཨཱཿཧཱུྃ༔ ལན་གསུམ། དེང་འདིར་དཀྱིལ་འཁོར་མཆོད་པས་འབྱུང་པོ་ཀུན༔ གནས་འདིར་མ་འདུག་གཏོར་མས་ཚིམ་གྱིས་ལ༔ རང་རང་སོ་སོའི་གནས་སུ་ཕྱིར་དེངས་ཤིག༔ གལ་ཏེ་མི་འགྲོ་བར་ཆད་བྱེད་པ་ན༔ ང་ཉིད་དབང་ཆེན་པདྨ་རྟ་སྐད་འཚེར༔ ཁམས་གསུམ་སྲིད་གསུམ་ཀུན་ཀྱང་འདར་ཞིང་སྔངས༔ གདོན་བགེགས་འབྱུང་པོ་མ་ལུས་རྡུལ་དུ་བརླག༔ ༀ་པདྨནྟ་ཀྲི་ཏ་ཧཱུྃ་ཕཊཿ གནོད་བྱེད་སརྦ་ཤ་ཏྲུཾ་མཱ་ར་ཡ་རྦད་ནན་ཟློག་ཅིག༔ ཅེས་གཏོར་མ་དོར། ཧཱུྃ་བཞིའི་སྔགས་ཀྱིས་བགེགས་བསྐྲད། གཉིས་པ་སྲུང་འཁོར་ནི། ཧྲཱིཿ བདག་ཉིད་འགྱུར་མེད་ཡེ་ནས་རྡོ་རྗེའི་སྐུ༔ ཕྱི་ནང་སྣོད་བཅུད་གཞལ་ཡས་སྐྱེ་འགྲོ་ལྷ༔ ཕྱོགས་དང་ཕྱོགས་མཚམས་འཇའ་འོད་མཚོན་ཆས་གཏམས༔ རྡོ་རྗེའི་ས་གཞི་ར་གུར་མེ་རིས་བསྐོར༔ ༀ་བཛྲ་རཀྵ་ཛྭ་ལ་རཾ༔ གསུམ་པ་སྐྱབས་སེམས་ནི།

ༀ་ཨཱཿཧཱུྃ༔ སྐྱབས་གནས་དམ་པ་རྣམས་ལ་སྐྱབས་སུ་མཆི༔ རྒྱུད་དྲུག་འཁོར་བར་འཁྱམས་པའི་ཕ་མ་རྣམས༔ བཟོད་མེད་གདུང་བས་སངས་རྒྱས་འཐོབ་བྱའི་ཕྱིར༔ ཀུན་ཀྱང་བྱང་ཆུབ་མཆོག་ཏུ་སེམས་བསྐྱེད་དོ༔ ལན་གསུམ། བཞི་པ་སྡིག་སྒྲིབ་སྦྱོང་བ་ནི། རང་ཉིད་ཐ་མལ་སྤྱི་གཙུག་ཏུ༔ རིགས་འདུས་རྡོར་སེམས་འོད་ཀྱི་སྐུ༔ དཀར་འཚེར་རྡོར་དྲིལ་རིན་ཆེན་བརྒྱན༔ སྐྱིལ་ཀྲུང་ཞལ་འཛུམ་བརྩེ་བའི་ཉམས༔ ཐུགས་ཀར་ཧཱུྃ་ལ་ཡིག་བརྒྱས་བསྐོར༔ འོ་རྒྱུན་ལྟ་བུའི་བདུད་རྩི་བབ༔ སྤྱི་གཙུག་རྐང་མཐིལ་ཡན་ཆད་ཀྱི༔ ནད་གདོན་སྡིག་སྒྲིབ་ཐམས་ཅད་དག༔ ཤེལ་བུམ་ཞོ་ཡིས་གང་བ་ལྟར༔ གསལ་སྟོང་འོད་ཀྱི་རང་བཞིན་གྱུར༔ ཡིག་བརྒྱ་དང་ཡང་སྙིང་ཡིག་དྲུག་ཅི་འགྲུབ་བཟླ། མཐར། རྡོར་སེམས་འོད་ཞུ་རང་ལ་ཐིམ། ལྔ་པ་ཚོགས་བསགས་པ་ནི། ཨེ་མ་ཧོཿ རང་ལུས་འོད་ཕུང་རྡོ་རྗེ་རྣལ་འབྱོར་མ༔ མདངས་གསལ་མེ་འོད་

གསལ་སྟོང་ལྷག་གེའི་ངང་༔ ཕྱོགས་མཚམས་ནམ་མཁའ་འཇའ་འོད་ཟེར་གྱི་ཀློང་༔ སྤྱི་བོར་བླ་མ་གུ་རུ་ཡིད་བཞིན་ནོར༔ བརྒྱུད་པའི་བླ་མ་པད་འབྱུང་སྤྱན་རས་གཟིགས༔ རིགས་ཀྱི་བདག་པོ་སྣང་བ་མཐའ་ཡས་དང་༔ གཞན་ཡང་མདོ་རྒྱུད་བསྟན་བཅོས་མན་ངག་སོགས༔ རྒྱ་བོད་མཁས་གྲུབ་བླ་མ་ཐམས་ཅད་བཞུགས༔ ༀ་ཨཱཿཧཱུྃ༔ ཆོས་རྣམས་ཐམས་ཅད་སྐུ་གསུམ་རང་བཞིན་ལ༔ གཉིས་མེད་ཀློང་ཡངས་ཆེན་པོར་ཕྱག་འཚལ་ལོ༔ མ་བཅོས་མཐའ་བྲལ་མཉམ་པ་ཉིད་ཀྱིས་མཆོད༔ རང་སེམས་སངས་རྒྱས་མ་རྟོགས་མཐོལ་ལོ་བཤགས༔ གནས་ལུགས་རང་རིག་ངང་དུ་ཡི་རང་ངོ་༔ འཛིན་མེད་ཁྱབ་བརྡལ་རོལ་པའི་ཆོས་འཁོར་བསྐོར༔ འཁོར་འདས་དབྱེར་མེད་བཞུགས་པར་གསོལ་བ་འདེབས༔ ཆོས་དབྱིངས་ལྷུན་གྲུབ་ཆེན་པོར་བསྔོ་བར་བགྱི༔ ཟུང་འཇུག་ཀུན་

ཁྱབ་བདེ་ཆེན་མཆོག་ཐོབ་ཤོག༔ ཅེས་ཡན་ལག་བདུན་པ་དང་། ༀ་ཨཱཿཧཱུྃ༔ ཆོས་དབྱིངས་མཎྜལ་རིག་པས་བརྒྱན་པ་འདི༔ བླ་མ་སངས་རྒྱས་ཆོས་ཀྱི་སྐུ་ལ་འབུལ༔ རང་ལུས་མཎྜལ་དབང་པོས་བརྒྱན་པ་འདི༔ བླ་མ་ལོངས་སྤྱོད་རྫོགས་པའི་སྐུ་ལ་འབུལ༔ རིན་ཆེན་མཎྜལ་གསེར་གཡུས་བརྒྱན་པ་འདི༔ བླ་མ་ཐུགས་རྗེ་སྤྲུལ་པའི་སྐུ་ལ་འབུལ༔ གུ་རུ་རཏྣ་མཎྜལ་ལ་ཀཾ་ནིརྱ་ཏ་ཡཱ་མི༔ དྲུག་པ་གསོལ་འདེབས་ནི། ༀ་ཨཱཿཧཱུྃ༔ ཐོག་མའི་སངས་རྒྱས་ཀུན་བཟང་སྣང་མཐའ་ཡས༔ གངས་ཅན་མགོན་པོ་ཁ་སར་པ་ཎི་དང་༔ འཇའ་ལུས་སྣང་སྲིད་དབང་སྡུད་པདྨ་འབྱུང་༔ ཡེ་ཤེས་མཚོ་རྒྱལ་ཉང་བན་ཏིང་འཛིན་བཟང་༔ ཡང་སྤྲུལ་རིག་འཛིན་ཆེན་པོ་འཇའ་ཚོན་སྙིང་༔ བདུད་འདུད་གླིང་པ་ཀློང་གསལ་སྙིང་པོའི་ཞབས༔ བདེ་ཆེན་གླིང་པ་ཚེ་དབང་ནོར་བུའི་དཔལ༔ ཕྲིན་ལས་ཤིང་རྟ་ཐུགས་ཀྱི་རྡོ་རྗེ་རྩལ༔

པདྨ་ཉིན་བྱེད་གཡུང་དྲུང་གླིང་པའི་ཞབས༔ དོན་གཉིས་མཐར་ཕྱིན་རྩ་བརྒྱུད་བླ་མ་ལ༔ གསོལ་བ་འདེབས་སོ་བྱིན་གྱིས་བརླབ་ཏུ་གསོལ༔ ཀ་དག་ལྷུན་གྲུབ་གཞི་ཐོག་ཕེབས་པ་དང་༔ ཁྲིགས་ཆོད་ཐོད་རྒལ་ལམ་ལ་རྩལ་འབྱོངས་ནས༔ སྐུ་དང་ཡེ་ཤེས་དབྱེར་མེད་མངོན་གྱུར་ཏེ༔ མཐའ་ཡས་འགྲོ་ཀུན་སྤྲུལ་པས་འདྲེན་པར་ཤོག༔ ཀཱ་ཡ་ཝཱ་ཀ་ཙིཏྟ་སིདྡྷི་ཧཱུྃ༔ ཞེས་དབང་བཞི་ལེན་ཅིང་བླ་མའི་ལྷ་ཚོགས་རང་ལ་བསྟིམ། བདུན་པ་མཆོད་པ་བྱིན་རླབས་ནི། རྃ་ཡྃ་ཁྃ། ༀ་ཨཱཿཧཱུྃ། རང་གི་གནས་གསུམ་ཡིག་འབྲུ་གསུམ་གྱིས་མཚན༔ དེ་ལས་ཟེར་མ་ཕྱོགས་བཅུར་རབ་འཕྲོས་པས༔ མཆོད་རྫས་དངོས་འཛིན་རྣམ་རྟོག་བག་ཆགས་དང་༔ ཉེས་སྐྱོན་བསྲེགས་གཏོར་སྦྱངས་བཀྲུས་བདུད་རྩིར་གྱུར༔ སྨན་རཀ་གཏོར་མཆོད་འོད་ཕུང་ལྡེམས་སེ་ལྡེམ༔ བླ་མེད་མཆོད་པ་དཔག་ཡས་བསམ་མི་ཁྱབ༔ ༀ་བྷྲཱུྃ་ཏྲཱྃ་

ཧྲཱིཿཨཱཿ གཉིས་པ་དངོས་གཞི་ལ་བདུན་ལས། དང་པོ་ཕྱི་ཞི་བ་ལྟར་བསྒྲུབ་པ་ལ་ཏིང་འཛིན་རྣམ་པ་གསུམ་ནི། ༀ་ཨཱཿཧཱུྃ༔ འདི་ལྟར་སྣང་སྲིད་གཉིས་བསྡུས་ཆོས་རྣམས་ཀུན༔ ཡེ་ནས་སྟོང་ཞིང་ནམ་མཁའ་ལྟ་བུ་ལ༔ གཟུང་འཛིན་སྤང་བླང་བྱ་བྱེད་མཐའ་ལས་འདས༔ པདྨ་སཾ་བྷ་བདག་ནི་དེ་ལྟར་སྨྲ༔ དྷརྨ་དྷཱ་ཏུ་སྭ་བྷཱ་ཝ་ཨཱཿཧཱུྃ༔ ཧྲཱིཿ བདག་ཉིད་ཐ་མལ་རང་སེམས་བཟོ་མེད་འདི༔ དཀོན་མཆོག་སྤྱི་འདུས་པདྨ་འོད་འབར་སྐུ༔ དཀར་གསལ་མདངས་ལྔ་མཛེས་འཛུམ་རྒྱན་གྱིས་སྤྲས༔ རྡོ་རྗེ་ཐོད་པ་ཚེ་བུམ་རིན་ཆེན་རྒྱན༔ པད་ཞྭ་རྒོད་ལྡེམ་ཁ་ཊྭཱཾ་གཡོན་ན་འཁྲིལ༔ ཕོད་ཁ་ཆོས་གོས་ཟ་འོག་བེར་ཕྱམ་ཅན༔ མཚན་དཔེས་རབ་བརྒྱན་འོད་ཀྱི་དཀྱིལ་འཁོར་མཛེས༔ མཉམ་ཉིད་བདེ་ཆེན་འཁྱིལ་པའི་སྐྱིལ་ཀྲུང་བཞུགས༔ འོད་ཀྱི་ལུས་ལ་ཡེ་ཤེས་སྙིང་པོ་ཅན༔ གསལ་སྟོང་ཐུགས་རྗེའི་འོད་ཟེར་ཀུན་ལ་སྙོམས༔ མཁའ་འགྲོ་

འཇའ་སྤྲིན་རྣམ་མང་འཁྲིགས་པའི་དབུས༔ སྐུ་ཡི་སྤྲུལ་པས་ཞིང་ཁམས་ཡོངས་ལ་ཁྱབ༔ ནམ་མཁའི་ལུས་ཅན་གར་ཡང་ཐོགས་པ་མེད༔ བདེ་གཤེགས་ཀུན་གྱི་བཀོད་པ་སྐུ་ལ་རྫོགས༔ ཀུན་ཀྱང་རྒྱལ་བའི་དཀྱིལ་འཁོར་ཟང་ཐལ་ལ༔ བགེགས་དང་བར་ཆད་ཅེས་བྱའི་མིང་ཡང་མེད༔ སྣང་སྟོང་སྒྱུ་མ་ཙམ་དུ་གསལ་བར་བསྐྱེད༔ དེ་ལྟར་གསལ་དུ་གསལ་བའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཟངས་མདོག་དཔལ་གྱི་རི་བོ་རི་བོ་པདྨ་འོད་ཀྱི་གཞལ་ཡས་ནས༔ ཨོ་རྒྱན་གྱི་གུ་རུ་པདྨ་འབྱུང་གནས་ལ་འཁོར་རྒྱལ་བ་རབ་འབྱམས་ཀྱིས་བསྐོར་བ་གཏེར་གྱི་གོང་བུ་ཁ་བྱེ་བ་ལྟར་དཔག་ཏུ་མེད་པ་སྤྱན་དྲངས༔ ཡེ་ཤེས་པ་སྤྱན་དྲངས་པ་ནི། ཧྲཱིཿ སྔོན་གྱི་བསྐལ་པའི་དང་པོ་ལ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་

མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་བསྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨཱཿ དམ་ཡེ་གཉིས་མེད་དུ་གྱུར་པ་ལ་ཕྱག་འཚལ་བ་ནི། ན་མོཿ སྐྱེ་འགག་འགྱུར་མེད་ཕྲིན་ལས་རྫོགས༔ རང་བྱུང་ཐུགས་རྗེས་འགྲོ་རྣམས་སྒྲོལ༔ ཡིད་བཞིན་དངོས་གྲུབ་ཆར་འབེབས་པའི༔ པདྨ་འོད་འབར་སྐུ་ལ་ཕྱག་འཚལ་ལོ༔ མཆོད་པ་འབུལ་བ་ནི། ༀ་ཨཱཿཧཱུྃ༔ མཆོད་འོས་ཕྱི་ནང་སྣོད་བཅུད་ཀུན༔ བློ་ཡིས་སྤྲུལ་ལམ་ལྷུན་གྱིས་གྲུབ༔ ཏིང་འཛིན་མཉམ་ཉིད་ཆེན་པོ་རུ༔ དཀོན་མཆོག་སྤྱི་

འདུས་རྒྱལ་བར་འབུལ༔ གཞན་ཡང་མཆོད་རྫས་བྱེ་བྲག་ནི༔ མཛེས་པའི་མེ་ཏོག་དབུ་ལ་འབུལ༔ དྲི་ཞིམ་བདུག་སྤོས་ཤངས་ལ་འབུལ༔ སྣང་གསལ་མར་མེ་སྤྱན་ལ་འབུལ༔ མཆོད་ཡོན་དྲི་ཆབ་སྐུ་ལ་འབུལ༔ རོ་ལྡན་ཞལ་ཟས་ལྗགས་ལ་འབུལ༔ སྙན་པའི་རོལ་མོ་ཐུགས་ལ་འབུལ༔ ཕྱག་རྒྱ་གར་གྱི་མཆོད་པ་འབུལ༔ བསྟོད་དབྱངས་གླུ་ཡི་མཆོད་པ་འབུལ༔ འདོད་ཡོན་མ་སྤངས་ཕྱི་མཆོད་འབུལ༔ ཉོན་མོངས་མ་སྤངས་ནང་མཆོད་འབུལ༔ འདུ་འབྲལ་མེད་པའི་གསང་མཆོད་འབུལ༔ རྩ་བརྒྱད་སྟོང་སྦྱར་སྨན་མཆོད་འབུལ༔ དུག་ལྔ་བསྒྲལ་བའི་རཀྟ་འབུལ༔ བ་ལིང་གཏོར་མའི་མཆོད་པ་འབུལ༔ དམ་རྫས་བདུད་རྩིའི་མཆོད་པ་འབུལ༔ བླང་དོར་མེད་པའི་མཆོད་པ་འབུལ༔ ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤབྟ་པྲ་ཏཱིཙྪ་ཨཱཿཧཱུྃ༔ མ་ཧཱ་པཉྩ་རཀྟ་བ་ལིངྟ་ཁཱ་ཧི༔བར།

འདིར་སྨན་མཆོད་བླ་སྒྲུབ་གཞན་ལྟར་ཁ་ཅིག་གིས་སྦྱོར་བར་སྣང་བ་བཞིན་སྤྲོ་ན། ཧཱུྃ༔ བླ་མ་ཡི་དམ་མཁའ་འགྲོའི་ཚོགས་བཅས་ལ༔ དུག་ལྔ་སེལ་ཕྱིར་ཡེ་ཤེས་ལྔ་རྫོགས་རྫས༔ དམ་རྫས་བདུད་རྩི་མཆོག་གི་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ གུ་རུ་དེ་ཝ་ཌཱ་ཀི་ནི་སརྦ་པཉྩ་ཨ་མྲྀ་ཏ་ལ་ཁཱ་ཧི༔ ཆོས་སྐུ་སྣང་བ་མཐའ་ཡས་ཞལ་དུ་སརྦ་པཉྩ་ཨྲྀ་ཏ་ལ་ཁ་རཾ་ཁཱ་ཧི༔ ལོངས་སྐུ་ཐུགས་རྗེ་ཆེན་པོའི་ཞལ་དུ༴ སྤྲུལ་སྐུ་པདྨ་འོད་འབར་ཞལ་དུ༴ མཁའ་འགྲོ་ཡེ་ཤེས་མཚོ་རྒྱལ་ཞལ་དུ༴ ཉང་བན་ཏིང་འཛིན་བཟང་པོའི་ཞལ་དུ༴ རིག་འཛིན་འཇའ་ཚོན་སྙིང་པོའི་ཞལ་དུ༴ ཁྲག་འཐུང་བདུད་འདུལ་རྡོ་རྗེའི་ཞལ་དུ༴ གཏེར་ཆེན་ཀློང་གསལ་སྙིང་པོའི་ཞལ་དུ༴ པདྨ་བདེ་ཆེན་གླིང་པའི་ཞལ་དུ༴ རྡོ་རྗེ་ཚེ་དབང་ནོར་བུའི་ཞལ་དུ༴ བཀའ་བརྒྱུད་ཕྲིན་ལས་ཤིང་རྟའི་ཞལ་དུ༴ རིག་འཛིན་ཐུགས་ཀྱི་

རྡོ་རྗེའི་ཞལ་དུ༴ པདྨ་ཉིན་བྱེད་དབང་པོའི་ཞལ་དུ༴ འཆི་མེད་གཡུང་དྲུང་གླིང་པའི་ཞལ་དུ༴ དྲིན་ཆེན་རྩ་བརྒྱུད་བླ་མའི་ཞལ་དུ༴ བཀའ་བབ་ཆོས་བདག་སྐྱེས་བུའི་ཞལ་དུ༴ བླ་མེད་དཀོན་མཆོག་སྤྱི་འདུས་ཞལ་དུ༴ ཡི་དམ་པདྨ་དྲག་པོའི་ཞལ་དུ༴ མཁའ་འགྲོ་སེང་གེའི་གདོང་ཅན་ཞལ་དུ༴ ཆོས་སྐྱོང་དམ་ཅན་རྒྱ་མཚོའི་ཞལ་དུ༴ གཞན་ཡང་མཆོད་འོས་རྒྱ་མཚོའི་ཞལ་དུ་སརྦ་པཉྩ་ཨྲྀ་ཏ་ལ་ཁ་རཾ་ཁཱ་ཧི༔ བསྟོད་པ་ནི། ཧྲཱིཿ རྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོ་ཉིད་དོན་ལ་ཆ་ལུགས་མི་མངའ་ཡང་༔ ཐབས་མཁས་གང་འདུལ་སོ་སོའི་སྐུར་སྟོན་པ༔ ཐུགས་རྗེའི་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ བདེ་གཤེགས་ཀུན་འདུས་གཞོན་ནུ་ལོ་བརྒྱད་ཚུལ༔ འགྲོ་བ་ཡོངས་ཀྱི་སྐྱབས་མགོན་པདྨ་འབྱུང་༔ འགྱུར་མེད་སྐུ་མདོག་གངས་ལ་ཉི་ཤར་ལྟར༔ དམར་མདངས་

ཅུང་ཟད་འཚེར་ལ་ཕྱག་འཚལ་བསྟོད༔ ཐབས་ཤེས་དབྱེར་མེད་རྡོ་རྗེ་ཐོད་པ་དང་༔ ཟུང་འཇུག་ཚེ་དང་ཡེ་ཤེས་བུམ་པ་འཛིན༔ དུག་གསུམ་རྩད་གཅོད་ཁ་ཊྭཱཾ་ཡུམ་གྱི་ཚུལ༔ ཁྲོ་འཛུམ་འགྲོ་འདུལ་མཛད་ལ་ཕྱག་འཚལ་བསྟོད༔ ཆོས་གོས་དམར་པོ་གསེར་གྱི་ཧ་རིས་ཅན༔ ཤེའུའི་སྙན་ཞུ་རྒོད་ལྡེམ་དར་སྣས་བརྒྱན༔ པདྨའི་གདན་ལ་མཚན་དང་དཔེ་བྱད་འབར༔ ཕྱི་ནང་ཡོན་ཏན་རྫོགས་ལ་ཕྱག་འཚལ་བསྟོད༔ སྐུ་དང་ཞིང་ཁམས་ཡེ་ནས་འདུ་འབྲལ་མེད༔ ཕྱོགས་བཅུ་ཀུན་ཀྱང་རྒྱལ་བའི་ཆོ་འཕྲུལ་ལས༔ ཆེ་ཆུང་མ་ངེས་སྐུ་གསུམ་ངང་དུ་བཞུགས༔ སྤྲུལ་པའི་གློག་སྟོང་འཁྱུགས་ལ་ཕྱག་འཚལ་བསྟོད༔ གཟི་བརྗིད་ཉི་མ་འབུམ་གྱི་འོད་ཟེར་གྱིས༔ ཚེ་ཡི་དངོས་གྲུབ་རང་བཞིན་གནས་ནས་འགུགས༔ དགོས་འདོད་རེ་སྐོང་ཡིད་བཞིན་མཆོག་གི་ངང་༔ འཆི་མེད་རྡོ་རྗེའི་སྐུ་ལ་ཕྱག་འཚལ་

བསྟོད༔ དེ་ལྟར་མཆོད་དང་བསྟོད་བྱ་མི་དམིགས་ཀྱང་༔ གློ་བུར་དྲི་མའི་རྣམ་རྟོག་སེལ་ཕྱིར་དུ༔ ཐབས་ཤེས་དབྱེར་མེད་ཆུ་ལ་ཆུ་བཞག་ཚུལ༔ གཉིས་མེད་རོལ་པ་ཆེན་པོར་ཕྱག་འཚལ་བསྟོད༔ དེས་བསྐྱེད་པའི་རིམ་པ་རྗེས་འབྲེལ་བཅས་སོང་། གཉིས་པ་བཟླས་པའི་རྣལ་འབྱོར་ལ་ཕྱི་སྒྲུབ་ནི། རང་གི་གནས་གསུམ་གྱི་ཡིག་འབྲུ་གསུམ་ལས་འོད་ཟེར་འཕྲོས་པས་མཆོག་གསུམ་རྩ་བ་གསུམ་པོ་ཐམས་ཅད་གུ་རུ་པདྨའི་སྐུ་གསུང་ཐུགས་ཀྱི་ཕྱག་རྒྱ་འོད་ཟེར་གྱི་རྣམ་པ་ཁ་བ་བབ་པ་ལྟར་བྱོན་རང་ལ་སིབ་སིབ་ཐིམ་པས་བྱིན་གྱིས་བརླབས་པར་གྱུར། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ་སིདྡྷི་ཕ་ལ་ཧཱུྃ་ཨཱཿ ཞེས་དབྱངས་དང་སྟངས་སྟབས་བཅས་བཟླའོ། །ནང་སྒྲུབ་ནི། རང་གི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་གསེར་གྱི་རྡོ་རྗེ་རྩེ་ལྔ་པའི་ལྟེ་བར་ཧཱུྃ་ཡིག་

དཀར་པོས་མཚན་པ། རྡོ་རྗེའི་མཐའ་བསྐོར་དུ་སྔགས་ཕྲེང་འོད་ལྔའི་མདངས་དང་ལྡན་པ་གཡས་བསྐོར་དུ་འཁོར་བ་ལས་འོད་ཟེར་འཕྲོས། ཞིང་ཁམས་རབ་འབྱམས་ཀྱི་རྒྱལ་བ་ཐམས་ཅད་ལ་མཆོད་པ་བླ་ན་མེད་པ་ཕུལ། སྐུ་གསུང་ཐུགས་ཀྱི་བྱིན་རླབས་ཐམས་ཅད་རང་ལ་འདུས། བར་དུ་ལྷ་སྲིན་དྲེགས་པ་ཅན་ཐམས་ཅད་དབང་དུ་བསྡུས། ཅི་བསྒོ་བའི་ལས་ཐམས་ཅད་རྩོལ་མེད་དུ་བསྒྲུབས། མར་རིགས་དྲུག་གི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། བདེ་བས་ཚིམ་པར་བྱས། འོད་ཟེར་འཕྲོ་འདུས་སྣོད་བཅུད་ལྷ་སྔགས་ཡེ་ཤེས་ཀྱི་རོལ་པ་ཆེན་པོར་གྱུར། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ འདི་བཟླས་པའི་དངོས་གཞི་ཡིན་པས་ཅི་འགྲུབ་བྱ། གསུམ་པ་འདིའི་ཡན་ལག་ཏུ་ཚེ་སྒྲུབ་ཉམས་སུ་ལེན་པར་སྤྲོ་ན། ནང་སྒྲུབ་བཟླས་པ་ཁྱུག་ཙམ་སྔོན་དུ་སོང་ནས། བདག་མདུན་སྐད་ཅིག་གིས་རིག་འཛིན་ཚེ་དཔག་མེད་པདྨ་འོད་འབར་

དུ་གསལ་བར་གྱུར། ཧྲཱིཿ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ འགྲོ་རྣམས་མ་ལུས་སྒྲོལ་བའི་དེད་དཔོན་མཆོག༔ ཨོ་རྒྱན་པདྨ་རིག་འཛིན་ཚེ་དཔག་མེད༔ བདག་གི་ལུས་ངག་ཡིད་གསུམ་བྱིན་རློབས་ལ༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ཞེས་གསོལ་འདེབས་ལན་གསུམ་བྱ། བདག་མདུན་གྱི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ཟེའུ་འབྲུར་ཕ་ལམ་གྱི་རྡོ་རྗེ་རྩེ་ལྔ་པའི་ལྟེ་བར་ཉི་ཟླའི་གའུ་ཁ་སྦྱོར་གྱི་དབུས་སུ་ཧྲཱིཿདཀར་པོ་ནྲི་དང་ཨཱཿས་མཚན་པ་དེའི་མཐར་སྔགས་ཕྲེང་འོད་ལྔའི་མདངས་དང་ལྡན་པ་གཡས་བསྐོར་དུ་འཁོར་བ་དང་། གནས་ལྔར་ཕྱག་མཚན་ལྔ་ཡིག་འབྲུ་ལྔས་མཚན་པ་ལས་འོད་ཟེར་སྤྲོ་བསྡུའི་ཕྱི་ནང་སྣོད་བཅུད་ལྷ་སྔགས་སུ་གསལ་བའི་གཟི་བརྗིད་ཀྱིས། སངས་རྒྱས་བྱང་སེམས་རྩ་བ་གསུམ་དང་ཆོས་སྐྱོང་སྲུང་མ་ཐམས་ཅད་ཀྱི་ཚེ་

ཡི་བྱིན་རླབས་དང་། འབྱུང་བའི་བཅུད་ཀྱི་དྭངས་མ་ཐམས་ཅད་དང་། དྲང་སྲོང་རིག་འཛིན་ཚེ་ལ་དབང་བ་ཐམས་ཅད་ཀྱི་ཐུགས་རྗེ་བྱིན་རླབས། མདོར་ན་སེམས་ཅན་བསོད་ནམས་ཅན་དཀར་པོ་དགེ་བའི་ལས་སྒྲུབ་ཅིང་དབང་ཆེ་བ། རྩལ་དྲག་པ། འཁོར་མང་བ། ཡོན་ཏན་ཆེ་བ། སྟོབས་དང་སྙན་གྲགས་ལྡན་པ། གདུལ་བྱ་ཕྲིན་ལས་ཅན་རྣམས་ཀྱི་ཚེ་དང་བསོད་ནམས་ཐམས་ཅད་ཡི་གེ་ནྲི་ཡི་རྣམ་པ་དང་འོད་ཟེར་ཁ་དོག་སྣ་ཚོགས་ཀྱི་ལི་ལི་བདག་མདུན་བུམ་པའི་ལྷ་ལ་ཐིམ་པར་གྱུར། ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཨཱཿཡུ་ཥེ་ཧཱུྃ་ནྲི་ཛཿ ཞེས་ཚེ་བསྙེན་གང་འགྲུབ་བཟླ། མཐར་སྨོན་ལམ་གདབ་པ་ནི། ནད་རིགས་བཞི་བརྒྱ་རྩ་བཞི་དང་༔ རྐྱེན་ངན་ཉི་ཁྲི་ཆིག་སྟོང་དང་༔ ཡེ་འདྲོགས་སུམ་བརྒྱ་དྲུག་ཅུ་དང་༔ བགེགས་རིགས་སྟོང་ཕྲག་བརྒྱད་ཅུ་སོགས༔ ཚེ་ཡི་བར་ཆད་མི་མཐུན་ཕྱོགས༔ ཐམས་ཅད་བྱང་ཞིང་

དག་གྱུར་ཅིག༔ ཚེ་འགུགས་ནི་མདའ་དར་གཡབ་ལ། ཧྲཱི༔ ཕྱི་ནི་བུམ་པ་ནང་ནི་བདུད་རྩིས་གང་༔ གསང་བའི་དོན་ནི་པདྨ་ཚེ་དཔག་མེད༔ གནས་ལྔར་ཕྱག་མཚན་ལྔ་དང་ཡིག་འབྲུ་ལྔ༔ འོད་ཟེར་དཔག་ཡས་ནམ་མཁའ་ཁྱབ་པར་འཕྲོས༔ ཧྲཱིཿ ཤར་ཕྱོགས་དྲི་ཟའི་ལག་ནས་ལྕགས་ཀྱུས་ཁུག༔ ལྷོ་ཕྱོགས་གཤིན་རྗེའི་ལག་ནས་ཞགས་པས་ཁུག༔ ནུབ་ཕྱོགས་ཀླུ་བདུད་ལག་ནས་ལྕགས་སྒྲོག་ཁུག༔ བྱང་ཕྱོགས་གནོད་སྦྱིན་ལག་ནས་དྲིལ་བུས་ཁུག༔ སྟེང་ཕྱོགས་ཚངས་པ་བརྒྱ་བྱིན་ལག་ནས་ཁུག༔ འོག་ཕྱོགས་དགའ་བོ་འཇོག་པོའི་ལག་ནས་ཁུག༔ ཚེ་སྲོག་ཆད་པ་མཐུད་ལ་ཡར་བ་ཁུག༔ གས་པ་སྦྱོར་ལ་ཉམས་པ་ཐམས་ཅད་གསོས༔ འོད་ཟེར་དཀར་ལ་འཚེར་ཞིང་སྣུམ་ལ་འདྲིལ༔ སྤྱི་བོའི་གཙུག་ནས་ལུས་ལ་སིམ་སིམ་ཐིམ༔ འོད་འབར་འཆི་མེད་ཚེ་ཡི་དབ་ཐོབ་ཤོག༔ འདིར་རྒྱུན་བཟླས་ལྟ་བུ་ལ་

མདུན་རྟེན་ཚེ་རྫས་དམིགས་བསལ་བཤམས་པ་མེད་ཀྱང་། གངས་བྲག་ནགས་རི་ཉི་ཟླ་གཟའ་སྐར་མཚོ་སོགས་ལ་དམིགས་པའི་རྟེན་བྱ་བ་རྡོ་རྗེའི་གསུང་གི་ངེས་དོན་ཡིན་ནོ། ། ༈ བཞི་པ་གསང་བ་གུ་རུ་དྲག་པོར་སྒྲུབ་པ་ནི། རང་ཉིད་སྐད་ཅིག་གིས་པདྨ་འོད་འབར་འོད་དུ་ཞུ་བ་ལས་བྱུང་བའི་གུ་རུ་དྲག་པོ་གཏུམ་དྲག་དམར་ནག་མེ་ཡི་ཕྲེང་བ་ཅན་གྱི་སྐུར་གྱུར་པའི་གནས་གསུམ་འབྲུ་གསུམ་གྱིས་མཚན་པ་ལས་འོད་ཟེར་འཕྲོས། ཕྱོགས་བཅུ་ཁྲོ་བོའི་ཞིང་དང་རྔ་ཡབ་པདྨ་འོད་ཀྱི་གཞལ་ཡས་ནས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་སྤྱན་དྲངས་པར་གྱུར། སྤྱན་འདྲེན་པ་ནི། ཧཱུྃ༔ ཆོས་སྐུ་ཞི་བའི་ངང་ལས་མ་གཡོས་ཀྱང་༔ གཟུགས་སྐུ་པདྨ་འོད་འབར་སྐད་ཅིག་ལ༔ རྔམ་བརྗིད་ཁྲོས་པའི་ངར་སྐད་ཕྱོགས་བཅུར་སྒྲོགས༔ སྤྲུལ་པ་ཡང་སྤྲུལ་དཔག་ཡས་འཇིགས་ཚུལ་སྟོན༔ ཆེ་མཆོག་དམར་ནག་མེ་ཡི་ཕྲེང་བ་ཅན༔ དེང་འདིར་རྣལ་འབྱོར་བདག་གི་གྲོགས་

ལ་བྱོན༔ ཛཿ ཆོས་ཀྱི་དབྱིངས་ནས་སྒྱུ་མའི་སྐུར་བཞེངས་པ༔ དུག་གསུམ་འབར་བའི་ཁྲོ་གཏུམ་འཇིགས་གཟུགས་ཅན༔ དྲེགས་པ་སྡེ་བརྒྱད་འདུལ་ཕྱིར་གཤེགས་སུ་གསོལ༔ རྒྱལ་སྲིན་དམ་སྲི་འདུལ་ཕྱིར་གཤེགས་སུ་གསོལ༔ གཉན་ལྷོག་སྨྱོ་འབོགས་འདུལ་ཕྱིར་གཤེགས་སུ་གསོལ༔ མཐའ་ཡི་དམག་དཔུང་བཟློག་ཕྱིར་གཤེགས་སུ་གསོལ༔ སྣང་སྲིད་བྲན་དུ་བཀོལ་ཕྱིར་གཤེགས་སུ་གསོལ༔ དབང་དང་དངོས་གྲུབ་སྩོལ་ཕྱིར་གཤེགས་སུ་གསོལ༔ མཆོད་པ་ནི། ཧཱུྃ༔ སྲིད་གསུམ་ཡེ་ནས་གཏོར་གཞོང་དུ༔ སྣང་སྲིད་ཐམས་ཅད་གཏོར་མར་སྦྱར༔ འཁོར་འདས་ཡོངས་གྲོལ་ཆེན་པོའི་ཚོགས༔ དབང་དྲག་འབར་བ་ཁྱོད་ལ་འབུལ༔ སྟོང་གསུམ་སྟོང་གི་གཏོར་གཞོང་དུ༔ རི་རབ་འབར་བའི་དཔལ་བཤོས་བཙུགས༔ སྐྱེ་འགྲོ་སེམས་ཅན་གྲངས་ལས་འདས༔ དབང་དྲག་

འབར་བ་ཁྱེད་ལ་འབུལ༔ བྷནྡྷ་འབར་བའི་གཏོར་གཞོང་དུ༔ དགྲ་བགེགས་ཤ་ཁྲག་ཐོད་ཚིལ་སྤུངས༔ ཞག་དང་རླངས་པ་ཆི་ལི་ལི༔ དབང་དྲག་འབར་བའི་ཐུགས་དམ་བསྐང་༔ བདུད་རྩི་གཏོར་ཆེན་རཀྟའི་མཚོ༔ སྦྱོར་སྒྲོལ་ཏིང་འཛིན་ཚོགས་མཆོད་དང་༔ ཕྱི་ནང་གསང་བའི་མཆོད་སྤྲིན་གཏིབས༔ དབང་དྲག་འབར་བའི་ཐུགས་དམ་བསྐང་༔ བསྟོད་པ་ནི། ཧཱུྃ༔ བདེ་ཆེན་རང་བཞིན་ཁྲོས་པའི་དཀྱིལ་འཁོར་ནས༔ དཀོན་མཆོག་སྤྱི་འདུས་དམར་ནག་འབར་བའི་སྐུ༔ ཟུར་ཞལ་གཡོན་གཟིགས་ཞབས་གཉིས་འདོར་སྟབས་བསྒྲད༔ ཞལ་གདངས་ལྗགས་འདྲིལ་རྣོ་དཀར་མཆེ་བ་གཙིགས༔ དགྲ་བགེགས་ཤ་ཁྲག་རུས་པ་ཀྲུམ་ཀྲུམ་སོལ༔ སྤྱན་གསུམ་དམར་ཟླུམ་སྡང་མིག་ཕྱོགས་བཅུར་འཁྱིལ༔ དྲེགས་པ་ཕོ་མོ་འདར་ཞིང་སྔངས་པར་བྱེད༔ ཤངས་ནས་རླུང་འཚུབ་འབྲུག་སྒྲ་ལྡིར་བ་ཡིས༔

ཁམས་གསུམ་སྲིད་གསུམ་དབང་སྡུད་ཟིལ་གྱིས་གནོན༔ རལ་པ་ཁམ་ནག་ནམ་མཁའི་དབྱིངས་ལ་སྒྲེང་༔ ཁྲོ་ཆུང་མང་པོས་དགྲ་བགེགས་ཐལ་བར་རླག༔ ཕྱག་གཡས་གསེར་གྱི་རྡོ་རྗེས་མཐའ་དམག་བཟློག༔ གཡོན་པས་ལྕགས་སྡིགས་ནག་པོས་སྤྲུལ་པ་འགྱེད༔ ཀླུ་རྣམས་འདུལ་ཕྱིར་སྦྲུལ་རིགས་ལྔ་ཡིས་བརྒྱན༔ འཁོར་བ་སྟོང་མཛད་མགོ་ཕྲེང་ལྔ་བཅུས་བརྒྱན༔ གླང་ཆེན་ཀོ་རློན་སྟོབས་བཅུ་ལྷུན་གྱིས་རྫོགས༔ སྟག་ཤམ་ང་རྒྱལ་དྲེགས་པ་དབང་དུ་སྡུད༔ རིན་ཆེན་རུས་རྒྱན་མཁའ་འགྲོ་རོལ་དུ་ཁྲིད༔ བ་སྤུའི་རྩེ་ནས་ཁྲོ་ཆུང་ཚྭ་ཚྭ་འཕྲོ༔ མེ་དུད་ཟིལ་གྱིས་སྲིད་གསུམ་སྐར་ལྟར་འཁྲུགས༔ གུ་རུ་དྲག་པོའི་སྐུ་ལ་ཕྱག་འཚལ་བསྟོད༔ དབང་དྲག་འབར་བའི་ཐུགས་དམ་དུས་ལ་བབ༔ རྣལ་འབྱོར་བདག་གི་སྔོན་གྱི་དམ་ཚིག་གིས༔ ལྷ་མཆོག་ཁྱེད་ལ་གདུང་བས་འབོད་ལགས་

ན༔ ཁྱེད་ཀྱི་ཐུགས་དམ་གནད་ནས་ད་བསྐུལ་ཅིག༔ གདུག་པའི་དགྲ་བགེགས་འདུལ་བའི་དུས་ལ་བབ༔ ནག་པོ་ཀླུ་གཉན་འདུལ་བའི་དུས་ལ་བབ༔ དྲེགས་པ་གཟའ་རྒོད་འདུལ་བའི་དུས་ལ་བབ༔ སྡེ་བརྒྱད་ལྷ་སྲིན་འདུལ་བའི་དུས་ལ་བབ༔ བེ་ཧར་སྲོག་བདག་འདུལ་བའི་དུས་ལ་བབ༔ མཐའ་ཡི་དམག་དཔུང་བཟློག་པའི་དུས་ལ་བབ༔ མི་ནད་ཕྱུགས་ནད་བཟློག་པའི་དུས་ལ་བབ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཡེ་ཤེས་པ་རང་ལ་ཐིམ་པས། རང་གི་དབུ་གཙུག་ན་རིགས་བདག་གུ་རུ་ཞི་བས་མཚན་པ། ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་དམར་ནག་གི་མཐའ་བསྐོར་དུ་སྔགས་ཕྲེང་གཡས་སུ་འཁོར་བ་ལས་འོད་ཟེར་དམར་ནག་ཡེ་ཤེས་ཀྱི་མེ་དང་མཚོན་ཆ་ལ་སོགས་པ་འཕྲོས། མ་རུངས་གདུག་པ་ཅན་ཐམས་ཅད་ཚར་བཅད། སྣང་སྲིད་ཐམས་ཅད་

རིག་འཛིན་དྲག་པོའི་སྐུར་གསལ་བར་གྱུར། ༀ་ཨཱཿཧཱུྃ་ཨར་ཙིག་ནིར་ཙིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ མཐར་སྡེ་བརྒྱད་ཤམ་བུ་ནི། ཨ་ཡ་མ་དུ་རུ་ཙ་ཤ་ན་ས་མ་ཡ་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ་ཟློག་ཟློག་བྷྱོ་ཟློག་ཅིག༔ རྩ་སྔགས་དང་སྦྲེལ་ལ་དེའི་བཅུ་ཆ་བཟླའོ། ། ༈ ལྔ་པ་ཡང་གསང་མཁའ་འགྲོ་སྒྲུབ་པ་ནི། རང་ཉིད་རིག་འཛིན་དྲག་པོ་གནས་གྱུར་ཏེ་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་སྐུར་གྱུར་པའི་གནས་གསུམ་འབྲུ་གསུམ་ལས་འོད་འཕྲོས། ནུབ་ཕྱོགས་ཨོ་རྒྱན་སྤྲུལ་པའི་ཕོ་བྲང་དང་གནས་ཡུལ་དུར་ཁྲོད་ཀྱི་ཞིང་ནས་ཡེ་ཤེས་པ་སྤྱན་དྲངས་པར་གྱུར། ཧཱུྃ་བྷྱོ༔ མ་སྐྱེས་རྫོགས་པ་ཆོས་ཀྱི་དབྱིངས་ཉིད་ལས༔ སྐྱེ་བའི་ཆོ་འཕྲུལ་འབར་བའི་སྐུར་སྟོན་པ༔ འགྲོ་བའི་དོན་མཛད་ཡེ་ཤེས་མཁའ་འགྲོ་མ༔ ནམ་མཁའི་མདོག་ཅན་དབུ་ནི་སེང་གེའི་གདོང་༔ གཅེར་བུ་ལོངས་སྤྱོད་རྫོགས་པའི་སྐུ་མངའ་མ༔

ཕྱག་གཡས་གྲི་གུག་གཡོན་པས་ཐོད་ཁྲག་འཛིན༔ དུག་ལྔ་གཅོད་ཅིང་སྐྱེ་མེད་དབྱིངས་སུ་རོལ༔ རྩེ་གསུམ་མཆན་དུ་བཟུང་ནས་དུག་གསུམ་སྒྲོལ༔ རུས་རྒྱན་མེ་ལོང་རྒྱན་གྱིས་ཌཱ་ཀི་དབང་དུ་སྡུད༔ ཡེ་ཤེས་མེ་རིས་མ་རིག་མུན་པ་འཇོམས༔ གཡས་བསྐུམ་གཡོན་བརྐྱང་ཐབས་ཤེས་དབྱེར་མེད་ངང་༔ པདྨ་ཉི་ཟླ་བམ་རོའི་གདན་ལ་བཞུགས༔ རང་བཞིན་གནས་ནས་སྤྱན་འདྲེན་གཤེགས་སུ་གསོལ༔ བྷྱོ༔ སྐུ་གསུང་ཐུགས་སྤྲུལ་མཁའ་འགྲོའི་ཚོགས༔ ཕྲིན་ལས་སྤྲུལ་པ་མ་མོའི་ཚོགས༔ ཀུན་ཀྱང་ཡང་སྤྲུལ་བསམ་མི་ཁྱབ༔ གུས་པའི་ཡིད་ཀྱིས་ཕྱག་འཚལ་ལོ༔ ན་མོ༔ ལྕང་ལོར་བཅས་པའི་བྷནྡྷ་རུ༔ དམར་གཏོར་ཁྲག་དང་ཞག་གིས་བརྒྱན༔ ཤ་སྣ་སྙིང་སྣའི་རྒྱལ་མཚན་བཙུགས༔ མཁའ་འགྲོ་འཁོར་བཅས་ཐུགས་དམ་བསྐང་༔ རཀྟའི་རྦ་ཀློང་ཕྱ་ར་ར༔ འོ་མཚོ་དཀར་དྭངས་ཀྱི་ལི་ལི༔

ཞག་གི་རྒྱ་མཚོ་མེ་རེ་རེ༔ ཞུན་ཆེན་གསུར་དུད་ཆི་ལི་ལི༔ རྔ་དུང་རོལ་མོ་དི་རི་རི༔ རྐང་གླིང་ཐོད་རྔ་ཁྲོ་ལོ་ལོ༔ དགྲ་བོའི་ཤ་ཁྲག་དམར་ཉི་ལི༔ མཁའ་འགྲོ་འཁོར་བཅས་ཐུགས་དམ་བསྐང་༔ དམ་ཉམས་དགྲ་བགེགས་མྱུར་དུ་སྒྲོལ༔ ཌཱ་ཀི་སེང་ཧ་མུ་ཁ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤབྟ་པྲ་ཏཱིཙྪ་ཨཱཿཧཱུྃ༔ མ་ཧཱ་མཾ་ས་ཙིཏྟ་རཀྟ་གོ་རོ་ཙ་ན་བ་སུ་ཏ་བ་ལིངྟ་ཁཱ་ཧི༔ ཡེ་ཤེས་པ་བསྟིམ་པས། རང་གི་དབུ་གཙུག་ན་གུ་རུ་ཞི་བ། གྲུ་མོར་རིག་འཛིན་དྲག་པོ་མཚོན་བྱེད་ཁ་ཊྭཱཾ་གས་མཚན་པ། ཕ་ལམ་ལས་གྲུབ་པའི་རྡོ་རྗེ་ལ་སོགས་པ་མཚོན་ཆའི་གུར་དང་ཡེ་ཤེས་ཀྱི་མེ་དཔུང་འཁྲིགས་པའི་དབུས་སུ་རང་འདྲའི་སྤྲུལ་པ་དུ་མ་དང་བཅས་ཏེ་བཞུགས་པའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་སྔོན་པོའི་མཐར་སྔགས་ཕྲེང་སྔོན་པོ་གཡོན་དུ་འཁོར་བ་ལས་འོད་ཟེར་འཕྲོས། དམ་

ཆོས་སྒྲུབ་པའི་བར་ཆད་ཐམས་ཐད་སྤུ་གྲིས་སྐྲ་བཞར་བ་ལྟ་བུར་སོང་བར་གྱུར། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ སྤྲོས་བཅས་སྤྲོས་མེད་གང་གི་ཚེའང་བཟློག་དམིགས་སྦྱར་བར་སྤྲོ་ན། སྤྱི་བོར་ཨཿཀཿམགྲིན་པར་སཿམཿདང་༔ སྙིང་གར་རཿཙཿལྟེ་བར་ཤཿདཿསྟེ༔ གསང་བར་རཿསཿབརླ་གཉིས་མཿརཿཡཿ ཕཊཿཀྱིས་མཚན་ལས་མེ་འོད་མཚོན་ཆ་འཁྲུགས༔ བར་ཆད་ཐམས་ཅད་རྡུལ་བཞིན་བརླག་པར་གྱུར༔ ཅེས་མོས་ལ་ཡི་གེ་བཅུ་བཞི་པ་བཟླ། མཐར་ཐལ་རྡེབ་སྤྲོ་ན་ལག་གཉིས་ཉི་ཟླར་གསལ་བ་ཆ་ལང་ལྟར་བརྡབས་པས་གནོད་བྱེད་ཐམས་ཅད་སྒོ་ང་བྲག་བར་དུ་བཅར་བ་བཞིན་སོང་བར་བསྒོམ་ལ། མཁའ་འགྲོ་མ་སེང་གེའི་གདོང་པ་ཅན་ཁྱེད་ཀྱི་རིག་སྔགས་བཟླས་པའི་མཐུ་དང་ནུས་པ་ལ་བརྟེན་ནས་བདག་ཅག་དཔོན་སློབ་འཁོར་དང་བཅས་པ་རྣམས་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། བར་དུ་གཅོད་པའི་རྐྱེན།

མདོར་ན་བཀྲ་མི་ཤིས་པའི་ཕྱོགས་རིས་ངན་པ་ཐམས་ཅད་ཕྱིར་བཟློག་པར་གྱུར་ཅིག །ལན་གསུམ་བྱ། ཟློག་དམིགས་དང་ཐལ་རྡེབ་འདི་དགོང་མོའི་ཆ་དང་དགུ་གསུམ་དུས་གཉན་ལྟ་བུར་ཆེད་དུ་དགོས་ན་མ་གཏོགས་ཚེས་བཅུའི་ཚོགས་མཆོད་བསྙེན་སྒྲུབ་སྐབས་སུ་མི་སྦྱར་རོ། ། ༈ དྲུག་པ་ཕྲིན་ལས་བཞི་སྒྲུབ་ནི། བསྙེན་སྒྲུབ་མཐར་ཕྱིན་པའི་ལས་སྦྱོར་གྱི་སྐབས་མ་གཏོགས་གཞན་ལ་སྦྱར་མི་དགོས་ཀྱང་། རྒྱུན་ཁྱེར་ལྟ་བུར་སྦྱོར་ཡང་འགལ་བ་མེད་པ་དེ་ལྟར་ན། ཞི་བ་ནི། རང་ཉིད་པད་འབྱུང་ཐུགས་སྲོག་ཧཱུྃ་བཅས་དཀར། །སྤྱི་བོར་པད་དཀར་འདབ་མ་སོ་གཉིས་ལྟེར། །ཟླ་སྟེང་ༀ་མཐར་སྔགས་ཕྲེང་འོད་ཟེར་དཀར། །རྒྱུད་བསྐུལ་ནུས་བསྐྱེད་སྡིག་སྒྲིབ་འཇིགས་བརྒྱད་ཞི། །སྣོད་བཅུད་རྡོ་རྗེ་སེམས་དཔའི་ཞིང་དུ་གྱུར། །བཛྲ་གུ་རུའི་ཤམ་དུ། ༀ་ཤནྟིཾ་ཀུ་རུ་ཡེ་སྭཱ་ཧཱ། ཞེས་བཟླ། སྨོན་ལམ་ནི། ནད་གདོན་སྡིག་སྒྲིབ་བག་ཆགས་ངན༔ སྡང་དགྲ་གནོད་བྱེད་གདུག་པའི་དབལ༔ རྣོ་བའི་མཚོན་དང་སྦྱོར་

བའི་དུག༔ སྟོང་ཕྲག་བརྒྱད་ཅུའི་བགེགས་ཀུན་དང་༔ བཞི་བརྒྱ་རྩ་བཞིའི་ནད་རྣམས་དང་༔ རྨིས་ལྟས་མཚན་ངན་ཐམས་ཅད་ཀུན༔ མྱུར་བ་ཉིད་དུ་ཞི་གྱུར་ཅིག༔ རྒྱས་པ་ནི། རང་ཉིད་པད་འབྱུང་ཐུགས་སྲོག་ཧཱུྃ་བཅས་སེར། །ལྟེ་བར་པད་སེར་འདབ་མ་རེ་བཞིའི་ལྟེར། །རིན་ཆེན་བྷྲཱུྃ་མཚན་སྔགས་ཕྲེང་འོད་ཟེར་སེར། །རྒྱུད་བསྐུལ་ནུས་བསྐྱེད་ཚོགས་གཉིས་འབྱོར་དྲུག་རྒྱས། །སྣོད་བཅུད་རིན་ཆེན་སེམས་དཔའི་ཞིང་དུ་གྱུར། །རྩ་སྔགས་ཤམ་དུ། བྷྲཱུྃ་པུཥྚིཾ་ཀུ་རུ་ཡེ་སྭཱ་ཧཱ། ཞེས་བཟླ། སྨོན་ལམ་ནི། ཚེ་དང་བསོད་ནམས་སྙན་གྲགས་སྟོབས༔ འཁོར་དང་བུ་སློབ་ཕྲིན་ལས་རྒྱས༔ མངའ་ཐང་ལོངས་སྤྱོད་ཡོན་ཏན་ཀུན༔ མྱུར་བ་ཉིད་དུ་རྒྱས་གྱུར་ཅིག༔ དབང་ནི། རང་ཉིད་པད་འབྱུང་ཐུགས་སྲོག་ཧཱུྃ་བཅས་དམར། །མགྲིན་པར་པདྨ་འདབ་མ་བཅུ་དྲུག་ལྟེར། །ཉི་སྟེང་ཧྲཱིཿམཐར་སྔགས་ཕྲེང་འོད་ཟེར་དམར། །རྒྱུད་

བསྐུལ་ནུས་བསྐྱེད་འཁོར་འདས་མོས་བཞིས་བསྡུས༔ སྣོད་བཅུད་པདྨ་སེམས་དཔའི་ཞིང་དུ་གྱུར། །རྩ་སྔགས་ཤམ་དུ། ཧྲཱིཿཝ་ཤཾ་ཀུ་རུ་ཡེ་སྭཱ་ཧཱ། ཞེས་བཟླ། སྨོན་ལམ་ནི། རྒྱལ་བའི་ཐུགས་རྗེ་བྱིན་རླབས་དང་༔ སྐྱེ་འགྲོ་མཐོང་ཐོས་དྲན་རེག་སོགས༔ ཁམས་གསུམ་དབང་དུ་འདུས་གྱུར་ཅིག༔ དྲག་པོ་ནི། རང་ཉིད་པད་འབྱུང་ཐུགས་སྲོག་ཧཱུྃ་བཅས་མཐིང་། །གསང་བར་པད་ལྗང་འདབ་མ་ཉེར་བརྒྱད་ལྟེར། །རལ་གྲི་ཧཱུྃ་མཚན་སྔགས་ཕྲེང་འོད་ཟེར་ནག །རྒྱུད་བསྐུལ་ནུས་བསྐྱེད་དགྲ་བགེགས་དུག་ལྔ་བརླག །སྣོད་བཅུད་ལས་ཀྱི་སེམས་དཔའི་ཞིང་དུ་གྱུར། །རྩ་སྔགས་ཤམ་དུ། ཧཱུྃ་མཱ་ར་ཡ་ཕཊཿ ཅེས་བཟླ། སྨོན་ལམ་ནི། དམ་སྲི་འབྱུང་པོ་མ་རུངས་པ༔ བསྟན་དགྲ་སྒོས་དགྲ་ལ་སོགས་པ༔ ཞིང་བཅུ་ལྡན་རྣམས་བརླག་གྱུར་ཅིག༔ ཅེས་ལས་གང་སྒྲུབ་མང་དུ་བཟླ་བའམ། དམིགས་བསལ་མེད་ན་ཆ་སྙོམས་པར་བཟླ། དེ་དག་གི་མཐར་ལྷག་

ཆད་ཁ་སྐོང་ཞིང་བྱིན་རླབས་ཀྱི་རྒྱུན་བརྟན་པའི་ཕྱིར་དབྱངས་གསལ་ཡིག་བརྒྱ་རྟེན་སྙིང་རྣམས་ཀྱང་ལན་གསུམ་བཟླའོ། ། ༈ བདུན་པ་ཐུན་མཚམས་སུ་གཏོར་མ་འབུལ་བ་ནི། རྃ་ཡྃ་ཁྃ། བདག་ཉིད་པདྨ་འོད་འབར་ཐུགས་ཀ་ནས། །མེ་རླུང་ཆུ་བྱུང་གཏོར་མའི་ཉེས་སྐྱོན་སྦྱངས། །ཨ་ལས་པདྨ་བྷནྡྷ་ཡངས་པའི་ནང་། །འབྲུ་གསུམ་ལས་བྱུང་ཡེ་ཤེས་བདུད་རྩིའི་མཚོ། །ཁ་དོག་དྲི་རོ་ནུས་བཅུད་ཕུན་སུམ་ཚོགས། །འདོད་ཡོན་མཆོད་སྤྲིན་དཔག་མེད་འཕྲོ་བར་གྱུར། ༀ་ཨཱཿཧཱུྃ། ལན་གསུམ། ཧཱུྃ་ཧྲཱིཿ དཀོན་མཆོག་སྤྱི་འདུས་པདྨ་འོད་འབར་རྗེ། །བརྒྱུད་གསུམ་རིག་འཛིན་བླ་མའི་ཚོགས་རྣམས་ཀྱིས། །གཏོར་མ་ཟག་མེད་ཡེ་ཤེས་བདུད་རྩིའི་བཅུད། །བཞེས་ནས་དབང་བསྐུར་བྱིན་གྱིས་བརླབ་ཏུ་གསོལ། །ཆེ་མཆོག་དམར་ནག་མེ་ཡི་ཕྲེང་བ་ཅན། །རྒྱུད་སྡེ་བཞི་དྲུག་ཡི་དམ་ལྷ་ཚོགས་ཀྱིས། །གཏོར་མ་ཟག་མེད་ཡེ་ཤེས་བདུད་རྩིའི་བཅུད། །

བཞེས་ནས་མཆོག་ཐུན་དངོས་གྲུབ་སྩལ་དུ་གསོལ། །ཡེ་ཤེས་ཌཱ་ཀི་སེང་གེའི་གདོང་པ་ཅན། །གནས་གསུམ་དཔའ་བོ་མཁའ་འགྲོའི་འཁོར་བཅས་ཀྱིས། །གཏོར་མ་ཟག་མེད་ཡེ་ཤེས་བདུད་རྩིའི་བཅུད། །བཞེས་ནས་ཕྲིན་ལས་རྣམ་བཞི་མྱུར་འགྲུབ་མཛོད། །དཔལ་མགོན་ལྕམ་དྲལ་གཟའ་མཆོག་རྡོ་རྗེ་ལེགས། །རྒྱུད་གསུམ་དམ་ཅན་རྒྱ་མཚོའི་ཚོགས་རྣམས་ཀྱིས། །གཏོར་མ་ཟག་མེད་ཡེ་ཤེས་བདུད་རྩིའི་བཅུད། །བཞེས་ནས་སངས་རྒྱས་བསྟན་པ་གཉན་པོ་སྲུངས། །རྡོ་རྗེ་དེ་མོ་བརྟན་མ་བཅུ་གཉིས་སོགས། །དཀར་ཕྱོགས་སྐྱོང་བའི་གཞི་གནས་གཏེར་བདག་གིས། །གཏོར་མ་ཟག་མེད་ཡེ་ཤེས་བདུད་རྩིའི་བཅུད། །བཞེས་ནས་བོད་ཡུལ་མཐའ་དབུས་བདེ་བར་མཛོད། །ཁྱད་པར་གཏེར་སྲུང་དགེ་བསྙེན་མཐུ་སྟོབས་ཆེ། །ཧོམ་འཕྲང་ཀླུ་བདུད་མཚོ་སྨན་འཁོར་བཅས་ཀྱིས། །

གཏོར་མ་ཟག་མེད་ཡེ་ཤེས་བདུད་རྩའི་བཅུད། །བཞེས་ནས་ཡང་ཟབ་བསྟན་པ་རྒྱས་པར་མཛོད། །རྩ་བརྒྱུད་བླ་མའི་སྤྱན་སྔར་ཞལ་བཞེས་ཤིང་། །བསྟན་པ་སྐྱོང་མཛད་དམ་ཚིག་ལྡན་རྣམས་ཀྱིས། །གཏོར་མ་འདི་བཞེས་འགལ་རྐྱེན་བར་ཆད་སོལ། །མཆོག་ཐུན་དངོས་གྲུབ་འགྲུབ་པའི་སྡོངས་གྲོགས་མཛོད། །ཅེས་པ་ཙམ་མམ། སྤྲོ་ན་རྩེ་ལེ་རིན་པོ་ཆེས་མཛད་པ་སོགས་བྱའོ། ། ༈ གསུམ་པ་རྗེས་ཀྱི་བྱ་བ་ལའང་བདུན་ལས། དང་པོ་ཚོགས་ཀྱི་མཆོད་པ་ནི། ཐབས་ཤེས་ཀྱི་རྫས་ཚོགས་པར་བྱས་ཏེ་ཆུ་ཆང་ནང་མཆོད་ཀྱིས་སྦྱངས་ལ། ཧྲཱིཿ བདག་ཉིད་ལྷ་ཡི་ཐུགས་ཀ་ནས༔ ཡི་གེ་རྃ་ཡྃ་ཁྃ་གསུམ་འཕྲོས༔ དངོས་འཛིན་རྣམ་རྟོག་བག་ཆགས་ཀུན༔ བསྲེགས་གཏོར་བཀྲུས་ནས་བདུད་རྩིར་གྱུར༔ ༀ་ཨཱཿཧཱུྃ༔ སླར་ཡང་སྙིང་པོ་འབྲུ་གསུམ་འཕྲོས༔ འདོད་ཡོན་ཟག་མེད་སྣང་སྲིད་གང་༔ རང་བཞིན་སྐུ་གསུམ་ཞིང་ཁམས་ནས༔ བླ་མ་ཡི་དམ་མཁའ་འགྲོ་དང་༔

ཆོས་སྐྱོང་དམ་ཅན་གཏེར་བདག་རྣམས༔ ཚོགས་ལ་སྤྱན་འདྲེན་གཤེགས་སུ་གསོལ༔ གུ་རུ་པདྨ་འབྱུང་གནས་ལ༔ འཁོར་དུ་དཔའ་བོ་མཁའ་འགྲོས་བསྐོར༔ དབུ་སྐྲ་ཐོར་ཚུགས་ལྡེམས་སེ་ལྡེམ༔ རིན་ཆེན་རྒྱན་ཆ་སི་ལི་ལི༔ གླུ་ལེན་གར་སྟབས་ཁྱུགས་སེ་ཁྱུག༔ ནམ་མཁའ་ས་གཞི་བར་སྣང་གང་༔ གནས་ཁང་འདི་ལ་བྱིན་ཆེན་ཕོབ༔ ཚོགས་གཏོར་འདི་ལ་བཅུད་ཅིག་ཕོབ༔ དུར་ཁྲོད་གནས་མཆོག་ཉམས་རེ་དགའ༔ རྣལ་འབྱོར་ཕོ་མོ་དམ་ཚིག་གཙང་༔ ཚོགས་དང་མཆོད་རྫས་དྭངས་རེ་སྤྲོ༔ ལྷུན་གྲུབ་འོད་ཁྱིམ་བཀྲག་མདངས་མཛེས༔ ༁ྃ༔ ཚོགས་སྤྱན་འདྲེན་དང་བྱིན་རླབས་བཞུགས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ གསང་སྔགས་བསྟན་པའི་རྒྱལ་མཚན་བཙུགས༔ ལྷོ་ནུབ་སྲིན་པོའི་ཁ་ནོན་མཛད༔ པདྨ་འབྱུང་གནས་མཆོག་ལ་འདུད༔ ཚོགས་ལ་སྤྱན་འདྲེན་མཆོད་པ་

འབུལ༔ བྱིན་རླབས་མཆོག་ཐུན་དངོས་གྲུབ་སྩོལ༔ གདེང་ཅན་མཁའ་ཡི་གྲུབ་པའི་ཕུལ༔ ཀུན་ནས་རོལ་པའི་དཔལ་འཛིན་པ༔ ཀླུ་སྒྲུབ་སྙིང་པོ་མཆོག་ལ་འདུད༔ ཚོགས༴ བྱིན་རླབས༴ མདའ་མཁན་ལུ་ཧི་སྦྲང་རྩི་ཡིས༔ ཆེར་མྱོས་མི་ཤིགས་གླུ་དབྱངས་ལེན༔ ས་ར་ཧ་པ་མཆོག་ལ་འདུད༔ ཚོགས༴ བྱིན་རླབས༴ ཀརྞའི་རི་ལ་མཆོག་ཐོབ་ཅིང༔ སྒྱུ་འཕྲུལ་ཆེན་པོས་འཇིག་རྟེན་འདུལ༔ རྡོ་རྗེ་དྲིལ་བུ་པ་ལ་འདུད༔ ཚོགས༴ བྱིན་རླབས༴ གསེར་མིག་ཅན་གྱི་ལྟོ་བ་རུ༔ མཁའ་ཁྱབ་ཏིང་འཛིན་རྣམ་སྤྲོས་པ༔ རྣལ་འབྱོར་ལཱུ་ཧི་པ་ལ་འདུད༔ ཚོགས༴ བྱིན་རླབས༴ གྲངས་མེད་ཌཱ་ཀིའི་དབང་ཕྱུག་མ༔ འཁོར་ལོས་སྒྱུར་བ་འཇིགས་མེད་རྒྱལ༔ ཨིནྡྲ་བྷུ་ཏི་མཆོག་ལ་འདུད༔ ཚོགས༴ བྱིན་རླབས༴ རྡོ་རྗེ་སྙིང་པོའི་ལམ་ཟབ་མོ༔ མ་སྨད་ཕྱག་རྒྱ་ཆེར་རོལ་པ༔ པདྨ་བཛྲ་ཞབས་ལ་འདུད༔ ཚོགས༴

བྱིན་རླབས༴ གཡུང་མོའི་བདུད་རྩི་ལེགས་བསྟེན་ཅིང༔ སྲིད་ལམ་དྲྭ་བ་ཀུན་ཏུ་སྡོམ༔ ཌོམྦྷི་ཧེ་རུ་ཀ་ལ་འདུད༔ ཚོགས༴ བྱིན་རླབས༴ རྣལ་འབྱོར་ནོར་སྐྱོང་མི་ཚུལ་གྱི༔ སྤྱོད་པའི་རྒྱལ་པོ་ཡོངས་སུ་གྲུབ༔ ཀུ་ཀུ་རི་པ་མཆོག་ལ་འདུད༔ ཚོགས་ལ་སྤྱན་འདྲེན་མཆོད་པ་འབུལ༔ བྱིན་རླབས་མཆོག་ཐུན་དངོས་གྲུབ་སྩོལ༔ ཅེས་པ་འདི་རྒྱལ་ཚབ་མཆོག་གི་སྤྲུལ་པའི་སྐུ་ནས་གྲུབ་ཆེན་བརྒྱད་ཀྱི་ཞལ་ཐང་ཞིག་དང་། རྗེ་དཔའ་བོ་རིན་པོ་ཆེས་ཉིད་ཀྱི་གུ་རུ་རིན་པོ་ཆེའི་གསེར་སྐུ་བཅས་ལ་ངོ་མཚར་མཆོད་འབུལ་སྐབས་དེར། ཞབས་དྲུང་སྐུ་མཆོག་ནས་ན་བཟའ་སྣ་ཚོགས་བཅས་རྟེན་འབྲེལ་བཟང་པོས་གྲུབ་ཆེན་དགུ་ཚོགས་འདི་བྱིན་རླབས་སྩོལ་ཕྱིར་བཀོད་པའོ། །ༀ་ཨཱཿཧཱུྃ༔ ཚོགས་མཆོད་འོད་ཕུང་འབར་བ་འདི༔ མཆོད་འོས་སྐྱེས་མཆོག་རྣམས་ལ་འབུལ༔ ཉམས་ཆག་འགལ་འཁྲུལ་ཐམས་ཅད་བཤགས༔ གཉིས་འཛིན་འཁྲུལ་སྣང་རུ་དྲ་འདི༔ ཞལ་དུ་བསྟབ་བོ་ཁ་རཾ་ཁཱ་ཧི༔ ༀ་ཨཱཿཧཱུྃ་གུ་

རུ་དྷེ་ཝ་ཌཱ་ཀི་ནི་ཀིཾ་ནི་རི་ཏི་ག་ཎ་ཙཀྲ་པཱུ་ཛ་ཁཱ་ཧི༔ སྐོང་བ་ཅུང་ཟད་རྒྱས་པར་སྤྲོ་ན། ཧྲཱིཿ མ་བཅོས་སྤྲོས་བྲལ་གནས་ལུགས་མངོན་གྱུར་པའི༔ རྒྱལ་བ་དགོངས་པ་བརྒྱུད་པའི་ཐགས་དམ་བསྐང་༔ ཏིང་འཛིན་མཆོག་བརྙེས་བརྡ་ཡི་བརྒྱུད་པ་སྟེ༔ རིག་འཛིན་རིག་པ་བརྒྱུད་པའི༴ བཀའ་ལུང་ལྷག་ཆད་མེད་པའི་དཀྱིལ་འཁོར་ནས༔ སྙན་ཁུང་བརྒྱུད་པའི་བླ་མའི་ཐུགས༴ བཀའ་བརྒྱུད་གཏེར་དུ་སྦས་པའི་བྱ་ར་མཛད༔ མཁའ་འགྲོ་གཏད་རྒྱ་བརྒྱུད་པའི་ཐུགས༴ མ་འོངས་ལས་འཕྲོ་ལྡན་པ་ལུང་དུ་བསྟན༔ སྨོན་ལམ་དབང་བསྐུར་བརྒྱུད་པའི་ཐུགས༴ ཤེས་བྱ་ཐམས་ཅད་རྣམ་པ་ཀུན་མཁྱེན་པའི༔ དུས་གསུམ་སངས་རྒྱས་རྣམས་ཀྱི༴ འགྲོ་ཀུན་ཞི་བདེའི་གནས་སུ་འདྲེན་མཛད་པའི༔ གསུང་མཆོག་དམ་ཆོས་རྣམས་ཀྱི་༴ ས་དང་ལམ་ལ་གནས་ནས་བསྟན་པ་སྐྱོང་༔ འཕགས་པའི་དགེ་དུན་རྣམས་ཀྱི༴ ལྟ་

སྒོམ་མཁྱེན་པ་མཆོག་ལ་མངའ་བརྙེས་པའི༔ སྐྱེས་མཆོག་བླ་མ་རྣམས་ཀྱི༴ དངོས་གྲུབ་ཐོགས་པ་མེད་པར་སྩོལ་མཛད་པའི༔ ཡི་དམ་ལྷ་ཚོགས་རྣམས་ཀྱི༴ ཕྱི་དང་ནང་གི་བར་ཆད་ཀུན་སེལ་བའི༔ མཁའ་འགྲོ་དམ་ཅན་རྣམས་ཀྱི༴ མ་སྐྱེས་གདོད་ནས་རང་བཞིན་རྣམ་པར་དག༔ སྐྱེ་མེད་མངོན་འགྱུར་ཆོས་སྐུའི༴ དུག་ལྔ་ཡེ་ཤེས་ལྔ་ཡི་ངོ་བོར་སྨིན༔ ཞི་ཁྲོ་ལོངས་སྤྱོད་རྫོགས་སྐུའི༴ རང་སྣང་མ་འགགས་གཞན་སྣང་དེར་སྟོན་པའི༔ སྤྲུལ་སྐུ་འགྲོ་དོན་མཛད་པའི༴ ཧྲཱིཿ ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས༔ བཞི་བཅུ་རྩ་གཉིས་རྒྱལ་བའི་༴ ཁྲག་འཐུང་རོལ་པའི་དུར་ཁྲོད་ཆེན་པོ་ནས༔ ལྔ་བཅུ་རྩ་བརྒྱད་ཁྲོ་བོའི༴ ཧཱུྃ༔ སྐུ་མཆོག་འགྱུར་བ་མེད་པའི་དཀྱིལ་འཁོར་ནས༔ འཇམ་དཔལ་སྐུ་ཡི་ལྷ་ཚོགས༴ གསུང་མཆོག་འགག་པ་མེད་པའི་དཀྱིལ་འཁོར་ནས༔ པདྨ་གསུང་གི་ལྷ་

ཚོགས༴ ཐུགས་མཆོག་གཡོ་བ་མེད་པའི་དཀྱིལ་འཁོར་ནས༔ ཡང་དག་ཐུགས་ཀྱི་ལྷ་ཚོགས༴ ཡོན་ཏན་ལྷུན་གྱིས་གྲུབ་པའི་དཀྱིལ་འཁོར་ནས༔ བདུད་རྩི་ཡོན་ཏན་ལྷ་ཚོགས༴ ཕྲིན་ལས་དྲག་པོས་བསྒྲལ་བའི་དཀྱིལ་འཁོར་ནས༔ ཕུར་པ་ཕྲིན་ལས་ལྷ་ཚོགས༴ ཤ་ཁྲག་རྒྱ་མཚོར་འཁྱིལ་བའི་དཀྱིལ་འཁོར་ནས༔ མ་མོ་རྦོད་གཏོང་ལྷ་ཚོགས༴ ཐུགས་རྗེའི་གདུང་འཚོབ་སྐུ་ཡི་དཀྱིལ་འཁོར་ནས༔ རིག་འཛིན་སློབ་དཔོན་ལྷ་ཚོགས༴ དམ་རྫས་རྫ་ལྟར་ལྷགས་པའི་དཀྱིལ་འཁོར་ནས༔ འཇིག་རྟེན་མཆོད་བསྟོད་ལྷ་ཚོགས༴ དགྲ་བགེགས་གདུག་པ་འདུལ་བའི་དཀྱིལ་འཁོར་ནས༔ དམོད་པ་དྲག་སྔགས་ལྷ་ཚོགས༴ བསྡུ་ན་འདི་མན་ཆད་ཀྱིས་འཐུས། ཧྲཱིཿ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ བླ་མེད་དཀོན་མཆོག་སྤྱི་འདུས་ཐུགས་དམ་བསྐང་༔ ལྷ་སྲིན་སྡེ་བརྒྱད་འདུལ་བའི་དཀྱིལ་འཁོར་

ནས༔ གུ་རུ་དྲག་པོའི་ལྷ་ཚོགས༴ ཨ་ཏི་བླ་མེད་བཀའ་ཡི་བྱ་ར་མ༔ མཁའ་འགྲོ་སེང་གེའི་གདོང་ཅན༴ སངས་རྒྱས་ཀུན་གྱི་བསྟན་པ་སྲུང་མཛད་པ༔ ཆོས་མགོན་མ་མགོན་ལྕམ་དྲལ༴ དཔལ་གྱི་སྤྱན་སྔར་རང་རྟགས་སྲོག་སྙིང་ཕུལ༔ དམ་ཅན་རྒྱ་མཚོ་ཡོངས་ཀྱི༴ སྒྲུབ་པ་པོ་ལ་དངོས་གྲུབ་ཆར་འབེབས་པའི༴ རྒྱལ་ཆེན་རྣམ་ཐོས་སྲས་ཀྱི༴ སྟོང་ཁམས་འདི་ན་དྲག་རྩལ་ལྡན་པ་ཡི༔ གཟའ་བདུད་རཱ་ཧུ་ལ་ཡི༴ གསང་སྔགས་རྒྱུད་སྡེ་ཀུན་གྱི་གཉེར་ཁ་གཏད༔ དམ་ཅན་རྡོ་རྗེ་ལེགས་པའི༴ ཨོ་རྒྱན་པདྨས་བཀའ་ཡི་གཉེར་དུ་བསྐོས༔ གཏེར་བདག་གཏེར་སྲུང་རྣམས་ཀྱི༴ ཚུལ་བཞིན་སྒྲུབ་པ་བྱེད་པའི་གྲོགས་མཛད་པ༔ གཞི་བདག་གཞི་སྲུང་རྣམས་ཀྱི༴ ཧཱུྃ༔ གཞན་ཡང་ཐུགས་དམ་བསྐང་བའི་དམ་རྫས་ནི༔ རྩ་བརྒྱད་སྟོང་ལ་སྦྱར་བའི་བདུད་རྩི་དང་༔ པདྨ་མཾ་སར་སྦྱར་བའི་རཀྟ་དང་༔

ཁྱད་པར་རྨད་དུ་བྱུང་བའི་གཏོར་མ་དང་༔ ཚོགས་ཀྱི་ཡོ་བྱད་ལོངས་སྤྱོད་རྒྱ་ཆེན་འདིས༔ ཁྱེད་རྣམས་ཐུགས་དམ་གཉན་པོ་བསྐང་གྱུར་ཅིག༔ ཁྱེད་རྣམས་ཐུགས་དམ་གཉན་པོ་བསྐངས་གྱུར་ནས༔ བདག་གི་གཡར་དམ་གཉན་པོ་སོར་སྩོལ་ཅིག༔ བསྐང་གྱུར་དབང་དང་དངོས་གྲུབ་སྩལ་དུ་གསོལ༔ ཧཱུྃ༔ བསྐང་དུ་མེད་དེ་སྐྱེ་མེད་ངང་དུ་བསྐང་༔ མཆོད་དུ་མེད་དེ་གཉིས་མེད་རོལ་པས་མཆོད༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་དབྱིངས་སུ་བསྒྲལ༔ ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་༔ ཚོགས་བཤགས་ནི། ཧོཿ དཀོན་མཆོག་སྤྱི་འདུས་དགོངས་སུ་གསོལ༔ པདྨ་འོད་འབར་ལ་ཕྱག་འཚལ༔ རྒྱལ་བའི་བཀའ་དང་བླ་མའི་ལུང༔ ཇི་བཞིན་མ་སྤྱད་སློབ་དཔོན་སྨད༔ རྡོ་རྗེའི་མཆེད་དང་ལྕམ་དྲལ་ལ༔ ལྟ་ལོག་གནོད་སེམས་ངན་དུ་སྨྲས༔ བརྡེག་བཙོགས་

གནོད་པ་དངོས་སུ་བགྱིས༔ ལྷ་དང་དཀྱིལ་འཁོར་ཉམས་མ་གསལ༔ ཛབ་བཟླས་མ་དག་ཟུར་ཆག་གཡེལ༔ གསང་བར་འོས་དང་གཉེར་གཏད་སྨྲས༔ གསང་བཅུ་བསྒྲགས་ཤིང་བླ་མ་བསླུས༔ རྩ་བའི་དམ་ཉམས་མཐོལ་ཞིང་བཤགས༔ གཞན་ཡང་སྤྱད་བྱའི་དམ་ཚིག་ལྔ༔ མི་སྤང་ལྔ་དང་དང་ལེན་ལྔ༔ ཤེས་བྱ་ལྔ་དང་བསྒྲུབ་བྱ་ལྔ༔ ཡན་ལག་དམ་ཉམས་མཐོལ་ཞིང་བཤགས༔ བསྙེན་སྒྲུབ་ཏིང་འཛིན་དམ་གཡེལ་ཞིང་༔ ཉ་ཤི་དུས་དྲུག་དུས་མཆོད་ཆག༔ ལེ་ལོ་གསོག་འཇོག་ཚོགས་སྤྱད་བྱས༔ ཕུད་ལྷག་ཉམས་ཤིང་ཁ་ཚར་ཤོར༔ ཚོར་དང་མ་ཚོར་རྐྱེན་དབང་གིས༔ སྒོ་གསུམ་བག་མེད་དམ་འགལ་བཤགས༔ དམ་ཚིག་ཉམས་དང་ཚོགས་འདྲེས་དང་༔ བསྐང་ཞིང་ཆོས་བཤད་འགྲོགས་ལ་སོགས༔ ཉམས་ཆག་སྐྱོན་གྱིས་གོས་པ་རྣམས༔ འགྱོད་པས་བཤགས་སོ་དག་གྱུར་ཅིག །

ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཡིན་པ་མེད་པའི་ལྟ་བ་རྟོགས༔ མིན་པ་མེད་པའི་སྒོམ་ཉམས་ལོན༔ ཡིན་མིན་མེད་པའི་སྤྱོད་པ་རྟོགས༔ རེ་དོགས་མེད་པར་བྱང་ཆུབ་ནས༔ རྩ་བ་ཡན་ལག་ཐམས་ཅད་ཀྱི༔ ཉམས་ཆག་མ་བྱུང་མ་སྐྱེས་པས༔ བཤགས་བྱ་བཤགས་བྱེད་གཉིས་མེད་གྲོལ༔ ༀ་བཛྲ་ས་ཏྭ་ས་མ་ཡ་སོགས་ནས་བཛྲི་བྷ་ཝ་མ་ཧཱ་ས་མ་ཡ་ས་ཏྭ་ཨཱཿ འདིའི་ཚིག་རྐང་དང་པོ་གཉིས་གསུང་རྒྱུན་དང་འཕྲོ་གསང་བ་ཡོངས་རྫོགས་ཀྱི་རྒྱུད་ཚིག་གོ། །བདག་ཅག་གིས་ཚེ་འཁོར་བ་ཐོག་མ་མེད་པ་ནས་བསགས་པའི་ལས་ངན་པའི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་ནས་ཀུན་བཟང་ཡངས་པ་ཆེན་པོའི་ཀློང་དུ་ཁ་བསྐང་ཞིང་བདེ་ཆེན་ཆོས་ཉིད་ཀྱི་དབྱིངས་སུ་སོར་ཆུད་པར་གྱུར་ཅིག༔ གནམ་ཕུད་འཐོར་ལ། ༀ་ཨཱཿཧཱུྃ༔ བླ་མ་རྒྱ་མཚོ་ཚོགས་ལ་རོལ༔ ཡི་དམ་རྒྱ་མཚོ་ཚོགས༴

མཁའ་འགྲོ་རྒྱ་མཚོ༴ ཆོས་སྐྱོང་སྲུང་མ༴ ནོར་ལྷ་གཏེར་བདག༴ སྣང་སྲིད་ལྷ་འདྲེ༴ ཡུལ་ལྷ་གཞི་བདག༴ རིགས་དྲུག་ཕ་མ༴ ལན་ཆགས་བགེགས་རིགས༴ ལ་ལ་ཕྱི་ཡི་ཚོགས་ལ་རོལ༔ ལ་ལ་ནང་གི་ཚོགས་ལ་རོལ༔ ལ་ལ་གསང་བའི་ཚོགས་ལ་རོལ༔ དེ་ཁོ་ན་ཉིད་ཀྱི་ཚོགས་བདེ་བ་ཆེན་པོ་ལ་རོལ༔ ག་ཎ་ཙཀྲ་པཱུ་ཛ་ཁཱ་ཧི༔ ལས་རྡོར་གྱིས། ཧོཿ ཚོགས་ཀྱི་མཆོད་པ་རྒྱན་དུ་རོལ༔ ཞེས་བསྟབ། ལེན་པ་པོས། ཨ་ལ་ལ་ཧོཿ ཞེས་བླངས་ལ་ནང་གི་བསྲེག་བླུགས་ཀྱིས་རོལ། ལྷག་མ་ནི། ༀ་ཨཱཿཧཱུྃ༔ ལྷག་ལ་དབང་བ་དྲེགས་པའི་ཚོགས༔ སྤྲིན་ལྟར་གཏིབས་ཤིང་ཧབ་ཤ་རྒྱུག༔ ཤ་ཁྲག་བརྒྱན་པའི་ཚོགས་ལྷག་བཞེས༔ སྔོན་གྱི་དམ་བཅའ་ཇི་བཞིན་དུ༔ བསྟན་དགྲ་དམ་ཉམས་ཟས་སུ་ཟོ༔ རྟགས་དང་མཚན་མ་མྱུར་དུ་སྟོན༔ སྒྲུབ་པའི་བར་ཆད་བཟློག་པ་དང་༔ ཕྲིན་ལས་ཐོགས་མེད་འགྲུབ་པར་མཛོད༔

ཨུཙྪིཥྚ་བ་ལིངྟ་ཁཱ་ཧི༔ དྲག་པོའི་ལས་དང་འབྲེལ་བའི་བསྐུལ་པ་དགོས་ན་སྐབས་འདིར་སྦྱར་བར་བྱ་སྟེ་གཞན་དུ་ཤེས་སོ། །གཉིས་པ་གཏོར་སྐྱོང་ལས་ཆད་མདོ་བྱ་བ་ནི། གཏོར་མ་ལ་དགྲ་བགེགས་འགུགས་བསྟིམ་བྱས་ཏེ་བདུད་རྩིར་དམིགས་ལ། ན་མོ༔ དཀོན་མཆོག་གསུམ་དང་ཡི་དམ་ལྷ༔ མཁའ་འགྲོ་ཆོས་སྐྱོང་བདེན་པའི་མཐུས༔ ཞིང་བཅུ་ཚང་བའི་བསྟན་དགྲ་རྣམས༔ བ་ལིང་གཏོར་རྫས་འདི་ལ་ཁུག༔ ཛཿཧཱུྃ་བཾ་ཧོཿ ༁ྃ༔ གུ་རུ་དྲག་པོའི་བསྐུལ་པ་ནི༔ ཧཱུྃ༔ དམར་ནག་གྲུ་གསུམ་འབར་བའི་དཀྱིལ་འཁོར་ནས༔ ལས་ཀྱི་དབང་དྲག་སྲིན་པོའི་གཟུགས་ཅན་ནི༔ སྐུ་ལ་མེ་འོད་མཚོན་ཆ་ཡ་ལ་ལ༔ ཁྲོ་ཚོགས་རབ་འཇིགས་གཡས་ནས་ཧཱུྃ་སྒྲ་སྒྲོགས༔ མཁའ་འགྲོ་རབ་འཇིགས་གཡོན་ནས་ཕཊ་སྒྲ་སྒྲོགས༔ ཕྱོགས་དང་ཕྱོགས་མཚམས་ལྕགས་སྡིག་ཤིག་ཤིག་ཟིང༔ ལྷ་སྲིན་སྡེ་བརྒྱད་བྲན་བཞིན་རོལ་དུ་ཁྲིད༔ གནོད་བྱེད་མ་ལུས་ཧབ་ཧབ་ཟས་སུ་ཟོ༔ ཧོར་སོག་

འཇིགས་པའི་དམག་དཔུང་མྱུར་དུ་ཟློག༔ རང་རང་གནས་སུ་བྱང་ཆུབ་བསྒྲུབ་པ་ཡི༔ ཕྲིན་ལས་དུས་ལ་བབ་བོ་ས་མ་ཡ༔ ཨོཾ་ཨཱཿཧཱུྃ་ཨརྩིག་སོགས་ནས་ཟློག་ཅིག །བར་བརྗོད། ༈ སེང་གདོང་མའི་བསྐུལ་པ་ནི༔ ཧཱུྃ༔ ང་ནི་དབང་དྲག་ཆེ་མཆོག་བདག༔ བྷྱོཿ བཞེངས་ཤིག་བཞེངས་ཤིག་དབྱིངས་ནས་བཞེངས༔ ཁྲག་མཚོ་ཁོལ་མའི་དབྱིངས་ནས་བཞེངས༔ སྲུང་མ་འཁོར་བཅས་རོལ་དུ་བཞེངས༔ བདག་ལ་བརྣག་པའི་དགྲ་བོ་འདིས༔ བླ་མ་དམ་པའི་སྐུ་ལ་བསྡོས༔ སངས་རྒྱས་བསྟན་པའི་རྨིང་རྡོ་བཤིག༔ དཀོན་མཆོག་གསུམ་གྱི་དབུ་འཕང་སྨད༔ ཆོས་མཛད་ཡོངས་ལ་བརྙས་སུ་བཙུགས༔ དགེ་བ་བཅུ་པོའི་སོ་ནམ་བཅག༔ མི་དགེ་བཅུ་པོ་དང་དུ་བླངས༔ རྣལ་འབྱོར་བདག་ལ་ཟློས་སུ་བཅུག༔ སྔགས་སྲུང་ཁྱོད་ལ་མཐུ་མེད་ཟེར༔ བསྐུལ་ལོ་མཁའ་འགྲོ་ལས་ལ་བསྐུལ༔ འདི་ལ་ཁྱེད་ཀྱི་

མཐུ་མེད་ན༔ ཁྲག་འཐུང་ཆེན་པོའི་བཀའ་ཡང་བཅག༔ ཁྱེད་ཀྱི་དམ་ཚིག་ཉམས་ཏ་རེ༔ རྣལ་འབྱོར་ཡི་ཡང་མི་ཆད་དམ༔ རྒྱུ་འབྲས་བདེན་པས་མི་བསླུ་འམ༔ དགྲ་བོ་ཚེ་ཟད་དུས་ཐེབ་ན༔ ཁྱེད་ཀྱི་མཐུ་རྩལ་ཅི་ཞིག་བྱ༔ གློ་བུར་ཧུར་ཐུམ་དུས་ལ་བབས༔ སྲོག་རྩ་ཆོད་ལ་སྙིང་ཁྲག་འཐུང༔ ལོ་དང་ཟླ་བར་བཞག་ཐབས་མེད༔ བསད་རྟགས་དོན་སྙིང་ད་ལྟ་ལོངས༔ དུས་ལ་བབ་བོ་ས་མ་ཡ༔ ཨཿཀཿསཿམཿརཿཙཿཤཿདཿརཿསཿམཿརཿཡཿཧཱུྃ་ཕཊཿ ཧཱུྃ༔ སྔོན་ཚེ་བར་དང་ཐ་མའི་བསྐལ་པ་དང་༔ སྙིགས་མ་རྩོད་ལྡན་དུས་དང་ཐ་མའི་གནས༔ ཀུན་བཟང་སྣང་བ་མཐའ་ཡས་པདྨ་འབྱུང་༔ རྒྱུད་གསུངས་གཏེར་དུ་སྦས་དང་བཏོན་པའི་ཚེ༔ སྣང་སྲིད་སོ་སོའི་ཁས་བླངས་དམ་བཅས་བཞིན༔ མཆོད་གཏོར་བཞེས་ལ་ཕྲིན་ལས་འགྲུབ་པར་མཛོད༔ འགོང་པོ་སྤུན་དགུ་རྒྱ་འདྲེའི་གནོད་པ་དང་༔ ཧོར་

སོག་འཇིགས་པའི་དམག་དཔུང་བཟློག་ཏུ་གསོལ༔ བཤལ་ཆུས་བརྟན་མ་སྐྱོང་བ་ནི། ཁྱད་པར་སློབ་དཔོན་པདྨའི་བཀའ་སྒྲུབ་པ༔ བོད་ཁམས་སྐྱོང་བའི་བརྟན་མ་ཆེན་མོ་ནི༔ བདུད་མོ་བཞི་དང་གནོད་སྦྱིན་སྨན་མོ་བཞི༔ འཁོར་དང་ལྷབ་ལྷུབ་སིལ་སྙན་སྒྲ་དང་བཅས༔ འདིར་གཤེགས་བཀའ་ཡི་གཏོར་མའི་བཤལ་ཆུ་བཞེས༔ བོད་ཁམས་དཀར་པོའི་ཆོས་ལ་འགོད་པ་དང་༔ ཡང་ཟབ་བསྟན་པ་ཕྱོགས་བཅུར་རྒྱས་པ་དང་༔ མཐོང་ཐོས་དྲན་རེག་སྨིན་ཅིང་གྲོལ་བར་མཛོད༔ དཀྱུས་ལ་ཕྱག་ལེན་དུ་མི་མཛད་ཀྱང་དྲག་ལས་སོགས་ཀྱི་མཇུག་ཏུ་རྟ་བྲོ་བྱ་བ་ནི། གཏོར་གཞོང་འོག་ཏུ་དམིགས་བྱ་བཀུག་ལ། ཧཱུྃ༔ སྟོང་གསུམ་སྟོང་གི་འཇིག་རྟེན་ན༔ ཞིང་བཅུ་བསྒྲལ་བའི་གདན་སྟེང་དུ༔ དབང་དྲག་ལྷ་ཚོགས་བྲོ་བརྡུངས་པས༔ དགྲ་ནི་ཐལ་བར་བརླག་པའི་བྲོ༔ བགེགས་ནི་ཕྱེ་མར་འཐག་པའི་བྲོ༔ གནོད་བྱེད་དམ་སྲི་འདུལ་

བའི་བྲོ༔ བར་ཆད་མེད་པར་བརྡུང་བར་བྱ༔ ༀ་སུམྦྷ་ནི་སོགས་ཧཱུྃ་བཞིའི་སྔགས་མཐར། ཧཱུྃ་ཧཱུྃ་ལཾ་ལཾ་སྟྭཾ་བྷ་ཡ་ནན༔ གསུམ་པ་མཆོད་བསྟོད་ནི། མཆོད་པ་ཁ་གསོས་ལ། ༀ་ཨཱཿཧཱུྃ༔ མཆོད་འོས་ཕྱི་ནང་སྣོད་བཅུད་ཀུན༔ བློ་ཡིས་སྤྲུལ་ལམ་ལྷུན་གྱིས་གྲུབ༔ ཏིང་འཛིན་མཉམ་ཉིད་ཆེན་པོ་རུ༔ དཀོན་མཆོག་སྤྱི་འདུས་རྒྱལ་བར་འབུལ༔ ཨོཾ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གྷནྡྷེ་ནཻ་ཝི་དྱ་ཤབྟ་པྲ་ཏིཙྪ་ཨཱཿཧཱུྃ༔ མ་ཧཱ་པཉྩ་ཨྲྀ་ཏ་རཀྟ་བ་ལིངྟ་ཁཱ་ཧི༔ ཧྲཱིཿ རྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡང་༔ ཐབས་མཁས་གང་འདུལ་སོ་སོའི་སྐུར་སྟོན་པ༔ ཐུགས་རྗེའི་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ ཅེས་ཤོ་ལོ་ཀ་གཅིག་གིས་བསྟོད། མཆོད་བསྟོད་འདི་ཚེས་བཅུའི་ཚོགས་མཆོད་སོགས་ལ་མཛད་སྲོལ་མེད་དོ། །བཞི་པ་དངོས་གྲུབ་བླང་བ་ནི། ཨེ་མ་ཧོཿ བདག་གཞན་བླ་མེད་ཚོགས་མཆོད་འདི་དག་གིས༔ སྡིག་སྒྲིབ་

ཉམས་ཆག་མ་ལུས་ཀུན་བྱང་ནས༔ ཚེ་འདི་ཉིད་ལ་རིག་འཛིན་མཆོག་འགྲུབ་ཅིང་༔ བྱིན་རླབས་རྩལ་དབང་གཟི་བྱིན་ནུས་མཐུ་ལྡན༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ཀཱ་ཡ་ཝཱ་ཀ་ཙིཏྟ་སིདྡྷི་ཧཱུྃ༔ ནོངས་བཤགས་བརྟན་བཞུགས་གཞུང་འགྲེལ་གང་དུའང་མ་གསུངས་པས་ཚེས་བཅུའི་ཚོགས་མཆོད་སོགས་ལ་ཕྱག་ལེན་མི་མཛད་ཀྱང་སྒྲུབ་མཆོད་དང་དབང་སྒྲུབ་ཀྱི་སྐབས་སུ་ཡིག་བརྒྱ་བཟླ་ཞིང་ནོངས་བཤགས་དང་། ཚོགས་མགྲོན་སོགས་བརྟན་བཞུགས་སྤྱི་ལྟར་བྱའོ། །ལྔ་པ་སྨོན་ལམ་ནི། ༀ་ཨཱཿཧཱུྃ༔ སྐྱབས་མེད་མགོན་མེད་སྐྱེ་འགྲོ་འདི་དག་ཀུན༔ འཁོར་བའི་འཁྲུལ་འཁོར་ཀུན་གྱི་གཞི་རྟེན་ལ༔ རྟེན་འབྲེལ་བཅུ་གཉིས་ཤིང་རྟ་ལྟ་བུ་ཡི༔ འཕང་ལོ་འདྲ་བ་མྱུར་དུ་ཞིག་གྱུར་ཅིག༔ བླ་མེད་རྫོགས་པའི་བྱང་ཆུབ་མྱུར་ཐོབ་ཤོག༔ དྲུག་པ་བཀྲ་ཤིས་ནི། ཨེ་མ་ཧོཿ ཤེས་བྱའི་དོན་ལ་མ་རྨོངས་པའི༔ བླ་མ་དམ་པའི་བཀྲ་ཤིས་ཤོག༔ གང་ལ་བསམ་པ་དེ་ཡིས་

འགྲུབ༔ ཡི་དམ་ལྷ་ཡི་བཀྲ་ཤིས་ཤོག༔ སྐུ་གསུང་ཐུགས་ཀྱི་བྷ་ག་ལ༔ ཕྱག་རྒྱ་ཆེན་པོའི་བཀྲ་ཤིས་ཤོག༔ བདུན་པ་བསྐྱེད་རིམ་བསྡུ་ལྡང་ནི། ༀ་ཨཱཿཧཱུྃ༔ སྣོད་བཅུད་སྣང་སྲིད་ཐམས་ཅད་ཀུན༔ སྒྱུ་ལུས་གཞལ་ཡས་ཁང་དུ་བསྡུ༔ དེ་ཡང་ཡས་མར་འོད་དུ་ཞུ༔ སྔགས་ཕྲེང་གསེར་གྱི་རྡོ་རྗེར་བསྡུ༔ དེ་ཡང་འཇའ་འམ་ཆུ་བུར་ལྟར༔ དམིགས་མེད་རྒྱ་ཡན་ལྷུག་པར་བཞག༔ རང་གཞན་དབྱིངས་རིག་མ་བུ་འདྲེས༔ གདོད་མའི་ཀུན་བཟང་མཇལ་བར་འགྱུར༔ ༀ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ གཟུགས་སྣང་ཐམས་ཅད་གསལ་སྟོང་ལྷ་ཡི་སྐུ༔ སྒྲ་གྲགས་ཐམས་ཅད་བརྗོད་བྲལ་སྔགས་ཀྱི་སྒྲ༔ དྲན་རྟོག་ཐམས་ཅད་རང་གྲོལ་ངོས་བཟུང་བྲལ༔ དམིགས་མེད་ཁྱབ་བརྡལ་ལྷུན་གྲུབ་ཆེན་པོར་ཤོག༔ ཅེས་བརྗོད་ལ་ཁྱེར་སོ་གསུམ་གྱི་གྲུབ་མཐའ་བསྐྱང་བར་བྱའོ། །རྩ་བའི་གཞུང་དང་དཀའ་འགྲེལ་ཡང་འགྲེལ་བཅས། །རིག་འཛིན་བརྒྱུད་པ་དུ་མའི་བཞེད་སྲོལ་གྱི། །

སྙིང་པོ་བསྡུས་ཏེ་དད་པས་སྦྱར་ན་ཡང་། །རྨོངས་བློའི་ཉེས་ཀུན་རྩ་གསུམ་ལྷ་ལ་བཤགས། །དབང་ལུང་ཐོབ་པས་རྒྱས་བསྡུས་གང་བྱས་ཀྱང་། །འགལ་བ་མེད་པར་རྗེས་སུ་གནང་བའི་མཐུས། །འདིས་ཀྱང་ལུས་ཅན་བྱེ་བ་དུང་ཕྱུར་སྙེད། །པདྨ་འོད་འབར་གོ་འཕང་སྒྲུབ་ནུས་ཤོག །ཆོས་འདིར་འབྲེལ་ཀུན་དག་པའི་ཞིང་གཅིག་ཏུ། །ཐུགས་ཡིད་གཅིག་འདྲེས་འོད་གསལ་ཁྱབ་བརྡལ་ཆེ། །ལྷུན་གྲུབ་ཐིག་ལེར་མངོན་པར་འཚང་རྒྱ་བར། །རྡོ་རྗེའི་གསུང་བཞིན་བསླུ་མེད་འགྲུབ་གྱུར་ཅིག །ཅེས་པ་འདིའང་ཁྱབ་བདག་ཀུན་མཁྱེན་བླ་མ་མཚོ་སྐྱེས་དགྱེས་པའི་ཞབས་ཀྱིས་གསེར་གྱི་མེ་ཏོག་བཅས་བཀའ་ཡི་ཅོད་པན་སྤྱི་བོར་ཕེབས་པ་དད་པས་གཙུག་ཏུ་བཀོད་དེ། པདྨའི་ཞལ་ཚབ་སི་ཏུ་པདྨ་དབང་ཆེན་གྱིས་རྗེས་སུ་བཟུང་ཞིང་ཆོས་འདིའི་རིགས་སྔགས་འཆང་བ་པདྨ་གར་དབང་ཕྲིན་ལས་འགྲོ་འདུལ་རྩལ་གྱིས་དེ་ཝཱི་ཀོ་ཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་སྨིན་ཟླའི་དཀར་ཕྱོགས་ཀྱི་ཚེས་བཅུའི་མཆོད་པ་དང་རྗེས་སུ་འབྲེལ་བར་གྲུབ་པར་བགྱིས་པ་ཟབ་ཆོས་འདི་ཉིད་ནམ་ཡང་མི་ནུབ་དར་ཞིང་རྒྱས་པའི་རྒྱུར་གྱུར་ཅིག །དགེ་ལེགས་འཕེལ།། །།

ཚོགས་གླུ་དཔའ་བོ་དགྱེས་པའི་གད་རྒྱངས། མཁའ་ཀློང་ཡངས་པ།

ཚོགས་གླུ་དཔའ་བོ་དགྱེས་པའི་གད་རྒྱངས་བཞུགས་སོ། །ཨ་ཧོ། རྒྱ་ཆད་ཕྱོགས་ལྷུང་བྲལ་བ་ཟང་ཐལ་གྱི་ཀློང་ནས། །ཀུན་བཟང་སྣང་བ་མཐའ་ཡས་ཚོགས་འཁོར་ལ་ཕེབས་ཤོག །ཀ་དག་ཀ་ནས་དག་པའི་ཚོགས་འཁོར་ཞིག་བསྐོར་ན། །ཆོས་ཉིད་ཟད་སར་ཕྱིན་པའི་དངོས་གྲུབ་ཅིག་སྩོལ་མཛོད། །གསལ་དག་འཇའ་ཟེར་ཐིག་ལེ་འོད་ལྔ་ཡི་ཀློང་ནས། །རྡོར་སེམས་སྡུག་བསྔལ་རང་གྲོལ་ཚོགས་འཁོར་ལ་ཕེབས་ཤོག །ལྷུན་གྲུབ་ལྷུན་གྱིས་གྲུབ་པའི་ཚོགས་འཁོར་ཞིག་བསྐོར་ན། །རིག་པ་ཚད་ལ་ཕེབས་

པའི་དངོས་གྲུབ་ཅིག་སྩོལ་མཛོད། །རྔ་ཡབ་པདྨ་འོད་སོགས་སྐུ་གསུམ་གྱི་ཞིང་ནས། །པད་འབྱུང་དྲི་མེད་འོད་ཟེར་ཚོགས་འཁོར་ལ་ཕེབས་ཤོག །ལྷ་སྔགས་ཡེ་ཤེས་རོལ་པའི་ཚོགས་འཁོར་ཞིག་བསྐོར་ན། །རང་སྣང་འཁོར་བ་དོང་སྤྲུགས་དངོས་གྲུབ་ཅིག་སྩོལ་མཛོད། །སྣང་སྲིད་ཆོས་སྐུར་བརྡལ་བ་དག་མཉམ་གྱི་ཀློང་ནས། །དྲིན་ཅན་རྩ་བའི་བླ་མ་ཚོགས་འཁོར་ལ་ཕེབས་ཤོག །སྣང་སྲིད་བླ་མར་ཤར་བའི་ཚོགས་འཁོར་ཞིག་བསྐོར་ན། །འབྲེལ་ཚད་དོན་དང་ལྡན་པའི་དངོས་གྲུབ་ཅིག་སྩོལ་མཛོད། །རྣམ་དག་དད་དམ་གཙང་མའི་སྐལ་བཟང་གི་དབུས་ན། །མཆེད་ལྕམ་རྡོ་རྗེའི་སྤུན་གྲོགས་ཚོགས་འཁོར་ལ་ཕེབས་ཤོག །རྐྱེན་ངན་གྲོགས་སུ་ཤར་བའི་ཚོགས་འཁོར་ཞིག་བསྐོར་ན། །ཚོམ་བུ་གཅིག་ཏུ་་འགོད་པའི་མཐུན་སྦྱོར་ཞིག་གནོངས་མཛོད། །འོག་གཞི་འབྱུང་བའི་དཀྱིལ་འཁོར་ཤ་ཆེན་གྱི་

དམ་རྫས། །རི་རབ་གླིང་བཞིའི་བཀོད་པ་རྣམ་ལྔ་ཡི་བདུད་རྩི། །ཕྱི་སྣོད་གནས་ཡུལ་དག་པའི་ཚོགས་འཁོར་ཞིག་བསྐོར་ན། །ངེད་ཅག་རྣལ་འབྱོར་ཕོ་མོ་བྲོ་གར་ཞིག་ཨེ་འཁྲབ། །འབྱུང་ལྔ་གནས་སུ་དག་པ་ཡུམ་ལྔ་ཡི་མཁའ་ལ། །ཕུང་ལྔ་གནས་སུ་དག་པ་རིགས་ལྔ་ཡི་ཚོམ་བུ། །ནང་བཅུད་ལྷ་ལུས་དག་པའི་ཚོགས་འཁོར་ཞིག་བསྐོར་ན། །ངེད་ཅག་རྣལ་འབྱོར་ཕོ་མོ་ཉམས་དབྱངས་ཤིག་ཨེ་ལེན། །རིག་པ་ཀ་ནས་དག་པའི་བདེ་ཆེན་གྱི་ཀློང་ནས། །རིག་རྩལ་རང་སར་གྲོལ་བ་ཡེ་ཤེས་ཀྱི་ཟེར་ཕྲེང་། །གསང་བ་སེམས་ཉིད་རང་གྲོལ་ཚོགས་འཁོར་ཞིག་བསྐོར་ནས། །ངེད་ཅག་རྣལ་འབྱོར་ཕོ་མོ་ཉམས་རྩལ་ཞིག་ཨེ་སྦར། །ཀྱེ་ཧོ། རྟོགས་པའི་འདབ་གཤོག་ལྡན་པ་སྐལ་བཟང་གི་བྱ་ཚོགས། །ཀ་དག་ལྷུན་གྲུབ་རྣམ་གཉིས་གཤོག་པ་ཡི་བང་རྩལ། །མོས་གུས་རྣམ་པར་དག་

པའི་རླུང་ཤུགས་ཀྱིས་བཏེག་ནས། །འཇིགས་མེད་ཀུན་བཟང་མཁའ་ལ་མཉམ་པོ་རུ་འཕུར་འགྲོ། །ཨ་ཧོ། ཟག་བཅས་འབྱུང་བའི་ལང་ཚོ་མར་མར་དུ་འགྲིབ་ཀྱང་། །ཟག་མེད་ཡེ་ཤེས་ལང་ཚོ་ཡར་ཡར་དུ་འཕེལ་སོང་། །སྣང་བ་བརྡ་ཡི་བླ་མ་རིང་རིང་ལྟར་སྣང་ཡང་། །ངེས་པ་དོན་གྱི་བླ་མ་ཉེ་ཆར་དུ་འདུག་གོ། །དྲང་དོན་ཤེས་བྱའི་རབ་དབྱེ་ཕར་ཕར་དུ་བརྗེད་ཀྱང་། །ངེས་དོན་བླ་མའི་གདམས་ངག་ཚུར་ཚུར་དུ་དྲན་སོང་། །སྐྱེས་ཕྲན་གཞོན་ནུ་མགུ་བའི་མཛེས་སྡུག་ཅིག་མེད་ཀྱང་། །སྐྱེས་བུ་དམ་པ་དགྱེས་པའི་མཁས་ཚུལ་ཞིག་ཡོད་དོ། །དགེ་བཤེས་གསར་བུ་མགུ་བའི་རྩོད་ངག་ཅིག་མེད་ཀྱང་། །གནས་བརྟན་རྒན་པོ་མགུ་བའི་གོ་རྟོགས་ཤིག་ཡོད་དོ། དགེ་འདུན་ཚོགས་གྲལ་འགྲིམ་པའི་བཙུན་ཚུལ་ཞིག་མེད་ཀྱང་། །ངེས་མེད་རྒྱལ་ཁམས་འགྲིམ་པའི་བརྟུལ་ཞུགས་ཤིག་ཡོད་དོ། །གཞན་སྣང་

ཀུན་རྟོག་ལས་སྣང་བུ་ཡུག་ལྟར་འཚུབས་ཀྱང་། །རང་སྣང་ཡེ་ཤེས་འོད་ཟེར་ཉི་མ་ལྟར་ཤར་སོང་། །གནས་སྐབས་བདེ་བའི་དཔལ་གྱི་འབྱོར་ཚོགས་ནི་ཆུང་ཡང་། །མཐར་ཐུག་སངས་རྒྱས་ས་ལ་ད་ལྟ་རང་ཆས་འགྲོ། །བསྐལ་ངན་དུས་ཀྱིས་སྒྲིབ་པའི་སྨག་རུམ་ལྟར་འཐིབས་ཀྱང་། །ཀུན་བཟང་ཐུགས་ཀྱི་བསྟན་པ་མེ་ཆེན་ལྟར་འབར་འགྲོ། །ཨ་ཧོ། འདོད་ཡོན་དུག་ལྔ་མ་སྤངས་ཐབས་ཤེས་ཀྱི་དམ་རྫས། །ལྷ་སྣང་ལྷ་ལ་ཐིམ་པ་དག་སྣང་གི་ཚོགས་འཁོར། །ཡེ་ཤེས་ལ་ནི་ཡེ་ཤེས་རོལ་པ་ཡི་ཚུལ་དུ། །གཉིས་མེད་མཉམ་པ་ཆེན་པོའི་ཀློང་ཡངས་སུ་རོལ་ནས། །ཕ་གཅིག་ཨོ་རྒྱན་ཆེན་པོའི་ཚོགས་འཁོར་གྱི་གྲལ་དུ། །ཕྱམ་གཅིག་མངོན་སངས་རྒྱས་ཏེ་གཞན་དོན་གྱི་གཟུགས་སྐུས། །གང་འདུལ་དེ་ལྟར་སྣང་བའི་སྒྲོན་མ་ཞིག་བཀོད་དེ། །འཁོར་བ་དོང་ནས་སྤྲུགས་པའི་འདུན་སྨོན་ལ་

འབད་ཤོག །ཅེས་པ་འདིའང་ཟོབ་རྒན་མི་འགྱུར་རམ་མིང་གཞན་མཁའ་ཀློང་ཡངས་པས་སྨོན་པ་དེ་བཞིན་དུ་འགྲུབ་པར་གྱུར་ཅིག །༈ སྣང་བ་ནི་གཏད་མེད་རིག་པ་ནི་གུ་ཡངས། །འགགས་མེད་ཀྱི་གླུ་ཆུང་བྱུང་རྒྱལ་གྱི་སྤྱོད་པ། །ལྟ་བ་ལ་ལྟ་རྒྱུ་མ་མཆིས་པའི་ཡེ་བབས། །སྒོམ་པ་ལ་བསྒོམ་རྒྱུ་མ་མཆིས་པའི་རང་བབས། །སྤྱོད་པ་ལ་སྤྱོད་རྒྱུ་མ་མཆིས་པའི་གཏད་མེད། །ཤུགས་འབྱུང་གི་སྤྱོད་པ་འགགས་མེད་ཀྱི་གླུ་ཆུང་། །ཆིག་དྲིལ་དུ་གདམས་པ་རྗེ་བཙུན་གྱི་མན་ངག །ཀུན་རྫོབ་ཏུ་ལས་འབྲས་བསླུ་མེད་དུ་འདུག་ཀྱང་། །ཆོས་ཉིད་ཀྱི་གཤིས་ལ་བྱ་ལམ་ནི་རྗེས་མེད། །འཕོ་འགྱུར་ནི་མི་འདུག་ཀུན་བཟང་གི་དགོངས་པ། །གང་ཤར་གྱི་འགྱུ་བ་ཐད་ཀ་རུ་སངས་སོང་། །ཟང་ཐལ་གྱི་ཉོན་མོངས་འཆིང་ཐག་ནི་ཆད་སོང་། །འདིར་སྣང་ནི་བདེན་བདེན་གྲུབ་གྲུབ་ཏུ་འདུག་ཀྱང་། །སྒྱུ་མ་ཡི་ཐིས་ར་གར་སོང་ནི་མི་འདུག །ཆོས་ཉིད་ཀྱི་

གཤིས་ལ་བདེ་སྡུག་དང་བྲལ་ཀྱང་། །བསླུ་བ་ནི་མེད་པས་ལས་འབྲས་ལ་སོམས་མཛོད། །རང་སེམས་འདི་སྐྱབས་གནས་གཅིག་ཆོག་ཏུ་འདུག་ཀྱང་། །བླ་མ་ཡི་གསོལ་འདེབས་མོས་གུས་ལ་རེམས་མཛོད། །མཁའ་ཀློང་ཡངས་པས་སོ།། །།

ཕྱག་རྡོར་གཏུམ་ཆུང་སྒྲུབ་ཐབས་བདག་མདུན་གྱི་འདོན་འགྲིག་བལྟས་ཆོག་ཏུ་བཀོད་པ། མཁས་གྲུབ་ཀརྨ་ཆགས་མེད།

ཕྱག་རྡོར་གཏུམ་ཆུང་སྒྲུབ་ཐབས་བདག་མདུན་གྱི་འདོན་འགྲིག་བལྟས་ཆོག་ཏུ་བཀོད་པ་བཞུགས་སོ། ། ༈ སྐྱབས་འགྲོ་སེམས་བསྐྱེད་དང་ཚད་མེད་བཞི་བྱ། ༀ་སྭ་བྷཱ་ཝ་སོགས། ཆོས་རྣམས་དམིགས་མེད་སྟོང་ཉིད་གྱུར། །ཧཱུྃ་ལས་གནམ་ལྕགས་འཁོར་ལོ་ནི། །རྩིབས་བཅུ་རྣོ་དབལ་དང་ལྡན་པ། །ཡངས་ཤིང་རྒྱ་ཆེ་དེ་ཡི་ནང་། །རྡོ་རྗེས་གཏམས་པའི་གུར་དུ་གྱུར། །དེ་དབུས་པདྨ་འདབ་བརྒྱད་ཀྱི། །ལྟེ་བར་ཉི་མའི་སྟེང་དུ་ཧཱུྃ། །མཐིང་ནག་འོད་ཀྱིས་དོན་གཉིས་བྱས། །ཚུར་འདུས་ཡོངས་སུ་གྱུར་པ་ལས། །བདག་ཉིད་རྡོ་རྗེ་གཏུམ་པོ་ནི། །མཐིང་ནག་ཞལ་

གཅིག་ཕྱག་གཉིས་པ། །གཡས་པས་རྡོ་རྗེ་རྩེ་ལྔ་ཕྱར། །གཡོན་པས་ཐུགས་ཀར་སྡིགས་མཛུབ་བསྒྲེང་། །ཞལ་གདངས་མཆེ་བ་རྣམ་པར་གཙིགས། །དམར་ལ་ཟླུམ་པའི་སྤྱན་གསུམ་གཡོ། །དབུ་སྐྲ་དམར་སེར་གྱེན་དུ་བརྫེས། །དེ་བཞིན་སྨིན་མ་སྨ་ར་འབར། །ཐོད་པ་སྐམ་པོས་དབུ་བརྒྱན་ཅན། །ཀླུ་བརྒྱད་སྦྲུལ་གྱིས་སྐྲ་ཆིངས་དང་། །སྙན་ཆ་དཔུང་རྒྱན་མགུལ་རྒྱན་དང་། །སྐ་རགས་ཕྱག་གདུབ་ཞབས་གདུབ་མཛད། །སྐུ་སྨད་སྟག་གི་ཤམ་ཐབས་ཅན། །ཞབས་གཡས་བསྐུམ་ཞིང་གཡོན་བརྐྱངས་པས། །གནོད་བྱེད་མཐའ་དག་རབ་མནན་ཞིང་། །ཡེ་ཤེས་མེ་དཔུང་ཀློང་ན་བཞུགས། །འདབ་བརྒྱད་ཉི་སྟེང་ཧཱུྃ་ཡིག་ལས། །རྡོ་རྗེ་གཏུམ་པོ་རང་འདྲ་བརྒྱད། །ནང་གི་ཕྱོགས་སུ་ཞལ་གཟིགས་པ། །མེ་དཔུང་དབུས་ན་བཞུགས་པར་གྱུར། །གཙོ་འཁོར་ཀུན་གྱི་ཐུགས་ཀར་ནི། །ཉི་མ་ལ་གནས་ཧཱུྃ་མཐིང་ནག །དེ་ཡི་

འོད་ཀྱིས་འོག་མིན་ནས། །བསྒོམས་པ་དང་འདྲའི་ཡེ་ཤེས་པ། །སྤྱན་དྲངས་མདུན་གྱི་ནམ་མཁར་བཞུགས། །ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ། དེ་བཞིན། དྷཱུ་པེ་ནས་ཤབྡའི་བར་བརྗོད། སྲིད་གསུམ་འཇིགས་བྱེད་དྲག་པོ་རྡོ་རྗེའི་སྐུ། །བདག་དང་གཞན་གྱི་དཔལ་གྱུར་སྙིང་རྗེ་ཅན། །བདུད་ལས་རྣམ་རྒྱལ་ཡེ་ཤེས་ལྔ་དང་ལྡན། །ཕྱག་ན་རྡོ་རྗེ་ཁྱོད་ལ་ཕྱག་འཚལ་བསྟོད། །ཛཿཧཱུྃ་བཾ་ཧོཿ ཡེ་ཤེས་པ་དང་དམ་ཚིག་དབྱེར་མེད་གྱུར། །སླར་ཡང་སྤྱི་བོར་ༀ་དཀར་མགྲིན་པར་ནི། །ཨཱཿདམར་ཐུགས་ཀའི་ཆ་སྨད་ཧཱུྃ་སྔོན་པོ། །གནས་གསུམ་རྡོ་རྗེ་གསུམ་དུ་བྱིན་གྱིས་བརླབས། །ཐུགས་ཀར་ཉི་སྟེང་ཧཱུྃ་ལ་གཡས་བསྐོར་དུ། །ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། སྔགས་ངོ་ཕྱི་ལ་སྟོན་པ་ཐམས་ཅད་ཀྱང་། །ཁ་དོག་མཐིང་གའི་འོད་ཟེར་འཕྲོ་བར་གྱུར། །བདག་གི་གཙོ་བོའི་ཞལ་ནས་སྔགས་བཟླས་པས། །གཏུམ་པོ་བརྒྱད་ཀྱང་སྔགས་

སྒྲ་རབ་ཏུ་སྒྲོགས། །སྙིང་པོ་ཅི་ནུས་སུ་བཟླས་མཐར། བདག་ཉིད་ཐུགས་ཀའི་ཧཱུྃ་མཐིང་དེ་ཉིད་ཀྱང་། །མི་དམིགས་སྟོང་པའི་ངང་དུ་མཉམ་པར་བཞག །དགེ་བ་འདི་ཡིས་མྱུར་དུ་བདག །རྡོ་རྗེ་གཏུམ་པོ་འགྲུབ་གྱུར་ནས། །སོགས། སརྦ་མངྒ་ལཾ།། ༼ཨ་རཱ་གས་སོ།།༽ མཆན།

རྟ་མཆོག་རོལ་པའི་དུམ་བུ་ལས་ནག་པོ་ཀླུ་འདུལ་ཉམས་ལེན་གཅིག་དྲིལ། མཁས་གྲུབ་ཀརྨ་ཆགས་མེད།

རྟ་མཆོག་རོལ་པའི་དུམ་བུ་ལས་ནག་པོ་ཀླུ་འདུལ་ཉམས་ལེན་གཅིག་དྲིལ་རཱ་ག་ཨ་སྱའི་ཁྱད་ཆོས་ཞེས་བྱ་བ་ཡོད་དོ། །ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ་ཕཊ༔ སྐད་ཅིག་དྲན་རྫོགས་ཏིང་འཛིན་གྱིས༔ གྲུ་གསུམ་མཐིང་ནག་དཀྱིལ་འཁོར་དུ༔ བདག་ཉིད་ཁྲོ་བོ་རྟ་མགྲིན་སྐུ༔ མཐིང་ནག་ཞལ་གཅིག་ཕྱག་གཉིས་པ༔ སྤྱན་གསུམ་མཆེ་བ་རབ་ཏུ་གཙིགས༔ ཕྱག་གཡས་སྒྲོལ་བྱེད་རལ་གྲི་ཡིས༔ དགྲ་བགེགས་མགོ་ལུས་དུམ་བུར་གཏུབ༔ གཡོན་པས་འཛིན་བྱེད་ལྕགས་ཀྱུ་ཡིས༔ དགྲ་བགེགས་མ་ལུས་སྙིང་ནས་འདྲེན༔ ཞབས་གཉིས་དགྲ་བགེགས་

ནོན་པར་མནན༔ སྐུ་ལ་དར་ནག་བེར་ཆེན་གསོལ༔ དབུ་གཙུག་རྟ་མགོ་ལྗང་ཞུར་གདེང་༔ རྟ་སྐད་དྲག་པོ་ནམ་མཁར་འཚེར༔ ཁམས་གསུམ་མ་ལུས་དབང་དུ་སྡུད༔ སྲིད་གསུམ་མ་ལུས་ཟིལ་གྱིས་གནོན༔ སྐུ་སྟོད་ཞིང་ཆེན་གཡང་གཞི་དང་༔ སྐུ་སྨད་སྟག་གི་ཤམ་ཐབས་གསོལ༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོད་རློན་ལྔ་བཅུས་དོ་ཤལ་བྱས༔ བ་སྤུ་མེ་ཡི་ཚྭ་ཚྭ་འཕྲོ༔ བསྐལ་པའི་མེ་དཔུང་ཀློང་ན་བཞུགས༔ དབུ་སྐྲ་གནམ་ལྕགས་རལ་པ་ཅན༔ རལ་པ་བསིགས་པའི་སྐྲ་གསེབ་ནས༔ ཁྲོ་ཆུང་དཔག་མེད་ཕྱིར་འཕྲོས་པས༔ དགྲ་བགེགས་ཐམས་ཅད་ཚར་བཅད་ནས༔ ཚུར་འདུས་ཁྲོ་བོའི་གུར་ཁང་གྱུར༔ བདག་ཉིད་དམ་ཚིག་སེམས་དཔའ་ཡི༔ ཐུགས་ཀར་ཡེ་ཤེས་སེམས་དཔའ་ནི༔ ཉི་ཟླའི་གདན་ལ་ཧཱུྃ་མཐིང་ནག༔ གཟི་བརྗིད་ལྡན་པའི་མཐའ་བསྐོར་དུ༔ རྩ་སྔགས་གཡས་སུ་འཁོར་བ་ལས༔ འོད་ཟེར་སྤྲོ་

བསྡུས་ཏིང་འཛིན་གྱིས༔ སྣོད་བཅུད་དངོས་པོ་ཐམས་ཅད་ཀུན༔ མེ་རི་ཁྲོ་བོའི་རང་བཞིན་ལས༔ གནོད་བྱེད་མིང་ཡང་མེད་པར་གྱུར༔ ཨོཾ་བཛྲ་ཀྲོ་དྷ་ཧྱ་གྷྲྀ་ཝ་ཧཱུྃ་ཕཊ༔ དོན་ལྡན་འདུག་ན་ཀྲོ་ཏ་སྦྱར་བ་ཡིན༔ སེམས་ཉིད་སྐྱེ་མེད་སྟོང་གསལ་འདི༔ ཡེ་ནས་རང་བཞིན་ལྷ་ཡི་སྐུ༔ དམ་ཚིག་ཡེ་ཤེས་གཉིས་མེད་ལ༔ སྤྱན་འདྲེན་རྒྱས་གདབ་མི་འཚལ་བ༔ དྲན་པ་ཙམ་གྱིས་རྫོགས་པ་ཆེ༔ ལྟ་བ་གྱད་ཀྱི་ལྷ་ཞེས་བྱ༔ རྡོ་རྗེ་ལྟ་བུའི་ཏིང་འཛིན་ནི༔ སྲུང་བ་ཀུན་གྱི་མཆོག་ཡིན་ནོ༔ ཞེས་གསུངས༔ ཞེས་པ་འདི་རང་གིས་ཉབ་ཉོབ་མང་བ་མི་ལྕོགས་ཀྱང་། སྔགས་འཆང་གསར་བུ་འགའ་ལ་ཕན་པའི་གདེང་ཐོབ་ཕྱིར་རཱ་ག་ཨ་སྱས་སྦྱར་བའོ།། །།

གུ་རུ་དྲག་པོ་མཐིང་གའི་གསང་བའི་སྒྲུབ་ཐབས་ཟབ་མོ། རིག་འཛིན་ཆོས་རྒྱལ་རྡོ་རྗེ།

༁ྃ༔ གུ་རུ་དྲག་པོ་མཐིང་གའི་གསང་བའི་སྒྲུབ་ཐབས་ཟབ་མོ་བཞུགས་སོ༔

༁ྃ༔ ན་མོ་གུ་རུ་བཛྲ་ཀ་རཱ་ཡ༔ དུས་ངན་སྙིགས་མའི་སེམས་ཅན་ནད་ཀྱི་འཇིགས་པ་ལས་སྐྱོབ་པའི་མན་ངག་གུ་རུ་དྲག་པོ་མཐིང་གའི་སྒྲུབ་ཐབས་ཟབ་མོ་དགོངས་པའི་གཏེར་ལས་ཕྱུངས་ཏེ་འགྲོ་བའི་དོན་དུས་ལ་བབས་ཚེ་བཀོད་པར་བྱས་སོ༔ ས་མ་ཡ་རྒྱ་རྒྱ་རྒྱ༔ ༈ ན་མོ་གུ་རུ་པདྨ་བཛྲ་ཡེ༔ ཆོས་སྐུ་སྣང་བ་མཐའ་ཡས་ཉིད༔ མ་རུངས་གདུག་པ་འདུལ་བའི་ཕྱིར༔ པདྨ་འབྱུང་གནས་ཐོད་ཕྲེང་རྩལ༔ དུས་ངན་གདུག་འདྲེ་འདུལ་ཕྱིར་དུ༔ ཀརྨ་དྲག་པོ་ཁྲོས་པའི་སྐུ༔ མ་རུངས་ཚར་གཅོད་དམ་སྲིའི་གཤེད༔ སྙིགས་མའི་འགྲོ་ལ་དཔལ་དུ་ཤར༔ སྒྲུབ་ཐབས་མཁའ་འགྲོའི་སྙིང་ཁྲག་འདི༔ མུ་ཁྲི་བཙན་པོ་ཁྱོད་ལ་གཏད༔ མ་འོངས་ཉི་ཤུ་ཁ་རལ་དུས༔ འདྲེ་སྲིན་མངོན་རྒྱུག་འགྲོ་ལ་འཚེ༔ མི་ནོར་ནད་གདོན་དགྲ་ཡིས་འཇིགས༔ དེ་དུས་ཁྱོད་ཀྱི་སྤྲུལ་པ་ཡིས༔ འདི་སྤེལ་འགྲོ་བའི་བར་ཆད་སེལ༔ སྐལ་ལྡན་ལས་ཅན་རྣལ་འབྱོར་རྣམས༔ སྤྲོས་མེད་རྒྱུན་གྱི་རྣལ་འབྱོར་

བསྒོམ༔ ཆོས་བྱེད་སྲོག་གི་གོ་ཆར་ཤོག༔ ས་མ་ཡ༔ རྒྱ་རྒྱ་རྒྱ༔ དཀོན་མཆོག་གསུམ་དངོས་པདྨ་འབྱུང་༔ སྙིང་ནས་འགྲོ་ཀུན་སྐྱབས་སུ་མཆི༔ མར་གྱུར་དུས་གསུམ་སེམས་ཅན་རྣམས༔ སངས་རྒྱས་ཐོབ་པར་སེམས་བསྐྱེད་དོ༔ ལན་གསུམ༔ ༀ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ༔ རང་སེམས་ཀ་དག་རྫོགས་པ་ཆེན་པོའི་ཀློང་ལས༔ རང་རྩལ་འགགས་མེད་ཀྱི་རང་མདངས༔ ནམ་མཁའ་ལས་སྤྲིན་ལྡང་བ་ལྟ་བུ༔ གུ་རུ་དྲག་པོ་སྐུ་མདོག་མཐིང་ག་ཞལ་གཅིག་ཕྱག་གཉིས་ཁྲོ་ཞིང་གཏུམ་པ༔ ཕྱག་གཡས་

གནམ་ལྕགས་ཀྱི་རྡོ་རྗེ་རྩེ་དགུ་པ་མེ་དཔུང་མཚོན་ཆའི་ཐོག་སེར་འབེབས་པ༔ གནོད་བྱེད་དམ་སྲི་རྒྱལ་འགོང་རྡུལ་དུ་བརླག་པ༔ གཡོན་གནམ་ལྕགས་ཀྱི་སྡིག་པ་མགོ་དགུ་རྭ་བཅོ་བརྒྱད་དང་ལྡན་པས་དགྲ་བགེགས་དམ་སྲི་ཧབ་ཧབ་ཏུ་གསོལ་ཞིང་རྗེས་མེད་དུ་བརླག་པ༔ ཞེ་སྡང་མེ་ལྟར་འབར་བ་འཛིན་པ༔ དབུ་སྐྲ་རལ་པ་དམར་པོས་བར་སྣང་ཁེངས་པའི་གསེབ་ནས་ཁྲོ་ཚོགས་མཚོན་ཆ་ཆར་ལྟར་འབེབས་པ་ཐོད་སྐམ་ལྔས་དབུ་ལ་བརྒྱན་པའོ༔ སྐུ་ལ་དུར་ཁྲོད་ཀྱི་ཆས་བརྒྱད་དང་ལྡན་པ༔ ཞབས་གཉིས་རྒྱལ་བསེན་ཕོ་མོ་མནན་པ༔ བསྐལ་པའི་མེ་དཔུང་འབར་བའི་ཀློང་ན་བཞུགས་པ༔ ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པ༔ བདུད་དང་ལོག་འདྲེན་ཚར་གཅོད་པ༔ གཡས་སུ་ཡཀྴ་མེ་དབལ་དམར་སྨུག་གཡས་ཐོ་བ་དང་གཡོན་ལྕགས་ཀྱུ་འཛིན་པ༔ ཆ་

ལུགས་གཙོ་བོ་ལྟ་བུ་གཡོན་དུ་ཁྲོས་མ་ནག་མོ་གྲི་གུག་ཐོད་ཁྲག་བསྣམས་པ༔ སྐུ་མདོག་མཐིང་ག་ཁྲོ་མོའི་ཆས་ཀུན་རྫོགས་པ༔ མདུན་དུ་ལྕགས་སྡིག་ནག་པོ་རྒྱལ་བསེན་དམ་སྲི་ཟས་སུ་ཟ་བ༔ རྒྱབ་ཏུ་ཐང་ལྷ་རྡོ་རྗེ་འབར་བ་མཐིང་ག༔ གཡས་སུ་རལ་གྲིས་རྒྱལ་འགོང་སྲོག་རྩ་གཅོད་ཅིང་༔ གཡོན་དམ་སྲིའི་ཙིཏྟ་ཞལ་དུ་གསོལ་བ༔ ཁྲོ་གཏུམ་འཇིགས་སུ་རུང་བ་རྟ་ནག་ལ་ཞོན་པ༔ སྟེང་དུ་ཡེ་ཤེས་ཀྱི་བྱ་ཁྱུང་ནག་པོ་རལ་གྲིའི་གཤོག་པ༔ སྤུ་གྲིའི་མཇུག་མ༔ མཆུ་སྡེར་དང་རྭ་རྩེ་ནས་བསྐལ་བའི་མེ་འབར་བ༔ ཀླུ་རིགས་དང་ནད་བདག་ཕོ་མོ་ཟས་སུ་ཟ་བ༔ སྒྲོ་གསེབ་ལས་རྡོ་རྗེ་མཚོན་ཆའི་ཆར་འབེབས་པ༔ ཕྱག་གཡས་རྡོ་རྗེ་དང་གཡོན་དུག་སྦྲུལ་ཞལ་དུ་གསོལ་བ༔ སྲིད་གསུམ་ཟིལ་གྱིས་གནོན་པའོ༔ གཙོ་བོའི་གནས་གསུམ་ༀ་ཨཱཿཧཱུྃ་ལས་འོད་ཟེར་འཕྲོས་པས༔ རྔ་ཡབ་

ཟངས་མདོག་དཔལ་གྱི་རི་བོ་ནས་བསྒོམས་པ་དང་འདྲ་བའི་ཡེ་ཤེས་པའི་ལྷ་ཚོགས་འཁོར་དང་བཅས་པ་སྤྱན་དྲངས་བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ དམ་ཚིག་དང་གཉིས་སུ་མེད་པར་གྱུར༔ སླར་ཡང་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་བྱང་སེམས་ཞི་ཁྲོའི་ལྷ་ཚོགས་ཐོད་ཕྲེང་སྡེ་ལྔ་ཡབ་ཡུམ་གྱི་རྣམ་པར་སྤྱན་དྲངས༔ སྐུ་གསུང་ཐུགས་ཀྱིས་བྱིན་གྱིས་བརླབས༔ ཡེ་ཤེས་ལྔ་ཡི་དབང་བསྐུར༔ དབང་རྟགས་སུ་རིགས་ཀྱི་བདག་པོས་དབུ་བརྒྱན་པར་གྱུར༔ རང་གི་ཐུགས་ཀར་ཡེ་ཤེས་སེམས་དཔའ་པདྨ་བཛྲ་སྐུ་མདོག་མཐིང་ག་རྡོ་རྗེ་དང་དྲིལ་བུ་བསྣོལ་ཐབས་སུ་འཛིན་པ་ཡུམ་མནྡྷ་ར་བ་ལ་འཁྱུད་པ༔ ལོངས་སྐུའི་ཆ་ལུགས་རྫོགས་པ༔ མཚན་དང་དཔེ་བྱད་ཀྱིས་བརྒྱན་པའི་ཐུགས་ཀར་ཟླ་བ་དང་ཉི་མའི་སྟེང་དུ་ཏིང་ངེ་འཛིན་སེམས་དཔའ་ཐུགས་སྲོག་ཧཱུྃ་ཡིག་མཐིང་

ག་ལ་སྔགས་ཕྲེང་གཡས་སུ་འཁོར་བ་ལས་འོད་ཟེར་མཐིང་ནག་འཕྲོས༔ ཕྱོགས་བཅུའི་སངས་རྒྱས་མཆོད༔ བྱིན་རླབས་ནུས་མཐུ་བསྡུས་ཏེ་ཐུགས་ཀར་ཐིམ༔ འོད་ཟེར་ཕྱི་སྣོད་འཇིག་རྟེན་ནང་བཅུད་རིགས་དྲུག་སེམས་ཅན་གཟུགས་ཅན་གཟུགས་མེད་ཐམས་ཅད་ལ་ཕོག༔ སྡུག་བསྔལ་སྡིག་སྒྲིབ་སྦྱངས༔ མ་རུངས་གདུག་པ་ཅན་ཐམས་ཅད་ཚར་བཅད༔ ཚེ་བསོད་མཐུ་སྟོབས་ནུས་པ་ཐམས་ཅད་བསྡུས་ནས་ཐུགས་སྲོག་སྔགས་ཕྲེང་ལ་ཐིམ་པས་སྔགས་ཀྱི་རང་སྒྲ་འབྲུག་སྟོང་དུས་གཅིག་ལ་ལྡིར་བ་ལྟ་བུའི་སྒྲ་སྒྲོགས་པས༔ ཕྱི་སྣོད་འཇིག་རྟེན་ཐམས་ཅད་གཞལ་ཡས་ཁང་༔ ནང་བཅུད་སེམས་ཅན་ཐམས་ཅད་གུ་རུ་དྲག་པོའི་སྐུར་གྱུར༔ སྒྲ་གྲགས་ཐམས་ཅད་དྲག་པོ་སྔགས་ཀྱི་སྒྲ༔ དྲན་རྟོག་ཐམས་ཅད་བློ་འདས་ཀ་དག་རྫོགས་པ་ཆེན་པོའི་ཀློང་ནས་འཁོར་འདས་དབྱེར་

མེད་སྐྱེ་འཆི་འགྲོ་འོང་བྲལ་བ་ནམ་མཁའ་ལྟ་བུའི་ངང་ནས་གཟུགས་སྔགས་གྲག་སྟོང་འབྲུག་སྒྲ་ལྟ་བུ་བཟླས་པར་བྱའོ༔ ཞི་བསྙེན་བཟླ་བ་ནི༔ ཟླ་གདན་ཐུགས་སྲོག་ལ་དམིགས༔ ༀ་པདྨ་བཛྲ་ཧཱུྃ༔ འབུམ་ཕྲག་གསུམ་མམ་བཞི་བཟླས་པས་འགྲུབ༔ དྲག་སྔགས་ཉི་གདན་ཐུགས་སྲོག་ལ་དམིགས༔ ༀ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ འབུམ་ཕྲག་གསུམ་མམ་བཞི་བཟླས་པས་འགྲུབ༔ འཁོར་རྣམས་ལ༔ ༀ་ཁྲོཾ་ག་རུ་ཊ་ཧཱུྃ་ཕཊ༔ ཁྱུང་༔ ༀ་བཛྲ་ཧཱུྃ་ཡཀྵ་ཧཱུྃ༔ མེ་དབལ༔ རཀྴ་ཧཱུྃ༔ སྡིག་པ༔ ༀ་བཛྲ་བྷཱ་ར་ཧི་ཧཱུྃ་ཕཊ༔ ཁྲི་འམ་སྟོང་བཟླས་པས་འགྲུབ༔ ཁྲོས་མ༔ ༀ་བཛྲ་འབར་བ་རྩལ་རཱ་ཙ་བིགྷྣན་མཱ་ར་ཡ་ཧཱུྃ་ཕཊ༔ བརྒྱ་ཕྲག་བཟླ༔ ཐང་ལྷ༔ སྡེ་བརྒྱད་གཟིར་ན༔ ཨ་ཡ་མ་དུ་རུ་ཙ་ཤ་ན་ས་མ་ཡ་ཧཱུྃ་ཧཱུྃ་ཕཊ་ཕཊ་བྷྱོ་བྷྱོ་ཟློག་ཟློག་བྷྱོ་ཟློག་ཅིག༔ བྱད་མ་རྦོད་གཏོང་སྡང་དགྲ་གནོད་བྱེད་དམ་སྲི་ཕོ་མོ་ནད་བདག་ཡམས་བདག་ཡུལ་འདྲེ་འབྱུང་པོ་མཐའ་ཡི་དམག་དཔུང་ནད་མུག་མཚོན་

འཁྲུགས་ཐམས་ཅད་མཱ་ར་ཡ་ཕཊ༔ ཟློག་ཟློག༔ ནན་ནན༔ ཁ་ཐམ་ཁ་ཆིངས༔ ལན་བརྒྱའམ་ཉེར་གཅིག་བཟླ༔ ལས་ཚོགས་རིམ་པ་གཞན་དུ་ཤེས༔ མཐར་ནི་བདག་ལུས་སྣོད་བཅུད་ཀུན༔ སྐྱེ་མེད་ཡི་གེ་ཧཱུྃ་ལ་ཐིམ༔ དམིགས་མེད་ཀ་དག་ཀློང་དུ་ཐིམ༔ གདོད་མའི་ཀུན་བཟང་མངོན་གྱུར་ཤོག༔ ས་མ་ཡ༔ རྒྱ་རྒྱ་རྒྱ༔ སྦས་རྒྱ༔ གབ་རྒྱ༔ གསང་རྒྱ༔ སྐལ་ལྡན་ལས་ཅན་བུ་ལ་གཏད་རྒྱ༔ ཀྱེ་མ། ཉོན་དང་ལས་ཅན་རིག་འཛིན་རྣམས༔ མ་འོངས་སྙིགས་མ་ཤི་ཤུ་ཁ་རལ་དུས༔ སྐལ་མེད་འགྲོ་རྣམས་ལོག་སྤྱོད་བདུད་ཀྱིས་ཁྱེར༔ བླ་མ་ཆོས་མེད་དཀོར་ནག་དུག་གིས་འཆིང་༔ ཚུལ་འཆོས་མཁས་པས་སྐལ་མེད་སེམས་ཅན་བསླུ༔ རབ་བྱུང་སྡོམ་ཉམས་ཁས་དྲག་ནོར་ལ་བརྣག༔ ལྐོག་ཏུ་ཆགས་སྤྱོད་མངོན་དུ་མི་ཐབས་མཁས༔ ཐར་མེད་སེམས་ཅན་ཀུན་གྱིས་སྐྱབས་སུ་འཛིན༔ བུད་མེད་ཁྲེལ་མེད་འདོད་ཆགས་མེ་ལྟར་འབར༔ འདུལ་བའི་བསྟན་བསྣུབས་ཡུལ་སྡེ་གྲོང་ཡུལ་དཀྲུག༔ ལས་ངན་སེར་སྐྱ་ཐམས་ཅད་དེ་ལ་འདུ༔ རྗེ་དཔོན་ཁྲེལ་མེད་འགྲོ་བའི་བདེ་སྐྱིད་འཕྲོག༔ དམག་འཁྲུག་བདེན་བརྫུན་གོ་ལོག་བཙན་པོས་འདུལ༔ དུས་ངན་སེམས་ཅན་དེ་ཡི་བྲན་དུ་སྐྱེ༔ སྐྱེ་བོ་དྲེགས་པས་སངས་རྒྱས་བསྟན་ལ་སྡང་༔ དབེན་གནས་བཅོམ་ཞིང་དགེ་འདུན་ཆོས་འཁོར་བཤིག༔ དགེ་མེད་རྐུན་ཇག་ཁྲམ་པ་དཔོན་དུ་བཀུར༔ དེ་རྣམས་སྙིགས་དུས་

སེམས་ཅན་རང་རྟགས་ཡིན༔ བླ་མ་འདྲེན་སྟོབས་གང་ཆེ་སྐུ་ཚེ་ཐུང་༔ སྒོམ་ཆེན་རྟོགས་ལྡན་ཐམས་ཅད་ཀུན་གྱིས་སྡང་༔ སྐྱེ་བོ་ཆོས་ལྡན་ཐམས་ཅད་རྐྱེན་ངན་མང་༔ དེ་འདྲའི་དུས་ཤར་སེམས་ཅན་སྡུག་བསྔལ་མནར༔ མནའ་སྡིག་སྲོག་གཅོད་ལས་འབྲས་དངོས་སུ་སྨིན༔ མཁའ་འགྲོ་ཆོས་སྐྱོང་ལྷ་སྲིན་སྡེ་བརྒྱད་འཁྲུགས༔ དཀར་ཕྱོགས་སྐྱོང་བའི་ཡུལ་ལྷ་གཞི་བདག་འཁྲུགས༔ མ་མོ་འཁྲུགས་པས་རིམས་ནད་སྣ་ཚོགས་འབྱུང་༔ མི་མཐུན་རྐྱེན་ངན་འགོས་ནད་ཡམས་ནད་ཀྱིས༔ ས་སྟེང་མི་ནོར་ཐམས་ཅད་གློ་བུར་འཆི༔ སུས་ཀྱང་བཅོས་ཐབས་མེད་པར་རང་བྱས་ལས༔ སངས་རྒྱས་ཐུགས་རྗེ་ཆུང་བ་མ་ཡིན་ནོ༔ གཏེར་མིན་གཏེར་འདྲ་ས་སྟེང་ཟོག་པོས་འདུལ༔ ཨོ་རྒྱན་བདག་གི་ཕོ་ཉ་ཁྱི་བས་བརྙས༔ བླ་གཟུགས་ཁྲག་དོག་ཅན་གྱིས་འགྲོ་དོན་འགོག༔ སེར་གཟུགས་ང་རྒྱལ་ཅན་གྱིས་ངན་སྨྲས་སྒྲོགས༔ ལས་ངན་ཕོ་མོས་གཤེད་མ་བས་ཀྱང་སྡང་༔ ཡེ་ཤེས་སྤྱན་ལྡན་རྒྱལ་བས་ལུང་བསྟན་ཀྱང་༔ བདུད་ཀྱིས་བསླུས་པའི་སེམས་ཅན་ཡིད་མི་ཆེས༔ དེ་རྣམས་ཐར་མེད་མར་འགྲོའི་ཟང་ཐལ་ཡིན༔ ང་ཉིད་དངོས་སུ་བྱོན་ཡང་གྲོལ་རེ་ཀན༔ དེ་འདྲའི་དུས་སུ་སྒྲུབ་པ་དང་དུ་ལོངས༔ སུ་མ་མགུ་ཡང་ང་ལ་གསོལ་བ་ཐོབ༔ ཇི་ལྟར་བྱུང་ཡང་ཡིད་གཉིས་ཐེ་ཚོམ་སྤོངས༔ པད་འབྱུང་ཆོས་གཏེར་བརྒྱུད་པ་ཉམས་སུ་ལོངས༔ རྐྱེན་ངན་ཅི་བྱུང་ཐམས་ཅད་གྲོགས་སུ་ཁྱེར༔ རི་ཁྲོད་གངས་ཁྲོད་དབེན་གནས་སྒྲུབ་པ་གྱིས༔ བསྙེན་སྒྲུབ་ཚད་སྐྱོལ་བསྐྱེད་རྫོགས་གཙོ་

བོར་ཐོན༔ མཚན་ལྡན་ཕྱག་རྒྱ་སྐལ་ལྡན་སློབ་མ་སྐྱོང་༔ ཆོས་ཀྱི་ཡང་སྙིང་རང་སེམས་ངོ་བོ་སྐྱོང་༔ འདི་ཕྱི་ཀུན་ཏུ་པད་འབྱུང་ངས་མི་བསླུ༔ ས་མ་ཡ༔ རྒྱ་རྒྱ་རྒྱ༔ དེ་ལྟའི་དྲག་པོ་ཐུགས་ཀྱི་སྒྲུབ་པ་འདི༔ སྦས་གནས་འགའ་ལ་འགའ་རེ་སྦས་པ་ཡོད༔ དེ་ཡང་དུས་བབས་ཁྱོད་ལ་གཏད་པ་ཡིན༔ ཐུགས་སྒྲུབ་འདི་ཉིད་ཐུགས་ཀྱི་ཀློང་དུ་སྦོས༔ མེ་ཁམས་རྟ་ལུག་ནད་ཡམས་མེ་ལྟར་འབར༔ ཏྲེ་ཏྲེ་ཧོན་གྱིས་བོད་ཀྱི་ནོར་ལུག་བརླག༔ དམ་སྲི་གྲོད་པ་མགོ་ནི་མངོན་དུ་རྒྱུག༔ རྒྱ་ནད་མཐའ་ནད་མི་ཡི་སྲོག་ལ་འབབ༔ བྱ་ཐེལ་ཅན་དང་སྲིན་མོ་དངོས་སུ་འོང་༔ དེ་དུས་འདི་དང་འཕྲད་པའི་སྐལ་ལྡན་རྣམས༔ མི་འཇིགས་རིན་ཆེན་སྲོག་གི་གོ་ཆ་ཡིན༔ ཐེ་ཚོམ་མེད་པར་སྐལ་ལྡན་རྣམས་ལ་སྤེལ༔ ཉམས་སུ་ལོངས་དང་བྱིན་རླབས་ཁྱད་པར་འཕགས༔ བཛྲ་གུ་རུ་རླུང་དར་རྒྱུན་ཁ་དང་༔ མ་ཎི་སཱཙྪ་ཆུ་གཏོར་གླུད་ཡས་ཐོངས༔ རྡོ་རྗེ་གྲོ་ལོད་སྲིད་གསུམ་གཏིང་བཟློག་འབད༔ ནད་བདག་དམ་སྲི་གླུད་དང་བསད་མནན་ཟློག༔ མན་ངག་ཁ་ཚར་རིམ་གྱིས་སྤེལ་བར་གྱིས༔ རིག་འཛིན་ཆོས་རྒྱལ་རྡོ་རྗེའི་ཆོས་སྐལ་མཛོད༔ མ་འོངས་སེམས་ཅན་སྐྱོབ་པའི་འགྲོ་དོན་ཤོག༔ ས་མ་ཡ༔ རྒྱ་རྒྱ་རྒྱ༔ ཞེས་ས་སྤྲེལ་གནམ་ལོ་གསར་ཚེས་གནས་ཆེན་ཙཱ་རི་ཏྲ་ཡི་གནས་སྒོ་འབྱེད་པའི་ཚེས་གཅིག་ཏིང་འཛིན་རྒྱལ་པོའི་དུས་དགོངས་པའི་གཏེར་ལས་བྱུང་སྟེ་སྤེལ་བས་སངས་རྒྱས་ཀྱི་བསྟན་པ་གསང་སྔགས་རྡོ་རྗེ་ཐེག་པའི་དམ་ཆོས་ཡུན་དུ་གནས་ཤིང་རྒྱལ་ཁམས་བདེ་སྐྱིད་

དཔལ་འབྱོར་གྱིས་ཡུན་དུ་འཚོ་ཞིང་དམ་པའི་ཆོས་ལ་སྤྱོད་པའི་སྐལ་བ་དང་ལྡན་པར་གྱུར་ཅིག༔ ཆུ་མོ་ལུག་གི་ལོ་ནས་ས་ཕོ་སྤྲེལ་ལོའི་བར་གསང་རྒྱ་བྱས་པས་བར་ཆད་གང་གིས་མི་ཚུགས་པར་ཟབ་རྒྱ། མངྒལཾ།། ༁ྃ༔ དྲག་པོ་ཁྲོས་པའི་ལྷ་ལ་འདུད༔ ལས་ཚོགས་ཟབ་པའི་མཐར་ཐུག་ནི༔ ལས་ཀྱི་རྣམ་སྨིན་སྒྲིབ་སྦྱང་ནི༔ ༀ་པདྨ་བཛྲ་ཧཱུྃ༔ དུས་གསུམ་བསགས་པའི་སྡིག་སྒྲིབ་བར་ཆད་ནད་གདོན་སརྦ་ཤནྟིཾ་ཀུ་རུ་སྭཱ་ཧཱ༔ ཞེས་བཟླ༔ དྲག་སྔགས་ཤམ་བུ་སྡེ་བརྒྱད་སོགས་གཟེར་བ་གཞུང་ལྟར༔ ཁྱུང་ཤམ་ལ༔ མི་ནད་ལ་རྩ་སྔགས་མཐར༔ ༀ་རྒྱ་ནད་སོད༔ རྒྱུ་གཟེར་སོད༔ ཚད་རིམས་མགོ་གཟེར་སོད༔ ནག་པོ་སྙིང་གཟེར་སོད༔ དམར་ནག་རྒྱུ་གཟེར་སོད༔ མཁྲིས་པ་རྩ་རྒྱུག་སོད༔ གཉན་ལྷོག་འགགས་གཟེར་སོད༔ ནད་རིགས་བཞི་བརྒྱ་རྩ་བཞི་གཏོང་བའི་ནད་བདག་ཕོ་མོའི་སྲོག་ལ་རྦད་རྦད་རཾ་རཾ་སོད༔ སྔགས་ཆུ་བྱས་པས་ཐེང་བས་ཆོག༔ ནོར་ནད་ལ་རྩ་སྔགས་མཐར༔ བྱ་ཁྱུང་ནག་པོ་ཏྲེ་ཏྲེ་ཧོན་གྱི་སྲོག་ལ་རྦད་རྦད༔ གློ་ནད་ཁ་ཚའི་

ནད་ཞི་ཞི༔ གག་ལྷོག་འགོས་ནད་སྲོག་ལ་རྦད་རྦད་རཾ་རཾ་སོད༔ ཅེས་སྔགས་ཆུ་བྱ༔ རྟ་ནད་ལ༔ རྩ་སྔགས་མཐར༔ ལ་བ་བཙན་དུག་གླན་དུག་རྟ་ནད་སྲོག་ལ་རྦད་རྦད་ཞི་ཞི༔ སྔགས་ཆུ་བྱའོ༔ བརྣངས་སྔགས་ལ༔ ཧག་ཕྱུང་གྱུར་ཕུད༔ ཕུ་བྱ༔ ཁྱི་སྨྱོན་སྔགས་ལ༔ རྩ་སྔགས་མཐར༔ ཁྱི་ནད་ཤ་ཟ་ནག་པོའི་གདོན་ལ་རྦད་རྦད༔ བྱེ་མ་ལ་སྔགས་གཏབ༔ ༀ་ཁྱི་མི་མིན་རུ་རུ་རཾ་རཾ་སྭཱ་ཧཱ༔ ཟན་ལ་ཕ་ཝཾ་ལོང་བུ་སྔགས༔ སེར་བ་སྲུང་ཐབས༔ སད་སྲུང་གཞན་དུ་གསལ༔ ཤོག་དྲིལ་ལྕགས་སྦུག་མ་འདི༔ བསམ་ཡས་མཆོད་རྟེན་ནག་པོ་ནས་གདན་དྲངས༔ དྲག་མཐིང་ལས་ཚོགས་གསང་རྒྱ༔ ཟབ་རྒྱ༔ ཆོས་རྒྱལ་རྡོ་རྗེ་བདག་གིས་བཏོན་པ་ས་མ་ཡ༔ རྒྱ་རྒྱ་རྒྱ༔ ༁ྃ༔ རིག་འཛིན་པདྨ་འབྱུང་གནས་ལ་ཕྱག་འཚལ་ལོ༔ དུས་ངན་སྙིགས་མ་ཉི་ཤུ་ཁ་རལ་དུས༔ མི་ནད་ནོར་ནད་ཁྱི་ནད་སྣ་ཚོགས་འོང་༔ གློ་བུར་བཅོས་མིན་ནད་རིགས་བྱུང་གྱུར་ན༔ ཕོ་ལ་གསེར་ཤོག་མོ་ལ་མཐིང་ཤོག་དང་༔ ནོར་ལ་ཤོག་སེར་ཁྱི་ལ་ཤོག་སྔོན་ལ༔ རྒྱ་སྣག་གཙང་མས་ཡིག་འབྲུ་མ་ནོར་བྲི༔ མི་ལ་བཏགས་ན་ལོ་གྲངས་ཉི་ཤུ་བསྲུང་༔ ནོར་བརྒྱ་སྲུང་

ཞིང་ལོ་བཅུ་བར་དུ་སྲུང་༔ རྟ་ལུག་སོགས་ལ་དེ་དང་འདྲ་བ་ཡིན༔ ཁྱི་ལ་ལོ་བཅུ་བར་བསྲུང་ཐེ་ཚོམ་མེད༔ རྫས་སྔགས་དམིགས་པ་གང་ཡང་མི་དགོས་སོ༔ པདྨ་ཐོད་ཕྲེང་རྩལ་གྱི་ཕོ་ཉ་ཨཱ་ཙ་ར་ཡི་ཆ་བྱད་ཅན་གཅིག་མངོན་དུ་བྱོན་ནས་དགོས་པ་ཁྱད་པར་ཅན་གྱི་དུས་སུ་ཨོ་རྒྱན་ཕྱག་དམ་མ་ཉམས་པའི་ཤོག་སེར་རིག་འཛིན་ཉིད་ལ་གནང་བ་གབ་སྦས་མེད་པར་ཕབ་པ་བཀའ་རྒྱ༔ རིག་འཛིན་ཆོས་རྒྱལ་རྡོ་རྗེས་ས་ཕོ་སྤྲེལ་གྱི་ལོ་སར་ཚེས་གཅིག་ལ་བྲིས་པ་མངྒ་ལཾ༔ ས་མ་ཡ༔ རྒྱ་རྒྱ་རྒྱ༔ མི་ཡི་འགོགས་འདིས་ལོ་ཉི་ཤུར་ཐུབ། སིབ། འབུ་རུ། རིམས་ནད་ཐམས་ཅད་འཐུས། ནོར་བརྒྱ་ལ་སྲུང་བ་གཅིག་བཏགས་ན་ལོ་བཅུ་ལ་ཐུབ། གློ་ཧོན་ཁ་ཚ་འགོས་ནད་ཐམས་ཅད་ཐུབ། ཁྱི་ནད་འགོགས་ལོ་ཉི་ཤུ་ཐུབ་དགེའོ།། །།

དྲག་མཐིང་རྒྱུན་བསྙེན་ཕྲིན་ལས་མྱུར་འགྲུབ། རིག་འཛིན་ཆོས་རྒྱལ་རྡོ་རྗེ།

དྲག་མཐིང་རྒྱུན་བསྙེན་ཕྲིན་ལས་མྱུར་འགྲུབ་བཞུགས་སོ། །ན་མོ་པདྨ་བཛྲ་ཡེ། སྐལ་ལྡན་རྣལ་འབྱོར་པ་རྣམས་ཀྱིས། །ཀརྨ་དྲག་པོའི་དབང་ཐོབ་ནས། །རྒྱུན་ཁྱེར་བསྙེན་པ་མ་ཆད་ཙམ། །ཉུང་ངུ་འཁྱེར་བདེ་ཙམ་བྲི་ན། །བླ་མ་དྲག་པོས་གནང་བ་སྩོལ། །ན་མོ། བླ་མ་མཆོག་གསུམ་པདྨ་འབྱུང་། །བདག་དང་འགྲོ་རྣམས་སྐྱབས་སུ་མཆི། །མར་གྱུར་དུས་གསུམ་སེམས་ཅན་རྣམས། །སངས་རྒྱས་ཐོབ་པར་སེམས་བསྐྱེད་དོ། །ལན་གསུམ་བརྗོད། ཧཱུྃ་ཧྲཱིཿ རང་སེམས་གདོད་ནས་མ་བཅོས་སྤྲོས་བྲལ་ཀློང་། །མ་འགགས་རིག་རྩལ་ཀརྨ་དྲག་པོ་རྩལ། །མཐིང་ནག་ཞལ་གཅིག་ཕྱག་

གཉིས་ཁྲོ་ཆས་རྫོགས། །ཕྱག་གཉིས་གནམ་ལྕགས་རྡོ་རྗེ་སྡིག་པ་འཛིན། །ཞབས་གཉིས་རྒྱལ་བསེན་དམ་སྲི་ཕོ་མོ་མནན། །སྐུ་ཡི་གནས་ལྔར་གོ་ཆ་ལྷ་ལྔ་གསལ། །སྤྱི་བོར་བྱ་ཁྱུང་ཐོད་ཕྲེང་སྡེ་ལྔ་དང་། །འཁོར་དུ་ལྕགས་སྡིག་མེ་དབལ་ཐང་ལྷ་ནག །གཡོན་དུ་ཡུམ་མཆོག་མཁའ་འགྲོ་ཁྲོས་མ་ནག །ཁྲོ་བཅུ་སྒོ་སྲུང་འཁོར་བཅས་གསལ་བར་བསྐྱེད། །གཙོ་འཁོར་མེ་དཔུང་དམར་ནག་འབར་བའི་ཀློང་། །ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན། །བདུད་དང་དམ་སྲི་དགྲ་བགེགས་ཚར་གཅོད་ཅིང་། །དམ་ཡེ་དབྱེར་མེད་ལྷུན་གྲུབ་ཉིད་དུ་གྱུར། །ཐུགས་ཀར་པདྨ་བཛྲ་ཡབ་ཡུམ་མཐིང་། །དེ་ཡི་ཐུགས་ཀར་ཟླ་བའི་གདན་ལ་ནི། །ཏིང་འཛིན་སེམས་དཔའ་ཧཱུྃ་མཐིང་སྔགས་ཀྱིས་བསྐོར། །ཨོཾ་པདྨ་བཛྲ་ཧཱུྃ། ཞི་བསྙེན་བཟླས། དྲག་པོའི་བསྙེན་པ་ཐུགས་ཀར་ཉི་གདན་སྟེང་དུ་ཧཱུྃ་བསྒོམ། ཨོཾ་ཨཱཿཧཱུྃ་ཨརྩིག་ནིརྩིག་ན་མོ་བྷ་ག་ཝ་

ཏེ་ཧཱུྃ་ཧཱུྃ་ཕཊཿ ཅེས་བཟླས། དེ་ནས་སྤྱི་དྲིལ་བསྙེན་པ་བཟླས། ཨོཾ་ཨཱཿཧཱུྃ་ཤྲཱི་ཀརྨ་ཧེ་རུ་ཀ་ཡ་མ་རཱ་ཛ་ཧྱ་གྷྲྀ་ཝ་བཛྲ་པཱ་ཎི་ཌཱཀྐི་ནི་ཧ་རི་ནི་ས་བཛྲ་ཀཱི་ལི་ཀཱི་ལ་ཡ་ཁྲོཾ་ག་རུ་ཊ་ཧཱུྃ་ཕཊ། ཅེས་བཟླས། མཐར་ནི་ལྷ་ཚོགས་ཧཱུྃ་ལ་ཐིམ། །ཧཱུྃ་ཡང་གྱེན་རྫོགས་མི་དམིགས་པ། །རྫོགས་པ་ཆེན་པོའི་ངང་ལ་བཞག །དགེ་འདིས་འགྲོ་ཀུན་སངས་རྒྱས་ཤོག །ཅེས་པ་འདི་ལྟར་རྒྱུན་ཁྱེར་ཤིན་ཏུ་ཉུང་ངུ་ཞིག་དགོས་ཞེས་རིམ་གཉིས་ཟབ་མོའི་རྣལ་འབྱོར་གྱི་དབང་ཕྱུག་དམ་པ་ཀརྨ་བསྟན་སྐྱོང་གིས་ལྷ་རྫས་དཀྱུས་རིང་བཅས་བཀའ་གནང་བཞིན་རིག་འཛིན་ཆོས་རྒྱལ་རྡོ་རྗེས་འོག་མིན་ཀརྨའི་གདན་སར་ཚེ་སྒྲུབ་ལ་གནས་པའི་སྐབས་ཐུན་གསེང་དུ་གང་དྲན་འཕྲལ་དུ་བྲིས་ཏེ་ཕུལ་བ་དགེ་ལེགས་འཕེལ། སརྦ་མངྒ་ལཾ། ཤུ་བྷཾ།། །།

ནོར་ལྷ་ཛམ་དཀར་གྱི་རྒྱུན་ཁྱེར་ཉུང་བསྡུས་བྱིན་རླབས་ཆར་འབེབས། རིག་འཛིན་ཆོས་རྒྱལ་རྡོ་རྗེ།

ནོར་ལྷ་ཛམ་དཀར་གྱི་རྒྱུན་ཁྱེར་ཉུང་བསྡུས་བྱིན་རླབས་ཆར་འབེབས་བཞུགས་སོ། །སྐྱབས་གནས་ཀུན་འདུས་པདྨ་འབྱུང་གནས་ལ་ཕྱག་འཚལ་ལོ། །གང་དག་འགྲོ་ཀུན་དབུལ་ཕོངས་ཞི་བ་དང་། །མཆོག་ཐུན་དངོས་གྲུབ་འབད་མེད་ལྷུན་གྲུབ་ཕྱིར། །ཨོ་རྒྱན་མཁའ་འགྲོ་ནོར་ལྷའི་སྒྲུབ་ཐབས་ཀྱི། །རྒྱུན་ཁྱེར་ཉུང་བསྡུས་བྱིན་རླབས་ཆར་འབེབས་བྲི། །བླ་མ་ཡི་དམ་མཁའ་འགྲོའི་བཀས་གནང་སྩོལ། །བདེ་བའི་སྟན་ལ་བདེ་བར་གནས་ཤིང་ཨཱ་ལི་ཀཱ་ལི་ཡིག་བརྒྱ་རྟེན་སྙིང་རྣམས་ཚར་གསུམ་སྦྲེལ་མར་བཟླས་ལ། ངག་བྱིན་བརླབས་ནས་སེམས་མ་ཡེངས་པའི་ངང་ནས་འདི་ལྟར་བརྗོད། ན་མོ། བླ་མ་པད་འབྱུང་སྤྱན་རས་གཟིགས། །དཀོན་

མཆོག་གསུམ་ལ་བདག་སྐྱབས་མཆི། །མཁའ་མཉམ་མར་གྱུར་སེམས་ཅན་རྣམས། །སངས་རྒྱས་ཐོབ་པར་སེམས་བསྐྱེད་དོ། །ལན་གསུམ། རང་སེམས་མ་བཅོས་སྟོང་པའི་ངང་། །མ་འགགས་གསལ་སྟོང་རིག་པའི་རྩལ། །རང་ཉིད་ཨཱརྱ་ཛམ་བྷ་ལ། །དཀར་གསལ་ཕྱག་གཡས་བེ་ཅོན་དང་། །གཡོན་པས་ནོར་སྐྱུག་ནེའུ་ལེ་འཛིན། །རིན་པོ་ཆེ་ཡི་རྒྱན་གྱིས་སྤྲས། །པདྨ་ཟླ་བའི་གདན་སྟེང་དུ། །གཡུ་འབྲུག་སྟེང་དུ་བཙན་འཁྱིལ་བཞུགས། །འཁོར་དུ་མཁའ་འགྲོ་སྡེ་བཞིས་བསྐོར། །རང་རང་ཕྱག་མཚན་རྒྱན་དང་བཅས། །སྤྱི་བོར་སྣང་མཐའ་སྤྱན་རས་གཟིགས། །རྒྱལ་བ་ཚེ་ལྷ་རིགས་ལྔ་དང་། །བླ་མ་ཨོ་རྒྱན་ཡབ་ཡུམ་བཅས། །སྣང་ལ་རང་བཞིན་མེད་པ་ཡི། །འཇའ་འོད་གསལ་སྟོང་ཀློང་ན་བཞུགས། །ཛམ་ལྷའི་ཐུགས་ཀར་ཟླ་བའི་སྟེང་། །ཐུགས་སྲོག་སྔགས་ཀྱི་ཕྲེང་བ་གསལ། །འོད་འཕྲོས་རྒྱལ་

མཆོད་བྱིན་རླབས་བསྡུས། །སེམས་ཅན་སྒྲིབ་སྦྱངས་ཚེ་བསོད་སྤེལ། །དངོས་གྲུབ་ཀུན་འདུས་བདག་ཐིམ་པས། །བྱིན་རླབས་དངོས་གྲུབ་ཆར་འབེབས་གྱུར་པར་བསམས་ལ། སྙིང་པོ་ནི། ཨོཾ་པདྨ་ཀྲོ་དྷ་ཨཱརྱ་ཛམ་བྷ་ལ་ཧྲི་ད་ཡ་ཧཱུྃ་ཕཊཿ དྷཱ་ཀི་ནི་ཧ་རི་ནི་ས་སྲིད་གསུམ་གྱི་ཟས་ནོར་ཚེ་བསོད་དཔལ་འབྱོར་སྙན་གྲགས་དབང་ཐང་ཀཱ་ཡ་ཝཱཀྐ་ཙིཏྟ་ཝ་ཤཾ་ཀུ་རུ་སྭཱ་ཧཱ། ཞེས་བཟླས་དམིགས་མེད་ཀ་དག་ངང་དུ་བཞག །དགེ་བསྔོ་བཀྲ་ཤིས་སྨོན་ལམ་བྱའོ། །ཞེས་རང་སློབ་སྦྱིན་བདག་དམ་ལྡན་ཨོ་རྒྱན་ཚེ་རྒྱལ་ངོར་རིག་འཛིན་ཆོས་རྒྱལ་རྡོ་རྗེས་དཔལ་འབྲུག་པའི་སྙིང་པོ་བསྟན་པ་མདོ་སྔགས་བཤད་སྒྲུབ་གླིང་གི་གདན་སར་༧གྲུབ་ཆེན་ཚོགས་གཉིས་ཀྱི་སྒྲུབ་ཁང་ནས་བྲིས་པ་དགེའོ། །སརྦ་མངྒ་ལཾ།།

རྩ་གསུམ་ཆོས་སྐྱོང་དང་བཅས་པ་ལ་གཏོར་འབུལ་གྱི་རིམ་པ་ཁྱེར་བདེ་རིག་འཛིན་དགའ་སྟོན། ཀརྨ་ངག་དབང་ཡོན་ཏན་རྒྱ་མཚོ།

རྩ་གསུམ་ཆོས་སྐྱོང་དང་བཅས་པ་ལ་གཏོར་འབུལ་གྱི་རིམ་པ་ཁྱེར་བདེ་རིག་འཛིན་དགའ་སྟོན་ཞེས་་བྱ་བ་བཞུགས་སོ། །ན་མོ་གུ་རུ་བྷྱ། གཏོར་མ་ལ་རྣམ་བཞག་མང་བ་ལས། སྐབས་འདིར་གཏའ་གཏོར་ཡོད་ན་ཁ་གསོ། མེད་དམ་ཡོད་ཀྱང་རུང་ལ་དུས་གཏོར་དང་རྒྱུན་གཏོར་གང་ཡིན་སྨན་རཀ་ཕུད་མཆོད་དང་བཅས་པ་བཤམ། དེ་དག་གང་ཡང་མི་འབྱོར་བའི་སྐབས་སུའང་ཕྱེ་མར་དང་ཕུད་མཆོད་ཙམ་ལ་བརྟེན་ཏེ་བྱིན་གྱིས་བརླབ་པ་ནི། ཧཱུྃ། བདག་ཉིད་ཡི་དམ་ལྷར་གསལ་ཐུགས་ཀ་ནས། །རྃ་ཡྃ་ཁྃ་འཕྲོས་ཡེ་ཤེས་མེ་རླུང་ཆུས། །གཏོར་མའི་འབགས་བཙོག་དྲི་མ་བསྲེགས་གཏོར་བཀྲུས། །རླུང་མེ་ཐོད་སྒྱེད་

སྟེང་དུ་ཀ་པཱ་ལ། །ཡངས་ཤིང་རྒྱ་ཆེར་ཤ་ལྔ་བདུད་རྩི་ལྔ། །རིགས་ལྔ་ཡབ་ཡུམ་ས་བོན་འབྲུ་བཅས་མཚན། །མེ་རླུང་སྦྱོར་བས་བནྡྷའི་དམ་རྫས་ཁོལ། །ཡེ་ཤེས་བདུད་རྩི་འབྲུ་གསུམ་རྣམ་པར་བཀུག །འོད་ཞུ་རྣམ་པར་རྟོག་པའི་ཉེས་སྐྱོན་སྦྱངས། །རོ་བཅུད་ནུས་ལྡན་བདུད་རྩི་ཆེན་པོར་རྟོགས། །འདོད་ཡོན་མཆོད་སྤྲིན་མཁའ་ཁྱབ་སྦར་བར་གྱུར། །ཨོཾ་ཨཱཿཧཱུྃ། ལན་གསུམ། ཐུགས་སྲོག་འོད་ཀྱི་ཕོ་ཉས་རྩ་གསུམ་དང༌། །ཆོས་སྐྱོང་གཏེར་སྲུང་དཀར་ཕྱོགས་སྐྱོང་བ་རྣམས། །མདུན་མཁར་སྤྱན་དྲངས་བཛྲ་ས་མཱ་ཛཿ རང་མཐུན་དགྱེས་པའི་གདན་ལ་བརྟན་པར་བཞུགས། །དངོས་འབྱོར་ཡིད་སྤྲུལ་ཕྱི་ནང་གསང་བས་མཆོད། །སྨན་གཏོར་རཀྟ་ཟག་མེད་བདུད་རྩིའི་བཅུད། །རྗེ་བཙུན་བླ་མ་རྣམས་ཀྱི་ཡེ་ཤེས་ལྗགས། །རྡོ་རྗེའི་སྦུ་གུས་དྲངས་ཏེ་བཞེས་སུ་གསོལ། ན་མོ་སརྦ་རཏྣ་གུ་རུ་ཨི་དམ་བ་ལིཾ་

ཏ་ཁ་ཁ་ཁཱ་ཧི་ཁཱ་ཧི། གཅིག་གམ་གསུམ་སྐབས་དང་སྦྱར། ན་མོ། རྒྱལ་བ་དགོངས་བརྒྱུད་རིག་འཛིན་བརྡ་ཡི་བརྒྱུད། །གང་ཟག་སྙན་བརྒྱུད་ལས་འཕྲོ་གཏེར་གྱི་བརྒྱུད། །མངོན་སུམ་གོང་འཕེལ་ཚད་ཕེབས་ཟད་སར་ཕྱིན། །འདུན་པ་སེམས་དང་རིགས་ཆེན་འབྱེད་པ་དང༌། །དབུགས་ཕྱིན་ལུང་ཆེན་ཐོབ་དང་རྩལ་ཆེན་རྫོགས། །རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ཀྱི། །ས་ལ་གནས་པའི་རིག་འཛིན་རྒྱ་མཚོ་དང༌། །ཁྱད་པར་དཀོན་མཆོག་སྤྱི་འདུས་གུ་རུ་རྗེ། །སྐུ་གསུམ་སྐུ་ལྔ་མཚན་བརྒྱད་རྗེ་འབངས་ཚོགས། །གཏེར་ཆེན་གཏེར་ཕྲན་ལས་ཅན་ཆོས་བདག་ལ། །དམ་རྫས་ཡེ་ཤེས་བདུད་རྩིའི་མཆོད་པ་འབུལ། །རྡོ་རྗེ་འཆང་ཆེན་གདོད་གནས་གྲུབ་ཆེན་བརྒྱད། །རྣལ་འབྱོར་དབང་ཕྱུག་བརྒྱད་ཅུ་རྩ་བཞི་སོགས། །རྒྱུད་སྡེ་བཞི་ཡིས་མཆོག་ཐུན་གྲུབ་རྣམས་དང༌། །ཁྱད་པར་ཏཻ་ལོ་ནཱ་རོ་མར་

མི་དྭགས། །ཆེ་བཞི་ཆུང་བརྒྱད་ཤངས་པ་བཀའ་བརྒྱུད་དང༌། །བཀའ་གདམས་ལམ་འབྲས་སྦྱོར་དྲུག་ཞི་བྱེད་གཅོད། །བསྙེན་སྒྲུབ་ལ་སོགས་བཤད་སྒྲུབ་སྲོལ་འཛིན་པའི། །རྩ་བརྒྱུད་དཔལ་ལྡན་བླ་མ་ཐམས་ཅད་ལ། །དམ་རྫས༴ བྱང་ཆུབ་བར་དུ་ཐུགས་རྗེས་མི་འདོར་བར། །ཡེ་ཤེས་མཆོག་གིས་བདག་རྒྱུད་བྱིན་གྱིས་རློབས། །སྨན་གཏོར་རཀྟ་ཟག་མེད་བདུད་རྩིའི་བཅུད། །ཡི་དམ་ལྷ་ཚོགས་རྣམས་ཀྱི་ཡེ་ཤེས་ལྗགས། །ཕྱག་མཚན་སྦུ་གུས་དྲངས་ཏེ་བཞེས་སུ་གསོལ། །ཨོཾ་དེ་བ་ག་ཎ་ཤཱནྟ་ཀྲོ་དྷ་ས་པཱ་རི་ཝ་ར་ཨི་དཾ་སོགས། བདེ་གཤེགས་ཞི་བ་བཞི་བཅུ་རྩ་གཉིས་དང༌། །འབར་བ་ཁྲག་འཐུང་ཁྲོ་བོ་ལྔ་བཅུ་བརྒྱད། །ཚོགས་ཆེན་འདུས་པ་ཐེག་དགུའི་དཀྱིལ་འཁོར་ལྷ། །སྒྱུ་འཕྲུལ་མཉམ་སྦྱོར་ལ་སོགས་ཏནྟྲ་སྡེ། །བཅོ་བརྒྱད་ནས་གསུངས་ཡི་དམ་ལྷ་ཚོགས་དང༌། །བླ་མ་དགོངས་འདུས་

དཀྱིལ་འཁོར་ཚོམ་བུ་དགུ། །རྟ་མཆོག་རོལ་པ་ཡི་དམ་དགོངས་འདུས་ལྷ། །དམར་ནག་མེ་ཕྲེང་གུ་རུ་དྲག་ཏུ་ཁྲོས། །བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་པ། །སྐུ་མཆོག་འཇམ་དཔལ་གསུང་མཆོག་པདྨ་དབང༌། །ཐུགས་མཆོག་ཡང་དག་ཡོན་ཏན་བདུད་རྩིའི་རིགས། །ཕྲིན་ལས་ཕུར་པ་རྦོད་གཏོང་མ་མོ་དང༌། །དམོད་པ་དྲག་སྔགས་འཇིག་རྟེན་མཆོད་བསྟོད་ལྷ། །སྒྲུབ་ཆེན་བཀའ་བརྒྱད་ཞི་དང་ཁྲོ་བོ་ལ། །དམ་རྫས་ཡེ་ཤེས༴ དུས་ཀྱི་འཁོར་ལོ་མཁའ་འགྲོ་དྲ་བ་སྡོམ། །དགྱེས་རྡོར་མཱ་ཡཱ་སངས་རྒྱས་ཐོད་པ་དང༌། །གདན་བཞི་རྒྱལ་བ་རྒྱ་མཚོ་དམ་ཚིག་སྒྲོལ། །གསང་འདུས་འཇིགས་བྱེད་དགྲ་ནག་གཤེད་དམར་པོ། །སྒྱུ་འཕྲུལ་དྲྭ་བ་མི་གཡོ་ཕྱག་རྡོར་སོགས། །ཕ་རྒྱུད་མ་རྒྱུད་གཉིས་མེད་ལྷ་རྣམས་དང༌། །དཔལ་རྩེ་རྡོར་དབྱིངས་ལ་སོགས་རྣལ་འབྱོར་རྒྱུད། །

རྣམ་སྣང་མངོན་བྱང་ལ་སོགས་སྤྱོད་པའི་རྒྱུད། །བདེ་གཤེགས་པདྨ་རྡོ་རྗེ་རྒྱས་པའི་རིགས། །ལྔས་རྩེན་ནོར་བུ་ཅན་ཏེ་བྱ་རྒྱུད་ཀྱི། །ལྷ་ཚོགས་ཡབ་ཡུམ་སྤྲུལ་པར་བཅས་པ་ལ། །དམ་རྫས༴ ཕྲིན་ལས་བཞི་དང་གྲུབ་པ་ཆེན་པོ་བརྒྱད། །ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལ། །སྨན་གཏོར༴ དཔའ་བོ་མཁའ་འགྲོ་རྣམས་ཀྱི་ཡེ་ཤེས་ལྗགས། །འོད་ཀྱི་སྦུ་གུས་དྲངས་ཏེ་བཞེས་སུ་གསོལ། །ཨོཾ་སརྦ་ཌཱ་ཀ་ཌཱ་ཀི་ནཱི་ས་པཱ་རི་ཝ་ར་ཨི་དཾ་སོགས། ཐོད་པའི་དུམ་བུ་རབ་གཏུམ་མ་ལ་སོགས། །ཡུལ་ཆེན་ཉེར་བཞི་གནས་ཆེན་སུམ་ཅུ་གཉིས། །དུར་ཁྲོད་བརྒྱད་ཀྱི་དཔའ་བོ་ཌཱ་ཀི་དང༌། །ཁྱད་པར་རྒྱལ་ཡུམ་རྡོ་རྗེ་རྣལ་འབྱོར་མ། །གསང་བ་ཡེ་ཤེས་མཁའ་སྤྱོད་དཀར་དམར་རིགས། །དབྱིངས་ཕྱུག་རྣམ་དགུ་མཁའ་འགྲོ་དགོངས་པ་འདུས། །ཁྲོས་མ་ནག་མོ་སེང་གེའི་གདོང་པ་ཅན། །ཀུ་རུ་ཀུལླེ་རྗེ་

བཙུན་སྒྲོལ་མ་ཡུམ། །གྲུབ་པའི་རྒྱལ་མོ་ཡེ་ཤེས་མཚོ་རྒྱལ་སོགས། །སངས་རྒྱས་རྡོ་རྗེ་རིན་ཆེན་པདྨ་ལས། །སྣ་ཚོགས་འཇིག་རྟེན་དམ་ཚིག་ཤ་ཟའི་རིགས། །དྲུག་ཅུ་རྩ་བཞི་རིགས་བརྒྱའི་རྣལ་འབྱོར་མ། །ཞིང་སྔགས་ལྷན་ཅིག་སྐྱེས་པའི་ཚོགས་རྣམས་ལ། །དམ་རྫས༴ ཐིག་རླུང་དབང་འདུས་རྟེན་འབྲེལ་ཕྱོགས་མེད་འཆར། །འཇའ་ལུས་མཁའ་སྤྱོད་འགྲུབ་པའི་གྲོགས་མཛོད་ཅིག །སྨན་གཏོར༴ དམ་ཅན་ཆོས་སྐྱོང་རྣམས་ཀྱི་རྡོ་རྗེའི་ལྗགས། །མཚོན་ཆའི་སྦུ་གུས་དྲངས་ཏེ་བཞེས་སུ་གསོལ། །ཨོཾ་སརྦ་དྷརྨ་པཱ་ལ་ས་པཱ་རི་ཝ་ར་ཨི་དཾ་སོགས། ཁྲག་འཐུང་རྡོ་རྗེ་སྲིན་པོ་ཚོགས་ཀྱི་བདག །ལེགས་ལྡན་ནག་པོ་ལྗང་སྔོན་དྲག་པོ་དང༌། །བྱ་རོག་མཚན་ཅན་མྱུར་མཛད་ཡེ་ཤེས་མགོན། །དཔལ་མགོན་མ་ནིང་རྡོ་རྗེ་གུར་མགོན་དང༌། །སྟོབས་འཕྲོག་དབང་པོ་ཞང་བློན་ཨ་གྷོ་ར། །

སྟག་ཞོན་བེང་མ་གྲི་གུག་སེང་ཞོན་དང༌། །ལས་མཛད་བདུད་མགོན་ཆེན་པོ་ཏྲཀྴད་སོགས། །སྐུ་གསུང་ཐུགས་ཡོན་ཕྲིན་ལས་མགོན་པོའི་རིགས། །དུར་བདག་ཡབ་ཡུམ་རྟ་ནག་དྲེགས་པ་ལ། །དམ་རྫས༴ སྨུག་ནག་ཁྲོས་མ་སྔགས་ཀྱི་བདག་མོ་ཆེ། །ཤན་པ་ནག་མོ་འབར་མ་མེ་ཡི་གདོང༌། །ཡུམ་ཆེན་དཔལ་འབར་རེ་ཏི་མཆེད་དེ་བཞི། །ཁྲག་འཐུང་དུད་སོལ་མ་དང་དམག་ཟོར་རྒྱལ། །འདོད་ཁམས་དབང་ཕྱུག་མ་གཅིག་དཔལ་ལྷ་མོ། །རབ་བརྟན་མ་དང་རྡོ་རྗེ་གཤོག་རྒོད་མ། །བདེ་ཆེན་རྒྱལ་མོ་ཞི་ཆགས་ཁྲོས་པའི་གར། །སྤྱང་ཞོན་མ་དང་ཤ་ཟ་ཁ་མོ་ཆེ། །ཞིང་སྐྱོང་དུར་ཁྲོད་མ་མོ་འཁོར་བཅས་ལ། །དམ་རྫས༴ རྡོ་རྗེ་བེར་ཅན་ལྷ་མོ་རང་བྱུང་མ། །དབུགས་ལེན་བཅུ་དྲུག་ཕྱོགས་བཅུ་སྐྱོང་བའི་མགོན། །དྲེགས་པ་དོན་གཉིས་མ་སྲིང་འབར་མ་དགུ། །དུས་བཞིའི་ལྷ་མོ་དམག་རྒྱལ་མཆེད་བཞི་

ལ། །དམ་རྫས༴ སྲིན་མགོན་ཐོད་ཕྲེང་དབང་ཕྱུག་ཡབ་དང་ཡུམ། །དམར་པོ་གྱད་ཆེན་འཆི་བདག་གཤིན་རྗེའི་རྒྱལ། །ཤན་པ་དམར་ནག་གཟའ་མཆོག་རཱ་ཧུ་ལ། །མགར་བ་དམར་ནག་ཞིང་སྐྱོང་སེང་གེའི་གདོང༌། །རྒྱལ་ཆེན་སྐུ་ལྔ་གནོད་སྦྱིན་ཙིཏྟ་དམར། །རོལ་པ་རྐྱ་བདུན་རྡོ་རྗེ་བྲག་བཙན་ལ། །དམ་རྫས༴ ཅེ་སྤྱང་མ་བརྒྱད་དབང་ཕྱུག་ཉི་ཤུ་བརྒྱད། །གིང་བདུད་རྩིས་པ་འཆི་བདག་བྱེ་བ་འབུམ། །ཁམས་བརྒྱད་དམུས་ལོང་ཁྱི་སྤྱང་འབྲུག་མོ་བརྒྱད། །ཤྭ་ན་བདག་ཉིད་ས་བདག་སྐྱེས་བུ་གིང༌། །རྗེ་མོ་བཅུ་བཞི་སྨན་མོ་ལྔ་བཅུ་བརྒྱད། །སྡེ་དཔོན་སུམ་ཅུ་སྔགས་བདག་བཅོ་བརྒྱད་དང༌། །ཕྱི་ནང་གསང་བ་ཡང་གསང་བཏགས་ཤིང་ཆགས། །གབ་སྦས་ལས་མྱུར་མཆོག་གི་སྡེ་བརྒྱད་རིགས། །དྲེགས་པ་རྐྱ་གསུམ་དྲེགས་པ་སྡེ་ལྔ་སོགས། །གནས་གཏེར་སྲུང་མ་དམ་ཅན་རྒྱ་མཚོ་

ལ། །དམ་རྫས༴ ཕྱི་ནང་གསང་བའི་བར་ཆད་སྲུང་ཞིང་ཟློག །དགྲ་བགེགས་བྱད་མ་ཐལ་བའི་རྡུལ་བཞིན་རློག །བྷྲཱུྃ་ལས་རིན་ཆེན་སྣོད་དུ་དཀར་མངར་བཅུད། །འདོད་རྒུ་ཀུན་འབྱུང་ཟག་མེད་བདུད་རྩིའི་མཚོ། །ནོར་ལྷ་གཏེར་བདག་རྣམས་ཀྱི་རྫུ་འཕྲུལ་ལྗགས། །རིན་ཆེན་སྦུ་གུས་དྲངས་ཏེ་བཞེས་སུ་གསོལ། །ཨོཾ་སརྦ་ཡཀྵ་ཛཾ་བྷ་ལ་བ་སུ་པ་ཏི་ས་པཱ་རི་ཝ་ར་ཨི་དཾ་སོགས། རྒྱལ་ཆེན་རྣམ་མང་ཐོས་སྲས་རིགས་ཆེན་བརྒྱད། །དཔལ་གྱི་ལྷ་མོ་ནོར་བདག་གྲོགས་མོ་བརྒྱད། །ཛཾ་ལྷ་དཀར་སེར་དམར་ལྗང་ནག་པོ་དང༌། །ཀུ་བེ་ར་སོགས་རྟ་བདག་ཆེན་པོ་བརྒྱད། །འབྲོག་གནས་མཆེད་ལྔ་ཨརྱ་རེ་མནྟ། །ཨ་པར་ཛི་ཏ་ཚོགས་བདག་དཀར་སེར་དམར། །གང་མཛེས་ནོར་དབང་ཀུན་འཁྱིལ་མཆེད་དེ་གསུམ། །ཇོ་བོ་སྔགས་ཀྱི་བདག་པོ་མི་མགོན་དཀར། །དོན་གྲུབ་སེར་མོ་དགེ་བསྙེན་ཡེ་ཤེས་

གྲགས། །ཕག་གདོང་མཆེད་ལྔ་འཕྲོག་མ་བུར་བཅས་ལ། །དམ་རྫས༴ སྣོད་བཅུད་རྒུད་པ་ཞི་ཞིང་དཔལ་འབྱོར་རྒྱས། །ཚེ་བསོད་དབང་ཐང་ཡར་ངོའི་ཟླ་ལྟར་སྤེལ། །གཏོར་མ་དཀར་མངར་འདོད་རྒུ་འབྱུང་བའི་བཅུད། །དཔལ་མགོན་གཞི་བདག་དཀར་ཕྱོགས་སྐྱོང་བའི་ལྗགས། །འོད་ཀྱི་སྦུ་གུས་དྲངས་ཏེ་བཞེས་སུ་གསོལ། །ཨོཾ་སརྦ་ལོ་ཀ་པཱ་ལ་བྷཱུ་མི་པ་ཏི་ས་པཱ་རི་ཝ་ར་ཨི་དཾ་སོགས། ལྷ་ཀླུ་གཟའ་ཆེན་རྒྱུ་སྐར་ཉི་ཤུ་བརྒྱད། །ཕྱོགས་སྐྱོང་འཇིགས་བྱེད་རྒྱལ་པོ་ཆེན་པོ་བཞི། །དབང་ཆེན་བརྟན་མ་འབྱུང་ལྔ་སྤར་སྨེ་དང༌། །ལོ་ཟླ་ཞག་དུས་ཕྱོགས་མཚམས་ས་ཡི་བདག །དཀར་པོ་བརྒྱད་ཅུ་ཨ་ཕྱི་མཆེད་ལྔ་ལ། །དམ་རྫས༴ སྨན་བཙུན་ཚེ་རིང་མཆེད་ལྔ་སྤྲུལ་འཁོར་བཅས། །བརྟན་སྐྱོང་ཡ་མ་བཅུ་གཉིས་མཐུ་ཆེན་བཞི། །མགུར་ལྷ་བཅུ་གསུམ་སྲིད་པའི་ལྷ་ཆེན་དགུ། །གཉན་ཆེན་

ཐང་ལྷ་སྨྱོ་ཁ་མཁའ་རི་དང༌། །མཁར་ནག་རྡོ་རྗེ་རྒྱལ་སོགས་སྤྲུལ་བསྒྱུར་བརྒྱད། །རྨ་རྒྱལ་སྤོམ་ར་སྐུ་རྗེ་སེང་ཆེན་རྒྱལ། །དགེ་བསྙེན་ཉེར་གཅིག་ཡུལ་འདིའི་གཞི་བདག་ལ། །དམ་རྫས༴ སྐྱོབ་པའི་ལྷ་ལྔ་བསྟེན་པའི་ལྷ་དགུ་དང༌། །མིའུ་གདུང་དྲུག་ཕ་མཚུན་དགྲ་བླའི་ཚོགས། །ལུང་ལྔ་ལྗོངས་གསུམ་གླིང་གཅིག་སྒྲུབ་གནས་བརྒྱད། །གངས་རི་ཉེར་གཅིག་གནས་ཆེན་ཉེར་ལྔ་སོགས། །གནས་ཆེན་གནས་ཕྲན་སྲུང་ཞིང་སྐྱོང་རྣམས་དང༌། །མདོར་ན་སྟོང་གསུམ་འཛམ་གླིང་བོད་ཡུལ་གྱི། །གནས་ཡུལ་གཞི་བདག་རིགས་ཆོས་རྒྱུད་སྲུང་ལ། །དམ་རྫས་ཡེ་ཤེས་བདུད་རྩིའི་མཆོད་པ་འབུལ། །འཇིག་རྟེན་བདེ་ཞིང་བསྟན་འགྲོའི་དགེ་ལེགས་འཕེལ། །རྣལ་འབྱོར་བསམ་པ་འགྲུབ་པའི་སྡོང་གྲོགས་མཛོད། །མགྲོན་རིགས་ཀུན་གྱི་སྐུ་གསུང་ཐུགས་ཡོན་ཏན། །ཕྲིན་ལས་བཅས་ལ་གུས་པས་

བསྟོད་པར་བགྱི། །ནོངས་པ་ཅི་མཆིས་ཆོས་དབྱིངས་ཀློང་དུ་བཤགས། །ཡེ་ཤེས་བརྩེ་བ་ཆེན་པོས་བཟོད་མཛོད་ལ། །ལས་དང་དངོས་གྲུབ་ཐོགས་པ་མེད་པར་སྩོལ། །རྟག་ཏུ་དགྱེས་པས་དགོངས་ཏེ་ཕྲིན་ལས་མཛོད། །རྩ་གསུམ་ནོར་ལྷ་རྟེན་ལ་རྟག་ཏུ་བཞུགས། །འཇིག་རྟེན་པ་རྣམས་སོ་སོའི་གནས་སུ་གཤེགས། །འདི་ཕྱི་ཀུན་ཏུ་དགེ་བའི་སྣང་བ་ཡིས། །བརྟན་གཡོ་ཀུན་ཁྱབ་བཀྲ་ཤིས་དཔལ་འབར་ཤོག །ཅེས་པ་འདིའང་སྒྲུབ་བརྩོན་སྡེ་སྣོད་འཛིན་པ་ཕུར་བླ་ཀརྨ་མཐུ་སྟོབས་ནས་བསྐུལ་ངོར། དུས་མཐའི་གཏོར་མའི་སློབ་དཔོན་ཀརྨ་ངག་དབང་ཡོན་ཏན་རྒྱ་མཚོས་ཙཱ་འདྲ་རིན་ཆེན་བྲག་ཏུ་བྲིས་པ་དགེ་ལེགས་འཕེལ།། །།

འབའ་རོམ་ལས་རྟགས་ཀྱི་རྟོགས་བརྗོད་བདེ་ཆེན་འོད་འབར།

༄༅། །འབའ་རོམ་ལས་རྟགས་ཀྱི་རྟོགས་བརྗོད་བདེ་ཆེན་འོད་འབར་བཞུགས། མཉམ་མེད་མར་པའི་བཀའ་བརྒྱུད་གངས་རི་བརྗིད། །སྒྲུབ་བརྒྱུད་འབའ་རོམ་རྒྱལ་བའི་མཚན་སྙན་བཀྲ། །ཟབ་རྒྱས་མདོ་ཡི་འཁོར་ལོ་འོད་སྟོང་འཕྲོ། །ངེས་གསང་སྔགས་ཀྱི་རྡོ་རྗེ་གཞོམ་གཞིག་བྲལ། །བདེ་ཆེན་དགའ་བཞི་འབར་བའི་ཐིག་ལེ་འཁྱིལ། །སྙན་བརྒྱུད་ནོར་བུ་རྣམ་གསུམ་གཏེར་ཁ་བྱེ། །ཐབས་ཤེས་ཕྲིན་ལས་ཉི་ཟླ་སྲིད་ཞིར་བརྡལ། །ཡེ་ཤེས་འོད་ལྔའི་མུ་ཁྱུད་ཀུན་ནས་མཛེས། །འདི་ལྟར་རྟེན་འབྱུང་སྒྱུ་མའི་སྣང་ཆ་ལས། །འགགས་མེད་ཤར་བའི་རྣམ་དཀར་ལེགས་བྱས་ཀྱིས། དྭགས་བརྒྱུད་སྙིང་པོ་འབའ་རོམ་རྒྱལ་བའི་བསྟན། །དར་རྒྱས་ཡུན་གནས་ས་གསུམ་ཀུན་ཏུ་ཁྱབ། བཀྲ་ཤིས་འོད་སྣང་རྒྱས་པའི་རྒྱུར་གྱུར་ཅིག །གུས་པའི་བསྟོད་ཚིག་འདིའང་འབའ་རོམ་པའི་བརྒྱུད་འཛིན་ཡོངས་ཀྱི་མོས་མཐུན་ལྟར་ཀརྨ་སྒྲུབ་བརྒྱུད་བསྟན་པའི་རྒྱལ་མཚན་དཔལ་བཟང་པོས་སྨོན་པ་དགེ་ལེགས་འཕེལ། ༈ གནས་བརྟན་ཉེ་བར་འཁོར་གྱི་བཙུན་ཚུལ་དང་། །འཛམ་གླིང་མཛེས་རྒྱན་དྲུག་གི་མཁས་ཚུལ་དང་། །དབང་ཕྱུག་བཞད་པ་རྡོ་རྗེའི་གྲུབ་ཚུལ་གྱིས། །འབའ་རོམ་རྒྱལ་བའི་བསྟན་པ་རྒྱས་གྱུར་ཅིག །

འདིར་འབད་དགེ་བས་བདག་གཞན་འགྲོ་བ་ཀུན། །ཨེ་ཝཾ་ཟུང་འཇུག་མཆོག་གི་སྡོམ་པ་ཆེ། །མི་བསྐྱོད་ཧེ་རུ་ཀ་དཔལ་འབའ་རོམ་པ། །དབྱེར་མེད་བླ་མའི་གོ་འཕང་མྱུར་ཐོབ་ཤོག །