སྡེ་དགེའི་བཀའ་འགྱུར་པོད་བརྒྱད་ཅུ་གྱ་གསུམ་པ།

འཕགས་པ་ལག་ན་རྡོ་རྗེ་གོས་སྔོན་པོ་ཅན་དྲག་པོ་གསུམ་འདུལ་བ་ཞེས་བྱ་བའི་རྒྱུད།

རྒྱུད་འབུམ་ཇ་པ་བཞུགས་སོ།

རྒྱ་གར་སྐད་དུ། །ཨཱརྱ་ནཱི་ལཱ་མ་བ་ར་དྷ་ར་བཛྲ་པཱ་ཎི་རུ་དྲ་བི་ཏྲི་བི་ན་ཏན་ཏྲ་ནཱ་མ། བོད་སྐད་དུ། འཕགས་པ་ལག་ན་རྡོ་རྗེ་གོས་སྔོན་པོ་ཅན་དྲག་པོ་གསུམ་འདུལ་བ་ཞེས་བྱ་བའི་རྒྱུད། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདུད་རྣམ་པར་འཇོམས་པ་བདུད་ཀྱི་སྡེ་དང་ལྷན་ཅིག་ཏུ་འོག་མིན་གཞན་འཕྲུལ་དབང་བྱེད་ཀྱི་ཕོ་བྲང་ན་ཐབས་ཅིག་ཏུ་བཞུགས་སོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་རྗེས་སུ་གནང་བ་འདི་ལག་ན་རྡོ་རྗེས་ཟུང་ཅིག་ཏུ་ཅེས་བཀའ་སྩལ་ཏོ། །དེ་ནས་ཕྱག་ན་རྡོ་རྗེས་གསོལ་པ། གནོད་སྦྱིན་བྱེ་བ་སྟོང་ཕྲག་བྱེ་བ་དཔག་ཏུ་མེད་པའི་ཚོགས་ཀྱིས་ཡོངས་སུ་བསྐོར་བ། མཆེ་བ་གཙིགས་པ་དང་འཚམ་པ། མིག་མེ་མདག་གི་ཕུང་པོ་འདྲ་བ། དབུགས་མེ་ལྕེ་ལྟར་འབར་བ། འཇིགས་པའི་ང་རོ་ཅན།

པད་མ་དང་ཆུ་ལྷས་ལག་པ་དང་དཔུང་པ་བརྒྱན་པ། ནོར་རྒྱས་དང་དུང་སྐྱོང་གིས་དབུ་ལ་བརྒྱན་པ། སྦྲུལ་རིན་པོ་ཆེ་འབར་བའི་ཅོད་པན་ཐོགས་པ། ཀླུ་དགའ་བོ་དང་ཉེ་དགའ་བོ་འབར་བས་སྙན་ཆ་བྱས་པ། རྐང་པས་སྦྲུལ་གདུག་པ་འབར་བ་མནན་ཅིང་ཟ་བ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། སྦྲུལ་ནག་པོ་སེ་རལ་ཁར་ཐོགས་པ། བཞིན་རྒྱས་པ་སྨིན་མ་ཁྲོ་གཉེར་དུ་བསྡུས་པ། ཡ་སོས་མ་མཆུ་མནན་པ། ལྕེ་གློག་ལྟར་འགྱུ་བ། གཤིན་རྗེའི་ཆ་བྱད་ཅན། གསུས་པོ་ཆེ་སྦྲུལ་ཟ་བ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པས་རྐང་པའི་པུས་མོར་ཕྱིན་པ། དབང་པོ་དང་ཉི་མའི་སྟེང་ན་བཞུགས་པ། ལག་པ་བརྡབས་པའི་སྒྲས་འཇིགས་པར་བྱེད་པ། ཨ་ལ་ལ་ཞེས་སྒྲ་བསྒྲགས་པས་སྐྲག་པར་བྱེད་པ། ཀླུ་ཐམས་ཅད་རླག་པར་བྱེད་པ། གད་རྒྱངས་ཆེན་པོ་དགོད་པས་ཀུན་ཏུ་འཁྲུག་པར་བྱེད་པ། གཤིན་རྗེའི་གཟུགས་ཅན་ཁམས་གསུམ་འཇིགས་པར་བྱེད་པ། ཀླུ་རྣམས་འདུལ་བར་བྱེད་པ་དེ་ལ་ཕྱག་འཚལ་ལོ་ཞེས་བྱང་ཆུབ་སེམས་དཔའ་ཕྱག་ན་རྡོ་རྗེས་བསྟོད་ནས་གསུང་དུ་གསོལ་ཞེས་སྨྲས་སོ། །དེ་ནས་ནམ་མཁའ་དེ་ཉིད་ལ་གཞལ་ཡས་ཁང་དང་། འཁོར་ལོ་ཆེན་པོའི་ཏིང་ངེ་འཛིན་དང་ལྡན་པའི་དྲག་པོ་ཆེན་པོས་འཁོར་བསྡུས་ནས། ཕྱག་ན་རྡོ་རྗེ་དྲག་པོ་ཆེ། །རྡོ་རྗེ་ཁྲོ་བོ་དྲག་ཆེན་འཇོམས། །རྡོ་རྗེ་གཟི་བརྗིད་སྔགས་ཀྱི་གཙོ། །རྡོ་རྗེ་མི་ཐུབ་འཇིགས་བྱེད་ཆེ། །རྡོ་རྗེ་ཕྲིན་ལས་ཀུན་དོན་མཛད། །ཐབས་འདུལ་འཁོར་ལོ་ཆེ་སྐུ་ལ། །འབྱུང་བ་ལྔ་ཡི་བདག་ཉིད་ཆེ། །མཛེས་ལྡན་འོད་ཟེར་

ཅན་དང་ནི། །མདངས་ཅན་སྒྲ་དབྱངས་རླུང་འབྱིན་ཏེ། །སྐྱེད་བྱེད་ལས་ཀུན་སྒྲུབ་པ་ལ། །འགུགས་ཤིང་སྡུད་དང་སྡོམ་ཞི་མཛད། །མཐའ་བརྟུལ་ལས་རྣམས་སྒྲུབ་པ་ལ། །ཐིག་ལེའི་རང་བཞིན་མི་ཤིགས་ལ། །ཁ་སྦྱོར་ཉི་ཟླའི་འཕྲོ་འདུ་ལས། །བགེགས་རིགས་སྟོང་ཕྲག་འཇོམས་མཛད་པ། །འཁོར་ལོའི་བདག་པོ་ཁྱོད་ལ་བསྟོད། །ས་བོན་རབ་ཏུ་འབར་བ་ཡིས། །ཐབས་དང་ཤེས་རབ་སྲེག་གསོ་མཛད། །བདེ་ཆེན་རབ་ཏུ་གསོལ་མཛད་ནས། །སྡུག་བསྔལ་ཉོན་མོངས་འཇོམས་ལ་འདུད། །ཨོཾ་ཨ་ཀཱ་རོ་མུ་ཁྃ་སརྦ་དྷརྨཱ་ཎཱྃ་ཨཱདྱཱ་ནུ་ཏ་པན་ན་ཏྭད་ཨོཾ་ཨཱཿཧཱུྃ་ཞེས་བཅོམ་ལྡན་འདས་ཀྱིས་དཀྱིལ་འཁོར་གྱི་ལྷ་ལ་བསྟོད་ནས་འཛུམ་པ་མཛད་དོ། །བྱང་ཆུབ་སེམས་དཔའ་ཕྱག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ནས་འཁོར་རྣམས་སྤྲོས་ཏེ། དེ་ནས་ཕྱག་ན་རྡོ་རྗེས་བཅོམ་ལྡན་འདས་ལེགས་སོ་ལེགས་སོ། །དེའི་ཕྱིར་འདིའི་གསང་སྔགས་ལས་ཐམས་ཅད་སྒྲུབ་པ། སྡིག་པ་ཐམས་ཅད་འཇོམས་པ། དྲག་པོ་གསུམ་འདུལ་བ་འདི་གསུང་དུ་གསོལ་ཞེས་བརྗོད་ནས་བསྐོར་བ་བྱས་ཏེ་སྤྱན་སྔར་འཁོར་རྣམས་དང་ལྷན་ཅིག་ཏུ་འདུག་གོ །དེ་ནས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་ཤིང་བྱིན་གྱིས་བརླབས་པའི་རིག་སྔགས་འདི་གདུག་པ་ཅན་རྣམས་འདུལ་བའི་དོན་དུ་བརྗོད་པར་བྱའོ། །ཏད་ཡ་ཐཱ། བྷོ་བྷོ་པཱན་ནཱ་ག་ཨ་དྷི་པ་ཏ་ཡེ།ཨི་དན་ནཱི་ལཱམ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡྃ། ཡཿས་མཱ་ཏི། ཀྲ་མ་ཐ། ཨུཏ་སཱ་ད་ནྃ་བྷ་བཾ་ཥྱ་ཏི། ཏདྱ་ཐཱ། བུད་དྷ་བུད་དྷ་བི་བུད་དྷ་བི་བུད་དྷ། མ་ཏི་པྲཱ་པ་ཏ། ཧ་ར་ཧ་ར་ནཱ་གཱ་ནཱཾ། པྲ་ཧ་ར་པྲ་ཧ་ར་སརྦ་ནཱ་གཱ་ནཱཾ། ཙྪིན་ད་ཙྪིན་ད་ནཱ་ག་ཧྲྀ་ད་ཡཱ་ནི། བྷིན་དྷ་བྷིན་དྷ་ནཱ་ག་མརྨཱ་ཎི། བི་ཤཱིཪྻནྟུ་ནཱ་གཱ་ཤ་རཱི་རྃ། བི་སྥོ་ཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ་ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཕཊ། ནཱ་གོ་ཏ་སཱ་ད་ནཱ་ཡ་ཕཊ། ནཱི་ལཱ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ་པར་ཀྲ་མཱ་ཡ་ཕཊ། ཀྲྀ་ཏཱན་ཏཱ་ཡ་ཕཊ། ཀྲི་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ།

ཀུཤྨཱ་ཎྜོཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤཱ་ཀ་རཱ་ཡ་ཕཊ། ཡཀྵ་ཨ་པ་སྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣཱན་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སྃ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱ་མ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། དེའི་ཚེག་ནི་གནོད་སྦྱིན་གྱི་གདོན་གྱིས་ཟིན་པ་ལ་ཆུ་ལ་སྔགས་བཏབ་སྟེ་གཏོར་ན་བཏང་བར་འགྱུར་རོ། །ཀླུ་ཟློག་པར་བྱེད་ན་སྨག་ཤད་ཀྱི་ལྕུག་མ་འམ། བལ་པོ་སེའུའི་ལྕུག་མས་བྱའོ། །ཡི་དགས་དང་བརྗེད་བྱེད་རྣམས་ལ་ནི་སྐུད་པས་བྱའོ། །རིམས་ནད་མེད་པར་བྱ་བ་དང་། གཞོགས་ཕྱེད་ན་བ་དང་། ཡི་ག་འཆུས་པ་ལ་ནི་སྐུད་པ་སྔོན་པོས་བྱའོ། །ནོར་འདོད་པ་ལ་ནི་ཞག་གཅིག་སྨྱུང་བར་འདུག་སྟེ་སྤོས་ཀྱིས་བདུགས་ན་རྨི་ལམ་དུ་དགེ་བ་དང་མི་དགེ་བའི་དོན་ཐམས་ཅད་སྟོན་ནོ། །མཆོད་རྟེན་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོ་ལ་སོགས་པས་མཆོད་ལ་སྔགས་སྟོང་བཟླས་ནས་གསོལ་བ་བཏབ་ན་གསེར་གྱི་དོང་ཚེ་བདུན་སྟོང་སྦྱིན་པར་བྱེད་དོ། །རྒྱས་བཏབ་པ་འགྲོལ་བར་འདོད་ན་ཐལ་བས་བྱའོ། །སྒོ་ལྕགས་དབྱེ་བར་འདོད་ན་ཡུངས་ཀར་གྱིས་བྱའོ། །འཇིགས་པ་ཐམས་ཅད་ལས་བསྲུང་བ་ལ་ནི་རྩི་མར་རྙིང་པ་དང་ཐལ་བ་དང་ཡུངས་ཀར་གྱིས་བྱའོ། །ནད་ཀྱི་འཇིགས་པ་ཐམས་ཅད་ལ་ནི་སྐུད་པ་སྔོན་པོ་ལ་བསྲུང་བའི་མདུད་པ་བྱས་ཏེ་མགུལ་དུ་བཏགས་ན་སྲུང་བའི་མཆོག་ཏུ་འགྱུར་རོ། །བྱིས་པ་གདོན་གྱིས་ཉེན་པ་ཐམས་ཅད་ལ་ནི་ཚོན་སྣ་ལྔའི་སྐུད་པ་མགུལ་དུ་བཏགས་ན་སྲུང་བའི་མཆོག་ཏུ་འགྱུར་རོ། །ཆོམ་རྐུན་བཟློག་པར་འདོད་ན་སས་བྱའོ། །དུག་ལ་ནི་རྩྭ་ཀུ་ཤས་བྱབ་པར་བྱའོ། །བདག་བསྲུང་བ་ལ་ནི་ཡིད་ཀྱིས་སམ་ཆུས་བྱའོ། །གཞན་བསྲུང་བ་ལ་ནི་སྐུད་པ་སྔོན་པོས་བྱའོ། །ལས་དེ་དག་ཐམས་ཅད་ལ་སྔགས་བརྗོད་པ་ནི་གཅིག་གམ། གསུམ་མམ། ལན་བཅུ་བཞི་འམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་བཟླས་ན་འགྲུབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་

སྩལ་པ་དང་། བྱང་ཆུབ་སེམས་དཔའ་ཕྱག་ན་རྡོ་རྗེ་དང་། བདུད་དཔུང་དང་བཅས་པ་རྗེས་སུ་ཡི་རང་སྟེ་བསྟན་པ་ལ་འཁོད་དོ། །འཕགས་པ་ལག་ན་རྡོ་རྗེ་གོས་སྔོན་པོ་ཅན་དྲག་པོ་གསུམ་འདུལ་བ་ཞེས་བྱ་བའི་རྒྱུད་རྫོགས་སོ།། །།བལ་པོའི་པཎ་ཌི་ཏ་དེ་ཝ་པུཎྱ་མ་ཏི་དང་། ལོ་ཙྪ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།

གསང་བའི་རྒྱུད་རྣམས་ཀྱི་རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ།

རྒྱ་གར་སྐད་དུ། བི་བྷངྒ་གུ་ཧྱ་ཏནྟྲ་ཎཱཾ་ཏྲི་རུ་དྲ་ད་མ་ནཾ་ནཱ་མ། བོད་སྐད་དུ། གསང་བའི་རྒྱུད་རྣམས་ཀྱི་རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ། འཇམ་པའི་རྡོ་རྗེ་ལ་ཕྱག་འཚལ་ལོ། །དེ་ནས་ཕྱག་ན་རྡོ་རྗེ་ཡིས། །གསང་བའི་དོན་འདི་ཡང་དག་ཞུས། །སྒྲུབ་དང་གནས་དང་མཚན་ཉིད་གང་། །རྫོགས་སངས་རྒྱས་ཀྱིས་བཀའ་སྩལ་པ། །ཤེས་རབ་སྙིང་རྗེ་གསང་དབང་ལྡན། །ལྕགས་འདྲའི་རི་དང་བྱ་སྐྱིབས་དང་། །ནགས་ཚལ་མཐུག་དང་མཆོད་རྟེན་ནང་། །ཞལ་གསུམ་ཕྱག་དྲུག་འཇིགས་པ་ཆེ། །མཆེ་བ་གཙིགས་པ་ནག་པོ་སྟེ། །དཀར་པོ་གཡས་ཏེ་ཁྲོས་པའི་མདོག །ཧཱུྃ་སྒྲོགས་མེ་ལྕེ་འབར་བའི་དབུགས། །དམར་སེར་གཡོན་ཏེ་བཞད་པའི་ཞལ། །སྤྱན་དམར་མེ་དཔུང་དང་འདྲ་བ། །ཟླ་བ་རྒྱས་པ་ལྟ་བུའི་ཞལ། །ནོར་རྒྱས་དུང་སྐྱོང་སེར་པོས་དབུ། །དགའ་བོ་ཉེ་དགའ་སྙན་ཆ་དམར། །དཔུང་པ་པད་མ་ཆུ་ལྷ་དཀར། །སེ་རལ་འདབ་བཟངས་རིགས་ལྡན་གནག །ཚམ་ངམ་རྡོ་རྗེ་སྡིགས་མཛུབ་དང་། །ཐལ་མོས་བདུད་འཇོམས་སྦྲུལ་ནག་འཛིན། །ཞལ་གསུམ་པ་སྟེ་འཇིགས་པ་ཆེ། །སྐུ་གསུམ་དག་གིས་རབ་ཏུ་མཚན། །ཕོ་ཉ་གསུམ་གྱིས་གདུག་པ་འདུལ། །ཀླུ་ཡི་གཉེན་པོ་གནོད་སྦྱིན་བདག །བདུད་འདུལ་ཚངས་པའི་ཕོ་ཉ་ནི། །ཟླ་བ་ཉི་མ་དག་གི་སྟེང་། །གླང་ཆེན་ཀར་ཀ་གསེར་གྱི་གདན། །བརྒྱ་བྱིན་སེར་པོ་རྡོ་རྗེ་འཛིན། །ཚངས་པ་རལ་གྲི་པད་མ་འཛིན། །ཀླུ་འདུལ་སྦྲུལ་ནག་འཛིན་པའོ། །བདུད་འདུལ་དབང་པོ་ཉི་མའི་སྟེང་། །གནོད་སྦྱིན་ཟླ་དང་སྟོབས་ཀྱི་སྟེང་། །ཀླུ་འདུལ་རི་སྟེང་རྒྱ་མཚོའི་ནང་། །སྦྲུལ་ནག་འཁྱིལ་པ་སྟོབས་ལྡན་ཏེ། །

མཁའ་དང་རི་བོས་མནན་པའི་སྟེང་། །གསེར་མདོག་སྟོབས་གཉིས་གསེར་གྱི་གདན། །བརྒྱད་ཁྲིར་ཞབས་བཞག་རི་རབ་མནན། །མེ་དཔུང་སྐུ་ལ་འཁྲུགས་པའི་འོད། །ཁམས་གསུམ་ཁྱབ་མཛད་ཁྲོ་བོ་འཕྲོ། །སངས་རྒྱས་འདུས་པའི་སྐུར་ཕྱག་འཚལ། །དེ་ནས་གསང་བའི་དཀྱིལ་འཁོར་ནི། །རྡོ་རྗེ་མེ་དཔུང་འོད་དང་ལྡན། །དེ་ཉིད་མཁའ་དང་འབྱུང་བ་ལས། །དུར་ཁྲོད་བརྒྱད་དང་ལྡན་པའི་གནས། །བདག་པོའི་ས་བོན་ལས་བྱུང་བ། །ཟླ་ཉི་ཐོད་པ་རྡོ་རྗེ་ལས། །དྲག་པོའི་རྟགས་ལྡན་གཙོ་བོ་ཆེ། །མཛེས་ལྡན་སྐུ་ལ་ཡང་དག་འཁྲིལ། །དྲག་ཆེན་འདུལ་མཛད་དྲི་ཟའི་གཙོ། །མདོག་དཀར་རྩེ་གསུམ་འབར་བ་འཛིན། །འོད་འཕྲོ་དཀར་མོ་སྐུ་ལ་འཁྲིལ། །འཇོམས་མཛད་སྤུ་གྲི་འབར་བ་འཛིན། །མགོན་པོ་གཟི་བརྗིད་གཤིན་རྗེའི་བདག །མདོག་སེར་དབྱུག་ཐོས་གཤིན་རྗེ་འདུལ། །མདངས་ལྡན་སེར་མོ་སྐུ་ལ་འཁྲིལ། །འཇའ་འདྲ་བ་ཡི་ཟངས་གྲི་བསྣམས། །འབྲུག་སྒྲ་སྒྲོགས་པ་ཀླུ་ཡི་གཙོ། །མདོག་དམར་ཀླུ་འདུལ་སྦྲུལ་གྱི་ཞགས། །སྒྲ་ཡི་ལྷ་མོ་སྐུ་ལ་འཁྲིལ། །མདོག་དམར་གཅོད་པའི་སྟེའུ་བསྣམས། །ཕྲིན་ལས་ཁྲོ་བོ་གནོད་སྦྱིན་བདག །ལྗང་ནག་བེ་ཅོན་གནོད་སྦྱིན་འདུལ། །རླུང་འབྱིན་ལྗང་གུ་སྐུ་ལ་འཁྲིལ། །འབར་བའི་འཁོར་ལོ་ཕྱག་ན་བསྣམས། །འགུགས་པ་ལྕགས་ཀྱུ་ལྕགས་ཀྱུ་སྟེ། །སྡུད་པ་ཞགས་པ་ཞགས་པའི་བདག །སྡོམ་པ་ལྕགས་སྒྲོག་ལྕགས་སྒྲོག་སྟེ། །ཞི་མཛད་དྲིལ་བུ་དྲིལ་བུ་ཞི། །ཁ་སྦྱོར་བདེ་དང་ལོངས་སྤྱོད་དང་། །ཆོས་དང་སྤྲུལ་པའི་འཁོར་ལོ་ལ། །ས་བོན་རབ་ཏུ་འབར་བ་ཡིས། །ཐབས་དང་ཤེས་རབ་སྲེག་གསོ་མཛད། །ཉི་མ་ཟླ་བའི་འཕྲོ་འདུ་ལས། །ཐིག་ལེའི་རང་བཞིན་མི་ཤིགས་ལ། །གསང་བའི་རྒྱུད་ཀྱི་རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ་ལས་ལེའུ་དང་པོའོ།། །།དེ་ནས་ཡང་དག་བཤད་བྱ་བ། །གསང་བའི་སྔགས་ནི་ཁྱོད་ཀྱིས་ཟུང་། །ལས་རྣམས་ཐམས་ཅད་འགྲུབ་པ་དང་། །སྡིག་པ་དག་ནི་ཞི་བའི་ཕྱིར། །ཀླུ་

དང་གནོད་སྦྱིན་བསྡིགས་པ་དང་། །བདུད་རྣམས་མ་ལུས་ཞི་བྱེད་པའི། །དུས་གསུམ་སངས་རྒྱས་བྱིན་བརླབས་པའི། །རྡོ་རྗེ་ཅན་གྱི་སྔགས་བཤད་བྱ། །ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དན་ནཱི་ལཱམ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡྃ། ཡཿས་མཱ་ཏི་ཀྲ་མ་ཐ་མཱ་ཀུ་ལོཧྶཱད་ནཾ་བྷཱ་བིཥྱནྟི། ཏདྱ་ཐཱ། བུད་དྷ་བུད་དྷ། བི་བུད་དྷ་བི་བུད་དྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱན། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪིན་ད་ཙྪིན་ད་ནཱ་ག་ཧྲྀ་ད་ཡཱ་ནི། བྷིན་དྷ་བྷིན་དྷ་ནཱ་ག་མརྨཱ་ཎི་ཎི། བི་ཤཱིརྱན་ཏུ་ནཱ་ག་ཤཱ་རཱི་རཱ་ཎི། བི་སྥོ་ཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ། ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ཕཊ། ནཱ་གོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བ་ས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་པ་རཱ་གྲ་མཱ་ཡ་ཕཊ། ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎ་ཡ་ཕཊ། ཏྲ་ས་ནཱ་ཡ་ཕཊ། ཀུཤྨཱཎྜོཏྶཱད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པ་སྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བི་གྷྣཱྃ། བིནཱ་ཤེ་ཀ་རཱ་ཡ་ཕཊ། སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱྃ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། ཞེས་པ་ཕྲེང་བའི་གསང་བའི་སྔགས་སོ། །སངས་རྒྱས་གང་གཱའི་ཀླུང་གིས་གསུངས་པའི། །རིག་སྔགས་འདིས་ནི་སྡིག་པ་ཐམས་ཅད་འདག་པ། མ་རུངས་པ་ཐམས་ཅད་འཇོམས་པ། ལས་ཐམས་ཅད་འགྲུབ་པ་ཡིན་ཏེ། དེ་ཡང་རིག་པ་འཛིན་པས་སྒྲུབ་སྟེ་དམ་ཚིག་དང་ལྡན་པས་སོ། །དེ་ཡང་བླ་མ་ལ་གུས་ཤིང་། །ཡི་དམ་དཀོན་མཆོག་ལ་དད་ཅིང་། །བྱང་ཆུབ་སེམས་དང་སྡོམ་པ་དང་། །ལྷ་དང་སྔགས་ལ་གུས་པ་དང་། །རྒྱུན་ཏུ་རྣལ་འབྱོར་དང་ལྡན་ཏེ། །རྒྱུད་དོན་དོན་ལ་བརྩོན་ལྡན་ན། །ལས་རྣམས་ཐམས་ཅད་འགྲུབ་པའོ། །བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ཀྱིས་བཀའ་བཞིན་མཛད་དེ་བཅོམ་ལྡན་འདས་ལ་ཞུས་པ། དམ་ཚིག་དག་ལས་འདས་ན་ལས་རྣམས་མི་འགྲུབ་ཅིང་། །དག་པ་མེད་དང་དོན་མེད་དག་སྟེ་

འབྲས་བུ་གང་དུ་སྐྱེ་འགྱུར་ཞེས་ཞུས་པས། རྡོ་རྗེ་དམྱལ་བའི་ནང་དུ་མི་ཟད་པའི་འབྲས་བུར་འགྱུར་རོ། །བཅོམ་ལྡན་འདས་དེའི་ཚེའི་ཚད་ཇི་ཙམ་དུ་སྡུག་བསྔལ་ཉམས་སུ་མྱོང་བར་འགྱུར་ཞེས་ཞུས་པས། །བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལེགས་སོ་ལེགས་སོ། །སྐྲག་པར་མ་བྱེད་ཅིག །འདིས་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་བཤིག་སྟེ་ཐུགས་དང་འགལ་བས་རྡོ་རྗེ་གདན་ནམ་ཞིག་ཙམ་ན་ཐར་བར་འགྱུར་རོ། །བཅོམ་ལྡན་འདས་རྡོ་རྗེ་གདན་ནམ་འཇིག་པར་འགྱུར་ཞེས་ཞུས་པ་དང་། ནམ་མཁའི་ཁམས་ཀྱི་སེམས་ཅན་ཐམས་ཅད་སངས་རྒྱས་བའི་འབྲས་བུ་ཐོབ་སྟེ་རྡོ་རྗེ་གདན་འཇིག་སྟེ་ཐར་བར་འགྱུར་རོ། །བར་མ་དོ་དང་སྐྱེ་གནས་འཇིག་པ་དག་ཡོད་དོ། །དེའི་གསང་བའི་སྔགས་ནི་ཟླ་བའི་སྟེང་དུ་ཡི་གེ་ཨ་བཀོད་དེ། ཆོས་ཉིད་དག་པའི་སྔགས་བརྗོད་དོ། །ན་མཿས་མན་ཏ་བཛྲ་ཎཱཾ་སརྦ་དྷརྨ་ཏཱ་བཛྲ་སཏྭ་ཧཱུཾ། ཞེས་ཕྱོགས་བཅུར་ཁ་བལྟས་ཏེ་རྡོ་རྗེ་ཐལ་མོ་སྦྱར་ཏེ་ཡེ་ཤེས་ཀྱི་འོད་ཀྱིས་གསོལ་བ་བཏབ་ལ། རྡོ་རྗེ་སེམས་དཔའི་སྐུར་མོས་པར་བྱའོ། །ཨོཾ་བཛྲ་སཏྭ་ཧཱུཾ་ཞེས་པ་འབུམ་དུ་བརྗོད་ན་རྩ་བའི་དམ་ཚིག་ཉམས་པ་ཞི་བར་འགྱུར་རོ། །རྡོ་རྗེ་རྡོ་རྗེ་འཇིགས་བྱེད་ཆེ། །མེ་ལོང་མེ་ལོང་གསལ་བའི་སྐུ། །ཞལ་གསུམ་ཕྱག་དྲུག་འཇིགས་པ་ཆེ། །མཚོན་ཆ་འཛིན་ལ་ཕྱག་འཚལ་བསྟོད། །དེ་བཞིན་གཤེགས་པ་དེ་བཞིན་གཤེགས། །ཆོས་དབྱིངས་ཆོས་དབྱིངས་རྣམ་པར་དག །ཞལ་གསུམ་ཕྱག་དྲུག་མཚོན་ཆ་འཛིན། །དེ་བཞིན་གཤེགས་ལ་ཕྱག་འཚལ་བསྟོད། །སོ་སོར་ཀུན་རྟོག་ཀུན་རྟོག་བྲལ། །པད་མ་དྲི་མེད་པད་མའི་བདག །ཞལ་གསུམ་ཕྱག་དྲུག་རྟ་སྐད་སྒྲོགས། །ཞལ་གསུམ་ཕྱག་དྲུག་མཚོན་ཆ་འཛིན། །རྒྱ་མཚོ་སྐྱེས་སྐུ་ཕྱག་འཚལ་བསྟོད། །རིན་ཆེན་བཻ་ཌཱུར་གཟི་བརྗིད་འབར། །མཉམ་པ་མཉམ་ཉིད་ཡེ་ཤེས་སྐུ། །ཞལ་གསུམ་ཕྱག་དྲུག་མཚོན་ཆ་འཛིན། །རིན་ཆེན་རྒྱ་མཚོ་ཕྱག་འཚལ་བསྟོད། །ལས་ཀྱི་སྐུ་སྟེ་ཕྲིན་ལས་མཛད། །བྱ་བ་བྱ་བ་སྒྲུབ་པའི་བདག །ཞལ་གསུམ་

ཕྱག་དྲུག་མཚོན་ཆ་འཛིན། །ཕྲིན་ལས་རྒྱ་མཚོར་ཕྱག་འཚལ་བསྟོད། །ཨོཾ་ཨཱ་ནན་ཏ་པ་ར་སྭཱ་ཧཱ། ཨོཾ་སུམ་བྷ་ནི་སུམ་བྷ་ཧཱུཾ། ཨཱ་ཀར་ཥ་ཡ་བན་དྷ་ཡ་སྭཱ་ཧཱ། ཧ་ཡ་གྲཱི་བ་བན་དྷ་ཤོ་ཀ་སྭཱ་ཧཱ། ཨོཾ་ཨ་པ་རེ་ཨ་པ་རཱ་ཛི་ཏ་སྭཱ་ཧཱ། རོ་ཥ་ཎཱ་ཡ་བྷྱཿཕཊ། །དེ་ནས་ལྷའི་གསང་སྔགས་བརྗོད་པར་བྱའོ། །ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ་ཕཊ། མཱ་ར་ཡ་ཙིཏྟ་ཙིཏྟ་རྦད་རྦད། ཨོཾ་བཛྲ་ཀྲོ་དྷ་མ་ཧཱ་ཀཱ་ལཱ་ཡ་ཧཱུཾ་ཕཊ། ཙིཏྟ་ལ་ཀྲོ་དྷི་དུཉྫ། ཨོཾ་བཛྲ་ཀྲོ་དྷ་ནཱ་ག་ཧཱུཾ་ཕཊ། མཱ་ར་ཡ་རཀ་ཏ་རྔུབས་རྔུབས། ཨོཾ་བཛྲ་ཀྲོ་དྷ་ཨ་མྲྀ་ཏེ་ཧཱུཾ་ཕཊ། མཱ་ར་ཡ་སོད་སོད་རྦད། དེ་ནས་ལྷ་མ་སྲིན་སྡེ་བརྒྱད་ཀྱིས་རིག་པ་ཕུལ་བ། མ་ཧཱ་དེ་བ་མཱ་ར་ཡ་སོད་སོད། མ་ཧཱ་ཡཀྵ་ཨ་སུ་ར་མཱ་ར་ཡ་ཧ་ན་ཧ་ན། ནཱ་ག་རཱ་ཛ་མཱ་ར་ཡ་ཛཿཛཿམ་ཧཱ་མ་ནི་མཱ་ར་ཡ་རྔུབས་རྔུབས། མ་ཧཱ་བྷྲུཾ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིན་ད་བྷིན་ད། ཁརྒ་མཱ་ར་ཡ་ཁོས་ཁོས། མ་ཧཱ་བྲཧྨ་དེ་ཡེ་ཕཊ། མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་མུགས་མུགས། མཱ་ར་ཎ་ཧ་ལ་ཧ་ལ། མཱ་ར་ཎ་དྷུ་ན་དྷུ་ན། མཱ་ར་ཎ་མྱོས་མྱོས། མཱ་ར་ཎ་བྱིང་བྱིང་། ཐུམ་རི་ལི་ལི། ཐུམ་རི་ལི་ལི། ཛཿཛཿ། བུམ་པ་ལེགས་པར་ལྡན་པ་ཡིས། །སྨན་གསུམ་རྩི་སྨན་སྣ་ཚོགས་དང་། །ཁ་དི་ར་ཡི་ལོ་འདབ་བཅས། །ལྕགས་ཀྱི་རྡོ་རྗེའི་ཁོང་སེང་དུ། །གསང་བའི་སྔགས་ནི་བརྗོད་པར་བྱ། །གནམ་ལྕགས་མཆུ་ནི་སྟོང་བ་རུ། །སྤྲིན་བྲལ་སེར་བ་བཅད་པའི་ཕྱིར། །གསང་བའི་སྔགས་འདི་བརྗོད་པར་བྱའོ། །ཏདྱ་ཐཱ། ཨོཾ་ཊཀྐི་ཙ་ཏི་གུ་ཧྱ་ལི་མི་ཥ་ཤ་གུ་གུ། ཤ་ཏི་བི་ཏི། ཧུ་ཡ་ཧུ་ཡ། པུ་རུ་ཏ་སྭཱ་ཧཱ། ཨོཾ་བཛྲ་པཱ་ཎི་བཛྲ་ཏཱ་ཀི་ནཱི་ནཱ་ག་ཧེ་ཧེ། ཧུ་ཡ་ཧུ་ཡ། ཧུ་ལུ་ཧུ་ལུ། པུ་རུ་ཏེ་པུ་རུ་ཏེ་སྭཱ་ཧཱ། ཨོཾ་མཉྫུ་ཤྲཱི་ཡ་མཱན་ཏ་ཀ །ཨེ་ཀཱ་པ་ར་ཧཱུཾ་ཕཊ། ཨོཾ་མ་ཎཱི་པད་མེ་བེ་ཤ་པྲ་བེ་ཤ་མཱ་མ་རུ་ལུ་བེ་ཤ་ཁ་ཐུན་བྷྱོ། ཨོཾ་བྲཧྨ་སྭ་སྟི། པུཥྚིཾ་སུ་ར་ཀཽ་ཤི་ཀ །རུ་དྲ་ཨཱི་ཤྭ་ར། བིཥྞུ། ཨཱི་ཤ་ནི། ཀུ་མཱ་ར་ཤཾ་ཀ་ར། སྨ་ར་ཤ་ཏྲཱུྃ་སྭཱ་ཧཱ། ཨོཾ་ཀརྐོ་ཊ། ཀུ་ལི་ཀ །པད་མ། མ་ཧཱ་པད་མ། ཨ་ནན་ཏ། ཏཱཀྵ་ཀ །

བཱ་སུ་ཀི །ཤང་ཁ་པཱ་ལ། ནཱ་ག་རཱ་ཛ་སྭཱ་ཧཱ། ཨོཾ་ཨཱ་དི་ཏྱ། སཽ་མ་ཨཾ་གཱ་ར། བུ་དྷཿབྲྀ་ཧ་སྤ་ཏིཿ། ཤུ་ཀྲཿ། ས་ནཻ་ཤྩཱ་ར། ཀེ་ཏུ་སྭཱ་ཧཱ། ཨོཾ་ནཀྵ་ཏྲ། ཀཱར་ཏི་ཀ །རོ་ཧཾ་ཎི། མྲྀ་ག་ཤི་རཿ། ཨརྡྲཿཔུ་ནརྦ་སུཿ། པུ་ཥཿཨ་ཤླེ་ཥཿ། མ་གྷཱ། པཱུ་ར་བ་ཕལ་གུ་ཎཱི། ཨུཏ་ཏར་ཕལ་གུ་ཎཱི་ཧ་སྟཱ་ཙི་ཏྲཱ་སྭ་ཏི། བི་ཤཱ་ཁཱ། ཨ་ནུ་རཱ་དྷ། ཛྱེཥྛཱ་མཱུ་ལཾ་པུརྦཱ་ཥཱ་ཌྷཱ། ཨུཏྟ་རཱ་ཥཱ་ཌྷཱ། ཤྲ་ཝཎཿཨ་བི་ཛི་ཏ། ཤ་ཏ་བྷི་ཥ་དྷ་ནི་ཥྛཿཔཱུར་ཝ་བྷ་དྲ་པ་དཱ། ཨུཏྟ་ར་བྷ་དྲ་པ་དཱ། རེ་བ་ཏཱི་ཨ་ཤྭི་ནཱི་བྷ་ར་ཎཱི་སྭཱ་ཧཱ། ཨོཾ་ཨིནྡྲ། ཡ་མ། བ་རུ་ཎ། ཀུ་བེར་ཨགྣི་རཱཀྵས། བཱ་ཡ་བེ། ཨཱི་ཤཱ་ན་སཱུརྱ། ཙནྡྲ་ལོ་ཀ་པཱ་ལཱ་ཡ་སྭཱ་ཧཱ། ཨོཾ་བཻ་ཤྲ་བ་ཎཿ། དྲྀ་ཌྷ་རཱཥྚྲ། བི་རཱུ་བཱཀྵ་ཌྷ་ཀ།བི་རཱུ་པཱཀྵ་སྭཱ་ཧཱ། ཨོཾ་དེ་བ་ནཱ་ག་རཱ་ཛཱ་སུ་ར་གན་དྷར་ཝཤྩ། ག་རུ་ཊ། ཀིནྣ་ར། མ་ཧོ་ར་ག །ཀུྃ་བྷཱཎྜ་སྭཱ་ཧཱ། ཧ་ར་ཧ་ར་ནཱ་ག་ཕུཿ། པྲ་ཧ་ར་པྲ་ཧ་ར་སརྦྦ་ནཱ་ག་ཕུཿ།ཙྪིན་ད་ཙྪིན་ད། ནཱ་ག་ཧྲྀ་ད་ཡཱ་ནི་ཕུཿ། བྷིན་ད་བྷིན་ད་ནཱ་ག་མ་རྨ་ཎི་ཕུཿ། བི་ཤིརྻནྟུ་ནཱ་ག་ཤ་རཱི་རཱ་ཎི་ཕུཿ། བི་སྥོ་ཊ་ཡ་ནཱ་ག་ན་ཡ་ནཱ་ཡ་ན་ནི་ཕུཿ། ནཱ་ག་བི་དཱ་ར་ནཱ་ཡ་ཕུཿ། ནཱ་གོཏྶཱ་ད་ནཱ་ཡ་ཕུཿསྭཱ་ཧཱ། ཡཀྵ་བི་དཱ་ར་ཎཱ་ཡ་ཧཱུྃ་ཕཊ། ཡཀྵ་ཀྲོ་དྷ་སཱ་ད་ནཱ་ཡ་ཧཱུྃ་ཕཊ། ཡཀྵ་ནི་ལྃ་བ་ས་ནཱ་ཡ་ཕཊ་སྭཱ་ཧཱ། ཡཀྵ་ཨ་པྲ་ཏི་ཧ་ཏ་བ་ལཱ་ཡ་ཕཊ། ཡཀྵ་པ་ར་ཀྲ་མཱ་ཡ་ཕཊ། ཡཀྵ་ཀྲྀ་ཏཱན་ཏཱ་ཡ་ཕཊ། ཡཀྵ་ཀྲྀ་ཏཱན་ཏཱ་རཱུ་པཱ་ཡ་ཕཊ། ཡཀྵ་རོ་ཥ་ཎཱ་ཡ་ཕཊ། དེ་སྐད་ཅེས་བཀའ་སྩལ་ནས་ཐམས་ཅད་དབང་དུ་འདུས་པར་གྱུར་ཏོ། །གསང་བའི་རྒྱུད་ཀྱི་རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ་ལས་གསང་བའི་སྔགས་ཀྱི་ལེའུ་སྟེ་གཉིས་པའོ།། །།དེ་ནས་ཆོ་ག་ཡང་དག་བཤད། །མཎྜལ་མེ་ཏོག་བཅས་པའི་སྟེང་། །མཆོད་རྟེན་སྐུ་གདུང་ལྡན་པ་དང་། །བུམ་པ་སྔོན་པོ་མགུལ་ཆིངས་བཅས། །མཆོད་པ་རྣམ་ལྔ་དང་ལྡན་པས། །སྒྲུབ་པོ་དག་ནི་སྨྱུང་ལྡན་པས། །རྨི་ལྟས་རིམ་པ་གསལ་བ་ཡིས། །ནད་པ་དག་ལ་ཡུངས་སྔགས་སོ། །བཅོམ་ལྡན་མགོན་པོ་ཞལ་གསུམ་དམར། །ཕྱག་དྲུག་རྡོ་རྗེ་

སྡིགས་པ་གཡོན། །དྲག་པོའི་ཐལ་མོས་འཇིགས་པར་བྱེད། །ཐ་མ་སྦྲུལ་གདུག་རི་རབ་མནན། །འཁོར་དུ་གནོད་སྦྱིན་ཆེན་པོ་སྟེ། །ཤ་ཟ་རབ་འཇིགས་རལ་པ་ཅན། །གདོང་སེར་སེང་གདོང་གནོད་སྦྱིན་མོ། །བོང་བུའི་རྣ་བ་རྣ་བ་འཕྱང་། །རལ་བ་གྱེན་འགྲེང་རལ་གྲི་སོ། །གནོད་སྦྱིན་འཁོར་ཏེ་ལྔ་བརྒྱར་བཅས། །ཡཀྵ་བི་དཱ་ར་ཎཱ་ཡ་ཧཱུྃ་ཕཊ། ཡཀྵ་ཀྲོ་དྷ་སཱ་ད་ནཱ་ཡ་ཧཱུྃ་ཕཊ། ཡཀྵ་ནི་ལྃ་བས་ནཱ་ཡ་ཧཱུྃ་ཕཊ། ཡཀྵ་པྲ་ཏི་ཧ་ཏ་བཱ་ལཱ་ཡ་ཧཱུྃ་ཕཊ། ཡཀྵ་པ་རཱ་ཀྲ་མཱ་ཡ་ཕཊ། ཡཀྵ་ཀྲྀ་ཏཱནྟཱ་ཡ་ཕཊ། ཡཀྵ་ཀྲྀ་ཏཱན་ཏ་རཱུ་པཱ་ཡ་ཕཊ། ཡཀྵ་རོ་ཥ་ཎཱ་ཡ་ཕཊ། ཞེས་བརྗོད་དེ་ཆུ་ལ་བསྔགས་ཤིང་གཏོར་ན་གནོད་སྦྱིན་གྱི་གདོན་ལས་ཐར་རོ། །མཆོད་རྟེན་སྐུ་གདུང་ལྡན་པའི་དྲུང་། །ཚོན་སྣ་ལྔ་དང་ལྡན་པ་ཡིས། །མཆོད་པ་ལྔ་དང་ལྡན་པས་མཆོད། །སྒྲུབ་པོ་དག་ནི་སྨྱུང་ལྡན་པས། །རྨི་ལྟས་རིམ་པ་གསལ་བ་ཡིས། །ནད་པ་དག་ལ་ཚོན་སྣས་བཅིང་། །བཅོམ་ལྡན་མགོན་པོ་ཞལ་གསུམ་ལྡན། །ཕྱག་དྲུག་རྡོ་རྗེ་སྡིགས་པ་གཡོན། །དྲག་པོའི་ཐལ་མོས་འཇིགས་པར་བྱེད། །ཐ་མ་སྦྲུལ་གདུག་རི་རབ་མནན། །མཁའ་ལ་རྫུ་འཕྲུལ་དང་ལྡན་བདུད། །དགའ་རབ་དབང་ཕྱུག་ཐོད་ཕྲེང་ཅན། །བུམ་སྣ་སེན་དགུ་ཤ་ཟ་བདུད། །བཙུན་མོ་མེ་ཏོག་མཛེས་མ་དང་། །འོད་ཟེར་འཕྲོག་དང་མདངས་འཕྲོག་མ། །གདོན་རིགས་སྟོང་ཕྲག་བརྒྱད་ཅུའི་འཁོར། །མ་ལུས་བཅས་པའི་སྔགས་འདི་ནི། །གནད་ལ་བོར་བའི་སྲོག་སྔགས་སོ། །པྲེ་ཏ་པི་ཤཱ་ཙ་བི་དྷ་ར་ཎཱ་ཡ་ཧཱུྃ་ཕཊ། པྲེ་ཏ་པི་ཤ་ཙ་ཀྲོ་དྷ་ས་དྷ་ནཱ་ཡ་ཧཱུྃ་ཕཊ། པྲེ་ཏ་པི་ཤཱ་ཙ་ནི་ལྃ་ཝ་ས་ན་ཡ་ཧཱུྃ་ཕཊ། པྲེ་ཏ་པི་ཤཱ་ཙ་ཨ་པྲ་ཏི་ཧ་ཏ་བ་ལ་ཡ་ཕཊ། པྲེ་ཏ་པི་ཤཱ་ཙ་པ་རཱ་ཀྲ་མཱ་ཡ་ཕཊ། པྲེ་ཏ་པི་ཤཱ་ཙ་ཀྲྀ་ཏཱནྟཱ་ཡ་ཕཊ། པྲེ་ཏ་པི་ཤ་ཙ་ཀྲྀ་ཏཱནྟ་རཱུ་པཱ་ཡ་ཕཊ། པྲེ་ཏ་པི་ཤཱ་ཙ་རོ་ཥ་ཎཱ་ཡ་ཕཊ། ཉི་མ་ཟླ་བ་དག་གི་བར་དུ་རླུང་ལ་བསྐྱོན་ཏེ། ཚོན་སྣེ་ལྔས་བཅིངས་ཏེ་བསྐྲད་པར་བྱའོ། །མཆོད་རྟེན་སྐུ་གདུང་ལྡན་པའི་དྲུང་། །མཎྜལ་མེ་ཏོག་བཅས་པའི་སྟེང་། །སྨྱུང་

བས་ཁྱི་ཡི་ཤ་ལ་བསྒྲུབ། །རྨི་ལྟས་རིམ་པ་ལྡན་པས་བརྟག །བརྒྱད་ཁྲི་ཞབས་ནུབ་འཇིགས་པའི་ཆ། །གད་རྒྱངས་བཞད་མཛད་ཞལ་གསུམ་པ། །ནག་པོ་ཞབས་གདུག་གདུག་པ་འཛིན། །སྟོབས་ཆེན་རབ་ཏུ་གནོན་པ་པོ། །ཀླུ་ཆེན་མ་རུངས་གདུག་པ་ཅན། །ནོར་རྒྱས་དང་ནི་དུང་སྐྱོང་དང་། །དགའ་བོ་དང་ནི་འཇོག་པོ་དང་། །པད་མ་པད་མ་ཆེན་པོའོ། །སྟོབས་ཀྱི་རྒྱུ་དང་རིགས་ལྡན་རྣམས། །རྒྱ་མཚོ་དག་ལ་གནས་པ་ཡི། །ཀླུ་དང་གཉན་དང་ས་བདག་གསུམ། །སྤྲུལ་པ་ལས་ལས་གྲུབ་པ་ཡི། །གླེན་པ་ང་རྒྱལ་རྫུ་འཕྲུལ་ཅན། །སྤྲུལ་པ་འབུམ་སྡེ་འཁོར་དང་བཅས། །མ་ལུས་པ་ཡི་སྔགས་འདི་ནི། །གནད་ལ་བོར་བའི་རྩ་སྔགས་སོ། །ཧ་ར་ཧ་ར་ནཱ་ག་ཕུཿ། པྲ་ཧ་ར་པྲ་ཧ་ར་ནཱ་ག་ཕུཿ། ཙྪིནྡ་ཙྪིནྡ་ནཱ་ག་ཕུཿ། བྷིན་ད་བྷིན་ད་ནཱ་ག་ཕུཿ། བི་ཤཱིརྱནྟུ་ནཱ་ག་ཤ་རཱི་རཱ་ཎི་ཕུཿ། བི་སྥོ་ཊ་ཡ་ནཱ་ག་ནཱ་ཡ་ན་ནི་ཕུཿ། ནཱ་ག་བི་དཱ་ར་ཎ་ཡ་ཕུཿ། ནཱ་ག་ཀྲོ་དྷ་སཱ་ད་ནཱ་ཡ་ཕུཿ། བལ་པོ་སེའུ་དག་དང་ནི། །སྨག་ཤད་དག་གི་ལྕུག་མས་བྱབ། །དེ་ནི་ཀླུ་བཟློག་པར་བྱེད་པའི་ཆོ་གའོ། །ནཱ་ག་དུ་ན་དུས། ནཱ་ག་ཤོན་དུས། ཧི་ལི་ཧི་ལི་ནཱ་ག་དུས་དུས། ཀླུ་ཆེན་ནཱ་གའི་སྲོག་སྙིང་སྟེ། །གནད་ལ་བོར་བའི་སྲོག་སྙིང་ངོ་། །ལྟོ་འཕྱེ་དག་གི་ཁ་ནས་ཁར། །བཅོམ་ལྡན་སྐུ་ནི་གསལ་བས་བཟླས། །དེ་ནས་རྡོ་རྗེ་འཛིན་ལ་བཀའ་སྩལ་པ། ལས་རྣམས་བཞི་ཡིས་ལས་རྣམས་འགྲུབ། །ས་གཞི་དག་ནི་སོ་སོར་བརྟག །ཞི་བ་དཀར་ཟླུམ་པད་མ་ཅན། །རྒྱས་སེར་གྲུ་བཞི་འཁོར་ལོའོ། །དབང་དམར་ཟླ་གམ་ལྕགས་ཀྱུ་སྟེ། །དྲག་པོ་མཐིང་ནག་རྩེ་གསུམ་པའོ། །ཞི་བ་རྒྱས་པ་སོར་བཞི་དང་། །ཁྲུ་གང་ཁྲུ་དོ་མཉམ་པའོ། །དབང་དང་དྲག་པོ་སོར་གསུམ་སྟེ། །ཁྲུ་གང་ཁྲུ་དོ་ཁྲུ་གསུམ་ཁྲུ། །འོ་མ་ཅན་དང་དྲི་ཞིམ་ཤིང་། །འབྲས་བུ་དང་བཅས་ཞི་རྒྱས་ཤིང་། །ཚེར་མ་དུར་ཁྲོད་ཤིང་དག་ནི། །ཁ་དོག་དམར་ནག་དབང་དྲག་ལ། །ཀུ་ཤ་དག་ཀྱང་དགྲམ་བྱ་སྟེ། །ལས་ཀྱི་བུམ་པས་བསང་བར་བྱའོ། །ཞི་བ་ཞོ་དང་མར་དང་ནི། །

འོ་མ་དྲི་ཞིམ་མེ་ཏོག་དཀར། །འབྲས་དང་ནས་དང་གྲོ་དང་ནི། །ཞོ་ཡི་ཆ་དང་བསྲེས་པ་དབུལ། །རྒྱས་པ་ཞོ་སྦགས་དཀར་གསུམ་སྟེ། །མངར་གསུམ་འབྲས་བུ་གསུམ་དག་སྟེ། །ཡམ་ཤིང་འོ་མ་ལོ་འདབ་བཅས། །ཏིལ་ནི་དཀར་པོ་ཤིས་པའོ། །ཁྭ་དང་འུག་པ་བྱ་རོག་བྲུན། །སྐེ་ཚེ་ནིམ་པ་ཡུངས་ཀར་དང་། །ཁྲག་གིས་སྦགས་པའི་རྫས་ཀུན་ཏེ། །ཡམ་ཤིང་ཚེར་མ་མར་དག་དང་། །ཤ་དང་ཚིལ་དང་གཟུགས་བཅས་པ། །ཏིལ་ནི་ནག་པོ་ཤིས་པའོ། །ཤར་དུ་བལྟས་ན་ཞི་བ་སྟེ། །བྱང་དུ་བལྟས་ན་རྒྱས་པའོ། །ནུབ་ཏུ་བལྟས་ན་དབང་དུ་སྡུད། །ལྟོ་རུ་བལྟས་ཏེ་གསད་པར་བྱའོ། །སྦྱིན་སྲེག་བྱས་པས་ལས་ཀུན་འགྲུབ། །གཡས་བརྐྱང་དབང་གི་འདུག་པ་སྟེ། །གཡོན་བརྐྱང་པས་ནི་གསད་པའོ། །བུམ་པ་ཁ་དོག་སྔོན་པོ་སྟེ། །གནམ་ལྕགས་སོར་ནི་བཅུ་དྲུག་ཚད། །སྨན་ལྔ་འབྲུ་ལྔ་རིན་པོ་ཆེ། །འབྲས་གསུམ་འབྲུ་གསུམ་བཅས་པ་སྟེ། །དྲི་ཞིམ་ལོ་འདབ་བཅས་པའི་ཤིང་། །བ་ཡི་རྣམ་ལྔ་ཁྲུ་དོའི་ཚད། །གྲུ་བཞི་ཁྲུ་གང་ཟླུམ་པོ་སྟེ། །སེང་ལྡེང་བཞི་ལས་བྱས་པ་ཡི། །ཕུར་པ་ཚོན་སྣ་དང་བཅས་པ། །དཀར་གསུམ་མངར་གསུམ་དང་བཅས་པའི། །གདེངས་ཀ་ཅན་ལ་དབུལ་བར་བྱའོ། །གྲུབ་པ་ཁྲུས་བྱ་བསྲུང་བར་བྱའོ། །འབྲས་ཆན་བུ་རམ་ཧྭགས་དང་ནི། །འབྲུ་ཡི་ཆན་དང་དྲི་ཞིམ་དང་། །དཀར་གསུམ་མངར་གསུམ་ཆུ་དག་དང་། །མདུན་དུ་བྱས་ཏེ་ཕྱོགས་རྣམས་སུ། །ཤ་དང་ཁྲག་དང་རུས་པ་དང་། །ནས་དང་འབྲས་དང་གྲོ་ལ་སོགས། །ལ་ཕུག་སྒོག་པ་འབྲུ་ལ་སོགས། །ཆང་དང་བཅས་པ་མདུན་དུ་འབུལ། ཨོཾ་བྲཧྨ། ཨོཾ་བིཥྞུ། ཨོཾ་རུ་དྲཱ་ཡ། ཨོཾ་ཀཱར་ཏི་ཀ །ཨོཾ་ག་ཎ་པ་ཏི། ཨོཾ་ཨིན་དྲཱ་ཡ། ཨོཾ་མ་ཧཱ་ཀཱ་ལ། ཨོཾ་མ་ཧཱ་བྲཧྨཱ་ཡ། བ་ལིན་ཏ་ཏ་ལེ། བ་ལིན་ཏ་ཏ་ལེ་སྭཱ་ཧཱ། སྟག་དང་ཁབ་ལེན་ཏི་ཙ་དང་། མཎྜལ་གྲུ་གསུམ་སྟེང་དུ་གཞག །ནག་པོའི་ཐོད་པ་གྲི་གུག་ཅན། །བསྲུང་དང་ལྡན་པས་གསང་སྔགས་བསྒྲུབ། །མ་ཧཱ་ཀཱ་ལ་མི་རཱུ་པ་ཎཱ། ཨོཾ་ཤྲཱི་གྲྀ་བོ་བེ་ད་ཛཿཛཿཧ་ཧ།

ས་མ་ཡ་གགས་སོལ། ལྕགས་ཀྱི་སྙིང་ཕྱུང་ཞེས་པས་ལྕགས་ལ་བྱའོ། །ནད་ཀྱི་སྲུང་བ་དག་ལ་ནི། །བྱང་ཆུབ་སེམས་དཔའི་སྐུར་གསལ་ལ། །སྙིང་གའི་ས་བོན་མེ་འབར་བས། །ནད་ཀུན་མ་ལུས་བསྲེག་པར་བྱའོ། །ཨོཾ་བི་དུག་ལུ་མ་པྲ་ཏི་བཻ་རོ་སྭཱ་ཧཱ། འབྲུ་དང་སྨན་དང་ཁུར་བ་དང་། །རིན་པོ་ཆེ་དང་ཆང་དང་ཤ། །རྐང་དང་ལ་དུ་དཀར་གསུམ་དང་། །མངར་གསུམ་བཅས་པའི་གཏོར་མ་དང་། །ཆུ་ཡི་འགྲམ་མམ་རྒྱ་མཚོར་དབུལ། །མེ་ཏོག་བདུག་པ་བཅས་པར་དབུལ། །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་སྃ་བྷ་ར་སྃ་བྷ་ར་ཧཱུྃ། གསང་བའི་རྒྱུད་ཀྱི་རྣམ་པར་འབྱེད་པ། དྲག་པོ་གསུམ་འདུལ་ཞེས་བྱ་བ་ལས། ལས་བསྟན་པའི་ལེའུ་སྟེ་གསུམ་པའོ། །རྫོགས་སོ།། །།རྒྱ་གར་གྱི་མཁན་པོ་དེ་བ་པུརྞྞ་མ་ཏི་དང་། ལོ་ཙྪ་བ་དགེ་སློང་ཆོས་ཀྱི་བཟང་པོས་བསྒྱུར་བའོ། །རྒྱ་གར་སྐད་དུ། བཛྲ་པཱ་ཎི་ནཱི་ལཱམ་བ་ར་བི་དྷི་བཛྲ་དཎྜ་ཏན་ཏྲ།

ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་རྡོ་རྗེ་བེ་ཅོན་གྱི་རྒྱུད།

བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་རྡོ་རྗེ་བེ་ཅོན་གྱི་རྒྱུད།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། གནོད་སྦྱིན་ཐམས་ཅད་ཡོངས་སུ་རྒྱུ་བ། ཤིན་ཏུ་དབེན་པ། ཤིན་ཏུ་ཡོངས་སུ་དག་པ་ན། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་ཞེས་བྱ་བ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་ཁྲོ་བོར་དབང་བསྐུར་བ། མཆེ་བ་གཙིགས་པ། ཡིད་ཁྲོས་པ་ལྟ་བུ། མིག་མེ་མདག་གི་ཕུང་པོ་འདྲ་བ། དབུགས་མེ་ལྕེ་ལྟར་འབར་བ། འཇིགས་པའི་ང་རོ་ཅན། ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ། ཀླུ་ནག་པོ་སེ་རལ་ཁར་ཐོགས་པ། ཀླུ་དགའ་བོ་དང་ཉེ་དགའ་བོས་སྙན་བརྒྱན་པ། སྦྲུལ་འབར་བ་རིན་པོ་ཆེའི་ཅོད་པན་ཐོགས་པ། སྦྲུལ་གདུག་པ་འབར་བ་ཟ་བ། བཞིན་རྒྱས་པ། སྨིན་མ་དཔྲལ་བར་བསྡུས་པ། ཡ་སོས་མ་མཆུ་མནན་པ། གཤིན་རྗེའི་ཆ་བྱད་

ཅན། ལྕེ་གློག་ལྟར་འགྱུ་བ། སྦྲུལ་ཟ་བ། གསུས་པ་ཆེ་བ། ལག་པ་བརྡབས་པའི་སྒྲས་འཇིགས་པར་བྱེད་པ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། ཨ་ལ་ལ་ཞེས་སྒྲོག་པར་བྱེད་པ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པས་རྐང་པའི་པུས་མོར་ཕྱིན་པ། དབང་པོ་དང་ཉི་མ་ཕྲག་པ་ལ་རབ་ཏུ་ཁུར་བ། ཀླུ་ཐམས་ཅད་རླག་པར་བྱེད་པའི་གད་རྒྱངས་ཆེན་པོ་དགོད་པས་ཀུན་ཏུ་འཁྲུག་པར་བྱེད་པ། ཀླུ་ཐམས་ཅད་འཆིང་བར་བྱེད་པ། འབྱུང་པོ་ཐམས་ཅད་འགུགས་ཤིང་འཆིང་བར་མཛད་པ། སྦྱོར་བ་ཐམས་ཅད་གཅོད་པར་མཛད་པ། སྦྱོར་བ་ཐམས་ཅད་ཟློག་པར་མཛད་པ། སྦྱོར་བ་ཐམས་ཅད་གནོན་པར་མཛད་པ། ཡོན་ཏན་ཐམས་ཅད་མ་ལུས་པའི་བདག་ཉིད་དེ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གནོད་སྦྱིན་མཐུ་བོ་ཆེ་ཐམས་ཅད་དང་། གནོད་སྦྱིན་དྲག་པོ་ཐམས་ཅད་དང་། ལྷ་ཐམས་ཅད་དང་། ཀླུ་ཐམས་ཅད་དང་། དྲི་ཟ་ཐམས་ཅད་དང་། ལྷ་མ་ཡིན་ཐམས་ཅད་དང་། ནམ་མཁའ་ལྡིང་ཐམས་ཅད་དང་། མི་འམ་ཅི་ཐམས་ཅད་དང་། ལྟོ་འཕྱེ་ཆེན་པོ་ཐམས་ཅད་དང་། འབྱུང་པོ་དང་། ཡི་དགས་དང་། བརྗེད་བྱེད་ལ་སོགས་པ་དང་ཐབས་ཅིག་ཏུ་བཞུགས་ཏེ། འདི་ལྟར་ཉི་མ་དང་། ཟླ་བ་དང་། སྐར་མའི་ཚོགས་ལྟ་བུར་བཞུགས་སོ། །དེའི་ཚེ་ས་ཡང་ཆེར་གཡོས་སོ། །འབྲུག་གི་སྒྲ་ཡང་བྱུང་། ཉི་མ་དང་སྐར་མ་ཡང་མི་སྣང་བར་གྱུར་ཏོ། །དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན་ལ་འཁོར་ཐམས་ཅད་ཀྱིས་གསོལ་པ། གོས་སྔོན་པོ་ཅན་ཁྱོད་ཅི། བདེ་གཤེགས་ཀུན་གྱི་སྤྲུལ་པ་འམ། །གལ་ཏེ་བསྡུས་པའི་སྐུ་ཡིན་ནམ། ལས་ཀྱི་ཁྲོ་བོར་དབང་སྐུར་རམ། བདག་ཅག་འཁོར་དང་བཅས་པ་རྣམས། ཅི་ལྟ་བུ་ཡི་དུས་གསུམ་བཀའ་ཉན་ཏེ། །ལས་དང་བྱ་བ་ཐམས་ཅད་བཀའ་སྩལ་མཛོད། །དྲག་པོའི་ཏིང་འཛིན་བསྟན་དུ་གསོལ། །ཞེས་གསུངས་སོ། །གླེང་གཞིའི་ལེའུ་སྟེ་དང་པོའོ།། །།

དེ་ནས་ལག་ན་རྡོ་རྗེ་དྲག་པོ་ཞེས་བྱ་བའི་ཏིང་ངེ་འཛིན་དུ་ཞུགས་ཏེ་འདི་སྐད་ཅེས་གསུངས་སོ། །ཕྱག་རྒྱ་གསང་སྔགས་མཐུ་སྦྱོར་ལས། །ཁྲོ་བོའི་རྒྱལ་པོ་བསམ་པར་བྱ། །ཁྲོ་བོ་རྡོ་རྗེའི་ཏིང་འཛིན་གྱིས། །བྱིན་བརླབས་ཡ་མཚན་སྣ་ཚོགས་ལྡན། །ཏིང་འཛིན་དེ་ལ་དབང་ཐོབ་ནས། །ལས་རྣམས་སྒྲུབ་ལ་ཐོགས་པ་མེད། །ཞི་རྒྱས་དབང་དང་དྲག་པོ་དང་། །གསད་རྨོངས་སྣ་ཚོགས་ངེས་པར་འགྲུབ། །དེ་ཉིད་གྲུབ་པར་གདོན་མི་ཟ། །རང་གཞན་འཕགས་དང་བླ་མ་དང་། །ཤིན་ཏུ་བླ་མ་དམ་པ་ཡང་། །མཆོད་ནས་དངོས་གྲུབ་མྱུར་དུ་འབྱུང་། །གལ་ཏེ་གཞན་ལ་ཕན་འདོགས་ན། །སྐུ་དེ་སྣ་ཚོགས་སྐུ་རུ་སྣང་། །སྣང་བའི་སྒྱུ་མའི་སྐུ་ཡིན་ཡང་། །གདུག་པ་འདུལ་ཕྱིར་རགས་པར་སྣང་། །སྣ་ཚོགས་དེ་ཉིད་བསམ་བྲལ་བའི། །དངོས་གཞི་ཡང་དག་ཐར་པ་གཅིག ། ལེའུ་གཉིས་པའོ།། །།གཞན་ཡང་གསང་སྔགས་སྦྱོར་བ་ནི། །ད་ཧ་སྲོག་སོགས་གསང་སྔགས་ཀྱིས། །ཐོགས་མེད་ལས་རྣམས་གྲུབ་པ་ཡིན། །གཉིས་ཀྱི་འོག་མས་གསུམ་པ་བརྒྱན། །ར་ཡི་མཐར་ནི་གསུམ་པའི་མཐའ། །དེ་ལ་གཉིས་ཀྱི་གང་ལྡན་པ། །ཟུང་དང་རབ་ཟུང་མིང་དང་ལྡན། །ཡང་མིང་སྐལ་ལྡན་བསམ་གཏན་ནི། །ལྕགས་ཀྱུའི་སྦྱོར་བ་རབ་ཏུ་བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱ་མ་བ་ར་ཧཱུྃ་ཕཊ། མཇུག་རྫོགས་གོང་དང་གསུམ་པའི་མཐའ། །ལན་གཉིས་གོང་བཞིན་བརྡེགས་སྔགས་ཤེས། །གསུམ་པའི་དང་པོ་གཉིས་པ་དང་། །དྲུག་པའི་དང་པོ་ཡི་གེ་ནི། །ལན་གཉིས་གོང་བཞིན་གཏོགས་བྱེད་སྔགས། །གཉིས་ཀྱི་དང་པོ་ལྔ་དང་པོས། །དྲག་པོ་དགའ་བའི་ས་བོན་ལྡན། །ལན་གཉིས་ལྡན་གྱུར་ལས་གྲུབ་པ། །གོང་མ་བཞིན་དུ་མཆོད་བྱེད་དོ། །ལེའུ་གསུམ་པའོ།། །།དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་ཅན། སྣ་ཚོགས་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱ་མ་བ་ར་ད་ཧ་ནི་བཛྲ་ཧཱུྃ་ཕཊ། གང་ཞིག་ཏིང་འཛིན་རྣལ་འབྱོར་དེ། །ཉེས་པ་ཀུན་ལས་

རབ་ཏུ་ཐར། །ལེགས་པའི་ཡོན་ཏན་ཐམས་ཅད་འཐོག །འབྲས་བུ་ཡང་དག་མངོན་པར་འགྲུབ། །སྔགས་ནི་གང་ཡིན་མིང་ཡིན་ཏེ། །གདུལ་བྱའི་མཐའ་དང་ལྡན་པ་ལ། །མཐའ་མ་ལས་སྔགས་མཐའ་དང་ལྡན། །ལེའུ་བཞི་པའོ།། །།དེ་ནས་གོས་སྔོན་པོ་ཅན་འཁོར་ལོ་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ། །འབྱུང་བཞིའི་སངས་རྒྱས་རབ་བསྒོམས་ནས། །སོ་སོ་ལས་ཀྱིས་བསྒོམ་པ་ནི། །མེ་བརྒྱད་རླུང་གཉིས་ལྡན་པར་བསམ། །ཆུ་བརྒྱད་དངོས་པོ་ཉིད་ཡིན་ཏེ། །དེ་བཞིན་ས་བརྒྱད་ཧཱུྃ་འབྲས་ལྡན། །རླུང་བརྒྱད་མེ་གཉིས་ལྡན་པ་སྟེ། །འབྲས་བུ་རིམ་གྱིས་གནོད་སྦྱིན་གཙོ། །སྒྲུབ་པ་སྔགས་བཞིན་མངོན་པར་འགྲུབ། །ཨེ་དང་སོ་སོའི་མཐའ་དང་ལྡན། །མེ་ལ་གོང་མས་མངོན་པར་འགྲུབ། །རྒྱུན་དུ་རྩ་བའི་གསང་སྔགས་བཟླས། །ལེའུ་ལྔ་པའོ།། །།དེ་ནས་འཕགས་པ་གོས་སྔོན་གྱིས། །ལས་བཅུ་མངོན་པར་སྒྲུབ་པ་ནི། །ཏིང་ངེ་འཛིན་ལ་སྙོམས་ཞུགས་ནས། །ལས་བཅུའི་སྦྱིན་སྲེག་འདི་གསུངས་སོ། །ཞི་ལ་ཤཱན་ཏིང་ཀུ་རུ་སྟེ། །རྒྱས་པ་པུཥྚིཾ་ཀུ་རུའོ། །དབང་ལ་ཝ་ཤང་ཀུ་རུའོ། །དྲག་པོ་མཱ་ར་གསུམ་པར་ལྡན། །ཐབ་ཁུང་དབྱིབས་ནི་ལས་བཞི་སྟེ། །ཤིང་ནི་རིགས་དང་སྦྱར་བར་བྱ། །ཞི་ལ་དཀར་པོའི་ཤིང་རྣམས་ཏེ། །རྒྱས་ལ་གསེར་ཤིང་ལ་སོགས་པའོ། །དབང་ལ་སེང་ལྡེང་ཤིང་བསྲེག་སྟེ། །དྲག་པོ་ཚེར་མ་ཅན་གྱི་ཤིང་། །གཞན་ནི་ཙན་དན་ཤིང་ལས་བྱ། །ཐབ་ཁུང་འདབ་བརྒྱད་དབྱིབས་ཡིན་ཏེ། །བི་དྷྭན་ས་ཡ། [ཨུཙྪ་ཊི་ནི།] མོ་ཧ་ཡ་མོ་ཧ་ཡ། སྟམ་བྷ་ཡ་སྟམ་བྷ་ཡ། ཨུན་མ་ན་ཨུན་མ་ན། ཨཱ་ཀར་ཥ་ཡ་ཨཱ་ཀར་ཥ་ཡ། བ་ཤིང་ཀ་ར་བ་ཤིང་ཀར། རཀྵ་ཡ་རཀྵ་ཡ། མོ་ཧ་བྷ་ཡ། སརྦ་ཀརྨ་ཀུ་རུ་ཧཱུྃ་ཕཊ། ལེའུ་དྲུག་པའོ།། །།དེ་ནས་དཔལ་ལྡན་རྡོ་རྗེ་འཛིན། །གདུལ་དཀའ་བ་ནི་འདུལ་བའི་མཆོག །གསང་བའི་བདག་པོ་གོས་སྔོན་ཅན། །དྲག་པོ་ཆེན་པོ་རབ་འབར་བའི། །ཏིང་

ངེ་འཛིན་ལ་སྙོམས་ཞུགས་ནས། །འཁོར་གྱི་ཀླུ་ཚོགས་དབང་བསྡུས་ཏེ། །ཉེན་རྣམས་བཟློག་པའི་ཆོ་གར་གསུངས། །གནས་ཁང་རིམ་པ་གསུམ་དག་ལ། །ཕྱི་རོལ་སྨེ་བསྲེགས་བསལ་བར་བྱ། །བར་དུ་ཕྱི་ནང་ཁྲུས་བྱས་ཏེ། །མཉེས་པའི་ལས་ཀྱང་ཅི་ནུས་བྱ། །ནང་དུ་བུམ་པའི་དབང་བསྐུར་བས། །ཉེན་རྣམས་བཟློག་ལ་ཐེ་ཚོམ་མེད། །ཀྱེ་ཧོ་ཉེན་རྣམས་འདུལ་བའི་མཆོག །ཨེ་མ་གསང་ཆེན་དྲག་པོ་ཆེ། །ཨེ་མ་མ་རུངས་འཇིགས་པ་ཅན། །ཨེ་མ་གསང་སྔགས་རྣལ་འབྱོར་ཆེ། །ཕྱག་ན་རྡོ་རྗེ་ཁྱོད་ཕྱག་འཚལ། །ཕྱོགས་བྲལ་ཁྲོ་བོ་ཁྱོད་ཕྱག་འཚལ། །ལེའུ་བདུན་པའོ།། །།དེ་སྐད་ཅེས་གསུངས་ནས་འཁོར་ཐམས་ཅད་དགའ་བའི་རྗེས་ལ་འདི་སྐད་ཅེས་བཀའ་སྩལ་ཏོ། །ཐམས་ཅད་ལྡན་པའི་གཏོར་མ་ལ། །རྃ་གྱིས་སྦྱངས་ནས་ཡྃ་གིས་བུས། །ཁྃ་གིས་བཀྲུས་ཏེ་དག་པ་ལ། །པྃ་ལས་བདུད་རྩི་ཆུ་རྒྱུན་བསྐྱེད། །ཡྃ་རྃ་དབབ་པའི་སྦྱོར་བ་བྱ། །ཛཿཡིས་བཀུག་སྟེ་གཏོར་མ་བསྟིམ། །བསམ་གཏན་ལྷ་མོས་མཆོད་པ་འབུལ། །དེ་ནས་འཁོར་ལ་འདི་སྐད་བསྒོས། །ང་ནི་ཁྲོ་བོ་གོས་སྔོན་ཅན། །སངས་རྒྱས་ཐམས་ཅད་འདུས་པའི་སྐུ། །སངས་རྒྱས་ཀུན་གྱིས་བྱིན་གྱིས་བརླབས། །དབང་བསྐུར་མཆོག་ཐོབ་ང་ཡི་སྐུ། །ཅི་སྟེ་ང་ཡི་དམ་འདས་ན། གཏོར་མ་དུག་གི་རང་བཞིན་གྱིས། །ཁྱེད་རྣམས་ཐལ་བའི་རྡུལ་དུ་རློག །གལ་ཏེ་དམ་ཚིག་མ་འདས་ན། །གཏོར་མ་ཡེ་ཤེས་བདུད་རྩི་ཡིས། །ཁྱེད་ཀྱི་སྒོ་གསུམ་སྒྲིབ་སྦྱངས་ནས། །ངེས་པར་ལེགས་པའི་ཡོན་ཏན་ཐོབ། །ཨོཾ་ཨ་ཀཱ་རོ་མུ་ཁྃ་སརྦ་དྷརྨཱ་ཎཱྃ་ཨཱདྱ་ནུད་པན་ན་ཏྭད་ཨོཾ་ཨཱཿཧཱུྃ་སྭཱ་ཧཱ། ལེའུ་བརྒྱད་པའོ།། །།དེ་ནས་དཔལ་ལྡན་གོས་སྔོན་ཅན། །གདུལ་དཀའ་འདུལ་བའི་བདག་པོ་དེས། །བསམ་གཏན་འཁོར་ལོ་མེད་པ་ལ། །སྔགས་ཀྱི་ངེས་པ་བཤད་པར་བྱ། །ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དན་ནཱི་ལཱཾ་བ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲྀ་ད་ཡཱ་ན། ཡཿས་མཱ་ཏི་ཀྲ་མ་ཐ། མཱ་ཀུ་ལ། ཨུད་སཱ་ད་ནྃ། བྷ་བི་ཥྱཾ་ཏི།

ལས་ཐམས་ཅད་པའི་སྔགས་སོ། །ལས་སོ་སོ་ལ་ཀླུ་འདུལ་བའི་སྔགས། ཏདྱ་ཐཱ། བུད་དྷ་བུད་དྷ། བི་བུད་དྷ་བི་བུད་དྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱྃ། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪིན་ད་ཙྪིན་ད། ནཱ་ག་ཧྲྀ་ད་ཡཱ་ནི་བྷིན་ད་བྷིན་ད། ན་ག་མརྨཱ་ཎི་བི་ཤཱིརྱན་ཏུ་ནཱ་ག་ཤ་རཱི་རཱ་ཎི། བི་སྥོ་ཊ་ཡ། ནཱ་ག་ནཱ་ཡ་ནཱ་ནི། ཏདྱ་ཐཱ། ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ཕཊ། ནཱ་ག་ཨུཏ་སཱ་ད་ནཱ་ཡ་ཧཱུྃ་ཕཊ། ཡི་དགས་ཐམས་ཅད་བཟློག་པ་ནི། ནཱི་ལཱ་མ་བ་ས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་པ་ལ་པ་རཱ་ཀྲ་མཱ་ཡ་ཕཊ། ཀྲྀ་ཏཱན་ཏཱ་ཡཱ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུཾ་བྷ་[ཎ་ཌོ་]ཏ་སཱ་ད་ནཱ་ཡ་ཕཊ། གཤིན་རྗེ་ཟློག་པའོ། །པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡི་དགས་ཐམས་ཅད་ཟློག་པའོ། །ཡཀྵ་ཨ་པསྨཱ་ར་བིནཱ་ཤ་ཀ་རཱ་ཡ་ཕཊ། གནོད་སྦྱིན་ལ་སོགས་པ་ཟློག་པའོ། །ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བི་གྷྣཱྃ་བི་ནཱ་ཤ་ཀ་རཱ་ཡ་ཕཊ། བགེགས་ཐམས་ཅད་ཟློག་པའོ། །སརྦ་ཤ་ཏྲཱུྃ་སྃ་གྷ་བི་ནཱ་ཤ་ཀ་རཱ་ཡ་ཕཊ། དགེ་འདུན་གྱི་དགྲ་འདུལ་བའོ། །ནཱི་ལཱམ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། རྡོ་རྗེ་བེ་ཅོན་དྲག་པོ་ཆེ། །རྡོ་རྗེ་འཇིགས་པ་སྔགས་ཀྱི་བདག །རྡོ་རྗེ་ཁྲོ་བོ་བགེགས་ཀྱི་གཤེད། །རྡོ་རྗེ་མི་ཐུབ་འཇིགས་པ་ཆེ། །རྡོ་རྗེ་ལས་ཀུན་གྲུབ་པ་ཆེ། །རྡོ་རྗེ་ལས་རྣམས་ཀུན་མཛད་པ། །སྔགས་ཀྱི་བདག་པོ་ཁྱོད་ཕྱག་འཚལ། །སྔགས་ཀྱི་ངོ་བོ་ཁྱོད་ཕྱག་འཚལ། །ལེའུ་དགུ་པའོ།། །།དེ་ནས་ཀླུ་དགུག་པའི་སྔགས་བསྟན་ཏེ། རྡོ་རྗེ་ལྕགས་ཀྱུ་རླུང་གི་སྦྱོར་བས་འགྲུབ་པར་འགྱུར། །དེ་བཞིན་མེ་ཡིས་ཀྱང་ནི་འདུལ་བར་ནུས་པ་ཡིན། །དེ་ལྟར་ནུས་ཕྱིར་དགུག་པའི་སྔགས་ནི་བཤད་པར་བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱམ་བ་ར་ནཱ་ག་ཧྲཱིཿགྲྀ་ཧྣ་གྲྀ་ཧྣ་ཧཱུྃ་ཕཊ། ཨཱ་ཀར་ཥ་ཡ་ཨ་ཀར་ཥ་ཡ་ཧཱུྃ་ཕཊ། བསམ་གཏན་དྲག་པོས་བཟླས་པ་བྱ། །བཟླས་པ་འདི་ལ་རབ་འབད་བྱ། །ཀླུ་རིགས་དུ་མ་ཐམས་ཅད་ཀུན། །འགུགས་འགྱུར་འདི་

ལས་གཞན་དུ་མིན། །ཇི་སྲིད་འགུགས་པའི་ཏིང་འཛིན་གྱིས། །ཁུགས་པར་གྱུར་པའི་ཀླུ་རྣམས་ཀུན། །ཟངས་གཞོང་ནང་དུ་སྤྱན་དྲངས་ཏེ། །ཁྲོ་བོའི་ཆེ་བ་བརྗོད་ནས་ནི། །དམ་ཚིག་བསྲེ་ཞིང་དུག་རྣམས་གཞོམ། །སྨན་གྱི་མཆོག་གིས་གསོས་ནས་ནི། །གང་གནོད་ཕྱོགས་སུ་གཤེགས་སུ་གསོལ། །ལེའུ་བཅུ་པའོ།། །།དེ་ནས་གཞན་ཡང་བཤད་བྱ་སྟེ། །ཞི་བའི་ལས་ཀྱིས་མི་འདུལ་བའི། །ཀླུ་གཟིར་དྲག་སྔགས་བསྟན་པར་བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱ་མ་བ་ར་ནཱ་ག་ཧ་ན་ཧ་ན་ཧཱུྃ་ཕཊ། ནཱ་ག་ད་ཧ་ད་ཧ་ཧཱུྃ་ཕཊ། ནཱ་ག་སྥོ་ཊ་སྥོ་ཊ་ཧཱུྃ་ཕཊ། ནཱ་ག་བི་སྥོ་ཊ་ཡ་བི་སྥོ་ཊ་ཡ་ཧཱུྃ་ཕཊ། ནཱ་ག་ག་རྫ་ག་རྫ་ཧཱུྃ་ཕཊ། ནཱ་ག་བྷིན་ད་བྷིན་ད་ཧཱུྃ་ཕཊ། བསམ་གཏན་རྡོ་རྗེ་ཐོགས་པ་ཡིས། །གདུལ་བའི་སྟེང་ནས་གདབ་པར་བྱ། །འོག་ཏུ་མེ་ཡི་འཁོར་ལོ་བསམ། །མེ་ཕུང་ཆེན་པོའི་ཏིང་འཛིན་གྱིས། །མེ་འབར་ཀློང་ཆེན་དཀྱིལ་དུ་གཟིར། །ཡུངས་ཀར་ཡུངས་ནག་སྐེ་ཚེ་ཡིས། །བརྡེག་ཅིང་ཁྲོ་བོའི་སྤྲུལ་པ་སྤྲོ། །ཁྲ་སྤྱང་ལ་སོགས་རྩ་ལྔའི་གསོབ། །གཅན་གཟན་སྣ་ཚོགས་མཆེ་སྡེར་དང་། །མཆུ་སྡེར་དབབ་ཅིང་སྤྲུལ་པ་སྤྲོ། །མྱུར་དུ་ཐར་བར་གདོན་མི་ཟ། །ལེའུ་བཅུ་གཅིག་པའོ།། །།དེ་ནས་འཕགས་པ་གོས་སྔོན་པོ་ཅན་གྱིས་ཉིད་ལ་ཉིད་ཀྱིས་མཆོད་པ་ཕུལ་བ། ཧཱུྃ་རྡོ་རྗེ་བདུག་པ་མ། བདག་ཉིད་དྲི་ཡིས་རྒྱས་མཛད་མ། །བཛྲ་དྷཱུ་པེ་པཱུ་ཛ་མེ་ཧཱུྃ། །ཧཱུྃ་རྡོ་རྗེ་མེ་ཏོག་མ། བདག་ཉིད་ཡོངས་སུ་བཀྲ་མཛད་མ། །བཛྲ་པུཥྤེ་པཱུ་ཛ་མེ་ཧཱུྃ། ཧཱུྃ་རྡོ་རྗེ་དྲི་ཆབ་མ། བདག་ཉིད་དངོས་པོ་དག་མཛད་མ། །བཛྲ་གན་དྷེ་པཱུ་ཛ་མེ་ཧཱུྃ། ཧཱུྃ་རྡོ་རྗེ་མར་མེ་མ། བདག་ཉིད་དཀྱིལ་འཁོར་གསལ་མཛད་མ། །བཛྲ་ཨཱ་ལོ་ཀེ་པཱུ་ཛ་མེ་ཧཱུྃ། ཇི་སྲིད་ཐམས་ཅད་མཆོད་པ་ཆེ། །ཇི་སྲིད་མཆོད་པ་བདེ་བ་ཆེ། །ཇི་སྲིད་མཆོད་པ་བླ་ན་མེད། །ཇི་སྲིད་མཆོད་པ་ཡང་དག་ཆེ། །ཨེ་མ་ཧོ། །ལེའུ་བཅུ་གཉིས་པའོ།། །།དེ་ནས་གཞན་ཡང་བཤད་བྱ་བ། །བཅོམ་ལྡན་གསང་བ་གོས་སྔོན་ཅན། །བསྡུ་བ་ཐབས་ཀྱི་ཏིང་འཛིན་གྱིས། །འཁོར་གྱི་ཀླུ་རྣམས་

སྡུད་མཛད་ནས། །མེ་ཡི་འཁོར་ལོ་སྙོམས་ཞུགས་ཚེ། །གསང་པ་མེ་ཡི་སྔགས་བཟླས་པས། །ཀླུ་རྣམས་མ་ལུས་ཚིག་པར་མཛད། །བྲལ་ནས་དཔག་ཚད་གནས་སུ་བྲོས། །སླར་བསྡུས་བདུད་རྩི་སྨན་གྱིས་གསོས། །ལས་བཅོལ་སོ་སོའི་གནས་སུ་འཁོད། །དེ་ནས་ཁམས་གསུམ་རྣམ་པར་རྒྱལ། །ཐལ་མོ་སྦྱར་ནས་འདི་སྐད་གསོལ། །མེ་བརྒྱད་འཁོར་ལོའི་བདག་ཉིད་ཆེ། །རྟག་ཏུ་མེ་ཡི་ཏིང་འཛིན་ལ། །སྙོམས་ཞུགས་ཁྱོད་ནི་རྒྱལ་གྱུར་ཅིག །བདེ་བའི་རོལ་མོ་མེ་ཀློང་དུ། །སྲེག་མཛད་མེ་བརྒྱད་ཁྱོད་ཕྱག་འཚལ། །རང་བཞིན་རྣམ་དག་ཁྱོད་ཕྱག་འཚལ། །ཆུ་ཡི་ངང་ལ་གནས་འདོད་ན། །ཆུ་བརྒྱད་ཏིང་འཛིན་ལ་གནས་ཏེ། །དེ་ཚེ་འཁོར་གྱིས་འདི་སྐད་བསྟོད། །ཆུ་བརྒྱད་འཁོར་ལོའི་བདག་ཉིད་ཆེ། །རྟག་པ་ཆུ་ཡི་དཀྱིལ་འཁོར་ཅན། །འབྱུང་བའི་གཙོ་བོ་ཆུ་ཡི་བདག །ཆུ་བརྒྱད་མངའ་བདག་ཁྱོད་ཕྱག་འཚལ། །རླུང་བརྒྱད་ཏིང་འཛིན་ལ་གནས་ན། །འཐོར་ཞིང་འབུད་པའི་བདག་ཉིད་ཆེ། །རླུང་ཆེན་དྲག་པོ་རྩལ་ཤུགས་ལྡན། །རླུང་ལྷ་གོས་སྔོན་ཁྱོད་ཕྱག་འཚལ། །ས་ཡི་ཏིང་འཛིན་ལ་གནས་ནས། །མི་གཡོ་བརྟན་པའི་ལས་མཛད་པ། །གསེར་ལྡན་རོལ་མོ་སྣ་ཚོགས་ལྡན། །ས་བརྒྱད་འཁོར་ལོ་ཁྱོད་ཕྱག་འཚལ། །ལེའུ་བཅུ་གསུམ་པའོ།། །།དེ་ནས་དཔལ་ལྡན་གོས་སྔོན་ཅན། །ཕྲ་མོའི་ཏིང་འཛིན་ལ་གནས་ནས། །འཁོར་གྱི་གནོད་སྦྱིན་མང་པོ་ཀུན། །ཤིན་ཏུ་ཡིད་དགའ་དད་པས་ཞུས། །ཕྲ་མོའི་ཐིག་ལེ་ཆེན་པོ་ཡིས། །ཅིར་སྣང་དངོས་པོ་གཅིག་ཏུ་འདུས། །དེ་ཉིད་མཐའ་འདས་རང་བཞིན་མེད། །དེ་ནས་དཔལ་ལྡན་གོས་སྔོན་ཅན། །འདོད་ཆགས་ཏིང་འཛིན་ལ་གནས་པས། །འཁོར་གྱི་གནོད་སྦྱིན་མང་པོ་ཀུན། །སྔངས་དང་ངུས་དང་བརྒྱལ་བ་ལས། །བསླང་སྟེ་བླ་མེད་དོན་བསྟན་པས། །ཐམས་ཅད་འདོད་ཆགས་མངོན་སངས་རྒྱས། །འཁོར་གྱི་སྐུ་ལ་མངོན་པར་བསྟོད། །ཀྱེ་ཧོ་གསང་བདག་གོས་སྔོན་ཅན། །བླ་མེད་རྫོགས་པའི་ཀློང་དཀྱིལ་ན། །འདོད་ཆགས་དག་པའི་བློ་ལྡན་པས། །མངོན་པར་སངས་རྒྱས་

ཁྱོད་ཕྱག་འཚལ། །ལེའུ་བཅུ་བཞི་པའོ།། །།དེ་ནས་འདུས་པའི་འཁོར་རྣམས་ཀྱིས། །འཁོར་གྱི་གཙོ་ལ་མངོན་པར་བསྟོད། །ལྕང་ལོ་ཅན་གྱི་ཕོ་བྲང་ནས། །གསང་བའི་བདག་པོ་གོས་སྔོན་ཅན། །ཡོན་ཏན་ཐམས་ཅད་སྐུ་ལ་རྫོགས། །དངོས་མེད་དག་པ་ཁྱོད་ཕྱག་འཚལ། །འཁོར་གྱི་ཀླུ་ཚོགས་འདུལ་བའི་ཕྱིར། །ཀླུ་བརྒྱད་སྐུ་ལ་རབ་བརྒྱན་ནས། །ཀླུ་ཚོགས་ཞལ་དུ་གསོལ་མཛད་པ། །ཀླུ་འདུལ་བྱམས་པ་ཁྱོད་ཕྱག་འཚལ། །སྣ་ཚོགས་དག་པའི་སྐུ་མངའ་ཞིང་། །རིགས་དྲུག་སྡེ་བརྒྱད་འདུལ་བར་མཛད། །སྐྱོན་གྱིས་མ་གོས་རང་སངས་རྒྱས། །ཐོགས་མེད་ཀུན་འདུལ་ཕྱག་འཚལ་བསྟོད། །ཅི་ལྟར་བསམ་པའི་དངོས་པོ་ཀུན། །ཁྱོད་ལས་འབྱུང་བས་མི་ཟད་གཏེར། །སྣ་ཚོགས་ཡིད་བཞིན་འཕྲུལ་པོ་ཆེ། །ཡིད་བཞིན་ནོར་བུ་ཁྱོད་ཕྱག་འཚལ། །ནད་དང་རིམས་ཀྱི་གཤེད་པོ་མཛད། །ནོར་དང་ཟས་ཀྱི་བདག་པོ་མཛད། །འཇིགས་པ་ཀུན་ལས་སྐྱོབ་པར་མཛད། །བླ་མེད་སྐྱོབ་མཛད་ཁྱོད་ཕྱག་འཚལ། །ཞེས་བསྟོད་ནས་རྗེས་སུ་ཡི་རང་ངོ་། །ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་ལ་སོགས་པ་ཡང་ཡིད་དགའ་བའི་མཆོད་པས་ཁྱབ་པར་གྱུར་ཏོ། །མི་ལ་སོགས་པ་འཇིགས་པའི་ཉེན་དང་ལྡན་པ་ཐམས་ཅད་བདེ་བ་ལ་བཀོད་དོ། །ལེའུ་བཅོ་ལྔ་པའོ།། །།འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་རྡོ་རྗེ་བེ་ཅོན་གྱི་རྒྱུད་རྫོགས་སོ།། །།

ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་གདེངས་པའི་རྒྱུད་ཁམས་གསུམ་ལས་རྣམ་པར་རྒྱལ་བ་ཞེས་བྱ་བ།

རྒྱ་གར་སྐད་དུ། ནཱི་ལཱམྦ་ར་དྷ་ར་བཛྲ་པཱ་ཎི་བཛྲ་ཕཱ་ཎ་ཀསྟནྟྲ་ཏྲཻ་ལོ་ཀྱ་བི་ཛ་ཡ་ནཱ་མ། བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་གདེངས་པའི་རྒྱུད་ཁམས་གསུམ་ལས་རྣམ་པར་རྒྱལ་བ་ཞེས་བྱ་བ།དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་གསང་བའི་བདག་པོ་འཁོར་དེ་དག་ལ་རྣམ་པར་གཟིགས་ནས་རང་ཉིད་མཁའ་དབྱིངས་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་སྲིད་པ་གསུམ་ཡང་རྣམ་པར་གཡོས་སོ། །དེ་ནས་རང་ཉིད་སྐུ་དང་

གསུང་དང་ཐུགས་རྣམ་པར་དག་པའི་རྡོ་རྗེ་ལས་སྔགས་འདི་ཕྱུང་ངོ་། །ཨོཾ་ན་མོ་གསང་སྔགས་རྒྱལ་པོ་སྨྲས་ཙམ་གྱིས། །ས་སྟེང་ས་རྣམས་བརྒྱལ་བར་འགྱུར། །ཀླུ་རྣམས་ཀུན་ཏུ་སྐྲག་ནས་ནི། །གསང་བདག་ཉིད་ལ་ཕྱག་འཚལ་ལོ། །སྙིང་རྗེ་ལྡན་ཞིང་མོས་པ་བརྟན། །གུས་ཤིང་བྱང་ཆུབ་སེམས་ལྡན་པའི། །ཕྱོགས་སུ་འགྲོ་བས་ཡིད་གནས་པའི། །ལྷ་དང་བླ་མ་མཉམ་མཆོད་ཅིང་། །བརྩོན་འགྲུས་ཤེས་རབ་ཆེ་བ་དེས། །རང་ཉིད་དང་ནི་གཞན་དག་ཏུ། །བདེ་ཞིང་ཉམས་དགའི་རི་ཕུག་གམ། །ཚལ་ལམ་མཚོ་འམ་ལྗོངས་རྣམས་སུ། །ས་ཡི་དཀྱིལ་འཁོར་རྣམ་དག་པར། །བྱས་ནས་དྲི་ཆུས་ལེགས་བྱུགས་ནས། །བདེ་བའི་སྟན་ལ་འདུག་བྱས་ཏེ། །གསང་བའི་བདག་པོ་བསྒྲུབ་པར་བྱ། །གཞན་དུ་རི་ཁྲོད་རྩུབ་པ་འམ། །དུར་ཁྲོད་ཡ་མའི་ཁང་པ་ཡང་། །འཁྲུག་ཅིང་གཡེང་དང་བཅས་པ་དང་། །རྒྱལ་པོས་གཟུང་ཞིང་གཏུམ་མོ་རྒྱུ། །འཇིགས་པའི་ཕྱོགས་ནས་གང་དག་རྣམས། །རྒྱལ་བ་སྒྲུབ་པའི་གནས་ཡིན་ནོ། །དུས་འདིར་བྱུང་བའི་བློ་ཞན་རྣམས། །འཇིག་རྟེན་འདི་ཡི་གཡེང་བ་དང་། །ཚོགས་པ་ཐམས་ཅད་སྐྱེད་པར་བྱེད། །ཆགས་པའི་སྟོབས་ཀྱི་ཆོས་ཉིད་ནི། །ཡང་དག་མི་རྟོག་དེ་ནི་སྐྱོན། །སྤྲུལ་པའི་གླང་པོ་དང་མཚུངས་སོ། །སྟོང་ཉིད་སྤྲོས་མེད་རང་བཞིན་ལས། །སྒྱུ་མའི་སྐུ་ནི་ཡོངས་འབྱུང་ཞིང་། །དང་པོ་སྟོང་ཉིད་རྡོ་རྗེ་སྟེ། །གཉིས་པ་ལ་ནི་ཡི་གེ་ཧཱུྃ། །གསུམ་པ་རྡོ་རྗེ་རྩེ་དགུ་པ། །བཞི་པ་བཅོམ་ལྡན་གསང་བའི་བདག །ལྔ་པ་ལྷ་ནི་ཡོངས་སུ་རྫོགས། །མེ་ལོང་དང་ནི་མཉམ་ཉིད་དང་། །ཆོས་དབྱིངས་ཡེ་ཤེས་ལས་གྲུབ་པའི། །སྐུ་ནི་ཡེ་ཤེས་བདག་ཉིད་དོ། །དེ་རྫོགས་ཡེ་ཤེས་ཆེན་པོའོ། །ཡེ་ཤེས་སྐུ་ལས་ཡེ་ཤེས་ཀྱིས། །སྤྲུལ་པའང་ཡེ་ཤེས་ཉིད་དུ་གནས། །འཁོར་བའི་ཉོན་མོངས་ལས་འདས་ནས། །མི་རྟོག་ཡེ་ཤེས་མེ་ཕུང་ལ། །གསང་བའི་བདག་ཉིད་ལེགས་པར་བཞུགས། །རྣམ་གྲོལ་རྣམ་དག་གྲོལ་བའི་རྒྱུ། །སྔགས་དབྱིབས་ཆོས་བདག་དོན་རྣལ་འབྱོར། །སྐད་

ཅིག་སྐད་ཅིག་ཡེ་ཤེས་ལས། །སྒྱུ་མ་ལྟ་བུའི་སྒྱུ་མའི་སྐུ། །སྒྱུ་མ་ཉིད་ལ་རྣམ་གྲོལ་ཚེ། །ཀྱེ་ཀྱེ་ཧ་ཧ་དཔའ་བོ་ཆེ། །ཀླུ་ཡི་དགྲར་གྱུར་འཇིགས་བྱེད་པོས། །གསང་བའི་བདག་པོ་རྡོ་རྗེ་ཅན། །ཉོན་མོངས་ལས་རྒྱལ་འཇིགས་སུ་རུང་། །དབང་ཕྱུག་ཁམས་གསུམ་ལས་རྒྱལ་བའི། །དེ་བས་བརྩོན་ལྡན་གང་ཡིན་དེས། །ཤིན་ཏུ་སྒྲུབ་པས་བསྒྲུབ་པར་བྱ། །བརྟན་པའི་ཡིད་སོས་པར་བྱེད་པས། །རྒྱལ་བ་གསང་བའི་བདག་པོའོ། །དེ་ནས་གསང་བའི་བདག་པོ་ཉིད། །དངོས་གྲུབ་ངེས་པར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་དང་གསུང་དང་ཐུགས་རྣམ་པར་དག་པའི་རྡོ་རྗེ་ལས་བྱུང་བ། ཨོཾ་བཛྲ་པཱ་ཎི་སརྦ་ཨརྠ་སིད་དྷི་ཀུ་རུ་ཀུ་རུ་སྭཱ་ཧཱ། ལྷ་ཀླུ་མི་མིན་དྲི་ཟ་འམ། །ཡང་ན་མི་ཡི་བུ་མོ་ཡི། །དཔྲལ་བར་ཐིག་ལེ་བྲིས་ནས་ནི། །ལག་ཏུ་ལྕགས་ཀྱུ་ཐོགས་ལ་གཞག །དཀྱིལ་འཁོར་གྲུ་བཞི་ལྷམ་པ་ལ། །བརྟེན་ནས་བུམ་པས་བསྒྲུབ་པར་བྱ། །རྣམ་པར་རྒྱལ་བའི་བུམ་པར་ནི། །སྨན་ལ་སོགས་པས་ལེགས་བཀང་ནས། །རས་ཀྱིས་དཀྲིས་ལ་གཞག་པར་བྱ། །རྒྱུན་དུ་དེ་ལས་བསྒྲུབ་གྱུར་ན། །ཞི་དང་རྒྱས་སོགས་དངོས་གྲུབ་དང་། །གཞན་ཡང་དངོས་གྲུབ་འགྲུབ་པར་འགྱུར། །དེ་ནས་ཡང་གསང་བའི་བདག་པོ་མི་འགྱུར་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དུག་ཐམས་ཅད་ཞི་བར་བྱེད་པའི་སྔགས་འདི་ཉིད་ཀྱིས་སྐུ་དང་གསུང་དང་ཐུགས་རྡོ་རྗེ་ཡང་དག་པ་ལས་ངེས་པར་ཕྱུང་ངོ་། །ཨོཾ་ན་གུ་ནཱ་གེ་པྲོ་ཏཾ་ག་མ་ནི། ཙ་ར་པོ་རྃ་ཡ་ར་བ་རཱ་ཧྱཻད་ཧ་རི་ནྃ་བྲྃ། རིན་ཆེན་སྣོད་དུ་ཆུ་བླུགས་ནས། །སྔགས་ཀྱི་རྒྱལ་པོ་འདི་ལ་ནི། །བརྒྱ་ནས་ཇི་སྲིད་སྟོང་གི་བར། །བརྗོད་ན་འགྲོ་བའི་དུག་ནད་སེལ། །གཞན་ཡང་གསང་སྔགས་རྒྱལ་པོ་ནི། །གསང་བའི་བདག་པོའི་སྦྱོར་བ་དང་། །བཅས་པས་མང་དུ་བརྗོད་བྱས་ནས། །སྒྲུབ་པས་ཅི་ཡང་འགྲུབ་པར་འགྱུར། །ཟླ་བ་སྤྱང་ཀིས་བཟུང་དུས་སུ་དཔྲལ་བར་གོ་རོ་ཙ་ནས་ཐིག་ལེ་བྱས་ཏེ་ཁ་ཤར་ཕྱོགས་སུ་གྱུར་ནས་གསང་སྔགས་འདི་

བརྗོད་ན་ཅི་འདོད་པ་དབང་དུ་བྱེད་དོ། །ཡང་ཟླ་བའམ་ཉི་མ་གཟས་བཟུང་པའི་ཚེ་ཀླུའི་གན་ནས་མི་ཁྲག་གིས་ལུས་བྱུགས་ཏེ་སྔགས་འདི་བརྗོད་ན་ཀླུ་ཐམས་ཅད་དབང་དུ་འགྱུར་རོ། །འདི་ལ་ཐེ་ཚོམ་མེད་དོ། །གཞན་ཡང་སྦྱོར་བ་བཤད་པར་བྱ། །གུར་གུམ་དང་ནི་གི་ཝང་གིས། །རྩིབས་བརྒྱད་པ་ཡི་འཁོར་ལོ་ལ། །དང་པོའི་སྔགས་བཞི་དག་དང་ནི། །ཐ་མའི་སྔགས་རྣམས་བྲི་བར་བྱ། །མུ་ཁྱུད་གཉིས་ལ་རྩ་བ་ཡི། །གསང་སྔགས་རྒྱལ་པོ་རིམ་གྱིས་བྲི། །རིན་ཆེན་སྣོད་བཞག་མཆོད་བྱས་ནས། །གསང་སྔགས་སྟོང་སོགས་བརྗོད་ནས་ནི། །རྒྱལ་མཚན་རྩེ་ལ་གདགས་པར་བྱ། །གཞན་གྱི་རིག་སྔགས་གཅོད་པར་བྱེད། །གལ་ཏེ་ཆར་པ་དབབ་པར་འདོད་ན་སའི་དཀྱིལ་འཁོར་གྲུ་བཞི་པར་བྱས་ཏེ། དབུས་སུ་པད་མ་འདབ་མ་བརྒྱད་པ་བྲིས་ལ་དེའི་སྟེང་དུ་ཀླུའི་རྒྱལ་པོ་བརྒྱད་ཀྱི་གཟུགས་བྱས་ཏེ་གཞག་ལ་རང་ཉིད་ཁྲོ་བོའི་རྒྱལ་པོ་གོས་སྔོན་པོ་ཅན་དུ་བྱས་ཏེ། སྨན་སྣ་ཚོགས་དང་། འོ་མ་དང་འབྲས་ཆན་དང་། ཞོ་ལ་སོགས་པ་རྣམས་དང་། ཀ་ར་དང་བུ་རམ་ལ་སོགས་པས་མཆོད་ནས་གོས་དཀར་པོ་བགོས་ཏེ་ཧཱུྃ་འབྲུག་གི་སྒྲ་ལྟ་བུ་བརྗོད་པས་མགོ་འདྲེན་པའི་གསང་སྔགས་ཀྱི་རྒྱལ་པོ་བརྗོད་པས་ཆར་འབེབས་པར་བྱེད་དོ། །གལ་ཏེ་མ་འབེབས་ན་ཀླུ་རྣམས་བསྡིགས་པའི་ཕྱིར། དཀྱིལ་འཁོར་དེའི་སྟེང་དུ་ཁྲག་སྣ་ཚོགས་དང་། དུག་ཤིང་ལ་སོགས་པས་སྦྱིན་བསྲེག་བྱའོ། །དེས་མྱུར་དུ་ཆར་འབེབས་པར་བྱེད་དོ། །གལ་ཏེ་ཆར་ཆེས་པའམ་སེར་བ་གཅོད་པར་འདོད་པས་ཉེར་ཤིང་དང་དུག་ཀ་ད་པའི་རྩ་བ་ལ་ཡི་གེ་བྲིས་ཏེ། དཀྱིལ་འཁོར་དཀར་པོའི་དབུས་སུ་བཙུགས་ལ་ཡུངས་ཀར་དང་ཐལ་བ་ལ་མང་དུ་བཟླས་པར་བྱའོ། །གལ་ཏེ་མི་འདོད་ན་བསྔགས་པ་ཙམ་གྱིས་ཀྱང་ངེས་པར་འབྱུང་ངོ་། །རྟའི་ཁྲག་དང་དུག་སྣ་ཚོགས་ཀྱིས་བརྒྱལ་བ་ལས་སོས་པར་བྱེད་དོ། །རླུང་ཞི་བར་འདོད་ན་དབང་ཕྱུག་གི་གོས་ལ་ཙ་ཏ་བ་ལ་རི་རྩེ་བས་སྔགས་བྲིས་ཏེ་དཀྱིལ་འཁོར་གྱི་སྟེང་དུ་བཞག་ནས། སྔགས་ཀྱི་རྒྱལ་པོ་སྟོང་ལ་སོགས་པ་ཅི་ནུས་པ་བརྗོད་ནས་ཁང་

པའི་སྟེང་དུ་བཞག་ན་རླུང་ཞི་བར་བྱེད་དོ། །གལ་ཏེ་ཡམས་ཞི་བར་འདོད་པས་གུར་གུམ་དང་། གི་ཝང་གི་རྩེ་མོ་བཅུ་གཉིས་པར་བྲིས་ནས་དང་པོའི་སྔགས་རྣམས་དང་། ཐ་མའི་སྔགས་རྣམས་རྩིབས་ལ་བྲིས་ཏེ། མུ་ཁྱུད་ལ་སྔགས་ལྷག་མ་བྲིས་ཏེ་མེ་ཏོག་དང་འབྲས་བུ་སེར་པོ་ཐམས་ཅད་མཆོད་ཅིང་གསོལ་པ་བཏབ་ནས་གཙུག་ལག་གི་རྩེ་མོ་འམ། དགེ་འདུན་གྱི་འདུ་བའི་སྒོ་གོང་ལ་བཏགས་ན་ཅི་འདོད་པ་འགྲུབ་ཅིང་ནད་ཡམས་ཐམས་ཅད་འཆད་པར་འགྱུར་རོ། །གལ་ཏེ་བུ་འདོད་པས་སེའུ་སྐྱ་དམར་པོའི་སྡོང་བུ་ལ་སྟེང་དུ་སྦྱིན་སྲེག་བྱས་ན་བུ་སྟེར་བར་ངེས་སོ། །གལ་ཏེ་གཏེར་འདོད་པས་སའམ། རིན་པོ་ཆེ་ལ་རྣམ་ཐོས་སྲས་ཀྱི་གཟུགས་ཁྲུ་གང་པ་བྱས་ནས་རིན་པོ་ཆེའམ་སྤང་ལེབ་ཀྱི་སྟེང་དུ་བཞག་ནས་མཆོད་པ་རྣམ་པ་སྣ་ཚོགས་ཕུལ་ནས་གསོལ་བ་བཏབ་ན་ཞག་བདུན་ནས་རིན་པོ་ཆེ་སྟེར་བར་བྱེད་དོ། །གལ་ཏེ་ཤི་བར་དོགས་པས་དཀྱིལ་འཁོར་ཁྲུ་གང་ཟླུམ་པོ་སེར་པོར་བྱས་ནས་དབུས་སུ་བུམ་པ་ལེགས་པར་བཞག་པའི་ནང་དུ་སྨན་སྣ་ཚོགས་བླུགས་ནས་རས་དཀར་པོས་ཁ་བཀབ་པར་བྱས་ཏེ། གསང་སྔགས་ཀྱི་རྒྱལ་པོ་མང་དུ་བརྗོད་ནས་ཕྱིས་བུམ་པ་ལ་དངོས་གྲུབ་བླངས་ན་ཅི་འདོད་པ་འགྲུབ་བོ། །དེ་ལྟར་ཡང་ཡང་བྱས་པས་ཚེའི་དངོས་གྲུབ་ཐོབ་པར་འགྱུར་རོ། །གལ་ཏེ་མཆོག་གྲུབ་པར་འདོད་པས་ས་འམ་རིན་པོ་ཆེ་ལ་ཕྱག་ན་རྡོ་རྗེ་ཞལ་གཅིག་ཕྱག་གཉིས་པ་གདན་པད་མ་དང་ཉི་མ་ལ་གནས་པར་བྱས་ནས་དེ་རིན་པོ་ཆེའི་སྣོད་དུ་བཞག་ལ་མཎ་ཌལ་དཀར་པོ་ཁྲུ་གང་པ་བྱས་པའི་སྟེང་དུ་ཁྲིའུའི་སྟེང་དུ་བཞག་ལ་མེ་ཏོག་དང་གོས་དཀར་པོས་མཆོད་ཅིང་ཙན་དན་དཀར་པོའི་ཆུས་ཅི་ནུས་པར་མཆོད་པར་བྱེད་ཅིང་། ཡང་ཚེས་བརྒྱད་དང་། བཅུ་བཞི་དང་། བཅོ་ལྔ་དང་། གནམ་སྟོང་ལ་དེའི་དུས་སུ་སྨྱུང་བ་བྱས་ནས། ཕྱིས་ནི་བརྒྱད་སྟོང་གི་གྲངས་སུ་གསང་སྔགས་འདོན་པར་བྱེད་ཅིང་རང་ཉིད་ཀྱི་སྤྱི་བོར་ཡི་གེ་ཨོཾ་དཀར་པོ་འོད་དང་ལྡན་པས་བདུད་རྩིའི་ཆུ་འབེབས་པར་བསམ་པས་ཁམས་གསུམ་པའི་ནད་ཐམས་ཅད་ཟད་པར་བསམ་ཞིང་སླར་རང་ཉིད་ལ་རིམས་ཀྱིས་ཞུ་བར་

བྱེད་པ་ནི་རྒྱུད་ལས་གྲུབ་པའི་བསམ་གཏན་ཏེ། འདི་གོམས་པས་གང་དང་གང་འདོད་པ་ཐམས་ཅད་འགྲུབ་ཅིང་ཁམས་གསུམ་གྱི་དབང་ཕྱུག་ཏུ་འགྱུར་རོ། །གསང་བའི་བདག་པོ་ང་ལས་ཉོན། །འཇིག་རྟེན་ཀུན་ལས་རྣམ་རྒྱལ་བའི། །སྐུ་ནི་སངས་རྒྱས་ཀུན་བདག་ཉིད། །གང་གིས་བགོས་པར་གྱུར་པ་ལས། །ཅི་འདོད་རྙེད་པར་བྱེད་པ་མཆོག །གལ་ཏེ་རྟོག་མེད་དེ་བྲལ་ན། །ཡེ་ཤེས་ཉིད་ནི་བླ་ན་མེད། །རྒྱལ་བའི་སྟོབས་ཀྱིས་རྟོགས་པར་བྱེད། །ཉོན་མོངས་ཀུན་ལས་རྒྱལ་བྱེད་ཅིང་། །ནད་རྣམས་ཐམས་ཅད་ཟད་བྱེད་ཅིང། །གལ་ཏེ་ནད་མེད་ནད་བཅས་བྱེད། །དབང་དང་རེངས་དང་དགུག་པ་དང་། །བརྒྱལ་དང་གསད་དང་དབང་ཕྱུག་དང་། །ཞི་དང་སྲུང་དང་དཔལ་བྱེད་དང་། །ཕྱིར་རྒོལ་བ་རྣམས་བརླག་པ་ཡི། །ཕྲ་མོ་འགྲུབ་པ་སྨོས་ཅི་དགོས། །འཇིག་རྟེན་ལས་གྲོལ་བདེ་བའི་ལུས། །རྒྱལ་བའི་གསུང་གིས་ལེགས་འཐོབ་བོ། །སྐུ་ནི་འདིར་བརྗོད་མེད་པས་ཏེ། །སྤྱོད་ཚུལ་རྣམས་ལས་འདས་པའོ། །མིང་དང་ཚོགས་ལས་རྣམ་འདས་ན། །ཉེར་ཞི་སྤྲོས་ལས་ཤིན་ཏུ་འདས། །ཚིག་གི་ཡུལ་ནི་རྣམ་པར་བྲལ། །རྡོ་རྗེ་སྒོ་ལ་དེ་དག་ནི། །ཅི་བཞིན་དོན་ནི་ཤེས་འགྱུར་གྱི། །གཞན་དུ་བསྐལ་པ་སྟོང་དུ་ཡང་། །ཅིས་ཀྱང་ཤེས་པར་ག་ལ་ནུས། །གལ་ཏེ་དམིགས་པ་ཟད་འདོད་པས། །མི་དམིགས་སྤྲོས་མེད་གང་ཞིག་ལ། །རང་གི་སེམས་ཉིད་གཞག་པར་བྱ། །དེ་ལ་ཐར་པས་གྲོལ་བའོ། །གལ་ཏེ་དགའ་འགྱུར་ཡིད་ཡོད་ན། །དངོས་འདི་ཤེས་པས་ཅི་སྟེ་སྟོང་། །དེ་སྟོང་སྤྲོས་དང་བྲལ་བ་ལ། །ཤེས་པ་ཉིད་ནི་ཅི་ལ་བརྟེན། །གསང་སྔགས་དྲག་པོའི་སྦྱོར་བ་འདི། །དབང་བསྐུར་གནང་བ་མེད་པ་དང་། །ཚུལ་ངན་ལང་ཚོ་ཕྲ་བ་དང་། །ང་རྒྱལ་དྲེགས་ཤིང་ཁེངས་པ་དང་། །ཐེག་པ་ཆེ་ལ་མ་མོས་ལ། །ཡི་གེ་ཙམ་ཡང་བསྟན་པ་མིན། །གལ་ཏེ་བརྒྱ་ལམ་རྨོངས་པ་འགས། །བསྟན་ན་རང་ཉིད་ཕུང་བར་བྱེད། །དེ་སྐད་དུ་ཁམས་གསུམ་ལས་རྣམ་པར་རྒྱལ་བ་ཞེས་བྱ་བའི་འོད་ཟེར་དེ་སླར་རང་གི་ཐུགས་ཀར་བསྡུས་ནས་

ཞལ་ཐམས་ཅད་ཞལ་ལ་ཐིམ་ཞིང་ཕྱག་ཐམས་ཅད་ཕྱག་ལ་ཐིམ་ནས། ཞལ་གཅིག་ཕྱག་གཉིས་པར་གྱུར་ཏེ། །ཧཱུྃ་ཧཱུྃ་ཧཱུྃ་ཞེས་པའི་གླུ་བླངས་སོ། །འདི་ལ་ཅི་ལྟར་དམིགས་བྱས་བཞིན། །ལྷ་རྣམས་ཀུན་ལ་དམིགས་པར་འགྱུར། །གསང་སྔགས་འབུམ་དུ་བརྗོད་བྱས་ནས། །བསྙེན་པའི་དམ་པ་འདི་འགྲུབ་བོ། །འདས་དང་མ་འདས་འོངས་གྱུར་པའི། །སངས་རྒྱས་རྣམས་ཀྱིས་སྔགས་འདི་བཤད། །འདི་ནི་སངས་རྒྱས་ཀུན་གྱི་གསང་། །ཡེ་ཤེས་ཆེན་པོ་ཞེས་བརྗོད་དོ། །དེ་ནས་འཁོར་དེ་དག་ཐམས་ཅད་ནི་གཙོ་བོའི་ཐུགས་ཀར་ཐིམ་པར་གྱུར་ཏོ། །ཀྭ་ཡེ་རྡོ་རྗེ་ཆེན་པོ་ནི། །ལག་ན་རྡོ་རྗེ་སྟོབས་པོ་ཆེ། །དུས་གསུམ་སངས་རྒྱས་ཐམས་ཅད་ཀྱི། །གསང་བའི་མཛོད་འཛིན་གྱུར་པའོ། །བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་གྱི་རྡོ་རྗེ་གདེངས་པའི་རྒྱུད་ལས་ཁམས་གསུམ་རྣམ་པར་རྒྱལ་བ་ཞེས་བྱ་བའི་ལེའུ་རྫོགས་སོ།། །།པཎ་ཌི་ཏ་ཨཌ་ཡ་ཤྲཱི་མ་ཏི་ཞེས་བྱ་བ་དང་། བོད་ཀྱི་ལོཙྪ་བ་བན་དེ་ཆོས་ཀྱི་དབང་ཕྱུག་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།

དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད།

རྒྱ་གར་སྐད་དུ། །ཤྲཱི་བཛྲ་ཙཎྜ་ཙིཏྟ་གུ་ཧྱ་ཏན་ཏྲ། བོད་སྐད་དུ། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད། དཔལ་གཏུམ་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་ན་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ལ་གཟིགས་པའི་བདེ་བར་གཤེགས་པ་ཐམས་ཅད་ཆོས་ཀྱི་སྐུ་ལས་ལོངས་སྤྱོད་རྫོགས་པའི་སྐུ་དང་། སྤྲུལ་བའི་སྐུ་དང་། རྡོ་རྗེའི་སྐུ་དང་། མངོན་པར་བྱང་ཆུབ་པའི་སྐུས་འགྲོ་བའི་དོན་མཛད་དོ། །བརྗོད་མེད་དོན་གྱི་གསུང་དང་། དགོངས་པ་བརྡའི་གསུང་དང་། ཚངས་པ་དབྱངས་ཀྱི་གསུང་དང་། དབྱེར་མི་ཕྱེད་པའི་གསུང་དང་། རིག་པ་བྱིན་གྱིས་བརླབས་ཀྱི་གསུང་གིས་འགྲོ་བའི་དོན་མཛད་དོ། །ཆོས་ཀྱི་དབྱིངས་ཀྱི་ཐུགས་དང་། མེ་ལོང་ལྟ་བུའི་ཐུགས་དང་། མཉམ་

པ་ཉིད་ཀྱི་ཐུགས་དང་། སོ་སོར་ཀུན་རྟོག་གི་ཐུགས་དང་། བྱ་བ་གྲུབ་པའི་ཐུགས་ཀྱིས་འགྲོ་བའི་དོན་མཛད་དོ། །གནས་དང་། གདན་ཁྲི་དང་། འཁོར་དང་། འདུལ་བའི་ཞིང་དང་། སྐུ་འོད་ཟེར་བསམ་གྱིས་མི་ཁྱབ་པས་འགྲོ་བའི་དོན་མཛད་དོ། །ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྱིས་གྲུབ་པའི་ཕྲིན་ལས་ཀྱིས་འགྲོ་བའི་དོན་མཛད་དོ། །དེའི་ཚེ་དེའི་དུས་ན། བཅོམ་ལྡན་འདས་རིགས་ལྔ་དང་། རིགས་གསུམ་ལ་སོགས་པའི་སངས་རྒྱས་ཀྱིས་སེམས་ཅན་འདུལ་བའི་དུས་ལ་བབ་པར་གཟིགས་ནས་མ་ཆགས་པའི་ཐུགས་རྗེས་རྣམ་པ་སྣ་ཚོགས་པའི་སྤྲུལ་པས་འགྲོ་བའི་དོན་མཛད་པའོ། །དེའི་ཚེ་ན་ལྷ་མ་སྲིན་ཤིན་ཏུ་དྲེགས་པ་དང་། དྲེགས་པའི་རུ་དྲ་ཞེན་ཆགས་ཀྱི་འདམ་ན་གནས་པ། ང་རྒྱལ་གྱི་རི་རབ་ལ་གནས་པ། ཕྲག་དོག་གི་རླུང་སེམས་ལ་འཚུབ་པ། གཏི་མུག་མུན་པའི་གཡུང་དྲུང་ན་གནས་པ། དེ་ལྟ་བུ་དག་འདུལ་བའི་དུས་ལ་བབ་པར་གཟིགས་ནས་དེ་བཞིན་གཤེགས་པ་ཐམས་ཅད་ཐུགས་གཅིག་ཏུ་གྱུར་ཏེ། མི་གནས་པའི་ཡེ་ཤེས་ཆེན་པོ་ལས་རྡོ་རྗེའི་རིགས་དང་བུད་དྷའི་རིགས་དང་། རིན་པོ་ཆེའི་རིགས་དང་། པད་མའི་རིགས་དང་། ལས་ཀྱི་རིགས་སུ་གྱུར་ཏེ། སོ་སོའི་ཡུམ་དང་ཆས་ནས་བཞུགས་ཏེ་ཐུགས་འདུས་པའི་བྱིན་གྱིས་བརླབས་ལས་ཐམས་ཅད་ཀྱི་རིགས་ཀྱི་སངས་རྒྱས་སྐུ་བཻཌཱུརྱའི་རང་བཞིན་ལྟར་སྔོ་བ། སྔོན་པོར་སྣང་བ་སྔོ་བར་གྱུར་པ། རིན་པོ་ཆེ་ཨིནྡྲ་ནི་ལ་ལྗང་གུ་ལྟ་བུའི་ཁ་དོག་ཏུ་སྣང་བ། ལྕང་ལོ་ཅན་གྱི་ཆ་བྱད་ཕྱག་ན་རྡོ་རྗེ་བསྣམས་ནས་ཐུགས་ཀར་བརྟན་པ་བྱུང་ངོ་། །བྱུང་བར་གྱུར་ཏོ། །དེའི་མཐུ་དང་སྟོབས་ཀྱིས་འཇིག་རྟེན་ན་གནས་པའི་དྲེགས་པ་ཅན་བཏུལ་ཏེ། དམ་ལ་བཏགས་ནས་བྱང་ཆུབ་མཆོག་ཏུ་སེམས་བསྐྱེད་དོ། །དཔལ་རྡོ་རྗེ་གཏུམ་པོ་ཐམས་ཅད་གསང་བའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།ཡང་དེའི་ཚེ་ན་ཉོན་མོངས་པ་ལ་གནས་པའི་སེམས་ཅན་ཞི་བས་མི་འདུལ་བར་གྱུར་པ་དག་གནས་པ་ལས་རིགས་ལྔའི་བཅོམ་ལྡན་འདས་རྣམས་ཀྱིས་གསང་བའི་བདག་པོ་ལ་

བཀའ་བསྒོ་བ་སྟེ། ཀྱེ་གསང་སྔགས་དང་རིག་སྔགས་དང་གཟུངས་སྔགས་ཀུན་གྱི་བདག་པོ་ཞི་བས་མི་འདུལ་བའི་སེམས་ཅན་ལ་ཐམས་ཅད་ཁྲོས་པའི་ཚུལ་གྱིས་གདུལ་བར་གྱིས་ཤིག་ཅེས་བཀའ་སྩལ་ཏོ། །ཨོཾ་བཛྲ་པཱ་ཎི་ཀྲོ་དྷ་ཀྲོ་དྷ་ཧཱུྃ་ཧཱུྃ་ཞེས་ཆེད་དུ་བརྗོད་པ་ལན་གསུམ་ཆེད་དུ་བརྗོད་པ་ལས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་མཆེ་བ་གཙིགས་ཤིང་འཚམ་པ། མིག་མེ་མདག་གི་ཕུང་པོ་ལྟར་འབར་བ། དབུགས་དུར་ཁྲོད་ཀྱི་མེ་ལྕེ་ལྟར་འབར་བ། འཇིགས་པའི་ང་རོ་བསྐལ་བའི་དུས་མཐའ་ལྟར་སྒྲོགས་པ་ལག་པ་དང་རྐང་པ་ཀླུའི་རྒྱལ་པོ་ནོར་བུ་དང་ནོར་རྒྱས་ཀྱི་བུས་བརྒྱན་པ། ཀླུའི་རྒྱལ་པོ་ནག་པོ་དང་ཉེ་གནག་ནག་པོས་སེ་རལ་ཁར་བརྒྱན་པ། ཀླུའི་རྒྱལ་པོ་དགའ་བོ་དང་ཉེ་དགའ་བོ་འབར་བས་རྣ་ཆ་བྱས་པ། སྦྲུལ་གདུག་པ་འབར་བ་ཟ་བ། བཞིན་རྒྱས་པ། སྨིན་མ་སེར་ནག་དཔྲལ་བ་ལ་བསྡུས་པ། གཤིན་རྗེའི་ཆ་བྱད་ཅན། ལྕེ་གློག་ལྟར་འགྱུ་བ། གསུས་པོ་ཆེ་སྦྲུལ་ཟ་བ། ལག་པའི་ཐལ་མོ་བརྡབས་པའི་སྒྲས་འཇིགས་པར་བྱེད་པ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། ཨ་ལ་ལ་ཞེས་འཇིགས་པར་བྱེད་པ། སྐྲག་པར་བྱེད་པ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་ཡོད་པ་རྐང་པའི་པུས་མོ་ཙམ་དུ་ཕྱིན་པ། དབང་པོ་དང་ཉི་མ་ཕྲག་པ་ལ་ཁུར་བ། ཀླུ་ཐམས་ཅད་རླག་པར་བྱེད་པ། ཧ་ལའི་གད་རྒྱངས་ཆེན་པོས་དགོད་པས་ཀུན་ཏུ་འཁྲུག་པར་བྱེད་པ། ཁམས་གསུམ་འཇིགས་ཤིང་སྐྲག་པར་བྱེད་པ། ཀླུ་རྣམས་འཆི་བར་བྱེད་པ་ཞིག་བྱུང་སྟེ། རང་གི་གཟུངས་སྔགས་འདི་ཆེད་དུ་བརྗོད་དོ། །ཏདྱ་ཐཱ། བྷོ་བྷོ་པཱ་ན་ནཱ་ག་ཨ་དྷི་བ་ཏ་ཡེ། ཨི་ནད་ནཱི་ལཱམ་བ་ར་དྷ་ར་ཤ་རཱི་རམ། བཛྲ་པཱ་ཎི་ཧྲྀ་ད་ཡྃ། ཡཿས་མཱ་ཏི་ཀྲ་མ་ཐ། མཱ་ཀུ་ལ་[ཨུད་]སཱ་ད་ནྃ་བྷ་བི་ཥྱཾ་ཏི། ཏདྱ་ཐཱ། བུད་དྷ་བུད་དྷ་བི་བུད་དྷ་བི་བུད་དྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱྃ། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪི་ད་ཙྪི་ད་ནཱ་ག་ཧྲྀ་ད་ཡཱ་ནི། བྷིན་ད་བྷིན་ད་ནཱ་ག་མརྨཱ་ཎི། བི་ཤཱིརྻནྟུ་ནཱ་ག་ཤ་རཱི་རཾ། བི་སྥོ་ཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ་ཧཱུྃ་ཕཊ།

ནཱ་ག་བི་དཱ་ར་ཎཱ་ཡ་ཕཊ། ནཱ་གོ་ཏ་སཱ་ད་ནཱ་ཡ་ཕཊ། ནཱི་ལཱམ་བ་ས་ནཱ་ཡ་ཕཊ། ཨ་བྲ་ཏི་ཧ་ཧ་བ་ལ་པ་རཀྲ་མཱ་ཡ་ཕཊ། ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོཥ་ཎཱ་ཡ་ཕཊ། ཏྭཱ་ས་ནཱ་ཡ་ཕཊ། ཀུ་སྨཱཾ་ཌོཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་བསྨཱ་ར་བིནཱ་ཤ་ཀ་རཱ་ཡ་ཕཊ། ཧ་ས་ཧ་ས། དཱ་ར་དཱ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣཱྃ་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲུྃ། སྃ་གྷ། བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། དེ་སྐད་ཅེས་བཀའ་སྩལ་མ་ཐག་ཏུ་དྲེགས་པ་ཅན་ཕལ་པ་དག་རི་མོ་བཞིན་གཡོ་བ་མེད་པར་གྱུར་ཏེ། བརྒྱལ་རབ་ཏུ་བརྒྱལ་བ་ལས་ཕྱིར་དྲན་པ་སངས་ནས་འདི་སྐད་ཅེས་གསོལ་ཏོ། །ཀྱེ་གསང་བའི་བདག་པོ་ཁྱོད་ནི་ཐུགས་རྗེའི་མངའ་བདག་ཀུན་གྱི་མགོན་དང་སྐྱབས་སུ་གྱུར་པ་ལགས་ན་བདག་ཅག་གི་སྡུག་བསྔལ་འདི་ལས་ཐར་བར་མཛད་དུ་གསོལ་ཞེས་གསོལ་ཏོ། །དེ་ནས་དྲེགས་པ་ཅན་དེ་དག་དམ་ལ་བཏགས་ཏེ་དབང་བསྐུར་དམ་ཚིག་ཕོག་ནས་བྱང་ཆུབ་ཏུ་སེམས་བསྐྱེད་དོ། །དཔལ་རྡོ་རྗེ་གཏུམ་པོ་ཐམས་ཅད་གསང་བའི་རྒྱུད་ལས་དྲེགས་པ་ཅན་ཕལ་བ་བཏུལ་བའི་ལེའུ་སྟེ་གཉིས་པའོ།། །།དེ་ནས་འཇིག་རྟེན་གྱི་དྲེགས་པ་ཅན་དག་ཤིན་ཏུ་ཡང་དྲེགས་པར་གྱུར་པ་དག་འདི་ལྟ་སྟེ། ཀླུ་རྒྱལ་རིགས་ཀྱི་རྒྱལ་པོ་རྒྱ་མཚོ་ཞེས་བྱ་བ་དང་། རྗེའུ་རིགས་ཀྱི་རྒྱལ་པོ་ཀུན་ནས་གདུགས་ཞེས་བྱ་བ་དང་། བྲམ་ཟེའི་རིགས་ཀྱི་རྒྱལ་པོ་ཆུ་ལྷ་ཞེས་བྱ་བ་དང་། གདོལ་པའི་རྒྱལ་པོ་ཤུ་ལ་པུ་ཀ་ར་ཞེས་བྱ་བ་དང་། བདུད་ཀྱི་རྒྱལ་པོ་སྐོས་རྗེ་དྲང་དཀར་དང་། གཟའ་རྒོད་ཆེན་པོ་དང་། དཀར་པོ་དུང་གི་ཐོར་ཚུགས་ཅན་དང་། བཙན་གྱི་རྒྱལ་པོ་དམར་པོ་སྲོག་ལེན་དང་། གཤིན་རྗེའི་རྒྱལ་པོ་རྨིག་པ་དང་། མ་མོའི་རྒྱལ་མོ་མཁའ་དབྱིངས་ཀྱི་ཡུམ་དང་། གཤིན་རྗེའི་སྲིང་མོ་ཕུང་བྱེད་རེ་བ་ཏི་ལ་སོགས་པ་དང་། ཤིན་ཏུ་དྲེགས་པ་ཅན་གྱིས་འཇིག་རྟེན་ཕུང་བར་བྱེད་པ་དག་མ་ཐུལ་བ་ལས་ལོངས་སྤྱོད་རྫོགས་པའི་སྐུ་ལྔས་ཀྱེ་གསང་བའི་བདག་པོ་དྲེགས་པ་ཕོ་མོ་དག་ཐུལ་བར་མ་གྱུར་ཏེ།

ཐམས་ཅད་ཀྱི་ཐབས་ཀྱིས་དྲེགས་པ་ཉོན་མོངས་པ་གདུལ་བར་བྱའོ་ཞེས་བཀའ་སྩལ་ཏོ། །དུས་གསུམ་གྱི་སངས་རྒྱས་ཐམས་ཅད་ཀྱང་གསང་བའི་བདག་པོ་ལ་འདི་སྐད་ཅེས་གསུངས་སོ། །འཇིག་རྟེན་གྱི་དྲེགས་པ་འདི་དག་འདོད་ཆགས་ལ་གནས་པས་སེམས་ཅན་ལ་རྣམ་པར་འཚེའི། ཀུན་གྱི་ལུས་དང་སྲོག་མ་རུངས་པར་བྱེད་པས་ཁྱོད་ཀྱིས་ཐམས་ཅད་ཁྲོས་པའི་ཚུལ་གྱིས་ཐུལ་ཅིག་ཅེས་བསྒོའོ། །ཕྱོགས་བཅུའི་ཞིང་ཁམས་རྣམ་པར་དག་པ་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་དང་། རིགས་སོ་སོར་ཀུན་ནས་འདུས་པ་རྣམས་ཀྱང་གསུང་གཅིག་གི་ང་རོས་འདི་སྐད་ཅེས་གསུངས་སོ། །གསང་བའི་བདག་པོ་ཁྱོད་ཤིན་ཏུ་ཁྲོས་པའི་ཚུལ་སྟོན་ལ་མ་མཆིས་པའི་སྟོབས་ཀྱིས་དྲེགས་པ་ཅན་ཐུལ་ཅིག་ཅེས་བཀའ་བསྒོའོ། །གཞན་ཡང་རིག་སྔགས་དང་། གསང་སྔགས་དང་། གཟུངས་སྔགས་ཀྱི་བདག་པོ་ཐམས་ཅད་འདུས་ཏེ། རིགས་ཀྱི་བདག་པོ་དང་། རིགས་ཀྱི་ཡུམ་དང་། རིགས་ཀྱི་ཁྲོ་བོ་དང་། རིགས་ཀྱི་སྤྲུལ་པ་དང་། རིགས་ཀྱི་ཕོ་ཉ་མོ་ལ་སོགས་པ་ཐམས་ཅད་འདུས་ནས་མགྲིན་གཅིག་ཏུ་བཀའ་སྩལ་པ། གསང་བའི་བདག་པོ་གདུལ་བྱའི་ཞིང་འདི་དག་ཞི་བའི་ཆ་བྱད་ཀྱིས་མི་འདུལ་བས། ཞེ་སྡང་དང་། གདུག་སེམས་སུ་བཅས་པ། ཉོན་མོངས་པ་རང་དགའ་མར་སྤྱོད་པ། འདོད་པའི་སྐོམ་གྱིས་གདུངས་པ་འདི་དག་ཁྱོད་ཀྱི་མཐུའི་སྟོབས་ཀྱིས་ཤིན་ཏུ་ཁྲོས་པའི་ཆ་བྱད་སྟོན་ལ་མ་འཕྱི་བར་མྱུར་བར་རབ་ཏུ་ཐུལ་ཅིག་ཅེས་བཀའ་བསྒོའོ། །དེ་ནས་སྐུ་མི་སྣང་བ་ཡེ་ཤེས་ཆེན་པོའི་ངང་ལ་བཞུགས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཁྲོ་བོར་བཀའ་བསྒོ་བའི་ལེའུ་སྟེ་གསུམ་པའོ།། །།ལ་མ་འཕྱི་བར་མྱུར་བར་རབ་ཏུ་ཐུལ་ཅིག་ཅེས་བཀའ་བསྒོའོ། །དེ་ནས་སྐུ་མི་སྣང་བ་ཡེ་ཤེས་ཆེན་པོའི་ངང་ལ་བཞུགས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཁྲོ་བོར་བཀའ་བསྒོ་བའི་ལེའུ་སྟེ་གསུམ་པའོ།། །།དེ་ནས་རིགས་ལྔ་དེ་ནས་རིགས་ལྔ་ཡབ་ཡུམ་གཉིས་སུ་མེད་པའི་མཁའ་ལས་ཐུགས་རྗེས་ཁྲོས་པའི་ས་བོན་ཧཱུྃ་མཐིང་ནག་ཧ་ལ་ནག་པོའི་མདོག་ལྟ་བུ་འོད་ཟེར་སྣ་ཚོགས་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ་དག་བྱུང་སྟེ། དེའི་བྱིན་གྱིས་བརླབས་ལས་ཐུགས་རྗེ་བྱིན་གྱིས་བརླབས་ལས་ཨེ་

མཐིང་ནག་དང་། ཡྃ་སྔོ་སྐྱ་དང་། རྃ་ཁྃ་དམར་ནག་དང་། སུྃ་སེར་ནག་དང་། རྃ་དམར་ནག་དང་། ཀེྃ་དཀར་སྐྱ་དང་། སྣ་ཚོགས་པའི་བྷྲཱུྃ་འཕྲོས་པར་གྱུར་ཏོ། །དེ་དག་གི་འཕྲོ་འདུ་ལས་གྲུ་གསུམ་མཐིང་ནག་ནམ་མཁའ་དང་། སྔོ་སྐྱ་རླུང་ཟླ་གམ་དང་། དམར་ནག་རཀ་ཏའི་རྒྱ་མཚོ་དང་། སེར་ནག་ཞིང་ཆེན་ས་གཞི་དང་། དཀར་སྐྱ་ཀེང་རུས་རི་རབ་དང་། སྣ་ཚོགས་རིན་པོ་ཆེའི་གཞལ་ཡས་ཁང་མཐིང་ནག་རྡོ་རྗེ་རྒྱ་གྲམ་ལས་ལྷུན་གྱིས་གྲུབ་པའི་དཀྱིལ་འཁོར་དུ་གྱུར་ཏོ། །ཆོས་ཉིད་མི་འགྱུར་ལྷུན་གྱིས་གྲུབ་པའི་ལྟེ་བ་མཐིང་ནག ཟླུམ་པོ་ཕྲིན་ལས་རྣམ་པ་བཞིས་ལྷུན་གྱིས་གྲུབ་པའི་རྒྱ་གྲམ་གྱི་རྩེ་མོ་ཕྱོགས་བཅུར་འཕྲོ་བ། བར་མཚམས་རིན་པོ་ཆེ་སྣ་བཞི་ལས་ལྷུན་གྱིས་གྲུབ་པ། གྲུ་ཆད་རིན་པོ་ཆེ་ལྗང་གུར་སྣང་བ། སྒོ་བཞི་རིན་པོ་ཆེ་སྣ་བཞི་ཚད་མེད་པ་བཞིའི་ཕྲིན་ལས་སུ་སྣང་བ་སྣ་ཚོགས་ཀྱི་རྒྱན་རང་བཞིན་དུ་སྣང་བ་རང་བྱུང་བར་གྱུར་ཏོ། །དེ་ནས་ཧཱུྃ་མཐིང་ནག་ཁྲོ་བོའི་ས་བོན་དེ་ལས་སྣ་ཚོགས་རྡོ་རྗེ་ཕྲ་མོའི་འོད་ཚ་ཚར་འཕྲོ་བ། རྡོ་རྗེ་ཕྲ་མོའི་འོད་ཟེར་ལས་རྡོ་རྗེ་ལྕགས་ཀྱུ་ཕྲ་མོ་བསམ་གྱིས་མི་ཁྱབ་པས་འཇིག་རྟེན་གྱི་དྲེགས་པ་ཅན་ཀུན་དང་། སྲོག་ལ་རྔམ་པའི་སྲིན་པོ་ཕོ་མོ་སྣ་ཚོགས་པ་བཀུག་སྟེ། གཞལ་ཡས་ཁང་གི་ཕྱི་རོལ་དུ་ཤིང་རྩ་བ་ནས་བསྒྱེལ་བ་བཞིན་དུ་གྱུར་ཏེ་རི་མོ་བཞིན་གཡོ་བ་མེད་པར་གྱུར་ཏོ། །མཐུའི་བྱིན་གྱིས་རླབས་ཀྱིས་འཁོར་ལོའི་ལྟེ་དབུས་སུ་རྡོ་བ་བསྐྱུར་བ་བཞིན་དུ་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱིས་ཀྱང་སྟི་ར་བྃ་ཞེས་བརྗོད་པས་སྲིན་པོ་ཕོ་མོ་དྲན་པ་རྙེད་དེ་མདུན་དུ་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་གཞལ་ཡས་ཁང་ལྷུན་གྱིས་གྲུབ་པའི་ལེའུ་སྟེ་བཞི་པའོ།། །།དེ་ནས་ཐུགས་རྗེ་ཁྲོས་པའི་ཧཱུྃ་མཐིང་ནག་འོད་འབར་བ་ལས་དེ་བཞིན་གཤེགས་པ་ཀུན་གསུང་གཅིག་གིས་ཨ་བྷི་རོ་ཥ་ཎ་ཧཱུྃ་ཞེས་གསུངས་པ་ལས་ཁྲོ་གཉེར་བསྡུས་ཤིང་ཞལ་བགྲད་པས་དུག་གསུམ་རྩད་ནས་གཅོད་པའི་མཆེ་བ་ཟུར་གསུམ་གཙིགས་པ། དེ་ལྟར་འབར་བའི་ཆ་བྱད་དུ་སྣང་བ་ཞིག་བྱུང་སྟེ། འཇིག་རྟེན་གྱི་ཁམས་ཆེན་

པོ་གསུམ་གཡོས། རབ་ཏུ་གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་འབར་བའི་ཁྲོ་བོ་ཁྲོས་པའི་ཚུལ་དུ་བསྐྱེད་པའི་ལེའུ་སྟེ་ལྔ་པའོ།། །།དེའི་ཚེ་དེའི་དུས་ན། དུས་གསུམ་གྱི་ཐེག་པའི་བདག་པོ་ཐམས་ཅད་འདུས་ཏེ། ཡེ་ཤེས་ཀྱི་མཁའ་གསང་བའི་བུམ་པས་འབར་བའི་ཁྲོ་བོ་དེའི་ལུས་ཀུན་བཀྲུས་ཏེ་ཡེ་ཤེས་ཀྱི་བུམ་པའི་ཆུ་རྒྱུན་གྱིས་དབང་བསྐུར་རོ། །དག་པར་འཁྲུ་བར་བྱེད་པའི་ཉེ་ཤིང་པ་དང་། སྒྲིབ་པ་སྦྱོང་ཞིང་ཀུན་ཏུ་སྐྱོབ་པར་བྱེད་པའི་ཕུར་མོའི་ཐལ་བ་དང་། ཆོས་ཉིད་ཀྱི་རྩི་དང་། ཡེ་ཤེས་ཀྱི་བཅུད་མར་ལ་སོགས་པས་འགྲོ་བ་རྣམས་ཀྱི་ཚུལ་དང་ལྡན་པའི་ཕྱིར་དབང་བསྐུར་རོ། །ཡེ་ཤེས་ཀྱི་ཁྲོ་བོ་དེ་ལུས་ལ་སིམ་ཞིང་རྒྱས་ཏེ་བདེ་བ་སྐྱེས་པར་གྱུར་ཏོ། །དེ་ནས་རིགས་ཐམས་ཅད་ཀྱི་བདག་པོ། སངས་རྒྱས་ལྔ་ཡུམ་དང་བཅས་པས་བདེ་བ་ལ་སྙོམས་པར་ཞུགས་ཏེ། གཉིས་སུ་མེད་པའི་མཁའ་ལས་ཡེ་ཤེས་ཀྱི་ཡིག་འབྲུ་ཀྵིཾ་མཐིང་ག་དང་། ཀྵིཾ་དཀར་མོ་དང་། ཀྵིཾ་སེར་པོ་དང་། ཀྵིཾ་དམར་པོ་དང་། ཀྵིཾ་ལྗང་གུ་དང་། ཀྵིཾ་སྣ་ཚོགས་ཀྱི་མདོག་ཏུ་སྣང་བ་དག་འཐོན་ཏེ། གསུང་གཅིག་གིས་བསྐྱེད་བསྐུལ་གྱི་སྔགས་བཀའ་སྩལ་པ། ཧཱུྃ་ཨེ་ཡྃ་རྃ་ཁྃ་[སུ]་རྃ་ཀེྃ་བྲུྃ། ཨ་བྷི་རོ་ཥ་ཎ་ཧཱུྃ། ཨོཾ་ཉི་མ་ས་སླ་ལ་ནཱན་ག་རུ་ཎ་ཙ་ལེ་ཙ་ལེ་ཧཱུྃ་ཕཊ་ཅེས་གསུངས་པ་ལས་ཡེ་ཤེས་ལས་སྤྲུལ་པ་ཁྱུང་མཐིང་ག་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། སོ་སོ་ནས་སྣ་ཚོགས་པ་འདུས་པའི་ཁྱུང་ལུས་དཀར་བ། གཤོག་པ་སྔོ་བ། རྭ་ཡེ་ཤེས་སྤུ་གྲི་འབར་བ། གདུག་པ་ཅན་འདྲེན་ཅིང་ཟ་བ། འབར་བའི་ཁྲོ་བོའི་ཐུགས་རྗེ་ལ་གནས་པར་གྱུར་ཏོ། །ལུས་ཁ་དོག་ལྔ་ལ། མཆུ་གནམ་ལྕགས་ཀྱི་རྡོ་རྗེ་ལས་གྲུབ་པ། གཤོག་པ་ནམ་མཁའི་མཐའ་མ་ཁེབས་པ། མིག་གསེར་ཞུན་མ་བཞིན་དུ་སྣང་བ། གདུག་པའི་སྦྲུལ་རིགས་བཞི་སོ་སོར་ཟ་བ་དག་སྤྱི་གཙུག་དང་། དཔྲལ་བ་དང་། རྣ་ལྟག་གཡས་གཡོན་དང་།

དབུའི་ལྟག་ཁུང་ལ་སོགས་པར་གནས་སོ། །རིགས་སོ་སོ་ཕྱག་མཚན་སོ་སོས་དབང་བསྐུར་ཏེ། དེ་བཞིན་གཤེགས་པའི་རིགས་ཀྱི་བདག་པོས་འཁོར་ལོ་སྤྱི་གཙུག་ཏུ་བྱིན་ཏེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧྃ་ཞེས་གསུང་ཞིང་འཁོར་ལོ་བྱིན་ནོ། །གསུང་རིགས་ཀྱི་བདག་པོས་ཀྱང་ཨཱཿསརྦ་ཏ་ཐཱ་ག་ཏ་བཱག་བཛྲ་སྭ་བྷཱ་བ་ཨཱཏྨ་ཀོ྅ཧྃ་ཞེས་གསུང་ཞིང་ཆོས་ཀྱི་འཁོར་ལོ་མགྲིན་པར་གཞག་གོ །ཐུགས་ཀྱི་རིགས་ཀྱི་བདག་པོས། ཧཱུྃ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ་ཞེས་ཐུགས་ཀར་རྡོ་རྗེ་གཞག་གོ །ཡོན་ཏན་གྱི་རིགས་ཀྱི་བདག་པོས་ཀྱང་། སྭཱ་སརྦ་ཏ་ཐཱ་ག་ཏ་རཏ་ན་གུ་ཧྱ་ཨ་བྷི་ཥིཉྩནྟུ་མཱཾ། ཞེས་རྒྱ་གྲམ་དང་ལྟེ་བར་རིན་པོ་ཆེ་འབར་བ་གཞག་གོ །ལས་ཀྱི་རིགས་ཀྱི་བདག་པོས་ཀྱང་ཧཱ་སརྦ་ཏ་ཐཱ་ག་ཏ་ཀརྨ་གུ་ཧྱ་ཨ་བྷི་ཥིཉྩནྟུ་མཱཾ། ཞེས་གསུང་ཞིང་གསང་གནས་སུ་རྒྱ་གྲམ་གཞག །ཡེ་ཤེས་ཀྱི་ཁྲོ་ཆུང་སྐུ་ཆུང་ལ་སྤྱན་ཆེ་བ་རྡོ་རྗེ་དང་སྡིགས་མཛུབ་འཛིན་པ། དཀར་པོ་དང་། དམར་པོ་དང་། སེར་པོ་དང་། ལྗང་གུ་དང་། མཐིང་ག་ལ་སོགས་ཏེ་སྣ་ཚོགས་པའི་ཁྲོ་ཆུང་འཐོན་ནོ། །འཐོན་པར་གྱུར་ཏོ། །དེ་དག་གི་བྱིན་གྱི་རླབས་ཀྱིས་ས་ཆེན་པོ་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས་པར་གྱུར་ཏོ། །སྲེག་པའི་བསྐལ་བའི་སྒྲ་ཙམ་ཡང་གྲག་པར་གྱུར་ཏོ། །དེ་དག་ཚུར་འདུས་ཤིང་ནམ་མཁའ་ལ་བབ་ནས། འཁོར་ལོ་འབར་བའི་ལྟེ་དབུས་སུ་གནས་པ་ལས་དེ་བཞིན་གཤེགས་པ་ཐམས་ཅད་ཀྱི་གསུང་གཅིག་གིས་རོ་ཥ་ཎ་ཡཀྵ་གྲྀཧྞ་གྲྀཧྞ་ཕཊ་ཅེས་གསུངས་པ་ལས་ཡེ་ཤེས་ཀྱི་ཁྲོ་བོ་སྐུ་དུག་ཧ་ལ་ནག་པོའི་མདོག་ལྟར་འཚེར་བ། ཡེ་ཤེས་རྔམ་པའི་སྤྱན་གསུམ་བསྐལ་བའི་གློག་ལྟར་འཁྱུག་ཅིང་གདུག་པ་ཉི་མའི་འོད་ཟེར་བཞིན་གང་ལ་བལྟས་པ་བརླག་ནུས་ཤིང་ཚ་བ། སྨིན་མ་རྔམ་པའི་གློག་དྲག་པོ་བཞིན་སེར་ནག་ཏུ་འབར་བས་གཏི་མུག་དང་། ཉོན་མོངས་པའི་མུན་པ་སེལ་བར་བྱེད་པ། སྨ་ར་སེར་ནག་ལ་ཡེ་ཤེས་ཀྱི་མེ་འབར་བ། ཉོན་མོངས་པའི་བག་ཆགས་སྲེག་པ། ཉོན་མོངས་པ་གཏི་མུག་

འཇོམས་པར་བྱེད་པའི་གླང་པོ་ཆེའི་ཀོ་རློན་གསོལ་པ། ཉོན་མོངས་པའི་ཞེ་སྡང་འདུལ་བའི་རྟགས་སུ། གཅན་གཟན་གྱི་རྒྱལ་པོ་སྟག་གི་ཤམ་ཐབས་བགོས་པ། ཉོན་མོངས་པ་ཕྲག་དོག་འདུལ་བར་བྱེད་པའི་གཟིག་གི་མགོ་བོས་བརྒྱན་པ། ཉོན་མོངས་པའི་འཁོར་བ་མ་སྤངས་པས་ཞིང་ཆེན་གྱི་གཡང་གཞི་གསོལ་བ། སྦྲུལ་དཀར་ཁྲས་དབུ་བརྒྱན་པ། སེར་ཁྲས་མགུར་ཆུ་བྱས་པ། དམར་ཁྲས་ཕྱག་གདུབ་བྱས་པ། ལྗང་ཁྲས་རྐེད་བཅིངས་བྱས་པ། ནག་ཁྲས་ཞབས་གདུབ་བྱས་པ། དུག་གསུམ་ངང་གིས་མི་སྤོང་བར་ཉོན་མོངས་པའི་ཤ་ཁྲག་གསོལ་བ། སྐུ་དང་། གསུང་དང་། ཐུགས་དང་ལྡན་པའི་ཐོད་པ་སྐམ་པོ་དང་། རློན་པ་དང་། ནེ་ཕྲེང་གིས་སྐུ་ལ་བརྒྱན་པ།ཆོས་ཉིད་སྐྱེ་བ་མེད་པའི་དོན་དང་ལྡན་ཞིང་འཁོར་བ་ཁྲག་ཞག་དང་འདྲ་བ་ལ་ཐུགས་རྗེས་གཟིགས་པའི་ཕྱིར་ཞག་གི་ཟོ་རིས་ཀྱིས་སྐུ་ལ་བརྒྱན་པ། ཐེག་པ་ཆེན་པོའི་དབང་གིས་ཐམས་ཅད་འདུལ་བའི་ཕྱིར་ཐལ་ཆེན་གྱི་ཚོམ་བུས་སྐུ་ལ་བརྒྱན་པ། ཆོས་ཉིད་སྐྱེ་བ་མེད་པའི་དོན་དང་ལྡན་ཞིང་ནོར་བུ་འབར་བས་ཆ་བྱད་དུ་སྣང་སྟེ། དབུ་སྐྲ་སྔོ་ནག་ལ་རལ་པའི་ཅོད་པན་གྱིས་བཅིངས་པ། ཞབས་གཡས་པ་བརྗིད་པའི་ཚུལ་གྱིས་བསྐུམ་ནས་གནས་པ། ཞབས་གཡོན་པ་དྲག་པོའི་ཚུལ་གྱིས་བསྒྲད་ནས་གནས་པས་སྲོག་ལ་རྔམ་པའི་སྲིན་པོ་ཕོ་མོ་བརྫིས་པ། ཕྱག་གཡས་པ་ན་རྡོ་རྗེ་རྩེ་ལྔ་པ་རྡེག་པའི་ཚུལ་དུ་འཛིན་པ། གཡོན་པ་ན་སྡིགས་པའི་མཛུབ་མོ་ཕྱར་བ་དག་ཏུ་སྣང་བ་ཞེས་རྒྱ་གྲམ་དང་། རལ་གྲི་འབར་བས་ཡན་ལག་བཞི་ལ་ལས་ཀྱི་བྱེད་པ་པོར་དབང་བསྐུར་རོ། །དམ་རྫས་བདུད་རྩི་རྣམ་པ་ལྔས་དབང་བསྐུར་ནས་ཕྲིན་ལས་ཐམས་ཅད་ཀྱི་བྱེད་པ་པོར་དབང་བསྐུར་ཏེ། དེ་ཡང་གཉིས་སུ་མེད་པའི་རོལ་པས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དེ་བཞིན་གཤེགས་པ་ཐམས་ཅད་ཀྱིས་འབར་བའི་ཁྲོ་བོ་ལ་དབང་བསྐུར་བའི་ལེའུ་སྟེ་དྲུག་པའོ།། །།དེ་ནས་དཔལ་རྡོ་རྗེ་གཏུམ་པོ་ལག་ན་རྡོ་རྗེས་སྡིགས་མཛུབ་ནི་བསྒྲེང་། རྡོ་རྗེ་ནི་སྤར་ནས་འབར་བའི་ཁྲོ་བོའི་ལྟ་བས་ཀུན་

ཏུ་བལྟས་ཏེ། སྤྱན་ནི་བཟློག །ཞལ་ནི་བགྲད་ནས་ཞལ་ནས་རྔམ་པའི་སྒྲ་སྐད་ནི་ཧ་ཧ། ཧཱུྃ་ཧཱུྃ། ཨ་ལ་ལ། ཨྃ་ཨྃ། དྷི་དྷི། ཧོ་ཧོ། ཞེས་པའི་བྱིན་རླབས་ལས་ཕྲག་པ་གཉིས་རབ་ཏུ་འབར་ཏེ། རྡོ་རྗེ་ཁྲོ་བོ་དཀར་བ། རྣམ་པར་དཀར་བ་དག་མཐའ་ཡས་པ་འཐོན་ཏོ། །དཔྲལ་བ་རྣམ་པར་འབར་བ་ལས་ཁྲོ་བོ་མཐིང་ག་སྣ་ཚོགས་པ་འཐོན་ཏོ། །མགྲིན་པ་རབ་ཏུ་འབར་བ་ལས་ཁྲོ་བོ་དམར་པོ་རྣམ་པར་དམར་བ་དག་འཐོན་ཏོ། །ཐུགས་ཀ་རབ་ཏུ་འབར་བ་ལས་རྡོ་རྗེ་ཁྲོ་བོ་ནག་པོ་རབ་ཏུ་འབར་བ་སྣ་ཚོགས་པ་འཐོན་ཏོ། །སྐུ་ལྟེ་བ་རབ་ཏུ་འབར་བ་ལས་རྡོ་རྗེ་ཁྲོ་བོ་ལྗང་གུ་རབ་ཏུ་འབར་བ་དག་འཐོན་ཏོ། །འབར་བའི་ཁྲོ་བོ་དེ་དག་ཀྱང་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ། མེ་ལྕེ་ལྟ་བུ་སྟེ། ཤིན་ཏུ་རྔམ་པ། ཤིན་ཏུ་འཇིགས་པ། དགོད་པའི་མདོག་ཏུ་སྣང་བ། ལོག་སྲེད་ཅན་དག་ལ་གཤེ་བའི་མདོག་ཏུ་སྣང་བ། ཐམས་ཅད་ཐུགས་རྗེ་ཆེན་པོས་ཀུན་ལ་ཁྱབ་པ། ཐུགས་ཞི་བ་དང་། རྒྱས་པ་དང་། དབང་དང་། དྲག་པོ་དང་། ཕྲིན་ལས་བཞི་ཡིས་སྐུའི་དངོས་པོ་ཤིན་ཏུ་བསྒྱུར་ཏེ་འགྲོ་བའི་དོན་མཛད་དོ། །ཞལ་ནས་རྔམ་པའི་སྒྲ་སྒྲོགས་པ་དེ་དག་ཀུན་ཀྱང་ཁྲོ་བོའི་སྟངས་སྟབས་དང་། མཆོངས་པ་དང་། འགྱིང་བ་དང་། རྩེ་བ་དང་། སྤྱན་བགྲད་པ་དང་། མཆེ་བ་གཙིགས་པ་དང་། ཁྲོ་གཉེར་མི་བཟད་པ་གཙིགས་པ་ཤིན་ཏུ་མི་བཟད་པའི་ཁྲོ་བོར་སྤྲུལ་ཏེ། རྩི་མཆོག་གི་རྒྱལ་པོ་མ་གི་ཏའི་དྲིར་ལྡན་པས་གདུག་པ་ཅན་ཀུན་གྱི་སྙིང་རབ་ཏུ་རུལ་བར་བྱེད་པ་དེ་ལྟ་བུའི་འབར་བའི་ཁྲོ་བོ་དེ་དག་སྤྲུལ་རབ་ཏུ་སྤྲུལ་པར་གྱུར་ཏོ། །དེ་ནས་རྔམ་པའི་གསུང་གིས་དྲག་པོའི་སྔགས་བཀའ་སྩལ་པ། ཨོཾ་བཛྲ་ཙཎྜ། ཨོཾ་བི་པུ་ལེ། ཨོཾ་བཛྲ་ཙཎྜ་པྲ་བ་ར་ནཱ་ག །ཨོཾ་བཛྲ་ཙཎྜ་མ་ཧཱ་ནཱ་ག་ཧྲྀ་ད་ཡ། ཨཱ་བར་ཏེ། ཛྭ་ལ་ཛྭ་ལ། སརྦ་ནཱ་ག་ཧྲྀ་ད་ཡཱ་ནི། ཨཱ་བར་ཏེ་ཛྭ་ལ། སརྦ་ནཱ་ག་ཧྲྀ་ད་ཡཱ་ནི། ཀི་མི་ཀི་མི། ནཱ་ག་ཀུ་ལཱ་ནི་བི་དྷྭཾ་ས་ནཱི། ཧ་ན་ཧ་ན། སརྦ་ནཱ་ག་དུཥྚཱྃ། ཧྲྀ་ད་ཡཱ་ནི། ད་ཧ་ད་ཧ། སརྦ་[དུཥྜ་]ན་ནཱ་ག་བནྡྷ་ནི། པ་ཙ་པ་ཙ། པཱ་ཙ་ཡ་པཱ་ཙ་ཡ། སརྦ་དུཥྚཱྃ་ནཱ་གཱ་ནཱྃ། ཨ་ཀྲ་མ་ཨ་ཀྲ་མ། སུ་ཀྲ་མ་ས་ཀ་ར་བི་མ་ལི། བི་ཀྲ་མ། མ་

ཧཱ་ནཱ་ག་ཏེ་ཛ་བ་རེ་སྭཱ་ཧཱ། ཞེས་པས་དེ་དག་ཐམས་ཅད་ཡུར་ཡུར་པོར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དབང་དུ་བསྡུས་པའི་ལེའུ་སྟེ་བདུན་པའོ།། །།དེ་ནས་དྲེགས་པ་ཅན་དེ་དག་ཟིལ་གྱིས་གནོན་པའི་ཕྱིར་རྡོ་རྗེ་ནམ་མཁའ་ལ་གསོར་བས་དྲེགས་པ་ཅན་དེ་དག་ཤིང་ལོ་རླུང་གིས་བསྐྱོད་པ་བཞིན་ནོ། །དེ་ནས་རྔམ་པའི་གསུང་དང་། བརྗིད་པའི་སྐུ་ལས་འདི་སྐད་གསུངས་སོ། །ཁྲོ་བོའི་རྒྱལ་པོ་ང་ཉིད་ཀྱིས། །སྲིད་པ་གསུམ་ན་གནས་པ་ཡང་། །ཐམས་ཅད་མ་ལུས་ཟིལ་གྱིས་གནོན། །རིགས་བཞི་ཀླུ་རྒྱལ་འཁོར་དང་བཅས། །གཟི་བྱིན་དྲག་པོས་གནོན་པར་བྱ། །ང་ནི་མཐུ་སྟོབས་བདག་པོ་སྟེ། །རྔམ་པའི་གསུང་དང་བརྗིད་པའི་སྐུ། །ཕྱག་རྒྱ་དྲག་པོས་ཟིལ་གྱིས་གནོན་ཞེས་ཆེད་དུ་བརྗོད་པས་བརྗོད་ནས་བརྗིད་གནོན་གྱི་ཕྱག་རྒྱ་ཞེས་བྱ་བ་བཅས་ཏེ་ཕྱག་སོར་མོ་བསྣོལ་ཏེ་མཐེ་བོང་གཉིས་དང་མཐེ་ཆུང་གཉིས་སོ་སོར་རྩེ་སྤྲད་ནས་བརྐྱང་ངོ་། །ཕྱག་གི་མཐིལ་འཁོར་ལོ་ཅན་ཡང་ཐུར་དུ་བསྟན་ཏེ་ཤིན་ཏུ་མི་བཟད་པའི་སྔགས་བཀའ་སྩལ་པ། ཨོཾ་བཛྲ་ཙཎ་ཌ་བཛྲ་པཱ་ཎི་ཧཱུྃ་ཧཱུྃ། ག་རུ་ཌ་པཀྵེ། ཧཱུྃ་ཧཱུྃ། ཛེཾ་མཱ་ལ་བ་རི་ཙི། ཙི་སྲི་ཙ་ཧཱུྃ་ཕཊ་ཅེས་ཆེད་དུ་བརྗོད་པས་དྲེགས་པ་ཅན་དང་ཀླུ་ཐམས་ཅད་མྱོས་རབ་ཏུ་མྱོས་ནས་བཀའ་བཞིན་བགྱིའོ་ཞེས་གསོལ་ཏོ། །དེ་དག་ཐམས་ཅད་ཀྱང་མྱོས་པའི་ཆུ་དྲག་པོ་འཐུངས་པ་ལྟ་བུ་འམ། སྐྱེས་བུ་གཉིད་ཀྱིས་གདུངས་པ་ལྟ་བུ་སྟེ། དེ་དག་ཐམས་ཅད་ཀྱིས་མགྲིན་གཅིག་ཏུ་གསོལ་པ། ཀྱེ་མ་གསང་བའི་བདག་པོ་བཅོམ་ལྡན་འདས། །རིག་སྔགས་བདག་པོ་ཁྲོ་བོའི་རྒྱལ། །ཁྱོད་ཀྱི་རིག་སྔགས་སྨོད་པ་ཡིས། །ཤིན་ཏུ་མི་ཟད་རབ་ཏུ་མྱོས། །འབངས་སུ་མཆི་ཞིང་བཀའ་བཞིན་འཚལ། །ཐུགས་རྗེ་ཅན་གྱིས་བདག་ཅག་ལ། །རབ་ཏུ་དགོངས་ཤིག་འབངས་སུ་མཆི། །སླད་མ་རྣམས་ལ་འཚེ་མི་བགྱིད་ཅེས་དམ་བཅས་སོ། །དཔལ་རྡོ་རྗེ་གཏུམ་པོ་

ཐུགས་གསང་བའི་རྒྱུད་ལས་དྲེགས་པ་ཅན་ཟིལ་གྱིས་གནོན་པའི་ལེའུ་སྟེ་བརྒྱད་པའོ།། །།དེ་ནས་སུམ་ཅུ་རྩ་གསུམ་གྱི་ལྷའི་སྡེ་དཔོན་ཆེན་པོ་བརྒྱ་བྱིན་ཞེས་བྱ་བ་ག་ལ་བ་དེར་འོངས་ཏེ་མཆོད་པའི་ཡོ་བྱད་རྣམ་པ་སྣ་ཚོགས་པས་མཆོད་ནས་རྡོ་རྗེ་ཁྲོ་བོ་དེ་ལ་འདི་སྐད་ཅེས་གསོལ་ཏོ། །ཀྱེ་ཁྲོ་བོའི་བདག་པོ་ཆེན་པོ་དྲེགས་པ་གདུག་པ་ཅན་འདི་དག་ནི་ཤིན་ཏུ་མ་རུངས་པར་གྱུར་ན། འདི་དག་བྲིད་ནས་བསྟན་པ་གནས་པའི་ཐབས་ཀྱི་སྤྲོ་བ་མཛད་དུ་གསོལ་ཞེས་གསོལ་པ་ལས་ལྷའི་དབང་པོ་ཉོན་ཅིག །ཀླུ་རྣམས་ཀྱི་རྫས་རྣམས་རྫས་སྣ་ཚོགས་པ་བསགས་ལ། བདག་ཉིད་ཀྱི་ལུས་དག་ཅིང་གཙང་བར་བྱས་ལ་ལོངས་མ་སྤྱད་པའི་རས་དཀར་པོ་བགོས་ཏེ། མངར་བ་དང་གསུར་བའི་དྲི་ཞིམ་པོ་དང་ལྡན་པའི་ཐིག་ལེས་ལུས་བྱུགས་ལ་བུ་རམ་དང་། ཤ་ཁར་དང་། སྦྲང་རྩི་མུར་བར་བྱས་ལ་ཞག་བདུན་ནམ་དགུའི་གོང་ནས་ཁ་ཟས་ངན་པ་སྤང་བར་བྱའོ། །ལུས་ཀྱི་རྣམ་པ་ལ་རྨ་བྱའི་སྒྲོ་ལྔ་བཙུགས་ཏེ། ཤེས་རབ་ཅན་གྱིས་བྱ་བའོ། །ཀླུའི་སྨན་སྣ་ཚོགས་པ་དང་འཇམ་པའི་འབྲུ་བསྲེས་པའི་ཕྱེ་མ་མངར་བའི་ཆུས་སྦྲུས་ཏེ་རི་ལུ་ཤ་རྟུག་གི་འབྲུ་ཙམ་བརྒྱ་རྩ་བརྒྱད་བྱའོ། །ཀླུ་སྨན་རྣམ་པ་ཐ་དད་པ་ཡང་བླུགས་ཏེ་དཀར་བ་ལ་སོགས་པ་དང་ལྡན་པར་བྱའོ། །དེ་ནས་ཐུགས་རྗེ་ཆེན་པོས་གཟིགས་ཏེ། ཀླུ་ཡི་རྒྱལ་པོ་འཁོར་དང་བཅས། །དགའ་དང་གུས་པས་སྤྱན་འདྲེན་གྱིས། །རྩེ་ཞིང་གདུང་བས་ཚུར་ཤོག་ཅིག །དགའ་ཞིང་གུས་པས་མངན་མི་སེམས། །ཀུན་ཀྱང་བརྩེ་བས་ཚུར་ཤོག་ཅིག །ཅེས་བཀའ་སྩལ་པས་དེ་དག་ཀུན་གྱི་དབང་པོ་ཀུན་ཀྱང་ཤིན་ཏུ་དངས་པར་གྱུར་ནས་ཤ་རིད་ལ་སྦྲང་མ་འདུས་པ་ལྟ་བུ་སྟེ། ཀུན་ཀྱང་དགའ་བའི་མདངས་དང་ཆས་ནས་གང་ན་བ་དེར་འཁོད་དོ། །སྔགས་བཀའ་སྩལ་པ། ནཱ་ག་རཱ་ཛ་ས་མ་ཡ་སྭཱ་ཧཱ་ཞེས་བཀའ་སྩལ་པས། ཀུན་ཀྱང་ཚིམ་པར་གྱུར་ཏོ། །དེ་དག་ཀུན་གྱིས་ཀྱང་མགྲིན་གཅིག་གིས་དམ་ཚིག་གི་རིམ་པ་ཕུལ་བ། དཔའ་བོ་ཆེན་པོ་ཁྲོ་བོའི་བདག །ཁྱོད་ཀྱི་བཀའ་ལས་འདས་གྱུར་ན། །བདག་ཅག་རྣམས་ཀྱི་མགོ་ལུས་སྙིང་། །

དུམ་བུར་གས་ནས་རུལ་བར་ཤོག །ཏདྱ་ཐཱ། ཨོཾ་ཙ་ཊཱ་ཙ་ཊཱ། བི་ཙི་ཊུ། ཤ་ཐ་ཤ་ཐ། སྭ་ཙ་ཏེ་སྭཱ་ཧཱ་ཞེས་གསོལ་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་གདུག་པ་ཅན་བཀའ་ལ་བཏགས་པའི་ལེའུ་སྟེ་དགུ་པའོ།། །།དེ་ནས་ཡང་དབང་པོ་ཆེན་པོས་གསོལ་བ། ཀྱེ་རྡོ་རྗེ་ཁྲོ་བོ་དག་དྲེགས་པ་ཅན་འདི་དག་ཤིན་ཏུ་མ་རུངས་པར་གྱུར་ན། ལ་ལ་ནི་རུས་པ་ཆག་ཅིང་གྲུགས། ལ་ལ་དག་ནི་ཚེའི་འདུ་བྱེད་མཐའ་ལ་གཏུགས་སུ་ཉེ། ལ་ལ་དག་ནི་ནམ་མཁའ་ལྡིང་དབུའི་གཙུག་ཏོར་ན་གནས་པས་ལེན་པའི་སྡུག་བསྔལ་གྱིས་གཟིར། ལ་ལ་དག་ནི་ཁྲག་བསྐམས། ལ་ལ་དག་ནི་སེན་མོ་དང་ཡན་ལག་ཆག །ལ་ལ་དག་ནི་གཏི་མུག་གི་གཉིད་ལོག་པས་བྱང་ཆུབ་ཀྱི་སྙིང་པོ་མི་ཤེས། ལ་ལ་དག་ནི་རྩ་དང་རྒྱུས་པ་ཆད་དེ། ནད་རྣམ་པ་སྣ་ཚོགས་ཀྱིས་གདུངས། ལ་ལ་དག་ནི་ལུས་ཀུན་ཚ་བའི་ནད་ཀྱིས་ཉམ་ཐག །ལ་ལ་དག་ནི་རྩེ་ཞིང་མིང་ཡང་མི་གྲག །ལ་ལ་དག་ནི་ཉོན་མོངས་པ་རྒྱས་ཏེ་སྔོན་སེམས་བསྐྱེད་པ་རྗེས་སུ་མི་དྲན། ལ་ལ་དག་ནི་སེམས་བསྐྱེད་པ་རྗེས་སུ་དྲན་ཡང་དེ་བཞིན་གཤེགས་པའི་ཞལ་མི་མཐོང་། ལ་ལ་དག་ནི་ཡི་དགས་ཀྱི་ཁམས་ལྟ་བུ་སྟེ་ཁ་ཟས་ཀྱི་སྐལ་བ་དང་མི་ལྡན་ན་འདི་དག་གསོ་བའི་ཐབས་བཀའ་སྩལ་དུ་གསོལ་ཞེས་གསོལ་པ་ལས་ལྷའི་དབང་པོ་དག་དབང་པོའི་ལག་པས་ནི་ལག་པ་ཆད་པ་སོས་པར་འགྱུར་རོ། །ཆུ་སྲིན་སྡེར་མོས་ནི་སེན་མོ་ཆག་པ་སོས་པར་འགྱུར་རོ། །ནཱ་ག་གེ་སར་གྱིས་ནི་བྱང་ཆུབ་ཀྱི་སེམས་བསྐྱེད་པ་རྗེས་སུ་དྲན་པར་འགྱུར་རོ། །ནཱ་ག་པུས་པས་ནི་ཀླུའི་གནས་མེ་ཏོག་གི་ཚལ་དུ་འགྱུར་རོ། །གུ་གུལ་གྱི་དྲི་ཆེན་པོས་ནི་དེ་མ་ཡིན་པ་ཐམས་ཅད་བསྲེགས་ནས། ཀླུའི་སྣ་ལ་མནམས་པ་ཙམ་གྱིས་སྔོན་བྱང་ཆུབ་མཆོག་ཏུ་སེམས་བསྐྱེད་པ་དྲན་པར་འགྱུར་རོ། །འབྲས་ཀྱི་ཡོས་ཀྱིས་ནི་ཀླུའི་ནད་ཐམས་ཅད་འཚོ་བར་འགྱུར་རོ། །ཐང་ཀ་བྱ་རྒྱུས་སྤུ་ཤེལ་གྱིས་ནི་རྩ་རྒྱུས་ཆད་པ་སོས་པར་འགྱུར་རོ། །ག་བུར་གྱིས་ནི་རྩ་བའི་ནད་སོས་ནས་ལུས་ཀྱི་བཅུད་ཀུན་ཚིམ་པར་བྱེད་དོ། །དར་ལེ་བརྒན་གྱིས་ནི་ག་རུ་ཎའི་

འཇིགས་པ་ལས་སྐྱོབ་པར་བྱེད་དོ། །མེ་ཚན་དང་། བྱེ་ཚན་དང་། གཅེར་བུ་དང་། རྒྱལ་པོའི་ཆད་པ་དང་། ས་གཡོ་བ་དང་། གཞན་གྱི་རིག་སྔགས་ཀྱིས་གནས་འགུལ་བ་དང་ཕུར་བུས་འདེབས་པ་ལས་ཐར་བར་བྱེད་དོ། །མཚལ་གྱིས་ཁྲག་བསྐམས་པ་སོས་པར་བྱེད་དོ། །དུང་གིས་རུས་པ་ཆག་པ་སོས་པར་བྱེད་དོ། །རས་སྐུད་དམར་པོས་ནི་སྲོག་འགགས་པ་ཚངས་པའི་ཚེ་དང་ལྡན་པར་བྱེད་དོ། །དཀར་དང་མངར་གྱིས་ཞལ་ཟས་རོ་མཆོག་བརྒྱ་དང་ལྡན་པར་བྱེད་དོ། །དེ་དག་ཀུན་ཀྱང་རིན་པོ་ཆེའི་བུམ་པ་འམ། ཁམ་ཕོར་ལྟ་བུ་མཆུ་ལྔ་པར་བླུགས་ནས་སྦས་ན་གང་ཉམས་པ་དེ་སོས་པར་འགྱུར་རོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཀླུ་གསོ་བའི་ལེའུ་སྟེ་བཅུ་པའོ།། །།དེ་ནས་ལྷའི་དབང་པོས་གསོལ་པ། ཀྱེ་རྡོ་རྗེ་ཁྲོ་བོ་ཆེན་པོ། འདི་དག་བསྡིགས་ན་ཇི་ལྟར་བསྡིགས། །གགས་དག་གཅད་པ་ཇི་ལྟ་བུ། །བརླག་པར་བྱ་བ་ཇི་ལྟ་བུ། །རྡོ་རྗེ་ཁྲོ་བོས་བཀའ་སྩལ་པ། །ཉོན་ཅིག་དབང་པོ་རྣམ་པར་རྒྱལ། །བསྡིགས་པར་བྱ་བ་འདི་དག་གོ །ཤིན་ཏུ་ཁྲོས་བཅས་མགོ་སྟོད་ལ། །མཁའ་ལྡིང་ག་རུར་སྤྲུལ་པར་བྱ། །རྡོ་རྗེ་ཁྲོ་བོ་འཆོལ་བ་གདོན། །ཕྱོགས་བཅུར་རྡོ་རྗེ་སྤྲོ་བར་བྱ་ཧཱུྃ་ཧཱུྃ་ཧཱུཾ། བཛྲ་ཙཎྜ་ཨྃ་ཨཱཿ ནཱ་ག་པྲ་ཐ་པྲ་ཐ། ཧཱུྃ་ནཱ་ག་ནཱ་ཤ་ཡ་ཕཊ། ཅེས་བཀའ་སྩལ་པས་དྲེགས་པ་ཅན་དེ་དག་ལུས་ལ་གཅད་གཏུབས་ཀྱི་སྡུག་བསྔལ་བྱུང་གིས་དོགས་ཏེ། འཕྲལ་ཉིད་དུ་གདུག་པ་ཅན་དེ་དག་ཤིན་ཏུ་[པྲེད་]པར་གྱུར་ཏེ་བཀའ་བཞིན་དུ་ཉན་ནོ། །ཤིན་ཏུ་འཇིགས་དངངས་ནས་བཅོམ་ལྡན་འདས་ཐུགས་རྗེས་གཟིགས་སུ་གསོལ་ཞེས་བཀའ་ཉན་ནོ། །དེ་ནས་གགས་གཅད་པར་འདོད་ན་སྦྱིན་སྲེག་བཞིན་ལས་བྱའོ། །གང་ན་བ་དེར་ཆ་བསྙམས་ལ། །ནག་ཕ་ོདྲི་དང་ལྡན་པར་བྱུག །ཟུར་གསུམ་སུམ་བརྩེགས་ཐུར་དུ་བརྐོ། །ཁ་ཁྱེར་ཐམས་ཅད་རྡོ་རྗེ་གནག །དབུས་སུ་གཞལ་ཡས་རྒྱ་གྲམ་བྲི། །སེ་སྐྱེར་གདུག་པའི་ཤིང་དག་ལ། །ཟུར་གསུམ་ཁྲུ་དོའི་ཚད་དུ་བརྩིག །ལོགས་ལ་རཀྟའི་ཚར་ཚར་བཏང་། །ཚེར་ཅན་ནག་པོ་ཟུར་གསུམ་

བཤག །བྲག་ནག་སྐྱེས་པའི་ཚེ་ནག་ཤུག །སོར་ནི་བདུན་བདུན་ཚད་དུ་བྱ། །མ་དུ་ཟུར་གསུམ་སོར་གསུམ་ཚད། །འབྲུ་ཆན་ནག་པོ་རཀྟར་སྦྱར། །མིང་བྱ་སྦྱིན་སྲེག་རབ་ཏུ་སྦར། །བརྒྱ་རྩ་བརྒྱད་དེ་ཉི་ཤུ་གཅིག །དམིགས་པ་ཆེ་གེའི་ལིང་ག་ནི། །དྲི་མ་ཁུ་ཆུ་ཁྲག་དག་དང་། །སྐྲ་དང་རྐང་རྗེས་གོས་ལ་སོགས། །ཚོགས་པར་བསོགས་ལ་ཨ་མུ་ཀྃ། །དེ་ལ་ཛཿཧཱུྃ་བྃ་ཧོཿས་དགུག །ཡི་དགས་གང་གནས་མཆོན་པ་བླ། །སྦྲུལ་གདུག་དམིགས་པའི་གཟུགས་སུ་བྱ། །གནོན་པར་བྱེད་པ་མཚོན་བྱས་ཛཿ། །སྙིང་གར་བྲིས་ལ་གན་རྐྱལ་མདུན། །ཐུན་བྲབ་གདབ་སྔགས་བསྐོར་བཅས་དབུལ། །མཱ་ར་ཡ་དང་བཅས་པའོ། །ནག་པོའི་ཆས་བགོ་རེ་སྟན་ས། །སྟོད་གཡོག་སྔོན་པོ་ཕུ་རུང་གནག །གཡང་གཞི་སྲིད་པའི་སྤྱི་བླུགས་བགོ །དགང་བླུགས་མཆོག་ཆེན་གཟར་བུས་བྱ། །ཁམ་སྐྱོང་ཟུར་གསུམ་རྫས་རྣམས་བསག །མཆོད་སྦྱིན་ང་དང་མགོན་བྱེད་ལའོ། །མེ་ཡི་ལྷ་ཡང་ང་ཉིད་དོ། །མཱ་ར་ཡ་ཕཊ། སུམ་བྷ་ནི་སུམ་བྷ་ཧཱུྃ། སྦྱིན་སྲེག་བྱས་པའི་ཐལ་བ་ལ། །ང་ཡི་གདོང་དུ་བསྒྲུབ་པར་བྱ། །ནང་དུ་དགྲ་བོའི་བརྡའ་ཡང་གཞུག །ས་ཡང་སེང་ལྡེང་ཕུར་བུས་གཟུང་། །མཚམས་ཀྱང་སྣ་ལྔའི་ཚོན་གྱིས་དབྱེ། །དེ་ནས་དེ་ལ་དམིགས་པས་སོ། །ཨོཾ་བཛྲ་ཙཎྜ་སྭཱ་བྷཱ་བ་དྷརྨ་དྷཱ་ཏུ་ཨཱཿ། ཨོཾ་བཛྲ་ར་ཏ་ན་པཉྩ་ཏྲཱྃ། ཨོཾ་བཛྲ་ཨ་མྲྀ་ཏ་པཱ་ཎི་སྭཱ་ཧཱ། ཨོཾ་བཛྲ་ཨཱ་ཀོ་ཊ་ཡ་མུད་ག་ར་བཛྲ་ཧ་ན་ཧ་ན་ཧཱུྃ། ཨོཾ་བཛྲ་ཙཎྜ་བཛྲ་བྷ་བ་ཡེ་སྭཱ་ཧཱ། ཨོཾ་བཛྲ་ཨ་ར་ཛེ་བི་ར་ཛེ་སྭཱ་ཧཱ། ཨོཾ་བཛྲ་ཨ་མྲྀ་ཏེ་ཨཱ་ཡུ་ཥེ་སྭཱ་ཧཱ། ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཕཊ། བྲུྃ་སྐ་ནི་སྐ། ཨོཾ་བཛྲ་དྷརྨ་ཏེ་སྭཱ་ཧཱ། ཨོཾ་བཛྲ་ཙཎ་ཌ་པྲ་མ་རྡན་ཡེ་སྭཱ་ཧཱ། ཙཎྜ་པུཥྤེ་སྭཱ་ཧཱ། དག་པ་ཆེན་པོ་བདེ་བའི་མཆོག །ཡེ་ཤེས་རྡོ་རྗེ་ཐོ་བས་བརྡུང་། །དེ་ལས་བྱིན་བརླབས་དེ་ལ་བླུགས། །ཡེ་ཤེས་ཐོ་བས་ཉོན་མོངས་བརྡུང་། །དམིགས་པ་ཛཿདམར་དག་གིས་དགུག །མ་གཏུན་རྡོ་རྗེ་རྒྱ་གྲམ་ཉིད། །གནས་ཉིད་ལྷ་ཡི་གཞལ་ཡས་ཁང་། །ཐམས་ཅད་ལྷ་ཡིན་

བཟའ་ལྡན། །དེར་གཞུག་བདུད་དང་ཉོན་མོངས་གནོན། །ང་ཉིད་དུ་ཡང་འགྱུར་བར་བསམ། །ཙཎ་ཌ་པུཥྤ་ཡེ་སྭཱ་ཧཱ། །མཚན་དང་དཔེ་བྱད་རྒྱུན་མི་འཆད། །དང་པོར་སྦྱོར་བས་མཆོད་པར་བྱ། །བ་ཡིས་བཀྲུ་བྱ་སྤོས་ཀྱིས་བྱུག །ཤིན་ཏུ་གཙང་བ་དག་གིས་འཕྱི། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲེགས་པ་ཅན་ཚར་གཅོད་པའི་ལེའུ་སྟེ་བཅུ་གཅིག་པའོ།། །།དེ་ནས་ལྷའི་དབང་པོས་གསོལ་པ། ཀྱེ་མ་གནོད་འདུལ་ཁྲོ་བོའི་རྒྱལ། །དྲེགས་པ་བསྲུང་བའི་ཐབས་ནི་གང་། །སྲུང་ཐབས་རྣམ་པ་དུ་དང་ལྡན། །གནོད་འདུལ་ཆེན་པོ་བཀའ་སྩོལ་ཅིག །ཉོན་ཅིག་དབང་པོ་ཀུན་གྱི་བདག །སྔགས་རྫས་ཏིང་འཛིན་འདུས་པ་བཞི། །དངོས་ཏེ་དགོངས་པ་ཐམས་ཅད་བྱེད། །རྡོ་རྗེ་བྲག་དང་རིན་ཆེན་ཚུལ། །དུག་དང་མེ་བཞིན་མཚོན་ཆ་འདྲ། །དུས་མིན་འཆི་ལས་རབ་ཏུ་བཟློག །སངས་རྒྱས་ཀུན་གྱི་མཐུ་དང་ལྡན། །དེ་འཆང་དངོས་གྲུབ་མཆོག་ཆེན་འཐོབ། །ངལ་དུ་ཀུན་ཏུ་ཞུགས་དང་མཚུངས། །སངས་རྒྱས་ཀུན་གྱི་སྲས་སུ་དགོངས། །གང་ཞིག་གསང་སྔགས་འདི་འཆང་བ། །ཀུན་གྱི་ང་དང་འདྲ་བར་མཐོང་། །གང་ཞིག་གསང་སྔགས་འདི་འཆང་བ། །ང་ཉིད་རྒྱུན་དུ་དེ་ན་གནས། །འཇིག་རྟེན་དུ་ནི་བདེ་བ་འབྱུང་། །འདས་ནས་སངས་རྒྱས་ཀུན་དང་མཚུངས། །རྩིབས་བཅུ་དབུས་དང་བཅུ་གཅིག་ལ། །ཡིག་འབྲུ་ཁྱམས་བཅས་བརྡ་བྲིའོ། །ཆུ་འཁྱགས་དག་ལ་ཡུངས་ཀར་རོ། །གྲུ་ཆར་ལ་ནི་ས་ཞག་མོ། །གཞན་ལ་སྲད་བུ་སྔོན་པོ་ལ། །མདུད་པ་རེ་ལ་རེ་རེའོ། །ཆུ་འམ་ཡིད་ནི་རང་ལའོ། །ཤ་རཱི་རཾ་དང་མི་གྷ་ཏ། །གསེར་དང་རྨ་བྱ་གྲུམ་པའི་སྤུ། །བལ་ཚོན་སྣ་ལྔའི་སྲད་བུ་ལ། །ཙཀྲ་བྲིས་ལ་མགུལ་དང་གཙུག །མོ་གཡོན་ཕོ་གཡས་བསྲུང་བར་བྱ། །ཆུས་ནི་ཡམས་དང་དུག་ལས་ཐར། །མཾ་ས་དྲི་དང་རཀྟ་དང་། །ཁུ་བ་ཆུ་དག་སྦྱར་རམ་བཟའ། །སངས་རྒྱས་ལྔ་ཡི་དངོས་གྲུབ་སྟེ། །ཀུན་གྱིས་སྤྱད་པར་བྱ་བ་ཡིན། །མཛེ་དང་རླུང་གི་གནོད་པ་སེལ། །ཚེ་རིང་ལུས་ཀྱང་རྒྱས་པ་ཡང་། །བྱང་ཆུབ་

དཀར་དམར་མདངས་དང་ལྡན། །ཡམས་དང་མི་གཙང་དངོས་པོ་སེལ། །དྲི་ཡི་ཆུ་ཡི་ཡོན་ཏན་ནི། །ཀླད་རྐང་ཕོ་ལོག་གྲང་བ་སེལ། །ཤིན་ཏུ་ཟབ་སྟེ་གསང་བའི་མཆོག །སྐལ་ལྡན་རྟོགས་པ་རྣམས་ཀྱིས་སྤྱད་པ་ལས། །སྐལ་མེད་བློ་དམན་རྣམས་ཀྱིས་ག་ལ་ཡིན། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་བསྲུང་བའི་འཁོར་ལོའི་ལེའུ་སྟེ་བཅུ་གཉིས་པའོ།། །།དེ་ནས་ལྷའི་དབང་པོས་འདི་སྐད་ཅེས་གསོལ་ཏོ། །སླད་མའི་ཚེ། སླད་མའི་དུས་ན་སེམས་ཅན་གདུག་པ་ཅན་གྱི་དུག་བསལ་བའི་མཚན་ཉིད་དང་། ཞུགས་ས་བསྟན་དུ་གསོལ། ཉོན་ཅིག་དབང་པོ་ཆེན་པོ་ལེགས་པར་རབ་ཏུ་ཡིད་ལ་ཟུང་ཤིག་མཚན་ཉིད་རྣམས་ནི་འདི་ལྟ་སྟེ། རུས་པ་ཤ་དང་པགས་པ་དང་། །རྩ་དང་ཁྲག་དང་ནང་གྲོལ་ལོ། །བཅུད་དང་ཆུས་ཏེ་ལུས་ཀྱི་སྟོབས། །ལུས་ཀྱི་རྩི་དང་མདོག་དང་དབྱིབས། །རེག་པ་ཆུ་དང་ཆུ་སེར་དང་། །ཀླད་པ་ལྷ་བ་ལུས་ཀུན་ལ། །ཞུགས་ས་རྣམས་ནི་བཅོ་བརྒྱད་དེ། །འོན་ཀྱང་གཅིག་སོགས་གྲངས་ཀྱིས་བརྟག །རུས་པ་ལ་ཞུགས་པ་ནི་ལུས་སྐེམས་པ་དང་། ཟུག་གཟེར་ཆེ་བ་དང་། ན་ཐང་དེ་བ་དང་། ཐིག་ལེར་ན་བའོ། །ཤ་ལ་ཞུགས་པ་ནི་ལུས་བེབས་སེ་འདུག་པ་དང་། ཡང་ན་ལྕི་སེ་འདུག་པ་དང་། མདོག་ནག་པ་དང་། དྲི་མ་ངན་པ་དང་། སྔར་འོང་བ་དང་ཤ་རོ་འབྱུང་བའོ། །པགས་པ་ལ་ཞུགས་པ་ནི་ཤ་འཁྲིག་པ་དང་མདོག་སྐྱ་བའོ། །རྩ་ལ་ཞུགས་པ་ནི་ལུས་སྦྲིད་བེར་བ་དང་། རྟགས་ནི་དེ་ལས་བཟློག་དཀའ་བའོ། །སྦྲིད་ལུགས་དང་ནི་སྦྲིད་ལྕི་དང་། །ཚ་བ་འཛག་དང་ཚ་རབ་དང་། །ཚ་ཀེར་བ་དང་ཚ་བྲེང་བ། །ལུས་ལ་སོགས་པ་ཚ་ཐང་པ། །ཚ་པིར་བ་དང་ཡན་ལག་འབྲབ། །ཁྲག་ལ་ཞུགས་པ་ནི། སྣ་ནས་ཁྲག་ཀྱང་སྐབས་སུ་འཛག །ཚ་བེར་བ་དང་ལྕི་ཡོར་བ། །གདོང་པ་རྟག་ཏུ་དམར་བ་དང་། །འོ་མའི་བྲིས་མ་ལྟར་འོང་ངོ་། །ནང་གྲོལ་ལ་ཞུགས་པ་ནི། གློ་སྙིང་མི་བདེ་སྐྱུག་ཏིང་ངེ། །སྙིང་འདར་སྙིང་ཡང་མི་དགའ་སྟེ། །དེ་ནི་བཟློག་པར་

དཀའ་བའོ། །བཅུད་ལ་ཞུགས་པ་ལ་བཞི་སྟེ། །ས་བོན་མི་འབྱུང་མཚན་མི་ལྡང་། །ཁུ་བ་སྐྱོ་མའི་མདོག་ཏུ་འོང་། །ཁུ་བ་དངས་སྙིགས་ཕྱེ་ནས་འོང་། །ཆུ་ལ་ཞུགས་པ་ནི་གསུམ་སྟེ། །སྦུགས་ཆུ་རྒྱ་སྐྱེགས་ཁུ་ལྟར་འོང་། །སྣ་ཆུ་རྟག་ཏུ་སྐྱ་བོར་འོང་། །མིག་གི་ཆུ་ཡང་རྟག་པར་འཛག །དུ་བ་སེར་བུ་བྱུང་ཙམ་གྱི། །གཞན་པས་རབ་ཏུ་མྱུར་བར་འཛག །ལུས་ཀྱི་སྟོབས་ལ་ཞུགས་པ་ནི། །སྒྱིད་ལུག་པ་དང་སྐྱི་ཞུམ་པ། །ལུས་ཀྱི་རྒྱུ་བ་ཉལ་ཉལ་འོང་། །ལུས་ཀྱི་རྩི་ལ་ཞུགས་པ་ནི། །རྩི་ལ་སོགས་ཏེ་ལུས་ཀྱི་དྲི། །བྱ་ཡི་པགས་བཞིན་སང་གིས་འགྲོ། །མདོག་ལ་ཞུགས་པ་ནི། ལྕེ་ནི་བཙོད་ཀྱི་མདོག་བཞིན་འོང་། །དབྱིབས་ལ་ཞུགས་པ་ནི། ལུས་ཀྱང་གཉེར་ཆུང་དག་གིས་ཁེངས། །སོར་མོ་བྱི་བའི་མཇུག་མ་འདྲ། །རེག་པ་ལ་ཞུགས་པ་ནི། སྣ་རྩེ་ལ་སོགས་ལག་རྩེ་རྣམས། །ཚ་ཡམ་ཚ་བེར་ལུས་གཙེ་བ། །གཡའ་བར་འོང་བ་དག་ཡིན་ནོ། །ཆུ་བ་ལ་ཞུགས་པ་ནི། ཡན་ལག་རེངས་ཤིང་ན་བ་དང་། །ཤ་འབུར་བ་དང་གྲང་སིང་སིང་། །ཡན་ལག་ཚོགས་རྣམས་ཁོལ་བའོ། །ཆུ་སེར་ལ་ཞུགས་པ་ནི་ཆུ་སེར་ལ་ལྔ་སྟེ། །ཟ་ཁོལ་ཁོལ་ཟ་ཙག་ཙག །ཚ་ལྗིབས་ལྗིབས། ལུས་ལ་ཆུ་སྒངས་ཡོད་པའོ། །ཆུ་སྒངས་བྱུང་ནས་རིད་མི་ལུས། །ལུས་ལ་འབྲུམ་རྗེས་སྲན་མ་འདྲའོ། །དེ་ནི་བཟློག་པར་སླ་བའོ། །ཀླད་པ་ལ་ཞུགས་པ་ནི། མགོ་བོ་ཕྱིང་ཕྱིང་སྐྲངས་པ་དང་། །འཐོམ་དང་བེམ་མེ་བ་དག་དང་། སྒྲ་རྣམས་ནུལ་གྱིས་བྱིལ་སོགས། །ལྷ་བ་ལ་ཞུགས་པ་ནི། གདོང་པ་ཚ་ལམ་ལམ་འོང་བ་དང་། གྲང་སེར་སེར་འོང་བའོ། །དེ་ནི་བཟློག་པར་སླ་བའོ། །ལུས་ཧྲིལ་གདོང་ཡང་ཐལ་སྐྱའི་མདོག །དེ་ནི་བཟློག་པར་དཀའ་བའོ། །ཤིན་ཏུ་ཁྲོ་བོའི་ཀླུ་རྣམས་ནི། །རྟགས་དང་མི་ལྡན་ཐུགས་ཀྱི་འོད། །བཟློག་དཀའ་རྨ་ཚོགས་མི་འཚོ་རྟགས་མི་ལྡན། །བཟློག་སླ་གཞན་ཡང་ཡན་ལག་ཕྲ་བ་དང་། །སྦོམ་དང་ཐུང་དང་རིངས་པ་ལ་སོགས་པ། །ཀླུའི་མཚན་ཉིད་དུ་ཤེས་པར་བྱའོ། །རྟག་ནི་དེ་དག་འགའ་ཞིག་ནི། །ནད་གཞི་གཞན་མ་ལས་

ཀྱང་འབྱུང་། །འགའ་ནི་ཀླུ་ཡི་གདོན་མ་ཡིན། །ལས་ལས་འབྱུང་བ་དག་ཀྱང་ཡོད། །དེ་དག་གི་ནི་མཚན་ཉིད་ནི། །མཁས་པས་སོ་སོར་ཤེས་པར་བྱའོ། །ནད་གཞི་ལས་བྱུང་སྨན་སོགས་དང་། །འཕྲོད་པའི་ཟས་ནི་ཕན་པ་ཡིན། །ནད་རྣམས་གཞན་མ་ཡུན་མི་རྟག །འདི་འདྲའི་མཚན་ཉིད་ཤེས་པར་བྱ། །ཤེས་ནས་མྱུར་དུ་བརྩོན་འགྲུས་ཀྱིས། །སྣ་ཚོགས་ཐབས་ལ་མ་རྨོངས་པས། །བཟློག་པའི་ལས་ལ་འབད་པར་བྱ། །ཆུ་ཡི་ཐིགས་པ་ཕྲ་མོ་ཡིས། །དུས་སུ་བྱུང་བས་རྡོ་བ་འབིགས། །གདུག་པའི་དབང་ཅན་ཞ་རིད་ཡང་། །ལེ་ལོ་དང་བྲལ་རྩེ་གཅིག་སེམས། །རྒྱུན་དུ་ལྷ་བསྒོམ་བཟླས་བརྗོད་ཀྱིས། །གདུག་པའི་ནད་ལས་ཐར་བར་ངེས། །རྩོལ་བ་ཆེ་ལ་སོམ་ཉི་བྲལ། །གང་བསམས་དེ་ལས་མི་འགྲུབ་མེད། །འཁོར་བའི་ཕུང་པོ་སྲོག་བཅས་ལ། །མངོན་སུམ་ཉིད་དུ་མཐོང་འགྱུར་གྱིས། །བརྩོན་པ་དོར་བར་མི་བྱའོ། །ཞེས་དཔལ་གཏུམ་པོ་ཆེན་པོས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་མཚན་ཉིད་བརྟག་པའི་ལེའུ་སྟེ་བཅུ་གསུམ་པའོ།། །།དེ་ནས་ལྷའི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་དག་ན། གདུག་པ་ཅན་གྱི་ཡི་དགས་རྣམས། །དུག་རྣམས་དབྱུང་ན་ཇི་ལྟར་དབྱུང་། །མཆོད་པའི་ལས་རྣམས་ཇི་ལྟར་བྱ། །ཆོས་ཀུན་བདག་པོས་བཀའ་སྩོལ་ཅིག་ཅེས་གསོལ་ཏོ། །བཀའ་སྩལ་པ། ལྷའི་དབང་པོ་ཉོན་ཅིག །མཆོད་པའི་ལས་དག་བྱེད་འདོད་ན། །གཉིས་དགོན་གཙུག་ལག་ཆུ་མིག་འགྲམ། །མཚེའུ་ལྟེང་ཀ་ཁྲོན་པའི་སྟེང་། །དབྱར་ཟླ་གསུམ་ལ་གནས་པར་བྱ། །དབྱིབས་ལེགས་རན་མཛེས་བྱི་དོར་བྱ། །བ་ཡི་རྣམ་ལྔ་སྤོས་དང་དྲི། །ཐིག་ལེ་ལྔ་དང་ལྡན་པར་བྱ། །དབུས་སུ་ཧཱུྃ་བྲི་གསལ་བར་བྱ། །ཨོཾ་ཕཱ་ཕོ་ཕཻ་ཕྃ་འདི་དག་བཞི་ལས་རྫོགས་པར་བསྐྱེད། ཀླུ་ཡི་རྒྱལ་པོ་རྒྱ་མཚོ་ནི། །ལུས་དཀར་རིན་ཆེན་སྦྲུལ་མགོ་གསུམ། །ལག་ན་རིན་ཆེན་སྡོང་བུའོ། །ཀླུ་ཡི་རྒྱལ་པོ་ཀུན་ནས་གདུགས། །སྦྲུལ་མགོ་གཉིས་པ་ཁ་

དོག་སེར། །རིན་ཆེན་འབར་བ་ལག་ནའོ། །ཆུ་ལྷ་མགོ་ལྔ་ཁ་དོག་དམར། །ལག་ན་པད་མ་འབར་བའོ། །ཀླུ་རྒྱལ་ཤིང་ལ་པུ་ར་ཀ། །ལག་ན་སྤྲིན་ཕུང་ཁ་དོག་ལྗང་། །རྒྱལ་དང་རྗེ་དང་བྲམ་ཟེ་དམངས། །སོ་སོའི་རིགས་ཀྱི་རྒྱལ་པོ་སྟེ། །སྤྲ་ཚིལ་ཞ་ཉེ་བག་ཟན་ལ། །གཟུགས་སུ་ཡང་ནི་མཛེས་པར་བྱ། །སེམས་ཅན་འཁོར་གྱིས་བསྐོར་བར་བྱ། །ཀླུ་སྨན་སྣ་ཚོགས་དཀར་དང་མངར། །ཚོགས་པར་བྱས་ལ་མཆོད་སྦྱིན་བྱ། །ཁམ་ཕོར་[སླུ]་གུ་མཆུ་ལྔ་པར། །བླུགས་ལ་ཁ་བཅད་གནས་སུ་སྦ། །གསོ་བར་བྱ་བའི་ལས་ནི་རབ། །སྤྱན་དྲངས་གདན་དང་ཕྱག་སྐྱབས་བསྟོད། །སྨོན་ལམ་ལ་སོགས་རྒྱ་ཆེར་བྱ། །བདེན་པ་བདར་ཞིང་བསྡིགས་པར་བྱ། །དུག་རྣམས་དབྱུང་བའི་ལས་དག་ནི། །རྃ་ཡྃ་ཁྃ་ལས་བྱུང་བ་ཡི། །འཁོར་ལོ་རྣམ་གསུམ་མེ་རླུང་ཆུ། །བསྲེག་གཏོར་བཀྲུ་བྱ་སྟོང་ཉིད་ཀྱིས། །འཁོར་ལོ་ཆེན་པོ་གནས་པར་བྱ། །ཧཱུྃ་ལས་གྱུར་པར་ལྡན་པར་བྱ། །བཟང་སྐྱོབ་པ་དང་དོགས་ཉེས་དང་། །མཉམ་དང་ལྡན་པས་མཆོད་པ་བྱ། །དེ་ནང་དེ་བཞེངས་མཚན་ནས་བརྗོད། །ཉ་སྟོང་དུས་མཆོད་སྲི་ཞུས་བསྐོར། །དེས་ནི་དོན་རྣམས་འགྲུབ་པར་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དུག་དབྱུང་ཞིང་མཆོད་པ་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཀའ་སྩལ་པ། དུས་ངན་ཐ་མར་གྱུར་པའི་ཚེ། །སྡིག་ལ་མི་འཛེམ་མི་དགེ་སྤྱོད། མཚམས་མེད་བྱེད་ཅིང་ཆོས་དཀོར་འཇིག །མཛེ་དང་ཤུ་བ་གཡན་པ་དང་། །སྐམས་དང་ཞ་གྲུམ་གཞོགས་ཕྱེད་ན། །དེའི་ཚེ་ང་ཡི་བསྟན་པ་འབྱུང་། །ཉོན་ཅིག་དབང་པོ་འཁོར་གྱི་མཆོག །ལོག་སྲེད་གདུལ་དཀའ་གདོལ་བ་ཅན། །ཞི་བས་མི་འདུལ་གང་ཟག་གི། །གཤེད་དུ་འཁོར་ལོ་འདི་བསྐོས་སོ། །ཀྲོ་དྷ་རཱ་ཛའི་གཟུངས་བཅས་ལ། །རྡོ་རྗེ་རྒྱ་གྲམ་མཐའ་བསྐོར་རྡོ་རྗེའི་རྭ། །བརྩོན་འགྲུས་བཞི་ལྡན་དབུས་དང་ལྔ་རུ་དེའོ། །དེ་ལས་རྒྱས་པ་དག་ཏུ་བསྐོར་འདོད་ན། །དེ་ལ་ཁྱད་པར་ཁྱམས་དང་ཡི་གེ་ནི། །བཅུ་གཅིག་ལྡན་བྱས་

མཚོན་རེའི་མིང་རུས་གཅར། །ཁྱམས་གཅིག་ཧཱུྃ་དང་མིང་རུས་མང་ན་སྦྲག །དབུས་ཁྱམས་སྔགས་བྲི་མང་ན་དེ་དང་སྦྲག །གཅིག་ལ་རྡོ་རྗེ་ཧཱུྃ་བར་མང་ན་གཅར། །རྐང་པ་མོས་མ་ཤིགས་ན་ཕོ་ཡི་ལས། །དེ་མ་བྱུང་ན་ཕོ་མོ་སྦྲག་པའི་ལས། །བསོད་ནམས་ཅན་གྱི་སྐལ་བཟངས་མ་ཐུལ་ན། །སྲིད་པའི་སྟོང་བཟློག་འཁོར་ལོ་དཀྲུགས་ཏེ་བསྐོར། །རོ་རས་ལ་བྲི་བྱ་རོག་འུག་པའི་སྒྲོ། །སྨྱུ་གུ་བྱས་ལ་གདན་ནག་ཡིག་སྔོན་བྲི། །དྲི་རྒོད་ཤིང་བསྲེགས་བོང་ཁྲག་བོང་དུག་སྦྱར། །དབུས་དང་བརྩོན་ཁང་བཞི་པོར་ཧཱུྃ་བར་གཅད། །དགོད་པ་ཀུན་བྱེད་ལས་རྣམས་ཐམས་ཅད་ཀྱི།།སྔགས་འདི་ཕོ་དང་མོར་བྲི་བར་དུ་གསད། །ཨོཾ་བཛྲ་ཙཎ་ཌ་མ་ཧ་རོ་ཥ་ཎ་ཧཱུྃ་ཕཊ། ཕོ་དང་མོར་བསྐོར་རབས་ཆད་ཕོ་མོར་གཞུག ། དབུས་ཀྱི་ཧཱུྃ་བཏགས་སྲད་བུ་ཚངས་བུག་དབྱུང་། །ཡཀྵ་ཁ་ཕཊ་ཕྱོགས་བཞིར་གཞག་པར་བྱ། །རྡོ་རྗེ་རབ་ཏུ་ཧཱུྃ་བར་དེ་བར་བཞག །དུག་སྣ་ཁྲག་སྣས་གའུ་ནག་པོར་བྱུག །གུ་གུལ་རྒྱ་ཚིལ་ཚིལ་ཆེན་ར་ལུག་རྨང་ཁ་ནི། །ཁུ་བ་ནག་པོས་བྱ་བར་རབ་ཏུ་ཤིས། །བོང་གྲི་ནག་པོའི་རྔོག་མ་དྲི་རྒོད་ཤི་སྐྲ་དང་། །ཡུགས་ས་མོ་ཡི་སྐྲ་ཤད་སྐུད་པས་དཀྲི། །ཡུགས་ས་མོ་ཡི་དོར་རྟས་དྲིལ་ལ་སྦ། །ཕོ་མོའི་ཐོད་པ་སྟེང་འོག་རྒྱ་གྲམ་བྲི། །རི་རབ་མནན་བྱས་མཐའ་གཉིས་དང་པོ་བཞི། །བང་རིམ་སྔགས་བྲིས་སྟེང་དུ་རྒྱ་གྲམ་དགབ། །རྒྱ་གྲམ་འོག་ཁུང་སྟེང་དུ་ཁྲུ་དོའི་ཚད། །བང་རིམ་བཞི་ལ་སྔགས་འདི་སྐུ་གསུང་ཐུགས། །ང་ཡི་རི་རབདག་ཏུ་མཚོན་ཕྱིར་བྲི། །ཨོཾ་ལྃ་ཧཱུྃ་ལྃ་སྟྃ་བྷ་ནཱྃ། ཨོཾ་བཛྲ་ཙཎ་ཌ་ནཱྃ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲག་པོ་འཁོར་ལོའི་ལེའུ་སྟེ་བཅོ་ལྔ་པའོ།། །།དེའི་ཚེ་དེ་སྐད་ཅེས་བཀའ་སྩལ་པའི་མཐུས་འཇིག་རྟེན་གྱི་ཁམས་ཀྱང་གཡོས། རབ་ཏུ་གཡོས་སོ། །འཇིག་རྟེན་གྱི་ཁམས་ཐམས་ཅད་ལ་ལ་ལ་ནི། གཡས་སུ་འཁོར་བའི་ཚུལ་གྱིས་འཁྲུགས་སོ། །ལ་ལ་ནི་གཡོན་དུ་འཁོར་བའི་ཚུལ་གྱིས་འཁྲུགས་སོ། །ལ་ལ་ནི་བླ་འོག་དགྱེ་དགུའི་ཚུལ་གྱིས་འཁྲུགས་སོ། །ལ་ལ་ནི་མཐོ་

དམན་དང་གྲུམ་པའི་ཚུལ་གྱིས་འཁྲུགས་ཏེ་དེ་དག་ན་གནས་པའི་གདུག་པ་ཅན་ཐམས་ཅད་རབ་ཏུ་མྱོས་ནས། ཁ་ནས་ཁྲག་ངན་སྐྱུགས་པ་དག་ཀྱང་བསྐུས་ཏེ། ཐམས་ཅད་ཀྱང་ག་ན་བ་དེར་ཐད་དུ་འདུས་ནས་ཕྱག་འཚལ་སྟེ་མགྲིན་གཅིག་ཏུ་སྐད་ཀྱིས་འདི་སྐད་ཅེས་གསོལ་ཏོ། །ཀྱེ་མ་སྔ་མ་མ་མཐོང་ཁྲོ་བདག་འཇིགས་པའི་སྐུ། །རབ་ཏུ་དྲག་པ་ཡ་མཚན་ཨེ་མ་ཧོ། །ཐུགས་རྗེས་དགོངས་ཤིག་བདག་ཅག་འབངས་སུ་མཆི། །དེ་ལས་འགལ་ན་དམྱལ་བར་ལྟུང་བར་ཤོག །ཅེས་གསོལ་ཞིང་འཁོད་དོ། །དེ་ནས་བདུད་ཀྱི་རྒྱལ་པོ་སྐོས་ཀྱི་བདག་པོ་བདུད་བྱེ་བ་འབུམ་ཕྲག་དང་བཅས་པསམགྲིན་གཅིག་གིས་སྲོག་གི་སྙིང་པོ་ཕུལ་བ། བཅོམ་ལྡན་འདས་བདག་ཅག་གི་རིག་པ་འདི་བཞེས་སུ་གསོལ། ཨོཾ་ནག་པོ་ཏྲི་ཊ་ཏྲི་ཊ་ཏྲི་ལིང་ཏྲ་ཏ་ཧ་ཀེ་ཎ། བདག་ཅག་གི་རིག་པ་འདི་གང་ན་གནས་པ་དེར་བདུད་ཀྱིས་འགལ་བར་མི་བགྱིད་དོ། །གང་ཡིད་ལ་དགོས་པ་དེ་གྲུབ་པར་བགྱིད་དོ། །ཕས་བྱད་སྔགས་དང་སྦྱོར་བ་བཏང་བ་ཡང་ཕྱིར་ལྡོག་གོ །དེ་ནས་གཟའ་རྒོད་ཆེན་པོ་རཱ་ཧུ་ལ་འཁོར་གཟའ་འབུམ་ཕྲག་དང་བཅས་པས་མགྲིན་གཅིག་གིས་རང་རྟགས་སྲོག་གི་སྙིང་པོ་ཕུལ་བ། །ཤུ་ཤུ་རཀྵ་ཚལ་པ། ཀྲོ་དྷ་ཀྲོ་ལེ་ཤྭར། རཱ་ཧུ་ལ། ཙ་ཏི་ཙ་ཏི། བདག་ཅག་གི་རིག་པ་འདི་གང་ན་གནས་པ་དེར་གཟའ་རྣམས་ཀྱིས་འགལ་བར་མི་བགྱིད་དོ། །ཕས་གཏང་བ་ཡང་སླར་དེ་ཉིད་ལ་མཆིའོ། །འདི་འཛིན་པ་ལ་ཅི་འཚལ་བ་ཡང་སྩོལ་བར་བགྱིད་དོ། །དེ་ནས་དཀར་པོ་དུང་གི་ཐོར་ཚུགས་ཅན་ལ་སོགས་པའི་རྒྱལ་པོ་འཁོར་འབུམ་ཕྲག་དང་བཅས་པ་ལྷགས་ནས་མགྲིན་གཅིག་གིས་རང་རྟགས་སྲོག་གི་སྙིང་པོ་ཕུལ་བ། བྲ་ཧྨ་པུ་ཌིད་ཥ། ཨ་བར་ཏ་རཱ་ཛདྷ་ན་རཀྵ་ཙི་ཏ་ཕྱུང་རཱ་ཛ་ཙི་ཏ་ར་ཛ་ཕྱུང་རཱ་ཛ་ཙི་ཏ་གཏུབས། བདག་ཅག་གི་རིག་པ་འདི་གང་ན་མཆིས་པ་དེར་ཡུལ་འཁོར་དང་དཔག་ཚད་དུ་འགལ་བར་མི་བགྱིད་དོ། །ཕས་བཏང་བ་ཡང་དེ་ཉིད་ལ་སླར་མཆིའོ། །དེ་ནས་བཙན་དམར་པོ་སྲོག་ལེན་བཙན་འབུམ་ཕྲག་དུ་མ་དང་བཅས་པས་མགྲིན་གཅིག་གིས་རང་རྟགས་སྲོག་གི་

སྙིང་པོ་ཕུལ་བ། ཨཱ་བི་ཤུ་རཱ་ཛ་ཏྲི་ལིཾ་བདག་ཅག་འཁོར་དང་བཅས་པ་རྣམས་འདི་ལས་འདའ་བར་མི་བགྱིད་དོ། །ཕས་བཏང་བར་གྱུར་ཀྱང་སླར་དེ་ཉིད་ལ་སླར་མཆིའོ། །དེ་ནས་གཤིན་རྗེའི་རྒྱལ་པོ་སྨིགས་པ་ཞེས་བྱ་བ་འཁོར་དང་བཅས་པས་མགྲིན་གཅིག་ཏུ་རང་རྟགས་སྲོག་གི་སྙིང་པོ་ཕུལ་བ། ཡ་མ་རཱ་ཛ་ཡ་མ་ཙིཏྟ་བདག་གི་རིག་པ་སྤྱོད་པ་དེར་བདག་གི་གནོད་པ་མི་སྤོབས་ལགས་ཏེ། གནོད་པའི་རྒྱུན་སྤངས་ནས་ཕས་གཏང་བ་ཡང་སླར་དེ་ཉིད་ལ་མཆིའོ། །དེ་ནས་མ་མོའི་རྒྱལ་མོ་མཁའ་དབྱིངས་ཀྱི་ཡུམ་ལྔ་དང་། །བདུད་ཀྱི་གཤིན་རྗེའི་སྲིང་མོ་སྲིད་པའི་ཕུང་བྱེད་རེ་མ་ཏི་ལ་སོགས་པ། མ་མོའི་ཚོགས་དཔག་ཏུ་མེད་པ་དག་གིས་རང་རྟགས་སྲོག་གི་སྙིང་པོ་ཕུལ་པ། རག་མོ་མཱ་མཱ་རུ་ལུ་སྙིང་ཁ་རཀྵ་ཛ་པཱ་ལ་མ་མ་བྷྱོ་བྷྱོ། །བདག་ཅག་གི་གསང་བའི་སྔགས་འདི་སྤྱོད་པ་དེར་སྲུང་བ་དང་བསྐྱབ་པ་བགྱིད་དོ། །འཁོར་དང་བཅས་ཏེ་བཀའ་བཞིན་བགྱིད་དོ། །ཕས་གཏང་བ་ཡང་སླར་དེ་ཉིད་ལ་མཆིའོ། །དེ་ནས་ཀླུ་འཁོར་དང་བཅས་པས་མགྲིན་གཅིག་ཏུ་རང་རྟགས་སྲོག་གི་སྙིང་པོ་ཕུལ་བ། ནཱ་གཱ་རཱ་ཛ་ནཱ་ག་ནི། །གང་ན་རིག་སྔགས་ཀྱི་རྒྱལ་པོ་སྤྱོད་པ་དེར་བདག་གི་ཀླུའི་གནོད་པའི་རྒྱུན་སྤོང་ངོ་། ཕས་གཏང་པ་ཡང་སླར་དེ་ཉིད་ལ་མཆིའོ་ཞེས་སོ་སོ་ནས་རང་རྟགས་སྲོག་གི་སྙིང་པོ་ཕུལ་ཏེ་དམ་བཅས་སོ། །དེ་ནས་དབང་པོ་ཆེན་པོས། ཁྲོ་བོའི་བདག་པོ་དེ་ལ་འདི་སྐད་ཅེས་གསོལ་ཏོ། །སྲིད་པ་དབང་ཅན་འདི་རྣམས་ཀུན། །འཁོར་ལོས་ཟློག་ན་ཇི་ལྟར་བཟློག །བཟློག་ཐབས་ཁྱད་པར་བཀའ་སྩོལ་ཅིག །བཀའ་སྩལ་པ། ཉོན་ཅིག་ལྷའི་དབང་པོ་མཱ་ར་ཡའི་ཙཀྲ་དག་ལས་སོ་སོའི་སྔགས་འཁོར་བྲི། བྱད་སྔགས་ཕྱིར་ཟློག་དམ་ཚིག་བཟློག་བཏགས་སོ། །མཆུ་གསུམ་སྙིང་ལྤགས་མེད་པའི་ཐོད་པ་དང་། །རོ་ཉ་སྦལ་ཤུགས་ཕག་ཐོད་རྣལ་གྲི་མོ། །དྲི་རྒོད་སྐྱུད་ག་ཐོད་ཆེན་ནང་དག་ཏུ། །རབ་ཏུ་དྲག་ཏུ་བསྐོར་བའི་འཁོར་ལོ་གཞུག །འོང་འགྲོ་འདྲུལ་སྲང་རྒྱ་གྲམ་ལམ་དག་ཏུ། །ཨེ་དོང་བྲུ་བྱས་རྒྱ་སོལ་མི་ཁྱི་ར། །རྟ་ཁྲག་རྨེ་ཁྲག་ནག་པོས་སྦྱངས་ལ་བསྐུ། །དབུས་བཅུག་

མཐའ་བསྐོར་མནན་པའི་ལས་དག་བྱ། །ཡང་ན་ཐུན་དུ་སྤགས་ལ་ཁྲོས་པས་འཕང་། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲེགས་པས་སྲོག་གི་སྙིང་པོ་ཕུལ་བ་དང་། མངོན་སྤྱོད་དྲག་པོའི་ལས་ཀྱིས་བཟློག་པའི་ལེའུ་སྟེ་བཅུ་དྲུག་པའོ།། །།དེ་ནས་ལྷའི་དབང་པོས་གསོལ་བ། ཀྱེ་བསྟན་པ་འཇིག་པའི་དུས་དག་ན། །ཐུན་གྱིས་ཚར་གཅད་བསྟན་དུ་གསོལ། །བཀའ་སྩལ་པ། ལྷའི་དབང་པོ་ཉོན་ཅིག །རྫས་དང་སྔགས་བཅས་ཏིང་འཛིན་གསུམ། །ཁྲོས་པས་ཞེ་སྡང་བསྐྱེད་པར་བྱ། །ཞེ་སྡང་དྲན་པས་གདུག་རྫས་བསག །ཡུངས་ཀར་ཡུངས་ནག་སྐེ་ཚེ་ཏིལ། །གཟེ་མ་སྐྱེར་པ་སེ་བའི་ཚེར། །ཐུན་སྔགས་འདི་བཟླས་བརྣགས་ལ་བྲབ། །ཨ་མུ་ཀམ་ནི་གཏོར་མ་འམ། །མཚན་ངན་ཀ་པཱ་ལ་རུ་གཞུག །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། མཱ་ར་ཡ་ཐུན་ཕོབ། དབང་པོ་ལ་ཡཾ། སྲོག་ལ་ཡཾ། ཙིཏྟ་ལ་ཡཾ། གོ་རོ་ཙ་ན་ལ་ཡཾ། གཟས་པའི་མཚན་མོས་རྡོ་རྗེའི་ཐོག་ཏུ་དབབ། །གང་དམིགས་གཟས་པའི་མཐུ་དང་རྫུ་འཕྲུལ་རྣམས། །བདག་ལ་བསྡུ་བྱས་རྟོག་པའི་བག་ཆགས་བཀྲུ། །སྔགས་འདིས་རོལ་ཅིག་བརྗོད་ཅིང་བྷ་ལིང་དགྲིལ། ཨོཾ་བ་ལིྃ་ཏ། བ་ལིྃ་པཱུ་ཛ་ཨརྒྷཾ་པྲ་ཏཱིཙྪ་ཧོཿ། བཛྲ་ཀྲོ་དྷ་ཙཎ་ཌ། བ་ལིྃ་ཁཱ་ཧི་ཁཱ་ཧི། བཛྲ་ཀྲོ་དྷ་ཙཎ་ཌ་ཧ་ཧ་ཧ། ཧེ་ཧེ་ཧེ། བྷ་ཊཱ་སྭཱ་ཧཱ། སྦྲུལ་དང་སྦལ་པ་ཉ་དང་ཆུ་སྲིན་སྙིང་། །ཤ་ཆེན་ཁྲག་ཆེན་ལོངས་སྤྱོད་རྣམ་པ་ཀུན། །ཤེས་རབ་མཆོག་གི་ཕྱག་རྒྱ་ཆེར་བསམ་ལ། ཡཾ་གཏོར་རཾ་བསྲེག་ཁཾ་བཀྲུས་བདུད་རྩིར་བསྒྱུར། །ཨ་མྲྀ་ཏ་དག་སྔགས་འདིས་སྦྱང་བར་བྱ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ། བཛྲ་ཨ་མྲྀ་ཏ་ཧཱུྃ་ཧྲཱིཿཐཱ། ཨོཾ་མ་ཧཱ་རཀ་ཏ་ཛྭ་ལ་རཾ་ཁཾ། ཁཱ་ཧི་ཁཱ་ཧི། ཧཱུྃ་ཧཱུྃ་ཧཱུྃ། ཧཱ་ཧཱ་ཧཱ། ཕྱི་ནང་གསང་བའི་མཆོད་པ་རྒྱ་མཚོའི་ཚོགས། །དངོས་སུ་འབྱོར་དང་ཡིད་ཀྱིས་སྤྲུལ་པ་ཀུན། །ཕྱོགས་བཅུའི་ཞིང་ཁམས་གང་བར་རབ་དམིགས་ལ། །སྐྱེ་མེད་དང་བས་ཉིན་མཚན་བརྩོན་པར་བྱ། །མི་དམིགས་མཉམ་གཞག་ཡེ་ཤེས་རབ་ལྡན་པ། །སྐུ་གསུང་དུས་གསུམ་

སངས་རྒྱས་ཐམས་ཅད་དང་། །སེམས་དཔའ་སེམས་མ་ཁྲོ་བོ་ཁྲོ་མོའི་ཚོགས། །མཆོད་པ་ཆེན་པོ་དེ་མཉེས་སྦྱིན་བྱའི་སེམས་ཅན་ཚིམ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཐུན་དྲག་མཆོད་སྦྱིན་གྱི་ལེའུ་སྟེ་བཅུ་བདུན་པའོ།། །།དེ་ནས་ལྷའི་དབང་བོ་ལ་སོགས་ཏེ། རི་རབ་དང་བར་སྣང་ལ་སོགས་པ་ལ་གནས་པའི་ལྷ་ཐམས་ཅད་ཀྱིས་ལྷ་རྫས་ཀྱི་མེ་ཏོག་དང་། ཕྲེང་བ་དང་། སྤོས་དང་། ཕྱེ་མ་དང་། ལྷའི་ན་བཟའ་དང་། ཞལ་ཟས་དང་། རྒྱན་སྣ་ཚོགས་པ་དང་། བདུག་སྤོས་དང་། སིལ་སྙན་དང་། བྱུག་པ་དང་། སྒྲ་སྣ་ཚོགས་པ་དང་། སྤོས་སྣ་ཚོགས་པ་ཐོགས་ནས་ལྷགས་སོ། །འཇིག་རྟེན་པ་དེ་དག་ཀྱང་རང་རང་གི་མཆོད་པ་སྣ་ཚོགས་པ་ཐོགས་ནས་ལྷགས་ཏེ། ཞེ་ས་དང་གུས་པ་བྱས་ཏེ་ཐམས་ཅད་ཀྱང་མགྲིན་གཅིག་གི་ང་རོས་གསོལ་པ། ཁྲོ་རྒྱལ་སྐུ་ལ་དྲི་མ་མི་མངའ་ཡང་། །དཀར་ཆབ་དང་ར་ཆབ་སྤོས་ཀྱི་ཆབ། །སྨན་ཆབ་བདུད་རྩིའི་ཆབ་ལ་སོགས། །ཁྱོད་ཀྱི་སྐུ་ལ་ཁྲུས་ཆབ་གསོལ། །ཨཱ་ཧ་ར་ཧཱུྃ། ག་བུར་བཟང་དྲུག་སྨན་གྱི་དྲི། །ཨ་ག་རུ་དང་དུ་རུ་སྐ། །གླ་རྩི་སྤོས་ཀྱི་དྲི་ལ་སོགས། །འགག་པ་མེད་པ་ཤངས་ལ་འབུལ། །དྷཱུ་པ་པཱུ་ཛ་མེ་གྷ་ཧཱུྃ། །རིན་ཆེན་ལྔ་ཡི་མེ་ཏོག་དང་། །ཆུ་ལས་སྐྱེས་དང་ཐང་ལས་སྐྱེས། །ཡིད་ཀྱིས་སྤྲུལ་པའི་མེ་ཏོག་རྣམས། །རྡོ་རྗེ་འཛིན་གྱི་དབུ་ལ་འབུལ། །པུཥྤ་པཱུ་ཛ་མེ་གྷ་ཧཱུྃ། །འབྲུ་ཡི་མར་མེ་རྩི་ཡི་མར། །འདམ་བུ་སྣང་གསལ་རིན་ཆེན་སྒྲོན། །སྤོབས་པ་བཅུད་ལེན་སྒྲོན་མ་རྣམས། །ཁྲོ་བོ་གཏུམ་པོའི་སྤྱན་ལ་འབུལ། །ཨཱ་ལོ་ཀེ་པཱུ་ཛ་མེ་གྷ་ཧཱུྃ། རྣམ་ལྔའི་སྤོས་དང་སྨན་ལྔར་སྦྱར། །ར་ས་ཡ་དང་ཨ་མྲྀ་ཏ། །རྡོ་རྗེ་འཛིན་ལ་དྲི་མཆོག་འབུལ། །གན་དྷེ་པཱུ་ཛ་མེ་གྷ་ཧཱུྃ། །རོ་མཆོག་བརྒྱ་ལྡན་བདུད་རྩིའི་མཆོག །བདེ་བར་བཞེས་ཏེ་དགྱེས་པར་དགོངས། །ཨ་མྲྀ་ཏཱ་བྷ་ར་ཧཱུྃ། ཀུན་ཏུ་གྲགས་པའི་སྒྲ་རྣམས་མ་ལུས་དང་། །དམ་ཆོས་སྒྲ་སྒྲོགས་སིལ་སྙན་འབུལ། །སྒཱ་ར་ཎ་ཁཾ་ཞེས་མགྲིན་གཅིག་གིས་གསོལ་ནས་དེ་ཉིད་དུ་སྤྲོ་བའི་ཚུལ་གྱིས་

གནས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲེགས་པའི་འཁོར་དག་གིས་སྲི་ཞུ་དང་གུས་པས་མཆོད་པའི་ལེའུ་སྟེ་བཅོ་བརྒྱད་པའོ།། །།དེ་ནས་རྡོ་རྗེ་ཁྲོ་བོ་དེས་དྲེགས་པའི་འཁོར་དེ་དག་ལ་དམ་ཚིག་ཆེད་དུ་སྤྱད་པ་འདི་བཀའ་སྩལ་ཏོ། །མི་གནས་མཐའ་ལས་འདས་པ་སེམས་ཉིད་མཆོག །སྣ་ཚོགས་ཆོ་འཕྲུལ་འབྱུང་བས་ཀུན་གྱི་གཞི། །མ་བཅོས་རང་བཞིན་རྐྱེན་གྱིས་བྱས་པ་མེད། །དེ་ལ་གནས་ན་རང་དམ་བསྲུངས་པ་ཡིན། །དེ་བཞིན་གྱུར་ཀྱང་འོད་འགྱེད་ཆེད་དུ་བླང་། །ནོར་བུ་འབར་བ་མ་མཐོང་སྟོན་པ་དང་། །ཐུགས་རྗེའི་བྱིན་གྱིས་བརླབས་ཀྱིས་གདུང་བའི་ནད་སེལ་བ། །བདུད་རྩི་ལྟ་བུའི་ཚིག་གིས་ཚིམ་བྱེད་པ། །ཀུན་གཞིའི་ཡུལ་དུ་ནུས་པའི་དབང་འབོགས་ཤིང་། །ཐུགས་རྗེས་སྐྱོབ་པར་མཛད་པའི་མགོན་པོ་དེ། །དུས་གསུམ་སངས་རྒྱས་ཀུན་པས་གཉེན་པ་སྟེ། །སྙིང་བཞིན་སྐྱེ་མེད་རྨི་ལམ་ནང་དུ་བཀུར། །ངག་གི་རྡོ་རྗེ་ཆུ་བོའི་རྒྱུན་བཞིན་དྲང་། །སྐྱོ་མེད་ཉིན་མཚན་དུས་སུ་བརྩོན་པར་བྱ། །རྡོ་རྗེའི་ཕྲག་པར་མི་གསེང་བསྡམས་ལ་དྲང་། །བརྫུན་མེད་ཚིག་གིས་དམ་པ་དེ་ལ་བསྟོད། །བཤད་པའི་དབང་རྣམས་རབ་ཏུ་མ་བསྟན་ན། །རྡོ་རྗེའི་ལྕེ་ལ་བདུད་རྩི་འཛག་གྱུར་ཀྱང་། །གཞན་ལ་ཟེར་ཐིགས་འགའ་ཡང་སྤྲོ་མི་བྱ། །གསང་འོས་གཉེར་གཏད་སྔགས་དང་མཚན་རྣམས་གསང་། །དུས་གསུམ་འགྱུར་མེད་རྡོ་རྗེའི་སྐུ་མཆོད་དེ། །ན་དང་འཆི་སོགས་ལས་ཀྱི་རྣམ་སྨིན་གང་། །སྡུག་བསྔལ་མི་བཟད་ཉམ་ཐག་ཅི་བྱུང་ཡང་། །ལྷག་པར་དྲན་པ་བསྐྱེད་དེ་རྗེས་སུ་གཟུང་། །འགྲོ་ཉལ་འདུག་ཟ་སྤྱོད་ལམ་རྣམ་པ་བཞིར། །མི་བརྗེད་ཤེས་རབ་དག་གིས་རྗེས་སུ་བཟུང་། །སློབ་དཔོན་མཚང་དང་གསང་ཚིག་ཡི་དམ་ལྷ། །སྲོག་གི་ཕྱིར་ཡང་དེ་དག་མི་སྤོང་ངོ་། །བཞི་པ་དེ་བཞིན་དེ་ལ་དེ་མི་སེམས། །དྲན་པས་རྗེས་སུ་དེ་ལ་བཟུང་བར་བྱ། །སྨིག་རྒྱུ་ཆུ་རྒྱུན་བརྟུལ་ཞུགས་བྱ་བ་བསྐྱེད། །དེ་ལས་འགལ་བའི་བརྟུལ་ཞུགས་རབ་ཏུ་སྤྱད། །རྡོལ་ཞིང་ཟག་འགྱུར་དུག་ཅན་སྨད་པའི་སྣོད། །དེ་རུ་

མུ་ཏིག་བདུད་རྩི་མི་བླུགས་ལྟར། །ཐབས་ཀྱི་སྤྱོད་པས་རྣམ་དབྱེ་ཤེས་པར་བྱ། །དཔག་ཚད་ཀུན་ཏུ་ཉམས་པ་རྣམ་པར་སྤོང་། །དེ་དག་འགལ་ན་རྡོ་རྗེ་དམྱལ་བ་ཡི། །སྡུག་བསྔལ་ཆུ་བོ་རེག་ཅིང་བཟོད་དཀའ་བར། །དུས་གསུམ་རྣམས་དང་ང་ཡིས་བརྗོད་མི་ནུས། །གཞན་ནས་གཞན་འཕང་ཐར་པའི་དུས་ཀྱང་མེད། །མ་ཉམས་བརྒལ་དཀར་འགྲོ་བར་གདོན་མི་ཟ། །ང་དང་དུས་གསུམ་ཀུན་ཀྱང་དེ་ལ་དགོངས། །གང་ལ་དམིགས་པའི་འབྲས་བུ་ཆུད་མི་ཟ། །ཕྱོགས་སྐྱོང་རྣམས་ཀྱིས་དམ་སྐྱོང་དེ་ལ་བསྲུང་། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ས་མ་ཡ་བཀོད་པའི་ལེའུ་སྟེ་བཅུ་དགུ་པའོ།། །།དེ་ནས་འཁོར་དེ་དག་ལ་ཆེད་དུ་རྗོད་པ་འདི་བརྗོད་དོ། །ཉོན་ཅིག་འདུས་པའི་འཁོར་རྣམས་ཀུན། །དོན་དམ་དབྱེར་མེད་ཕྱོགས་ཆ་ཀུན་དང་བྲལ། །མི་ལེན་མི་གནས་མི་སྤོང་མི་འགོག་ཅིང་། །རང་བཞིན་གནས་པ་དེ་ལ་བཅོས་སུ་མེད། །རྟོག་པའི་གནས་མིན་ཕྲ་བའི་སྤྱོད་ཡུལ་མིན། །དངོས་པོར་མི་གནས་མཚན་མ་ཀུན་དང་བྲལ། །སྒྲོ་དང་སྐུར་པས་དེ་ལ་དཔག་མི་དཔོགས། །སྟོང་པ་མ་ཡིན་ཐ་སྙད་དེ་ལས་འདས། །མི་གནས་མི་རྟོག་རྐྱེན་གྱིས་བསྐྱེད་པ་མེད། །དངོས་བྲལ་ཀུན་གྱི་མཐའ་འདས་བརྗོད་དུ་མེད། །འདི་ཞེས་ངེས་པ་དེ་ལ་མཚོན་དུ་མེད། །དུས་གསུམ་བདག་པོ་སངས་རྒྱས་ཐམས་ཅད་ཀྱི། །ཡབ་ཡུམ་ཤུལ་དང་ཀུན་གྱི་དངོས་པོ་ཡིན། །སེམས་ཅན་འཇིག་རྟེན་ཁམས་ཀྱི་རང་བཞིན་དང་། །བུད་དྷ་འཇིག་རྟེན་ཁམས་ཀྱི་རང་བཞིན་ཀུན། །གཅིག་སྟེ་རྣམ་གྲངས་ཡོངས་ཀྱིས་དེ་ལས་མེད། །གང་ཡང་མ་འགགས་གཅིག་ཏུ་ངེས་པ་མེད། །ཐ་སྙད་བརྗོད་བྲལ་སངས་རྒྱས་ཀུན་གྱི་དངོས། །དེ་ལྟར་གྲོལ་བ་རྣལ་འབྱོར་མཆོག་གི་ལམ། །ཕྲ་བའི་སྒོ་མོ་རྣམས་ཀྱིས་རྗེས་དཔག་དཀའ། །དེ་ལ་སྤྲོ་དང་བསྡུ་བའི་དབང་པོ་མེད། །གཟུགས་དང་ཁ་དོག་རྣམ་པ་གང་དུ་ཡང་། །དེ་ཉིད་མ་གྲུབ་དེ་ལ་གཉེན་པོ་མེད། །འབྱུང་བ་ཆེན་པོ་ནམ་མཁའི་རང་བཞིན་ལ། །ཁུ་རླངས་འཇའ་ཚོན་ན་བུན་སྤྲིན་ལ་སོགས། །ཐན་

དྲག་ལྷགས་རླུང་ལ་སོགས་གང་བྱུང་ཡང་། །ནམ་མཁའ་ཆེན་པོ་དེ་ལ་གཡོ་བ་མེད། །དང་པོ་བྱུང་ཡང་དེ་ཡི་ངང་ལས་བྱུང་། །ཐ་མར་ཞི་ཡང་དེ་ཡི་ངང་དུ་ཞི། །དེ་དག་དེ་ཡི་ནང་དུ་འུབ་ཀྱིས་འཆུས། །ཡངས་སོ་ཆེའོ་ནམ་མཁའི་ཁོག་པར་གནས། །ཁམས་གསུམ་སེམས་ཅན་དུས་གསུམ་སངས་རྒྱས་རྣམས། །དོན་དམ་ང་ཡི་རང་བཞིན་ང་ཉིད་ཡིན། །ཀུན་ཀྱང་དགེ་དང་སྡིག་སོགས་གང་བྱས་ཀྱང་། །རང་བྱུང་འཕྲུལ་ལྡན་དེ་ལ་འཕེལ་འགྲིབ་མེད། །རང་བྱུང་ཡེ་ཤེས་རྒྱུ་རྐྱེན་དངོས་པོ་མེད། །སེམས་ཅན་སངས་རྒྱས་གཉིས་ཤེས་རྟོག་གི་བུ། །དེ་ལ་དབྱེ་དང་མིང་དང་ཡིག་ཚོགས་མེད། །ཅེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་གཞི་བྱང་ཆུབ་སྙིང་པོའི་རྒྱུའི་ལེའུ་སྟེ་ཉི་ཤུ་བའོ།། །།དེ་ནས་དྲེགས་པའི་འཁོར་དེ་དག་ངོ་མཚར་དུ་གྱུར་ནས་མགྲིན་གཅིག་གིས་འཛུམ་པའི་མདངས་ཀྱིས་མངོན་པར་བསྟོད་པ། ཨེ་མ་ཧོ་རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་འཛིན་པ་ཀུན་གྱི་རྒྱལ། །རྡོ་རྗེ་རྡོ་རྗེ་འཛིན་པ་ཆེ། །རྡོ་རྗེ་སྐུ་སྟེ་ཆེ་བ་བོ། །མི་ཤེས་དྲི་མ་ཀུན་འཇོམས་པ། །སངས་རྒྱས་ཀུན་པས་སྔར་སངས་རྒྱས། །འགྲོ་བའི་མགོན་ལ་ཕྱག་འཚལ་བསྟོད། །རྡོ་རྗེ་ལུས་ཏེ་ལུས་ཀྱི་མཆོག །ལུས་རྣམས་ཐ་དད་རྣམས་སྤྲུལ་ཅིང་། །ལུས་དམན་པ་དག་འཇིགས་པར་མཛད། །ལུས་ཀྱི་ངེས་དོན་གཏིང་དཔག་དཀའ། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་འབར་བ་ཆེར་འབར་བ། །འབར་བའི་འོད་ཀྱིས་སྡང་བ་འཇོམས། །རྡོ་རྗེ་ཤུགས་ཏེ་ཤུགས་ཆེ་བ། །རྡོ་རྗེའི་མཚོན་ཆེན་ཕྱག་འཚལ་བསྟོད། །ཕྱག་ན་རྡོ་རྗེ་ཡེ་ཤེས་ཆེ། །ཞལ་གྱི་རྡོ་རྗེ་སྡང་བ་འབིགས། །རྡོ་རྗེ་མཆེ་བ་རྣོ་བ་ཆེ། །ཆེ་བ་རྒྱ་མཚོ་གསུང་ཆེན་བསྟོད། །རྡོ་རྗེ་པད་མ་བྱང་ཆུབ་ཆེ། །ཐུགས་ཉིད་སངས་རྒྱས་རང་བྱུང་བ། །རྡོ་རྗེ་རྒྱ་ཆེ་ཐུགས་ཀྱི་མཆོག །རྡོ་རྗེ་རྣལ་འབྱོར་ཐུགས་ཆེན་བསྟོད། །འཇིགས་བྱེད་དྲག་པོ་ནག་པོ་ཆེ། །རྡོ་རྗེ་འཇིགས་བྱེད་སྡང་བྱེད་པ། །བསྒྲུབ་དཀའ་བསྒྲུབ་ལེགས་ཡོན་ཏན་ཆེ། །ཡོན་ཏན་རྡོ་རྗེ་མཆོག་ལེགས་བསྟོད། །རྡོ་རྗེ་ཁྲོ་བོ་དྲག་པོ་ཆེ། །ཧ་

ལ་ཧ་ལ་ནག་པོ་ཆེ། །རྟོག་པའི་དུས་ངན་རྣམ་པར་སྤྱོད། །རྡོ་རྗེ་སེམས་དཔའ་ཕྱག་འཚལ་བསྟོད། །ཅེས་མངོན་པར་བསྟོད་དོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་འཁོར་གྱིས་མངོན་པར་བསྟོད་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་ལྷའི་དབང་པོས་འདི་སྐད་ཅེས་གསོལ་ཏོ། །ཀྱཻ་རྡོ་རྗེ་ཁྲོ་བོ་ཁྱོད། །དུས་ངན་བསྟན་པ་མི་གནས་ཚེ། །འཇིག་རྟེན་ཁམས་སུ་ཆུ་འཁྱགས་དབབ་པའི་ཐབས་བཀའ་སྩལ་དུ་གསོལ། །བཀའ་སྩལ་པ། ཉོན་ཅིག་དབང་པོ་ཆེན་པོ། འཇིག་རྟེན་ཕུང་བར་བྱན་ནཱ་གའི་ཆུ་འཁྱགས་དབབ། །གསང་བའི་ལས་རབ་འདི་ནི་རབ་ཏུ་གནག །ན་མོ་བུད་དྷཱ་ཡ། བཛྲ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཕཊ། ཨོཾ་བཛྲ་ཙཎ་ཌ། ཀི་ལི་ཀི་ལི། ཙཎ་ཌ་མོ་ར་ཙི་ཎ། ཙཎ་ཌ་ཙཎ་ཌེ། ནཱ་ག་བྷན་དྷཱ་ཡ་ཕཊ་སྭཱ་ཧཱ། སོར་བརྒྱད་སེང་ལྡེང་ཕུར་བུ་གུ་གུལ་དང་། །ཚིལ་ཆེན་སྨེ་ཁྲག་བྱུག་ཅིང་བདུག །རྩ་གཟིར་སྔགས་ཤམ་གདགས་པ་བཅའ། །ཐོག་མའི་གོང་ནས་གྲངས་མེད་བཟླས་པའི་མཆོག །ཀླུ་གནས་བཏབ་ན་ཁྱུང་གིས་མི་ཐར་འཆིང་། །ཕྱོགས་བཏབ་ལྡོག་འགྱུར་ཞིང་བཏབ་འབུ་སྲིན་ཟ། །ལྡུམ་ར་རྟ་བྲེས་གནག་ར་ར་ལུག་གནས། །བཏབ་ནས་མི་སྐྱེ་རི་སྙིལ་ཆུ་ཡང་ལྡོག །ཕལ་པའི་གྲོང་དང་རྒྱལ་པོའི་སྒོར་བཏབ་ན། །ཕལ་པའི་གྲོང་འཇིག་རྒྱལ་པོའི་འཁོར་གྱི་མི། །འབྱེར་ཞིང་ནད་ཀྱིས་ཐེབས་འགྱུར་ཕྱུང་ན་ཐར། །ནཱ་གའི་གནས་བཏབ་ཐམས་ཅད་འཆིང་བར་འགྱུར། །ནག་པོ་གནས་སུ་སོང་ལ་ལས་འདི་བྱ། །བྱང་བལྟས་ཆུ་མིག་རྔོམ་དང་དམས་སྐྱིབས་གནག །མགོ་ན་རྡོ་ནག་དྲེག་པ་ཆགས་པ་ཡོད། །གནས་དེར་ཨེ་ནག་འདོམ་བཞི་རྩེ་མོ་ལྷོ། །དཀར་ནག་རྡོ་བ་གླང་དམར་རྭ་སྐྱེད་བྱ། །སྐམ་པོ་དུམ་བཞིར་ཕྱི་རོལ་ཁྲག་དུག་གནག །ར་ཁྱི་མིའི་ཁྲག་བསྐོལ་བྱ་ཏིང་འཛིན་བསམ། །ག་རུའི་སྤྲུལ་པ་མང་པོ་ཤིན་ཏུ་གཅེས། །དཀར་ནག་དུད་པས་དྲན་བསྐྱེད་དབང་དུ་བསྡུ། །དེ་ནས་ཁྱུང་བསྐུལ་བ་ཞེས་བྱ་བ་འདི་གསུངས་སོ། །ཧྲཱིཿདཔག་བསམ་ཤིང་ལས་བཞེངས་པའི་ག་རུ་ཌ། །ཡེ་ཤེས་གཤོག་པ་འབར་བ་གསེར་གྱི་མིག །

རྡོ་རྗེའི་མཆུ་སྡེར་ཐོགས་མེད་ལྕགས་ཀྱུ་ཅན། །རི་རབ་རྩེ་ནས་རྒྱ་མཚོའི་གཏིང་དུ་སླེབ། །ཀླུ་རྒྱལ་གདན་དུ་འདིངས་ཤིང་ཀླུ་ཕྲུག་ཟས་སུ་ཟ། །ཀླུ་རྣམས་བཀའ་ལས་མ་འདའ་ཆུ་འཁྱགས་ཕོབ། །བརྗིད་གནོན་མན་ཏྲ་མུ་དྲས་ཟིལ་གྱིས་གནོན། །ནཱ་ག་རཱ་ཛ་ཕུཏྟ་ཕུཏྟ། སྟོང་བཟླས་གཤམས་སྦྲེལ་བནྡྷ་ཆུ་མིག་བརྡབ། །ཀླུ་གཟུགས་སྦྲུལ་མགོ་བདུན་སྔོན་སྐྱེད་ཁར་གཞག །མགོ་ལ་ཁྲག་བྱུང་འདི་ཉིད་རྩ་བརྒྱད་བཟླས། །ནཱ་ག་ནཱ་ག་ལ་ཁྲག་ནང་མགོ་ལ་ཕོབ། །ནཱ་ག་མགོ་ལ་ཁྲག་ཐུན་རྦད། །རྩ་བརྒྱད་བརྗོད་ཅིང་ཐབ་བྱ་ཁྲག་ལྷག་དང་། །ཐལ་འཇིམ་བན་དྷ་ཆུ་མིག་ནང་དུ་བརྡབ། །ཐོག་དང་སེར་བ་ཇི་ལྟར་འདོད་བཞིན་འོང་། །ནཱ་གའི་གཟུགས་ནི་ནག་པོ་གེལ་ཆགས་ཆེ། །མིག་ནས་གློག་འགྱུ་ཁ་ནས་ཁྲག་སེར་འབབ། །དེ་ལྟར་བསམས་ན་ཀླུ་འཁྲུགས་སེར་བ་འབེབས། །དཔལ་ལྡན་རྡོ་རྗེ་གཏུམ་པོ་ཐུགས་གསང་པའི་རྒྱུད་ལས་འཇིག་རྟེན་ཐོག་སེར་གྱི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་ཡང་ལྷའི་དབང་པོས་ཞུས་པ། མཐར་ཐུག་དྲག་པོའི་ལས་ཀྱིས་ཇི་ལྟར་དབབ། །རྫས་དང་སྔགས་བཅས་དྲག་པོའི་སྦྱར་ཐབས་གང་། །སྦ་གནས་དུས་ཚོད་མཛེས་པ་གང་ལ་བགྱི། །བསྲུང་བའི་གོ་རིམས་བཅས་བཇི་ལྟར་ལགས་ཞེས་ཞུས་པ་ལས། བཀའ་སྩལ་པ། ཉོན་ཅིག་སྐལ་ལྡན་ལྷ་ཡི་དབང་པོ་ཉོན། །རྫས་དང་སྔགས་བཅས་དྲག་པོའི་སྦྱོར་བ་འདིའོ། །མཛེ་ཤ་མཛེ་ཚིལ་ཐོད་པ་ཚིལ་ཆེན་དུད། །གཞོབ་རྣམས་བླུགས་ཏེ་སྤྲ་བའི་མེ་དང་སྤྲད། །ཡུགས་སའི་ཞབས་དྲིལ་ཁར་ནག་བཅིང་བྱས་ལ། །ཆུ་མིག་འགྲམ་སར་སེང་ལྡེང་ཕུར་པ་གདབ། །སྟོན་ཟླ་ར་འབྲིང་གཟའ་རྒོད་རྒྱུ་དུས་གཏད། །སྐྱ་རེང་ཤར་དང་ཉི་ཕྱེད་ཉ་ལ་གཏད། །རྫས་མཆོག་མ་ཕྱུང་ཆུ་འཁྱགས་ཉིན་རེ་འབབ། །དེ་ནས་ཀླུ་རྣམས་ཀུན་གྱི་གཉེན་པོ་རཀྟ་ཙ་མུཎྜི་ཞེས་བྱ་བ་འདིས་སྐུལ་བཀའ་སྩལ་ཏོ། །ཧཱུྃ་སྐུ་ནི་གནམ་ལྕགས་འབར་བ་ལ། །དམར་སེར་མེ་ཡི་རལ་པ་ཅན། །ཁམས་གསུམ་སྲིད་གསུམ་ཁ་ན་ཁྱེར། །སྲིད་པ་གསུམ་ནི་ལྟོ་ན་འཕྱོ། །

ཡ་འགལ་གནམ་ལ་མ་འགལ་ས། །ཉི་མའི་སྨན་དང་སྤྱན་ནས་འཆར། །ཟླ་བའི་སྐྱིན་དང་ཞལ་ནས་འཆར། །རི་རབ་རྩེ་དགུ་ཕྱག་ན་བསྣམས། །མི་བཟད་འབར་མ་གཏུམ་ཆེན་མོ། །ཕྱག་ན་རྡོ་རྗེའི་བཀའ་ཉན་མ། །འདུལ་བའི་གཉེན་པོ་ཀླུ་འདུལ་མ། །ཐུགས་དམ་ཀླུ་ཡི་བན་དྷ་འདྲེན། །ཟས་སུ་ཀླུ་ཡི་ཤ་ལ་ཟ། །ཀླུ་ཡི་གནས་རིས་དབང་དུ་སྡུད། །སྔགས་བཀའ་སྩལ་པ། ཨོཾ་ནཱ་ག་ཞུང་ཐུན། ཛྭ་ལ་ཛྭ་ལ། ཙྪིནྡ་ཙྪིནྡ། བྷིནྡྷ་བྷིནྡྷ། ཕཊ་ཕཊ་སྭཱ་ཧཱ། ལས་ཀྱི་གོ་ཆ་དྲུག་ནི་རབ་ཏུ་གཅེས། །ལོག་གནོན་གྱི་སྔགས་བཀའ་སྩལ་པ། ནཱ་ག་ལི་དུམྤ་ཡ་ས་དོམ་དྷེ་བ་ཀུ་རུ་ཧཱུྃ་ཧཱུྃ། ཛཿཛཿབྷྱོ་བྷྱོ། འཁོར་ལོ་ཚུལ་དུ་ལུས་ལའོ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་མཐར་ཐུག་དྲག་པོའི་ལས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་འཁོར་དེ་དག་གིས་ཞུས་པ། བཅོམ་ལྡན་ཉིད་ཀྱི་མཚམས་བཅད་ཇི་ལྟར་གཟུང་བར་བགྱི་ཞེས་གསོལ་པ་དང་། བཀའ་སྩལ་པ། འདུལ་བའི་ཚོགས་ཉོན་ཅིག །ངའི་རང་བཞིན་ནི་དུས་གསུམ་གྱི་བདེ་བར་གཤེགས་པར་རྟོགས་པར་བྱོས་ཤིག །ངའི་རང་བཞིན་ནི་སྐྱེ་བ་མེད་པར་རྟོགས་པར་བྱོས་ཤིག །ངའི་རང་བཞིན་ནི་འགག་པ་མེད་པར་རྟོགས་པར་བྱོས་ཤིག །ངའི་རང་བཞིན་ནི་སྟོང་པ་ཉིད་དུ་རྟོགས་པར་བྱོས་ཤིག །ང་གང་ཡིན་པ་དེ་ནི་གསང་བའི་བདག་པོའོ། །ང་གང་ཡིན་པ་དེ་ནི་རྡོ་རྗེ་སེམས་དཔར་རྟོགས་པར་བྱོས་ཤིག །ང་གང་ཡིན་པ་དེ་ནི་ཁམས་གསུམ་རྣམ་པར་རྒྱལ་བར་རྟོགས་པར་བྱོས་ཤིག །ང་གང་ཡིན་པ་དེ་ནི་གཏུམ་པོ་ཆེན་པོ་ཉིད་དུ་རྟོགས་པར་བྱོས་ཤིག །ང་གང་ཡིན་པ་དེ་ནི་ཆོས་སོ། ཆོས་ཀྱི་ཕུང་པོའོ་ཞེས་བཀའ་སྩལ་པས་དེ་བཞིན་གཤེགས་པ་ཐམས་ཅད་དགྱེས་ཤིང་དགའོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཡོངས་སུ་གཏད་པའི་ལེའུ་སྟེ་ཉི་ཤུ་རྩ་བཞི་བའོ།། །།རྒྱ་གར་གྱི་མཁན་པོ་ཨ་བ་ཡུག་ཏའི་ཞལ་སྔ་ནས་ཞུས་ནས། བོད་ཀྱི་ལོ་ཙྪ་བ་ཆོས་ཀྱི་བརྩོན་འགྲུས་ཀྱིས་བསྒྱུར་བ་རྫོགས་སོ།། །།

དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ།

རྒྱ་གར་སྐད་དུ། ཤྲི་བཛྲ་ཙཎྜ་ཙིཏྟ་གུ་ཧྱ་ཏནྟྲ་ཨུཏྟ་ར། བོད་སྐད་དུ། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ།དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་བརྒྱ་བྱིན་ལྷའི་དབང་པོས་གསོལ་པ། ཀྱེ་བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་གསང་བའི་བསྟན་པ་དམ་པའི་དབང་ཇི་ལྟ་བའི་གསང་བ་དམ་པ་མཛད་དུ་གསོལ། །དེ་སྐད་ཅེས་གསོལ་པ་དང་། ཆོས་ཀྱི་དབྱིངས་རྣམ་པར་དག་པའི་ངང་ལས་མ་ཧཱ་ཙཎྜ་ཀྲོ་དྷི་ཧཱུཾ་ཞེས་གསུངས་པས། གཡོན་དུ་ཁྲོ་མོ་གཏུམ་ཆེན་མོ། །མཐིང་ནག་ཆེན་མོ་འཇིགས་ཚུལ་ཅན། །དབུ་སྐྲ་ཁམ་པ་གྱེན་བརྫེས་མ། །སྤྱན་དམར་སྡང་མིག་བགྲད་པའི་ཚུལ། །མཆེ་གཙིགས་ཁྲོ་གཉེར་སྤྱན་གསུམ་མ། །ཕྱག་གཡས་དྲིལ་འཛིན་གཙོ་ལ་འཁྱུད། །གཡོན་པ་ཐོད་ཁྲག་གཙོ་ལ་སྟོབ། །ཞབས་གཉིས་གཙོ་ལ་དགྱེས་ཚུལ་འཁྲིལ། །ཧི་ཧི་དགྱེས་དང་ཧ་ལའི་སྒྲས། །ཐམས་ཅད་གཡོ་ཞིང་རླག་པར་བྱེད། །དུར་ཁྲོད་རྒྱན་ལྡན་མེ་དཔུང་ནང་། །སྐུ་ལ་འཁྲིལ་བའི་ཚུལ་དུ་བཞུགས། །དེ་ནས་བཅོམ་ལྡན་དགྱེས་ཆེན་པོ། །དགྱེས་པའི་ཏིང་འཛིན་ལ་གནས་པས། །ཉིད་ཀྱི་མཁའ་ལ་ཧཱུྃ་ཨོཾ་ལྡན། །ནོར་བུ་དང་ནི་རྡོ་རྗེར་ལྡན། །རྡོ་རྗེའི་རྩེ་མོའི་སྦུབ་མར་ཕཊ། །ཡུམ་གྱི་གསང་བར་པ་ཏྲ་ལྡན། །པད་མ་དང་ནི་ཟེ་འབྲུར་ལྡན། །མ་ལས་ཉི་མའི་དཀྱིལ་འཁོར་རོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་ཡུམ་རྣམ་པར་འཕྲུལ་པ་དང་། མཁའ་གསང་རབ་ཏུ་ལྡན་པའི་ལེའུ་སྟེ་དང་པོའོ།། །།དེ་ནས་ལྷའི་དབང་པོས་གསོལ་པ། བཅོམ་ལྡན་འདས་བདེ་རྫོགས་གང་ལགས་བཤད་དུ་གསོལ་ཞེས་ཞུས་པས་བཅོམ་ལྡན་འདས་བདེ་རྫོགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་ལོ་བདེ་རྫོགས་ཞེས་བྱ་བ་བཀའ་སྩལ་པ། ཉོན་ཅིག་ལྷ་ཡི་དབང་པོ་མཆོག །བདེ་སྐྱོང་འཁོར་ལོ་སུམ་ཅུ་གཉིས། །དུང་དང་ཀུནྡ་ལྟ་བུར་གནས། །མི་ཤིགས་ཧཱུྃ་ནི་ཁ་འོག་བལྟས། །མགྲིན་ཆེན་ལོངས་སྤྱོད་འདབ་བཅུ་དྲུག །དབུས་ན་གསེར་

ཞུན་ལྟ་བུ་མྃ། །ཡ་བ་ར་ལ་ཁ་དོག་བཞི། །ཕྱོགས་བཞི་འདབ་མ་བཞི་ན་གནས། །ཆོས་ཀྱི་འཁོར་ལོ་འདབ་བརྒྱད་དེ། །ཧཱུྃ་མུྃ་དབུས་ཏེ་ཕྱོགས་མཚམས་ན། །ཨོཾ་ཀྲོ་དྷི་ཧ་མཱྃ་ལཱྃ་པཱྃ་ཏཱྃ། །སྤྲུལ་པའི་འཁོར་ལོ་དྲུག་ཅུ་བཞི། །དབུས་ན་ཨོཾ་དཀར་དེ་བཞིན་དུའོ། །མེ་ཡི་འཁོར་ལོ་གྲུ་གསུམ་རྃ། །རླུང་ནི་གཞུ་འདྲ་བ་དན་ཅན། །ཛ་ཉ་ཕཊ་དང་རྃ་ལྡན་པའོ། །དབབ་དང་བསྐྱིལ་བའི་སྦྱོར་བ་ཡིས། །ཤིན་ཏུ་སྣོད་ལྡན་དམ་པ་ལ། །སྲིན་མཐེབ་ལྕེས་བླང་དབུགས་ཀྱིས་དྲང་། །བྱིན་རླབས་བྱས་པའི་ཤེས་རབ་མ། །རང་ལུས་ཐབས་ལྡན་གཏད་པ་དང་། །བདེ་བ་དང་ནི་བདེ་བ་ཆེ། །ཤིན་ཏུ་བདེ་ཆེན་བདེ་མཆོག་ཡིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་འཁོར་ལོ་བདེ་རྫོགས་ཀྱི་ལེའུ་སྟེ་གཉིས་པའོ།། །།དེ་ནས་ལྷའི་དབང་པོས་གསོལ་པ། བཅོམ་ལྡན་འདས། སེམས་ཅན་དོན་དུ་བྱིན་བརླབས་མཐུ། །སྔགས་ཀྱི་མཐུ་རྣམས་བཀའ་སྩོལ་ཅིག །ཅེས་གསོལ་པས། ཉོན་ཅིག་ལྷའི་དབང་པོ་སྔོན་ཆད་ང་ལ་དེ་བཞིན་གཤེགས་པ་ཐམས་ཅད་ཀྱིས་གསང་བའི་མཛོད་འཛིན་པར་དབང་བསྐུར་ཏེ། ད་ལྟར་ངས་ཁྱོད་ལ་བཤད་པར་བྱའོ། །འདི་ནི་ཀླུ་ཐམས་ཅད་འཇོམས་པར་བྱེད་པའོ། །ཉི་མ་ས་སླ་ལ་ནྃ། ནཱ་ག་ཀུ་ན་ཞི། ཙིཏྟ་མུ་ལིང་ནྃ། ཟློག་བྱེར། ནཱ་ག་ཤིག །ནཱ་ག་བཟློག །ནཱ་ག་བྱེར། ནཱ་ག་ད་ཧ་ད་ཧ་མཱ་ར་ཡ་ཕཊ། ནཱ་ག་ཧ་ན་ཧ་ན། མཱ་ར་ཡ་ཕཊ། གསང་བ་གསང་བའི་མཛོད་འཛིན་པའི། །སྔགས་དེས་ཀླུ་རྣམས་རླག་པར་བྱེད། །རྫས་སུ་བསྟན་པ་འདི་ལྟ་སྟེ། །རྩ་བ་དང་ནི་སྐྱོབས་སུ་བཅས། །ལྕེ་པོག་ནག་པོ་རྒྱ་ཚིལ་དང་། །མགོ་གཉིས་ཨཱི་དྲ་མ་གྷ་དྷ། །ས་ཡི་དྲི་དང་རྣམ་ལྔའོ། །གདུག་པ་ཐམས་ཅད་འཇིལ་བར་བྱེད། །ཤུ་དག་ཚིལ་ཆེན་རྭ་གཞོབ་དང་། །དྲི་ཆེན་དྲི་ཆུ་རྨ་བྱའི་མདོངས། །བྱུག་དང་བདུག་པར་བྱ་བའོ། །མུ་ཟི་གླ་རྩི་དྲི་ཆེན་དང་། །ཞུན་ཆེན་དྲི་ཆུ་སྦྱར་བ་རྣམས། །ལྟོར་བཏང་གདོན་རྣམས་རང་ཞིར་འགྱུར། །འདིས་ནི་རང་ཉིད་སྲུང་བར་བྱེད། །ནཱ་ག་ཤ་ཏི་དུན་

ཛིབས། །ནཱ་ག་ཙི་ཏ་ནྃ། ནཱ་ག་ནི་ར་རྦུད། ཤཱ་ན་ཏིང་ཤ་དུ་རྩུབས། ནཱ་ག་ཨ་ར་ལིག་ཤམས། ནཱ་ག་དུན་དུན། གྱེན་གྱེན། ནཱ་ག་ཤྃ་ཏི། ཡ་ཡ། ཚུབས་ཚུབས་དུ་ཤ་རྦུད། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་ཀླུ་ཐམས་ཅད་རླག་པར་བྱེད་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་འཇིག་རྟེན་གསུམ་རྣམ་པར་འཆིང་བར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ནས་འཇིག་རྟེན་འཆིང་བྱེད་ཀྱི་སྔགས་གསུངས་པ། ཨོཾ་ཨེ་ཀ་ཡ་མ། ཧེ་ཀ་ཡ་མ། ཧྲི་མ་ཡ་མ། སརྩ་ཙིཏྟ་གཟེར་ཐུམས་བིགྷྣྃ། ཞེས་གསུངས་མ་ཐག་ཏུ་སྲིད་པའི་རྩེ་མོ་ནས་མནར་མེད་པ་ལ་ཐུག་པ་ཡན་ཆད་སེམས་རྣམ་པར་མྱོགས་ཏེ། ལུས་རི་མོ་བཞིན་གཡོ་བ་མེད་པར་བཅིངས་པར་གྱུར་ཏོ། །དེ་ནས་དཔུང་རྣམ་པར་ཟློག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཔུང་ཟློག་བྱེད་ཀྱི་སྔགས་གསུངས་པ་ཨོཾ་ཨེ་ཀ་ཡ་མ་ཧེ་དུན་རཀྵ་ཧེ་དུ་ན། ཧཱུྃ་ཛཿཧཱྃ། ཡ་མ་ཙིཏྟ་ཤ་མ། ཤ་ཏཱུྃ་སྟྃ་བྷ་ཡ་ནྃ་དྷྲྀ་ཀ་རྦད། ཅེས་གསུངས་པས་འཇིག་རྟེན་གྱི་ཁམས་ཐམས་ཅད་འཁྲུགས་ཤིང་། དྲེགས་པ་ཅན་ཐམས་Ｘཅད་རྫ་མཁན་གྱི་འཁོར་ལོ་བསྐོར་བ་བཞིན་དུ་གྱུར་ཏེ། མྱོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་འཇིག་རྟེན་བཅིང་ཟློག་གི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཁྱུང་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྱུང་ལས་ལ་གཟུད་པ་ཞེས་བྱ་བའི་གསང་སྔགས་གསུངས་པ། གྲང་ཏི་ཏིག་ཏིག །གྲ་ཏ་བྲག་ཤི་ཏ་ཏ་ལེ་ཧེ་དུ་ཧཱུྃ་ཕཊ། དེ་ནས་ཡང་དགྲ་འབའ་ཞིག་པ་གསད་པ་ཐུན་མོང་མ་ཡིན་པའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་དྲག་པོ་ཐོག་འབབ་ཅེས་བྱ་བའི་སྔགས་གསུངས་པ། ཨོཾ་མཱ་ར་ན་སོད་སོད་། མཱ་ར་ན་བྱིང་བྱིང་། མཱ་ར་ན་རྨུགས་རྨུགས། མཱ་ར་ན་ཧལ་ཧལ། མཱ་ར་ན་དུན་དུན། མྱོགས་མྱོགས། བྱིང་བྱིང་། ཐུམ་རི་ལི་ལི་རྦད་ཛ་ཛ། ནཱ་ག་ལ་སོགས་ཤ་ཏྲཱུྃ་སྦྱར་ཞེས་གསུངས་

སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གསང་པ་སྔགས་ཀྱི་ལེའུ་སྟེ་ལྔ་པའོ།། །།དེ་ནས་ཡང་ལྷའི་དབང་པོས་གསོལ་པ། ཀྱཻ་བཅོམ་ལྡན་འདས་གདུག་པ་ཅན་ཚར་བཅད་པའི་ལས་ཁྱད་པར་ཅན་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཁྱུང་སྒྲོལ་བྱེད་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རབ་ཏུ་གསང་སྔགས་བཀའ་སྩལ་པ། ཨོཾ་ཏདྱ་ཐཱ། ཨོཾ་ཊ་ཀི་ཙ་ཏི། གུརྱ་ལ། གྷྱུ་ལི་མི་ལི་ཤ་ཤ་གྷྱུ་གྷྱུ། ཤད་ཏི་བི་རི་ཏི། ཧཱུྃ་ཡ་ཧཱུྃ་ཡ། ཧཱུྃ་ཏུ་ཏི་སྭཱ་ཧཱ། འབྲས་དང་སོ་བ་ནས་ནག་དང་། །ཨ་རུ་ར་རྣམས་ཞིབ་བཏགས་ཏེ། དགུ་དང་བཅུ་གཅིག་བསྒྲུབ་པར་བྱ། །མཁའ་ལྡིང་སྒོ་ང་སྔགས་ཀྱིས་བསྐོར། །འགྲམ་དུ་བཞག་ལ་བསྒྲུབ་པར་བྱ། །མཱ་ར་ན་སོད། མཱ་ར་ན་བྱིང་བྱིང་། མཱ་ར་ན་མུགས་མུགས། མཱ་ར་ན་ཧ་ན་ཧ་ན། མཱ་ར་ན་དུན་དུན། ཧ་ལ་ཧ་ལ། མྱོས་མྱོས། བྱིང་བྱིང་། ཐུམ་རི་ལི་ལི་ཛ་ཛ། དེ་ནས་གཏོར་མ་དབུལ་བར་བྱ། །བ་ལིཾ་ཏ་ཁཱ་ཧི་ཁཱ་ཧི། གྲྀཧྞ་ཧྲྀཧྞ། མ་ཧཱ་རག་སི་པ་ཏོ། ས་མཱ་ཡ་སྭཱ་ཧཱ། གསོལ་བ་གདབ་ཅིང་ཕྲིན་ལས་བཅོལ། །གླ་རྩི་ཤིང་ཀུན་ཤ་ཆེན་དང་། །ལྕེ་པོ་གནག་པོ་ཤ་རཱི་ར། །བྱི་སྐུ་སྟག་གི་སྡེར་མོ་རྣམས། །རས་སུ་གཏུམས་ལ་ལུས་ལ་བཅང་། །ཨོཾ་ཉི་མས་སླ་ནཱཾ། གྷུ་ནི་ཞི་རྩི་ཏ་གྷུ་བི་ནཱཾ། ཙི་ཏྲ་མུ་ཏྲ་ཟློག་བྱེར། །ཙི་ཏ་གྷུ་ལི་ནཱཾ། ཡ་ཁྲ་ནཱ་ག་ཟློག །ནཱ་ག་ཤིག །ནཱ་ག་མགོ་ལ་ནཱཾ། ཧ་པ་ས་ཁྲེ། རྟག་ཏུ་སྟོམ་ཆངས་གཏོར་མས་མཆོད། །ཞི་བས་དུག་དབྱུང་བྱད་ཀྱང་དགྲོལ། །རྩ་བའི་དཀྱིལ་འཁོར་ཕྱོགས་བཞི་རུ། །ནཱ་གའི་གཟུགས་བྲིས་དུག་ཅན་གཞག །ཚོན་སྐུད་སྦྲུལ་བསྒོམས་བཅིངས་པ་དེ། །སྤུ་གྲི་འབར་བས་གཏུབས་ཤིང་དབྱེ། །རི་རབ་ཆེན་པོའི་ཕྱོགས་བཞི་ན། །དུག་བཞི་ལས་སྐྱེས་རིགས་བཞིའི་ཀླུ། །ས་ཆུ་མེ་རླུང་དུག་བཞིའི་བདག །བཅིངས་པ་དགྲོལ་ཅིང་དུག་དབྱུང་ཕྱིར། །དུག་ཐུབ་སྒྲོ་ལ་ཁྱུང་བསམ་ཕྱིར། །དུག་བྱབ་རང་རང་གནས་

སུ་བཏང་། །བདེན་པ་བདར་ཞིང་ཏིང་འཛིན་གསལ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་རབ་ཏུ་གསང་བའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བདུད་རྩི་མཆོག་བཀའ་སྩལ་པ། རིན་ཆེན་བུམ་པ་ཚད་ལྡན་ལ། །དྲི་ཡི་རྒྱལ་པོ་ལ་སོགས་ལྔས། །བྱུགས་ལ་བོག་ནག་དུད་པས་བདུག །རྩི་ལྡན་འོ་མ་འབྲས་དང་ནས། །ཏིལ་དཀར་དང་ནི་ཨ་རུ་ར། །བ་རུ་ར་དང་སྐྱུ་རུ་ར། །མངར་གསུམ་ཀླུ་སྨན་སྣ་ཚོགས་དང་། །ཙན་དན་ལ་སོགས་དྲི་སྦྱར་བའི། །ཆུས་བཀང་ལྕུག་མ་འོ་མ་ཅན། །ཁ་རྒྱན་བྱས་ཏེ་མགུལ་པ་ཡང་། །དར་རས་སྔོན་པོས་བཅིངས་བྱས་ལ། །མཎྜལ་གཙང་མའི་སྟེང་དུ་བཞག །ལྷ་ཡི་ང་རྒྱལ་ལྡན་པ་ཡིས། །གྲི་ལྕགས་སྦུ་གུར་མཆུ་བཙུགས་ཏེ། །དབུགས་མ་ཤོར་བར་རབ་ཏུ་བསྣགས། །སེང་ལྡེང་ཕུར་པ་སོར་བརྒྱད་དང་། །སྔགས་ཀྱི་མདའ་མཆོག་ལ་ཡང་བསྣག །བུམ་པ་ལ་སྔགས་འབུམ་ཚར་རེ། །བཏོན་ནས་སྙིང་རྗེའི་ཡུལ་ལ་བཀྲུ། །ཁོང་དུ་བཏང་ན་གྲོལ་བར་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བདུད་རྩི་བུམ་ཁྲུས་ཀྱི་ལེའུ་སྟེ་བདུན་པའོ།། །།དེ་ནས་ཡང་བདུད་རྩི་བུམ་པ་ཁྲོལ་བུ་ལ་བསྒྲུབ་པ་གསུངས་པ། ཉོན་ཅིག་ལྷ་ཡི་དབང་པོ་གཙོ། །ཏིང་འཛིན་གསང་བར་སྒྲུབ་པ་ནི། །ཛཱ་ཏི་ཕ་ལ་ནས་སྔོན་མོ། །འབྲས་དང་སོ་བ་མ་གི་ཏ། །ཏིང་འཛིན་གཞུ་བཏུལ་བྱས་ཏེ་བསྒྲུབ། །དེ་ལ་རྟགས་བྱུང་ཕྱེ་མར་བསྒྲུབ། །བྱུགས་ནས་དྲི་ཆུས་སྐྱོ་མར་སྦྱར། །ཞུན་ཆེན་སྦྱར་ཏེ་ཁོང་དུ་གཏང་། །བུམ་པའི་ཆུ་ལ་ལྕགས་སྦུགས་སྔགས། །མཆོད་དང་ཏིང་འཛིན་བརྩོན་པར་བྱ། །བུམ་ཆུས་ཁྲུས་བྱ་འདེ་གུས་བྱུག །སྐྱོ་མ་ཞུན་ཆེན་ཁོང་དུ་གཏང་། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བུམ་པ་ཁྲོལ་བུ་ཕྱེ་མ་དང་། འདེ་གུ་དང་། ཁོང་དུ་གཏང་པའི་ལེའུ་སྟེ་བརྒྱད་པོའོ།། །།དེ་ནས་ཡང་ལྷའི་དབང་པོ་ལ་བཀའ་སྩལ་པ། ཉོན་

ཅིག་ལྷ་ཡི་དབང་པོ་དག །གདུག་པའི་དུག་ལ་རྣམ་མང་ཡང་། །བསྡུས་ན་རྣམ་པ་གཉིས་ཡོད་དེ། །མངོན་སུམ་དུག་དང་རྐུ་དུག་སྟེ། །རྐུན་ཐབས་དུག་ནི་བཟློག་པར་དཀའ། །གདུག་ཅན་ཉོན་མོངས་གསུམ་ལྡན་ཏེ། །གཏི་མུག་ཆེ་བས་བྱོལ་སོང་རིགས། །འདོད་ཆགས་ཆེ་བས་དབྲལ་བར་དཀའ། །ཤིན་ཏུ་ཞེ་སྡང་ཆེ་བས་ཀྱང་། །དུག་ནི་རྐུན་ཐབས་དག་ཏུ་གཏོང་། །དེ་ཕྱིར་སླར་ཡང་ལྡོག་པར་བྱེད། །ཕྲག་དོག་ཆེ་བས་རང་རྟེན་ལ། །གཞན་གྱིས་གཙེས་ན་གཞན་ལ་གནོད། །རྐུན་ཐབས་དུག་གི་མཚན་ཉིད་ཀྱང་། །ཐབས་ཤིང་གདུག་པའི་དུག་ཀློད་ཀྱང་། །བར་བར་སྐབས་སུ་ལྡང་བར་བྱེད། །དེ་བཟློག་ཐབས་ནི་ཤིན་ཏུའང་དཀའ། །དེ་ཡི་བཟློག་ཐབས་དམ་པ་འདི། །ངས་བསྟན་པ་ལ་ཐེ་ཚོམ་དུ། །གང་ཞིག་བྱེད་པར་གྱུར་པ་དེ། །ནམ་ཡང་གྲུབ་པར་མི་འགྱུར་ཏེ། །གྲུབ་ཀྱང་གཡེལ་བར་གྱུར་པ་ཡིན། །དེ་ནས་ལྷ་ཡི་དབང་པོ་དག །ཐེ་ཙོམ་མེད་པར་ངེས་པར་བྱོས། །ཙན་དན་དམར་པོས་གཙོར་བྱས་ཏེ། །ནཱ་ག་གེ་སར་མ་གི་ཏ། །རྒྱ་ཚིལ་རྒྱ་མཚོའི་ལྦུ་བ་དང་། །ཕག་རྒོད་དག་གི་ཤ་དག་སྟེ། །ཡང་ན་རྒྱ་ཚིལ་མ་གི་ཏ། །ཕག་རྒོད་ཤ་དང་སྦྱར་བྱས་ཏེ། །ལྕགས་སྣོད་ནང་དུ་ལྕགས་ཀྱིས་ཕུར། །འབུམ་ཕྲག་གསུམ་དུ་བསྙེན་བྱས་ནས། །སྒྲུབ་པས་དཀར་གསུམ་གཞན་མི་བསྟེན། །འོ་མ་སོལ་ཆུས་ལུས་བཀྲུས་ཏེ། །ཉ་ལ་གནས་དྲུག་ཐིག་ལེ་བྱ། །མཁུར་ཚོས་གཉིས་དང་དཔྲལ་བ་དང་། །སྙིང་ག་ལྐོག་མ་ལག་མཐིལ་གཉིས། །ཐིག་ལེ་མཚོན་གང་པ་རེ་བྱ། །ལྟེ་བ་པུས་མོ་གསང་གནས་སུ། །མ་གི་ཏ་ཉིད་འབའ་ཞིག་བྱུག །ཐིག་ལེ་རེ་ལ་ཉི་ཤུ་གཅིག །དེ་ལྟར་ལོ་གཅིག་བར་དུ་བྱ། །གངས་རི་ལ་ནི་ཉི་མ་བཞིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་རྐུན་ཐབས་ཀྱི་དུག་བཟློག་པའི་ལེའུ་སྟེ་དགུ་པའོ།། །།དེ་ནས་ལྷའི་དབང་པོས་གསོལ་པ། ཀྱཻ་མ་ཁྲོ་བདག་རྡོ་རྗེ་འཛིན། །གདུག་པའི་དུག་གི་མཚན་ཉིད་གང་། །

ཟློག་དང་མི་ཟློག་ཇི་ལྟ་བུ། །ཁྲོ་བདག་ཆེན་པོས་བཤད་དུ་གསོལ། །ཞེས་གསོལ་པས། །བཅོམ་ལྡན་འདས་ཀྱིས་བཀའ་སྩལ་པ། །དགའ་བས་ཉོན་ཅིག་ལྷ་ཡི་དབང་པོ་ཁྱོད། །བསྙེན་དང་སྒྲུབ་པ་རྟགས་དང་གནོད་པ་རྟོགས། །ལྕགས་ཟངས་མི་དང་གཅེར་བུ་བུམ་པ་ཐོགས། །བ་ལང་ཉ་ལྕིབས་ཟས་སུ་ཟ་བ་དང་། །མེ་ཆེན་འབར་དང་ཟམ་པ་འཛུགས་པ་དང་། །སྐྱེ་ཤིང་འཛུགས་དང་ཉི་མ་ཤར་བ་དང་། །བཟང་བ་ཡི་ནི་རྟགས་སུ་ཤེས་པར་བྱ། །ཉི་མ་ནུབ་དང་ནམ་སྲོས་ཐུར་དུ་བབས། །བཙོན་དུ་བཟུང་ནས་མི་ཐེག་ཁུར་བསྐུར་དང་། །སྒྲུབ་པོ་གཞན་ཡུལ་འགྲོ་བ་ངན་པའི་རྟགས། །ལུང་པ་དང་ནི་སྐམ་ནས་ཆུ་བྱུང་དང་། །ཉ་སྦྲུལ་ས་རླུང་གསོད་དང་འཆོད་པ་དང་། །རིད་དང་སྐེམས་པ་དེ་དག་ཁྲི་ལ་འདུག །གཅེར་བུ་སྤྱི་བཅིངས་ཚོགས་ཀྱིས་སེམས་ཅན་གསོལ་བ་མཐོང་། །འཇིགས་པའི་ཆུ་མིག་སྐམས་དང་རྟག་ཏུ་ནོར་བུ་རྒྱུད། །སྦལ་སྦྲུལ་ཟས་སུ་ཟ་དང་ཁྱི་སྤྱང་གསོད་ལ་སོགས། །བཟང་བ་ཡི་ནི་ལྟས་སུ་ཤེས་པར་བྱ། །ཆུ་ནང་ཆུང་དང་སྦལ་སྦྲུལ་ལུས་ལ་འཇུག །དེ་དག་ཕྱི་བཞིན་དུ་ནི་འབྲང་བྱེད་ཅིང་། །སྦྲང་བུ་མཆུ་རིང་ལ་སོགས་ལུས་ལ་ཟ། །བ་ལང་མ་ཧེའི་ཚོགས་ཀྱིས་བརྡུངས་ནས་འདེད་པ་དང་། །ཁྱི་སྤྱང་ཚོགས་ཀྱིས་ཟུགས་དང་འདམ་དུ་ཚུད། །འབག་སེང་བུ་ཆུང་ལ་སོགས་སྟོན་པ་ངན། །གནོད་པའི་རྟགས་སུ་གཏིང་རིང་གྲོག་པོ་རུ། །མི་ཤོང་བཞིན་དུ་ཕྱིན་དང་སླར་མི་ཐར། །རི་བྲག་དོག་མོ་ལུང་པ་ཕུག་རྡུགས་དང་། །ལྷ་ཁང་གནས་ཁང་ཧྲུལ་པོར་མི་ཤོང་བཞིན། །སྒོ་ལ་འཛུལ་ནས་སླར་ཡང་མི་ཐོན་དང་། །ཆུ་ངན་མཚོ་དང་ལུ་མ་ཉ་སྦྲུལ་སོགས། །ཕག་པ་བ་གླང་མ་ཧེ་ལ་སོགས་ཏེ། །ཤིན་ཏུ་ཡིད་དུ་མི་འོང་གཟུགས་མང་སྟོན། །རི་གཟར་མི་ཐར་ཅེ་སྤྱང་ཚོགས་ཀྱིས་འདེད། །དེ་དག་གནོད་རྟགས་ལུས་ཀྱི་ཉམས་མྱོང་ཡང་། །ནུལ་བ་དང་ནི་ཀུ་དང་ཆང་ལ་དགའ། །ནད་དང་ཉམས་ལྕི་ཡན་ལག་ན། །ཤ་ནི་འགུལ་འཕྲིག་ཤུ་གཡན་ཤ་བཀྲ་དང་། །ངོ་ལྷེག་ཤ་རོ་སྐབས་སུ་ཟུག་གཟེར་ཆེ། །དེ་དག་གནོད་པའི་རྟགས་སུ་

ཤེས་པར་བྱ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བསྙེན་སྒྲུབ་ཀྱི་ལྟས་དང་། གནོད་རྟགས་བསྟན་པའི་ལེའུ་སྟེ་བཅུ་པའོ།། །།དེ་ནས་ལྷའི་དབང་པོས་གསོལ་བ། ཀྱཻ་བཅོམ་ལྡན་འདས་སེམས་ཅན་གྱི་ལུས་ལ་གདུག་པའི་དུག་ལུས་ལ་སླེབ་པའི་མཚན་ཉིད་བཤད་དུ་གསོལ། དེ་སྐད་ཅེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། །ཤ་མཐངས་བར་དུ་སླེབ་པའི་དུག །རྟག་ཏུ་སྙིང་ཡང་མི་དགའ་ཞིང་། །ཤ་རྩ་ཟ་ཞིང་འགུལ་དང་འཕྲིག །རྟག་ཏུ་འཕྲུག་སྙིང་འདོད་པ་དང་། །ཤ་ཡང་འོ་མའི་བྲིས་མ་བཞིན། །ཤ་མདོག་མེ་ལྕེ་འདྲ་བའོ། །སྐབས་སུ་ཤ་མཐངས་བར་དག་ན། །ཆུ་གྲང་བླུག་པ་སྙམ་བྱེད་དང་། །ཤུ་བ་བལ་བལྡགས་ཤ་བཀྲ་འོང་། །གདུག་པ་དུག་གིས་ཤ་ལ་སླེབ་པ་ནི། །འཕྲིག་འགུལ་ཟ་སྦྲིད་བེར་བ་ལྟར། །ཤ་ནི་གནག་ཅིང་དམར་ལ་བེམ། །དུ་བ་མིག་ཏུ་སོང་བ་བཞིན། །མིག་གི་ཐ་མ་ཆུ་ཡིས་གང་། །མིག་ཀྱང་ཟླུམ་ལ་སྨིན་མ་གྲུགས། །སྨིན་མ་བྱི་ཞིང་མིག་ཀྱང་འགུལ། །སོར་མོ་རྣམས་ནི་བྱི་མཇུག་འདྲ། །རྩ་དང་ཆུ་ལ་ཞུགས་པ་ནི། །ལུས་ལ་དྲི་མ་ང་བ་འབྱུང་། །ཆུ་བུར་དང་ནི་ཆུ་རྒངས་དང་། །དེ་ནི་རྩ་ཡི་མེ་ཏོག་ཡིན། །ཆུ་སེར་མདོག་ནི་དུད་ཁུ་འདྲ། །ཆུ་སེར་ཀོ་རུལ་མནམ་པ་དང་། །ཀོ་བ་རུལ་པའི་དྲི་མནམ་པའི། །ཆུ་སེར་དག་ནི་འབྱུང་བ་ཡིན། །རོ་སྟོད་མི་བདེ་བློ་ཡང་འདེགས། །སྤྱི་ཡི་མཚན་ཉིད་འདི་དག་དང་། །འབྱུང་བར་འགྱུར་བ་དག་ཀྱང་ཡོད། །མེ་འོད་ཚ་བ་འདྲ་བ་འོང་། །ཚེར་མ་ཟུག་པ་འདྲ་བ་འོང་། །ལུས་པོ་ཚ་ལ་འབྲུམ་པ་འོང་། །ཀོར་ཚེ་ཤུ་བ་འབྱུང་བ་དང་། །རྨ་དང་སེར་ཀ་མི་འཚོ་བ། །ཀོར་ཚེ་ཚོར་བ་མེད་པར་འབྱུང་། །ན་ཚ་མེད་པའི་ཤུ་བ་འབྱུང་། །ཚ་ལ་འཁུམས་པ་འབྱུང་བ་ཡོད། །ལུས་ཀྱི་ཉམས་སྟོབས་ཆུང་བར་འབྱུང་། །གླང་ཤུ་བ་དང་ཤ་བཀྲ་འབྱུང་། །ཤ་རོ་སྦལ་མིག་འདྲ་བ་འབྱུང་། །ཤ་སུལ་ཐམས་ཅད་འགུལ་འཕྲིག་འབྱུང་། །དུག་གིས་རུས་པར་སླེབ་གྱུར་ན། །

ཕྱི་ཡི་ཤ་རྣམས་ཀུན་སྐམས་ཏེ། །མདོག་ནི་སྔོ་སྐྱ་ཤ་མདངས་འཆོར། །གོས་ཀྱི་མདངས་ཀྱང་འཆོར་བ་སྟེ། །དེ་ནི་ཐར་བར་མི་འགྱུར་ཀྱང་། །སྔགས་དང་རྫས་དང་ཏིང་འཛིན་གྱིས། །ཚེ་རིང་སྐད་གསང་ལུས་ཀྱང་བདེ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གདུག་པའི་དུག་རུས་པ་ལ་སླེབ་པའི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་ལྷའི་དབང་པོས་གསོལ་པ། ཀྱེ་མ་བཅོམ་ལྡན་འདས་སླད་མའི་དུས་ཀྱི་འགྲོ་བ་ལ་ཕན་གདགས་པའི་ཕྱིར་རྫས་ཀྱི་ཁྱད་པར་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ལྷ་ཡི་དབང་པོ་གཙོ། །ཕྱི་མའི་དུས་ཀྱི་སེམས་ཅན་རྣམས། །གདུག་པའི་དུག་གིས་ཉེན་པ་ན། །ཕན་པའི་སྦྱོར་བ་འདི་ལྟ་བུ། །ཀུན་ཀྱང་སྔགས་ཀྱིས་བསྒྲུབ་པར་བྱ། །མེ་འོད་འདྲ་ན་སྤྱང་དུག་བཏང་། །ཚེར་མ་ཟུག་པ་ལྟ་བུ་ལ། །ར་དུག་དང་ནི་རེ་ལྕག་གོ །ཚ་ལ་འབྲུམ་པ་བྱུང་བ་ན། །བཙོད་དང་སྤང་སྤོས་བཏང་བར་བྱ། །ཤ་ནི་ཀོར་ཚེ་ཤུ་བ་ལ། །ར་ཐུག་སྲེ་དང་ལོང་རྟོལ་བཏད། །རྨ་དང་སེར་ཀ་མི་འཚོ་ན། །ཁོང་དུ་བསྒྲུབ་པའི་མ་གི་ཏ། །དེ་ཉིད་དྲག་པོའི་སྔགས་ཀྱིས་གདུལ། །ཀོར་ཚེ་ཚོར་བ་མེད་པ་ལ། །སྟག་ཤ་གསེར་གྱི་མེ་ཏོག་དང་། །རྒྱ་ཚ་སྦྱར་ཏེ་བཏང་བར་བྱ། །ཤ་བུ་ཐལ་བ་བདུད་རྩིས་གསོ། །མུ་ཟི་བ་བླ་ལྡོང་རོས་དང་། །དྲི་ཆུ་སྦྱར་ཏེ་བསྐུ་བར་བྱ། །ན་ཚ་མེད་པའི་ཤུ་བ་ལ། །བོང་རིལ་ཏི་ཚ་མར་དཀར་བསྐུ། །ཚ་འཁུམས་ལྕེ་བོག་རྭ་རུ་གཞོབ། །ཚ་དང་ཞུན་ཆེན་སྦྱར་བར་བྱ། །ལུས་ཀྱི་ཉམས་སྟོབས་ཆུང་བ་ན། །བུམ་པའི་ཆུ་དང་མ་གི་ཏ། །སྦྱར་ཏེ་བཀྲུ་ཞིང་བཏུང་བར་བྱ། །དྲི་ཆུ་ཞུན་ཆེན་བཏང་བར་བྱ། །ཤ་བཀྲ་གུར་གུམ་ཕག་ཚིལ་ལོ། །གླང་ཤུ་འདྲ་བ་བྱུང་བ་ན། །གསེར་གྱི་མེ་ཏོག་མུ་ཟི་དང་། །སྔགས་ཀྱི་བྱ་བ་འབད་པར་བྱ། །ཤ་རོ་སྦལ་མིག་འབྱུང་བ་དང་། །ཤ་ཡི་སུལ་རྣམས་འགུལ་བ་ལ། །གླ་བ་མུ་ཟི་ལྕེ་པོག་གནག །ཤ་མཐངས་བར་གྱི་དུག་

རྣམས་ལ། །ས་ཡི་དྲི་དང་མ་གི་ཏ། །ཤུ་དག་ལྕེ་བོག་རུ་རྟ་དང་། །གུ་གུལ་ནག་པོ་དྲི་མ་དང་། །རོ་ཡི་རོ་དང་བཙན་དུག་དང་། །བྱི་ཀུ་ཅིག་སྐྱེས་མི་ཕག་བཅུད། །ཡང་ན་བཙན་དུག་ལྕེ་པོག་དང་། །ལྡོང་རོས་དང་ནི་ས་ཡི་དྲི། །ཞུན་ཆེན་དྲི་ཆུས་བསྡུས་ཏེ་བསྐུ། །གུ་གུལ་ཤུ་དག་ཤིང་ཀུན་དང་། །གླ་རྩི་བཙན་དུག་རོ་ཡི་རོ། །རུས་ཆེན་བཏགས་ཏེ་ཞུན་གྱིས་བསྡུ། །རིལ་བུ་བྱས་ཏེ་བསྲེགས་ནས་ཀྱང་། །ཡང་དང་ཡང་དུ་སྣ་བུག་བདུག །དུག་ཆེན་ཀླུ་དང་དེ་ལས་གྲམ་པའི་གདོན། །སྐྱེ་དགུ་འཚེ་བྱེད་གདོན་རྣམས་གང་ཡིན་ཡང་། །གདུག་པ་ཆེན་པོའི་དྲི་འདི་ཚོར་བ་ཡིས། །གདུག་པ་ཅན་རྣམས་ཀླད་པ་རབ་ཏུ་འགས། །ཉི་མའི་འོད་ཀྱིས་མུན་པ་ཇི་བཞིན་ནོ། །ཤ་ལ་ཞུགས་པའི་གདུག་པའི་དུག་རྣམས་ལ། །བྱུག་པའི་རྫས་རྣམས་ཕྱི་ནས་བྱུག །བདུག་པ་ཅན་གྱིས་རྟག་ཏུ་བདུག །མ་གི་ཏ་དང་དྲི་ཆུ་གྲང་མོར་སྦྱར། །བཀྲ་ཞིང་ཁོང་དུ་གཏན་དུ་བཏང་བར་བྱ། །ནད་རྣམས་འབྱང་ཞིང་སྤུ་སོགས་བྱི་བ་སྐྱེ། །རྩ་དང་ཆུ་བ་དག་ལ་གནས་པའི་དུག །བྱུག་པ་བདུག་པ་ཆུ་བོའི་གཞུང་བཞིན་དུ། །ཁོང་དུ་བཏང་བའི་རྫས་ནི་འདི་ལྟ་སྟེ། །མ་གི་ཏ་ནི་དྲི་ཡི་ཆུས་སྦྱངས་ཏེ། །ཨ་རུ་ར་དང་སྦྱར་བ་རྒྱུན་མི་བཅད། །རྩ་ཡི་གནས་སུ་ནད་རྣམས་དངས་སྙིགས་འབྱེད། །དངས་སྙིགས་ཕྱེད་པའི་ནད་ནི་ཕྱི་རུ་འབྱུང་། །གངས་ཀྱི་རི་ལ་ཉི་མ་ལྟ་བུའོ། །དུག་རྣམས་རུས་པ་དག་ལ་རྒྱས། །ཁོང་དུ་བཏང་བའི་རྫས་ནི་རྒྱུན་དུ་བཏང་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གདུག་པའི་དུག་རྫས་ཀྱིས་གདུལ་བའི་ལེའུ་སྟེ་བཅུ་གཉིས་པའོ།། །།དེ་ནས་ཡང་ལྷའི་དབང་པོས་གསོལ་པ། ཀྱཻ་བཅོམ་ལྡན་འདས་གདུག་པ་ཅན་ཤིན་ཏུ་ཡང་ཚར་གཅོད་པའི་ཐབས་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་དབང་པོ་ཆེན་པོའི་ལྷ། །གདུག་པ་ཤིན་ཏུ་ཚར་གཅད་ན། །བསྲེག་པའི་ལས་ལ་ཤིན་ཏུ་བརྩོན་པར་བྱ། །

ཐབ་ཁུང་གྲུ་གསུམ་སོར་བརྒྱད་པ། །ཁྲག་དང་དུར་ཁྲོད་སོལ་བས་བྱུག །དཀྱིལ་དུ་རྡོ་རྗེ་རྩེ་གསུམ་བྲི། །ཟུར་དུ་མཆོད་རྟེན་གསུམ་གཞག་སྟེ། །དེ་སྟེང་དྲག་པོའི་སྣོད་བཞག་ལ། །ནང་དུ་གྲུ་གསུམ་རྩེ་མོ་ལྷོ། །གདུག་པའི་ཤིང་ཡང་ཟུར་གསུམ་བརྩིག །དཀྱིལ་འཁོར་ཆེན་པོའི་ཤར་ལྷོར་བྱ། །ཤིང་ཤུན་དག་ལ་ཤུཏྲཱུ་ཡང་། །བརྒྱ་རྩ་བརྒྱད་བྱ་དུག་སྣ་དང་། །ཚ་བ་གསུམ་དང་བོང་བུའི་ཆུ། །རྔ་མོ་བྱ་རོག་བྲུན་ཡང་བསག །ལྷ་ཡི་ཏིང་འཛིན་མཆོད་སྔགས་ཀྱིས། །ཏིང་འཛིན་གསལ་སྟེ་ལྷ་ལ་འབུལ། །སྲེག་པའི་སྔགས་ནི་འདིས་བྱའོ། །སརྦ་བིགྷྣཱན་མཱ་ར་ཡ་ཛྭ་ཝ་རྃ། །སྟོང་རྩ་བརྒྱད་དང་བརྒྱ་རྩ་བརྒྱད། །ལན་གྲངས་མང་དུ་བྱས་པ་ཡི། །ཐལ་བ་ཆུ་ཆེན་གཞུང་ལ་བོར། །ཐབ་ཁུང་འོག་མའི་ཐལ་བ་ཡང་། །ཁྱི་ཡི་དྲི་ཆེན་ཚ་བ་གསུམ། །བསྲེས་ཏེ་ཤ་ཏྲཱྃ་གཟུགས་བྱས་ལ། །ནཱ་ག་སྟྃ་བྷ་ན་ན་ཞེས་རྒྱ་གྲམ་དཀྱིལ་དུ་མནན་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་དྲེགས་པ་ཅན་ཤིན་ཏུ་ཚར་གཅད་པ་བསྲེག་པ་དྲག་པོའི་ལེའུ་སྟེ་བཅུ་གསུམ་པའོ།། །།དེ་ནས་ཡང་ལྷའི་དབང་པོས་གསོལ་བ། ཀྱཻ་བཅོམ་ལྡན་འདས། གནོན་པའི་ལས་ནི་བགྱི་བ་ཡི། །ཤིན་ཏུ་ཚར་གཅད་ཇི་ལྟར་བགྱི་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། །ལྷ་ཡི་དབང་པོ་ཆེན་པོ་ཉོན། །རུ་སྦལ་ཁོག་པ་ཁ་སྦྱར་དུ། །རྒྱ་མཚོའི་ལྦུ་བ་ཁྲེ་རྒོད་དང་། །ནཱ་ག་གེ་སར་ཅུ་གང་དང་། །དཀར་གསུམ་ཤ་ཆེན་ཤ་རཱི་ར། །མ་གི་ཏ་ཡིས་གཙོ་བྱས་ཏེ། །རུ་རྟ་དང་སྦྱར་རོ་ཉེའི་ཤུབས། །རེ་བས་གཏུམས་ཏེ་སྔོན་དམར་དཀྲི། །སྔགས་ཀྱིས་མདའ་ལ་སུམ་སྟོང་བསྔགས། །ནཱ་ག་སྟམ་བྷ་ནན། བརྒྱད་གསུམ་དབུས་མའི་ཟླ་ཟེར་ལ། །ནུབ་ཀྱི་རྒྱ་གྲམ་སུམ་མདོ་འམ། །ཡང་ན་གནོད་པའི་ས་ཕྱོགས་སུ། །ཤུག་པའི་ཕུར་པས་ཁྲུ་གང་བརྐོ། །དེར་བཅུག་གཡམ་པ་རྒྱ་གྲམ་ཅན། །དེ་སྟེང་གནོན་པའི་རི་རབ་གཞག །དེ་དག་བྱེད་ཚེ་དམན་ཟས་སྤང་། །ཁ་ཟས་དཀར་གསུམ་མངར་གྱིས་བྱ། །ཤ་རུལ་ཁྲག་

རུལ་རྒྱ་ཚིལ་དང་། །སྔགས་མདའ་སྔགས་དང་ལྡན་པ་ཡིས། །རང་གནས་བརྟེན་པའི་བར་དུ་གཅད། །ཐོག་དྲག་ལྟ་བུར་སྔགས་ལས་བྱ། །རྩ་གཅིག་བར་དུ་གནོད་མི་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་ཕྱིར་མི་ལྡོག་པའི་གནོན་པའི་ལེའུ་སྟེ་བཅུ་བཞི་པའོ།། །།དེ་ནས་ལྷའི་དབང་བོས་ཡང་གསོལ་པ། ཀྱཻ་བཅོམ་ལྡན་འདས་གདུག་པ་ཅན་དེ་དག་དེ་ཉིད་ཁོ་ནར་འགྲོ་བ་ལ་རྣམ་པར་འཚེ་འམ། དེ་དག་གཞན་དང་གཞན་དག་གི་མཐུ་ཡང་གནོན་པར་འགྱུར། གལ་ཏེ་གཞན་དག་གི་མཐུས་ཀྱང་འགྲོ་བ་མ་རུངས་བར་བྱེད་ན། དེ་ཇི་ལྟར་ཡོངས་སུ་བསལ་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་དབང་པོ་ཆེན་པོ་ལྷ། །ཕྱི་མའི་དུས་ཀྱི་སེམས་ཅན་ལ། །གདུག་པའི་དུག་གཅིག་ཞུགས་གྱུར་ན། །ཕོ་ཉ་འདི་དག་མ་རུངས་བྱེད། །བཙན་དང་རྒྱལ་པོ་འགོང་པོ་དང་། །དངོས་གྲུབ་འཚེ་བ་བྱེད་ཀུན་ཏུ། །དེ་དག་དེ་ཉིད་ཤེས་གྱུར་ན། །དེ་དག་རང་གཤེད་རང་གིས་བྱེད། །རཱ་ཛ་ཙིཏྟ་རྦད་ནན། ཙ་ཧུར་ཐུམས་ཛཿམ་རཱ་ཡ་རྦད་ནན། ཨོཾ་ཏྲི་ཙིཏྟ་རྦད་ནན། ཏྲི་ཙིཏྟ་རྦད་ནན། ཧབ་ཤཾ་ཏྲི་ཙིཏྟ་རྦད་ནན། རུ་ཏྲི་ཙིཏྟ་རྦད་ནན། རཱ་ཛ་ཏྲིག་ནན། ཙ་ཧུར་ཐུཾ་ཛ། མཱ་ར་ཡ་རྦད། སྡེ་བརྒྱད་སྤྱིར་གདུལ་བ་ནི། ཨོཾ་ཨཱཿཧཱུྃ་བཛྲ་སརྦ་དུཥྚཱཾ་ཏྲིག་ནན། ཨེ་ཧུར་ཐུཾ་ཛཿམཱ་ར་ཡ་རྦད། གལ་ཏེ་རྒྱལ་པོ་གདུག་པ་དག །ཤིན་ཏུ་ཆེ་བར་གྱུར་པ་ན། །ཀུ་ཤ་རྩ་ལ་བརྒྱ་བྱིན་གཟུགས། །མཛེ་མོའི་སོག་པ་གཡས་པ་ལ། །ཁྲག་ཆེན་གྱིས་བྲི་སྙིང་གར་སྩལ། །ཏྲི་བཛྲ་ཨཾ་ཀུ་ཤ་ཛཿ ལྕེ་པོག་གིས་བདུག་སྔོན་དམར་བཅིང་། །རྩ་བའི་དཀྱིལ་འཁོར་དབུས་དག་ཏུ། །གྲུ་གསུམ་ནག་པོར་བཅུག་བྱས་ལ། །ལྕགས་ཀྱུའི་ཕྱག་རྒྱ་བཅས་ལ་དགུག །ཏྲི་བཛྲ་ཏྲི་བཛྲ། ཡཀྵ་དུཥྚཱན་བཛྲ་ཨྃ་ཀུ་ཤ་ཛཿ ཀྲོ་དྷིང་ཀྲོ་ལ་ཤ །རཱ་ཛ་ཐ་མ་ནྃ། རཱ་ཛ་ཤ་ཏྲཱུྃ་མཱ་ར་ན་ཕཊ། རཱ་ཛ་ཨ་མུ་ཀཾ །བྷཀྵ་ནི་གྲྀ་ཧྞ་གྲྀ་ཧྞ། གྲྀ་ཧྞ་གྲྀ་ཧྞ་མཱ་ར་ཡ་ཕཊ། ཕུར་བ་གདབ་ཅིང་

ལྕག་གིས་བྲབ། །དེ་ནས་བསྐོར་བའི་འཁོར་ལོ་བཅའ། །རྩ་བའི་འཁོར་ལོའི་ལྟེ་བ་ལ། །ཀུ་ཤའི་གཟུགས་གཞག་ཕྱི་རྩིབས་ལ། །རེའུ་མིག་བཅུ་བཞི་ལྡན་པ་ལ། །རྩིབས་ལ་གཟུགས་བྲིས་བོང་ཁྲག་སྦྱར། །རེའུ་མིག་ཆ་ལ་བསྐོར་སྔགས་དགོད། །དུ་ཏྲི་པ་ཏྲི་དཀོར་བ་ཁྃ་རྦད། །ཡ་ཏྲི་དཀོར་བ་ཁྃ་རྦད། །ཡུངས་ཀར་ཁྲག་སྣ་དུག་སྣས་བྲབ། །ཡང་ན་ཆུ་བོའི་གཞུང་ལ་བསྐུར། །ཡང་ན་ཕུགས་རྡུགས་གྲོག་པོར་གནོན། །དེ་ཚེ་ཞིང་ལྕགས་དྲག་ཏུ་བསྣུན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་རྫོགས་སོ།། །།རྒྱ་གར་གྱི་སློབ་དཔོན་ཨ་བ་ཡུག་ཏི་དང་། བོད་ཀྱི་ལོཙྪ་བ་བླ་བན་ཆོས་ཀྱི་བརྩོན་འགྲུས་ཀྱིས་ཞུས་ཏེ་བསྒྱུར་ཅིང་གཏན་ལ་ཕབ་པའོ།། །།

དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ།

རྒྱ་གར་སྐད་དུ། ཤྲཱི་བཛྲ་ཙཎྜ་ཙིཏྟ་གུ་ཧྱ་ཏནྟྲ་ཨུཏྟ་རོཏྟ་ར། བོད་སྐད་དུ། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ།བཅོམ་ལྡན་འདས་དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་འཁོར་དེ་ན་གནོད་སྦྱིན་ལག་ན་རྡོ་རྗེ་གཏུམ་པོ་ཞེས་བྱ་བ་འཁོད་པ་སྟན་ལས་ལངས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་མིག་འཛུམས་དང་བཅས་པས་རང་གི་སྤྱོད་པ་ལས་ཤིན་ཏུ་སྤ་གོང་བར་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་སླད་མའི་དུས་ན། གདུག་པ་ཅན་གྱི་སེམས་ཅན་ལ་རྣམ་པར་འཚེ་ཞིང་རྣམ་པ་གསུམ་གྱིས་སེམས་ཅན་མ་རུངས་པར་བགྱིད་དེ། རེག་པའི་དུག་གིས་ཀྱང་རབ་ཏུ་ཡང་གཟིར་བར་བགྱིད་དོ། །ཁ་རླངས་ཀྱི་དུག་གིས་ནི་རབ་ཏུ་མྱོས་ཤིང་ཤིན་ཏུ་ཡང་ལྕི་བར་བགྱིད་དོ། །མཐོང་བའི་དུག་གིས་ནི་ཟ་ཞིང་འཕྲུག་ཅིང་ཚ་བར་བྱེད་དོ། །འཕྲོ་བ་ཁ་རླངས་ཀྱི་དུག་ཅན་དང་། རེག་པ་ལུས་ཀྱི་དུག་རྣམས་ཀྱི་གདུང་བ་བསལ་བའི་སླད་དུ་བཅོམ་ལྡན་འདས་ཀྱིས་བཤད་དུ་གསོལ་ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་གནོད་

སྦྱིན་གསང་བའི་བདག །དུག་གསུམ་དུག་གི་རྩ་བ་ཡང་། །དུག་གསུམ་ལས་ནི་བྱུང་བ་ཡིན། །རྩ་བའི་དུག་ལ་རང་བཞིན་མེད། །དེ་ནི་དུག་གསོ་སྨན་གྱི་མཆོག །སྨན་ཉིད་རང་འབྱུང་གཞན་ལས་མིན། །དེ་ཉིད་རང་དང་གཞན་ལས་གྲོལ། །རྩ་བའི་དུག་ལ་རང་གྲོལ་ན། །དུག་གསུམ་ལ་སོགས་གཞན་དུ་མེད། །དུག་ལྔ་ལས་འཕྲོས་འབྱུང་ལྔའི་དུག །ཀུན་རྫོབ་ཙམ་དུ་འབྱུང་བ་འཇོམས། །དེ་དག་རབ་ཏུ་གཞོམ་པའི་ཕྱིར། །རང་གཞན་རང་གྲོལ་བདུད་རྩི་ཡི། །རྩ་བའི་དུག་སོགས་འཇོམས་པར་བྱེད། །ལྷ་ཡི་སྐུ་དང་སྔགས་ཀྱི་མཐུ། །ཡེ་ཤེས་འབྱུང་བ་ཆེན་པོ་ཡིས། །ལས་ཀྱི་འབྱུང་བ་འཇོམས་པར་བྱེད། །རྫས་ཀྱིས་ཀྱང་ནི་དེ་བཞིན་ནོ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་དུག་དང་དུག་འཇོམས་བྱེད་ཀྱི་ལེའུ་སྟེ་དང་པོའོ།། །།དེ་ནས་གནོད་སྦྱིན་གཏུམ་པོས་འདི་སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་དུག་ཆེན་པོ་དེ་དག་སྨིན་པ་ལ། གདོན་པའི་ལས་དག་གང་གིས་བགྱི། །ནན་ཏན་གྱིས་ནི་བཀའ་སྩོལ་ཅིག །ཅེས་གསོལ་བས། བཅོམ་ལྡན་འདས་ཀྱིས་བཀའ་སྩལ་པ། བཛྲེ་སརྦ་ཥྚཾ་ཙིཏྟ་རྦད་ནན། མ་ཧཱ་ཀཱ་ལ་ཙིཏྟ་རྦད་ནན། སརྦ་ཤ་ཏྲཱུྃ་མཱ་ར་ཡ་རྦད་ནན། ཞག་གྲངས་ཉི་ཤུ་གཅིག་ཏུ་བྱ། །ནམ་ལངས་ཉི་མ་ཤར་ག་རུ། །སྟོང་ཚར་རེ་སྟེ་དེ་བཞིན་དུ། །སྲོད་དང་ཐོ་རངས་ནམ་གུང་ལ། །མ་ཁྲག་གསུམ་དང་དུག་སྣ་དང་། །དྲག་པོའི་རྫས་རྣམས་དག་གིས་བྲབ། །ནཱ་གའི་གཟུགས་བྱས་རྫ་ཡི་ནང་། །གཟུགས་ནང་ཕུཿལ་སྔགས་ཕྲེང་བསྐོར། །རྫ་ནང་ཐལ་ཆེན་འབྲུབ་ཁུང་དུའོ། །སྔགས་པར་རྩ་བའི་འཁོར་ལོ་ཡིས། །ཁ་ཆོད་སྨེ་གོས་ནག་པོ་དགབ། །དེ་ནས་དྲག་པོའི་སྦྱིན་བསྲེག་བྱ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་གདུག་པ་སྲོག་གི་འཁོར་ལོའི་ལེའུ་སྟེ་གཉིས་པའོ།། །།དེ་ནས་ཡང་གསུངས་པ། ནཱ་གའི་གཟུགས་

ལ་རེག་བྱ་ནི། །སྔགས་ཀྱི་འབྲུ་བཞིན་སྔགས་བཀོད་དོ། །ཀླུ་རྒྱལ་བཞི་གཟུགས་མཐར་བཞག་ནས། །གདུག་པ་ལས་ཀྱི་འཁོར་ལོ་བསྐོར། །དང་པོའི་ཞི་བ་ཐ་མར་དྲག །དང་པོར་དྲག་ལ་ཐ་མར་ཞི། །ཐོག་མཐའ་གཉིས་ཀ་ཞི་དང་དྲག །ཨོཾ་ནཱ་ག་རཱ་ཛ་ས་མ་ཡ། །ཨ་པ་ལཱ་ཡ་ཙིཏྟ་ཛྭ་ལ་ཡ། ས་མ་ཡ་སྭཱ་ཧཱ། ཉི་ཤུ་གཅིག་གིས་མཐར་དབྱུང་ངོ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་དམ་ཚིག་སྲོག་གི་འཁོར་ལོ་འཇམ་པ་དང་རྩུབ་པའི་སྔགས་ཀྱི་ལེའུ་སྟེ་གསུམ་པའོ།། །།དེ་ནས་ཡང་གནོད་སྦྱིན་གཏུམ་པོས་གསོལ་པ། ཀྱེ་བཅོམ་ལྡན་འདས་སླད་མའི་དུས་ན་བསྟན་པ་ལ་གནོད་པ་དང་གདུག་པ་ཅན་འདུལ་བ་ཐུན་མོང་གི་ལས་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཐུན་མོང་ཕྱི་རུ་གསད་འདོད་ན། །ཕྲིན་ལས་མི་འགྱུར་འཁོར་ལོ་བསྐོར། །འཁོར་ལོར་གཞུག་དང་གཟུགས་ལ་གདབ། །གསང་བའི་འཁོར་ལོ་ལྟོ་སྦྱར་དུ། །གང་དམིགས་གཟུགས་དེ་ཁྲག་ཏུ་བྲི། །སྙིང་གར་མིང་བྲི་ལྟེ་བ་ལ། །ཤྭ་རཱི་ར་ཏེ་མགོ་བོ་ལ། བྷནྡྷ་བྷནྡྷ་ཞེས་པ་དགོད། །ཡན་ལག་བཞི་པ་ཧ་ན་སྟེ། །མཱ་ར་ཡ་བརླ་གཉིས་དང་ནི་མཚན་མ་ལའོ། །དམིགས་པའི་ས་ནས་ཟག་པའི་རྫས། །བླངས་ཏེ་བོང་བུའི་ཆུས་སྦྲུས་ལ། །ཤ་ཏྲཱུྃ་གཟུགས་བྱ་ཡིག་འབྲུ་རྣམས། །གནས་སུ་བཀོད་དེ་སྔོན་དམར་བཅིང་། །དུག་རྫས་གཏུམ་པའི་རྫས་ཀྱིས་གཏུམ། །བཙོན་ཁང་བསྐུར་ཏེ་ཐུན་རྣམས་དབབ། །ཟླ་བ་གཅིག་ཏུ་གནག་པར་བྱ། །བདུན་བདུན་བསྐོར་བྱ་བར་བར་དུ། །མཆོད་པའི་ལས་བྱ་མཚན་ཐུན་དབབ། །བསྲེག་དང་གནོན་པས་མཐའ་བརྟུལ་བྱ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཕྲིན་ལས་མི་འགྱུར་བའི་འཁོར་ལོའི་ལེའུ་སྟེ་བཞི་པའོ།། །།དེ་ནས་ཡང་གནོད་སྦྱིན་གཏུམ་པོས་གསོལ་པ། ཀྱཻ་བཅོམ་ལྡན་འདས་སླད་མའི་དུས་ན། གདུལ་དཀའ་བའི་གདོལ་པ་

ཅན་རྣམས་ཀྱི་ལོ་ཏོག་འཇོམས་པའི་ཐབས་བཀའ་སྩལ་དུ་གསོལ། ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལོ་ཏོག་འཇོམས་པའི་ལས་བྱས་ན། །ནཱ་ག་གཟིར་ཏེ་གཞོམ་པར་བྱ་ཞེས་སྟོབས་ཀྱི་ཡི་གེ་འབྲུ་བཞི་དང་། མི་འགྱུར་བའི་ཡི་གེ་འབྲུ་གསུམ་གསུངས་པ། ཨོཾ་ཧཱུྃ་བཛྲ་མ་ཧཱ་བ་ལ་ཞེས་གཏུམ་པོ་སྟོབས་ཆེན་པོའི་སྔགས་གསུངས་སོ། །ནཱ་ག་ཙིཏྟ་རྦད་ནན། ཞེས་ཀླུའི་སྙིང་གཟིར་དྲུག་པ་གསུངས་སོ། །སརྦ་དུཥྚཱ་ན། ཞེས་ཐམས་ཅད་དབང་དུ་སྡུད་པ་གསུངས་སོ། །ཕོབ་ཤར་ཤར་ཕོབ། ཅེས་ཆུ་འཁྱགས་ཀྱི་སྙིང་པོ་གསུངས་སོ། །གཅིག་ཏུ་དྲིལ་ཞིང་བརྡེག་པར་བྱ། །ནཱ་གའི་གཟུགས་བཅས་སྔགས་བཀོད་ནས། །ཡུངས་ཀར་བརྡེག་ཅིང་ཕུར་བུས་གདབ། །མཛེ་ཐོད་ནང་དུ་ཀླུ་གཟུགས་གཞུག །ཁྲག་ཆེན་བཙན་དུག་གླ་བའི་ཁྲག །ཡུངས་ཀར་ཡུངས་ནག་སྔགས་ཤིང་བརྡེག །ཀླུ་གཟུགས་ནིམ་པའི་ཆུ་ནས་དབྱུང་། །དང་པོ་ཆོ་འཕྲུལ་ཆེ་བར་འདོད། །ཉམ་ཐག་པ་ན་དབབ་ལས་བྱ། །གསད་ཅིང་རོ་རུ་འདུག་པ་ན། །དུས་ལས་ཡོལ་ཏེ་ཕེབས་མི་འགྱུར། །རྟགས་དང་ལྡན་པར་གྱུར་པ་ན། །བདག་ཉིད་ཏིང་འཛིན་ལྡན་པ་ཡིས། །དྲག་པོའི་སྔགས་ཀྱིས་ཀླུ་གཟུགས་བཏུམ། །རྫས་དང་ཐོད་པ་ཆུ་མིག་མནན། །དྲག་པོ་རྒྱུ་བའི་དུས་དང་སྦྱར། །འཇིག་རྟེན་ལྡོག་པར་ཐེ་ཙོམ་མེད། །ཅེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཆུ་འཁྱགས་ལོ་ཏོག་འཇོམས་བྱེད་ཀྱི་ལེའུ་སྟེ་ལྔ་པའོ།། །།དེ་ནས་དྲེགས་པ་ཅན་ཐམས་ཅད་ཤིན་ཏུ་ཡང་ཡི་རང་བར་གྱུར། ལྗོན་ཤིང་ལ་དུས་ཀྱི་རླུང་དྲག་པོས་བསྐྱོད་པ་བཞིན་འདར་བཞིན་དུ་འཁོད་དེ། བཀའ་བཞིན་དུ་བགྱིད་དོ་ཞེས་འཛེར་ཅིང་སྤྱན་སྔ་ན་འཁོད་པ་ལས་གནོད་སྦྱིན་གཏུམ་པོས་གསོལ་པ། ཀྱེ་བཅོམ་ལྡན་འདས་སླད་མའི་དུས་ཀྱི་བསྟན་པ་ལ་གནས་པའི་སླད་དུ་ལས་གནད་ལ་དབབ་ཏུ་གསོལ་ཞེས་གསོལ་པས། །བཅོམ་ལྡན་འདས་ཀྱིས་བཀའ་སྩལ་པ། བདུད་རྣམས་ལས་ལ་གཞུག་པ་ནི། །ཁ་རག་ནག་པོ་ཁྲ་མཱ་ཡ་ནྲྀ་མཱ་ར་ཛཱ་མྲྀ་ཁུག་ཛཿ

བཙན་རྣམས་ལས་ལ་གཞུག་པ་ནི། །ཨཱ་པི་ཤུ་རཀྵ་ཚལ་པ་ཚལ་པ་ཨ་ནྲྀ་ཏྲྀ་ཛཿཛཿ། ཀླུ་བཙན་ལས་ལ་གཞུག་པ་ནི། །ནཱ་ག་རཱ་ཛ་ཤུལ་ཨ། ཏྲྀ་ཛཿཛཿམཱ་ར་ཡ་ནྲྀ་ལོ་སོད། རྒྱལ་པོ་ལས་ལ་གཞུག་པ་ནི། །ཏྲོ་ཏ་ནི་ཏྲོ་ཏ་ནི། པ་ཏྲ་པ་ཏྲ། ཤཱུ་ལ་ཤཱུ་ལ། དྷ་ཤ་གྲཱི་བ་མཱ་ར་ཡ་ནྲྀ་ཛཿཛཿརྦད། ཀླུ་རྣམས་ལས་ལ་གཞུག་པ་ནི། །ནཱ་ག་གུར་ལིང་། སྙིང་ཁྲག་བམ་རུལ། ནཱ་ག་ར་ར་ཧེ་ས་ཏད་རྦད། པུ་དུ་མ་ཤི་ཁ་ལ་རཀྵ་རྦད། གཉན་ལས་ལ་གཞུག་པ་ནི་ཨུ་ཏ་ཁ་ཁ་ད་ར་སིང་ག་རཀྴ་ཁ་ལ་ནི་དུན་མཱ་ར་ཎ་དུན་རྦད་ཛཿ། དེ་དག་གི་ཕྱག་བརྙན་ལས་ལ་གཟུང་བ་ནི་ཛ་ལ་ཛི་ནྲི་ཧ་ན་ནྲྀ་མ་དུ་མ། སྙིང་ཁ་ལ་ནྲྀ་ཛཿཛཿ། ཛ་ནྲྀ་རྦད་པུ་ཁལ་རཀྵ་རྦད། ལིང་ག་བྱད་གཞུག་རེ་བས་དྲིལ། །རྟ་ནག་ཐོད་པར་བཅུག་ནས་ཀྱང་། །ནུབ་ཀྱི་ཕྱོགས་ཀྱི་བྲག་ནག་རྩར། །མཐུན་པའི་རྫས་དང་མིང་བྱང་སྦྲག །རྟ་ནག་ལུག་ནག་སྙིང་དག་དང་། །ལུག་ནག་མཐིང་ནག་དར་གྱིས་བརྒྱན། །རྟ་ནག་ཐོད་བཅུག་བྲག་རྩར་གཏད། །མཐུན་པའི་མིང་བྲིས་དུག་གིས་བྲབ། །མཐིང་ནག་དར་དྲིལ་མཛོ་ཐོད་གཞུག །བ་དམར་རྟ་དམར་སྙིང་དུང་གཟུགས། །ཐོད་པར་བཤོས་ཆ་དམར་པོར་གཞུག །ཆུ་མིག་བྲག་གི་རྩ་བ་ན། །རྩེ་ན་བྲག་དམར་ཡོད་པར་གཏད། །མིང་རུས་བྲིས་ལ་ཟ་འོག་དྲིལ། །འཇོན་མོ་སྤྲེའུ་ཡི་མགོ་ཅོ་རུ། །རྟ་དང་བྱ་དང་ལུག་དཀར་སྙིང་། །སྤྱན་གཟིགས་དཀོར་འབྲུ་ཟ་འོག་དྲིལ། །ཐོད་པར་བཅུག་སྟེ་ལྷ་ཁང་གི། །ཐེམ་པའི་འོག་ཏུ་མནན་པར་བྱ། །ཤ་ཏྲཱུྃ་སྦལ་ནག་ལྟོ་བར་བྲི། །གླང་དམར་རྭ་རུར་བཅུག་ལ་དྲིལ། །རྩི་སྨན་འབྲུ་དང་རིན་པོ་ཆེ། །བ་དམར་གླང་རུར་བླུག་ནས་ཀྱང་། །ནཱ་ག་གདུག་པའི་ལག་ཏུ་གཏད། །མཛོ་དྲེའི་ཐོད་པར་མིང་བྱང་གཞུག །ཆུ་རྟའི་གཟུགས་དང་རྟ་སྔོན་སྙིང་། །ཐོད་པར་བཅུག་སྟེ་རྒྱ་མཚོར་སྐྱུར། །ཙ་ར་དམར་པོའི་ཐོད་པ་རུ། །ཤ་ཏྲཱུྃ་མིང་གཟུགས་དར་དམར་དྲིལ། །སྔོན་དམར་དོག་པས་དམ་དུ་བཅིང་། །བྱ་དམར་ར་དམར་སྙིང་དང་གཟུགས། །ཐོད་པར་བཤོས་ཆ་དམར་པོ་གཞུག །བྱང་ཕྱོགས་བྲག་དམར་རྩ་རུ་མནན། །བརྣག་པའི་

མིང་བྱང་བྲིས་ནས་ཀྱང་། །ཙ་ར་སྔོན་མོའི་ཐོད་པར་གཞུག །མཇོ་ལྟོལ་བ་ལང་དྲེའུའི་ཡང་། །ཐོད་པར་བཅུག་སྟེ་ཆུ་འགྲམ་དང་། །ཤིང་གཅིག་རྩ་རུ་མནན་པར་བྱ། །ཏིང་འཛིན་སྔགས་དང་རྫས་རྣམས་ཀྱིས། །རང་གི་བྱ་བ་ནན་ཏན་བྱོས། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་བསྟན་པ་ལ་གནོད་པ་ཆོམ་ལ་དབབ་པའི་ལེའུ་སྔགས་ཀྱི་ཕོང་བསྟན་པ་སྟེ་དྲུག་པའོ།། །།དེ་ནས་གནོད་སྦྱིན་གཏུམ་པོས་གསོལ་པ། །ཀྱཻ་བཅོམ་ལྡན་འདས་སླད་མའི་དུས་ན་གདུག་པ་ཅན་ཕྱག་བརྙན་བཅས་པའི་སྦྱོར་བའི་མཐུ་ཟློག་པའི་ཐབས་བཀའ་སྩལ་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ནས་སྦྱོར་བའི་མཐུ་བཟློག་ན། །རང་ལུས་སྦས་ཏེ་དེ་དག་གི། །མིག་གི་འབྲས་བུ་གཅར་བར་བྱ། །རང་ལུས་སྦ་བར་བྱ་བ་ནི། །སྐྱེ་འགྲོ་མིག་གི་འབྲས་བུ་གཅར། །ནག་པོ་ཁ་ཏའི་འབྲས་བུ་དང་། །ཙ་ར་རོག་པོའི་འབྲས་བུ་གཉིས། །མིག་ལ་བསྐུས་ཏེ་ནོར་བུ་བཙལ། །རྙེད་ནས་ལུས་བཅད་རི་ཁྲོད་འགྲིམ། །དེ་དག་རྙེད་པར་མ་གྱུར་ན། །གསེར་དང་དངུལ་རྡོ་ཞ་ཉེའི་རྡོ། །སྤྲ་ཚིལ་དང་ནི་ཨ་རུ་ར། །བ་རུ་ར་དང་པི་པི་ལིང་། །ཕོ་བ་རིས་རྣམས་ཆ་མཉམ་སྟེ། །བཞུ་སྟེ་རྫི་དང་རླངས་ལ་གཟབ། །དེ་དག་གཞན་གྱི་སྦྱོར་བ་ཡིས། །བདག་གམ་གཞན་ལས་འཚེ་གྱུར་ན། །དྲེགས་པ་ཀུན་གྱི་འབྲས་བུ་གཅར། །ལྟོ་འཕྱེའི་ཤ་དང་སྦལ་འདྲའི་ཤ། །ས་ཆུ་དག་ན་གནས་པའི་མི། །གླང་མའི་སྒྲོན་ཤིང་འབྲས་བུ་དང་། །མེ་མ་བཏང་བའི་དུ་བ་དང་། །ཉག་གཅིག་པོ་ཡི་དྲི་ཆེན་དང་། །སེམས་མ་ཆགས་པའི་ཤ་རྣམས་ཀུན། །ལེགས་པར་ནན་ཏན་བྱས་བཅས་ནས། །འཇིག་རྟེན་པ་ཡི་ལྷ་རྣམས་ཀྱི། །རྣམ་པར་དག་པས་མཐོང་མི་འགྱུར། །གདུག་པའི་ཀླུ་རྣམས་འགྲས་པའི་གདོན། །དེ་དག་འབྲས་བུར་གཅར་བ་ནི། །ཕག་ཕོ་རོག་པོའི་དོན་སྙིང་ལྔ། །ལྕེ་བོག་ནག་པོའི་གསེར་ལུམ་དང་། །ཐར་ནུའི་ཐངས་ཉམས་རྙེད་གདུང་སྟེ། །ལུས་ལ་བཅངས་པར་གྱུར་པ་ན། །

ཤ་མིག་རྣམ་པར་དག་པ་ཡི། །ཀླུ་ཆེན་བརྒྱད་ཀྱིས་བལྟས་གྱུར་ཀྱང་། །མཐོང་བར་འགྱུར་བ་མ་ཡིན་ནོ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ལུས་རྣམ་པར་སྦ་བའི་ལེའུ་སྟེ་བདུན་པའོ།། །།དེ་ནས་ལྷ་ཡི་དབང་པོ་དང་། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གཏུམ་པོ་དང་། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གོས་སྔོན་པོ་ཅན་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་སྟོབས་པོ་ཆེ་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གསང་བའི་བདག་པོ་དང་། དེ་དག་ལ་སོགས་པ་འདུས་པའི་ཚོགས་ཆེན་པོ་རྣམས་རབ་ཏུ་ཡི་རངས་ཏེ། ལན་བརྒྱ་སྟོང་དུ་མར་མཆོད་ཅིང་བསྐོར་ནས་མངོན་པར་བསྟོད་དོ། །དེ་ནས་ལག་ན་རྡོ་རྗེ་བཞི་ལ་བཀའ་སྩལ་པ། ལག་ན་རྡོ་རྗེ་བཞི་པོ་དང་། རྒྱུད་འདི་དག་གང་ན་གནས་པར་ཁྱེད་ཀྱང་རྗེས་སུ་འབྲངས་ལ་རྒྱུད་འདི་འཆད་པ་དུས་གསུམ་དུ་མཆོད་ཅིང་བཀུར་བར་གྱིས་ཤིག །དེའི་དགོས་པ་གང་ཅིའང་རུང་པ་མ་ལུས་པར་སྒྲུབས་ཤིག །ཕྱི་མའི་དུས་ན་ཨོ་ཏྲེ་ཡུལ་དུ་རྒྱས་པར་འགྱུར་གྱིས་དེར་སྲུང་བར་བྱོས་ཤིག་ཅེས་གསུངས་ནས་ཆོས་ཀྱི་དབྱིངས་རྣམ་པར་དག་པ་ལ་བཞུགས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཡོངས་སུ་གཏད་པའི་ལེའུ་སྟེ་བརྒྱད་པའོ།། །།དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་རྫོགས་སོ།། །།རྒྱ་གར་གྱི་སློབ་དཔོན་ཨ་པ་ཡུག་ཏི་ལ་དང་། བོད་ཀྱི་ལོ་ཙྪ་བ་བླ་བན་ཆོས་ཀྱི་བརྩོན་འགྲུས་ཀྱིས་ཞུས་ཏེ་བསྒྱུར་ཅིང་གཏན་ལ་ཕབ་པའོ།། །།

རྨི་ལམ་མཐོང་བ་ཞེས་བྱ་བའི་གཟུངས་།

དཀོན་མཆོག་གསུམ་ལ་ཕྱག་འཚལ་ལོ། གནོད་སྦྱིན་གྱི་སྡེ་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། ཨོཾ་མུ་ཙི་ནི་སྭཱ་ཧཱ། མུ་ཁེ་སེ་སྭཱ་ཧཱ། མོ་ཧཱ་ནི་སྭཱ་ཧཱ། དན་ཏི་སྭཱ་ཧཱ། ཆོ་ག་འདི་ཆུ་ཁྱོར་བ་གང་བཟླས་པ་བྱས་ཏེ། འཐུངས་ནས་སེམས་བཞིན་དུ་ཉལ་ན་ལག་ན་རྡོ་རྗེས་རྨི་ལམ་སྟོན་པར་འགྱུར་རོ། །རྨི་ལམ་མཐོང་བ་ཞེས་བྱ་བའི་གཟུངས་རྫོགས་སོ།། །།

ཕྱག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད།

རྒྱ་གར་སྐད་དུ། ནཱི་ལཱམྦ་ར་དྷ་ར་བཛྲ་པཱ་ཎི་ཡཀྵ་མ་ཧཱ་རུ་དྲ་བཛྲཱ་ན་ལ་ཛི་ཧྭ་ཏནྟྭ་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད་ཅེས་བྱ་བ། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཐམས་ཅད་འབྱུང་བའི་ཡུམ་བཙུན་མོའི་བྷ་ག་ལ་བཞུགས་ཏེ། དེ་ནས་གནོད་སྦྱིན་དྲག་པོ་བྱེ་བ་ཕྲག་བཅུ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་དྲག་ཅིང་གཏུམ་པའི་རིགས་ཇི་སྙེད་པ་ཐམས་ཅད་དང་ཐབས་ཅིག་གོ །དེ་ནས་བཅོམ་ལྡན་འདས་དྲག་པོའི་སྐྱིལ་མོ་ཀྲུང་བཅས་ནས་གཡས་པ་ནམ་མཁའ་ལ་བསྒྲེང་། གཡོན་པ་ས་ལ་བགྲད་ནས་སྤྱན་བཟློག་པས་ཕྱོགས་བཅུར་གཟིགས་ཏེ། ཞལ་ནས་ཧཱུྃ་ཧ་ཞེས་པའི་སྒྲ་ཆེར་བྱུང་ངོ་། །དེ་ནས་འཁོར་ཐམས་ཅད་གཙོ་བོ་མི་སྣང་བས་ཡུན་རིང་དུ་བརྒྱལ་བར་གྱུར་ཏོ། །དེའི་སྐད་ཅིག་དེ་ཉིད་ལ་བཅོམ་ལྡན་འདས་ཀྱི་སྤྱི་བོའི་གཙུག་ནས་སངས་རྒྱས་ཐམས་ཅད་ཀྱིས་གནང་བ། སྔགས་རྣམ་པ་གསུམ་གྱི་བདག་པོར་གྱུར་པ་ཕྱག་བརྙན་ལག་ན་རྡོ་རྗེ་ཞེས་བྱ་བ་ཁ་དོག་སྔོན་པོ་ཆེར་གྲགས་པ། ཕྱག་གཡས་པ་ན་རྡོ་རྗེ་རྩེ་དགུ་པ་ཐོགས་པ། གཡོན་པ་ན་ནམ་མཁའ་ལྡིང་གི་རྒྱལ་པོ་དྲག་པོ་ཐོགས་པ་ཞིག་རྒྱ་མཚོ་ཆེན་པོར་ཞུགས་སོ། །དེ་ནས་ནམ་མཁའ་ལྡིང་གི་གཤོག་པ་བསྐྱོད་པས་རྒྱ་མཚོར་ཞུགས་ཏེ། ཀླུའི་རྒྱལ་པོ་དགའ་བོ་དང་། འཇོག་པོས་རང་གི་བདག་པོའི་སྤྱི་བོར་འདུད་དོ། །ཉེ་དགའ་བོ་དང་དུང་སྐྱོང་གིས་རྣ་ཆ་བྱས་སོ། །རིགས་ལྡན་གྱིས་མགུལ་རྒྱན་དུ་བྱས་སོ། །པདྨ་དང་པདྨ་ཆེན་པོས་ལག་གདུབ་ཏུ་བྱས་སོ། །སྤྲིན་གྱི་ཤུགས་ཅན་གྱིས་སེ་རལ་ཁར་བཅིངས་སོ། །ཧུ་ལུ་ཧུ་ལུས་སྐ་རགས་སུ་བྱས་སོ། །འབྲུག་སྒྲ་དང་བདུད་འཇོམས་ཀྱིས་རྐང་གཏུབ་ཏུ་བྱས་ཏེ། སླར་བདག་པོའི་ལག་པ་གཡོན་པར་སོང་ངོ་། །དེ་ནས་གནོད་སྦྱིན་བྱེ་བ་ཕྲག་བཅུ་དང་། །དྲག་པོའི་རིགས་རྣམས་བརྒྱལ་བ་ལས་སངས་ཏེ། ཕྱོགས་ཀུན་ཏུ་བལྟས་

པ་ལས་ཕྱག་བརྙན་ལག་ན་རྡོ་རྗེ་རྒྱ་མཚོའི་ནང་ན་འདུག་པ་མཐོང་ནས། རིངས་པར་ཀྱེ་མ་ཨ་ལ་ལ་བདག་ཅག་གི་གཙོ་བོ་ཉིད་བཞུགས་སོ། །ཞེས་བརྗོད་ནས་སོང་བ་ལས་ཕྱིན་ཏེ།བལྟས་པས་ཆེར་དྲག་པ་སྐྲ་ཁམ་པ་གྱེན་དུ་འཕགས་པ། མིག་མེ་མདག་གི་ཕུང་བོ་ལྟར་འབར་བ། མཆེ་བ་གཙིགས་པ། ལྕེ་གློག་ལྟར་འགྱུ་བ། གསུས་པ་རྫིང་བུ་ལྟར་འཁྱིལ་བ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་ཡོད་པ་རྐང་པའི་པུས་མོར་ཕྱིན་པ། ཀླུའི་རྒྱན་ཆ་བདུན་དང་ལྡན་པ། ལག་པ་གཡས་ན་རྡོ་རྗེ་རྩེ་དགུ་པ་ཐོགས་པ། གཡོན་ན་ནམ་མཁའ་ལྡིང་གི་རྒྱལ་པོ་དྲག་པོ་ཐོགས་པ། སྐུ་བྱིན་པོ་ལ་དཔག་ཚད་ཉིས་འབུམ་དྲུག་ཁྲི་ཡོད་པ་བཞུགས་སོ། །དེ་ནས་གནོད་སྦྱིན་རྣམས་ཀྱིས་གསོལ་པ། གཙོ་བོ་ཁྱོད་ཀྱིས་བཅོམ་ལྡན་འདས་ལ་གསང་བའི་དོན་དྲག་པོ་རྒྱས་པར་གསོན་ཅིག་དང་། །བདག་ཅག་རྣམས་ཀྱིས་ཞུ་བར་མ་སྤོབས་ཀྱིས་ཞེས་གསོལ་ནས། ལག་ན་རྡོ་རྗེ་ལ་གོས་སྔོན་པོ་དང་ལ་བཻཌཱུརྱ་ཞུན་མའི་ནང་དུ་བཙོས་པ་ཞིག་བླ་གོས་སུ་གསོལ་ཏོ། །སྟག་གི་པགས་པ་དྲུག་སྟོང་གིས་ཤམ་ཐབས་སུ་བཅིངས་སོ། །དེ་ནས་ལག་ན་རྡོ་རྗེ་རིངས་པར་བཅོམ་ལྡན་འདས་ཀྱི་སྤྱན་སྔར་སོང་སྟེ་ཞབས་ལ་སྤྱི་བོས་གཏུགས་ཏེ། མདུན་དུ་སྙིང་པོ་དང་ལྡན་པའི་སྐྱིལ་མོ་ཀྲུང་བཅས་ཏེ་འདུག་གོ །དེ་ནས་བཅོམ་ལྡན་འདས་ཀྱིས་ནམ་མཁའ་དང་ས་གཞི་ལ་གཟིགས་ནས། བར་སྣང་དུ་ཡང་སྤྱན་གྱིས་འཁོར་བར་གཟིགས་སོ། །དེ་ནས་ཁྃ་ཐུྃ་སྃ། ཞེས་བྱ་བའི་སྔགས་བརྗོད་དོ། །དེ་ནས་ལག་ན་རྡོ་རྗེ་སྟན་ལས་ལངས་ནས། རྡོ་རྗེ་ཐལ་མོ་རང་གི་སྙིང་གར་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏེ། །ཀྱེ་མ་བཅོམ་ལྡན་འདས་ལ་གསང་བ་དྲག་པོའི་དོན་བདག་དང་སེམས་ཅན་ཐམས་ཅད་ལ་ཕན་པའི་ཕྱིར་ཞུ་ན། །ཅི་བཅོམ་ལྡན་འདས་ཀྱིས་སྐབས་དབྱེ་བར་གནང་ངམ་ཞེས་གསོལ་པ་དང་། ཅི་ཡང་མི་གསུང་བར་བཅོམ་ལྡན་འདས་གདུག་པའི་ཚོགས་ངེས་པར་འདུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་མ་

ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་གདུག་པ་ཅན་ཐམས་ཅད་སྙིང་འདར་བར་གྱུར་ཏོ། །དེ་ནས་ཏིང་ངེ་འཛིན་དེ་ལས་བཞེངས་ནས། ལག་ན་རྡོ་རྗེ་ལ་གཟིགས་ཏེ་བྱེད་པ་གཡོན་པའི་ཆུ་ཤིང་སྙིང་པོ་ནས་དྲངས་ཏེ་བཀུག་པའོ། །བྱེད་པ་སྐྱེས་པའི་ཆུ་ཤིང་སྒྲ་དང་བཅས་པས་བརྐྱང་བ་བྱས་ཏེ་གནས་སོ། །དེ་ནས་ལག་ན་རྡོ་རྗེ་ཕྱག་རྒྱ་དེ་ཉིད་ཡང་དག་པར་རིག་སྟེ། ཚིག་འདི་སྐད་ཅེས་བརྗོད་དེ། ཁྱེད་ལ་སོགས་པའི་འཁོར་དག་ས་ཕྱོགས་འདིར་མ་གནས་པར་ཕྱོགས་གཞན་དུ་དེངས་ཤིག །གལ་ཏེ་མི་འགྲོ་ན་ཁྱེད་ལ་སོགས་པའི་སྙིང་འགས་པར་འགྱུར་རོ། །ཞེས་བརྗོད་པས་སྒྲ་གནས་ཀྱི་ཁུང་བུར་སྒྲིབ་བྱེད་ཀྱི་ཚོགས་སོང་སྟེ། སྔ་མ་བཞིན་དུ་འཁོད་དོ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་ཕྱག་ན་རྡོ་རྗེ་ཡིས། །ཐུབ་པའི་སྐུ་ལ་འདི་སྐད་གསོལ། །གསང་བའི་རྡོ་རྗེ་དྲག་པོའི་དོན། །རྒྱས་པར་བདག་ལ་བཤད་དུ་གསོལ། །གསང་བའི་བདག་པོ་ལེགས་པར་ཡང་། །ཉོན་ལ་ཡིད་ལ་ཟུང་ཤིག་ཁྱོད། །ང་ཡི་གསང་བ་གང་ཡིན་དང་། །རྡོ་རྗེ་དྲག་པོ་གང་ཡིན་པ། །ང་ལ་མཚན་ཉིད་གཞན་མེད་དེ། །ཁྱོད་ཉིད་ཀྱི་ནི་རྒྱུད་དང་ཡང་། །ཁྱོད་ཀྱི་བྱ་བའི་ལས་བཤད་བྱ། །སྐྱེ་བ་བཞི་བསྡུས་སེམས་ཅན་རྣམས། །གདུག་པ་ཅན་གྱིས་གཙེས་གྱུར་པ། །ཐབས་སུ་ལྡན་པའི་བཟློག་པ་ཡི། །མཚན་མ་ངེས་པར་བཤད་པར་བྱ། །བ་ནི་རྣམ་པར་སྣང་མཛད་དེ། །ཛ་ནི་མི་བསྐྱོད་ཐུབ་པའི་སྐུ། །ར་ནི་རིན་ཆེན་འབྱུང་ལྡན་སྐུ། །མེ་ལྕེའི་ཡིག་འབྲུ་གསུམ་པོ་ལ། །དང་པོར་གཙོ་བོ་བཤད་བྱ་བ། །པཱ་ནི་རྡོ་རྗེ་འཇོམས་བྱེད་མ། །ཎ་ནི་པདྨ་འཇོམས་བྱེད་མ། །ཨི་ནི་ཀུན་འགྲོ་འཇོམས་བྱེད་མ། །འོག་བཏགས་གསུམ་པོ་མིང་མཐར་སྦྱར། །ཨེ་ནི་ཀུན་ཏུ་གོ་བྱེད་དེ། །ར་ནི་སྨིན་པར་བྱེད་པ་སྟེ། །པ་ནི་ཀུན་ནས་སྡུད་པ་ཡིན། །ས་ནི་ཡོངས་སུ་རྟེན་པའི་ལས། །ཡ་ནི་ཡང་དག་བསྐྱོད་པར་བཤད། །གོ་འབྱེད་གཉིས་པའི་སྟེང་གནས་པའི། །སྣ་ལྡན་དག་ཏུ་ཤེས་

པར་བྱ། །དེ་ལས་ངེས་པར་བྱུང་བས་ན། །ཀུན་སྣང་གང་ཡིན་དངོས་དང་སྦྱར། །བསམ་པའི་དངོས་ལ་འཇུག་རྣམས་ཀྱི། །ཡན་ལག་ཐབས་རྣམས་ཐམས་ཅད་དུ། །གོང་དུ་སྨོས་ནས་བརྗོད་པ་ཡིན། །དོན་དུ་གསལ་བར་ཟློས་པ་ཡི། །ཚིག་ནི་རྒྱས་པར་བརྗོད་མི་དགོས། །ལས་ལས་གྲུབ་པའི་གཟུགས་རྣམས་ལ། །དྲག་པོ་ཡོངས་སུ་སྟོན་པ་དང་། །གནོད་སྦྱིན་བེ་ཅོན་ཐོགས་རྣམས་ལ། །གཙོ་བོའི་དོན་དུ་བཤད་པས་ན། །ཚིག་ཏུ་ངེས་པར་ཡང་དག་བརྗོད། །ཁྱོད་ཀྱི་ལུང་འཆང་རབ་དགའ་བས། །དེ་ཉིད་རིགས་སུ་བྱུང་བ་སྟེ། །ཀུན་ཀྱང་དྲག་པོའི་ལས་ལ་དགའ། །སྣང་བ་དག་པར་མི་མཐོང་བཞིན། །དེ་ཉིད་ལ་ནི་ངེས་པར་བརྗོད། །གོང་དུ་བསྟན་པ་གང་ཡིན་པ། །སོ་སོ་དག་ལ་གདོན་མི་ཟ། །སྦྱོར་བ་སྣ་ཚོགས་དེས་བསྒྲུབས་ན། །སྣང་བར་འབྱོར་བ་སྣ་ཚོགས་པ། །མངོན་དུ་རྒྱས་ཤིང་ངེས་པར་གསལ། །སྣང་བ་ཆེན་པོ་བདག་མེད་པར། །རྒྱུད་པས་ཡོངས་སུ་གྲུབ་པ་ཡིན། །ཀུན་རྫོབ་གོང་མའི་ཚིག་ལྟ་བུ། །དངོས་པོ་བསྟེན་པ་ལྟ་བུར་མཐོང་། །དོན་དམ་འོག་མའི་སྒྲ་ལྟ་བུར། །ཉོན་མོངས་ཀུན་བསྲེགས་རང་བཞིན་གྱིས། །འོད་གསལ་བ་རུ་གནས་པ་ཡིན། །སྙིང་པོ་དོན་དམ་ལ་འཇུག་པ། །ཕྱི་རིམ་ཀུན་རྫོབ་ལ་བརྟེན་བྱ། །དང་པོར་སངས་རྒྱས་མི་གནས་ཤིང་། །སྔ་མིའི་བྱ་བ་སྦྱོར་བར་བརྩོན། །དབང་ཐོབ་པ་ལ་རློམ་སེམས་མེད། །བླ་མའི་མན་ངག་ངེས་པ་ལས། །བླ་མ་ཉིད་ལ་ཅི་ནུས་ཀྱིས། །ཡང་དག་པར་ནི་མཆོད་པར་བྱ། །རྡོ་རྗེ་ངོ་བོ་ཀུན་འབྱུང་དང་། །གདུག་པ་ཐམས་ཅད་སྲེག་ཕྱིར་གང་། །དངོས་པོ་ལ་འཇུག་གོང་མའི་སྒྲ། །གོང་མའི་ཚིག་ཏུ་བརྗོད་པ་ཡིན། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས། ངེས་ཚིག་གི་ལེའུ་སྟེ་གཉིས་པའོ།། །།གོས་སྔོན་ལག་ན་རྡོ་རྗེ་ཡིས། །སངས་རྒྱས་མགོན་ལ་འདི་སྐད་གསོལ། །གང་ཞིག་བསྒྲུབ་པར་བྱ་བ་ཡི། །ཐབས་ཀྱི་དཀྱིལ་འཁོར་གསུང་དུ་གསོལ། །རིག་པའི་རྒྱལ་པོས་བཀའ་སྩལ་པ། །ཡང་དག་དོན་དམ་

དངོས་གྱུར་ན། །དཀྱིལ་འཁོར་ལྷ་གཟུགས་མེད་པ་སྟེ། །འགྲོ་བ་རྟོག་པ་ལ་གནས་པས། །དེ་ཡི་ཀུན་རྟོག་བསལ་བའི་ཕྱིར། །ལྷ་ཡི་སྦྱོར་བ་བཤད་པར་བྱ། །གང་ཞིག་མོས་པས་བྱེད་པ་ཡིས། །ཁྲུ་གསུམ་དཀྱིལ་འཁོར་ཕྱོགས་བཞི་པ། །ནགས་སམ་དུར་ཁྲོད་ཁང་སྟོང་ངམ། །གཙུག་ལག་ཁང་ངམ་མཆོད་རྟེན་ནམ། །དེ་དག་གནས་སུ་ངེས་པར་བརྩམ། །དང་པོར་བསྙེན་པ་རབ་གནས་པས། །བུ་མོ་བཅུ་དྲུག་སྟོན་མོ་བྱས། །བདག་གིས་ཞག་གསུམ་ཁྲུས་བྱ་ཞིང་། །སྤྱི་བོ་ལྐོག་མ་སྙིང་ག་རུ། །གསང་བ་གསུམ་གྱི་ཡི་གེ་བརྟག །རམས་སུ་བཅོས་པའི་གོས་ཉིད་ལ། །གུར་གུམ་ཐིག་ལེ་ངེས་བཏབ་སྟེ། །དེ་ཉིད་ལ་ནི་བསྐོན་པར་བྱ། །ཟས་སུ་དཀར་གསུམ་སྦྱིན་བྱས་ཤིང་། །སྐྱེས་པ་དང་ནི་ཕྲད་མི་བྱ། །སྙིང་པོ་འདི་ཉིད་འབུམ་ཚད་དུ། །རང་གིས་བཟླས་པས་རིག་པ་འབྱིན། །དེ་ནས་བསྙེན་པ་རྫོགས་པ་ལས། །བུ་མོ་ཉིད་ལ་ཚིག་བརྗོད་དེ། །བ་ཡི་རྣམ་ལྔ་ཉིད་དང་ཡང་། །རམས་དང་མཐིང་ཤུན་ཀུན་འདུས་སུ། །རིན་ཐང་མི་བརྩི་ཉོར་བཅུག་སྟེ། །དེ་ཉིད་རིགས་མཐུན་ནང་གཏུམས་ལ། །གནས་གང་ཡིན་པར་བདག་ལ་གཏད། །དེ་ཡིས་ཞག་གསུམ་སྦྱོར་བ་ཡིས། །ཕྱག་རྒྱ་ངེས་པ་ཉིད་དང་ཡང་། །སྙིང་པོ་གོང་གི་སྦྱོར་བ་ཡིས། །དྲི་ཆུ་བཏབ་ལ་གྲངས་ཚད་དུ། །ཕྱིན་པར་ཡང་དག་བཟླས་པར་བྱ། །དེ་ནས་སྐུད་པ་སྔོན་པོ་ནི། །བུ་མོས་ལེགས་པར་བཀལ་བ་ལ། །སྔགས་ཀྱིས་དག་བྱས་རབ་མཛེས་པས། །སྲད་བུ་དགུ་རུ་ངེས་པར་སྒྲིལ། །མེ་ཏོག་སྔོན་པོའི་ནང་གཏུམས་ལ། །སེང་ལྡེང་ཕུར་པ་ལྔ་རྣམས་ཀྱིས། །སྲེད་བུ་ཡོངས་སུ་བྲི་བར་བྱ། །རབ་ཏུ་ཚད་དུ་ངེས་པ་ཡིས། །ཕྱག་རྒྱ་མ་ལ་ངག་བརྗོད་པས། །དེ་ཉིད་མཉམ་པར་གཞག་པ་ཡི། །དཀྱིལ་འཁོར་ལེགས་པར་བྱས་པ་ཡིན། །འཕང་དུ་ཁྲུ་གང་ཚད་བྱས་ཏེ། །དང་པོ་བྱང་ཤར་མཚམས་ཉིད་ནས། །ཀུན་རྟེན་ཁ་དོག་རིགས་མཐུན་བླང་། །ཡོངས་སུ་བསྡུས་བྱས་ངེས་པར་བྱ། །གཉིས་པ་གཉིས་པ་ཉིད་དུ་ངེས། །

གསུམ་པ་གཅིག་གི་ཚད་དང་ལྡན། །དེ་ལྟར་ཚད་དུ་ལྡན་པ་ལས། །ཤིན་ཏུ་མཉམ་པར་འཐས་པར་བྱ། །དེ་ཉིད་རྗེས་སུ་འཇུག་པ་ཡིས། །དང་པོའི་སྲད་བུ་གང་ཡིན་པས། །ཁ་དོག་སེར་པོའི་ཐིག་གདབ་བྱ། །དཀྱིལ་འཁོར་དགུ་རུ་ངེས་པ་ལས། །འབྲུ་དང་ས་དང་རིན་ཆེན་དང་། །ཕྱེ་མ་ཉིད་དུ་བཏགས་པ་ཡིས། །དཀྱིལ་དུ་པདྨ་བཅུ་དྲུག་པ། །འདབ་མར་ལྡན་པར་བྲི་བར་བྱ། །ཤར་དང་ལྷོ་དང་ནུབ་བྱང་དང་། །མཚམས་རྣམས་སུ་ཡང་དེ་བཞིན་བྲི། །ལེ་ཚེའི་པདྨ་གང་ཡིན་པ། །སྣ་ཚོགས་པར་ནི་ཡང་དག་བཤད། །མཚམས་རྣམས་སུ་ནི་མཆོད་པ་ཡི། །ལྷ་མོ་ཡོངས་སུ་དགོད་པར་བྱ། །སྒོ་བཞི་དག་ཏུ་ཁྲོ་མོ་བཞི། །སྦྱོར་བས་ཡང་དག་དགོད་པར་བྱ། །རིན་ཆེན་ཕ་གུ་འདོད་ཡོན་དང་། །དྲ་བ་དྲ་ཕྱེད་ཡང་དག་ལྡན། །ཏྭ་ར་ཎ་ནི་བཞིས་བརྒྱན་ཅིང་། །སྣ་ཚོགས་རྡོ་རྗེ་གཞིར་གནས་ཡིན། །གདུགས་དང་རི་དགས་གང་ཡིན་པ། །རྒྱན་རྣམས་ཀུན་གྱིས་རྣམ་པར་སྒེག །སྔགས་པ་བྱང་ཆུབ་བློ་ལྡན་པས། །ཀེང་རུས་ཕྲེང་བ་ཉིད་དང་ཡང་། །སྦྲུལ་མགོའི་ཕྲེང་བས་རྣམ་པར་བརྒྱན། །རྡོ་རྗེ་སྣ་ཚོགས་རབ་འབར་བའི། །ཕྲེང་བས་ཕྱི་རོལ་ལེགས་པར་བསྐོར། །ཟུར་བཞི་དག་ཏུ་བུམ་པ་བཞི། །རྒྱན་གྱིས་རྫོགས་པར་ཡང་དག་བྲི། །དེ་དཀྱིལ་ཕྱག་ན་རྡོ་རྗེ་ཉིད། །སྔ་མའི་ཚུལ་གྱིས་ཡོངས་སུ་གནས། །ཤར་དུ་ཁམས་གསུམ་རྣམ་རྒྱལ་ཉིད། །ཡང་དག་པར་ནི་བྲི་བྱ་སྟེ། །ཁ་དོག་དམར་པོ་ཉིད་ལ་ཡང་། །དབུ་གསུམ་ཕྱག་ནི་དྲུག་པའི་དབྱིབས། །ཞབས་བཞི་བརྐྱང་བསྐུམ་ཚུལ་དུ་བཞུགས། །ཕོ་ནི་རྡོ་རྗེ་ངེས་པ་ལས། །མོ་ནི་དགྲ་སྟ་ཡང་དག་ལྡན། །བར་མ་གཉིས་ཀྱིས་འཆིང་བྱེད་པ། །གུང་མོ་མཐེ་བོ་ངེས་མདུད་ནས། །གཞན་རྣམས་ཡོངས་སུ་བརྐྱང་པ་ཡིན། །དེ་ཉིད་སྙིང་པོ་གང་ཡིན་པ། །སྙིང་གར་ཡང་དག་བཟུང་བྱས་ནས། །དེ་འོག་ཕོ་ཡིས་ཞགས་པ་འཛིན། །མོ་ཡིས་རལ་གྲི་བཟུང་བྱས་པ། །དང་པོ་ཉིད་ལ་དགོད་པར་བྱ། །ལྷོ་རུ་ནག་པོ་ཆེན་པོ་ཉིད། །ཁ་དོག་དུད་སྤྲིན་ལྟ་བུ་ལ། །ཞལ་གཅིག་ཕྱག་ནི་གཉིས་པའི་དབྱིབས། །ཕོ་ཉིད་ཙན་དན་

བདེ་ཆེན་བསྣམས། །མོ་ནི་ཞགས་པ་ཡོངས་སུ་འཛིན། །ཁྲོ་ཞལ་གཟིགས་པ་མི་བཟད་པས། །ཕྱོགས་བཅུ་རྣམས་སུ་རབ་ཏུ་གཟིགས། །དེ་ཉིད་མགོན་པོ་གང་ཡིན་པ། །ཕྱོགས་གཉིས་པར་ནི་རབ་ཏུ་དགོད། །ནུབ་ཕྱོགས་གསུམ་པར་དགོད་བྱ་བ། །ལུས་ངན་སྲས་པོ་སྟོབས་པོ་ཆེ། །ཁ་དོག་ལྗང་གུ་ཉིད་ལ་ཡང་། །ཆུང་ཟད་སྤྱན་ནི་རྒྱས་པ་ཉིད། །ཞལ་གཅིག་ཕྱག་ནི་གཉིས་པ་ལ། །སྤྱི་བོར་རྡོ་རྗེ་རྨོག་གིས་བརྒྱན། །གཡས་པ་ཉིད་ལ་རྡོ་རྗེ་ཅན། །གཡོན་པ་ནེའུ་ལེའི་རྐྱལ་པ་འཛིན། །ཞབས་གཉིས་དྲང་པོར་རབ་གནས་ཏེ། །ཤར་ཕྱོགས་བལྟས་པས་ཡོངས་སུ་གནས། །བྱང་ཕྱོགས་བཞི་པར་དགོད་བྱ་བ། །བདུད་རྩི་འཁྱིལ་པ་ཡོངས་སུ་གནས། །ཁ་དོག་སྔོན་པོ་དེ་ཉིད་ལ། །ཚམ་རྔམ་ཁྲོ་གཉེར་བརྗིད་པའི་ཞལ། །གཡས་བསྐུམ་གཡོན་བརྐྱང་སྟང་སྟབས་ཚུལ། །ཕྱག་གཉིས་བྲང་དུ་རབ་བསྣོལ་ཏེ། །གཡོན་དུ་ངེས་པར་ཅུང་ཟད་གཟིགས། །ལྷོར་བལྟས་ཡང་དག་དགོད་པར་བྱ། །བྱང་ཤར་རྡོ་རྗེ་གནོད་སྦྱིན་ཏེ། །ཁ་དོག་དམར་ནག་འཇིགས་པ་ལ། །གཡས་བརྐྱང་གཡོན་བསྐུམ་རབ་བཞུགས་ནས། །ཕྱག་གཡས་གྲི་གུག་རྣོན་པོ་འཕྱར། །གཡོན་པ་ཅང་ཏེའུ་དྲག་པོ་རྡུང་། །གཙོ་བོ་ལ་བལྟས་དགོད་པར་བྱ། །ཤར་ལྷོ་རྡོ་རྗེ་རོ་ལངས་ཉིད། །ཁ་དོག་སྔོ་སྐྱ་རབ་འབར་ལ། །མི་བཟད་འབར་བ་འཇིགས་པའི་གཟུགས། །ཅུང་ཟད་གཡས་སུ་ངེས་པར་གཟིགས། གཡས་བརྐྱང་གཡོན་བསྐུམ་ཚུལ་གནས་ཏེ། །རྡོ་རྗེ་ལྕགས་སྒྲོག་རབ་བཟུང་ནས། །གུང་སྲིན་ལ་སོགས་གསུམ་པོ་རྣམས། །དམ་པོར་བཀུག་པས་ཡོངས་སུ་བསྡམས། །མཐེབ་མཛུབ་བཞི་རྣམས་རབ་བརྐྱང་སྟེ། །སྤྱི་བོར་ངེས་པར་བསྣོལ་བར་བསྣམས། །ལྷོ་ནུབ་རྡོ་རྗེ་མཁའ་འགྲོ་སྟེ། །ཁ་དོག་དམར་སྐྱ་ཉིད་ལ་ཡང་། །ཤིན་ཏུ་མི་བཟད་འཇིགས་པའི་གཟུགས། །ཞབས་གཉིས་མཐིལ་སྦྱར་བཙུགས་པ་ལ། །ནམ་མཁའ་གྲུ་བཞི་པ་རུ་འདོད། །ལག་གཉིས་སྤྱི་བོ་ཐལ་སྦྱར་ནས། །མེ་ལྕེ་འབར་བ་ཡོངས་སུ་འཛིན། །

ཐོད་པ་ལྔ་ཡིས་མགོ་བརྒྱན་པ། །གཙོ་བོ་ལ་བསྟན་དགོད་པར་བྱ། །ནུབ་བྱང་བཞི་པའི་མཚམས་སུ་ཡང་། །རྡོ་རྗེ་འཇིགས་བྱེད་ཞེས་བྱ་བ། །ཁ་དོག་སྔོ་ནག་འཇིགས་པའི་གཟུགས། །ཞལ་གསུམ་ཕྱག་ནི་དྲུག་པ་ལ། །ཞབས་གཉིས་དག་ཏུ་རྣམ་པར་བཤད། །གཡས་གཡོན་དང་པོ་གླང་ཆེན་གྱི། །པགས་པ་ཡོངས་སུ་བརྐྱང་བ་འཛིན། །དེ་འོག་གཡས་པ་དགྲ་སྟ་ལ། །གཡོན་པ་རྡོ་རྗེ་ཡང་དག་འཛིན། །གསུམ་པའི་གཡས་ན་ལྕགས་ཀྱུ་སྟེ། །གཡོན་ན་མི་མགོ་རློན་པ་བསྣམས། །བརྐྱང་བསྐུམ་ཚུལ་དུ་གནས་ནས་ཀྱང་། །གཙོ་བོ་ཉིད་ལ་ཁ་བལྟས་བཞུགས། །མཚམས་ཀྱི་གྲུ་ཆད་གང་ཡིན་པར། །འོད་སྐྱེད་མ་དང་ཡིད་འཕྲོག་མ། །ཀུན་བཟང་མ་དང་གླུ་སྒྲ་ཅན། །རང་གི་ཕྱོགས་ཀྱི་ཁ་དོག་ལ། །ཤིན་ཏུ་ཞི་བས་ལྡེམ་བག་ཅན། །ཕྱག་གཡས་སུ་ནི་མེ་ཏོག་དང་། །དྲི་དང་ཞལ་ཟས་སྒྲ་བརྙན་རྣམས། །གར་གྱིས་རོལ་བར་ཡང་དག་ལྡན། །ནུ་མ་ཅུང་ཟད་འབུར་བ་ལ། །དར་དག་དཀར་པོས་སྨད་གཡོགས་པས། །གཙོ་བོ་ལ་བལྟས་མཛེས་པའི་གཟུགས། །ཕྱི་ཡི་གྲྭ་རུ་དགོད་པར་བྱ། །སྒོ་རྣམས་སུ་ནི་སྒོ་སྐྱོང་ནི། །སྲོག་གཅོད་མ་དང་དབུགས་རྔུབ་མ། །ཁྲག་འཐུང་མ་དང་ཤ་ཟ་མ། །ཞལ་གཅིག་ཕྱག་ནི་གཉིས་པ་ལ། །སྟག་དང་སེང་གེ་སྦྲུལ་དང་ཡང་། །དོམ་དུ་ཡང་དག་གནས་པ་སྟེ། །ཕྱག་གཡས་ཐོ་བ་རྐྱལ་པ་དང་། །ཧོམ་གཟར་གྲི་གུག་རྣོན་པོ་བསྣམས། །གཡོན་པ་རྣམས་ནི་ཞགས་པ་ཉིད། །ཀུན་ཀྱང་འཇིགས་པར་ཡོངས་སུ་འཛིན། །རང་གི་ཕྱོགས་ཀྱི་ཁ་དོག་སྟེ། །ཀུན་ཀྱང་ནག་པོ་ཤིན་ཏུ་བསྲེག །གཡོན་བརྐྱང་གཡས་ནི་བསྐུམ་པ་ཉིད། །མཆེ་བ་གཙིགས་ཤིང་རྔམ་པའི་སྐུ། །ཤིན་ཏུ་ཁྲོ་གཉེར་བརྗིད་པའི་ཞལ། །གར་སྟབས་ཀྱིས་རོལ་བདེ་ཆེན་གནས། །ཅུང་ཟད་གཡོན་དུ་གཟིགས་པ་ཡིས། །ཧ་ལ་ཧ་ལའི་སྒྲ་ཡང་སྒྲོགས། །གཞན་ཡང་ལྷ་རྣམས་དེ་དག་ཀུན། །ཐོད་པ་ལྔ་ཡིས་བརྒྱན་བྱས་ནས། །རྒྱན་ཆ་ལྔ་དང་ཡང་དག་ལྡན། །ཀུན་

ཀྱང་སྟག་གི་པགས་པ་ཡིས། །སྨད་ནི་ཡོངས་སུ་དཀྲིས་པ་ཡིན། །དེ་སྟེངས་གདན་ནི་རབ་གནས་པ། །གཙོ་བོ་ཉིད་ལ་ཉི་ཟླ་ཡིས། །ཕྲག་པ་ཉིད་ལ་འཁོར་བར་རྒྱུ། །ཚངས་པ་དབང་པོ་ལྷ་ཆེན་གཉིས། །ཞབས་ཀྱིས་ཡོངས་སུ་མནན་པ་ཡིན། །ཤར་གྱི་ལྷ་ཆེན་རྣམ་རྒྱལ་ཉིད། །ཀེང་རུས་སྟེང་ན་བཞུགས་པ་བཞིན། །གཞན་ཡང་དེ་ལྟར་གནས་པ་ཡིན། །ས་བོན་གནས་པ་གང་ཡིན་པ། །སྒྲ་དང་བཅས་པ་ཤེས་པར་བྱ། །དང་པོ་གཙོ་བོ་སྐྱེད་བྱེད་གང་། །ཧཱུྃ་ལས་ངེས་པར་རྫོགས་བྱ་ཞིང་། །གཞན་རྣམས་འདི་ལས་འབྱུང་བར་བསམ། །ཧཱུྃ་མྃ་བྃ་ཨྃ། ཡྃ་བྃ་ཌྃ་བྷྃ། པྲྃ་མྃ་སྃ་ཤྃ། པྲྃ་ཤྃ་རྃ་མྃ། དེ་དག་ལས་བྱུང་སྔགས་པ་ཡིས། །འོད་དང་བཅས་པར་བདེ་གཤེགས་ཀྱི། །ཞལ་ནས་འབྱུང་བར་ཡང་དག་ལྡན། །དེ་ལས་རགས་པ་གང་ཞིག་གི། །འབར་འཕྲོ་ངེས་པར་བསྐྱེད་པར་བྱ། །དང་པོ་ཀུན་ཀྱང་གཅིག་པ་ཡིས། །བྃ་ལས་གྱུར་པ་སྣ་ཚོགས་པ། །ཡང་དག་པར་ནི་སྐྱེད་པར་བྱེད། །དེ་འོག་ཀྃ་ལས་རབ་བསྐྱེད་པས། །སྐམ་པོར་ཡོངས་སུ་བརྟག་པ་ཡིན། །དེ་དག་རབ་རྫོགས་སྔགས་པ་ཡིས། །སྐུ་རུ་ཡོངས་སུ་རྫོགས་བྱས་ལ། །བདག་གིས་རྣལ་འབྱོར་ཡང་དག་འགྲུབ། །དེ་ནས་སྔགས་པ་བློ་ལྡན་པས། །རིགས་སུ་ངེས་པ་གང་ཡིན་པ། །ཐབས་འདི་ལ་ནི་འཇུག་པར་བྱ། །ཀུན་ལ་འཇུག་པར་གྱུར་པ་ཡི། །ཁྱབ་པའི་བདག་པོ་ཆེན་པོ་ནི། །རིགས་ཀྱི་གཙོ་བོས་སྤྱི་ལ་ཁྱབ། །མདུན་ནི་རྡོ་རྗེའི་རིགས་ཡིན་ཏེ། །ལྷ་མིན་ལ་སོགས་ངེས་པར་འཇིག །གཡས་པ་ཉིད་ན་གང་གནས་པ། །རིན་ཆེན་རིགས་སུ་ངེས་པ་སྟེ། །ཤ་ཟ་ལ་སོགས་ངེས་པར་འཇིག །རྒྱབ་ན་གནས་པ་གང་ཡིན་པ། །པདྨའི་རིགས་སུ་ཡང་དག་ལྡན། །ནོར་ལ་སོགས་པ་གང་དགོད་པ། །རེ་བ་བཞིན་དུ་སྐོང་བར་བྱེད། །གཡོན་ན་ངེས་པར་གནས་པ་གང་། །ལས་ཀྱི་རིགས་སུ་ངེས་པ་ལས། །ཀླུ་དང་གནོད་སྦྱིན་ལ་སོགས་པ། །མ་རུངས་པ་རྣམས་ཡོངས་སུ་འཇིག །གཞན་ཡང་ལྷག་

མ་ཐམས་ཅད་ཀུན། །ཕོ་ཉའི་ཚུལ་དུ་ངེས་པར་གནས། །དང་པོ་ཉི་མ་ཤར་བ་ན། །ལས་ཀྱི་སྦྱོར་བ་སྣ་ཚོགས་པ། །སོ་སོ་དག་ལ་སྙིང་པོ་ཉིད། །གོང་དུ་བུྃ་ལས་རབ་རྫོགས་པའི། །བརྒྱ་རྩ་བརྒྱད་དག་ངེས་པར་བཟླས། །ཧཱུྃ་གི་སྒྲ་དང་རབ་ལྡན་པས། །བདག་ཉིད་ཁ་ནི་མེ་འབར་གསལ། །ཕྱག་རྒྱ་སྣང་བར་བཅས་བྱས་ཏེ། །དེ་ཉིད་སྟང་སྟབས་བསྐྱོད་པ་ཡིས། །གདུག་པ་ཐམས་ཅད་སྲེག་བྱེད་དང་། །བདེ་གཤེགས་མངོན་པར་དགྱེས་པར་བྱ། །རྡོ་རྗེ་དྲིལ་བུ་གཟུང་བྱས་ནས། །ཁྲོ་བོའི་ཆ་ལུགས་གང་ཡིན་པས། །ཕྱོགས་རྣམས་རྨོངས་པར་བྱེད་པ་ཡིན། །ལྷ་མོའི་གཟུགས་འཆང་གང་ཡིན་པས། །གཞན་གྱི་སེམས་ཀྱང་འཕྲོག་པར་བྱེད། །རེ་མིག་རྣམས་ཀྱི་བར་གང་ཡིན། །མེ་ལྕེ་འབར་བ་ཡོངས་སུ་བྲི། །འཁོར་ལོའི་འོག་ཏུ་གནས་བྱ་བ། །ཆོས་འབྱུང་ཕྱག་རྒྱ་ངེས་པར་བྲི། །ཐབས་དང་ཤེས་རབ་ལྡན་པ་ལ། །ཀུན་འབྱུང་ཡུམ་དུ་ངེས་པར་གསལ། །རྟེན་འབྲེལ་ཡང་དག་འབྱུང་བ་ཡིས། །ཀུན་རྫོབ་ལ་ནི་དོན་དམ་བརྟེན། །དོན་དམ་ཉིད་ལ་ཀུན་རྫོབ་ཀྱང་། །བརྟེན་པ་ཉིད་དུ་ཡང་དག་གནས། །དེ་བས་སྣང་བ་མི་གསལ་བར། །ཆོས་འབྱུང་ཕྱག་རྒྱ་ངེས་པར་ཡང་། །རྒྱས་པ་ལ་སོགས་མ་ཡིན་གྱི། །དྲག་པོའི་དཀྱིལ་འཁོར་ཡིན་པ་དང་། །དེ་བཞིན་དབྱིབས་སུ་རང་གསལ་བ། །དྲན་དང་བཅས་པས་བྲི་བར་བྱ། །མཐུ་དང་ལྡན་པའི་གང་ཟག་ལ། །སྟོབས་ནི་ཤིན་ཏུ་ངེས་པར་སྐྱེ། །དཀྱིལ་འཁོར་ལྷ་གཉིས་མངོན་བསྒྲུབས་པས། །ལུས་ལ་གཟི་བརྗིད་འཇུག་པའོ། །རྡོ་རྗེ་མེ་ལྕེའི་རྒྱུད་ལས་དཀྱིལ་འཁོར་དང་ལྷའི་ལེའུ་སྟེ་གསུམ་པའོ།། །།ལག་ན་རྡོ་རྗེ་གོས་སྔོན་གྱིས། །འཇིག་རྟེན་མགོན་ལ་འདི་སྐད་གསོལ། །དཀྱིལ་འཁོར་ལྷ་རྣམས་དགྱེས་བྱ་བ། །ཐབས་དེ་གང་ལགས་གསུང་དུ་གསོལ། །ནང་གི་བདག་ཉིད་ཅན་དང་ཡང་། །ཕྱི་ཡི་ཁྲུས་སོགས་རབ་བྱས་ལ། །རབ་གསལ་ལ་སོགས་རྒྱུན་བཅད་ནས། །གང་ཡང་རུང་བའི་ལོ་ཉིད་ལ། །སྟོན་ཟླ་ར་བ་ནས་བརྩམས་ནས། །ལྷ་མིན་བླ་དང་མེ་ཏོག་གི། །

དྲག་པོ་དང་པོ་དེ་ཉིད་ལ། །བདག་གིས་སྦྱོར་བ་ངེས་པར་བརྩམ། །དེ་ནས་དང་པོ་བདག་ལུས་ལ། །རྒྱན་ཆ་ལྔ་ཡིས་རབ་བརྒྱན་ཏེ། །ལུས་ལ་གོས་དག་སྔོན་པོ་ཉིད། །བླ་གོས་སྨད་གཡོགས་ཡང་དག་བཅིངས། །སྤྱི་བོ་ལ་སོགས་གནས་ལྔ་རུ། །སྦྲུལ་གྱིས་ཡོངས་སུ་བཅིང་བར་བྱ། །རང་ཉིད་དཀྱིལ་འཁོར་ཤར་སྒོ་རུ། །འདུག་པས་སྦྱོར་བ་བརྩམ་པར་བྱ། །དེ་ནས་དང་པོ་བླ་རེ་གང་། །སྟེང་དུ་ངེས་པར་ཕུབ་བྱས་ལ། །ཟུར་བཞི་དག་ཏུ་བ་དན་བཞི། །སྔོན་པོས་ཡོངས་སུ་དཔྱང་བར་བྱ། །བླ་རེ་དག་གི་དཀྱིལ་དག་ནས། །སྐུད་པ་ལ་བརྒྱུས་མེ་ཏོག་གི། །ཕྲེང་བ་ཡོངས་སུ་དཔྱང་བར་བྱ། །དེ་ནས་སྔ་མའི་ཚུལ་གནས་ལ། །གོང་དུ་བསྟན་པའི་གནས་རྣམས་སུ། །བདག་གི་ལས་འདི་ངེས་པར་བརྩམ། །གཏོར་མའི་ལས་རྣམས་ཀུན་རྫོགས་དང་། །མཆོད་པ་རྣམ་པ་ལྔ་རྣམས་དང་། །སེང་ལྡེང་ཕུར་པ་སོར་བརྒྱད་ལ། །སྔགས་འདི་ཡིས་ནི་ཡང་དག་བསྔགས། །ཨོཾ་བཛྲ་ཀཱི་ལ་ཡ་སརྦ་བིགྷྣཱ་ན་ཧ་ན་ཧ་ན་ཧཱུྃ་ཕཊ། ཨོཾ་བཛྲ་པཉྩ་ཛྙ་ན་ཤོ་དྷ་ཡ་སརྦ་ཙཀྵུ་ཀཱ་ར་ཡ་ཧཱུྃ། སྔགས་དེ་དག་གིས་ཕུར་བུ་དང་། །སྐུད་པ་ལྔ་ལ་ལན་གྲངས་ནི། །ཉི་ཤུ་རྩ་གཅིག་བཟླས་བྱས་ལ། །ཙན་དན་ལ་སོགས་དྲི་ལྔ་ཡིས། །གོས་པར་ཡང་དག་བཅང་བར་བྱ། །དེ་ནས་སྔགས་པ་བློ་ལྡན་པས། །བདག་ཉིད་བསྲུང་བའི་འཁོར་ལོ་བརྩམ། །རང་གི་ཕྱི་རོལ་མཚམས་སུ་ནི། །མི་འགྱུར་ལས་ནི་བསིལ་ལྡན་བསྒོམ། །དེ་སྟེང་སྡུད་པའི་དངོས་པོ་གང་། །ཁ་དོག་ནག་པོ་ཡང་དག་བསམ། །དེ་ལས་ཁྱབ་བྱེད་རིགས་ལྔ་པ། །ཡང་དག་པར་ནི་བསམ་པར་བྱ། །དེ་ནས་ཡོངས་སུ་རྫོགས་པ་ལས། །བདུད་རྩི་འཁྱིལ་པར་བདག་བསམ་སྟེ། །རྡོ་རྗེ་སྡིགས་མཛུབ་ཕྱག་རྒྱ་ཡིས། །སྔགས་བཟླས་པས་ནི་བགེགས་བསྐྲད་ལ། །རིགས་གཙོའི་རྩེ་མོ་དེ་ཉིད་ལ། །ཀྃ་ལས་ལུས་སྐྱོབ་བསམ་བྱ་སྟེ། །སྤྱི་བོར་གནས་པས་ཁྱབ་པར་བསམ། །དེ་ནས་གཏོར་མ་དེ་ཉིད་ལ། །བདུག་པ་ལ་སོགས་གང་ཡིན་དང་། །སྐྱེ་བ་བཞེས་

བསྡུས་སེམས་ཅན་ལ། །ལས་ཀྱི་བར་ཆད་མི་འགྱུར་ཕྱིར། །བསམ་པར་རྫོགས་པར་རིན་ཐང་བྱ། །དེ་ནས་བདག་ཉིད་དད་པ་ཡིས། །མཆོད་པ་རྣམ་པ་ལྔ་རྣམས་ནི། །བསམ་པ་སྔགས་ཀྱིས་དབུལ་བར་བྱ། །གོང་མའི་སྟང་སྟབས་ལས་བྱ་བ། །གཡས་པ་ངེས་པར་བསྐུམས་པ་ལས། །གཡོན་པ་ལེགས་པར་བརྐྱང་བྱས་ཏེ། །གཡས་པའི་ལག་པས་རྡོ་རྗེ་ཉིད། །ཕྱར་ནས་གཡོན་གྱི་བེ་ཅོན་དང་། །རྩེ་སྤྲད་སྤྱི་བོར་གནས་བྱས་ལ། །གཡོན་པའི་བེ་ཅོན་གཡས་སྤོས་ལ། །གཡས་པ་རྡོ་རྗེ་གཡོན་པ་ཡི། །ལག་པས་བཟུང་ནས་སྙིང་གར་མནན། །བེ་ཅོན་ངེས་པར་བསྐོར་བ་ཡིས། །ཕྱོགས་བཞི་མཚམས་སུ་ངེས་པར་གདག །ཁ་ནས་ཧཱུྃ་གི་སྒྲ་འབར་ཞིང་། །སྣ་ཚོགས་རྡོ་རྗེ་གར་ཐབས་ཀྱིས། །ལན་གསུམ་རབ་ཏུ་བསྐོར་བར་བྱ། །དེ་ནས་གདུག་པ་གང་ཡིན་པ། །ཕྱོགས་བཞི་དག་ཏུ་སོང་བ་ལས། །ས་ཕྱོགས་ངེས་པར་གཙང་བར་འགྱུར། །དེ་ནས་ཐིག་སོགས་གདབ་པ་ཡིས། །སྟ་གོན་ལེགས་པར་གནས་པ་དང་། །རིམ་པ་བཞིན་དུ་དབང་བསྐུར་ལ། །རྨི་ལྟས་ངེས་པར་གདབ་པར་བྱ། །བཟང་ངན་ལྟས་དག་དབབ་པ་དང་། །བཟློག་དང་མི་བཟློག་བྱ་བ་གང་། །ཤེས་རབ་ཅན་གྱིས་གསལ་བར་བརྟག །སངས་རྒྱས་དཀྱིལ་འཁོར་བཞེངས་བྱའི་ཕྱིར། །བདག་གིས་དྲག་པོ་དང་པོ་ལ། །ཕྱེ་མ་ལྔ་ལ་སྔགས་དག་དང་། །ཕྱག་རྒྱ་བཅས་པས་བྱིན་གྱིས་བརླབ། །དེ་ནས་སྣོད་དག་ཐོད་པ་ལ། །བྱས་པའི་རྡོ་རྗེ་ཕྱག་རྒྱས་གདབ། །ངེས་པར་ལས་ཀྱི་སྦྱོར་བ་བརྩམ། །ཕྱོགས་སུ་ངེས་པར་བསྐོར་བ་ཡིན། །དབུགས་རྒྱུ་བ་ཡི་དངོས་པོ་གང་། །ཡི་གེ་མངོན་པར་གསལ་བ་ཡིས། །རྒྱུན་མི་འཆད་པར་བྲི་བར་བྱ། །སྐབས་ཀྱི་སྐད་ཅིག་ཤེས་པ་ཡིས། །རབ་ཏུ་ཁྲོ་གཉེར་བསྟན་པར་བྱ། །དང་པོ་ནག་པོ་བྲི་བྱ་ཞིང་། །གཉིས་པ་དཀར་པོར་ངེས་པར་དགྱེ། །གསུམ་པ་ཉིད་ནི་སེར་པོ་སྟེ། །བཞི་པ་དམར་པོ་ཡང་དག་ལྡན། །ལྔ་པ་ལྗང་གུ་བྲི་བྱ་ཞིང་། །དྲུག་པ་ཁ་དོག་སྣ་ཚོགས་རྒྱས། །དཀྱིལ་འཁོར་ལས་རྣམས་རྫོགས་པ་དང་། །རྫས་སུ་ཡོངས་སུ་ལྡན་བྱས་ཏེ། །གྲུ་བཞི་དག་ཏུ་བྱང་ཤར་

གྱི། །མཚམས་ནས་ས་གང་བུ་མོ་ཡིས། །བླངས་པ་ལས་བྱས་མཆོད་རྟེན་ནི། །སྔོན་པོ་བཞི་དག་གཞག་པར་བྱ། །དེ་ཡི་བསྐོར་བའི་རྩེ་མོ་ལ། །གོང་གི་སྲད་བུ་བཏགས་བྱས་ཏེ། །མེ་ཏོག་སྔོན་པོའི་ཕྲེང་བ་ཡིས། །འཁོར་བར་ཡོངས་སུ་བརྒྱན་པར་བྱ། །བུམ་པ་སྔོན་པོ་བཅུ་བདུན་ཉིད། །མཐའ་མའི་ཕྱོགས་སུ་ངེས་པར་གཞག །སྨན་དང་སྤོས་དང་སྙིང་པོ་དང་། །ལན་ཚྭ་རྩི་ཐོག་ལ་སོགས་པས། །ལེགས་པར་བཀང་བས་གནས་པ་ཡིན། །རྒྱན་རྣམས་ཀུན་གྱིས་རབ་བརྒྱན་ནས། །ལུས་ལ་མངོན་པར་ཕྱོགས་པར་བཞག །དེ་ནས་སྔགས་པ་བློ་ལྡན་པ། །གྲངས་དང་ངེས་པར་རབ་སྦྱར་ལ། །ཞལ་ཟས་ཟུར་མེད་ལེགས་པ་དང་། །དྲི་དང་སྣང་བ་གང་ཡིན་དང་། །བྱུག་པའི་དྲི་དང་ཚངས་སྐུད་དང་། །ཕྲེང་བ་རལ་གྲི་བེ་ཅོན་རྣམས། །ཡང་དག་པ་རུ་དགོད་པར་བྱ། །གདུགས་དང་རྒྱལ་མཚན་བ་དན་དང་། །ཕྱོགས་སུ་ངེས་པར་ཡང་དག་གནས། །དེ་ནས་བདག་པོ་གང་ཞིག་གིས། །ན་བཟའ་དར་ཡུག་སྔོན་པོ་ལ། །གུར་གུམ་ཐིག་ལེས་ལེགས་བྲིས་ལ། །དེ་ཉིད་ལ་ནི་དབུལ་བར་བྱ། །ཡོལ་བ་སྔོན་པོས་ཕྱོགས་བསྐོར་ལ། །ཕྱི་མ་རྣམས་ཀྱིས་སྣང་མི་བྱ། །གལ་ཏེ་སྣང་བར་གྱུར་པ་ན། །རང་གི་ལུས་ལས་མ་གཏོགས་པའི། །གཞན་རྣམས་བརླག་པར་འགྱུར་བ་ཡིན། །དེ་བས་ལེགས་པར་བསྒྲིམས་པ་ཡིས། །ཕྱི་རོལ་གཞན་ལ་བསྟན་མི་བྱ། །གང་ཟག་གཅིག་པུར་གནས་པ་ཡིས། །ལས་ཀྱི་སྦྱོར་བ་འདི་བརྩམ་བྱ། །ཕྱག་དག་སྔོན་དུ་སོང་བ་ཡིས། །མཆོད་པའི་ལས་ལ་མངོན་པར་གཞག །བདག་ཉིད་ལས་ཀྱི་ཕྱག་རྒྱར་གནས། །བསམ་པ་མངོན་དུ་གྱུར་པ་ཡིས། །ཀུན་གྱི་འབྲས་བུ་གང་ཡིན་པ། །བདག་གིས་གསལ་བར་རབ་ཏུ་བརྟག ། སྔགས་དང་ཕྱག་རྒྱ་རབ་ལྡན་པའི། །མཆོད་པ་འདི་དག་ངེས་པ་ལས། །བགེགས་བསལ་ཡེ་ཤེས་རབ་དབབ་པའི། །རྣལ་འབྱོར་རྫོགས་པར་ཡང་དག་གནས། །རང་རང་རིགས་ཀྱི་ཕྱག་རྒྱ་ཡིས། །སྔགས་བཟླས་པ་ཡིས་དབུལ་བར་བྱ། །ཨོཾ་ན་མོ་ནཱི་ལཱྃ་

བརདྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། པུཤྤ་པཱུ་ཛ་མེ་གྷ་ས་མུ་དྲཱ་སྥ་ར་ཎ་ས་མ་ཡེ་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། དྷཱུ་པ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། ཨཱ་ལོ་ཀེ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བར་བྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱྃ། གནྡྷ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། ནཻ་ཝི་དྱ་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜལ་དེ་བ་ཏཱ་ནཱྃ། ཤབྔ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎྜ ལ་དེ་བ་ཏཱ་ནཱྃ། ཙ་ནི་ཡཱ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། ཏ་རི་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། བཱ་ས་ན་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། གནྡྷར་རི་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། སྥརྴ་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎྜ་ལ་དེ་བ་ཏཱ་ནཱྃ། རཏྣ་སརྦ་བསྟུ་ནི་ར་ཡཱ་ཏ་ཡཱ་མི་ཧཱུྃ། དེ་ཡིས་སྔགས་ཀྱི་མཆོད་པ་ལས། །སྡིག་པ་བཤགས་པའི་སྔགས་ཀྱིས་སུ། །ཕྱག་རྒྱ་ངེས་པར་རབ་བཅས་པ། །སྡིག་པ་བཤགས་པའི་སྨྲེ་སྔགས་ཀྱིས། །ལུས་ངག་ཡིད་གསུམ་བཏུད་པ་ཡིས། །ཡང་དག་པར་ནི་བཤགས་པར་བྱ། །བསོད་ནམས་རྗེས་སུ་ཡི་རང་དང་། །ཡོངས་སུ་བསྔོ་དང་སྐྱབས་འགྲོ་དང་། །སེམས་བསྐྱེད་པ་དང་གནས་བཞི་དང་། །གོང་དུ་བསྟན་པའི་ཕྱག་རྒྱ་ཉིད། །སྐབས་འདི་དག་ཏུ་ཤེས་པར་བྱ། །དང་པོ་རྒྱུ་ལས་སྐྱེས་པ་ལས། །ཕྱི་ནས་དངོས་པོར་མི་གནས་ཤིང་། །རང་བཞིན་འོད་ནི་གསལ་བར་སྒོམ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་མཆོད་པའི་ལེའུ་སྟེ་བཞི་པའོ།། །།དེ་ནས་ལག་ན་རྡོ་རྗེ་ཡིས། །གསང་བའི་མགོན་ལ་འདི་སྐད་གསོལ། །བསམ་པ་རབ་ཏུ་རྫོགས་པ་ཡི། །ནང་གི་རྣལ་འབྱོར་གསུང་དུ་གསོལ། །བདེ་གཤེགས་གསང་བས་བཀའ་སྩལ་པ། །གང་ཞིག་བསྒྲུབ་པར་བྱ་བ་ལ། །

ཐབས་ཀྱི་དངོས་གྲུབ་འགྲུབ་པར་འགྱུར། །དང་པོ་ཤེས་རབ་ཅན་དག་གིས། །བདག་གིས་དངོས་པོར་སྣང་བ་ལས། །དེ་ཉིད་ངང་ལ་མཆོག་ཉིད་ཀྱིས། །འོད་ཟེར་བསིལ་ལྡན་ཡང་དག་བསམ། །དེ་ལ་གང་དུ་གྱུར་པ་ནི། །དབུགས་རྒྱུ་འགུགས་པར་ངེས་པར་བསམ། །དེ་ལས་གསལ་ལྡན་རིགས་ལྔ་བ། །སྟོང་པའི་དཔེ་ལས་མངོན་སོང་བའི། །གཟུགས་བཟངས་མ་སོགས་རིགས་མ་ཡིས། །མི་འཆི་ལྔ་ལྡན་དུས་འགྱུར་ལས། །འཛིན་པ་ཅན་ལ་སྦྱིན་པར་བསྒོམ། །དེ་ནས་སྔགས་འདིས་རབ་བསྔགས་ཏེ། །བདག་ཉིད་རིགས་སུ་ལྡན་པ་ཡིས། །བདག་པོས་ཕྱག་རྒྱ་ངེས་པར་གསལ། །ཨོཾ་ཨ་བྷི་ཥིཉྩ་ཏུ་མཱྃ་བཛྲ་པཱ་ཎི་ཧཱུྃ་ཨ་ཧོ་ཨཱ་ཧ་རྃ་ཏ་ཐཱ་སྠི་ཏོ་ཡྃ་ཨ་ཧོ་མ་མ་པྲི་ཡང་སྟུ་ཏི་ཧཱུྃ། བདག་ཉིད་དངོས་པོ་ལ་བརྟེན་ནས། །མཚན་མར་མི་གནས་མ་སྐྱེས་པའི། །གདོད་ནས་གྲུབ་པ་བསམ་བྱ་སྟེ། །སངས་རྒྱས་དངོས་ལ་རབ་སྦྱོར་བས། །དང་པོར་དངོས་དག་བསམ་བྱས་ནས། །བདག་ཉིད་གང་གི་གཟུགས་གནས་ལ། །སྟེང་དུ་མིག་འདྲའི་དངོས་པོ་བསྒོམ། །དེ་ལས་གོང་དུ་གྱུར་པ་ལས། །འཇིགས་བྱེད་རིགས་དགུ་ངེས་པར་བསམ། །མིག་འདྲའི་སྦུ་གུ་རབ་སྦྱར་བས། །སྙིང་པོའི་སྟེང་དུ་གསལ་བར་སྣང་། །སྙིང་པོའི་སྟེང་དུ་ཆུ་བསྒྲུབས་པས། །ཡན་ལག་སྟོང་དང་ལྡན་པ་ཉིད། །སྤུན་ལ་ཕྱོགས་པར་ཁ་བལྟས་ནས། །བདག་ལས་གོང་དུ་གྱུར་པ་ཡིས། །ཧཱུྃ་གཉིས་ལས་བསྒྲུབས་སྟེང་མ་ཡི། །ངེས་པར་གསལ་བྱེད་སྦྱར་བ་ལས། །དངོས་པོའི་སྙིང་པོར་རབ་སོང་སྟེ། །དེ་ལས་མི་འཆི་འོད་ལྡན་པས། །འཇོམས་བྱེད་སྟེང་ན་རབ་གནས་པའི། །མིག་འདྲའི་ཡན་ལག་བརྒྱད་དང་ལྡན། །འཇོམས་བྱེད་མིག་འདྲ་གར་མར་སྦྱོར། །ཐབས་དང་ཤེས་རབ་གསུམ་དུ་ངེས། །དངོས་པོ་གསུམ་ལས་རབ་བརྒྱུད་དེ། །སྙིང་པོའི་སྟེང་ན་རབ་གནས་པའི། །མིག་འདྲའི་སྟེང་དུ་ངེས་པར་སོང་། །རང་གི་གར་མའི་ཁྱོན་ཙམ་ལ། །སྐད་ཅིག་བྱེ་ཕྲག་བཅུ་དྲུག་པའི། །ཐབས་སུ་ཡོངས་སུ་རྫོགས་པ་སྟེ། །དང་པོ་དངོས་པོར་བརྟག་མི་བྱ། །རྫོགས་པ་ཉིད་ལ་མེ་འབར་བས། །རིམ་པ་དེ་ཉིད་མི་

གནས་ཤིང་། །དངོས་པོའི་སྣང་བ་གང་ཡིན་པ། །མར་མེའི་རྩེ་མོ་ལྟ་བུ་ཡི། །ཕྱི་ནས་རང་བཞིན་འོད་གསལ་བའི། །དང་པོ་རབ་ཏུ་བརྟག་པར་བྱ། །རིམ་པ་གསུམ་པ་རབ་རྫོགས་ཡིན། །སྟེང་དུ་བྃ་གཉིས་རབ་འབར་དང་། །ཧཱུྃ་ལས་སྐྱེས་པ་ཐུབ་པའི་སྐུ། །ཡང་དག་པ་རུ་བརྟག་བྱ་ཡིན། །འོག་ཀྱང་གོང་མའི་ས་བོན་ལས། །བསྐྱེད་པར་བྱ་བ་ཁོ་ན་ཡིན། །སེམས་དཔའ་གཉིས་སུ་ངེས་པ་དང་། །འཁོར་ལོ་སྤྲོས་པས་ཆར་ལྟ་བུའི། །ལོ་ཏོག་ཤིན་ཏུ་སྨིན་བྱེད་པའི། །སྐྱོན་རྣམས་སྤངས་ནས་དེ་ཉིད་དུ། །སླར་ཡང་ངོ་བོས་ཡང་དག་གནས། །དེ་ལྟར་གསལ་བར་མ་འཁྲུལ་བར། །སྐྱོན་གྱིས་མ་གོས་དྲི་མེད་དོ། །མཁའ་ལ་ཀུན་ཞེས་སེམས་ཀྱིས་སུ། །རྡོ་རྗེ་ལམ་དུ་རབ་ཞུགས་ནས། །ནོར་བུ་དྲི་མེད་ཟླ་བ་ཡི། །ལས་ལ་སྦྱོར་བ་སྣ་ཚོགས་པ། །མཉམ་པར་སྦྱར་བས་བདེ་བའི་མཆོག ། མི་འཛག་གནས་དང་ལྡན་པར་འགྱུར། །མཁས་པ་སངས་རྒྱས་བདེ་བས་བདེ། །ལུས་ལ་ཆགས་པར་མི་ལྟ་ཞིང་། །སེམས་ལ་ཆགས་པ་ཆེན་པོར་བསྐྱེད། །དེ་འདྲའི་སྤྱོད་པས་ཡོངས་བསྡུས་ནས། །གང་ཞིག་མྱ་ངན་འདས་པ་ལས། །མཆོག་འགྱུར་མི་གནས་མྱ་ངན་འདས། །ས་ལ་མངོན་པར་མི་གནས་ཤིང་། །ཀུན་ཏུའང་མངོན་པར་མི་གནས་པས། །ཡེ་ཤེས་རྡོ་རྗེ་གོ་འཕང་ཉིད། །བརྒྱུད་པས་མངོན་དུ་བྱེད་པ་ལ། །འདི་ལ་རྫས་ལ་སོགས་པ་ཡི། །འདི་ཡི་དངོས་གྲུབ་གང་ཡིན་པས། །ངེས་པར་འགྲུབ་པ་སྨོས་ཅི་དགོས། །ཤེས་རབ་ཅན་གྱི་ལས་འདི་ལས། །ཆགས་པ་ཆེན་པོར་ཡང་དག་བསྒྲུབ། །ལུས་ལ་མེ་འབར་ཆེན་པོ་ཡི། །སྙིང་པོ་འདི་ཉིད་བཟླས་པ་ལས། །རང་ཉིད་པདྨ་གསང་བ་ཡི། །དྲག་པོའི་རྟགས་སུ་ངེས་པ་སྟེ། །དེ་བཞིན་རྟག་ཏུ་བསྒྲུབ་པར་བྱ། །སྔགས་བཟླས་ཆོ་ག་གསུམ་ལས་ནི། །ཁྱད་པར་ངེས་པར་དམིགས་བྱས་ལ། །བདག་ཉིད་ཐ་མལ་གཟུགས་ཀྱིས་གནས། །དེ་དག་ཕན་ཚུན་བརྒྱུད་པ་ཡིས། །ཟོ་ཆུན་བརྒྱུད་པ་བཞིན་དུ་བསམ། །དྲག་པོའི་བཟླས་པ་དེ་ཉིད་དང་། །རང་བཞིན་རྡོ་རྗེའི་བཟླས་པ་ཡིས། །རིགས་

གསུམ་ཡོངས་སུ་བསྡུས་པ་ཡིན། །ཨོཾ་བྷོ་བྷོ་བཱན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱྃ་བ་ར་དྷ་ར་རཱི་རྃ། བཛྲ་པཱ་ཎི་ཧྲྀ་ད་ཡྃ། ཡཿས་མཱ་ཏི་ཀྲ་མ་ཐ་མཱ་ཀུ་ལ་ཨུད་སཱ་ད་ནཱྃ་བྷ་བི་ཥཾ་ཏེ་ཏདྱ་ཐཱ། བུདྡྷ་བུདྡྷ། བི་བུདྡྷ་བི་བུདྡྷ། མ་ཏི་ཀྲ་མ་ཐཱ། ཧ་ར་ཧ་ར་ནཱ་གཱ་ནཱྃ། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪིནྡ་ཙྪིནྡ་ནཱ་ག་ཧྲྀ་ད་ཡཱ་ནི། བྷིནྡ་བྷིནྡ། ནཱ་ག་མརྨཱ་ཎི་བི་ཤཱིརྻནྟུ་ནཱ་ག་ཤ་རཱི་རྃ། བི་སྥོ་ཊ་ཡ་ནཱ་ག་ནཱ་ཡ་ནཱ་ནི། ཏདྱ་ཐཱ་ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ཕཊ། ནཱ་ག་ཀྲོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་པ་རཱ་ཀྲ་མཱ་ཡ་ཧཱུྃ་ཕཊ། ཀྲྀ་ཏཱན་ཏཱ་ཡ་ཧཱུྃ་ཕཊ། ཀྲྀ་ཏཱན་ཏ་རཱུ་པཱ་ཡ་ཧཱུྃ་ཕཊ། རོ་ཥ་ཎཱ་ཡ་ཧཱུྃ་ཕཊ། ཏྲཱ་ས་ནཱ་ཡ་ཧཱུྃ་ཕཊ། ཀུྃ་བྷཱཎྜ་ཨུད་སཱ་ད་ནཱ་ཡ་ཕཊ། པྲེ་ཏ་བི་ཤཱ་ཙི་བི་ནཱ་ཤ་ཀ་རཱ་ཡ་ཧཱུྃ་ཕཊ། ཡཀྵ་ཨ་པསྨཱ་བི་ནཱ་ཤྐ་རཱ་ཡ་ཕཊ། ཧ་ན་ཧ་ན་ཧཱུྃ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བི་གྷཱྃ་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སཾ་གྷ་བི་ནཱ་ཤ་ཀ་རཱ་ཡ་ཧཱུྃ་ཕཊ། ཨི་དཾ་ནཱི་ལཱྃ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏཾ་སྭཱ་ཧཱ། ཨོཾ་དཾཥྚྲ་ཀ་རཱ་ལོ་ཀི་བྷཱི་ཥ་ཎ་ནཱི་ལཱྃ་བ་ར་དྷ་ར་བཛྲ་པཱ་ཎི་ཡེ་ནཱ་ག་ཨ་ལྃ་ཀཱ་ར་ས་པ་ཏེ་ཀེ་ཏུ་བྱཱ་གྷྲ་ཙ་ར་མ་ནི་བྷཱ་ས་ནཱ་ཡཱ། བྷ་མ་ཀཱ་རཱ་ག་རུ་ཌ་ར་སི་ཏི། ཀྲོ་དྷ་མཱུར་ཏི་ན་ཏྲཻ་ལོ་ཀྱད་ཧཱ་ཡ། བྷྱ་མ་མན་ཏྲ་ཨ་ས་ན་རུ་དྲཱ་ཡ། ནཱ་ག་ཙ་ཏུར་མ་བྷཀྵཱ་ཡ་ཧཱུྃ་ཕཊ། ཨོཾ་ཏྲཻ་ལོ་ཀྱ་བྟི་ཛཱ་ཡ་ཧཱུྃ་ཕཊ། ཨོཾ་མ་ཧཱི་ཀཱ་ལ་རོ་ཥ་ཎཱ་ཡ་ཧཱུྃ་ཕཊ། ཨོཾ་བེ་ཤྲ་མ་ནཱ་ཡ་ཧཱུྃ་ཕཊ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཨོཾ་བཛྲ་ཡཀྵ་ཧཱུྃ་ཕཊ། ཨོཾ་བཛྲ་ཡ་བཻ་ཏཱ་ལཱི་ནི་ཧཱུྃ་ཕཊ། ཨོཾ་བཛྲ་ཌཱ་ཀཱ་ཡ་ཧཱུྃ་ཕཊ། ཨོཾ་བཛྲ་བྷཻ་ར་བཱ་ཡ་ཧཱུྃ་ཕཊ། ཨོཾ་བཛྲ་པྲ་བྷོ་ཏ་པ་དཱ་ཡ་ཧཱུྃ་ཕཊ། ཨོཾ་མ་ནོ་ཧཱ་ར་ཡ་ཧཱུྃ་ཕཊ། ཨོཾ་ས་མནྟ་བྷ་དྱཻ་ཧཱུྃ་ཕཊ། ཨོཾ་ཤབྡ་གི་ཏྱཻ་ཧཱུྃ་ཕཊ། ཨོཾ་བྲཎཱཔ་ཏྱཻ་ཧཱུྃ་ཕཊ། ཨོཾ་རཱ་ག་ཏ་པྲི་ཡ་ནི་ཧཱུྃ་ཕཊ། ཨོཾ་མཱན་ས་བྷཀྵི་ཎེ་ཧཱུྃ་ཕཊ། ཨོཾ་ཙཎྜ་མ་ཧཱ་རོ་ཥ་ཎ་སརྦ་སིདྡྷ་ཡ་ཧཱུྃ་ཕཊ། ཨོཾ་མ་ཎི་དྷ་རི་བཛྲི་ཎི་ཧཱུྃ་ཕཊ། ཨོཾ་བཱ་སུ་རཏྣ་བི་ཏ་ཧཱུྃ་ཕཊ། ཨོཾ་ཨ་མྲྀ་ཏ་སིདྡྷི་ཧཱུྃ་ཕཊ། ཨོཾ་སཾ་ཤོདྷ་ཡ་བ་ར་བ་ར་ཧཱུྃ་ཕཊ། ཨོཾ་ཙ་པ་ཤ་ས་བ་ནི་ར་ཧཱུྃ་ཕཊ།ཨོཾ་ཀུ་མཱ་ར་ཙ་ཤ་མ་ཎི་ཧཱུྃ་ཕཊ། དེ་ནས་ཕྱོགས་བཅུ་འཁྲུགས་

པ་ལས། །ཡི་གེ་ངེས་པ་གང་ཡིན་པ། །བླ་མའི་མན་ངག་རབ་གསལ་བས། །གཅིག་ཏུ་བསྡུས་པས་བཟླས་པར་བྱ། །རང་བྱུང་སྔགས་པས་བདག་ཉིད་ལ། །གྲངས་ཚད་གཟུང་བ་གང་ཡིན་པ། །རིགས་ཀྱི་དབང་གིས་རྣམ་པར་བཤད། །ཀུན་ཏུ་སྣང་བ་གང་ཡིན་པ། །རིགས་སུ་བསྡུས་ནས་ངག་གི་ཡང་། །སྤྱོད་ཡུལ་མ་ཡིན་ཐ་མལ་གཉིད། །དྲག་པོའི་སྙིང་པོ་ཉིད་དང་ཡང་། །རང་བཞིན་རྡོ་རྗེ་བཟླས་པ་ཡིས། །རིགས་གསུམ་ཡང་དག་བསྡུས་པ་ཡིན། །གོང་མའི་སྔགས་ལ་རབ་སྔགས་པ། །མཐའ་རུ་ཀུན་ལ་ཧཱུྃ་གིས་བརྒྱན། །དེ་མཐར་བསྐྲད་པའི་ཚིག་དག་གིས། །ཡོངས་སུ་བརྒྱན་པས་ངེས་པར་བཟླས། །གང་དང་གང་ལ་ལས་སྦྱོར་བ། །དེ་དང་དེ་ལས་མན་ངག་གིས། །མངོན་པར་ཤེས་པའི་ཡང་དག་བཤད། །བཟླས་པ་ཕུན་སུམ་ཚོགས་ལྡན་པས། །རབ་འབྲིང་ཐ་མ་ལྡན་པ་ཡིས། །དང་པོ་སྦྱོར་བ་ངེས་པ་དང་། །མཐའ་མར་ལས་ལ་འཇུག་པ་ལ། །གྲངས་དང་ཆ་རུ་རྣམ་པར་ལྡན། །སྤྱོད་ཡུལ་བསྡུས་པ་ངེས་གསལ་བ། །བདག་གིས་གང་ལ་བརྟག་པར་བྱ། །དང་པོར་སྲིད་ལ་ཆགས་པ་དང་། །བར་དུ་གང་ཞིག་གནས་པ་ཉིད། །ཐ་མར་འཇིག་པ་གང་ཡིན་པས། །སྔགས་རྣམས་ཐམས་ཅད་རྒྱས་པར་གསུངས། །འབྱུང་བ་ལྔ་དང་རབ་ལྡན་ནས། །དེ་ལས་ཆོས་རྣམས་ཐམས་ཅད་ལས། །ཡོངས་སུ་འབྱུང་བའི་ཡང་དག་གནས། །དེ་དང་རབ་སྦྱོར་དང་པོའི་དོན། །འདི་ལས་གྲུབ་པར་གྱུར་པ་གང་། །ལས་རྣམས་སྣ་ཚོགས་གང་ཡིན་པ། །གདོན་མི་ཟ་བར་ངེས་པ་ཡིན། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ནང་དང་སྔགས་ཀྱི་ལེའུ་སྟེ་ལྔ་པའོ།། །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །སེམས་ཅན་སྨིན་པར་བྱ་བའི་ཕྱིར། །འཇུག་པའི་ཐབས་ཉིད་གསུང་དུ་གསོལ། །ཀུན་མཁྱེན་མགོན་པོས་བཀའ་སྩལ་པ། །དང་པོར་ས་བརྟག་ལ་སོགས་པ། །ངེས་པར་གོང་དུ་བསྟན་པ་ལྟར། །ལས་རྣམས་ངེས་པར་རྫོགས་པར་བྱ། །ས་ཕྱོགས་དབེན་པའི་ཁྱིམ་རྣམས་སུ། །བ་ཡི་རྣམ་ལྔ་ལ་སོགས་དང་། །རམས་དང་མཐིང་ཤུན་ངེས་

པར་སྦྱར། །ཐ་མའི་ཚད་དུ་རབ་སྦྱར་ལ། །གུར་གུམ་ཐིག་ལེས་ཡང་དག་གདབ། །ཞལ་ཟས་སྣ་ཚོགས་འབྱོར་ལྡན་པའི། །ཀུན་ཀྱང་ལྔ་ལྔར་ཡོངས་སུ་གནས། །ལས་རབ་མཆོག་གི་གཏོར་མ་ལ། །རྫས་རྣམས་ཕུན་སུམ་ཚོགས་པ་ཡིས། །སེམས་བསྐྱེད་པ་དང་སྐྱབས་འགྲོ་དང་། །གསང་བ་གསུམ་གྱི་གནས་རྣམས་སུ། །དྲི་ཡི་ཐིག་ལེ་རྡོ་རྗེ་དང་། །བཅས་པའི་གུང་མོས་ཀུན་བསྐུས་ལ། །མི་འགྱུར་གསུམ་ལ་སྐུ་གསུམ་དུ། །སྔགས་འདི་དག་གིས་བྱིན་གྱིས་བརླབ། །ཨོཾ་ཏྲི་མ་ཏ་བི་ཤོ་དྷ་ཡ་ཨཱཿཧཱུྃ། དེ་ནས་སོ་ཤིང་དག་ལ་ནི། །སྔགས་འདིས་ཡོངས་སུ་དག་བྱས་ལ། །སློབ་མ་ལ་བྱིན་སོ་བཀྲུས་ཏེ། །མིག་བཀབ་བསམ་པ་དག་པ་ཡིས། །དེ་ཡི་སྟེང་དུ་བོར་བར་བྱ། །གང་དུ་ཁ་བལྟས་མེ་ཏོག་ཕྲེང་། །རིགས་དང་རྗེས་སུ་བསྟུན་པ་ལས། །དེ་ཡི་དངོས་གྲུབ་བརྗོད་པར་བྱ། །དེ་ནས་སྲུང་སྐུད་སྔོན་པོ་ལ། །སྔགས་ཀྱིས་དག་པར་བྱས་པ་ལས། །སྐྱེས་པ་གཡས་པ་བུད་མེད་གཡོན། །དཔུང་པ་དག་ལ་བཅིང་བར་བྱ། །བཀྲ་ཤིས་རྩྭ་ཡི་སྔས་དང་སྟན། །ལེགས་པར་བཅུག་པའི་མཚན་མ་བརྟག །བཟང་ངན་ལྟས་སུ་བཅས་པ་དང་། །བཟློག་པར་བྱ་དང་བྱ་མི་དགོས། །ཤེས་རབ་ཅན་གྱིས་རྒྱུད་གཞན་ལས། །འབྱུང་བ་བཞིན་དུ་བརྟགས་ལ་བྱ། །དང་པོར་བསྙེན་པ་རབ་འབྲིང་དང་། །ཐ་མར་ཡོངས་སུ་བསྙེན་བྱས་ལ། །དེ་འོག་སྔགས་པ་བློ་ལྡན་པས། །ཡང་དག་པར་ནི་སྦྱོར་བ་བརྩམ། །ཨོཾ་བཛྲ་ས་མ་ཡ་སིངྡྷི་ཨཱ། །ཨོཾ་སརྦ་རཀྵ་སརྦ་སིདྡྷ་ཨཱཿཧཱུྃ། རང་བཞིན་མི་གནས་དགོས་པ་ཡིས། །ཀུན་རྫོབ་དྲི་མ་སྦྱང་བར་བྱ། །དེ་ནས་སྣ་ཚོགས་འབྱོར་པ་ལས། །གོང་དུ་སྨོས་པའི་དཀྱིལ་འཁོར་ཉིད། །ཡོངས་སུ་རྒྱས་པར་བྲི་བར་བྱ། །རྫས་རྣམས་ཕུན་སུམ་ཚོགས་པ་ལ། །མཆོད་པས་ཡང་དག་མཆོད་པར་བྱ། །དེ་ཉིད་གཟུགས་ལ་རབ་ཏུ་ཡང་། །གནས་པས་བདག་ཉིད་དེ་ཉིད་དུ། །ཡང་དག་པར་ནི་བསྐྱེད་པར་བྱ། །པདྨ་ཉིད་ལ་གོས་ལ་སོགས། །སྔོན་པོས་ཡང་དག་དཀྲིས་བྱས་ལ། །བདུད་རྩི་འཁྱིལ་པའི་སྔགས་ཀྱིས་སུ། །དྲི་ཆུས་གཏོར་ཞིང་གཞུག་པར་བྱ། །

མདུན་དུ་ངེས་པར་གནས་པ་ལས། །ཆེ་ཆུང་དེ་ཉིད་འབྱོར་པ་ཡིས། །ཡོན་ཉིད་ཁས་དག་ལེན་དུ་གཞུག །ཐལ་མོ་བདག་གིས་བཟུང་བྱས་ལ། །སེམས་བསྐྱེད་ལ་སོགས་རྒྱས་པར་བརྗོད། །སྣང་བ་སྣ་ཚོགས་ངེས་པ་ལས། །རིགས་ནི་རྗེས་སུ་གཟུང་བར་བྱ། །མེ་ཏོག་སྔོན་པོའི་ཕྲེང་བ་ཡིས། །སྔགས་བརྗོད་པས་ནི་བོར་བར་བྱ། །དེ་ལྟར་ལྷ་ཚོགས་རབ་བསྟན་ནས། །བུམ་པའི་ཆུ་ཡིས་སློབ་མ་ལ། །དབང་བསྐུར་སློབ་དཔོན་བདག་ཉིད་ཀྱིས། །བྱིན་པ་བུམ་པའི་དབང་ཡིན་ཏེ། །རགས་པ་རྣམ་པར་དག་པར་འདོད། །དེ་ནས་ཕྱག་རྒྱ་བཅས་པ་ལས། །བྱང་ཆུབ་སེམས་ལྡན་མཉམས་པས། །བདག་དང་གཞན་རྣམས་གང་རུང་བས། །བདེ་བ་མངོན་དུ་རབ་སྦྱར་ནས། །བསམ་པས་ཡང་དག་སྦྱར་བྱས་ཏེ། །ཐབས་དང་ཤེས་རབ་ཕྱག་རྒྱ་ཡིས། །དེ་ཡི་ཁ་རུ་སྦྱིན་པར་བྱ། །དེ་དག་གསང་བའི་དབང་ཡིན་ཏེ། །དེ་འོག་རྣམ་པར་དག་པ་ཡིན། །དེ་ནས་བདག་ཉིད་དངོས་པོ་གང་། །བུ་མོ་མདོག་བཟང་སྔོན་མོ་ལ། །གར་དང་ལྡན་པའི་ཡངས་པས་བསྐྱོད། །ཆོ་གས་ཡང་དག་བཟུང་བྱས་ལ། །ཐབས་གཉིས་རབ་ཏུ་བསྐྱོད་པ་ཡིས། །སྣ་ཚོགས་དངོས་པོ་སྣང་བ་ཡིས། །དེ་འོག་སོར་བཞི་གཞལ་བྱས་ནས། །ཤེས་རབ་གཉིས་ལ་མནན་པ་ཡིས། །བདེ་བ་དཔག་ཏུ་མེད་པ་མྱོང་། །དེ་མྱོང་སྐད་ཅིག་རྫོགས་པ་ཡིས། །དཔེ་ལ་བལྟས་པ་ཡིན་པར་བསྟན། །དེ་ཡིས་ཤེས་རབ་ཡེ་ཤེས་ཀྱི། །དབང་ཉིད་མངོན་པར་རྫོགས་པར་འགྱུར། །དེ་རྫོགས་སེམས་ཉིད་དག་པ་དེ། །བཞི་པ་ཆོས་ཉིད་མངོན་རྟོགས་དབང་། །མེད་པར་མངོན་པར་སྣང་བར་འགྱུར། །དེ་ཡིས་སྤྱི་ལ་ཁྱབ་གནས་ཏེ། །རང་ལ་ཡོད་བཞིན་ངེས་པར་སྤངས། །ཨོཾ་ཨཱ་ཁི་བཱི་ར་ཧཱུྃ། ཨོཾ་ཡ་ཐཱ་ཀུ་ལ་ཏ་ཐཱ་ཨ་ཧྃ།སངས་རྒྱས་ཀུན་གྱི་ཕྱག་བརྙན་འབར། །དེ་ཉིད་དུ་ནི་སློབ་མ་འགྲུབ། །དར་ལ་སོགས་པ་སྔོན་པོ་ཡིས། །སློབ་མ་ཉིད་ལ་དབང་བསྐུར་ལ། །སྔགས་འདི་ཡིས་ནི་བྱིན་རླབས་ལ། །དང་པོ་གཉིས་སྦྱར་དར་བཟུང་ནས། །སྔགས་ཀྱིས་ཡང་དག་བསྐོན་པར་བྱ། །མཁའ་ལྡིང་སྔོན་པོ་འདབ་རྒྱས་

པ། །མགུལ་བ་དར་དཔྱངས་ལྡན་པ་ཡིས། །བུ་ཉིད་ལ་ནི་ངེས་པར་སྦྱིན། །དངོས་གྲུབ་སྣ་ཚོགས་འགྲུབ་པ་དང་། །གདོན་རྣམས་ཐམས་ཅད་འཇོམས་པ་དང་། །བེ་ཅོན་སྔོན་པོ་དབྱིག་དང་ལྡན། །མེ་ཏོག་སྔོན་པོའི་ཕྲེང་བས་ཀྱང་། །དེ་ཉིད་ལ་ནི་བསྐོན་བྱས་ནས། །སྔགས་དང་ཕྱག་རྒྱ་འདིར་ལྡན་པའི། །བུ་ཉིད་ལ་ནི་སྦྱིན་པར་བྱ། །དང་པོ་གསུམ་པ་རབ་སྦྱར་བས། །སྤྱི་བོའི་སྟེང་དུ་ངེས་བཟུང་སྟེ། །དེ་ནི་བྱེད་པ་པོ་ལ་བཞག །བདག་ཉིད་ཡན་ལག་རིགས་ངན་གྱིས། །དབུས་ཀྱི་གཡོན་པ་བགྲང་བྱས་ལ། །རིགས་ཚད་ཡན་ལག་བཅིངས་པ་ཡིས། །ཕྱིར་ཏེ་བྱེད་པ་པོ་ལ་བཞག །དེ་ཡི་སྟོད་ལ་གནས་བྱ་བ། །ཚངས་པ་ཆེན་པོ་མཐོང་བྱེད་དང་། །མཆོད་པ་ཀུན་གྱིས་སྡུད་པ་ཡིས། །དར་དམར་རས་སམ་གང་རུང་བའི། །སྔགས་ཆུས་དག་བྱས་ལེགས་བཀབ་ནས། །བཞི་རུ་ངེས་པར་གཅིག་པ་ཡི། །དངོས་པོ་གང་དག་གདགས་པར་བྱ། །ཕྱག་རྒྱ་འདའ་མིན་གྲགས་པར་ལྡན། །བྱིས་པས་སྔགས་བཟླས་ཡང་དག་ལྡན། །ཀུན་ལ་ཁྲོ་གཉེར་བརྗིད་པར་བལྟ། །ཨོཾ་ཨུ་ད་ར་སཾ་གྷ་བ་བྷུ་ཡ་ཧཱུྃ། ཨོཾ་ག་རུ་ཌ་སརྦ་ནཱ་ག་བྷ་ཀྵཱ་ཡ་ཧཱུྃ། ཨོཾ་བ་རྃ་དན་ད་ཀ་སརྦ་སིདྡྷི་པྲཱཔྟ་ཧཱུྃ། ཨོཾ་ཨཱཛྙཱ་པ་ཡ་ཏི་ལོ་ཀ་པ་ཤི་ཀ་རཱ་ཡ་ཧཱུྃ། དེ་ཡི་ལག་པ་སྒྲོམ་བྱས་ལ། །བདག་གིས་དྲག་པོའི་ལས་སྦྱོར་བ། །དེ་ཡི་སྒྲོམ་ནས་དྲངས་བྱས་ལ། །སྙིང་པོ་འདི་ཉིད་ངེས་པར་སྦྱིན། །ཨོཾ་ཙཎྜ་མ་ཧཱ་རོ་ཥ་ཎ་བཛྲ་པཱ་ཎི་ད་ཧ་ད་ཧ། སརྦ་བིགྷ་ནཱྃ། ཧ་ན་ཧ་ན་སརྦན། སརྦ་ཨརྠ་ཤཱི་གྷྲཾ་ཀུ་རུ་ཡ་ཧཱུྃ། དེ་ནས་ལེགས་པའི་མཚན་མ་ལ། །ཆོས་ལ་དབང་སོགས་མི་གནས་ན། །འཇུག་པར་འགྱུར་བ་ག་ལ་སྲིད། །རྒྱུད་གཞན་ལ་ནི་སྤྱི་དབང་གནས། །དེ་ནས་ཀུན་ལ་འཇུག་པར་འགྱུར། །སྤྱི་ཉིད་དབང་ལ་མི་ལྟོས་པར། །དེ་ཉིད་ལ་ནི་རྟོག་པའི་མཆོག །འདི་ཡིས་འཇུག་པ་ཁོ་ན་ཡིན། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་དབང་གི་ལེའུ་སྟེ་དྲུག་པའོ།། །།དེ་ནས་ལག་ན་རྡོ་རྗེ་ཡིས། །གསང་བའི་མགོན་ལ་འདི་སྐད་གསོལ། །ཐམས་ཅད་རྫོགས་པ་ཆེན་པོ་ཡིས། །རིམ་པའི་རྣལ་འབྱོར་གསུང་དུ་གསོལ། །བདེ་གཤེགས་

གསང་བས་བཀའ་སྩལ་པ། །སྟེང་དང་འོག་གི་སྟེང་དུ་གཉིས། །དཀྱིལ་འཁོར་བཞི་ཡི་བདག་ཉིད་ནི། །ཐམས་ཅད་ཤེས་རབ་དམ་པ་སྟེ། །ཡོན་ཏན་སྡུད་སོགས་ཚོགས་སྙིང་པོ། །ས་བོན་འབྲས་བུ་རྣམ་པ་ཡིས། །སྤར་དང་བསྒོམ་ལ་ལྟུང་བར་འགྲུབ། །རྣམ་པར་སྣང་མཛད་གནས་དག་ཏུ། །རྩ་གཉིས་གཉིས་ཀྱི་བདག་ཉིད་ཅན། །གློ་གཏད་རྩེ་ལ་ལྟུང་གྱུར་ནས། །བདེ་དེ་གྱེན་དུ་བཟློག་པས་ནི། །ཐམས་ཅད་གནས་སུ་གཅིག་ཏུ་འགྱུར། །སྣང་བ་མཐའ་ཡས་གནས་དག་ཏུ། །བརྒྱད་གཉིས་ཤེས་རབ་རི་མོར་བཅས། །དབུས་ཀྱི་བྱང་ཆུབ་ཐིག་ལེ་ལ། །གློ་གཏད་སྣང་མཛད་གནས་སུ་བྱིན། །དེ་ཡིས་སངས་རྒྱས་ཐམས་ཅད་བཀུག །ཡིད་བཞིན་ནོར་བུ་དང་འདྲར་འགྱུར། །འོག་ནས་རང་གི་གནས་སུ་བསྡུ། །རྡོ་རྗེ་སེམས་དཔའི་གནས་དག་ཏུ། །བརྒྱད་དང་བཞི་ཡི་བདག་ཉིད་ཅན། །དང་པོ་ས་དང་འབྱུང་བ་ཡིས། །ངེས་པའི་རི་མོ་བསམ་པར་བྱ། །རང་གི་ས་ནས་མཐའ་ཡས་བསྐུལ། །འདྲེས་པའི་བདེ་བའི་གནས་སུ་ཕྱིན། །ཐམས་ཅད་འདྲེས་པར་རང་གི་སར། །བདེ་དང་ལྡན་ནས་དེ་ཡིས་འགྲུབ། །སྤྲུལ་པའི་གནས་སུ་བཅུ་གསུམ་ལ། །གཉིས་པ་གཉིས་དང་ཡང་དག་ལྡན། །ཡི་གེ་ཐིག་ལེ་བཅས་པ་ཡིས། །འགྲོ་རྣམས་བདེ་བའི་གནས་སུ་སྤྲོས། །སླར་འདུས་དེ་རུ་དངོས་གྲུབ་འགྱུར། །ཡང་ན་རྟག་ཆད་བྲལ་བ་ཡི། །དབུ་མ་ཆེན་པོའི་དབྱིངས་ཉིད་དུ། །ཡེ་ཤེས་ཕྲ་མོ་མར་གྱིས་སྤྲོས། །དབྱིངས་ལ་ཐུག་ནས་མར་ལ་བྱུང་། །དེ་ཚེ་མི་གནས་བསམ་དང་བྲལ། །འདོད་ཆགས་དག་དང་ལྡན་གྱུར་ན། །ཅིག་ཤོས་ལེན་པའི་ཡོན་ཏན་ལྡན། །རྩེ་མོར་མ་དང་ཕཊ་ལྡན་པས། །ཙཎྜ་ལཱི་ཡི་དྲོད་བྱུང་ནས། །སེམས་དཔའ་ཡེ་ཤེས་རྩེ་ལ་ཟུང་། །དེ་ཡིས་ཡང་སྤྲུལ་གནས་སུ་བཀུག །སྙོམས་པར་ཞུགས་ཤིང་གཡོ་བས་བཟློག །ཐ་མའི་ཡི་གེ་འགྲོ་འོང་ནི། །ཞུ་བའི་བསམ་པས་བྱ་བར་གསུངས། །དེ་ནས་དེ་བསང་དངོས་གྲུབ་འགྱུར། །ཡང་ན་འོག་གི་ཐིག་ལེ་བཞི། །རླུང་དེ་སྤྲུལ་པའི་འཁོར་ལོར་འདུས། །དྲོ་བར་བྱང་ཆུབ་སེམས་བཀུག་ནས། །རྩེ་ལ་ཕྱིན་ནས་ནུབ་བྱང་བསམ། །སླར་

ལོག་ཕར་འགྲོ་ཡང་དང་ཡང་། །ཐ་མ་སྙོམས་པར་ཞུགས་གྲུབ་འགྱུར། །ཡང་ན་གནས་བཞི་གསུམ་པོ་དག །གང་ཡང་རུང་བས་སྟེང་དུ་ཕྱིན། །སླར་ལོག་རྡོ་རྗེ་རྩེ་ལ་བཏོན། །ཚུར་ལོག་གནས་ནས་ལས་རྣམས་བྱས། །དེས་ནི་དངོས་གྲུབ་ཆེན་པོ་ཡང་། །རྡོ་རྗེ་བཞིན་དུ་འགྲུབ་པར་བསམ། །ཁམས་གསུམ་ཐམས་ཅད་དག་པ་དང་། །ཞིང་རྣམས་གཙང་མར་སྐྱེ་བར་འགྱུར། །བསམ་གཏན་དེ་དང་ལྡན་པའི་ཚེ། །གཞན་པའི་ཡུལ་དུ་འགྲུབ་འགྱུར་སྤང་། །སྤང་བ་མ་ཡིན་བླང་བ་མིན། །སྙོམས་པ་དེ་ཡི་ངང་ལ་བཞག །གཟུགས་དང་སྒྲ་ལ་སོགས་པ་ཡི། །རང་གི་སེམས་གཡེང་འགྱུར་བའི་ཚེ། །བསྟན་པའི་རང་བཞིན་མེད་པ་བསམ། །བར་དུ་སོ་སོའི་ཐིག་ལེ་བསམ། །ཐམས་ཅད་སྒྱུ་མ་ལྟ་བུར་བརྟག །དང་པོ་དང་པོའི་དུས་དག་ཏུ། །འདོད་པའི་ཡོན་ཏན་ལྷ་མོར་བསམ། །དེས་ནི་རྟོག་པ་ཞི་བར་འགྱུར། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ལས་ཐམས་ཅད་རྫོགས་པ་ཆེན་པོའི་རིམ་པ་རྣལ་འབྱོར་པའི་ལེའུ་སྟེ་བདུན་པའོ།། །།དེ་ནས་ལག་ན་རྡོ་རྗེ་ཡིས། །བཅོམ་ལྡན་མགོན་ལ་འདི་སྐད་གསོལ། །འཇིག་རྟེན་ཀུན་ལ་ཕན་གདགས་ཕྱིར། །གཏོར་མའི་རིམ་པ་གསུང་དུ་གསོལ། །ཀུན་མཁྱེན་མགོན་གྱིས་བཀའ་སྩལ་པ། །རྣལ་འབྱོར་རྣམས་ལ་ཕན་གདགས་ཕྱིར། །བདག་གིས་གཏོར་མ་བཤད་པར་བྱ། །ཕན་གདགས་པ་དང་ཚར་གཅད་པ། །ཕན་པ་མཆོག་དང་ཐུན་མོང་ངོ་། །གསང་བ་བླ་མེད་མཆོག་ཏུ་འདོད། །ཕྱི་ནང་ཐུན་མོང་ཤེས་པར་བྱ། །རྒྱས་དང་བསྡུས་དང་ཤིན་ཏུ་བསྡུས། །ཚར་གཅོད་པ་ཡང་ཤེས་པར་བྱ། །དགུག་དང་བསྐྲད་དང་གསད་པར་དང་། །གནན་དང་བསྲེག་པར་ཤེས་པར་བྱ། །རྒྱུན་དུས་ཆེན་པོའི་གསུམ་ཉིད་དང་། །ཆུང་ངུ་རྒྱུན་ནམ་དུས་ཆེན་གྱི། །བཅུ་གཉིས་བཞི་འམ་ཐ་མ་གཅིག །རྩ་བ་ལྔ་འམ་ཡན་ལག་ལྔ། །འབྲུ་དང་ཤིང་ཏོག་སྨན་རྣམས་དང་། །ཆ་མཐུན་འབུར་བ་ལ་སོགས་རྫས། །དེ་སྟེངས་དཀར་གསུམ་ཀླུ་ལ་ཤིས། །ཁྲག་སྣ་སྙིང་སྣ་ཤ་སྣ་གསུམ། །དེ་སོགས་མཐུན་རྫས་ཚར་གཅད་པའི། །བསྐྱེད་

རིམ་དང་ནི་ལྡན་པ་ཡིས། །བླ་ནས་བསྲུང་བ་བྱས་པ་ལས། །ཆོ་ག་གསུམ་དུ་བྱས་པ་འམ། །ཡང་ན་སྐད་ཅིག་ལྷར་བསྐྱེད་ལ། །མཚན་དང་ལྡན་པའི་པདྨ་རུ། །རྫས་རྣམས་ཀུན་གྱིས་བཀང་ནས་ནི། །ཟླ་བ་རྡོ་རྗེ་ཧཱུྃ་གིས་མཚན། །མཐོ་གང་ལ་ནི་རི་བོང་ཅན། །དེ་ལ་བཅུ་དྲུག་བདུན་པའི་མཚན། །རྡོ་རྗེ་མཚན་ལྡན་པ་རུ་ནི། །སྡུད་སྤྱོད་འཕྲོ་བའི་མཐིང་དམར་དཀར། །པད་འོད་ཡེ་ཤེས་ལྔ་ལྡན་གསུམ། །གྲུ་གསུམ་འོག་ནས་ཟླ་གམ་ཅན། །ཐུགས་ཀྱི་མཐིང་ནག་འཕྲོ་བ་ལས། །རྡོ་རྗེ་ལྟེ་བསྐུལ་མཐའ་གསུམ་བསྐྱོད། །དམར་པོ་འབར་བས་མཚན་ལྡན་ཁྲོལ། །ཐུགས་ཀྱིས་བསྡུས་ཤིང་གསུང་གིས་སྦྱངས། །སྐུ་ལས་འཕྲོས་པའི་རི་འོད་བསྐུལ། །ཤེས་རབ་ཅན་ལས་འོད་ཟེར་འཕྲོས། །དེ་ཡིས་ཡབ་ཡུམ་བསྐུལ་ནས་ནི། །ཁ་དོག་དཀར་པོའི་བདུད་རྩི་འབབ། །དང་པོ་སྐུལ་བྱེད་འོད་དུ་ཞུ། །ཁོང་སེང་གནས་པ་པདྨར་འབབ། །བབ་པའི་རྟིང་ལ་དེ་ཉིད་ལྟུང་། །ལན་གསུམ་བསྐོར་བས་འོག་མ་བཞིན། །བཞི་པའི་དང་པོ་གཉིས་པར་མཚན། །དེ་ནས་གདན་བསྐྱེད་འཁོར་བཅས་བཀུག །ཛི་བཾ་རྡོ་རྗེ་ཁོང་སེང་གིས། །བཞི་པའི་དང་པོ་གཉིས་པར་བསམ། །ཡང་ན་ཡུད་ཙམ་ལྷར་བསམས་ལ། །ཐུགས་ཀར་ཉི་མ་དེ་སྟེང་ཧཱུྃ། །འོད་ཀྱིས་ཆོས་འབྱུང་གྲུ་གསུམ་སྤྲུལ། །དེ་ཡི་ནང་དུ་པདྨ་ནི། །འདབ་བརྒྱད་དུར་ཁྲོད་དེ་དབུས་སུ། །ཡྃ་ལས་རླུང་བྱུང་རྃ་ལས་མེ། །དེ་སྟེང་ཨ་ལས་ཀ་པཱ་ལ། །ནང་དུ་བདུད་རྩི་ཨོཾ་ཨཱཿཧཱུྃ། དེ་སྟེང་ཟླ་བ་རྡོ་རྗེ་ཧཱུྃ། །ཟླ་ཨྃ་འོད་འཕྲོས་བདུད་རྩི་བཀུག །བསྡུས་དང་བཞུ་དང་བདུད་རྩིར་བསམ། །ཡི་གེ་གསུམ་དང་གོ་རིམས་བཞིན། །ཐུགས་ལས་འོད་འཕྲོས་རླུང་ལ་ཕོག །རླུང་གིས་མེ་སྦར་ཐོད་པ་བསྐོལ། །དེ་ཡི་རྐྱེན་གྱིས་བསྡུས་པ་དང་། །གཞུ་དང་མདུང་རྩེར་བསྡུས་པ་དང་། །ཡི་གེ་གསུམ་དང་སྦྱར་ལ་དབུལ། །ཡང་ན་ལྷ་མོ་དཀར་མོ་ཡིས། །མཚན་ལྡན་དག་ནི་བཀང་ལ་མཆོད། །ཡང་ནི་སྐད་ཅིག་ལྷར་བསྐྱེད་ལ། །ཐུགས་ཀའི་ཧཱུྃ་གིས་བདུད་རྩི་སྦྱངས། །སླར་ཡང་ཡེ་ཤེས་བདུད་རྩི་བབ། །ཡུད་ཙམ་སྤྲུལ་པས་ལྷ་ཡིས་གསོལ། །བསྟོད་

ནས་གཤེགས་ཤིང་ལས་བཅོལ་ལོ། །རྒྱས་དང་བསྡུས་དང་ཤིན་ཏུ་བསྡུས། །ཁ་ཟས་སྤྱད་པ་བསྡུས་དང་མཐུན། །དེ་ལྟར་ཡི་གེ་བརྒྱ་པས་བཤགས། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གཏོར་མའི་ཆོ་གའི་ལེའུ་སྟེ་བརྒྱད་པའོ།། །།དེ་ནས་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །རྣལ་འབྱོར་ཐམས་ཅད་བཀྲ་ཤིས་དང་། །གནོད་པ་ཐམས་ཅད་བསལ་བའི་ཕྱིར། །སྦྱིན་སྲེག་ཆོ་ག་གསུང་དུ་གསོལ། །འཇིག་རྟེན་མགོན་གྱིས་བཀའ་སྩལ་པ། །གཞན་དག་དྲན་པ་བསྐྱེད་པ་དང་། །དངོས་གྲུབ་ལྡན་པ་ཐོབ་འདོད་པས། །མན་ངག་རིམ་པར་དྲན་པའི་ཕྱིར། །རྣལ་འབྱོར་དོན་དུ་བཤད་པར་བྱ། །སྔོན་དུ་བསྙེན་པ་བྱས་པ་ཡིས། །བསྒྲུབ་པ་ཡི་ནི་དུས་དག་ཏུ། །སྦྱིན་སྲེག་གིས་ནི་ལས་ཀུན་འགྲུབ། །ས་བརྟག་བསླང་ཞིང་སྦྱང་བ་དང་། །བྱིན་གྱིས་བརླབས་ཤིང་བསྲུང་བ་དང་། །ས་གཞི་དཀར་པོར་རྒྱར་ཁྲུ་གང་། །ཟབས་སོར་བཅུ་གཉིས་ཟླུམ་པོར་བྱ། །དེ་དབུས་རྡོ་རྗེ་རྩེ་ལྔ་པ། །སོར་ནི་བརྒྱད་པ་དག་ཏུ་བྱས། །ཐབ་དེ་པ་ཡི་རྣམ་ལྔ་དང་། །ནང་ཀུན་དྲི་ནི་དཀར་པོས་བྱུག །དུས་གསུམ་མེ་ཏོག་དཀར་པོས་གཏོར། །ཡམ་ཤིང་ནིམ་པ་པ་ལ་ཤ། །ཨུ་དུམ་བ་ར་ཨ་མྲ་ལ། །སོགས་པ་བྱང་ཆུབ་ཤིང་དག་དང་། །འདབ་མ་ཅན་དང་འོ་མ་ཅན། །བརླན་དང་བཅས་པ་མཉམ་བཅད་ལ། །རྩེ་མོའི་ཆ་ལས་བྱུང་བ་ཡི། །མཐོ་གང་ཙམ་ནི་འོ་མ་དང་། །མར་དང་སྦྲང་རྩི་ལ་སོགས་པ། །རྩེ་གཉིས་ལོ་མ་བཅས་པ་དབུལ། །རྙིང་རུལ་གས་དང་འབུས་ཟོས་པ། །སྲོག་ཆགས་གནས་པ་སྤང་བར་བྱ། །ནས་དང་བྲ་ཡོས་ཏིལ་དག་དང་། །འབྲས་ཆེན་ཡུངས་ཀར་མར་དང་ཞོ། །མེ་ཏོག་ཐང་ཆུ་དྲི་ཞིམ་དང་། །ཇི་ཙམ་རྙེད་པ་དབུལ་བར་བྱའོ། །བུད་ཤིང་དག་གི་རྣམ་པ་ཡང་། །ཐབ་ལས་ཅུང་ཟད་དམའ་བར་ནི། །དགོན་པའི་བ་ཡི་ལྕི་བས་བྱ། །དེ་ནས་སྔགས་པ་ལུས་བཀྲུས་ཏེ། །དྲི་ཞིམ་སྤོས་དང་གླ་བས་བྱུག །ཚད་མེད་བཞི་ཡི་སེམས་ལྡན་ཞིང་། །ཞི་བའི་རྒྱན་བཅས་དཀར་པོ་བགོས། །ལྷ་ཡི་རྣལ་འབྱོར་གསལ་བྱས་ལ། །སྲོད་དང་

སྔ་དྲོའི་དུས་སུ་ནི། །ཤར་ཕྱོགས་སུ་ནི་ཁ་བལྟས་ལ། །ཞི་བའི་སེམས་ཀྱིས་ཞི་བ་བྱ། །མཆོད་ཡོན་འབྲུ་དང་བཅས་པ་ཡི། །དྲི་ཞིམ་པ་ཡི་ཆུས་བྱུགས་ལ། །རང་གི་ལྷ་ཡི་སྙིང་པོ་བརྗོད། །ལས་ཐམས་ཅད་པའི་ཆུ་དང་ནི། །རྡོ་རྗེ་གནོད་སྦྱིན་སྔགས་ཀྱིས་བསང་། །ལས་རྣམས་ཐམས་ཅད་བུམ་པ་དང། །མཆོད་ཡོན་གཡོན་དུ་གཞག་པར་བྱ། །བུད་ཤིང་བསྲེག་རྫས་གཡས་སུ་བཞག །དེ་ནས་ཨོཾ་བཛྲ་ཡཀྵ་ཧཱུྃ། །ཞེས་པས་མེ་ནི་སྦར་བ་སྟེ། །རླུང་ཡབ་ཀྱིས་ནི་མེ་སྦར་རོ། །ཨོཾ་ཛྭ་ལ་ཛྭ་ལ་ཧཱུྃ། དེ་ནི་མེ་སྦར་སྙིང་པོ་ཡིན། །དེ་ནས་ཧཱུྃ་གིས་ཐབ་བསྐྱེད་ལ། །དེ་དབུས་རྃ་ལས་གྲུ་གསུམ་མེ། །ཨོཾ་ལས་པདྨ་ལ་གནས་པ། །རྃ་ལས་བྱུང་བའི་མེ་ལྷ་ནི། །སྐུ་མདོག་དཀར་པོ་རྒྱན་དང་ལྡན། །འབར་བའི་ཕྲེང་བས་རབ་ཏུ་བརྒྱན། །གསུས་ཁྱིམ་ཆེ་ལ་ཕྲེང་བ་གཡོན། །གུཎྜེ་འཛིན་པའི་རྡོ་རྗེ་མེ། །རང་ལྷའི་རྣལ་འབྱོར་དང་ལྡན་པས། །ཐུགས་ཀའི་ས་བོན་འོད་ཟེར་གྱིས། །མེ་ལྷ་ཡེ་ཤེས་སེམས་དཔའ་བཀུག །བཀུག་ཅིང་དབང་དུ་བྱ་བའོ། །དེ་ནས་དབང་ནི་བསྐུར་བ་དང་། །སྐུ་གསུང་ཐུགས་བྱིན་བརླབ་པའོ། །དེ་ནས་མཆོད་ཡོན་ཕུལ་ནས་ནི། །མཆོད་པ་ལྔས་ནི་རབ་མཆོད་དོ། །སྒེག་མོ་ལ་སོགས་མཆོད་པས་མཆོད། །ཨོཾ་ཨགྣ་ཡེ་ཧ་བྱ་ཀ་བྱ་བ་ཧ་ན་ཡེ་ཧ་བྱ་ཏི་ཡ་ན་ཡེ་སྭཱ་ཧཱ། ཞེས་པས་བསྲེག་རྫས་རྣམས་དབུལ་བྱ། །དེ་ནས་དབུལ་བའི་རིམ་པ་ནི། །འབར་བའི་མེ་ལ་ཡམ་ཤིང་སྟེ། །དེ་ནས་མར་དང་དེ་འོག་ཏིལ། །དེ་ནས་འབྲས་ཆན་ལ་སོགས་པའོ། །དེ་ནས་བསྟོད་དེ་ལས་བཅོལ་ལོ། །དེ་ནས་མེ་ཡི་དབུས་རང་གིས། །ལྷག་པའི་ལྷ་ཉིད་རིམ་པ་བཞིན། །དབང་བསྐུར་བ་དང་བསམ་པར་བྱ། །སྐུ་གསུང་ཐུགས་སུ་བྱིན་གྱིས་བརླབས། །དེ་ཡང་མཆོད་ཡོན་ཞབས་བསིལ་ཕུལ། །མཆོད་པ་རྣམ་པ་ལྔ་དག་དང་། །སྒེག་མོ་ལ་སོགས་པ་རྣམས་དབུལ། །དེ་ནས་ཕྱག་ན་རྡོ་རྗེ་ནི། །གོས་སྔོན་ལྕེ་ལ་ཧཱུྃ་བསམས་ལ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཤཱནྟིཾ་ཀུ་རུ་སྭཱ་ཧཱ། སྔ་མའི་རིམ་པ་བཞིན་དུ་བྱ། །བསྲེག་རྫས་རེ་རེ་ལ་བདུན་བདུན། །

ཡང་ན་གསུམ་གསུམ་དབུལ་བར་བྱ། །བཟླས་མཐར་སྦྱིན་སྲེག་བྱ་བར་གཅེས། །དེ་ལ་མར་གྱི་སྦྱིན་སྲེག་དབུལ། །ཡང་ན་མ་གྲུགས་ནས་དག་དང་། །ཡུངས་ཀར་མར་དང་སྦྱར་ལ་དབུལ། །སོ་བ་མར་དང་ཡུངས་ཀར་ལ། །སོགས་པས་ལས་ཀྱི་སྒྲིབ་པ་སྦྱང་། །དེ་ཕྱིར་ཉི་ཤུ་རྩ་གཅིག་གམ། །ཡང་ན་བརྒྱ་རྩ་བརྒྱད་དུ་དབུལ། །དེ་ནས་མཆོད་ཡོན་དང་འཐོར་འཐུང་ཕུལ་ལ་བསྟོད་པར་བྱའོ། །ཨོཾ་ཡེ་ཤེས་ཆེན་པོའི་ཁྱད་པར་ལས། །སྤྲུལ་པ་ཕྱག་ན་རྡོ་རྗེ་སྟེ། །མཐོན་མཐིང་སྐུ་འདྲ་འོད་ཟེར་འབར། །བདུད་འདུལ་ཁྲོ་གཏུམ་བརྗིད་པའི་ཞལ། །ཕྱག་གཡས་རྡོ་རྗེ་རྩེ་ལྔ་བསྣམས། །དྲིལ་བུས་གཡོན་གྱི་དཀུར་བརྟེན་འགྱིང་། །སྐུ་ནི་རྒྱན་དང་ན་བཟས་བརྒྱན། །ཕྱག་བརྙན་བྱེ་བའི་ཚོགས་ཀྱིས་བསྐོར། །དེ་ལ་བསྟོད་དེ་ཕྱག་འཚལ་ལོ། །དེ་ནས་ཡང་མེ་ལྷ་སྔ་མ་བཞིན་དུ་མཆོད་ལ་བསྟོད་དོ། །དྲག་པོ་མཎྜལ་གྲུ་གསུམ་ལ། །ཁྲུ་གང་ཚད་ལས་ཕྱེད་བརྐོས་ཏེ། །ལྷོ་ཕྱོགས་ཟུར་བསྟན་གསུམ་ནི་དོར། །བདུད་རྩི་ལ་སོགས་ནག་པོར་བྱ། །དེ་དབུས་རྡོ་རྗེ་སྟེང་སྦངས་ཏེ། །བར་དུ་མེ་རི་རྩེ་མོ་འཕགས། །བུད་ཤིང་གནག་ཅིང་གདུག་པའི་ཤིང་། །ཐབ་ཀྱི་ཚད་ལས་ཟོར་མཐོ་ཙམ། །ཡངས་ཤིང་དེ་མཐུན་བཅུ་གཉིས་ཚད། །མཆོད་རྫས་ནག་པོ་འབའ་ཞིག་གོ །བསྲེག་རྫས་མར་ནག་རུས་ཁྲག་ཤ། །སྐྱེ་ཚེ་ཤང་ཚེ་ཡུངས་ཀར་དང་། །དེ་ལ་སོགས་པའི་མཐུ་རྫས་དང་། །དེ་རྣམས་རྫས་ལ་གཟུགས་བརྙན་བྱ། །མཆོད་རྫས་གཡས་ལ་བསྲེག་རྫས་གཡོན། །བྱིན་གྱིས་བརླབ་ཅིང་གཞག་པར་བྱ། །དགང་གཟར་བླུགས་གཟར་གཞན་དང་མཐུན། །ཡང་ན་ལག་པ་དག་གིས་བྱ། །དེ་གཉིས་རྡོ་རྗེ་དྲིལ་བུ་ཡང་། །མདུན་ཉིད་དུ་ནི་གཞག་པར་བྱ། །ལས་ཀྱི་བུམ་པས་ཐམས་ཅད་བསང་། །དུས་ནི་ནམ་ཕྱེད་ཉིན་ཕྱེད་བྱ། །ནག་པོ་རྒྱན་གོན་ལྷོ་ཕྱོགས་བལྟ། །གཡོན་བརྐྱང་འདུག་སྟེ་དྲག་ཏུ་བཟླས། །མཆེ་བ་གཙིགས་ཤིང་ཁྲོ་གཉེར་བསྡུས། །དང་པོ་བསྙེན་པ་སྔོན་སོང་བས། །མེ་བྲ་བརྟག་ཅིང་བགེགས་བཟློག་བྱ། །བཟང་ན་དེ་ནི་བྱ་མི་དགོས། །ཐབ་བསང་བྱ་ཞིང་བསྐྱེད་

པ་དང། །ཆོ་ག་གསུམ་མམ་སྐད་ཅིག་མས། །མེ་ལྷ་ནག་པོ་ཁྲོས་པ་བསྐྱེད། །ཡེ་ཤེས་མེ་ལྷ་སྤྱན་དྲངས་བསྟིམ། །གཉིས་སུ་མེད་པར་རྒྱས་བཏབ་ལ། །མེ་ལྷའི་སྔགས་མཆོད་བཏགས་ལ་དབུལ། །དེ་ནས་བསྲེག་རྫས་དབུལ་བར་བྱ། །དེ་དབུལ་བ་ཡི་མན་ངག་ཀྱང་། །ཁྲོ་བོ་བདག་གི་ཆོ་འཕྲུལ་གྱིས། །གཟུགས་བརྙན་བཀུག་བསྟིམ་གཏུབས་ཏེ་དབུལ། །ཡང་ན་རྫས་མཆོག་མཉེས་པ་ལས། །འོད་ཟེར་ཁྲོ་བོས་བཀུག་ཅིང་བསྲེག །མན་ངག་དེ་ལ་ནན་ཏན་བྱ། །ཨོཾ་བཛྲ་ཀྲོ་དྷ་ཨགྣ་ཡེ་ཆེ་གེ་མོ་མཱ་ར་ཡ་ཕཊ། སྟོང་ངམ་བརྒྱ་འམ་ཉི་ཤུ་རྩ་གཅིག་གོ །ཡང་ན་བསོད་ནམས་རིམ་པ་ཡིས། །བརྒྱ་དང་སྟོང་དང་ཁྲི་རུ་བྱ། །དེ་ལྟར་བྱས་ན་ལས་ཀུན་འགྲུབ། །ཐ་མར་དགང་བླུགས་བསྟོད་བྱའོ། །དེ་ཡི་ཐུགས་ཀར་གོས་སྔོན་བསྐྱེད། །ཡེ་ཤེས་སེམས་དཔའ་སྤྱན་དྲངས་བསྟིམ། །རྒྱས་བཏབ་མཆོད་པ་གོང་བཞིན་དབུལ། །དེ་ནས་བསྲེག་སྔགས་གོང་བཞིན་དབུལ། །ཨོཾ་བཛྲ་ཀྲོ་དྷ་ནཱི་ལཱྃ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་ཆེ་གེ་མོ་མཱ་ར་ཡ་ཧཱུྃ་ཕཊ། གོང་ན་མན་ངག་ཤེས་པར་བྱ། །དགང་བླུགས་ཕུལ་ལ་བསྟོད་པར་བྱ། །ལྕང་ལོ་ཅན་གྱི་ཕོ་བྲང་ནས། །གསང་བའི་བདག་པོ་གོས་སྔོན་ཅན། །སངས་རྒྱས་ཀུན་གྱི་སྤྲུལ་པ་པོ། །དབང་བསྐུར་མཆོག་ལ་ཕྱག་འཚལ་བསྟོད། །གདུག་ཅིང་གཏུམ་ལ་བརྗིད་པའི་སྐུ། །སྣ་ཚོགས་ལས་རྣམས་མཛད་པ་པོ། །ཐོགས་མེད་ཡིད་བཞིན་ནོར་བུའི་ཚུལ། །རྡོ་རྗེ་སྐུ་ལ་ཕྱག་འཚལ་བསྟོད། །དངོས་པོ་ཐམས་ཅད་རྣམ་དག་ཀྱང་། །སྨོན་ལམ་སྟོབས་ཀྱིས་བྱུང་བའི་གསུང་། །ཚིག་དང་བྲལ་བའི་སྣ་ཚོགས་སྒྲ། །རྡོ་རྗེ་ནོར་བུ་ཁྱོད་ལ་བསྟོད། །དཔལ་ལྡན་རྡོ་རྗེ་གོས་སྔོན་ཅན། །འཁོར་ལོ་འབར་བ་ཕྱག་ན་བསྣམས། །ལྷ་རྣམས་ཐབས་ཀྱིས་འདུལ་བར་མཛད། །ལྷ་ཡི་རྒྱལ་པོ་ཁྱོད་ལ་བསྟོད། །དཔལ་ལྡན་ཆེན་པོ་གོས་སྔོན་ཅན། །བྱ་ཁྱུང་འབར་བ་ཕྱག་ན་བསྣམས། །ཀླུ་རྣམས་ཐབས་ཀྱིས་འདུལ་བར་མཛད། །ཀླུ་འདུལ་གོས་སྔོན་ཁྱོད་ལ་བསྟོད། །དཔལ་ལྡན་ཆེན་པོ་གོས་སྔོན་ཅན། །དབྱུག་ཏོ་འབར་བ་ཕྱག་ན་བསྣམ། །གནོད་སྦྱིན་ཐམས་ཅད་འདུལ་མཛད་ལ། །

གནོད་སྦྱིན་གཙོ་ལ་ཕྱག་འཚལ་བསྟོད། །དྲག་པོར་གྱུར་པ་འདུལ་བའི་ཕྱིར། །སྡིགས་མཛུབ་རྩེ་ལ་འོད་བྱུང་བས། །གདུག་པ་ཐམས་ཅད་ཀུན་འདུལ་བ། །ཐོགས་མེད་རྡོ་རྗེ་ཁྱོད་ལ་བསྟོད། །ཕྲིན་ལས་བཅོལ་ཞིང་གཤེགས་སུ་གསོལ། །ཏིང་འཛིན་བསྡུས་ཏེ་ལྟ་བ་གསོ། །རྫས་རྣམས་ཐམས་ཅད་བསྡུས་ནས་ནི། །མེ་ཡི་ལྷ་ལ་དབུལ་ཞིང་བསྟོད། །ཡི་གེ་བརྒྱ་པས་ལྷག་ཆད་བཀང་། །ཏིང་འཛིན་བསྡུས་ཏེ་སྤྱོད་ལམ་བྱ ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་སྦྱིན་སྲེག་གི་ཆོ་གའི་ལེའུ་སྟེ་དགུ་པའོ།། །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་དག་ཀླུ་ཡིས་ཟིན་པ་ལ། །ཐབས་དེ་གང་ལགས་གསུང་དུ་གསོལ། །ཀུན་མཁྱེན་གཙོ་བོས་བཀའ་སྩལ་པ། །ང་ཡི་སྦྱོར་བ་འདི་ཉིད་ལ། །བརྟེན་ནས་ཀླུ་རྣམས་གདུལ་བར་བྱ། །ནུབ་ཕྱོགས་དྲང་པོའི་ས་དག་ལ། །ཟབས་སུ་མི་གང་བརྐོས་བྱས་ལ། །དེ་སྟེངས་སྔར་ནི་བུ་མོ་གང་། །སྟོན་མོ་བཅུ་གཉིས་བྱས་པ་ཡི། །རིགས་ལྡན་ཁ་དོག་སྔོན་པོ་འམ། །རིགས་བཞི་ཡང་དག་ལྡན་པ་ཡིས། །འོ་མས་ཁྲུས་བྱས་ཐིག་ལེ་བྱུག །གོས་དག་དམར་པོ་བསྐོན་བྱས་ལ། །ཆོ་ག་རབ་འབྲིང་ཐ་མ་ཡི། །དབང་སྡུད་ཁ་ལ་མེ་འབར་བའི། །བུ་མོ་ལ་ནི་ཡོངས་སུ་བསྔགས། །རྒྱན་ཆ་ལྔ་ཡིས་རྒྱན་བཏགས་ལ། །རྐང་པ་བརྒྱུད་མར་ལོང་བཏགས་ལ། །ལག་པ་བརྒྱུད་མར་དབང་བསྒྱུར་དུ། །ཡང་དག་གནས་པས་ཕྱག་རྒྱ་བཅས། །ཀླུ་ཡི་མིང་མཚན་གང་ཡིན་པའི། །དངོས་པོ་གང་ལ་རབ་སྦྱར་ནས། །གཙོ་བོ་ཀུན་འབྱུང་མཆོག་ཉིད་ལས། །འཁོར་རྣམས་བརྒྱད་ཀྱིས་ངེས་པར་བསྐོར། །ནུབ་ཏུ་དངོས་པོ་རྟེན་བྱེད་པ། །གྲུ་བཞི་པ་དག་རབ་ཏུ་གདགས། །དེ་ཉིད་ས་རུ་བདག་ཐོབ་སྟེ། །དེ་སྟེང་ཅི་ནུས་སྦྱོར་བ་བསྒྲུབ། །དེ་ཐོབ་རབ་ཏུ་བྲལ་བ་ལས། །དེ་ཡི་ཕྱོགས་སུ་མི་ལྟ་ཞིང་། །དྲག་པོ་ཆེན་པོའི་སྔགས་བཟླས་བྱ། །དེ་ཉིད་བདག་གིས་མཐོང་བ་ལས། །ལེགས་སོ་སྙམ་པའི་ཚིགས་བཅད་བརྗོད། །དེ་ནས་ས་ཕྱོགས་རབ་དབེན་པར། །བདག་གིས་

སྦྱོར་བ་ལེགས་བརྩམ་བྱ། །རྒྱར་ནི་ཁྲུ་དོ་ངེས་བ་ལས། །འཕང་དུ་ཆག་གང་རྣམ་པར་བྱ། །རམས་དང་མཐིང་ཤུན་དྲི་ཆུ་སོགས། །ཡོངས་སུ་སྦྱར་བ་བྱས་པ་དང་། །བ་ཡི་རྣམ་ལྔ་ལ་སོགས་པས། །ཡོངས་སུ་བྱུག་པར་བྱས་པ་ལ། །སྣ་ཚོགས་པདྨ་བཅུ་དྲུག་པ། །སྙིང་པོ་ཟེ་འདབ་རྒྱས་པར་བྱ། །དེ་སྟེང་ཚད་ཆུང་ཆུ་སྐྱེས་ཉིད། །ཕྱོགས་རྣམས་ལ་ནི་རྣམ་པར་དགོད། །དེ་སྟེང་གནས་པ་གང་ཡིན་པ། །ལྷ་ཚོགས་གཟུགས་སུ་རྣམ་པར་དགོད། །ཕྱི་རོལ་འབར་བའི་ཕྲེང་བ་ཡིས། །ཡང་དག་པར་ནི་བསྐོར་བར་བྱ། །སྔོན་དུ་སོར་བརྐྱང་གང་བསྐོར་ནི། །མདོག་དམར་ཀུན་ནས་ཟླུམ་པར་ཕྱེ། །དེ་སྟེང་ཀླུ་རིགས་དྲུག་པོ་དང་། །ཉ་དང་སྦལ་པ་ལྕོང་མོ་དང་། །སྦྲུལ་དང་རྩངས་པ་ཆུ་སྲིན་དང་། །མི་དང་རུ་སྦལ་བ་ལང་དང་། །བྱི་ལ་ནོར་བུ་རྒྱ་འབུད་རྣམས། །གཙོ་བོའི་ཆ་ཡིས་བཟུང་བྱས་ནས། །ཤུལ་དུ་དྲག་པར་དྲངས་བྱས་ལ། །མ་ཏུ་ལུང་གའི་ཕྱེ་མ་ཡིས། །བཞི་བཀང་རིགས་མཐུན་དངོས་པོ་ནི། །རབ་ཏུ་གསལ་བར་བྱ་བ་ཡིན། །མཚན་མོ་དྲག་པོའི་གཏོར་མ་ལ། །སྣང་བ་བཞི་པར་ངེས་པར་བྱ། །བཟླས་པའི་སྔགས་ནི་རབ་འབར་བས། །དྲག་པོའི་ཕྲེང་བ་བཟུང་བྱས་ལ། །གུར་དག་སྔོན་པོས་ཕུབ་བྱས་ལ། །ཇི་སྲིད་དེ་ཉིད་མ་རྫོགས་པར། །བདག་གིས་བལྟ་བར་མི་བྱ་ཞིང་། །དྲག་པོ་ཉིད་ལ་མངོན་པར་བཟླས། །དེ་ཡི་ཕྱི་རིམ་དག་ལ་ནི། །ཤིང་ཆེན་སྣ་ཚོགས་འབྱོར་པ་དང་། །སྔགས་བཟླས་སྲད་བུ་སྔོན་པོ་ཡིས། །དྲ་བར་འབྲེལ་པར་ཡོངས་སུ་བྲི། །ཕྱི་རིམ་གདུག་པའི་ཚེར་མ་ཡིས། །ཡོངས་སུ་འཁོར་བར་བསྐོར་བར་བྱ། །མཆོད་པ་རྣམ་པ་ལྔ་དག་གིས། །དུས་གཉིས་དག་ཏུ་ངེས་པར་མཆོད། །སྙིང་པོ་ཡོངས་སུ་རྫོགས་པ་དང་། །མཁའ་ལྡིང་དྲག་པོའི་སྔགས་བཟླས་བྱ། །སྟེང་དུ་གདུག་པའི་ཚེར་མ་ཡིས། །ཡང་དག་པར་ནི་དགབ་པར་བྱ། །མཐའ་རུ་ལྷ་ཚོགས་ཐམས་ཅད་ཀྱིས། །སྙིང་པོ་ཀུན་ལ་བརྒྱ་རྩ་བརྒྱད། །ཐིམ་པར་ཡོངས་སུ་བཟླས་པར་བྱ། །དེ་འོག་གྲངས་སུ་ངེས་པ་ཉིད། །རབ་འབྲིང་ཐ་མར་ཡང་དག་ལྡན། །བདག་ཉིད་གཙོ་

བོའི་ཆ་ལུགས་སུ། །སྔགས་དང་ཕྱག་རྒྱ་ཡང་དག་བསྒོ། །བཟླས་པའི་གྲངས་སུ་རྫོགས་བྱས་ལ། །ནད་པ་དེར་ནི་བཀུག་བྱས་ལ། །བྱང་ཕྱོགས་དག་ཏུ་གནས་པར་བྱ། །དངུལ་གྱི་རྫིང་བུ་ཉིད་དུ་ཡང་། །བྲང་གི་ས་བོན་དཀར་པོ་ཡིས། །ཡོངས་སུ་གང་བར་བྱ་བ་ཡིན། །རྫོགས་པའི་སྒྲ་ལྡན་བཅུ་དྲུག་པས། །ལྕགས་ཀྱི་སྐམ་པ་ཀ་བི་ཙའི། །ཤིང་དག་སོར་ནི་བཅུ་གཉིས་པ། །ཡོངས་སུ་གཅད་པར་བྱ་བ་ལས། །སྔགས་ཀྱིས་མངོན་པར་བཟླས་བྱ་སྟེ། །དེ་ཉིད་དག་ཏུ་སྦྱང་བར་བྱ། །རྨ་བྱའི་མདོངས་ལ་རབ་བསྔགས་ནས། །པདྨའི་སྐུད་པས་ཤིང་དང་ནི། མདོངས་སུ་ཡང་དག་བསྡམ་པར་བྱ། །སེང་ལྡེང་ཕུར་པ་སོར་བཅུ་གཉིས། །ཁྲོ་བོའི་སྔགས་ཀྱིས་མངོན་པར་བསྔགས། །དེ་ནས་སྔགས་ཀྱིས་རབ་བསྔགས་ཏེ། །ནད་པ་ཉིད་ལ་བྱབ་བྱ་སྟེ། །རིགས་དྲུག་པོ་ལ་ངེས་པར་གདབ། །དེ་ནས་དེ་ཉིད་སྙིང་ག་ལ། །ཐིག་ལེ་དྲུག་ཏུ་ངེས་པར་བྲི། །དེ་སྟེང་རིགས་དྲུག་བསམ་བྱས་ལ། །གཡོན་ན་གནས་པའི་ང་རྒྱལ་མཆོག །སྔགས་ཀྱིས་མངོན་པར་བསྐུལ་བྱེད་པས། །དྲག་པོའི་ཤུགས་ཀྱིས་རབ་སོང་སྟེ། །རྔམ་པའི་ཞལ་དུ་ངེས་པར་བསྟབས། །དེ་ལྟར་བསམ་པ་རབ་བརྟན་པས། །ཡོངས་སུ་བསྒོམ་པར་བྱ་བ་ཡིན། །དེ་ཡིས་དེ་ལ་གནོད་བྱེད་པ། །སྐད་ཅིག་ཙམ་ལས་མི་གནས་ཤིང་། །མྱུར་བར་སྐྲག་པར་ཕྱོགས་བཅུར་འབྲོས། །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ནི་དཱ་ཏ་ཡཾ་པྲ་ཏི་ཧཱུྃ་ཕཊ། ཨོཾ་བནྡྷ་བནྡྷ་ནཱ་གཱ་ནཱཾ་ཕཊ། ཨོཾ་ག་རུ་ཌ་ག་རུ་ཌ་པུ་ཏྲ་བྷཀྵ་ནཱ་གཱ་ནཱྃ་ཧཱུྃ་ཕཊ། ཨོཾ་ནཱི་ལཱྃ་བ་ས་ན་སརྦ་ཨ་ལཾ་ཀྲྀཏྭ་མེ་བཛྲ་པཱ་ཎི་བྷ་བ་ཏེ་ཧཱུྃ་ཕཊ། ཨོཾ་བྷེ་ཀྵ་མ་ག་ལེན་སརྦ་བྱ་དྷི་པེ་ཏ་ཡ་ཧཱུྃ་ཕཊ། ཨོཾ་བྷཀྵི་ཙེ་བི་ཤ་ནཱ་ཡ་ཧཱུྃ་ཕཊ། ཨོཾ་སརྦ་ནཱ་གཱ་ནཱྃ་ཨཱ་ཀརྵ་ཡཱ་བི་ཤ་ཡཱ་བི་ཏོ་ཤ་ཡ་ཧཱུྃ་ཕཊ། ཨོཾ་མ་ཧཱ་རཽ་ཏྲ་ག་རུ་ཌ་གཙྪ་གྲྀཧྞ་གྲྀཧྞ་སརྦ་ནཱ་གཱ་ནཱྃ་ཕཊ། གོང་མའི་ཕུར་པ་གང་ཡིན་པས། །སྔགས་འདི་བརྗོད་པས་གཏུབ་པར་བྱ། ཨོཾ་བཛྲ་ཀཱི་ལཱ་ཡ། སརྦ་ནཱ་ག་བིདྷྭནྻ་ན་ཧཱུྃ་ཕཊ། བཞིན་ནི་རབ་ཏུ་འབར་བ་དང་། །ཞེ་སྡང་རྡོ་རྗེ་ཏིང་འཛིན་གྱིས། །འབྲུག་སྒྲ་ལྡན་པས་ཡོངས་སུ་གཏུབ། །དེ་ནས་དྲག་པོའི་

སྔགས་ཀྱིས་སུ། །མཚན་མ་ངེས་པར་གདབ་པར་བྱ། །དེ་ཉིད་དག་ལ་གང་བྱུང་བ། །དེ་ལ་ཤེས་རབ་ཅན་གྱིས་དཔྱད། །རྟགས་སུ་ལྡན་པ་གང་ཡིན་པ། །སྐུ་རྣམས་གཡོས་པ་ཉིད་དང་ནི། །གང་གིས་གཟུགས་རྣམས་གཡོས་གྱུར་པ། །རྟགས་སུ་ངེས་པར་གྱུར་པ་ཡིན། །དེ་ཉིད་འདར་བ་གང་ཡིན་པ། །དེ་ཡང་རྟགས་སུ་ངེས་པ་ཡིན། །དང་པོ་རབ་ཏུ་འབྱོར་བ་ལ། །ནང་གི་བགེགས་ཉིད་བསལ་བ་ཡིས། །ཕྱི་ནས་ཕྱི་ཡི་ནད་བསལ་བ། །སྨན་ལ་སོགས་པའི་སྦྱོར་བ་ཡིས། །མཁས་པས་ཕྱི་ཡི་ནད་བསལ་ཏེ། །བརྒྱ་ཀ་ལ་སོགས་ལྔ་རྣམས་དང་། །མར་ནག་ཉིད་ལ་ངེས་བཏབ་ལ། །ཞག་གྲངས་བདུན་དུ་མནན་པ་ཡིས། །ལྦུ་ཆུང་ལེགས་པར་ཁྱབ་པར་སྣང་། །སུག་པ་ལ་སོགས་སྤང་སྦྱར་བས། །གོང་དུ་སྔགས་ཀྱི་བསྙེན་པར་གནས། །འོད་ཟེར་དཀར་པོ་ཡོངས་རྟོགས་པའི། །ཉི་མ་ཉིད་ལ་ཁྲུས་བྱས་ཏེ། །དྲི་མ་དག་པར་བསམས་པ་ལགས། །དྲུག་སྦྱང་ངེས་པར་བསྐུལ་བར་བྱ། །དེ་འོག་མཆོག་གི་སྨན་ཉིད་གང་། །གྲགས་ལྡན་ཆེན་པོ་སྲང་གཅིག་ཉིད། །ལེགས་པར་བསྐོལ་བས་ཁ་ཉིད་དུ། །ཞག་དག་ངེས་པར་ཆགས་པར་འགྱུར། །དེ་ཉིད་ལུས་ལ་བསྐུ་བྱ་ཞིང་། །ཚིགས་མ་ཞོ་གསུམ་བཟའ་བར་བྱ། །སྙིང་པོ་གསུམ་ལ་ཤར་བཅོས་ཏེ། །ཁུ་བ་ངེས་པར་བཏུང་བར་བྱ། །གནམ་སྒྲོ་ནག་པོ་ཟུར་གསུམ་པ། །རྩེ་མོ་ཤིན་ཏུ་རྣོ་བ་ལ། །རི་མོ་སྣ་ཚོགས་འདུག་འགྱུར་བ། །བརྒྱ་དག་ཤིན་ཏུ་འདུས་འགྱུར་དེ། །བཅུ་དྲུག་ཆ་རུ་ངེས་པར་བསྐོལ། །དེ་ཡི་ལུས་ལ་བསྐུས་བྱས་ཏེ། །ཁ་རུ་ངེས་པར་བཏུང་བར་བྱ། །དེ་ཡིས་ཀུན་ཀྱང་སྐྱུར་འགྱུར་ཏེ། །ནད་ནི་ངེས་པར་ཕྱུང་བར་འགྱུར། །དྲི་ཞིམ་སྣ་ཚོགས་སྦྱར་བ་ཡི། །ཆང་དུ་ཞག་བཅུ་ངེས་པར་སྦང་། །དེ་ནས་སྔོན་པོར་གྱུར་པ་དང་། །ལན་ཚྭ་ཕུལ་གང་དེས་བཏབ་སྟེ། །དེ་བཏབ་ཞག་བཞི་སྤང་བྱས་ནས། །བཅུ་བཞི་པ་ལ་ལོ་མར་ཉིད། །ཕུལ་དོ་དང་ནི་བསྲེས་བྱས་ལ། །ལྦུ་བ་དངས་པར་ཡང་དག་བསྐོལ། །དེ་ཡིས་ལུས་ལ་བསྐུས་པ་ན། །སུམ་གཉིས་ཁ་རུ་ངེས་པར་བླུད། །སྦྱོར་བ་དེ་ལ་རབ་བརྟེན་ན། །གདོན་མི་ཟ་པར་འཚོ་བར་འགྱུར། །ལག་ན་རྡོ་རྗེ་གོས་

སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ཀླུ་གདུག་མདངས་འཕྲོག་གི་གདོན་འདུལ་བའི་ལེའུ་སྟེ་བཅུ་པའོ།། །།དེ་ནས་ལག་ན་རྡོ་རྗེ་ཡིས། །འཇིག་རྟེན་མགོན་ལ་འདི་སྐད་གསོལ། །གང་ཞིག་ཚངས་པས་ཟིན་པ་ལ། །ཐབས་དེ་གང་ལགས་བསྟན་དུ་གསོལ། །མགོན་པོ་མཆོག་གིས་བཀའ་སྩལ་པ། །ཚངས་པ་སྲིན་པོའི་གདོན་ཞེས་བྱ། །ཤིན་ཏུ་གདུལ་བར་དཀའ་བ་སྟེ། །དེ་ལ་དྲག་པོས་མ་བྱས་ན། །ཐ་མལ་པ་ཡིས་འགྲོ་བ་མིན། །བྲམ་ཟེ་སྔགས་པ་མི་བཟད་པས། །ཡང་ན་དྲག་པོའི་སྒྲ་ལྡན་པས། །སྟོན་མོ་བཅུ་བཞི་བྱས་པ་ལ། །ཞག་གསུམ་བར་དུ་དཀར་གསུམ་ཟས། །རྒྱུན་མི་འཆད་པར་སྦྱིན་པར་བྱ། །རིག་བྱེད་སྔགས་སུ་ལྡན་པ་ཉིད། །དེ་ལ་བསླབ་པར་བྱ་བ་ཉིད། །ཚངས་པའི་སྐུད་པས་སྟོད་དཀྲིས་ལ། །གོས་དག་དཀར་པོས་ཡོངས་སུ་བརྒྱན། །སྤྱི་བོར་ཐོར་ཚུགས་བཅིངས་བྱས་ལ། །ལག་གཡས་བཞི་པ་དེ་ཉིད་ལ། །བཀྲ་ཤིས་དངོས་པོས་ཡོངས་སུ་བསྔམ། །ཤར་ཕྱོགས་དག་ཏུ་སོང་བ་ལས། །ཤིང་ཆེན་རྩ་ནས་ཁྲུ་གང་ཉིད། །འོག་ཏུ་བརྐོས་པས་ས་བླང་བྱ། །དེ་རྟེན་རས་ཡུག་དཀར་པོ་ཡིས། །ཐོབ་པས་ཕྱོགས་སུ་མི་བལྟ་ཞིང་། །ཤར་ཕྱོགས་ཁྲོ་བོའི་སྙིང་པོ་བཟླས། །དེ་ནས་དེ་ཉིད་མཐོང་བ་དང་། །ཧ་ལ་ཧ་ལའི་སྒྲ་ཡང་བརྗོད། །བ་ཡི་རྣམ་ལྔ་ཉིད་དང་ནི། །རམས་དང་མཐིང་ཤུན་དྲི་ཆུ་ལ། །སྦྱར་བས་ཁྲུ་གང་མཐོ་གང་གི། །དཀྱིལ་འཁོར་ཟུར་ལྔར་ལྡན་པར་བྱ། །དཀྱིལ་གྱི་ལྟེ་བ་ཉིད་ལ་ནི། །ལྷ་ཡི་ཚོགས་རྣམས་ངེས་པར་དགོད། །ཟུར་ལྔ་པ་དང་འདབས་འབྱོར་དུ། །ཟུར་གསུམ་པ་དང་སོར་བརྒྱད་པས། །ཡོངས་སུ་ཟབས་སུ་བྲུ་བར་བྱ། །འོག་ཏུ་སྨན་གྱི་ཕྱེ་མ་ཡིས། །ལེགས་པར་བདལ་བར་བྱ་བ་ཡིན། །དེ་དང་དེ་ཉིད་གཟུགས་བྱས་ལ། །སྤྲ་ཚིལ་ལས་སྦྱར་སོར་བཅུའི་ཚད། །དྲག་པོ་རིད་པར་གྱུར་པ་ལ། །ལག་གཉིས་སར་བ་གདེངས་པར་བྱ། །སྐྱེར་པའི་ཕུར་པ་སོར་བཞི་པས། །མཐའ་མ་ཡོངས་སུ་བསྐོར་བར་བྱ། །སྟེང་ཡང་ཕུར་པ་ཡུངས་ཀར་ལ། །སྔགས་བཟླས་པ་ཡིས་ཡོངས་སུ་བསྣུན། །གཏོར་མ་སྟོབས་

རྣམས་སྐྱེད་བྱེད་དང་། །མཆོད་པ་ལྔ་ཡིས་དུས་གཉིས་སུ། །ཡང་དག་པར་ནི་མཆོད་པར་བྱ། །རང་ཉིད་སྔ་མའི་ཚུལ་གནས་ལ། །ཡིད་ཆེས་ཕྲེང་བ་རབ་བཟུང་ནས། །དྲག་པོའི་རིགས་ལ་རྩ་བའི་སྔགས །ཚད་དུ་ཕྱིན་པར་ཡོངས་སུ་བཟླས། །དེ་མཐའི་སྙིང་པོ་མ་ལུས་པ། །བརྒྱ་རྩ་བརྒྱད་དག་བཟླས་པར་བྱ། །དེ་ཡི་མཐའ་རུ་བཟླས་བྱ་བ། །དེ་ཡི་སྲོག་སྙིང་ངེས་པར་བཟླས། །སྐྱེར་པའི་ཚེར་མ་རབ་སྤངས་ལ། །དཀྱིལ་འཁོར་མཐའ་རུ་གནས་པར་བྱ། །དེ་ནས་འགུགས་པའི་སྔགས་བཟླས་བྱ། །ཚད་དུ་ངེས་པར་ཐིམ་བྱས་ལ། །དེ་ཉིད་འོངས་པར་མ་གྱུར་ན། །གུ་གུལ་ནག་པོའི་དུད་པ་ཡིས། །དེ་བཀུག་སྔགས་ཀྱིས་མངོན་པར་བཟླས། །ལྕགས་ཀྱུའི་ཕྱག་རྒྱ་བཅས་པ་ལས། །ཡོངས་སུ་དགུག་པར་བྱ་བ་ཡིན། །དེ་ནས་སྔགས་པས་ནད་པ་ཉིད། །མདུན་དུ་མངོན་པར་བཀུག་བྱས་ལ། །སྔགས་ཆུས་ངེས་པར་གཏོར་བར་བྱ། །དེ་ནས་བསྒྲུབ་བྱ་འོངས་པ་ན། གཟུགས་དེ་འགྱུར་བར་གྱུར་པ་འམ། །ཡང་ན་འགྱེལ་བར་གྱུར་པ་ཡིན། །དེ་ནས་བདག་གིས་བདེན་པ་དང་། །ཞི་བའི་ཚིག་གིས་གདབ་པར་བྱ། །གལ་ཏེ་སོང་བར་གྱུར་པ་ན། །བདག་གིས་སྙིང་ལས་ཆུང་དུ་ཡིན། །འོན་ཏེ་འགྲོ་བར་མི་འགྱུར་ན། །བདག་གིས་སྦྱོར་བ་འདི་བརྩམ་བྱ། །སྐུད་པ་རྣམ་ལྔར་ལྡན་པ་ལ། །ཁྲོ་བོའི་སྔགས་ཀྱིས་རབ་བསྔགས་ཏེ། །ཞགས་མིག་དམ་པོས་ནད་པ་བཅིངས། །ལྕགས་ཀྱུས་སྙིང་ནས་དྲངས་བྱས་ལ། །གཡོན་དུ་རྡོ་རྗེ་བཟུང་བྱས་ནས། །གཡས་པས་ཡིད་ཆེས་བཟུང་བྱས་ཏེ། །ལུས་ངག་ཡིད་གསུམ་རབ་དྲག་པས། །སྔགས་ཚོགས་ཡོངས་སུ་བཟླས་པར་བྱ། །ཕྱག་རྒྱ་ལྔ་ཡིས་བསྡམས་བྱས་ལ། །དེ་ཉིད་ལྔ་ནི་ཡོངས་སུ་དབབ། །དེ་ནས་སྐྱེར་པའི་བམ་པོ་ལ། །གུ་གུལ་ཆུ་ཡིས་བཏབ་བྱས་ཏེ། །ཕུང་བར་བྱ་ཕྱིར་དེ་ཉིད་བསྲེག །དུག་དང་ཕུར་བུ་སྐྱེ་ཚེ་དང་། །མདོག་བཟང་ཡུངས་ཀར་ཝ་ཏིའི་ཆུས། །ཡོངས་སུ་སྔགས་བཟླས་བསྲེག་པར་བྱ། །གསུང་དེ་བདག་ཉིད་འབར་བ་ཡིས། །འཁོར་ལོ་ལ་ནི་ཡང་དག་མཆོད། །དེ་ནས་ལྕགས་གུར་ནག་པོ་ཡིས། །གསང་བའི་དོན་དུ་ཁ་གདབ་

བྱ། །ཨོཾ་བྷུར་བྷུ་ཏ་སཱ་བུ་བས་སྭཱ་ཧཱ། ས་མ་ན་ཨཱ་ཀཱ་སེ་མེ་ཀར་ཏྃ། བྷུ་ཡུ་བྷུ་ཏ་བྲཧྨ་ནི་ཀ་ཡ་ཡྃ་ས་ར་པ་ར་བྷུ་ཏ་སྭཱ་ཧཱ། ཨོཾ་ཏི་ལི་ཏི་ལ་བཛྲ་ཤ་ར་ཤ་བ་ར་ཧཱུྃ་ཕཊ། ཨོཾ་བྲཧྨ་རཀྵ་གྷ་ཡ་ཧྲྀ་ད་ཡ་ཀ་ར་དི་ཙྪེ་དི་ཡ་ཕཊ། ཨོཾ་ཨཱ་ཀརྵ་ཡ་ཨཱ་ཀརྵ་ཡ་ག་ཏ་ཡ་ཧཱུྃ་ཕཊ།ཨོཾ་ཨ་མྲྀ་ཏ་སིད་དྷ་ཧ་ར་ཧ་ར་བི་ཤོ་དྷ་ཡ་བྃ་ཧཱུྃ། ཨོཾ་བན་དྷ་ནཱྃ་དུ་ཥ་ག་ཡ་ཧཱུྃ། ཨོཾ་བཛྲ་ཀྵོ་བྷ་ཧཱུྃ། ཨོཾ་ཏཱ་རཀྵོ་བྷ་ཧཱུྃ། ཨོཾ་ཨ་ཏྲ་ཀྵོ་བྷ་ཧཱུྃ། ཨོཾ་བྲཧྨ་ཨཀྵ་གྲ་ཧཱ་ཡ། ད་ཧ་ཡ་མཱ་ར་ཡ་ཙྪིན་ད་ཡ་ཨ་བི་ཙཱ་ར་ཡ་བཽ་ཥ་ཊ་ཧེ་ཕཊ་ཕཊ། དེས་བསྲེགས་བདག་གི་ལུས་ངག་ནི། །ཚིག་པས་དེ་ལ་འགྱོད་པའི་ངག །བདག་གིས་ངེས་པར་བརྗོད་པར་བྱ། །དེ་ཡིས་དེ་ཉིད་ལུས་ལ་སོགས། །གདོན་དང་བྲལ་བ་ཞི་བར་འགྱུར། །དེ་ནས་ཐལ་བས་ནད་པ་ལ། །ལུས་ལ་བསྐུས་ནས་བསྲུང་བ་ཡི། །འཁོར་ལོ་འདི་ལྟར་གདགས་པར་བྱ། །སྐུད་པ་སྔོན་པོ་གང་ཡིན་པ། །བུ་མོ་ཕྱུག་ཅིང་རིགས་བཟང་བ། །མཛེས་པ་བཅྭ་བརྒྱད་ལོན་པ་ལ། །དེ་ཡི་གོང་འོག་གཉིས་པ་ལ། །འཁལ་དུ་བཅུག་པས་འདུར་བ་མེད། །རྡུལ་གྱི་བར་ནས་བཏོན་བྱས་ནས། །ལྷས་མ་ལེགས་པར་བླངས་པ་ཡིས། །བདེ་བའི་ལུས་ལ་ངེས་པར་གདགས། །དེས་ནི་སྐྱེ་བ་ཐམས་ཅད་དུ། །བསྲུང་བ་ལེགས་པར་གནས་པ་ཡིན། །ཁམས་གསུམ་རྣམ་རྒྱལ་འབར་བ་ཡི། །བུམ་པ་བཟང་པོ་ཡོངས་སུ་བཅའ། །སྔགས་ཀྱིས་ཡོངས་སུ་བརྒྱན་པར་བྱ། །ཕུར་པ་རྡོ་རྗེ་ཞགས་པ་དང་། །ཐོ་བས་དབང་བསྐུར་རིམ་པར་བྱ། །དེ་ནས་མཆོད་པ་ལྔ་དག་གིས། །མཆོད་པ་ལུས་ལ་རྒྱས་པར་མཆོད། །ཡང་དག་གྲུབ་པ་གང་ཡིན་པ། །ཕྱག་རྒྱ་བཅས་པས་བསྔགས་པ་ཡིན། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་འཛིན་པ་ལ། །གུས་པ་ཡིས་ནི་སངས་རྒྱས་བདེ། །མཆོད་པ་རབ་ཏུ་རྒྱས་པ་ལ། །སྔོན་དུ་བསྙེན་པས་ཡོངས་སུ་བསྒྲུབ། །ཁམས་གསུམ་རྣམ་རྒྱལ་ཁྲོ་བོ་ལ། །བསྒྲུབ་པའི་ཐབས་ནི་ཡང་དག་བཤད། །གོང་གི་ཆ་བྱད་དེ་ཉིད་ལ། །དུར་ཁྲོད་དག་ཏུ་སོང་བྱས་ལ། །མི་ཡི་ཐལ་བ་གང་ཡིན་པས། །བདག་གི་ལུས་ལ་ཁྱབ་པར་བྱུག །གཡོན་དུ་ཐོད་པ་ཐོགས་བྱས་ལ། །གཡས་

སུ་རྡོ་རྗེ་ཐོགས་བྱས་ཏེ། །ཡིད་ཆེས་དཀར་པོའི་ཕྲེང་བ་ལ། །དྲག་པོའི་བཟླས་པ་མང་དུ་བྱ། །དེ་ཡི་ལོངས་སྤྱོད་བཟང་ཟ་ཞིང་། །སྟག་གི་པགས་པས་སྨད་དཀྲིས་བྱ། །དོན་དང་ལྡན་པའི་སྙིང་པོ་བསམ། །ཁྲག་གིས་ངོ་ཡང་བསྐུས་བྱས་ལ། །ནག་པོར་གཏོགས་པའི་འཕོ་བ་བརྒྱད། །སོགས་པའི་མིང་ལ་ཞུགས་བྱས་ལ། །སྐར་མ་དག་ལ་ངེས་པར་བསྒོམ། །ཆང་འདུ་བ་ལ་གནས་བཅས་ལ། །ཤེས་རབ་ཟུང་དུ་ལྡན་པ་ཡིས། །སྐར་མ་ཉིད་ལ་མཉམ་སྦྱར་ལ། །བརྒྱུད་པ་ཡིས་ནི་སྔགས་བཟླས་བྱ། །ཞག་གྲངས་བརྒྱ་རྩ་བརྒྱད་པ་ཡིས། །ཡང་དག་པ་རུ་བསྒྲུབ་པར་བྱ། །དེ་ནས་ཞག་གྲངས་ཐིམ་པར་བྱ། །མཐའ་རུ་མཚན་མོ་ཐོག་ཐག་པར། །སྔགས་དག་ངེས་པར་བཟླས་པར་བྱ། །དེ་ནས་སྐེ་ཚེ་ཡུངས་ཀར་དང་། །ཁྲག་དང་སྦྲང་རྩི་སྦྱར་བ་ཡིས། །སྦྱིན་སྲེག་སྟོང་དུ་ཐིམ་བྱས་ལ། །ཀ་ར་བཱི་རའི་ལྕུག་མ་ལ། །ཙན་དན་དཀར་པོའི་ཆུས་བསྐུས་ཏེ། །མེ་ཏོག་ཕྲེང་བ་བཏགས་པ་ཡིས། །ལག་པ་གཡས་སུ་ཐོགས་བྱས་ཏེ། །ཡིད་ཆེས་སྤུ་ལ་ཐག་པ་ཡིས། །ཡང་དག་པ་རུ་བཀལ་ནས་ནི། །བདག་གི་སྤྱི་བོར་བཅིང་བྱས་ཏེ། །དེ་ནས་གྲོང་ཁྱེར་རྒྱུས་པ་ན། །ཀུན་གྱིས་ཕྱག་བྱེད་མཆོད་པར་བྱེད། །འཇིག་རྟེན་ཀུན་གྱིས་ཕྱག་བྱེད་ཅིང་། །སྙིང་དུ་སྡུག་པར་ངེས་པ་ཡིན། །མཁའ་འགྲོ་མ་སོགས་ཕྲ་མེན་མས། །བདག་ལ་ལུང་ཡང་ངེས་པར་སྟོན། །སྡུག་བསྔལ་རྟག་ཏུ་མི་འབྱུང་ཞིང་། །ལྷ་མིན་ལ་སོགས་གདུག་པ་ཡིས། །དེ་ཡི་ཕུང་པོར་མཐོང་བ་ཡིན། །བདག་ལ་སྡིག་པ་མང་པོ་འཇུག །དེ་ལ་འཇིགས་པ་བསྐྱེད་མི་བྱ། །བདག་ལ་གདུག་པ་སྣ་ཚོགས་པ། །གནོད་པ་སྣ་ཚོགས་བྱེད་པ་ན། །དེ་ལ་འཇིགས་པ་མི་བསྐྱེད་ཅིང་། །སེམས་དགའ་བ་ཡིས་ཡོངས་སུ་མཆོད། །ཨོཾ་ཀ་པཱ་ལ་དྷ་ར་སིདྡྷ་ཡེ། ཨོཾ་བྷ་ཀྵ་སརྦ་ན་མཿས་ནཱཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཌཱ་ཀི་ནྱ་བ་ཤཱི་ཀ་རཱ་ཡ་སྭཱ་ཧཱ། ཨོཾ་སརྦ་ལོ་ཀཱ་བ་ཤཱི་ཀ་རཱ་ཡེ་ཧཱུྃ། ཨོཾ་སརྦ་དུཥྚ་ཙིཏྟ་ས་ན་ཡ་ཕཊ། ཨོཾ་མ་ཧཱ་ཀཱ་ལ་ས་བ་ཡ་ཧཱུྃ་ཕཊ། ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ཚངས་པ་སྲིན་པོའི་གདོན་འདུལ་བའི་ལེའུ་སྟེ་བཅུ་གཅིག་པའོ།། །།ལག་ན་རྡོ་རྗེ་

གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་གཤིན་རྗེས་ཟིན་པ་ལ། །ཐབས་དེ་གང་གིས་བགྱི་བ་ལགས། །རིགས་པའི་རྒྱལ་པོས་བཀའ་སྩལ་པ། །གཤིན་རྗེ་བྲང་དམར་ཞེས་པའི་གདོན། །ཁ་དོག་སྔོན་པོ་ཉིད་ལ་ནི། །མཆེ་བ་བཞི་དང་རབ་ལྡན་པའི། །གཡས་ན་ཐོད་དབྱུག་འཛིན་པ་ལ། །གཡོན་ན་མི་ཡི་མགོ་བོ་འཛིན། །དྲག་པོ་འཇིགས་སུ་རུང་བ་ཡི། །གདོན་གྱིས་གང་དག་ཟིན་གྱུར་ན། །ཐབས་འདི་ཡང་དག་སྦྱོར་བར་བྱ། །རང་གི་སྦྱོར་བར་བཟུང་བྱས་ནས། །དྲག་པོའི་སྒྲ་ལྡན་ཉི་ཤུ་པ། །ཤིན་ཏུ་དཔའ་ཞིང་དད་པར་ལྡན། །སྟོབས་ལྡན་གཏུམ་པའི་བདག་ཉིད་ཅན། །ཞག་དྲུག་བར་དུ་བསྙེན་བྱ་བ། །ཤ་ལྔ་ལ་སོགས་ཆང་བྱིན་ཏེ། །དེ་ལའང་སྔགས་ཀྱིས་བཏབ་བྱས་ནས། །ཤ་གོས་ཁྲ་བོས་ཡོངས་སུ་བསྐོན། །མེ་ཏོག་མཛེས་པས་བརྒྱན་བྱས་ལ། །སྔགས་འདི་ཉིད་ནི་འབུམ་དུ་བཟླས། །དེ་ནས་དེ་ཡི་གཡས་ཉིད་དུ། །ཞགས་པ་ངེས་པར་བཀུར་བྱས་ལ། །གྷ་ས་གྷ་སའི་སྙིང་པོ་བརྗོད། །གཡོན་དུ་དངོས་པོ་ལྡུགས་བྱེད་པ། །ཡིད་ཆེན་ལ་ནི་རབ་ཏུ་བཅེམ། །ནག་པོར་གཏོགས་པའི་གསུམ་པ་ལ། །སྐར་མ་ཉིད་ལ་རབ་བསྐུལ་ཏེ། །མཉམ་པའི་ས་ནི་བླང་བར་བྱ། །དེ་ཐོབ་སྔགས་པ་བློ་ལྡན་པས། །དཀྱིལ་འཁོར་ངེས་པར་བརྩིག་བྱ་སྟེ། །ཁྲུ་དོ་པ་ལ་ཟུར་དྲུག་པ། །འཕང་དུ་སོར་བཞི་རྣམ་པར་སྤྱད། །དེ་ལ་རམས་དང་མཐིང་ཤུན་དང་། །བ་ཡི་རྣམ་ལྔས་བྱུག་པར་བྱ། །འཁོར་ལོ་བཅུ་དྲུག་ཡང་དག་བྲི། །མཐའ་མར་འབར་བའི་ཕྲེང་བ་ཡིས། །སྣ་ཚོགས་པར་ནི་བསྐོར་བར་བྱ། །དེ་ལ་ལྷ་ཚོགས་རབ་བཀོད་ལ། །བླ་རེ་སྔོན་པོས་ཡོངས་སུ་དབུབ། །དེ་ལ་འདབས་འབྱོར་འཁོར་ལོ་ཉིད། །ཟླུམ་པོ་ངེས་པར་བརྐོ་བྱས་ལ། །ཁྲུ་གང་ཡོངས་སུ་བརྐོ་བར་བྱ། །འོག་ཏུ་དུག་གི་ཕྱེ་མ་ཡིས། །ཡང་དག་པར་ནི་གདིང་བར་བྱ། །གྲི་ལ་སོགས་པའི་མཚོན་གྱིས་ནི། །ཁ་རིམ་ངེས་པར་བསྐོར་བར་བྱ། །བླ་ཕྱོགས་དར་གྱིས་ཕུབ་བྱས་ལ། །ནག་པོ་ཆེན་པོའི་སྙིང་པོ་ནི། །འབུམ་དུ་ཚང་བར་བཟླས་པར་བྱ། །བདག་ཉིད་སྔ་མའི་ཚུལ་གནས་

ལ། །འབོར་གཉིས་རུས་པའི་ཕྲེང་བ་ཡིས། །དྲག་པོའི་རིགས་ལ་བཟུང་བྱས་ཏེ། །རྩ་བའི་སྔགས་སོགས་ཐིམ་པར་བཟླས། །མཆོད་པ་རྣམ་པ་ལྔ་དག་དང་། །ཤ་ཆེན་ལ་སོགས་གཏོར་མ་ཉིད། །གཉིས་སུ་ངེས་པར་དབུལ་གཏང་བྱ། །དེ་ཉིད་འགུགས་པའི་སྙིང་པོ་ཡིས། །ཡང་དག་པ་རུ་དགུག་པར་བྱ། །རལ་གྲི་འབར་བ་གང་ཡིན་པས། །ཤར་ཕྱོགས་དག་ཏུ་ངེས་པར་གནས། །དེ་ལ་ནག་པོ་ཆེན་པོ་ཡི། །སྔགས་ཀྱིས་ཡོངས་སུ་བཟླས་པར་བྱ། །དེ་ཡི་སྲོག་སྙིང་གང་ཡིན་པ། །མཐའ་རུ་སྦྱར་བས་ཡང་དག་བཟླས། །དེ་ནས་དེ་ཡི་གཟུགས་བྱ་བ། །བག་ཟན་ཉིད་ལ་སོར་བཅུ་དྲུག །འཇིགས་པའི་གཟུགས་བྱས་རམས་ཀྱིས་བསྐུ། །དེ་ཡི་ནང་དུ་དེ་ཉིད་ཀྱི། །མིང་དག་ངེས་པར་བྲི་བྱས་ལ། །ནང་དུ་ངེས་པར་གཞུག་པར་བྱ། །ལྕགས་ལས་བྱས་པའི་ཚེར་མ་ལ། །རྩེ་མོ་དུག་གིས་བསྐུ་བྱས་ཏེ། །དེ་ཡི་ཕྱོགས་སུ་དུག་དག་ནི། །ཡོངས་སུ་གཟུགས་པར་བྱ་བ་ནི། །དེ་ལ་སྔགས་ཀྱིས་བསྔགས་བྱས་ལ། །དེ་སྟེང་དར་གྱིས་ངེས་པར་གདིང་། །དེ་ལྟར་ཞག་གྲངས་སུམ་ཅུ་པར། །ཡོངས་སུ་བསྙེན་པར་བྱས་པ་ལས། །ནད་པའི་གོས་ལ་སོགས་པ་དང་། །ཁ་འཕྲོ་ལ་སོགས་བདག་གི་རྣམས། །སྣོད་དུ་ཐམས་ཅད་བསོགས་བྱས་ཏེ། །སྔགས་ཆེན་གྱིས་ནི་ཡང་དག་བསྔགས། །དེ་ནས་བསྙེན་པར་རྫོགས་པ་དང་། །ནད་པ་དངོས་པོ་བཀུག་བྱས་ལ། །ཐལ་མོ་ཡོངས་སུ་སྦྱར་བྱས་ཏེ། །སེམས་བསྐྱེད་པ་དང་སྐྱབས་འགྲོ་བྱ། །རྡོ་རྗེ་འབར་བའི་ལྕགས་ཀྱུ་ཡིས། །དེ་ཡི་སྙིང་ནས་དྲངས་བྱས་ལ། །ཨོཾ་བཛྲ་ཕཊ་ཀྱི་སྒྲ་ཡང་བསྒྲགས། །ཞེ་སྡང་རྡོ་རྗེའི་ཏིང་འཛིན་གྱིས། །ཁྲོ་བོའི་གཟུགས་དང་དྲག་པོའི་སྒྲས། །གཡས་པར་ཕྲེང་བ་ཐོགས་བྱས་ལ། །གཡོན་པར་རལ་གྲི་རབ་འབར་གཟུང་། །ནག་པོ་ཆེན་པོ་རབ་རྦད་ལ། །དེ་ཡི་ཕུང་པོ་འཇོམས་པར་བསམ། །དེ་ནས་སྔགས་པ་བློ་ལྡན་པས། །གཟུགས་བརྙན་མཚོན་གྱིས་གཟེར་བར་བྱ། །དེ་ནས་ཕྱི་རུ་ངེས་བཏོན་པས། །དང་པོར་རལ་གྲི་གང་ཡིན་པས། །སྐེ་ནི་ཡོངས་སུ་གཏུབ་པར་བྱ། །དེ་ལྟར་སྔགས་བཟླས་གཏུབས་པ་

ཡིས། །ནད་པ་སྐད་ངན་འདོན་པར་བྱེད། །ཡོངས་སུ་གྲུབ་པའི་རྟགས་སུ་ནི། །ལྷ་རྣམས་ཕྱོགས་ཆར་གཡོ་བ་དང་། །དེ་ཡི་གཟུགས་བརྙན་གཡོ་བ་ཉིད། །གྲུབ་པའི་རྟགས་སུ་བསྟན་པ་ནི། །དེ་ཡི་དུམ་བུ་གང་ཡིན་པ། །གཞན་གྱིས་སྦྱར་བར་གཏོར་མ་གཏང་། །དེ་ཡི་སྦྱོར་བ་གང་ཡིན་པས། །གཤིན་རྗེའི་གདོན་དང་ངེས་པར་བྲལ། །དེ་དང་བྲལ་བ་གང་ཡིན་པས། །བསྲུང་བའི་འཁོར་ལོ་ངེས་པར་བརྩམས། །ཚོན་སྣ་ལྔ་ཡི་སྐུད་པ་ནི། །ཛཱ་ཏི་པ་ལའི་ནང་བཙོས་ཏེ། །རྡོ་རྗེ་འབར་བའི་སྔགས་བཏབ་སྟེ། །མདུད་པ་ཉི་ཤུ་གཅིག་བོར་ལ། །དེ་ཡི་སྐེར་ནི་གདག་པར་བྱ། །དེས་ནི་སྲུང་བ་མཆོག་ཡིན་ཏེ། །ཕྱི་ནས་བགེགས་མི་འཇུག་པ་ཡིན། །ཨོཾ་ཕ་ར་ཕ་ར་ཡ་ཏ་ཧཱུྃ་སྭཱ་ཧཱ། ཨོཾ་ཀྃ་ཀ་ཤ་རི་བྷ་བ་པ་ཕཊ། ཨོཾ་གྷ་ས་གྷ་ས་བ་རཱུ་པ་ཧ་ཡ་ཧ་ཡ་སྃ་ཙ་ཧཱུྃ། ཨོཾ་མ་ཧཱ་ཀཱ་ལ་ཡམ་གྷ་ཧ་མཱ་ར་ཡ་ཧཱུྃ་ཕཊ། །ཨོཾ་ཨཱ་ཀརྵ་ཡ་ཨཱ་ཀརྵ་ཡ། སརྦ་མ་ཡ་ན་ཧཱུྃ། ཨོཾ་ཡ་མ་དུ་དུ་ཧེ་ད་ཨ་ན་ཨ་སརྦ་ཡ་མེ་ན་ཧ། ཨོཾ་ཤ་ཏ་ཏིཀྵྞ་རུ་པེ་ན་ཡ་མ་ཙྪིནྡ་ཙྪིནྡ་ནཱྃ་ཧཱུྃ་ཕཊ། ཡྃ་ཨོཾ་ཙཎྜ་ཁད་གེ་ད་ཡ་མ་ཙྪིནྡ་ཀ་རཱ་ཡ་ཕཊ། ཨོཾ་ཛྭ་ལ་ཛྭ་ལ་ན་རོ་གི་རཀྵ་རཀྵ་སྭཱ་ཧཱ། དེ་ལྟར་འབྱུང་པོ་ངེས་བསལ་ན། །རྣལ་འབྱོར་པ་ལ་གནོད་བྱེད་པའི། །དངོས་པོ་གང་དག་གསད་བྱའི་ཕྱིར། །ནག་པོ་ཆེན་པོ་འདི་བསྒྲུབ་བྱ། །ཤིན་ཏུ་བརྟགས་ལ་མངོན་པར་བསྒྲུབ། །ཕྲ་མོ་ཙམ་ལ་བྱ་བ་མིན། །བསྟན་པ་དངོས་སུ་འཇིག་ལ་སོགས། །སྙིང་རྗེ་ཆེན་པོས་སྦྱོར་བ་བརྩམ། །དང་པོར་གཙུག་ལག་ཁང་ཆེན་ནམ། །མཆོད་རྟེན་ཁང་སྟོང་ཆེན་པོ་འམ། །རབ་ཏུ་བསྔགས་པ་དུར་ཁྲོད་མཆོག །བདག་གིས་ནག་པོ་ཆེན་པོ་ཡི། །གཟུགས་བརྙན་ལེགས་པར་བྲིས་པ་ཡི། །མཆོད་པ་སྣ་ཚོགས་འབྱོར་པ་དང་། །རབ་གསལ་ལྔ་ཡི་དུད་པ་དང་། །མི་འཆི་ལྔ་ཡི་དུད་པ་ཡིས། །ཞག་བདུན་བར་དུ་བདུག་པར་བྱ། །དང་པོར་གཞི་མའི་དངོས་པོ་གང་། །ཡིད་ཆེས་པགས་པ་ངེས་པ་ལས། །དེ་ལས་བྱུང་བ་གང་ཡིན་པ། །ཡང་དག་པ་རུ་བྲི་བར་བྱ། །དེ་ནས་གནས་གང་ཡིན་པ་རུ། །སྐར་མ་དག་ལ་ཡོངས་མཆོད་ལ། །རབ་གསལ་ལྔ་དང་མི་འཆི་ལྔ། །གཞན་

ཡང་རབ་གསལ་སྣ་ཚོགས་པས། །ཡང་དག་པ་རུ་མཆོད་པར་བྱ། །དཔའ་བོ་སྣ་ཚོགས་འབྱོར་པ་དང་། །མཆོད་པ་སྣ་ཚོགས་ཅི་འབྱོར་པས། །ཟླ་གསུམ་བར་དུ་མཆོད་བྱ་ཞིང་། །རང་ཉིད་ཆ་ལུགས་བསྒྱུར་བ་ཡིས། །ལུས་ལ་ཁྲག་གིས་རྣམ་པར་བསྐུ། །རླག་བྱེད་དངོས་པོ་གང་ཡིན་པ། །འབར་བའི་དཀྱིལ་འཁོར་ཕྱོགས་ཀུན་ཏུ། །སྟོད་ཀྱི་ཚིགས་གཉིས་བཀུག་པ་ཡིས། །ཡོངས་སུ་བྲུ་བར་བྱ་བ་ཡིན། །དེ་ཡི་ནང་དུ་དངོས་པོ་གང་། །ཡང་དག་པར་ནི་བླུགས་བྱས་ལ། །མགོ་ཆོ་བ་དང་དྲེ་ར་ཤ། །དེ་གསུམ་ཡོངས་སུ་བསྲེས་པ་ཡིས། །གང་ལ་དམིགས་པར་བྱ་བ་ཡི། །དངོས་པོ་གང་དག་དེར་བསམ་བྱ། །སྔགས་དང་ཕྱག་རྒྱ་སྦྱོར་ཤེས་པས། །གསལ་བར་བསྒོམས་པས་དབུལ་བར་བྱ། །གཏོར་མ་ཉིད་ལ་སྣ་ཚོགས་པའི། །དངོས་པོ་གང་དག་བླུགས་བྱས་ལ། །མཚན་མོ་ཕྱེད་ནས་ཡོངས་སུ་གཏང་། །དེ་ཡི་ཐུགས་ཀ་ཉིད་ནས་ནི། །ཐུགས་ཡིད་བསྡུས་པ་ཡང་དག་བསམ། །འདི་ཡི་སྟོད་ཀྱི་ཆ་གང་ལགས། །མི་འགྱུར་གནས་པ་གང་དག་བསམ། །དེ་གཉིས་དཀར་དང་གནག་པ་སྟེ། །འདི་ལ་འབྲེལ་པར་གྱུར་པ་ཡིན། །དངོས་པོ་ནག་པོར་དེ་ཉིད་ལ། །དངོས་པོ་དཀར་པོ་གང་ཡིན་པ། །སྟོབས་བསྐྱེད་གསལ་བར་གནས་པར་བྱ། །དེ་ལྟར་སྐད་ཅིག་དུ་མ་ཡིས། །ཡོངས་སུ་གནས་པར་བྱས་པ་ལས། །བདག་ལ་ང་རྒྱལ་དྲག་པོ་བསྐྱེད། །དེ་སྐྱེས་པ་ཡི་གྲུབ་པར་བསམ། །རྟགས་སུ་བྱ་བ་གང་ཡིན་པས། །དེ་ཉིད་དངོས་པོ་གཡོས་གྱུར་དང་། །དྲག་པོ་སྒྲ་ཡང་ཐོས་པ་དང་། །སེམས་ཅན་མ་རུངས་འཇིགས་པའི་གཟུགས། །མངོན་སུམ་དག་ཏུ་འོངས་གྱུར་ན། །ངེས་པ་ཉིད་དུ་འགྲུབ་པ་ཡིན། །དེ་འགྲུབ་བསྒྲུབ་བྱ་གང་ཡིན་པ། །དེ་ཉིད་རྣམས་གསུམ་བསྲེགས་པ་ཡིན། །ཆག་གང་པ་ཡི་དབྱིབས་བྱས་ལ། །དེ་ཡི་དཀྱིལ་དུ་སྲོག་སྙིང་གཞུག །དེ་ནས་ནག་པོ་ཆེན་པོ་ལ། །མ་ཉེས་པ་ཡི་ཚིག་བརྗོད་དེ། །ནག་པོ་ཆེན་པོ་ཉིད་ལ་བསྟབས། །དེ་ཡི་སྔགས་དག་བཟླས་པ་ཡིས། །རབ་གསལ་ལྔ་དང་མི་འཆི་ལྔ། །དཔའ་བོ་ལ་སོགས་ཐམས་ཅད་ཀྱིས། །ཡོངས་སུ་སྦྱར་བ་དེ་ཉིད་གསུམ། །དངོས་པོ་གང་ཉིད་ཛ

ལ་སོགས་པ། །མཚོན་གྱིས་ཡོངས་སུ་གཏུབ་པར་བྱ། །དེ་ནས་མེ་ཉིད་རབ་སྦྱར་བས། །སྔགས་དང་ཕྱག་རྒྱར་རབ་ལྡན་པས། །ལུས་ངག་ཡིད་ནི་དྲག་པོ་ཡིས། །ལས་ཀྱི་སྦྱོར་བ་ངེས་པར་སྤྱད། །ཨོཾ་མ་ཧཱ་ཀཱ་ལ་མཱ་ར་ཡ་མཱ་ར་ཡ་སརྦ་ཤ་ཏྲཱུྃ་ནཱྃ་ཕཊ་ཕཊ་ཕཊ། ཨོཾ་མ་ཧཱ་ཀཱ་ལ་སརྦ་ཤ་ཏྲཱུྃ་ཙྪིནྡ་ཡ་ཕཊ། ད་ས་དྃ་རེ་ཕ་ར་ཧ་ཧ་ཧ་བྷ་སྭཱ་ཧཱ། དེ་ནས་སྔགས་པ་ཡོངས་རྟོགས་པས། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་སངས་རྒྱས་རྣམས་ལ། །གང་ཞིག་གནོད་པར་བྱེད་པ་ཡི། །གང་ཟག་རྣལ་འབྱོར་བསྒྲུབ་པ་ཡི། །གོང་མའི་སེམས་ཀྱིས་ཡང་དག་སྦྱར། །དེ་ལ་བླ་མའི་མན་ངག་གིས། །ཡང་དག་པར་ནི་དབྱེ་བར་བྱ། །བླ་མ་ཉིད་ལ་ཅི་ནུས་པའི། །ཡོངས་སུ་མཆོད་པས་མན་ངག་དབྲལ། །འདིས་ནི་ངེས་པར་འགྲུབ་པས་ན། །ཡིད་ཆེས་པར་ནི་ཡོངས་སུ་བསྒྲུབ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གཤིན་རྗེ་བྲང་དམར་གྱི་གདོན་འདུལ་བའི་ལེའུ་སྟེ་བཅུ་གཉིས་པའོ།། །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་གནོད་སྦྱིན་གདོན་གྱིས་ཟིན། །དེ་ལ་ཐབས་གཉིས་གསུང་དུ་གསོལ། །གསང་བའི་མགོན་གྱིས་བཀའ་སྩལ་པ། །གནོད་སྦྱིན་གདོང་སེར་ཞེས་པའི་གདོན། །ཤིན་ཏུ་དྲག་པར་གྱུར་པ་ལས། །ཐབས་འདི་ཡང་དག་བརྩམ་པར་བྱ། །དྲག་པོའི་སྒྲ་དང་རབ་ལྡན་པའི། །ཁ་དོག་སེར་བ་སུམ་ཅུའི་གཟུགས། །སྟོབས་དང་ལྡན་ཞིང་རབ་ཏུ་གུས། །ཟས་སུ་སྦྲང་རྩི་ཟར་བཅུག་ལ། །ཞག་བདུན་བར་དུ་ངེས་པར་བསྙེན། །གོས་དག་ལྗང་ཁུ་བསྐོན་བྱས་ལ། །སྔགས་འདི་དག་གིས་ཡོངས་སུ་བསྔགས། །བདག་གིས་རབ་ཏུ་དང་བས་ནི། །སངས་རྒྱས་རྣམས་ལ་མཆོད་པས་མཆོད། །དེ་ནས་སུམ་ཅུ་པ་དག་ལ། །དངོས་པོ་བརྟེན་པར་བྱེད་པ་ཡི། །རས་སོགས་གོས་དྲས་བཙེམས་བྱས་ལ། །བྱང་ཕྱོགས་དག་གི་ཁང་སྟོང་དུ། །ཕྱིན་པས་ས་ཉིད་བླང་བར་བྱ། །ལུས་ངན་སྲས་པོས་རབ་བསྔགས་པ། །སྙིང་པོ་ཉིད་ཀྱང་གདོན་བྱ་ཞིང་། །དེ་ཐོབ་བྱང་ཕྱོགས་ཁྲོ་བོ་ཡི། །སྔགས་བཟླས་

པ་ཡིས་ཕྱིར་མི་ལྟ། །དེ་ནས་སྔགས་པ་བློ་ལྡན་པས། །དཀྱིལ་འཁོར་ཁྲུ་ནི་ཕྱེད་དང་དོ། །ཟུར་བཞི་པ་རུ་བྱས་པ་ལ། །རམས་དང་མཐིང་ཤུན་ཡུང་བ་དང་། །བ་ཡི་རྣམ་ལྔ་དྲི་ལྡན་པས། །འཕང་དུ་སོར་གཉིས་རྣམ་པར་ངེས། །ནང་ནས་རབ་ཏུ་ཟླུམ་བྱས་ལ། །ཙན་དན་དཀར་པོའི་ཐིག་ལེ་ནི། །བཅུ་བདུན་ཡོངས་སུ་བྲི་བར་བྱ། །དེ་སྟེང་འཁོར་ལོའི་ལྷ་ཚོགས་གནས། །བླ་རེ་ལྗང་ཁུ་ཕུབ་བྱས་ལ། །དེ་ནས་འདབས་འབྱོར་དེ་ཉིད་ཀྱི། །དཀྱིལ་འཁོར་གྲུ་བཞི་པ་ཉིད་ལ། །རྒྱར་ནི་སོར་མོ་བཅུ་གཉིས་ལ། །ཟབས་སུ་ཆག་གང་ངེས་པར་བྲུ། །ཁུ་བྱུག་དུག་ཏུ་བསྲེས་པ་ཡི། །དེ་ཡི་གཅལ་དུ་རྣམ་པར་དགྲམ། །མཆོད་པ་ལྔ་དང་གཏོར་མ་དང་། །ལས་ལ་སྦྱོར་སོགས་དཀར་པོ་ཉིད། །ཡོངས་སུ་གཏང་བར་བྱ་བ་ཡིན། །སྒྲ་སྐད་ཆེན་པོའི་རུས་པ་ལ། །ཕྲེང་བ་བྱས་པས་དྲག་པོའི་རིགས། །དེ་ཉིད་ལ་ནི་བཟུང་བ་ཡིས། །རྩ་བའི་སྔགས་སོགས་འབར་བ་བཟླས། །དེ་དག་སྟེང་དུ་ཐིམ་འགྱུར་བས། །ལུས་ངན་སྲས་པོའི་སྔགས་བཟླས་པས། །དེ་ཡང་གོང་མའི་ཚད་ཉིད་དུ། །ཕྱིན་པས་ཡོངས་སུ་བཟླས་པར་བྱ། །ཡིད་ཆེན་ཕུར་བུ་སོར་བཅུ་པ། །བཅུ་དྲུག་དག་གིས་དེ་ཉིད་ཀྱི། །ཁ་རུ་ཡོངས་སུ་བསྐོར་བར་བྱ། །བདག་ཉིད་སྔ་མའི་ཆ་ལུགས་ལ། །འབར་བ་བསྐྱོད་པས་ཕུར་བུ་བསྔགས། །ཡུངས་ཀར་ཏིལ་གྱིས་རིགས་གཉིས་ལ། །བྱང་ཕྱོགས་ཁྲོ་བོའི་སྙིང་པོ་ཉིད། །བརྒྱ་རྩ་བརྒྱད་པས་ཡོངས་སུ་བསྔགས། །སྐུད་པ་སྔོན་པོ་ཉིད་ལ་ཡང་། །འབར་བ་ཆེན་པོའི་སྔགས་བཟླས་ནས། །དེ་ཡི་གཟུགས་ཉིད་ཡུང་བ་ཡིས། །གྲོ་ག་དག་ལ་བྲིས་བྱས་ལ། །སྐུད་པ་དེ་ཡིས་རབ་བཅིངས་ལ། །ནང་དུ་ངེས་པར་གཞུག་པར་བྱ། །སྟེང་དུ་མེ་ལོང་ཉིད་ལ་ཡང་། །གུར་གུམ་ཁུ་བས་བྱུགས་བྱས་ལ། ངོ་བསྟན་ཁ་ནི་དགའ་བར་བྱ། །ཞག་བདུན་བར་དུ་བསྙེན་པ་ཡིས། །དེ་ཉིད་འགུགས་པའི་སྔགས་ཀྱང་བཟླས། །དེ་ནས་སྔགས་པས་སྦྱོར་བ་འདི། །ཡོངས་སུ་མ་ཉམས་ཡང་དག་བཟླས། །དེ་རྫོགས་ནད་པ་བཀུག་བྱས་ལ། །གུ་གུལ་ནག་པོའི་དུད་པ་ཡིས། །སྣ་ཉིད་དག་ཏུ་བདུག་

པར་བྱ། །དེ་ནས་དེ་ཉིད་འཕྲོས་པ་ན། །མི་བཟད་རབ་ཏུ་འབར་བ་ཡི། །སྡེར་མོ་ཡིས་ནི་དྲག་ཏུ་བཟུང་། །ཧཱུྃ་གི་ང་རྒྱལ་སྒྲ་དང་ལྡན། །ཞགས་པ་སྔོན་པོ་གང་ཡིན་པས། །དེ་ཡི་སྐེ་ནས་བཟུང་བྱས་ལ། །མེ་ལོང་ཉིད་ལ་ངོ་བསྟན་བྱ། །གཡས་པ་རྡོ་རྗེ་ལྡན་པ་ཡིས། །ཕྲེང་བས་སྔགས་ནི་ཡང་དག་བཟླས། །དེ་ནས་རབ་ཏུ་ལྡན་པ་ཡིས། །སྲོག་གི་སྙིང་པོ་ཡོངས་སུ་བཟླས། །བསམ་པ་ཡོངས་སུ་རྫོགས་པ་ཡིས། །དེ་ཉིད་ལ་ནི་ཡང་དག་དབབ། །དེ་ནས་རྣམ་པར་རབ་ལྡན་པས། །སྔགས་ཆུ་ཡིས་ནི་ཁྲུས་བྱས་ལ། །ལུས་ངག་ཡིད་གསུམ་དྲག་པོ་ཡིས། །དངོས་པོ་ཡོངས་སུ་བཅིངས་བྱས་ལ། །ཁྲུ་གང་བརྐོས་པའི་ནང་དུ་གཞུག །ཕུར་བུས་སྟེང་དུ་གཟིར་བྱས་ལ། །ཕཊ་ཀྱི་སྔགས་ཀྱིས་ཡང་དག་མནན། །དེས་ནི་གདོན་མི་ཟ་བར་ནི། །གནོད་སྦྱིན་གདོན་དང་ངེས་པར་བྲལ། །དེ་ནས་སྲུང་བའི་འཁོར་ལོ་ཉིད། །ཡོངས་སུ་བསྲུང་བ་བྱས་པ་ཡིས། །ཕྱི་ནས་གདོན་མི་འཇུག་པ་ཡིན། །ཨོཾ་མ་ཧཱ་བཻ་ཤྲ་མ་ཎཱ་ཡེ་ཀཾ་ཀཱ་ལ་ཡཀྵ་བྷན་དྷ་ནཱྃ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ་ཕཊ། བ་ཙ་ཝ་ཕུཿ ཤ་ཡ་ཧ་ཧ་ན་ཧ་ན་ཡཀྵ་པ་ར་ཡ། ཨོཾ་ཨཱ་ཀརྵ་ཡ་ཨཱ་ཀརྵ་ཡ་སརྦ་ཡཀྵ་ནཱྃ་ཧཱུྃ་རྃ། ཤ་ཨོཾ་ཡཀྵ་ཧྲྀ་ད་མ་ཛ་མ་ཛ་སོ་པ་ལ་ཧཱུྃ། ཨོཾ་སརྦ་ར་ར་བི་ཤོ་དྷ་ཡ་ཧཱུྃ་ཕཊ། ཨོཾ་ཧ་ཧ་ཧ་ཕཊ་ཕཊ་ཕཊ་ཧཱུྃ། སངས་རྒྱས་བྱང་ཆུབ་སེམས་དཔའ་དང་། །ལུས་ལ་སོགས་པའི་ཕན་གནོད་གཉིས། །ཡོངས་སུ་སྦྱང་བར་ཡང་དག་བཤད། །དེ་ཉིད་ལུས་ངན་སྲས་པོ་ལ། །གང་བསྟབས་དེ་ཉིད་ངེས་པར་འཇིག །དེ་ཡི་སྦྱོར་བ་བྱ་བ་ནི། །ལུས་ངན་སྲས་པོའི་བསྒྲུབ་པ་བཤད། །དང་པོར་དེ་ཡི་གཟུགས་བྱ་བ། །རམས་དང་ཡུང་བ་རབ་སྦྱར་བས། །བ་དན་ནེའུ་ལེའི་རྐྱལ་པ་དང་། །སྐུ་གདུང་གཡས་ཕྱོགས་བཞག་བྱས་ལ། །གོང་མ་ལྟ་བུའི་གཟུགས་སུ་བྲི། །གཡས་གཡོན་གཉིས་སུ་དེ་ཉིད་ཀྱི། །ཡི་གེ་གཉིས་པོ་བྲི་བྱས་ལ། །དེ་མཐཪ་དྲག་པོའི་སྙིང་པོ་བྲི། །གསུམ་སྦྱར་དངོས་པོ་འབིགས་བྱེད་པའི། །ཚིགས་གསུམ་དུ་ནི་ངེས་པ་ལས། །དར་དག་དམར་པོ་ཁ་ཚོན་གང་། །

མེ་ཏོག་ཕྲེང་བས་ཡོངས་སུ་བརྒྱན། །རིན་ཆེན་སྣ་ལྔའི་ཕྱེ་མ་དང་། །དྲི་ཡི་ཕྱེ་མ་སྣ་ཚོགས་པ། །ཕུར་མ་བྱས་པས་གདགས་པར་བྱ། །སྲོག་སྙིང་འོ་མས་བྲི་བྱས་ལ། །དེ་ཡི་མིང་རུས་ཁྲག་གིས་བྲི། །འབྲུ་དག་དཀར་པོའི་སྟེང་བཙུགས་པས། །དེ་ཉིད་ལ་ནི་ཆགས་པར་འགྱུར། །དཀྱིལ་འཁོར་ཁྲུ་གང་གྲུ་བཞི་པ། །འཕང་དུ་སོར་གཉིས་ངེས་པ་ལས། །གོང་དུ་བསྟན་པའི་སྦྱོར་བ་ཡིས། །ཡོངས་སུ་བྱུགས་པར་བྱས་པ་ལས། །མཆོད་པ་ལྔ་ཡིས་རབ་མཆོད་ལ། །བདག་ཉིད་སྡོམ་པར་ཡང་དག་གནས། །ཟས་སུ་དཀར་གསུམ་བཟའ་བྱས་ཤིང་། །ཆང་ལ་སོགས་པ་བཏུང་མི་བྱ། །གཏོར་མ་ཆ་གཅིག་བསྙེན་པར་གནས། །ཆ་གཉིས་ཉིན་མཚན་དུས་གཉིས་སུ། །བསམ་པའི་སྦྱོར་བས་ཡོངས་སུ་གཏང་། །དང་པོའི་གཏོར་མ་དེ་ཉིད་ལ། །ཡུངས་ཀར་ཉིད་ཀྱང་བླུགས་བྱས་ལ། །བཟླས་པས་གྲངས་སུ་ཐིམ་པར་བྱ། །དེ་ཡི་མིང་རུས་གང་ཡིན་པས། །སྙིང་པོ་དག་ལ་རེ་རེ་ཞིང་། །ཡང་དག་པ་རུ་མཉེས་པར་བྱ། །རང་གིས་མ་ཉེས་གང་ཡིན་པའི། །ཚིག་བཏོན་པ་ཡིས་དྲག་པོར་བོད། །ཤིན་ཏུ་གདུག་སེམས་རབ་འབར་བས། །དང་པོ་སྙིང་རྗེ་ཆེན་པོ་བསྐྱེད། །འདི་ལ་རྟགས་ཀྱིས་སྦྱོར་བ་དང་། །བརླག་པར་བགྱི་བའི་བསྐུལ་མ་གདབ། །རིང་དུ་འཚོ་ན་སྙིང་རྗེ་སྤང་། །མྱུར་དུ་ཁྱོད་ཀྱིས་བསྒྲལ་དུ་གསོལ། །དེ་དག་ལ་སོགས་ཚིག་དག་གིས། །དེ་ལ་ཚིག་ཀྱང་དྲག་པོར་བརྗོད། །དེ་ནས་གནས་གང་ཡིན་པར་ནི། །དང་པོའི་གཏོར་མ་བརྡབ་པར་བྱ། །དང་པོ་དང་ནི་བར་དག་དང་། །ཐ་མར་ཕྱོགས་སྐྱོང་སྲུངས་མ་ལ། །འོ་དོད་བོད་པས་གཏོར་མ་གཏང་། །སྔགས་རྣམས་བླ་མའི་ལུང་ལས་ནི། །ཡོངས་སུ་ཤེས་པར་བྱ་བ་ནི། །ཨོཾ་བཻ་ཤྲ་པ་ཎཱ་ཡེ་ཧཱུྃ། ཨཱ་མུ་ཏྃ་ཁ་ཏ་བ་ཏས་ས་ག་རུ། དེ་ལས་ཡོངས་སུ་བྱུང་བས་ནི། །ཡང་དག་པ་རུ་ཤེས་པར་བྱ། །མཚན་མོ་མགྱོགས་པ་ཞེས་བྱ་བའི། །སྲོག་ཆགས་གང་དག་ཤི་བ་ཡི། །རུས་པ་ལ་ནི་སྔགས་བཟླས་ལ། །དེ་ཡི་ཁང་རྩར་གཞུག་པར་བྱ། །དེ་ཡིས་ལྟས་ངན་སྣ་ཚོགས་པ། །ཡང་དག་པ་རུ་འབྱུང་བ་ཡིན། །གྲུབ་པའི་རྟགས་སུ་བསྟན་པ་ནི། །སྐྱེས་པ་མདའ་གཞུ་པ་དག་ནི། །ཡང་ཡང་རྨིས་པར་གྱུར་པ་

ནི། །ངེས་པར་འགྲུབ་པར་ཡང་དག་བཤད། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གནོད་སྦྱིན་གདོང་སེར་གྱི་གདོན་འདུལ་བའི་ལེའུ་སྟེ་བཅུ་གསུམ་པའོ།། །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་སྒྲུབ་པར་བྱེད་པ་ལ། །བྲིས་སྐུ་ལ་སོགས་གླེགས་བམ་ཉིད། །ཚད་དེ་གང་གིས་བགྱི་བ་ལགས། །རིག་པའི་རྒྱལ་པོས་བཀའ་སྩལ་པ། །གང་ཞིག་སྒྲུབ་པར་བྱེད་པ་ཡིས། །བྲིས་སྐུ་གླེགས་བམ་སྦྱོར་བ་འདིས། །ཡང་དག་པར་ནི་བསྒྲུབ་པར་བྱ། །དུར་ཁྲོད་ལ་སོགས་གང་ཡིན་པར། །རི་མོ་མཁན་ཉིད་རིམ་པ་བཞིན། །དབང་བསྐུར་བ་ནི་ཡང་དག་བྱ། །ཐ་ག་པ་ཡང་བསྙེན་བྱས་ལ། །དྲི་ཞིམ་པ་ཡིས་ཡོངས་སུ་བྱུག །སྟེང་འོག་གཉིས་ལ་མཐའ་གཉིས་གསུམ། །མཉམ་པར་བཞག་པས་ཡང་དག་བརྟག །དམར་པོ་ལྔ་ཡིས་རབ་བྱུགས་ལ། །ས་བོན་ཡང་དག་ལྡན་པ་དང་། །དྲི་ཞིམ་རྣམ་པ་སྣ་ཚོགས་པ། །ཡོངས་སུ་བྱུག་པར་བྱ་བ་ཡིན། །ཚོན་རྩི་རྣམ་པ་སྣ་ཚོགས་པས། །ཡིད་ཆེས་སྔགས་ཀྱི་ཚོན་རྩི་རྣམས། །མཉམ་པར་སྦྱར་བ་བྲི་བར་བྱ། །སྣོད་དག་ཐོད་པ་ཉིད་ལ་ནི། །པིར་ནི་མི་ཡི་སྐྲ་ཡིས་བྱ། །དུར་ཁྲོད་ཉིད་དམ་ཁང་སྟོང་ངམ། །གནས་དབེན་པར་ནི་ཡོངས་སུ་བྲི། །ལས་མཁན་སྔོན་པོའི་གོས་བགོས་ཏེ། །ཁྲག་གིས་གདོང་དག་བྱུགས་བྱས་ལ། །སྔགས་འདི་ཡིས་ནི་རྟག་ཏུ་བཟླས། །ཨོཾ་ཙཎྜ་མ་ཧཱ་རོ་ཥ་ཎ་ཀ་ར་ཡྃ། སརྦ་ས་ཏྭཱ་ར་ཐ་ཧཱུྃ་ཧཱུྃ། གཏོར་མ་དྲག་པོ་གང་ཡིན་པ། །བྲི་བའི་དུས་སུ་གཞག་པར་བྱ། །ཟིན་ནས་དེ་ཉིད་གཏང་བར་བྱ། །དང་པོར་ཚོན་རྩི་ཐམས་ཅད་ལ། །རིན་ཆེན་སྣ་ལྔར་བྱིན་གྱིས་བརླབ། །རྡོ་རྗེ་རྩེ་གཅིག་ཕྱག་རྒྱ་ཡིས། །ཡང་དག་པ་རུ་བྲི་བྱ་སྟེ། །སྐྱེད་བྱེད་དང་ནི་ཡོན་བདག་གི །བསམ་པས་ཡོངས་སུ་བྲི་བར་བྱ། །དཀྱིལ་དུ་པདྨ་བཅུ་དྲུག་ལ། །སྙིང་པོ་ཟེ་འབྲུ་ཡང་དག་ལྡན། །དཀྱིལ་དུ་གཙོ་བོ་འབར་བ་ཉིད། །གོང་མའི་གཟུགས་ཀྱིས་བྲི་བར་བྱ། །འཁོར་ལ་སོགས་པ་ཐམས་ཅད་ཀྱང་། །སྔ་མ་ལྟ་བུར་ཡང་དག་བྲིས། །ཕྱི་རོལ་ཤིང་ལ་སོགས་པ་དང་། །དུར་ཁྲོད་བརྒྱད་ཀྱིས་རྣམ་པར་བརྒྱན། །འཇིགས་པར་བྱེད་

པའི་རོ་ལངས་དང་། །ཅེ་སྤྱང་དྲག་པོའི་སྒྲ་ཡང་སྒྲོགས། །དེ་ལྟར་རིམ་པ་ཇི་བཞིན་པས། །གོང་མ་ལྟ་བུས་ཡང་དག་བྲི། །དབང་བསྐུར་གནས་སྐབས་གང་ཡིན་པས། །མཚན་མའི་དཀྱིལ་འཁོར་ཡོངས་སུ་བྲི། །དེ་ཡི་བར་དུ་མི་གཞན་ལ། །བྲིས་སྐུ་བསྟན་པར་མི་བྱའོ། །བརྒྱང་ཤིང་རུས་པ་ཉིད་ལ་ནི། །བྱས་པས་ཐང་ཀ་ཡོངས་སུ་བརྒྱངས། །གུར་དག་སྔོན་པོ་ཕུབ་བྱས་ལ། །མཁའ་ལ་ཡོངས་སུ་བསྟན་མི་བྱ། །གལ་ཏེ་བསྟན་པར་བྱས་པ་ན། །དངོས་གྲུབ་འགྲུབ་པར་འགྱུར་བ་མེད། །དེ་བས་མཉམ་པར་བཞག་པ་ཡིས། །སྦྱོར་བ་ལེགས་པར་བརྩམ་པར་བྱ། །གླེགས་བམ་ངེས་པར་བྲི་བར་བྱ། །གྲོ་ག་དག་ལ་སོར་དག་ནི། །དཀྱུས་སུ་བཅུ་གཉིས་ཞེང་དུ་བཞི། །དེ་ཡི་ཚད་དུ་བྱ་བ་ལ། །ཁྲག་དང་བདུད་རྩི་ལྔ་རྣམས་ཀྱིས། །ཡོངས་སུ་བྱུག་པར་བྱས་པ་ལ། །མེ་ལོང་ཨུར་གྱིས་མནན་བྱས་ཏེ། །མཐིང་ཤུན་ཉིད་ཀྱིས་ལེགས་པར་བྲི། །འདྲི་མཁན་སྦྱོར་བ་རབ་ལྡན་པས། །སྨྱུ་གུ་ལྕགས་ལས་བྱས་པ་ཡི། །སྣོད་ནི་ཐོད་པར་ཡང་དག་ལྡན། །གཏོར་མ་ཡང་དག་བཤམས་བྱས་ལ། །ཧཱུྃ་གི་ངག་གིས་རྟག་ཏུ་བརྗོད། །གོས་དག་སྔོན་པོ་བགོས་བྱས་ནས། །རྒྱན་ཆ་ལྔ་ཡིས་རྣམ་པར་བརྒྱན། །མི་གཞན་ལ་ནི་མི་བསྟན་ཅིང་། གླེགས་ཤིང་རུས་པའམ་གླང་ཆེན་གྱི། །བ་སོ་དག་ལ་ངེས་པར་བྱ། །ཐག་པ་བྲམ་ཟེ་མོ་ཡི་ནི། །སྐྲ་ཡིས་ཡོངས་སུ་བསྡམ་པར་བྱ། །ཡང་ན་ཡིད་ཆེས་པགས་པ་ལ། །མཉེན་པར་བྱ་བས་ཡོངས་སུ་བསྡམ། །དེར་ནི་ལག་གཡོན་སྟོད་ཀྱི་བར། །དེ་ཉིད་བདག་གིས་ཡོངས་སུ་སྦ། །སངས་རྒྱས་ལྔ་ཡི་བདག་པོ་མཆོག །ངེས་པར་རྡོ་རྗེ་རྣོན་པོ་ཉིད། །སྡང་བ་ཐམས་ཅད་འདུལ་བྱེད་ཅིང་། །དངོས་སུ་དཔའ་བོ་རབ་འབར་བ། །ཆེན་པོ་ཡི་ནི་ཆེན་པོ་ཉིད། །ཀུན་ལ་མཁའ་འགྲོ་ཆེན་པོ་སྟེ། །སྐུ་ཆེན་རབ་དྲག་འཇིགས་པའི་གཟུགས། །མཁའ་ལྟར་མཉམ་ལ་ཕྱག་འཚལ་བསྟོད། །ལས་ལ་འཇུག་པར་སྣང་བ་ཉིད། །ཀུན་བསྡུས་པས་ནི་དེ་བརྗོད་བྱ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་བྲིས་སྐུ་དང་གླེགས་བམ་གྱི་ལེའུ་སྟེ་བཅུ་བཞི་པའོ།། །།ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་

འདི་སྐད་གསོལ། །གང་ཞིག་རྒྱུད་འདི་ལས་སྦྱོར་བས། །ཐབས་ཀྱི་ཡན་ལག་སྣ་ཚོགས་པ། །ཡང་དག་རྒྱས་པར་གསུང་དུ་གསོལ། །བདེ་གཤེགས་མཆོག་གིས་བཀའ་སྩལ་པ། །དད་པའི་རང་བཞིན་ཅན་གྱི་མིས། །འདི་ཉིད་ལ་ནི་མངོན་པར་བསྒྲུབ། །ཀླུ་གདུག་འབར་བས་ཟིན་པ་ནི། །ནུབ་མོ་ན་པར་གྱུར་པ་དང་། །ཡན་ལག་དྲག་པར་ན་བ་དང་། །སྨིན་མ་ལ་སོགས་བྱི་བ་དང་། །ལུས་ལ་ཤ་རོ་ཁོལ་བར་གནས། །ཚིགས་སུ་ན་ཞིང་ཆགས་པར་ལྡན། །སྙིང་མི་དགའ་དང་དཀར་ལ་དགའ། །ཀླུ་ཡི་ནད་དུ་ཤེས་པར་བྱ། །བ་ལང་དམར་པོ་མཐོང་བ་དང་། །སྦལ་པ་ཉ་སོགས་མཚན་མོ་རྨི། །བུ་མོ་གཞོན་ནུ་མཐོང་བ་དང་། །སྐྱེས་པ་སྐྲ་སེར་རྨི་བ་དག །ཀླུ་ཡི་མཚན་སྨྲ་བསྟན་པ་ཡིན། །ཁྲུས་ལ་དགའ་ཞིང་སྐུད་པ་འཁལ། །ཆང་ལ་ཡོངས་སུ་དད་ཆེ་བ། །ཚངས་པའི་ནད་དུ་ཤེས་པར་བྱ། །སྨྲ་ལོག་མང་དང་ལག་སྒྱུར་དང་། །ཐོ་རངས་ན་བ་གང་ཡིན་པ། །ཟས་མི་ཟ་དང་སྙིང་འཕར་བ། །ཚངས་པའི་གདོན་དུ་རིག་པར་བྱ། །རྐེད་པ་བརྐྱང་དང་ཉལ་ལ་དགའ། །སེན་མོ་བྱི་དོར་བྱེད་པ་དག །ཚངས་པའི་ནད་དུ་ཤེས་པར་བྱ། །ནུབ་མོ་སྦུར་བ་རྨི་བ་དང་། །སྤྲེའུ་བྱི་ལ་མཐོང་གྱུར་ན། །ཚངས་པའི་མཚན་མར་བསྟན་པ་ཡིན། །མི་རྒན་རིད་པ་མཐོང་བ་དང་། །ཤར་ཕྱོགས་རི་ལ་འཛེགས་པ་དག །ཚངས་པའི་རྟགས་སུ་བསྟན་པ་ཡིན། །དབུགས་དག་ནང་དུ་འདྲེན་པ་དང་། །གླལ་ཞིང་སྤྱི་བོར་ལག་པ་འདུད། །སྐྱུག་པར་བྱེད་ཅིང་ཤ་ལ་དགའ། །གཤིན་རྗེ་ཡི་ནི་གདོན་དུ་བསྟན། །རྐང་པ་ས་ལ་རྡེབ་པ་དང་། །མཁལ་སོགས་གཡས་པའམ་གཡོན་པ་ན། །གཤིན་རྗེའི་ནད་དུ་རིག་པར་བྱའོ། །ཚིག་པ་ཟ་དང་གཞན་ལ་རྒོལ། །མི་གཞན་ལ་ནི་མངོན་པར་སྡང་། །སྡུར་དག་རབ་ཏུ་མི་བདེ་དང་། །ཐག་པ་དག་ལས་མདུད་པ་འདོར། །གཤིན་རྗེའི་གདོན་དུ་ཤེས་པར་བྱ། །གླང་དང་ཤ་བ་རྨིས་པ་དང་། །གོས་དག་སྔོན་པོ་ལུས་ལ་གྱོན། །གཤིན་རྗེ་ཡི་ནི་མཚན་མ་ཡིན། །ཤིང་ལ་འཛེགས་པས་ཕྱིར་ལྷུང་དང་། །གྲུ་ན་ཞུགས་པ་གང་རྨི་བ། །དེ་ནི་གཤིན་རྗེའི་མཚན་མ་ཡིན། །མིག་རྩ་རྒོད་ཅིང་

ལྦུ་བ་སྐྱུག །འཁུར་བ་འབུད་ཅིང་བྲང་ལ་རྡུང་། །གནོད་སྦྱིན་གདོན་དུ་ཤེས་པར་བྱ། །ཡང་ཡང་ལྡང་ཞིང་རྔམ་པ་རྒོད། །ཁ་ནས་ལྕེ་ནི་རྐྱོང་བ་དང་། །ལུས་ལ་བསྐུ་བྱུག་བྱེད་པ་ནི། །གནོད་སྦྱིན་གདོན་དུ་ཤེས་པར་བྱའོ། །ལྟོ་བ་ན་ཞིང་ཟས་ལ་དགའ། །རྒྱབ་ཏུ་གཟེར་བ་གང་ཡིན་པ། །གནོད་སྦྱིན་ནད་དུ་ཤེས་པར་བྱ། །རྟ་སྔོན་དག་ལ་ཞོན་པ་དང་། །བོང་བུ་ལ་ཞོན་རྨི་བ་རྣམས། །གནོད་སྦྱིན་མཚན་མ་ཡིན་པར་བཤད། །བྱ་རོག་ལག་པར་ཐོགས་པ་དང་། །ཐག་པས་ལུས་འཁྱུད་ཉལ་བར་རྨིས། །གནོད་སྦྱིན་མཚན་མར་རིག་པར་བྱའོ། །སྤོས་ཆུ་ལ་ནི་སྔགས་བཏབ་ནས། །བྱིན་ན་ལེན་པར་མི་བྱེད་པ། །ཚངས་པའི་གདོན་དུ་ཤེས་པར་བྱ། །ཡུངས་ཀར་ཉིད་ལ་རབ་བསྔགས་ནས། །ལག་པར་བྱིན་པས་མིག་མི་ལྟ། །གཤིན་རྗེའི་གདོན་དུ་ཤེས་པར་བྱ། །ཤ་ལ་སྔགས་ཀྱིས་རབ་བསྔགས་ནས། །ཁ་རུ་བྱིན་པས་སྣ་འགགས་པ། །དེ་ནི་ཀླུ་གདོན་ངེས་པར་གསལ། །སྐུད་པ་སྔོན་པོ་ཉིད་ལ་ནི། །རབ་བསྔགས་མདུད་པ་བདུན་བོར་བ། །མགུལ་དུ་བཅིངས་པས་སྐད་ངན་འདོན། །གནོད་སྦྱིན་གདོན་དུ་ཡིན་པར་བཤད། །ཆོམ་པོ་དག་ནི་ཕྲད་པ་ན། །སྦྱོར་བ་འདི་ཡིས་ཡང་དག་སྦྱོར། །དུར་ཁྲོད་མི་གང་བསྲེགས་པ་ཡི། །སྣ་ཚོགས་ཐལ་བ་བླང་བྱས་ལ། །ཆང་དང་ངེས་པར་སྦྲུས་བྱས་ཏེ། །སྦྲུལ་གྱི་པགས་པས་གཏུམས་བྱས་ལ། །ཏིལ་གྱི་གང་བུ་གྲགས་པ་ལ། །འབུམ་དུ་ཡང་དག་བཟླས་བྱས་ཏེ། །བདག་ཉིད་གོས་ལ་ཡང་དག་གཏུམ། །དེ་ནས་དེ་དང་ཕྲད་པ་ན། །དྲག་པོ་ལས་ཀྱི་སྦྱོར་བ་ཡིས། །དེ་ཉིད་ལ་ནི་ཕོག་པར་གཏོར། །དེ་ཡིས་དེ་ལ་གཏོར་བ་ཡིས། །དེ་ནི་རེངས་དང་རྨོངས་པར་འགྱུར། །ཨོཾ་མཱ་ནུ་ཥ་དུཥྚ་སྟཾ་བྷ་ན་ཧཱུྃ། །སྒྱུ་མ་དབང་དུ་སྡུད་བྱེད་ན། །སྦྱོར་བ་འདི་ཉིད་བརྩམ་པར་བྱ། །ངོས་འཇམ་རྡུལ་དང་ཟླ་བ་དང་། །བགེགས་ཀྱི་གཉེན་པོའི་ཁུ་བ་དང་། །སྒོག་ཆེན་ལས་ཀྱི་ཁུ་བས་སུ། །བྱེད་པ་གཉི་ག་པར་སྦྲུས་ལ། །དེ་ལ་མཐུན་པ་ཉིད་ལ་ནི། །ཡོངས་སུ་བསྐུལ་བས་སྦྱིན་པར་བྱ། །དེ་ནས་ངེས་པ་དུས་བཏབ་ལ། །ཁ་སྦྱོར་བ་ཡིས་ཡང་དག་བསྔགས། །ཨོཾ་ན་མོ་ཀཱ་

མ་དེ་བ་ཡ་ཡ་ཡ་ཀ་ཡ་ཀ་ཀཱ་ལ་སིཉྩ་བྷ་གྷ་བི་བརྟ་ན་སྭཱ་ཧཱ། ཨ་མུ་ཀཾ །འབུམ་དུ་དང་པོར་བསྙེན་པ་ཡིས། །སྦྱོར་བ་ངེས་པར་སྤྱད་པར་བྱ། །ནོར་དག་བསྒྲུབ་པར་འདོད་པ་ན། །ནོར་འཛིན་ལྷ་མོ་ཡོངས་སུ་བྲི། །ཁ་དོག་སེར་པོ་ཉིད་ལ་ནི། །ཕྱག་བཞི་པར་ནི་བྲི་བར་བྱ། །ཞལ་གཅིག་ནུ་མ་འབུར་བ་ལ། །གཡས་ཀྱི་དང་པོ་ཏིང་འཛིན་པ། །གཉིས་པ་འབྲས་ཀྱི་སྙེ་མ་འཛིན། །གཡོན་གྱི་དང་པོ་ཉིད་ན་ནི། །རིན་ཆེན་འབར་བ་ཡང་དག་བསྣམས། །གཉིས་པ་ནེའུ་ལེའི་རྐྱལ་པ་བསྣམས། །དེ་ལྟ་བུ་ཡི་གཟུགས་བྱས་ལ། །སྣ་ཚོགས་དྲི་ཡིས་ཡང་དག་མཆོད། །མཆོད་པ་རྣམ་པ་ལྔ་དག་དང་། །ནམ་བཟའ་དར་ལ་སོགས་པ་ཡིས། །ཡང་དག་པ་རུ་མཆོད་པར་བྱ། །ཞག་གྲངས་བརྒྱ་རྩ་བརྒྱད་པ་རུ། །ཡོངས་སུ་བསྙེན་པས་སྔགས་བཟླས་བྱ། །དེ་ནས་གྲུབ་པར་གྱུར་པའི་རྟགས། །དེ་ཉིད་གཡོ་བར་གྱུར་པ་ཡིན། །དེ་གྲུབ་རྟེན་ནི་རྙེད་པར་ནི། །དེ་ཡིས་ལུང་ནི་སྟོན་པར་འགྱུར། །དེ་ནས་དབྱིག་ནི་མི་བཟད་པའི། །བདག་པོར་མི་དེ་ངེས་པར་འགྱུར། །མ་རུངས་པ་དག་སྨྱོར་གཞུག་ན། །སྦྱོར་བ་འདི་དག་ངེས་པར་བརྩམ། །དེ་ཡིས་ཀུན་གྲགས་ཉིད་དང་ནི། །ཁུ་ཆེན་ས་ལ་སོགས་པ་ལ། །སྔགས་འདི་ཡིས་ནི་འབུམ་དུ་བཟླས། །དེ་ནས་བསྙེན་པ་ཡོངས་རྫོགས་པས། །ཡིད་ཆེན་དུང་ལ་སྦུ་གུ་ཅན། །སོར་བདུན་དག་ལ་དུག་བླུགས་ཏེ། །སྐུད་པ་སྔོན་པོས་རབ་བཅིངས་ལ། །ནུབ་ཕྱོགས་དག་ཏུ་ངེས་པར་གདགས། །དེ་ནི་འབྱུང་བས་བསྐྱོད་པ་ན། །མི་དེ་ངེས་པར་སྨྱོ་བར་འགྱུར། །ཨོཾ་མ་ཧཱ་ཀཱ་ལ་ཡ་སྟཾ་བྷ་ཨུ་ན་མ་ཏ་ཡ། ཨ་མུ་ཀཾ་སཉྩ་ལ་སྭཱ་ཧཱ། མི་རྣམས་ངེས་པར་མི་གསལ་པས། །རྡོ་རྗེ་མོ་ནི་ཡོངས་སུ་བསྒྲུབ། །ས་ལ་ཕྱོགས་བཞི་མཚམས་བརྒྱད་དུ། །རེ་མིག་བཅུ་གཉིས་བྲིས་བྱས་ལ། །མ་རིག་ལ་སོགས་རྟགས་ཀྱི་ནི། །དངོས་པོ་ཡང་དག་འདྲི་བར་བྱ། །དེ་ནས་སྔགས་པས་རབ་བསྔགས་ལ། །བསམ་པ་རབ་ཏུ་རྫོགས་བྱས་ལ། །དེ་ཉིད་དངོས་པོ་གང་ཡིན་པས། །བསམ་པ་སྦྱར་བས་མེ་ཏོག་བོར། །གང་དུ་བབ་པ་དེར་གནས་ལ། །ཤེས་རབ་ཅན་གྱིས་རྣམ་

པར་དཔྱད། །བཟང་ངན་ལྟས་རྣམས་ཡོངས་སུ་བཤད། །རིག་པ་ལེགས་པར་སྤངས་པ་ཡིས། །བ་ཡི་ལྕི་བས་རབ་གཏུམས་ལ། །དང་པོར་གཉིས་སུ་ཤེས་པར་བྱ། །རིང་དུ་བྱེ་བྲག་མེད་པ་ཡིས། །བཅོམ་ལྡན་སྔོན་དུ་བཞག་བྱས་ཏེ། །དང་པོར་མཆོད་པས་ཡང་དག་མཆོད། །དམོད་དག་ཡོངས་སུ་བཙུགས་པ་ཡིས། །ཤེས་རབ་བཅུ་གསུམ་བདག་ཉིད་ཅན། །དམར་པོ་གོས་ཀྱིས་བརྒྱན་བྱས་ཏེ། །ཁྲུས་དག་ལེགས་པར་བྱས་པ་དང་། །དྲི་ཡིས་ལེགས་པར་བྱུགས་བྱས་ལ། །དཔྲལ་བར་ཐིག་ལེ་དམར་པོ་གདབ། །མེ་ཏོག་དྲི་ཞིམ་དམར་པོ་ཉིད། །དེ་ཡི་ལག་ཏུ་སྦྱིན་པར་བྱ། །དེ་ཡིས་དེ་ལ་བླང་བར་བྱ། །དེ་ཉིད་དངོས་པོ་གསལ་བྱ་སྟེ། །བཟང་ངན་ལྟས་སུ་ངེས་པར་སྟོན། །སྤྱིར་ན་སྣ་ཚོགས་གདོན་ལ་ནི། །འབར་བ་ཆེན་པོའི་སྔགས་བཟླས་བྱ། །གུ་གུལ་ནག་པོའི་དུད་པ་དག །དེ་ཡི་སྣ་རུ་བདུག་བྱས་ལ། །ཡུངས་ཀར་གུ་གུལ་མེ་ཏོག་དང་། །དེ་ཡི་སྙིང་པོས་བསྲེག་པར་བྱ། །དེ་ཡིས་ནད་པ་གང་ཡིན་པ། །བགེགས་དང་ངེས་པར་བྲལ་བར་འགྱུར། །སྲིན་ལག་ཉིད་ལ་སྐུད་པ་ནི། །སྔོན་པོས་ཡང་དག་བསྡམ་པར་བྱ། །སྤྱི་བོའི་སྐྲ་ལ་སྲད་བུ་གང་། །བཅིངས་པས་སྔགས་ནི་ངེས་པར་བཟླས། །འཁྲུག་པའི་སྡེ་དག་རྒྱལ་འདོད་ན། །ཁམས་གསུམ་རྣམ་རྒྱལ་སྙིང་པོ་ཡིས། །འབུམ་དུ་བཟླས་པས་བསྙེན་པ་བྱ། །དེ་ནས་ཨ་མྲའི་ལོ་མ་ལས། །ཡུང་བས་ཡོངས་སུ་བྲིས་བྱས་ལ། །གི་ཝང་གིས་ནི་རབ་ཏུ་བསྐུ། །ཅོད་པན་སྤྱི་བོར་གཏུམས་བྱས་ལ། །རང་ཉིད་སྐུ་རུ་བསྒོམ་བྱས་ལ། །ལག་པ་གཡས་པས་ཡུངས་ཀར་དང་། །སྐེ་ཚེ་ཐལ་བར་སྦྱར་བྱས་ལ། །སྔགས་བཟླས་སྡིགས་མཛུབ་ཕྱར་བ་ཡིས། །ཡོངས་སུ་བྲིས་བར་སྔ་རྒྱལ་འགྱུར། །རྣལ་འབྱོར་པ་ཡིས་བདག་ཉིད་ལ། །འཆི་བབ་བསླུ་བ་ཡང་དག་བྱ། །བདག་གི་རྒྱུད་ལ་འཆི་ལྟས་ནི། །ཕྱི་ནང་བཅུ་གཉིས་ཡང་དག་ལྡན། །བདག་གི་བྲང་ལ་ཤ་མཚན་དག །དམར་པོ་བྱུང་བར་གྱུར་པ་ན། །སུམ་ཅུ་གཉིས་ཞག་འཆི་འགྱུར་བས། །རིག་པའི་རྒྱལ་པོའི་སྔགས་ཀྱིས་སུ། །ཏིལ་ལ་སྲེག་བླུགས་སྟོང་དུ་ནི།

ཚང་བར་བྱས་པས་དེ་བཟློག་འགྱུར། །དེ་དང་ཆ་མཐུན་གང་ཡིན་པ། །རྐན་ལ་འབྲུམ་བུ་གསུམ་པ་དང་། །ལྕེ་ཡི་རྩེ་མོར་སྨེ་བ་དང་། །རྡོ་རྗེའི་ལམ་ནས་ཁྲག་འཛག་དང་། །འཛག་གཉིས་དབུགས་དག་གསུམ་པ་དང་། །རི་ཡི་རྩེ་མོར་ཤུ་བ་བྱུང་། །ནང་གི་འཆི་ལྟས་ངེས་པ་སྟེ། །སྟག་དང་བྱི་བ་འབྲུག་དག་དང་། །རྩངས་པ་བྱ་གག་ནག་པོ་རུ། །ཡོངས་སུ་སྦྱོར་བས་རིག་པ་བཟླས། །གི་ཝང་འུག་པ་རུ་སྦལ་དང་། །ཙམ་པ་ཀ་དང་ཨུཏྤལ་དང་། །སེང་ལྡེང་ཕུར་བུ་གང་ཡིན་དང་། །འུག་པའི་སྒྲོ་ལ་སྦྱོར་བ་དང་། །བྱ་རོག་མཁའ་ལ་འཕུར་བ་ཡི། །དཀར་པོས་བདག་ལ་ཕོག་པ་ནི། །ཕྱི་ཡི་འཆི་ལྟས་ཡིན་པས་ན། །གོང་དུ་གྲགས་པའི་སར་སོང་ལ། །རིག་པ་ལ་སོགས་སྦྱོར་བ་ཡིས། །ཡོངས་སུ་བཟློག་པར་བྱ་བ་ཡིན། །མཁའ་ལ་སྣ་ལྔ་མཐོང་བ་དང་། །ཆུ་ལ་མི་གཟུགས་མཐོང་གྱུར་ན། །ཤིན་ཏུ་སྡིགས་པའི་ལྟས་སུ་བསྟན། །རྨི་ལམ་ལ་ནི་སྟག་ཞོན་ལ། །མཆོད་རྟེན་ཉིད་ལ་འཛེགས་པ་དང་། །སེང་གེའི་ཁར་ནི་ཞུགས་རྨིས་པ། །ཡོངས་སུ་སྡིགས་པའི་ལྟས་ཡིན་པས། །ལོགས་ཤིག་སོར་མོ་རྩེ་གསུམ་དང་། །བསེ་རུའི་ཕྱོགས་དང་ཀུནྡའི་འདབ། །ཡོན་ཏན་རྒྱ་མཚོའི་མཚན་བཟང་དང་། །སྐྱེ་མཆེད་འཕགས་ལམ་ཆུ་སྲིན་མོ། །ལོ་གསུམ་ཞག་བཞི་ཟླ་བ་ལྔར། །མི་དེ་ངེས་པར་འཆི་བས་ན། །རིག་པའི་རྒྱལ་མོ་བདུད་རྩི་འཁྱིལ། །རྟེན་འབྲེལ་ཡི་གེ་བརྒྱ་པ་ཡི། །སྔགས་ཀྱིས་སྨན་ལ་བསྲུང་བ་བྱ། །ཁམས་གསུམ་རྣམ་རྒྱལ་འཇིག་རྟེན་མགོན། །དེ་དག་གི་ནི་སྙིང་པོ་ཡིས། །སྟག་སོགས་གསོབ་ལ་ངེས་པར་བཟླས། །རྨ་བྱ་ཆེན་མོའི་སྔགས་དག་གིས། །འུག་པའི་སྒྲོ་སོགས་ངེས་པར་བསྔགས། །ཕྱག་ན་རྡོ་རྗེ་འཇམ་དབྱངས་དང་། །སྟོབས་ཆེན་ཁྲོ་བོ་གང་དག་གི། །སྔགས་ཀྱིས་སེང་ལྡེང་འུག་སྒྲོ་དང་། །ཀུ་ཤ་བྱི་ལ་ལ་སོགས་དང་། །གསོབ་ལ་བསྔགས་པས་ཡོངས་སུ་བཟློག །གཏོར་མ་སྦྱིན་སྲེག་ལས་ཀྱིས་ནི། །ཡོངས་སུ་བཟློག་པར་བྱ་བ་ཡིན། །ཤིན་ཏུ་དཔའ་དང་དད་པར་ལྡན། །ཤེས་རབ་ཆེ་དང་ཐོས་པ་བསགས། །

བླ་མ་ལ་གུས་གཏོང་བར་ཕོད། །ལྟུང་བ་མ་གོས་གཙང་མ་ལ། །རིམ་པ་བཞིན་དུ་དབང་བསྐུར་ནས། །ཚོགས་ཀྱི་འཁོར་ལོ་ལྔ་བྱས་ལ། །ཤེས་རབ་ལྡན་ལ་བསྟན་བྱ་བའི། །གསང་བ་དྲག་པོའི་རྒྱུད་རྒྱལ་འདི། །གཞན་ལ་བཤད་པར་བྱ་བ་མིན། །གསང་བ་བདག་པོ་ཁྱོད་ཀྱིས་ནི། །ཕན་དང་གནོད་བྱ་གང་ཡིན་ལ། །རིམ་པ་བཞིན་དུ་ཤེས་པ་ཡིས། །ལེགས་པར་སྦ་དང་བཤད་པ་ནི། །གནས་སྐབས་དུ་མ་དང་ལྡན་ཞིང་། །ཀུན་ལ་ངེས་པར་ཞུགས་པ་ཡིས། །རྒྱུད་འདི་ལ་ནི་ངེས་པར་བརྟག །རྒྱུད་འདི་གང་ན་གནས་པ་ན། །ས་ཕྱོགས་དེ་ཡི་གདུག་པ་རྣམས། །རིང་དུ་བསྲིངས་པས་གནས་མི་བྱེད། །གལ་ཏེ་གནས་པར་བྱེད་པ་ན། །དེ་རྣམས་ཀུན་གྱི་རྒྱུད་ཚིག་འགྱུར། །དྲག་པོ་རྒྱུད་ཀྱི་རྒྱལ་པོ་ལ། །གང་ཞིག་ཞུགས་པར་གྱུར་པ་ལ། །དུག་གསུམ་སྐུ་ལ་རབ་བརྒྱན་ནས། །བཙུན་མོའི་བྷ་ག་ལ་གནས་ཏེ། །ཉོན་མོངས་འཁོར་གྱིས་རབ་བསྐོར་ནས། །བདེ་བ་ཆེན་པོའི་རོལ་པས་གནས། །ལག་ན་རྡོ་རྗེས་དེ་ཉིད་དུ། །སྐད་ཅིག་ཙམ་གྱིས་བསྐོར་བ་ནི། །འབུམ་ཕྲག་གསུམ་དུ་རབ་བསྐོར་ནས། །བདེ་བར་གཤེགས་ལ་འདི་སྐད་གསོལ། །བདག་གིས་རྒྱུད་ཀྱི་རྒྱལ་པོ་འདི། །ངེས་པའི་དོན་དང་རབ་སྦྱར་ནས། །གསང་བ་ཉིད་དུ་སྦ་བར་བགྱི། །ལག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་རྡོ་རྗེ་མེ་ལྕེའི་རྒྱུད་ལས་ལས་སྣ་ཚོགས་ཀྱི་ལེའུ་སྟེ་བཅྭ་ལྔ་པའོ།། །།ཕྱག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།རྒྱ་གར་གྱི་མཁན་པོ་ཆེན་པོ་རཏྣ་ཀཱིརྟི་དང་། བོད་ཀྱི་ལོ་ཙྪ་བ་དགེ་ཚུལ་ཁྱུང་གྲགས་ཀྱིས་བཀའ་དྲིན་མནོས་ནས་རྒྱ་དཔེ་བོད་དུ་སྤྱན་དྲངས་ཏེ་བསྒྱུར་བ་ལགས་སོ།། །།

རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས།

རྒྱ་གར་སྐད་དུ། བཛྲ་ཧྲི་ད་ཡ་བཛྲ་ཛི་ཧྭཱ་ན་ལ་ནཱ་མ་དྷཱ་ར་ཎཱི། བོད་སྐད་དུ། རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་

བདག་གིས་ཐོས་པ་དུས་གཅིག་ན། །བཅོམ་ལྡན་འདས་དུར་ཁྲོད་ཆེན་པོ་བསིལ་བའི་ཚལ་ན་བཞུགས་ཏེ། དེ་ན་འཁོར་ཉེ་བའི་སྲས་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། ལྷ་དང་། མི་དང་། ལྷ་མ་ཡིན་དང་། ཀླུ་རྣམས་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་རྡོ་རྗེ་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐུགས་ཀ་ནས་འོད་ཟེར་རབ་ཏུ་བཀྱེ་བར་གྱུར་ཏེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱབ་པར་བྱས་ནས་སེམས་ཅན་ཐམས་ཅད་ཀྱི་ནད་དང་མི་བདེ་བ་དང་སྡུག་བསྔལ་ཐམས་ཅད་དང་བྲལ་བར་བྱས་ནས་སླར་བཅོམ་ལྡན་འདས་ཀྱི་ཐུགས་སུ་ཞུགས་སོ། །དེ་ནས་དྲང་སྲོང་ཆེན་པོ་ཉེས་འདོར་ལངས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་འདི་ན་སེམས་ཅན་ཐམས་ཅད་ལ་ནད་དང་། དུག་དང་། རིམས་དང་། དགྲ་དང་། གདོན་དང་། བྱད་སྟེམས་དང་། སྦོད་གཏོང་དང་། ཆར་ཆེས་པ་དང་། ཆར་མི་འབབ་པ་དང་། ལོ་ཏོག་མ་རུངས་པར་བྱེད་པ་རྣམས་ཀྱིས་སེམས་ཅན་ཐམས་ཅད་སྡུག་བསྔལ་ཞིང་ཉམ་ཐག་པར་གྱུར་ན་དེ་ལ་ཇི་ལྟར་བསྲུང་བ་དང་། བསྐྱབ་པ་དང་སྦ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཉེས་འདོར་བ་ལ་རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་ཡོད་དེ། དེས་སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་བྱེད་དོ། །དེ་ངས་བཤད་ཀྱིས་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག །དེ་ནས་བཅོམ་ལྡན་འདས་ཀྱིས་བཛྲ་བཛྲ་ཧཱུྃ་ཞེས་གསུངས་པས་རྡོ་རྗེ་སྙིང་པོ་ཁྲོ་ཞིང་གཏུམ་པ་གདུག་པའི་ཆ་ལུགས་ཅན་འཐོན་ནས་བཅོམ་ལྡན་འདས་ཀྱི་སྣམ་ལོགས་ན་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མགྲིན་གཅིག་ཏུ་གཟུངས་འདི་བཀའ་སྩལ་ཏོ། །ཉི་མ་ནཱན་ཟླ་ནཱན། ཀླད་པ་ནཱན། ཀུ་ན་ཞི་ཙི་ཏ་ཀུ་ལི་ནཱ་ན། ཡག་ཤ་བཟློག་བྱེར། དེ་ནས་གཟུངས་འདི་གསུངས་མ་ཐག་ཏུ་བགེགས་དང་ལོག་འདྲེན་ཐམས་ཅད་འཇིགས་ཤིང་སྐྲག་ནས་ཁ་སྦུབ་ཏུ་

འགྱེལ་ཏེ་ལྦུ་བར་སྐྱུག་ཅིང་བརྒྱལ་བར་གྱུར་ཏོ། །དེ་ནས་ཀླུའི་རྒྱལ་པོ་མཐའ་ཡས་ཀྱང་འཇིགས་སྐྲག་ནས་ལུས་འདར་ཞིང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དགྲ་དང་གདོན་ཐམས་ཅད་བརླག་པར་བྱེད་པའི་གཟུངས་འདི་བརྗོད་པར་བགྱིས་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ན་མོ་བུདྡྷ་ཡ། ཙི་ཏྲ་མུ་དྲཱ་ཡཀྵ་བཟློག་བྱེར། དེ་ནས་གཟུངས་འདི་སྨྲས་མ་ཐག་ཏུ་ས་ཆེན་པོ་གཡོས་པར་གྱུར་ཏེ། འཇིག་རྟེན་གྱི་ཁམས་ཐམས་ཅད་ཁ་སྦུབ་ཏུ་འགྱེལ་ཏེ། གདོན་དང་ལོག་འདྲེན་ཐམས་ཅད་ཁ་སྦུབ་ཏུ་འགྱེལ་ཏེ། ཁྲག་ཏུ་སྐྱུག་ཅིང་དབུགས་དང་བྲལ་བར་གྱུར་ཏོ། །དེ་ནས་ཡང་ཀླུ་མཐའ་ཡས་ཀྱིས་འདི་སྐད་ཅེས་བརྗོད་དོ། །བཅོམ་ལྡན་འདས་བདག་གིས་སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་བགྱིའོ། །བཅོམ་ལྡན་འདས་ཀྱི་བསྟན་པ་བསྲུང་བར་བགྱིའོ། །སངས་རྒྱས་ཀྱི་བསྟན་པ་ཡུན་རིང་དུ་གནས་པར་བགྱིའོ། །ཆར་དུས་སུ་དབབ་ཅིང་ལོ་ཏོག་ཐམས་ཅད་བསྲུང་བར་བགྱིའོ། །ནད་དང་དགྲ་དང་གདོན་ཐམས་ཅད་གཞོམ་པར་བགྱིའོ། །བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་ལྟར་བགྱིད་པ་ལས་བཟློག་པར་མི་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཀླུའི་རྒྱལ་པོ་མཐའ་ཡས་ཁྱོད་ཀྱིས་ཇི་ལྟར་དམ་བཅས་པ་ལྟར་གྱིས་ཤིག །དམ་ཚིག་རྗེས་སུ་སྲུངས་ཤིག །ཇི་ལྟར་ངའི་བཀའ་བཅག་ན་ངན་སོང་དུ་ལྷུང་བར་གྱུར་ཏ་རེ། ངའི་ཇི་ལྟར་བསྒོ་བ་ཐམས་ཅད་གྱིས་ཤིག །དེ་ནས་གསང་བའི་བདག་པོས་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་བཀླགས་པས་འགྲུབ་པ་དྲག་པོ་རབ་ཏུ་མི་བཟད་པ་འདི་སྨྲས་སོ། །ནཱ་ག་ཤིག །ནཱ་ག་བྱེར། ནཱ་ག་ནཱན།ནཱ་ག་གོ་ལ་ནཱན། །ནཱ་ག་ཧ་ན་ཧ་ན། །མཱ་ར་ཡ་རྦད་ནཱན། ས་གདོན་ནག་པོ་སོད། ས་གདོན་ནག་པོ་སོད། ས་གདོན་ནག་པོ་ནཱན། ཕྱུ་ག་ཙི་ཕཊ། ཙི་ག་ཕྱུ་ཕཊ། ལྕེ་བ་ཏི་ཕཊ། ཨེ་ག་ར་བ། ཙེ་དི་ནཱ་ག་བ་ར་མ། མ་ཧཱ་པ་ལ་ས་ཏ། ཡེ་

གོ་དེ། སད་ཏེ་ནཱན། ཐུམ་རིལ་རྦད། ཆེ་གེ་མོ་མཱ་ར་ཡ་ཛཿརྦད་ནཱན། ནཱ་ག་ཧྲིལ་ཧྲིལ། ནཱ་ག་ཕྲཽཾ་ཕྲོཾ། ནཱ་ག་ཕོབ། བཛྲ་པྲ་བེ་ཤ་ཡ། ས་འདི་སྲུངས་ཤིག་བྱེར་ཡ། བྷྱོར་མ་མ་ཧཱ་ཨ་ཧཱུྃ་ཧཱུྃ་ཕཊ་སྭཱ་ཧཱ། དེ་ནས་གཟུངས་འདི་གསུངས་མ་ཐག་ཏུ་ནམ་མཁའ་ལ་གནམ་ལྕགས་དྲག་པོའི་རྡོ་རྗེའི་ཐོག་ཕབ་ནས། དགྲ་དང་། གདོན་དང་། ལོ་ཏོག་མ་རུངས་པར་བྱེད་པ་ཐམས་ཅད་ཀྱི་ལུས་དུམ་བུ་དུམ་བུར་གཏུབས་ནས་རྡུལ་ཕྲ་རབ་བཞིན་དུ་བརླག་པར་བྱས་སོ། །དེ་ནས་བཅོམ་ལྡན་འདས་ཀྱིས་ཆོ་ག་བཀའ་སྩལ་པ། དྲང་སྲོང་ཆེན་པོ་སའི་དཀྱིལ་འཁོར་གྲུ་བཞི་པ་བྱི་དོར་བྱས་ནས་བའི་རྣམ་ལྔས་བྱུག་པར་བྱའོ། །ཙན་དན་དང་རྒྱ་སྤོས་དྲི་ཞིམ་པོས་བྱུག་པར་བྱའོ། །མེ་ཏོག་སིལ་མ་དགྲམ་མོ། །བུམ་པ་གང་བ་གཞག་གོ །མར་མེ་བུད་དོ། །གཏོར་མ་བཟང་པོ་གཞག་གོ །ལྕགས་སམ་སེང་ལྡེང་གི་ཕུར་པ་གཟུགས་སོ། །དབུས་སུ་རྡོ་རྗེ་སྙིང་པོ་གཞག་པར་བྱའོ། །དེའི་མདུན་དུ་ཀླུ་མཐའ་ཡས་གཞག་གོ །དེ་ནས་མཆོད་པར་འདོད་ན་མེ་ཏོག་ལ་སོགས་པ་མཆོད་པ་ལྔ་བྱའོ། །ཀླུ་མཆོད་པར་འདོད་ན་འཁར་བའི་སྣོད་དུ་འོ་མ་དང་། ཀླུ་སྨན་སྣ་ཚོགས་དང་། རྩི་སྨན་སྣ་ཚོགས་ཀྱིས་བྱའོ། །ནད་དང་དུག་བསྲུང་བར་འདོད་ན་ཚིལ་ཆེན་དང་། གླ་རྩི་དང་། སྐུད་པ་སྔོན་པོ་དང་། རྨ་བྱའི་སྒྲོས་བྱའོ། །ཀླུ་ནག་པོ་ཆེན་པོ་ལ་ནི་ཚིལ་ཆེན་དང་། གླ་རྩི་དང་། ཚོན་སྐུད་སྣ་ལྔ་དང་། སེང་ལྡེང་གི་ཕུར་པས་བྱའོ། །འབྱུང་པོ་ཐམས་ཅད་ལ་ནི་ཕུར་པ་དང་། ཡུངས་ཀར་གྱིས་བྱའོ། །སྐྱ་རེངས་འཆར་ཀའི་གདོན་ལ་ནི་ཕུར་པ་དང་། ཡུངས་ཀར་དང་། ཡུངས་ནག་དང་། སྐེ་ཚེ་དང་། ཐལ་ཆེན་གྱིས་བྱའོ། །འབྱུང་པོ་ཀུན་དུ་རྒྱུ་བ་ལ་ནི་ཕུར་བུ་ལྔ་དང་། ཐོད་པས་བྱའོ། །གཞན་དག་གསད་པར་འདོད་ན་ཕུར་པ་དང་། གཟུགས་དང་། ཐོད་བས་བྱའོ། །གནོན་པར་འདོད་ན་ཐོད་པ་དང་། དུག་དང་། ཡུངས་ཀར་གྱིས་བྱའོ། །ལོ་ཏོག་གཞོམ་པར་འདོད་ན་ཐོད་པ་དང་། དུག་དང་། ཡུངས་ཀར་དང་།ཚིལ་ཆེན་དང་། ཁྲག་སྣ་ཚོགས་ལ་བྱའོ། །ལོ་ཐོག་བསྲུང་བར་འདོད་ན་ཐལ་ཆེན་

དང་། སྐེ་ཚེ་དང་། ཕུར་བུས་བྱའོ། །ཀུན་ཏུ་བསྲུང་བ་ཞེས་བྱ་བ་གཞན་གྱི་སྦོད་གཏོང་བཟློག་པར་འདོད་ན་མཆོད་རྟེན་དང་གཟུགས་དང་། ཐོད་པ་དང་། ཡུངས་ཀར་དང་། ཕུར་པས་བྱའོ། །ཐམས་ཅད་ཞི་བར་འདོད་ན་ཐབ་ཁུང་རྙིང་པར་ཙན་དན་ནམ་རྒྱ་ཤུག་ལ་མེ་བཏང་ལ། དཀར་གསུམ་དང་། མངར་གསུམ་དང་། འབྲས་དང་། ཏིལ་དང་། མར་དཀར་ལ་སྦྱིན་སྲེག་བྱ་ཞིང་། ཆེ་གེ་མོ་མཱ་ར་ཡ་ཤཱ་ཏིང་ཀུ་རུ་སྭཱ་ཧཱ་ཞེས་བཟླས་ན་ཐམས་ཅད་བསྲུང་བར་འགྱུར་རོ། །གང་དག་གསད་པར་འདོད་ན་སླ་ངའི་ནང་དུ་སེང་ལྡེང་ངམ་གདུག་པའི་ཤིང་ལ་མེ་བཏང་ལ། གདུག་པའི་རྫས་སྣ་ཚོགས་དང་། སྐེ་ཚེ་དང་། ཏིལ་དང་། མར་ནག་དང་། ཚིལ་ཆེན་དང་། མིང་བྱང་སྤེལ་ཏེ། སྦྱིན་སྲེག་བྱ་ཞིང་། ཆེ་གེ་མོ་ར་ཤ་མཱ་ར་ཡ་རྦད་ཅེས་བཟླས་ན་དགྲ་དང་། གདོན་ཐམས་ཅད་བརླག་པར་འགྱུར་རོ། །བདག་དང་གཞན་བསྲུང་བར་འདོད་ན་རྨ་བྱའི་མཁྲིས་པ་དང་ཀ་ར་དང་། སའི་བདུད་རྩི་ལོ་ལྔ་བརྒྱ་ལོན་པས་བྱའོ། །ཀླུ་ས་བདག་བསྲུང་བར་འདོད་ན་སྤོས་དང་། གུ་གུལ་ནག་པོ་དང་། གླ་རྩི་དང་། མུ་ཟི་དང་། ལྡོང་རོས་དང་། དྲི་ཆེན་དང་། སྦྲང་རྩིས་བྱའོ། །མཆོག་ཏུ་བསྲུང་བར་འདོད་ན་འབྲས་བུ་གསུམ་དང་། བུ་ཆུང་གི་རང་བྱུང་དང་། དྲི་ཆུས་བྱའོ། །ཁྱད་པར་དམ་པ་བསྲུང་བ་ཆེན་པོ་ནི་ཨ་རུ་ར་རྣམ་པར་རྒྱལ་བ་བཅང་ཞིང་གཟུངས་འདི་བརྗོད་པར་བྱའོ། །ཤིག་བྱེར་ནཱན། འགོ་ནཱན་ཧ་ན་ཧ་ན་མཱ་ར་ཡ་རྦད་ནཱ་ན། དྲང་སྲོང་ཆེན་པོ་ཉེས་འདོར་གཟུངས་འདི་ཡིད་ལ་རབ་ཏུ་ཟུང་ཤིག །སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་གྱིས་ཤིག །ངའི་བསྟན་པ་རྗེས་སུ་སྲུངས་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དྲང་སྲོང་ཆེན་པོ་ཉེས་འདོར་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་རྫོགས་སོ།། །།འདི་དང་པོ་སྐ་ཅོག་གིས་བསྒྱུར་ཞིང་། ཕྱིས་གཉན་ལོཙྪ་བ་དར་མ་གྲགས་ཀྱིས་ཀྱང་བསྒྱུར་རོ།། །།

དཔལ་ཕྱག་ན་རྡོ་རྗེ་གསང་བ་བསྟན་པའི་རྒྱུད།

རྒྱ་གར་སྐད་དུ། །ཤྲཱི་གུ་ཧྱ་བཛྲ་པཱ་ཎི་ཨ་བྷི་དེ་ཤ་ཏནྟྲ་ནཱ་མ། བོད་སྐད་དུ། དཔལ་ཕྱག་ན་རྡོ་རྗེ་གསང་བ་བསྟན་པའི་རྒྱུད། དཔལ་གསང་བའི་བདག་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་ན། བཅོམ་ལྡན་འདས་དཔལ་ཆེན་པོ་ལ། རིག་སྔགས་ཀྱི་ལྷ་ཚོགས་ཀྱིས་བསྐོར་ཏེ་བཞུགས་སོ། །དེ་ནས་དཔའ་མོའི་དབང་ཕྱུག་མས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་བའི་བདག་པོ་འདི་སྒྲུབ་པའི་རྣལ་འབྱོར་པ་ཇི་ལྟ་བུ་ཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། སྙིང་རྗེར་ལྡན་ཞིང་ཤེས་རབ་ཆེ། །བཟོད་དང་ལྡན་ཞིང་བརྩོན་འགྲུས་ཆེ། །ཕྱི་ནང་གསང་བའི་དབང་ཐོབ་ཅིང་། །བསླབ་པ་གསུམ་ལ་རབ་ཏུ་གནས། །དེས་ནི་དཔའ་བོ་ཡང་དག་འགྲུབ། །གསང་བ་བསྟན་པའི་རྒྱུད་ལས་སྒྲུབ་པ་པོ་གང་ཟག་བསྟན་པའི་ལེའུ་སྟེ་དང་པོའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དབེན་པ་ཉམས་དགའ་ཡིད་འོང་བ། །བཀྲ་ཤིས་དཔལ་འཕེལ་དབང་ཡང་འཛིན། །དུར་ཁྲོད་ཆེན་པོ་འཇིགས་གནས་པ། །རི་གསུམ་རྩེ་འམ་བྲག་རི་སྔོ། །ཁྲོ་བོའི་ཆ་བྱད་འདྲ་བའི་གནས། །དེ་ནི་དཔའ་བོ་བསྒྲུབ་ལ་ཤིས། །གསང་བ་བསྟན་པའི་རྒྱུད་ལས་བསྒྲུབ་པའི་གནས་བསྟན་པའི་ལེའུ་སྟེ་གཉིས་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྐྱེད་པའི་དམིགས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དང་པོ་སྟོང་ཞིང་བདག་མེད་དེ། །སྣང་ཞིང་སྲིད་པའི་ཆོས་རྣམས་ཀུན། །ངོ་བོ་ཉིད་ཀྱིས་རྣམ་པར་དག །དེ་ལྟ་བུ་ཡི་ཆོས་ཉིད་ལ། །སངས་རྒྱས་སེམས་ཅན་གཉིས་མེད་པས། །མི་སྒོམ་མི་རྟོག་སྣང་ལ་གསལ། །མཐའ་བྲལ་མཁའ་མཉམ་དབུ་མའི་དོན། །སེམས་ཀྱི་རང་བཞིན་དེ་ལྟ་བུ། །དེ་ལྟར་མ་

རྟོགས་སེམས་ཅན་ལ། །སྡུག་བསྔལ་ཀུན་དང་བྲལ་བ་ཡི། །ཐུགས་རྗེ་ཕྱོགས་མེད་བསྒོམ་པར་བྱ། །སངས་རྒྱས་ཐམས་ཅད་འབྱུང་བའི་རྒྱུ། །རང་གི་སེམས་ནི་ཡི་གེ་ཧཱུྃ། །ཡི་གེ་ཧཱུྃ་གི་འཕྲོ་འདུ་ལས། །གཞལ་ཡས་ཁང་དང་ལྷ་ཡི་གདན། །ལྷ་ཡིས་བོན་ཡི་གེ་ལས། །གོ་རིམས་བཞིན་དུ་བསྐྱེད་པར་བྱ། །གསང་བ་བསྟན་པའི་རྒྱུད་ལས་བསྐྱེད་པའི་དམིགས་པ་བསྟན་པའི་ལེའུ་སྟེ་གསུམ་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་རིག་སྔགས་ཀྱི་བདག་པོ་འདིའི་བསམ་གྱིས་མི་ཁྱབ་པའི་དམིགས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བསྐྱེད་པའི་དམིགས་པ་ཐོབ་ནས་ནི། །སྙིང་གར་ཡེ་ཤེས་སེམས་དཔའ་བསྒོམ། ཡེ་ཤེས་སེམས་དཔའི་ཐུགས་ཀར་ནི། །པདྨ་འདབ་བཞི་རྒྱ་སྲན་ཙམ། །དབུས་སུ་ཉི་ཟླའི་གཞལ་ཡས་ཁང་། །གཞལ་ཡས་ཁང་གི་ནང་དུ་ནི། །ཨ་ཤད་མར་མེའི་རྩེ་ལྟར་སྒོམ། དེ་ལ་དམིགས་པ་ཐོབ་ནས་ནི། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམས་པས། །དེ་ལ་ཡེ་ཤེས་ཐོབ་པར་འགྱུར། །གསལ་ལ་རྟོག་མེད་རིག་པའི་སྐུ། །ཡེ་ཤེས་ཞེས་ནི་དེ་ལ་བྱའོ། །གསང་བ་བསྟན་པའི་རྒྱུད་ལས་བསམ་གྱིས་མི་ཁྱབ་པའི་དམིགས་པ་བསྟན་པའི་ལེའུ་སྟེ་བཞི་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་གསང་བའི་བདག་པོ་འདིའི་འཁོར་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་འདིའི་འཁོར་ནི། །ཐུགས་ཀྱི་འཁོར་ནི་བཞིའོ། །གསུང་གི་འཁོར་ནི་བརྒྱད་དོ། །སྐུའི་འཁོར་ལྔ་བརྒྱར་ངེས་སོ། །གསང་བ་བསྟན་པའི་རྒྱུད་ལས་འཁོར་བསྟན་པའི་ལེའུ་སྟེ་ལྔ་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔལ་ཆེན་པོ་འདིའི་རིག་པ་ཇི་ལྟ་བུ་ལགས། །བཅོམ་ལྡན་འདས་ཀྱིས་བཀའ་སྩལ་པ། ཨོཾ་བཛྲ་པཱ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་བཛྲ་ཀྲོ་དྷ་ནཱི་ལཱྃ་བ་ར་དྷ་ར་བཛྲ་པཱ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་བཛྲ་པཱ་ཎི་ཀྲོ་དྷ་མ་ཧཱ་ཙཎྜ་རོ་ཥ་ཎ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འཁོར་བཞིའི་རིག་པ་ཕུལ་བ་ནི། ཨོཾ་བཛྲ་ཀྲོ་དྷ་མ་ཧཱ་ཀཱ་ལཱ་

ཡ་ཧཱུྃ་ཧཱུྃ་ཕཊ་ཕཊ་ཙིཏྟ་ཀྲོ་ཙི་དུན་ཛ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ་ཧཱུྃ་ཕཊ་ཕཊ། བྃ་མཱ་ར་ཡ་ཙིཏྟ་རྦད་རྦད། ཨོཾ་བཛྲ་ཀྲཽ་དྷ་ནཱ་ག་སྦུ་ཤ་ཧཱུྃ་ཧཱུྃ་ཕཊ་ཕཊ། མཱ་ར་ཡ་རཀྟ་རྔུབས་རྔུབས་རྦད། ཨོཾ་བཛྲ་ཀྲོ་དྷ་ཀུ་བཻ་ར་ཧཱུྃ་ཧཱུྃ་ཕཊ་ཕཊ། མཱ་ར་ཡ་ཀེ་ཚོཾ་ཚོཾ་རྦད། དཔའ་བོའི་འཁོར་ལྷ་སྲིན་སྡེ་བརྒྱད་ཀྱི་རིག་པ་ཕུལ་བ། མ་ཧཱ་དེ་བ་མཱ་ར་ཡ་སོད་སོད། མ་ཧཱ་ནཱ་ག་མཱ་ར་ཡ་སོད་སོད་ཛ་ཛཿ་མ་ཧཱ་དེ་ཝི་མཱ་ར་ཡ། ཧ་ན་ཧ་ན། མ་ཧཱ་མ་ནི་མཱ་ར་ཡ་གཏུབས་གཏུབས། མ་ཧཱ་སིདྡྷ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིནྡ་བྷིནྡ། མ་ཧཱ་ཏྲི་ཛ་མཱ་ར་ཡ་ཁོས་ཁོས། མ་ཧཱ་མ་ནི་བིནྡྷ་མཱ་ར་ལ་ནན་ནན། མ་ཧཱ་བཛྲ་ཧཱུྃ་ཕཊ། འཁོར་གོས་སྔོན་ཅན་ལྔ་བརྒྱའི་རིག་པ་ཕུལ་བ། མཱ་ར་ཡ་རུ་དྷ་རུ་དྷ་ཧཱུྃ་ཧཱུྃ་ཕཊ་ཕཊ། གསང་བ་བསྟན་པའི་རྒྱུད་ལས་རིག་པ་ཕུལ་བའི་ལེའུ་སྟེ་དྲུག་པའོ།། །།ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདིའི་ཕྲིན་ལས་མཇུག་སྦྱིན་སྲེག་གིས་བསྡུ་འཚལ་ལམ་མི་འཚལ་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྦྱིན་སྲེག་ནི་རྣམ་པ་གསུམ་སྟེ། ཕྱི་དང་ནང་དང་གསང་བ་གསུམ། །རེ་རེ་ལ་ནི་བཞི་བཞིར་བསྟན། །ཞི་བ་དང་ནི་རྒྱས་པར་བསྟན། །དབང་དང་དྲག་པོའི་སྦྱིན་སྲེག་གོ །གསང་བ་བསྟན་པའི་རྒྱུད་ལས་སྦྱིན་སྲེག་གི་ལེའུ་སྟེ་བདུན་པའོ།། །།བཅོམ་ལྡན་འདས་དཔལ་ཆེན་པོས། །དེ་སྐད་ཅེས་བཀའ་སྩལ་པ་དང་། དཔའ་མོའི་དབང་ཕྱུག་མ་དང་། རིགས་ཀྱི་ལྷ་ཚོགས་རྣམས་དགའ་མགུ་ཡི་རངས་ཏེ། དཔལ་ཆེན་པོས་གསུངས་པ་ལ་མངོན་པར་བསྟོད་དོ།། །།དཔལ་ཕྱག་ན་རྡོ་རྗེ་གཏུམ་པོ་གསང་བ་བསྟན་པའི་རྒྱུད་རྫོགས་སོ།། །།རྒྱ་གར་གྱི་པཎྜི་ཏ་ཝ་ལ་ཙནྡྲ་དང་། ལོ་ཙྪ་བ་གླན་ཆུང་དར་མ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།

བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། བྷ་ག་བཱན་བཛྲ་པཱ་ཎི་གུ་ཧྱ་ཨ་བྷི་དེ་ཤ་ཏནྟྲ་རཱ་ཛ་ནཱ་མ། བོད་སྐད་དུ། བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་

བྱ་བ།དཔལ་གསང་བའི་བདག་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྕང་ལོ་ཅན་གྱི་ཕོ་བྲང་ན། སངས་རྒྱས་གང་གཱའི་ཀླུང་གི་བྱེ་མ་དང་མཉམ་པའི་ཚོགས་དང་བྱམས་པ་ལ་སོགས་པ་བྱང་ཆུབ་སེམས་དཔའི་ཚོགས་དང་རིག་པའི་ཁྲོ་བོའི་ཚོགས་དཔག་ཏུ་མེད་པ་དང་། ལྷ་མ་ཡིན་གྱི་ཚོགས་དང་། གནོད་སྦྱིན་ལྔ་བརྒྱ་དང་བཅས་ཏེ་ཐབས་ཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་བདུད་ཐམས་ཅད་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་བླ་གོས་ཕྲག་པ་གཅིག་ལ་གཟར་ཏེ། ཕྱག་འཚལ་ནས་འདི་སྐད་ཅེས་གསོལ་ཏོ། །ཀྱེ་མ་གསང་བའི་རྡོ་རྗེ་འཛིན། །ཏིང་འཛིན་རྒྱལ་པོ་མི་གཡོ་ལས། །ཅིག་ཅར་བཞེངས་ཏེ་གསང་བའི་མཆོག །ཡེ་ཤེས་ལྔ་ཡི་སྤྱོད་ཡུལ་གྱི། །སྐུ་གསུང་ཐུགས་ཀྱི་གསང་བ་མཆོག །ཇི་ལྟར་བསྒྲུབ་པའི་རིམ་པ་དང་། །ལས་ཀྱི་བྱ་བ་མདོར་བསྡུས་ཏེ། །གང་ཟག་ཇི་ལྟ་བུས་སྒྲུབ་ཅིང་། །རིག་པའི་རྒྱལ་པོ་མཆོག་གྱུར་པ། །བཅོམ་ལྡན་འདས་ཀྱིས་ལེགས་པར་གསུངས། །ཞེས་ཞུས་པ་དང་། བཅོམ་ལྡན་འདས་མཉམ་པར་བཞག་པ་ལས་ལངས་ཏེ། ཐུགས་ཀར་ཡེ་ཤེས་ལྔ་མི་ཕྱེད་པའི་རྡོ་རྗེ་ལན་གསུམ་དུ་གསོར་བས་འཇིག་རྟེན་གྱི་ཁམས་ཐམས་ཅད་འགུལ་བ་དང་། ལྡེག་པ་ལ་སོགས་པ་ཀུན་ཏུ་འཁྲུགས་ཏེ། གདུག་པ་ཅན་འདུལ་བ་ཞེས་བྱ་བའི་འོད་ཟེར་བཀྱེ་ནས་སླར་ཐུགས་ཀར་ཐིམ་པ་ལས་རྡོ་རྗེའི་ལྟེ་བ་ནས་ཡུམ་དཔའ་མོ་རྡོ་རྗེ་བདེ་མ་ཞེས་བྱ་བ་བྱུང་སྟེ། རང་གི་སྟོན་པ་ལ་གཡས་ཕྱོགས་སུ་བསྐོར་བ་ལན་གསུམ་བྱས་ནས། །ཕྱག་བྱས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །ཁྱོད་ཀྱི་སྐུ་གསུང་ཐུགས་ཀྱི་ནི། །གསང་བ་དམ་པ་གང་ཡིན་པ། །རྡོ་རྗེ་འཛིན་པས་ལེགས་པར་གསུངས། །འདི་ནི་རྙེད་དཀའ་རྒྱུད་ཆེན་ཏེ། །རིན་ཆེན་ལྟ་བུར་འདོད་འབྱུང་བ། །གྲངས་མེད་ཚོགས་ལས་བྱུང་བ་འདི། །ཐུགས་རྗེའི་རང་བཞིན་སྟོང་པ་ལས། །བཅོམ་ལྡན་ཁྱོད་ཀྱིས་བཤད་དུ་གསོལ། །ཞེས་ཞུས་པ་

དང་། ཞལ་འཛུམ་པ་མཛད་ནས་བྱམས་པ་རྣམ་པར་འཕྲུལ་པ་ཞེས་བྱ་བའི་འོད་ཟེར་གྱིས་འཇིག་རྟེན་གྱི་ཁམས་ཁྱབ་པར་བྱས་ཏེ། ཚུར་འདུས་ནས་རང་གི་ཞལ་དུ་ཐིམ་པ་དང་། དཔའ་མོ་རྡོ་རྗེ་བདེ་མ་ཁྱོད། །སྟོང་པའི་རང་བཞིན་བདག་མེད་མས། །ཇི་ལྟར་ཞུས་བཞིན་བཤད་པར་བྱ། །གུས་པར་ཉོན་ལ་ལེགས་པར་ཟུང་། །རྡོ་རྗེ་འཆང་གི་སྐུ་གསུང་ཐུགས། །མི་ཕྱེད་སྟོང་པའི་རང་བཞིན་ལས། །ཐུགས་རྗེ་སྣ་ཚོགས་ཐབས་ཚུལ་ཏེ། །འདི་ནི་རབ་ཏུ་རྟོགས་དཀའ་བས། །འདས་དང་ད་ལྟར་བཞུགས་པ་དང་། །མ་འོངས་སངས་རྒྱས་སྤྱོད་ཡུལ་ཡིན། །བསམ་གྱིས་མི་ཁྱབ་རྣམ་པར་དག །བརྗོད་མེད་མི་གཡོ་འདུས་མ་བྱས། །ནམ་མཁའ་དྲི་མེད་ཆོས་ཀྱི་སྐུ། །དུས་གསུམ་དུས་མེད་རྟོགས་པའི་མཆོག །འདི་ལ་ཇི་ལྟར་བསྟན་དུ་ཡོད། །འོན་ཀྱང་སྙིང་རྗེའི་རང་བཞིན་པས། །ཐབས་དང་ཤེས་རབ་རང་བཞིན་ནི། །གཉིས་མེད་གཉིས་ཀྱི་ཐབས་ཚུལ་རིག །འདི་ནི་གསང་བ་དམ་པ་སྟེ། །དེ་ཉིད་གཞན་ལ་མངོན་བསྟན་པས། །གདུལ་བྱ་ཚིམ་འགྱུར་རྒྱལ་པོ་བཞིན། །རང་འདོད་འབྲས་བུ་འབྱུང་འགྱུར་བས། །གསང་བ་མངོན་པར་བསྟན་པ་ཡི། །རྒྱུད་ཆེན་རྒྱལ་པོ་བཤད་པར་བྱ། །ཨེ་མ་ཧོ་མི་ཕྱེད་རྡོ་རྗེ་གསང་བའི་མཆོག །ཨེ་མ་ཧོ་ཐབས་དང་ཤེས་རབ་གཉིས་མེད་པའི། །སྣ་ཚོགས་ནོར་བུ་རྒྱུད་ཆེན་འདི། །རང་གི་གསང་བ་དམ་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་རབ་ཏུ་དགའ་བའི་གླེང་གཞིའི་ལེའུ་སྟེ་དང་པོའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཆེན་པོ་ཁྱོད་བསྒྲུབ་པའི་གང་ཟག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་གང་ཟག་ནི། །སྙིང་རྗེ་ལྡན་ཞིང་ཤེས་རབ་ཆེ། །བཟོད་ལྡན་བརྩོན་འགྲུས་ཕུན་སུམ་ཚོགས། །བསླབ་པ་གསུམ་ལྡན་དད་པས་བརྒྱན། །དཔའ་ཞིང་གསང་བའི་སྤྱོད་པ་ཤེས། །གུས་

ཤིང་གཡོ་མེད་སྐྱབས་གནས་གསུམ། །རྟག་ཏུ་མཆོད་ཅིང་ཡེངས་པ་མེད། །ལྷག་པའི་ལྷ་ལ་ཡིད་ཆེས་ཤིང་། །ཕྱི་ནང་གསང་བའི་དབང་ཐོབ་ལ། །དམ་ཚིག་བརྡ་དོན་ངེས་པར་འཛིན། །དེ་ལྟས་སྒྲུབ་པ་བྱས་གྱུར་ན། །ཡུན་མི་རིང་བར་ང་ཉིད་ཀྱི། །གསང་གསུམ་ལ་ནི་མཁས་འགྱུར་ཏེ། །འབད་པས་ཐོབ་པའི་འབྲས་བུ་ནི། །སྐལ་ལྡན་དེ་ཡི་སྙིང་ལ་གནས། །ཞེས་གསུངས་སོ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྒྲུབ་པ་པོའི་གང་ཟག་བསྟན་པའི་ལེའུ་སྟེ་གཉིས་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཁྱེད་སྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་གནས་མཆོག་ནི། །དུར་ཁྲོད་བརྒྱད་དམ་ཉེ་བའི་གནས། །དུར་ཁྲོད་ནགས་ཀྱི་ནང་དུ་ནི། །རི་རྩེ་བྲག་རི་སྔོན་པོའི་མདོག །ཁྲོས་པའི་གཟུགས་འདྲ་བྱང་ལྟ་བ། །མེ་ཏོག་སྔོན་པོ་མཛེས་པ་དང་། །ནེའུ་གསིང་དང་ཨུཏྤལ་ནགས། །དབེན་ཞིང་ཡིད་འོང་ཉམས་དགའ་བ། །བཀྲ་ཤིས་དཔལ་འཕེལ་དབང་ཡང་འཛིན། །ལྕང་ལོ་ཅན་དང་མིང་མཐུན་པ། །སྣ་ཚོགས་སྒྲུབ་པའི་གནས་སུ་ཤིས། །ཚྭ་སྒོ་ཆུ་མེད་ཨུ་མའི་གནས། །རྒྱལ་པོའི་ཕོ་བྲང་ཚོང་དུས་དང་། །ཉན་ཐོས་ལ་སོགས་འདུག་གནས་སུ། །ང་ཉིད་སྒྲུབ་པར་མི་བྱའོ། །སྨིན་པའི་གང་ཟག་རྣམས་ལ་ནི། །གནས་སོགས་བརྟགས་པས་ཅི་ཞིག་བྱ། །ཐམས་ཅད་བདེ་ཆེན་སངས་རྒྱས་ཀྱི། །ཞིང་ཁམས་རོལ་པས་གནས་པ་ཡིན། །དེ་བས་རིགས་ཀྱིས་བརྟག་པར་བྱ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྒྲུབ་པའི་གནས་བསྟན་པ་ཞེས་བྱ་བའི་ལེའུ་སྟེ་གསུམ་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཁྱོད། སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་

པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་རིམ་པ་ནི། །སྙིང་རྗེ་ཆེན་པོས་སྔོན་འགྲོ་ཞིང་། །གཞན་གྱི་དོན་ལ་བསླབ་པར་བྱ། །ནམ་མཁའ་རྡོ་རྗེ་ཅན་དམིགས་ལ། །བདེ་བ་ཆེན་པོས་རྣམ་པར་མཆོད། །རྒྱུད་སྦྱང་སངས་རྒྱས་ཚོགས་དག་ལ། །འགྱོད་པ་སྤངས་ཏེ་རྗེས་ཡི་རང་། །མྱ་ངན་འདས་ལ་གསོལ་བར་བྱ། །དམ་པའི་དོན་ལ་བསྐུལ་བྱ་ཞིང་། །རིགས་ཀྱིས་བོན་ཆེར་བསྐྱེད་ལ། །ཀུན་ལ་ཁྱབ་བྱེད་གཞན་དོན་བསྒྲུབ། །བདག་གི་སྡུག་བསྔལ་མི་བལྟ་ཞིང་། །གཞན་དག་བདེ་ལ་དགོད་པར་བྱ། །མེ་འོབས་ལྟ་བུར་གནས་པ་ཡི། །སེམས་ཅན་ཀུན་ལ་སྙིང་རྗེ་བསྒོམ། །སྤྲོས་བྲལ་གཉིས་འཛིན་སྤངས་པ་ཡི། །ཚུལ་ལ་ཡང་དག་བསླབ་པར་བྱ། །སངས་རྒྱས་སེམས་ཅན་གཉིས་མེད་ཅིང་། །དང་པོ་སྟོང་ཞིང་བདག་དང་བྲལ། །སྣང་ཞིང་སྲིད་པའི་ཆོས་རྣམས་ཀུན། །ངོ་བོ་ཉིད་ཀྱིས་རྣམ་པར་དག །འཐབ་བྲལ་མཁའ་འདྲ་དབུ་མའི་དོན། །དེ་ལྟ་བུ་ཡི་ཆོས་ཉིད་ལ། །སེམས་ཀྱི་རང་བཞིན་གཉིས་སུ་མེད། །མ་རྟོགས་ལོག་པའི་སེམས་ཅན་ལ། །སྡུག་བསྔལ་ཀུན་དང་བྲལ་བའི་ཕྱིར། །སྙིང་རྗེ་ཆེན་པོ་བསྒོམ་པར་བྱ། །རང་གི་སེམས་ཉིད་ཡི་གེ་ཧཱུྃ། །སངས་རྒྱས་ཐམས་ཅད་བསྐྱེད་པའི་མ། །ཆུ་སྐྱེས་ཐབས་དང་ཤེས་རབ་ལྡན། །མཐའ་གཉིས་སྤངས་པ་གདན་དང་བཅས། །གཉིས་མེད་རྡོ་རྗེའི་རང་བཞིན་ཏེ། །སྙིང་རྗེས་སྦྱངས་ནས་གསུམ་པ་རྫོགས། །སྐུ་མདོག་ནག་པོ་ཞལ་གཅིག་པ། །ཕྱག་གཉིས་གཡས་པ་རྡོ་རྗེ་འཛིན། །སྣུན་པའི་སྟོབས་ཅན་རྡོ་རྗེ་འབར། །གཡོན་པས་དྲིལ་བུ་དཀུར་བརྟེན་ཏེ། །སྒེག་པའི་ཚུལ་ཅན་ནམ་མཁར་གདེངས། །རིན་ཆེན་ཆུ་འཛིན་རྒྱན་དང་ལྡན། །སྟག་ལྤགས་དར་གྱིས་སྐུ་ལ་བརྒྱན། །གཡས་བསྐུམ་གཡོན་བརྐྱང་བདུད་ལ་བརྫིས། །སྤྱན་གསུམ་གདུག་པའི་མཆེ་བ་གཙིགས། །བསྐལ་བའི་མེ་འོད་ནང་དུ་བཞུགས། །ཡི་གེ་གསུམ་གྱི་གནས་གསུམ་པོ། །ལྷར་བྱས་སྐྱེ་མཆེད་བྱིན་གྱིས་བརླབ། །གནས་སུ་ཁྲོ་བོའི་ཡིག་འབྲུ་བསྐྱེད། །སྤྲུལ་

པ་དཔག་མེད་ཕྱོགས་བཅུར་འགྱེད། །ཡི་གེ་བཞི་ཡིས་ཡེ་ཤེས་དབབ། །རིགས་བདག་ལ་སོགས་སངས་རྒྱས་ཀྱིས། །དབང་བསྐུར་བྱིན་བརླབས་ཅོད་པན་བསམ། །དེ་ཡི་ཏིང་འཛིན་འབྱུང་བའི་རྒྱུ། །ཆོ་ག་གསུམ་པའི་སེམས་དཔའ་ཡིས། །གཞན་དོན་རྒྱུན་མི་འཆད་པར་བསྒོམ། །ཡང་ན་གསུང་གི་ཡིག་འབྲུས་མཚན། །ཕྲིན་ལས་ཐོགས་མེད་རྣལ་འབྱོར་བཟླས། །འདི་ནི་རྣམ་དག་རིག་པ་སྟེ། །རྟག་ཏུ་མ་ཉམས་འབྲས་བུར་ལྡན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་དཔའ་བོ་གཅིག་པ་བསྒྲུབ་པའི་ལེའུ་སྟེ་བཞི་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་དཀྱིལ་འཁོར་བསྒོམ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །སྐད་ཅིག་མ་ཡིས་ལྷར་བསམས་ནས། །སྙིང་གར་ཉི་མའི་རིག་པ་ཧཱུྃ། །འོད་ཀྱི་རང་བཞིན་སྣོད་བཅུད་རྣམས། །སྦྱངས་ཏེ་སངས་རྒྱས་ས་ལ་གཞག །འོད་ཟེར་གཉིས་པས་སངས་རྒྱས་དང་། །བྱང་སེམས་དཀྱིལ་འཁོར་དགུག་བྱ་སྟེ། །ཕྱག་བྱ་ཧཱུྃ་ལས་ལྷ་མོ་བསམ། །མེ་ཏོག་ལ་སོགས་པས་མཆོད་ལ། །ཐ་དད་པ་ཡི་མཆོད་པ་ཆེ། །དེ་འོད་དཔག་མེད་ལྷ་མོ་ཡིས། །རེག་བྱ་ཐ་མི་དད་པས་མཆོད། །སྡིག་བཤགས་རྗེས་སུ་ཡི་རང་དང་། །གསོལ་ཞིང་སྐྱབས་འགྲོ་བདག་ལུས་དབུལ། །སེམས་བསྐྱེད་དགེ་བ་བསྔོ་བར་བྱ། །དེ་རྗེས་དང་པོ་བྱམས་པ་སྟེ། །གཉིས་པ་སྙིང་རྗེ་གསུམ་པ་དགའ། །ཀུན་གྱི་མཐའ་ལ་བཏང་སྙོམས་སོ། །སྦྱང་གཞི་སྔགས་ཀྱིས་ཕྱི་ནང་ཀུན། །སྟོང་པར་བྱས་ཏེ་རང་ལུས་ཀྱང་། །དབང་པོའི་གཞུ་འདྲ་སྲིད་འཛིན་གྱི། །གནས་སུ་ཧཱུྃ་བསམ་དེ་འོད་བཅས། །ཙྃ་ལས་བྱུང་བའི་འཁོར་ལོ་སྟེ། །རྩིབས་བཅུ་ལ་ནི་ཉི་མ་བསམ། །དབུས་སུ་ཧཱུྃ་ལས་གནོད་མཛེས་བསྐྱེད། །དེ་ལས་ཧཱུྃ་འཕྲོས་ཁྲོ་བཅུ་ཡང་། །རང་རང་ས་ལ་གསལ་བར་བསྐྱེད། །སྔགས་པས་

བགེགས་མེད་གྱིས་ཤིག་པར། །དེ་ལ་བཀའ་ལུང་བསྒོ་བར་བྱ། །ཞལ་བཞིའི་གསང་སྔགས་དྲན་པ་ཡིས། །མཐེ་བོང་སྡིགས་མཛུབ་སྦྱར་ནས་ནི། །ཕྱོགས་བཅུར་བརྡ་ནི་བསྟན་པར་བྱ། ཨོཾ་སུྃ་བྷ་ནི་སུྃ་བྷ་ནི་ཧཱུྃ་ཧཱུྃ་ཕཊ། ཨོཾ་གྲིཧྞ་གྲྀཧྞ་ཧཱུྃ་ཧཱུྃ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷག་བཱན་བིདྱ་རཱ་ཛ་ཡ་ཧཱུྃ་ཧཱུྃ་ཕཊ། སྔགས་ཀྱི་རྒྱལ་པོ་འདི་བརྗོད་པས། །ལུས་ངག་སེམས་ལས་བྱུང་བ་ཡི། །བགེགས་ཀུན་གྱི་ནི་མགོ་སྟེངས་སུ། །རྡོ་རྗེ་ཕུར་པ་གཟུགས་པར་བྱ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཱན་བིགྷྣན་ཧཱུྃ་ཧཱུྃ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པྃ་ཨཱཛྙཱ་པ་ཡ་ཏི་ཀཱ་ཡ་པཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། རྡོ་རྗེ་ཐོ་བས་བརྡུང་བྱ་སྟེ། ཨོཾ་བཛྲ་མུངྒ་ར་བཛྲ་ཀཱི་ལ་ཡ་ཨཱ་ཀོ་ཊ་ཡ་ཧཱུྃ་ཕཊ། སྤྱི་བོར་བཏབ་པས་ངེས་པར་བརླག །སླད་འདུས་ཕྱོགས་མཚམས་མ་ལུས་པར། །ས་གཞི་ར་བ་དྲ་བ་དང་། །གུར་བཅིང་བ་དང་བླ་རེ་དང་། །མདའ་དང་མེ་ཡི་འོད་འབར་བསྒོམ། །ཨོཾ་བཛྲ་མེ་དི་ནཱི་བཛྲི་བྷཱ་བ་བཛྲ་བནྡྷ་བནྡྷ་ཧཱུྃ། ཨོཾ་བཛྲ་པྲཱ་ཀཱ་ར་ཧཱུྃ་ལྃ་ཧཱུྃ། ཨོཾ་བཛྲ་བི་ཏཱ་ན་ཧཱུྃ་ཁྃ་ཧཱུྃ། ཨོཾ་བཛྲ་ཤ་ར་ཛཱ་ལ་ཏྲྃ་སྃ་ཏྲྃ། ཨོཾ་བཛྲ་ཛྭཱ་ལ་ཨ་ན་ལཱརྐ་ཧཱུྃ་རྃ་ཧཱུྃ། རིམ་པས་བརྗོད་ལ་སྙིང་རྗེ་ཡི། །བདག་ཉིད་གཞན་ལ་ཕན་འདོད་པ། །སྨོན་ལམ་ལས་འབྱུང་རྫུ་འཕྲུལ་མཆོག །ཡཾ་ལས་བྱུང་བ་གཞུ་འདྲ་བ། །སྔོན་པོ་བ་དན་ལྡན་པ་བསམ། །དེ་སྟེང་རྃ་བྱུང་རྒོད་མའི་ཁ། །གྲུ་གསུམ་དམར་པོ་འོད་འབར་བ། །བྃ་ལས་སྐྱེས་པ་ཟླུམ་པོ་སྟེ། །དཀར་པོ་འཁྱིལ་པའི་ཚུལ་དུ་བསམ། །དེ་ལས་སྐྱེས་པ་དབང་ཆེན་ཏེ། །ལྃ་སྐྱེས་སེར་པོ་རྡོ་རྗེའི་རྒྱུ། །གྲུ་བཞི་འོད་ཟེར་འབར་བ་བསམ། །དེ་སྟེང་ཙྃ་ལས་ཆོས་ཀྱི་འཁོར། །ལྟེ་བར་བྲུྃ་ལས་གཞལ་ཡས་ཁང་། །གྲུ་བཞི་སྒོ་དང་རྟ་བབས་བཅས། །དྲ་བ་ཕྱེད་དང་དྲ་བས་བརྒྱན། །ཕྲེང་བ་རིན་ཆེན་རྡོ་རྗེ་དང་། །མཛེས་པའི་བ་དན་བཅས་པ་བསམ། །དེ་ནང་པྃ་ལས་ཆུ་སྐྱེས་ནི། །གེ་སར་འདབ་མར་བཅས་པའི་སྟེང་། །ཉི་མ་ཀཱ་ལི་འོད་འབར་ཚ། །སྟེང་དུ་ཟླ་བ་ཨཱ་ལི་བསིལ། །ཁ་སྦྱར་བར་དུ་ཧཱུྃ་དང་ཨཱ། །གནག་ཅིང་དམར་བའི་རྣམ་པ་ལ། །དེ་ལས་པདྨ་རྡོ་རྗེ་བསམ། །སླར་ཡང་ཡི་

གེས་འགྲོ་བ་སྦྱངས། །ཧཱུྃ་གིས་མི་བསྐྱོད་ཐུགས་རྣམས་བསྡུ། །ཨ་ཡིས་འོད་དཔག་གསུང་བསྡུས་ལ། །གཉིས་མེད་ཞུ་བས་སྤྲུལ་པ་བསྡུ། །རྡོ་རྗེ་ལས་ནི་ཁྲོ་བོ་སྟེ། །པདྨས་ཁྲོ་མོའི་རྣམ་པར་བསྐྱེད། །ཁྲོ་བོ་མཐིང་ག་ཞལ་གཅིག་པ། །རང་འོད་ལས་བྱུང་ཕྱག་གཉིས་འཁྱུད། །རྡོ་རྗེ་དྲིལ་བུ་ཐབས་ཤེས་རབ། །གཡས་དང་གཡོན་དུ་བསམ་པར་བྱ། །དབུ་རྒྱན་ལ་སོགས་རིན་ཆེན་ལྡན། །དབུ་སྐྲ་ཁམ་སེར་གྱེན་དུ་འབར། །ནག་པོ་སྦྲུལ་ལུས་ཀླུ་ཆེན་བརྒྱད། །སྐུ་སྨད་སྟག་གི་པགས་པས་དཀྲིས། །ཆོས་གོས་སྔོན་པོས་སྐུ་སྟོད་དཀྲིས། །མཆེ་བ་གཙིགས་ཤིང་སྤྱན་གསུམ་དམར། །འདོད་དགུར་སྒྱུར་ཞིང་བརྐྱང་བསྐུམ་ཞབས། །མཐའ་གཉིས་སྤངས་པའི་སྟེང་དུ་བཞུགས། །དེ་ཡུམ་རྡོ་རྗེ་བདེ་མ་ཁྲོ། །དམར་ལྗང་ཞལ་གཅིག་ཕྱག་གཉིས་མ། །གཡས་པ་གྲི་གུག་ཡབ་ལ་འཁྱུད། །གཡོན་པ་ཐོད་པ་བདེ་བ་སྟེར། །གཉིས་མེད་གཡོན་གྱི་ཕྱོགས་ནས་འཁྲིལ། །རྡོ་རྗེས་སྦྱོར་བའི་སྒྲས་བསྐུལ་ཏེ། །ཤར་ཕྱོགས་པདྨར་ཉི་ཟླ་ལ། །ཧཱུྃ་ལས་ཁམས་གསུམ་རྣམ་པར་རྒྱལ། །དཀར་པོ་ཞལ་གཅིག་ཕྱག་བཞི་པ། །གཡས་པ་རྡོ་རྗེ་རྩེ་གསུམ་འཛིན། །གཡོན་པ་དྲིལ་བུ་བེ་ཅོན་ཏེ། །ཁྲོ་བོའི་རྒྱན་ལྡན་བསམས་ནས་ཀྱང་། །འབྱུང་པོའི་ནུས་པ་འཇོམས་པར་བྱེད། །ལྷོ་ཕྱོགས་ཉི་མ་རོ་སྟེངས་སུ། །ཧཱུྃ་ལས་བྱུང་བའི་ལེགས་ལྡན་གནག །གཡས་པ་གྲི་གུག་གཡོན་ཐོད་པ། །ཞབས་གཉིས་བརྐྱང་བསྐུམ་ཐོད་ཕྲེང་ལྡན། །དགྲ་བོ་གསོད་པའི་ལས་ལ་བརྩོན། །ནུབ་ཏུ་ཀླུ་འདུལ་བདུད་རྩི་འཁྱིལ། །ལྗང་གུ་ཞལ་གཅིག་ཕྱག་བཞི་ཁྲོ། །གཡས་པ་རྡོ་རྗེ་བྱ་ཁྱུང་དང་། །གཡོན་པ་དབྱུག་ཏོ་ཕུར་བུ་བསྣམས། །ས་འོག་ཀླུ་སོགས་ཟས་སུ་གསོལ། །བྱང་དུ་ཀྵ་ལས་རྣམ་ཐོས་བུ། །ཞལ་གཅིག་ཕྱག་གཉིས་བུམ་སྟེངས་སུ། །མདོག་སེར་གཡས་པ་རྒྱལ་མཚན་བསྣམས། །གཡོན་པས་ནོར་སྦྱིན་བཟུང་བ་སྟེ། །དབུལ་བ་སེལ་བའི་དོན་ལ་བརྩོན། །སྒོ་མཚམས་ལྷ་ཡི་རང་བཞིན་ལ། །ཡེ་ཤེས་སྤྱན་དྲངས་མཆོད་ལ་གཞུག །དེ་ནི་ཡི་གེ་བཞི་སྦྱོར་ཡིན། །ལུས་ངག་སེམས་ལ་ཡི་གེ་ཡི། །ལྷ་ཡི་མཚན་

མ་གདབ་པར་བྱ། །སྐྱེ་མཆེད་ལྷར་བྱས་ཏིང་འཛིན་གྱི། །ནུས་པ་མི་ཤིགས་ལྷར་བལྟས་ལ། །ཡེ་ཤེས་ལྔ་འདུས་ཡི་གེ་བསམ། །དེ་ཡི་འོད་ཀྱིས་སྤྱན་དྲངས་པའི། །རིགས་ལྔ་སྙོམས་འཇུག་བྱིན་རླབས་ཀྱིས། །མི་བསྐྱོད་རྡོ་རྗེ་དབང་བསྐུར་ཏེ། །གསང་བ་ཤེས་རབ་ཡེ་ཤེས་ཀྱིས། །རྒྱས་གདབ་རིགས་ལ་བཞི་པ་ཡི། །ཕྱག་རྒྱ་ཆེ་ལ་རིགས་མེད་དོ། །འདི་ནི་གསང་ཆེན་སྐུ་སྒྲུབ་པ། །རིམ་གྱིས་གསལ་ཞིང་རྣམ་པར་དག །རྡོ་རྗེ་འཛིན་པའི་སྐུ་ཐོབ་པ། །ཚེ་གཅིག་ཉིད་ལ་འགྱུར་བ་ཡིན། །རྟག་ཏུ་གོམས་པའི་སྦྱོར་བ་ཡིས། །ས་སོགས་འཇིག་རྟེན་མ་ལུས་ཀུན། །སྐད་ཅིག་ཉིད་ལ་དབང་དུ་འགྱུར། །གཙུག་ན་རིན་ཆེན་ལ་སོགས་པའི། །གདུག་པ་ཅན་རྣམས་སྙིང་ཡང་འབྱིན། །དགའ་བོ་ལ་སོགས་ཀླུ་ཆེན་རྣམས། །རྟག་ཏུ་དེ་ལ་འདུད་པར་འགྱུར། །ནད་ཀྱི་རིགས་ཀུན་མ་ལུས་འཇོམས། །གནོད་སྦྱིན་མ་ལུས་བཀའ་ཉན་ཅིང་། །ལྷ་སྲིན་མ་ལུས་བྲན་དུ་འགྱུར། །འདི་ནི་གསང་བ་དམ་པ་སྟེ། །མཛེས་མ་ཁྱོད་ལ་བཤད་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་དཀྱིལ་འཁོར་བསྐྱེད་པའི་ལེའུ་སྟེ་ལྔ་བའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རིག་པའི་གསང་སྔགས་ཀྱི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། །གསང་བ་མཆོག་གི་གསང་བ་སྟེ། །ཕྲིན་ལས་ཐམས་ཅད་རྫོགས་བྱེད་ཅིང་། །སྡུག་བསྔལ་ཀུན་ལས་སྐྱོབ་བྱེད་པའི། །ཨཱ་ལི་ཀཱ་ལི་མཉམ་སྦྱོར་ལས། །ཐབས་དང་ཤེས་རབ་མཉམ་མེད་པའི། །སྔགས་ཀྱི་དོན་ནི་རྣམ་པ་ལྔ། །སྐུ་གསུང་ཐུགས་ཀྱི་རིག་པ་དང་། །ཕྲིན་ལས་སྣ་ཚོགས་རིག་པ་དང་། །འཁོར་གྱི་ལས་ཀྱི་རིག་པ་དང་། །འབྱུང་པོ་དགུག་དང་གསད་པ་དང་། །གཏོར་མ་གཏང་བའི་རིག་པའོ། །ཨོཾ་བཛྲ་པཱ་ཎི་ཧཱུྃ་ཕཊ་སྭཱ་ཧཱ། ཨོཾ་བཛྲ་ཀྲོདྷ་ན་ནཱི་ལཱྃ་བ་ར་དྷ་ར་བཛྲ་པཱ་ཎི་ཧཱུྃ་ཕཊ་སྭཱ་ཧཱ། ཨོཾ་བཛྲ་ཙཎྜ་མ་

ཧཱ་རོ་ཥ་ཎ་ཧཱུྃ་ཕཊ་སྭཱ་ཧཱ། ཏདྱ་ཐཱ་བྷོ་བྷོ་པཱནྣཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱམྦ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲྀ་ད་ཡཾ། ཡཿས་མཱ་ཏི་ཀྲ་མ་ཐ། མཱ་ཀུ་ལ། ཨུཏ་སཱ་ད་ནཱཾ། བྷ་བི་ཥྱནྟི། ཏདྱ་ཐཱ་བུདྡྷ་བུདྡྷ་བི་བུདྡྷ་བི་བུདྡྷ་མ་ཧི་པྲཱ་པ་ཏ། ཧ་ར་ཧ་ར་ནཱ་གཱ་ནཱྃ། པྲཱ་ཧ་ར་པྲཱ་ཧ་ར་ནཱ་གཱ་ནཱྃ། ཙྪིནྡ་ཙྪིནྡ་ནཱ་ག་ཧྲྀ་ད་ཡཱ་ནི། བྷིནྡ་བྷིནྡ་ནཱ་ག་དྷ་རྨ་ཎི། བི་ཤཱིརྱནྟུ་ནཱ་ག་ཤ་རཱི་རཱྃ། བི་སྥོ་ཊ་ཡ་ནཱ་ག་ནཱ་ནི། ཏདྱ་ཐཱ། ཨོཾ་ཨཱཿཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ནཱ་གོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བཱས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་པ་རཱ་ཀྲ་མཱ་ཡ་ཧཱུྃ་ཕཊ། ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུཥྨ་ཎྚོཏ་སཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨ་རཱ་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། ད་ར་ད་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣན་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱྃ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། ཨོཾ་བཛྲ་ཏྲཻ་ལོཀྱ་བི་ཛ་ཡ་ཧཱུྃ་ཕཊ། ཨོཾ་བཛྲ་ཏྲི་ལོཀྱ་བི་ཛ་ཡ་བསྨིཾ་སྭཱ་ཧཱ། མཱ་ར་ཡ་ཙིཏྟ་རྦད་རྦད། ཨོཾ་བཛྲ་ཀྲོ་དྷ་མ་ཧཱ་ཀཱ་ལཱ་ཡ་ཧཱུྃ་ཕཊ། ཨོཾ་མ་ཧཱ་ཀཱ་ལ་གུ་ཎ་ཧྲྀ་ད་ཡ་ཧཱུྃ་ཕཊ། ཙིཏྟ་ཀྲོ་དྷི་དུཉྫ་ཛཿ ཨོཾ་བཛྲ་ཀྲོ་དྷ་ཨ་མྲྀ་ཏ་ནཱ་ག་ཧཱུྃ་ཕཊ། ཨོཾ་ཨ་མྲྀ་ཏ་ཀུཎྜ་ལི་སི་ཁྃ་ཀུ་རུ་ཧཱུྃ་ཕཊ། མཱ་ར་ཡ་རཀྟ་རྡུབས་རྡུབས། ཨོཾ་བཛྲ་ཀྲོ་དྷ་ཀུ་བེ་ར་རཱ་ཛ་ཡ་ཧཱུྃ་ཕཊ། ཨོཾ་ཨཱརྱ་ཛཾ་བྷ་ལ་ཛ་ལེནྡྲཱ་ཡ་ཧཱུྃ་ཕཊ་སྭཱ་ཧཱ། མཱ་ར་ཡ་ཀེ་ཆོཾ་ཆོཾ། མ་ཧཱ་དེ་བ་མཱ་ར་ཡ་སོད་སོད། མ་ཧཱ་ནཱ་ག་མཱ་ར་ཡ་ཛ་ཛྭཿ། མ་ཧཱ་དེ་བི་མཱ་ར་ཡ་ཧ་ན་ཧ་ན། མ་ཧཱ་མ་ནུ་མཱ་ར་ཡ་གཏུབས་གཏུབས། །མ་ཧཱ་གྲུབ་པ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིནྡ་བྷིནྡ་མ་ཧཱ་གན་དྷརྦ་མཱ་ར་ཡ་ཁོས་ཁོས། མ་ཧཱ་མ་རི་ནི་མཱ་ར་ཡ་ནཱྃ། མ་ཧཱ་ནཱི་ལཱྃ་བ་ར་དྷ་ར་བཛྲ་པཱ་ཥི་ཡཀྵ་ཧཱུྃ། མུ་རུ་ཏ་མུ་རུ་ཏ་ཧཱུྃ་ཕཊ། མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་རྨུགས་རྨུགས། མཱ་ར་ཎ་ཧལ་ཧལ། མཱ་ར་ཎ་མྱོས་མྱོས། མཱ་ར་ཎ་མྱོས་བྱིང་། མཱ་ར་ཎ་ཐུམ་རིལ་ཛ་ཛཿ། ཀ་ཀ་རཀྵྃ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཏེ་ཤེ་རཀྵ་ཧཱུྃ་ཧཱུྃ། སྟྭྃ་བྷྱོ་ཛྭཿ།ཁ་ཁཱ། ཙ་པ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཙ་ཀ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། མུན་དུ་རཀྵ་ཧཱུྃ་ཧཱུྃ་སྟྭྃ་བྷྱོ་ཛྭ་ཁ་ཁཱ། ཀ་ཀ་རཀྵ་ས་མ་ཡ་བུདྡྷཱ་ཡ་སྤུ་ཏ་ར། ཏེ་ཤ་རཀྵ་

ས་མ་ཡ་བུདྡྷཱ་ཡ་སྤུ་ཏ་ར་ཙ་པ་རཀྵ་ས་མ་ཡ་བུདྡྷཱ་ཡ་སྤུ་ཏ་ར་ཙ་ཀ་རཀྵ་ས་མ་ཡ་བུདྡྷཱ་ཡ་སྦུ་ཏ་ར། མུན་དུ་རཀྵ་ས་མ་ཡ་བུདྡྷཱ་ཡ་སྦུ་ཏ་ར། ཧཱུྃ་ཧཱུྃ་ཧྲིལ་ཧྲིལ། དིམ་དིམ། ཕོབ་ཕོབ། ཤར་ཤར། དི་རི་དི་རི་རྦད་རྦད། ཁ་ཐྃ་ཁ་ཐྃ། ཐུྃས། ཐུྃས། ཛ་རེ་ཛ་རེ་བྷྱོ། ཧ་ས་ཧ་ས། ཏེ་པ་ཏེ་པ། ཀྲི་ཏ་ཧ་ཀྲི་ཏ་ཧ། ཀྲི་ཁུག་ཀྲི་ཁུག །ཚལ་པ་ཚལ་པ། རྦད་ལིང་རྦད་ལིང་། སྲོག་ཚིག་ནན་རྦད། ལུས་དུལ་མཱ་ར་ཡ་རྦད། རྃ་རྃ་ཛྭཱ་ལ་ཛྭཱ་ལ་ཤི་ཤི། རྡུལ་བུན་རྦད་སོད། །ནཱ་ག་མཱ་ར་ཡ་ཧཱུྃ་ཕཊ། ཛཿཧཱུྃ་བྃ་ཧོཿདྷརྨྨཱ་ཀ་ཀ་ཀི་ཏི་ར།དྷརྨྨ་ཏེ་ཤ་ས་མུཉྫ། དྷརྨྨ་ཏེ་ཤ་ཏ་ཀ་ར། དྷརྨྨ་ཏེ་ཤ་ཙ་ཀ་ར། དྷརྨྨ་ཏེ་ཤ་ས་མ་ཡ། བུདྡྷཱ་ཡ་པུ་ཏ་ར། ཏེ་པ་ཏེ་པ་ཁ་ཁཱ་རི། ཏེ་པ་ཏེ་པ་ཀ་ཙ་རི། ཏེ་པ་ཏེ་པ་མུནྡུ་རི། ཏེ་པ་ཏེ་པ་པུསྟྭྃ་ཧ་ར། ཏེ་པ་ཏེ་པ་ས་ཛ་ས་མུཉྫ། ཙ་ཀ་ར་མུནྡུ་ར་ཁེ། བཛྲ་ཙ་མཾ་རན་ཛཱ་ཛཱ། ཏེ་ཤ་རྃ། མུ་ནྡུ་ནན། བཛྲ་ཛུ་རུ་ཛུ་རུ་རྃ། ཛུ་རུ་ཛུ་རུ་ས་མུཾ་ཛ་ཛཱ་ཧཱྃ། བཛྲ་གྷེ་ནེ་ཁེ་ཛ། བཛྲ་པཱུརྞི་ཁེ་ཛ། བཛྲ་མུཎྜ་རེ་ཁེ་ཛ། ཁ་ཛ་རཱ་ཛ་མུནྡུ་ར་ཁེ། ཁ་ཛ་རཱཛྫཱ་མུནྡུ་ར་ས་མུྃ་ཁེ། པདྨ་ར་ཎི་ཁ་ཛ་རཱ་ཛ་མུནྡུ་རཱ་ཛཱ་ཁེ། ཁ་ཛ་རཱ་ཛ་མུ་ནྡུ་ར་ས་མུཉྫར་ཁེ་ཛུ་ཛུ་ཛ་ཛ་ཁཱ་ཧི་ཛ། ཨོཾ་ཀཱ་ཡ་ཝཱ་ཀ་ཅིཏྟ་ཨི་དྃ་བ་ལིང་། བུཉྫ་ཛི་གྷ་ཕུལླ་དྷཱུ་བ་མཱྃ་ས་སེ། ས་ཁནྟི་ཁུན་ཎི་ཕཊ་གཱ་ཏ། ཨོཾ་ཨ་མྲི་ཏ་པྲ་ཏི་ཛ་ཀས་ཀ་རུ་པཱུ་ཛཱ་ཁཱ་ཧི། རཀྟ་བི་བ་ཏ་ཀ་སེ་རུ་པཱུ་ཛ་ཁཱ་ཧི། དྷཱུ་པེ། པུཥྦེ། ཨ་ལོ་ཀེ །གན་དྷེ། ནཻ་བེ་དྱེ། ཀ་ས་ཀ་རུ་པཱུ་ཛ་ཁཱ་ཧི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱྃ། ཨཱདྱ་ནུད་པན་ན་ཏྭཱཏ་ཨོཾ་ཨཱཿཧཱུྃ། འདི་ནི་རིན་ཆེན་སྔགས་ཀྱི་མཆོག །མ་ལུས་དགོས་འདོད་འབྱུང་བའི་དཔལ། །གཟུངས་མ་ཁྱོད་ལ་ཉེར་བཤད་པས། །འདི་ནི་མི་འདའི་དམ་ཚིག་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་གསང་སྔགས་བསྟན་པའི་ལེའུ་སྟེ་དྲུག་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་

ཡི་འཁོར་ནི་བསམ་མི་ཁྱབ། །འདི་ཙམ་གྲངས་ནི་སངས་རྒྱས་ཀྱིས། །བསྐལ་པར་བགྲངས་ཀྱང་ཤེས་མི་འགྱུར། །དེ་བས་ནམ་མཁའི་ཚད་དང་མཚུངས། །མདོར་བསྡུས་ནས་ནི་བཤད་པར་བྱ། །སྐུ་ཡི་འཁོར་ནི་ཁྲོ་བོ་བཅུ། །རིགས་ལྔའི་ངོ་བོ་སྐུ་གསུང་ཐུགས། །མི་འགྱུར་གདུག་པ་འདུལ་བ་ཡིན། །ཐུགས་ཀྱི་འཁོར་ནི་རིགས་བརྒྱ་སྟེ། །མདོར་བསྡུས་སྤྲུལ་པའི་ཁྲོ་བོ་བཞི། །གསུང་གི་འཁོར་ནི་དཔག་མེད་ཀྱང་། །རིགས་དྲུག་འདུལ་བའི་ཁྱུང་ཆེན་ཡིན། །སྣ་ཚོགས་བསམ་གྱིས་མི་ཁྱབ་པོ། །གདུལ་བྱའི་འཁོར་ནི་ཀླུ་ཆེན་བརྒྱད། །གསུང་གིས་དེ་རིགས་འདུལ་བ་ཡིན། །གནོད་སྦྱིན་ལག་ན་རྡོ་རྗེའི་ཚོགས། །ལྔ་བརྒྱ་རིགས་བསྡུས་སྐུ་ཡིས་འདུལ། །ཐུགས་ཀྱིས་ལྷ་སྲིན་གདུག་པ་འདུལ། །བྱམས་པའི་ཏིང་ངེ་འཛིན་གྱིས་འདུལ། །འདི་ལ་འདིས་འདུལ་སྤྲུལ་པའི་ཚོགས། །སྨོན་ལམ་དབང་གིས་བྱུང་བ་སྟེ། །བསམ་གྱིས་མི་ཁྱབ་དེས་འདུལ་བ། །རིགས་ལ་བརྗོད་པར་ག་ལ་ནུས། །མདོར་བསྡུས་མཛེས་མ་ཁྱོད་ལ་བསྟན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་འཁོར་ངེས་པར་བསྟན་པའི་ལེའུ་སྟེ་བདུན་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་ལས་སྒྲུབ་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །གདུག་པའི་ཀླུ་རྣམས་འདུལ་འདོད་པའི། །རྡོ་རྗེ་ཁྱུང་ཆེན་སྟོབས་ཆེན་འདུལ། །ང་ཡི་གསུང་གི་སྤྲུལ་པ་སྟེ། །མཆེ་བ་རྣོ་དཔལ་དྲག་པོ་གཙིགས། །བྃ་ལས་རྒྱ་མཚོའི་རི་རབ་སྟེང་། །ཡི་གེ་ཧཱུྃ་ལས་བྱུང་བ་ཡི། །དཔའ་བོ་ཀླུ་འདུལ་བསྒོམ་པར་བྱ། །སྐུ་མཆོག་ནག་པོ་ཞལ་དགུར་ལྡན། །རྩ་ཞལ་མཐིང་ནག་གཡས་པ་དཀར། །གཡོན་པ་དམར་པོ་དེ་སྟེང་དུ། །དབུས་དམར་གཡས་པ་ལྗང་བ་སྟེ། །གཡོན་པ་བཙོ་མ་གསེར་དང་འདྲ། །དེ་སྟེང་དབུས་དཀར་གཡས་པ་གནག །གཡོན་པ་བཻ་ཌཱུརྱ་ལྟར་སྟོ། །ཐམས་

ཅད་སྤྱན་གསུམ་རྡོ་རྗེའི་མཆུ། །སྤྱི་གཙུག་རིན་ཆེན་རྡོ་རྗེའི་རྭ། །ཕྱག་ནི་བཅྭ་བརྒྱད་གཡས་པ་ན། །རྡོ་རྗེ་རལ་གྲི་དགྲ་སྟ་ཞགས། །མདུང་དང་ལྕགས་ཀྱུ་མདའ་དང་ནི། །རྩེ་གསུམ་ལས་ཀྱི་བྱ་ཁྱུང་བསྣམས། །རིམ་བཞིན་ཆུ་བདག་མཐའ་ཡས་དང་། །ནོར་རྒྱས་སྟོབས་རྒྱུ་དུང་སྐྱོང་དང་། །པདྨ་པད་ཆེན་རིགས་ལྡན་དང་། །འཇོག་པོ་ཀླུ་དགུ་རོ་སྟོད་ལྷ། །ཐལ་སྦྱོར་གཙོ་ལ་རིན་ཆེན་སྟོབས། །མཇུག་མ་ཕྱག་ལ་དཀྲིས་མཛད་དེ། །ཀུན་ཀྱང་རང་རང་ཁ་དོག་འཛིན། །སྦྲུལ་མགོ་བདུན་པ་སྤྲིན་བཞིན་གཏིབས། །གཡོན་པ་དྲིལ་བུ་བེ་ཅོན་དང་། །འཁོར་ལོ་རྒྱ་གྲམ་ཐོད་དབྱུག་ཆེ། །སྦྲུལ་གྱི་རྒྱལ་མཚན་གཞུ་དང་ནི། །གཏུམ་ཆུང་ཕུར་དང་ཁྱུང་ཕུར་རོ། །རིམ་བཞིན་རླུང་འབྱིན་དགའ་མ་དང་། །མཛེས་ལྡན་དཔའ་མོ་འོད་བྱེད་མ། །གྲུབ་མ་བརྟན་མ་དགེ་མ་དང་། །གསལ་བྱེད་རིམ་བཞིན་ཡབ་དང་འདྲ། །ཐལ་སྦྱར་གཙོ་ལ་པདྨ་འབུལ། །གདེངས་ཀ་གསུམ་གྱིས་འདུད་བྱེད་མ། །གཡོན་དུ་རིམ་བཞིན་བསམ་པར་བྱ། །ཞབས་བཞི་ཆུ་སྲིན་རུ་སྦལ་དང་། །ཕག་དང་ལྟོ་འཕྱེའི་སྟེང་ན་བཞུགས། །གཤོག་པ་རིགས་བཞིའི་རྡོ་རྗེ་སྟེ། །མཇུག་མ་རལ་གྲི་རིགས་བཞིར་ལྡན། །སྡེར་ཆེན་པགས་ལ་མེ་འབར་བས། །རབ་ཏུ་གཏུམ་ཞིང་ས་བདག་དང་། །ཀླུ་རིགས་མ་ལུས་བརླག་མཛད་པ། །འོག་མིན་གནས་སུ་སླེབས་པར་བསམ། །དེ་རྗེས་གནས་གསུམ་ཡི་གེས་བརྒྱན། །ཨོཾ་ཨཱཿཧཱུྃ་དཀར་དམར་ཞིང་གནག །སྤྲུལ་པ་གོ་ཆའི་སྔགས་བསམ་པ། །ཨོཾ་ཧཱུྃ་ཧྲཱྃ་ཧྲཱི་ཨཱ། སྦྱི་བོ་མགྲིན་པ་སྙིང་ག་དང་། །ལྟེ་བ་གསང་གནས་བསམ་པར་བྱ། །ཨེ་བྃ་མ་ཡཱ་དཔུང་པ་དང་། །དཔྱི་ཡི་སྟེང་དུ་བསམ་པར་བྱ། །ཧཱུྃ་སཱ་ཧཱི་ཨ་བྲང་དང་ནི། །སོག་དཔྲག་ལྟོང་མོ་ལྟེ་ལྐོག་བསམ། ཛཿཧཱུྃ་བྃ་ཧོཿསྒོ་བཞིར་བསམ། སྟཾ་ཛ་ཡ་ཨ་སྤྲུལ་པ་དང་། །ཡང་སྤྲུལ་བསམ་གྱིས་མི་ཁྱབ་བསམ། །དེ་ནས་གསང་བའི་སྔགས་བསྟན་པ། །ལས་ཀྱི་ཁྱུང་ཆེན་དྲག་པོའི་སྔགས། །སངས་རྒྱས་ཀུན་གྱི་མཐུ་བསྡུས་པ། །ཨོཾ་བཛྲ་ཁྱུང་ཀར་ཁྱུང་ཀར་བཛྲ་ག་རུ་ཌ་ཙ་ལེ་ཙ་ལེ་ཧཱུྃ་ཕཊ། སྐུ་ཡི་གསང་བའི་སྔགས་སུ་བསྟན། །ཨོཾ་བཛྲ་ག་རུ་ཌ་ཧཱུྃ་སྲོག་ཚིག་ནན་རྦད། ལུས་དུལ་ནཱ་ག་མཱ་ར་ཡ་

ཕཊ། །རཾ་རཾ་ཛྭ་ལ་ཛྭ་ལ་ཞི་ཞི་རྡུལ་བུན་རྦད་ཕཊ། གསུང་གི་རིག་པ་དམ་པའོ། །ཨོཾ་བཛྲ་ཙཎྜ་ག་རུ་ཌ་ཧཱུྃ་མཱ་ར་ཡ་མཱ་ར་ཡ། སྥོ་ཊ་ཡ་སྥོ་ཊ་ཡ། བཛྲ་བ་ཏི་ག་རུ་ཌ་བེ་གེ་ཧཱུྃ་ཛེ་ཛ་རི་ཛ་པྲི་ཛ་ཧཱུྃ་ཕཊ། ཐུགས་གསང་རྡོ་རྗེ་གཏུམ་པོའི་སྔགས། །དྲག་བྱེད་ཐམས་ཅད་རླག་པར་བྱེད། །ཀླུ་རྣམས་སྙིང་ཁྲག་འཐིག་པ་ཡིན། །རྡོ་རྗེ་འཛིན་པའི་དམ་ཚིག་འདི། །རིན་ཆེན་བཞིན་དུ་རྙེད་དཀའ་བས། །འདི་ལ་རྟག་ཏུ་འབད་པར་བྱ། །མཐུན་པའི་རྫས་ཀྱི་གཏོར་མ་སྦྱིན། །དེ་ཡི་ནང་དུ་གནོད་པ་དགུག །ཨོཾ་བཛྲ་ཤྲཱི་མ་མཱ་ནཱ་ག་ས་བི་ཏ་ཆོ་ག་ཁུག་མྃ་ལིྃ་དྷིྃ་སྭཱ་ཧཱ། འདིས་ནི་བཀུག་ལ་ལྷ་ལ་འབུལ། །གལ་ཏེ་གསད་པར་འདོད་པས་ན། སྐུ་གསུང་ཐུགས་ཀྱི་རིག་པ་ལ། །ཕུར་བུ་གཉིས་པའི་དྲག་སྔགས་དང་། །གསད་པ་སྤྱི་ཡི་ཤམ་བུར་གདགས། །གཟུགས་བརྙན་ཕུར་བུས་བཏབ་པར་བྱ། །ཚངས་པ་ཡིན་ཡང་ངེས་པར་བརླག །ཨོཾ་བཛྲ་ཙཎྜ་མ་ཧཱ་རོ་ཥ་ཎ་བཛྲ་ཀཱི་ལཱ་ཡ་སརྦ་བིགྷྣཱ་ན་མུངྒ་ར་ཀཱི་ལཱ་ཡ་ཨཱ་ཀོ་ཊ་ཡ་ཧཱུྃ་ཕཊ། ཨོཾ་བཛྲ་ཙཎྜ་ག་རུ་ཌ་ཀཱི་ལི་ཀཱི་ལ་ཡ་སརྦ་བིགྷྣཱ་ན་མུངྒ་ར་ཀཱི་ལཱ་ཡ་ཨཱ་ཀོ་ཊ་ཡ་ཧཱུྃ་ཕཊ། གཏུམ་ཆུང་ཕུར་བུས་བཏབ་པའི་སྔགས། །དེ་རྗེས་གཟུགས་བརྙན་མ་ལུས་པ། །དྲག་པོའི་ཐབ་ཏུ་བསྲེག་པར་བྱ། །ཚེར་མ་ཅན་གྱི་མེ་སྦར་ལ། །ཁྱུང་ཆེན་གཏུམ་པོའི་ང་རྒྱལ་གྱིས། །ནཱ་ག་བྷཱུ་མི་པ་ཏི་སརྦ་ཀཱ་ཡ་ཝཱ་ཀ་ཙིཏྟ་བཛྲ་ཛྭཱ་ལ་ཨ་ན་ལཱརྐ་ཧཱུྃ། ཅི་རིགས་སྔགས་ཀྱིས་བསྲེག་པ་དང་། །ཐལ་བ་དཀར་གསུམ་སྦྱར་བྱ་སྟེ། །རྒྱ་མཚོར་འབབ་པའི་ཆུ་ལ་དོར། །དེ་ལྟར་ལས་ཀྱི་སྦྱོར་བ་དེ། །ལན་བདུན་བྱས་པར་གྱུར་ན་ནི། །ཀླུ་ཆེན་དུག་གིས་སྙིང་ལ་ཟིན། །ངེས་པར་སོས་པར་འགྱུར་བ་ཡིན། །གལ་ཏེ་མི་གཏོང་ཀླུ་ཆེན་གྱི། །ལུས་དང་ཁང་པར་བཅས་པ་ལ། །མེ་དང་རྡོ་རྗེའི་ཆར་པ་ཡིས། །སྐད་ཅིག་ཉིད་ལ་འཚིག་པར་འགྱུར། །དེ་བས་དམ་ཚིག་མི་འདའ་བས། །ལས་འདི་མྱུར་བར་མི་བྱའོ། །ལས་ཀྱི་གཏུམ་པོ་ཁྱུང་སྒྲུབ་པ། །མཛེས་མ་ཁྱོད་ལ་བསྟན་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས། ལས་སྒྲུབ་པའི་ལྷ་རྡོ་རྗེ་གཏུམ་པོ་ཁྱུང་གི་བསྒྲུབ་པ་བསྟན་པའི་ལེའུ་སྟེ་བརྒྱད་པའོ།། །།

དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་སྐུའི་སྤྲུལ་པ། ཕོ་ཉ་གནོད་སྦྱིན་ནག་པོའི་སྒྲུབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཡི་གནོད་སྦྱིན་ནག་པོ་འདི། །བྱ་བའི་ལས་ཀུན་ཐོགས་པ་མེད། །ཁྱད་པར་དྲག་པོའི་ཕྲིན་ལས་འགྲུབ། །དུར་ཁྲོད་བྲག་རྫོང་ནགས་ཕུག་ཏུ། །ནག་པོའི་ས་ལ་དཀྱིལ་འཁོར་བྱ། །པདྨ་འདབ་བརྒྱད་སྒོ་དང་བཅས། །མཐིང་ནག་གྲུ་གསུམ་མེ་འོད་ལྡན། །སུྃ་ལས་རི་རབ་སྟེང་དུ་ཧཱུྃ། འོད་ཟེར་འཕྲོ་འདུས་རྡོ་རྗེར་བསམ། །དེ་ལས་གནོད་སྦྱིན་ནག་པོ་ནི། །ཞལ་གསུམ་ཕྱག་དྲུག་ཞབས་གསུམ་ལྡན། །གཡས་པ་འཇིགས་པ་སྟག་གི་ཞལ། །གཡོན་པ་སྟོབས་ཆེན་སེང་གེ་སྟེ། །ཕྱག་གཡས་དང་པོ་རྡོ་རྗེ་འཛིན། །གཉིས་པ་རྩེ་གསུམ་གསུམ་པ་ཕུར། །གཡོན་པ་དྲིལ་ཆེན་ལྕགས་ཀྱུ་དང་། །ཐོད་པ་ཁྲག་གིས་བཀང་བ་ཡིན། །གཡས་པ་གཏུམ་པས་བདུད་མོ་བརྫིས། །གཡོན་པས་བདུད་ཕོ་ཉི་གདོང་མནན། །ཕུར་ཞབས་དམར་པོ་མེ་འབར་བས། །གནོད་བྱེད་བགེགས་ཀྱི་མགོ་ལ་བཏབ། །ཐོད་ཕྲེང་མི་ཡི་པགས་པ་གྱོན། །དུར་ཁྲོད་རུས་པའི་རྒྱན་དང་ལྡན། །དབུ་སྐྲ་དམར་པོ་ཐུར་དུ་འཕྱང་། །སྤྱན་གསུམ་མཆེ་བ་རབ་ཏུ་གཙིགས། །ཧ་ཧར་དགོད་ཅིང་གདུག་པ་འདུལ། །སྤྲུལ་པའི་གནོད་སྦྱིན་སྟོང་དང་བཅས། །རྡོ་རྗེ་འཆང་གི་བཀའ་བཞིན་སྒྲུབ། །དེ་ཡིས་རིག་པ་ཕུལ་བ་ནི། ཨོཾ་བཛྲ་ཡཀྵ་ཀཱ་ལ་ཙཎྜ་ནཱི་ལཱྃ་པ་ར་དྷ་ར་ཤ་རཱི་ར་ཧཱུྃ་ཕཊ། རྩ་བའི་གསང་སྔགས་འབུམ་དུ་བཟླས། །གྲུབ་པར་གྱུར་ནས་གང་དམིགས་ལ། །རྗེས་སུ་ཚ་བའི་འབྲུ་དང་ནི། །ཚྭ་ལས་ལིང་གར་འཁོར་ལོ་གཞུག །དམིགས་པ་བསྟིམས་ལ་འགྲུབ་གནས་གཞུག །དེ་སྟེང་ཡུངས་ཀར་ཟི་ར་དང་། །དུག་གི་རིགས་ཀྱིས་བྲབ་པར་བྱ། །གསང་བ་དྲག་པོའི་སྔགས་འདི་བཟླས། །ཨོཾ་བཛྲ་ཡཀྵ་ཀཱ་ལ་ཙཎྜ་ནཱི་ལཱྃ་བ་ར་དྷ་ར་སརྦ་ཤ་ཏྲཱུྃ་བི་དྷཱ་རཱ་ཡ་ཕཊ། ཧ་ར་ཧ་ར་ཕཊ། པྲ་ཧ་

ར་པྲ་ཧ་ར་ཕཊ། ཙྪིནྡ་ཙྪིནྡ་ཕཊ། བྷིནྡ་བྷིནྡ་ཕཊ། བི་སྥོ་ཊ་ཡ་བི་སྥོ་ཊ་ཡ་ཕཊ། སརྦ་ཤ་ཏྲཱུྃ་ཀཱ་ཡ་ཝཱཀ་ཙིཏྟ་བི་ནཱ་ཤ་ཀ་ར་ཡ་ཕཊ། ཇི་སྲིད་མ་ཤིའི་བར་དུ་བྲབ། །གྲུབ་ནས་རིགས་མེད་ཐོད་པར་གཞུག །ཙེ་ཏི་ཆེན་པོའི་འོག་ཏུ་སྦ། །སྟེང་དུ་རི་རབ་རྡོ་རྗེ་ཡིས། །མནན་པ་བྱས་པས་ངེས་པར་བརླག །ཡང་ན་གནོད་སྦྱིན་ཆེན་པོ་དེ། །དུར་ཁྲོད་རས་ལ་བྲིས་བྱས་ལ། །དེ་ཡི་སྙིང་གར་སྔགས་འདི་བྲི། །ཨེ་ཡི་ནང་དུ་ཆུད་པར་ནི། །ཨོཾ་བཛྲ་ཡཀྵ་ཀཱ་ལ་ཙཎྜ་ས་མ་ཡ་མ་ནུ་སྨ་ར་སིདྡྷི་ཧཱུྃ། ཕྱག་ལ་ཡཀྵ་པ་ཏ་ལི། །ཞབས་ལ་ཀྃ་མྃ་བྷ་ར་བྲི། །དེ་ཉིད་གཏོར་མ་ཆེན་པོ་ལ། །བཅུག་སྟེ་སྔོན་པོའི་དར་གྱིས་དགབ། །དེ་སྟེང་རས་སམ་ཤིང་ལོ་ལ། །གནོད་སྦྱིན་སྲོག་གི་འཁོར་ལོ་ནི། །ལྟེ་བ་རྩིབས་བཅུ་མུ་ཁྱུད་བཅས། །ཡང་རྩིབས་བཅུ་དང་མུ་ཁྱུད་ལྡན། །མེ་འོད་ལྡན་པ་བྲི་བྱས་ཏེ། །སྔགས་ཀྱི་འཁྲུལ་འཁོར་བཀོད་ནས་ཀྱང་། །ལས་ཀྱི་མིང་དང་སྤེལ་བ་བྲི། །འདི་ནི་གནོད་སྦྱིན་སྲོག་ཡིན་ཏེ། །མི་འདའ་བཀའ་ཡི་དམ་ཚིག་ཡིན། །ལས་རྣམས་གང་བཅོལ་སྐུ་ཡིས་བྱེད། །ཡང་ན་རྒྱལ་རིགས་ཐོད་པ་ལ། །གནོད་སྦྱིན་བྲིས་ལ་ཚ་བའི་མར། །ཆང་དང་བསྲེས་ལ་བྱུག་བྱ་སྟེ། །ཉིན་རེ་གང་འདོད་ལས་དང་སྦྱར། །མེ་ཏོག་ཁ་དོག་མཐུན་པས་བྲབ། །བསྒོ་བའི་ཕྲིན་ལས་འགྲུབ་པར་འགྱུར། །ཆུ་དར་སྔོན་པོའི་གཞི་མ་ལ། །གསེར་གྱིས་འཁོར་ལོ་བྲི་བར་བྱ། །ལྟེ་བ་རྩིབས་བརྒྱད་མུ་ཁྱུད་ལྡན། །ཕྱི་མ་རེའུ་མིག་བཅུ་དྲུག་པར། །ས་བོན་སྔགས་དང་སྤེལ་བྱས་ཏེ། །ཀུན་གྱི་མཐའ་རུ་ཕྲིན་ལས་སྔགས། །བྲིས་པ་མགུལ་དུ་བཏགས་པ་ཡིས། །མི་མཐུན་ཕྱོགས་རྣམས་བསྲུང་འགྱུར་ཏེ། །བུང་བ་མེ་ལ་བྱ་བ་བཞིན། །ཁྱི་ཤ་བཏགས་པའི་རིལ་བུའི་ནང་། །དགྲ་ཡི་གཟུགས་བྲིས་སྔགས་དང་སྤེལ། །ཉི་ནུབ་བྱ་རོག་ལ་བྱིན་ཏེ། །སྔགས་བཟླས་ཕྱིར་ཞིང་ལན་གྲངས་ནི། །བརྒྱ་འམ་སྟོང་དུ་བྱས་གྱུར་ན། །གང་ཡིན་གནས་ནས་བསྐྲད་པར་འགྱུར། །ཁྱི་འབྲེལ་སྤུ་ལ་སྲད་བུ་བྱས། །མདུད་པ་བརྒྱ་རྩ་བརྒྱད་བྱས་ཏེ། །སྔགས་རེ་ཞིང་ཡང་གནོད་སྦྱིན་རེ། །འབྲས་ཀྱི་ནང་དུ་བསྐྱུར་བ་ན། །ཕུབ་མ་འབྲལ་བར་མི་འགྱུར་རོ། །

དེ་བཞིན་ཁྱིམ་དུ་བཅངས་པ་ན། །མི་ཕྱུགས་ལ་སོགས་འཁྲིག་པ་ན། །ཁྱི་དང་འདྲ་བར་འབྲེལ་པར་འགྱུར། །ཁྱི་ནག་སྙིང་དུ་གནོད་སྦྱིན་གྱི། །སྙིང་དང་སྐུ་དང་སྔགས་བཅུག་ནས། །བཅངས་པ་ཙམ་གྱིས་གནོད་སྦྱིན་ཉིད། །ལུས་དང་གྲིབ་མར་འདྲ་བར་འགྱུར། །སྐད་ཅིག་ཙམ་ཡང་སྒྲུབ་པ་པོ། །དེ་ཡིས་གཏོང་བར་མི་བྱེད་དོ། །དེ་ལ་སོགས་པའི་ལས་ཀྱི་རིམ། །མཛེས་མ་ཁྱོད་ལ་བཤད་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་གནོད་སྦྱིན་ནག་པོ་སྒྲུབ་པའི་ལེའུ་སྟེ་དགུ་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རྣལ་འབྱོར་བསམ་གྱིས་མི་ཁྱབ་པའི་རྫོགས་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །བསམ་གྱིས་མི་ཁྱབ་རྫོགས་པ་ཆེ། །ལྷ་ཡི་བྱ་བ་སྔོན་སོང་སྟེ། །བསྐྱེད་ལ་དམིགས་པ་ཐོབ་ནས་ནི། །སྙིང་གར་ཡེ་ཤེས་སེམས་དཔའ་བསམ། །དེ་ཡི་རང་བཞིན་སྙིང་ནང་དུ། །པདྨ་འདབ་བཞིའི་ཐིག་ལེས་བརྒྱན། །ཉི་ཟླའི་བར་དུ་རྒྱ་སྲན་ཚད། །དེ་ཡི་ནང་དུ་གནས་པའི་སྲོག །ཨ་ཤད་མར་མེའི་རྩེ་ལྟར་སྒོམ། །དེ་ལ་དམིགས་པ་བརྟན་པ་དང་། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམས་ན། །དེ་ལས་ཡེ་ཤེས་སྐྱེ་བར་འགྱུར། །གསལ་ཞིང་མི་རྟོག་རིག་པའི་སྐུ། །ཡེ་ཤེས་ཞེས་ནི་དེ་ལ་བྱ། །རྟེན་མེད་རྣམ་དག་གསལ་བ་ཡིན། །རྟོག་པ་རྟེན་ཅན་བསྒོམ་འདོད་པས། །སྐུ་ཡི་གནས་སུ་འཁོར་ལོ་ནི། །དཀར་པོ་རྩ་འདབ་སུམ་ཅུ་གཉིས། །མཚན་གྱི་ཐབས་ཀྱིས་ཆས་བརྒྱན་པ། །གསུང་གི་གནས་སུ་རྩ་འདབ་ནི། །བཅུ་དྲུག་དམར་པོ་ཤེས་རབ་སྟེ། །དེ་ལ་ཐབས་ཀྱིས་ངེས་པར་བརྒྱན། །ཐུགས་ཀྱི་གནས་སུ་དུས་སྦྱོར་བརྒྱད། །གཙོ་བོའི་ཡི་གེ་བརྒྱད་གནས་པ། །ཕྲིན་ལས་བྱ་བའི་གནས་དག་ཏུ། །དབྱུག་གུའི་གྲངས་ཀྱི་རྩ་གནས་པ། །ཤེས་རབ་གཉིས་འགྱུར་

ཁ་དོག་དམར། །དེ་དབུས་གཉིས་མེད་གཡས་དང་གཡོན། །ཐབས་དང་ཤེས་རབ་རྣམ་པར་དབྱེ། །རྟོག་པ་སད་པའི་འཁོར་ལོ་ནི། །ཐབས་ལ་དྲུག་དང་ཤེས་རབ་དྲུག །ཐ་མ་བདེ་བ་འཛིན་པའི་ས། །མི་རྟོག་དཔའ་བོ་གནས་པ་ཡིན། །ཡི་གེ་བཞི་ཡིས་རྒྱན་མཛད་དེ། །བདེ་འཛིན་འཁོར་ལོར་ཡི་གེ་མེད། །བརྗོད་པ་ཐམས་ཅད་སྤངས་པ་སྟེ། །འདུས་མ་བྱས་པའི་རང་བཞིན་མཆོག །ཁུ་བ་ཁྲག་དང་ཆུ་སེར་གནས། །འདི་ནི་ལམ་གསུམ་འཇོམས་བྱེད་པའོ། །སྐད་ཅིག་རླུང་གི་རྟ་ཡིས་ནི། །ཐབས་དང་ཤེས་རབ་གཉིས་བསྐུལ་ནས། །གཉིས་མེད་ཡེ་ཤེས་སྐྱེ་བར་འགྱུར། །ཡེ་ཤེས་ཀྱིས་ནི་རྟོག་པ་བསྲེག །ཐལ་བའང་དམིགས་པར་མི་འགྱུར་བའི། །རྟགས་ལྔ་རིམ་པར་འབྱུང་བར་འགྱུར། །དེ་ནས་དཔལ་གྱི་ཡོན་ཏན་ཏེ། །ཡང་ནས་ཡང་དུ་གོམས་པར་བྱ། །སྡེ་པ་བཞི་ཡི་ལོངས་སྤྱོད་ནི། །གནས་སུ་ཡང་དག་སྐྱེ་བར་འགྱུར། །གཉིས་མེད་བདེ་བའི་གནས་ཐོབ་ནས། །སྐྱེ་འཆི་ལ་སོགས་རྒྱུན་ཆད་དེ། །འདི་ནི་རྣམ་དག་ལེགས་པའི་གནས། །ཐོབ་པར་འགྱུར་བ་སྨོས་ཅི་དགོས། །འདི་ལྟར་རྣམ་པར་དག་པ་ནི། །ཉིན་མཚན་ཆ་ཡི་དབྱེ་བ་ཡིས། །དབྱུག་གུ་ཆུ་ཚོད་དུས་སྦྱོར་སོགས། །བརྩི་བས་རྣལ་འབྱོར་ངལ་བའི་རྒྱུ། །ཐམས་ཅད་གཅིག་ཏུ་བསྡོམས་གྱུར་ན། །མི་རྟོག་མཉམ་ཉིད་ནམ་མཁར་དག །འབད་མེད་ཡེ་ཤེས་ལྷུན་གྱིས་གྲུབ། །དང་པོའི་སངས་རྒྱས་ཡེ་ཤེས་ཆེ། །ཁམས་གསུམ་ཐམས་ཅད་སྒྲོལ་མཛད་མ། །ཤེས་རབ་ཡུམ་ལ་ཕྱག་འཚལ་ལོ། །མི་གནས་སྤྲོས་བྲལ་འདུས་མ་བྱས། །ལེགས་རྟོགས་བླ་མ་མཆོག་ལ་འདུད། །བརྗོད་པར་དཀའ་བའི་རྣལ་འབྱོར་འདི། །མཛེས་མ་ཁྱོད་ལ་བཤད་པ་ཡིན། །དཔའ་བོ་བརྟན་པར་མ་གྱུར་ན། །ཡི་གེ་ཧཱུྃ་གི་སྦྱོར་བ་ཡིས། །འཇིག་རྟེན་ཁམས་ཀུན་འཇིག་པར་འགྱུར། །མེ་ཡིས་བུད་ཤིང་སྲེག་མཛད་དེ། །ཤིང་མེད་མེ་ཡང་ཇི་ལྟར་གནས། །བརྟན་གཡོ་ཉམས་པར་གྱུར་པ་ན། །མི་ཤིགས་ཡི་གེ་རྣམ་པར་དག །འདི་ནི་གསང་བ་དམ་པ་སྟེ། །གསང་བ་བླ་ན་མེད་པ་འདི། །བདག་མེད་རྟོགས་པ་ཁྱོད་ལ་བཤད། །གཞན་དུ་

གང་གཱའི་བྱེ་མ་དང་། །མཉམ་པའི་སངས་རྒྱས་རྣམས་ཀྱིས་ཀྱང་། །བརྗོད་པར་ནུས་པ་ག་ལ་ཡོད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་བསམ་གྱིས་མི་ཁྱབ་པ་རྫོགས་པའི་རིམ་པ་བསྟན་པའི་ལེའུ་སྟེ་བཅུ་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རིགས་དག་པ་ལ་དབང་བསྐུར་བ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དང་པོར་སློབ་དཔོན་མཚན་ཉིད་ཀྱང་། །མཛེས་ཤིང་དུལ་ལ་བྱམས་སེམས་ལྡན། །སྔགས་དང་རྒྱུད་ཀྱི་དེ་ཉིད་མཁས། །སྙན་པར་སྨྲ་ཞིང་གཏོང་ལ་དགའ། །བརྟན་ཞིང་བདེན་སྨྲ་བྱམས་སེམས་ལྡན། །བསམ་པ་ཤེས་ཤིང་གསོང་པོར་སྨྲ། །དམ་ཚིག་ལྡན་ཞིང་སྔགས་ཚུལ་མཁས། །ཕྱག་རྒྱ་དཀྱིལ་འཁོར་བརྡ་རྣམས་མཁས། །དེ་ཉིད་བཅུ་ཤེས་སྙིང་རྗེར་ལྡན། །འཇིག་རྟེན་པ་ཡི་རྣམ་སྤངས་པ། །མཁས་པས་དེ་ཉིད་ཤེས་ནས་ཀྱང་། །དེ་ནི་སངས་རྒྱས་ཀུན་རང་བཞིན། །བྱང་ཆུབ་སེམས་དང་དགྲ་བཅོམ་དང་། །ཉན་ཐོས་རང་རྒྱལ་གོང་ན་མེད། །དེ་ལྟའི་བླ་མ་སྲོག་ལྟར་བསྟེན། །གལ་ཏེ་སློབ་དཔོན་སྨོད་པ་ལ། །དངོས་གྲུབ་རྨི་ལམ་དུ་ཡང་མེད། །དེ་བས་བླ་མ་མཉེས་བྱས་ལ། །བླ་གོས་ཕྲག་པ་ལ་གཡོགས་ཏེ། །པུས་བཙུགས་ཐལ་སྦྱར་མེ་ཏོག་ཐོགས། །དཀྱིལ་འཁོར་བྲི་བར་གསོལ་བར་བྱ། །གྲོང་དང་ཚོང་དུས་དུར་ཁྲོད་དང་། །ཚལ་དང་ལྷ་ཁང་གྲོང་ཁྱེར་ཏེ། །བྱང་ཤར་དངོས་གྲུབ་གཞན་གཉིས་སྤངས། །རོ་ཧི་ཏ་སོགས་ཟླ་བ་ཡི། །ལྟོ་འཕྱེའི་ལྟོ་བར་ཤེས་པར་ཡིན། །གཞན་དུ་ཉེས་པ་འབྱུང་བར་འགྱུར། །མཁས་པས་ཉེས་པ་མེད་པར་བྱ། །ས་བསླང་བ་དང་བརྟག་པ་ནི། །རིམ་བཞིན་གཙུག་ལག་ཁང་པ་དང་། །ཚལ་དང་རྡོ་ལེབ་ཁང་བཟངས་ཏེ། །ཀུན་ལ་བརྟག་པ་སྤང་བར་བྱ། །སློབ་དཔོན་སྨིན་པས་སློབ་མ་རྣམས། །ཕུང་པོ་ལྔ་པོ་དག་པར་བྱ། །ས་ཡི་ཉེས་པ་ཀུན་བསལ་

ནས། །ལྃ་ལས་བྱུང་བའི་ལྷ་མོ་ནི། །རྒྱན་ལྡན་བུམ་པ་ཕྱག་ན་བསྣམས། །དེ་ལ་མཆོད་ཅིང་གསོལ་བར་བྱ། །ཨོཾ་ཚུར་སྤྱོན་ཚུར་སྤྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱིས་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་པར། །མཆོད་ཡོན་འདི་ནི་བཞེས་ནས་ཀྱང་། །དཀྱིལ་འཁོར་ལས་ནི་ལེགས་སྒྲུབ་མཛད། །ཨོཾ་ཧི་ཧི་ཧི་ཧི་ཧཱུྃ་སྭཱ་ཧཱ། །གནང་བས་ས་ལ་སླར་ཐིམ་བསམ། །སླར་སྦྱངས་བསང་ཞིང་གཙོ་བོ་ལ། །དྲི་ཡི་གདན་ཆེན་གྲུ་བཞི་སྟེ། །འཁོར་ལོ་སུམ་ཆ་དོར་བས་ཟླུམ། །མེ་ཏོག་སྔོན་པོའི་གདན་ལ་བསམ། །རིན་པོ་ཆེ་འམ་ས་ཡང་རུང་། །བུམ་པ་ནག་པོའི་སྐྱོན་སྤངས་ཏེ། །བྱཱ་གྷྲི་སེང་གྷྲི་དབྱུག་པ་ཡི། །ཨུཏྤལ་གཞན་གྱིས་མི་ཐུབ་པ། །ཧ་ས་དེ་བས་ནད་རྣམས་སྦྱོང་། །དངུལ་དང་མུ་ཏིག་མུ་མེན་དང་། །བྱེ་རུ་གསེར་གྱིས་ཡེ་ཤེས་འཕེལ། །ནས་གྲོ་ཏིལ་དང་སྲན་མ་དང་། །མུད་ག་ཡིས་ནི་ལམ་ལྔ་དག །ག་པུར་གུར་གུམ་ཛཱ་ཏི་དང་། །ཙན་དན་ཨ་ག་རུ་ཡིས་ནི། །གཞན་དོན་ཕྲིན་ལས་ལྔ་འགྲུབ་བོ། །ཆུ་དང་སྙིང་པོ་ལྔ་ཡིས་ནི། །རྣལ་འབྱོར་ཕུན་སུམ་ཚོགས་གྱུར་པས། །མགྲིན་པ་གོས་ཀྱིས་དཀྲིས་པ་དང་། །འབྲས་ལྡན་ཤིང་གིས་ཁ་ཡང་བརྒྱན། །ཀུ་ཤ་ལ་འདུག་མཚན་མ་ཅན། །རང་རང་ཕྱོགས་སུ་གཞག་པར་བྱ། །བདུག་སྤོས་ཐོགས་ལ་གསོལ་བ་གདབ། །བཅོམ་ལྡན་རྡོ་རྗེ་འཛིན་པའི་རྒྱལ། །བདག་ལ་དགོངས་ནས་གཟིགས་སུ་གསོལ། །སློབ་མ་རྣམས་ཀྱི་དོན་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །བདག་ནི་དཀྱིལ་འཁོར་འདྲི་བར་འཚལ། །རིན་པོ་ཆེ་ཡི་མཐུ་བཞིན་དུ། །བཀའ་དྲིན་རྗེས་སུ་གནང་བ་ཡིས། །སང་ནི་བྱོན་པར་མཛད་དུ་གསོལ། །ལན་གསུམ་བར་དུ་གསོལ་བར་བྱ། །སློབ་མ་རྣམས་ལ་རྗེས་བརྩེ་བས། །སྡོམ་གཟུང་གསོལ་ཞིང་སྲུང་བ་དང་། །སློབ་དཔོན་རྡོ་རྗེ་ཅན་དམིགས་ལ། །གང་ཡང་གསང་སྔགས་ལྷ་ཀུན་དང་། །འཇིག་རྟེན་སྐྱོང་བ་མ་ལུས་པ། །རྫོགས་པའི་བྱང་ཆུབ་ལ་ཞུགས་དང་། །སངས་རྒྱས་བསྟན་དགའི་འབྱུང་པོ་དང་། །གང་

དག་རྡོ་རྗེའི་སྤྱན་ལྡན་རྣམས། །རྡོ་རྗེ་འཆང་གི་དཀྱིལ་འཁོར་མཆོག །དེང་བདག་འདྲི་བར་འགྱུར་བ་ལ ། །བདག་དང་སྐལ་ལྡན་སློབ་མ་ལ། །བྱིན་གྱིས་རླབས་ཕྱིར་བསྲུང་བར་མཛོད། །སྲད་བུ་ཡེ་ཤེས་ལྔ་ཡི་དངོས། །རེ་རེའང་རིགས་ལྔ་རྣམ་དག་སྟེ། །ཆོས་ཀུན་ངོ་བོ་ཉིད་མེད་པས། །ཕན་ཚུན་སྔགས་བཟླས་བསྒྲིལ་བར་བྱ། །དཀྱུས་སུ་འཁོར་ལོའི་ཉིས་འགྱུར་ལ། །སྦོམས་སུ་སྒོ་ཡི་བཅུ་གཉིས་ཚད། །ཧཱུྃ་བརྗོད་བདུད་རྩི་ལྔ་བྱུགས་ལ། །ཛྫ་ཛྫ་སྒྲ་བརྗོད་ལྟེ་བར་གཟུང་། །སླར་ཡང་དེ་བཞིན་ཡེ་ཤེས་ཀྱི། །ཐིག་ཆེན་ནམ་མཁར་གདབ་པར་བྱ། །དེ་བཞིན་ཆ་ལྡན་གཉིས་པ་ཡིས། །གཙང་ཞིང་རྡོ་རྗེ་འཛིན་བསམས་ཏེ། །ཚངས་པའི་ཐིག་ཆེན་གདབ་པར་བྱ། །གཉིས་པ་ཟུར་ཐིག་ལ་སོགས་པར། །ནུབ་དང་ལྷོར་ནི་སློབ་དཔོན་ལ། །བྱང་ཤར་སློབ་མའི་གནས་ས་སྟེ། །གཡས་ཀྱིས་བསྐོར་བ་མ་གཏོགས་པར། །གཡོན་དུ་ནམ་ཡང་མ་ཡིན་ནོ། །དེ་ལྟར་ཆ་ཡིས་རྣམ་པར་དབྱེ། །ཐིག་སྐུད་ཆད་ན་བླ་མ་འཆི། །དམན་དང་ལྷག་པས་ནད་དུ་འགྱུར། །ཕྱོགས་འཁྲུལ་ན་ནི་སློབ་མ་རྨོངས། །དེ་བས་མཁས་པས་སྐྱོན་མེད་བྱ། །རིན་ཆེན་ལྔ་འམ་འབྲུ་ཡི་ཕྱེ། །ཡང་ན་འབྱུང་ཁུངས་ལས་བྱུང་བ། །ཡི་གེ་བཅུ་ཡིས་བྱིན་བརླབས་ཏེ། །རིགས་ལྔ་རྣམ་པར་དག་པ་ལས། །དཀར་སེར་དམར་ལྗང་ནག་པོ་དང་། །དབང་ལྡན་ཕྱོགས་ནས་བྲི་བར་བྱ། །གལ་ཏེ་ཚོན་རྩི་མི་མཉམ་ཞིང་། །ཡོ་དང་དམའ་བར་གྱུར་ན་ནི། །དངོས་གྲུབ་མེད་ཅིང་རྩོད་ལ་གདུང་། །སྦོམ་པས་ནད་འབྱུང་ཕྲ་བས་ནི། །ནོར་ཉམས་གལ་ཏེ་ཆད་པས་ནི། །འཆི་འགྱུར་གཡས་སྐོར་མ་བྲིས་ན། །ཕུར་བུས་བཏབ་པ་ཡིན་ཞེས་བྱ། །ཤར་ཕྱོགས་དཀར་ལ་ལྷོ་ནུབ་བྱང་། །སེར་དམར་ལྗང་ཁུར་བྲི་བར་བྱ། །དབུས་ནི་བཻ་ཌཱུརྱ་ལྟ་བུ། །པདྨ་ཕྱོགས་ཀྱི་རྣམ་པ་སྟེ། །མཚམས་ནི་མཛེས་ཚོན་བུམ་པས་བརྒྱན། །སྒོ་ལ་སོགས་པའི་རྒྱན་རྣམས་དང་། །དུར་ཁྲོད་ར་བའི་ནང་དུ་བྲི། །གཏུམ་དྲག་ལ་སོགས་ཕྱོགས་མཚམས་དགོད། །དབུས་མཐོ་ཤར་དང་བྱང་གཞོལ་ཞིང་། །མཐོ་ཞིང་མ་འདྲེས་དྲང་བར་བྲི། །དེ་ནས་རྡོ་རྗེ་འཛིན་

དམིགས་ལ། །གུས་པས་མེ་ཏོག་དང་བཅས་ནས། །གསོལ་བ་འདི་ལྟར་གདབ་པར་བྱ། །དཔལ་ལྡན་རྡོ་རྗེ་འཛིན་པ་ཆེ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་མཆོག་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་བ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་པར་མཛོད། །ཅེས་པ་ལན་གསུམ་བར་དུ་བྱ། །བུ་ཚུར་ཐེག་པ་ཆེན་པོ་ཡི། །ཚུལ་ཆེན་སྣོད་ནི་ཁྱོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་མཆོག །ཁྱོད་ལ་ཡང་དག་བཤད་པར་བྱ། །རྡོ་རྗེ་མི་ཕྱེད་མཐུ་ཡིས་ནི། །མཉམ་མེད་པ་ཡི་ཡེ་ཤེས་འཐོབ། །དེ་བས་ཀུན་མཁྱེན་ཐོབ་འདོད་པས། །བུ་ཡིས་བློ་གྲོས་འདི་གྱིས་ཤིག །བླ་མ་སངས་རྒྱས་ཀུན་མཆོད་ཅིང་། །རྩ་བ་ཡན་ལག་ཉེས་པ་སྤོང་། །མ་གྲོལ་འཁོར་བའི་སེམས་ཅན་ལ། །སྙིང་རྗེ་ཆེན་པོ་རབ་བསྐྱེད་ནས། །བསྒྲལ་ཞིང་གྲོལ་བའི་ལམ་ལ་དགོད། །བདེ་བར་དབུགས་ནི་དབྱུང་བར་བྱ། །དེ་དག་རིམ་དང་རིམ་མིན་པ། །སློབ་མའི་རིམ་པ་རྣམ་པར་བརྟག །ཁྲུས་བྱ་སོ་ཤིང་སྦྱིན་པར་བྱ། །ཕྲིན་ལས་ཕྱོགས་དང་དངོས་གྲུབ་ཀྱི། །རིམ་པར་རྣམ་པར་བརྟག་པར་བྱ། །སྲུང་སྐུད་གདགས་དང་ཀུ་ཤ་སྦྱིན། །རྨི་ལམ་བརྟགས་ལ་ངན་པ་ན། །ཞི་བའི་མེ་ཡིས་བཟློག་པར་བྱ། །གདོང་གཡོགས་བཅིངས་ལ་ཡེ་ཤེས་དབབ། །དཀྱིལ་འཁོར་དམ་པར་གཞུག་པའི་ཕྱིར། །སྔོན་བསགས་སྡིག་པ་མ་ལུས་ལས། །དཀྱིལ་འཁོར་མཐོང་བ་ཙམ་གྱིས་འབྱང་། །བུ་ཁྱོད་སུ་ཡིན་ཅི་དགའ་བ། །བདག་ནི་སྐལ་བཟང་རིགས་ཡིན་པས། །རྡོ་རྗེ་འཛིན་པ་ཁྱོད་ལ་དགའ། །མིག་དབྱེ་དཀྱིལ་འཁོར་ལྷ་ཡང་བསྟན། །དམ་ཚིག་ཆུ་སྦྱིན་མནའ་ཡང་བསྒྲག །མེ་ཏོག་དོར་ལ་ལྷ་ངོ་བསྟན། །གང་དང་གང་དུ་བབ་གྱུར་པའི། །རིགས་ཀྱིས་དེ་ལ་སྤྲོ་བར་བྱ། །ཆུ་དང་ཅོད་པན་རྡོ་རྗེ་དེ། །དྲིལ་བུ་མིང་གིས་དབང་བསྐུར་ཏེ། །རིགས་ལྔའི་བདག་ཉིད་ཡེ་ཤེས་ལྔ། །བརྟུལ་ཞུགས་ལུང་བསྟན་རྗེས་གནང་སྦྱིན། །

དབུགས་དབྱུང་རྡོ་རྗེ་སློབ་དཔོན་བསྒྲུབ། །གསང་བ་ཤེས་རབ་ཡེ་ཤེས་དང་། །བཞི་པ་བརྗོད་མེད་དབང་བསྐུར་བ། །གསང་བ་མཆོག་གི་དཀྱིལ་འཁོར་དུ། །མཆོག་ཏུ་རབ་ཞུགས་མཐོང་བས་ན། །དེང་ཁྱོད་སྡིག་པ་མ་ལུས་ལས། །རྣམ་གྲོལ་རིགས་སུ་སྐྱེས་པས་ན། །སངས་རྒྱས་ཀུན་དང་མཉམ་གསུངས་པའི། །རྗེས་སུ་གནང་བས་དབུགས་ཕྱིན་འགྱུར། །དངོས་གྲུབ་རྒྱུ་ཡི་དམ་ཚིག་ནི། །བུ་ཡིས་རྟག་ཏུ་བསྲུང་བར་གྱིས། །སློབ་མས་བླ་མ་ལ་བཏུད་ནས། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བསྒྲུབ་པར་བགྱི། །བཅོམ་ལྡན་འདས་ཀྱིས་བཤད་པ་ལྟར། །རྒྱན་དང་ན་བཟའ་རིན་ཆེན་དང་། །རྒྱལ་སྲིད་བུ་དང་ཆུང་མ་དང་། །རང་གི་ལུས་ཀྱང་བླ་མ་ལ། །བསྙེན་བཀུར་ཚིམ་པ་མེད་པར་བྱ། །དེང་དུ་བདག་ཚེ་འབྲས་བུ་ཡོད། །བདག་ནི་གསོན་པ་འབྲས་བུ་ཆེ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་གྱུར་པས། །སེམས་ཅན་དོན་ནི་མཉམ་མེད་བྱ། །ཞི་བའི་སྦྱིན་སྲེག་དངོས་གྲུབ་གྲོགས། །ཚོགས་ཀྱི་འཁོར་ལོ་དགེ་འདུན་མཆོད། །ནད་པའམ་མགོན་མེད་ཕོངས་པ་ཀུན། །ཁ་ཟས་ཀྱིས་ནི་ཚིམ་པར་བྱ། །ཞིང་སྐྱོང་གཏོར་མས་མཉེས་བྱས་ལ། །རང་འདོད་འབྲས་བུ་གསོལ་བ་གདབ། །རྗེས་སུ་དམ་ཚིག་སྤྱོད་པ་དང་། །སྐྱེད་པ་ལ་སོགས་རྒྱུན་མི་ཆད། །རྣལ་འབྱོར་པས་ནི་བསམ་པར་བྱ། །འདི་ནི་རིགས་མཆོག་དབང་བསྐུར་བླ་ན་མེད། །མཛེས་མ་ཁྱོད་ལ་སྐལ་ལྡན་བསྒྲུབ་ཕྱིར་བསྟན། །གཞན་དུ་རིགས་མེད་དུག་ལ་དེ་ཡིས་སླར་ཞིང་གནོད། །དེ་ཕྱིར་འདི་ནི་དམ་ཚིག་རྡོ་རྗེའི་བཀོད་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སློབ་མ་དབང་བསྐུར་བའི་ལེའུ་སྟེ་བཅུ་གཅིག་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་

བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །གདུལ་བྱའི་རིགས་སུ་སྐྱེས་པ་ཡི། །གདུག་པའི་ཀླུ་ཆེན་རྣམ་པ་བརྒྱད། །རིགས་བསྡུས་ཆུ་བདག་བ་རུ་ཎ། །དམ་ཚིག་ལ་གནས་སོག་མ་མེད། །འདི་དག་བསྒྲུབ་པར་འདོད་པས་ནི། །མཛེས་པའི་དཀྱིལ་འཁོར་རྣམ་ལྔས་བྱུག །པདྨ་ལྷ་སྣམ་སྒོ་དང་བཅས། །སྒོ་རྒྱན་ལྟོས་འགྲོས་རབ་ཏུ་མཛེས། །ལྟེ་བར་རྡོ་རྗེ་འཛིན་པ་བསམ། །མདུན་དུ་ལས་ཀྱི་བཀའ་ཉན་བསྐྱེད། །པདྨ་བརྒྱད་ལ་ཀླུ་ཆེན་བརྒྱད། །གདེངས་ཀ་བདུན་ལྡན་ཐལ་སྦྱར་བསམ། །ལྷ་རྣམས་རིགས་བཞིའི་ས་བདག་སྟེ། །སྒོ་དང་གྲུ་ཆད་རིགས་ཀྱི་རིམ། །མཆོད་རྫས་ཀླུ་ཡི་རྩི་སྨན་བསམ། །དེ་རྗེས་རྡོ་རྗེ་འཛིན་བསམས་ལ། །ཀླུ་ཆེན་གནས་ནས་སྤྱན་དྲངས་ཏེ། །ཨེ་ཧྱེ་ཧི་ནཱ་ག་རཱ་ཛས་པ་རི་བཱ་ར་ས་མ་ཡ་ཛཿཛཿ། རང་རང་སྟན་ལ་བཞུགས་པར་བྱ། །པདྨའི་ལྟེ་བར་ཆུ་བདག་དང་། །དམ་ཚིག་སོག་མེད་དཀར་དང་སེར། །ཐལ་སྦྱར་སྦྲུལ་གྱི་ཞབས་སུ་འཁྱིལ། །གཙོ་བོ་རྡོ་རྗེ་འཆང་ལ་འདུད། །ཤར་ཕྱོགས་མཐའ་ཡས་སྔོན་པོ་སྟེ། །ལྷོ་ཕྱོགས་ནོར་རྒྱས་སེར་པོ་ཆེ། །ནུབ་ཕྱོགས་འཇོག་པོ་ཁ་དོག་དམར། །བྱང་ཕྱོགས་སྟོབས་རྒྱུ་ནག་པོ་སྟེ། །ཤར་ལྷོར་པདྨ་དུང་དང་འདྲ། །ལྷོ་ནུབ་པད་ཆེན་སེར་བ་སྟེ། །ནུབ་བྱང་དུང་སྐྱོང་བཙོད་དང་འདྲ། །བྱང་ཤར་རིགས་ལྡན་དཱུར་བའི་མདོག །མཇུག་མ་འཁྱིལ་བས་གཙོ་ལ་འདུད། །སྣ་ཚོགས་གཟུགས་ནི་རིགས་བཞི་དང་། །ས་བདག་སྣ་ཚོགས་གཟུགས་ཀྱིས་བསྐོར། །དེ་དག་སྔགས་ཀྱི་རིམ་པ་ནི། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་བཛྲ་པཱ་ཎི་ཧྲྀ་ད་ཡཾ། ནཱ་ག་ཡ་ས་མཱ་ཏི་ཀྲཱ་མ་ཐ་ཨུད་སཱ་ད་ནྃ་བྷ་བི་ཥྱ་ཏི་སྭཱ་ཧཱ། རྡོ་རྗེ་འཆང་གིས་ཀླུ་དམ་ཚིག་ལ་གཞག་པའོ། །ཨོཾ་བ་རུ་ཎཱ་ཡ་ཧཱུྃ་ཕུཿསྭཱ་ཧཱ། ཨོཾ་སྥུ་ཊ་སྥུ་ཊ་མ་ཧཱ་ནཱ་ག་རཱ་ཛ་ཀྲོ་དྷ་ཧཱུྃ། སིདྡྷི་སིདྡྷི་སྥོ་ཊ་ཡ་ཧཱུྃ་ཕུཿསྭཱ་ཧཱ། ཨོཾ་ཨ་ནན་ཏ་ཧཱུྃ་ཕུཿསྭཱ་ཧཱ། །ཨོཾ་བཱ་སུ་ཀི་ཧཱུྃ་ཕུཿསྭཱ་ཧཱ། ཨོཾ་ཏཀྵ་ཀ་ཧཱུྃ་ཕུཿསྭཱ་ཧཱ།ཨོཾ་ཀ་ར་ཀོ་ཊ་ཧཱུྃ་ཕུཿསྭཱ་ཧཱ། ཨོཾ་པདྨ་ཧཱུྃ་ཕུཿསྭཱ་ཧཱ། ཨོཾ་མ་ཧཱ་པདྨ་ཧཱུྃ་ཕུཿསྭཱ་ཧཱ། ཨོཾ་ཤཾ་ཁ་པཱ་ལ་ཧཱུྃ་ཕུཿསྭཱ་ཧཱ། ཨོཾ་ཀུ་ལི་ཀ་ཧཱུྃ་ཕུཿསྭཱ་ཧཱ།

འདི་དག་ཀླུའི་རྒྱལ་པོ་རྣམས་ཀྱི་སྔགས་སོ། །རིམ་པས་མཆོད་ཅིང་གསོ་བ་བྱ། །མཛེས་པའི་རྒྱ་མཚོ་གཏོར་མ་ཡིས། །ཀླུ་རྣམས་ཚིམ་པས་གདུག་སེམས་ཞི། །དེ་རྗེས་བསྟོད་པ་བརྗོད་པར་བྱ། །ཧཱུྃ་ཆུ་བདག་ཆེན་པོ་སྤྲུལ་པའི་དམ་ཚིག་ཅན། །མཐའ་ཡས་ནོར་རྒྱས་ལ་སོགས་ཀླུ་དབང་རྣམས། །རྒྱ་མཚོ་ཆུ་གཏེར་ཟབ་པའི་མཇིང་ཆེན་གནས། །རིན་ཆེན་སྣ་ཚོགས་ཡིད་འོང་སྤྲས་པ་ཡི། །གཞལ་ཡས་འབྱོར་པ་ཕུན་སུམ་གནས་ན་བཞུགས། །སྦྲུལ་མགོའི་གདེངས་ཀ་རབ་འབར་རིན་ཆེན་གསལ། །ཡིད་འོང་ནོར་བུ་འདོད་པ་ཀུན་སྒྲུབ་པ། །རང་གཞན་ཕུན་ཚོགས་དོན་རྣམས་སྟེར་བའི་དཔལ། །འོད་འབར་ས་འོག་མུན་པ་མ་ལུས་སེལ། །དུ་མའི་བསྐལ་པར་ཡོན་ཏན་སྦྱངས་པ་ཡིས། །ཀླུ་རྒྱལ་འབྱོར་པ་མཆོག་ལ་མངའ་བརྙེས་པ། །བསམ་གྱིས་མི་ཁྱབ་རྫུ་འཕྲུལ་མཆོག་བརྙེས་པའི། །ཡོན་ཏན་བསམ་གྱིས་མི་ཁྱབ་ཁྱོད་ལ་བསྟོད། །སངས་རྒྱས་བཀའ་ཐོབ་དད་པའི་སྟོབས་འཕེལ་བ། །སངས་རྒྱས་སར་གནས་སྒྲུབ་ལ་ནན་ཏན་བྱེད། །ཐབས་དང་ཤེས་རབ་འབྲེལ་བས་གཞན་དོན་མཛད། །བདག་གཞན་དོན་སྒྲུབ་ཁྱོད་ལ་ཕྱག་འཚལ་ལོ། །བདེ་གཤེགས་སྤྱན་སྔར་ཁས་བླངས་དམ་བཅས་ཏེ། །བསྟན་པ་བསྲུང་ཞིང་འགྲོ་རྣམས་བསྐྱང་བའི་ཕྱིར། །ཁས་བླངས་མནའ་ཕུལ་དམ་ཚིག་དྲན་གྱིས་ལ། །ཕྲིན་ལས་དོན་གྱིས་བདག་གཞན་དོན་གྲུབ་མཛོད། །གཞན་ཡང་འཇིག་རྟེན་པ་རྣམས་ལ། །ཨོཾ་མཐའ་ཡས་དང་ནི་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་བུ་དང་དུང་སྐྱོང་དང་། །པདྨ་དང་ནི་ཆུ་ལྷ་དང་། །རྒྱ་མཚོ་རྒྱ་མཚོ་ཆེན་པོ་དང་། །དཔལ་གྱི་འོད་དང་འོད་པོ་ཆེ། །གཟུགས་ཆེ་ལྟོ་འཕྱེ་སྦྲུལ་ཆེན་པོ། །ཀླུ་ཆེན་འཁོར་དང་བཅས་པ་ལ། །མཐུན་པའི་དམ་རྫས་ཡིད་འོང་བ། །དཀར་གསུམ་མངར་གསུམ་གསོ་བའི་སྨན། །རིན་ཆེན་དར་དང་ཟ་འོག་དང་། །དཔག་བསམ་ཤིང་དང་འདོད་འཇོའི་བ། །སྣ་ཚོགས་ཁྱེད་ལ་ཕུལ་བ་ཡིས། །ཀླུ་ཡི་ནད་རྣམས་མེད་པར་མཛོད། །ཕྱིས་ཀྱང་མི་ཕྱེད་དམ་ཆོས་ལ། །སོ་སོའི་གནས་སུ་འགྲོ་བར་

གྱིས། །འདི་ནི་རྡོ་རྗེ་འཆང་གི་བཀའ། །འདི་ལས་འདས་ན་ཀླུ་རྒྱལ་རྣམས། །སྙིང་འཚིག་མགོ་བོ་འགས་འགྱུར་ཏེ། །ལུས་ལ་བསྐལ་པའི་མེ་འབར་ནས། །སྡུག་བསྔལ་གྱུར་ན་མ་ལེགས་པས། །དམ་ལས་འདའ་བར་མ་བྱེད་ཅིག །ནཱ་ག་རཱ་ཛ་ས་མ་ཡ་ཨ་བྷི་ཥིཉྩ་བཛྲ་ཙཎྜ་མ་ཧཱ་རོ་ཥ་ཎ་བཛྲ་པཱ་ཎི་ཧཱུྃ་ཕཊ། ཀླུ་རྣམས་དམ་ཚིག་སྒྲུབ་པའོ། །དེ་བཞིན་བྱས་ན་ཀླུ་ནད་རྣམས། །སྐད་ཅིག་ཉིད་ལ་བྱང་འགྱུར་ཏེ། །སྒྲུབ་པོ་བདེ་བར་འགྱུར་བ་ཡིན། །དེ་བས་འདི་ལ་བརྩོན་པར་གྱིས། །མཛེས་མ་ཁྱོད་ཀྱིས་ཞུས་པ་བཞིན། །གཏན་ལ་ཕབ་པས་རབ་ཏུ་བཤད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུ་སྒྲུབ་པའི་ལེའུ་སྟེ་བཅུ་གཉིས་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་གདུག་པ་ཅན་རྣམས་ཀྱི་ནད་འབྱུང་བའི་རྟགས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཀླུ་ལ་རིགས་དྲུག་ལ་སོགས་པ། །སྣ་ཚོགས་རིགས་སུ་ཡོད་གྱུར་ཀྱང་། །འབྱུང་བ་ལྔ་ཡི་རང་བཞིན་ཏེ། །ནོར་རྒྱས་དུང་སྐྱོང་རྒྱལ་རིགས་ཡིན་ཏེ་མཐོང་བའི་དུག །སེར་པོ་ས་ལ་དབང་སྟེ་ལྕི་འཐིབས་ལུས་པོ་སྦོ། ཤ་བབས་ར་བ་བཞི་ལ་ཁྱད་པར་ན་བ་ཡིན། །བཅྭ་ལྔ་ཉིན་གུང་རྒྱུ་བའི་དུས་ལ་ན། །ནད་ཀྱི་གནས་ནི་སྤྱི་བོར་ངེས་པར་འབབ། །རླུང་རྩ་བབས་ལ་ཤ་རུས་བར་དུ་ན། །སྐྲ་འབྱི་གླང་ཐབས་བྱས་ནས་ན་སྟེ་རྣ་བ་དང་། །གློ་བར་འབྲེལ་པས་ཤ་རོ་གློ་ལུ་འབྱུང་བ་ཡིན། །དགའ་བོ་རིགས་ལྡན་བྲམ་ཟེ་ཡིན་ཏེ་བསམས་པའི་དུག །དམར་པོ་མེ་ལ་དབང་བ་ཡིན་ཏེ་ཚ་ཞིང་གདུང་། །ལུས་དམར་སྐྱི་ཆུང་ཐང་ལ་མིག་རྩ་ལུས་པོ་སྐམ། །འབྲིང་པོ་བབས་ས་ཉི་ནུབ་དགོངས་མོའི་དུས་སུ་ན། །གནམ་སྟོང་བཅྭ་ལྔ་རྒྱུ་བའི་དུས་ཏེ་དེ་ལ་ན། །སྙིང་གར་བབས་པ་སྙིང་མི་དགའ་ཞིང་དྲན་པ་ཉམས། །མཇུག་ཏུ་མགོ་དང་ལུས་ལ་བབས་ཏེ་ན་ཚ་ཆེ། །ཤ་རོ་སྙིང་ལ་འོང་བས་

ལྕེ་ཡིས་རོ་མི་ཚོར། །པདྨ་འཇོག་པོ་རྗེ་རིགས་ཡིན་ཏེ་ཁ་རླངས་དུག །དཀར་པོ་ཆུ་ལ་དབང་བས་གྲང་ཞིང་བསིལ་བར་ན། །ལུས་མདོག་དཀར་ལ་པགས་པའི་སྤྲིས་མ་འཆགས། །ཐ་ཆུངས་བབས་པ་ཡིན་ཏེ་ཚེས་བརྒྱད་བཅྭ་བརྒྱད་ན། །སྔ་དྲོ་ཐོ་རངས་མི་བདེ་སྐེ་དང་དཔུང་པ་གཡས། །བྲང་ན་ཐ་མ་མཆིན་པར་བབས་པའི་ས་ཡིན་ནོ། །ཕོ་བས་ཟས་མི་འཇུ་ཞིང་མིག་གིས་གཟུགས་མི་འཛིན། །ཤ་བྲུལ་ཚོར་བ་མེད་དེ་ཅུང་ཟད་ཤ་ལྤགས་དམར། །པད་ཆེན་སྟོབས་རྒྱུ་དམངས་རིགས་ཡིན་ཏེ་རེག་པའི་དུག །ནག་པོ་རླུང་ལ་དབང་པས་ཡང་ཞིང་གཡོ། །ལུས་འདར་སེམས་རྒོད་ཤ་འཕར་ཕུ་ཤུས་འདེབས། །ཡན་ལག་ཚིགས་བཞི་ན་ཞིང་ཕོལ་དང་བད་ཀན་སྐྱེ། །སྒྲེགས་དང་རོ་སྟོད་ན་ཞིང་སྣ་ཁྲག་དག་ཀྱང་འབྱུང་། །འབྱང་ཞིང་ལུས་ངལ་དགོངས་དང་སྲོད་ལ་ན། །ཐ་ཆུངས་ཞག་ལ་འབས་ཏེ་ཚེས་གསུམ་བཅུ་གསུམ་ན། །འདི་ནི་འགོང་རིགས་རྩུབ་པས་སྨྱོ་འབོག་བཙན་ཐབས་གསོད། །ཐ་མ་མཁལ་མར་འབབ་སྟེ་རྣ་བས་སྒྲ་མི་ཐོས། །ཁུ་ཆུ་ཉམས་པས་ཆུ་སྲི་སོར་མོ་ཕྲ། །ཆུ་ལྷ་དམ་ཚིག་ནམ་མཁའ་ཡིན་པས་ཀུན་ལ་ཁྱབ། །གོང་མ་ཅི་རིགས་འབྱུང་ཞིང་དུས་མེད་ཤེས་པ་ཞུམ། །ལུས་ཀྱི་ཤེད་ཉམས་བྲལ་ཏེ་སྣ་ཚོགས་སྟོན་པ་སྟེ། །འདི་ནི་བཅོས་པར་དཀའ་སྟེ་གཏན་ལ་ཕེབས་པར་བྱ། །ཁྱད་པར་མཆེར་བ་ན་ཞིང་གདོང་ལ་སྨེ་བ་འབྱུང་། །ལུས་ལ་ཤིག་མང་ཀོ་དྲི་རྭ་གཞོབ་མནམ་པ་དང་། །ཐུར་སེལ་རླུང་ལ་རུལ་བའི་དྲི་མ་བྲོ་གྱུར་ལ། །འདི་ནི་མཆེར་བར་འབབ་སྟེ་ཆུ་ལ་ཁྲག་ཀྱང་འབྱུང་། །སོ་སོའི་རྟགས་སུ་མཁས་པས་ཤེས་པར་གྱིས། །སྤྱིར་ནི་ལྔ་པོ་གང་ཞུགས་ཀྱང་། །རིམ་པས་འདི་ལྟར་འབྱུང་བར་འགྱུར། །མེ་དང་གྲོག་པོ་ཕུགས་རྡུགས་དང་། །རི་ཕུག་དོག་པའི་སྒོ་དང་དོང་། །ལྷ་ཁང་འདམ་རྫབ་མི་སྡུག་གཟུགས། །དུད་འགྲོའི་ཚོགས་དང་མཚོ་རི་གཟར། །སྙིང་མི་དགའ་ཞིང་འཚིག་པ་ནི། །དང་པོ་འབྱུང་བར་ཤེས་པར་བྱ། །གླུ་ལེན་ནུབ་མོ་ན་དང་ཤེས་པ་ལྕི། །ཡན་ལག་མི་བདེ་ཤུ་བ་གཡན་པ་དང་། །བས་ལྡགས་འབྲུམ་ཆུང་དམར་སིབ་འོང་། །འཕྲུག་

ཅིང་ཟ་འཕྲུག་ཤ་མདོག་ཉམས། །མེ་རིས་ཆུ་གྲང་བླུགས་ལྟར་གྲང་། །གྲང་སིབ་ཚ་ཐིག་ཤ་བཀྲ་ཆེ་ཆུང་བྱེད། །ཤ་འཕྲིག་བེམ་དང་སྦྲིད་ཅིང་འཁོལ། །མིག་ཟླུམ་ཚ་ཞིང་སྨིན་མ་བྱི། །ལག་སོར་སེན་མོ་ཉམས་པས་ཕྲ། །ལུས་ལ་དྲི་ང་ཆུ་བུར་དང་། །ཉ་སྒངས་གནག་ཆུ་རུལ་དྲི་མནམ། །སྟོད་གཟེར་སྨད་དུ་འཁྲུ་བར་བྱེད། །ཕྱི་ཡི་ཤ་སྐམས་མདོག་ཉམས་དྲི་མ་བྲལ། །བུག་པའི་སྒོ་ཡོ་བདུད་རྩི་དུས་མེད་པ། །ཡང་ཅིག་མདོར་བསྡུས་བཤད་པ་ནི། །དབང་པོ་གསལ་བའི་འབྲས་བུ་ནི། །མཆིན་པའི་སྒོ་ཡིན་མིག་ལ་བརྟག །རྒྱལ་མོ་འཁོར་ལོ་གཡང་ར་ཡིན། །གནས་པ་རུས་པའི་འབྲས་བུ་ནི། །མཛེས་པ་སོ་ཡི་མཁར་ཡིན་པས། །ཁ་དོག་རྐང་བུ་ནུས་པ་བལྟ། །ནུས་པ་ཆུ་བའི་འབྲས་བུ་ནི། །ཟངས་མདོག་སེན་མོའི་ཚོགས་ཡིན་པས། །སྐྱེ་ལུགས་ཁ་དོག་རྩ་བ་བརྟག །མདོངས་དང་ཤ་ཡི་འབྲས་བུ་ནི། །ཁྱབ་པ་དྲེག་པ་ཡིན་པས་ན། །ཆགས་ལུགས་ཁ་དོག་འགྱུར་བ་བལྟ། །དྲོད་བརྟེན་ཁྲག་གི་འབྲས་བུ་ནི། །བུད་མེད་གསང་སྒོའི་ཆུ་ཡིན་པས། །ཁ་དོག་ཀུ་ཡ་གཟུགས་ལ་བརྟག །རྐང་མར་བཅུད་ཀྱི་འབྲས་བུ་ནི། །རྩ་བ་གནས་ལུགས་སྐྱེ་ས་བརྟག །དེ་རྣམས་ཐམས་ཅད་རྟགས་ལྡན་ན། །ངས་ཀྱང་གསོ་བར་ག་ལ་ནུས། །གསུམ་བཞི་ལྔ་ལ་སོགས་པ་ཡི། །རིམ་པ་རྣམས་དང་ལྡན་པ་ན། །སྔགས་དང་སྨན་གྱིས་གསོ་བར་བྱ། །ཕྱི་ནང་འབྲེལ་བའི་བབས་ས་ཡིས། །ལེགས་པར་བརྟགས་ཏེ་གསོ་བར་བྱ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་ཞུགས་པ་བརྟག་པའི་ལེའུ་སྟེ་བཅུ་གསུམ་པའོ།། །།དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་ཀླུའི་ནད་གསོ་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །བྱོལ་སོང་ཀླུ་ཡིས་ཟིན་པ་ལ། །འཚོ་དང་མི་འཚོ་གཉིས་ཡིན་ཏེ། །ངེས་པའི་རྟགས་ཆེན་

དྲུག་ཚང་ན། །དེ་ལ་མཁས་པས་ཅི་བྱར་ཡོད། །རྣམ་སྨིན་ལས་ལས་བྱུང་བ་ཡིན། །གཞན་རྣམས་གསོ་བར་འདོད་པ་ལ། །དཀའ་དང་སླ་བ་གཉིས་ཡིན་ཏེ། །དང་པོ་སྔགས་ཀྱི་རིམ་པ་ཡིན། །གཉིས་པ་རྫས་དང་འབྲེལ་བ་ཡིན། །དང་པོ་སྔགས་ཀྱི་སྦྱོར་བ་ནི། །དབང་བསྐུར་ཚོགས་བསགས་རྒྱུད་སྦྱངས་ལ། །རིམ་པ་གསུམ་གྱིས་བསྙེན་པར་བྱ། །ཁ་ཅིག་དེ་ཙམ་གྱིས་ཀྱང་ཞི། །གལ་ཏེ་ནུས་པ་ཆེ་བ་ན། །གསང་པ་དྲག་པོའི་ཤམ་བུ་གདགས། །ཁ་ཅིག་དེ་ཡིས་འཚོ་བ་ཡིན། །གལ་ཏེ་གནོད་ཚབས་ཆེ་བ་ན། །ཀླུ་ཡི་རང་གཤེད་བཟླས་པ་ཙམ། །ནམ་མཁའི་ཀླུ་ཡིས་སྙིང་ནས་གཟིར། །རིག་པ་གཉིས་པ་གཤམ་དུ་སྦྲེལ། །རྡོ་རྗེ་ལྟེ་བར་འཁོར་ལོ་བྲི། །དེ་ལ་དམིགས་ཏེ་བསྒྲུབ་པར་བྱ། །དུག་རིགས་གསལ་བར་གྱུར་ན་ནི། །ས་དུག་ངོས་ཟིན་རྡོ་རྗེའི་ནང་། །དགའ་བོ་རིགས་ལྡན་མེ་ཡི་སྔགས། །བྲམ་ཟེའི་འཁྲུལ་འཁོར་ཤིས་པ་ཡིན། །མེ་ལ་ཆུ་ཡི་འཁྲུལ་འཁོར་ཏེ། །དེ་ཡི་སྔགས་ཀྱིས་གསད་པར་བྱ། །བང་ཆེན་སྟོབས་རྒྱུ་རླུང་ཡིན་པས། །ས་ཡི་འཁྲུལ་འཁོར་ལྟེ་བར་བཅས། །པདྨ་འཇོག་པོ་ཆུ་ཡིན་པས། །རླུང་གི་འཁོར་ལོས་གསད་པར་བྱ། །རང་རང་ཁ་དོག་གཤེད་དུ་སྦྱར། །གཞི་སྙིང་སྔགས་རྣམས་དྲིལ་ལ་བཟླས། །གཉེན་པོ་མི་མཐུན་རྫས་དང་སྦྱར། །གཉེན་པོ་གང་ཡིན་ལྷ་ཡི་གཤེད། །མན་ངག་བཞིན་དུ་ཤེས་པར་བྱ། །འཁྲུལ་འཁོར་ཚང་ནས་མ་བདེ་ན། །རྒྱལ་པོའི་སྡོང་ཟླ་དབྱེ་བར་བྱ། །དུས་ཚོད་ཞག་གྲངས་རིམ་པ་ནི། །རྟགས་དང་སྦྱར་ལ་ཤེས་པར་བྱ། །རྟགས་རྗེས་རྗེས་སུ་ལོག་པ་ན། །སྦྱིན་སྲེག་ཅི་རིགས་མཁས་པས་བྱ། །ཕྱི་རྗེས་དྲག་པོས་བཅད་པ་དང་། །ལྷ་དང་རྫས་ཀྱི་སྔགས་ཀྱིས་བཅད། །མནན་པས་ལས་མཐའ་བརྟུལ་བར་བྱ། །ཞི་བ་དྲག་པོའི་རིམ་པ་ནི། །མཁས་པས་བརྟགས་ལ་བརྟེན་པར་བྱ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་བསལ་བའི་ལེའུ་སྟེ་བཅུ་བཞི་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་

གི་གཏོར་མ་བྱ་བའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དཀྱིལ་འཁོར་འདྲི་དང་སྦྱིན་སྲེག་དང་། །བཟླས་པ་ཐུན་མཚམས་རབ་གནས་དང་། །དབང་བསྐུར་བསྐྲད་ཅིང་གསད་པ་དང་། །འབྱུང་པོ་ཁྱུང་དང་གནོད་སྦྱིན་དང་། །ཀླུ་དང་གནས་སྐྱོང་མཆོད་པ་ནི། །གཏོར་མ་མེད་པར་གང་སྤྱད་པ། །ལས་དེ་འབྲས་བུ་མེད་པའམ། །བར་ཆད་ཉེ་བར་སྐྱེ་འགྱུར་བས། །གཏོར་མའི་ཆོ་ག་བསྟན་པར་བྱ། །ལྷ་ཡི་རྣལ་འབྱོར་ལྡན་པ་ཡིས། །ཕུན་སུམ་ཚོགས་པའི་འབྱོར་པ་བསག །གཏོར་མའི་འོག་ཏུ་རླུང་ལྷ་ཡི། །ས་བོན་ལས་སྐྱེས་ཁ་དོག་སྔོ། །གཡོ་བའི་རླུང་ཡབ་དང་བཅས་པ། །དེ་སྟེངས་རྒོད་མའི་ཁ་བསམས་ཏེ། །དམར་པོ་རླུང་ལས་སྐྱེས་པ་བསམ། །གྲུ་གསུམ་ཧཱུྃ་ལས་རྡོ་རྗེ་གསུམ། །སྐུ་གསུང་ཐུགས་ཀྱིས་བརྟན་པོར་བྱ། །དེ་སྟེང་ཨ་ལས་པདྨ་ཆེ། །ཡངས་ལ་དཀར་ཞིང་ཅུང་ཟད་དམར། །ཆོས་དབྱིངས་སྣོད་ཀྱི་གཞལ་ཡས་ཡིན། །དེ་ནས་སྦྱང་བའི་ས་བོན་ལས། །བྲུྃ་ཨྃ་ཛྲྃ་བྃ་ཧཱུྃ་བསམས་ཏེ། །སླར་ཡང་ཤ་ལྔ་སྦྱངས་པ་ལས། །མཱྃ་ལཱྃ་པཱྃ་ཏཱྃ་བཱྃ་བསམས་ཏེ། །ཡུམ་ལྔའི་ཡེ་ཤེས་རྣམ་པར་དག །བདུད་རྩི་ཡེ་ཤེས་རྣམ་དག་འདི། །སྦྱང་དང་སྤར་རྟོགས་སྦྱོར་བ་ཡིས། །ཡི་གེ་གསུམ་གྱི་སྒྲ་ལྡན་པ། །བདེ་བའི་རོ་ཆེར་ཉི་མར་གསལ། །འཆར་བའི་ཁ་དོག་འདྲ་བར་འགྱུར། །རྡོ་རྗེ་ལས་བྱུང་དངུལ་ཆུའི་མདོག །གཉིས་མེད་ཐབས་དང་ཤེས་རབ་ཡིན། །ས་བོན་ལས་བྱུང་པདྨའི་གདན། །ཡངས་པར་རྡོ་རྗེ་འཛིན་པ་དང་། །ཕྱོགས་སྐྱོང་ལ་སོགས་བཀུག་ལ་བསྟིམ། །མཛུབ་མདུད་གུང་མོ་རྩེ་མོ་སྦྱོར། །མཐེ་བོང་རྡོ་རྗེ་བརྟན་པར་གནས། །རང་འདོད་དངོས་གྲུབ་སར་བཞག་ལ། །ཧཱུྃ་སྒྲ་ལྡན་པས་སྔགས་འདིས་སྦྱིན། ཨོཾ་ཨིནྡ་ཛ་མ་ཛ་ལ། ཛཀླ་བྷུ་ཏ་བཧྣི། བ་ཨུ་རཀྑ། ཅནྡ་སུཛྫ། མ་ད་པ་པྤ། ཏ་ལ་བ་ཏཱ་ལེ། ཨཊྛ་སབྤ་སྭཱ་ཧཱ། ཨི་དཾ་བ་

ལི་བྷུྃ་ཛི་གྷ་ཕུལླ། དྷཱུ་པ། མཱྃ་ས། པྃ་ག །ཨ་མྦྷ། ཀཛྫ། སཔྤ་སཱ་ཧ། ཁཎ་ཏི་ཁུ་ཎི་ཕེ་ཌ་ག་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱཱ་ནུདྤནྣ་ཏྭཱད་ཨོཾ་ཨཱཿཧཱུྃ་ཕཊ་སྭཱ་ཧཱ། འཁོར་རྣམས་རྟོགས་པར་བྱ་བའོ། །ལྷག་པར་ཁྱུང་ཆེན་མཆོད་པ་ནི། །ཉ་ཤ་བྷྲེང་གི་ལ་དུ་དང་། །འོ་མ་སྦྲུལ་གྱི་ཤ་ཡིས་མཆོད། །གནོད་སྦྱིན་དག་ལ་ཤ་རློན་དང་། །ཆང་ནི་མེད་དུ་མི་རུང་ངོ་། །ར་ཁྲག་ཤིང་ཐོག་རྣམས་ཀྱིས་སོ། །ཀླུ་ལ་དཀར་གསུམ་མངར་གསུམ་དང་། །རྩི་སྨན་དར་ཟབ་སྣ་ཚོགས་མཆོད། །རང་གི་རིག་པ་ཕུལ་བྱས་ལ། །བསྟོད་ཅིང་གསོལ་བ་གང་ཡིན་བྱ། །ཧཱུྃ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །རང་གི་གནས་སུ་གཤེགས་ནས་ཀྱང་། །སླར་ཡང་སྤྱན་དྲངས་ཚེ་ན་སྤྱོན། །ཨོཾ་བཛྲ་ས་མ་ཡ་མུཿཞེས་བརྗོད། །མཆོད་སྦྱིན་འདི་དང་མ་བྲལ་ན། །ཞི་སོགས་གྲུབ་པ་བརྒྱད་གང་ཡིན། །མཆོག་གི་འབྲས་བུ་ཐོབ་པར་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་བྱ་བ་ལས་གཏོར་མའི་ཆོ་ག་བསྟན་པའི་ལེའུ་སྟེ་བཅྭ་ལྔ་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་ལ་ཞུ་བ་གསོལ་བ་བདག་གི་སྒྲུབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དུས་གསུམ་སངས་རྒྱས་བསྐྱེད་པའི་མ། །རྡོ་རྗེ་བདེ་ཆེན་སྟོང་པ་ཉིད། །ཁྱོད་ཀྱི་སྒྲུབ་པ་བཟང་པོ་ནི། །འདས་པའི་སངས་རྒྱས་རྣམས་ཀྱིས་བཤད། །ད་ལྟར་བྱུང་བའང་དེ་འཆད་དེ། །མ་འོངས་རྣམས་ཀྱང་འཆད་འགྱུར་ལ། །ང་ཡིས་ཀྱང་ནི་འདིར་བཤད་དེ། །བྱང་ཆུབ་སེམས་ལྡན་གང་ཟག་གིས། །རབ་དབེན་པ་ཡི་ས་ཡི་ཆར། །མཆོད་ཅིང་བསྟན་དགའ་བསྙེན་བྱས་ལ། །སངས་རྒྱས་རྡོ་རྗེ་ཅན་མཆོད་བྱ། །རིམ་པས་ཚངས་པའི་གནས་བཞི་བསྒོམ། ཨོཾ་སྭ་བྷཱ་བ་ཤུད་དྷཱཿསརྦ་དྷརྨཱཿསྭ་བྷཱ་བ་ཤུད་

བྷོ྅ཧཾ། རང་བཞིན་རྣམ་པར་དག་པ་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། བརྗོད་མེད་ཡེ་ཤེས་དག་པར་བསྒོམ། །བསྲུང་ཞིང་གཞལ་ཡས་ཁང་པ་དེར། །མཛེས་པའི་པདྨ་ལ་གནས་པ། །ཆོས་འབྱུང་རྣམ་དག་ཕོ་བྲང་དུ། །ཉི་མ་ཟླ་བ་རྣམ་དག་དཔལ། །བྃ་ལས་བྱུང་བའི་ལྷ་མོ་ནི། སྐུ་མདོག་དམར་ལྗང་ཞལ་གཅིག་མ། །ཕྱག་གཉིས་གྲི་གུག་ཐོད་པ་འཛིན། །གར་སྟབས་རྒྱན་གྱིས་མཛེས་མ་སྟེ། །ཐོད་པ་སྐམ་པོའི་ཕྲེང་བས་བརྒྱན། །ཤར་དུ་མཱ་མ་ཀཱི་བསམས་ཏེ། །སྔོན་མོ་ཞལ་གཅིག་ཕྱག་གཉིས་མ། །གཡས་པ་རྡོ་རྗེ་གཡོན་ཐོད་པ། །གཡས་སུ་སངས་རྒྱས་སྤྱན་སེར་ཏེ། །ཞལ་གཅིག་ཕྱག་གཉིས་གཡས་པ་ན། །རིན་ཆེན་གཡོན་པས་ཐོད་པ་འཛིན། །གཡོན་དུ་དམ་ཚིག་སྒྲོལ་མ་ལྗང་། །གཡས་པ་ཨུཏྤལ་ཐོད་པ་འཛིན། །རྒྱབ་ཏུ་གོས་དཀར་དམར་སེར་ཏེ། །པདྨ་ཐོད་པ་བསྣམས་པའི་ཕྱག །ཀུན་ཀྱང་ཁྲོ་ཞིང་གར་སྟབས་བཞུགས། །རུས་པ་རིན་ཆེན་རྒྱན་དང་ལྡན། །མཆོག་སྒྲུབ་ནད་རྣམས་སྦྱང་བ་དང་། །བསྲུང་ཞིང་འདོད་པ་ཞི་རྒྱས་དང་། །རང་གི་སྲོག་འཛིན་ཕྲིན་ལས་དབང་། །རྟག་ཏུ་ཡེ་ཤེས་པ་ཡང་མཆོད། །རིག་པ་ངེས་པར་བསྟན་པ་ནི། །ཨོཾ་བཛྲ་སུ་ཁཱ་བུདྡྷ་སརྦ་པ་ཤྃ་ཀུ་རུ་སུ་ར་ཀ་ཧཱུྃ་ཕཊ་སྭཱ་ཧཱ། ཨོཾ་ཤང་ཀ་རེ་ཤཱནྟི་ཀ་རེ། གྷུཊྚ་གྷུཊྚ་གྷུཊྚི་ནི་གྷཱ་ཏ་ཡ། གྷཱ་ཏ་ཡ། གྷུཊྚི་ནི་སྭཱ་ཧཱ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཨོཾ་ཨ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊྃ་ཀ་ཊེ་ཀ་རོ་ཊྃ་བཱི་རྱཻ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུ་ཥེ་སྭཱ་ཧཱ། རང་རང་ལས་དང་འབྲེལ་པ་ནི། །འབུམ་འགྱུར་སྔགས་ཀྱིས་འགྲུབ་པར་འགྱུར། །ལས་གཞན་དངོས་གྲུབ་མ་བསྒྲུབས་པར། །ལྷ་མོ་ཁྱོད་ཀྱིས་བྱེད་པ་ཡིན། །འདི་ནི་གསང་བ་དམ་པ་སྟེ། །ཆེས་གསང་བས་ཀྱང་མཆོག་ཡིན་ནོ། །དེ་བས་མཛེས་མ་ཁྱོད་ལ་བཤད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཡུམ་བསྒྲུབ་པ་རྣམ་པར་ཕྱེ་བའི་ལེའུ་སྟེ་བཅུ་དྲུག་པའོ།། །།དཔའ་མོ་

རྡོ་རྗེ་བདེ་མས་གསོལ་པ། །རྡོ་རྗེ་འཆང་གི་ལས་སྣ་ཚོགས་པ་སྒྲུབ་པ་ཇི་ལྟ་བུ་ལགས། །བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག ། ཁྱོད་ལ་བཤད་ཀྱིས་ལེགས་པར་ཉོན། །སྒྲུབ་པོ་ཕུན་སུམ་ཚོགས་འདོད་པས། །ང་ཉིད་ཐོག་མར་མཉེས་བྱ་སྟེ། །འདོད་པའི་རྫས་ལ་འཁོར་ལོ་བྲི། །དེ་ཡི་ནང་དུ་ཆུད་པ་ཡི། །ལོངས་སྤྱོད་མིང་དང་སྤེལ་བྲིས་ནས། །དགུག་ལ་བཅུག་ལ་སྔགས་འདི་བཟླས། །ཨོཾ་ཙཎྜ་མ་ཧཱ་རོ་ཥ་ཎ། ཏདྱ་ཐཱ། ཨོཾ་ཙ་ལེ་པྲ་ཙ་ལེ་ལ་ལཱ་ལུ་ཏེ་ཡཱ། དེ་བ་ཀཱ་མ་ཧཱ་ཀཱ་ལ་ཨ་ན་ཚ་ར་ཡ་བི་སཱི་སྭཱ་ཧཱ། ཁྲི་བཟླས་པས་རང་ཅི་འདོད་པ་འོང་བར་འགྱུར་ཏེ། །གོང་བུ་དགུག་པའོ། །རང་ཉིད་རྡོ་རྗེ་འཛིན་དུ་བསམས་ལ་ཏ་ལའི་ལོ་མ་ལ་རི་རབ་ཀྱི་འཁོར་ལོ་བྱས་ཏེ། །ཟུར་དུ་ཧཱུྃ་དང་ཧྲཱིའི་བར་དུ་བསྒྲུབ་བྱའི་མིང་བྲིའོ། །ལྟེ་བར་སྔགས་བྲི། རྩིབས་ལ་ཡང་སྔགས་བྲིས་ཏེ། །རྐང་པ་གཡོན་པས་མནན་ཅིང་། །ཨོཾ་ཙཎྜ་མ་ཧཱ་རོ་ཥ་ཎ་ཙ་མུཎྜི་དུ་མ་ཀེ་ཤི་ཧྲཱི། ཧ་ན་ཧ་ན་ཧྲི། པ་ཙ་པ་ཙ་ཧྲི། དེ་བ་དད་ཏ་ཆེ་གེ་མོ་མེ་པ་ཤི་རི་སྭཱ་ཧཱ། ཞེས་ཁྲི་བཟླས་པས་རྐང་པ་དགུག་པའོ། །ཨོཾ་ཙཎྜ་མ་ཧཱ་རོ་ཥ་ཎ་ག་ག་ཨ་རིག་རྐ་ཐ་ཏ་རི་སྭཱ་ཧཱ། སྔགས་འདི་བཟླས་ལ་ཁ་བཀྲུས་ལ། ཁྱུ་མཆོག་གི་ལྕི་བ་དང་། ལྡོང་རོས་བསྲེས་ལ་རྡོ་རྗེའི་གཟུགས་བྱས་ཏེ། ལྟེ་བར་འཁྲུལ་འཁོར་བཅུག་ལ་དགྲའི་སྒོར་སྦས་ན་འཆི་བར་འགྱུར་རོ། །བཀླགས་པས་འགྲུབ་འགྱུར་ནུས་པ་འདི། །རྡོ་རྗེ་འཛིན་པར་རབ་ཞུགས་ནས། །རྫ་མཁན་ལག་པའི་འདག་པ་ལ། །རྡོ་རྗེའི་རྣམ་པར་འཁྲུལ་འཁོར་བཅའ། །ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་མུ་ཁ་ཏེ་ཐཱཾ་ཏི་ས་གྷ་ཚཱ་ན་ཏིང་གྷན་ད་ན་ཏིང་ལཾ་གྷཱཾ་མུ་ཏྲ་མུ་རཱི་ཥེ་ནཾ་ཆེ་གེ་མོ་བྷནྡྷཱ་མི་སྭཱ་ཧཱ། སྔགས་འདི་ཁྲི་བཟླས་ཁང་པར་མནན། །ངེས་པར་ཤགས་ལས་རྒྱལ་བར་འགྱུར། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ན་མ་ནི་ཁ་བེ་རཱ་ཡ་ཅི་རི་ཙི་རི་ཀརྟ་ཏུ་བེ་ན་མུ་ཤི་ཏུན་ཏེ་བནྡྷཱ་སི་རི་ཁ་ལི་སྭཱ་ཧཱ། །རྡོ་རྗེ་ལ་ནི་ཁྲག་གིས་བྲི། །གང་གིས་ཕྱོགས་མཚམས་སྦས་པ་ན། །བྱི་བ་ཁ་ནི་འཆིང་བ་

ཡིན། །ཨོཾ་ཙཎྜ་མ་ཧཱ་རོ་ཥ་ཎ་ནཾ་ཏུ་ན་ཏེ་སི་རི་སི་རི་ཁི་ལི་ཁི་ལི་སྭཱ་ཧཱ། སྟག་གི་པགས་པ་ལ་བྲིས་ཏེ། །གང་ལ་བཏགས་པའི་སྤྱང་ཀི་བསྲུང་། །ཨོྃ་ཙཎྜ་མ་ཧཱ་རོ་ཥ་ཎ་མྃ་ར་རཀྵ་ཏོ། ནཱ་ཤ་ཀ་རཱ་ཡ་སྭཱ་ཧཱ། ཤིང་ཐོག་ལ་བཟླས་ར་བར་སྦས། །སྤྲེའུའི་གནོད་པ་བཟློག་པར་འགྱུར། ཨོཾ་ཙཎྜ་མ་ཧཱ་རོ་ཥ་ཎ་སརྦ་སྟྃ་བྷ་ཡ་དུྃ་བྷེ་སྭཱ་ཧཱ། སྦྲང་རྩི་བུ་རམ་ཁུ་བ་ལ། །འདི་བཟླས་བྱུག་པས་དོམ་འབྲོས་སོ། ཨོྃ་ཙཎྜ་མ་ཧཱ་རོ་ཥ་ཎཱ་པཱ་རཱ་ཧ་དྷི་ནྃ་དྲུྃ་དྲུྃ་དྟེ་སྭཱ་ཧཱ། དུག་དང་ལན་ཚྭ་སྐེ་ཚེ་དང་། །ཡུངས་ཀར་ལ་ཕུག་ས་བོན་དང་། །དྷ་དུ་ར་དང་ཀལ་བི་དང་། །མ་ཧེ་ཕག་དང་ཅེ་སྤྱང་ཁྲག །སྦྲུས་ལ་རྡོ་རྗེ་བརྒྱད་བྱས་ལ། །ཕྱོགས་མཚམས་སྦས་ན་གནོད་པ་ཞི། །མཚམས་བཅད་པ་ཡི་དམ་པ་ཡིན། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་བྷི་དྷ་ཧཱི་ནི་ཀྃ་བྷེ་སྭཱ་ཧཱ། སྔགས་ནི་བརྒྱ་རྩ་བརྒྱད་བཟླས་ན། །བསྲུང་བ་འདི་ཡང་མཚམས་གཅད་ཡིན། ཨོཾ་བི་ཏི་པི་ན་ཧཱི་བྷྲིཾ་པི་ཊ་བི་ཊ་ཧཱུྃ་ཧཱུྃ་སྭཱ་ཧཱ། སྔགས་འདི་གང་ཡིན་ལྕི་བ་ལ། །བཟླས་ཏེ་མ་ཧེ་འཐུང་བའི་ཆུ། །ནང་བཅུག་ཞོ་རྣམས་བརླག་པར་འགྱུར། །གསེར་མེ་ལ་མ་རེག་པ། གཡུ་མིག་མ་ཕུག་པ། མུ་ཏིག་མུ་མེན། གསེར་གྱིས་བྲིས་པའི་ཁྲོྃ། བ་བླ་མུ་ཟི། བཙན་དུག་གུ་གུལ་གི་ཝང་སྤྲེའུའི་སྤུས་གཏུམས་ལ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ག་རུ་ཌ་ཙ་ལེ་ཙ་ལེ་བདུད་རུ་དྲཱ་མཱ་ར་ཡ། བཛྲ་བྷ་ཏི་ག་རུ་ཌ་བེ་གེ་ཧཱུྃ་རི་ཛ་པྲི་ཛ་ནཱ་ག་རཱ་ཛ་མཱ་ར་ཡ་ཧཱུྃ་ཕཊ། སྔགས་ཁྲི་བཟླས་ཏེ་ལུས་ལ་བཅངས་ན་ཀླུ་ཐམས་ཅད་འབྲོས་པར་འགྱུར་རོ། །ཨོཾ་པདྨཱ་ཀྵ་པདྨཱ་ཀྵ་བ་རུ་ནི་ཧཱུྃ་ཕཊ་སྭཱ་ཧཱ། ཆུ་གཙང་མ་ལ་བཟླས་ཏེ་མིག་བཀྲུས་ན་མིག་ནད་ཐམས་ཅད་འབྱང་བར་འགྱུར་རོ། །སུག་སྨེལ་དང་། ཛཱ་ཏི་དང། ནཱ་ག་གེ་སར་དང་། ཨ་ཤོ་ཏ་ཀའི་འབྲས་བུ་རྣམས་ལ་སྔགས་འདི་བཟླས་ཏེ་དཔྲལ་བར་ཤུ་ཏྲས་ཐིག་ལེ་བྱས་ན་ཀུན་གྱི་ཡིད་དུ་འོང་བར་འགྱུར་རོ། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཛྃ་བྷེ་མོ་ཧ་ཡ་ཧྲཱི་སྭཱ་ཧཱ། བརྒྱ་རྩ་བརྒྱད་བཟླས་སོ། །བྱིས་པ་གསར་བཙས་བསྲུང་བ་ན། །ཁམ་ཕོར་ནང་དུ་རྡོ་རྒྱུས་ཀྱིས། །རྡོ་རྗེ་རྒྱ་གྲམ་ལྟེ་བའི་ནང་། ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ལ་རཀྵ་རཀྵ་སྭཱ་ཧཱ། ཧཱུྃ་བཅུ་

བྲིས་ཏེ་ལྷ་བསྟིམས་ལ། །མཆོད་སྦྱིན་གཏོར་མ་སྦྱིན་བྱས་ཏེ། །དེ་ཡི་སྟེང་དུ་སྦྱང་བར་བྱ། །ལུས་ལ་གུར་གུམ་ཆུས་བྲིས་པའི། །འཁོར་ལོ་གཉིས་པས་བསྲུང་བར་བྱ། །ཨོཾ་བཛྲ་ཙཌྞ་མ་ཧཱ་རོ་ཥ་ཎ་བ་ས་ཧ་དོ་ལཱ་ཡཱི་སྭཱ་ཧཱ། མེ་དོ་ཡཱ་སཱ་བ་ཙི་ན་མོ་ཧ་ཡི་སྭཱ་ཧཱ། ཨེས་བ་ཛི་ཧཱ་ཡི་ན་མཱ་ཏ་ཡི་སྭཱ་ཧཱ། སྔགས་འདི་མེ་ཏོག་དང་། གོས་དང་། ཟས་དང་། རྒྱན་ལ་མངོན་པར་བསྔགས་ཏེ་བྱིན་ན་དབང་དུ་འགྱུར་རོ། །ཨོྃ་བཛྲ་ཙཎྜ་མ་ཧཱ་རོ་ཥ་ཎ་ན་མ་ས་ར་ནཱ་མཏདྱ་ཐཱ། དྷ་ར་ད་མ་ཧཱ་དྷ་ན་དྷ་དྷ་ཌ་དུ་ཌེ་དེ་སྭཱ་ཧཱ། བྱེ་མ་དང་ཐལ་ཆེན་ལ་བསྔགས་ཏེ་ཞིང་ལ་གཏོར་ན་སྲོག་ཆགས་ཀྱིས་ཟ་བར་མི་འགྱུར་རོ། །ཨོྃ་བཛྲ་སུ་ཥ་དྷེ་བྷི་ཤུདྡྷ་ཨལླཱི་བ་བ་ར་ཙུ་ལི་ཙེ་ར་ས་ག་གནྡྷ་སཱ་པ་མི་ཧ་བནྡྷ་ལི་ས་སྭཱ་ཧཱ། སྔགས་འདི་རྡོ་རྗེའི་ཤིང་དང་། ད་ལིས་དང་། ཨརྒ་གསུམ་ལ་ལན་བདུན་བདུན་བཟླས་ཏེ། །རྣ་བའི་འོག་ཏུ་བཅུག་ན་ཙཽ་ར་བ་ཐམས་ཅད་ཀྱིས་གནོད་པར་བྱ་བར་མི་ནུས་སོ། །མི་རུས་ལ་བྱས་ཕུར་བུ་ནི། །བགེགས་ཀྱི་ལུས་ཅན་ཞལ་གཅིག་པ། །ཕྱག་བཞི་ཐོ་བ་ཞགས་པ་དང་། །དགྲ་སྟ་རྩེ་གསུམ་བསྣམས་པ་སྟེ། །དུག་ཁྲག་ལན་ཚྭ་སྐེ་ཚེ་དང་། །རྒྱ་ཚྭ་མར་ནག་ནང་དུ་བཙོ། །སྟོབས་ཆེན་སྔགས་བྲིས་རས་མས་གཏུམ། །ཁྱིམ་སྒོར་སྦས་ན་འཆི་བར་འགྱུར། །ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷ་ནྶ་ཡ། ཨུད་སཱ་ད་ཡ་མཱ་ར་ཡ་ཧཱུྃ་ཕཊ། སྦྲུལ་མགོ་གཉིས་པའི་ཐོད་པར་ཁྱི་སྨྱོན་པའི་ལྕེ་ལ་དགྲའི་ལིང་ག་བྲིས་ཏེ་རྟའི་རྨིག་པའི་འོག་ཏུ་བཅུག་ལ་སྔགས་འདི་བཟླས་ནས་གང་གི་སྒོར་སྦས་ན་བསྐྲད་པའམ་སྨྱོ་བར་འགྱུར་རོ། །ཨོྃ་བཛྲ་ཙཎྜ་མ་ཧཱ་རོ་ཥ་ཎ་ཆེ་གེ་མོ་མུ་པྟ་ཡ་ཕཊ་ཅེས་ཁྲི་བཟླས་སོ། །ཤིང་ལོ་དང་སྟག་པ་ལ་རྡོ་རྗེའི་རྣམ་པར་བྱས་ལ་ལྟེ་བར་ལས་ཀྱི་རིག་པ་བཅུག །དཔའ་བོ་གཡུལ་དུ་ཤི་བའི་སྐྲའི་ཐེ་གུས་རྐེད་པར་བཏགས་ལ་ཀླད་ལ་བསྐོར་ན་བགེགས་འབྲོས་པར་འགྱུར་རོ། །གྲོ་གའི་འདབ་མ་ལ་རྡོ་རྗེའི་ནང་དུ་ཆུད་པའི་ལྟེ་བར་སྐུ་གསུང་ཐུགས་ཀྱི་སྔགས་དང་བསྲུང་བྱ་བྲི། །དེའི་མཐའ་མར་ལས་རབ་འབྱམ་བྲི། དེའི་ཉེ་བར་བསྟན་པའི་འཁོར་གྱི་སྔགས་བྲི། དེའི་མཐའ་མར་ཤེས་རབ་ཀྱི་

སྔགས་བྲི། དེའི་མཐའ་མར་མེའི་ཚོགས་བྲིས་ཏེ་དྲིལ་ལ་ལུས་ལ་བཅངས་ན་གདོན་ཐམས་ཅད་ཀྱིས་གླགས་མི་རྙེད་དོ། །བྱི་ཁུང་ཤར་བལྟས་ས་དང་ནི། །འུག་ཆུང་རུས་པ་ལང་ཀའི་རྩྭ། །སྒོ་ལྕགས་ཁུང་བུར་བླུགས་བྱས་ཏེ། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཀུར་ཏྲི་ས་ནཱ་ཀར་ཏི་ཚུམས་དང་ཕུཊ་ཕུཊ་སྭཱ་ཧཱ། སྔགས་དེ་བརྒྱ་དང་བརྒྱད་བཟླས་ན། །སྨྱིག་མས་ཡང་ཡང་དཀྲོག་པ་ནི། །སྒོ་ལྕགས་འབྱེ་བར་ཐེ་ཚོམ་མེད། །དུར་ཁྲོད་སོལ་བས་བསྲེགས་པས་ནི། །སླར་ཡང་སྔ་མ་དག་ཏུ་འགྱུར། །རྒྱ་གྲམ་ནང་དུ་ཆུད་པ་ཡི། །དམག་གི་གཙོ་བོ་བྲི་བྱ་སྟེ། །སྔགས་དང་སྤེལ་ནས་སྙིང་ག་རུ། །སིང་ལྡེང་ཕུར་པ་བཏབ་ན་ནི། །ངེས་པར་དེ་ཉིད་རེངས་པར་འགྱུར། །བྱི་བ་ནག་པོའི་རྟུག་པ་དང་། །ཤ་ཅན་ར་ཡི་རྭ་དང་ནི། །ཁྱི་ནག་སྤུ་དག་བསྲེགས་གྱུར་ན། །འབྲུ་ཡི་རྣམ་པ་འཕེལ་བར་འགྱུར། །དེ་སོགས་ལས་ཀྱི་རིམ་པ་ནི། །བསམ་གྱིས་མི་ཁྱབ་ཇི་སྙེད་པ། །ཁྱོད་ལ་བསྟན་པར་མི་ནུས་པས། །སྔགས་གྲུབ་དེ་ཡིས་རྟོགས་པར་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ལས་སྣ་ཚོགས་བསྟན་པའི་ལེའུ་སྟེ་བཅུ་བདུན་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ཆར་དབབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཆུ་བདག་གནས་པའི་ས་ཡི་ཆར། །དཀྱིལ་འཁོར་པདྨ་བརྒྱད་པ་ལ། །སྒོ་དང་རྟ་བབས་སྦྲུལ་གྱིས་བརྒྱན། །མེ་ཏོག་མཆོད་པས་མཉེས་བྱ་བ། །བྲམ་ཟེའི་ཐོད་པ་གཙང་མ་གཉིས། །ཆུ་བདག་དམ་ཚིག་ཀླུ་ཡི་གཟུགས། །གུར་གུམ་བཟང་པོས་བྲི་བར་བྱ། །ཁ་སྦྱར་བར་དུ་རྡོ་རྗེ་འཛིན། །ཞལ་བཞི་པ་ལ་ཕྱག་བརྒྱད་པ། །བཻ་ཌཱུརྱ་ལྟར་གནས་པ་ནི། །ཆུ་དར་ཡང་ན་རས་ལ་བྲི། །རྩ་བ་ཁྲོ་བོ་གཡས་གཡོན་རྒྱབ། །དཀར་དམར་དེ་

བཞིན་ལྗང་ཁུ་སྟེ། །རྩ་བ་ཁྱུང་ཆེན་ཟིལ་གྱིས་གནོན། །གཡས་ཀྱི་ཕྱག་ན་རིམ་པ་ལྟར། །རྡོ་རྗེ་འཁོར་ལོ་རལ་གྲི་དང་། །ལྕགས་ཀྱུ་རིགས་ལྡན་པདྨ་དང་། །པད་ཆེན་དུང་སྐྱོང་ཡུམ་དང་བཅས། །གཡོན་པ་དྲིལ་བུ་རྩེ་གསུམ་དང་། །ཕུར་བུ་སྤྲིན་གྱི་ཞགས་པ་སྟེ། །མཐའ་ཡས་ནོར་རྒྱས་འཇོག་པོ་དང་། །སྟོབས་རྒྱུ་ཡུམ་གྱིས་བཅིངས་པ་ནི། །ཐམས་ཅད་གཙོ་ལ་ཐལ་སྦྱར་ཏེ། །སྦྲུལ་མགོ་སྤྲིན་ཆེན་བཞིན་དུ་གཏིབས། །འདབ་མར་ཀླུ་ཆེན་བརྒྱད་བསྐྱེད་ལ། །སྤྱན་དྲངས་མཆོད་པ་བྱས་ནས་ཀྱང་། །ཆར་གྱི་རྒྱུན་ཆེན་འབབ་པར་བསམ། །ཀླུ་ཆེན་རྩ་བའི་སྔགས་རྣམས་ལ། །བྷ་རི་ཤ་ཡ་བཏགས་ཏེ་བཟླས། ངེས་པར་ཆར་རྒྱུན་འབབ་པར་འགྱུར། །གལ་ཏེ་འབབ་པར་མ་གྱུར་ན། །གུ་གུལ་དུད་པས་གཟིར་བྱས་ནས། །ཕྲིན་ལས་སྔགས་ཀྱིས་སྲོག་ཀྱང་གཡོ། །གལ་ཏེ་མ་བབ་ན་རྡོ་རྗེ་འཛིན་པ་ཕྱུང་ལ་ཚ་བའི་མར་ནག་གིས་བླུགས་ལ་སྔགས་བཟླས་ན་འབབ་པར་འགྱུར་རོ། །ཡང་ན་ཁམ་ཕོར་ལ་སྦྲུལ་མགོ་གཉིས་པའི་ཁྲག་དང་ཤས་སྔར་ལྟར་བྱས་ལ་སྐྱེར་པའི་སོལ་བའི་མེ་ལ་སྔར་ལྟར་བསྲོ་བར་བྱ་སྟེ། དེས་ངེས་པར་འབབ་པར་འགྱུར་རོ། །ཡང་ན་གཏུམ་པའི་འབྲས་བུ་ལ། །སྔགས་ཀྱིས་བཏབ་སྟེ་ཀླུ་ཡི་ཁྱིམ། །སྦྱིན་སྲེག་བྱས་པས་འབབ་པར་འགྱུར། །དེས་ཀྱང་འབབ་པར་མ་གྱུར་ན། །ཡུངས་ཀར་སྐྱེ་ཚེ་སྦྲང་རྒོད་དང་། །བྲ་མའི་མེ་ཏོག་ཕྱེ་མར་བྱས། །ར་ཡི་འོ་མས་རིལ་བུ་སྦྱར། །སྔགས་བཟླས་མཚོ་འམ་ཆུ་མིག་ཏུ། །བརྒྱ་དང་བརྒྱད་དུ་བསྐྱུར་ན་འབབ། །དེས་ཀྱང་འབབ་པར་མ་གྱུར་ན། །སྟ་རུའི་ཁུ་བས་རིལ་བུ་བྱས། །མཚོར་བསྐྱུར་ངེས་པར་འབབ་པ་ཡིན། །གལ་ཏེ་དེས་ཀྱང་མ་བབ་ན། །པདྨ་ཨུཏྤལ་སྔོན་པོ་དང་། །ཡུངས་ཀར་ཟངས་ཕྱེ་བ་བླ་དང་། །དབང་པོ་ལག་པ་རྒྱ་སྐྱེགས་ཤིང་། །བུ་རམ་ར་ཡི་འོ་མས་བསྡུས། །རྒྱ་ཤུག་འབྲུ་ཙམ་རིལ་བུ་ལ། །ལན་བདུན་བསྔགས་ཏེ་མཚོར་བསྐྱུར་ན། །ཆར་རྒྱུན་མཚུངས་པ་མེད་པར་འབབ། །མི་འབེབས་ཀླུ་རྣམས་

མགོ་གས་ཏེ། །ལུས་ནི་བསྐམས་ཏེ་འཚིག་པར་འགྱུར། །ང་ཡི་བཀའ་ལས་གང་འདའ་བ། །སྐད་ཅིག་ཉིད་ལ་བརླག་པར་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཆར་དབབ་པའི་ལེའུ་སྟེ་བཅྭ་བརྒྱད་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་སྦྱིན་སྲེག་གི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཐབ་དང་རྫས་དང་ལྷ་དང་ནི། །སྔགས་ཀྱི་རིམ་པ་ཕན་ཡོན་རྣམས། །རིམ་པས་མཛེས་མ་ཁྱོད་ལ་བསྟན། །སྦྱང་བའི་ལས་ནི་སྔོན་འགྲོ་བས། །སོར་ནི་ཉི་ཤུ་རྩ་བརྒྱད་དང་། །བཅུ་དྲུག་བཅུ་བཞི་བཅུ་གཉིས་དང་། །བཅུ་དང་བརྒྱད་ལས་ཆུང་བ་སྤང་། །རིམ་བཞིན་ནད་རྣམས་ཞི་ཞིང་ནོར་འཕེལ་དང་། །རིམས་རྣམས་ཞི་ཞིང་ཞི་ལས་འགྲུབ། །དབང་དུ་བསྡུ་དང་རྒྱས་པ་དང་། །གསོད་པའི་ཐབས་སུ་ཤེས་པར་བྱ། །ཐུར་དུ་རྐོ་བ་སུམ་གཉིས་ཏེ། །ཁ་ཁྱེར་བརྒྱད་ཆ་མཐོ་བའོ། །རིམ་བཞིན་ཕྱེད་ཕྱེད་རྡོ་རྗེས་མཚན། །དཀར་སེར་དམར་ནག་ལྗང་ཁུ་སྟེ། །ལས་དང་འབྲེལ་བ་ཤེས་པར་བྱ། །མཆོད་པའི་རྫས་དང་ཡམ་ཤིང་དང་། །དཱུར་བ་ལ་སོགས་བསྲེག་པའི་རྫས། །གཡས་དང་གཡོན་གྱི་རིམ་པ་ཡིན། །རང་ཉིད་རྡོ་རྗེ་འཛིན་པར་བསྐྱེད། །རྒྱས་ལ་དགའ་དང་ཞི་ལ་ཞི། །དབང་ལ་ཆགས་པ་ཁྲོ་ལ་བསད། །གཞན་རྩུབ་བསྐྲད་པ་ལ་སོགས་ཡིན། །དམར་བ་མེ་ཕྱོགས་གདུང་བའི་ལས། །བསྐྲད་པ་རླུང་སྟེ་གནོན་པ་ནི། །བདེན་བྲལ་དབང་དང་དགུག་པ་ཡང་། །ལྷོ་ཡི་ཕྱོགས་སུ་ལྟ་བ་ཡིན། །གསད་དང་དབྱེ་བའང་དེ་བཞིན་ཏེ། །ཤར་ཞི་བྱང་ཕྱོགས་རྒྱས་པ་ཡིན། །ཧཱུྃ་ལས་སྐྱེས་པ་ཁ་དོག་དམར། །མཛེས་པའི་ཞལ་གདངས་ཅུང་ཟད་གནག །དབྱུག་གུ་རིལ་བ་སྤྱི་བླུགས་དང་། །བགྲང་ཕྲེང་གཡོན་དང་གཡས་སུ་བསམ། །རལ་པའི་ཅོད་པན་གསུས་པོ་ཆེ། །རྒྱན་དང་ལྡན་པ་

བསམས་ལ་བསྟིམ། །བསང་གཏོར་འཐོར་འཐུང་མཆོད་ཡོན་དང་། །ཞབས་བསིལ་ལ་སོགས་དབུལ་བར་བྱ། །མེ་ཏོག་ལ་སོགས་རིམ་པ་སྟེ། །གཟར་བུ་གཉིས་ཀྱིས་དགང་བླུགས་དབུལ། །ཨོྃ་ཨགྣ་ཡེ་སྭཱ་ཧཱ། དེ་རྗེས་མེ་ཡི་མཚན་མ་བརྟག ། མདོག་དང་སྒྲ་དང་དྲི་དང་རོ། །དབྱིབས་དང་ཁ་དོག་བལྟ་བར་བྱ། །མེ་ནི་རྩེ་གཅིག་འབར་གྱུར་ན། །བསམ་པ་ཐམས་ཅད་འགྲུབ་པར་སྟོན། །གཉིས་འབར་རྩེ་གསུམ་མི་གཡོ་ན། །འབར་བའི་འབྲས་བུ་ཐམས་ཅད་འཛིན། །རྩེ་བཞི་མཉམ་ཉིད་བརྟན་པ་སྟེ། །རྒྱས་པའི་ལས་ལ་འབྲས་བུ་ཡོད། །ཟླ་འདྲ་སྣུམ་ལ་དྲི་མ་མེད། །དུ་བ་མེད་ཅིང་བཻ་ཌཱུ་ར་འདྲ། །ནད་མེད་རིགས་རྣམས་རྒྱས་པར་བྱེད། །ཆུ་ཤེལ་ནོར་བུ་སྤུང་པ་དང་། །པདྨ་རཱ་ག་གསལ་བ་ནི། །སྡིག་པ་མ་ལུས་ཟད་པར་འགྱུར། །དམར་སེར་པུཎྜ་རཱི་ཀ་དང་། །བན་དུ་ཁ་དོག་གསལ་བ་ན། །རྒྱལ་སྲིད་དཔལ་རྣམས་འབྱོར་པ་ཡིན། །ཨུཏྤལ་མ་ལི་ཨུ་ཤིའི་དྲི། །ཙམ་པ་ཀ་དང་སིག་ཀར་དྲི། །ག་པུར་ཨ་ག་རུ་ཡི་དྲིས། །དགེ་ཞིང་ཚེ་རིང་དཔལ་གྱི་གནས། །ཟབ་པའི་སྐད་དང་དུང་དང་ནི། །རྫ་རྔ་པི་ཝང་ཌཱ་མ་རུ། །དེ་ཡི་སྒྲས་ནི་བདེ་བ་འཕེལ། །དཔལ་བེའུ་བཀྲ་ཤིས་གཟུགས་སུ་འཆར། །རྒྱལ་མཚན་རྔ་ཡབ་ཕྱག་མཚན་རྣམས། །རིན་ཆེན་གདུགས་ཀྱི་དབྱིབས་སུ་འཆར། །དགེ་བ་མེ་ཡི་དབྱིབས་སུ་བསྟན། །ངན་པ་དེ་ལས་ཅི་རིགས་བཟློག །དེ་རྗེས་རྫས་ཀྱི་རིམ་པ་ནི། །ཨོཾ་ཨགྣ་ཡེ་ཨ་མུ་ཀ་སྱ་ཤཱནྟིཾ་ཀུ་རུ་ཡེ་སྭཱ་ཧཱ། བསྲེག་བླུགས་སོ། །ཨོྃ་བོ་དྷི་བྲྀཀྵཱ་ཡ་སྭཱ་ཧཱ། ཨ་ཤྭད་ཐའི་འོ། །ཨོྃ་བཛྲ་ཏ་ལཱ་ཡ་སྭཱ་ཧཱ། བླག་ཤའིའོ། །ཨོྃ་བཛྲ་ཀུ་བེ་ར་ཡེ་སྭཱ་ཧཱ། འོ་མ་ཅན་གྱི་ཤིང་གིའོ། །ཨོྃ་བཛྲ་ཤ་མ་ཛྭཱ་ལཱ་ཡ་སྭཱ་ཧཱ། ཨུ་དུམ་ཝཱ་རའིའོ། །ཨོྃ་སརྦ་བཱ་པཾ་ད་ཧ་ན་བཛྲ་སྭཱ་ཧཱ། ཏིལ་གྱིའོ། །ཨོྃ་བཛྲ་དུཥྚ་ཡེ་སྭཱ་ཧཱ། འབྲས་སོ་བའི་འོ། །ཨོྃ་བཛྲ་སྃ་པ་དེ་སྭཱ་ཧཱ། ཞོ་དང་ཟན་གྱིའོ། །ཨོྃ་བཛྲ་ཨཱ་ཡུ་ཥེ་སྭཱ་ཧཱ།དཱུར་བའིའོ། །ཨོྃ་བཛྲ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། །རྫས་རྣམས་རང་སྔགས་ཅི་རིགས་དབུལ། །བསྟོད་

ཅིང་གསོལ་བའི་ལས་བྱ་སྟེ། །མེ་ཡི་སྙིང་གར་དཀྱིལ་འཁོར་མཆོད། །གསད་ལ་སོགས་པ་རིམ་པ་བཞིན། །སྔར་བསྟན་པ་ལས་ཤེས་པར་བྱ། །དེ་རྗེས་ལྷག་མས་ཅི་རིགས་མཆོད། །ཞུ་བ་ལ་སོགས་རྫས་རྣམས་ནི། །ལྷ་ཡི་ཞལ་དུ་མཆོད་པར་བྱ། །ཡམ་ཤིང་ཀུ་ཤ་ལ་སོགས་པ། །འོད་ལ་མཆོད་པར་བྱ་བ་ཡིན། །ཕྱག་ཏུ་ཞལ་ཟས་འཐོར་འཐུང་དབུལ། །མེ་ཏོག་བདུག་པ་དབུ་དང་འོད། །ཐིག་ལེ་སྙིང་ག་བསང་གཏོར་ཡང་། །སྐུ་ལ་ཕུལ་ཏེ་ཞབས་བསིལ་ཞབས། །མར་མེ་ལ་སོགས་རིམ་བཞིན་གནས། །དཀྱིལ་འཁོར་བསྡུ་གཤེགས་རིམ་པ་རྣམས། །མཁས་པས་ཉེ་བར་བརྟགས་ཏེ་བྱ། །དཀྱིལ་འཁོར་ལྷས་ནི་མཆོག་སྟེར་ལ། །མེ་ཡིས་འདོད་པའི་དོན་སྒྲུབ་བྱེད། །ལག་པན་གྱིས་ནི་བདེ་བ་འབྱིན། །འོ་མ་སྦྲང་རྩིས་རིག་པ་འཕེལ། །གྲོ་དང་སྲན་མས་ནད་ཀུན་སེལ། །དཱུར་བས་སྲོག་ནི་འཛིན་པར་བྱེད། །ནས་ཀྱིས་བརྩོན་འགྲུས་ལ་དབང་སྟེ། །སྟོབས་འཕེལ་མཱ་ཤཱ་ཀ་ཡིན་ནོ། །འབྲུ་འཕེལ་སོ་བའི་ལས་ཡིན་ཏེ། །སྡིག་པ་འདག་པ་ཏིལ་ཡིན་ནོ། །འབྲས་ཀྱིས་ནུས་པ་འཕེལ་བྱེད་པ། །ཞི་ལ་ཡུངས་ཀར་ཀུ་ཤས་བསྲུང་། །དཔལ་བསྐྱེད་པ་ནི་བུད་ཤིང་སྟེ། །ཡམ་ཤིང་གཟི་བྱིན་སྟེར་བར་བྱེད། །འབྱོར་པ་འཕེལ་བ་མར་ཡིན་ནོ། །སྦྱིན་བདག་བཀྲ་ཤིས་ཐབ་ཡིན་ཏེ། །དངོས་གྲུབ་ཀུན་སྟེར་མཆོད་པའི་རྫས། །ཐབས་དང་ཤེས་རབ་གཟར་བུ་སྟེ། །བདུད་རྩི་མར་གྱིས་ཚིམ་བྱེད་པ། །མཆོད་པ་གཞན་གྱིས་ཅི་ཞིག་བྱ། །འདི་ནི་མཛེས་མའི་ཡུལ་ཡིན་གྱིས། །གཞན་གྱིས་རྟོགས་པར་ག་ལ་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྦྱིན་སྲེག་གི་ཆོ་ག་བསྟན་པའི་ལེའུ་སྟེ་བཅུ་དགུ་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་ཁྱོད་ཀྱི་གསང་བའི་མཚན་ཉི་ཤུ་རྩ་གཅིག་གི་བསྟོད་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །

ཁྱོད་ལ་བཤད་ཀྱིས་ལེགས་པར་ཉོན། །ང་ཡི་མིང་ནི་ཉི་ཤུ་གཅིག །དུས་གསུམ་སངས་རྒྱས་རྣམས་ཀྱིས་གསུང་། །མི་འགྱུར་གཡུང་དྲུང་དབང་བསྐུར་ཏེ། །འདི་དག་མཛེས་མ་ཁྱོད་ལ་བསྟན། །ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་ཙཎྜ་བཛྲ། ན་མོ་གྷ་ཛ་ཀརྞྞོ་བྷོ་ཙཎྜ་བཛྲ་ན་མཿསུ་བྷུ་ཥ་ནི་ས་བྷྱོ་ཙཎྜ་བཛྲ། ན་མོ་རཏྣ་གུ་ཎ་ཀ་ར་སི་ཙཎྜ་བཛྲ། ན་མོ་བྷ་ག་བན་པྲཛྙཱ་དྷ་སཱི་ར་ཙཎྜ་བཛྲ། ན་མཿཨཱརྱ་གྷོ་ཥ་སཱནྣི་ཙཎྜ་བཛྲ། ན་མཿཔྲ་ས་རཱ་ཡི་ཏོ་སཱི་ཙཎྜ་བཛྲ། ན་མོ་བཛྲ་ལ་ཨར་ཙི་ཤི་སཱི་ཙཎྜ་བཛྲ། ན་མཿསཱ་རཱུ་པ་ནོ་ཕ་ལ་ཙཎྜ་བཛྲ། ན་མོ་དུར་དཱན་ཏ་ད་མ་ཀ་མ་བ་རཿཙཎྜ་བཛྲ། ན་མཿབྷེ་ར་བ་བྷ་ས་ཏྭ་རཱུ་པི་བྷིཿཙཎྜ་བཛྲ། ན་མོ་དྲོ་མོ་ཀྲོ་དྷ་བི་གྲ་ཧ་རཱུ་པི་བྷིཿཙཎྜ་བཛྲ། ན་མཿཙ་ཏུར་སྨཱ་རཱ་རྀ་ཥྀ་སིནྣ་ཙཎྜ་བཛྲ། ན་མོ་མ་ཧཱ་བ་ལ་པ་རཱ་ཀྲ་མ་ཙཎྜ་བཛྲ། ན་མོ་ནི་རཱཏྨ་སིདྷ་ནིརྣ་ཏཱ་ཙཎྜ་བཛྲ། ན་མ་ན་མོ་ཨ་མོ་གྷ་ཛ་ག་དརྠ་ཀྲིད་ཙཎྜ་བཛྲ། ན་མོ་ད་ཤཱ་དིག་བི་ཤྭ་ནི་ར་མཱ་ཎཾ་ཙཎྜ་བཛྲ། ན་མོ་ཧ་ཧཱ་སཏྭ་སོ་ནིར་གྷོ་ཥ་ཙཎྜ་བཛྲ། ན་མོ་ཨ་ཙ་ལོ་ཧི་ཀ་ཛ་ཏ་ཏོ་ཙཎྜ་བཛྲ། ན་མཿཔཉྩ་བུདྡྷཱུ་ཏ་མ་མུ་ཀུ་ཊ་ཙཎྜ་བཛྲ། ན་མོ་བཛྲ་མ་ཧཱ་བྷེ་ཤ་ཡུདྡྷ་རོད་ཙཎྜ་བཛྲ། རྡོ་རྗེ་གཏུམ་པོའི་མཚན་ཉི་ཤུ་རྩ་གཅིག་པོ་འདི་འཛིན་པ་དང་། འཆང་བ་དང་། ཀློག་པ་དང་། ཡིད་ལ་བྱེད་པ་དང་། འདྲི་བ་དང་། འདྲིར་འཇུག་པ་དང་། གླེགས་བམ་དུ་བྱས་ཏེ་འཆང་བ་ལ་ནི་ཕྱོགས་བཅུའི་སངས་རྒྱས་ཐམས་ཅད་ཀྱིས་རྗེས་སུ་སྐྱོང་བར་འགྱུར་རོ། །སྲུང་བར་འགྱུར་རོ། །སྦེད་པར་འགྱུར་རོ། །སྐྱོབ་པར་འགྱུར་རོ། །མཚན་འདི་རྣམས་འཛིན་པ་དེ་མཚམས་མེད་པ་ལྔ་བྱས་པའི་སྡིག་པ་ཡང་བྱང་བར་འགྱུར་རོ། །ལན་ཅིག་ཙམ་བརྗོད་པས་ཀྱང་བསྐལ་པ་བྱེ་བ་ཕྲག་དགུ་བཅུའི་བར་དུ་སེམས་ཅན་དམྱལ་བ་རྣམས་སུ་མི་སྐྱེའོ། །ངན་འགྲོ་གཞན་ཡང་སྤངས་པ་ཡིན་ནོ། །ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར་རོ། །རྡོ་རྗེ་འཆང་ལྔ་བརྒྱ་ཡང་རྟག་ཏུ་མཚན་འདི་འཛིན་པའི་ཕྱི་བཞིན་རྗེས་སུ་འབྲང་ངོ་། །གདུག་པ་ཅན་གྱི་ཀླུ་རྣམས་ཀྱིས་མི་འཚེ་ཞིང་སླར་ལོངས་སྤྱོད་སྣ་ཚོགས་སྦྱིན་ནོ། །འཆི་བའི་དུས་སུ་ཡང་བཻ་དཱུརྱ་ལྷ་བུའི་སྐུ་ལུས་བསྟན་ཏེ། རང་གི་གནས་སུ་ཁྲིད་པར་འགྱུར་རོ། །མཚན་འདི་

གནས་པའི་ས་དེ་ནི་ལྕང་ལོ་ཅན་དང་མཚུངས་པ་ཡིན་ནོ། །མི་དང་མི་མ་ཡིན་པ་གདུག་པ་ཅན་རྣམས་ཀྱིས་ནམ་ཡང་གནོད་པ་བྱེད་པར་མི་འགྱུར་རོ། །གྲུབ་པ་བརྒྱ་དང་སངས་རྒྱས་ཀྱང་སྟེར་བར་བྱེད་ན། གཞན་ལྟ་ཡང་ཅི་སྨོས་ཏེ། མཚན་འདི་དག་རིན་པོ་ཆེ་དང་འདྲ་བར་བལྟ་བར་བྱའོ། །འདི་ནི་དུས་གསུམ་སངས་རྒྱས་ཀྱིས། །ཆེད་དུ་བརྗོད་པ་རིན་པོ་ཆེ། །གདུག་པ་ཐམས་ཅད་འཇོམས་པར་བྱེད། །དཔལ་དང་གཟི་བརྗིད་འཕེལ་བ་ཡིན། །ཕྲིན་ལས་སྒོ་རྣམས་ཐོགས་པ་མེད། །འདི་ནི་རྡོ་རྗེ་འཆང་ཡིན་པས། །ཉིན་མཚན་དུས་གསུམ་ཀློག་པ་ཡི། །ཕྱི་བཞིན་རྟག་ཏུ་སྲུང་བར་བྱེད། །ནད་དང་གདོན་རྣམས་ཀུན་ལས་ཐར། །སྨན་ཆེན་ཉེས་པ་ཐམས་ཅད་འཇོམས། འབྱུང་པོ་ཀུན་གྱིས་བཀུར་བ་སྟེ། །མཛེས་མ་ཁྱོད་ལ་བསྟན་པ་ཡིན། །འདི་ནི་རྣམ་དག་ལེགས་པའི་ལམ། །སུ་འཆང་ལག་ན་དཔལ་གནས་ཏེ། །རྟག་ཏུ་མཚན་འདི་བརྗོད་པར་གྱིས། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་མཚན་ཉི་ཤུ་རྩ་གཅིག་གིས་བསྟོད་པའི་ལེའུ་སྟེ་ཉི་ཤུ་པའོ།། །།དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་རྒྱུད་འདི་བཤད་པ་དང་། སྦ་བ་དང་། ཇི་ལྟར་གཟུང་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཕྱི་མའི་དུས་སུ་ང་ཡི་རྒྱུད། །གསང་བ་སྐུ་གསུང་ཐུགས་ཀྱི་གཏེར། །བླ་མེད་རྒྱུད་རྒྱལ་རིན་ཆེན་འདི། །བྱང་ཆུབ་སེམས་ལྡན་སྙིང་རྗེ་ཆེ། །ཐོས་མང་ཤེས་རབ་མཆོག་ཏུ་གསལ། །དད་པ་ཆེ་ཞིང་ལྷ་ལ་གུས། །བླ་མ་བསྟེན་ཅིང་དབང་བསྐུར་ཐོབ། །དམ་ཚིག་སྡོམ་པ་མ་ལུས་ལྡན། །བརྩོན་འགྲུས་ཆེ་ལ་གཞན་དོན་དཔའ། །འཇིག་རྟེན་བདེ་ལ་མ་ཆགས་པས། །རྒྱུད་འདི་མཉན་དང་བཤད་པར་བྱ། །དེ་ལས་བཟློག་པའི་གང་ཟག་ལ། །མིང་ཙམ་བསྟན་པར་མི་བྱའོ། །གལ་ཏེ་བསྟན་པར་

གྱུར་པ་ན། །སྔགས་པ་དམ་ཚིག་ཉམས་གྱུར་ཏེ། །ནད་གདོན་འབྱུང་པོ་མ་ལུས་པས། །ཉེ་བར་གཙེས་ཏེ་འཆི་བར་འགྱུར། །དེ་ནས་མནར་མེད་སྡུག་བསྔལ་ནི། །གྲངས་མེད་འདས་ཀྱང་ཐར་མི་འགྱུར། །དེ་བས་གསང་བ་སྐུ་གསུང་ཐུགས། །སྙིང་པོ་དམ་པ་འདི་དག་ལ། །རྒྱ་ཡིས་བཏབ་སྟེ་མཆོད་པ་དང་། །བསྟོད་ཅིང་སྦ་བ་བྱས་གྱུར་ན། །ཡིད་ལ་རེ་བ་ཀུན་རྫོགས་ཤིང་། །འཇིག་རྟེན་ཐམས་ཅད་བདེ་བར་འགྱུར། །གླེགས་བམ་སོར་ནི་བཅུ་དྲུག་ལ། །རིམ་བདུན་བརྒྱ་ཡིས་བཏབ་ནས་ཀྱང་། །རྟག་ཏུ་སྤྱི་བོའི་གཙུག་ཏུ་གཟུང་། །འདི་དང་བྲལ་བར་མ་གྱུར་ན། །བསྙེན་པ་དེ་ཡིན་བསྒྲུབ་པ་དེ། །སྒྲུབ་པ་ཆེན་པོའང་དེ་ཡིན་ཏེ། །སྔགས་ཀྱང་དེ་ཡིན་ལྷ་ཡང་དེ། །བླ་མ་དེ་ཡིན་སློབ་དཔོན་ཡང་། །སངས་རྒྱས་ཆོས་དང་དགེ་འདུན་ཡང་། །དེ་ཡིན་བསྐྱེད་དང་རྫོགས་པ་དེ། །མ་ལུས་དབང་ཡང་དེ་ཡིན་ཏེ། །འཇིག་རྟེན་བྱ་བ་ཀུན་སྤངས་ནས། །འདི་ལ་མཆོད་པར་གྱུར་པ་ནི། །ཚོགས་གཞན་ཅི་ཡོད་རྨོངས་པའི་རྒྱུ། །ཅི་ཕྱིར་འདི་ལ་འབད་མི་བྱེད། །ཅེས་བཅོམ་ལྡན་འདས་ཀྱིས་གསུངས་ཏེ། ཡུམ་ལ་རྗེས་སུ་གཏད་པའི་དོན་བསྟན་པ་ནི། །སངས་རྒྱས་ཀུན་གྱི་ཡུམ་ཆེན་མོ། །རྡོ་རྗེ་བདེ་མ་བདེ་སྟེར་མ། །རྟོག་པ་གཅོད་མཛད་ཡུམ་ཁྱོད་ལ། །རྒྱུད་འདི་གཏད་ཀྱིས་ལེགས་པར་ཟུང་། །གཟུངས་མ་ཡིད་འོང་རྒྱལ་བའི་ས། །རྣམ་དག་མཆོད་ཅིང་སྡུག་བསྔལ་འཇོམས། །མ་ལུས་འགྲོ་བ་འདྲེན་པའི་དཔལ། །རྡོ་རྗེ་བདེ་མ་ཕྱག་འཚལ་ལོ། །ཞེས་བསྟོད་ནས་རྒྱུད་གཏད་དོ། །དེ་ནས་ཡུམ་གྱིས་རྗེས་བཟུང་སྟེ། །དུས་གསུམ་བདེ་གཤེགས་མ་ལུས་པའི། །ཐུགས་ཀྱི་སྲས་པོ་སྡེ་དཔོན་ཆེ། །འཇིག་རྟེན་ཐམས་ཅད་འདུལ་མཛད་པ། །དཔའ་བོ་ཁྱོད་ལ་ཕྱག་འཚལ་ལོ། །གཏུམ་པོ་དཔའ་བོ་འཇིགས་པར་བྱེད། །ཀླུ་འདུལ་གཞན་གྱིས་མི་ཐུབ་པ། །དྲག་པོ་འཇིགས་པར་བྱེད་པའི་ལྷ། །རྡོ་རྗེ་གཏུམ་པོ་ཁྱོད་ཕྱག་འཚལ། །ཞེས་བསྟོད་ནས་ཕྱག་དང་བསྐོར་བས་མཉེས་པར་བྱས་ནས། སླར་ཡབ་ཀྱི་ཐུགས་ཀའི་རྡོ་རྗེའི་ལྟེ་བར་ཐིམ་པར་གྱུར་ཏོ། །དེ་ནས་

འཁོར་ཐམས་ཅད་ཀྱིས་མཆོད་པས་མཆོད་ཅིང་བསྟོད་པས་བསྟོད་དེ། གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་གསུངས་པ་ལེགས་སོ་ལེགས་སོ། །ཞེས་མངོན་པར་མགྲིན་གཅིག་ཏུ་ཆེད་དུ་བརྗོད་པ་ཆེད་དུ་བརྗོད་དེ། རྡོ་རྗེ་འཆང་ཆེན་པོས་གསུངས་པ་ལ་མངོན་པར་དགའ་ནས་ཡི་རངས་ཏེ་མངོན་པར་བསྟོད་པར་གྱུར་ཏོ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས། རྒྱུད་ཇི་ལྟར་བསྟན་ཅིང་སྦ་བ་དང་རྗེས་སུ་ཡི་རང་བའི་ལེའུ་སྟེ་ཉི་ཤུ་རྩ་གཅིག་པའོ།། །།བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཝ་ལ་ཙནྡྲ་གུ་རུ་ཆེན་པོ་དང་། བོད་ཀྱི་ལོ་ཙྪ་བ་གླན་ཆུང་དར་མ་ཚུལ་ཁྲིམས་ཀྱིས་བྱང་ཕྱོགས་ཤམྦྷ་ལའི་དཔེ་དང་བསྟུན་ཏེ་བསྒྱུར་བའོ། །སླད་ཀྱིས་ཡུལ་དབུས་ཀྱི་དཔེ་དང་། ཁ་ཆེ་ནས་བྱུང་བ་དང་བསྟུན་ནས་ལེགས་པར་གཏན་ལ་ཕབ་པའོ། །

རྡོ་རྗེ་བདེ་ཁྲོས་རྒྱུད་ཀྱི་རྒྱལ་པོ།

རྒྱ་གར་སྐད་དུ། བཛྲ་སུ་ཁ་ཀྲོ་དྷ་ཏནྟྲ་རཱ་ཛ། བོད་སྐད་དུ། རྡོ་རྗེ་བདེ་ཁྲོས་རྒྱུད་ཀྱི་རྒྱལ་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདུད་ལས་རྣམ་པར་རྒྱལ་བ་ཞེས་བྱ་བ་འོག་མིན་གྱི་གནས་གཞན་འཕྲུལ་དབང་བྱེད་ཀྱི་ཕོ་བྲང་ན་བཞུགས་སོ། །དེའི་ཚེ་འདུས་པ་རྣམས་ཀྱི་དང་པོ་སེམས་དཔའ་ཆེན་པོ་ཡིད་ཆེར་གཡོས་ཏེ། གུས་པས་བཀུར་སྟི་དང་། རིམ་གྲོ་དང་། ཕུ་དུད་དང་། བསྟི་སྟང་དུ་བྱས་ཏེ། ཨེ་མའོ་བྱམས་མགོན་ཐུགས་རྗེ་ཅན། །འགྲོ་བའི་སེམས་ཅན་ཐམས་ཅད་ཀུན། །མེ་ཡིས་ཚིག་ཅིང་མཚོན་གྱིས་ཕོག །མུན་པར་འཁྱམས་ནས་རི་ཡིས་ནོན། །རླུང་གིས་ཁྱེར་བ་སྙིང་རེ་རྗེ། །སྐྱབས་ཀྱི་དམ་པ་བཀའ་སྩལ་འཚལ། །ཞེས་ཞུས་པས། དེར་ནི་མགོན་པོས་སྐུ་བསྟན་ཏེ། །ཞལ་གྱི་པདྨ་རབ་ཕྱེ་ནས། །སྤྱན་གྱི་གཟི་མདངས་ཀུན་ལ་གཟིགས། །ལྗགས་ཀྱི་དཀྱིལ་ནས་བཀའ་སྩལ་པ། །སྐྱོབ་པའི་དམ་པ་འདི་ཡིན་གྱིས། །རྡོ་རྗེ་བདེ་

དང་ཁྲོས་པ་ཡི། །དུམ་བུ་གསུམ་པ་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུང་། །ཞེས་གསུངས་སོ། །རྡོ་རྗེ་བདེ་ཁྲོས་ཀྱི་རྒྱུད་ལས་གཏམ་རྒྱུད་ཀྱི་རིམ་པ་བསྟན་པའི་ལེའུ་སྟེ་དང་པོའོ།། །།དེ་ནས་མངོན་པར་བཤད་བྱ་བ། །བཀྲ་ཤིས་མཎྜལ་ལེགས་བྱས་ལ། །ཚུལ་དང་མཐུན་པའི་བུམ་པ་དགོད། །དེ་ཡང་ཆུ་གཙང་སྣ་བདུན་བླུགས། །གཞན་ཡང་ཤིང་ཏོག་འབྲས་བུ་དང་། མངར་གྱི་རྣམ་པ་དང་། དྲིའི་རྣམ་པ་དང་། རིན་པོ་ཆེའི་མཆོག་དང་། འབྲུའི་བྱེ་བྲག་དང་། །སྨན་རྣམས་བླུགས་སོ། །བུམ་པ་དེའི་མགྲིན་པ་དར་སྔོན་པོས་དཀྲིས་ཏེ། སྟེང་དུ་བླ་རེ་ཕུབ་ལ་གཞག་གོ །རྡོ་རྗེ་བད་ཁྲོས་ཀྱི་རྒྱུད་ལས་སྒྲུབ་རྫས་ཀྱི་ལེའུ་སྟེ་གཉིས་པའོ།། །།དེ་ནས་མངོན་པར་བཤད་བྱ་བ། །སྒྲུབ་བྱེད་རང་རྒྱུད་དག་པ་ཡིས། །བསྐྱེད་ཚུལ་རྒྱས་སམ་བསྡུས་ཀྱང་རུང་། །ཧུྃ་ལས་ཕྱག་ན་རྡོ་རྗེ་ནི། །དབུ་གསུམ་མཐིང་ནག་ཕྱག་བཞི་མཛེས། །སྐུ་ནི་ཆེ་ཞིང་མཚུངས་པ་མེད། །ཞབས་ཀྱིས་རྒྱ་མཚོའི་ནང་དུ་ཡང་། །ཆུ་སྲིནསྦལ་བའི་སྟེང་དུ་བརྫིས། །གཡས་གཡོན་དང་པོའི་ཕྱག་གཉིས་ཀྱིས། །རྡོ་རྗེ་གསོར་ཞིང་དྲིལ་ཆེན་རྡུང་། །མཐའ་གཉིས་དྲུག་པ་ཞལ་དུ་འདྲེན། །དབུ་གསུམ་གཡས་དཀར་རིགས་ལྔས་བརྒྱན། །དབུ་གཡོན་དམར་པོ་སྦྲུལ་གྱིས་མཛེས། །ཞལ་དབུས་མཐིང་ནག་ལྕགས་མཆུ་ཅན། །སྟེང་དུ་མཁའ་ལྡིང་ཚངས་པ་སྤྲུལ། །དཔའ་བོ་གདུག་པ་དཔུང་པའི་རྒྱན། །རིན་ཆེན་ལྷུན་པོའི་རི་རབ་ལ། །སྟེགས་བཅས་ཞུམ་པ་མེད་པར་བཞུགས། །དེ་ལྟར་ལྷ་དང་རབ་སྦྱར་ནས། །དེ་ཉིད་བསྟན་པའི་ཡན་ལག་གིས། །རང་ལུས་ཚགས་སུ་གཞུག་པར་གྱིས། །རྡོ་རྗེ་བདེ་ཁྲོས་པའི་རྒྱུད་ལས་ལྷ་བསྒོམ་པའི་ལེའུ་སྟེ་གསུམ་པའོ།། །།དེ་ནས་མངོན་པར་བཤད་བྱ་བ། །སྒོ་གསུམ་སྦྱོར་བ་ཤེས་པ་ཡིས། །གསང་བའི་སྙིང་པོ་འབུམ་དུ་བཟླས། །ཨོཾ་བཛྲ་ཙཎྜ་སརྦྦ་དུ་ཥྚཾ་ཏ་ཀ་ཧ་ན། ད་ཧ་པ་ཙ་ཧཱུྃ་ཕཊ། བཅོ་བརྒྱད་སྔགས་ཀྱི་རྒྱལ་པོ་འདི། །མ་བྱུང་མི་འབྱུང་འབྱུང་མི་འགྱུར། །འདི་བཟླས་སྔོན་དུ་གྲུབ་པར་འགྱུར། །

རྟག་ཏུ་མཚན་མ་བཟང་པོ་འབྱུང་། །གཞན་གྱི་སྦྱོར་བ་འོང་མི་འོང་། །རང་ལ་ངེས་པར་སྟོན་པར་འགྱུར། །བསྙེན་པའི་རིམ་པས་ཐུབ་མི་ཐུབ། །འབད་པས་ལེགས་པར་བརྟག་པར་བྱ། །དེ་ནས་གཏོར་མའི་སྦྱིན་པ་ནི། །ཨོཾ་ཨཿཧཱུྃ་ཞེས་རྒྱུན་དུ་གཏང་ངོ་། །རྡོ་རྗེ་བདེ་ཁྲོས་ཀྱི་རྒྱུད་ལས་གསང་བའི་སྙིང་པོ་དང་མཚན་ལྟས་བསྟན་པའི་ལེའུ་སྟེ་བཞི་པའོ།། །།དེ་ནས་མངོན་པར་བཤད་བྱ་བ། །རྟེན་ནི་རྡོ་རྗེའི་འོད་དུ་འབར། །བརྟེན་པ་འཕྲོ་ཚད་ཧཱུྃ་དུ་འབར། །འབར་བའི་འོད་ཟེར་ཀུན་ཏུ་འཕྲོ། །འཇིག་རྟེན་མ་ལུས་སྦྱངས་ནས་ཀྱང་། །སླར་ལ་ཐིག་ལེ་ཉིད་ལ་འདུས། །སྒྲ་དང་བཅས་ཏེ་རང་གསལ་འབར། །བརྟན་པར་གྱུར་ན་སྤྲོ་བསྡུ་བྱ། །རྡོ་རྗེ་བདེ་ཁྲོས་ཀྱི་རྒྱུད་ལས་མེའི་བསམ་གཏན་གྱི་ལེའུ་སྟེ་ལྔ་པའོ།། །།དེ་ནས་མངོན་པར་བཤད་བྱ་བ། །མཐིང་གི་ཤོག་གུ་སྔོན་པོ་ལ། །གསེར་གྱི་འཁོར་ལོ་བྲིས་པའི་སྟེང་། །བསྲུང་བའི་སྙིང་པོ་ལེགས་བཀོད་དེ། །གང་མིང་རཀྵ་སྦྱར་བར་གྱིས། །དེ་ཡང་ཏྲི་ཡིས་ཡོངས་བགོས་ཏེ། །སངས་རྒྱས་སེམས་ཅན་ཉིད་ལ་བསྟིམ། །དེ་ཉིད་བུམ་པར་ལེགས་བཞུ་གསལ། །མཆོད་ཅིང་བཟླས་བརྗོད་གསོལ་བ་གདབ། །དེ་ནས་ཚེས་པའི་དུས་བཟང་ལ། །རང་ངམ་གཞན་ལ་བཏགས་གྱུར་ན། །བར་ཆད་ཐམས་ཅད་ཉེར་ཞི་ནས། །ཚེ་དཔལ་བསོད་ནམས་རྒྱས་པར་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་བསྲུང་བའི་ལེའུ་སྟེ་དྲུག་པའོ།། །།དེ་ནས་མངོན་པར་བཤད་བྱ་བ། །འགྲོ་བ་དུག་གིས་གདུངས་པ་ལ། །གདུག་པའི་དབང་ཆེན་ལ་སོགས་པ། །འཚེ་བ་འདི་ལྟར་འབྱུང་བར་འགྱུར། །མི་དགའ་སེམས་འཕྱོ་འགྲོ་སྙིང་འདོད། །ཉམ་ཆུང་འཐིབས་དང་ལྟས་ཀྱང་ངན། །ཡང་ཡང་ན་ཞིང་གཏམ་བསྣོལ་འོང་། །དེ་ནི་ཀླུ་ཡི་གནོད་པ་སྟེ། །ཚོར་ནས་ལེགས་པར་བཅོས་ན་བཟློག །ས་སྲིན་མི་ལ་འདི་ལྟར་གནོད། །ལུས་སྦྲིད་ཤ་འཕྲིག་ཤ་རོ་འབྱུང་། །ཤ་བཀྲ་ཐོར་བུ་ངོ་ཡང་འགྱུར། །དེ་ཡང་ཚོར་ནས་བཅོས་ན་བཟློག །ས་བདག་གནོད་ན་འདི་ལྟར་འགྱུར། །གདོན་ཡང་ཤིན་

ཏུ་ལྡོག་འགྱུར་ཆེ། །ན་ཚའི་ཟུག་རྔུ་དྲག་པོར་འགྱུར། །རེས་འགའ་བདེ་བ་ལྟར་ཡང་བྱེད། །སྐབས་སུ་ཐིག་ལེ་ཁོ་ནར་ན། །དེ་ཡང་བཅོས་དཀའ་ཤེས་པས་བཟློག །གཉེན་གྱི་གནོད་པ་འདི་ཡིན་ཏེ། །ཤིན་ཏུ་ན་ཚའི་ཚབས་ཀྱང་ཆེ། །རྐང་ལག་ན་འཁུམས་དྲི་མ་ལྡོག །ཤ་ཁྲག་ལུད་ནས་མིག་ཀྱང་སླེ། །ཁ་ཡོ་སྣ་ཡོ་ཆུ་སེར་ཟ། །ཁ་ཡང་མི་ཐུབ་གནོད་པ་ཟ། །ཆུ་བུར་བྱུར་ན་འཚང་ཡང་ཆེ། །ཚོར་བར་མི་ཆོག་བསྒྲིམ་པ་གཅེས། །གདོན་ཚོགས་གཞན་ཡང་ཡུན་མི་རྟག །ཕྲ་མོ་ཙམ་ལ་སོགས་པ་བཟློག །ཀུན་ལ་བསྒྲིམས་ཏེ་བཅོས་ན་འཚོ། །རྡོ་རྗེ་བདེ་ཁྲོས་ཀྱི་རྒྱུད་ལས་གཞན་གྱི་གནོད་པ་བརྟག་པའི་ལེའུ་སྟེ་བདུན་པའོ།། །།དེ་ནས་མངོན་པར་བཤད་བྱ་བ། །དབང་ཆེན་ལ་སོགས་ཐམས་ཅད་ལ། །མཆོད་དང་གཏོར་མས་མགུ་བར་བྱ། །ཅི་འདོད་པ་ཡི་རྫས་རྣམས་སྦྱིན། །རྟེན་ཡོད་གནས་སུ་ལེགས་པར་སྦ། །སྙན་པའི་ཚིག་གིས་བསྒོ་བྱས་ལ། །བུམ་པར་ནོར་བུ་རིན་ཆེན་གཞུག །མཛེས་པའི་དར་སྣ་འབྲུ་ཡི་མཛོད། །གང་གི་རྟེན་ལ་སྦས་གྱུར་ན། །གནོད་པ་རགས་པ་ཞི་བར་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་ཞི་བྱེད་མཆོད་ཐབས་ཀྱི་ལེའུ་སྟེ་བརྒྱད་པའོ།། །།དེ་ནས་མངོན་པར་བཤད་བྱ་བ། །བཙན་དུག་གུ་གུལ་གླ་རྩི་དང་། །ཤུ་དག་ཤིང་ཀུན་མུ་ཟི་དྲུག །གསང་སྔགས་བཏབ་སྟེ་ལུས་ལ་བྱུག །གུ་གུལ་ཉ་མཁྲིས་གླ་རྩི་དང་། །སྒོག་པ་ཤུ་དག་དྲི་ཆེན་རྣམས། །བདུག་པ་བྱས་ཏེ་ཡང་ན་བཀྲུ། །གསེར་གཡུ་བྱི་རུ་མིག་མ་ཕུག །བཙན་དུག་རྨ་བྱའི་མཁྲིས་པར་བཅས། །བཅངས་ན་བསྲུང་བའི་མཆོག་ཏུ་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་རྟེན་འབྲེལ་རྫས་ཀྱི་ལེའུ་སྟེ་དགུ་པའོ།། །། རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་དང་པོ་བསྟན་པའོ།། །།དེ་ནས་མངོན་པར་བཤད་བྱ་བ། །གདུག་པ་ཐམས་ཅད་འདུལ་བའི་ཕྱིར། །དྲག་སྔགས་འདི་དག་བརྗོད་པར་བྱའོ། །ཨོཾ་མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་རྨུགས་རྨུགས། མཱ་ར་ཎ་

ཧ་ལ་ཧ་ལ། མཱ་ར་ཎ་དུན་དུན། མཱ་ར་ཎ་མྱོས་མྱོས། མ་ར་ཎ་མྱོས་བྱིང་ཐུམ་རིལ་ཛཿ། མི་ཚིག་སྤངས་ཏེ་དྲག་སྔགས་འདི། །དབུགས་མ་ཤོར་བར་སྦུབ་མས་དྲངས། །བུམ་པར་བསྟིམས་ནས་རྟགས་ཐོབ་ནས། །འཐུངས་སམ་བཀྲུས་ན་དངོས་གྲུབ་འཐོབ། །སྔགས་ལ་གང་མིང་སྦྱར་བྱས་ནས། །ཡུངས་ཀར་གདུག་པའི་ཕུར་པ་ལ། །བརྗོད་དེ་ལས་ལ་སྦྱར་གྱུར་ན། །གང་ལ་བཟླས་པ་བརླག་པར་འགྱུར། །མ་བསྒྲུབས་ལན་ཅིག་བརྗོད་པས་ཀྱང་། །དངོས་གྲུབ་ཐམས་ཅད་ཐོབ་པར་འགྱུར། །མ་བྱུང་མི་འབྱུང་འབྱུང་མི་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་དྲག་སྔགས་ཁྲོས་པའི་ལེའུ་སྟེ་བཅུ་པའོ།། །།དེ་ནས་མངོན་པར་བཤད་བྱ་བ། །རྫས་བསག་ལྷ་བསྐྱེད་དྲག་སྔགས་བཟླས། །དགོས་པ་ཚང་བའི་བུམ་པ་སྟེ། །མི་དམིགས་བྃ་ལས་རིན་པོ་ཆེའི། །བུམ་པ་ཚུལ་དང་འཐུན་པར་བསམ། །དེ་ནས་བྃ་དང་ལྃ་ལས་ནི། །ཆུ་དང་ས་ཡི་དཀྱིལ་འཁོར་བསམ། །ལྷ་བསྒོམས་ཁྱད་པར་བུམ་པ་འཛིན། །མཆུ་ནི་རྡོ་རྗེའི་སྦུ་གུ་སྟེ། །དེ་ནས་སྔགས་ཀྱི་འོད་ཟེར་འཕྲོས། །ཕྱིར་འཕྲོས་གདུག་པ་མ་ལུས་བསྲེག །འོད་ཟེར་ལྕགས་ཀྱིསྦུབ་མར་དྲངས། །བུམ་པར་ཁྲོ་ཆུ་ཁོལ་མར་གྱུར། །དེ་འཐུངས་བཀྲུས་པས་གང་གནོད་པ། །རྡུལ་དུ་བརླག་སྟེ་དག་པར་བསམ། །བརྩམས་པའི་ལས་ལ་ཐེ་ཚོམ་མེད། །རྡོ་རྗེ ཁྲོས་པའི་རྒྱུད་ལས་བུམ་པ་ཁྲོས་པའི་ལེའུ་སྟེ་བཅུ་གཅིག་པའོ།། །།དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་འཁོར་ལོ་བསྐོར། །རོ་རས་བྱི་དུག་བྱ་རོག་སྒྲོས། །ཁྲུ་གང་ཙམ་གྱི་མཚན་ཉིད་ལ། །འཆི་བར་བྱེད་པའི་སྣག་ཚ་ལ། །འུག་པའི་སྒྲོ་རྩ་གཡས་པ་ཡིས། །དྲག་སྔགས་མཉམ་པའི་རེའུ་མིག་བྲི། །དེ་ནས་མཚན་མར་གང་དམིགས་གཟུགས། །ཁ་དོག་རིགས་བཞི་ཉིད་དུ་བྱ། །དེ་སྙིང་དྲག་སྔགས་རེ་རེ་དགོད། །མཎྜལ་གཙང་མ་དྲིས་བྱུག་སྟེ། །དཀར་ཛ

དང་དམར་དང་སེར་དང་ལྗང་། །རྨ་བྱའི་སྒྲོ་ཡིས་བརྒྱན་བྱས་ཏེ། །ལྷ་བསྒོམ་ཁྱད་པར་འཁོར་ལོ་འཛིན། །འཁོར་ལོ་བསྐོར་བའི་རིམ་པ་ནི། །དྲག་སྔགས་མཉམ་པའི་འཁོར་ལོ་བསྐོར། །སྔགས་ནི། ནཱ་ག་ཙཀྲ་མ་ར་ཎ་ཧཱུྃ་ཕཊ། གང་བསམས་འདི་ལ་ཐེ་ཚོམ་མེད། །རྡོ་རྗེ་ཁྲོས་པའི་རྒྱུད་ལས་འཁོར་ལོ་ཁྲོས་པའི་ལེའུ་སྟེ་བཅུ་གཉིས་པའོ།། །།དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་ཕུར་པ་གདབ། །ལྕགས་སམ་སེང་ལྡེང་དུག་ཤིང་ལ། །སྔགས་གྲངས་མཉམ་པའི་ཕུར་པ་བཤམ། །འཁོར་ལོའི་མཐའ་མ་བསྐོར་ཏེ་དགོད། །ལྷ་བསྒོམ་ཁྱད་པར་ཕུར་བུ་འཛིན། །དྲག་སྔགས་བཟླས་པའི་རིམ་པ་ནི། །ནཱ་ག་བཛྲ་ཀཱི་ལཱ་ཡ་མཱ་ར་ཎ་ཧཱུྃ་ཕཊ། སྔགས་གྲངས་མཉམ་པའི་ཕུར་པ་བཤམ། །བརྩམ་པའི་ལས་ལ་ཐེ་ཚོམ་མེད། །རྡོ་རྗེ་བདེ་ཁྲོས་ཀྱི་རྒྱུད་ལས་ཕུར་པ་ཁྲོས་པའི་ལེའུ་སྟེ་བཅུ་གསུམ་པའོ།། །།དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་སྦྱིན་སྲེག་བྱ། །གདུག་པའི་ཤིང་བུ་ཁྲུ་གང་ཚད། །སྔགས་ཀྱི་གྲངས་ཀྱང་མཉམ་པར་བྱ། །སྔོན་དམར་སྐུད་པས་རིམ་གསུམ་དཀྲི། །བར་དེར་འཁོར་ལོའི་སྲོག་རྩ་གཅད། །ལག་ཏུ་གྲི་ཐོགས་དྲག་སྔགས་བརྗོད། །ནཱ་ག་ཏིཀྵྞ་ཆེ་གེ་མོ་མཱ་ར་ཡ་ཧུྃ་ཕཊ། །རིམ་པར་བགྲངས་ཏེ་གཡང་གཞིའི་ཁུད། །བྱང་ཤར་མཚམས་སུ་རྣམ་པར་གཞག །དེ་ནས་མཎྜལ་དབུས་ཉིད་དུ། །ཧོམ་ཁུང་བྲུས་ཏེ་དུག་ཁྲག་བྱུག །ནང་དུ་ཧོམ་དུ་གཟུགས་པར་བྱ། །འཁོར་ལོ་གྲིས་གཏུབས་ཐོགས་ནས་ནི། །གྲངས་དང་མཉམ་པར་བསྲེག་པར་བྱ། །མེ་དེ་ཡུགས་སའི་ཁྱིམ་ནས་བསླང་། །ལྷ་བསྒོམ་ཁྱད་པར་མེ་དཔུང་འཛིན། །གསང་སྔགས་བཟླས་པའི་རིམ་པ་འདི། །ནཱ་ག་ཙིཏྟ་ཛྭ་ལ་རཾ། མཱ་ར་ཡ་ཕཊ། །བསྲེགས་ནས་ལས་བརྩམས་འགྲུབ་པར་འགྱུར། །རྡོ་རྗེ་བེད་ཁྲོས་ཀྱི་རྒྱུད་ལས་མེ་དཔུང་ཁྲོས་པའི་ལེའུ་སྟེ་བཅུ་བཞི་པའོ།། །།

དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་མནན་སྔགས་བཟླས། །ཆུ་སྲིནསྲམ་མམ་བྱི་བའི་མགོར། །བསྲེགས་པའི་ཐལ་བ་བསྡུས་བྱས་ལ། །གང་ཡིན་ཉིད་ཀྱིསྦྱོར་བ་བཅས། །ལྷ་བསྒོམ་ཁྱད་པར་རི་རབ་འཛིན། །དྲག་སྔགས་བཟླས་པའི་རིམ་པ་ནི། །ནཱ་ག་སྟམྦྷ་ཡ་ནཱན། མནན་བྱས་ཆུ་སྲིན་ཁ་རུ་བསྒོམ། །འདི་བྱས་གང་ལ་བཟླས་པ་བརླག །འདི་ལ་ཐེ་ཚོམ་མི་བྱའོ། །རྡོ་རྗེ་བདེ་ཁྲོས་ཀྱི་རྒྱུད་ལས་རི་རབ་ཁྲོས་པའི་ལེའུ་སྟེ་བཅྭ་ལྔ་པའོ།། །།རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་གཉིས་པའོ།། །།དེ་ནས་མངོན་པར་བཤད་བྱ་བ། །གླང་པོའི་པགས་པར་འབྲུག་བྲིས་ནས། །གང་མིང་བཅུག་སྟེ་དྲག་སྔགས་བཟླས། །གནམ་ལྕགས་འབབ་པ་བཟློག་པར་འགྱུར། །འབྲུ་ཡི་པདྨ་འདབ་བརྒྱད་ལ། །ཀླུ་ཡི་གཟུགས་རྣམས་བྲིས་པ་ལ། །བསྟིམས་ནས་དྲག་སྔགས་རྒྱབ་གྱུར་ན། །གནམ་ཆུ་དུས་སུ་ཕེབས་པར་འགྱུར། །ཐོད་པར་ཨེ་བྲིས་སྔགས་ཀྱིས་བསྐོར། །གང་ཡིན་བཅུག་ལ་བསྟིམས་པ་ལ། །དྲག་སྔགས་གང་ཡིན་བཟླས་བྱས་ན། །མྱུར་དུ་འགྲུབ་པར་གདོན་མི་ཟ། །སྲོག་ཆགས་འཇིགས་པར་གྱུར་པ་ལ། །འཆི་བའི་ཆུ་ཡིས་དྲག་སྔགས་བྲི། །འཇིགས་བྱེད་བཀུག་སྟེ་དེ་ལ་མཆོད། །དེ་ཉིད་ཡུངས་ཀར་ཐུམ་པོར་འདེབས། །གང་ལ་བཏགས་པ་བསྲུང་བའི་མཆོག །རྡོ་རྗེ་བདེ་ཁྲོས་ཀྱི་རྒྱུད་ལས་ལས་ཕྲ་མོའི་ལེའུ་སྟེ་བཅུ་དྲུག་པའོ།། །།དེ་ནས་དེ་དག་ལ་འཁོར་རྣམས་མངོན་པར་དགའ་སྟེ། བཅོམ་ལྡན་འདས་ལ་མཆོད་ཅིང་བསྟོད་ནས་རྗེས་སུ་ཡི་རང་བ་ཕུལ་ཏེ་མི་སྣང་བར་གྱུར་ཏོ། །མཉམ་པ་ཆེན་པོ་ལ་བཞག་པའོ། །རྡོ་རྗེ་བདེ་ཁྲོས་ཀྱི་རྒྱུད་ལས་རྗེས་སུ་ཡི་རང་བའི་ལེའུ་སྟེ་བཅུ་བདུན་པའོ།། །།རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་གསུམ་པ་རྫོགས་སོ།། །།མཆོག་ཏུ་གསང་བའོ། །ཛྙཱ་ན་ཀ་རས་བསྒྱུར་རོ།། །།

རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ།

རྒྱ་གར་སྐད་དུ། མཱ་ཡཱ་ཛཱ་ལ་མ་ཧཱ་ཏནྟྲ་རཱ་ཛ་ན་མ། བོད་སྐད་དུ། རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གནས་གཙང་མའི་སྟེང་ན་ཁང་པ་བརྩེགས་པ་རིན་པོ་ཆེའི་གཞལ་མེད་ཁང་ཆེན་པོ་བཀོད་པ། རྡོ་རྗེའི་ཀ་བས་བརྒྱན་པ་ཤིན་ཏུ་མཛེས་པའི་རིན་པོ་ཆེ་བཀོད་པས་རྣམ་པར་བཀྲ་བ། རྡོ་རྗེ་དྲིལ་བུ་འཁྲོལ་བ། ཡིད་ལས་བྱུང་བའི་མཆོད་པའི་ཁྱད་པར་ཆེན་པོས་བརྒྱན་པ། རྡོ་རྗེའི་འཁོར་ལོས་སྤྲས་པ། །དེ་བཞིན་གཤེགས་པའི་སྤྲུལ་པའི་ཆ་བྱད་སྣ་ཚོགས་འཆང་བ་རྣམས་ཀྱིས་དོན་གྱི་བྱ་བ་བྱས་པ། རྣམ་པར་སྣང་མཛད་ཀྱི་སྙིང་པོ་ལས་ཡང་དག་པར་འབྱུང་བའི་སྤྱོད་པ་བསྐྱོད་ནས་ཞལ་བཞིའི་སྒོའི་གོ་སྐབས་ནས་བྱུང་བ་སྣ་ཚོགས་དང་། རྡོ་རྗེ་དང་། རིན་པོ་ཆེ་ཆེན་པོ་དང་། འོད་དཔག་མེད་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་དང་། རིག་སྔགས་ཀྱི་ལྷ་མོ་རྣམས་ཀྱིས་བརྒྱན་པ། ཁྲོ་བོའི་རྒྱལ་པོ་དང་། བྲན་ཕོ་དང་། བྲན་མོ་དང་། ཕོ་ཉ་དང་། ཕོ་ཉ་མོ་དང་། ཕྱག་བརྙན་དང་། ཕྱག་བརྙན་མོ་དུ་མའི་འཁོར་གྱིས་བསྐོར་ཅིང་མདུན་གྱིས་བལྟས་པ། ཏིང་ངེ་འཛིན་གྱི་ཡེ་ཤེས་ཀྱི་བདེ་བ་དེའི་བདག་ཉིད་དང་། དམིགས་པ་དང་མ་བྲལ་བ་ཐུགས་རྗེ་ཆེན་པོས་མཉེས་གཤིན་པ། སེམས་ཅན་ཐམས་ཅད་བསྒྲལ་བ་ལ་བརྩོན་པར་མཛད་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་ལ་སོགས་པ་མང་པོས་བརྒྱན་པ་ན། བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པ་བཞུགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཁོར་གྱི་ཁྱམས་ཀྱི་དབུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འདུག་པ་ལ་གཟིགས་ནས་འཛུམ་པ་མཛད་དོ། །འཛུམ་པ་མཛད་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བླ་གོས་

ཕྲག་པ་གཅིག་ཏུ་གཟར་ནས་འགྱིང་བག་ཅན་དུ་བལྟས་ནས་རྡོ་རྗེ་གསོར་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ནས་གསོལ་པ། སངས་རྒྱས་བཅོམ་ལྡན་འདས་རྣམས་ནི་དགོངས་པ་མ་མཆིས་པར་འཛུམ་པ་མི་མཛད་ན།ྲ བཅོམ་ལྡན་འདས་ཀྱིས་དགོངས་པ་གང་གི་སླད་དུ་གཟིགས་པ་དང་འཛུམ་པ་མཛད། དེས་ན་བདག་དང་འཁོར་རྣམས་ངོ་མཚར་དུ་གྱུར་པ་ལགས་ན། དེའི་སླད་དུ་བཅོམ་ལྡན་འདས་ཀྱིས་སེང་གེ་ཆེན་པོའི་སྒྲ་དབྱངས་ཀྱིས་བཀའ་སྩལ་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་དེ་སྐད་དུ་གསོལ་བ་བཏབ་མ་ཐག་ཏུ། བཅོམ་ལྡན་འདས་ཀྱིས་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཡེ་ཤེས་རྣམ་པར་བསྒྱིངས་པ། རྒྱུད་ཐམས་ཅད་ཀྱི་ཕྱི་མའི་ཡང་ཕྱི་མའི་ཐབས་བདེ་བ་རྡོ་རྗེའི་ཡེ་ཤེས་བསྒྲུབ་པ་རོལ་པས་མཉེས་པར་བྱ་བའི་ཐབས་དེ་ཁོ་ན་ཉིད་ཐམས་ཅད་ཀྱི་འབྱུང་གནས་སྟངས་སྟབས་ཀྱིས་རྣམ་པར་རྒྱལ་བའི་ཐབས་དང་ཤེས་རབ་བདེ་བ་ཆེན་པོའི་རྡོ་རྗེས་སྒྲོལ་བ། རོལ་པས་བཞད་ཅིང་བསྒྱིངས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྒྱུ་འཕྲུལ་དྲ་བའི་རྒྱུད་ཀྱི་དམ་ཚིག་དང་། དཀྱིལ་འཁོར་དང་རི་མོའི་གཟུགས་དང་། བསྒོམ་པ་དང་། བཟླས་བརྗོད་དང་། སྟངས་སྟབས་དང་། སྦྱོར་བ་དགོད་པ་དང་། ཏིང་ངེ་འཛིན་དང་། དབབ་པ་དང་། བསྐྲད་པ་དང་། དབྲོག་པ་དང་། དགུག་པ་དང་། བཅིང་བ་དང་། བརྡེག་པ་དང་། བསྡིགས་པ་དང་། ཉམ་ཐག་པར་བྱ་བ་དང་། བཅད་པ་དང་། བསྲེག་པ་དང་། བཀང་བ་དང་། བསྐྲུན་པ་དང་། དབང་བསྐུར་བ་དང་། སྦྱིན་པ་དང་། སློབ་དཔོན་དང་། སློབ་མ་གཟུང་བ་དང་། གསང་སྔགས་མང་པོའི་འཇོ་ཚུལ་རྣམས་ངས་བཤད་པར་བྱའོ། །དེའི་ཕྱིར་ཁྱོད་ཀྱིས་ཀྱང་ཏིང་ངེ་འཛིན་མཆོག་ལ་སྙོམས་པར་ཞུགས་ལ་ཉོན་ཅིག །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། གཞན་ཡང་གང་དག་འཁོར་དུ་འདུས་པ་དེ་དག་ཐམས་ཅད་ཀྱིས་ཆོས་ཀྱི་འབྲེལ་བའི་གཏམ་མཉན་པར་བརྩམས་སོ། །དེ་ལ་རེ་ཞིག་དང་པོ་དངོས་གྲུབ་ནི་སློབ་དཔོན་

ཆོས་ཀྱི་རྗེས་སུ་འབྲང་བ་ཡིན་པས། སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཡེ་ཤེས་སྙིང་པོ་ཁྱོད་ཉོན་ཅིག །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་ཤེས་པས། །དཀྱིལ་འཁོར་བྲི་བའི་ལས་བྱའོ། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་ཀུན་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཕྱི་རོལ་བསྟན་བཅོས་ཡོངས་ཤེས་ཤིང་། །ཉན་ཐོས་རྣམས་ཀྱིས་ལམ་འགྲོ་དང་། །གསང་བ་དེ་ཉིད་བསྡུ་བ་དང་། །ཐེག་པ་ཆེན་པོ་མི་ཤེས་པ། །སྙིང་རྗེ་ཡོད་པ་མ་ཡིན་དང་། །དད་མེད་བརྩོན་འགྲུས་མི་ལྡན་ལ། །རྟག་ཏུ་ངན་པའི་ཚུལ་སྤྱོད་དང་། །བསྟན་བཅོས་རྣམས་ལ་སྨོད་པ་མིན། །གོང་དུ་བསྟན་པའི་མཚན་ཉིད་དང་། །ལྡན་ན་སློབ་དཔོན་ཡིན་པར་གཟུང་། །དེ་ཡིས་དཀྱིལ་འཁོར་བྲི་བ་དང་། །དེ་ཉིད་ཀྱིས་ནི་རྒྱུད་རྣམས་བསྟན། །དེ་ཡིས་བསྟན་པའི་གསང་སྔགས་དག །འགྲུབ་འགྱུར་འདི་ལ་ཐེ་ཚོམ་མེད། །དགེ་དང་སྡོམ་ལ་དགའ་བ་དང་། །རྟག་ཏུ་བླ་མ་ལ་གུས་དང་། །རྒྱུན་དུ་ལྷ་རྣམས་མཆོད་བྱེད་པའི། །ཡོན་ཏན་ལྡན་ན་སློབ་མ་ཡིན། །སློབ་དཔོན་ཅི་འདྲ་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་བཞིན། །སློབ་དཔོན་གྱི་ནི་ཡོན་ཏན་གཟུང་། །སྐྱོན་རྣམས་ནམ་ཡང་མ་ཡིན་ནོ། །ཡོན་ཏན་བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །རྒྱུ་དང་མི་རྒྱུ་གསང་བ་ཡི། །དམ་པ་གང་ཡིན་སྤངས་པར་འགྱུར། །སློབ་དཔོན་སྨོད་པར་བྱེད་པ་དག །རྨི་ལམ་དུ་ཡང་མཐོང་མི་བྱ། །སློབ་དཔོན་སྨོད་པ་གང་ཡིན་ཏེ། །བགེགས་དང་ལོག་འདྲེན་རྣམས་ཀྱིས་གཟུང་། །ངན་པ་གཏུམ་པོ་ལས་བྱེད་པ། །མཁས་པས་

རྟག་ཏུ་སྤང་བར་བྱ། །མནར་མེད་ཤིན་ཏུ་སྐྱི་གཡའ་བའི། །དམྱལ་བ་བསྟན་པ་གང་ཡིན་པ། །དེར་ནི་སློབ་དཔོན་སྨོད་བྱེད་པ། །གནས་པར་འགྱུར་ཞེས་རབ་ཏུ་གསུངས། །དེ་ཕྱིར་ཀུན་གྱིས་རབ་བསྒྲིམས་ཏེ། །བསམ་ཡས་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་བྱེད་པའི། །སེམས་ཅན་དད་པ་ལྡན་པས་མཆོད། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས། འདི་ནི་འཇུག་པ་རིམ་པར་ཕྱེ་བའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས་སྒྱུ་འཕྲུལ་དྲ་བ་ཆེན་པོ་ཡེ་ཤེས་བསྒྱིངས་པ་གསང་བའི་བྱིན་བརླབས་ཀྱི་མཆོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་རྡོ་རྗེ་འཆང་ལ་བཀའ་སྩལ་པ། ཕྱག་ན་རྡོ་རྗེ་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བའི་དཀྱིལ་འཁོར་གྱི་རྒྱལ་པོ་ཆེན་པོ་དཀྱིལ་འཁོར་ཐམས་ཅད་ཀྱི་ཕྱི་མའི་ཡང་ཕྱི་མ་ཡེ་ཤེས་ཆེན་པོའི་སྙིང་པོ་འབར་བ་རྡོ་རྗེ་བསྙེན་བཀུར་བྱེད་པ་ཞེས་བྱ་བའི་དཀྱིལ་འཁོར་འདིར་དབང་བསྐུར་ན། དཀྱིལ་འཁོར་ཐམས་ཅད་དུ་དབང་བསྐུར་བར་འགྱུར་བས་ཕྱག་ན་རྡོ་རྗེ་སེམས་ཅན་གང་ལ་ལས་ཚོན་རྩི་མཐོང་བ་དེ་དག་ཀྱང་དེ་བཞིན་གཤེགས་པ་ཐམས་ཅད་ལ་ཕྱག་བྱས་པ་དང་། མཆོད་པ་བྱས་པར་འགྱུར་བ་ལ་ཡང་དག་པར་ཞུགས་པ་དེ་དག་ནི་དེ་བཞིན་གཤེགས་པའི་སངས་རྒྱས་ཀྱི་ཞིང་དུ་སངས་རྒྱས་ཉིད་ཀྱི་གྲངས་སུ་འགྲོ་བར་འགྱུར་བ་དེ་ཉོན་ཅིག །དང་པོ་ཁོ་ནས་ཡོངས་སུ་གཟུང་བ་བྱས་ཏེ། སློབ་དཔོན་གྱིས་ལྷ་ཉིད་ཀྱི་སྟང་སྟབས་སུ་འདུག་ལ། ལག་པ་གཡས་པ་བསྒྲིམས་ཏེ་རྡོ་རྗེ་གསོར་ཞིང་། ལག་པ་གཡོན་པས་དྲིལ་བུ་གསིལ་ནས་རྡོ་རྗེ་འགྲོས་ཀྱིས་ཡོངས་སུ་བསྐོར་བར་བྱའོ། །རྒྱན་ཐམས་ཅད་ཀྱིས་བརྒྱན་པ་ཁྲོ་བོའི་ང་རྒྱལ་གྱིས་ཧཱུྃ་ཞེས་བརྗོད་ཅིང་དཀྱིལ་འཁོར་གྱིས་གཞི་བརྗིད་པ་གང་གིས་བསྐོར་ནས་ཀྱང་ཁྲོ་བོའི་སྐུར་བསྒོམས་ནས་སྡང་བའི་ལྷ་དང་། ལྷ་མ་ཡིན་དང་གསང་བ་པ་རྣམས་ལ་ཚིག་འདི་རབ་ཏུ་བརྗོད་པར་བྱའོ། །སློབ་དཔོན་

མིང་འདི་ཞེས་བྱ་བས་སློབ་མ་ཆེ་གེ་མོ་ཞིག་རྫོགས་པའི་བྱང་ཆུབ་རྫོགས་པར་བྱ་བ་དང་། སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར། ས་ཕྱོགས་འདིར་དཀྱིལ་འཁོར་གྱི་རྒྱལ་པོ་མིང་འདི་ཞེས་བྱ་བ་བྲི་ཡིས། ལྷ་དང་ལྷ་མ་ཡིན་དང་། གནོད་སྦྱིན་དང་སྲིན་པོ་དང་ཡི་དགས་དང་། ཤ་ཟ་དང་། བརྗེད་བྱེད་དང་། འབྱུང་པོ་དང་། མཁའ་འགྲོ་མ་དང་། གནོན་པོ་དང་། ནམ་མཁའ་ལྡིང་དང་། མིའམ་ཅི་དང་། རིག་སྔགས་གྲུབ་པ་དང་། རྒན་པོའམ། རྒན་མོ་གཡོག་དང་འཁོར་དུ་བཅས་པ་གང་དག་འཁོད་པ་རྣམས་དེངས་ཤིག །འདི་ལྟར་རྡོ་རྗེ་འཆང་གི་བཀའ་ཐོས་ནས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག་ནི་ཕྱག་ན་རྡོ་རྗེ་ཧཱུྃ་ཞེས་བྱ་བ་རབ་ཏུ་ཁྲོས་པའི་བཞིན་འབར་བ་ཅན་གྱིས་ཡེ་ཤེས་ཀྱི་རྡོ་རྗེ་འབར་བ་ཀུན་ཏུ་འབར་བས་མགོ་ཚལ་པ་བརྒྱར་འགས་པར་འགྱུར་རོ་ཞེས་ལན་གསུམ་བརྗོད་ནས། སྟང་སྟབས་ལ་གནས་བཞིན་དུ་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །གཡས་བརྐྱང་བ་དང་། གཡོན་བརྐྱང་བ་དང་། ས་གའི་འདུག་སྟངས་དང་། ཟླུམ་པོའི་འདུག་སྟངས་དང་། མཐུན་པའི་རྐང་སྟབས་དང་། རུས་སྦལ་གྱི་རྐང་སྟབས་དང་། རྡོ་རྗེ་གདེགས་པ་དང་། རྡོ་རྗེ་འཇོ་ཚུལ་དང་། རྐང་པ་ཡ་གཅིག་གི་སྟངས་དང་། སེང་གེའི་སྟབས་དང་། སེང་གེ་གླལ་བ་དང་། བུང་བའི་འཕུར་བའི་སྟང་སྟབས་དང་། རྡོ་རྗེ་སྒྲོག་དང་། རྡོ་རྗེ་གསོར་བ་དང་། རྡོ་རྗེའི་སྟང་སྟབས་དང་། རྡོ་རྗེ་དགུག་པ་དང་། རྡོ་རྗེ་གར་དང་། རྡོ་རྗེ་འཇིགས་སུ་རུང་བ་དང་། རྡོ་རྗེ་རོ་ལངས་མ་དང་། རྡོ་རྗེ་ཐོ་བ་དང་། རྡོ་རྗེའི་བྱིན་རླབས་དང་། རྡོ་རྗེའི་གདུ་བུ་དང་། བུད་མེད་ཀྱི་སྒྱུ་འཕྲུལ་སྟང་སྟབས་དང་། རྡོ་རྗེའི་དྲ་བ་དང་།སྟོབས་པོ་ཆེའི་འདེགས་པ་དང་། རྡོ་རྗེ་མཆེ་བ་དང་། རྡོ་རྗེ་གད་མོ་དང་། རྡོ་རྗེ་སྒྲ་དང་། རལ་གྲིའི་ཐབས་དང་། རྡོ་རྗེའི་ཐབས་དང་། འཁོར་ལོའི་ཚུལ་དང་། གཏུན་ཤིང་གི་ཚུལ་དང་། བ་དན་གྱི་ཚུལ་དང་། ཞགས་པའི་ཚུལ་དང་། པད་མའི་ཚུལ་དང་། བེ་ཅོན་གྱི་ཚུལ་དང་། མི་འཇིགས་པའི་ཚུལ་དང་། ལྕགས་ཀྱུའི་ཚུལ་དང་། འབྲས་བུའི་ཚུལ་དང་། མདུང་ཐུང་གི་ཚུལ་དང་། གཞུའི་ཚུལ་དང་། མདའ་བཟུང་

བའི་ཚུལ་དང་། མདའ་འཕང་བའི་ཚུལ་དང་། ཐག་མདུང་བསྐོར་བའི་ཚུལ་དང་། མཆོག་སྦྱིན་པའི་ཚུལ་དང་། མདུང་གི་ཚུལ་དང་། མཚོན་རྩེ་གཅིག་པའི་ཚུལ་དང་། ཕྱག་འཚལ་བའི་ཚུལ་དང་། རྡོ་རྗེའི་འདུག་སྟངས་དང་། ཏིང་ངེ་འཛིན་གྱི་འདུག་སྟངས་དང་། རྡོ་རྗེ་སྐྱིལ་མོ་ཀྲུང་དང་། པདྨའི་འདུག་སྟངས་དང་། སེམས་དཔའི་སྐྱིལ་མོ་ཀྲུང་དང་། དཔའ་བོའི་འདུག་སྟངས་དང་། བཟང་པོའི་འདུག་སྟངས་དང་། ཙོག་པུའི་འདུག་སྟངས་དང་། རྩེ་བའི་འདུག་སྟངས་དང་། མདུན་དུ་དགུ་བ་དང་། ཕྱིར་དགྱེ་བ་དང་། མཐའ་ཡས་དང་། རྣམ་པར་རྒྱལ་བ་དང་། སྤྲིན་སྒྲ་དང་། གསུས་པོ་ཆེ་དང་། རྒྱལ་བའི་ཕུར་བུས་གནས་པའི་བཅིང་བ་དང་། ཕུར་བུ་བརྡུང་བ་དང་། དྲ་བ་དང་། ར་བས་མཚམས་གཅད་པ་དང་། ཕྱོགས་བཅིང་བ་དེ་ལྟ་བུས། ས་གཞི་རྡོ་རྗེའི་རང་བཞིན་འོད་འབར་བས་འཁྲིགས་པར་བསྒོམས་ཏེ་གཏན་ལ་དབབ་པར་བྱའོ། །རང་གི་མིང་ནས་སྨོས་ཏེ། ཧཱུྃ་ཞེས་བྱ་བའི་གསང་སྔགས་ཀྱི་སྒྲ་བརྗོད་ན་འཁོར་ལོ་ཐམས་ཅད་ཀྱི་བླ་ན་མེད་པར་འགྱུར་རོ། །དེ་ནས་སའི་ལྷ་མོ་སྟ་གོན་དུ་གནས་པར་བྱ་བ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །དངོས་གྲུབ་ཐམས་ཅད་ཐོབ་བྱའི་ཕྱིར། །བདག་གིས་དཀྱིལ་འཁོར་འདྲི་བར་བྱ། །ཞེས་ལན་གསུམ་བརྗོད་དོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྟ་གོན་དུ་གནས་པར་བྱ་སྟེ། ཐུགས་བརྩེར་གནས་པའི་དགོངས་པ་ཅན། །སངས་རྒྱས་བདག་ལ་དགོངས་སུ་གསོལ། །སྲས་དང་ལྷན་ཅིག་གཤེགས་ནས་ཀྱང་། །ས་གཞི་ཡོངས་སུ་གཟུང་བར་མཛོད། །དེ་ནས་འཁོར་ལོའི་དབུས་སུ་ཆོས་ཀྱི་དཀྱིལ་འཁོར་བྱས་ལ། མཐའ་ཀུན་ཏུ་ཡང་མཚན་ནས་སྨོས་ཏེ་ཐིག་ལེར་བྱའོ། །དེ་ལྟར་སྤྱན་དྲངས་ཏེ་མཆོད་པས་མཉེས་པར་བྱས་ནས་ཕྱིར་བྱུང་སྟེ་ཕྱོགས་ཀྱི་གཏོར་མ་སྦྱིན་ནོ། །དེ་ནས་སེམས་ཅན་སྟ་གོན་དུ་གནས་པར་བྱ་སྟེ། སྤོས་ཆུས་སྤྱི་བོར་བསང་གཏོར་བྱས་ནས། ལག་པ་སྙིང་གར་བཀྲམ་ནས་སུ། །རྩེ་མོ་

ལྔ་པ་རྒྱ་གྲམ་བྱ། །གཡས་པས་སྲུང་སྐུད་བཅིངས་ནས་སུ། །ལག་མཐིལ་སོ་ཤིང་ཀུ་ཤ་སྦྱིན། །དེ་ནས་འདུག་སྟེ་གསུམ་ལ་སྐྱབས་སུ་བཏང་བ་དང་། སྡིག་པ་ཀུན་ཏུ་བཤགས་པ་དང་། བསོད་ནམས་ཀྱི་རྗེས་སུ་ཡི་རང་བ་དང་། བདག་ཉིད་དབུལ་བ་དང་། བྱང་ཆུབ་ཏུ་སེམས་བསྐྱེད་པར་བྱའོ། །དེ་ལ་འདི་ནི་སྐྱབས་སུ་འགྲོ་བ་ཡིན་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་ལ་ཡི་རང་སྟེ། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་ལན་གསུམ་བརྗོད་དོ། །དེ་ནས་ཅི་ནུས་ཀྱིས་ཅི་འདོད་པའི་ཆོས་བཤད་པར་བྱའོ། །དེ་ནས་སྔར་བཤད་པ་བཞིན་དུ་མཉེས་པར་འགྱུར་བས་མཆོད་པའི་ཆོ་ག་བཟང་པོ་བྱ་སྟེ། སླར་ཡང་གཤེགས་སུ་གསོལ་བར་བྱའོ། །དེ་ནས་ནང་དུ་ཞུགས་ལ་དཀྱིལ་འཁོར་གྱི་ས་གཞིར་གློ་གཡས་པས་ཉལ་ཏེ། རྨི་ལམ་བཟང་ངན་བལྟས་ནས་ཕྱི་དེ་ཉིན་དཀྱིལ་འཁོར་བྲི་བར་བྱའོ། །ཚོན་དང་ཐིག་ལས་སངས་རྒྱས་ལྔའི། །ངོ་བོ་དག་ཀྱང་སྤྲུལ་པར་བྱ། །འདི་ནི་ཆོས་དབྱིངས་དག་པ་སྟེ། །སེམས་ཅན་རྣམས་ནི་རྣམ་གྲོལ་མཛད། །དེ་བཞིན་གཤེགས་པ་ཀུན་གྱི་གནས། །རྣམ་པར་སྣང་མཛད་རྒྱལ་བདག་སྟེ། །ཉེས་པ་ཐམས་ཅད་རྣམ་སྤངས་པའི། །ཚོན་རྩི་དགྱེ་བ་བརྩམ་པར་བྱ། །དང་པོ་སློབ་དཔོན་ཉིད་ཀྱིས་བགྱི། །དེ་ནས་ཀུན་ཏུ་སློབ་མས་བྱ། །དང་པོ་ས་གཞི་ཡོངས་གཟུང་བ། །གཉིས་པ་སྟ་གོན་གནས་པ་སྟེ། །ནུབ་གསུམ་པ་ནི་འཇུག་པ་ཡིན། །ཚོན་སྣ་ལྔ་པའི་སྲད་བུ་ཡིས། །ཁྲུ་སྟོང་པའམ་ལྔ་བརྒྱ་བར། །དཀྱིལ་འཁོར་དམ་པ་ཐིག་གདབ་པོ། །ཡང་ན་ཁྲུ་ལྔ་ཁྲུ་དོ་པ་འམ། །ཁྲུ་གང་བ་ཡི་བར་དུ་བྱའོ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་བརྒྱན་པ་ཡི། །དབུས་སུ་འཁོར་ལོ་ལེགས་པར་བྲི། །དཀྱིལ་དུ་རྣམ་པར་སྣང་མཛད་གཞག །ཤར་ཕྱོགས་སུ་ནི་མི་འཁྲུགས་པ། །ལྷོ་ཕྱོགས་སུ་ནི་རིན་ཆེན་འབྱུང་། །ནུབ་ཕྱོགས་སུ་ནི་འོད་དཔག་མེད། །བྱང་ཕྱོགས་སུ་ནི་དོན་གྲུབ་རྣམས། །འཁོར་ལོ་གྲྭར་ནི་

ལྷ་མོ་བཞི། །དངོས་གྲུབ་སྦྱིན་པར་མཛད་པར་བྲི། །དབང་བདག་གི་ཕྱོགས་སུ་ནི་སྤྱན་ནོ། །མེའི་ཕྱོགས་སུ་ནི་མཱ་མ་ཀཱིའོ། །བདེན་བྲལ་ཕྱོགས་སུ་ནི་གོས་དཀར་ཅན་ནོ། །རླུང་གི་ཕྱོགས་སུ་ནི་ལྷ་མོ་སྒྲོལ་མའོ། །རྡོ་རྗེ་ཤུགས་ཀྱིས་ཕྱིར་ཕྱུང་ནས་རིམ་པ་གཉིས་པ་ལ་ཤར་ཕྱོགས་སུ་ནི་རྡོ་རྗེ་སེམས་མ། ལྷོར་རྡོ་རྗེ་རིན་ཆེན་མ། ནུབ་ཏུ་རྡོ་རྗེ་ཆོས་མ། བྱང་དུ་རྡོ་རྗེ་ལས་མ་རྣམས་བྲིའོ། །གྲྭ་རྣམས་སུ་སྐུལ་བྱེད་མ་དང་། རིན་ཆེན་སྒྲོལ་མ་དང་། ཁྲོ་གཉེར་ཅན་དང་། རྡོ་རྗེ་ལུ་གུ་རྒྱུད་རྣམས་སོ། །དེ་ནས་ཡང་འགྱིང་བག་ཏུ་ལངས་ཏེ། རྡོ་རྗེ་ཤུགས་ཀྱིས་ཕྱིར་ཕྱུང་ནས་རིམ་པ་གསུམ་པ་ལ། ཤར་ཕྱོགས་སུ་བྱང་ཆུབ་སེམས་དཔའ་བྱམས་པ་དང་། འཇམ་དཔལ་དང་། སྤོས་ཀྱི་གླང་པོ་དང་། ཡེ་ཤེས་ཏོག་རྣམས་བྲིའོ། །ལྷོ་ཕྱོགས་སུ་བཟང་སྐྱོང་དང་། བློ་གྲོས་རྒྱ་མཚོ་དང་། བློ་གྲོས་མི་ཟད་པ་དང་། སྤོབས་པ་བརྩེགས་པ་རྣམས་བྲིའོ། །ནུབ་ཕྱོགས་སུ་ནི་མཐུ་ཆེན་ཐོབ་དང་། ངན་སོང་ཐམས་ཅད་སྤོང་བ་དང་། མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་དང་། དྲ་བ་ཅན་གྱི་འོད་རྣམས་བྲིའོ། །བྱང་ཕྱོགས་སུ་ཟླ་འོད་དང་། འོད་དཔག་མེད་དང་། ནམ་མཁའ་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་རྣམས་བྲིའོ། །ཤར་སྒོར་ནི་གཤིན་རྗེ་མཐར་བྱེད་དོ། །ལྷོ་སྒོར་ནི་ཤེས་རབ་མཐར་བྱེད་དོ། །ནུབ་སྒོར་ནི་པདྨ་མཐར་བྱེད་དོ། །བྱང་སྒོར་ནི་བགེགས་མཐར་བྱེད་དོ། །གྲྭ་རྣམས་སུ་ནི་མི་གཡོ་བ་དང་། འདོད་པའི་རྒྱལ་པོ་དང་། བེ་ཅོན་སྔོན་པོ་དང་། སྟོབས་པོ་ཆེའོ། །ཟུར་རྣམས་སུ་ནི་རྡོ་རྗེ་བྲིའོ། །སྒོའི་ནང་ལོགས་སུ་ཡང་རྡོ་རྗེ་བྲིའོ། །འཁོར་ལོ་ནི་ཚོན་རྩི་དཀར་པོས་བྲིའོ། །གཉིས་པ་ནི་ཚོན་རྩི་དཀར་པོ་དང་། སེར་པོ་དང་། སྔོན་པོ་གསུམ་གྱིས་བྲིའོ། །གསུམ་པ་ནི་སྣ་ལྔས་བྲི་བར་བྱ་སྟེ། དེ་ལྟ་བུ་ནི་དཀྱིལ་འཁོར་ཆེན་པོ་ཡིན་ནོ། །དེ་ནས་དབང་བསྐུར་བའི་དོན་དུ་དཀྱིལ་འཁོར་གྲུ་བཞི་པ་སྒོ་བཞི་དང་ལྡན་པ་རིམ་པ་གཉིས་པར་བྱའོ། །དབུས་སུ་ནི་པདྨ་འདབ་མ་བརྒྱད་པ་སྙིང་པོ་དང་བཅས་པ་བྲིའོ། །སྣམ་བུ་གཉིས་པ་ལ་ཤར་ཕྱོགས་སུ་ནི་རྡོ་རྗེའོ། །ལྷོ་ཕྱོགས་སུ་ནི་རིན་པོ་ཆེ། ནུབ་ཕྱོགས་སུ་ནི་པདྨ། བྱང་ཕྱོགས་སུ་ནི་

རལ་གྲི་སྟེ། །དེ་ལྟ་བུར་དཀྱིལ་འཁོར་བྲི་བར་བྱའོ། །དེ་ནས་སློབ་དཔོན་གྱིས་ལུས་ལེགས་པར་བཀྲུས་ཏེ། སྤོས་ཀྱིས་བསྐུས་ནས་ལེགས་པར་བརྒྱུས་པའི་མེ་ཏོག་གི་ཕྲེང་བ་མགོ་ལ་བཅིངས་ནས། མགུལ་པ་དར་གྱིས་བཅིངས་པ་ལ། །ལྡུམ་བུ་ཡིས་ནི་ཁ་བཀབ་པ། །རིན་ཆེན་སྨན་འབྱུང་སྣ་ལྔ་དང་། །སྤོས་ཆུ་ཡིས་ནི་བཀང་བ་དང་། །བུམ་པ་མངོན་པར་བསྔགས་པར་བྱ། །རྣམ་རྒྱལ་བུམ་པ་དཀྱིལ་འཁོར་གྱི། །བདག་པོ་ལྷ་མོ་རྣམས་ཀྱི་བཞི། །ལྷ་རྣམས་ཀུན་གྱི་བུམ་པ་བཞི། །སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པས་བཟླས་བརྗོད་དོ། །སེམས་ཅན་ཀུན་གྱིས་བསང་གཏོར་བྱ། །ཡང་ན་ཀུ་ཤའི་ཆུན་པོས་བྱ། །དེ་ནས་བུམ་པ་མངོན་པར་བསྔགས་ཏེ་ལྷ་བཤོས་དང་གཏོར་མ་ཕུལ་ནས་མེ་ཏོག་དང་བདུག་པ་དང་། དྲི་དང་། ཕྲེང་བ་དང་། མཆོད་ཡོན་དང་། ཞབས་བཀྲུ་བ་ལ་སོགས་པ་དབུལ་ལོ། །དེ་རྣམས་ཕུལ་ནས་བུམ་པ་རྣམས་གྲྭར་གཞག་པར་བྱའོ། །རྣམ་པར་རྒྱལ་བའི་བུམ་པ་ནི་དབུས་སུ་སྤྱན་དྲང་བར་བྱའོ། །དེ་བཞིན་གཤེགས་པ་ལ་སོགས་པ་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་གསལ་བར་བྱ་སྟེ། གཞུག་པ་དང་། བསྡམ་དང་། དབང་དུ་བྱ་སྟེ། ཕུར་བུ་དང་།ར་བ་དང་། དྲ་བས་ཕྱོགས་བཅིང་བ་དང་། མཚམས་གཅད་པ་བྱས་ལ། མཆོད་ཡོན་དང་། ཞལ་བསིལ་དང་། གདན་དང་། མེ་ཏོག་དང་། བདུག་པ་ལ་སོགས་པ་ཡང་བསྔོས་ཏེ་ཕུལ་ནས་ཕྱག་རྒྱའི་ཚོགས་རང་རང་ལ་བསྟན་པར་བྱའོ། །བསྟོད་པ་དང་། རྡོ་རྗེའི་གླུ་དང་། དྲིལ་བུ་གསིལ་བའི་སྒྲ་དང་། སིལ་སྙན་དང་། གླིང་བུ་དང་། རྒྱུད་ཀྱི་སྒྲའི་ཁྱད་པར་ཡང་དབུལ་ལོ། །རོལ་མོའི་ཁྱད་པར་གཞན་རྣམས་ཀྱིས་ཀྱང་བསྟོད་པར་བྱའོ། །བསྟོད་ནས་བཟོད་པར་གསོལ་ཏེ་དངོས་གྲུབ་ཐམས་ཅད་ཀྱི་ཕྱིར་གསོལ་བ་གདབ་པོ། །དེ་ནས་སློབ་དཔོན་བདག་ཉིད་ཞུགས་ཏེ། དེའི་འོག་ཏུ་སློབ་མ་གཞུག་གོ །དེ་ནས་སེམས་ཅན་ཐམས་ཅད་སྙིང་པོ་འདི་དང་ཕྱག་རྒྱས་གནས་ལྔར་བསྲུང་ཞིང་གནས་ལྔར་ཆོ་ག་བྱའོ། །ཧཱུྃ་ཨོྃ་ཛི་ན་ཛིཀ །ཨཱཿཨཱ་རོ་ལྀ་ཀ །ཧཱུྃ་བཛྲ་དྷྲྀ་ཀ། སྭཱ་རཏྣ་དྷྲྀ་ཀ །ཧཱ་པྲཛྙཱདྷྲྀ་ཀ །

དེ་ནས་ཚིགས་སུ་བཅད་པ་འདིས་གཞུག་པར་བྱ་སྟེ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་དཀྱིལ་འཁོར་སྙིང་པོ་འདིར། །བདག་གིས་སློབ་མ་གཞུག་པར་བྱ། །རྡོ་རྗེ་སེམས་མས་མེ་ཏོག་གཏོར་བར་བགྱི་སྟེ། པྲ་ཏཱིཙྪ་བཛྲ་ཧོཿ། ཚིགས་སུ་བཅད་པ་འདིས་གདོང་གཡོགས་དགྲོལ་ལོ། །དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དེང་འདིར་བལྟ་བར་གྱིས། །སངས་རྒྱས་གདུང་གི་རིགས་སུ་འཁྲུངས། །སྔགས་དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཕུན་སུམ་ཚོགས། །དམ་ཚིག་མཆོག་ཏུ་གྲུབ་པར་བྱེད། །རྡོ་རྗེ་པདྨ་རོལ་པའི་མཆོག །སྔགས་ཀྱི་བདག་ཉིད་ཤེས་པར་བྱ། །དེ་ཡི་སྙིང་པོ་འདི་ཡིན་ཏེ། །པ་ཤྱ་བཛྲ། གང་ལ་མེ་ཏོག་བབ་པ་དེ་དེའི་ལྷ་ཡིན་ནོ། །དེ་ནས་དབང་བསྐུར་སྦྱིན་བྱ་སྟེ། །དྲི་དང་མེ་ཏོག་ཕྲེང་བས་བརྒྱན། །གོས་དང་རྒྱན་གྱིས་ལེགས་པར་བརྒྱན། །སྟེང་དུ་བླ་རེ་བྲེ་བར་བྱ། །གདུགས་དང་རྒྱལ་མཚན་བ་དན་དང་། །ལྷ་དང་ཚངས་པའི་སྐུད་པ་དང་། །གདུ་བུ་དག་དང་སྐ་རགས་དང་། །བཀྲ་ཤིས་ཡོ་བྱད་རྣམས་ཀྱིས་བཀླུབས། །སློབ་མ་སྡིག་དང་བྲལ་བ་ལ། །སློབ་དཔོན་གྱིས་ནི་དབང་བསྐུར་རོ། །དང་པོར་རྣམ་རྒྱལ་བུམ་པ་ཡིས། །དེ་ནས་ལྷ་མོ་བཞི་རྣམས་དང་། །ལྷ་རྣམས་ཀུན་གྱི་བཞི་པོ་ཡིས། །བཀྲ་ཤིས་ཚིགས་བཅད་གླུ་སྒྲ་དང་། །རྡོ་རྗེ་དྲིལ་བུ་གསིལ་བ་ཡིས། །སྐྱོབ་པ་ཀུན་གྱིས་མངོན་སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བྱ། །དཀྱིལ་འཁོར་དེ་ཉིད་རིག་པར་བསམ། །དེ་ལྟ་བུར་ནི་བསམས་ནས་ཀྱང་། །ཆོས་ཀྱི་མཚན་ཉིད་བསྟན་པར་བྱ། །ཐུར་མ་མེ་ལོང་འཁོར་ལོ་དང་། །དུང་དང་རྡོ་རྗེ་གླེགས་བམ་དང་། །གསེར་དག་དང་ནི་དངུལ་རྣམས་ཀྱིས། །མི་ཤེས་རབ་རིབ་ལ་སོགས་པ། །ཅི་ནུས་པར་ནི་བསལ་བར་བྱ། །ཐུར་མ་ལ་སོགས་མེད་ན་ཡང་། །ཕྱག་རྒྱས་གཟུགས་རྣམས་བསྟན་པར་བྱ། །དེ་ནས་དམ་ཚིག་བསྟན་པར་བྱ། །དེ་རིང་ཕྱིན་

ཆད་བུ་ཁྱོད་ཀྱིས། །སྲོག་དང་ལུས་ལ་བབ་གྱུར་ཀྱང་། །དམ་པའི་ཆོས་དང་བྱང་ཆུབ་སེམས། །སློབ་དཔོན་ལ་ནི་བརྙས་མི་བྱ། །རྡོ་རྗེ་སྤུན་རྣམས་བཀུར་སྟི་ཞིང་། །སྡང་ལ་བྱམས་ཤིང་ཆགས་བྲལ་བ། །ནམ་ཡང་བྱ་བ་མ་ཡིན་ནོ། །དེ་ལྟར་བྱས་ན་སངས་རྒྱས་ཀྱིས། །ཁྱོད་ནི་དམྱལ་བའི་ནང་དུ་འདོར། །དེ་ནས་བླ་མས་ཡོན་བླངས་ཏེ། །ས་དང་ཡིད་འོང་ཆུང་མ་དང་། །རིན་ཆེན་གསེར་དང་ནོར་བུ་འབར། །མུ་ཏིག་བྱི་རུ་ལ་སོགས་དང་། །ལུས་ཀྱང་དབུལ་དུ་གཞུག་པར་བྱ། །བླ་མ་ལ་ནི་གུས་པ་ཡི། །སློབ་མས་དེ་བཞིན་ཁོ་ནར་བྱ། །བླ་མ་དེ་ནི་མགུ་བར་བྱ། །བླ་མ་མགུ་བ་དངོས་གྲུབ་སྟེ། །གཞན་དུ་མིན་ཞེས་ཐུབ་པ་གསུང་། །དེ་ནས་སློབ་མ་བསླང་སྟེ། །སངས་རྒྱས་ཐམས་ཅད་ཀྱི་སྤྱན་སྔར་མཆོད་པ་བྱ་སྟེ། སྦྱིན་སྲེག་གི་ལས་བྱའོ། །དེ་ནས་ཆོ་ག་མཐོང་བས་ལས་བྱས་ནས། །སྦྱིན་སྲེག་བཟླས་བརྗོད་མཆོད་པ་དང་། །དེ་བཞིན་བསྒོམ་པའི་རིམ་པའི་ཚུལ། །ཞི་དང་རྒྱས་པའི་རིམ་པ་ཡིས། །ལས་རྣམས་ཐམས་ཅད་ཚིམ་པར་བྱ། །དེ་ནས་དུས་གསུམ་གཤེགས་པ་ཡི། །རྒྱལ་བ་ཐམས་ཅད་གཤེགས་སུ་གསོལ། །བསྒྲིམས་ཏེ་ཚོན་རྩི་རྣམས་བསྡུས་ནས། །ཆུ་ཀླུང་ཆེན་པོར་བསྐུར་ནས་ཀྱང་། །བ་ཡི་ལྕི་བས་བྱུག་པར་བྱ། །དཀྱིལ་འཁོར་གྱི་ནི་ཡོ་བྱད་ཀུན། །སློབ་དཔོན་ཉིད་ཀྱིས་བསྡུ་བར་བྱ། །སློབ་མས་ཅུང་ཟད་མི་སྤྱད་དོ། །དེ་ནི་དམ་ཚིག་ཉམས་པར་འགྱུར། །སློབ་དཔོན་གྱིས་ཀྱང་ཅི་རིགས་པར། །བདག་ཉིད་འདོད་པ་སྤྱད་པར་བྱ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་དཀྱིལ་འཁོར་རིམ་པར་ཕྱེ་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་རྡོ་རྗེ་དེ་བཞིན་གཤེགས་པས་ཡང་གསང་སྔགས་ཀྱི་འཁོར་ལོ་ལ་འཇུག་པའི་རྡོ་རྗེ་ཞེས་བྱ་བའིི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཕྱག་ན་རྡོ་རྗེ་ལ་བཀའ་སྩལ་པ། ཕྱག་ན་རྡོ་རྗེ་གསང་སྔགས་ཀྱི་སྙིང་པོའི་ཡི་གེ་རྣམས་ཉོན་ཅིག །ཕྱག་ན་རྡོ་རྗེས་གསོལ་པ། སེམས་ཅན་ཐམས་ཅད་

ལ་སྨན་པའི་སླད་དུ་བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པས་བཤད་དུ་གསོལ། ཨོྃ་ལས་རྣམ་པར་སྣང་མཛད་དོ། །ཨོྃ་ཧཱུྃ་མི་འཁྲུགས་པའོ། །ཨོྃ་ཏྲཱྃ་རིན་ཆེན་འབྱུང་གནས་སོ། །ཨོྃ་ཧྲཱིཿའོད་དཔག་མེད་དོ། །ཨོྃ་ཁྃ་དོན་ཡོད་གྲུབ་པའོ། །ཨོྃ་ག་ག་ན་ལོ་ཙ་ནི་ཧཱུྃ་སྤྱན་གྱིའོ། །ཨོྃ་ཀི་རི་ཀི་རི་མཱ་མ་ཀཱི་ཧཱུྃ་མཱ་མ་ཀཱིིའིའོ། །ཨོཾ་ཀ་ཊེ་བི་ཀ་ཊེ་ཀ་ཊྃ་ཀ་ཊེ་ཀ་རོ་ཊི་པཱིརྱ་སྭཱ་ཧཱ། གོས་དཀར་མོའི་འོ། །ཨོྃ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། སྒྲོལ་མའིའོ། ཨོྃ་ས་ཏྭ་བཛྲཱི་ཧཱུྃ། རྡོ་རྗེ་སེམས་མའིའོ། །ཨོྃ་རཏྣ་བཛྲཱི་ཧཱུྃ། རྡོ་རྗེ་རིན་ཆེན་མའིའོ། །ཨོྃ་དྷརྨ་བཛྲཱི་ཧཱུྃ། རྡོ་རྗེ་ཆོས་མའིའོ། །ཨོྃ་ཀརྨ་བཛྲཱི་ཧཱུྃ། རྡོ་རྗེ་ལས་མའིའོ། །ཨོྃ་ཙ་ལེ་ཙུ་ལེ་ཙུནྡེ་སྭཱ་ཧཱ། སྐུལ་བྱེད་མའིའོ། །ཨོཾ་རཏྣ་ལོ་ཀི་རཏྣཱ་ཛྭཱ་ལི་ནི་སྭཱ་ཧཱ། རིན་ཆེན་སྒྲོན་མའིའོ། །ཨོྃ་བྷྲྀ་ཀུཊྚི་བྷྲྀ། ཁྲོ་གཉེར་མའིའོ། །ཨོཾ་བཛྲ་ཤྲྀཾ་ཁ་ལེ་ཧཱུྃ་ཕཊ་སྭཱ་ཧཱ། རྡོ་རྗེ་ལུ་གུ་རྒྱུད་མའིའོ། །ཨོྃ་མ་བྱམས་པའིའོ། །ཨོྃ་མུྃ། འཇམ་དཔལ་གྱིའོ། །ཨོྃ་ས་མནྟ་བྷ་དྲ་ཧཱུྃ། ཀུན་ཏུ་བཟང་པོའིའོ། །ཨོྃ་གནྡྷ་ཧ་ཏི་ནི་ཧཱུྃ། སྤོས་ཀྱི་གླང་པོའིའོ། །ཨོྃ་ཛྙཱན་ཀེ་ཏུ་བ་ཏི་ཧཱུྃ། ཡེ་ཤེས་ཏོག་གོ །ཨོྃ་བྷ་དྲ་བྷ་ཏི་བྷ་དྲ་པཱ་ལེ་ཧཱུྃ། བཟང་སྐྱོང་ངོ་། །ཨོྃ་སཱ་ག་རེ་མ་ཧཱ་སཱ་ག་རེ་ཧཱུྃ། བློ་གྲོས་རྒྱ་མཚོའོ། །ཨོྃ་ཨཀྵཱ་ཡེ་ཧཱུྃ་ཧཱུྃ་ཨཀྵ་ཡཀྵ་ཨ་ཀརྨ་ཨཱ་པ་ར་ཎ་པ་རི་ཤོ་དྷ་ནི་སྭཱ་ཧཱ། བློ་གྲོས་མི་ཟད་པའོ། །ཨོྃ་པྲ་ཏིབྷཱ་ནི་པྲ་ཏི་བྷ་ནེ་ཀཱུ་ཊེ་ཧཱུྃ། སྦོབས་པ་བརྩེགས་པའོ། །ཨོྃ་སྠཱ་མེ་མ་ཧཱ་སྠཱ་མ་བ་ཏི་སྭཱ་ཧཱ། མཐུ་ཆེན་ཐོབ་པའོ། །ཨོྃ་སརྦ་ཨ་པཱ་ཡ་ཛ་ཏེ་སརྦཱ་པཱ་པྃ་ཤོ་དྷ་ཧཱུྃ། ངན་སོང་ཐམས་ཅད་སྤོང་བའོ། །ཨོྃ་སརྦ་ཤོ་ཀ་ཏ་མོ་ནི་རྔཱ་མ་ཏི་ཧཱུྃ། མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་སོ། །ཨོྃ་ཛཱ་ལི་ནི་མ་ཧཱ་ཛཱ་ལི་ནི་ཧཱུྃ། དྲ་བ་ཅན་གྱི་འོད་དོ། །ཨོྃ་སུ་དྷ་ན་ཤྲི་ཡེ་ཧཱུྃ། ནོར་བཟངས་སོ། །ཨོྃ་ཙནྡྲེ་ཙནྡྲེ་བྱཱ་བ་ལོ་ཀི་ཏེ་སྭཱ་ཧཱ། །ཟླ་འོད་དོ། །ཨོྃ་ཨ་མི་ཏེ་པྲ་བྷེ་ཨ་མི་ཏེ་ཧཱུྃ། འོད་དཔག་མེད་དོ། །ཨོྃ་ག་ག་ག་ནེ་ག་ག་ན་བ་ར་ལོ་ཙ་ན་ཧཱུྃ། ནམ་མཁའ་མཛོད་དོ། །ཨོྃ་སརྦྦ་ནི་པཱ་ར་ཎ་བིཥྐ་བྷི་ནེ་ཧཱུྃ། སྒྲིབ་པ་ཐམས་ཅད་རྣམ་པར་སེལ་བའོ། །ཨོྃ་ཡ་མཱནྟ་ཀྲིཏ། གཤིན་རྗེ་གཤེད་དོ། །ཨོྃ་པྲ་ཛྙཱན་ཏ་ཀྲི་ཏ། གཞན་གྱིས་མི་ཐུབ་

པའོ། །ཨོྃ་པདྨཱ་ན་ཏ་ཀྲིཏ། རྟ་མགྲིན་ནོ། །ཨོྃ་ཨ་མྲྀ་ཏ་ཀུཎྜ་ལི་བིགྷཱན་ཏ་ཀྲིཏ། བདུད་རྩི་ཐབ་སྦྱོར་རོ། །ཨོྃ་ཨ་ཙ་ལ་ཧཱུྃ་ཧྃ། མི་གཡོ་བའོ། །ཨོྃ་ཊཀྐི་ཧཱུྃ། འདོད་པའི་རྒྱལ་པོའོ། །ཨོྃ་ནཱི་ལ་དཎྜ་མ་ཧཱ་དཎྜ་ཧཱུྃ། བེ་ཅོན་སྔོན་པོའོ། །ཨོྃ་ཀྲོ་དྷ་ཧཱུྃ་ཛཿ། སྟོབས་པོ་ཆེའོ། །དཀྱིལ་འཁོར་དུ་དགོད་པའི་གསང་སྔགས་ཀྱི་ཡི་གེ་དེ་དག་གོ །འདི་དག་ལ་བསྟེན་ནས་ཏིང་ངེ་འཛིན་གྱི་ཁྱད་པར་ལས་ངེས་པར་འབྱུང་བའི་གསང་སྔགས་བྱེ་བ་ཕྲག་དུ་མ་གསུངས་སོ། །དེ་བཞིན་གཤེགས་པ་ལ་སོགས་པ་ཐམས་ཅད་ནི་ལྕགས་ཀྱུས་སྤྱན་དྲང་ངོ་། །བྱང་ཆུབ་སེམས་དཔའ་རྣམས་ནི་རྡོ་རྗེའི་ཕྱག་རྒྱས་སོ། །རིག་པའི་ལྷ་མོ་རྣམས་ཀྱི་ནི་རིགས་ཀྱི་ཡུམ་རྣམས་ཀྱིས་སོ། །ཁྲོ་བོ་རྣམས་ཀྱི་ནི་ཞལ་གྱི་ཕྱག་རྒྱས་སོ། །བྲན་རྣམས་ནི་ཞགས་པའི་ཕྱག་རྒྱས་སོ། །ཕོ་ཉ་རྣམས་ནི་ལྕགས་ཀྱུའི་ཕྱག་རྒྱས་སོ། །དེ་དག་ལ་སོགས་པ་ནི་སྤྱན་དྲང་བའི་སྦྱོར་བའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་གསང་སྔགས་རིམ་པར་ཕྱེ་བའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོའི་རྡོ་རྗེའི་དེ་བཞིན་གཤེགས་པ་ཡེ་ཤེས་ཆེན་པོའི་སྟོབས་ཀྱིས་རྣམ་པར་འཕྲུལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཕྱག་ན་རྡོ་རྗེ་རས་སམ་རྩིག་པ་ལ་སོགས་པ་ལ་གཟུགས་བརྙན་བསྒྲུབ་པ་ལ་དམིགས་པ་གང་གིས་གསང་སྔགས་འཆང་རྣམས་ཀྱིས་ཡེ་ཤེས་རྫོགས་པར་འགྱུར་ཞིང་ཡེ་ཤེས་རྫོགས་པས་སངས་རྒྱས་ཉིད་བདེ་བླག་ཏུ་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་པའི་གསང་སྔགས་ཀྱི་ཚོགས་ཐམས་ཅད་ཀྱི་ཏིང་ངེ་འཛིན་གསང་ཆེན་བླ་ན་མེད་པ་བཤད་པར་བྱ་ཡིས་ཉོན་ཅིག །ཨོྃ་གྱི་ཡེ་ཤེས་ཀྱིས་བསྒྲུབས་པ། །རྒྱལ་ཆེན་རྣམ་པར་སྣང་མཛད་ནི། །ཤེས་རབ་ཡེ་ཤེས་རབ་རྒྱས་པ། །སངས་རྒྱས་ཀུན་གྱིས་མཆོག་གིས་མཆོད། །ཞི་བ་ཐོར་ཚུགས་ཅོད་པན་འཆང་། །ཞལ་གསུམ་གྱིས་ནི་རྣམ་པར་བརྒྱན། །གསེར་གྱི་མདོག་ཅན་ཕྱག་དྲུག་པ། །དང་པོ་བསམ་གཏན་ཕྱག་རྒྱ་ཅན། །

བགྲང་ཕྲེང་ལྡན་ཞིང་མདའ་ཡིས་བརྒྱན། །གཡོན་གྱིས་ལྷ་མོའི་ནུ་མ་འཛིན། །འཁོར་ལོ་དང་ནི་གཞུ་ཐོགས་ཤིང་། །ལྷ་རྣམས་བྲེད་ཅིང་ཁམས་རྣམས་འཛག །འབར་བའི་འོད་དཀྱིལ་བརྒྱན་པ་ལ། །སངས་རྒྱས་ཀུན་གྱི་སྤྲིན་འཕྲོ་བ། །རབ་ཏུ་འབྱུང་ཞིང་ལེགས་འཁྱུད་པ། །དེ་ཉིད་སྤྱོད་ཡུལ་ཅན་བསྒོམས་ཏེ། །གསང་སྔགས་ནང་གི་བཟླས་བརྗོད་བྱ། །ཏིང་ངེ་འཛིན་ཐམས་ཅད་ཀྱི་སྟོབས་རྫོགས་པར་བྱེད་པའི་ཡེ་ཤེས་ཞེས་བྱ་བའི་ཏིང་ངེ་འཛིན་ཏོ། །ཨོྃ་ཞེས་བྱ་བའི་ཚིག་གི་ལམ། །འཇིག་རྟེན་དབང་ཕྱུག་འོད་ཆེན་བསམ། །ཐོར་ཚུགས་ཅོད་པན་འཆང་བའི་ལྷ། །དབུ་རྒྱན་ཐམས་ཅད་མཁྱེན་པས་བརྒྱན། །རྒྱན་རྣམས་ཀུན་གྱིས་བརྒྱན་པ་སྟེ། །གཙོ་བོ་ཟླ་བའི་གཟུགས་དང་འདྲ། །ཞལ་གསུམ་སྤྱན་གསུམ་འབར་བ་ལ། །ཕྱག་དྲུག་འདུག་སྟངས་བཞི་པ་ཅན། །ཕྱག་གཉིས་པདྨའི་འཇོ་ཚུལ་ཅན། །གཡས་ན་བགྲང་ཕྲེང་རྡོ་རྗེ་འཆང་། །གཡོན་པས་ནུ་མ་འཛིན་པ་ལ། །རིལ་བ་སྤྱི་བླུགས་གསུམ་པ་ན། །གཟུགས་རྣམས་ཐམས་ཅད་འཕྲོ་མཛད་ཅིང་། །ཀུན་ནས་འོད་ཟེར་ཕྲེང་བ་ཅན། །ལག་ནས་མཚོན་ཤོར་འཇིགས་འཁྲུགས་པའི། །བགེགས་འགྱེལ་བ་ལ་ལྟ་བྱེད་པའི། །དེ་འདྲའི་ཚིག་གིས་ལམ་བསྒོམས་ན། །རིང་པོར་མི་ཐོགས་སངས་རྒྱས་འཐོབ། །རྣམ་པ་ཐམས་ཅད་ཀྱི་མཆོག་ཡངས་པ་ཐམས་ཅད་ཀྱི་འབྱུང་གནས་ཆོས་ཀྱི་རྒྱལ་པོ་ཞེས་བྱ་བའི་ཏིང་ངེ་འཛིན་ཏོ། །ཟླ་བའི་གཟུགས་ལ་ཧཱུྃ་ཞེས་པ། །སེམས་ཀྱི་རྡོ་རྗེ་བསྒོམ་པར་བྱ། །མཐིང་ཤིང་བཟང་པོ་ལྟ་བུའི་མདོག །རྒྱན་རྣམས་ཀུན་གྱིས་རབ་བཀླུབས་པ། །ཅོད་པན་ལ་ནི་མི་འཁྲུགས་བཞུགས། །རིན་ཆེན་རྣམས་ཀྱིས་ཡོངས་སུ་བརྒྱན། །ཞལ་རས་གསུམ་ལྡན་སྤྱན་གསུམ་པ། །ཅུང་ཟད་བཞད་ཅིང་འཇོ་སྒེག་ཅན། །ཕྱག་བརྒྱད་ཀྱིས་ནི་བརྒྱན་པ་ལ། །རྡོ་རྗེ་དང་པོར་གསོར་བ་དང་། །གཉིས་པ་ན་ནི་རལ་གྲི་གདེངས། །ལྕགས་ཀྱུ་བཟང་པོ་གསུམ་པ་ན། །བཞི་པ་ཡིས་ནི་མདའ་ཡང་གསོར། །དེ་བཞིན་གཡོན་ན་དྲིལ་བུ་བསྣམས། །དེ་བཞིན་གཉིས་པས་ནུ་མ་འཁྱུད། །

གསུམ་པ་ན་ནི་ཞགས་པ་སྟེ། །བཞི་པ་ལྷ་རྫས་གཞུ་ཡང་འཛིན། །རོལ་པའི་སྟབས་སུ་ལེགས་པར་བཞུགས། །དེ་བཞིན་སངས་རྒྱས་སྤྲིན་གྱིས་འབར། །འདི་འདྲ་གང་ཞིག་རྟག་སྒོམ་པ། །དེ་ཡི་རྡོ་རྗེ་སེམས་བརྟན་ཞིང་། །རིང་པོར་མི་ཐོགས་བྱང་ཆུབ་འཐོབ། །རྒ་ཤི་རྣམས་ཀྱི་ཕ་རོལ་འགྲོ། །སེམས་ཅན་གྱི་སྟོབས་མཐའ་ཡས་པ་རྫོགས་པར་བྱེད་པའི་ཏིང་ངེ་འཛིན་གྱི་རྒྱལ་པོ་རྡོ་རྗེ་ཤུགས་ཞེས་བྱ་བའི་ཏིང་ངེ་འཛིན་ཏོ། །ཏྲཱྃ་གི་ཡེ་ཤེས་ལས་བསྒྲུབས་པ། །རིན་ཆེན་འབྱུང་བའི་བདག་ཉིད་དེ། །ཞལ་རས་གསུམ་ལྡན་སྤྱན་གསུམ་པ། །ཐོར་ཚུགས་ཅོད་པན་རྣམས་ཀྱིས་བརྒྱན། །བདེ་བ་ཆེན་པོ་ཁ་དོག་དམར། །ཏིང་འཛིན་ཕྱག་རྒྱ་རྣམ་པར་བཞུགས། །སེམས་དཔའི་སྐྱིལ་ཀྲུང་བཅས་པ་སྟེ། །ཕྱག་གཡས་ན་ནི་རྡོ་རྗེ་དང་། །གཡོན་པ་རིན་ཆེན་ཡོངས་སུ་འཛིན། །འོད་ཟེར་སེར་པོ་འཕྲོ་བ་ལས། །རིན་ཆེན་འབྱུང་བའི་སྤྲིན་ཆེན་ནམ། །བྱང་ཆུབ་སེམས་དཔའ་གཞན་རྣམས་ཀྱིས། །རིན་ཆེན་ཆར་གྱིས་རྒྱས་པར་བྱས། །རིན་ཆེན་མངོན་པར་ཐོབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ། །ཁྃ་གི་ཡེ་ཤེས་ལས་བསྒྲུབས་པ། །དོན་ཡོད་རྡོ་རྗེ་བསམ་པར་བྱ། །ཏིང་འཛིན་ཕྱག་རྒྱ་ལེགས་བཞུགས་པ། །མརྒད་ཏ་ཡི་འོད་ལྟར་འབར། །གཡས་པའི་ཕྱག་ན་རལ་གྲི་དང་། །གཡོན་པ་ཡིས་ནི་ལྕགས་ཀྱུ་ཉིད། །སངས་རྒྱས་ཀྱི་ནི་སྤྲིན་འཕྲོ་ཞིང་། །ལེགས་པར་བསྒྲུབ་ཕྱིར་སླར་ཡང་སྡུད། །འོད་ཟེར་ཆེན་པོས་རབ་གསལ་ཞིང་། །ཡེ་ཤེས་རྒྱ་མཚོའི་འོད་དང་མཚུངས། །འདི་འདྲ་རྟག་ཏུ་སེམས་བྱེད་པ། །ནམ་མཁའི་སྙིང་པོ་ཐུབ་པ་ཆེ། །འདུ་བྱེད་ཐམས་ཅད་སྤངས་པ་ཡི། །མཁའ་དང་མཉམ་པ་དེར་འགྱུར་རོ། །ནམ་མཁའ་སྣང་བར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ལ་ཡི་ཡེ་ཤེས་ལས་བསྒྲུབས་པ། །རྒྱལ་བ་ཐམས་ཅད་ཀྱིས་ཀྱང་བརྒྱན། །ལྷ་མོ་སྤྱན་གསུམ་ཕྱག་བརྒྱད་པ། །ཞལ་གསུམ་གསེར་གྱི་མདོག་དང་མཚུངས། །སྒེག་པའི་ཆ་ལུགས་ལེགས་འཆང་བ། །ཅུང་ཟད་བཞད་པས་འདོད་

ཆགས་མ། །དང་པོའི་ཕྱག་ནི་མཆོག་སྦྱིན་མཛད། །དེ་བཞིན་གཉིས་པ་མི་འཇིགས་སྦྱིན། །ཕྱག་གསུམ་པ་ན་རྡོ་རྗེ་སྟེ། །བཞི་པ་ན་ནི་མདའ་ཡང་གསོར། །གཡོན་པ་སྡིགས་མཛུབ་ཞགས་པ་ཅན། །རིན་ཆེན་སྙེ་མ་གཉིས་པ་ན། །གསུམ་པ་ན་ནི་བགྲང་ཕྲེང་སྟེ། །བཞི་པ་གཞུ་ཡིས་ལེགས་པར་བརྒྱན། །འོད་དམར་འོད་ཟེར་ཕྲེང་བ་ཅན། །ལྷ་རྣམས་འཇིགས་པས་སེམས་མྱོས་ཏེ། །ལག་པ་ཐལ་མོ་སྦྱོར་བར་བྱེད། །སངས་རྒྱས་རྣམས་ཀྱི་སྤྲིན་འཕྲོ་བར། །ཡེ་ཤེས་རྡོ་རྗེ་སྤྱན་མ་བསམ། །བྱང་ཆུབ་ཡན་ལག་འབྲས་བརྒྱན་པའི། །ལྷ་མོ་འདི་འདྲ་བསྒོམ་པར་བྱ། །ཡེ་ཤེས་སྤྱན་གྱིས་སྣང་བར་བྱེད་པའི་རྡོ་རྗེ་འཇོ་ཚུལ་ཞེས་བྱ་བའི་ཏིང་ངེ་འཛིན་ཏོ། །མ་ཡི་ཡེ་ཤེས་ལས་བསྒྲུབས་པ། །རྡོ་རྗེ་རིགས་ཅན་མཱ་མ་ཀཱི། །ལྷ་མོ་ཞལ་གསུམ་ཕྱག་དྲུག་མ། །དགོད་ཅིང་ཞལ་རས་ཁྲོ་དང་བཅས། །ཨུཏྤལ་སྔོན་པོའི་མདོག་འདྲ་བ། །འོད་དམར་ཤིན་ཏུ་འབར་བ་ཅན། །དང་པོ་མི་འཇིགས་སྦྱིན་པའི་ཕྱག །གཉིས་པ་ལེགས་པར་རྡོ་རྗེ་བསྡམས། །གསུམ་པ་ཡིས་ནི་མདའ་ཡང་གསོད། །གཡོན་པ་བསྡིགས་པའི་མཛུབ་མོ་སྟེ། །གཉིས་པ་ཞགས་པ་ལེགས་པར་བསྣམས། །གསུམ་པ་ཡིས་ནི་གཞུ་ཡང་འཛིན། །རྡོ་རྗེ་ཅན་མ་སྐུ་གསུམ་འཆང་། །དངོས་མེད་ངོ་བོ་མཚན་ཉིད་ཅན། །སངས་རྒྱས་ཀྱི་ནི་སྤྲིན་འཕྲོ་བ། །འདི་འདྲ་སྒོམ་པས་བསྒོམ་པར་བྱའོ། །སྒྱུ་འཕྲུལ་འབྱུང་བའི་སྟོབས་ཀྱིས་ཡེ་ཤེས་ཟབ་མོ་ཞེས་བྱ་བའི་ཏིང་ངེ་འཛིན་ཏོ། །པ་ཡི་ཡེ་ཤེས་ལས་བསྒྲུབས་པ། །ཟླ་བའི་མདོག་དང་ལྡན་པའི་ཡུམ། །མིང་ནི་གོས་དཀར་ཅན་ཞེས་བྱ། །སྤྱན་གསུམ་དག་གིས་རྣམ་པར་བརྒྱན། །ཞལ་རས་གསུམ་པ་དགའ་མཛད་མ། །ཕྱག་དྲུག་མི་འཇིགས་སྤྱན་མཛད་མ། །གཉིས་པ་ན་ནི་རྡོ་རྗེ་སྟེ། །གསུམ་པ་མདའ་ཡིས་རྣམ་པར་བརྒྱན། །གཡོན་པ་པདྨ་བསྣམས་པར་བྱ། །གཉིས་པ་ན་ནི་བགྲང་ནོར་ཕྲེང། །གསུམ་པ་ན་ནི་གཞུ་བསྣམས་ཤིང་། །རོལ་པའི་སྟབས་སུ་ལེགས་པར་བཞུགས། །སངས་རྒྱས་གཟུགས་ནི་འཕྲོ་བར་མཛད། །པདྨའི་སྤྲིན་གྱིས་རྒྱས་པར་

བསྒོམ། །གལ་ཏེ་བྱང་ཆུབ་མཆོག་འདོད་ན། །རིན་ཆེན་སྐུར་ནི་བསྒོམ་པར་བྱ། །པདྨའི་གཟུགས་ཀྱི་འཇོ་ཚུལ་སངས་རྒྱས་ཀྱི་རྒྱལ་བ་འདྲེན་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཏཱ་ཡི་ཡེ་ཤེས་ལས་བསྒྲུབས་པ། །ལྷ་མོ་སྒྲོལ་མ་རྫུ་འཕྲུལ་ཅན། །འཇོ་སྒེག་ཆ་ལུགས་ལ་གནས་པ། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་སེམས་དཔའི་སྐྱིལ་མོ་ཀྲུང་། །བཞད་པ་མརྒད་འོད་དང་ལྡན། །དང་པོ་མི་འཇིགས་སྤྱིན་པའི་ཕྱག །གཉིས་པ་ན་ནི་རྡོ་རྗེ་བསྣམས། །གསུམ་པ་ན་ནི་མདའ་ཡང་གསོར། །གཡོན་པ་བསྡིགས་པའི་མཛུབ་མོ་སྟེ། །གཉིས་པ་ན་ནི་ཨུཏྤལ་ཉིད། །གསུམ་པ་ན་ནི་གཞུ་ཡང་འཛིན། །འོད་ཟེར་དམར་པོ་འབར་བ་ཅན། །སངས་རྒྱས་འཕྲོ་བས་རྒྱས་མཛད་པ། །དགའ་མཛད་སེམས་ཅན་ཀུན་གྱི་མ། །རྟག་པར་རྒྱུན་དུ་བསྒོམ་པར་བྱ། །སེམས་ཅན་ཐམས་ཅད་དབང་དུ་འགྲོ་ཞིང་དགའ་བར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སྐྱེས་མཆོག་རྒྱལ་བས་གསུངས་པ་ཡི། །སེམས་མ་བཞི་ནི་བརྗོད་པའི་མིང་། །སེམས་མ་དང་ནི་རིན་ཆེན་མ། །ཆོས་མ་རྡོ་རྗེ་ལས་མ་སྟེ། །རོལ་པས་རྗེས་སུ་མཉེས་མཛད་མ། །དེ་དག་ཇི་ལྟར་རིགས་པར་བསྒོམ། །དེ་དག་ཀྱང་ནི་བསྒོམས་པ་ཡིས། །རིང་པོར་མི་ཐོགས་བྱང་ཆུབ་འཐོབ། །སེམས་ཅན་རབ་ཏུ་དགའ་བྱེད་པའི། །འཕགས་མ་བཞི་ཡི་ཏིང་ངེ་འཛིན་ཏོ། །ཙུྃ་གི་ཡི་གེ་ལས་བསྒྲུབས་པ། །མིང་ནི་སྐུལ་བྱེད་ཅེས་མའི་གཟུགས། །སྐུ་གསུམ་རྒྱལ་བ་བྱེ་བ་ཕྲག །བདུན་གྱིས་གསང་སྔགས་གླུ་ཡིས་བསྟོད། །ཡི་གེ་དགུ་པ་ཐབས་དགུ་ཅན། །ལྷ་དགུ་རྣམས་ཀྱི་གནས་ཀྱང་ཡིན། །ཞལ་གསུམ་སྟོན་ཀའི་འདམ་བུའི་མདོག །རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་སྐལ་ལྡན་དར་ལ་བབ། །རིག་སྔགས་ཐམས་ཅད་སྒྲོལ་མཛད་མ། །དང་པོའི་ཞལ་ནི་ཅུང་ཟད་ཙམ། །བཞད་ཅིང་སྤྱན་གསུམ་ལྡན་པ་སྟེ། །གཡས་ཀྱི་ཞལ་ནི་རྣམ་གདངས་པ། །ཨུཏྤལ་སྔོན་པོ་འདབ་མའི་འོད། །མཆེ་བ་ཟླ་བ་ཚེས་པ་བཞིན། །ལྕེ་

ནི་གློག་བཞིན་ལྗིབ་པར་མཛད། །གཡོན་པ་ཁ་དོག་དམར་པོ་སྟེ། །ཚེམས་ཀྱིས་སྒྲོས་ནི་རྣམ་པར་གནོན། །རོལ་པའི་སྟབས་སུ་ལེགས་པར་བཞུགས། །གདུ་བུ་རྣམ་པ་སྣ་ཚོགས་ཀྱིས། །བརྒྱན་པའི་ཕྱག་ནི་ཉི་ཤུ་རྩ་དྲུག་དེ་ལ་ཕྱག་གཉིས་རྩ་བའི་ཕྱག་རྒྱས་སྙིང་གའི་གནས་རྣམ་པར་བརྒྱན་པའོ། །གཡས་པ་གཉིས་ནི་མི་འཇིགས་པ་སྦྱིན་པའོ། །གསུམ་པ་ན་རལ་གྲིའོ། །བཞི་པ་ན་རིན་པོ་ཆེ་སྦྱིན་པའོ། །ལྔ་པ་ན་ཤིང་ཏོག་བཱི་ཛ་པཱུ་རའོ། །དྲུག་པ་ན་མདའ་གསོར་བའོ། །བདུན་པ་ན་དགྲ་སྟའོ། །བརྒྱད་པ་ན་དབྱུག་ཏོའོ། །དགུ་པ་ན་ཐོ་བའོ། །བཅུ་པ་ན་ལྕགས་ཀྱུའོ། །བཅུ་གཅིག་པ་ན་རྡོ་རྗེའོ། །བཅུ་གཉིས་པ་ན་སེ་གོལ་གཏོགས་པའོ། །བཅུ་གསུམ་པ་ན་བགྲང་ཕྲེང་ངོ་། །གཡོན་པ་གཉིས་པ་ན་ཡིད་བཞིན་ནོར་བུའི་རྒྱལ་མཚན་ནོ། །གསུམ་པ་ན་པདྨའོ། །བཞི་པ་ན་རིལ་བ་སྤྱི་བླུགས་སོ། །ལྔ་པ་ན་ཞགས་པའོ། །དྲུག་པ་ན་གཞུའོ། །བདུན་པ་ན་མདུང་ཐུང་ངོ་། །བརྒྱད་པ་ན་འཁོར་ལོའོ། །དགུ་པ་ན་དུང་ངོ་། །བཅུ་པ་ན་བསྡིགས་པའི་མཛུབ་མོའོ། །བཅུ་གཅིག་པ་ན་བུམ་པ་བཟང་པོའོ། །བཅུ་གཉིས་པ་ན་ཐག་མདུང་ངོ་། །བཅུ་གསུམ་པ་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །འོད་ཟེར་དམར་པོའི་དཀྱིལ་འཁོར་ཅན། །པདྨ་ལ་བཞུགས་བསྒོམ་པར་བྱ། །ལ་ཡི་ཞིང་ཅུང་བགོས་པ་ཡི། །སྟེང་དུ་བླ་གོས་གྱོན་པ་སྟེ། །སྣ་ཚོགས་ཚིག་གུ་ན་བཟར་གསོལ། །ཆོ་འཕྲུལ་རྣམ་པ་སྣ་ཚོགས་དང་། །སངས་རྒྱས་རྣམས་ཀྱིས་སྐུ་གཟུགས་འཕྲོ། །སུམ་ཅུའི་ལྷ་རྣམས་ལྟུང་བ་དང་། །བགེགས་རྣམས་ཤིན་ཏུ་འཇིག་སྐྲག་ནས། །ཐལ་མོ་སྦྱོར་བར་བྱེད་པ་སྟེ། །འདི་འདྲ་གང་ཞིག་རྟག་བསྒོམས་ཤིང་། །བསྒྲིམས་ནས་གསང་སྔགས་བརྗོད་པ་དེས། །སངས་རྒྱས་མྱུར་དུ་ཐོབ་གྱུར་ན། །དངོས་གྲུབ་གཞན་ལྟ་ཅི་ཞིག་སྨོས། །ཏིང་འཛིན་ངོ་བོ་ཐོབ་འགྱུར་ཞིང་། །སྡིག་པ་ཀུན་ལས་རྣམ་པར་གྲོལ། །རྒྱལ་བ་མཐའ་ཡས་པའི་ཡེ་ཤེས་སྐུལ་བར་བྱེད་པའི་སྟོབས་ཀྱི་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ར་ཡི་ཡེ་ཤེས་ལས་བསྒྲུབས་པ། །རིན་ཆེན་སྒྲོན་

མ་ཞེས་བྱ་བའི་གཟུགས། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་གསེར་གྱི་མདོག་དང་ལྡན། །ན་ཆུང་དར་ལ་བབ་པའི་ཚད། །ཞལ་ནི་ཅུང་ཟད་བཞད་པ་སྟེ། །ཕྱག་ནི་རིན་ཆེན་གདུ་བུས་གཏམས། །ཕྱག་གཉིས་རིན་ཆེན་ཐལ་མོ་སྟེ། །འོད་ཀྱིས་དཀྱིལ་འཁོར་ཕྲེང་བ་འཁྲུགས། །གཡས་པའི་ཕྱག་ནི་མི་འཇིགས་སྦྱིན། །གསུམ་པ་མདའ་ནི་རྣམ་པར་གསོར། །གཡོན་མཛུབ་མ་རུང་རྣམས་ལ་བསྡིགས། །གསུམ་པ་ཡིས་ནི་གཞུ་ཡང་འཛིན། །འོད་ཟེར་དམར་པོ་ལེགས་པར་འབར། །རོལ་སྟབས་ཐབས་ཀྱི་ཞབས་ཀྱིས་གནོན། །སངས་རྒྱས་སྤྲིན་ནི་འཕྲོ་ཞིང་སྡུད། །ཆོས་འཛིན་ཡིད་དུ་འོང་བ་ཡི། །ལྷ་མོ་འདི་འདྲ་བསྒོམ་པར་བྱ། །སངས་རྒྱས་རིན་ཆེན་སྤྲིན་གྱི་ཡེ་ཤེས་ཀྱིས་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་ཏོ། །བྷྲི་ཡི་ཡེ་ཤེས་ལས་བསྒྲུབས་པ། །འཇིགས་ལས་སྒྲོལ་བ་ཁྲོ་གཉེར་ཅན། །ཞལ་རས་གསུམ་པ་སྤྱན་གསུམ་པ། །སྟོན་ཀའི་ཟླ་བའི་འོད་དང་མཚུངས། །ཕྱག་དྲུག་པདྨ་ལ་བཞུགས་པ། །རོལ་པའི་སྟངས་ལ་བརྩོན་པ་སྟེ། །ཞལ་ནི་ཁྲོ་དང་བཅས་པར་བཞད། །ལེགས་པར་འབར་བའི་རྩེར་ལྟ་ཅན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་བེ་ཅོན་འཛིན་པར་བཤད། །གསུམ་པ་ཡིས་ནི་མདའ་ཡང་གསོར། །གཡོན་པ་བསྡིགས་པའི་མཛུབ་མོ་ཅན། །གཉིས་པ་རིལ་བ་སྤྱི་བླུགས་བསྣམས། །གསུམ་པ་ན་ནི་མཚོན་ཆ་གཞུ། །སངས་རྒྱས་རྣམས་ཀྱི་སྤྲིན་འཕྲོ་ཞིང་། །དེ་བཞིན་གཞན་དག་ལེགས་སྡུད་པའི། །ཉལ་དང་འགྲེང་དང་འདུག་པ་ན། །ལྷ་མོ་འདི་འདྲ་རྟག་ཏུ་བསྒོམ། །འཇིགས་པ་ཐམས་ཅད་དམིགས་པ་མེད་པར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་རྡོ་རྗེ་ལུ་གུ་རྒྱུད། །ཐམས་ཅད་འཆིང་བ་བསྐྱེད་པ་སྟེ། །སེམས་ཅན་མ་རུངས་ཕུང་བར་བྱེད། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་སྔོ་བསངས་གཟུགས་བཟང་མ། །ཞལ་ནི་ཅུང་ཟད་བཞད་པ་མཛད། །ལག་པ་གཡས་ན་རྡོ་རྗེ་སྟེ། །གཉིས་

པ་རྡོ་རྗེ་ལུ་གུ་རྒྱུད། །གསུམ་པ་ན་ནི་མདའ་ཡང་བསྣམས། །གཡོན་པ་བསྡིགས་པའི་མཛུབ་མོ་སྟེ། །གཉིས་པ་ན་ནི་ཞགས་པར་གསུངས། །གསུམ་པ་གཞུ་ཡང་ཐོགས་པར་བརྩོན། །སངས་རྒྱས་རྣམས་ནི་སྤྲིན་འཕྲོ་བ། །རྡོ་རྗེ་ལུ་གུ་རྒྱུད་བསྒོམས་ན། །བྱང་ཆུབ་སྐད་ཅིག་གིས་འཐོབ་ན། །དངོས་གྲུབ་གཞན་ལྟ་ཅི་ཞིག་སྨོས། །རྡོ་རྗེ་སྒྲོག་གི་ཡེ་ཤེས་ཀྱི་རྡོ་རྗེ་ལྟ་བ་ཞེས་བྱ་བའི་ཏིང་ངེ་འཛིན་ཏོ། །མཻ་ཡི་ཡེ་ཤེས་ལས་བསྒྲུབས་པ། །ཐུབ་པའི་སྐྱེས་མཆོག་བྱམས་པ་ནི། །ཞལ་རས་གསུམ་པ་སྤྱན་གསུམ་པ། །དེ་ཡི་འོག་ན་པདྨ་སྟེ། །སེམས་དཔའི་སྐྱིལ་མོ་ཀྲུང་དུ་བཞུགས། །ཕྱག་བཞི་དག་གིས་རྣམ་པར་བརྒྱན། །ཕྱག་གཉིས་ཆོས་འཆད་ཕྱག་རྒྱས་བརྒྱན། །གཡས་པ་ཡི་ནི་ཕྱག་གཉིས་པ། །སེམས་ཅན་སྐྱོབ་པ་མཆོག་འཛིན་མཛད། །གཡོན་པ་ལྷ་རྫས་ཀླུ་ཤིང་གི། །མེ་ཏོག་ཟེའུ་འབྲུའི་མགོ་ལྕོགས་བསྣམས། །སངས་རྒྱས་བྱང་ཆུབ་སེམས་དཔའ་ཡི། །སྤྲིན་ཆེན་དེ་བཞིན་འཕྲོ་བར་མཛད། །བྱམས་པའི་སྟོབས་ཀྱི་ཡེ་ཤེས་ཀྱི་རྡོ་རྗེ་རྣམ་པར་བརྒྱན་པའི་ཏིང་ངེ་འཛིན་ཏོ། །མུྃ་གྱི་ཡེ་ཤེས་ལས་བསྒྲུབས་པ། །གཞོན་ནུ་འཇམ་པ་ཚིག་གི་ལམ། །ཤེས་རབ་ཡེ་ཤེས་མཆོག་ཐོབ་པ། །ཟབ་མོ་ཚུལ་ནི་སྟོན་པ་པོ། །ཞལ་གསུམ་སྤྱན་གསུམ་ཟུར་ཕུད་གསུམ། །གཞོན་ནུ་རྒྱན་གྱིས་བརྒྱན་པ་སྟེ། །ཅོད་པན་བཟང་པོ་མི་འཁྲུགས་ཅན། །མེ་ཏོག་སྣ་ཚོགས་རྣམས་ཀྱིས་བཀླུབས། །འོག་མ་པདྨ་ཆེན་པོ་ལ། །སེམས་དཔའི་སྐྱིལ་མོ་ཀྲུང་དུ་བཞུགས། །འཇོ་སྒེག་ཐབས་ཀྱིས་རོལ་པ་སྟེ། །ཞལ་ནི་ཅུང་ཟད་བཞད་པ་ལ། །དཔའ་བོ་ཆེན་པོ་ཕྱག་དྲུག་པ། །དང་པོ་མི་འཇིགས་སྦྱིན་པར་བྱ། །གཉིས་པ་ན་ནི་རལ་གྲི་ཉིད། །གསུམ་པ་ན་ནི་མདའ་ཡང་གསོར། །དེ་བཞིན་གཡོན་པ་ཤེས་རབ་འཆང་། །གཉིས་པ་ན་ནི་ཨུཏྤལ་ཐོགས། །གསུམ་པ་ན་ནི་གཞུ་ཉིད་དོ། །ཤེས་རབ་ཡེ་ཤེས་མཆོག་གིས་བཀླུབས། །སངས་རྒྱས་རང་

བཞིན་སྤྲིན་གྱི་བསྣམས། །འཕྲོ་བར་སངས་རྒྱས་འདོད་པས་བསྒོམ། །འཇམ་དཔལ་མཆོག་གི་ཤེས་རབ་དང་ཡེ་ཤེས་ཀྱི་རྡོ་རྗེ་སྣང་བ་ཞེས་བྱ་བའི་ཏིང་ངེ་འཛིན་ཏོ། །སྤོས་ཀྱི་གླང་པོ་ཡེ་ཤེས་ཏོག །དེ་བཞིན་དུ་ནི་བཟང་སྐྱོང་དང་། །བློ་གྲོས་རྒྱ་མཚོ་བློ་གྲོས་ནི། །མི་ཟད་པ་དང་སྤོབས་བརྩེགས་ཉིད། །ངན་སོང་ཀུན་སྤོང་མཐུ་ཆེན་ཐོབ། །མྱ་ངན་ཀུན་མུན་འཇོམས་པའི་བློ། །ནོར་བཟངས་དང་ནི་དྲ་བའི་འོད། །དེ་བཞིན་ཟླ་འོད་འོད་དཔག་མེད། །ནམ་མཁའི་མཛོད་དང་སྒྲིབ་ཀུན་སེལ། །དེ་ལྟར་དེ་སོགས་གྲངས་མེད་པའི། །བྱང་ཆུབ་སེམས་དཔའ་སྐྱོབ་པ་ཀུན། །ས་བོན་ཡིག་འབྲུ་རྣམས་ལས་འཁྲུངས། །ཡི་གེ་ཕྱག་རྒྱའི་སྦྱོར་བ་ཅན། །ཞལ་རས་གསུམ་པ་སྤྱན་གསུམ་པ། །སྣ་ཚོགས་ཐབས་ཀྱིས་རོལ་བར་མཛད། །བྱང་ཆུབ་སེམས་དཔའ་འདི་ཡི་རྒྱུ། །གསང་སྔགས་བཟློས་པར་བསྒོམ་པར་བྱ། །མདོག་ལྡན་འདུ་ཞིང་འཕྲོ་མཛད་པ། །རྣལ་འབྱོར་ཅན་གྱིས་རྟག་ཏུ་བསམ། །ཧཱུྃ་གི་ཡེ་ཤེས་ལས་བསྒྲུབས་པ། །གཟི་བརྗིད་ལྡན་པ་འཇམ་དབྱངས་ཀྱི། །གཤིན་རྗེའི་དགྲ་ཞེས་རྣམ་གྲགས་པ། །བསྐལ་བའི་མེ་ལྟར་འབར་བ་སྟེ། །ཆར་སྤྲིན་གྱི་ནི་འོད་དང་འདྲ། །ཞལ་དྲུག་པ་ལ་ཕྱག་དྲུག་པ། །དེ་བཞིན་ཞབས་དྲུག་མིའུ་ཐུང་འདྲ། །གསུས་ཁྱིམ་ཤིན་ཏུ་ཆེ་བ་སྟེ། །དེ་ནི་དྲག་པོ་ཆེན་པོ་ཡིན། །ལྗགས་འདྲིལ་རྡོ་རྗེ་མཆེ་བ་ཅན། །སྦྲུལ་གྱི་རྒྱན་གྱིས་བརྒྱན་པ་སྟེ། །སྟག་ལྤགས་ཀྱིས་ནི་ཤམ་ཐབས་བགོས། །ཪོལ་པའི་སྟབས་ཅན་མ་ཧེ་བཅིབས། །དེ་ཡི་འོག་ཏུ་པདྨ་བྱས། །མི་ཐོད་ཕྲེང་ཅན་སྐྲ་འཁྱིལ་པ། །ཨག་ཙོམ་སེར་ལ་སྒྲ་ཆེན་འབྱིན། །མགོ་ཡི་སྟེང་ནས་མི་འཁྲུགས་པ། །སྐུ་གསུམ་ལ་ནི་རྣམ་པར་བཞུགས། །འཇམ་པའི་དཔལ་གྱིས་རྣམ་པར་བརྒྱན། །དང་པོའི་ཞལ་ནི་རྣམ་པར་བཞད། །གཡས་པ་ལྗགས་ནི་འདྲིལ་བ་སྟེ། །གཡོན་པའི་ཚེམས་ཀྱིས་སྒྲོས་མནན་ཁྲོ། །གཡས་པའི་ཕྱག་ན་རལ་གྲི་སྟེ། །གཉིས་པ་ན་ནི་རྡོ་རྗེ་ཉིད། །གསུམ་

པ་ཡིས་ནི་མདའ་ཡང་གསོར། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ནི་བདུངས་པ་ཡིས། །ཤིན་ཏུ་ལེགས་པར་རྣམ་པར་བརྒྱན། །ལྷ་མོ་ཡིས་ནི་གཡས་ནས་འཁྱུད། །གཉིས་པ་ན་ནི་ཨུཏྤལ་ཐོགས། །གཡོན་པ་ཟླ་བ་ལྟར་སྣང་བ། །པདྨ་དཀར་པོ་ཐོགས་པར་བྱ། །འོག་ཏུ་ལྷ་དང་བགེགས་ཀྱི་རྣམས། །སྡར་མ་བྲེད་ནས་ཕྱག་ཀྱང་འཚལ། །འོད་ཟེར་དམར་པོ་འབར་དང་བཅས། །སངས་རྒྱས་སྤྲིན་རྣམས་འཕྲོ་ཞིང་སྡུད། །རྣལ་འབྱོར་དག་གིས་བསྒོམས་ནས་སུ། །བསྒྲིམས་ནས་གསང་སྔགས་བཟླས་པ་དེ། །འདུག་དང་ཉལ་དང་འཆག་པ་ན། །ལེགས་པར་བསམས་ཏེ་ཀུན་ཟོས་ཤིང་། །འདོད་པ་ལྔ་ལ་ལོངས་སྤྱད་ཀྱང་། །ནམ་མཁའ་ལྟ་བུར་གོས་མི་འགྱུར། །གཤེད་བྱེད་ཐམས་ཅད་རྨོངས་པར་བྱེད་པའི་ཡེ་ཤེས་རྡོ་རྗེ་གཤིན་རྗེ་གསོད་པའི་འདུལ་བ་འཇུག་པ་ཞེས་བྱ་བའི་ཏིང་ངེ་འཛིན་ཏོ། །པྲ་ཡི་ཡེ་ཤེས་ལས་བསྒྲུབས་པ། །ཁྲོ་བོ་གཞན་གྱིས་མི་ཐུབ་པ། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་གིས་ནི་རྣམ་པར་བརྒྱན། །མདོག་སེར་མི་ཐུང་གཟུགས་ཅན་ལ། །འོད་ཟེར་དམར་པོའི་དཀྱིལ་འཁོར་ཅན། །པདྨ་ལ་བཞུགས་རོལ་བའི་སྟབས། །སྦྲུལ་གྱི་རྒྱན་གྱིས་བརྒྱན་པ་ལ། །དང་པོའི་ཞལ་ནི་རྣམ་པར་བཞད། །དེ་བཞིན་གཡས་པ་རྣམ་པར་བསྒྱུར། །གཡོན་པའི་ཚེམས་ཀྱིས་སྒྲོས་ཀྱང་མནན། །སྣ་ཚོགས་ཚུལ་གྱིས་འབར་བ་སྟེ། །ལག་པ་གཡས་པ་རྡོ་རྗེ་ཐོགས། །གཉིས་པ་ན་ནི་དབྱུག་པ་སྟེ། །གསུམ་པ་ན་ནི་མདའ་ཡང་ཐོགས། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ཅན་ཡིན་པར་གསུངས། །སྤྱི་བོའི་སྟེང་ན་མི་འཁྲུགས་པ། །རིམ་བཞིན་འཕྲོ་ཞིང་སྡུད་པ་སྟེ། །འདི་འདྲ་གོམས་པར་བསྒོམ་པར་བྱ། །བཟློས་པས་སངས་རྒྱས་ཉིད་ཀྱང་འཐོབ། །གཞན་གྱིས་མི་ཐུབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཧ་ཡི་ཡེ་ཤེས་ལས་བསྒྲུབས་པ། །ཁྲོ་བོ་པདྨ་མཐར་བྱེད་པ། །ཞལ་

རས་གསུམ་པ་སྤྱན་གསུམ་པ། །ཁ་དོག་དམར་པོ་ཕྱག་བརྒྱད་ཅན། །སྐུ་ནི་སྦྲུལ་གྱིས་དཀྲིས་པ་སྟེ། །པདྨ་ལ་བཞུགས་རོལ་པའི་སྟབས། །ཁྲོ་བོ་ལྟ་བས་གཟིགས་མཛད་པ། །དང་པོ་ཞལ་ནི་རྣམ་པར་བཞད། །གཡས་པ་ལྗགས་ནི་འདྲིལ་བ་སྟེ། །གཡོན་པ་ཚེམས་ཀྱིས་སྒྲོས་མནན་པ། །སྟག་ལྤགས་གསོལ་ཞིང་ཁྲོ་བ་ལ། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ན་ནི་དབྱུག་ཐོ་གསུངས། །གསུམ་པ་ན་ནི་ལྕགས་ཀྱུ་སྟེ། །བཞི་པ་ན་ནི་མདའ་ཡང་གསོར། །གཡོན་པ་བསྡིགས་པའི་མཛུབ་མོ་སྟེ། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་པདྨ་སྟེ། །བཞི་པ་ན་ནི་གཞུ་ཉིད་དོ། །དེ་ཡི་ཅོད་པན་མི་འཁྲུགས་པ། །སངས་རྒྱས་གཟུགས་ནི་མང་པོ་དག །འཕྲོ་ཞིང་འདུ་བར་བསྒོམས་བྱས་ན། །འགྲུབ་པར་འགྱུར་ཏེ་གཞན་དུ་མིན། །རྟ་མཆོག་གི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་ཁྲོ་བོ་བགེགས་ཀྱི་གཤེད། །མེ་ཡི་དཀྱིལ་བཞུགས་སྒྲུབ་པ་སྦྱིན། །ལག་ན་རྡོ་རྗེའི་རྗེས་འབྲངས་པ། །ཞལ་རས་གསུམ་པ་སྤྱན་གསུམ་པ། །བགེགས་རྣམས་འཇོམས་མཛད་ཕྱག་དྲུག་ཅན། །དང་པོའི་ཞལ་ནི་བཞད་པ་སྟེ། །དེ་བཞིན་གཡས་པའི་ཞལ་གདངས་པ། །གཡོན་པ་ཚེམས་ཀྱིས་སྒྲོས་མནན་ཁྲོ། །ཨུཏྤལ་སྔོན་པོའི་འདབ་འདྲའི་མདོག །ཞབས་ཀྱིས་བགེགས་ནི་མནན་པ་སྟེ། །གཉིས་པ་པདྨའི་སྟེང་ན་བཞུགས། །གཡས་ཀྱི་ཕྱག་ན་རལ་གྲི་སྟེ། །གཉིས་པ་ན་ནི་དགྲ་སྟར་གསུངས། །གསུམ་པ་ཡིས་ནི་མདའ་ཡང་གསོར། །གཡོན་པ་སྡིགས་མཛུབ་ཞགས་པ་ཅན། །དེ་བཞིན་གཉིས་པ་ནུ་མ་འཛིན། །གསུམ་པ་ན་ནི་གཞུ་ཡང་གསུངས། །སངས་རྒྱས་རང་བཞིན་སྤྲིན་འཕྲོ་བར། །ཡེ་ཤེས་མཁས་པས་བསྒོམ་པར་བྱ། །བགེགས་རྣམས་ཐམས་ཅད་འདྲལ་བའི་ཡེ་ཤེས་ཀྱི་རྡོ་རྗེས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མི་གཡོ་བྱིས་པའི་གཟུགས་དང་ལྡན། །

ཞལ་རས་གསུམ་པ་སྤྱན་གསུམ་པ། །གཞོན་ནུའི་རྒྱན་གྱིས་བརྒྱན་པ་ལ། །དང་པོའི་ཞལ་ནི་བཞད་པ་སྟེ། །དེ་ཡི་གཡས་པའི་ཞལ་གདངས་པས། །ཁྲག་གིས་བརླན་པའི་ལྗགས་ཀྱང་འདྲིལ། །གཡོན་པ་ཚེམས་ཀྱིས་སྒྲོས་མནན་ཁྲོ། །ཧཱུྃ་གིས་སྙིང་གའི་ཕྱོགས་ཀྱང་བཀང་། །མཐིང་ཤུན་གྱི་ནི་མདོག་ཅན་ཏེ། །རིན་ཆེན་རི་སྟེངས་པདྨ་ལ། །རོལ་པའི་ཞབས་ཀྱིས་སྟབས་སུ་བཞུགས། །ཐུབ་པ་བགེགས་ཀྱི་ཆུ་འཛིན་འཇོམས། །ཕྱག་དྲུག་འབར་བ་འཕྲོ་བ་ཡི། །འོད་བཟང་དམར་པོའི་དཀྱིལ་འཁོར་ན། །གཡས་པའི་ཕྱག་ན་རལ་གྲི་སྟེ། །གཉིས་པ་ན་ནི་རྡོ་རྗེར་གསུངས། །གསུམ་པ་མདའ་ནི་རྣམ་པར་གསོར། །གཡོན་པས་སྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ནི་བདུངས་པ་ལ། །ཚངས་པས་གཟུང་སྟེ་ལྟ་བ་དང་། །སྣ་ཚོགས་མེ་ཏོག་གིས་བཅིངས་པའི། །ཅོད་པན་དང་ནི་དབུ་རྒྱན་ཐོགས། །ཟུར་ཕུད་གཡོན་པ་བུང་བའི་མདོག །མི་འཁྲུགས་པ་ཡིས་རྣམ་པར་བརྒྱན། །སངས་རྒྱས་རང་བཞིན་སྤྲིན་དག་གིས། །ཆོ་འཕྲུལ་ཆེན་པོ་དུ་མ་འཕྲོ། །དེ་ལྟར་རྟག་ཏུ་རྣལ་འབྱོར་གང་། །སྒོམ་པས་སྒོམ་པར་བྱེད་པ་དེ། །བླ་ན་མེད་པའི་བྱང་ཆུབ་ཀྱི། །ཐེམ་སྐས་ལ་ནི་འཛེག་པར་འགྱུར། །དེ་བཞིན་གཤེགས་པ་ཐམས་ཅད་སངས་རྒྱས་ཀྱི་བཀའ་བཞིན་བྱེད་པ་མི་གཡོ་བའི་ཡེ་ཤེས་རྡོ་རྗེ་བསྒྱིངས་པ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་འདོད་པའི་རྒྱལ་པོ་སྟེ། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་པ་ཞེས་བྱ་བར་བསྒྲགས། །དབུ་རྒྱན་སངས་རྒྱས་ཀྱིས་བརྒྱན་པའི། །ཐོར་ཚུགས་ཅོད་པན་བཟང་པོ་ཅན། །དང་པོའི་ཞལ་ནི་བཞད་པ་ལ། །གཡས་པ་ཡིས་ནི་རྣམ་པར་བསྒྱུར། །གཡོན་པ་ཚེམས་ཀྱིས་སྒྲོས་མནན་ཁྲོ། །དཔྲལ་བ་ཁྲོ་གཉེར་རིམ་པ་ཅན། །འབར་བ་ཆར་སྤྲིན་ལྟ་བུའི་མདོག །དཀྱིལ་འཁོར་དམར་པོ་འབར་བ་ཅན། །ཕྱག་གཉིས་འདོད་པའི་ཕྱག་རྒྱར་ལྡན། །གཡས་པ་ན་ནི་རྡོ་རྗེ་གསུངས། །གསུམ་པ་མདའ་

ཡིས་རྣམ་པར་རོལ། །གཡོན་པ་ཡིས་ནི་ནུ་མ་འཛིན། །གསུམ་པའི་ཕྱག་ན་གཞུ་ཡང་བསྣམས། །པདྨ་ལ་བཞུགས་རོལ་པའི་སྟབས། །འོག་ཏུ་བགེགས་ཀྱང་རྣམ་པར་མནན། །སངས་རྒྱས་ལང་ལོང་འཕྲོ་མཛད་པ། །ཏིང་ངེ་འཛིན་གྱིས་བསྒོམས་བྱས་ན། །བླ་ན་མེད་པའི་ཡེ་ཤེས་འཐོབ། །སྙིང་ཐམས་ཅད་འགུགས་པའི་ཡེ་ཤེས་ཀྱི་རྡོ་རྗེ་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །ཁྲོ་བོ་བེ་ཅོན་སྔོན་པོ་ཅན། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་གིས་ནི་རྣམ་པར་བརྒྱན། །དང་པོའི་ཞལ་ནི་འཇོ་སྒེག་བཞད། །དེ་བཞིན་གཡས་པ་རྣམ་པར་གདངས། །གཡོན་པ་ཚེམས་ཀྱིས་སྒྲོས་ཀྱང་མནན། །སྐུ་ནི་ཁ་ཆུ་འདྲ་བ་སྟེ། །ལུས་ནི་སྦྲུལ་གྱིས་རྣམ་པར་བརྒྱན། །སྐྲ་ཚོགས་ལྕང་ལོར་འཁྱིལ་པ་སྟེ། །དབུ་རྒྱན་ལ་ནི་སངས་རྒྱས་བཞུགས། །པདྨ་ལ་བཞུགས་རོལ་སྟབས་ཅན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ན་ནི་བེ་ཅོན་ཉིད། །གསུམ་པ་མཚོན་ཆ་མདའ་དང་ལྡན། །གཡོན་པ་སྡིགས་མཛུབ་ཞགས་པ་སྟེ། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་གཞུ་ཉིད་བསྣམས། །དཀྱིལ་འཁོར་དམར་པོ་འབར་བ་ཅན། །སྦྱོར་བའི་ཡེ་ཤེས་ཀྱིས་བསྐྲུན་པའི། །སངས་རྒྱས་སྤྲིན་ནི་རྟག་ཏུ་འཕྲོ། །བགེགས་ཀྱིས་རྟོག་པའི་ཡེ་ཤེས་རྡོ་རྗེ་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། ཧཱུྃ་ཞེས་གསུངས་པའི་ཁྲོ་བོ་ནི། །ཡེ་ཤེས་དམ་པ་སྟོབས་པོ་ཆེ། །ཞལ་རས་གསུམ་པ་སྤྱན་གསུམ་པ། །ཕྱག་བརྒྱད་ཀྱིས་ནི་རྣམ་པར་བརྒྱན། །སྤྲིན་གྱི་ཁ་དོག་འདྲ་བ་སྟེ། །སྦྲུལ་གྱི་རྒྱན་གྱིས་རྣམ་པར་བརྒྱན། །མིག་དམར་སྐྲ་འབར་གྱེན་དུ་བརྫེས། །མགོ་བོ་ལ་ནི་མི་འཁྲུགས་བཞུགས། །དང་པོའི་ཞལ་ནི་རྣམ་པར་བཞད། །དེ་བཞིན་གཡས་པ་རྣམ་པར་གདངས། །གཡོན་པ་ཚེམས་ཀྱིས་སྒྲོས་མནན་པ། །པདྨ་ལ་བཞུགས་འགྱིང་བག་ཅན། །དྲག་པོའི་ཆམ་རྔམ་སྟང་སྟབས་ཅན། །ཕྱོགས་བཅུའི་ལྷ་རྣམས་ཕུང་བར་མཛད། །འབར་བ་རྣམས་ཀྱིས་ཡོངས་བསྐོར་

བའི། །ཉི་མའི་དཀྱིལ་འཁོར་ནང་ན་བཞུགས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་བེ་ཅོན་ཐོགས་པར་མཚོན། །གསུམ་པ་ཡིས་ནི་རལ་གྲི་གདེངས། །བཞི་པ་མདའ་ཡིས་རྣམ་པར་བརྒྱན། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་ཐོ་བ་ཉིད། །ཕྱག་བཞི་པ་ནི་གཞུ་ཅན་ལ། །སངས་རྒྱས་རང་བཞིན་སྤྲིན་འཕྲོ་བ། །སྒོམ་པ་མཆོག་གིས་བསྒོམ་པར་བྱ། །བསྣོལ་བ་མེད་པའི་ཡེ་ཤེས་རྡོ་རྗེའི་སྟོབས་ཀྱིས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །བྷྲུྃ་གྱི་ཡེ་ཤེས་ལས་བསྒྲུབས་པ། །གཙུག་ཏོར་འཁོར་ལོས་སྒྱུར་བ་སྟེ། །སྐུ་གསུམ་ལྡན་པ་ཞལ་རས་གསུམ། །གསེར་གྱི་མདོག་ཅན་འོད་བཟང་བ། །འདོམ་གང་འོད་ཀྱིས་རྣམ་པར་བརྒྱན། །ཏིང་འཛིན་ཕྱག་རྒྱར་རྣམ་པར་གནས། །རིན་ཆེན་རི་སྟེངས་པདྨ་ལ། །རྡོ་རྗེ་སྐྱིལ་མོ་ཀྲུང་དུ་བཞུགས། །རིགས་ཀྱི་ཡུམ་ནི་བཞི་བོ་རྣམས། །གཟུགས་དང་ཡན་ལག་ཀུན་མདངས་ཅན། །ཞལ་རས་འཇོ་སྒེག་ཚུལ་གྱིས་བརྒྱན། །གོས་དང་རྒྱན་གྱིས་བཀླུབས་པ་སྟེ། །ཆགས་ཕྱིར་སྤྲོ་བའི་རྩོལ་བ་ཅན། །ཕྱག་རྒྱ་རིན་ཆེན་སྙེ་མ་དང་། །རྡོ་རྗེ་པདྨ་ཨུཏྤལ་ལྡན། །ལྷ་མོ་སོ་སོའི་ཕྱོགས་ན་བཞུགས། །གཙུག་ཏོར་འོད་ཟེར་ལྔ་པ་ཅན། །ཀུན་ཏུ་འཁོར་ལོའི་ཕྲེང་བ་དང་། །འཁོར་ལོའི་བར་ན་རྡོ་རྗེ་གནས། །འོད་ཟེར་ཕྲེང་བས་རྣམ་པར་བརྒྱན། །སངས་རྒྱས་རང་བཞིན་སྤྲིན་འཕྲོ་བས། །ནམ་མཁའ་ཐམས་ཅད་འགེངས་པར་མཛད། །བྱང་ཆུབ་སྙིང་པོ་དོན་གཉེར་བས། །འདི་འདྲའི་འཁོར་ལོ་ཅན་སྒོམ་ཞིང་། །བསྒྲིམས་ནས་རྣལ་འབྱོར་བསྒོམས་པ་ཡིས། །རིང་པོར་མི་ཐོགས་འདོད་པ་འཐོབ། །བྱང་ཆུབ་སྙིང་པོ་ཐམས་ཅད་ཀྱི་རྒྱན་གྱི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཛྃ་གྱི་ཡེ་ཤེས་ལས་བསྒྲུབས་པ། །གནོད་སྦྱིན་གནོད་གནས་སྐུ་གསུམ་ཅན། །ཞལ་རས་གསུམ་པ་ཕྱག་གཉིས་ན། །བཱི་ཛ་བཱུ་རི་ནེའུ་ལེ་ཅན། །པདྨའི་གདན་ལ་བཞུགས་པ་འམ། །ཡང་ན་བཟང་པོའི་འདུག་སྟངས་གནས། །ངོས་

ན་རྒྱན་རྣམས་ཐམས་ཅད་ཀྱིས། །བརྒྱན་པའི་གནོད་སྦྱིན་མོ་བཞི་དག །རིན་ཆེན་ཆར་པ་འབེབས་པར་བྱེད། །མགོ་བོའི་སྟེང་ན་སངས་རྒྱས་ལྔ། །དེ་ཡི་ཅོད་པན་བཟང་པོ་ཡི། །གཡོན་ཕྱོགས་རྩེ་ཕྲན་རྒྱན་ཡང་ཆགས། །སངས་རྒྱས་རྣམས་ཀྱི་སྤྲིན་འཕྲོ་ཞིང་། །རིན་ཆེན་ཆར་པ་འབེབས་པར་མཛད། །གང་ཞིག་ནོར་རྫས་འདོད་པ་ཡིས། །གནོད་གནས་འདི་འདྲ་བསྒོམས་བྱས་ན། །དེ་ཡིས་ས་ཆེན་ནོར་རྫས་ཀྱིས། །རིང་པོར་མི་ཐོགས་གང་བར་འགྱུར། །ལག་ན་རྡོ་རྗེས་བདུད་རྩི་ཡི། །ཆུ་ཡང་རྟག་ཏུ་དབུལ་བར་བྱ། །རིན་པོ་ཆེ་སྤྲིན་སྦྱིན་པའི་ཆར་པ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །མ་ཡི་ཡེ་ཤེས་ལས་བསྒྲུབས་པའི། །ཉི་མའི་འོད་ལྟར་འོད་ཟེར་ཅན། །རྟ་བདུན་ལྡན་པའི་ཤིང་རྟར་བཞུགས། །འབར་བའི་དཀྱིལ་འཁོར་སྣང་མཛད་པ། །ཞལ་རས་གསུམ་པ་སྤྱན་གསུམ་ལྡན། །ཕྱག་དྲུག་ཁ་དོག་སེར་པོར་སྣང་། །ཕྱོགས་བཅུ་བསྲུང་བར་བརྩོན་པ་སྟེ། །འཇོ་སྒེག་ཚུལ་དུ་ཞལ་ཡང་བཞད། །ན་ཆུང་རྒྱན་ནི་གཡོ་བ་ཅན། །ཅོད་པན་རྫོགས་པའི་སངས་རྒྱས་ལྔ། །ཐོར་ཚུགས་མེ་ཏོག་རྣམས་ཀྱིས་བརྒྱན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ལ་ནི་ཁབ་སྐུད་བསྣམས། །གསུམ་པ་ན་ནི་མདའ་ཡང་གསོར། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཨ་ཤྭའི་ཡལ་ག་སྟེ། །གསུམ་པ་ན་ནི་གཞུ་ཉིད་དོ། །གཟུགས་བརྙན་མང་པོ་འཕྲོ་བ་ཡིས། །སྡང་བའི་སེམས་ཅན་བཅིང་བ་དང་། །མིག་དང་ཁ་ནི་འདྲུབ་པར་བྱེད། །གསང་སྔགས་བཟླས་བརྗོད་འབད་པ་དག །གལ་ཏེ་བྱང་ཆུབ་མཆོག་འདོད་ན། །ལྷ་མོ་ཧཱུྃ་མཛད་བསྒོམ་པར་བྱ། །འདི་ནི་སྒོམ་པར་བྱེད་པ་ཡིས། །དབང་དུ་སེམས་ཅན་རབ་ཏུ་འགྲོ། །སྡང་བ་རྣམས་ཀྱིས་མི་ཚུགས་པར་བྱེད་པའི་རྡོ་རྗེ་མཆོག་རབ་ཅེས་བྱ་བའི་ཏིང་ངེ་འཛིན་ཏོ། །པ་ཡི་ཡེ་ཤེས་ལས་བསྒྲུབས་པའི། །རིག་པའི་རི་ཁྲོད་ཤིང་ལོ་ཅན། །ཞལ་རས་གསུམ་པ་སྤྱན་གསུམ་པ། །ཞལ་རས་བཞད་ཅིང་ཁྲོ་དང་བཅས། །

རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་གཞོན་ནུ་ཕྱག་དྲུག་མ། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ན་ནི་དགྲ་སྟ་ཉིད། །གསུམ་པ་མདའ་ཡང་རྣམ་པར་གསོར། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཤིང་ལོའི་བམ་པོ་སྟེ། །ཕྱག་གསུམ་པ་ན་གཞུ་ཉིད་དོ། །ཐོར་ཚུགས་མེ་ཏོག་ཕྲེང་བས་བརྒྱན། །དེ་སྟེང་ཁ་དོག་ལྔ་པོ་དག །རབ་ཏུ་འདྲེས་པའི་སངས་རྒྱས་བཞུགས། །མདོག་སེར་པདྨའི་གདན་ལ་བཞུགས། །དཀྱིལ་འཁོར་དམར་པོ་ཆེར་འབར་བས། །ཁྲོ་བོའི་སྤྲིན་འཕྲོ་སྡུད་མཛད་ཅིང་། །གདོན་གང་སྐྱེ་དགུའི་ནང་གནས་པ། །དེ་དག་ཁྲོ་བོའི་མེས་ཀྱང་བསྲེག །ཕྱིར་ཡང་བསྲེགས་ནས་སངས་རྒྱས་ཀྱི། །ཁ་དོག་བདུད་རྩི་ཆར་འབེབས་མཛད། །དེ་འདྲ་རྣལ་འབྱོར་གྱིས་བསྒོམས་ན། །མི་ངས་ཐམས་ཅད་ཞི་བར་མཛད། །ནད་ཐམས་ཅད་ཞི་བར་བྱེད་པའི་ཡེ་ཤེས་ཀྱི་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ཏོ། །ཛ་ཡི་ཡེ་ཤེས་ལས་བསྒྲུབས་པ། །རིག་སྔགས་མཚན་ནི་དུག་སེལ་མ། །སྦྲུལ་མགོ་བདུན་གྱི་གདེངས་ཀ་ཅན། །ནོར་བུ་འབར་བས་བརྒྱན་པ་སྟེ། །ཞལ་རས་གསུམ་པ་སྤྱན་གསུམ་པ། །གཞོན་ནུ་མཚན་ནི་འབར་བ་ཅན། །བཞད་ཅིང་ཁྲོ་དང་བཅས་པ་སྟེ། །སྦྲུལ་གྱི་སྐ་རགས་དག་གིས་བརྒྱན། །ཕྱག་དྲུག་རོལ་བའི་སྟང་སྟབས་ཅན། །མགོ་ཡི་སྟེང་ན་མི་འཁྲུགས་བཞུགས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་རལ་གྲི་ཐོགས་པར་བརྩོན། །ཕྱག་གསུམ་པ་ནི་གར་ཐབས་ཀྱིས། །སྟང་སྟབས་ཚུལ་གྱིས་མདའ་ཡང་གསོར། །གཡོན་པ་སྡིགས་མཛུབ་ཞགས་པ་ཅན། །གཉིས་པ་དུག་གི་མེ་ཏོག་ཅན། །ཕྱག་གསུམ་པ་ན་གཞུ་ཉིད་དོ། །དབུ་རྒྱན་མེ་ཏོག་རྣམས་ཀྱིས་བརྒྱན། །གསེར་མདོག་པདྨའི་གདན་ལ་བཞུགས། །འོད་ནི་དམར་པོའི་དཀྱིལ་འཁོར་ཅན། །ཛ་རྣམས་འཕྲོ་བས་བསྐོར་བ་སྟེ། །ཀུན་ནས་འབར་བ་རྣམས་ཀྱིས་ཁེབས། །སངས་རྒྱས་གཟུགས་བརྙན་འཕྲོ་བ་ཅན། །ཕྱག་བཟང་བུམ་པ་ཟླ་འདྲ་བའི། །ཁ་ནི་

ཛ་ཡིས་རྣམ་བརྒྱན་པས། །དུག་གིས་ཕོག་པ་རྣམས་ལ་ལྡུགས། །རྟག་ཏུ་སྐུ་གསུམ་དུག་སེལ་མ། །དུག་གིས་ཕོག་པ་རྣམས་ལ་བསྒོམ། །དེ་ལྟར་བསྒོམ་པར་བྱས་པ་ཡིས། །རིང་པོར་མི་ཐོགས་བྱང་ཆུབ་འཐོབ། །ཉོན་མོངས་རྣམས་ཀྱི་དུག་སེལ་བ། །གདེངས་ཀའི་དབང་པོ་རྡོ་རྗེ་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཏོ། །ཏྲི་ཡི་ཡེ་ཤེས་ལས་བསྒྲུབས་པ། །སྐུ་ཆེན་ཧ་ལ་ཧ་ལ་སྟེ། །ཞལ་རས་གསུམ་པ་སྤྱན་གསུམ་པ། །ཐོར་ཚུགས་ཅོད་པན་རྣམས་ཀྱིས་རྒྱན། །ཟླ་བ་ཚེས་པ་བསྣམས་པའི་ལྷ། །དབུ་རྒྱན་ཐོད་པ་དག་གིས་བརྒྱན། །ཐོར་ཚུགས་རྒྱལ་པོའི་སྐུ་གཟུགས་བཞུགས། །རྒྱན་རྣམས་ཀུན་གྱིས་བརྒྱན་པ་སྟེ། །པདྨ་དཀར་པོ་ལྟ་བུར་སྣང་། །སེམས་སྟོབས་ལྡན་པའི་འཇོ་ཚུལ་ཅན། །ཕྱག་བརྒྱད་ཞལ་ཡང་བཞད་པ་སྟེ། །སྨད་གཡོགས་སྟག་གི་པགས་པ་མནབས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་བགྲང་ནོར་ཕྲེང་བ་ཅན། །གསུམ་པ་ཡིས་ནི་མདའ་ཡང་གསོར། །གཡོན་པ་པདྨས་རྣམ་པར་བརྒྱན། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་གཞུ་ཉིད་དོ། །གཡས་པ་མདུང་རྩེ་གསུམ་པ་ལ། །སྦྲུལ་གྱིས་ཡོངས་སུ་དཀྲིས་པ་སྟེ། །གཡོན་ན་ཐོད་པ་དྲི་ཞིམ་པའི། །མེ་ཏོག་སྣ་ཚོགས་ཀྱིས་བཀང་བ། །པདྨ་དམར་པོ་ལ་བཞུགས་པ། །རོལ་པའི་སྟང་སྟབས་ཚུལ་དུ་གནས། །རིན་ཆེན་རི་ཕུག་ནང་བཞུགས་པར། །རྣལ་འབྱོར་སེམས་དཔས་བསྒོམ་པར་བྱ། །སངས་རྒྱས་རང་བཞིན་གཟུགས་དང་ནི། །ཆོ་འཕྲུལ་ཆེན་པོ་སྣ་ཚོགས་འབྱུང་། །རྣམ་པར་མི་རྟོག་ཏིང་འཛིན་གྱིས། །ཁ་ཟས་ཐམས་ཅད་ཟ་བྱེད་ཅིང་། །ནང་གི་སྔགས་པས་སྔགས་བརྗོད་ཅིང་། །རིམ་བཞིན་རྣལ་འབྱོར་གྱིས་བསྒོམས་ན། །བྱང་ཆུབ་མྱུར་དུ་ཐོབ་འགྱུར་ཞིང་། །བླ་ན་མེད་པའི་བདེ་བ་འདྲེན། །འདོད་པ་ཐམས་ཅད་རབ་བསྒྲུབ་པ། །ཧ་ལ་ཧ་ལ་ཡོངས་སུ་མཉེས་པར་བྱེད་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ས་ཡི་ཡེ་ཤེས་ལས་བསྒྲུབས་

པ། །སྟོང་ཆེན་རབ་ཏུ་འཇོམས་མཛད་པའི། །ལྷ་མོ་ནད་ཀུན་འཕྲོག་མ་སྟེ། །སྡང་བའི་སེམས་ཅན་འཇོམས་མཛད་མ། །ཕྱག་སྟོང་ལྡན་ཞིང་དབུ་སྟོང་ལ། །སྤྱན་གསུམ་དག་གིས་རྣམ་པར་བརྒྱན། །བརྩོན་ཆེན་ཕྱག་བརྒྱད་ཁྲོ་བ་དང་། །སྟེག་པའི་སྟབས་ཀྱིས་དགོངས་པ་ཅན། །ཕྱག་གཡས་མཆོད་སྦྱིན་ལྷ་རྫས་ཀྱི། །རལ་གྲི་ལྕགས་ཀྱུ་མདའ་དང་ལྡན། །ཕྱག་གཡོན་པདྨོ་རྡོ་རྗེ་ནོར། །ཞགས་པ་གཞུ་དང་སྟ་རེ་ཅན། །མདོག་དམར་ཞལ་རས་བཞི་པ་སྟེ། །བགེགས་སྟོང་འཇོམས་པར་མཛད་པ་ཡིན། །རང་གི་རྣལ་འབྱོར་ལ་བརྩོན་པས། །ནམ་མཁའི་མཐའ་གཏུགས་འཇུག་ཅིང་སྤྲོ། །གླང་པོ་རྟ་དང་སྐྱེས་པ་དག །ཟ་བར་མཛད་མ་ཕྲེང་བ་ཅན། །དེ་ཡི་ལས་ཀྱིས་བསྐུལ་བ་ཡི། །གསང་སྔགས་དཔའ་བོས་གདོན་པར་བྱ། །རྣལ་འབྱོར་དབང་ཕྱུག་ལས་འདོད་པས། །འདི་བྱས་པས་ནི་སྲུང་བར་འགྱུར། །དཔུང་ཆེན་པོ་ལ་རྣམ་པར་ལྟ་བ་ཐམས་ཅད་སྲུང་བ་སྟོབས་ཀྱི་མཆོག་སྟོང་ཆེན་པོ་རྣམ་པར་འཇོམས་པའི་ཡེ་ཤེས་ཀྱིས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དྷྭཾ་ཞེས་བྱ་བས་བསྐྱེད་པ་ཡི། །བསྡིགས་པའི་མཛུབ་མོའི་ཕྱག་རྒྱ་ཅན། །དྲག་མོ་ཆེན་མོ་ཞལ་བཞི་པ། །སྤྱན་གསུམ་ཕྱག་བརྒྱད་ཀྱིས་རྣམ་བརྒྱན། །རལ་གྲི་གཏུན་ཤིང་འཁོར་ལོ་མདའ། །མདུང་རྩེ་གསུམ་པ་རྡོ་རྗེ་གཞུ། །ཆོམ་རྐུན་མཛུབ་མོས་བསྡིགས་པ་སྟེ། །རྡོ་རྗེ་རོ་ལངས་འབྱུང་བ་དག ། མཐོང་བས་དཔུང་རྣམས་བཅོམ་གཏོར་བས། །ལྷ་མོ་རྟག་ཏུ་བསྒོམས་ན་ནི། །རིང་པོར་མི་ཐོགས་བྱང་ཆུབ་འཐོབ། །འཇིག་རྟེན་གསུམ་རྣམ་པར་འཇོམས་པ་ལ་མཁས་པ་མཆོག་གི་རྩེ་མོ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །པྲ་ཡི་ཡེ་ཤེས་ལས་བསྒྲུབས་པ། །སྟོབས་ཆེན་ཕ་རོལ་གནོན་མཛད་མ། །སྤྱན་གསུམ་ཕྱག་བརྒྱད་གཡས་པ་ན། །རལ་གྲི་འཁོར་ལོ་མདུང་རྩེ་གསུམ། །མདའ་ཡིས་རྣམ་བརྒྱན་ཕྱག་གཡོན་ན། །རྡོ་རྗེ་ཞགས་པ་དགྲ་སྟ་གཞུ། །བསྣམས་པས་སྡང་བའི་བགེགས་ལྟུང་མཛད། །བུ་མི་

འཚོ་དང་མོ་ཤམ་དག །གསང་བའི་དཀྱིལ་འཁོར་བཅུ་གནས་སུ། །ལྷ་རྣམས་ཀུན་གྱི་བུམ་པ་འཛིན། །སློབ་དཔོན་གྱིས་ནི་དབང་བསྐུར་ཞིང་། །དེ་ཡི་མངལ་དུ་བྱིས་པ་ནི། །འཇམ་པའི་གཟུགས་ཅན་འཇུག་པར་བསམ། །ཞགས་པའི་ཕྱག་རྒྱས་མཚན་ངན་ནས། །སྐྱེས་པ་གཟུགས་ཅན་འབྱུང་བ་དང་། །དྲན་པ་ཡིས་ནི་བྲལ་ནས་ཀྱང་། །མངལ་ནི་བསོད་ནམས་དག་གིས་སྤེལ། །མངལ་ཐམས་ཅད་རྣམ་པར་ལྟ་བ་སོ་སོ་འབྲང་མའི་ཡེ་ཤེས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བ་ཡི་ཡེ་ཤེས་རོལ་པས་བསྐྲུན། །ལྷ་མོ་ནོར་གྱི་བློ་གྲོས་མ། །གཟི་ཆེན་གསེར་གྱི་མདོག་ཅན་ལ། །ཕྱག་དྲུག་ལང་ཚོ་དར་ལ་བབ། །རྒྱན་རྣམས་ཀུན་གྱིས་བརྒྱན་པ་སྟེ། །འཇོ་སྒེག་ཐབས་བཅས་འབར་བ་སྟེ། །དེ་ཡི་ཕྱག་གཡས་མཆོག་སྦྱིན་མཛད། །གཉིས་པས་འབྲུ་ཡི་སྙེ་མ་དང་། །གསུམ་པ་ཡིས་ནི་མདའ་ཡང་གསོར། །ཕྱག་གཡོན་ཡིད་བཞིན་ནོར་བུ་དང་། །རིན་ཆེན་ཆར་འབེབས་གཞུ་ཡང་འཛིན། །གྲོགས་མོའི་སྐྱེ་བོས་ཡོངས་བསྐོར་ཅིང་། །མངག་གཞུག་གནོད་སྦྱིན་མོ་ཡི་གཟུགས། །རིན་ཆེན་ཆར་པ་འབེབས་པ་དང་། །ནོར་ཀུན་གྱི་ནི་ཆར་པ་ཡང་། །འབེབས་པར་བྱེད་པ་བསམ་པར་བྱ། །ནོར་གྱི་བློ་གྲོས་ཆེན་མོ་འདི། །དེ་ལྟར་སྔགས་པས་བསྒོམས་ན་དེས། །དཔག་ཚད་བདུན་ནི་རྒྱས་པར་ཡང་། །ནོར་གྱི་ཆར་གྱིས་ཁྱབ་པར་མཛད། །བྱང་ཆུབ་སྦྱིན་མཆོག་དམ་པ་མ། །དེ་ལྟར་རྣལ་འབྱོར་བདག་ཉིད་བསྒོམ། །ནོར་གྱི་རྒྱུན་གྱི་ཆར་རབ་ཏུ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། བི་ཡི་ཡེ་ཤེས་ལས་བསྒྲུབས་པ། །སྲིན་མོ་འབར་བའི་གློག་ཕྲེང་ཅན། །མིང་ནི་དངུལ་དཀར་ལས་སྐྱེས་མོ། །སྟོབས་མོ་ཆེ་ལ་ཕ་རོལ་གནོན། །གསུས་འཕྱང་མོ་ལ་མཆེ་གཙིགས་མ། །སྐྲ་སེར་ཁམ་པ་གྱེན་དུ་བརྫེས། །ཐོར་ཚུགས་ཅོད་པན་གྱིས་བརྒྱན་པ། །སྤྱི་བོ་ལ་ནི་མི་འཁྲུགས་བཞུགས། །བཅུ་གཉིས་དབུ་དང་བཅྭ་བརྒྱད་ཕྱག །སྤྱན་ནི་གསུམ་གསུམ་ཐོད་ཕྲེང་ལྡན། །དྲག་མོ་ལག་

ན་རཀྟ་ཡིས། །བཀང་བའི་ཐོད་པ་ཐོགས་པ་སྟེ། །སྨད་གཡོགས་སེང་གེའི་པགས་པས་གཡོགས། །སྦྲུལ་གྱིས་མཆོད་ཕྱིར་ཐོགས་པ་ཅན། །རལ་གྲི་ལྕགས་ཀྱུ་འཁོར་ལོ་དང་། །གཏུན་ཤིང་རྩེ་གསུམ་དྲིལ་བུ་དང་། །བ་དན་ལྟག་དབྱུག་མདུང་མཆོག་སྦྱིན། །གཞུ་མདའ་མདུང་ཐུང་བེ་ཅོན་དང་། །ཞགས་པ་དགྲ་སྟ་ཐོ་བ་ཐོགས། །རྒྱན་རྣམས་ཀྱིས་ནི་ལུས་ལ་བརྒྱན། །མདོག་ནག་རོལ་པའི་སྟབས་ཀྱིས་ནི། །པདྨའི་གདན་བཞུགས་སྡང་བ་དག །འདུལ་བ་ཞེས་བརྗོད་འདི་ལྟ་བུ། །རྟག་ཏུ་ཧཱུྃ་གིས་ཧཱུྃ་མཛད་པ། །བཟླས་བརྗོད་ཡང་དག་ལྡན་པར་བསྒོམ། །སེམས་ཅན་ཀུན་དོན་ཚོགས་པ་ཡི། །བྱང་ཆུབ་རིང་བོར་མི་ཐོགས་འཐོབ། །སེམས་ཅན་ཐམས་ཅད་འཆིང་བར་བྱེད་པའི་མཆོག་རང་བྱང་ཆུབ་ཀྱི་སྙིང་པོར་རྣམ་པར་རྒྱལ་བའི་སྟོབས་ཞེས་བྱ་བའི་ཏིང་ངེ་འཛིན་ཏོ། །ཀྵིཾ་ཞེས་བྱ་བས་བསྒོམ་པའི་གཟུགས། །རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་གཞོན་ནུ་འཇོ་ཚུལ་ཅན། །མགོ་བོ་སྐྲ་ཚུགས་ཕྱེད་དུ་གཟུང་། །དེ་བཞིན་དུ་ནི་སྟོད་གཡོགས་ཀྱང་། །ལ་དཀར་སེང་བ་བགོས་པ་སྟེ། །དེ་ལ་ཁ་དོག་ལྔ་པ་ཡི། །མེ་ཏོག་འཕྲུལ་པ་རྣམས་ཀྱིས་བརྒྱན། །གསེར་གྱི་མདོག་ཅན་བཞིན་འཛུམ་པ། །ཕྱེད་ཟུར་བས་ནི་རྣམ་པར་རོལ། །དཔག་བསམ་ཤིང་གིས་བརྒྱན་པ་ཡི། །རིན་ཆེན་རི་ལ་ལེགས་པར་བཞུགས། །འཇམ་པའི་ཁྲོ་བོ་རྡོ་རྗེ་ཡིས། །དེ་ཡི་མགོ་བོ་མནན་ནས་བཞུགས། །ཐ་མ་ཐོག་ཐག་གནོད་སྦྱིན་མོས། །ནམ་མཁའ་གང་བར་བསྒོམ་པར་བྱ། །གནོད་སྦྱིན་མོ་ཐམས་ཅད་སྒྲུབ་པའི་མཆོག་རབ་ཅེས་བྱ་བའི་ཏིང་ངེ་འཛིན་ཏོ། །སྔགས་ལ་ཨོྃ་ཨཱཿཧཱུྃ། ཡི་གེ་གསུམ་པ་མིག་གསུམ་གཟུགས། །ཁྱབ་འཇུག་ལྷ་ཆེན་མེས་པོ་སྟེ། །གདོང་གསུམ་རང་གི་མཚོན་ཐོགས་ལ། །རྡོ་རྗེ་ཧཱུྃ་མཛད་ཀྱིས་བསྐུལ་ཅིང་། །རྡོ་རྗེ་ཏིང་ངེ་འཛིན་བསྒོམས་ནས། །མོད་ལ་དངོས་གྲུབ་ཐོབ་པར་འགྱུར། །འཇིག་རྟེན་ཐམས་ཅད་གྲུབ་པ་མིག་གསུམ་རྣམ་པར་རོལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །གཞན་ཡང་གསང་སྔགས་ཡི་གེ་ཡི། །

ས་བོན་གང་གིས་སྦྱར་བྱས་ཏེ། །རྡོ་རྗེ་ཡིག་འབྲུ་རྣམས་བསྒོམས་ན། །དེ་དག་མ་བསྒྲིམས་བཞིན་དུ་འགྲུབ། །འཕྲོག་མ་འཕྲོག་བྱེད་ལས་སྐྱེས་པའི། །བུ་ནི་ལྔ་བརྒྱ་པོ་རྣམས་དང་། །ལྔ་རྩེན་དང་ནི་དཔལ་ཅན་མ། །མྱུར་བ་ཉིད་དུ་འགྲུབ་པར་འགྱུར། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཏིང་ངེ་འཛིན་རིམ་པར་ཕྱེ་བའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པས། དེ་བཞིན་གཤེགས་པ་ཐམས་ཅད་ལ་ཞི་བར་ལྟ་བ་རྡུལ་དང་བྲལ་བའི་མཆོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་ལས་སྣ་ཚོགས་ཀྱི་ཡེ་ཤེས་བསྐྱེད་པར་མཛད་པ་འདི་དམ་ཚིག་གསུམ་གྱི་རྡོ་རྗེ་ལས་ཕྱུང་ངོ་། །ཨོྃ་བྷ་ག་བ་ཏཱི་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦྦ་ཨརྠ་སཱ་དྷ་ནི་སྭཱ་ཧཱ། དེ་ནས་ལས་ཐམས་ཅད་རབ་ཏུ་རྫོགས་པར་བྱེད་པ་འདི་གསུངས་པ་ཙམ་གྱིས། སངས་རྒྱས་རྣམས་ནི་ཐམས་ཅད་དང་། །བྱང་ཆུབ་སེམས་དཔའ་མཁས་རྣམས་དགྱེས། །བདུད་ཀྱི་དཔུང་རྣམས་འདར་འགྱུར་ཏེ། །སངས་རྒྱས་རྡོ་རྗེ་རྗེས་དྲན་བྱེད། །ཞི་བ་སངས་རྒྱས་རྣམས་ཀྱི་ཡུམ། །རྡོ་རྗེ་དམ་ཚིག་གིས་བསྐུལ་ན། །ཤི་བ་རྣམས་ལ་སྲོག་སྦྱིན་མཛད། །མ་གྲུབ་པ་རྣམས་གྲུབ་པར་སྩོལ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པ་སྐུ་གསུམ་རྡོ་རྗེ་འབར་བའི་མཆོག་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་འཆང་མཆོག་ཐམས་ཅད་སྐྱེད་པའི་ཡུམ་རྡོ་རྗེ་དཀྱིལ་འཁོར་ཐམས་ཅད་ཀྱི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་འདི་ཕྱུང་ངོ་། །ཨོྃ་ཤཾ་ཀ་རེ། ཤཱནྟི་ཀ་རི། གྷུནྚ་གྷུཊྚ་གྷུཊྚི་ནི་བྷཱ་ཊ་ཡ་གྷུཊྚི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །རྡོ་རྗེ་གསུམ་ལས་སྐྱེས་གྱུར་པ། །ཐམས་ཅད་ཀྱིས་ནི་མིག་ཕྱེ་ནས། །རྡོ་རྗེ་ཤུགས་ནི་རྗེས་དྲན་གྱུར། །སྒྲུབ་པ་ཐམས་ཅད་སྲུང་མཛད་མ། །དེ་བཞིན་ལས་རྣམས་སྒྲུབ་པ་ཡིན། །སྡིག་པ་ཐམས་ཅད་འཇོམས་མ་སྟེ། །ཞི་དང་རྒྱས་དང་འཕེལ་མཛད་མའོ། །དེ་ནས་བཅོམ་ལྡན་འདས་རྣམ་པར་སྣང་

མཛད་ཀྱིས་འདོད་ཆགས་ཆེན་པོས་ཞེན་པ་པདྨ་གར་གྱི་སྟང་སྟབས་ཐུགས་ཀྱི་རྡོ་རྗེ་གསུམ་གྱིས་རྣམ་པར་འཐོར་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་ཐམས་ཅད་འཛིན་པ་མཆོག་གི་ཡུམ་འདི་རྡོ་རྗེ་གསུམ་རྣམས་ལས་ཕྱུང་ངོ་། །ཨོཾ་ཀ་ཊེ་བི་ཀ་ཊེ་ནི་ཀ་ཊེ། ཀ་ཊྃ་ཀ་ཊེ་སྭཱ་ཧཱ། དེ་ནས་ཆོས་ཀྱི་རྒྱལ་མཚན་མཆོག །དམ་པ་འདི་ནི་གསུངས་ཙམ་གྱིས། །ཏིང་ངེ་འཛིན་གྱིས་མིག་ཕྱེ་ནས། །རྡོ་རྗེ་པདྨ་རྗེས་དྲན་བྱེད། །རྒྱས་པ་ཆེན་པོ་ཡུམ་ཡིན་ཏེ། །ཆོས་མཛོད་རྣམ་པར་འཕེལ་མཛད་མ། །བསྒོམས་ཤིང་བསྟེན་ཏེ་བཟླས་བརྗོད་ན། །རྒྱ་ཆེར་སྲུང་བར་མཛད་པ་ཡིན། །དེ་ནས་བཅོམ་ལྡན་འདས་ཀྱིས་ཐམས་ཅད་དབང་དུ་བྱ་བ་ཁོང་དུ་ཆུད་པས། རྡོ་རྗེ་གསུམ་མཉམ་པ་ཉིད་ཀྱིས་དགའ་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡེ་ཤེས་ལ་འཇུག་པར་བྱེད་པ་སྣ་ཚོགས་ཐམས་ཅད་འཆང་བའི་ཡུམ་གྱི་སྒྲོལ་མ་འདི་གསུངས་སོ། །ཨོྃ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཀུན་དང་སྲས་ཀྱི་རྣམས། །སྤྱན་ཕྱེད་རྣམ་པར་གདངས་ནས་སུ། །ཡེ་ཤེས་རྡོ་རྗེ་ལྡན་པར་དྲན། །ལྷ་མོ་བཟླས་བརྗོད་བྱས་ཙམ་གྱིས། །སྐྱེ་དགུ་རྣམས་ནི་མངག་གཞུག་འགྱུར། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་གི་ཡེ་ཤེས་ལ་འཇུག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་རྡོ་རྗེ་གསུམ་ལས་ཕྱུང་ངོ་། །ན་མཿས་མནྟ་བུད་དྷཱ་ནཱྃ། ཨོྃ་ཁ་ཁ་ཁཱ་ཧི་ཁཱ་ཧི། སརྦ་དུཥྚ་སཏྭ་ད་མ་ཀ་ཨ་སི་མུ་ས་ལ་པ་རྴུ་པཱ་ཤ་ཧསྟ། ཙ་ཏུ་ར་མུ་ཁ། ཙ་ཏུར་བྷུ་ཛ། ཁཊྩར་ཎ། ཨཱ་གཙྪ། ཨཱ་གཙྪ། སརྦྦ་དུཥྚ་པྲཱཎཱ་ཨ་པ་ཧཱ་རི་ཎེ། མ་ཧཱ་བི་གྷྣཱ་གྷཱ་ཏ་ཀ །བི་ཀྲྀ་[ཏ་]ཨཱ་ན་ན། སརྦྦ་བྷཱུ་ཏ་བྷ་ཡྃ་ཀ་ར། ཨཊྚཱཊྚ་ཧཱ་ས་ནཱ་དི་ན། བྱཱ་གྷཱ་ཙར་མ་ནི་བཱ་ས་ན། ཀུ་རུ་ཀུ་རུ། སརྦྦ་ཀརྨཱ་ཎི། ཚིནྡྷ། ཚིནྡྷ། སརྦྦ་མཱནྟྲཱ་ནན། བྷིནྡྷ། བྷིནྡྷ། པ་ར་མུ་དྲཱ་ན། ཨཱ་ཀརྵ་ཡ། ཨཱ་ཀརྵ་ཡ། སརྦ་བྷཱུ་ཏཱ་ན། མ་ཐ་མ་ཐ། ནི་རྨ་ཐ་ནི་རྨ་ཐ།སརྦ་དུཥྚཱཾ་པྲ་བི་ཤ་ཡ། པྲ་བི་ཤ་ཡ། མཎྜལ་མ་དྷྱ་བཻ་བ་ཤྭ་ཏ། ཛཱི་

བི་ཏཱན་ཏ་ཀ་ར། ཀུ་རུ་ཀུ་རུ། མ་མ་ཀཱརྱཾ། ད་ཧ་ད་ཧ། པ་ཙ་པ་ཙ། མཱ་བི་ལ་མཱ། མཱ་བི་ལ་མཱ། ས་མ་ཡ་མ་ནུ་སྨ་ར། ཧཱུྃ་ཧཱུྃ། ཕཊ་ཕཊ། བི་སྥོ་ཊ་ཡ། བི་སྥོ་ཊ་ཡ། སརྦ་ནཱ་ཤ་ཡ་རི་པཱ་ན། ཀ་ར་ཀ་ར། [བིགྲཾ་]སརྦ་ཨཱ་ཤཱ་པ་རི་པཱུ་ར་ཀ །ཧེ་ཧེ་བྷ་ག་བཱ་ན། ཀིཉྩི་རཱ་ཡ་སི། མ་མ་སརྦ་ཨརྠ་སཱ་དྷ་ཡ་སྭཱ་ཧཱ། དེ་ནས་ཁྲོ་བོ་འདི་གསུངས་པས། །སངས་རྒྱས་བྱང་ཆུབ་སེམས་མཁས་ཀུན། །འདར་ཞིང་འཇིགས་པ་སྐྱེས་གྱུར་ནས། །གཙོ་བོ་རྡོ་རྗེ་རྣམ་སྣང་མཛད། །རྡོ་རྗེ་ར་བ་དྲ་བ་ཡིན། །ཡེ་ཤེས་སྣ་ཚོགས་ཅན་ལ་ལྟ། །སྲུབས་གཅིག་པའམ་སྲུབས་གཉིས་པའི། །ཐོད་པ་བཟང་པོ་རྙིང་པ་དང་། །རྐང་རྗེས་ས་ཡི་ཆོ་ག་ལ། །ལྷ་མོ་བཞི་པའི་སྦྱོར་བ་དང་། །སངས་རྒྱས་ལྔ་ཡིས་བྱིན་རླབས་ཏེ། །སྐུ་གསུམ་དབྱེར་མེད་བསྒོམས་ནས་སུ། །མྱུར་བར་ཁུགས་ཀྱི་བར་དུ་ནི། །རྐང་པས་མནན་ཏེ་བཟླས་བརྗོད་བྱ། །ཞེས་བཅོམ་ལྡན་འདས་རྡོ་རྗེ་རྣམ་པར་སྣང་མཛད་ཆེན་པོས་བཀའ་སྩལ་ཏོ། །དེ་ནས་བཅོམ་ལྡན་འདས་ཀྱིས་ཡེ་ཤེས་ཀྱི་རྡོ་རྗེ་གདོན་མི་ཟ་བའི་མཆོག་སྤྲིན་ཆེན་པོ་ནམ་མཁའི་རྡོ་རྗེ་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་གསུམ་རྣམས་ལས་སྙིང་པོ་འདི་གསུངས་སོ། །ན་མཿས་མནྟ་བུདྡྷཱ་ནཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དྃཥྚྲོཏྐ་ཊ་བྷཻ་ར་བཱ་ཡ། ཨ་སི་མུ་ས་ལ། པ་ར་ཤུ་བཱ་ཤ་ཧསྟཱ་ཡ། ཨོྃ་ཨ་མྲྀ་ཏ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ། བི་སྥོ་ཊ་ཡ། སརྦྦ་བིགྷྣཱ་བི་ནཱ་ཡ་ཀཱ་ན། མ་ཧཱ་ག་ཎ་པ་ཏ། ཛཱི་བི་ཏཱནྟྲ་ཀ་རཱ་ཡ་སྭཱ་ཧཱ། ཁྲོ་བོ་ཆེན་པོ་གསུངས་པ་ཡིས། །གྲགས་ཆེན་སངས་རྒྱས་ཐམས་ཅད་ནི། །ཡིད་ཕྱུང་ནས་ནི་སྐྲག་པར་འགྱུར། །ལོག་འདྲེན་རྣམས་དང་བགེགས་རྣམས་འདར། །སྐུ་གསུམ་ཡེ་ཤེས་མཆོག་མངའ་བའི། །རྡོ་རྗེ་རྣམ་སྣང་མཛད་པ་དྲན། །དེ་ཡི་རྐང་རྗེས་ས་དང་ནི། །རླུང་གིས་གཙུབས་པའི་ཤིང་ལོ་ལ། །ཁྲོ་བོའི་འཁོར་ལོར་གཟིར་ནས་སུ། །ཚོགས་བདག་རྐང་པའི་དྲུང་དུ་བཞུག། །ཧཱུྃ་དང་ཕཊ་ཀྱིས་བསྐུལ་ནས་སུ། །བསྐྲད་པའི་སྦྱོར་བ་བྱས་ན་ནི། །

སངས་རྒྱས་རྡོ་རྗེ་ཅན་ཡང་སྐྲོད། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་འཕྲོ་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཞེས་བྱ་བའི་ཁྲོ་བོ་ཆེན་པོ་སྐུ་གསུམ་རྣམས་ལས་ཕྱུང་ངོ་། །ན་མཿས་མནྟ་ཀཱ་ཡ་བཱ་ཀ་ཙིཏྟ་བཛྲཱ་ཎཱཾ། ཨོྃ་ཧཱུྃ་ཛི་ན་རི་ཏིཊྚ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། །དེ་ནས་ཁྲོ་བོ་འདི་བརྗོད་པས། །སངས་རྒྱས་བྱང་ཆུབ་སེམས་དཔའ་རྣམས། །འཇིགས་པར་གྱུར་ཅིང་སྐྲག་གྱུར་ནས། །གཙོ་བོ་རྣམ་སྣང་མཛད་པ་དྲན། །སྲིན་པོ་འབྱུང་པོ་དང་མཁའ་འགྲོ། །སྐེམ་བྱེད་གདོན་རྣམས་གཟིར་བ་ལ། །རྡོ་རྗེ་གཟིར་བའི་སྦྱོར་བ་ཡིས། །ཧཱུྃ་ཙམ་གྱིས་ཀྱང་ལས་བྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མཐའ་ཡས་ཀྱིས་ཡོན་ཏན་རིན་པོ་ཆེ་དཔག་ཏུ་མེད་པ་ཀུན་ནས་སྡུད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་པདྨའི་ཁྲོ་བོ་ཆེན་པོ་འདི་སྐུ་གསུམ་རྣམས་ལས་ཕྱུང་ངོ་། །ན་མཿས་མནྟ་བུདྡྷཱ་ཎཱཾ། ཨོཾ་ཧཱུྃ་ཧཱུྃ་ཧཱུྃ་ཏ་རུ་ལ། བི་རུ་ལ། སརྦ་བི་ཥ་གྷཱ་ཏ་ཀ། ཛྭ་ལི་ཏ། བི་སྥུ་ལིཾ་ག །ཨཊྚཱ་ཊྚ་ཧཱ་ས། ནཱ་དེ་ནི། ཀེ་ཥ་རི་ས་ཊཱ་ཊོ་པ་ཊྃ་ཀཱ་ར། བཛྲ་ཁུ་ར། ནིར་གྷཱ་ཏ་ན། ཙ་ལེ་ཏ་བ་སུ་དྷ་ཏ་ལ་ནི་ཤྭཱ་ས་མཱ་རུ་ཏོ་ཏིཀྵ་པྟ་དྷཱ་ར་ཎཱི་དྷ་ར། བྷཱི་ཥ་ཎ་ཨཊྚཱ་ཊྚ་ཧཱ་ས། ཨ་པཱ་རི་མི་ཏཱ། བ་ལ་པ་རཱ་ཀྲ་མ། ཨཱརྱ་ག་ཎ་བྷཱི་ཏ་བྷཱུཏ་ག་ཎ། [ཨཎྷྱུ་]ཥི་ཏ། བུདྷྱ་བུདྷྱ། ཧ་ཡ་གྲཱི་བ། ཁཱ་ད་ཁཱ་ད། པ་ར་མནྟྲཱ་ནཱ། ཚིནྡྷ་ཚིནྡྷ། བིྷནྔྷ་བྷིནྔྷ། སིདྡྷིམྨེ། ཨ་དྷིཥྛ་ཏེ་ཨཱ་བི་ཥ་ཡ་ཨཱ་བེ་ཥ་ཡ། བཛྲ་སརྦྦ་ཛྭ་ར་པི་ཤཱ་ཙཱ་ནི། སརྦྦ་གྲ་ཧེ་ཥུ། ཨ་པྲ་ཏི་ཧ་ཏོ་བྷ་བཱ། བཛྲ་དྃ་[ཥྙ]ཱ་ཀིཉྩི་རཱ་ཡ་སི། ཨི་དཾ་དུཥྚ་གྲཧཱ་ན། དུཥྚ་སརྦྦ་མྦཱ། དྷུ་ན་དྷུ་ན། མ་ཐ་མ་ཐ། མརྡ་མརྡ། པཱ་ཊ་ཡ་པཱ་ཊ་ཡ། མཊ་མཊ། བནྡྷ་བནྡྷ། བུདྡྷ་དྷརྨྨ་སཾ་བྷཱ། ཨ་ནུ་ཛྙཱ་ཏཾ་ཀརྨྨ་ཀུ་རུ་ཤཱིགྷྲཾ་ཧ་ཡ་ཤྲཱི་ཧ་ཡ་གྲཱི་པཱ་ཡ་ཕཊ། བཛྲ་ཡ་ཕཊ། བཛྲཱ་གཱ་ཏྲཱ་ཡ་ཕཊ། བཛྲ་ནཻ་ཏྲཱ་ཡ་ཕཊ། བཛྲ་དཾ་ཥྚྲཱ་ཡ་ཕཊ། བཛྲ་ཁུ་རཱ་ཡ་ཕཊ། བཛྲ་ཁུ་ར་ནིར་གྷཱ་ཏ་ནཱ་ཡ་ཕཊ། པ་ར་མནྟྲ་བི་ནཱ་ཤ་ནཱ་ཡ་ཕཊ། སརྦྦ་ཏྲཻ་ལོཀྱ་བྷ་ཡཾ་ཀ་རཱ་ཡ་ཕཊ། སརྦ་ཀརྨྨ་སུ་པྲ་ཏི་ཧ་ཏཱ་ཡ་ཕཊ། བཛྲ་ཀུ་ལ་སནྟྲཱ་ས་ནཱ་ཡ་ཕཊ། ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། དེ་ནས་

ཁྲོ་ཆེན་བྱུང་བ་ཡིས། །རྡོ་རྗེ་པད་མཆོག་ལས་བྱུང་རྣམས། །ཡིད་ནི་འཇིགས་ཤིང་སྐྲག་པར་འགྱུར། །འཁོར་བཅས་འཇིགས་པས་རྣམ་འཁྲུགས་ནས། །བྱང་ཆུབ་ཚོགས་ནི་དྲན་བྱེད་ཅིང་། །ཡེ་ཤེས་རྡོ་རྗེ་དྲན་འགྱུར་བ། །ལག་པ་ལ་ནི་པདྨ་དང་། །ཧ་ཞེས་བྱ་བ་མཆོག་འབར་བསམ། །ཁྲོ་རྒྱལ་ཏིང་འཛིན་ལ་གནས་ནས། །རྡོ་རྗེ་གསུམ་ཡིག་འཛིན་པ་ཡིས། །ཁམས་གསུམ་དག་ཀྱང་ཁྱབ་བྱེད་པའོ། །མི་བཟད་དུག་ནི་དྲང་བར་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དོན་ཡང་དག་པར་འབྱུང་བའི་རྒྱལ་མཚན་གྱི་མཆོག་ནོར་བུའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྲོ་བོའི་རྒྱལ་པོ་ཆེན་པོ་བེ་ཅོན་སྔོན་པོ་ཅན་འདི་རྡོ་རྗེ་གསུམ་ལས་ཕྱུང་ངོ་། །ན་མཿས་མནྟ་བུདྡྷཱ་ཎཱཾ། ཨེ་ཧི་ཨེ་ཧི། བྷ་ག་བཱ་ན། ནཱི་ལ་བཛྲ་དཎྜ། ཏུ་རུ་ཏུ་རུ། ཧུ་ལུ་ཧུ་ལུ་སྭཱ་ཧཱ། གུ་ལུ་གུ་ལུ། གུ་ལཱ་པ་ཡ་གུ་ལཱ་པ་ཡ། ཀྲམ་ཀྲམ། བྷ་ག་བཱན། བཱ་ཡུ་བེ་གེ་ན། བྷཱུ་ཏཱ་ནཱ་ཤཱི་གྷྲྃ། ད་ཧ་ད་ཧ། ད་ར་ད་ར། བ་ཧ་བ་ཧ། པ་ཙ་པ་ཙ། མ་ཐ་མ་ཐ། པཱ་ཏ་ཡ་པཱ་ཏ་ཡ། མ་ཊ་མ་ཊ། མོ་ཊཱ་པ་ཡ་མོ་ཊཱ་པ་ཡ། སརྦྦ་ཀརྨྨ་ཎི། ཚིནྡྷ་ཚིནྡྷ། བྷཱཀྵ་ཡ་བྷཀྵ་ཡ། ཨསྠི་མི་དཾ་ཨ་སེ། རུ་དྷི་ར་མ་ཛྫ་མི་དཾ། བི་ཤྭ་མཛྫ། རུ་དྟི་ར། བྲི་ཡ་ཨེ་ཧྱེ་ཧ་བྷི་ག་བཱ་ན། སརྦྦ་བིགྷྡན། སརྦྦ་བི་དྱཱ་ནི། སརྦྦ་མནྟྲཱ་ཎི། སརྦྦ་མཱུ་ལ་ཀརྨྨ་ཎི། ཀྲྀ་ཏྲི་མ་ཎི། བི་ཥ་དཱི་ནི། སརྦ་གྲ་ཧཱ་ན། ཧ་ན་ཧ་ན། བྷཉྫ་བྷཉྫ མརྡ་མརྡ། ཨེ་དཾ་མེ།ཀཱརྱཾ་སཱ་དྷ་ཡ། ཧཱུྃ་ནཱི་ལཱ་ཡ་ནཱི་ལཱ་ཡ། ནཱི་ལ་བཛྲ་དཎྜཱ་ཡ། ཏུ་རུ་ཏུ་རུ། བིགྷྡཱན་བི་ནཱ་ཡ་ཀཱ་ན། ནཱ་ཤ་ཡ་ནཱ་ཤ་ཡ། ཧུ་རུ་ཧུ་རུ། དཱིབྟ་ཙཎྜཱ་ཡ། སརྦ་ཤ་ཏཱུཾ་ནྲྀཾ་ཧྲྀ་ད་ཡཱ་ནི་པཱི་ཊ་ཡ། ཚིནྡ་ཚིནྡ། པར་བིདྱཱ་ནཱ་མ། ཙྪེ་དཀ་ཧཱུཾ་བིདྱཱ་ནཱ་མཤྴིཥྚ་ཀ ། ས་མ་ཡ་མ་ནུ་སྨ་ར། བཛྲ་དྷ་ར་བ་ཙ་ནཾ་ཙ། མར་མཱ་ཎི་ནི་ཀྲྀནྟ། ཧཱུྃ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀུ་རུ་ཀུ་རུ། ཏུ་རུ་ཏུ་རུ། ཧུ་རུ་ཧུ་རུ། ཕཊ་ཕཊ་ཧཱུྃ་ཧཱུྃ་ཀྲི་ཏཱནྟྲ་ཡ། དེ་བ་རྀ་ཥྀ་བི་དྲཱ་བ་ཀཱ་ཡ། ཧ་ན་བཛྲ་དཎྜེ་ན་སྭཱ་ཧཱ། ཁྲོ་བོ་ཆེན་པོ་མཆོག་འདི་གསུངས་མ་ཐག་

ཏུ་བདུད་ཀྱི་རིས་ཐམས་ཅད་དང་། སངས་རྒྱས་ཀྱི་ཞིང་རྣམས་རབ་ཏུ་གཡོས་ཏེ་སྐུ་གསུམ་གྱི་མཆོག་གཙོ་བོ་རྣམ་པར་སྣང་མཛད་དྲན་པར་གྱུར་ཏོ། །སངས་རྒྱས་ཐམས་ཅད་ཀྱི་སྦྱོར་བའི་ཚོགས་བསྐུལ་ན་བརྒྱ་རྩ་བརྒྱད་བཟླས་བརྗོད་བྱས་པ་ཙམ་གྱིས་མོད་ལ་ཁྲོ་བོ་ཆེན་པོས་གསོད་པར་བྱེད་དོ། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་མི་འཁྲུགས་པས་བཀོད་པ་ཀུན་ཏུ་རྣམ་པར་འཕྲོ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྟོབས་པོ་ཆེ་རྡོ་རྗེ་འདི་སྐུ་གསུམ་ལས་ཕྱུང་ངོ་། །ན་མཿ ས་མནྟ་བུདྡྷཱ་ནཱྃ། ཨོྃ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཨུ་གྲ་ཤཱུ་ལ་པཱ་ཎི་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོྃ་ཛྱ་ཏི་ནི་རནཱ་ད་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོྃ་མ་ཧཱ་བ་ལཱ་ཡ་སྭཱ་ཧཱ། དེ་ནས་ཁྲོ་བོ་གསུངས་ཙམ་གྱིས། །གདེངས་ཀ་ཡིས་ནི་བསྐོར་བ་ཀུན། །ཡིད་ནི་ཤིན་ཏུ་འཇིགས་སྐྲག་སྟེ། །རྡོ་རྗེ་རྣམ་པར་སྣང་མཛད་དྲན། །གསང་སྔགས་རྒྱལ་པོ་བཟླས་པ་ཡིས། །ལས་ཀུན་རབ་ཏུ་གྲུབ་པར་བྱེད། །ཆར་པ་ཆེ་ན་གཅོད་འགྱུར་ལ། །ཆར་པ་ཆུང་ན་རབ་ཏུ་འབེབས། །དེ་ནས་བཅོམ་ལྡན་འདས་ཀྱིས་ཀུན་ཏུ་འབར་བའི་སྙིང་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྲོ་བོ་ཆེན་པོ་འདོད་པའི་ཁྲོ་བོ་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ན་མཿས་མནྟ་བུདྡྷ་ནཱ། ཊཀྐི་ཧཱུྃ་ཛཿ། དེ་ནས་ཁྲོ་བོ་གསུངས་པ་ཡིས། །སངས་རྒྱས་ཐམས་ཅད་རབ་ཏུ་འདར། །བྱང་ཆུབ་སེམས་དཔའ་རྣམས་ཀྱང་སྐྲག ། བདུད་ཀྱི་དཔུང་རྣམས་ལྟུང་བར་འགྱུར། །རྐང་གཡས་སྣ་ཚོགས་རྡོ་རྗེ་ཡི། །སྦྱོར་བས་མཚན་ནི་མནན་ནས་སུ། །སྐུ་གསུམ་ཡེ་ཤེས་སྟོབས་ལྡན་པས། །ཁྲོ་གཉེར་རིམ་པར་གཉེར་བྱས་ཏེ། །གསང་སྔགས་ཀུན་གྱིས་བཀུག་ནས་སུ། །སེམས་ཅན་ཐམས་ཅད་དབང་དུ་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་རྡོ་རྗེ་རབ་ཏུ་འབར་ཞིང་ཁྲོ་བའི་ཡེ་ཤེས་རབ་ཏུ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཁྲོ་བོ་མི་གཡོ་བ་གཏུམ་པོ་འདི་རྡོ་རྗེ་སྐུ་གསུམ་

རྣམས་ལས་ཕྱུང་ངོ་། །ན་མཿས་མནྟ་བུདྡྷཱ་ནཱཾ། ཨ་ཙ་ལ་ཀཱ་ཎ་ཙཎྜ། ན་ཊ་ན་ཊ། མཊྚ་མཊྚ། མོཊྚ་མོཊྚ། སཊྚ་སཊྚ། ཏཊྚ་ཏཊྚ། ཏ་ན་ཏ་ན། ད་ཧ་ད་ཧ། མོ་ཧ་མོ་ཧ། མོ་ཧ་ཀ་ར། ཧ་ས་ཧ་ས། བཛྲ་ཧཱ་ས་ཀུ་རུ། ཧཱ་ས་ཧཱ་ས། མ་ར་མ་ར་ཊ། མ་ར་མ་ར་ཊ། གརྫྫ་གརྫྫ། ཧ་ན་ཧ་ན། བནྡྷ་བནྡྷ། ཏིཥྛ་ཏིཥྛ། ཨཱ་བི་ཤ་ཨཱ་བི་ཤ །མ་ཧཱ་མནྟཱཔཱ་ལ་ཀཱ། དྷུ་ན་དྷུ་ན། ཏི་ཎི་ཏི་ཎི། ཁཱ་ད་ཁཱ་ད། བིགྷྣ་ན། མཱ་ར་ཡ་མཱ་ར་ཡ། དུཥྚཱ་ན། བྷཀྵ་བྷཀྵ། སརྦཱན་ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཥ་མ་བཛྲ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཧཱུྃ། ཏྲི་བི་ལཱ་ཏ་རངྒ་ནརྟ་ཀ། ཨྃ་ཨྃ་ཨྃ། ཧཱྃ་ཧཱྃ་ཧཱྃ། ཨ་ཙ་ལ་ཙ་ཊ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཨ་ས་མནྟ་ཀཱཊཱ་ཊ་མ་ཧཱ་བ་ལ་ཤ་ཏཱ་ཡ། བ་ར་མནྡཱི་ན། ཨྃ་ཨྃ། ཧཱྃ་ཧཱྃ་མྃ་ཤུདྡྷྱྃ་ཏུ་ལོ་ཀ། ཏུཥྱྃ་ཏུ་བཛྲཱཾ། ན་མོ་ཏུ་ཀྲུ་ཨ་པྲ་ཏི་ཧ་ཏ་བ་ལེ་བྷྱཿཛྭ་ལཱ་ཡ། ཏྲཱ་ཊ་ཨ་ས་ཧ་ན་མཿསྭཱ་ཧཱ། །དེ་ནས་ཁྲོ་བོ་མི་གཡོ་བ། །ཁྲོ་བོ་སྟོབས་ཆེན་འདི་གསུངས་པ། །ལྷ་དང་ཀླུ་ཀུན་མངག་གཞུག་བྱེད། །གནོད་སྦྱིན་སྲིན་པོ་ལྷ་མ་ཡིན། །འཇིགས་པ་ཐོབ་ནས་བརྒྱལ་བར་འགྱུར། །བདུད་ཀྱི་སྡེ་རྣམས་ལྷུང་ནས་སུ། །ཚིག་ཅིང་རབ་ཏུ་ཞུམ་བཞིན་དུ། །གཙོ་བོ་རྡོ་རྗེ་སྣང་མཛད་དྲན། །ཁྲོ་བོའི་རྒྱལ་པོ་དུ་མ་ཡིས། །བཅུག་པས་འཇིགས་པས་ཉེན་བཞིན་དུ། །གཙོ་བོ་རྣམ་པར་སྣང་མཛད་ཉིད། །སྣ་ཚོགས་ལས་རྣམས་མྱུར་དུ་མཛད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་སྐུ་གསུམ་གྱི་ཡེ་ཤེས་རྡོ་རྗེ་འབར་བའི་འོད་ཟེར་གྱིས་འཇིགས་པ་ཆེན་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པའི་རྒྱལ་པོ་ཆེན་པོ་གནོད་མཛེས་འདི་གསུངས་སོ། །ན་མཿཨོྃ་སུཾ་བྷ་ནི་སུཾ་བྷ་ཧཱུྃ། གྲྀཧྞ་གྲྀྀཧྞ་ཧཱུྃ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུྃ། ཨོྃ་ཨཱ་ན་ཡ་ཧོ་བྷ་ག་བཱ་ན་བིདྱཱ་ཛ་ཧཱུྃ་ཕཊ། དེ་ནས་ཁྲོ་བོ་འདི་གསུངས་པས། །ལྷ་ཡི་བུ་མོ་ཐམས་ཅད་ནི། །སྐྲ་ཚུགས་ཞིག་ཅིང་གཅེར་བུར་གྱུར། །མིག་རྩ་རིག་རིག་བྱེད་པ་དག །སྐུ་གསུམ་རྡོ་རྗེ་མཆོག་མངའ་བའི། །ཞབས་ཀྱིས་ནུ་མ་གཉིས་མནན་པས། །གཙོ་བོ་རྡོ་རྗེ་

རྣམ་སྣང་མཛད། །ཡེ་ཤེས་ཀྱིས་འཇོམས་དྲན་པར་འགྱུར། །ལྕགས་ཀྱུ་ཡིས་ནི་རྣམ་དྲལ་ཏེ། །རྡོ་རྗེ་ཞགས་པས་བཅིངས་ནས་སུ། །བུ་མོ་ཐམས་ཅད་དགུག་བྱ་བ། །བུ་མོ་དགུག་པའི་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་ཡེ་ཤེས་ཆེན་པོ་རྣམ་པར་བསྒྱིངས་པས་དགའ་བ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་གསུམ་གྱི་མཆོག་རྡོ་རྗེ་འཆང་བསྐྱེད་པར་མཛད་པ་སངས་རྒྱས་ཀྱི་བྱང་ཆུབ་འདི་རྗེས་སུ་དྲན་པར་མཛད་དོ། །འཁོར་ལོ་ཆེ་ལ་རྣམ་གནས་ནས། །སངས་རྒྱས་རྣམས་ཀྱི་སྤྲིན་དག་དང་། །དེ་བཞིན་རྡོ་རྗེ་འཆང་བའི་སྤྲིན། །རྡོ་རྗེ་ལྕགས་ཀྱུ་ཞགས་ཐོགས་འབྱིན། །ཀུན་མཁྱེན་ཡེ་ཤེས་ལས་བྱུང་གཙོ། །གསང་སྔགས་སྐྱེས་བུར་བདག་བསྒོམས་ན། །སངས་རྒྱས་རྣམས་ཀྱང་འགུགས་བྱེད་ན། །རྡོ་རྗེ་འཆང་སོགས་ཅི་ཞིག་སྨོས། །བུད་མེད་ལྷ་ཆེན་བུ་མོ་དག །རླུང་ལ་རྐང་པ་བཞག་ནས་སུ། །ལྕགས་ཀྱུས་སྙིང་ལ་དྲངས་ནས་ནི། །སེམས་ཅན་ཀུན་ཡང་འགུགས་འགྱུར་ཏེ། །འདི་ལ་དཔྱད་པ་ཅུང་ཟད་མེད། །རྡོ་རྗེ་རྣམ་པར་སྣང་མཛད་ནི། །སྐུ་ཆེན་ཟླ་བའི་ཁ་དོག་ཡིན། །ཟླ་བའི་དཀྱིལ་འཁོར་ལ་གནས་པ། །རྡོ་རྗེ་བདུད་རྩི་འབབས་བསམས་ཏེ། །ལན་གྲངས་བཅུ་ནི་བརྗོད་པ་ཡིས། །དེ་ནས་གདོན་མི་ཟ་བར་ཁུགས། །རྡོ་རྗེ་དཀྱིལ་འཁོར་ལས་བྱུང་བ། །རྡོ་རྗེ་ལྕགས་ཀྱུ་ཆེན་པོ་ཡི། །འབར་བའི་འོད་ཟེར་འཕྲོ་བ་ཡིས། །གཞོན་ནུ་མ་དག་ངེས་པར་འགུགས། །རྡོ་རྗེ་གསུམ་འཁྲུགས་ཁྲོ་བོ་ནི། །རྡོ་རྗེ་ས་འོག་གནས་པ་སྟེ། །ལྷ་མ་ཡིན་ཀུན་དེས་སྲེག་ཅིང་། །ལྷ་མིན་བུ་མོ་རྗེས་ཆགས་པས། །གསལ་ཤིང་གིས་ནི་བསྒྱེལ་ནས་སུ། །རྡོ་རྗེ་ལྕགས་ཀྱུ་ཞགས་པ་ཡིས། །དྲངས་ནས་ལྷ་མིན་བུ་མོ་འགུགས། །བཙག་དང་ཐོད་ལོ་ཀོར་དང་ནི། །བ་བླ་འབྱོར་པར་གྱུར་ན་ནི། །གཟས་ཟིན་ཚེ་ན་ཁར་བཅུག་སྟེ། །རྫས་རྒྱལ་རྡོ་རྗེ་ལྕགས་ཀྱུས་འགྲུབ། །དྲག་པོ་རླུང་དང་ཁྱབ་འཇུག་དང་། །ལྷ་མོ་གནོད་སྦྱིན་གནོད་སྦྱིན་མ། །མངག་གཞུག་བཅས་པར་འཇིགས་སྐྲག་སྟེ། །མིང་བྲིས་ཀུན་ནས་རྟག་

ཏུ་འགུགས། །སངས་རྒྱས་འཁོར་ལོར་ལེགས་བཞུགས་ཏེ། །འཇམ་དཔལ་རྡོ་རྗེར་རྣམ་པར་བསྒོམ། །ཁྲོ་བོ་ཆེན་པོ་གཤིན་རྗེ་གཤེད། །ལག་ན་རྡོ་རྗེ་ལྕགས་ཀྱུ་ཐོགས། །ཁྲོས་ཤིང་འབར་བ་འཕྲོ་བ་ཡིས། །གནོད་སྦྱིན་བུ་མོ་བཀུག་ནས་སྤྱོད། །ཕྱག་རྒྱ་གསང་སྔགས་སྦྱོར་བ་དང་། །བསམ་གཏན་འཁོར་ལོ་སྦྱོར་བ་ཡིས། །དགུག་པར་བྱ་བའི་ཚིག་གསུངས་པ། །གཞན་དུ་བྱས་ན་འགྲུབ་མི་འགྱུར། །རྒྱལ་པོའི་ཞབས་དྲུང་ཀུན་གནས་པས། །རྡོ་རྗེ་སེམས་དཔའ་སེམས་དཔའ་ཆེ། །ཀུན་གྱིས་སེམས་རབ་རྫོགས་བྱེད་པས། །ཡང་དང་ཡང་དུ་སྐུལ་བར་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་རྡོ་རྗེའི་དེ་བཞིན་གཤེགས་པས་ཡེ་ཤེས་ཀྱི་རྣམ་པར་རྒྱལ་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་རྒྱལ་མོ་ཆེན་མོ་རྣམ་པར་བསྒྱུར་བའི་རྡོ་རྗེ་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ཨོཾ་ཤཱུ་ལི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །ཀླུ་མོ་དབང་ཆེན་གྲགས་པ་དག །གོས་དང་བྲལ་ཞིང་ཚིག་བཞིན་དུ། །གཙོ་བོ་རྡོ་རྗེ་རྣམ་སྣང་དྲན། །གསང་སྔགས་རིག་སྔགས་འདི་ཡིས་ནི། །ཀླུ་རྣམས་ཐམས་ཅད་འགུགས་པར་བྱེད། །བསམ་གཏན་རྡོ་རྗེ་མཐུ་དང་ནི། །གསང་སྔགས་བཟླས་བརྗོད་བྱས་པ་ཡིས། །སོར་གདུབ་རྒྱན་ནི་གསོལ་བ་ཡིས། །ཀླུ་མོ་མིག་ཡངས་བཀུག་ནས་ནི། །འདོད་པའི་ཡོན་ཏན་ལྔས་ཆགས་པའི། །ཀླུ་མོ་ཉེ་བར་སྤྱོད་པར་བྱེད། །དེ་ནས་བཅོམ་ལྡན་འདས་ཀྱིས་ནམ་མཁའ་ཆེན་པོའི་ཤུགས་རྒྱ་མཚོ་འཕྲོ་བའི་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུལ་བྱེད་མ་ཆེན་མོའི་གཟུངས་ཀྱི་རིག་སྔགས་ཆེན་མོ་འདི་གསུངས་སོ། །ན་མཿས་མནྟ་བུདྡྷཱ་ནཱྃ། སམྱཀྶི་བུདྡྷཱ་ཀོ་ཊཱི་ནཱཾ། ཏདྱ་ཐཱ། ཨོྃ་ཙ་ལེ་ཙུ་ལེ་ཙུནྡ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །བྱང་ཆུབ་སེམས་དཔའ་རྣམས་ཀྱི་ལུས། །ཏིང་ངེ་འཛིན་ལས་གཡོས་པར་གྱུར། །བདུད་རྣམས་བརྒྱལ་

ཞིང་ཚིག་ནས་སུ། །ཐམས་ཅད་ཆོ་ངེས་འདེབས་པར་བྱེད། །ས་ཡི་འོག་གི་བུ་མོ་དང་། །ལྷ་མིན་བུ་མོ་ཀླུ་མོ་དང་། །གསང་དབང་བུ་མོ་རྣམས་འཁྲུགས་ནས། །གཙོ་བོ་རྡོ་རྗེ་སྣང་མཛད་དྲན། །རིག་སྔགས་འདི་ནི་བཟླས་པ་དང་། །སྒོམ་པ་ཡི་ནི་སྦྱོར་བ་ཡིས། །བཟླས་པ་ཙམ་གྱིས་འགྲུབ་འགྱུར་ཞིང་། །བཀུག་ནས་རབ་ཏུ་ལོངས་སྤྱོད་བྱེད། །དེ་ནས་བཅོམ་ལྡན་འདས་ཀྱིས་ནམ་མཁའ་མཛོད་ཀྱིས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་བདུད་རྩིའི་དམ་ཚིག་གི་རྡོ་རྗེའི་ཁྲོ་གཉེར་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ཨོྃ་བྷ་ཡ་ནཱ་ཤ་ནི་ཏྲཱ་ས་ནི་ཏྲཱ་སེ། ཏྲཱ་ས་ཡ་ཏྲཱ་ས་ཡ། བཻ་ར་ཊི་བྷྲྀ་ཀུ་ཊི་ཏི་ཊེ། བཻ་ཊ་ཊི་བཻ་ཊ་ཊི། ཤྭེ་ཏེ་ཤྭེ་ཏེ། ཛ་ཊི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །རིག་སྔགས་འཆང་དང་ལྷ་རྣམས་ནི། །གཡོས་ཤིང་འཇིགས་པ་ཐོབ་པར་འགྱུར། །བདུད་རྣམས་འཇིགས་པས་རྣམས་འཁྲུགས་ཏེ། །གཙོ་བོ་རྡོ་རྗེ་རྣམ་སྣང་མཛད། །ཡིད་གཅིག་ཏུ་ནི་དྲན་པར་བྱེད། །ནོར་བུའི་གདུབ་རྣམས་གཡོ་བ་ཡིས། །རིག་སྔགས་འཆང་མ་ཀླུ་མོར་བཅས། །ལྷ་མིན་བུ་མོ་གསང་བ་ཡི། །བུ་མོ་བཀུག་ལ་སྤྱོད་པར་བྱེད། །འདིས་ནི་ལས་ཀུན་བྱེད་པ་དང་། །མཁའ་འགྲོ་མ་རྣམས་འཇིགས་པ་ཡིན། །ཡང་ན་གསང་སྔགས་ཐམས་ཅད་ནི། །སྐྱེ་བོ་མེད་པའི་ནགས་ཚལ་དུ། །སྔགས་པས་བྱེ་བ་བཟླས་ནས་སུ། །ལས་རྣམས་ཐམས་ཅད་བྱ་བ་གསུངས། །གང་གཞན་སློབ་དཔོན་སྨོད་པ་དང་། །ཐེག་པ་ཆེན་པོ་སུན་འབྱིན་དང་། །མི་གང་གསང་སྔགས་རྒྱུད་དག་གིས། །སྦྱོར་བ་ལ་ནི་འཕྱ་བྱེད་པ། །དེ་ཡིས་དངོས་གྲུབ་ཐོབ་མི་འགྱུར། །དེ་ནི་རྟག་ཏུ་གདོན་གྱིས་ཟིན། །བསྒྲིམས་ནས་གསང་བར་བྱ་བ་འམ། །ཡང་ན་ལུས་ནི་གཞིག་པར་བྱ། །སྔགས་པས་འདི་ལྟར་བྱས་ན་ནི། །བྱང་ཆུབ་དངོས་གྲུབ་ལེགས་པར་འཐོབ། །ཕྱོགས་བཅུའི་སེམས་ཅན་ཐམས་ཅད་ནི། །སྐུ་གསུམ་ཡེ་ཤེས་ལས་བྱུང་བའི། །ཁྱད་པར་དུ་ནི་བསྒོམ་པར་བྱ། །དགྲ་ལ་

འདི་ནི་ཐེ་ཚོམ་མེད། །ཁྲག་འཐུང་ཆུ་ཡིས་བརླན་པའམ། །དུར་ཁྲོད་ཐལ་བའམ་བཤང་གཅི་ཡིས། །བརླན་པའི་གོས་ནི་བགོས་ནས་ཀྱང་། །རྐང་པས་མཚན་མ་མནན་ནས་སུ། །ཁྲོ་བོའི་རྒྱལ་པོར་སྦྱོར་བྱས་ཏེ། །གསང་སྔགས་བརྒྱ་རྩ་བརྒྱད་བཟླས་ན། །སངས་རྒྱས་ཀྱང་ནི་ངེས་པར་འཇིག །ཆུས་བརླན་པ་ཡི་གོས་བགོས་ཏེ། །ཁྲོ་བོའི་མདུན་དུ་བཅིངས་ནས་སུ། །རྐང་པ་གཡོན་པས་མནན་ན་ནི། །སངས་རྒྱས་ཉིད་ཀྱང་ངེས་པར་འཇིག །བཤང་གཅི་ཡིས་ནི་སྦགས་པའི་གོས། །རུལ་བའི་དྲི་ཅན་སྨད་པ་དག །བགོས་ནས་གསང་སྔགས་བཟླས་བརྗོད་ན། །མོད་ལ་འཆི་བའམ་སྐམས་པར་འགྱུར། །དུར་ཁྲོད་ཐལ་བས་བསྡུས་པའི་གོས། །བགོས་ནས་ཁྲོ་བོ་འཁྲུགས་ནས་ནི། །ལན་གྲངས་སྟོང་དུ་བརྗོད་ན་ནི། །རྡོ་རྗེ་སེམས་དཔའང་རྣམ་པར་འཇིག །སྐྲ་ནི་ལྷུག་པར་བཤིག་ནས་ནི། །ཁ་བཞིན་རྣམ་པར་བསྒྱུར་བྱས་ཏེ། །རྐང་པས་མཚན་མ་མནན་ན་ནི། །ནམ་མཁའི་ཁམས་ཀྱང་འཇིག་པར་འགྱུར། །མ་མོའི་གནས་སམ་དུར་ཁྲོད་དམ། །ཁང་སྟོང་འམ་ནི་བཞི་མདོ་འམ། །མཚན་མ་གཅིག་པའམ་ཤིང་གཅིག་ཏུ། །དྲག་ཤུལ་སྤྱོད་པ་བརྩམ་པར་བྱ། །དེ་ཡི་རྐང་རྗེས་ས་ལ་ནི། །མི་རུས་ལས་བྱས་ཕུར་བུ་དག །སོར་བརྒྱད་ཙམ་གྱི་ཚད་ཙམ་ལ། །ལན་གྲངས་བརྒྱ་རྩ་བརྒྱད་བརྗོད་པའི། །ཕུར་བུ་ཡིས་ནི་བཏབ་ནས་སུ། །དགྲ་ཡི་ཁྱིམ་སྒོར་བརྐོས་ཏེ་གཞུག །སངས་རྒྱས་སྐུ་གསུམ་མཆོག་སྦྱིན་པ། །ཤེས་དང་མི་ཤེས་སྤངས་པ་ཡང་། །ཟླ་ཕྱེད་ཉ་ཡི་ནང་རོལ་དུ། །འཆིང་བའམ་ཡང་ན་འཇིག་པར་འགྱུར། །མཁས་པས་ཐོད་པ་ཡོངས་ཚང་བ། །ཁྱད་པར་ཅན་ནི་རྙེད་པ་དང་། །དེ་ལ་གསང་སྔགས་ཚིག་བྲིས་ཏེ། །རྡོ་རྗེ་ཚིག་གིས་བཟླས་བརྗོད་ནས། །དགྲ་ཡི་སྒོ་འམ་ཡང་ན་ནི། །གྲོང་དུ་སྦས་ན་ངེས་པར་སྐྲོད། །ཏ་ལའི་འདབ་མའམ་གཞན་ལའང་རུང་། །ཁྲོ་བོའི་གསང་སྔགས་ལེགས་བྲིས་ཏེ། །དགྲ་ཡི་ཁྱིམ་མམ་སྒོ་ཀར་ནི། །སྦས་ན་འཆི་འམ་སྐམས་པར་འགྱུར། །ཞེས་བཅོམ་ལྡན་འདས་རྡོ་རྗེ་རྣམ་པར་སྣང་མཛད་ཆེན་པོས་བཀའ་སྩལ་ཏོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུམ་རྡོ་རྗེའི་

ཕུར་བུའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁམས་གསུམ་ཐམས་ཅད་ཡེ་ཤེས་ཀྱི་སྐུ་དང་གསུང་དང་ཐུགས་རྡོ་རྗེའི་ཕུར་བུ་ཞེས་བྱ་བ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་ངོ་། །ཨོྃ་གྷ་གྷྲ། གྷཱ་ཏ་ཡ་གྷཱ་ཏ་ཡ། སརྦ་དུཥྚཾ་ཕཊ་ཕཊ། ཀཱི་ལ་ཡ་ཀཱི་ལ་ཡ།སརྦ་པཱ་པྃ་ཕཊ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་བཛྲ་དྷ་ར་ཨཱཛྙཱ་ཕ་ཡ་ཏི། ཀཱ་ཡ་བཱཀྩིཏྟ་བཛྲ། ཀཱི་ལ་ཡ་ཧཱུྃ་ཧཱུྃ་ཧཱུྃ་ཕཊ་ཕཊ། དེ་ནས་འདི་ནི་གསུངས་ཙམ་གྱིས། །རྡོ་རྗེ་དབང་ཆེན་གྲགས་པ་ཀུན། །བརྒྱལ་ནས་འཇིགས་པ་སྐྱེས་གྱུར་ཏེ། །རྡོ་རྗེ་རྣམ་སྣང་མཛད་པ་དྲན། །མི་ཡི་རུས་པའི་ཕུར་བུའམ། །ཡང་ན་སེང་ལྡེང་ལས་བྱུང་བའམ། །ལྕགས་ལས་བྱས་པའི་ཕུར་བུས་ནི། །རྡོ་རྗེ་སེམས་དཔའ་རྣམ་པར་འཇིག །རྡོ་རྗེ་སེམས་དཔར་མཉམ་གཞག་སྟེ། །འོད་བཟང་མེ་སྟག་འཁྲུག་པ་ཅན། །སྐུ་གསུམ་རྡོ་རྗེ་མཐའ་གཏུགས་པས། །གཟུགས་བརྙན་ལ་ནི་བསམས་ནས་སྦྱོར། །རྣམ་སྣང་ཕྱག་རྒྱ་ཆེན་པོའམ། །ཡང་ན་འདོད་ཆགས་རྡོ་རྗེ་ཅན། །ཕྱག་རྒྱ་ཆེན་པོ་གཤིན་རྗེ་གཤེད། །འདོད་པའི་ཁྲོ་བོ་ཉིད་དུ་ནི། །རྡོ་རྗེ་ཕུར་བུ་བསམ་པར་བྱ། །བདག་ཉིད་ཆེན་པོ་སྟོབས་པོ་ཆེ། །བདུད་རྩི་ཐབ་སྦྱོར་རྡོ་རྗེ་དང་། །རྡོ་རྗེ་ཡི་ནི་རྣལ་འབྱོར་གྱིས། །སྡང་དང་གཏུམ་པོ་གཅད་པར་བྱ། །སངས་རྒྱས་བདག་ཉིད་ཆེན་པོ་ཡང་། །ཐུགས་ནས་ཞབས་ལ་ཐུག་པར་དུ། །རྡོ་རྗེ་ཕུར་བུས་རྣམ་པར་བསྒོམས། །རྡོ་རྗེ་ཏིང་འཛིན་སྦྱོར་བ་ཡིས། །སངས་རྒྱས་དག་ཀྱང་ངེས་པར་གནོན། །འདི་ནི་ཕུར་བུའི་མཐུ་རླབས་ཏེ། །སྟེང་འོག་ལྷ་ཡི་དམ་ཚིག་ཡིན། །རྒྱལ་ཆེན་རྡོ་རྗེ་སེམས་དཔའ་དང་། །སངས་རྒྱས་ཐམས་ཅད་གནོན་པ་ཡི། །ཏིང་འཛིན་སྦྱོར་བ་འདི་ཡིས་ནི། །མྱུར་དུ་འཆི་འམ་སྐམས་པར་འགྱུར། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོས་དེ་བཞིན་གཤེགས་པའི་སྐུའི་ཡེ་ཤེས་རྣམ་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེའི་སྐུ་གཉིས་སུ་མེད་པའི་དམ་ཚིག་གི་ཕུར་བུའི་གསང་སྔགས་འདི་ཉིད་ཀྱི་རྡོ་རྗེའི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་ངོ་། །ཨོཾ་ཚིནྡ་ཚིནྡ་ད་ཧ་ད་ཧ། དཱིཔྟ་

བཛྲ་ཙཀྲ་ཧཱུྃ་ཕཊ། ཕན་ཚུན་བཟླས་པའི་ཚུལ་གྱིས་ནི། །མཐེ་བོའི་ངོས་ཀྱི་དྲུང་དུ་བསྡུ། །སྣང་མཛད་ཞབས་ཀྱིས་མནན་ནས་སུ། །རྡོ་རྗེ་ཕུར་བུས་བཏབ་པར་བྱ། །བཏབ་པ་ཙམ་གྱིས་སེམས་དཔའ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་བྱས་ན་བརླག་པར་འགྱུར། །དེ་ནས་བཅོམ་ལྡན་འདས་ཀྱིས་རྡོ་རྗེའི་ཐུགས་ཀྱི་ཡེ་ཤེས་ཆེན་པོ་རྣམ་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཆེན་པོའི་སྟང་སྟབས་ཀྱིས་ཕུར་བུ་ཞེས་བྱ་བའི་གསང་སྔགས་འདི་ཉིད་ཀྱི་རྡོ་རྗེ་སྐུ་དང་གསུང་དང་ཐུགས་རྣམས་ལས་ཕྱུང་ངོ་། །ཨོྃ་བཛྲ་རཱ་ཛ་ཧཱུྃ། རྩེ་མོ་ལྔ་པ་བཅིངས་ནས་སུ། །མེ་སྟག་འཕྲོ་བ་བསྒོམས་བྱས་ཏེ། །རྡོ་རྗེ་ཐུགས་ཀྱིས་ཞབས་ཀྱིས་མནན། །རྡོ་རྗེ་ཕུར་བུས་གདབ་པར་བྱ། །བཏབ་པ་ཙམ་གྱིས་རྒྱལ་པོ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་བྱས་ན་བརླག་པར་འགྱུར། །དེ་ནས་བཅོམ་ལྡན་འདས་ཀྱིས་འཇིག་རྟེན་དབང་ཕྱུག་གི་དམ་ཚིག་མཆོག་རྣམ་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསུང་གི་དམ་ཚིག་གི་སྟང་སྟབས་ཀྱི་ཕུར་བུའི་གསང་སྔགས་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་ངོ་། །ཨོྃ་ཏྲི་ཨོཾ་བྷུརྦྷུ་བཿ། རྡོ་རྗེ་སོར་མོ་བཅུམ་པ་ཡིས། །པདྨ་ཁ་བྱེ་འབར་བ་ཡིས། །འདོད་ཆགས་རྡོ་རྗེ་ཞབས་ཀྱིས་མནན། །རྡོ་རྗེ་ཕུར་བུས་ངེས་པར་གདབ། །བཏབ་པ་ཙམ་གྱིས་རྒྱལ་པོ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་བྱས་ན་བརླག་པར་འགྱུར། །སྐུ་གསུང་ཐུགས་ཀྱིས་ཆགས་པ་ཡིན། །ཆོ་ག་བཟང་པོ་ཙམ་གྱིས་ནི། །རྡོ་རྗེ་མཁའ་དབྱིངས་མཐའ་གཏུགས་པ། །མནན་འགྱུར་འདི་ལ་ཐེ་ཚོམ་མེད། །ཅེས་བཅོམ་ལྡན་འདས་རྣམ་པར་སྣང་མཛད་ཀྱིས་རྡོ་རྗེ་ཕུར་བུའི་ཚིག་རྣམས་བཀའ་སྩལ་ཏོ། །དེ་ནས་སངས་རྒྱས་སྐུ་གསུམ་མཆོག །སེམས་ཅན་ཁམས་ལ་ཕན་བཞེད་རྣམས། །དགྱེས་ཤིང་མགུ་བ་བརྙེས་ནས་སུ། །རྡོ་རྗེ་དབྱིངས་ཀྱིས་འདི་སྐད་གསུངས། །ཀྱེ་མའོ་གསང་བའི་ཚིག་

གི་མཆོག །ཀྱེ་མའོ་གསང་བ་ཀུན་འདུས་པ། །ཀྱེ་མའོ་ཞི་བ་ཆོས་ཀྱི་ཚིག །ཡེ་ཤེས་རྡོ་རྗེ་ཕུར་བུ་རྨད། །གསང་སྔགས་ཀུན་གྱི་ཕུར་བུས་འདི། །བདེ་གཤེགས་བཀའ་ཡི་རྗེས་སུ་བྱེད། །འདི་དག་སངས་རྒྱས་ཀུན་གྱི་སྟེ། །ཕུར་བུ་དེ་ཉིད་རྣམས་ལས་བྱུང་། །དེ་ནས་བཅོམ་ལྡན་འདས་ཀྱིས་ཆོམ་རྐུན་ཐམས་ཅད་མདོངས་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་འོད་ཟེར་ཅན་འདི་གསུངས་སོ། །ཨོྃ་མཱ་རཱི་ཙྱཻ་དེ་བ་ཏཱ་ཡཻ་སྭཱ་ཧཱ། རིག་སྔགས་གསུངས་པའི་མོད་ལ་ནི། །དབང་ཆེན་གྲགས་པའི་སངས་རྒྱས་ཀུན། །ཐུགས་ནི་དགྱེས་ཤིང་མགུ་བར་འགྱུར། །སྲས་རྣམས་ཀྱི་ནི་སྤྱན་ཡང་ཕྱེ། །འདི་ནི་ལས་རྣམས་ཐམས་ཅད་མ། །ཆོམ་རྐུན་སྡང་བ་འཆིང་མཛད་མ། །འདི་ཡི་སྦྱོར་བ་ལ་གནས་ན། །འགྲོ་བའི་ཚེ་ན་མཐོང་མི་འགྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་སྡང་བ་ཐམས་ཅད་རྣམ་པར་འཇོམས་པ་སེམས་ཅན་ཐམས་ཅད་སྒྲོལ་བར་བྱེད་པའི་ཡེ་ཤེས་ཆེན་པོའི་སྟོབས་ཀྱིས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྟོང་ཆེན་པོ་རབ་ཏུ་འཇོམས་པའི་རིག་སྔགས་ཀྱི་རྒྱལ་མོ་འདི་གསུངས་སོ། །ཨོྃ་མ་ཧཱ་ས་ཧ་སྲ་པྲ་མརྡ་ནཱ་བ་ར་སིདྡྷིཾ་ད་མཱི་གེ་མ་ཎི་བཛྲ་ཎི་ཧཱུྃ་ཕཊ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །བྱང་ཆུབ་སེམས་དཔའ་ཐམས་ཅད་དང་། །བདུད་ཀྱི་རིས་རྣམས་གཡོས་པར་འགྱུར། །གཙོ་བོ་རྡོ་རྗེ་སྣང་མཛད་པ། །ཐམས་ཅད་ཚིག་བཞིན་བཏུད་ནས་སུ། །བཅོམ་ལྡན་རིག་སྔགས་མཐུ་སྟོབས་ཀྱིས། །གནོད་བགྱིད་ཐམས་ཅད་གཟེར་ལགས་སོ། །གང་ན་རིག་སྔགས་སྟོབས་མོ་ཆེ། །ཕ་རོལ་གནོན་པ་འདི་ཟློས་པ། །དེར་ནི་བདག་ཅག་མི་མཆི་ཞིང་། །དེར་ནི་སྲུང་བ་དག་ཀྱང་བགྱི། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས། བརྒྱ་བྱིན་མངོན་པར་མཐོ་བའི་སྟོབས་ལྷ་མ་ཡིན་རྣམ་པར་འཇོམས་པས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྒྱལ་མཚན་

གྱི་རྩེ་མོའི་དཔུང་རྒྱན་གྱི་གཟུངས་ཆེན་མོ་འདི་གསུངས་སོ། །ཨོཾ་གྷ་ག་བ་ཏཱི་དྷཱ་ཛཱ་གྲ་ཀེ་ཡཱུ་རེ་པ་ར་སཻ་ནྱ། བི་དྷྭནྶ་ན་ཀཱ་སྭཱ་སཻ་ནྱ་པ་རིལ་ནི། ཨུ་ཡུ་ཀཱ་མུ་ཁི་ཁ་ཁ། ཁཱ་ཧི་ཁཱ་ཧི། པ་ར་སཻ་ནྱ་མ་ཨནནྟ་བྷུ་ཛེ། ཨ་ནནྟ་མུ་ཁེ། པྲ་ཧ་ར་པྲ་ཧ་ར་ཧཱུྃ་ཕཊ་ཕཊ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་གཡོས་པར་འགྱུར། །བྱང་ཆུབ་སེམས་དཔའ་རབ་གཡོས་ཤིང་། །བདུད་ཀྱི་སྡེ་རྣམས་ཚིག་པར་འགྱུར། །གནོད་སྦྱིན་སྲིན་པོ་གོས་བྲལ་ནས། །འཇིགས་ཤིང་སྐྲག་པར་གྱུར་པ་ཡིས། །གཙོ་བོ་རྡོ་རྗེ་རྣམ་སྣང་དྲན། །བཅོམ་ལྡན་འདས་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་ཚིག་ལགས་ཏེ། །བདག་ཅག་དམ་ཚིག་ལ་གནས་པར་འཚལ་ལགས་ན་མགོན་མཛད་ཅིང་ལུས་ཐམས་ཅད་རབ་ཏུ་བསྒྲུབ་ཏུ་གསོལ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་མངལ་ཐམས་ཅད་ཡང་དག་པར་སྐྱེས་པས་ཁྱབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་སོ་སོ་འབྲང་བ་འདི་གསུངས་སོ། །ཨོྃ་མ་ཎི་དྷ་རི་བཛྲ་ཎི་མ་ཧཱ་པྲ་ཏི་ས་རི་སྭཱ་ཧཱ། རིག་སྔགས་ཆེན་མོ་གསུངས་པ་དང་། །རིག་སྔགས་རྒྱལ་མོའི་མཐུ་ཡིས་ནི། །མི་ཡི་སྐྱེ་དགུ་འཚེ་བྱེད་པ། །མཐུ་ཆེན་མངལ་ནི་འཕྲོག་པ་དང་། །ལོག་འདྲེན་ཀུན་དང་སྡང་བའི་རྣམས། །མི་བཟད་མེ་ལྕེས་ཚིག་གྱུར་ནས། །འཇིགས་པ་དང་ནི་སྐྲག་པ་ཡིས། །རྡོ་རྗེ་སྣང་མཛད་དྲུང་ལྷགས་ཏེ། །ཞབས་ལ་གཏུགས་ཏེ་ཚིག་སྨྲས་པ། །བདག་ཅག་དམ་ཚིག་གནས་པར་འཚལ། །རིག་སྔགས་དམ་ཚིག་རྟག་གནས་པ། །གང་གིས་མངལ་ཡང་མི་འཕྲོག་ཅིང་། །རྟག་ཏུ་མངལ་ནི་སྤེལ་བར་མཛད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་ནོར་གྱི་རྒྱུན་གྱིས་ཡང་དག་པར་འཛིན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་ནོར་རྒྱུན་འདི་གསུངས་སོ། །ཨོཾ་བ་སུདྷཱ་རི་མ་ཧཱ་བསུ་དྷཱ་ར་བྲྀཥྚ་ནི་པཱ་ཏ་ནི་པ་སུ་སྭཱ་ཧཱ། ནོར་གྱི་རྒྱུན་ཞེས་བྱ་བ་ཡི། །རིག་སྔགས་གསུངས་པའི་མོད་ལ་ནི། །

བགེགས་དང་ལོག་འདྲེན་ཐམས་ཅད་དག །ཡིད་ནི་འཇིགས་ཤིང་སྐྲག་གྱུར་ནས། །རྡོ་རྗེ་རྣམ་པར་སྣང་མཛད་ཀྱི། །དྲུང་དུ་ཉེ་བར་འོངས་ནས་སུ། །དམ་བཅས་པ་ཡི་ཚིག་སྨྲས་པ། །བཅོམ་ལྡན་ནོར་རྒྱུན་ཞེས་བྱ་བའི། །མཚན་ནི་མི་མཆོག་སྒྲོགས་བགྱིད་ན། །དེ་ལ་ནོར་གྱི་ཆར་འབབ་ཅིང་། །ནོར་ཆེན་དང་ནི་ལྡན་པར་བགྱི། །དེ་ནས་བཅོམ་ལྡན་འདས་ཀྱིས་གནོད་པར་བྱེད་པ་ཐམས་ཅད་འདུལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྲིན་མོ་གློག་འབར་མ་བསྒྱུར་བའི་སྙིང་པོ་འདི་གསུངས་སོ། །ཨ་རེ་དུ་ཏྲེ་ཎི་བྲ་ཀུཔྟ་ཙཎྜི་མ་ཧཱ་བེ་ག་དྷ་རི་བིད་སཱ་དྷུ་ཛི་ཏྲེ། མ་ཧོ་ད་ནི་རཽ་ཏྲི་ཀ་པཱ་ལ་མཱ་ལ་དྷ་རི་ཎེ་ཛཱ་ཊ་མུ་ཀུ་ཊ། མཎྜི་ཏེ། ནཱ་ནཱ་པྲ་ཧ་ར་ཎ། དྷ་རི་ཧཱུྃ་ཧཱུྃ་ཕཊ་ཕཊ། སརྦ་ཏ་ཐཱ་ག་ཏ་ས་མ་ཡ་མ་ནུ་སྨ་ར། ཀུ་རུ་ཀུ་རུ་ཧཱུྃ་ཧཱུྃ་པྲ་མ་དྷ་མ་སརྦ་ཤ་ཏྲཱུྃ་ཎཱྃ། ཤོ་ཎི་ཏ་བི་པ་པྲ་ཙཎྜེ། བེ་ག་དྷ་རི་པ་ཙ་ཏ་པ་ཙ་ཏ། བེ་ཀི་ར་ཏ་ས་ཏ་ཡ་ཧཱུྃ། ད་ཧ་ད་ཧ། སརྦ་ཤ་ཏྲཱུཾ། སརྦ་དུཥྚ་ན། ནི་གྲྀནྟ། པྲ་སཱ་དྷ་ཡ་ཧཱུྃ། མ་ཧཱ་བྷ་ག་བ་ཏེ། ཛྭཱ་ལ་ཛྭཱ་ལ། ཧཱུྃ་ཕཊ། ཆེ་གེ་མོ་ཞིག་མེ་བ་ཤ་མཱ་ནཱ་ཡ་སྭཱ་ཧཱ། དེ་ནས་སྲིན་མོ་འབར་བའི་གློག །རིག་སྔགས་ཆེན་མོ་གསུངས་པ་ཡིས། །བདུད་ཀྱི་གནས་རྣམས་ཚིག་པར་འགྱུར། །དགྲ་རྣམས་ཀྱི་ནི་སྙིང་ཡང་སྐམས། །དུར་ཁྲོད་ཀྱི་རས་ལ་སྲིན་མོ་བཙག་གིས་བྲིས་ནས་ལེགས་པར་སྦས་ཏེ་གུ་གུལ་གྱི་བདུག་པས་བསྲེག་ཅིང་བརྒྱ་རྩ་བརྒྱད་བཟླས་བརྗོད་བྱས་ལ། །མེ་ཏོག་དམར་པོ་དང་། དྲི་དམར་པོ་དང་། གཏོར་མ་དང་། ལྷ་བཤོས་དམར་པོར་བྱས་པ་བྱིན་ནས་དུར་ཁྲོད་དུ་བརྐོ་བར་བྱའོ། །དེའི་སྟེང་དུ་མིང་ནས་སྨོས་ཤིང་བརྒྱ་རྩ་བརྒྱད་བཟླས་བརྗོད་བྱས་པའི་ཡུངས་ཀར་གྱིས་གཏོར་ཏོ། །བརྐོས་པའི་མོད་ལ་ཕྱིར་རྒོལ་བ་དང་དགྲ་ཐམས་ཅད་བཅིངས་པར་འགྱུར་རོ། །མནན་པ་དང་རྨོངས་པར་བྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཕྲོག་མའི་དགའ་སྟོན་གནོད་སྦྱིན་མོའི་ཚོགས་དགའ་བར་བྱེད་པའི་དངོས་གྲུབ་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་འཆང་ཆེན་པོ་འཕྲོག་མའི་གསང་སྔགས་འདི་གསུངས་སོ། །ཨོྃ་ཧཱ་རི་ཏྱེ་མ་ཧཱ་ཡཀྵི་ཎཱི་ཡེ་ཧ་ར་ཧ་ར། སརྦ་ཡཀྵི་ཎཱི་པྲ་བེ་ཤ་ནི་སྭཱ་ཧཱ། དེ་ནས་འཕྲོག་དགའ་

འཕྲོག་མ་ནི། །གནོད་སྦྱིན་ཆེན་མོ་གསུངས་པ་དང་། །གནོད་སྦྱིན་མ་ཀུན་གཡོས་ནས་སུ། །དངོས་གྲུབ་ཕྱིར་ནི་མངོན་ཕྱོགས་གྱུར། །ཁྲོ་མོའི་འཁོར་ལོ་གནོད་སྦྱིན་མ། །བརྒྱད་དབུས་འཕྲོག་མས་བརྒྱན་བྱས་ཏེ། །ལྕགས་ཀྱུ་འབྲས་བུ་ནེའུ་ལེ་ཅན། །གནོད་སྦྱིན་བརྒྱད་ཀྱིས་བཀླུབས་ནས་སུ། །གནོད་སྦྱིན་མ་ཀུན་བསྒྲུབ་པར་བྱ། །དེ་ནས་བཅོམ་ལྡན་འདས་ཀྱིས་ནད་ཆེན་པོ་ཐམས་ཅད་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་མི་ངས་ཆེན་པོ་ཞི་བར་མཛད་པའི་རིག་སྔགས་རི་ཁྲོད་ཀྱི་ཤིང་ལོ་ཅན་མ་འདི་གསུངས་སོ། །ཨོཾ་པི་ཤཱ་ཙི་པརྞ་ཤ་བ་རི། སརྦ་མཱ་རི་པྲ་ཤ་མ་ནི་ཧཱུྃ་ཕཊ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །གནོད་བྱེད་ནད་འགྲོ་སྲིན་པོ་དང་། །སྡང་བ་རྣམས་ཀྱི་སྙིང་ཡང་ཟགས། །ཡམ་ཤིང་འོ་མ་ཅན་དང་ཏིལ། །འོ་མས་དུ་བ་ཞི་བར་འགྱུར། །ནམ་མཁར་ཀུན་ནས་རིག་སྔགས་ཀྱི། །རྒྱལ་མོས་ལེགས་པར་བཀང་ནས་སུ། །བདུད་རྩི་ཆར་འབེབས་བསམས་ན་ནི། །མོད་ལ་གནོད་པ་ཞི་བར་འགྱུར། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་གྱི་དྲ་བ་ལས་འདི་ནི་གསང་སྔགས་ཀྱི་ཡེ་ཤེས་རྣམ་པར་བསྒྱིངས་པའི་རིམ་པར་ཕྱེ་བའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སྐུ་གསུམ་ཡེ་ཤེས་ཀྱི་རྡོ་རྗེ་ལས་ཡང་དག་པར་བྱུང་བ་ལག་པའི་ཕྱག་རྒྱ་ཐ་དད་པ་རྣམས་མཉམ་པར་གཞག་པའི་སེམས་ཀྱིས་ཉོན་ཅིག །གང་ཞིག་བཅིངས་པ་ཙམ་གྱིས་ནི། །སྡིག་པ་ཀུན་ལས་རྣམ་གྲོལ་ཞིང་། །འདི་ན་ལུས་ནི་བྱིན་རླབས་ཏེ། །རང་གི་གཟུགས་སུ་རྣམ་བསྒོམས་ན། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ལག་པ་གཉིས་ཁུ་ཚུར་བཅངས་པ་ལས་མཐེ་བོ་གཉིས་བཏེག་པ་ནི་དེ་བཞིན་གཤེགས་པའི་སྟེ། སྐུ་བྱིན་གྱིས་བརླབ་པའི་ཕྱག་རྒྱའོ། །དེ་ཉིད་ལས་གཡོན་པའི་མཐེ་བོ་ནང་དུ་བཅུག་སྟེ། གཡས་པའི་མཐེ་བོ་བཏེག་པ་ནི་འཇིག་རྟེན་དབང་ཕྱུག་གི་

སྟེ་གསུང་བྱིན་གྱིས་བརླབ་པའི་ཕྱག་རྒྱའོ། །དེ་ཉིད་ལས་གཡས་པའི་མཐེ་བོ་ནང་དུ་བཅུག་སྟེ། གཡོན་པའི་མཐེ་བོ་བཏེག་པ་ནི་རྡོ་རྗེ་འཆང་གི་སྟེ། ཐུགས་བྱིན་གྱིས་བརླབ་པའི་ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་གཡོན་པའི་མཛུབ་མོ་བསྒྲེང་བའི་ཐོར་ཏོ་གཡས་པའི་ཁུ་ཚུར་གྱིས་བཟུང་པ་ནི་རྡོ་རྗེ་རྣམ་པར་སྣང་མཛད་ཆེན་པོའི་ཕྱག་རྒྱའོ། །སེམས་དཔའི་སྐྱིལ་མོ་ཀྲུང་དུ་འདུག་ནས་ལག་པ་གཡོན་པ་པང་པར་བཞག་སྟེ། གཡས་པ་ས་ལ་གནོན་པ་ནི་མི་འཁྲུགས་པའི་ཕྱག་རྒྱའོ། །དེ་ཉིད་ལས་གཡས་པ་མཆོག་སྦྱིན་པར་བྱས་པ་ནི་རིན་ཆེན་འབྱུང་གནས་ཀྱི་ཕྱག་རྒྱའོ། །དེ་ཉིད་ལས་ལག་པ་གཉིས་བསམ་གཏན་གྱི་ཚུལ་དུ་བྱས་པ་ནི་འོད་དཔག་མེད་ཀྱི་ཕྱག་རྒྱའོ། །དེ་ཉིད་ལས་གཡས་པ་མི་འཇིགས་པ་སྦྱིན་པར་བྱས་པ་ནི་གདོན་མི་ཟ་བར་གྲུབ་པའི་ཕྱག་རྒྱའོ། །ལག་པ་གཉིས་རྡོ་རྗེ་བཅིང་པར་བྱས་པ་ལས་གུང་མོ་གཤིབས་ཏེ་བསྒྲེང་བ་ནི་རྡོ་རྗེ་སེམས་མའི་ཕྱག་རྒྱའོ། །དེ་ཉིད་ལས་གུང་མོའི་ཚིགས་དང་པོ་བཀུག་སྟེ། རིན་པོ་ཆེའི་ཚུལ་དུ་བྱས་པ་ནི་རྡོ་རྗེ་རིན་ཆེན་མའི་ཕྱག་རྒྱའོ། །དེ་ཉིད་ལས་གུང་མོ་པདྨོའི་འདབ་མ་ལྟར་གདུ་བུའི་ཚུལ་དུ་བྱས་པ་ནི། རྡོ་རྗེ་ཆོས་མའི་ཕྱག་རྒྱའོ། །དེ་ཉིད་ལས་གུང་མོ་ནང་དུ་བསྐུམ་པ་ནི་རྡོ་རྗེ་ལས་མའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལ་མཛུབ་མོ་གཉིས་གདུ་བུ་ལྟར་བྱས་ཏེ་མཐེ་བོའི་རྩེ་མོར་མིག་གི་ཚུལ་དུ་བྱས་པ་ནི། སངས་རྒྱས་སྤྱན་གྱི་ཕྱག་རྒྱའོ། །རྡོ་རྗེ་བཅིངས་པ་ལས་གུང་མོ་བསྒྲེང་བའི་ཚིགས་གསུམ་པར་མཛུབ་མོ་གཉིས་རྡོ་རྗེའི་ཚུལ་དུ་བཟུང་བ་ནི་མཱ་མ་ཀཱིའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ཏེ་པདྨ་ཁ་བྱེ་བའི་ཚུལ་དུ་བྱས་པ་ནི་གོས་དཀར་ཅན་གྱི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་བཀུག་པས་གུང་མོའི་སེན་མོ་མནན་ཏེ་མཐེ་བོ་གཉིས་དབུས་སུ་བཞག་ནས་ཅུང་ཟད་བཀུག་པ་ནི་སྒྲོལ་མའི་ཨུཏྤ་ལའི་ཕྱག་རྒྱའོ། །ལག་པ་གཉིས་ཐལ་མོ་སྦྱར་ཏེ། མཛུབ་མོ་དང་གུང་མོའི་ཚིགས་དབུས་མར་གདུ་བུའི་ཚུལ་བྱས་ནས་མཐེ་བོ་གཉིས་གློར་བཞག་པ་འདི་

ནི་སྐུལ་བྱེད་མའི་གཟུངས་ཀྱི་ཕྱག་རྒྱའོ། །དེ་ནས་རྡོ་རྗེ་བཅིངས་པ་བྱས་པ་ལས་མཛུབ་མོ་གཉིས་མཐེ་བོའི་རྩེ་མོར་བཀུག་པ་འདི་ནི་རིན་ཆེན་སྒྲོལ་མའི་ཕྱག་རྒྱའོ། །ལག་པ་གཉིས་བརྐྱང་སྟེ་མཐེ་བོས་སོ་སོའི་མཐེའུ་ཆུང་གི་སེན་མོ་མནན་ནས་ལྷག་མ་རྡོ་རྗེའི་མཚན་ཉིད་དུ་བྱས་པ་འདི་ནི་ཁྲོ་གཉེར་ཅན་མའི་ཕྱག་རྒྱའོ། །ལག་པ་གཉིས་སོ་སོར་ཁུ་ཚུར་བཅངས་པ་ལས་མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་པ་འདི་ནི་རྡོ་རྗེ་ལུ་གུ་རྒྱུད་ཀྱི་ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་གུང་མོ་དང་སྲིན་ལག་གཉིས་བསྒྲེངས་ཏེ་རྩེ་མོའི་ཚུལ་དུ་བྱས་ལ་གུང་མོའི་རྒྱབ་ཏུ་སྲིན་ལག་བསྣོལ་ལ། མཛུབ་མོ་གཉིས་གདུ་བུའི་ཚུལ་དུ་བྱས་པས་དཀྲིས་པས་མཐེ་བོ་གཉིས་མདུན་དུ་བཞག་པ་ལས་ཅུང་ཟད་བཀུག་སྟེ་ཁའི་ཚུལ་དུ་བྱས་པ་འདི་ནི་གཤིན་རྗེ་གཤེད་ཀྱི་ཕྱག་རྒྱའོ། །ལག་པ་གཡོན་པ་རྡོ་རྗེ་ཁུ་ཚུར་བཅངས་པ་ལས་ཁྲོ་བོའི་མཛུབ་མོ་སྙིང་གར་བཞག་སྟེ། ལག་པ་གཡས་པ་ཐལ་ལྕག་གི་ཚུལ་དུ་བྱས་པ་ནི་ཁྲོ་བོ་གཞན་གྱིས་མི་ཐུབ་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ལ་མཐེའུ་ཆུང་ལུ་གུ་རྒྱུད་ལྟར་མདུད་ལ་མཛུབ་མོ་གཞིབས་ཏེ་བསྒྲེང་བ་ལས་བཟློག་སྟེ། དཔྲལ་བར་བཞག་པ་ནི་རྟ་མགྲིན་གྱི་ཕྱག་རྒྱའོ། །ལག་པ་གཉིས་ཀྱི་མཐེ་བོས་སྲིན་ལག་དང་མཐེའུ་ཆུང་གཉིས་ཀྱི་སེན་མོ་མནན་ལ་རལ་གྲི་ཤུབས་ནས་དབྱུང་བའི་ཚུལ་དུ་བྱས་པ་ནི་འཕགས་པ་མི་གཡོ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བཅངས་པ་ལས་རྒྱབ་སྤྲད་དེ་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་ནས་མཛུབ་མོ་གཉིས་བསྒྲེངས་པ་ལས་ཞགས་པའི་ཚུལ་དུ་བྱས་པ་ནི་འདོད་པའི་རྒྱལ་པོའི་ཕྱག་རྒྱའོ། །ལག་པ་གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་སྙིང་གར་བཞག་ལ། གཡས་པ་ཁྲོ་བོའི་སོར་མོ་བེ་ཅོན་གྱི་ཚུལ་དུ་ཕྱར་བ་ནི་བེ་ཅོན་སྔོན་པོ་ཅན་གྱི་ཕྱག་རྒྱའོ། །ལག་པ་གཡོན་པ་རྡོ་རྗེ་སྙིང་གར་བཞག་ལ་གཡས་པའི་རྡོ་རྗེ་ཁུ་ཚུར་རྡེག་སྟངས་དང་བཅས་པར་ཕྱར་བ་ནི་སྟོབས་པོ་ཆེའི་ཕྱག་རྒྱའོ། །ལག་པ་གཉིས་སོ་སོར་ཁུ་ཚུར་བཅངས་ལ། མཛུབ་མོ་དང་གུང་མོ་བསྒྲེངས་ཏེ་སྤྲད་ནས་མེ་ཏོག་གི་ཚུལ་དུ་བྱས་པ་ནི་བྱམས་པའི་ཕྱག་རྒྱའོ། །

ལག་པ་གཉིས་ཐལ་མོ་ཁོང་སྟོང་དུ་སྦྱར་ནས་མཛུབ་མོ་གཉིས་ཀྱིས་སྲིན་ལག་གཉིས་ཀྱི་སེན་མོ་མནན་ནས་ཨུཏྤལ་ཁ་བྱེ་བའི་ཚུལ་དུ་གཞུག་པ་ནི་འཇམ་པའི་དབྱངས་ཀྱི་ཕྱག་རྒྱའོ། །ལག་པ་གཡོན་པ་པང་པར་བཞག་ལ། ལག་པ་གཡས་པ་གླང་པོ་ཆེའི་སྣ་ལྟར་བྱས་པ་ནི་སྤོས་ཀྱི་གླང་པོའི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་ནམ་མཁའ་ལ་སྒྲེང་བ་ལག་པ་གཡས་པའི་སོར་མོ་བ་དན་གྱི་ཚུལ་དུ་བྱས་པ་ནི་ཡེ་ཤེས་ཏོག་གི་ཕྱག་རྒྱའོ། །བཟང་པོའི་འདུག་སྟངས་སུ་འདུག་སྟེ།ཐལ་མོ་ཁོང་སྟོང་དུ་སྦྱར་ཏེ་སྙིང་གར་བཞག་པ་ནི་བཟང་སྐྱོང་གི་ཕྱག་རྒྱའོ། །ལག་པ་གཉིས་ཆུ་རླབས་ཀྱི་ཚུལ་དུ་བརྐྱང་བ་ལས་སོར་མོ་རྣམས་ཆུ་རླབས་དྲང་བ་ནི་བློ་གྲོས་རྒྱ་མཚོའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་སྙིང་གར་བཞག་ལ་གཡས་པ་མཆོག་སྦྱིན་པ་ནི་བློ་གྲོས་མི་ཟད་པའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་པང་དུ་བཞག་ལ་གཡས་སེ་གོལ་གཏོགས་པའི་ཚུལ་དུ་བྱས་པ་ནི་སྤོབས་པ་བརྩེགས་པའི་ཕྱག་རྒྱའོ། །ལག་པ་གཉིས་པདྨ་ཅུང་ཟད་ཁ་བྱེ་བ་ལྟར་བྱས་པ་ནི་མཐུ་ཆེན་ཐོབ་ཀྱི་ཕྱག་རྒྱའོ། །ལག་པ་གཉིས་མེ་ཏོག་འདོར་བའི་ཚུལ་དུ་བྱས་པ་ནི་ངན་སོང་ཐམས་ཅད་སྤོང་བའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལས་བསྣུན་པའི་ཚུལ་དུ་བྱས་པ་ནི་མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་ཀྱི་ཕྱག་རྒྱའོ། །ལག་པ་གཉིས་བརྐྱང་ནས་འཕྲོ་བའི་ཚུལ་དུ་བྱས་པ་ནི་དྲ་བ་ཅན་གྱི་འོད་ཀྱི་ཕྱག་རྒྱའོ། །གཡས་པ་མཆོག་སྦྱིན་པར་བྱས་པ་ལ་གཡོན་པ་ཟླ་བའི་ཚུལ་དུ་བྱས་པ་ནི་ཟླ་འོད་ཀྱི་ཕྱག་རྒྱའོ། །ལག་པ་གཉིས་བུམ་པའི་ཚུལ་དུ་བྱས་ནས་དབང་བསྐུར་བ་ནི་འོད་དཔག་མེད་ཀྱི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་བྱས་ལ་གཡས་པའི་ཁུ་ཚུར་ནམ་མཁའ་ལ་ཀུན་ཏུ་བསྐོར་བའི་ཚུལ་དུ་བྱས་པ་ནི་ནམ་མཁའ་མཛོད་ཀྱི་ཕྱག་རྒྱའོ། །གཡོན་པ་ས་ལ་བརྐྱང་ནས་ལག་པ་གཡས་པའི་མཛུབ་མོ་དང་མཐེ་བོང་སྤྲད་ནས་ཞི་བའི་ཚུལ་དུ་བྱས་པ་ནི་སྒྲིབ་པ་ཐམས་ཅད་ངེས་པར་སེལ་བའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་ལས་ཁྲོ་བོའི་མཛུབ་མོ་སྙིང་གར་བཞག་ལ་ཧཱུྃ་ཞེས་བྱ་ཞིང་། ལག་པ་གཡས་པའི་རྡོ་རྗེ་ཁུ་ཚུར་རྡེག་

སྟབས་དང་བཅས་པར་ཕྱར་བ་ནི་རི་ཁྲོད་ལོ་མ་ཅན་གྱི་ཕྱག་རྒྱའོ། །ལག་པ་གཡོན་པ་སོར་མོ་བརྐྱང་བ་ལས་མཛུབ་མོ་དང་མཐེ་བོ་རྐང་པས་འཛིན་པའི་ཚུལ་དུ་བྱས་ལ། ལག་པ་གཡས་པ་ཁབ་ཀྱི་ཚུལ་གྱིས་འཚེ་བར་བྱེད་པ་རྣམས་ཀྱི་ཁ་མིག་འདྲུབ་པ་ནི་འོད་ཟེར་ཅན་མའི་ཕྱག་རྒྱའོ། །ལག་པ་གཉིས་སྤྱི་བོར་སྦྲུལ་མགོ་གདེངས་ཀའི་གདུགས་ལྟར་བྱས་ནས་ཕུད་ཅེས་བརྗོད་པ་ནི་དུག་སེལ་མའི་ཕྱག་རྒྱའོ། །འདོད་པའི་རྒྱལ་པོའི་ཕྱག་གཉིས་ལས་མཛུབ་མོ་གཉིས་བསྒྲེང་བ་ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱའོ། །དེ་ཉིད་ལས་གཡས་པའི་ཁྲོ་བོའི་ལྕགས་ཀྱུ་ཡིས་ཛཿཞེས་བྱ་བའི་དགུག་པ་ནི་རྡོ་རྗེ་ཁྲོ་བོ་ལྕགས་ཀྱུ་དགུག་པ་སྟེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་སྟེ་རྡོ་རྗེ་ཁྲོ་བོའི་ལྕགས་ཀྱུའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་མཆེ་བའི་ཚུལ་དུ་བྱས་པ་ལས་བསྣོལ་ཏེ་འགྲམ་པ་གཉིས་སུ་བཞག་ལ། ལྕེ་ལྗིབ་ཅིང་ཁྲོ་བོའི་ལྟ་བས་བལྟ་བར་བྱ་བ་ནི་རྡོ་རྗེ་མཆེ་བའི་ཕྱག་རྒྱའོ། །དེ་ཉིད་ལས་མཐེའུ་ཆུང་གཉིས་བསྐུམ། མཛུབ་མོ་གཉིས་ལྕགས་ཀྱུའི་ཚུལ་དུ་བྱས་ནས་ཁའི་གྲྭར་བཞག་སྟེ་ཧཱུྃ་ཞེས་བྱ་ཞིང་ཁྲོ་བོའི་ལྟ་བས་ལུས་གཅུ་བ་ནི་རྡོ་རྗེ་མཁའ་འགྲོ་མའི་ཕྱག་རྒྱའོ། །ལག་པ་གཉིས་ཀྱིས་རྡོ་རྗེ་ཁུ་ཚུར་བཅངས་པ་ལས་མཛུབ་མོ་གཉིས་བརྐྱང་སྟེ་བསྣོལ་ནས་གྱེན་དུ་བཏེག་པ་ལྟར་བྱས་པ་ནི་དཀྱིལ་འཁོར་གྱི་ཕྱག་རྒྱའོ། །དེ་ཉིད་ལས་མཁྲིག་མ་གཉིས་བསྣོལ་ཏེ་བསྟོད་ཅིང་བཏེག་པ་ནི་སྒོ་དབྱེ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བསྣོལ་ནས་མཆན་ཁུང་དུ་བསྡམས་ཏེ་ཁྲོ་བོའི་ལྟ་བས་འགྱུར་བ་དང་བཅས་པ་ནི་གདོན་ཐམས་ཅད་སྐྲག་པར་བྱེད་པའི་ཕྱག་རྒྱའོ། །ལག་པ་གཡོན་བརྐྱང་སྟེ་ཁ་སྦུབ་པ་ལ་དེའི་སྟེང་དུ་གཡས་པ་བཞག་ནས་ལག་པ་གཉིས་ཀྱིས་སོར་མོ་བསྐྱོད་པ་ནི་ལྷ་མ་ཡིན་གྱི་སྒྱུ་དང་འཁྲུལ་འཁོར་འབྱེད་པ་དང་། ལྷ་མ་ཡིན་གྱི་བུ་མོ་སྨྲར་གཞུག་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་ཏེ་བཞག་ལ། ལྷག་མ་བ་དན་རྩེ་གསུམ་པའི་ཚུལ་དུ་བྱས་ནས་སྟང་སྟབས་དང་བཅས་པར་ཧཱུྃ་ཞེས་བྱ་བའི་ཁྲོ་

བོ་རྡོ་རྗེས་འོག་གི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་གྱི་ཁྲོ་བོའི་མཛུབ་མོས་བསྡིགས་པ་ནི་རྡོ་རྗེའི་བདག་མོའི་ཕྱག་རྒྱའོ། །རྡོ་རྗེ་བཅིངས་པ་ལས་མཛུབ་མོ་གཉིས་བརྐྱང་སྟེ་ཕུར་བུའི་ཚུལ་དུ་བྱས་པ་ནི་རྡོ་རྗེ་ཕུར་བུའི་ཕྱག་རྒྱའོ། །གཡས་པའི་རྡོ་རྗེ་ཁུ་ཚུར་བརྡུང་བའི་ཚུལ་དུ་བྱས་པ་ནི་རྡོ་རྗེ་ཐོ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བཅངས་པ་ལས་མཛུབ་མོ་གཉིས་བརྐྱང་སྟེ་རྡོ་རྗེ་མདུད་པ་དོར་བའི་ཚུལ་དུ་བྱས་པ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཅིངས་པའི་ཕྱག་རྒྱའོ། །ལག་པ་གཉིས་ཀྱིས་རྡོ་རྗེ་ཁུ་ཚུར་བཅངས་ཏེ་སོག་ལེ་དྲང་བའི་ཚུལ་དུ་བྱས་པ་ནི་རྡོ་རྗེ་སོག་ལེའི་ཕྱག་རྒྱའོ། །ལག་པ་གཉིས་ཐལ་མོ་ཟླ་བའི་ཚུལ་དུ་བྱས་ཏེ་གདོང་གཡོག་ཅིང་བརྐྱང་ལ་ཁྲོ་བོའི་མིག་ཏུ་བྱས་ནས་ཨ་ལ་ལ་ཞེས་བྱ་བ་ནི་རྡོ་རྗེ་སྲིན་མོའི་ཕྱག་རྒྱའོ། །ལག་པ་གཉིས་ལུ་གུ་རྒྱུད་དུ་བཅིངས་པ་ལ་མཛུབ་མོ་དང་མཐེ་བོ་གཉིས་པདྨའི་ཚུལ་དུ་བྱས་པ་ནི་སྤྲིན་ཐམས་ཅད་གཏུབ་པའི་ཆར་པའི་ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་མཛུབ་མོ་གཉིས་གདུ་བུ་ལྟར་བྱས་ཏེ་སྐམ་པའི་ཚུལ་དུ་དཔུང་པ་བརྐྱང་བ་ནི་འཁྲུལ་འཁོར་གྱི་ཕུར་པ་དབྱུང་བའི་སྐམ་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་ལག་མཐིལ་དུ་བཞག་སྟེ། ལྷག་མ་རྣམས་འདབ་མ་ལྟར་གཡབ་ཅིང་རྐང་པ་ཡ་གཅིག་ས་ལ་བཙུགས་ལ། གཅིག་རྒྱབ་ཏུ་བསྐུམས་ནས་ཁྲོ་བོའི་ལྟ་བས་ལྕེ་ལྗིབ་ཅིང་ཧཱུྃ་ཕཊ་ཅེས་བྱ་བས་རིམ་གྱིས་བསྐྱོད་པ་ནི་རྡོ་རྗེ་ནམ་མཁའ་ལྡིང་གི་ཕྱག་རྒྱའོ། །འདི་བཅིངས་པ་ཙམ་གྱིས་ཁམས་གསུམ་ཁྱབ་པའི་དུག་ཀྱང་སྐད་ཅིག་གིས་སེལ་བར་བྱེད་དོ། །རྡོ་རྗེ་ཁུ་ཚུར་གཉིས་མདའ་གཞུ་དགང་བའི་ཚུལ་གྱིས་ཕྱོགས་བཞིར་མདའ་བཀང་སྟེ་འཕངས་པས་ཕ་རོལ་དཔུང་གཞིག་པ་ནི་མཉེས་པར་བྱེད་པའི་རྡོ་རྗེ་མདའི་ཕྱག་རྒྱའོ། །ཁུ་ཚུར་གཉིས་ལས་གུང་མོ་གཤིབས་ཏེ་བསྒྲེང་བ་ལས་རིན་པོ་ཆེའི་ཚུལ་དུ་བཀུག་ལ་མཐེ་བོ་བརྐྱང་བའི་སྟེང་དུ་མཛུབ་མོ་གཉིས་གདུ་བུའི་ཚུལ་དུ་བྱས་པ་ནི་སངས་རྒྱས་འཁོར་ལོ་ཅན་གྱི་ཕྱག་རྒྱ་གཡུལ་ལས་སྒྲོལ་བར་བྱེད་པའོ། །ལག་པ་གཡོན་པའི་མཐེ་བོས་སོར་མོ་མནན་ཏེ་གུང་མོ་བསྒྲེང་ལ་གཡས་པས་པདྨ་ཁ་འབྱེད་པའི་ཚུལ་དུ་བྱས་པ་ནི་ཧ་ལ་

ཧ་ལའི་ཕྱག་རྒྱའོ། །ཁུ་ཚུར་གཉིས་ཀྱིས་མཐེའུ་ཆུང་གཉིས་དཀྲིས་ལ་མཛུབ་མོ་གཉིས་གཤིབས་ཏེ་བསྒྲེང་ནས་བཟློག་ལ་དཔྲལ་བར་བཞག་པ་ནི་རྡོ་རྗེ་ཁྲག་འཐུང་གི་ཕྱག་རྒྱ་སྟེ། །དུར་ཁྲོད་དུ་འཇུག་པ་ན་མཁའ་འགྲོ་མ་རྣམས་འཇིགས་པར་བྱེད་པའོ། །གཡོན་པས་ཐོད་པ་གཟུང་ལ་གཡས་པས་མདུང་རྩེ་གསུམ་ཐོགས་ནས་རལ་པ་བཅིངས་ཏེ་ཟླ་བས་བརྒྱན་ཅིང་མཚན་བསྒྲེང་ལ། མིག་གསུམ་པ་གར་བྱེད་པ་ནི་གར་སྟབས་ཀྱི་ཕྱག་རྒྱ་སྟེ་འདི་ནི་བདེ་བྱེད་ཀྱི་ཕྱག་རྒྱའོ། །གཡོན་པ་མི་འཇིགས་པར་བྱས་པ་ལས་སོར་མོ་རྣམས་ཅུང་ཟད་ཕྱེ་སྟེ་མཐེ་བོ་ལག་མཐིལ་དུ་བཞག །དེ་བཞིན་དུ་གཡས་པའི་ཁུ་ཚུར་དབྱུག་ཐོ་འཛིན་པ་ལྟར་བྱས་པ་ནི་ཁྱབ་འཇུག་གི་ཕྱག་རྒྱའོ། །ལག་པ་གཉིས་བརྐྱང་ནས་པདྨའི་ཚུལ་དུ་བྱས་པ་ནི་ཚངས་པའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ཏེ་མེ་ཏོག་ལྟར་བྱས་པ་ནི་མ་མོ་རྣམས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་ནི། །རྒྱབ་ཏུ་མདུད་པ་ལྟར་འདོར་ཞིང་། །རྡོ་རྗེ་སེམས་མ་ལ་སོགས་པའི། །རིན་ཆེན་ཅོད་པན་ཕྲེང་དབང་བསྐུར། །ཏིང་འཛིན་གནས་པས་འཁོར་ལོ་ཅན། །འཁོར་ལོ་མངའ་བའི་ལྷ་རྣམས་ལ། །སངས་རྒྱས་ས་ནི་རབ་འགེངས་པའི། །གསང་བའི་མཆོད་པ་འབྱུང་བར་བསམ། །འགྱུར་ཞིང་ཅུང་ཟད་འཇོ་ཚུལ་ཅན། །སྒེག་མོ་ཡི་ནི་ཕྱག་རྒྱ་ཡིས། །གར་གྱི་ཚུལ་དུ་བསྐྱོད་ནས་ཀྱང་། །ཧཱུྃ་ཞེས་བྱ་བ་གླུར་བླངས་ཤིང་། །དེ་ནས་སངས་རྒྱས་ཀུན་དགྱེས་པ། །རྡོ་རྗེ་རྒྱུད་ནི་བསྒྲེང་བར་བྱ། །དེ་ནས་ཕྲེང་ཚུལ་ཕྲེང་བ་ཡིས། །ལྷ་རྣམས་ཀུན་ལ་བཅིང་བར་བྱ། །འཇོ་སྒེག་ཐབས་ལ་སྤྲོ་བ་ཡིས། །ལག་གཉིས་བསྐོར་ཞིང་དགྲོལ་བ་དང་། །གཡས་ནས་གཡོན་དུ་བསྐོར་བ་ཡིས། །གར་སྟབས་བྱས་ནས་མགོ་ལ་གཞག །མེ་ཏོག་དབུལ་བའི་ཚུལ་དུ་ནི། །གང་གིས་མེ་ཏོག་ཐལ་མོ་སྦྱར། །བདུག་སྤོས་རྩེ་མོ་སྦྱར་བ་ཡིས། །གུང་མོ་གཉིས་ནི་བཟློག་སྟེ་བསྒྲེང་། །བསྐོར་ཅིང་བསྒྱུར་བ་བྱས་པ་ཡིས། །མཐེབ་གཉིས་མར་མེའི་ཚུལ་དུ་གཞག །དུང་གི་ཚུལ་དུ་ལག་བསྒྱུར་ནས། །དུང་

ཕོར་ལྟ་བུའི་མཆོད་ཡོན་དབུལ། །དེ་ནས་ལྷ་རྣམས་ཀུན་ལ་ཡང་། །ལག་པའི་གར་གྱིས་བྱུག་ཚུལ་བྱ། །དེ་ནས་སིལ་སྙན་ཚུལ་གྱིས་སུ། །ལག་གཉིས་སིལ་སྙན་ལེགས་པར་བརྡུང་། །དུང་དང་གླིང་བུ་བུད་པ་དང་། །ལག་པ་གཉིས་ནི་རྔ་ཡབ་གཡོབ། །བསིལ་ཡབ་ཚུལ་གྱིས་བསིལ་ཡབ་དང་། །སོར་མོ་གཉིས་ཀྱིས་རྒྱལ་མཚན་བྱ། །ཚོན་དགྱེ་ཚེ་ན་ལྕུག་ཕྲན་ལྟར། །བསྐྱོད་ཅིང་ཚོན་གྱི་ཕྲེང་བ་དགྱེ། །ལག་གཡོན་སྣོད་ཀྱི་ཚུལ་བྱས་ལ། །གཡས་པ་ཡིས་ནི་ལྷ་བཤོས་དབུལ། །ཁང་པ་བརྩེགས་པ་བཞག་ནས་སུ། །གོས་ཀྱི་ཚུལ་གྱིས་གོས་རྣམས་དང་། །གདུ་བུ་སྐེ་རགས་རྐང་རྒྱན་དང་། །རྣ་ཆ་དོ་ཤལ་གནས་ལྔར་གཞག །དེ་ནས་གདུགས་ཀྱི་ཚུལ་གྱིས་སུ། །ལྷ་རྫས་གདུགས་ནི་ལེགས་པར་གཟུང་། །བསམ་གཏན་ཚུལ་གྱིས་ལག་པ་དག །ནམ་མཁའ་ལ་ནི་མཛེས་བསྐོར་ན། །སངས་རྒྱས་ཞིང་རབ་འགེངས་བྱེད་པའི། །བླ་རེ་རྣམ་པ་སྣ་ཚོགས་འགྱུར། །གྲྭར་ནི་པདྨའི་ཕྲེང་བ་དང་། །དྲིལ་བུ་གཡེར་ཀའི་དྲ་བས་བརྒྱན། །གསང་སྔགས་འདི་ནི་ཆོ་ག་བཞིན། །རྡོ་རྗེ་དྲིལ་བུ་གསིལ་བ་ཡིས། །སྒོ་འཕར་དག་ཀྱང་དབྱེ་བར་བྱ། །ཨོྃ་བཛྲ་གྷཎྜ་ར་ཎི་ཏ། པྲར་ཎི་ཏ་སྃ་བྲ་ར་ཎི་ཏ། སརྦ་བུདྷ་ཀྵེ་ཏྲ། པྲ་ཙ་ལི་ཏེ། པྲཛྙཱ་པཱ་ར་མི་ཏཱ། ནཱ་ད་སྭ་བྷཱ་བེ་བཛྲ་དྷརྨྨ་ཧྲྀ་ད་ཡ། སནྟོ་ཥ་ཎི་ཧཱུྃ་ཧཱུྃ་ཧཱུྃ། ལག་གཡས་རྡོ་རྗེ་གསོར་བྱ་ཞིང་། སྣ་ཚོགས་ཁུགས་སུ་འགྱུར་བ་ཡི། །རྡོ་རྗེ་གླུ་ཡིས་བསྟོད་པར་བྱ། །རྡོ་རྗེ་ཐེག་པས་མཉེས་བྱེད་པ། །འདི་ནི་དོན་དམ་མཆོད་པ་ཡིན། །གང་གིས་རྣམ་རྟོག་རྣམ་སྤངས་ཏེ། །བྱང་ཆུབ་སེམས་ནི་རྣམ་བསྒོམས་པས། །ལུས་ངག་སེམས་ནི་རྣམ་དག་པ། །དེ་ཡི་མཆོད་པ་བླ་ན་མེད། །སེམས་ཅན་གང་གིས་དབུ་མ་ཡི། །ཐེག་པ་གོང་མ་མ་བསྒོམས་ཤིང་། །ཐེག་པ་དམན་པ་ལྷག་མོས་པ། །དེ་ཡི་མཆོད་པ་ཀུན་རྫོགས་པ། །སངས་རྒྱས་དབང་ཆེན་གྲགས་ཀུན་གྱིས། །མཆོད་པ་དེ་དག་གསན་པ་དང་། །ངོ་མཚར་བྱུང་བའི་སྤྱན་ཕྱེ་ནས། །ལེགས་སོ་ཞེས་ནི་རབ་ཏུ་གསུངས། །ཨེ་མའོ་སངས་རྒྱས་ཐམས་ཅད་ཀྱིས། །

བྱང་ཆུབ་སངས་རྒྱས་ཐབས་སུ་སྟེ། །རྡོ་རྗེ་བསྒོམ་པ་བྱས་པ་ཡིན། །ཉོན་མོངས་མེད་པར་བྱང་ཆུབ་འཐོབ། །རྡོ་རྗེ་ཐེག་ཆེན་ལེགས་པ་སྟེ། །སངས་རྒྱས་རྣམས་ཀྱིས་བསྟན་པ་ལེགས། །ཟབ་ཅིང་རྒྱ་ཆེ་ལེགས་པ་སྟེ། །རྡོ་རྗེ་རིན་ཆེན་ཀུན་འདུས་ལེགས། །དེ་ནས་ཡེ་ཤེས་ཀྱི་སྐུ་གསུམ་ལས་བྱུང་བའི་བྱང་ཆུབ་སེམས་དཔའ་དེ་དག་གིས་སངས་རྒྱས་ཐམས་ཅད་ཀྱི་རྡོ་རྗེ་ཐེག་པ་བསྔགས་པ་ཐོས་ནས། དགའ་བས་སྤུ་ཟིང་ཞེས་བྱེད་པར་གྱུར་ནས། གཙོ་བོ་རྡོ་རྗེ་སྣང་མཛད་ལ། །དགའ་བའི་ཡིད་ཀྱིས་སྟོད་པར་བྱེད། །ཐོག་མ་མེད་ཅིང་སྐྱེ་བ་མེད། །འགྱུར་བ་མེད་ཅིང་གནས་པ་མེད། །མཁའ་བཞིན་རྣམ་རྟོག་ལས་གྲོལ་བ། །རྟོག་པ་རྣམས་ཀྱིས་རྣམ་པར་བརྟག །ཐབས་སུ་བརྟགས་པ་གང་ཡིན་དེས། །ཡེ་ཤེས་ཀྱི་ནི་སྲས་པོ་ཀུན། །རྡོ་རྗེ་ཐེག་པ་བསྒོམས་པ་ཡིས། །སངས་རྒྱས་ས་ཡང་ཐོབ་པར་འགྱུར། །ཞེས་སྨྲས་སོ། །བདེ་བ་ལས་འཁྲུངས་རྡོ་རྗེ་འཆང་བ་ཡིས། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ནི། །དག་ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་ཚུལ་གྱིས་ཕྲེང་བས་བསྐོར་བ་ཡི། །སྒྱུ་འཕྲུལ་དྲ་བ་ཁྱོད་ལ་ཕྱག་འཚལ་ལོ། །གསུང་སྙན་ཡི་གེ་ཀུན་ལ་ཁྱབ་པ་ཡི། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མིག་གསུམ་ལྷ་མོ་དང་བཅས་འདུལ་མཛད་པ། །སྒྱུ་འཕྲུལ་ཚུལ་མང་ལྡན་པ་འགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པ། །ན་ཆུང་དག་དང་ལྷན་ཅིག་བཞད་མཛད་ཅིང་། །གཡས་པའི་ཕྱག་གིས་རྡོ་རྗེ་གསོར་ནས་སུ། །གཡོན་པའི་ཕྱག་གིས་དྲིལ་བུ་སྒྲ་སྙན་འཁྲོལ། །ལྷ་མོ་མཐའ་དག་བཙུན་མོར་གྱུར་པ་ཡི། །དམ་ཚིག་རྣམས་ཀྱིས་བྱ་བ་བྱས་པར་འགྱུར། །གཅིག་གི་ལག་པས་ཀུན་ནས་འཁྱུད་པ་སྟེ། །གཉིས་པ་རྗེས་སུ་ཆགས་ཕྱིར་བདེ་བའི་མཐུ། །གསུམ་པ་མི་བཟོད་མེ་ཏོག་ཕྲེང་བ་འཐོར། །བཞི་པ་བདེ་བ་ཡིས་ནི་མདའ་ཡང་འཕེན། །གང་ཞིག་གླུ་འདི་ལེན་པར་བྱེད་པ་དག །བདེ་བའི་རྡོ་རྗེ་ཅན་དང་

མཉམ་པར་འགྱུར། །འདི་ནི་སངས་རྒྱས་ཐམས་ཅད་མཉེས་པར་བྱེད་པའི་རྡོ་རྗེའི་གླུ་ཡིན་ནོ། །ཨོྃ་ཨ་ནུནྟྟ་ར་སརྦྦ་པཱུ་ཛཱ་མེ་གྷ་ཨུངྒ་ཏེ། སྥ་ར་ཎ་ཨི་མྃ་ག་ག་ན་ཁཾ་ཧཱུྃ་ཕཊ་སྭཱ་ཧཱ། སྔགས་འདི་ལན་གསུམ་བརྗོད་པས་མཆོད་པའི་སྤྲིན་རབ་འབྱམ་ཐམས་ཅད་ཀྱི་བྱིན་གྱིས་བརླབ་པར་འགྱུར་རོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་ཕྱག་རྒྱའི་མཆོད་པ་རིམ་པར་ཕྱེ་བའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཚིག་མཐུན་པར་སྒྲ་དབྱངས་གཅིག་གིས་གསོལ་བ་བཏབ་པ། བཅོམ་ལྡན་དེ་བཞིན་གཤེགས་ཀུན་གྱི། །ཡེ་ཤེས་གཅེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་ཐུགས་སུ་ཆུད་ནས་བྱང་ཆུབ་སེམས་དཔའ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །སེམས་ནི་ལུས་ཀྱི་རྣམ་པ་ཡིན། །ལུས་ཀྱང་སེམས་ཀྱི་རྣམ་པ་ཡིན། །སེམས་ཀྱང་ཚིག་གིས་བརྗོད་པ་ཡིན། །དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྣམ་པར་སྦྱོར་བ་ཐོས་ནས་ཆེད་དུ་བརྗོད་པ་འདི་བརྗོད་དོ། །ཨེ་མ་ཀུན་ཏུ་བཟང་པོ་ནི། །སྐུ་གསུང་ཐུགས་ཀྱི་རྡོ་རྗེ་ཅན། །ཆོས་རྣམས་སྐྱེ་བ་མེད་པ་སྟེ། །གཡོ་བ་མེད་ཅིང་གནས་པ་མེད། །རྟོག་པའི་དྲི་མ་སྤངས་པ་འདི། །བསྐྱེད་པར་བྱ་ཞེས་རབ་ཏུ་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པས་གསུང་སྤྲོས་པ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་ཏེ། །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་བཞིན་དུ་དམིགས་མེད་པའི། །བྱང་ཆུབ་སེམས་འདི་བརྟན་པ་ཡིན། །ཞེས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་མི་འཁྲུགས་པས་གསུངས་

སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་ཀྱིས་དེ་བཞིན་གཤེགས་པ་ཐམས་ཅད་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་དངོས་མེད་དེ། །ཆོས་ཀྱི་མཚན་ཉིད་སྤངས་པ་ཡིན། །བདག་མེད་ཆོས་ལས་ལེགས་བྱུང་བའི། །བྱང་ཆུབ་སེམས་འདི་བརྟན་པ་ཡིན། །ཞེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ཀྱིས་རྡོ་རྗེ་མེ་ལྕེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་སྐྱེ་བ་མེད་པ་སྟེ། །དངོས་པོ་ངོ་བོ་ཡོད་མིན་པས། །ནམ་མཁའི་གོ་འཕང་ཐོབ་པོ་ཞེས། །དངོས་རྣམས་རབ་ཏུ་བརྗོད་པ་ཡིན། །ཞེས་བཅོམ་ལྡན་འདས་འོད་དཔག་མེད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དེ་བཞིན་གཤེགས་པ་ཐམས་ཅད་ཀྱི་བླ་མའི་ཡང་བླ་མ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་པ། །བཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་མེད། །རྨི་ལམ་སྒྱུ་མ་ལྟར་སྣང་བའི། །བྱང་ཆུབ་སེམས་འདི་བརྟན་པ་ཡིན། །ཞེས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་གསུངས་སོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེའི་དེ་བཞིན་གཤེགས་པའི་བྱང་ཆུབ་ཀྱི་སེམས་རྣམ་པར་དག་པར་མཐོང་ནས་ངོ་མཚར་སྐྱེས་པར་གྱུར་ཏེ་ཆེད་དུ་བརྗོད་པ་འདི་བརྗོད་དོ། །ཀྱེ་མའོ་སངས་རྒྱས་ཀྱེ་མའོ་དག །ཀྱེ་མའོ་ཆོས་ནི་བསྟན་པ་རྣམས། །བདག་མེད་ཆོས་ལས་ལེགས་བྱུང་བ། །བྱང་ཆུབ་སེམས་ལ་ཕྱག་འཚལ་ལོ། །བྱང་ཆུབ་སེམས་ནི་བསྒོམ་པ་

ཡིན། །མི་གཡོ་ཡི་གེ་ལས་བྱུང་བ། །རྨི་ལམ་སོགས་ལྟར་མ་སྐྱེས་པ། །བྱང་ཆུབ་སེམས་ལ་ཕྱག་འཚལ་ལོ། །གནས་དང་སྟན་ནི་རྣམ་བསམས་ཏེ། །སེམས་དཔའི་སྐྱིལ་མོ་ཀྲུང་བཅས་ནས། །དང་པོར་རང་བཞིན་དག་པའོ་ཞེས། །དག་པའི་ཆོས་ཀྱི་ཚུལ་ལ་གནས། །ཡིད་ཀྱིས་ཧཱུྃ་བྱས་རྡོ་རྗེ་ཅན། །རྡོ་རྗེ་སེམས་མས་བྱིན་གྱིས་བརླབས། །རིན་ཆེན་ལུས་སུ་ང་རྒྱལ་བྱ། །ལག་པ་བསྟོད་དེ་བསྐོར་བ་ཡི། །ལྕགས་ཀྱུ་ཡིས་ནི་སྤྱན་ཡང་དྲང་། །བྱོན་ནས་དང་པོར་ཕྱོགས་བཅིངས་ཏེ། །དམ་ཚིག་དག་ཀྱང་དབུལ་བར་བྱ། །གདན་རྣམས་སོ་སོར་ཕུལ་ནས་སུ། །མཆོད་ཡོན་དབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་སོགས། །སིལ་སྙན་མཆོད་སོགས་ངོ་བོ་བྱ། །རྣམ་པ་ཀུན་གྱིས་མཉེས་པར་བྱ། །རྣལ་འབྱོར་བདག་ཉིད་ཅན་གྱིས་བརྟག །རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབས་དང་ཡོངས་བརྟགས་དང་། །གཟུགས་གཉིས་རྫོགས་པར་གྱུར་པ་ནི། །རྣལ་འབྱོར་ཡིན་ཞེས་སངས་རྒྱས་གསུང་། །སྔགས་ཀྱིས་བྱིན་བརླབས་ང་རྒྱལ་བསྐྱེད། །རྣལ་འབྱོར་བྱིན་བརླབས་ཡིན་པར་གསུངས། །བྱང་ཆུབ་སེམས་ནི་དག་པ་དང་། །གསང་སྔགས་ས་བོན་བསྐྱེད་པ་ཆེ། །ཕྱག་རྒྱའི་ཚོགས་སུ་བརྟགས་པ་ཡིན། །རིམ་གྱིས་གཟུགས་ནི་རྫོགས་བྱས་པ། །དེ་ནི་བརྟག་པར་བརྗོད་པ་སྟེ། །རྣལ་འབྱོར་ཆོ་ག་ཡིན་པར་གསུངས། །བསྡུ་དང་སྤྲོ་བར་བྱས་པ་ལས། །རྣམ་པའི་མཆོག་ཀུན་ལྡན་པ་དག །སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །དང་པོར་དམ་ཚིག་བྱིན་བརླབས་པར། །རྣལ་འབྱོར་སྤྱོད་པ་བདག་གིས་བརྟགས། །རབ་ཏུ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཉོན་མོངས་དྲི་མར་བྱས་པའི་སེམས། །བྱང་ཆུབ་སེམས་ཀྱིས་དག་བྱས་ཏེ། །དེ་ནི་རང་བཞིན་དག་པའོ་ཞེས། །བརྗོད་ཅིང་ཐལ་མོ་གསུམ་གྱིས་སྦྱང་། །དག་འགྱུར་དེ་ནས་བློ་ཡིས་ནི། །སེམས་ལ་སོ་སོར་བརྟག་པར་བྱ། །སེམས་ལ་སོ་སོར་བརྟགས་ནས་ཀྱང་། །ཕྱི་རོལ་རང་བཞིན་སྟོང་པར་བྱ། །སེམས་ཙམ་ལ་ནི་གནས་

ནས་སུ། །བྱང་ཆུབ་ཚོགས་ཀྱི་བག་ཆགས་ཏེ། །བསྒོམ་པར་བྱ་བའི་ངོ་བོ་དག །ཟླ་བའི་གཟུགས་སུ་རྣམ་པར་བརྟག །ལག་པའི་པདྨ་ལ་གནས་པའི། །ཨོཾ་གྱི་མྱུ་གུས་བསྐྲུན་པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུར་ནི་བསྒོམ་པར་བྱ། །ཨཱཿཞེས་བྱ་བ་སྤྲོས་མེད་གསུང་། །སེམས་ནི་ཧཱུྃ་ཞེས་བྱ་བར་སྤྲུལ། །ཡི་གེ་གསུམ་གྱིས་བྱིན་བརླབས་ལུས། །སྙིང་ལ་གནས་པའི་ཟླ་བའི་གཟུགས། །དེ་ལ་རང་གི་ཡི་གེ་ནི། །མདོག་གཟུགས་འོད་ནི་ཕྱེད་བསམས་ཏེ། །ང་རྒྱལ་བསྐྱེད་ནས་དེ་ལ་ནི། །རྡོ་རྗེའི་བདག་ཉིད་བདག་ཡིན་བརྗོད། །རྒྱན་ཀུན་ཡོངས་སུ་རྫོགས་པ་དང་། །འོད་ཀྱི་དཀྱིལ་འཁོར་གྱིས་བརྒྱན་པ། །ཆ་ཤས་ཀྱི་ནི་དྲ་བ་ཅན། །ཡེ་ཤེས་སེམས་དཔའ་རྫོགས་པར་བརྟག །དེ་འོག་ལག་པའི་ཕྱག་རྒྱ་ཡིས། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་ལྔར་དབང་བསྐུར་ཏེ། །ཅོད་པན་ཕྲེང་བ་རྣམས་ཀྱིས་བཀླུབས། །དེ་ནས་དེ་འོག་སངས་རྒྱས་ཀྱི། །སྤྲུལ་པ་མཛད་པའི་སྒྱུ་མ་སྤྲོ། །ཡན་ལག་བཞི་པའི་དབུས་ལྡན་པའི། །ཕྱོགས་བཅུར་ཁྲོ་བོ་བཅུ་དག་དང་། །བསྙེམས་མ་དང་ནི་རྟོགས་ལྡན་མ། །མཚོན་ཆ་མདའ་དང་རྩེ་མོ་ཅན། །སྒྱུ་མའི་ཆ་བྱད་རྣམ་མང་པོ། །རྣམ་པར་འཕྲུལ་པར་བྱིན་གྱིས་བརླབ། །ཀུན་ལ་ཁྱབ་པར་བྱེད་པ་ཡི། །སྣ་ཚོགས་དབུས་སུ་བཞག་ནས་ནི། །དེ་ཉིད་ཆེན་པོ་བདག་ཉིད་ལྔས། །ཕྱོགས་བཞིའི་འཁོར་ལོ་ཁྱབ་བྱས་ཏེ། །དགའ་བས་དགའ་བྱེད་བཞི་ཡང་སྤྲོ། །ཏིང་འཛིན་ཀུན་གྱིས་དགའ་བ་ལ། །ལོངས་པར་སྤྱོད་པའི་སྔགས་པ་ཡིས། །འཁོར་ལོ་ལ་ནི་རྡོ་རྗེའི་གཟུགས། །པདྨའི་གཟུགས་ལ་དེ་དག་ནི། །འཁོར་ལོ་ཀུན་ལས་པདྨ་ཡི། །ངོ་བོ་ཡིས་ནི་རོལ་པ་དང་། །ཨེ་ཞེས་བྱ་བ་འཕྲོས་པ་ལས། །མདོག་ལྡན་བདག་ཉིད་གཟུགས་སུ་བྱ། །མཛེས་པའི་རྒྱན་ཉིད་ཀུན་ལྡན་པ། །ཉིད་ཀྱི་སྟན་ལ་བཞུགས་པར་བལྟ། །སྒེག་མོ་གླུ་དང་གར་རྣམས་དང་། །རྒྱལ་མཚན་ལ་སོགས་ཚོན་དགྱེ་དང་། །སིལ་སྙན་མཆོད་པའི་རྣམ་པ་ནི། །སྣ་ཚོགས་རྣམས་ཀྱིས་

མཆོད་པར་བྱ། །རྣམ་པ་ཀུན་དང་ལྡན་པར་ནི། །བདག་ཉིད་ཀྱི་ནི་ལུས་བསྒོམས་ནས། །མྱུར་ཆེས་པ་དང་བུལ་བ་དང་། །མི་གསལ་གུག་སྐྱེད་ཉམས་པ་དང་། །རྟོག་པ་ངན་པ་རྣམ་སྤངས་ནས། །དེ་ནས་གསང་སྔགས་བཟླས་བརྗོད་བྱ། །བཟླས་པས་སྐྱོན་ལག་གཡས་ཀྱིས། །བསྒྲིམས་ཏེ་རྡོ་རྗེ་གསོར་ནས་ཀྱང་། །གཡོན་པས་རྡོ་རྗེ་དྲིལ་གསིལ་ཞིང་། །རྡོ་རྗེ་གླུ་ཚུལ་སྣ་ཚོགས་དང་། །བ་དན་ཚུལ་དུ་བྱ་བས་མཆོད། །བཟླས་པའི་མཇུག་ནི་བརྟུལ་ནས་ཀྱང་། །གཤེགས་སུ་གསོལ་ཏེ་བདག་ཉིད་བསྲུང་། །ལུས་དང་ངག་དང་སེམས་བསྒོམས་ཏེ། །བརྟན་པོར་ཅི་བདེར་འགྲོ་བར་བྱ། །བར་ཆད་དུ་ནི་གྱུར་ན་ཡང་། །ཡི་གེ་བརྒྱ་པས་བྱིན་གྱིས་བརླབ། །དེ་ལྟར་སྒོམ་པས་སྒོམ་བྱེད་པ། །རྡོ་རྗེ་ཐེག་པས་རབ་རྫོགས་པའི། །བྱང་ཆུབ་དེས་ནི་མྱུར་ཐོབ་ནས། །ཟླ་ཉའི་དཀྱིལ་འཁོར་ལྟ་བུར་སྣང་། །སྣ་ཚོགས་ལས་ཀྱིས་ཐོག་འདྲེན་ཅིང་། །རིན་ཆེན་རྒྱལ་མཚན་རབ་དགའ་བྱེད། །ཆགས་ཆེན་པདྨའི་གདུང་རྒྱུད་ཅན། །གནས་ཆེན་འཇིག་རྟེན་དབང་ཕྱུག་འགྱུར། །དཔལ་ལྡན་རིག་སྔགས་ཀུན་གྱི་གཙོ། །དགའ་ཆེན་རྡོ་རྗེ་ལྕགས་ཀྱུར་འགྱུར། །སྒྱུ་མ་བཤིག་པ་ཀུན་ཤེས་ཤིང་། །དྲེགས་པ་འཇོམས་བྱེད་ཁྲོ་བོར་འགྱུར། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་བྱང་ཆུབ་ཀྱི་སེམས་སྒོམ་པའི་ཡེ་ཤེས་སྒྲུབ་པ་རིམ་པར་ཕྱེ་བའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་བཀའི་འཁོར་ལོ་རབ་ཏུ་སྒྲུབ་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྱི་ནང་གི་འཁོར་ལོ་ཐམས་ཅད་རབ་ཏུ་སྒྲུབ་པའི་ཡེ་ཤེས་ཀྱི་ལས་ཀྱི་སྦྱོར་བ་རབ་འབྱམ་འདི་བཀའ་སྩལ་ཏོ། །ལྷ་ནི་གང་ཡང་རུང་བ་ཞིག །འཁོར་ལོའི་དབུས་སུ་བཞག་ན་ནི། །དེ་ཡི་མིང་སྨོས་རྡོ་རྗེ་ཡི། །དཀྱིལ་འཁོར་ཡིན་ཞེས་སངས་རྒྱས་གསུང་། །ཞི་དང་རྒྱས་དང་དྲག་ཤུལ་དང་། །རང་གི་ལས་ལ་སྦྱོར་བ་ན། །འཁོར་ལོའི་རྒྱལ་པོ་རྣམ་བསྒོམས་ནས། །བདག་པོ་ཉིད་ཀྱིས་རབ་ཏུ་བྱ། །ཞི་བ་སྤྱན་དང་སྐུལ་བྱེད་མས། །རྒྱས་ལ་རིན་ཆེན་གོས་དཀར་མོ། །

དབང་ལ་སྒྲོལ་མ་ལུ་གུ་རྒྱུད། །ཡམས་དང་གནོད་པ་གཞིག་པའི་ཕྱིར། །འོད་ཟེར་ཅན་དང་རི་ཁྲོད་མས། །དྲག་ཤུལ་སྤྱད་ལ་མཱ་མ་ཀཱི། །ཁྲོ་གཉེར་ཅན་མ་དག་གིས་བྱ། །འདི་དག་ཤེས་རབ་རོལ་པ་སྟེ། །ཆགས་པའི་རྡོ་རྗེས་རྗེས་ཆགས་པ། །གསང་སྔགས་དེ་ཉིད་ཀྱིས་བསྐུལ་ན། །གདོན་མི་ཟ་བར་ཕྲིན་ལས་མཛད། །སྤྱན་དང་ལྷ་མོ་སྐུལ་བྱེད་མ། །དབང་པོ་ཞི་བ་ཟླ་འདྲ་བ། །ཕྱག་གཉིས་ན་ནི་བགྲང་ཕྲེང་དང་། །རིལ་བ་སྤྱི་བླུགས་ཀྱིས་བརྒྱན་པ། །དང་པོར་ཏིང་འཛིན་གྱིས་སྤྲུལ་ནས། །བུམ་པ་ཟླ་བའི་མདངས་ལྡན་པ། །བདུད་རྩིའི་འོ་མས་རབ་བཀང་སྟེ། །ལག་གཉིས་པདྨའི་གདུབ་མཆོག་གིས། །རྣམ་པར་སྣང་མཛད་ཞབས་དྲུང་དུ། །ནད་པ་ལ་ནི་བདུགས་པར་བསམས། །རིན་ཆེན་མ་དང་གོས་དཀར་ཅན། །སྐུ་ཆེ་ཁ་དོག་སེར་པོ་སྟེ། །ལྷ་མོ་སེར་མོ་སྣང་བ་ལ། །ཕྱག་ན་རིན་ཆེན་པདྨ་ཅན། །དང་པོར་ཏིང་འཛིན་གྱིས་སྤྲུལ་ནས། །ཡིད་འོང་རྒྱལ་བའི་འདོད་པ་ཡིས། །རིན་ཆེན་འབྱུང་བའི་ཞབས་དྲུང་དུ། །བདུད་རྩིའི་རབ་ཏུ་དགང་བ་དང་། །བླ་མེད་རིན་ཆེན་ཁར་བབ་ན། །རྒྱས་པ་མཚུངས་མེད་མཛེས་པར་འགྱུར། །ལྷ་མོ་སྐུ་ཆེན་མདོག་དམར་བ། །སྒྲོལ་མ་དེ་བཞིན་ལུ་གུ་རྒྱུད། །ཀུན་ནས་འོད་དམར་འབར་བ་ཅན། །ལྷ་རྫས་ལྕགས་ཀྱུ་ཞགས་ཐོགས་པ། །རབ་ཏུ་བཞད་ཅིང་སྤྱན་ཕྱེ་བས། །འོད་དཔག་མེད་པའི་ཞབས་དྲུང་དུ། །བསྒྲུབ་བྱ་རྒྱགས་པས་མྱོས་པ་དག །བཀུག་སྟེང་མདའ་ཡིས་བསྣུན་ན་ནི། །སྐད་ཅིག་ཉིད་ལ་དབང་དུ་མཛད། །མི་ངས་གནོད་པ་གཞིག་པའི་ཕྱིར། །སྐུ་ཆེན་ནམ་མཁའི་ཁ་དོག་ཅན། །འོད་ཟེར་ཅན་དང་རི་ཁྲོད་མས། །རྡོ་རྗེ་དོན་ཡོད་ཞབས་དྲུང་དུ། །མཁས་པས་སྔར་བཤད་ཚུལ་དུ་ནི། །བདུད་རྩི་ཡིས་ཀྱང་རྣམ་པར་བཟློག །ལྷ་མོ་ཁྲོ་གཉེར་མཱ་མ་ཀཱི། །མ་རྒད་ལྟ་བུའི་མདོག་ཅན་མ། །ཧཱུྃ་ཞེས་བྱ་བའི་སྒྲ་སྒྲོགས་པ། །རྡོ་རྗེས་བསྡིགས་པར་བརྩོན་པ་ཡིས། །རྡོ་རྗེ་མི་འཁྲུགས་ཞབས་དྲུང་དུ། །ཁྲོས་ནས་རྡོ་རྗེའི་མེ་ཡི་ཆར། །འབེབས་པར་རྣམ་པར་བསམ་པར་བྱ། །རྡོ་རྗེ་རབ་ཏུ་འབར་བ་དེས། །བསྒྲུབ་བྱ་ཚིག་ནས་མོག་ཅེས་བྱེད། །སྦྱོར་བ་འདི་ཡི་མོད་ལ་

ནི། །དེ་ནི་འཆི་བར་འགྱུར་བའམ། །ཡང་ན་ལུས་ནི་འཇིག་པར་མཛད། །བྱིན་རླབས་དམ་ཚིག་དབང་བསྐུར་ལ། །རྡོ་རྗེ་སེམས་མ་རིན་ཆེན་དང་། །ཆོས་དང་རྡོ་རྗེ་ལས་མ་བཞི། །སྦྱོར་བ་རྣམས་ནི་རབ་ཏུ་སྦྱར། །སེམས་དཔའ་ཆེན་པོ་བཅུ་དྲུག་ཀྱང་། །བླ་མེད་འཁོར་ལོ་བྱེད་པ་སྟེ། །རང་གི་ཕྱོགས་ནས་ལས་བྱས་ན། །འབྲས་བུ་དོན་ཡོད་སྦྱིན་པར་བྱེད། །ཁྲོ་བོའི་ལུས་ལ་ལེགས་གནས་ཏེ། །ཁྲོ་བོའི་རྒྱལ་པོ་སྦྱར་བར་བྱ། །དམ་ཚིག་ལ་སོགས་ཆོ་ག་བཞིན། །དེར་ནི་རྡོ་རྗེ་བསྒོམས་ནས་བསྐུལ། །རྐང་པའི་རྗེས་ཀྱིས་བླངས་ལ། །དུར་ཁྲོད་ཐལ་བདག་དང་བསྲེ། །དེ་ཡི་རས་བླངས་མི་རུས་དང་། །ཆུ་འགྲམ་གཉིས་ཀྱི་ས་དག་ནི། །བཏགས་ནས་ལུང་བོང་གཅིན་གྱིས་སྦྲུ། །དེ་ལས་དགྲ་བོའི་གཟུགས་བྱས་ལ། །དེ་ཚེ་གཟུགས་བརྙན་བཅིང་བར་བྱ། །དུག་དང་སྐེ་ཚེ་ལན་ཚྭ་དང་། །འབྲུ་མར་ཚ་བ་རབ་བསྲེས་ཏེ། །དགྲ་བོ་ཚ་བ་བསྐྱེད་པའི་ཕྱིར། །དེ་ཡིས་ལུས་ནང་རབ་ཏུ་དགང་། །དེ་ནས་རྣམ་ཤེས་རླུང་འདྲ་བ། །ལྕགས་ཀྱུ་ཡིས་ནི་བཀུག་ནས་ཀྱང་། །སྲིན་བུ་མེ་ཁྱེར་འདྲ་བཅུག་སྟེ། །ཞགས་པ་ཡིས་ནི་དམ་དུ་གཟུང་། །དེ་ནི་རྡོ་རྗེ་སྒྲོག་ཏུ་གཞུག །བསྒྲིམས་ནས་དེ་ཡི་མིང་སྨོས་ཏེ། །དགྲ་བོའི་ལུས་ནི་མ་ལུས་པར། །པོ་སོན་ཆ་ཡི་ཚེར་མས་དབུག །མི་རུས་ལས་བྱས་ཕུར་བུ་འམ། །ཡང་ན་སེང་ལྡེང་ལས་བྱུང་བས། །དཔྲལ་བ་སྙིང་མགྲིན་དཔུང་མགོ་གཉིས། །གནས་ལྔ་དག་ཏུ་བསྒྲིམས་ཏེ་གདབ། །ནིམ་པའི་ཤིང་ལ་སྦར་བ་ཡིས། །མེ་འབར་བ་ལ་བསྐམ་པར་བྱ། །མཁས་པས་རྐང་པ་ནས་བརྩམས་ཏེ། །མཚོན་ཆ་རྣོན་པོས་གཏུབས་ནས་ནི། །འབར་བའི་ལུས་ཅན་ཁྲོས་པ་ཡིས། །དེ་ཡི་དུམ་བུ་སྦྱིན་སྲེག་བྱ། །ལས་འདི་ལ་ནི་ལྷག་པར་ཡང་། །རུས་སྦལ་གྱི་ནི་རྐང་སྟབས་སྦྱར། །ཉི་མའི་གུང་ངམ་ནམ་ཕྱེད་ན། །ལས་འདི་ཉིད་ནི་བསྒྲུབ་པར་བྱ། །ལས་འདི་བྱས་ནས་ངེས་པར་ནི། །གང་ཞིག་རྒྱལ་བས་བསྲུངས་ནའང་དེས། །ངེས་པར་འཆི་ན་ཁྱབ་འཇུག་དང་། །ལྷ་ཆེན་ཚངས་པས་ཅི་ཞིག་སྨོས། །ཕྱི་རོལ་གྱི་དྲག་ཤུལ་སྤྱོད་པའི་གོ་ཆའོ། །གསོད་པའི་ཡེ་ཤེས་ལས་སྤྲུལ་པ། །ནང་གི་ཡང་ནི་བཤད་པར་བྱ། །བསྒྲུབ་བྱ་ཡིད་ཀྱིས་

བསྲུངས་ནས་སུ། །ཆོ་ག་བཞིན་དུ་དགུག་པར་བྱ། །ལག་ན་རལ་གྲི་མཚོན་ཆ་དང་། །བེ་ཅོན་རྡོ་རྗེ་གཏུན་ཤིང་ཞགས། །ལག་ན་འཁོར་ལོ་མདའ་གཞུ་ཅན། །ཁྲོ་བོ་སྣ་ཚོགས་བསྣམས་པ་དེས། །བསྒྲུབ་བྱ་ཞགས་པས་བཅིངས་ནས་སུ། །རྡོ་རྗེ་ཡི་ནི་ཁྲོ་བོ་ཡིས། །ལྷོ་ཡི་ཕྱོགས་སུ་ཁྲིད་པ་དང་། །རྡོ་རྗེ་གཞན་གྱིས་བརྡེག་པ་དང་། །དེ་ནི་རལ་གྲིས་གཏུབ་པ་དང་། །རྒྱུ་མ་ལང་ལོང་ནར་པར་བསམ། །ཨོྃ་ཧཱུྃ་བཛྲ་རཱཀྵ་སཱི། བྷཀྵ་ཡ་ཐ་ཕཊ། རྡོ་རྗེ་སྲིན་མོ་བསྒོམས་ནས་ཀྱང་། །བྱ་རོག་ཝ་དང་བྱ་རྒོད་ཀྱིས། །ཀུན་ནས་ཡོངས་སུ་བསྐོར་ནས་སུ། །དེ་དག་ཟང་ཐོབ་བྱེད་པར་ནི། །བསྒོམ་ཞིང་མིང་ནས་བསྐུལ་བར་བྱ། །རླུང་གི་དཀྱིལ་འཁོར་ལ་གནས་པའི། །རྡོ་རྗེ་རྔ་མོ་རྣམས་བསམས་ཏེ། །བསྒྲུབ་པར་བྱ་བར་ཡོངས་བརྟགས་པ། །དེ་ཡི་རྒྱབ་ཏུ་ཞོན་ནས་སུ། །རྡོ་རྗེ་ཁྲོ་བོས་གཟིར་བཞིན་དུ། །ལྷོ་ཕྱོགས་སུ་ནི་དཀྲི་བར་བྱ། །དེ་ཡི་རྐང་རྗེས་ས་ལ་ནི། །རླུང་གིས་གཙུབས་པའི་ཤིང་ལོ་ལ། །དེ་ཡི་མིང་ནས་བརྗོད་བྱས་ཏེ། །རྡོ་རྗེ་སྣ་ཡོན་དྲུང་དུ་སྦ། །དེ་ལྟ་བུར་ནི་སྦྱོར་བའི་ལས། །བསྒོམ་ཞིང་ཆོ་ག་བཞིན་བྱས་ན། །བརྒྱ་བྱིན་ཉིད་ཀྱང་བསྐྲད་འགྱུར་ན། །ས་སྟེང་སྐྱེ་བོ་སྨོས་ཅི་དགོས། །དེ་མིང་གསང་སྔགས་དང་སྤེལ་ཏེ། །འུག་པའི་སྒྲོ་ལ་བྲིས་ནས་ནི། །དགེ་སྦྱོང་བྲམ་ཟེའི་སྐྲས་དཀྲིས་ཏེ། །ས་ཡི་འོག་ཏུ་བརྐོས་ནས་གཞུག །རྡོ་རྗེ་ཁྲོ་བོ་གཉིས་ཀྱིས་ནི། །འཐབ་མོ་འགྱེད་དུ་གཞུག་པར་བྱ། །དེ་ལྟར་བསམས་པའི་སྦྱོར་བ་ཡིས། །འདོད་པ་བཞིན་དུ་དབྱེ་བར་འགྱུར། །ཧཱུྃ་ཞེས་བྱ་བས་གང་བ་ཡི། །རྡོ་རྗེ་ཕྲ་མོ་བསྒོམས་བྱས་ནས། །སྣ་ཡི་རྩེ་མོ་ནས་བཏོན་ཏེ། །བསྒྲུབ་བྱའི་ལུས་ནི་དགང་བར་བྱ། །ལུས་ཀྱི་ཚིགས་ནི་ཐམས་ཅད་དུ། །སྣ་ཚོགས་རྡོ་རྗེ་བཅིངས་ནས་སུ། །རྡོ་རྗེ་འབར་བ་འཕྲོས་གྱུར་པ། །དེས་ནི་ལུས་ཀྱང་བསྐམ་པར་བྱ། །རྡོ་རྗེ་མཁའ་འགྲོ་མ་བསྒོམས་ཏེ། །ཀུན་ནས་ཀྱང་ནི་གཞིག་པར་བྱ། །ཨོྃ་བཛྲ་ཌཱ་ཀི་ནཱི། ཨ་མུ་ཀསྱ་རཀྟ་ཨཱ་ཀརྵ་ཙ་ཤ་ཡ་ཧཱུྃ་ཕཊ། སྦྱོར་བའི་རིམ་པ་འདི་ཡིས་ནི། །སྐམ་འགྱུར་འདི་ལ་ཐེ་ཚོམ་མེད། །མཁས་པས་རླུང་གི་ཕྱོགས་སོང་སྟེ། །

དཀྱིལ་འཁོར་གྲུ་བཞིར་བྱས་ནས་ནི། །སྤོས་ཀྱི་ཐིག་ལེ་བདུན་བྱས་ཏེ། །དེ་དག་ཁམ་པའི་ཕོར་པ་དགབ། །དེ་ནི་རི་རབ་ཐམས་ཅད་ནས། །རྩེ་མོ་བརྒྱད་པར་སྤྲུལ་བྱས་ཏེ། །རྡོ་རྗེ་འཕྲོ་བས་བརྒྱན་པ་ཡིས། །དེ་དག་རྣམས་ནི་མནན་པར་བྱ། །ཡྃ་ཞེས་བྱ་བས་བསྐྱེད་པའི་རླུང་བདུན་རྣམས། །ལྃ་ཞེས་བྱ་བའི་མཚན་མ་དབང་ཆེན་གྱི། །ནང་དུ་རླུང་རྣམས་ངེས་པར་ཆུད་པར་བྱ། །དེ་ལྟའི་སྦྱོར་བས་འཇིག་པའི་རླུང་ཡང་བཅིངས། །པདྨ་འདབ་བརྒྱད་བསྒོམས་ནས་དེའི་འདབ་ལ། །ཀླུ་བརྒྱད་བཀོད་དབུས་མེ་ཚོགས་འབར་བ་ཅན། །རྡོ་རྗེ་ཁྲོ་བོའི་སྐུ་ཡི་ཞབས་མཐིལ་གྱིས། །ཀླུ་རྣམས་མནན་ན་ཆར་སྤྲིན་ཆར་པ་འབེབས། །ཧཱུྃ་ཞེས་བྱ་བས་གཉིས་དབུས་ཀླུ་རྣམས་ཀྱི། །སྙིང་པོ་ཡོངས་བཅུག་སྤེལ་མས་གཟིར་ནས་སུ། །ཧཱུྃ་ཞེས་བྱ་བ་བཟླས་བརྗོད་བྱས་ནས་སུ། །འཇིག་དུས་ཆར་པ་ལྟ་བུའི་ཆར་པ་འབབ། །ཉི་མའི་མདོག་ལྟར་དམར་པོའི་འོད་བཟང་ཞལ། །ནམ་མཁའ་ཁྱབ་པར་རྣམ་པར་གདངས་ནས་ནི། །ཀུན་ནས་ཆར་ཆུས་ཡོངས་སུ་གང་བའི་སྤྲིན། །ཧཱུྃ་ཞེས་བྱ་བའི་འབར་བའི་ལྕེ་ཡིས་ལྡག །དབུགས་རྔུབ་པ་ཡིས་བཀུག་ནས་དབྱུང་བ་ཡིས། །ཤིང་བལ་བཞིན་དུ་རབ་ཏུ་གཏོར་བར་བྱ། །ཡང་ན་རང་གི་ཕྱག་རྒྱའི་ཚོགས་འབར་བ། །བཏང་བས་སྐད་ཅིག་ལ་ནི་བཅད་གཏུབས་ཏེ། །ཧཱུྃ་ཞེས་བྱ་བས་བསྡིགས་པ་བྱས་ན་ནི། །ནམ་མཁའ་དག་ཀྱང་སྟོན་ཀའི་དུས་ལྟར་སྣང་། །མེ་ཡི་དཀྱིལ་འཁོར་ལ་གནས་སྣང་མཛད་ཀྱི། །ཞབས་དྲུང་དཔྲལ་དབྱེས་ནས་བྱུང་མི་གཡོ་བྲན། །བདུད་ལས་རྣམ་རྒྱལ་ཕྱག་དྲུག་མདའ་གཞུ་ཞགས། །རལ་གྲི་འཁོར་ལོ་རྡོ་རྗེ་ཆར་འབེབས་པ། །ཁྲོ་བོ་གྲངས་མེད་པ་ཡིས་ཡོངས་བསྐོར་ནས། །བགེགས་རྣམས་སྲེག་མཛད་ཧཱུྃ་གི་སྒྲས་བཀང་ནས། །འཇིག་རྟེན་གསུམ་པོ་གང་འདི་རྣམ་པར་འཇིག །རྐང་རྗེས་ས་དང་མི་ཡི་ཁྲག་དག་ལས། །མི་ཡི་གཟུགས་བྱས་མི་རུས་ཕུར་བུ་ལ། །འོད་ཟེར་ཅན་གྱི་གསང་སྔགས་བསྒྲགས་པ་ཡིས། །ལན་གྲངས་ཉི་ཤུར་མངོན་སྔགས་མིག་ཏུ་གདབ། །ཚོགས་ཀྱི་བདག་པོའི་ཁར་ནི་མིང་བཅུག་ནས། །ཕྱི་བཞིན་རྡོ་རྗེ་

གཏུན་ཤིང་དག་གིས་བརྡུང་། །ཨོྃ་སུྃ་བྷཱ་བཛྲ་མུས་ལེན། ཙཱུརྞྞ་ཡ་ན་ར་བྷི་གྷཱན་ཧཱུྃ་ཕཊ། ལས་འདི་བསམས་པས་མོད་ལ་ནི། །མ་ཡི་བགེགས་ཀྱང་བཟློག་པར་འགྱུར། །སྟོང་ཟིལ་ཁ་དོག་ལྟ་བུ་ནམ་མཁའ་ལྡིང་། །ལུས་ལ་སྦྲུལ་སྟོང་དག་གིས་བརྒྱན་བྱས་པ། །མཁའ་ལ་འདུག་ནས་གདེངས་ཀ་སྟོང་ལྡན་པའི། །ཀླུ་བརྒྱད་དག་དང་ཆར་སྤྲིན་རྣམས་ལ་བསྒོ། །བརྒྱ་བྱིན་བཀའ་ནི་དེ་དག་གིས་ཐོས་ནས། །སྤྲིན་ཚོགས་བུམ་པའི་ཆར་གྱིས་མེ་ཡང་གསོད། །ནམ་མཁའ་ལྡིང་གི་འདབ་མས་བཀབ་ནས་ནི། །མཆུས་བརྐོས་ཆུ་ཀླུང་གིས་ནི་མཚམས་ཀྱང་བཅད། །ཨོྃ་བཛྲ་ནཱ་རཱ་ཡཎ། ནི་རབ་བཱ་ཡ། མ་ཧི་ན། བ་མ་མུ་མེ་གེ་ཧཱུྃ། ཞལ་རས་གསུམ་པ་སྟོན་ཀའི་ཟླ་བའི་མདོག །ཕྱག་བཞི་འོད་དམར་སྣ་ཚོགས་འབར་བའི་འོད། །ལྷ་མོ་བཞི་པ་བསྙེམས་མ་བྱམས་མ་དང་། །ཆུ་སྲིན་རྒྱལ་མཚན་མེ་ཏོག་རོལ་པས་བསྐོར། །གཡས་པའི་ཕྱག་གིས་རྡོ་རྗེ་ལེགས་གསོར་ཞིང་། །གཡོན་པས་རྡོ་རྗེ་དྲིལ་བུ་སྒེག་པར་གཞག །ལྡེམ་བག་འཇོ་སྒེག་ཚུལ་གྱིས་རོལ་པ་སྟེ། །སེམས་དཔའ་འབྱུང་བའི་སྤྲིན་རྣམས་རྣམ་པར་འཕེལ། །རྣམ་པ་ཀུན་གྱིས་རྣམ་བརྒྱན་ཅིང་། །རིན་ཆེན་ཅོད་པན་དབང་བསྐུར་བས། །ནམ་མཁའ་ལ་ནི་འབབ་པ་ཡི། །ཐོག་ཐོག་རྣམ་པར་ཟློག་པར་བྱེད། །ཨོྃ་མ་ཧཱ་པུཀྐ་བཛྲ། ཆེ་གེ་མོཛྫ་ཞེས་བྱ་བ་དང་། ཧཱུྃ་ཞེས་བྱ་བ་ནས། པཱུ་ར་ཊ་བནྡྷ་ཧཱུྃ་ཕཊ། སྦྱོར་བ་འདི་ནི་བྱས་པ་ཡིས། །བླ་མེད་བྱང་ཆུབ་རྒྱས་པར་འགྱུར། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་རྣམ་པར་སྣང་མཛད་ཆེན་པོ། །མི་འཁྲུགས་རིན་ཆེན་འོད་དཔག་མེད། །དོན་ཡོད་གསང་སྔགས་རྒྱལ་རྣམས་དང་། །བཟང་པོ་རྣམ་པ་བཅུ་དྲུག་པོ། །ཀུན་དང་དྲག་པོའི་ཏིང་འཛིན་ལ། །གནས་པ་ཡི་ནི་ཁྲོ་བོ་དང་། །གསང་སྔགས་རྫོགས་མཛད་རིག་རྒྱལ་མ། །རྣམ་པ་ཀུན་དང་ལྡན་པ་དག །རིམས་བྲལ་རང་གི་ཏིང་འཛིན་གནས། །ཐམས་ཅད་ལྡན་པའི་འཁོར་རྣམས་ལ། །གཟིགས་པ་ཆེན་པོས་རྣམ་གཟིགས་ནས། །སྐུ་གསུང་ཐུགས་ཀྱི་རྡོ་རྗེ་ཅན། །སྨིན་མ་མཛེས་པར་བསྐྱོད་ནས་སུ། །ཡན་ལག་འཕྲོག་པའི་

འཛུམ་བསྟན་ནས། །ཐུགས་ཀྱི་སེམས་ནི་དགའ་བར་མཛད། །དགའ་བར་མཛད་པའི་མོད་ལ་ནི། །སངས་རྒྱས་མཆོག་ཀུན་གྱིས་མཆོད་པ། །ཤེས་རབ་ཆེན་པོའི་ཐོག་འདྲེན་པས། །བསྒྲིམས་ཏེ་སོ་སོར་གསོར་ནས་དེས། །བདེ་ཆེན་ཏིང་འཛིན་ལ་གནས་ཏེ། །ལྡེམ་བག་འཇོ་ཚུལ་གྱིས་བལྟས་ནས། །ལག་གཉིས་པདྨའི་ཚུལ་གྱུར་ཏེ། །སྤྱི་བོར་ཐལ་མོ་སྦྱར་བྱས་ནས། །ཡེ་ཤེས་ལམ་ནི་རབ་སྟོན་པ། །རྒྱལ་ཆེན་རྣམ་པར་སྣང་མཛད་ལ། །ལག་ན་རྡོ་རྗེ་སྟོབས་པོ་ཆེ། །ཡིད་རྒྱས་པ་ཡིས་ཚིག་གསོལ་པ། །ཅི་སླད་རྣམ་པ་ཐམས་ཅད་དུ། །ཟུར་གྱིས་རྣམ་པར་གཟིགས་པ་དང་། །སྨིན་མ་བསྐྱོད་བྱས་འཛུམ་མཛད་པ། །ཡེ་ཤེས་རྣམ་པར་བསྒྱིངས་བས་གསུངས། །བྱང་ཆུབ་ཆེན་པོའི་རྡོ་རྗེ་ཅན། །ལག་ན་རྡོ་རྗེས་གསོལ་མོད་ལ། །བརྟན་ཞིང་ཟབ་པའི་གསུང་གིས་ནི། །སངས་རྒྱས་རྣམས་ཀྱི་རོལ་པ་བཤད། །བསྒོམ་པའི་ལམ་ལ་ལེགས་བྱུང་བ། །རྡོ་རྗེ་ཡེ་ཤེས་རྣམས་ཀྱི་ཐབས། །བདེ་བའི་བྱང་ཆུབ་ཐོབ་འགྱུར་བ། །སངས་རྒྱས་ཀུན་དང་སངས་རྒྱས་ཀྱི། །རྗེས་སུ་འབྲང་བའི་འཁོར་ཉོན་ཅིག །གང་ལ་དངོས་རྣམས་དངོས་མེད་ཅིང་། །མཐའ་གཉིས་ཀྱི་ནི་མཚན་མ་མེད། །དབུས་ལའང་སྤྱོད་པ་མེད་པ་དག །དུས་གསུམ་འདས་པའི་ནམ་མཁའ་འདྲ། །ཐབས་དང་ཤེས་རབ་རྣམ་སྤངས་པ། །དེ་ལ་བྱང་ཆུབ་ཇི་ལྟར་རྟོགས། །རྟོགས་པར་འདོད་པ་དེ་དག་ནི། །ཐབས་རྣམས་ང་ཡིས་བཤད་པར་བྱ། །ཕུང་པོ་དངོས་པོ་ཡོང་མེད་པའི། །བྱང་ཆུབ་སེམས་ནི་གྲོགས་གྱུར་པ། །སྤྲོ་བ་དང་ནི་བཏུང་བ་ཡིས། །སྐུ་གསུམ་མཆོག་ནི་མཆོད་པར་བྱ། །སེམས་ཀྱིས་སྐུ་ནི་ཐོབ་འགྱུར་ཞིང་། །སེམས་ཀྱིས་ཆོས་རྣམས་བསྟན་པ་ཡིན། །སེམས་ཀྱིས་བྱང་ཆུབ་འཐོབ་འགྱུར་བས། །དེ་བཞིན་ཉིད་ཀྱི་རྣམ་པར་བསྒོམ། །སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་ལ་ནི་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་

བསོད་ནམས་ཡེ་ཤེས་ལས། །བྱུང་བའི་ཚོགས་ཀྱིས་བསྒོམ་པའི་སེམས། །སེམས་ཅན་རྣམས་ཀྱི་བསམ་པ་ལ། །བླ་མེད་བྱང་ཆུབ་སྣང་བར་བྱེད། །དངོས་པོ་དོན་དམ་མི་ཤེས་པ། །ཕྱི་རོལ་དངོས་ལ་མངོན་ཞེན་པའི། །ངན་པར་རྟོག་པའི་རྣམ་རྟོག་གིས། །རིན་ཆེན་སེམས་འདི་དྲི་མར་བྱས། །འབྱུང་བ་ཆེན་པོ་བཞི་རྣམས་དང་། །དངོས་པོ་ཐམས་ཅད་ལྡན་ཞེས་གསུངས། །དེ་ལ་གཙང་དང་མི་གཙང་སོགས། །མི་ཤེས་པ་ཡིས་ཡོངས་སུ་བརྟགས། །བདག་ཏུ་འཛིན་པའི་མངོན་ཞེན་པས། །དོན་དམ་ཕྱི་རོལ་བྱས་པ་ཡི། །ཐེག་པ་དམན་པ་པ་རྣམས་ཀྱིས། །བླ་མེད་བྱང་ཆུབ་ཅི་ལྟར་འཐོབ། །བྱང་ཆུབ་རྣམ་པ་གཉིས་གསུངས་ཏེ། །ལྷག་མ་དང་བཅས་ལྷག་མ་མེད། །ལྷག་བཅས་ཕུང་པོའི་ངོ་བོ་སྟེ། །ཉོན་མོངས་པ་རྣམས་ཡོངས་སུ་བསྲེགས། །ལྷག་མེད་བག་ཆགས་མེད་པ་སྟེ། །མཁའ་ལྟར་དྲི་མ་མེད་པ་ཡིན། །བླ་མེད་བྱང་ཆུབ་འདི་ལྟ་བུར། །སངས་རྒྱས་ཀུན་གྱིས་རྣམ་པར་བཤད། །དེ་ཡི་བྱང་ཆུབ་སྤེལ་བའི་ཕྱིར། །ལས་ཀྱི་ཚུལ་ནི་སྣ་ཚོགས་ཡིན། །རྣལ་འབྱོར་ཅན་གྱི་གསང་སྔགས་གང་། །ཡེ་ཤེས་སེམས་དཔའི་ཞབས་དྲུང་དུ། །རྟག་ཏུ་མཉེས་བྱས་མ་གྲུབ་པའི། །ལྷག་མ་ང་ཡིས་བཤད་བྱ་སྟེ། །དེ་ནི་བདེ་བླག་ཐབས་ཀྱིས་སུ། །ཚར་བཅད་ནས་ནི་བསྒྲུབ་པ་བཤད། །རྡོ་རྗེ་ལྕགས་ཀྱུ་རྒྱལ་པོ་ཆེ། །རྡོ་རྗེ་ཞགས་པ་རབ་གདུང་བྱེད། །རྡོ་རྗེ་ཁུ་ཚུར་གཟི་བརྗིད་ཆེ། །རྡོ་རྗེ་ཕུར་བུ་རྣམས་འདྲིལ་བྱེད། །རྡོ་རྗེ་ཐོ་བ་རྡུང་བ་སྟེ། །རྡོ་རྗེ་ནག་མོ་ཆེར་འབར་པ། །ལྷ་རྣམས་ཀུན་ལ་འཇིགས་པ་སྐྱེད། །ཕྱག་རྒྱ་རྣམ་པ་སྣ་ཚོགས་འདི། །བསྒོམས་ནས་ལས་ལ་སྦྱར་ན་ནི། །དམ་ཚིག་རྒྱལ་བས་བསྟན་པའི་ཕྱིར། །མཚུངས་པ་མེད་པའི་ལས་བྱེད་དོ། །གསང་སྔགས་རིག་པས་ཧཱུྃ་ཞེས་པའི། །ལྕགས་ཀྱུ་བཏང་ནས་ཞབས་དྲུང་དགུག །འདི་ནི་གལ་ཏེ་སངས་རྒྱས་སམ། །རྡོ་རྗེ་འཆང་བའི་སྙིང་ལས་དགུག །དམ་ཚིག་གིས་ནི་ཞུགས་པ་དང་། །རྡོ་རྗེ་བཅིང་བས་བཅིང་བར་བྱ། །རྡོ་རྗེ་ཁུ་ཚུར་གྱིས་བཟུང་ནས། །རྡོ་རྗེ་ནག་མོས་ཀུན་ཏུ་བསྡིགས། །རྡོ་རྗེ་ཡི་ནི་ཕུར་བུ་ཡིས། །གཟུགས་བརྙན་གྱི་ནི་གནས་ལྔ་པོ། །དཔྲལ་

བ་མགྲིན་པ་སྙིང་ག་དང་། །དེ་བཞིན་དཔུང་པ་གཉིས་སུ་གདབ། །རྡོ་རྗེ་ཐོ་བས་བརྡུང་བར་བྱ། །ཆོ་གའི་སྦྱོར་བ་འདི་ཡིས་ནི། །སངས་རྒྱས་ཉིད་ཀྱང་ངེས་པར་གནོན། །བསྡིགས་ལ་སོགས་པའི་སྦྱོར་བ་ཡིས། །གཟུགས་བརྙན་མིག་ཡོར་གྱུར་པ་དང་། །སངས་རྒྱས་བྱང་ཆུབ་རབ་རྫོགས་པའི། །དངོས་གྲུབ་དེ་ཚེ་སྦྱིན་པར་མཛད། །འདི་ནི་མཐུ་ཡིས་གྲུབ་པ་ཡི། །སྦྱོར་བ་གཅིག་པུ་གསང་ཆེན་ཡིན། །དེ་ནས་ཐམས་ཅད་དང་ལྡན་པའི་འཁོར་དེ་དག་གིས་གསང་བའི་སྒྲུབ་པ་ཐོས་ནས་མགྲིན་གཅིག་ཏུ་ཐམས་ཅད་ཀྱིས་ལེགས་སོ་ཞེས་བྱ་བར་གསོལ་ཏོ། །གཙོ་བོ་རྡོ་རྗེ་རྣམ་སྣང་མཛད། །དཔའ་བོ་ཆེན་པོ་ལེགས་སོ་ཞེས། །ཟབ་མོ་ཆོས་ཀྱི་མཆོག་གྱུར་པ། །དམ་པ་བཤད་པར་མཛད་པ་ལེགས། །སེམས་ཅན་ཕན་ཕྱིར་ཐུགས་རྗེ་ཡི། །ལྕགས་ཀྱུས་ཀུན་ནས་འབར་བ་ལེགས། །བདག་མེད་ཆོས་རྣམས་སྒྲུབ་པ་ཡི། །ཡེ་ཤེས་སྙིང་ཁུ་འབར་བ་ལེགས། །གསང་ཆེན་ཐམས་ཅད་བསྟན་པ་ཡི། །རྡོ་རྗེ་ཐེག་པ་ངེས་པར་གསུངས། །ཐེག་པའི་ཚུལ་འདི་ལ་གནས་ན། །བླ་མེད་བྱང་ཆུབ་བདེ་བར་ཐོབ། །ཨོྃ་བཛྲ་ཨཾ་ཀུ་ཤ་ཨཱ་ཀུ་ཤ་ཨཱ་ཀརྵ་ཡ་ཧཱུཾ། ཨོཾ་བཛྲ་པཱ་ཤ་བནྡྷ་ཧཱུྃ། ཨོྃ་བཛྲ་ཊཱཀྐི་རཱ་ཛཱ་ཡ་ཧཱུྃ། ཨོྃ་བཛྲ་མུཥྚི་གྲྀཧྣ་ཧཱུྃ། ཨོྃ་བཛྲ་ཀཱི་ལ་ཡ་ཀཱི་ལ་ཡ་ཧཱུྃ། ཨོྃ་བཛྲ་མུད་ག་ར་ཨཱ་ཀོ་ཊ་ཡ་ཧཱུྃ། ཡེ་ཤེས་ཀྱི་སྙིང་ཁུས་སྙིང་པོ་ཅན་དུ་གྱུར་པའི་གསང་སྔགས་དག་པ་མཆོག་ཏུ་གྱུར་པ་དོན་ཡོད་པའི་ལས་འདི་དག་སུ་ལ་ཡང་བསྟན་པར་མི་བྱའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་སྦྱོར་བའི་ཐབས་ཀྱིས་སྒྲུབ་པའི་རིམ་པར་ཕྱེ་བའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་རྣམ་པར་སྣང་མཛད་ཆེན་པོས་སྦྱོར་བའི་ལས་ཐམས་ཅད་ཀྱི་རྗེས་སུ་འབྲང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དབབ་པ་ལ་སོགས་པའི་ལས་བྱ་བ་འདི་བཤད་དོ། །ཨོཾ་ཞེས་བྱ་བ་མགོར་བཞག་སྟེ། །ཨཱཿནི་བཞིན་གྱི་པདྨ་ལ། །ཧཱུྃ་ནི་བསྐུལ་ནས་སྙིང་གར་གཞག །ཡྃ་ནི་རླུང་གི་དཀྱིལ་འཁོར་ལ། །བཞག་ནས་བསྒྲིམས་ཏེ་གདེག་བྱས་ན། །འགྲོ་བ་དང་ནི་གནས་པ་ཡི། །འགྲོ་བ་ཐམས་ཅད་འབབ་པར་འགྱུར། །དབབ་སྣོད་སྐུལ་བྱེད་གཟུགས་དེ་ཡི། །གཟུགས་ཀྱི་ངོ་བོར་བསམས་ནས་སུ། །རྡོ་རྗེ་འཆང་བའི་ང་རྒྱལ་གྱིས། །གསང་སྔགས་བསྙེམས་དང་བཅས་པར་བཀླག །བརྗོད་པར་

བྱ་བ་ཐོགས་པ་མེད་པའི་ཕྲེང་བ་ནི། །ན་མཿས་མནྟ་བུདྡྷ་ནཱྃ། སམྱཀྶཾ་བུདྡྷ་ཀོ་ཊཱིནཱཾ། ཏདྱ་ཐཱ། ཨོཾ་ཙ་ལེ་ཙུ་ལེ་ཙུ་ནྡེ་སྭཱ་ཧཱ། བརྩོན་འགྲུས་ཆེན་མོ་ཐོགས་བ་མེད་པར་འདུལ་བ། སྟོབས་ཆེ་བ། ཕ་རོལ་གནོད་པ་ཆེ་བ། ཕྱག་ན་རལ་གྲི་དང་། ཐོ་བ་དང་། དགྲ་སྟ་དང་ཞགས་པ་བསྣམས་མ། ཁྲོ་མོ་ཆེན་མོ་ཁྲོ་མོའི་དབང་ཕྱུག་མ། དྲག་པོའི་གཟུགས་ཅན་མ། ཞལ་རས་མཐའ་ཡས་པ། ཕྱག་སྟོང་མ། མི་ཕམ་མ། གཞན་གྱིས་མི་ཐུབ་མ། དོན་ཡོད་པ། གདུལ་བར་དཀའ་བ། མིག་སྟོང་མ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་མ། ལྷ་ཐམས་ཅད་ཀྱིས་ཕྱག་བྱས་ཤིང་མཆོད་པ་རབ་ཏུ་གྲུབ་མ། རྡོ་རྗེའི་སེན་མོ་ཅན་རྡོ་རྗེ་རྡོ་རྗེ་འདྲེན་མ། རྡོ་རྗེའི་མཚོན་ཆ་ཅན། རྡོ་རྗེའི་སྐུ་ཅན་མ། རྡོ་རྗེའི་སྤྱན་གདངས་བའི་སྟང་སྟབས་ཅན། དྲག་ཤུལ་ཅན་མ་ལགས་ཀྱང་དྲག་ཤུལ་ཅན་གྱི་གཟུགས་ཅན་དུ་བསྒྱུར་བར་སྣང་བ། སྐུ་རྡོ་རྗེ་དང་བཻཌཱུ་རྱས་བརྒྱན་མ། ཨོཾ་བྷ་ག་པཱ་ཏི་ཙུནྡེ་དྲུཾ་དྲུཾ་དྲུཾ་དྲུཾ། མྲྀ་མྲྀ། རུ་རུ། སྲུ་སྲུ་རུ་རུ་གྲྀཧྣ་གྲྀཧྣ་ཨཱ་བེ་ཤ་ཡཱ། གྲྀ་ཧཱ་པ་ཡ གྲྀཧྞཱ་བ་ཡ། ས་ར་ས་ར། མཱ་ར་ཡ་མཱ་ར་ཡ། ཧ་ར་ཧ་ར། བྷཉྫ་བྷཉྫ། མ་ར་མ་ར། མཱ་ར་ཡ་མཱ་ར་ཡ། བ་ཙ་བ་ཙ། ད་ཧ་ད་ཧ། གྲྀཧྞ་གྲྀཧྞ། སྡང་བའི་གདོན་དང་། རིམས་ཞག་གཅིག་པ་དང་། ཞག་གཉིས་པ་དང་། ཞག་གསུམ་པ་དང་། ཞག་བཞི་པ་དང་། རྟག་པའི་རིམས་དང་། ཡུད་ཙམ་པ་དང་། འབྱུང་པོ་དང་། རོ་ལངས་དང་། གནོད་སྦྱིན་དང་། སྲིན་པོ་དང་། གྲུལ་བུམ་གྱི་གདོན་དང་། མངལ་ནས་སྐྱེས་པ་དང་། ལས་ལས་སྐྱེས་པ་དང་། འགྲོ་བ་དང་། གནས་པ་འདི་དག་དང་། སྡང་བ་གང་དག་བདག་ལ་འཚེ་བ་ཐམས་ཅད། སཱདྷ་ཡ་སཱདྷ་ཡ། མརྡ་ཡ་མརྡ་ཡ། ཤོ་ཥ་ཡ་ཤོ་ཥ་ཡ། ཏཱ་པ་ཡ་ཏཱ་པ་ཡ། ཨུཏྤ་དྷ་ཡ་ཨུདྤ་དྷ་ཡ། ཧ་ན་ཧ་ན། བཛྲེ་ཎ་ས་ར་ས་ར་དཎྜེ་ན། མ་ར་མ་ར། ཁཌྒེ་ན་ཧཱུྃ་ཧཱུྃ་ཧཱུྃ། ཙུྃ་ཙུྃ་ཙུྃ། ཏྲི་ཏྲི་ཏྲི། ཨོཾ་ཙ་ལེ་ཙུ་ལེ་ཙུནྡེ་སརྦྦ་སཱ་དྷ་ཡ་སྭཱ་ཧཱ། དེ་ནི་རྡོ་རྗེས་བསྐུལ་ནས་སུ། །རྡོ་རྗེ་དྲིལ་བུ་གསིལ་བྱ་ཞིང་། །རྡོ་རྗེ་བཅིང་བ་བསྟོད་པར་བྱ། །དབང་ཆེན་དཀྱིལ་འཁོར་ལ་གནས་ཨོཾ། །དབུས་སུ་པདྨ་འདབ་བརྒྱད་དང་། །འབྲེལ་བའི་པདྨ་བཞག་ནས་སུ། །ཨཱཿཞེས་བྱ་བར་བརྒྱད་ཀྱིས་བརྒྱན། །དབུས་སུ་བསྒྲུབ་བྱ་བཞག་ནས་སུ། །ཧཱུྃ་བཞི་ཡིས་ནི་མཛེས་པར་བྱ། །ཁམ་ཕོར་ཁ་སྦྱར་ནང་བཅུག་སྟེ། །སྟེང་དུ་རྡོ་རྗེ་འཆང་བས་མནན། །སྒོམ་ཞིང་གསང་སྔགས་བསྐུལ་ཚིག་གིས། །བཟླས་བརྗོད་དག་ནི་བྱ་བ་དང་། །བ་ཞེས་བྱ་བའི་ཐེག་པ་ཡིས། །ཀུན་ནས་ཀྱང་ནི་བཀྲི་བར་བྱ། །

འདི་ནི་སྐུ་གསུམ་ལས་བྱུང་བའི། །ལྷ་དང་མི་ཀུན་མནན་པར་འགྱུར། །སྔགས་ལ་མཁས་པའི་བདག་ཉིད་ནི། །ཁ་དོག་དམར་པོ་རྡོ་རྗེ་ཅན། །འདོད་ཆགས་ཆེ་དང་ལྡན་པའི་གཟུགས། །འདོད་པའི་ལྷ་དང་ལྷན་ཅིག་བསམ། །སྐུ་གསུམ་ལྡན་པ་མདའ་ཐོགས་ཤིང་། །གཡོན་པ་ཡིས་ནི་གཞུ་ཡང་གཟུང་། །ཨོྃ་ཧཱུྃ་བུད་མེད་སྤྱི་བོར་བསམས་ནས་ནི། །འདོད་པས་སྙིང་ཟགས་དྲེགས་བདོ་བ། །མདོག་དམར་ཐལ་མོ་སྦྱར་ནས་ནི། །འདུད་བཞིན་དུ་ནི་མདུན་བཞག་སྟེ། །རྡོ་རྗེ་མདའ་ཡིས་བསྣུན་ན་ནི། །པདྨ་དག་ལས་ཟིལ་པ་འཛག །རྡོ་རྗེ་མདའ་ཡི་སྦྱོར་བ་ཡིས། །འདོད་ཆགས་ཅན་མ་འཛག་པར་འགྱུར། །རྣལ་འབྱོར་ཅན་གྱིས་དབང་བྱའི་ཕྱིར། །འདོད་ཆགས་རྡོ་རྗེ་ཅན་ཡང་བསྒོམ། །མི་ཐོད་ལས་བྱས་ཅང་ཏེའུ་ལ། །སྤྲེའུའི་པགས་པས་གཡོགས་ནས་ནི། །ངོས་གཉིས་ལ་ནི་པདྨ་བྲི། །བུད་མེད་ཁྲག་གིས་འཛག་པར་བྱ། །དེ་ཡི་དཀྱིལ་དུ་བྲེཾ་བྲིས་ཏེ། །མི་ཡི་སྐྲ་ཡིས་བཏགས་ནས་ནི། །མཐིང་རིལ་གྱི་ནི་རྐང་རུས་ཀྱིས། །ཕྲེཾ་ཧཱུྃ་མིང་ནས་བརྗོད་ཅིང་བརྡུང་། །ལམ་གྱི་བཞི་མདོར་དཀྱིལ་འཁོར་ནི། །རྐང་པ་གཡོན་པའི་མཐེ་བོས་བྲིས། །གྲྭར་ནི་བུ་མོ་ཟས་སྦྱིན་མ། །འགུགས་པར་བརྩོན་པའི་ལྕགས་ཀྱུ་བྱ། །གཙོ་བོ་ཁྲག་འཐུང་ཆ་ལུགས་ཀྱི། །གཟུགས་ཅན་གྱིས་ནི་རྟིང་བས་བརྡུང་། །འདིས་ནི་ཁམས་གསུམ་རྣམ་གནས་པའི། །བུ་མོ་ཟས་སྦྱིན་འགུགས་པར་འགྱུར། །གང་ཡང་རུང་བའི་གཟུགས་བརྙན་ལ། །གནས་པ་ཡི་ནི་ང་རྒྱལ་གྱིས། །རྣལ་འབྱོར་འཁོར་ལོ་རྫོགས་གྱུར་ན། །ཚིག་གི་རྣམ་པ་ཙམ་གྱིས་ཀྱང་། །ལྷ་དང་ལྷ་མིན་མི་ལ་སོགས། །རྣལ་འབྱོར་ཅན་གྱིས་ཐམས་ཅད་བྱེད། །གང་ཚེ་དབང་ཉིད་ལ་གནས་པ། །དེ་ཚེ་ཐམས་ཅད་མངག་གཞུག་འགྱུར། །བལྟས་པ་ཙམ་གྱིས་འཆི་བ་འམ། །མེ་ཙམ་གྱིས་ཀྱང་གཅོད་པའི་མཆོག །སྒྱུ་མའི་ཡེ་ཤེས་ཀྱིས་བསྐུལ་ནས། །རྣལ་འབྱོར་ཅན་གྱིས་གླུ་དང་གར། །ཅི་ལྟར་ཅི་ལྟར་བསྒོམས་བྱས་པ། །དེ་ལྟར་འགྲོ་བ་རབ་ཏུ་བྱེད། །སྦྱིན་སྲེག་དེ་ཉིད་ལ་གནས་པའི། །མེ་ཡི་ལྷ་ནི་ཞལ་ཡིན་པས། །སྣ་ཚོགས་ལས་རྣམས་གྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་

གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་སྐོང་། །དེ་ཕྱིར་སྐུ་གསུམ་མཁས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །གཙུབ་ཤིང་ལས་ནི་བྱུང་བའི་མེ། །དགེ་བ་ཡི་ནི་ལས་རྣམས་བྱེད། །གདོལ་པའམ་དུར་ཁྲོད་ལས་བྱུང་བའི། །མེ་ཡིས་ལས་རྣམས་རབ་ཏུ་སྒྲུབ། །ཐབ་ཁུང་ཟླུམ་པོ་གྲུ་བཞི་པ། །ཟླ་གམ་དང་ནི་ཟུར་གསུམ་པ། །དཀྱིལ་འཁོར་ཟུར་གྱི་ཁ་ཁྱེར་ལ། །རྡོ་རྗེ་མཚན་མ་དག་གིས་བརྒྱན། །སྦྱིན་སྲེག་དེ་ཉིད་ཚུལ་རིག་པས། །ཐབ་ཁུང་རྣམས་ཀྱི་དབུས་སུ་ནི། །པདྨོ་སྟེང་གནས་གཙུག་ཏོར་དང་། །རྡོ་རྗེ་རིན་ཆེན་པདྨ་གཞག །ཅི་ལྟར་རིགས་པར་འདུག་གནས་སུ། །ལག་གཉིས་པུས་མོའི་བར་བཞག་སྟེ། །དགང་གཟར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག །སྦྱིན་སྲེག་ལ་དགོས་གཡས་སུ་གཞག །གཡོན་དུ་ཆུ་ཡི་སྣོད་དག་གོ །ལས་ཀུན་བྱེད་པ་བཟླས་ནས་སུ། །བསང་གཏོར་དང་ནི་འཐོར་འཐུང་བྱ། །ཀུ་ཤའི་རྩེ་མོས་གནོན་པ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་ཤེས་པ་དང་། །གཡས་པས་མི་འཇིགས་མཐེབ་བསྐྱོད་ཅིང་། །གསང་སྔགས་འདིས་ནི་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེག་བླུགས་ཞལ་ཟས་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ཨོྃ་ཨ་གཱ་ཡེ། དཱི་བྱ་དཱི་བྱ། ཨཱ་བེ་ཤ་མ་ཧཱ་ཤྲི་ཡེ། ཧ་བྱ་ཀ་བྱ། བ་ཧ་ནཱ་ཡ་སྭཱ་ཧཱ། ལག་གཡོན་རྡོ་རྗེ་བསང་གཏོར་ཏེ། །མཆོད་ཡོན་མཆོད་པ་རྣམ་ལྔ་དབུལ། །མེ་ཡི་ཕྱོགས་ནས་བོད་པ་ནི། །གསུས་པོ་ཆེ་ལ་མིག་གསུམ་པ། །གདོང་བཞི་ལག་པ་བཞི་དང་ལྡན། །འོད་དམར་རལ་པའི་ཐོར་ཚུགས་ཅན། །མེ་ཡི་དཀྱིལ་འཁོར་ལ་གནས་ཤིང་། །ལས་ཀྱི་འོད་ཟེར་རྣམས་ཀྱིས་བརྒྱན། །ལག་པ་དང་པོ་མཆོག་སྦྱིན་ལ། །གཉིས་པ་ན་ནི་སྔགས་ནོར་ཕྲེང་། །གཡོན་ན་རིལ་པ་སྦྱི་བླུགས་ཏེ། །གཉིས་པ་ན་ནི་བེ་

ཅོན་ཉིད། །མདོག་དམར་རྒྱན་ནི་མེད་པ་ལ། །དྲང་སྲོང་རྣམས་ཀྱིས་ཡོངས་བསྐོར་བ། །འདི་ལྟའི་གཟུགས་ནི་བསམས་ནས་ཀྱང་། །ཐབ་ཀྱི་དབུས་སུ་བཞུགས་སུ་གསོལ། །དེ་ལ་སྦྱིན་སྲེག་ལ་དགོས་པ། །ཀུན་ནས་ལན་གསུམ་བསྲེག་བླུགས་དབུལ། །དེ་ནས་འཐོར་འཐུང་བྱས་ནས་སུ། །འབར་བའི་རྣམ་པར་བསྒྱུར་བར་བྱ། །རིམ་པ་འདི་ཡི་ཚུལ་གྱིས་ནི། །མཁས་པས་ལྷ་རྣམས་ཚིམ་པར་བྱ། །ལེགས་པར་ཚིམ་བྱས་བཟོད་གསོལ་ཏེ། །འདོད་པའི་དངོས་གྲུབ་གསོལ་བ་གདབ། །བཅུམ་པ་རྒྱལ་མཚན་རྡོ་རྗེ་གདུགས། །པདྨ་ལྕགས་ཀྱུའི་རྣམ་པ་དག །མེ་ལྕེ་མདོག་དཀར་སྣང་བ་དང་། །འཁྱིལ་བའི་མཚན་མ་མཁས་པས་བརྟག །དེ་ནས་མྱུར་དུ་འགྲུབ་འགྱུར་བས། །བསྒོམ་དང་བཟླས་ལ་འབད་པར་བྱ། །ཞི་དང་རྒྱས་དང་དབང་ལ་ནི། །ཨོྃ་ཞེས་པ་དང་སྭཱ་ཧཱ་མཐར། །དབྱངས་ཀྱི་རྒྱུན་ནི་བསྲིང་བ་དང་། །བར་ཆད་མེད་པའི་དབྱངས་ཀྱིས་སྦྱར། །ཞི་བའི་སེམས་ཀྱིས་ཞི་བ་མོ། །འབྱོར་བ་རྒྱས་པ་མངོན་པར་སྤེལ། །དྲེགས་གདོང་སྟབས་ཚུལ་བཅས་པ་དང་། །དབང་དུ་གྱུར་པས་དབང་བྱའོ། །དྲག་ཤུལ་སྤྱོད་ཚུལ་ལ་གནས་པས། །ཧཱུྃ་ཞེས་པ་དང་ཕཊ་དང་བཅས། །ལུས་ནི་མེ་ལྕེ་འབར་བ་དང་། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དང་སྤེལ་བ་ཡི། །གསང་སྔགས་ཡི་གེ་ངེས་པར་སྦྱར། །སྔགས་གྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །སྣ་ཚོགས་ལས་དང་ལྡན་པའི་ལྷ། །གང་དག་ཡིན་པར་མཆོད་པར་བྱ། །སྦྱིན་སྲེག་དེ་ཉིད་ཀྱིས་བསྐུལ་ཅིང་། །དང་པོ་དགང་བླུགས་སྲེག་ཅིང་དབུལ། །ཕྱིས་ནི་རིམ་བཞིན་རྣམ་པར་སྤེལ། །ཞི་དང་རྒྱས་དང་དབང་རྣམས་ལ། །དགེ་བ་རྫས་རྣམས་སྦྱིན་སྲེག་བྱ། །བཤང་གཅི་ཁྲག་རྐང་རུས་པ་དང་། །ཤ་ཆེན་དག་ཀྱང་སྦྱིན་སྲེག་བྱ། །ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་བཀང་ན་གོ །ཇི་ལྟར་སྡིག་པ་མི་སྐྱེ་འགྱུར། །གལ་ཏེ་སྡིག་འགྱུར་འབྲས་བུ་གང་། །སེམས་ཅན་མི་ཤེས་པས་རྨོངས་ཏེ། །ཐམས་ཅད་ཤེས་རབ་རྣམས་སྤངས་ཤིང་། །ཕྱི་རོལ་དངོས་ལ་

མངོན་ཞེན་པ། །རྣམ་རྟོག་དྲ་བས་བླུན་བྱས་གང་། །དེ་དག་གིས་ནི་དགེ་སྡིག་གི། །ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་སྟེ། །སྐྱེ་བ་མེད་ཅིང་གནས་པ་མེད། །སེམས་ཅན་ཤེས་པ་སྤེལ་བའི་ཕྱིར། །སངས་རྒྱས་རྣམས་ཀྱི་ཐབས་ཀྱིས་བསྟན། །དམ་པའི་དོན་དུ་དགེ་སྤངས་ན། །བསོད་ནམས་མེད་པ་ཅི་ཞིག་སྨོས། །དཔེར་ན་ཆུས་གང་ཆུ་ཀླུང་གི། །ཕ་རོལ་འགྲོ་བའི་སེམས་ཅན་དག །རྩྭ་དང་ཤིང་ལ་སོགས་བསྡུས་ཏེ། །ཆུ་ལས་རྒལ་བའི་གཟིངས་བྱས་ན། །དེ་ལ་འཇུས་ཏེ་ལེགས་བརྒལ་ན། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་བྱས་ཀྱང་། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བ་ཐོབ་པ་བཞིན། །དེ་ཕྱིར་རྣམ་རྟོག་དྲང་སྤོངས་ལ། །ཟབ་མོ་ཡི་ནི་ཆོས་སྤེལ་ཏེ། །དེ་བཞིན་གཤེགས་པས་གསུངས་ལམ་ལ། །སྔགས་རིག་རྣམ་རྟོག་མ་བྱེད་ཅིག །རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་པས། །ནམ་མཁའ་ལྟ་བུར་དྲི་མེད་པའི། །རྣམ་པར་མི་རྟོག་ཏིང་འཛིན་མནོས། །དབང་པོ་གཉིས་ནི་མཉམ་སྦྱར་ཏེ། །ལུས་དང་ངག་དང་སེམས་བསྡམས་ནས། །ངའོ་སྙམ་པའི་གཟི་བསྐྱེད་གཟུགས། །རྣམ་པ་ཀུན་གྱིས་རྣམ་པར་བརྒྱན། །རྣལ་འབྱོར་ལྡན་པ་ཚེ་འདི་ལ། །ཡེ་ཤེས་རྫོགས་པ་ཉིད་དུ་འགྱུར། །ལས་ལས་བྱུང་བར་རྣམ་བསྟན་པའི། །སྐྱེས་པ་བུད་མེད་གཟུགས་མང་ལ། །བརྙས་པ་ཉིད་དུ་མི་བྱ་འདིས། །རྡོ་རྗེ་ལུས་ཅན་དམ་ཚིག་ཡིན། །ངན་རྟོག་བཟང་རྟོག་དྲ་བ་ཡི། །སེམས་ཀྱི་སེམས་ཅན་རྣམས་ལ་ནི། །སྣ་ཚོགས་གདུང་བས་སུན་མི་དབྱུང་། །རྡོ་རྗེ་སེམས་ལྡན་དམ་ཚིག་ཡིན། །སྲེད་པས་བསྐྱེད་རྩུབ་ཕྲ་བ་ཡིས། །ཚིག་དག་རྣམ་པར་མི་སྨྲ་ཞིང་། །མཉན་ན་བདེ་བར་བྱེད་པ་འདི། །རྡོ་རྗེ་ངག་ཅན་དམ་ཚིག་ཡིན། །རྣམ་པར་སྣང་མཛད་ཆེར་འཁྲུགས་མཆོག །ཤ་ཡི་ཁམས་ལ་གནས་པ་ཡིན། །རྐང་ལ་མི་འཁྲུགས་རྒྱལ་པོ་སྟེ། །ཁྲག་ལ་རིན་ཆེན་འབྱུང་བ་གཙོ། །སེམས་ཅན་རྣམས་ཀྱི་རུས་ཕུང་གི། །རུས་གོང་ལ་ནི་འོད་དཔག་མེད། །རྩ་ཡི་ཚོགས་རྣམས་རྣམ་འདྲེན་པ། །ཐུབ་པ་སྐྱེས་མཆོག་དོན་ཡོད་ལ། །དམ་ཚིག་ཤེས་པ་རྣམས་ལ་ནི། །གསང་ཆེན་ང་ཡིས་བསྟན་པ་འདི། །བློ་ལྡན་རྡོ་རྗེ་སེམས་ཀྱིས་ནི། །རྟག་ཏུ་བསྟེན་ཞིང་བསྒོམ་

པར་བྱ། །འདོད་ཆགས་ཞེ་སྡང་དེ་བཞིན་རྨོངས། །སྲེད་དང་དེ་བཞིན་རྣམ་སྤེལ་བའི། །ཆོས་ནི་རྣམ་པ་ལྔ་པོ་འདི། །ཐུབ་པ་སྐྱེས་མཆོག་རྣམས་ཀྱིས་གསུངས། །བཤང་གཅི་ཁུ་བ་མཆིལ་མ་ཁྲག །འཛག་པ་འབྱུང་བ་བཞིས་བསྡུས་པ། །བསྒོམ་པའི་བློ་གྲོས་རྫོགས་པ་ཡིས། །དམ་ཚིག་བསྟེན་པར་བྱ་བ་སྟེ། །རྟག་ཏུ་བཟའ་ཞིང་བཏུང་བར་བྱ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་གྱི་དྲ་བ་ལས་འདི་ནི་སྦྱིན་སྲེག་རིམ་པར་ཕྱེ་བའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་ཏིང་ངེ་འཛིན་ཐམས་ཅད་ཀྱི་དངོས་གྲུབ་དམ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཐམས་ཅད་ཀྱི་རྡོ་རྗེ་ཆེན་པོའི་མཆོག་དངོས་གྲུབ་འདི་བཀའ་སྩལ་ཏོ། །ལག་ན་རྡོ་རྗེ་གསང་སྔགས་བསྒོམ་པའི་རྣལ་འབྱོར་གྱི་ཆོ་གས་ཡང་དག་པར་བསྐུལ་ནས་རྫས་ཐམས་ཅད་ཀྱི་དངོས་གྲུབ་བསྒྲུབ་པའི་ཐབས་གསང་ཆེན་འདི་ཉོན་ཅིག ། རྣམ་པར་སྣང་མཛད་ཏིང་འཛིན་ལ། །གནས་ཤིང་སྐུ་གསུང་ཐུགས་བསྒོམས་ཏེ། །མདུན་དུ་འཁོར་ལོ་ལེགས་པར་གཞག །སྐུ་གསུམ་རྡོ་རྗེ་ཅན་གྱི་གཟུགས། །འབར་བའི་ཕྲེང་བ་འཁྲུགས་པའི་འོད། །འཁོར་ལོའི་ནང་དུ་ཞུགས་གྱུར་པར། །བསྒོམ་ཞིང་འཁོར་ལོ་བསྒྲུབ་པར་བྱ། །མེ་ཡི་འོད་ལྟར་འབར་བའི་འོད། །འཁོར་ལོ་ཆེན་པོ་འཕགས་པར་འགྱུར། །སྤྱན་ནི་བཟླས་བརྗོད་བྱེད་བཞིན་དུ། །བླ་མེད་འཁོར་ལོ་བླང་བར་བྱ། །རྒྱལ་ཆེན་འཁོར་ལོ་དྲུག་པ་དག །འོད་ནི་རྣམ་པར་སྣང་མཛད་བཞིན། །ལན་གསུམ་འཇུག་པའི་སེམས་ཅན་ལ། །ཆོས་ཀྱི་འཁོར་ལོ་བསྐོར་བར་འགྱུར། །མི་འཁྲུགས་པར་ནི་རྣམ་བསྒོམ་ཞིང་། །རྡོ་རྗེ་མདུན་དུ་བཞག་ནས་ནི། །རིམ་པ་བཞིན་དུ་བསྐུལ་ན་འདིས། །སྐུ་གསུམ་རྣམ་པར་འཕེལ་འགྱུར་ཞིང་། །འབར་བའི་ཕྲེང་ཆེན་མཉམ་པའི་འོད། །རྡོ་རྗེ་ཆེན་པོ་འཕགས་པར་འགྱུར། །མཱ་མ་ཀཱི་ནི་ཟློས་བཞིན་དུ། །རྡོ་རྗེ་བླ་མེད་བླང་བར་བྱ། །རྡོ་རྗེ་རྒྱལ་པོ་བླངས་པ་ཡིས། །གཙོ་བོ་རྡོ་རྗེ་འཆང་གཉིས་འགྱུར། །གཙོ་བོ་ཆེན་པོ་སངས་རྒྱས་དང་། །བྱང་ཆུབ་སེམས་དཔས་ཡོངས་བསྐོར་ནས། །སེམས་ཅན་ཀུན་སེམས་ལ་གནས་པའི། །ལག་ན་རྡོ་རྗེ་རྡོ་རྗེ་འཆང་། །འཇིག་རྟེན་ཁམས་སུ་རྣམ་རྒྱུ་ཞིང་། །ཀུན་གྱི་བསམ་པ་ཡོངས་རྫོགས་བྱེད། །རིན་ཆེན་འབྱུང་བ་བསྒོམས་ན་ནི། །

རིན་པོ་ཆེ་ནི་མདུན་བཞག་སྟེ། །སྦྱོར་བའི་རིམ་པས་རྣམ་སྤེལ་ན། །རིན་ཆེན་ཆེན་པོ་འཕགས་པར་འགྱུར། །རིན་ཆེན་སྒྲོལ་མ་ཟློས་བཞིན་དུ། །འོད་བཟང་གཟི་བརྗིད་འབར་བ་ཅན། །ཕྱོགས་ཀུན་སྣང་བར་བྱེད་པ་ཡི། །ནོར་བུའི་རྒྱལ་པོ་བླང་བར་བྱ། །ལྷ་རྫས་ནོར་བུ་བླངས་པ་ཡིས། །རིན་ཆེན་འབྱུང་བ་གཉིས་པར་འགྱུར། །དེ་ནི་སེམས་ཅན་ཐམས་ཅད་ཀྱི། །ཡིད་བཞིན་ནོར་བུ་རིན་ཆེན་བཞིན། །རིན་ཆེན་ཆར་པ་རབ་འབེབས་ཤིང་། །སེམས་ཅན་ཀུན་གྱི་དབུལ་བ་འཇོམས། །གཙོ་བོ་ཡིད་བཞིན་ནོར་བུ་ཅན། །སངས་རྒྱས་ཞིང་དུ་རྣམ་པར་རྒྱུ། །འོད་དཔག་མེད་པར་རྣམ་བསྒོམས་ནས། །པདྨ་ཆེན་པོ་མདུན་བཞག་སྟེ། །རིམ་བཞིན་གཟི་བརྗིད་གཟེངས་བསྟོད་ན། །འདབ་མ་བྱེ་བས་རྣམ་བརྒྱན་པ། །འོད་བཟང་གསེར་ལྟར་འབར་བ་ཅན། །པདྨ་ཆེན་པོ་འཕགས་པར་འགྱུར། །གོས་དཀར་ཅན་མའི་གསང་སྔགས་ཀྱིས། །ཡིད་ལས་བྱུང་བའི་པདྨ་བླང་། །པདྨའི་རྒྱལ་པོ་བླངས་པ་ཡིས། །འོད་དཔག་མེད་པ་གཉིས་པར་འགྱུར། །ཆོས་མཛད་རྣམས་ཀྱིས་ཐོག་འདྲེན་ཅིང་། །སེམས་ཅན་རྣམས་ལ་བདུད་རྩི་སྩོལ། །སངས་རྒྱས་ཞིང་རྣམས་སྣང་བྱེད་གཙོ། །བདེ་བ་ཅན་གྱི་རྒྱན་དུ་འགྱུར། །དོན་ཡོད་གྲུབ་པ་རྣམ་བསྒོམས་ནས། །རལ་གྲི་མདུན་དུ་རྣམ་བཞག་སྟེ། །རྣལ་འབྱོར་རིམ་པ་འདི་ཡིས་ནི། །བསྒོམ་པ་དེ་ཉིད་ཀྱིས་བསྐུལ་ན། །རྡོ་རྗེ་འབར་བ་ལྟ་བུའི་འོད། །རལ་གྲི་ཆེན་པོ་འཕགས་པར་འགྱུར། །སྒྲོལ་མའི་གསང་སྔགས་ཟློས་བཞིན་དུ། །རལ་གྲི་བླ་མེད་བླང་བར་བྱ། །དེ་ནས་རལ་གྲི་མཆོག་བླངས་ནས། །དོན་ཡོད་གྲུབ་པ་གཉིས་པར་འགྱུར། །སངས་རྒྱས་ཞིང་དུ་རྣམ་རྒྱུ་ཞིང་། །སེམས་ཅན་རྣམས་ཀྱི་མི་ཤེས་གཅོད། །རྟག་ཏུ་དྲི་མེད་སྣང་གྱུར་ཏེ། །ཆུ་ཡི་ནང་གི་སྟོན་ཟླ་བཞིན། །རྫས་ཀྱི་དངོས་གྲུབ་བསྟན་ནས་ནི། །ཕྱག་རྒྱ་ཆེན་པོ་བསྒྲུབ་པར་བྱ། །རྣལ་འབྱོར་ཆེ་ལ་རྣམ་གནས་པ། །དེ་བཞིན་གཤེགས་ཀྱི་བཙུན་མོ་ཆེ། །ཞེ་སྡང་རིགས་ནི་འདྲེན་མཛད་མ། །རྡོ་རྗེ་གདན་ཅན་མཱ་མ་ཀཱི། །རིན་ཆེན་འབྱུང་བའི་ལྷ་མོ་དང་། །ལྷ་མོ་འགྲོ་བ་དབང་མཛད་མ། །མཁའ་ལ་ལོངས་སྤྱོད་སྤྱོད་མཛད་མ། །རིམ་པ་བཞིན་དུ་ང་ཡིས་བཤད། །དེ་ནས་བུ་མོ་མིག་ཡངས་མ། །ལོ་ནི་བཅུ་དྲུག་ལོན་པ་ལ། །གཟུགས་དང་མདངས་དང་ལང་ཚོར་ལྡན། །གསེར་གྱི་རྣ་ཆ་གཡོ་བ་ཅན། །གཅིག་ཅིག་བསྒྲིམས་ཏེ་བཙལ་ནས་སུ། །ལྷ་མོ་བྱི་དོར་ལེགས་བྱས་ཏེ། །

རིགས་ལྔ་ཡི་ནི་ཚོགས་ཅན་མ། །ལས་ཀྱི་རྗེས་སུ་བསྒོམས་བྱས་ནས། །བཞག་སྟེ་སྤྲད་པའི་སྦྱོར་བ་ཡིས། །པདྨ་ལ་ནི་རྡོ་རྗེ་གཞག །སྤྲད་པ་དང་ནི་འཁྱུད་པ་ཡིས། །རྡོ་རྗེ་དང་ནི་པདྨ་བསྐུལ། །གར་གྱི་ཚུལ་དུ་གྱུར་པ་དང་། །དེ་བཞིན་སྤྲོ་དང་བསྡུ་བ་ཡི། །མོད་ལ་སྒྱུ་མའི་དྲེགས་མྱོས་ནས། །རྡོ་རྗེ་ལས་ནི་བདུད་རྩི་འབྱུང་། །རྣལ་འབྱོར་ལྡན་པའི་ཤེས་རབ་ལས། །པདྨ་ལ་གནས་བདུད་རྩི་བཏུང་། །རྣལ་འབྱོར་ལྡན་པའི་ཁ་ཡིས་ནི། །འཐུངས་པས་དེ་བཞིན་གཤེགས་ལྔ་ཡི། །སྐུ་ནི་ཡོངས་སུ་འགྱུར་བ་འཐོབ། །ནམ་མཁའ་འདྲ་བའི་ཆོས་ཀུན་ལ། །ཐབས་དང་ཤེས་རབ་རྣམ་པར་འཕེལ། །འདི་ནི་སངས་རྒྱས་ཐམས་ཅད་ཀྱི། །སྐུ་ཡི་སྙིང་པོ་སྒྲུབ་པ་སྟེ། །འདོད་ལྔའི་ཡོན་ཏན་རྗེས་འཇུག་པའི། །བྱང་ཆུབ་བདེ་བས་བསྒྲུབས་ན་ནི། །རྡོ་རྗེ་པདྨ་བྱིན་བརླབས་ནས། །རྗེས་སུ་ཆགས་པས་འཐོབ་པར་འགྱུར། །གྲུབ་ཆེན་གསང་བའི་དངོས་གྲུབ་ནི། །སྡུག་བསྔལ་མེད་པའི་བདེ་བའི་ཐབས། །རྗེས་སུ་ཆགས་པས་བདེ་བ་ཡི། །རྡོ་རྗེ་ཐེག་པས་མཉེས་པར་འགྱུར། །སྦྱོར་བའི་ཁྱད་པར་འདི་ཡིས་ནི། །ལན་གསུམ་འཇུག་པའི་གསང་སྔགས་དང་། །ལམ་གྱི་ཕྱག་རྒྱ་ངས་བཤད་དོ། །དེ་དག་ལག་པའི་ཕྱག་རྒྱ་དག །ཡེ་ཤེས་ཕྱག་རྒྱ་རབ་བསྐུལ་བས། །དམ་ཚིག་མཆོག་གིས་འགྲུབ་པར་འགྱུར། །ཐུབ་ཆེན་སྣ་ཚོགས་གཟུགས་མངའ་བ། །སྣ་ཚོགས་ཕྲིན་ལས་མཛད་པར་འགྱུར། །དེ་ནས་ཕྱག་ན་རྡོ་རྗེ་ཁམས་གསུམ་གྱི་དམ་ཚིག་གི་འཁོར་ལོ་འདི་ཉིད་ཀྱི་རྡོ་རྗེའི་སྐུ་དང་གསུང་དང་། ཐུགས་ལས་ཕྱུང་ངོ་། །ས་ནི་སྤྱན་དུ་བརྗོད་པ་སྟེ། །ཆུ་ཁམས་མཱ་མ་ཀཱི་ཞེས་བཤད། །སྒྲོལ་མ་རླུང་ཞེས་ཀུན་ཏུ་བརྗོད། །གོས་དཀར་ཅན་མ་མེ་རུ་བསྒྲགས། །རྡོ་རྗེ་དམ་ཚིག་ནམ་མཁའི་དབྱིངས། །སྟོན་པ་རྡོ་རྗེ་འཆང་བས་བཤད། །ཅེས་དེ་བཞིན་གཤེགས་པ་ཐམས་ཅད་ཀྱི་སའི་དབང་ཕྱུག་བཅོམ་ལྡན་འདས་རྡོ་རྗེ་སེམས་དཔའ་ཆེན་པོས་གསུངས་སོ། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ལ་རྣམ་པར་བལྟས་ནས་ཅང་མི་གསུང་བར་གྱུར་ཏོ། །

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་གསང་བ་འདུས་པར་དབང་བསྐུར་བའི་སློབ་དཔོན་དེ་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཅི་ལྟར་བལྟ་བར་བགྱི་ལགས། རིགས་ཀྱི་བུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཆེན་པོ་ཐམས་ཅད་ཀྱིས་འདི་ནི་རྡོ་རྗེའི་བྱང་ཆུབ་ཀྱི་སེམས་སུ་བལྟ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་དང་རྡོ་རྗེ་སློབ་དཔོན་འདི་གཉིས་གཉིས་སུ་བྱར་མེད་པའི་ཕྱིར་ཞེས་བྱ་བའི་བར་ནས་རིགས་ཀྱི་བུ་མདོར་བསྡུས་ནས་ཡང་བཤད་པར་བྱའོ། །ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་དང་བྱང་ཆུབ་སེམས་དཔའ་བཞུགས་ཤིང་གཞེས་པའི་བར་དེ་དག་ཐམས་ཅད་དུས་གསུམ་དུ་བྱོན་ནས། སློབ་དཔོན་ལ་དེ་བཞིན་གཤེགས་པ་ཐམས་ཅད་ཀྱིས་མཆོད་པས་མངོན་པར་མཆོད་ནས་འདི་སྐད་ཅེས་བདག་ཅག་དེ་བཞིན་གཤེགས་པ་ཐམས་ཅད་ཀྱི་ཕ་ཡིན་ནོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་མ་ཡིན་ནོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་སྟོན་པ་ཡིན་ནོ། །ཞེས་རྡོ་རྗེའི་ཡི་གེ་གསུམ་ཕྱུང་ནས་སླར་ཡང་རང་རང་གི་སངས་རྒྱས་ཀྱི་ཞིང་དུ་གཤེགས་པར་འགྱུར་རོ། །རིགས་ཀྱི་བུ་དཔེར་ན་སངས་རྒྱས་བཅོམ་ལྡན་འདས་ཕྱོགས་བཅུ་ན་བཞུགས་པའི་བར་དེ་དག་གིས་སངས་རྒྱས་བཅོམ་ལྡན་འདས་རྣམས་ཀྱི་རྡོ་རྗེའི་སྐུ་དང་གསུང་དང་ཐུགས་ཀྱི་བསོད་ནམས་ཀྱི་ཕུང་པོ་བས་ནི་རྡོ་རྗེ་སློབ་དཔོན་དེའི་སྤུའི་ཁུང་བུ་གཅིག་གི་བསོད་ནམས་ཀྱི་ཕུང་པོ་ཆེས་ཁྱད་པར་དུ་འཕགས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྙིང་པོར་གྱུར་པའི་བར་ནས་ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འཇིགས་ཤིང་སྐྲག་པའི་ཡིད་ཀྱིས་ཅང་མི་སྨྲ་བར་གྱུར་ཏོ། །དེ་ནས་ཡང་དེ་བཞིན་གཤེགས་པ་མི་འཁྲུགས་པ་དང་། རིན་ཆེན་འབྱུང་གནས་དང་། དོན་ཡོད་གྲུབ་པ་དང་། དེ་བཞིན་གཤེགས་པ་འོད་དཔག་མེད་དང། དེ་བཞིན་གཤེགས་པ་རྣམ་པར་སྣང་མཛད

རྣམས་རྡོ་རྗེ་འཆང་ཐམས་ཅད་ཀྱི་དངོས་གྲུབ་ཀྱི་དམ་ཚིག་ལ་དམིགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བྱང་ཆུབ་སེམས་དཔའ་དེ་དག་ལ་བོས་ནས་ཤེས་ལྡན་བྱང་ཆུབ་སེམས་དཔའ་ཐམས་ཅད་ཉོན་ཅིག །ཕྱོགས་བཅུ་དུས་གསུམ་དུ་བྱུང་བའི་སངས་རྒྱས་བཅོམ་ལྡན་འདས་རྣམས རྡོ་རྗེ་སློབ་དཔོན་གྱི་དྲུང་དུ་བྱོན་ནས་མཆོད་པར་མཛད་ཅིང་ཕྱག་འཚལ་བར་བརྗོད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་སྟོན་པ་ཡིན་པ་དང་། བཅོམ་ལྡན་འདས་རྡོ་རྗེ་འཆང་དེ་ཉིད་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བདག་པོ་ཡིན་པའི་ཕྱིར་རོ། །དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་དེ་དག་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་ཀྱི་དངོས་གྲུབ་གང་ལ་གནས། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། རྡོ་རྗེའི་སྐུ་དང་གསུང་དང་ཐུགས་ཀྱི་གསང་བ་གསུམ་ནི་རྡོ་རྗེ་སློབ་དཔོན་གྱི་ལུས་དང་ངག་དང་ཡིད་ལ་གནས་སོ། །བྱང་ཆུབ་སེམས་དཔའ་ཐམས་ཅད་ཀྱིས་གསོལ་པ། རྡོ་རྗེ་སློབ་དཔོན་གྱི་ལུས་དང་ངག་དང་སེམས་ཀྱི་གསང་བ་གང་ལ་གནས། ནམ་མཁའ་ལ་གནས་སོ། །ནམ་མཁའ་གང་ལ་གནས། རྡོ་རྗེ་སློབ་དཔོན་གྱི་སེམས་ལ་གནས་སོ། །སེམས་གང་ལ་གནས། གང་དུ་ཡང་མ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ངོ་མཚར་དུ་གྱུར་ནས་ཅང་མི་ཟེར་བར་འཁོད་དོ། །དཀྱིལ་འཁོར་དང་། ཏིང་ངེ་འཛིན་དང་། ཕྱག་རྒྱ་དང་། སྟང་སྟབས་དང་། འདུག་སྟངས་དང་། བཟླས་བརྗོད་དང་། སྦྱིན་སྲེག་དང་། མཆོད་པ་དང་ལས་ལ་སྦྱར་བ་དང་སླར་བསྡུ་བ་རྣམས་ནི་གསང་སྔགས་ཀྱི་ཚུལ་དེ་ཁོ་ན་ཉིད་བཅུ་ཡིན་པར་གསུངས་སོ། །དུས་གསུམ་དུ་འབྱུང་བའི་རྒྱལ་བ་ཐུགས་རྗེའི་རོ་གཅིག་པ་རྣམས་ཀྱི་གསང་བ་དང་། གསང་ཆེན་དང་། ཡེ་ཤེས་རྣམ་པ་གསུམ་གྱི་སྙིང་པོ་བསྟན་པ་དག་ནི་སློབ་དཔོན་གྱི་ཁ་ནས་བླ་མ་ལ་གུས་པའི་སློབ་མས་ཤེས་པར་བྱའོ། །བླ་མས་དམ་ཚིག་ཅི་ལྟར་ལྟ་བ་བཞིན་གྱི་དབང་དུ་བྱས་ནས་བཤད་པར་བྱའོ། །བསྒྲིམས་ནས་སེམས་ཅན་རྣམས་ལ་རྣལ་འབྱོར་དང་། རྣལ་འབྱོར་ཆེན་པོ་དང་། ལྷག་པའི་རྣལ་འབྱོར་རྣམས་གོ་རིམས་བཞིན་བཤད་པར་བྱའོ། །འདི་མཐའ་དག་ནི་རྒྱུད་ཐམས་ཅད་ཀྱི་སྤྱིར་ཤེས་པར་བྱའོ། །དེ་ཁོ་ན་ཉིད་ཀྱི་དངོས་པོ་མཐའ་དག་ཡོངས་སུ་མི་

ཤེས་པར་གསང་སྔགས་སྨྲ་བ་ང་ཡིན་ནོ་ཞེས་མངོན་པའི་ང་རྒྱལ་གྱིས་གསང་སྔགས་ཀྱི་ཆོ་ག་འཆད་པར་བྱེད་ན་དམ་ཚིག་ཐམས་ཅད་ཉམས་པར་འགྱུར་རོ། །དམ་ཚིག་ལས་ཉམས་ན་བདུད་ཀྱིས་གཟུང་བར་འགྱུར་རོ། །སྐྱེས་བུ་ཤི་ནས་དམྱལ་བའི་གནས་མི་བཟོད་པ་ཆེན་པོར་འགྲོ་བར་འགྱུར་རོ། །སེམས་ཅན་རྣམས་ལ་བརྟེན་ཏེ་བྱང་ཆུབ་ཐོབ་པར་འགྱུར་བས་སེམས་ཅན་ལ་བསླུ་བར་མི་བྱའོ། །ཞེས་ཤེས་པར་བྱས་ནས་དེ་བཞིན་གཤེགས་པའི་ལམ་དེ་ཉིད་ལ་སེམས་ཅན་དེ་དག་སྦྱར་བར་བྱའོ། །གང་ཞིག་འདི་ལ་བརྩོན་པར་མ་བྱས་པ་དེ་དག་གིས་ནི་ལག་པ་དང་རྐང་པ་དང་། མིག་སྦྱིན་པའི་དཀའ་བ་སྤྱད་པ་དང་། དཀའ་ཐུབ་ཅི་ལྟ་བུས་ཀྱང་སྡིག་པ་གཞོམ་པའམ། བདུད་རྩིའི་རོ་ཐོབ་པར་མི་ནུས་སོ། །རྣལ་འབྱོར་གཅིག་ཁོང་དུ་ཆུད་ནས་དབེན་པར་སོང་སྟེ། བསྒོམ་པ་བྱས་ན་སྡིག་པ་ལས་གྲོལ་ཞིང་ཚེ་འདི་ཉིད་ལ་སངས་རྒྱས་ཀྱི་ཡོན་ཏན་རྣམས་དང་། ཆོས་བདག་མེད་པར་བསྒོམས་པས་ཐམས་ཅད་མཁྱེན་པའི་རྣལ་འབྱོར་ཁོང་དུ་ཆུད་པར་བྱའོ། །ཤེས་རབ་དང་ཡེ་ཤེས་ཀྱི་འཇོ་ཚུལ་གྱིས་གསང་བ་ལྔའི་བདག་ཉིད་ཀྱི་གཙོ་བོ་ལ་མཆོད་པར་བྱའོ། །དངོས་པོ་ཐམས་ཅད་དངོས་མེད་པར། །བཞི་བཅུའི་དོན་ནི་རྟོག་པ་དང་། །རྡོ་རྗེ་པདྨས་དབང་བསྐུར་བས། །བདུད་རྩི་ལྔས་ནི་དགའ་བར་བྱེད། །གསང་བར་བྱ་བའི་ཆོས་གསང་བ། །གསང་ཞིང་སྦས་ཏེ་གཞག་པར་བྱ། །འདོད་ཡོན་ལྔ་ཡི་རྣམ་པ་ནི། །གཟུགས་སྒྲ་དྲི་རོ་རེག་བྱ་སོགས། །རྣལ་འབྱོར་སེམས་དཔའ་སྤྱད་བྱ་ཞིང་། །དེ་བཞིན་བཟའ་དང་བཏུང་བྱས་ན། །བལྟས་དང་ཁུ་ཚུར་རྣམ་པ་ཡིས། །སེམས་ཅན་ཐམས་ཅད་དབང་དུ་བྱེད། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་ཆོ་ག་ཐམས་ཅད་བསྟན་པ་རིམ་པར་ཕྱེ་བ་སྟེ་བཅུ་པའོ།། །།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་བ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། ཐམས་ཅད་དང་ལྡན་པའི་འཁོར་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཐེག་པ་ཆེན་པོའི་ཡང་ཐེག་པ་ཆེན་པོའི་ཚུལ་ཟབ་མོ་གསང་བ་བས་ཀྱང་ཆེས་གསང་བ་ཆེན་པོ་རྫོགས་སོ།། །།ཞུ་ཆེན་གྱི་ལོཙྩ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་ནག་པོ་ཞེས་བྱ་བའི་རྒྱུད།

རྒྱ་གར་སྐད་དུ། སརྦ་ཏ་ཐཱ་ག་ཏ་ཀཱ་ཡ་ཝཱཀྩིཏྟི་ཀྲྀཥྞ་ཡ་མཱ་རི་ནཱ་མ་ཏནྟྲ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་ནག་པོ་ཞེས་བྱ་བའི་རྒྱུད། འཕགས་པ་འཇམ་དཔལ་གཤིན་རྗེའི་གཤེད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བཙུན་མོ་ཐམས་ཅད་ཀྱི་བྷ་ག་རྣམས་ལ་བཞུགས་ཏེ། གཏི་མུག་རྡོ་རྗེ་གཤིན་རྗེའི་གཤེད་དང་། ཕྲ་མོ་རྡོ་རྗེ་གཤིན་རྗེའི་གཤེད་དང་། འདོད་ཆགས་རྡོ་རྗེ་གཤིན་རྗེའི་གཤེད་དང་། ཕྲག་དོག་རྡོ་རྗེ་གཤིན་རྗེའི་གཤེད་དང་། ཞེ་སྡང་རྡོ་རྗེ་གཤིན་རྗེའི་གཤེད་དང་། ཐོ་བ་གཤིན་རྗེའི་གཤེད་དང་། དབྱུག་པ་གཤིན་རྗེའི་གཤེད་དང་། པདྨ་གཤིན་རྗེའི་གཤེད་དང་། རལ་གྲི་གཤིན་རྗེའི་གཤེད་དང་། མཚམས་རྣམས་སུ་རྡོ་རྗེ་ཙ་རྩི་ཀཱ་དང་། རྡོ་རྗེ་ཕག་མོ་དང་། རྡོ་རྗེ་དབྱངས་ཅན་མ་དང་། རྡོ་རྗེ་གཽ་རཱི་མ་རྣམས་མཚམས་སུའོ། །དེ་དག་ལ་སོགས་ཏེ་གཤིན་རྗེའི་གཤེད་ཀྱི་ཚོགས་ཆེན་པོ་དང་། ཐབས་ཅིག་ཏུ་བཞུགས་སོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསོལ་བ་བཏབ་པ་དང་། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདུད་ཐམས་ཅད་རྣམ་པར་འཇོམས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ངེས་པར་བཏོན་ཏོ། །ཟླ་བ་རྡོ་རྗེ་སྦྱོར་བ་ཡིས། །གཤིན་རྗེ་མཐར་བྱེད་བསྒོམ་པར་བྱ། །བདུད་རྣམས་ཞི་བར་བྱ་ཕྱིར་དང་། །ཞེ་སྡང་ཐམས་ཅད་བསལ་བའི་ཕྱིར། །འོད་ཟེར་ལྔ་ཡིས་འཁྲིགས་པ་ཡིས། །རྡོ་རྗེ་བསྲུང་བའི་དོན་དུ་བསྒོམ། །ཕྱི་མཚམས་རྡོ་རྗེ་ས་གཞི་དང་། །ར་བ་དྲ་བ་དེ་བཞིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྐྱེད་པ་པོ་བདུད་འདུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཏི་མུག་རྡོ་རྗེ་གཤིན་རྗེའི་གཤེད་ལ་སོགས་པ་ཐམས་ཅད་ཀྱི་ས་བོན་འདི་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལ་ངེས་པར་ཕྱུང་བ། དབུས་སུ་ཡ་དང་ཀྵེ་མ་མེད་ཡཙྪ་ནི་རཱ་ཛཱ་ས་དོ་རུ་ཎ་ཡོ་ནི་རའོ། །ཡ་སོགས་ཡི་གེ་དང་པོ་ལས། །གཤིན་རྗེའི་གཤེད་དུ་གྱུར་པ་ཡིན། །ཡི་གེ་ཀྵེ་ནི་གཏི་

མུག་བརྗོད། །ཡི་གེ་མ་ནི་ཕྲ་མར་གསུངས། །ཡི་གེ་མེ་ནི་འདོད་ཆགས་ཉིད། །ཡི་གེ་ད་ནི་ཕྲག་དོག་འགྱུར། །གཤིན་རྗེའི་གཤེད་སོགས་ལྔ་རུ་གྲགས། །ཡི་གེ་ཡ་ལས་ཐོ་བར་འགྱུར། །ཡི་གེ་ཙྪ་ལས་དབྱུག་པའི་གཙོ། །ལག་ན་པདྨ་ནི་ཡིག་ལས། །ལག་ན་རལ་གྲི་རཱ་ལས་ཡིན། །ཛ་ལས་ཙརྩི་ཀཱ་ཞེས་བརྗོད། །ཡི་གེ་ས་ལས་ཕག་གདོང་མ། །ཡི་གེ་དོ་ལས་དབྱངས་ཅན་བསྒྲགས། །ཡི་གེ་རུ་ལས་གཽ་རཱི་དྲན། །ཎ་ཡོ་ནི་ར་མཚམས་ཀྱི་བཞི། །ཐོད་པ་བཞི་རུ་འདོད་པ་ཡིན། །སྣ་ཚོགས་རྡོ་རྗེ་འཇིགས་རུང་བ། །ནམ་མཁའ་རྡོ་རྗེའི་དཀྱིལ་དུ་བསམ། །དེ་དཀྱིལ་བཞུགས་པ་གཤིན་རྗེའི་གཤེད། །གནག་ཅིང་འབར་བ་བསྒོམ་པར་བྱ། །ཤར་དུ་གཏི་མུག་རྡོ་རྗེ་སྟེ། །ལྷོ་རུ་དེ་བཞིན་ཕྲ་མ་ཡིན། །ནུབ་ཏུ་འདོད་ཆགས་རྡོ་རྗེ་སྟེ། །དེ་བཞིན་བྱང་དུ་ཕྲག་དོག་གོ །མཚམས་ཀྱི་རྡོ་རྗེ་རྩེ་བཞི་ལ། །ཙརྩི་ཀཱ་སོགས་རྣམ་པར་བསྒོམ། །སྒོ་ཡི་རྡོ་རྗེ་རྩེ་བཞི་ལ། །ཐོ་བ་ལ་སོགས་རྣམ་པར་བསྒོམ། །སྣ་ཚོགས་རྡོ་རྗེའི་མཚམས་བཞི་རུ། །མི་ཡི་མགོ་བོ་བཞི་དག་གོ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཤིན་རྗེའི་གཤེད་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེ་སྡང་ཆེན་པོའི་རིགས་ཀྱི་སྔགས་གསུངས་པ། ཨོཾ་ཧྲཱིཿཥྚྲཱིཿཝི་ཀྲྀཏཱ་ནན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཏི་མུག་རྡོ་རྗེ་ཆེན་པོའི་སྔས་གསུངས་པ། ཨོཾ་ཛི་ནི་ཛཱི་ཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲ་མ་རྡོ་རྗེའི་སྔགས་གསུངས་པ། ཨོཾ་རནྟ་དྷྲཱྀཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་འདོད་ཆགས་རྡོ་རྗེའི་སྔགས་གསུངས་པ། ཨོཾ་ཨཱ་རོ་ལཱི་ཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲག་དོག་རྡོ་རྗེའི་སྔགས་གསུངས་པ། ཨོཾ་པྲཛྙཱདྷྲཱྀཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཐོ་བའི་སྔགས་གསུངས་པ། ཨོྃ་མུཌྒ་ར་དྷྲཱྀཀ  །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་

བདག་པོས་རྡོ་རྗེ་དབྱུག་པའི་སྔགས་གསུངས་པ། ཨོཾ་དཎྜ་དྷྲཱྀཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་པདྨའི་སྔགས་གསུངས་པ། ཨོཾ་པདྨ་དྷྲཱྀཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་རལ་གྲིའི་སྔགས་གསུངས་པ། ཨོཾ་ཁཌྒ་དྷྲཱྀཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཙརྩི་ཀཱའི་སྔགས་གསུངས་པ། ཨོཾ་མོ་ཧ་ར་ཏི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཕག་མོའི་སྔགས་གསུངས་པ། ཨོཾ་དྭེ་ཥ་ར་ཏི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་རཱ་ག་ར་ཏི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་གཽ་རཱི་མའི་སྔགས་གསུངས་པ། ཨོཾ་བཛྲ་ར་ཏི། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོས་སྐུ་གསུང་ཐུགས་བྱིན་གྱིས་བརླབ་པའི་སྔགས་གསུངས་པ། ཨོྃ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་པ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཞེ་སྡང་ཆེན་པོའི་སྐུ་ངེས་པར་བསྟན་པ། ཞལ་གསུམ་ཕྱག་དྲུག་ཁྲོས་པ་ལ། །ཨིནྡྲ་ནཱི་ལ་འདྲ་བའི་མདོག །ཕྱག་ན་རྡོ་རྗེ་བསྣམས་པ་ཉིད། །གཤིན་རྗེའི་གཤེད་ནི་བསྒོམ་པར་བྱ། །ཞལ་གསུམ་ཕྱག་དྲུག་ཞི་བ་ལ། །གསལ་བའི་གཟུགས་དང་འདྲ་བའི་འོད། །ཕྱག་ན་འཁོར་ལོ་བསྣམས་པ་ཉིད། །གཏི་མུག་རྡོ་རྗེ་རྣམ་བསྒོམ་བྱ། །ཞལ་གསུམ་ཕྱག་དྲུག་རྒྱས་གྱུར་པ། །གསེར་གྱི་རྣམ་པའི་འོད་དང་ལྡན། །ཕྱག་ན་རིན་ཆེན་བསྣམས་པ་ཉིད། །ཕྲ་མ་རྡོ་རྗེ་རྣམ་བསྒོམ་བྱ། །ཞལ་གསུམ་ཕྱག་དྲུག་དབང་བྱེད་པ། །པདྨ་རཱ་ག་མཚུངས་པའི་འོད། །ཕྱག་ན་པདྨ་བསྣམས་པ་ཉིད། །འདོད་ཆགས་རྡོ་རྗེ་རྣམ་བསྒོམ་བྱ། །ཞལ་གསུམ་ཕྱག་དྲུག་ཐམས་ཅད་ལ། །རིན་ཆེན་མ་རྒད་འོད་དང་ལྡན། །ཕྱག་ན་ཤུབས་ཅན་བསྣམས་པ་ཉིད། །ཕྲག་དོག་རྡོ་རྗེ་རྣམ་བསྒོམ་

བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་མངོན་པར་རྟོགས་པའི་རིམ་པར་ཕྱེ་བ་སྟེ་ལེའུ་དང་པོའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པ། གཤིན་རྗེའི་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེའི་གཤེད་པོ་རབ་འཇིགས་པའི། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །གཤིན་རྗེའི་གཤེད་པོ་རབ་འཇིགས་པ། །རྡོ་རྗེ་གསུང་དང་རབ་མཚུངས་པ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་ངོ་བོའི་རང་བཞིན་ཁྱོད། །གཤིན་རྗེའི་གཤེད་པོ་ལས་ཀུན་པ། །རྡོ་རྗེ་ཆགས་དང་རབ་ཏུ་མཚུངས། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་དངོས་པོ་ཁྱོད། །སངས་རྒྱས་ཐམས་ཅད་གཅིག་བསྡུས་པས། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །རྡོ་རྗེ་མིག་དང་། རྡོ་རྗེ་རྣ་བ་དང་། རྡོ་རྗེ་སྣ་དང་། རྡོ་རྗེ་ལྕེ་དང་། རྡོ་རྗེ་ལུས་དང་། རྡོ་རྗེ་ཐུགས་ཞེས་བཅོམ་ལྡན་འདས་ཀྱིས་གསུངས་པ་ནི་མིག་ལ་སོགས་པ་བྱིན་གྱིས་བརླབ་པའི་ཆོ་གའོ། །དེ་ནས་ཡང་དག་བཤད་བྱ་བ། །འདོད་པའི་དོན་གྲུབ་སྒྲུབ་བྱེད་པའི། །གཤིན་རྗེའི་གཤེད་པོ་ཉིད་མཚུངས་པ། །གཤིན་རྗེའི་འཇིགས་པའི་དཀྱིལ་འཁོར་ལོ། །སྐུད་པ་གསར་པ་ལེགས་བསྒྲིམས་ལ། །ལེགས་པའི་ཚད་ལ་མཛེས་པ་ཡིས། །སྐུད་པ་བྱས་པས་ཐིག་གདབ་པོ། །གཤིན་རྗེའི་ཚོགས་ཀྱི་དཀྱིལ་འཁོར་ལོ། །མཚན་རྣམས་ཐམས་ཅད་རབ་རྫོགས་ཤིང་། །བར་ཆད་ཐམས་ཅད་རབ་ཉམས་པ། །ཞི་བ་ལ་སོགས་རབ་འཇུག་པའི། །དཀྱིལ་འཁོར་འཁོར་ལོའི་ཆ་བྱད་ལ། །རྩེ་མོ་ལྔ་དང་མཉམ་ལྡན་པའི། །ལས་ཀྱི་རྡོ་རྗེ་དེ་ལ་བྲི། །རྡོ་རྗེ་འབར་བ་འཁྲིགས་པ་ཡི། །རྡོ་རྗེ་དེ་ཡི་དབུས་སུ་བྲི། །རལ་གྲི་བྱང་གི་ཕྱོགས་སུ་བྲི། །འཁོར་ལོའི་འོད་ཀྱིས་བསྐོར་བ་ཡི། །འཁོར་ལོ་ཤར་གྱི་ཕྱོགས་སུ་

བྲི། །འོད་ཀྱི་ཕྲེང་བ་མཉམ་འཕྲོ་བའི། །རིན་པོ་ཆེ་ནི་ལྷོ་རུ་བྲི། །པདྨ་རཱ་གའི་མདངས་འདྲའི་འོད། །པདྨ་ནུབ་ཀྱི་ཕྱོགས་སུ་བྲི། །འོད་ཟེར་ལྔ་དང་མཉམ་ལྡན་པའི། །ཤར་གྱི་མཚམས་སུ་འཁོར་ལོ་བྲི། །ལྷོ་རུ་རྡོ་རྗེ་བྲི་བར་བྱ། །ནུབ་ཏུ་པདྨའི་མེ་ཏོག་ནི། །ཡུ་བ་དང་བཅས་ཁ་བྱེ་གསལ། །འོད་ཀྱི་ཕྲེང་བ་མཉམ་འཕྲོ་བའི། །ཨུཏྤ་ལ་ནི་བྱང་ནུབ་བྲི། །ཤར་གྱི་སྒོར་ནི་ཐོ་བ་སྟེ། །དབྱིག་པ་དེ་བཞིན་ལྷོ་ཡི་སྒོར། །འདམ་ལས་སྐྱེས་པ་ནུབ་ཀྱི་སྒོར། །བྱང་དུ་རྡོ་རྗེ་རལ་གྲིའོ། །ཤེས་པས་དཀྱིལ་འཁོར་རྫོགས་པ་ལ། །མཆོད་པ་ཁྱད་པར་འཕགས་པ་ནི། །འདོད་པའི་ཡོན་ཏན་ལྔ་དག་གིས། །འཇིགས་པ་མེད་པར་མངོན་པར་མཆོད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་དཀྱིལ་འཁོར་ཆེན་པོའི་རིམ་པར་ཕྱེ་བ་སྟེ་ལེའུ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བསྟོད་པའི་རྒྱལ་པོ་འདིས་བསྟོད་ནས་གསོལ་བ་བཏབ་པ། སྡིག་པ་ཐམས་ཅད་འཇོམས་པ་ཡི། །འཇིགས་པའི་གཤིན་རྗེ་འཇོམས་དཀྱིལ་འཁོར། །དཀྱིལ་འཁོར་ཐམས་ཅད་ཀྱི་གཙོ་བོ། །མགོན་པོ་དཀྱིལ་འཁོར་བྲི་བར་མཛོད། །དེ་ནས་བཅོམ་ལྡན་འདས་རྡོ་རྗེ་འཛིན་ཆེན་པོས་ཉིད་ཀྱི་སྐུ་གསུང་ཐུགས་རྣམས་ལས་བདུད་རྩི་མྱང་བའི་ཆོ་ག་ངེས་པར་ཕྱུང་བ། ཨོཾ་ཨཱཿཧཱུྃ། རྡོ་རྗེ་མེ་ལྕེ་སྦྱོར་བ་ཡིས། །རྡོ་རྗེ་ཅན་ཀུན་མཉེས་པ་དང་། །རྫོགས་པའི་སངས་རྒྱས་ཐམས་ཅད་བཞུགས། །ཡེ་ཤེས་འབྱུང་གནས་ངོ་བོ་ཉིད། །དགུག་པ་དང་ནི་གཞུག་པ་དང་། །བཅིང་དང་དེ་བཞིན་དབང་བྱ་ཉིད། །ཐོ་བ་ལ་སོགས་སྔགས་བཞི་ཡིས། །མཉམ་པར་བཞག་པས་རྣམ་པར་བསྒོམ། །མ་ཧེ་རྡོ་རྗེ་རྣམ་བསྒོམས་ལ། །དཀྱིལ་འཁོར་གཙོ་བོ་རྣམ་བསྒོམ་བྱ། །ཟླ་བའི་དཀྱིལ་འཁོར་དབུས་གནས་པར། །གཏི་མུག་རྡོ་རྗེ་རྣམ་བསྒོམ་བྱ། །རྟ་བདུན་ལྡན་པའི་དབུས་གནས་པ། །ཕྲ་མ་ཞེས་བྱ་རྣམ་བསམ་བྱ། །དཀྱིལ་འཁོར་དམ་པའི་དབུས་གནས་པ། །འདོད་ཆགས་རྡོ་རྗེ་རྣམ་བསྒོམ་བྱ། །ལས་ཀྱི་དཀྱིལ་འཁོར་དབུས་གནས་པ། །རྡོ་རྗེ་ལས་ནི་བསྒོམ་པར་བྱ། །ཞི་བའི་གཏི་མུག་རྡོ་རྗེ་སྟེ། །རྒྱས་པ་དེ་

བཞིན་ཕྲ་མ་ཡིན། །འདོད་ཆགས་རྡོ་རྗེ་དབང་དུ་བྱས། །རྡོ་རྗེ་ལས་ཀྱིས་ཐམས་ཅད་དུའོ། །རྡོ་རྗེ་ལས་ཀྱི་སྦྱོར་བ་ཡིས། །མི་ཚིལ་མི་ཡི་ཐོད་པར་བཞག །དེ་བཞིན་མི་སྐྲས་སྡོང་བུ་བྱ། །དུར་ཁྲོད་དག་ཏུ་དུ་བ་བསྒྲུབ། །མིག་སྨན་དག་ནི་དེ་བཞིན་དུ། །མིག་སྨན་ལས་ཀྱི་བསྒོམ་པ་དང་། །ལས་ཀྱི་བཟླས་པའི་སྦྱོར་བ་ཡིས། །མིག་སྨན་འདི་ནི་འགྲུབ་པར་འགྱུར། །ཁྲག་དང་གུར་གུམ་གཟུང་བྱས་ནས། །སྒྲུབ་པ་བྱུག་པ་བསྒྲུབ་པར་བྱ། །ལས་ཀྱི་རྡོ་རྗེ་སྦྱོར་བ་ཡིས། །རྐང་མགྱོགས་དག་ནི་འགྲུབ་པར་འགྱུར། །བདུད་རྩི་ལྔ་ནི་མཉམ་པ་ལ། །ཤ་ལྔ་དང་ནི་ལྡན་པ་ཡིས། །ལྕགས་གསུམ་དུ་ནི་བཅུག་བྱས་ན། །ལས་ཀྱི་སྦྱོར་བས་འགྲུབ་པར་འགྱུར། །ཀན་ཏའི་ལྕགས་ཀྱི་རལ་གྲི་ནི། །ལས་ཀྱི་སྦྱོར་བ་བསྒྲུབ་པར་བྱ། །ལས་ཀྱི་རྡོ་རྗེ་སྦྱོར་བ་ཡིས། །ལས་ཀྱི་རལ་གྲི་རབ་འགྲུབ་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ལས་ཀྱི་རིམ་པར་ཕྱེ་བ་སྟེ་ལེའུ་གསུམ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་བསྟོད་པའི་རྒྱལ་པོ་འདིས་བསྟོད་ནས་གསོལ་བ་བཏབ་པ། ལས་ཀྱི་དབྱེ་བའི་དབྱེ་བ་ལས། །སེམས་ཅན་འཇུག་པ་ཇི་ལྟར་འགྱུར། །རྡོ་རྗེ་ཆེན་པོས་བཤད་དུ་གསོལ། །ཡོན་ཏན་རྒྱ་མཚོ་རྣམས་ཉན་ལགས། །དེ་ནས་རྡོ་རྗེ་འཛིན་རྒྱལ་པོས། །ལས་ནི་ཐམས་ཅད་རབ་སྒྲུབ་པ། །ཉེས་ཀུན་གསོ་བའི་བདག་ཉིད་ཀྱིས། །འདི་སྐད་ཀྱི་ནི་ཚིག་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཐུགས་རྡོ་རྗེ་ཉིད་ཀྱི་མཐུས་ཕྱག་འཚལ་ཞིང་མཆོད་པ་བྱས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཡང་དང་ཡང་དུ་ཕྱག་བྱས་ནས། །བཅོམ་ལྡན་འདས་ཀྱི་གསུང་ཉན་ཏོ། །དེ་ནས་རྡོ་རྗེ་འཛིན་རྒྱལ་པོས། །དབང་དུ་བྱ་བའི་འཁྲུལ་འཁོར་བསྟན། །གཤིན་རྗེའི་གཤེད་ལས་འཁོར་ལོ་མཆོག །མ་བྱུང་འབྱུང་བར་མི་འགྱུར་རོ། །བུད་མེད་དབང་དུ་བྱ་བ་དང་། །བསྲུང་བའི་དོན་དང་དེ་བཞིན་དུ། །ཞི་བ་རོ་ཙ་ནས་བཟུང་སྟེ། །གྲོ་གའམ་དེ་བཞིན་སྨྱུག་ཤུན་ལ། །འཁོར་ལོ་གཉིས་

ནི་མཉམ་བྲིས་ནས། །ན་མཿམིང་གིས་རྣམ་བསྟེན་ལ། །ནག་དང་ཡུ་ཅན་མ་ཡིན་པའི། །ཁམ་ཕོར་གཉིས་ནི་ཁ་སྦྱར་ཏེ། །མར་དང་སྦྲང་རྩིས་བཀང་བར་གཞུག །སྐུད་པ་དཀར་པོས་ཁམ་ཕོར་བཅིང་། །ཤར་དུ་མངོན་པར་ཕྱོགས་པ་ཡིས། །མེ་ཏོག་དཀར་པོས་དུས་གསུམ་གཏོར། །གཤིན་རྗེ་མཐར་བྱེད་ཆུ་ཤེལ་འདྲར། །བདག་ཉིད་བསྒོམས་ནས་མདུན་བཀོད་ལ། །ཟླ་བའི་དཀྱིལ་འཁོར་ལ་གནས་ནས། །བསྒྲུབ་བྱ་བ་ལྟས་ནས་དབང་བསྐུར་བྱ། །བདུད་རྩི་ལྔ་ཡིས་གང་བ་ཡི། །བུམ་པ་དཀར་པོ་ཟླ་བ་འདྲས། །རྫོགས་སངས་དུ་མས་ཁྲུས་བྱས་ཏེ། །བལྟས་ནས་སྔགས་ཀྱི་བཟླས་པ་བརྩམ། ཨོྃ་ན་མཿཧྲཱིཿཥྚྲིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་དེ་བ་དཏྟཱ་ཡ་ཤཱནྟིཾ་ཀུ་རུ་ན་མཿསྭཱ་ཧཱ། ཞི་བའི་ཆོ་ག་གསུངས་པའོ། །སྐྱེས་པ་ཞི་ལ་གུར་ཀུམ་གྱིས། །བྲི་བྱ་དེ་བཞིན་རྒྱས་པ་ཡང་། །འཁོར་ལོ་གཉིས་ནི་ཁ་ཆེ་ཡི། །སྭཱ་ཧཱས་མིང་ནི་བརྒྱན་པ་ཡི། །བསྒྲུབ་བྱའི་མིང་ནི་བྲིས་བྱས་ལ། །མར་དང་སྦྲང་རྩིས་བཀང་ནས་ནི། །ཁམ་ཕོར་ཁ་སྦྱར་ནང་དུ་གཞུག །སྐུད་པ་སེར་པོས་བཅིངས་ནས་ནི། །མེ་ཏོག་སེར་པོ་དུས་གསུམ་གཏོར། །བྱང་དུ་ཁ་བལྟས་མདོག་སེར་བའི། །གཤིན་རྗེའི་གཤེད་དུ་བདག་ཉིད་བསམ། །བསྒྲུབ་བྱ་ཟླ་བ་སེར་ནག་ལ། །བུམ་པ་སེར་པོས་བཀྲུ་བྱ་ཞིང། །དབང་བསྐུར་བ་ནི་བསྒོམ་བྱས་ལ། །སྤྲོས་ལ་རྒྱས་པའི་བཟླས་པ་བྱ། །ཨོྃ་ཧྲཱིཿཥྚྲིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་བ་དཏྟ་པུཥྚིཾ་ཀུ་རུ་སྭཱ་ཧཱ། ཨོྃ་ཧྲཱིཿཥྚྲཱི་ཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། བཽ་ཥ་ཊ་དེ་བ་དཏྟ་སྱ་པུཥྚིཾ་ཀུ་རུ་བཽ་ཥ་ཊ་སྭཱ་ཧཱ། འདི་ནི་བཅོམ་ལྡན་འདས་ཀྱིས་རྒྱས་པའི་ཆོ་ག་གསུངས་པའོ། །གྲོག་འམ་རས་ལ་རྒྱ་སྐྱེགས་ཀྱི། །ཁུ་བའམ་ཙནྡན་དམར་པོའམ། །སྲིན་ལག་གི་ནི་ཁྲག་ཀྱང་རུང་། །ཡི་གེ་ཧོཿཡིས་བརྟེན་པ་ཡི། །འཁོར་ལོ་གཉིས་ནི་མཉམ་པར་བྲི། །འཁོར་ལོ་ནག་པོ་སོགས་བྲལ་བའི། །ཁམ་ཕོར་གཉིས་ནི་ཁ་སྦྱར་དུ། །མར་དང་སྦྲང་རྩིས་བཀང་བ་གཞག །སྐུད་པ་དམར་པོས་བཅིངས་བྱས་ལ། །ནུབ་ཕྱོགས་སུ་ནི་ཁ་བལྟས་ནས། །མེ་ཏོག་དམར་པོས་མཆོད་པར་བྱ། །བདག་ཉིད་གཤིན་རྗེ་མཐར་བྱེད་པ། །ཁ་དོག་དམར་པོ་ཆེར་འབར་བ། །ཟླ་བ་དམར་པོ་ལ་གནས་པའོ། །བསྒྲུབ་བྱ་ཡང་ནི་རྣམ་བསམ་བྱ། །རང་གི་ལུས་ལས་བྱུང་བ་ཡི། །འོད་ཟེར་

དམར་པོ་ལྕགས་ཀྱུ་ཡིས། །བསྒྲུབ་བྱ་དགུག་པར་བྱ་བར་བསམ། །སྔགས་ནི་སྤྲོ་ཞིང་ཁྲི་བཟླས་བྱ། །དེས་ནི་བསྒྲུབ་བྱ་ཉམས་གྱུར་ནས། །རྐང་པ་གཉིས་སུ་ལྷགས་གྱུར་ནས། །གོས་བྲལ་སྐྲ་ནི་བཤིག་གྱུར་པ། །རྣམ་པར་བསམས་ལ་བཟླས་པ་བརྩམ། །གལ་ཏེ་དབང་དུ་མ་གྱུར་ན། །མར་ལ་སོགས་པ་བྲལ་བྱས་ལ། །དུ་བ་མེད་པའི་སེང་ལྡེང་མེས། །འཁོར་ལོ་དེ་ནི་སྒྲུབ་པོས་བསྲོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཧོ་དེ་བ་དཏྟ་ཝ་ཤཾ་ཀུ་རུ་ཧོཿ ཨོཾ་ཧྲཱིཿཥྚྲཱི་ཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། བཽ་ཥཊ་དེ་བ་དཏྟ་སྱ་ཝ་ཤ་མ་ན་ཡ་བཽཥཊ། འདི་ནི་བཅོམ་ལྡན་འདས་ཀྱིས་དབང་དུ་བྱ་བའི་ཆོ་ག་གསུངས་པའོ། །དུར་ཁྲོད་གོས་སམ་ཡང་ན་ནི། །རང་བྱུང་གིས་བསྐུས་རས་ལ་ནི། །ཁྲག་དང་རྒྱ་སྐྱེགས་བསྲེས་པ་ཡིས། །འཁོར་ལོ་གཉིས་ནི་མཉམ་བྲིས་ལ། །ཡི་གེ་ཛཿདང་ཡི་གེ་ཧྲཱིཿས། །མིང་ནི་རྣམ་པར་བརྟེན་བྱས་ལ། །བཙུན་མོ་ཡི་ནི་པདྨའི་སྣོད། །ཁ་སྦྱོར་ནང་དུ་བཙུད་བྱས་ཏེ། །སྐུད་པ་དམར་པོས་བཅིངས་བྱས་ལ། །མེ་ཏོག་དམར་པོས་མཆོད་པར་བྱ། །བདག་ཉིད་གཤིན་རྗེ་མཐར་བྱེད་པ། །ནུབ་ཀའི་ཉི་མ་དང་འདྲ་དམར། །ལྕགས་ཀྱུ་དམར་པོས་བཀུག་པ་ཡི། །བསྒྲུབ་བྱ་དག་ནི་རྣམ་བསྒོམ་བྱ། །སྙིང་ལ་ལྕགས་ཀྱུས་བརྒྱ་བ་ནས་ནི། །སྐེ་ནས་ཞགས་པས་བཅིངས་བྱས་ཏེ། །གཅེར་བུ་སྐྲ་ནི་མ་བཅིངས་པར། །རླུང་གི་དཀྱིལ་འཁོར་སྦྱོར་བ་ཡི། །སེང་གེ་དམར་པོའི་སྟེང་འདུག་ལ། །རྫས་ལྔ་ཡིས་ནི་བཀྲུ་བྱ་ཞིང་། །འོངས་པ་རུ་ནི་བསམ་པར་བྱ། །གལ་ཏེ་བསྒྲུབ་བྱ་མི་འོང་ན། །སེང་ལྡེང་གི་ནི་མེ་མདག་ལ། །དེར་ནི་བཟླས་པ་བརྩམ་པར་བྱ། །བརྟུལ་ཞུགས་ཅན་གྱིས་འཁོར་ལོ་བསྲོ། །ཨོྃ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧྲཱིཿཨ་མུ་ཀཾ་ཨཱ་ཀརྵ་ཡ་ཧྲཱིཿ ཨོྃ་ཧྲཱིཿཥྚྲཱི་ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཛཿདེ་བ་དཏྟ་ཨཱ་ཀརྵ་ཡ་ཛཿ། འདི་ནི་བཅོམ་ལྡན་འདས་ཀྱིས་དགུག་པའི་ཆོ་ག་གསུངས་པའོ། །དུར་ཁྲོད་གོས་ལ་མཁས་པས་ནི། །ཡུང་བ་ཡི་ནི་ཁུ་བ་ཡིས། །འཁོར་ལོ་གཉིས་ནི་མཉམ་པར་བྲི། །ཡི་གེ་ལྃ་གྱིས་བརྟེན་པ་ཡི། །བསྒྲུབ་བྱའི་མིང་ཡང་བྲི་བར་བྱ། །ཁམ་ཕོར་ཁ་སྦྱོར་ནང་དུ་སྟེ། །ཁམ་ཕོར་སེར་པོའི་སྟེང་དུ་བཞག །དེ་ལ་མཁས་པས་རེ་ཁཱ་བྲི། །རེ་ཁཱ་བདུན་ནམ་ཡང་ན་

བཞི། །མཉམ་པར་བཞག་པས་བྲི་བར་བྱ། །རི་རབ་ལྕོག་བརྒྱད་ཅེས་གྲགས་པ། །དེ་ཡི་སྟེང་དུ་མཉམ་པར་བྲི། །ཡི་གེ་ཧཱུྃ་དང་ཡི་གེ་བྃ། རི་རབ་དེ་ནི་བརྟན་པར་བྱ། །དེ་ཡི་སྟེང་དུ་ལྃ་ཡིག་ལས། །དབང་ཆེན་དཀྱིལ་འཁོར་དགོད་པར་བྱ། །སྣ་ཚོགས་རྡོ་རྗེས་མནན་པ་ལ། །སྐུད་པ་སེར་པོས་བཅིངས་ནས་ནི། །གཤིན་རྗེའི་གཤེད་པོ་མདོག་སེར་པོ། །དབང་ཆེན་དཀྱིལ་འཁོར་ལ་གནས་པ། །བསྒྲུབ་བྱ་སེར་པོ་རྣམ་བསམས་ལ། །རི་རབ་ཀྱིས་ནི་མནན་བྱས་པ། །ཕྱག་ན་རྡོ་རྗེས་མནན་བྱས་པ། །དབང་ཆེན་དཀྱིལ་འཁོར་གྱི་འོག་ཏུ། །མན་དཱ་ར་སོགས་རི་བོ་དང་། །སྣ་ཚོགས་རི་བོ་རྣམས་ཀྱིས་ཀྱང་། །བསྒྲུབ་བྱ་མནན་པར་བསྒོམ་པར་བྱ། །དེ་ལ་གནས་ནས་བཟླས་པར་བྱ། །ཨོྃ་ཧྲཱིཿཥྚྲཱིཿལྦི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྃ་དེ་བ་དཏྟ་སྠཱ་ནེ་སྟམྦྷ་ཡ་ཀུ་རུ་ལཾ། འདི་ནི་བཅོམ་ལྡན་འདས་ཀྱིས་རེངས་པར་བྱེད་པའི་གསུངས་པའོ། །ངག་ནི་རེངས་པར་འདོད་པ་ཡིས། །དེ་བཞིན་འཁོར་ལོ་གཉིས་བྲིས་ལ། །བསྒྲུབ་བྱའི་མིང་ཡང་བྲི་བར་བྱ། །དེར་ནི་སྔགས་ཀྱང་སྤྲོས་ལ་བཟླས། །ཨོྃ་ཧྲཱིཿཥྚྲཱི་ཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྃ་དེ་བ་དཏྟསྱ་ཡ་ཐཱསྲ་རཐཱ། ཀར་ཀྲིཏ་ཏེ་ནན་ཏི་བི་ར་ཡ་ཐཱ་ཨ་བི་རཱུ་པ་ཀཾ་དེ་བ་དཏྟ་ཡ་ཛྙཱ་དཏྟ་ཡ་སྱ་ཝཱ་ཀཝཀ་སྟམྦྷ་ན་ཀུ་རུ་ལཾ། བཅོམ་ལྡན་འདས་ཀྱིས་རེངས་པར་བྱེད་པའི་ཆོ་ག་དེ་སྐད་གསུངས་སོ། །ཤིན་ཏུ་ལེགས་པར་སྦས་པ་ཡིས། །འདི་ལས་གསུངས་བཞིན་དགོས་པ་དག །གཤིན་རྗེའི་གཤེད་ནག་སྦྱོར་བ་ཡིས། །ཉི་མ་གཅིག་གིས་འགྲུབ་པར་འགྱུར། །སྔར་བཞིན་དུར་ཁྲོད་ཀྱི་རས་ལ། །འཁོར་ལོ་གཉིས་བྲིས་བརྟུལ་ཞུགས་ཅན། །སྐེ་ཚེ་དང་ནི་ཚྭ་དང་ནི། །དུག་དང་གཞན་ཡང་ནིམ་པ་དང་། །ཚ་བ་གསུམ་དང་ཚ་བའི་མར། །དུར་ཁྲོད་ཀྱི་ནི་སོལ་བ་དང་། །དྷ་དུར་ལོ་མའི་ཁུ་བ་དང་། །ཙན་ད་ལི་འབྲས་མཛུབ་མོ་ཁྲག །ཚ་སྒོ་ཅན་གྱི་ས་བླངས་ཏེ། །གདོལ་བའི་རྫ་མའི་དྲེག་པ་དང་། །རབ་ཏུ་ལྟོགས་པའི་སྨྱུ་གུ་ཡིས། །བཅུ་བཞི་ལ་བྲིས་བརྟུལ་ཞུགས་ཅན། །ཁྲོས་པའི་སེམས་ཀྱིས་ཉིན་ཕྱེད་ན། །གདུག་པ་ཅན་རྣམས་གསད་པའི་ཕྱིར། །སེམས་ཅན་གནོད་པ་བྱེད་པའི་མིང་། །ཡི་གེ་ཧཱུྃ་གིས་བརྟེན་བྱས་ལ། །བདག་ཉིད་གཤིན་རྗེ་མཐར་བྱེད་པའི། །སྦྱོར་བས་ལྷོ་ཕྱོགས་

ཁ་བལྟས་ཏེ། །ཁྲོ་ཆེན་རབ་ཏུ་དྲག་པོའི་གཟུགས། །རུས་པས་མགོ་བོ་རྣམ་བརྒྱན་ལ། །མ་ཧེ་ལ་བཞུགས་ལྕེ་ཕྱུང་འདྲིལ། །གསུས་པ་ཆེ་ལ་རབ་འཇིགས་པ། །སྐྲག་བྱེད་སྐྲ་འབར་གྱེན་དུ་འགྲེང་། །སྨ་ར་སྨིན་མ་དེ་བཞིན་སེར། །གཡས་ན་རྡོ་རྗེ་ཆེན་པོ་དང་། །གཉིས་པ་ན་ནི་རལ་གྲི་དང་། །གསུམ་པའི་ཕྱག་ན་གྲི་གུག་གོ །ད་ནི་གཡོན་པའི་བྲི་བར་བྱ། །འཁོར་ལོ་དང་ནི་པདྨ་ཆེ། །ཐོད་པ་ཉིད་ནི་གཡོན་ནའོ། །རྩ་བའི་ཞལ་ནི་ཤིན་ཏུ་གནག །གཡས་པའི་ཟླ་འོད་བཟང་པོ་འདྲ། །གཡོན་པའི་དམར་པོ་ཡིན་པར་བརྟག །རྡོ་རྗེ་རྒྱན་གྱིས་རབ་ཏུ་བརྒྱན། །བ་སྤུ་ཁུང་ནས་འཇིགས་ཆེན་པོ། །རང་རིགས་བདག་པོ་རབ་འཕྲོ་བ། །ཉི་མའི་དཀྱིལ་འཁོར་སྟེང་ན་ནི། །ཞབས་ནི་གཡོན་པ་བརྐྱང་བས་གནས། །མཆེ་བ་གཙིགས་ཤིང་རྒྱགས་པ་ཡིས། །བསྐལ་པའི་འབར་བ་མེ་དང་མཚུངས། །འདི་ལྟ་བུ་ཡི་བདག་ཉིད་ཀྱིས། །བསྒྲུབ་པར་བྱ་བ་མདུན་དུ་དགོད། །གདུག་པའི་མཚོན་གྱིས་བརྒྱབ་པ་ཡིས། །དྲི་མ་ཅན་ལ་ནད་ཀྱིས་གཟིར། །གོས་མེད་འདར་ཞིང་ཉམ་ཆུང་བས། །དོན་འདོད་པ་ཡི་ཚིག་སྨྲ་ཞིང་། །མཚོན་གྱིས་གཟིར་བར་བྱས་པ་ཡི། །རྣག་གི་ཐུམ་པོས་ལུས་གང་བ། །གྲང་བའི་རླུང་གིས་གཙེས་གྱུར་ཞིང་། །མེ་ཡི་ནང་དུ་ཞུགས་པ་ལ། །མ་ཧེ་དང་ནི་སྟག་དག་དང་། །ཁྱི་དང་མཆུ་རིངས་ཅན་དག་གིས། །སངས་རྒྱས་སྡེ་ནི་མངོན་འཇིགས་པའི། །སྡིག་པོ་ཆེ་ནི་བཟའ་བར་བྱེད། །མཐར་བྱེད་པ་ཡི་ལྷོར་གནས་པ། །ཚེར་མས་ལུས་ནི་བཀང་བ་དང་། །རྐང་པ་ཤིང་ལྕགས་སྒྲོག་གིས་བསྡམས། །དེ་བཞིན་དུམ་བུ་དུམ་བུར་བྱས། །པགས་པ་དག་ནི་བཤུས་བྱས་ནས། །དེ་ལ་ཚྭ་དང་སྐེ་ཚེ་བསྐུས། །ཧཱུྃ་ཞེས་ཟེར་བ་བསྒོམ་པར་བྱ། །དེ་ཡི་ལུས་བསྲུང་ལ་སོགས་པ། །གཅད་པ་དག་ནི་མདུན་དུ་དགོད། །དེ་ཡི་གོ་ཆའང་མེད་བྱས་ནས། །སྟོང་པའི་ལུས་ནི་མདུན་དུ་བསམ། །རང་གི་ལུས་བྱུང་ཁྲོ་བོ་ནི། །གཤིན་རྗེའི་གཤེད་སོགས་བདག་ཉིད་འདྲས། །དེ་ཡི་ལུས་ལ་བརྒྱབ་ནས་ནི། །ཚིལ་བུ་རྐང་དག་འཐུང་བར་བྱེད། །དེ་ཡི་མདུན་དུ་གཤིན་རྗེ་བསྒོམ། །ལག་ན་དབྱིག་པ་སྟོབས་པོ་ཆེ། །གདུག་པ་ཅན་དེས་རྡེག་པར་བྱེད། །

དེ་ཡི་རྒྱུ་མའི་ཕྲེང་བ་སོགས། །བྱ་རྒོད་ཀྱིས་ཁྱེར་མཁའ་ལ་འགྲོ། །ས་ཡི་འོག་ནས་ཀླུ་དང་ནི། །ལྷ་མ་ཡིན་ལ་སོགས་པས་རྡེག །འདི་ལྟར་བསྒྲུབ་བྱ་ཉམས་བྱ་བ། །སྙིང་རྗེ་ལ་གནས་སེམས་ཀྱིས་ནི། །བྱེད་པས་འཁོར་བའི་གནས་བཏོན་ནས། །སངས་རྒྱས་ཞིང་དུ་འགྲོ་བར་བྱེད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཁྱད་པར་ཅན་གྱི་ཐུགས་ཀྱིས་འདི་ལྟ་བུའི་གསུང་ཕྱུང་བར་མཛད་དོ། །ཨེ་མའོ་གསད་པའི་ཡང་དག་གསད། །བསད་པ་མ་ཡིན་སྡིག་ལས་བཀྲོལ། །ཇི་སྲིད་བསད་ཀྱང་མ་བསད་དོ། །སྡིག་པ་སྟོང་ཕྲག་བྱས་པ་ཡི། །མནར་མེད་ལ་སོགས་མི་སྐྱེ་བ། །ཨེ་མའོ་སངས་རྒྱས་ཆེ་བའི་བདག །བསད་པས་བྱང་ཆུབ་ཐོབ་པར་བྱེད། །སེམས་ཅན་གསོད་པ་བསད་པ་ཉིད། །སྙིང་རྗེ་ཆེན་པོ་ཉིད་ཀྱིས་བྱས། །ཨེ་མའོ་སྙིང་རྗེ་སྟོབས་ཀྱི་མཆོག །སྙིང་རྗེ་དམན་པས་འགྲུབ་མི་འགྱུར། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧཱུྃ་དེ་བ་དཏྟ་མཱ་ར་ཡ་ཧཱུྃ་ཕཊ། ཨོཾ་ཧྲཱིཿཥྚྲཱིཿཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དེ་བ་དཏྟ་མཱ་ར་ཡ་ཕཊ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་རྣམ་པར་རྟོག་པ་གསོད་པའི་རྡོ་རྗེའི་འཁྲུལ་འཁོར་དང་སྔགས་དང་སྨན་གྱིས་གསད་པ་ལ་སོགས་པའི་ཆོ་ག་སྟེ་རིམ་པར་ཕྱེ་བ་བཞི་པའོ།། །།དེ་ནས་འཁོར་ལོ་གཉིས་བྲིས་ལ། །ཡི་གེ་ཕཊ་ཀྱིས་བརྟེན་པ་ཡི། །བསྒྲུབ་བྱའི་མིང་ནི་བྲི་བྱས་ལ། །ཐོད་པ་ཁ་སྦྱར་ནང་དུ་གཞུག །སྐུད་པ་སྔོན་པོས་བཅིངས་བྱས་ཏེ། །ཉི་མ་ཕྱེད་ཀྱི་དུས་སུ་ནི། །དུར་ཁྲོད་ས་ཡི་ནང་དུ་སྦ། །གཤིན་རྗེའི་གཤེད་ཀྱི་སྦྱོར་བ་ཡི། །རྟ་དང་མ་ཧེ་ཞོན་པ་ཡི། །ལག་ན་མཚོན་ཐོགས་བསྒྲུབ་བྱ་གཉིས། །མདུན་དུ་བསྒྲུབ་བྱ་དགོད་པར་བྱ། །ཁྲོས་པའི་ལུས་ལ་སྤྲུལ་བའི་ཚོགས། །གཉིས་ཀའི་ཕྱོགས་སུ་བསམ་པར་བྱ། །གཉིས་ཀས་འཐབ་མོ་མང་པོ་བྱེད། །ཁྲོས་ཤིང་གདུག་པའི་སེམས་ལྡན་པའི། །སྟོབས་ལྡན་ཁྲོས་པ་བསྒོམ་པར་བྱ། །བསྒོམས་པས་བཟླས་པ་བརྩམ་པར་བྱ། །ཨོཾ་ཧྲཱིཿཥྚྲཱིཿཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དེ་བ་དཏྟ་ཡ་ཛྙཱ་དཏྟེ་བི་དྭེཥཱ་ཡ་ཧཱུྃ་ཕཊ། འདི་ནི་བཅོམ་ལྡན་འདས་ཀྱིས་དབྱེ་བའི་ཆོ་ག་གསུངས་

པའོ། །ཆོ་ག་དག་ནི་སྔ་མ་བཞིན། །འཁོར་ལོ་གཉིས་ནི་བྲི་བྱས་ལ། །ཡི་གེ་ཧཱུྃ་ཕཊ་ཀྱིས་བརྟེན་པ། །ཐོད་པ་ཁ་སྦྱར་ནང་དུ་གཞུག །སྐུད་པ་ནག་པོས་བཅིངས་བྱས་ལ། །ཤ་ཟའི་ཚུལ་དུ་སྦ་བར་བྱ། །གཤིན་རྗེའི་སྦྱོར་བ་ལ་གནས་པས། །མདུན་དུ་བསྒྲུབ་བྱ་བ་སྒོམ་པར་བྱ། །ཡྃ་བྱུང་གཞུ་ཡི་དབྱིབས་འདྲ་བའི། །རླུང་གི་དཀྱིལ་འཁོར་ནག་པོ་ལ། །དེ་སྟེང་མདོག་སྔོན་རྔ་མོ་བསྒོམ། །དེ་ལ་གདུག་པ་ཅན་བསྐྱོན་ལ། །ལྷོ་ཡི་ཕྱོགས་སུ་ཁ་བསྟན་ཏེ། །ཁྲོ་བོའི་ཚོགས་ཀྱིས་དེ་བརྡེག་པ། །སངས་རྒྱས་ཡིན་ཡང་བཟློག་པ་དཀའ། །ཨོཾ་ཧྲཱིཿཥྚྲཱི་ཝིཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧཱུྃ་ཕཊ་དེ་བ་དཏྟ་ཨུཙྪ་ཊ་ཡ་ནྃ་ཧཱུྃ་ཕཊ། འདི་ནི་བཅོམ་ལྡན་འདས་ཀྱིས་བསྐྲད་པའི་ཆོ་ག་གསུངས་པའོ། །ཁྲོས་པས་རྣལ་འབྱོར་ལྷོར་བལྟས་ལ། །ར་ཁྲག་རོ་བསྲེགས་ཐལ་བ་དང་། །དུག་གི་ཚྭ་དང་སྐེ་ཚེ་དང་། །མར་ཁུ་སྨྱོན་པའི་ཁུ་བ་ཡིས། །དུར་ཁྲོད་རས་ལ་འཁོར་ལོ་གཉིས། །རིམ་པ་འདི་བཞིན་བྲི་བར་བྱ། །བསད་པ་གཤིན་རྗེའི་ལུས་ལ་གནས། །དབྱེ་བ་རྟ་དང་མ་ཧེ་ཡིས། །བསྐྲད་པ་རྔ་མོའི་ལུས་ལ་གནས། །ཞི་བ་ཟླ་བའི་དཀྱིལ་འཁོར་གྱིས། །རྒྱས་པ་ཟླ་བ་སེར་པོ་ལ། །བཙུན་མོ་སྙིང་གར་དབང་དུ་བྱ། །ར་ལ་བསྐྱོན་པས་འགུགས་པར་བྱེད། །རི་བོའི་དཀྱིལ་དུ་རེངས་བྱ་གཞག །ཤ་ར་བྷ་འམ་སེང་གེས་དགུག །དེ་བཞིན་གཞན་ཡང་མཚོན་པར་བྱ། །རོ་ཙ་ན་དང་རྒྱ་སྐྱེགས་དང་། །ཁ་ཆེ་ཡི་ནི་ཁྱད་པར་གྱི། །དབང་དུ་བྱ་བ་གྲོ་གར་བྲི། །དགེ་བའི་སེམས་ཀྱིས་བཟུང་བྱས་ན། །འགྲུབ་པར་འགྱུར་ཏེ་ཐེ་ཚོམ་མེད། །ཁམ་ཕོར་ཁ་སྦྱར་ནང་དུ་གཞུག །ཁྭ་ཡི་སྒྲོ་ཡི་སྨྱུ་གུ་ཡིས། །ཉི་མ་ཕྱེད་ནས་བྲི་བར་བྱ། །པདྨའི་ཁ་སྦྱོར་རོ་བསྲེགས་སར། །གཤིན་རྗེའི་རྣལ་འབྱོར་བདག་ཉིད་ཀྱིས། །ཨོཾ་ཧྲཱིཿཥྚྲཱིཿལ་སོགས་གསང་སྔགས་བཟླས། །ལྷོ་ཕྱོགས་གནས་ཏེ་ཚར་གཅད་བྱ། །མཐའ་ཡི་ཡ་བོར་ཞི་བ་ལ། །ཡི་གེ་ནི་དེ་གཉིས་ཀ་དང་། །ཕྱི་ནས་དཀྱིལ་གྱི་ཡ་སྤངས་ཏེ། །ཡི་གེ་ལྷག་མ་ཇི་བདེ་བར། །སྔོན་དུ་བསྙེན་པ་ཁྲི་ཙམ་བྱ། །འདིས་ནི་ལས་རྣམས་རབ་སྒྲུབ་པ། །ཡེ་ཤེས་རྡོ་རྗེ་བྱ་བ་སྟེ། །གཤིན་རྗེའི་གཤེད་ཀྱི་རྣལ་འབྱོར་པས། །རབ་ཏུ་གྲགས་པའི་འཁོར་

ལོ་འདི། །ཡི་གེར་བྲིས་ནས་གནས་པ་དང་། །འཁོར་ལོ་བྲིས་ནས་གནས་པ་ཡི། །ཁྱིམ་དེར་འཐབ་མོ་རྟག་ཏུ་འབྱུང་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཁྲུལ་འཁོར་གྱི་གོ་རིམས་བྲི་བ་ཞེས་བྱ་སྟེ་རིམ་པར་ཕྱེ་བ་ལྔ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཅོམ་ལྡན་འདས་རྡོ་རྗེ་འཆང་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་པ། གང་གིས་རྡོ་རྗེ་ཅན་མཉེས་པ། །ཞེ་སྡང་ཕྱག་རྒྱའི་རྣལ་འབྱོར་གྱིས། །རྡོ་རྗེའི་ཕྱག་རྒྱས་རྒྱས་བཏབ་པས། །དངོས་གྲུབ་རྒྱ་ཆེན་ཐོབ་པར་བྱེད། །དེ་ནས་རྡོ་རྗེ་འཆང་རྒྱལ་པོས། །འདི་ལྟ་བུ་ཡི་གསུང་བསྒྲགས་སོ། །དཀྱིལ་འཁོར་གྱི་ནི་ལྷ་ཀུན་གྱི། །དབུ་ལ་གཤིན་རྗེའི་གཤེད་པོ་བསྒོམ། །རྟག་ཏུ་དཀྱིལ་འཁོར་བྲི་བར་བྱ། །རྟག་ཏུ་སྦྱིན་སྲེག་གིས་ཀྱང་དགང་། །རྟག་ཏུ་དམ་ཚིག་དག་ཀྱང་གཟུང་། །སྡོམ་པ་དག་ཀྱང་ཡང་དག་གཟུང་། །དང་པོ་ལ་ནི་ཅོད་པན་དབང་། །གཉིས་པ་རལ་གྲི་སྦྱིན་པར་བྱ། །གསུམ་པ་རྡོ་རྗེ་དྲིལ་བུ་དང་། །ཟླ་བ་བཟའ་བ་བཞི་པ་སྟེ། །བཞི་པོ་འདི་ནི་དབང་ཆེན་པོ། །ནག་པོའི་ཞལ་ནས་བྱུང་བ་ཡི། །དབང་འདི་དག་གི་བྱེ་བྲག་གིས། །རྒྱལ་བའི་སྲས་ཀྱིས་བྱང་ཆུབ་ཐོབ། །འབྱུང་པོ་ཀུན་གྱི་གཏོར་མའི་ལུགས། །སྔགས་འདི་དེ་ནས་རབ་བཤད་བྱ། །སྔགས་ཆེན་བཟླས་པ་ཙམ་གྱིས་ནི། །འབྱུང་པོ་ཐམས་ཅད་འདར་འགྱུར་བ། །ཨོཾ་ཨིནྡྲཱ་ཡ་ཧྲཱིཿ། ཡ་མཱ་ཡ་ཥྚྲཱིཿ། བ་རུ་ཎཱ་ཡ་ཝི། ཀུ་བེ་རཱ་ཡ་ཀྲྀ། ཨཱི་ཤྭ་ནཱ་ཡ་ཏ། ཨགྷ་ཨེ་ཨཱ། ནཻ་རི་ཏྱཱ་ཡ་ན། བཱ་ཡ་བེ་ན། ཙནྡྲཱ་ཡ་ཧཱུྃ། ཨཱ་ཀརྵ་ཡ་ཧཱུྃ། བྲཧྨ་ཎཱེ་ཡ་ཕཊ། བ་སུ་དྷ་རཱི་ནྱཻ་ཕཊ། བཻ་མ་ཙེ་ཏྲི་ཎྃ་སྭཱ། སརྦ་བྷཱུ་ཏིཾ་བྷྱོ། ཧཱ་ཧ་ཧ་ཧི་ཧི། ཧཱུྃ་ཧཱུྃ། ཕཱོཾ་ཕོཾ་ཕཊ་ཕཊ་སྭཱ་ཧཱ། བཌྜི་མཱུ་ཏྲ་ཆུ་བསྲེས་པས། དཀྱིལ་འཁོར་གྲུ་གསུམ་བྱས་ནས་ནི། །ལྷ་རྣམས་ཀྱང་ནི་ཚིམ་པར་བྱ། །ཧ་ཧ་ཞེས་ཀྱང་དྲན་པར་བྱ། །དཀྱིལ་འཁོར་རིམ་གསུམ་བྱ་བ་ནི། །བརྒྱད་དང་བཅུ་གཉིས་བཅུ་དྲུག་པའི། །དཀྱིལ་འཁོར་མཁས་པས་བྲིས་པ་ལ། །སྔགས་ནི་ཀུན་ཏུ་དགོད་པར་བྱ། །བརྟུལ་ཞུགས་ཅན་གྱིས་བཅུ་གཉིས་པར། །གྲུབ་པའི་སྔགས་རྣམས་དགོད་པར་བྱ། །རྒྱུ་དང་མི་རྒྱུའི་

འཇིག་རྟེན་གསུམ། །མ་ལུས་ལུས་པ་མེད་པར་འགྲུབ། །ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ།ཎ་ཡོད་ཡ། ཡ་ད་ཡོ་ནི། ར་ཡ་ཀྵེ་ཡ། ཡ་ཀྵེ་ཡཙྪ། ནི་རཱ་མ་ཡ། དཀྱིལ་དུ་ཡ་བྱས་ཤར་དུ་ཀྵེ། །ལྷོ་རུ་འཇམ་པའི་རྡོ་རྗེ་སྟེ། །ཡི་གེ་མེ་ནི་ནུབ་དུ་བྲི། །བྱང་དུ་ད་སྟེ་ད་མ་ནཱ། །བསྒྲུབ་བྱའི་མིང་ནི་སྦྱིན་བྱ་བ། །མཚམས་ཀྱི་སྟོད་པ་དག་ཏུའོ། །ཧཱུྃ་གཉིས་ཀྱིས་ནི་བརྟེན་བྱས་པས། །དགོས་པ་ཐམས་ཅད་སྒྲུབ་པར་བྱེད། །ཡཙྪ་ནི་རཱ་ཛཱ་ས་དོ་རུ། །ཎ་ཡོ་ནི་རལ་སོགས་པ། །ཕྱི་རོལ་རིམ་པར་གཡོན་བརྩམས་བྲི། །དོན་ཀུན་རབ་ཏུ་བསྒྲུབ་པའི་ཕྱིར། །རིམ་པ་གསུམ་པ་དེ་ལ་ནི། །ཀུན་དུ་ཆ་རེ་བོར་བ་ལ། །ཤར་ནས་བརྩམས་ནས་བྲི་བར་བྱ། །ཨོཾ་ཧྲཱིཿཥྚྲཱིཿལ་སོགས་པའི་སྔགས། །དེ་ཡི་བར་དག་ཐམས་ཅད་ཀྱི། །ཆ་བརྒྱད་པོར་བ་དག་ལ་བྲི། །ཨ་མུ་ཀཾ་ཀུ་རུ། ཨུཙྪ་ཊ་ཡ། ཝ་ཤཾ་ཀུ་རུ། བི་དྭ་ཥ་ཡ། ཤནྟིཾ་ཀུ་རུ། པུཥྚིཾ་ཀུ་རུ། འདི་ལྟར་གཡོན་ནས་བརྩམས་ནས་ནི། །ལས་དང་རྗེས་སུ་མཐུན་པར་ནི། །མིང་དང་ན་མཿཐ་མའི་བར། །ཐ་མ་རུ་བཽ་ཥ་ཊ་དང་། །ཧཱུྃ་ཕཊ་དང་ལྡན་ས་བོན་གྱིས། །ཞི་དང་རྒྱས་དང་མཐར་དབང་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཁོར་ལོ་རྣམ་པར་བྲི་བ་ཞེས་བྱ་བ་སྟེ་རིམ་པར་ཕྱེ་བ་དྲུག་པའོ།། །།ཁྲག་དགུག་པ་ཡི་སྦྱོར་བ་ནི། །ཞལ་གསུམ་ཕྱག་དྲུག་སྐེམ་པ་ཡི། །ཕྱག་ན་འཁོར་ལོ་ཟླ་འོད་འདྲའི། །མཁས་པས་ཙརྩི་ཀཱ་བསྒོམ་བྱ། །ཆང་དག་དགུག་པའི་སྦྱོར་བ་ནི། །ཞལ་གསུམ་ཕྱག་དྲུག་ཕག་གདོང་མ། །རབ་སྔོ་ཕྱག་ན་རྡོ་རྗེ་བསྣམས། །མཁས་པས་ཕག་མོ་བསྒོམ་པར་བྱ། །ཤེས་རབ་བསྐྱེད་པར་བྱ་བའི་ཕྱིར། །ཞལ་གསུམ་ཕྱག་དྲུག་དམར་བ་ལ། །ཞི་བ་ཕྱག་ན་པདྨ་བསྣམས། །དབྱངས་ཅན་བརྟུལ་ཞུགས་ཅན་གྱིས་བསྒོམ། །ཁུ་བ་དགུག་པའི་སྦྱོར་བ་ནི། །ཞལ་གསུམ་ཕྱག་དྲུག་རལ་གྲི་བསྣམས། །ནོར་བུ་མརྒད་འདྲ་བ་ནི། །གཽ་རཱི་མཁས་པས་བསྒོམ་པར་བྱ། །དེ་ནས་བཅོམ་ལྡན་འདས་རྡོ་རྗེ་གཤེན་རྗེའི་གཤེད་པོ་གསད་པ་དང་དགུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཙརྩི་ཀཱའི་སྔགས་འདི་

གསུངས་སོ། །ཨོཾ་ཙརྩི་ཀཱ་སིདྡྷེ་ན་དྲ་ནཱི་ལ་ཧཱ་རི་ཎི་རཏྣ་ཏྲ་ཡ་ཨ་པ་ཀཱ་རི་ཎོ་རུ་དི་ར་ཨཱ་ཀརྵ་ཡ་ཛཿ། སྔགས་འདི་དག་ནི་དྲན་བྱས་ན། །ཁ་གདངས་པ་དག་བྱས་པ་ཡིན། །འཇིག་རྟེན་གསུམ་གྱི་ཁྲག་ཆེན་པོ། །འགུགས་པ་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་གཤིན་རྗེའི་གཤེད་ཆེན་པོ་ཆང་འགུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཕག་མོའི་ཆང་འགུགས་པའི་སྔགས་གསུངས་པ། ཨོཾ་བཛྲ་གྷོ་ཎེ་སུགྷོ་ཎེ་བཛྲ་མཱ་མ་ཀཱི་བྷ་ར་བྷ་ར། སམྦྷ་ར་སམྦྷ་ར། ཏྲཻ་དྷཱ་ཏུ་ཀཱརྱཾ། ཨཱ་ཀརྵ་ཡ་ཛཿ། རྫ་མཁན་ལག་པ་ཕྱིས་པའི་སས། །བུམ་པ་ཁ་མཛེས་ཉེར་བྱས་ལ། །རྐུན་མའི་སྐྲ་ནི་རྟེན་བཞག་སྟེ། །སྔགས་ནི་རྗེས་སུ་དྲན་པར་བྱ། །སྔགས་འདི་ཆེ་བའི་བདག་ཉིད་འདི། །བ་ཏ་མཆོད་རྟེན་དག་ཏུ་བསྟན། །དལ་གྱིས་དམིགས་ནས་འབད་པར་བྱ། །ཆང་ནི་འགུགས་པར་རབ་ཏུ་གྲགས། །དེ་ནས་བཅོམ་ལྡན་འདས་དམ་ཚིག་ཆེན་པོའི་གཤིན་རྗེའི་གཤེད་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་པི་ཙུ་པི་ཙུ་པྲཛྙཱ་བརྡྷ་ནི་ཛྭཱ་ལ་ཛྭཱ་ལ་མེ་དྷཱ་བརྡྷ་ནི། དྷི་ནི་དྷི་ནི། བུདྡྷི་བརྡྷ་ནི་སྭཱ་ཧཱ། ཚེས་ཀྱི་དང་པོ་ནས་བཟུང་སྟེ། །ཀུན་ཏུ་ཟླ་བ་ཉ་ཡི་བར། །སྦྱར་བའི་སྐད་ནི་སྨྲ་བར་བྱ། །ཇི་སྲིད་ཟླ་བའི་རྗེས་འཇུག་པས། །རྟག་ཏུ་ཚིགས་བཅད་བརྒྱ་ཟིན་འདི། །ངག་གི་དབང་ཕྱུག་འགྲུབ་པར་འགྱུར། །ཁམས་གསུམ་མ་ལུས་པ་དག་ནི། །མ་ལུས་ལུས་པ་མེད་པར་འགྲུབ། །དེ་ནས་བཅོམ་ལྡན་འདས་གཤིན་རྗེའི་གཤེད་རྡོ་རྗེས་ཁུ་བ་འགུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁུ་བ་འགུགས་པར་བྱེད་པའི་གཽ་རཱིའི་སྔགས་འདི་གསུངས་སོ། །ཨོཾ་ཨཱཾ་ཀརྵ་ཎི་ཨཱ་ཀརྵ་ཎི་གོ་རཱི་ཧྲཱིཿདུཥྚཱ་ཡ། དུཥྚཱ་ཡ། ཤུ་ཀྲ་མ། ཨཱ་ཀརྵ་ཡ་ཛཿཛཿཛཿཧཱུཾ་ཧཱུཾ་ཧཱུཾ་སྭཱ་ཧཱ། པདྨ་ཁ་དང་རྡོ་རྗེ་དང་། །དྲིལ་བུ་ལྕགས་ཀྱུའི་རླུང་སྦྱོར་གྱིས། །བཟླས་དང་བསྒོམ་པའི་སྦྱོར་བ་ནི། །ཁུ་བའི་ཚོགས་ནི་འགུགས་པར་བྱེད། །ནགས་ཀྱི་ནང་ངམ་དབེན་པ་རུ། །ལས་འདི་དག་ནི་བསྐུལ་བྱས་ནས། །ནུབ་བདུན་ཙམ་དུ་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་གཤིན་

རྗེའི་གཤེད་ཆེན་པོ། རྡོ་རྗེ་ནག་པོ་འཇིགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དབང་བསྐུར་བ་མཆོག་གི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་ཕྱུང་བར་མཛད་དོ། །ཨུ་དུམ་བཱ་ར་མ་ན་དཱ་ར། །པ་རི་ཛ་ཏ་ཀ་ཕྲེང་དང་། །ཀར་ཎི་ཀ་ཡི་ཕྲེང་བ་ནི། །བུ་ཁྱོད་ཟུང་ལ་བྱིན་གྱིས་རློབ། །རལ་གྲི་ཆེན་པོ་ཁམས་གསུམ་པའི། །སངས་རྒྱས་ཀུན་གྱིས་ཕྱག་བྱས་པ། །འབྱུང་པོ་ཐམས་ཅད་འགུགས་པར་བྱེད། །ལས་ཀྱི་རལ་གྲི་དམ་པ་འདི། །བཟུང་ན་བདུད་ལས་རྒྱལ་བར་འགྱུར། །ཤེས་རབ་ཐབས་ཀྱི་ངོ་བོ་ཉིད། །རྡོ་རྗེ་དྲིལ་བུ་བསྒྲུབས་པ་འདི། །ལོང་ལ་སློབ་མ་ཡང་དག་ཟུང་། །བཏུང་བ་རིན་པོ་ཆེ་འདིས་ནི། །རྡོ་རྗེ་ལུས་ནི་རབ་ཏུ་སྒྲུབ། །ཀུན་ཏུ་ཡེ་ཤེས་བུ་ཁྱོད་ཀྱིས། །འཐུང་ཤིག་ཡེ་ཤེས་ལས་བྱུང་བ། །སློབ་མའི་ཁར་ཡང་བླུག་བྱ་བ། །གཤིན་རྗེའི་གཤེད་ཀྱིས་བསྒྲགས་པ་ཡིན། །རྡོ་རྗེ་སློབ་མ་བདག་ཉིད་ཆེས། །ཤིན་ཏུ་དགའ་བའི་སེམས་སུ་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་དགུག་པ་ལ་སོགས་པའི་སྦྱོར་བའི་རིམ་པར་ཕྱེ་བ་སྟེ་བདུན་པའོ།། །།དེ་ནས་རྡོ་རྗེ་འཛིན་རྒྱལ་པོ། །སྲུང་བའི་འཁོར་ལོ་སྦྱོར་བར་བྱེད། །བགེགས་དང་ལོག་པར་འདྲེན་པ་དང་། །གདུག་པ་ཅན་དག་བསལ་ཕྱིར་གསུངས། །དཔལ་ལྡན་རལ་གྲི་འཆང་བའི་བདག །སྲུང་བའི་འཁོར་ལོ་སྦྱོར་བར་བྱེད། །རལ་གྲི་འབར་བའི་བདག་ཉིད་ཀྱིས། །རིག་པ་གསུམ་ལས་མཆོད་པར་བྱེད། །སེམས་ཅན་ཐམས་ཅད་སྐྱོབ་པ་ཡི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །གཤིན་རྗེའི་གཤེད་ཀྱི་དཀྱིལ་འཁོར་ནི། །སློབ་དཔོན་བདག་གིས་དཀྱིལ་འཁོར་བྲི། །གོས་ཀྱིས་གདོང་ནི་བཅིངས་བྱས་ལ། །དཀྱིལ་འཁོར་གྱི་ནི་མདུན་སྐོར་བཞག །ཁྱོད་སུ་ཞེས་ཀྱང་འདི་སྐད་དྲི། །སྐལ་བཟང་བདག་ཅེས་ཚིག་ཏུ་བརྗོད། །གསོལ་བཏབ་པ་ཡི་བློ་བཟང་ལ། །ཡོལ་བའི་ནང་དུ་སྦྱིན་པར་བྱ། །དབང་བསྐུར་དོན་དུ་གུས་ཆེན་པོས། །དེ་ནས་ལན་གསུམ་ཆེད་དུ་བརྗོད། །ཇི་ལྟར་སངས་རྒྱས་ཆོས་ཆེན་པོས། །རྡོ་རྗེ་སེམས་དཔའ་དབང་བསྐུར་ལྟར། །བདག་

ཀྱང་མགོན་པོས་དབང་བསྐུར་ཞིང་། །མཆོག་ཀྱང་བདག་ལ་སྩལ་དུ་གསོལ། །དེ་བཞིན་གླུ་དང་རོལ་མོས་མཆོད། །དེ་བཞིན་ཁྲུས་དང་བྱུག་པས་ཀྱང་། །སློབ་མ་དང་བས་བླུག་པར་བྱ། །དེ་ལ་བསྟོད་པ་ཀུན་ཀྱང་བྱ། །དེ་ནས་རྡོ་རྗེ་འཆང་གི་རྒྱལ་པོས་སྟོང་པའི་སྔགས་གསུངས་པ། །ཨོྃ་ཤཱུ་ནྱཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། ཨོྃ་པཱུ་ཛ་བཛྲ་སྭབྷཱ་བ་ཨཱཏྨ་ཀོ྅ཧཾ། ཨོྃ་དྷརྨ་དྷཱ་ཏུ་བཛྲ་སྭབྷཱ་བ་ཨཱཏྨ་ཀོ྅ཧཾ། ཞི་བ་ལ་སོགས་དབྱེ་བ་ཡི། །སྦྱིན་སྲེག་དེ་ནས་བཤད་པར་བྱ། །སྦྱིན་སྲེག་གང་གིས་གྲུབ་པ་ཡི། །ལས་རྣམས་ཐམས་ཅད་རབ་སྒྲུབ་པ། །ཞི་བ་ཞི་བའི་སེམས་ཀྱིས་ཏེ། །རྒྱས་པ་རྒྱས་པའི་སེམས་ཀྱིས་སོ། །དབང་ཡང་དེར་གཏང་སེམས་ཀྱིས་ཏེ། །བསད་དང་བསྐྲད་པ་ལ་ཡང་ངོ་། །ཞི་བའི་དཀྱིལ་འཁོར་ཟླུམ་པོ་སྟེ། །རྒྱས་པ་ཡི་ནི་རྫིང་བུ་འདྲ། །དབང་དུ་བྱ་བ་ཟླ་གམ་ལྟར། །ནམ་མཁའི་ཁམས་འདྲ་བས་ནི་བསད། །ཞི་བ་ཁྲུ་གང་ཚད་དུ་སྟེ། །དེ་བཞིན་རྒྱས་པའི་ཁྲུ་དོ་པ། །ཇི་ལྟར་རྒྱས་པ་དེ་ལྟར་དབང་། །བསད་པ་ལ་ནི་སོར་ཉི་ཤུ། །ཞི་བ་སྟེང་དུ་ཁྲུ་ཕྱེད་ཚད། །རྒྱུས་པ་ལ་ནི་ཁྲུ་ཙམ་སྟེ། །སོར་ལྔ་གཉིས་ནི་བསད་པ་ལ། །དབང་ལ་ཇི་ལྟར་དེ་བཞིན་དགུག །ཚེས་གཅིག་ལ་ནི་ཞི་བ་བྱ། །ཟླ་བ་ཉ་ལ་རྒྱས་པ་སྟེ། །བཅུ་བཞི་ལ་ནི་མངོན་སྤྱོད་དོ། །དབང་གི་ལས་ནི་ཚེས་བརྒྱད་ལའོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་སྦྱིན་སྲེག་གི་ཆོ་ག་རིམ་པར་ཕྱེ་བ་སྟེ་བརྒྱད་པའོ།། །།རྒྱ་མཚོའི་ས་ནི་བླངས་བྱས་ལ། །ཀླུ་ཡི་གཟུགས་གཅིག་བརྩམས་བྱས་ཏེ། །ཡི་གེ་ཧཱུྃ་ཕུཿསྙིང་གར་ནི། །ཧྲཱིཿཥྚྲཱིཿལ་སོགས་བཟླས་པ་བྱ། །ཆར་ནི་མི་འབབ་དུས་དག་ཏུ། །བཟླས་པ་ཁྲི་བྱས་འབབ་པར་འགྱུར། །སྦྲུལ་ནག་པོ་ཡི་ཤ་དང་ནི། །ནིམ་པའི་ལོ་མ་དང་བསྲེས་ལ། །དེ་ལ་རིལ་བུ་བྱས་ནས་ནི། །བརྟུལ་ཞུགས་ཅན་གྱིས་རྒྱ་མཚོར་གཞུག ། སྔགས་ཀྱི་བཟླས་པ་ཁྲི་བྱས་ན། །མཚོ་རླབས་རེངས་བྱེད་མཆོག་ཡིན་ནོ། །ཙནྡན་འབྲས་བུ་བརྒྱ་བླངས་ལ། །འབྲས་དང་མར་ཤས་བསྲེས་བྱས་ཏེ། །འབུམ་ཕྲག་བརྒྱ་ནི་རབ་བཟླས་ལ། །སྦྱིན་སྲེག་བྱས་ན་ལྷ་མཐོང་འགྱུར། །དུར་ཁྲོད་རོ་བསྲེགས་ཡོག་པའི་ཤིང་། །བརྟུལ་

ཞུགས་ཅན་གྱི་གཟུགས་སུ་བྲི། །སྨྱོན་པའི་ཁུ་བས་བསྐུ་བྱས་ལ། །སྔགས་ཁྲི་བཟླས་པས་མཛེས་ཐེབས་འགྱུར། །གྲུབ་པའི་ཡུངས་ཀར་བླངས་བྱས་ལ། །འབུམ་ཕྲག་བཞི་ནི་བཟླས་བྱས་ན། །སྦྲུལ་གྱིས་བཟུང་ནས་འགྱེལ་བ་ལ། །གཏོར་ན་འཚོ་བརཐེ་ཚོམ་མེད། །རི་གཤོང་ཆུ་ཡི་ས་བླངས་ལ། །སྔགས་ཀྱི་བཟླས་པ་འབུམ་བྱས་ནས། །མགོ་ལ་བསྐུས་པ་ཙམ་གྱིས་ནི། །མགོ་ཡི་ནད་ནི་ཉམས་པར་བྱེད། །སྔགས་ནི་ལན་བདུན་མངོན་བཟླས་པའི། །ལག་པས་མགོ་བོ་མཉེས་ན་ནི། །མགོ་ནི་ཟུག་གཟེར་འབྱུང་མི་འགྱུར། །དེ་ནི་འདི་ལྟར་ཐེ་ཚོམ་མེད། །བྲམ་ཟེ་ཡི་ནི་ཤ་དག་ལ། །དུར་ཁྲོད་ས་དང་ཐལ་བ་ལས། །གཤིན་རྗེའི་གཤེད་ཀྱི་གཟུགས་བྱས་ཏེ། །ཕྱག་གཉིས་ཞལ་ནི་གཅིག་པ་ལ། །རྡོ་རྗེ་ཆེན་པོ་གཡས་པ་ན། །དེ་བཞིན་མི་མགོ་གཡོན་པ་ནའོ། །མདོག་ནི་དཀར་པོ་ཆེར་འཇིགས་པ། །དེ་ཡིས་གདུག་པ་འཇོམས་པར་བྱེད། །བདུད་རྩི་ལྔ་དང་ཤ་ལྔ་ཡིས། །ཉིན་རེ་བཞིན་དུ་གཏོར་མ་སྦྱིན། །བདག་གི་དགྲ་བོ་ཆོམས་ཤིག་ཅེས། །རྣལ་འབྱོར་པས་བདག་གསོལ་བ་གདབ། །ནུབ་མོ་དེ་སྐད་བརྗོད་པས་ཉལ། །དགྲ་ནི་ཐོ་རངས་འཆི་བར་འགྱུར། །ཆུ་འགགས་ལ་སོགས་པས་གཟིར་ཞིང་། །ཡང་ན་ནད་ཀྱིས་ཐེབས་པར་འགྱུར། །དགྲ་ཡི་བཻ་རོ་ཙ་ན་བླང་། །མི་ཡི་རྐང་སྦུབས་ཡོངས་བཀང་སྟེ། །རབ་ཏུ་བཀང་ནས་འབུམ་བཟླས་ན། །ཤིང་རྩེར་རྒྱུ་བའི་ཡི་དགས་མཚུངས། །ལྷ་རྫས་དངོས་གྲུབ་ཀུན་བྱེད་ཅིང་། །དགོས་པ་སྣ་ཚོགས་རབ་སྒྲུབ་བོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཇིགས་བྱེད་གཤིན་རྗེའི་གཤེད་ཅེས་བྱ་བའི་རིམ་པར་ཕྱེ་པ་སྟེ་དགུ་བའོ།། །།རོ་ལངས་ཆེན་པོའི་སྒྲུབ་ཐབས་ནི། །དེ་ནས་ཡང་དག་བཤད་པར་བྱ། །སྒྲུབ་པ་བཟང་པོ་ཀུན་བྱེད་ཅིང་། །དགོས་པ་སྣ་ཚོགས་རབ་སྒྲུབ་པའོ། །བཟང་པོ་མ་གོད་རྨ་མེད་པ། །ཤིང་ལ་སྦྱངས་པས་བསྡུས་བྱས་ལ། །ཕབ་ལ་ལེགས་པར་བཀྲུ་བྱ་སྟེ། །དེར་འདུག་སྔགས་བཟླས་བརྟུལ་ཞུགས་ཅན། །ཨེ་མའོ་ངོ་མཚར་སྔགས་ཀྱི་མཐུ། །བསམ་པ་མེད་པའི་འོ་དོད་འབོད། །གཤིན་རྗེའི་རྣལ་འབྱོར་ལྡན་པ་ཡི། །ཡིད་ཀྱིས་ཅུང་ཟད་འཇིགས་མི་བྱ། །རྣལ་འབྱོར

ལམ་ནི་གང་འདོར་པ། །དེ་ཀུན་ཐམས་ཅད་སྟེར་བར་བྱེད། །སྟག་དང་དེ་ལས་གཞན་པ་དང་། །དོམ་དང་སྤྲེའུ་དག་ལ་ནི། །ཁྱི་དག་གི་ནི་ཁྱད་པར་དང་། །དུག་དག་སྐེ་ཚེ་ཚྭ་དང་ནི། །དེ་བཞིན་ཚྭ་གསུམ་སོ་པཉྫ། །འདི་དག་ལེགས་པར་སྦྱར་གཟུགས་བྱ། །གཤིན་རྗེའི་གཤེད་པོ་འཇིགས་པའི་གཟུགས། །དེ་ལ་རྣལ་འབྱོར་པས་གསོལ་གདབ། །ཧྲཱིཿཥྚྲཱིཿལ་སོགས་སྔགས་ཀྱིས་ནི། །ཆེ་གེ་མོ་དེ་བདག་ལ་སྩོལ། །དེ་ཡི་ཕ་ཡིས་སྟེར་བར་བྱེད། །གལ་ཏེ་རྣལ་འབྱོར་པ་མ་ཕྱིན། །རྨི་ལམ་གཤིན་རྗེའི་གཤེད་བརྡེག་ཅིང་། །ལྷོ་ཡི་ཕྱོགས་སུ་ཁྱེར་མཐོང་ནས། །སད་ན་དེ་ཡི་ཕ་ཡིས་སྟེར། །ཞལ་གསུམ་ཕྱག་དྲུག་འཇིགས་པ་ལ། །ཨིནྡྲ་ནཱི་ལ་འདྲ་བའི་མདོག །ཐོ་བ་འཛིན་པའི་བརྟུལ་ཞུགས་ཅན། །ཕྱག་ཏུ་ཐོ་བ་དགོད་པར་བྱ། །ཞལ་གསུམ་ཕྱག་དྲུག་ཁྲོས་པ་ལ། །མདོག་དམར་པོ་སྟེ་ཁྲོས་པར་འཇིགས། །འཇིགས་པ་ཡང་ནི་འཇིགས་པར་མཛད། །མཁས་པས་ཕྱག་ཏུ་དབྱིག་པ་དགོད། །ཞལ་གསུམ་ཕྱག་དྲུག་དམར་བ་ལ། །འཇིགས་པ་ཆེན་པོ་བསྡིགས་པ་ཡི། །ཕྱག་ན་པདྨ་དམར་པོ་བསྣམས། །པདྨ་ཞེས་བྱ་མཁས་པས་བསྒོམ། །ཞལ་གསུམ་ཕྱག་དྲུག་ལྗང་གུ་སྟེ། །ཕྱག་ན་རལ་གྲི་བསྣམས་པ་ཡི། །ལས་ཀུན་བྱེད་པར་གྱུར་པའོ། །རལ་གྲི་ཞེས་བྱ་རྣམ་བསྒོམ་བྱ། །བྷ་གར་ལིང་ག་རྣམ་བསྒོམ་ཉིད། །དཀྱིལ་འཁོར་བདག་པོ་རྣམ་པར་བསྒོམ། །ཞེ་སྡང་རྗེས་དྲན་རྣལ་འབྱོར་གྱིས། །གཏི་མུག་རྗེས་དྲན་རྣམ་བསྒོམ་བྱ། །གཏི་མུག་རྗེས་དྲན་ལ་དམིགས་ནས། །ཕྲ་མ་རྗེས་དྲན་བསྒོམ་པར་བྱ། །ཕྲ་མ་རྗེས་དྲན་རྣལ་འབྱོར་གྱིས། །འདོད་ཆགས་རྗེས་དྲན་བསྒོམ་པར་བྱ། །འདོད་ཆགས་རྗེས་དྲན་རྣལ་འབྱོར་གྱིས། །ཕྲག་དོག་དྲན་བྱ་བརྟུལ་ཞུགས་ཅན། །སོ་སོའི་རིགས་ཀྱི་སྤྲིན་རྣམས་ནི། །བ་སྤུའི་ཁུང་ནས་སྤྲོ་བར་བྱ། །ཉི་མའི་དཀྱིལ་འཁོར་དབུས་སུ་ནི། །གཏུམ་པོའི་ཁྲོ་བོ་བསྒོམ་པར་བྱ། །ཟླ་བའི་དཀྱིལ་འཁོར་དབུས་སུ་ནི། །ལྷ་མོ་བཞི་པོ་རབ་བསྒོམ་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་རྗེས་སུ་དྲན་པ་རིམ་པར་ཕྱེ་བ་སྟེ་བཅུ་བའོ།། །།ཞེ་སྡང་གིས་མནན་འགྲོ་མཐོང་ནས། །ཞེ་སྡང་གཤིན་རྗེའི་

གཤེད་གཟུགས་སུ། །བཅོམ་ལྡན་གཤིན་རྗེའི་དབང་དུ་མཛད། །ཞེ་སྡང་ཐམས་ཅད་ཟད་པར་བྱེད། །གཏི་མུག་གིས་མནན་འགྲོ་མཐོང་ནས། །གཏི་མུག་གཤིན་རྗེའི་གཤེད་གཟུགས་སུ། །བཅོམ་ལྡན་གཤིན་རྗེའི་དབང་མཛད་ནས། །གཏི་མུག་ཐམས་ཅད་ཟད་པར་མཛད། །འགྲོ་བ་ཕྲ་མས་མནན་མཐོང་ནས། །ཕྲ་མ་གཤིན་རྗེའི་གཤེད་གཟུགས་སུ། །བཅོམ་ལྡན་སྙིང་རྗེ་ཅན་གྱིས་མཛད། །ཕྲ་མ་ཐམས་ཅད་ཟད་པར་མཛད། །འདོད་ཆགས་ཀྱིས་མནན་འགྲོ་མཐོང་ནས། །འདོད་ཆགས་གཤིན་རྗེའི་གཤེད་གཟུགས་སུ། །བཅོམ་ལྡན་སྙིང་རྗེ་ཅན་མཛད་ནས། །འདོད་ཆགས་ཐམས་ཅད་ཟད་པར་མཛད། །ཕྲག་དོག་གིས་མནན་འགྲོ་མཐོང་ནས། །ཕྲག་དོག་གཤིན་རྗེའི་གཤེད་གཟུགས་སུ། །བཅོམ་ལྡན་སྙིང་རྗེ་ཅན་མཛད་ནས། །ཕྲག་དོག་ཐམས་ཅད་ཟད་པར་མཛད། །བྱམས་པ་ཙརྩི་ཀཱར་གསུངས་ཏེ། །སྙིང་རྗེ་དེ་བཞིན་ཕག་མོའོ། །དབྱངས་ཅན་མ་ནི་དགའ་བ་སྟེ། །བཏང་སྙོམས་གཽ་རཱིའི་གཟུགས་སོ། །བདག་ཉིད་དངོས་པོ་ཐམས་ཅད་ཀྱིས། །རྫོགས་པར་བྱས་ནས་དཀྱིལ་འཁོར་གྱི། །རྣལ་འབྱོར་སྙིང་གའི་ས་བོན་སྤྲོ། །འགྲུབ་པར་འདི་ལ་ཐེ་ཚོམ་མེད། །དེ་ནས་ད་ནི་བཤད་བྱ་བ། །སྤྱོད་པ་ཡི་ནི་མཚན་ཉིད་མཆོག །གཤིན་རྗེའི་གཤེད་པོ་འཇིགས་གཟུགས་ཀྱིས། །སྐུ་དང་གསུང་དང་ཐུགས་སུ་འགྲུབ། །དགོན་པ་ཆེན་པོའི་ས་ཕྱོགས་སུ། །མ་ཧེ་མཆོག་ནི་བཀུག་ལ་ཞོན། །སྦྲུལ་དག་གིས་ནི་བརྒྱན་པར་བྱ། །ལྕགས་ཀྱི་རྡོ་རྗེ་གཟུགས་པར་བྱ། །སྐྲ་ཡང་སེར་པོ་དག་ཏུ་བྱ། །གྱེན་བརྫེས་པ་ཡི་ཁྱད་པར་གྱིས། །མགོ་ལ་ཐོད་པས་ཡང་དག་བསྐོར། །སྨ་ར་ལྐོག་སྤུ་སེར་པོར་བྱ། །ཧྲཱིཿཥྚྲཱིཿལ་སོགས་སྔགས་བརྗོད་ཅིང་། །ལྕགས་ཀྱི་རྡོ་རྗེ་མཁའ་ལ་གསོར། །རྡོ་རྗེ་གཤིན་རྗེའི་གཤེད་སྦྱོར་བས། །སེང་གེའི་སྒྲ་ཡང་དེ་ལ་བྱ། །ནུས་པ་ཅུང་ཟད་སྐྱེས་པ་ན། །རོལ་ཅིང་གྲོང་དུ་འཇུག་པར་བྱ། །གར་དང་བདེ་བའི་ཆ་ཀུན་གྱིས། །དྲུག་ལས་སྐྱེད་སོགས་གླུ་བླང་བྱ། །དེ་ནས་རྒྱལ་མཚན་ཁྱམས་མཐོང་ན། །དེར་ནི་འོ་མ་རབ་བསྒྲུབ་བྱ། །འོ་མ་ལ་སེམས་གཅིག་གོམས་པས། །ཕྱག་རྒྱ་ཆེན་པོ་རབ་བསྒྲུབ་བྱ། །ཕག་མོ་ཡི་ནི་གཟུགས་བཟུང་བའི། །

བཙུན་མོ་ཀུན་ལ་འཁྱུད་པ་ཡིས། །དཔའ་མོ་སེང་གེ་བཞིན་དུ་སྤྱད། །འདོད་པའི་དོན་ཀུན་རབ་ཏུ་འགྲུབ། །དེ་ནས་ད་ནི་བཤད་བྱ་བ། །ཕྱག་རྒྱ་མ་ནི་རབ་སྒྲུབ་ཐབས། །གསང་སྔགས་ཆེན་པོ་ཡི་གེ་གཅིག །དེ་ཡི་བཟླས་པ་མངོན་པར་བཤད་བྱ། །ཡི་གེ་ཧྲཱིཿལས་བྱུང་བ་ཡི། །མ་ཧེ་ཡང་དག་བསྒོམ་བྱ་སྟེ། །རྡོ་རྗེ་དཀྱིལ་འཁོར་ལ་གནས་པ། །མ་ཧེ་སྟེང་དུ་བསྒོམ་པར་བྱ། །གང་ཡང་ཅུང་ཟད་གཅོད་ཅིང་འབིགས། །མཚོན་ཆ་སྣ་ཚོགས་གཟུགས་དེ་ནི། །མ་ཧེ་སྣ་ཚོགས་བསྒྲུབ་པ་ཡི། །བློ་དང་ལྡན་པའི་ཕྱག་ན་བསྣམས། །དེ་ནས་ཡང་དག་བཤད་བྱ་བ། །དབྱིག་པ་གཤིན་རྗེའི་གཤེད་སྒྲུབ་ཐབས། །ཡི་གེ་ཧྲཱིཿནི་གསང་སྔགས་ཆེ། །མ་ཧེ་ཆེན་པོ་ལ་བཅིབས་པ། །ཕྱག་ནི་འབུམ་ཕྲག་རྫོགས་པའི་ཕྱག །སྐུ་ནི་མི་རོའི་ཐལ་བས་བསྐུས། །རི་རབ་དང་ནི་མཉམ་པའི་ལུས། །གསེར་གྱི་ས་གཞི་ཐུག་པར་མནན། །དེ་ནས་ཡང་དག་བཤད་བྱ་བ། །བྱེ་བའི་ཕྱག་ཅན་སྒྲུབ་པའི་ཐབས། །ཡི་གེ་ཧཱུྃ་ལས་བྱུང་བའི་གཙོ། །ཝིཀྲྀ་ཏཱ་ན་གསང་སྔགས་ཆེ། །ཨོྃ་ཧྲཱིཿཥྚྲཱིཿཝིཀྲྀ་ཏཱ་ནན་ཧཱུྃ་ཧཱུྃ་ཕཊ་ཕཊ་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧཽ་ཧྃ་ཧཿཕཊ་སྭཱ་ཧཱ། དགོས་པ་ཐམས་ཅད་བསྒྲུབ་པ་ཡི། །དམ་ཚིག་སྒྲུབ་ཐབས་བཤད་པར་བྱ། །སྔགས་ཀྱིས་དུབ་པས་ཁ་ཟས་བཟའ། །ངན་པ་དང་བྲལ་རྙེད་དཀའ་མིན། །ཤ་ཆེན་དག་ནི་རྟ་དང་ནི། །གླང་པོ་ཆེ་ཡི་ཁྱད་པར་དང་། །བ་ལང་གི་དང་ཁྱི་དང་ནི། །བོང་བུ་རྔ་མོ་ཅེ་སྤྱང་ངོ་། །སྔོན་པོ་དང་ནི་བསྲེས་པ་ཡི། །སྣུམ་ཆེན་གྱིས་ནི་ལུས་བྱུགས་ན། །ལུས་ལ་བྱུགས་པ་ཙམ་གྱིས་ནི། །འགྲོ་བ་ཐམས་ཅད་དབང་དུ་འགྱུར། །སྣང་མཛད་སི་དུ་བ་ར་དང་། །དེ་བཞིན་བིལ་བའི་ལོ་མ་དང་། །སོ་ཕག་ཕྱེ་མ་བསྲེས་པ་དང་། །གསེར་ཤིང་ལོ་མའི་ཁུ་བ་རྣམས། །འདི་ཡིས་དྲིལ་ཕྱིས་བྱས་གྱུར་ན། །ཁམས་གསུམ་པོ་ནི་དབང་དུ་འགྱུར། །དུག་དང་ཆུ་བུར་དེ་བཞིན་མཛེ། །དྲིལ་ཕྱིས་བྱས་པས་ཉམས་པར་བྱེད། །གཅི་བ་ཆེན་པོ་བཏུང་བར་བྱ། །རྡོ་རྗེ་བདུད་རྩི་དེ་བཞིན་དུ། །འདི་ནི་རྣལ་འབྱོར་མཆོག་གཙོ་བོ། །རང་འབྱུང་མེ་ཏོག་བཏུང་བ་བཞིན། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་སྤྱོད་པ་སྟོན་པ་ཞེས་

བྱ་བའི་རྒྱུད་རིམ་པར་ཕྱེ་བ་སྟེ་བཅུ་གཅིག་པའོ། །དེ་ནས་བཅོམ་ལྡན་འདས་སྐྱེས་བུ་ཆེན་པོའི་དམ་ཚིག་རྡོ་རྗེ་སེམས་དཔའི་ངོ་བོ་ཙརྩི་ཀཱའི་རྣམ་པའི་ཏིང་ངེ་འཛིན་ལ་ཡང་སྙོམས་པར་ཞུགས་ཤིང་། ཕག་མོའི་རྣམ་པའི་ཏིང་ངེ་འཛིན་ལ་ཡང་སྙོམས་པར་ཞུགས་སོ། །དབྱངས་ཅན་གྱི་རྣམ་པའི་ཏིང་ངེ་འཛིན་ལ་ཡང་སྙོམས་པར་ཞུགས་སོ། །གཽ་རི་མའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། མཆོད་པའི་གླུ་འདི་དག་རྗོད་པར་མཛད་དོ། །ཨ་ཀྱེ་ཀྱེ་གཤིན་རྗེའི་གཤེད་ནག་བླ། །སྲིན་པོའི་གཟུགས་ཅན་རང་བཞིན་ཁྱོད། །བདག་གིས་ཁྱོད་མཐོང་ཤིན་ཏུ་འཇིགས། །ཁྲོ་བའི་རང་བཞིན་འདི་ཐོང་མཛོད། །མཐོ་རིས་ས་སྟེངས་ས་འོག་བཅས། །ཁྱོད་ཀྱི་གར་གྱིས་གཡོས་པར་མཛད། །ཨཉྫ་ནག་པོ་བཅག་འདྲ་བའི། །ཁྲོ་ཁྱོད་རོ་ལངས་ཞི་གར་མཛོད། །རྣམ་པ་སྣ་ཚོགས་གཟུགས་སྤྲུལ་ཞིང་། །མདངས་ནག་ཚད་ནི་ཐུང་བ་ལ། །བདེ་ཆེན་ངོ་བོ་ཁྲོ་གར་གྱིས། །རྡོ་རྗེ་དབྱངས་ཅན་མ་གསོལ་འདེབས། །ཧྲཱིཿཥྚྲཱི་སྔགས་དང་གར་གྱིས་ཁྱོད། །སྲིད་པ་གསུམ་གྱི་འཁྲུལ་པ་ཆོད། །སྙིང་རྗེ་ཁྲོས་པའི་དང་སྒྲོལ་གར། །འགྲོ་བས་དད་ནི་ངོ་མཚར་འགྱུར། །དེ་ནས་ཡང་དག་བཤད་བྱ་བ། །བཟླས་པ་ཡི་ནི་མཚན་ཉིད་མཆོག ། བཟླས་པ་གང་ཞིག་རབ་བཟླས་ན། །དངོས་གྲུབ་ཡངས་པ་ཐོབ་པ་ནི། །མྱུར་བར་མ་ཡིན་དལ་བར་མིན། །རིང་དུ་མ་ཡིན་ཐུང་ངུ་མིན། །སྔགས་ནི་ཅུང་ཟད་ཐོས་པར་བཟླས། །གཤིན་རྗེ་སློབ་དཔོན་མི་མཆོག་གི། །མ་ཧེ་མི་དང་སོ་གཉིས་དང་། །བ་ལང་དང་ནི་རྟ་དག་དང་། །བོང་བུ་རྔ་མོའི་རུས་པ་ལས། །བཟླས་པའི་ཕྲེང་བ་རབ་བསྒྲུབ་བྱ། །ཟླ་ངོ་གཅིག་གི་བཅུ་བཞི་ལ། །བདུད་རྩི་ལྔ་དང་ལྡན་པ་ཡིས། །ཤ་ལྔ་དག་ནི་བསྡུ་བྱས་ནས། །བཟླས་ན་དངོས་གྲུབ་འགྲུབ་པའི་མཆོག །རིལ་བུ་དག་ནི་སོ་སོ་ལ། །རྣལ་འབྱོར་པ་ཡིས་གཤིན་གཤེད་བསྒོམ། །མཁས་པས་ནི་ཡང་མི་མགོ་སྟེ། །ཁྲག་གིས་བཀང་བའི་མགོ་བསྒོམ་བྱ། །ཁྲི་ཙམ་གྱིས་ནི་འབྱུང་པོ་རྣམས། །མཁའ་འགྲོ་མ་རྣམས་སྟོང་ཕྲག་གིས། །བདུད་དང་ཡི་དགས་ཚོགས་ཀྱང་འཆི། །གཤིན་གཤེད་རྡོ་རྗེའི་སྦྱོར་བ་ཡིས། །རྣལ་འབྱོར་བདག་ཉིད་འབུམ་བཟླས་ནས། །དེས་ནི་

ལས་ཀུན་བྱེད་པ་ཡིན། །བྱ་བ་བཟླས་ནས་དངོས་གྲུབ་སྟེར། །བྱེ་བ་ལྔ་བཟླས་སྨོས་ཅི་དགོས། །ཉིན་རེའམ་ཡང་ན་ཟླ་རེ་འམ། །དེ་བཞིན་ལོ་ནི་རེ་རེ་ལ། །གཏོར་མ་དྲུག་ཅུ་རྩ་བཞི་སྦྱིན། །དབྱུག་གུ་དྲུག་ཅུ་རྩ་བཞིར་ཤེས། །རྟག་ཏུ་ཅུང་ཟད་ཅི་ཟ་དང་། །དེ་བཞིན་ཅུང་ཟད་འཐུང་བ་དང་། །གཞན་ཡང་བཟའ་བ་ཐམས་ཅད་ཀྱི། །ཕུད་ནི་གཤིན་རྗེའི་གཤེད་ལ་དབུལ། །དེ་ནས་ཡང་དག་བཤད་བྱ་བ། །བླ་མ་ལ་ནི་ཡོན་དབུལ་བའོ། །ལས་ནི་ཐམས་ཅད་བསྒྲུབ་པ་དང་། །བདག་ཉིད་ཞི་བར་བྱ་བའི་ཕྱིར། །བདག་ཉིད་ཀྱང་ནི་དབུལ་བ་དང་། །རྟ་དང་བ་དང་གླང་པོ་དང་། །གསེར་དང་དེ་ལས་གཞན་པ་དང་། །རང་གི་ཆུང་མ་དེ་བཞིན་བུ། །མ་དང་སྲིང་མོ་ཚ་མོ་དང་། །དེ་བཞིན་དུ་ནི་སྤུན་ཟླ་དང་། །ན་བཟའ་སྣ་ཚོགས་དག་དང་ནི། །གདུགས་དང་རྡུལ་ཡབ་མཛེས་པ་དང་། །ཁྱིམ་དང་གདན་དང་དྲི་ཞིམ་དང་། །དེ་བཞིན་གླུ་དང་རོལ་མོ་དང་། །རལ་གྲི་དང་ནི་རྒྱན་དག་དང་། །བརྟུལ་ཞུགས་ཅན་གྱིས་བླ་མར་དབུལ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ཉེ་བར་མཁོ་བའི་ལས་ཀྱི་ཁྱད་པར་ཐམས་ཅད་ཞེས་བྱ་སྟེ་རིམ་པར་ཕྱེ་བ་བཅུ་གཉིས་པའོ།། །།དེ་ནས་སེམས་ཅན་ཐམས་ཅད་ཀྱི། །སྡིག་པ་དག་ནི་ཇི་སྙེད་པ། །དེ་དག་གཅོད་པའི་གྲི་གུག་སྟེ། །ཞེ་སྡང་གཅོད་པའི་ཤུབས་ཅན་ནོ། །དེ་ནས་ཡང་དག་བཤད་བྱ་བ། །རིང་བའི་ཐོས་པ་བསྒྲུབ་པའི་ཕྱིར། །རྡོ་རྗེ་མཁའ་འགྲོ་མ་སྒྲུབ་ཐབས། །ནམ་མཁའི་ཁམས་ཀྱི་དབུས་གཏོགས་པར། །ཉི་མའི་དཀྱིལ་འཁོར་མཆོག་བསམ་བྱ། །གནས་དེར་རྩེ་ལྔ་པ་ཡང་བསྒོམ། །དེ་ཡི་སྟེང་དུ་གནས་དགོད་བྱ། །མཐིང་མདོག་ནག་པོ་འཇིགས་ཚུལ་ལ། །ཕྱག་དྲུག་འཇིགས་སུ་རུང་བ་སྟེ། །ཕྱག་ན་རྡོ་རྗེ་རྣམ་བསྒོམ་བྱ། །ཕྱག་གཞན་དག་ལ་གཞན་དག་དགོད། །ཤར་དུ་སངས་རྒྱས་མཁའ་འགྲོ་མ། །ཕྱག་དྲུག་གཏི་མུག་རྡོ་རྗེ་མཚུངས། །ལག་ན་འཁོར་ལོ་འཇིགས་པར་བྱེད། །བསྒོམ་བྱ་སྦྱོར་བའི་དཀྱིལ་འཁོར་དུ། །ལྷོ་རུ་རིན་ཆེན་མཁའ་འགྲོ་མ། །ཕྱག་དྲུག་ཕྲ་མ་དང་མཚུངས་པ། །ཕྱག་ན་རིན་ཆེན་རབ་འབར་བ། །ཉི་མའི་དཀྱིལ་འཁོར་བསྒོམ་པར་བྱ། །ནུབ་ཏུ་

པདྨའི་མཁའ་འགྲོ་མ། །ཕྱག་དྲུག་པདྨ་འཛིན་པའོ། །བྱང་དུ་ལས་ཀྱི་མཁའ་འགྲོ་མ། །རལ་གྲི་འཛིན་པའི་དཀྱིལ་འཁོར་རིམ་པའོ། །མེ་ལ་སོགས་པ་མཚམས་བཞི་རུ། །ལྷ་མོ་བསྒོམ་བྱ་བརྟུལ་ཞུགས་ཅན། །ལཱ་སྱེ་མཱ་ལེ་དེ་བཞིན་གར། །གླུ་མ་ཡི་ནི་ཁྱད་པར་རོ། །ལས་ཀྱི་ཆོ་ག་མཐོང་བ་ཡིས། །དེར་ནི་སྒོ་སྐྱོང་བསྒོམ་པར་བྱ། །ཐོ་བ་དབྱིག་པ་དང་པདྨ། །དེ་བཞིན་གཞན་ནི་རལ་གྲིའོ། །ཨོྃ་བཛྲ་ཌཱ་ཀི་ནཱི། ཨོྃ་བུདྡྷ་ཌཱ་ཀི་ནཱི། ཨོྃ་རཏྣ་ཌཱ་ཀི་ནཱི། ཨོྃ་པདྨ་ཌཱ་ཀི་ནཱི། ཨོྃ་ཀརྨྨ་ཌཱ་ཀི་ཆཱི། ལྃ་ནྃ་གྃ་མྃ། མཚམས་སུའོ། །ཨོྃ་མུདྒར་ཛཿཨོཾ་དཎྜ་ཧཱུྃ། ཨོྃ་པདྨ་བྃ། ཨོྃ་ཁངྒ་ཧོཿ །འདི་ནི་བཅོམ་ལྡན་འདས་རྡོ་རྗེ་ཅན་གྱིས་རྡོ་རྗེ་མཁའ་འགྲོ་མའི་སྒྲུབ་ཐབས་གསུངས་པའོ། །རིང་པོའི་ཐོས་པ་བསྒྲུབ་དོན་དུ། །རྡོ་རྗེ་མཁའ་འགྲོ་མ་བསྒོམ་བྱ། །དེར་ནི་གསང་སྔགས་ཀྱི་དངོས་གྲུབ་འགྲུབ་པར་འགྱུར་ཏེ། །ཨོྃ་ཨཱ་ཀི་ཤ་ཙ་ར་བཛྲ་ཌཱ་ཀི་ནཱི་སྭཱ་ཧཱ། དེ་ནས་ཡང་དག་བཤད་བྱ་བ། །རྡོ་རྗེས་འོག་སྒྲུབ་ཐབས་སོ། །ས་འོག་རྣམ་པར་བསྒྲུབ་དོན་དུ། །གནོད་མཛེས་རྡོ་རྗེ་བསྒོམ་པར་བྱ། །ཕྱག་དྲུག་མདོག་སྔོན་འཇིགས་པ་ཡི། །ཕྱག་ཏུ་གཏུན་ཤིང་དགོད་པར་བྱ། །དཀྱིལ་འཁོར་གྱི་ནི་དཀྱིལ་དག་ཏུ། །འདི་ནི་རབ་ཏུ་དགོད་པར་བྱ། །ཤར་དུ་སྤྱན་མ་དགོད་པར་བྱ། །དེ་བཞིན་ལྷོ་རུ་མཱ་མ་ཀཱི། །ནུབ་ཏུ་ལྷ་མོ་གོས་དཀར་མོ། །སྒྲོལ་མ་བྱང་གི་ཕྱོགས་སུ་དགོད། །མེ་ཏོག་སྤོས་དང་དེ་བཞིན་དྲི། །མར་མེ་ལ་སོགས་མཚམས་སུ་དགོད། །ཐོབ་ལ་སོགས་སྒོ་དྲུང་སྟེ། །སྦྲུལ་གྱིས་བརྒྱན་པའི་སྐ་རགས་བྱས། །ལས་ཀྱི་ཆོ་ག་མཐོང་ནས་ནི། །དཀྱིལ་འཁོར་འདི་ལྟར་བསྒོམ་པར་བྱ། །རྡོ་རྗེ་ས་འོག་སྦྱོར་ལྡན་པས། །རྨི་ལམ་དུ་ནི་ལམ་མཐོང་འགྱུར། །དེ་ནས་ཡང་དག་བཤད་བྱ་བ། །བདུན་པའི་རྒྱལ་པོའི་དཀྱིལ་འཁོར་ཏེ། །མཁའ་སྤྱོད་ཉིད་ནི་རབ་བསྒྲུབ་ཕྱིར། །རྟ་ཡི་མཆོག་ནི་རབ་ཏུ་བསྒྲུབ། །ཕྱག་གཉིས་པ་ལ་ཞལ་གཅིག་པ། །སྐུ་མདོག་ལྗང་གུ་འཇིགས་པར་བྱེད། །ཉི་མའི་དཀྱིལ་འཁོར་སྟེང་དུ་གཞག །རྟ་ཡི་གདོང་པ་རབ་མཛེས་པས། །གཡས་པ་སྲད་བུ་ཁུ་ཚུར་བཅས། །ཕྱག་གཡོན་པ་ནི་ཐོད་པའོ། །ཨོྃ་ཕུྃཤ་ཕུྃ་ཕུྃ་ཧི་ཧི་ཧི། གསང་

སྔགས་འདི་ནི་མཁས་པས་བཟླ། །རྟ་ཡི་མཆོག་ཏུ་གྱུར་པར་གྲགས། །ཤར་དུ་བ་ཌ་བིཾ་བསྒོམ་བྱ། །ལྷོ་ཕྱོགས་སུ་ནི་རིམ་གྲོ་མ། །ནུབ་ཏུ་བདུན་པའི་རྒྱལ་པོ་སྟེ། །རྟ་མཆོག་མ་ནི་བྱང་ཕྱོགས་དགོད། །བདག་པོའི་ཞལ་ཕྱག་ཇི་ལྟ་བར། །ཐམས་ཅད་དེ་དང་འདྲ་བར་བསྒོམ། །སྔགས་འདི་ཡིས་ནི་ཐམས་ཅད་དུ། །གཤེགས་སུ་གསོལ་བར་རབ་ཏུ་གྲགས། །སྨྱུག་མའི་གླིང་བུ་པི་བང་དང་། །རྔ་ཟླུམ་རྔ་བྲན་མཚམས་སུ་གཞག །བན་གླང་སྣ་དང་གླང་པོའི་སྣ། །དེ་བཞིན་གདོང་བཟང་གདོང་ངན་ཏེ། །གཏུན་ཤིང་དང་ནི་སྟ་རེ་དང་། །ལྕགས་ཀྱུ་དང་ནི་ཞགས་པ་དང་། །གར་ལ་སོགས་པའི་རྣལ་འབྱོར་གྱིས། །སྒོ་བཞི་རུ་ནི་རྟག་ཏུ་བསྒོམ། །སྔོ་ཆགས་གཡོན་པར་བསྒོམ་པར་བྱ། །རང་གི་ཕྱག་མཚན་དེ་བཞིན་གཡས། །ཇི་ལྟར་རྟ་མཆོག་སྔགས་ཀྱིས་ནི། །རྡོ་རྗེ་ས་འོག་གི་ཡང་གཏེར། །རྟ་མཆོག་རྣལ་འབྱོར་ཉིད་ཀྱིས་ནི། །ཁམས་གསུམ་ནམ་མཁའི་ཁམས་སུ་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་དངོས་གྲུབ་ངེས་པར་བསྟན་པ་སྟེ་རིམ་པར་ཕྱེ་བ་བཅུ་གསུམ་པའོ།། །།དེ་ལ་འདི་ནི་སྲད་བུ་བརྐྱང་བའི་དམ་ཚིག་གི་མཆོག་སྟེ། ཨ་ཀཱ་རོ་མུ་ཁྃ་སརྦཱདྷརྨཱཏྟཱུཾ། ཨཱདྱཱ་ནུད་པན་ན་ཏྭཱད། །དཔལ་ལྡན་གཤིན་རྗེའི་གཤེད་བསྒོམས་ལ། །སློབ་མ་རྣམ་སྣང་མཛད་དུ་བསྒོམ། །ཡེ་ཤེས་ཐིག་མཆོག་རྩེ་མོ་རྩེ། །ཤིན་ཏུ་མཉམ་པར་བཞག་ནས་བཏབ། །དེ་ལ་འདི་ནི་དཀྱིལ་འཁོར་ཆེན་པོའི་དམ་ཚིག་མཆོག །ཨོྃ་ཨཱཿཧཱུྃ་དཀྱིལ་འཁོར་ཉིས་འགྱུར་རིམ་པར་བྱ། །དེ་ཡི་སྤོ་ཡི་ཉི་ཤུའི་ཚད། །བ་ཡི་རྣམ་ལྔ་མཉམ་བྱུགས་པའི། །སྐུད་པ་སངས་རྒྱས་ཀྱིས་རབ་བརྟགས། །དེ་ལ་འདི་ནི་རྡོ་རྗེ་ཆེན་པོ་གསོལ་བ་གདབ་པའི་དམ་ཚིག་གོ །ཨེ་མའོ་སངས་རྒྱས་སློབ་དཔོན་ཆེ། །ཨེ་མའོ་ཆོས་དང་ཚོགས་ཀྱི་གཙོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །དེ་ལ་འདི་ནི་ས་ཆེན་པོ་ཡོངས་སུ་གཟུང་བའི་ཆོ་ག་སྟེ། རྡོ་རྗེ་སའི་ལྷ་མོ་བཀུག་ལ། །ལྷ་མོ་ཁྱོད་ནི་དཔང་དུ་འགྱུར། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པ་ཡི་ནི་ཁྱད་པར་

དང་། །ས་དང་ཕ་རོལ་ཕྱིན་པ་ལའོ། །སྒོ་ནི་དཀྱིལ་འཁོར་ཆ་བརྒྱད་དེ། །ཁྱམས་ཆེན་དག་ནི་བོར་བ་ལ། །བདག་ཉིད་ཆེན་པོས་ཤེས་པར་བྱ། །ཡིད་དུ་འོང་ཞིང་ལེགས་སྤྲས་པའི། །མུ་ཁྱུད་སྒོ་ཙམ་ཤེས་པར་བྲི། །ལྷ་ཡི་སྣམ་བུའང་དེ་ཙམ་མོ། །རྡོ་རྗེ་ལྷ་མོ་ལྡན་པ་ཡིས། །གླུ་དང་རོལ་མོ་གར་ཡང་དགོད། །མཆོད་སྣམ་སྒོ་ཡི་ཕྱེད་ཉིད་དེ། །འགྲམ་དང་ངོས་ཀྱང་དེ་ཙམ་མོ། །དོ་ཤལ་སེ་མོ་དོ་དང་ནི། །ཉི་མ་ཟླ་བ་མེ་ཏོག་ཕྲེང་། །དེ་ལ་གོས་དང་འཕན་དག་གོ །རྩ་བ་ས་ཡི་ཐིག་རྒྱབ་ཏུ། །ཚོན་རྩེའི་སྣམ་བུ་དེ་ཡི་ཕྱེད། །དེ་ལ་སྙིང་པོ་ཆེན་པོ་འདིས། །བདག་ཉིད་འཁོར་ལོ་རྣམ་པར་དགོད། །དེར་ནི་རང་གི་ཕྱག་རྒྱའང་བསྟེན། །དམ་ཚིག་ཡེ་ཤེས་གཞུག་པ་སྟེ། །དེ་ལྟར་དཀྱིལ་འཁོར་བསྒྲུབ་པར་བྱ། །ཤར་དུ་དཀར་པོ་ཆེན་པོ་སྟེ། །ལྷོར་ནི་སེར་པོ་དང་ལྡན་པས། །ནུབ་ཀྱི་ཆར་ནི་དམར་པོའོ། །བྱང་དུ་ལྗང་གུ་དང་ལྡན་པར། །ཨིནྡྲ་ནཱི་ལའི་འོད་འདྲ་བའི། །དབུས་ཀྱི་ཆར་ནི་ཡང་དག་བྲི། །དེ་ལ་ཕྱག་རྒྱ་དགོད་པར་བྱ། །ལས་ཀྱི་ཆོ་ག་མཐོང་ནས་ནི། །རྟག་ཏུ་ཕྱག་རྒྱ་མཁའ་མཉམ་པ། །ཕྱག་རྒྱ་དེ་ཉིད་རྟག་ཏུ་བྲི། །དེ་ཡི་དཀྱིལ་དུ་རྡོ་རྗེ་བྲི། །ཤར་དུ་འཁོར་ལོ་ཡང་དག་བྲི། །དེ་ལྟ་བུ་ལ་སོགས་པ་བལྟ། །ཕྱག་མཚན་ཀུན་ཏུ་ཞལ་དང་མཚུངས། །དེ་ལ་འདི་ཡི་དགང་གཟར་ནི། །དེ་ཡི་ཡུ་བའི་ཚད་དུ་བྱ། །ཁྲུ་གང་དང་ནི་ལྡན་པར་བྱ། །དེ་ཡི་དཀྱིལ་འཁོར་རྩེ་མོ་ནི། །སོར་བཞི་པོ་ལ་ཟླུམ་པོར་བྱ། །གཏིང་དུ་སོར་གཉིས་ཟབ་པ་ལ། །དེ་ལ་སོར་ཕྱེད་མཆུར་བྱས་པའོ། །བླུགས་གཟར་པདྨའི་འདབ་འདྲ་བའི། །ཁ་ནི་མཐེ་བོའི་ལྟོ་གང་ལ། །དེ་ལ་སོར་གཅིག་ཙམ་ཟབ་པ། །རྒྱུད་འདི་རུ་ནི་རབ་ཏུ་བསྔགས། །དཀྱིལ་འཁོར་དུ་ནི་མ་ཞུགས་དང་། །མཚམས་མེད་ལྔ་ནི་བྱས་པ་དང་། །སེམས་ཅན་སྲོག་ནི་གཅོད་པ་དང་། །ཉ་དང་ཤ་ནི་མངོན་ཟ་དང་། །ཆང་ལ་མངོན་པར་དད་པ་དང་། །ཆད་ལྟའི་བརྟུལ་ཞུགས་འཛིན་པ་དང་། །མངོན་པར་དབང་ནི་མ་བསྐུར་དང་། །ཀུན་ཏུ་འཁྱམ་ཞིང་ལྡོམ་བུ་དང་། །གྲོང་གི་གླ་མི་བྱེད་པས་ཀྱང་། །གཤིན་རྗེའི་གཤེད་རྒྱུད་མངོན་

གཞོལ་ན། །ནག་པོའི་ཚིག་ནི་ཇི་ལྟ་བར། །གྲུབ་པར་འདི་ལ་ཐེ་ཚོམ་མེད། །དེ་ནས་བྱམས་པ་ལ་སོགས་ཀྱིས། །རྡོ་རྗེ་ངེས་པ་འདི་མཐོང་ནས། །རྡོ་རྗེ་བྱང་ཆུབ་སེམས་དཔའ་ཀུན། །མི་སྨྲ་བར་ནི་སྡོད་པར་གྱུར། །དེ་ལ་འདི་ནི་རྡོ་རྗེ་དབབ་པའི་ཆོ་གའོ། །འབྱུང་བཞིའི་ས་བོན་ཆེན་པོ་ཡིས། །འཁོར་ལོ་བཞི་ནི་རབ་བསྒྲུབ་བྱ། །གནས་བཞིར་རབ་ཏུ་སྦྱོར་བ་བསམ། །ནམ་མཁའ་ལ་ནི་གཡོ་བར་བྱེད། །རྐང་པ་དག་གི་འོག་ཏུ་ཡྃ། །ལྟེ་བར་རྃ་སྟེ་སྙིང་གར་ལྃ། །མགོ་བོ་ལ་ནི་ཡི་གེ་བྃ། །ཡི་གེ་ཡ་ནི་ནག་ཆེན་པོ། །དྲག་ལ་རྔམ་པ་རབ་འགྱུར་བའི། །གྲུ་གསུམ་སྲེག་པའི་མེ་ལྟར་འབར། །ཉི་མའི་དཀྱིལ་འཁོར་ལྟ་བུར་དམར། །རྡོ་རྗེ་ས་གཞི་འཛིན་བཟོད་པའི། །སེར་པོ་ཆེན་པོ་གྲུ་བཞི་པ། །རི་རབ་རི་ཡིས་མནན་པ་ཡི། །ནོར་འཛིན་དེ་ནི་བསྒོམ་པར་བྱ། །དཀར་པོ་ཟླུམ་པོ་བསིལ་ཆེན་པོ། །སྤྲིན་བཞིན་དུ་ནི་ཆར་བ་འཛིན། །རྒྱ་མཚོ་དུ་མ་ཆུས་གང་བའི། །གངས་ཀྱི་རི་བོ་ལྟར་བསིལ་བའི། །གནས་བཞི་རུ་ནི་སྦྱོར་བས་ན། །ཁར་ནི་སྣང་བ་མཐའ་ཡས་ཏེ། །སློབ་མ་རྡོ་རྗེ་བསྒོམ་པར་བྱ། །མྱུར་བ་རུ་ནི་འབེབས་པར་བྱེད། །དེ་ལ་འདི་ནི་སྤྲོ་བའི་ཆོ་གའོ། །རྡོ་རྗེ་ཆོས་ནི་མགོན་ཆེན་པོ། །སྣང་བ་མཐའ་ཡས་བདེ་བ་ཆེ། །གསུངས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་པར་དྲི། །ཁྲུ་གང་ནས་ནི་བརྩམས་ནས་ནི། །ཇི་སྲིད་ཁྲུ་ནི་སྟོང་གི་བར། །སློབ་མ་ཆེན་པོ་འཕར་བར་འགྱུར། །དེ་ནི་དབབ་པའི་ཆོ་གའོ། །འཇིགས་གཟུགས་རི་མོའི་མཚན་ཉིད་ནི། །དེ་ནས་ཡང་དག་བཤད་པར་བྱ། །ས་ནི་འཇམ་པོ་བླངས་བྱས་ལ། །བརྟུལ་ཞུགས་ཅན་གྱིས་བཟླས་པ་བྱ། །སྲན་གྲེའུ་འོ་མ་དེ་བཞིན་ཤ །བུ་རམ་ཏིན་ནི་ནི་ལ་སོགས། །སྣུམ་དང་ནིམ་པའི་འོ་མ་དང་། །ན་ཏི་དེ་བཞིན་ཛ་གེ་སར། །དང་པོར་དཀར་པོར་བྲི་བར་བྱ། །ཁ་དོག་གཞན་གྱིས་དེ་ནས་བསྒོམ། །རྡོ་རྒྱུས་དང་ནི་བཙག་དག་ལས། །རྒྱ་སྐྱེགས་ལྟ་བུའི་མདོག་ཏུ་འགྱུར། །ཡུང་བ་དེ་དང་རམས་དག་ལས། །དེ་བཞིན་ཁ་དོག་ལྗང་གུར་འགྱུར། །སྔོན་པོ་དག་ནི་རམས་ཀྱིས་བྱ། །དེ་བཞིན་དུ་བས་ནག་པོའོ། །ལྡོང་རོས་ཀྱིས་ནི་སེར་པོ་སྟེ། །དམར་པོ་དེ་བཞིན་

མཚལ་གྱིས་སོ། །དེ་ལ་བིལ་བའི་སྙིང་པོ་བཞག །ཧ་ཅང་ཉུང་དང་མང་བ་མིན། །མང་ན་ནག་པོར་འགྱུར་བ་སྟེ། །ཉུང་ན་དེ་བཞིན་འཐུལ་བར་འགྱུར། །གཟུགས་ནི་ཁྲོ་དང་ཞི་བའོ། །མཚན་ཉིད་དག་ནི་བཤད་པར་བྱ། །རོལ་བ་ཞི་བར་གསུངས་པ་སྟེ། །ཁྲོ་བོ་སྦོམ་ལ་ཐུང་བར་བཤད། །སྣ་ནི་སོར་བཞི་བྱ་བ་སྟེ། །དཔྲལ་བ་ཀོས་ཀོ་མཆུ་དེ་བཞིན། །མགྲིན་པ་འགྲམ་པ་དེ་བཞིན་མཚན། །སོར་བཞི་དག་ཏུ་བྱ་བ་ཡིན། །ཉི་ཤུ་རྩ་བཞི་ལག་པ་ལ། །གྱེན་དུ་སོར་ནི་ཉི་ཤུ་ཡིན། །ལག་པ་རྐང་པ་གདོང་ཇི་ལྟར། །མིག་ནི་མཐེ་བོང་གང་ཙམ་སྟེ། །རྣ་བ་གཉིས་ལ་སོར་གཉིས་བསྒྲགས། །འབྲས་བུ་གཉིས་ལ་དེ་བཞིན་བཞི། །མཆུ་ནི་སོར་གཉིས་བསྡོམས་པའོ། །ལྟེ་བ་སོར་གཅིག་ཟབ་པ་ཡིན། །ལུས་ནི་མགྲིན་པ་བོར་བ་ཡི། །གདོང་ནི་གསུམ་འགྱུར་ལུས་ལ་དགོད། །རལ་པ་ཅོད་པན་དེ་ཡི་ཚད། །རིན་ཆེན་ཅོད་པན་སོར་དྲུག་པའོ། །རལ་པ་གཅིག་མ་རབ་སྒྲུབ་ཐབས། །དེ་ནས་ཡང་དག་བཤད་བྱ་བ། །གནོད་སྦྱིན་མོ་ནི་སྒྲུབ་འདོད་པས། །རལ་པ་གཅིག་མ་རབ་སྒྲུབ་ཐབས། །ཕྱག་གཉིས་པ་ལ་ཞལ་གཅིག་སྟེ། །གྲི་གུག་དང་ནི་ཐོད་པ་ལ། །ཤིན་ཏུ་སྦོམ་ལ་མདོག་སྔོ་བ། །དཀྱིལ་འཁོར་དབུས་སུ་བསྒོམ་པར་བྱ། །ཛམྦྷ་ལ་ནི་ཤར་དུ་བསྒོམ། །བ་སུ་དྷ་ར་ལྷོ་ཕྱོགས་སུ། །ཆུ་དབང་ནུབ་ཏུ་དགོད་པར་བྱ། །བྱང་དུ་རྣ་ཆ་ཀོས་ཀོ་འཕྱང་། །མེ་ལ་སོགས་པའི་མཚམས་དག་ཏུ། །གནོད་སྦྱིན་མོ་བཞི་རབ་བསྒོམ་བྱ། །ཀུ་ཏལ་ཀྱེ་ཧེ་ནི་གྱི་ཧྃ། །བ་སུ་དྷ་རི་ཆོ་ག་བཞིན་དགོད། །དེར་ནི་སྒོ་བ་རྣམ་བསྒོམས་ཏེ། །ཐོ་བ་ལ་སོགས་མཉམ་པར་རོ། །འཁོར་ལོ་སྔ་མ་མཐོང་བ་བཞིན། །དེ་བཞིན་མདོག་ནི་རབ་སྦྱར་བྱ། །ཕྱག་མཚན་བདག་ནི་ལྟར་འཛིན་པ། །མཁས་པས་ཕྱི་ནས་སྔགས་བཟླས་ཏེ། །ཨོཾ་ཨེ་ཀ་ཛཊཱི་བ་སུདྷཱ་རི་ཎི་སྭཱ་ཧཱ། །པུཀྐ་སཱི་ནི་རབ་སྒྲུབ་ཐབས། །དེ་ནས་ཡང་དག་བཤད་པར་བྱ། །གང་ཞིག་བསྒོམས་པ་ཙམ་གྱིས་ནི། །འཇིག་རྟེན་གསུམ་ལ་འཚེ་ནུས་པ། །སྐུ་མདོག་སེར་པོ་ཞལ་བཞི་པ། །ཕྱག་བཞི་བོང་བུ་ལ་བཅིབས་པ། །པུཀྐ་སཱི་ཡི་ལུས་བསྒོམ་བྱ། །

ཞགས་པ་ཐོ་བ་མདའ་དག་དང་། །བརྟུལ་ཞུགས་ཅན་གྱིས་གཞུ་བཅས་བསྒོམ། །ཨོཾ་པུཀྐ་སཱི་ཨཾ་ཞེས་སྔགས་བརྗོད་དོ། །འཇམ་པའི་རྡོ་རྗེའི་དཀྱིལ་འཁོར་ནི། །དེ་ནས་ཡང་དག་བཤད་བྱ་བ། །དེ་ཡི་མོད་ལ་མི་སྣང་བར། །འཇམ་པའི་རྡོ་རྗེ་གྲགས་འགྱུར་བ། །འབར་བའི་གསེར་འོད་འདྲ་བ་ཡི། །སེར་པོ་ཞལ་གསུམ་ཕྱག་དྲུག་པ། །གཞོན་ནུའི་གཟུགས་ནི་འཛིན་པའི་མགོན། །མི་མཐོང་བྱ་བའི་དོན་དུ་བསྒོམ། །ཤར་དུ་མཛེས་མ་དགོད་པར་བྱ། །དེ་བཞིན་ལྷོ་རུ་སྐྲ་ཅན་མ། །ནུབ་ཏུ་སེར་པོ་བསྒོམ་པར་བྱ། །བྱང་དུ་ཉེ་བའི་སྐྲ་ཅན་མ། །ཐམས་ཅད་ཕྱག་ན་རལ་གྲི་དང་། །འཁོར་ལོ་ལ་སོགས་གཞན་ལ་དགོད། །ཐམས་ཅད་ཞལ་གསུམ་ཕྱག་དྲུག་པ། །སྣ་ཚོགས་རྒྱན་གྱིས་བརྒྱན་པའོ། །ས་བོན་ཡི་གེ་མཾ་ལས་བྱུང་། །དཀྱིལ་འཁོར་གྱི་ནི་དབུས་ན་བཞུགས། །ཐམས་ཅད་ཞབས་ནི་གཡོན་བརྐྱང་བས། །རི་བོང་ཅན་གྱི་གདན་ལ་བཞུགས། །འོད་ཟེར་ཅན་དང་རི་ཁྲོད་མ། །དེ་བཞིན་ནོར་འཛིན་སྐུལ་བྱེད་མ། །མེ་ལ་སོགས་པའི་མཚམས་བཞི་རུ། །བསྡུས་པ་དགོད་བྱ་སྙིང་པོ་ལའོ། །མྱ་ངན་མེད་དང་ཡལ་འདབ་དང་། །འབྲས་ཀྱི་སྙེ་མ་དབྱིག་པའོ། །སེར་དང་ལྗང་དང་ཡང་སེར་པོ། །དཀར་པོའི་ལུས་ནི་བསྒོམ་པར་བྱ། །ཀུན་ཀྱང་ཞལ་གསུམ་ཕྱག་དྲུག་པ། །དཀྱིལ་འཁོར་དག་ཏུ་གདབ་པར་བྱ། །ཐོ་བ་ལ་སོགས་སྒོ་བ་བཞི། །བསྒོམས་ན་མཐོང་བར་མི་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཇམ་པའི་རྡོ་རྗེ་སྒྲུབ་པའི་ཐབས་ཞེས་བྱ་སྟེ་རིམ་པར་ཕྱེ་བ་བཅུ་བཞི་པའོ།། །།འཕགས་པ་ཛི་གུ་ལིའི་སྒྲུབ་ཐབས། །དེ་ནས་ཡང་དག་བཤད་པར་བྱ། །གང་ཞིག་བསྒོམ་པ་ཙམ་གྱིས་ནི། །ཆུ་ཡི་སྟེང་ནས་འགྲོ་འགྱུར་བ། །སེར་པོ་ཞལ་གསུམ་ཕྱག་དྲུག་པ། །ས་བོན་ཕུཿལས་ཡང་དག་བྱུང་། །སྐུ་ཆེན་ཕྱག་ན་སྦྲུལ་བསྣམས་པ། །རྨ་བྱ་ལ་ནི་ཞོན་པ་དགོད། །ཤར་དུ་རྨ་བྱ་དགོད་པར་བྱ། །དེ་བཞིན་ལྷོ་རུ་ཁྲོ་གཉེར་ཅན། །ནུབ་ཏུ་རི་ཁྲོད་ལོ་མ་ཅན། །བྱང་དུ་རྡོ་རྗེ་ལྕགས་སྒྲོག་མ། །རྨ་བྱའི་སྒྲོ་དང་སྤྱི་བླུགས་དང་། །ལོ་མ་དང་ནི་ལྕགས་

སྒྲོག་མ། །དེ་དག་རྣམ་པར་བསྒོམ་པར་བྱ། །སེར་དང་དམར་དང་དེ་བཞིན་ལྗང་། །ཁ་དོག་སྔོན་པོ་དབྱེ་བ་ཉིད། །མཁས་པས་འདི་ལྟར་བསྒོམ་པར་བྱ། །དེ་བཞིན་སྔགས་འདི་དག་ཀྱང་བཟླས། །ཨོཾ་ཕུཿཛཿ། ཐོ་བ་ལ་སོགས་སྒོ་རུ་དགོད། །མེ་ཏོག་ལ་སོགས་མཚམས་སུ་དགོད། །ཛྃ་གུ་ལི་ཡི་སྦྱོར་བ་ཡིས། །ཆུ་ཡི་སྟེང་ནས་རྟག་ཏུ་འགྲོ། །ཀུ་རུ་ཀུལླེ་རབ་སྒྲུབ་ཐབས། །དེ་ནས་ཡང་དག་བཤད་པར་བྱ། །གང་གིས་བསྒོམས་པ་ཙམ་གྱིས་ནི། །ཀླུ་ཡི་བུ་མོ་རབ་འགུགས་པ། །ཁ་དོག་དམར་པོ་ཞལ་བཞི་པ། །ཕྱག་བརྒྱད་དང་ནི་རབ་ཏུ་ལྡན། །ཧྲཱིཿཡི་ས་བོན་ལས་བྱུང་བས། །ཀླུ་ནི་འགུགས་པར་བྱེད་པ་ཡིན། །ཕྱག་བརྒྱད་དུ་ནི་ཀླུ་དགོད་དེ། །མཐའ་ཡས་ལ་སོགས་ཀླུ་རིགས་བརྒྱད། །ལུས་ནི་སྦྲུལ་གྱིས་རབ་ཏུ་བརྒྱན། །བརྟུལ་ཞུགས་ཅན་གྱིས་མཛེས་མ་བསྒོམ། །སྔགས་ནི་ཨོཾ་ཀུ་རུ་ཀུལླེ་ཧྲཱིཿ[ཕུཿ]སྭཱ་ཧཱ། དེ་ནས་གསང་བ་བཤད་པར་བྱ། །བསྡུས་ནས་ཡིན་གྱི་རྒྱས་པ་མིན། །གང་ཞིག་ཤེས་པ་ཙམ་གྱིས་ནི། །ལྷ་ཡི་བུ་མོ་འགུགས་བྱེད་པ། །ཕྱག་གཉིས་པ་ལ་ཞལ་གཅིག་སྟེ། །ཕྱག་ན་མདའ་དང་གཞུ་བསྣམས་པ། །ལུས་ནི་སེར་པོ་ཆེན་པོ་ཡི། །རྡོ་རྗེ་ལུས་མེད་བསྒོམ་པར་བྱ། །ཤར་དུ་དགའ་མ་བསྒོམ་པར་བྱ། །ལྷོ་རུ་འདོད་པས་མཛེས་མ་བསྒོམ། །ནུབ་ཏུ་འདོད་པའི་ལྷ་མོ་བསྒོམ། །བྱང་དུ་འདོད་པའི་ལྕགས་ཀྱུའོ། །འདོད་པའི་ལྷ་མོ་ཐམས་ཅད་ཀྱི། །ཕྱག་ཏུ་མདའ་དང་གཞུ་བསྒོམ་བྱ། །སེར་དང་དམར་དང་དེ་བཞིན་ལྗང་། །དམར་སྐྱ་དག་ནི་བསྒོམ་པར་བྱ། །མཚམས་རྣམས་སུ་ནི་རྟག་དགོད་པ། །མི་འགག་དེ་བཞིན་མཚམས་ཀྱི་བདག །གཡི་དང་སྤྲེའུའི་རྒྱལ་མཚན་ནི། །སྒོ་ཡི་ཕྱོགས་ཀྱི་བཤད་པར་བྱ། །འདོད་པ་འགྱིང་དང་འགྱིང་བག་ཅན། །དྲན་དང་དེ་བཞིན་མདའ་གྲི་ཅན། །ལྷ་རྣམས་དེ་དག་ཐམས་ཅད་ཀྱི། །དབུ་ལ་གཤིན་རྗེའི་གཤེད་པོ་བསྒོམ། །བུད་མེད་ཀྱི་ནི་པདྨ་རུ། །རྡོ་རྗེ་ལུས་མེད་བསྒོམ་པར་བྱ། །ཡི་གེ་ཧྲཱིཿལས་ཡང་དག་བྱུང་། །ཀུན་ཏུ་འཁོར་བར་རྣམ་པར་འཕྲོ། །བསླུས་ཤིང་གཡེངས་པ་བསྒོམ་པར་བྱ། །མྱོས་

ནས་བདེ་བའི་འདོད་ཡིད་ཀྱིས། །དམར་པོའི་གོས་ཀྱིས་ཡོངས་དཀྲིས་ཏེ། །རྐང་པའི་དྲུང་དུ་ལྷུང་བར་འགྱུར། །དེར་ནི་སྔགས་ཀྱང་བཟླས་པར་བྱ། །ཡི་གེ་ཨོཾ་ནི་རིང་པོར་དྲང་། །ཡི་གེ་སྭཱ་ཧཱ་མཐའ་མར་སྦྱིན། །ཡི་གེ་སི་ཏིའི་སྔགས་བཟླས་བྱ། །ཆེ་གེ་མོ་ཞིག་བདག་དབང་འགྱུར། །ཐམས་ཅད་དུ་ནི་བསྒོམས་བྱས་ན། །ནག་པོའི་ཚིག་ནི་ཇི་བཞིན་གྱིས། །རྣལ་འབྱོར་འདོད་པས་དེ་འཐོབ་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ལུས་མེད་རྡོ་རྗེའི་སྒྲུབ་ཐབས་རིམ་པར་ཕྱེ་བ་སྟེ་བཅྭ་ལྔ་པའོ།། །།ཧེ་རུ་ཀ་ཆེན་སྒྲུབ་པའི་ཐབས། །དེ་ནས་ཡང་དག་བཤད་པར་བྱ། །རྣལ་འབྱོར་འཁོར་བར་བཅིངས་པ་ལ། །གང་ཞིག་ཤེས་པས་མྱུར་གྲོལ་བ། །ཕྱག་གཉིས་པ་ལ་ཞལ་གཅིག་སྟེ། །ཁ་དོག་སྔོན་པོ་ཕྱེད་གར་ཅན། །རྡོ་རྗེ་ཕྱག་ཏུ་བསྒོམ་པར་བྱ། །གཞན་ཡང་ཐོད་པ་བསྒོམ་པར་བྱ། །སྤྱན་གསུམ་སྐྲ་ནི་གྱེན་དུ་འགྲེང་། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱྃ་ག་ནི་གཡོན་ཕྱོགས་སུ། །ཕྲེང་བ་དག་གིས་རྐང་པ་བརྒྱན། །ས་བོན་ཧཱུྃ་ལས་ཡང་དག་བྱུང་། །ཡི་དགས་ལ་གནས་རྟག་ཏུ་དགོད། །སངས་རྒྱས་ལྔ་རུ་རབ་སྦྱོར་བ། །ཐོད་པ་ལྔ་ནི་དབུ་ལའོ། །ཅོད་པན་ལ་ནི་མི་བསྐྱོད་བསྒོམ། །ཧེ་རུ་ཀར་གྲགས་བསྒོམ་པར་བྱ། །ཤར་དུ་ཆོས་ཀྱི་འཁོར་ལོ་མ། །སངས་རྒྱས་བྱང་ཆུབ་ལྷོ་རུའོ། །འདོད་པ་ཀུན་གྱི་འཁྲིས་མ་ནུབ། །བྱང་དུ་ཧེ་རུ་ཀ་ཉིད་འདྲ། །རྒྱན་ཀུན་གྱིས་ནི་རྣམ་བརྒྱན་པའི། །ཁ་དོག་སྣ་ཚོགས་རྣམ་པར་དགོད། །གཟུགས་མཛེས་ཡི་དགས་ལ་བཞུགས་པ། །གཏི་མུག་ཐམས་ཅད་ཉེར་འཇོམས་བྱེད། །ཆོས་འཁོར་ཨ་ཤྭཏྠའི་དབྱུག་པ། །དེ་བཞིན་ཡིད་བཞིན་ནོར་བུའི་ཤིང་། །ལྷ་མོ་རྣམས་ཀྱི་ཕྱག་གཡས་སུ། །རྡོ་རྗེ་ཡང་ནི་བསྒོམ་པར་བྱ། །ཆོས་ཀྱི་འཁོར་ལོ་ཐམས་ཅད་ལ། །ཐོད་པའི་སྣོད་ནི་གཡོན་པ་ལ། །སྤྱན་མ་མཱ་མ་ཀཱི་སྒྲོལ་མ། །གོས་དཀར་ཡིད་དུ་འོང་བ་རྣམས། །མེ་ལ་སོགས་པའི་མཚམས་བཞི་རུ། །འཁོར་ལོ་ཕྱི་རོལ་གཤིན་གཤེད་དོ། །ཤེས་རབ་མཐར་བྱེད་རྟ་མགྲིན་དང་། །འཁྱིལ་བར་བཅས་པ་བསྒོམ་

པར་བྱ། །འཁོར་ལོ་ཡི་ནི་སྒོ་སྲུངས་ཏེ། །ཆོ་གའི་ལས་ནི་མཐོང་བས་སོ། །གཤིན་རྗེའི་གཤེད་ནག་པོའི་རྒྱུད་ལས་ཧེ་རུ་ཀ་བསྒྲུབ་པའི་རིམ་པར་ཕྱེ་བ་སྟེ་བཅུ་དྲུག་པའོ།། །།རྣམ་པ་ལྔ་ནི་བསྒོམས་བྱས་ལ། །སངས་རྒྱས་གཟུགས་ནི་བསྒོམ་པར་བྱ། །སངས་རྒྱས་གཟུགས་ནི་བསྒོམ་པ་ཡིས། །མཁས་པས་འཁོར་ལོ་བསྒོམ་པར་བྱ། །གྲུ་བཞི་ཡི་ནི་སྦྱོར་བ་ཡིས། །འཁོར་ལོ་བསྐྱེད་པར་བྱ་བ་སྟེ། །ཙརྩི་ཀཱ་སོགས་གླུ་དང་ནི། །དྲུག་པ་སྐྱེས་སོགས་ལེན་པར་བྱེད། །སྙིང་རྗེ་ཁྲོས་པའི་དད་སྒྲོལ་བཞེངས། །ཁམས་གསུམ་ཀུན་གྱི་གཏི་མུག་སོལ། །དད་སྒྲོལ་གསོལ་བས་མ་བཞུགས་བཞེངས། །བདུད་འདི་དག་ལས་རྒྱལ་བར་མཛོད། །འཇིག་རྟེན་མགོན་པོ་སྟོང་ཉིད་ཇི་སྟེ་བཞུགས། །དད་སྒྲོལ་འཇིག་རྟེན་བསོད་ནམས་ཀྱིས་བཞེངས་ཤིག །བྱང་ཆུབ་འདོད་པའི་འཇིག་རྟེན་མགྲོན་བོས་ནས། །ཁྱོད་ནི་སྟོང་པ་ཉིད་ལ་སེམས་པར་བྱེད། །ཇི་ལྟར་སྐར་མདའ་འཕོ་བ་བཞིན། །བྱང་ཆུབ་སེམས་ལ་ཞུགས་པར་གྱུར། །རྡོ་རྗེ་འཆང་རང་ངོ་བོ་ཉིད། །སྙིང་རྗེ་དང་ནི་འདོད་ཆགས་སེམས། །དང་པོར་བསྒོམ་པ་རྣལ་འབྱོར་ཏེ། །གཉིས་པ་རྗེས་ཀྱི་རྣལ་འབྱོར་ཡིན། །གསུམ་པ་ཤིན་ཏུ་རྣལ་འབྱོར་ཏེ། །བཞི་པ་རྣལ་འབྱོར་ཆེན་པོའོ། །རྡོ་རྗེ་སེམས་དཔའ་རྫོགས་པ་ཡིན། །རྣལ་འབྱོར་ཡིན་པར་འདི་ལྟར་འདོད། །དེ་ནི་རྒྱུ་མཐུན་ལྷ་ཡི་སྐུ། །རྗེས་ཀྱི་རྣལ་འབྱོར་ཡིན་པར་གྲགས། །འཁོར་ལོ་ཐམས་ཅད་ཡོངས་རྫོགས་པ། །ཤིན་ཏུ་རྣལ་འབྱོར་ཡིན་པར་གྲགས། །སྐུ་དང་གསུང་དང་ཐུགས་རྣམས་དང་། །ལྷ་ཡི་མིག་སོགས་བྱིན་རླབས་དང་། །ཡེ་ཤེས་འཁོར་ལོ་གཞུག་པ་དང་། །བདུད་རྩི་མྱང་བ་དག་དང་ནི། །མཆོད་དང་བསྟོད་པ་ཆེན་པོ་དག །རྣལ་འབྱོར་ཆེན་པོ་ཞེས་བྱའོ། །སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་འདའ་མི་བྱ། །དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་གཞན་ཆོས་ལ་སྨད་མི་བྱ། །སེམས་ཅན་ལ་ནི་བྱམས་པ་དག །ནམ་ཡང་གཏང་བར་མི་བྱའོ། །ཡོངས་སུ་མ་སྨིན་སེམས་ཅན་ལ། །གསང་

བ་དག་ནི་བསྟན་མི་བྱ། །བདག་སོགས་ཕུང་པོ་བརྙས་མི་བྱ། །གྲོང་པའི་ཆོས་ནི་སུན་མི་གདོན། །གདུག་ལ་བྱམས་པ་རྟག་ཏུ་སྤང་། །ཆོས་ལ་ཚད་གཞལ་བར་མི་བྱ། །སེམས་ཅན་དད་པ་ཅན་མི་བསླུ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པ་ཉེས་པ་དེ་བཞིན་ནོ། །རྣལ་འབྱོར་སློང་མོས་རྒྱུ་མི་བྱ། །རྣལ་འབྱོར་སྤང་བར་མི་བྱ་སྟེ། །རྟག་པར་རྒྱུན་དུ་གསང་སྔགས་བཟླ། །རྟག་ཏུ་དམ་ཚིག་ལ་སོགས་བསྟེན། །གལ་ཏེ་བག་མེད་བྱུང་གྱུར་ན། །བླ་མ་དམ་ཚིག་ལ་གནོད་ན། །དེས་ནི་དཀྱིལ་འཁོར་བྲི་བྱས་ལ། །བདེ་གཤེགས་རྣམས་ལ་ཉེས་པ་བཤགས། །སྙིང་རྗེ་ཅན་གྱིས་མི་བརྟག་པར། །དད་པས་བླ་མའི་དམ་ཚིག་བསྲུང་། །ཉེས་པ་མ་ལུས་རྣམ་སྤངས་སེམས་ཀྱིས་ནི། །བསམ་གཏན་ལ་སོགས་བཟླས་པ་མཆོག་གཞོལ་བར། །བྱས་ལ་རྟག་ཏུ་བླ་མ་བླ་མར་བྱ། །བརྟན་ཞིང་དུལ་ལ་སྙིང་རྗེ་གཅིག་ཏུ་སེམས། །དད་དང་ལྷག་པའི་བསམ་པས་བཟོད་པ་འཛིན། །སློབ་མ་བླ་མ་ལ་ནི་གུས་པ་དང་། །དད་པས་གཤིན་རྗེའི་གཤེད་ལ་གུས་པ་ལ། །བརྟུལ་ཞུགས་ལྡན་པས་དེ་ནི་ཡོངས་སྦྱིན་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་དགའ་བ་ཆེན་པོའི་ངོ་བོ་རྡོ་རྗེ་འཆང་གི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏེ། འདི་ལྟ་བུའི་ཆེད་དུ་བརྗོད་པས་ཆེད་དུ་བརྗོད་དོ། །བརྟུལ་ཞུགས་མཐར་ཐུག་ཐོད་པ་ཆེན་པོ་ལྟར། །འཁྲུལ་འཁོར་མཐར་ཐུག་གཤིན་རྗེའི་གཤེད་ཀྱི་རྒྱུད། །རྒྱུད་ཀྱི་མཐར་ཐུག་པ་ནི་འདུས་པ་སྟེ། །བྱུང་བར་མ་གྱུར་འབྱུང་བར་མི་འགྱུར་རོ། །ཨེ་མའོ་ཞི་བ་ཆེན་པོའི་ཆོས། །ཨེ་མའོ་ཁྲོ་བོ་འཇིགས་མཛད་པ། །ཨེ་མའོ་མྱ་ངན་འདས་པའི་མཆོག །ཨེ་མའོ་འཁོར་བ་ཞི་བ་ཉིད། །ཨེ་མའོ་འདི་ནི་རབ་ཏུ་མཚར། །ཉེས་པ་གང་དེ་ཡོན་ཏན་འགྱུར། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མ་ཡིན་བསྒོམ་བྱ་མིན། །ཁམས་མ་ཡིན་ཞིང་རྣམ་ཤེས་མིན། །ནམ་མཁའི་ཁམས་དང་མཚུངས་པ་ཉིད། །ནམ་མཁའ་ལྟ་བུར་བདག་མེད་པ། །ཆོས་འདི་

བདེ་བ་ཆེན་པོ་སྟེ། །ས་ཡང་མ་ཡིན་ཆུ་མིན་ཏེ། །མེ་མིན་རླུང་མིན་ནམ་མཁའ་མིན། །རྡོ་རྗེ་སེམས་དཔའི་སྦྱོར་བ་ཡིས། །བསྐྱེད་པ་ཡང་ནི་རབ་གནས་ནས། །དངོས་པོ་ཐམས་ཅད་དངོས་མེད་བཤད། །དངོས་པོ་མེད་ཅེས་མ་བསྒྲགས་པ། །རྣལ་འབྱོར་སྦྱོར་བ་དང་འབྲེལ་ཕྱིར། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་དོག་མེད། །ཐོག་མ་བར་དང་མཐའ་སྤངས་པ། །དངོས་པོ་ཐམས་ཅད་མེད་པར་འགྱུར། །མཆོག་ཏུ་དགའ་བའི་མཚན་ཉིད་དོ། །དེ་ནས་བཅོམ་ལྡན་འདས་ཙརྩི་ཀཱ་ཆེན་པོ་ལ་སོགས་པས་ཆེད་དུ་བརྗོད་པས་ཆེད་དུ་བརྗོད་དོ། །བསོད་ནམས་སྡིག་པ་དག་དང་མ་འབྲེལ་བས། །མཆོག་ཏུ་དགའ་བ་དྲི་མེད་དག་པའི་མགོན། །དེ་བཞིན་ཉིད་ཀྱི་གཏེར་ཆེན་གཅིག་པུ་དང་། །ཀུན་ཀྱང་སྙིང་རྗེའི་སེམས་ཀྱིས་མགོན་འདི་ཡོད། །ཆོས་རྣམས་ངོ་བོ་བདེ་བ་ཆེན་པོའི་དངོས། །མཆོག་ཏུ་དགའ་བ་འདི་ཡི་ངོ་བོ་ཉིད། །དེ་ལ་གཟུགས་མེད་བསོད་ནམས་མེད་ཅིང་སྡིག་པ་མེད། །སྐྱེ་བ་དང་ནི་འགག་པ་དག་ནི་ཡོད་མ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་བྱང་ཆུབ་ཀྱི་སེམས་ཀྱི་རིམ་པར་ཕྱེ་བ་སྟེ་བཅུ་བདུན་པའོ།། །།དེ་ནས་གཏམ་རྒྱུད་བཤད་པར་བྱ་སྟེ། བཅོམ་ལྡན་འདས་མངོན་པར་བྱང་ཆུབ་པའི་དུས་སུ་བཅོམ་ལྡན་འདས་ཐུབ་པ་ཆེན་པོ་ལ་བྱང་ཆུབ་ཀྱི་བར་དུ་གཅོད་པའི་ཕྱིར་ཤིན་ཏུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་། བདུད་ཀྱི་དཔུང་ཆེན་པོ་ལྷགས་ཏེ། །དེའི་དུས་ན་བདུད་ཆེན་པོ་ལས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེའི་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་ལག་ན་རྡོ་རྗེ་ཐུབ་པ་ཆེན་པོའི་བཀའ་བཞིན་བྱེད་པ་ལ། ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེའི་གཤེད་ཀྱི་ཁྲོ་བོའི་གཟུགས་སུ་བསྒྱུར་ཏེ། བདུད་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ལྷ་རྣམས་ཀྱང་ཆོམས་ཤིག །ཆིངས་ཤིག །རྟོགས་ཤིག་ཅེས་གསུངས་སོ། །དེའི་དུས་ན་

ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། སྐད་ཅིག་ལ་བཟུང་ཞིང་དོན་བཟུང་སྟེ་བསྡུས་ནས་རབ་ཏུ་ཡིད་ལ་བྱས་སོ། །ཞེས་གསང་བ་ཆེན་པོའི་བདག་པོ་ཆེན་པོ་རྡོ་རྗེ་རིགས་ཀྱི་གཙོ་བོ་ནཱ་ད་ཀུ་བེ་རའི་ཡབ་ཀྱིས་དེ་སྐད་ཅེས་གསུངས་སོ། །ཨཽཌྱན་གྱི་ཡུལ་ནས་ཡང་དག་པར་བྱུང་བ་དངོས་གྲུབ་ཐམས་ཅད་སྐྱེད་པར་བྱེད་པ་རྒྱུད་ཀྱི་རྒྱལ་པོ་འབུམ་ཕྲག་བདུན་པ་ལས་ཕྱུང་བ་གཤིན་རྗེའི་གཤེད་ནག་པོའི་རྒྱུད་ལས་ལེའུ་བཅྭ་བརྒྱད་པའོ།། །།དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་རྫོགས་སོ།། །།རྒྱ་གར་གྱི་མཁན་པོ་ཆེན་པོ་མཁས་པ་དཱི་པཾ་ཀར་ཤྲཱིཛྙཱ་ན་དང་། བོད་ཀྱི་ལོཙྪ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པ། སླད་ཀྱིས་ལོཙྪ་བ་དགེ་སློང་དར་མ་གྲགས་ཀྱིས་བཅོས་ལ། དེ་ལས་ཀྱང་དགེ་སློང་རྡོ་རྗེ་གྲགས་ཀྱིས་བཅོས་སོ།། །།

དཔལ་རྡོ་རྗེ་འཇིགས་བྱེད་ཆེན་པོའི་རྒྱུད།

རྒྱ་གར་སྐད་དུ། ཤྲཱི་བཛྲ་མ་ཧཱ་བྷཻ་ར་བ་ནཱ་མ་ཏནྟྲ། བོད་སྐད་དུ། དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་ཅེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོ་ཁྲོས་པའི་རྒྱལ་པོ་ལ་ཕྱག་འཚལ་ལོ། །དེ་ནས་རྡོ་རྗེ་འཇིགས་བྱེད་ཀྱི། །བསྒྲུབ་པ་ཡང་དག་རབ་བཤད་དེ། །དེ་ནི་ལྷ་རྣམས་ཐམས་ཅད་ལ། །དྲག་ཤུལ་ཆེ་ཞིང་འཇིགས་པར་བྱེད། །དེ་ལ་ཐོག་མར་སྔགས་པས་ཡིད་དུ་འོང་བའི་གནས་གང་ཡང་རུང་བར་གནས་ལ་དགོས་པ་ཐམས་ཅད་བསྒྲུབ་པར་བྱའོ། །དེ་ལ་གནས་གསུངས་པ་ནི། དུར་ཁྲོད་དམ། ཆུ་ཀླུང་གི་འགྲམ་མམ། ཤིང་གཅིག་གམ། མཚན་མ་གཅིག་པའམ། བཞི་མདོའམ། རིའི་རྩེ་མོའམ། ཁང་སྟོང་དམ། མ་མོའི་ཁྱིམ་མམ། ལྷའི་ཁང་པའམ། འཐབ་མོའི་གནས་སམ། གྲོང་ཁྱེར་རམ། ནགས་ཁྲོད་དམ། གྲོང་བར་ལ་སོགས་པའི་གནས་སུ་སྔགས་པ་གནས་ཏེ། དཔལ་རྡོ་རྗེ་འཇིགས་བྱེད་ཆེན་པོའི་དབང་བསྐུར་བའི་རྣལ་འབྱོར་པས་དབང་དང་། དགུག་པ་དང་། གསད་པ་དང་།བསྐྲད་པ་དང་། དབྱེ་བ་དང་། རེངས་པ་དང་། རལ་གྲི་དང་།

མིག་སྨན་དང་།ས་འོག་དང་།རིལ་བུ་དང་། གསེར་འགྱུར་དང་། བཅུད་ཀྱིས་ལེན་པ་དང་། ནོར་དང་། འབྱུང་པོ་དང་། རོ་ལངས་དང་། ཤ་ཟ་དང་། གནོད་སྦྱིན་དང་། གནོད་སྦྱིན་མོ་དང་། ཀླུ་ལ་སོགས་པ་ཆོ་ག་འདིས་བསྒྲུབ་པར་བྱའོ། །དེ་ལ་ཆོ་ག་ནི་དང་པོར་རེ་ཞིག་སྔགས་པས་རོ་བསྲེགས་པའི་ཐལ་ཆེན་གྱིས་ལུས་བྱུགས་ཏེ། མཚན་ཕྱེད་ན་གཅེར་བུ་སྐྲ་བསིལ་བུ་བྱས་ལ་འཕགས་པ་མ་ཧེའི་གདོང་ཅན་གྱི་རྣལ་འབྱོར་གྱིས་དུར་ཁྲོད་ལ་སོགས་པར་དཀྱིལ་འཁོར་བྲིས་ཏེ། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲིལ་བུ་དར་གྱི་འཕན་ལ་སོགས། །མེ་ཏོག་ཕྲེང་བས་རྣམ་པར་བཀླུབས། །གྲྭ་རྣམས་དག་ནི་ཐམས་ཅད་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་གྱིས་སྤྲས་པའི། །ཟླ་བ་ཕྱེད་པ་དེ་བཞིན་ནོ། །དེ་དབུས་འཁོར་ལོ་བྲི་བ་ནི། །རེའུ་མིག་དགུ་པ་ཟླུམ་པོའོ། །སྒོ་གཅིག་པ་ནི་དབྱེ་བར་བྱ། །ལྷག་མ་ཡོངས་སུ་གཅད་པར་བྱ། །དེ་དབུས་མི་རོ་བྲི་བར་བྱ། །ཤར་དུ་མགོ་བོ་ལྷོར་ལག་པ། །ནུབ་ཏུ་རྒྱུ་མ་བྱང་དུ་རྐང་པ། ཤར་ལྷོའི་གྲྭར་ཐོད་པ། ལྷོ་ནུབ་ཏུ་ཐོད་ཚལ། ནུབ་བྱང་དུ་དུར་ཁྲོད་ཀྱི་རས། བྱང་ཤར་དུ་སྐྱེས་བུ་གསལ་ཤིང་ལ་བཙུགས་པའོ། །དེ་དག་ནི་འཁོར་ལོའི་དབུས་སུ་མཚན་མའི་ཕྱག་རྒྱ་ལྔའོ། །དེ་ནས་འཁོར་ལོའི་ཕྱི་རོལ་གྱི་ཕྱག་རྒྱ་རྣམས་ནི་ཤར་ཕྱོགས་ཀྱི་སྣམ་བུ་ལ་གྲི་གུག་དང་། མཚོན་རྩེ་གཅིག་པ་དང་། གཏུན་ཤིང་དང་། ཆུ་གྲི་དང་། རྡོ་རྗེ་རྩེ་གཅིག་པ་དང་། ལྕགས་ཀྱུ་ལ་སོགས་པ་རྣམས་བྲིའོ། །ལྷོ་ཕྱོགས་ཀྱི་སྣམ་བུ་ལ་སྟ་རེ་དང་། མདའ་དང་། ཁ་ཊྭཱཾ་ག་དང་། དབྱིག་ཏོ་དང་། འཁོར་ལོ་དང་། རྡོ་རྗེ་ཞགས་པ་ལ་སོགས་པ་བྲིའོ། །ནུབ་ཕྱོགས་ཀྱི་སྣམ་བུ་ལ་རྡོ་རྗེ་དང་། རྡེའུ་ཆུང་དང་། ཕུབ་དང་། གཞུ་དང་། དྲིལ་བུ་དང་། རླུང་གི་རས་ལ་སོགས་པ་བྲིའོ། །བྱང་ཕྱོགས་ཀྱི་སྣམ་བུ་ལ་སྡིགས་མཛུབ་དང་། འཕན་རྩེ་གསུམ་པ་དང་། གླང་པོའི་པགས་པ་དང་། རྡོ་རྗེ་ཐོ་བ་དང་། མདུང་དང་། མེ་ཐབ་ལ་སོགས་པ་བྲིའོ། །སྒོ་བཞི་དང་གྲྭ་རྣམས་ལ་རོ་ལངས་ཆེན་པོ་བྲིའོ། །གལ་ཏེ་མཆོག་གི་དངོས་གྲུབ་

འདོད་ན་མར་ཁུ་ཆེན་པོའི་མར་མེ་དབུལ་ལོ། །མི་དང་།བོང་བུ་དང་། རྔ་མོ་དང་། ཁྱི་དང་། ཝ་དང་། མ་ཧེ་དང་། གླང་པོ་ཆེ་དང་། བ་ལང་དང་། བ་མེན་དང་། ལུག་དང་། རི་དགས་དང་། ཕག་པ་ལ་སོགས་པའི་ཤ་རྣམས་དབུལ་བར་བྱའོ། །གཞན་ཡང་བྱ་རྒོད་དང་། འུག་པ་དང་། བྱ་རོག་དང་། ཁྲ་དང་། ཆུ་སྐྱར་དང་། མཐིང་རིལ་དང་། བཞད་དང་། རྨ་བྱ་དང་། ཁྱིམ་བྱ་དང་། རི་སྐེགས་དང་། ལྟས་ངན་ཆེན་པོ་ལ་སོགས་པའི་ཤ་རྣམས་དབུལ་བར་བྱའོ། །ཤིན་ཏུ་མཉམ་པར་བཞག་པས་བཟའ་བ་དང་། སྟོན་མོ་དང། སྦྱིན་སྲེག་དང་། གཏོར་མའི་ལས་བྱའོ། །དཀྱིལ་འཁོར་གྱི་གྲྭ་ཐམས་ཅད་དུ་ཁྲག་གིས་ཆག་ཆག་བྱའོ། །དཔལ་རྡོ་རྗེ་འཇིགས་བྱེད་མ་ཧེའི་གདོང་གི་སྦྱོར་བ་ལ་གནས་པས་ལྷ་བཤོས་ཐམས་ཅད་དབུལ་བར་བྱའོ། །དེ་ནས་སྔགས་པས་སྔོན་དུ་སྤྱད་པ་བྱས་ཏེ། བདག་ཞི་བར་གྱུར་པའི་ཤིན་ཏུ་མཐུན་པའི་གྲོགས་སམ། བདག་གཅིག་པུ་རྣམ་པར་སྣང་མཛད་ཀྱིས་ལུས་བྱུགས་ཏེ། གཅེར་བུར་ཕུད་ནས་སྐྲ་བསིལ། མཚན་ཕྱེད་ནས་ཅང་ཏེའུ་དཀྲོལ་ལ་ཧ་ཧ་ཞེས་བྱ་ཞིང་མཉམ་པར་གཞག་སྟེ། རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་དུ་དངོས་གྲུབ་འདོད་པས་འཇུག་པར་བྱའོ། །རབ་ཏུ་ཞིམ་པའི་ཆང་ལ་སོགས་པ་བཏུང་བ་དང་། བཟའ་བའི་རོ་རྣམས་དབུལ་ལོ། །ཕྱི་ནས་དངོས་གྲུབ་དང་། དངོས་གྲུབ་མ་ཡིན་པ་ལ་དམིགས་ལ་དེའི་སྟེང་དུ་དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་བསམ་པར་བྱའོ། །དེའི་མདུན་དུ་གཡས་བསྐུམ་དུ་གནས་ལ་ང་རྒྱལ་དང་བཅས་པས་སེམས་རྩེ་གཅིག་ཏུ་ཤིན་ཏུ་མཉམ་པར་བཞག་པས་ཡི་གེ་བཅུ་པའི་སྔགས་བཟླ་བར་བྱའོ། །དེ་ནས་འཇིགས་པ་ཆེན་པོ་བྱུང་ན། དེ་ལ་སྔགས་པས་འཇིགས་པར་མི་བྱ་སྟེ། གལ་ཏེ་འཇིགས་པར་གྱུར་ན། དེ་ལ་བགེགས་ཆེན་པོའི་བར་ཆད་འགྱུར་རོ། །བར་ཆད་བྱུང་ན་དངོས་གྲུབ་མི་འགྲུབ་པོ། །དེ་བས་ན་སྔགས་པས་འཇིགས་པར་མི་བྱ་སྟེ། དེ་ལ་དཔལ་རྡོ་རྗེ་འཇིགས་བྱེད་ཆེན་པོ་དགྱེས་སོ། །དགྱེས་ནས་ཁྱོད་ཅི་འདོད་ཅེས་གསུང་པ་དང་། དེ་ལ་རིག་འཛིན་གྱིས་སྨྲ་བར་བྱ་སྟེ། རལ་གྲི་དང་།

ས་འོག་དང་། མིག་སྨན་དང་། གསེར་འགྱུར་དང་། བཅུད་ཀྱིས་ལེན་པའམ། དེ་ལས་གཞན་ཡང་ཡིད་ལ་འདོད་པའི་དངོས་གྲུབ་ངེས་པར་བདག་ལ་སྩོལ་ལོ། །བརྒྱ་ཞིག་ལ་སྔགས་པས་དེ་དག་མ་གྲུབ་ན་ཡང་དེའི་ཕྲ་མོའི་ལས་ཐམས་ཅད་ངེས་པར་འགྲུབ་བོ། འདི་ནི་འཇམ་དཔལ་ཞེས་བྱ་བའི་མིང་དཔལ་རྡོ་རྗེ་འཇིགས་བྱེད་ཆེན་པོའི་འཁོར་ལོའི་རྣལ་འབྱོར་རྒྱུད་ལས་དཀྱིལ་འཁོར་བསྟན་པ་སྟེ་རྟོག་པ་དང་པོའོ།། །།དེ་ནས་ལས་ཀྱི་ཚོགས་ཀྱི་ཆོ་ག་རབ་ཏུ་བཤད་དེ་རིམ་པ་ཇི་ལྟ་བ་བཞིན་དུ། བསད་པ་དང་། བསྐྲད་པ་ལ་སོགས་པ་སྔགས་པ་ཁྲོས་པས་དཔལ་རྡོ་རྗེ་འཇིགས་བྱེད་ཆེན་པོའི་སྦྱོར་བ་ལ་གནས་པས་བྱ་སྟེ། དང་པོར་རེ་ཞིག་སྔགས་པས་གསད་པར་བྱ་སྟེ། དེ་ཅིའི་ཕྱིར་ཞེ་ན། རྣལ་འབྱོར་གཙོ་བོ་ཡིན་པའི་ཕྱིར་རོ། །རྣལ་འབྱོར་གྱི་རྒྱུད་ལ་ལྷའི་སྦྱོར་བ་དང་ལྡན་པས་ཐོག་མར་ནི་དེ་བྱ་སྟེ། དེ་སྦྱོར་བའི་གཙོ་བོ་ཡིན་པའི་ཕྱིར་རོ། །དེ་ལ་འདིའི་ལས་ནི་ཇི་ལྟར་གསད་པར་འདོད་པའི་སྔགས་པས་དུར་ཁྲོད་ཀྱི་རས་ལ། དུག་དང་། ཁྲག་དང་། ལན་ཚྭ་དང་། སྐེ་ཚེ་དང་། ནིམ་པ་དང་། [དྷ་དུ་རའི་]ཁུ་བ་ཡིས་རྡོ་རྗེ་འཇིགས་བྱེད་ཆེན་པོའི་འཁོར་ལོ་ལེ་ཚེ་བཅུ་དྲུག་པ་བྱ་རོག་ཆེན་པོའི་སྒྲོ་རྩའི་སྨྱུ་གུའམ། མིའི་རུས་པའི་སྨྱུ་གུས་གཅེར་བུ་སྐྲ་བཤིག་པས་ཁ་ལྷོར་བལྟས་ཏེ། མ་ཧེའི་གདོང་གི་སྦྱོར་བས་བྲི་བར་བྱའོ། །མེ་གཉིས་ཀྱི་དབུས་སུ་བསྒྲུབ་བྱའི་མིང་དང་བཅས་པར་གཞག་ལ་དེ་ཡི་གེ་བཅུ་པས་བསྐོར་ཞིང་ཧཱུྃ་བརྒྱད་བྲི། ཟུར་རྣམས་སུ་ཕཊ་ཀྱི་ཡི་གེ་རྣམས་བྲི། བདག་ཉིད་ཚ་བའི་མར་གྱིས་ལུས་བྱུགས་ལ། ཐོད་པ་གཉིས་ཀྱི་དབུས་སུ་འཁྲུལ་འཁོར་རབ་ཏུ་བཅུག་ལ་སྒྱེད་པུ་གསུམ་གྱི་སྟེང་དུ་བཞག་ནས་དུར་ཁྲོད་ཀྱི་མགལ་མེ་རབ་ཏུ་སྦར་ཏེ། རྐང་པ་གཡོན་པས་མནན་ལ་ཡི་གེ་བཅུ་པའི་སྔགས་བཟླས་སོ། །དེ་ཡིས་སྐད་ཅིག་གིས་ཐེ་ཚོམ་མེད་པར་འཆིའོ། །གཞན་ཡང་རིམས་ཀྱིས་ཐེབས་པར་འདོད་ན་འཁོར་ལོ་དེ་ཉིད་མིའི་ཉ་ཕྱིས་གཉིས་ཀྱི་དབུས་སུ་ལེགས་པར་བཞག་ལ་མེ་ཐབ་ཀྱི་འོག་ཏུ་ཁྲུ་ཕྱེད་བརྐོས་ལ་བཅུག་ནས་མེ་སྦར་ན་རིམས་ནད་ཀྱིས་འཛིན་ནོ། །

དེ་ལ་ལེ་ཚེ་བཅུ་དྲུག་པའི་རབ་ཏུ་སྦྱོར་བ་འདི་གསུངས་ཏེ། འོན་ཀྱང་འདིའི་ཁྱད་པར་ནི་ཡི་གེ་སུམ་ཅུ་རྩ་གཉིས་པའི་སྔགས་དང་ལྡན་པ་ཡི་གེ་བཅུ་པའི་སྔགས་བསྒྲུབ་བྱའི་མིང་དང་ལྷན་ཅིག་ཏུ་ཡི་གེ་དང་སྔགས་སྤེལ་ལོ། །སྔོན་དུ་གསུངས་པའི་རྫས་དང་ལྷན་ཅིག་ཏུ་བྱ་རོག་གིས་བཏོགས་པའི་ལྷག་མ་མི་གཙང་བ་དང་། རྣམ་པར་སྣང་མཛད་དང་ལྷན་ཅིག་ཏུ་དུར་ཁྲོད་ཀྱི་རས་ལ་བྱུགས་ཏེ། དེ་ལ་སྔོན་དུ་གསུངས་པའི་ཆོ་གས་འཁོར་ལོ་བྲིས་ཏེ། དུར་ཁྲོད་དུ་སྦས་ན་འཆི་བར་འགྱུར་རོ། །ཤིང་གཅིག་གི་དྲུང་དུ་སྦས་ན་བསྐྲད་པར་འགྱུར་རོ། །མཚན་མ་གཅིག་པར་སྦས་ན་དབྱེ་བར་འགྱུར་རོ། །ཆུའི་ནང་དུ་སྦས་ན་རེངས་པར་འགྱུར་རོ། །ཁྱིམ་དུ་བཞག་ན་ཞི་བར་འགྱུར་རོ། །ཕྱུང་ནས་ལེགས་པར་བཀྲུས་ན་གྲོལ་བར་འགྱུར་རོ། །གཞན་ཡང་རབ་ཏུ་སྦྱོར་བ་གསུངས་པ་གཤིན་རྗེའི་འཁོར་ལོ་སྔོན་གྱི་ཆོ་གས་དུར་ཁྲོད་ཀྱི་རས་ལ་བྲིས་ཏེ། དུར་ཁྲོད་དམ། ལམ་བཞི་མདོ་དང་། ཤིང་གཅིག་དང་། གྲོག་མཁར་དང་། ཆུ་འགྲམ་དང་། མཚན་མ་གཅིག་པ་དང་། རྒྱལ་པོའི་སྒོ་དང་། རྣམ་པར་སྣང་མཛད་དང་། རྡོ་རྗེ་ཆུ་དང་། དུར་ཁྲོད་ཀྱི་སོལ་བས་བསྒྲུབ་བྱའི་གཟུགས་བརྙན་ཚད་སོར་བརྒྱད་པ་བྱས་ལ་དེའི་སྙིང་གར་འཁོར་ལོའི་སྔགས་བཅུག་སྟེ། མིའི་རུས་པའི་ཕུར་བུས་གནས་ལྔར་གདབ་པར་བྱའོ། །ཚིགས་ཐམས་ཅད་ལ་ཚེར་མ་རྣོན་པོས་དགང་བར་བྱེད། །དེ་ཐོད་པ་གཉིས་ཀྱི་དབུས་སུ་བཅུག་སྟེ། དེ་གྲོག་མཁར་དང་གནས་བདུན་གྱིས་ས་གཤིན་རྗེའི་གཟུགས་ཁྲུ་གང་ཙམ་ཞལ་གཙིགས་པ། གསུས་པ་ཆེ་བ། ཞལ་གཅིག་པ། ཕྱག་གཉིས་པ། ཕྱག་ན་རལ་གྲི་དང་ཞགས་པ་འཛིན་པ། གཅེར་བུ་སྐྲ་བསིལ་བ་བྱས་ལ། དེའི་སྙིང་གར་ཐོད་པ་གཉིས་བཅུག་སྟེ། ཉི་མ་ཕྱེད་དམ་ནམ་ཕྱེད་ན་དུར་ཁྲོད་དམ། རོ་བསྲེགས་པའི་སར་སྦས་ཏེ། ཤིན་ཏུ་རིང་བར་མགོ་ལྷོར་བསྟན་ལ། ཁ་ཐུར་དུ་ཕུབ་ལ་སྦའོ། །ཁྱིམ་དུ་འོངས་པ་དང་མཉམ་པར་གཞག་པས་མ་ཧེའི་གདོང་གི་སྦྱོར་བས་བསྒྲུབ་བྱའི་མིང་དང་བཅས་པ་ཡི་གེ་བཅུ་པའི་སྔགས་བཟླས་པ་བྱས་ན་ཉི་མ་གསུམ་གྱིས་འཆིའོ། །ཕྱུང་ནས་བཀྲུས་

ན་ཐར་བར་འགྱུར་རོ། །དེ་ནས་རེངས་པའི་རབ་ཏུ་སྦྱོར་བ་གསུངས་ཏེ། ཏེའུ་ལོའི་པགས་པ་ལ་དུག་ལ་སོགས་པའི་རྫས་ཀྱིས་ཡི་གེ་བཅུ་པའི་སྔགས་བྲིས་ལ། པགས་པ་དེ་བསྒྲུབ་བྱའི་རྐང་རྗེས་ཀྱི་རྡུལ་དང་། གཅིན་བཏང་བའི་ཤུལ་གྱི་སས་བཀང་ལ་དེའི་སྐྲས་བཅིང་བར་བྱའོ། །ཕྱི་ནས་བོང་བུའི་གཅིན་དང་། རྣམ་པར་སྣང་མཛད་དང་ལྷན་ཅིག་ཏུ་བརྫིས་ལ་ཁམ་ཕོར་དགང་བར་བྱའོ། །དེར་འཁོར་ལོ་བཅུག་ལ་རོ་བསྲེགས་པའི་མེ་ལ་གཞག་སྟེ། རྐང་པ་གཡོན་པས་མནན་ལ་གཤིན་རྗེའི་སྦྱོར་བས་ཡི་གེ་བཅུ་པའི་སྔགས་བཟླས་པ་བྱས་ན་ཞག་གཅིག་གིས་རེངས་པར་བྱེད་དོ། །འདི་ནི་ཕྱིས་རྗེས་སུ་བཟུང་བ་མི་འགྲུབ་པའི་རབ་ཏུ་སྦྱོར་བའོ། །སྔགས་པ་ཤིན་ཏུ་ཁྲོས་པས་རབ་ཏུ་སྦྱོར་བ་བྱའོ། །གཞན་ཡང་དབྱེ་བའི་རབ་ཏུ་སྦྱོར་བ་ནི་གཤིན་རྗེའི་འཁོར་ལོ་སྔོན་གྱི་ཆོ་གས་བྲིས་ལ། གནས་བདུན་གྱི་སས་མ་ཧེ་དང་རྟ་བྱས་ཏེ། དེ་གཉིས་གཅིག་གི་སྟེང་དུ་གཅིག་གཞག་ལ། དེ་གཉིས་ཀྱི་སྙིང་གར་འཁོར་ལོ་བཅུག་སྟེ། ནིམ་པའི་ཤིང་དྲུང་དུ་གཞག་གོ །འཁོར་ལོ་ཡང་མ་ཧེ་དང་རྟའི་ཁྲག་གིས་བྲིས་ཏེ་འདི་ནི་སྔགས་ཀྱི་བྱེ་བྲག་སྟེ། ཤིན་ཏུ་མཉམ་པར་བཞག་པས་བྱས་ན་ཞག་གསུམ་གྱིས་འབྱེད་པར་བྱེད་དོ། །དེ་ནས་སྔགས་པས་བསྐྲད་པར་འདོད་ན་གནས་བདུན་གྱི་སས་རྔ་མོ་བྱས་ལ། དེའི་རྒྱབ་ཏུ་ཡི་གེ་ཡྃ་ཡོངས་སུ་གྱུར་པ་ལས་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པ་དམིགས་ཏེ། དེའི་སྟེང་དུ་བསྒྲུབ་བྱ་དམིགས་ལ། དེའི་རྒྱབ་ཏུ་གཤིན་རྗེའི་གཟུགས་ལག་པས་དབྱུག་པ་འཛིན་པར་དམིགས་ཏེ་དེའི་དབྱུག་པས་བརྡེག་ཅིང་ཁ་ལྷོ་རུ་བལྟས་ནས་ཁྲིད་པར་རྣམ་པར་བསམ་པར་བྱའོ། །འཁོར་ལོ་དེ་དེའི་སྙིང་གར་གོང་དུ་གསུངས་པའི་ཆོ་གས་བསྒྲུབ་བྱའི་མིང་དང་། སྤེལ་བ་ཡང་དག་པར་བྲིས་ལ་བཅུག་ན་ཞག་བདུན་གྱིས་ཐེ་ཚོམ་མེད་པར་སྐྲོད་པར་འགྱུར་རོ། །དེ་ནས་གཞན་ཡང་རབ་ཏུ་སྦྱོར་བ་གསུངས་ཏེ། ཉི་མའི་ཚེས་ལ་གཏུམ་པོ་ཚ་བའི་མར་ཁུས་བྱུགས་ལ་ནིམ་པའི་ཤིང་ལ་འཛེགས་ནས། དེར་གཞག་ལ་དེའི་ལུས་ཀྱི་མར་ཁུ་ཉ་

ཕྱིས་ཀྱིས་བཞར་ལ་དེར་གནས་པར་གཟུང་ངོ་། །མར་ཁུ་དེ་བླངས་ནས་ལྷ་ཆེན་པོའི་རྒྱལ་མཚན་གྱི་རས་བླངས་ལ་དེ་བསྲེགས་པའི་བར་གྱི་དུ་བའི་དྲེག་པ་དེ་དང་མར་ཁུ་དེ་གཅིག་ཏུ་བྱས་ལ་བསྐྲད་པར་འདོད་པ་དེའི་མཆིལ་ལྷམ་ལ་དེ་བསྐུའོ། །དེའི་ལག་པ་དང་རྐང་པ་གཉིས་ལ་ཡང་བྱུགས་ན་སྐད་ཅིག་གིས་དེ་སྐྲོད་དོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ་ནི་དུར་ཁྲོད་ཀྱི་རས་སམ། གྲོ་གའི་ལོ་མ་ལ་རླུང་གི་དཀྱིལ་འཁོར་བྱ་རོག་གི་ཁྲག་དང་བྱ་རོག་གི་སྒྲོའི་སྨྱུ་གུས་བྲི་བར་བྱ་སྟེ། རླུང་གི་དཀྱིལ་འཁོར་གྱི་དབུས་སུ་བསྒྲུབ་བྱའི་མིང་དང་སྤེལ་ཏེ་གཏོར་མ་ཟ་བའི་མགྲིན་པར་བཅིངས་ལ། བྱ་རོག་བཟུང་ནས་མ་ཧེའི་གདོང་པའི་སྦྱོར་བར་གནས་པས་ཁ་ལྷོར་བལྟས་ལ་འཕང་སྟེ། དེའི་སྐད་ཅིག་གིས་བྱ་རོག་བཞིན་ས་ཀུན་ཏུ་འཁོར་རོ། །གཞན་ཡང་བསྐྲད་པ་ནི་ཚ་བའི་མར་ཁུས་བསྐུས་ལ་ནིམ་པའི་ཤིང་ལས་གཏོར་མ་ཟ་བའི་ཚང་བླངས་ལ། ཚང་དེའི་ཤིང་ཕའི་ནགས་ཀྱི་ཤིང་མེས་བསྲེགས་པའི་ཐལ་བ་བླངས་ལ། གང་གི་མགོར་བླུགས་པ་དེ་སྐྲོད་པར་འགྱུར་རོ། །གཞན་ཡང་དབྱེ་བའི་རབ་ཏུ་སྦྱོར་བ་ནི། བྱ་རོག་དང་འུག་པའི་གཤོག་པ་དང་། བྲམ་ཟེ་དང་གཏུམ་པོ་རྣམས་ཀྱི་སྐྲ་གཅིག་ཏུ་བྱས་ལ། དྷ་དུ་རའི་ཤིང་ལ་མེ་རབ་ཏུ་སྦར་ཏེ། དུ་བ་མེད་པའི་མེས་བསྲེགས་ལ། དེའི་ཐལ་བ་བླངས་ལ་ཡི་གེ་བཅུ་པའི་སྔགས་བཟླས་ནས་བུད་མེད་དང་སྐྱེས་པ་གཉིས་ཀྱི་བར་དུ་ཐལ་བ་བཞག་ན། དེ་སྐད་ཅིག་གིས་འབྱེད་པར་བྱེད་དོ། །དེ་ནས་དུར་ཁྲོད་ཀྱི་རས་བླངས་ལ་དུག་ལ་སོགས་པའི་རྫས་ཀྱིས་བྲན་པའི་བར་དུ་བསྒྲུབ་བྱའི་མིང་བྲིས་ལ་ཟེར་མོ་དང་སྦྲུལ་གྱི་སྤུ་དང་པགས་པ་བླངས་ཏེ། དེ་ལ་བཅུག་ནས་སྡོང་བུ་བྱས་ཏེ། གང་གི་ཁྱིམ་དུ་སྦར་བ་དེར་ཕན་ཚུན་འཐབ་པར་འགྱུར་རོ། །དེ་ནས་གསད་པར་འདོད་པ་ནི་བཤང་གཅི་ལ་གཟུགས་བརྙན་བྱས་ལ། དེའི་སྟེང་དུ་རུས་པ་ཕྱེ་མས་རབ་ཏུ་བྱུགས་ལ། དུར་ཁྲོད་ཀྱི་མེ་ལ་སྐྲ་བཤིག་པ་བྱས་ལ། ཁ་ལྷོར་བལྟས་ཏེ་མ་ཧེའི་གདོང་པའི་སྦྱོར་བས་ནམ་ཕྱེད་ན་དེ་གཏུབས་ལ་བསྲེག་གོ །གང་གི་མིང་དང་བཅས་པར་བྱས་ན་དེ་སྐད་ཅིག་གིས་འཆིའོ། །རྡོ་རྗེ་འཇིགས་

བྱེད་ཆེན་པོ་ཉིད་ཀྱི་རབ་ཏུ་སྦྱོར་བ་འདི་གསུངས་སོ། །དེ་ནས་བསྐྲད་པར་འདོད་པས་རྒྱལ་མཚན་གྱི་རས་ལ་ལེ་ཚེ་བཅུ་དྲུག་པའི་འཁོར་ལོ་ལ་ཡི་གེ་བཅུ་པའི་སྔགས་སྔོན་དུ་གསུངས་པའི་རྫས་དང་དུར་ཁྲོད་ཀྱི་སོལ་བས་གང་གི་མིང་དང་བཅས་པ་བྲིས་ཏེ། ནིམ་པའི་ཤིང་ལ་རྒྱལ་མཚན་བཞག་ན་དེ་སྐྲོད་པར་འགྱུར་རོ། དེ་ནས་རེངས་པར་འདོད་པས་གཤིན་རྗེའི་འཁོར་ལོ་གཡམ་པའམ་རས་ལ་བ་བླ་དང་། ཡུང་བས་གང་གི་མིང་དང་བཅས་པ་ལེགས་པར་བྲིས་ལ་བཞག་ན། དེ་རེངས་པར་འགྱུར་རོ། གལ་ཏེ་སྔགས་པས་དབང་དུ་བྱ་བར་འདོད་ན། གྲོག་མཁར་གྱི་ས་དང་གུར་ཀུམ་དང་། གི་ཝང་དང་བ་བླ་དང་ཡུང་བ་རྣམས་ལྷན་ཅིག་ཏུ་བྱས་ཏེ། བསྒྲུབ་བྱ་ཕོའམ། གལ་ཏེ་མོའི་གཟུགས་བརྙན་སོར་བཅུ་དྲུག་པ་བྱས་ལ། གི་ཝང་དང་། སྲིན་ལག་གི་ཁྲག་གིས་གྲོ་ག་ལ་གཤིན་རྗེའི་འཁོར་ལོ་བྲིས་ཏེ། དེའི་སྙིང་གར་བཅུག་ནས་རང་གི་ཁྱིམ་དུ་བཞག་ལ། མེ་ཏོག་དམར་པོ་དུས་གསུམ་དུ་དབུལ་བ་དང་། ཁ་ནུབ་ཏུ་བལྟས་ལ་ཡི་གེ་བཅུ་པའི་སྔགས་བཟླས་པ་བྱས་ན། ཞག་བདུན་གྱིས་བརྒྱ་བྱིན་ཡང་དབང་དུ་འགྱུར་ན་ཡང་ཕྲ་མོའི་མི་ལྟ་ཅི་སྒོས། དེ་ནས་ཡང་དགུག་པར་འདོད་ན་དེ་ལ་ཐོད་པ་ལ་འཁོར་ལོ་གི་ཝང་དང་སྲིན་ལག་གི་ཁྲག་གིས་བྲིས་ཏེ། སེང་ལྡེང་གི་མེ་ལ་བསྲོ་ཞིང་གང་བྱ་བའི་མིང་དང་བཅས་པར་བཟླས་ན། དེ་སྐད་ཅིག་གིས་རླུང་གི་ཤུགས་བཞིན་དུ་འགུགས་པར་འགྱུར་རོ། དེ་ནས་སྔགས་པས་སྨྱོ་བར་བྱ་བར་འདོད་ན་དྷ་དུ་རའི་འབྲས་བུ་བླངས་ལ། ཤ་ཆེན་དང་ལྷན་ཅིག་ཏུ་ཤིང་སྲིན་གྱིས་ཟོས་པའི་ཕྱེ་མ་དང་བསྲེས་ནས་བཟའ་བ་དང་བཏུང་བ་སྦྱིན་ནོ། །སྔགས་ཀྱང་བཟླས་པ་བྱ་སྟེ། དེ་སྐད་ཅིག་གིས་སྨྱོ་བར་འགྱུར་ཞིང་ཞག་བདུན་གྱིས་འཆིའོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ། གཤིན་རྗེའི་སྔགས་དུར་ཁྲོད་ཀྱི་རས་ལ་དུག་ལ་སོགས་པའི་རྫས་ཀྱིས་བྲིས་ཏེ། མར་མེ་ཆེན་པོ་དང་རྣམ་པར་སྣང་མཛད་ཀྱིས་གཟུགས་བརྙན་བྱས་ལ། དེའི་སྙིང་གར་འཁོར་ལོ་བཅུག་ནས་ཕའི་གནས་སུ་སོང་ལ་རོ་བསྲེགས་པའི་མེ་ལ་མཚོན་རྣོན་

པོས་གཏུབས་ནས་རྣམ་པར་བརྩེགས་པའི་སྦྱོར་བས་རྣལ་འབྱོར་པ་གནས་པས། རྣམ་པར་སྣང་མཛད་ཀྱིས་ལུས་བྱུགས་ཏེ། ཁ་ལྷོར་བལྟས་ནས་བསྲེགས་ན་དེ་མྱུར་དུ་འཆིའོ། །དེ་ནས་དཔྲལ་བའི་རབ་ཏུ་སྦྱོར་བ་འབྱུང་བ་ནི་བྱ་རོག་དང་། འུག་པའི་རུས་པ་བླངས་ལ་དེ་གཉིས་ལ་ལྕགས་ཀྱི་ཚེར་མས་བསྒྲུབ་བྱའི་མིང་དང་ལྷན་ཅིག་ཏུ་ཡི་གེ་བཅུ་པའི་སྔགས་བྲིས་ལ། གཅིག་པུ་གནས་སུ་གནས་ཏེ། གང་གི་མིང་དང་བཅས་པར་བཟླས་ཤིང་། དེ་གཅིག་ལ་གཅིག་དྲུད་ན་འབྲལ་བར་འགྱུར་རོ། དེ་ནས་གཤིན་རྗེའི་འཁོར་ལོ་གྲོ་གའི་འདབ་མ་ལ་བུད་མེད་དང་སྐྱེས་པའི་མིང་བྲིས་ནས་སྦལ་བའི་གསུས་པར་བཅུག་ནས། གང་གི་མིང་དང་བཅས་པ་ཐེམ་པའི་འོག་ཏུ་སྦས་ན། དེའི་ཡན་ལག་མཚོན་གྱིས་འབུགས་པར་འགྱུར་རོ། དེ་ནས་བུ་མོ་རེངས་པའི་རབ་ཏུ་སྦྱོར་བ་འདི། གཤིན་རྗེའི་སྔགས་དུར་ཁྲོད་ཀྱི་རས་ལ་དུག་ལ་སོགས་པས་བྲིས་ལ། རོ་བསྲེགས་པའི་སོལ་བས་གཟུགས་བརྙན་མཐོ་གང་ཙམ་གྱི་ཚད་བརྩིགས་ལ། དེའི་སྙིང་གར་འཁོར་ལོ་བཅུག་ནས་རྐང་པ་གཡོན་པས་མནན་ལ། མ་ཧེའི་སྦྱོར་བས་ཆེ་གེ་མོའི་བུ་མོ་མྱུར་བར་རེངས་པར་གྱུར་ཅིག་ཅེས་ཡི་གེ་བཅུ་པའི་སྔགས་བཟླས་ན་རེངས་པར་འགྱུར་རོ། འདིའི་ལས་རྣམས་ནི་གཞན་སུ་ལ་ཡང་སྨྲ་བར་མི་བྱའོ། །གལ་ཏེ་སྔགས་པ་རྨོངས་པའི་བདག་ཉིད་ཅན་གྱིས་བྱེད་ན་དམྱལ་བར་ངེས་པར་ལྟུང་ངོ་། །དཀོན་མཆོག་གསུམ་ལ་གནོད་པར་བྱེད་པ་དང་། བླ་མ་ལ་བརྙས་པར་བྱེད་པ་དང་། དམ་ཚིག་དང་བྲལ་བ་དང་། སྔགས་དང་རྒྱུད་ལ་འཕྱ་བར་བྱེད་པ་དང་། སེམས་ཅན་ལ་འཚེ་བ་འདི་རྣམས་ལ་ཕན་པའི་ཕྱིར་སྔགས་པས་སྙིང་རྗེས་གདུངས་པའི་སེམས་ཀྱིས་གནོད་པ་རབ་ཏུ་སྦྱོར་བ་བྱའོ། །གལ་ཏེ་གཞན་ལ་བྱས་ན་དམ་ཚིག་ཉམས་ནས་ཚབ་ཆེན་པོར་འགྲོའོ། །ངས་རྒྱུད་གཞན་དུའང་བཤད་དེ། སློབ་དཔོན་ལ་ནི་སྨོད་བྱེད་དང་། ཐེག་པ་ཆེན་པོ་སྐུར་པ་དང་། །སྔགས་རྒྱུད་རབ་སྦྱོར་ཡེ་ཤེས་ལ། །འཕྱ་བར་བྱེད་པའི་མི་གང་དག །དེ་ནི་འབད་ལ་གསད་པར་བྱ། །ཡང་ན་གནས་ནས་གཡོ་བར་བྱ། རྣལ་འབྱོར་སྙིང་

རྗེ་མེད་པ་ཡི། །གཞན་ལ་རུང་རུང་བྱས་ན་ནི། །དེ་ལ་དེ་བཞིན་ལས་དེ་ནི། །ཕྱིར་བཟློག་པར་ནི་འབྱུང་བར་འགྱུར། །ཅི་ཕྱིར་སེམས་ཅན་ཐོབ་ཙམ་ཕྱིར། །རྣལ་འབྱོར་པ་ནི་འདི་ལ་འོ། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་ལས་ཐམས་ཅད་གྲུབ་པའི་རྟོག་པ་སྟེ་གཉིས་པའོ།། །།དེ་ནས་གོ་རིམས་ཇི་ལྟ་བའི་ཆགས་སྔགས་བཏུ་པ་རབ་ཏུ་གསུངས་ཏེ། རབ་ཏུ་གཙང་བའི་ཡུལ་ཁམས་སུ་སྔགས་པས་གནས་ལ་སྔགས་བཏུ་བར་བྱ་སྟེ། ཇི་ལྟར་དྲུག་པའི་དང་པོ་དང་། །ལྔ་པ་ཡི་ནི་ལྔ་པ་དང་། །དྲུག་པ་ཡི་ནི་གཉིས་པ་ལ། །དབྱངས་ཡིག་གཉིས་པ་དང་ལྡན་པ། །གཉིས་པ་ཡི་ནི་གསུམ་པ་ལ། །ཡང་ནི་དབྱངས་ཡིག་གཉིས་པར་ལྡན། །བདུན་པ་ཡི་ཡང་གསུམ་པ་དང་། །བཞི་པ་ཡི་ཡང་གསུམ་པ་ལ། །དབྱངས་ཡིག་བཅུ་གསུམ་དང་ལྡན་པ། །ལྔ་པ་ཡི་ཡང་ལྔ་པ་ལ། །དབྱངས་ཡིག་བཅུ་གཅིག་དང་ལྡན་པ། །དྲུག་པ་ཡི་ནི་དང་པོ་དང་། །དྲུག་པའི་དང་པོ་གཉིས་འགྱུར་དང་། །ཡང་ནི་རླུང་གི་ས་བོན་སྦྱིན། །ལྔ་པ་ཡི་ཡང་ལྔ་པ་ལ། །བཅུ་དང་གཅིག་གིས་མནན་ལྡན་པ། །བཞི་པ་ཡི་ནི་གསུམ་པ་ལ། །བཅུ་གསུམ་པ་ཡིས་མཉམ་མནན་པ། །དྲུག་པ་ཡི་ཡང་གཉིས་པ་ལ། །དབྱངས་ཡིག་ལྔ་པ་དང་ལྡན་པ། །གསུམ་པ་ཡི་ནི་ལྔ་པ་དང་། །རླུང་གི་ས་བོན་དེ་ནས་སྦྱིན། །དབྱངས་ཡིག་བཅུ་གསུམ་ཡང་དག་ལྡན། །བཞི་པ་ཡི་ནི་གསུམ་པ་དང་། །དེ་ནས་རླུང་གི་ས་བོན་སྦྱིན། །དྲུག་པ་ཡི་ཡང་དང་པོ་དང་། །བཞི་པ་ཡི་ནི་གསུམ་པ་དང་། །དེ་ལ་རླུང་གི་ས་བོན་ནི། །དབྱངས་ཡིག་བཅུ་གསུམ་པ་དང་ལྡན། །བཞི་པ་ཡི་ནི་ལྔ་པ་ལ། །དབྱངས་ཡིག་གསུམ་པ་དང་ལྡན་པ། །དེ་ནས་མེ་ཡི་ས་བོན་སྦྱིན། །རླུང་གི་ས་བོན་དེ་བཞིན་ནོ། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །རླུང་གི་ས་བོན་དེ་བཞིན་མཆོག །དྲུག་པ་ཡི་ནི་དང་པོ་དང་། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །ཡང་ནི་

རླུང་གི་ས་བོན་དང་། །གཉིས་པ་ཡི་ནི་དང་པོ་དང་། །དེ་ནི་གཉིས་འགྱུར་ལྡན་པར་བྱ། །བཞི་པ་ཡི་ནི་ལྔ་པ་ལ། །དབྱངས་ཡིག་གསུམ་པ་དང་ལྡན་པ། །དེ་ནས་མེ་ཡི་ས་བོན་དང་། །ལྔ་པ་ཡི་ནི་ལྔ་པ་དང་། །དེ་ནས་རླུང་གི་ས་བོན་སྦྱིན། དང་པོར་རྣམ་པར་སྣང་མཛད་སྦྱིན། །མཆོག་གི་དབང་ཕྱུག་དང་སྦྱར་བ། །ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོ་ནི། །མཁས་པས་ལན་གཉིས་བརྗོད་པར་བྱ། །འདི་ནི་འཇམ་དཔལ་ཞེས་བྱ་བའི། །འཇིགས་བྱེད་ཆེན་པོ་རྒྱུད་འཁོར་ལོ། །མ་ཧེ་གདོང་ཅན་རྩ་སྔགས་ཏེ། །འབུམ་བཟླས་པ་ཡིས་ལས་ཀུན་བྱེད། །འདི་ནི་སྔགས་ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །བདུད་པ་ཡི་ནི་བཞི་པ་ལ། །དབྱངས་ཡིག་བཞི་པ་དང་ལྡན་པ། །མེ་ཡི་ས་བོན་འོག་ཏུ་སྦྱིན། །དེ་ནས་མངའ་བདག་བཅུ་དྲུག་མཐའ། །བདུན་པ་ཡི་ནི་གཉིས་པ་ལ། །དབྱངས་ཡིག་བཞི་པ་དང་ལྡན་ཞིང་། །གསུམ་པ་ཡི་ནི་དང་པོ་ལ། །འོག་ཏུ་མེ་ཡི་ས་བོན་གདགས། །མངའ་བདག་བཅུ་དྲུག་མཐའ་མ་སྟེ། །དྲུག་པ་ཡི་ནི་བཞི་པ་ལ། །དབྱངས་ཡིག་གསུམ་པ་དང་ལྡན་པ། །དང་པོ་ཡི་ཡང་དང་པོ་དང་། །དབྱངས་ཡིག་བདུན་པ་དང་ལྡན་པ། །འོག་ཏུ་མེ་ཡི་ས་བོན་སྦྱིན། །བཞི་པ་ཡི་ནི་དང་པོ་ལ། །དབྱངས་ཡིག་གཉིས་པ་དང་ལྡན་པ། །བཞི་པ་ཡི་ནི་ལྔ་པ་ནི། །མཁས་པ་ཡིས་ནི་ལན་གཉིས་བརྗོད། །དང་པོར་རྣམ་པར་སྣང་མཛད་སྦྱིན། །ཡ་ཚོགས་བརྒྱད་པའི་ས་བོན་ལ། །དབྱངས་ཡིག་དྲུག་པ་དང་ལྡན་ལ། །སྤྱི་བོ་རུ་ནི་ཐིག་ལེས་བརྒྱན། །ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོའོ། །འདི་ནི་སྔགས་ཀྱི་རྒྱལ་པོ་སྟེ། །མ་ཧེའི་གདོང་ཅན་སྦྱོར་བ་ཡིན། །ཐམས་ཅད་ལས་ནི་བྱེད་པའོ། །ལས་ཀྱི་སྔགས་སུ་གྲགས་པ་སྟེ། །སུམ་འབུམ་བཟླས་ན་ལས་ཀུན་བྱེད། །དྲུག་པ་ཡི་ནི་དང་པོ་དང་། །ལྔ་པ་ཡི་ཡང་ལྔ་པ་ལ། །དབྱངས་ཡིག་གཉིས་པ་དང་ལྡན་པ། །བཞི་པ་ཡི་ནི་དང་པོ་སྟེ། །དེ་ཡི་ལྔ་པ་ཀླད་དུ་གཞག །དང་པོ་ཡི་ནི་དང་པོ་དང་། །

དང་པོར་རྣམ་པར་སྣང་མཛད་སྦྱིན། །ཡ་ཚོགས་བརྒྱད་པའི་ས་བོན་ལ། །དབྱངས་ཡིག་དྲུག་པ་དང་ལྡན་ལ། །སྤྱི་བོ་རུ་ནི་ཐིག་ལེས་བརྒྱན། །ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོའོ། །འདི་ནི་མ་ཧེ་གདོང་ཅན་གྱི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་རེ་འབུམ་བཟླས་ན། །འཇིག་རྟེན་གསུམ་གྱི་ལས་ནི་གང་། །ཅི་ཡང་རུང་བ་ཐམས་ཅད་བྱེད། །སྔགས་བཏུ་བའི་ཆོ་གའི་དུས་འདིར་མཆོད་པར་བྱའོ། །འདི་ནི་འཇམ་དཔལ་ཞེས་བྱ་བ་དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་སྔགས་བཏུ་བ་བསྟན་པའི་རྟོག་པ་སྟེ་གསུམ་པའོ།། །།དེ་ནས་རྡོ་རྗེ་འཇིགས་བྱེད་ཀྱི་སྒྲུབ་པ་ཡང་དག་པར་བཤད་དེ། ཆོས་ཐམས་ཅད་ལ་བདག་མེད་པ་སྔོན་དུ་འགྲོ་བས་ལྷར་དམིགས་པར་བྱ་སྟེ། དང་པོར་རེ་ཞིག་རང་བཞིན་གྱིས་དག་པའི་སྔགས་བརྗོད་པས། ཆོས་ཐམས་ཅད་བདག་མེད་པའི་ངོ་བོར་བྱས་ནས་ནམ་མཁའི་དཀྱིལ་དུ་ཡྃ་གི་རྣམ་པ་ལས་གྲུབ་པའི་རླུང་གི་དཀྱིལ་འཁོར་མདོག་དུ་བའི་རྣམ་པ་བསམ་མོ། དེའི་སྟེང་དུ་དང་པོའི་དབྱངས་ཡིག་ལས་གྱུར་པའི་ཟླ་བའི་དཀྱིལ་འཁོར་དམིགས་ཏེ། དེའི་སྟེང་དུ་དྷཱིཿའི་རྣམ་པ་ལས་འཇམ་དཔལ་གཞོན་ནུའི་གཟུགས་སུ་གྱུར་པར་བསམ་པར་བྱའོ། །དེར་ཨའི་རྣམ་པ་ལས་གྲུབ་པའི་ཉི་མའི་དཀྱིལ་འཁོར་བསམ་སྟེ། ཉི་མའི་དཀྱིལ་འཁོར་དེ་ལས་འོད་ཟེར་འཕྲོས་པས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་དང་བྱང་ཆུབ་སེམས་དཔའ་དང་རིག་པའི་ལྷ་མོ་དང་ཁྲོ་བོ་ལ་སོགས་པ་ཤིན་ཏུ་བསྐུལ་ཏེ། ཡང་འོངས་ནས་ཉི་མའི་དཀྱིལ་འཁོར་ལ་བཞུགས་པར་བསམ་མོ། །དེ་ནས་ཡང་འཇམ་དཔལ་དང་དེ་བཞིན་གཤེགས་པ་ལ་སོགས་པ་དེ་རྣམས་གཅིག་ཏུ་གྱུར་ནས། ཉི་མའི་དཀྱིལ་འཁོར་དུ་བསམ་པར་བྱའོ། །འོད་ཟེར་འབར་བའི་རྣམ་པས་དཔག་ཚད་སྟོང་ཕྲག་བརྒྱར་ཁྱབ་པར་གསལ་བར་བྱའོ། །དེའི་སྟེང་དུ་ཧཱུྃ་མདོག་ནག་པོ་འོད་ཟེར་ལྔ་དང་ཡང་དག་པར་ལྡན་པར་བསམ་སྟེ། ཧཱུྃ་དེ་ལས་འོད་ཟེར་གྱི་རྣམ་པར་འཕྲོས་པས་

སྔོན་དུ་གསུངས་པ་བཞིན་དུ་ཡང་ཞུགས་ཏེ། ཡི་གེ་དེ་ལས་རྡོ་རྗེ་ཆེན་པོ་རྣམ་པར་གདེངས་པ་ཁ་དོག་ནག་པོ་འོད་ཟེར་ལྔ་དང་ལྡན་པ་རྣམ་པར་དམིགས་པར་བྱ་སྟེ། རྡོ་རྗེ་དེ་ལས་ཕྲ་མོའི་རྣམ་པ་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ལྷ་མོས་ནམ་མཁའ་ཏིལ་གྱི་གང་བུ་ལྟར་གང་བ་ཉི་མ་ལ་གནས་པ་རྣམ་པར་བསམ་པར་བྱའོ། །དེ་སངས་རྒྱས་ལ་སོགས་པ་རྣམས་ཀྱིས་ནི་སེམས་ཅན་ཡོངས་སུ་སྨིན་པར་བཏུལ་ནས་བྱང་ཆུབ་ལ་རབ་ཏུ་བཀོད་དེ། ཡང་དེ་ཉིད་ལྷན་ཅིག་ཏུ་བསྡུས་ནས་རྡོ་རྗེའི་གཟུགས་བརྙན་ལ་རབ་ཏུ་ཞུགས་པར་བསམ་མོ། །རྡོ་རྗེའི་གཟུགས་དེ་ཉིད་ཞལ་དགུ་པ། མ་ཧེའི་གདོང་ཅན་འཇིག་པའི་དུས་ཀྱི་མེ་ལྟར་འབར་བའི་རྡོ་རྗེ་འཇིགས་བྱེད་ཆེན་པོ་ཁམས་གསུམ་ཟ་བར་ནུས་པ། ཞལ་གཙིགས་པ། ཧ་ཧ་ཞེས་ལྗགས་འདྲིལ་བ། རྣམ་པར་གཙིགས་པའི་ཁྲོ་གཉེར་འཇིགས་པ། ཁྲོ་གཉེར་གྱི་འགྲམ་ནས་སྨིན་མ་དང་སྤྱན་འཇིགས་པ་ཆེན་པོའི་དུས་ལྟར་ཁྲོ་བ་སྒྲ་སྒྲོགས་པ། མིའི་ཁྲག་དང་ཚིལ་དང་ཞག་དང་རྐང་ཟ་བ། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སོགས་པ་ལ་སྡིགས་མཛུབ་བྱེད་པ། བརྒྱ་བྱིན་དང་ཚངས་པ་དང་དབང་ཕྱུག་ཆེན་པོ་དང་ཁྱབ་འཇུག་དང་གནོད་སྦྱིན་ལ་སོགས་པ་ཟ་བ། ཐོད་པ་གཙིགས་པའི་རྩེ་མོ་འཇིགས་སུ་རུང་བའི་ཐོད་པས་ཐོང་བྱས་པ། འཇིགས་པ་ཆེན་པོ་ཅན། ཕཊ་ཅེས་སྒྲ་སྒྲོགས་ཤིང་ཐོད་པའི་འཕྱང་འཕྲུལ་གྱི་རྒྱན་གྱིས་བརྒྱན་པ་ཞབས་བཅུ་དྲུག་པ། གཅེར་བུའི་གཟུགས་མཚན་མ་གྱེན་དུ་འགྲེང་བ། གཡོན་བརྐྱང་བ། གསུས་པ་ཆེ་བ། སྐྲ་གྱེན་དུ་བརྫེས་པ། འཇིགས་པ་ཆེན་པོར་བྱེད་པ། ཕེཾ་ཅེས་སྒྲ་སྒྲོགས་པ། ཕྱག་སུམ་ཅུ་རྩ་བཞི་དང་ལྡན་པ། གླང་པོ་ཆེའི་པགས་པ་རློན་པ་འཛིན་པ། དཔལ་རྡོ་རྗེ་འཇིགས་བྱེད་ཆེན་པོ། མ་ཧེའི་གདོང་ཅན་རྣམ་པར་བསམ་པར་བྱ་སྟེ། དེ་ལྟར་ཤིན་ཏུ་བསམ་པ་བརྟན་པར་བྱས་ཏེ། དེ་ཁོ་ན་ཉིད་ཀྱི་སྦྱོར་བ་ལ་ཤིན་ཏུ་མཉམ་པར་གཞག་པའི་སྔགས་པས་རྟག་ཏུ་བསྒོམ་པར་བྱ་སྟེ། གཡས་དང་པོ་

གྲི་གུག །གཉིས་པ་ན་མཚོན་རྩེ་གཅིག་པ། གསུམ་པ་ན་གཏུན་ཤིང་། བཞི་པ་ན་ཆུ་གྲི། ལྔ་པ་ན་རྡོ་རྗེ་རྩེ་གཅིག་པ། དྲུག་པ་ན་སྟ་རེ། བདུན་པ་ན་མདུང་ཐུང་། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱིག་ཐོ། བཅུ་གཅིག་པ་ན་ཁ་ཊྭཱྃ་ག །བཅུ་གཉིས་པ་ན་འཁོར་ལོ། བཅུ་གསུམ་པ་ན་རྡོ་རྗེ། བཅུ་བཞི་པ་ན་རྡོ་རྗེ་ཐོ་བ། བཅྭ་ལྔ་པ་ན་རལ་གྲི། བཅུ་དྲུག་པ་ན་ཅང་ཏེའུའོ། །གཡོན་པའི་དང་པོ་ན་ཐོད་པ། གཉིས་པ་ན་མགོ་བོ །གསུམ་པ་ན་ཕུབ། བཞི་པ་ན་རྐང་པ། ལྔ་པ་ན་ཞགས་པ། དྲུག་པ་ན་གཞུ། བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ། བཅུ་གཉིས་པ་ན་མེ་ཐབ། བཅུ་གསུམ་པ་ན་ཐོད་ཚལ། བཅུ་བཞི་པས་སྡིགས་མཛུབ། བཅྭ་ལྔ་པ་ན་འཕན་རྩེ་གསུམ་པ། བཅུ་དྲུག་པ་ན་རླུང་གིས་ཕྱར་བའི་དུར་ཁྲོད་ཀྱི་རས། ཕྱག་གཉིས་ཀྱིས་གླང་པོ་ཆེའི་པགས་པ་རློན་པ་འཛིན་པའོ། །ཞབས་གཡས་པའི་དང་པོས་མི། གཉིས་པས་མ་ཧེ། གསུམ་པས་གླང་། བཞི་པས་བོང་བུ། ལྔ་པས་རྔ་མོ། དྲུག་པས་ཁྱི། བདུན་པས་ལུག །བརྒྱད་པས་ཝ། ཞབས་གཡས་པས་འདི་དག་ལ་ཞོན་པའོ། །ཞབས་གཡོན་པའི་དང་པོས་བྱ་རྒོད། གཉིས་པས་འུག་པ། གསུམ་པས་བྱ་རོག །བཞི་པས་ནེ་ཙོ། ལྔ་པས་ཁྲ། དྲུག་པས་ཁྱུང་ཆེན་པོ། བདུན་པས་རི་སྐེགས། བརྒྱད་པས་བཞད། ཞབས་གཡོན་པས་འདི་དག་མནན་པའོ། །དཔལ་འཇིགས་བྱེད་ཆེན་པོའི་དང་པོའི་ཞལ་ནི་རབ་ཏུ་གནག་པ་མ་ཧེའི་རྣམ་པ་ཤིན་ཏུ་ཁྲོས་པ་ཅན། རྭ་གཡས་ཀྱི་ཞལ་གསུམ་ལ་དང་པོ་སྔོན་པོ། གཉིས་པ་དམར་པོ། གསུམ་པ་སེར་པོ་སྟེ། མངའ་བདག་གི་ཞལ་གསུམ་ཤིན་ཏུ་ཁྲོས་པ། རྭ་གཡོན་པར་ཞལ་གསུམ་ལ། དང་པོ་དཀར་པོ། གཉིས་པ་དུད་ཁ། གསུམ་པ་ནག་པོ་རབ་ཏུ་ཁྲོས་པ། གཙིགས་པའི་ཞལ་རབ་ཏུ་བསམ་པར་བྱའོ། །

རྭ་གཉིས་ཀྱི་བར་དུ་དབུས་ཀྱི་ཞལ་དམར་པོ་རབ་ཏུ་འཇིགས་པ་ཞལ་ནས་ཁྲག་འཛག་པ་བསམ་པར་བྱའོ། །སྟེང་དུ་འཇམ་དཔལ་གྱི་ཞལ་ཅུང་ཟད་སེར་བ་ཡུད་ཙམ་ཁྲོ་བ་བྱིས་པའི་རྒྱན་གྱིས་བརྒྱན་པ། སྤྱི་བོར་རལ་པ་ལྔ་དང་ལྡན་པ་རྣམ་པར་བསམས་ཏེ། ཞལ་རྣམས་ཐམས་ཅད་སྤྱན་གསུམ་པར་བསྒོམ་སྟེ། འདི་ལྟར་བདག་ཉིད་རྟག་ཏུ་རྩེ་གཅིག་ཏུ་དམིགས་སོ། །དེ་ཉིད་དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་དེ་བདག་ཉིད་ཡིན་པར་བསྒོམས་ནས། དཔའ་བོའི་གནས་ལ་གནས་པའི་རྣལ་འབྱོར་པས་དེ་ནས་ཕྱི་ནས་སྔགས་བཟླ་བར་བྱ་སྟེ།བཟླས་པའི་དུས་སུ་རང་གི་སྙིང་གར་ཉི་མའི་དཀྱིལ་འཁོར་བསམས་ཏེ། དེའི་སྟེང་དུ་རང་གི་སྔགས་ཀྱི་ཡི་གེ་དགོད་པར་བྱའོ། །འབར་བ་དང་ཕྱི་ནས་མ་ཡེངས་པའི་ཡིད་ཀྱིས་བཟླས་པ་བྱའོ། །སྦྱོར་བ་འདི་ལ་གནས་པའི་སྔགས་པ་ཡིས། །རྟག་ཏུ་འཇིགས་བྱེད་ལས་ཀུན་བྱ། །དུར་ཁྲོད་གནས་ལ་བསྒོམ་བྱ་ཞིང་། །རྟག་ཏུ་བདུད་རྩི་ལྔ་རྣམས་བཟའ། །དེ་ཡིས་བསྒྲུབ་ལས་བསྒྲུབ་གཞན་མེད། །གཞན་ཡང་མར་མེ་ཆེ་ཟ་ཞིང་། །མཚན་མོ་རྒྱུ་བའི་རྣལ་འབྱོར་པས། །སུམ་འབུམ་རྩ་བའི་སྔགས་བཟླས་བྱ། །འདི་ཟློས་པ་ཡི་སྔགས་པ་ཡིས། །ཐམས་ཅད་ལས་ནི་བྱེད་པར་འགྱུར། །འདི་ནི་འཇམ་དཔལ་ཞེས་བྱ་བ་དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་ལས་བསྒོམ་པའི་རྟོག་པ་སྟེ་བཞི་པའོ།། །།དེ་ནས་དཔལ་འཇིགས་བྱེད་ཆེན་པོས་བསྟན་པའི་བྲིས་སྐུའི་ཆོ་ག་རབ་ཏུ་གསུངས་པ། དཔའ་བོའི་རས་སམ། རོ་ལ་བཀབ་པའི་རས་སམ། མེ་ཏོག་ཅན་གྱི་རས་སམ། བུ་སྐྱེས་པའི་རས་སམ། དེ་མ་རྙེད་ན། རས་གང་ཡང་རུང་བ་ལ། རི་མོ་མཁན་བཟང་པོ་རྣམ་རྟོག་མེད་པ། མི་ཁྲོ་བ། གཙང་བ། མཁས་པ། ཡིད་གཞུངས་པ། དད་པ་དང་ལྡན་པ། བརྩེ་བ་ཅན། སྲེད་པ་དང་བྲལ་བ། འདི་ལྟར་ཡོན་ཏན་དང་ལྡན་པའོ། །དེ་ལྟ་བུའི་རི་མོ་མཁན་གྱི་ལག་པས་དཔའ་བོའི་རས་ལ་བྲི་བར་བྱའོ། །གལ་ཏེ་དངོས་གྲུབ་འདོད་པས་དཔའ་བོའི་ཡོན་སྦྱིན་ནོ། །དེ

ལ་ཆོ་ག་ནི་གསང་བའི་གནས་སུ་གནས་ལ། ཤིན་ཏུ་མཉམ་པར་གཞག་པས་བྲི་བར་བྱ་སྟེ། རི་མོ་མཁན་དང་སྒྲུབ་པ་པོས་མཐོང་བ་ལས། འཇིག་རྟེན་པ་གཞན་གྱིས་མི་མཐོང་བར་བྲི་བར་བྱ་སྟེ། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་པ། ཞལ་དགུ་པ། གཅེར་བུ་ཁ་དོག་ནག་པོ་གཡོན་བརྐྱང་བ། འཇིགས་པ་ཆེན་པོ་ཡང་འཇིགས་པར་བྱེད་པའི་རྣམ་པ་ཅན། མཚན་མ་གྱེན་དུ་འགྲེང་བའི་ཐང་ཀ་བྲི་བར་བྱའོ། །ཞལ་དང་པོ་མ་ཧེ། རྭའི་གཡས་སུ་ཞལ་གསུམ་པ་སྟེ། སྔོན་པོ་དང་། དམར་པོ་དང་སེར་པོ་ཤིན་ཏུ་ཁྲོས་པ་བྲི་བར་བྱའོ། །གཡོན་དུ་དཀར་པོ་དང་། དུད་ཁ་དང་། ནག་པོའོ། །དེ་གཉིས་ཀྱི་དབུས་སུ་རབ་ཏུ་དམར་བ་བྲི་བར་བྱའོ། །དེའི་སྟེང་དུ་འཇམ་དཔལ་གྱི་ཞལ་སེར་པོ་ཅུང་ཟད་ཁྲོ་བ་བྲི་བར་བྱའོ། །ཕྱག་གཡས་པར་གྲི་གུག་དང་།མཚོན་རྩེ་གཅིག་པ་དང་། གཏུན་ཤིང་དང་། ཆུ་གྲི་དང་། རྡོ་རྗེ་རྩེ་གཅིག་པ་དང་། སྟ་རེ་དང་། མདུང་དང་། མདའ་དང་། ལྕགས་ཀྱུ་དང་། དབྱིག་ཐོ་དང་། ཁ་ཊྭཱྃ་ག་དང་། འཁོར་ལོ་དང་། རྡོ་རྗེ་དང་། རྡོ་རྗེ་ཐོ་བ་དང་། རལ་གྲི་དང་། ཅང་ཏེའུའོ། །ཕྱག་གཡོན་པ་ན་ཐོད་པ་དང་། མགོ་བོ་དང་། ཕུབ་དང་། རྐང་པ་དང་། ཞགས་པ་དང་། གཞུ་དང་། རྒྱུ་མ་དང་། དྲིལ་བུ་དང་། ལག་པ་དང་། དུར་ཁྲོད་ཀྱི་རས་དང་། སྐྱེས་བུ་གསལ་ཤིང་གིས་ཕུག་པ་དང་། མེ་ཐབ་དང་།ཐོད་ཚལ་དང་། སྡིགས་མཛུབ་དང་། འཕན་རྩེ་གསུམ་པ་དང་། རླུང་གིས་བསྐྱོད་པའི་རས་སོ། །ཕྱག་གཉིས་ཀྱིས་གླང་པོ་ཆེའི་པགས་པ་རློན་པ་འཛིན་པ་བྲིའོ། །ཞབས་གཡས་པས་མི་དང་། མ་ཧེ་དང་། གླང་དང་། བོང་བུ་དང་། རྔ་མོ་དང་། ཁྱི་དང་། ལུག་དང་། ཝ་རྣམས་སོ། །ཞབས་གཡོན་པས་བྱ་རྒོད་དང་། འུག་པ་དང་། བྱ་རོག་དང་། ནེ་ཙོ་དང་། ཁྲ་དང་། བྱ་ཆེན་དང་། རི་སྐེགས་དང་། བཞད་རྣམས་སོ། འདི་ལྟ་བུར་འདུག་པའི་རྡོ་རྗེ་འཇིགས་བྱེད་ཆེན་པོ་བྲི་བར་བྱའོ། །དེའི་འོག་ཏུ་དུར་ཁྲོད་ཆེན་པོ་ཡང་བྲི་བར་བྱའོ། །འཇིགས་

པ་ཆེན་པོ་བྱེད་པ། སྲིན་པོ་དང་། ཞིང་སྐྱོང་བ་དང་། རོ་ལངས་དང་ལྡན་པ་སྐྱེས་བུ་མདུང་རྩེར་བཙུགས་པའི་གཟུགས་དེར་མཐོང་བར་བྱའོ། །ནྱ་གྲོ་དྷའི་ཤིང་དག་གི་སྟེང་དུ་སྐྱེས་བུ་འཕྱང་བ་བྲི་བར་བྱ། སྐྱེས་བུ་བསྲེགས་བཞིན་པ་ཡང་བྲི། མདུང་གིས་ཕུག་པའི་སྐྱེས་བུ་ཡང་བྲི། བྱ་སྣ་ཚོགས་དང་། བྱ་རོག་དང་། ཁྱི་དང་། ཅེ་སྤྱང་དག་ཧ་ཧ་འབྱིན་པ་བྲི། སྒྲུབ་པ་པོ་རྣམས་ཀྱང་བྲི་སྟེ། བཅོམ་ལྡན་འདས་ལ་རྩེ་གཅིག་ཏུ་ལྟ་བ་གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང་། ཐོད་པ་དང་། ཁ་ཏྭཱྃ་ག་འཛིན་པ། ཐོད་པས་སྤྱི་བོར་བརྒྱན་པ་དགོད་ཅིང་དུར་ཁྲོད་དེར་འཇུག་པ་བྲི། འདི་ནི་གསང་བའི་བྲིས་སྐུ་སྟེ། གནས་གཅིག་ཏུ་ལེགས་པར་གཞག་ལ་ཤ་ཆེན་གྱི་སྤོས་དབུལ། དེའི་མདུན་དུ་དུང་ཆེན་གྱི་ཕྲེང་བས་བཟླས་པ་བྱ། སྔགས་པ་མཉམ་པར་གཞག་པས་དུས་གསུམ་དུ་འབད་ལ་བྲིས་སྐུ་བསྲུང་ངོ་། །གཞན་གང་ཡང་མི་གཞག་གོ་གཞན་གང་གི་མདུན་དུ་ཡང་མི་དགྲམ་མོ། །ཀློག་པ་དང་། བཏུང་བ་དང་། བཟའ་བ་དང་། སྟོན་མོ་ནི་ཤ་ཆེན་རྟག་ཏུ་མཚན་མ་བཟའོ། །གལ་ཏེ་མཆོག་གི་དངོས་གྲུབ་འདོད་ན་དུས་གསུམ་དུ་རྣམ་པར་སྣང་མཛད་དང་ཁྲག་གི་སྤོས་བྲིས་སྐུའི་མདུན་དུ་དབུལ་ལོ། །འདི་ནི་འཇམ་དཔལ་ཞེས་བྱ་བ། རྡོ་རྗེ་འཇིགས་བྱེད་ཆེན་པོ་རྣལ་འབྱོར་ཀྱི་རྒྱུད་ལས་བྲིས་སྐུའི་ཆོ་གའི་རྟོག་པ་སྟེ་ལྔ་པའོ།། །།དེ་ནས་སྦྱིན་སྲེག་གི་ལས་ཀྱི་ཆོ་ག་གསུངས་པ། ཇི་ལྟར་སྔོན་གྱི་རིམ་པ་སྟེ། དང་པོར་རེ་ཞིག་སྔགས་པ་དབེན་པའི་གནས་སུ་ཕྱིན་ལ། མཚན་ཕྱེད་ན་སྦྱིན་སྲེག་གི་ལས་ཀུན་བྱས་ཏེ། གོང་དུ་གསུངས་པའི་ལྷའི་རྣལ་འབྱོར་ལ་གནས་པས་ལས་ཐམས་ཅད་བྱའོ། །དེ་ལ་ལས་ནི་འདི་རྣམས་ཡིན་ནོ། །གལ་ཏེ་གསད་པར་འདོད་ན་དེར་མིའི་རུས་པ་དང་། རྣམ་པར་སྣང་མཛད་དང་། བོང་བུའི་སྦངས་དང་། ཁྱིའི་སྦངས་དང་། ཚེར་མ་དང་། སྐྲ་དང། སེན་མོ་དང་། དེ་དག་ཐམས་ཅད་ཚ་བའི་མར་ཁུས་སྦྲུས་ལ། མ་ཧེའི་ཞལ་གྱི་སྦྱོར་བས་ཤིན་ཏུ་མཉམ་པར་གཞག་ལ།

ཁ་ལྷོར་བལྟས་ཏེ་རོ་བསྲེགས་པའི་མེ་ལ་གོང་གི་མིང་དང་བཅས་པར་བརྒྱ་རྩ་བརྒྱད་བསྲེགས་ན་ཐེ་ཚོམ་མེད་པར་དེ་ཞག་གསུམ་གྱིས་འཆིའོ། །ཡང་ན་ཕྱོགས་གཅིག་ཏུ་གནས་ལ་མེ་ཐབ་གྲུ་གསུམ་བྱས་ནས། དེར་སྔོན་དུ་གསུངས་པའི་རྫས་ཀྱིས་གཏུམ་པོའི་མེ་ལ་སྦྱིན་སྲེག་བྱ་སྟེ། སྦྱོར་བ་དེས་ནི་ལས་དེ་ཉིད་འགྲུབ་བོ། །དེ་ནས་དབྲལ་བར་འདོད་ན་བྱ་རོག་དང་། འུག་པ་དང་། རྨ་བྱ་དང་། སྦྲུལ་དང་། སྐྲ་དང་། འབྲས་ཕུབ་དང་། མ་ཧེ་དང་། རྟའི་ཤ་དང་། ལྷན་ཅིག་ཏུ་གང་གི་མིང་དང་བཅས་པར་ཡི་གེ་བཅུ་པའི་སྔགས་ཀྱིས་དུར་ཁྲོད་ཀྱི་མེ་ལ་བསྲེགས་ན་དེས་འབྲལ་བར་འགྱུར་རོ། །ཡང་ན་དུར་ཁྲོད་ཀྱི་ཤིང་ལ་གཏུམ་པོའི་མེ་རབ་ཏུ་སྦར་ལ་ཁྱིམ་དུ་གནས་ཏེ། གོང་གི་རྫས་དེ་བསྲེགས་ན། རྡོ་རྗེ་འཛིན་པ་ལྟ་བུ་ཡང་ཉི་མ་བདུན་གྱིས་འབྲལ་ལོ། །དེ་ནས་བསྐྲད་པར་འདོད་ན་བྱ་རོག་གི་ཤ་དང་། རྔ་མོའི་རྟུག་པ་དང་ལྷན་ཅིག་ཏུ་ཆང་དང་ཡང་དག་པར་ལྡན་པ་རླུང་གི་དཀྱིལ་འཁོར་གྱི་དབུས་སུ་དུར་ཁྲོད་ཀྱི་ཤིང་ལ་མེ་རབ་ཏུ་སྦར་ལ། གཅེར་བུ་སྐྲ་བཤིག་པར་བསྒྱུར་ནས། ཁ་ལྷོ་ཕྱོགས་སུ་བལྟས་ཏེ། གཤིན་རྗེའི་སྔགས་ཀྱིས་ཆེ་གེ་མོའི་མིང་དང་བཅས་པར་ལག་པ་གཡོན་པས་སྦྱིན་སྲེག་སྟོང་བྱས་ན་སྐྲོད་པ་ལས་གཞན་དུ་མ་ཡིན་ནོ། །དེ་ནས་རེངས་པར་འདོད་ན། བ་བླ་དང་། ཡུང་བ་དང་། ལྡོང་རོས་དང་། གི་ཝང་དང་བཅས་པས་དཀྱིལ་འཁོར་གྲུ་བཞི་པ་བྱས་ལ་ཁ་བྱང་དུ་བལྟས་ཏེ་ལས་ཀྱི་རྗེས་སུ་འབྲང་བའི་སྦྱོར་བ་དམིགས་ནས། གང་གི་མིང་དང་བཅས་པར་སྦྱིན་སྲེག་བྱས་ན། དེ་ཉི་མ་བདུན་གྱིས་རེངས་པར་འགྱུར་རོ། །དེ་ནས་གྲོང་བསྐྲད་པར་འདོད་ན། ནི་མ་པའི་ཤིང་ལ་མེ་རབ་ཏུ་སྦར་ལ། ཁྱིའི་ཤ་དང་། སྦལ་པའི་ཤ་དང་། ཁྱིམ་བྱའི་ཤ་དང་། རྔ་མོའི་རྟུག་པ་དང་། བྱི་ལའི་ཁྲག་གཅིག་ཏུ་སྦྲུས་ལ། གཤིན་རྗེའི་སྦྱོར་བ་ལ་གནས་པས། གྲོང་གི་མིང་དང་བཅས་པར་ཡི་གེ་བཅུ་པའི་སྔགས་ཀྱིས་རླུང་གི་དཀྱིལ་འཁོར་གྱི་དབུས་སུ་སྦྱིན་སྲེག་སྟོང་ཕྲག་བཅུ་བྱས་ན་གྲོང་སྐྲོད་པར་འགྱུར་རོ། །ལས་དེ་རྣམས་ནི་ཤིན་ཏུ་ཡང་མཉམ་

པར་བཞག་པས་བྱ་སྟེ། གཞན་དུ་ན་སྔགས་པ་རང་ཉིད་ལ་འབབ་པར་འགྱུར་རོ། །གཞན་གང་ལ་ཡང་མི་བསྟན་ནོ། །དེ་ནས་བུ་མོ་རེངས་པར་འདོད་ན། ཚེར་མ་དང་། དུག་དང་། སྐེ་ཚེ་དང་བཅས་པར་རང་གི་ཁྲག་གིས་སྦྲུས་ནས། ཡི་གེ་བཅུ་པའི་སྔགས་དང་བཅས་པར་བུ་མོ་རེངས་པར་གྱུར་ཅིག་ཅེས་དུར་ཁྲོད་ཀྱི་མེ་ལ་སྦྱིན་སྲེག་སྟོང་བྱས་ན་རེངས་པ་ལས་གཞན་མ་ཡིན་ནོ། །དེ་ནས་ཞི་བར་བྱ་བར་འདོད་ན། མར་དང་། སྦྲང་རྩི་དང་། འོ་མ་དང་། དཱུར་བ་དང་བཅས་པར་བ་ལ་ཤའི་ཤིང་ལ་མེ་རབ་ཏུ་སྦར་ན་ཞི་བར་འདོད་པར་དམིགས་ནས་ཡུལ་གྱི་ཤར་ཕྱོགས་སུ་ཁ་བལྟས་ཏེ་གནས་པས་དུས་གསུམ་དུ་སྦྱིན་སྲེག་སྟོང་རྩ་བརྒྱད་བྱས་ན་དེས་ཡུལ་ཞི་བར་བྱས་པར་འགྱུར་རོ། །དེ་ནས་རྒྱས་པར་འདོད་ན། ཏིལ་དང་། འབྲས་དང་། ནས་དང་། མར་དང་བཅས་པས་ཨུ་དུམ་བཱ་རའི་ཤིང་ལ་མེ་རབ་ཏུ་སྦར་ན་ལས་ཀྱི་རྗེས་སུ་འབྲང་བའི་ལྷའི་སྦྱོར་བ་དམིགས་ཏེ། ཁ་བྱང་དུ་བལྟས་ནས་མཉམ་པར་བཞག་པས་ཡི་གེ་བཅུ་པའི་སྔགས་ཀྱིས་དུས་གསུམ་དུ་སྦྱིན་སྲེག་སྟོང་བྱས་ན་རྒྱས་པར་འགྱུར་རོ། །དེ་ནས་དགུག་པར་འདོད་ན་སྐེ་ཚེས་གཟུགས་བརྙན་བྱས་ལ། དེ་ནས་སེང་ལྡེང་གི་མེའི་དབུས་སུ་གཤིན་རྗེའི་སྔགས་ཀྱིས་བརྒྱ་རྩ་བརྒྱད་དུ་བསྲེགས་ན་མ་གྲུབ་པ་ཡང་འགྲུབ་པར་འགྱུར་རོ། །ཉི་མ་བདུན་གྱིས་གང་འདོད་པ་ཐེ་ཚོམ་མེད་པར་འགུགས་སོ། །དེ་ནས་སྨྱོ་བར་བྱ་བར་འདོད་ན། བྱ་རྒོད་ཆེན་པོའི་ཚང་དང་། ཤ་ཆེན་བསྲེགས་ན་སྨྱོ་བར་འགྱུར་རོ། །དེ་ཕུབ་མའི་མེ་ལ་བསྲེགས་ན་བདེ་ལེགས་སུ་འགྱུར་རོ། །དེ་ནས་ནོར་ནོར་མ་ཡིན་པར་བྱ་བར་འདོད་ན། རས་བལ་གྱི་མེ་ལ་དྷ་དུ་རའི་འབྲས་བུ་བཅས་པར་མཚན་མོ་ཡི་གེ་བཅུ་པའི་སྔགས་བརྒྱ་རྩ་བརྒྱད་སྦྱིན་སྲེག་བྱས་ན་ཤིན་ཏུ་ཆུད་ཟོས་པར་འགྱུར་རོ། །ཨ་རུ་ར་བསྲེགས་ན་སླར་རྫས་དེ་ཉིད་དུ་འགྱུར་རོ། །རྗེ་བཙུན་གྱི་མདུན་དུ་ཤ་ཆེན་ཆང་དང་བཅས་པ་ཟླ་བ་དྲུག་ཏུ་མཚན་མོ་སྦྱིན་སྲེག་བརྒྱ་རྩ་བརྒྱད་བྱས་ན་ཡུལ་ཐམས་ཅད་ཀྱི་བདག་པོར་འགྱུར་རོ། །བ་ལང་གི་ཤ་དང་ཁྲག་ཏུ་བཅས་པར་གང་གི་མིང་དང་བཅས་པར་སྦྱིན་སྲེག་

སྟོང་བྱས་ན་དེ་ཇི་སྲིད་འཚོའི་བར་དུ་བྲན་དུ་གནས་པར་ཐེ་ཚོམ་མེད་དོ། །ཁྱི་ཤ་རྡོ་རྗེའི་ཆུ་དང་བཅས་པར་སྐྱེས་པའི་བདག་ཉིད་ཀྱིས་མཚན་མོ་གང་གི་མིང་དང་བཅས་པར་སྦྱིན་སྲེག་བརྒྱ་རྩ་བརྒྱད་བྱས་ན་བདག་ཉིད་ཀྱི་ནོར་དང་བཅས་པ་དབང་དུ་འགྱུར་རོ། །རྟའི་ཤ་རྣམ་པར་སྣང་མཛད་དང་བཅས་པ་གཤིན་རྗེའི་གཤེད་ཀྱི་སྔགས་ཀྱིས་སྦྱིན་སྲེག་བརྒྱ་རྩ་བརྒྱད་གནས་གཅིག་ཏུ་གནས་ལ། མཚན་མོ་རྒྱལ་པོ་ལ་དམིགས་ནས་བྱས་ན་ཞག་བདུན་གྱིས་འཁོར་དག་བཅས་པ་དབང་དུ་འགྱུར་རོ། །གླང་པོའི་ཤ་ཁུ་བ་དང་བཅས་པས་མིའི་འཇིག་རྟེན་ཀུན་ལ་དམིགས་ལ་ཡི་གེ་བཅུ་པའི་སྔགས་ཀྱིས་མཚན་མོ་སྦྱིན་སྲེག་སྟོང་བྱས་ན་ཞག་བདུན་གྱིས་དབང་དུ་འགྱུར་རོ། །ཉ་དང་། ཤ་དང་། ཆང་དང་བཅས་པས་འཇིགས་པ་མེད་པར་ཡི་གེ་བཅུ་པའི་སྔགས་ཀྱིས་སྦྱིན་སྲེག་བརྒྱ་རྩ་བརྒྱད་བྱས་ན་བུད་མེད་ཐམས་ཅད་དབང་དུ་འགྱུར་རོ། །དེ་ནས་བསྐྲད་པར་འདོད་ན། བྱ་རོག་གི་ཤ་མ་འདྲེས་པར་ཡི་གེ་བཅུ་པའི་སྔགས་ཀྱིས་གང་གི་མིང་དང་བཅས་པར་སྦྱིན་སྲེག་སྟོང་བྱས་ན་ཉི་མ་བདུན་གྱིས་རྡོ་རྗེ་འཛིན་པ་ལྟ་བུ་ཡང་རབ་ཏུ་འབྲོས་ན་ཕྲ་མོའི་མི་ལྟ་ཅི་སྨོས། དེ་ནས་བྱ་རོག་གི་ཚང་དང་འབྲས་ཀྱི་ཕུབ་མ་དང་ལྷན་ཅིག་ཏུ་དྷ་དུ་རའི་ཤིང་ལ་མེ་རབ་ཏུ་སྦར་ནས་ཡི་གེ་བཅུ་པའི་སྔགས་གང་གི་མིང་དང་བཅས་པར་ནམ་ཕྱེད་ན་སྦྱིན་སྲེག་བྱས་ན། ཉི་མ་བདུན་གྱིས་སྐྲོད་པར་འགྱུར་རོ། །དེ་ནས་དབང་དུ་བྱ་བར་འདོད་ན། སེང་ལྡེང་གི་མེ་ལ་ཏིལ་དང་འབྲས་དང་བུད་མེད་ཀྱི་མེ་ཏོག་དང་ལྷན་ཅིག་ཏུ་རྡོ་རྗེའི་ཆུ་དང་བསྲེས་ཏེ། རྣལ་འབྱོར་གྱི་གཟུགས་དམར་པོ་དམིགས་ནས་ཁ་ནུབ་ཏུ་བལྟས་ཏེ། ཡི་གེ་བཅུ་པ་གང་གི་མིང་དང་བཅས་པར་སྔགས་པས་བསྲེགས་ན། ཉི་མ་བདུན་གྱིས་དབང་དུ་འདུས་ཏེ། དེ་ཇི་སྲིད་འཚོའི་བར་དུ་མི་འབྲལ་ལོ། །དེ་ནས་འགུགས་པར་འདོད་ན། བདུད་རྩི་ལྔ་མར་དང་བཅས་པར་སེང་ལྡེང་གི་མེ་ལ་གང་གི་མིང་དང་བཅས་པར་སྦྱིན་སྲེག་བརྒྱ་རྩ་བརྒྱད་བྱས་ན་དེ་སྐད་ཅིག་གིས་འོང་བར་འགྱུར་རོ། །ལས་འདི་རྣམས་ནི་སྔོན་དུ་བསྙེན་པ་བྱས་པའི་སྔགས་པས་བྱའོ། །གཞན་

པས་བྱས་ན་སྔགས་པ་འཇིག་རྟེན་པས་དཔྱས་པར་འགྱུར་རོ། །ཇི་ལྟར་བྱེ་བྲག་མི་བྱ་སྟེ། གང་ལ་ཡང་བྲེ་བྲག་སྦྱིན་པར་མི་བྱའོ། །བྱེ་བྲག་ཕྱེ་ན་སྔགས་པས་དངོས་གྲུབ་མི་འགྲུབ་བོ། །ངས་རྒྱུད་གཞན་ལས་ཀྱང་བཤད་དེ། །ཇི་ལྟར་བྱེ་བྲག་མ་སྐྱེས་པ། །དེ་བཞིན་བྱ་བའི་བྱེ་བྲག་སྨྲས། །རྡོ་རྗེ་སེམས་དཔས་ཀྱང་མི་འགྲུབ། །གང་གི་མདུན་དུའང་སྔགས་པ་ཡིས། །དེ་ཕྱིར་ལས་རྣམས་མཐོང་མི་བྱ། །གཞན་དུའང་ལྷན་ཅིག་ཏུ་མི་བྱ། །གལ་ཏེ་སྔགས་པས་ལས་བྱ་འདོད། །དེ་དག་གཅིག་པུ་ཞིག་གིས་བྱ། །སྔགས་པ་དེ་ཡིས་ལས་ཀུན་བྱེད། །འདི་ནི་འཇམ་དཔལ་ཞེས་བྱ་བ། །དཔལ་རྡོ་རྗེ་འཇིགས་བྱེད་ཀྱི་རྣལ་འབྱོར་གྱི་རྒྱུད་ལས་སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པ་སྟེ་དྲུག་པའོ།། །།དེ་ནས་བསམ་གཏན་གྱི་ལས་ཀྱི་ཆོ་ག་ཇི་ལྟ་བུ་ཡང་དག་པར་གསུངས་ཏེ།བསམ་གཏན་དང་སྔགས་ཀྱི་རབ་ཏུ་སྦྱོར་བ་ལས་དགོས་པ་ཐམས་ཅད་རབ་ཏུ་བསྒྲུབ་པར་བྱ་སྟེ། དེའི་ཆོ་གའི་དང་པོར་རེ་ཞིག་རྣལ་འབྱོར་པ་མ་ཧེའི་གདོང་པའི་སྦྱོར་བ་ལ་གནས་པའི་སྔོན་དུ་སྦྱང་བ་བྱས་པས་ལས་ཐམས་ཅད་བྱའོ། །རེ་ཕ་ལས་ཡོངས་སུ་གྱུར་པའི་མེའི་དཀྱིལ་འཁོར་ཀུན་ཏུ་གསལ་བར་འབར་བར་རྣམ་པར་བསམས་ལ། དེའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ། བྲེད་པར་གྱུར་པ་བདག་གི་མདུན་དུ་རྣམ་པར་བསམ་མོ། །དེ་ནས་རང་གི་ལུས་ལས་ཁྲོ་བོའི་གཟུགས་མང་པོ་རྣམ་པར་སྤྲོས་ཏེ། ཁྲོ་བོ་དེ་རྣམས་ཀྱིས་རལ་གྲི་བཏབ་ཅིང་ཁྲག་འཐུང་བར་བསམ་པར་བྱའོ། །བསྒྲུབ་བྱ་དེའི་ཤ་ཟ་བ་དང་། རྒྱུ་མ་དྲངས་པར་བསམ་པར་བྱའོ། །འདི་སྐད་སྨྲ་བར་བྱ་སྟེ། དཀོན་མཆོག་གསུམ་ལ་གནོད་པར་བྱེད་པ་དང་། བླ་མ་ལ་སྐུར་པ་འདེབས་པ་ལ་རྒྱོབ་ཅིག་རྒྱོབ་ཅིག །སོད་ཅིག་སོད་ཅིག་བསམས་པ་ཙམ་གྱིས་རྡོ་རྗེ་འཛིན་པ་ཡང་ཞག་བདུན་གྱི་འཆི་ན་ཕྲ་མོའི་སྲོག་ཆགས་གཞན་ལྟ་ཅི་སྨོས། དེ་ནས་གཞན་ཡང་བསམ་གཏན་གྱི་རབ་ཏུ་སྦྱོར་བ་འབྱུང་བ་ནི་མ་ཧེའི་གདོང་པའི་སྦྱོར་བའི་ང་རྒྱལ་ལ་གནས་ཏེ་ལས་ཐམས་ཅད་བསྒྲུབ་པར་བྱའོ། །མེའི་

དཀྱིལ་འཁོར་གྱི་དབུས་སུ་བསྒྲུབ་བྱ་ངུ་བར་བསམས་ལ། དེའི་མདུན་དུ་སྲིན་པོ་མང་པོ་བསམ་པར་བྱ་སྟེ། སྲིན་པོ་དེ་དག་ཐ་དད་པའི་ལུས་ཅན་མ་རུངས་པ། ཤིན་ཏུ་གཏུམ་པར་ཤ་ཟ་བ་དང་། ཁྲག་འཐུང་བར་རྣམ་པར་བསམ་པར་བྱའོ། །གཞན་ཡང་རྣམ་པ་སྣ་ཚོགས་པའི་བྱ་རྣམས་ཏེ། བྱ་རྒོད་དག་དང་། བྱ་རོག་དང་། འུག་པ་དང་། ཝ་རྣམས་དང་། ཁྱི་རྣམས་ཀྱིས་ཤ་ཟ་བ་དང་། ཁྲག་འཐུང་བར་རྣམ་པར་བསམ་པར་བྱ་སྟེ། བསམ་གཏན་འདིའི་རབ་ཏུ་སྦྱོར་བས་ཐེ་ཚོམ་མེད་པར་འཆིའོ། །དཔག་ཚད་བརྒྱན་གནས་པའི་སྐྱེས་བུ་ཡང་སེམས་ཀྱིས་བཟུང་བས་བསམ་གཏན་བརྩམ་མོ། །སྔགས་པས་བསམ་གཏན་བརྟན་པར་བྱའོ། །དེ་ནས་དབྲལ་བར་འདོད་ན་མ་ཧེའི་སྙིང་གར་བསྒྲུབ་བྱ་བསམ་པར་བྱ་སྟེ། བསྒྲུབ་བྱ་གཞན་རྟའི་སྙིང་གར་རྣམ་པར་བསམ་པར་བྱའོ། །རྟ་དང་མ་ཧེ་གཉིས་ཕན་ཚུན་འཐབ་པར་བྱེད་པར་བསམ་སྟེ། ཇི་སྲིད་དུ་རྟ་དང་མ་ཧེ་གཉིས་ཕྱེ་བར་མ་གྱུར་གྱི་བར་དུའོ། །ཕྱི་ནས་བསྒྲུབ་བྱ་དེ་གཉིས། རབ་ཏུ་མི་མཛའ་བར་བསམ་པར་བྱ་སྟེ། བསམས་པ་ཙམ་གྱིས་ཉི་མ་བདུན་གྱིས་ངེས་པར་འཐབ་པར་འགྱུར་ཏེ། གཞན་དུ་མ་ཡིན་ནོ། །དེ་ནས་བསྐྲད་པར་འདོད་ན་དེ་རུ་ཡྃ་ལས་ཡོངས་སུ་གྱུར་བའི་རྔ་མོ་བསམ་པར་བྱ་སྟེ། ཡྃ་དེའི་རྒྱབ་ཏུ་ཡྃ་གི་རྣམ་པ་ལས་གྱུར་པའི་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པར་བསམ་པར་བྱའོ། །དེའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ། བྲེད་པར་གྱུར་པར་བསམ་པར་བྱ་སྟེ། མ་ཧེའི་གདོང་ཅན་གྱི་སྦྱོར་བ་ལ་གནས་པས་དེའི་རྒྱབ་ཏུ་གཤིན་རྗེའི་གཟུགས་ལག་པ་གཡས་པས་དབྱུག་པ་འཛིན་པ་སྐྲ་བསིལ་བ་རྣམ་པར་བསམ་པར་བྱ་སྟེ། རྔ་མོ་དེ་ཁ་ལྷོར་བསྟན་ལ་གཏང་ངོ་། །དེའི་མིང་དང་བཅས་པར་གཤིན་རྗེའི་སྔགས་བརྗོད་པས་རྣམ་པར་བསམ་པར་བྱའོ། །རྣལ་འབྱོར་པས་འདི་བསམས་པ་ཙམ་གྱིས་ཞག་བདུན་ན་འདི་ལྟར་རྡོ་རྗེ་འཛིན་པ་ཡང་སྐྲོད་པར་འགྱུར་རོ། །གཞན་ཡང་བསམ་གཏན་གྱི་རབ་ཏུ་སྦྱོར་བ་ནི་བྱ་རོག་གམ། བྱ་རྒོད་ཀྱི་རྒྱབ་ཏུ་བསྒྲུབ་བྱ་སྐྲ་གྲོལ་བ་གཅེར་བུ་རྣམ་པར་བསམ་མོ། །དེའི་

རྒྱབ་ཏུ་གཤིན་རྗེ་རྣམ་པར་བསམ་པར་བྱ་སྟེ། ལག་པ་ཐོ་བ་ཐོགས་པ་བསྒྲུབ་བྱའི་སྐྲ་བཟུང་བ་དེ་ལ་མ་ཧེའི་གདོང་ཅན་གྱིས་བཀའ་བསྒོ་སྟེ། ཁ་ལྷོ་རུ་བལྟས་ནས་སོང་བར་བསམ་པར་བྱ་སྟེ། རྩེ་གཅིག་པའི་སྦྱོར་བས་བསམ་པར་བྱས་ན། རྩེ་གཅིག་པའི་སྦྱོར་བ་དེས་ཞག་བདུན་གྱིས་སྐྲོད་པར་འགྱུར་རོ། །དེ་ནས་འགུགས་པར་བྱེད་པར་འདོད་ན་ཡི་གེ་ཡྃ་ལས་བྱུང་བའི་རླུང་གི་དཀྱིལ་འཁོར། དེའི་སྟེང་དུ་ཨ་ལས་བྱུང་བའི་ཟླ་བའི་དཀྱིལ་འཁོར་དེའི་སྟེང་དུ་གཤིན་རྗེའི་གཟུགས་ལྕགས་ཀྱུ་དང་ཞགས་པ་ལག་ཏུ་ཐོགས་པ་རྣམ་པར་བསམ་མོ། །མ་ཧེའི་གདོང་པའི་རྣལ་འབྱོར་ལ་གནས་པས་དེ་ལ་བཀའ་བསྒོ་བ། གཤིན་རྗེ་སོང་ལ་ཡུལ་ཆེ་གེ་མོ་ནས་བུ་མོ་ཆེ་གེ་མོ་མྱུར་བར་ཁུག་ཅིག །དེ་སྐད་བསྐུལ་བས་ཡྃ་གི་རྣམ་པར་བསྐྱོད་དེ་སོང་བར་རྣམ་པར་བསམ་པར་བྱའོ། །བསམ་གཏན་འདིའི་རབ་ཏུ་སྦྱོར་བ་ལ་གནས་པའི་སྔགས་པས་ཁམས་གསུམ་དུ་གཏོགས་པའི་བུད་མེད་བཀུག་ལ་རོལ་པར་བྱའོ། །ཇི་ལྟར་བསམ་པ་བརྟན་པར་གྱུར་ན་འདིའི་རབ་ཏུ་སྦྱོར་བས་དེ་དག་བྱའི་གཞན་གྱིས་མི་བྱའོ། །དེ་ནས་སྦྲུལ་གྱིས་ཟིན་པ་བླང་བའི་རབ་ཏུ་བྱེད་པ་གསུངས་ཏེ། རང་གི་སྙིང་གར་པདྨ་དཀར་པོ་འདབ་མ་བརྒྱད་པ་རྣམ་པར་བསམ་མོ། །དེའི་སྟེང་དུ་དབྱངས་ཡིག་གསུམ་པ་འདབ་མར་ཕཊ་བརྒྱད་རྣམ་པར་བསམ་མོ། །དེ་ཡིས་ནི་འོག་གི་ཀླུའི་གཟུགས་རྣམ་པར་བསམ་པར་བྱ་སྟེ། དེའི་སྤྱི་བོར་ཡི་གེ་ཨི་ཁ་དོག་དཀར་པོ་ལས་བདུད་རྩི་འཛག་པ་བསམ་པར་བྱའོ། །ཀླུ་དེའི་མིག་རྣམས་ནས་བདུད་རྩི་འཕྲོས་ནས་བསྒྲུབ་བྱ་དེའི་ལུས་ལ་ཐིམ་པར་བསམ་པར་བྱ་སྟེ། བསམ་གཏན་འདིའི་སྦྱོར་བས་ཁམས་གསུམ་ཡོངས་སུ་གང་བའི་དུག་ཀྱང་མེད་པར་འགྱུར་རོ། །དུག་ཁུར་སྟོང་ཡང་ཟ་ནུས་སོ། །དེ་ནས་ཞུ་བའི་བསམ་གཏན་གྱི་རབ་ཏུ་སྦྱོར་བ་འབྱུང་སྟེ། བསྒྲུབ་བྱ་མདུན་དུ་བསམ་སྟེ། དེའི་རྐང་པ་གཉིས་ལ་ཡི་གེ་ཡྃ་ལས་གྱུར་པའི་རླུང་གི་དཀྱིལ་འཁོར་བསམ་པར་བྱ། དེའི་སྟེང་དུ་གསང་བའི་གནས་སུ་མེའི་དཀྱིལ་འཁོར་གྲུ་གསུམ་ཁ་དོག་དམར་པོ་རཾ་གྱིས་བྱིན་གྱིས་བརླབས་པ་བསམ་པར་བྱའོ། །དེའི་སྟེང་དུ་སྙིང་

གར་སའི་དཀྱིལ་འཁོར་གྲུ་བཞི་པ་མདོག་སེར་པོ་ལྃ་གྱིས་བྱིན་གྱིས་བརླབས་པ་བསམ་པར་བྱའོ། །དེའི་སྟེག་དུ་དཔྲལ་བར་ཟླ་བའི་དཀྱིལ་འཁོར་རྣམ་པར་བསམ་པར་བྱའོ། །དེའི་དབུས་སུ་ཡི་གེ་བྃ་མགོ་ཐུར་དུ་གནས་པ་ལས་བདུད་རྩི་འཛག་པར་བསམ་སྟེ། འདི་ནི་ལེགས་པར་རྣམ་པར་བསམས་ནས་རླུང་གིས་མེ་རབ་ཏུ་སྦར་ཏེ། མེ་དེས་དབང་ཆེན་གྱི་དཀྱིལ་འཁོར་བསྲེགས་པར་རྣམ་པར་བསམ། དབང་ཆེན་གྱི་དཀྱིལ་འཁོར་གྱི་དྲོད་ཀྱིས་བདུད་རྩིའི་དཀྱིལ་འཁོར་དེ་ཞུ་བར་བསམ་པར་བྱའོ། །འདི་ཡི་སྦྱོར་བ་ཙམ་གྱིས་ནི། །དེ་ཡི་བུད་མེད་ཞུ་འགྱུར་ཏེ། །འོ་མ་ཡི་ནི་ཤིང་བཞིན་དུ། །ཞུ་བར་བྱེད་པར་ཐེ་ཚོམ་མེད། །དེ་ནས་རྒྱལ་པོའམ། རྒྱལ་པོའི་བློན་པོ་དབང་དུ་བྱ་བར་འདོད་ན་སྔགས་པ་མ་ཧེའི་གདོང་ཅན་གྱི་རྣལ་འབྱོར་ལ་རབ་ཏུ་གནས་ལ། དེ་ཉིད་མདོག་དམར་པོར་བསམས་ཏེ། བསྒྲུབ་བྱ་གང་དུ་གནས་པ་དེའི་སྟེང་དུ་གནས་ལ། ཕྱི་ནས་རང་གི་ལུས་འཇམ་དཔལ་མདོག་དམར་པོ་ཕྱག་ན་ལྕགས་ཀྱུ་དང་ཞགས་པ་ཅན་ཕྱུང་སྟེ། འཇམ་དཔལ་དེས་བསྒྲུབ་བྱའི་སྙིང་ག་དང་མགྲིན་པ་བཅིངས་ནས་བཀུག་པར་བསམས་ཏེ། འཇམ་དཔལ་གྱི་སྐུ་ལ་རབ་ཏུ་གཞུག་གོ །བསྒྲུབ་བྱ་དེ་མྱོས་པར་བསམ་པར་བྱ་སྟེ། དེའི་སྙིང་གར་ཡི་གེ་བཅུ་པའི་སྔགས་རྣམ་པར་བསམ་པར་བྱའོ། །ཡང་ཁ་དོག་དམར་པོ་སྒྲུབ་བ་པོས་ཡེ་ཤེས་ཀྱི་གཟུགས་ཀྱིས་ཡི་གེ་ལ་གཞུག་པར་བྱའོ། །དེ་དང་བསྒྲུབ་བྱ་གཅིག་ཏུ་གྱུར་པར་བྱའོ། །བསམ་གཏན་འདིའི་རབ་ཏུ་སྦྱོར་བས་ཉི་མ་བདུན་གྱིས་འཁོར་ལོས་སྒྱུར་བ་ཡང་དབང་དུ་འགྱུར་ཏེ། ཇི་སྲིད་འཚོའི་བར་དུ་ཐེ་ཚོམ་མེད་དོ། །རབ་ཏུ་མཉམ་པར་བཞག་པའི་སྔགས་པས་མི་གཡོ་བའི་བསམ་གཏན་གྱིས་བྱའོ། །རྒྱུད་གང་ལ་ཡང་མི་སྦྱིན་ནོ། །གལ་ཏེ་སྔགས་ཀྱང་མི་བསྟན། །དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་གྱི་བསམ་གཏན་གང་ལ་ཡང་མི་སྦྱིན། སྨྲ་བར་ཡང་མི་བྱ། སྔགས་ཀྱི་དབྱེ་བ་ཡང་མི་བྱ། བྲིས་སྐུ་ཡང་གང་གི་མདུན་དུ་ཡང་མི་དགྲམ་སྟེ། ཐང་ཀ་ཡང་གསང་བར་གཞག་གོ །རྒྱུད་འདི་རབ་ཏུ་སྦྱོར་བ་དང་། །

བཟླས་པ་དང་། སྨྲ་བ་གཞན་སུ་ལ་ཡང་འགའ་ཙམ་ཡང་མི་སྨྲ། གལ་ཏེ་སྨྲས་ན་དཔལ་རྡོ་རྗེ་འཇིགས་བྱེད་དང་། གཞན་ཡང་རྣལ་འབྱོར་མ་རྣམས་དང་། མཁའ་འགྲོ་མ་རྣམས་ཀྱིས་ཟའོ། །དམ་ཚིག་ཉམས་པར་འགྱུར་བས། དེའི་ཕྱིར་སྔགས་པས་སུ་ལ་ཡང་མི་སྦྱིན་ནོ། །དེ་ནས་དམ་ཚིག་མཉམ་པ་དང་། རྣམ་པར་རྟོག་པ་མེད་པ་དང་། དམ་པའི་བརྟུལ་ཞུགས་ཅན་དཔའ་བོ་བླ་མ་ལ་གུས་པ་དུལ་བ་ཅན། དེ་བཞིན་གཤེགས་པའི་བསྟན་པ་ལ་ངེས་པར་འཛིན་པ། རྒྱུད་སྦས་པ། མི་ཁྲོ་བ་སྙིང་རྗེ་དང་ལྡན་པ། བཟླས་པ་དང་བསམ་གཏན་ལ་ཕྱོགས་པ། རྣམ་པར་སྨིན་པ་ལ་འཇོམ་པ། འདི་ལྟ་བུའི་ཡོན་ཏན་ཁྱད་པར་ཅན་ནི་སློབ་མ་བཟང་པོ་སྟེ། དཀྱིལ་འཁོར་དམ་པ་དཔལ་རྡོ་རྗེ་འཇིགས་བྱེད་ཆེན་པོ་ལ་མཆོག་ཏུ་གུས་པ། སྙིང་རྗེ་ཆེན་པོས་ཡིད་བརླན་པ། རྣམ་པར་རྟོག་པ་མེད་པ། མཆོག་ཏུ་བླ་མ་ལ་གུས་པ། རབ་ཏུ་བརྟག་པ་ལ་ཤིན་ཏུ་རྣམ་པར་བསམས་ཏེ། བླ་མས་དེ་ལྟ་བུའི་སློབ་མ་ལ་དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་སྦྱིན་ནོ། །སྔགས་པས་གཞན་ལ་བྱིན་ན་དེ་དང་སློབ་མར་བཅས་ནས་དམྱལ་བར་འགྲོ་བར་ཐེ་ཚོམ་མེད་དོ། །འཇིག་རྟེན་འདིར་ནི་འཇིགས་པ་ཆེན་པོར་འགྱུར་རོ། །འཇིག་རྟེན་ཕ་རོལ་ཏུ་ནི་དམྱལ་བར་འགྲོའོ། །དམ་ཚིག་ཀྱང་ཉམས་པར་འགྱུར་རོ། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་བསམ་གཏན་གྱི་ལས་བསྒྲུབ་པ་བརྟག་པའི་རྟོག་པ་སྟེ་བདུན་པའོ།། །།དཔལ་རྡོ་རྗེ་འཇིགས་བྱེད་ཆེན་པོའི་འཁོར་ལོའི་རྒྱུད་འབུམ་པ་ནས་བཏུས་ནས་ཕྱུང་བ་རྟོག་པའི་ཕྱོགས་བཀླགས་པས་འགྲུབ་པ། དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་གྱི་དངོས་གྲུབ་འགྲུབ་པའི་རྟོག་པ་རྫོགས་སོ།། །།དཔལ་ཨོ་ཌྱན་གྱི་གནས་ཆེན་པོ་ནས་དཔལ་འཇམ་དཔལ་གྱི་རྒྱུད་ལས་ཕྱུང་བ་རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་འཇིགས་བྱེད་ཆེན་པོ་ཞེས་བྱ་བ། བླ་མ་དམ་པའི་དཀྱིལ་འཁོར་ཆེན་པོའི་སློབ་དཔོན་དཔལ་ལཱ་ལི་ཏ་བཛྲས་བཏོན་ནས་མཛད་པ་རྫོགས་

སོ།། །།རྒྱ་གར་གྱི་པཎྜི་ཏ་མཆོག་གི་དངོས་གྲུབ་བརྙེས་པ་བཱ་རོ་ཕྱག་རྡུམ་གྱི་ཞལ་སྔ་ནས་དང་།བོད་ཀྱི་ལོཙྪ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ།། །།

དཔལ་གཤིན་རྗེའི་གཤེད་ནག་པོའི་རྒྱུད་ཀྱི་རྒྱལ་པོ་རྟོག་པ་གསུམ་པ།

རྒྱ་གར་སྐད་དུ། ཤྲཱི་ཀྲི་ཥྞ་ཡ་མཱ་རི་ཏ་ནྟྲ་རཱ་ཛ་ཏྲི་ཀལྤ་ནཱ་མ། བོད་སྐད་དུ། དཔལ་གཤིན་རྗེའི་གཤེད་ནག་པོའི་རྒྱུད་ཀྱི་རྒྱལ་པོ་རྟོག་པ་གསུམ་པ་ཞེས་བྱ་བ། བཅོམ་ལྡན་འདས་དཔལ་གཤིན་རྗེའི་གཤེད་པོ་ལ་ཕྱག་འཚལ་ལོ། །དོན་དམ་ཆོས་སྐུ་ཞི་བ་ཉིད། །གང་འདིར་ཁམས་གསུམ་རྣམ་རྒྱལ་ཏེ། །གཤིན་རྗེའི་དགྲ་ཞེས་གྲགས་པ་ཡི། །འཁོར་ལོ་བསྐོར་བའི་ཆོ་ག་བཤད། །ཡོན་ཏན་ལྡན་པའི་སྔགས་པ་ཡིས། །ཆོ་ག་བཞིན་དུ་བསྙེན་བྱས་ནས། །དུར་ཁྲོད་དབེན་པ་ལ་སོགས་པར། །མཎྜལ་ཁྲུ་དོའི་ཚད་དུ་བྱ། །དྲི་དང་བ་ཡི་རྣམ་ལྔ་དང་། །ཉི་ཟླ་སོགས་པས་བྱི་དོར་བྱ། །བ་ལང་ལ་སོགས་དམ་རྫས་ལྔ། །གཞན་ཡང་ཚོགས་ཀྱི་འཁོར་ལོ་དང་། །ཕྱི་ནང་མཆོད་པའི་བྱེ་བྲག་གིས། །ལེགས་པར་མཆོད་པ་བྱས་ནས་ནི། །འཁོར་ལོ་བྲི་དང་བཏུ་བ་དང་། །དྲང་དང་བསྲེ་དང་སྤོ་བ་བརྩམ། །སྔགས་པ་རྣལ་འབྱོར་ལྡན་པ་ཡིས། །ལྷོ་ཡི་ཕྱོགས་སུ་ཁ་བལྟས་ཏེ། །དམ་ཚིག་རྗེས་སུ་དྲན་པ་ཡིས། །ཨོྃ་བཛྲ་ས་མ་ཡ་སྟྭཾ། གསང་སྔགས་འདི་ནི་དྲན་བྱེད་ཅིང་། །འཁོར་ལོ་བྲི་བ་བརྩམ་པར་བྱ། །དབུས་ནས་སོར་ཚད་བཅུ་དྲུག་པར། །ཀུན་ནས་ཟླུམ་པོར་བསྐོར་བ་ནི། །འདི་ནི་ནང་གི་འཁོར་ལོ་སྟེ། །རིམ་པ་གསུམ་དུ་བསྐོར་བ་ལ། །སྒོ་མེད་ལྕགས་མཁར་བཅུ་དྲུག་བྱ། །འདི་ནི་གཤིན་རྗེའི་གྲོང་ཁྱེར་ཏེ། །སྲིད་པ་གསུམ་གྱི་འཇུག་ས་ཡིན། །དེ་ཡི་ཕྱི་རིམ་མུ་ཁྱུད་གསུམ། །ཀུན་ཏུ་ལྕགས་རིས་བསྐོར་བ་སྟེ། །མུ་ཁྱུད་དེ་དག་རེ་རེ་ལའང་། །ཁང་པ་སུམ་ཅུ་རྩ་གཉིས་མཛེས། །འགྲོ་བ་ཆོས་བཞིན་སྤྱོད་པ་ཡི། །འཁོར་ལོ་འདི་ལྟར་བྲིས་ནས་ནི། །ཕྱི་རིམ་མུ་ཁྱུད་ཐ་མ་ལ། །ཡི་གེ་ཀ་སོགས་ད་ཡིག་མཐའ། །ང་ཉ་བསལ་ནས་དགོད་པར་བྱ། །ཡི་གེ་དྷ་སོགས་ཀྵཿཡིག་མཐར། །དེ་ཡི་རྗེས་སུ་བྲི་བར་བྱ། །

མུ་ཁྱུད་དབུས་མ་དག་ལ་ནི། །དབྱངས་ཡིག་བཅུ་དྲུག་ཉིས་འགྱུར་དགོད། །བཏུ་དང་དགོད་སོགས་བརྩམ་པ་ན། །མཚན་མ་འདི་དག་ཤེས་པར་བྱ། །ཟླ་བ་མིག་དང་ཡོན་ཏན་དང་། །རིག་བྱེད་མདའ་དང་དབང་པོ་དང་། །རྒྱ་མཚོ་བཀྲ་ཤིས་གཟའ་དང་ཕྱོགས། །དྲག་པོ་ཉི་མ་ཡན་ལག་ས། །ཚེས་ཞེས་བྱ་བར་རབ་ཏུ་གྲགས། །ཕྱི་རོལ་མུ་ཁྱུད་ཐ་མ་ལ། །ཤར་གྱི་ཚངས་ཐིག་ནས་བརྩམས་ཏེ། །རིམ་མིན་གཟའ་ཅན་ཁང་པ་ནས། །ཡི་གེ་བཀྲ་ཤིས་ཙམ་བླངས་ཏེ། །ནང་གི་ངོས་ཀྱི་མུ་ཁྱུད་ཀྱི། །ཚངས་ཐིག་གི་ནི་ངོས་དག་ལ། །ཕྱོགས་བཞིར་མིག་གི་ཚད་དུ་སྦྱིན། །རིམ་མིན་ཕྱོགས་ཅན་ཁང་པ་ནས། །ཡི་གེ་མིག་གི་ཚད་བླངས་ཏེ། །ཤར་དུ་དེ་ཡི་གཡས་གཡོན་གཞག །རིམ་མིན་བཀྲ་ཤིས་ཁང་བ་ནས། །དབྱངས་ཡིག་གཉིས་པ་ཅན་བླངས་ཏེ། །མིག་གི་ཚད་དུ་བྱས་ནས་ནི། །དེ་ཡི་ངོས་ལ་རེ་རེ་གཞག །ནུབ་ཀྱི་ཚངས་ཐིག་ནས་བགྲངས་པའི། །རྒྱ་མཚོ་ཅན་གྱི་ཁང་པ་ནས། །དབྱངས་ཡིག་བཅུ་གཅིག་དང་ལྡན་པ། །མིག་གི་ཚད་དུ་བླངས་ནས་ནི། །ལྷོ་ཕྱོགས་དེ་ཡི་གཡས་གཡོན་གཞག །ནུབ་ནས་རིམ་པ་མིན་པ་ཡི། །ཟླ་བ་ཅན་གྱི་ཁང་པ་ནས། །དབྱངས་ཡིག་བཅུ་གསུམ་དང་ལྡན་པ། །མིག་གི་ཚད་དུ་བླངས་ནས་ནི། །ལྷོ་ངོས་དེ་རྗེས་སྦྱིན་པར་བྱ། །དེ་ཉིད་དབྱངས་ཡིག་གསལ་བ་ནི། །མིག་གི་ཚད་དུ་བླངས་ནས་ནི། །སྔོན་བཞིན་ནུབ་ཀྱི་ངོས་སུ་སྦྱིན། །ནུབ་ནས་བཀྲ་ཤིས་ཁང་པ་ནས། །དབྱངས་ཡིག་བཅུ་གསུམ་པར་ལྡན་པ། །མིག་གི་ཚད་དུ་བླངས་ནས་ནི། །ནུབ་ཀྱི་ངོས་ལ་དེ་བཞིན་སྦྱིན། །བྱང་ནས་བཀྲ་ཤིས་ཁང་པ་ནས། །དབྱངས་ཡིག་བཅུ་གཅིག་པར་ལྡན་པ། །མིག་གི་ཚད་དུ་བླངས་ནས་ནི། །བྱང་གི་ངོས་ལ་དེ་བཞིན་སྦྱིན། །རླུང་གི་ས་བོན་ཞེས་བྱ་བ། །མིག་གི་ཚད་བླངས་དེ་རྗེས་སྦྱིན། །མདའ་ཅན་ཁང་པ་ནང་གནས་པ། །འོད་ཀྱི་གོང་བུར་བྱས་པ་དང་། །དེ་ཉིད་ནས་ནི་བགྲངས་པ་ཡི། །གཟའ་ཅན་ཁང་པ་ལ་གནས་པ། །དབྱངས་ཡིག་གསུམ་པར་

ལྡན་པ་དག །ཟླ་བའི་ཚད་དུ་བླངས་ནས་ནི། །བྱང་ཤར་མཚམས་སུ་རེ་རེ་སྦྱིན། །རྒྱ་མཚོའི་ཁང་པ་ན་གནས་པ། །དབྱངས་ཡིག་གཉིས་པ་དང་ལྡན་དག །རིམ་མིན་ཡོན་ཏན་ཁང་པ་ནས། །ཟླ་བའི་ཚད་དུ་བླངས་ནས་ནི། །ཤར་ལྷོའི་མཚམས་སུ་དེ་བཞིན་སྦྱིན། །རིམ་མིན་བཀྲ་ཤིས་ཁང་པ་ནས། །དབྱངས་ཡིག་ལྔ་པ་ལྡན་པ་དག །ཡན་ལག་ཅན་གྱི་ཁང་པ་ནས། །ཟླ་བའི་ཚད་དུ་བླངས་ནས་ནི། །ལྷོ་ནུབ་མཚམས་སུ་དེ་བཞིན་སྦྱིན། །རིམ་མིན་ཚེས་ཅན་ཁང་པ་ནས། །དབྱངས་ཡིག་གསུམ་དང་ལྡན་པ་དང་། །རིམ་མིན་བཀྲ་ཤིས་ཁང་པ་ནས། །ཟླ་བའི་ཚད་དུ་བླངས་ནས་ནི། །ནུབ་བྱང་མཚམས་སུ་དེ་བཞིན་སྦྱིན། །དེ་ལྟར་དགོད་པ་བྱས་ནས་ནི། །དེ་ནས་དྲང་བ་བརྩམ་པར་བྱ། །དམ་ཚིག་རྗེས་སུ་དྲན་བྱེད་ཅིང་། །རྡོ་རྗེ་ཤུགས་དང་ལྡན་པ་ཡིས། །ཤར་གྱི་ཚངས་ཐིག་ངོས་གཉིས་ནས། །ཡི་གེ་ཟུང་ལྡན་དྲངས་ནས་ནི། །དབུས་ཀྱི་ཁང་པར་གཞག་པར་བྱ། །ཕྱོགས་གཞན་ཚངས་ཐིག་ངོས་དག་ནས། །དེ་བཞིན་ཟུང་ལྡན་དྲངས་ནས་ནི། །དེ་བཞིན་དབུས་ཀྱི་ཁང་པར་གཞག །དེ་ནས་ཤར་གྱི་ཡི་གེ་ཡང་། །ཟུང་ལྡན་གཉིས་པ་དྲངས་ནས་ནི། །རིམ་པ་གཉིས་པའི་ཁང་པར་གཞག །ཕྱོགས་གཞན་དུ་ཡང་དེ་བཞིན་ནོ། །ཤར་གྱི་ཟུང་ལྡན་གསུམ་པ་ཡང་། །རིམ་པ་གསུམ་པའི་ཁང་པར་དྲང་། །ཕྱོགས་གཞན་དུ་ཡང་དེ་བཞིན་ནོ། །མཚམས་ཀྱི་ཡི་གེ་ཡ་བྲལ་ནི། །རང་རང་ནང་གི་མཚམས་སུ་དྲང་། །དེ་དག་ཕྱུང་བའི་ཁང་སྟེང་དུ། །དབྱངས་ཀྱི་ཡི་གེ་དྲང་བར་བྱ། །དབྱངས་ཀྱི་ཡི་གེའི་གཞི་ལ་ནི། །མིང་གི་ཡི་གེ་དྲང་བར་བྱ། །མིང་གི་ཡི་གེའི་གཞི་ལ་ནི། །སོ་སོ་ལས་དང་མཐུན་པ་ཡི། །བསྐུལ་བའི་ཡི་གེ་དགོད་པར་བྱ། །གསད་དང་བསྐྲད་དང་དབྱེ་བ་ལ། །ཡི་གེ་ཕཊ་ནི་གཞག་པར་བྱ། །མནན་པ་ལ་ནི་ཡི་གེ་ལྃ། །ཞི་བ་ལ་ནི་ཡི་གེ་ཨོཾ། །རྒྱས་པ་དེ་བཞིན་ཡི་གེ་སྭ། །དབང་ལ་བྃ་གྱིས་བརྒྱན་པ་སྟེ། །དགུག་པ་ལ་ནི་ཡི་གེ་ཛཿ། །དེ་ལ་ལས་ཀྱི་འོད་ཟེར་ནི། །

ཞི་བ་ཆུ་སྟེ་རྒྱས་པ་ས། །དབང་ནི་རླུང་སྟེ་དྲག་པོ་མེ། །དབྱེ་དགུག་བསྐྲད་པ་དབང་དང་མཐུན། །མནན་པ་ལ་ནི་རྒྱས་པ་བཞིན། །དྲང་བའི་སྦྱོར་བ་བྱས་ནས་ནི། །བསྲེ་བའི་སྦྱོར་བ་བརྩམ་པར་བྱ། །གཉིས་མེད་སྔགས་དང་ལྡན་པ་ཡིས། །དབུས་ཀྱི་བཀྲ་ཤིས་ཡི་གེ་ཡང་། །ཟླ་ལྟར་འོད་ཀྱི་གོང་བུར་བྱ། །སྔགས་ཀྱི་རྒྱལ་པོ་བཅུ་པ་ཡང་། །འོད་ཀྱི་གོང་བུར་དེ་ནང་དུ། །འདོད་པའི་བསྒྲུབ་བྱ་གཞག་པར་བྱ། །དེ་དཀྱིལ་རང་མིང་དང་པོར་གཞག །ཕྱོགས་ཀྱི་ཁྱིམ་ན་གནས་པ་ཡི། །ཡི་གེ་ཟུང་མ་ཐམས་ཅད་ཀྱང་། །དེ་ཚེ་འོད་ཀྱི་གོང་བུར་བྱ། །སྔགས་ཀྱི་རྒྱལ་པོ་བཅུ་པ་ཡང་། །བཅུ་གཉིས་ཁྱིམ་དུ་སྤེལ་ཏེ་བྲི། །བྱིན་རློབ་ཧཱུྃ་ཞེས་བྱ་བ་ཡང་། །ཁང་པ་བཞི་ལ་ཟུར་རེ་མཛེས། །ཡོངས་སུ་དག་པར་དགོད་བྱས་ནས། །མཆོད་དང་གཏོར་མ་བྱས་ནས་ནི། །སྤོ་པ་དག་ནི་བརྩམ་པར་བྱ། །ལས་ཀྱི་དབྱེ་བ་ཇི་ལྟ་བར། །འཁོར་ལོའི་རས་ནི་བླང་བྱ་སྟེ། །ཞི་བ་དང་ནི་རྒྱས་པ་ལ། །ཤིན་ཏུ་དགེ་བའི་རས་ལ་བྱ། །དབང་དང་དགུག་པ་སྨད་འཚོང་སོགས། །གསད་དང་དབྱེ་དང་བསྐྲད་པ་དང་། །མནན་པ་ལ་ནི་དུར་ཁྲོད་རས། །གི་ཝང་གུར་གུམ་ཞི་རྒྱས་ལ། །དབང་དང་དགུག་ལ་ཙནྡན་དམར། །མནན་པ་ལ་ནི་ལྡོང་རོས་སོགས། །བསྐྲད་ལ་བྱ་རོག་ཁྲག་གིས་ཏེ། །དབྱེ་ལ་རྟ་དང་མ་ཧེའི་འོ། །གསད་ལ་དུག་ལ་སོགས་པས་བྲི། །དགེ་བའི་རས་ལ་བཟང་པོའི་ཤིང་། །དགེ་མིན་ལ་ནི་རུས་པ་དང་། །ལྕགས་ལ་སོགས་པས་བྲི་བར་བྱ། །ཞི་བ་ཤར་བལྟས་དབང་ལ་ནུབ། །རྒྱས་པ་བྱང་སྟེ་དྲག་པོ་ལྷོ། །གཞན་ཡང་ཅི་རིགས་སྦྱར་བར་བྱ། །ཞི་རྒྱས་དབང་དང་དགུག་པ་ལ། །ས་བསྐོར་རིམ་བཞིན་དགོད་བྱས་ཏེ། །གནས་བསྐོར་དག་ནི་རིམ་ལས་བཟློག །གསད་བསྐྲད་དབྱེ་དང་མནན་པ་ལ། །ས་བསྐོར་རིམ་ལས་བཟློག་པ་སྟེ། །གནམ་བསྐོར་དག་ནི་རིམ་བཞིན་བྲི། །འདི་ལྟར་ལེགས་པར་མ་བྲིས་ན། །འཁོར་ལོ་རང་ལ་ལྡོག་པར་འགྱུར། །དེ་བས་ནན་ཏན་བསྐྱེད་དེ་བྱ། །རས་ཀྱི་འཁོར་ལོ་ལེགས་ཟིན་ནས། །མཎྜལ་ལ་གནས་

འཁོར་ལོ་དེ། །རས་ཀྱི་འཁོར་ལོ་སྤྱན་དྲངས་ཏེ། །རྡོ་རྗེ་བསྡུ་བའི་སྦྱོར་བ་ཡིས། །མཎྜལ་འཁོར་ལོ་བསྡུ་བར་བྱ། །རས་ཀྱི་འཁོར་ལོ་མཆོད་ནས་ནི། །བདེན་པའི་བྱིན་བརླབས་དམིགས་པར་བྱ། །ཇི་ལྟར་གསུངས་པའི་ཆོ་ག་བཞིན། །འཁོར་ལོ་སྤོ་བ་བྱས་ནས་ནི། །གསང་སྔགས་བཟླས་པ་བརྩམ་པར་བྱ། །ཨོྃ་བཛྲ་ས་མ་ཡ་སྟྭྃ། དམ་ཚིག་གི་སྔགས་སོ། །ཨོྃ་བཛྲ་བེ་ག་ཧཱུྃ། རྡོ་རྗེ་ཤུགས་ཀྱི་སྔགས་སོ། །ཨོྃ་ཨ་ས་མེ་ཏྲི་ས་མེ་མ་ཧཱ་ས་མ་ཡེ་སྭཱ་ཧཱ། ཡི་གེ་བསྲེ་བའི་སྔགས་སོ། །ཨོྃ་བཛྲ་ས་མཱ་ཛཿ། འཁོར་ལོ་སྤོ་བའི་སྔགས་སོ། །ཨོྃ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཕཊ་ཕཊ། འདི་ནི་རྩ་བའི་གསང་སྔགས་ཏེ་ལས་ཐམས་ཅད་པའོ། །ཨོྃ་ཧྲཱིཿཥྚྲཱིཿཝི་ཀྲྀ་ཏ་ནན་ཧུྃ་ཕཊ། འདི་ནི་ལས་ཀྱི་གསང་སྔགས་ཏེ་ལས་ཐམས་ཅད་པའོ། །ཤཱནྟིཾ་ཀུ་རུ་སྭཱ་ཧཱ། །ཞི་བར་བསྐུལ་བའོ། །པུཥྚིཾ་ཀུ་རུ་སྭཱ་ཧཱ། རྒྱས་པའིའོ། །བ་ཤཾ་ཀུ་རུ་སྭཱ་ཧཱ། དབང་གིའོ། །མཱ་ར་ཡ་ཕཊ། གསད་པའི་འོ། བི་དྭེ་ཥ་ཡ་ཕཊ། དབྱེ་བའི་འོ། །ཨུཙྪ་ཊ་ཡ་ཕཊ། བསྐྲད་པའི་འོ། །སྟྭཾ་བྷ་ཡ་ཧཱུྃ་ལྃ། མནན་པའི་འོ། །ཨཱ་ཀཪྵ་ཡ་ཧཱུྃ་ཛཿ། དགུག་པའི་འོ། །ཨོྃ་མུྃཿ། སླར་དགྲོལ་བའི་འོ། །ཨཱ་ལི་ཀཱ་ལིའི་གྲོང་ཁྱེར་ནི། །གསང་སྔགས་འབྱུང་བའི་རྩ་བ་སྟེ། །ལས་ཀྱི་བཙོན་རར་དག་ཀྱང་ཡིན། །ཡི་གེ་བཏུ་བ་མེད་ན་ནི། །གསང་སྔགས་སྒྲ་ནི་ལོག་པར་འགྱུར། །ཡི་གེ་ཚང་བར་མ་བཀོད་ན། །གསང་སྔགས་སྒྲ་ནི་ཉམས་པར་འགྱུར། །གསང་སྔགས་བརྡ་ཡིས་མ་བརྗོད་ན། །སྔགས་ནི་དངོས་གྲུབ་མེད་པར་འགྱུར། །དྲང་བ་དག་ནི་མ་བྱས་ན། །ཤིན་ཏུ་འཁོར་བར་མི་འགྱུར་རོ། །ཡི་གེ་བསྲེ་བ་མ་བྱས་ན། །བཅུ་དྲུག་ཁང་པ་དོན་མེད་འགྱུར། །བསྐོར་ཕྱོགས་ལོག་ན་དོན་མི་འགྲུབ། །རིག་སྔགས་ཉམས་དང་ལོག་པ་ནི། །ལྷ་མིན་གཡུལ་ལས་ཕམ་པ་དང་། །དབང་པོའི་དགྲ་ཡིས་དགྲ་བསད་བཞིན། །འཁོར་ལོ་སྤོ་བ་མ་བྱས་ན། །ཆོ་ག་དག་ནི་ཉམས་པར་འགྱུར། །རྒྱུ་ཡིན་པ་དང་སྦྱོར་བ་དང་། །དད་པ་བརྟན་

པས་འགྲུབ་པར་འགྱུར། །དེ་བས་ནན་ཏན་བསྐྱེད་དེ་བྱ། །དཔལ་གཤིན་རྗེའི་གཤེད་ནག་པོའི་འཁོར་ལོ་བྲི་བའི་ཆོ་ག་རྒྱས་པའི་རྟོག་པ་སྟེ་དང་པོའོ།། །།དེ་ནས་གཞན་ཡང་བཤད་བྱ་བ། །སྔགས་པས་རྟག་ཏུ་བསྟེན་པ་ནི། །རུ་སྦལ་འོ་མ་ཞེས་བྱ་དང་། །དེ་བཞིན་འོད་ཀྱི་ལོ་མ་དང་། །འཇིམ་པ་སྐམ་པོ་ཉིད་དང་ནི། །དེ་བཞིན་མེ་ཡི་ཁུ་བ་དང་། །སྒྲ་བརྙན་གྱི་ནི་རྫས་དག་སྟེ། །འདི་རྣམས་རྟག་ཏུ་སྤྱད་ན་ནི། །རང་བཞིན་གྱིས་ནི་ནད་མེད་ཅིང་། །ཚེ་རིང་དབང་པོ་རྒྱས་པ་དང་། །རྟག་ཏུ་ལང་ཚོ་དར་ལ་བབ། །ལྷ་རྣམས་ཀུན་གྱིས་བྱིན་གྱིས་རློབ། །འདི་ལ་དཔྱད་པར་མི་བྱ་སྟེ། །མཐུ་དང་ངོ་བོ་ཉིད་ཀྱིས་འགྲུབ། །ཏིང་འཛིན་སྔགས་ཀྱིས་བྱིན་བརླབས་ན། །ལས་ཀྱི་རྣམ་སྨིན་སྦྱོང་བར་བྱེད། །རིག་པ་འཛིན་པའི་ས་ལ་གནས། །དེ་ཕྱིར་ཆོ་ག་བཞིན་དུ་བསྟེན། །ཚེས་གཅིག་སྐྱ་རེངས་ཤར་ཙམ་ན། །སྣོད་མ་རེག་ལ་རུ་སྦལ་ཞོ། །དྲོད་མ་ཡལ་བར་བཏུང་བའམ། །ཡང་ན་ཉི་མའི་སྦུ་གུས་བཏུང་། །མར་གྱི་ངོ་ཡི་ཚེས་གཅིག་ལ། །འོད་ཀྱི་ལོ་མ་བཙལ་ནས་ནི། །དེ་ཉིད་ནས་ནི་བཟུང་ནས་ཀྱང་། །ཞག་གསུམ་སྐྱ་རེངས་ཤར་བ་ན། །ལོ་མ་དེ་བཅང་བཟའ་བར་བྱ། །ཡང་ན་ཉི་མའི་སྦུ་གུས་བྱ། །འཇིམ་པ་བཟང་པོ་སྦྱར་ནས་ནི། །ཞག་གསུམ་ཆུ་ཡི་ནང་དུ་སྦང་། །དེ་བླངས་ནས་ནི་ཡང་བསྐམས་ནས། །ཕྱེ་མ་བྱི་ལའི་སྦར་ཚད་རེ། །བ་ཡི་འོ་མ་དང་སྦྱར་ནས། །སྔགས་པས་རྟག་ཏུ་བཏུང་བར་བྱ། །མེ་ཡི་སྡོང་པོ་སར་པ་ནི། །ས་ཡི་མར་གྱིས་དྲིལ་ནས་ནི། །ཁ་སྦྱར་སྣོད་དང་ལྡན་བྱས་ནས། །མེ་ཆུ་ས་ཡིས་བཙིར་ནས་ནི། །བཏུང་ངམ་ཉི་མའི་སྦུ་གུས་བཏུང་། །ལན་ཚྭ་བྲལ་བའི་སྒྲ་ལས་ནི། །ཞག་གསུམ་བཅིངས་པའི་སྒྲ་བརྙན་རྫས། །ནམ་གྱི་གུང་ལ་སྔགས་པས་བླངས། །ཆ་གསུམ་སྣོད་དུ་ཞག་གསུམ་གཞག ། རྩེ་མོའི་ཆ་ནི་བྱུག་པ་སྟེ། །དབུས་མའི་ཆ་ནི་བདུད་རྩི་ཡིན། །རྩ་བའི་ཆ་ནི་དོར་བར་བྱ། །འདི་རྣམས་སོ་སོར་བསྟེན་པ་ན། །ཐ་མར་འབྲས་བུ་གསུམ་གྱི་ཕྱེ། །བྱི་ལའི་སྦར་ཚད་རེ་དང་སྦྱར། །མ་སྦྱར་ན་ཡང་ཉེས་པ་མེད། །ཚོགས་པར་བསྟེན་ན་བཟང་བར་བཤད། །རེ་རེ་བསྟེན་

ཀྱང་ཉེས་པ་མེད། །འཇམ་དཔལ་གྱི་རྟོག་པ་ལས་དམ་རྫས་སྨན་དུ་བསྒྱུར་ཏེ་བསྟན་པའི་ཆོ་གའི་རྟོག་པ་སྟེ་གཉིས་པའོ།། །།དེ་ནས་གཞན་ཡང་བཤད་པ་ནི། །ལས་ཀྱི་གྲོགས་ཀྱི་བྱེ་བྲག་སྟེ། །ཞི་བའི་ལས་ནི་ཟླ་བ་ཡིན། །རྒྱས་པ་དེ་བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དབང་དུ་བྱ་བ་རིག་བྱེད་ཡིན། །དགུག་པའི་ལས་ནི་དེ་བཞིན་མདའ། །བསྐྲད་དང་མནན་པ་དབང་པོ་ཡིན། །མནན་པ་རྗེས་སུ་འབྲང་བ་ཡིས། །གསད་པའི་ལས་ནི་རྒྱ་མཚོར་འདོད། །ལས་རྣམས་དེ་དག་རེ་རེ་ཡང་། །འཕགས་སོགས་མཆོད་སྦྱིན་དང་པོ་སྟེ། །ཉི་མ་གཉིས་པ་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་ཚང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། །གྲོགས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་བསྐོར་བ་ཉི་མ་བཞི། །ལས་ཀྱི་བྱེ་བྲག་འདི་ཤེས་ན། །ཞི་བས་འཇིགས་པ་བརྒྱད་ལས་སྐྱོབ། །རྒྱས་པས་ཡོན་ཏན་དྲུག་དང་སྦྱོར། །དབང་གིས་མོས་པ་རྣམ་བཞིར་འགྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ནི་ཇི་ལྟར་དེ་བཞིན་ནོ། །སྔགས་དང་རྫས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པར་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བར་གདོན་མི་ཟ། །དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་སྦྱོར་བའི་དངོས་གྲུབ་རིང་། །བླ་མས་མན་ངག་བསྟན་བྱས་ཀྱང་། །སློབ་མ་ཡིད་གཉིས་ཡོད་པ་ན། །

དེ་ལ་དངོས་གྲུབ་རིང་བར་བཤད། །བླ་མས་མན་ངག་སྦས་བྱས་ཀྱང་། །སློབ་མ་ཡིད་གཉིས་མི་ཟ་ཞིང་། །བླ་མའི་མན་ངག་དམ་པ་ཞེས། །གཅེས་སྤྲས་བྱས་ན་འགྲུབ་པར་ངེས། །དེ་ཡི་ཕྱིར་ན་སྔགས་པ་ཡིས། །རང་གི་ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །བསྙེན་བཀུར་བྱས་ན་ནུས་མཐུ་ཆེ། །གསང་སྟེ་བརྗོད་པས་བར་ཆད་མེད། །ཡོན་ཆེན་ཕུལ་བ་བྱས་པས་ནི། །རང་སེམས་རིན་ཆེན་རྣམ་གཉིས་འགྱུར། །རིན་ཆེན་གཉིས་ལས་གྲུབ་པ་འབྱུང་། །དཀོན་པར་གྱུར་པས་བསྔགས་པ་བརྗོད། །བསྔགས་ན་ཡོན་ཏན་འབྱུང་འགྱུར་ཏེ། །བསྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང་། །གང་གིས་བསྔགས་པ་མ་བྱས་པ། །དེ་ལ་འདོད་དོན་མི་སྟེར་རོ། །དད་པ་སངས་རྒྱས་དད་བ་ཆོས། །དད་པ་དགེ་འདུན་དད་པ་མ། །དད་པ་བླ་མ་དད་པ་ཕ། །དད་པ་ལམ་ཆེན་དད་པ་གྲུ། །དད་པ་ཡིད་བཞིན་ནོར་བུ་སྟེ། །དད་པ་གསང་སྔགས་དངོས་གྲུབ་ཉིད། །དད་པ་བསོད་ནམས་ནོར་ཉིད་དེ། །དེ་ཡི་ཕྱིར་ན་སྔགས་པ་ཡིས། །རང་སེམས་དད་པ་བསྐྱེད་པའི་ཕྱིར། །གཞན་ལ་གུས་པས་མཆོག་ཏུ་བཀུར། །དཔལ་གཤིན་རྗེའི་གཤེད་ནག་པོའི་འཁོར་ལོ་བསྐོར་བའི་ཆོ་ག་ལས། །ལས་ཀྱི་རྒྱུད་དང་གྲོགས་བསྟེན་པའི་རྟོག་པ་སྟེ་གསུམ་པའོ།། །།དཔལ་གཤིན་རྗེའི་གཤེད་ནག་པོའི་རྒྱུད་རྟོག་པ་གསུམ་པ་རྫོགས་སོ།། །།

དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། ཤྲཱི་བཛྲ་བྷཻ་ར་བ་ཀལྤ་ཏནྟྲ་རཱ་ཛ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ། ངག་གི་དབང་ཕྱུག་ལ་ཕྱག་འཚལ་ལོ། །དེ་ནས་འདིར་ནི་བཤད་བྱ་བ། །ཇི་ལྟར་འགྲོ་རྣམས་ཟད་བྱེད་ཅིང་། །སྡུག་བསྔལ་རྣམ་ཐར་བྱེད་པ་ཡི། །སྒྲུབ་པའི་ཐབས་ཆེན་མཆོག་གྱུར་པ། །གསང་སྔགས་དེ་ལས་འབྱུང་བར་འགྱུར། །དང་པོར་རྣམ་པར་སྣང་མཛད་དེ། །དེ་དང་ཉེ་བར་ངག་དབང་ཕྱུག །རྡོ་རྗེས་འཁོར་ལོ་སྒྱུར་བའོ། །གདོན་གྱི་བདག་དང་འབྱུང་པོའི་རྗེ། །མི་ཡི་ས་བོན་གཉིས་ལྡན་བྱ། །མཆོད་རྟེན་སྲེག་བྱེད་མཐའ་དང་བཅས། །གཞན་དུ་ཤེས་པར་མི་འགྱུར་ཏེ། །རྡོ་རྗེ་ཅན་གྱི་མཁའ་ལ་གནས། །ཡི་གེ་འབུམ་ཕྲག་ཁྲི་བརྗོད་ན། །ཉམས་པ་ཐམས་ཅད་སེལ་བྱེད་ཅིང་། །

ཞི་དང་རྒྱས་དང་དབང་མངོན་སྤྱོད། །གསོད་དང་སྐྲོད་དགུག་དབྱེ་རིངས་དང་། །དམན་པར་བྱེད་དང་རྒྱལ་སྲིད་སོགས། །ཐོབ་པ་ཉིད་ལ་ཐེ་ཚོམ་མེད། །དུར་ཁྲོད་ཚང་ཚིང་ཁྲོན་ངོགས་རྩུབ། །ཤིང་གཅིག་ཁང་སྟོང་མཚན་གཅིག་དབེན། །གང་འདོད་གནས་སུ་བསམ་གཏན་བརྩམ། །དེ་ནས་བཅོམ་ལྡན་འདས་འཕྲུལ་བ་ཐམས་ཅད་ལ་ཁྱབ་པ་མེ་ལོང་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། །སྐུ་དང་ཡེ་ཤེས་ཐམས་ཅད་ལ་ཁྱབ་པར་བྱ་བའི་ཕྱིར། །སྐུ་མདོག་དཀར་པོ་ཞལ་ལྔ་དང་ལྡན་པར་བྱས་ནས། །འཇིག་རྟེན་པ་ཐམས་ཅད་ལ་གཟིགས་ནས། །རང་གི་རིགས་ཀྱི་ཡི་གེ་ཉིད་བརྗོད་པས། སྐུ་དང་གསུང་དང་ཐུགས་དང་ཡོན་ཏན་དང་། ཕྲིན་ལས་དང་། ཡེ་ཤེས་ཀྱང་གཅིག་གི་ངོ་བོར་སྤྲུལ་པའི་སྐུར་གྱུར་ཏོ། །ཀྱེ་མ་བཅོམ་ལྡན་རྡོ་རྗེ་ཆེ། །དོན་རྣམས་བསྐྱེད་པ་ཡང་ཉིད་དོ། །མཁའ་དཀྱིལ་འོད་ཀྱིས་འགེངས་འགྱུར་བ། །སླར་ཞིང་ཁ་དོག་ལྔ་ལྡན་པ། །ས་བོན་སྔགས་ཀྱིས་བསྐུལ་བ་ཡི། །འོད་ཀྱི་རྩེ་ཕྲག་ཐུབ་པའི་སྐུ། །ཀུན་ཀྱང་སངས་རྒྱས་གནས་ལས་སྐྱེས། །རང་ལ་ཞུགས་པས་སྐུ་རྫོགས་འགྱུར། །ཞལ་དྲུག་ཁྲོ་གཉེར་རབ་བརྗིད་པ། །མ་ཧེའི་ཞལ་ལྡན་སྟེང་གནས་པ། །འཇམ་དཔལ་ཞལ་ནི་འཛུམ་བཅས་བཞུགས། །ལྷག་མ་དམར་དང་སེར་དང་སྔོ། །དུ་བའི་མདོག་མཚུངས་གྱེན་སྐྲར་ལྡན། །ཐོད་པ་སྐམ་རློན་རྒྱུ་མ་སྦྲུལ། །རུས་པ་རྡོ་རྗེའི་ཕྲེང་བས་བརྒྱན། །གླང་ཆེན་སྟག་ལྤགས་གྱོན་ནས་ནི། །ཧཱུྃ་ཕཊ་གླུར་ལེན་མོ་ཅན། །ནམ་མཁའི་ལུས་ཅན་ཁྲོ་བོའི་སྤྲིན། །ཡང་དང་ཡང་དུ་སྤྲོ་བྱེད་པའི། །ཕྱག་དྲུག་རབ་ཏུ་བརྗིད་པ་སྟེ། །དབྱུག་པ་ཐོ་བ་གཏུན་ཤིང་དག །གཡས་པའི་ཕྱག་གིས་རིམ་བཞིན་འཛིན། །དགྲ་སྟ་དང་ནི་ལྕགས་ཀྱུ་དང་། །ཞགས་པ་གཡོན་པའི་ཕྱག་གིས་འཛིན། །པདྨ་ཉི་མ་མ་ཧེ་དང་། །གཤིན་རྗེའི་སྟེང་ན་འགྱིང་བག་ཅན། །ཞབས་དྲུག་གཡོན་བརྐྱང་གར་གྱིས་གནས། །འཇིག་རྟེན་བདག་པོ་མཐར་མཛད་པའོ། །དེ་ལྟར་གང་ཞིག་དད་པ་དང་། །བློ་ལྡན་གཡོ་སྒྱུ་རབ་སྤངས་ཤིང་། །ལེགས་པར་དབང་རྣམས་ཐོབ་བྱས་ནས། །རྡོ་རྗེ་སློབ་དཔོན་མཉེས་བྱེད་པས། །ཡང་ནས་ཡང་དུ་དྲན་བྱེད་ན། །བརྟན་པ་ཆེན་པོ་ཐོབ་པར་འགྱུར། །ལྷ་ཡི་དགེ་འདུན་ང་ལ་ཉོན། །དཔའ་

བོ་འཆང་ལ་རབ་དགའ་ཞིང་། །ཤ་ཆེན་རྟག་ཏུ་མུར་བྱེད་ན། །ལས་རྣམས་དེ་ཡིས་མྱུར་དུ་འགྲུབ། །སྐུ་ནི་དུ་མ་འཕྲོ་བྱེད་ཅིང་། །སྐུ་ལ་སྐུ་རྣམས་ངེས་ཐིམ་བྱེད། །ཐམས་ཅད་སྒྱུ་མ་ཉིད་ཤེས་པས། །འཇིག་རྟེན་རྣམས་སུ་ཡིད་སད་བྱེད། །ཁོང་སྟོང་རྩ་ནི་ཀ་བ་སྟེ། །རྒྱུན་དུ་བྱང་ཆུབ་སེམས་འཛག་བྱེད། །ཆུ་སྐྱེས་དམར་པོ་ཁ་སྦྱར་གཉིས། །ཡན་ལག་གཉིས་ཀྱིས་ལེགས་པར་བཅུན། །ཤེས་པ་འཕེལ་བ་མེ་དང་རླུང་། །ཉི་མ་ཟླ་བ་ཐབས་ལྡན་དང་། །ཤེས་རབ་ལྡན་པར་ཤེས་པར་བྱ། །གཉིས་པོ་དེ་ཉིད་རྣམ་སྤངས་ན། །ཁོང་དུ་ཆུད་པར་མི་འགྱུར་རོ། །ཆུ་སྐྱེས་ཁ་སྦྱོར་ལ་བརྟེན་ཏེ། །གསུམ་གནས་པ་ཡི་ཏིང་འཛིན་ལ། །རྡོ་རྗེ་ཆོས་ཀྱིས་རྒྱས་བཏབ་པའི། །ཐབས་དང་ཤེས་རབ་གྲོལ་བའི་རྒྱུ། །བློ་ལྡན་འབད་པས་ཤེས་པར་འགྱུར། །དེ་ཕྱིར་དེ་ལ་བརྩོན་པར་བྱ། །ཆོས་རྣམས་ཆོས་ཉིད་དབྱེར་མེད་པས། །སྟོང་པ་ཉིད་ཀྱི་ཡེ་ཤེས་ཆེ། །མི་ཤིགས་རྟོག་བྲལ་མཚན་མ་མེད། །བདེ་ཆེན་ཡེ་ཤེས་རྡོ་རྗེའི་སྐུར། །ཡེ་ཤེས་མི་རྟོག་རྟོག་པ་བྲལ། །རྟོག་པའི་མཚན་མ་ཐམས་ཅད་སྲེག །སྤྲོས་པའི་མཚན་མ་མཐའ་དག་ནི། །ཇི་སྙེད་སྒྱུ་མའི་རྣམ་པ་ཤེས། །དེ་ཉིད་ཤེས་ནས་གྲོལ་བའོ། །མི་ཤེས་པས་ནི་ཕྱིར་ཞིང་འཁོར། །འཇིག་རྟེན་སྐྱེ་བོ་བློ་ལྡན་འགས། །ངེས་པར་རྟོག་པ་ཐབས་ཀྱི་མཆོག །སྡུག་བསྔལ་ཆེན་པོ་རབ་འཇིགས་ནས། །བདེ་བ་འདོད་པས་ནན་ཏན་བྱ། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས། །ཐབས་དང་ཤེས་རབ་ཀྱི་བསམ་གཏན་བསྟན་པའི་ལེའུ་སྟེ་དང་པོའོ།། །།དེ་ནས་ཡང་དག་བཤད་བྱ་བ། །སྔགས་གྲུབ་པ་ལས་བྱུང་བ་ཡི། །ལས་རྣམས་འདིར་ནི་ཤེས་བྱ་སྟེ། །དེར་ནི་ལྷ་ཡི་སྐུ་ཡང་སྦྱར། །ཞི་སོགས་བཟླས་པའི་རིམ་པ་ལ། །རྡོ་རྗེའི་དབུས་སུ་རྡོ་རྗེ་ནི། །ཉི་ཟླ་ལ་བརྟེན་ཡི་གེ་ཡི། །ཕྲེང་བ་ཁ་དོག་ལྔར་ཤེས་པ། །སྐྱེན་བུལ་སྤངས་ནས་བཀླག་པ་ནི། །མཁས་པས་བཟླས་པའི་རིམ་པའོ། །དྲག་པོའི་ལས་རྣམས་སྒྲུབ་པ་ལ། །ཉོན་མོངས་གཅོད་པའི་འཁོར་ལོ་ནི། །སེར་པོ་རྩེ་རྩིབས་བཅུ་བ་ལ། །འོད་ཟེར་སྣ་ཚོགས་འཕྲོ་བ་བསམ། །ཞི་བར་འདོད་པའི་སྐྱེས་བུ་དེས། །སེམས་ནི་ཡང་དག་མཉམ་གཞག་ནས། །སྔགས་ཀྱི་འོད་ཀྱང་འགྲོ་གཞན་ལ། །ཕན་པའི་ཡིད་དང་ལྡན་པར་བྱ། །གྲོ་ག་རས་དང་ཤིང་ཤུན་ལ། །

གུར་གུམ་གི་ཝང་དྲི་རྣམས་ཀྱིས། །མཆོད་རྟེན་རིམ་པ་ལྔར་ལྡན་ཞིང་། །གདུགས་དང་འཁོར་ལོ་ལྡན་པར་བྱ། །སྒྲུབ་པ་པོ་ཡི་མིང་དང་རུས། །དེ་ཡི་བུམ་པའི་ནང་དུ་བྲི། །ཡེ་དྷརྨཱ་ལ་སོགས་པ་ཡི། །སྔགས་ཀྱིས་གཡོན་ནས་བསྐོར་བར་བྲི། །ཅིག་ཤོས་གཡས་ནས་གཡོན་དུ་བྲི། །དེ་ལ་སྤེལ་ཚིག་མང་པའམ། །ཡང་ན་འཁོར་ལོའི་བར་དུ་གཞག །འཁོར་ལོ་ཀུན་ལ་ཁ་སྦྱོར་གནད། །རབ་ཏུ་གནས་པར་བྱས་ནས་ཀྱང་། །ལུས་སམ་མགུལ་ལམ་གང་བདེར་གཞག །དེས་ནི་གདོན་དང་བྱད་སྟིམས་དང་། །རིམས་དང་ཡམས་རྣམས་སེལ་བར་བྱེད། །གང་ཞིག་ཡུལ་རྣམས་གཞོམ་འདོད་ན། །ཧུྃ་གི་ས་བོན་དང་ལྡན་པར། །མིང་ཡིག་ཙམ་པོ་བྲི་བར་བྱ། །སོ་ཕག་ཕྱེ་མ་ལྡོང་རོས་དང་། །བ་བླ་མ་ཧེའི་ཁྲག་གིས་བརྫིས། །ཟླ་གམ་གཉིས་པའི་གཟུགས་བྱས་ཏེ། །བར་དུ་གང་འདོད་བསྒྲུབ་བྱ་ཡི། །གཟུགས་བརྙན་སོར་བརྒྱད་པ་ཡི་ཚད། །བྱས་ལ་གན་རྐྱལ་དུ་གཞག་ལ། །མ་ཧེ་གདོང་གི་སྦྱོར་བ་ཡིས། །ཁྲི་ཕྲག་གཅིག་ཏུ་སྔགས་བཟླས་ནས། །དུམ་བུ་དུམ་བུར་གཏུབས་བྱས་ཏེ། །ཆུ་བོའི་གཞུང་དུ་དོར་བྱས་ན། །སྐད་ཅིག་དེ་ལ་དེ་དབང་འགྱུར། །བྱ་རོག་འུག་པའི་གཟུགས་བྱས་ཏེ། །མ་ནུ་མ་ལི་རོ་ཙ་ནས། །ཁྱོ་ཤུག་བསྒྲུབ་བྱའི་མིང་བྲིས་ཏེ། །གཤིན་རྗེའི་ཕྱོགས་བལྟས་གསང་སྔགས་གདོན། །རྐང་པ་གཡོན་པས་མནན་ནས་ནི། །མི་ཡི་རྗེ་ངར་ཕུར་པས་གདབ། །སྐད་ཅིག་ཙམ་ལ་དེ་དག་དབྱེ། །དེ་ནས་འདིར་ནི་བསད་པ་ཡི། །ཆོ་གའི་རིམ་པ་བཤད་པར་བྱ། །ཞལ་དྲུག་ཕྱག་དྲུག་ཞབས་དྲུག་གམ། །ཡང་ན་ཞལ་གཅིག་ཕྱག་བཞིའམ། །ཞལ་གཅིག་ཕྱག་གཉིས་པ་ཡང་རུང་། །མ་ཧེའི་གདོང་གི་སྦྱོར་བ་ཡིས། །ཁྲག་རྣམས་སྣ་ཚོགས་ཐ་དད་དང་། །བསྒྲུབ་བྱའི་རྗེས་དང་དུག་གི་རིགས། །རྟ་དང་མ་ཧེ་བོང་བུའི་ཆུས། །སྦྲུས་པའི་བསྒྲུབ་བྱའི་ལིང་ག་བྱ། །ལུས་ལ་ཚེར་མས་གཟུགས་བྱ་ཞིང་། །ཏིལ་མར་གྱིས་ཀྱང་བསྐུ་བར་བྱ། །ཡང་ནི་ཤིང་ལོ་གྲོ་གའམ། །དུར་ཁྲོད་རས་སམ་ཤུན་པ་ལ། །རང་ཉིད་གཅེར་བུ་སྐྲ་བཤིག་ནས། །ལུས་ནི་ཐལ་བས་བྱུགས་བྱས་ཏེ། །མངོན་སུམ་ཁྲོས་ནས་ཤ་ཆེན་བཟའ། །རབ་ཏུ་ཞིམ་པའི་ཆང་འཐུང་ཞིང་། །ནག་པོའི་ཆོས་ཀྱི་མཚན་ཕྱེད་དུས། །འཁོར་ལོ་བྲི་བ་བརྩམ་པར་བྱ། །ལེ་ཚེ་བཅུ་གཉིས་འཁོར་ལོ་ནི། །ཧཱུྃ་

དང་ཧྲཱིཿཥྚྲཱིཿདབུས་སུ་དགོད། །ཎ་ཡོ་ནི་ར་རྩིབས་མཆན་ལ། །ཡུངས་ཀར་ཏིལ་དང་སྐགས་ཁུ་དང་། །རྟ་དང་མ་ཧེ་ར་ཁྱི་ཁྲག །བྱ་རོག་འུག་པའི་སྒྲོ་ཡིས་བྲི། །ཡི་གེ་ཡ་ཡི་ལྟོ་བར་ཡང་། །མིང་དང་རུས་སུ་ལྡན་པར་བྲི། །ཕྱོགས་བཞིར་ཡི་གེ་བཅུ་པ་ནི། །མིང་དང་བཅས་པ་བྲི་བར་བྱ། །བརྒྱད་པོ་དག་ལ་རིམ་པ་བཞིན། །ཡི་གེ་འདི་དག་བྲི་བར་བྱ། །ཨོྃ་མུ་ས་ལེ་ཙུརྞ་ར་ག་ཙ་ར་ན་ཙུ་ཤ་ན་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཡི་གེ་ཡ་ལ་བསྐོར་ནས་ནི། །བསྒྲུབ་བྱ་གཟུགས་དང་ལྡན་པར་བྲི། །དེ་ཡི་མུ་ཁྱུད་དག་ལ་ནི། །ཡི་གེ་བཅུ་པ་མིང་བཅས་བྲི། །ཕྱོགས་བཞིར་རྩེ་གསུམ་རྡོ་རྗེས་མཚན། །དེ་བཞིན་རྫས་རྣམས་མ་ལུས་པས། །འཁོར་ལོ་ལྟོ་བར་ལྡན་པ་བྲི། །གཤིན་རྗེའི་གཟུགས་ནི་རལ་གྲི་དང་། །དབྱུག་པ་འཛིན་པ་བྲིས་ནས་ནི། །དེ་དང་དེ་གཉིས་ལྟོ་སྦྱར་ལ། །མཚན་ངན་ཐོད་པའི་ནང་དུ་གཞུག །ཚ་གསུམ་སྐེ་ཚེ་དུག་མུ་ཟི། །རོ་ཉེས་བཀང་ནས་དཀྱིལ་འཁོར་ནི། །གྲུ་གསུམ་དབུས་སུ་གཞག་པར་བྱ། །ཡུངས་དང་བྲ་བོ་སཱ་ལུ་ནག །ཛ་བྷི་བྲ་བོ་སོགས་རྣམས་ལ། །གསང་སྔགས་རྒྱལ་པོ་བརྗོད་བྱས་ཏེ། །དྲོའམ་དུ་བ་འཐུལ་བར་དུ། །རིམས་དང་རིམས་ཀྱི་ཁྲག་རྣམས་ནི། །མ་ལུས་ཟད་པར་འཐུང་བ་ཡིས། །མ་ཡེངས་པར་ནི་བསམ་གཏན་བྱ། །ཡང་ན་བསྒྲུབ་བྱ་ཟ་བར་མཐོང་། །ཤིང་གཅིག་རྩར་ནི་རེངས་པ་དང་། །མལ་གྱི་འོག་ཏུ་ཞ་ཞིང་ལྐུགས། །ཆུ་མདོར་འབྱེད་ཅིང་རི་རྩེར་བསྐྲད། །གསད་པ་མེ་ཐབ་འོག་ཏུ་སྦ། །དགུག་པ་ལ་ནི་སྒོ་ཁང་འོག །ལྷ་འམ་འཁོར་ལོ་སྒྱུར་བའོ། །བདེ་གནས་རྣམས་ཀྱིས་དབང་དུ་འགྱུར། །མར་ཁུ་ཆེན་པོ་ཐོད་པ་ཡི། །ནང་དུ་བླུགས་ནས་བསྐོལ་བྱས་ཏེ། །བཞར་བས་མིག་ལ་བྱུག་བྱེད་ན། །མངོན་ཤེས་དེ་ཉིད་མྱུར་དུ་འཐོབ། །རིགས་ལྡན་རྒྱལ་པོ་ལས་རྙེད་ཅིང་། །མདོག་ལྡན་ལང་ཚོ་གསར་བཀུག་ལ། །ཙནྡན་ལྡེ་གུ་མང་བྱས་ཏེ། །ལས་ཀྱི་སྦྱོར་བས་དེ་ཉིད་བཅིང་། །ཡང་ན་མེ་ལ་གདུང་བས་འགྲུབ། །ཨོྃ་བཛྲ་ཀྲོ་དྷ་ཡ་མ་རཱ་ཛཿབཛྲ་ཀཱི་ལི་ཀཱི་ལ། ཧཱ་ན་ཧ་ན་མཱ་ར་ཡ་ཕཊ། ཅེས་བྱའི་གསང་སྔགས་བརྗོད་བྱས་ལ། །རུས་པའི་ཕུར་བས་གདབ་པར་བྱ། །གསལ་ཤིང་ལ་བཙུགས་སྐྱེས་བུ་ཡི། །རྫས་ལ་བརྟེན་ཏེ་བསྒྲུབ་པར་བྱ། །ཏིལ་མར་བྱུགས་ལ་ཐོད་པས་བཞར། །མར་མེར་བྱས་པའི་དུད་པ་ཡིས། །མིག་རྣོན་དག་ནི་འགྲུབ་པར་འགྱུར། །གསང་སྔགས་རྒྱལ་

པོ་ཐོགས་མེད་ལ། །བསྟེན་པས་ཐོབ་བྱ་མང་མོད་ཀྱང་། །འདིར་ནི་བརྗོད་པ་ཅི་ཞིག་དགོས། །ཡང་ན་འདི་ལྟར་ཤེས་བྱ་སྟེ། །རང་ཉིད་སྔགས་དང་ཏིང་འཛིན་ལྡན། །བརྩོན་ཆེན་གཞན་དུ་མ་ཡེངས་པས། །གང་དུ་བརྩམས་པ་དེ་འགྲུབ་འགྱུར། །སྨད་འཚོང་རང་བྱུང་ཉིད་ཀྱིས་ནི། །སྔོན་བསྟན་ཙཀྲ་ལེགས་བྲིས་ཏེ། །ལིང་གའི་སྙིང་གར་བཅུག་བྱས་ལ། །རང་མདུན་ཁྲག་གི་ཟླ་གམ་སྟེང་། །ཁྲག་གིས་བྱུགས་པའི་སྟེང་དུ་གཞག །མི་འམ་རྒྱལ་པོའི་བུ་མོ་དག །དགུག་དང་དབང་གི་ཡི་གེ་ཡིས། །དེ་ཉིད་དུ་ནི་ངེས་པར་འགྱུར། །ཉལ་སའི་འོག་ཏུ་མནན་པར་བྱ། །མི་གླང་ར་ཁྱི་བསེ་ཕག་ཁྲག །འཁོར་ལོ་བྲིས་ནས་ལིང་ག་ཡི། །མགྲིན་པར་བཅུག་ནས་བྱ་རོག་གི། །ཁྲག་གིས་ཁྲག་སྐྱུག་སྔགས་བྲིས་ནས། །ཡི་གེ་དེ་ལྡན་ཐོད་པ་རུ། །བཅུག་ནས་གསང་སྔགས་མང་བཟླས་ཏེ། །དུར་ཁྲོད་མེ་ཐབ་འོག་བཞག་ན། །ཁྲག་སྐྱུག་པ་ལ་ཐེ་ཚོམ་མེད། །བསྲོས་ན་ཚ་བའི་ནད་ཀྱིས་འཆི། །སྦལ་ཁྲག་ཕ་ཝང་ཀླད་པ་ཡིས། །འཁོར་ལོ་དེ་ཉིད་ལེགས་བྲིས་ནས། །ལིང་གའི་མཆན་ཁུང་གཡོན་བཅུག་ལ། །གཡས་གཡོན་གླང་ཁྲག་སྦལ་ཁྲག་བྱུག །ལིང་གའི་ཕྱོགས་སུ་རང་ཉིད་ཀྱི། །རྐང་པ་གཡོན་པའི་མཐེ་བོས་མནན། །དེ་ཚེ་བཟླས་པ་མང་བྱས་ནས། །རྒྱ་གྲམ་ལམ་དུ་མནན་ལ་གཞག །དེ་ལས་ཟློག་པ་བྲིས་ནས་ནི། །ཤིང་གཅིག་ཁོང་པར་སྦས་ན་རེངས། །རྔ་མོ་བྱ་རོག་རྒན་པོའི་ཁྲག །འཁོར་ལོ་བྲིས་ནས་ལིང་ག་ཡི། །རྐང་གཉིས་བར་བཅུག་རང་མདུན་དུ། །ཁྲག་གིས་རྔ་མོ་གཟུགས་བྲིས་ཏེ། །དེ་ཡི་སྟེང་གཞག་རང་ཉིད་ཀྱིས། །རླུང་གི་བསམ་གཏན་ངེས་ལྡན་ན། །བསྐྲད་པ་ཉིད་དུ་ཐེ་ཚོམ་མེད། །རི་བོའི་རྩེ་ལ་འཛེགས་ཏེ་སྦ། །ནེའུ་ལེ་སྦྲུལ་རྟ་མ་ཧེ་དང་། །བྱ་རོག་འུག་པའི་ཁྲག་གིས་ནི། །ཁྱོ་ཤུག་རྐང་པའི་རྗེས་སྦྲུས་པའི། །ལིང་ག་སོར་བརྒྱད་པར་བྱས་ཏེ། །ཁྲག་དེས་བྲིས་པའི་འཁོར་ལོ་དག །སྙིང་གར་བཅུག་པ་གཉིས་བྱས་ཏེ། །ནེའུ་ལེ་གཟུགས་བྱས་སྟེང་དུ་གཞག །ལག་གཉིས་རྟ་དང་མ་ཧེ་ཡི། །རུས་པས་བརྡུང་ཞིང་གསང་སྔགས་ཟློས། །རྩེ་འདྲུད་ཤིང་རྩར་སྦས་ན་འབྱེར། །ཙནྡན་དཀར་པོས་

ལེགས་བྲིས་ནས། །གསེར་སོགས་རིན་ཆེན་རྫས་སུ་དྲིལ། །མདུན་དུ་ཟླ་བའི་གཟུགས་སྟེང་དུ། །གཞག་ལ་ཉིན་རེའི་བསྐོར་བ་ནི། །ཇི་སྲིད་བྱས་ན་བསྲུང་བར་ངེས། །སྤྱི་བོར་བཏགས་ན་གཡུལ་ལས་རྒྱལ། །རྐང་པར་བཏགས་ན་ཆུ་སྟེང་འགྲོ། །བ་ཡི་འོ་མས་ཁྲུས་བྱས་ཏེ། །ཀུ་ཤ་བ་མར་སོགས་མཆོད་ན། །གསོལ་བཏབ་ནད་རྣམས་ཐམས་ཅད་སྲུང་། །དེ་ནས་བཅོམ་ལྡན་འདས་ལས་ཕྲ་བ་ཐམས་ཅད་ལས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ལས་ཐམས་ཅད་ཀྱི་རྗེས་སུ་འགྲོ་བའི་སྔགས་འདི་སྐུ་དང་། གསུང་དང་ཐུགས་རྡོ་རྗེ་ལས་ཕྱུང་ངོ་། །མཱ་ར་ཡ་ཕཊ་ཅེས་བསད་པའི་འོ། །བི་དྭེ་ཥ་ཡ་དབྱེ་བའི་འོ། །ཨུཙྪ་ཊ་ཡ་བསྐྲད་པའི་འོ། །མོ་ཧ་ཡ་རྨོངས་པའི་འོ། །བ་ཤྃ་ཀུ་རུ་དབང་དུ་བྱ་བའི་འོ། །སྟམྦྷ་ཡ་མནན་པའི་འོ། །ཨཱ་ཀརྵ་ཡ་ཛཿདགུག་པའི་འོ། །ཨོྃ་ཧྲཱིཿསྭཱ་ཧཱ་མཆོད་པའི་འོ། །ཨོྃ་ཨི་དྃ་གྷ་སྭཱ་ཧཱ་ཞལ་བསིལ་གྱིའོ། །ཨོྃ་དུཥྚ་སྭཱ་ཧཱ་དྲིའིའོ། ཨོྃ་བྷོ་ཡྃ་ཛཿཛ་མེ་ཏོག་གིའོ། །ཨོྃ་ཥྚི་ཧ་ཧེ་ཕཊ་ཕཊ། བདུག་པའི་འོ། ཨོྃ་དཱི་པོ་དྷ་ན་མ་ཡ་སྭཱ་ཧཱ། མར་མེའིའོ། །ཨོྃ་བཛྲ་ནཻ་བིདྱ་ཨཱཿཧཱུྃ་སྭཱ་ཧཱ། ཞལ་ཟས་ཀྱིའོ། །ཨོྃ་ཀཱ་ལ་རཱུ་བ་ས་ཏྭ་ད་མ་ཀ །མ་ཧཱ་བྷཱུ་ཏ་པ་ཏི། ཨི་དྃ་བ་ལི་གྲྀཧྞཱ་པ་ཡ་སྭཱ་ཧཱ། གཏོར་མའིའོ། །ཨོྃ་ཧྲཱིཿཡ་མ་རཱ་ཛ་ཨེ་ཧྱེ་ཧི་ཨཱ་གཙྪ་བྷ་ག་བཱ་ན་སརྦྦ་མཱྃ་ས་མེ་ད་མཛྫ། རུ་དྷི་ར་པྲི་ཡེ་བྷཀྵ་བྷཀྵ། མ་མ་སརྦྦ་སཏྭ་ད་མ་ཀ །ཀརྨ་ཀུ་རུ་སིདྷི་སྨེ་སྭཱ་ཧཱ་ལྷ་སྤྱན་དྲང་པའིའོ། །ཨོྃ་ཧྲཱིཿབཛྲ་ཛ་ཡེ་སུ་ཛ་ཡེ་མ་ཧཱ་བཛྲ་ཛ་ཡེ་མུ་ནི་བཛྲ་མུཿལྷ་ལ་སོགས་པ་གཤེགས་སུ་གསོལ་བའིའོ། །དེ་ནས་རྡོ་རྗེ་འཛིན་པ་ཉིད་ཆོས་ཐམས་ཅད་ཀྱི་རྗེས་སུ་འགྲོ་བ་དང་། ལྡོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། གསང་སྔགས་ཡོངས་སུ་རྫོགས་པའི་ཕྲིན་ལས་འདི་ཉིད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །ཧཱུྃ་ལས་ཡོངས་སུ་རྫོགས་པ་ཡི། །རྡོ་རྗེ་འཇིགས་བྱེད་བསམ་པར་བྱ། །དམར་པོ་ཞལ་གཅིག་ཕྱག་གཉིས་པ། །ཤེས་རབ་མོ་དང་མཉམ་དུ་སྦྱོར། །དབྱུག་པ་ཐོད་ཁྲག་ཕྱག་ན་འཛིན། །མ་ཧེ་པདྨ་ཉི་མ་ལ། །གཡོན་བརྐྱང་བ་ཡི་ཚུལ་གྱིས་བསྒོམ། །ཨོྃ་ཡ་མཱནྟ་ཀྲྀཏ་ཧཱུྃ་ཕཊ། གསང་སྔགས་རྒྱལ་པོ་འདི་བཟླས་ན། །འདོད་

པའི་དངོས་གྲུབ་ཐམས་ཅད་འབྱུང་། །ནམ་མཁའི་དབྱིངས་སུ་དབུས་གནས་པར། །ཡ་ཡིག་སྔོན་པོ་ལས་སྐྱེས་པའི། །ཁྲོ་བོ་རྡོ་རྗེ་འཇིགས་བྱེད་ནི། །པདྨ་ཉི་མའི་གདན་སྟེང་ན། །སེམས་དཔའི་སྐྱིལ་ཀྲུང་གིས་གནས་པའི། །གྲི་གུག་བི་དྷི་པ་ལ་དང་། །དགྲ་སྟ་དང་ནི་ཐོད་ཁྲག་དང་། །ཕྱག་བཞི་པོ་ནི་རིམ་པས་འཛིན། །མ་ཧེ་ནག་པོ་ཞལ་སྟེང་ན། །འཇམ་དཔལ་ཞལ་ནི་སེར་ཞིང་འཛུམ། །དཔའ་བོ་ཆེན་པོ་རང་ཉིད་བསྒོམ། །རབ་ཏུ་ཞིམ་པའི་ཆང་བཏུང་ཞིང་། །ཤ་ཆེན་དག་ཀྱང་མུར་བར་བྱ། །མཚན་མོ་དུར་ཁྲོད་རྒྱུ་བྱེད་ཅིང་། །རྟག་པར་གསང་སྔགས་བཟླ་བར་བྱ། །ཐིག་ལེ་འདྲེན་པའི་རྣལ་འབྱོར་ནི། །བསྒྲུབ་བྱའི་ཕྱོགས་སུ་བསམ་པར་བྱ། །ལས་རྣམས་མྱུར་དུ་འདིས་འགྲུབ་པོ། །ཡང་ན་འདི་ལྟར་ཤེས་བྱ་སྟེ། །མ་ཧེ་གདོང་གི་སྦྱོར་བ་ཡིས། །སྐུ་ཡི་ཁ་དོག་སོ་སོར་ཤེས། །ཁྱད་པར་དུ་ཡང་གསད་པ་ལ། །ནག་པོ་མ་ཧེའི་ཞལ་ཅན་ནི། །རྩེ་གསུམ་ལྕགས་ཀྱུ་འཛིན་པ་སྟེ། །མ་ཧེ་ཤ་སྟེང་བསམ་བྱས་ན། །ཁྲག་འདྲེན་པ་ཡི་མཆོག་ཏུ་གསུངས། །རེས་འགའ་སྐུ་ལ་ཁྲོ་བོ་ནི། །ལྕགས་ཀྱུ་འཛིན་པ་གྲངས་མེད་སྤྲོ། །ཟླ་བ་སྤྱང་ཀིས་ཟིན་དུས་སུ། །བྱི་ལའི་སྡེར་མོ་ར་སྙིང་དང་། །བྱ་ཡི་ཁྲག་དང་མི་རུས་བསྲེས། །གང་ལ་ཕོག་པ་སྨྱོ་བར་འགྱུར། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་སྦྱོར་བའི་ལེའུ་སྟེ་གཉིས་པའོ།། །།དེ་ནས་ཡང་དག་བཤད་བྱ་བ། །སྒྲུབ་པར་བྱེད་པའི་རྣལ་འབྱོར་པས། །དུར་ཁྲོད་རས་སམ་དཔའ་བོའི་གོས། །ཡང་ན་མཚན་གྱི་ཁེབ་མ་ལ། །རྣམ་སྣང་མཛད་དང་རྡོ་རྗེ་ཆུས། །དཔའ་བོའི་ཁྲག་དང་ཆང་དང་དུག །གོ་རོ་ཙ་ནས་རས་ཚོས་བྱ། །ལེགས་པར་དམ་པོར་དྲུད་བྱས་ཏེ། །ལུས་ངག་ཡིད་ཀྱི་གནས་སུ་ནི། །བདུད་རྩི་ལྔ་དང་ལྡན་པའི་ཆུས། །ཡི་གེ་ཨོྃ་དང་ཨཱཿཧཱུྃ་བྲི། །སྐྲ་ཕྱེད་དུར་ཁྲོད་སོལ་བ་དང་། །ཁྲག་ཆེན་ལྡོང་རོས་བ་བླ་ཡིས། །དབང་ཐོབ་དམ་ཚིག་སྲུང་བྱེད་ཅིང་། །ཤིན་ཏུ་གསང་ལ་དམ་པ་ཡི། །རི་མོ་མཁན་ནི་བརྩོན་ལྡན་དེས། །རྒྱུད་ཀྱི་དོན་ལ་མཁས་བྱས་ནས། །ནག་པོའི་ཚེས་ཀྱི་མཚན་ཕྱེད་དུས། །གསང་བའི་གནས་སུ་རབ་ཞུགས་ནས། །བཅོམ་

ལྡན་རྡོ་རྗེ་འཇིགས་མཛད་བྲི། །རྩ་བ་མ་ཧེ་ཁྲོས་པའི་ཞལ། །དེ་སྟེང་འཇམ་དཔལ་འཛུམ་པའི་ཞལ། །ལྷག་མ་དམར་དང་སེར་དང་སྔོ། །དུ་བའི་མདོག་མཚུངས་གྱེན་སྐྲ་ཅན། །རབ་ཏུ་བརྗིད་ཅིང་ཁྲོ་བོའི་ཞལ། །དྲུག་དང་ལྡན་པའི་སྐུ་ལུས་ཆེ། །ཐོད་པ་སྐམ་རློན་རྒྱུ་མ་སྦྲུལ། །རུས་པ་རྡོ་རྗེ་ཕྲེང་བས་བརྒྱན། །གླང་ཆེན་སྟག་ལྤགས་གྱོན་ནས་ནི། །པདྨ་ཉི་མ་མ་ཧེ་ལ། །གཤིན་རྗེ་མནན་ནས་ཞབས་དྲུག་གིས། །གཡོན་བརྐྱང་གཡས་བསྐུམ་གར་གྱིས་འགྱིང་། །ཕྱག་དྲུག་གཡས་ཀྱི་དང་པོ་ན། །རྩེ་གཅིག་གཉིས་པ་ཐོ་བ་སྟེ། །གསུམ་པ་གཏུན་ཤིང་མཁའ་ལ་འཕྱར། །དགྲ་སྟ་ལྕགས་ཀྱུ་ཞགས་པ་ནི། །གཡོན་པའི་ཕྱག་གིས་འཛིན་པ་བྲི། །ནམ་མཁའི་མདོག་ཅན་ཐལ་བས་བྱུགས། །སྐུ་ལ་ཁྲོ་བོ་དུ་མ་འཕྲོ། །སྣ་ཚོགས་མཆོད་པའི་ལྷ་མོས་བསྐོར། །ལེགས་པར་དེ་ལྟར་བྲིས་པ་ཡི། །རྒྱབ་དང་ཕྱོགས་རྣམས་ཐམས་ཅད་དུ། །དུར་ཁྲོད་ཆེན་པོས་བསྐོར་བར་བྲི། །མགོ་རྡུམ་རྒྱུ་མ་མཁའ་ལ་ཁྱེར། །རྐང་རྡུམ་ལག་རྡུམ་རོ་ལངས་དང་། །ཝ་དང་སྤྱང་ཀི་གཏུམ་པོ་དང་། །མཁའ་འགྲོ་ཕོ་མོ་ཤ་ཟའི་ཚོགས། །བྱ་དང་གཅན་གཟན་སྣ་ཚོགས་བྲི། །སྐྱི་བུང་རབ་ཏུ་འཇིགས་བྲིས་ནས། །དེར་ནི་སྒྲུབ་པ་པོ་ཡང་བྲི། །གྲི་ཐོད་བཟུང་ནས་ཤ་ཆེན་མུར། །གོས་ནག་གྱོན་ནས་ཁྲག་ཆེན་འཐུང་། །རྟ་དང་མ་ཧེ་རུས་པ་ཡི། །ཕྲེང་བ་བཟུང་ནས་གསང་སྔགས་འདོན། །བཅོམ་ལྡན་འདས་ལ་ལྟ་བར་བྲི། །དེ་ལྟར་བྲིས་ནས་ཆང་དང་ཁྲག །ཤ་ཆེན་གོ་རོ་ཙ་ནས་མཆོད། །མཉམ་གཞག་ལྷ་ཡི་དགེ་འདུན་དེས། །དུས་གསུམ་རྒྱུན་དུ་མཆོད་བྱེད་ན། །རྡོ་རྗེ་འཛིན་པ་མྱུར་དུ་འཐོབ། །སྐུ་ནི་རབ་ཏུ་སྦ་ཞིང་གསང་། །ཕན་ཡོན་དམ་པ་འདི་ལས་འབྱུང་། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་བྲིས་སྐུའི་ལེའུ་སྟེ་གསུམ་པའོ།། །།དེ་ནས་ཡང་དག་བཤད་བྱ་བ། །རྟོག་པ་མ་ལུས་ཟད་བྱེད་ཅིང་། །ལས་རྣམས་ཐམས་ཅད་གྲུབ་འདོད་པས། །བློ་ལྡན་སེར་སྣ་རྣམ་སྤངས་ཏེ། །རྟུལ་ཕོད་གཡེང་བ་རྣམ་སྤངས་ནས། །སྦྱིན་སྲེག་ལས་ལ་རབ་བརྩོན་བྱ། །མཚལ་དང་བ་

བླ་ལྡོང་རོས་དང་། །ཤན་པའི་གོ་ཐལ་དུར་ཁྲོད་ས། །མི་དང་མ་ཧེ་ཁྲག་གིས་བརྫི། །ཁྲུ་དོ་པ་ལ་ཁྲུ་ཕྱེད་བརྩིག །གྲུ་བཞིའི་སྟེང་དུ་ཟླུམ་པོ་ནི། །རྡོ་རྗེ་རྒྱ་གྲམ་ལྡན་བྱས་ལ། །དེ་སྟེང་འཁོར་ལོ་རྩིབས་དྲུག་ལ། །མཚན་མ་དྲུག་ནི་དགོད་པར་བྱ། །ལྟེ་བར་མེ་ཡི་དཀྱིལ་འཁོར་ནི། །མཐོ་གང་ཚད་དུ་བྱས་པ་ལ། །མ་ཧེའི་ཁྲག་གིས་ལེགས་པར་བྱུག །བདག་ཉིད་ལྷོ་ཡི་ཕྱོགས་བལྟས་ཏེ། །མ་ཧེ་ཞལ་གྱི་སྦྱོར་བ་ཡིས། །ཐབ་ཀྱི་ནང་གི་ཕྱོགས་མཚམས་སུ། །མེ་ཡི་ས་བོན་མངོན་བལྟས་ལ། །བསྐལ་བའི་མེ་ཆེན་ལྟ་བུར་བསྒོམ། །དེར་ནི་མེ་ལྷའང་བསྒོམ་བྱ་སྟེ། །ཞལ་གསུམ་ཕྱག་བཞི་གནག་ལ་རྩུབ། །ཕྱག་གཉིས་རང་འདྲའི་ཡུམ་ལ་འཁྱུད། །གཡས་བའི་ཕྱག་གིས་འགྲོ་རྣམས་ལ། །སྐྱབས་སྦྱིན་མཛད་ཅིང་བགྲང་ཕྲེང་འཛིན། །གཡོན་པས་རིལ་བ་མཆོག་སྩོལ་བརྩོན། །ཞབས་དྲུག་རིགས་དྲུག་མཚན་མ་བརྫིས། །ཞལ་ནས་མེ་རྣམས་རབ་འཕྲོ་ཞིང་། །འོད་རྣམས་སྣ་ཚོགས་ཀྱིས་བརྒྱན་པ། །དེ་ལྟར་ཤེས་ནས་རབ་བསྲེགས་ན། །འདོད་པའི་དོན་རྣམས་རབ་ཏུ་འབྱུང་། །དགྲ་བོའི་གཟུགས་དང་ཤ་ཆེན་དང་། །ཆང་དང་མ་ཧེའི་ཁྲག་བཅས་པ། །སྟོང་ཕྲག་གསུམ་དུ་བསྲེགས་བྱས་ན། །བསྒྲུབ་བྱ་ཁྲག་ཏུ་སྐྱུགས་ནས་འཆི། །གླང་པོ་རྟ་བོང་ཁྱི་ཤ་ལ། །སྟོང་ཕྲག་གསུམ་གྱིས་དབང་དུ་བྱེད། །བྱ་རོག་འུག་པ་ཁྱི་ཤ་ཆུ། །བསྲེགས་ན་མི་རྟ་འབྱེར་བར་ངེས། །ཏིལ་དང་ནས་དང་གྲོ་སཱ་ལུ། །ཡུང་བ་གི་ཝང་སོ་ཕག་རྣམས། །སྟོང་ཕྲག་དྲུག་ཏུ་གང་བསྲེགས་པ། །ལོངས་སྤྱོད་ཐམས་ཅད་རྙེད་པར་འགྱུར། །རྟ་དང་རྔ་མོ་བྱ་རོག་ཤ། །མི་ཤ་རྡོ་རྗེ་ཆུར་བཅས་པ། །གསང་སྔགས་རྣལ་འབྱོར་ལྡན་བྱས་ཏེ། །བརྒྱ་རྩ་བརྒྱད་ཀྱིས་ངེས་པར་སྐྲོད། །ར་ཤ་ད་ན་ཨུཏྤ་ལ། །ཆང་དང་མ་ཧེ་ཆུར་བཅས་པ། །གང་འདོད་བརྒྱ་རྩ་བརྒྱད་ཀྱིས་ལྐུགས། །དུག་དང་ཁྲག་དང་སྒོག་པ་དང་། །ཤ་ཆེན་ཏིལ་མར་རབ་སྦགས་ཏེ། །བརྒྱ་རྩ་བརྒྱད་དུ་བསྲེགས་བྱས་ན། །ཕ་རོལ་གཞན་གྱི་རིག་སྔགས་གཅོད། །ཙནྡན་དཀར་པོ་འབྲས་དཀར་དང་། །ཏིལ་དཀར་འབྲས་ཆན་ཡུངས་ཀར་དང་། །ཨུཏྤལ་དཀར་དམར་ག་པུར་དག །ཤར་དུ་བལྟས་ཏེ་བརྒྱ་རྩ་བརྒྱད། །བསྲེགས་ནས་དུས་རྣམས་ཀུན་ཏུ་བསྲུང་། །གང་ཞིག་བྱ་བའི་རིམས་སོགས་དང་། །སྔགས་རྣམས་བསམ་གཏན་ངེས་ལྡན་པས། །སྙིང་རྗེའི་ཡིད་ནི་མ་བྲལ་ན། འདོད་པ་ཐམས་ཅད་འདིར་བསྒྲུབ་བྱ། །གཞན་དུ་རྨོངས་པའི་བྱིས་པ་འགའ། །བློ་གྲོས་མེད་གང་ཤེས་རབ་འཆལ། །སྔགས་དང་དམ་ཚིག་དམན་གྱུར་ཅིང་། །

ཏིང་ངེ་འཛིན་ལ་མངོན་གཡེལ་བ། །བརྩོན་པ་ཆུང་ཞིང་ལྷོད་པ་འགས། །བསྐལ་པ་སྟོང་དུ་བསྒྲུབས་བྱས་ཀྱང་། །འབྲས་བུ་ཡོད་པ་མ་ཡིན་ཏེ། །ཤ་ཐང་ཆད་པ་ཉིད་དུ་འགྱུར། །དཔེར་ན་བློ་ཞན་བྱིས་པ་རྣམས། །འགའ་ཞིག་འབྲས་འདོད་འཁྲུལ་གྱུར་ནས། །ཕུབ་མ་རླུང་ཁར་བྱེད་པ་ལ། །འབྲས་ཡོད་ནམ་ཡང་མི་འགྱུར་བཞིན། །ཇི་ལྟར་སྤྲིན་དང་ཆུ་ཟླ་དང་། །དབང་པོའི་གཞུ་རྣམས་རྟག་མིན་ཏེ། །ཐར་པ་འདོད་པའི་བྱ་བའང་དེ། །སྒྱུ་མ་ཉིད་ལ་སྒྱུ་མ་རོལ། །ཡེ་ཤེས་གཅིག་པུ་རྣམ་གྲོལ་རྒྱུ། །སྟོང་པ་དཔག་པར་བློས་ཅི་ནུས། །དེ་ལ་དཔྱད་ཅིང་གཞལ་བཟོད་ན། །བརྟགས་པའི་སྙིང་པོ་དེ་ལ་མེད། །དེ་ལ་དངོས་རྣམས་མ་གྲུབ་ན། །བསྒྲུབ་པའི་རིམ་གཞན་སྨོས་ཅི་དགོས། །བྱ་བ་དང་ནི་བྱེད་པ་དག །ངེས་པར་དེ་ལ་བརྟག་མི་བཟོད། །ངམ་གྲོག་གཡང་སར་ལྷུང་ཡང་བླའི། །ཆད་པར་རྟོག་པ་འདི་མི་བཟོད། །རྟག་པ་ཉིད་ཀྱང་རིག་མིན་ཏེ། །དངོས་པོ་ཡོད་པ་ག་ལ་འགྱུར། །དཔེར་ན་བྱིས་པ་རྣམས་ལ་མས། །ས་འདིར་སྡོད་དང་མ་ཉིད་ཀྱིས། །འབྲས་བུ་ཤིང་ཏོག་མང་བླངས་ལ། །ཁྱོད་ལ་བདེ་བས་སྦྱིན་ཞེས་བརྗོད། །དེ་བཞིན་རྣམ་པ་དུ་མ་ཡང་། །འཇིག་རྟེན་རྟོག་པ་ཐ་དད་པས། །དེ་དག་དྲང་བར་བྱ་ཕྱིར་བཤད། །བཅོམ་ལྡན་ལྷ་ཡི་ལྷ་མདུན་དུ། །ཤ་ཆེན་བོ་ཡི་ཞལ་ཟས་དང་། །ཆང་དང་ཏིལ་མར་མ་ཧེ་ཁྲག །རབ་ཏུ་ཞིམ་པའི་ཟས་མཆོག་རྣམས། །དུས་རྣམས་རྟག་ཏུ་དབུལ་བར་བྱ། །གསང་སྔགས་རྒྱལ་པོ་ཡི་གེ་བཅུ། །བདག་གིས་རྒྱུན་དུ་གདོན་བྱ་ཞིང་། །བསམ་གཏན་རྟག་ཏུ་བརྩོན་པར་བྱ། །དེ་ལྟར་ཤེས་ཤིང་སྒྲུབ་བྱེད་པའི། །སྐྱེས་བུ་བློ་ལྡན་དེ་ཡིས་ནི། །སངས་རྒྱས་ཉིད་ཀྱང་མྱུར་འགྲུབ་འགྱུར། །ཞི་སོགས་ལས་རྣམས་སྨོས་ཅི་དགོས། །གྲོང་ཁྱེར་དཀྲུག་ན་སྔགས་པ་དེས། །ཁྱི་ཤ་སྦལ་ཤ་རུས་སྦལ་ཤ། །རྔ་མོ་བྱི་ལའི་ཤ་རྣམས་ལ། །སྟོང་རྩ་བརྒྱད་དུ་བསྲེག་པར་བྱ། །རྟ་ཤ་དྲི་ཆེན་རབ་སྦྱར་བས། །རིལ་བུ་བྱས་ཏེ་བདག་མདུན་དུ། །གསང་སྔགས་རྒྱལ་པོ་བཟླས་བྱས་ནས། །བརྒྱ་རྩ་བརྒྱད་དུ་བསྲེགས་པས་ནི། །རྒྱལ་པོ་དབང་དུ་བྱེད་པར་འགྱུར། །བུད་མེད་དབང་དུ་བྱེད་འདོད་ན། །ཉ་ཤ་ཆང་དང་ཤ་ཆེན་རྣམས། །རྡོ་རྗེ་ཆུ་ཡིས་སྦགས་བྱས་ཏེ། །བརྒྱ་རྩ་བརྒྱད་དུ་བསྲེག་པར་བྱ། །ཐ་མལ་དབང་དུ་བྱེད་འདོད་ན། །ཤ་ཆེན་གླང་པོའི་ཤ་དང་བཅས། །བྱང་ཆུབ་སེམས་དང་བསྲེས་བྱས་ཏེ། །སྟོང་ཕྲག་བརྒྱད་དུ་བསྲེག་པར་བྱ། །དགུག་པ་དུས་རྣམས་ཐམས་ཅད་དུ། །ཁྱི་ཤ་ཉ་ཤ་བདུད་རྩི་ལྔ། །ཆ་མཉམ་རིལ་བུ་བྱས་ནས་ནི། །བརྒྱ་རྩ་བརྒྱད་དུ་བསྲེགས་ན་འགུགས། །སྦྱིན་སྲེག་ལས་རྣམས་ཐམས་ཅད་ཀྱང་། །མ་ཧེ་ཞལ་

གྱི་སྦྱོར་བས་ནི། །གསང་སྔགས་རྒྱལ་པོས་འདོད་པ་སྦྱར། །མ་ཡེངས་རྩེ་གཅིག་སེམས་ཀྱིས་བྱ། །གསུངས་དང་མ་གསུངས་མཐའ་དག་ཀྱང་། །ཇི་ལྟ་བ་ཡི་རིམ་པ་ཡིས། །རྒྱུད་ཀྱི་རྒྱལ་པོ་ཉིད་ཉེར་གནས། །སངས་རྒྱས་འབྲས་བུ་མྱུར་དུ་འཐོབ། །ཞི་ལ་ཞི་བའི་ཡིད་ཀྱིས་ཏེ། །རྒྱལ་པོ་ལྟ་བུར་རྒྱས་པ་ལ། །སྡང་བྲལ་ཆགས་པས་དབང་ལའོ། །དྲག་པོའི་ལས་ལ་ཁྲོ་ཞིང་རྩུབ། །རབ་ཏུ་གཏུམ་པའི་ཡིད་ཀྱིས་ནི། །གསོད་པའི་སེམས་དང་ལྡན་པར་བྱ། །གང་ཞིག་ལྟོས་པ་མེད་པའི་མི། །གྲུབ་པ་མྱུར་དུ་ཚོལ་བྱེད་ན། །སེམས་ཀྱི་རང་བཞིན་རྣམ་དག་པས། །རྡོ་རྗེ་འཛིན་པ་དེ་འགྲུབ་འགྱུར། །དངོས་པོ་གང་དང་གང་སྤྱོད་ཡུལ། །དེ་དང་དེ་ཡི་རང་བཞིན་འགྲོ། །མཉམ་གཞག་ཉམས་པར་མི་བྱ་ལ། །དུས་རྣམས་རྟག་ཏུ་རྣལ་འབྱོར་པས། །ཤིན་ཏུ་མཉམ་པར་གཞག་པར་བྱ། །དེས་ནི་ཐར་པ་ཉིད་ཀྱི་རྒྱུ། །རྒྱུད་ཀྱི་རྒྱལ་པོ་འདི་ལས་ནི། །འདོད་པའི་དངོས་གྲུབ་མྱུར་བྱེད་དེ། །དཀའ་བ་མེད་པའི་ཐབས་འདི་ནི། །དཀའ་སྤྱོད་བརྟུལ་ཞུགས་རྣམས་སྤངས་ཏེ། །ཤིན་ཏུ་བདེ་བར་སྒྲུབ་པའི་ཐབས། །སྡུག་བསྔལ་འཇིགས་མེད་བདུད་རྩིའི་རོ། །བློ་ལྡན་ལེགས་པར་བླང་བྱ་སྟེ། །ཤིན་ཏུ་འབད་པས་བསྒྲུབ་པར་བྱ། །མི་ཤེས་བློ་གྲོས་རྨོངས་པ་འགའ། །རྟོག་པའི་དྲ་བས་བསྒྲིབས་པའི་ཚེ། །བསོད་ནམས་དང་ནི་སྡིག་པ་ཡི། །ཕུང་པོ་རྣམ་པ་གཉིས་སུ་བརྟགས། །འོན་ཀྱང་འདོད་པ་ཐམས་ཅད་ནི། །རྒྱུད་མཆོག་འདི་ལས་འབྱུང་འགྱུར་ཕྱིར། །དམན་ཞིང་བརྩོན་པ་ཆུང་བ་འགའ། །འདི་ལ་ཞུགས་ན་མྱུར་དུ་འགྲུབ། །དེ་བས་ངོ་མཚར་རྒྱུད་འདི་ནི། །རྙེད་དཀའ་ཁྱད་པར་མཆོག་གྱུར་པ། །ཡི་གེའི་དབྱིབས་ཀྱང་མི་བསྟན་ན། །བཤད་ཅིང་འགྲོལ་བ་སྨོས་ཅི་དགོས། །དབང་རྣམས་ངེས་པར་མ་བླངས་ཤིང་། །བླ་མ་མཉེས་པར་མ་བྱས་ཚེ། །བསྟན་ཀྱང་ཐོབ་པར་མི་འགྱུར་ཏེ། །ཚ་བ་ལ་སོགས་འཁོར་བར་འཁོར། །དེ་སྐད་སྟོན་པས་བཤད་པའི་ཚེ། །སྡེ་རྣམས་མྱོས་ཤིང་བརྒྱ་ལ་རྨོངས་ཏེ། །ཀུན་ཀྱང་འདུད་ཅིང་མགོ་བོ་སྨད། །འཇིག་རྟེན་འདི་ནི་ཤིན་ཏུ་གཡོས། །གང་ཞིག་རྒྱུད་འདི་ཉན་པ་དང་། །ཤེས་ནས་འཆང་བར་བྱེད་པ་དང་། དུས་རྣམས་ཀུན་ཏུ་འདོན་བྱེད་ན། །ཚེ་འདིར་འཇིགས་པ་ཀུན་བསལ་ཏེ། །ཤི་ནས་མཐོ་རིས་མྱུར་དུ་འཐོབ། །གལ་ཏེ་གཞན་དུ་རྒྱུད་མཆོག་འདི། །བསྟན་ནམ་བཤད་དམ་གསལ་ཕྱེ་ན། །དེ་ནི་སྡུག་བསྔལ་མང་མྱོང་ནས། །ཤི་ནས་མྱུར་དུ་དམྱལ་བར་འགྲོ། །རང་གིས་ཤིན་ཏུ་བཅང་བྱས་ཤིང་། །དངོས་གྲུབ་

ཉིད་བཞིན་མངོན་བྱས་ན། །སྡུག་བསྔལ་མཐའ་དག་ངེས་ཟད་ནས། །མྱུར་དུ་བླ་མེད་ཐོབ་པར་འགྱུར། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་སྦྱིན་སྲེག་གི་རིམ་པར་ཕྱེ་བའི་ལེའུ་སྟེ་བཞི་པའོ།། །།དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོའི་ལས་ཀྱི་དངོས་གྲུབ་བརྟག་པ་ཞེས་བྱ་བ་རྫོགས་སོ།། །།པཎྜི་ཏ་ཆེན་པོ་ཨ་མོ་གྷའི་ཞབས་ནུས་པ་ཅན་དང་། བོད་ཀྱི་ལོཙྪ་བ་མར་པ་བནྡེ་ཆོས་ཀྱི་དབང་ཕྱུག་གྲགས་པས་བསྒྱུར་ཅིང་ཞུས་པའོ། །སླད་ཀྱིས་གྲུབ་ཐོབ་ཆེན་པོ་ཀརྞ་ཤྲཱིའི་ཞལ་སྔ་ནས་མཉན་ཏེ། །ཐར་པ་ལོ་ཙྪ་བ་ཉི་མ་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།

གཏམ་རྒྱུད་ཀྱི་རྟོག་པ།

དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དེ་ནས་ཡང་དག་བཤད་བྱ་བ། །བཅོམ་ལྡན་ཉིད་ཀྱི་སྐུ་གསུང་ཐུགས། །རྡོ་རྗེ་རྣམས་ལས་བྱུང་བ་ཡི། །རྡོ་རྗེ་འཇིགས་བྱེད་ཆེན་པོ་ཡིས། །ལྷོ་ཕྱོགས་རྒྱ་མཚོའི་ཕར་རྒལ་ན། །དེ་ནས་གཤིན་རྗེའི་གྲོང་ཁྱེར་ནི། །ག་ལ་བ་ཡི་གནས་སུ་བྱོན། །མི་བཟད་ཞབས་ནི་བཅུ་དྲུག་གིས། །ལྕགས་མཁར་སྒོ་མེད་བཅུ་དྲུག་བརྫིས། །ཡེ་ཤེས་རྩེ་གཅིག་མཚན་མ་ཡིས། །དབུས་ཀྱི་ལྕགས་མཁར་ཆེན་པོ་བརྫིས། །དེ་ཚེ་བདུད་ཆེན་ལས་བརྒྱལ་ནས། །ཧ་ཧ་ཧི་ཧིའི་སྒྲ་སྒྲོགས་པས། ཆོས་ཀྱི་རྒྱལ་པོ་ལ་སོགས་པ། །གཟིར་བཞིན་དུ་ནི་རབ་སྨྲས་པ། །དཔའ་བོ་ཆེན་པོ་ག་ལ་ཅི། །དཔའ་བོའི་དགོས་པ་བདག་གིས་བགྱི། །བདག་ཅག་སྲོག་གི་སྙིང་པོ་རྣམས། །ཚུལ་བཞིན་འབུལ་གྱིས་དཔའ་བོས་བཞེས། །ལྷ་མ་སྲིན་ནི་སྡེ་བརྒྱད་ཀྱིས། །སྲོག་གི་ཡང་སྙིང་ཕུལ་བ་ནི། །གཤིན་རྗེས་ཡ་ཕུལ་མ་མོས་མ། །སྲིན་པོས་ར་ཕུལ་གནོད་སྦྱིན་ཀྵེ། །མི་ཡིས་ཎི་ཕུལ་ས་བདག་ས། །བཙན་གྱིས་ཙ་ཕུལ་བདུད་ཀྱིས་ད། །དེ་རྣམས་གཅིག་ཏུ་དྲིལ་བ་ནི། །བྲན་དུ་ཡང་ནི་ཁས་བླངས་སོ། །གཏན་ཚིགས་ཆེན་པོ་དེ་ཡི་ཕྱིར། །ཡེ་ཤེས་ལྷ་ཡི་དགོངས་པ་དང་། །བསྙེན་པ་ཉམས་འོག་རབ་ཆུད་ནས། །ལྷ་ཡི་བསྙེན་པ་ལ་ཆུད་ནས། །སྔོན་གྱི་ཐུགས་དམ་ལས་མི་འདའ། །མི་འགྲུབ་པ་ནི་མི་སྲིད་དོ། །ཡ་མ་རཱ་ཛ་ས་དོ་མེ་ཡ། །ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། དེ་སྐད་ཅེས་ནི་སྨྲས་པ་དང་། །རྡོ་རྗེ་འཇིགས་བྱེད་ཆེན་པོ་ཡིས། །ཆོས་ཀྱི་རྒྱལ་པོ་ལ་སོགས་པ། །གཤིན་རྗེའི་ཕོ་ཉ་ཐམས་ཅད་ཀུན། །སྒྲོལ་བའི་

གིང་དུ་བྱིན་གྱིས་བརླབས། །མ་དང་སྲིང་མོ་བུ་མོ་རྣམས། །འཁོར་བཅས་རྣམས་ལ་བཀའ་བསྒོ་བ། །ལྔ་བརྒྱ་དུས་ཀྱི་ཐ་མ་ལ། །ང་ཡི་བསྟན་པ་འབྱུང་བའི་ཚེ། །རྣལ་འབྱོར་རིག་འཛིན་ལྡན་པ་ལ། །བཀའ་བསྒོའི་ལས་རྣམས་ཚུལ་བཞིན་གྱིས། །ཅེས་པས་དམ་བཅས་པ་དང་མནན་བཞིན་དུ་མནའ་བོར་རོ། །གཏམ་རྒྱུད་ཀྱི་རྟོག་པ་རྫོགས་སོ།། །།

ཏེའུ་ལོ་པའི་ཆོ་ག་ཞེས་བྱ་བ།

རྒྱ་གར་སྐད་དུ། ཙྪུ་ཙྪུ་ན་དྷ་ར་ཀལྤ་ན་མཿ། བོད་སྐད་དུ། ཏེའུ་ལོ་པའི་ཆོ་ག་ཞེས་བྱ་བ། གཤིན་རྗེའི་གཤེད་པོ་ལ་ཕྱག་འཚལ་ལོ། །དེ་ནས་ཙྪུ་ཙྪུ་ན་དྷ་རའི་ཆོ་ག་ཞིབ་མོ་བཤད་པར་བྱ་སྟེ། ཨོཾ་ཏུ་ཏྲ་ཡ་མ་ཧེ་ཤ་ར་ཡོ་ག་པྲཏྟ་མ་ཡ། ཡོ་ག་སིདྡྷི། དཱ་ཧཱ་ནི་མེ་སྭཱ་ཧཱ། ཧཱུ་ཧ། ད་ཧ་ད་ཧ། པ་ཙ་པ་ཙ། ཨུར་དྷི་ཡ་ཧཱུཾ་ཕཊ། རིག་སྔགས་འདིའི་བྱ་བའི་ཆོ་ག་ནི། །ཉིན་མཚན་དུ་མི་ཉལ་བར་དྲི་དང་མེ་ཏོག་དང་། བདུག་སྤོས་ཕུལ་ནས། གཏོར་མ་བཏང་སྟེ་སྟོང་ཕྲག་བརྒྱད་བཟླས་ན་འགྲུབ་པར་འགྱུར་རོ། །དེ་ནས་ལས་རྣམས་སུ་འགྱུར་བ་ནི། །ཙྪུ་ཙྪུན་དྷ་ར་ཤི་བ་བླངས་ལ། པགས་པ་དང་རུས་པ་དང་། ཤ་དང་སྤུ་རྣམས་ཕྱེ་མར་བཏགས་ཏེ་སྟོང་ཕྲག་གཉིས་བཟླས་ནས་ཕྱེ་མ་དེ་དཔྲལ་བར་བྱུགས་ན་བདག་ཉིད་དགྲས་མི་མཐོང་། ཨོཾ་མ་མ་ཧཱུ་པ་ཏི། ཕྱེ་མ་དེ་ལག་པ་ལ་བསྐུས་ནས་གང་ལ་རེག་པ་དེ་དབང་དུ་འགྱུར་རོ། །ཕྱེ་མ་དེ་རྐང་པ་ལ་བསྐུས་ནས་དཔག་ཚད་བརྒྱར་སོང་ན་ཡང་ལྡོག་གོ །ཕྱེ་མ་དེ་ཉིད་ཀྱིས་དགྲའི་སྒོ་ལོགས་ལ་བསྐུས་ནས་ཁྱིམ་གྱི་སྒོར་སྟོང་ཕྲག་བརྒྱར་བཟླས་ན་སྐྲོད་པར་འགྱུར་རོ། །ཕྱེ་མ་དེ་དང་དུར་ཁྲོད་ཀྱི་རས་དགྲ་བོའི་སྒོ་རྩར་བཅད་ཅིང་སྦས་ན་དགྲ་བོའི་རིགས་རྣམས་འཇོམས་པར་འགྱུར་རོ། །ཡང་ན་དགྲ་བོའི་རིགས་སྐྲོད་པར་འདོད་ན་ཙྪུ་ཙྪུན་དྷ་རའི་པགས་པ་ཕྱེ་མར་བཏགས་ལ། སྟོང་ཕྲག་བརྒྱད་ཡོངས་སུ་བཟླས་ནས་གཅིན་ཤུལ་གྱི་སས་བཀང་ནས་སྐུད་པ་སྔོན་པོས་བཅིངས་ཏེ་ནམ་མཁར་བཏེག་ན་གཅིན་འགགས་པར་འགྱུར་རོ། །བཀྲོལ་ན་ནི་ཐར་རོ། །ཙྪུ་ཙྪུན་དྷ་རའི་པགས་པ་ཕྱེ་མར་བཏགས་ནས་ལྷ་ཆེན་པོའི་མདུན་དུ་སྟོང་ཕྲག་བརྒྱད་བཟླས་ལ་ཡང་དྲི་དང་མེ་ཏོག་དང་བདུག་སྤོས་དང་གཏོར་མ་བཏང་སྟེ། སླར་ཡང་སྟོང་ཕྲག་བརྒྱད་བཟླས་ན་དེས་འགྲུབ་པར་འགྱུར་རོ། །ཕྱེ་མ་དེ་སྣའི་རྩེ་མོར་བསྐུས་ན་སྐྱེ་འགྲོ་ཐམས་ཅད་ལ་སྡུག་པར་འགྱུར་རོ། །མགོ་བོར་

བཞག་ན་དགྲ་ཐམས་ཅད་དང་འགྱེད་པའི་ལན་ཐེབས་པར་འགྱུར་རོ། །ཕྱེ་མ་དེ་ཉིད་རང་གི་སྙིང་གར་བསྐུས་ནས་དགྲ་ལ་བསྟན་ན་སྙིང་ན་བར་འགྱུར་རོ། །སཱ་ལུའི་ཕྱེ་མ་ལ་གཟུགས་བྱས་ནས་ཕྱེ་མ་དེ་བསྐུས་ན་མཛེས་ཐེབས་པར་འགྱུར་རོ། །དུར་ཁྲོད་ཀྱི་ཐལ་བ་དང་བཅས་པས་དགྲ་བོའི་ཚོགས་ལ་གཏོར་ན་གང་གིས་མནན་པ་དང་མཐོང་བ་དེ་དག་ནད་ཀྱིས་ཐེབས་པར་འགྱུར་རོ། །ཕྱེ་མ་དེ་ལ་ལན་སྟོང་བཟླས་ནས་གང་གི་མགོ་བོར་བླུགས་པ་དེ་དབང་དུ་འགྱུར་རོ། །ཕྱེ་མ་དེ་ཐོད་པ་དང་ལྷན་ཅིག་སྒོ་ལོགས་སུ་བཞག་ན་དགྲ་བོ་དང་དབྱེ་བར་འགྱུར་རོ། །ཕྱེ་མ་དེ་བུད་མེད་ཀྱི་ལག་པ་ལ་བསྐུས་ན་བུད་མེད་དེ་འཆི་བར་འགྱུར་རོ། །ཕྱེ་མ་དེ་གང་གི་སྒོར་སྦས་ན་སྐྲོད་པར་འགྱུར་རོ། །ཕྱེ་མ་དེ་ཤ་ཆེན་པོ་དང་བསྲེས་ནས་གང་གི་བཏུང་བར་སྦྱིན་ན་ཉི་མ་བདུན་གྱིས་འཆིའོ། །ཕྱེ་མ་དེ་དགྲ་ལ་བྱིན་ལ་དགྲ་བོ་བཀྲེས་པ་དང་། །གཞང་འབྲུམ་དང་། ཚད་པས་ཐེབས་ནས་ཕྱི་ནས་ནི་རང་ཉིད་དགའ་བར་འགྱུར་རོ། །ཙྪུ་ཙྪུན་དྷ་རའི་རུས་པ་བླངས་ནས་གང་གི་ཁྱིམ་དུ་སྦས་ན་འཆིའོ། །ཙྪུ་ཙྪུན་དྷ་རའི་ཤ་དང་ཉའི་ཞག་དང་བཅས་པ་ལྷ་ལ་མཆོད་པ་བྱས་ནས་དུར་ཁྲོད་དུ་ཐོད་པའི་སྟེང་དུ་འདུག་ནས་ཐོད་པ་བཟུང་ལ་བཟླས་པ་བྱ། དུར་ཁྲོད་ཀྱི་སོལ་བ་ལ་ལན་སྟོང་དུ་བླུགས་ཅིང་། སྦྱིན་སྲེག་བྱས་ན་འགྲུབ་པར་འགྱུར་རོ། །ཕྱེ་མ་དེ་ཚ་བ་གསུམ་དང་བསྲེས་པས་ལས་སུ་འགྱུར་བ་ནི། གང་གི་ཁྱིམ་དུ་བཞག་ན། དེ་ལ་མེའི་ཚ་བ་གསུམ་དང་འབྱུང་བར་འགྱུར་རོ། །ཕྱེ་མ་དེ་སྐེ་ཚེ་དང་བསྲེས་པས་ཀྱང་ལས་དེ་ཉིད་དུ་འགྱུར་རོ། །ཕྱེ་མ་དེ་དང་དུར་ཁྲོད་ཀྱི་སས་གཟུགས་བརྙན་བྱས་ཏེ་སྒོ་རྩར་སྦས་ན། ཕྲལ་དུ་ན་ཚས་གསོད་པར་འགྱུར་རོ། །ཕྱེ་མ་དེ་ལན་ཚྭ་དང་བསྲེས་ནས་གང་ལ་བརྡེག་པ་དེ་དབང་དུ་འགྱུར་རོ། །ཕྱེ་མ་དེ་ཡུངས་ཀར་དང་བསྲེས་ནས་རྒྱལ་པོའི་སྒོ་ལ་གཏོར་ན། རྒྱལ་པོ་དབང་དུ་འགྱུར་རོ། །ཙྪུ་ཙྪུན་དྷ་རའི་རྟོག་པ་ཞིབ་མོ་རྫོགས་སོ།། །།རྒྱ་གར་གྱི་མཁན་པོ་དཱི་པྃ་ཀ་ར་དང་། བོད་ཀྱི་ལོཙྪ་བ་རྭ་རྡོ་རྗེ་གྲགས་ཀྱིས་བསྒྱུར་བའོ།། །།

གཤིན་རྗེའི་གཤེད་དགྲ་ནག་པོའི་འཁོར་ལོ་ལས་ཐམས་ཅད་གྲུབ་པར་བྱེད་པ་ཞེས་བྱ་བའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། །ཡ་མཱ་རི་ཀྲྀ་ཥྞ་ཀརྨྨ་སརྦྦ་ཙཀྲ་སིདྡྷ་ཀར་ནཱ་མ་ཏ་ནྟྲ་རཱ་ཛ། བོད་སྐད་དུ། གཤིན་རྗེའི་གཤེད་དགྲ་ནག་པོའི་འཁོར་ལོ་ལས་ཐམས་ཅད་གྲུབ་པར་བྱེད་པ་ཞེས་བྱ་བའི་རྒྱུད་ཀྱི་རྒྱལ་པོ། བཅོམ་ལྡན་འདས་རྡོ་རྗེ་མཁའ་འགྲོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་གཏི་མུག་རྡོ་རྗེ་དང་། སེར་སྣ་རྡོ་རྗེ་དང་། འདོད་ཆགས་རྡོ་རྗེ་དང་། ཞེ་སྡང་རྡོ་རྗེ་དང་། ཕྲག་དོག་རྡོ་རྗེ་དང་། ས་རྡོ་རྗེ་དང་། ཆུ་རྡོ་རྗེ་དང་། མེ་རྡོ་རྗེ་དང་། རླུང་རྡོ་རྗེ་དང་། བྱང་ཆུབ་ཀྱི་སེམས་བདེ་བ་ཆེན་པོ་མ་དང་། ཡོན་ཏན་གྱི་ཕྲེང་བ་མ་དང་། སེམས་ཀྱི་རྒྱུད་ཚིམ་པར་བྱེད་པ་མ་དང་། བརྩོན་འགྲུས་ཀྱི་ངོ་བོ་མ་དང་། བདུག་སྤོས་མ་དང་། མེ་ཏོག་མ་དང་། མར་མེ་མ་དང་། དྲི་ཆབ་མ་དང་། དེ་ལ་སོགས་པ་དཔག་ཏུ་མེད་པ་དང་། ཐབས་ཅིག་ཏུ་བཞུགས་སོ། །དེ་ནས་ལྷ་མོ་བཻ་ཏཱ་ལཱི་སྟན་ལས་ལངས་ཏེ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་འདི་ན་གདུག་པ་ཅན་རྣམས་ཀྱིས་སེམས་ཅན་ཐམས་ཅད་ལ་འཚེ་བར་བགྱིད་པ་དང་། མ་འོངས་པ་ན་ཡང་ཐེག་པ་ཆེན་པོ་པ་དང་། སེམས་ཅན་ཐམས་ཅད་ལའང་འཚེ་བར་བགྱིད་པ་དག་འབྱུང་ན་དེ་རྣམས་ཇི་ལྟར་ཚར་གཅད་པར་བགྱི། དེ་ནས་བཅོམ་ལྡན་འདས་བགེགས་ཐམས་ཅད་འཇོམས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་གསུང་ཐུགས་རྡོ་རྗེ་ལས་སྙིང་པོ་འདི་ཕྱུང་ངོ་། །ཧྲཱིཿདེ་མ་ཐག་ཏུ་བཅོམ་ལྡན་འདས་ཉིད་ཞལ་དྲུག་པ་ཕྱག་དྲུག་པ་ཞབས་དྲུག་པའི་ངོ་བོར་གྱུར་ནས་མ་ཧེ་རྭ་གཉིས་པ་བརྫིས་ཏེ། མ་ཧེའི་བདག་པོ་ཆུང་མ་བཅས་པར་ཨོཾ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ་ཞེས་ཞལ་བཞད་པ་དང་བཅས་པས་ཨོཾ་གསུང་ཞིང་མནན་པར་གྱུར་ཏོ། །ལྷ་དང་ལྷ་མ་ཡིན་དང་བདུད་ཐམས་ཅད་ཀྱང་སྐྲག་ཅིང་འདར་བ་དང་བཅས་པས་འདུད་པར་གྱུར་ཏོ། །ཚངས་པ་དང་། དབང་པོ་ལ་སོགས་པ་ཐམས་ཅད་ཀྱང་ཕྱག་འཚལ་ཞིང་འདུད་པར་གྱུར་ཏོ། །དེ་ནས་བཅོམ་ལྡན་ཁྲོ་བོ་ཡི། །རྒྱལ་པོ་ཆེན་པོ་རབ་འཇིགས་པ། །ཐུགས་རྗེ་ཆེན་པོ་

དང་ལྡན་པས། །གསུང་ནི་འདི་སྐད་བཀའ་སྩལ་ཏོ། །དེ་ནས་སྒྲུབ་པ་བཤད་བྱ་བ། །རྩིབས་བརྒྱད་དབུས་ཀྱི་ལྟེ་བ་ལ། །བདག་ཉིད་ཕྱག་དང་ཞལ་རྣམས་ནི། །དྲུག་དྲུག་ལྡན་པར་གྱུར་པ་བསྒོམ། །ཞབས་ཀྱང་དེ་དང་འདྲ་བ་སྟེ། །གཡས་ཀྱི་དང་པོའི་ཕྱག་ན་ནི། །རྡོ་རྗེ་ཐོ་བ་གཡས་གཉིས་ན། །རལ་གྲི་དེ་བཞིན་གཡོན་གྱི་ཡང་། །དང་པོར་ཞགས་པ་སྡིགས་མཛུབ་ལྡན། །གཉིས་པར་གཏུན་ཤིང་ལེགས་པར་འཛིན། །རྡོ་རྗེ་དྲིལ་བུ་ཐ་མས་བསྣམས། །སྟེང་ཞལ་ནག་པོར་བ་འཇིགས་པ། །ཞབས་གཉིས་རྡོ་རྗེ་སྐྱིལ་ཀྲུང་སྟེ། །བརྐྱང་བསྐུམ་གར་གྱིས་ཞབས་བཞིར་གནས། །སྟག་ལྤགས་ཀྱིས་ནི་རྣམ་དཀྲིས་ཤིང་། །སེང་གེ་སེར་ལ་རལ་པ་ནི། །གྱེན་འགྲེང་བསྡུས་ཏེ་སྤྱི་བོར་ཡང་། །ཐོད་པའི་ཕྲེང་བས་རྣམ་པར་བཅིངས། །འདི་ནི་ཁྲོ་བོ་འཆོལ་པ་སྟེ། །ལག་ཆ་སྣ་ཚོགས་དག་དང་ལྡན། །ཤར་རྩིབས་ལ་སོགས་རྣམ་བཞི་ལ། །གཏི་མུག་སོགས་ཏེ་བཞི་པོ་ཡང་། །དཀར་དང་སེར་དང་དམར་བ་ཡང་། །དེ་བཞིན་བཞི་པ་ལྗང་གུ་སྟེ། །གཡས་ཀྱིས་འཁོར་ལོར་རིན་ཆེན་འབར། །པདྨ་སྣ་ཚོགས་རྡོ་རྗེ་སྟེ། །གཡོན་གྱིས་དྲིལ་བུ་ལེགས་པར་འཛིན། །མཚམས་སུ་ལྃ་སོགས་ལས་སྐྱེས་པ། །ལྷ་མོ་བཞི་པོ་ངེས་པར་བསམ། །བདག་པོ་འདྲ་སྟེ་སྒེག་ཉམས་འཛིན། །གྲྭ་ཡི་ལྷ་མོ་མཚན་ལ་ནི། །སྒེག་མོ་ཁུ་ཚུར་དཀུར་ལྡན་ནོ། །རིན་ཆེན་ཕྲེང་བ་ཕྱག་གཉིས་བསྣམས། །པི་ཝང་སྒྲོགས་པའི་གསུང་དབྱངས་ཅན། །གར་གྱིས་རྒྱས་པར་འགྲོ་བ་ཡི། །དོན་ལ་རྟག་ཏུ་བརྩོན་འགྲུས་ལྡན། །བདུག་སྤོས་སོགས་དང་བཞི་པོ་ཡང་། །རང་གི་མཚན་མ་ངེས་པར་འཛིན། །ཕྱག་རྒྱའི་སྔགས་རྣམས་བརྗོད་པས་སོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཏི་མུག་རྡོ་རྗེའི་སྔགས་འདི་གསུངས་སོ། །ཨོཾ་ཛི་ན་ཛིཀ །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་སེར་སྣ་རྡོ་རྗེའི་སྔགས་འདི་གསུངས་སོ། །ཨོཾ་རཏྞ་དྷྲྀཀ །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་འདོད་ཆགས་རྡོ་རྗེའི་སྔགས་འདི་གསུངས་སོ། །ཨོཾ་ཨཱ་རོ་ལིཀ །དེ་ནས་ཡང་

བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲག་དོག་རྡོ་རྗེའི་སྔགས་འདི་གསུངས་སོ། །ཨོཾ་པྲཛྙཱ་དྷྲྀཀ །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ས་རྡོ་རྗེའི་སྔགས་འདི་གསུངས་སོ། །ཨོཾ་ལོ་ཙ་ནཱ་ཧཱུྃ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཆུ་རྡོ་རྗེའི་སྔགས་འདི་གསུངས་སོ། །ཨོཾ་ཨཱ་མ་ཀཱི་ཏྲཱཾ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མེ་རྡོ་རྗེའི་སྔགས་འདི་གསུངས་སོ། །ཨོཾ་པཎྜ་རི་བཱ་ཧྲཱིཿ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རླུང་རྡོ་རྗེའི་སྔགས་འདི་གསུངས་སོ། །ཨོཾ་ཏ་རཱ་ཨཱཿ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདེ་བ་ཆེན་པོ་སྐྱེད་པར་བྱེད་པའི་སྔགས་འདི་གསུངས་སོ། །ཨོཾ་ལཱ་སྱེ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པས་ཡོན་ཏན་རྒྱུད་པ་མའི་སྔགས་འདི་གསུངས་སོ། །ཨོཾ་མཱ་ལེ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་དབྱངས་ཅན་མའི་སྔགས་འདི་གསུངས་སོ། །ཨོཾ་གཱི་ཏི། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གར་མའི་སྔགས་འདི་གསུངས་སོ། །ཨོཾ་ནྲྀ་ཏྱེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མཆོད་པའི་སྔགས་རྣམས་གསུངས་པ་ནི། ཨོཾ་བཛྲ་དྷཱུ་པེ། ཨོཾ་བཛྲ་པུཥྤེ། ཨོཾ་བཛྲ་[དཱི་]པེ། ཨོཾ་བཛྲ་གནྡྷེ། དེ་ནས་ཡང་བཅོམ་ལྡན་འདས་ཀྱིས་ཐམས་ཅད་འགུགས་པར་བྱེད་པའི་སྔགས་དང་། དེ་བཞིན་གཤེགས་པ་ཐམས་ཅད་གཞུག་པ་དང་། དེ་བཞིན་གཤེགས་པ་ཐམས་ཅད་བཅིངས་པ་དང་། དེ་བཞིན་གཤེགས་པ་ཐམས་ཅད་རྗེས་སུ་དགྱེས་པར་བྱེད་པའི་སྔགས་རྣམས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གསུངས་པ་ནི། ཨོཾ་བཛྲ་ཨོཾ་ཀུ་ཤ་ཛཿ། ཨོཾ་བཛྲ་པཱ་ཤཧཱུྃ། ཨོཾ་བཛྲ་སྥོ་ཊ་བྃ། ཨོཾ་བཛྲ་ཨཱ་བེ་ཤ་ཧོཿ། བློ་ལྡན་མཁས་པས་ཅི་ནུས་ཀྱིས། །ཐིག་གི་ཐིག་ནི་གདབ་པ་ལ། །ཚད་ལྡན་འཇུར་མདུད་མེད་པ་དང་། །གཤེར་

ཞིང་སར་པ་མཛེས་པ་ཡིས། །ཤར་དུ་བལྟས་ཏེ་གདབ་པར་བྱ། །ཚངས་ཐིག་གཉིས་པ་གདབ་པ་ཡང་། །ལྷོ་རུ་བལྟས་ཏེ་གདབ་པར་བྱ། །དེ་འོག་མཐའ་ཡི་ཐིག་གདབ་པ། །བྱིན་ཟར་གནས་ཏེ་དབང་ལྡན་བལྟ། །རླུང་གནས་བདེན་བྲལ་ཁ་བལྟས་ཏེ། །ནུབ་ཏུ་ལེགས་པར་བྲི་བར་བྱ། །དེར་གནས་ཤར་དུ་ཁ་བལྟས་ཏེ། །བྱང་དུ་བྲིས་ཏེ་བྱིན་ཟར་གནས། །བདེན་བྲལ་མིན་པའི་མཐའ་མ་གདབ། །བལྟ་བ་བདེན་བྲལ་ཕྱོགས་སུའོ། །སློབ་དཔོན་ལྡང་མིན་གྲོགས་པོ་ནི། །རི་དགས་ཞོན་པའི་ཕྱོགས་འདུག་སྟེ། །ཚངས་ཐིག་དང་པོ་གདབ་པར་བྱ། །གཉིས་པའང་བདེན་བྲལ་ཕྱོགས་འདུག་སྟེ། །བགེགས་ཕྱོགས་བརྐྱང་ལ་གདབ་པར་བྱ། །དབུས་དང་མཐའ་མར་ཕྱེ་བ་ཡི། །གཞལ་ཡས་ཁང་པའི་མཚན་ཉིད་ནི། །གྲུ་བཞིར་བགྱི་ཞིང་སྒོ་བཞི་དང་། །རྟ་བབས་བཞིས་ནི་བརྒྱན་པ་ཡི། །དབུས་སུ་རྩིབས་བརྒྱད་ལྟེ་བ་ལ། །རྡོ་རྗེ་ཐོ་བ་བྲི་བར་བྱ། །ཉི་མའི་དཀྱིལ་འཁོར་དབུས་ཉིད་དུ། །གྲི་གུག་ཀྱང་ནི་བྲི་བར་བྱ། །ཤར་རྩིབས་འཁོར་ལོ་ཆེན་པོ་སྟེ། །རིན་ཆེན་ལྷོ་ཡི་ཕྱོགས་རྩིབས་ལ། །པདྨ་དམར་པོ་ནུབ་ཏུ་བྲི། །བྱང་དུ་རྡོ་རྗེ་ཀུན་དུ་རྩེ། །ཤར་ལྷོ་ཕྱོགས་སུའང་དེ་དང་འདྲ། །གྲྭ་བཞིར་བརྒྱད་པོའང་ཉིས་བརྩེག་ཏུ། །མཚན་མ་རྣམས་ནི་ལེགས་པར་བྲི། །སྒོ་བཞི་དག་ཏུ་བྲི་བ་ཡང་། །ལྕགས་ཀྱུ་ཞགས་པ་ལྕགས་སྒྲོག་དྲིལ། །གཞན་ཡང་རྒྱན་ཀུན་ལེགས་པར་བྲི། །མཆོད་པ་ལེགས་པར་དགྲམ་པར་བྱ། །ཁུ་ཚུར་དཀུ་གཉིས་བཞག་པ་དང་། །དེ་བཞིན་དཔྲལ་བར་ཉུག་པ་དང་། །ཁ་ནས་འབྱིན་དང་གར་བསྐྱོད་དང་། །བདུག་སྤོས་ཉུག་དང་མེ་ཏོག་འཐོར། །མཐེ་བོང་བསྒྲེང་སྟེ་རང་ལུས་ལའང་། །གཞན་ལ་ཉུག་ཚུལ་གནས་པ་ནི། །བརྒྱད་པོ་མཆོད་པའི་ལྷ་མོ་དག །བསྐྱེད་དང་ལེགས་གནས་ཕྱག་རྒྱ་ཡིན། །སྐུ་གསུང་ཐུགས་ཀྱི་ལྷ་རྣམས་དག ། རང་ལུས་བཅུག་སྟེ་གནས་པ་ལ། །སྔགས་ཀྱིས་བྱིན་གྱིས་བརླབ་པ་ནི། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷྲ་བ་ཨཱཏྨ་ཀོ྅ཧྃ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། མིག་སོགས་བྱིན་གྱིས་བརླབ་པ་ལ། །གཏི་མུག་རྡོ་རྗེ་

སོགས་ཀྱིས་བསྲུང་། །དབང་སྒྲུབ་སྟོང་པ་ཉིད་བྱས་ཏེ། །སྙིང་པོའམ་མིང་གི་ཡི་གེ་ཡི། །རིགས་ཀྱི་ཕྱག་མཚན་བསྣམས་པ་ཡི། །སྐུ་རྣམས་ངེས་པར་བསྐྱེད་པས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདུད་རྩི་མྱང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ཨོཾ་ཨཱཿཧཱུྃ། དག་ཅིང་འབར་བར་རྣམ་བརྟགས་ཏེ། །ཉི་མའི་དཀྱིལ་འཁོར་དབུས་གནས་པར། །ཞེ་སྡང་རྡོ་རྗེའི་བདག་པོ་སྟེ། །ཟླ་བའི་དབུས་སུ་གཏི་མུག་བསམ། །རིན་ཆེན་དབུས་སུ་བསམ་པ་ཡང་། །སེར་སྣ་ཉིད་དུ་བསམ་པར་བྱ། །པདྨའི་དབུས་སུ་འདོད་ཆགས་བསམ། །སྣ་ཚོགས་དབུས་སུ་ཕྲག་དོག་བསམ། །བསམ་བྱ་ལྗགས་ལ་ས་བོན་ཏེ། །འཕྲོས་པས་བཀུག་སྟེ་ཚིམ་པར་བྱ། །ཤར་ནི་དཀར་པོ་ཆེན་པོ་སྟེ། །ལྷོ་ནི་སེར་པོ་ཉིད་དུའོ། །ནུབ་ཏུ་དམར་པོར་ངེས་པར་ཤེས། །བྱང་ནི་ལྗང་གུ་ཡང་དག་ལྡན། །དེ་ལས་དེ་བཞིན་རེ་ཁཱའི་རིམ། །དཀྱིལ་འཁོར་བསྒོམ་པའི་ཚེ་ན་ཡང་། །བྱམས་དང་སྙིང་རྗེ་དགའ་བཏང་སྙོམས། །ཚད་མེད་པ་ཡི་རིམ་པ་ཡིས། །སེམས་ཅན་རྣམས་ལ་ཕན་གདགས་ཕྱིར། །བརྟན་དང་གཡོ་བའི་དངོས་པོ་རྣམས། །ཡོད་མིན་མེད་མིན་གཉིས་ཀ་མིན། །གཉིས་ཀ་མིན་པའང་མ་ཡིན་ཏེ། །སྤྲོས་བྲལ་ངོ་བོ་མེད་པར་བསྒོམ། །ཨོཾ་ཤཱུ་[ནྱ]ཏཱཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། རྃ་ལས་ཉི་མ་རྣམ་བསྒོམས་ཏེ། །དེ་དབུས་ལས་ཀྱི་རྡོ་རྗེ་ནི། །ཀུན་ཏུ་རྩེ་ལྔའི་རང་བཞིན་ཏེ། །དེ་དབུས་ཧཱུྃ་ལས་རྡོ་རྗེ་ནི། །ཀུན་ཏུ་ཕྲ་མོས་བགེགས་བཅོམ་སྟེ། །ར་བ་གུར་དང་ས་གཞི་ཡང་། །དེ་ཡི་འོག་ཏུ་ངེས་པར་བསྒོམ། །གྲུ་གསུམ་གྱེན་བསྒྲེང་དཀར་པོ་ནི། །ཤིན་ཏུ་གསལ་བར་བདག་གིས་དམིགས། །ཞེ་སྡང་ལས་ནི་སྔར་མ་བྱུང་། །བྱུང་ཞིང་འབྱུང་བར་མི་འགྱུར་རོ། །བྱང་ཆུབ་སེམས་ལ་གཞོལ་བ་དང་། །གཏོང་ཞིང་ཐོས་པའི་ཁེངས་པ་མེད། །ལེ་ལོ་བཅོམ་ཞིང་ཁྲོ་བ་མེད། །སེར་སྣ་མེད་དེ་གཡོ་ཡང་མེད། །སྒྱུ་སྤངས་ཤེས་རབ་གསལ་བ་དང་། །གཅིག་ཏུ་ཐེག་པ་ཆེ་ལ་གཞོལ། །དེས་ནི་དཀའ་བ་མེད་པར་ཡང་། །གཞན་གྱི་དོན་དུ་འདི་བརྩམས་ན། །གྲངས་ནི་བྱེ་བ་ཚང་བ་

ཡི། །བཅུ་བཞིར་ཚང་བའི་གསང་སྔགས་ཀྱིས། །ལས་རྣམས་ཀུན་གྲུབ་ཐེ་ཚོམ་མེད། །ཡང་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་ཡི་འཁྲུལ་འཁོར་ཇི་ལྟ་བུ། །ཡི་གེ་རྣམས་ནི་ཇི་ལྟར་བྲི། །བཅོམ་ལྡན་འདས་ཀྱིས་བཀའ་སྩལ་པ། །བདུན་ཚན་བདུན་དང་ལྡན་པ་ཡི། །རེའུ་མིག་ལེགས་པར་བྲི་བར་བྱ། །ལས་ཀུན་བྱེད་པའི་འཁོར་ལོ་ལ། །མཆོད་པ་ཡིས་ཀྱང་ལེགས་མཆོད་ལ། །དེ་འོག་ལས་རྣམས་བརྩམ་པར་བྱ། །བཟླས་པའི་མཚན་མ་རྨི་ལམ་མམ། །མངོན་སུམ་བྱུང་བར་གྱུར་ནས་ཀྱང་། །འཁྲུལ་འཁོར་རྣམས་ནི་བྲི་བྱ་བའི། །རྨི་ལམ་མཚན་མ་འདི་ཡིན་ཏེ། །ཚལ་ཆེན་ཟུག་པའི་གླིང་དག་དང་། །ལྷ་ཁང་མཆོད་རྟེན་གཞལ་ཡས་སུ། །དམ་པ་རྣམས་དང་ངེས་ཕྲད་དེ། །དབང་བསྐུར་རི་ལ་འཛེག་པ་དང་། །རྒྱ་མཚོར་བཅས་པའི་ཆུ་བརྒལ་ལམ། །ཀླ་ཀློ་བྲན་དུ་འཁོལ་རྨི་ན། །ངེས་པར་འགྲུབ་སྟེ་འཁོར་ལོ་བྲི། །དེ་ནས་ཡང་བཅོམ་ལྡན་འདས་ཀྱིས་འབྱུང་བའི་དཀྱིལ་འཁོར་བསྒོམ་པ་གསུངས་ཏེ། ཡྃ་ལས་བྱུང་བའི་རླུང་དཀྱིལ་འཁོར། །སྔོན་པོ་གཞུ་ཡི་དབྱིབས་ཅན་ལ། །བ་དན་ལྡན་པར་ངེས་པར་བསམ། །རྃ་ལས་བྱུང་བའི་མེ་དཀྱིལ་འཁོར། །གྲུ་གསུམ་དམར་པོ་བསམ་པར་བྱ། །བྃ་ལས་བྱུང་བ་ཆུ་ཡིན་ཏེ། །དཀར་པོ་ཟླུམ་པོ་བསམ་པར་བྱ། །ལྃ་བྱུང་ས་ཡི་དཀྱིལ་འཁོར་ནི། །ལྗང་སེར་གྲུ་བཞི་བསམ་བྱས་ཏེ། །སྔོན་དུ་བསམ་བྱ་ལྟ་རིམ་བཞིན། །ཏྭ་ར་ཕྱི་ནས་ངེས་པར་བསམ། །བྷྲུྃ་ལས་བྱུང་བའི་འཁོར་ལོའི་རྩིབས། །དྲུག་གཉིས་ལྡན་པའི་ལྟེ་བ་ལ། །བྷྲུྃ་ལས་གཞལ་ཡས་ཁང་པ་སྟེ། །གདན་དང་ལྡན་པར་སྒྲུབ་པོས་བསམ། །དེ་ནས་ཡང་བཅོམ་ལྡན་འདས་ཀྱིས་རྡོ་རྗེ་བསྡུ་བའི་ཕྱག་རྒྱ་དང་སྔགས་ཀྱིས་བདེ་བར་གཤེགས་པ་འཁོར་དང་བཅས་པ་བསྡུ་བར་བྱའོ། །ཨོཾ་བཛྲ་ས་མཱ་ཛཿ། ལག་ངར་གཉིས་ནི་ངེས་བསྣོལ་ལ། །མཛུབ་གཉིས་ལྕགས་ཀྱུའི་ཚུལ་བྱས་ཏེ། །སེ་གོལ་བརྡབ་ཅིང་བསྡུ་བར་བྱ། །ལྕགས་ཀྱུ་ལ་སོགས་རྣམ་པ་བཞིས། །ངེས་པར་དགུག་པ་ལ་སོགས་བྱ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མཆོད་པའི་སྔགས་

འདི་གསུངས་སོ། །ཨོཾ་ཨརྒྷཾ་པྲཏཱི་ཙྪ་སྭཱ་ཧཱ། པྲ་བར་སཏྐཱ་ར་པྲ་ཏཱིཙྪ་སྭཱ་ཧཱ། ནག་པོ་ར་རི་མེད་པ་ཡི། །བུམ་པ་ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་ལྡན་པར། །སྙིང་པོར་ལྡན་པའི་སྨན་སོགས་གཞུག །མགྲིན་པར་རས་བཟངས་དག་གིས་དཀྲི། །འདབ་མར་ལྡན་པའི་ལྕུག་མ་ཡང་། །དྲི་དང་ལྡན་པའི་ཁ་རྒྱན་ཏེ། །བདུད་རྩིར་ལྡན་པ་ཡིས་ཀྱང་མཆོད། །བླ་རེ་གདུགས་དང་རྒྱལ་མཚན་དང་། །བ་དན་སིལ་སྙན་རོལ་མོ་ཡིས། །གུས་པས་དཀྱིལ་འཁོར་ལ་ཡང་མཆོད། །འཛམ་བུའི་གླིང་ངམ་གླིང་གཞན་དག །ནོར་བུ་རིན་ཆེན་བཀང་བ་ཡང་། །སྟོང་གསུམ་ལ་སོགས་དེ་བཞིན་ཏེ། །ཞུམ་པ་མེད་པར་བྱས་ཏེ་དབུལ། །བློ་ལྡན་སྒྲུབ་པོས་སེམས་ཅན་ལ། །ཕན་པའི་སེམས་ཀྱིས་སྲོག་མི་གཅོད། །མ་བྱིན་པར་ཡང་མི་བླང་ངོ་། །འདོད་པ་མི་སྤྱད་བརྫུན་མི་སྨྲ། །གནོད་པའི་རྒྱུ་ཕྱིར་ཆང་མི་བཏུང་། །གདུག་པ་རྣམས་ལས་བཟློག་སྟེ་བྱ། །དངོས་སུའམ་ཡང་ན་སྔགས་དང་གཞན། །འཁྲུལ་འཁོར་དང་ནི་ཏིང་ངེ་འཛིན། །སྨན་གྱིས་ཀྱང་ནི་བྱ་བ་སྟེ། །དེ་ལྟར་མི་བྱེད་དེ་ཡི་ནི། །ངེས་པར་དམ་ཚིག་ཉམས་པར་འགྱུར། །གདོན་དང་ལོག་འདྲེན་དག་གིས་ཀྱང་། །ངེས་པར་འཆི་སྟེ་དམྱལ་བར་ནི། །ཡུན་རིང་སྡུག་བསྔལ་གྱིས་སྡུག་སྟེ། །དེ་བས་ནན་ཏན་ལྡན་པ་རུ། །བཟོད་པ་མི་བསྐྱེད་སྙིང་རྗེ་ཡིས། །སྔགས་ཀྱིས་ངེས་པར་གསད་པར་བྱ། །མི་ལྡོག་པ་ཡི་སེམས་སུ་གནས། །བྱང་ཆུབ་ཆུ་ཡིས་ར་རོ་ཞིང་། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེ་ལ་དེ་གཞོལ་ཏེ། །ངོ་བོ་དང་བྲལ་དངོས་པོ་འཇིག །མ་བྱིན་བྱང་ཆུབ་བླང་པ་ལ། །བརྩོན་པས་ལེ་ལོ་དོར་བར་བྱ། །བརྫུན་དུ་ཤེས་བྱ་དངོས་པོ་རྣམས། །དེ་ནས་དེ་བཞིན་གཞན་ལ་བརྗོད། །རྒྱས་བཏབ་པ་ཡི་དངོས་པོ་ལ། །རྒྱབ་ཤིག་ཤེས་རབ་རལ་གྲི་ཡིས། །བཅད་ཅིང་རྣམ་པ་མེད་པ་ལ། །བསད་པ་ཡང་ནི་ང་ཡིས་བསྒྲགས། །ཨུ་མེད་པ་ཡི་ཡི་གེ་རྣམས། །སྟེང་གི་གཡས་ཕྱོགས་ཉིད་ནས་བྲི། །འོག་གི་ཡི་གེ་བྲི་བ་ནི། །དེ་ཉིད་གཡོན་གྱི་ཕྱོགས་ནས་བྲི། །ཨཱ་ལི་ཀཱ་ལི་ངེས་བྲིས་ཏེ། །ཀྵཿམ་གཏོགས་པར་དབུས་སྟོང་སྟེ། །དེ་ལ་བགེགས་ཀྱི་མཚན་མ་འམ། །མིང་སོགས་ངེས་པར་བྲི་བ་ཡང་། །ལྟོ་བའི་

ནང་དུ་ཆུད་པར་བྲི། །འཁོར་ལོ་ཉིད་ཀྱང་དེ་འདྲ་བ། །གྲྭ་བཞི་དག་ཏུ་བྲི་བ་ནི། །མ་ནིང་འདོད་པའི་ཀཱ་ལི་དང་། །ཨཱ་ལི་མིན་ཏེ་ལྷག་མ་ཡིན། །གདུག་པའི་ཡི་གེ་བཅུ་བཞི་པོ། །མིང་དང་བཅས་པ་ཕྱོགས་བཞིར་བྲི། །དབྱངས་ཀྱི་ཡི་གེ་བཞི་པ་ཡིས། །བཞི་པ་གཅིག་གི་མགོ་སྟེངས་སུ། །སུམ་སྐོར་ཉིད་ནི་ཤིས་པ་ཡིན། །ལས་ཀུན་བྱེད་པའི་འཁོར་ལོ་དེ། །འདྲི་བར་བྱེད་པའི་སྤྱི་དུས་དང་། །ཁྱད་པར་དུས་ཚེས་ལྷ་ཡི་ནི། །རྣལ་འབྱོར་མེད་པས་བྱ་བ་མིན། །ཕྱོགས་སུ་བལྟ་བའི་བྱེ་བྲག་གིས། །ལས་ཀྱི་སྒྲུབ་པོས་ཤེས་པར་བྱ། །ལས་ཀུན་བྱེད་པའི་འཁོར་ལོ་ནི། །བདེ་གཤེགས་ཀུན་གྱི་སྙིང་པོ་སྟེ། །དེ་བཞིན་གཤེགས་པའི་གསང་བའང་ཡིན། །འཁོར་ལོ་འདིར་ནི་བཅུག་པ་གང་། །སངས་རྒྱས་ཀྱང་ནི་ངེས་པར་འཇིག །དམ་ཆོས་སྨོད་པའང་དེ་བཞིན་ཞི། །འཁོར་ལོས་སྒྱུར་བའང་དབང་དུ་འདུ། །ལྷ་མིན་པྲ་ཏིའང་ཞི་བར་བྱེད། །དགྲ་བཅོམ་གསོད་པའང་དེ་ཞི་ལ། །བརྒྱ་བྱིན་ཉིད་ཀྱང་དབང་དུ་ངེས། །དེ་ལྟ་བུ་ཡི་འཁོར་ལོ་དེ། །ཐོག་མར་བྲིས་ཏེ་དེ་འོག་ཏུ། །བྱིན་རླབས་མ་ནོར་དེ་ཉིད་ལ། །མཆོད་པ་གུས་པར་བདག་གིས་བྱ། །མཆོད་མིན་ལས་རྣམས་བྱས་པ་ལ། །འབྲས་བུ་འབྱུང་མིན་འཁྲུལ་པ་ལའང་། །འབྲས་མེད་ངལ་བ་ཉིད་ཡིན་ནོ། །ཡང་ལྷ་མོ་རོ་ལངས་མ་ཉིད་སྟན་ལས་ལངས་ཏེ་མཆོད་པ་ཆེན་པོ་བྱས་ཏེ་འདི་སྐད་ཅེས་གསོལ་བ་བཏབ་བོ།། །།འཁོར་ལོ་འདྲི་བའི་སྣག་ཚ་གང་། །བྲི་གཞི་སྨྱུ་གུ་ཇི་ལྟ་བུ། །གཅིག་གམ་འོན་ཏེ་དེ་ཐ་དད། །བཅོམ་ལྡན་འདས་ཀྱིས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ལེགས་སོ་ལེགས་སོ། །དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །ཇི་ལྟར་ལས་རྣམས་བྱེ་བྲག་ཡོད་པ་ལྟར། །བྲི་བའི་གནས་དང་གཞུག་པའི་གནས། །ཐ་དད་དེ་བཞིན་འཁོར་ལོ་བསྒྲུབ། །སྣག་ཚ་ཐ་དད་འབྲུ་རྣམས་བཞིན། །གྲོང་ཁྱེར་ཆེན་པོ་བསྲུང་འདོད་དམ། །སྐྱེས་པ་བསྲུང་བར་འདོད་ན་ཡང་། །གྲོ་ག་དེ་བཞིན་ཨུ་བྷི་ཤུན། །གླ་གོར་ཞོ་ཤའི་ཤུན་པའམ། །རས་ལ་ཁ་ཆེས་འཁོར་ལོ་ནི། །བསྐུལ་བའི་ཚིག་དང་ལྡན་

པར་རོ། །སོ་མ་བཏང་བའི་ཁམ་ཕོར་དུ། །སྦྲང་མར་དག་དབུས་འཁོར་ལོ་གཞུག །སྐུད་པ་དཀར་པོས་ལེགས་པར་དཀྲི། །ནང་པར་ཤར་དུ་ཁ་བལྟས་ཏེ། །མེ་ཏོག་དཀར་པོ་དག་གིས་མཆོད། །བདག་ཉིད་དཀར་པོའི་མདོག་ཏུ་བསམ། །མདུན་དུ་སྐྱེས་པ་ཟླ་བ་ལ། །མཐའ་དག་གནས་པ་མདུན་དུ་བསམ། །སངས་རྒྱས་ཕྱོགས་བཅུར་བཞུགས་པ་ཡིས། །བདུད་རྩི་ལྔས་གང་བུམ་པ་ཡི། །ཆུ་རྒྱུན་དག་གིས་དབང་བསྐུར་ཏེ། །དེ་འོག་བཟླས་པ་བརྩམ་པར་བྱ། །སྭཱ་ཧཱའི་སྔོན་དུ་བསྐུལ་ཚིག་ལྡན། །བུད་མེད་ལ་ནི་གི་ཝང་སྟེ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲི། །ཕྱི་མ་སྐྱེས་པའི་ཇི་བཞིན་ནོ། །བྱེ་བྲག་ཏུ་ཡང་སྐྱེས་པའམ། །བུད་མེད་ཞི་བར་འདོད་ན་ཡང་། །ག་པུར་ཙནྡན་དག་གིས་ནི། །ཤིར་ཤ་ཤིང་གི་ཤུན་པ་ལ། །འཁོར་ལོ་ཡི་གེ་ལེགས་བྲིས་ཏེ། །ཤར་དུ་ནང་པར་བལྟས་ཏེ་མཆོད། །ལས་ཀུན་བྱེད་པའི་ཐབས་ལ་ཡང་། །སྔོན་གསུངས་ཞལ་ལྡན་དགོད་པར་བྱ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲི། །བུམ་པ་ཁ་རྒྱན་དང་ལྡན་ཞིང་། །རིན་ཆེན་འབྲུ་དང་སྨན་དུ་ལྡན། །དྲི་ཞིམ་ཆུ་དང་ལྡན་པར་བྱ། །གོས་བཟངས་ཀྱིས་ནི་མགྲིན་པ་དཀྲི། །ཕྱོགས་བཞི་དག་ཏུ་གཞག་པར་བྱ། །ཐང་ཀའམ་དཀྱིལ་འཁོར་ལ་མཆོད་དེ། །དྲིའམ་ཆུ་དང་མེ་ཏོག་དང་། །བསྲེས་པའི་སྐྱོར་མོས་ཆུ་ཡང་བླུགས། །གཟར་བུ་སྟོང་གིས་སྦྱིན་སྲེག་བྱ། །ཆུ་དེས་གཞན་ཡང་གཏོར་བར་བྱ། །བར་མ་ཆད་པར་ཉིན་བདུན་དུ། །དེ་ལྟར་རྒྱུན་དུ་གཏོར་མ་སྦྱིན། །ཕྱི་ནས་འཁོར་ལོ་རིན་ཆེན་དེ། །བུམ་པའི་ནང་ནས་རྣམ་ཕྱུང་སྟེ། །རྒྱལ་མཚན་རྩེ་ལ་བཏགས་ནས་སུ། །གནས་མཐོན་པོར་ཡང་གཞག་པར་བྱ། །ཞི་བར་བྱེད་པ་ཐེ་ཚོམ་མེད། །སྔར་བཤད་པ་ཡི་ཤིང་ཤུན་དང་། །དུར་ཁྲོད་རས་ལ་སྒྲུབ་པོ་ཡིས། །ཡུང་བའི་ཁུ་བས་འཁོར་ལོ་བྲི། །སོ་མ་བཏང་བའི་ཁམ་ཕོར་དུ། །བསྒྲུབ་བྱའི་རྐང་རྗེས་ས་དག་དང་། །སྣང་མཛད་ཆུ་ངོགས་ས་དག་དང་། །རི་དང་ལམ་ས་བཏགས་ནས་ནི། །ལྡོང་རོས་དང་ནི་ཡུང་བ་ཡི། །ཁུ་བས་

སྦྲུས་ཏེ་གཟུགས་བྱས་ལ། །འཁོར་ལོ་གཉིས་དྲིལ་ཡུང་བ་དང་། །ལྡོང་རོས་ཀྱི་ནི་ཁུ་བས་བསྐུ། །སྙིང་གར་བཅུག་སྟེ་གཞུག་པར་བྱ། །སེང་ལྡེང་ཕུར་པ་སོར་བརྒྱད་པས། །ལུས་ལ་སོགས་པ་གདབ་པར་བྱ། །དགྲ་རྣམས་འོང་བའི་ལམ་དུ་ཡང་། །ཁུང་བུར་བརྐོས་ཏེ་གཞུག་པར་བྱ། །ལྃ་ལས་དབང་ཆེན་གྱིས་མནན་ཅིང་། །སུྃ་ལས་སྐྱེས་པ་དེ་སྟེང་ན། །སྣ་ཚོགས་ལས་ཀྱིས་མནན་པ་ཡི། །ཁམ་ཕོར་སྐུད་སེར་དཀྲི་བར་བྱ། །རྒྱལ་ཆེན་དག་ནི་སེར་པོ་ཡང་། །དབང་ཆེན་ལ་གནས་ལྷོར་བལྟས་ཏེ། །བསྒྲུབ་བྱ་སེར་པོའི་རིགས་མནན་པར། །བསམས་ནས་བཟླས་པ་བརྩམ་པར་བྱ། །སྭཱ་ཧཱ་མེད་པར་སྟྃ་བྷ་ཡ། །ལྃ་གྱི་མཐའ་ཅན་ལྔ་སྟོང་བཟླས། །གཏོར་མ་རྒྱུན་དུ་སྦྱིན་པར་བྱ། །རེངས་པ་ཆེན་པོའི་ལས་འདི་ཡིས། །དམག་གི་དཔུང་ཡང་ངེས་པར་རེངས། །འགའ་ཙམ་ལ་ནི་སྨོས་ཅི་དགོས། །སྲན་ནེ་ལན་གསུམ་བསྔགས་པ་ཡིས། །དུར་ཁྲོད་རས་ལ་འཁོར་ལོ་བྲི། །རིམས་དང་དུག་གིས་ཟིན་པ་དེ། །དེ་ཡི་སྟེང་དུ་གཞག་པར་བྱ། །བདག་ཉིད་དཀར་པོར་རྣམ་བསམས་ཏེ། །ཆོ་གས་བྱབ་ཅིང་གདོན་པར་བྱ། །དེ་ནི་དེ་ནས་ཞི་བར་འགྱུར། །ངག་དག་རེངས་པར་འདོད་ན་ཡང་། །སྨྱོ་བྱེད་ཁུ་བ་དུར་ཁྲོད་སོལ། །བཙག་རྣམས་བསྲེས་ཏེ་སོ་མ་བཏང་། །ཁམ་ཕོར་གཉིས་ལ་འཁོར་ལོ་འདི། །ཕོ་དང་མོ་ཡི་སྐོར་ཕྱོགས་གཉིས། །མ་ནོར་བྲིས་ཏེ་ཁ་སྦྱར་ལ། །རོ་བསྲེགས་སོ་དང་ཐལ་བས་གཡོགས། །སྟེང་དུ་བཟླས་ཤིང་སྤེལ་བ་ནི། །སྟྃ་བྷ་ན་དང་ཀུ་རུ་ལྃ། །སྭཱ་ཧཱ་མེད་པའི་སྔགས་འདི་ཡིས། །ཁ་བཅིང་བ་ནི་ངེས་པར་འགྱུར། །གང་ཞིག་གསད་པར་བྱེད་པ་ལ། །སྙིང་རྗེར་ལྡན་པའི་གང་ཟག་གིས། །གདུག་བྱེད་ལས་འདི་བྱེད་པ་ལ། །གཤིན་དགྲ་ལྷ་ཡི་རྣལ་འབྱོར་གྱིས། །གཅིག་གིས་ནི་འགྲུབ་པར་བྱེད། །བཅུ་བཞི་ཉི་མ་ཕྱེད་པ་ན། །བྱ་རོག་སྒྲོ་རྩའི་སྨྱུ་གུ་ཡིས། །དུར་ཁྲོད་ཀྱི་ནི་རས་དག་ལ། །དུག་དང་ཚྭ་དང་སྐེ་ཚེ་དང་། །ནིམ་པ་ཚ་བ་གསུམ་དག་དང་། །ཚ་བའི་མར་ཁུ་དུར་ཁྲོད་སོལ། །སྨྱོ་བྱེད་མཛུབ་མོའི་ཁྲག་གིས་བྲི། །རོ་བསྲེགས་པ་ཡི་ཐལ་བ་དང་། །བསྒྲུབ་བྱའི་རྐང་པའི་རྗེས་ཀྱིས། །མི་ཡི་རུས་ཕྱེ་ལ་སོགས་

ལ། །གཟུགས་བྱས་དེ་ཡི་སྙིང་གར་གཞུག །དུར་མེ་དག་ལ་དེ་བགྲོ་ཞིང་། །ཁྲོས་པའི་སེམས་ཀྱིས་ཁྲི་བཟླས་ན། །སྐད་ཅིག་ཙམ་གྱིས་འཆི་བ་ནི། །དེ་ཡི་ཁྱིམ་མམ་དུར་དུ་སྦ། །དེ་ལྟའི་ལས་ཀྱིས་དེ་འགྲུབ་སྟེ། །མཚན་མོ་ཕྱེད་ན་ཁ་ལྷོར་བལྟ། །བདག་ཉིད་འཇིགས་པའི་གཟུགས་ཅན་ཏེ། །ཞལ་སོགས་སྔོན་དུ་གསུངས་པ་ལྟར། །མ་ཧེའི་སྟེང་ན་མཆེ་བ་གཙིགས། །གསུས་ཁྱིམ་ཆེ་ལ་གྱེན་སྐྲ་འབར། །སྤུ་སོགས་གཞན་ཡང་དེ་འདྲའོ། །བ་སྤུ་དག་གི་བུ་ག་ནས། །འཇིགས་མཚོན་སྣ་ཚོགས་ཐོགས་པ་ཡི། །ཁྲོ་བོ་མང་པོ་འཕྲོ་བ་སྟེ། །བདག་ཉིད་བསྐལ་བའི་མེ་ལྟར་འབར། །བསྒྲུབ་བྱ་མདུན་དུ་བསམ་བྱ་བ། །མཚམས་མེད་རྫོགས་པའི་སྡིག་དང་ལྡན། །དྲི་མ་ཅན་དེ་ཕྱོགས་གོས་འཆང་། །གྲོང་ཁྱེར་སྐྱེ་བོས་འཚེ་བ་ཅན། །གྲང་བའི་རེག་པས་ལུས་ལ་རྒྱས། །མཚོན་གྱིས་བཏབ་པ་བྱས་པ་ལ། །གཅན་གཟན་སོགས་ཟ་མདུན་དུ་བསམ། །ངག་ཏུའང་དེ་ལྟར་ཡང་ཡང་བརྗོད། །ལྕགས་ཀྱི་འཁྱུད་མོས་ཡན་ལག་བསྡམས། །ཚེར་མས་དབུག་པ་བྱས་པ་སྟེ། །ལུས་ཀྱི་པགས་པ་མེད་པར་བསམ། །སྐེ་ཚེ་ལན་ཚྭས་ལུས་བྱུགས་ཏེ། །ཨ་ཆུ་བ་ཡི་སྒྲ་འབྱིན་བསམ། །དེ་ཡི་མགོན་སྐྱབས་བསལ་བྱས་ནས། །གཤིན་རྗེའི་ལྟོ་བའི་ཐ་མར་གཞག །བེ་ཅོན་ཐོགས་པས་དེ་ཟའོ། །འདི་ལྟར་བསད་པས་སངས་རྒྱས་ཀྱི། །སྲས་སུ་དེ་ནི་སྐྱེ་བར་འགྱུར། །ལས་ཀྱི་སྡིག་ལས་དེ་གྲོལ་ལོ། །གསོད་པའི་སྔགས་དེ་སྤེལ་བ་ནི། །ཧཱུྃ་ཆེ་གེ་མོ་མཱ་ར་ཡ་ཧཱུྃ། བསྒྲུབ་བྱ་ནང་དག་དབྱེ་བ་ནི། །མ་ཧེ་རྟ་ཡི་པགས་པ་དག །ཡང་ན་རོ་དང་དུར་ཁྲོད་རས། །རྟ་དང་མ་ཧེ་བྱི་ལ་འམ། །ཁྱིམ་བྱའི་ཁྲག་དང་སྐེ་ཚེ་བསྲེ། །དེར་ནི་འཁོར་ལོ་འདི་བྲིས་ཏེ། །རྣམ་པར་འགྲས་པ་བསྐུལ་དང་ལྡན། །རྟ་སྦལ་དག་གི་ནང་བཅུག་སྟེ། །མ་ཧེའི་རྨིག་པའི་ནང་བཅུག་ལ། །སྟོང་ཕྲག་བཅུ་ནི་ཚང་བར་བཟླས། །ནིམ་པའི་ཤིང་བསྲོས་དེ་ནང་སྦ། །དེ་ནང་འགྲས་པ་ཉིད་དང་ནི། །དཔག་ཚད་བརྒྱས་ཆོད་འཐབ་པར་འགྱུར། །ཨ་ནུ་ཀི་དང་ཨ་མུ་ཀི། །བི་དཱེ་ཥ་ཡ་ཕཊ། རིམས་

ཀྱིས་ཐེབས་པར་བྱ་བ་ལ། །དུར་ཁྲོད་ཀོ་བ་ཆེ་བ་ལ། །ཨརྐ་ཤིང་གི་ལོ་མ་དང་། །ཙི་ཏྲ་ཀ་དང་སྐེ་ཚེ་དང་། །ཁྲག་གིས་འཁོར་ལོ་བྲི་བར་བྱ། །བྲི་བ་བསྐོས་ལ་རི་མོས་དགང་། །སེང་ལྡེང་འདབ་མ་དུ་མེད་ལ། །བསྲོ་ཞིང་ཁྲོས་པས་ལྔ་བརྒྱ་བཟླ། །ཁྱིམ་དང་ལམ་གྱི་བཞི་མདོ་དང་། །དུར་ཁྲོད་སྦས་ན་རིམས་ཀྱིས་འཛིན། །རྒྱས་པའི་ལས་ཀྱིས་རྒྱས་འདོད་ན། །གི་ཝང་གིས་ནི་གྲོ་ག་ལ། །འཁོར་ལོ་གཉིས་ནི་རྣམ་བྲིས་ཏེ། །བསྐུལ་ཚིག་ལྡན་པར་ཡི་གེ་བྲི། །ཟླ་དྲུག་ཐང་ཀའི་མདུན་དག་ཏུ། །གནོད་སྦྱིན་དང་ནི་གནོད་སྦྱིན་མོས། །རིན་ཆེན་ཆར་ནི་འབེབས་པ་དང་། །གཤིན་དགྲ་སེར་པོ་ཟླ་སེར་ལ། །གནས་པར་བསམས་ཏེ་ཁྲི་བཟླས་ན། །འཕགས་པ་ནོར་འཛིན་འདྲ་བར་འགྱུར། །ཨོཾ་ཆེ་གེ་མོ་པུཥྚིཾ་ཀུ་རུ་ཨོཾ། གྲོག་སོགས་ཀྱི་ཤོག་ཤོག་ལ། །གི་ཝང་དང་ནི་རང་བྱུང་གི། །མེ་ཏོག་དག་གིས་བྲི་བ་སྟེ། །ཡང་ན་ཐ་ལྟག་ཁྲག་དང་ནི། །བིལ་བའི་ལོ་མའི་ཁུ་བ་དང་། །རས་དམར་པོ་ཡི་ཁུ་བ་དང་། །སེན་རྩི་རྣམས་བསྲེས་བྲི་བར་བྱ། །སྤྲ་ཚིལ་གྱིས་ནི་འཁོར་ལོ་དྲིལ། །བུམ་པ་མར་སྦྲང་ལྡན་པར་གཞག །དུས་བཞི་དག་ཏུ་མཆོད་པ་ནི། །མེ་ཏོག་དམར་པོས་མཆོད་པའོ། །དེ་ཚེ་བཟླས་པ་ཚུལ་དག་ནི། །ཧོཿཝཱ་ཤཾ་ཀུ་རུ་ཧོཿ། །དེ་མཐག་ཏུ་ལྷ་རྣམས་ཀྱང་། །དབང་དུ་བྱེད་པར་ངེས་འགྱུར་རོ། །གྲོ་ག་དག་ལ་བྲི་བ་ནི། །ཟླ་བ་གཟས་ཟིན་དུས་དག་གམ། །རྒྱལ་གྱི་ཉིན་པར་བྲི་བྱ་སྟེ། །སྐུད་པ་དམར་པོས་འཁོར་ལོ་དཀྲི། །མེ་ཏོག་དམར་པོས་མཆོད་པར་བྱ། །ཐོད་པ་ཁ་སྦྱར་ནང་གཞག་སྟེ། །བཟླས་པ་ཁྲིས་ནི་བརྒྱ་བྱིན་གྱི། །བུ་མོ་འང་རྙེད་པར་ངེས་འགྱུར་རོ། །དུར་ཁྲོད་ཀྱི་ནི་རས་དག་ལ། །གུར་གུམ་སོགས་ཀྱིས་འཁོར་ལོ་བྲི། །ཡི་གེ་ཐིག་ལེས་རྣམ་བསྐོར་ཏེ། །ཨ་མུ་ཀི་དང་མཱ་མ་ཀཱི། །མོ་ཧ་ན་དང་རྣམ་སྤེལ་ལ། །བསྒྲུབ་བྱའི་གོས་ཀྱི་མཐའ་མ་ལ། །ལེགས་བཏགས་ཆོས་ཀྱི་དབྱིངས་ཉིད་དུ། །བསྒོམས་ནས་ཟློས་ཤིང་འགྲོ་ན་ཡང་། །ལྷ་དང་ལྷ་མིན་གྱིས་མི་མཐོང་། །བདག་ཉིད་གཤིན་དགྲ་ཉིད་བསྒོམས་ནས། །ཆུ་ཡི་སྟེང་ནས་འགྲོ་འདོད་ན། །རྡུལ་ཕྲན་ལྷ་ཡི་རྣམ་པར་ཏེ། །ཨོ་རྒྱན་དུ་ནི་བདག་རང་ཉིད། །ངེས་པར་སྟེང་འགྲོ་གཞན་དག་ཀྱང་། །བུ་མོས་ནགས་ཀྱི་རས་བལ་ལ། །སྐུད་པ་བཀལ་བ་གཞོན་ནུ་མས། །

སུམ་སྒྲིལ་དུ་ཡང་དེ་ཡིས་བྱ། །གདུག་སྔགས་སྟོང་དུ་ཚང་བར་ཏེ། །བཟླས་ཚུལ་སྔོན་དུ་གསུངས་པ་བཞིན། །སྐར་མ་རྒྱལ་གྱི་དུས་ལ་བཟླ། །བྲི་བའི་ཉིན་མོའང་དེ་ལའོ། །དཀྱིལ་འཁོར་གྱི་ནི་ལྷར་བརྟག་པ། །གཡོན་གྱིས་མདུད་བྱས་གཞན་ལ་གདགས། །མ་ལུས་མཚོན་དག་རེངས་བྱེད་དེ། །གཅེར་བུ་བ་ལང་རེངས་པར་བྱེད། །མེ་ཏོག་ལས་ནི་གཞན་དུ་མིན། །ཤ་ལྔ་སོགས་ཀྱི་རིལ་བུ་ནི། །ལེགས་པར་གྲིབ་མ་དག་ལ་བསྐམ། །ལྕགས་གསུམ་དག་གིས་དཀྲི་བར་བྱ། །བཟླས་ཤིང་མཆོད་པ་བྱེད་པའི་ཚེ། །དངུལ་དག་གི་ནི་རང་བཞིན་བྱ། །འབར་བར་གྱུར་བ་ཉིད་ན་ཡང་། །མཆོད་པ་ལེགས་པར་རྣམ་བྱས་ཏེ། །སྐོར་བ་བརྒྱ་ཕྲག་དུ་མ་བྱ། །དེ་ནས་བློ་ལྡན་སྒྲུབ་པ་པོས། །ཁར་བཅུག་ཙམ་གྱིས་འདོད་པ་བསྒྲུབ། །ཕྱུང་ན་སྔོན་ལྟར་རྣལ་མ་ཉིད། །གསོ་བ་འདྲ་བར་འོ་མས་ཀྱང་། །ངེས་པར་འཁྲུལ་འཁོར་བཀྲུ་བར་བྱ། །རིག་སྔགས་འཁྲུལ་འཁོར་ལས་གྲོལ་ཏེ། །རྣལ་མ་ཉིད་ལ་གནས་པ་ཡིན། །སྣུམ་སྟེར་དག་གི་ས་བོན་ལ། །ཉ་ལྕིབས་དང་ནི་བྱི་ཏང་ཀ །ཁུ་བས་ཡང་དེ་བྱུགས་པ་ལ། །ཐོད་པས་ས་ནི་རྣམ་བཀང་བར། །སྦས་ཏེ་བཟླས་པ་གྲངས་མེད་བྱ། །དེ་ཚེ་མཆོད་དང་གཏོར་མ་དག །ཡོངས་རྒྱས་འབྲས་བུ་རྣམ་བླངས་ཏེ། །ཁར་བཅུག་མཁའ་འགྲོའི་བྱར་འགྱུར་རོ། །དེ་ལ་འདི་སྐད་ཅེས་བྱ་སྟེ། །ཞུས་དང་འདས་དུས་བྱུང་གདུག་པ། །མངོན་པར་རྟོགས་པའི་ཏིང་ངེ་འཛིན། །དཀྱིལ་འཁོར་རྣམ་པར་སྤྲོས་པ་དང་། །ཐིག་གིས་གཞལ་ཡས་མཚོན་པ་དང་། །རྡུལ་ཚོན་ཕྱོགས་ལས་རྣམ་པར་བརྟགས། །ཡང་དག་བྱིན་གྱིས་བརླབས་པ་དང་། །བདུད་རྩི་མྱང་བར་བྱ་བ་དང་། །ཚངས་པའི་གནས་བཞི་བསྒོམ་པ་དང་། །སྔགས་ཀྱི་དངོས་མེད་དེ་བཞིན་མཚམས། །ཆོས་འབྱུང་དང་ནི་སྒྲུབ་པོ་དང་། །བཟླས་དང་དེ་ཡི་གྲངས་ཚད་དང་། །འཁོར་ལོ་དང་ནི་ཡི་གེ་གཉིས། །ངེས་པར་ཞུས་དང་མཆོད་པ་དང་། །འཁོར་ལོ་འདྲི་བའི་མཚན་མ་དང་། །འབྱུང་བ་བཞི་དང་བསྡུ་སོགས་དང་། །སྡོམ་པ་འཁོར་ལོའི་ཡི་གེ་བྲི། །གཞི་དང་དེ་བཞིན་སྣག་ཚ་དང་། །སོ་སོ་ལས་ཀྱི་བྱེ་བྲག་སྟེ། །བསྡུས་ཏེ་ང་ཡིས་བསྟན་པ་ཡིན། །དེ་ནས་བཅོམ་ལྡན་འདས་ཀྱིས་འབྱུང་པོ་རྣམས་ལ་

གཏོར་མས་ཚིམ་པར་བྱ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐུ་དང་། གསུང་དང་། སཐུགས་རྡོ་རྗེ་ལས་སྔགས་འདི་ཕྱུང་ངོ་། །ཨོཾ་ཧྲཱིཿཥྱཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འབྱུང་པོ་རྣམས་དང་རྣམ་སྤེལ་ཏེ། །ཐ་མར་སྦྱར་བ་བྱས་པ་ནི། །ཧི་ཧི་ཧི་ཧཱུྃ་ཕེྃ་ཕེྃ་ཕེྃ་སྭཱ་ཧཱ། །དུར་ཁྲོད་རྒྱན་གྱིས་རྣམ་བཞུགས་པའི། །ཞེ་སྡང་གཤིན་གཤེད་རྡོ་རྗེ་ནི། །སྤྲོས་མེད་ནམ་མཁའ་ལྟ་བུ་ལས། །སྙིང་རྗེའི་ཐབས་ཀྱིས་སྐུ་སྤྲུལ་བ། །ཡེ་ཤེས་ཁྲོ་རྒྱལ་རབ་འཇིགས་པའི། །དུད་པ་མུན་ཆེན་སྐུ་ལ་འདུད། །གར་དགུ་ཉམས་དང་ལྡན་པ་ཡི། །གཏི་མུག་རྡོ་རྗེ་གཤིན་རྗེའི་གཤེད། །སྐྱེ་མེད་དོན་དམ་ངང་ཉིད་ལས། །ཐབས་ཀྱི་སྤྲུལ་པའི་སྐུར་བསྟན་པ། །འཇིགས་བྱེད་དྲག་པོའི་ཆ་ལུགས་ཅན། །ཟླ་བ་ཉ་འདྲ་ཁྱོད་ལ་འདུད། །བསྐལ་པའི་མེ་ལྟར་འབར་བ་ཡི། །སེར་སྣ་གཤིན་རྗེའི་རྡོ་རྗེ་ནི། །འཛིན་པ་པོ་ལས་གྲོལ་བ་ཡིས། །གདུག་པ་འདུལ་ཕྱིར་ཁྲོ་བོར་སྤྲུལ། །གཏེར་འཆང་སེར་སྣ་གྲོལ་མཛད་པ། །བཙོ་མ་གསེར་འདྲ་ཁྱོད་ལ་འདུད། །ཆགས་པས་མ་ལུས་དབང་མཛད་པའི། །འདོད་ཆགས་གཤིན་རྗེའི་རྡོ་རྗེ་ནི། །སྐྱེ་མེད་རྣམ་དག་ཆོས་དབྱིངས་ལས། །ཁམས་གསུམ་པ་དག་ཁྲོ་བར་སྤྲུལ། །མ་ཆགས་སྤྱན་ལྡན་ཐུགས་རྗེ་ཅན། །བནྡུ་ལྟ་བུའི་སྐུ་ལ་འདུད། །ཤེས་རབ་ཐབས་ལྡན་ཧེ་རུ་ཀ། །ཕྲག་དོག་གཤིན་རྗེའི་རྡོ་རྗེ་ནི། །རྣམ་རྟོག་དཔེ་དང་བྲལ་བ་ལས། །ཐུགས་རྗེས་སྤྲུལ་པའི་ཁྲོ་བོ་ནི། །འགྲོ་དོན་བརྩོན་པའི་རལ་གྲི་ཅན། །སྣ་ཚོགས་མདོག་ཅན་ཁྱོད་ལ་འདུད། །ཐམས་ཅད་བསྐྱེད་པའི་ལྷ་མོ་ཆེ། །དཔང་པོ་ལྟ་བུར་སྒྱུར་མཛད་པ། །ཁམས་གསུམ་གཟིགས་པའི་སྤྱན་དང་ལྡན། །རྣམ་སྣང་ཅན་གྱིས་བདུད་བཞི་འཇིགས། །བདེ་བ་ཆེན་པོས་རྟག་ཏུ་དགྱེས། །ཡེ་ཤེས་སྤྱན་ཅན་ཁྱོད་ལ་འདུད། །ཀུན་སྡུད་ལྷ་མོ་རིན་པོ་ཆེ། །རྣམ་རྟོག་སྐྱོན་ལས་རྣམ་གྲོལ་ཡང་། །དུས་གསུམ་བདེ་གཤེགས་བདག་གིར་བྱེད། །རིན་ཆེན་ཏོག་ཅན་མཛེས་པའི་སྐུ། །དོན་དམ་ཐུགས་ཆུད་འཁོར་བ་སེལ། །མ་ལུས་ཀུན་གྱི་བདག་ལ་འདུད། །འདུས་བྱས་མ་ལུས་སྲེག་བྱེད་པ། །རྣམ་རྟོག་ཞི་བའི་རང་བཞིན་ལས། །ཁམས་

གསུམ་མ་ལུས་སྒྲོལ་བར་བྱེད། །འོད་དཔག་མེད་ཀྱིས་རབ་མཛེས་པ། །མ་ཆགས་ཕྱག་ན་བསྣམས་པ་ཡི། །ཕྲིན་ལས་དག་བྱེད་ཅན་ལ་འདུད། །ཐུགས་རྗེས་གཡོ་བའི་རང་བཞིན་ཅན། །འཇིག་རྟེན་གསུམ་དག་སྒྲོལ་བར་བྱེད། །གཉིས་མེད་བདེ་ཆེན་ངང་ཉིད་ལས། །ཕྲིན་ལས་གྲུབ་པའི་རང་བཞིན་ཅན། །བཏང་སྙོམས་བཞུགས་པས་འགྲོ་བ་འདུལ། །ཀུན་ཏུ་ལས་ཀྱི་རྒྱལ་ལ་འདུད། །ཅེས་གཟུགས་རྡོ་རྗེ་ལ་སོགས་པ་ལ་སོ་སོར་ཡོངས་སུ་བསྟོད་དོ། །དེ་ནས་ཡང་ཐམས་ཅད་ཀྱི་བདག་པོས་ལེགས་སོ་ཞེས་བྱ་བ་བྱིན་ཏེ། ལྷ་མོ་རྣམས་ཀྱི་སྐུ་ལ་བཏུད་དེ། །གདུག་པ་འཇིགས་པའི་ཡི་གེ་ནི། །བཅུ་བཞི་པ་ལ་དམིགས་པ་ཡང་། །འཁོར་བར་དམིགས་པར་བྱ་བ་འམ། །ཉི་མའི་སྟེང་ན་སྐྱེས་པ་ལྟར། །དམིགས་ཏེ་མ་ཡེངས་བརྗེད་པ་མེད། །བཟླས་པ་ཉིད་ནི་དེ་ལྟར་བྱ། །བྱེ་བ་ཚང་བར་བཟླས་པ་ཡིས། །རབ་འབྱམ་ལས་ལ་མི་འགྲུབ་པ། །མེད་དེ་དེ་ཡིས་ཐམས་ཅད་འགྲུབ། །འབུམ་དང་ས་ཡ་བཟླས་པས་ཀྱང་། །ཕྲ་མོའི་ལས་རྣམས་འགྲུབ་པར་བྱེད། །གཞན་དུ་མི་འགྲོའི་སེམས་ཀྱིས་ནི། །དེ་ལྟའི་ཚུལ་དུ་བཟླས་པ་བྱ། །ཡུལ་གཞན་བློ་ནི་འགྲོ་བ་ཡིས། །བསྐལ་པར་བཟླས་ཀྱང་འབྲས་མི་འབྱིན། །མི་འཕྲོ་སེམས་ཀྱིས་འདི་ཟློས་ཤིང་། །ལམ་དུ་ཞུགས་པའི་སྐྱེས་བུ་ལ། །སྟག་སོགས་ཆུ་ཡིས་མི་འཇིགས་སོ། །དེ་ནས་ཡང་དག་བཤད་བྱ་བ། །དབང་གི་བློ་སྦྱངས་རབ་ལྡན་པས། །འབྲས་ཐོབ་དེ་མེད་མི་འགྲུབ་སྟེ། །དེ་བས་དེ་ནི་བཤད་པར་བྱ། །བུམ་པའི་དབང་གིས་ཐོག་མར་སྦྱང་། །གསང་བའི་དབང་གིས་གཉིས་པ་སྟེ། །གསུམ་པར་བྱ་བ་དེ་ཉིད་ནི། །ཤེས་རབ་ཡེ་ཤེས་དེ་ཡིན་ཏེ། །དེ་ལྟར་དེ་བཞིན་བཞི་པ་ཡིན། །བརྟན་གཡོ་དངོས་པོ་མ་ལུས་པ། །བསྒོམ་པར་བྱ་བའི་དུས་ཉིད་ལ། །བློས་ནི་ཡོངས་སུ་མི་བསྒོམ་སྟེ། །ཀུན་གྱི་མཚན་ཉིད་མ་ཤེས་ན། །བསྒོམ་པ་ཁོ་ན་དེ་མིན་ཏེ། །ཐམས་ཅད་དངོས་ཉིད་ཡོངས་ཤེས་ན། །དེ་ནི་བསྒོམ་པར་ཡོངས་སུ་བསྒྲགས། །དེ་ཉིད་བླ་མའི་ཁ་ཡིས་ཏེ། །འབད་པས་མཉེས་བྱ་དེ་མི་སྨད། །དེ་ལ་ཐམས་ཅད་འབྱུང་བ་

སྟེ། །བླ་མ་ལ་སྨོད་གཡོ་སྒྱུ་ཅན། །ངེས་པར་དེ་ནི་དུག་དང་ཡང་། །གདོན་ཆེན་དག་ནི་མ་ལུས་པས། །འཆི་ཞིང་བརླགས་པར་དེ་གྱུར་ནས ། །དམྱལ་བ་དག་ཏུ་ཡུན་རིང་ལྟུང་། །བསྐལ་པ་དུ་མར་སྡུག་བསྔལ་ཏེ། །རྟག་ཏུ་ཆོ་ངེས་འདེབས་པར་བྱེད། །དེ་བས་བློ་གྲོས་ཆེན་པོ་ལ། །ནམ་དུའང་མི་སྨད་གཞན་དུ་ན། །བཀུར་སྟི་ཕུ་དུད་འགྲོ་བ་ལ། །ཕན་པའི་སེམས་ཀྱིས་དེ་ལྟར་བྱ། །གཞན་ཡང་བསྒོམ་པར་བྱ་བ་ཉིད། །གང་དག་དབང་པོའི་ལམ་འགྲོ་བ། །དེ་དེའི་ངོ་བོར་བདག་གིས་བྱ། །བསམ་གཏན་མི་བྱེད་དེ་བློ་ཡིས། །ཀུན་ཏུ་བློ་ཡིས་བསྒོམ་པར་བྱ། །བཅོམ་ལྡན་བདག་པོ་ཆེན་པོ་ཡིས། །གསང་དབང་ལག་ན་རྡོ་རྗེ་ལ། །བོས་ནས་གསང་བའི་དབྱངས་འདི་གསུངས། །གཟུགས་སྒྲ་ལ་སོགས་དྲུག་པོ་རྣམས། །དངོས་མེད་མཁའ་དང་འདྲ་བ་ལས། །ལོངས་སྤྱོད་ཡུལ་དུ་དུ་མར་སྣང་། །ཤེལ་ལ་ཚོན་ནི་ཇི་བཞིན་དུ། །འདོད་པ་ལྔ་དང་ཆོས་རྣམས་ལ། །རྟག་ཏུ་རྣལ་འབྱོར་སྤྱོད་པར་ཤོག །ཨ་ལ་ལ་ཧོ། །རོལ་དུ་གསོལ། བསྣམས་པར་མཛོད། མི་འཛིན་སྒྱུ་མ་ལྟ་བུ་ལ། །གར་གྱིས་དགྱེས་པའི་རོལ་པ་མཛོད། །རིག་བྱ་དགག་པ་མེད་པ་ལ། །མི་གཡོ་བཞིན་དུ་རོལ་པར་མཛོད། །ཧོ་ཆགས་པ་མེད་པས་ཆགས་པར་མཛོད། །དེ་ནས་ཡང་དག་རབ་བཤད་པ། །སྔགས་དང་ཕྱག་རྒྱ་དབང་བསྐུར་བའི། །དེ་ཡི་མཚན་ཉིད་བཤད་པའི་ཕྱིར། །གསུང་ནི་འདི་སྐད་བཀའ་སྩལ་ཏོ། །ལྕེ་ལ་སྒོམ་པའི་རྡོ་རྗེ་ནི། །རྡོ་རྗེ་གནོད་མཛེས་ནག་པོ་སྟེ། །ཁ་ནི་ཀུན་དུ་གྱེས་པ་ཡི། །ལག་གཉིས་ཐལ་མོ་ངེས་སྦྱར་ཏེ། །གུང་མོའི་རྩ་བའི་ཚིགས་ཉིད་ལ། །མཐེ་བོང་ངེས་པར་སྦྱར་བར་བྱ། །མཛུབ་མོ་གུང་མོའི་རྒྱབ་རྩེར་སྦྱར། །འདི་ནི་དམ་ཚིག་ཕྱག་རྒྱ་སྟེ། །སྙིང་ག་དཔྲལ་བ་ལྐོག་མ་དང་། །སྤྱི་བོར་བྱིན་གྱིས་བརླབ་པར་བྱ། །ཨོཾ་ཧྲཱིཿ[ཥྚྲཱིཿ]བི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཨ་དྷི་ཏིཥྛ་སྭ་མཱཾ། །གཞན་ཡང་རྡོ་རྗེ་སེམས་མ་སོགས། །ཕྱག་རྒྱས་དབང་བསྐུར་དབུ་རྒྱན་བརྟག །གཏི་མུག་རྡོ་རྗེ་ལ་སོགས་པ། །སོ་སོའི་བདག་པོས་དབུ་བརྒྱན་ཅིང་། །དབང་བསྐུར་ཚེ་ན་བུམ་པ་ཆེ། །ཕྱག་གིས་བསྣམས་ཏེ་དབང་བསྐུར་རོ། །འཁོར་ལོ་ལས་ཀུན་བྱེད་པ་ལ། །

གསང་དབང་ལག་ན་རྡོ་རྗེ་ཡིས། །བསྟོད་པའི་རྒྱལ་པོ་འདི་ཡིས་བསྟོད། །གདུག་པ་སྐྲག་བྱེད་འཁོར་ལོ་མེ་ལྟར་འབར། །དུས་གསུམ་ཁྲོ་རྒྱལ་ཧེ་རུ་ཀ་ཡི་ཐུགས། །ལས་རྣམས་དག་བྱེད་ཕྲག་དོག་རྡོ་རྗེ་སྟེ། །མ་ལུས་ཚེམས་གཅོད་གསོལ་བས་སྐུ་ཡི་དང་། །ཧཱུྃ་དང་ཕཊ་ཀྱི་གདུག་རྩུབ་སྦྱོར་བས་གསུང་། །ཀུན་གྱི་རང་བཞིན་ཁྱོད་ཀྱིས་གཤིན་རྗེ་ཡི། །ལྟོར་འཛུད་བཀའ་ལས་ངས་ཀྱང་མི་འདའ་ཞིང་། །ཕྱོགས་བཅུའི་སྤྲུལ་པས་གནས་ནས་འགུགས་མཛད་པ། །མ་ལུས་ཀུན་བྱེད་འཁོར་ལོ་ཆེ་མཆོག་ལ། །གཞན་གྱི་དོན་རྫོགས་གུས་པས་ཕྱག་འཚལ་ལོ། །ཁྱོད་ནི་དཔའ་བོ་ཐུབ་ཆེན་ཀུན་གྱི་བདུད། །ང་ཡིས་ལམ་བསྟན་བདུད་རྣམས་མི་ཕྱེད་ཀྱང་། །དམ་ལས་འདའ་ཞིང་ལོག་པ་ཀུན་བསྐྱེད་ལ། །ཁྱོད་ཀྱང་བཀའ་ལས་མ་འདའ་ལས་རྣམས་སྒྲུབས། །ཚེ་དང་སྲོག་བསྡུས་ཡན་ལག་རྣམ་པར་བཅིངས། །བདུད་རྩི་ཆུ་རྒྱུན་རྣལ་འབྱོར་ང་ལ་འདོད་སྒྲུབ་ན། །ངས་ནི་སྦྱིན་བྱ་ཁྱོད་ནི་དམ་ལས་མ་འདའ་ཞིག །ཅེས་དཔལ་གཤིན་རྗེའི་དགྲ་ནག་པོའི་འཁོར་ལོ་གཞན་གྱི་ལྟོ་བ་ལ་གནས་འཆའ་བར་འདོད་པའི་གཏན་འཕོ་བ་མ་ཡིན་པའི་ཚེ་བྱའོ། །འཁོར་ལོ་སྙིང་གར་ལྟ་བའི་ཚེ། །ས་བོན་ཚུལ་ཏེ་ལྟེ་བ་ལ། །ཡི་གེ་མ་ལུས་འདོད་པ་ཡང་། །མཚན་ཉིད་ངན་པའི་རྟོག་པ་ལས། །གྲོལ་ཏེ་མཐའ་གསུམ་ངོ་བོ་ལས། །ཀྵཿནི་ཟད་པའི་བདག་ཉིད་ལ། །ཨུ་ནི་ཧཱུྃ་གི་བདག་ཉིད་དེ། །དེ་ནི་སེམས་ཀྱི་རང་བཞིན་ཉིད། །དགའ་ལས་འདས་པའི་ཡེ་ཤེས་ཏེ། །ཐབས་ནི་ཤེས་རབ་ལྡན་པ་ལས། །དུས་ཐབས་བསྟན་པའི་བདག་ཉིད་ཀྱིས། །འཐོབ་སྟེ་གཞན་དུ་དེ་མི་འཐོབ། །ཆུ་འགྲམ་ཆེན་པོ་བས་མཐའ་དང་། །དུར་ཁྲོད་ཤིང་དྲུང་དགོན་པ་སྟེ། །དབེན་པའི་ཡུལ་དང་མ་མོའི་ཁྱིམ། །དེར་ནི་མགོན་པོ་འདི་ལ་འབད། །གཞན་དུ་བསྒྲུབས་ཀྱང་དེ་མི་འགྲུབ། །སྐད་ཅིག་དེ་ལ་རང་བཞིན་ཀུན། །ངེས་པར་མི་སྣང་རིག་པ་ཡི། །ལམ་དུ་གྱུར་པ་མེད་པར་ཤེས། །འབྲས་བུ་དེ་ནི་རྒྱ་ཆེན་ཏེ། །མཐའ་ཡི་འཐོབ་པ་དེ་ཡིན་ནོ། །དེ་ནས་ཡང་ཐམས་ཅད་ཀྱི་བདག་པོ་བདེ་བར་གཤེགས་པས་རྡོ་རྗེ་སའི་ཆོ་ག་གསུངས་པ་ན

སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །བསྲུང་བའི་དཀྱིལ་འཁོར་རབ་གནས་པས། །སྡང་བའི་ལོག་འདྲེན་སྐྱེ་བོ་དང་། །བགེགས་རྣམས་བསལ་བ་འདི་སྐད་གསུངས། །དཔལ་ལྡན་བདག་ནི་རྡོ་རྗེ་འཛིན། །བསྲུང་བའི་འཁོར་ལོ་རབ་སྦྱོར་བས། །བདག་གིས་ཡེ་ཤེས་རྡོ་རྗེ་ཡིས། །ལུས་ངག་ཡིད་དུ་བཅས་པ་དག །སངས་རྒྱས་ཀུན་གྱི་བདག་ཉིད་ནི། །ཁྲོ་བོ་གཤིན་རྗེ་ནག་པོའི་བདག །སློབ་དཔོན་གྱིས་ནི་དཀྱིལ་འཁོར་བྲི། །ཞེས་ལན་གསུམ་གྱི་བར་དུ་བརྗོད་པར་བྱའོ། །དཀྱིལ་འཁོར་གྱི་ནི་དྲུང་ཉིད་དུ། །དར་གྱིས་གདོང་ནི་བཀབ་པ་ལ། །སྒོ་དྲུང་གནས་པ་ཁྱོད་གང་ཡིན། །སློབ་དཔོན་གྱིས་ནི་རབ་བརྗོད་དེ། །དེས་བདག་སྐལ་བ་ལྡན་པར་བརྗོད། །ཇི་ལྟར་བླ་མེད་དཔའ་བོ་ཡིས། །མགོན་ལ་དབང་ནི་བསྐུར་བ་བཞིན། །བླ་མེད་བྱང་ཆུབ་གནས་བྱའི་ཕྱིར། །བདག་ལའང་མགོན་པོས་དབང་བསྐུར་གསོལ། །མེ་ཏོག་སོགས་ཏེ་མཆོད་པའི་མཆོག །རབ་འབྱམ་རྒྱ་མཚོ་མ་ལུས་པས། །སློབ་དཔོན་དཔའ་བོ་དེ་ཉིད་ལ། །ཡང་ཡང་མཆོད་ཅིང་བསྟོད་པའི་ཚོགས། །རྒྱས་པར་མཉེས་བྱ་དེ་འོག་ཏུ། །དཔའ་བོས་དེ་ལ་དབང་རྣམས་སྦྱིན། །དེ་ནས་རྒྱལ་པོ་བདེ་ཆེན་པོ། །དཔའ་བོ་ལོངས་སྤྱོད་ཀུན་ལྡན་པ། །འགྲོ་དོན་བརྩོན་པའི་སྐུ་གསུམ་བདག །ཉིད་ཀྱིས་འདི་སྐད་བཀའ་སྩལ་ཏོ། །སྦྱིན་སྲེག་མེད་ན་འབྲས་མི་འབྱིན། །དེ་བས་བདག་ཉིད་དམ་པ་ཡིས། །དེ་ཡི་ལས་ལ་འབད་པར་བྱ། །གོས་ནག་རྒྱན་གྱིས་རྣམ་བརྒྱན་ལ། །གཤིན་རྗེར་རྣམ་བལྟས་རྣལ་འབྱོར་པས། །ཁྲོ་བོའི་སྐྱིལ་ཀྲུང་བཅས་པ་ཡིས། །སྲ་བའི་སྟན་ལ་བདག་འདུག་ནས། །ལས་རྣམས་བསྒྲུབ་པར་བྱ་བ་ནི། །མཚན་མོའམ་ཉི་མ་ཕྱེད་ཉིད་ན། །རྃ་བྱུང་མེ་ཡི་དཀྱིལ་འཁོར་དུ། །ཧཱུྃ་ཕཊ་མཐའ་ན་ཡོད་པ་ཡི། །སྔགས་ཀྱི་ཐོག་མ་བར་ཐ་མར། །སྦྱིན་སྲེག་བྱ་སྟེ་དེ་མེ་ནི། །དུར་ཁྲོད་མེ་འམ་རུས་པའམ། །རྡོ་ཉིད་ལས་ནི་བྱུང་པའམ། །ཙཎྜ་ལཱི་ཡི་ཁྱིམ་ཉིད་ནས། །ཐབ་ཁུང་གྲུ་གསུམ་ཅན་དེར་ནི། །ཚེར་མ་ཅན་གྱི་

བུད་ཤིང་བརྫང་། །རླུང་གཡབ་སྦར་ཏེ་ཧཱུྃ་ཛྭ་ལ་རྃ། །ཛྭ་ལ་ཧཱུྃ་བརྗོད་མེ་སྦར་བརྗོད། །ལག་གཡས་ཀུ་ཤ་བཅས་པ་ཡིས། །མཐེ་བོང་སྲིན་ལག་རྩ་རུ་གཟུགས། །ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དྭི་ཛ་སཏྟ་མ་གྲྀ་ཧཱི་ཏྭཱ་ཨཱ་ཧཱུ་ཏི་ཨཱ་ཧཱ་རྃ་ཨ་སྨིན་སྃ་ནི་ཧི་ཏོ་བྷ་བ་ཞེས་བརྗོད་ལ་སྤྱན་དྲང་ངོ་། །འབར་བ་མེ་ཡི་དབུས་ཉིད་དུ། །མིང་དེ་ཟད་བྱེད་ཅེས་བྱ་བ། །ཁྲོ་བོ་མེ་ལྟར་ཕུན་སུམ་ཚོགས། །བ་སྤུ་ཁམ་པ་དེ་བཞིན་དུ། །དུ་མདོག་ཟུར་མིག་སྟེང་དུ་གཟིགས། །སྒྲ་ཆེ་མཆེ་བཞི་ལྡན་སྟོབས་ཆེ། །ཡྃ་ལས་རླུང་གི་དཀྱིལ་འཁོར་ཏེ། །བཞུགས་ནས་དྲག་པོའི་ཡི་གེ་བརྗོད། །སྤྱན་གསུམ་པ་ལ་ཕྱག་བཞི་པ། །རིག་པའི་གནས་ལ་ལེགས་པར་བཞུགས། །ཞལ་བདུན་རྣམ་གཙིགས་མ་ཧེ་ལ། །ཆིབས་པ་དུ་བའི་ཕྲེང་རྣམས་འཁྲིགས། །ཕྱག་གཉིས་མདུང་དང་རྡོ་རྗེ་འཛིན། །གཉིས་ཀྱིས་རལ་གྲི་གྲི་གུག་འཛིན། །དེ་ཡི་གཡས་ཀྱི་ཕྱོགས་ཉིད་དུ། །དེ་བཞིན་མདུན་གྱི་ཕྱོགས་ཉིད་དམ། །སྤྱན་དྲངས་བྱིན་བརླབས་ལྡན་པ་ལ། །ཨརྒྷཾ་སོགས་ཀྱིས་མཆོད་པ་བྱ། །ཨོཾ་ཨརྒྷཾ་པྲ་ཏཱིཙྪ་སྭཱ་ཧཱ། ལག་གཡས་མཛུབ་མོ་མཐེ་བོང་དག །སྐམ་པ་ལྟ་བུར་རྣམ་བྱས་པས། །ཆུ་བླངས་བསྐྱོད་པས་དབུལ་བར་བྱ། །ཨོཾ་པཱ་ཏྱཾ་མཐར་ནི་སྔོན་གྱི་བརྗོད། །ཞབས་བཀྲུ་བ་ལ་ཤིས་པ་ཡིས། །དགང་གཟར་ཡུ་བ་སོར་བཅུ་དྲུག །དེ་མིན་སོར་བཞི་ཟབས་སོར་གཉིས། །ཟུར་གསུམ་དབུས་སུ་སོར་གཉིས་ཚད། །རྩེ་གསུམ་ཕྲེང་བས་ཡོངས་སུ་བསྐོར། །དེ་ཡི་དབུས་སུའང་མཚན་མ་སྟེ། །སྟག་སྦྲུལ་གང་འདོད་པས་མཚན་བྱ། །ཁུ་བཅུད་འཛག་པ་སོར་གཅིག་གོ །ཁྲོ་བོ་རྡོ་རྗེ་མཆུ་ཡི་དབྱིབས། །བྱིན་བརླབས་སོར་གཅིག་ཚད་ཅན་ནོ། །བླུགས་གཟར་ཡུ་བ་སོར་བཅུ་བཞི། །ཟབས་སུ་སོར་གཅིག་གྲུ་གསུམ་དང་། །ཡུ་བའི་མཐར་ནི་རྩེ་གསུམ་པ། །གདེངས་པ་བྱིན་བརླབས་མངོན་སྤྱོད་ཀྱི། །གཟར་བུ་ཡིན་པར་ང་ཡིས་བསྟན། །གནམ་ལྕགས་ཚེར་མ་ཅན་སོགས་ཤིང་། །དེ་ལ་དེ་བྱས་སངས་རྒྱས་འཇིགས། །བསྲེག་རྫས་གཟུགས་བརྙན་ལ་སོགས་བསྲེག །སྟོང་དུ་ཚང་པས་འབྲས་བུ་ནི། །ངེས་

པར་འབྱིན་པར་བྱེད་མ་ཡིན། །གཡོན་གྱི་རྩ་དེར་དགང་གཟར་ལ། །གཡས་པ་བླུགས་པའི་གཟར་བུ་ཡིན། །ཁ་ནི་པདྨའི་འདབ་མ་ཡིན། །སོར་མོ་གཉིས་པར་དེ་རྒྱས་སོ། །རྡོ་རྗེ་བར་གྱི་ཐོད་པ་དག །བསྲེག་རྫས་ཀྱི་ནི་སྣོད་ཡིན་ལ། །རྫས་རྣམས་རྡོ་རྗེ་རིན་ཆེན་དཔལ། །ཧཱུྃ་ཕཊ་ཀྱི་ནི་མཐའ་ཅན་གྱིས། །བསྲེག་བྱ་ས་ཆུ་མེ་དང་རླུང་། །ནམ་མཁའ་ལྟ་བུའི་དབུས་སུ་གནས། །ཁ་བྱེ་གནས་པ་རྟག་ཏུའོ། །ཀུན་ཏུའང་ཁ་ཕྱེ་བསྐོར་བར་བྱ། །བཞི་གཉིས་འདབ་མའི་སྟེང་དུ་སྟེ། །ལྟེ་བ་དང་ནི་ཡང་དག་ལྡན། །ལྷན་ཅིག་རྣམ་པར་ཤེས་པའི་ལྷ། །ནམ་མཁའ་ཉིད་དུ་ངེས་པར་འབར། །དེ་ཡི་མཚན་མར་ཤེས་བྱ་བ། །རྡུལ་གྱི་རྣམ་པར་དེ་ཉིད་དོ། །ཐིག་ལེ་ཡི་གེ་མེད་པ་སྟེ། །རྒྱུན་མི་འཆད་པར་འོད་ཀྱིས་གནས། །བརྒྱར་གཤགས་སྐྲ་ཡི་ཚད་ཀྱིས་སོ། །ཨརྒྷས་རབ་ཏུ་སྦར་བར་བྱ། །སྔར་གསུངས་འབྱུང་བ་རྣམ་བཞི་དང་། །ནམ་མཁར་ཡང་དག་ལྡན་པ་ཡི། །སོར་མོ་ལྔ་དང་ངེས་ལྡན་པས། །གང་གི་སྦྱིན་སྲེག་དེས་བྱའོ། །གཞན་དག་སོར་མོ་གསུམ་གྱིས་བསྲེག །དམིགས་པ་ཐམས་ཅད་འགག་པར་འགྱུར། །རྟེན་མེད་སྟོང་པ་ནམ་མཁའ་འདྲ། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེན་པོ་དབང་དུ་འགྱུར། །བདེ་གཤེགས་ཀུན་དང་མཉམ་འགྱུར་བ། །ཤེས་རབ་དང་ནི་སྙིང་རྗེ་ཆེས། །འགག་པ་མེད་པའི་ཆོས་འགྱུར་རོ། །བདེ་ཆེན་ནམ་མཁའ་ལྟ་བུ་སྟེ། །རྣལ་འབྱོར་པ་ཡི་དམིགས་པ་ཡིན། །མདོག་ནག་འདབ་བརྒྱད་ལྟ་བུ་ལ། །རྒྱ་དང་ཟབས་སུ་སོར་མོ་ནི། །ཉི་ཤུ་དེ་བཞིན་བཅུ་པའི་ཐབ། །བྱང་དུ་རྩེ་མོ་བསྟན་པ་ལ། །རྡོ་རྗེ་ཐོ་བའི་མཚན་མ་དེ། །སོར་ནི་བཞི་བར་བྲི་བར་བྱ། །དེ་སྟེང་སོར་མོ་གསུམ་བོར་བར། །ཁ་ཁྱེར་ཀྱང་ནི་དེ་ཡི་ཚད། །ས་ནག་བོང་བུ་རྔ་མོའི་སྦངས། །མི་རུས་འབྲས་ཀྱི་ཕུབ་མ་དང་། །སོལ་བའི་ཕྱེ་མས་རྣམ་བྱུགས་ལ། །མི་ཞིམ་དྲི་དང་བདུག་པས་མཆོད། །དུར་ཁྲོད་ཤིང་ངམ་བོང་བུ་དང་། །རྔ་མོའི་སྦངས་སྐམ་བུད་ཤིང་ངོ་། །སོར་གཅིག་གིས་ནི་དམའ་བ་

ཡིན། །ནིམ་པ་དེ་བཞིན་སེང་ལྡེང་དང་། །སེ་བ་དེ་བཞིན་བསེ་ཤིང་དང་། །དུར་ཁྲོད་ཤིང་བུ་སོར་བཅུ་བ། །རྩ་བའི་ཆ་ལས་རྣམ་བྱུང་བ། །དུར་ཁྲོད་མར་ཁུ་རྣམས་བསྙུགས་ལ། །དེ་ཡིས་ཡམ་ཤིང་བྱ་བ་ཡིན། །བྱ་རོག་འུག་པའི་གཤོག་པ་དང་། །ནིམ་པའི་འདབ་མ་ཐལ་བ་དང་། །རྐང་རྗེས་ས་དང་བོང་བུ་དང་། །རྔ་མོ་སོགས་ཀྱི་སྦངས་དང་ནི། །སྐྲ་དང་ཞག་དང་བཤང་བ་དང་། །གཅི་བ་མི་རུས་ཡུངས་ཀར་དང་། །ཡུངས་མར་ཁྲག་དང་ལན་ཚྭ་དང་། །དེ་ལ་སོགས་པ་རེ་རེ་ཞིང་། །ཇི་ལྟར་རྙེད་པའི་རྫས་རྣམས་ནི། །དུག་དང་ཁྲག་དང་སྨྱོ་བྱེད་ཀྱི། །འདབ་ཁུ་ཐལ་བ་སོལ་བ་དང་། །འབྲས་ཀྱི་ཕུང་མ་ལ་སོགས་པ། །དགྲ་བོ་དག་གི་གཟུགས་བྱས་ལ། །མགོ་ནས་བརྩམས་ཏེ་རལ་གྲི་ཡིས། །དུམ་བུར་གཏུབ་ཅིང་ལྕགས་ཕོར་དུ། །ཁྲག་དང་ཆུ་དང་མི་རྣམས་དང་། །བོང་བུའི་གཅིན་ལ་ཕཊ་ལྡན་པའི། །གདུག་པའི་ཡི་གེ་རྣམས་བཟླས་པའི། །རྫས་ལ་བསང་གཏོར་བྱས་ནས་ཀྱང་། །སློབ་དཔོན་ལ་སྡང་རྨོངས་པ་འདི། །བརྗོད་ཅིང་སྦྱིན་སྲེག་དབུལ་བར་བྱ། །དེ་ལ་འདི་སྐད་ཅེས་བྱ་སྟེ། །འབྱུང་བོ་ཚིམ་བྱ་གཏོར་མ་དང་། །བསྟོད་བཟླས་མཉེས་པར་བྱ་བ་དང་། །དབང་གི་དབྱེ་བ་བསྟན་པ་དང་། །དཀྱིལ་འཁོར་འཇུག་པར་བྱ་བ་དང་། །དེ་ཡི་ས་ལ་མཆོད་པ་སོགས། །ཅོད་པན་དུ་ནི་བདེ་གཤེགས་གཞག །མངོན་སྤྱོད་ཧོམ་གྱི་ཆོ་ག་དང་། །བསྡུས་ནས་བར་དུ་རྣམ་པ་བརྒྱད། །པདྨ་དཀར་འདྲ་མགྲིན་པ་རིང་། །གཟུགས་མཛེས་ཧ་ཅང་རིང་བ་མིན། །ལུས་ལ་རྡུལ་བྱུང་ཡིད་འཕྲོག་མ། །དྲི་ནི་ཤིན་ཏུའང་ཞིམ་པ་ཡིན། །ལྟ་སྟངས་མིག་སོགས་རི་དགས་འདྲ། །མགྲིན་དང་ལྟོ་བའང་རི་དགས་ཀྱི། །སྐལ་བཟང་རྐེད་པའང་རི་དགས་ཀྱི། །གླང་ཆེན་དྲི་ལྡན་བཞིན་འཕེལ་ཆེ། །མྱོས་ཤིང་ནུ་མ་རབ་ཏུ་རྒྱས། །གཞན་ཡང་ཀུན་རྫོབ་བདེན་པ་ནི། །བོང་ཐུང་དེ་ཡི་སྐྲ་ཡང་ཐུང་། །རྐང་ལག་རིང་ཞིང་བཞིན་རིང་མ། །ཉ་ཡི་དྲི་བྲོ་བོང་རིང་མ། །ཟླ་འདྲ་སྐྱེ་གནས་རབ་ཏུ་རིང་། །སྐྱེ་གནས་ཆུང་ཞིང་ཡན་ལག་

རྩུབ། །བོང་རིང་དེ་བཞིན་ནུ་མ་མཁྲང་། །སྐྲ་སྲབ་དལ་སྨྲ་ཡན་ལག་ཆུང་། །སྔོ་བསངས་རི་མོ་མཉམ་པ་དེ། །གསང་བ་ཤེས་རབ་རྣམ་གཉིས་ལ། །རིག་མར་ང་ཡིས་བསྒྲགས་པ་ཡིན། །ངང་པའི་འགྲོས་ཅན་སྐྲ་འཁྱིལ་མ། །བཞིན་ཟླུམ་ནུ་རྒྱས་ལུས་ཀྱང་རྒྱས། །ཤིན་ཏུ་རིང་མིན་དལ་བར་སྨྲ། །དབུས་ནས་རྣ་འཕྱང་གཉེར་གསུམ་ཅན། །མཚན་ཉིད་ངན་ཞིང་ལེ་ལོ་ཆེ། །ཡན་ལག་ནག་ཅིང་སྐྲ་འཁྱིལ་མ། །ཁང་པར་གནས་ཤིང་ལུས་རྩུབ་མ། །ས་ལིའི་དྲི་འབྱུང་ས་ལི་བྲོ། །ནུ་ཡངས་དེ་ནི་སྐྱེས་བུ་བཞིན། །ཆང་གིས་མྱོས་པའི་དཔའ་མོ་སྟེ། །ཆང་ལ་ཤིན་ཏུ་ཆགས་པ་ཡིན། །དེ་གཉིས་དེ་ལ་ཤིས་པ་ཡིན། །ཐ་མ་ཐ་མར་ངེས་པར་ཡིན། །འཆི་བའི་བསམ་གཏན་དེ་ཉིད་ནི། །བདེ་བ་དམ་པ་ཁོ་བོས་འདོད། །འདི་ལའང་བདེ་བ་དེ་ཉིད་ཡིན། །ཀ་སོགས་སྤངས་པའི་ཨཱ་ལི་ནི། །བཅུ་དྲུག་ཡིན་ཏེ་ཕྲག་གཉིས་པོ། །འཁོར་ལོ་སོགས་པའི་ས་བོན་ཡིན། །ཟླ་བ་དེ་དག་སུམ་ཅུ་གཉིས། །ཨཱ་སོགས་སྤངས་པའི་ཀཱ་ལི་སྟེ། །བཅུ་བདུན་གཉིས་པ་དེ་སྟེང་དུ། །ཡ་སོགས་སྤངས་པ་མིན་པ་ཉིད། །གསུམ་པའི་གསུམ་དང་བཞི་པའི་གཉིས། །བཅུ་ཕྲག་བཞི་སྟེ་དེ་ཕྲག་གཉིས། །སེན་མོ་ཟངས་སོགས་ས་བོན་ཏེ། །ཉི་མར་རྣམ་བསྒྲགས་དེ་དབུས་གནས། །ཧཱུྃ་དང་ཨ་ཡི་རང་བཞིན་ལས། །རྡོ་རྗེ་ཐོ་སོགས་སོ་སོར་རྟོག །ཐིམ་པས་ནན་ཏན་ཡེ་ཤེས་ཏེ། །ཆོས་ཀྱི་དབྱིངས་ཉིད་དག་པ་སྟེ། །གཤིན་དགྲར་བདག་ཉིད་འདོད་པ་ཡིན། །རྒྱན་གྱི་བྱེ་བྲག་ལུས་ལ་གནས། །དེ་ནི་འདི་སྐད་བྱ་བ་སྟེ། །རིག་པ་ཤེས་རབ་བསྟན་པ་དང་། །བསྐྱེད་པའི་རྒྱུ་ཡི་བྱེ་བྲག་ནི། །ཐ་མར་བསྟན་ཏེ་སྡོམ་གསུམ་མོ། །མཚོན་པར་བྱེད་པའི་བདག་ཉིད་དེ། །མཚོན་བྱ་སྔོན་བསྟན་ཉིད་ཡིན་ནོ། །གཤིན་རྗེའི་གཤེད་ནག་པོའི་ལས་ཐམས་ཅད་གྲུབ་པར་བྱེད་པའི་འཁོར་ལོའི་རྒྱུད་ཀྱི་རྒྱལ་པོ་རྫོགས་སྷོ།། །།པཎྜི་ཏ་བཱ་རོ་ཕྱག་རྡུམ་གྱི་ཞལ་སྔ་ནས། རྭ་རྡོ་རྗེ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

དཔལ་གཤིན་རྗེའི་གཤེད་དམར་པོ་ཞེས་བྱ་བའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། །ཤྲཱི་རཀྟ་ཡ་མཱ་རི་ཏནྟྲ་རཱ་ཛ་ནཱ་མ། །བོད་སྐད་དུ། དཔལ་གཤིན་རྗེའི་གཤེད་དམར་པོ་ཞེས་བྱ་བའི་རྒྱུད་ཀྱི་རྒྱལ་པོ། བཅོམ་ལྡན་འདས་གཤིན་རྗེའི་གཤེད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ། །དེར་བཅོམ་ལྡན་འདས་ཀྱི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྗེ་བཙུན་གསང་བ་ལས་ཆེས་ཤིན་ཏུ་གསང་བ། ཨེ་མའོ་བྱང་ཆུབ་སེམས་དཔའ་ཆེན་པོ་སྙིང་རྗེ་ཆེན་པོ་ཕྱག་ན་རྡོ་རྗེ་ལེགས་སོ་ལེགས་སོ། །ཞེ་སྡང་རྡོ་རྗེའི་རྡོ་རྗེ་བྱང་ཆུབ་སེམས་དཔའ་ཆེན་པོའི་སྙིང་པོ་གཤིན་རྗེའི་གཤེད་དམར་པོའི་རང་བཞིན་ཉོན་ཅིག །ཕྱག་ན་རྡོ་རྗེས་གསོལ་པ། །འདིར་གསུངས་པའི་གཤིན་རྗེ་འཇོམས་པར་བྱེད་པ་ཇི་ཙམ་ཞིག་མཆིས། །གཏི་མུག་རྡོ་རྗེ་གཤིན་རྗེའི་གཤེད་དང་། ཕྲ་མ་རྡོ་རྗེ་གཤིན་རྗེའི་གཤེད་དང་། འདོད་ཆགས་རྡོ་རྗེ་གཤིན་རྗེའི་གཤེད་དང་། ཕྲག་དོག་རྡོ་རྗེ་གཤིན་རྗེའི་གཤེད་ཅེས་བྱའོ། །རྡོ་རྗེ་ཙརྩི་ཀཱ་དང་། རྡོ་རྗེ་ཕག་མོ་དང་། རྡོ་རྗེ་དབྱངས་ཅན་མ་དང་། རྡོ་རྗེ་གཽ་རཱི་མ་རྣམས་ཀྱང་ངོ་། །མཚམས་རྣམས་ལ་བུམ་པ་རྣམས་སོ། །དེ་ལྟ་བུ་ལ་སོགས་པའི་གཤིན་རྗེ་འཇོམས་པའི་ཚོགས་རྣམས་ཀྱིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་བདུད་ཐམས་ཅད་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་བར་མཛད་པ་ནི། སྔགས་ཀྱིས་འགུགས་དང་དབང་བྱེད་ཆེ། །དེ་བཞིན་མཐུ་ཡི་ཆོ་ག་མང་། །རལ་གྲི་བསྒྲུབ་དང་རྒྱལ་པོ་དང་། །ཕ་རོལ་དམག་ཚོགས་རྣམ་འཇོམས་དང་། །མི་སྣང་མིག་སྨན་བཅུད་ལེན་དང་། །དེ་བཞིན་གྲིབ་གནོན་རིག་པ་དང་། །རོ་ལངས་གནོད་སྦྱིན་སྒྲུབ་པ་དང་། །སྦྲུལ་གདུག་ལ་སོགས་བསྲུང་བ་དང་། །སྦྱིན་སྲེག་དཀྱིལ་འཁོར་ལས་རྣམས་དང་། །བྱང་ཆུབ་སེམས་ཀྱི་རྣམ་དཔྱོད་དང་། །ཐབས་རྣམས་ཀུན་གྱི་སྤྱོད་པ་དང་། །ཕ་རོལ་གྲོང་དུ་འཇུག་རྣམས་ལ། །འོད་ཟེར་རྣམ་ལྔ་འཁྲིགས་པ་ཡི། །རྡོ་རྗེ་བསྲུང་བའི་དོན་དུ་བསྒོམ། །

རྡོ་རྗེ་ས་གཞིའི་ཆ་རྣམས་ལ། །ར་བ་གུར་རྣམས་དེ་བཞིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བསྐྱེད་པར་མཛད་པ། བདུད་ཐམས་ཅད་རྣམ་པར་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཏི་མུག་གཤིན་རྗེའི་གཤེད་ལ་སོགས་པ་ཐམས་ཅད་ཀྱི་ས་བོན་འདི་ཉིད་ཀྱི་སྐུ་དང་གསུང་དང་ཐུགས་རྣམས་ལས་ངེས་པར་ཕྱུང་ངོ་། །ཡ་ནི་དབུས་སུ་སྟེ། །ཀྵེ་མ་མེད་ཡཙྪ་ནི་རཱ་ཛ་ས་དོ་རུ་ཎ་ཡོ་ནི་ར། དང་པོར་ཡ་ལས་གཤིན་རྗེའི་གཤེད། །ཀྵེ་ཡིག་ལས་ནི་རྨོངས་པར་བརྗོད། །མ་ཡིག་ལས་ནི་ཕྲ་མར་བཤད། །མེ་ཡིག་ལས་ནི་འདོད་ཆགས་ཉིད། །ད་ཡིག་ལས་ནི་ཕྲག་དོག་སྟེ། །གཤིན་རྗེའི་གཤེད་རྣམས་ལྔ་རུ་གྲགས། །ཛ་ཡིག་ཙརྩི་ཀཱར་བཤད་དོ། །ས་ཡིག་ལ་ནི་ཕག་མོའོ། །དོ་ཡིག་དབྱངས་ཅན་མར་བཤད་དོ། །རུ་ཡིག་གཽ་རཱི་མར་འདོད་དོ། །ཎ་ཡོ་ནི་ར་མཚམས་བཞི་ལ། །མི་ཡི་ཐོད་པ་རྣམ་པ་བཞི། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་གཤིན་རྗེའི་གཤེད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེ་སྡང་ཆེན་པོའི་རིགས་བསྒོམ་པའི་རྣལ་འབྱོར་གསུངས་པ། སྦྱིན་དང་ཚུལ་ཁྲིམས་བཟོད་པར་ལྡན། །རོ་གཅིག་མཁས་པས་སེམས་ཅན་དོན། །བྱམས་སོགས་ཡོན་ཏན་ཀུན་ཏུ་རྫོགས། །ཐོས་པའི་རྒྱུན་གྱིས་རྣམ་པར་བརྒྱན། །དང་པོར་ཁ་སོགས་ཡོངས་སུ་གསང་། །སྔ་བར་སྙིང་རྗེའི་བདག་ཉིད་ཅན། །རབ་ཏུ་རྩོམ་པ་དབེན་པའི་ཕྱོགས། །དུར་ཁྲོད་སོགས་སུ་བདེ་བའི་གདན། །དབེན་ཞུགས་ཉིད་ཀྱི་ཐུགས་ཀར་ནི། །པད་ཉི་བལྟ་ཞིང་འོད་རབ་འབར། །དེ་ཡི་འོད་ཀྱིས་བཀུག་བྱས་ནས། །སེམས་ཅན་དོན་རྣམས་ཕུན་སུམ་ཚོགས། །བསྒོམ་བྱ་བླ་མ་སངས་རྒྱས་རྣམས། །ཇི་སྙེད་མ་ལུས་ནམ་མཁའི་མཐིལ། །དམིགས་ཏེ་ཕྱག་འཚལ་དེ་རྣམས་ཀྱི། །སྐུ་ཡི་བཀོད་པ་རྣམ་པར་བསྒྲུབ། །ཙརྩི་ཀཱ་སོགས་རྣམས་ཀྱིས་མཆོད། །དེ་ལ་སྡིག་པ་རབ་ཏུ་བཤགས། །ལུས་དང་ངག་དང་ཡིད་རྣམས་ཀྱིས། །ཡང་དག་སྡིག་གྱུར་བྱས་དེ་བཞིན། །བདག་གིས་དེ་བཤགས་གང་ཞིག་ཡང་། །དུས་གསུམ་མགོན་མཛོད་རྗེས་ཡི་རང་། །རྫོགས་

པའི་སངས་རྒྱས་མཚུངས་རྣམས་ཀྱིས། །བསོད་ནམས་ཚོགས་ལ་རྗེས་ཡི་རང་། །རྫོགས་པའི་སངས་རྒྱས་དམ་ཆོས་དང་། །ཚོགས་མཆོག་རྣམས་ལ་བདག་སྐྱབས་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །བདག་གི་ལུས་འདི་དབུལ་བར་བགྱི། །གནས་དང་ཆོས་ཀུན་སྟོན་པ་དང་། །ཤིན་ཏུ་མཐར་ཡང་མཛེས་པ་དང་། །ཡང་དག་རྫོགས་པའི་སངས་རྒྱས་ཀྱི། །དེ་ཉིད་སྦྱིན་སོགས་གཟུགས་ཅན་གྱི། །སྐུ་གསུམ་ཡེ་ཤེས་ཐོབ་བྱའི་ཕྱིར། །བསྟེན་ཅིང་འདི་ལ་རབ་ཏུ་དད། །སེམས་ཅན་རྣམས་ཀྱི་དོན་བྱེད་ཕྱིར། །བྱང་ཆུབ་སེམས་དག་བདག་གིས་བསྐྱེད། །གང་ཞིག་བསོད་ནམས་ཉེར་བསགས་རྣམས། །རྫོགས་པའི་བྱང་ཆུབ་བདག་གིས་བསྔོ། །འགྲོ་འདི་ཀུན་ལ་ཕན་མཛད་ཕྱིར། །དཔལ་ལྡན་གཤིན་རྗེ་མཐར་བྱེད་གྱུར། །ལྷག་པར་སྨོན་ལམ་འདི་བྱས་པས། །དེ་རྣམས་ལ་ནི་གཤེགས་སུ་གསོལ། །བརྩེ་བས་བྱང་ཆུབ་བཞིན་དུ་བལྟ། །ཁམས་གསུམ་རྣམས་ནི་སྟོང་པར་བསམ། །རང་བཞིན་གྱིས་ནི་སྦྱོར་བྲལ་བས། །རྒྱུ་དང་དེ་བཞིན་མཚན་ཉིད་ལ། །རྣམ་པར་རྟོག་པ་བྲལ་བ་དང་། །ལྷ་དང་སྨོན་ལམ་རྣམས་པར་སྤངས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཡྃ་རྃ་བྃ་ལྃ་བཞི་ལ་དཀྱིལ་འཁོར་བསྡུས་ནས་བྷྲུྃ་ཡིག་ལས་སྐྱེས་པའི་གཞལ་ཡས་ཁང་བསྒོམ་པར་བྱའོ། །ཟུར་བཞི་པ་དང་སྒོ་བཞི་པ། །རྟ་བབས་བཞི་ཡིས་བརྒྱན་པ་ལ། །དྲ་བ་དྲ་ཕྱེད་ཀྱིས་སྤྲས་པ། །ལྷ་དང་ལྷ་མོས་ཤིན་ཏུ་མཛེས། །བ་དན་དྲིལ་བུ་བཅས་པ་རྣམས། །སྣ་ཚོགས་རྩེ་མོ་རླུང་གིས་བསྐྱོད། །བྃ་ཡིག་ལས་ནི་དེ་དབུས་གནས། །སྣ་ཚོགས་པདྨ་རྣམ་པར་བསམ། །དེ་ཡི་ཟེ་འབྲུའི་དབུས་གནས་ལ། །སྣ་ཚོགས་རྡོ་རྗེ་དབྱུག་པར་བཅས། །ཡོངས་སུ་གྱུར་ལས་མཐའ་དག་རྟགས། །ཞེ་སྡང་བདག་ཉིད་རྣམ་པར་བསྒོམ། །རིམ་མཚུངས་པདྨ་ཉི་མ་ལ། །མ་ཧེ་དམར་པོའི་སྟེང་དུ་ནི། །སྤྲུལ་པས་བདུད་རྣམས་མ་ལུས་པ། །གཡོན་བརྐྱང་ཞབས་ཀྱིས་མནན་པར་བྱ། །ཉི་མ་བྱེ་བའི་འོད་འབར་ལྷ། །རོ་ལངས་མ་ཡིས་མགུལ་ནས་འཁྱུད། །དཔའ་བོ་ཞལ་གཅིག་ཕྱག་གཉིས་པ། །ཀླུ་བརྒྱད་ཀྱིས་ནི་རྣམ་པར་

བརྒྱན། །སྤྱན་གསུམ་དམར་ཞིང་འཇིགས་སུ་རུང་། །མགོ་བོ་དམར་པོ་བརྒྱ་ཡི་ཕྲེང་། །གཡས་ན་རྡོ་རྗེའི་དབྱུག་པ་དང་། །གཡོན་ན་ཐོད་པ་བསྣམས་པའོ། །ཁྲོ་བོའི་མཚུངས་པར་ལྡན་པ་དང་། །ལྗགས་ནི་བསྐྱོད་ཅིང་མཆེ་བ་གཙིགས། །ཁྲོ་གཉེར་སྐུ་མཁྲེགས་རྐེད་པ་ལ། །སྟག་གི་པགས་པས་རྣམ་པར་བརྒྱན། །ཐུང་ཞིང་ལྟོ་འཕྱང་རྔམ་ཞིང་འབར། །ཤིན་ཏུ་རྣམ་དག་དྲི་མ་བྲལ། །རོ་ལངས་མ་ཡི་གཡས་གྲི་གུག །གཡོན་ན་མི་ཡི་ཐོད་པའོ། །སྤྱན་གསུམ་སྐྲ་ནི་གྲོལ་བ་དང་། །ཕྱག་རྒྱ་ལྔ་ཡིས་རྣམ་པར་བརྒྱན། །མགོ་བོའི་ཕྲེང་བ་མཚུངས་པར་ལྡན། །རོ་བཅུད་འཛིན་པ་གཙོ་བོ་ཡི། །ཤར་གྱི་འདབ་མ་ལ་གཏི་མུག་རྡོ་རྗེ་དཀར་པོ། རྡོ་རྗེ་ཙརྩི་ཀཱ་དང་སྙོམས་པར་འཇུག་པའོ། །ལྷོའི་འདབ་མ་ལ་ཕྲ་མ་གཤིན་རྗེའི་གཤེད་ཁ་དོག་སེར་པོ། །རྡོ་རྗེ་ཕག་མོ་དང་སྙོམས་པར་ཞུགས་པའོ། །ནུབ་ཀྱི་འདབ་མ་ལ་འདོད་ཆགས་གཤིན་རྗེའི་གཤེད་ཁ་དོག་དམར་པོ། རྡོ་རྗེ་དབྱངས་ཅན་མ་དང་སྙོམས་པར་ཞུགས་པའོ། །བྱང་གི་འདབ་མ་ལ་ཕྲག་དོག་གཤིན་རྗེའི་གཤེད་ཁ་དོག་ལྗང་གུ་རྡོ་རྗེ་གཽ་རཱི་དང་སྙོམས་པར་ཞུགས་པའོ། །ཙ་རྩི་ཀཱ་ནག་མོའོ། །ཕག་མོ་སེར་མོའོ། །དབྱངས་ཅན་མ་དཀར་མོའོ། །གཽ་རཱི་སྔོན་མོའོ། །གཡོན་ཕན་ཐོད་པ་དང་གཡས་པ་ན་གྲི་གུག་གོ །ཕྱག་དང་ཞལ་དང་སྐུ་མདོག་ཡང་དག་པར་གནས་པ་ནི་དཔའ་བོ་ཇི་ལྟ་བ་བཞིན་ནོ། །མེའི་མཚམས་ན་མུ་མེན་གྱི་བུམ་པ་བཞི་མཉམ་གྱིས་གང་བའོ། །བདེན་བྲལ་དུ་གསེར་གྱི་བུམ་པ་གླ་པ་ཡིས་གང་བའོ། །རླུང་དུ་བྱི་རུའི་བུམ་པ་སི་[ཧྲས]་གང་བའོ། །དབང་ལྡན་དུ་དངུལ་གྱི་བུམ་པ་གུ་པུར་གྱིས་གང་བའོ། །ཐོད་པ་ཡིས་ཁ་གཡོགས་པ་རྣམ་པར་བསྒོམ་པར་བྱའོ། །ཁྲོ་བོའི་རྒྱལ་པོ་ལ་སོགས་པ་དཔའ་བོ་གཙོ་བོའི་སྔགས་གསུངས་པ་ནི། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་ཧཽཾ་ཀྵཽཾ་ཀྵ་ཡཽཾ་ཀཱ་རཱ་ཡ་གྲྀཧྞ་གྲྀཧྞ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོཾ་མ་ཧཱ་ཡཀྵ་སེནཱ་དྷི་པ་ཏ་ཡེ་མ་ཧཱ་དུར་དཱན་ཏ་ད་མ་ཀཱ་ཡ་ནཱ་ཤ་ཡ་ནཱ་ཤ་ཡ། བི་དྲཱ་པ་ཡ་བི་དྲཱ་པ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཕྲེང་སྔགས་སོ། ཨོཾ་དྭེ་ཥ་ར་ཏི་ནུ་ད་ནུ་ད་ཏྲུ་ཊ་ཏྲུ་ཊ་ཧཱུྃ་ཛཿསྭཱ་ཧཱ། རྗེ་བཙུན་མའི་སྔགས་སོ། །ཨོཾ་མྃ་

ཧཱན་ཏ་ཀྲྀཏ་ཧཱུྃ་ཧཱུྃ་ཕཊ། །ཨོཾ་བི་ཤུ་ནཱན་ཏ་ཀྲྀཏ་ཧཱུྃ་ཧཱུྃ་ཕཊ། ཨོཾ་རཱ་གཱ་ན་ཏ་ཀྲྀ་ཏ་ཧཱུྃ་ཧཱུྃ་ཕཊ། ཨོཾ་ཨཱིར་ཥྱན་ཏ་ཀྲྀཏ་ཧཱུྃ་ཧཱུྃ་ཕཊ། དཔའ་བོ་བཞིའི་སྔགས་སོ། །ཨོཾ་མོ་ཧཱ་ར་ཏི་ཧཱུྃ་ཛཿ། ཨོཾ་པི་ཤུ་ན་ར་ཏི་ཧཱུྃ་ཛཿ། ཨོཾ་རཱ་ག་ར་ཏི་ཧཱུྃ་ཛཿ། ཨོཾ་ཨཱི་ར་ཥྱ་ར་ཏི་ཧཱུྃ་ཛཿ། དཔའ་བོའི་དབང་ཕྱུག་མ་བཞིའི་སྔགས་སོ། །ཨོཾ་མར་མེ་མར་མཱ་བི་གྷཱ་ཏེ་ཨོཾ་བཛྲ་ཙརྩི་ཀེ་ཧ་ར་ཧ་ར་བུཀྐམ་རཱ་ཡ་ཆེ་གེ་མོ་ལ་ཛཿ། ཨོཾ་གྷོ་ཎེ་སུ་གྷོ་ཎེ་བཛྲ་མཱ་མ་ཀཱི། བྷར་བྷར། སམྦྷ་ར་སམྦྷ་ར་ཧཱུྃ་ཛཿ། ཨོཾ་མར་མེ་མར་མཱ་ཀྵོ་བྷ་ཎཱི་བཛྲ་ས་ར་སྭ་ཏི་དར་དར། ཐར་ཐར། ཕར་ཕར། ཀྃ་པ་ཀ་པ། དྷུ་ན་དྷུ་ན་ཧཱུྃ། ཆེ་གེ་མོ་ལ་ཛཿ། ཨོཾ་གམྦྷི་རེ་བཛྲ་ཀཱ་ར་ཏི་ཀེ་གྷ་གྷ། རཀྟ་ཤོ་ཎ་ཏི་པྲི་ཡེ་གཽ་རཱི་ཆེ་གེ་མོ་ལ་ཛཿ། གདེངས་ཀའི་དབང་པོ་དགའ་བོ་ནི། །སྔོན་པོས་སྐྲ་བཅིངས་འཇིགས་པར་བྱེད། །ཀླུ་འཇོག་དམར་པོས་རྣ་བ་ལ། །བརྒྱན་ཅིང་རྩེ་མོ་འཁྱིལ་བ་སྟེ། །རིག་ལྡན་ཁྲ་པོས་དཔུང་པ་བརྒྱན། །ལག་གདུབ་གདེངས་ཀ་དུང་སྐྱོང་སེར། །ཤིན་ཏུ་དཀར་བ་པད་དོ་ཤལ། །མཐའ་ཡས་སྔོན་པོ་མཆོད་ཕྱིར་ཐོགས། །ཤིན་ཏུ་མཛེས་པར་བྱས་པའོ། །བདུད་རྩིའི་ཁ་དོག་གདེངས་ཀ་ནི། །ནོར་རྒྱས་ཀྱིས་ནི་ཅོད་པན་བྱས། །པདྨའི་སྡོང་བུའི་ཁ་དོག་དཀར། །རྐང་གདུབ་པདྨ་ཆེན་པོ་ཡིས། །ཐམས་ཅད་ཕུ་ཏཱའི་ཡི་གེ་སྒྲོགས། །ཕྱག་གཉིས་པ་དང་མཆེ་བ་གཙིགས། །འཁོར་བ་དང་ནི་མྱ་ངན་འདས། །གཤིན་རྗེ་འཇོམས་པ་ཞེས་བྱ་ལ། །རྣམ་རྟོག་ཐམས་ཅད་འཇོམས་པ་ཡི། །སྔགས་ཀྱིས་བྱིན་གྱིས་བརླབ་པར་བྱ། །མཁའ་ཁྱབ་རྫོགས་པའི་སངས་རྒྱས་ཀུན། །རང་གི་སྙིང་གའི་ས་བོན་གྱི། །ལྕགས་ཀྱུས་ཀུན་བཀུག་ཁར་ཞུགས་ནས། །བདེ་བ་སྙིང་གར་ཞུགས་ཤིང་ཞུ། །དེ་ལས་སྤྲོ་བྱས་ས་བོན་རྣམས། །དེ་ཞུ་རྡོ་རྗེའི་ལམ་ནས་ནི། །རང་འོད་པདྨའི་ནང་མཐར་གནས། །དེ་བལྟས་ས་བོན་རང་གཟུགས་ལ། །དེ་ཡི་ས་བོན་ལས་སྐྱེས་པའི། །འཁོར་ལོ་ས་བོན་ཀུན་བྱིན་བརླབ། །མེ་སྟག་འཕྲོ་བའི་ཚོགས་གསལ་བ། །ཆོ་ག་བཞིན་དུ་མཁས་པས་བསྒོམ། །བལྟ་ཞིང་སྙིང་གར་བཞུ་བྱས་ལ། །རྡོ་རྗེའི་ལམ་ནས་དབྱུང་བར་བྱ། །རང་རིག་པདྨའི་ཟེ་འབྲུ་ལ། །ལྷ་ཡི་ཚོགས་རྣམས་བལྟ་

བྱས་ལ། །སྣ་ཚོགས་མེ་ཏོག་ལ་སོགས་དབུལ། །ལག་ན་ལོ་མ་འཛིན་རྣམས་ཀྱིས། །ལེགས་པར་མཆོད་པར་བྱ་བ་སྟེ། །མཆོད་པའི་གླུ་ནི་ཡིད་འོང་དང་། །སྣ་ཚོགས་གར་གྱི་རང་བཞིན་དང་། །དེ་བཞིན་བདེ་བ་ཆེན་པོས་མཆོད། །ཨེ་མ་གཤིན་རྗེའི་གཤེད་དམར་པོ། །བླ་མ་སྲིན་པོའི་རང་བཞིན་ཏེ། །བདག་ནི་ཁྱོད་མཐོང་འཇིགས་པས་ན། །བླ་མ་སྲིན་པོའི་རང་བཞིན་སྤངས། །མཐོ་རིས་ས་སྟེངས་ས་འོག་རྣམས། །ཁྱོད་ཀྱི་གར་གྱིས་གཡོ་བར་བྱེད། །ཁྲག་གི་མིག་སྨན་ཁྲོ་བོའི་སེམས། །གར་མཛད་ཁྱོད་ནི་རོ་ལངས་གཟུགས། །དམར་ཞིང་ཐུང་བའི་ཚད་ལྡན་པ། །རྣམ་པ་མང་པོའི་སྤྲུལ་གཟུགས་བྱེད། །རྡོ་རྗེ་དབྱངས་ཅན་མ་ཡིས་ཞུས། །ཁྱོད་ཀྱི་གར་མཛད་བདེ་བ་ཆེ། །ཁྱོད་ཀྱི་ཧྲཱིཿཥྚྲཱིཿའི་སྔགས་ཀྱི་གར། །ས་གསུམ་པོ་ཡི་འཁྲུལ་པ་སེལ། །བརྩེ་བས་ཁྲོ་བའི་རྗེ་བཙུན་ཁྱོད། །འགྲོ་ལ་ལྟ་ཞིང་གར་མཛད་དོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧྃ། སྒྲ་ཡི་ཚོགས་པ་ཐམས་ཅད་ལ། །སྒྲ་བརྙན་དང་ནི་མཚུངས་པར་བལྟ། །འཁོར་ལོ་ཡི་ནི་འདྲེན་པ་ལ། །དེ་ཡི་དེ་ལ་དེ་བཞིན་བསྟོད། །གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ཤིན་ཏུ་འཇིགས། །རྡོ་རྗེའི་ཐུགས་དང་རབ་མཚུངས་པའི། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །གསུང་མཆོག་ཀུན་གྱི་རབ་མཆོག་སྟེ། །གསུང་གི་རྡོ་རྗེ་ཕྱག་འཚལ་བསྟོད། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གྱི་རབ་མཆོག་གཙོ། །དཀྱིལ་འཁོར་དབང་ཕྱུག་ཕྱག་འཚལ་བསྟོད། །ཨཱཿཡིག་ལས་སྐྱེས་རྣམ་དག་པ། །མགོ་བོ་གསུམ་གྱི་སྟེང་དུ་གནས། །པདྨའི་སྣོད་ནི་གང་བ་ཡི། །དེ་

འོག་མེ་ཡི་དཀྱིལ་འཁོར་ཏེ། །རཾ་ཡིག་ལས་བྱུང་གྲུ་གསུམ་མོ། །དེ་འོག་རླུང་གི་དཀྱིལ་འཁོར་ཏེ། །ནག་ཅིང་གཡོ་བ་གཞུ་ཡི་དབྱིབས། །ཡྃ་ལས་བྱུང་བ་བ་དན་མཚན། །དེ་ལ་རྣམ་པར་སྣང་མཛད་སོགས །ད་ཡིག་ལ་སོགས་ལས་བྱུང་བ། །གླང་པོ་ལ་སོགས་ལྔ་རྣམས་སོ། །ཧཱུྃ་སྐྱེས་རྡོ་རྗེའི་དགབ་བྱ་འདིས། །བཀབ་པ་མཁས་པས་བསྒོམ་པར་བྱ། །རླུང་གིས་བསྐྱོད་ཅིང་མེ་ཡིས་ཞུ། །དེ་ལ་རྣམ་པ་བསྒོམ་པར་བྱ། །རྡོ་རྗེས་མཚུངས་པར་རོ་གཅིག་གྱུར། །ཤིན་ཏུ་དྲི་མེད་དག་པར་བལྟ། །ཧཱུྃ་ཡིག་འོད་ཀྱིས་སངས་རྒྱས་རྣམས། །ཡེ་ཤེས་གཟུགས་ཀྱིས་དགུག་པར་བྱ། །རབ་ཞུགས་སྔགས་ཀྱི་གཟུགས་ཀྱིས་ནི། །མཆོག་གི་བདུད་རྩི་ལྔ་རྣམས་བལྟ། །དེ་ཉིད་གསུམ་གྱིས་བྱིན་གྱིས་བརླབ། །དཀྱིལ་འཁོར་བདག་པོ་རྣམས་ལ་མཆོད། །ལྕེ་ལ་རྣམ་དག་རྡོ་རྗེ་ཉིད། །ཧཱུྃ་ཡིག་ལས་བྱུང་དེ་ལ་བལྟ། །དེ་ཡི་འོད་ཟེར་སྦྲུབས་རྣམས་ལས། །མཚུངས་པར་དགུག་ཅིང་དེ་ཡིས་ནི། །ཁམས་གསུམ་བཞུགས་པའི་རྫོགས་སངས་ཀུན། །དེ་བཞིན་དཀྱིལ་འཁོར་མཆོག་འདི་ལ། །སྙིང་གའི་ཡེ་ཤེས་དགུག་གཞུག་བྱ། །རྣམ་པར་རྟོག་པ་ཐམས་ཅད་སྤངས། །ཐོག་མཐའ་དབུས་མའི་དབྱེ་བ་ཡིས། །དཔག་མེད་གཟུགས་བྱེ་དེ་ལ་ཡང་། །འཁྲུལ་པའི་གཟུགས་ལ་དེ་ཉིད་མེད། །གང་ལས་འཁྲུལ་པ་གཉིས་ལ་གནས། །འཁྲུལ་མེད་ཐམས་ཅད་སེམས་ལ་སྦྱིན། །འཕྲོ་དང་བསྡུ་བ་རྣམ་པར་གཟུང་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་དམར་པོའི་རྒྱུད་ལས་མངོན་རྟོགས་ཀྱི་རིམ་པར་ཕྱེ་བ་སྟེ་དང་པོའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་པ་དང་། །ཇི་ལྟར་སེམས་ཅན་རབ་འཇུག་ལ། །ལས་ཀྱི་དབྱེ་བའི་རབ་དབྱེ་ལས། །ཡེ་ཤེས་ཀྱི་ནི་རྒྱ་མཚོ་རྣམས། །རྡོ་རྗེ་ཆེན་པོ་བཤད་ཀྱིས་ཉོན། །དེ་ནས་རྡོ་རྗེ་འཛིན་རྒྱལ་པོས། །ལས་ཀུན་ཐམས་ཅད་རབ་བསྒྲུབ་པ། །ཉེས་ཀུན་གསོ་བའི་བདག་ཉིད་ཀྱིས། །ཚིག་འདི་ཉིད་ནི་བཀའ་སྩལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་

པ་རྣམས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་རབ་ཏུ་གསལ་བར་མཛད་པ་ལ། བཅོམ་ལྡན་འདས་མཆོད་ཅིང་ཕྱག་འཚལ་ཏེ། གཡས་ཕྱོགས་སུ་ལན་གསུམ་བསྐོར་བ་བྱས་ནས། ཡང་དང་ཡང་དུ་ཕྱག་འཚལ་ཏེ་བཅོམ་ལྡན་འདས་ཀྱིི་བཀའ་ཉན་པར་མཛད་དོ། དེ་ནས་རྡོ་རྗེ་འཛིན་རྒྱལ་པོས། །དབང་དུ་བྱ་བའི་འཁྲུལ་འཁོར་གསུངས། །འཁྲུལ་འཁོར་མཐར་ཐུག་གཤིན་རྗེ་གཤེད། །མ་བྱུང་འབྱུང་བར་མི་འགྱུར་རོ། །བུད་མེད་དབང་དུ་བྱ་བ་དང་། །བསྲུང་བའི་དོན་དང་དེ་བཞིན་དུ། །ཞི་བ་ལ་ནི་གི་ཝང་གཟུང་། །དེ་བཞིན་གྲོ་གའམ་སྨྱུག་ཤུན་ལ། །འཁོར་ལོ་གཉིས་ནི་མངོན་པར་བྲི། །མིང་ནི་ནཱ་མཿབརྟེན་པར་བྱ། །ནག་པོའི་རྩ་སོགས་དང་བྲལ་བའི། །ཁམ་ཕོར་གཉིས་ནི་ཡང་དག་སྦྱར། །དབུས་སུ་ཞུན་མར་སྦྲང་རྩི་བླུགས། །སྲད་བུ་དཀར་པོས་དཀྲི་བར་བྱ། །མེ་ཏོག་དཀར་པོས་ཐུན་མཚམས་གསུམ། །མཆོད་བྱ་ཁ་ནི་ཤར་རུ་ཕྱོགས། །གཤིན་རྗེ་མཐར་བྱེད་ཆུ་ཤེལ་བཞིན། །བདག་ཉིད་བསྒོམས་ནས་བསྒྲུབ་བྱ་ནི། །མདུན་དུ་ཟླ་བའི་དཀྱིལ་འཁོར་སྟེང་། །བལྟས་ལ་མངོན་པར་དབང་བསྐུར་རོ། །བུམ་པ་དཀར་པོ་ཟླ་བ་བཞིན། །བདུད་རྩི་ལྔ་ཡིས་ཡོངས་སུ་གང་། །སངས་རྒྱས་རྣམས་ཀྱིས་ཁྲུས་མཛད་པ། །ཡང་དག་བལྟ་ཞིང་བཟླས་པ་བརྩམས། །ཨོཾ་ཧྲཱིཿཥྚཱིཿཝི་ཀྲྀ་ཏྭ་ནན་ཧཱུྃ་ཧཱུྃ་ཕཊ་ཕཊ། ན་མཿལྷ་སྦྱིན་ལ་ཤཱནྟིཾ་ཀུ་རུ་ན་མཿ། ཞི་བའི་དམ་ཚིག་འདི་ལྟ་སྟེ། །སྐྱེས་བུ་རྣམས་ཀྱི་ཞི་བ་ལ། །གུར་གུམ་གྱིས་བྲི་རྒྱས་པ་ཡང་། །འཁོར་ལོ་གཉིས་བྲི་ཁ་ཆེ་ཡིས། །སྭཱ་ཧཱའི་དབུས་སུ་མིང་བཅུག་སྟེ། །བསྒྲུབ་བྱའི་མིང་བླང་དེ་རྣམས་ལ། །བུ་ཡིས་མངོན་པར་གཏོར་བར་བྱ། །ཁམ་ཕོར་ཁ་སྦྱོར་ནང་བཅུག་ནས། །སྲད་བུ་སེར་པོས་དཀྲི་བར་བྱ། །ཁ་ནི་བྱང་བལྟས་ཐུན་མཚམས་གསུམ། །མེ་ཏོག་སེར་པོས་མཆོད་པར་བྱ། །ཁ་དོག་སེར་པོ་གཤིན་རྗེ་གཤེད། །བདག་ཉིད་ངེས་པར་བལྟ་བར་བྱ། །བསྒྲུབ་བྱ་ཟླ་བ་སེར་ལ་གནས། །བུམ་པ་སེར་པོ་ཆུ་ཡིས་བཀྲུ། །མངོན་བར་དབང་བསྐུར་བསྒོམ་པར་བྱ། །རྒྱས་པར་བྱ་ཕྱིར་ཡང་དག་བཟླ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལྷ་

སྦྱིན་གྱི་པུཥྚིྃ་ཀུ་རུ་སྭཱ་ཧཱ། ཕོ་ཋ་ཊ་ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ལྷ་སྦྱིན་གྱི་པུཥྚིྃ་ཀུ་རུ་བཽ་ཥཊ། ཅེས་པ་ནི་བཅོམ་ལྡན་འདས་ཀྱིས་རྒྱས་པའི་དམ་ཚིག་ཏུ་གསུངས་སོ། །གྲོ་གའམ་ནི་རས་དག་ལ། །རྒྱ་སྐྱེགས་དག་གི་ཁུ་བ་འམ། །ཡང་ན་ཙནྡན་དམར་པོ་ལ། །མིང་མེད་དག་གི་ཁྲག་བསྲེས་ནས། །འཁོར་ལོ་གཉིས་ནི་ཡང་དག་བྲི། །ཧོཿཡིག་གིས་བརྟེན་བྱས་པ་ཡི། །འཁྲུལ་འཁོར་ནག་སོགས་དང་བྲལ་བ། །ཁམ་ཕོར་གཉིས་ནི་ཡང་དག་སྦྱར། །མར་དང་སྦྲང་རྩི་བཅུག་བྱས་ལ། །སྲད་བུ་དམར་པོས་དཀྲི་བར་བྱ། །ཁ་ནི་ནུབ་ཏུ་མངོན་ཕྱོགས་གནས། །མེ་ཏོག་དམར་པོས་མཆོད་པར་བྱ། །ཁ་དོག་དམར་པོ་འབར་བ་ཆེ། །བདག་ཉིད་གཤིན་རྗེ་འཇོམས་བྱེད་ལ། །བསྒྲུབ་བྱ་ཟླ་བ་དམར་པོའི་སྟེང་། །དེ་བཞིན་དུ་ནི་བསམ་པར་བྱ། །རང་གི་ལུས་ལས་འཐོན་གྱུར་ཏེ། །འོད་ཟེར་དམར་པོའི་ལྕགས་ཀྱུ་ཡིས། །བསྒྲུབ་བྱ་འགུགས་པར་བསྒོམ་པར་བྱ། །སྔགས་ནི་ཁྲི་ཙམ་སྤྲོ་ཞིང་བཟླས། །དེས་ནི་བསྒྲུབ་བྱ་མྱོས་གྱུར་ཏེ། །རྐང་པ་དག་ནི་དེ་བཞིན་འགྱེལ། །གོས་བྲལ་སྐྲ་ནི་གྲོལ་བ་རུ། །བསམ་ཞིང་བཟླས་པ་བརྩམ་པར་བྱ། །གལ་ཏེ་དབང་དུ་མ་གྱུར་ན། །བརྟུལ་ཞུགས་ཅན་གྱིས་འཁོར་ལོ་བསྲོ། །མར་སོགས་བྲལ་བར་བྱས་ནས་ནི། །དུ་མེད་སེང་ལྡེང་མེ་ལའོ། །ཨོཾ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧོཿ། ལྷ་སྦྱིན་གྱི་མཆོད་སྦྱིན་དབང་དུ་གྱིས་ཤིག་སྭཱ་ཧཱ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། བཽ་ཥ་ཊ་ལྷ་སྦྱིན་གྱི་མཆོད་སྦྱིན་དབང་དུ་གྱིས་ཤིག །བཽ་ཥ་ཊ་ཞེས་བ་ནི་འདིར་བཅོམ་ལྡན་འདས་ཀྱིས་དབང་གི་དམ་ཚིག་ཏུ་གསུངས་སོ། །ཡང་ན་དུར་ཁྲོད་གོས་དག་གམ། །རང་བྱུང་གིས་བྱུགས་རས་དག་ལ། །རྒྱུ་སྐྱེགས་ཁྲག་དང་བསྲེས་པ་ཡིས། །འཁོར་ལོ་གཉིས་ནི་ཡང་དག་བྲི། །ཛ་ཿཡིག་དང་ནི་ཧྲཱིཿཡིག་གིས། །བསྒྲུབ་བྱའི་མིང་ནི་བརྟེན་བྱས་ལ། །བུད་མེད་པདྨའི་སྣོད་དག་ནི། །ཁ་སྦྱར་ནང་བཅུག་མཆོད་པར་བྱ། །སྲད་བུ་དམར་པོས་དཀྲི་བྱས་ལ། །མེ་ཏོག་དམར་པོས་མཆོད་པར་བྱ། །ཉི་མ་འཆར་ཀ་དང་མཚུངས་དམར། །བདག་ཉིད་གཤིན་རྗེ་འཇོམས་བྱེད་དོ། །

ཁ་དོག་དམར་པོའི་ལྕགས་ཀྱུ་ཡིས། །བསྒྲུབ་བྱ་འགུགས་པར་བསྒོམ་པར་བྱ། །སྙིང་གར་ལྕགས་ཀྱུས་དགུག་བྱ་ཞིང་། །མགྲིན་པ་ཞགས་པས་བཅིང་བར་བྱ། །སེང་གེ་དམར་པོ་ལ་ཞོན་ནས། །རླུང་གི་དཀྱིལ་འཁོར་སྦྱར་བ་ཡིས། །འོང་བ་དག་ནི་བསམ་བྱ་ཞིང་། །བདུད་རྩི་ལྔ་ཡི་ཆུ་ཡིས་བཀྲུ། །གལ་ཏེ་བསྒྲུབ་བྱ་མ་འོངས་ན། །བརྟུལ་ཞུགས་ཅན་གྱིས་འཁྲུལ་འཁོར་བསྲོ། །སེང་ལྡེང་ཤིང་གི་མེ་ལའོ། །དེ་ནས་བཟླས་པ་ཡང་དག་བརྩམ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཆེ་གེ་མོ་ཁུག་ཅིག་ཧྲཱིཿ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཛཿལྷ་སྤྱིན་ཁུག་ཛཿཞེས་པ་ནི་འདིར་བཅོམ་ལྡན་འདས་ཀྱིས་འགུགས་པའི་དམ་ཚིག་ཏུ་གསུངས་སོ། །བློ་ལྡན་གང་གིས་དུར་ཁྲོད་གོས། །ཡུང་བ་དག་གི་ཁུ་བ་ཡིས། །འཁོར་ལོ་གཉིས་ནི་ཡང་དག་བྲི། །ལ་ཡིག་དག་གིས་བརྟེན་བྱས་ལ། །བསྒྲུབ་བྱའི་མིང་ནི་ཡང་དག་གཟུང་། །ཁམ་ཕོར་ཁ་སྦྱོར་དབུས་སུའོ། །ཁམ་ཕོར་སེར་པོ་སྟེང་དུ་གཞག །དེ་ལ་མཁས་པས་རེ་ཁཱ་བྲི། །བདུན་དང་བཞི་པའི་རེ་ཁཱ་བྲི། །བདུན་དང་བཞི་པའི་རེ་ཁཱ་སོགས། །ཡང་དག་བྲིས་ཏེ་ཏིང་འཛིན་བྱ། །རི་རབ་རྩེ་མོ་བརྒྱད་པར་གྲགས། །དེ་ཡི་སྟེང་དུ་ཡང་དག་བྲི། །ཧཱུྃ་ཡིག་དང་ནི་བྃ་ཡིག་སྟེ། །དེ་ཡི་དབུས་སུ་རི་རབ་བོ། །དེ་ཡི་སྟེང་དུ་ལཾ་ཡིག་གིས། །དབང་ཆེན་དཀྱིལ་འཁོར་དགོད་པར་བྱ། །སྣ་ཚོགས་རྡོ་རྗེས་མནན་བྱ་ཞིང་། །སྲད་བུ་སེར་པོས་བཅིང་བར་བྱ། །གཤིན་རྗེ་འཇོམས་བྱེད་ཁ་དོག་སེར། །བདག་ཉིད་རྣམ་པར་བསམ་པར་བྱ། །བདག་ཉིད་ཁ་ནི་ལྷོ་རུ་ཕྱོགས། །དབང་ཆེན་དཀྱིལ་འཁོར་གྱིས་མནན་པའི། །བསྒྲུབ་བྱ་སེར་པོ་རྣམ་པར་བསམ། །མྱུར་དུ་རི་བོ་དགོད་ཅིང་གནོན། །སྣ་ཚོགས་རྡོ་རྗེས་མནན་བྱས་ལ། །དབང་ཆེན་དཀྱིལ་འཁོར་འོག་དག་ཏུ། །མནྡ་ར་སོགས་རི་འཇིགས་དང་། །གངས་རི་མི་གཡོར་གྱུར་པ་ཡིས། །བསྒྲུབ་བྱ་མནན་པར་བསྒོམ་པར་བྱ། །དེ་ལ་འདི་བཞིན་བཟླས་པར་བྱ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ལཾ་ལྷ་སྦྱིན་རང་གནས་སུ་རེངས་ལཾ་སྭཱ་ཧཱ། ཞེས་པ་ནི་བཅོམ་ལྡན་འདས་ཀྱིས་རེངས་པ་ཆེན་པོའི་དམ་ཚིག་གོ །ངག་ནི་རེངས་པར་འདོད་པ་ཡིས། །འཁོར་ལོ་གཉིས་བོ་དེ་བཞིན་བྲི། །ནང་དུ་བསྒྲུབ་བྱའི་མིང་བྱས་ནའང་། །དེ་ལ་

སྔགས་ནི་སྤྲོ་ཞིང་བཟླས། ཨོཾ་ཧྲཱིཿཥྚྲིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྃ་ལྷ་སྦྱིན་གྱི་འདོད་པའི་དོན་གྱི་ཕྱིར་འགོག་ཅིང་ངན་པར་སྨྲོས་ཤིག །མཆོད་སྦྱིན་གྱི་ངག་སྟྃ་བྷ་ནྃ་ཀུ་རུ་ལྃ་ཞེས་པ་ནི་འདིར་བཅོམ་ལྡན་འདས་ཀྱིས་ངག་རེངས་པའི་དམ་ཚིག་ཏུ་གསུངས་སོ། །ཤིན་ཏུ་མཐར་ཐུག་ལེགས་པར་སྦ། །ཇི་ལྟར་འདི་ཡི་བྱ་བ་བཤད། །ཉི་མ་གཅིག་གིས་འགྲུབ་པར་འགྱུར། །བཤིན་རྗེ་གཤེད་དམར་སྦྱོར་བས་སོ། །དུར་ཁྲོད་རས་ལ་སྔོན་བཞིན་དུ། །འཁོར་ལོ་གཉིས་བྲི་བརྟུལ་ཞུགས་ཅན། །སྐེ་ཚེ་བ་དང་ཚྭ་དང་ནི། །དུག་དང་ནིམ་པ་ཀ་འམ་ནི། །ཚ་བ་གསུམ་དང་ཚྭ་རྐྱང་ངོ་། །དེ་བཞིན་དུར་ཁྲོད་སོལ་བ་དང་། །དྷ་དུ་ར་ཡི་ལོ་མའི་ཆུ། །ཙཎྜའི་ས་བོན་དེ་བཞིན་དུ། །མཛུབ་མོ་ཡི་ནི་ཁྲག་བླངས་ཏེ། །ཙི་ཏྲ་ཀ་ཡི་ཁུ་བས་སམ། །ཚ་སྒོ་ཙན་གྱི་ས་བླངས་ཏེ། །གདོལ་པའི་རྫ་ཡི་དྲག་པ་དང་། །བྱ་རོག་སྒྲོ་ཡི་སྨྱུ་གུ་ཡིས། །བཅུ་བཞི་ལ་བྲི་བརྟུལ་ཞུགས་ཅན། །གུང་ཐུན་ཁྲོ་བའི་སེམས་ཀྱིས་ནི། །གདུག་པ་ཅན་རྣམས་གསང་པའི་ཕྱིར། །སྣ་ཚོགས་སེམས་ཅན་རྣམ་འཇོམས་པ། །ཧཱུྃ་གི་ཡི་གེས་མཐའ་རྟེན་ལ། །རྣལ་འབྱོར་ཁ་ནི་ལྷོ་རུ་ཕྱོགས། །བདག་ཉིད་གཤིན་རྗེ་འཇོམས་བྱེད་དེ། །ཁྲོ་བོའི་གཟུགས་ཅན་གཏུམ་པོ་ཆེ། །མགོ་བོའི་དུམ་བུས་རྣམ་པར་བརྒྱན། །མ་ཧེ་ལ་བཞུགས་ལྗགས་བསྐྱོད་ཅིང་། །གསུས་ཆེན་འཇིགས་པར་བྱེད་པ་པོ། །མཆེ་གཙིགས་སྐྲ་ནི་གྱེན་དུ་བརྫེས། །སྨིན་མ་དམར་སེར་དེ་བཞིན་དུ། །གཡས་ན་རྡོ་རྗེའི་དབྱུག་ཆེན་ལ། །དེ་བཞིན་གཡོན་ན་ཐོད་པའོ། །མི་སྡུག་མཆེ་བ་རབ་ཏུ་གཙིགས། །བསྐལ་པའི་མེ་ནི་འབར་བ་བཞིན། །དེ་བཞིན་བདག་ཉིད་རྣམ་པར་བསྒོམ། །མྱུར་དུ་བསྒྲུབ་བྱ་དེ་མདུན་གཟུང་། །དྲི་མ་དང་ནི་རྨ་དག་དང་། །གདུག་པའི་ནད་ཀྱིས་བཟུང་ཞིང་འཇོམས། །གོས་དང་བྲལ་ཞིང་འདར་བར་བྱེད། །ངལ་ཞིང་ལུས་ནི་རྨ་དང་ལྡན། །ཕོལ་གྱི་ཕྲེང་བས་ལུས་ལ་བཟུང་། །མཚོན་གྱིས་རྨ་ནི་དོད་པར་བྱེད། །གྲང་བ་དང་ནི་རླུང་གིས་གཙེས། །མེ་ཡི་དབུས་སུ་ཡང་དག་བརྟེན། །མ་ཧེ་སྟག་དང་ཁྱི་རྣམས་དང་། །མཆུ་རིངས་རྣམས་ཀྱིས་ཟ་བར་བྱེད། །སངས་རྒྱས་སྡེ་རྣམས་འཇོམས་བྱེད་

པའི། །མ་རུངས་ཆེན་པོ་རྣམས་ཀྱི་ནི། །ལྟོ་བའི་ནང་ནས་རྒྱུ་མ་དང་། །ལུས་ལ་ཚེར་མས་གང་བ་དང་། །རྐང་པ་གདོས་དང་སྒྲོག་གིས་བསྡམས། །དེ་བཞིན་དུམ་བུ་དུམ་བུར་བྱས། །པགས་པ་ངེས་པར་བཤུ་བར་བསམ། །སྐེ་ཚེ་ཚྭ་ཡིས་བྱུག་པར་བྱ། །གྲང་བ་ཡིས་ནི་ལུས་འདོན་བསྒོམ། །དེ་ཡི་ལུས་ཀྱི་བསྲུང་སོགས་རྣམས། །བཅད་ཅིང་བདག་ཉིད་མདུན་དུ་གཟུང་། །དེ་ཡི་གོ་ཆ་གཅད་པར་བྱ། །ལུས་ནི་དེ་བཞིན་སྟོང་པར་བསྒོམ། །བདག་གི་ལས་ལས་སྐྱེས་པ་ཡི། །ཁྲོ་བོ་གཤིན་རྗེ་གཤེད་གཟུགས་ཀྱིས། །འཇོམས་པ་དག་ཏུ་བསྒོམ་བྱ་ཞིང་། །རྐང་དང་ཚིལ་རྣམས་འཐུང་བ་སྟེ། །དེ་ཡི་མདུན་དུ་གཤིན་རྗེ་བསྒོམ། །ལག་ན་དབྱུག་པ་སྟོབས་ཆེན་ལྡན། །མ་རུངས་དེ་ཡིས་གདུག་པ་དེ། །རྣམ་པར་འཇོམས་པ་བསྒོམ་པར་བྱ། །དེ་ཡི་རྒྱུ་མ་རྩ་རྣམས་ནི། །བྱ་རྒོད་ཀྱིས་བཟུང་མཁའ་ལ་འགྲོ། །ཀླུ་ཡིས་ས་འོག་འགུགས་པར་བྱེད། །ལྷ་མ་ཡིན་ལ་སོགས་པས་བཙིར། །དེ་ལྟར་བསྒྲུབ་བྱ་བསམ་པར་བྱ། །སྙིང་རྗེའི་སེམས་ཀྱིས་རབ་བཅིངས་ནས། །འཁོར་བ་ལས་ནི་ཕ་རོལ་བྱས། །སངས་རྒྱས་རྣམས་ཀྱི་ཞིང་དུ་འགྲོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐུགས་དགྱེས་ནས་གསུངས་པ། འདི་ལྟ་སྟེ། །ཀྱེ་མ་གསད་བྱ་ལེགས་པར་བྱས། །གསད་པར་བྱ་བ་མ་བསད་དེ། །ཇི་སྲིད་སྡིག་རྣམས་གྲོལ་བར་བྱས། །ཤི་བ་དེ་ཡང་མ་ཤི་སྟེ། །སྡིག་པ་སྟོང་ཕྲག་བྱས་པ་ཡི། །མནར་མེད་ལ་སོགས་མི་སྐྱེའོ། །ཨེ་མ་བདག་ཉིད་ཆེན་པོ་སྟེ། །བསད་པས་སངས་རྒྱས་བྱང་ཆུབ་ཐོབ། །སླར་ཡང་བརྩེ་བས་སེམས་ཅན་རྣམས། །གསང་པར་བྱ་བས་གསད་པར་བྱ། །ཨེ་མ་སྙིང་རྗེའི་སྟོབས་ཀྱིས་ཏེ། །སྙིང་རྗེ་དམན་པས་འགྲུབ་མི་འགྱུར། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧཱུྃ་ལྷ་སྦྱིན་སོད་ཧཱུྃ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧཱུྃ་ཕཊ་ལྷ་སྦྱིན་མཱ་ར་ཡ་ཧཱུྃ་ཕཊ་ཅེས་པ་ནི། བཅོམ་ལྡན་འདས་ཀྱིས་རྟོག་པ་ཆེན་པོ་གསང་པའི་རྡོ་རྗེའི་འཁྲུལ་འཁོར་དང་སྔགས་དང་རྒྱུད་ཀྱིས་གསད་པ་ལ་སོགས་པའི་དམ་ཚིག་ཏུ་གསུངས་སོ། །དེ་ནས་འཁོར་ལོ་གཉིས་བྲིས་ཏེ། །ཕཊ་ཀྱི་ཡི་གེའི་ནང་དུ་ནི། །བསྒྲུབ་བྱའི་

མིང་དང་བཅས་པ་གཟུང་། །ཐོད་པ་ཡང་དག་སྦྱར་བྱས་ཏེ། །སྲད་བུ་ནག་པོས་དཀྲི་བར་བྱ། །ཞེ་སྡང་སེམས་ཀྱིས་ཉིན་གུང་ལ། །དུར་ཁྲོད་དུ་ནི་གཞུག་པར་བྱ། །གཤིན་རྗེ་མཐར་བྱེད་མཚུངས་བལྟས་ནས། །བསྒྲུབ་བྱ་རང་གི་མདུན་དུ་བྱ། །རྟ་དང་མ་ཧེའི་སྟེང་ན་གནས། །གཉིས་པོ་དེ་ཡི་ལག་ན་མཚོན། །ཁྲོ་བོའི་ཚོགས་ཀྱིས་ཀུན་ནས་བསྐོར། །གཉིས་པོའི་ཕྱོགས་ལ་བསམ་པར་བྱ། །གཉིས་པོ་ངག་ནི་འཐབ་བྱེད་ཅིང་། །ཁྲོ་བས་སེམས་ནི་བཅིངས་པ་སྟེ། །འཐབ་མོ་བྱེད་པར་བསྒོམ་བྱས་ལ། །སྒོམ་ཞིང་བཟླས་པ་བརྩམ་པར་བྱ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྷ་སྦྱིན་དང་མཆོད་སྦྱིན་དག་རྣམ་པར་ཞེ་སྡང་བར་གྱིས་ཤིག་ཕཊ་ཅེས་པ་ནི་བཅོམ་ལྡན་འདས་ཀྱིས་ཞེ་སྡང་ཆེན་པོའི་དམ་ཚིག་ཏུ་གསུངས་སོ། །ཆོ་ག་དེ་ཡིས་སྔོན་མ་བཞིན། །འཁོར་ལོ་གཉིས་པོ་ཀུན་ཏུ་བྲི། །ཧཱུྃ་ཕཊ་ཡི་གེ་དག་གིས་བརྟེན། །ཐོད་པ་གཉིས་ནི་ཡང་དག་སྦྱར། །སྲད་བུ་ནག་པོས་ཡང་དག་དཀྲི། །ཕག་ཤིན་ནགས་སུ་བཞགས་བྱས་ལ། །གཤིན་རྗེ་གཤེད་ཀྱི་རྣལ་འབྱོར་གྱིས། །བསྒྲུབ་བྱ་སྔོན་དུ་གཟུང་བར་བསྒོམ། །ཡྃ་ལས་བྱུང་བ་གཞུ་ཡི་དབྱིབས། །རླུང་གི་དཀྱིལ་འཁོར་ནག་པ་ལ། །རྔ་མོ་ཆེན་མོ་ཁ་དོག་སྔོ། །དེ་ཡི་སྟེང་དུ་བསྒོམ་པར་བྱ། །དེ་ལ་མ་རུངས་ཆེན་པོ་སྟེ། །རྡེག་ཅིང་ལྷོ་ཕྱོགས་འདོད་པ་དང་། །ཁྲོ་བོ་རྣམས་ཀྱིས་འཇོམས་པ་དང་། །སངས་རྒྱས་ཡིན་ཡང་བཟློག་པར་དཀའ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྷ་སྦྱིན་སྐྲོད་པར་གྱིས་ཤིག་ཧཱུྃ་ཕཊ་ཅེས་པ་ནི་བཅོམ་ལྡན་འདས་ཀྱིས་བསྐྲད་པ་ཆེན་པོའི་དམ་ཚིག་ཏུ་གསུངས་སོ། །རྣལ་འབྱོར་ཁྲོ་ཞིང་ལྷོར་ཕྱོགས་ལ། །ཁྲག་བཅས་དུར་ཁྲོད་ཐལ་བ་དང་། །དུག་དང་ཚྭ་དར་སྐེ་ཚེ་དང་། །ཚ་བའི་མར་ཁུ་སྨྱོ་ལོ་མས། །དེ་བཞིན་དུར་ཁྲོད་གོས་ལ་ནི། །འཁོར་ལོ་གཉིས་པ་དེ་བཞིན་བྲི། །གསད་བྱ་གཤིན་རྗེའི་ལུས་ལ་གནས། །སྡང་སེམས་མ་ཧེ་རྟ་དག་ལ། །བསྐྲད་པ་རྔ་མོའི་ལུས་ལ་གནས། །ཞི་བ་ཟླ་བའི་དཀྱིལ་འཁོར་དཀར། །རྒྱས་པ་ཟླ་བ་སེར་པོ་ལ། །བུད་མེད་སྙིང་གར་དབང་དུ་བྱ། །ངག་བཅིང་ང་ཡི་ལུས་ལ་གནས། །རེངས་

པ་རི་རབ་དབུས་སུ་སྟེ། །དགུག་པ་སེང་གེ་སྟག་ལ་གནས། །དེ་བཞིན་གཞན་ཡང་མཚོན་པར་བྱ། །གི་ཝཾ་དང་ནི་རྒྱ་སྐྱེགས་དང་། །དེ་བཞིན་ཁ་ཆེའི་བྱེ་བྲག་གིས། །དབང་བྱ་གྲོ་ག་ཤིང་ཤུན་བྲི། །འགྲུབ་འགྱུར་འདི་ལ་ཐེ་ཚོམ་མེད། །ཁམ་ཕོར་ཁ་སྦྱར་ནང་དུ་གཞུག །དགེ་བའི་སེམས་ཀྱིས་ཡང་དག་གཟུང་། །བྱ་རོག་སྒྲོ་ཡིས་བྲི་བར་བྱ། །པདྨ་ཁ་སྦྱོར་དུར་ཁྲོད་ལ། །ཉི་མའི་གུང་ལ་སྦ་བར་བྱ། །གཤིན་རྗེ་གཤེད་ཀྱི་རྣལ་འབྱོར་བདག །ཨོཾ་ཧྲཱིཿཥྚྲཱིཿསོགས་སྔགས་བཟླས་ལ། །ལྷོ་ཕྱོགས་གནས་ཏེ་ཚར་གཅད་དོ། །ཞི་བའི་ཁ་དོག་ཡ་ཡིག་དབྱི། །ནི་གཉིས་ཀྱང་ནི་དེ་བཞིན་ནོ། །ཕྱི་ནས་དབུས་སུ་ཡ་ཡིག་ལས། །ལྷག་མའི་ཡི་གེ་ཅི་བདེ་བར། །སྔོན་དུ་བསྙེན་པ་ཁྲི་བཟླས་ལ། །ལས་འདི་རབ་ཏུ་བསྒྲུབ་པར་བྱ། །ཡེ་ཤེས་རྡོ་རྗེས་བྱ་བ་སྟེ། །གཤིན་རྗེ་གཤེད་ཀྱི་སྦྱོར་བ་ཡིས། །དྲག་པོ་ཆེན་པོའི་དཀྱིལ་འཁོར་འདི། །གང་དུ་བྲིས་ཤིང་གནས་པ་དང་། །ཡི་གེ་བྲིས་པར་གྱུར་པ་ཡིས། །ཁྱིམ་དེ་རྟག་ཏུ་འཐབ་མོར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་འཁྲུལ་འཁོར་གྱི་སྐབས་རིམ་པར་ཕྱེ་བ་གཉིས་པའོ།། །།རི་དང་སྐྱེ་བོས་དབེན་པའི་ཕྱོགས། །གསང་ཞིང་ཡིད་བརྟགས་ས་གཞི་ལ། །རི་མོ་གསལ་བྲིས་རྣལ་འབྱོར་བདག །སྔགས་ཀྱིས་འགུགས་པ་བརྩམ་པར་བྱ། །དཀར་ཞིང་ཞལ་གཅིག་ཕྱག་གཉིས་པ། །གྲི་གུག་ཐོད་པ་འཛིན་པ་ཡི། །ཙརྩི་ཀཱ་ནི་བསྒོམ་པར་བྱ། །རྣལ་འབྱོར་ཁྲག་འགུགས་རབ་སྦྱོར་བ། །དེ་ནས་བཅོམ་ལྡན་འདས་གཤིན་རྗེ་གཤེད་ཆེན་པོ་དཀྲུག་པ་རྡོ་རྗེ་ཁྲག་འགུགས་པ་ཞེས་བྱ་བ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྡོ་རྗེ་ཙརྩི་ཀཱའི་སྔགས་གསུངས་པ། །འདི་ལྟ་སྟེ། ཨོཾ་བཛྲ་ཙརྩི་ཀཱེ་སི་དྷཱ་ན་ཏྲ་ནཱ་ལ་ཧཱ་རི་ཎི་རཏྣ་ཏྲ་ཡཱ་པ་ཀ་རི་ཎོ་རུ་དྷི་ར་མཱ་ཀརྵ་ཡ་ཛཿ། ཞལ་ནི་རབ་ཏུ་བསྐྱོད་མཛད་ནས། །སྔགས་འདི་རྗེས་སུ་དྲན་བྱས་ལ། །ཁམས་གསུམ་པ་ཡི་ཁྲག་ཆེན་པོ། །འགུགས་འགྱུར་འདི་ལ་ཐེ་ཚོམ་མེད། །དེ་ནས་གཤིན་རྗེ་གཤེད་ཆེན་པོ་རྡོ་རྗེ་མྱོས་པ་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་

སྙོམས་པར་ཞུགས་སོ། །རྡོ་རྗེ་ཕག་མོས་ཆང་དགུག་པའི་དམ་ཚིག་གསུངས་པ་འདི་ལྟ་སྟེ། །ཨོཾ་གྷོ་ནེ་སུ་གྷོ་ནེ་བཛྲ་མཱ་མ་ཀཱི་བྷ་ར་བྷ་ར། སྃ་བྷ་ར་སྃ་བྷ་ར། ཏྲཻ་དྷཱ་ཏུ་ཀ་མ་དྱཱ་ཀརྵ་ཡ་ཛཿ། རྫ་མཁན་ལག་པ་ཕྱིས་པའི་སས། བུམ་པ་ཁ་ནི་མཛེས་བྱས་ཏེ། །རྐུན་པོའི་སྐྲ་ཡི་སྟེང་དུ་གཞག །སྔགས་ནི་རྗེས་སུ་དྲན་པར་བྱ། །སྔགས་འདིའི་བདག་ཉིད་ཆེ་བ་ནི། །མཆོད་རྟེན་པ་ཏ་ན་རུ་བསྟན། །མཁས་པས་འབད་པས་དམིགས་བྱས་ན། །ཆང་ནི་འགུགས་པར་རབ་ཏུ་གྲགས། །དེ་ནས་བཅོམ་ལྡན་འདས་གཤིན་རྗེ་གཤེད་ཀྱི་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དབྱངས་ཅན་མས་སྔགས་འདི་གསུངས་སོ། །ཨོཾ་པི་ཙུ་པི་ཙུ་པྲཛྙཱ་བར་དྷ་ནི། ཛྭ་ལ་ཛྭ་ལ་མེ་དྷཱ་བ་ར་དྷ་ནི། དྷི་རི་དྷི་རི། བུད་ངྷི་བ་ར་ངྷ་ནི་སྭཱ་ཧཱ། ཚེས་གཅིག་ནས་ནི་བཟུང་ནས་ནི། །ཇི་སྲིད་བཅྭ་ལྔའི་མཐར་ཐུག་ཀུན། །ལེགས་པར་སྦྱར་བ་བརྩམ་པར་བྱ། །ཇི་སྲིད་ཟླ་པའི་རྗེས་འབྲངས་ནས། །གསུང་གི་དབང་ཕྱུག་མ་ནི་འགྲུབ། །འདི་ཡིས་ཚིགས་བཅད་བརྒྱ་ཕྱེད་དོ། །ཁམས་གསུམ་པ་ནི་མ་ལུས་ཤིང་། །མ་ལུས་ལུས་པ་མེད་པ་འགྲུབ། །དེ་ནས་བཅོམ་ལྡན་འདས་གཤིན་རྗེ་མཐར་བྱེད་ཆེན་པོ་དཀྲུག་པ་རྡོ་རྗེ་ཁུ་བ་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཁུ་བ་འགུགས་པ་གཽ་རཱིའི་སྔགས་གསུངས་པ་འདི་ལྟ་སྟེ། ཨོཾ་[ཀརྞྷྲི་]ནི་ཀརྵ་ཎི་གཽ་རཱི་ཛཿདུཥྚ་པྲ་དུཥྚཱ། ཡཱཿཤུ་ཀྲ་མཱ་ཀརྵ་ཡ་ཛཿཛཿཛཿཧཱུྃ་སྭཱ་ཧཱ། །ནམ་མཁའི་གདོང་དང་རྡོ་རྗེའི་ལམ། །རླུང་དང་དྲིལ་སྦྱོར་ལྕགས་ཀྱུ་ཡིས། །ཁུ་བའི་ཚོགས་རྣམས་འགུགས་པར་བྱེད། །བསྒོམ་དང་བཟླས་པ་རབ་སྦྱོར་བས། །སྐྱེ་བོས་དབེན་དང་ནགས་ཚལ་དུ། །ལས་འདི་རབ་ཏུ་བསྒྲུབ་པར་བྱ། །མཚན་མོ་བདུན་གྱི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་གཤིན་རྗེ་གཤེད་ཆེན་པོ་དུས་ཀྱི་དབྱེ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འདིར་མཆོག་གི་དབང་བསྐུར་བའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་སྤྲོ་བར་མཛད་ནས།

ཨུ་དུམ་བཱ་ར་མན་དཱ་ར། །ཡོངས་སུ་སྐྱེས་དང་སྣ་མ་དང་། །ཀརྞ་ཀ་ཡི་ཕྲེང་བ་རྣམས། །བུ་ཁྱོད་ཟུང་ལ་བྱིན་གྱིས་རློབས། །ཁམས་གསུམ་རལ་གྲི་ཆེན་པོ་ལ། །སངས་རྒྱས་ཀུན་གྱིས་ཕྱག་བྱས་པ། །བཟུང་ན་བདུད་ལས་རྒྱལ་བར་འགྱུར། །ལས་ཀྱི་རལ་གྲི་དམ་པ་འདི། །ཐབས་དང་ཤེས་རབ་རང་བཞིན་གྱི། །རྡོ་རྗེ་དྲིལ་བུ་བསྒྲུབ་པའི་ཕྱིར། །བུ་ཁྱོད་གསང་བའི་རྡོ་རྗེ་ཟུང་། །སློབ་མ་ཡང་དག་གཟུང་བར་གྱིས། །འདི་ནི་བཏུང་བ་རིན་ཆེན་ཏེ། །རྡོ་རྗེའི་ལུས་སུ་རབ་སྒྲུབ་པ། །མི་ཡི་བཏུང་བྱ་ཡེ་ཤེས་ཆུ། །བུ་ཁྱོད་ཀྱིས་ནི་ཐམས་ཅད་དུ། །།སློབ་མའི་ཁར་ཡང་བླུད་པར་བྱ། །གཤིན་རྗེ་གཤེད་ཀྱིས་རབ་ཏུ་གསུངས། །སེམས་ནི་རབ་ཏུ་དགའ་བ་ཡིས། །རྡོ་རྗེ་སློབ་མ་བདག་ཉིད་ཆེ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྔགས་ཀྱིས་འགུགས་པ་རབ་ཏུ་སྦྱོར་བ་སྟེ་རིམ་པར་ཕྱེ་བ་གསུམ་པའོ།། །།དེ་ནས་དཔལ་ལྡན་རྡོ་རྗེ་འཆང་། །རལ་གྲི་སྒྲུབ་པ་གསུང་བར་མཛད། །སྐྱོབ་པ་སངས་རྒྱས་ཐམས་ཅད་ཀྱི། །ལྷ་མོ་ཁྱོད་ནི་དཔག་དུ་གྱུར། །གཤིན་རྗེ་གཤེད་ཀྱི་དཀྱིལ་འཁོར་གྱི། །སློབ་དཔོན་རྣམས་གསུངས་རྒྱུད་བསྒྲུབ་ཕྱིར། །ཁབ་ལེན་ལྕགས་ཀྱི་རལ་གྲི་ཉིད། །དེ་རྣམས་ཡང་ན་བཅུད་ཅན་གྱི། །རལ་གྲི་ཁྲུ་གང་ཚད་བཅས་ཚད། །བརྟུལ་ཞུགས་ཅན་གྱིས་རྣམ་པར་བསམ། །བཅུ་བཞི་འམ་ནི་བརྒྱད་དག་ལ། །དུར་ཁྲོད་དབུས་སུ་སྦ་བར་བྱ། །བདུད་རྩི་ལྔ་དང་མཚུངས་པར་ལྡན། །ཐུན་མཚམས་གསུམ་དུ་བཟླས་པ་ཁྲི། །ཟླ་བ་སོ་སོའི་བཅུ་བཞི་ལ། །གཏོར་མས་སྔོན་དུ་མཆོད་པར་བྱ། །ཟླ་བ་རེ་ལ་བཟླས་པ་འབུམ། །འབུམ་ཕྲག་ལྔ་ཡིས་འགྲུབ་པར་འགྱུར། །གྲུབ་ན་རལ་གྲི་རབ་ཏུ་འབར། །འོད་ཟེར་ལྔ་ཡི་གློག་ཆེན་འཁྱུག །གྲུབ་པ་དེ་ནི་གཟུང་གྱུར་པས། །མི་རྣམས་ཁམས་གསུམ་ལས་རྒྱལ་འགྱུར། །རྣལ་འབྱོར་གང་གིས་རལ་གྲི་གྲུབ། །གཤིན་རྗེ་གཤེད་པོ་འཇིགས་བྱེད་སྦྱོར། །བདེ་བར་འགྲུབ་ཅིང་ས་ཆེན་གྱིས། །དེ་ཡིས་འཐབ་པ་བཟོད་མི་ནུས། །རྐང་གཉིས་པ་དང་རྐང་བཞི་ཀུན། །མཐོང་

བས་གནས་སྐབས་བཅུ་རུ་འགྱུར། །ལྷ་དང་ལྷ་མིན་གྱིས་མི་བཟོད། །མི་ཡི་འཇིག་རྟེན་སྨོས་ཅི་དགོས། །རྒྱ་མཚོའི་ས་ནི་བླངས་བྱས་ལ། །ཀླུ་ཡི་གཟུགས་ནི་སྦྱར་བར་བྱ། ཨོཾ་ཕུཿཡི་གེ་ཧཱུྃ་ལ་དགོད། །ཧྲཱི་ཥྚྲིཿལ་སོགས་སྔགས་རྣམས་བཟླ། །ཆར་མི་འབབ་པའི་དུས་རྣམས་ལ། །ཁྲི་ནི་བཟླས་བས་འབབ་པ་འགྱུར། །སྦྲུལ་ནག་ཤ་དང་ནིམ་པ་ཡི། །ལོ་མ་དག་ནི་བསྲེས་པ་ཡི། །དེ་ཡི་རིལ་བུ་ལེགས་པར་བྱ། །བརྟུལ་ཞུགས་ཅན་གྱིས་རྒྱ་མཚོར་འཕང་། །ཁྲི་ཕྲག་བཟླས་པར་གྱུར་པ་ཡི། །དཔའ་ཀློང་རེངས་བྱེད་མཆོག་ཡིན་ནོ། །ཙཎྜའི་ས་བོན་བརྒྱ་བཟུང་ཞིང་། །མོན་སྲན་གྲེའུ་འབྲས་བསྲེས་ཏེ། །འབུམ་ཕྲག་བརྒྱད་བཟླས་སྦྱིན་སྲེག་གིས། །དེ་ཡིས་ལྷ་རྣམས་མཐོང་བར་འགྱུར། །དུད་ཁྲོད་རོ་བསྲེགས་མགལ་བའི་ཤིང་། །བརྟུལ་ཞུགས་ཅན་གྱིས་གཟུགས་བརྙན་བྲི། །སྨྱོ་བྱེད་ཁུ་བས་བྱུགས་བྱས་ཏེ། །ཁྲི་ཕྲག་བཟླས་ན་མཛེ་ཡིས་འཁྱེར། །ཡུངས་ཀར་ས་བོན་བསྡུས་པ་ལ། །འབུམ་ཕྲག་བཞི་ནི་བཟླས་བྱས་ཏེ། །སྦྲུལ་གྱིས་གཟུང་ནས་འགྱེལ་བ་ལ། །གཏོར་ན་འཚོ་བར་ཐེ་ཚོམ་མེད། །རི་བོ་ཆུས་བཀས་ས་བླངས་ནས། །སྔགས་ནི་འབུམ་དུ་བཟླས་པ་ཡིས། །མགོ་ལ་བྱུག་པ་ཙམ་གྱིས་ནི། །མགོ་ཡི་ཟུག་རྣམས་འཇོམས་པར་འགྱུར། །བདུན་ཉིད་མངོན་པར་བསྔགས་བྱས་ཏེ། །ལག་པས་མགོ་བོ་མཉེ་བྱས་ན། །མགོ་ཡི་ཟུག་རྔུ་མི་འབྱུང་ཞིང་། །ཉམས་པར་འདི་ལ་ཐེ་ཚོམ་མེད། བྲམ་ཟེ་ཡི་ནི་ཤ་དག་དང་། །དུར་ཁྲོད་ས་དང་ཐལ་བ་ལ། །གཤིན་རྗེ་གཤེད་ཀྱི་སྐུ་གཟུགས་བྱ། །ཞལ་གཅིག་ཕྱག་ནི་གཉིས་པ་སྟེ། །གཡས་ན་རྡོ་རྗེ་ཆེན་པོ་སྟེ། །གཡོན་ན་མགོ་བོ་དེ་བཞིན་དུ། །ཁ་དོག་དཀར་པོ་འཇིགས་ཆེན་པོ། །དེ་ཡིས་གདུག་པ་འཇོམས་པར་བྱེད། །བདུད་རྩི་རྣམ་པ་ལྔ་ཡིས་ནི། །ཉི་མ་སོ་སོར་གཏོར་མ་སྦྱིན། །བདག་གི་དགྲ་བོ་སོད་ཅིག་ཅེས། །རྣལ་འབྱོར་པ་ཡིས་རྟག་གསོལ་གདབ། །འདི་སྨྲས་མཚན་མོ་ཉལ་བ་ལས། །དགྲ་བོ་ཐོ་རངས་འཆི་བར་འགྱུར། །ཡང་ན་ནད་

ཀྱིས་འདེབས་འགྱུར་ཏེ། །ཆུ་འགགས་ལ་སོགས་ཀྱིས་ཁྱབ་འགྱུར། །དགྲ་ལས་རྣམ་པར་སྣང་མཛད་བླང་། །མི་ཡི་རྐང་སྦུབས་ཡོངས་བཀང་སྟེ། །སྔགས་ནི་འབུམ་དུ་བཟླས་ནས་ནི། །ཤིང་གི་དྲུང་དུ་མངོན་པར་འགྱེལ། །ཡི་དགས་ནགས་སུ་རྟག་ཏུ་འཁྱམ། །རྣལ་འབྱོར་དབང་ཕྱུག་ཚིམ་པས་བདེ། །སྣ་ཚོགས་དོན་རྣམས་རབ་ཏུ་འགྲུབ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་འཇིགས་པར་བྱེད་པ་ཞེས་བྱ་བ་སྟེ་རིམ་པར་ཕྱེ་བ་བཞི་པའོ།། །།དེ་ནས་རྒྱལ་པོ་རབ་བསྒྲུབ་པ། །བདག་གིས་ཡང་དག་བཤད་པར་བྱ། །མ་ཉམས་དེ་བཞིན་རྨ་མེད་པ། །ལྗོན་ཤིང་དག་ལ་སྦྱངས་པ་བླངས། །ཕབ་ནས་ལེགས་པར་ཁྲུས་བྱས་ཏེ། །ཕྲེང་བའི་བཟླས་པས་བསྒྲུབ་པར་བྱ། །ཟླ་བ་ཟླ་བའི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་ལྔ་ཡིས་ནི་བྱུགས་བྱས་ལ། །མཆོག་གི་བཟླས་པས་བཟླས་པར་བྱ། །འདི་ནི་བྱེ་བ་བཟླས་པ་ཡིས། །རྒྱལ་པོ་ངེས་པར་འགྲུབ་འགྱུར་ཏེ། །ཨེ་མ་སྔགས་ཀྱི་ནུས་པ་ཡིས། །རོ་ནི་སྒྲོགས་པར་བྱེད་འགྱུར་ན། །གཤིན་རྗེ་གཤེད་ཀྱི་རྣལ་འབྱོར་ལྡན། །ཅུང་ཟད་འཇིགས་པར་མི་བྱའོ། །རྣལ་འབྱོར་གང་དང་གང་འདོད་པ། །དེ་རྣམས་ཐམས་ཅད་སྟེར་བར་འགྱུར། །མ་ཧེ་དང་ནི་ཆུ་སྲིན་ནམ། །སྟག་གམ་དེ་བཞིན་གཞན་ཡང་ནི། །དྲེད་དང་སྤྲེའུའི་ཁྱད་པར་ཅན། །དུག་དང་སྐེ་ཚེ་ཆྭ་དང་ནི། །ཤོ་བྷཱཉྫ་ནཾ་ཚ་པ་གསུམ། །དེ་རྣམས་ལས་ནི་གཟུགས་བརྙན་ནི། །གཤིན་རྗེ་གཤེད་ཀྱི་གཟུགས་འཇིགས་བྱེད། །ཧྲཱིཿཥྚྲཱིཿལ་སོགས་སྔགས་བཟླས་ལ། །རྣལ་འབྱོར་པ་ཡིས་གསོལ་བ་གདབ། །རྒྱལ་པོ་ཆེ་གེ་མོ་སོད་ལ། །བདག་ལ་དེ་ཡི་བྱ་བ་གྱིས། །བསྙེན་པ་བྱེ་པ་བཟླས་པས་འགྲུབ། །ངེས་པར་བདེན་པར་ཐེ་ཚོམ་མེད། །དེ་ནས་གཞན་ཡང་རྒྱལ་ཟླ་ཡི། །དཀར་ཕྱོགས་ཉི་མ་སྣུབས་ལྡན་ཚེ། །རྡུལ་གྱི་གོས་ནི་ཡང་དག་བླང་། །རི་མོ་མཆོག་ཉིད་བྲི་བར་བྱ། །སྣག་ཚ་ཆེན་པོ་མཚུངས་སྦྱོར་བས། །དཀྱིལ་འཁོར་གྱི་ནི་བདག་པོ་

ཉིད། །ཁ་དོག་དཀར་པོ་འཇིགས་ཆེན་པོ། །མཆོག་ནི་ཞལ་གཅིག་ཕྱག་གཉིས་པ། །གཡས་ན་རྡོ་རྗེ་འབར་བ་དང་། །གཡོན་ན་ཁྲག་བཅས་མགོ་བོ་འཛིན། །གཡོན་བརྐྱང་ཞབས་དང་འཇིགས་པ་སྟེ། །རིན་ཆེན་ཅོད་པན་རྣམ་བརྒྱན་ཅིང་། །རིན་ཆེན་རྒྱན་རྣམས་ཡོངས་རྫོགས་ལ། །འོད་ཟེར་ཕྲེང་བས་འཁྲིགས་པ་སྟེ། །རྒྱལ་པོ་གསོད་པར་བྱེད་པ་ནི། །འོག་གི་ཆ་ལ་ངེས་པར་སྦྱར། །མིང་བཅས་ཁ་དོག་ཡང་དག་ལྡན། །ཇི་ལྟ་བ་ཡི་རྣམ་པར་གནས། །ལྷ་ལ་ཡོངས་སུ་རྫོགས་པར་བྱ། །ཇི་ལྟ་བ་ཡི་དངོས་པོའི་ཚད། །དཀྱིལ་འཁོར་གྲུ་གསུམ་ངེས་པར་ནི། །དེ་ཡི་མདུན་དུ་སྦྱིན་སྲེག་བྱ། །སྦྱིན་སྲེག་འབུམ་གྱིས་རྒྱལ་པོ་ནི། །ཐོབ་འགྱུར་འདི་ལ་ཐེ་ཚོམ་མེད། །དེ་ནས་གཞན་ཡང་ཟླ་གཟས་གསུང་། །ཡང་ན་ཉི་མ་མ་མཐོང་ཚེ། །དུར་ཁྲོད་ཐལ་བ་བླངས་ནས་ནི། །བརྟུལ་ཞུགས་ཅན་གྱིས་གཟུགས་བརྙན་བྱ། །རྭ་ཅན་སྐེ་ཚེ་ཤ་ལྔ་དང་། །ནིམ་པ་དྷ་དུ་རའི་ལོ་མ། །ཆོ་ག་འདི་ཡིས་གཅིག་བྱས་ནས། །མཁས་པ་ཡིས་ནི་གཟུགས་བརྙན་བྱ། །ཁ་དོག་སྔོན་པོ་འཇིགས་ཆེན་པོ། །ཞལ་གཅིག་པ་ལ་ཕྱག་ནི་གཉིས། །མ་ཧེ་ལ་གནས་ཞལ་ནི་གདངས། །རྡོ་རྗེ་དང་ནི་ཐོད་པ་འཛིན། །སྐུ་གཟུགས་རྫོགས་པར་བྱས་ནས་ནི། །རྣམ་པ་མང་པོས་མཆོད་པར་བྱ། །ཧྲཱིཿཥྚྲཱིཿལ་སོགས་སྔགས་ནི་བཟླས། །བཟླས་པ་འབུམ་གྱིས་རིག་པར་བྱ། །རྒྱལ་པོ་ཆེ་གེ་མོ་ཡི་ནི། །སྡེ་དང་ཡོངས་སུ་འཛིན་བཅས་ཆོམས། །རྣལ་འབྱོར་བདག་ཉིད་བཟླས་པ་འབུམ། །འབུམ་དུ་བཟླས་པའི་ཁྱད་པར་ལས། །ཆོ་ག་འདི་ཡིས་སྦྱིན་སྲེག་དང་། །མཆོད་པའི་ལས་རྣམས་ལྡན་པར་བསམ། །སེམས་ཅན་དོན་བྱེད་བློ་ལྡན་གྱིས། །རྒྱལ་པོ་ཐོབ་འགྱུར་ཐེ་ཚོམ་མེད། །དེ་ནས་གཞན་ཡང་རྡུལ་གྱི་གོས། །ནམ་མཁའི་རང་བཞིན་ཆུ་ཡིས་ནི། །གཟའ་ནི་བཀྲ་ཤིས་ལ་བཀྲུས་ཏེ། །རི་མོ་མངོན་པར་བྲི་པར་བྱ། །ཞལ་གཅིག་པ་དང་ཕྱག་ནི་གཉིས། །ཁ་དོག་ནག་པོ་འཇིགས་ལྡན་པ། །སྐྲ་ནི་འོད་ཟེར་ཡང་དག་ལྡན། །མགོ་བོའི་ཕྲེང་བ་རབ་ཏུ་འཕྱང་། །གྲི་གུག་ཐོད་པ་ལག་ན་

ལྡན། །མ་ཧེའི་སྟེང་དུ་བྲི་བྱས་ནས། །འདི་ཡི་བསྒོམ་པ་བརྩམ་བར་བྱ། །དགྲ་ནི་མདུན་དུ་བསམ་བྱ་སྟེ། །གྲི་གུག་གིས་ནི་གཅོད་བྱེད་ཅིང་། །རྐང་དང་ནག་རྣམས་འཐུང་བར་བྱ། །རྒྱུ་མ་རྣམས་ནི་ཟ་བ་དང་། །ཁྲག་ནི་མང་པོ་འཐུང་བར་བྱེད། །འབུམ་དུ་གྱུར་པ་ཙམ་གྱིས་ནི། །ཞ་འམ་རྨ་ཡིས་སྙིང་ལ་གཟེར། །དེ་ནས་གཞན་ཡང་མིའི་རུས་པ་སོར་བཞི་པ་བླངས་ལ། ཧྲཱིཿཥྚྲཱིཿལ་སོགས་པའི་སྔགས་ཀྱི་ནང་དུ་བྱས་ཏེ་དགྲའི་སྒོ་ལ་སྦས་ན་འཁོར་དང་བཅས་བསྐྲོད་པར་བྱེད་དེ། །གལ་ཏེ་བརྒྱ་བྱིན་དང་མཚུངས་པ་ཡིན་ཡང་འགྱུར་རོ། །སྐྱེ་བོས་དབེན་པའི་ས་ཕྱོགས་སུ་གཅིག་བུར་གྱུར་པས་རྗེ་བཙུན་གྱི་ཐད་ཀ་གསལ་བར་བྱས་ཏེ། ཕྱོགས་བཅུ་ན་བཞུགས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ཏེ། མིའི་རུས་པ་བཅད་པའི་ཁྲག་ཆེན་པོ་བྱ་རོག་གི་ཁྲག་དང་བསྲེས་ནས། སོར་བཅུ་གཉིས་པའི་ཚད་ཀྱི་འཁོར་ལོ་རྩིབས་བཅུ་གཉིས་པོའི་དབུས་སུ་ས་བོན་བཅུ་གཉིས་པོ་དེ་ལ་དགྲའི་མིང་མང་དུ་ཚེག་དྲག་དང་བཅས་པ་ཡང་དག་པར་སྦྱར་ཏེ། ཋ་ཡིག་གསུམ་གྱིས་ཕྱི་སྐོར་ཏེ་བྱ་རོག་གི་སྐེ་ལ་བཏགས་ནས་གལ་ཏེ་རྒྱུན་རབ་ཏུ་འབབ་པ་ལ་བསྐུར་ན་དེ་གཟུང་དུ་མེད་དོ། །དེ་བཞིན་དུ་ས་བོན་བཅུ་གཉིས་བྲིས་ཏེ། ཕཊ་ཕཊ་ཧཱུྃ་ཧཱུྃ་ན་ན་ཏཱ་ཀྲྀ་ཝི་ཥྚཱིཿཧྲཱིཿཨོཾ། ཇི་ལྟ་བའི་དངོས་པོ་མཆོད་པ་བྱས་ཏེ། སྟོབས་ཆེན་པོའི་སྤོས་བྱིན་ཏེ་རྒྱུན་རབ་ཏུ་འབབ་པ་ལ་བསྐུར་ན་དེ་གཟུང་དུ་མེད་དོ། །མི་འདོད་ན་བྱ་རོག་གི་གཤོག་པ་ལ་ལན་བདུན་དུ་མངོན་པར་བསྔགས་ཏེ། །མིང་ནང་དུ་བྱས་ཏེ་དགྲའི་སྒོ་ལ་སྦས་ན་འཁོར་དང་བཅས་པ་ངེས་པར་སྐྲོད་པར་འགྱུར་རོ། །དེ་བཞིན་དུ་འཁོར་ལོ་རྩིབས་བཅུ་གཉིས་པའི་དབུས་སུ་ཚ་བ་གསུམ་དང་དུག་དང་སྐེ་ཚེ་རྣམས་རུས་པ་ཆེན་པོའི་སྨྱུ་གུས་མེའི་ས་བོན་གྱི་དབུས་ཀྱི་དབུས་སུ་ཚེག་དྲག་དང་བཅས་ཤིང་བྷ་ཡིག་གཉིས་ཡང་དག་པར་སྦྱར་ཏེ། །ཋ་ཡིག་གསུམ་གྱིས་ཕྱི་བསྐོར་ཏེ་ལྕི་བའི་མེ་ལ་བསྲེགས་ན་བུ་དང་ཆུང་མ་དང་འཁོར་དང་བཅས་པ་དེའི་སྐད་ཅིག་ལ་འཆི་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་རྒྱལ་པོ་

སྒྲུབ་པ་སྟེ་རིམ་པར་ཕྱེ་བ་ལྔ་པའོ།། །།དེ་ནས་ཕ་རོལ་དམག་ཚོགས་རྣམས། །ཉམས་བྱ་བདག་གིས་བཤད་པར་བྱ། །བྲམ་ཟེ་མོ་ཡི་རྡུལ་གོས་ལ། །རྒྱལ་ཟླ་ཉིད་ལ་ཡང་དག་བརྩམ། །མ་ཧེའི་གདོང་ཅན་རི་མོ་བྲི། །ལག་པ་བརྒྱ་ནི་རབ་གསལ་ལ། །མཚོན་ཆ་ཤིན་ཏུ་རྣོ་བ་རྣམས། །ཐམས་ཅད་དུ་ནི་བྲི་བར་བྱ། །རི་མོ་དཀར་པོ་རྫོགས་པ་ལ། །པདྨ་དཀར་པོས་མཆོད་པར་བྱ། །སྔགས་ནི་འབུམ་དུ་བཟླས་བྱས་ཏེ། །པདྨ་ཡང་ནི་དེ་བཞིན་ནོ། །རི་མོ་མདུན་དུ་གཞག་བྱ་སྟེ། །བ་དན་སྟེང་དུ་བཟུང་བྱས་ན། །སྐྱེ་བོ་གང་གིས་མཐོང་རྣམས་ཀྱི། །རྐང་གཉིས་རྐང་བཞི་ལ་སོགས་རྣམས། །ཐམས་ཅད་དེ་ལ་ལྟ་མི་ནུས། །སེང་གེ་གླང་ཆེན་མཐོང་བ་བཞིན། །དེ་ནས་གཞན་ཡང་ཚངས་ས་བོན། །ཁྲི་བཟླས་ཞག་ཆེན་སྟ་རེས་བཅད། །རྔ་མོའི་ཆུ་དང་སྦྱར་བྱས་ཏེ། །བརྟུལ་ཞུགས་ཅན་གྱིས་རི་མོ་བྱ། །རང་གི་དམག་གདོང་ཐིག་ལེ་བྱ། །ཕ་རོལ་དམག་རྣམས་རྣམ་པར་འཇིག །མྱ་ངན་མེད་ཀྱི་ལྗོན་ཤིང་འོག །འགྲོ་ཞིང་བརྒྱད་དམ་བཅུ་བཞི་ལ། །ཟླ་བ་གཅིག་གི་ཐུན་མཚམས་གསུམ། །སྔོན་བསྙེན་འབུམ་ཕྲག་གཅིག་བྱས་ནས། །ཨོཾ་སིདྷཱ་ན་ཏ་ནཱ་ལ་ཧཱ་རི་ཎི་པ་ར་སཻ་ནྱ་བི་ནཱུ་སི་ནི་ཧྲཱིཿ སྭཱ་ཧཱ། །དེ་རྣམས་ཀྱིས་ནི་འགྲུབ་འགྱུར་ཏེ། །མཐོང་བར་གྱུར་པ་ཙམ་གྱིས་ནི། །ཕ་རོལ་དམག་རྣམས་རྣམ་པར་འཇིག །གཤིན་རྗེ་ཡི་ནི་སྣང་བ་ཡིས། །དེ་རྣམས་ཀྱང་ནི་འབྲོས་པར་འགྱུར། །དེ་ནས་གཞན་ཡང་ཤིང་གཅིག་དྲུང་དུ་སོང་ནས་ནི། །རོ་ནི་སྦྱངས་པ་མཆོག་ལ་ནི། །གཡས་ན་རལ་གྲི་བཟུང་བྱས་ནས། །གཡོན་བརྐྱང་བ་ཡི་ཞབས་ཀྱིས་སོ། །ཧྲཱིཿཥྚྲཱིཿལ་སོགས་སྔགས་རྣམས་ནི། །མཐའ་དག་མཚན་མོ་བཟླས་པར་བྱ། །དེ་ལ་རལ་གྲི་འཕྲོ་བ་སྟེ། །དེ་ཡིས་ཕ་རོལ་དམག་རྣམས་འཇོམས། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཕ་རོལ་གྱི་དམག་ཉམས་པར་བྱ་བ་སྟེ་རིམ་པར་ཕྱེ་བ་དྲུག་པའོ།། །།དེ་ནས་རྒྱལ་པོ་རྡོ་རྗེ་འཆང་། །མི་སྣང་སྒྲུབ་པར་རབ་བཤད་དེ། །དང་པོ་རྣལ་འབྱོར་བ་མི་སྣང་བ་བསྒྲུབ་པའི་ཕྱིར་རྒྱལ་གྱི་ཉི་མའི་ཉི་མ་ལ་བརྩམ་པར་བྱའོ། །ཡང་དག་པའི་

བསམ་པས་སྔོན་དུ་འབུམ་བཟླས་པས་དེ་གྲོལ་བར་འགྱུར་རོ། །ཉི་མ་བཟུང་བའི་དུས་ལ་པ་ཎི་ཊ་ག་རའི་རྩ་བ་དང་། དངུལ་ཆུ་དང་། ཁྃ་གཱ་རི་དང་། དཎ་ཌའི་རྩ་བ་དང་ཐམས་ཅད་གཅིག་ཏུ་རིལ་བུ་བྱས་ཏེ་ཁར་བཅུག་པས་མི་མཐོང་བར་འགྱུར་རོ། །དེ་ནས་གཞན་ཡང་ཁོ་ཊཱི་ཛཱ་ལ་ཀི་ཛ་ཡན་ཏི་དང་། རྒན་པོ་འཇོམས་པའི་རྩ་བ་དང་། ཐམས་ཅད་སྦལ་པའི་ཤ་དང་ཆ་མཉམ་དུ་བྱས་ཏེ་ཉི་མ་གསུམ་བསྐམས་ནས་རིལ་བུ་ཁར་བཅུག་ན་མི་སྣང་པར་འགྱུར་རོ། །དེ་ནས་གཞན་ཡང་ཉི་མ་གཟས་བཟུང་བའི་དུས་སུ་ཨུ་ཀ་ནུ་ཁྃ་དང་། དངུལ་ཆུ་དང་གསེར་དང་དྷ་དུ་ར་ཞེས་པ་རྣམས་རྟ་རྒོད་མའི་ཆུ་དང་ཡང་དག་པར་སྦྱར་ནས་རིལ་བུ་བྱས་ཏེ་ཁར་བཅུག་ན་མཆོག་ཏུ་མི་སྣང་ངོ་། །དེ་ནས་གཞན་ཡང་བྱི་བའི་མིག་དང་བྱ་རྒོད་ཀྱི་མིག་དང་འོག་སྐྱོང་གི་མིག་དང་ཆ་མཉམ་དུ་རིལ་བུ་གཅིག་ཏུ་བྱས་ཏེ་ཁར་བཅུག་ན་དེའི་སྐད་ཅིག་ལ་མི་སྣང་བར་འགྱུར་རོ། །དེ་ནས་གཞན་ཡང་གཟའ་ཉི་མ་ལ་བྱི་བའི་མིག་རབ་ཏུ་བླངས་ཏེ། རམས་དང་ཙི་ཏྲ་ཀའི་རྩ་བ་དང་། བྱ་རྒོད་ཀྱི་ཁྲག་དང་སྦྱར་ཏེ་རིལ་བུ་ཁར་བཅུག་ན་མི་སྣང་བའི་མཆོག་གོ །དེ་ནས་གཞན་ཡང་པཱ་ཤཱིའི་ཤ་དང་། བ་ཧུ་རའི་འབྲས་བུ་མཉམ་དུ་དར་གོས་ཀྱིས་དྲིལ་ནས་བྲམ་ཟེའི་ཐོད་པ་ལ་མིག་སྨན་བྱའོ། །དེའི་མིག་སྨན་གྱིས་མིག་གཉིས་ལ་བྱུགས་ན་མི་སྣང་བར་འགྱུར་རོ། །དེ་ནས་གཞན་ཡང་ཙཎ་ཊ་ལཱིའི་མེ་ཏོག་དང་། ཤ་ཏཱ་བར་ཏི་དང་བྷ་དྲ་པ་ཀྵིའི་མིག་དང་དེ་རྣམས་རིལ་བུར་བྱས་ནས་ཁར་བཅུག་ན་མི་སྣང་བར་འགྱུར་རོ། །དེ་ནས་གཞན་ཡང་བྷ་དྲ་པཀྵ་ཎྃ་བཟུང་སྟེ་ཉི་མ་བདུན་གྱི་མཐར་ཐུག་པ་དངུལ་ཆུ་མ་ཤ་གཅིག་ཟས་སུ་བྱས་ནས་དེའི་བྲུན་གང་ཡིན་པ་དང་། དེ་ཡིས་བདག་ཉིད་ཀྱི་ཁུ་བ་དང་ལྷན་ཅིག་ཏུ་བྱས་ནས་ཐིག་ལེ་བྱས་ན་མི་སྣང་བར་འགྱུར་རོ། །འདི་ནི་མི་སྣང་བའི་རབ་ཏུ་བྱ་བའོ། །མིག་སྨན་བཤད་པར་བྱ་བ་ལ། རེ་ཞིག་དང་པོ་མིག་སྨན་གྱི་ཕྱིར་བཅོམ་ལྡན་འདས་ཀྱི་སྔགས་འབུམ་ཕྲག་ལྔ་ཡོངས་སུ་བཟླས་ཏེ་མིག་སྨན་སྒྲུབ་པ་བརྩམ་པར་བྱའོ། །སྲམ་དང་བྱ་རྒོད་དང་ཀུར་རཱ་རྣམས་ཀྱི་མིག་བླངས་ནས་ཚད་མཉམ་པར་བྱས་ཏེ་ས་འོག་གི་སྤྲང་གི་ཁུ་བ་ལ་དར་གོས་ཀྱི་སྡོང་བུས་མིག་སྨན་བྱའོ། །འདིའི་མིག་སྨན་གྱིས་སའི་མཐོངས་མཐོང་བར་

འགྱུར་རོ། །སྐར་མ་ལག་ལ་བྲྀ་ཧ་ཏཱི་དཀར་པོའི་རྩ་བ་དང་། ནག་པོ་ཛ་ཡན་ཏིའི་རྩ་བ་དང་། ཅེ་སྤྱང་གི་མིག་རྣམས་མཉམ་དུ་དོང་གི་སྦྲང་རྩི་དང་ལྷན་ཅིག་ཏུ་བྱས་ཏེ་ཐིག་ལེ་བྱས་ན་སའི་མཐོངས་ལས་མཐོང་བར་འགྱུར་རོ། །སའི་འཁྲི་ཤིང་དང་བི་ཥཾ་ཀ་རཱིའི་རྩ་བ་དང། ཙ་སེན་དང་། རྡུལ་དང་ལྷན་ཅིག་ཏུ་དར་གོས་ལ་གཞོན་ནུ་མས་བཀལ་པའི་སྲད་བུས་དཀྲིས་ནས་སྡོང་བུ་བྱས་ཏེ་མིའི་ཐོད་པ་ལ་དྲེག་པ་བྲུས་པའི་མིག་སྨན་གྱིས་གཏེར་རྣམས་ངེས་པར་མཐོང་ངོ་། །དེ་ནས་གཞན་ཡང་རྒྱལ་གྱི་ཟླ་བ་སྐར་མ་སྣུབས་ལ་རྡུལ་གྱི་གོས་བཟུང་སྟེ། བརྒྱད་དམ་ཡང་ན་བཅུ་བཞི་ལ་རྡོ་རྗེ་ཙརྩི་ཀཱའི་རི་མོ་མངོན་བར་བྲིས་ནས་མཆོད་པ་ཆེན་པོ་བྱས་ཏེ། མཚན་མོ་གཅིག་ཁྲི་བཟླས་ན་རྨི་ལམ་དུ་གཏེར་ངེས་པར་མཐོང་ངོ་། །གཞན་ཡང་ནིམ་པའི་ཤིང་ལྗོན་པའི་འོག་ཏུ་ཕྱིན་ཏེ་བརྒྱད་དང་ཡང་ན་བཅུ་བཞི་ལ་རི་མོའི་མདུན་དུ་ཙརྩི་ཀཱ་བསྒོམ་པར་བྱ་ཞིང་། ཅེ་སྤྱང་གི་མགོ་བོའི་སྟེང་དུ་ཁྲི་བཟླས་སོ། །ཙརྩི་ཀཱ་འོངས་ནས་བདག་གིས་ཅི་བྱ་ཞེས་འདྲི་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་ལ་མིག་སྨན་གྱི་དངོས་གྲུབ་གནང་བར་མཛོད་ཅིག །དངུལ་ཆུ་དང་བཅུད་ཀྱིས་ལེན་ཡང་སྩོལ་ཅིག་ཅེས་སོ། །གི་ཝང་དང་ཤ་ལའི་མིག་དང་དངུལ་ཆུ་དང་ཤཱི་ཏ་ལཱིའི་ཁུ་བ་དང་དོང་གི་སྦྲང་རྩི་རྣམས་མཉམ་དུ་རིལ་བུ་བྱས་ཏེ་འདིའི་མིག་སྨན་གྱིས་སའི་མཐོངས་ལས་མཐོང་བར་འགྱུར་རོ། །ཅེ་སྤྱང་གི་མིག་དང་བྱ་རྒོད་ཀྱི་མིག་དང་ཀུ་ར་རཱའི་མིག་རྣམས་དེ་བཞིན་དུ་གཡོན་ལ་གཡོན་དང་། གཡས་ལ་གཡས་བླངས་ཏེ་ཞག་ཆེན་པོའི་དྲེག་པ་བྱའོ། །འདིའི་མིག་སྨན་གྱིས་སའི་མཐོངས་ལས་མཐོངས་ལས་མཐོང་བར་འགྱུར་རོ། །དེ་ནས་གཞན་ཡང་གི་ཝང་དང་མིའི་མཁྲིས་པ་དང་ག་བུར་དང་དངུལ་དང་དེ་བཞིན་དུ་ཟས་སྦྱིན་པར་བྱའོ། །འདིའི་མིག་སྨན་གྱིས་སའི་མཐོངས་ལས་མཐོང་བར་འགྱུར་རོ། །དེ་ནས་གཞན་ཡང་སྣ་ཚོགས་པའི་དངོས་གྲུབ་ཀྱི་དོན་དང་ནོར་དང་འབྲུ་ལ་སོགས་པའི་ཕུན་སུམ་ཚོགས་པ་རྣམས་དང་། རིག་བྱེད་བརྒྱད་རྨོངས་པ་དང་། མཁའ་ལ་སྤྱོད་པ་སྟེར་བར་བྱེད་དོ། །སྔོན་དུ་བསྙེན་པའི་དོན་ལ་སྔགས་འབུམ་ཕྲག་གཅིག་བཟླས་ནས་དངུལ་ཆུ་བསྒྲུབ་པ་བརྩམ་པར་བྱའོ། །དང་པོ་

དངུལ་ཆུ་བླངས་ནས་ཙིཏྲ་ཀ་དམར་པོའི་ཁུ་བས་མཉེ་བར་བྱའོ། །དེའི་རྗེས་ལ་ཟངས་ཀྱི་ཕྱེ་མ་དང་། གསེར་གྱི་ཕྱེ་མ་བཞི་ཆ་སྦྱིན་ཏེ་ཤཱ་ཁོ་ཌའི་ཁུ་བས་བསྡུ་བར་བྱའོ། །གླང་པོ་ཆེའི་ཤ་དང་ལྷང་ཚེར་མཉམ་དུ་བྱས་ཏེ་ལུགས་ཀོང་གི་དབུས་སུ་ར་ཛྃ་ལ་བྱིན་ནས་སྦྱར་ཞིང་བཅིངས་པས་རྡོག་པོར་འགྱུར་རོ། །འདིའི་ཕྱེ་མར་ཏི་ཡིས་སྲང་ལ་བསྣུན་པར་གྱུར་ན་གསེར་དུ་འགྱུར་རོ། །འདིར་དངུལ་ཆུ་ཞག་ཆེན་ལ་མཉེས་ནས་ལྷང་ཚེར་དང་མུ་ཟི་ཞག་ཆེན་པོ་ལ་ཉི་མ་གསུམ་དུ་བཙོ་ཞིང་། ཡང་ཇི་སྲིད་རྡོག་པོར་མ་གྱུར་གྱི་བར་དུའོ། །སྦྲང་དང་ལྷན་ཅིག་ཟེགས་མ་རེ་ཟོས་ན་མི་དེ་ལོ་སྟོང་དུ་འཚོའོ། །དངུལ་ལ་བསྣུན་ན་གསེར་དུ་འགྱུར་རོ། །དེ་ནས་གཞན་ཡང་དཱ་ཧླཱ་པའི་ཁུ་བ་ནས་དངུལ་ཆུ་མཉེ་བར་བྱ་སྟེ་རྡོག་བོར་མ་སོང་གི་བར་དུའོ། །ཤཱིཏ་ལི་དང་ཛམྦྷི་རའི་ཁུ་བ་ལ་ཤཱ་ཁོ་ཌའི་འབྲས་བུ་བ་གུ་ལ་སོ་སོར་མཉམ་དུ་བྱིན་ནས་ལུགས་ཀོང་གི་ནང་དུ་བཅུག་སྟེ་དེས་དེ་བཞིན་དུ་ཡོངས་སུ་བྱུགས་ཏེ་ལུགས་ཀོང་བསྐམ་པར་བྱའོ། །ཕྱི་ནས་ལྕི་བའི་མེ་ལ་བསྲེགས་པས་རྡོག་པོར་འགྱུར་རོ། །ར་ཏི་གཉིས་ཀྱི་ཚད་ཀྱིས་ཉི་མ་ཉི་ཤུ་རྩ་གཅིག་ཏུའོ། །ཇི་སྲིད་དུ་ལོ་མ་དང་སྐྱུར་རྣམས་སྤོང་ངོ་། །ཐམས་ཅད་དུ་བུད་མེད་བསྟེན་པ་སྤངས་པས་མི་དེ་ལོ་སྟོང་ཕྲག་བཅུ་གཉིས་འཚོ་ཞིང་མཁའ་སྤྱོད་འཐོབ་བོ། །སྤྱང་ཚེར་ལ་བསྣུན་ན་གསེར་དུ་འགྱུར་རོ། །དེ་ནས་གཞན་ཡང་རཉྫ་ནཱི་ལའི་ཁུ་བ་ལ་སུ་པར་ཎ་མཱ་ཀྵི་ཀྃ་དང་སྦྱར་བའི་སྙིང་པོ་དང་། དཱི་སྣ་ནེ་ན་དང་མཉེ་བར་བྱའོ། །ལྷང་ཚེར་དང་ན་ར་ཤེ་ཎའི་ཁུ་བ་བསྲེས་ཏེ་ལུགས་ཀོང་གི་ནང་དུ་བཅུག་ནས་ས་ཧ་རཱིའི་མར་ཁུས་སྦྱར་ན་ཟླ་བ་དྲུག་གིས་རྡོག་པོར་འགྱུར་རོ། །ལྕགས་བརྒྱད་ལ་བྱུགས་ན་ངེས་པར་གསེར་དུ་འགྱུར་རོ། །ཟོས་ན་མཁའ་སྤྱོད་ཐོབ་པར་འགྱུར་རོ། །མིག་ལ་བྱུགས་པ་ཙམ་གྱིས་ལོ་ལྔ་བརྒྱར་འཚོ་བར་འགྱུར་རོ། །དེ་ནས་གཞན་ཡང་དངུལ་ཆུ་ཀུ་མཱ་རཱའི་ཁུ་བས་མཉེས་ནས་སོ་མ་ལ་ཏ་དང་པ་ལཱ་ཤའི་རྩ་བ་དང་ནཱ་ག་གེ་སར་དང་བ་ཀུ་ལཾ་དང་བཙག་དང་ཀ་ཐི་ནཱི་དང་དེ་བཞིན་དུ་ནྱ་གྲོ་དྷའི་ལོ་མ་དང་། དེ་བཞིན་དུ་ཡང་མཉམ་དུ་ལུགས་ཀོང་གིས་ཁ་བཀབ་ཅིང་སྦྱར་བར་བྱའོ། །ཐུན་ཚོད་གཉིས་ཀྱིས་རྡོག་པོར་འགྱུར་རོ། །གཟེགས་མ་ཟོས་པ་ཙམ་གྱིས་ས་གསུམ་

ལ་ངེས་པར་འགྲོ་བར་འགྱུར་རོ། །ར་ཏི་ཙམ་གྱིས་ཟངས་སྲང་གསེར་དུ་ངེས་པར་འགྱུར་རོ། །དེ་ནས་གཞན་ཡང་དངུལ་ཆུ་ཤི་རི་ཁན་དའི་འོ་མས་དར་ཙམ་མཉེས་ལ་མུ་ཟི་དང་མཉམ་དུ་ཟངས་ཀྱི་སྣོད་དུ་ཛཾ་བི་རའི་ཁུ་བས་མཉེས་ཏེ་ཉི་མ་ལ་བསྐམ་པར་བྱས་ན་རྡོག་པོར་འགྱུར་རོ། །ལུགས་ཀོང་གི་ནང་དུ་བཅུག་ཅིང་སྦྱར་ཏེ་ཐུན་ཚོད་གཉིས་ཀྱིས་སོ། །ཤིན་ཏུ་གྲངས་པ་དང་བཏོན་ནས་ར་ཏིའི་ཚད་ཀྱིས་མནན་ཏེ་ཟངས་ལ་བསྣུན་ན་གསེར་དུ་འགྱུར་རོ། །ལུས་ལ་བྱུགས་པས་སྐྲ་དཀར་གཉེར་མ་དང་བྲལ་བར་འགྱུར་རོ། །དེ་ནས་གཞན་ཡང་དངུལ་ཆུ་དང་བཱ་ལཱའི་རྩ་བ་མཉེ་བར་བྱའོ། །སླར་ཡང་ཙཎྜཱ་ལིའི་མེ་ཏོག་དངུལ་ཆུ་དང་མཉེ་བར་བྱའོ། །རྩབས་དང་རྣམ་པར་སྣང་མཛད་ཀྱི་ཁུ་བས་སླར་ཡང་མཉེ་བར་བྱའོ། །དེའི་རྗེས་སུ་བཞི་ཆའི་ཚད་ཀྱིས་གསེར་གྱི་ཕྱེ་མ་ལ་བྱིན་པས་རྡོག་པོར་འགྱུར་རོ། །འདབ་མ་བདུན་པའི་ལུགས་ཀོང་གི་ནང་དུ་གླང་པོ་ཆེའི་རྐང་པའི་ཚད་ཀྱི་ཐུམ་པོ་ལ་བྱིན་པ་ལས་རྡོག་པོར་འགྱུར་རོ། །དེ་བཏོན་ནས་ར་ཏིའི་ཚད་ཀྱིས་ཟངས་ལ་བསྣུན་ན་གསེར་དུ་འགྱུར་རོ། །ལུས་ལ་ཡང་ར་ཏིའི་ཚད་ཀྱིས་ཉེས་བ་གསུམ་འཇོམས་པར་འགྱུར་རོ། །རྣལ་འབྱོར་ཆེན་པོ་རྣམས་ཀྱི་འདུ་བའི་ནང་འཚོ་བར་འགྱུར་རོ། །ཟོས་པ་ཙམ་གྱིས་རྒྱང་གྲགས་བརྒྱར་འགྲོ་ནུས་སོ། །དེ་ནས་གཞན་ཡང་དངུལ་ཆུ་ཙམ་གནས་པ་ལ་རྡོ་རྗེ་དང་ངེས་པར་ཏི་ཥ་དང་ཏྲི་ཧཱིའི་རྩ་བ་དང་། ཀ་རཉྫཉྩ་དང་མ་ནུའི་རྩ་བ་དང་མཉེ་བར་བྱའོ། །བ་ཎི་ཊ་པ་ཤཱུར་ཎ་སྦྱར་ཏེ་ལུགས་ཀོང་ནང་དུ་སྦྱར་བར་བྱའོ། །མཚན་མོ་རིལ་པོ་བསྲེགས་པས་དེ་འགྲུབ་སྟེ། ར་ཏིའི་ཚད་བླངས་ནས་ཟངས་ལ་བསྣུན་པས་དེ་འགྲུབ་བོ། །ར་ཏི་ཙམ་གྱིས་བཟའ་བས་སྐྲ་དཀར་དང་གཉེར་མ་དང་བྲལ་བར་འགྱུར་རོ། །ཟླ་བ་དྲུག་ཏུ་རབ་ཏུ་སྦྱོར་བས་ལོ་སྟོང་འཚོ་བར་འགྱུར་རོ། །དེ་ནས་གཞན་ཡང་སྦྱོར་བ་དེ་བཞིན་དུ་དངུལ་ཆུ་སྲང་གཅིག་བཟུང་ནས་ཤྲིང་[གཱིའི་]བུ་བ་དང་མཉེ་བར་བྱའོ། །ཨ་བྷྲ་ཊཾ་དང་གསེར་གྱི་གཟེགས་མ་སྦྱར་ལ། །ཤྲིང་གཱི་དམར་པོ་དང་མཉམ་སྟེ་ཙི་ཊི་པཱའི་ཁུ་བ་བླངས་ཏེ། ཉི་མ་བཅུ་གཉིས་དེའི་རྗེས་སུ་ལུགས་ཀོང་གི་ནང་དུ་བཅུག་ནས་སྦྱར་བར་བྱའོ། །གླང་པོ་

ཆེའི་རྐང་པའི་ཚད་ལས་ཕྱུང་སྟེ་མཉམ་དུ་བླངས་ནས་ར་ཏིའི་ཚད་གཞུག་པར་བྱའོ། །ཟངས་མ་ལ་བསྣུན་ན་མ་ལུས་པ་ངེས་པར་གསེར་དུ་འགྱུར་རོ། །ཟོས་པས་ཡུན་རིང་དུ་འཚོ་ཞིང་མཁའ་སྤྱོད་དུ་འགྲོ་བར་ཐེ་ཚོམ་མེད་དོ། །གནོད་སྦྱིན་དང་མིའམ་ཅིའི་བདག་པོ་རྣམས་ཞམ་རིང་བྱེད་བར་འགྱུར་ཞིང་གཤིན་རྗེའི་འཇིག་རྟེན་དུ་མི་འགྲོའོ། །དེ་ནས་གཞན་ཡང་ལྷང་ཚེར་ནག་པོ་སྲང་གཅིག་དང་སྦལ་པའི་ལོ་མའི་ཁུ་བས་སྦྱར་བའི་དངོས་པོ་ཟླ་བ་ཕྱེད་མཚལ་དང་རོ་མཉམ་པར་བྱས་ཏེ་ཟླ་བ་གཅིག་གི་ཚད་ཀྱིས་ཆུ་གྲང་མོ་དང་བཅས་ཏེ་བཟའ་བར་བྱའོ། །ཟླ་བའི་སྦྱོར་བས་རྣལ་འབྱོར་གྱི་བདག་ཉིད་ནད་དང་འཆི་བ་མེད་པར་འགྱུར་རོ། །དེ་ནས་གཞན་ཡང་ལྕགས་སྲང་ཙམ་བཟུང་སྟེ་རེ་ཏྱའི་ཕྱེ་མའི་རབ་ཏུ་བྱེད་པ་དང་། ཀ་ཤཱིའི་ཁུ་བ་དང་མཉམ་དུ་སྦྱར་ཏེ་ཉི་མའི་འོད་ཟེར་ལས་བསྐམ་པར་བྱའོ། །དངུལ་ཆུ་དང་ལྷང་ཚེར་དང་མུ་ཟི་རྣམས་དེའི་བཞི་ཆའི་ཚད་སྦྱོར་བ་ལས་ཀ་ཀོ་ལ་དང་ལི་ཤིའི་ཕྱེ་མ་རྣམས་སྔོན་མའི་ཚད་ལས་ཕྱེད་དང་གཉིས་སོ། །ཐམས་ཅད་གཅིག་ཏུ་བྱས་ཏེ། །ལྕགས་དང་མཉེ་བར་བྱ་སྟེ་རྡོ་བརྟན་པོ་ལའོ། །ལུགས་ཀོང་གི་ནང་དུ་བཅུག་སྟེ་ཁ་བཅད་ནས་སྦྱར་ཏེ་ལྕི་བའི་མེ་ལ་བསྲེག་པར་བྱའོ། །དེ་ནས་ཕྱུང་སྟེ་ལྕགས་ཆེན་པོ་དང་མཱ་ཤའི་ཚད་ཀྱིས་ཟོས་ན་སྐྲ་དཀར་གཉེར་མ་རྣམ་པར་འཇོམས་ཤིང་ནང་དང་འཆི་བས་མི་ཚུགས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་མི་སྣང་བ་དང་མིག་སྨན་དང་བཅུད་ལེན་སྒྲུབ་པ་སྟེ་རིམ་པར་ཕྱེ་བ་བདུན་པའོ།། །།དེ་ནས་རྡོ་རྗེ་འཛིན་པའི་རྒྱལ་པོས་གྲིབ་གནོན་གྱི་རབ་ཏུ་བྱེད་པ་གསུངས་པ་འདི་ལྟ་སྟེ། དགྲ་བོ་རྐང་བཞི་པ་རྣམས་ཀྱི་ཆད་པའི་རབ་ཏུ་སྦྱོར་བ་འདི་གསུངས་ཏེ། དང་པོར་རེ་ཞིག་གཤིན་རྗེ་གཤེད་འཇིགས་སོ། །སེམས་ཅན་ཀུན་གྱི་རྨོངས་བྱེད་བསྒོམ་པར་བྱ། །རང་གི་ཁྱིམ་དུ་མཚན་མོའི་དུས། །སྟག་གི་པགས་པའི་སྟན་ལ་གནས། །ཞལ་གཅིག་དམར་པོ་ཤིན་ཏུ་རྔམ། །ཞགས་པ་དང་ནི་ལྕགས་ཀྱུ་འཛིན། །རོ་ཡི་སྟེང་དུ་འཇིགས་ཆེན་གནས། །སྤྱན་གསུམ་ཤིན་ཏུ་འཇིགས་པར་བྱེད། །ལྷ་རྣམས་ཐམས་ཅད་རྨོངས་བྱེད་པ། །མེ་སྟག་ཚོགས་པས་འཁྲིགས་པ་

སྟེ། །དེ་བཞིན་བསྒོམ་ཞིང་བཟླས་པ་འབུམ། །ཕྱི་ནས་ཆོ་གས་སྤྱད་པར་བྱ། །ཀ་ར་བཱི་ར་དཀར་པོའི་རྩ། །དེ་བཞིན་དནྟི་དམར་པོའི་རྩེ། །སྦལ་པའི་ཁྲག་གིས་སྦྱར་བྱས་ཏེ། །བརྟུལ་ཞུགས་ཅན་གྱིས་ཐིག་ལེ་གཟུང་། །གང་གི་གྲིབ་མ་རྐང་པས་མནན། །དེ་ནི་བརྒྱལ་བར་བྱེད་འགྱུར་ཏེ། །རྐང་གཉིས་པ་དང་རྐང་བཞི་དག །ཐམས་ཅད་རྨོངས་པ་ཐེ་ཚོམ་མེད། །གཟའ་ནི་ཉི་མའི་དཀར་ཕྱོགས་ལ། །ལྟོ་བ་ལས་བྱུང་སྲིན་བུ་ལ། །དེ་རྙེད་ནས་ནི་འབད་པ་ཡིས། །ཤྲིང་གཱི་ཎ་ཡིས་ཐིག་ལེ་བྱ། །དཔྲལ་བར་ཐིག་ལེ་བྱིན་པ་ཡིས། །གང་གི་གྲིབ་མ་འཕྲོ་བར་བྱེད། །གལ་ཏེ་མྱོས་ཐོབ་གྲོལ་བྱེད་ན། །འོ་མས་གཏོར་བས་བདེ་བར་བྱེད། །དནྟཱི་རོ་ཧ་ལུང་ཐང་ནག །དེ་རྣམས་རྩ་བ་གཅིག་ཏུ་བྱས། །བྱ་རོག་ཁྲག་གིས་སྦྱར་བྱས་ཏེ། །བརྟུལ་ཞུགས་ཅན་གྱིས་ཐིག་ལེ་བྱ། །ཐིག་ལེ་འདི་ཡི་མཐུ་ཡིས་ནི། །ལྷ་རྣམས་ཀྱང་ནི་རབ་ཏུ་གཡོ། །ཕྱག་ནི་བཙལ་བར་མི་བྱ་སྟེ། །བྱས་ན་དེ་ནི་བརྒྱལ་བར་འགྱུར། །དེ་བཞིན་གཞན་ཡང་རབ་སྦྱོར་ཏེ། །ར་ས་ཤྲིང་གཱི་ཀུ་ཐཱ་རི། །ཕ་ཎི་ནཱ་ག་པ་ཎི་དང་། །དེ་རྣམས་ཐམས་ཅད་ཟླ་བ་ཡིས། །བརྟུལ་ཞུགས་ཅན་གྱིས་རིལ་བུ་བྱ། །ནམ་མཁའི་རང་བཞིན་ཆུ་ཡིས་ནི། །ཐིག་ལེ་སྤྱི་བོར་གཟུང་བར་བྱ། །ཕྱག་འཚལ་གདོང་དུ་བལྟས་པ་ཡིས། །མི་དེ་ཁྲག་ཏུ་སྐྱུག་པར་འགྱུར། །ཀཱ་མ་ཙཱ་དང་མ་དྷུ་དཀར། །ཁུ་བྱུག་དཀར་པོའི་མིག་རྣམས་ནི། །ནམ་མཁའི་ཆུ་དང་ཡང་དག་ལྡན། །སྤྱི་བོ་རུ་ནི་ཐིག་ལེ་བྱ། །ཐིག་ལེ་དེ་ཡི་མཐུ་ཡིས་ནི། །དགྲ་རྣམས་དབང་དུ་འདུ་བར་འགྱུར། །གང་ལ་ཕྱག་ནི་བཙལ་གྱུར་ན། །དེ་ནི་ངེས་པར་རྨོངས་འགྱུར་ཏེ། །དེ་ནས་གཞན་ཡང་རབ་སྦྱོར་ཏེ། །ལྟོས་འགྲོ་ནག་པོའི་ལྕེ་དང་ནི། །དེ་བཞིན་ན་ཀུ་ལ་ཡི་ལྕེ། །བྱི་བའི་མཁྲིས་པ་ཡང་དག་བསྲེས། །རིལ་བུ་ཁྲི་ཕྲག་ལྔ་བྱས་ནས། །འདི་ཡི་ཐིག་ལེའི་མཐུ་ཡིས་ནི། །ཁྲོ་བོའི་སྔགས་འཇུག་དེ་ལ་འགྲོ། །རྒྱལ་པོ་རྟག་ཏུ་རྨོངས་འགྱུར་ཏེ། །གདུག་པ་ཅན་དང་ལྷན་ཅིག་གོ །དེ་ནས་གཞན་ཡང་རབ་སྦྱོར་ཏེ། །བདུད་རྩི་རྩ་བ་ཨརྐ་དཀར། །བ་ཀུ་རི་ཡི་འབྲས་དེ་བཞིན། །དེ་རྣམས་ཆ་ནི་མཉམ་པོ་རུ། །མཁས་

པ་ཡིས་ནི་རིལ་བུ་བྱ། །འདི་ཡི་ཐིག་ལེ་རྟག་བཟུང་ན། །འཇིག་རྟེན་གསུམ་ནི་རྨོངས་པར་འགྱུར། །ཁ་ཡི་བདུད་རྩི་བླངས་ནས་ནི། །གཡོན་པ་ཡི་ནི་མིང་མེད་ཀྱིས། །སྔགས་འདིས་རིལ་བུ་ཐམས་ཅད་ལ་བྱིན་གྱིས་བརླབ་པར་བྱའོ། །ཨོཾ་མ་ཧཱ་ཡཀྵ་སེ་ནཱ་དྷི་པ་ཏ་ཡེ་མ་ཧཱ་དུར་དམྟཾ་ད་མ་ཀཱ་ཡ། །ནཱ་ཤ་ཡ་ནཱ་ཤ་ཡ། བི་ནཱ་ཤ་ཡ་བི་ནཱ་ཤ་ཡ། བི་ཏྲཱ་པ་ཡ་བི་ཏྲཱ་པ་ཡ། ཧཱུྃ་ཧཱུྃ་སརྦ་དུཥྚྲཱྃ་ཌཱྃ་ཕཊ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་གྲིབ་གནོན་བསྒྲུབ་པ་སྟེ། རིམ་པར་ཕྱེ་བ་བརྒྱད་པའོ།། །།འདིར་བཅོམ་ལྡན་འདས་ཀྱིས་རོ་ལངས་ལ་སོགས་པའི་སྒྲུབ་ཐབས་གསུངས་པ་ནི། ཨོཾ་ཧཱུྃ་ཛཱཿཨ་པ་རཱ་ཛི་ཏཿཨོཾ་ཧཱུྃ་ཛཿཨ་ཛི་ཏཿཨོཾ་ཧཱུྃ་ཛཿཔཱུ་ར་ཎ། ཨོཾ་ཧཱུྃ་ཛཿཨ་བཱུ་ར་ཎ། ཨོཾ་ཤྲཱཾ་ཛཿཤྨ་ཤཱ་ནཱ་དྷི་པ་ཏིཿ། ཨོཾ་རྱུཾ་ཛ་ཀུ་ལེ་ཤྭ་རཿ། ཨོཾ་ཧཱུྃ་ཛཿབྷཱུ་ཏེ་ཤྭ་རཿ། ཨོཾ་ཨཾ་ཛཿ། ཀིཾ་ཀ་རོ་ཏ་ཏ་མཿཞེས་པ་འདི་རྣམས་འབྱུང་པོའི་བདག་པོ་ཆེན་པོ་རྣམས་སོ། །གཞན་གྱིས་མི་ཐུབ་པ་སྒྲུབ་པར་གྱུར་ན་དཔལ་ལྡན་རྡོ་རྗེ་དབྱུག་པ་འཛིན་པའི་མདུན་དུ་སྔོན་དུ་བསྙེན་པ་འབུམ་བཟླས་པ་བྱས་ནས་དེ་རྫོགས་པ་དང་མཆོད་པ་རྒྱ་ཆེན་པོ་བྱས་ནས་ཟས་དཀར་པོ་དང་ཞོ་དང་བུ་རམ་དང་འོ་མའི་ཐུག་པས་ཇི་ལྟར་གསུང་བའི་མཆོད་པར་བྱའོ། །གུ་གུལ་གྱི་སྤོས་ཕུལ་ནས་མཚན་མོ་ཧྲིལ་པོ་བཟླས་པ་བྱའོ། །ཤིན་ཏུ་སྔ་བ་ན་ངེས་པར་འོང་བར་འགྱུར་རོ། །གལ་ཏེ་མ་འོངས་ན་དེའི་སྐད་ཅིག་ལ་འཆི་བར་བྱེད་དོ། །འོངས་ནས་གནང་བ་ཞུ་བར་བྱེད་དེ། །བདག་གིས་ཅི་བྱ་ཞེས་སོ་སྒྲུབ་པ་པོས་སྨྲ་བར་བྱ་སྟེ། །བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་སྟེ་གང་བསྒོ་བའི་ལས་རྣམས་བྱེད་དོ། །རིག་པ་འཛིན་པ་དང་རྒྱལ་པོ་ཡང་སྟེར་རོ། །དགྲ་རྣམས་ལ་ཆད་པས་གཅོད་པར་བྱེད་དོ། །ཟླ་བའི་ལྷ་མོ་ཡང་བླངས་ནས་སྟེར་རོ། །རྒྱབ་ལ་ཞོན་པས་ལྷའི་འཇིག་རྟེན་དུ་འགྲོ་ཞིང་བརྒྱ་བྱིན་ཡང་སྟེར་རོ། །བསྐལ་བ་བདུན་དུ་འཚོ་བར་འགྱུར་རོ། །དེ་ནས་ཨ་ཛི་ཏ་སྒྲུབ་པར་གྱུར་ན་མཆོད་རྟེན་གྱི་མདུན་དུ་མཚན་མོ་སྟོང་ཕྲག་བརྒྱད་བཟླས་པ་བྱས་ཏེ། ཉི་མ་བདུན་པའམ་བརྒྱད་པ་ལ་མཆོད་

པ་རྒྱ་ཆེན་པོ་བྱས་ཏེ་གཏོར་མ་ཕུལ་ནས་གུ་གུལ་གྱི་སྤོས་ཕུལ་ཏེ་བཟླས་པ་བྱའོ། །བཟླས་པའི་མཐའ་ལ་ངེས་པར་འོང་བར་འགྱུར་ཏེ། །ཀྱཻ་སྒྲུབ་པ་པོ་བདག་གིས་ཅི་བགྱི་ཞེས་སོ། །སྒྲུབ་པ་པོས་སྨྲ་བར་བྱ་སྟེ། །བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་བཟུང་ནས་བསྒོ་བའི་ལས་རྣམས་བྱེད་པར་འགྱུར་རོ། །སླར་ཡང་རྒྱལ་པོ་སྟེར་ཞིང་ལོ་སྟོང་དུ་འཚོ་བར་འགྱུར་རོ། །དེ་ནས་གང་སྒྲུབ་པར་གྱུར་ན་རྡོ་རྗེ་འཛིན་པའི་ཁང་བར་ཞུགས་ཏེ་སྟོང་ཕྲག་བརྒྱད་བཟླས་པར་བྱའོ། །ཉི་མ་བདུན་པའམ་ཉི་མ་བརྒྱད་པ་ལ་གཏོར་མ་དང་མཆོད་པ་རྒྱ་ཆེན་པོ་བྱས་ཏེ། །ཁ་ཟས་དཀར་པོ་དང་ཞོ་དང་ཇི་སྐད་བཤད་པའི་མཆོད་པ་ཕུལ་ནས་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པར་བྱའོ། །ཇི་སྲིད་ནམ་ཕྱེད་དུ་གྱུར་པ་ན་རང་ཉིད་འོང་བར་འགྱུར་རོ། །མེ་ཏོག་དང་མཆོད་ཡོན་ཕུལ་ཏེ་ཚིམ་བར་བྱས་པས་རྒྱལ་པོ་སྟེར་བར་འགྱུར་རོ། །འདོད་པ་ཐམས་ཅད་ཡོངས་སུ་རྫོགས་པར་བྱེད་དོ། །ལོ་སྟོང་དུ་འཚོ་བར་འགྱུར་རོ། །ཇི་སྲིད་འཚོའི་བར་དུ་གང་བཅོམ་བའི་ལས་རྣམས་བྱེད་དོ། །ཆེ་གེ་མོ་སོད་ཅིག་ཅེས་པ་དང་། ཆེ་གེ་མོ་འཚོ་བར་གྱིས་ཤིག་ཅེས་པ་ཡང་བྱེད་དོ། །དེ་ནས་མ་གང་བསྒྲུབ་པར་གྱུར་ན་བདུད་དང་བཅས་པའི་མཆོད་རྟེན་གྱི་དྲུང་དུ་སྔོན་དུ་ཁྲི་བཟླས་ཏེ་བསྙེན་པ་བྱས་པར་གྱུར་པས་དེ་ནས་ཟླ་བ་ཡོངས་སུ་རྫོགས་པ་ལ་ཇི་སྐད་བཤད་པའི་དངོས་པོས་མཆོད་པ་བྱས་ནས་ཇི་སྲིད་ནམ་ཕྱེད་དུ་གྱུར་པ་དེ་སྲིད་དུ་བཟླས་པ་བྱའོ། །དེ་ནམ་ཕྱེད་ན་མྱུར་དུ་འོང་བར་འགྱུར་ཏེ་འོངས་ནས་མདུན་དུ་བསྡད་དེ་ཀྱཻ་བུ་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ་བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་བཟུང་སྟེ་ཅི་བཅོལ་བའི་ལས་རྣམས་བྱེད་དོ། །གནོད་སྦྱིན་གྱི་བུ་མོ་མཆོག་རྣམས་བླངས་ནས་སྟེར་བ་དང་། །འདོད་པའི་ཁ་ཟས་མཆོག་རྣམས་སྟེར་བ་དང་། །ཉི་མ་སོ་སོ་ལ་གུས་པས་གོས་ཟུང་དང་དོང་ཙེ་ལྔ་རབ་ཏུ་སྟེར་བར་འགྱུར་རོ། །ལོ་ལྔ་བརྒྱར་འཚོ་བར་འགྱུར་རོ། །དེ་ནས་དུར་ཁྲོད་ཀྱི་བདག་པོ་སྒྲུབ་པར་གྱུར་ན་མཚན་མོ་དུར་ཁྲོད་དུ་ཕྱིན་ནས་བཟླས་པ་སྟོང་ཕྲག་གཅིག་བྱའོ། །ཉི་མ་བདུན་པ་དང་བརྒྱད་པ་ལ་

རབ་ཏུ་མང་པོའི་ཉ་དང་ཏིལ་དང་ཛི་བུ་ལི་ཀ་དང་དཀར་བའི་ཟས་དང་ཞོ་དང་བུ་རམ་དང་དྷཱུ་པ་དང་འབྲས་བུ་དང་ཉེ་བར་སྤྱོད་པ་རྣམས་དང་ཇི་སྐད་གསུངས་པའི་གཏོར་མ་བྱིན་ཏེ་གུ་གུལ་གྱི་སྤོས་ཕུལ་ཏེ་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པ་བྱའོ། །དེའི་ནམ་ཕྱེད་ན་ཧཱ་ཧཱ་སྒྲོགས་པ་ཐོས་པར་འགྱུར་ཏེ། དེ་ལ་འཇིགས་པར་མི་བྱའོ། །དེ་འཁོར་གྱི་ཚོགས་ཀྱིས་ཡོངས་སུ་བསྐོར་ནས་འོང་བར་འགྱུར་རོ། །འོངས་པ་དང་གཏོར་མ་བྱིན་པས་ཚིམ་པར་འགྱུར་རོ། །འབྱུང་པོ་ཐམས་ཅད་གང་བསྒོ་བ་བྱེད་དོ། །ཉི་མ་རེ་རེ་ཞིང་དོང་ཙེ་བརྒྱད་བླང་བར་འགྱུར་རོ། །དགྲ་ཐམས་ཅད་འཇོམས་ཤིང་ལོ་སྟོང་དུ་འཚོ་བར་འགྱུར་རོ། །དེ་ནས་རིགས་ཀྱི་དབང་ཕྱུག་སྒྲུབ་པར་གྱུར་ན་ལྷའི་གནས་སུ་ཕྱིན་ནས་དྲི་དམར་པོ་དང་། མེ་ཏོག་དམར་པོ་དང་གུ་གུལ་ཕུལ་ནས་སྔོན་དུ་བསྙེན་པ་ཁྲི་བཟླས་པར་བྱའོ། །ནག་པོའི་ཕྱོགས་ཀྱི་བཅུ་བཞིའི་མཚན་མོ་ལ་ཉ་ཤ་དང་། ཏིལ་དང་། ཛཾ་བུ་ལི་ཀ་དང་། ཁ་ཟས་དམར་པོ་དང་། ཇི་ལྟ་བའི་མཆོད་པས་གཏོར་མ་དབུལ་བར་བྱ་ཞིང་སི་ཧླའི་སྤོས་ཕུལ་ནས་ཇི་སྲིད་ནམ་ཕྱེད་ཀྱི་བར་བཟླས་པ་བྱའོ། །དེ་ནས་འབར་བ་ཆེན་པོ་མཐའ་མེད་པ་ཤིན་ཏུ་འཇིགས་པའི་གཟུགས་འོང་བར་འགྱུར་རོ། །དེ་ལ་འཇིགས་པར་མི་བྱ་སྟེ། བུ་བདག་གིས་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ཇི་སྲིད་འཚོའི་བར་དུ་གང་བཅོལ་བའི་ལས་བྱེད་པར་འགྱུར་རོ། །ཉི་མ་རེ་རེ་ལ་དོང་ཙེ་ལྔ་ཐུན་མཚམས་གསུམ་དུ་སྟེར་བར་བྱེད་དོ། །འདོད་པའི་ཁ་ཟས་མཆོག་སྟེར་ཞིང་ལོ་ལྔ་བརྒྱ་འཚོ་བར་འགྱུར་རོ། །དེ་ནས་འབྱུང་པོའི་དབང་ཕྱུག་སྒྲུབ་པར་གྱུར་ན་ལིངྒ་གཅིག་པའི་དྲུང་དུ་ཕྱིན་ཏེ། །ཉིན་མཚན་གསུམ་དུ་དམར་བའི་ཟས་དང་ཉ་ཤ་དང་ཏིལ་དང་། ཛཾ་བུ་ལི་ཀའི་གཏོར་མ་བྱིས་པས་ཉི་མ་གསུམ་པ་ལ་བདག་ཉིད་མྱུར་དུ་འོངས་ནས་མདུན་དུ་འཁོད་དེ་བདག་གིས་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སྨྲས་པས་རྟག་ཏུ་རྗེས་སུ་འབྲང་ཞིང་ལྷའི་བུ་མོ་བླངས་ནས་སྟེར་བར་བྱེད་ཅིང་། རང་གིས་ཟས་

བླངས་ཏེ་སྟེང་གཡོགས་ནས་རྣམ་པ་སོ་སོར་སྟེར་བར་བྱེད་དོ། །ལོ་ཉིས་སྟོང་དུ་འཚོ་བར་འགྱུར་རོ། །དེ་ནས་མངག་གཞུག་པ་མཆོག་སྒྲུབ་པར་གྱུར་ན་རྡོ་རྗེ་འཛིན་པའི་ཁང་པར་ཞུགས་ནས་ནག་པོའི་བཅུ་བཞི་ལ་བཟླས་པ་ཁྲི་ཕྲག་གཅིག་བྱའོ། །སྔོན་དུ་བསྙེན་པ་བྱས་ནས་ཉི་མ་བདུན་པ་ལ་དེ་ནས་སྒྲུབ་པ་བརྩམ་བར་བྱའོ། །དཀྱིལ་འཁོར་ལ་ཙནྡན་གྱིས་བྱུགས་ཏེ་གུ་གུལ་གྱི་སྤོས་ཕུལ་ནས་དཀར་བའི་ཟས་དང་། ཞོ་དང་། མར་དང་། འོ་མ་དང་། ཀུ་ཤ་ཆུན་པོའི་སྟེང་དུ་མར་གྱི་མར་མེ་རབ་ཏུ་སྤར་ཏེ། མཚན་མོ་ཇི་སྲིད་པ་དེ་སྲིད་དུ་བཟླས་པར་བྱའོ། །ནམ་ཕྱེད་ན་མངག་གཞུག་པ་མཆོག་ཉིད་འོང་བར་འགྱུར་རོ། །འོངས་པ་ན་ཙནྡན་གྱི་མཆོད་ཡོན་ཕུལ་བས་ཚིམ་པར་བྱའོ། །བདག་གིས་ཅི་བྱ་ཞེས་འདྲི་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་སྟེ་གང་བཅོལ་བའི་ལས་རྣམས་བྱེད་པར་འགྱུར་རོ། །འདོད་པའི་འབྲས་བུ་ཐམས་ཅད་སྟེར་ཞིང་འདོད་པའི་དོན་ཐམས་ཅད་ཕུན་སུམ་ཚོགས་པར་བྱེད་དོ། །དེ་ནས་འདོད་པའི་དབང་ཕྱུག་མ་སྒྲུབ་པར་གྱུར་ན་གྲོ་གའི་ལོ་མ་ལ་གི་ཝང་གིས་གཟུགས་བརྙན་བྲིས་ཏེ། རང་གཅིག་པུ་ཉལ་སའི་སྟེང་དུ་བསྡད་ལ་སྟོང་ཕྲག་གཅིག་བཟླས་པ་བྱའོ། །དེ་ནས་ཟླ་བའི་མཐར་མཆོད་པ་རྒྱ་ཆེན་པོ་བྱས་ལ་མར་གྱི་མར་མེ་རབ་ཏུ་སྦར་ཏེ་མི་སྨྲ་བར་གྱུར་པས་བཟླས་པར་བྱའོ། །དེའི་ནམ་ཕྱེད་ན་ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་བས་ཆུང་མར་འགྱུར་རོ། །མཛེས་པའི་རྒྱན་དང་བཟའ་བ་དང་བཅས་ཤིང་ཉལ་ཏེ་ཉིན་མོ་ཡོངས་སུ་སྤངས་ཤིང་འགྲོའོ། །བུད་མེད་གཞན་དང་འགྲོགས་པ་སྤང་བར་བྱ་སྟེ། གཞན་དུ་ན་རྣམ་པར་འཇིག་པར་བྱེད་དོ། །དེ་ནས་ཀ་ན་མ་ནཱི་སྒྲུབ་པར་གྱུར་ན་ནྱ་གྲོ་དྷའི་ཤིང་དྲུང་དུ་ཕྱིན་ཏེ་ཆོ་གས་ཉ་ཤའི་གཏོར་མ་སྦྱིན་ནོ། །བདག་ཉིད་འཐུངས་པའི་ལྷག་མས་མཆོད་ཡོན་བྱིན་ལ་བཟླས་པ་སྟོང་ཕྲག་གཅིག་བྱའོ། །དེ་བཞིན་ད་ུཉི་མ་བདུན་པའི་མཚན་མོ་བདག་ཉིད་འོང་བར་འགྱུར་ཏེ། རྒྱན་ཐམས་ཅད་ཀྱིས་བརྒྱན་ཅིང་འཁོར་བརྒྱ་ཕྲག་གསུམ་དང་ལྷན་ཅིག་ཏུ་ནམ་ཕྱེད་ན་ངེས་པར་འོང་

བར་འགྱུར་རོ། །འོངས་པ་ན་འདོད་པ་བྱས་པས་ཆུང་མར་འགྱུར་རོ། །སྐྱེ་བ་བཅུ་གཉིས་ཀྱི་གོས་དང་རྒྱན་དང་བཟའ་བ་རྣམས་སྟེར་བར་བྱེད་དོ། །ཉི་མ་སོ་སོ་ལ་དོང་ཙེ་བརྒྱད་རབ་ཏུ་སྟེར་བར་བྱེད་དོ། །དེ་ནས་དགའ་མ་སྒྲུབ་པར་གྱུར་ན་ཐང་ཀ་ལ་རི་མོ་བྲི་བར་བྱ་སྟེ། གསེར་གྱི་མདོག་ཅན་རྒྱན་ཐམས་ཅད་ཀྱིས་བརྒྱན་པ་ལག་ན་ཨུཏྤལ་དང་ལྡན་པའོ། །ཛ་ཏིའི་མེ་ཏོག་གིས་མཆོད་པར་བྱའོ། །གུ་གུལ་གྱི་སྤོས་བྱིན་ནས་སྟོང་ཕྲག་བརྒྱད་བཟླས་པར་བྱའོ། །ཟླ་བའི་མཐའ་ལ་ཇི་ལྟ་བའི་དངོས་པོས་མཆོད་པ་བྱ་སྟེ། མར་གྱི་མར་མེ་རབ་ཏུ་སྦར་ལ་ཇི་སྲིད་ནམ་ཕྱེད་ཀྱི་བར་དུ་དེ་སྲིད་བཟླས་པ་ན་རང་ཉིད་འོང་བར་འགྱུར་རོ། །འོངས་པ་ན་མི་སྨྲ་བར་བསྒོམ་ཞིང་འདོད་པ་བྱས་པས་ཆུང་མར་འགྱུར་རོ། །སྒྲུབ་པ་པོའི་འཁོར་རྣམས་ནི་སྐྱོང་བར་འགྱུར་རོ། །འདོད་པའི་བཟའ་བ་མཆོག་རྣམས་དང་དངུལ་ཆུ་དང་བཅུད་ལེན་རྣམས་སྟེར་ཞིང་དོང་ཙེ་ཉི་ཤུ་རྩ་ལྔ་རབ་ཏུ་སྟེར་བར་བྱེད་དོ། །དེ་ནས་པདྨ་ནི་སྒྲུབ་པར་གྱུར་ན་རང་གི་ཁང་པར་སྤྱི་བོའི་གནས་སུ་དཀྱིལ་འཁོར་ལ་ཙནྡན་བྱུགས་ཏེ་གུ་གུལ་གྱི་སྤོས་ཕུལ་ལ་ཟླ་བ་གཅིག་ལ་སྟོང་ཕྲག་གཅིག་བཟླས་སོ། །དེ་ན་ཟླ་བ་ཡོངས་སུ་གང་བ་ན་ཇི་ལྟ་བའི་དངོས་པོས་མཆོད་པར་བགྱིས་ཏེ། ཇི་སྲིད་ནམ་ཕྱེད་པ་དེ་སྲིད་དུ་བཟླས་པས་ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་བས་ཆུང་མར་འགྱུར་རོ། །འདོད་པའི་མཆོག་རབ་ཏུ་སྟེར་ཞིང་དངུལ་ཆུ་དང་བཅུད་ལེན་དང་དངོས་གྲུབ་ཀྱི་རྫས་ཀྱང་སྟེར་བར་འགྱུར་རོ། །དེ་ནས་རལ་པ་གཅིག་མའི་སྒྲུབ་ཐབས་བདག་གིས་ཡང་དག་པར་རབ་ཏུ་བཤད་པར་བྱའོ། །གནོད་སྦྱིན་མོ་རྣམས་སྒྲུབ་པའི་དུས་སུ་རལ་བ་གཅིག་མ་རྣམ་པར་བསྒོམ་བར་བྱའོ། །ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ་ཁ་དོག་སྔོན་མོ། འཇིགས་པ་ཆེན་མོ་བྷ་གའི་དཀྱིལ་འཁོར་ལ་བསྒོམ་པར་བྱའོ། །ཤར་གྱི་འདབ་མ་ལ་ཛམྦྷ་ལ་བསྒོམ་པར་བྱའོ། །ནོར་བུ་འཛིན་པ་ནི་ལྷོ་རུའོ། །ཆུ་དབང་ནི་ནུབ་ཏུའོ། །ཙིའི་འཁྱིལ་བ་ནི་བྱང་དུའོ། །མེ་ལ་སོགས་པའི་མཚམས་བཞི་ལ་གནོད་སྦྱིན་མོ་བཞི་བསྒོམ་བར་བྱ་སྟེ། ཀུཎྜ་ལཱཾ་དང་། ཧ་ཌྷི་ནཱི་དང་། རོ་ཧྲཾ་དང་། མཛེས་

མ་རྣམས་ཆོ་གས་དགོད་པར་བྱའོ། །དེ་ནས་སྒོ་སྐྱོང་བསྒོམ་བྱ་ཞིང་། །དབྱུག་པ་ལ་སོགས་མཐའ་དག་ལ། །སྔོན་དུ་འཁོར་ལོ་ཇི་ལྟ་བཞིན། །དེ་བཞིན་ཁ་དོག་རབ་ཏུ་སྦྱོར། །ཀུན་ལ་བདག་པོའི་མཚན་མ་འཛིན། །ཕྱི་ནས་ཀྱང་ནི་སྔགས་བཟླས་ཏེ། །ཨོཾ་ཨེ་ཀ་ཛ་ཊི་བ་སུ་སཱ་དྷ་ནི་སྭཱ་ཧཱ། དེ་ནས་པུཀྐ་སཱི་ཡི་ནི། །སྒྲུབ་ཐབས་བདག་གིས་བཤད་པར་བྱ། །གང་གིས་བསྒོམས་ཙམ་སྐད་ཅིག་ལས། །འཇིག་རྟེན་གསུམ་ལ་པུཀྐ་སཱི། །ཁ་དོག་དམར་སེར་ཞལ་བཞི་པ། །ཕྱག་བཞི་བོང་བུ་ལ་ཞོན་སྒོམ། །ལས་ཀྱི་པུཀྐ་སཱི་ཡི་ནི། །བྱ་རོག་དང་ནི་ཐོ་བ་དང་། །མདའ་གཞུ་བརྟུལ་ཞུགས་ཅན་གྱིས་བསྒོམ། །སྔགས་བཟླས་པར་བྱའོ། །ཨོཾ་པུཀྐ་སཱི་ཨོཾ། དེ་ནས་འཇམ་པའི་རྡོ་རྗེ་ཡི། །སྒྲུབ་ཐབས་བདག་གིས་རབ་བཤད་བྱ། །འཇམ་པའི་རྡོ་རྗེའི་གྲུབ་པ་ལས་སྐད་ཅིག་གཅིག་ལས་མི་མཐོང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་རོ་ལངས་གནོད་སྦྱིན་མོ་བསྒྲུབ་པ་སྟེ་རིམ་པར་ཕྱེ་བ་དགུ་པའོ།། །།དེ་ནས་རྡོ་རྗེ་འཛིན་པའི་རྒྱལ་པོས་རོ་ལངས་དང་། གཅན་གཟན་གདུག་པ་ཅན་ལ་སོགས་པ་བསྲུང་བའི་སྔགས་བཤད་པར་བྱའོ། །འབུམ་ཕྲག་བཞི་ནི་བཟླས་པ་ཡིས། །དོན་གྲུབ་ས་བོན་གཏོར་བྱས་ན། །རོ་ནི་དོན་བྱེད་ལངས་འགྱུར་ཏེ། །འཚོ་བར་ཡང་ནི་ཐེ་ཚོམ་མེད། །ཞི་ལ་གཤིན་རྗེ་གཤེད་དཀར་པོ། །རྣལ་འབྱོར་བསྒོམ་བྱར་རྟག་ཏུ་རིག །ལག་ན་དོན་འགྲུབ་ས་བོན་ལ། །འབུམ་ཕྲག་བཞི་ནི་བཟླས་པ་ཡིས། །རོ་ནི་མདུན་དུ་ཕྱོགས་བྱས་ནས། །ཡུངས་ཀར་གྱིས་ནི་བསྣུན་གྱུར་ན། །དེ་ཉིད་ལྡང་བར་ཐེ་ཚོམ་མེད། །གལ་ཏེ་ནག་པོས་བཟུང་གྱུར་ན། །ཧཱུྃ་མཛད་དཀར་པོ་དང་མཚུངས་པ། །བསྒྲུབ་བྱ་ཡི་ནི་སྙིང་གར་བསྒོམ། །ཧྲཱིཿཥྚྲཱིཿལ་སོགས་སྔགས་རྣམས་བཟླས། །འོད་ཟེར་གྱིས་ནི་དུག་རྣམས་དགུག །ལག་པ་གཡས་དང་དེ་བཞིན་གཡོན། །པདྨ་འདབ་མ་བརྒྱད་པ་འཛིན། །དེ་དབུས་ཧཱུྃ་མཛད་དཀར་པོ་སྟེ། །འོད་ཟེར་གྱི་ནི་བདུད་རྩི་འབབ། །དེ་ཡི་མགོ་བོའི་སྟེང་དུ་ཡང་། །བསིལ་ཟེར་བྱེད་པའི་དཀྱིལ་འཁོར་དབུས། །མཁས་པས་ཧཿཡིག་བསམ་པར་བྱ། །ཧྲཱིཿཥྚྲཱིཿལ་སོགས་སྔགས་

དེ་ཡི། །རྒྱུད་ཀྱི་དུག་རྣམས་དྲང་བྱ་སྟེ། །ཨོཾ་ཧྲཱིཿཥྚྲཱིཿཧཿཧྲཱྃཿཛཿཕུཿཞེས་པའི་སྔགས་ཀྱི་ཡི་གེས་མགོ་བོ་ནས་བརྩམས་ནས་རྐང་བའི་མཐར་ཐུག་པ་སྔགས་ཀྱིས་བྱ་བ་པར་བྱའོ། །བདུད་རྩིའི་ཆར་རྒྱུན་འབབ་པར་བསྒོམ། །དེ་ཡིས་འཚོ་བར་ཐེ་ཚོམ་མེད། །ས་བོན་ཡི་གེ་ལས་གྲུབ་པའི། །གཟུངས་ཀྱིས་འཆིང་བ་མཆོག་ཏུ་འགྱུར། །རྨ་ཡི་གནས་ལ་འདི་བསྒོམ་སྟེ། །ཁ་དོག་སེར་པོ་ལས་བྱུང་བའི། །ཨོཾ་ཡིག་ལ་སོགས་མཐར་ཚེག་དྲག །ཧ་ཋའི་རྣམ་པ་སྦྱར་བྱས་ལ། །སྦྱོར་བ་ཡིས་ཀྱང་བརྡ་བར་བྱ། །མགོ་གཟེར་རབ་ཞི་བློ་མཆོག་ལྡན། །དེ་བཞིན་གཞན་ཡང་སྒོམ་དང་ནི། །བི་ཀ་ཊ་དང་རྐང་ཤུ་སོགས། །རབ་ཏུ་སྦྱོར་བ་མང་པོ་རྣམས། །ལག་པས་ངེས་གཟུང་འཚོ་བར་བྱེད། །དེ་ནས་རྒྱལ་པོ་རྡོ་རྗེ་འཆང་། །བསྲུང་བའི་འཁོར་ལོ་རབ་སྦྱོར་བ། །བགེགས་དང་ལོག་འདྲེན་གདུག་པ་རྣམས། །བརྟུལ་ཞུགས་ཅན་གྱིས་གཞོམ་བྱའི་ཕྱིར། །བདག་ཉིད་དཔལ་ལྡན་དབྱུག་འཛིན་གྱི། །སྤྲུལ་བའི་འཁོར་ལོ་རབ་ཏུ་སྦྱོར། །དབྱུག་པའི་འོད་ཀྱིས་རང་ལུས་ཁྱབ། །སྐུ་གསུམ་ལས་ནི་སྐྱེས་པའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །གཤིན་རྗེའི་གཤེད་ཀྱི་དཀྱིལ་འཁོར་དུ། །སློབ་དཔོན་བདག་གིས་དཀྱིལ་འཁོར་བྲི། །གོས་ཀྱིས་གདོང་ནས་བཅིངས་བྱས་ལ། །དཀྱིལ་འཁོར་ཁང་པའི་སྒོ་དྲུང་དུ། །ཀྱེ་མ་འབོད་པ་སུ་ཞིག་ལགས། །སྐལ་བཟང་བདག་ཅེས་བརྗོད་པར་བྱ། །ཡོལ་བ་ཡི་ནི་ནང་བྱས་ནས། །བླ་མ་མགོན་ལ་མཁས་པས་ཞུ། །གུས་པ་ཆེན་པོས་དབང་གི་ཕྱིར། །རྗེས་སུ་མགོན་བྱེད་ལན་གསུམ་བརྗོད། །ཇི་ལྟར་སངས་རྒྱས་བདེ་ཆེན་གྱིས། །རྡོ་རྗེ་སེམས་དཔའ་དབང་བསྐུར་ལྟར། །བདག་ཀྱང་མགོན་པོས་དབང་བསྐུར་ནས། །མཆོག་ཀྱང་བདག་ལ་སྩལ་དུ་གསོལ། །གླུ་དང་རོལ་མོས་དེ་བཞིན་མཆོད། །མཆོད་ཡོན་ཞབས་བསིལ་དེ་བཞིན་དུ། །སློབ་མས་གུས་དང་བཅས་ཏེ་དབུལ། །བསྟོད་པ་ཡང་ནི་དེ་ལ་བྱ། །དེ་ནས་རྒྱལ་པོ་རྡོ་རྗེ་འཆང་། །སྟོད་ཉིད་གསུངས་པ་འདི་ལྟ་སྟེ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་

སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་པཱུ་ཛཱ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ཞི་བ་ལ་སོགས་པའི། །སྦྱིན་སྲེག་རབ་དབྱེ་བདག་གིས་བཤད། །གང་གིས་ལས་ཀུན་རབ་སྒྲུབ་པ། །སྦྱིན་སྲེག་གིས་ནི་འགྲུབ་པར་འགྱུར། །ཞི་ལ་ཞི་བའི་སེམས་ཀྱིས་ཏེ། །རྒྱས་ལ་རྒྱས་པའི་སེམས་ཀྱིས་སོ། །དབང་ལ་རྗེས་སུ་ཆགས་སེམས་ཏེ། །གསང་བ་ལ་ནི་ཁྲོ་སེམས་ཀྱིས། །ཞི་ལ་མཎྜལ་རྣམ་པ་སྟེ། །རྒྱས་ལ་རྫིང་གི་རྣམ་པའོ། །དབང་ལ་ཟླ་བ་ཕྱེད་པ་སྟེ། །ནམ་མཁའི་ཁམས་ནི་གསད་པ་ལ། །ཞི་ལ་ཁྲུ་གང་ཚད་ཡིན་ཏེ། །རྒྱས་ལ་དེ་བཞིན་ཁྲུ་དོའོ། །རྒྱས་པ་ཇི་ལྟ་དེ་བཞིན་དབང། །གསད་ལ་སོར་མོ་ཉི་ཤུའོ། །ཞི་ལ་ཁྲུ་ཕྱེད་གཏིང་དུའོ། །ཁྲུ་ཡི་ཚད་ཀྱིས་རྒྱས་པ་ལ། །གསད་པ་ལ་ནི་ལྔ་གཉིས་སོ། །རྒྱས་པ་ཇི་ལྟར་དེ་བཞིན་དགུག །ཞི་བའི་སྦྱིན་སྲེག་ཚེས་གཅིག་ལ། །རྒྱས་པ་ཟླ་བ་གང་བ་ལ། །བཅུ་བཞི་ལ་ནི་མངོན་སྤྱོད་དོ། །བརྒྱད་ལ་དབང་གི་ལས་ཡིན་ནོ། །ཉ་སྐྱོགས་དང་ནི་ཤེལ་དག་དང་། །ཞི་ལ་མུ་ཏིག་འབྲས་བུ་མཆོག །དུང་གི་བུ་ནི་འཚོ་བ་ལ། །ནད་མེད་པ་ལ་མུ་མེན་ནོ། །ཙནྡན་དམར་པོ་དག་དང་ནི། །བྱི་རུ་དམར་པོའི་ཁྱད་པར་དང་། །རགྣ་དང་ནི་ལུང་ཐང་ནག །མི་ཡི་རུས་དང་དེ་བཞིན་དུ། །ནཱ་ག་ཕ་ཎཱི་ཞེས་བྱ་རྣམས། །ཞི་བ་ལ་ནི་བརྒྱ་ཕྲག་གཅིག །རྒྱས་པ་བརྒྱད་ཀྱིས་ལྷག་དེ་བཞིན། །དབང་དགུག་ཉི་ཤུ་རྩ་ལྔའོ། །མངོན་སྤྱོད་དྲུག་ཅུ་རྩ་བཞིའོ། །རྡོག་པོ་རྣམས་ནི་སྔགས་ཀྱིས་བསྐུ། །བརྒྱ་ཕྱེད་སྔགས་ཀྱིས་བསྒྲུབ་པར་བྱ། །ཕྲེང་བ་ཀུན་ལ་མཐར་མདུང་བྱ། །དེ་བཞིན་དུ་ནི་རི་རབ་གཉིས། །མཛུབ་མོའི་སྟེང་ནས་ཞི་བ་ལ། །གུང་མོ་ལ་ནི་རྒྱས་པའོ། །དབང་དགུག་དག་ལ་མིང་མེད་ལས། །ཆད་པས་བཅད་ལ་མཐེ་ཆུང་ལས། །ཞི་ལ་ཁ་དོག་དཀར་པོ་དང་། །ཁ་དོག་སེར་པོ་རྒྱས་པ་ལ། །དམར་པོ་དབང་ལ་རྟག་ཏུ་བསྒོམ། །ནག་པོ་ཤིན་ཏུ་གསད་ལ་འདོད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྦྱིན་སྲེག་གི་ཆོ་ག་སྟེ་རིམ་པར་བྱེ་བ་བཅུ་པའོ།། །།

རྣལ་འབྱོར་བཞི་དང་ལྡན་པའི་རྣལ་འབྱོར་པས་སྣ་ཚོགས་པའི་བཅའ་བ་ལ་སོགས་པ་དང་། །བཟའ་བ་དང་། མྱང་བ་དང་། བཏུང་བ་དང་། བལྡག་པ་ལ་སོགས་པ་དང་ཡང་དག་པར་ལྡན་པའི་དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་ལ་སོགས་པ་རྣམས་ཀྱིས་རབ་ཏུ་གང་བ་ལ་རོལ་མོའི་སྒྲ་ཆེན་པོ་ལྔ་བསྒོམ་པར་བྱའོ། །མདུན་དུ་གཏོར་མ་བཞི་ཁྱོགས་དང་ཁུར་དང་དཔུང་ཐེགས་དང་མཐའ་ན་ཟན་ཙམ་ཆུ་དང་བཅས་པ་ཁྱོར་བ་གསུམ་དང་ཇི་ལྟར་རྙེད་པའི་དམ་ཚིག་གི་རྫས་དང་ལྡན་པ་བཤམས་ནས་དེ་སྟོང་པར་དམིགས་ཏེ་བརྩམ་པར་བྱའོ། །ནམ་མཁའི་ཁམས་སུ་པདྨ་འདབ་མ་བརྒྱད་པ་བསྒོམ་པར་བྱ་སྟེ། །གེ་སར་དང་བཅས་པའི་ཟེའུ་འབྲུ་ལ་ཡྃ་ཡིག་ལས་རླུང་གི་དཀྱིལ་འཁོར་ཁ་དོག་ནག་པོ་གཞུའི་རྣམ་པ་ལ་རྩེ་མོ་གཉིས་ལ་གཡོ་བའི་བ་དན་དཀར་པོ་བརྒྱད་ཀྱིས་སྤྲས་པའོ། །དེའི་སྟེང་དུ་རྃ་ཡིག་ལས་མེའི་དཀྱིལ་འཁོར་ཟུར་གསུམ་དམར་པོ་ཟུར་གསུམ་ན་ར་ཡིག་གིས་སྤྲས་པའོ། །དེའི་སྟེང་དུ་རུ་ཡིག་གསུམ་ཡོངས་སུ་གྱུར་པ་ལས་མགོ་བོ་དམར་པོའི་སྒྱེད་པུ་གསུམ་གྱི་སྟེང་དུ་ཨཱཿཡིག་ལས་སྐྱེས་པའི་པདྨའི་སྣོད་ཕྱི་དཀར་ལ་ནང་དམར་བ་དེ་ལ་ཆུ་སྐྱེས་འདབ་མ་བརྒྱད་པའི་རྣམ་པར་བསམ་པར་བྱའོ། །དེའི་ཤར་ལ་སོགས་པའི་འདབ་མ་ལ་ཨོཾ་ཨཱྃ་ཛྲཱིྃ་ཁྃ་ཧཱུྃ་གི་ཡི་གེ་རྣམས་ལས་རྣམ་པར་སྣང་མཛད་ལ་སོགས་པའི་རང་གཟུགས་རྣམས་སོ། །དེ་བཞིན་དུ་མེ་ལ་སོགས་པའི་མཚམས་རྣམས་ལ་ལཱྃ་མཱྃ་པཱྃ་ཏཱྃ་བཱྃ་གི་ཡི་གེ་རྣམས་ལས་སྤྱན་མ་ལ་སོགས་པའི་རང་གཟུགས་རྣམས་བསྒོམ་པར་བྱའོ། །ཡི་གེ་བཅུ་པོ་འདི་རྣམས་ཡོངས་སུ་གྱུར་པ་ནི་གོ་ཀུ་ད་ཧ་ན་རྣམས་དང་། །བི་ར་ཤུ་མཱ་མཱུ་ཞེས་པ་སྟེ། འདི་རྣམས་ཀྱི་ས་བོན་གྱི་ཡི་གེས་མཚན་པའི་དམ་ཚིག་གི་རྫས་བཅུ་པོ་དེ་པདྨའི་སྣོད་དུ་བལྟས་ཏེ། དེའི་སྟེང་དུ་ཨོཾ་ཡིག་ཁ་དོག་དཀར་པོས་བཀབ་པའི་གཟུག་སུ་བསྒོམ་མོ། །ཨོཾ་ཡིག་ལས་སྐྱེས་པའི་ཟླ་བའི་དཀྱིལ་འཁོར་དེའི་སྟེང་དུ་ཧཱུྃ་ཡིག་དཀར་པོ་ལས་བྱུང་བའི་རྡོ་རྗེ་དབྱུག་པ། དེ་ས་བོན་གྱིས་མཚན་པ་བལྟས་ཏེ། དེ་ཡང་པདྨའི་སྣོད་ལས་འོག་

ན་སྒྱེད་པུ་ལ་ཨོཾ་ཨཱཿཧཱུྃ་ལན་གསུམ་བཟླས་ཤིང་བརྗོད་པར་བསྒོམས་ཏེ་སྔོན་མརྒྱུན་མ་ཆད་པར་རླུང་གི་དཀྱིལ་འཁོར་རྒྱ་ཆེན་པོ་དང་། རབ་ཏུ་འབར་བ་མེའི་དཀྱིལ་འཁོར་བསྒོམས་ཏེ། རྒྱ་ཆེན་པོ་འབར་ཞིང་བར་མ་ལུས་པའི་རང་གཟུགས་གོ་ཀུ་ལ་སོགས་པའི་དམ་ཚིག་གི་རྫས་བཅུ་ཞུ་བ་ལས་རྡོ་རྗེ་དབྱུག་པས་དཀྲུགས་པར་བལྟའོ། །དེ་ཡང་རྡོ་རྗེ་དབྱུག་པས་བདུད་རྩི་ཞུ་སྟེ་ཉི་མ་གསར་པའི་ཁ་དོག་གམ། དངུལ་ཆུའི་རྣམ་པར་བསམ་པར་བྱའོ། །དེ་ལ་ཡང་ཨོཾ་ཨཱཿཧཱུྃ་གསུམ་གྱི་ཡི་གེ་བལྟས་ཏེ། དེ་ལས་ཡི་གེ་གསུམ་གྱི་འོད་ཟེར་གྱི་ཚོགས་ཆེན་པོ་རྣམ་པར་འཕྲོས་ཏེ་འཇིག་རྟེན་གསུམ་ན་གནས་པའི་བདུད་རྩི་རབ་ཏུ་མང་པོ་འོད་ཟེར་གྱིས་བཀུག་སྟེ། དེ་ལ་རབ་ཏུ་གཞུག་པར་བྱའོ། །དེ་རབ་ཏུ་ཞུགས་པས་ཟླ་བའི་འོད་ཟེར་ཚོགས་པ་ཤིན་ཏུ་ལྷག་པ་ཡོངས་སུ་གྱུར་པ་ལས་ཁ་བ་ལྟ་བུ་སྦྲང་རྩིའི་ཚོགས་པའི་གཟུགས་ཀྱིས་མནན་པར་བྱའོ། །ཕྱི་ནས་ཡི་གེ་གསུམ་གྱིས་བྱིན་གྱིས་བརླབ་པར་བྱ་སྟེ། ཁ་དོག་དང་དྲི་དང་རོ་བཅུད་དང་ལྡན་པ་སྟོན་ཀའི་ཟླ་བ་དྲི་མ་མེད་པའི་འོད་ལྟ་བུ་ཡེ་ཤེས་ཀྱི་བདུད་རྩིའི་སྦྱོར་བས་གཏོར་མར་གྲུབ་པར་འདུན་པ་བྱའོ། །གཤིན་རྗེ་གཤེད་ཀྱི་གཟུགས་འཛིན་པའི་སྔགས་ཀྱིས་ཁྲོ་བོ་རྣམས་ལ་ཕྱག་ན་ཞགས་པ་དང་ལྕགས་ཀྱུ་འཛིན་ཅིང་འཕྲོ་བས་ཕྱོགས་སྐྱོང་རྣམས་ཀྱི་སྙིང་ག་ནས་ལྕགས་ཀྱུས་འབིགས་ཤིང་མགྲིན་པ་ལ་ཞགས་པས་བཅིངས་ཏེ་འགུགས་བར་བསྒོམ་པར་བྱའོ། །དེ་ནས་ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་[དུཥྚཱནྡྲ]་ས་པ་རི་ཝཱ་ར་མཱ་ཀརྵ་ཡ་ཛཿསྔགས་འདིས་དབང་པོ་མིག་སྟོང་སེར་སྐྱ་གླང་པོ་ཆེ་དཀར་པོ་ལ་ཞོན་པ། ལག་པ་གཡས་པ་དང་གཡོན་པ་རྡོ་རྗེ་དང་སྡིགས་མཛུབ་ཅན་བཀུག་སྟེ་ཤར་དུ་རྣམ་པར་དགོད་པར་བྱའོ། །དེ་བཞིན་དུ་དེའི་སྔགས་ཀྱིས་ཉེ་བའི་དབང་པོ་བྱ་ཁྱུང་ལ་གནས་པ། རིན་པོ་ཆེའི་ཅོད་པན་ཅན། གཡས་ན་དབྱུག་པ་དང་འཁོར་ལོ། གཡོན་ན་དུང་དང་ནོར་བུ་འཛིན་པ། དེའི་གཡོན་མི་རིང་བ་ན་གནས་པའོ། །ཡང་དེ་བཞིན་དུ་གཤིན་རྗེ་ནག་པོ་མ་ཧེ་ལ་ཞོན་པ། དབྱུག་པ་འཛིན་པ་ལྷོར་གནས་པའོ། །ཡང་དེ་བཞིན་དུ་ཆུ་བདག་ཁ་དོག་དཀར་པོ་སྦྲུལ་ལ་

གནས་པ། ལག་ན་ཀླུའི་ཞགས་པ་འཛིན་པ། ནུབ་ཏུ་རྣམ་བར་གནས་པའོ། །ཡང་དེ་བཞིན་དུ་ལུས་ངན་པོ་སེར་པོ་གཏེར་ལ་གནས་པ། ལག་ན་བཱི་ཛ་པཱུ་ར་ཀ་དང་ན་ཀུ་ལི་བསྣམས་པ། བྱང་དུ་རྣམ་པར་གནས་པའོ། །དེ་བཞིན་དུ་སྣ་ལྡན་དཀར་པོ་བྱི་བ་ལ་གནས་པ། གཡས་ན་བགྲང་ཕྲེང་དང་དགྲ་སྟ་འཛིན་པ། །གཡོན་ན་ལ་ཕུག་དང་ལ་དུའོ། །དེ་བཞིན་དུ་དབང་ལྡན་དཀར་པོ་ཁྱུ་མཆོག་དཀར་པོ་ལ་གནས་པ། །རལ་པ་འཛིན་པ་རྩེ་གསུམ་དང་ཐོད་པ་ལག་ན་བསྣམས་པ། ལག་པ་གཉིས་གཽ་རཱི་ལ་འཁྱུད་པ། དབང་ལྡན་དུ་རྣམ་པར་གནས་པའོ། །ཡང་དེ་བཞིན་དུ་མེ་ལྷ་དམར་པོ་ར་ལ་གནས་པ། ལག་ན་བགྲང་ཕྲེང་དང་སྤྱི་བླུགས་བསྣམས་པ། མེའི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་སྲིན་པོ་ནི་རོལ་ཞོན་པ། ལག་ན་གྲི་གུག་དང་ཐོད་པ། ཁ་དོག་སྔོན་པོ་ཁྲོ་ཞིང་གཏུམ་པ་བདེན་བྲལ་གྱི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་རླུང་ལྷ་དུ་བའི་ཁ་དོག་རི་དགས་སེར་པོ་ལ་གནས་པ། རླུང་གི་བ་དན་བསྣམས་པ། རླུང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་ཉི་མ་ནི་དམར་པོ། ལག་པ་གཉིས་ན་པདྨ་འཛིན་པ། རྟ་བདུན་གྱི་སྟེང་ན་སྟེང་གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཟླ་བ་ནི་དཀར་པོ། །ལག་པ་གཉིས་ན་ཀུ་མུ་ད་བསྣམས་པ། ཤིང་རྟ་ལ་ཞོན་པ། སྟེང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་ཚངས་པ་ནི་སེར་སྐྱ་གདོང་བཞི་པ། སྤྱི་བླུགས་དང་མི་འཇིགས་པ། དབྱུག་པ་དང་བགྲང་ཕྲེང་བསྣམས་པ། ངང་པ་ལ་ཞོན་པ། སྟེང་གི་ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་སའི་ལྷ་མོ་ཕྱག་གཡོན་ན་བུམ་པ་བསྣམས་པ། གཡས་ན་དམ་འཆའ་དང་ཁས་ལེན་གྱི་ཕྱག་རྒྱ་སྟེ། འོག་གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཐགས་ཟངས་རིས་སྔོན་པོ་ཤིང་རྟ་ལ་གནས་པ། གཡས་དང་གཡོན་ན་རལ་གྲི་དང་སྡིགས་མཛུབ་འཛིན་པ། དེ་ཡང་དེ་བཞིན་དུ་རྣམ་པར་གནས་པའོ། །དེ་རྣམས་ཁྲོ་བོ་གཤིན་རྗེ་གཤེད་ཀྱི་གཟུགས་ལ་ལག་ན་ཕུར་བུ་འཛིན་པས་ཁྲོ་བོའི་མགྲིན་པ་དང་སྙིང་

གའི་ས་བོན་གྱི་འོད་ཟེར་གྱིས་བཀུག་སྟེ། དེ་རྣམས་ཀྱི་སྙིང་ག་དང་མགྲིན་པ་དང་སྤྱི་བོ་དང་རྐང་པའི་མཐར་ཐུག་འདིས་ཕུར་བུས་གདབ་པར་བྱ་སྟེ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧཱུྃ་སརྦཱེནྟ་དི་ན་ཀཱི་ལ་ཡ་ཧཱུྃ་ཕཊ་ཅེས་པ་ནི་ཕུར་བུ་བར་མ་ཆད་པར་གྲུབ་པའི་ཁུ་བའི་ཚོགས་པ་ལ་སོགས་པས་དེ་ཐམས་ཅད་ཀྱང་གཤིན་རྗེ་མཐར་བྱེད་ཀྱི་རྣམ་པར་གྲུབ་པའི་མཐར་བྱང་ཆུབ་སེམས་ཀྱི་ཁུ་བའི་གཟུགས་རླུང་གི་ས་བོན་གྱི་རྟགས་ཀྱི་གོ་རིམས་ཀྱིས་གྲུབ་པའི་མཐའ་ལ། དེ་ལ་ཧྲཱིཿཡིག་གི་ས་བོན་ལས་གྲུབ་པ་ནི་དབང་པོའོ། །[ཥྚྲ]ཱིཿཡིག་གི་ས་བོན་ལས་གྲུབ་པ་ནི་གཤིན་རྗེའོ། །བི་ཡིག་གི་ས་བོན་ལས་གྲུབ་པ་ནི་ཆུ་བདག་གོ །གྲྀ་ཡིག་གི་ས་བོན་ལས་གྲུབ་པ་ནི་ལུས་ངན་ནོ། །ཏཱ་ཡིག་གི་ས་བོན་ལས་ཟུབ་པ་ནི་དབང་ལྡན་ནོ། །ཨ་ཡིག་གི་ས་བོན་ལས་གྲུབ་པ་ནི་མེའོ། །ན་ཡིག་གི་ས་བོན་ལས་གྲུབ་པ་ནི་བདེན་བྲལ་ལོ། །ན་ཡིག་གི་ས་བོན་ལས་གྲུབ་པ་ནི་རླུང་ངོ་། །ཧཱུྃ་ཡིག་གིས་བོན་ལས་གྲུབ་པ་ནི་ཟླ་བའོ། །ཧཱུྃ་ཡིག་གི་ས་བོན་ལས་གྲུབ་པ་ནི་ཉི་མའོ། །ཕཊ་ཡིག་གི་ས་བོན་ལས་གྲུབ་པ་ནི་ཚངས་པའོ། །ཕཊ་ཡིག་གི་ས་བོན་ལས་གྲུབ་པ་ནི་ནོར་རྒྱུན་མའོ། །ས་ཡིག་གི་ས་བོན་ལས་གྲུབ་པ་ནི་ཐགས་ཟངས་རིས་སོ། །ཧཱ་ཡིག་གི་ས་བོན་ལས་གྲུབ་པ་ནི་འབྱུང་པོ་ཐམས་ཅད་དོ་ཞེས་ཏེ། དེ་བཞིན་དུ་གྲུབ་པར་བསམ་པར་བྱའོ། །དེ་རྣམས་ཀྱི་མིག་ལ་སོགས་པ་རྣམས་ལ་ཇི་ལྟར་གནས་པ། ཡང་མིག་ལ་སོགས་པ་རྫོགས་པའི་སྐུ་ལ་སོགས་པ་རྣམས་ལ་ཡང་སྐུ་རྡོ་རྗེ་ལ་སོགས་པ་ཇི་ལྟར་མངོན་པར་དབང་བསྐུར་བ་བཞིན་དུ་གཤིན་རྗེ་མཐར་བྱེད་ཀྱིས་དབུ་བརྒྱན་པ་ཉིདདོ། །ཡང་མཆོད་ཡོན་ལ་སོགས་པའི་བསང་གཏོར་དང་། ཞལ་བསིལ་ལ་སོགས་པ་དབུལ་བར་བྱའོ། །ཕྱི་ནས་གཏོར་མ་ཉེ་བར་དབུལ་བ་ནི་བདུད་རྩི་སྒྲུབ་པའི་གོ་རིམས་སྔོན་དུ་རྫོགས་པ་ལ་དེ་ཉིད་གསུམ་གྱིས་མངོན་པར་བསྔགས་ཏེ་ཡང་དེ་རྣམས་ཀྱི་ལྗགས་རབ་ཏུ་སྦྱོར་བར་བསྒོམ་པར་བྱའོ། །སྔགས་འདིས་བདུད་རྩི་དབུལ་བར་སྟེ། ཨོཾ་རཀྟ་མུ་ཀུ་ཊཱ་ཡ། རཀྟ་ཛ་ཊཱ་ཡ། རཀྟ་མུ་ཁཱ་ཡ། རཀྟ་ཤ་རཱི་རཱ་ཡ། རཀྟ་བྷུ་ཛཱ་ཡ། རཀྟ་མུཎྜ་མཱ་ལཱ་བྷ་ར་ཎཱ་ཡ། རཀྟ་

ར་ཐ་ས་མཱ་རཱུ་ཌྷཱ་ཡ། རཀྟ་པདྨཱ་ས་ནཱ་ཡ། རཀྟ་བྷ་ར་ཎ་བྷཱུ་ཥ་ཎཱ་ཡ། ཨི་དཾ་བ་ལིཾ་གྲྀཧྞ་གྲྀཧྞ། མ་མ་བི་གྙཱཾ་ཧ་ར་ཧ་ར། ཙ་ཏུ་ར་མཱ་རཱ་ནཱི་བཱ་ར་ཡ། ནི་བཱ་ར་ཡ། ཏྲཱ་ཤ་ཡ་ཏྲཱ་ཤ་ཡ། བྷྲཱ་མ་ཡ་བྷྲུ་མ་ཡ། ཙྪིནྡ་ཙྪིནྡ། བྷིནྡྷ་བྷིནྡྷ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེད་ཙྪེད། བྷེ་ད་བྷེ་ད། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཕྱི་ནས་སོ་སོའི་ཆ་ཡིས་སྤྱད་པར་བྱ། །ཨོཾ་ཨིནྡྷཱ་ཡ་ན་མཿཧྲཱིཿ། ཡ་མཱ་ཡ་ན་མཿཥྚྲཱིཿ། བ་རུ་ཎཱ་ཡ་ན་མཿཝི། ཀུ་བེ་རཱ་ཡ་ན་མཿཀྲྀ། ཨི་ཤྭ་རཱ་ཡ་ན་མཿཏ། ཡགྣ་ཡེ་ན་མཿཨཱ། ནཻ་རྀ་ཏྱཱ་ཡ་ན་མཿན། བཱ་ཡ་བེ་ན་མཿན། ཙནྡྲ་ཡ་ན་མཿཧཱུྃ། [ཨརྐྐ་]ཡ་ན་མཿཧཱུྃ། བྲཧྨ་ཎེ་ན་མཿཕཊ། བ་སུ་དྷ་རཱ་ཡཻ་ན་མཿཕཊ། བེ་མ་ཙི་ཏྲི་ཎེ་ན་མཿསྭཱ། སརྦྦ་བྷཱུ་ཏི་བྷྱོ་ན་མཿཧཱ། ཧ་ཧ་ཧ་ཧི་ཧི་ཧི་ཧཱུྃ་ཧཱུྃ་ཧཱུྃ། ཕེྃ་ཕེྃ་ཕེྃ། ཕྱི་ནས་མེ་ཏོག་དང་སྤོས་དང་མར་མེ་དང་ཞལ་ཟས་ལ་སོགས་པ་ཡང་དབུལ་བར་བྱའོ། །དེ་རྣམས་ཀྱང་སྒྲུབ་པ་པོའི་མངོན་པར་རབ་ཏུ་དད་པས་རོ་བཅུད་ཐམས་ཅད་མྱོང་ཞིང་ལོངས་སྤྱོད་པར་འགྱུར་རོ། །རྡོ་རྗེ་གསོར་ཞིང་དྲིལ་བུ་དལ་གྱིས་འཁྲོལ་བས་གནས་དེ་ལ་བསྟོད་པར་བྱའོ། །གཏི་མུག་དགའ་མ་ལ་སོགས་པ་རྣམས་ལ་ཕྱི་ནས་མངོན་པར་འདོད་པ་ཞུས་ཏེ་མཆོད་པའི་མཐར་བཞད་པ་སྔགས་རྣམ་པ་བརྒྱད་བརྗོད་པར་བྱ་སྟེ། དེ་ལ་སྔགས་འདིས་གཤེགས་སུ་གསོལ་ལོ། །ཧ་ཧཱ་ཧེ་ཧྲེེ་ཧོ་ཧཽ་ཧཱུྃ་ཧཱུྃ། བི་ས་རཛྫ་ཡེ་ཏ། ཨོཾ་ཨཱཿམུ་ཞེས་པས་ཀྱང་ངོ་། །ཕྱི་ནས་སྒྲུབ་པ་པོའི་མངོན་པར་འདོད་པས། སེམས་ཅན་ཀུན་གྱི་དོན་མཛད་ཕྱིར། །ཇི་ལྟར་རྗེས་འཇུག་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང། །སླར་ཡང་འདིར་ནི་བྱོན་པར་ཞུ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་གཏོར་མའི་རིམ་པར་ཕྱེ་བ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པ་མཛད་དེ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་

ཤིན་ཏུ་འཇིགས། །རྡོ་རྗེའི་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །དབྱངས་མཆོག་ཀུན་གྱི་མཆོག་གི་མཆོག །རྡོ་རྗེའི་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གྱི་རབ་མཆོག་གཙོ། །དཀྱིལ་འཁོར་དབང་ཕྱུག་ཕྱག་འཚལ་བསྟོད། །རྡོ་རྗེའི་མིག་དང་རྡོ་རྗེའི་རྣ་བ་དང་རྡོ་རྗེའི་སྣ་དང་རྡོ་རྗེའི་ལྕེ་དང་རྡོ་རྗེའི་ལུས་དང་རྡོ་རྗེའི་ཡིད་ཅེས་བཅོམ་ལྡན་འདས་ཀྱིས་གསུངས་པ་ནི་མིག་ལ་སོགས་པ་བྱིན་གྱིས་བརླབ་པའི་དམ་ཚིག་གོ །དེ་ནས་གཤིན་རྗེ་གཤེད་འཇིགས་ཀྱི། །དཀྱིལ་འཁོར་བདག་གིས་རབ་བཤད་བྱ། །གཤིན་རྗེ་གཤེད་པོ་དང་མཚུངས་པ། །དོན་རྣམས་ཐམས་ཅད་སྒྲུབ་བྱེད་པ། །སྲད་བུ་གསར་པ་ལེགས་བསྒྲིམས་ཤིང་། །མཛེས་ཤིང་ཚད་དང་ཡང་དག་ལྡན། །གཤིན་རྗེ་གཤེད་ཀྱི་དཀྱིལ་འཁོར་ལ། །ཤེས་རབ་ཅན་གྱིས་ཐིག་གདབ་བོ། །མཚན་ཉིད་ཐམས་ཅད་ཡོངས་རྫོགས་པ། །དོན་མེད་ཐམས་ཅད་རྣམ་པར་འཇིག །ཞི་བ་ལ་སོགས་རབ་སྒྲུབ་པའི། །མཎྜལ་དཀྱིལ་འཁོར་རྣམ་པ་ལ། །ལས་ཀྱི་རྡོ་རྗེ་བྲི་བྱ་སྟེ། །དེ་ལ་རྩེ་ལྔ་མཐའ་དག་ལ། །དེ་ཡི་དབུས་སུ་རྡོ་རྗེ་བྲི། །རྡོ་རྗེ་འབར་བས་ཀུན་ཏུ་འཁྲིགས། །ཤར་གྱི་རྩིབས་ལ་འཁོར་ལོ་བྲི། །འཁོར་ལོའི་འོད་ཟེར་ཀུན་ཏུ་འཁྲིགས། །ལྷོ་རུ་རིན་ཆེན་བྲི་བྱ་སྟེ། །འོད་ཟེར་ཕྲེང་བས་ཀུན་ཏུ་ཁྱབ། །ནུབ་ཏུ་པདྨ་བྲི་བྱ་སྟེ། །པདྨ་རཱ་གའི་འོད་ཟེར་མཛེས། །བྱང་དུ་རལ་གྲི་བྲི་བྱ་སྟེ། །སྤྲིན་གྱི་ཁ་དོག་འོད་ཟེར་མཚུངས། །ཤར་གྱི་མཚམས་སུ་འཁོར་ལོ་བྲི། །ལྷོ་རུ་རྡོ་རྗེ་བྲི་བར་བྱ། །ནུབ་ཏུ་པདྨ་བྲི་བྱ་སྟེ། །པདྨ་གདོང་བཅས་རྒྱས་པའི་ཞལ། །བྱང་དུ་རལ་གྲི་བྲི་བྱ་སྟེ། །འོད་ཟེར་ལྔ་དང་མཚུངས་པར་ལྡན། །ཤར་གྱི་སྒོ་རུ་ཐོ་བ་སྟེ། །རྡོ་རྗེ་དབྱུག་པ་ལྷོ་རུའོ། །ནུབ་ཀྱི་སྒོ་རུ་ཆུ་སྐྱེས་ཏེ། །རྡོ་རྗེ་རལ་གྲི་བྱང་དུའོ། །དཀྱིལ་འཁོར་

རྫོགས་པར་ཤེས་བྱས་ལ། །ཁྱད་པར་ཅན་གྱིས་མཆོད་བྱ་བ། །འདོད་པའི་ཡོན་ཏན་ལྔ་རྣམས་ཀྱིས། །ཐེ་ཚོམ་མེད་པས་སངས་རྒྱས་མཆོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དཀྱིལ་འཁོར་ཆེན་པོའི་རིམ་པར་ཕྱེ་བ་སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་གདབ་བོ། །ཕྱག་རྒྱ་གསུངས་པས་རབ་སྦྱོར་བ། །གང་གིས་རྡོ་རྗེ་རྣམས་ལ་བསྟོད། །ཕྱག་རྒྱ་རྡོ་རྗེ་ཕྱག་རྒྱ་ཡིས། །དངོས་གྲུབ་མང་པོ་སྒྲུབ་པར་མཛོད། །དེ་ནས་རྒྱལ་པོ་རྡོ་རྗེ་འཆང་། །ཚིག་འདི་དག་ནི་གསུང་བར་མཛད། །དཀྱིལ་འཁོར་པ་རྣམས་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་བསྒོམ། །རྟག་ཏུ་དཀྱིལ་འཁོར་ཟླུམ་བྱས་ལ། །རྟག་ཏུ་སྦྱིན་སྲེག་མཆོད་པ་དང་། །རྟག་ཏུ་དམ་ཚིག་བསྒྲུབ་བྱ་ཞིང་། །དེ་ཡི་སྡོམ་པ་གཟུང་བར་བྱ། །དང་པོ་ཅོད་པན་དབང་བསྐུར་ཏེ། །གཉིས་པ་རལ་གྲི་སྦྱིན་པར་བྱ། །གསུམ་པ་རྡོ་རྗེ་དྲིལ་བུ་སྟེ། །བཞི་པ་ཟླ་བའི་བཟའ་བའོ། །དབང་བསྐུར་ཆེན་པོ་བཞི་པ་ནི། །དམར་པོའི་ཞལ་ནས་འབྱུང་བ་སྟེ། །དབང་བསྐུར་འདི་ཡི་མཐུ་ཡིས་ནི། །བྱང་ཆུབ་རྒྱལ་བའི་རོ་བཅུད་འཐོབ། །དེ་ནས་བདག་གིས་སྔགས་བཤད་པས། །འབྱུང་པོ་ཀུན་ལ་གཏོར་མ་བྱ། །སྔགས་ཆེན་པོ་ནི་བརྗོད་པ་ཡིས། །འབྱུང་པོ་ཐམས་ཅད་རབ་ཏུ་འབར། །སྔགས་ཀྱི་ས་བོན་ཧྲཱིཿཥྚྲཱིཿསོགས། །མཐར་ནི་སྭཱ་ཧཱ་ངེས་པར་སྦྱར། །བི་ཊ་མ་ཊ་ཆུ་བསྲེས་ཀྱིས། །མཎྜལ་ཟུར་གསུམ་བྱས་ནས་ནི། །ལྷ་རྣམས་མཉེས་བྱ་རྣལ་འབྱོར་པས། །ཧཱ་ཧཱ་ཞེས་སྒྲོགས་སླར་དྲན་བྱ། །འཁོར་ལོ་རིམ་གསུམ་བྱ་བ་ནི། །བརྒྱད་དང་བཅུ་གཉིས་བཅུ་དྲུག་དང་། །མཁས་པས་ཆོ་ག་བཞིན་དུ་བྲི། །སྔགས་ནི་ཀུན་ཏུ་དགོད་པར་བྱ། །བརྟུལ་ཞུགས་ཅན་གྱིས་བཅུ་གཉིས་པར། །གྲུབ་པའི་སྔགས་རྣམས་དགོད་པར་བྱ། །ཁམས་གསུམ་གཡོ་དང་མི་གཡོ་བ། །མ་ལུས་ལུས་པ་མེད་པར་འགྲུབ། །ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ།

ཡ་ཀྵེ་ཡཙྪ་ནི་རཱ་མ་ཡ། ཡ་དབུས་ཀྵེ་ནི་ཤར་དུ་སྟེ། །མ་ཡིག་འཇམ་པའི་རྡོ་རྗེ་ལྷོར། །མེ་ཡིག་ནུབ་ཏུ་བྲི་བར་བྱ། །བྱང་དུ་ད་ནི་དཀར་པོ་སྟེ། །བསྒྲུབ་བྱའི་མིང་ནི་བཟུང་བྱས་ནས། །སྟོང་པའི་མཚམས་ལ་དགོད་པར་བྱ། །ཧཱུྃ་གཉིས་དག་གིས་བརྟེན་པར་བྱ། །དགོས་པ་ཐམས་ཅད་སྒྲུབ་པར་བྱེད། །ཡཙྪ་ནི་ར་ཛཱ་ས་དོ་རུ། །ཎ་ཡོ་ནི་ར་ཞེས་པས་ཀྱང་ནི་ཕྱི་རོལ་དུ། །གཡོན་ནས་བརྩམས་ཤིང་ཡང་དག་བྲི། །དོན་ཀུན་རབ་ཏུ་བསྒྲུབ་པའི་ཕྱིར། །རེའུ་མིག་གསུམ་པའི་མདུན་ནས་ནི། །རེའུ་མིག་ཆ་རེ་སྤངས་པར་ནི། །ཤར་ནས་བརྩམས་ཏེ་བྲི་བར་བྱ། །ཧྲཱིཿཥྚྲཱིཿཞེས་པའི་སྔགས་རྣམས་ཀྱིས། །རེའུ་མིག་བརྒྱད་ཀྱི་བར་བར་དུ། །རེའུ་མིག་རྣམས་ལ་ཡང་དག་བྲི། །ཆེ་གེ་མོ་ཀུ་རུ་མཱ་ར་ཡ། ཨུཙྪ་ཊ་ཡ། བ་ཤཾ་ཀུ་རུ། བི་དྭེ་ཥ་ཡ་ཤཱནྟིཾ་ཀུ་རུ། པུཥྚིཾ་ཀུ་རུ། ཞེས་པ་ལ་སོགས་པ་ནི་ལས་ཀྱི་རྗེས་སུ་འབྲངས་ཏེ། ཨོཾ་ནི་དང་པོར་ན་མཿམཐར། །མཐར་ནི་བ་ཤཾ་བཽ་ཥ་ཊ། ཧཱུྃ་ཕཊ་ཡི་གེ་དང་ལྡན་པས། །ཞི་རྒྱས་དབང་དུ་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དབང་བསྐུར་བ་དང་འཁྲུལ་འཁོར་གྱི་སྣང་བ་ཞེས་བྱ་བའི་རིམ་པར་ཕྱེ་བ་སྟེ་བཅུ་གསུམ་པའོ།། །།བཅོམ་ལྡན་འདས་ཀྱིས་བརྩེ་བར་མཛད། །གཤིན་རྗེ་གཤེད་ཆེན་ཡང་དག་གཟུགས། །ཞེ་སྡང་གིས་མནན་འགྲོ་ལ་གཟིགས། །ཞེ་སྡང་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །གཏི་མུག་གཤིན་རྗེ་གཤེད་མཆོག་གཟུགས། །གཏི་མུག་གིས་མནན་འགྲོ་ལ་གཟིགས། །གཏི་མུག་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །ཕྲ་མ་གཤིན་རྗེ་གཤེད་མཆོག་གཟུགས། །ཕྲ་མས་མནན་པའི་འགྲོ་ལ་གཟིགས། །ཕྲ་མ་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །འདོད་ཆགས་གཤིན་རྗེ་གཤེད་མཆོག་གཟུགས། །འདོད་ཆགས་ཀྱིས་མནན་འགྲོ་ལ་གཟིགས། །འདོད་ཆགས་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །ཕྲག་དོག་གཤིན་རྗེ་གཤེད་མཆོག་གཟུགས། །ཕྲག་དོག་གིས་མནན་འགྲོ་ལ་གཟིགས། །ཕྲག་

དོག་ཐམས་ཅད་ཟད་པར་མཛད། །བྱམས་པ་ཙརྩི་ཀཱར་གསུངས་ཏེ། །ཕག་མོ་དེ་བཞིན་སྙིང་རྗེའོ། །དབྱངས་ཅན་དགའ་བར་ཤེས་བྱ་སྟེ། །བཏང་སྙོམས་གཽ་རཱིའི་གཟུགས་སུའོ། །བདག་ཉིད་དངོས་པོ་ཐམས་ཅད་ཀྱིས། །སླར་ཡང་དཀྱིལ་འཁོར་ཡོངས་རྫོགས་པ། །རྣལ་འབྱོར་སྙིང་གའི་ས་བོན་སྤྲོ། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་སྤྱོད་པའི་མཚན་ཉིད་མཆོག །བདག་གིས་ཡང་དག་བཤད་པར་བྱ། །གཤིན་རྗེ་གཤེད་པོའི་འཇིགས་གཟུགས་ཀྱི། །སྐུ་དང་གསུང་དང་ཐུགས་རྣམས་དག །དགོན་པ་ཆེན་པོའི་ཕྱོགས་རྣམས་ལ། །མ་ཧེ་མཆོག་ལ་ཞོན་བྱས་ཏེ། །སྦྲུལ་གྱི་རྒྱན་གྱིས་རྣམ་པར་བརྒྱན། །ལྕགས་ཀྱི་རྡོ་རྗེ་བསྒོམ་པར་བྱ། །སྐྲ་ནི་དམར་སེར་གྱེན་དུ་འཁྱིལ། །ཁྱད་དུ་འཕགས་པའི་གཟུགས་ཅན་བྱ། །མགོ་ལ་ཐོད་པས་ཡང་དག་བསྐོར། །སྨ་ར་དམར་སེར་བརྫེས་པ་སྟེ། །ཧྲཱིཿ ཥྚྲཱིཿལ་སོགས་སྔགས་རྣམས་བརྗོད། །རྡོ་རྗེ་དབྱུག་པ་ཡང་དག་གསོར། །གཤིན་རྗེ་གཤེད་ཀྱི་རྣལ་འབྱོར་པས། །སེང་གེའི་སྒྲ་ནི་བསྒྲག་པར་བྱ། །ཅུང་ཟད་མཐུ་ནི་ཐོབ་པ་ཡིས། །གྲོང་ཁྱེར་ཞུགས་ཏེ་རོལ་པར་བྱ། །རབ་མཛེས་གར་ནི་བྱ་བ་དང་། །དྲུག་འགྱུར་ལ་སོགས་གླུ་བླང་ངོ་། །སྲང་དུ་རྒྱལ་མཚན་དེ་བལྟ་ཞིང་། །དེ་ལ་འོ་མ་རབ་ཏུ་བསྒྲུབ། །འོ་མ་ལ་འདྲིས་རྩེ་གཅིག་སེམས། །ཕྱག་རྒྱ་ཆེན་པོ་རབ་བསྒྲུབ་བྱ། །ཕག་མོའི་གཟུགས་སུ་བསྒོམ་བྱས་ལ། །འདོད་པའི་མཐའ་ལ་བཙུན་མོ་ཀུན། །སེང་གེ་བཞིན་དུ་འཇིགས་མེད་པས། །འདོད་དོན་ཀུན་འགྲུབ་རྣལ་འབྱོར་པའི། །དེ་ནས་ཕྱག་རྒྱ་རབ་བསྒྲུབ་པ། །བདག་གིས་ཡང་དག་རབ་བཤད་བྱ། །ཡི་གེ་གཅིག་གི་སྔགས་ཆེན་ཏེ། །དེ་ཡི་བཟླས་པ་ངེས་པར་བཤད། །ཥྚཱིཿཡིག་ས་བོན་ལས་བྱུང་བའི། །མ་ཧེའི་གདོང་པ་རྣམ་པར་བསྒོམ། །རྡོ་རྗེའི་དཀྱིལ་འཁོར་ལ་གནས་པ། །མ་ཧེའི་སྟེང་དུ་བསྒོམ་པར་བྱ། །གང་ཞིག་ས་ལ་གནས་པ་ཡི། །སྣ་ཚོགས་མཚོན་ཆའི་རང་གཟུགས་རྣམས། །བློ་དང་ལྡན་པས་ལག་ན་བསྒོམ། །མ་ཧེའི་གདོང་ཅན་སྒྲུབ་པའོ། །དེ་ནས་རྡོ་རྗེ་དབྱུག་པ་ཡི། །སྒྲུབ་ཐབས་བདག་གིས་རབ་བཤད་

བྱ། །ཡི་གེ་ཧྲཱིཿནི་གསང་སྔགས་ཆེ། །མ་ཧེ་ཆེན་པོ་ལ་ཞོན་པ། །འབུམ་ཕྲག་གཉིས་ནི་རྫོགས་པའི་ཕྱག །ཐལ་བའི་རྡུལ་གྱིས་ལུས་ལ་བྱུགས། །རི་རབ་བཞིན་དུ་མཐོ་བ་ལ། །རོ་ལྡན་འོག་དུ་ཡང་དག་གནོན། །དེ་ནས་ཕྱག་ནི་བྱེ་བ་ཡི། །སྒྲུབ་ཐབས་བདག་གིས་རབ་བཤད་བྱ། །ཝི་ཀྲྀ་ཏཱ་ན་གསང་སྔགས་ཆེ། །ཧཱུྃ་ཡིག་ལས་བྱུང་གཙོ་བོ་སྟེ། ཨོཾ་ཝི་ཀྲྀ་ཏཱ་ན་ན་ཧྃ་ཧཱ་ཧི་ཧོཿཧཱུྃ་ཧཱུྃ་ཧེ་ཧེཿཧོཿཧཿསྭཱ་ཧཱ། དགོས་པ་ཐམས་ཅད་རབ་སྒྲུབ་པའི། །དམ་ཚིག་སྒྲུབ་པ་འདིར་བཤད་དོ། །སྔགས་ཀྱིས་དུབ་ལ་ཁ་ཟས་བཟའ། །ཁ་ན་མ་ཐོ་མེད་རྙེད་བླང་། །ཤ་ཆེན་དེ་བཞིན་རྟ་དང་ནི། །དེ་བཞིན་གླང་ཆེན་ཁྱད་པར་ཅན། །བ་ལང་གཟུགས་དང་ཁྱི་དང་ནི། །བོང་བུ་རྔ་མོ་ཅེ་སྦྱང་ངོ་། །རམས་དང་བསྲེས་ཤིང་བཙོ་བྱས་ནས། །ཞག་ཆེན་ལུས་ལ་མངོན་པར་བྱུག །འདི་ཡིས་ལུས་ལ་བྱུགས་ཙམ་གྱིས། །འགྲོ་བ་མཐའ་དག་དབང་དུ་བྱེད། །རྣམ་སྣང་སིན་དུ་བཱ་རཉྩ། །དེ་བཞིན་བིལ་བའི་ལོ་མ་དང་། །སོ་ཕག་ཕྱེ་མ་ལྷན་ཅིག་ཏུ། །གསེར་ཤིང་ལོ་མའི་ཁུ་བ་རྣམས། །འདི་ཡི་ལུས་ལ་དྲིལ་ཕྱིས་བྱ། །རྡོ་རྗེ་ཆེན་པོའི་བདུད་རྩི་བཞིན། །རང་འབྱུང་མེ་ཏོག་བཏུང་བ་བཞིན། །འདི་ནི་རྣལ་འབྱོར་རབ་མཆོག་གོ །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྤྱོད་པའི་དམ་ཚིག་སྒྲུབ་པའི་རིམ་པར་ཕྱེ་བ་སྟེ་བཅུ་བཞི་པའོ།། །།དེ་ནས་བཅོམ་ལྡན་འདས་སྐྱེས་བུ་ཆེན་པོའི་དམ་ཚིག་ཙརྩི་ཀཱའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། །རྡོ་རྗེ་ཕག་མོའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། གཽ་རཱི་མའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་ལས་མཆོད་པའི་གླུ་འདིས་གསོལ་བ་གདབ་བོ། །ཨེ་མ་གཤིན་རྗེ་གཤེད་དམར་པོ། །བླ་མ་སྲིན་པོའི་རང་བཞིན་ཏེ། །བདག་ནི་ཁྱོད་མཐོང་པས་འཇིགས་པས། །བླ་མ་ཁྲོ་བོའི་རང་བཞིན་སྤངས། །མཐོ་རིས་ས་སྟེང་ས་འོག་རྣམས། །ཁྱོད་ཀྱི་གར་གྱིས་གཡོ་བར་བྱེད། །ཁྲག་གི་མིག་སྨན་ཁྲོ་བའི་སེམས། །གར་མཛད་ཁྱོད་

ནི་རོ་ལངས་གཟུགས། །དམར་ཞིང་ཐུང་བའི་ཚད་ལྡན་པ། །རྣམ་པ་མང་པོའི་སྤྲུལ་གཟུགས་བྱེད། །རྡོ་རྗེ་དབྱངས་ཅན་མ་ཡིས་ཞུས། །ཁྱོད་ཀྱི་གར་མཛད་བདེ་བ་ཆེ། །ཁྱོད་ཀྱི་ཧྲཱིཿཥྚྲཱིཿའི་སྔགས་ཀྱི་གར། །ས་གསུམ་པོ་ཡི་འཁྲུལ་པ་སོལ། །བརྩེ་བས་ཁྲོ་བའི་རྗེ་བཙུན་ཁྱོད། །འགྲོ་ལ་བལྟ་ཞིང་གར་མཛད་དོ། །དེ་ནས་བཟླས་པའི་མཚན་ཉིད་མཆོག །བདག་གིས་ཡང་དག་རབ་བཤད་བྱ། །གང་གིས་བཟླས་པ་རབ་སྦྱོར་བས། །མང་པོ་ཡིས་ནི་དངོས་གྲུབ་འཐོབ། །མྱུར་བ་མ་ཡིན་བུལ་བ་མིན། །རིང་པོ་མ་ཡིན་ཐུང་བ་མིན། །ཅུང་ཟད་སྔགས་ནི་ཐོས་པར་རོ། །གཤིན་རྗེ་གཤེད་ཀྱི་སློབ་དཔོན་མཆོག །མི་དང་མ་ཧེ་གཉིས་འཐུང་དང་། །བ་ལང་གཟུགས་དང་རྟ་དང་ནི། །བོང་བུ་རྔ་མོའི་རུས་བཟུང་ནས། །བཟླས་པའི་ཕྲེང་བས་རབ་བསྒྲུབ་བྱ། །ཟླ་བ་ཟླ་བའི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་ལྔ་ཡིས་ནི་བྱུག་པར་བྱ། །བཟླས་པ་ཡིས་ནི་དངོས་གྲུབ་མཆོག །སོ་སོའི་རྐང་པའི་རིལ་བུ་ལ། །གཤིན་རྗེ་གཤེད་སྒོམ་རྣལ་འབྱོར་པས། །མཁས་པས་ཡང་ན་མི་མགོ་ནི། །ཁྲག་འཛག་རློན་པ་བསྒོམ་པར་བྱ། །ཁྲི་ཡི་སྔགས་ཀྱིས་འབྱུང་པོ་རྣམས། །མཁའ་འགྲོ་མ་རྣམས་སྟོང་གིས་ཏེ། །གཤིན་རྗེ་གཤེད་པོ་རབ་སྦྱོར་བས། །ཡི་དགས་རྣམས་ནི་གཞོམ་ཞིང་བསད། །རྣལ་འབྱོར་བདག་ཉིད་འབུམ་བཟླས་ན། །ལས་ཀུན་དེ་ཡིས་བྱེད་པར་འགྱུར། །བྱེ་བ་བཟླས་ན་དངོས་གྲུབ་སྟེ། །བྱེ་བ་ལྔ་ཡིས་སྨོས་ཅི་དགོས། །ཉི་མ་སོ་སོའམ་ཡང་ན་ཟླ། །ཡང་ན་ལོ་ནི་སོ་སོ་ལ། །མཁས་པས་དབྱུག་གུ་དྲུག་ཅུ་བཞིའི། །གཏོར་མ་དྲུག་ཅུ་རྩ་བཞི་སྦྱིན། །འགའ་ཞིག་རྟག་ཏུ་བཟའ་བ་དང་། །འགའ་ཞིག་དེ་བཞིན་བཏུང་བ་དང་། །གཞན་ཡང་བཟའ་བ་ཐམས་ཅད་ཀྱི། །དང་པོ་གཤིན་རྗེ་གཤེད་ལ་དབུལ། །དེ་ནས་བླ་མར་ཡོན་གྱི་མཆོག །དབུལ་བར་བྱ་བ་དག་བཤད་བྱ། །བདག་ཉིད་ཞི་བའི་ཕྱིར་དང་ནི། །དེ་བཞིན་ལས་ཀུན་སྒྲུབ་པའི་ཕྱིར། །བདག་གི་ལུས་དབུལ་ངེས་པར་འདུད། །རྟ་དང་བ་ལང་གླང་པོ་དང་། །གསེར་དང་ནོར་དང་མ་མ་དང་། །རང་གི་ཆུང་མ་དེ་བཞིན་བུ། །མ་དང་སྲིང་

མོ་ཚ་མོ་དང་། །གོས་ནི་རྣམ་པ་སྣ་ཚོགས་དང་། །གདུགས་དང་མཛེས་པའི་རྔ་ཡབ་དང་། །ཁྱིམ་དང་ཁྲི་དང་དྲི་བཟངས་དང་། །གླུ་དང་དེ་བཞིན་རོལ་མོ་དང་། །རལ་གྲི་རྒྱན་རྣམས་དེ་བཞིན་དུ། །བརྟུལ་ཞུགས་ཅན་གྱིས་བླ་མར་དབུལ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཐབས་ཐམས་ཅད་སྒྲུབ་པའི་རིམ་པར་ཕྱེ་བ་སྟེ་བཅྭ་ལྔ་པའོ།། །།དེ་ནས་སེམས་ཅན་ཐམས་ཅད་ཀྱི་བདུད་དང་འདོད་ཆགས་ལ་སོགས་པའི་ཉོན་མོངས་པ་གཅོད་ཅིང་གཞོམ་པའི་དོན་གྱི་ཕྱིར་སྐུ་མདོག་དམར་པོའོ། །སྤྱན་གསུམ་ནི་འདས་པ་དང་། མ་འོངས་པ་དང་ད་ལྟར་གྱི་དུས་གསུམ་མོ། །ཕྱག་གཉིས་ནི་དངོས་པོ་དང་དངོས་པོ་མེད་པའི་རྣམ་པར་རྟོག་པ་རྣམས་འཇོམས་པའོ། །ཤེས་རབ་མ་ལ་འཁྱུད་པ་ནི་སྟོང་པ་ཉིད་དང་སྙིང་རྗེ་ཐ་མི་དད་པར་སྦྱོར་བའོ། །ཀླུ་བརྒྱད་ནི་རྣམ་པར་ཤེས་པར་བརྒྱད་དུ་གསུངས་སོ། །མགོ་བོའི་བརྒྱ་ཕྱེད་ཕྲེང་བ་ནི་ཡི་གེ་ལྔ་བཅུ་སྦྱོར་བའོ། །གཡོན་ན་ཐོད་པ་ནི་ཡེ་ཤེས་ལྔའི་བདུད་རྩིའི་བཅུད་ཀྱིས་ཡོངས་སུ་གང་ཞིང་སྟོང་པ་ཉིད་ཀྱི་རང་བཞིན་ནོ། །གཡས་ན་དབྱུག་པ་ནི་ཕུང་པོ་དང་ཉོན་མོངས་པ་དང་ལྷའི་བུ་དང་འཆི་བའི་བདུད་རྣམས་འཇོམས་ཤིང་སྙིང་རྗེའི་རང་བཞིན་ནོ། །ཞབས་གཡོན་བརྐྱང་བ་ནི་ཁམས་གསུམ་དུ་བཤད་དོ། །ལྷ་མོའི་ཕྱག་གཡོན་ན་ཐོད་པ་བདུད་བཞིའི་ཁྲག་དཔག་ཏུ་མེད་པ་དངུལ་ཆུ་དང་བཅུད་ལེན་དང་རོ་བཅུད་དོ། །གཡས་ན་དངོས་པོ་དང་དངོས་པོ་མེད་པའི་རྣམ་པར་རྟོག་པ་གཅོད་པའི་གྲི་གུག་གོ །ཁྲོ་བོའི་གཟུགས་ཕྱལ་རྒྱས་པ་ནི་གདུག་པ་ཅན་རྣམས་འདུལ་བའོ། །སྐྲ་དམར་སེར་གྱེན་དུ་བརྫེས་པ་ནི་སྤྲུལ་པ་དཔག་ཏུ་མེད་པའི་ཕྱིར་རོ། །གྲུ་བཞི་ནི་སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱི་བདེན་པར་བཤད་དོ། །སྒོ་བཞི་ནི་བདུད་བཞི་སྐྲག་པར་བྱེད་པའོ། །ཟུར་བཞི་ནི་ཚངས་པའི་གནས་བཞི་རབ་ཏུ་རྫོགས་པའི་ཕྱིར་རོ། །ཀ་བ་བརྒྱད་ནི་སྒྱུ་མའི་དཔེ་བརྒྱད་ཀྱི་ཕྱིར་ཏེ། སྤྲུལ་པའི་གྲོང་ཁྱེར་དང་སྒྲ་བརྙན་དང་སྒྱུ་མ་དང་སྤྲིན་དང་རི་དགས་སྲེད་དང་མེ་ལོང་དང་གཟུགས་བརྙན་དང་ཆུ་ཟླའོ། །ནམ་མཁའ་ནི་དངོས་པོ་དང་དངོས་པོ་མེད་པའི་

ཉོན་མོངས་པ་འཇོམས་པའི་ཕྱིར་རོ། །ཡང་དག་པར་སྤོང་བ་ནི་དྲ་བ་དྲ་ཕྱེད་དོ། །རྟ་བབས་བཞི་ནི་སྦྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་མཐུན་པ་བཞིའི་རྣམ་པར་དག་པའོ། །དེ་ནས་རྡོ་རྗེ་མཁའ་འགྲོ་མའི། །སྒྲུབ་ཐབས་བདག་གིས་རབ་བཤད་བྱ། །ནམ་མཁའི་ཁམས་ཀྱི་དབུས་སོང་ནས། །ཉི་མའི་དཀྱིལ་འཁོར་མཆོག་བསམས་ཏེ། །རྩེ་ལྔ་པ་ནི་རྣམ་པར་བསྒོམ། །དེ་ཡི་སྟེང་དུ་པདྨ་དགོད། །འདི་མདོག་ནག་ལ་འཇིགས་ཆེན་མོ། །ཕྱག་དྲུག་མཛེས་པའི་གཟུགས་ལྡན་མ། །ཕྱག་ན་རྡོ་རྗེ་རྣམ་པར་བསྒོམ། །ལྷག་མའི་ཕྱག་ཏུ་གཞན་དགོད་དོ། །ཤར་དུ་སངས་རྒྱས་མཁའ་འགྲོ་མ། །ཕྱག་དྲུག་གཏི་མུག་དང་མཚུངས་པ། །ཕྱག་ན་འཁོར་ལོ་འཇིགས་ཆེན་མོ། །རྣལ་འབྱོར་དཀྱིལ་འཁོར་ལ་བསྒོམ་བྱ། །ལྷོ་རུ་རིན་ཆེན་མཁའ་འགྲོ་མ། །ཕྲ་མ་དང་མཚུངས་ཕྱག་དྲུག་མ། །ཕྱག་ན་རིན་ཆེན་འཇིགས་ཆེན་མོ། །ཉི་མའི་དཀྱིལ་འཁོར་ལ་བསྒོམ་བྱ། །ནུབ་ཏུ་ཆོས་ཀྱི་མཁའ་འགྲོ་མ། །ཕྱག་དྲུག་པདྨ་འཛིན་པ་མོ། །བྱང་ན་ལས་ཀྱི་མཁའ་འགྲོ་མ། །སྙིང་པོའི་དཀྱིལ་འཁོར་རལ་གྲི་མ། །མེ་ལ་སོགས་པའི་མཚམས་བཞི་ལ། །བརྟུལ་ཞུགས་ཅན་གྱིས་ལྷ་མོ་བསྒོམ། །དྲི་མ་དེ་བཞིན་གར་མ་དང་། །གླུ་མ་སྒེག་མོ་ཁྱད་པར་ཅན། །དེ་ནས་སྒོ་སྐྱོང་བསྒོམ་པར་བྱ། །ཆོ་ག་བཞིན་དུ་ལས་རྣམས་བལྟ། །ཐོ་བ་དབྱུག་པ་པད་རལ་གྲི། །ཨོཾ་བུདྡྷ་ཌཱ་ཀི་ནཱི། ཨོཾ་བཛྲ་ཌཱ་ཀི་ནཱི། ཨོཾ་དྷརྨྨ་ཌཱ་ཀི་ནཱི། ཨོྃ་རཏྣ་ཌཱ་ཀི་ནཱི། ལཱྃ་མཱྃ་ནཱྃ་གཱྃ་མཚམས་སུའོ། །ཨོཾ་མུངྒ་ར་ཛཿ། ཨོཾ་དཎྜ་ཧཱུྃ། ཨོཾ་པདྨ་བྃ། ཨོཾ་ཁཌྒ་ཧོཿ། ཞེས་པ་ནི་བཅོམ་ལྡན་འདས་རྡོ་རྗེ་ཅན་གྱིས་རྡོ་རྗེ་མཁའ་འགྲོ་མའི་སྒྲུབ་ཐབས་གསུངས་པའོ། །རིང་པོ་ནས་ཐོས་པ་བསྒྲུབ་པའི་ཕྱིར་རྡོ་རྗེ་མཁའ་འགྲོ་མ་བསྒོམ་པར་བྱའོ། །དེའི་སྔགས་ཀྱི་ཚིག་རྣམས་ནི་འདི་ཡིན་ཏེ། །ཨོཾ་ཨཱ་ཀཱ་ཤ་ཙ་ར་བཛྲ་ཌཱ་ཀི་ནཱི་སྭཱ་ཧཱ། དེ་ནས། གཞན་ཡང་རྡོ་རྗེ་ས་འོག་གི། །སྒྲུབ་ཐབས་བདག་གིས་རབ་བཤད་བྱ། །ས་འོག་བུ་ག་བསྒྲུབ་བའི་ཕྱིར། །གནོད་མཛེས་རྡོ་རྗེ་བསྒོམ་པར་བྱ། །ཕྱག་དྲུག་ཁ་དོག་སྔོན་པོ་ལ། །ཕྱག་ན་གཏུན་ཤིང་འཛིན་པར་བྱེད། །སྙིང་པོའི་དཀྱིལ་འཁོར་དབུས་སུ་ནི། །

འདི་ནི་རབ་ཏུ་སྤྱོད་པར་བྱེད། །ཤར་ལ་སྤྱན་མ་དགོད་བྱ་སྟེ། །ལྷོ་རུ་དེ་བཞིན་མཱ་མ་ཀཱི། །ནུབ་ཏུ་ལྷ་མོ་གོས་དཀར་མོ། །བྱང་དུ་སྒྲོལ་མ་དགོད་པར་བྱ། །མེ་ཏོག་སྤོས་དང་མར་མེ་དང་། །དྲི་རྣམས་མེ་སོགས་རྣམས་ལ་དགོད། །སྒོ་ལ་ཐོ་བ་ལ་སོགས་ཏེ། །སྦྲུལ་གྱི་རྒྱན་གྱིས་སྐེ་རགས་བྱས། །དེ་བཞིན་འཁོར་ལོ་བསྒོམ་བྱ་ཞིང་། །ཆོ་ག་བལྟ་བས་ལས་རྣམས་སོ། །རྡོ་རྗེ་ས་འོག་སྦྱོར་ལྡན་པས། །རྨི་ལམ་དུ་ནི་བུ་ག་ཤེས། །དེ་ནས་རྒྱལ་པོ་བདུན་གྱི་ནི། །དཀྱིལ་འཁོར་བདག་གིས་རབ་བཤད་བྱ། །མཁའ་སྤྱོད་རབ་ཏུ་བསྒྲུབ་བྱའི་ཕྱིར། །རྟ་མཆོག་རབ་ཏུ་བསྒྲུབ་པར་བྱ། །ཞལ་གཅིག་པ་དང་ཕྱག་གཉིས་པ། །སྐུ་མདོག་སྔོན་པོ་འཇིགས་པར་བྱེད། །ཉི་མའི་སྟེང་དུ་གནས་པ་སྟེ། །ཤིན་ཏུ་འཇིགས་བྱེད་རྟ་ཡི་གདོང་། །གཡས་ན་རལ་གྲི་ཁུ་ཚུར་ཏེ། །ཕྱག་དྲུག་གཡོན་ན་ཐོད་པའོ། །ཨོཾ་ཕུ་ཕུ་ཧཱི་ཧཱི། །ཤེས་རབ་ཅན་གྱིས་སྔགས་འདི་བཟླ། །རྟ་མཆོག་རབ་ཏུ་བསྒྲུབ་པའི་ཕྱིར། །ཤར་ལ་བྷི་ད་བཱི་བསྒོམ་བྱ། །ལྷོ་ཕྱོགས་སུ་ནི་མྱུར་འགྲོ་མ། །ནུབ་ཏུ་བདུན་པའི་རྒྱལ་མོ་སྟེ། །རྟ་མཆོག་མ་ནི་བྱང་དུ་དགོད། །བདག་པོའི་ཞལ་དང་ཕྱག་བཞིན་དུ། །ཐམས་ཅད་དེ་བཞིན་མཚུངས་པར་བསྒོམ། །སྔགས་འདིས་ཐམས་ཅད་མཚུངས་པ་དང་། །སྤྲོ་བ་རུ་ནི་རབ་ཏུ་གྲགས། །གླིང་བུ་པི་ཝང་རྔ་ཟླུམ་དང་། །རྔ་བྲན་རྣམས་ཀྱང་ཟུར་ལ་དགོད། །བ་ལང་སྣ་དང་གླང་ཆེན་སྣ། །དེ་བཞིན་བཞིན་བཟང་བཞིན་ངན་མ། །གཏུན་ཤིང་དང་ནི་སྟ་རེ་དང་། །ལྕགས་ཀྱུ་དང་ནི་ཞགས་པའོ། །གར་ལ་སོགས་པའི་རྣལ་འབྱོར་གྱིས། །སྒོ་བཞི་ལ་ནི་རྟག་ཏུ་བསྒོམ། །ནས་ལྗང་སྙེ་མ་དང་བཅས་བསམ། །རང་གི་རྟགས་རྣམས་དེ་བཞིན་གཡས། །ཇི་ལྟར་རྟ་མཆོག་གི་ནི་སྔགས། །རྡོ་རྗེ་ས་འོག་གི་ཡང་ངོ་། །རྟ་མཆོག་བསྒོམ་པའི་སྦྱོར་བ་ལས། །ཁམས་གསུམ་མཁའ་ལ་རྒྱུ་བར་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དངོས་གྲུབ་ངེས་པའི་རིམ་པར་ཕྱེ་བ་སྟེ་བཅུ་དྲུག་པའོ།། །།དེ་ལ་འདིར་ཐིག་གདབ་པའི་དམ་ཚིག་མཆོག་ནི། ཨ་ཀཱ་རོ་མུ་ཁཾ་སརྦ་དྷརྨཱ་ཎཱ་མཱ་

[དྱ་ནུཏྦ་ནྣ་ཏྭཱ]ཏ། དཔལ་ལྡན་གཤིན་རྗེ་མཐར་བྱེད་གཟུགས། །སློབ་མ་རྣམ་པར་སྣང་མཛད་བྱ། །ཡེ་ཤེས་ཐིག་མཆོག་རྩེ་དག་གཟུང་། །མཉམ་གཞག་ནས་ནི་ལེགས་པར་གདབ། །དེ་ལ་འདི་ནི་དཀྱིལ་འཁོར་ཆེན་པོར་རབ་ཏུ་འཇུག་པའི་དམ་ཚིག་གོ །ཨོཾ་ཨཱཿཧཱུྃ། དཀྱིལ་འཁོར་ཉིས་འགྱུར་རིང་བ་ལ། །སྒོ་ཡི་ཉི་ཤུ་ཆ་ཡིས་སྦོམ། །བ་ཡི་རྣམ་ལྔས་ལེགས་པར་བྱུག །སྐུད་པ་གཉིས་སུ་མེད་པར་བརྟག །དེ་ལ་འདི་ནི་རྡོ་རྗེ་ཆེན་པོར་རབ་ཏུ་འཇུག་པའི་དམ་ཚིག་སྟེ། ཀྱེ་མ་སངས་རྒྱས་སློབ་དཔོན་ཆེ། །ཀྱེ་མ་ཆོས་དང་ཚོགས་ཀྱི་གཙོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་བྱིན། །དེ་ལ་འདི་ནི་ས་ཆེན་པོ་ཡོངས་སུ་གཟུང་བའི་དམ་ཚིག་གོ །རྡོ་རྗེ་ས་ཡི་ལྷ་མོ་སྤྱན་དྲངས་ལ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྒོ་ནི་དཀྱིལ་འཁོར་བརྒྱད་ཆ་རུ། །བདག་ཉིད་ཆེན་པོས་ཤེས་བྱ་སྟེ། །ཁམས་ཆེན་པོ་ནི་མ་གཏོགས་པའི། །ཚད་ལྡན་ཤིན་ཏུ་མཛེས་པའོ། །སྒོ་དང་སྒོ་ཁྱུད་དེས་ཤེས་བྱ། །དེ་ཡི་ཕྱེད་ཀྱིས་སྣམ་བུ་སྟེ། །གླུ་མ་རྔ་མ་གར་མ་སོགས། །རྡོ་རྗེའི་ལྷ་མོ་ཡང་དག་ལྡན། །དེ་ཡི་ཕྱེད་ཀྱིས་རྡུལ་ཚོན་ས། །སྒོ་ཡི་ཕྱེད་ཀྱིས་འགྲམ་དང་ལོགས། །འདིར་ཡང་དྲ་བ་དྲ་ཕྱེད་དང་། །ཉི་མ་ཟླ་བ་མེ་ཏོག་ཕྲེང་། །ལྷ་ཡི་སྣམ་བུ་དང་པོའི་ཚད། །དེ་བཞིན་ཕྱི་ཡི་དཀྱིལ་འཁོར་རོ། །དེ་ལ་སྙིང་པོ་ཆེན་པོ་འདི། །བདག་གིས་འཁོར་ལོ་ནམ་མཁར་དགོད། །རང་གི་ཕྱག་རྒྱའང་དེ་རུ་བརྟེན། །དམ་ཚིག་ཡེ་ཤེས་གཞུག་བྱས་ནས། །དཀྱིལ་འཁོར་རབ་ཏུ་བསྒྲུབ་པར་བྱ། །ཤར་དུ་དཀར་པོ་ཆེན་པོ་སྟེ། །ལྷོ་རུ་སེར་པོ་དང་ལྡན་པ། །དམར་པོ་ནུབ་ཀྱི་ཆ་ལ་སྟེ། །བྱང་དུ་མ་ར་ཀ་ཏ་ལྡན། ཨིནྡྲ་ནཱི་ལའི་འོད་མཚུངས་པ། །དབུས་ཀྱི་ས་གཞིར་ཡང་དག་བྲི། །ལས་ཀྱི་ཆོ་ག་མཐོང་བ་ཡིས། །དེ་ཡི་ཕྱག་རྒྱ་དགོད་པར་བྱ། །དབུས་སུ་རྡོ་རྗེ་ཡང་དག་བྲི། །ཤར་ལ་འཁོར་ལོ་ལེགས་པར་བྲི། །དེ་ལྟ་བུ་ལ་སོགས་པར་བལྟ། །ཕྱག་རྒྱ་རྟག་ཏུ་ནམ་མཁའ་མཚུངས། །དེ་ལ་བླུགས་གཟར་དགང་གཟར་ཚད། །འདི་ཡི་ཚད་ཀྱིས་ཡུ་བ་བྱ། །ཁྲུ་གང་ཚད་དང་ལྡན་པ་ལ། །དེ་ཡི་རྩེ་མོར་དཀྱིལ་

འཁོར་བྱ། །སོར་མོ་བཞི་ཡི་ཚད་ལྡན་ལ། །གཏིང་དུ་སོར་གཉིས་ཟབ་པ་ལ། །དེ་ལ་སོར་ཕྱེད་བཅུད་ཁུང་དུ། །བླུགས་གཟར་པད་མའི་རྣམ་པ་བཞིན། །མཐེ་བོའི་ལྟོ་གང་ཚད་ལ་ནི། །གཏིང་དུ་སོར་མོའི་ཚད་ལྡན་ནོ། །རྒྱུད་འདི་ལ་ནི་རབ་ཏུ་བསྔགས། །དཀྱིལ་འཁོར་དུ་ནི་མ་ཞུགས་ཤིང་། །མཚམས་མེད་ལྔ་ནི་བྱས་པ་དང་། །གང་གིས་སྲོག་ཆགས་གསོད་པ་དང་། །ཉ་དང་ཤ་སོགས་ཟ་བ་དང་། །ཆང་དང་འདོད་མ་ལ་ཆགས་དང་། །ཆད་ལྟའི་བརྟུལ་ཞུགས་འཛིན་པ་དང་། །མངོན་པར་དབང་ནི་མ་བསྐུར་དང་། །བྱ་བ་མ་ཡིན་བྱེད་སྤྲོ་དང་། །གྲོང་ཁྱེར་དབྱེན་བྱེད་བས་ཀྱང་ནི། །དམར་པོའི་གསུང་ནི་ཇི་ལྟར་བར། །གཤིན་རྗེ་གཤེད་རྒྱུད་མཆོག་ལ་གཞོལ། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བྱམས་པ་ལ་སོགས་པའི་རྡོ་རྗེའི་བྱང་ཆུབ་སེམས་དཔའ་ཀུན་གྱིས་རྡོ་རྗེ་ཆེན་པོའི་སྔོན་མེད་པའི་གསུང་ཐོས་པས་ཅང་མི་སྨྲ་བར་གྱུར་ཏོ། །དེ་ལ་འདི་ནི་རྡོ་རྗེ་དབབ་པའི་དམ་ཚིག་སྟེ། །དེ་ཡང་འབྱུང་བའི་ས་བོན་ཆེ། །འཁོར་ལོ་བཞི་པོ་རབ་བསྒྲུབ་བྱ། །གནས་བཞིར་རབ་ཏུ་སྦྱོང་བ་ཡིས། །ནམ་མཁའ་ཡང་ནི་གཡོ་བར་བྱེད། །རྐང་ཡ་དག་གི་འོག་ཏུ་ཡྃ། །ལྟེ་བར་རྃ་སྟེ་སྙིང་གར་ལྃ། །མགོ་བོ་ལ་ནི་བྃ་ཡིག་གོ །གཞུ་ཡི་རྣམ་པ་ནག་པོ་ཆེ། །གཏུམ་པོའི་རླུང་ནི་འཇིགས་བྱེད་པ། །སྲེག་བྱེད་ཟུར་གསུམ་མེ་བཞིན་འབར། །ཉི་མ་དམར་པོའི་འོད་དང་མཚུངས། །རྡོ་རྗེའི་ས་གཞིའི་རིམ་པ་ནི། །སེར་པོ་ཆེན་པོ་གྲུ་བཞི་པ། །རི་རབ་རི་ཡིས་མནན་པ་ཡི། །ནོར་འཛིན་དེ་ནི་བསྒོམ་པར་བྱ། །དཀར་པོ་ཟླུམ་པོ་བུམ་པ་བཞིན། །སྤྲིན་བཞིན་དུ་ནི་ཆར་པ་འཛིན། །སྟོང་གིས་རབ་ཏུ་གང་བ་ཡི། །གངས་ཀྱི་རི་བོ་ལྟ་བུར་བསིལ། །གནས་བཞི་རབ་ཏུ་སྦྱོར་བ་ཡིས། །སློབ་མ་རྡོ་རྗེ་ཅན་ལ་བསྒོམ། །རྡོ་རྗེ་སྣང་བ་མཐའ་ཡས་སྦྱོར། །མྱུར་བ་ཉིད་དུ་འབེབས་པར་བྱེད། །དེ་ལ་འདི་ནི་དྲི་བའི་དམ་ཚིག་གོ །རྡོ་རྗེ་ཆོས་ནི་མགོན་ཆེན་པོ། །སྣང་བ་མཐའ་ཡས་བདེ་བ་ཆེ། །གསུངས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་པར་འདྲི། །ཁྲུ་གང་ནས་ནི་བཟུང་ནས་ནི། །ཇི་སྲིད་ཁྲུ་ནི་སྟོང་གི་བར། །སློབ་མ་ཆེན་པོ་འཕར་བར་འགྱུར། །འདི་ནི་དབབ་པའི་དམ་ཚིག་གོ །རི་མོ་བྲི་བའི་མཚན་ཉིད་རྣམས། །བདག་

གིས་ཡང་དག་བཤད་པར་བྱ། །ས་ནི་སྣུམ་པ་བླངས་བྱས་ལ། །བརྟུལ་ཞུགས་ཅན་གྱིས་མནན་པར་བྱ། །སྲན་གྲེ་དེ་བཞིན་འོ་མ་ཤ། །བུ་རམ་བསེ་ཡབ་ལ་སོགས་པ། །ཏིལ་དང་ནིམ་པའི་ལོ་མ་དང་། །དེ་བཞིན་ནཱ་ཊཱིའི་ས་བོན་ནོ། །དང་པོ་དཀར་པོ་བྲི་བར་བྱ། །དེ་ལ་ཁ་དོག་གཞན་གྱིས་བྲི། །ཐོད་ལོ་ཀོར་དང་བཙག་དག་ལ། །ཆུ་ཡིས་སྦྱར་བས་རྒྱ་སྐྱེགས་བཞིན། །ཡུང་བ་དང་ནི་རམས་དག་ལས། །དེ་བཞིན་ཁ་དོག་ལྗང་གུར་འགྱུར། །སྔོན་པོ་རྟག་ཏུ་རམས་ཀྱིས་སོ། །དེ་བཞིན་མེ་དྲག་ནག་པོ་སྟེ། །སྐྱ་བོ་དེ་བཞིན་བ་བླ་ཡིས། །དེ་བཞིན་དམར་པོ་མཚལ་གྱིས་སོ། །ཀ་པེད་ཁུ་བ་དེ་ལ་སྦྱིན། །ཆུང་དུས་མ་ཡིན་ལྷག་དེ་བཞིན། །ལྷག་པས་ནག་པོ་དམན་པ་ཡིས། །སྐྱ་བོ་རུ་ནི་འགྲོ་བར་བྱེད། །ཁྲོ་དང་ཞི་བ་རྣམ་གཉིས་ཀྱི། །གཟུགས་ཀྱི་མཚན་ཉིད་བཤད་པར་བྱ། །ཞི་བ་སྒེག་པོར་གསུངས་པ་སྟེ། །ཁྲོ་བོ་སྦོམ་ལ་ཐུང་བར་ཐོས། །སོར་མོ་བཞི་ཡི་ཚད་ཀྱིས་ནི། །དཔྲལ་བ་དེ་བཞིན་ཁ་ལའོ། །མགྲིན་པ་དེ་བཞིན་འགྲམ་པ་དང་། །གསང་གནས་ལ་ནི་སོར་བཞིའི་ཚད། །སོར་མོ་ཉི་ཤུ་བཞི་ཡིས་ལག །སོར་མོ་ཉི་ཤུ་བར་[ལྷུའོ།] །ལག་པ་རྐང་པ་དེ་བཞིན་གདོང་། །མིག་ལ་མཐེ་བོའི་ཚད་ཡིན་ཏེ། །རྣ་བ་ལ་ནི་སོར་གཉིས་གསུངས། །སྒོ་ངའི་སྦུབས་ལ་དེ་བཞིན་བཞི། །མཆུ་གཉིས་དག་ལ་སོར་གཉིས་སོ། །ལྟེ་བའི་ཟབས་སུ་སོར་མོ་སྟེ། །མགྲིན་པ་མ་གཏོགས་ལུས་ལ་ནི། །གདོང་གི་སུམ་འགྱུར་དག་ཏུ་འདོད། །རལ་པ་རྣམས་ནི་གདོང་གི་ཚད། །རིན་ཆེན་དབུ་རྒྱན་སོར་མོ་དྲུག །དེ་ནས་འཕགས་མ་སོར་མོ་ཡི། །སྒྲུབ་ཐབས་བདག་གིས་རབ་བཤད་བྱ། །གང་གིས་བསྒོམ་པ་ཙམ་གྱིས་ནི། །ཆུ་ཡི་སྟེང་དུ་འཆགས་པར་བྱེད། །སེར་མོ་ཞལ་གསུམ་ཕྱག་དྲུག་པ། །ཕུ་ཡིག་ས་བོན་ལས་བྱུང་བ། །ཕྱག་ན་སྦྲུལ་དང་གཟུགས་ཆེན་མོ། །རྨ་བྱ་ལ་ནི་ཞོན་པར་དགྱེས། །ཤར་ལ་རྨ་བྱ་མ་དགོད་དོ། །ལྷོ་རུ་དེ་བཞིན་ཁྲོ་གཉེར་ཅན། །ནུབ་ཏུ་རི་ཁྲོད་ལོ་མ་ཅན། །བྱང་དུ་རྡོ་རྗེ་ལྕགས་སྒྲོག་མ། །རྨ་བྱའི་སྒྲོ་དང་སྤྱི་བླུགས་དང་། །ཡལ་ག་དེ་བཞིན་ལྕགས་སྒྲོག་སྟེ། །དེ་རྣམས་རྣམ་པར་བསྒོམ་པར་བྱ། །སེར་པོ་དམར་པོ་ལྗང་གུ་དང་། །ཁ་དོག་སྔོན་པོའི་དབྱེ་བ་ཉིད། །

ཤེས་རབ་ཅན་གྱིས་དེ་བཞིན་བསྒོམ། །དེ་བཞིན་དུ་ནི་སྔགས་འདི་བཟླས། །ཨོཾ་ཕུ་ཛཿར། ཐོ་བ་ལ་སོགས་སྒོ་ལ་དགོད། །མེ་ཏོག་ལ་སོགས་མཚམས་སུའོ། །ཨཱརྱ་ཛཾ་གུ་ལིའི་སྦྱོར་ལྡན་པས། །ཆུ་ཡི་སྟེང་དུ་རྟག་ཏུ་འགྲོ། །དེ་ནས་ཀུ་རུ་ཀུལླེ་ཡི། །སྒྲུབ་ཐབས་བདག་གིས་རབ་བཤད་བྱ། །གང་གིས་བསྒོམས་པ་ཙམ་གྱིས་ནི། །ཀླུ་ཡི་བུ་མོ་འགུག་པར་བྱེད། །ཁ་དོག་དམར་པོ་ཞལ་བཞི་པ། །ཕྱག་བརྒྱད་དང་ནི་ཡང་དག་ལྡན། །ཧྲཱིཿཡིག་ས་བོན་ལས་བྱུང་བ། །ཀླུ་རྣམས་འགུགས་པར་བྱེད་པའོ། །མཐའ་ཡས་ལ་སོགས་ཀླུ་རིགས་བརྒྱད། །ཕྱག་བརྒྱད་དུ་ནི་དགོད་པར་བྱ། །སྦྲུལ་གྱི་རྒྱན་གྱིས་སྐུ་ལ་བརྒྱན། །བརྟུལ་ཞུགས་ཅན་གྱིས་མཛེས་མ་བསྒོམ། །སྔགས་ནི་ཀུ་རུ་ཀུལླེ་ཧྲཱིཿཕུཿསྭཱ་ཧཱ། །དེ་ནས་རྒྱས་མིན་མདོར་བསྡུས་པས། །གསང་བ་བ་ནི་བཤད་པར་བྱ། །གང་གིས་ཤེས་པ་ཙམ་གྱིས་ནི། །ལྷ་ཡི་བུ་མོ་འགུགས་པར་བྱེད། །ཞལ་གཅིག་མ་དང་ཕྱག་གཉིས་མ། །ཕྱག་ན་མདའ་དང་གཞུ་བསྣམས་པ། །ལུས་ནི་སེར་པོ་ཆེན་པོ་ཡི། །ལུས་མེད་རྣམ་པར་བསྒོམ་པར་བྱ། །ཤར་དུ་དགའ་མ་བསྒོམ་པར་བྱ། །མྱོས་བྱེད་མཛེས་མ་ལྷོ་རུ་བསྒོམ། །ནུབ་ཏུ་འདོད་པའི་ལྷ་མོ་སྟེ། །བྱང་དུ་མྱོས་པར་སྤྲོ་མའོ། །འདོད་པའི་ལྷ་མོ་ཐམས་ཅད་ཀྱི། །ལག་ན་མདའ་དང་གཞུ་བསྒོམ་མོ། །སེར་དང་དམར་དང་དེ་བཞིན་ལྗང་། །དཀར་དམར་ཉིད་རྣམས་བསྒོམ་པར་བྱ། །མཚམས་སུ་རྟག་ཏུ་རྒོད་མ་དང་། །མ་འགགས་མ་དང་དབང་བྱེད་མ། །ཆུ་སྲིན་རྒྱལ་མཚན་ཞེས་པ་རྣམས། །སྒོ་ཡི་ཆ་ལ་རབ་ཏུ་བཤད། །འདོད་འགྱིང་དང་ནི་སྙེམས་ཅན་དང་། །དྲན་པ་དེ་བཞིན་མཚམས་ཀྱི་བདག །ལྷ་རྣམས་དེ་དག་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་བསྒོམ། །བུད་མེད་རྣམས་ཀྱིས་ནམ་མཁའི་གདོང་། །མཐའ་ལ་རྡོ་རྗེ་ལུས་མེད་སྒོམ། །ཤཱིཏ་ཡིག་སྔགས་ལས་ཡང་དག་བྱུང་། །ཀུན་ཏུ་རྣམ་པར་འཕྲོ་བ་སྟེ། །བསླུས་ཤིང་གཡེང་བ་བསྒོམ་པར་བྱ། །མྱོས་པས་བདེ་བ་འདོད་ཡིད་ཀྱིས། །གོས་ནི་དམར་པོས་ཡོངས་དཀྲིས་ཏེ། །རྐང་པ་དག་གི་དྲུང་དུ་ལྷུང་། །དེ་ལ་སྔགས་ནི་ཤིན་ཏུ་བཟླ། །ཨོཾ་ཡིག་དབྱངས་ཀྱི་དབྱེ་བ་དང་། །སྭཱ་ཧཱའི་ཡི་གེ་མཐའ་མར་སྦྱིན། །ཤཱི་ཏ་ཡེ་གེའི་སྔགས་

རྣམས་བརྗོད། །ཆེ་གེ་མོ་ནི་བདག་དབང་གིས། །དམར་པོའི་གསུང་ནི་ཇི་བཞིན་དུ། །ཐམས་ཅད་དུ་ནི་བསྒོམས་བྱས་ན། །རྣལ་འབྱོར་པ་ཡི་འདོད་པ་འཐོབ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ལུས་མེད་པ་ལ་སོགས་པའི་རིམ་པར་ཕྱེ་བ་སྟེ་བཅུ་བདུན་པའོ།། །།དེ་ནས་ཧེ་རུ་ཀ་ཆེན་གྱི། །སྒྲུབ་ཐབས་བདག་གིས་རབ་བཤད་བྱ། །རྣལ་འབྱོར་འཁོར་བས་བཅིངས་པ་ལས། །གང་ཞིག་ཤེས་པས་མྱུར་གྲོལ་བ། །ཞལ་གཅིག་པ་ལ་ཕྱག་གཉིས་ཏེ། །སྐུ་མདོག་སྔོན་པོ་གཏུམ་པོ་ཆེ། །ཕྱག་ན་རྡོ་རྗེ་བསྒོམ་པར་བྱ། །གཞན་ལ་ཐོད་པ་དགོད་པར་བྱ། །སྤྱན་གསུམ་སྐྲ་ནི་གྱེན་དུ་བརྫེས། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱྃ་ག་ནི་གཡོན་གྱི་ཆར། །རྐང་གདུབ་ཆེན་པོས་རྣམ་པར་བརྒྱན། །ཧཱུྃ་ཡིག་ས་བོན་ལས་བྱུང་བ། །ཡི་དགས་སྟེང་བཞུགས་རྟག་ཏུ་འཛུམ། །སངས་རྒྱས་ལྔ་ནི་རབ་སྦྱོར་བས། །ཐོད་པ་ལྔ་ཡིས་དབུ་ལ་བརྒྱན། །མི་བསྐྱོད་པ་ཡི་ཅོད་པན་བསམ། །ཧེ་རུ་ཀར་གྲགས་རྣམ་པར་བསྒོམ། །ཤར་དུ་ཆོས་ཀྱི་འཁོར་ལོ་བྲི། །སངས་རྒྱས་བྱང་ཆུབ་ལྷོ་རུའོ། །འདོད་ལྔའི་ཁྲོ་ཤིང་ནུབ་ཏུ་སྟེ། །བྱང་དུ་ཧེ་རུ་ཀ་དང་མཚུངས། །སྣ་ཚོགས་གཟུགས་ཅན་སྒེག་པ་ལ། །རྒྱན་རྣམས་ཀུན་གྱིས་རྣམ་པར་བརྒྱན། །གཟུགས་མཛེས་ཡི་དགས་སྟེང་དུ་སྟེ། །གཏི་མུག་ཐམས་ཅད་ཉེར་འཇོམས་མ། །ཆོས་ཀྱི་འཁོར་ལོ་དེ་བཞིན་གཞན། །ཡིད་བཞིན་ནོར་དང་དཔག་བསམ་ཤིང་། །བུམ་པ་བཟང་པོ་དེ་བསྒོམ་བྱ། །ལྷ་མོ་རྣམས་ནི་ཕྱག་གཡས་ན། །རྡོ་རྗེ་ཡང་ནི་བསྒོམ་པར་བྱ། །དཀྱིལ་འཁོར་དཀྱིལ་འཁོར་ཐམས་ཅད་ལ། །ཐོད་པའི་སྣོད་ནི་གཡོན་དུའོ། །སྤྱན་དང་མཱ་མ་ཀཱི་སྒྲོལ་མ། །གོས་དཀར་ཤིན་ཏུ་ཡིད་འོང་རྣམས། །མེ་ལ་སོགས་པའི་མཚམས་བཞི་ལ། །ཕྱི་ཡི་འཁོར་ལོར་གཤིན་རྗེ་གཤེད། །ཤེས་རབ་མཐར་བྱེད་རྟ་མགྲིན་དང་། །བདུད་རྩི་འཁྱིལ་བཅས་བསྒོམ་པར་བྱ། །འཁོར་ལོ་ཡི་ནི་སྒོ་སྲུངས་ཏེ། །ལས་རྣམས་ཆོ་ག་མཐོང་བ་ཡིས། །རྣམ་པ་ལྔ་ནི་བསྒོམས་བྱས་ནས། །སངས་རྒྱས་བྱང་ཆུབ་རྣམ་པར་བསྒོམ། །འཁོར་ལོ་བསྒོམ་བྱ་རྣལ་འབྱོར་བས། །གླུ་བཞི་རབ་ཏུ་སྦྱོར་བ་ཡིས། །འཁོར་ལོ་ཅན་ནི་བསྐུལ་བར་

བྱ། །ཙརྩི་ཀཱ་སོགས་སྙན་པའི་གླུ། །དྲུག་འགྱུར་ལ་སོགས་གླུ་རྣམས་ཀྱིས། །བརྩེ་བས་ཁྲོ་བའི་རྗེ་བཙུན་བཞེངས། །ས་གསུམ་པོ་ཡི་གཏི་མུག་སོལ། །བསམ་དུ་མེད་པའི་རྗེ་བཙུན་བཞེངས། །བདུད་བཞི་རྣམས་ལས་རྒྱལ་བར་མཛད། །འཇིག་རྟེན་མགོན་པོས་སྟོད་པར་བཞུགས། །འཇིག་རྟེན་བསོད་ནམས་རྗེ་བཙུན་བཞེངས། །བྱང་ཆུབ་དངོས་ལ་འཇིག་རྟེན་མགོན། །ཁྱོད་ནི་སྟོང་ཉིད་སེམས་པར་མཛད། །ཇི་ལྟར་སྐར་མ་འཕྲོ་བ་ལྟར། །བྱང་ཆུབ་སེམས་ནི་དེ་ལ་ཞུགས། །བརྩེ་བས་ཆགས་པའི་སེམས་ཞུ་སྟེ། །རྡོ་རྗེ་འཛིན་པ་རང་ཉིད་དོ། །དང་པོར་རྣལ་འབྱོར་བསྒོམ་པར་བྱ། །རྗེས་སུ་རྣལ་འབྱོར་གཉིས་པའོ། །ཤིན་ཏུ་རྣལ་འབྱོར་གསུམ་པའོ། །རྣལ་འབྱོར་ཆེན་པོ་བཞི་པའོ། །རྡོ་རྗེ་སེམས་དཔའ་རྫོགས་པ་ལ། །རྣལ་འབྱོར་ཞེས་ནི་མངོན་པར་བརྗོད། །ལྷ་ཡི་སྐུ་ནི་རྫོགས་པ་ལ། །རྗེས་སུ་རྣལ་འབྱོར་ཞེས་གྲགས་སོ། །འཁོར་ལོ་ཐམས་ཅད་རྫོགས་པ་ལ། །ཤིན་ཏུ་རྣལ་འབྱོར་ཡིན་པར་འདོད། །ལྷ་ཡི་མིག་སོགས་བྱིན་བརླབ་དང་། །སྐུ་དང་གསུང་དང་ཐུགས་རྣམས་དང་། །ཡེ་ཤེས་འཁོར་ལོ་རབ་གཞུག་དང་། །དེ་བཞིན་བདུད་རྩི་མྱང་བ་དང་། །མཆོད་དང་བསྟོད་པ་ཆེན་པོ་ནི། །རྣལ་འབྱོར་ཆེན་པོ་ཞེས་འདོད་དོ། །སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་མི་འདའ་སྟེ། །དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །སེམས་ཅན་ཀུན་ལ་བྱམས་པའི་སེམས། །ནམ་ཡང་གཏང་བར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་གཞན་ཆོས་ལ་སུན་མི་དབྱུང་། །ཡོངས་སུ་མ་སྨིན་སེམས་ཅན་ལ། །གསང་བ་བསྒྲག་པར་མི་བྱའོ། །བདག་གི་ཕུང་པོ་སྨད་མི་བྱ། །བཅོམ་ལྡན་ཆོས་ནི་སུན་མི་དབྱུང་། །གདུག་པའི་བྱམས་པ་རྟག་ཏུ་སྤང་། །ཆོས་ལ་ཚད་གཞལ་མི་བྱའོ། །སེམས་ཅན་དད་པ་ཅན་མི་བསླུ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པའི་ཉེས་པ་དེ་བཞིན་ནོ། །རྣལ་འབྱོར་སློང་མོས་རྒྱུ་མི་བྱ། །རྣལ་འབྱོར་སྤང་བར་མི་བྱ་སྟེ། །རྟག་པར་ཀུན་དུ་གསང་སྔགས་བཟླ། །རྟག་ཏུ་དམ་ཚིག་ལ་སོགས་བསྟེན། །གལ་ཏེ་བག་མེད་གྱུར་པ་ཡིས། །བླ་མའི་

དམ་ཚིག་ལས་ཉམས་ན། །དེས་ནི་དཀྱིལ་འཁོར་ཟླུམ་པོ་བྲི། །བདེ་གཤེགས་རྣམས་ལ་ཉེས་པ་བཤགས། །དད་པས་བླ་མའི་དམ་ཚིག་བསྲུང་། །སྙིང་རྗེ་ཅན་གྱིས་མི་རྟོག་པར། །ཉེས་པ་མ་ལུས་སྤང་སེམས་ཀྱིས། །བསམ་གཏན་ལ་གཞོལ་བཟླས་མཆོག་གཞོལ། །བརྟན་ཞིང་དུལ་ལ་བརྩེ་བའི་སེམས། །དད་དང་ལྷག་པའི་བསམ་པ་དང་། །མཆོག་ཏུ་བཟོད་པ་འཛིན་པ་ཡི། །སྐྱེས་བུ་རྟག་ཏུ་བླ་མར་བྱ། །སློབ་མ་བླ་མ་ལ་གུས་དང་། །གཤིན་རྗེ་གཤེད་ལ་རབ་གུས་པ། །བརྟུལ་ཞུགས་ཅན་གྱིས་ཡོངས་སྨིན་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་མཆོག་ཏུ་དགའ་བའི་ངོ་བོ་ཉིད་རྡོ་རྗེ་སེམས་དཔའི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏོ། །འདི་ལྟ་བུའི་ཆེད་དུ་བརྗོད་དོ། །འཁྲུལ་འཁོར་མཐར་ཐུག་གཤིན་རྗེ་གཤེད། །བརྟུལ་ཞུགས་མཐར་ཐུག་ཐོད་པ་ཆེ། །རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་རོ། །ཨེ་མ་ཞི་བ་ཆེན་པོའི་ཆོས། །ཨེ་མ་ཁྲོ་བོ་འཇིགས་མཛད་པ། །ཨེ་མ་མྱ་ངན་འདས་པའི་མཆོག །ཨེ་མ་འཁོར་བ་ཞི་བ་ཉིད། །ཨེ་མ་འདི་ནི་རབ་ཏུ་མཚར། །ཉེས་པ་གང་དེ་ཡོན་ཏན་འགྱུར། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མེད་ཅིང་སྒོམ་པའང་མེད། །ཁམས་ཀྱང་མེད་ཅིང་རྣམ་ཤེས་མེད། །ནམ་མཁའི་དཀྱིལ་དང་མཚུངས་པ་ཉིད། །ནམ་མཁའ་བཞིན་དུ་བདག་མེད་པ། །ཆོསའདི་བདེ་བ་ཆེན་པོའོ། །ས་ཡང་མེད་ཅིང་ཆུ་ཡང་མེད། །མེ་མེད་རླུང་མེད་ནམ་མཁའ་མེད། །རྡོ་རྗེ་སེམས་དཔའ་རབ་སྦྱོར་བས། །བསྐྱེད་པ་འདི་ནི་རབ་ཏུ་གནས། །དངོས་པོ་ཐམས་ཅད་དངོས་མེད་བཤད། །དེས་ན་རང་བཞིན་མེད་ཅེས་བསྒྲགས། །རྣལ་འབྱོར་སྦྱོར་བ་དང་ལྡན་པས། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་དོག་མེད། །དངོས་པོ་ཐམས་ཅད་བདེན་པར་མེད། །ཐོག་མ་བར་དང་མཐའ་མ་སྤངས། །མཆོག་ཏུ་དགའ་བའི་མཚན་ཉིད་དོ། །དེ་ནས་ཙརྩི་ཀཱ་ལ་སོགས་པས་ཆེད་དུ་བརྗོད་པ་འདི་བརྗོད་དོ། །བསོད་ནམས་སྡིག་པ་དག་དང་མ་འབྲེལ་བས། །མཆོག་ཏུ་དགའ་བ་དྲི་མེད་རྣམ་དག་པ། །དེ་བཞིན་ཉིད་ཀྱི་གཏེར་ཆེན་གཅིག་པུ་ནི། །ཀུན་

ནས་སྙིང་རྗེའི་སེམས་ཀྱིས་རབ་ཏུ་གནས། །མཆོག་ཏུ་དགའ་བ་འདི་ཡི་ངོ་བོ་ནི། །ཆོས་རྣམས་ངོ་བོ་བདེ་བ་ཆེན་པོའི་དངོས། །གཟུགས་མེད་བསོད་ནམས་མེད་ཅིང་སྡིག་པ་མེད། །སྐྱེ་དང་འགག་པ་དག་ནི་ཡོད་མ་ཡིན། །དེ་བཞིན་གཤེགས་པ་ཐམས་ཅད་ཀྱི། །སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་བྱང་ཆུབ་སེམས་ཀྱི་རིམ་པར་ཕྱེ་བ་སྟེ་བཅྭ་བརྒྱད་པའོ།། །།དེ་ནས་གཏམ་རྒྱུད་རབ་ཏུ་བཤད་པར་བྱ་སྟེ། བཅོམ་ལྡན་འདས་མངོན་པར་བྱང་ཆུབ་པའི་དུས་སུ་བཅོམ་ལྡན་འདས་ཐུབ་པ་ཆེན་པོ་ལ་བྱང་ཆུབ་ལ་བར་དུ་གཅད་པའི་ཕྱིར་ཤིན་ཏུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་བདུད་ཀྱི་དཔུང་གི་ཚོགས་ཆེན་པོ་དཔག་ཏུ་མེད་པ་ལྷགས་ཏེ། དེའི་དུས་ན་བདུད་ཆེན་པོ་ལས་མཆོག་ཏུ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། །བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེ་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་ཕྱག་ན་རྡོ་རྗེ་བཅོམ་ལྡན་འདས་ཐུབ་པ་ཆེན་པོའི་བཀའ་བཞིན་བྱེད་པ་ལ། ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེ་གཤེད་ཀྱི་ཁྲོ་བོའི་གཟུགས་སུ་བསྒྱུར་ཏེ། བདུད་དང་། གནོད་སྦྱིན་དང་། ལྷ་མ་ཡིན་དང་། ལྷ་དང་། སྲིན་པོ་རྣམས་སྐྲག་ཅིང་འཇིགས་པ་དང་སོད་ཅིག་ཅེས་གསུངས་སོ། །དེའི་དུས་ན་ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། སྐད་ཅིག་ལ་བཟུང་ཞིང་དོན་བཟུང་སྟེ། བསྡུས་ནས་ཤིན་ཏུ་དགའ་བས་ལེགས་པར་སེམས་བསྐྱེད་དོ། །གསང་བའི་བདག་པོ་ཆེན་པོ་ལ། །འདི་སྐད་ཅེས་ནི་བཀའ་སྩལ་ཏོ། །ཕ་རོལ་གྲོང་དུ་རབ་འཇུག་པའི། །ཐབས་རྣམས་རབ་ཏུ་གསལ་བྱ་སྟེ། །འགྲོ་དང་འོང་བར་འདོད་པ་ཡིས། །ཏིང་ངེ་འཛིན་དང་གསང་སྔགས་བཟླ། །བྱེ་བ་བཟླས་པས་འགྲུབ་འགྱུར་ཏེ། །བྱེ་བ་ལྔ་ཡིས་སྨོས་ཅི་དགོས། །དང་བོ་དེ་ནས་བརྩམཔར་བྱ། །བདག་ཉིད་ནམ་མཁའ་ལྟ་བུ་སྟེ། །དང་པོར་གོམས་པར་བྱ་བའི་དུས། །སེམས་ལ་སེམས་ཉིད་གཞུག་པར་བྱ། །

དཔེར་ན་སེམས་འདི་རྨི་ལམ་ན། །འགྲོ་དང་སླར་ཡང་བཟློག་པར་བྱ། །སྐད་ཅིག་ལ་ནི་དེ་བཞིན་གནས། །རྒྱུན་མི་འཆད་པར་སྦྱོར་གོམས་པས། །དཔེར་ན་མཚོན་ཆ་གནས་བྱས་ནས། །གཞུ་ཡིས་མདའ་ནི་འཕེན་པ་སྟེ། །དེ་བཞིན་འདིར་ཡང་ཡིད་ཀྱི་གཞུས། །རྒྱུན་མི་འཆད་པར་འགྲོ་བར་བྱེད། །ཟླ་བ་ཉི་མ་སྦྱོར་བ་ཡིས། །རླུང་གིས་སེམས་ནི་གཞུག་པར་བྱ། །ལུས་ནི་རྣམ་པར་སྤངས་ནས་ནི། །དེ་ལ་ཡིད་ནི་འགྲོ་དང་འཇུག །ཅུང་ཟད་དྲོད་ནི་རྙེད་པ་ཡིས། །ཐོབ་པའི་ཕྱོགས་སུ་སྒོམ་པ་པོ། །ལུས་ཀྱི་ནང་དུ་འཇུག་པ་ནི། །དཔེར་ན་གྲོང་གཞན་ལས་འགྲོ་ཞིང་། །ཟླ་བ་ཉི་མའི་འགྲོས་འཇོམས་ཤིང་། །སྒྲ་གཅན་འཇུག་པ་སྦྱོར་བ་ཡིས། །བགྲོད་པའི་གནས་ནི་ཐོབ་པ་ན། །རླུང་གི་བཞོན་པའི་སྦྱོར་བ་ཡིས། །འཚི་ལྟས་མཚན་ཉིད་ཤེས་བྱས་ལ། །ཆོ་ག་མཚན་ཉིད་ལྡན་པས་བགྲོད། །ཇི་ལྟར་འདོད་པ་གཡོ་མི་གཡོ། །རང་འདོད་ཀུན་ཏུ་སྐྱེ་བར་འགྱུར། །ཐུར་སེལ་འོག་ལམ་གསང་བའི་མཐའ། །གཏོང་ཞིང་ལྟེ་བར་རྩོམ་པར་བྱེད། །སྙིང་ག་མགྲིན་པར་སོང་ནས་ནི། །སྲོག་ནི་སྣ་བུག་དག་ནས་འགྲོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཕ་རོལ་གྱི་གྲོང་དུ་འཇུག་པ་སྟེ། རིམ་པར་ཕྱེ་བ་བཅུ་དགུ་པའོ།། །།དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སྷོ།། །།བླ་མ་ཆོས་ཀྱི་རྒྱལ་པོའི་གསུང་གི་འོད་ཟེར་དང་། །བྷོ་ཊ་པཎྜི་ཏའི་གསུང་དང་། མིའི་དབང་པོ་ཀུན་དགའ་བཟང་པོའི་གསུང་དང་། དཔོན་ཀུན་གཞོན་གྱིས་གསེར་གནང་བ་ལ་བརྟེན་ནས། ཤཱཀྱའི་དགེ་སློང་ཙནྡྲ་ཤྲཱིའི་ཞལ་སྔ་ནས་ཞུས་ཤིང་། པཎྜི་ཏ་ཆེན་པོ་ཙནྡྲ་ཀཱིརྟི་དང་། ཡར་ལུངས་པ་གྲགས་པ་རྒྱལ་མཚན་གྱིས། བལ་ཡུལ་ཡམ་བུའི་གྲོང་ཁྱེར་དུ་བསྒྱུར་རོ།། །།

དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། ཤྲཱི་མཱཾ་རཀྟ་ཡ་མཱ་རི་ཏནྟྲ་རཱ་ཛ་ནཱ་མ། བོད་སྐད་དུ། དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་ཞེས་བྱ་བ། གཤིན་རྗེ་མཐར་བྱེད་དམར་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདྲེས་པར་གྱུར་པ་བདག་མེད་མའི་བྷ་ག་ལ་བཞུགས་སོ། །དེ་ལ་མགྲིན་པར་དམ་འཁྱུད་དེ། །རང་ཉིད་སེམས་ཅན་ཆེད་ཞུས་པ། །ཀྱཻ་རྡོ་རྗེར་གསུངས་པ་དང་། །ཐར་པ་དེ་བཞིན་སྡོམ་པར་ཡང་། །འདུས་པ་ལ་སོགས་རྒྱུད་དུ་ཡང་། །སླར་ཡང་ཆེས་མང་དུ་གསུངས་ཀྱང་། །སེམས་ཅན་བསམ་པ་ཡོངས་རྫོགས་བྱེད། །ད་ནི་བདག་གིས་རབ་བཤད་བྱ། །ཁ་ཅིག་རྒྱལ་སྲིད་འདོད་པ་དང་། །ཚེ་རིང་ནད་མེད་ཕུན་སུམ་ཚོགས། །ཞི་བ་ལ་སོགས་ལས་རྒྱས་པ། །སྣ་ཚོགས་རྒྱུད་དུ་གསུངས་པ་ཡང་། །གང་ཡང་མངོན་པར་སྤྱོད་པ་དང་། །དགྲ་ཡི་སྡེ་ཉམས་བྱེད་པ་དང་། །སྐྲོད་དང་འགུགས་དང་གསོད་པ་དང་། །སྣ་ཚོགས་རྒྱུད་དུ་མ་བརྗོད་པའི། །འཁྲུལ་འཁོར་འཇིག་རྟེན་གསུམ་རྙེད་དཀའ། །ཁྱོད་ལ་ཕན་པའི་ཐབས་གཟུང་ཕྱིར། །བཤད་བྱ་ལྷ་མོ་གུས་བཅས་ཉོན། །འཁྲུལ་འཁོར་གང་གི་མཐུ་སྟོབས་ཀྱིས། །རྟག་ཏུ་རྒྱལ་སྲིད་ཐོབ་བྱ་ནི། །ཇི་སྲིད་ཉི་མ་ཟླ་བ་བཞིན། །འཚོ་བར་འདོད་དོ་གལ་ཏེ་མིན། །ད་ནི་མིང་གི་སྤྱོད་ཡུལ་དུ། །ཁུ་བ་རེངས་དང་སྡེ་འགུགས་དང་། །མཁའ་སྤྱོད་ཉིད་དང་མཆོག་ཏུ་མྱུར། །དེ་ཡི་སྨན་ནི་བཤད་པར་བྱ། །དང་པོར་བྱམས་པ་བསྒོམ་པར་བྱ། །གཉིས་པར་སྙིང་རྗེ་དེ་བཞིན་ནོ། །གསུམ་པར་དགའ་བ་བསྒོམ་པར་བྱ། །བཞི་པར་བཏང་སྙོམས་རྣམ་བསྒོམ་བྱ། །འཇིག་རྟེན་ཆོས་རྣམས་བརྒྱད་པོ་ནི། །ཡོངས་བཏང་སྟོང་པར་བསམ་པར་བྱ། །སླར་ཡང་སྟོང་ཉིད་བྱང་ཆུབ་སྟེ། །གཉིས་པ་ལ་ནི་ས་བོན་བསྡུ། །བཞི་པར་ཡི་གེ་དགོད་པའོ། །ར་ཡིག་ལས་བྱུང་ཉི་མ་ལ། །ཧཱུྃ་བྱུང་སྣ་ཚོགས་རྡོ་རྗེའོ། །དེ་ཉིད་ཀྱིས་ནི་རྡོ་རྗེ་ཡི། །ར་བ་ཞེས་དང་དེ་བཞིན་དུ། །ས་གཞི་རྡོ་རྗེ་བཅིངས་པའོ། །དང་པོར་སྟོང་པར་བསྒོམ་པར་བྱ། །དེ་ནས་ཡི་གེ་ཨཾ་དམར་པོ་ཡོངས་

སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཡི་གེ་ཧཱུྃ་དམར་པོའོ། །དེའི་སྟེང་དུ་བརླན་དང་བཅས་པའི་མགོ་བོས་བརྒྱན་པའི་དབྱུག་པའི་དབུས་སུ་ཧཱུྃ་ཡིག་དམར་པོའོ། །དེར་ཡང་ཉི་མ་ལ་ཧཱུྃ་ཡིག་གོ །དེ་ལས་ངེས་པར་བྱུང་བའི་འོད་ཟེར་རྣམས་ཀྱིས་ནམ་མཁའི་ཕྱོགས་སུ་དཔའ་བོའི་གཟུགས་དེ་ལ་འཇིག་རྟེན་གསུམ་པ་ཐམས་ཅད་བསྡུས་ནས་སླར་ཡང་དེ་ཉིད་དུ་བཅུག་སྟེ། དཔལ་གཤིན་རྗེ་གཤེད་དམར་པོའི་གཟུགས་སུ་བདག་ཉིད་བསམ་པར་བྱའོ། །སྐུ་མདོག་དམར་པོ་གཡོན་བརྐྱང་ཞིང་རྣམ་པར་འགྱུར་བའི་ཞལ་མཆེ་བ་གཙིགས་པ། ལྗགས་འདྲིལ་བ་འཇིགས་པར་བྱེད་པ། ཀླུ་བརྒྱད་ཀྱིས་རྣམ་པར་བརྒྱན་པ། དབུ་སྐྲ་དམར་སེར་གྱེན་དུ་འབར་བ། རྐེད་པའི་ཕྱོགས་སུ་སྟག་གི་པགས་པ་འཛག་པས་རྣམ་པར་བརྒྱན་པ། མིའུ་ཐུང་གསུས་པ་འཕྱང་ཞིང་འཇིགས་པ། སྤྱན་གསུམ་པ་ཤིན་ཏུ་འཇིགས་པར་བྱེད་པ་དམར་པོ་འབར་བའི་རྒྱུན་མི་ཟད་པ་འོད་ཟེར་སྣ་ཚོགས་ཀུན་ཏུ་འཁྲུགས་པ། གཡོན་པར་སྲེད་མེད་ཀྱི་བུ་ལ་སོགས་པའི་ཁྲག་གིས་གང་བའི་ཐོད་པ་དང་། གཡས་པར་བདུད་བཞི་རྣམ་པར་འཇོམས་པར་བྱེད་པའི་དབྱུག་པ་དཀར་པོ་དང་ཀླུའི་རྒྱན་ལ་སོགས་པས་སྤྲས་པ། རྡོ་རྗེ་རོ་ལངས་མས་ཕྲག་པར་འཁྱུད་པ། འདོད་ཆགས་ཆེན་པོ་གཅིག་ཏུ་ངེས་པར་རྒྱས་པ་དང་མཚུངས་པ་གང་ཡིན་པའི་རྗེ་བཙུན་གྱི་གཟུགས་སོ། །རྗེ་བཙུན་མ་ཡང་དེ་དང་འདྲ་སྟེ་ཁྱད་པར་དུ་མགོ་བོ་སྐམ་པོས་བརྒྱན་པ། བཅོམ་ལྡན་འདས་ནི་འཛག་པ་དང་བཅས་པའི་མགོ་བོའི་རྒྱན་དང་སྐ་རགས་ཀྱང་གྲོལ་བར་གྱུར་པའོ། །མ་ཧེ་དམར་པོ་ལ་གཡོན་བརྐྱང་གི་ཞབས་ཀྱིས་གནས་པར་བཞུགས་པའོ། །ཕྱི་ནས་བཅོམ་ལྡན་འདས་ལས་སྐྱེས་པའི་རྩེ་གསུམ་པའི་དབྱུག་པ་དཀར་པོའི་དབུས་སུ་སླར་ཡང་ས་བོན་ཁ་དོག་དམར་པོ་བསམ་པར་བྱའོ། །ཕྱི་ནས་བཅོམ་ལྡན་འདས་ཀྱི་རྡོ་རྗེ་ཡང་ཧཱུྃ་ཡིག་ལས་སྐྱེས་པའོ། །སླར་ཡང་བཅོམ་ལྡན་འདས་མའི་གསང་བའི་པདྨར་ཡང་པདྨ་འདབ་མ་བརྒྱད་པ་དངོས་སུ་ཨཱཿཡིག་གིས་རྫོགས་པར་མཚན་པའོ། །དེའི་རྗེས་སུ་གསང་སྔགས་རྒྱལ་བའི་བདག་ཉིད་ཅན་ནི། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ།

ལྟེ་བའི་འོག་ཏུ་པདྨ་དམར་པོ་འདབ་མ་བརྒྱད་པ་ཁ་དོག་དམར་པོའོ། །དེར་ཡི་གེ་ཧྲཱིཿདམར་པོ་ངེས་པར་སོན་པའོ། །སྤྱི་བོར་སོན་པའི་རེ་ཁ་དཀར་པོ་སླར་ཡང་བསམ་པར་བྱ་ཞིང་བཅོམ་ལྡན་འདས་ཀྱི་དབུ་ལ་གཞུག་པར་བྱའོ། །སླར་ཡང་རྡོ་རྗེའི་ལམ་དེར་སོན་པར་བློ་བཟང་པོས་བསམ་པར་བྱའོ། །ཕན་ཚུན་གཉིས་གཉིས་སྙོམས་པར་ཞུགས་པས་རོ་མཉམ་པའི་ས་བོན་གྱི་གཟུགས་ཅན་ནོ། །ས་བོན་དེ་ལྷ་མོ་བཞིས་རང་གི་གཟུགས་སུ་བླང་བ་ནི། ཤར་ལ་སོགས་པའི་ཕྱོགས་བཞི་རྣམས་ན་གནས་པ་དེ་རྣམས་རང་གི་བདག་པོ་ལ་བལྟ་ཞིང་སློང་བར་བྱེད་པས་ལྷ་མོ་ཐམས་ཅད་བླང་བའི་ཆེད་དུ་གླུའི་མཆོད་པར་བྱེད་པར་བལྟའོ། །ཐུགས་རྗེའི་ཁྲོ་བོ་རྗེ་བཙུན་ཉིད་བཞེངས་ཤིག །ས་གསུམ་མཐའ་དག་རྨོངས་པ་སོལ་མཛོད་ཅིག །རྡོ་རྗེ་ཙ་རྩི་ཀཱ་ཡིས་སོ། །ཇོ་བོ་བདུད་བཞི་བོ་ནི་ལས་རྒྱལ་བ། །སེམས་ནི་གཡེངས་སོ་རྗེ་བཙུན་ཉིད་བཞེངས་ཤིག །ཕག་མོ་ཡིས་སོ། །འཇིག་རྟེན་མགྲོན་གཉེར་སྟོང་ཉིད་བཞུགས་སམ་ཅི། །རྗེ་བཙུན་འཇིག་རྟེན་བསོད་ནམས་ཉིད་ཀྱིས་བཞེངས། །དབྱངས་ཅན་མ་ཡིས་སོ། །བྱང་ཆུབ་རང་བཞིན་འཇིག་རྟེན་མགྲོན་གཉེར་ནས། །ཁྱོད་ཉིད་སྟོང་ཉིད་སེམས་ཤིང་ཅི་ལ་བཞུགས། །གཽ་རཱི་ཡིས་སོ། །རབ་ཏུ་སད་པར་བྱས་ནས་སླར་ཡང་དེ་ལ་རབ་ཏུ་བཞུགས་སོ། །དེའི་འོག་ཏུ་དེ་ལ་ཁུ་བའི་ཚོགས་གྱུར་པ་ལས་བདག་ཉིད་ལྷའི་བདག་ཉིད་ཅན་མ་ཧེ་དམར་པོའི་སྟེང་ན་དེ་ཡང་གར་གྱི་ཉམས་དགུ་དང་ལྡན་པ་བན་དྷུ་ཀའི་མེ་ཏོག་ལྟ་བུ་དྲག་པོ་ཞལ་གཅིག་པ། ཕྱག་གཉིས་པ་མཆེ་བ་རྣམ་པར་གཙིགས་པ། དམར་ལ་ཟླུམ་པའི་སྤྱན་གསུམ་པ། སྨ་ར་དམར་སེར་འཇིགས་པར་བྱེད་པ་མིའུ་ཐུང་གསུས་པ་འཕྱང་ཞིང་འཇིགས་པ། དབུ་སྐྲ་དམར་སེར་གྱེན་དུ་བརྫེས་པ། ལྗགས་འདྲིལ་ཞིང་ཁྲག་འཛག་པ། སྨིན་མ་གཉེར་ཞིང་དྲག་ཏུ་བཞད་པ། མགོ་བོས་མཚན་པའི་དབྱུག་པ་དཀར་པོ་གཡས་པའི་ཕྱག་གིས་འཛིན་པ། ཕྱག་གཡོན་པས་མྱོས་བྱེད་དང་ཁྲག་གིས་གང་བའི་ཐོད་པ་འཛིན་པ། ཉི་མ་བྱེ་བའི་གཟི་བརྗིད་དང་མཉམ་པ། གཡོན་བརྐྱང་བའི་ཞབས་ཀྱིས་གནས་པ། གཤིན་རྗེ་འཇིགས་ཤིང་བསྡིགས་པར་

མཛད་པ། མ་ཧེའི་རྒྱབ་ན་གནས་པ་བརྒྱད་གཉིས་ལོན་པའི་རྣམ་པ་ཅན། ཀླུ་བརྒྱད་ཀྱིས་རྣམ་པར་བརྒྱན་པ། མགོ་བོའི་ཕྲེང་བ་དབུ་ལ་བཅིངས་པ་མགོ་བོའི་ཕྲེང་བ་རབ་ཏུ་འཕྱང་བ། སྟག་གི་པགས་པའི་ཤམ་ཐབས་ཅན། རྡོ་རྗེ་ཕག་མོས་འཁྱུད་པའོ། །བཅོམ་ལྡན་འདས་ཀྱི་གཟུགས་དང་ཁ་དོག་འདྲ་བ་ལ་གྲི་གུག་དང་ཐོད་པ་ཅན་ཕྱག་རྒྱ་ལྔས་རྣམ་པར་བརྒྱན་པའི་ལུས་ཅན་མར་བརྩོན་པའི་སེམས་ཀྱིས་བསྒོམ་པར་བྱ་ཞིང་། དེ་ནས་ང་རྒྱལ་བྱས་ན་བདག་ཉིད་གྲུབ་པར་འགྱུར་བར་ཐེ་ཙོམ་མེད་དོ། །དེ་ནས་བཛྲ་སྭ་བྷཱ་ཝ་[མཱཏྨ་]ཀོ྅ཧིས་གསང་སྔགས་བཀླག་པར་བྱའོ། །དེ་ནས་བཅོམ་ལྡན་འདས་མས་རྗེས་སུ་ཆགས་པ་ཆེན་པོས་ཡན་ལག་དང་ཉིང་ལག་ཐམས་ཅད་རྣམ་པར་བལྟས་ནས་པདྨར་རྡོ་རྗེ་གསོར་ཏེ་གཉིས་ཀའི་སྟག་ལྤགས་ཀྱི་ན་བཟའ་འཕྱར་བར་བསྒོམ་པར་བྱའོ། །དེ་ལ་འདི་དག་རྗེས་སུ་ཆགས་པར་བྱེད་དོ་ཞེས་བྱས་ནས་རྡོ་རྗེ་པདྨ་དག་སེམས་ལ་བྱིན་ནས་ཧཱུྃ་དམར་པོ་ཡོངས་སུ་གྱུར་པ་ལས་རྡོ་རྗེ་རྩེ་མོར་ཨོཾ་ཡིག་སེར་པོས་བྱིན་གྱིས་བརླབས་པ་རབ་ཏུ་བསྒོམ་པར་བྱའོ། །ཨཱཿཡིག་དམར་པོས་པདྨ་དེའི་ཟེ་འབྲུ་ལ་ཨཿཡིག་གིས་བྱིན་གྱིས་བརླབས་པའོ། །དེ་ནས་ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བཀླགས་ནས། རྡོ་རྗེ་པདྨ་མཉམ་པར་སྦྱོར་བ་ལས་བཞེངས་པར་བདག་ཉིད་བསྒོམ་པར་བྱ་སྟེ། ཕྱི་རོལ་གྱི་གཉིས་གཉིས་བཞིན་ནོ། །དེ་ནས་འཕོ་བའི་གནས་སྐབས་ན་བདག་ཉིད་དུ་བསྒོམས་པའི་ལྷ་མོའི་པདྨའི་ཁོངས་སུ་དུས་མཉམ་པར་འཛག་པའི་ཁམས་གཉིས་འདྲེས་པར་བསྒོམ་པར་བྱའོ། །དཀར་པོ་དང་དམར་པོ་དེ་དག་ཡོངས་སུ་གྱུར་པས་གཏི་མུག་གཤིན་རྗེ་གཤེད་ལ་སོགས་པ་རྣམས་བདག་ཉིད་ཇི་ལྟ་བ་བཞིན་དུ་པདྨའི་དབུས་སུ་བསམས་ནས་བཅོམ་ལྡན་འདས་མ་ལས་སྐྱེ་བར་བསྒོམ་པར་བྱའོ། །དེའི་འོག་ཏུ་དེ་རྣམས་མདུན་དུ་བལྟས་ནས་རང་རང་གི་གནས་སུ་སོ་སོར་གནས་པར་བསམ་པར་བྱའོ། །དེ་ནས་ཤར་གྱི་འདབ་མའི་ཉི་མ་ལ་གཏི་མུག་གཤིན་རྗེ་གཤེད་ཙརྩི་ཀཱ་ནག་མོས་འཁྱུད་པའོ། །ལྷོའི་འདབ་མའི་ཉི་མ་ལ་ཕྲ་མ་གཤིན་རྗེའི་གཤེད་སེར་པོ་ཕག་མོ་སེར་མོས་འཁྱུད་པ་སྟེ་དེ་ཡང་ཕག་པའི་གདོང་པ་ཅན་ནོ། །ནུབ་ཀྱི་འདབ་མའི་ཉི་མ་ལ་འདོད་ཆགས་གཤིན་རྗེའི་གཤེད་དམར་པོ་དབྱངས་

ཅན་མ་དཀར་མོ་དང་སྦྱོར་བའོ། །བྱང་གི་འདབ་མའི་ཉི་མ་ལ་ཕྲག་དོག་གཤིན་རྗེའི་གཤེད་སྔོ་བསངས་གཽ་རཱི་མ་དང་སྙོམས་པར་འཇུག་པའོ། །ཡང་ན་ཐམས་ཅད་ཀྱང་གཤིན་རྗེའི་གཤེད་དམར་པོ་དང་། རོ་ལངས་མ་དང་མཚུངས་པར་བསྒོམ་པར་བྱའོ། །མེ་རུ་མུ་མེན་གྱི་བུམ་པ་བཞི་མཉམ་སྦྱར་བས་གང་བའོ། །བདེན་བྲལ་དུ་གསེར་གྱི་བུམ་པ་གླ་རྩིས་གང་བའོ། །དེ་བཞིན་དུ་རླུང་དུ་བྱི་རུའི་བུམ་པ་སི་ཧླས་གང་བའོ། །དབང་ལྡན་དུ་དངུལ་གྱི་བུམ་པ་ག་བུར་གྱིས་གང་བ་ཇི་ལྟ་བ་བཞིན་ནོ། །ཐོད་པ་གང་བ་བལྟས་ནས་ཉི་མ་དང་ཟླ་བ་ཀུན་རྫོགས་པ་དག་ལའོ། །འདི་ཉིད་བདེ་བ་ཆེན་པོ་དང་ཟུང་དུ་འཇུག་པ་མཆོག་ལས་གཞན་པ་མ་ཡིན་པའོ། །དེ་ནས་རང་གི་སྙིང་གར་པདྨ་དང་། ཉི་མ་ལ་གནས་པའི་ཧཱུྃ་ཡིག་ལས་སྐྱེས་པ་དེའི་འོད་ཟེར་རྣམས་ཀྱིས་དཀྱིལ་འཁོར་གྱི་འཁོར་ལོ་ལ་མཆོད་པ་ཀུན་གྱིས་མཆོད་ནས། ཛཿཧཱུྃ་བཾ་ཧོཿཞེས་པས་བདེན་པར་དགུག་པ་དང་། གཞུག་པ་ལ་སོགས་པ་དང་མཆོད་པར་བྱའོ། །སེམས་ཅན་རྣམས་ཐམས་ཅད་བླ་མའི་མན་ངག་ཇི་ལྟ་བ་ལས་སོ་ཞེས་རྣལ་འབྱོར་གཉིས་པའོ། །དེ་ནས་ཕྱོགས་བཅུར་བཞུགས་རྣལ་འབྱོར། །རྣལ་འབྱོར་མ་ཚོགས་དེ་རྣམས་ལ། །བློ་དང་ལྡན་པས་སྔར་བཞིན་དགུག །མཆོད་ཅིང་དབང་བསྐུར་ལ་སོགས་པ། །ཞེས་ཏེ། དེ་བཞིན་གཤེགས་པ་རྣམས་ཀྱིས་དབང་བསྐུར་བཞིན་པ་ལ་སྤྱན་མ་ལ་སོགས་པ་རྣམས་ཀྱིས་ཀུན་དགའ་བའི་ཐུགས་ཀྱིས་སྣ་ཚོགས་པར་གྱུར་པའི་གླུ་ལ་སོགས་པ་དང་གར་གྱིས་བདུད་རྩི་ལྔ་ཡིས་གང་བའི་བུམ་པ་རྣམས་ཀྱིས། །དབང་བསྐུར་རིན་ཆེན་ཆེན་པོ་ལ། །ཁམས་གསུམ་པ་ཡིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཞེས་ཀློག་ཅིང་བསྟོད་པས། དཀྱིལ་འཁོར་བ་ཐམས་ཅད་ཀྱི་དབུ་ལ་ཁུ་བ་སྟེར་དུ་འབྱུང་བ་ལས། རྡོ་རྗེ་སེམས་དཔའི་རྒྱས་བཏབ་པར་བསམ་མོ། །ཆོ་གའོ། །གཏི་མུག་དང་། ཕྲ་མ་དང་། འདོད་ཆགས་དང་། ཕྲག་དོག་རྣམས་ཀྱིས། གསོལ་བ་འདེབས་པར་བྱེད་པ་ནི། ཀྱེ་ཀྱེ་གཤིན་རྗེའི་གཤེད་དམར་པོ། །བླ་མ་སྲིན་པོའི་གཟུགས་རང་བཞིན། །ཁོ་བོས་ཁྱོད་མཐོང་རྣམ་པར་

འཇིགས། །བླ་མ་ཁྲོ་བོའི་རང་བཞིན་སྤོངས། །ཁྱོད་ཀྱིས་གར་མཛད་ས་སྟེངས་དང་། །ས་བླ་དང་ནི་ས་འོག་གཡོ། །ཆགས་པས་བརྒྱན་པའི་ཁྲོ་བོ་ཡི། །གར་མཛད་ཁྱོད་ནི་རོ་ལངས་ལགས། །སྐུ་ནི་སྦོམ་ཐུང་དམར་པོ་སྟེ། །རྣམ་པ་སྣ་ཚོགས་སྐུ་སྤྲུལ་པ། །རྡོ་རྗེ་དབྱངས་ཅན་མ་ཡིས་བཏུད། །གར་མཛད་ཁྱོད་ནི་བདེ་བ་ཆེ། །ཧྲཱིཿཥྚྲཱི་གསང་སྔགས་དག་གིས་ནི། །ཁྱོད་ནི་ས་གསུམ་འཁྲུལ་པ་སེལ། །རྗེ་བཙུན་སྙིང་རྗེའི་ཁྲོ་བོ་ལགས། །གར་མཛད་ཁྱོད་ནི་འགྲོ་ལ་གཟིགས། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེ་ནས་སྔར་བཞིན་དུ་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར། དེའི་སྟེང་དུ་ཨོཾ་ཡིག་ཡོངས་སུ་གྱུར་བའི་གསང་བའི་དཀྱིལ་འཁོར་གསུམ་གྱི་སྟེང་དུ་ཨཱཿཡིག་ཡོངས་སུ་གྱུར་པ་ལས་ཐོད་པ་བསྒོམ་པར་བྱའོ་ཞེས་སོ། །དེའི་དབུས་སུ་བདུད་རྩི་ལྔ་དང་། ཤ་ལྔ་དང་། ཞོ་དང་འོ་མ་དང་། ཤ་དང་། ཉ་ལ་སོགས་པ་དབྱུག་པས་དཀྲུགས་པས་རོ་མཉམ་པར་བྱས་ལ་ཚོས་ནས་རྒྱ་སྐྱེགས་ཀྱི་ཁུ་བ་ལྟ་བུར་བལྟའོ། །ཨོཾ་ཨཱཿཧཱུཾ་ཞེས་པ་འདིས་བསིལ་བར་གྱུར་བར་བྱས་ནས་ཧཱུྃ་ཡིག་ཡོངས་སུ་གྱུར་པའི་ལྕེ་སྦུ་གུ་ཅན་བསམས་ནས་བཏུང་བར་བྱའོ། །རང་རང་གི་ཁ་ཡིས་ནི་ལྷ་མོའི་ཁ་རུ་སྦྱིན་པར་བྱའོ། །དཀྱིལ་འཁོར་པ་རྣམས་ཀྱིས་ཀྱང་བསམས་ནས་ཀུན་ཏུ་སྤྱད་པར་བྱའོ། །དེ་ནས་བདུད་རྩི་མྱངས་པས་ཡང་དག་པར་དགེས་པར་གྱུར་ནས་ཕྱི་ནས་གསང་སྔགས་བཟླས་པར་བྱའོ། །སྙིང་གར་གནས་པའི་ས་བོན་དང་མཚན་མ་བསྟན་པར་བྱས་ནས་གསང་སྔགས་བཟླས་པར་བྱའོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་པས་ཇི་སྲིད་འདོད་པར་བསམས་ནས་བཟླས་པར་བྱའོ། །ལྡང་བར་འདོད་ན་རང་གི་ལུས་ཀྱི་འོད་ཟེར་གྱིས་སེམས་ཅན་གྱི་དོན་བྱས་ནས་ཐམས་ཅད་བདག་ལ་རབ་ཏུ་བཅུག་སྟེ་ཡིད་ཀྱིས་གཤིན་རྗེའི་གཤེད་ལྷན་ཅིག་སྐྱེས་པའི་རྣལ་འབྱོར་གྱིས་ཇི་ལྟར་བདེ་བར་གནས་པར་བྱ་ཞེས་པའོ། །ལྷན་ཅིག་སྐྱེས་པའི་གཤིན་རྗེ་གཤེད་ཀྱི་རྣལ་འབྱོར་གྱི་གནས་སྐབས་ནི་བདག་ཉིད་ཀྱི་གཟུགས་ལྟ་བུ་རང་བཞིན་གྱིས་གྲུབ་པའི་གཤིན་རྗེའི་གཤེད་དུ་ང་རྒྱལ་བྱེད་པར་བརྗོད་པར་བྱ་སྟེ། །རང་བཞིན་གྱིས་གྲུབ་

པའི་ཞལ་གཅིག་པ་ཕྱག་གཉིས་པ་གཤིན་རྗེ་གཤེད་ཁོ་ན་ངའོ་ཞེས་སོ། །རྣལ་འབྱོར་ཆེན་པོའོ། །རྣལ་འབྱོར་བཞི་བརྗོད་པ་འདིས་ཐུན་གསུམ་ཉིད་ཀྱིས་སམ། ཐུན་བཞིས་ཀྱང་རུང་སྟེ། དེ་ལྟར་མངོན་པར་འདོད་པའི་དུས་སུ་རྟག་ཏུ་ཡོངས་སུ་རྫོགས་པའི་བར་ཇི་སྲིད་དུའོ་ཞེས་སོ། །དེ་ནས་འབུམ་ཕྲག་གི་མཐར་མཚན་ཐོག་ཐག་ཏུ་བཟླས་པར་བྱ་སྟེ། །སྔོན་དུ་བསྙེན་པར་བྱས་པར་འགྱུར་རོ། །དེ་ནས་ལས་ཐམས་ཅད་པའི་ཐབས་ཀྱི་ཆོ་གས་མར་དང་སྦྲང་རྩི་དང་མེ་ཏོག་དམར་པོས་སྟོང་ཕྲག་བཅུར་སྦྱིན་སྲེག་བྱ་སྟེ། རེ་རེ་ཞིང་གསང་སྔགས་བཀླགས་ནས་སོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་མནྟྲ་སིདྡྷིམྨེ་དེ་ཧི་ཏཱི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་གསང་སྔགས་ཀྱི་སྔགས་ཀྱི་དངོས་གྲུབ་ཏུ་འགྱུར་རོ། །ལས་ཐམས་ཅད་ཀྱི་དངོས་གྲུབ་བོ། །དམར་པོ་ཞེས་པའི་ལྷ་ལ་སོགས་པའི་ལེའུ་སྟེ་དང་པོའོ།། །།འདིར་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱེ་ཕྱག་རྒྱ་ཆེའི། །དངོས་གྲུབ་ཇི་ལྟར་འགྱུར་བ་དང་། །རྣམ་པ་ཅི་ཡིས་བསྒྲུབ་བྱ་བ། །དེའང་བཅོམ་ལྡན་འདས་གསུང་དུ་གསོལ། །ཁ་ཡིས་ཁ་ལ་འོ་བྱས་ནས། །ཕན་ཚུན་དམ་པོ་ཡིས་ནི་འཁྱུད། །མཆོག་ཏུ་དགའ་བའི་གཟུགས་ཀྱིས་ནི། །དགའ་མ་བཤད་པར་བྱ་ཡིས་ཉོན། །གར་བྱེད་པའི་འབྱུང་གནས་རྣལ་འབྱོར་བ་དག་ཉིད་ཀྱི་གཟུགས་གང་ཡིན་པ། བཅོམ་ལྡན་འདས་མཆོག་ཏུ་རྣམ་པར་མ་ཆད་པར་འབབ་པ་སྟེ། །དཔེར་ན་ཆུ་ཀླུང་གི་རྒྱུན་རབ་ཏུ་འབབ་པ་བཞིན་ནོ། །འདིར་ཇི་སྲིད་དུ་བསྒོམས་པ་ལས་སྐྱོན་སྔགས་བཟླས་པར་བྱའོ། །བཅོམ་ལྡན་འདས་ཀྱི་གཟུགས་གལ་ཏེ་མྱུར་དུ་གྲུབ་པར་འགྱུར་གྱི་གཞན་དུ་མ་ཡིན་ནོ། །ཇི་སྲིད་དུ། འདིའི་དངོས་གྲུབ་ཀྱང་ཕྱག་རྒྱ་ཆེན་པོའི་དངོས་གྲུབ་ཁོ་ན་དེའོ། །འདི་རྣམས་ཀྱང་རྣལ་འབྱོར་གོམས་པ་ཁོ་ནས་ཐམས་ཅད་སྒྲུབ་པར་བྱེད་ཀྱི་གཞན་དུ་མ་ཡིན་ནོ། །གོམས་པའི་སྦྱོར་བར་འགྱུར་བ་ནི་སྐྱེས་པ་དང་བྱུང་བ་དང་མ་བྱུང་བ་དང་། སྔོན་དུ་གནས་པ་རྣམས་ཐར་པའི་དོན་དང་འདོད་པའི་དོན་རྣམ་པ་སྣ་ཚོགས་པ་དང་སངས་རྒྱས་ཉིད་ཀྱི་དངོས་གྲུབ་ཀྱང་སྐྱེ་བ་འདི་ཉིད་ལའོ། །ལས་

ཐམས་ཅད་ཡོངས་སུ་སྤངས་ནས་དེར་སོན་པའི་ཡིད་དུ་གྱུར་ནས། ཇི་སྲིད་རང་ཉིད་འོངས་ནས་སྨྲ་བར་བྱེད་དེ། ཀྱེ་ཀྱེ་སྒྲུབ་པ་པོ་མཆོག་ཅི་ཡིན་པ་དེ་སྩལ་བར་བགྱིའོ། །དེ་ནས་མཆོད་ཡོན་བྱིན་ནས་ཕྱག་བྱས་ཏེ་དངོས་གྲུབ་བླང་བར་བྱས་པ་དེ་སྦྱིན་པར་བྱེད་དོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་རྡོ་རྗེ་རོ་ལངས་མ་སྒྲུབ་པར་འདོད་ན། རྡོ་རྗེ་རོ་ལངས་མའི་གཟུགས་བརྙན་བྱས་ཏེ། རས་སམ་འབྲས་བུ་ལ་བྱས་ཏེ། རྗེ་བཙུན་གྱི་ཁ་དོག་དང་དབྱིབས་སུ་ཐོག་མར་ཡང་དག་པར་གནས་ཏེ། ཇི་ལྟར་འབྱོར་པའི་མཆོད་པ་བྱས་ཏེ། དེ་དག་རང་རང་སོ་སོའི་གཟུགས་མ་འདྲེས་པས་ཀུན་ཏུ་མཐོང་བ་དེ་སྲིད་དུ་བཟླས་པར་བྱའོ། །ཇི་སྲིད་དུ་འོངས་ནས་སྒྲུབ་པ་པོ་ལ་འཁྱུད་དེ་སྨྲས་པ། ཀྱེ་སྒྲུབ་པ་པོ་ཁྱོད་ཀྱི་བཀའ་བསྒོ་བ་ཅི་ལགས། སྒྲུབ་པ་པོས་མཆོད་ཡོན་བྱིན་ནས་སྨྲ་བར་བྱ་སྟེ། བདག་གི་ཆུང་མར་འགྱུར་བའོ་ཞེས་པས་ཆུང་མར་འགྱུར་རོ། །དེ་ལ་ལོངས་སྤྱད་པས་གཤིན་རྗེ་གཤེད་ཀྱི་གཟུགས་སུ་གྲུབ་པར་འགྱུར་རོ། ཨོཾ་དྭེ་ཥ་ར་ཏི་ཨཱ་གཙྪ་ཨཱ་གཙྪ་ནུ་ད་ནུ་ད་ཏྲུ་ཊ་ཏྲུ་ཊ་ཧཱུྃ་ཛཿསྭཱ་ཧཱ། ཡང་ན་ཨོཾ་བཛྲ་བེཏྟ་ལི་ཨཱ་གཙྪ་ཨཱཙྪ་ཧཱུྃ་ཛཿསྭཱ་ཧཱ། གཞོན་ནུ་མ་ལོ་བཅུ་དྲུག་ལོན་པ་ཡན་ལག་བཟང་མོ་བག་མར་བླངས་པས་སམ། སྐྱེད་ནས་སྐལ་ལྡན་མར་བྱས་ཏེ། དབང་བསྐུར་བའི་རྣལ་འབྱོར་མ་སྔགས་ཀྱི་སྒོམ་པའི་ཚུལ་གྱིས་ཡང་དག་པར་མཆོད་དེ། ལག་པ་གཡོན་པས་འཁྱུད་ལ་རྣལ་འབྱོར་མའི་གཟུགས་སུ་བསམས་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །དེ་ནས་དེ་ལ་བཟུང་ནས་གཤིན་རྗེའི་གཤེད་ཀྱི་གཟུགས་སུ་གྲུབ་པར་འགྱུར་རོ། །ཨོཾ་བཛྲ་བེཏྟ་ལི་ཛྭ་ལཾ་ཧཱུྃ་ཛཿསྭཱ་ཧཱ། ཞེས་བཟླས་པར་བྱའོ། །དེ་ནས་གཏི་མུག་གཤིན་རྗེའི་གཤེད་སྒྲུབ་པར་འདོད་ན་གཏི་མུག་གཤིན་རྗེའི་གཤེད་ཀྱི་ཆ་ལུགས་སུ་བྱས་ནས་གཡས་པ་དང་ཅིག་ཤོས་ཀྱི་རྐང་པའི་མཐིལ་གྱིས་པདྨ་མནན་ཏེ། ཇི་སྲིད་དུ་ཀྱེ་སྒྲུབ་པ་པོ་ཞེས་བོས་ནས་བཀའ་བསྒོ་བ་ཅི་ལགས་ཞེས་སྨྲ་བར་བྱེད་པ་དང་། ཅི་བགྱི་བར་འགྱུར་ཞེས་སྨྲ་བ་དེ་སྲིད་དུ་བཟླས་པར་བྱའོ། །དེ་ནས་བརྩམས་ཏེ་འཇིག་རྟེན་གསུམ་གྱི་རྒྱལ་སྲིད་ཀྱང་

སྟེར་རོ། །དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་བཞིན་དུ་ཕྲ་མ་གཤིན་རྗེའི་གཤེད་དང་། འདོད་ཆགས་གཤིན་རྗེའི་གཤེད། ཕྲག་དོག་གཤིན་རྗེའི་གཤེད་སྒྲུབ་པར་འདོད་ན་དེ་བཞིན་ཉིད་དུ་འབྲས་བུ་སྲུབ་པའི་གསང་སྔགས་ནི། ཨོཾ་མོ་ཧཱ་ཡ་མཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོཾ་པི་ཤུ་ན་ཡ་མཱནྟ་ཀྲྀ་ཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོཾ་རཱ་ག་ཡ་མཱནྟ་ཀྲྀ་ཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ། ཨོཾ་[ཨཱིརྵྱ]་ཡ་མཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་བར་བྱའོ། །དེ་ནས་གཏི་མུག་དགའ་མ་སྒྲུབ་པར་འདོད་ན་གཏི་མུག་དགའ་མ་ལྟ་བུའི་སྔར་བརྗོད་པའི་ལྷ་མོའི་གཟུགས་མ་ཧེ་ལ་ཞོན་པ་བདག་ཉིད་དང་ལྷན་ཅིག་པ་བྱས་ནས་སྔར་བཞིན་དུ་མནན་ཏེ། ཇི་སྲིད་དུ་འོངས་ནས་ཅི་བགྱི་བར་འགྱུར་རོ་ཞེས་སྨྲ་བ་དེ་སྲིད་དུ་བཟླས་པར་བྱའོ། །དེ་ནས་བརྩམས་ནས་སྒྲུབ་པ་པོ་མངོན་པར་འདོད་པ་ཕུན་སུམ་ཚོགས་པར་འགྱུར་རོ་ཞེས་སོ། །དེ་བཞིན་དུ་ཕྲ་མ་དགའ་མ་དང་། འདོད་ཆགས་དགའ་མ་དང་། ཕྲག་དོག་དགའ་མ་བསྒྲུབ་པར་བྱའོ། །དེ་ནས་སྔགས་ནི། ཨོཾ་མོ་ཧཱ་ར་ཏི་ཨཱ་གཙྪ་ཨཱཙྪ་ཧཱུྃ་ཛཿ། ཨོཾ་པི་ཤུ་ནཱ་ར་ཏི་ཨཱ་གཙྪ་ཨཱཙྪ་ཧཱུྃ་ཛཿ། ཨོཾ་རཱ་གཱ་ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ། ཨོཾ་[ཨཱིརྵྱ་]ར་ཏི་ཨཱ་གཙྪ་ཨཱ་གཙྪ་ཧཱུྃ་ཛཿ། ཞེས་བཟླས་པར་བྱའོ། །ཡང་ན། ཨོཾ་བཛྲ་ཙརྩི་ཀེ་ཨཱ་གཙྪ་ཨཱ་གཙྪ་ཧཱུྃ་ཛཿ། དེ་བཞིན་དུ། བཛྲ་ཝཱ་རཱ་ཧཱི། བཛྲ་སྭ་ར་སྭ་སྟི། བཛྲ་གཽ་རཱི་ཞེས་བཟླས་པར་བྱའོ། །དེ་ནས་གནོད་སྦྱིན་སྒྲུབ་པར་འདོད་ན། དེའི་ཚེ་འཇིག་རྟེན་གྱི་དངོས་གྲུབ་སྒྲུབ་པའི་འདུ་ཤེས་ཀྱིས་གནོད་སྦྱིན་གྱི་གཟུགས་བརྙན་བྱས་ཏེ། དེ་མནན་ཏེ་བསྒྲུབ་པར་བྱའོ། །བཀའ་བསྒོ་བ་ཐམས་ཅད་ཕུན་སུམ་ཚོགས་པར་འགྱུར་རོ། །དེ་བཞིན་དུ་གནོད་སྦྱིན་མོ་དང་། ཀླུ་དང་། ཀླུ་མོ་དང་། ཡི་དགས་དང་། ཡི་དགས་མོ་དང་། ཤ་ཟ་དང་། ཤ་ཟ་མོ་དང་། ལྷ་དང་། ལྷ་མོ་དང་། མི་དང་། མི་མོ་ཡང་ངོ་། །གཞན་ཡང་མངོན་དུ་བསྒྲུབ་པར་བྱས་ཏེ། ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཆེ་གེ་མོ་སཱ་དྷ་ཡ་སཱ་དྷ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། །དེ་ནས་རྡོ་རྗེ་དབྱུག་པ་སྒྲུབ་པར་འདོད་ན། སྐར་མ་རྒྱལ་ལ་རྡོ་རྗེའི་དབྱུག་པ་ཤིང་ལས་བྱུང་བ་སོར་མོ་སུམ་ཅུ་བའི་དབྱུག་པ་བྱས་ནས། བ་བྱུང་ལྔས་བྱུགས་ཏེ། ཙནྡནདང་།

མེ་ཏོག་གི་ཕྲེང་བས་ཉེ་བར་མཛེས་པར་བྱས་ཏེ། གང་དེ་ཐོག་མར་རལ་གྲིའི་ཚུལ་གྱིས་བཟུང་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །དེ་ནས་དབྱུག་པ་འཛིན་པར་འགྱུར་ཏེ། གཤིན་རྗེའི་གཤེད་དང་མཚུངས་པར་ཕ་རོལ་གནོན་ཏོ། །ཨོཾ་ཧྲཱྃཿཥྚྲཱིཿབི་ཀྲྀ་ཏཱ་ན་ན་བཛྲ་དཎྜ་ཛྭཱ་ལ་ཡ་ཛྭཱ་ལ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། །དེ་ནས་ཐོད་པ་སྒྲུབ་པར་འདོད་ན་གཤིན་རྗེའི་གཤེད་ཤིང་གི་གཟུགས་ཐོད་པ་སོར་མོ་སུམ་ཅུ་སོ་གཉིས་པ་བྱས་ནས་སྔར་བཞིན་དུ་ལག་པ་གཡོན་པས་ཐོགས་ཏེ། ལག་པ་གཡས་པས་གཡོགས་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །འབྲས་བུ་ནི་དེ་ལྟ་བུ་ཁོ་ནའོ། །སྔགས་ལ་ནི། ཀ་པཱ་ལཾ་ཛྭཱ་ལ་ཡ་ཞེས་པ་ཁྱད་པར་རོ། །དེ་ནས་དབྱུག་པའི་ཕྱག་རྒྱ་བསྒྲུབ་པར་བྱ་སྟེ། དེའི་ཚེ་ལག་པ་གཡས་པ་ཁུ་ཚུར་བྱས་ནས་སྡིགས་མཛུབ་བརྐྱང་བར་བྱའོ། །དེའི་ཕྱག་རྒྱ་བཅིངས་ནས་ཇི་སྲིད་དུ་འབར་བར་གྱུར་པ་དེ་སྲིད་དུ་བཟླས་པར་བྱའོ། །དེ་ནས་གཤིན་རྗེའི་གཤེད་ཀྱི་གཟུགས་ཀྱི་དངོས་གྲུབ་ཏུ་འགྱུར་རོ། །སྔགས་ལ་ནི། དཎྜཾ་མུ་ཏྲཱཾ་ཛྭཱ་ལ་ཡ། ཞེས་བ་ཁྱད་པར་རོ། །འདི་ནི་འདོད་པ་ལྔ་པོ་ཐམས་ཅད་ལ་ཉེ་བར་ལོངས་སྤྱོད་པ་ཉིད་ཀྱིས་ཐམས་ཅད་བསྒྲུབ་པར་བྱའོ་ཞེས་ཏེ། ཇི་ལྟར་རྙེད་པའི་དམ་ཚིག་གི་རྫས་བསམ་པ་རབ་ཏུ་རྫོགས་པའི་དོན་དུ་བཟའ་བར་བྱ་ཞིང་། བཏུང་བར་བྱའོ། །ཡང་ནས་ཡང་དུ་གང་ཅིའང་རུང་། །དེ་ཀུན་གདོན་མི་ཟ་བར་ཡང་། །བཟའ་བྱ་ཐམས་ཅད་བཏུང་བར་བྱ། །ཕུད་ཀུན་གཤིན་རྗེའི་གཤེད་ལ་དབུལ། །ཞེས་པ་དངོས་གྲུབ་ཆེན་པོ་སྒྲུབ་པའི་ཆོ་གའི་ལེའུ་སྟེ་གཉིས་པའོ།། །།དེ་ནས་དངོས་གྲུབ་ཕྲན་ཚེགས་སྒྲུབ་པར་འདོད་ན། དེ་ལ་ཞི་བ་ཅན་ལ་སོགས་པ་བསྒྲུབ་པར་བྱ་སྟེ། གྲོ་ག་ལ་ཡང་ལན་བརྒྱ་རྩ་བརྒྱད་དུ་སྔགས་པའི་འོ་མས་རྩིབས་བཅུ་གཉིས་པའི་འཁོར་ལོ་སོ་སོ་ཐ་དད་པ་མངོན་པར་བྲི་བར་བྱའོ། །དེའི་ཤར་སྒོ་ནས་བརྩམས་ཏེ། གཡས་བསྐོར་གྱིས་ཡི་གེ་བཅུ་གཉིས་བྲི་བར་བྱའོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དབུས་སུ་ཆུའི་ས་བོན་བཾ་ཡིག་བྲི་བར་བྱ་སྟེ། བཾ་ཡིག་གཉིས་ཀྱི་ཁ་སྦྱར་ལ་བསྒྲུབ་བྱའི་མིང་དེའི་དབུས་སུ་བྲི་བར་བྱའོ། །ཕྱི་རོལ་ཏུ་ཡི་གེས་བསྐོར་བར་བྱའོ། །དེ་ནས་

ཁ་སྦྱོར་དུ་བྱས་ནས་སྐུད་པ་དཀར་པོས་དཀྲིས་ནས་མྱོས་བྱེད་ཀྱིས་དཀྲིས་ཏེ་བརྒྱ་རྩ་བརྒྱད་དུ་བྱིན་གྱིས་བརླབས་ལ་འོ་མས་གང་བའི་བུམ་པར་བཅུག་སྟེ། སྔགས་བཟླས་པར་བྱའོ། །ཇི་ལྟར་འབྱོར་པའི་མཆོད་པ་བྱས་ནས། ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་བ་དེ་བ་དཏྟ་སྱ་ཤནྟིཾ་ཀུ་རུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པ་བྱ་སྟེ་ཞི་བར་འགྱུར་རོ། །འཇིག་རྟེན་པ་རྣམས་ཀྱི་སྡིག་པ་དང་ནད་ལ་སོགས་པ་ཉེ་བར་འཚེ་བ་གྲོང་གི་ཕྱོགས་བཅུ་རྣམས་སུ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་གྲཱ་མ་ཨ་མུ་ཀ་སྱ་སརྦོ་བ་དྲ་ཝ་ཤཱནྟིཾ་ཀུ་རུ་ཀུ་རུ་ཧཱུྃ་ཧཱུྃ་བ་ལིཾ་གྲྀཧྞ་གྲྀཧྞ་ཕཊ་ཕཊ་སྭཱ་ཧཱ། ཞེས་པ་འདིས་ལན་བདུན་དུ་བྱིན་གྱིས་བརླབས་ནས་གཏོར་མའི་ཆོ་གས་སྦྱིན་པར་བྱའོ། །ཕྱི་རོལ་ལ་སོགས་པ་སྔོན་དུ་བྱས་ཏེ་འོ་མས་སྦགས་པའི་སྦྱིན་སྲེག་གྲོང་གི་དབུས་ཇི་སྲིད་པར་བྱས་ན་ཉེ་བར་འཚེ་བ་ཐམས་ཅད་ཞི་བར་འགྱུར་རོ། །དེ་ནས་རྒྱས་པར་བྱ་བར་འདོད་ན་སྔར་བཞིན་དུ་འཁོར་ལོ་གཉིས་མངོན་པར་བྲིས་ཏེ་ཡི་གེ་བཅུ་གཉིས་པོ་རྣམས་ཀྱི་དབུས་སུ་བྷཱུྃ་ཡིག་དཀྱིལ་འཁོར་གྱི་འཁོར་ལོའི་ས་བོན་བྲི་བར་བྱའོ། །དེའི་དབུས་སུ་བསྒྲུབ་བྱའི་བཽ་ཥཊ་གཉིས་ཁ་སྦྱར་བ་བྲི་བར་བྱའོ། །ཕྱི་རོལ་དུ་གུར་གུམ་གྱིས་གྲུ་བཞི་པའི་རི་མོ་གསུམ་གྱིས་བསྐོར་བར་བྱའོ། །དེ་སྐུད་པ་སེར་པོས་དཀྲིས་ནས་བརྒྱ་རྩ་བརྒྱད་དུ་མངོན་པར་བསྔགས་ཏེ། མར་དང་སྦྲང་རྩིས་གང་བའི་བུམ་པར་བཅུག་ནས་སྔགས་བཟླས་པར་བྱའོ། །ཇི་ལྟར་འབྱོར་པའི་མཆོད་པ་བྱས་ནས་སྔགས་བཟླས་པར་བྱ་སྟེ། ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་བྷཱུཾ་བཽ་ཥཊ་ལྷ་སྦྱིན་གྱི་པུཥྚིཾ་ཀུ་རུ་བཽ་ཥཊ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བཟླས་པར་བྱའོ། །ཇི་སྲིད་དུ་ནོར་འཕེལ་ཞིང་རྒྱས་པར་གྱུར་གྱི་བར་དུའོ་ཞེས་པའོ། །སྔགས་བཟླས་པའི་བར་མ་ཆད་པར་ཞོའི་ཟན་གྱིས་སྦྱིན་སྲེག་བྱའོ། །དེ་ནས་དབང་དུ་བྱེད་པར་འདོད་ན་སྔར་བཞིན་དུ་འཁོར་ལོ་གཉིས་ལ་སེན་རྩིའི་ཁུ་བས་ཡི་གེ་བཅུ་གཉིས་པོ་རྣམས་མངོན་པར་བྲིས་ཏེ། དབུས་སུ་ཧྲཱིཿཡིག་ཀུ་རུ་ཀུལླེའི་ས་བོན་ནོ། །དབུས་སུ་ཧོཿཡིག་གཉིས་ཁ་སྦྱར་བ་ཀུན་བྲིའོ། །ཕྱི་རོལ་ཏུ་གྲུ་གསུམ་པའི་རི་མོས་བསྐོར་བར་བྱའོ། །དེ་ནས་སྲད་བུ་དམར་པོས་ཀུན་ཏུ་དཀྲིས་ནས་བརྒྱ་རྩ་བརྒྱད་དུ་བྱིན་གྱིས་བརླབས་ལ་མར་དང་སྦྲང་རྩིས་གང་བའི་ཁམ་ཕོར་ལ་རྒྱ་སྐྱེགས་ཀྱི་ཁུ་བས་བྲིས་ཏེ་བཅུག་ནས་

ཇི་ལྟར་འབྱོར་པའི་མཆོད་པ་བྱས་ནས་སྔགས་བཟླས་པར་བྱའོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧྲཱིཿཧོ། །ལྷ་སྦྱིན་གྱིས་ལྷ་སྦྱིན་ལ། ཝ་ཤ་མཱ་ན་ཡ་ཧོཿཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ཇི་སྲིད་དབང་དུ་གྱུར་གྱི་བར་དུ་བཟླས་པར་བྱའོ། །སྔགས་བཟླས་པའི་མཐར་ནི་ལན་ཚྭ་དང་ལྷན་ཅིག་པའི་མེ་ཏོག་དམར་པོ་དང་ལྡན་པའི་སྦྱིན་སྲེག་བྱའོ། །དེ་ནས་གོང་བུ་དགུག་པར་སེམས་ན་དུར་ཁྲོད་ཀྱི་སོལ་བ་དང་སའི་གཟུགས་བརྙན་གྱི་དབུས་སུ་སྔགས་དང་དེ་ཉིད་ཀྱི་མིང་སྙིང་གར་བཅུག་སྟེ། རྐང་པའི་མཐེ་བོས་མནན་ནས་བཟླས་པ་བྱ་སྟེ། འདི་ཁོ་ན་བསྒྲུབ་བྱའི་གོང་བུ་ཞེས་ཇི་སྲིད་དུ་གོང་བུ་ཁུགས་པར་གྱུར་གྱི་བར་དུ་བཟླས་པར་བྱའོ། །སྔགས་ལ་ནི། ཝ་ཤ་མཱ་ན་ཡའི་གནས་སུ་ཨཱརྵ་ཡ་ཧཱུྃ་ཞེས་པ་དང་། ཧོཿཡིག་གནས་སུ་ཛཿཞེས་པ་ནི་ཁྱད་པར་རོ། །ཨོཾ་མ་རྨེ་མ་རྨ་ཨ་བི་གྷ་ཏེ་ཨོཾ་ཙརྩི་ཀེ་ཧ་ར་ཧ་ར་བུཀྐཾ་མཱ་ར་ཡ་མཱ་ར་ཡ་ཆེ་གེ་མོའི་ཆེད་དུ་ཛཿ། ཨོཾ་གཾ་བྷཱི་རི་ཙརྩི་ཀེ་པ་ཧཱུྃ་ཤོ་ཎི་ཏ་པྲཱི་ཡེ་གཾ་བྷྲཱི་ར་ཆེ་གེ་མོ་ལ་ཛཿ། ཤིང་གཅིག་གམ་དུར་ཁྲོད་དམ་རི་བོ་རུ། ལྷོར་མངོན་པར་ཕྱོགས་པས་གཅེར་བུར་བྱུང་ནས་བརྒྱ་རྩ་བརྒྱད་དུ་བཟླས་པར་བྱའོ། །དེ་ནས་འགྲུབ་པར་ཐེ་ཚོམ་མེད་དོ། །བཅོམ་ལྡན་འདས་སྔགས་ཀྱི་ཆོ་ག་ཇི་ལྟ་བུ། བཅོམ་ལྡན་འདས་ཀྱིས་བཀའ་སྩལ་པ། དབེན་པར་གཅིག་པུ་ཅན་དུ་གྱུར་པས་རྗེ་བཙུན་གྱི་བྲིས་སྐུ་རབ་ཏུ་གསལ་བའི་ཕྱོགས་བཅུར་གནས་པའི་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་མངོན་སུམ་དུ་བྱས་ནས་མིའི་རུས་པ་བཅད་པ་དང་། ཁྲག་ཆེན་པོ་དང་། བྱ་རོག་ཆེན་པོའི་ཁྲག་གིས་སོར་མོ་བཅུ་གཉིས་པའི་རྩིབས་བཅུ་གཉིས་པའི་རྣམ་པའི་འཁོར་ལོའི་དབུས་སུ་རླུང་གི་ས་བོན་ནོ། །དེའི་ཁོངས་སུ་དགྲའི་མིང་རྣམ་པར་བཅད་པ་དང་བཅས་པ་ཁ་སྦྱར་ལ། བྱ་རོག་གི་མགྲིན་པ་ལ་བཅིངས་ནས་གལ་ཏེ་མ་བཀྲོལ་བ་དེའི་ཚེ་ཚར་གཅོད་དོ། །དེའི་ཚེ་ཚར་མ་ཆོད་ན་དེ་ལ་ས་བོན་བཅུ་གཉིས་བྲི་བར་བྱའོ། །ཕཊ་ཕཊ་ཧཱུྃ་ཧཱུྃ་ན་ན་ཏཱ་ཀྲྀ་བི་ཥྚྲཱིཿཧྲཱིཿཨོཾ་། ཇི་ལྟར་འབྱོར་པའི་མཆོད་པ་བྱས་ནས་སྟོབས་པོ་ཆེ་ཡིས་གདུག་པ་བྱིན་ནས་གལ་ཏེ་རྒྱུན་ལ་བསྐུར་བར་བྱའོ། །གལ་ཏེ་མ་ཡིན་ན་ཁྭ་ཏའི་གཤོག་པ་ལ་ལན་བདུན་དུ་བསྔགས་ཏེ་ཁྱིམ་གྱི་སྒོ་རུ་མིང་ནས་སྨོས་ན་འཕྲལ་དུ་སྐྲོད་པར་བྱེད་དེ་དེ་ཚར་གཅོད་དོ། །

དེ་བཞིན་དུ་རྩིབས་བཅུ་གཉིས་པའི་འཁོར་ལོའི་དབུས་སུ་ཚ་བ་གསུམ་དང་། དུག་དང་། སྐེ་ཚེ་དང་། རུས་པ་ཆེན་པོ་དང་། བུད་ཤིང་གི་མེའི་ས་བོན་གྱི་དབུས་སུ་རྣམ་པར་བཅད་པ་དང་བཅས་པའི་ཡ་ཡིག་གཉིས་ཁ་སྦྱར་ལ་ཐ་ཡིག་གཉིས་ཀྱིས་ཕྱི་རོལ་ནས་བསྐོར་ཏེ་མེའི་ཤིང་གི་མེ་ལ་གདུང་བར་བྱའོ། །དེ་བུ་ཁྱེའུའི་སྟེང་དུ་གཟུང་ན་དེའི་སྐད་ཅིག་ལ་འཆི་བར་འགྱུར་རོ། །གལ་ཏེ་མ་ཡིན་ན་མིའི་རུས་པ་སོར་བཞི་པ་ལ་ལན་བདུན་དུ་མངོན་པར་བསྔགས་པར་བྱས་ནས་དགྲའི་སྒོར་སྦ་བར་བྱའོ། །དེ་ཡིས་ཁྱིམ་ནས་སྐྲོད་པར་བྱེད་དོ། །དེ་བཞིན་ཉིད་དུ་ས་བོན་བཅུ་གཉིས་ཡོངས་སུ་གྱུར་པས་རྩིབས་བཅུ་གཉིས་པའི་འཁོར་ལོའི་དབུས་སུ་ཙནྡན་ལ་ཛི་ཝ་དང་། ཀཥྛི་ཀ་དང་། གཞན་གྱིས་མི་ཐུབ་པའམ་འཁྲི་ཤིང་གི་ཆུའི་ས་བོན་གྱི་དབུས་སུ་དེ་ཉིད་གཉིས་ཀྱིས་ཁ་སྦྱར་ལ་ཐ་ཡིག་གཉིས་ཕྱི་རོལ་ཏུ་བསྐོར་བར་བྱའོ། །བརྒྱ་རྩ་བརྒྱད་བཟླས་སོ། །འོ་མས་བཀང་བཞིན་དུ་རཱ་ཛཱ་ཏ་དང་མེ་ཏོག་དམར་པོ་འབུམ་ཕྲག་གཅིག་ལ་འཆི་བ་མེད་ཅིང་དེ་ལས་གཞན་དུ་ཡང་རཱ་ཛཱ་ཏ་དེའི་དངོས་པོ་འགྲོ་བ་མེད་དོ། །དེའི་ཚེ་བདག་ཉིད་མཚམས་མེད་པ་ལྔ་བྱེད་པ་ཡང་བྲལ་བར་འགྱུར་རོ། །ཡང་ན་ཤིང་སེ་ཕ་ལའི་འབྲས་བུ་དང་ལྡན་པ་ལྟ་བའི་མེ་ཏོག་དམར་པོ་རྣམས་ཀྱིས་དེ་བཞིན་ཉིད་དུ་ས་བོན་བཅུ་གཉིས་ཀྱིས་ཡོངས་སུ་གང་བའི་ཁམ་ཕོར་དུ་བཞག་ནས་བཟླས་པར་བྱའོ། །ལྷ་དང་། ལྷ་མ་ཡིན་དང་། མིའམ་ཅི་དང་། ལྟོ་འཕྱེ་ཆེན་པོ་དང་། སྦྲུལ་གདུག་པ་དང་། མཁའ་འགྲོ་དང་། མཁའ་འགྲོ་མ་དང་། གནོད་སྦྱིན་དང་། སྲིན་པོ་དང་། གདུལ་དཀའ་བའི་མི་དང་། མི་བདག་རྒྱལ་པོ་ལ་སོགས་པ་རྣམས་འབངས་དང་འབངས་མོའི་དངོས་པོ་འགྲོ་བར་བྱེད་དོ། །གཤིན་རྗེ་གཤེད་དམར་པོའི་རྒྱུད་དུ་ཐུན་མོང་གི་ཞི་བ་ཅན་ལ་སོགས་པའི་ཆོ་གའི་ལེའུ་སྟེ་གསུམ་པའོ།། །།དེ་ནས་མངའ་བདག་དམ་འཁྱུད་ཅིང་། །ཚེམས་ཀྱིས་མ་མཆུ་འཚིར་མཛད་པ། །དེ་ལ་བདག་མེད་མས་སེམས་ཅན། །དོན་ཕྱིར་ཕན་བྱུང་ཞུས་པ་ནི། །བཅོམ་ལྡན་ཇི་ལྟར་སེམས་ཅན་རྣམས། །ཅི་ལྟར་རྒྱལ་པོ་རྣམས་སུ་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །ལྷ་མོ་ངོ་མ་ཆོགས་པའི་ཕྱིར། །ཁྱོད་ལ་བཤད་པར་བྱ་ཡིས་ཉོན། །

ཨ་ཡིག་དང་བ་ཡིག་དག་ལས་ཀྱང་གཞན་དུ་སྐར་མ་རྒྱལ་གྱི་གཞི་པ་ལ་ལ་བ་ཊི་ཀ་བྱེད་དུ་བཅུག་ལ་སྐར་མ་རྒྱལ་ལས་ས་གསུམ་པོ་བསྒྲུབ་པར་བྱའོ། །རྒྱལ་རིགས་ཀྱི་རིགས་ཀྱི་ཁྱིམ་ལྔ་རུ་གསང་སྔགས་སྟོང་ཕྲག་བཟླས་པར་བྱའོ། །རྣལ་འབྱོར་མའི་རྡོ་རྗེ་ཉིད་མ་བསང་གཏོར་དང་། རང་གི་གསང་སྔགས་སྒྲུབ་པ་ནི་སྔོན་དུ་ཁྲི་བཟླས་པའི་སྒྲུབ་པ་ལས་སོ། །གསེར་དང་། དངུལ་དང་། བྱི་རུ་དང་། བཻཌཱུརྱ་དང་། མཱ་ལི་ཀ་ལ་བསྙེན་པ་འབུམ་ཕྲག་གཅིག་དང་། དེ་བཞིན་དུ་བཅུའི་ཆ་ཤས་ཀྱི་སྦྱིན་སྲེག་བྱའོ། །རྡོ་རྗེའི་ས་ལ་འབད་པ་ལས་སླར་ཡང་། ཏྃ་བྃ་རྩྃ་བྃ་རྃ། ཕྱོགས་རྣམས་སུ་རྣམ་པར་གཞག་པར་བྱའོ། །དབུས་སུ་རྒྱན་ཐམས་ཅད་ཀྱིས་བརྒྱན་པ་གསང་སྔགས་ལ་བརྩོན་པ་མཉམ་པར་གཞག་པའི་རྣལ་འབྱོར་པས་གང་སྔགས་ཀྱི་ལྷའི་བདག་ཉིད་རྣམས་ལ་ཉེར་སྤྱོད་ལྔའི་མཆོད་པ་རྣམས་ཀྱིས་དང་། ཕྱོགས་བཞིར་རྡོ་རྗེ་ཐོད་པ་རྣམས་སུ་ཡང་དག་པར་གང་བའི་གཏོར་མ་བྱས་ཏེ་ཕྱི་རོལ་ཏུ་ཕྱོགས་ཀྱི་གཏོར་མ་བྱས་ནས་དེ་བཞིན་དུ་བགེགས་ལ་ཕུར་བ་དང་། མཆོད་སྦྱིན་གྱི་ཤིང་ལས་བྱུང་བའི་དབྱུག་པ་རྣམས་ཀྱིས་བགྱིངས་པ་དང་བཅས་པས་གསང་སྔགས་ཀློག་གོ །ཕྱི་རོལ་དུ་ཡང་དེ་ཉིད་དོ། །ངོས་བཞིའི་ཕྱི་རོལ་ཏུ་པྲྃ་པྃ་གྲྃ་ཤྃ་ང་། གཏོར་མ་སྦྱིན་པ་སྔོན་དུ་འགྲོ་བས་དྲིལ་བུ་དཀྲོལ་ཏེ། དེ་བཞིན་དུ་ཀློག་པར་བྱེད་པའི་ཀློག་པ་པོ་དང་། སྒྲུབ་པ་པོ་བཞི་ཡིས་གར་བྱེད་པ་ལ་བརྩོན་པའོ། །ཉམས་པ་དང་འགོག་པ་ཞེས་སོ། །སཱ་ལུ་ལ་སོགས་པ་ལྔ་བཟའ་བ་དང་། བཟའ་བ་མ་ཡིན་པ་དང་བཅས་པ་མེད་དོ་ཞེས་པ་བསོད་ནམས་རྣམ་པ་བཞི་ཤེས་པར་བྱའོ། །ཇི་ལྟར་དབྱེ་བར་ཤེས་པར་བྱ་བ་མ་ཡིན་ཏེ། ཡོངས་སུ་གང་བའི་ཐོད་པ་རུ་ཆང་གི་བཏུང་བ་ཅུང་ཟད་བྱའོ། །ཐབ་ཏུ་ཡང་བློ་དང་ལྡན་པས་སྦྱིན་སྲེག་བྱའོ། །ཇི་ལྟར་གསང་སྔགས་མཉམ་པར་གཞག་པས་དཔའ་བོའི་དབང་པོ་ཉིད་བསྒྲུབ་པར་བྱའོ། །དེ་ནས་སྦྱིན་སྲེག་འབུམ་ཕྲག་གཅིག་བྱས་ན་གལ་ཏེ་འདོད་ན་ཕྱི་རོལ་གྱི་ཐུན་མོང་གི་འཁོར་ལོས་སྒྱུར་བ་ཐོབ་བོ།། །།འདི་ཉིད་ཀྱིས་ཉིས་འགྱུར་གྱིས་འགྱུར་བ་འདིར་ཐེ་ཚོམ་མེད་དོ། །དེ་ནས་ལྷ་མོས་གསོལ་པ་ཕྲ་མོའི་རྒྱལ་སྲིད་ཐོབ་པ་ལ་དགྲ་འབྱུང་ངོ་། །ཐབས་ཆེས་མང་པོ་ཅི་ཡིས་ལྷའི་དབང་པོ་ཡིད་ཀྱི་ཤིང་རྟ་ཡང་དག་པར་

རྫོགས་པར་འགྲོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྙིང་རྗེ་དང་ལྡན་པ་སེམས་ཅན་གྱི་བསམ་པ་ཡོངས་སུ་རྫོགས་པར་བྱེད་པར་འགྱུར་བ་དང་། གལ་ཏེ་དགེ་འདུན་མཆོད་པའི་ཚོགས་ཀྱི་བཟའ་བར་བྱ་བ་ཡང་རྗེས་སུ་ཉིན་རེར་བྱེད་པ་དང་། དེའི་དོན་ཡང་བྱ་སྟེ་སེམས་ཅན་མཆོད་པར་བྱས་པར་འགྱུར་རོ། །སྔགས་ཀྱི་བསམ་གཏན་ལ་བརྩོན་པས་དང་པོར་དབང་བསྐུར་བར་བྱ་སྟེ། རང་གི་སྙིང་པོ་དང་ཉེ་བའི་སྙིང་པོའི་གསང་བའི་སྔགས་རབ་ཏུ་སྦྱིན་པར་བྱའོ། །ཐུན་མཚམས་གསུམ་དུ་གཏོར་མ་དྲུག་ཅུ་རྩ་བཞི་པ་བྱིན་ནས་ཇི་ལྟ་བ་བཞིན་དུ་བྱའོ། །བྱ་བའི་རང་བཞིན་དེས་སེམས་ཅན་མཆོད་པ་ཇི་ལྟ་བ་བཞིན་དུ་འགྱུར་རོ། །བཀོད་པ་ལྔ་བྱ་སྟེ། གསང་བར་བྱས་ནས་རང་གི་མཆོད་སྦྱིན་གྱི་མཐར་གཏོར་མ་དབུལ་བར་བྱའོ། །སྔགས་ཀྱི་བསམ་གཏན་ལ་བརྩོན་པས་རྣལ་འབྱོར་མ་བཞིས་མཆོད་པ་མང་པོ་དང་དབང་བསྐུར་བར་ཡང་བྱའོ། །རྒྱན་ལྔ་དང་ནི་ཡང་དག་ལྡན། །རྟག་ཏུ་མྱོས་བྱེད་མང་པོ་དང་། །གྲི་གུག་དང་ནི་ཐོད་པར་ལྡན། །ཀུན་ཏུ་སྟག་པགས་ཤམ་ཐབས་དང་། །སཱ་ལི་རྣམས་ཀྱིས་ཁ་བཀང་ནས། །ཁ་ནས་ཁ་ཡི་ནང་དུ་སྦྱིན། །སྒྲུབ་པོ་གཅིག་ནི་རྒྱན་ཀུན་བརྒྱན། །གཡོན་པས་དྲིལ་བུ་དཀྲོལ་བྱེད་ཅིང་། །གཡས་ཉིད་རྡོ་རྗེ་གསོར་བར་བྱེད། །ཁྲུ་ལྔ་ཡི་ནི་ཚད་ཀྱིས་ནི། །བྲིས་སྐུ་ལྔ་པོ་གྱིས་ཤིག་དང་། །གཏི་མུག་ཕྲ་མ་འདོད་ཆགས་དང་། །ཕྲག་དོག་ཁ་དོག་དབྱེ་ལས་བྲི། །དཀར་པོ་སེར་དམར་སྔོ་བསངས་རྣམས། །རང་རང་གཟུགས་ལ་བྲི་བར་བྱ། །དབུས་སུ་གཤིན་རྗེའི་གཤེད་བྲིའོ། །སྔགས་ལ་མཆོག་ཏུ་གཞོལ་བ་ཡིས། །སྦྲང་ཆེན་སྣག་ཚ་བྱས་ནས་ནི། །མཆོག་གི་རུས་པས་བྲི་བར་བྱ། །ཨ་ཡིག་དང་ནི་བ་ཡིག་དག །འབུམ་ཕྲག་བཞི་པོ་ཡང་དག་རྫོགས། །ཐབ་ཁུང་གྲུ་གསུམ་པའི་དབུས་སུ། །སྦྱིན་སྲེག་སྔགས་ལ་མཆོག་གཞོལ་བ། །ཕྱིར་གཞན་སློབ་དཔོན་བཞི་རྣམས་ཀྱིས། །དེ་བཞིན་ཐབ་ཏུ་འདབ་གསུམ་གྱིས། །ཕྱི་ནས་ས་བོན་བཅུ་གཉིས་དང་། །དེ་བཞིན་འཁོར་ལོ་བཅུ་གཉིས་ལ། །སྔགས་ཀྱིས་ཆ

བོན་བྲི་བར་བྱ། །གྲོ་ག་སོར་བཅུ་དྲུག་ཉིད་ལའང་། །མིང་མེད་ཀྱི་ནི་ཁྲག་ཉིད་ལ། །སེན་རྩི་ཡིས་ནི་བསྲེས་པས་སམ། །ཡང་ན་རྒྱ་སྐྱེགས་ཁུ་བས་སོ། །ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་རཱ་ཡཀྵེ་ཡ། ཡཀྵེ་ཡ་ཙ་ནི་རཱ་མ་ཡ། ལྷ་མོ་གསང་སྔགས་རྙེད་དཀའ་འདི། །བདག་གིས་ངོ་མ་ཆོགས་པར་བཤད། །འདི་ཡི་སྔགས་ཀྱི་མཐུ་སྟོབས་ཀྱིས། །བདག་གིས་སངས་རྒྱས་ཉིད་སྒྲུབ་སྟེ། །འཇིག་རྟེན་གསུམ་གྱི་དབང་ཕྱུག་འགྲོ། །གསང་སྔགས་བརྩོན་པས་སྦྱར་བྱས་ན། །སྡེ་དང་བཅས་པ་བར་སྣང་ལ། །འགྲོ་འགྱུར་འདི་ནི་ཐེ་ཚོམ་མེད། །གཤིན་རྗེའི་གཤེད་དམར་རྣལ་འབྱོར་པ། །ཁ་ཅིག་རྟག་ཏུ་དམ་ཚིག་བརྩོན། །རིགས་ལྔའི་བསྙེན་པར་གྱུར་པ་ཡང་། །འབུམ་དུ་བཟླས་པས་བྲི་བར་བྱ། །ཕོ་ཉས་ཤར་གྱི་དཀྱིལ་འཁོར་དུ། །ཁམ་ཕོར་གཉིས་ཀྱི་དབུས་སུ་མར་དང་སྦྲང་རྩིས་ཡང་དག་པར་གང་བ་ལ་བཞག་ནས་ཞོའི་ཟན་དང་། ཡུངས་ཀར་དཀར་པོ་དང་། ལན་ཚྭའི་སྦྱིན་སྲེག་བྱའོ། །ནུབ་ཀྱི་འདབ་མ་ལ་དེ་དང་མཚུངས་པའི་ཁམ་ཕོར་ལ་མེ་ཏོག་དམར་པོ་དང་། སེན་རྩི་དང་། རྒྱ་སྐྱེགས་ཀྱི་ཁུ་བ་བསྲེས་པས་སྦྱིན་སྲེག་བྱའོ། །བྱང་ཕྱོགས་ཀྱི་འདབ་མ་ལ་སྦྲང་ཆེན་གྱིས་གང་བའི་ཁམ་ཕོར་ལ་ཡང་དག་པར་བཞག་ནས་ཐབ་ཁུང་གྲུ་གསུམ་དུ་ཤིང་སིཊྛ་ཀ་ཤུ་དང་། ཤིང་སཾ་ཀོ་ཙ་དང་། ཤིང་ཀཎྜི་ཀ་དང་། དུག་དང་། སྐེ་ཚེ་རྣམས་ཀྱིས་སྦྱིན་སྲེག་བྱའོ། །དགུ་ཡི་བདག་ཉིད་ཅན་འབད་པས། །དང་པོར་དམ་ཚིག་བྱས་ནས་ནི། །རྒྱན་ལྔ་ཡིས་ནི་བརྒྱན་པ་ཡིས། །རྣལ་འབྱོར་མ་ཡང་དེ་དང་མཚུངས། །སྣ་ཚོགས་རིན་ཆེན་རང་བཞིན་བརྒྱན། །རྔ་ཡབ་དཀར་པོས་བརྒྱན་པ་ཡི། །ལག་པ་དག་གིས་རྡོ་དྲིལ་ཡང་། །ཡང་ནས་ཡང་དུ་གཏོར་མ་སྦྱིན། །ཇི་ལྟར་ཁ་ཅིག་ཡོན་ཕུལ་བས། །གང་གིས་མཉེས་པར་འགྱུར་བ་ཡིན། །དབུས་སུའང་དེ་དང་མཚུངས་པར་བྱ། །མཐའ་རུ་བཞི་འགྱུར་དུ་བྱའོ། །དགེ་འདུན་བཟའ་བ་ཡང་བྱའོ། །དམན་དང་ཞན་ལ་རྗེས་བརྩེ་བ། །སོ་སོར་བདག་ནི་དམ་ཚིག་མཆོད། །ཤེས་རབ་བཅས་ཤིང་ཡོན་དང་བཅས། །རིགས་

ནི་ལྔ་པོ་རྣམས་ཀྱིས་ནི། །དེ་ནས་ཞོ་བཅས་བཟའ་བ་ཡི། །མེ་ལ་སྦྱིན་སྲེག་བྱ་བའོ། །བློ་བཟང་འབད་པས་བཞག་མི་བྱ། །དབྱུག་པ་ལྷན་ཅིག་དེ་སྒོ་བཞིར། །རྔ་བོ་ཆེ་ཡི་སྒྲ་བྱའོ། །གང་དང་གང་དུ་སྒྲ་ཐོས་པ། །རོ་ལ་སྡེ་ནི་རབ་བྲོས་ནས། །རྣ་བ་རྣམས་ནི་གསལ་བར་བྱེད། །མིག་གིས་མཐོང་བར་མི་བྱེད་ཅིང་། །སྡེ་རྣམས་དབང་དུ་བྱེད་པ་དང་། །མགོ་ལ་ཟུག་རྔུར་འགྱུར་བ་དང་། །སྐྲོད་པ་དག་ནི་བྱེད་པ་ཡིན། །ཡང་ན་བྱའི་གཤོག་པ་ལ་བཅིངས་ནས་བརྗོད་པར་བྱ་སྟེ། གང་དང་གང་དུ་འགྲོ་བ་དེ་དང་དེ་ཉིད་དུ་ཕ་རོལ་གྱི་སྡེ་རྣམས་ནི་རང་གི་ཆུང་མ་ཡང་ཡོངས་སུ་དོར་ནས་སྨྱོ་བར་འགྱུར་རོ། །བདག་ཉིད་གཡུལ་ལ་མཆོག་ཏུ་གཞོལ་བར་འགྱུར་རོ། །གླང་པོ་ཆེ་རྣམས་དང་། རྟ་ལ་སོགས་པ་རྣམས་ཀྱིས་ལྡོག་སྟེ་བདག་ཉིད་ཀྱིས་སྡེ་ཡིས་འགྲོ་བར་བྱེད་དོ། །གང་གི་ཚེ་སྡེ་ཚན་གསུམ་གྱིས་གཡུལ་བྱས་ནས་དུམ་བུས་ལྟུང་བར་བྱེད་དོ། །ཕོ་ཉ་གཅིག་པུས་གནས་པས་ཇི་ལྟ་བ་བཞིན་དུ་འཚོ་བ་ཙམ་གྱིས་འཚོ་བར་བྱེད་དོ། །དེའི་ཐལ་བས་ཕ་རོལ་གྱི་སྡེ་གཤོག་པར་བྱེད་པའམ། ཀུན་ཏུ་བསྐོར་བས་སྒྲིབ་པར་འགྱུར་རོ། །གློ་བུར་དུ་གླང་པོ་ཆེའི་ཚད་ཀྱི་རྡོ་བ་འབེབ་པར་བྱེད་དོ། །ཆར་ཆེན་པོ་འབེབ་པར་འགྱུར་རོ། །ཀླུའི་ཚུལ་གྱི་སྒྲུབ་པས་སྦྱིན་སྲེག་འབུམ་གྱིས་འདོད་པ་རྙེད་དོ། །ཤི་བའི་ཕ་རོལ་ཏུ་ཡང་དགྲ་བོ་དེ་རྣམས་འབངས་སུ་འགྱུར་རོ། །འདི་ནི་སུམ་འགྱུར་གྱིས་ས་དང་འཇིག་རྟེན་གསུམ་ལ་དབང་བྱེད་པར་འགྱུར་རོ། །དེ་ནས་ཤིང་སེ་བ་ལའི་འབྲས་བུ་འབུམ་ཕྲག་གཅིག་གིས་དེའི་འབྲས་བུར་འགྱུར་རོ་ཞེས་པ་གཤིན་རྗེའི་གཤེད་དམར་པོའི་རྒྱུད་དུ་དངོས་གྲུབ་ཕྲན་ཚེགས་ཀྱི་ལས་རབ་འབྱམ་གྱི་ལེའུ་སྟེ་བཞི་བའོ།། །།དེ་ནས་བཅོམ་ལྡན་འདས་མས་གསོལ་བ། དེ་ནས་བྷ་ག་ལ་རྟགས་ཡང་དག་པར་སྦྱོར་བའི་ཁུ་བ་འདི་ནུ་མ་རབ་ཏུ་འཕེལ་བར་བྱ་བ་ལ་ནད་ཉམས་པ་ལས་དང་། ཡིད་བུད་མེད་ཀྱི་དབང་དུ་གྱུར་པ་མེད་པ་ལས་དང་། དེ་འཆིང་བར་བྱེད་པ་ལས་ཀྱང་ཁུ་བ་ཡིས་ནུ་མ་ལ་བསྲུང་བ་དང་བསྐྱབ་པའི་སྦྱོར་བ་བཤད་དུ་གསོལ། དེ་ནས་བཅོམ་ལྡན་

འདས་ཀྱིས་བཀའ་སྩལ་པ། ཁྱོད་ཀྱིས་ང་ལ་ཞུས་པ་ལེགས་སོ་ཞེས་གནང་ནས། དང་པོར་ཕུང་པོ་སྦྱང་བྱ་སྟེ། །ཕྱི་ནས་རབ་འབྱམ་ལས་བརྩམ་བྱ། །འབྲས་བུ་གསུམ་གྱི་ཕྱེ་མ་གཟུང་། །ཡ་བཀྵ་ར་[པཱ་ལཱ་ཤ]། །ཟོས་ནས་བུ་རམ་འཐུངས་པ་ལས། །སྲིན་དང་འཁོགས་པ་རབ་ཏུ་འཇོམས། །ཏིལ་མར་ཀཻ་ཏ་ཀེའི་ཁུ་བ། །ཧི་ལ་མོ་ཙི་ཁུ་བ་དང་། །རྒྱམ་ཚ་འཐུངས་ཤིང་བྱུག་པ་དེའི། །སྲིན་བུ་ཤིག་རྣམས་འཇོམས་པར་འགྱུར། །ཏིལ་མར་ཀཻ་ཏ་ཀའི་ཁུ་བ། །པི་ཙི་ནྲི་ཝན་ཡང་དག་ལྡན། །དྲག་མོ་བྷྲ་མ་ཎ་སྦྱོར་བས། །ནྲི་ཝ་ཎ་ཡིས་འཇོམས་པར་འགྱུར། །ཧི་ལ་མོ་ཙིའི་ཁུ་བ་དང་། །རྒྱམ་ཚ་ཅུང་ཟད་ཡང་དག་ལྡན། །གྲིབ་མར་རབ་ཏུ་འཇུག་བྱས་ནས། །པི་ཙི་པི་ཏུ་འཇོམས་པར་བྱེད། །ཏིལ་མར་ཀཻ་ཏ་ཀའི་ཁུ་བ། །རྒྱ་སྐྱེགས་རྩ་བར་སྦ་བྱས་ན། །འཐུང་བའི་སྦྱོར་བས་ཏིལ་མར་འཇོམས། །ཀུཥྨཎྜ་ཁུ་རྐང་མར་དང་། །པི་ཙེ་ནྲི་ཝན་ཡང་དག་ལྡན། །ཀླུ་ཡི་ཕྱེ་མ་འཐུངས་གྱུར་ན། །བད་ཀན་རྣམས་ཀྱི་སྦྲང་རྩི་འཇོམས། །ཉི་མ་རེ་རེ་རེ་བྱ་བའོ། །ཕྱི་ནས་སྨན་ནི་བརྩམ་པར་བྱའོ། །དེ་ནས་འབྲས་བུ་སྦྱིན་པར་གནས། །གཞན་དུ་འབྲས་བུ་མེད་ལ་དགའ། །ཤལ་མི་ལི་ཤུན་ཕྱེ་མ་དང་། །ཏཔྟ་སྙིང་པོས་བཟའ་བར་བྱ། །རྣམ་བདུན་བསྔགས་ལ་ཐོ་རངས་སུ། །རུང་སྟེ་བཟའ་བ་ཟ་བྱེད་ལ། །སླར་བདག་ཇི་སྲིད་འཚོ་ཡི་བར། །ཁྲག་དང་ཁུ་བ་འཕེལ་བར་བྱེད། །ཨོཾ་ཙཎྜ་མ་ཧཱ་རོ་ཥ་ཎ་ཨི་མཾ་དི་བྱ་ཨ་མྲྀ་ཏཾ་མེ་ཀུ་རུ་ཧཱུྃ་ཕཊ། ས་ཊི་ཏཾ་དང་མ་ཧི་ཥཾ། །ན་རི་ཀེ་ལ་དག་ལ་ཡང་། །ཝཱ་ཤཱིའི་ཉིང་ཁུ་ཡང་དག་ལྡན། །ཕག་ལས་བྱུང་བའི་ཚིལ་ཁུ་ཡིས། །རྟགས་དང་རྣ་བ་ནུ་མའི་དང་། །བྷ་ག་ཡི་ཡང་རྣམ་པར་མཉེས། །ལུས་ཀུན་རྣམ་པར་མཉེས་པ་ཡིས། །འཕེལ་བར་འགྱུར་བར་ཐེ་ཚོམ་མེད། །ངེས་པར་སེན་མོས་བསྡིགས་བྱས་ནས། །བསྐུས་ནས་ཀྱང་ནི་དེ་ཉིད་ཀྱིས། །སྐྱེ་གནས་དབུས་སུ་རབ་གཞུག་བྱ། །རྒས་བས་སྐྱེ་གནས་འཕེལ་བར་འགྱུར། །སེ་འབྲུའི་པགས་པ་སྙིགས་མ་ཡི། །ཡུངས་ཀར་ཏིལ་མར་ལ་བཙོ་བྱ། །ནུ་མ་

མཉེས་པས་འཕེལ་བར་བྱེད། །ཡུངས་ཀར་དཀར་པོ་ཤུ་དག་དང་། །དྲི་བཟང་དྲི་ཧཱ་ཏཱི་བྱས་པས། །སྙིགས་མ་ཡིས་ནི་ལིང་ག་འཕེལ། །ནུ་མ་རྣ་བ་འཕེལ་བར་འགྱུར། །གཞན་གྱིས་མི་ཐུབ་དཀར་པོ་དང་། །ལག་ལྡན་པི་པི་ལིང་བྱས་པས། །མ་ཧེ་ཡི་ཡང་མར་སར་གྱིས། །འཐུངས་པས་ལིང་ག་འཕེལ་བར་བྱེད། །ད་དྷུར་ཁུ་བ་རྟ་བོན་པོ། །རྩ་བར་བཅུག་ནས་མ་ཧེ་ཡི། །མར་གསར་དང་ནི་བསྲེས་པ་དང་། །ད་དྷུར་འབྲས་བུ་གོ་ཌ་ཀ། །ཉིན་དང་མཚན་དུ་གདུང་བར་བྱ། །དེ་ནས་མ་ཧེ་ཡི་སཾ་གུ་ཌ་མཉེས་ནས་སྔར་བརྗོད་པས་མཚན་མོ་གསུམ་དུ་བྱུགས་ནས་མཉེས་པར་བྱ་སྟེ་འཕེལ་བར་འགྱུར་རོ། །ལྷམ་བུ་ཆུ་ཤེལ་གྱི་ཕྱེ་མ་ཡིས་མར་བསྒྲུབས་ནས་བཙུན་མོའི་སྐྱེ་གནས་ཀྱི་ནང་དུ་བྱུག་པར་བྱའོ། །ཤི་ཐིལ་ཡིས་སྐྱེ་གནས་དམ་པོར་འགྱུར་རོ། །པདྨའི་ས་བོན་དང་། ཨུཏྤ་ལའི་ས་བོན་དང་། པདྨའི་རྩ་ལག་དང་། པུ་ཤེལ་ཙེ་དང་། གླ་སྒང་རྣམས་ཏིལ་གྱི་ཏིལ་མར་ལ་བཙོ་བར་བྱའོ། །དེས་བྷ་གའི་ཡན་ལག་མངོན་པར་བགྲོད་དཀའ་བའི་དོན་དུ། ཤི་ཐི་ལ་ལ་ཉམ་ང་བར་འདོར་བ་ལ་སོགས་པ་འཇོམས་པར་བྱེད་དོ། །ནིམྦའི་ཤུན་པ་བསྐོལ་བ་ཡིས་བྷ་ག་བཀྲུ་བར་བྱའོ། །ནིམྦའི་ཤུན་པས་བདུག་པར་བྱའོ། །གཞོན་ནུ་མ་བཟང་མོ་ཉིད་དྲི་བཟང་བོ་ཅན། སྐལ་བ་བཟང་མོ་ལ་སོགས་པའི་ཡོན་ཏན་དང་ལྡན་པར་འགྱུར་རོ། །བ་བླའི་ཆ་ཤས་ལྔ་དང་། རྒྱ་སྐྱེགས་ཀྱི་ཤིང་གི་འགྱུར་བྱེད་ཀྱི་ཆ་ཤས་གཅིག་དང་། ཆུ་ཡིས་བཏགས་ནས་བྱུགས་པ་ཙམ་གྱིས་བྷ་ག་དང་མཆན་ཁུང་དང་། རྟགས་རྣམས་ཀྱི་སྤུ་རྣམས་འབྱི་བར་བྱེད་དོ། །ཧ་ལ་ཧ་ལ་དང་གསེར་གྱི་ཕུད་བུ་བསྲེས་པ་ཚ་བའི་ཏིལ་མར་དང་། །ཤིང་ས་སཔྟཱ་དང་། ཤིང་ཧཱསྠཱ་པི་དང་། དེས་ལིང་ག་ལ་སོགས་པ་ལ་བྱུག་པར་བྱ་སྟེ། སླར་ཡང་སྐྲ་རྣམས་འབྱུང་བར་འགྱུར་རོ། །མ་ཧེ་དང་། ཕག་པ་དང་། གླང་པོ་ཆེ་དང་། ཁྱིམ་བྱ་རྣམས་ཀྱི་མར་ཁུ་དག་གིས་མཉེས་པས་ནུ་མ་ལ་སོགས་པ་རྣམས་འཕེལ་ལོ། ཛྭ་ཏིའི་

མེ་ཏོག་གི་ཏིལ་མར་གྱིས་བཏགས་ན་བྷ་ག་འཕེལ་བར་འགྱུར་རོ། །མ་ཧེའི་མར་གསར་དང་། ཤུ་དག་དང་། ཤིང་ཀུ་ཊ་རྣམས་ལྟེ་བར་མཉེས་པར་བྱ་སྟེ་ནུ་མ་འཕེལ་བར་འགྱུར་རོ། །རྔ་མོའི་ཆུ་ཡིས་བཀྲུས་པ་ལས་ལིང་ག་འཕེལ་བར་འགྱུར་བ་དེ་དང་འདྲའོ། །དཎྜོད་པ་ལའི་རྩ་བ་དང་། བ་ལས་བྱུང་བའི་མར་གྱིས་བཏུང་བར་བྱ་སྟེ། སྦྲུམ་པར་འགྱུར་རོ། །བ་ལ་དང་། ཨ་ཏི་བ་ལཱ་དང་། ཤི་ཏ་དང་། ཤིརྐ་རཱ་དང་། ཏིལ་མར་དང་། བུང་བུའི་སྦྲང་རྩི་དང་། སྦྲང་དང་ལྡན་པ་བཏུང་བར་བྱ་སྟེ། ཁྲག་འབབ་པ་འཇོམས་པར་བྱེད་དོ། །ནས་ཀྱི་ཕྱེ་མ་དང་། བ་ལང་གི་གཅིན་དང་། སྲ་རྩི་པོག་གལ་ཏེ་སྦྲང་རྩི་དང་མར་གྱིས་དྲིལ་ཕྱིས་ལས་ལུས་ཐམས་ཅད་བཟང་པོར་འགྱུར་རོ། །ཟླ་མཚན་གྱི་དུས་སུ་ཕག་གནོན་པའི་རྩ་བ་རྣ་བ་ལ་བཅིང་པ་ལས་སྦྲུམ་མར་འགྱུར་རོ། །ཀ་ལ་མྦཱི་པཱ་ཀྃ་བཟའ་བར་བྱ་སྟེ་ཁུ་བ་འཕེལ་ལོ། །སྐྱུ་རུ་རའི་ཕྱེ་མ་དང་། ལི་ཁྲི་དང་། ཞོ་ཟོས་པས་ཁུ་བ་འཕེལ་ལོ། །ཁུ་བ་དང་ཁྲག་ཟོས་པས་ཁུ་བ་འཕེལ་ལོ། །བུད་མེད་ཀྱི་བཤང་བ་དང་། བུད་མེད་ཀྱི་གཅི་བ་སྦགས་ནས་བཏུང་བར་བྱ་སྟེ་ཁུ་བ་འཕེལ་ལོ། །སྐྱུ་རུ་རའི་ཕྱེ་མ་དང་། ཆུ་དང་མར་དང་། སྦྲང་རྩི་རྣམས་བརྗོད་པའི་དུས་སུ་བཟའ་བར་བྱའོ། །མིག་ལ་སྟུགས་པ་དང་ཤེས་རབ་ཀྱང་སྐྱེ་བར་བྱེད་དོ། །སྐྱུ་རུ་རའི་ཕྱེ་མ་དང་། འོ་མ་ལ་སོགས་པ་བཟའ་བར་བྱ་སྟེ། ལོའི་སྦྱོར་བས་ཚེ་བརྒྱའོ། །སྐྱུ་རུ་རའི་ཁུ་བ་སྲང་གཅིག་དང་། ཝཱ་གུ་ཙཱི་ཕྱེ་མ་ཞོ་གཅིག་བཏུང་བར་བྱའོ། །འཁོགས་པ་ལ་ཐོ་རངས་ཟླ་བ་གཅིག་ཏུ་ཟོས་ནས་ལོ་ལྔ་བརྒྱའི་ཚེ་རུ་འགྱུར་རོ། །ཝཱ་གུ་ཙཱི་ཞོ་གཅིག་དང་། དར་བ་དང་། ཆུ་དང་ཕབས་དང་། འོ་མས་ཀྱང་རུང་སྟེ་འཐུངས་ན་ཟླ་བ་དྲུག་གིས་ལང་ཚོ་ལ་སོགས་པ་དང་ལྡན་ནོ། །མུཎྜི་རི་ཕྱེ་མ་དང་མར་བཟའ་བར་བྱ་སྟེ། ཉི་མ་ཉི་ཤུ་རྩ་གཅིག་གིས་ལོ་བཅུ་དྲུག་ཏུ་བྱེད་དོ། །ཥ་ཎའི་ས་བོན་གྱི་ཕྱེ་མ་སྲང་གཅིག་དང་། སཱ་ལུ་དམར་པོ་སྲང་གཅིག་དང་། བ་ཁ་དོག་གཅིག་པའི་འོ་མ་ཁམ་ཕོར་གཉིས་བཟའ་བར་བྱ་སྟེ། ཐོག་མར་འོ་མ་ཁམ་ཕོར་གཅིག་ཟད་པར་འཐུངས་ནས་ས་ཎ་ལ་སོགས་པ་དེ་

ལ་བྱིན་ནས་བཏུང་བར་བྱའོ། །དེ་ནས་བཟའ་བར་བྱའོ། །འཁོགས་པ་འོ་མས་བཏུང་བར་བྱ་སྟེ། ཉི་མ་བདུན་ནམ་གསུམ་གྱི་བར་དུ་ཇི་སྲིད་པར་རླུང་དང་ཚད་པ་སྤང་ངོ་། །བྱ་བ་ཇི་ལྟ་བུ་དང་། བྱ་བ་ཕྱི་མ་ཇི་ལྟ་བུས་དེའི་སྐྲ་ལ་སོགས་པ་ལྟུང་བར་བྱེད་དོ། །དེ་ནས་སྐྲ་དཀར་དང་གཉེར་མ་སྤངས་ཏེ་ལོ་བརྒྱ་ཕྲག་ལྔར་འཚོ་བར་བྱེད་དོ། །ཁྲག་སྐྲོད་པའི་རྩ་བ་དང་། མར་དང་སྦྲང་རྩི་བྱི་ལའི་རྐང་པ་ཙམ་བཟའ་བར་བྱ་སྟེ། འབྲས་བུ་ནི་ཇི་ལྟ་བ་བཞིན་ཁོ་ནའོ། །སྐྱུ་རུ་ར་དང་། ཨ་རུ་ར་དང་། བུང་བའི་རྒྱལ་པོ་དང་། པི་པི་ལིང་དང་། ན་ལེ་ཤམ་དང་། ལྕགས་ཀྱི་ཕྱེ་མ་རྣམས་སྦྲང་རྩི་དང་། ཤ་ཀ་ར་དག་གིས་ཨུ་དུམ་བཱ་རའི་འབྲས་བུའི་ཚད་ཀྱིས་རིལ་བུར་བྱའོ། །དེ་ནས་རིལ་བུ་བཟའ་བར་བྱ་སྟེ། ཟླ་བས་ཚེ་ལོ་སུམ་ཅུར་འགྱུར་རོ། །ཀུ་མཱ་རི་སྲང་གཅིག་དང་། མར་དང་། ཞོ་དང་ལྡན་པས་བཟའ་བར་བྱ་སྟེ་སྟོབས་ཆེན་པོར་འགྱུར་རོ། །བྷ་ཏྲཱ་ལཱི་དང་། ལི་ག་དུར་སུམ་འགྱུར་གྱི་ཨ་རུ་ར་དང་། ཆུ་ཆ་གཅིག་ལ་སོགས་པ་ཟོས་པས་སྟོབས་ཆེན་པོར་འགྱུར་རོ། །ཐམས་ཅད་དུ་བདག་ཉིད་ལྷའི་རྣམ་པར་བཟའ་བར་བྱའོ། །སྔགས་ཀྱིས་མཉེས་ཤིང་བྱིན་གྱིས་བརླབ་པར་བྱའོ། །ཁུ་བ་རེངས་པའི་ལེའུ་སྟེ་ལྔ་པའོ།། །།དེ་ནས་དན་དའི་ཤིང་གི་རྩ་བ་ཕབས་ཀྱིས་བཏགས་ནས་མགོ་ལ་མཉེ་བར་བྱ་སྟེ། མགོ་བོའི་གཟེར་འཇོམས་པར་བྱེད་དོ། །སྦྲང་དང་མར་དང་མིག་སྨན་དུ་བྱ་སྟེ། མཚན་མོ་ལོང་བ་འཇོམས་སོ། །ཤིང་སེ་ཕ་ལའི་འབྲས་བུའི་རྩ་བ་ཟོས་པ་ལས་སྦ་བ་འཇོམས་པར་བྱེད་དོ། །ལ་ཕུག་གི་ས་བོན་དང་། པྲི་ཡང་ཀུ་དང་། ཙནྡན་དམར་པོ་དང་། རུ་རྟ་བཏགས་ནས་དྲིལ་ཕྱིས་བྱས་པ་ལས་སྤྲེའུ་ལ་སོགས་པ་རྣམ་པར་འཇོམས་སོ། །ཤ་བའི་ཤ་སྐམ་པོ་དང་རའི་འོ་མ་བཏུང་བར་བྱ་སྟེ། གཟའ་རྣམས་འཇོམས་སོ། །སྐྱུ་རུ་ར་དང་པི་པི་ལིང་དང་། ཙི་ཏྲ་ཀ་དང་། སྒེའུ་གཤེར་དང་བུ་རམ་རྙིང་པ་དང་། མར་དང་སྦྲང་རྩི་མཉམ་པར་བཟའ་བར་བྱ་སྟེ། དུས་མ་ཡིན་པའི་ལུད་པ་དང་དབུགས་མི་

བདེ་བ་འཇོམས་སོ། །སྒེའུ་གཤེར་དང་། ཟི་ར་ནག་པོ་དང་། ཞོའི་ཉིང་ཁུས་ཀྱང་རུང་སྟེ། ལན་ཚྭ་དང་ལྷན་ཅིག་ཏུ་བཏུང་བར་བྱའོ། །དེའི་ཁྲག་སྲི་བ་རྣམ་པར་འཇོམས་སོ། །ལི་ཁར་དང་། ཡ་བཀྵ་ར་མཉམ་པར་བཟའ་བར་བྱའོ། །སོ་བྷཱཉྫ་ན་བསྐོལ་བ་བཏུང་བར་བྱ་བའམ། ཡང་ན་རྡོ་འཇོམས་པ་བཏུང་བར་བྱ་བའོ། །ཨ་རུ་ར་དང་། ཙི་ཏྲ་ཀའི་ཆུ་བཏུང་བར་བྱ་སྟེ། མཆིན་པའི་ནད་འཇོམས་སོ། །ཟི་ར་ནག་པོ་དང་བུ་རམ་བཟའ་བར་བྱ་སྟེ། རིམས་འཁོར་མ་འཇོམས་སོ། །ཡ་བཀྵ་རའམ་ཞོ་བཏུང་བར་བྱ་སྟེ། རླུང་ནད་རྣམ་པར་འཇོམས་སོ། །ཚ་བའི་ཏིལ་མར་ལ་བྱི་ཏང་ཀ་དང་རྒྱམ་ཚ་བྱིན་ནས་ཅུང་ཟད་བསྲོས་པའི་ཉིང་ཁུ་བཏུང་བར་བྱ་སྟེ། མེ་དབལ་དང་། སྲིན་བུ་དག་རྣམ་པར་འཇོམས་སོ། །ཨ་རུ་ར་དང་བུ་རམ་བཟའ་བར་བྱ་སྟེ། མིང་ངན་པ་རྣམ་པར་འཇོམས་པས་སོ། །ཨ་རུ་ར་དང་སྒ་སྐྱ་བཟའ་བར་བྱ་སྟེ་རླུང་ནད་འཇོམས་སོ། །རྩ་དཱུར་བ་ལ་ཡུང་བས་བཏགས་ནས་བྱུག་པར་བྱ་སྟེ་ཁྱི་རྔོ་འཇོམས་སོ། །འདི་ཉིད་ཀྱི་ཁྱི་དང་ཤུ་བ་དང་། འབྲུམ་བུ་དང་། འཇོམས་པ་ལ་སོགས་པ་རྣམས་འཇོམས་སོ། །བུ་རམ་དང་ཚ་བའི་ཏིལ་མར་བཏུང་བར་བྱ་སྟེ། དབུགས་མི་བདེ་བ་རྣམ་པར་འཇོམས་སོ། །ཨརྫུ་ན་དང་། ཤིང་ཚ་དང་། མར་ལ་སོགས་པ་རྣམས་བཟའ་བར་བྱ་སྟེ། སྙིང་གི་ཟུག་རྔུ་འཇོམས་སོ། །བིལ་བ་བསྲེགས་ནས་བུ་རམ་བཟའ་བར་བྱ་སྟེ། ཁྲག་ཚད་འཇོམས་སོ། །བུ་རམ་དང། མར་བཟའ་བར་བྱ་སྟེ། རླུང་དང་མཁྲིས་པ་དང་། བད་ཀན་དང་མཛེ་ལ་སོགས་པ་རྣམས་འཇོམས་པར་བྱེད་དོ། །འབྲས་བུ་གསུམ་གྱི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ། ནད་ཐམས་ཅད་འཇོམས་སོ། །ཨ་རུ་རའི་ཕྱེ་མ་དང་། མར་དང་སྦྲང་རྩི་དུས་གསུམ་ཀུན་ཏུ་བཟའ་བར་བྱ་སྟེ། རླུང་དང་བད་ཀན་རྣམ་པར་འཇོམས་སོ། །བ་ཤ་ཀའི་ཡན་ལག་ལྔ་དང་། ཤུ་དག་དང་ཚངས་མའི་ཤིང་དང་། པི་པི་ལིང་སྐམ་པོ་ཕྱེ་མར་བྱས་ནས་རྒྱམ་ཚྭ་དང་སྦྲང་རྩི་ཡིས་ཝ་ཌི་རུ་བྱ་སྟེ་དེ་ནས་བཟའ་བར་བྱའོ། །དུས་མ་

ཡིན་པའི་རླུང་དང་བད་ཀན་འཇོམས་སོ། །ཤཱལྨཱ་ལི་དཀར་པོའི་ཤིང་ཤུན་ཕྱེ་མར་བྱས་ནས་པདྨའི་ས་བོན་དང་། ཀུ་མུ་ཏའི་འབྲས་བུ་ལྷན་ཅིག་ཏུ་བྱས་བཏགས་ཏེ། རྩ་བའི་སྔགས་སྟོང་ཕྲག་གཅིག་ཏུ་བཟླས་ནས་དུའི་རིལ་བུའི་ཚད་ཀྱི་རིལ་བུ་རྣམ་པར་བྱས་ཏེ། གྲིབ་བསྐམས་བྱས་ནས་ཙ་ན་ཡའི་ཁུ་བས་བསྐམ་པར་བྱའོ། །ཐོ་རངས་ཟོས་ནས་ཇི་སྲིད་འདོད་པར་བཏུང་བར་བྱ་སྟེ། གཅིན་ནད་མེད་པར་འགྱུར་རོ། །དབྱངས་སྙན་པར་བྱེད་དོ། །ཚངས་མའི་ཤིང་དང་། ཤུ་དག་དང་། སྒ་སྐྱ་དང་། པི་པི་ལིང་དང་། ཨ་རུ་ར་དང་། བ་ཤ་ཀ་དང་། སེང་ལྡེང་རྣམས་སྦྲང་རྩིས་རིལ་བུར་བྱས་ནས་བཟའ་བར་བྱ་སྟེ་འབྲས་བུ་ནི་དེ་ཁོ་ན་བཞིན་ནོ། །གཤིན་རྗེ་མོ་དང་། ཨ་རུ་ར་དང་། སྒ་སྐྱ་དང་། རྒྱམ་ཚ་དང་། མཱ་ན་སཱ་མ་ན་རྣམས་བཟའ་བར་བྱ་སྟེ། འཁོགས་པ་ཐམས་ཅད་འཇོམས་སོ། །སླེ་ཏྲེས་ཀྱི་ཁུ་བ་དང་སྦྲང་རྩི་བཏུང་བར་བྱས་ཏེ་གཅིན་ནད་འཇོམས་སོ། །མཱ་ཏྲ་ལ་འོ་མ་དང་། པི་པི་ལིང་གི་ཕྱེ་མ་དང་། མར་དང་སྦྲང་རྩི་རྣམས་བཏུང་བར་བྱ་སྟེ། རིམས་ཕྲ་མོ་དང་ལུད་པ་ལ་སོགས་པ་རྣམ་པར་འཇོམས་པར་བྱེད་དོ། །ངོ་ཚ་ཅན་དང་། ཨཱ་ཤར་དང་། བུམ་ཁ་ཡ་དག་གི་རྩ་བ་ལ་ཝཱ་ཎིའི་ཆུ་ཡིས་བཏགས་ནས་རབ་ཏུ་བྱུག་པར་བྱའོ། །སླེ་ཏྲེས་ཀྱི་རྩ་བ་ཡང་བཟའ་བར་བྱ་སྟེ། རྩའི་རྨ་འཇོམས་པར་བྱེད་དོ། །སྒ་སྐྱ་དང་། ཡ་བཀྵ་ར་ཡི་བཟའ་བར་བྱ་སྟེ། དོང་ཁ་བདེ་བར་འགྱུར་རོ། །ཛ་ཡན་ཏི་ས་བོན་དང་། ན་ལེ་ཤམ་གྱི་ལྷན་ཅིག་བཏུང་བར་བྱ་སྟེ། བསྡིགས་པའི་ནད་འཇོམས་སོ། །འབྲས་བུ་གསུམ་དང་། མེ་ལི་ཀ་ནག་པོ་དང་། སའི་འཇིམ་པ་དང་། བྷྲྀངྒ་རཱ་ཛ་དང་། ས་ཧ་ཀཱ་རའི་ས་བོན་དང་། ལྕགས་ཕྱེ་དང་། ཙམ་མོ་སྟེ་འདི་རྣམས་ཀྱིས་བསྡམས་པར་བྱའོ། །དེ་ནས་གུ་གུལ་གྱིས་སྐྲ་ལ་བདུགས་ནས་དེས་མཉེ་བར་བྱའོ། །དེ་ནས་ཉི་མ་བདུན་དུ་མེ་ཡིས་གདུང་བར་བྱ་སྟེ། སྐྲའི་མིག་སྨན་ནོ། །རྨ་བྱའི་མཁྲིས་པ་དང་བྷྲྀངྒ་རཱ་ཛ་དག་གི་ཁུ་བ་དག་གིས་བ་ལས་བྱུང་བའི་མར་ལ་བཙོས་ནས་སྦྱིན་པར་བྱ་སྟེ་སྐྲའི་མིག་སྨན་ནོ། །ཕག་པ་མོ་དང་། ཚ་བ་གསུམ་ཆ་མཉམ་པར་ཕྱེ་མར་བྱས་ནས་ཝརྟྟི་ཀའི་དབུས་སུ་འབར་

བས་འོག་ཏུ་ཕྱོགས་པའི་ཝརྟྟི་ཀའི་རིམ་པས་སྤྲེའུའི་ཏིལ་མར་བརྒྱ་ཕྲག་བཟུང་ནས་ཐིགས་པ་གཉིས་ཀྱི་སྦྱོར་བས་གཉེར་མ་དང་སྐྲ་དཀར་པོ་སྤོང་ངོ་། །འདིས་མཉེས་ཏེ་ཁུ་བས་མཛེ་ལ་བྱུགས་པ་ཞི་བར་འགྱུར་རོ། །འཕྲལ་གྱི་མར་གསར་གྱིས་མཉེས་ནས་གནྟ་ཀ་དང་མ་ས་ཀཱ་དང་ལྷན་ཅིག་ར་ས་ཏོ་ལ་ཀཱི་དང་། འབྲས་སཱ་ལུ་དང་། ཙི་ལོ་ནི་སའི་གོང་བུས་བུམ་པའི་འཁྲུལ་འཁོར་གྱི་བུམ་པའི་ནང་དུ་མྲི་ཥི་ཀཱ་ཡིས་བཀབ་ལ་ཝ་ལུ་ཀ་དང་ལྷན་ཅིག་མེ་ལ་བྱིན་པ་ལས་རོ་འཆིང་ངོ་། །ཟ་བ་ལས་ནི་ཉི་མའི་ཚོགས་ཀྱི་བེའུའི་བྲུན་བཟུང་ནས་རིལ་བུར་བྱའོ། །རྒྱ་སྤོས་ཀྱི་རྩ་བས་བཏགས་ནས་དཀྲི་བར་བྱའོ། །རིལ་བུ་རེ་རེ་ཟོས་ནས་དུག་བཟའ་སྟེ། དུག་རབ་ཏུ་མེད་པར་འགྱུར་རོ་ཞེས་པ་རྒས་པ་འཇོམས་པའི་ལེའུ་སྟེ་དྲུག་པའོ།། །།ཀྱེ་བཅོམ་ལྡན་འདས་དབང་དུ་བྱེད་པའི་ཆོ་ག་གསུངས་ཤིག །བཅོམ་ལྡན་འདས་ཀྱིས་བཀའ་སྩལ་པ། གཞན་གྱིས་མི་ཐུབ་པ་དཀར་པོའི་རྩ་བ་ལ་ཁུ་བ་ཡིས་བ་ཌི་ཀཱ་བྱས་ཐིག་ལེས་བུད་མེད་དབང་དུ་བྱེད་པར་འགྱུར་རོ། །ཚངས་པའི་དབྱུག་པ་དང་། ཤུ་དག་དང་། རུ་རྟ་དང་། སྦྲང་རྩིས་བཏགས་ལ་དྲིལ་ཕྱིས་བྱས་ན་གང་འདོད་པ་དེ་དབང་དུ་འགྱུར་རོ། །དཎྜོད་པ་ལའི་ར་བ་ལ་ཏམྦུ་ལའི་ས་སྦྱིན་པར་བྱའོ། །དེ་བཞིན་དུ་ཚངས་པའི་དབྱུག་པ་དང་། ཤུ་དག་དང་། རུ་རྟ་དང་། ན་ག་གེ་སར་དང་། ཏམྦུ་ལ་བྱིན་ན་དབང་དུ་འགྱུར་རོ། །གི་ཝཾ་དང་རང་བྱུང་གི་མེ་ཏོག་གི་ཐིག་ལེས་སྐལ་བ་དང་ལྡན་པ་དབང་དུ་འགྱུར་རོ། །གི་ཝཾ་དང་། ཤི་ཤུ་ལོ་ལ་དང་། བྷྲྀངྒ་རཱ་ཛས་ལྷན་ཅིག་སྐར་མ་རྒྱལ་ལ་ཝ་ཌི་གའི་རྣམ་པར་བྱ་སྟེ་ཐིག་ལེས་དབང་དུ་བྱེད་པར་འགྱུར་རོ། །བྷྲྀངྒ་རཱ་ཛའི་རྩ་བ་ལ་བདག་ཉིད་ཀྱི་ཁུ་བས་མིག་སྨན་བྱའོ། །དེ་བཞིན་དུ་རྨ་བྱའི་གཙུག་ཕུད་དང་། ཤི་བའི་ཕྲེང་བ་དང་། ཁྭ་ཏའི་ལྕེ་སྐམ་པོའི་ཕྱེ་མ་གང་གི་མགོ་ལ་བྱིན་པ་དེ་དབང་དུ་འགྱུར་རོ། །བ་ལང་གི་སོ་ལ་བཟའ་བ་དང་བཏུང་བ་བཏགས་ནས་བྱིན་ན་དབང་དུ་འགྱུར་རོ། །ཁྱབ་འཇུག་གནོན་པའི་རྩ་བ་བཏགས་ལ་བྱུགས་ན་དགའ་བ་ལས་དེ་བཞིན་ནོ། །སྐར་མ་རྒྱལ་ལ་ད་དྷུ་ར་འི་རྩ་བ་གཟུང་ནས་སྐར་མ་སྐག་ལ་ཝ་ཌའི་ཤིང་ཤུན་ནོ། །མེ་བཞི་ལ་འདབ་མའོ། །ནག་བ་ལ་མེ་ཏོག་གོ །

སྣུབས་ལ་རྩ་བའོ། །ཆ་མཉམ་པའི་ཕྱེ་མ་ལ་སྦྲང་རྩིས་བ་ཌི་ཀ་རུ་བྱའོ། །རས་ལ་བཏུམས་ནས་བསྐམ་པར་བྱའོ། །ཏམྦུ་ལ་ལ་བྱིན་ནས་དུང་གི་ཕྱེ་མས་དབང་དུ་འགྱུར་རོ། །ཤིང་ཨརྒའི་སོལ་བ་དང་། སྨྱོ་བྱེད་དང་། ཁྱིའི་མིག་དང་། རྐང་པའི་མཐེ་བོས་གང་གི་མིང་བྲིས་ཏེ་ཆེ་གེ་མོ་ཤོག་ཅིག་ཅེས་བརྗོད་པས་འོང་བར་བྱེད་དོ། །དུ་བ་མེད་པའི་མེ་ལ་གདུང་བར་བྱའོ། །སྐར་མ་རྒྱལ་ལ་གཞན་གྱིས་མེ་ཐུབ་པའི་རྩ་བའི་རྩ་བ་བཏོན་ཏེ་མའི་ཞུན་གྱི་མར་ཁུས་དེ་ལ་བསྐུས་ན་ཐོད་པ་རུ་དུད་པ་བཏུང་བར་བྱའོ། །མིག་སྨན་དེས་བུད་མེད་དང་སྐྱེས་པ་དབང་དུ་བྱེད་དོ། །རྒྱ་སྤོས་དང་། བྱི་ཐང་ཀ་དང་། སེང་ལྡེང་རུ་རྟ་བྱིན་ན་མི་འདོད་པ་འཇོམས་པར་བྱེད་དོ། །པྲི་ཡང་ཀུ་དང་། གི་ཝཾ་དང་། ལྡོང་རོས་དང་། ན་ག་གེ་སར་གྱིས་མིག་ལ་མིག་སྨན་དུ་བྱས་ན་དབང་བྱེད་དོ། གླ་རྩི་དང་། ངོ་ཚ་ཅན་དང་། ད་དྷུ་ར་དང་། ས་ཧ་དེ་རྣམས་ཀྱིས་བྱས་པའི་ཏིལ་མར་གྱིས་དབང་དུ་བྱེད་དོ། །ན་མཤྩཎྚ་ལཱི་ཆེ་གེ་མོ་མེ་ཝ་ཤ་མཱ་ན་ཡ་སྭཱ་ཧཱ། སྟོང་ཕྲག་བཅུ་བཟླས་པས་སྔོན་དུ་བསྙེན་པ་བྱས་ནས་བསྙེན་པ་ཁྲིའོ། །དུར་ཁྲོད་ཀྱི་ཐལ་བ་ལ་བཅུ་བཞི་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ། བུད་མེད་ཀྱི་མགོ་ལ་བྱིན་ན་དབང་དུ་འགྱུར་ཏེ། རྟག་ཏུ་ངེས་པར་སེམས་པས་སླར་ཡང་དགའ་བཞིན་པའི་སེམས་དང་ལྡན་ནོ། །ཁུ་བ་རེངས་པའོ། །ཤིང་ཁུ་བྱུག་གི་མིག་དང་། ཤི་རྟའི་རྩ་བ་དང་། ད་དྷུ་ར་དང་། གཞན་ཡང་བྱང་གི་མུཀྟ་ཤི་ཁ་རྐེད་པ་ལ་བཅིངས་ནས་ཁུ་བ་རེངས་པར་བྱེད་དོ། །སྲ་རྩི་བོག་དང་། ཝཱ་མ་དྷ་ཏི་དང་། གཞན་ཡང་ཤ་ར་དཀར་པོ་དང་། བུ་ཁའི་རྩབས་ཀྱང་འཁྲིག་པ་ལས་ཁུ་བ་རེངས་པར་བྱེད་དོ། །འཇམ་འབྲས་ལ་སྦུབས་བྱས་ནས་དངུལ་ཆུས་བཀང་སྟེ་སྲད་བུས་རྐེད་པ་ལ་བཅིངས་ན་ཁུ་བ་འཛིན་ནོ། །འཕགས་པའི་ཏིལ་མར་དང་། རྒྱ་སྐྱེགས་དང་། རཉྫི་ཏ་དང་ཨརྐ་ར་དཀར་པོའི་ཤིང་བལ་གྱི་སྙིང་པོས་སྦར་ན་ཁུ་བ་རེངས་སོ། །སའི་འཁྲིལ་ཤིང་གི་ཕྱེ་མ་དང་། དབུས་ཀྱི་སྙིང་པོ་ཏིལ་མར་གྱིས་བསྲེག་པར་བྱ་སྟེ། ཁུ་བ་རེངས་སོ། །ཏིལ་གྱི་ཏིལ་མར་དང་། སའི་འཁྲིལ་ཤིང་ཕྱེ་མར་བྱས་ནས་སམ་མེ་ཏོག་གི་

མར་ཁུ་བཏུང་བར་བྱའོ། །དེས་རྐང་པའི་མཐིལ་ལ་བསྐུས་ན་ཁུ་བ་རེངས་སོ། །ཁྭ་ཏ་དཀར་པོའི་རྗེ་ངར་གྱི་རྩ་བ་དང་། པདྨ་དཀར་པོའི་གེ་སར་དང་སྦྲང་རྩི་རྣམས་ཀྱིས་ལྟེ་བར་བྱུགས་ན་ཁུ་བ་རེངས་སོ། པདྨའི་འདབ་མས་ཁྱབ་འཇུག་གནོན་པའི་རྩ་བར་འདབ་མས་དཀྲིས་ནས་ཝཱཌཱི་དཀྲི་བར་བྱ་སྟེ། ཁུ་བ་རེངས་སོ། །བ་བླའི་ཁུ་བའི་མིག་སྨན་དང་། དངུལ་ཆུ་དང་། པི་པི་ལིང་དང་། རྒྱམ་ཚ་དང་། རུ་རྟ་དང་། ཕུག་རོན་གྱི་བྲུན་རྣམས་ཀྱིས་ལིང་ག་ལ་དྲིལ་ཕྱིས་བྱས་པ་ལས་ཁུ་བ་རེངས་སོ། །གུསྠ་དང་[ཨུདྡྷ་]བ་ལི་དང་། བརྡྷ་དང་ཤྲི་ག་བྱུགས་ན་སྟེང་དུ་འགྱུར་རོ། །ཤིང་ཀ་པེད་ཀྱི་རྩ་བ་དང་། དརྦི་དང་། རའི་གཅིན་གྱིས་བཏགས་ནས་ལིང་ག་ལ་ཀུན་བྱུགས་ཏེ། པདྨ་དབྱེ་བར་བྱ་སྟེ། ལན་གསུམ་དུ་སྟེང་དུ་འགྱུར་རོ། །ཚ་བའི་ཆུ་ཡིས་བཀྲུས་ན་རབ་ཏུ་ཞི་བར་བྱེད་དོ། །འགྲོན་བུའི་ནང་དུ་དངུལ་ཆུས་བཀང་ནས་ཁ་རུ་བཞག་ན་ཁུ་བ་རེངས་སོ། །རའི་གཅིན་གྱིས་དབང་པོ་ཆུ་ལྷ་མོ་ལ་ཉི་མ་བདུན་དུ་བགོ་བར་བྱའོ། །དེས་དྲིལ་ཕྱིས་བྱས་པ་ལས་ལིང་ག་རེངས་པར་འགྱུར་རོ། །ད་དྷུ་རའི་རྩ་བ་དང་། ཀཱ་མ་རྩའི་རྩ་བ་དང་། ཨོ་ཥ་ཎའི་རྩ་བ་དང་། ག་བུར་གྱི་ཁུ་བས་བཏགས་ནས་ལིང་ག་ལ་བྱུགས་ན་འདོད་པའི་བུད་མེད་འཛག་པར་བྱེད་དོ། །རྒྱམ་ཚ་དང་། ཚ་ལ་དང་། ག་པུར་དང་། གྷོ་ཥའི་ཕྱེ་མ་སྦྲང་རྩིས་བཏགས་ནས་ལིང་ག་ལ་བྱུགས་ནའང་དེ་བཞིན་ནོ། ཕུག་རོན་གྱི་བྲུནསྦྲང་རྩིས་བཏགས་ནས་ལིང་ག་ལ་བསྐུས་ན་འདོད་པའི་བུད་མེད་འཛག་པར་བྱེད་དོ། །ཀ་མཱ་ཙཱིའི་རྩ་བ་དང་། ཏམྦུ་ལ་ཤིན་ཏུ་དགའ་བའི་དུས་སུ་བུད་མེད་ཀྱིས་ཟོས་ན་དེ་འཛག་པར་བྱེད་དོ། །པཀྭ་དང་། ཏིན་ཌཱི་དང་མ་ལླེ་ཀཱ་རྒྱམ་ཚ་བསྲེས་པར་བྱས་ནས་རང་གི་སྡིགས་མཛུབ་ཀྱི་སོར་མོར་བཅུག་སྟེ། དེའི་བྷ་གར་བཅུག་ནས་རྡོ་རྗེ་དབྱིངས་ཀྱི་དབང་ཕྱུག་མའི་རྩ་ཇི་སྲིད་དུ་དེ་འཛག་པར་བྱེད་ཀྱི་བར་དུ་བསྐྱོད་པར་བྱའོ། །ག་པུར་དང་། དངུལ་ཆུ་དང་། ཚ་ལ་དང་། ཤིང་ཧ་ཏི་དང་། པི་པི་ལིང་དང་། སྦྲང་རྩི་རྣམས་ཀྱིས་བྱུགས་ན་བུད་མེད་འཛག་པར་བྱེད་དོ། །ཤིང་ཛ་ཡནྟིའི་རྩ་བས་བཏགས་ནས་འབྲས་ཐུག་པོ་ཆེ་དང་། ཆུ་བསྲེས་པའི་ཟླ་མཚན་གྱི་དབུས་སུ་དེའི་སྐྱེ་

གནས་ལ་རབ་ཏུ་བྱུགས་ན་བུད་མེད་མོ་ཤམ་དུ་འགྱུར་བར་ཐེ་ཚོམ་མེད་དོ། །པཱ་ལ་ཤའི་ས་བོན་བཏགས་ནས་བྱུག་པར་བྱ་ཞིང་། མར་དང་སྦྲང་རྩི་འཐུངས་བ་ལས་ཁྲག་གི་མཚན་མའི་བུད་མེད་མོ་ཤམ་དུ་འགྱུར་རོ། །ཆ་ག་བ་དང་། ཕྱེ་མ་ལེབ་ཀྱི་ཕྱེ་མ་དང་། ཕྱིས་ས་སྐྱེ་གནས་སུ་བྱིན་ན་དམ་པོར་འགྱུར་རོ། །ཁུ་བ་རེངས་པའི་ལེའུ་སྟེ་བདུན་པའོ།། །།མགྲིན་པ་བཏེག་ནས་དམ་འཁྱུད་ཅིང་། །ལྷ་ལ་ཡང་ཡང་འོ་བྱས་ནས། །རྒྱལ་པོའི་དངོས་པོར་བྱས་པ་ཅིག །འཁོར་ལོས་སྒྱུར་བར་ཇི་ལྟར་འགྱུར། །གང་ཞིག་ཉེ་བར་མ་ཞུགས་པ། །གནས་ཅིག་ཏུ་ནི་རྒྱལ་སྲིད་འགྱུར། །དགྲ་བོ་གཡོ་མེད་འགྱུར་བ་དང་། །དགའ་ཞིང་ཞབས་ལ་འདུད་པའམ། །ཀུན་དུ་འགུགས་ཤིང་འདྲེན་པ་དང་། །མངའ་བདག་དེ་བཞིན་དེར་བཟླས་པ། །སེམས་ཅན་དོན་དུ་བདག་ལ་ཤོད། །བཅོམ་ལྡན་འདས་ཀྱིས་བཀའ་སྩལ་པ། །བྲིས་སྐུ་དང་ནི་གཟུགས་བརྙན་ལ། །ཉེར་སྤྱོད་ལྔ་རྣམས་ཀྱིས་མཆོད་ནས། །དྲུག་ཅུ་རྩ་བཞི་ཡོངས་རྫོགས་པའི། །གཏོར་མ་ཐུན་མཚམས་གསུམ་དུ་བྱིན། །གསེར་བུམ་དེ་བཞིན་ཁམ་ཕོར་བརྒྱད། །འཁྲུལ་འཁོར་རྒྱས་པའི་སྦྱོར་བ་ཡིས། །དེ་བཞིན་བསྔགས་ལ་མཆོག་གཞོལ་བ། །སླར་ཡང་ཤིང་རྟ་ཁམ་ཕོར་སོགས། །མར་དང་སྦྲང་རྩིས་བཀང་བ་ཡིས། །གཙོ་བོ་དཔལ་གྱི་ཁྱིམ་སྟེང་དུ། །ཨཿཡིག་འཁོར་ལོར་ངེས་བཅིང་བྱ། །གསང་སྔགས་རིག་པ་ཧྲཱིཿཥྚྲཱི་སོགས། །བློ་དང་ལྡན་པས་དུས་གསུམ་མཆོད། །ག་ཌ་ཀ་ཡི་སྟེང་གི་ཆར། །དཀྱིལ་འཁོར་ལྔ་པོ་བྱས་ནས་ནི། །ལེགས་པར་དཀྲི་བ་བྱིན་ནས་ནི། །འབད་པས་ས་ཀུན་སྦྱང་བར་བྱ། །ས་གཞི་ཡོངས་སུ་གཟུང་བྱས་ནས། །དཀྱིལ་འཁོར་མཆོག་ནི་བྱ་བ་ཡིན། །རྡུལ་ཚོན་མཛེས་པས་བྲི་བའམ། །ཡང་ན་འབྲས་ནི་ཐུག་པོ་ཆེ། །ཁ་དོག་ལྔ་པོ་དེ་བཞིན་ལྡན། །དེ་བཞིན་སློབ་དཔོན་ལྔ་རྣམས་ཀྱིས། །ཅུང་ཟད་མྱོས་བྱེད་འཐུངས་ནས་ནི། །སྟེང་གི་རི་མོའི་སྟེང་དུ་ནི། །དགུ་བདག་དཀྱིལ་འཁོར་ཡིད་འོང་བ། །གྲྭ་བཞི་རུ་ནི་ཐོད་པའོ། །

རང་གི་འདོད་ལྷའི་རྣལ་འབྱོར་ལྡན། །སྲད་བུས་ཐིག་གདབ་ཤེས་རབ་ཅན། །ལྷ་མོའི་དཀྱིལ་འཁོར་ཆེས་མང་བ། །རྣམ་པ་ཇི་བཞིན་མངོན་བྲི་བྱ། །འདབ་བཞིར་དེ་བཞིན་བྲི་བྱ་བ། །ཁྱད་པར་དབྱུག་པ་དཀར་པོའོ། །དབུས་སུ་དབྱུག་པ་དཀར་པོ་ནི། །སྣ་ཚོགས་རྡོ་རྗེ་བཞིན་བྲི་བྱ། །རིགས་ནི་ལྔ་པོ་མཚུངས་པར་བྱ། །སྐལ་བ་བྱས་ནས་ལེགས་པར་བསླབ། །རྒྱུད་ལ་སོགས་པའི་སྦྱོར་བས་འདིར། །རབ་ཏུ་འབད་པས་དབང་བསྐུར་སྦྱིན། །སློབ་དཔོན་གསང་བ་ཤེས་རབ་དང་། །བཞི་པ་དེ་སླར་དེ་བཞིན་ནོ། །སློབ་དཔོན་བཞི་པོ་རྣམས་ཉིད་ཀྱིས། །ཡང་དང་ཡང་དུ་གཏོར་མ་སྦྱིན། །དྲིལ་བུ་རྡོ་རྗེ་མཉམ་པར་གནས། །སྣ་ཚོགས་རྒྱན་གྱིས་བརྒྱན་པ་ཡི། །ཀུན་ཏུ་སེར་པོའི་གོས་ཉིད་དང་། །མི་ཡི་རྒྱན་གྱིས་བརྒྱན་པའོ། །གསེར་དངུལ་ཟངས་ལྕགས་བཞི་ཡིས་ནི། །བུམ་པ་དཀྱིལ་འཁོར་ཡང་དག་དགོད། །དབུས་སུ་གསེར་གྱི་བུམ་པ་ཡང་། །སྣ་ཚོགས་རིན་ཆེན་ལེགས་པར་མཛེས། །གསེར་དངུལ་ཟངས་ལྕགས་ལས་བྱུང་བ། །འཁྲུལ་འཁོར་བཞི་བོ་རྣམས་དང་ནི། །དབུས་སུ་གསེར་གྱི་འཁྲུལ་འཁོར་ནི། །མེ་ཏོག་དམར་པོས་ལེགས་མཛེས་པའོ། །སླར་ཡང་ཕྱིར་གཞན་དཀྱིལ་འཁོར་བཞིར། །སྡོང་པོ་བཀོད་སོགས་འབད་པས་བཀླག །ཕྱི་རུ་ཟན་ལ་འདུས་པ་ཉལ། །ལོངས་སྤྱོད་དེ་བཞིན་གཞན་ལ་བདུན། །དགེ་འདུན་ཡོན་དང་ལོངས་སྤྱོད་ཀྱང་། །བློ་བཟང་འབད་པས་བྱ་བ་ཡིན། །ཤར་དུ་ཝ་ཌ་ལྷོ་རུ་ནི། །ཨ་ཤྭ་ཏྭ་ནུབ་ཝ་ཀུ་ལ། །བྱང་དུ་ན་ག་གེ་སེར་རོ། །ཤར་དུ་མེ་ཏོག་དཀར་ལྷོར་སེར། །དེ་བཞིན་ནུབ་དམར་བྱང་དུ་ཡང་། །ལྗང་གུ་དེ་བཞིན་སྟེང་དུ་ཡང་། །མ་རུ་ལ་ཌ་རྗེ་རིགས་དང་། །བྲམ་ཟེ་རྡོ་རྗེ་རིན་ཆེན་སོགས། །ཤར་གྱི་ཕྱོགས་སུ་རབ་སྦྱིན་ཕྱིར། །སྐྱེ་བོ་འདི་དག་ས་ག་ལ། །སྣ་ཚོགས་རྒྱན་ཀུན་གྱིས་བརྒྱན་པའི། །མི་བདག་གི་ནི་ངོས་བཞི་རུ། །བཞི་འགྱུར་འདྲེན་མ་རྣམས་དང་ནི། །ལྷན་ཅིག་མཆོད་སྦྱིན་འདུས་པ་ལ། །བརྒྱ་རྩ་བརྒྱད་རབ་སྦྱིན་བྱས་ནས། །པུས་མོ་གཡས་པའི་ལྷ་ང་ནི། །སར་བཙུགས་ལག་པ་སྦྱར་བྱས་ནས། །རིན་ཆེན་ལ་སོགས་ཀྱིས་སྤྲས་པ། །སྣ་ཚོགས་ལ་སོགས་རྒྱན་དང་

གསེར། །གང་བའི་སྣོད་ལ་དེ་བརྗོད་པ། །ས་སྟེངས་ཐམས་ཅད་གནོད་མེད་པའི། །ལྷ་ཡི་རྒྱལ་སྲིད་བདག་ལ་སྩོལ། །འཁོར་ལོས་སྒྱུར་བའི་རྒྱལ་སྲིད་དང་། །དབང་པོ་ཉིད་ཀྱང་བདག་ལ་གསོལ། །དེ་ནས་དཔལ་ལྡན་གཤིན་རྗེའི་གཤེད། །དམར་པོའི་སློབ་དཔོན་བདེན་པ་ལ། །རྒྱལ་པོ་ཆེན་པོ་འདི་དག་ནི། །ཡིད་ཀྱི་ཤིང་རྟ་རྫོགས་པར་གྱིས། །གཤིན་རྗེ་གཤེད་ཀྱི་རྣལ་འབྱོར་པས། །སྔགས་དང་བསམ་གཏན་མཆོག་གཞོལ་བ། །བློ་ལྡན་གུས་པས་ཅུང་ཟད་ཉོན། །ཤེས་རབ་ཕ་རོལ་ཕྱིན་པ་བཀླག །ཛམྦྷ་ལ་ལ་ཆུ་སྦྱིན་དང་། །ཡི་དགས་གཏོར་མ་དེ་བཞིན་སྟོན། །བརྩེ་བའི་ངང་ཚུལ་འཇིག་རྟེན་སྐྱོང་། །དེང་ཁྱོད་ལ་སོགས་བརྗོད་པར་བྱ། །མི་བདག་བདག་ལ་བདེན་པར་སྨྲོས། །མངའ་བདག་བདེན་ལས་གཞན་མིན་པས། །མི་བདག་གིས་བདེན་བརྗོད་པར་བྱ། །མགོ་དང་སྙིང་གར་རྡོ་རྗེ་ནི། །ལན་གསུམ་བྱིན་ནས་རྒྱལ་སྲིད་བྱ། །དཀྱིལ་འཁོར་བསྟེན་པར་བྱ་བའོ། །གནས་སུ་བདག་ལ་སྨྲ་བ་ནི། །དེང་བདག་སྐྱེ་བ་འབྲས་བུར་བཅས། །མི་ཡི་འགྲོ་བ་ལེགས་པར་ཐོབ། །དེ་ནས་དཔལ་ལྡན་གཤིན་རྗེའི་གཤེད། །དམར་པོའི་རྣལ་འབྱོར་པ་བདག་ནི། །འཇིག་རྟེན་གསུམ་རྒྱལ་སྲིད་བྱས་ནས། །ཕྱིས་ནས་དབང་པོ་ལ་སོགས་པ། །བཟློག་པ་བདག་གིས་བྱེད་པ་ཡིན། །དེ་བཞིན་སླར་ཡང་ཀཻ་ལཱ་ཤར། །བུད་མེད་རྒྱལ་སྲིད་བྱས་ནས་ནི། །རྒྱལ་སྲིད་འབྱོར་གྲུབ་ཆེན་མང་དང་། །མཐའ་དག་རྒྱལ་སྲིད་ཁུར་བཟུང་ནས། །མི་བདག་འཕྲོག་བྱེད་ཟླ་བ་ལྟར། །སངས་རྒྱས་ཀུན་དང་དངོས་གྲུབ་ཀུན། །གང་གིས་མྱུར་དུ་འབྱུང་འགྱུར་བ། །ད་ལྟར་ལྷ་ཡི་དེ་མཛོད་ལ། །མངའ་བདག་བདག་ལ་མཆོག་སྩོལ་ཅིག །དེ་བཞིན་ཁོ་ནར་བདེན་དང་བདེན། །ས་ཡི་གནས་སུ་ཕྱག་བྱས་ནས། །བཟོད་པར་གསོལ་ནས་ཁྱིམ་འགྲོ་བྱ། །དེ་བཞིན་སྣ་ཚོགས་གླུ་དང་ནི། །རོལ་མོ་ལ་སོགས་པ་རྣམས་ཀྱིས། །སྤྲོ་བར་བཅས་པས་སྦྱིན་སྲེག་བྱ། །ཉི་མ་སོ་སོར་ཉེར་སྤྱོད་བཅས། །མཚན་མོ་ཕྱེད་ནས་ཚོགས་འཁོར་དང་། །ཤེས་རབ་བཅས་ཤིང་ཡོན་དང་བཅས། རིམ་འདིས་ཉི་མ་ཉི་ཤུ་ལྡན། །ཟླ་བ་དྲུག་གིས་མཆོད་སྦྱིན་རྫོགས། །དེ་བཞིན་ཀུན་དུ་འོངས་ནས་གར། །གླང་པོ་རྟ་ལ་སོགས་

པའི་ཡོན། །བྱིན་ནས་མཆོག་ནི་བླང་བར་བྱེད། །དེ་ཚེ་ཡང་དང་ཡང་དུ་ནི། །གང་གང་མི་བདག་གང་ཡིན་ཏེ། །གཞན་དུ་ཕོ་ཉར་རབ་ཏུ་འཇོག །རྒྱལ་སྲིད་བདག་གིས་བཟུང་བ་ཉིད། །གལ་ཏེ་མིན་ན་ཆད་པ་ལ། །རབ་ཏུ་བཞག་ནས་འབྱིན་པར་བྱེད། །སྣ་ཚོགས་རིན་ཆེན་ལ་སོགས་པ། །མྱུར་འགྲོ་རྣམས་ནི་འབྲུལ་བར་བྱེད། །རང་ཕན་རང་གི་སྐལ་བ་རྣམས། །རབ་མཆོག་གལ་ཏེ་འདོད་ན་ནི། །དེ་ཡིས་རྒྱལ་སྲིད་སྦྱིན་པར་བྱེད། །གང་གང་མིང་གིས་མི་འོང་ན། །དེ་ཡིས་འཁྲུལ་འཁོར་སེང་ལྡེང་གི། །མེ་ལ་གདུང་བར་བྱ་བ་ཡིན། །སྐད་ཅིག་དེ་ལས་དེ་རྨོངས་ཏེ། །གཞན་གྱི་ཡུལ་དུ་འགྲོ་བར་འགྱུར། །བཙོ་བའི་ཐབ་ཀྱི་ཐལ་བ་གང་། །གང་གིས་ནད་ལ་སོགས་བྱིན་པ། །དེ་དག་ཉེ་བར་ཞི་བར་བྱེད། །གལ་ཏེ་གསོ་སྦྱོང་བྱ་བ་ཡི། །དབང་པོ་ཉིད་ནི་ཐོབ་པར་བྱེད། །སྦྱིན་སྲེག་གིས་འདི་བཞི་འགྱུར་རོ། །བཅོམ་ལྡན་འདས་མ་ཀྱེ་ཁྱོད་ལ། །ངོ་མ་ཆོགས་པས་བཤད་པ་ཡིན། །དེ་ཡི་སྔགས་མཆོག་ཅུང་ཟད་ཀྱང་། །འཇིག་རྟེན་གསུམ་དུ་རྙེད་པ་དཀའ། །ལྷ་མོ་དཔལ་ནི་ཀྱཻ་རྡོ་རྗེ། །བསྟན་པ་ཐར་པ་མཆོག་དང་ནི། །དཔལ་ལྡན་བདེ་མཆོག་རྒྱུད་དུ་ཡང་། །མང་ཞིང་རྒྱ་ཆེའི་རྣལ་འབྱོར་མ། །ལྷ་མོ་དཔལ་ལྡན་འདུས་པ་དང་། །རྒྱས་པར་རྣལ་འབྱོར་རྒྱུད་དུ་ཡང་། །གངྒཱའི་ཀླུང་གི་བྱེ་མཚུངས་པས། །ཆེས་མང་དགའ་བའི་དངོས་གྲུབ་རྣམས། །གཤིན་རྗེའི་གཤེད་ནི་དམར་པོའི་རྒྱུད། །ལྷ་མོ་གུས་དང་བཅས་པས་ཉོན། །ལྷ་མོ་བདག་ནི་མྱ་ངན་འདས། །དབང་པོ་སོགས་ཀྱིས་མི་མཐོང་ངོ་། །མིག་མི་བཟང་གི་རྣལ་འབྱོར་དབང། །ཚངས་པར་སྐྱེ་བར་འགྱུར་བ་ཡིན། །བརྩོན་འགྲུས་ཆེན་པོ་སྟོབས་ཆེན་ལྡན། །དེ་ཕྱིར་ཆོས་ནི་སྟོན་པ་པོ། །ཅི་འདིས་བསྐྱངས་པར་འགྱུར་ནས་ནི། །རྒྱུད་ནི་ལེགས་པར་སྦས་པ་ཐོབ། །གསང་སྔགས་འབུམ་ཕྲག་གཅིག་བཟླས་ནས། །བདག་ལ་སྒྲུབ་པར་བྱེད་པ་དང་། །རབ་ཏུ་སྤྱོད་པར་འགྱུར་བ་ཡིན། །འཛམྦུའི་གླིང་ན་སྣ་ཚོགས་པའི། །དངོས་གྲུབ་རབ་ཏུ་སྟེར་བར་བྱེད། །འགུགས་པའི་ས་བོན་གཾ་སཾ་ཀཾ། །འདི་དག་བདུན་གྱི་རྣལ་འབྱོར་པས། །སྐྱེད་ཚལ་རྙེད་པར་བྱེད་པར་འགྱུར། །སླར་ཡང་ཀ་ནཽ་ཡུ་ག་དང་། །བ་ལ་གོཏྟ་ལ་དང་ནི། །གོ་མ་ཙཱ་རཱ་ལཱ་བྷྲི་ཏི། །ལ་སོགས་རྣལ་འབྱོར་པ་ཡིས་འགྱུར། །ཀ་

ལིངྒ་དང་བངྒ་དང་། །གཽ་རཱི་དང་ནི་མ་ག་དྷ། །སུ་ར་ཀ་རྒྱལ་ཨུ་བི་ཀྲི། །བི་ཙ་ཀ་ལ་ར་ཛ་དང་། །གོ་དེར་མ་ཀཾ་གི་ལིདྒེ། །བི་མོ་ཛི་ཞེས་བྱ་སོགས་རྒྱལ། །དཔལ་ལྡན་གཤིན་རྗེའི་གཤེད་དམར་པོའི། །རྣལ་འབྱོར་པས་ནི་འགྱུར་བ་ཡིན། །གང་ཡང་སྨྲ་རྗོད་བྱེད་པ་དང་། །གང་ཡང་བརྩོན་འགྲུས་ལྡན་པ་དང་། །གང་ཡང་ཕ་རོལ་གནོན་པ་ཆེ། །ཁ་ཅིག་འདིར་ནི་འཇིག་རྟེན་སོགས། །སླར་ཡང་སྔགས་ལ་མཆོག་གཞོལ་བ། །སླར་ཡང་རྒྱལ་སྲིད་དབང་པོ་སོགས། །འཁོར་ལོས་སྒྱུར་བར་འགྱུར་པ་ཡིན། །གསང་སྔགས་ཆེན་པོ་ལེགས་སྦས་པ། །བྱིས་པའི་རྣལ་འབྱོར་ལ་མི་བསྟན། །བདེན་པར་སངས་རྒྱས་ཉིད་འདོད་པ། །རྒྱུད་ལ་འཇུག་པ་ལ་བསྟན་བྱ། །འདི་ལས་རྒྱུད་འདི་བརྗོད་པ་ལ། །དང་པོར་དབང་བསྐུར་བྱ་བ་སྟེ། །ཕྱི་ནས་འདི་ནི་བསྟན་པར་བྱ། །རྒྱུད་རྒྱལ་རྒྱུད་ཀྱི་མཆོག་གྱུར་པ། །སྔགས་དང་བསམ་གཏན་བརྗོད་ཉུང་བ། །བཀླགས་པ་ཙམ་གྱིས་འགྲུབ་པར་འགྱུར། །གང་སྡིག་ལས་ལ་དགའ་བ་དང་། །དད་པ་དམན་པས་འགྲུབ་མི་འགྱུར། །གང་ཡང་སྡིག་པ་བྱེད་པ་ཡང་། །བསླབ་པ་འཛིན་པར་བྱེད་ན་ནི། །འབད་མེད་དངོས་གྲུབ་ཉིད་འགྲུབ་པར། །འགྱུར་བར་འདིར་ནི་ཐེ་ཚོམ་མེད། །དགེ་བ་བཅུ་ལས་བརྩམས་ནས་ནི། །ཕྱི་ནས་ཆོས་ནི་རབ་གསལ་བྱ། །དེ་བཞིན་དེ་ཡི་བྱ་བ་ནི། །ཇི་ལྟ་བ་བཞིན་འགྱུར་བ་ཡིན། །ཞེས་པ་རྒྱལ་སྲིད་ཀྱི་བསླབ་པའི་ལེའུ་སྟེ་བརྒྱད་པའོ།། །།བཅོམ་ལྡན་འདས་ཀྱེ་རྒྱལ་པོ་རུ། །འབྱུང་བར་འགྱུར་ལ་ཆོས་ཅན་འགྱུར། །ཆོས་ཀྱི་དེ་ཉིད་བདག་ལ་གསུངས། །སྔགས་ཀྱི་དེ་ཉིད་མེད་པར་གང་། །བསམ་གཏན་མེད་པ་འདི་ཉིད་ལས། །སེམས་ཅན་ཐམས་ཅད་བསྒྲལ་དོན་དུ། སྔགས་ཀྱི་དེ་ཉིད་རབ་གསལ་བ། །བསམ་གཏན་མེད་པར་འགྲུབ་པར་འགྱུར། །བསམ་གཏན་མེད་ན་དེ་ཉིད་ལས། །རྣམ་པ་གཞན་དུ་རྒྱུར་འགྱུར་རོ། །བྱིས་རྣམས་ཕྱག་རྒྱ་དེ་བྱེད་པ། །དང་པོ་ལྷ་ཡི་གཟུགས་སུ་སྟེ། །ལུས་ནི་རྣམ་པར་དག་པར་བྱ། །གཉིས་པར་གསང་བ་བཟླས་པ་སྟེ། །ཨཱ་ལི་ཀཱ་ལི་བཟླས་པ་དང་། །སྐུ་གསུང་ཐུགས་ཀྱི་དབྱེ་བ་ཡིས། །བློ་ལྡན་ཡི་གེ་གསུམ་བཟླས་བྱ། །དེ་བཞིན་བློ་ལྡན་ཁྲི་ཕྲག་གཉིས། །བརྒྱ་ཕྲག་བཅུ་དྲུག་བཟླས་པར་བྱ། །ཉིན་དང་མཚན་མོའི་གྲངས་ཀྱིས་ནི། །གསང་སྔགས་བཟླས་པ་བྱེད་པ་ཡིན། །དེ་ནས་དེ་ལ་སྣ་ཡི་རྩེ། །ཁོ་ན་ས་བོན་མཚན་མའི་རིམ། །ཡུངས་ཀར་དུ་ཡང་བསམ་པར་བྱ། །རྡོ་རྗེ་སྐྱིལ་ཀྲུང་སྦྱོར་

བ་ལས། །སེམས་ནི་བརྟན་པར་བྱས་ཉིད་ཀྱིས། །རང་བྱིན་རླབ་པར་ཡང་འགྱུར་རོ། །ཇི་ལྟར་སྒྱུ་མ་ཇི་ལྟར་རྨི། །དེ་བཞིན་སླར་ཡང་ཆུ་ཟླ་བ། །འདི་ལྟ་བུ་ཡི་གཟུགས་སུ་འགྱུར། །ཇི་ལྟར་བླ་མའི་མན་ངག་ལས། །ཆུ་དང་ཆུ་འདུས་གཅིག་པ་བཞིན། །སྒྱུ་མ་སྟོང་པའི་སྦྱོར་བ་ཡིས། །གཉིས་པོ་འདི་དག་སྤྱོད་པ་ཡིས། །ཟུང་དུ་འཇུག་པ་རབ་སྒྲུབ་བྱེད། །རྣལ་འབྱོར་ཅུང་ཟད་བསམ་མི་བྱ། །བཏང་སྙོམས་མཆོག་ཏུ་འགྱུར་བ་ཡིན། །ལྷ་རུ་ཅུང་ཟད་བསམ་མི་བྱ། །རང་གི་དེ་ཉིད་གསལ་བར་འགྱུར། །བསམ་བྱ་མེད་ཅིང་བསམ་མེད་གང་། །དེ་ཡང་འདིར་ནི་ཡོད་མ་ཡིན། །དེ་འདིར་བསམ་མི་ཁྱབ་པར་བརྗོད། །སྲིད་པའི་ཤིང་གི་ལྟ་ར་སྟེ། །ཁ་ཅིག་རྒོད་དང་བརྗོད་པར་གནས། །ཁ་ཅིག་རབ་ཏུ་འཇུག་པར་བྱ། །སྒོམ་པའི་ནུས་པ་སེམས་ལ་ནི། །ཇི་ལྟར་དབྱེ་བ་མི་ཤེས་པ། །དེ་བཞིན་རྣལ་འབྱོར་རིམ་པས་འགྱུར། །སྣ་ཚོགས་དངོས་གྲུབ་རབ་སྟེར་བྱེད། །རང་བློ་འཁོར་བའི་འཇིག་རྟེན་དུ། །འདོད་པས་མཐོ་རིས་རབ་ཏུ་སྐྱེ། །བཙུན་མོ་ཐམས་ཅད་དགའ་བར་བྱེད། །སྲུང་བ་སོགས་ཀྱི་ཉི་མ་མཆོག །ཁ་ཅིག་ཟླ་བརྒྱན་ཡན་ལག་བྱུགས། །ཁ་ཅིག་འདམ་བྱུགས་ཡན་ལག་བརྒྱན། །སྣ་ཚོགས་ཁ་ཅིག་སྨིན་པར་བྱེད། །དེ་ཕྱིར་གནས་པའི་སྡུག་བསྔལ་དང་། །བདེ་བས་གནོད་པ་མེད་པ་ཡིན། །ཤིན་ཏུ་དགའ་དང་ཐེ་ཙོམ་བྱེད། །འདོད་པ་དེ་རྣམས་རྣལ་འབྱོར་པ། །རྣམ་སྤྱོད་མེད་པར་དེ་བྱའོ། །འདོད་པ་ལྔ་ལ་ལོངས་སྤྱོད་ཅིང་། །འདོད་པའི་ཡོན་ཏན་ལྔ་རྣམས་ལྡན། །རྟག་ཏུ་རྩེ་བར་བྱ་བ་སྟེ། །འཁོར་བ་འགྲོལ་ཞིང་གྲོལ་བ་སྟེ། །དངོས་དང་དངོས་མེད་རྣམ་པར་གྲོལ། །ངོ་ཚའི་བྱ་བ་རྣམ་པར་སྤངས། །བློ་གྲོས་སྦྱོར་བ་ལས་འདས་པ། །ལས་རྣམས་ཐམས་ཅད་རིག་པའི་མཆོག །ཅེས་པ་དེ་ཁོ་ན་ཉིད་ཀྱི་ལེའུ་སྟེ་དགུ་པའོ།། །།ཀྱེ་བཅོམ་ལྡན་འདས་མངོན་པར་དབང་བསྐུར་མིང་ཅི་ལྟར། །མངའ་བདག་བདག་ལ་དེ་གསུངས་ཤིག །དགའ་མ་དབང་བསྐུར་རྣམ་པ་བཞི། །སེམས་ཅན་འཇུག་བྱེད་དེ་ཉོན་ཅིག །གཏོར་བས་དྲི་མ་མེད་བྱེད་ཕྱིར། །དེ་དག་ཀུན་ཀྱང་གཡོ་བྱེད་པ། །འཆི་སྟེ་རྡོ་རྗེ་སྐྱིལ་མོ་ཀྲུང་། །འཛག་མེད་ལ་སོགས་བདེ་བས་གང་། །འདི་དག་ཇི་སྲིད་དྲི་མེད་གྱུར། །བྱང་ཆུབ་སེམས་ནི་སྤོང་བྱེད་པ། །ཇི་སྲིད་རྣལ་འབྱོར་པས་མི་བྱ། །བྱང་ཆུབ་སེམས་ནི་

གཏོང་བྱེད་པ། །གང་གྲུབ་ཐོབ་པ་རྣམ་པར་སྤྱོད། །ཇི་སྲིད་ཀུན་དུ་དགའ་བའི་མཆོག །བདེ་བའི་གཟུགས་ནི་དེ་ཉིད་ཀྱིས། །ཡང་དག་ལྡན་པའི་སངས་རྒྱས་གཟུགས། །ཇི་སྲིད་ཁུ་བ་བསྟན་གྱུར་པར། །བདག་ཉིད་རྟག་ཏུ་བསྒོམ་པར་བྱ། །དེ་ནི་འཇིག་རྟེན་བདེན་པར་གྲགས། །ཡང་ན་དོན་མེད་ད་གང་ལས། །བཞི་པ་སླར་ཡང་དེ་བཞིན་ནོ། །འདིར་ནི་ཤེས་རབ་ཡེ་ཤེས་གང་། །མངོན་པར་དབང་བསྐུར་བཞི་པ་རུ། །བྱིས་པའི་སྐྱེ་བོ་སྨྲ་བར་འགྱུར། །དེ་ནི་སླར་ཡང་དེ་བཞིན་ཞེས། །བཞི་པ་དེ་ཉིད་གསུམ་པ་རུ། །དེ་བཞིན་བྱས་པར་མི་འགྱུར་ཏེ། །དང་པོའི་ཡན་ལག་ལས་སླར་ཡང་། །སྨོས་པ་སྐྱོན་འགྱུར་དེ་བཞིན་དུ། །བྱིས་པ་རྣམས་ཀྱི་རྒྱུ་གསུམ་པ། །གང་ཡིན་འབྲས་བུ་བཞི་པ་སྟེ། །རྒྱུ་འབྲས་དབྱེ་བ་མེད་པའི་ཕྱིར། །བཞི་པའང་གསུམ་པར་གྲུབ་པོ་ཞེས། །སྔར་བརྗོད་དོན་དམ་བདེན་པ་ཉིད། །གང་ལས་ཕྱག་རྒྱ་གསུམ་གྱིས་ནི། །འབྲས་བུ་གསུམ་ནི་སྒྲུབ་པའི་ཕྱིར། །གསང་སྔགས་ཚུལ་འདིར་སྦྱིན་སྲེག་འབྲས། །ཕྱག་རྒྱ་གསུམ་དང་བྲལ་བ་ཡིན། །ཨེ་མ་ཕྱག་རྒྱ་གསུམ་སྒྲུབ་ལ། །ལས་རྒྱ་ཡེ་ཤེས་ཕྱག་རྒྱ་ནི། །རྒྱུ་རུ་མི་འགྱུར་རོ་ཞེས་པ། །ལས་རྒྱ་ཡེ་ཤེས་ཕྱག་རྒྱ་ནི། །སྒོམ་པ་ཡོངས་སུ་སྤངས་པ་ལས། །ཕྱག་རྒྱ་ཆེན་པོ་ངེས་པར་སྒོམ། །འདིར་ནི་དབང་པོ་གཉིས་སྦྱོར་བ་དེ། །འདོད་པ་ཀུན་སྤྱོད་བདེ་བ་ཞེས། །འཛག་དང་མི་འཛག་མཚན་ཉིད་ཀྱི། །ངོ་བོའི་ཀུན་སྤྱོད་བདེར་མི་འགྱུར། །གསུམ་པ་རྒྱུ་ལ་མ་སྐྱེས་པ། །རིགས་ཀྱི་འཛག་པ་གསུམ་པའི་འབྲས། །དོན་དམ་བཞི་པར་མི་འགྱུར་རོ། །ཞེས་པས་ཁོང་དུ་ཆུད་པར་བྱའོ། །དབང་བསྐུར་བའི་ཆོ་གའི་ལེའུ་སྟེ་བཅུ་པའོ།། །།བཅོམ་ལྡན་འདས་བྲིས་སྐུའི་ཆོ་ག་གསུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་བ། དམར་ཞིང་དཀར་བའི་བུད་མེད་དེ་ལ་འབད་པས་མཆོད་པར་བྱའོ། །སྐར་མ་རྒྱལ་ལ་བརྩམ་པར་བྱ་སྟེ། དེ་ཡང་མངོན་པར་དབང་བསྐུར་བར་བྱའོ། །དེ་ལ་དོག་བ་དམར་ཞིང་དཀར་བ་ཐག་པས་འབད་པས་འཐག་པའི་རྒྱུ་དང་སྤུན་དེ་ལ་སྦྱིན་པར་བའོ། །

ཉི་མ་སོ་སོར་དམ་ཚིག་བསྟེན་པས་ཤེས་རབ་དང་བཅས་པས་བཏགས་ནས། རས་དེ་དམར་ཞིང་དཀར་བའི་བུད་མེད་རྡུལ་དང་ལྡན་པའི་དུས་སུ་མལ་ཆར་སྦྱིན་པར་བྱའོ། །ཉི་མ་གསུམ་གྱི་ཕྱི་ནས་རི་མོ་མཁན་དམ་ཚིག་དང་ལྡན་པ་མངོན་པར་བསྔགས་ཏེ། དཔའ་བོའི་ཚོང་གི་གང་སྨྲ་བར་བྱེད་པ་དེ། དེ་ལ་སྦྱིན་པར་བྱའོ། །སྦྲང་རྩི་ཆེན་པོས་སྣག་ཚ་བྱས་ནས་མིའི་རུས་པའི་སྨྱུ་གུས་བྲི་བར་བྱའོ། །ཇི་སྲིད་འདྲི་བར་བྱེད་པ་དེ་སྲིད་དུ་མྱོས་བྱེད་ཅུང་ཟད་འཐུངས་ནས་ཉི་མ་སོ་སོར་ཐུན་མཚམས་བཞིར་གཏོར་མ་དང་། གསང་སྔགས་བརྒྱ་ཕྲག་གཅིག་ཏུ་བཟླས་པར་བྱའོ། །རིགས་རྣམས་ཀྱི་དམ་ཚིག་གི་གཅིག་ཏུ་གདོན་མི་ཟ་བར་བྱའོ། །དཔའ་བོའི་རིམ་པས་ཤིན་ཏུ་གསང་ལ་རབ་ཏུ་གནས་པ་ཡང་ངོ་ཞེས་སོ། །དེའང་གཤིན་རྗེའི་གཤེད་ཀྱི་རྣལ་འབྱོར་པ་དམ་ཚིག་དང་ལྡན་པས་གྲོ་ག་ལ་གླེགས་བམ་སོར་བཅུ་གཉིས་པ་བྱའོ་ཞེས་སོ། །ཞེས་པ་བྲིས་སྐུ་དང་གླེགས་བམ་གྱི་ཆོ་གའི་ལེའུ་སྟེ་བཅུ་གཅིག་པའོ།། །།མངའ་བདག་རླུང་སྦྱོར་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །སྙིང་གར་སྲོག་དང་ཐུར་སེལ་བཤད། །ལྟེ་བའི་ཕྱོགས་སུ་མཉམ་གནས་སོ། །མགྲིན་པའི་ཕྱོགས་ནི་གྱེན་རྒྱུ་སྟེ། །ལུས་ཀུན་སོན་པ་ཁྱབ་བྱེད་དོ། །འདི་རྣམས་དབུས་སུ་གཙོ་བོ་གང་། །སྲོག་རླུང་སྙིང་གར་གནས་པའོ། །དབུགས་དབྱུང་དབུགས་རྔུབ་དབྱེ་བ་ཡིས། །འཚོ་བ་འཕོ་བ་བཅུ་དྲུག་གོ །སྦྱོར་བས་སོ་སོ་རེ་རེ་ལ། །དཀྱིལ་འཁོར་བཞི་སྟེ་རེ་རེ་ལ། །དབྱུག་གུ་རེ་རེ་འབབ་པ་ཡིས། །ཉི་ཁྲི་བརྒྱ་ཕྲག་བཅུ་དྲུག་གོ །གཡས་ནས་རེག་ཅིང་འབབ་པ་ཡིས། །མེ་ཡི་དཀྱིལ་འཁོར་བརྗོད་བྱ་སྟེ། །གཡོན་དང་གཡས་ལ་རེག་པ་ལས། །དབང་ཆེན་གྱི་ནི་འཁོར་ལོར་འགྱུར། །བརྟན་ཐོབ་དལ་བའི་དཀྱིལ་འཁོར་འགྱུར། །རྐྱང་མ་དང་ནི་རོ་མ་དང་། །གཡོན་དང་གཡས་སུ་གནས་པའོ། །ཀུན་འདར་མ་ནི་དབུས་ཕྱོགས་སུ། །ལྷན་ཅིག་སྐྱེས་པ་རྗེས་སུ་བྱེད། །འཇུག་པར་འགྱུར་དང་འབྱིན་པ་དང་། །གནས་པ་གཡོ་མེད་ངོ་བོ་ལ། །

རྣམ་འཇོམས་ཞེས་པ་སྲད་བུའི་རླུང་། །ཇི་སྲིད་འཚོ་བའི་འཇུག་པར་འགྱུར། །འཇུག་པ་བུམ་པ་ཅན་ཞེས་བྱ། །དེ་ཡི་འཛིན་ལས་གང་བ་ཅན། །དབྱུང་བ་རེ་ཙ་ཀ་ཤེས་བྱ། །གཡོ་མེད་བུམ་པ་ཅན་དུ་འགྱུར། །རླུང་ནི་རབ་ཏུ་འཇུག་པའི་ཚོགས། །སྟོང་ཕྲག་བརྒྱ་ལ་སོགས་པའི་གྲངས། །སངས་རྒྱས་མགོན་པོའི་གསུང་ཇི་བཞིན། །སྐད་ཅིག་དེ་ལས་འགྲུབ་པར་འགྱུར། །རླུང་ཚོགས་གཅིག་གྱུར་གང་ཡིན་ནི། །ཤེས་རབ་ལ་ནི་དམ་འཁྱུད་པས། །ཟླ་ཕྱེད་ཙམ་གྱིས་འགྲུབ་པར་འགྱུར། །རང་གི་ལྷག་པའི་ལྷ་སྦྱོར་བས། །སངས་རྒྱས་ཡེ་ཤེས་ཡང་དག་ལྡན། །མངོན་ཤེས་ལྔ་ནི་ཤེས་པར་འགྱུར། །རང་གི་ལྷག་པའི་ལྷ་སྦྱོར་བས། །རང་གི་བུད་མེད་དམ་དུ་འཁྱུད། །སྙིང་ག་ཡིས་ནི་སྙིང་ག་རུ། །གསང་བར་གསང་བས་ཡང་དག་སྦྱོར། །ཁ་ཡིས་ཀྱང་ནི་ཁར་བྱས་ནས། །བྱེད་པ་མེད་པ་ལྷུར་ལེན་པས། །སྙིང་གར་གནས་པའི་ས་བོན་བཞི། །ཀུན་ཏུ་གང་བར་བསྒོམ་པར་བྱ། །དེ་གནས་གང་ཡིན་དེ་ཉིད་ཀྱིས། །མི་ནི་ཐམས་ཅད་ཤེས་པར་འགྱུར། །ཀུན་དུ་དགོངས་པ་ཙམ་གྱིས་ནི། །བྱུང་དང་འབྱུང་འགྱུར་ད་ལྟ་བར། །ཕ་རོལ་སེམས་ཀྱང་ཤེས་པར་བྱེད། །བདེན་པ་བདེན་པར་སྨྲ་བར་བྱེད། །དེ་བཞིན་སྦྱོར་བ་དེ་ཉིད་ཀྱིས། །རྣ་བ་ལ་ནི་རྣམ་བསྒོམ་བྱ། །དྲུང་ན་གནས་པའི་སྒྲ་ཇི་བཞིན། །བསྟན་པ་ཀུན་ནི་ཉན་པར་བྱེད། །དེ་བཞིན་མིག་ལ་རབ་བསྒོམས་ནས། །འཇིག་རྟེན་གསུམ་ཡང་ལྟ་བར་བྱེད། །སྣ་ལ་དེ་བཞིན་བསམས་ནས་ནི། །དྲི་རྣམས་ཐམས་ཅད་ཤེས་པར་བྱེད། །ལྕེ་ལ་དེ་བཞིན་བསམས་ནས་ནི། །ཐག་རིངས་མྱོང་བྱ་རབ་རྟོགས་བྱེད། །རང་གི་རྟགས་རྩེར་དེ་བཞིན་བསམ། །རེག་བྱ་ཐམས་ཅད་ཤེས་པར་བྱེད། །དེ་བཞིན་མགོ་བོའི་དབུས་བསམས་ནས། །ནུས་པ་ཐམས་ཅད་རབ་འཕེལ་བྱེད། །གང་དང་གང་དུ་རླུང་གནས་པ། །རོ་མཉམ་གྱུར་པར་བྱས་པ་ནི། །འགགས་པ་དེ་དང་དེ་ཉིད་ལ། །དེ་ཉིད་སོ་སོར་རྟོགས་པར་བྱེད། །ཞི་དང་རྒྱས་པ་ཅན་དང་དབང་། །དེ་བཞིན་འགུགས་དང་གསོད་པ་དང་། །སྐྲོད་པར་བྱེད་དང་ཐམས་ཅད་ཉིད། །སྒོམ་པ་ཁོ་ནས་རབ་

སྒྲུབ་བྱེད། །བུམ་པ་ཅན་སོགས་རབ་སྦྱོར་བས། །ལྟ་སྟངས་བཞི་ནི་ངེས་སྦྱོར་བྱ། །གཡོན་དུའང་ལྟ་བའི་ལྟ་སྟངས་ནི། །བུམ་པ་ཅན་གྱིས་དབང་དུ་བྱེད། །གཡས་ནས་དགུག་པར་བྱ་བ་ནི། །གང་བ་ཅན་གྱིས་ངེས་པར་སྦྱོར། །དཔྲལ་བར་གནས་པའི་ལྟ་སྟངས་གང་། །རེ་ཙ་ཀ་ཡིས་གསོད་པར་བྱེད། །སྣ་རྩེར་གནས་པའི་ལྟ་སྟངས་ནི། །བུམ་པ་ཅན་གྱིས་རེངས་པར་བྱེད། །ཛ་བའི་མེ་ཏོག་བུམ་པ་ཅན། །རློན་པའི་ཤིང་ལའང་རེ་ཙ་ཀས། །མཉམ་པར་ཟོས་ལ་རེ་ཙ་ཀས། །གཡོ་བཅས་རྩ་ལ་བུམ་པ་ཅན། །སྔོན་དུ་ལྟ་སྟངས་ངེས་སྦྱོར་བ། །ཟླ་བ་དྲུག་ཏུ་བསམ་པར་བྱ། །ཀུན་གྱི་ནུས་པ་སྦྱོར་བ་ནི། །སེམས་འགོག་པ་ལས་འགྲུབ་པར་བྱེད། །སེམས་འགོག་པ་ལས་རླུང་འགོག་སྟེ། །འགོག་ལས་སེམས་ཀྱང་འགོག་པར་འགྱུར། །ཕན་ཚུན་སོན་པ་བཅིངས་པའོ། །ཤེས་རབ་ཐབས་གཅིག་རྡོ་རྗེ་དང་། །པདྨ་མཉམ་པར་རྟོགས་པ་ལ། །འགོག་པའི་བདེ་བ་ཟོས་པ་ནི། །ཐམས་ཅད་ཡང་དག་འགྲུབ་པར་འདོད། །ཚངས་པ་ཁྱབ་འཇུག་ལ་སོགས་ལྷ། །སྔགས་པ་དེ་ཡི་ལྷན་ཅིག་ཏུ། །འཇིག་རྟེན་པ་ཀུན་ཅི་སླར་ཡང་། །ཅི་བགྱི་ཡོད་པར་འགྱུར་བ་ཡིན། །རྣལ་འབྱོར་རྣལ་འབྱོར་མ་རྒྱུད་དུ། །ཐམས་ཅད་མཁྱེན་པས་གསུངས་པ་ཡང་། །རྩོད་ལྡན་དུས་སུ་རབ་ཏུ་སྤྱོད། །དངོས་གྲུབ་མེད་པར་མི་བལྟ་སྟེ། །རྫོགས་ལྡན་གསུམ་ལྡན་གཉིས་ལྡན་དང་། །རྩོད་དུས་ལ་ཡང་བདེན་པར་འགྲུབ། །སླར་ཡང་ལྷ་དང་བཅས་པ་ཡི། །དངོས་གྲུབ་མཆོག་ནི་བསྟན་པར་བྱ། །སྦས་པ་ཀུན་མཁྱེན་སྤྱོད་ཡུལ་བ། །ཁྱེད་ཀྱིས་དེ་ལ་ང་ཡིས་བཤད། །གཤིན་རྗེའི་གཤེད་པོས་དེའི་ངལ་བ་འབྲས་བུ་མེད། ཅེས་སོ། །གཤིན་རྗེའི་གཤེད་དམར་པོའི་རྒྱུད་དུ་རླུང་གི་དེ་ཉིད་ཅེས་བྱ་བའི་ལེའུ་སྟེ་བཅུ་གཉིས་པའོ།། །།བཅོམ་ལྡན་གཤིན་རྗེའི་གཤེད་ཀྱི་མི། །དམར་པོ་བརྗོད་པའི་མིང་ཅན་ལ། །ཡ་ཡིག་གིས་ནི་ཅི་ཞིག་བརྗོད། །དེ་བཞིན་མ་ཡིག་གིས་ཀྱང་ནི། །སླར་ཡང་དེ་ཡི་ཨ་ཡིག་གིས། །རི་ཡིག་གིས་ཅི་བརྗོད་པར་བྱ། །རཀྟ་ཉིད་ནི་ཅི་ཡི་མིང་། །མངའ་བདག་བདེན་པས་གསུང་དུ་གསོལ། །ལེགས་སོ་ལེགས་སོ་གང་དྲིས་པ། །དེ་ནི་བཤད་ཀྱིས་ཉོན་ཅིག་དང་། །ཡ་ཡིག་གིས་ནི་རླུང་ཡང་སྟེ། །གཤིན་རྗེའི་གཤེད་དམར་པོར་

བརྗོད་བྱ། །དེ་ནས་ཡ་ཡིག་མཆོག་ཏུ་དགའ། །མ་ཡིག་གཉིས་པར་བརྗོད་པར་བྱ། །ཨཱ་རི་དགའ་བ་གསུམ་པའོ། །རཀྟ་བཞི་པའི་མིང་ཅན་ནི། །ཡང་ན་རླུང་དང་ལྡན་པ་ལ། །དེ་ཡི་ཐབས་ནི་ཨ་ཡིག་སྟེ། །ཨེ་ཡིག་རེག་པའི་དབང་པོའོ། །རཀྟ་གཉིས་མེད་སྦྱོར་བའོ། །ཡང་ན་རཀྟ་འདོད་ཆགས་རྒྱལ། །རླུང་གིས་རོ་བསྐུལ་དེར་སོན་སེམས། །ཨཱ་རི་སྟོང་ཉིད་སྙིང་རྗེ་གཅིག །རཀྟ་ཡ་མཱ་རི་ཞེས་བརྗོད། །དགའ་བ་བཞི་ཡི་མིང་ལྔ་པོ། །སྐད་ཅིག་བཞི་རུ་ཤེས་པར་བྱ། །དེ་ནས་གཏི་མུག་ལ་སོགས་པའི། །མིང་ནི་མངའ་བདག་ཁྱོད་གསུངས་ཤིག །གཏི་མུག་གཤིན་རྗེ་མཐར་བྱེད་ནི། །རྣམ་སྣང་མཛད་དོ་ཕྲ་མ་ཡི། །གཤིན་རྗེ་མཐར་བྱེད་རིན་ཆེན་འབྱུང་། །འདོད་ཆགས་གཤིན་རྗེ་མཐར་བྱེད་ནི། །སྣང་མཐའ་ཕྲག་དོག་གཤིན་མཐར་བྱེད། །དོན་གྲུབ་དབུས་སུ་མི་བསྐྱོད་པ། །གཤིན་རྗེ་མཐར་བྱེད་དམར་པོའོ། །ཙརྩི་ཀཱ་སོགས་ངོ་བོ་ཅི། །ས་ཁམས་སྤྱན་མ་ཙརྩི་ཀཱ། །ཆུ་ཁམས་མཱ་མ་ཀཱི་ཕག་མོ། །མེ་ཁམས་དཀར་མོ་དབྱངས་ཅན་མ། །རླུང་ཁམས་སྒྲོལ་མ་གཽ་རཱིའོ། །མཁའ་ཁམས་རྡོ་རྗེ་རོ་ལངས་མ། །བཅོམ་ལྡན་འདས་ལ་འཁྱུད་པའོ། །འདོད་ཆགས་ཆེན་པོའི་རྗེས་ཆགས་ལས། །བདེ་བ་ཆེན་པོའི་རོ་ཡིས་ནི། །གཉིས་མེད་ངོ་བོ་དཔའ་བོ་སྟེ། །བཅུ་དྲུག་ཆ་རྫོགས་ཟླ་བ་བཞིན། །ཞེས་པ། གཤིན་རྗེའི་གཤེད་དམར་པོའི་རྒྱུད་དུ་མིང་མདོར་བསྟན་པའི་ལེའུ་སྟེ་བཅུ་གསུམ་པའོ།། །།རོ་ལངས་མས་ནི་དམ་འཁྱུད་ནས། །འོ་བྱས་ཚེམས་ཀྱིས་མ་མཆུ་བཟུང་། །སེམས་ཅན་དོན་ཕྱིར་གཏོར་མ་ཆེ། །ལྷ་མོར་བཅས་པས་དེ་ལ་ཞུས། །བཅོམ་ལྡན་འདས་ཀྱིས་བཀའ་སྩལ་པ། དཔལ་གཤིན་རྗེའི་གཤེད་དམར་པོའི་ང་རྒྱལ་བྱས་ནས། སྟེང་དུ་བླ་རེ་དང་རྔ་ཡབ་དཀར་པོ་དང་། ཕྱི་རོལ་དུ་གར་དང་། གླུས་ཉེ་བར་མཛེས་པར་བྱས་པ། རྒྱན་ཐམས་ཅད་ཀྱིས་བརྒྱན་པ། གཡོན་པ་དང་ཅིག་ཤོས་དྲིལ་བུ་དང་རྡོ་རྗེ་སྒྲ་དབྱངས་ཀྱིས་ཡོངས་སུ་གང་ལ་འབར་ཞིང་གསལ་ལ་རྒྱས་པའི་སྣོད་ཀྱི་གཏོར་མ་དོར་བར་བྱ་སྟེ་སྣོད་གཉིས་གཞག་པར་བྱའོ། །སྣོད་གཅིག་ཏུ་གོ་ཀུ་ད་ཧ་ན་དང་། བི་ར་ཤུ་མཱ་མུ་བདུད་རྩི་ལྔ་དང་བཅས་པའི་ཤ་དང་འོ་མ་དང་། ཉ་ཤས་ཡང་དག་པར་གང་བར་བྱའོ། །གཞན་དུ་ཁྱིམ་ལ་སོགས་པའི་ལྷ་རྣམས་གཞག་པར་བྱའོ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧཱུྃ་སརྦ་[བི་]ག་ཎཱཾ་ས་པ་རི་ཝཱ་རཱ་ན་ཨཱ་ཀརྵ་ཡ་

ཛཿ། ཞེས་པའི་སྔགས་འདིས་ཤར་ཕྱོགས་ཀྱི་ཆ་བ་རྣམས་ལ་བཀའ་བསྒོ་བ་དང་། རང་ཉིད་སོང་ནས་བགེགས་ཀྱི་ཚོགས་རྣམས་ཀྱི་མགྲིན་པར་ཞགས་པས་བཅིངས་ནས་སྙིང་གར་ལྕགས་ཀྱུས་ཕུག་སྟེ་འགུགས་བཞིན་པར་བསམ་པར་བྱའོ། །དབང་པོ་སེར་པོ་སྤྱན་སྟོང་པ་ཕྱག་ན་རྡོ་རྗེ་འཛིན་པས་སྲུང་དཀར་པོ་ལ་ཞོན་པའོ། །ལྷོ་རུ་གཤིན་རྗེ་ནག་པོ་ལག་ན་དབྱུག་པ་ཅན་མ་ཧེ་ལ་ཞོན་པའོ། །ནུབ་ཏུ་ཆུ་ལྷ་དཀར་པོ་ཆུ་སྲིན་མ་ཀ་ར་ལ་ཞོན་པ་ལག་ན་ཀུ་མུ་ད་ཅན་ནོ།།བྱང་གི་འདབ་མར་གནོད་སྦྱིན་སེར་པོ་མི་ལ་ཞོན་པ་ལག་ན་དཔལ་འབྲས་ཐོགས་པའོ། །འདི་རྣམས་ཐམས་ཅད་རྒྱན་ཐམས་ཅད་ཀྱིས་བརྒྱན་པ་རིན་པོ་ཆེའི་ཅོད་པན་ཅན། གཤིན་རྗེའི་ཉི་མའི་གདན་དང་ཉི་མའི་འོད་ཅན་ནོ། །ལྷག་མ་རྣམས་ཟླ་བའི་གདན་དང་ཟླ་བའི་འོད་ཅན་ནོ། །དབང་ལྡན་གྱི་འདབ་མར་འབྱུང་པོའི་བདག་པོ་དཀར་པོ་མིག་གསུམ་པ་རལ་པའི་ཅོད་པན་ཅན་ཁྱུ་མཆོག་ལ་ཞོན་པ་ལག་ན་མདུང་ཐོགས་པ་སྟག་གི་པགས་པའི་གོས་འཛིན་པ་ལུས་ཐལ་བས་བྱུགས་པ། རུས་པའི་རྒྱན་ཐམས་ཅད་ཀྱིས་བརྒྱན་པ་ཟླ་བའི་གདན་དང་ཟླ་བའི་འོད་དོ། །མེའི་འདབ་མ་ལ་མེ་ལྷ་སེར་པོ་བོང་ཐུང་ཞིང་གསུས་པ་འཕྱང་བར་ལ་ཞོན་པ་བགྲང་ཕྲེང་དང་རིལ་བ་སྤྱི་བླུགས་འཛིན་པ། རལ་པའི་ཅོད་པན་ཅན་ཉི་མའི་གདན་དང་ཉི་མའི་འོད་དཔའ་བོའི་གོས་སོ། །བདེན་བྲལ་གྱི་འདབ་མ་ལ་སྲིན་པོ་སྐྲ་གྲོལ་བ་ཅན་ལག་ན་གྲི་གུག་དང་ཐོད་པ་འཛིན་པ། ཁྲོས་པ་སྨིན་མ་ཁྲོ་གཉེར་དང་བཅས་པ་ནག་པོ་རོའི་སྟེང་ན་ཉི་མའི་གདན་དང་ཉི་མའི་འོད་མངའ་བའོ། །རླུང་ཕྱོགས་ཀྱི་འདབ་མ་ལ་རླུང་ལྷ་ལྗང་ཞིང་དམར་བ་ལག་ན་བ་དན་ཐོགས་པ། །རིན་པོ་ཆེའི་ཅོད་པན་ཅན། རི་དགས་ལ་ཞོན་པ་ཟླ་བའི་གདན་དང་ཟླ་བའི་འོད་ཅན། རྒྱན་ཐམས་ཅད་འཛིན་པའོ། །ཟེ་འབྲུ་ལ་སའི་ལྷ་མོ་སེར་མོ་ལྷའི་གོས་དང་རྒྱན་ཐམས་ཅད་ཀྱིས་བརྒྱན་པ། །ཟླ་བའི་གདན་དང་ཟླ་བའི་འོད་དང་ཡི་དགས་དང་སའི་ལྷས་ཀུན་ནས་བསྐོར་ཏེ་གནས་པའོ། །དབང་པོ་ལ་སོགས་པ་རྣམས་གཡོན་ན་ཀླུའི་ཞགས་པ་འཆང་བ་ཐམས་ཅད་ཀྱང་གཡོན་བརྐྱང་བའི་ཞབས་ཀྱིས་གནས་པའོ། །སྟེང་དུ་ཆོས་འབྱུང་ལ་གནས་པའི་པདྨ་འདབ་མ་བརྒྱད་ལ་ཤར་གྱི་འདབ་མ་ལ་ཟླ་བ་དཀར་པོ་རྟ་ལ་ཞོན་པ་རིན་པོ་ཆེ་དཀར་པོའི་ཅོད་པན་ཅན་ཟླ་བའི་འོད་དོ། །ལྷོའི་འདབ་མ་ལ་ཉི་མ་དམར་པོ་ཕྱག་གཉིས་པ་པདྨ་འཛིན་པ། རྟ་ལྗང་གུ་ལ་ཞོན་པ་རིན་པོ་ཆེའི་ཅོད་པན་དང་

རྒྱན་ཐམས་ཅད་དང་ལྡན་པ་འོད་སྔོ་བསངས་ཅན་ནོ། །ནུབ་ཀྱི་འདབ་མ་ལ་ལྷག་པ་སེར་པོ་ཁྱུ་མཆོག་ལ་ཞོན་པ་ཉི་མའི་གདན་དང་ཉི་མའི་འོད་ཅན་རྩེ་གསུམ་འཛིན་པའོ། །རླུང་གི་འདབ་མ་ལ་སྒྲ་གཅན་མཇུག་རིངས་ཉི་མའི་གདན་དང་། ཉི་མའི་འོད་ཅན་ཆེར་གནག་པ་དང་དུ་བའི་མདོག་ཅན་འཁོར་ལོ་འཁོར་བས་བཀུག་ནས་ཟ་བའི་ཚུལ་འཛིན་པའི་སྒྲ་གཅན་དང་ཐལ་མོ་སྦྱར་བ་འཛིན་པའི་མཇུག་རིངས་སོ། །དེའི་དབུས་ཀྱི་ཟེ་འབྲུ་ལ་ཚངས་པ་གདོང་བཞི་པ་ལག་པ་བཞི་པ་དབྱུག་གུ་གསུམ་འཆང་བ་དང་མི་འཇིགས་པའི་ཕྱག་ཅན་ཕྱག་ལྷག་མ་དག་གིས་བགྲང་ཕྲེང་དང་རིལ་བ་སྤྱི་བླུགས་འཆང་བ་སེར་པོ་ངང་པ་ཞོན་པ་ཟླ་བའི་གདན་དང་ཟླ་བའི་འོད་ཅན་མཆོད་ཕྱིར་ཐོགས་པ་ཅན་རལ་པ་སེར་པོ། གཟུགས་ཐུང་བ་ཚངས་པའི་བུ་ཡིས་བསྐོར་བ་སྟེ། ཚངས་རིས་ཀྱི་ལྷ་དང་། ཚངས་པ་མདུན་ན་འདོན་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། འོག་མིན་ལ་སོགས་པའི་མིང་ཅན་རྣམས་སོ། །འོག་གི་ཆོས་འབྱུང་གི་ཕྱོགས་ཀྱི་འདབ་མ་ལ། ནོར་རྒྱས་ཀྱི་བུ་སེར་པོ། །ཀླུ་པདྨ་དཀར་པོ། ཀླུ་སྟོབས་ཀྱི་རྒྱུ་དམར་པོ། ཀླུ་འཇོག་པོ་ནག་པོ། ཀླུ་དུངསྐྱོང་མིའི་གདོང་པ་ཅན་རྒྱན་ཐམས་ཅད་འཆང་བ། མགོ་བོར་གདེངས་ཀ་དང་བཅས་པས་མཚན་པ། ལྷ་མ་ཡིན་དང་སེམས་ཅན་དམྱལ་བའི་སེམས་ཅན་དང་ལྷན་ཅིག་པའོ། །ཟེ་འབྲུ་ལྷག་མ་ལ་ཀླུ་ལྷག་མ་ལ་རིན་པོ་ཆེའི་ཅོད་པན་ཅན་མིའི་གདོང་པ་ཅན་ནོ། །འདིར་གདེངས་ཅན་འདི་དག་བསྟན་པར་བྱས་ནས་སླར་དེ་དག་ཡོངས་སུ་གྱུར་པས་དཔལ་གཤིན་རྗེའི་གཤེད་མཐར་བྱེད་ཀྱི་གཟུགས་ཀྱིས་རྫོགས་པར་བྱས་ཏེ། སྐུ་གསུང་ཐུགས་ཀྱི་རབ་ཏུ་སྦྱོར་བ་ལས་སྟེང་དུ་གནས་པ་ནི་སྐུའི་རྣམ་པའོ། །དབུས་སུ་གནས་པ་ནི་སླར་ཡང་མི་བསྐྱོད་པའི་རྣམ་པའོ། །འོག་ཏུ་གནས་པ་ནི་གསུང་རྡོ་རྗེའི་རྣམ་པར་བལྟ་བར་བྱའོ། །ལས་ཐམས་ཅད་ཀྱི་དོན་དུ་སླར་ཡང་ཕྱག་དང་ཞལ་ཇི་ལྟ་བ་དེ་ལྟ་བུའི་ང་རྒྱལ་ཇི་ལྟར་རིགས་པར་བྱའོ། །ཡང་ན་ཐམས་ཅད་དུ་བདག་ཉིད་ཀྱི་གཟུགས་ཇི་ལྟ་བ་དེ་བཞིན་ནོ། །དེའི་རྗེས་སུ། ཨོཾ་ཨརྒྷཾ་པྲ་ཏཱིཙྪ་སྭཱ་ཧཱ། མཆེ་བའི་ཕྱག་རྒྱས་ཞབས་དག་ལ་ཞབས་བསིལ་ཕུལ་ནས་སྔར་བརྗོད་པའི་བདུད་རྩི་མྱང་བས་གཏོར་མའི་ཀུན་སྤྱོད་བྱའོ། །ཨོཾ་རཀྟ་མུ་ཀུཊཱ་ཡ། རཀྟ་ཛ་ཊཱ་ཡ། རཀྟ་མུ་ཁཱ་ཡ། རཀྟ་བྷུ་ཛཱ་ཡ། རཀྟ་ཤ་རཱི་རཱ་ཡ། རཀྟ་མུཎྜ་མཱ་ལཱ་བྷ་ར་ཎཱ་ཡ། རཀྟ་པདྨ་ཨཱ་ས་ནཱ་ཡ་རཀྟ་བྷ་ར་ཎ་བྷཱ་ཥ་ཎཱ་ཡ། ཨི་མཾ་བ་ལིཾ་གྲྀཧྞ་གྲྀཧྞ་ཙ་ཏུ་རྨྨ་རཱནྣི་བཱ་རཱ་ཡ་ནི་བཱ་རཱ་ཡ། ཏྲཱ་ས་ཡ་ཏྲཱ་ས་ཡ། ཙྪིནྡ་ཙྪིནྡ། བྟིནྡ་

བྷིནྡ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེ་ད་ཡ་ཙྪེ་ད་ཡ། བྷེད་བྷེད། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་ཨིནྡྲ་ཡ་ཧྲཱིཿཡ་མཱ་ཡཥྚྲཱིཿབ་རུ་ཎཱ་ཡ་བི། ཀུ་བེ་རཱ་ཡ་ཀྲྀ་ཨཱི་ཤ་ནཱ་ཡ་ཏ། ཨགྣ་ཡེ་ཨ། ནཻ་རྀ་ཏྱ་ཡ་ན། བཱ་ཡ་བེ་ན། ཙནྡྲ་ཡ་ཧཱུྃ། ཨརྐཱ་ཡ་ཧཱུྃ། བྲཏྨ་ཎེ་ཕཊ། བ་སུནྡྡ་རཱ་ཡཻ་ཕཊ། བཻ་མ་ཙི་ཏྲི་ཎེ་སྭཱ། སརྦ་བྷུ་ཏེ་བྷྱོ་ཧཱ། ཧཱ་ཧཱ་ཧཱ་ཧཱི་ཧཱི་ཧཱི་ཧཱུྃ་ཧཱུྃ་ཧཱུྃ། ཕེཾ་ཕེཾ་ཕེཾ་ཕཊ་སྭཱ་ཧཱ། ཨོཾ་མོ་ཧ་ཡ་མཱནྟ་ཀཱ་ཡ་སྭཱ་ཧཱ། ཨོཾ་པི་ཤུན་ཡ་མཱནྟ་ཀཱ་ཡ་སྭཱ་ཧཱ། ཨོཾ་རཱ་ག་ཡ་མཱནྟ་ཀཱ་ཡ་སྭཱ་ཧཱ། ཨོཾ་ཨཱིརྵྱ་ཡ་མཱནྟ་ཀཱ་ཡ་སྭཱ་ཧཱ། ཨོཾ་བཛྲ་ཙརྩི་ཀཱ་ཡཻ་སྭཱ་ཧཱ། ཨོཾ་བཛྲ་བཱ་ར་ཧྱཻ་སྭཱ་ཧཱ། ཨོཾ་བཛྲ་གཽ་རྱཻ་སེ་སྭཱ་ཧཱ། ཨོཾ་བཛྲ་བེཏྟཱ་ལི་བ་ལི་བྲ་ཏཱིཙྪ་སྭཱ་ཧཱ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །སྐུ་ཡི་རྡོ་རྗེ་ཁྱོད་ཕྱག་འཚལ། །ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ཤིན་ཏུ་འཇིགས། །ཐུགས་ཀྱི་རྡོ་རྗེ་རབ་གསལ་བ། །རྡོ་རྗེ་རིན་ཆེན་ཁྱོད་ཕྱག་འཚལ། །འདོད་ཆགས་རྡོ་རྗེའི་རང་བཞིན་ཁྱོད། །མངའ་བདག་ཆགས་པའི་ཆོས་འབྱུང་གནས། །དབྱངས་མཆོག་ཀུན་གྱི་མཆོག་གི་མཆོག །གསུང་གི་རྡོ་རྗེ་ཁྱོད་ཕྱག་འཚལ། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ལས་ཀུན་བྱེད། །སྐུ་ཡི་རྡོ་རྗེ་རབ་གསལ་བ། །ཕྱག་ན་རལ་གྲི་ཁྱོད་ཕྱག་འཚལ། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་དབང་ཕྱུག་ཁྱོད་ཕྱག་འཚལ། །ཧོ་བྷ་ག་ཝན་ཏྭེ་ནོ་པ་ཏིབྛ་དྲྀཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་བཱ་ན། བཅོམ་ལྡན་འདས་སྐུ་བཞི་པོ་གསུང་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་བྷ་གར་འཇིག་རྟེན་འདས། །སངས་རྒྱས་སྐུ་ནི་འཇིག་རྟེན་པ། །རྣམས་ལ་ཕན་པའི་ཆེད་དུ་ནི། །ཧེ་རུ་ཀ་ངས་བསྟན་པ་ཡིན། །བླ་མ་དམ་པའི་གདམས་པས་དམན། །སངས་རྒྱས་སྐུ་ནི་རྣམ་པར་སྤངས། །རྡོ་རྗེ་ཐེག་པས་རྣམ་དམན་པ། །དེ་རྣམས་རྒྱུད་འདིར་ཁ་ཕྱིར་ཕྱོགས། །གང་གིས་ཧེ་ཡིག་མི་ཤེས་པ། །སྲིད་པར་འདུས་པའི་རྣལ་འབྱོར་པས། །བཤད་པའི་རྒྱུད་ཀྱི་རྗེས་འབྲངས་ནས། །རྣལ་འབྱོར་པ་ཁྱོད་གཤིན་རྗེའི་གཤེད། །དམར་པོའི་རྒྱུད་ཆེན་ཚིག་ཉུང་དེ། །གང་གིས་

ཡོངས་སུ་ངལ་མེད་པར། །བདེ་བ་ཆེན་པོ་གསུངས་པ་དེའི། །བདེ་བ་ཐམས་ཅད་ཀུན་བསྡུས་པའོ། །པད་འདབ་དྲུག་ཅུ་རྩ་བཞི་པ། །རྒྱུ་བཅས་ཆེད་དུ་རྣལ་འབྱོར་མ། །ལོངས་སྤྱོད་རྫོགས་ལས་བདེ་བ་ཐོབ། །སྤྱོད་ཅིང་སྤྱོད་ལ་དེ་རྩེའོ། །སྐད་ཅིག་གཅིག་མངོན་རྫོགས་བྱང་ཆུབ། །གཞན་དུ་འཇིག་རྟེན་གསུམ་སྤྱོད་བྱེད། །འདི་ནི་སྐུ་ནི་བཞི་པོ་སྟེ། །སངས་རྒྱས་རྣམས་ཀྱིའང་སྤྱོད་ཡུལ་མིན། །འཇིག་རྟེན་འདས་པའི་ཐ་སྙད་ཀྱིས། །རྣལ་འབྱོར་དམ་པའི་རྣམ་པས་བསྟན། །འཁོར་ལོ་བཞི་ཡི་རྣམ་པ་ཡིས། །ཀྱེ་ཡི་རྡོ་རྗེར་བདག་གིས་བསྟན། །སྒོམ་པའི་སྦྱོར་བ་འདུས་པ་རུ། །རྩ་རྣམས་མཁའ་འགྲོ་མ་ཀུན་གྱིས། །འབྲས་བུའི་སྒྲུབ་ཐབས་ཀྱེ་རྡོ་རྗེར། །གང་དུ་རླུང་གི་སྒྲུབ་ཐབས་ནི། །ཉིན་དང་མཚན་མའི་རབ་དབྱེ་ལ། །འདབ་མ་དྲུག་ཅུ་བཞིར་དབྱུག་གུ། །ཞེས་པ་འདི་དག་ཐུན་མོང་གི། །རབ་ཏུ་དབྱེ་བས་བརྗོད་པར་བྱ། །ལྷ་ཡི་གཟུགས་ཀྱི་བདག་ཉིད་ཅན། །སླར་ཡང་སྐུ་གསུང་ཐུགས་དབྱེ་བས། །ཡིག་གསུམ་ཉིད་ཀྱི་མཉམ་གཞག་པའི། །ཡིད་ཀྱིས་ཁོང་དུ་ཆུད་པར་བྱ། །ཨོཾ་ཡིག་གིས་ནི་འཇུག་པ་དང་། །ཨཱཿཡིག་གིས་ནི་དེ་བཞིན་གནས། །ཧཱུྃ་ཡིག་གིས་ནི་དབྱུང་བ་ཡང་། །རྣལ་འབྱོར་མན་ངག་ལས་བྱའོ། །ཨོཾ་ཨཱཿཧཱུྃ་ཞེས་བྱ་བ་འདིས། །རྒྱུ་བཅས་རྒྱུ་མེད་བསྟན་པར་འགྱུར། །དེ་ལས་ས་བོན་མཚན་མའང་སླར། །སྣ་རྩེར་མཆོག་ཏུ་བསམ་པར་བྱ། །འོད་གསལ་བ་ཡི་རང་བཞིན་བྱ། །དེ་བཞིན་བདག་གཞན་མཉམ་པ་ཉིད། །བྱེད་མེད་གཟུགས་ཀྱི་ཕྲེང་བ་ཡི། །ཡང་ཡང་སྐད་ཅིག་སྐད་ཅིག་མ། །གཅིག་ལས་སླར་ཡང་བཞེངས་ཆེད་དུ། །སྔགས་པས་གྲིབ་མ་སྒྱུ་མ་ལྟའི། །དབྱེ་བས་ཀུན་ཏུ་བསམ་པར་བྱ། །དག་པའི་སྐུ་འདི་ཡིས་ནི་གང་། །ཡེ་ཤེས་བརྩོན་པས་བསྒོམ་པར་བྱ། །སེམས་ཅན་ཀུན་ནི་ཆོས་ཉིད་བྱེད། །ལྷ་ཡི་རྣལ་འབྱོར་འདི་ཉིད་ནི། །བླ་མའི་མན་ངག་ལས་རྟོགས་བྱ། །སླར་ཡང་སྔགས་པས་འཇིག་རྟེན་དོན། །སླར་ཡང་ཡི་གེ་བསྒོམ་པར་བྱ། །ལོངས་སྤྱོད་རྫོགས་པའི་སར་ལན་གྲངས། །ཀུན་ཏུ་ངེས་པ་འཆིང་བས་བཅིང་། །ལག་པས་ངེས་སྦྱར་སྟེང་གིས་ནི། །ཡི་གེས་བསྟན་པའི་འཁྲུལ་འཁོར་ལས། །རྐྱང་མ་དང་ནི་རོ་མ་ཡིས། །དབུས་སུ་གཡོ་མེད་འཇུག་པར་གྱིས། །སྐུ་གསུང་ཐུགས་སུ་ངེས་སྦྱར་ནས། །ཕྱག་རྒྱ་མཆོག་ཏུ་བསམ་པར་བྱ། །སྐད་ཅིག་དེ་ལས་

ལྷན་སྐྱེས་འཆར། །བསྒོམ་བྱ་འདིར་ནི་ཐེ་ཚོམ་མེད། །དོན་འདི་གང་གིས་ཤེས་བྱེད་པ། །བློ་བཟང་ཡིད་ནི་མཉམ་པར་གཞག །ཆོས་རྣམས་ཐམས་ཅད་དེ་ཤེས་བྱེད། །སངས་རྒྱས་ལམ་གྱི་མན་ངག་གོ །འཇུག་ངོགས་ཆེན་པོར་ཁྱོད་བཀྲུས་ཏེ། །དེ་བཞིན་གཤེགས་པས་མངོན་དབང་བསྐུར། །དེ་ཡང་གང་དང་གང་འགྲོ་བ། །དེར་ནི་སངས་རྒྱས་འོང་བར་བྱེད། །ཀུན་དུ་བྱང་ཆུབ་སེམས་དཔའ་ཉིད། །སྣ་ཚོགས་སེམས་ཅན་ཕན་པར་བྱེད། །ཧ་ཧར་དགོད་པར་གྱིས་ཤིག་ཅེས། །ཕྱོགས་བཅུར་རྣམ་པར་གནས་པ་ཡིས། །བདུད་རྣམས་ཀུན་དུ་འབྲོས་པར་བྱེད། །ཐལ་མོ་སྦྱར་བར་བྱས་ནས་ནི། །ཁྱེད་ཞབས་ཀུན་གྱིས་འདུད་པར་བྱེད། །སྣ་ཚོགས་གཟུགས་འཆང་བུད་མེད་ནི། །སྣ་ཚོགས་འདོད་པས་འཁྲུགས་པར་རིག །བཙོགས་མ་ཏིལ་མཆོག་མ་ལ་སོགས། །བཀུག་ནས་རྫོགས་པར་ལོངས་སྤྱོད་བྱེད། །ཅེས་པས་གཤིན་རྗེའི་གཤེད་དམར་པོའི་རྒྱུད་དུ་རླུང་གི་དེ་ཉིད་དེ་ལེའུ་བཅུ་བཞི་པའོ།། །།དེ་ནས་རླུང་གི་རྣམ་གྲངས་ནི། །བཅོམ་ལྡན་འདས་ཀྱིས་བསྟན་དུ་གསོལ། །རབ་ཏུ་ཕྱེ་ནས་བཤད་ཀྱིས་ཉོན། །རིགས་ཀྱི་དབྱུག་གུ་སོ་གཉིས་ལ། །ཐུན་ཚོད་བཞི་རུ་འགྱུར་བ་ཡིན། །བཅུ་དྲུག་གཉིས་ཀྱིས་རྣམ་པར་འགྱུར། །ཐུན་གཅིག་དབྱུག་གུ་ལྷག་པ་ལ། །ཐུན་ཕྱེད་དབྱུག་གུ་བཞི་ཡིན་ཏེ། །དེས་ན་རིམ་པ་བཞིན་འགྱུར་རོ། །ཉིན་དང་མཚན་མོར་རིམ་པས་ཀྱང་། །འཕོ་བ་བཅུ་དྲུག་རབ་ཏུ་བརྗོད། །མེ་དང་རླུང་དང་ཆུ་དང་ནི། །དབང་ཆེན་དཀྱིལ་འཁོར་བཞི་པོ་ནི། །འབབ་པས་དབྱུག་གུ་བཞི་རབ་གྲགས། །རླུང་ནི་བཞི་པོ་རྣམ་འཕེལ་ལས། །འཁོར་ལོ་བཞི་རུ་རབ་ཏུ་བརྗོད། །རྣམ་པ་སྣ་ཚོགས་ལ་སོགས་བཞི། །སྐད་ཅིག་ཐང་ཅིག་སོགས་དབྱེ་ལས། །རྣམ་པ་བཞི་རུ་དེ་བརྗོད་དོ། །དེ་བཞིན་དགའ་བ་བཞི་པོ་སྟེ། །ཐུན་ཚོད་བཞིར་ཡང་རབ་ཏུ་བརྗོད། །སྐུ་གསུམ་དེ་ལ་སྐུ་བཞི་པ། །དེ་བཞིན་ཐམས་ཅད་བཞི་རུ་ཡང་། །ཕྱི་ཡི་རིམ་པ་དེ་བཞིན་ནོ། །རྣལ་འབྱོར་བཞི་དང་བཞི་པ་ནི། །སྐུ་ནི་བཞི་རུ་ཡང་དག་བརྗོད། །འདིས་ནི་དབྱུག་གུ་བཞིར་འགྱུར་ཏེ། །རབ་ཏུ་དབྱེ་བས་དྲུག་ཅུ་བཞི། །ཀྱེ་ཡི་རྡོ་རྗེ་བསྟན་དང་འདིར། །དེ་བཞིན་ངེས་བསྟན་ལུས་ཀྱི་ནི། །འོག་ལ་འཁོར་ལོ་བཞི་ཡོད་དེ། །དེ་ཡང་སྐུ་ནི་བཞི་པ་ཡིན། །དགའ་བ་བཞི་ལ་མཚོན་པ་ཡང་། །སྐུ་བཞི་པོར་ནི་རབ་ཏུ་བརྗོད། །དཔལ་གཤིན་རྗེའི་གཤེད་དམར་པོའི་རྒྱུད་མདོར་བསྟན་པ་སྟེ་ལེའུ་བཅོ་ལྔ་པའོ།། །།

བཅོམ་ལྡན་འདས་ཀྱིས་བཀའ་སྩལ་པ། །སྲིད་པའི་འཁོར་ལོར་བརྗོད་བྱ་ཅི། །ལྷ་ཡི་གསང་ལས་ཆེས་གསང་དྲིས། །སྲིད་གསུམ་སེམས་ཅན་རྨོངས་པ་རྣམས། །ཉམས་བྱེད་སྙིང་པོ་འདི་ཉོན་ཅིག །རྟག་ཏུ་སངས་རྒྱས་ཉིད་སྒྲུབ་པ། །བདུད་ཀྱིས་སྤྲུལ་པ་འདིས་ནི་ཞེས། །དེ་ལྟར་རྣལ་འབྱོར་འཁོར་བར་འཁྱམ། །རྣལ་འབྱོར་འཁོར་བར་འཁྱམ་པ་ལས། །འཁོར་བ་མཆོག་ཏུ་བརྩེ་བར་བྱེད། །ཆུ་ལ་པདྨའི་འདབ་མ་བཞིན། །སྐྱོན་གྱིས་ཅི་ཡང་གོས་པ་མེད། །བཅུ་གཉིས་རྣམ་པའི་འཁོར་ལོ་འདི། །བཅུ་གཉིས་དོན་ཞེས་རབ་ཏུ་གནས། །འཁོར་ལོ་འདི་ཉིད་ཁོ་ན་ཡང་། །ཡན་ལག་བཅུ་གཉིས་རབ་ཏུ་གྲགས། །གང་གིས་འཁོར་ལོ་འདི་ཤེས་བྱེད། །སངས་རྒྱས་ཀུན་གྱིས་རབ་གྲགས་པའི། །ཆོས་རྣམས་མ་ལུས་ཤེས་བྱེད་ཅིང་། །ཆོས་ཀྱི་འཁོར་ལོ་རབ་བསྐོར་བྱེད། །དེ་ཕྱིར་ཡན་ལག་བཅུ་གཉིས་པའི། །ཆོས་ཀྱི་འཁོར་ལོ་རབ་བསྐོར་བ། །བདག་གིས་བཤད་པར་བྱ་ཡིས་ཉོན། །མ་རིག་པ་དང་འདུ་བྱེད་དང་། རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤི་ཞེས་བྱ་བ་ཡན་ལག་བཅུ་གཉིས་རྣམས་སོ། །མ་རིག་པ་ནི་སྔོན་གྱི་ཉོན་མོངས་པའོ། །འདུ་བྱེད་ནི་སྔོན་གྱི་ལས་རྣམས་སོ། །རྣམ་པར་ཤེས་པ་ནི་སྔོན་གྱི་སོ་སོར་ཀུན་ཏུ་རྟོག་པའོ། །མིང་དང་གཟུགས་ནི་ནུར་ནུར་པོ་དང་། མེར་མེར་པོ་དང་། གོར་གོར་བོ་དང་། ནར་ནར་པོ་དང་། རྐང་ལག་འགྱུས་པའི་གནས་སྐབས་ལྔའོ། །སྐྱེ་མཆེད་དྲུག་ནི་མངལ་ནས་ངེས་བྱུང་བའི་མིག་ལ་སོགས་པའི་དབང་པོ་དྲུག་རྫོགས་པའོ། །རེག་པ་ནི་ཡུལ་དང་། དབང་པོ་དང་། རྣམ་པར་ཤེས་པ་གསུམ་འདུས་པ་ལས་སོ། །ཚོར་བ་ནི་བདེ་བ་དང་། སྡུག་བསྔལ་དང་། བཏང་སྙོམས་ཀྱི་མཚན་ཉིད་ལས་དོན་རྣམ་པ་གསུམ་དུ་དབྱེའོ། །སྲེད་པ་ནི་འཁྲིག་པའི་འདོད་ཆགས་སོ། །ཉེ་བར་ལེན་པ་ནི་འདོད་པའི་ཡུལ་ཡོངས་སུ་འཛིན་པའོ། །སྲིད་པ་ནི་འབྱུང་འགྱུར་གྱི་སྲིད་པ་ལས་ཀྱི་འབྲས་བུའོ། །སྐྱེ་བ་ནི་སླར་ཡང་ཕུང་པོ་ལ་ཉིང་མཚམས་སྦྱོར་བའོ། །རྒ་ཤི་

ནི་མིང་དང་གཟུགས་ལ་སོགས་པའི་ཡན་ལག་བཞིའོ་ཞེས་སོ། །ཡན་ལག་བཅུ་གཉིས་ཁྱད་པར་ལས། །ཐུབ་པས་རྟེན་ཅིང་ཀུན་འབྱུང་བསྟན། །ཇི་སྲིད་ཉོན་མོངས་ལས་དང་ནི། །སྡུག་བསྔལ་གསུམ་དུ་དེ་རྣམས་འདུས། །དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་སུ་འགྱུར། །ལྷག་མ་བདུན་ནི་སྡུག་བསྔལ་ཡིན། །བཅུ་གཉིས་པོ་ནི་གསུམ་འདུས་ཕྱིར། །ཆོས་གསུམ་པོ་ནི་བསྟན་པར་འགྱུར། །བཟླས་དབྱེ་གཉིས་སུ་དེ་འགྱུར་རོ། །བདུན་བདུན་དག་ཏུ་འགྱུར་པ་ཡིན། །དེ་ཉིད་ཡང་ཡང་དེ་འཁོར་ཞིང་། །འཁོར་བས་སྲིད་པའི་འཁོར་ལོའོ། །འགྲོ་བ་ཕན་ཚུན་རྒྱུ་དང་འབྲས། །འགའ་ཞིག་འདིར་མེད་སེམས་ཅན་སྟོང་། །དེ་ལྟར་སྟོང་ལས་ཆོས་རབ་འབྱུང་། །ཆོས་ལས་འཕོ་བའང་ཡོད་མིན་ཏེ། །ལེགས་པར་ཀློག་དང་མར་མེ་རྒྱ། །མེ་ལོང་སྒྲ་དང་ཉི་མ་འཕོ། །ས་བོན་ལས་ནི་ཕུང་པོ་འདི། །མཚམས་སྦྱོར་བ་དང་འཕོ་བ་མེད། །སེམས་ཀྱི་ཀུན་སྤྱོད་འདུལ་བར་འགྲོ། །འདིར་བརྗོད་ཡན་ལག་བཅུ་གཉིས་ནི། །ཁྱད་པར་ཐུབ་པས་བསྟན་པ་ཡིན། །ཅི་ལྟར་རྟེན་ཅིང་ཡང་དག་འབྱུང་། །དེ་རྣམས་བསྡུས་པར་ཤེས་པར་བྱ། །སོ་སོར་ངེས་བསྟན་ཉན་པར་འདོད། །དེ་དེ་སངས་རྒྱས་སྤྱོད་ཡུལ་ཞེས། །སློབ་དཔོན་འདིར་བརྗོད་གནས་པའོ། །ཉོན་མོངས་ལས་དང་སྡུག་བསྔལ་རྣམས། །ཞེས་པས་ཇི་སྲིད་བསྡུས་པའོ། །དེ་ལ་གཉིས་དག་གིས་ལྷག་པའི་བཅུ་སོ་སོར་བསྟན་པ་ལ། ཡན་ལག་ཅེས་པ་འདི་དག་གི་ཆ་ཤས་ཀྱི་ཁྱད་པར་རོ། །དཔེར་ན་ཨཾ་ག་བཾ་གའི་དངོས་པོའི་ཁྱད་པར་ནི་བསྔགས་པའོ། །ཞེས་ཏེ། ཨཾ་ག་ནི་ཁྱད་པར་རོ། །ལུས་དང་ངག་དང་ཡིད་འཁྲིག་པ་ལས་ཐུབ་པ་དེས་ནི་ཐུབ་པས་སོ། །བསྟན་པ་ནི་རབ་ཏུ་གསལ་བར་གསུངས་པའོ་ཞེས་པ་རྣམ་གྲངས་སོ། །དེ་རྣམས་ཀྱི་གཙོ་བོ་དང་། རང་བཞིན་དང་། དབང་ཕྱུག་ཏུ་ངེས་པ་དང་། ཕྱོགས་སྐྱོང་བ་དང་། ངོ་བོ་ཉིད་ལ་སོགས་པ་མ་ཡིན་གྱི། ཡན་ལག་བཅུ་གཉིས་ཀྱི་ཁྱད་པར་རོ། །དེ་ལྟ་མོད་ཀྱི་ཉོན་མོངས་པ་རྣམས་ལ་ལས་དང་སྡུག་བསྔལ་རྣམས་སུ་སྟེ། ཕན་ཚུན་བསྟེན་པ་དབྱུག་གུ་གསུམ་གྱི་ཚུལ་གྱིས་

གསུམ་རྣམས་སུ་ཇི་ལྟ་བ་བཞིན་དུ་བསྡུས་ནས་འགྲོ་སྟེ། དཔེར་ན་ཆུ་བཞིན་ནོ། །སླར་ཡང་ཉོན་མོངས་པ་རྣམས་དང་། ལས་རྣམས་དང་། སྡུག་བསྔལ་ཏེ་དེ་རྣམས་ཇི་ལྟ་བ་བཞིན་དུ་འདི་གསུམ་བསྡུས་ནས་ཇི་ལྟར་འགྲོ་ཞེ་ན། བརྗོད་པར་བྱ་སྟེ། དང་པོ་བརྒྱད་དགུ་ཉོན་མོངས་འགྱུར་ཞེས་པ་ནི། ཡན་ལག་བཅུ་གཉིས་པོ་འདི་རྣམས་ཀྱི་ཁྱད་པར་གྱི་ནང་ནས། དང་པོ་མ་རིག་པ་དང་བརྒྱད་པ་སྲེད་པ་དང་། དགུ་པ་ཉེ་བར་ལེན་པ་ཞེས་པ་གསུམ་པོ་འདི་རྣམས་ཉོན་མོངས་པ་སོ་སོར་བསྡུས་པར་རྟོགས་པར་བྱའོ། །གཉིས་པ་བཅུ་པ་ལས་ཡིན་ཏེ་ཡང་ཅི། འདུ་བྱེད་ནི་གཉིས་པའོ། །སྲིད་པ་ནི་བཅུ་པའོ། །འདི་དག་ལས་སུ་བསྡུས་པར་རིག་པར་བྱའོ། །ལྷག་མ་བདུན་ནི་སྡུག་བསྔལ་ཡིན། ཉོན་མོངས་པ་དང་ལས་སུ་བསྡུས་པ་འདི་རྣམས་ཀྱི་ལྷག་མ་གང་ཡིན་པའི་ཡན་ལག་གི་ཁྱད་པར་བདུན་ནི་སྡུག་བསྔལ་དུ་བསྡུས་པར་རིག་པར་བྱའོ། །འདི་ལྟ་སྟེ། རྣམ་པར་ཤེས་པ་དང་། མིང་དང་། གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྐྱེ་བ་དང་། རྒ་ཤི་ཡང་ངོ་ཞེས་པ་སྟེ། ཡང་གི་སྒྲ་རབ་ཏུ་སྦྱོར་བ་ནི་བསྡུ་བ་ཡང་དག་པར་རབ་ཏུ་སྦྱོར་བ་སྟེ། མ་རིག་པ་ལ་སོགས་པ་རྣམས་སྡུག་བསྔལ་དུ་ཡང་དག་པར་སྡུད་པར་བྱེད་དོ། །དེ་བཞིན་ཆོས་བཅུ་གཉིས་པོ་འདི་རྣམས་ཐམས་ཅད་ནི་ཉོན་མོངས་པ་དང་། ལས་དང་། སྡུག་བསྔལ་ཞེས་བྱ་བ་གསུམ་དུ་བསྡུས་ཏེ། དམན་པ་དང་ལྷག་པ་ཡོད་པ་མ་ཡིན་པར་ཤེས་པར་བྱེད་པའི་དོན་ལས་སོ། །ནིའི་སྒྲ་ནི་འདི་རྣམས་མདོ་རུ་ངེས་པར་བསྟན་པ་དེ་སྲིད་དུ་ཡོངས་སུ་བགྲངས་པ་འདི་དག་མཆོག་ཏུ་ཡོད་དོ་ཞེས་བརྗོད་པར་བྱའོ། །ཅི་སྟེ་གང་ལས་འདི་རྣམས་ལས་དང་ཉོན་མོངས་རྣམས་ཀྱིས་དང་། ལས་དང་སྡུག་བསྔལ་རྣམས་ཀྱིས་འགྱུར་ཞེ་ན། བརྗོད་པར་བྱ་སྟེ། གསུམ་རྣམས་ཟླས་དབྱེར་འགྱུར་བ་ནི། ཟླས་དབྱེ་བ་ལས་འགྱུར་རོ། །བདུན་པ་ཉོན་མོངས་པ་ཞེས་བྱ་བ་ནི། གསུམ་རྣམས་སུ་ཟླས་དབྱེ་བར་འགྱུར་རོ། །ལས་ཞེས་བྱ་བ་ཟླས་དབྱེར་འགྱུར་ཏེ། ཟླས་དབྱེ་བ་ལས་རབ་ཏུ་འགྱུར་བ་ཁོ་ནའོ། །སྡུག་བསྔལ་ཞེས་པ་སྔར་བཞིན་དུ་ངེས་པར་བསྟན་པ་ལས་བདུན་

པ་གསུམ་འབྱུང་སྟེ། སྡུག་བསྔལ་ཞེས་བྱ་བ་རྣམས་སུ་ཉོན་མོངས་པ་ཞེས་བྱ་བ་གཉིས་པོ་དེ་ཉིད་ནི་རབ་ཏུ་འཁོར་བར་བྱེད་པས་སྲིད་པའི་འཁོར་ལོའོ། །དེ་ལ་སྲིད་པ་ནི་ལས་ཀྱི་གཟུགས་ཀྱིས་སྒྲ་གཅན་ནོ། །དེ་ཡང་མིང་གསུམ་པ་ཅན་འདིར་འཁོར་ལོ་བྱུང་བ་ལས་འཇིག་རྟེན་བདུན་པོ་དེར་ཡོངས་སུ་འཁོར་བར་བྱེད་དོ། །ནིའི་སྒྲ་ནི་ངེས་པའི་དོན་ནོ། །དཔེར་ན་ཟླ་བ་ཤར་དུ་ཡོངས་སུ་འཁོར་བར་བྱེད་པ་བཞིན། སྲིད་པའི་འཁོར་ལོའོ། །དེ་བཞིན་དུ་རྫོགས་པར་འབྱུང་བ་ནི་མ་ཡིན་ནོ། །དེ་ལྟ་མོད་ཀྱི་ངེས་པ་ནི་མེད་དོ། །ཞེས་པས་ནི་སྒྲའོ། །དེ་ནས་ད་ནི་ལུས་ཅན་ཐམས་ཅད་དབང་ཕྱུག་བྱེད་པ་པོ་དང་། བྱེད་པ་ཅི་ཡིན་ཞེ་ན་བརྗོད་པར་བྱ་སྟེ། འགྲོ་བ་ཐམས་ཅད་ཕན་ཚུན་དུ་རྒྱུ་དང་འབྲས་བུ་ཡང་འགའ་ཞིག་ཀྱང་འདིར་མེད་དེ། སེམས་ཅན་ལ་གཞན་དུ་ཉེ་བར་བཏགས་པ་ལས་སོ། །རྒྱུ་ཡི་ཡང་འདི་ཡོངས་སུ་བྱེད་པ་ལ་རྒྱུར་ཉེ་བར་བཏགས་པ་ཙམ་མོ། །དེའི་ཕྱིར་རྫས་གཞན་ལ་སེམས་ཅན་དུ་བདེན་ནོ་ཞེས་སོ། །དེ་ནས་ད་ནི་གནས་པའི་འཇིག་རྟེན་ལས་ཕ་རོལ་གྱི་འཇིག་རྟེན་དུ་རྗེས་སུ་འགྲོ་བ་ཅི་ཞེ་ན་བརྗོད་པར་བྱ་སྟེ། འཇིག་རྟེན་ཕ་རོལ་གྱི་དོན་ཙམ་ཡང་དངོས་པོ་སྟེ། འཕོ་བ་ནི་མེད་དོ། །འོན་ཀྱང་སྟོང་པ་ཁོ་ན་ལས་སྟོང་པའི་ཆོས་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ། །ཆོས་རྣམས་ལས་ནི་བདག་གི་བ་མེད་པའི་ཉོན་མོངས་དང་ལས་ཀྱི་མིང་ཅན་ལྔ་པོ་རྣམས་ལས་བདག་དང་བདག་གི་བས་སྟོང་པའི་འབྲས་བུའི་མིང་ཅན་བདུན་པོའི་ཆོས་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ་ཞེས་པ་དེ་ལྟ་བུར་འཛིན་པའི་རང་བཞིན་དུ་བདག་ཏུ་གནས་པ་རྣམས་ལས་རང་བཞིན་དང་བྲལ་བའི་སྟོང་པའི་ཆོས་བདུན་པོ་རྣམས་རབ་ཏུ་འབྱུང་སྟེ། འཕོ་བ་ཡང་མེད་དོ། །དེའང་འདི་དག་བསྟན་པ་ཅི་ཞེ་ན། འདིར་བརྗོད་པར་བྱ་སྟེ། ལེགས་པར་ཀློག་དང་སྒྲོན་མེ་རྒྱ། །མེ་ལོང་སྒྲ་དང་ཉི་མ་འཕོ། །ས་བོན་མིག་གི་ངེས་བསྟན་པ། །ཞེས་པ་ནི་དེ་ཁོ་ན་ཉིད་ལས་འགྲོ་བ་མེད་པ་ཉིད་དང་། རང་བཞིན་གྱིས་བདག་ཀྱང་མེད་དེ། ཐ་སྙད་དུ་འཇིག་རྟེན་ཕ་རོལ་ཡོད་དོ། །ཞེས་པའོ། །དཔེར་ན་བླ་མ་ལས་ཀློག་པར་བྱེད་པ་

ནི་འཕོ་བ་ཡང་མེད་དེ། དེའི་དངོས་པོ་བླ་མ་ལས་ཀློག་པ་ཉམས་པ་མེད་ལ་སློབ་མས་ཀློག་པ་ཡང་ཉམས་པ་མེད་ཅིང་། སློབ་མས་ཀློག་པ་གཞན་མ་ཡིན་ནོ། །དེ་བཞིན་དུ་ཀུན་ཏུ་འབྱུང་བར་བྱེད་ན་རྒྱུ་མེད་པ་ཅན་གྱི་ཉེས་པར་ཐལ་བར་འགྱུར་བའི་ཕྱིར་རོ། །དེ་བཞིན་དུ་འཆི་བར་བྱེད་པའི་སེམས་ནི་འཇིག་རྟེན་ཕ་རོལ་ཏུ་འགྲོ་བ་མེད་དེ་རྟག་པའི་ཉེས་པར་ཐལ་བའི་ཕྱིར་རོ། །འཇིག་རྟེན་ཕ་རོལ་གཞན་ཁོ་ན་ལས་འབྱུང་བ་མ་ཡིན་ཏེ། དཔེར་ན་བླ་མ་ལས་ཀློག་པར་བྱེད་པའི་རྒྱུ་མཚན་ཅན་ནི་སློབ་མའི་ཀློག་པར་བྱེད་པའོ། །དེ་ཉིད་དེ་ལས་གཞན་མ་ཡིན་པ་དེ་བཞིན་དུ་དེའོ་ཞེས་ནུས་པ་མངོན་པར་བརྗོད་དོ། །དེ་བཞིན་དུ་དེ་འཆི་བའི་མཐར་ཐུག་པའི་སེམས་ལ་བསྟེན་ནས་སྐྱེ་བའི་ཆ་ཤས་ཅན་གྱི་སེམས་དེ་ཉིད་གཞན་མ་ཡིན་ནོ། །དེ་བཞིན་དེ་ཡང་ནུས་པ་མངོན་པར་བརྗོད་དོ། །དཔེར་ན་མར་མེ་ལས་མར་མེའོ། །རྒྱ་ལས་ཕྱིར་རྒྱའོ། །བཞིན་ལས་མེ་ལོང་ལས་གཟུགས་བརྙན་ནོ། །སྒྲ་ལས་བྲག་ཅའོ། །ཉི་མ་དང་ནོར་བུའི་འོད་དང་བུད་ཤིང་རྣམས་ལས་མེའོ། །ས་བོན་ལས་མྱུ་གུའོ། །དཔེར་ན་ཤུ་གའི་འབྲས་བུ་ཟོས་པའི་རྒྱུ་མཚན་གྱིས་གཞན་གྱིས་ཁ་འཛག་པ་ལས་གཞན་མ་ཡིན་ནོ་ཞེས་རབ་ཏུ་ཤེས་པར་བྱའོ། །དེ་བཞིན་དུ་ཕུང་པོ་ལས་ཕྱིར་ཕུང་པོ་འཕོ་བ་མེད་པ་ཡང་མཁས་པ་རྣམས་ཀྱིས་ཀུན་ཏུ་དཔྱད་པའོ་ཞེས་སོ། །དེ་ལ་ཕུང་པོ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་མིང་ཅན་འདི་རྣམས་ཀྱི་ཕུང་པོ་ཉིང་མཚམས་སྦྱོར་བ་འདི་དག་ཕུང་པོ་ལྔ་པོ་རྣམས་སུ་ངེས་པར་བརྟག་པར་བྱ་སྟེ། རྒྱུ་མེད་པ་ཅན་ཡང་མ་ཡིན་ལ་གཞན་ལས་འབྱུང་བ་ཡང་མ་ཡིན་ནོ། །འཇིག་རྟེན་འདི་ལས་འཇིག་རྟེན་ཕ་རོལ་མ་ཡིན་ནོ། །དེ་ནས་མིག་ཀྱང་དངོས་པོ་འཕོ་བ་མེད་དོ། །འདི་དེ་སྲིད་དུ་འདུ་བྱེད་འཁོར་བའི་རིམ་པའོ། །ཡང་གི་སྒྲ་ནི་ལྡོག་པ་སྟེ། དེའི་ཕྱིར་ཕྱིན་ཅི་ལོག་ཏུ་རྟོགས་པར་མི་བྱའོ། །གང་གི་ཕྱིར་རྟག་ཏུ་སྡུག་བསྔལ་སྟོང་པའི་བདག་ཉིད་ཅན་གྱི་དངོས་པོ་ཡིན་པ་དེའི་ཕྱིར། སོ་སོར་ཀུན་ཏུ་རྟོག་པའི་དངོས་པོ་ལ། ཀུན་ཏུ་རྨོངས་པར་མི་འགྱུར་རོ། །རྨོངས་པ་མེད་པའི་

ཡིད་རྟག་ཏུ་སྐྱེ་བར་མི་བྱེད་དོ། །སྲུང་བ་མེད་པས་ཉེས་པར་མི་འགྱུར་རོ། །གདུག་པ་མེད་པས་རྟག་ཏུ་སྡིག་པའི་ལས་སུ་མི་འགྱུར་རོ། །ལས་སུ་གྱུར་པའི་དངོས་པོ་ཉེ་བར་མི་ལེན་ནོ། །ཉེ་བར་ལེན་པ་མེད་པ་དང་མངོན་པར་འདུ་བྱེད་པ་མེད་དོ། །དངོས་པོ་དང་དངོས་པོ་མེད་པ་གདགས་པ་མེད་དོ། །མ་སྐྱེས་པའི་ཕུང་པོ་ལ་ཡིད་རྣམས་སྡུག་བསྔལ་རྣམས་སུ་མི་འགྱུར་རོ། །དེ་བཞིན་དུ་འདིར་རྣམ་པ་ལྔ་པོ་འདིའི་རྒྱུའི་ཟས་བྱིན་པ་ལས་འདིར་འབྲས་བུ་རྣམ་པ་བདུན་ཐོབ་ཀྱི་གཞན་མེད་པ་ལས་མི་འབྱུང་ངོ་། །དེ་ཡང་ཐར་པ་ཞེས་བརྗོད་པར་བྱའོ། །དེ་བཞིན་དུ་དད་པ་དང་། རྟག་པ་དང་། ཆད་པ་དང་། འཕོ་བ་ལ་སོགས་པ་རྣམས་རྟག་ཏུ་ལྟ་བ་ངན་པ་དང་གྱ་ནོམ་པ་རྣམས་མི་འབྱུང་ངོ་། །བཅོམ་ལྡན་འདས་ཀྱིས་ཡང་འདིར་ཚིགས་སུ་བཅད་པ། རྐྱེན་ལས་འབྱུང་བ་མ་མཐོང་ཞིང་། །དོན་ཉིད་ཀྱིས་ནི་ཚོར་བ་མེད། །སྐྱེ་བ་དང་ནི་འཇིག་པ་ཡང་། །གང་གིས་འབྱུང་བར་རྣམ་པར་བརྟགས། །འདི་ལ་བསལ་བྱ་ཅི་ཡང་མེད། །ཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །རྟེན་ཅིང་འབྲེལ་པར་འབྱུང་བའི་ལེའུ་སྟེ་བཅུ་དྲུག་པའོ།། །། ཁ་སྦྱོར་གྱི་ཚུལ་གྱིས་ཀྱང་གནས་པ་ལ་འཛམྦུའི་གླིང་པའི་འཇིག་རྟེན་གྱི་འཛག་པའི་བདེ་བའོ། །དེ་རྣམས་ཚེ་བརྒྱ་པ་ལོ་བརྒྱའི་ཚེ་རྣམས་སོ། །བཅོམ་ལྡན་འདས་བུད་མེད་མེད་པ་ལས་ཅི་ལྟར་ཁུ་བ་རེངས་པར་འགྱུར། ཁུ་བ་རེངས་པ་དང་བྲལ་བས་ཚེ་རིང་པོ་རྗེས་སུ་འགྲོ་བ་མེད་དོ། །དེའི་ཕྱིར་འོག་དང་སྟེང་དུ་རླུང་གི་རྒྱུ་བ་རྗེས་སུ་བཅིང་བར་བྱེད་པ་ལས། སྲོག་བརྟན་པར་བྱས་པ་ལ་ལུས་ལ་རྒས་པ་དང་འཆི་བ་མི་འབྱུང་ངོ་། །དང་པོར་ལུས་དག་པར་གྱུར་ནས་ཆོས་ཀྱི་ཕྱག་རྒྱ་རབ་ཏུ་བསྒྲུབ་པར་བྱའོ། །ཕྱིའི་དགའ་བ་གང་དང་འདྲ་བ་དེ་དང་འདྲ་བ་བསྒོམ་པར་བྱའོ། །དེ་བཞིན་དུ་སླར་ཡང་རྣལ་འབྱོར་པས་ལུས་ཀྱི་ཕྱག་རྒྱའི་དགའ་བ་རྩོམ་པ་ལ་རྐང་པ་གཡོན་པས་ཚངས་པའི་སྐུད་པ་ཀུན་ཏུ་བཙིར་ནས་ཁ་སྟེང་དུ་བྱས་ནས་ཧཱ་ཡིག་རྣམ་པར་བསམ་པར་བྱའོ། །སླར་ཡང་སཱིཏ་ཡིག་བྱས་ནས་ཧཱུྃ་ཡིག་སྙིང་གར་གནས་པའོ། །ཨཱཿཡིག་

ཨཿཡིག་སླར་ཡང་བསྒོམ་པར་བྱའོ། །འདབ་མ་བརྒྱད་པ་གེ་སར་དང་བཅས་པ་དེའི་དབུས་སུ་ཧྲཱིཿཡིག་འབར་བ་དེ་ལ་འོད་ཟེར་དང་བཅས་པའོ། །དེ་ལས་ངེས་པར་བྱུང་བའི་རི་མོ་དཀར་པོ་ངེས་པར་འབྱུང་བ་སླར་ཡང་འོངས་ཏེ་པདྨ་འདབ་མ་དྲུག་ཅུ་རྩ་བཞི་པའི་དབུས་སུ་སོན་པར་བསམ་པར་བྱའོ། །སླར་ཡང་ཨ་ཡིག་བསམ་པར་བྱ་སྟེ། རྣལ་འབྱོར་པས་སྲོག་གི་རླུང་སླར་ཡང་བཅིང་བར་བྱའོ། །དེའི་ཕྱོགས་སུ་ལྷ་མོར་གསལ་བའི་ཚངས་པའི་མདུད་པ་ངེས་པར་བྱུང་ནས་བྷ་ག་དང་སྙིང་གར་ཡང་ལྡན་པར་བསམ་པར་བྱའོ། །པདྨ་འདབ་མ་བརྒྱད་པ་དེ་ལ་ཕྱོགས་སུ་དམར་པོར་བསམ་པར་བྱའོ། །མེའི་ཟུར་དུ་མེ་དང་དེ་བཞིན་དུ་སླར་ཡང་རླུང་དུའོ། །དབང་ལྡན་དུ་སྔོན་པོ་ཡང་ངོ་། །དེ་བཞིན་དུ་སྲིན་པོའི་ཟུར་དུའོ། །དེའི་དབུས་སུ་སོན་པའི་ཧཱུྃ་ཡིག་ཁ་དོག་ནག་པོ་འོད་ཟེར་དམར་པོ་ཅན་ནོ། །དེ་ལས་ངེས་པར་བྱུང་བའི་རི་མོ་སྤྱི་བོར་སོན་པ་རྣམ་པར་བསམ་པར་བྱའོ། །འོག་དང་སྟེང་དུ་ཧཱུྃ་ཡིག་ཁ་དོག་ནག་པོ་འོད་ཟེར་དང་བཅས་པ་དེར་སོན་པ་བསམ་པར་བྱའོ། །རི་མོ་འབར་བར་བྱེད་པ་ནི་ཡང་ནས་ཡང་དུ་དེ་བཞིན་ནོ། །དེའི་ཚེ་ཁྱོགས་བྱ་བའི་སྒོམ་པ་བླ་མའི་མན་ངག་ལས་སོ། །དེའི་ཚེ་གཏུམ་མོ་འབར་བས་དེ་བཞིན་གཤེགས་པ་ཐམས་ཅད་བསྲེགས་ཏེ། རི་བོང་ཅན་འཛག་པ་འོག་གི་བྷ་ག་ལ་དགའ་བ་ཆེན་པོའི་བདེ་བར་འགྱུར་རོ། །སླར་ཡང་གཉིས་གཉིས་སྟེང་དུ་འགྲོ་བའི་དོན་དུ་སྲོག་དང་ཐུར་སེལ་འགོག་པ་ལས་སེམས་སྟོང་པ་ལ་ངེས་པར་སྦྱར་ནས་མྱོས་པར་བྱེད་དོ། །སླར་ཡང་སེམས་མྱོས་པར་གྱུར་པ་ཇི་སྲིད་དུ་འཁྱིལ་བ་བཅིང་བའི་སྦྱོར་བ་ལས། དེའི་ཚེ་འཁོར་བ་ལས་འབད་པས་ཀུན་ནས་གཡས་སུ་འཁོར་བ་མེད་པར་བྱ་སྟེ། སླར་ཡང་ཁོ་ཌའི་སྒྲ་ཉེ་བར་གནས་སོ། །ཆོས་ཀྱི་འཁོར་ལོ་ལ་ཧཱུྃ་ཡིག་གི་ན་དས་སླར་ཡང་གནས་སུ་རབ་ཏུ་བཀུག་ནས་ལོངས་སྤྱོད་རྫོགས་པའི་འཁོར་ལོ་ལ་རྩ་གཉིས་རབ་ཏུ་གཡོ་བར་བྱས་ནས། སླར་ཡང་བརྟན་པར་བཅིང་བར་བྱའོ། །གཡོན་པ་གཉིས་པོ་དེ་ལ་ཞུ་བར་གྱུར་པར་དེའི་ཚེ་འོང་བར་འགྱུར་རོ། །དེ་ལ་ཡང་དག་པར་སྦྱངས་པར་འགྱུར་རོ། །སླར་ཡང་ཡེ་ཤེས་ཀྱི་འཁོར་ལོ་ལ་སྲུབ་པར་བྱེད་པ་དང་། འོ་བྱེད་པ་ནི་བླ་མའི་མན་ངག་ལས་སོ། །སླར་ཡང་འཁོར་ལོ་གསུམ་པོ་མྱོས་པར་བྱེད་པའི་

སྦྱོར་བས་སྦྱང་བར་བྱའོ། །སྟེང་དུ་སོང་བ་དེ་ལ་བདེ་བ་ཆེན་པོ་བརྟན་པར་འགྱུར་ཏེ། འདི་རྣམས་ལམ་གྱི་མཆོག་སྟེ་ཕུལ་དུ་བྱུང་བའི་ལྷ་རྣམས་ཀྱི་སྤྱོད་ཡུལ་མ་ཡིན་ནོ། །གང་ཞིག་ཤེས་པ་བསོད་ནམས་དང་ལྡན་པ་དང་། འཇིག་རྟེན་གསུམ་དང་བཅས་པས་མཆོད་པར་འགྱུར་རོ། །ལོ་གཅིག་ཏུ་གོམས་པས་ཆེས་ཕྲ་བའི་ལུས་སུ་འགྱུར་རོ། །སྒྲ་ཆེན་པོའི་རང་བཞིན་རབ་ཏུ་སྨྲའོ། །དེ་བཞིན་དུ་སེམས་ཕྲ་བའི་རང་བཞིན་དང་འདོད་པའི་དོན་ལ་ཀུན་ཏུ་རྒྱུ་སྟེ། གདུལ་བྱའི་ཆེད་དུ་རྒྱ་མཚོ་དང་ནམ་མཁའ་ལ་ཡང་འགྲོའོ། །གང་འདོད་པ་དེ་བྱེད་དོ། །བློ་བཟང་རྩེ་བར་བྱེད་ཅིང་དགའ་བར་བྱེད་དོ་ཞེས་གཤིན་རྗེའི་གཤེད་དམར་པོའི་རྒྱུད་དུ་གོམས་པའི་ལེའུ་སྟེ་བཅུ་བདུན་པའོ།། །།བཅོམ་ལྡན་འདས་མས་གསོལ་པ། བཅོམ་ལྡན་འདས་ཀྱེ་ལྟད་མོ་ལ་སོགས་པ་མངའ་བདག་གསུང་དུ་གསོལ། སྦྱོར་བ་སྣ་ཚོགས་མ་ལུས་ཉིད། །དེ་བཞིན་དུས་ཀྱི་མཚན་ཉིད་དང་། །རང་གཟུགས་ལུས་ཀྱི་འཁྲུལ་འཁོར་ནི། །ད་ལྟ་བཀའ་དྲིན་མཛད་དུ་གསོལ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ལེགས་སོ་ལེགས་པར་བྱས། །ཁྱོད་ཀྱིས་གང་གཞན་བྱས་ཏེ་བཤད། །ཨོཾ་ཛྭཱ་ལ་ཀ་རཱ་ལ་པ་ད་ནེ་སརྦཱ་ས་ཏྭཧཱ་ལ་ཧཱ་ལ་བཛྲེ་སུ་བཛྲེ་སྥཱ་ར་སྥཱ་ར་སྥཱ་ཡ་སྥཱ་ཡ་སརྦ་མེ་གྷ་བཱ་ཏ། བྲྀཥྚི་སྟམྦྷ་ཡ་སྥོ་ཊ་ཡ་སྥོ་ཊ་ཡ་གྷཿགྷཿགྷཿ སརྦ་པཱ་ནཱི་ཡཾ་ཤོ་ཥ་ཡ་ཧཱུྃ་ཕཊ། གསང་སྔགས་འདི་དག་བཟླས་པར་བྱ་ཞིང་ཁྲོ་བོའི་ལྟ་སྟངས་ཀྱིས་ནམ་མཁའ་ལ་བལྟ་བར་བྱའོ། །རླུང་དང་སྤྲིན་ལ་སོགས་པ་འཇོམས་པར་བྱེད་དོ། །ཨོཾ་ཕཊ་ཀཱ་ར་ཕེཾ་ཧ་ཧ་ཧཱ་ཧཱུྃ་ཕཊ་ཨོཾ་ཧྲཱིཿཥྚྲི་བི་ཀྲྀ་ཏཱ་ན་ན་སརྦ་ཀྲོ་དྷཱ་ན་ཀཱི་ལ་ཡ་ཀཱི་ལ་ཡ་བཛྲ་དཎྜེ་ན་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཧྲཱིཿབརྗོད་ནས་ལྷའི་བདག་ཉིད་ཀྱི་རྡུལ་རྣམ་པ་བདུན་སྦྱིན་པར་བྱ་སྟེ་སྦྲུལ་འབྲོས་པར་བྱེད་དོ། །ཨོྃ་ཡ་མཱནྟ་ཀ་ཧྲཱིཿཥྚྲཱི་ཧཱུྃ་ཧཱུྃ་ཕཊ་ཕཊ་ཏྲཱ་ས་ཡ་ཏྲཱ་ས་ཡ་ཙཎྜ་ཙཎྜ་པྲ་ཙཎྜ་པྲ་ཙཎྜ་ཧཱུྃ་ཕཊ། ཞེས་པས་མ་ཧེ་འབྲོས་པར་བྱེད་དོ། །ཨོྃ་མ་མ་བརྡ་ནེ་མརྡ་ཡ་མརྡ་ཡ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཞེས་པ་འདིས་སྡིག་པའི་ནད་འཇོམས་སོ། །ཨོྃ་ཀྲོ་དྷ་ནེ་སཾ་ཀྲོ་དྷ་ཡ་སཾ་ཀྲོ་དྷ་ཡ་སྭཱ་ཧཱ། ཞེས་པ་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོར་སྔགས་ཀྱི་ལས་

རབ་འབྱམ་གྱི་ལེའུ་སྟེ་བཅྭ་བརྒྱད་པའོ།། །།ལྷ་མོས་གསོལ་པ། ཀྱེ་བཅོམ་ལྡན་འདས་གཏུམ་པོ་ཆེན་པོ་ཁྲོས་པ་ཞེས་བྱ་བའི་ཁྲོ་བོ་ཆེན་པོའི་དབང་ཕྱུག་དེའི་སྔགས་ཀྱི་ལས་རབ་འབྱམ་གསུང་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་མི་གཡོ་བ། འཇིགས་པའི་ཡང་འཇིགས་པར་བྱེད་པ་རྒྱན་ཐམས་ཅད་ཀྱིས་བརྒྱན་པའི་དཔའ་བོ་རལ་གྲི་དང་སྡིགས་མཛུབ་འཆང་བ་གཏུམ་པོ་ཁྲོས་བ་ཆེན་པོའི་ང་རྒྱལ་དུ་བྱས་ནས་སྔགས་བཟླས་པར་བྱའོ། །ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཞེས་པའི་གསང་སྔགས་ཆེན་པོ་གང་གི་དཔུང་པར་སོན་ཅིང་གནས་པ་དེ་བདུད་ཐམས་ཅད་ལས་ངེས་པར་རྒྱལ་བར་འགྱུར་རོ། །ཨོཾ་ཀྲོ་དྷ་ནེ་སཾ་ཀྲོ་ཥ་ཎེ་བྷེ་ད་ནེ་ཧཱུྃ་ཕཊ། ཆུ་ལ་མངོན་པར་བསྔགས་ནས་སྦྱིན་པར་བྱ་སྟེ་གཟེར་སེལ་བར་འགྱུར་རོ། །ཨོྃ་སནྟྲ་ཨཱ་ས་ནེ་མོ་ཧཱ་ཡ་ཧཱུྃ་ཕཊ་ཞེས་པ་འདིས་སྤྱི་གཙུག་ཏུ་བཅིངས་ན་མི་མཐོང་ངོ་། །ཨོྃ་ཨ་ཙ་ལེ་སཉྩ་ལེ་ཆེ་གེ་མོའི་མུ་ཁཾ་ཀཱི་ལ་ཡ་ཧཱུྃ་ཕཊ། མྱོས་བྱེད་ལ་གཟུགས་བརྙན་བྱས་ནས་གྲོ་ག་ལ་བ་བླས་བྲིས་ནས་དེའི་ཁར་བཅུག་སྟེ། ཕུར་བུས་བཏབ་ལ་ལམ་བཞི་མདོར་སྦ་བར་བྱ་སྟེ། ཕྱིར་རྒོལ་བའི་ཁ་ལ་ཕུར་བུས་གདབ་བོ། །ཨོཾ་སརྦྦ་མཱ་ར་བྷཉྫ་ནེ་ཆེ་གེ་མོའི་པཱ་དཽ་ཀཱི་ལ་ཡ་ཧཱུྃ་ཕཊ། སླར་བཞིན་དུ་སྙིང་གར་བཅུག་ནས་རྐང་པ་དག་ལ་ཕུར་བུས་གདབ་པར་བྱ་སྟེ། འགྲོ་བ་དང་འོང་བ་རེངས་པར་བྱེད་དོ། །ཨོྃ་བི་ཀྲྀ་ཏཱ་ན་ནེ་སཱ་ར་བ་ལ་བྷཉྫ་ནེ་ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ་བཛྲ་པཱ་ཤེ་ན་ཆེ་གེ་མོ་སཻནྱཾ་བནྡྷ་བནྡྷ། ཨོྃ་ཧཱུྃ་ཕཊ་ཁཿཥཿཧཱ་ཧཱ་ཧཱི་ཧཱི་ཕེཾ་ཕེཾ་ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། སྔར་བཞིན་དུ་བཅུག་ནས་སྡེའི་བདག་པོའི་གོས་ལ་ཕུར་བུས་གདབ་སྟེ། གཟུགས་བརྙན་ཁ་འོག་ཏུ་བྱས་ཏེ་སྦ་བར་བྱའོ། །ཕ་རོལ་གྱི་སྡེ་འོང་བ་རེངས་པར་བྱེད་དོ། །ཨོྃ་ད་ཧ་ད་ཧ་པ་ཙ་པ་ཙ་མ་ཐ་མ་ཐ། ཛྭཱ་ལ་ཛྭཱ་ལ། ཛྭཱ་ལ་ཡ་ཛྭཱ་ལ་ཡ། གྲྀཧྞ་གྲྀཧྞ་ཛྭ་ལ་ཛྭ་ལ་ཧཱུྃ་ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། དུར་ཁྲོད་ཀྱི་གོས་ལ་གཞན་གྱིས་མི་ཐུབ་པ་སོར་མོ་བརྒྱད་ཀྱི་ཚད་ལ་ལྷ་སྦྱིན་མངོན་པར་བྲིས་ནས་སྔགས་ཀྱི་ཕྲེང་བས་བསྐོར་ཏེ་མྱོས་བྱེད་གཟུགས་བརྙན་གྱི་སྙིང་གར་བཅུག་ནས་ཤིང་ལ་གཞག་པར་བྱའོ། །དེ་ནས་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ལ་ཛྭ་རེ་ཎ་གྲྀཧྞཱ་པ་ཡ་ཧཱུྃ་

ཕཊ། ཞེས་བཟླས་ནས་དུར་ཁྲོད་ཀྱི་མེ་ལ་གདུང་བར་བྱའོ། །སེང་ལྡེང་དང་རྒྱ་ཤུག་གི་མེ་ལའོ། །དགྲ་རྣམས་ལ་རིམས་བྱེད་དོ། །ཨོྃ་ཛ་ཡ་ཛ་ཡ་པ་ར་ཛ་ཡ་ནི་རྫི་ཏཱ་ཡནྟྲ་ཧཱི་ཧཱི་སྥོ་ཊ་ཡ་སྥོ་ཊ་ཡ་ཨུཙྪ་ཊ་ཡ་ཨུཙྪ་ཊ་ཡ་ཨུཙྪ་ཊ་ཡ། ཤཱིགྷཾ་ཀརྨ་ཀུ་རུ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། དུར་ཁྲོད་ཀྱི་རས་ལ་བྲིས་ནས་སྐུད་པ་སྔོན་པོས་དཀྲིས་ནས་དཔུང་པའམ་མགུལ་ལམ། མགོ་བོའམ། རྐེད་པར་འཆང་བར་བྱེད་ན་གཞན་གྱི་སྔགས་རབ་ཏུ་མི་འབྱུང་ངོ་། །ཨོྃ་ཙཎྜ་མ་ཧཱ་སེ་ན་གྲ་ས་གྲ་ས་ཁ་ཁ་ཁཱ་ཧི་ཁཱ་ཧི། ཤོ་ཥ་ཡ་ཤོ་ཥ་ཡ། མ་ར་མ་ར་མཱ་ར་ཡ་མཱ་ར་ཡ་ཆེ་གེ་མོ་ཨོཾ་ཕཊ། དུར་ཁྲོད་ཀྱི་རས་ལ་བྲིས་ནས། སྔར་བཞིན་དུ་གཟུགས་བརྙན་དུ་བཅུག་སྟེ་སོར་མོའི་ཚད་ཀྱི་རུས་པའི་ཕུར་པས་སམ། ལྕགས་ཀྱི་ཕུར་པས་ཕུར་བུས་བཏབ་ནས་དུར་ཁྲོད་དུ་ཁ་འོག་ཏུ་བྱས་ནས་སྦས་ན་ཉི་མ་བདུན་གྱིས་འཆི་བར་བྱེད་དོ། །ཨོྃ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཨུཙྪ་ཊ་ཡ་ཧཱུྃ་ཕཊ། ནིམ་པའི་ཤིང་བྱ་ཁྭ་ཏའི་ཚང་ན་གནས་པ་བླངས་ཏེ། དུར་ཁྲོད་ཀྱི་མེས་བསྲེག་པར་བྱའོ། །དེའི་ཐལ་བ་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ། ཁྱིམ་དང་གོས་ལ་གཏོར་ཏེ་བཞག་གོ །རྔ་མོ་ལ་ཞོན་པ་གཡོན་པར་བྱེད་པའི་ཞགས་པས་བཅིངས་ནས་ལྷོའི་ཕྱོགས་སུ་དྲངས་པར་ཡིད་ཀྱིས་བསམ་པར་བྱ་སྟེ། སྐྲོད་པར་བྱེད་དོ། །ཨོྃ་དྭེ་ཥེ་དྭེ་ཥེ་བཛྲེ་ཆེ་གེ་མོ་ཡིས་བི་དྭེ་ཥ་ཡ་ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། འཐབ་བཞིན་པའི་གླང་པོ་དག་གི་རྡུལ་བཟུང་ནས་བསྒྲུབ་བྱའི་གཟུགས་བརྙན་བྱས་ནས་གཉིས་པོ་ལ་བསྣུན་པར་བྱའོ། །ཕན་ཚུན་སྡང་བར་བྱེད་དོ། །ཨོྃ་ཙཎྜ་མ་ཧ་རོ་ཥ་ཎ་ཧྲིཿཧྲིཿཧྲིཿཧྲོཾ་གོ་ར་རཱུ་པེ་ཎ་ཙ་ཊ་ཙ་ཊ་པྲ་ཙ་ཊ་པྲ་ཙ་ཊ། ཧ་ན་ཧ་ན་གྷཱ་ཏ་ཡ་གྷཱ་ཏ་ཡཱ་ཀཌྜྷྱ་ཀཌྜྷ་པྲ་སྥུ་ར་པྲ་སྥུ་ར། པྲ་སྥཱ་ར་ཡ་པྲ་སྥཱ་ར་ཡ། ཀཱི་ལ་ཡ་ཀཱི་ལ་ཡ། ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ་ཆེ་གེ་མོ་ལ་ཧཱུྃ་ཕཊ། གྲོ་ག་ལ་ཏ་ལའི་སྨྱུ་གུས་རུས་སྦལ་སོར་དྲུག་པར་མཉམ་པར་བྲིས་ནས་རྐང་པ་བཞི་ལ་ཧྲིཾ་གི་ཡི་གེ་དང་། ཁའི་དབུས་སུ་[ཥྚྲཱི]ཿའི་ཡི་གེའོ་སྡང་བར་འགྱུར་རོ། །དེ་ནས་བྲིས་པའི་བསྒྲུབ་བྱ་དེའི་རྒྱབ་སྔགས་ཀྱི་ཕྲེང་བ་གཞན་གྱིས་ཀུན་ཏུ་དཀྲིས་ཏེ་མཆོད་ན། དེ་ནས་བརྩམས་ཏེ་འདོད་པ་ཡོངས་སུ་ཉམས་ཏེ་རུས་སྦལ་བཞིན་དུ་མང་པོས་ཡོག་པར་བྱེད་དོ། །སྲད་བུ་དམར་པོས་ཀུན་ཏུ་དཀྲིས་ནས་རྐང་

པ་རབ་ཏུ་བསྡུས་ནས་མི་འདེགས་པར་བྱས་ལ། རྐང་པ་གཡོན་པས་གདེག་པར་བྱའོ། །ཆེ་གེ་མོ་མེ་བ་ས་མཱན་ཡ་ལན་བདུན་གྱིས་དགྲའི་ཁ་རེངས་པར་བྱེད་དོ། །ཨོཾ་ཙི་ལི་ཙི་ལི། མི་ལི་མི་ལི་ན་ལི་ཏེ་ཧུྃ་ཕཊ། མིག་འཛུམས་པ་ཉམས་པར་བྱེད་དོ། །ཨོྃ་ཙྪཱིཾྪཱྪཱ་ཙྪཱིཾ་ཙྪཱིཾ། ཤོ་ཥ་ཡ་ཤོ་ཥ་ཡ་དྷ་ར་དྷ་ར། བནྡྷ་བནྡྷ། ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། རོའི་རུས་པའི་ཕུར་བ་སོར་བདུན་པའི་ཚད་ལ་བརྒྱ་རྩ་བརྒྱད་དུ་མངོན་པར་བསྔགས་ནས་བ་ལང་གནས་སུ་སྦས་ན་འོ་མ་མི་འཛག་གོ །ཨོྃ་བ་ལི་པཏྟྲཾ་བ་ཏ་ཡ་སུ་ར་པ་རི་མཱ་ཛྙཱ་པ་ཡ་ཏི་ཛྭཱ་ལ་ཡ་ཛྭཱ་ལ་ཡ། ཨོཾ་ཙཎྜ་མ་ཧ་རོ་ཥ་ཎ་ཧཱུྃ་ཕཊ། གྲོག་མཁར་གྱི་སའི་གོང་བུ་ལ་བརྒྱ་རྩ་བརྒྱད་དུ་མངོན་པར་བསྔགས་ཏེ། ཚོང་བའི་ཁྱིམ་དུ་སྦ་བར་བྱ་སྟེ་ཟོང་མི་བྲིན་ནོ། །ཨོྃ་ཧྲིཾ་ཧྲིཾ་ཧྲིཾ་པྲཾ་ཡ་མ་མ་ཐ་ནི་ཨཱ་ཀཌྜྷྱ་ཨཱ་ཀཌྜྷྱ་ཀྵོ་བྷ་ཡ་ཀྵོ་བྷ་ཡ། སརྦཱ་ཀཱ་མ་པྲ་སཱ་དྷ་ནེ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གྲོ་གའི་འདབ་ལ་གུར་གུམ་དང་ཡང་དག་པར་ལྡན་པས་ལྷ་ཕྱག་གཉིས་པ་ལག་ན་ཞགས་པ་དང་ལྕགས་ཀྱུ་ཅན་འདོད་པ་དྲག་ཅིང་འཇིགས་པར་བྱེད་པ་བྲིས་ལ། གླང་པོ་ཆེའི་ཆང་དང་ཟླ་མཚན་དང་མེ་ཏོག་གི་སྔགས་ཀྱིས་ཡི་གེ་རྣམས་སྤེལ་བར་བྱའོ། །ཨོྃ་སྤྱི་བོར་རོ་ཧཱུྃ་སྙིང་གར་རོ་ཧྲིཾ་ལྟེ་བར་རོ། །ཏཾ་མིག་ཏུའོ། །དེ་ལ་སྔགས་ཀྱི་ཕྲེང་བས་བསྐོར་ནས་ཁྲག་གིས་ཀུན་ཏུ་བཀང་ཞིང་། ཕྱེ་མར་བྱས་ཏེ་སྐྱེས་པ་དང་བུད་མེད་ཀྱི་ཐོད་པར་བཅུག་ནས། མར་དང་སྦྲང་རྩིས་བཀང་སྟེ་མྱོས་བྱེད་ཀྱིས་དང་སྲད་བུ་དམར་པོས་དཀྲིས་ནས་མགོ་བོའི་གནས་སུ་སྦ་བར་བྱའོ། །རྐང་པ་གཡོན་པས་མནན་ནས་བཟླས་པར་བྱ་སྟེ། སྟོང་ཕྲག་ཉི་ཤུ་རྩ་ལྔས་གྲོང་འཁྲུག་པར་འགྱུར་རོ། །ཨོྃ་ཨཱ་ཀཌྜྷྱ་ཨཱ་ཀཌྜྷྱ་མོ་ཧ་ཡ་མོ་ཧ་ཡ་ཆེ་གེ་མོ་མེ་བ་བ་ཤཱཾ་བྷ་བ་ཏུ་སྭཱ་ཧཱ། ལྟོ་བའི་སྲིན་བུ་ཕྲ་མོའི་ཕྱེ་མ་དང་ཁུ་བ་དང་མིང་མེད་ཀྱི་ཁྲག་དག་གིས་བ་ཌི་ཀ་བྱས་ནས་མངོན་པར་བསྔགས་ཏེ། བཟའ་བ་དང་བཏུང་བ་ལ་སྦྱིན་པར་བྱའོ། །གྱེན་དུ་འཁོར་བའི་འདབ་མ་དག་དང་། བུང་བའི་གཤོག་པ་དག་དང་། རྒྱལ་པོ་གཉིས་ཀྱི་སོ་དག་དང་། ཤི་བའི་ཕྲེང་བ་རྣམ་པར་བཏགས་པའི་ཕྱེ་མ་འདིས་རྒྱལ་བའི་ལུས་ཅན་ལུས་ཅན་གྱི་རྗེས་ནས་རྗེས་ནས་རྒྱུག་གོ །

ཨོྃ་ཤྭེ་ཏེ་གྲྀ་དྷྲི་ཎཱི་ཁཱ་ཧི་བི་ཥཉྩ་རུ་བི་ཎཱི་ཁཿཁཿཨ་ཏི་མྲྀཏྟྭ་དྭཱ་རེ་ཙཱིར་ཀ་པཱ་བཱ་ས་བཏྟཱ་བེ་ཤཿཧཿཧཿསཿསཿསཿཙཎྜ་མ་ཧཱ་རོ་ཥ་ཎ་སེ་ན་ཨཱ་ཛྙཱ་པ་ཡ་ཏི་སྭཱ་ཧཱ། ཡང་ན་ཨོཾ་སཾ་ཀཱ་རི་ཎི་ཙཾ་པཾ་ཧཱཾ་ཧཾ་ཧཱུྃ་ཧཱ། དུག་ཐམས་ཅད་འཇོམས་པར་བྱེད་དོ། །ཨོྃ་ནཱ་གཱ་རི་བཱ་མ་ནེ་ཧ་ར་ཧ་ཕཊ་ཕཊ། ཨོཾ་ཨཱ་ཎེ་ཀཱ་ཎེ་ཆེ་གེ་མོ་བ་ཤཱིཾ་ཀུ་རུ་སྭཱ་ཧཱ། དྲི་བཟང་པོ་ཅན་གྱི་མེ་ཏོག་དཀར་པོ་སྦྱིན་པ་ལས་དབང་དུ་བྱེད་དོ། །ན་མོ་བི་ཏཱ་གཱ་ཡ་མཻ་ཏྲི་སིདྡྷ་ལོ་ཙ་སྭཱ་ཧཱ། ཆུ་ལ་མངོན་པར་བསྔགས་ནས་དེས་མིག་བཀྲུས་པ་ལས་རབ་རིབ་འཇོམས་པར་བྱེད་དོ། །ཨོྃ་ས་བ་ན་ཁ་ཁ་ཙུརྞ་ཁཱ་ནཱ་ཏ་ན་པྲ་བྷ་བ་ཏི། ཨཱ་དིརྱ་ར་ཐ་བེ་གེ་ན་བཱ་སུ་དེ་བ་བ་ལེན་ཙ། ག་རུ་ཌ་པཱཀྵི་ས་དེ་ན་པྷཱུ་མྱཱ་གཙྪ་བི་ཥཾ་སྭཱ་ཧཱ། སྦྲུལ་དང་སྡིག་པ་དང་། ཀརྐ་ཊ་ལ་སོགས་པའི་དུག་འཇོམས་པར་བྱེད་དོ། །ཨོྃ་ཙཱ་མུཎྜེ་ཨ་ཛི་ཏེ་ཨ་པ་རཱ་ཛི་ཏེ་ཨ་པ་རཱ་ཛི་ཏི་ཕུ་ཕུ་རཀྵ་རཀྵ་སྭཱ་ཧཱ། བོང་བ་ལ་ལན་བདུན་མངོན་པར་བསྔགས་ནས་ཕྱོགས་བཞིར་འཕང་བར་བྱའོ། །དེ་བཞིན་དུ་གཅིག་གཞག་པར་བྱའོ། །ཨོྃ་ཛམྦྷ་ནཱི་སྟམྦྷ་ནཱི་མོ་ཧ་ནཱི་སརྦ་དུཥྚ་པྲ་ཤཱ་མ་ནཱི་སྭཱ་ཧཱ། ཆོམ་རྐུན་མི་འབྱུང་ངོ་། །ཨོྃ་ན་མཿཙཎྜ་ཀྲོ་དྷཱ་ཡ་ཧུ་ལུ་ཧུ་ལུ་ཏིཥྛ་ཏིཥྛ་བནྡྷ་བནྡྷ་མོ་ཧ་ཡ་མོ་ཧ་ཡ་ཧ་ན་ཧ་ན་ཧཱུྃ་ཕཊ། མེ་ཏོག་ལ་སོགས་པ་ལ་ཡོངས་སུ་བཟླས་ཏེ། བྱིན་པ་ལ་དབང་དུ་བྱེད་དོ། །ན་མོ་རཏྣ་ཏྲ་ཡཱ་ཡ་ཨོཾ་ཊཿསུཿཔིསྨ་རེ་སྭཱ་ཧཱ། ཀེ་ཏ་ཀཱི་འདབ་མ་ལུས་ལ་བཅངས་ན་རིམས་ཐམས་ཅད་འཇོམས་པར་བྱེད་དོ། །ཞེས་པ་གཤིན་རྗེའི་གཤེད་དམར་པོའི་རྒྱུད་དུ་དཔའ་བོ་གཅིག་པའི་སྒྲུབ་ཐབས་ལ་སོགས་པ་འཁྲུལ་འཁོར་དང་། སྔགས་ཀྱི་ལེའུ་སྟེ་བཅུ་དགུ་པའོ།། །།བཅོམ་ལྡན་འདས་མས་གསོལ་བ། བཅོམ་ལྡན་འདས་ལྟད་མོ་ཉན་པར་འཚལ་ལོ། །ཤཱ་ཁོ་ཌ་ཀའི་རྩ་བ་དང་། བ་རུ་རའི་རྩ་བ་གཅིག་ཏུ་བྱས་ནས་ཁྱིམ་དུ་གཞག་པར་བྱ་སྟེ་རྩོད་པར་འགྱུར་རོ། །ད་དྷུ་རའི་མེ་ཏོག་གི་དབུས་སུ་གནས་པའི་གུཎྜ་ཀ་དྲི་བཟང་པོའི་མེ་ཏོག་གི་དབུས་སུ་བཅུག་པ་ཙམ་གྱིས་མགོ་ལ་གཟེར་འབྱུང་ངོ་། །རྩ་བ་མོས་ཉམས་པར་བྱས་པས་གྲོལ་ལོ། །ཁྱི་མོའི་མངལ་གྱི་མལ་སྟན་དེ་ཡིས་བདུགས་ཏེ་བསྐོར་ལ་རྨ་བྱའི་མཇུག་མས་གཡས་སུ་བསྐོར་བས་རི་མོ་འཕྲོག་གོ །གཡོན་དུ་བསྐོར་བ་ཡིས་ཐར་རོ། །ཁྭ་ཏའི་སྙིང་ཁྲག་གིས་ཤིང་ཨ་མྲའི་འདབ་མ་ལ་དེའི་གཟུགས་བརྙན་བྲི་བའི་ཚུལ་གྱིས་བྲིས་པའི་འཁྲུལ་

འཁོར་གང་གི་བཤང་བ་ལ་བཞག་པ་དེ་ཁྭ་ཏས་ཟ་བར་བྱེད་དོ། །བྷ་གའི་རྣམ་པའི་དོང་བྱས་ནས་བུད་མེད་ཀྱི་བཤང་བ་དང་སྡིག་པ་དང་། པཏྟྲི་ཀ་དང་ལྡན་པ་བཅུག་ནས་བྱུག་པར་བྱ་སྟེ། དེའི་ལམ་དུ་གནོད་པར་བྱེད་དོ། །ཤིང་སྣུ་ཧིའི་འོ་མས་བསྒོས་པའི་ཏིལ་གྱི་ཏིལ་མར་བསྐུས་པ་ལས་མགོ་སྐྱེས་དཀར་པོར་འགྱུར་རོ། །སྐྲ་བཞར་བ་ཡིས་ཐར་རོ། །བྱི་ལ་མོའི་ཕྲུ་མ་དང་། མི་མོའི་ཕྲུ་མ་དག་གིས་བདུགས་པ་ལས་ཟླ་བའི་རི་མོ་མི་མཐོང་བར་བྱེད་དོ། །སྦྲང་རྩིའི་བདུགས་པས་ཐར་རོ། །རྔ་མོའི་ཐོད་པ་དང་། དབྱུག་པ་དཀར་པོ་དང་། སྐུད་པ་ལ་བ་ལས་བསྐུས་ནས་ལག་པ་ལ་བསྐུས་ནས་ཉི་མར་བྱས་ན་རི་མོ་མཐོང་ངོ་། །ལག་པ་བཀྲུས་པ་ལས་ཐར་རོ། །བུད་མེད་ཀྱི་ཕྲུ་མའི་བདུགས་པ་ལས་རི་མོ་འགེབས་པར་བྱེད་དོ། །གུ་གུལ་གྱིས་བདུགས་པ་ལས་ཐར་རོ། །སྦལ་པའི་ཞུན་མར་གྱིས་མིག་སྨན་ལས་ཁྱིམ་དུ་འབྲེལ་བའི་སྦྲུལ་མཐོང་ངོ་། །མར་མེ་མནལ་བའི་མེ་ལ་མུ་ཟིའི་ཕྱེ་མ་བྱིན་པ་ལས་འབར་བར་བྱེད་དོ། །ཤིང་སྣུ་ཧིའི་རྩ་བ་དང་བུ་རམ་ཟོས་ན་གཉིད་མེད་པར་འགྱུར་རོ། །ཀཱ་མ་ཙིའི་རྩ་བ་གཙུག་ཏོར་དུ་བཅིང་བར་བྱ་སྟེ་གཉིད་མེད་པར་འགྱུར་རོ། །ཀླུ་འདུལ་བར་བྱེད་པ་དྲོ་ཎིའི་མེ་ཏོག་གི་རྩ་བ་དང་། ཡུང་བ་དང་། འབྲས་ཐུག་པོ་ཆེ་བཏགས་ནས་དྲིལ་ཕྱིས་བྱས་པ་ལས་ཆུ་ཡོངས་སུ་ཟད་པ་ལས་རྒྱལ་ལོ། །ཤིང་ཤལ་མ་ལའི་རྩ་བ་ལ་མཚལ་དང་ལྡན་པ་ཟོས་པ་ལས་མེ་ཏོག་ལྟུང་བར་བྱའོ། །ཀཱཾ་གུཥྛ་དང་། མ་དིར་ཡ་སྦྱིན་པར་བྱ་བའམ། ཡང་ཏམྦུ་ལ་ཡིས་རྡུལ་དང་ཕྲལ་བར་འགྱུར་རོ། །ཤིང་སྣུ་ཧིའི་ལོ་མ་དང་མརྐ་ཌའི་ས་བོན་དང་། གུ་ཎའི་ཕྱེ་མས་བུ་རམ་དང་ལྷན་ཅིག་ཟོས་པ་ལས་ཁྲག་ལྟུང་ངོ་། །ཚུ་ཚུན་ད་རའི་ཕྱེ་མས་རྟའི་སྣ་ལ་བསྐུས་ན་ཟས་མི་བྱེད་དོ། །ཙནྡན་གྱིས་བཀྲུས་པ་ལས་ཐར་རོ། །ཤིང་ཀེ་ཏའི་རྩ་བ་མགོ་ལ་བཅིང་བར་བྱ། ཤིང་འབྲ་གོའི་རྩ་བ་ལག་པ་ལ། ཤིང་ཏ་ལའི་རྩ་ག་ཁུ་རུམ་རྒྱལ་ལ་གདོན་པར་བྱའོ། །བྱང་ཕྱོགས་སུ་བལྟས་ཏེ་གཅེར་བུ་སྐྲ་གྲོལ་བར་གྱུར་ནས་གསུམ་པོ་རྣམས་ཅུང་ཟད་བཏགས་ནས་བཏུང་བར་བྱ་སྟེ། མཚོན་ཆས་འཇོམས་པར་མི་འགྱུར་རོ། །ཤོ་ནཱ་ཀཱའི་ས་བོན་དང་། བཱུ་ར་ཀ་པཱ་དུ་ཀ་གཉིས་པོ་ཤ་བའི་པགས་པའི་ཁུད་དུ་དེ་མཉེས་ཏེ་ལྕེའི་མཐིལ་དུ་བཞག་པ་ལཏྟ་པའི་འབྲས་

བུ་ཟོས་པ་ལས། སྲེག་པར་མི་བྱེད་དོ་ཞེས་གཤིན་རྗེའི་གཤེད་དམར་པོའི་རྒྱུད་དུ་ཐུན་མོང་གི་སྨན་གྱི་ལེའུ་སྟེ་ཉི་ཤུ་པའོ།། །།ཀྱེ་བཅོམ་ལྡན་འདས་ཅི་ལྟར་དུས་བྱེད་པ་དང་། སེམས་ཅན་བྱེད་པར་ངེས་པ་དེ་རྣམས་ཀྱི་རྒྱུ་མཚན་བཅོམ་ལྡན་འདས་ཀྱིས་བསྟན་དུ་གསོལ། རྐང་པ་དང་རྐན་ལ་ཕུག་ནས་མིག་ཏུ་ཟུག་པ་ལས་ཟླ་བ་གསུམ་གྱིས་གྲུབ་བོ། །རྣ་བར་ཕུག་པས་ཟླ་བ་བཞིས་སོ། །མཛོད་སྤུར་ཟུག་པ་ལས་ཉི་མ་གཅིག་གིས་སོ། །རྐང་པ་དང་རྐན་ལ་ཕུག་ནས་ལྟེ་བར་ཟུག་པ་ལས་ཟླ་བ་གསུམ་གྱིས་འཆིའོ། །རྐང་པ་དང་རྐན་ལ་ཕུག་ནས་སྣ་ལ་ཟུག་པ་ལས་ཟླ་བ་གསུམ་གྱིས་སོ། །བཤང་བ་རབ་ཏུ་འཛག་པའི་དུས་མཚུངས་པར་སྦྲིད་པ་བྱུང་ན་ལོ་གཅིག་གིས་སོ། །ཤིན་ཏུ་དགའ་བའི་རབ་ཏུ་གལ་ཏེ་སྦྲིད་པ་བྱུང་བ་དང་མཚུངས་པར་མཐེ་ཆུང་ཐམས་ཅད་དུ་ཟུག་པ་ལས་ཟླ་བས་སོ། །སྙིང་དང་མགྲིན་པར་ཟུག་པ་ལས་ཕྱོགས་གསུམ་གྱིས་སོ། །མཚུངས་པར་རྐན་ལ་གསུམ་ཟུག་པ་ལས་ཉི་མ་གསུམ་གྱིས་སོ། །རྐང་པའི་མཐེ་བོང་ནས་བརྩམས་ནས་ལྟེ་བའི་མཐར་ཐུག་པར་ཟུག་པ་ལས་ཟླ་བ་དྲུག་གིས་སོ། །སྣའི་རྩེ་མོར་ཟླ་བས་དེ་དེར་གྱུར་ན་མཚན་མོ་བདུན་གྱིས་འཆི་བའི་དུས་སུ་འགྱུར་རོ། །རྣ་བ་དག་གི་དྲིལ་བུའི་སྒྲ་ལས་ཟླ་བ་གསུམ་གྱིས་སོ། །རྣ་བ་གཉིས་དང་སྨིན་མའི་དབུས་དང་ཀླད་པའི་རྩེ་མོ་རྣམས་སུ་སོ་སོ་སོ་སོར་ཟུག་པ་ལས་ཉི་མ་གཅིག་གིས་སོ། །སེན་མོ་ལ་དམར་བའི་མཆོག་ཏུ་མཐོང་བ་ལས་ཟླ་བ་དྲུག་གིས་སོ། །སོ་བསྐམས་པ་ལས་ཟླ་བ་དྲུག་གིས་སོ། །བྱས་པ་ཤེས་པར་འགྱུར་བ་ཉིད། །རྡོ་རྗེ་སྐྱེས་བ་དེ་བདག་ལ་གསོལ། །འདམ་སྐྱེས་འདབ་མ་གསུམ་པ་ནི། །གེ་སར་སྦྲང་རྩིས་བརྒྱན་པ་མཐོང་། །ཨེ་མ་བདེ་བ་ལྡན་པའི་ཞིང་། །ཆགས་པ་སངས་རྒྱས་ཉེ་བར་མཛེས། །ཆགས་ཅན་རྣམས་ཀྱིས་བདེ་བ་ཞི། །རྟོག་པ་ཐམས་ཅད་རྣམ་པར་སྤངས། །ཡིད་ནི་འདོད་ཆགས་ཀྱིས་དཀྲུགས་པས། །བུད་མེད་གན་རྐྱལ་བསྒྱེལ་ནས་ནི། །ཕྲག་པར་རྐང་པ་ཟུང་བྱིན་ནས། །འོག་དང་སྟེང་དུ་ངེས་བརྟགས་ནས། །དེ་ཡི་པདྨ་རྒྱས་པ་ཡི། །པདྨའི་བུ་གར་འཇུག་པར་བྱེད། །པདྨའི་འདབ་མར་ཤའི་སྙིང་པོ། །ལྡན་པར་རྡོ་རྗེ་དེ་བཅུག་ནས། །ཇི་ལྟར་བདག་གི་ནུར་ནུར་བོ། །བྱེ་བ་ཉིས་སྟོང་འབུམ་

རྣམས་ཀྱིས། །དབུས་སུ་སེམས་ལ་རབ་མཆོད་བྱ། །བདག་ལ་རླུང་པང་སྙིང་པོ་ལས། །སྙིང་པོ་བླ་མེད་རྡོ་རྗེའི་རྩེར། །རཀྟ་བན་དྷུ་ཀ་དང་ལྡན། །བློ་ལྡན་དེ་དེར་བརྗོད་སྨྲ་བྱེད། །སླར་ཡང་སེམས་དཔའ་གཅིག་བསྒོམ་བྱ། །བདེ་བ་གཡོ་མེད་དམ་པའི་སེམས། །དེ་ལས་སོ་སོར་མཆོག་སྦྱིན་ནས། །དགའ་བའི་སྐད་ཅིག་ཉིས་འགྱུར་ཉིད། །ཇི་སྲིད་རབ་བརྗོད་འདི་ལྟ་བུའི། །གཟུགས་སྐུ་སྐད་ཅིག་ཙམ་བསམ་བྱ། །བུད་མེད་རི་མོ་བསྐྱེད་མའང་ཅིག །འགྲོ་བ་རྣམས་ཀྱི་ཡང་གསུམ་མོ། །བདེ་བ་སྦྱིན་པ་ཞི་བར་རིག །ཅུང་ཟད་འདིར་ནི་རྟོག་པར་བྱེད། །ཁ་དྲག་ཆེད་དུ་སྡིག་ལས་གནས། །དེ་དེས་གཏིང་དཔག་དཀའ་བ་ཅན། །ངུ་འབོད་དུ་ནི་རྟག་ཏུ་བརྡུངས། །རྣམ་མང་སྲེག་ཅིང་འོ་དོད་འབོད། །ལུས་ནི་བསྐལ་བ་གསུམ་དུ་གནས། །བུད་མེད་ཡོན་ཏན་བརྗོད་ཅི་དགོས། །སེམས་ཅན་ཀུན་ལ་ཡོངས་སུ་འཛིན། །སྙིང་རྗེས་ཉིན་མོར་བྱེད་པ་ལས། །བུད་མེད་སེམས་ཀྱིས་སོ་སོར་གནས། །ནུབ་པར་གྱུར་པ་ལེགས་ཤེས་ཤིང་། །ཡོངས་སུ་ཤེས་པའང་རྒྱས་པར་བྱེད། །གལ་ཏེ་དེ་ལྟའི་སློང་མོའི་གཟུགས། །གཞན་མིན་རྡོ་རྗེ་རྣལ་འབྱོར་མ། །དེ་ཡི་ནུབ་དང་མཐོང་བ་ནི། །ས་དང་ས་ལ་རིང་བ་ལས། །གང་གིས་དྲན་པར་བྱེད་ཙམ་གྱིས། །སྐད་ཅིག་དེ་ལས་བདེ་བ་མྱོང་། །ཕྱོགས་ཉིད་ཡུལ་དང་བུད་མེད་ཉིད། །ལྷ་ཡི་གཟུགས་ཀྱིས་ཡང་དག་གནས། །ཕྱག་རྒྱ་དེ་ལ་ཕན་བྱས་ནས། །ཡིད་ལྡན་དེ་ལ་གནས་པར་བྱེད། །དེ་ཕྱིར་སྐྱོན་ལས་རྣམ་པར་གྲོལ། །ཡོན་ཏན་དམ་པ་ཀུན་ལ་མཁས། །བསོད་ནམས་བསོད་ནམས་བསོད་ནམས་ཆེ། །རབ་དང་བྱེད་པ་མཐར་ཕྱིན་ཅན། །དེ་ཕྱིར་དེ་ལ་བརྟན་བལྟས་ནས། །དེ་མཆུ་སོ་ཡིས་བཙིར་བྱས་ཏེ། །རྣལ་འབྱོར་པ་ཤཱིཏ་སྒྲོགས་བྱེད་ཅིང་། །དེ་ལའང་སྟ་ཟུར་དུ་བྱ་བ། །རང་བདེ་འབྱུང་བ་བཅིང་བར་བྱ། །ས་མ་དམྦྷ་ཀ་ཉིད་ཀྱང་། །བཅིང་བ་འདས་ཚོགས་མིང་ཅན་ནོ། །བུང་བའི་དྲ་བ་བཅིངས་པ་ཡང་། །རྐང་པ་སྟེང་ནས་འཁྲུལ་འཁོར་ལོ། །དེ་བཞིན་ཁོ་ནར་རུས་སྦལ་གྱི། །བཅིངས་པའང་ཀུན་ལས་བཟང་པོ་ཉིད། །དེ་ལ་སྐྱིལ་ཀྲུང་དབུས་སུ་ནི། །ལྔ་གསུམ་ཙོག་པུའི་གདན་དུ་ནི། །བྱས་ནས་དཔུང་པ་ཟུང་ལ་ནི། །དེ་ནས་བཅོམ་ལྡན་འདས་མ་ཡིས། །བཅོམ་ལྡན་འདས་ལ་དམ་པོ་ཡིས། །འཁྱུད་ནས་པདྨས་རྡོ་རྗེ་

ནི། །རྒྱས་པར་བྱས་ནས་རབ་གསོལ་བ། །རྫོགས་པའི་རིམ་པའི་རྣལ་འབྱོར་ལ། །སྒོམ་པ་ཅི་ལྟ་བུ་ཞིག་འགྱུར། །རྣལ་འབྱོར་བ་རྣམས་ཕན་དོན་དུ། །ཞུས་པ་འབྲས་བུ་བཅས་པར་མཛོད། །བཀའ་སྩལ་པ། རྫོགས་པའི་རིམ་པའི་རྣལ་འབྱོར་གང་། །རྣལ་འབྱོར་བརྩོན་པའི་རྣལ་འབྱོར་པ། །ཉིན་མཚན་མཉམ་པའི་ཚུལ་དུ་ནི། །སེམས་གཅིག་གིས་ནི་བསྒོམ་པར་བྱ། །དགེ་ལེགས་གང་བསྒོམ་རྟག་བྱ་བ། །སྲིད་པའི་ངོ་བོས་ངེས་པར་རྒྱས། །ཤིན་ཏུ་བརྟན་ཞིང་མངོན་སྦྱོར་བས། །ཇི་བཞིན་ཁོ་ནར་གསལ་བར་འགྲོ། །དེ་ནས་མ་དང་བུ་མོའམ། །རྣལ་འབྱོར་མ་དང་ཚ་མོ་དང་། །གཞན་ཡང་ཉེ་དུ་མོ་རྣམས་ཀུན། །གཏུམ་མོ་དེ་བཞིན་བྲམ་ཟེ་མོ། །མི་མོའི་ཚོགས་ནི་འདི་དག་སྦྱིན། །ཆོ་ག་བཟང་པོས་ཀུན་བསྙེན་བྱ། །ཇི་ལྟར་དབྱེ་བ་མི་ཤེས་པ། །དབྱེ་བས་རྗེ་བཙུན་ཆོག་ཤེས་པ། །སྒྲུབ་པོ་མནར་མེད་འཁྲིད་པར་བྱེད། །འདིར་ནི་འཇིག་རྟེན་འགལ་བ་ཉིད། །འཇིག་རྟེན་ཕ་རོལ་བདེན་པ་བཅོམ། །དེ་ཕྱིར་ཀུན་ཏུ་རབ་འབད་པས། །བློ་བཟང་ལེགས་པས་ཡང་དག་བརྩམ། །མཁའ་འགྲོ་མ་སྔགས་བཞིན་སྦས་ནས། །ཇི་ལྟར་སངས་རྒྱས་ཀྱིས་གསུངས་པའི། །ཡིད་དང་རྗེས་མཐུན་ཕྱོགས་སུ་ནི། །ཉེ་བར་འཚེ་བ་ཀུན་སྤངས་ཏེ། །རང་སེམས་དགའ་བའི་འདོད་པ་མོ། །རབ་དང་དེ་དག་ཡང་དག་བླངས། །དབེན་ཞིང་དུབ་པ་མེད་བྱས་ནས། །ཇི་སྲིད་རྙེད་པའི་གོས་དང་ནི། །གཉིས་ཀྱིས་བརྟན་པར་བསྒོམ་པར་བྱ། །བློ་བཟང་ཕན་ཚུན་སྦྱོར་བ་ལས། །བུད་མེད་རང་ལ་མངོན་ཕྱོགས་བྱས། །ཞུགས་ནས་གཉིས་དག་ཕན་ཚུན་དུ། །ཆགས་པས་བརྟན་པར་བརྟག་པར་བྱ། །དེ་ནས་བལྟ་དང་ཁར་བརྗོད་པ། །རྩེ་གཅིག་ཡིད་ཀྱིས་གནས་པར་བྱ། །དེ་བཞིན་དེ་ཉིད་ལས་བརྗོད་བྱ། །བདེན་པའི་གཟི་བརྗིད་ཤིན་ཏུ་བྱེད། །དེ་ཡི་བུ་དང་ཁྱིམ་ཐབ་ཁྱོད། །བདག་ལ་སྤུན་དང་ཕ་ཞིང་པ། །ཁྱོད་ངའི་མ་དང་ཆུང་མ་སྟེ། །རྣལ་འབྱོར་མ་དང་ཚ་མོ་དང་། །སྐྱེས་བུ་བདུན་གྱི་འབངས་ང་ཡིན། །ཁྱོད་ཞལ་ཅན་གྱི་འབངས་དང་བྲན། །སྨྲ་བ་དེ་འདྲར་བརྗོད་པར་བྱ། །བདེ་བ་གཟི་བརྗིད་བྱེད་པའི་མཆོག །ཁྱོད་ངའི་ཕ་མ་ཆུང་མ་དང་། །རྣལ་འབྱོར་མ་དང་ཚ་མོ་དང་། །ང་ནི་ཁྱོད་ཀྱི་དུས་ཀུན་འབངས། །མདུང་ཐུང་རྣོན་པོ་མཆོག་ཏུ་གཞོལ། །བརྩེ་

བའི་མ་ཡིས་བདག་ལ་གཟིགས། །བསྙེན་པའི་ལྟ་བས་ངེས་རྟོགས་པས། །དེ་བདག་སྐྱེས་བུ་མཐོང་ནས་ནི། །ཡང་དང་ཡང་དུ་འོ་བྱས་ནས། །ཡི་གེ་གསུམ་ནི་སྟེར་བར་བྱེད། །རྡོ་རྗེའི་སྦྲང་རྩི་མཚུངས་པའི་ཁྲག །པདྨ་ས་འཇིགས་པར་བྱའོ་དེའི། །མཐོང་ནས་མིག་ནི་རྣམ་པར་འཁྲུལ། །གདོང་ཡང་དྲི་ཡིས་བྱུགས་བྱས་ནས། །དེ་ནས་ནུ་མར་བཙིར་བར་བྱ། །བསྟན་པར་ཀུན་ཏུ་ཁར་དེའི་ཁར། །རེག་ནས་ཁ་རུ་སྦྱིན་པར་བྱེད། །གཡོ་བར་བྱེད་ཅིང་སྨྲ་བར་བྱ། །དེ་ཡིས་འདི་འདྲར་བརྗོད་པར་བྱ། །བདག་གི་ཨ་རུནྡྷཏྟེ་ནི། །མཐོང་ཕྱིར་བཟའ་བ་རྣམ་སྣང་མཛད། །ཟླ་དྲུག་ལྟེ་བ་ཕྱིན་ཅི་ལོག །བུ་ག་ཐམས་ཅད་མཐོང་བའི་ཕྱིར། །ཧ་ཡིག་རེག་ཅིང་མཐོང་བ་ལས་ཕྱོགས་གསུམ་གྱིས་སོ། །མིང་མེད་ཀྱི་རྩ་བར་རི་མོ་ནག་པོ་མཐོང་བ་ལས་སོ། །ཡན་ལག་ཐམས་ཅད་བསིལ་བར་མཐོང་བ་ལས་ཉི་མ་བཅྭ་བརྒྱད་ནའོ། །ཁྲུས་བྱས་པ་བྱས་མ་ཐག་བསྐམས་པ་ན་ཉི་མ་བཅུ་ཡིས་སོ། །ལུས་དྲི་ངན་པ་ལས་ཟླ་བ་གཉིས་ནའོ། །གཅིན་གཡོན་དུ་འཁོར་བ་ལས་མཚན་མོ་གསུམ་གྱིས་སོ། །ལུས་ཕྲ་མོར་མཐོང་བས་ཟླ་བ་དྲུག་གིས་སོ། །སྣའི་རྩེ་མོ་མ་མཐོང་བ་ལས་ཉི་མ་གཅིག་ལའོ། །ཕྱོགས་ཀྱི་འདི་དག་ཤེས་པའི་ཕྱིར། །དེ་བཞིན་རྣལ་འབྱོར་པ་སྒོམ་དང་། །བསམ་གཏན་བརྩོན་པས་སྔགས་བཟླས་བྱ། །རྣལ་འབྱོར་པས་ནི་འབད་པས་བཀླག །བསྲུང་བ་ལྔ་སོགས་བཀླག་པ་ཡང་། །རང་ངམ་གཞན་གྱིས་བྱ་བའོ། །ཉིན་རེར་ཚོགས་ལ་ཟས་དང་ནི། །དགེ་འདུན་ཟས་དང་དེ་བཞིན་གཞན། །དམན་དང་ཞན་ལ་རྗེས་བརྩེ་བས། །སེམས་ཅན་རྣམས་ལ་རྟག་ཏུ་བྱ། །ཞེས་པ་སྣ་ཚོགས་རྒྱུད་དུ་གསུངས། །ཞེས་སོ། །གཤིན་རྗེའི་གཤེད་དམར་པོའི་རྒྱུད་དུ་ལེའུ་ཉི་ཤུ་གཅིག་པའོ།། །།ཀྱེ་བཅོམ་ལྡན་འདས། མུ་སྟེགས་བྱེད་པ་རྣམས་ཐམས་ཅད་ལ་སྙིང་བརྩེ་བ་མེད་པར་འདོད་པའི་དོན་ལྷུར་ལེན་པ་དང་། གང་ཞིག་ངག་གདུག་པ་ཐམས་ཅད་དུ་གསོད་པ་ལྷུར་ལེན་པ་དེ་རྣམས་ཀྱི་བསམ་པ་ལ་ཐུགས་བརྩེ་བར་གྱུར་པས་དེ་དག་མངའ་བདག་གིས་བདག་ལ་གསུང་དུ་གསོལ། །དང་པོར་

གསོ་སྦྱོང་སྦྱིན་པར་བྱ། །ཕྱི་ནས་བསླབ་པའི་གནས་ལྔ་སྦྱིན། །བྱེ་བྲག་སྨྲ་བ་འབད་པས་བསླབ། །མདོ་སྡེ་པ་ཡང་དེ་བཞིན་ནོ། །དགེ་བ་བཅུ་ལ་གོམས་གྱུར་ཅིང་། །བླ་མ་ལ་གུས་འདུལ་ལ་མོས། །དབུ་མའང་སློབ་ཏུ་བཅུག་ནས་ནི། །སྔགས་ནི་ཀུན་ཏུ་བརྩམ་པར་བྱ། །གསང་ལས་ཤིན་ཏུ་གསང་བའི་རྒྱུད། །མྱུར་དུ་ཕུན་སུམ་ཚོགས་པའི་རྒྱུ། །ཆོ་གའི་སྦྱོར་བ་འདིས་མྱུར་དུ། །བསླབ་པ་ཐོས་ནས་སྤྱོད་ཡུལ་བཟང། །བདུད་བཞི་རྣམས་སྤངས་རྣལ་འབྱོར་པས། །ལྷ་ཡི་སྦྱོར་བས་གནས་པར་བྱ། །སྟ་རེས་གཅོད་པ་དང་ཐོད་ལེ་ཀོར་བྱས་ནས་ཉི་མ་གཟས་ཟིན་པའི་དུས་སུ་མི་བསྐྱོད་པས་གཏོར་ཏེ། དེ་ནས་རྐང་པ་གཉིས་ཀྱིས་མནན་ནས་སྔགས་བཟླས་པར་བྱའོ། །གསང་སྔགས་འབུམ་ཕྲག་གཅིག་བཟླས་ན་ཐིག་ལེ་འཆིང་ངོ་། །གཤིན་རྗེའི་སྟོབས་སུ་འགྲོ་སྟེ་དེ་གསལ་བར་བྱེད་དོ། །བདག་གི་ལྟེ་བར་བསྒོམ་པའི་མན་ངག་གོ །གང་གང་སྐད་ཅིག་ལས་བརྩམས་ཏེ། །དེ་ཡི་ཉི་མས་བསྒྲུབ་པར་བྱ། །ཉི་མ་ལྔ་ཡི་མཐར་ཐུག་བྱ། །ལོག་པར་སྨྲ་བའི་འཇིག་རྟེན་ལས། །ལེགས་སྦས་རབ་ཏུ་གསལ་བ་ནི། །དེ་ཉིད་འདུས་པའི་རྣལ་འབྱོར་མཆོག །རྣལ་འབྱོར་མ་ཀུན་དེ་ཉིད་བསྟན། །བཟླས་བརྗོད་འབུམ་ཕྲག་གཅིག་ཏུ་བརྗོད། །བརྟུལ་པོ་ཡིས་ནི་འབུམ་ཕྲག་ལྔ། །གང་ཞིག་རྒྱུད་དུ་གསུངས་རང་གི། །རང་བཞིན་ལས་ནི་འབུམ་ཕྲག་བཞི། །དེ་ནས་ཤིན་ཏུ་ཆུང་བ་འདི། །ལྷ་མོ་དེ་ཀུན་གསལ་བར་བསྟན། །དཔལ་ལྡན་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོ་ལེའུ་ཉི་ཤུ་རྩ་གཉིས་པའོ།། །།རང་གི་རྒྱུད་འདི་མི་ཤེས་པར། །རྒྱུད་དང་རྒྱུད་དུ་ངེས་བརྗོད་པ། །གལ་ཏེ་འཚོ་བའི་བསམ་པ་ཡིས། །སྟོང་པའི་ས་ལ་དེ་འཁོར་རོ། །དཔལ་ལྡན་གཤིན་རྗེའི་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སོ།། །།སྐད་གཉིས་སྨྲ་བ་ཆེན་པོ་ཐར་པ་ལོཙྪ་བའི་བཀའ་དྲིན་གྱིས་བསྐྱངས་པ། བོད་ཀྱི་ལོ་ཙྪ་བ་ཤཱཀྱའི་དགེ་སློང་རིན་ཆེན་གྲུབ་ཀྱིས། ཆོས་ཀྱི་རྗེ་ཁྲོ་ཕུ་ལོཙྪ་བའི་གདན་ས་གནས་གསར་དགོན་པར་བསྒྱུར་ཅིང་ཞུས་ཏེ་གཏན་ལ་ཕབ་པ།། །།རྒྱུད་འདི་འགྱུར་ལས་འབད་པའི་བསོད་ནམས་ཀྱིས། །ནག་པོའི་རྩ་ལག་མ་ལུས་ཀུན་བཅོམ་སྟེ། །བསྟན་པའི་བྱ་བ་ཡིད་བཞིན་འགྲུབ་པ་དང་། །མཐར་ཐུག་འཇམ་པའི་རྡོ་རྗེ་ཉིད་གྱུར་ཅིག།། །།

དཔལ་བཅོམ་ལྡན་འདས་རལ་པ་གཅིག་པའི་བརྟག་པའི་རྒྱུད་ཀྱི་རྒྱལ་པོ་ཆེན་པོ།

རྒྱ་གར་སྐད་དུ། ཤྲཱི་བྷ་ག་བཱ་ན་ཨེ་ཀ་ཛ་ཊ་མ་ཧཱ་ཀལྤ་ཏནྟྲ་རཱ་ཛ་ནཱ་མ། བོད་སྐད་དུ། དཔལ་བཅོམ་ལྡན་འདས་རལ་པ་གཅིག་པའི་བརྟག་པའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ། བཅོམ་ལྡན་འདས་རལ་པ་གཅིག་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྕང་ལོ་ཅན་གྱི་གནས་རྡོ་རྗེའི་རི་བོའི་ཟོམ་ན་བཞུགས་ཏེ། བྱང་ཆུབ་སེམས་དཔའ་ཕྱག་ན་རྡོ་རྗེ་དང་། འཇིགས་བྱེད་རྒྱལ་པོ་དང་། ཀླུའི་དབང་པོ་དང་། ཉི་མ་དང་ཟླ་བའི་གདོང་ཅན་དང་། ཡེ་ཤེས་བཀོད་པའི་ཕྱག་རྒྱ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བའི་དེ་ཁོ་ན་ཉིད་ཤིན་ཏུ་སྦས་པའི་མཛོད་ལ་མངའ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་ཡང་དག་པར་ངེས་པ། རིགས་དང་ཚོགས་དང་དམ་ཚིག་དང་བརྟུལ་ཞུགས་ཆེན་པོ་ཕྱག་རྒྱ་རྒྱ་མཚོ་ལྟ་བུའི་ཚུལ་ལ་གནས་པ། གསང་བ་བས་ཀྱང་ཆེས་གསང་བའི་བདེ་བ་ཆེན་པོ་ལ་རྣམ་པར་རོལ་པ། ཐབས་དང་ཤེས་རབ་བླ་ན་མེད་པའི་ཁ་སྦྱོར་ལས་ངེས་པར་འབྱུང་བའི་ཡེ་ཤེས་ཅན། འགྲོ་བ་ཐམས་ཅད་ཀྱི་ཀུན་ནས་ལྡང་བ་དང་བག་ལ་ཉལ་འཇོམས་པ་ལ་མཁས་པ་དཔག་ཏུ་མེད་པ་དང་ཐབས་ཅིག་ཏུ་བཞུགས་སོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་སྟན་ལས་ལངས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྡོ་རྗེ་དབང་ཕྱུག་རྡོ་རྗེ་ཆེ། །རྡོ་རྗེའི་རྒྱལ་པོ་ཀུན་བདག་པོ། །སངས་རྒྱས་ཐམས་ཅད་བསྐྱེད་མཛད་ཡབ། །བདེ་ཆེན་འཁོར་ལོ་བདག་ལ་གསུངས། །སྲིད་གསུམ་ཐིབས་པོ་སེལ་མཛད་ཅིང་། །མྱ་ངན་འདས་ལ་མི་གནས་པ། །ལུས་ཅན་ཀུན་སྐྱོབ་བརྩེ་ཆེན་པོ། །འདྲེན་པ་ཁྱོད་ལམ་བསྟན་དུ་གསོལ། །བློ་གྲོས་སྙིང་རྗེ་བརྟན་ལྡན་པས། །ཐབས་ནི་གང་ཞིག་མངོན་བསྒོམས་ན། །སྐུ་ལྔ་ཕྱག་རྒྱ་འགྲུབ་འགྱུར་བ། །གཙོ་བོ་དེ་ནི་འདིར་བཤད་གསོལ། །རྡོ་རྗེ་དཀྱིལ་འཁོར་ཆེར་འབྱུང་བ། །འབུམ་ཕྲག་རྒྱུད་ཆེན་ལས་གསུངས་པ། །རལ་པ་གཅིག་ཕྲེང་དཀྱིལ་འཁོར་གཙོ། །སྦས་པ་གང་ལགས་བརྩེ་བས་གསུངས། །ཞེས་

གསོལ་པ་དང་། བཅོམ་ལྡན་འདས་རྡོ་རྗེ་དཀྱིལ་འཁོར་མ་ལུས་པའི་བདག་པོ་རབ་ཏུ་དགྱེས་པས་འཛུམ་པ་མཛད་དེ། ཞལ་གྱི་སྒོ་ནས་འོད་ཟེར་ཁ་དོག་ལྔ་ཕྱུང་སྟེ། འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ་སླར་འདུས་པས་འཁོར་གྱི་དཀྱིལ་འཁོར་ཡོངས་སུ་སྦྱངས་ཏེ། བཅོམ་ལྡན་འདས་ཉིད་ལ་བསྐོར་བ་ལན་གསུམ་བྱས་ནས་སྤྱི་གཙུག་ཏུ་ནུབ་པར་གྱུར་ཏོ། །དེ་ནས་ཡང་དབུའི་གཙུག་ཏོར་གྱི་ནོར་བུ་ལས་ཟླ་བ་དང་། ཀུནྡ་ལྟ་བུའི་འོད་ཟེར་དཀར་པོ་བྱུང་སྟེ། དབུའི་སྟེང་དུ་དཀྱིལ་འཁོར་ཆེན་པོ་མངོན་པར་འབྱུང་བའི་རྣམ་པར་བཀོད་པ་མངོན་སུམ་དུ་གསལ་བར་མཛད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སྙིང་རྗེ་ཆེན་པོ་ཁྱོད་སེམས་ཅན་ཐམས་ཅད་ལ་སྨན་པ་དང་བདེ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་མངོན་པར་འབྱུང་བའི་མཛོད་རྡོ་རྗེ་སྒེག་པ་ཆེན་པོ་རལ་པ་གཅིག་པའི་གསང་བ་མཆོག་ཞུས་པ་ལེགས་སོ་ལེགས་སོ། །རྡོ་རྗེ་འཆང་འདི་ནི་ཁྱོད་ཀྱི་དུས་ཡིན་ཞིང་འདི་ནི་ཁྱོད་ཀྱི་སྣང་བར་བྱེད་པ་ཡིན་ནོ། །ང་ཡང་སྔོན་རྡོ་རྗེ་རི་བོའི་ཟོམ་འདི་ཉིད་དུ་བྱང་ཆུབ་སེམས་དཔའ་སྐར་མ་ལ་དགའ་བ་ཞེས་བྱ་བར་གྱུར་པ་ན། དེ་བཞིན་གཤེགས་པ་ཐམས་ཅད་དང་། ཡེ་ཤེས་རལ་པ་གཅིག་པའི་གསང་བ་ལྷན་ཅིག་ཏུ་རྣམ་པར་རོལ་པས་སེམས་ཅན་དཔག་ཏུ་མེད་པ་སྨིན་པར་བྱས་པ་རྗེས་སུ་དྲན་ནོ། །དེ་བས་ན་ཁྱོད་ཀྱིས་སྙིང་རྗེ་ཆེན་པོ་དང་ཐབས་ལ་མཁས་པས་གསང་སྔགས་ཀྱི་ངེས་པར་འབྱུང་བའི་རྟོག་པ་འདི་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ཀྱི་ལྟར་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཨོྃ་ཨཱཿཨོཾ་ཨོཾ་ཨཱཿཧྲཱིཾ་ཏྲཱིཾ་ཧཱུྃ། ཨོྃ་ཨཱཿསརྦ་ཏ་ཐཱ་ག་ཏོ་གརྦྦེ་བཛྲ་ཏ་ཏྭ་སརྦྦ་ཉྫཱ་ན་ཛྭཱ་ལ་ཧཱུྃ་ཕཊ་སྭཱ་ཧཱ། ཨོྃ་ཨཱཿསརྦ་ཏ་ཐཱ་ག་ཏོ་མཱྀ་ཏྲྀ་བཛྲ་ཏ་ཏྭོ་པཱ་ཡ་ས་ར་བེཾ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཛྙཱ་ན་ཧཱུྃ་ཕཊ། ཨོྃ་ཨཱཿབཛྲ་ཙཀྲ་ཨ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་རཏྣ་ཨི་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་པདྨ་ཨུ་ཧཱུྃ་ཕཊ་སྭཱ་ཧཱ། ཨོྃ་

ཨཱཿབཛྲ་བི་ཤྭ་ཨེ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་མོ་ཧཱ་ཨྃ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཝརྞྞ་ཨཱི་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་རཱ་ག་ཨཱུ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་དྭེ་ཥ་ཨཻ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་སྠཱི་ར་ཨཽ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཡོ་ག་ཨྃ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཛྭཱ་ལ་ཨཱཿཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་བ་ལ་ཨཱཿཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་རཱུ་པ་ཎི་ཀ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཤཔྡ་ཙ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་གནྡྷ་ཊ་ཧཱུྃ་ཕཊ་སྭཱ་ཧཱ། ཨོྃ་ཨཱཿར་ས་ཏ་བཛྲ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་སྥརྵ་པ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་དྷརྨ་ཡ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཀྵི་ཏྲ་ཤ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཨཱ་ལོ་ཀཱཀྵཿཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་ཨོཾ་ཀུ་ཤ་རྀ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་པཱ་ཤ་རཱྀ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་བནྡྷ་ལྀ་ཧཱུྃ་ཕཊ་སྭཱ་ཧཱ། ཨོྃ་ཨཱཿབཛྲ་གྷཎྜ་ལཱྀ་ཧཱུྃ་ཕཊ་སྭཱ་ཧཱ། ཨོྃ་སྭ་བྷཱ་བ་ཤུདྡྷཱཿསརྦཱ་དྷརྨཱཿསྭབྷཱ་བ་ཤུདྡྷོ྅ཧྃ། ཨོྃ་བཛྲ་ཤུདྡྷཱཿསརྦྦ་དྷརྨཱཿབཛྲ་ཤུདྡྷོ྅ཧྃ། ཨོྃ་ཡོག་ཤུདྡྷཱཿསརྦྦ་དྷརྨཱཿཡོ་ག་ཤུདྡྷོ྅ཧྃ། རྡོ་རྗེ་མི་བསྐྱོད་རལ་པ་གཅིག །མི་བསྐྱོད་པ་ནི་བྱང་སེམས་བཅས། །རྡོ་རྗེ་སྒྲོན་མ་རྡོ་རྗེ་དང་། །རྡོ་རྗེ་ཞགས་པ་རྣམ་པར་བསྒོམ། །གཏི་མུག་བག་ཆགས་འདོད་ཆགས་དང་། །ཞེ་སྡང་རྡོ་རྗེ་འཁོར་ལོར་གནས། །རི་རབ་ཉི་ཟླ་བ་དན་ལས། །འབྱུང་བཞིའི་རྡོ་རྗེ་དེ་བཞིན་ནོ། །ཁྱམས་བཞིར་མེ་ལོང་པི་ཝྃ་དང་། །དྲི་མཆོག་ཞལ་ཟས་ལས་བྱུང་བ། །གཟུགས་སྒྲ་དྲི་རོ་རྡོ་རྗེ་མ། །མཁས་པས་རྟག་ཏུ་མཉམ་པར་གཞག །ཕྱོགས་བྲལ་ན་བཟའ་ཆོས་འབྱུང་དང་། །མཎྜལ་མར་མེ་ལས་སྐྱེས་པ། །རེག་ཆོས་ཞིང་དང་སྣང་བ་ཡིས། །རྡོ་རྗེ་ལྷ་མོ་རྣམ་པར་བལྟ། །སྒོ་བཞིར་ལྕགས་ཀྱུ་ཞགས་པ་དང་། །ལྕགས་སྒྲོག་དྲིལ་བུ་ཡོངས་གྱུར་པས། །རྡོ་རྗེ་ལྕགས་ཀྱུ་ལ་སོགས་བསྒོམ། །རང་མཚན་ཀ་པཱ་ལས་རབ་མཛེས། །གཏུམ་དྲག་ཚང་ཚིང་འཁྲིགས་པ་དང་། །འུར་འུར་འབར་བས་ཁྱབ་པ་དང་། །ཀེང་རུས་འཇིགས་རུང་ཤར་སོགས་ཀྱིས། །ཕྱོགས་སུ་གཡོན་བསྐོར་གྱིས་ལེགས་གནས། །ཧ་ཧར་དགོད་པ་དབང་ལྡན་དུ། །བྱིན་ཟར་དཔལ་གྱི་ནགས་ཚལ་ལོ། །མུན་པ་མི་བཟད་བདེན་བྲལ་དུ། །རླུང་དུ་ཀི་ལི་ཀི་ལིར་སྒྲོགས། །མི་མཉམ་མེད་པ་ཟུར་བཞི་

ཡིན། །དྲན་དང་དབང་པོ་སྒོ་བཞི་སྟེ། །བསམ་གཏན་བཞི་ནི་རྟ་བབས་བཞི། །རྣམ་ཐར་བརྒྱད་ཕྱིར་ཀ་བ་བརྒྱད། །བྱང་ཆུབ་ཡན་ལག་བདུན་དག་ཕྱིར། །དྲ་བ་དང་ནི་དྲ་བ་ཕྱེད། །ཕྱོགས་བཞིར་ཚད་མེད་བཞི་ཡིན་ཏེ། །པདྨ་འཁོར་ལོ་ཤེས་རབ་ཐབས། །རྣམ་པར་ཤེས་བརྒྱད་ཡོངས་དག་པ། །དེ་ནི་དུར་ཁྲོད་ཆེན་པོ་བརྒྱད། །ཟླ་བ་མེ་ལོང་ཉི་མཉམ་ཉིད། །ས་བོན་མཚན་མ་ཀུན་ཏུ་རྟོག །ཡོངས་གྱུར་བྱ་བ་གྲུབ་པ་སྟེ། །ཉེར་རྫོགས་ཆོས་དབྱིངས་ཡེ་ཤེས་ཡིན། །ལྔ་ཕུང་དང་ནི་དྲི་མ་བཞིན། །ཆེན་པོ་བཞི་དང་སྤྱོད་ཡུལ་བརྒྱད། །རྣམ་བཞི་ཚོར་བ་རྣམ་དག་ལྷ། །ཡེ་ཤེས་བདག་ཉིད་འཁོར་ལོའོ། །དགོད་དང་ཕྲད་འཁྱུད་འཁྲིག་པ་དག །པཱུ་ཛཱ་ཨོ་ཨ་གོ་ར་དེ་མ། །ཀ་ཨོ་ཏྲི་ཀོ་ཀ་ལ་ཀཱ་ཧི། །པྲེ་གྲྀ་སཽ་སུ་ན་སི་མ་ཀུ། །ཧ་ཧི་ཧུ་ཧེ་ཧོ་ཧྃ། །ཨ་ཨི་ཨུ་ཨེ་ཨོ་ཨྃ། །རྣམ་པ་སྣ་ཚོགས་རྣམ་པར་སྨིན། །རྣམ་པར་འཇོམས་དང་རྣམ་མཚན་བྲལ། །དགའ་དང་མཆོག་དགའ་དགའ་བྲལ་དང་། །ལྷན་ཅིག་སྐྱེས་དགའི་མཚན་ཉིད་དོ། །དགོད་དང་ཕྲད་འཁྱུད་འཁྲིག་པ་དག །བདེ་ཆེན་དག་ཕྱིར་བུམ་པ་དང་། །གསང་བ་ཤེས་རབ་བདེ་བ་ཆེ། །དབང་བཞི་རྒྱལ་པོ་ཐོབ་པར་འགྱུར། །ཛཿཧཱུྃ་བྃ་ཧོཿ། དམིགས་པས་དུབ་དང་གཞན་གོམས་འདོད། །རྣམ་པར་མི་རྟོག་དེ་ཉིད་བསྒོམ། །རྨི་ལམ་ནམ་མཁའི་སྦྱོར་བ་ནི། །ཉིན་མཚན་རྟག་ཏུ་རྣམ་པར་གཞག །སྤྱི་བོ་སྙིང་ག་ལྟེ་བར་ནི། །ཟླ་བ་པདྨ་ཉི་སྟེང་དུ། །ཧྃ་དང་ཧཱུྃ་དང་ཨ་ཞེས་པ། །ཡི་གེ་བདེ་གསལ་མི་རྟོག་རྒྱུད། །སྙིང་པོ་འཕོ་དང་ཐིམ་དང་གནས། །འགྱུར་དང་འགུལ་དང་འཕར་བ་དང་། །མདའ་བསྣུན་བསྡུ་དང་འགྲོ་འོང་སྦྱར། །ལུས་མེད་སེམས་ནི་ཅི་བདེར་འགྲོ། །བསྟིམས་ནས་འཕྲོ་ཞིང་འབར་བར་བྱེད། །དབང་དུ་བྱེད་དང་ཁ་སྦྱར་བསྒོམ། །འདུན་པས་བསྒྲུབ་དང་ས་བོན་བསྒྱུར། །འཕེན་དྲན་བར་དོར་དོན་སྒྲུབ་འགྱུར། །ཚེ་འདི་ཡི་ནི་དེ་བཞིན་དུ། །ཉིང་མཚམས་སྦྱོར་དང་སྲིད་མཚམས་ཡང་། །རྣལ་འབྱོར་རྒྱལ་པོ་ཐབས་ལྡན་པས། །བདེ་ཆེན་ས་གསུམ་བདེ་བླག་འགྲོ། །སྲིད་ཞི་དག་དང་ངེས་པ་དང་། །རྟེན་འབྲེལ་

འབྱུང་དང་ཟློག་དང་གསད། །ཞི་རྒྱས་དབང་དང་ཞི་ལ་སོགས། །འདི་ལ་ཐེ་ཚོམ་མི་བྱའོ། །གཉིས་སྦྱོར་རྒྱུན་མི་འཆད་བ་དེ་དང་། །ཀུན་ནས་འོད་གསལ་ལྷན་ཅིག་སྐྱེས། །བུང་བས་མེ་ཏོག་རྩི་ལྟར་ནི། །རྣམ་པ་ཀུན་ཏུ་དོན་བསྒྲུབ་པའོ། །ཨོཾ་ཨ་ཀཱ་རོ་མུ་ཁྃ་སརྦྦ་དྷརྨྨ་ནཱྃ་ཨཱདྱ་ནུཏྤནྟ་ཏྭཱ་ཏ་སརྦ་ནི་སྭ་བྷཱ་བ་ཧཱུྃ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་སོགས་པ་འཁོར་དེ་དག་ཐམས་ཅད་རབ་ཏུ་ཡི་རངས་ཏེ། ཚིགས་སུ་བཅད་པ་འདི་དག་གིས་མངོན་པར་བསྟོད་ཅིང་མཆོད་པ་བསམ་གྱིས་མི་ཁྱབ་པ་ཐམས་ཅད་ཀྱིས་མཆོད་པ་ལ་བརྩོན་པར་གྱུར་ཏེ། འཇིག་རྟེན་མགོན་པོ་བཅོམ་ལྡན་ལེགས། །འགྲོ་བ་ཉོན་མོངས་བསྐྱབ་སླད་དུ། །སྟོང་པའི་ཏིང་འཛིན་སྤངས་ནས་ནི། །ཁྱོད་ཀྱིས་བྱམས་ཆེན་སྐུར་བསྟན་མཛད། །ཐུགས་རྗེ་ཆེན་པོ་བཅོམ་ལྡན་ལེགས། །སེམས་ཅན་སྡུག་བསྔལ་བསྒྲལ་སླད་དུ། །ཞི་བའི་མཐའ་ལ་མི་གནས་པར། །བརྩེ་ཆེན་རྣམ་པར་འཕྲུལ་པར་མཛད། །བདེ་ཆེན་རྒྱལ་པོ་བཅོམ་ལྡན་ལེགས། །ལུས་ཅན་བདེ་དོན་བསྒྲུབ་སླད་དུ། །ཟག་མེད་དབྱིངས་ཐུགས་མ་གཞོལ་བར། །དགྱེས་ཆེན་ཀུན་དུ་སྣང་མཛད་ལེགས། །གཙོ་བོ་རྡོ་རྗེ་རྒྱལ་པོ་ལེགས། །སྐྱེ་བོ་དུབ་བ་ངལ་བསོའི་ཕྱིར། །མཐའ་གཅིག་རྒྱུན་ཆད་མི་བཞུགས་པར། །མ་ལུས་འཚལ་བ་སྒྲུབ་པ་རྨད། །དེ་ནས་འཁོར་གྱི་ཚོགས་ཕལ་མོ་ཆེ་དེ་དག་དང་། རྡོ་རྗེའི་རིགས་ཀྱི་བྱང་ཆུབ་སེམས་དཔའ་ཆེན་པོ་དེ་དག་ཐམས་ཅད་ཀྱང་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་པའི་ངེས་པར་གྱུར་པ་ཐབས་དང་ཤེས་རབ་བསམ་གྱིས་མི་ཁྱབ་ཅིང་གཞལ་དུ་མེད་པའི་ཏིང་ངེ་འཛིན་ལ་གནས་བཞིན་དུ་ཐམས་ཅད་ཀྱི་བྱིན་གྱི་བརླབས་ཀྱིས་སེམས་ཅན་ཐམས་ཅད་ལ་ཕན་གདགས་པའི་དོན་དུ། ཆོ་འཕྲུལ་ཆེན་པོ་དུ་མ་བསྟན་ཏོ། །བཅོམ་ལྡན་འདས་ཀྱིས་ཡང་བཀའ་སྩལ་པ། གང་ལ་ལ་ཞིག་བཅོམ་ལྡན་འདས་རྡོ་རྗེ་མི་བསྐྱོད་པའི་གསང་བ་ཆེན་པོ་རྒྱུད་ཀྱི་རྒྱལ་པོ་འདི་ཉན་པ་དང་། འཛིན་པ་དང་། འཆང་བ་ལ་སོགས་པ་དེ་དག་ནི་ང་དང་རྒྱལ་བ་ཐམས་ཅད་ཀྱིས་དགོངས་པར་འགྱུར་རོ། །རྡོ་རྗེ་འབར་བ་ཁྲག་འཐུང་གི་རྒྱལ་

པོའི་དཀྱིལ་འཁོར་གྱི་ལྷ་བྱེ་བ་ཁྲག་ཁྲིག་མང་པོ་ཡང་དེ་ཡི་ཕྱི་བཞིན་དུ་འབྲང་བར་འགྱུར་རོ། །དྲན་པ་ཙམ་གྱིས་ཚེ་རབས་ཐམས་ཅད་དུ་ཡི་དམ་བྱེད་པར་འགྱུར་རོ། །མིའམ་མི་མ་ཡིན་པ་ལ་སོགས་པའི་གནོད་པ་ཐམས་ཅད་དང་། འཚེ་བ་དང་། ཡ་ང་བ་དང་། བཀྲ་མི་ཤིས་པ་ཐམས་ཅད་འབྱུང་བར་མི་འགྱུར་རོ། །གང་གི་ཁྱིམ་ན་གནས་པ་དེ་ཡང་མཆོད་རྟེན་དུ་བྱ་བར་འགྱུར་རོ། །རིག་པ་དང་དངོས་གྲུབ་ཐམས་ཅད་ཀྱི་གཏེར་ཚད་མེད་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བཅོམ་ལྡན་འདས་རལ་པ་གཅིག་པ་བརྟག་པ་རྡོ་རྗེའི་རྒྱུད་ཆེན་པོ་བླ་ན་མེད་པ་རྫོགས་སོ།། །།རྣལ་འབྱོར་གྱི་དབང་ཕྱུག་ཆེན་པོ་ཤྲཱི་ཛ་ག་ཏ་མི་ཏྲ་ཨཱ་ནནྡའི་བཀའ་དྲིན་ལ་བརྟེན་ནས། རྒྱ་གར་གྱི་པཎྜི་ཏ་ཆེན་པོ་བཛྲ་ཤྲྀ་ཁ་ལ་རུ་དྲ་དང་། བོད་ཀྱི་ལོཙྪ་བ་དགེ་སློང་བྱམས་པའི་དཔལ་གྱིས་བསྒྱུར་བའོ།།

དཔལ་ཟླ་གསང་ཐིག་ལེ་ཞེས་བྱ་བ་རྒྱུད་ཀྱི་རྒྱལ་པོ་ཆེན་པོ།

རྒྱ་གར་སྐད་དུ། ཤྲཱི་ཙནྡྲ་གུ་ཧྱ་ཏིལ་ཀ་ནཱ་མ་མ་ཧཱ་ཏནྟྲ་རཱ་ཛ། བོད་སྐད་དུ། དཔལ་ཟླ་གསང་ཐིག་ལེ་ཞེས་བྱ་བ་རྒྱུད་ཀྱི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་ཆེན་པོར་གྱུར་ཏེ། ཡང་འདུས་ནས་ཕྱག་གར་དང་བཅས་པས་ཐལ་མོ་ཁོང་སྟོང་དུ་སྦྱར་ནས། བཅོམ་ལྡན་འདས་ཀུན་ཏུ་བཟང་པོ་ཆེན་པོ་ལ་གཙུག་གིས་འདུད་པས་གསོལ་བ་བཏབ་པ། དཔའ་བོ་ཀུན་གྱི་གསང་བ་ཡི། །ཟླ་གསང་ཐིག་ལེ་དགའ་བྱེད་པ། །གཉིས་མེད་ཡེ་ཤེས་ཡང་དག་འབྱུང་། །བཅོམ་ལྡན་ཁྱེད་ཀྱིས་བཤད་དུ་གསོལ། །སེམས་ཅན་ཀུན་གྱི་མ་སྐྱེས་པ། །སྐྱེ་དང་མ་སྐྱེས་རྣམ་སྤངས་པའི། །བྱུང་དང་འབྱུང་འགྱུར་རབ་སྦྱོར་བའི། །མཆོག་ཏུ་རྟོག་པར་སྦྱོར་བའོ། །རིན་ཆེན་ཐམས་ཅད་འབྱུང་གནས་དག །དྲི་མེད་ནམ་མཁའ་དང་འདྲ་བའི། །རྒྱལ་མཚན་ཆེན་པོ་བསྒྲེང་བྱས་ཏེ། །ཉི་མ་ཆེན་པོས་དབང་བསྐུར་བའོ། །ཆོས་ཀྱིལོངས་

སྤྱོད་ཡང་དག་འབྱུང་། །པདྨ་དམར་པོ་མཆོག་གི་མདོག །འདོད་ཆགས་དེ་ཉིད་གསང་བ་ཆེ། །ཐམས་ཅད་བདེ་བྱེད་བདུད་རྩིའི་མཆོག །ཨཱ་དང་ལར་ནི་ཡང་དག་ལྡན། །ཡང་དག་མཛེས་པ་འགྱིང་བའི་འགྲོས། །སྣ་ཚོགས་ཡེ་ཤེས་སྣ་ཚོགས་ཆེ། །ཟླ་གསང་ཐིག་ལེའི་མཆོག་ཉིད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོས་དེ་བཞིན་གཤེགས་པ་ཐམས་ཅད་ཀྱིས་གསང་བའི་གསོལ་བ་བཏབ་པར་མཁྱེན་ནས། འགོག་པ་ཆེན་པོའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་ངོ་མཚར་རྨད་དུ་གྱུར་ཏེ། ཡང་འདུས་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ལ་དེ་ཁོ་ན་ཉིད་དབྱངས་ཀྱིས་བསྐུལ་ཏེ་བཞེངས་པར་མཛད་དོ། །ཨོྃ་ཧཱུྃ་ཨཱཿ། མི་སྐྱེ་ཡེ་ཤེས་བདེ་བའི་མཆོག་དང་ལྡན་པའི་རོ་ལ་མནབས་སུ་གསོལ། །ཨ་ལ་ལ་ཧོ། །སེམས་པ་བདེ་མཆོག་དེ་ཉིད་འགོག་པ་རྣམས་ལ་བསླང་བའི་ཕྱིར། །ཆགས་པ་མེད་པའི་བདེ་མཆོག་མངའ་མཛད་བཞེངས་ཤིག་མནབས། །མཆོག་ཏུ་གསང་བའི་བདེ་ལ་རོལ་ཅིང་དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་དགའ་བའི་གར་མཛོད་ཅིག །ཨ་ལ་ལ་ཧོ། །སྔོན་གྱི་ཞེན་པའི་མཐའ་དང་སྔོ་སྐམས་ཉོན་མོངས་གཟིར་བ་ལ། །རྨོངས་མེད་བདེ་མཆོག་རྒྱན་དང་ལྡན་པས་ཐབས་ཀྱིས་བསྐུལ་ཏེ་གོ་བར་མཛོད། །འགྲོ་ཀུན་མཚུངས་པར་སྤྱོད་པའི་སྒོ་མོར་བྱང་ཆུབ་ལམ་སྟོན་ཅིང་། །བདེ་མཆོག་བདུད་རྩི་ཁྱད་པར་མེད་པར་འདུས་པའི་ཚོགས་ལ་བཀའ་སྩོལ་ཅིག །ཨ་ལ་ལ་ཧོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ནམ་མཁའི་དབྱིངས་ཐམས་ཅད་དུ་ཁྱབ་པའི་བདག་ཉིད་ཆེན་པོས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཆེན་པོ་ཟླ་གསང་ཐིག་ལེ་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་ཐུགས་ཀྱི་གསང་བའི་ཐིག་ལེ་ལས་ཤིན་ཏུ་དགྱེས་པ་ཆེན་པོའི་བདེ་བ་ཞེས་བྱ་བའི་འོད་ཟེར་གྱི་ཚོགས་ཕྱུང་ནས། དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཟླ་བའི་ཐིག་ལེའི་

དབུས་སུ་རྒྱས་པར་བྱས་ཏེ། ནམ་མཁའི་དབྱིངས་ཐམས་ཅད་དུ་ཡང་སྣང་བར་བྱས། སྟེང་དང་འོག་ཏུ་ཡང་ཞུགས་ཏེ། མ་ལུས་ལུས་པ་མེད་པའི་རི་དང་། སེམས་ཅན་རྣམས་ལ་གསལ་བར་བྱས་ནས་ཤིན་ཏུ་དགྱེས་པ་ཆེན་པོའི་བདེ་བས་མཉེས་པར་བྱས་ཏེ། སླར་དེ་ཉིད་དུ་ལོག་ནས་བཅོམ་ལྡན་འདས་ཤིན་ཏུ་མཉེས་པ་ཆེན་པོའི་བདེ་བའི་བདག་པོ་སྙིང་པོ་གསང་བ་མཆོག་གི་ཟླ་བའི་ཐིག་ལེའི་དབུས་ན་བདེ་བར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་མཆོག་ཏུ་བདེ་བ་ཆེན་པོར་གྱུར་པའི་སྙིང་པོ་དེས་བསྐུལ་བ་ན། གར་མཛད་ཅིང་རང་རང་གི་ཏིང་ངེ་འཛིན་དུ་དམིགས་ནས། བཅོམ་ལྡན་འདས་ཀུན་ཏུ་བཟང་པོ་ཆེན་པོའི་ཐུགས་ཀའི་ཟླ་བའི་ཐིག་ལེའི་དབུས་སུ་མཆོག་ཏུ་གསང་བའི་ཤིན་ཏུ་དགྱེས་པ་ཆེན་པོའི་བདེ་བར་གཅིག་ཏུ་སྟུག་པོར་གྱུར་པ་བསྒྲུབས་ཏེ། རང་རང་གི་སྐུ་བུད་མེད་ཀྱི་ཚུལ་དུ་བསྐྱེད་ནས། བཅོམ་ལྡན་འདས་ཀྱི་ཐུགས་ཀ་ནས་མངོན་པར་བྱུང་བར་གྱུར་ཏོ། །དེ་ནས་ལ་ལ་ནི་སྤྱན་པདྨོ་འབར་བ་རྒྱས་པ་ལྟར་བསྒྱུར་ཞིང་བཟློག་སྟེ་སྨིན་རིས་གཡོ་བས། སངས་རྒྱས་ཚུལ་གྱིས་གར་མཛད་ཅིང་། །སངས་རྒྱས་རྣལ་འབྱོར་མ་དཀྱིལ་དུ། །རྡོ་རྗེ་རབ་དགྱེས་གདོན་མི་ཟ། །སེམས་དཔའ་ཆེ་ལ་དགྱེས་མཛད་ཅིང་། །སངས་རྒྱས་བདེ་བའི་བདེ་བ་ཡིས། །བཅོམ་ལྡན་སངས་རྒྱས་བཞུགས་པར་འགྱུར། །སྨིན་མ་བསྒྱུར་ཞིང་ཞབས་བསྒྱུར་བ། །སྤྱན་བསྒྱུར་ཤིན་ཏུ་གནོན་པ་ཡི། །སོར་མོའི་མཐའ་མ་རྣམ་བསྒྱུར་བ། །རྡོ་རྗེའི་ཚུལ་གྱིས་གར་མཛད་དེ། །རྡོ་རྗེ་ཆེ་ལ་མཉེས་མཛད་ཅིང་། །རྡོ་རྗེ་རྣལ་འབྱོར་མ་དཀྱིལ་དུ། །སྐད་ཅིག་སྐད་ཅིག་བསྐུལ་བ་ཡིས། །བཅོམ་ལྡན་རྡོ་རྗེ་གནས་པར་གྱུར། །བརྗིད་པའི་ཞབས་དང་རིན་ཆེན་དབུ། །དྲི་མེད་སྤྱི་བོས་གར་མཛད་ཅིང་། །ཞལ་གྱི་དཀྱིལ་འཁོར་རྣམ་བསྒྱུར་བས། །བདེ་བྱེད་ཆེན་པོ་མྱང་བར་མཛད། །དུར་ཁྲོད་ཡོན་ཏན་ཚོགས་དག་གི། །པདྨོའི་སྤྱན་གྱིས་གཟིགས་མཛད་ཅིང་། །བདེ་བ་བདག་པོ་ཆེན་པོ་ལ། །རིན་ཆེན་ཚུལ་གྱིས་མཛེས་པར་མཛད། །ཤིན་ཏུ་དགྱེས་གསལ་བདེ་དམ་པ། །པདྨོ་དམར་ལ་

ཕྱེ་མཛད་དེ། །འདོད་ཆགས་བུལ་དགྱེས་རྣམ་བསྒྱུར་བར། །པདྨོ་དྲ་བས་གར་མཛད་ཅིང་། །པདྨོ་རྣལ་འབྱོར་མ་དཀྱིལ་དུ། །བརྗིད་པའི་སྤྱན་གྱིས་ཀུན་གཟིགས་ཏེ། །བདེ་བ་ཆེ་ལ་མཉེས་མཛད་ཅིང་། །བཅོམ་ལྡན་པདྨོར་གནས་པར་གྱུར། །ཕྱག་གི་རྩེ་མོར་སོར་མོའི་མཐའ། །རྣམ་པར་བསྒྱུར་བས་གར་མཛད་ཅིང་། །ཕྱག་སྦྱར་ཁོང་སྟོང་པདྨོ་ཡིས། །གློག་བཞིན་དཔལ་དང་སྤྱི་གཙུག་ཏུ། །མཆོད་པའི་སྤྲིན་གྱིས་ལང་ལོང་པོས། །སྣ་ཚོགས་བདེ་བྱེད་གཙོ་ཉིད་ལ། །ལས་ཀྱི་ཚུལ་གྱིས་མཉེས་མཛད་ཅིང་། །སྣ་ཚོགས་བཅོམ་ལྡན་གནས་པར་གྱུར། །དེ་ནས་བཅོམ་ལྡན་འདས་བདེ་བ་ཆེན་པོ་དཔལ་རྡོ་རྗེ་སེམས་དཔའ་ཀུན་ཏུ་བཟང་པོ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡང་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་གསང་བ་དང་། པདྨོ་དང་ལས་ཀྱི་གསང་བ་ཆེན་པོ་ཐམས་ཅད་ཀྱིས་བཞེད་པ། བདེ་བ་ཆེན་པོ་ཞེས་བྱ་བ་འོད་ཟེར་ཆེན་པོའི་སྤྲིན་གྱི་ཚོགས་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་མཆོག་ལས་ཕྱུང་ངོ་། །དེ་ནས་དེ་བཞིན་གཤེགས་པའི་སྐུ་འདི་དག་ཐམས་ཅད་སྣང་བས་སྣང་བར་བྱས་ཏེ། ཉིད་ཀྱི་ཐུགས་ཀྱི་ཟླ་བའི་ཐིག་ལེ་ལ་སྟུག་པོ་གཅིག་ཏུ་གྱུར་ནས་བཞུགས་ཏེ། ཐུགས་ཀྱི་ཟླ་བའི་ཐིག་ལེའི་དབུས་སུ་འོད་ཟེར་དེས་དགྱེས་པ་བསྐྱེད་ཅིང་དྲངས་ནས་བཅུག་སྟེ་གཅིག་ཏུ་བྱས་ནས་ཉིད་ཀྱི་སྐུ་དང་། གསུང་དང་། ཐུགས་དགྱེས་པ་ཆེན་པོ་གདོན་མི་ཟ་བར་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་ཞེས་བྱ་བའི་དཀྱིལ་འཁོར་གྱི་རྒྱལ་པོ་ཆེན་པོ་ཤིན་ཏུ་དགྱེས་པའི་བདེ་བ་ཆེན་པོ་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་ཕྱུང་ངོ་། །དཀྱིལ་འཁོར་གྱི་ནི་ཚུལ་གྱིས་སུ། །ཆོ་ག་སྦྱོར་བས་སྤྲོ་བྱས་ཏེ། །ཐེག་དང་མཐུན་པར་དཀྱིལ་འཁོར་དོན། །སྦྱོར་བའི་གར་གྱིས་གར་བྱ་ཞིང་། །ཇི་ལྟར་ཡང་དག་བརྟག་པར་བྱ། །ཇི་ལྟར་དཀྱིལ་འཁོར་དེ་ཁོ་ན། །ཟླ་གསང་ཐིག་ལེའི་དཀྱིལ་འཁོར་ནི། །རྡོ་རྗེ་སེམས་དཔའ་

དཔའ་བོས་ཀྱང་། །བརྟག་པར་ནུས་པ་མ་ཡིན་ནོ། །དཀྱིལ་འཁོར་ཡེ་ཤེས་ཀྱིས་བརྟགས་པ། །སྙིང་པོ་ཕྱག་རྒྱ་སྔགས་རིག་གིས། །ལྷ་ཡི་སྦྱོར་བས་རྒྱས་བཏབ་པས། །ཆོ་ག་ཤེས་པས་བྲི་བར་བྱ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཐིག་བཞིས་ཡོངས་སུ་བྲིས་པ་སྟེ། །ཀ་བ་བརྒྱད་མཆོག་ཡང་དག་གནས། །ཀུན་ཏུ་ཡོངས་སུ་ཟླུམ་པ་སྟེ། །ཟླ་བ་དེ་ཡི་དབུས་བསམ་པ། །བདེ་བ་ཆེན་པོ་མི་ཕྱེད་པ། །གཙོ་བོ་དེ་སྟེང་བྲི་བར་བྱ། །དེ་ནི་ཚེག་དྲག་བཅས་པ་སྟེ། །ཡི་གེ་བཅུ་གསུམ་ལྡན་པ་ཡི། །ཡི་གེ་མཆོག་ཏུ་བདེ་བ་སྟེ། །རླུང་གི་དཀྱིལ་འཁོར་ཡང་དག་འབྱུང་། །ཤེས་རབ་ཅན་གྱིས་དེ་མདུན་དུ། །མི་ཕྱེད་ཡིད་ཕྱུང་བྲི་བྱ་སྟེ། །དྲག་པོའི་ཚེག་དང་འདྲེན་པར་བཅས། །བཞི་ཡིས་གཙུག་ཏུ་བྱས་པའོ། །དེ་ཡི་ལྷོ་ཡི་ཕྱོགས་སུ་ནི། །མི་སྨྲ་བ་ཡི་ཡི་གེའི་མཆོག །ཕྱག་རྒྱའི་ཡེ་ཤེས་མཆོག་ཐམས་ཅད། །སྒྲུབ་པར་བྱེད་པའི་ཡི་གེ་བྲི། །ཧ་དང་རང་ལྡན་ཚེག་དྲག་བཅས། །བཞི་པ་ཡི་ནི་དབུས་བྱས་པ། །སྔགས་ཀྱི་གཟུགས་ཀྱི་ཡི་གེ་ནི། །ནུབ་ཀྱི་ཕྱོགས་སུ་བྲི་བར་བྱའོ། །ཁྲོ་བོའི་ཡི་གེ་ཡེ་ཤེས་ཆེ། །ཡི་གེའི་ཕྱག་རྒྱའི་རྨད་བྱུང་བ། །བརྗིད་དུ་བཅས་པ་དགོད་པ་ཡི། །བྱང་གི་ཕྱོགས་སུ་བྲི་བར་བྱ། །སེམས་ཅན་ཐམས་ཅད་མཆོག་དག་དང་། །དགྱེས་པ་ཆེན་པོ་རབ་འགྲུབ་ཕྱིར། །ང་ཡི་དེ་ཉིད་གསུང་གིས་ནི། །དཀྱིལ་འཁོར་དེ་ཉིད་བསྟན་པ་ཡིན། །སངས་རྒྱས་བྱང་ཆུབ་བདེ་ཆེན་པོ། །གར་གྱིས་ཚུད་པས་རྫོགས་སངས་རྒྱས། །སེམས་ཅན་མཆོག་གིས་སྟོན་བྱེད་ན། །དེ་ཉིད་སངས་རྒྱས་བྱང་ཆུབ་འགྲུབ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདག་པོ་རྡོ་རྗེ་འཛིན་ཆེན་པོ་ལ་གར་མཛད་ཅིང་། རབ་ཏུ་སྤྲོས་པ་སྤྱན་གདངས་ནས། །ཞབས་དང་ཞབས་ཀྱིས་གནོན་པ་ཡིས། །སྡུད་ཅིང་འདོར་བ་འཛུགས་པར་མཛད། །གཡས་དང་གཡོན་གྱི་ཕྱག་གཉིས་ཀྱིས། །རྗིད་པའི་རྩེ་མོ་མཐའ་ལས་དགྲོལ། །ཅུང་ཟད་ཟུར་གྱིས་གདངས་པའི་སྤྱན། །མཛེས་པའི་སྤྱན་ཚུགས་རྣམ་བསྒྱུར་བས། །སྤྱན་གྱི་ཕྱག་རྒྱས་གར་མཛད་པས། །འགྲོ་

ལ་རྒྱས་བཏབ་འདུད་པར་འགྱུར། །སེམས་དཔའ་ཆེན་པོ་དཔའ་བོ་ལ། །དབྱངས་འདི་ཡིས་ནི་བསྐུལ་མཛད་ཅིང་། །ཤིན་ཏུ་དགྱེས་ཆེ་དཀྱིལ་འཁོར་དུ། །རྣལ་འབྱོར་མ་ཀུན་གནས་པར་འགྱུར། །ཤིན་ཏུ་དགྱེས་ཆེ་རྡོ་རྗེ་དག །སངས་རྒྱས་ཀུན་གྱི་བདེ་ཆེན་པོ། །དཀྱིལ་འཁོར་མཆོག་ཏུ་དགྱེས་པ་ཡི། །དེ་ཉིད་བཅོམ་ལྡན་ཉིད་ཀྱིས་ཤོད། །རྣམ་པ་ཀུན་ཏུ་སྐྱེ་བ་མེད་པའི་བདེ་བས་རོལ་ཅིང་ཆུབ་མཛད་པའི། །བདག་ཅག་གཟུགས་ཀྱི་དམ་དང་བཅས་ཏེ་རྣམ་སྤྱོད་འགྱུར་བ་མེད་པའི་ཡིད། །བདེ་མཆོག་བྱང་ཆུབ་སེམས་ནི་རྣམ་པ་ཀུན་ཏུ་སྡུག་བསྔལ་ཡོངས་བྲལ་ཏེ། །ཆེ་བའི་ཡེ་ཤེས་ལྷུན་གྲུབ་མཆོག་ལྡན་བདེ་སྤྱོད་བདེ་ལ་རོལ་པར་མཛོད། །ཨ་ལ་ལ་ཧོ། །འདི་ནི་གླུ་རུ་བླངས་པ་ཡིས། །ཤིན་ཏུ་སྲིད་པས་མྱ་ངན་འདས། །དགའ་ཆེན་དེ་བཞིན་གཤེགས་པ་རྣམས། །དཀྱིལ་འཁོར་འདི་ལ་བྱིན་གྱིས་རློབ། །དེ་ནས་བཅོམ་ལྡན་འདས་རྡོ་རྗེ་བདེ་བ་ཆེན་པོ་ཞལ་འཛུམ་པ་དང་བཅས་པས་རྒྱས་པའི་སྤྱན་ཨུཏྤ་ལ་ཁ་ཕྱེ་བ་བཞིན་སྨིན་མ་དང་སྐུ་རྣམ་པར་འགྱུར་བ། གློག་དང་ཆུ་རླབས་བཞིན་དུ་འགྱུར་བའི་རྣམ་པར་གནོན་པས་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་དེ་ཁོ་ན་ཉིད་འདི་གསུངས་སོ། །དཀྱིལ་འཁོར་དཀྱིལ་འཁོར་ཞེས་བྱ་བ། །རྡོ་རྗེ་ཡེ་ཤེས་ཐུགས་ལ་གནས། །དཀྱིལ་འཁོར་རྡོ་རྗེའི་མཆོག་ཉིད་ནི། །བདག་ཉིད་སྦྱོར་བས་བརྟགས་པ་ཡིན། །རྡོ་རྗེ་དགྱེས་པ་ཆེན་པོ་ཡི། །དཀྱིལ་འཁོར་ཟླ་བ་གང་བ་འདྲ། །འོད་ཟེར་དཀར་པོའི་ཕྲེང་བས་མཛེས། །བྱང་ཆུབ་སེམས་མཆོག་འདྲ་བ་ཡིན། །རྡོ་རྗེ་དཔའ་བོའི་དཀྱིལ་འཁོར་ནི། །མཛེས་པའི་ཟླ་བ་ཁམ་པ་ལ། །མཐིང་གའི་འབར་བ་ཀུན་རྒྱས་པ། །མེ་དང་རླུང་གིས་བུས་པ་བཞིན། །ཤིན་ཏུ་དགྱེས་པའི་མཆོག་སྒྲུབ་པ། །རྡོ་རྗེ་རིན་ཆེན་དཀྱིལ་འཁོར་ནི། །དགའ་བྱེད་དཀྱིལ་འཁོར་ཆ་བརྒྱད་ཀྱི། །འབར་དང་བཅས་པའི་ཉི་མ་བཞིན། །དཀྱིལ་འཁོར་དགྱེས་མཆོག་འབྱུང་བྱེད་པ། །པདྨོའི་དབང་པོ་པདྨ་འདྲ། །འདབ་མ་བརྒྱད་པོ་གྱེས་པ་ཡི། །གེ་སར་ཟླ་བས་མཛེས་བྱས་པའོ། །ཐམས་ཅད་ལས་ནི་གྲུབ་བྱེད་པ། །རྡོ་རྗེའི་ལས་ཀྱི་དཀྱིལ་འཁོར་ནི། །དགའ་བྱེད་དཀྱིལ་འཁོར་

གྲུ་གསུམ་སྟེ། །རབ་ཏུ་འབར་བ་མེ་དང་འདྲ། །དེ་ལ་སོགས་པ་མཐའ་ཡས་པའི། །དཀྱིལ་འཁོར་རྣམས་ནི་བརྟག་པར་བྱ། །སྐྱོང་བ་རྡོ་རྗེ་སེམས་དཔའ་ཡིས། །ཇི་ལྟར་དེ་ཉིད་སྤྲུལ་པ་ཡིན། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་བཞེངས་ནས་བརྗིད་པའི་རྡོ་རྗེ་གང་དག་གིས་གར་མཛད་ཅིང་གླུ་དང་སིལ་སྙན་གྱི་གླིང་བུ་དང་པི་ཝང་དང་། རྫ་རྔ་དང་། དུནྡུ་བྷི་དང་། བ་ན་ཝ་དང་། པ་ལི་ཀ་དང་། ཞི་བའི་ཐལ་མོ་ལ་སོགས་པ་དང་། རྣམ་པ་སྣ་ཚོགས་ཀྱིས་ཀུན་ཏུ་བརྡུང་བ་དང་། སིལ་སྙན་ལ་སོགས་པའི་རྣམ་པར་རོལ་པས་ལྷའི་རོ་དང་། རོའི་ཟས་དང་། བཟའ་བ་དང་། བཅའ་བ་དང་། བཏུང་བ་དང་། ཐེག་པ་དང་། སྟན་དང་། གོས་དང་། བལྡག་པ་དང་། བཞིབ་པ་དང་། འཇམས་ལ་སོགས་པ་རྣམ་པ་སྣ་ཚོགས་ཀྱིས་བཅོམ་ལྡན་འདས་བདེ་བ་ཆེན་པོ་དཔལ་རྡོ་རྗེ་འཛིན་པ་ལ་བསྟབས་ནས། གུས་པ་དང་བཅས་པས་པདྨོའི་སོར་མོ་ཁོང་སྟོང་དུ་མཛད་དེ་གཡོན་དུ་བཏུད་པའི་ཚུལ་གྱིས་འཛུམ་པ་དང་བཅས་པའི་སྤྱན་གདངས་ཏེ། ཡང་དེ་ཁོ་ན་ཉིད་བསྐུལ་བར་མཛད་པའི་དབྱངས་འདིས་བསྟོད་པ་མཛད་དོ། །ཤིན་ཏུ་བདེ་བའི་བྱམས་པ་ཀུན་ཏུ་གཟིགས་པའི་ཐུགས་རྗེ་སྤྱན་མངའ་བས། །བྱང་ཆུབ་ཆེན་པོ་སྙིང་པོར་འགྲོ་བ་བསྒྲལ་བས་སྐྱོ་ཡིད་མི་མངའ་སྟེ། །མཐུན་པའི་ལམ་སྟོན་ཉོན་མོངས་དྲུག་ལས་བསྒྲལ་བའི་ཕྱིར། །ནམ་མཁའི་ཚུལ་དུ་གཟུངས་ཀྱི་རང་བཞིན་བདེ་གཤེགས་ཀུན་ལ་སྟོབས། །ཨེ་མའོ། །བདེ་བ་ཀུན་ཏུ་རྒྱས་པས་ཆེ་བའི་ཡེ་ཤེས་འདྲེན་ཅིང་བསྣམས། །ས་ཡི་ཁྱད་པར་བདེ་བས་རྫོགས་པའི་སྐུ་ཉིད་སྟོང་པས་ཚོགས་པའི་རྒྱལ་པོ་བཞིན། །ཆོས་ཉིད་ཇི་བཞིན་དེ་ལ་རེག་པས་སྐུ་ཉིད་ཆེ་བ་ཀུན་སྟོན་ཅིང་། །སྙིང་པོ་བྱང་ཆུབ་བགྲོད་ཕྱིར་འགྲོ་བ་ཐམས་ཅད་སྒོ་མོ་བསམ་གྱིས་མི་ཁྱབ་བསྟན། །དཔལ་གྱི་སྙིང་པོ་གཟུངས་སུ་བསྟན་ཏེ་རིགས་ལྔའི་གཙོ་རྣམས་མཉེས་མཛད་ཅིང་། །དགྱེས་པས་དྲོངས་ལ་མནབས་ཤིང་རབ་ཏུ་དགྱེས་པས་རོལ་མོ་མཛོད། །དེ་བཞིན་གཤེགས་པའི་བདེ་བ་མནོས་ཏེ་བྱིང་བའི་གནས་ནས་བསླང་བའི་ཕྱིར། །གནོད་སྦྱིན་ཆ་ལུགས་སྐྱེ་འགོག་མེད་པའི་ཚུལ་དང་རྣམ་པར་ལྡན། །སྙིང་རྗེ་ཆེན་པོ་བཅས་ནས་བདེ་བ་

ཆེན་པོ་སྟོན་པའི་ཆོས་ཉིད་ནམ་མཁའ་བཞིན། །དགྱེས་པ་མཆོག་གི་ངང་ལ་སྤྲུལ་པའི་ལྷ་མོ་སྐྱེ་མཆེད་དང་། །རོལ་པས་འདུས་པའི་ཚོགས་ལ་བདེ་མཆོག་སྩོལ་བར་མཛོད། །ཧ་ཧ་ཧ་ཧོཿབདེ་ལ་གནས་ཤིང་བདེ་མནོབས་ཧཱུྃ། །དགྱེས་པ་མཆོག་དང་ལྡན་པའི་མི་སྐྱེ་བདེ་མཆོག་བདེ་ལ་ཆར་པ་རབ་ཏུ་དབབ་ཏུ་གསོལ། །རྣམ་པ་ཀུན་ཏུ་མཐའ་དང་བྲལ་བའི་དབྱིངས་ལ་བདེ་གཤེགས་སློབ་མ་གཟུང་དུ་གསོལ། །དཔལ་གྱི་རྒྱལ་པོ་ཚུལ་བཞིན་དེ་ལྟར་བཞུགས་པའི་གནས་སུ་མནབས་སུ་གསོལ། །ངོ་མཚར་བྱང་ཆུབ་ཆེ་བ་འདི་ཉིད་འགྲོ་བ་རྟེན་བཞིན་བདེ་ཐོབ་པ། །ཕ་རོལ་ཕྱིན་དྲུག་དངོས་ཉིད་གང་ལའང་མི་བརྟེན་པར། །མི་སྐྱེ་མྱ་ངན་འདས་པའི་གཟུངས་དང་རྟག་ཏུ་རྣམ་པར་ལྡན། །མཐའ་དང་བྲལ་བའི་བདེ་བས་ཆོས་ཀྱི་དབྱིངས་ལ་གནས་པ་ཡི། །རྨོངས་པའི་བདེ་བས་བྱིང་ཞིང་གནས་པའི་འགྲོ་ལ་སྙིང་རྗེའི་ཆུས་ཁྲུས་མཛོད། །ཧོཿ། དེ་ནས། ཤིན་ཏུ་དགྱེས་མཆོག་མི་ཆགས་པ། །འདི་ནི་གླུ་རུ་བླངས་པ་ཡིས། །ཡིད་དང་མཐུན་པའི་བདེ་ཆེན་པོ། །དངོས་གྲུབ་མྱུར་དུ་འཐོབ་པར་འགྱུར། །དེ་ནས་བཅོམ་ལྡན་འདས་ཀུན་ཏུ་བཟང་པོ་བདེ་བ་ཆེན་པོ་དཔལ་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསོལ་བའི་དབྱངས་ཀྱིས་བསྟོད་པ་ཉེ་བར་གནས་ནས་ཡང་ཆུ་སྐྱེས་ཀྱི་འདབ་མ་དྲི་མ་མེད་པ་དང་འདྲ་བའི་སྤྱན་གྱིས་ཀུན་ཏུ་གཟིགས་ཤིང་འཛུམ་པ་དང་བཅས་པས་ཞལ་རྒྱས་པར་གྱུར་ནས། ཡང་ཚད་མེད་པ་མཐའ་ཡས་པའི་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་ཚོགས་ཀྱི་འཇིག་རྟེན་གྱི་ཁམས་མང་པོ་བསྐལ་པ་རྒྱས་པའི་སྤྲིན་གྱི་རྒྱ་མཚོ་མ་ལུས་ལུས་པ་མེད་པའི་དེ་བཞིན་གཤེགས་པ་དང་། རྡོ་རྗེ་དང་། ནོར་བུ་རིན་པོ་ཆེ་དང་། པདྨ་དང་། ལས་ཀྱི་རིགས་ཐམས་ཅད་ལས་བྱུང་བའི་དེ་བཞིན་གཤེགས་པ་དང་། རྡོ་རྗེ་འཛིན་དང་། རིན་ཆེན་འཛིན་དང་། ཆོས་འཛིན་དང་། སྣ་ཚོགས་རྡོ་རྗེ་འཛིན་པ་ཆེན་པོ་ཐམས་ཅད་དང་། རྣལ་འབྱོར་གྱི་དབང་ཕྱུག་གི་ཚོགས་ཆེན་པོ་དང་། ཐུགས་ལས་བྱུང་བ་དང་། མཚོན་དང་། དགའ་བ་དང་། སྒེག་མོ་ལ་སོགས་པའི་རྣལ་འབྱོར་མའི་དབང་ཕྱུག་ཆེན་མོའི་གཡོག་གི་ཚོགས་ཚད་མེད་པ་འདྲེན་པར་བྱེད་པ་དང་།འགུགས་པར་བྱེད་པ་དང་། འཇིབ་པར་བྱེད་པ་ལ་སོགས་

པའི་རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བ་ཆེན་མོའི་ཚོགས་དང་། གྲངས་མེད་པའི་རྡོ་རྗེ་འཕྲོག་པར་བྱེད་པའི་ཚོགས་དང་། གཞན་ཡང་ཕྱི་རོལ་གྱི་རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ལས་བྱུང་བའི་རྣལ་འབྱོར་དང་། རྣལ་འབྱོར་གྱི་དབང་ཕྱུག་ཆེན་པོ་དང་། ནམ་མཁའ་ལ་འགྲོ་བའི་ཚོགས་རྣམས་ལ་རྣམ་པར་བདེ་བ་ཆེན་པོ་གྱུར་པ་དང་བཅས་པའི་ཀུན་ཏུ་གཟིགས་པའི་སྤྱན་གྱིས་གར་མཛད་པ་དང་། རྣམ་པར་འགྱུར་བ་དང་བཅས་པའི་རྣམ་པར་གནོན་པས་ཀུན་ཏུ་གནོན་པས། རྣམ་པར་འགྱུར་བ་དང་བཅས་པས་འདེགས་ཤིང་ཚེམས་ཀྱིས་འདེབས་པ་དང་། རྣམ་པར་འགྱུར་བ་དང་བཅས་པའི་ཀུན་ཏུ་འབྲེལ་པའི་ཕྱག་གིས་གར་མཛད་པ་དང་། རྣམ་པར་འགྱུར་བ་དང་བཅས་པའི་སྒེག་པས་འགྱིང་བ་དང་། སྤྱོད་པ་དང་མི་སྤྱོད་པར་བཅས་པའི་རྣམས་དང་། ཀུན་ཏུ་འདོར་བའི་རྣམ་པར་གནོན་པས་འཁོར་གྱི་ཚོགས་ཀྱི་དཀྱིལ་འཁོར་ཆེན་པོ་ལ་བྱིན་གྱིས་བརླབས་ནས་དགྱེས་པ་ཆེན་པོ་རྡོ་རྗེ་གདོན་མི་ཟ་བ་ཞེས་བྱ་བ་དཀྱིལ་འཁོར་གྱི་རྒྱལ་པོ་ཆེན་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །བདག་ཉིད་དེ་ཉིད་མཉམ་གཞག་དང་། །དེ་བཞིན་ལྷ་ཡི་དེ་ཉིད་དང་། །སྔགས་དང་ཕྱག་རྒྱ་དེ་ཉིད་དང་། །དེ་ཡི་དཀྱིལ་འཁོར་མཆོག་ཏུ་འགྱུར། །ཡན་ལག་ཐམས་ཅད་བསྒོམ་ལས་འདས། །རྟོག་དང་མི་རྟོག་རྣམ་སྤངས་པ། །འདྲེན་དང་ཚིག་ལས་ཡང་དག་འདས། །འདི་ནི་དཀྱིལ་འཁོར་མཆོག་ཅེས་བྱ། །ཆོས་དང་ཆོས་མིན་རྣམ་སྤྱོད་པ། །ཆོས་རྣམས་ཐམས་ཅད་བརྟག་པར་བྱ། །རྣམ་དག་ནམ་མཁའ་འདྲ་བ་ཡི། །དཀྱིལ་འཁོར་འདི་ནི་བསྟན་པ་ཡིན། །འདོད་ཆགས་མི་ཆགས་འདོད་ཆགས་མཉམ། །ཆུ་ཡི་པདྨ་དམར་བ་འདྲ། །རང་སེམས་འདོད་ཆགས་ཤིན་ཏུ་ཆགས། །འདི་ནི་དཀྱིལ་འཁོར་མཆོག་ཡིན་ནོ། །གཟུགས་དང་གཟུགས་མིན་དྲི་མེད་པས། །གང་ཁམས་ཀུན་ལ་འཇུག་འགྱུར་བ། །སེམས་ནི་ཆུ་དང་སྐུལ་བྱེད་པ། །དཀྱིལ་འཁོར་དཀྱིལ་འཁོར་ཞེས་བྱའོ། །དེ་ནས་དེ་བཞིན་གཤེགས་པ་རྣལ་འབྱོར་གྱི་དབང་ཕྱུག་ཆེན་པོ་གཡོག་དང་བཅས་པ་དང་། ཕོ་ཉ་དང་ཕོ་ཉ་མོ་དང་། ནམ་མཁའ་ལ་འགྲོ་བ་ཆེན་པོ་དང་། ནམ་མཁའ་ལ་འགྲོ་བ་ཆེན་མོའི་ཚོགས་ཀྱི་དཀྱིལ་འཁོར་དེ་

དག་ཐམས་ཅད་ཡང་བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་འཛིན་གཙོ་བོ་ཆེན་པོ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཀྱེ་མའོ་རབ་དགྱེས་སེམས་དཔའ་མཆོག །ཀྱེ་མའོ་རབ་དགྱེས་ཕྱོགས་བསྒྱུར་བ། །རྣལ་འབྱོར་མ་ཡི་ཚོགས་མཆོག་གི། །དཀྱིལ་འཁོར་གསང་བ་ཉིད་ཀྱིས་གསུངས། །སངས་རྒྱས་སྦྱོར་བ་སྦྱོར་ཆེ་བ། །རྡོ་རྗེ་སྦྱོར་བ་བླ་ན་མེད། །འཇིགས་གསུམ་བདེ་མཆོག་ཐོབ་འགྱུར་བས། །གསང་བའི་དཀྱིལ་འཁོར་ཉིད་ཀྱིས་གསུང་། །རིན་ཆེན་པདྨ་སྣ་ཚོགས་ཆེ། །སྣ་ཚོགས་སྦྱོར་བའི་གར་མཛད་པ། །རྣམ་གྲངས་ཐིག་ལེའི་འཇིག་རྟེན་དུ། །རྣམ་དག་དཀྱིལ་འཁོར་ཉིད་ཀྱིས་གསུང་། །དེ་ནས་བཅོམ་ལྡན་འདས་ལ་རྣལ་འབྱོར་མ་ཐམས་ཅད་གར་དང་བཅས་པའི་ཕྱག་པདྨའི་སོར་མོའི་འདབ་མ་ཀུན་ཏུ་འབྲེལ་པའི་རྡོ་རྗེའི་ཐལ་མོ་དང་། གར་རྣམ་པར་འགྱུར་བའི་བརྗིད་བག་ཏུ་བཅས་པསམཐའ་འགྲོལ་ཞིང་མ་མཆུ་ཚེམས་ཀྱིས་མནན་ནས་ཆུ་སྐྱེས་སར་པའི་འདབ་མ་བཞིན་གཟིགས་པས་བཞད་པ། གླུའི་ཕྱག་རྒྱས་དབྱངས་ལེན་པ་དང་། གཅིག་ལ་གཅིག་བསྐུལ་བ་དང་། བདག་ཉིད་ཀྱི་དཔུང་པ་ལ་འདེགས་ཤིང་གཡས་དང་གཡོན་པའི་རྣལ་པར་གནོན་པའི་ཚུལ་གྱིས། ཨོྃ་ཧཱུྃ་ཨ་ལ་ལ་ལ་ཧོ། །ཀུན་ཏུ་སྣང་ཞིང་མི་ཆགས་པར། །མི་ཆགས་པ་ཡི་བདེ་མཆོག་གིས། །བདེ་བའི་རྣལ་འབྱོར་གཟུགས་ཀྱི་རྣམས། །སྟོབས་ཤིང་བདེ་བ་སྦྱིན་མཛད་པས། །ཨ་ལ་ལ་ལ་ཧོ། །བསམ་གྱིས་མི་ཁྱབ་ནམ་མཁའི་རང་བཞིན་ཏེ། །བཞེངས་ཤིང་གཞན་ལ་སྟོབས་ལ་གྲུབ་པར་མཛོད། །ཆགས་པས་མི་གོས་དངོས་པོ་ཡི། །བདེ་བ་ཀུན་ལ་རེག་པར་མཛད་ཅིང་དགོངས་སུ་གསོལ། །དེ་ནས་ཀུན་ཏུ་བཟང་པོ་ཤིན་ཏུ་དགྱེས་པ་ཆེན་པོ་རྡོ་རྗེའི་བདག་པོ་དེ་ཁོ་ན་ཉིད་ཀྱིས་དབྱངས་ཆེན་པོའི་བསྐུལ་བས་ཐུགས་སད་པར་གྱུར་ཏེ། ཤིན་ཏུ་དགྱེས་པ་ཆེན་པོ་ཀུན་ཏུ་ལོངས་སྤྱོད་པ་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཤིན་ཏུ་དགྱེས་པ་ཆེན་པོའི་རྡོ་རྗེ་གདོན་མི་ཟ་བའི་རྣལ་འབྱོར་མའི་ཚོགས་ཀྱི་དཀྱིལ་འཁོར་ཆེན་པོ་འདིར་སྣ་ཚོགས་ཤིན་ཏུ་དགྱེས་པ་ཆེན་པོའི་རྣམ་པར་གནོན་པར་གར་མཛད། ཤིན་ཏུ་དགྱེས་པ་ཆེན་པོའི་

རྡོ་རྗེའི་དབྱངས་ཀྱིས་གླུ་ལེན། རྡོ་རྗེ་རྣམ་པར་རོལ་པ་ཆེན་པོས་རྣམ་པར་རོལ། ཤིན་ཏུ་དགྱེས་པ་ཆེན་པོའི་རྡོ་རྗེ་བཞད་པ་ཆེན་པོས་བཞད་ཅིང་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཟླ་བའི་ཐིག་ལེའི་དཀྱིལ་ནས། ཨོྃ་མ་ཧཱ་སུ་ཁ་ཧཱུཾ་ཞེས་བརྗོད་ནས། དེ་བཞིན་གཤེགས་པ་ཐམས་ཅད་ཀྱི་བདག་མོ་ཡེ་ཤེས་དབྱིངས་ཕྱུག་མ་ཕྱུང་ངོ་། །སྟེང་དུ་ཟླ་གམ་ལྡན་པ་ཡི། །གཉིས་པ་ཡི་གེ་མ་ལྟ་བུ། །མཚན་དུ་ཐིག་ལེ་ལྡན་བྱས་པ། །ཡེ་ཤེས་གསལ་བའི་རྣལ་འབྱོར་མའོ། །ཨཱ་ལི་ཀཱ་ལི་འདྲེན་བྱ་བ། །དབུས་སུ་རི་མོ་བརྟག་བྱས་ཏེ། །དེ་ཡི་མགོ་དང་མཇུག་དག་ཏུ། །ཁྲོ་བོ་གཉིས་པོ་མཆོག་བསམ་བྱ། །འདི་ནི་བཙུན་མོའི་རབ་གསལ་བ། །དཀྱིལ་འཁོར་རྡོ་རྗེ་རྣལ་འབྱོར་མའོ། །འདི་ནི་དྲན་པ་ཙམ་གྱིས་ཀྱང་། །བསོད་ནམས་ཀུན་གྱིས་བྱིན་རློབ་འགྱུར། །ཨཱ་ལི་གཉིས་དབུས་རི་མོ་བྲི། །ལྡན་པ་འདྲེན་པ་ཡང་དག་ལྡན། །དེ་སྟེང་ཟླ་གམ་ཐིག་ལེ་དག །མགོ་མཇུག་གཉིས་སུ་གཞན་ཡང་ཏྲྃ། །འདི་ནི་དོན་དམ་གསལ་བ་སྟེ། །རིན་ཆེན་རྣལ་འབྱོར་མ་དབང་སྦྱིན། །དྲན་པས་བསོད་ནམས་ཐོབ་འགྱུར་ཏེ། །སྡིག་པ་རྣམས་ཀྱང་འཇིག་པར་བྱེད། །ཨཱ་ལི་གཉིས་དང་ལྡན་བྱས་ཏེ། །ཚེག་དྲག་ཡི་གེ་གཉིས་སུ་བཤད། །འདི་ནི་རབ་དགའ་ཀུན་ཏུ་ཆགས། །ཆུ་སྲིན་མ་ཞེས་བསྟན་པ་ཡིན། །དང་པོ་སྐལ་བ་ཆེན་པོ་ཡི། །ཚེག་དྲག་པོ་དང་བཅས་པ་གཞན། །སངས་རྒྱས་ཀུན་གྱི་ཨ་ལི་འདི། །སངས་རྒྱས་བྱང་ཆུབ་རབ་སྦྱིན་བྱེད། །བདག་ཉིད་ལའམ་ཡང་ན་གཞན། །ཕྱག་རྒྱ་འདི་ཡིས་རྒྱས་བཏབ་སྟེ། །བསྒྲུབ་བྱའི་དཀྱིལ་འཁོར་གྲུབ་བྱེད་ན། །དངོས་གྲུབ་མྱུར་དུ་ཐོབ་པར་འགྱུར། །འདི་ནི་དཀྱིལ་འཁོར་རྣམས་ཀྱི་མཆོག །ཡི་གེའི་ཕྱག་རྒྱའི་མངོན་གནས་པའི། །འཛིན་པའི་བསོད་ནམས་ཅི་འདྲ་བ། །བྲིས་པ་ཡིས་ཀྱང་ཁྱད་པར་འགྱུར། །ཨེ་མའོ་བདེ་བ་ཡེ་ཤེས་ཆེ། །དེ་ཡི་ཡེ་ཤེས་ཚེ་འདི་ལ། །འདོད་བྱེད་བདེ་བ་སྟེན་བྱེད་ཅིང་། །འདི་ཡི་ཚུལ་གྱིས་ཐོབ་པར་འགྱུར། །ཁམས་གསུམ་མཆོག་གི་དཀྱིལ་འཁོར་འདིར། །འདི་ལས་རྒྱ་ཆེ་མཆོག་གཞན་མེད། །སྒྲུབ་པ་པོ་ཡི་སེམས་ཅན་ཀུན། །ཚེ་འདི་ཉིད་ལ་སངས་རྒྱས་འགྲུབ། །ཟླ་གསང་ཐིག་ལེའི་གསང་བའི་རྒྱལ་པོ་ཆེན་པོ་

ཤིན་ཏུ་དགྱེས་པ་རྡོ་རྗེ་གདོན་མི་ཟ་བའི་དམ་ཚིག་གི་དཀྱིལ་འཁོར་ཆེན་པོ་རྒྱས་པ་མཆོག་ཏུ་གསང་བ་ལས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཙུན་མོ་རྣམས་ཀྱི་གསང་བ་ཆེན་པོ་རྣལ་འབྱོར་མའི་དབང་ཕྱུག་ཆེན་པོ་རྣམས་ཀྱི་མཆོག་ཏུ་གསང་བའི་ཡེ་ཤེས་ཀྱི་དཀྱིལ་འཁོར་ཏེ་དང་པོ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ཏེ། དགྱེས་པའི་ཡིད་བདེ་བ་དང་། མགུ་བ་དང་། ཡིད་དགའ་བ་བསྐྱེད་ནས་གར་དང་ཤིན་ཏུ་དགྱེས་པ་ཆེན་པོའི་རྡོ་རྗེ་བཞད་པ་མཛད་ཅིང་ཡང་ཤིན་ཏུ་དགྱེས་པ་ཆེན་པོའི་བདེ་བ་གཉིས་སུ་མེད་པའི་ཡེ་ཤེས་རྡོ་རྗེ་ཞེས་བྱ་བ་འདུ་བ་མཛད་ནས། བཅོམ་ལྡན་འདས་ལ་གསོལ་བ་འདེབས་པར་འགྱུར་རོ། །བདེ་བྱེད་ཆེན་པོ་བཤད་པ་ཤོད། །བདེ་བ་ཆེན་པོ་བཤད་པ་ཤོད། །གསང་བ་ཆེན་པོ་བཤད་པ་ཤོད། །དགྱེས་པ་ཆེན་པོ་བཤད་པ་ཤོད། །ཁྱོད་ལས་འདོད་ཆགས་ཡང་དག་འབྱུང་། །ཁྱོད་ལས་ཞེ་སྡང་ཆེན་པོ་སྟེ། །ཁྱོད་ལས་སྡིག་བྱེད་སྡུག་བསྔལ་དང་། །ཁྱོད་ལས་ཁམས་གསུམ་ཐམས་ཅད་འབྱུང་། །ཁྱོད་ལས་སྐྱེས་པ་མ་ནིང་དང་། །ཁྱོད་ལས་འདོད་གཟིར་བུད་མེད་དང་། །ཁྱོད་ལས་འདོད་ལས་རྣམ་གྲོལ་དང་། །ཁྱོད་ལས་བྱང་ཆུབ་བླ་མེད་འབྱུང་། །ཁྱོད་ལས་ནམ་མཁའ་རླུང་དག་དང་། །ཁྱོད་ལས་གཟི་བརྗིད་མེ་ཡི་ཁམས། །ཁྱོད་ལས་དེ་བཞིན་ཆུ་དང་ས། །ཁྱོད་ལས་སྤྱོད་དང་མི་སྤྱོད་ཀུན། །ཁྱོད་ལས་སངས་རྒྱས་དཔའ་ཆེན་པོ། །ཡང་ནས་ཡང་དུ་འབྱུང་བར་འགྱུར། །ཁྱོད་ལས་ཆོས་དང་དགེ་འདུན་དང་། །ཁྱོད་ལས་ཕ་རོལ་ཕྱིན་པའི་ཚོགས། །བྱང་ཆུབ་སེམས་དཔའ་ཆེན་པོ་དང་། །རི་དང་སྐྱེ་བོ་ཐམས་ཅད་འབྱུང་། །ཁྱོད་ལས་རྡོ་རྗེ་སེམས་དཔའ་དང་། །ཁྱོད་ལས་དྲི་མེད་པདྨོ་དང་། །ཁྱོད་ལས་རིན་ཆེན་ཚད་མེད་ཆེ། །དེ་བཞིན་རྡོ་རྗེ་སྣ་ཚོགས་འབྱུང་། །ཁྱོད་ལས་ཕྱག་རྒྱ་སྔགས་ཀྱི་རྣམས། །ཁྱོད་ལས་རིག་པའི་སྙིང་པོ་འབྱུང་། །དེ་ནས་བཅོམ་ལྡན་འདས་སྤྱན་མི་འཛུམས་པས་སྨིན་མ་བརྐྱང་སྟེ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་ལ་སོགས་པ་ཆེན་པོ་དང་། རྣལ་འབྱོར་མ་ཆེན་མོའི་ཚོགས་དང་། རྡོ་རྗེ་ནམ་མཁའ་ལ་

འགྲོ་བ་དང་། ནམ་མཁའ་ལ་འགྲོ་བའི་ཚོགས་དང་། འཇིག་རྟེན་དང་འཇིག་རྟེན་ལས་འདས་པ་དང་། གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཀུན་འདུས་པ་ཐམས་ཅད་ལ་སྐད་ཅིག་སྐད་ཅིག་ཏུ་ཀུན་ཏུ་གཟིགས་ནས་བརྗིད་པ་དང་བཅས་པའི་ཕྱག་འཇམ་པོས་ཉིད་ཀྱི་སྙིང་གའི་རྡོ་རྗེ་གསོར་ཞིང་། ཉིད་ཀྱི་མཚན་མའི་ཕྱག་རྡོ་རྗེ་རྗེས་སུ་ཆགས་པ་རབ་ཏུ་རྒྱས་པ་ཆེན་པོའི་ལྟ་བས་འཁོར་ཐམས་ཅད་ཟིལ་གྱིས་མནན་ཏེ། ཉིད་ཀྱི་ཐུགས་པདྨ་ཟླ་བའི་དཀྱིལ་འཁོར་ཡི་གེའི་ཐིག་ལེའི་དཀྱིལ་ནས་འོད་ཟེར་ཕྱུང་སྟེ་ཀུན་ཏུ་སྣང་བར་བྱིན་གྱིས་བརླབས་ནས། ཤིན་ཏུ་དགྱེས་པ་གདོན་མི་ཟ་བའི་རྡོ་རྗེ་ཞེས་བྱ་བའི་གསང་བའི་དཀྱིལ་འཁོར་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དང་པོའི་ཡི་གེ་བཅུ་གསུམ་པ། །ཐིག་ལེར་བཅས་པ་བསམ་བྱས་ཏེ། །བདེ་ཆེན་ཚུལ་བཞིན་གཞག་བྱས་ལ། །གཞན་གྱིས་མི་ཕྱེད་ཐིག་ལེར་བཅས། །ཡི་གེ་དྲུག་པ་འདྲེན་པ་རུ། །ཚུལ་བཞིན་འོག་ཏུ་ཡོངས་སུ་བརྟག །འདི་ནི་གསང་བ་ཆེན་པོ་སྟེ། །རྨད་བྱུང་ཡི་གེ་ཕྱག་རྒྱའོ། །བདེ་ཆེན་བདེ་བར་བསྐྱེད་པའི་ཕྱིར། །སངས་རྒྱས་ཀུན་གྱིས་བསྒྲགས་པ་ཡིན། །ཡེ་ཤེས་ཀྱི་ནི་ཕྱག་རྒྱ་འདིས། །སྐད་ཅིག་སྙིང་པོས་རྒྱས་བཏབ་ན། །དཀྱིལ་འཁོར་རྣམས་ཀྱི་འཆད་པ་པོ། །སྟོན་པ་རྡོ་རྗེ་འཛིན་པར་འགྱུར། །བདེ་བ་ཆེན་པོ་སྐུལ་བྱེད་པའི། །སངས་རྒྱས་རྣམས་ཀྱི་རྟོགས་པར་བྱེད། །ཡི་གེ་ཡེ་ཤེས་གྲུབ་པ་ཡིས། །ཡེ་ཤེས་དབང་ཕྱུག་ཉིད་དུ་འགྱུར། །འཕྲུལ་གྱི་མིག་དང་ཤེས་རབ་ཆེ། །མི་ཤེས་སྡིག་པ་འཇོམས་པར་བྱེད། །རྡོ་རྗེ་སེམས་དཔའ་ཉིད་འདྲ་བར། །ཚེ་འདི་ཉིད་ལ་འཐོབ་པར་འགྱུར། །བདེ་བ་ཆེན་པོ་རེག་པ་ཆེ། །སྡུག་བསྔལ་འདོད་པ་འཇོམས་བྱེད་པའོ། །ཤེས་རབ་ཡེ་ཤེས་དངོས་གྲུབ་ཆེ། །བྱང་ཆུབ་མྱུར་དུ་འཐོབ་འགྱུར་ཏེ། །རིག་མ་འབུམ་ཕྲག་བརྒྱས་བསྐོར་ཅིང་། །སེམས་དཔའ་ཆེན་པོ་དེ་དང་རྩེན། །རྡོ་རྗེ་པདྨ་མཉམ་སྦྱོར་བས། །ཐལ་མོ་བརྐྱང་སྟེ་རོལ་པ་ཡིས། །ཚེ་དང་ལང་ཚོ་སྐལ་དང་ལྡན། །དྲན་པ་ཙམ་གྱིས་འཐོབ་པར་འགྱུར། །

འདོད་པ་ཡིས་ནི་དགོས་པའི་རྣམས། །མྱུར་བ་ཉིད་དུ་འགྲུབ་པར་འགྱུར། །འོག་དང་སྟེང་གི་ནམ་མཁའ་ལ། །བདག་འདོད་བཞིན་དུ་འགྲོ་འོང་བྱེད། །ས་ཡང་རྣམ་པར་ཕུག་ནས་སུ། །སྟོབས་ཆེན་དེ་འདིར་འོང་བར་བྱེད། །སངས་རྒྱས་ཀུན་ལ་གནོད་བྱེད་དེ། །བྱང་ཆུབ་པར་ནི་གདོན་མི་ཟ། །བདེ་བ་ཆེན་པོའི་རྣམ་མཛད་པས། །གཞོམ་ཞིང་དེ་བཞིན་མྱང་བ་ཡི། །རྡོ་རྗེ་བློ་ཡིས་བདུད་ཀྱི་རྣམས། །རྣམ་པར་འགྱུར་བས་ཐམས་ཅད་བསྒྲལ། །བདེ་བ་ཆེན་པོ་གཏོང་བ་ཡིས། །སྐད་ཅིག་ཉིད་དུ་གསོལ་བར་བྱ། །གྲུབ་པའི་རྡོ་རྗེ་འཛིན་པ་ཆེ། །དཔའ་བོ་ཆེན་པོས་དགུག་པར་བྱ། །རྣལ་འབྱོར་མ་རྣམས་ཅི་འདོད་པར། །རྣམ་གནོན་ཚུལ་གྱིས་གནོན་པར་བྱ། །དབང་པོ་ཉེ་དབང་དབང་ཆེན་པོ། །གནོད་བྱེད་སྟོབས་ཀྱིས་དགོན་གནས་པར། །རབ་ཏུ་རྣམ་འཇོམས་གནོན་པ་ཡིས། །གཞོམ་པའི་ཚུལ་གྱིས་བསྒྲལ་བར་བྱ། །མཚོན་ཆ་ལྔ་ཡིས་རྣམ་གནོན་པས། །གཞན་གྱི་བུད་མེད་རྩེན་པར་བྱ། །ཀྱེ་མའོ་བདེ་བ་བདེ་གནས་པའི། །སེམས་ཅན་ཆེན་པོས་གྲོལ་བྱས་ཏེ། །བྱང་ཆུབ་སེམས་ནི་བདེ་འབྱུང་བས། །སེམས་དཔའ་བདག་ཉིད་མཆོད་པར་བྱ། །དམ་ཚིག་རྗེས་སུ་ལྡན་པ་ཡིས། །རྣལ་འབྱོར་རྟག་པའི་ངོ་བོར་འགྱུར། །སྐད་ཅིག་མཐོ་རིས་འགྲོ་བར་བྱེད། །སྐད་ཅིག་བདེ་ལྡན་འགྲོ་བར་བྱེད། །རྡོ་རྗེའི་ཤུགས་ཀྱིས་ཐམས་ཅད་དུ། །སེམས་ཅན་སྐད་ཅིག་འདི་རུའོ། །སངས་རྒྱས་ཀུན་གྱི་གནས་སུ་འགྱུར། །སེམས་ཅན་རྣམས་དང་གྲགས་ཆེན་པོ། །ཐམས་ཅད་ཀྱི་ནི་རིགས་རྣམས་དང་། །ཕ་རོལ་ཕྱིན་རྣམས་སྐྱེ་གནས་ཏེ། །དེ་བཞིན་རིགས་དང་ཕ་རོལ་ཕྱིན། །དེ་དག་འདི་ལ་རབ་ཏུ་གནས། །དབང་པོར་གྱུར་པ་བརྟེན་ཆེན་པོ། །ཡོན་ཏན་ཚོགས་ནི་ནམ་མཁའ་བཞིན། །དེ་ཉིད་དངོས་པོ་ཐམས་ཅད་ལ། །ཐམས་ཅད་དུས་གསུམ་མཉམ་གནས་ཏེ། །རྡོ་རྗེ་སེམས་དཔའ་མཆོག་ཏུ་བདེ། །སེམས་དཔའ་ཐོག་མ་ཐ་མེད་ཡིན། །བཅོམ་ལྡན་འདས་དཔལ་རྡོ་རྗེ་སེམས་དཔའི་ཤིན་ཏུ་བདེ་བ་ཆེན་པོའི་རྡོ་རྗེ་ཆོས་ཀྱི་ཡི་གེ་ཞེས་བྱ་བ་ཡི་གེ་ཆེན་པོའི་ཕྱག་རྒྱའི་ཡེ་ཤེས་སོ། །བཅུ་གསུམ་གྱི་ནི་ཡི་གེ་ཆེ། །ཡེ་ཤེས་ཐིག་ལེ་ལྡན་པ་སྟེ། །རྡོ་རྗེ་ཡིད་འབྱུང་ལྷགས་པ་ཡི། །ཧ་ལ་ར་བཏགས་

དབུ་བསྐོར་བྱ། །འདི་ནི་ཡིད་ལས་སྐྱེས་པ་སྟེ། །ཤིན་ཏུ་དགྱེས་ཆེ་མཛེས་པ་ཡིས། །ཡི་གེའི་ཕྱག་རྒྱ་ཕྱག་རྒྱ་ཆེ། །གཙོ་བོའི་སྤྱན་སྔར་གནས་པ་ཡི། །གསང་བའི་སྙིང་གི་པདྨོ་ལ། །ཕྱག་རྒྱ་འདི་ཡིས་རྒྱས་བཏབ་པས། །དེ་ནི་དེ་མ་ཐག་ཉིད་དུ། །ཤིན་དུ་དགྱེས་པའི་མཉེས་པར་འགྱུར། །གཙོ་ཆེན་རྡོ་རྗེ་སེམས་དཔའ་ལ། །དེ་ཡི་བདེ་བས་མཉེས་བྱས་ཏེ། །དབང་པོ་ཡི་ནི་སྦྱོར་བ་ཡིས། །དེ་དང་རོལ་པས་མྱུར་དུ་འགྲུབ། །དེ་གཉིས་ཕན་ཚུན་དགྱེས་པ་ལས། །ཤིན་ཏུ་དགྱེས་པའི་གཞིར་གྱུར་ཏེ། །རིག་འཛིན་མཆོག་གི་གཟུགས་ལྡན་དང་། །ལྷ་མི་ཀུན་གྱིས་མཆོད་པར་འགྱུར། །དེ་དང་ལྷན་ཅིག་རོལ་པ་ན། །ལྷ་ཆེན་ཚངས་པ་གཏོགས་འདོད་རྣམས། །ཕྱག་རྒྱ་སྦྱོར་བའི་ཚུལ་གནས་པའི། །བདག་ཉིད་ཆེ་ལ་ཕྱག་བྱེད་པའོ། །ཉེས་གསུམ་དྲི་མ་སྤངས་པ་ཡི། །ཤིན་ཏུ་སྦྱོར་བའི་རྒྱས་བཏབ་པ། །སེམས་ཅན་གར་ནི་བྱེད་པ་དང་། །སེམས་དཔའ་ཆེ་ལ་མཉེས་པར་བྱེད། །དེ་ནི་ས་དང་ནམ་མཁའ་ལ། །བདེ་བར་གནས་ཤིང་འགྲོ་བར་བྱེད། །སྣ་ཚོགས་ལྷ་མོ་བདེ་ཆེ་བའི། །སྣ་ཚོགས་བདེ་བས་ཉེར་སྤྱོད་དོ། །ཕྱག་རྒྱའི་གར་གྱིས་གར་མཛད་ཅིང་། །སེམས་ཅན་མྱུར་དུ་རྟོགས་པར་བྱེད། །རལ་གྲིར་གྱུར་པ་གཟི་ཆེན་པོ། །ནམ་མཁའ་ཀུན་ཏུ་ཕན་ཚུན་འགྲོ། །ལྷ་མོ་འཕྲུལ་གྱི་འགྲོ་བ་དང་། །ལྷ་མིན་ཀླུ་ཡི་བུ་མོ་དང་། །གཞན་ཡང་འཕྲུལ་ལྡན་མིའི་བུ་མོ། །དེ་ཡི་བུད་མེད་ཀུན་བསྒྲུབ་བྱ། །ཕྱག་རྒྱའི་ཡེ་ཤེས་རབ་གནས་པས། །དེ་ཉིད་ཀུན་ཏུ་འགྲོ་བྱེད་དེ། །ཇི་ཙམ་འདོད་པར་དཀྱིལ་འཁོར་དུ། །རྡོ་རྗེ་སེམས་དཔའ་ཆེ་གནས་སོ། །སངས་རྒྱས་ཐམས་ཅད་མྱུར་དུ་འགྲུབ། །ཐམས་ཅད་ཆོས་ནི་བདེ་ཆེན་པོ། །དགེ་འདུན་ཆགས་མེད་ཐམས་ཅད་རྣམས། །དེ་དག་ཐམས་ཅད་དེ་ཡིན་ནོ། །དབང་པོ་ཉེ་དབང་དབང་ཆེན་གྱི། །ཐོགས་མེད་སྟོབས་ཀྱིས་བཀུག་ནས་སུ། །རྡོ་རྗེ་སེམས་དཔའི་ཐབས་གནས་པས། །གཞན་གྱི་བུད་མེད་རྩེན་པར་བྱ། །དེ་ལ་སོགས་པ་མཐའ་ཡས་པ། །ཕྱག་རྒྱ་ཡེ་ཤེས་བསྒྲུབ་བྱ་སྟེ། །སྐད་ཅིག་སྐད་ཅིག་བསྟེན་པ་ཡི། །བདག་གི་སྦྱོར་བས་འགྲུབ་པར་འགྱུར། །གཉིས་མེད་སྦྱོར་བ་འདི་ཡིས་ནི། །དེ་ནི་དངོས་གྲུབ་ཀུན་འགྱུར་ཏེ། །བདག་མེད་

ང་རྒྱལ་མེད་འགྱུར་ཏེ། །སྣང་བ་མེད་ཅིང་ཡི་གེ་མེད། །ཤིན་ཏུ་དགྱེས་པ་ཆེན་པོའི་ཡིད་དང་རྗེས་སུ་མཐུན་པར་མཛད་མའི་ཡི་གེའི་ཕྱག་རྒྱའི་ཡེ་ཤེས་སོ། །ལྷ་མོ་རྡོ་རྗེ་ཀཱི་ལི་ནི། །དང་པོར་ཨོཾ་གྱིས་རྣམ་བརྒྱན་པ། །བགེགས་མཐར་བྱེད་དང་ལྡན་པ་ནི། །དབང་མཆོག་སྦྱིན་པར་མཛད་མ་སྟེ། །དེ་ཡིས་བུད་མེད་སྙིང་ག་རུ། །བདག་ཉིད་ཀྱིས་ནི་བྱིན་བརླབས་ཏེ། །དབང་པོ་གཉིས་ནི་སྦྱོར་བ་ཡིས། །མཁས་པས་ཚུལ་བཞིན་བསྒོམ་པར་བྱ། །དེ་ནས་རྣལ་འབྱོར་ཆེན་པོ་དེ། །རྣལ་འབྱོར་དབང་ཕྱུག་བྱིན་བརླབས་པས། །ནམ་མཁའི་དཀྱིལ་འཁོར་མཐའ་དག་ཏུ། །མཛེས་པའི་སྤྱན་དང་རོལ་ཅིང་འགྲོ། །བདག་གམ་འོན་ཏེ་གཞན་དག་ལ། །ཕྱག་རྒྱ་དེ་ཡིས་རྒྱས་བཏབ་སྟེ། །རྡོ་རྗེ་པདྨོ་ཕྱེ་བ་ཡིས། །སྒྲུབ་པ་པོས་ནི་མྱུར་དུ་བསྒྲུབ། །པདྨ་རྣམ་པར་ཕྱེ་བྱས་ཏེ། །ཕྱག་རྒྱ་སྦྱོར་བས་རོལ་པ་ཡི། །ཕྱག་རྒྱ་འདི་ཡིས་རྒྱས་བཏབ་ན། །འགྲོ་དང་འོང་བ་གདོན་མི་ཟ། །གཡས་དང་གཡོན་པའི་ཚུལ་གྱིས་སུ། །ལག་པའི་ཕྱག་རྒྱ་བཟུང་བྱས་ཏེ། །སྦྱོར་བ་ཆེན་པོ་བསྒོམ་བྱས་ན། །དེ་མ་ཐག་ཏུ་ནམ་མཁར་འགྲོ། །བདག་ཉིད་གན་རྐྱལ་གནས་བྱས་ཏེ། །ཉིད་ཀྱི་སྟེང་དུ་ཕྱག་རྒྱ་གཞག །ཉིད་ཀྱིས་བྱིན་བརླབས་ཕྱག་རྒྱ་ལ། །སྔགས་པས་ཚུལ་བཞིན་བསྐྱོད་པར་བྱ། །གཡས་དང་གཡོན་གྱི་གློ་དག་ཏུ། །དགྱེས་དང་མཛའ་བ་གཉིས་བཞུགས་པར། །མི་གཡེང་ཕྱག་རྒྱ་བཞག་བྱས་ཏེ། །བདག་ཉིད་ཤིན་ཏུ་དགྱེས་པར་བསྒོམ། །འདི་ཡིས་དངོས་གྲུབ་ཐོབ་འགྱུར་ཏེ། །འདི་དག་ལྷན་ཅིག་འགྲོགས་པ་ཡིས། །གཟུངས་མ་ཀུན་གྱི་དཀྱིལ་འཁོར་དུ། །སངས་རྒྱས་ལ་སོགས་ཐམས་ཅད་འགྱུར། །འདི་དང་ལྷན་ཅིག་སྦྱོར་བ་ཡིས། །ནམ་མཁའ་བདག་པོ་སངས་རྒྱས་བཞིན། །སངས་རྒྱས་ཀུན་གྱིས་བྱིན་བརླབས་པས། །དེ་ནི་སངས་རྒྱས་ངོ་བོར་འགྱུར། །དབང་པོ་གཉིས་ནི་རབ་སྦྱོར་བས། །ནུབ་གཅིག་བདུད་རྩི་དབྱུང་བྱས་ཏེ། །གཟུངས་མའི་ཕྱག་རྒྱ་ལ་བརྟེན་ནས། །རྨད་འབྱུང་ཉིད་ནི་འཐོབ་ཅེས་བཤད། །མཚན་གྱི་མཐའ་དང་ཉིན་གྱི་མཐའ། །དང་པོར་གཉིས་ཀ་འདུས་བྱས་ན། །སྔགས་ཀྱི་དབྱིངས་ཕྱུག་གར་འགྲོ་བ། །དེ་དང་ལྷན་ཅིག་དངོས་གྲུབ་འགྲོ། །ཕྱེད་དམ་ཡང་ན་ནམ་

ཕྱེད་ན། །རིག་མའི་དབྱིངས་སུ་རེག་བྱ་ཞིང་། །མྱུར་བས་ཁྲོས་པའི་སྒྲ་སྒྲོགས་པས། །གྱད་ཀྱི་འགྱེད་པས་བརྩམ་པར་བྱ། །བཀྱེ་བའི་མཇུག་ཏུ་དེ་མ་ཐག །འོ་མ་མཆོག་ནི་བཏུང་བྱས་ནས། །དེ་ནས་དེ་ནི་རྡོ་རྗེ་འགྲུབ། །ཟླ་གསང་དཀྱིལ་དུ་འགྲོ་བར་བྱེད། །བྱ་བ་དེ་བཞིན་བཟློག་པ་དང་། །ཅི་བདེ་བསྟེན་པ་བྱས་པ་ལས། །བྱང་ཆུབ་སེམས་ནི་འཆར་མ་ཐག །འཕྲོག་མ་ཡི་ནི་དངོས་གྲུབ་བོ། །འདི་ཡིས་རིན་ཆེན་གཙུག་ཉིད་དུ། །མི་གཡེང་མཚན་མོ་བྱས་གྱུར་ན། །སངས་རྒྱས་དངོས་གྲུབ་འཕྲོག་བྱེད་དེ། །སངས་རྒྱས་དངོས་གྲུབ་ཉིད་ཀྱིས་ཐོབ། །འདི་ཡིས་སྙིང་གི་ཟླ་གསང་ལ། །ཐིག་ལེ་ཉིད་དུ་བརྟག་བྱས་ན། །དེ་ནི་དེ་མ་ཐག་ཏུ་ཡང་། །ཟླ་གསང་ཐིག་ལེའི་མཆོག་འདྲར་འགྱུར། །འདི་ཡིས་རེག་པ་ཙམ་གྱིས་ཀྱང་། །དངོས་གྲུབ་གང་དག་འཐོབ་བྱེད་དེ། །རྡོ་རྗེའི་ཕྱག་རྒྱ་གཟི་ཆེན་པོ། །རྒྱལ་པོ་འདི་ནི་རྣམ་པར་རྒྱུ། །འདི་ནི་སྒྲུབ་པའི་དུས་སུ་ཡང་། །རྣམ་པར་རྟོག་པ་ཡོང་མི་བྱ། །རྟག་ཏུ་མི་རྟོག་འགྱུར་བ་ཡིས། །ནན་ཏན་གྱིས་ནི་བསྒྲུབ་པར་བྱ། །སྡུག་བསྔལ་བ་ཡི་སེམས་ཅན་ལ། །སྦྱིན་པ་བཞི་ནི་རྟག་ཏུ་སྦྱིན། །དེ་ལ་བདེ་བ་སྦྱིན་བྱས་ཏེ། །མི་སྙན་ནམ་ཡང་སྦྱིན་མི་བྱ། །ཤིན་ཏུ་དགྱེས་པའི་སེམས་མ་ཆེན་མོ་དཔེ་མེད་པ་དང་ལྡན་མ་ཞེས་བྱ་བའི་རྡོ་རྗེ་ཀཱི་ལི་ཀཱི་ལི་ཤིན་ཏུ་དགྱེས་པའི་བདེ་བ་ཆེན་པོ་འཐོབ་པར་བྱེད་པའོ། །ཐོག་མ་ཨོྃ་སྟེ་འཇའ་ཆེན་མོ། །རྡོ་རྗེ་ཤིན་ཏུ་དགྱེས་དང་འབྲེལ། །འདི་ནི་འདོད་ཆགས་ཐམས་ཅད་ལ། །འདོད་ཆགས་བདེ་བྱེད་སྙོམས་པར་འཐོབ། །རོལ་པའི་སྦྱོར་བས་བུད་མེད་ལ། །འདི་ནི་རྟག་ཏུ་མཉེས་པར་བྱ། །འདི་ཡི་འགྲོ་བ་གསུམ་དག་ཏུ། །དངོས་གྲུབ་མྱུར་དུ་འཐོབ་པར་བྱེད། །པདྨ་ཁ་ཆེ་རྒྱས་པའི་སྤྱན། །སྔགས་མཁན་དེ་ནི་སྐད་ཅིག་འགྱུར། །གཙོ་བོ་ཡི་ནི་བདེ་མཆོག་གིས། །ཨཱ་ལི་ཀཱ་ལི་མཉམ་སྦྱོར་བྱ། །སྤྲོད་པའི་ཕྱག་རྒྱ་རྒྱས་བཏབ་སྟེ། །སྐད་ཅིག་སྐད་ཅིག་སྤྱད་པར་བྱ། །དུས་དག་ཏུ་ནི་རེག་པ་དང་། །གཞུག་པ་ཡང་ནི་རྟག་ཏུ་བྱ། །བསྐྱོད་དང་མཉེ་བ་དེ་བཞིན་དུ། །མཉམ་དུ་འགྲོགས་པའི་ཆོ་ག་བྱ། །བསྐྱེད་པ་དང་ནི་སྦྱང་བ་དང་། །སྐད་ཅིག་སྐད་ཅིག་བསྙེན་པར་བྱ། །གར་དང་ཀུན་ནས་བསྐོར་བ་དང་། །

འཇིབ་དང་དེ་བཞིན་བཏུང་བ་དང་། །ཐེ་ཚོམ་མེད་པའི་སེམས་ཀྱིས་ནི། །དམ་ཚིག་དང་ནི་བསྒྲུབ་པར་བྱ། །ཕྱག་རྒྱ་འདི་ཡིས་རྣལ་འབྱོར་པ། །མི་གཡོ་ཚེར་ནི་དངོས་གྲུབ་སྟེ། །སངས་རྒྱས་བྱང་ཆུབ་དངོས་གྲུབ་དང་། །བསྐལ་པར་གནས་པ་སྨོས་ཅི་དགོས། །འདི་ནི་དངོས་གྲུབ་འཐོབ་མ་ཐག །པདྨ་འཛིན་པའི་རྗེས་འགྱུར་ཏེ། །ལག་ན་པདྨ་འབར་ཁྱེར་བཞིན། །བློ་ལྡན་མི་གཡེང་བསྐལ་པར་གནས། །བརྗིད་པས་དཔལ་དགྱེས་ལྷན་ཅིག་ཏུ། །བདེ་ལྡན་ཞིང་དུ་འགྲོ་འགྱུར་ཏེ། །རྣལ་འབྱོར་ཆེན་པོ་དེར་ཕྱིན་ནས། །བདེ་ལྡན་གྱི་མཆོག་གཙོ་བོ་ཡི། །པདྨོའི་གཟུགས་ཀྱི་དཀྱིལ་འཁོར་དུ། །དེ་ནི་བདེ་བར་གནས་པར་འགྱུར། །བདེ་ལྡན་རྟག་ཏུ་འགྲོགས་འགྱུར་བ། །དངོས་གྲུབ་ཡེ་ཤེས་བདེ་མྱོང་འགྱུར། །ཡི་གེ་ཡི་ནི་ཕྱག་རྒྱ་འདིས། །པདྨ་ལས་སྐྱེས་གཟུངས་གཟུང་སྟེ། །བྱིན་གྱིས་བརླབས་ནས་བདེ་མྱངས་ན། །པདྨ་བདེ་བའི་བདག་པོར་འགྱུར། །གཞན་གྱི་བུད་མེད་བདག་ཉིད་ཀྱིས། །ཕྱག་རྒྱ་འདི་ཡིས་རྒྱས་བཏབ་སྟེ། །བསྟེན་བྱས་འདོད་པའི་གཟུགས་ཉིད་དུ། །སྔགས་མཁན་འགྱུར་བ་གདོན་མི་ཟ། །སྡུག་ཅིང་ལ་སོགས་བརྒྱན་པ་ཡི། །ཉི་མའི་འོད་ཟེར་གསར་བྱུང་བཞིན། །དྲི་མེད་ཡངས་པའི་ལྟ་བ་ཡིས། །པདྨ་སེམས་དཔའི་ཚེ་འགྲུབ་པོ། །ཇི་ཙམ་ནམ་མཁར་ཉེ་བར་ནི། །དཔའ་བོ་ཆེན་པོ་འཕུར་བྱེད་དེ། །རིག་མ་འབུམ་ཕྲག་བརྒྱ་ཚོགས་ཀྱི། །ལྷ་མོ་ཡིས་ནི་མཆོད་པ་བྱེད། །སངས་རྒྱས་སྲས་དང་བཅས་ཀུན་གྱིས། །སངས་རྒྱས་ཀུན་གྱིས་བདག་ཉིད་མཆོད། །འཁོར་བ་ཉིད་ན་གནས་པའི་ཚེ། །འཁོར་བའི་དྲི་མས་མི་གོས་སོ། །ཕྱག་རྒྱ་འདི་ཡིས་རྒྱས་བཏབ་ན། །རྟག་ཏུ་ཉོན་མོངས་དག་འགྱུར་ཏེ། །སྨན་གྱི་ཕྱེ་མ་སྦྱོར་བ་ཡིས། །སྦྲུལ་ནི་གསོད་པར་གྱུར་པ་བཞིན། །ཟླ་གསང་ཐིག་ལེའི་དགའ་བྱེད་འདི། །ཚེ་འདི་ཉིད་ལ་འཐོབ་འགྱུར་ཏེ། །འདི་ཡི་མཐུ་ཡི་ངོ་བོ་ཡིས། །དགོས་པ་ཐམས་ཅད་དངོས་གྲུབ་བོ། །གང་འདོད་དངོས་གྲུབ་དོན་ཡོད་པ། །འཁོར་བ་འདི་དང་ཕ་རོལ་གྱི། །མཐུ་ཆེན་ཕྱག་རྒྱ་འདི་ཉིད་ཀྱིས། །དྲན་པ་ཙམ་གྱིས་དེ་དངོས་འགྲུབ། །ཤིན་ཏུ་དགྱེས་པ་པདྨའི་ཕྲེང་བ་ཞེས་བྱ་བའི་ཡི་གེའི་ཕྱག་རྒྱ་ཡེ་ཤེས་

སོ།། །།དང་པོར་ཨོྃ་དང་ཡང་དག་ལྡན། །ཐ་མར་བསྒྱིངས་པའི་ཧཱུྃ་ཉིད་དེ། །དབུས་སུ་རབ་དགྱེས་རྡོ་རྗེ་བཞག །ཡི་གེ་འདི་ནི་རྨད་བྱུང་བའོ། །ཕྱག་རྒྱ་འདི་ཡིས་རྒྱས་བཏབ་པས། །སྡིག་པ་སྐད་ཅིག་མེད་པར་འགྱུར། །ཁམས་གསུམ་འདི་ནི་དངོས་གྲུབ་ཆེ། །དཔལ་གྱི་བསྒྱིངས་པ་འཐོབ་པར་འགྱུར། །བདུད་དང་བདུད་ལས་རྗེས་འཇུག་པ། །མི་ཐོགས་པར་ནི་བརྒྱལ་བྱེད་དེ། །སྣ་ཚོགས་རྡོ་རྗེ་མཉམ་སྦྱོར་བས། །དེ་ཡིས་ཁམས་གསུམ་འཕྲོག་པར་བྱེད། །བདག་གི་མཐུ་ཡིས་རྣམ་རྒྱལ་ཏེ། །དེ་ཡིས་ཁམས་གསུམ་ལོངས་སྤྱོད་དོ། །ཕྱག་རྒྱ་འདི་ཡིས་རྒྱས་བཏབ་སྟེ། །པདྨོ་རྡོ་རྗེ་རབ་ལྡན་བྱ། །ཕྲེང་ཕྱེད་ཕྲེང་བའི་ཚུལ་གྱིས་སུ། །ཕྲེང་བ་བསྐུམས་ཏེ་འཛིན་པ་བཞིན། །འདི་ཡིས་བྱིན་གྱིས་བརླབས་བྱས་ཏེ། །བསྙེན་ན་མྱུར་དུ་དངོས་གྲུབ་བོ། །གཡས་དང་གཡོན་གྱི་སྨིན་བསྒྱུར་བས། །ཆུ་སྐྱེས་སྤྱན་ནི་སྦྱར་བྱས་ཏེ། །ཕྱག་རྒྱས་བཏབ་སྟེ་རོལ་བྱས་ན། །བླ་མའི་དངོས་གྲུབ་འཐོབ་པར་བྱེད། །རྡོ་རྗེ་རྣལ་འབྱོར་ཉེ་བ་ཡིས། །རྡོ་རྗེའི་བདག་ཉིད་མཆོད་བྱེད་དེ། །དེ་དག་ཀུན་གྱིས་བསྐོར་བྱས་ནས། །དཀྱིལ་འཁོར་དུ་ནི་དབང་བསྐུར་རོ། །རྡོ་རྗེ་སེམས་དཔའ་དཔའ་བོ་ཡིས། །འཇིགས་ཤིང་སྐྲག་ལས་སྦྱིན་བྱེད་པ། །རང་ཉིད་ཀྱི་ནི་ཕྱག་རྒྱའི་གཟུངས། །ཉིད་ཀྱིས་དངོས་གྲུབ་སྟོབས་པར་བྱེད། །གཞན་ནི་ཡང་དག་ཕ་རོལ་ཕྱིན། །སངས་རྒྱས་རྣམས་ཀྱི་ཡོན་ཏན་རྒྱན། །དེ་ཡང་དེ་ལ་འཇིགས་སྐྲག་ནས། །རང་གི་དགྱེས་མཆོག་སྟོབས་པར་བྱེད། །བདག་ཉིད་ཆེན་པོ་དམིགས་གསུམ་དང་། །ཆེ་བའི་ཕ་ནི་ངོ་བཞི་དང་། །རྡོ་རྗེ་འཛིན་དང་གཏོགས་རྣམས་དང་། །རང་གི་སྡུག་པ་སྟོབས་པར་བྱེད། །གཤིན་རྗེ་ཤ་ཀ་རྒྱལ་པོ་དང་། །རྡོ་རྗེ་འཛིན་དེ་དངོས་གྲུབ་ལ། །འོངས་ནས་བདག་གི་སྡུག་པ་རྣམས། །སྲོག་གི་ཕྱིར་ཡང་སྟོབས་པར་བྱེད། །གཞན་གྱི་འཕྲུལ་གྱི་ལུས་ཀྱི་རྣམས། །ཁམས་གསུམ་ལམ་ལ་གནས་པ་དག །མྱུར་དུ་ཉེ་བར་འོངས་ནས་ཀྱང་། །བདག་ཉིད་དངོས་གྲུབ་སྦྱིན་པར་བྱེད། །སྣ་ཚོགས་གཉེན་ནི་རྒྱལ་པོ་ཆེ། །དབང་ཕྱུག་དམ་པ་སྣ་ཚོགས་བྱེད། །དེ་ཡང་ཉེར་འོངས་གཙུག་གཏུགས་ཏེ། །རྣལ་འབྱོར་སྣ་ཚོགས་མ་སྦྱིན་བྱེད། །

གནོད་སྦྱིན་སྲིན་པོའི་གཟུགས་ལ་སོགས། །ཤ་ཟ་ཡི་དགས་བུ་མོ་རྣམས། །སྦྱོར་ལྡན་ཕྱག་རྒྱ་བླང་བྱས་ཏེ། །བརྟག་པ་མཆོག་གིས་བརྟག་པར་བྱ། །ཐམས་ཅད་ལས་བྱེད་དགེ་བ་ཡི། །འདི་ཡིས་དངོས་གྲུབ་མྱུར་དུ་འགྲུབ། །ལྷ་དང་ཀླུ་ཡི་བུ་མོ་དང་། །ལྷ་མིན་ལྷ་ཡི་མངལ་སྐྱེས་པ། །ཕྱག་རྒྱ་འདི་ཡིས་བྱིན་བརླབས་ན། །གྲུབ་པ་མྱུར་དུ་དངོས་གྲུབ་པོ། །གཟུགས་བཟང་ཡང་ན་ངན་ཡང་རུང་། །གང་དེ་བུད་མེད་བཟུང་བྱས་པ། །རིམ་པ་འདི་ཡི་ཚུལ་གྱིས་སུ། །ཕྱག་རྒྱའི་སྦྱོར་བ་བརྟག་པར་བྱ། །འདི་ཡིས་སངས་རྒྱས་ཐམས་ཅད་དང་། །དེ་བཞིན་དཔའ་བོ་ཀུན་ཉིད་དུ། །སྐད་ཅིག་སྐད་ཅིག་རྒྱས་བཏབ་པས། །ཚེ་འདི་ཉིད་ལ་ཐོབ་པར་འགྱུར། ཤིན་ཏུ་དགྱེས་པ་ཆེན་པོ་སྣ་ཚོགས་དཔེ་མེད་པའི་ཕྲེང་བ་ཞེས་བྱ་བའི་ཡི་གེའི་ཕྱག་རྒྱའོ།། །།ང་རོ་བཅུ་གསུམ་སྟེང་ཉིད་དུ། །དེ་བཞིན་ཐིག་ལེའི་རྒྱལ་པོ་སྟེ། །རབ་དགྱེས་རྡོ་རྗེ་ལྟ་ཆེ་བདེ། །མཐའ་ནི་ཡི་གེ་ཧི་སྦྱར་བའོ། །འདི་ནི་སངས་རྒྱས་ཐམས་ཅད་ཀྱི། །བདེ་ཆེན་སྤྱན་ནི་དགའ་བྱེད་ཡིན། །ཕྱག་རྒྱའི་ཡི་གེ་འདི་ཡིས་ནི། །མཁས་པས་བྱིན་གྱིས་བརླབས་བྱས་ན། །དེ་ནི་དེ་མ་ཐག་ཏུ་ཡང་། །བླ་མེད་འཕྲུལ་གྱི་སྤྱན་དུ་འགྱུར། །སྟོང་ཉིད་ཡེ་ཤེས་གནས་པ་ཡི། །སངས་རྒྱས་ཤིན་ཏུ་འཕྲ་བ་མཐོང་། །སྨིན་མ་རྣམ་སྒྱུར་རྒྱས་པ་ཡིས། །ལྟ་བའི་ཕྱག་རྒྱས་གར་བྱེད་ཅིང་། །འགུགས་བྱེད་སངས་རྒྱས་ཐམས་ཅད་དང་། །དཔའ་བོ་རྡོ་རྗེ་ཀུན་འཛིན་དང་། །ཕ་རོལ་ཕྱིན་པ་ཐམས་ཅད་དང་། །དེ་བཞིན་གཟུངས་མའི་ཚོགས་རྣམས་དང་། །རྣལ་འབྱོར་མ་དང་མཁའ་འགྲོ་དང་། །ཕྱི་དང་ནང་གི་ཚོགས་རྣམས་དང་། །ལྷ་མོ་ཀླུ་མོ་གནོད་སྦྱིན་མོ། །ལྷ་མིན་དངོས་གྲུབ་ལུས་ཀྱི་མཆོག །གྲུལ་བུམ་མི་འམ་ཡི་དགས་སམ། །ཤ་ཟ་འཕྲུལ་གྱི་མི་བུ་མོ། །འདི་ནི་སྙིང་གར་བཞག་པ་ཡིས། །རྡོ་རྗེ་འཛིན་དུ་བདག་ཉིད་འགྱུར། །སངས་རྒྱས་ཡང་ན་ཉི་མ་དང་། །པདྨོ་དྲ་བ་སྣ་ཚོགས་བློ། །ལྷ་དང་ལྷ་མིན་མི་དག་དང་། །གཞན་ཡང་གནོད་སྦྱིན་སྲིན་པོ་དང་། །བདུད་དང་བདུད་ཀྱི་ཚོགས་རྣམས་ཀྱི། །གཞན་གྱིས་འཕྲོག་པར་ཡོང་མི་ནུས། །ལྷ་དང་ལྷ་མིན་གྱིས་མཆོད་

ཅིང་། །དངོས་གྲུབ་ཁམས་གསུམ་འགྲོ་བར་བྱེད། །ལྷ་དང་ལྷ་མིན་སྟེན་བྱེད་ཅིང་། །སྐད་ཅིག་ཉིད་དུ་འགྲོ་བར་བྱེད། །སངས་རྒྱས་རྣམས་ཀྱི་མཁྱེན་པའི་ཡུལ། །སངས་རྒྱས་རྣམས་ཀྱི་ཞིང་ཀུན་ཏུ། །རིག་པའི་རིགས་ནི་བརྒྱ་དག་དང་། །དེ་ནི་རྩེན་ཞིང་འགྲོ་བར་བྱེད། །འཇིགས་མེད་ཡན་ལག་ཀུན་སྤངས་པ། །ཐོག་མ་ཐ་མ་མེད་འགྱུར་ཏེ། །སངས་རྒྱས་རྣམས་ཀྱིས་མཁྱེན་སྦྱོར་བས། །དགྱེས་པའི་རྨད་མཆོག་གཅིག་ཏུ་འགྱུར། །རྡོ་རྗེའི་ནང་ན་རྡོ་རྗེར་འགྱུར། །རིན་ཆེན་ནང་ན་རིན་ཆེན་འགྱུར། །པདྨའི་ནང་ན་པདྨར་འགྱུར། །སྣ་ཚོགས་ནང་ན་སྣ་ཚོགས་མཆོག །དེ་ལ་སོགས་པ་མཐའ་ཡས་མཆོག །མཉམ་དང་མི་མཉམ་ཆོས་ཀྱི་དབྱིངས། །ཕྱག་རྒྱའི་ཡེ་ཤེས་བྱིན་བརླབས་པས། །དམ་པ་སྣ་ཚོགས་ཉིད་དུ་འགྱུར། །གཟུགས་མི་སྡུག་པ་གཟུགས་མཆོག་འགྱུར། །མིག་མེད་པ་ཡང་མིག་ལྡན་འགྱུར། །རྣ་འོན་པ་ཡང་སྒྲ་ཐོས་ཏེ། །གླེན་པ་ཡང་ནི་ཡིད་རྣོར་འགྱུར། །དེ་ལ་སོགས་པ་དཔག་མེད་པ། །མིག་གི་ཕྱག་རྒྱས་བཏབ་པར་འགྱུར། །དེ་ཡིས་ལུས་ལ་ཡོན་ཏན་ནི། །ཡོན་ཏན་དམ་པ་མདངས་ཆེར་འགྱུར། །ཇི་ཙམ་དེ་ནི་ནམ་མཁའི་མཐོངས། །འཕུར་ཞིང་འོག་ཏུ་འབབ་པར་བྱེད། །དེ་ནི་རི་ཡང་ཕུག་ནས་འགྲོ། །ས་དང་ས་ཡི་འོག་ཏུ་ནི། །སྣ་ཚོགས་རྫུ་འཕྲུལ་རྣམས་བྱེད་པས། །དེ་ནི་སྐད་ཅིག་འགྲོ་བར་བྱེད། །སྣ་ཚོགས་མཁའ་འགྲོའི་དཀྱིལ་འཁོར་དུ། །སྔགས་མཁན་འགྱིང་བ་གར་བྱེད་པ། །བདེ་བ་ཆེན་པོ་བསྐྱེད་པ་ཡིས། །སེམས་ཅན་དེ་ནི་འཇུག་པར་བྱེད། །མི་གཡེང་བལྟ་བའི་བསྒྱུར་བ་ཡིས། །ལས་རྣམས་ཐམས་ཅད་དེ་ཡིས་བྱེད། །འདེགས་པ་དང་ནི་ལྟ་བ་ཡིས། །གར་དང་རྣམ་པར་བསྐོར་བ་དང་། །འགྲོ་བ་ཐམས་ཅད་འབབ་བྱེད་དེ། །རི་དང་སེམས་ཅན་ཐམས་ཅད་ལ། །སྨྲ་བ་དང་ནི་སྒྲ་འབྱིན་དང་། །ཅི་དགའ་བ་ནི་མངག་པར་བྱེད། །གདུག་པའི་ལྟ་བས་སྲོག་ཆགས་རྣམས། །རྡེག་པ་དང་ནི་སྒྲོལ་བར་བྱེད། །གཏུམ་དང་གདུག་འཇིགས་ཆེ་བ་དང་། །ཁྲོ་བོའི་ལྟ་བས་སྒྲོལ་བར་བྱེད། །ཤིན་ཏུ་དགྱེས་པ་ཆེན་པོའི་རྡོ་རྗེ་སྤྱན་དང་ལྡན་པ་ཞེས་བྱ་བ་འདོད་པའི་ཡོན་ཏན་ཐམས་ཅད་འགྲུབ་པར་བྱེད་པའི་ཡི་གེའི་ཕྱག་རྒྱ་ཡེ་ཤེས་ཀྱི་མཐུ་ཆེན་པོའོ།། །།དང་པོ་ཨོཾ་

གྱིས་རྣམ་པར་བརྒྱན། །ཐ་མར་འབྲུག་གི་སྒྲ་འབྱིན་པ། །རྡོ་རྗེ་རབ་ཏུ་དགྱེས་པའི་སྐུ། །བདེ་བ་སྐྱེད་བྱེད་བཤད་པ་ཡིན། །ཕྱག་རྒྱ་འདི་ནི་ཕྱག་རྒྱ་ཆེ། །སངས་རྒྱས་རྡོ་རྗེ་དཔའ་བོ་ཡི། །གང་གིས་འདི་ནི་བསྒོམས་མ་ཐག །རྡོ་རྗེ་གསུམ་གྱིས་བྱིན་རློབ་འགྱུར། །བདག་གམ་ཡང་ན་གཞན་ཡང་རུང་། །འདི་ཡིས་ཉིད་ཀྱི་སྙིང་ག་རུ། །བསྒོམས་ཏེ་གཉིས་མེད་སྦྱོར་བྱས་ན། །སངས་རྒྱས་སྐུ་ནི་རབ་ཏུ་འགྲུབ། །བསྒྲུབས་ན་སངས་རྒྱས་ཐམས་ཅད་ཀྱི། །བུད་མེད་ཀུན་དང་རྩེན་བྱེད་དེ། །ཨཱ་ལི་ཀཱ་ལི་མཉམ་སྦྱོར་བས། །སེམས་ཅན་དམན་པའང་དངོས་གྲུབ་པོ། །ཤིན་ཏུ་སྐལ་ལྡན་ཐམས་ཅད་དང་། །སངས་རྒྱས་སྐལ་ལྡན་འཐོབ་འགྱུར་ཏེ། །སྐལ་དང་ལྡན་པ་ཐམས་ཅད་ཀྱིས། །ཆུ་སྐྱེས་ཞབས་ལ་བསྙེན་པར་བྱེད། །ལྷ་དང་ལྷ་མིན་བུ་མོ་དེའི། །རིག་མས་མཐོང་ན་དགའ་བྱེད་དེ། །ཕྱག་རྒྱའི་ཡེ་ཤེས་བརྒྱན་པ་ཡི། །སྣ་ཚོགས་འདོད་པའི་གཟུགས་སུ་འགྱུར། །སྤྱོད་དང་མི་སྤྱོད་མི་དག་དང་། །ལྷ་དང་ཀླུ་དང་གནོད་སྦྱིན་དང་། །མི་འམ་ཅི་དང་སྐྱེས་བུ་ཡི། །དངོས་གྲུབ་པས་ནི་འཕྲོག་མི་ནུས། །དེ་ལ་སོགས་པས་སྟོད་བྱེད་དེ། །འཇིགས་པར་འགྱུར་བའི་སེམས་ཀྱིས་ནི། །བླ་མ་བཞིན་དུ་མཆོད་བྱེད་ཅིང་། །ཀུན་གྱིས་བསྟོད་མཆོད་བསྟི་སྟང་བྱེད། །དེ་ལ་སོགས་པ་མཐའ་ཡས་མཆོག །ནམ་མཁའ་མཐའ་ཀླས་ལྷ་རྣམས་དང་། །ཉི་མ་བཅུ་ཡི་འོད་ཟེར་བཞིན། །རྣལ་འབྱོར་ཆེན་པོ་འགྲུབ་པ་འགྲོ། །སངས་རྒྱས་ཀུན་གྱི་ཞིང་ཀུན་དུ། །འོད་ཀྱིས་ཐམས་ཅད་མཉེས་བྱེད་ཅིང་། །སངས་རྒྱས་བྱང་ཆུབ་སེམས་དཔའ་རྣམས། །ཟིལ་གྱིས་མནན་ཏེ་གནས་པར་འགྱུར། །སངས་རྒྱས་ཀུན་གྱི་བདག་ཉིད་ལ། །སྲས་རྣམས་འདུད་ཅིང་ཕྱག་བྱེད་དེ། །ལྷ་དང་ལྷ་མིན་གྲུལ་བུམ་དང་། །ཚངས་པ་གཏོགས་འདོད་ལྷ་ཆེན་པོ། །ཕྱག་རྒྱའི་ཡེ་ཤེས་བྱིན་བརླབས་དེར། །འཇིགས་ཤིང་སྐྲག་པས་འོང་བར་བྱེད། །བཅོམ་ལྡན་དངོས་གྲུབ་བཀའ་སྩལ་སྩོལ། །ཇི་ལྟར་ཐུགས་ལ་དགོངས་པ་བཞིན། །སྤྱི་བོས་བཀའ་བླངས་གདུལ་དཀའ་རྣམས། །དེ་དག་ཐམས་ཅད་བསྒྲུབ་པར་བགྱི། །

མདོར་བསྡུས་རྣམ་པ་བཞི་པོ་ཡི། །དམ་པ་རྣམས་ཀྱང་བསྐྱང་བར་བགྱི། །ཟླ་གསང་ཐིག་ལེའི་མཆོག་ཉིད་ཀྱི། །དབང་བསྐུར་བ་ཡང་བླང་བགྱི་སྟེ། །རིགས་ལྔ་རྣམས་ཀྱི་སྡོམ་པ་ཉིད། །རྣམ་པ་བཞི་པོ་ཐམས་ཅད་བླང་། །ཆུ་སྐྱེས་དངོས་གྲུབ་ཁྱོད་ཞབས་དྲུང་། །འཚོ་བའི་བར་དུ་བདག་ཅག་འབངས། །ཁྱེད་ཀྱི་སྤྱན་སྔར་ཞམ་རིང་དུ། །ཅི་བགྱི་ཞེས་ནི་བཀའ་ནོད་དོ། །ཕྱག་རྒྱ་འདི་ཡིས་རྒྱས་གདབ་ན། །སྤྱོད་བཅས་མི་སྤྱོད་དགའ་བྱེད་དེ། །རྟག་ཏུ་སངས་རྒྱས་རྣམས་ཀྱི་མཆོག །ཤིན་ཏུ་བདེ་དང་མཛའ་བ་མྱོང་། །རྡོ་རྗེ་ཤིན་ཏུ་དགྱེས་པའི་སྐུ་ཆེན་མོ་བདེ་བ་དཔེ་མེད་པ་དང་ལྡན་པ་ཞེས་བྱ་བའི་ཕྱག་རྒྱའི་ཏིང་ངེ་འཛིན་ཏོ།། །།དང་པོར་ཨོྃ་སྟེང་ཐིག་ལེ་སྟེ། །གཞན་གྱིས་མི་ཕྱེད་ཁྲོས་བཅས་པས། །གཉིས་ཀྱི་དབུས་སུ་བཞག་པ་ནི། །གསུང་གི་རྡོ་རྗེ་ཤིན་ཏུ་དགྱེས། །བདེ་གསང་སངས་རྒྱས་ཐམས་ཅད་ཀྱི། །མཆོག་ཏུ་རོ་ནི་མྱོང་བྱེད་པ། །དམ་ཆོས་སྒྲ་ཡིས་གང་བྱས་པའི། །གསུང་གསལ་རྣ་བ་དགའ་བར་བྱེད། །ཡི་གེའི་ཕྱག་རྒྱ་ཆེན་པོ་འདི། །བྱང་ཆུབ་ཆེན་པོར་གྲུབ་བྱེད་དེ། །ཡོན་ཏན་ཡོན་ཏན་སྡུག་མཐོ་བའི། །ཚད་མེད་ཡོན་ཏན་འཛིན་པའོ། །དཔལ་ལྡན་ཕྱག་རྒྱ་འདིས་བཏབ་ན། །དཔལ་ཀུན་བདག་པོ་དེ་མ་ཐག །བདག་དང་བདག་གིར་འཛིན་སྤངས་པ། །སངས་རྒྱས་ཀུན་གྱི་བདག་ཉིད་འཐོབ། །ཕྱག་རྒྱ་འདི་ཡིས་བདག་གམ་གཞན། །རྒྱས་བཏབ་འདོད་པ་སྤྱད་བྱས་ནས། །དངོས་གྲུབ་རྨད་དུ་བྱུང་བ་ཡི། །དེ་ཡིས་མྱུར་དུ་འཐོབ་པར་འགྱུར། །སངས་རྒྱས་རྡོ་རྗེ་འཛིན་རྒྱལ་པོ། །སྒྲུབ་པ་པོ་ཡི་བཀའ་ཉན་ཏེ། །ཅི་སྟེ་རྨོངས་པས་འདའ་བྱེད་ན། །དེ་ཡི་སྲོག་ནི་ཐ་མ་ཡིན། །དེ་ཡི་བསྲུང་བ་བྱས་ན་དཔལ། །ཚེ་དང་ལང་ཚོ་བདེ་བའི་མཆོག །རྡོ་རྗེ་གསུང་གིས་བསྟན་པ་བཞིན། །གདོན་མི་ཟ་བར་འཐོབ་པར་འགྱུར། །ཕྱག་རྒྱ་ཡེ་ཤེས་རྗེས་བསྡུས་པས། །སྒྲུབ་པ་མི་བྱེད་ཅུང་ཟད་མེད། །བདག་ཉིད་ཐམས་ཅད་སྤྲུལ་པ་ནི། །མཆོག་གི་ཡེ་ཤེས་དངོས་གྲུབ་འགྱུར། །ཕྱག་རྒྱའི་ཡེ་ཤེས་བྱིན་བརླབས་ལ། །སངས་རྒྱས་བྱང་ཆུབ་མི་ལྡོག་དང་། །ཆོས་དབྱིངས་མི་མཉམ་རབ་

ཀླས་པ། །དངོས་གྲུབ་བདག་ཉིད་གཤེགས་ནས་ཀྱང་། །ཤིན་ཏུ་འདས་པའི་སངས་རྒྱས་ཀྱིས། །སེམས་དཔའ་ཆེན་པོ་དེ་ཁྲིད་དོ། །རང་གི་ཏིང་འཛིན་ལྡང་བའི་ཚེ། །དམ་ཚིག་མཆོག་ཏུ་བསྲུང་བྱ་བ། །ཇི་སྙེད་ནམ་མཁའི་དཀྱིལ་འཁོར་དུ། །འདོད་པ་ཐམས་ཅད་དེ་སྤྱོད་དེ། །རྣལ་འབྱོར་ཆེན་པོ་མི་འདའ་ཞིང་། །ངན་སོང་གསུམ་ཡང་མི་འགྲོ་བྱེད། །དེ་ནི་ཅུང་ཟད་འོག་སྡུག་བསྔལ། །འགྲོ་བ་ཐམས་ཅད་མྱོང་མི་འགྱུར། །རྡོ་རྗེ་གསུམ་དེ་རྨད་འབྱུང་བས། །སངས་རྒྱས་ཀུན་གྱིས་བསྔགས་བྱེད་དེ། །བག་ཆགས་མཚམས་སྦྱོར་རྣམ་གྲོལ་བས། །ནམ་མཁའི་རིམ་པས་འགྲོ་འོང་བྱེད། །ལྷ་ཡིས་རྟག་ཏུ་མཆོད་བྱེད་དེ། །མཆོད་པར་བྱས་པས་ཤིན་ཏུ་མཆོད། །སེམས་དཔའ་ཆེན་པོ་འགྲོ་འདུག་ཀྱང་། །བདེ་བྱེད་ཀུན་གྱིས་བདག་ཉིད་དགེ། །གནས་དང་ཟས་དང་བཏུང་བ་སོགས། །ནམ་མཁའ་ལས་ནི་སྐད་ཅིག་རྙེད། །བུད་མེད་རིན་ཆེན་མཆོག་མཁའ་ལས། །བསམས་པ་ཙམ་གྱིས་འགྲུབ་པར་འགྱུར། །ལས་ཀྱི་དབྱིངས་རྣམས་མ་ལུས་པ། །དེ་ཡིས་ཁམས་གསུམ་འཐོབ་པར་བྱེད། །རྣལ་འབྱོར་སྦྱོར་བ་དངོས་གྲུབ་ཀྱི། །རྣལ་འབྱོར་གྲུབ་ཆེན་འཕྲོག་པར་འགྱུར། །འདི་ལས་བརྟུལ་ཞུགས་དྲག་པ་མེད། །དཀའ་ཐུབ་འདི་དང་འདྲ་མེད་དེ། །བུད་མེད་མཆོག་ཏུ་བདེ་བ་ལས། །འདོད་པའི་ལོངས་སྤྱོད་སྤྱད་པས་འགྲུབ། །དགེ་བའི་པདྨོའི་རིགས་ཀུན་ཏུ། །སེམས་དཔའ་ཆེན་པོ་ངག་དབང་འགྱུར། །གཟུངས་མ་ཀུན་གྱིས་བདེ་ཆེན་པོ། །རྒྱལ་པོ་ཆེན་པོར་དེ་འགྱུར་རོ། །གསུང་ཐམས་ཅད་ཀྱི་རྡོ་རྗེ་དཔེ་མེད་པ་དང་ལྡན་པ་ཞེས་བྱ་བ་རྡོ་རྗེ་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོས་འཐོབ་པར་བྱེད་པ་ཁམས་གསུམ་ཀུན་ཏུ་སྣང་བར་གྲགས་པ་པདྨའི་རིགས་ཀྱི་ཚོགས་ཞལ་གྱི་གསུང་གིས་དགོངས་པ་ཐམས་ཅད་འགྲུབ་པར་བྱེད་པའོ།། །།ཨོཾ་བཅས་མི་ཕྱེད་ཐ་མར་ཏེ། །རབ་ཏུ་སེམས་ནི་བདེ་བ་སྟེ། །རྡོ་རྗེ་རབ་དགྱེས་བདེ་བྱེད་ཆེ། །དབུས་སུ་མིང་ནི་སྦྱར་བར་བྱ། །ཕྱག་རྒྱ་འདི་ཡིས་དངོས་གྲུབ་ཆེ། །བྱང་ཆུབ་སེམས་ནི་རབ་བསྒྲུབས་པ། །འདི་ཡིས་བྱིན་གྱིས་བརླབས་མ་ཐག །བདུད་

རྩིའི་མཆོག་ནི་ཆུད་པར་འགྱུར། །ཐམས་ཅད་འདོད་པ་ལྡན་བྱས་ན། །དེ་སྟེ་ཐམས་ཅད་སེམས་ཀྱང་རུང་། །བདེ་བ་ཆེན་པོས་སེམས་ཐམས་ཅད། །སྔགས་མཁན་རེག་པའི་རྒྱས་བཏབ་ན། །འདི་ཡིས་རྡོ་རྗེ་འཛིན་ཉིད་དང་། །རྡོ་རྗེ་དཔའ་བོ་ཉིད་དུ་ཡང་། །ལྷ་མོའི་ཕྱག་རྒྱས་བྱིན་བརླབས་པ། །སྐད་ཅིག་ཏུ་ནི་འཐོབ་པར་འགྱུར། །ལྷ་མོ་རྣམས་དང་གར་བྱེད་ཅིང་། །དེ་ནི་རབ་དགྱེས་བདག་པོ་ཁྲིད། །ཕོ་བྲང་དགའ་བྱེད་རབ་དགྱེས་ཆེ། །རབ་ཏུ་ཆེན་པོ་བདེ་འཐོབ་ཏུ། །སེང་གེའི་གདན་རབ་འཇོག་བྱེད་དོ། །བཞི་དང་བཞི་ཡི་མཆོག་ཉིད་ཀྱི། །རྡོ་རྗེ་པདྨོ་སྦྱོར་བ་ཡིས། །དེ་ནི་ཁྲིད་ནས་དབང་བསྐུར་རོ། །དེ་ནས་རྫོགས་སངས་ཚེ་དཔག་མེད། །བྱང་ཆུབ་སེམས་དཔའ་བརྩོན་འགྲུས་ཆེ། །ཡོད་དང་མེད་པའི་འདོད་སྤངས་པ། །དེ་ལ་ཕྱག་ནི་བྱེད་པར་འགྱུར། །རྡོ་རྗེ་སེམས་མཆོག་འཇོག་བྱེད་དེ། །རང་གི་སྤྱོད་པའི་ཚུལ་གྱིས་ནི། །ཕ་རོལ་ཕྱིན་པ་ཐམས་ཅད་དང་། །སངས་རྒྱས་ཀུན་གྱིས་མདུན་དུ་བསྐོར། །ས་གསུམ་ཐམས་ཅད་ཀུན་ཏུ་ནི། །སེམས་དཔའ་ཆེན་པོས་སྟོན་བྱེད་པ། །རེས་འགའ་ཤིན་ཏུ་དགའ་སྤྱོད་པ། །རེས་འགའ་ཁབ་ནས་འབྱུང་བ་དང་། །རེས་འགའ་བྱང་ཆུབ་རེས་འགའ་ལྷུམས། །རེས་འགའ་སྐྱེ་དང་རེས་འགའ་འཕོ། །རེས་འགའ་སྤྱོད་ཆེན་རོལ་པ་དང་། །རེས་འགའ་བདུད་ལས་རྒྱལ་བར་མཛད། །རེས་འགའ་བྱང་ཆུབ་མངོན་བྱང་ཆུབ། །རེས་འགའ་འཁོར་ལོ་སྐོར་མཛད་དེ། །རེས་འགའ་སྣ་ཚོགས་འཇུག་པར་མཛད། །རེས་འགའ་དུས་སུ་ཤིན་ཏུ་མཛེས། །རེས་འགའ་བུད་མེད་སྐྱེས་པ་དང་། །རེས་འགའ་ལྷ་དང་སྐྱེ་དགུའི་བདག །རེས་འགའ་འདོད་དབང་རྒྱལ་པོ་སྟེ། །རེས་འགའ་འདོད་ལ་རྒྱབ་ཀྱིས་ཕྱོགས། །རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་མཛད་དེ། །དེ་ལ་སོགས་པ་མཐའ་ཡས་པ། །ཕྱག་རྒྱ་འདི་ཡིས་རྒྱས་བཏབ་པ། །ཅི་དགར་དངོས་གྲུབ་འདོད་པ་ལ། །བདག་གིས་ངོ་བོར་སྟོན་པར་བྱེད། །མི་ཕྱེད་ཆོ་ག་སྦྱོར་བ་ཡིས། །འདྲེན་པ་མི་ཕྱེད་ཉེ་བྱས་ཏེ། །ཕན་ཚུན་རེག་པ་ཆེན་པོ་ཡིས། །རྡོ་རྗེ་ཅན་གྱིས་དེ་འབིགས་ཏེ། །གཟུངས་མ་མང་པོ་ཚོགས་ཀྱི་

རྣམས། །བདེ་བྱེད་ཆེན་པོ་གཞན་ཅི་སྨོས། །སྤྱོད་བཅས་མི་སྤྱོད་བདེ་དམ་པ། །འབད་པ་མི་དགོས་ཐོབ་པར་འགྱུར། །བརྗིད་པས་བྱང་ཆུབ་སྙིང་པོ་རུ། །རྟག་པ་རུ་ནི་གནས་འགྱུར་ཏེ། །ཕྱག་རྒྱ་འདི་ཡིས་རྣལ་འབྱོར་པ། །སྦྱོར་བ་རྗེས་སྡུད་ལྡན་པས་སོ། །ཐམས་ཅད་ཆ་ནི་རྣམ་བྲལ་བ། །བྱང་ཆུབ་སེམས་ནི་མཆོག་བཞིན་དེ། །ཡི་གེ་འདིས་ནི་སྦྱོར་བ་ཡིས། །བདག་ཉིད་ཆེན་པོར་དེ་འགྱུར་རོ། །རྡོ་རྗེ་ཤིན་ཏུ་དགྱེས་པ་ཆེན་མོ་ཚིམ་པའི་ཡིད་ལས་སྐྱེས་པ་དཔེ་མེད་པ་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ། ལས་ཐམས་ཅད་གྲུབ་པར་བྱེད་པའོ།། །།དང་པོར་ཨོཾ་ནི་སྦྱོར་བ་སྟེ། །ཐ་མར་གཉིས་པོ་རྫ་རྔའི་སྒྲ། །རབ་དགྱེས་རྡོ་རྗེ་བྱིན་རླབས་པའི། །ལྷ་མོ་དངར་བྱེད་དབུས་སུ་གཞག །འདི་ནི་སངས་རྒྱས་ཐམས་ཅད་ཀྱི། །རབ་དགྱེས་ཐོབ་པ་རྨོངས་བྱེད་མ། །རྡོ་རྗེ་ཡེ་ཤེས་ཐུགས་གནས་པ། །དངོས་གྲུབ་ཐམས་ཅད་བསྒྲུབ་པར་བྱ། །སྔགས་མཁན་ཡི་གེ་ཕྱག་རྒྱ་འདིས། །བདག་གམ་གཞན་ལ་རྒྱས་བཏབ་སྟེ། །རྡོ་རྗེ་འདམ་སྐྱེས་བཅུག་བྱས་ན། །དེ་ནས་དེ་མྱུར་དངོས་གྲུབ་བོ། །ཐམས་ཅད་ལས་བྱེད་དཔལ་དང་ལྡན། །ཚེ་དང་ལང་ཚོ་སྐལ་ལྡན་པའི། །རྡོ་རྗེ་འཛིན་དང་འདྲ་འཐོབ་སྟེ། །རྡོ་རྗེ་སེམས་དཔའ་རབ་ཏུ་འགྲུབ། །སངས་རྒྱས་རྣམས་དང་དཔའ་བོ་ཡི། །སངས་རྒྱས་ཀུན་དང་རྩེན་བྱེད་ཅིང་། །སྡེ་དབང་རྣམས་དང་ལྷ་རྣམས་ཀྱི། །འཕྲུལ་གྱི་བུད་མེད་འཕྲོག་བྱེད་དོ། །རྡོ་རྗེ་རབ་ཏུ་དགྱེས་པ་ཆེན་མོ་དངར་བྱེད་ཀུན་ཏུ་མྱང་བ་མེ་ཏོག་གི་རྒྱལ་མཚན་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ། སྒྲིབ་པ་ཐམས་ཅད་རྣམ་པར་སེལ་བ་ལས་ཐམས་ཅད་བྱེད་པ་ཆེན་མོ་གདོན་མི་ཟ་བའི་གཞན་གྱིས་མི་ཕྱེད་མའོ།། །།ཚངས་པའི་གསུང་གི་ང་རོར་བཅས། །ཐ་མར་དྲིལ་བུའི་ང་རོ་གཉིས། །དབུས་སུ་མིང་གི་ཕྲེང་བ་སྟེ། །ཡི་གེ་འདི་ནི་ཆུ་འཛིན་མཆོག །འདི་ནི་སངས་རྒྱས་ཐམས་ཅད་ཀྱི། །ཡིད་ཀྱི་དངོས་གྲུབ་ཐོབ་བྱེད་དེ། །འདོད་པ་ཡི་ནི་ཐམས་ཅད་རྣམས། །ཡི་གེ་སྐད་ཅིག་འགྲུབ་པར་བྱེད། །འདི་ཡིས་རྒྱས་བཏབ་བུད་མེད་རྣམས། །བདག་དང་རང་གི་སློབ་མའང་རུང་། །དེ་ཉིད་སྦྱོར་བས་

བསྟེན་བྱས་ན། །རྡོ་རྗེ་འཛིན་དཔལ་འདྲ་བར་འགྱུར། །རྣལ་འབྱོར་མ་རྣམས་བདག་པོར་ནི། །མྱུར་དུ་མཁའ་ལ་འགྲོ་བྱེད་དེ། །ཚངས་པ་གཏོགས་འདོད་དབང་ཆེན་དང་། །ལྷ་རྣམས་ཀྱིས་ནི་མཆོད་པར་འགྱུར། །ལྷ་མོའི་ཚོགས་དང་རྩེན་བྱེད་ཅིང་། །ལྷ་མོ་ཀུན་གྱི་བདག་པོར་འགྱུར། །འཕྲོག་བྱེད་ལ་སོགས་བདག་པོ་ཆེ། །འཇིགས་པར་བྱེད་དང་རྐུ་བྱེད་པ། །སེམས་ཅན་ཀུན་གྱི་མཆོག་དམ་པ། །སེམས་དཔའ་ཆེན་པོར་དེ་འགྱུར་རོ། །སྡུག་པའི་ཚོགས་ཀྱི་དབུས་སུ་ནི། །བརྗིད་ལ་སོགས་པའི་སྤྱོད་པས་འགྲོ། །བརྗིད་ཆེ་པདྨོ་ཆེན་མོ་ལ། །ཐམས་ཅད་ཀུན་ཏུ་བརྗིད་པ་ཡིས། །བདེ་བྱེད་ཆེན་པོ་མྱོང་བྱེད་དེ། །རབ་ཏུ་དགྱེས་པས་སྒེག་པ་བཞིན། །རབ་ཏུ་སྐལ་ལྡན་མགྲིན་འཁྱུད་པས། །རྣལ་འབྱོར་ཆེན་པོར་དེ་གནས་ཏེ། །འདི་ནི་སྙིང་ལ་བྲིས་པ་ཡིས། །ཅི་འདོད་པར་ནི་འདོད་པ་ཐོབ། །ཕྱག་རྒྱ་ཆུ་སྐྱེས་བཏབ་བྱས་ཏེ། །དེ་ལྟར་བྱས་ན་ཕྱག་རྒྱ་དགྱེས། །རྡོ་རྗེ་ཤིན་ཏུ་དགྱེས་པ་ཆེན་མོའི་དྲི་མ་མེད་པའི་མདོག་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ་ཐམས་ཅད་ལས་བྱེད་པ་དགེ་བའོ།། །།དང་པོ་ཉིད་དུ་ཨོྃ་བྱ་སྟེ། །ཐིག་ལེའི་རྒྱལ་པོས་ཉེ་བར་བརྒྱན། །ཚེག་དྲག་བཅས་པ་འདྲེན་པ་གཉིས། །ལྡན་པ་མཐའ་མར་གཞག་བྱས་ཏེ། །རྡོ་རྗེ་རབ་དགྱེས་བརྒྱན་བྱས་པ། །རྡོ་རྗེ་སྟོན་ཀ་དབུས་སུ་བསམ། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་སྣང་བ་རབ་སྒྲུབ་པ། །ཡི་གེ་ཡི་ནི་ཕྱག་རྒྱ་འདིས། །ཉིད་ཀྱི་སྙིང་གར་རྒྱས་བཏབ་ན། །སངས་རྒྱས་ཡེ་ཤེས་མཆོག་བྱེད་པ། །དེ་ཡིས་སྟོན་ཀ་མ་དངོས་གྲུབ། །སྡེ་དབང་ལྷར་བཅས་ལྷ་རྣམས་དང་། །གནོད་སྦྱིན་སྲིན་པོར་བཅས་པ་དང་། །སྦྲུལ་དང་མི་འམ་ཅི་གནས་པ། །ཐམས་ཅད་འདི་ཡི་གཡོག་ཏུ་འགྱུར། །འདི་ནི་འོད་ཟེར་རབ་ཏུ་འབར་བ་ཡིས། །སངས་རྒྱས་མཆོག་གི་ཐུགས་ལྡན་དེ་འགྲོ་སྟེ། །སྣ་ཚོགས་རབ་འབྱུང་དཔལ་གྱིས་ཡང་དག་ཁྱབ། །ཆོས་མཆོག་དམ་པ་བྱེད་པ་གཏོང་བྱེད་ཅིང་། །སྤྱོད་བཅས་མི་སྤྱོད་འཇིག་རྟེན་སྣང་བྱེད་དེ། །སྤྲིན་དང་བྲལ་བའི་ཟླ་བའི་འོད་མཆོག་བྱེད། །མཁའ་དབྱིངས་རྣམ་པར་བསྒྱིངས་པས་རབ་

དགའ་བས། །ཨཱ་ལི་ཀཱ་ལི་པདྨོ་བདེ་མཆོག་ལ། །མྱོང་ཞིང་མཆོག་བྱས་བསྐལ་པར་གནས་པར་འགྱུར། །འདི་ཡིས་སྡིག་པ་འཕྲོག་བྱེད་དེ། །འདི་ཡིས་མྱུར་དུ་དགའ་བར་འགྱུར། །འདིས་ནི་བདེ་བའི་ངོ་བོ་དེ། །འདི་ཡིས་དངོས་གྲུབ་གྲུབ་པར་འགྱུར། །སྐྱེ་བའི་སྡུག་བསྔལ་རྒྱབ་ཕྱོགས་པ། །ཚེ་འདི་ཉིད་ལ་ཐོབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཤིན་ཏུ་དགྱེས་པ་ཡེ་ཤེས་ཀྱི་སྣང་བ་དང་ལྡན་པ་ཞེས་བྱ་བའི་ཕྱག་རྒྱ་ཆེན་མོ་སྟེ་ཐམས་ཅད་མཁྱེན་པའི་ཡེ་ཤེས་འགྲུབ་པར་བྱེད་པའོ།། །།དང་པོ་ཨོྃ་དང་ཡང་དག་ལྡན། །ཐ་མར་དགྱེས་པའི་ཡི་གེ་གཉིས། །རྡོ་རྗེ་ཤིན་ཏུ་དགྱེས་པ་ཆེ། །དབུས་སུ་གསལ་བའི་ཡི་གེ་བསམ། །འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོའི་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །སྣ་ཚོགས་ཡེ་ཤེས་དངོས་གྲུབ་བོ། །སྔགས་མཁན་ཉིད་ཀྱིས་བྱིན་བརླབས་པ། །སྣ་ཚོགས་བདག་པོ་ཆེན་པོར་འགྱུར། །སྡིག་པའི་ཡན་ལག་ཀུན་སྤངས་ཏེ། །བསོད་ནམས་ཀུན་གྱི་ཡན་ལག་དགེ །ཀུན་ཏུ་འགྲོ་བའི་དངོས་གྲུབ་ནི། །འདི་ཉིད་ཀྱིས་ནི་རབ་ཏུ་འགྲུབ། །སྣ་ཚོགས་སྒྱུ་མའི་བདེ་ཆེན་གྱིས། །སྣ་ཚོགས་ཆེན་པོའི་བསྐལ་པར་གནས། །རྡོ་རྗེའི་བདག་ཉིད་བརྒྱན་པ་ཡི། །བུད་མེད་ཀུན་དང་རྩེན་པར་འགྱུར། །དེ་ནས་དེ་ཡི་ཆོས་དབྱིངས་གནས། །དབང་ཕྱུག་མཆོག་གི་དངོས་གྲུབ་བོ། །པདྨའི་མདུན་དུ་ཐོག་མའི་ལྷ། །བྱས་ཏེ་རྡོ་རྗེ་བསྒྲུབ་པར་བྱ། །མཐེ་བོང་སྲིན་ལག་དེ་ཕྱུང་སྟེ། །ཁ་ཡི་ནང་དུ་གཞག་པར་བྱ། །ཆང་བཞིན་མྱང་བར་བྱས་ན་ནི། །མོད་ལ་འདོད་པའི་གཟུགས་སུ་འགྱུར། །ཨཱ་ལི་ཀཱ་ལི་རབ་སྦྱོར་བས། །བུད་མེད་རྣམས་དང་རྩེན་པར་བྱེད། །བློ་ལྡན་རྡོ་རྗེ་སེམས་དཔའ་ཡི། །འདི་ནི་ཤིན་ཏུ་དགྱེས་ཞེས་བྱ། །བསིལ་བ་དགའ་བྱེད་ཆེན་མོ་སྟེ། །སྣ་ཚོགས་འདི་ནི་འགྲོ་ལ་གནས། །དང་པོ་ཨོཾ་ནི་གནས་པ་སྟེ། །ཏྲ་ཏ་དང་ལྡན་ཐ་མར་བྱ། །རྡོ་རྗེ་ཤིན་ཏུ་དགྱེས་ཆེ་ཧོ། །སྒེག་མོ་དབུས་སུ་བསྐུལ་བའོ། །འདི་ནི་སངས་རྒྱས་ཐམས་ཅད་ཀྱི། །སྒེག་པར་བྱ་བ་སྤྲུལ་པ་ཡིན། །འདི་དག་མཉམ་པར་སྦྱོར་བ་ཡིས། །སྒེག་མོས་ཡེ་ཤེས་བསྐྱེད་པར་བྱ། །

རྡོ་རྗེ་བློ་ལྡན་བརྟན་པོ་ཡིས། །བདེ་བར་འདོད་པའི་པདྨར་གཟུགས། །འདོད་པས་འདོད་པ་སྤྱད་པར་བྱ། །མྱུར་དུ་འདོད་པས་དངོས་གྲུབ་བོ། །དེ་ནས་རྡོ་རྗེ་འདོད་དཔལ་ཏེ། །བདེ་བྱེད་ཐམས་ཅད་ཉེ་བར་སྒྲུབ། །སེམས་ཅན་ཀུན་གྱིས་འདོད་བསྐྱེད་པ། །བདེ་བ་ཆེན་པོར་དེ་འགྱུར་རོ། །མཐུ་ཡིས་ཕ་རོལ་ཕྱིན་པའི་མཆོག །པདྨོའི་ཚུལ་དུ་སྒེག་པ་ཡིས། །རྡོ་རྗེ་སྦྱོར་ཐབས་ལ་གནས་པས། །རྡོ་རྗེ་ཆེན་པོ་དེ་དངོས་གྲུབ། །ཅི་དགའ་འདོད་པའི་འདོད་ཆགས་ཀྱིས། །རྟག་པའི་ལམ་དང་ཡང་དག་ལྡན། །རྟག་པའི་ཆོས་ཀྱིས་རྗེས་མཐུན་སྤྱོད། །བསྒྲུབས་ན་བརྟག་པ་རྟོགས་པར་འགྱུར། །འདི་ཡིས་ཀུན་ཏུ་བཟང་ཞེས་བྱ། །དེ་ནི་དངོས་པོ་ཀུན་ཡིན་ཏེ། །འདོད་པ་མེད་ཅིང་ཉོན་མོངས་མེད། །ང་རྒྱལ་མེད་ཅིང་འཛིན་མེད་པ། །སངས་རྒྱས་མཆོག་ཏུ་བརྟག་པ་ཡི། །སངས་རྒྱས་ཆེན་པོ་དེ་ཡི་དངོས། །དཔལ་ལྡན་ཐོག་མ་ཐ་མ་མེད། །ཆོས་རྣམས་ཀུན་གྱི་རྗེས་མཐུན་པའི། །འདིས་ནི་དངོས་པོ་ཐམས་ཅད་ཀྱི། །སངས་རྒྱས་བདག་པོར་བདག་ཉིད་འགྱུར། །སངས་རྒྱས་རྣམ་པར་སྣང་མཛད་དང་། །འདི་ལ་ཁྱད་པར་ཅུང་ཟད་མེད། །ཤིན་ཏུ་དགྱེས་པ་ཆེན་པོ་རྡོ་རྗེ་བདག་པོའི་དཔལ་ཤིན་ཏུ་དགྱེས་པ་སྒེག་མོ་དཔེ་མེད་པ་དང་ལྡན་པའི་ཡི་གེའི་མཆོག་གི་སྐུའོ།། །།དང་པོ་ཨོྃ་བཅས་ལྷ་མོ་ཡི། །ཐ་མར་ཚེག་དྲག་མི་ཕྱེད་གཉིས། །དེ་གཉིས་དབུས་ཀྱི་ཕྱོགས་ཉིད་དུ། །ཧེ་ཞེས་བྱ་བ་རྣམ་བརྒྱན་ཏེ། །ཤིན་ཏུ་དགྱེས་པ་རྡོ་རྗེ་ཆེ། །བཞད་པ་ཉིད་ནི་རབ་ཏུ་སྦྱར། །ཡི་གེ་ཡི་ནི་ཕྱག་རྒྱ་འདིས། །ཉིད་ཀྱི་སྙིང་ལ་རྒྱས་བཏབ་ན། །ཕྲེང་བའི་རྒྱན་གྱིས་རྣམ་བརྒྱན་པར། །དཔལ་ལྡན་དེ་མ་ཐག་ཏུ་འགྱུར། །ཡིད་ཀྱིས་ཇི་ལྟར་བསམས་པ་བཞིན། །དེ་ནི་སངས་རྒྱས་ཡུལ་དུ་འགྲོ། །དེ་ནི་དེ་ཕྱིར་སངས་རྒྱས་མཐོང་། །ཆུ་སྐྱེས་དེ་དང་རྩེན་པར་བྱེད། །དེ་ནས་འདུས་པ་དགྱེས་འགྱུར་ཏེ། །སངས་རྒྱས་ཡང་དག་ཞིང་ཉིད་ནས། །སངས་རྒྱས་རྣམས་ཀྱིས་བདེ་བ་ཆེ། །དངོས་གྲུབ་རྣལ་འབྱོར་དེ་ལ་སྦྱིན། །བྱེད་པ་དང་ནི་བཟློག་པ་དང་། །བདེ་བ་ཆེན་པོ་འཕྲོག་པ་ཡིས། །རྣལ་འབྱོར་གསང་བའི་དབང་ཕྱུག་ལ། །གསང་བ་ཆེན་པོས་མགུ་བར་བྱེད། །ཐབས་བཅས་

ཤེས་རབ་ཆེན་པོ་ལ། །རྒྱལ་བ་ཉིད་ཀྱིས་སྟོབས་བྱེད་དེ། །ཨཱ་ལི་ཀཱ་ལི་མཉམ་སྦྱོར་བས། །བདེ་བ་ཆེན་པོ་མགུ་བར་བྱེད། །བདེ་བ་ཐབས་ཀྱི་དངོས་གྲུབ་རྣམས། །སྒྱུ་མའི་ཚུལ་གྱིས་བསྒྲུབ་པར་བྱ། །ཡི་གེ་ཡི་ནི་ཕྱག་རྒྱ་འདིས། །ཤིན་ཏུ་དངོས་གྲུབ་མཆོག་ཏུ་བརྟག །རྡོ་རྗེ་ཤིན་ཏུ་དགྱེས་པའི་བདེ་བའི་ཕྲེང་བ་རྒྱས་པ་དཔེ་མེད་པ་དང་ལྡན་མ་ཞེས་བྱ་བའི་ཕྱག་རྒྱ་སྟེ། ལས་ཐམས་ཅད་ཀྱི་དོན་གྱི་དངོས་གྲུབ་སྦྱིན་པའོ།། །།ཨོྃ་ནི་དང་པོར་གཙུག་ཏོར་བྱ། །ཏེ་དེ་སྐད་སྙན་ཐ་མར་ཏེ། །དབུས་སུ་ཧེ་དགའ་ཞེས་བྱ་བ། །བདེ་ཆེན་དགའ་བ་རྡོ་རྗེ་དབྱངས། །རྡོ་རྗེ་ཤིན་ཏུ་དགྱེས་ཆེ་ཡི། །ཕྱག་རྒྱ་འདི་ནི་རབ་དགྱེས་འབྲེལ། །བྲིས་པ་དང་ནི་འཛིན་པ་དང་། །དྲན་པ་ཡིས་ཀྱང་དངོས་གྲུབ་སྟེར། །སྡིག་པ་ཀུན་ལས་གྲོལ་བྱེད་ཅིང་། །བསོད་ནམས་ཐམས་ཅད་ཉེ་བར་འགྲོ། །མི་དགེ་ཐམས་ཅད་མ་ལུས་སྤོང་བྱེད་ཅིང་། །སེམས་ནི་ཕྱག་རྒྱའི་ཡི་གེ་བརྒྱན་ཏེ་འགྲོ། །འཇིག་རྟེན་ཐམས་ཅད་ཀུན་ཏུ་བཀུར་སྟི་བྱེད། །རིག་མ་སྟོང་གིས་མངོན་པར་མཆོད་བྱེད་ཅིང་། །རིག་འཛིན་མུ་སྨན་བུད་མེད་རྣམས་ཀྱིས་ནི། །གཡག་རྔ་དཀར་པོའི་ཚོགས་ཀྱིས་གཡོབ་བྱེད་པའི། །འཇིག་རྟེན་དབང་པོ་བདེ་མཆོག་འབྲེལ་བ་འཐོབ། །བློ་ལྡན་ནམ་མཁའ་ངོས་ནི་ཐམས་ཅད་དུ། །རྡོ་རྗེ་འཛིན་གྱི་དགྱེས་པའི་རྣལ་འབྱོར་མ། །ཡིད་དུ་འོང་བའི་སྤྱན་ནི་རྒྱས་པ་དང་། །རྣལ་འབྱོར་སྤྱོད་པའི་བདེ་བས་འབིགས་པ་ཡིས། །མགུལ་ནས་འཁྱུད་པའི་རྩེན་པས་རོལ་པར་བྱེད། །པི་ཝང་གླིང་བུ་ཡ་མཚན་སྒྲ་སྙན་གྱིས། །གླུ་བླངས་དངོས་གྲུབ་རྒྱ་ཆེ་ཐོབ་པར་བྱེད། །ཇི་སྙེད་ཡིད་དུ་འོང་བའི་གླུ་དག་ནི། །འཇིག་རྟེན་གྲགས་པའི་བདེ་བའི་བདེ་བ་དག །བདེ་བའི་སྒྲ་ཡིས་བསྐྱེད་པར་རྣམ་བསྒྱུར་བའི། །དེ་དང་མཐུན་པའི་དབྱངས་འདིས་སྒྲུབ་པར་བྱེད། །ཁ་ཊ་བ་ད་གར་ཛའི་དབྱངས། །གླུ་རུ་བླངས་པས་པདྨ་གནས། །དངོས་གྲུབ་མྱུར་དུ་འཐོབ་པར་བྱེད། །འདི་ཡིས་བྱིན་རླབས་དག་པ་དང་། །འདི་ཡིས་བྱིན་རླབས་བདེ་བའི་རྣམས། །སྦྱོར་བ་འདི་ཡིས་སྦྱར་བ་ཡིས། །འདོད་བྱེད་ཐམས་ཅད་འཐོབ་པར་འགྱུར། །ཤིན་ཏུ་དགྱེས་པ་ཆེན་

པོ་རྡོ་རྗེ་སེམས་དཔའ་མཆོག་ཏུ་དགྱེས་པ་ཆེན་མོའི་དབྱངས་དཔེ་མེད་པ་དང་ལྡན་པའི་ཡི་གེའི་ཕྱག་རྒྱའོ།། །།དེ་བཞིན་ཨོྃ་ནི་དང་པོར་ཏེ། །དབུས་སུ་ཧེ་དགྱེས་བདེ་བ་ཆེ། །རྡོ་རྗེ་གར་བྱེད་བདེ་བ་གཉིས། །འདི་ནི་ཐམས་ཅད་བདེ་བྱེད་དེ། །སངས་རྒྱས་རྣམས་ཀྱིས་རབ་དགྱེས་ཉིད། །རྣལ་འབྱོར་ཡིས་ནི་རྒྱས་བཏབ་ན། །བདེ་དང་ལྡན་པར་བྱེད་ཅིང་འགྲོ། །འོག་མིན་གྱི་ནི་གནས་ཆེན་དུ། །སངས་རྒྱས་རྣམས་དང་ཐབས་ཅིག་འགྲོགས། །བདེ་བྱེད་ཆེན་པོའི་དབང་ཆེན་དང་། །ཆོས་ཀྱི་རྒྱལ་པོ་བདེ་ཆེན་ཐོབ། །ཇི་སྙེད་གར་གྱི་གཙུག་ལག་ལས། །སྒྱུར་བར་བྱེད་པ་ཤད་པ་དང་། །ཇི་སྙེད་དེ་སྙེད་ཕྱག་རྒྱའི་རྣམས། །གཉིས་མིན་འདུས་པས་འདི་དངོས་གྲུབ། །ཀྱེ་མའོ་དགྱེས་པ་བདེ་བྱེད་ཆེ། །ཀྱེ་མའོ་བདེ་བ་བདེ་ཆེན་པོ། །ཀྱེ་མའོ་འདོད་པ་འདོད་ཆགས་ཆེ། །ཀྱེ་མའོ་སྣ་ཚོགས་བདག་ཉིད་ཆེ། །དེ་ལ་སོགས་པ་ཚད་མེད་པ། །འཇིག་རྟེན་གྱི་ནི་ཡོ་བྱད་རྣམས། །པདྨོ་གསལ་བ་གར་གྱིས་ནི། །རྣལ་འབྱོར་གར་བྱས་དངོས་གྲུབ་བོ། །སངས་རྒྱས་ཀུན་གྱི་ཕྱག་རྒྱ་འདི། །སྣ་ཚོགས་གར་ནི་སྟོན་བྱེད་པས། །མྱུར་དུ་གར་ནི་མང་བྱས་པས། །གར་གྱི་གཙུག་ལག་དངོས་གྲུབ་བོ། །རྡོ་རྗེ་ཤིན་ཏུ་དགྱེས་པ་ཆེན་པོའི་དཔལ་བདེ་བ་ཆེན་པོ་དགའ་བྱེད་གར་ཞེས་བྱ་བའི་ཡི་གེ་ཕྱག་རྒྱ་ཕན་ཚུན་བཅུ་པ་རྒྱལ་མཚན་དང་བ་དན་གསུམ་པའོ།། །།བཅུ་གསུམ་ཡི་གེ་དང་པོ་ཉིད། །རྡོ་རྗེ་ཤིན་ཏུ་དགྱེས་པ་ཆེ། །རྡོ་རྗེའི་སྐུ་ནི་སྣ་ཚོགས་ཆེ། །ཐ་མར་འབར་དང་འདྲ་བའི་ཛ། །ནམ་མཁར་ཟླ་སྐར་འདྲ་བ་ཡི། །ཕྱག་རྒྱའི་ཡེ་ཤེས་རྨད་བྱུང་བའི། །འདི་ཡིས་ཐབས་ཀྱིས་མཉམ་གཞག་སྟེ། །གཟུང་བ་གསལ་བར་གཟུང་བ་ཡི། །ཚ་བའི་གསེར་གྱིས་གཟི་བརྗིད་འཛིན། །ཡེ་ཤེས་སྙིང་གར་བསམ་པར་བྱ། །ནམ་མཁའ་ཉི་མ་བུམ་འདྲ་བར། །དེ་ནི་དེ་མ་ཐག་ཏུ་འགྱུར། །འདི་ནི་སངས་རྒྱས་ཐམས་ཅད་ཉིད། །ཤིན་ཏུ་རྨད་བྱུང་ཐོབ་པར་འགྱུར། །རྣལ་འབྱོར་ཀུན་གྱི་བདེ་འབྲེལ་པ། །རྡོ་རྗེ་བློ་མཆོག་དངོས་གྲུབ་བོ། །སངས་རྒྱས་རྡོ་རྗེ་འཛིན་དགེ་ཡི། །སྣ་ཚོགས་ཆེན་པོ་ཐོབ་འགྱུར་ནས། །འདོད་པའི་ཆོས་ཀྱིས་མི་གོས་བློ། །འདོད་པ་ཆེན་པོ་སྟེན་པར་བྱེད། །

དེ་བཞིན་གཤེགས་པ་ཐམས་ཅད་ཀྱི་བདག་པོ་ཤིན་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའི་རྡོ་རྗེ་མ་ལུས་པ་ལུས་པ་མེད་པའི་རྡོ་རྗེའི་སྐུ་དཔེ་མེད་པ་དང་ལྡན་པ་ཞེས་བྱ་བའི་ཡི་གེ་ཆེན་པོའི་ཕྱག་རྒྱའོ།། །།དེ་བཞིན་ཨོྃ་ནི་གཞག་བྱ་སྟེ། །རྡོ་རྗེ་ཤིན་ཏུ་དགྱེས་པ་ཆེ། །རྡོ་རྗེའི་སྒྲ་ནི་བདེ་འབྲེལ་པ། །ཐ་མར་ཁྲོ་བཅས་སྦྱར་བར་བྱ། །ཕྱག་རྒྱ་འདི་ནི་བདེ་མཆོག་སྟེ། །བར་བཅད་པ་ཡང་ཐོས་པར་འགྱུར། །ཁམས་གསུམ་ངོ་བོ་ཐམས་ཅད་ནི། །སྒྲ་ཡི་ཐོས་པ་དངོས་གྲུབ་བོ། །འདི་ཡིས་སངས་རྒྱས་ཐམས་ཅད་ཉིད། །ཚེ་འདི་ཉིད་ལ་དངོས་གྲུབ་སྟེ། །བུད་མེད་པདྨོ་ཨུཏྤལ་དང་། །མ་ལུས་རྒྱལ་བ་རྣམས་དང་རྩེན། །རྡོ་རྗེ་པདྨར་སྦྱར་བས་ན། །དགའ་བྱེད་མྱུར་དུ་དངོས་གྲུབ་བོ། །རབ་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའི་ཚད་མེད་པའི་ཡོན་ཏན་གྱི་སྒྲ་དཔེ་མེད་པ་དང་ལྡན་པ་ཞེས་བྱ་བའི་དོན་གྱིས་དཔལ་ཐམས་ཅད་གྲུབ་པར་བྱེད་མའོ།། །།ཨོྃ་ནི་སྤྱི་གཙུག་ཐིག་ལེར་བབས། །རབ་དགྱེས་ཆེན་མོ་རྡོ་རྗེ་ཅན། །རྡོ་རྗེ་དྲི་བདེར་འབྲེལ་པ་ཡི། །ཐ་མར་གནས་ཤེས་རབ་སྦྱར་བྱ། །འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོ་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །སྣ་ཚོགས་ཡེ་ཤེས་གྲུབ་པར་འགྱུར། །བདག་ཉིད་རྡོ་རྗེ་བརྒྱན་པ་ཡི། །དེ་ནི་མཚན་ལྡན་ཀུན་དང་རྩེན། །དེ་ནས་ཆོས་དབྱིངས་གནས་པ་དེས། །ཨཱ་ལི་ཀཱ་ལི་མཉམ་སྦྱོར་བས། །དགའ་བྱེད་ལྷན་ཅིག་རྩེན་བྱས་ན། །དབང་ཕྱུག་དམ་པ་དངོས་གྲུབ་འགྱུར། །འདི་ནི་རྡོ་རྗེ་སེམས་དཔའ་ཡི། །བློ་ལྡན་རབ་ཏུ་དགྱེས་ཞེས་བྱ། །རྡོ་རྗེའི་དྲི་དཔེ་མེད་པ་དང་ལྡན་མ་ཞེས་བྱ་བའི་ཡི་གེའི་ཕྱག་རྒྱའོ།། །།ཨོྃ་མཆོག་གཙུག་ཏོར་རྣམས་བྱས་ཏེ། །ཤིན་ཏུ་དགྱེས་ཆེ་དབུས་ཉིད་དུ། །རྡོ་རྗེ་རོ་ནི་སྦྱོར་ཆེ་བ། །ཐ་མར་ཧེ་སྟེ་ཐིག་ལེ་གཉིས། །འདི་ཡིས་རབ་ཏུ་དགྱེས་པར་འགྱུར། །དཔལ་ལྡན་དཔེ་མེད་བདེ་བ་དང་། །བཅོམ་ལྡན་རྡོ་རྗེ་སེམས་དཔའ་ཉིད། །སྣ་ཚོགས་སྦྱོར་བ་སྣ་ཚོགས་བདག །སངས་རྒྱས་ཀུན་གྱི་རོལ་པ་ཡིས། །མཆོད་པ་མི་ཟད་བྱེད་པར་འགྱུར། །སངས་རྒྱས་རྣམས་ཀྱི་གནས་ཐམས་ཅད། །ནམ་མཁའ་མཉམ་པ་ཉིད་ཐོབ་བོ། །རབ་ཏུ་

དགྱེས་པའི་དབང་པོ་ཤིན་ཏུ་དགྱེས་པ་ཆེན་པོའི་རོ་མཆོག་གི་རྒྱལ་མཚན་དང་ལྡན་པ་ཞེས་བྱ་བ་སེམས་ཅན་ཐམས་ཅད་ཀྱི་དོན་ཐམས་ཅད་གྲུབ་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་ཟླ་གསང་ཐིག་ལེ་བཤད་པའི་རྒྱལ་པོ་ལས། ཆོས་ཀྱི་འཁོར་ལོ་སྟེ་གཉིས་པའོ།། །།དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའ་ཀུན་ཏུ་བཟང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཤིན་ཏུ་དགྱེས་པ་ཆེན་པོ་གདོན་མི་ཟ་བའི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་བཤད་ནས་ཅང་མི་གསུང་བར་གྱུར་ཏོ། །དེ་ནས་ནམ་མཁའི་དབྱིངས་ཐམས་ཅད་ཀྱི་རྡུལ་ཕྲན་དང་མཉམ་པའི་དེ་བཞིན་གཤེགས་པ་དེ་དག་ཐམས་ཅད་གསང་བའི་གཟུངས་དང་གཡོག་ཏུ་བཅས་པ་རྣམས་ཀྱིས་ཡོངས་སུ་བསྐོར་བ། བྱང་ཆུབ་སེམས་དཔའི་འཁོར་ཆེན་པོ་དང་བཅས་པ་རྣམས་ཀྱིས་མདུན་དུ་བྱས་པ་མ་ལུས་པ་ལུས་པ་མེད་པའི་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བའི་ཚོགས་དང་ལྡན་པ། ཕྱི་ནང་གི་ཕོ་ཉ་དང་ཕོ་ཉ་མོ་རབ་ཏུ་རྒྱས་པ་རྣམས་ཤིན་ཏུ་ངོ་མཚར་རྨད་དུ་གྱུར་ཏེ། དགྱེས་ཤིང་སྤྱན་ནི་རྒྱས་པ་ཡིས། །བཞེངས་ནས་དགྱེས་པ་ཆེན་པོ་ཡི། །བརྗིད་པའི་ཕྱག་གིས་གར་མཛད་ཅིང་། །ཐལ་མོ་སྦྱར་ནས་གཙུག་ཉིད་དུ། །བཞག་པ་ཡིས་ནི་འདུད་པ་བྱེད། །བསྐུལ་བ་ཡིས་ནི་དབྱངས་འདི་ཡིས། །དེ་དག་གཙོ་ལ་མཉེས་པར་བྱེད། །ཀྱེ་མའོ་ཆོས་ནི་ངོ་མཚར་ཆེ། །ཀྱེ་མའོ་སྤྱོད་པ་ངོ་མཚར་ཆེ། །ཀྱེ་མའོ་སྦས་པ་ངོ་མཚར་ཆེ། །ཀྱེ་མའོ་བདེ་བ་ཡང་དག་འབྱུང་། །ཀྱེ་མའོ་ཀུན་ཏུ་བཟང་པོའི་དོན། །ཀྱེ་མའོ་རབ་དགྱེས་ཡང་དག་འགྲོགས། །ཀྱེ་མའོ་བདེ་བ་དག་པ་ཆེ། །ཀྱེ་མའོ་བདེ་བ་བདེ་མཆོག་སྟེ། །ཀྱེ་མའོ་སྔགས་ཀྱི་ཡང་དག་སྦྱོར། །ཀྱེ་མའོ་སྙིང་པོ་ཡང་དག་བསྡུས། །ཀྱེ་མའོ་ཕྱག་རྒྱ་མཉམ་པར་བཞུགས། །ཀྱེ་མའོ་སྒྲུབ་པ་རྨད་འབྱུང་བའོ། །ཀྱེ་མའོ་ཕ་རོལ་ཕྱིན་མ་ཡིན། །ཀྱེ་མའོ་ཇི་ལྟར་མཐུར་རིག་མའི། །ཀྱེ་མའོ་སྣ་ཚོགས་དགོས་པ་ཆེ། །ཀྱེ་མའོ་དག་པ་གསུམ་སྦྱར་བ། །ཀྱེ་མའོ་རྡོ་རྗེ་མཉམ་སྦྱོར་བའི། །ཀྱེ་མའོ་པདྨ་རྣམ་བྱེ་བས། །ཀྱེ་མའོ་

དབང་པོ་གཉིས་སྦྱོར་བའོ། །ཀྱེ་མའོ་མཆོག་དང་མཉམ་པའོ། །ཀྱེ་མའོ་གར་ནི་དག་པ་ཆེ། །ཀྱེ་མའོ་གླུ་རབ་དྲི་མ་མེད། །ཀྱེ་མའོ་སིལ་སྙན་རྣམ་པར་འབྲེལ། །ཀྱེ་མའོ་བརྡབ་དང་མུན་པ་སེལ། །ཀྱེ་མའོ་དག་བྱེད་མེ་ཏོག་ཕྲེང་། །ཀྱེ་མའོ་སྤོས་སྣོད་དགེ་བ་སྟེ། །ཀྱེ་མའོ་མར་མེ་མུན་པ་སེལ། །ཀྱེ་མའོ་དྲི་ནི་ཤིན་ཏུ་བསིལ། །ཀྱེ་མའོ་རྣལ་འབྱོར་མཉམ་པར་སྦྱོར། །ཀྱེ་མའོ་སྒྱུར་བ་ནམ་མཁའ་འདྲ། །ཀྱེ་མའོ་སངས་རྒྱས་རྡོ་རྗེ་མཆོག །ཀྱེ་མའོ་རིན་ཆེན་བདེ་མཆོག་སྐྱེད། །ཀྱེ་མའོ་སྣ་ཚོགས་པད་མཆོག་ལྡན། །ཀྱེ་མའོ་སྣ་ཚོགས་སྒྱུ་མ་མཛད། །ཀྱེ་མའོ་ངོ་མཚར་སངས་རྒྱས་དང་། །ཀྱེ་མའོ་ངོ་མཚར་དཔའ་བོ་རྣམས། །ཀྱེ་མའོ་ངོ་མཚར་སེམས་དཔའ་རྣམས། །ཀྱེ་མའོ་ངོ་མཚར་ལྷ་ཡི་རྣམས། །ཤིན་ཏུ་དགྱེས་ཆེ་རྡོ་རྗེ་ལ། །རྒྱན་པ་ཀུན་གྱིས་བསྟོད་བྱས་ཏེ། །རྡོ་རྗེ་སེམས་དཔའི་འགྱིང་བ་ཡིས། །དགའ་དང་བདེ་བྱེད་སྐྱེས་པར་འགྱུར། །དེ་ནས་ཕ་རོལ་ཕྱིན་ཐམས་ཅད། །འཁོར་གྱི་དཀྱིལ་འཁོར་དགྱེས་འགྱུར་ཏེ། །སེམས་དཔའ་ཆེ་ལ་ཕྱག་བྱས་ནས། །མཆོག་གི་དབྱངས་ཀྱིས་སྟོད་པར་བྱེད། །ཆུ་སྐྱེས་ཞལ་ནི་འཛུམ་བཅས་པ། །ཡངས་པའི་སྤྱན་གྱིས་གར་མཛད་དེ། །ཕྱག་དང་ཞབས་ནི་བསྒྱུར་བ་ཡིས། །རབ་ཏུ་དགྱེས་ལྡན་སྨིན་མ་བསྒྱུར། །ཡིད་ཙམ་འཛུམ་པའི་སྤྱན་ཟུར་གཟིགས། །ཤ་རྒྱས་བརླ་ནི་ནུ་མར་མདུད། །རྐེད་པའི་དབྱིབས་ནི་རྣམ་པར་ཡངས། །སྣམས་ཀྱི་ངོས་ཀྱང་ཆེ་ལ་མཛེས། །ཆགས་པ་ཆུང་ཟད་ཚེམས་ཀྱིས་གནོན། །ཚེམས་ཀྱི་ཕྲེང་བ་ཀུནྡ་ཟླ། །མིག་དྲག་ཟློས་པའི་དབུགས་འབྱིན་ཅིང་། །ཨ་ལ་ལ་ལ་ཧོ། །དམ་ཚིག་རྗེས་སུ་ཆགས་པའི་བདག་ཉིད་སྡུག་བསྔལ་ཞི་མཛད་ཅིང་། །རབ་ཏུ་དགྱེས་ཆེ་དགྱེས་པར་བསྟོད། །བདེ་བས་བདེ་ལ་ལོངས་སྤྱོད་མཆོག་ཏུ་བདེ་བའི་རང་བཞིན་བསམ་གྱིས་མི་ཁྱབ་བསྟན། །དགོངས་པའི་དབང་དང་ལྡན་པས་འགྲོ་བ་ཡ་མཚན་ཆེན་པོའི་སྒོ་ནས་འདུལ་མཛད་ཅིང་། །གསང་བའི་ཐིག་ལེ་འཇིག་རྟེན་གསུམ་པོ་འདིར་ནི་དངོས་གྲུབ་གཙོར་བསྟན་ཏེ། འཇིག་རྟེན་གསུམ་པོ་སྦྱང་བར་བྱ་བའི་ཆོས་དེ་བདེ་གཤེགས་དོན་དུ་མཛད། །ངོ་མཚར་ཡོན་ཏན་ལྡན་པ་དམ་ཚིག་བདེ་ལས་འབྱུང་། །བདེ་མཛོད་བདེ་སྤྱོད་དགའ་ལ་རོལ་པ་ཚུལ་བཞིན་

མཛོད། །ཐམས་ཅད་དགའ་བའི་ངང་ཉིད་ཐིག་ལེའི་དཀྱིལ་དུ་བསྐྱེད་མཛད་དེ། །བྱང་ཆུབ་སྙིང་པོ་འགྲོ་བའི་ལམ་འདི་བདེ་བར་བསྐུལ་ལ་བསྙེན་པ་མཛོད། །ངོ་མཚར་དེ་བཞིན་གཤེགས་པའི་དམ་ཚིག་རིག་པ་ཆེ་ལ་དགྱེས་ཤིང་བཞུགས། །བདག་ཅག་འདུ་ཤེས་རྣམས་དང་བྲལ་བ་ཉིད་ཀྱང་བཞུགས་སྤྱོད་འཛེམ་བཅས་པས། །ཚངས་པའི་རྒྱལ་པོ་དབང་དང་ལྡན་པས་ཀྱང་ནི་དེ་ལ་རག་ལུས་སོ། །ཨ་ལ་ལ་ལ་ཧོ། ཡངས་པའི་སྤྱན་ཅན་དྲངས་ཤིང་བཅུག་སྟེ་རོལ་པ་ཚུལ་བཞིན་མཛོད། །རྣམ་དག་ཡེ་ཤེས་ཆུ་དེས་འགྲོ་བ་རྣམས་ཀྱི་སྡིག་པ་ཁྲུས། །བྱམས་མའི་གཟུངས་མ་བདག་ཉིད་ཆེ་དང་རབ་ཏུ་བརྩོན་མཛོད་ལ། །ཐུགས་རྗེ་ཆེན་པོ་རང་བཞིན་དག་པའི་ཆུ་དེས་བདག་ཅག་དབང་སྐུར་ཅིག །མི་གཡོ་མཉམ་པ་ཉིད་ཀྱི་རང་བཞིན་ཡེ་ཤེས་ཐོབ་འདོད་ཕྱིར། །དམ་ཚིག་ཆེན་པོ་གསུམ་པོ་གསུམ་པོ་འདི་ལ་གནས་ནས་ནི། །ཟླ་གསང་ཐིག་ལེའི་དབྱིངས་སུ་བདག་ཅག་དོགས་མེད་འགྲོ་བར་བགྱི། །དབྱངས་ཀྱི་རྒྱལ་པོ་འདི་ཡིས་ནི། །ཤིན་ཏུ་སྲིད་པས་སྐྱོ་བ་ཡིས། །སངས་རྒྱས་ཀུན་ཀྱང་འདོད་པ་བཞིན། །གླུ་བླངས་མྱུར་དུ་བསྐུལ་བར་འགྱུར། །དེ་ནས་བཅོམ་ལྡན་འདས་ལ་དབྱངས་ཀྱི་རྒྱལ་པོ་འདིས་བསྟོད་པས་ཤིན་ཏུ་དགྱེས་ཏེ་དེ་བཞིན་གཤེགས་པ་དང་བྱང་ཆུབ་སེམས་དཔར་བཅས་པ་དང་། རྡོ་རྗེ་དང་རིན་པོ་ཆེ་དང་། པདྨོ་དང་ལས་ཀྱི་རིགས་ཀྱི་བཙུན་མོ་དེ་དག་ཐམས་ཅད་ལ་རྡོ་རྗེ་ཤིན་ཏུ་དགྱེས་པའི་བདེ་བ་ཆེན་པོས་མཉེས་པར་མཛད་དེ། དེ་བཞིན་གཤེགས་པ་ཐམས་ཅད་དང་། རྣལ་འབྱོར་གྱི་དབང་ཕྱུག་ཆེན་པོའི་ཚོགས་རྣམས་དང་། བྱང་ཆུབ་སེམས་དཔར་བཅས་པ་དང་། ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་མའི་ཚོགས་སུ་བཅས་པ་རྣམས་དང་། ཕྱི་ནང་གི་རྡོ་རྗེའི་རིགས་ལས་སྐྱེས་པ་རྣམས་ལ་ཤིན་ཏུ་དགྱེས་པ་ཆེན་པོའི་གར་དང་དབྱངས་དང་། བརྡུང་བ་དང་ཞི་བའི་ཐལ་མོ་ལ་སོགས་པ་རྣམ་པར་མཛད་པ་ཆེན་པོས་རབ་ཏུ་མཛད་ནས། དམ་ཚིག་ཆེན་པོ་རྡོ་རྗེ་ཤིན་ཏུ་དགྱེས་པ་འདོད་པའི་དབང་མོ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བདེ་བར་ཅང་མི་གསུང་བར་གྱུར་ཏོ། །དེ་ནས་དེ་དག་ཀུན་དགྱེས་ནས། །ཤིན་ཏུ་དགྱེས་པ་ཉིད་བྱས་ཏེ། །ཐལ་མོ་སྦྱར་ནས་ས་སྟེང་དུ། །

པུས་མོའི་ལྷ་ང་བཙུགས་མཛད་དེ། །ཆོས་ཀྱི་ཕྱིར་ནི་གསོལ་བ་འདེབས། །དཀྱིལ་འཁོར་དམ་ཚིག་བདག་ཉིད་ལ། །བཅོམ་ལྡན་དགྱེས་པས་བཤད་དུ་གསོལ། །གང་གི་སེམས་ཅན་བདེ་ཉིད་ཀྱི། །བདེ་བས་དཀྱིལ་འཁོར་བསྒྲུབ་པར་བགྱི། །དེ་ནས་བཅོམ་ལྡན་འདས་དམ་ཚིག་འདོད་པ་ཉེ་བར་ལོངས་སྤྱོད་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཀྱིལ་འཁོར་མཛད་དོ། །ཕྱག་གཉིས་གར་དང་བཅས་པ་ཡིས། །མདུན་དུ་ཐལ་མོ་བཀན་པར་བྱ། །སོར་མོ་ཀུན་གྱི་རྩེ་མོ་ལ། །ཕ་རོལ་ཕྱིན་པའི་ཚོགས་རྣམས་བསམ། །དེ་དག་མིང་གི་བརྡ་ཡིས་ནི། །སོར་མོ་ཐམས་ཅད་བརྟག་པར་བྱ། །སྦོམ་པོ་ཕན་ཚུན་བསྣོལ་བྱས་ཏེ། །ཤེས་རབ་མཆོད་རྟེན་དུ་ནི་བརྟག །རྡོ་རྗེ་མཆོད་རྟེན་ཕྱིར་བྱས་ཏེ། །ལྷག་མ་འོད་བཞིན་སྤྲོ་བར་བྱ། །འདི་ནི་སངས་རྒྱས་ཐམས་ཅད་ཀྱི། །ཤེས་རབ་ཕ་རོལ་ཕྱིན་མ་དགེ། །གང་གིས་བཅིངས་པ་ཙམ་གྱིས་ཀྱང་། །སངས་རྒྱས་བྱང་ཆུབ་བྱིན་རློབ་བོ། །ཕྱག་རྒྱ་འདི་ཡིས་རྒྱས་བཏབ་པས། །རྟག་པའི་ཕོ་བྲང་འགྲོ་འོང་བྱེད། །སངས་རྒྱས་སྣང་མཛད་དཔལ་དང་ལྡན། །བཙོ་མའི་གསེར་གྱི་ཁ་དོག་འཛིན། །ཤེས་རབ་ལྡན་པས་སྦྱོར་བྱས་ན། །འདི་ཡིས་མྱུར་དུ་དངོས་གྲུབ་བོ། །སྐལ་ལྡན་འཕྲུལ་གྱི་བུ་མོ་ལ། །འདི་ཡིས་བྱིན་རླབས་གར་བྱས་ཏེ། །རྡོ་རྗེ་པདྨོར་གཞུག་བྱས་ནས། །སེམས་ནི་བཞུགས་པས་བསྒྲུབ་བྱས་ལ། །དེ་ནས་སེམས་དེ་བླང་བྱས་ཏེ། །བློ་ལྡན་དེ་ཡིས་བཏུང་བྱས་ཏེ། །གྲུབ་པ་གཟུངས་ཀྱི་དཀྱིལ་འཁོར་དུ། །ཡང་དག་དངོས་གྲུབ་འགྲོ་བར་བྱེད། །ཤེས་རབ་དང་ནི་འཕུལ་གྱི་འམ། །དེ་བཞིན་གཤེགས་པ་འཕྲུལ་བརྟག་འཐོབ། །སངས་རྒྱས་རྡོ་རྗེ་བློ་ལྡན་གྱིས། །ཀུན་ཏུ་འཕྲོག་པར་ཡོང་མི་ནུས། །ཤིན་ཏུ་དགྱེས་པ་ཀུན་ཏུ་ལོངས་སྤྱོད་པའི་བདེ་བ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་མའོ།། །།ཐལ་མོ་དེ་ཉིད་ཁྲོ་སྐྱེས་པ། །སྦོམ་པོ་སྐྱིལ་ཀྲུང་གཞག་བྱས་ཏེ། །སྣ་ཚོགས་ཕྲེང་བ་འབར་བྱེད་པ། །རྣལ་འབྱོར་གྱིས་ནི་ལྷག་མ་སྤྲོ། །འདི་ནི་རྡོ་རྗེ་ཐམས་ཅད་ཀྱི། །ཤེས་རབ་ཕ་རོལ་ཕྱིན་མ་གསལ། །ཕྱག་རྒྱ་འདི་ཡིས་རྒྱས་བཏབ་པས། །རྡོ་རྗེ་ཡེ་ཤེས་བླ་ན་མེད། །འདི་ཡིས་མྱུར་དུ་འཐོབ་པར་

འགྱུར། །ཕྱག་རྒྱ་འདི་ཡིས་རྒྱས་བཏབ་པས། །འདི་ནི་བཅིངས་པ་ཙམ་གྱིས་ཀྱང་། །རིང་དུ་སྡིག་པ་འཇིག་པར་བྱེད། །ཚེ་དང་དཔལ་དང་ཡེ་ཤེས་སྐལ། །རྡོ་རྗེ་འཛིན་གྱིས་ཐོབ་པར་འགྱུར། །འདི་ནི་དབང་བསྐུར་ཙམ་གྱིས་ཀྱང་། །རྡོ་རྗེ་འཛིན་རྗེར་དེ་འགྱུར་ཏེ། །རྡོ་རྗེ་དཀྱིལ་གྱིས་མཚན་བཏབ་པས། །ས་ཆེན་འོང་ཞིང་འགྲོ་བར་བྱེད། །འདི་ནི་དགའ་བྱེད་རྡོ་རྗེ་རིགས། །རྡོ་རྗེ་བུད་མེད་འགྲོགས་པ་དང་། །རྡོ་རྗེ་གཟུངས་ཀྱི་དཀྱིལ་འཁོར་དུ། །རྡོ་རྗེ་སེམས་ཉིད་འཐོབ་པར་འགྱུར། །ཇི་ལྟར་དངོས་གྲུབ་འདུག་པ་དང་། །སངས་རྒྱས་རྡོ་རྗེ་དཔའ་བོ་རྣམས། །སྐད་ཅིག་གཅིག་གིས་འདྲེན་པར་བྱེད། །བསྒྲལ་དང་མཉེས་པར་བྱ་བ་དང་། །རྒྱས་བཏབ་དེ་བཞིན་རྨོངས་པ་དང་། །གསོ་བར་བྱེད་དང་ཟ་བ་དང་། །ཕན་ཚུན་དུ་ནི་སྐྱེད་པར་བྱེད། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་དབང་བསྐུར་བ་རྡོ་རྗེའི་ཕྲེང་བ་ཞེས་བྱ་བ་ཤིན་ཏུ་དགྱེས་པ་བདེ་བ་ཐོབ་པར་བྱེད་པ་དཔེ་མེད་པའི་རྡོ་རྗེར་བྱེད་པའི་ཕྱག་རྒྱའོ།། །།རྡོ་རྗེའི་ཐལ་མོ་དེ་ཉིད་ལས། །ཁྲོ་མོ་རྒྱབ་ནི་བསྐུམ་བྱས་ཏེ། །སོར་མོ་ལྷག་མ་སྔ་མ་བཞིན། །ཕྱག་རྒྱ་འདི་ནི་དབང་བསྐུར་བའོ། །རིམས་དང་གདོན་དང་དུག་ལ་སོགས། །དེ་མ་ཐག་ཏུ་འཕྲོག་པར་བྱེད། །འདི་ནི་བཅིངས་པ་ཙམ་གྱིས་ཀྱང་། །སངས་རྒྱས་ཀྱི་ནི་དགྱེས་པ་ཐོབ། །འདི་ཉིད་ཀྱི་ནི་དབང་སྐུར་དང་། །འདི་ཉིད་ཀྱིས་ནི་བདེ་དམ་པ། །འདི་ཉིད་ཀྱིས་ནི་རྒྱལ་པོ་ཆེ། །འདི་ཉིད་ཀྱིས་ནི་དཔལ་དམ་པ། །འདི་ཡིས་རྩེན་པ་བྱས་པ་ཡིས། །རབ་དགའ་འགུགས་པ་དངོས་གྲུབ་བོ། །མི་ལ་འདི་ཡིས་བྱིན་བརླབས་ཏེ། །ཉི་མ་ཕྱེད་ན་སྤྱད་བྱས་ན། །འདི་ནི་དེ་མ་ཐག་ཏུ་ཡང་། །དཔལ་ལྡན་རྡོ་རྗེ་གཟི་བརྗིད་འཛིན། །ཉི་མ་བཅུ་གཉིས་འོད་འདྲར་འགྱུར། །ཞག་བདུན་གྱིས་འགྱུར་གཞན་གྱིས་མིན། །སངས་རྒྱས་ཀུན་གྱིས་འདུལ་བ་དང་། །དགེ་བ་ཐམས་ཅད་དབང་དུ་བྱེད། །གྲོལ་འདོད་རྣམས་ཀྱི་མུན་པ་སེལ། །བློ་ལྡན་ཕྱག་རྒྱ་མཆོག་ཏུ་འགྱུར། །དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་གཟི་བརྗིད་དཔེ་མེད་པ་དང་ལྡན་པའི་ཕྲེང་བ་ཞེས་བྱ་བ་བ་དན་གསུམ་པའི་འཇིག་རྟེན་གསུམ་དུ་བདེ་བ་ཆེན་པོ་ཐོབ་པར་བྱེད་པའི་དམ་ཚིག་གི་ཕྱག་རྒྱ་ཆེན་པོའོ།། །།ཕ་རོལ་ཕྱིན་པའི་ཕྱག་རྒྱ་ཉིད། །དགེ་བའི་ཁྲོ་མོ་དང་བྲལ་བ། །ཕ་

རོལ་ཕྱིན་པའི་ཆོས་ཡིན་ཏེ། །ཚིག་དང་ཚིག་ཏུ་རྣམ་བྲལ་བའོ། །ཕྱག་རྒྱ་འདི་ནི་བཅིངས་པ་ཡིས། །ཆོས་ཀྱི་དབྱིངས་ནས་རྗེ་རུ་འགྱུར། །སངས་རྒྱས་ཀུན་གྱིས་དབང་བསྐུར་བས། །དབང་ཕྱུག་དམ་པ་དེ་འགྱུར་ཏེ། །ཐམས་ཅད་དག་པ་མོས་པ་ཡིས། །པདྨོ་དམར་པོ་མཆོག་འཛིན་འགྱུར། །པདྨོ་སྒྱུ་མ་རྣམ་མཛད་པས། །སྣ་ཚོགས་ཆེན་པོར་དེ་འགྱུར་རོ། །སྡུག་བསྔལ་ཐམས་ཅད་འཕྲོག་པར་བྱེད། །སེམས་ཅན་ཀུན་ལ་ཐམས་ཅད་སྦྱིན། །འདོད་ཆགས་ཆེན་པོ་ཉེས་སྤངས་ཏེ། །དེ་ནི་བདུད་རྩི་འདྲ་བར་འགྱུར། །འདི་ནི་མྱུར་དུ་གར་བྱས་པ། །བསྒྲུབ་པར་མི་བྱེད་ཅུང་ཟད་མེད། །འདི་ནི་པདྨོ་སྦྱོར་བ་ཡིས། །བདེ་མཆོག་རྟག་པ་ཐོབ་པར་འགྱུར། །ཤིན་ཏུ་དགྱེས་པ་ཆེན་པོའི་མྱོས་པར་བྱེད་པའི་དཔལ་པདྨོ་ཕྲེང་བ་ཞེས་བྱ་བ་ཐམས་ཅད་ཀྱི་དོན་དཔལ་ཤིན་ཏུ་དགྱེས་པར་བྱེད་པའི་ཕྱག་རྒྱའོ།། །།འདི་ཉིད་གཉིས་པའི་སྤྱི་གཙུག་ཏུ། །བསྒྱུར་ནས་གཞག་པར་བྱས་པ་ནི། །མ་ལུས་དྲི་མ་འཕྲོག་བྱེད་པ། །སྣ་ཚོགས་ཆེན་པོར་དེ་འགྱུར་རོ། །འདི་ཡིས་དབང་ནི་བསྐུར་མ་ཐག །ཁམས་གསུམ་སྣ་ཚོགས་བྱེད་པར་འགྱུར། །སྣ་ཚོགས་དབང་པོ་རྒྱལ་པོ་ཆེ། །སྣ་ཚོགས་གཟུགས་དང་སྣ་ཚོགས་བདག །སྒྲུབ་པ་ཐམས་ཅད་བདེ་དམ་པ། །འདོད་པ་ཀུན་གྱི་དབང་ཕྱུག་རྒྱལ། །འདོད་པའི་དོན་ཀུན་སྒྲུབ་བྱེད་པ། །ཐམས་ཅད་འདི་ཡིས་དངོས་གྲུབ་བོ། །བུད་མེད་འདི་ཡིས་བྱིན་རླབས་ནས། །སྔོ་བསངས་མཁུར་ཚོས་དཀར་མོ་དང་། །དེ་དང་ལྷན་ཅིག་གར་བྱས་པས། །སྣ་ཚོགས་བདག་པོ་ཆེན་པོར་འགྱུར། །སྔོ་བསངས་ཞིང་མ་ཕྲེང་མ་དག །བྱིན་གྱིས་བརླབས་ནས་དུས་གསུམ་དུ། །མཚན་གྱིས་མཐར་ནི་བསྙེན་བྱས་ནས། །ལས་ཀྱི་དངོས་གྲུབ་ཐོབ་པར་འགྱུར། །རིགས་ངན་ཅན་དང་སྨེ་མ་དང་། །གར་མཁན་དེ་བཞིན་གར་བྱེད་དག །ཕྱག་རྒྱ་ཡེ་ཤེས་བྱིན་བརླབས་ཏེ། །བསྙེན་དང་དངོས་གྲུབ་ཐོབ་པར་འགྱུར། །ཤིན་ཏུ་དགྱེས་པ་སྣ་ཚོགས་བདེ་བ་སྦྱིན་པར་བྱེད་པ་ཞེས་བྱ་བ་འདོད་པར་བྱེད་པ་ཐམས་ཅད་ཀྱི་མཆོག་སྒྲུབ་པར་བྱེད་པའི་ཕྱག་རྒྱའོ།། །།ཕྱག་རྒྱ་དེ་དག་བསྟེན་པའི་རྣམས། །གར་གྱི་ཚུལ་གྱིས་རང་གི་གནས། །དམ་ཚིག་མཆོག་གི་དམ་ཚིག་གིས། །དངོས་གྲུབ་ཆེན་པོའི་མཐུར་འགྱུར་

རོ། །ཐལ་མོ་དེ་ཉིད་སྦྱར་བྱས་ཏེ། །རྡོ་རྗེ་བཅིངས་པས་བཅིང་བར་བྱེད། །དེ་ནས་དགའ་བྱེད་དབང་བསྐྱེད་དེ། །མངའ་ཡི་ཚུལ་གྱིས་གཟུང་བར་བྱ། །འདི་ནི་རབ་དགྱེས་གཙོ་བོ་ཡིས། །ཕ་རོལ་ཕྱིན་མཆོག་སྡུག་པ་ཡིན། །སངས་རྒྱས་རྣམས་ཀྱི་མྱོས་བྱེད་པ། །དཔའ་བོ་རྣམས་ཀྱང་རྨོངས་པར་བྱེད། །འདི་ནི་བཅིངས་པ་ཙམ་གྱིས་ཀྱང་། །མི་ཤེས་བྱེད་པ་འཇིགས་པར་བྱེད། །ལས་ཀྱི་དོན་ནི་བཀའ་བཞིན་དུ། །དགའ་ནས་བྲན་བཞིན་བྱེད་པར་འགྱུར། །འདི་ཡིས་བྱིན་གྱིས་བརླབས་པ་ཡིས། །བདེ་ཆེན་རྒྱལ་པོ་འདྲ་བར་འགྱུར། །དགའ་དང་ལྷན་ཅིག་གར་བྱེད་ཅིང་། །འདོད་དབང་སར་ནི་འགྲོ་བར་བྱེད། །དཔལ་རྡོ་རྗེ་སེམས་དཔའ་ཤིན་ཏུ་དགྱེས་པ་ཀུན་ཏུ་བཟང་མོའི་དགྱེས་པ་ཆེན་མོའི་བདེ་བ་གཉིས་སུ་མེད་པ་དང་ལྡན་མ་ཞེས་བྱ་བ་སྦྱོར་བའི་ཕྱག་རྒྱ་ཆེན་པོའོ།། །།སྙིང་གར་གཟུང་བའི་སྦྱོར་བ་ཡིས། །འདི་ཡིས་ལས་ཀུན་བྱེད་འགྱུར་ཏེ། །བདུད་རྣམས་ཐམས་ཅད་འབིགས་པར་བྱེད། །རྒྱལ་བ་འདོད་ཆགས་བྲལ་སྤྱོད་པ། །བདེ་གཤེགས་མྱ་ངན་འདས་ཀུན་དང་། །ཐམས་ཅད་འདི་ཡིས་སློང་བར་བྱེད། །སངས་རྒྱས་ཐམས་ཅད་མཉེས་བྱས་ནས། །མྱུར་དུ་ལས་ལ་སྦྱོར་བར་བྱེད། །དབང་པོ་ཉེ་དབང་དབང་ཆེན་གྱི། །གདུག་པ་ཐམས་ཅད་འཇོམས་བྱེད་དེ། །འཇིགས་བྱེད་དྲག་པོ་ཆེན་པོ་ཡིས། །གདུག་པ་ཐམས་ཅད་གདུང་བར་བྱེད། །རྡོ་རྗེ་པདྨོར་བཅུག་པ་ཡིས། །མཆེ་བས་མ་མཆུ་བཟུང་བྱས་ཏེ། །སོར་མོ་ཕན་ཚུན་བསྣོལ་བ་ཡིས། །དཔུང་པ་བརྐྱང་སྟེ་གར་དུ་བྱ། །སྣ་ཚོགས་ཆེན་པོ་རབ་རྒྱས་པས། །བདེ་ཆེན་པོ་ཡི་བདེ་འཐོབ་བོ། །འདི་ནི་སངས་རྒྱས་ཐམས་ཅད་ཀྱི། །འདོད་དང་ཐར་བར་གྲུབ་བྱེད་དེ། །ཕྱག་རྒྱ་འདི་ཡིས་རྒྱས་བཏབ་ན། །འདོད་པ་བཞིན་དུ་འཕུར་བར་བྱེད། །རབ་དགྱེས་འབྲེལ་པས་གར་བྱས་ཤིང་། །ནམ་མཁའ་གཟུངས་མའི་ཐབས་ཉིད་ཀྱིས། །ཕན་ཚུན་གཅུ་བའི་གནོན་པ་ཡིས། །བཅིངས་ན་འདི་ཡིས་དངོས་གྲུབ་བོ། །དེ་ནི་དེ་མ་ཐག་ཏུ་ཡང་། །ལྷ་དང་ལྷ་མིན་མཆོད་བྱེད་དེ། །དབང་པོ་ཉེ་དབང་དབང་ཆེན་དང་། །ཉི་ཟླ་གཤིན་རྗེ་ཆུ་དབང་རྣམས། །སྤྱི་བོ་ཡིས་ནི་ཕྱག་བྱས་ནས། །

རང་གི་དཔལ་མཆོག་སྟོབས་བྱེད་དེ། །རྡོ་རྗེ་འཛིན་པ་ཐམས་ཅད་ཀྱང་། །ཉིད་ཀྱིས་དཔལ་ཅན་སྟོབས་པ་ཡིས། །བརྟན་པ་དེ་ལ་མགུ་བྱེད་ཅིང་། །སངས་རྒྱས་དགོས་པ་རབ་སྒྲུབ་བྱེད། །འདི་ཡིས་ལས་ཀྱི་ཚུལ་གྱི་རྣམས། །ལས་དང་རྗེས་སུ་མཐུན་འགྱུར་ཏེ། །རྣལ་འབྱོར་དབང་ཕྱུག་རྣམ་མཛད་པས། །སངས་རྒྱས་ཀུན་དང་མཉམ་སྦྱོར་ཏེ། །གཟུངས་དང་གཉིས་མེད་སྦྱོར་བ་ཡིས། །ཡིད་ལ་འདོད་པའི་ལས་ཀུན་བྱེད། །འཛུམ་དང་གནས་དང་སྦས་པ་དང་། །སྤྱོད་པས་གར་གྱིས་བྱས་པས་སོ། །གཞན་དག་ཀྱང་དེ་དངོས་གྲུབ་ཆེ། །པདྨོའི་འདབ་མ་རྣམས་ཕྱེ་བས། །བྱང་ཆུབ་སེམས་ནི་རབ་སྒྲུབ་པ། །སྒྲུབ་པ་པོས་ནི་པདྨོ་སྒྲུབ། །དེ་བཞིན་གཤེགས་པ་ཐམས་ཅད་ཀྱི། །བདེ་བ་གཉིས་སུ་མེད་པའི་དཔལ། །ཤིན་ཏུ་དགྱེས་པའི་པདྨོ་འདབ་མ་ཞེས་བྱ་བ་ཤིན་ཏུ་དགྱེས་པ་ཆེན་པོའི་བདེ་བ་ཐོབ་པར་བྱེད་པའོ།། །།ཐལ་མོ་དེ་ཉིད་བཅིངས་པ་ཡིན། །བཅིངས་པ་གྱེན་དུ་བཟུང་བྱས་ཏེ། །མཐེའུ་ཆུང་གཉིས་ནི་བསྒྲེང་བྱས་ཏེ། །དེ་བཞིན་སྦོམ་པོ་གཉིས་ཀྱང་བྱ། །ཕྱག་རྒྱ་འདི་ནི་ཆུ་སྲིན་ཞེས། །རྒྱལ་མཚན་ལྡན་པར་བཤད་པ་ཡིན། །རྡོ་རྗེ་སེམས་དཔའ་སྤྲུལ་པ་སྟེ། །འདོད་བྲལ་ཆགས་པར་བསྒྲུབ་པ་ཡིན། །ཕྱག་རྒྱ་འདི་ཡིས་བདེ་ལྡན་གྱི། །ཕོ་བྲང་ཆེན་པོར་འགྲོ་བར་བྱེད། །དེར་ཕྱིན་ཆོས་ཀྱི་འཁོར་ལོ་དག །བླ་མེད་པར་ནི་སྐོར་བར་བྱེད། །སངས་རྒྱས་ཕ་རོལ་ཕྱིན་མས་བསྐོར། །སྡིག་སྤངས་རྣམས་ནི་བཀུག་ནས་ཀྱང་། །སྤྱོད་པ་དྲག་པོའི་ཚུལ་གྱིས་ནི། །བསྐལ་པ་བྱེ་བར་བསྙེན་པར་བྱེད། །ཡང་དག་བྱང་ཆུབ་གནས་པ་ཡི། །སངས་རྒྱས་འདི་ཡིས་མཉེས་པར་བྱེད། །དེ་ནས་དགྱེས་ཏེ་སྣ་ཚོགས་ཆེ། །སྣ་ཚོགས་ཡེ་ཤེས་སྐྱེ་བ་ཡི། །རང་གི་དམ་ཚིག་གསུངས་པ་ཡི། །སེམས་དཔའ་ཆེན་པོ་སྒྲུབ་པར་བྱེད། །བླ་མེད་དངོས་གྲུབ་ཐམས་ཅད་ཀྱང་། །འདི་ཡིས་ཐམས་ཅད་འགྲུབ་པར་བྱེད། །སྦྱོར་དང་ལྡན་པས་བྱིན་རླབས་ཏེ། །སྙིང་གར་ཉེ་བར་བསམ་བྱས་ན། །ལས་ཀྱི་ངོ་བོ་ཚུལ་འདི་ཡིས། །ཐམས་ཅད་ལས་ནི་བྱེད་དུ་གཞུག །གར་དང་དབྱངས་ཀྱི་རོ་དགའ་དང་། །སིལ་སྙན་བརྡུང་བ་རྣམ་བྱེད་དང་། །པི་ཝང་གླིང་བུ་རྫ་རྔ་ཡི། །ཕྱག་རྒྱ་འདི་ཡིས་བསྒྲུབ་པར་བྱ། །དཔལ་རྡོ་རྗེ་ཤིན་ཏུ་དགྱེས་

པ་ཆེན་པོའི་ཐུགས་ཀྱི་དགྱེས་པ་དཔེ་མེད་པ་དང་ལྡན་མ་ཞེས་བྱ་བའི་ཕྱག་རྒྱའོ།། །།ཐལ་མོ་དེ་ཉིད་མཉམ་བཟུང་ནས། །འགྱིང་ཞིང་འགྱིང་བས་གར་བྱས་ཏེ། །བཅིང་བ་ཆེན་པོས་བཅིངས་བྱས་ནས། །སྦྱོང་བ་ཆེན་པོ་གཉིས་སུ་བྱ། །ཁུ་ཚུར་གཉིས་པོ་དཀུ་ཉིད་དུ། །གཡོན་དུ་འགྱིང་བས་བརྟན་པར་བྱ། །ཕྱག་རྒྱ་འདི་ནི་རྒྱལ་ལ་སོགས། །བདེ་བ་དམ་པས་མཆོད་བྱས་ཏེ། །འགྱིང་བའི་སྦྱོར་བས་གར་བྱས་ན། །དངོས་གྲུབ་ཐམས་ཅད་གྲུབ་པར་བྱེད། །འགྱིང་བ་ཙམ་གྱི་སྦྱོར་བ་ཡིས། །འགྱིང་བ་ཐམས་ཅད་འཕྲོག་པར་བྱེད། །ལྷ་དང་ལྷ་མིན་རིག་མ་ཡིས། །འབུམ་ཕྲག་བརྒྱ་ཡིས་མཆོད་པར་བྱེད། །རབ་ཏུ་དགྱེས་པ་བདེ་མཆོག་ཆེ། །ཀུན་ཏུ་གར་བྱས་གནས་པར་འགྱུར། །ཀླུ་མོ་ལྷ་དང་ལྷ་མིན་དང་། །དེ་བཞིན་མིའམ་བདག་པོར་འགྱུར། །ནམ་མཁར་འགྲོ་མའི་ཁྱོར་འགྱུར་ཏེ། །རྣལ་འབྱོར་མ་ཀུན་བདེ་བ་ཆེ། །གཟུངས་མ་རྣམས་ཀྱི་དག་པ་བདག །གསང་བ་ཕ་རོལ་ཕྱིན་པའི་རྗེ། །ལས་ཀྱི་སྦྱོར་བ་འདི་ཡིས་ནི། །ཐམས་ཅད་ལས་ནི་བྱེད་པར་བཤད། །སངས་རྒྱས་ཀུན་གྱི་གསང་བ་ཆེ། །གསང་ཆེན་སྦྱོར་བས་དངོས་གྲུབ་བོ། །དཔལ་ཤིན་ཏུ་དགྱེས་པ་བདེ་བ་ཆེན་མོ་སེམས་ཅན་ཐམས་ཅད་སྒྲོལ་བར་སྦས་པ་ཞེས་བྱ་བའི་ཕྱག་རྒྱ་ཐམས་ཅད་འགྲུབ་པའོ།། །།ཕྱག་རྒྱ་དེ་ཉིད་མཉམ་བཟུང་སྟེ། །ལག་པའི་འདབ་མ་གར་དང་བཅས། །མྱུར་བར་སྟེང་དུ་དོར་བ་ཡིས། །མགྱོགས་སུ་འགྲོ་བ་དངོས་གྲུབ་བོ། །འདི་ཡིས་སངས་རྒྱས་ཐམས་ཅད་ཀྱི། །རྨད་འབྱུང་དམ་པ་མཆོད་བྱས་པ། །སྦྱོར་བ་གར་གྱིས་མཆོད་བྱས་ན། །ཐམས་ཅད་ལས་བྱེད་དངོས་གྲུབ་བོ། །གང་དག་དངོས་གྲུབ་མེད་པ་དང་། །གང་དག་བདེ་བ་མེད་པའི་རྣམས། །དེ་དག་ཕྱག་རྒྱ་འདིས་བཏབ་ན། །ནམ་མཁའི་དཀྱིལ་འཁོར་འགྲོ་བར་འགྱུར། །དེ་ཡིས་ཐམས་ཅད་ལས་རྣམས་ནི། །རྨད་འབྱུང་དམ་པ་འགྲུབ་པར་བྱེད། །བཙུན་མོ་ཆེན་པོ་དེ་བཞིན་གཤེགས། །འདི་ཡིས་དེ་ནི་འགྲུབ་པར་བྱེད། །གཞན་ཡང་མཆོག་ཏུ་རྒྱ་ཆེ་བ། །མཉམ་དང་མི་མཉམ་ཆོས་ཀྱི་དབྱིངས། །བཙུན་མོ་དམ་པ་དེ་བཞིན་གཤེགས། །ཕྱག་རྒྱའི་སྦྱོར་བས་དངོས་གྲུབ་པོ། །དཔལ་བདེ་བ་ཆེན་པོ་རྡོ་རྗེ་རབ་ཏུ་དགྱེས་པའི་མེ་ཏོག་གི་ཕྲེང་བ་ཞེས་བྱ་བའི་ཕྱག་

རྒྱའོ།། །།དེ་ཉིད་འོག་གི་ངོས་སུ་དོར། །སྟེང་དུ་ཅུང་ཟད་བསྒྲུབ་པར་བྱ། །འདི་ཡིས་སངས་རྒྱས་ཐམས་ཅད་ཀྱི། །བདེ་མཆོག་ཡིད་ནི་ཚིམ་བྱེད་པ། །འདིས་ནི་བཅིངས་པ་ཙམ་གྱིས་ཀྱང་། །བདུད་རྣམས་ཤིན་ཏུ་རིང་བར་འགྱུར། །ཕྱག་རྒྱ་བཅིངས་ཏེ་བསྡིགས་པ་ཡིས། །སྐྲག་ནས་དངོས་གྲུབ་སྦྱིན་པར་བྱེད། །སངས་རྒྱས་དམ་ཚིག་གསུམ་གནས་པའི། །འདི་ཡིས་མཆོད་པ་བྱས་པར་འགྱུར། །དེ་ནས་གཙོ་བོ་འདིས་མཉེས་ནས། །མཆོག་གི་ཐབས་ནི་སྟོབས་པར་བྱེད། །ཕྱག་རྒྱ་བཅིངས་པ་སྦྱོར་བ་ཡིས། །འདི་ནི་ཐམས་ཅད་བྱེད་པར་འགྱུར། །རྒྱུན་དུ་བྱས་ན་རྣལ་འབྱོར་པ། །དགོས་པ་ཐམས་ཅད་བྱེད་པར་འགྱུར། །སྡིག་པ་ཐམས་ཅད་འཕྲོག་བྱེད་དེ། །བདེ་བ་དམ་པ་འཐོབ་བྱེད་ཅིང་། །ཚེ་འདི་དང་ནི་ཕ་རོལ་ཏུ། །ཕྱག་རྒྱའི་གནས་སུ་དེ་འགྲོའོ། །དཔལ་ཤིན་ཏུ་དགྱེས་པ་ཆེན་པོའི་བདེ་བ་ཚིམ་པར་བྱེད་པ་ཞེས་བྱ་བའི་ཕྱག་རྒྱ་སྟེ། དྲི་མ་ཐམས་ཅད་སྤོང་བ་དཔལ་ཤིན་ཏུ་དགྱེས་མའོ།། །།ཐལ་མོ་དེ་ཉིད་སྦོམ་པོ་བསྒྲེང་། །ལྷག་མ་གསལ་བའི་ཉི་མ་བཞིན། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་མཆོག་ཏུ་སྣང་བྱེད་པའོ། །ཐོག་མ་མེད་ནས་བསྐོར་བ་ཡི། །འདི་ཡིས་གཏི་མུག་འཕྲོག་བྱེད་དེ། །མཉམ་པར་བཞག་ནས་བཅིངས་མ་ཐག །སངས་རྒྱས་ཀུན་གྱིས་བྱིན་གྱིས་རློབ། །མཉམ་ཉིད་ཡེ་ཤེས་དྲི་མེད་དང་། །པདྨོ་དྲ་བ་དགའ་བ་ཆེ། །སྣ་ཚོགས་དྲ་བ་དཔལ་ཆེན་པོ། །བདེ་བྱེད་ཆེན་པོ་འཐོབ་པར་འགྱུར། །རྡོ་རྗེ་དགྱེས་པ་ཆེན་མོའི་དཔེ་མེད་པའི་དཔལ་དང་ལྡན་མ་ཞེས་བྱ་བའི་ཕྱག་རྒྱའོ།། །།གཡས་དང་གཡོན་པའི་ལག་པ་ཡིས། །བརྗིད་པའི་གར་གྱིས་གར་བྱ་ཞིང་། །ཐལ་མོ་དེ་ཉིད་མཉམ་སྦྱར་ཏེ། །གཡོན་གྱི་ཁུ་ཚུར་སྤྱི་བོར་གཞག །རྒྱལ་བ་རྣམས་ཀྱི་ཕྱག་རྒྱ་འདི། །མཆོད་པ་ཐམས་ཅད་གྲུབ་བྱེད་དོ། །ཐམས་ཅད་དོན་རྣམས་གྲུབ་པ་དགེ། །བཀྲ་ཤིས་རྒྱལ་བ་འཐོབ་པར་བྱེད། །གང་ཞིག་བཅིངས་པ་ཙམ་གྱིས་ཀྱང་། །མཆོད་པའི་སྤྲིན་ཉིད་རྒྱས་པ་ཆེ། །མཐའ་ཡས་དྲི་མེད་གཟི་བརྗིད་དང་། །སངས་རྒྱས་ཞིང་ནི་དངོས་གྲུབ་པོ། །ཕྱག་རྒྱ་སྦྱོར་བས་སྦྱར་བྱས་ཏེ། །སྐད་ཅིག་གཅིག་གིས་སྦྱར་བྱས་ན། །རྫོགས་སངས་རྒྱས་དང་སྲས་མཆོག་

དང་། །འདི་ཡིས་ཐམས་ཅད་འབབ་པར་འགྱུར། །སྣ་ཚོགས་ཀྱི་ནི་སྦྱོར་བ་ཡིས། །སྣ་ཚོགས་གར་གྱིས་གར་བྱས་ན། །དཔའ་བོ་ཐམས་ཅད་ཀུན་ཏུ་འགྲོ། །ཕུན་སུམ་ཚོགས་པ་འདིས་འགྲུབ་པོ། །དཔལ་ཤིན་ཏུ་དགྱེས་པ་ཆེན་པོ་བདེ་བའི་སེམས་འཕེལ་བར་བྱེད་མ་ཞེས་བྱ་བའི་ཕྱག་རྒྱའོ།། །།དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་པོ་དཔལ་ཀུན་ཏུ་བཟང་པོ་ཤིན་ཏུ་དགྱེས་པ་ཆེན་པོ་བདེ་བའི་བདག་ཉིད་རྣམ་པར་སྣང་མཛད་ཆེན་པོ་བཤད་པ་མཐས་ཀླས་པ་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་མཆོག་ཏུ་ཕ་རོལ་ཏུ་ཕྱིན་པ། གསང་བ་ཆེན་པོ་དམ་ཚིག་གི་ཕྱག་རྒྱའི་ཡེ་ཤེས་ཀྱི་དཀྱིལ་འཁོར་ཤིན་ཏུ་དགྱེས་པ་རྡོ་རྗེ་གདོན་མི་ཟ་བའི་དཀྱིལ་འཁོར་ཆེན་པོ་བསྐལ་པའི་མཐའ་ཀླས་པ་ཞེས་བྱ་བ་གསུམ་པ་རྫོགས་སོ།། །།དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་གསང་བའི་ཕ་རོལ་ཏུ་ཕྱིན་པའི་དམ་ཚིག་གི་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་འདི་བཤད་ནས་སླར་ཡང་བདེ་བར་ཅང་མི་གསུང་བར་གནས་པར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། ཕ་རོལ་ཏུ་ཕྱིན་མ་རྣལ་འབྱོར་མ་ཆེན་མོའི་ཚོགས་ཐམས་ཅད་དང་། ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་མའི་ཚོགས་ཐམས་ཅད་ངོ་མཚར་དུ་གྱུར་ནས་ཕྱི་ནང་གི་རྡོ་རྗེའི་རིགས་སུ་གཏོགས་པ་འཕྲོག་པར་བྱེད་པའི་ཚོགས་ཐམས་ཅད་ལ་སླར་དབུགས་ཕྱུང་སྟེ། དེ་ལས་བཞེངས་ནས་གར་མཛད་ཅིང་རབ་ཏུ་དགྱེས་པའི་སྤྱན་རྒྱས་པས་བཅོམ་ལྡན་འདས་ལ་ཡང་དང་ཡང་དུ་ལྟ་ཞིང་དབྱངས་ཀྱི་མཆོག་བདེ་བ་འདི་གླུ་བླངས་ཏེ་དགྱེས་པར་བྱེད་དོ། །རྣམ་མང་བདེ་བའི་རོལ་པས་བདག་ཉིད་ཆེན་པོ་ཡིས། །སྐྱེ་དང་མི་སྐྱེའི་ཆོས་ཉིད་ཡ་མཚན་རྨད་དག་དཔལ་བསྟན་པ། །ཤིན་ཏུ་བདེ་བའི་དཀྱིལ་འཁོར་འཇིག་རྟེན་འདིར་བྱུང་སྟེ། །རང་བཞིན་དག་པའི་གཟུངས་མའི་དཀྱིལ་ནས་བསྐྱེད་པར་མཛོད། །ངོ་མཚར་རྨད་དུ་བྱུང་བའི་ཆོས་ཉིད་བདེ་བས་རོལ་མཛད་ཅིང་། །བདུད་རྩིའི་རང་བཞིན་འདུས་པ་རྣམས་ལ་དབུགས་འབྱིན་ཅིང་། །གསང་བའི་ཐིག་ལེའི་དངོས་ཉིད་ནམ་མཁའ་འདྲ་བ་རྣམས་སྤྱད་དེ། །བདེ་བ་ཕུན་སུམ་ཚོགས་པའི་ལོངས་སྤྱོད་རྒྱུ་ལ་དབང་མཛད་པས། །བྱང་ཆུབ་མཆོག་གི་

ལམ་འདི་ཉོན་མོངས་མཐའ་དང་རྣམ་བྲལ་ཞིང་། །བདེ་བའི་འབྱུང་གནས་སྐྱེ་ཤི་མེད་པའི་སྒོ་མོར་པདྨོ་རྣམ་དག་པ། །ཉོན་མོངས་མི་གོས་སྒྱུ་མར་གནས་པ་ཆུ་ཟླའི་དཀྱིལ་འཁོར་བཞིན། །ཨེ་མའོ་ཀུན་ཏུ་བཟང་པོ་རིག་པ་རྒྱ་ཆེན་བསམ་གྱིས་མི་ཁྱབ་པ། །དངོས་ཉིད་མེད་པས་ཆོས་ལ་དགའ་བའི་རོལ་པས་གཟུངས་སུ་འགྱུར། །སངས་རྒྱས་ཀུན་གྱི་བདེ་མཆོག་བདུད་རྩི་རས་ཡན། །ཇི་ལྟར་བདེ་ལ་རྟེན་ཅིང་ཀུན་ཏུ་གནང་བར་མཛད། །ཀྱེ་མ་བདེ་མཆོག་བདེ་བས་རོལ་པ་ཚུལ་བཞིན་མཛོད། །སྡུག་བསྔལ་འགྲོ་བའི་ལས་ཅན་བདེ་བས་ཚིམ་པར་མཛོད། །བྱམས་པའི་སྤྱན་ཅན་ཐུགས་རྗེ་ཉི་མས་འགྲོ་བ་ཀུན་ལ་ཤར་མཛད་ནས། །གཏི་མུག་ཐིབས་པོའི་མུན་ནག་བྱང་ཆུབ་སེམས་ཀྱིས་གསལ་བར་སྟོན། །དེ་ནི་འདུས་པའི་ཚོགས་ལ་བདེ་སྦྱིན་རོལ་པའི་རྒྱལ་པོས་གསུངས། །བྱང་ཆུབ་མཆོག་གི་སེམས་དེས་སྙིང་པོ་མཆོག་ཏུ་དབང་བསྐུར་ཅིག །དབྱངས་ཀྱི་ཕྱག་རྒྱ་འདི་ཡིས་ནི། །སྐད་ཅིག་སྐད་ཅིག་བསྐུལ་བྱས་ན། །རབ་ཏུ་དགྱེས་པའི་བདག་ཉིད་ཀྱིས། །མདུན་དུ་གནས་ཏེ་དངོས་གྲུབ་སྦྱིན། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བའི་བདག་པོ་ཀུན་ཏུ་བཟང་པོ་ཆེན་པོ་རྡོ་རྗེ་ཟླ་གསང་ཐིག་ལེ་ཆེན་པོ་ལ། རྡོ་རྗེ་ནམ་མཁའ་ལ་འགྲོ་བ་གསང་བ་ཆེན་པོ་ཚད་མེད་པ་དང་། མཆོག་ཏུ་ཕ་རོལ་ཏུ་ཕྱིན་པའི་རྣལ་འབྱོར་དང་། རྣལ་འབྱོར་མའི་ཚོགས་ཆེན་མོ་དེ་རྣམས་ཀྱིས་བསྟོད་ཅིང་བསྐུལ་བ་བྱ་བ་དང་། གསང་བ་ཐམས་ཅད་ཀྱི་བདེ་བ་ཆེན་པོ་ཤིན་ཏུ་དགྱེས་པ་ལོངས་སྤྱོད་པའི་དཔལ་ཞེས་བྱ་བའི་ཏིང་ངེ་འཛིན་གྱི་རྒྱལ་པོ་འདི་ལ་སྙོམས་པར་ཞུགས་ནས། ཤིན་ཏུ་དགྱེས་པ་ཆེན་པོ་གདོན་མི་ཟ་བའི་དམ་ཚིག་ཅེས་བྱ་བ་རྣལ་འབྱོར་མའི་དཀྱིལ་འཁོར་ཆེན་པོ་འདི་རང་གི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་།། །།གྲུ་བཞི་པ་ལ་སྒོ་བཞི་པ། །རྟ་བབས་རྣམ་པ་བཞི་ཡིས་བརྒྱན། །དར་དང་དྲིལ་བུའི་ཆུན་པོ་དང་། །ཉི་མ་ཟླ་བས་རྣམ་པར་བརྒྱན། །རིན་ཆེན་མུ་ཏིག་འབྲས་བུས་སྤྲས། །དོ་ཤལ་གདུ་བུ་རྣམས་ཀྱིས་བརྒྱན། །སྣ་ཚོགས་གདུགས་ནི་རྣམ་བྲེས་པ། །སྣ་ཚོགས་ཕྲེང་བ་གོས་ཀྱིས་བརྒྱན། །སྲད་བུ་བཞི་དང་ལྡན་པ་སྟེ། །ཀ་བ་བརྒྱད་མཆོག་ཡང་དག་གནས། །དབུས་ཀྱི་དགའ་

བྱེད་སྟན་ལ་ནི། །དངུལ་ལ་སོགས་པས་རྣམ་པར་བརྒྱན། །སྣ་ཚོགས་པདྨོ་དར་གྱིས་གཡོགས། །ཐམས་ཅད་སྟན་དེ་དག་ཅེས་བྱ། །དབུས་སུ་རྡོ་རྗེ་ཤིན་ཏུ་དགྱེས། །སྟན་དེ་ལ་ནི་གཞག་པར་བྱ། །ཚད་མེད་པདྨོ་དམར་འདྲ་བའི། །སྣ་ཚོགས་རྒྱན་གྱིས་རྣམ་པར་བཀླུབས། །ཡིད་བཞིན་ནོར་བུ་དབུ་རྒྱན་ལྡན། །རིན་ཆེན་གཙུག་གིས་རྣམ་པར་མཛེས། །ཚད་མེད་དར་ནི་དཔྱངས་པ་ཡིས། །དབུ་ལ་ཆུ་བོས་མཛེས་པར་བྱ། །སྣ་ཚོགས་སངས་རྒྱས་ཀུན་གྱི་བདག །སྣ་ཚོགས་ཡེ་ཤེས་རབ་ཏུ་གནས། །ཆུ་སྐྱེས་སྤྱན་ནི་ཡིད་ཙམ་རྒྱས། །དགའ་བྱེད་ཡིད་ཙམ་གཡོན་དུ་འདུད། །གཡས་པའི་ཕྱག་གིས་རྡོ་རྗེ་ཆེ། །སྙིང་གར་གསོར་ལ་ཤིན་ཏུ་བརྩོན། །དེ་ལ་སོགས་པའི་ཡོན་ཏན་ལྡན། །ཐོག་མ་ཉིད་དུ་རྣམ་པར་གཞག །སློབ་མའམ་ཡང་ན་གཞན་ཡང་རུང་། །མཚན་ཀུན་གྱིས་ནི་རྣམ་བརྒྱན་པ། །ཚུལ་བཞིན་བྱིན་གྱིས་བརླབ་བྱ་སྟེ། །དབུས་ཀྱི་དཀྱིལ་དུ་གཞག་པར་བྱ། །བདག་ཉིད་ཀྱང་ནི་མཉམ་གཞག་སྟེ། །དེ་ལ་སོགས་པ་ཡོན་ཏན་གཙོ། །དབུས་ཀྱི་སྟན་ལ་འདུག་པ་ན། །བདག་ནི་རབ་དགྱེས་ཞེས་སུ་སྨྲ། །དེས་ནི་སློབ་མ་བྱིན་བརླབས་ཏེ། །ཐམས་ཅད་ལས་བྱེད་ཕུན་སུམ་ཚོགས། །རྡོ་རྗེ་པདྨོ་ལས་བྱུང་བའི། །གསང་བ་ཡིས་ཀྱང་དབང་བསྐུར་རོ། །རབ་དགྱེས་ལ་སོགས་ཡོན་ཏན་ལྡན། །ཡིད་འོང་བུ་མོ་བཙལ་བྱས་ཏེ། །མགྲིན་པ་དཔྲལ་བ་སྙིངསྤྱི་བོར། །ལྷ་ལ་སོགས་པའི་འབྲུ་བསྒོམས་ཏེ། །མཚན་མ་ཕྱག་རྒྱར་རབ་འབར་བ། །རྡོ་རྗེ་པདྨོར་མཉམ་སྦྱོར་བའི། །རང་ལ་འཁྱུད་པའི་ཕྱག་རྒྱ་ཡིས། །ཚུལ་བཞིན་ཐམས་ཅད་གཞག་པར་བྱ། །མདུན་དུ་ལྷ་མོ་སྨྱོ་བྱེད་མ། །མ་མཆུ་འཛིན་པས་རོ་ལ་དགྱེས། །དཀར་དམར་ཁ་དོག་འདྲེས་པ་ཡི། །ཐམས་ཅད་རྒྱན་དང་ཡང་དག་ལྡན། །ལོ་ནི་བཅུ་དྲུག་ལོན་པའི་མཆོག །ཤེས་རབ་ཅན་གྱིས་མདུན་དུ་གཞག །གཡས་སུ་ལྷ་མོ་གསོད་བྱེད་མ། །མཚོན་ཆའི་མདའ་ནི་འདྲེན་པར་བརྩོན། །དོ་ཤལ་རྐང་གདུབ་དག་གིས་བརྒྱན། །ལོ་གྲངས་ཉི་ཤུ་ལོན་པ་སྟེ། །གསེར་གྱི་རི་བོ་ཞུ་བ་འདྲ། །ཆུ་སྐྱེས་སྤྱན་ནི་ཡིད་ཙམ་སྔོ། །སེམས་དཔའ་ཆེ་ལ་དགྱེས་མཛད་ཅིང་། །འདི་ནི་ཚུལ་བཞིན་གཞག་པར་བྱ། །རྒྱབ་ཏུ་ལྷ་མོ་རྨོངས་བྱེད་མ། །པདྨ་

དམར་པོ་མདོག་གི་འོད། །ཆུ་སྲིན་རྒྱལ་མཚན་མཛེས་མའོ། །སྐུ་ཚེའི་ཚད་ནི་ཉི་ཤུ་གཅིག །དགའ་བྱེད་འདོད་པའི་རོ་ལ་དགྱེས། །སྣ་ཚོགས་ན་བཟའ་ཡང་དག་གསོལ། །སྣ་ཚོགས་རྒྱན་གྱིས་རྣམ་པར་བཀླུབས། །སྣ་ཚོགས་པདྨོ་སྦྱོར་ལ་སོགས། །གར་གྱི་བྱ་བ་རབ་བསླབས་གཞག །གཡོན་དུ་སྣ་ཚོགས་ཆེན་མོ་སྟེ། །སྣ་ཚོགས་དགོས་པའི་རྗེས་བསླབས་པ། །སྐུ་ཚེའི་ཚད་ནི་བཅུ་གཉིས་ལྡན། །རྣལ་འབྱོར་ལ་ནི་ཤིན་ཏུ་བརྩོན། །ལྷ་དང་ལྷ་མིན་མི་ཡི་རྣམས། །འགྲོ་བ་ཐམས་ཅད་མྱོས་འགྱུར་མ། །སྣ་ཚོགས་རྒྱན་གྱིས་རྣམ་པར་བཀླུབས། །སྣ་ཚོགས་དར་གྱི་ན་བཟའ་གསོལ། །གྲྭ་རྣམས་ཀྱི་ནི་ཐམས་ཅད་དུ། །གཟུགས་སྒྲ་དྲི་རོ་རེག་གི་རྣམས། །བདུག་པ་མེ་ཏོག་བསུང་ལྡན་པ། །གཟི་བརྗིད་ཆེན་པོ་འོད་དང་ལྡན། །ཅི་རིགས་པར་ནི་གཞག་པར་བྱ། །སྒོ་ཡི་ཕྱོགས་རྣམས་ཐམས་ཅད་དུ། །རང་གི་ལས་ཀྱི་ཕྱག་རྒྱར་ལྡན། །སྐལ་ལྡན་དགའ་ལ་རྣམ་མོས་པ། །སྒོ་སྲུང་བཞི་ནི་གཞག་པར་བྱ། །གཞན་ཡང་རྣམ་པ་སྣ་ཚོགས་རྣམས། །པི་ཝང་གླིང་བུ་བརྡབ་པ་དང་། །རྫ་རྔ་རྔ་ཆེན་མུ་ཀུ་དང་། །མུ་ར་ཛ་དང་ད་ར་དང་། །གར་དང་དབྱངས་དང་བཞད་པ་ཆེ། །རོལ་མོའི་ཡོ་བྱད་སྣ་ཚོགས་རྣམས། །དགའ་བྱེད་དཀྱིལ་འཁོར་གཞག་པར་བྱ། །ཕྱི་ཡི་དཀྱིལ་འཁོར་ཐམས་ཅད་དོ། །དཀྱིལ་འཁོར་འདི་ཡི་ཕྱི་རོལ་དུ། །རྡོ་རྗེ་ནམ་མཁར་འགྲོ་མ་གཞག །ཡི་དགས་རྒྱལ་པོ་ཡང་དག་ཞོན། །དཔའ་བོ་འཇིགས་བྱེད་གཟུགས་འཛིན་ཏེ། །སྐལ་ལྡན་རང་གི་ལག་ཆར་ལྡན། །གདུག་པའི་སེམས་ཀྱིས་སྡིགས་བྱེད་ཅིང་། །ཤ་ཁྲག་དང་ནི་རྒྱུ་མ་དང་། །རྐང་དང་ཚིལ་བུ་ཟ་སྤྱོད་པ། །དཀྱིལ་འཁོར་བྱས་ཏེ་འདུག་པ་ནི། །ཚོགས་ཀྱི་དཀྱིལ་འཁོར་གཞག་པར་བྱ། །དགའ་བར་བྱེད་དང་འདྲེན་པར་བྱེད། །གསོད་པར་བྱེད་དང་སྤྲོ་བར་བྱེད། །རྡོ་རྗེ་མཁའ་འགྲོ་ཚོགས་ཀྱི་རྣམས། །ཤར་གྱི་ཕྱོགས་སུ་གཞག་པར་བྱ། །གཟི་བརྗིད་ཆེ་དང་འབར་བྱེད་མ། །འཇིགས་བྱེད་བོང་བུ་ལྷོ་རུ་སྟེ། །གཙུག་ལག་མཐོང་བའི་རྒྱུ་ཡིས་ནི། །མཁས་པས་ཚུལ་བཞིན་གཞག་པར་བྱ། །ཆགས་ཆེན་མོ་དང་ཆགས་བྲལ་དང་། །འཁོར་ལོ་མོ་དང་རྒྱས་འདེབས་མོ། །རབ་ཏུ་སྦྱོར་

བས་སྦྱོར་བྱས་ཏེ། །ཅི་རིགས་ནུབ་ཏུ་གཞག་པར་བྱ། །སྣ་ཚོགས་ལུས་དང་བསྲུང་བ་དང་། །གནོད་སྦྱིན་མ་དང་ཡང་དག་འཕྲོག །སྔགས་དང་ཕྱག་རྒྱས་བྱིན་བརླབས་ཏེ། །སྔགས་མཁན་ཅི་རིགས་བྱང་དུ་གཞག །ཤར་གྱི་གྲྭ་རུ་གཞག་པ་ནི། །བྱ་རོག་གདོང་སྟེ་མིག་འདྲ་ཞིང་། །འཇིགས་པའི་མིག་དང་འཇིགས་པའི་གདོང་། །ཇི་ལྟར་རྗེས་སུ་མཐུན་བྱས་ཏེ། །ཡི་དགས་སྟན་ལ་ཡང་དག་འདུག །སྣ་ཚོགས་མཆོག་གི་མདོག་འཛིན་ཏེ། །ལག་པ་གྲི་དང་འཁར་གཞོང་ཐོགས། །མཆོག་ཏུ་ཤ་དང་ཁྲག་ཟ་བའོ། །ནུབ་དང་ལྷོ་ཡི་མཚམས་གཞག་པ། །བཞད་དང་འུག་པའི་གདོང་རིང་མ། །ཁྲོས་པའི་ཁྱི་དང་ཕག་གི་གདོང་། །གསུས་པོ་ཆེ་ལ་ལྟོ་འཕྱངས་མ། །ནུབ་བྱང་གི་ནི་མཚམས་དག་ཏུ། །རྔ་མོ་བོང་བུའི་གདོང་འཛིན་དང་། །ཁྲོས་པའི་ར་དང་བྱི་ལའི་གདོང་། །རྒྱུ་མའི་མགོ་ནས་ཟ་བྱེད་རྣམས། །ཤར་དང་བྱང་གི་མཚམས་དག་ཏུ། །ཀེང་རུས་དཀར་པོ་འཛིན་པ་སྟེ། །ཁྲོས་པ་རུས་པའི་ཕྲེང་བས་བཀླུབས། །ལྟོ་འཕྱངས་མོ་ལ་བུམ་པ་འཛིན། །ཕན་ཚུན་འཐབ་པར་བརྩོན་པ་ཡི། །ཅེ་སྤྱང་གི་ནི་འཁོར་གྱི་རྣམས། །འཇིགས་བྱེད་གདོང་ནི་མཆེ་བ་འབྱིན། །རྣམ་པར་འགྱུར་བས་གཟུགས་འཛིན་པའོ། །སྒོ་སྲུང་གི་ནི་ཕྱོགས་ཀུན་དུ། །སྒོ་བཞི་རྣམས་སུ་གཞག་བྱ་བ། །བྱང་གི་ཕྱོགས་སུ་འབོད་འགྲོགས་ཏེ། །བུམ་པའི་རྣ་ནི་ཤར་ཉིད་དུ། །ནུབ་ཏུ་རྣམ་པར་འཇིག་པའོ། །ལྷོར་ནི་གཤིན་རྗེའི་རྒྱལ་པོ་གཞག །དེ་དང་གཞན་ཡང་རྒྱལ་པོ་མཆོག །ནམ་མཁའ་འགྲོ་བས་ཀུན་ཏུ་བསྐོར། །བུམ་པ་རྣམ་པ་སྣ་ཚོགས་ཏེ། །གསེར་དང་དངུལ་ལས་བྱས་པ་ལ། །སྣ་ཚོགས་གོས་ཀྱིས་ཡང་དག་དཀྲིས། །མེ་ཏོག་འབྲས་བུ་རྣམས་ཀྱིས་བརྒྱན། །བདུད་རྩི་ལྔ་ཡིས་གང་བྱས་པ། །སྨན་ལྔ་དང་ནི་ཡང་དག་ལྡན། །རིན་ཆེན་ལྔ་དང་ལྡན་བྱས་པ། །འབྲུ་སྣ་ལྔ་ཡིས་བརྒྱན་བྱས་པའི། །བུམ་པ་བཅུ་དྲུག་གཞག་བྱས་ཏེ། །བཅུ་གཉིས་བརྒྱད་དམ་ཡང་ན་ཕྱེད། །ཐ་ན་ཆུང་ངུ་གཅིག་ཙམ་ཡང་། །ཇི་ལྟར་རིམ་བཞིན་གཞག་བྱས་ཏེ། །དབུས་སུ་བུམ་པ་རོ་ཡི་མཆོག །དམ་ཚིག་ཆུས་ནི་གང་བྱས་པ། །གསེར་རམ་དངུལ་ལམ་ཟངས་ཀྱང་རུང་། །ལྕགས་སམ་ས་ལས་བྱས་པ་ལ། །ཟླ་བ་ཉི་མ་དྲི་ཆུ་དང་། །

བཏུང་བ་སྣུམ་པོར་ལྡན་པ་ཡི། །དབང་པོ་ཀུན་ལས་འབྱུང་བ་རྣམས། །ཤ་སྲང་གཅིག་གིས་རབ་བསྲེས་པ། །ཀུན་ལས་འཕགས་པ་རོ་ཡི་མཆོག །ཚོགས་ཀྱི་དབུས་སུ་བསྒྲུབ་བྱས་ཏེ། །བཏུང་བ་བཞིན་དུ་མྱངས་པ་ཡིས། །རྡོ་རྗེ་བློ་ལྡན་བསྐལ་པར་གནས། །རྣམ་པ་སྣ་ཚོགས་ཉེ་བའི་ཟས། །བཟའ་བ་དང་ནི་བཅའ་བས་མཆོད། །མཆོད་པ་ཉེ་བའི་ཟས་ལྔ་དང་། །ཚད་མེད་འདོད་པའི་ཡོན་ཏན་ལྔས། །ཚད་མེད་རྣལ་འབྱོར་མ་ཚོགས་ལ། །སྐད་ཅིག་སྐད་ཅིག་མཆོད་པར་བྱ། །སྔགས་མཁན་ཚུལ་བཞིན་མཉམ་གཞག་སྟེ། །འབྱུང་པོ་རྣམས་ལ་གཏོར་མ་སྦྱིན། །ལྷ་རྣམས་ཀྱི་ནི་ཐམས་ཅད་ལ། །ཧེ་རུ་ཀ་ཡི་ཕྱག་རྒྱ་ཡིས། །ཉིད་ཀྱི་གཏོར་མ་བྱིན་བརླབས་ཏེ། །སྤྱན་དྲངས་གཙང་སྦྲ་བྱས་པ་དབུལ། །གཟུངས་ཀྱི་ཚོགས་ནི་དེ་རྣམས་ལ། །མཉེས་པར་བྱས་ནས་སླར་གཤེགས་སོ། །རྣལ་འབྱོར་མ་ཆེན་དཀྱིལ་འཁོར་དུ། །སློབ་མའི་མཆོག་ནི་གཞུག་པར་བྱ། །མཚུངས་པར་སྤྱོད་པ་རབ་མཛེས་མ། །སྣ་ཚོགས་གོས་ཀྱིས་ཡང་དག་དཀྲིས། །ལག་པ་གཡོན་གྱིས་གཟུང་བྱས་ཏེ། །རབ་དགྱེས་ལོངས་སྤྱོད་ཕྱག་རྒྱ་ཡིས། །བཅུག་ནས་སྒོ་ཡི་གྲྭ་ཉིད་དུ། །བློ་ལྡན་དམ་ཚིག་བསྒྲག་པར་བྱ། །འདི་ལས་མི་བྱ་ཅུང་ཟད་མེད། །ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་དོགས་པ་མེད་བྱས་ཏེ། །འདོད་པ་ལྔ་ཡི་ཡོན་ཏན་སྤྱོད། །གཞན་ཡང་དམ་ཚིག་ཉམས་པ་དང་། །སྐྱེ་བོ་གང་དག་དམ་ལ་གནོན། །བརྟུལ་ཞུགས་ཁྱོད་ཀྱི་དེ་དྲངས་ཏེ། །ཁྲག་ཆེན་པོ་ནི་བཏུང་བར་བྱ། །གང་དག་སློབ་དཔོན་སྨོད་བྱེད་དང་། །གང་དག་བཀའ་རྣམས་མི་བྱེད་པ། །དེ་དག་བྲོས་ནས་ཁྲག་ཆེན་པོ། །བློ་ལྡན་སྙིང་ལས་བཏུང་བར་བྱ། །དཀོན་མཆོག་གསུམ་ལ་གནོད་བྱེད་དང་། །སློབ་དཔོན་ལ་ཡང་གནོད་བྱེད་པ། །རྡོ་རྗེ་ཁྲོ་བོ་བསྡུས་པ་ཡིས། །དམ་ཚིག་བསྒོམས་ཏེ་བསྒྲལ་བར་བྱ། །དེ་ནས་དམ་ཚིག་བླུད་བྱས་ཏེ། །རྡོ་རྗེ་བདུད་རྩི་རོ་ཡི་མཆོག །དུང་ཆེན་པོར་ནི་གཞག་པར་བྱ། །རྡོ་རྗེ་བདུད་རྩིའི་ཆུ་བླུད་དོ། །ཀྱེ་མ་དམྱལ་བ་ཡི་ནི་ཆུ་འདི་སྟེ། །ཁྱོད་ཀྱི་སྙིང་ལ་ཀུན་དུ་གནས། །དམ་ཚིག་བསྲུངས་པས་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འདི་འཐུང་། །ཨོཾ་བཛྲ་ཨུ་ད་ཀ་ཧཱུྃ་ཋ། །དམ་ཚིག་འདི་ནི་བརྒྱར་བཟླས་པའི། །

བྱིན་གྱིས་བརླབས་ཏེ་འཐུང་དུ་གཞུག །གཞན་དུ་དམ་ཚིག་མི་འགྱུར་ཏེ། །དངོས་གྲུབ་ཉིད་དུའང་འདི་འགྱུར་རོ། །བདག་ནི་དམ་ཚིག་སྐལ་དགའ་ཞེས། །སློབ་མ་སྔགས་ནི་བརྗོད་དུ་གཞུག །སྒོ་གྲྭར་གནས་ནས་དྲི་བྱ་བ། །ཀྱེ་ཁྱོད་དགའ་བ་ཅི་ལ་དད། །འཇུག་པ་ཡིས་ཀྱང་སྨྲ་བྱ་བ། །བདག་ནི་སྐལ་ལྡན་བདེ་མཆོག་ལ། །རབ་དགྱེས་འཕྲུལ་ལ་བདག་དགའ་སྟེ། །མཆོག་ཏུ་དགའ་བ་བདག་དགའོ། །དེ་ནས་རྣལ་འབྱོར་མ་མཆོག་གི། །དཀྱིལ་དུ་མེ་ཏོག་བོར་བྱས་ཏེ། །མེ་ཏོག་གང་ལ་ལྷུང་བ་ཡི། །ལྷ་ཉིད་དུ་ནི་དངོས་གྲུབ་བོ། །དབང་བསྐུར་པ་ཡི་ཕྱག་རྒྱ་ཡིས། །དེ་ནས་སྤྱི་བོར་དབང་བསྐུར་བྱ། །བུམ་པ་རྣམ་པ་བཞི་ཡིས་ཀྱང་། །མཉམ་པར་བཞག་སྟེ་ལྔ་པོ་ཡིས། །པདྨའི་དཀྱིལ་འཁོར་ཞུགས་བྱས་ཏེ། །དེ་ནས་ཡང་ནི་དབང་བསྐུར་བྱ། །ཅི་རིགས་པར་ནི་གཟུངས་མོའི་རྣམས། །བདག་ཉིད་སྐལ་ལྡན་ཞེས་སུ་སྨྲ། །གང་དག་འགྲོ་བར་གྱུར་པ་ཡིས། །ལྷ་དེ་ཉིད་ནི་བསྟེན་པར་བྱ། །དགའ་བར་བྱེད་པའི་གཟུངས་མ་འདིའི། །ཁྱོད་ཀྱིས་རྟག་ཏུ་བསྒྲུབ་པར་གྱིས། །དེ་ནས་རྒྱལ་དབང་སློབ་མ་དེ། །ནང་གི་སྦས་པ་བསྡུས་པ་ཡི། །གསང་བ་མཉམ་པར་འཇུག་པ་ཡིས། །སྦྱོར་དང་ལྡན་པས་དབང་བསྐུར་བྱ། །རྡོ་རྗེ་པདྨོ་ལས་དྲངས་པ། །སྦོམ་པོ་དང་ནི་དབང་གིས་བླང་། །རྡོ་རྗེ་དཀན་དུ་གཞག་བྱས་ལ། །རྟག་པ་དགེ་བ་བདེ་བ་ཆེ། །ཀྱེ་མའོ་དམ་ཚིག་བདེ་བརྗོད་ཅིང་། །ཀྱེ་མ་བདེ་བ་བླང་བར་བྱ། །འདི་ནི་གསང་བ་ཞེས་བྱ་སྟེ། །དབང་བསྐུར་བ་ཡི་ཐབས་མཆོག་གོ །རྡོ་རྗེ་སློབ་དཔོན་བདག་ཉིད་ཆེས། །རང་གི་ཁར་ནི་རྡོ་རྗེ་གཞག །སེམས་དཔའ་ཆེན་པོ་དྲངས་བྱས་ན། །སེམས་ཀྱིས་བྱང་ཆུབ་བདེ་བ་འཐོབ། །འདི་ནི་མཆོག་ཏུ་གསང་བ་སྟེ། །དབང་བསྐུར་བ་ཡི་བདེ་བའོ། །སློབ་མ་མི་ཤེས་པ་རྣམས་ལ། །འདི་དག་ཐམས་ཅད་བསྒྲག་མི་བྱ། །རྡོ་རྗེ་སློབ་དཔོན་གྱིས་བྱ་བ། །ཡང་ནས་ཡང་དུ་བརྟག་པར་བྱ། །འདི་ཡིས་དབང་ནི་བསྐུར་མ་ཐག །སློབ་མ་ཚོགས་ཀྱི་བདག་པོར་འགྱུར། །སངས་རྒྱས་རྡོ་རྗེ་འཛིན་པ་ཡི། །སློབ་དཔོན་ཉིད་དུ་བདེ་བར་འགྱུར། །གཟུངས་མ་རྣམས་ཀྱིས་དགའ་བའི་བདག །སངས་རྒྱས་རྣམས་ཀྱི་རྗེར་བཤད་དོ། །མཁའ་ལ་འགྲོ་བའི་ཁྱོར་འགྱུར་

ཏེ། །རི་དང་འགྲོ་བ་ཀུན་གྱི་བདག །དེ་ནས་ཤེས་རབ་ཡེ་ཤེས་དབང། །སློབ་མ་མཆོག་ལ་སྦྱིན་པར་བྱ། །གཟུངས་མ་དེ་ནི་བདག་ཉིད་ལ། །བླ་མ་ཉིད་ཀྱིས་བྱིན་བརླབས་ཏེ། །དངོས་གྲུབ་འབྲས་བུ་མྱུར་འཐོབ་ཕྱིར། །སློབ་མ་ལ་ནི་སྦྱིན་པར་བྱ། །དབང་བསྐུར་ཤིན་ཏུ་སྦས་པ་ཡིས། །རྡོ་རྗེ་སློབ་དཔོན་ཚུལ་ཇི་བཞིན། །བློ་ལྡན་ཐེ་ཚོམ་མེད་པའི་ཕྱིར། །རྣམ་པ་བཞི་པོ་འདི་སྦྱིན་ནོ། །དེ་ཚུན་ཅད་ནི་སློབ་མ་ལ། །རྒྱུད་ཀུན་ལས་ནི་གང་ཆུང་ཟད། །ཡི་གེའི་ཚུལ་གྱིས་སྦས་པ་རྣམས། །གསང་བ་མཆོག་ནི་བསྟན་པར་བྱ། །དེ་ནས་དེ་ཉིད་ལངས་བྱས་ཏེ། །སློབ་དཔོན་རྐང་པར་གཏུགས་བྱས་ནས། །རྒྱལ་པོ་དབང་ཕྱུག་བདེ་དམ་པ། །ཐམས་ཅད་ཡོན་ནི་དབུལ་བར་བྱ། །གཟུངས་དེ་དག་ནི་ཐམས་ཅད་ལ། །ཅི་དགའ་བར་ནི་ཡོན་ཡང་འབུལ། །སློབ་དཔོན་ཅུང་ཟད་གང་འདོད་པ། །ཡིད་ལ་བསམས་པའི་ཡོན་ཡང་རུང་། །དམ་ཚིག་འདས་པས་འཇིགས་པ་ཡིས། །དེ་དག་ཐམས་ཅད་དབུལ་བར་བྱ། །སློབ་དཔོན་ལ་ནི་ཡོན་གྱི་མཆོག །རིགས་ཀྱི་ཁྱད་པར་དབུལ་བྱས་ཏེ། །སེང་གེའི་གདན་ལ་ཉིད་ཀྱི་མ། །སངས་རྒྱས་བྱིན་ནི་ཡོན་མཆོག་ཡིན། །གླང་པོ་རིན་ཆེན་གསེར་དག་དང་། །སྲིང་མོ་བླ་མའི་ཡོན་མཆོག་ཡིན། །རྡོ་རྗེ་སེམས་དཔའི་རིགས་ཡིན་ཏེ། །ཡོན་དེ་མཆོག་གི་ཡོན་ཡིན་ནོ། །རིན་ཆེན་པདྨའི་ཆུང་མ་དང་། །ཤིང་རྟ་རྟ་ནི་ཤིན་ཏུ་བརྒྱན། །སྣ་ཚོགས་རིན་ཆེན་རྣམ་དག་པ། །མུ་ཏིག་ཕྲེང་བས་ཤིན་ཏུ་མཛེས། །བུ་མོ་རིན་ཆེན་དྲ་བ་ཡིས། །བརྒྱན་ཏེ་སྣ་ཚོགས་རྡོ་རྗེ་ལའོ། །རྒྱལ་པོ་ཡི་ནི་དབང་ཕྱུག་དང་། །ཆུང་མ་བླ་མ་དབུལ་བར་བྱ། །འཕྲུལ་གྱི་བཞོན་པ་རྣམ་སྣ་ཚོགས། །གླང་པོ་རྟ་ནི་ཤིན་ཏུ་བརྒྱན། །དེ་བཞིན་གཤེགས་པ་ཀུན་གྱི་རྗེ། །ནན་ཏན་བླ་མ་དབུལ་བར་བྱ། །བླ་མའི་ཡོན་གྱི་ཕྱག་རྒྱ་འདི། །རྡོ་རྗེ་བློ་ལྡན་སློབ་མ་ཡིས། །ཅི་སྟེ་བདེ་བྱེད་ཀུན་འདོད་ན། །དགའ་དང་མོས་པའི་སེམས་ཀྱིས་བྱ། །དེ་ལ་སོགས་པའི་སྦྱོར་བ་ཡིས། །རབ་དགྱེས་གདོན་མི་ཟ་བའི་བདེ། །གང་གིས་མྱུར་དུ་ཐོབ་འགྱུར་ཏེ། །སློབ་དཔོན་གཙོ་མཆོག་ཉིད་དུ་འགྱུར། །ཆོས་རྣམས་ཀུན་གྱི་དབང་ཕྱུག་རྒྱལ། །རྡོ་རྗེ་བློ་ལྡན་མཆོག་

ཏུ་འགྱུར། །རིན་ཆེན་ཀུན་གྱི་རིགས་ཀྱི་རྒྱལ། །དེ་བཞིན་སྣ་ཚོགས་རིགས་ཀུན་ཏུ། །པདྨོའི་རིགས་ཀུན་དཔལ་དང་ལྡན། །རྡོ་རྗེ་རིགས་ཀུན་བདག་པོར་དེ། །སངས་རྒྱས་ཀྱི་ནི་རིགས་ཀུན་དང་། །རྒྱལ་བའི་གཙོ་བོ་མཆོག་ཏུ་འགྱུར། །དཀྱིལ་འཁོར་གྱི་ནི་འཁོར་ལོའི་གར། །ཉིད་དང་སློབ་མའི་ཚོགས་གྱུར་པས། །རྡོ་རྗེ་སེམས་དཔའ་བདེ་བ་ཆེ། །སེམས་དཔའ་བདག་ཉིད་མཆོད་པར་བྱ། །ཕན་ཚུན་ལ་སོགས་ཚུལ་གྱིས་ནི། །ཤེས་རབ་མཆོད་པའི་སྦྱོར་བ་ཡིས། །རྡོ་རྗེ་ཆེ་ཡིས་ཐབས་གནས་ཏེ། །མཁའ་འགྲོ་ཀུན་ལ་མཆོད་པར་འགྱུར། །ཕྱི་ཡི་སྦས་པ་གསང་ལ་སོགས། །ནང་གི་མཆོད་པ་མཆོག་གི་རྣམས། །ཕྱག་རྒྱའི་སྦྱོར་བ་ཚུལ་གནས་ཏེ། །ཚུལ་བཞིན་རྒྱས་བཏབ་དབུལ་བར་བྱ། །ལུས་དང་ངག་སེམས་བདེ་བྱེད་ཀྱིས། །མཆོདཔའི་བདག་ཉིད་མཆོད་པར་བྱ། །འདོད་པའི་རོལ་པ་མྱོང་བ་ཡིས། །མྱ་ངན་མཆོད་པ་ཐོབ་པར་འགྱུར། །མཆོད་པ་ཀུན་གྱི་ཆོ་ག་ཡིས། །རང་རིག་ཁྱད་པར་ཤེས་བྱས་ཏེ། །སྒྲུབ་པ་ཐམས་ཅད་བསྒྲུབས་བྱས་ན། །དངོས་གྲུབ་ཐམས་ཅད་མྱུར་དུ་འཐོབ། །དཀྱིལ་འཁོར་འཁོར་ལོ་འདི་མཐོང་བས། །དགའ་མགུ་རངས་པའི་ཡིད་ཀྱིས་ནི། །རྡོ་རྗེ་སེམས་ལ་ཕྱག་བྱེད་ཅིང་། །རང་གི་དཀྱིལ་འཁོར་གསོལ་བ་འདེབས། །བདེ་བྱེད་ཆེན་པོའི་དཀྱིལ་མོ་བརྒྱ། །རིགས་ཀྱི་ཁྱད་པར་གྱིས་ནི་ལྔ། །ལྷ་རྣམས་ཀྱང་ནི་རེ་རེ་ཡང་། །སེམས་ཀྱི་ཁྱད་པར་མཆོག་མཐའ་ཡས། །འདས་པའི་དུས་ནི་མ་བྱུང་བ། །མཐའ་ཡས་ཆོས་ནི་ཡངས་པ་བསྟན། །འདོད་ཆགས་རྣམས་ཀྱིས་དཀྲིས་པ་ཡི། །སྡུག་བསྔལ་གཟིར་བའི་མཐའ་ནས་འགྲོ། །འདོད་པའི་མཆོག་གི་ལོངས་སྤྱོད་རྣམས། །མོས་པའི་རྗེས་སུ་ཞུགས་ཤིང་སྤྱོད། །ཀུན་ཏུ་ཆགས་པར་མི་འགྱུར་ཞིང་། །བདེ་བས་ལངས་པའི་ཡིད་དང་ལྡན། །བྱང་ཆུབ་སྙིང་པོར་བགྲོད་པ་ནི། །དམ་བཅས་རྣམས་དང་སེམས་ཀྱིས་སོ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོ་ཆེན་པོ། །རབ་ཏུ་བཞད་ཅིང་སྤྱན་ཟུར་གྱིས་གཟིགས་པའི་ཐུགས་ཀྱིས་ཤིན་ཏུ་དགྱེས་པ། ཀུན་ཏུ་ལོངས་སྤྱོད་པའི་སྐྱིལ་མོ་ཀྲུང་གི་དཔལ་ཞེས་བྱ་བའི་ཏིང་ངེ་

འཛིན་ལ་སྙོམས་པར་ཞུགས་ནས། སྐྱིལ་མོ་ཀྲུང་ཆེན་པོའི་དཔལ་ཞེས་བྱ་བ་རང་གི་ཕྱག་རྒྱའི་ཡེ་ཤེས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་།། །།གཡས་དང་གཡོན་གྱི་ཚུལ་གྱིས་ནི། །རྐང་པ་གཉིས་ཀ་བཏེག་བྱས་ཏེ། །བདག་ཉིད་བརླ་ནི་མི་སྣང་བཞིན། །རྩ་བ་སྐྱིལ་མོ་བཅིང་བར་བྱ། །སྦྱོར་བ་གར་མཁན་ཚུལ་གྱིས་ནི། །གར་གྱིས་སྦྱོར་བས་གར་བྱའོ། །རྡོ་རྗེ་གདན་གྱི་བདེ་བ་ཆེ། །འདི་ཡིས་བདུད་ལས་རྒྱལ་བར་འགྱུར། །གདུག་པ་དང་ནི་དགྲ་ཐམས་ཅད། །སྐད་ཅིག་གིས་ཀྱང་སྨོས་ཅི་དགོས། །རབ་ཏུ་དགྱེས་པའི་སྟན་འདི་ཡིས། །ཡང་དག་བྱང་ཆུབ་མྱུར་དུ་འཐོབ། །མི་ཕྱེད་པ་ནི་ཐིག་ལེར་བཅས། །འོག་གི་ཕྱོགས་སུ་ཡི་གེ་དྲུག །ཤེས་རབ་ཅན་གྱིས་བསྐྱོད་ཅིང་བཟླས། །བྱུང་བའི་ཚེ་ནི་ཕཊ་ཅེས་བཤད། །པདྨོ་མི་ཕྱེད་འདྲེན་པ་དང་། །ཐིག་ལེར་བཅས་པའི་སྦྱོར་བ་བྱ། །མི་ཕྱེད་ཨོཾ་དང་ཡང་དག་ལྡན། །ཚེག་དྲག་བཅས་པ་བདེ་འབྱུང་ནའོ། །བུད་མེད་ལ་ནི་ཞག་བདུན་དུ། །འདི་ཡིས་རྩེན་པར་བྱས་པ་ནི། །ནམ་མཁའ་ཐམས་ཅད་གང་བ་ཡི། །སངས་རྒྱས་རྣལ་འབྱོར་ཆེན་པོ་མཐོང་། །རབ་དགྱེས་ལོངས་སྤྱོད་གནས་པ་ཡི། །སེམས་དཔའ་ཆེ་ལ་སློང་མཛད་དེ། །གཟུངས་ཀྱི་པདྨོ་ལས་བྱུང་བ། །བདེ་བྱེད་མཆོག་གི་དབང་བསྐུར་རོ། །དེ་ནས་རབ་དགའ་བདེ་ཐོབ་པ། །སེམས་དཔའ་དེ་ནི་དངོས་གྲུབ་བོ། །ཐོག་མ་དང་ནི་མཐའ་མེད་པར། །འདོད་པ་ཐམས་ཅད་དེ་ལོངས་སྤྱོད། །ཚེ་དང་དཔལ་དང་ཕུན་སུམ་ལྡན། །གདོན་དང་དུག་དང་ཚ་བའི་ནད། །མཁའ་འགྲོས་ཉེ་བར་གཙེས་པ་དང་། །སྡིག་ཅན་འཁོར་བ་ལས་གྲོལ་ཏེ། །ས་རྣམས་ཀུན་ལ་རྣམ་པར་རྒྱུ། །གཟི་བརྗིད་ཉི་མ་ཤར་དང་འདྲ། །སྣ་ཚོགས་འདྲ་བ་འབར་བྱེད་པས། །སྣ་ཚོགས་ཐམས་ཅད་སྣང་བྱེད་ཅིང་། །དེ་ཡིས་སེམས་ཅན་ཐམས་ཅད་ཀྱི། །ནད་དང་མྱ་ངན་འཇིགས་ཆེན་འཕྲོག །ཕྱག་རྒྱ་འདི་ཡིས་སྦྱོར་བ་ཡིས། །ཡེ་ཤེས་ལྔ་ནི་བསྟན་པར་བྱ། །རྩེ་བའི་སྐྱིལ་མོ་ཀྲུང་ཞེས་བྱ་བ་ཕྱག་རྒྱ་ཆེན་པོའི་ལས་ཀྱི་དོན་ཐམས་ཅད་སྒྲུབ་པར་བྱེད་པའོ།། །།བདག་གི་རྐང་པ་དབུས་སུ་བསྡུ། །དེ་ཡིས་རྐང་པས་བཅིངས་བྱས་ཏེ། །

སེམས་དཔའི་སྐྱིལ་མོ་བཞིན་དུ་འབྲེལ། །འདི་ནི་བཅིངས་པ་ཙམ་གྱིས་ཀྱང་། །ཁམས་གསུམ་སྒྲུབ་པར་བཞེད་པ་ཡིན། །ཡི་གེ་རྣམས་ནི་སྔ་མ་བཞིན། །རང་གི་ལྷར་ནི་སྦྱོར་བརྩོན་པས། །བསྒོམས་སམ་ཡང་ན་བསྐྱོད་ཀྱང་རུང་། །སྔགས་པ་འདི་ཡིས་དངོས་གྲུབ་སྟེ། །སྔགས་ཀྱི་སེམས་འཛིན་གཙང་མ་ཡི། །ཞག་བདུན་སྒོམ་པ་བསྒོམ་བྱས་ནས། །ཡང་དག་དངོས་གྲུབ་ཉིད་དུ་འགྱུར། །ཕྱག་རྒྱ་འདི་ཡིས་རྒྱས་བཏབ་སྟེ། །སྦྱོར་བ་ཤིན་ཏུ་བསྟན་བྱས་ན། །གདོན་མི་ཟ་བར་རྒྱལ་པོ་འཐོབ། །ཡིད་བཞིན་དགོས་པ་ཐམས་ཅད་བྱེད། །རྡོ་རྗེའི་སྐྱིལ་མོ་ཀྲུང་ངོ་། །གཟུངས་མ་བཟུང་སྟེ་བཅིང་བ་ནི། །རིན་པོ་ཆེ་ལྟར་སྦྱར་བྱས་ཏེ། །རང་གི་རྐང་པ་མི་སྣང་བྱ། །རིན་ཆེན་ཀུན་གྱི་སྐྱིལ་མོ་ཀྲུང་། །འདི་ནི་རིན་ཆེན་ཐམས་ཅད་ཀྱི། །དབུལ་ཞིང་ཕོངས་པ་འཇོམས་བྱེད་དེ། །སྡིག་པ་ཐམས་ཅད་འཕྲོག་བྱེད་མ། །གནོད་པའི་དུག་ཀུན་འཕྲོག་པར་བྱེད། །གདུག་པ་ཐམས་ཅད་རྨོངས་བྱེད་དོ། །དགྲ་རྣམས་ཐམས་ཅད་འཇོམས་པར་བྱེད། །ཁྲོ་བོ་ཐམས་ཅད་འཛུམ་བྱེད་དེ། །གདུག་པ་རྣམས་ཀྱི་རྒྱས་འདེབས་ན། །མི་གཡེང་ཟླ་བ་གཅིག་གིས་ནི། །འདི་ཡིས་རྒྱལ་པོ་དངོས་གྲུབ་བོ། །ཡིད་བཞིན་ལས་རྣམས་ཐམས་ཅད་བྱེད། །ཅི་སྟེ་བདག་ཉིད་རྒྱལ་པོ་རུ། །མཆོག་ཏུ་རྨད་འབྱུང་བསྒྲུབ་འདོད་ན། །རིན་ཆེན་སེམས་ཀྱི་རིན་ཆེན་མཚན། །གསང་བའི་ཕྱག་རྒྱ་ཚུལ་གནོན་པ། །རྒྱལ་པོ་ཁམས་གསུམ་རྒྱལ་བྱེད་པ། །ཟླ་ཕྱེད་ཙམ་གྱིས་འགྲུབ་པར་འགྱུར། །རིན་པོ་ཆེ་ཡི་སྐྱིལ་མོའོ། །དེ་བཞིན་རྐང་པ་གཉིས་བཞག་པ། །པདྨོ་འདྲ་བ་སྦྱར་བྱས་ཏེ། །བདག་གམ་དེ་བཞིན་གཞན་ཡང་རུང་། །བློ་ལྡན་པདྨོ་བདེ་བསྒྲུབ་བྱ། །འདི་ཡིས་སེམས་ཅན་ཐམས་ཅད་དང་། །མདོར་ན་སངས་རྒྱས་རྣམ་དག་དང་། །རྡོ་རྗེ་ཉི་མ་མ་ལུས་ཀྱང་། །དབང་དུ་འགྱུར་བ་གདོན་མི་ཟ། །བདེ་ལྡན་ཕོ་བྲང་ཆེན་པོ་ཡི། །བདེ་བྱེད་འདི་ཡིས་ཐོབ་པར་བྱེད། །སེམས་ཅན་ཁམས་རྣམས་ཐམས་ཅད་དུ། །སེམས་དཔའ་ཆེན་པོ་འགྲོ་འོང་བྱེད། །པདྨོའི་སྐྱིལ་མོའོ། །དེ་བཞིན་སྐྱིལ་མོ་རྒྱས་བྱས་ཏེ། །སྣ་ཚོགས་ཚུལ་གྱིས་སྦྱོར་བ་བྱ། །སྔགས་མཁན་ཆེན་པོའི་སྦྱོར་

བ་ཡི། །སྔགས་མཁན་ཡི་གེ་ཤིན་ཏུ་བརྩོན། །ཟློས་པ་བྱེད་ཅིང་རྣམས་བསྒོམས་ན། །དངོས་གྲུབ་རྟག་པ་ཐོབ་པར་འགྱུར། །མི་གཡེང་སྔོན་གྱི་བདུག་པ་ཡི། །ལས་རྣམས་ཐམས་ཅད་འཕྲོག་པར་བྱེད། །སྣ་ཚོགས་དཀྱིལ་དུ་གནས་པ་ཡིས། །བླ་མེད་དངོས་གྲུབ་ཐོབ་པར་འགྱུར། །སྣ་ཚོགས་ཀྱི་ནི་སྐྱིལ་མོའོ། །དེ་ནས་མཁའ་འགྲོ་མའི་སྐྱིལ་མོ་རྒྱས། །ཐམས་ཅད་ཁྲག་ནི་འཕྲོག་བྱས་ཏེ། །གཟུངས་མ་ཡི་ནི་རྐང་པ་གཉིས། །ཉིད་ཀྱིས་གཉའ་བར་རྐང་པ་བཏེག །རྡོ་རྗེ་མཁའ་འགྲོའི་སྦྱོར་བ་ཡི། །བསྙེན་པས་ཁྲག་རྣམས་འཕྲོག་པར་བྱེད། །མཉམ་པར་བཞག་ནས་གཟུངས་མ་ཡི། །རྐང་པ་གཅིག་ནི་མགུལ་ཉིད་དུ། །སྦྱོར་དང་ལྡན་པས་བཏེག་བྱས་ན། །ཟས་རྣམས་ཐམས་ཅད་འཕྲོག་བྱེད་དེ། །བཏུང་བ་བཟའ་བ་བཅའ་བ་དང་། །གོས་ཀྱི་རྒྱན་གྱིས་བཀླུབས་པ་ཡིས། །དེ་བཞིན་ཞག་བདུན་ཉིད་ཀྱིས་ཀྱང་། །ཐམས་ཅད་ལས་བྱེད་གདོན་མི་ཟ། །ཚངས་པ་གཏོགས་འདོད་དབང་པོ་ཡི། །དཔལ་ཆེན་མཆོག་ནི་འཕྲོག་པར་བྱེད། །ལག་པ་བསྒྲེང་བའི་ཚུལ་གྱིས་ནི། །ཁམས་གསུམ་རིམ་པར་རྒལ་བར་བྱེད། །མིག་ནི་བཙུམས་པར་བྱེད་འགྱུར་བ། །འགྲོ་བ་གསུམ་པོ་རྣམ་པར་འཇིག །རུ་སྦལ་བཞིན་དུ་མཉམ་གཞག་སྟེ། །མི་གཡེང་སྐད་ཅིག་བཅིང་བྱས་ན། །གདུག་པའི་སྲོག་ཆགས་ཐམས་ཅད་དང་། །དགྲ་དང་སྤྱོད་བཅས་མི་སྤྱོད་ཕྲོག །སྦལ་པ་བཞིན་དུ་མཉམ་བཞག་སྟེ། །དཀྱིལ་འཁོར་ཚུལ་གྱིས་བསྐོར་བར་བྱའོ། །མ་ལུས་རྣམས་ཀྱང་རྨོངས་བྱེད་དེ། །ཁམས་གསུམ་རྣམས་ཀྱང་རྒལ་བར་བྱེད། །རྟོགས་འདོད་ཀྱིས་ནི་མཉམ་གཞག་སྟེ། །ས་གསུམ་རྣམས་ཀྱི་རྒྱས་གདབ་བྱ། །གར་དབང་གིས་ནི་མཉམ་གཞག་སྟེ། །ས་གསུམ་རྣམས་ནི་གར་བྱེད་གཞུག །དྲིལ་བུ་ཡིས་ནི་མཉམ་བཞག་སྟེ། །ས་གསུམ་རྣམས་ནི་གདབ་པར་བྱ། །གཞོན་ནུའི་སྐྱིལ་མོ་བཅིངས་པ་ཡིས། །སངས་རྒྱས་བདེ་ཆེན་འཐོབ་པར་བྱེད། །སྐྱིལ་མོ་ཕྱེད་ནི་མཉམ་གཞག་ནས། །གཉིས་པ་ཡིས་ནི་མནན་བྱས་ན། །ཁམས་གསུམ་ཐམས་ཅད་གནོན་འགྱུར་ཞིང་། །འདོད་བྱེད་ཐམས་ཅད་དངོས་གྲུབ་བོ། །དགའ་བྱེད་མ་ཡི་མཉམ་བཞག་པས། །སྐྱིལ་མོ་རབ་ཏུ་དགའ་ཐོབ་སྟེ། །དགའ་བྱེད་

མ་ཡི་ཡིད་འོང་མ། །ཁམས་གསུམ་ཐམས་ཅད་དངོས་གྲུབ་བོ། །རིག་འཛིན་རྣམ་པར་གཞག་བྱས་ཏེ། །ཁམས་གསུམ་སྐད་ཅིག་མནན་པར་བྱ། །ཁམས་གསུམ་རྣམ་པར་རྒྱལ་བ་ཡི། །མདོར་བསྡུས་གཟུངས་མའི་བཅིངས་པ་ཡི། །འཇིག་རྟེན་གསུམ་ནི་རྣམ་རྒྱལ་ཏེ། །སྐད་ཅིག་ཁམས་གསུམ་བདག་པོར་འགྱུར། །རྟག་པར་ཕན་ཚུན་འབྲེལ་བ་ཡིས། །དཔུང་པ་གཉིས་ནི་བསྐུམ་བྱས་ཏེ། །ཐམས་ཅད་སྒོ་ནི་འགེགས་པ་ཡིས། །མཆེ་བ་སྦོམ་པོ་རབ་ཏུ་སྦྱར། །གཡས་ཀྱི་བརྐྱང་བསྐུམ་ཚུལ་གྱིས་ནི། །གནོན་པའི་མནན་པས་བསྡིགས་བྱས་ཏེ། །མི་ཕྱེད་སྦྱོར་བས་བསྐུལ་བྱ་བ། །ཁྲོས་པའི་སེམས་ཀྱིས་མྱང་བར་བྱ། །གཡོན་པའི་བརྐྱང་བསྐུམ་སྦྱར་བར་བྱ། །མྱུར་དུ་གནོན་པས་བཏེག་བྱ་ཞིང་། །མཐེའུ་ཆུང་བདེ་བའི་ལྕགས་ཀྱུ་ཡིས། །མཛུབ་མོ་ལྕེ་ལ་རེག་བྱས་ཏེ། །ས་བོན་ཚེག་དྲག་ཧྲི་ལྡན་པའི། །ཐིག་ལེའི་སྤྱི་བོར་བརྒྱན་བྱས་པས། །བདུད་རྩིའམ་རིག་མ་དྲང་བར་བྱ། །ལྕེ་ཡི་ཐོག་མར་སྤྲོ་བྱས་ཏེ། །འདྲེན་པའི་ཚུལ་གྱིས་དྲང་བར་བྱ། །རྡོ་རྗེ་གནོད་སྦྱིན་མཉམ་བཞག་སྟེ། །ཁ་ཡི་ཕྱོགས་སུ་མཆེ་བ་ཡི། །སྦོམ་པོ་ལྕེ་དང་འདྲ་བྱས་ཏེ། །ཁྲོས་པ་མཆེ་བ་སྦྱོར་བ་ཡིས། །སོར་མོ་ཐོད་པ་བཞིན་བྱས་ནས། །ཁྲག་མང་པོ་ནི་བཏུང་བར་བྱ། །ཡི་གེ་དང་པོ་ཨོཾ་དང་ལྡན། །སྤྱི་བོར་ཐིག་ལེ་ལྡན་བྱས་ཏེ། །འོག་གི་ཕྱོགས་སུ་ར་ཡིས་གདགས། །ཨུ་འདྲེན་ང་རོས་བརྒྱན་པར་བྱ། །འདི་ནི་ཁོ་བོའི་སྙིང་པོ་སྟེ། །མཆོག་ཏུ་ཐམས་ཅད་ལས་བྱེད་པའོ། །གསོད་པ་དང་ནི་འདྲེན་པ་ཀུན། །དབང་དང་དབང་རྣམས་བྱེད་ལ་སོགས། །དེ་ལ་སོགས་པའི་ལས་གཞན་ཡང་། །ཚུལ་བཞིན་སྦྱར་བས་བྱེད་པར་འགྱུར། །ཤི་བ་བཞིན་དུ་མིག་བཙུམས་ནས། །རང་གི་ལུས་ནི་བསྐུམ་བྱས་ཏེ། །བུམ་པ་ལྔ་མཐའི་སྦྱོར་བ་ཡིས། །དགྲ་རྣམས་ཐམས་ཅད་གསད་པར་བྱ། །ང་རོ་དང་པོ་ཡང་དག་ལྡན། །བདག་ཉིད་ངོ་བོ་ཐམས་ཅད་བྱ། །སངས་རྒྱས་ཆེན་པོ་བསྒོམ་བྱས་ཏེ། །ཞི་བའི་འོད་ཟེར་སྤྲིན་ཕུང་སྤྲོ། །དེ་ཡིས་ལུས་ནི་ཞི་བར་འགྱུར། །དེ་ཡིས་སེམས་ཅན་ཐམས་ཅད་ཀྱི། །ཚ་བ་གདོན་དང་དུག་ལ་སོགས། །སྡུག་བསྔལ་མཁའ་

འགྲོའི་མཆེ་བ་དང་། །འཇིགས་པ་ཐམས་ཅད་བྲལ་བར་བྱེད། །ཤེས་རབ་ཕ་རོལ་ཕྱིན་མཉམ་གཞག །བདག་ཉིད་ཀྱིས་ནི་ཚུལ་བཞིན་དུ། །འདི་ཡིས་ཐམས་ཅད་ནང་གི་རྣམས། །སྡུག་བསྔལ་དོགས་པ་འཕྲོག་པར་བྱེད། །དེ་ལ་སོགས་པ་མཐའ་ཡས་པ། །ནམ་མཁའ་ས་སྟེང་ལས་ཀྱི་རྣམས། །སྙིང་གར་རྡོ་རྗེ་སེམས་དཔའ་གཞག །ཡིད་བཞིན་ཐམས་ཅད་བྱེད་པར་འགྱུར། །མྱུར་དུ་རྡོ་རྗེ་སློབ་དཔོན་ལ། །སྔགས་ཀྱི་དངོས་གྲུབ་དོན་འདོད་པས། །གུས་ལ་ཞེ་སར་བཅས་པ་ཡིས། །ཤིན་ཏུ་ལྷག་པར་ཕྱོགས་པར་བྱ། །ནམ་ཡང་རྡོ་རྗེ་སློབ་དཔོན་གྱི། །སེམས་ནི་དཀྲུག་པར་མི་བྱ་སྟེ། །ཅི་སྟེ་ཤེས་རབ་འཆལ་པས་བྱེད། །མྱུར་དུ་ན་རག་ལྟུང་བར་འགྱུར། །ནད་དང་འཚེ་བ་དགྲ་དག་དང་། །གདོན་དང་ཚ་བ་དུག་ཉིད་ཀྱིས། །སློབ་དཔོན་ཞབས་ལ་སྨོད་བྱེད་པ། །གཏི་མུག་ཆེན་པོར་དེ་འཆིའོ། །བླ་མ་ལས་ནི་དངོས་གྲུབ་ཐོབ། །བླ་མ་མཐོ་རིས་བླ་མ་བདེ། །དེ་བས་ནན་ཏན་ཐམས་ཅད་ཀྱིས། །བླ་མའི་བཀའ་ལས་འདའ་མི་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་རྡོ་རྗེའི་བདག་པོ་ཀུན་ཏུ་བཟང་པོ་ཆེན་པོ་དཔལ་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོ་རྡོ་རྗེ་སེམས་དཔའ་ཤིན་ཏུ་དགྱེས་པ་ཆེན་པོའི་བདེ་བ་གདོན་མི་ཟ་བའི་རྡོ་རྗེ་དམ་ཚིག་གི་དབང་བསྐུར་བའི་ཡེ་ཤེས་ཀྱི་དཀྱིལ་འཁོར་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་རྡོ་རྗེ་མཆོག་གསང་བ་སྦས་པ་ཆེན་པོ་ཟླ་གསང་ཐིག་ལེའི་རྒྱུད་ཀྱི་རྒྱལ་པོ་ཤིན་ཏུ་དགྱེས་པ་ཆེན་པོའི་རྡོ་རྗེ་རྣལ་འབྱོར་མ་ཆེན་མོའི་ཚོགས་ཀྱི་དཀྱིལ་འཁོར་ཏེ་བཞི་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་འཁོར་དང་བཅས་པའི་འཁོར་ལོའི་ཚོགས་དང་། རྡོ་རྗེ་རྣལ་འབྱོར་ཕ་དང་། རྣལ་འབྱོར་མ་དང་། རྣལ་འབྱོར་གྱི་དབང་ཕྱུག་ཆེན་པོའི་ཚོགས་དང་། །རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་མའི་ཚོགས་ཀྱི་གཡོག་རྣམས་མཆོག་ཏུ་དགའ་བ་ཆེན་པོ་སྐྱེས་ཏེ། ཅ་ཅོ་འབྱིན་ཅིང་དབྱངས་ཆེན་པོ་བརྗོད་པར་གྱུར་ཏེ། ཀྱེ་མའོ་རྡོ་རྗེ་སེམས་དཔའ་ཡི། །རྡོ་རྗེ་ཤིན་ཏུ་དགྱེས་པ་ཆེ། །སྣ་ཚོགས་ཐབས་ནི་བདེ་བྱེད་ཆེ། །སྣ་ཚོགས་ཡེ་ཤེས་བདེ་བ་ཆེ། །ཀྱེ་མ་ཀུན་ཏུ་བཟང་པོ་ཡི། །དགེ་བའི་

ཡེ་ཤེས་བདེ་བ་ཆེ། །གང་བདེ་ཕྱིར་ནི་རིག་མ་ཡི། །པདྨོ་ལས་ནི་གནས་པ་མཛད། །ཀྱེ་མའོ་རིག་པ་ཤིན་ཏུ་ཟབ། །ཤེས་རབ་ཕ་རོལ་ཕྱིན་པ་བདེ། །སེམས་ཅན་ཀུན་ལ་ཤེས་རབ་ཀྱིས། །མུན་པའི་ཐིབས་པོ་སེལ་བར་མཛད། །ཀྱེ་མའོ་ཐམས་ཅད་ངོ་མཚར་ཆེ། །མཁའ་འགྲོའི་དྲ་བས་གར་མཛད་ཅིང་། །སྣོམ་པར་མཛད་དང་མྱང་བ་དང་། །མཉེ་བ་དང་ནི་འཕྲོག་པའི་མཆོག །ཨེ་མའོ་ཤིན་ཏུ་རབ་ཏུ་དགྱེས། །སྐལ་ལྡན་སྐལ་ལ་སྤྲོད་པ་དང་། །སྣ་ཚོགས་སྐལ་བ་བདེ་བྱེད་ཆེ། །སྣ་ཚོགས་རྡོ་རྗེ་ཤིན་ཏུ་མཛེས། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཤིན་ཏུ་དགྱེས་པ་ཆེན་པོ་ཀུན་ཏུ་ལོངས་སྤྱོད་པའི་འདོད་པའི་ལྷ་ཤིན་ཏུ་དགྱེས་པ་བདེ་བ་ཆེན་པོ་ལ་གནས་པ་ལ་རྣལ་འབྱོར་མ་ཐམས་ཅད་དང་། མཆོག་གི་ཕ་རོལ་ཕྱིན་མ་ལ་སོགས་པ་རྣལ་འབྱོར་གྱི་དབང་ཕྱུག་ཆེན་མོ་ཐམས་ཅད་རང་གི་གདན་ལས་བཞེངས་ཏེ། ཤིན་ཏུ་དགྱེས་པ་བདེ་བ་ཆེན་པོའི་འགྱིང་བའི་འདུད་པས་ཕྱག་བྱས་ཏེ། ཤིན་ཏུ་དགྱེས་པ་ཆེན་པོའི་བདེ་བ་འཐོབ་པར་བྱེད་པའི་དབྱངས་ཀྱི་ཕྱག་རྒྱ་ཆེན་པོ་འདིས་མཉེས་པར་བྱེད་དོ། །སྒྱུ་མའི་བདེ་བས་ནམ་མཁའ་ཀུན་ཏུ་གང་བ་ཡི། །སྤྲུལ་པའི་རང་བཞིན་སྐྱེ་བ་མཆོག་གི་བདེ་སྟོན་ཏེ། །རྗེས་སུ་ཆགས་པའི་པདྨ་དགའ་བས་ཀུན་ཁྱབ་ཅིང་། །ཆོས་ཀྱི་བདེ་བ་ཉིད་ཀྱང་ཀུན་ཏུ་བཏང་སྙོམས་མཛད། །ཨེ་མའོ་འདི་ལྟའི་གཟུངས་མ་བདེ་མཆོག་དཔལ་དང་རྣམ་ལྡན་མ། །བྱམས་མའི་ཕྱོགས་སུ་མི་གཏོང་ཡེ་ཤེསཤིས་ཉིད་ཀྱིས་འཇུག །འདོད་པའི་ཡོན་ཏན་འདི་རྣམས་ཆོས་ཉིད་རྣམ་པར་དག །དུག་གསུམ་དབང་དུ་མཛོད་ཅིང་མོས་པ་རྣམས་མི་བསྐྱོད། །ངོ་མཚར་ཕྱོགས་དང་མ་བྲལ་བྱང་ཆུབ་སྙིང་པོར་བགྲོད། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་འཛུམ་པ་དང་བཅས་པའི་སྤྱན་རྒྱས་པས་འཁོར་དེ་དག་ཐམས་ཅད་ལ་ཡུད་ཙམ་ཡུད་ཙམ་ཀུན་ཏུ་གཟིགས་ཏེ། རྡོ་རྗེ་པདྨོ་དང་གཉིས་སུ་མེད་པའི་སྦྱོར་བའི་དཔལ་ཆེན་མོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཅང་མི་གསུང་བར་མཉམ་པར་བཞུགས་ཏེ། དབུགས་མི་རྔུབ་དབུགས་མི་འབྱིན། དབུགས་རབ་ཏུ་གཏོང་བར་མི་མཛད། ཀུན་ཏུ་མི་གཟིགས། ཀུན་ཏུ་རྣམ་པར་མི་གཟིགས། བཞེངས་པར་མི་མཛད། བཞུགས་

པར་མི་མཛད། །གཤེགས་པར་མི་མཛད། གསུང་བར་ཡང་མི་མཛད། རྣམ་པར་རྟོག་པར་ཡང་མི་མཛད། དེ་བཞིན་དུ་བཅོམ་ལྡན་འདས་ཤིན་ཏུ་བདེ་བ་ཆེན་པོས་ནམ་མཁའི་དབྱིངས་ཐམས་ཅད་དུ་ཤིན་ཏུ་ཁྱབ་པར་ཤིན་ཏུ་དགྱེས་པ་ཆེན་པོའི་བདེ་བ་ལས་བཙལ་ཏེ་རྒྱས་པར་མཛད་པ་ན། དེར་དེ་བཞིན་གཤེགས་པ་ཐམས་ཅད་དྲངས་བཅུག་བཅིངས་དབང་དུ་བྱས་ཏེ། འདོད་པ་ལྔའི་ཡོན་ཏན་གྱིས་མཉེས་པར་བྱས་ཏེ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུ་བ་མཛད་ནས། ཡང་ནས་ཡང་བཅོམ་ལྡན་འདས་ལ་གཟིགས་ཏེ།བདེ་བ་ཆེན་པོ་ཤིན་ཏུ་དགྱེས་པ་དང་གཉིས་སུ་མེད་པར་ལོངས་སྤྱོད་པ་དཔལ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བསྐུལ་ནས་བཅོམ་ལྡན་འདས་ཀྱི་ཐུགས་ཀར་ཞུགས་ཏེ། བྱང་ཆུབ་ཀྱི་སེམས་ཆེན་པོ་ལ་ཡང་ཐིམ་པར་གྱུར་པ་ན། ཁམས་གསུམ་འདིར་དམ་པའི་ཆོས་སྟོན་པ་དང་། འཇུག་པར་བྱེད་པ་དང་། བསྟན་པ་ལ་གནས་པར་བྱེད་པ་འགའ་ཡང་མེད། སངས་རྒྱས་དང་། ཆོས་དང་། དགེ་འདུན་འཇུག་པར་བྱེད་པ་ཡང་མེད། ཁྲོས་པ་དང་གཏུམ་པོ་ཆེན་པོ་དང་། རྔམ་པ་དང་། རབ་ཏུ་གདུག་པ་ཆེན་པོར་སེམས་པ་དང་། འདོད་ཆགས་དང་། ཞེ་སྡང་དང་། གཏི་མུག་གི་མུན་པས་བསྒྲིབས་པ་དང་། གཏུམ་འཁྲུགས་ཆེན་པོ་དང་། གཞན་གྱི་སྲོག་ཕྲོག་པ་དང་། གཞན་གྱི་སེམས་ཕྲོག་པ་དང་། བུད་མེད་ཀྱིས་འཆུམས་པ་དང་། ཚིག་རྩུབ་མོ་ལ་སོགས་པའི་ཉོན་མོངས་པ་དང་། ཉེ་བའི་ཉོན་མོངས་པས་གཞན་ལ་གཙེས་པ་དང་། གཅིག་གི་ཤ་གཅིག་གིས་ཟ་བ་དང་། ཐབས་མེད་པའི་ལམ་ལ་གནས་པ་རྣམས་ཀྱིས། ཀྱེ་མའོ་འཇིག་རྟེན་གསུམ་པོ་འདི་བརླག་གོ་ཞེས་སྔོན་གྱི་སྨོན་ལམ་ལས་ཀྱི་སྟོབས་ལ་གནས་པའི་དེ་བཞིན་གཤེགས་པ་རྣམས་ཀྱིས་གཟིགས་སོ། །ཐབས་དང་ཤེས་རབ་ཀྱི་ཐུགས་རྗེའི་སྨོན་ལམ་ཆེན་པོ་ནམ་མཁའི་དབྱིངས་ཀུན་ཏུ་འཇུག་པའི་ཡང་དག་པར་གནས་པ་འདི་ལྟ་བུའི་འཇིག་རྟེན་གྱི་ཁམས་ཐམས་ཅད་རབ་ཏུ་བརླག་པར་གཟིགས་ནས། དེ་བཞིན་གཤེགས་པ་ཐམས་ཅད་ཀྱི་བདག་པོ་ཤིན་ཏུ་དགྱེས་པ་ཆེན་པོའི་བདེ་བ་ཡང་དག་པར་ཞུགས་པ་ཀུན་ཏུ་བཟང་པོ་ཆེན་པོ་དཔལ་རྡོ་རྗེ་སེམས་

དཔའ་ལ་དབྱངས་ཀྱི་རྒྱལ་པོ་འདིས་བསྐུལ་བ་མཛད་དོ། །ཧོ་རང་བཞིན་དག་པ་དག་པ་པདྨ་བདེ་བའི་མཆོག་མངའ་བ། །ཐུགས་ཀྱི་ཡིད་བཞིན་རིན་ཆེན་གཞན་ལ་དགོངས་ནས་བཞེངས་མཛད་དེ། །བསྐལ་པའི་མཐའ་ནས་བསྒྲུབས་པའི་བྱམས་པས་གཟུགས་ཀྱིས་བརྗིད་པ་དང་། །བྱང་ཆུབ་སྙིང་པོའི་ཆུ་དེས་འགྲོ་བ་རྣམས་ཀྱི་རང་བཞིན་ཁྲུས། །ཨ་ལ་ལ་ལ་ཧོ། །པདྨའི་འབྱུང་གནས་བདེར་གཤེགས་ཀུན་གྱི་སྐལ་བ་མཆོག་དང་ལྡན། །སྡུག་བསྔལ་ནད་ཀུན་སེལ་བའི་ཐུགས་རྗེའི་འཇིག་རྟེན་གསུམ་ལ་གཟིགས། །དགའ་བའི་རོལ་པས་གར་དང་བཅས་ཏེ་བཞེངས་ཤིང་དབང་དུ་མཛོད། །ཨ་ལ་ལ་ལ་ཧོ། །སྔོན་གྱི་རྒྱལ་བ་རྣམས་ཀྱིས་མ་བསྒྲགས་གསང་བ་ཡི། །འགྲོ་བ་ཀུན་གྱི་ཡིད་དང་འཐད་པའི་གསང་ཆེན་འདི་ཕྱུང་སྟེ། །རྣམ་དག་སྤྱོད་ཡུལ་གཞན་གྱིས་མི་འཕྲོགས་ནམ་མཁའ་ལ། །དངོས་མེད་རོལ་མོའི་གཞན་ལས་འཕགས་པ་བཞེངས་ཤིང་མཛད་དུ་གསོལ། །ཨ་ལ་ལ་ལ་ཧོ། །སྐད་ཅིག་མ་ཡི་སྤྱོད་ཡུལ་འདིས། །མུན་པ་ཐམས་ཅད་སེལ་བའི་ཕྱིར། །གཞན་ལ་ཐུགས་རྗེས་དགོངས་ནས་སུ། །ལྷ་རྣམས་བྱིན་གྱིས་བརླབ་ཏུ་གསོལ། །དབྱངས་ཀྱི་རྒྱལ་པོ་འདི་ཡིས་ནི། །དགྱེས་མཆོག་དམ་པ་བསྐུལ་བྱས་ན། །པདྨོ་དྲ་བ་རྡོ་རྗེ་དང་། བདེ་བར་སྦྱོར་བར་བཞེངས་སུ་གསོལ། །བདེ་བ་ཆེན་པོ་བདེ་གནས་པ། །གཙོ་ལ་འདི་ཡིས་བསྐུལ་བ་ཡིས། །སེམས་ཅན་ཀུན་དོན་བཞེངས་འགྱུར་ཏེ། །རྒྱལ་བ་ཐམས་ཅད་གདོན་པར་མཛད། །དེ་ནས་བཅོམ་ལྡན་འདས་བདེ་བ་ཆེན་པོ་ཀུན་ཏུ་བཟང་པོ་དཔལ་རྡོ་རྗེ་འཛིན་ཡང་དག་པ་དང་ལྡན་པའི་བདེ་བ་ཆེན་པོས་བརྒྱན་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བཞེངས་ནས་ཕྱོགས་བཅུ་མཐའ་ཡས་རབ་འབྱམ་མཐས་ཀླས་པའི་འཇིག་རྟེན་གྱི་ཁམས་ཀུན་གཟིགས་ནས་ངོ་མཚར་དུ་གྱུར་ཏེ། །ཀྱེ་མའོ་ཁམས་གསུམ་འདི་སྟོངས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་རྣམས་དང་བྲལ་བས་གདུག་པ་ཐམས་ཅད་ཀྱིས་འདི་དག་ཉེ་བར་གཙེས། གནོད་སྦྱིན་དང་སྲིན་པོ་ཐམས་ཅད་དང་། ནད་དང་། འཚེ་བ་དང་། གདོན་ཆེན་པོ་དང་། ཉོན་མོངས་པ་དང་། ཉེ་བའི་ཉོན་མོངས་པ་ཐམས་ཅད་ཀྱིས་ཡང་དག་པར་ཟོས་ཞེས་དགོངས་པ་ན་བཅོམ་

ལྡན་འདས་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་གཏོང་བའི་རྡོ་རྗེ་ཡེ་ཤེས་ཀྱི་བདེ་བ་ཆེན་པོ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ཡེ་ཤེས་བདེ་བ་ཆེན་པོའི་རང་གི་རྡོ་རྗེ་དང་པདྨོ་ལས་བྱང་ཆུབ་ཀྱི་སེམས་ཉེ་བར་བསྡུ་བར་བྱ་སྟེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་ཕྱུང་ངོ་།། །།ཐོག་མར་ཨོྃ་ནི་ཐིག་ལེར་བསམ་བྱས་པའི། །རྡོ་རྗེ་སེམས་དཔའ་བཅས་པ་འབྲུག་གི་སྒྲ་འབྱིན་པ། །མི་ཕྱེད་འདྲེན་པ་ཡང་དག་གཉིས་དང་ལྡན་པ་སྟེ། །འདི་ནི་སྟོན་པའི་མཆོག་སྟེ་རྡོ་རྗེའི་རིགས་ཉིད་དོ། །ཕྱུང་ནས་ནམ་མཁའི་དབྱིངས་ཐམས་ཅད་དུ་གང་བའི་སྤྲོ་བས་སྣང་བར་བྱས་ཏེ། སླར་ཡང་འདུས་ནས་རྡོ་རྗེ་ལྟ་བུར་གནས་སོ། །ཡང་སྤྲོ་བ་དང་བསྡུ་བ་བྱས་ནས་སླར་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་སེམས་དཔའ་ལྟ་བུར་གྱུར་ནས་ཤར་གྱི་དཀྱིལ་འཁོར་དབུས་སུ་བཞུགས་པར་གྱུར་པ་ན། ཧཱུྃ་ཧཱུྃ་ཧཱུྃ་ཞེས་བཞད་པ་ཆེན་པོར་བཞད་ཅིང་ཨ་ཞེས་བརྗོད་ནས་བཞུགས་ཏེ། རང་གི་སེམས་དཔའི་སྐྱིལ་མོས་གཡོན་དུ་ཡིད་ཙམ་འགྱིང་བས་འདུད་པ། གཡས་ཀྱི་རྡོ་རྗེ་གསོར་ཞིང་འཛུམ་པ་དང་བཅས་ཤིང་སྤྱན་རྒྱས་པ། །ཆེ་བའི་ཆེན་པོ་དབུ་ལྔ་པ། །ཕྱག་ནི་བཅུ་དྲུག་རྣམས་དང་ལྡན། །སྣ་ཚོགས་སྐུ་ནི་མཆོག་འཛིན་པ། །དཔའ་བོ་ཐམས་ཅད་ལས་བྱེད་པ། །ཁ་དོག་རྣམ་ལྔ་གཟི་བརྗིད་ཆེ། །མཚོན་ཆ་རྣམ་པ་སྣ་ཚོགས་འཛིན། །རྡོ་རྗེ་སྒྱུ་མར་རབ་ཏུ་གནས། །མཁས་པ་གང་གིས་སྙིང་ག་ཉིད། །མཉམ་པར་བཞག་སྟེ་འཛིན་བྱས་ན། །རྡོ་རྗེ་པདྨོ་བདེ་ཆེན་ཡིས། །རྡོ་རྗེ་སེམས་དཔའ་བདེ་མྱུར་འཐོབ། །དེ་ནས་བཅོམ་ལྡན་འདས་ནམ་མཁའ་འགྲོ་མ་ཀུན་ལོངས་སྤྱོད་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་མཆོག་ཏུ་གསང་བ་དེ་བཞིན་གཤེགས་པ་ཐམས་ཅད་ཀྱི་ཟླ་གསང་ཐིག་ལེ་ལས། ནམ་མཁའ་ཤིན་ཏུ་དགྱེས་པ་འཐོབ་པར་བྱེད་པའི་བདེ་བ་ཆེན་པོ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་ཕྱུང་ངོ་།། །།ཨོྃ་ཡི་གཙུག་ཏུ་ཐིག་ལེ་སྟེ། །མི་ཕྱེད་ཐིག་ལེར་བཅས་པ་ཡི། །འོག་ཏུ་གཟི་

བརྗིད་ཡང་དག་བཅས། །མཐར་ནི་དྲལ་ཏེ་ཚེག་དྲག་བཅས། །འདི་ནི་རིན་ཆེན་ཐམས་ཅད་ཀྱི། །སྙིང་པོ་མཆོག་ཏུ་རྨད་འབྱུང་བའོ། །ཕྱུང་བ་ཡིས་ནི་ནམ་མཁའ་དང་། །སངས་རྒྱས་ཀྱི་ནི་ཞིང་ཀུན་དང་། །འོད་ཟེར་སྤྲིན་ཕུང་རྒྱས་བྱས་ཏེ། །སླར་ཡང་དེ་ཉིད་བཞུགས་པར་འགྱུར། །དེ་ཡི་ཐུགས་ཀར་ཞུགས་ནས་ཀྱང་། །བརྡ་ཡི་ཚུལ་གྱིས་བཞུགས་པར་འགྱུར། །རྒྱལ་བ་ཀུན་གྱིས་དབང་བསྐུར་ནས། །སེམས་དཔའི་ཚུལ་གྱིས་སྤྲུལ་པ་ནི། །ཁ་དོག་རྣམ་ལྔ་ཡངས་པའི་སྤྱན། །ཆུ་སྐྱེས་བཞད་པ་འཛུམ་དང་བཅས། །ཉི་མའི་གཟི་བརྗིད་མཛེས་པ་ཆེ། །ཕྱག་རྒྱ་ལ་སོགས་སྣ་ཚོགས་བརྒྱན། །སྐྱིལ་མོ་འགྱིང་བ་གཡོན་དུ་འདུད། །གཡས་ཀྱི་སྙིང་གར་རིན་ཆེན་འཛིན། །བརྒྱད་གཉིས་ཕྱག་རྒྱ་ངོ་བོ་ཡིས། །དྲི་མ་གསུམ་སྤང་བརྒྱན་པ་སྟེ། །རང་གི་དཀྱིལ་འཁོར་གང་བྱས་ནས། །སྣ་ཚོགས་ལྷོ་རུ་གནས་པར་འགྱུར། །རྣམ་པ་ཀུན་མཁྱེན་མངོན་རིགས་པའི། །ནད་ཀྱིས་གློངས་པ་འཇིག་པར་འགྱུར། །འདི་ནི་སངས་རྒྱས་ཐམས་ཅད་ཀྱི། །གཟི་བརྗིད་ཆེན་མོ་མདངས་ཆེ་བ། །དབུལ་དང་ནད་དང་གདོན་ཆེན་པོ། །སེམས་ཅན་ཀུན་གྱི་འཕྲོག་པར་བྱེད། །ཉི་མ་འཆར་པའི་དུས་ཉིད་དང་། །ཉི་མ་ཕྱེད་པའི་དུས་ཉིད་དུ། །ཉིད་ཀྱི་སྙིང་གར་འདི་བྱས་ཏེ། །ནོར་བུ་རིན་ཆེན་བསྒོམ་བྱས་ན། །ཞག་བདུན་གྱིས་ནི་ངེས་པར་ཡང་། །དངོས་གྲུབ་ནོར་མང་སྦྱིན་མཛད་དེ། །དབང་པོ་གཉིས་ཀྱི་སྦྱོར་བ་ཡིས། །ཀྱེ་མའོ་བདེ་བས་དབང་བསྐུར་བྱ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་མཆོག་ཏུ་བདེ་བ་ཆེན་པོ་དཔལ་རྡོ་རྗེ་སེམས་དཔའ་ཤིན་ཏུ་དགྱེས་པའི་འདོད་པའི་དབང་གི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། པདྨོ་ཆེན་པོ་ཀུན་ཏུ་གཟིགས་པའི་ལོངས་སྤྱོད་པའི་དཔལ་ཞེས་བྱ་བའི་སྙིང་པོ་ཆེན་པོ་ཉིད་ཀྱི་སྐུ་དང་གསུང་དང་ཐུགས་ཀྱི་ཡེ་ཤེས་མཆོག་ཏུ་གསང་བ་ཟླ་གསང་ཐིག་ལེ་ལས་འདི་ཕྱུང་ངོ་།། །།དང་པོར་ཨོྃ་དང་ལྡན་བྱས་ཏེ། །མི་ཕྱེད་ར་བཏགས་འདྲེན་པར་བཅས། །ཚེག་དྲག་པ་ནི་སྔགས་ཡིན་ཏེ། །བསམ་པ་ཐམས་ཅད་ཡོངས་སུ་བསྐོར། །སྔགས་མཁན་གང་གིས་མཉམ་གཞག་སྟེ། །སྙིང་གར་འདི་ནི་སྦྱར་བྱས་ནས། །

བདག་ནི་འདོད་ཆགས་ཞེན་སེམས་ཤིང་། །པདྨོ་སྦྱར་བས་བསྒོམ་པར་བྱ། །མཚམས་ཀྱི་མཐའ་མ་དུས་དག་ཏུ། །དམ་ཚིག་འདི་ནི་སྤྱད་བྱས་ན། །ཟླ་བ་ཕྱེད་ཀྱི་ནང་ལོགས་སུ། །དབང་ཕྱུག་མོ་ནི་དངོས་གྲུབ་འཐོབ། །པདྨོ་ཆེ་ལས་བྱུང་ནས་ཀྱང་། །ཐམས་ཅད་དུ་ནི་རྒྱས་འགྱུར་ཏེ། །འདི་ཉིད་དུ་ནི་སླར་ཞུགས་ནས། །པདྨོའི་ཚུལ་གྱིས་གནས་པར་འགྱུར། །ཀུན་ཏུ་སྣང་བས་ཁྱབ་བྱས་ན། །སེམས་དཔའི་ཚུལ་གྱིས་སྤྲུལ་པ་ནི། །དེ་ནས་འདོད་ཆགས་བབས་ནས་ཀྱང་། །པདྨའི་དབུས་སུ་ཞུགས་པར་འགྱུར། །དཀྱིལ་འཁོར་དུ་ནི་གང་བ་ཡིས། །རྒྱབ་ནས་རྗེས་སུ་མཉེས་མཛད་ཅིང་། །འཛུམ་བཅས་པདྨ་ཕྱེ་བ་ཡིས། །ཐུགས་ཀྱི་དབུས་སུ་ཡིད་ཙམ་འདུད། །དཔལ་དང་ལྡན་པ་ཞལ་ལྔ་འཛིན། །ཕྱག་ནི་ཉི་ཤུར་བཞིས་མ་གཏམས། །མཚོན་ཆ་རྣམ་པ་སྣ་ཚོགས་འཛིན། །སྣ་ཚོགས་རྒྱན་གྱིས་བཀླུབས་པ་ཡིས། །ཟླ་བ་བཞིན་དུ་རྣམ་གྲོལ་བ། །བརྗིད་པའི་གར་ནི་མཛད་ཅིང་བཞུགས། །འདི་ཡིས་པདྨའི་གནས་ཉིད་དུ། །ཚེ་འདི་ཉིད་ལ་ཐོབ་པར་འགྱུར། །དཔལ་ལྡན་གར་དབང་འཐོབ་འགྱུར་ཏེ། །འདོད་ཆགས་ཀུན་གྱིས་ཐབས་གནས་པས། །འཇམ་པའི་ཕྱག་ནི་སྟོང་རྣམས་ཀྱིས། །གར་དུ་མཛད་ཅིང་འགྲོ་བ་འདུལ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོ་ཀུན་ཏུ་བཟང་པོས་ཡང་སྣ་ཚོགས་ཆེན་པོ་ཀུན་ཏུ་ལོངས་སྤྱོད་པའི་རྣམ་པར་འགྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཡེ་ཤེས་མཆོག་ཏུ་གསང་བ་ཟླ་གསང་ཐིག་ལེ་ཆེན་པོ་ལས་ཕྱུང་ངོ་།། །།སྣ་ཚོགས་ཆེན་པོ་ཨོ་ཆེན་པོ། །སྟེང་དུ་ཐིག་ལེར་ཡང་དག་ལྡན། །འདི་ནི་དབུས་ཏེ་ལྟ་འོག་ཁྲོ། །སྔགས་ཀྱི་མཆོག་ནི་གཞག་པར་བྱ། །སྣ་ཚོགས་འདི་ནི་ཐུགས་ཀར་གྲགས། །སྣ་ཚོགས་ཕྱུང་ནས་ཀུན་གནང་བས། །སངས་རྒྱས་ཚུལ་བཞིན་ཀུན་མཉེས་བྱས། །དེ་ཉིད་སླར་འཁོར་རབ་བཞུགས་ཏེ། །སྣ་ཚོགས་རྡོ་རྗེ་གཟུགས་མཆོག་གནས། །སྐད་ཅིག་སེམས་དཔའ་སྐུ་གནས་པ། །རྣམ་པ་སྣ་ཚོགས་བཞད་པས་བརྒྱན། །འགྱིང་བཅས་ཐུགས་ཀར་སྣ་ཚོགས་འཛིན། །སྣ་ཚོགས་གཟི་བརྗིད་འབར་བ་གཏོང་། །ཕྱག་ནི་བརྒྱད་

གཉིས་གཉིས་ཀྱིས་ཕྱོགས། །ཁ་འབྱེད་སྣ་ཚོགས་མཚོན་ཆ་གཏོང་། །ཞལ་ལྔ་སྣ་ཚོགས་ཡངས་ཆེ་བ། །བགེགས་སྤོང་ཐམས་ཅད་དངོས་གྲུབ་མཛད། །དཀྱིལ་འཁོར་གང་བར་བཞག་ནས་བྱང་དུ་གནས། །སྣ་ཚོགས་རྡོ་རྗེ་བདག་མོར་རྡོ་རྗེ་ཡང་དག་གིས། །ཐུགས་ཀར་མཛད་ནས་བདེ་བར་ཡང་དག་གནས། །སྔགས་མཁན་ཞག་བདུན་དུ་ནི་བསྒོམ་བྱས་ན། །སྣ་ཚོགས་གྱུར་ཏེ་སྣ་ཚོགས་དེ་ལ་བབ། །སྣ་ཚོགས་ལས་ནི་སྣ་ཚོགས་བྱེད་པར་འགྱུར། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་ཏུ་ངོ་མཚར་དུ་གྱུར་ཏེ། དབྱངས་ཆེན་པོ་ལེན་ཅིང་དཀྱིལ་འཁོར་ཆེན་པོའི་དབུས་ཀྱི་བཅོམ་ལྡན་འདས་ལ་མཉེས་པ་མཛད་དོ། །གཙོ་བོ་བྱིན་གྱིས་བརླབ་པའི་ཕྱིར། །ཡེ་ཤེས་ལྔ་ཡི་ངོ་བོ་དག །རྒྱལ་བ་ཉིད་ཀྱིས་བཤད་པར་མཛོད། །སངས་རྒྱས་སྐུ་ལ་བསྟོད་ཕྱག་འཚལ། །སྔགས་རིག་ཕྱག་རྒྱ་ཡན་ལག་བཅས། །ལྷ་ཡི་དེ་ཉིད་ཕ་རོལ་ཕྱིན། །བདག་ནི་དེ་ཉིད་སྣ་ཚོགས་ཆེ། །སྣ་ཚོགས་ཡེ་ཤེས་བསྟོད་ཕྱག་འཚལ། །གཟུངས་ཀྱི་པདྨོ་ཡང་དག་ལྡན། །འདོད་བྱེད་ཐུགས་ཀྱི་མཆོག་ཡིན་ཏེ། །ཤེས་རབ་ཕ་རོལ་ཕྱིན་སྦྱོར་བ། །སྦྱོར་བའི་ཡེ་ཤེས་བསྟོད་ཕྱག་འཚལ། །ཆོས་ཀྱི་དོན་ནི་གཉིས་མེད་ཚུལ། །སྟོང་པ་ཉིད་ཀྱི་ལམ་རིག་པ། །ཡངས་པའི་སྤྱན་ནི་སོ་སོར་གཟིགས། །མེ་ལོང་ཡེ་ཤེས་ཡང་དག་འབྱུང་། །བྱ་བ་ནན་ཏན་སེམས་ཅན་དོན། །རང་གི་ཡོན་ཏན་མི་མཉམ་ཤོད། །དེ་ཉིད་རིག་པའི་སེམས་ཅན་ཀུན། །རྡོ་རྗེ་གསུམ་གྱིས་བྱིན་རླབས་པ། །གང་གིས་བྱིན་གྱིས་བརླབས་མ་ཐག །སངས་རྒྱས་གསུམ་ནི་དབང་དུ་འགྱུར། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་གཉིས་སུ་མེད་པའི་མཉམ་པ་ཉིད་ཀྱི་རྡོ་རྗེ་ཡེ་ཤེས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་འབྲུ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་བྷྲུྃ། སྟོང་པ་ཆེན་པོའི་སྙིང་པོའོ། །ཨོྃ་བཛྲ་ཙིཏྟ་ཧཱུཾ། ཨོྃ་བཛྲ་ཀཱ་ཡ་ཨོྃ། ཨོྃ་བཛྲ་བཱཀ་ཨཱཿ། ཨོྃ་བཛྲ་ཨ་བྷི་ཥིཉྩ་ཏྲཱྃ།བཛྲ་ས་མ་ཡ་ཧོཿ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཤིན་ཏུ་མགུ། རབ་ཏུ་དགྱེས་

པའི་ཡིད་ཀྱིས་བཅོམ་ལྡན་འདས་ལ་ཕྱག་བྱས་ཏེ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་ཐམས་ཅད་ཀྱང་རང་རང་གི་སྙིང་པོ་བཅོམ་ལྡན་འདས་ལ་འབུལ་ལོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་དེ་བཞིན་གཤེགས་པ་ཐམས་ཅད་ལ་དགེའོ་ཞེས་བདེ་བ་ཆེན་པོའི་ཚུལ་གྱིས་རབ་ཏུ་སྤྲོ་བར་མཛད་དོ། །དགེའོ་དགེའོ་རྒྱལ་བ་ཀུན། །དགེའོ་དགེའོ་རྒྱལ་བ་མཆོག །དགེའོ་དགེའོ་ལེགས་པའི་ལས། །དགེའོ་དགེའོ་སྔོན་འགྲོ་བ། །དགེའོ་དགེའོ་སྣ་ཚོགས་ཆེ། །ཉིད་ཀྱི་སྙིང་གར་དྲངས་བྱས་ཏེ། །རང་གི་གསང་བ་བཤད་པར་མཛོད། །གང་གིས་མ་འོངས་སངས་རྒྱས་རྣམས། །བདེ་བའི་ཡིད་ནི་ཆུད་པར་འགྱུར། །དེ་ནས་བཅོམ་ལྡན་འདས་སྟོང་པ་ཉིད་ཀྱི་ཡེ་ཤེས་རྡོ་རྗེ་ཆེན་པོ། དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་མེ་ལོང་གི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་ཨཱ་དརྵ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་དེ་བཞིན་གཤེགས་པ་སོ་སོར་ཀུན་ཏུ་གཟིགས་པས་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་མ་ཧཱ་པྲ་ཏྱ་པྲ་བེ་ཀྵཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་མཉམ་པ་ཉིད་ཀྱི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་མ་ཧཱ་ས་མནྟཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་བྱ་བ་ནན་ཏན་གྱི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་ཀྲཱི་ཏྱ་ཨ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་ཡང་དགེ་བའི་ཚུལ་སྦྱིན་པར་མཛད་དེ། །ཨོྃ་དགེའོ་དགེའོ་སྟོང་པ་ཆེ། །ཨོྃ་དགེའོ་དགེའོ་ཐུགས་ཆེན་པོ། །ཨོྃ་དགེའོ་དགེའོ་སྐུ་ཆེན་པོ། །ཨོྃ་དགེའོ་དགེའོ་གསུང་ཆེན་པོ། །ཨོྃ་དགེའོ་དགེའོ་རིན་པོ་ཆེའོ། །ཨོྃ་

དགེའོ་དགེའོ་སྣ་ཚོགས་ཆེ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདུ་བ་མཛད་ནས་བཅོམ་ལྡན་འདས་ལ་རང་གི་དཀྱིལ་འཁོར་བཤད་པར་གསོལ་བ་འདེབས་ཏེ། དཀྱིལ་འཁོར་སངས་རྒྱས་རྡོ་རྗེ་ཡི། །དགའ་བྱེད་བཅོམ་ལྡན་ཉིད་ཀྱིས་ཤོད། །གང་གིས་སེམས་ཅན་བདེ་ཉིད་ཀྱིས། །དཀྱིལ་འཁོར་རབ་ཏུ་འཐོབ་པར་འགྱུར། །དཀྱིལ་འཁོར་དཀྱིལ་འཁོར་ཞེས་བགྱི་བ། །རྒྱལ་བའི་བདག་པོས་གསང་བ་གསུངས། །གང་གིས་དཀྱིལ་འཁོར་མྱུར་བྲིས་ནས། །དཀྱིལ་འཁོར་གྱི་ནི་རྒྱན་དུ་འགྱུར། །དཀྱིལ་འཁོར་བདེ་བའི་གཞི་ཉིད་ནི། །གསང་བའི་དཀྱིལ་འཁོར་ཞེས་བགྱིའོ། །དཀྱིལ་འཁོར་བརྒྱན་པའི་བདག་ཉིད་དེ། །གསང་བ་བཅོམ་ལྡན་ཉིད་ཀྱིས་གསུངས། །དཀྱིལ་འཁོར་མཉམ་པའི་ཡེ་ཤེས་ནི། །དཀྱིལ་འཁོར་སྙིང་པོ་ཞེས་བགྱི་བ། །དཀྱིལ་འཁོར་གྱི་ནི་ཅི་རིགས་པར། །གཙོ་བོ་ཆེན་པོ་ཉིད་ཀྱིས་ཤོད། །དཀྱིལ་འཁོར་མི་མཉམ་ཡེ་ཤེས་ནི། །དཀྱིལ་འཁོར་གསང་བ་པདྨོ་སྟེ། །དཀྱིལ་འཁོར་རབ་དགྱེས་འཐོབ་བྱེད་པའི། །ཚད་མེད་དཀྱིལ་འཁོར་བཤད་པར་མཛོད། །དེ་ནས་བཅོམ་ལྡན་འདས་ཀུན་ཏུ་བཟང་པོ་རབ་ཏུ་དགའ་བའི་ཡེ་ཤེས་ཀྱི་དཀྱིལ་འཁོར་རྡོ་རྗེའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དཀྱིལ་འཁོར་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་།། །།གཟུགས་དང་ལང་ཚོས་བརྒྱན་པ་ཡི། །བུ་མོ་མིག་ཡངས་གཟུང་བྱ་སྟེ། །ཤེས་རབ་ཅན་གྱིས་བྱིན་རླབས་འབྲུས། །མཉམ་པར་བཞག་སྟེ་བྱིན་བརླབས་ནས། །ཤེས་རབ་ཕ་རོལ་ཕྱིན་པའི་བདག །དེ་བཞིན་གཤེགས་ཀྱི་བཙུན་མོ་གཞག །གཉིས་པོ་མདུན་དུ་གཞག་བྱས་པ། །བརྩོན་འགྲུས་ཕ་རོལ་ཕྱིན་པའི་གནས། །རྡོ་རྗེ་སེམས་དཔའི་བཙུན་མོ་སྟེ། །ཐུགས་ནི་དགྱེས་པར་བྱེད་པ་ཡིན། །གསུམ་པ་ལྷོ་རུ་བསམ་བྱ་བ། །དགེ་བ་སྦྱིན་པའི་བདག་ཉིད་གཞག །རིན་ཆེན་འབྱུང་ལྡན་བཙུན་མོ་ཆེ། །དབང་བསྐུར་ཡོན་ཏན་འཐོབ་བྱེད་པའོ། །བཞི་པ་ཚུལ་ཁྲིམས་ཆེན་མོ་སྟེ། །དེ་ཉིད་ཆོས་དོན་ཡང་དག་གནས། །རྡོ་རྗེ་ཆོས་ཀྱི་བཙུན་མོ་སྟེ། །དེ་སྦྱིན་དགའ་བྱེད་མ་ཡིན་ནོ། །བཟོད་

པ་ཆེན་མོ་བྱང་དུ་སྟེ། །གསོད་པའི་བདག་ཉིད་ཟད་པ་སྦྱིན། །བཙུན་མོ་རྡོ་རྗེ་གདོན་མི་ཟ། །དམ་ཚིག་གནས་ནི་སྐྱོང་བྱེད་མའི། །གྲྭ་དག་ཏུ་ནི་ཐམས་ཅད་དུ། །སྔ་མ་བཞིན་དུ་མཆོད་ལ་སོགས། །སྒོ་ཡི་ཕྱོགས་རྣམས་ཐམས་ཅད་དུ། །སྒོ་སྲུང་རྣམས་ནི་རྣམ་པ་བཞི། །ཅི་འདོད་པར་ནི་མཆོད་བྱ་སྟེ། །སློབ་མ་མཆོག་ནི་གཞུག་པར་བྱ། །ཕྱག་རྒྱས་ལག་པ་བརྒྱན་བྱས་ཏེ། །འཛུམ་དང་བཅས་པའི་འདོད་ཆགས་མིག །རྒྱན་ཀུན་གྱིས་ནི་རྣམ་པར་བཀླུབས། །སྤྲོ་བ་ཆེ་བས་གར་བྱ་ཞིང་། །ལྷ་ཡི་འགྱིང་བའི་འདུན་པ་ཡིས། །དགའ་བྱེད་དཀྱིལ་འཁོར་གཞུག་པར་བྱ། །མིག་ནི་དར་གྱི་གོས་ཉིད་ཀྱིས། །གཡོགས་ཏེ་ལག་པས་བཟུང་ནས་ཀྱང་། །སྒོ་ཡི་གྲྭར་ཡང་གཞག་བྱ་སྟེ། །སྨོན་ལམ་མཆོག་ནི་སྨྲ་རུ་གཞུག །རྡོ་རྗེ་ཆེན་མོ་བདག་ཅེས་བགྱི། །རང་གི་ལྷ་རྣམས་ཕྱག་བགྱི་སྟེ། །རང་དགྱེས་གནས་ལས་བྱུང་བ་ཡི། །བདེ་བྱེད་ཆེན་མོས་མཉེས་པར་བགྱི། །ཇི་ལྟ་བཞིན་དུ་མཉམ་ཉིད་འཐོབ། །མེ་ཏོག་ཕྲེང་བ་དོར་བྱས་ཏེ། །ལྷ་མོ་ཆེན་མོ་བཞེངས་སུ་གསོལ། །ཁྱོད་ཀྱི་དཀྱིལ་འཁོར་བདག་འཚལ་ལོ། །ལྷ་མོ་གང་ལ་ལྷུང་བ་ཡི། །དེ་ཡི་ལག་ནས་བསྐོར་བ་བྱ། །ལྷ་མོ་འདི་ནི་ཁྱོད་དང་མཐུན། །སེམས་ཆེ་ཁྱོད་ཀྱིས་འདོད་པར་གྱིས། །དེ་ནས་སློབ་མ་དེ་ཡིས་ནི། །བདག་གི་རབ་དགྱེས་སྨྲ་བྱ་ཞིང་། །དེ་ལ་འདོད་པ་སྤྱད་པར་མཛོད། །ཁྲོ་བོ་རྣམས་ཀྱི་མི་ཕྱེད་ཕཊ། །མཐའ་ནི་ཧོཿཞེས་སྦྱར་བར་བྱ། །འབྱུང་བའི་དུས་སུ་བྱ་བ་ནི། །ཨ་ཧོ་སུ་ཁ་བདེ་ཞེས་སྨྲ། །དེ་ནས་རྡོ་རྗེ་ཕྱུང་བ་ཡི། །མཁས་པས་དེ་ནི་བླང་བྱས་ཏེ། །བདེ་བ་ཆེན་པོ་དངོས་གྲུབ་རྫས། །བླ་མ་ལ་ནི་དང་པོར་དབུལ། །དེ་ནས་དེ་ཉིད་ཀུན་ལ་ཡང་། །ཅི་བདེ་བར་ནི་དབུལ་བར་བྱ། །སྤྱི་བོ་ཞབས་ལ་གཏུགས་བྱས་ཏེ། །བླ་མ་ལ་ནི་དབང་བསླང་བྱ། །ཤིན་ཏུ་སྦས་པ་འཕགས་པའི་དབང། །བཅོམ་ལྡན་བདག་ལ་སྩལ་བར་མཛོད། །དེ་ནས་སྦྱོར་བ་ཆེན་པོ་ཡི། །སྙོམས་པར་ཞུགས་ཏེ་དེའི་བདེ་བ། །སློབ་དཔོན་རྡོ་རྗེ་ཕྱུང་བྱས་ཏེ། །སྤྱི་བོར་རབ་ཏུ་གཞག་པར་བྱ། །ལག་པ་ཡིས་ནི་མ་རེག་པར། །ཁ་ལ་རབ་ཏུ་སྦྱིན་པར་བྱ། །ཁྱད་པར་དུ་ནི་དྲང་བྱས་ཏེ། །ཅི་བདེ་བར་ནི་བཏུང་བར་

བྱ། །གཟུངས་མ་དེ་དག་ཐམས་ཅད་ལ། །རྡོ་རྗེ་ཡིས་ནི་སྦྱིན་པར་བྱ། །དེ་ནས་སློབ་མ་མཆོག་ཉིད་ཀྱིས། །བླ་མ་ལ་ནི་ཡོན་དབུལ་བྱ། །མ་དང་སྲིང་མོ་བུ་མོ་དང་། །ཆུང་མ་དང་ནི་རང་གི་བུ། །བདག་ཉིད་དང་ནི་རྒྱལ་སྲིད་དང་། །དེ་བཞིན་ལོངས་སྤྱོད་དབང་ཕྱུག་དང་། །རྫས་དང་ནོར་དང་གཏེར་རྣམས་དང་། །གླང་པོ་རྟ་དང་ཤིང་རྟ་དག །བླ་མ་ལ་ནི་ཡོན་མཆོག་སྟེ། །དགའ་བའི་ཡིད་འགྱུར་དབུལ་བར་བྱ། །ཕྱི་ཡི་སྦས་པ་གསང་བ་དང་། །དེ་བཞིན་གཤེགས་པ་ཐམས་ཅད་དང་། །རྡོ་རྗེ་དང་ནི་གཟུངས་མའི་རྣམས། །འདོད་པའི་དངོས་གྲུབ་དྲི་བར་བྱ། །སྙིང་པོ་ཡང་དག་ཤེས་གྱུར་ནས། །དངོས་གྲུབ་མཆོག་ནི་བསྒྲུབ་པར་བྱ། །དེ་བཞིན་གཤེགས་པ་ཐམས་ཅད་ཀྱི། །གསང་བ་ཡི་ནི་དཀྱིལ་འཁོར་འདི། །ཅི་སྟེ་རྨོངས་པས་སྨྲ་བྱས་ན། །སློབ་དཔོན་གྱི་ནི་དམ་ཚིག་ཉམས། །མྱུར་དུ་ཟླ་ཕྱེད་ཚུན་ཆད་དུ། །བསྟན་པས་རྣམ་པར་འཇིག་པར་འགྱུར། །དང་པོར་དམ་ཚིག་གཞག་བྱས་ཏེ། །ཕྱི་ནས་དཀྱིལ་འཁོར་བསྟན་པར་བྱ། །གཞན་དུ་བྱས་ན་དཔའ་བོའི་རྣམས། །དམྱལ་བར་བསྐལ་པར་གྲངས་མེད་སྨིན། །དེ་བས་བློ་ལྡན་རྡོ་རྗེ་ཡིས། །ནན་ཏན་དམ་ཚིག་བསྒྲག་མི་བྱ། །སྔགས་ཀྱི་དངོས་གྲུབ་དོན་འདོད་པས། །དམ་ཚིག་བསྲུང་ལ་བརྩོན་པར་བྱ། །གཞན་དུ་བྱས་ན་སྔགས་མཁན་གྱི། །སྔགས་ལ་སོགས་པའི་དོན་མི་འགྲུབ། །ལྷ་རྣམས་ཀྱང་ནི་དམ་ཚིག་གི། །གསོལ་ཡང་བཞེས་སུ་མི་གནང་སྟེ། །འཇིག་རྟེན་འདི་རུ་སྡུག་བསྔལ་ཆེ། །འཇིག་རྟེན་ཕ་རོལ་དམྱལ་བའི་རྣམས། །དམ་ཚིག་སྤྱོད་པ་འདས་པས་སོ། །རྨོངས་པའི་བདག་ཉིད་དེས་འཐོབ་བོ། །སློབ་མ་དེ་ཡང་དེ་བཞིན་དུ། །བློ་ཞན་སྡུག་བསྔལ་འཐོབ་གྱུར་ཏེ། །དེས་ན་སྔགས་ཀྱི་དོན་མི་སྨིན། །ལྷ་རྣམས་ཀྱི་ནི་མཆོག་ཏུ་བདེ། །དམ་ཚིག་མེད་པའི་སློབ་མ་ལ། །ནམས་ཀྱང་སྦྱིན་པར་མི་འགྱུར་རོ། །དེ་བས་དམ་ཚིག་གཙོ་ཡིན་ཏེ། །ཐོག་མར་དམ་ཚིག་སྦྱིན་པར་བྱ། །སྔགས་རྣམས་དང་ནི་ཕྱག་རྒྱ་ཡང་། །དེ་བཞིན་ཐབས་དང་ཤེས་རབ་རྣམས། །དམ་ཚིག་དེ་རྣམས་ཐམས་ཅད་ཀྱང་། །སྔགས་པས་གསང་བ་སྦྱོར་བ་ཡིས། །དམྱལ་བ་ངན་སོང་ཟློག་པའི་ཕྱིར། །བུ་དང་སློབ་མ་སྦྱིན་པར་བྱ། །སྔགས་ཀྱི་

དངོས་གྲུབ་བསོད་ནམས་བྱེད། །གཙང་སྦྲ་དོགས་པ་མེད་པ་འགྱུར། །དེ་བཞིན་གཤེགས་པ་ཀུན་གྱིས་དལ། །དཀྱིལ་འཁོར་ཚུལ་བཞིན་བྲི་བྱས་ཏེ། །གཞོན་ནུའི་ཚད་ནི་བཅུ་དྲུག་ལོན། །དམ་ཚིག་སློབ་མའི་དཀྱིལ་འཁོར་དུ། །བཞག་ནས་ཆོ་ག་འདིས་གཞུག་བྱ། །དམ་ཚིག་རྣམས་ནི་འདི་ཡིན་ཏེ། །སྦྲང་རྩི་ཤ་དང་དྲི་ཆེན་པོ། །ཉི་མ་ཟླ་བའི་བློ་ཆེན་དང་། །རྡོ་རྗེ་ལས་བྱུང་ཆུ་བསྒྲུབས་རྣམས། །དཀྱིལ་འཁོར་ལ་སོགས་ཚུལ་བཞིན་གཞག །དམ་ཚིག་ཡི་གེ་གཞག་པ་ཡིས། །མྱུར་དུ་དམ་ཚིག་བསྒྲུབ་བྱས་ན། །དགའ་བྱེད་དམ་ཚིག་དངོས་གྲུབ་སྟེ། །དངོས་གྲུབ་ཐམས་ཅད་འཐོབ་པར་འགྱུར། །དམ་ཚིག་འདི་ནི་སྣ་ཚོགས་ཏེ། །འཛིན་པ་ཡིས་ནི་མཐུ་རུ་འགྱུར། །མ་འོངས་སངས་རྒྱས་ཆེན་པོ་དང་། །རྡོ་རྗེ་སེམས་དཔའ་བདག་པོ་ཆེ། །བློ་ལྡན་དབང་བསྐུར་བླངས་པ་ཡིས། །དབང་བསྐུར་ཕུན་སུམ་ཚོགས་པ་ཀུན། །སངས་རྒྱས་ཀུན་གྱིས་འཐོབ་འགྱུར་ཏེ། །དབང་བསྐུར་བ་ཡི་ཡིད་དུ་འགྱུར། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་རྡོ་རྗེ་ཡེ་ཤེས་ཆེན་པོ་ཞེས་བྱ་བ་མཆོག་ཏུ་གསང་བ་ཆེན་པོའི་དཀྱིལ་འཁོར་ཏེ་ལྔ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་ཏུ་དགྱེས་པ་ཆེན་པོ་ཡིད་བདེ་བར་གྱུར་ཏེ། བཅོམ་ལྡན་འདས་ལ་གསོལ་བ་འདེབས་སོ། །གདུག་པ་ཐམས་ཅད་རྣམ་འདུལ་བ། །འཇིགས་པར་བྱེད་པ་ཆེན་པོ་འདི། །རྡོ་རྗེ་ཁྲོ་བོ་ཆེན་པོ་ཡི། །དཀྱིལ་འཁོར་ཆེན་པོ་རྣམ་བཤད་ཕྱིར། །འཇིགས་བྱེད་ཆེན་པོ་རྣམས་འདུལ་བ། །དཀྱིལ་འཁོར་རྡོ་རྗེ་ཐམས་ཅད་ཀྱི། །ཁྲོ་བོ་དམ་ཚིག་དེད་དཔོན་གྱིས། །གསང་བ་ཆེན་པོ་ཉིད་ཀྱིས་ཤོད། །དེ་ནས་བཅོམ་ལྡན་འདས་བདེ་བ་ཆེན་པོ་དཔལ་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་འདྲེན་པའི་ཁྲོ་བོའི་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ཡེ་ཤེས་ལས་འདི་ཕྱུང་ངོ་། །ཨོཾ་བཛྲ་མ་ཧཱ་ཙཎྜ་སརྦྦ་དུཥྚཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། འདི་ཕྱུང་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཁྲོ་བོ་ཆེན་པོའི་མཐུས་རྣམ་པ་དྲུག་ཏུ་གཡོས། ཀུན་ཏུ་གཡོས། ལྷ་

དང་། ཀླུ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྲིན་པོ་ཐམས་ཅད་འཁྲུག་པ་ཆེན་པོར་གྱུར་ཏོ། །དེ་ནས་འཇིགས་པ་ཆེན་པོས་ཉེན་པས་དེ་དག་བརྒྱ་བྱིན་གྱི་ཐད་དུ་ལྷགས་ནས་བརྒྱ་བྱིན་བདག་ཉིད་ཀྱང་སྐྱབས་མེད་པར་མཐོང་ནས་ཚངས་པའི་ཐད་དུ་ཕྱིན། ཚངས་པ་ཡང་གཏོགས་འདོད་ཀྱི་གན་དུ་ཕྱིན། གཏོགས་འདོད་ཀྱང་དབང་ཕྱུག་ཆེན་པོའི་ཐད་དུ་ཕྱིན་ཏེ། དེ་ནས་དབང་ཕྱུག་ཆེན་པོ་བདག་ཉིད་ཀྱི་མཐུ་འཇིགས་བྱེད་ཆེན་པོའི་གཟུགས་སུ་བྱས་ཏེ། འཇིག་རྟེན་གྱི་ཁམས་འདི་དག་ཐམས་ཅད་རང་གི་རྫུ་འཕྲུལ་གྱི་མཐུས་ཀུན་ཏུ་སྣང་བར་བྱས་ཏེ། ལྷ་རྣམས་མ་འཇིགས་ཤིག །ཀླུ་རྣམས་མ་འཇིགས་ཤིག །གནོད་སྦྱིན་རྣམས་མ་འཇིགས་ཤིག །ལྷ་མ་ཡིན་རྣམས་མ་འཇིགས་ཤིག །དྲི་ཟ་རྣམས་མ་འཇིགས་ཤིག །ལྷ་དང་འཇིག་རྟེན་དུ་བཅས་པ་རྣམས་མ་འཇིགས་ཤིག ། ངའི་རྫུ་འཕྲུལ་གྱི་ཁྱད་པར་འདི་ལྟ་བུ་གཞན་འགས་ཀྱང་རབ་ཏུ་བརྫི་ནུས་སམ། ཁྱེད་རྣམས་ཅི་དགར་སྤྱོད་པས་གནོས་ཤིག་ཅེས་དབུགས་ཕྱུང་ངོ་། །དེ་ནས་བཅོམ་ལྡན་འདས་ཀྱིས་ཀྱང་དེ་བཞིན་གཤེགས་པ་ཐམས་ཅད་ཀྱི་གཟི་བརྗིད་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་ཁྲོ་གཉེར་ཆེན་པོ་ཞེས་བྱ་བ། ཁྲོ་བོ་ཆེན་པོའི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ལས་ཕྱུང་ངོ་། །ཨོྃ་བཛྲ་བྷྲྀ་ཀུ་ཊི། མ་ཧཱ་ཀྲོ་དྷ་ཧ་ན་ཧ་ན། གྲྀཧྣ་གྲྀཧྣ། མ་ར་མཱ་ར། བྷཉྫ་བྷཉྫ། ད་ཧ་ད་ཧ། པ་ཙ་པ་ཙ་ཧཱུྃ། བྷྲྀ་བྷྲྀ། བྷྲ་ཧྨ་བྷྲ་ཧྨ་ཡ། བྷྲྀ་ཀུཊྚ་སརྦྦ་མཱ་རཱ་ན་སརྦྦ་དུ་མ་ཊ་མ་ཊ། མོ་ཊ་མོ་ཊ། ཧཱུྃ་བྷྲྀ། ཧཱུྃ་ཏྣྃ། ཏྲ་ཊ་ཏྲ་ཊ། བྷྲྀ་ཧུྃ་ཧྲྀ་ཧུྃ་ཏྲོྃ་ཏྲ་ཊ། འདི་བརྗོད་མ་ཐག་ཏུ་དེ་དག་སྔ་མ་བཞིན་དུ་སྐྲག་ནས་དབང་ཕྱུག་ཆེན་པོའི་ཐད་དུ་ཉེ་བར་ལྷགས་སོ། །དེ་ནས་དབང་ཕྱུག་སྔ་མ་བཞིན་དུ་བདག་གི་ཆེ་བ་ཉེ་བར་སྟོན་ཅིང་གཏོགས་འདོད་ལ་སྨྲས་པ། ཁྱེད་ཀྱང་མཐུ་ཆེན་པོའི་ལྷ་ཆེན་པོ་སྟེ་གདུག་པ་ཐམས་ཅད་ཀྱི་ཚོགས་ཀྱི་བདག་པོ་ཡིན་ན། རང་གི་མཐུ་རྒྱ་ཆེན་པོའི་རྫུ་འཕྲུལ་ཉེ་བར་སྟོན་པས་གདུག་པ་དེ་རྣམས་དབུགས་དབྱུང་བར་མཛོད་ཅིག །དེ་ནས་གཏོགས་འདོད་དེ་མ་ཐག་ཏུ་རང་གི་མཐུ་འཇིགས་བྱེད་ཀྱི་གཟུགས་འཁོར་ལོའི་ནག་པོ་ཆེན་

པོར་བསྒྱུར་ནས་རྡོ་རྗེའི་སྐད་དྲག་པོ་ཆེན་པོའི་བགད་པའི་གདངས་འབྱིན་པས་འཇིག་རྟེན་ཐམས་ཅད་ལ་ཉེ་བར་སྟོན་ཅིང་གནས་པར་གྱུར་ཏོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་ཁྲོ་བོ་ཆེན་པོའི་པདྨོ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྙོམས་པར་ཞུགས་མ་ཐག་ཏུ་པདྨོའི་དྲ་བ་འཆར་བའི་ཁྲོ་བོ་ཐམས་ཅད་སླར་ལྡོག་སྟེ། བཅོམ་ལྡན་འདས་ཀྱི་ཐུགས་ཀར་ཞུགས་སོ། །ཞུགས་ནས་ཁྲོ་བོ་ཆེན་པོའི་སྙིང་པོར་བདག་ཉིད་བྱིན་གྱིས་བརླབས་ནསབཅོམ་ལྡན་འདས་ཀྱི་སྐུ་དང་གསུང་དང་ཐུགས་རྡོ་རྗེའི་ཐུགས་ཀ་ནས་ཕྱུང་ངོ་། །ཨོཾ་པདྨ་མ་ཧཱ་ཛྭཱ་ལཧཱ་ཀྲོ་དྷ་བ་ད་བ་མུ་ཁ་ཁ་ཁ། སརྦྦ་དུཥྚཱཾ། ཁ་ཧི་ཁཱ་ཧཱི། སརྦྦ་དུཥྚའཾ། པྲ་དུཥྚ་ནཾ། ད་མ་ད་མ། བཛྲ་དཾ་ཥྚོད་ཀ་ཊ་མ་ཧཱ་མ་ཊ། ཀྵོ་ཊ་ཀྵོ་ཊ། བཛྲ་ཁ་ར། ཙ་པ་ལ་དུར་ག་བེ་ག །ཏྲ་ས་ཏྲ་ས། མ་ཧཱ་བཛྲ་བ་ཌ་བ་མུ་ཁ། པྲ་མ་ཐ་པྲ་མ་ཐ་ཧཱུྃ་ཕཊ། ཧྲི་ཧ་ཧ་ཧི་ཧི། ཙ་ཏུརྨུ་ཁ། ངེ་ཤ་པྲཱ་ཎ་ཤ་ན། ཧཱུྃ་ཧྲཱོཾ་ཧཱུྃ་ཧཱུྃ་དྷཱཾཿཧ། དེ་ནས་འདི་གསུངས་མ་ཐག་ཏུ་ཚངས་རིས་ཆེན་པོ་འདར་ཡེད་ཡེད་ཞིང་ཁས་བུབ་ཏུ་འགྱེལ་ཏེ། བརྡབ་འཆོས་སོ། །དེ་ནས་ཚངས་པ་ཆེན་པོ་ངོ་མཚར་དུ་གྱུར་ཏེ། དབང་ཕྱུག་ཆེན་པོ་ལ་དྲིས་པ། ལྷ་འདི་ནི་ཤིན་ཏུ་ངོ་མཚར་དུ་སྣང་ངོ་། །དེ་ནས་དབང་ཕྱུག་ཆེན་པོས་ཚངས་པ་ལ་བསྐུལ་བ། ཁྱོད་ནི་སེམས་ཅན་ཀུན་གྱི་གཙོ་བོ། །ལྷའི་ཚོགས་ཐམས་ཅད་ཀྱི་བདག་པོ། ཁྱོད་ནི་འཇིག་རྟེན་གསུམ་ན་གཏོང་བ་དང་བྱེད་པའོ། །རྫུ་འཕྲུལ་ཆེན་པོ་དང་ལྡན་པ་དེའི་ཕྱིར་ཁྱོད་ཀྱིས་གདུག་པའི་སེམས་ཅན་དང་། གདུག་པའི་ལུས་ཅན་ཐམས་ཅད་བརླག་པར་གྱིས་ཤིག །དེ་ནས་ཚངས་པས་རང་ཉིད་ཀྱི་མཐུ་དང་། ཚངས་པ་ཆེན་པོའི་སྲིན་པོའི་གཟུགས་སུ་མངོན་པར་སྤྲུལ་ནས། འཇིགས་བྱེད་ཆེན་པོ་ལྟ་བུར་གདོང་བཞི་པ། མེ་ལྕེ་སྟོང་གི་གཟི་བརྗིད་ཅན་གྱི་ལུས་འགུལ་བ་དང་བཅས་པས་བགད་པ་ཆེན་པོ་འབྱིན་པས་ལྷའི་ཚོགས་ཀྱི་གདུག་པ་ཐམས་ཅད་ལ་ཉེ་བར་སྟོན་ཅིང་གནས་སོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་ལྷ་ཐམས་ཅད་རབ་ཏུ་འཇོམས་པ་ཞེས་བྱ་བ་ཁྲོ་བོ་ཆེན་པོའི་ཏིང་ངེ་འཛིན་ལ་ཡང་དག་པར་སྙོམས་པར་ཞུགས་ཏེ། རྡོ་རྗེ་ཆེན་པོའི་འཇིགས་བྱེད་ཅེས་བྱ་བའི་ཁྲོ་བོ་

ཆེན་པོའི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཡེ་ཤེས་ཀྱི་ཐུགས་ཀ་ནས་ཕྱུང་ངོ་། །ཨོྃ་བཛྲ་བྷཻ་ར་བ། མ་ཧཱ་ཀྲོ་དྷ། སརྦྦ་དུཥྚཾ། སྃ་བྷཀྵ་ཡ་ཧཱུྃ་ཧཱུྃ་ཕཊ་ཕཊ། བཛྲ་ཡཀྵ་ཧ་ན་ཧ་ན་ཧཱུྃ་ཕཊ། དེ་ནས་འདི་ཕྱུང་མ་ཐག་ཏུ་བརྒྱ་བྱིན་གྱི་ཁང་པ་འདི་ཐམས་ཅད་དུམ་བུ་བརྒྱར་རྣམ་པར་བཤིག་སྟེ། རི་རབ་ཀྱི་རྩེ་མོ་ཡང་འགུལ་ཞིང་ཀུན་ཏུ་འཁོར་ནས་གནས་པར་འགྱུར། བརྒྱ་བྱིན་འཁོར་དང་བཅས་པ་ཡང་ཁས་བུ་བཙམ་དུ་འགྱེལ་ཏེ་བརྒྱལ་བར་གྱུར་ཏོ། །དེ་ནས་ལངས་ཏེ་དབང་ཕྱུག་ཆེན་པོ་ལ་བལྟས་པ་དང་། །དབང་ཕྱུག་ཆེན་པོས་ཀྱང་བསྐུལ་བ། ཁྱོད་ནི་ལྷའི་ཚོགས་ཐམས་ཅད་ཀྱི་བདག་པོ་སྟེ། མཐུ་ཆེ་བ་ཡིན་ལ་སུམ་ཅུ་རྩ་གསུམ་གྱི་ལྷ་གདུག་པའི་ཚོགས་ཐམས་ཅད་ཀྱང་ཁྱོད་ལ་མཉེས་པར་བྱེད་པ་ཡིན་ན་དེ་ལྟར་བདག་ཉིད་ཀྱི་རྫུ་འཕྲུལ་གྱི་མཐུ་ཉེ་བར་སྟོན་ཅིག །དེ་ནས་ལྷའི་རྒྱལ་པོ་ཆེན་པོ་བརྒྱ་བྱིན་དེ་རང་ཉིད་ཀྱི་མཐུ་གནོད་སྦྱིན་དང་། སྲིན་པོ་ཆེན་པོའི་གཟུགས་ཉེ་བར་སྟོན་ཅིང་གདུག་པའི་ཚོགས་ཐམས་ཅད་ལ་གདུག་པ་དག་མ་འཇིགས་ཤིག །ངའི་རྫུ་འཕྲུལ་འདི་ལྟ་བུ་དག་མཐོང་ན་སུས་ཀྱང་ཟིལ་གྱིས་གནོན་མི་ནུས་སོ་ཞེས་དབུགས་འབྱིན་པར་བྱེད་དོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་སྔགས་ཀྱི་ལྷ་ཐམས་ཅད་འདྲེན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ལྷ་དེ་དག་ཐམས་ཅད་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཡེ་ཤེས་ལས་འཇུག་པར་མཛད་དེ། བཅུག་ནས་ཀྱང་ཁྲོ་བོ་ཆེན་པོ་ཐམས་ཅད་ཕྱག་རྒྱ་ཆེན་པོར་མངོན་པར་བསྒྱུར་ནས་བདག་ཉིད་ཀྱང་ཁྲོ་བོ་ཐམས་ཅད་འབྱིན་པའི་ཁྲོ་བོ་ཆེན་པོའི་གཟུགས་སུ་དམིགས་ཏེ་མཆེ་བ་ཆེན་པོ་འབྱིན་པ། ཞལ་མི་སྡུག་པ། སྤྱན་སྟོང་པ། ཉི་མ་ཆེན་པོ་སྟོང་གི་གཟི་བརྗིད་ཅན་རབ་ཏུ་མི་བཟད་པར་བྱེད་པའི་མེ་རླུང་གིས་བདས་པའི་མདོག་སྔོན་པོའི་སྐུ། དུར་ཁྲོད་ཆེན་པོའི་དཔལ་ཆེན་གྱི་ཕྱག་རྒྱ་མིའི་ཀེང་རུས་དང་། ཁྲག་དང་། ཤ་དང་། ཀླད་པ་དང་། རྐང་དང་། ཚིལ་རྣམས་ཟས་སུ་གསོལ་པ། མིའི་པགས་པས་སྣོམ་ལོགས་རྒྱབ་ལ་གཡོགས་ཏེ་བསྡམས་པ། མིའི་མགོ་བོའི་ཕྲེང་བ་དབུ་ལ་འཛིན་པ། སེང་གེ་དང་། གླང་པོ་ཆེ་དང་། བོང་བུ་དང་། རྔ་མོ་དང་། མ་ཧེ་དང་། ཕག་དང་། ཅེ་སྤྱང་དང་། ར་དང་། ཁྱི་དང་། འུག་པ་དང་།

བྱ་རོག་དང་། བཞད་དང་། བྱི་ལ་དང་། གཟིག་དང་། སྟག་ལ་སོགས་པའི་ཁྲོ་བོ་བྱོལ་སོང་གི་གདོང་བརྒྱ་སྟོང་མང་པོ་རང་གི་བ་སྤུའི་བུ་ག་ནས་ཕྱུང་སྟེ། དཀྱིལ་འཁོར་ཆེན་པོའི་ཚུལ་གྱིས་ཤར་ཕྱོགས་ན་འཇིགས་བྱེད་ཆེན་པོ་འདུལ་བ་རྣམ་པར་གཉེར་བའི་འཇིགས་པ་ལྟ་བུའི་སྤྱན་དང་། ཞལ་རྡོ་རྗེའི་མཆེ་བ་ཆེན་པོ་གཙིགས་པ། འཇིགས་པར་བྱེད་པའི་ཁྲོ་བོ་ཆེན་པོ་བརྒྱ་སྟོང་གི་གཡོག་དང་། ཤར་ཕྱོགས་ཀྱི་དཀྱིལ་འཁོར་དུ་འཁྱིལ་བར་གྱུར་ཏེ་གནས་སོ། །ལྷོའི་དཀྱིལ་འཁོར་དུ་ཡང་རྡོ་རྗེ་ཁྲོ་གཉེར་ཅན་ཁྲོ་བོ་བརྒྱ་སྟོང་མང་པོའི་གཡོག་དང་། འཁྱིལ་བར་གྱུར་ཏེ་གནས་སོ། །ནུབ་ཀྱི་དཀྱིལ་འཁོར་དུ་ཡང་པདྨ་ཆེན་པོ་རྟ་གདོང་ཁྲོ་བོ་བརྒྱ་སྟོང་མང་པོའི་གཡོག་དང་། ནུབ་ཀྱི་དཀྱིལ་འཁོར་དུ་འཁྱིལ་པར་གྱུར་ཏེ་གནས་སོ། །བྱང་གི་དཀྱིལ་འཁོར་དུ་ཡང་རྡོ་རྗེ་འུར་འུར་ཆེན་པོའི་ཁྲོ་བོ་བརྒྱ་སྟོང་མང་པོའི་གཡོག་དང་འཁྱིལ་པར་གྱུར་ཏེ་གནས་སོ། །བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོ་ཡང་ཁྲོ་བོ་ཆེན་པོའི་ཚོགས་བརྒྱ་སྟོང་མང་པོས་བསྐོར་ནས་དཀྱིལ་འཁོར་གྱི་དབུས་སུ་བཞུགས་ཏེ། ཁྲོ་བོ་ཆེན་པོའི་ཚོགས་དེ་དག་དང་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོས་ཀུན་ཏུ་སྤྱོད་ཅིང་ཁྲོ་བོ་ཆེན་པོའི་རྣམ་པ་བརྒྱ་སྟོང་མང་པོའི་རི་རབ་ཀྱི་རྡུལ་ཕྲན་དང་མཉམ་པ་སྙེད་ཕྱུང་ནས། ནམ་མཁའི་དབྱིངས་རབ་འབྱམ་ཐམས་ཅད་དུ་གང་བར་བྱས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱང་གང་བར་བྱས་སོ། །དེ་ནས་གདུག་པའི་ཚོགས་ཐམས་ཅད་ཀྱིས་དེ་དག་མཐོང་ནས་འཇིགས་དངངས་སྐྱབས་མ་མཐོང་ནས། རང་རང་གི་བདག་པོའི་ཐད་དུ་སོང་སྟེ། རྗེ་ཅིག་རྗེ་ཅིག་ཉིད་ཀྱིས་བདག་ལ་སྐྱོབས་ཤིག །དེ་ནས་དབང་ཕྱུག་ཆེན་པོ་ལ་སོགས་པའི་ལྷའི་བདག་པོ་དེ་དག་བདག་ཉིད་ཀྱི་མཐུ་སྤྲུལ་ནས་སླར་ཡང་བསླང་སྟེ་འཇིག་རྟེན་གསུམ་པོ་ཡོངས་སུ་བསྐོར་དུ་བཅུག་ནས་འཇིགས་བྱེད་གདུངས་པ་ང་ལ་སྐྱབས་སུ་སོང་ཞེས་བསྒོ་ཡང་སྐྱབས་སུ་འགྲོ་བ་མི་ལེན་ཅིང་། སླར་ཡང་རང་གི་རྒྱུད་ཀྱི་ང་རྒྱལ་བསྐྱེད་དེ། འཇིགས་བྱེད་ཆེན་པོ་བརྒྱད་པ་ཞེས་བྱ་བ་ཕྱུང་ནས་རི་རབ་ཀྱི་བདག་ཉིད་ཆེན་པོ་ཉེ་བར་སྟོན་ཅིང་། བགད་པ་ཆེན་པོའི་ང་རོ་འབྱིན་པར་གྱུར་ཏོ། །ཨོྃ་མ་ཧཱ་བྷེ་ར་བ་བེ་ཥྚིཾ་ཥྚིཾ། ཊྲ་ཊྲ་ཊྲ་ཏ་ཊྲ་ཏ། ཧ་ཧ་ཨི་ཏི།

འོན་ཀྱང་བ་སྤུའི་བུ་གའི་རྩེའུ་ཆུང་ཚད་ཙམ་ཡང་མ་འགུལ་ཏོ། །དེ་ནས་ཡང་འཇིགས་བྱེད་ཆེན་པོ་འདུལ་བར་བྱེད་པའི་ཁྲོ་བོ་དེས་ཧེ་རུ་ཀའི་ང་རོ་འབྱིན་ཅིང་མགོ་བོར་མནན་ནས་བསྣུན་ཏེ་ཧེ་རུ་ཀས་བདག་ཉིད་ཀྱི་མཐུ་ཆེན་པོས་འཇིགས་བྱེད་ཆེན་པོའི་ང་རོ་འབྱིན་ཅིང་རྒྱུ་མའི་སྦུ་གུ་དྲངས་ནས་ཁྲག་དང་རུས་པ་དང་རྐང་རྣམས་ཟ་ཞིང་ཆེམ་ཆེམ་མཛད་པས། དེའི་འཁོར་ལ་རབ་ཏུ་སྟོན་པར་མཛད་དེ། ཨུ་མ་དང་འགའ་འགའ་ཡང་རྣམ་པར་བཅོམ་མོ། །མ་མོའི་ཚོགས་ཐམས་ཅད་ཀྱང་སྒྲེན་མོར་བྱས་ཏེ་དམའ་ཕབ་ནས། ཁྲོ་བོ་བདག་ཉིད་ཀྱི་མཐུ་ཉེ་བར་སྤེལ་ཅིང་འཁོར་ཐམས་ཅད་ཀྱང་བཏུལ། སྐྱབས་ལེན་དུ་ཡང་བཅུག །དམ་ཚིག་ལ་ཡང་གནས་པར་བྱས་ཏེ་ཡང་དག་པར་ཞུགས་སོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོ་ཁྲོ་བོ་ཆེན་པོ་དྲག་པོ་བཞེད་པས་བཞད་ཅིང་རྡོ་རྗེའི་ཁྲོ་གཉེར་ཁྲོ་བོ་ཆེན་པོའི་ཞལ་ནས་མ་འཇིགས་ཤིག །མ་འཇིགས་ཤིག་ཅེས་དབུགས་འབྱིན་པར་བྱེད་དོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོས་ཁྲོ་བོའི་ཚོགས་ཀུན་ལ་བཀའ་སྩལ་པ། ན་མོ་རཏྣ་ཏྲ་ཡཱ་ཡ། མ་ཧཱ་ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེནཱ་པ་ཏཱ་ཡེ། ཏཏྱ་ཐཱ། ཨོཾ་བོ་དྷ་བོ་དྷ། མ་ཧཱ་བྷཻ་ར་བ་ད་ར་བ་པ་ཧཱ་རི་ཧ་ར་ཧ་ར། གྲཱྀཧྞ་གྲཱིཧྞ། མཱ་ར་མཱ་ར། བྷཉྫ་བྷཉྫ། ཤཱིགྷྲྃ་མ་ཧཱ་བཛྲ། ཙནྜ་སརྦ་དུཥྚཱཾ། ཏ་ཀ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། མ་ཐ་མ་ཐ་ཧཱུཾ་ཕཊ། འདི་གསུངས་མ་ཐག་ཏུ་འཇིགས་བྱེད་ཆེན་པོའི་འདུལ་བར་བྱེད་པས་རང་གི་སྐུ་ནམ་མཁའི་དབྱིངས་ཀྱི་ཚད་དུ་བསྐྱེད་དོ། །ཁྲོ་བོ་བརྒྱ་སྟོང་མང་པོ་རྣམ་པར་བསྙེར་བའི་ཞལ་མཆེ་བ་གཙིགས་ཏེ། འཁྱིལ་ཞིང་བསྒྱུར་བ། ཕྱག་བརྒྱ་སྟོང་མང་པོ་ལ་མཚོན་ཆ་སྣ་ཚོགས་འཛིན་པ་ཞལ་སྣ་ཚོགས་མང་པོ་བརྒྱ་སྟོང་མེ་ལྕེ་བཞིན་དུ་རབ་ཏུ་འབར་བའི་སྐུ་བརྒྱ་སྟོང་རྣམས་འཇིགས་བྱེད་ཆེན་པོ་ག་ན་བ་དེར་སོང་སྟེ། རྡོ་རྗེ་དྲག་པོའི་གད་མོ་ཆེར་འབྱིན་པས་བཞད་ཅིང་མདུན་ན་གནས་སོ། །ཨོྃ་མ་ཧཱ་བཛྲ་ཧེ་རུ་ཀ་བཛྲ་ཨཊྚཱཊྚཱ་ཧཱ་ས་ཧཱ་ས་ར་ཧ་ཧ་ཧ་ཧ་ཧཱུྃ་ཧ་ཨི་ཏི། དེ་ནས་དབང་ཕྱུག་ཆེན་པོས་རྡོ་རྗེ་དྲག་པོ་བཞད་པ་ཆེན་པོ་ཐོས་ནས་གཡོག་དང་བཅས་པར་ཁས་བུབ་ཏུ་འགྱེལ་ཏེ་བརྒྱལ་བར་གྱུར་ནས། མགོ་ལ་ཞབས་ཀྱིས་བསྣུན་ཏེ་གཏོང་བར་མཛད་དོ། །

ཨོྃ་བཛྲ་བྷྲྀ་ཀུ་ཊི། ཧ་ན་ཧ་ན། གྲྀཧྞ་གྲྀཧྞ་ཧུྃ། མ་ཏ་མ་ཏ་ཀིཉྩི་རཱ་ཡ་སི། སཱུརྱ་ས་ཧ་སྲ་ཧ་སྟི། རེ་ཀེ་བ་སུ་རཱ་ཛ་ལ་ལ་རྩི་པྲ་ཛྭཱ་ལི་ཏ། མ་ཧཱ་[མཱུརྟི་ཨཱ་ཀཌྜྷ་ཨཱ་ཀཌྜྷ◌ྱ་ཨབྱ་ཝ་མ་བྱ་ཝ་མ།] ཀྲི་ཎ་པ་ཙ་ཀྲ་བྷཻ་ར་བ་ཧྲྀ་ད་ཡྃ་ཧཱུྃ་བྷྲྀ། དེ་ནས་རྡོ་རྗེ་ཁྲོ་གཉེར་ཆེན་པོའི་ཁྲོ་བོ་ཆེན་པོས་བཞད་པས་བཞད་ཅིང་འགྲོ་བ་ཐམས་ཅད་ལ་ཁྱབ་པའི་གཟུགས་སུ་མངོན་པར་སྤྲུལ་ནས་འཁོར་ལོ་ཅན་གྱི་མདུན་དུ་སྟོན་ཏོ། །དེ་ནས་འཁོར་ལོ་ཅན་གྱི་འཁོར་འཇིགས་པ་ཆེན་པོས་ཉེན་ཏེ། ཁས་བུབ་ཏུ་འགྱེལ་ཏེ་རབ་ཏུ་བརྒྱལ་ཞིང་རྗེ་ཅིག་བདག་ཅག་ལ་སྐྱོབས་ཤིག་ཅེས་སྨྲ་ཞིང་། སྐྱབས་མེད་པར་བདག་ཉིད་ཀྱིས་མཐོང་ནས་འཁོར་ལོ་ཅན་ལ་སྐྱབས་སུ་སོང་ངོ་། །དེ་ནས་བིཥྞུས་ཀྱང་བདག་ཉིད་ཀྱི་མཐུ་མང་པོ་རབ་ཏུ་ཉེ་བར་སྟོན་ཅིང་ཤིན་ཏུ་དགྱེས་པ་ཆེན་པོའི་མདུན་དུ་གནས་ཏེ་རྒྱབ་ལ་ཞུགས་སོ། །ཀྭ་ཡེ་ཀྭ་ཡེ་གདུག་པ་ཉེ་བའི་ཁྲོ་གཉེར་གྱིས་སྙིང་དྲལ་ཏེ་ཇི་སྲིད་མ་འཐུངས་ཀྱི་བར་དུ་དེ་སྲིད་རང་གི་གནས་སུ་སོང་ཤིག །དེ་ནས་རྡོ་རྗེ་ཁྲོ་གཉེར་ཆེན་པོ་དེ་རབ་ཏུ་འཁྲུགས་གཏུམ་པོར་གྱུར་ནས། དེ་དྲངས་ཏེ་བསྡམས་ནས་སྙིང་དྲལ་ཏེ། དེའི་ཁྲག་ལ་ཉི་མའི་ཁྲོ་གཉེར་ཆེན་པོ་གནོད་སྦྱིན་ཆེན་པོའི་གདོན་གྱི་བདག་ཉིད་ཡང་དག་པར་ཚིམ་པར་མཛད་དོ། །ཨོྃ་བཛྲ་བ་སཱུརྱ་བྷྲྀ་ཀུ་ཊི་ཀྲོ་དྷ་མ་ཧཱ་གྲ་ཧ་ཧ་ར་པ་ཏ་ར་པ། སྱ་སུ་དྷེ། ར་མཱྃ་ས་མེ་ད་[མདྱེ་ན།] ཨོྃ་བྷྲ་བྷྲ་བྷྲྀ་བྷུྃ་བྷྲ། དེ་ནས་འཁོར་ལོ་ཅན་དེ་སེམས་རབ་ཏུ་བརླག་པར་གྱུར་ཏེ་གནས་སོ། །དེའི་ཆུང་མ་རུག་མི་ནི་དང་། མ་ཧཱ་ཤྲཱི་དང་། ལཀྵྨི་ཡང་གཡོག་དང་བཅས་པར་རྣམ་པར་བཅོམ་སྟེ། སྣ་ཚོགས་རྣམས་རྣམ་པར་བཏུལ་ནས་བཞུགས་སོ། །དེ་ནས་བཅོམ་ལྡན་འདས་ཀྱིས་རྟ་གདོང་ཆེན་པོ་ཁྲོ་བོ་ཆེན་པོའི་རྒྱབ་ཏུ་གཅིག་བསྣུན་ནས་གཏོང་བར་མཛད་དོ། །ཨོཾ་བཛྲ་བ་ཌ་བ་མུ་ཁ་ཁ་ཁ་ཁཱ་ཧི་ཁཱ་ཧི། ཙ་ཏུ་རྨུ་ཁཱ། པི་བ་པི་བ། ཨ་སྱ་རུ་དྷི་ར་མ། ཨ་ཀཌྜྷྱ། ཨ་ཀདྦྷྱ། ཧྲྀ་ད་ཡྃ་ཏྲཱ་ན། དམ་ཧེ། བཛྲ་བ་ཌ་བ་མུ་ཁ། ཧི་ཧི་ཥ་མ་ཧཱ་ཤྭ་ཤྭེ་ཤྭེ་ར་ཧཱི་ཧཱི། དེ་ནས་རྡོ་རྗེ་རྟ་གདོང་ཆེན་པོ་རྟ་སྐད་ཆེན་པོ་མཛད་ཅིང་ཚངས་པའི་མདུན་དུ་གནས་པར་གྱུར་ཏོ། །དེ་ནས་ཚངས་པ་ཚངས་པའི་སྲིན་པོ་བདག་ཉིད་ཀྱིས་ནམ་མཁའ་བཀང་ནས་རྒྱུ་བར་བྱེད་དེ། དེ་ནས་ཚངས་པ་ཆེན་པོའི་འཁོར་ཁས་བུབ་ཏུ་འགྱེལ་ནས། རྗེ་ཅིག་སྐྱོབས་

ཤིག །རྗེ་ཅིག་སྐྱོབས་ཤིག་ཅེས་སྨྲས་སོ། །ཀྭ་ཡེ་ཀྭ་ཡེ་གདུག་པའི་གདོང་མྱུར་དུ་སོང་སོང་། ཁྱོད་ཀྱི་རྒྱབ་ཏུ་ཞོན་ཏེ་མ་བཏུལ་རེ་ཞེས་སྨྲས་སོ། །དེ་ནས་རྡོ་རྗེ་རྟ་གདོང་ཆེན་པོ་རབ་ཏུ་འཁྲུགས་གཏུམ་པོར་གྱུར་ནས། ཚངས་པ་ཆེན་པོ་དེའི་མགོར་བརྫིས་ཏེ། སྙིང་དྲངས་ནས་ཁྲག་བཏུང་བ་ལ་ཞུགས་ཏེ། ཤ་དང་། ཀླད་པ་དང་། ཚིལ་བུ་དང་། རུས་པ་རྣམས་མྱངས་ནས་ཕྱོགས་བཅུར་གཏོར་ཏོ། །དེའི་ཆུང་མ་ཤི་རི་མ་དང་། སྭ་ར་སྭ་སྟི་དང་། ཤཱན་ཏི་རྣམས་ཀྱང་རྣམ་པར་བཅོམ། དེའི་ཚོགས་རྣམས་ཀྱང་བཏུལ་ནས། དམ་ཚིག་གི་སྡོམ་པ་ལ་གནས་པར་བྱས་ཏེ་བཞུགས་སོ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་ཁྲོ་བོ་ཆེན་པོས་ཁྲོས་པ་དང་བཅས་པའི་ལྟ་བས་གཟིགས་ཏེ་གཏོང་བར་མཛད་དོ། །ཨོྃ་གུ་ལུ་གུ་ལུ་བཛྲ་མ་ཧཱ་ཀྲོ་དྷ། ཨཱ་ཀཱརྵ་ཡ། ཨཱ་ཀརྵ་ཡ་ཤ་ཀྲ་ཧྲྀ་ད་ཡྃ། མ་ཧཱ་བཛྲ་དྃཥྚྲཱ་ཡ། ཧཱུྃ་བྷཀྵ་ཡ་བྷཀྵ་ཡ་ཧཱུྃ། དེ་ནས་རྡོ་རྗེ་གནོད་སྦྱིན་ཆེན་པོའི་སྐུ་ཆེན་པོས་ནམ་མཁའི་ངོས་ཀུན་བཀང་སྟེ། བརྒྱ་བྱིན་གྱི་མདུན་དུ་བཞུགས་པར་གྱུར་ཏོ། །དེ་ནས་བརྒྱ་བྱིན་འགྱིང་བ་ཆེན་པོས་འགྱིངས་ཏེ། མི་བཟད་པར་ཁྲོས་པས་གནོད་སྦྱིན་ཆེན་པོ་ཁྱོད་སུའི་བྲན་ཡིན་ཞེས་དེ་ལ་སྨྲས་སོ། །དེ་ནས་རྡོ་རྗེ་གནོད་སྦྱིན་ཆེན་པོ་ཁྲོས་འཁྲུགས་རྔམ་པར་གྱུར་ཏེ། སྙིང་ནས་གཙུག་གི་ནོར་བུ་ཕྱུང་སྙིང་ཡང་བྲལ་ཏེ། དེའི་ཤ་དང་། ཁྲག་དང་། ཀླད་པ་དང་། ཚིལ་བུ་དང་། རུས་པ་དང་། བཟའ་བ་རྣམས་བཟའ་བར་ཞུགས་སོ། །དེ་ནས་དེའི་འཁོར་རྣམས་འཇིགས་ཤིང་དངངས་པའི་ཡིད་དུ་གྱུར་ཏེ། སྐྱབས་སུ་ཉེ་བར་གྱུར་ཏོ། །དེའི་ལྷ་མོའི་ཚོགས་རྣམས་ཀྱང་བཅོམ་ནས་དེའི་གནས་ན་གནས་པར་གྱུར་ཏོ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོ་ཁྲོ་བོ་ཆེན་པོ་རྡོ་རྗེའི་རྣལ་འབྱོར་མ་རྣམས་དང་། རོལ་ཅིང་ཤིན་ཏུ་དགྱེས་པའི་ཀུན་ཏུ་ལོངས་སྤྱོད་པའི་ཁྲོ་བོ་ཆེན་པོའི་དཀྱིལ་འཁོར་ཆེན་པོ་ན་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུ་བར་མཛད་ནས་བཅོམ་ལྡན་འདས་ལ་བསྐུལ་བར་མཛད་དོ། །ཨོྃ་མ་ཧཱ་སུ་ར་ཏ་བཛྲ་མ་ཧཱ་ཀྲོ་དྷ་སཾ་ཧ་རོ་པ་སཾ་ཧ་ར། སརྦ་ཀྲོ་དྷ་མ། ཤམ་ཤམ། པྲ་ཤམ་པྲ་ཤམ། སརྦ་ཀྲོ་དྷ། ཨུཏྟི་མ་ཀྲོ་དྷ། སྭ་ས་མ་ཡ་མ་ཧཱ་མཎྜ་ལེ། སྠཱ་

པ་ཡ་སྠཱ་པ་ཡ། སརྦ་ཀྲོ་དྷ་མ་དུཥྚ་པྲ་དུཥྚ་བི་བ་ཡ། བི་ཛ་ཡ་བི་ཛ་ཡ་ཤ་ཀྲ་བྲཧྨབིཥྞུར་མ་ཧེ་ཤྭ་ར་མ་ཧོ་བྷ་ག་ཝཱན། སུ་ར་ཊ། སཽ་ཁྱ་ཀྲོ་དྷ། སརྦ་ཏ་ཐཱ་ག་ཏ་སཏྟྱ་ན་ས་མ་ཡེཉྩ་ཧོ། སུ་ར་ཏ་ས་མ་ཡ་ཨི་ཏི། དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོ་ཁྲོ་བོ་ཆེན་པོས་ཁྲོ་བོ་ཐམས་ཅད་འདྲེན་པ་དང་། གཞུག་པ་དང་། བཅིང་བ་དང་། དབང་དུ་བྱ་བའི་ཕྱིར། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་ཛཿཧཱུྃ་བྃ་ཧོཿ། ཊཀྐི་ཧཱུྃ་ཛྫཿ། ཊཀྐི་ཧཱུྃ་ཛྫཿ། ཧཱུྃ་ཊཀྐི་ཧཱུྃ་ཛྫཿ། ཧཱུྃ་ཊཀྐི་ཧཱུྃ་ཛྫཿ། ཨཱ་ཀརྵ་ཡ། ཨཱ་ཀརྵ་ཡ། བྷནྡྷ་ཡ། བ་ཤྃ་ཀུ་རུ། སརྦ་ཀྲོ་དྷ། ས་མ་ཡྃ། ཛཿཧཱུྃ་བྃ་ཧོཿ། ཊཀྐི་ཧཱུྃ་ཛྫཿ། ཧཱུྃ་ཊཀྐི་ཧཱུྃ། དེ་ནས་ཁྲོ་བོ་ཆེན་པོའི་དམ་ཚིག་དེ་དག་ཐམས་ཅད་འོངས་ནས། རང་གི་དཀྱིལ་འཁོར་ཆེན་པོའི་འཁོར་ལོར་འཁྱིལ་བར་གྱུར་ཏེ། ཀྱེ་བཅོམ་ལྡན་འདས་ཉིད་ཀྱིས་བཀའ་སྩལ་དུ་གསོལ་ཞེས་སྨྲ་ཞིང་གནས་པར་གྱུར་ཏོ། །དེ་ནས་བཅོམ་ལྡན་འདས་ཁྲོ་བོ་ཐམས་ཅད་ཀྱི་བཀའི་འཁོར་ལོའི་རྡོ་རྗེ་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁྲོ་བོ་ཐམས་ཅད་ཀྱི་བཀའི་འཁོར་ལོ་ཆེན་པོ་ཕྱུང་ངོ་། །ཨོཾ་སུམྦྷ་ནི་སུམྦྷ་མ་ཧཱ་ཀྲོ་དྷ་ཤ་ཧཱུྃ་ཕཊ། དེ་ནས་དེ་དག་ལ་ཁྱོད་ཀྱིས་དབང་ཕྱུག་ཆེན་པོ་ལ་སོགས་པ་གདུག་པའི་སེམས་ཅན་ཆེན་པོ་རྣམས་གསོས་ཤིག་ཅེས་བཀའ་སྩལ་ཏོ། །དེ་དག་གིས་བཅོམ་ལྡན་འདས་ཉིད་ཀྱིས་རབ་ཏུ་གདུག་པའི་རྣམས་གསོས་ཞེས་གསོལ་ནས། དེ་ནས་ཅང་མི་གསུང་བར་བཞུགས་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པས་ཁྲོ་བོས་ཕྱག་བསྣོལ་ཏེ་བཙིར་ནས་རྡོ་རྗེ་བདུད་རྩི་ཁྲོ་བོའི་དབང་མོ་ཆེན་མོ་ཕྱུང་ངོ་། །ཨོྃ་བཛྲ་ཨ་མྲྀ་ཏ། མ་ཧཱ་ཀྲོ་དྷེ་ཤྭ་རི། ཨུཏ་ཤྲཱི་ཛཿ། ཨུཏ་ཤྲཱི་ཛཿ། བཛྲ་ཨ་མྲྀ་ཏི་ཧཱུྃ་ཨཱཿ། དེ་ནས་བཅོམ་ལྡན་འདས་མ་བདུད་རྩི་ཆེན་མོ་དེ་དག་ཀུན་ཏུ་ཁྲོས་ཏེ་སྨིན་མ་བསྒྱུར་བའི་གཟིགས་པའི་ཞལ་བཞད་པ། རུ་ལུ་རུ་ལུ། ཞེས་པའི་སྒྲ་འབྱིན་ཅིང་རང་གི་པདྨོ་ལ་བཅོམ་ལྡན་འདས་ཀྱི་རྡོ་རྗེ་བཅུག་ནས་བདུད་རྩི་ཡང་དག་པར་བསྒྲུབ་པའི་རིག་པ་འདི་ཕྱུང་ངོ་། །ཨོྃ་ཨ་མྲྀ་ཏ་སཉྫཱི་བ་ནི་མ་ཧ་མྲྀ་ཏ་མུ་ཥེ། པྲ་བེ་ཤ་ཡ་པྲ་བེ་ཤ་ཡ། སརྦན་བཛྲ་པདྨ་སཪྻོ་གེ །མ་ཧཱ་བོ་དྷི་ཙིཏྟ་པི་ཋ་པི་ཋ། མུརྟེ་ཨཱ། དེ་ནས་དབང་ཕྱུག་ཆེན་མོ་

ལ་སོགས་པ་གདུག་པ་དེ་དག་ཐམས་ཅད་སྔ་མ་བཞིན་དུ་བདག་ཉིད་ཀྱི་ལུས་སོས་པར་གྱུར་ཏེ། སེམས་དྲན་པས་དེ་བཞིན་གཤེགས་པའི་འཁོར་ལོ་ཐམས་ཅད་མཐོང་ནས་ངོ་མཚར་དུ་གྱུར་ཏོ། །བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ལ་སྐྱབས་སུ་དོང་ནས། ཕྱིའི་དཀྱིལ་འཁོར་ཇི་ལྟ་བ་བཞིན་དུ་ཁྲོ་བོའི་འཁོར་རྣམས་གནས་པར་གྱུར་ཏོ། །དེ་ནས་དེ་དག་རབ་ཏུ་མགུ་བའི་ཡིད་ཀྱིས་བཅོམ་ལྡན་འདས་ལ་སྟོད་པར་བྱེད་དེ། ཁྱོད་ནི་སེམས་ཅན་ཀུན་གྱི་ཡབ། །ཕན་བྱེད་དེ་བཞིན་ཡུམ་ཡིན་ཏེ། །གཙོ་བོ་འདུས་པས་བདག་ཅག་རྣམས། །འཇིགས་པ་ཆེ་ལས་སྐྱོབ་པ་སྟེ། །རྗེ་བོ་སྡུག་བསྔལ་ཐམས་ཅད་སེལ། །ཁྱོད་ནི་འགྲོ་བའི་དབང་པོ་རྗེ། །ཁམས་གསུམ་འདི་ནི་བྱེད་དང་གཏོང་། །ཆེ་བ་ཆེ་ཁྱོད་སྐྱེ་བོ་སྐྱོང་། །ཐོག་མ་མེད་ཁྱོད་ང་རོ་ཐིགས། །ང་རོའི་སྟེང་ནི་ཆ་ཡང་མེད། །གཙོ་བོ་ཡིག་མེད་བདུད་རྩི་ཡི། །རབ་དགྱེས་བདེ་བྱེད་གཏོང་བ་ཡི། །འགྲོ་བ་ཀུན་ལ་ཕན་བྱའི་ཕྱིར། །དེ་ནི་སངས་རྒྱས་ཐམས་ཅད་རྣམས། །རབ་དགྱེས་འགྲོ་ལ་བདེ་བའི་ཕྱིར། །མགོན་པོ་ཁྱོད་ཀྱིས་གཏོང་བར་མཛོད། །སེམས་ཅན་འདམ་གྱིས་མི་གོས་ཤིང་། །བླ་ན་མེད་པ་བྱང་ཆུབ་ལམ། །སྣ་ཚོགས་སྡུག་བསྔལ་ཞི་མཛད་པ། །སེམས་ཅན་སྐོམ་པ་ངོམས་མཛད་ཅིང་། །འཁོར་བ་རྦ་ཀློང་གྲོལ་མཛད་དེ། །མྱུར་དུ་བདེ་ལ་དགོངས་པ་མཛད། །དངོས་པོ་ཀུན་གྱིས་ཐམས་ཅད་དུ། །རྒྱལ་བ་ཀུན་གྱིས་མི་དཔོགས་ཏེ། །ཞི་བའི་རྣམ་པས་ཞིར་གྱུར་པ། །རྡུལ་དང་བྲལ་བས་འཛུམས་པ་སྤངས། །ནམ་མཁའ་སྒོམ་ལས་རྣམ་འདས་པ། །རྣམ་རྟོག་དྲི་མས་མ་གོས་ཏེ། །སྒྱུ་མ་ཀུན་ལས་ཡང་དག་འདས། །འདོད་པ་ཀུན་ལ་རྒྱབ་ཕྱོགས་པ། །གཙོ་བོ་ཁྱོད་ལ་བདག་ཕྱག་འཚལ། །དྲེགས་པ་མེད་པ་འཇིགས་བྱེད་ལ། །བྱང་ཆུབ་མཆོག་ནི་ཐོབ་ཀྱི་བར། །བདག་ཅག་སྐྱབས་སུ་རབ་ཏུ་མཆི། །ཇི་སྲིད་འཚོ་བ་མཆིས་པ་དང་། །དམྱལ་བ་རྩུབ་མོའི་འཇིག་རྟེན་དུ། །ལྟུང་བར་གྱུར་པ་ཇི་སྲིད་པ། །ཁྱོད་ཀྱི་དམ་ཚིག་བསྐྱང་བར་བགྱི། །བྱང་ཆུབ་མཆོག་ཏུ་བདག་ཅག་ཀྱང་། །དྲི་མེད་སྐལ་བར་གྱུར་པ་ཡི། །གཙོ་བོ་བདག་ཅག་དབང་བསྐུར་བ། །བདེ་བ་ཆེན་པོས་སྩལ་དུ་གསོལ། །དེ་ནས་

བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོས་དེ་དག་གི་གསོལ་བའི་ཚིག་ཉེ་བར་གསན་ནས་མཉམ་པ་ཉིད་ཀྱི་བདེ་བའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་མ་ཐག་ཏུ་བཅོམ་ལྡན་འདས་ཀྱིས་བདེ་བ་དང་ཡིད་བདེ་བ་སྒྲུབ་པའི་ཐབས་མང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་སྟེ། བདེ་བ་ཆེན་པོའི་སྤྲོ་བའི་ཆོ་འཕྲུལ་ཆེན་པོས་ལྷའི་འཁོར་ཐམས་ཅད་དབང་བསྐུར་ཏེ། དེ་ནས་དབང་ཕྱུག་ཆེན་པོ་ལ་སོགས་པའི་ལྷ་ཆེན་པོ་དེ་དག་བདེ་བ་ཆེན་པོའི་སྤྲོ་བའི་ཆོ་འཕྲུལ་གྱིས་དབང་བསྐུར་བས་ཡིད་བདེ་བར་གྱུར་ཏེ། བཅོམ་ལྡན་འདས་ཀྱི་ཞབས་ལ་ཡང་དང་ཡང་དུ་གཏུགས་ནས་བསྐོར་བ་བྱས་ཏེ། ཇི་ལྟ་བ་བཞིན་དུ་ཀུན་ཏུ་ཡོངས་སུ་བསྐོར་ནས་གནས་སོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོ་དེ་བཞིན་གཤེགས་པས་ཡང་རྡོ་རྗེ་གཟུངས་མ་ཤིན་ཏུ་དགྱེས་པ་བདེ་བ་ཆེན་མོའི་དམ་ཚིག་དང་སྦྱོར་བའི་ཐབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཅང་མི་གསུང་བར་བཞུགས་ནས། དེ་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཁྲོ་མོ་དབང་མོ་ཆེན་མོ་ཞེས་བྱ་བ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཏ་ཐཱ་ག་ཏ་མ་ཧཱ་བཛྲ་ཀྲོ་དྷེ་ཤྭ་རི་སརྦ་དུཥྚཱ་ནི་མུ་དྲཱ་ཎི་མ་ཧཱ་པྲ་ལ་ཡཱ་ན་ལཤྨ་ཤཱ་ན་བྷཱི་ཥ་ཎི། བཛྲ་མ་ཧཱ་ཀྲོ་དྷ་དཾཥྚཱ་ཀ་རཱ་ལོ་གྲ་ཏ་བ་ཏ་ནེ། སརྦ་ཤ་ཏྲཱུྃ། པྲ་ཤ་མ་ནི། ཧཱུྃ་ཧཱུྃ་མ་ཧཱ་ཀྲོ་དྷེ་ཤྭ་རི་ཧཱུྃ་ཕཊ་ཕཊ། འདིས་ཇི་ལྟ་བ་བཞིན་དུ་བྱིན་གྱིས་བརླབས་ནས། དབུས་ཀྱི་དཀྱིལ་འཁོར་དུ་གཞག་སྟེ། དཔུང་པ་བཅུ་དྲུག་ལ་ཕྱག་ན་མཚོན་ཆ་སྣ་ཚོགས་བསྣམས་པ། ཞལ་གསུམ་པ་མདོག་ཨིནྡྲ་ནཱི་ལའི་འོད་འབར་བ་འདྲ་བ། རྡོ་རྗེ་དང་། ཐོད་པའི་འཁར་བ་དང་། ཐོད་པ་དང་། མདུང་དང་། སྟ་རེ་དང་། ཞགས་པ་དང་། རྩེ་གསུམ་པ་དང་། བེ་ཅོན་དང་། མུ་སུ་ར་དང་། འཁོར་ལོ་དང་། ཀ་ན་ཡ་དང་། ཏོ་མ་ཡ་དང་། གཞུ་དང་། མདའ་དང་། ཤ་ག་ཏི་དང་། གྲི་རྣམས་ཕྱག་ན་འཛིན་པ། ཐོད་པའི་ཕྲེང་བས་དབུ་རྒྱན་བྱས་པ། ཉི་མ་བརྒྱ་དང་མེའི་འོད་འདྲ་བའོ། །དེའི་མདུན་དུ་རྡོ་རྗེ་ཁྲག་འཐུང་ཆེན་མོ་དེ་དང་འདྲ་བའི་གཟུགས་དང་ཆ་ལུགས་འཛིན་པ་རིག་པ་འདིས་གཞག་པར་བྱའོ། །ཨོཾ་མ་ཧཱ་བཛྲ་དྷ་ར་མ་ཧཱ་ཀྲོ་དྷེ་ཤྭ་རི་མ་ཧཱ་ཤྨ་ཤཱ་

ན་བྷཱི་ཥ་ནི་ནཱི་ལ་ཛྭཱ་ལ་ས་ཧ་སྲ་པྲ་ཛྭ་ལི་ཏ་མཱུརྟི་དྷ་རེ་ཀ་པཱ་ལ་མཱ་ལཱ་བྷཱུ་ཥི་ཏ་མ་གུ་ཏེ། ན་ར་དཱུ་ཏིར་ར་ཏྲ། པ་རི་པུ་རི་ཏ་ཀ་པཱ་ལ། ཨ་སྟེ་ཁ་ཊྭཱྃ་ག །བཛྲ་ཏྲི་ཤཱུ་ལ་གྷནྡྷ་མ་ཧཱ་ཀྲོ་དྷེ་ན། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཧེ་ཧེ་རུནྟ་མུནྟ་པྲི་ཡེ་ཧཱུྃ་ཕཊ། དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོའི་གཟི་བརྗིད་ཆེན་པོའི་མཆོག་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཉི་མ་ཁྲོ་མོའི་དབང་མོ་ཆེན་མོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། ཨོྃ་ཧཱུྃ་ཏྲཱྃ་མ་ཧཱ་སཱུརྱ་བཛྲ་ཀྲོ་དྷེ་ཤྭ་རི་བི་ད་མ། མ་ཐ་མ་ཐ། གྲཱ་ས་གྲཱ་ས། སརྦ་དུཥྚཱྃ། པྲ་དུཥྚཱྃ། ཧུྃ་ཕཊ་ཨོཾ་ཧཱུྃ་ཏྲྃཏྲྃ། ཏྲ་ཏྲ་ཏྲ། ཁྲོ་མོ་ཆེན་མོ་འདིས་ལྷོ་ཕྱོགས་ཀྱི་རིན་ཆེན་འབྱུང་ལྡན་གྱི་དཀྱིལ་འཁོར་དུ་གཞག་པར་བྱ་སྟེ། གཟི་བརྗིད་ཆེན་པོར་རབ་གཏོང་ཞིང་། །ཤིན་ཏུ་འཇིགས་པ་མེ་བཞིན་འབར། །དཔུང་པ་བཅུ་དྲུག་རྣོ་བ་སྟེ། །དཔུང་རྒྱན་ཐོད་པས་བརྩེག་པར་བྱ། །སྤྱན་ནི་རབ་དམར་སྔོ་བསངས་མདོག །མཚོན་ཆའི་ཚོགས་ནི་བསྣམས་པར་བརྩོན། །གདུག་པ་ཐམས་ཅད་འཆའ་བྱེད་ཅིང་། །ཡིད་དགས་ཆེན་པོའི་སྟན་ལ་ཞོན། །རང་གི་གཡོག་གིས་མདུན་དུ་བསྐོར། །དེ་ནས་བཅོམ་ལྡན་འདས་པདྨོ་འབྱུང་གནས་བཀོད་པའི་འོད་ཀྱི་ཕྲེང་བ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། པདྨོའི་དྲ་བ་ཁྲོ་མོའི་དབང་མོ་ཆེན་མོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་ཧྲཱིཿབཛྲ་པདྨ་མ་ཧ་བནྡྷ་མུ་ཁེ། ཁ་ཁ་ཁཱ་ཧི་ཁཱ་ཧི། མ་ཧཱ་མ་ཧོ། དྷ་ར་བི་ཀོ་པེ་ཧཱུྃ་ཧེ་ཧཱུྃ་ཧཱུྃ་ཧ་ཧ། ཧཱུྃ་ཧཱུྃ་ཧྲཱིཿ ཧི་ཤ་ཧི་ཤ །མ་ཧཱ་བཛྲ་བ་ད་བ་མུ་ལ་མི་ཧོ་ཏྱོ་ཏྱེ། ཧཱུྃ་ཧཱུྃ། ཧི་ཧི་ཧཱུྃ་ཧྲཱིཿཧཱུྃ། དཀྱིལ་འཁོར་ནང་གི་དབུས་ཉིད་དུ། །འདི་ནི་རྒྱབ་ཏུ་གཞག་པར་བྱ། །རྣོ་བ་ཆེན་པོ་ཞལ་གསུམ་པ། །རྟ་གདོང་གྱེན་དུ་སྟོན་པ་སྟེ། །ཁྲོ་མོ་ཆེན་མོ་དཔུང་བཅུ་དྲུག །རྣམ་པར་བསྒྱུར་བའི་མི་སྡུག་གདོང་། །མི་རོའི་རྟ་ལ་ཡང་དག་ཞོན། །ཁྲག་མང་པོ་ལ་འཐུང་བྱེད་པ། །མཚོན་ཆ་སྣ་ཚོགས་འཛིན་པ་སྟེ། །ཁྲོས་པའི་དབུ་རྒྱན་ཐོད་པས་བརྩེགས། །འོད་ཟེར་རྣོན་པོ་གཏོང་བྱེད་ཅིང་། །གཡོག་བཅས་དཀྱིལ་འཁོར་བརྒྱན་ཏེ་གནས། །དེ་ནས་བཅོམ་ལྡན་འདས་ཡང་གདོན་མི་ཟ་བའི་ཡེ་ཤེས་ཁྲོ་མོ་གཉིས་སུ་མེད་པར་འདུ་བའི་ཐབས་ཞེས་བྱ་བའི་ཏིང་ངེ་

འཛིན་ལ་སྙོམས་པར་ཞུགས་ཏེ། གདོན་མི་ཟ་བའི་དྲག་པོ་དང་ལྡན་མ་ཆེན་མོ་ཞེས་བྱ་བའི་ཁྲོས་པའི་དབང་མོ་ཆེན་མོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་སརྦ་ཨ་མོ་གྷ་མ་ཧཱ་བི་ཤྭེ་ཤྭ་རི་ཧཱུྃ་ཧཱུྃ་ཧཱུྃ། ཧྃ་ཧྃ་ཧྃ། མ་ཧཱ་ཀྲོ་དྷེ་གྲ་མུ་ཁེ། མ་ཧཱ་བི་ཤྭེ་བ་ད་རི་ཎི། སརྦ་དུཥྚ། པྲ་ཤ་མ་ནི་ཧཱུྃ་ཧཱུྃ་ཕཊ། །འདི་ཉིད་ཀྱིས་ནི་ཅི་རིགས་པར། །རྡོ་རྗེ་གདོན་མི་ཟ་བ་ཡི། །དཀྱིལ་འཁོར་གཡོག་བཅས་རྣམ་པ་བཞི། །སྣ་ཚོགས་དམ་ཚིག་གཞག་བྱས་ཏེ། །སྣ་ཚོགས་གཟུགས་དང་ཁྱད་པར་ལྡན། །ཀུན་ཏུ་ཡོངས་སུ་བསྐོར་ནས་གནས། །བསྙེར་བ་དང་ནི་བཙུམས་པའི་གདོང་། །རབ་ཏུ་དྲག་ལ་རོ་མྱོང་ཞིང་། །གདོང་གཉེར་ཐོད་པའི་རྩེ་མོར་བྱས། །དཔུང་པ་བཅུ་དྲུག་གིས་བརྒྱན་པའི། །ཁྲོ་མོ་ཆེན་མོ་གདོང་གསུམ་པ། །ཟ་བྱེད་མི་བཞིན་ལྟ་བ་ཡི། །དེ་ཡི་ངོ་བོ་ཐམས་ཅད་ཀྱི། །གཡོག་ནི་རྣམ་པ་བཞི་རྣམས་ཀྱིས། །བསྐོར་བར་ཤེས་རབ་ཅན་གྱིས་གཞག །རང་གི་ཕྱག་རྒྱ་མཚན་མར་ལྡན། །དཔུང་པ་བརྒྱད་དང་ལྡན་པ་ཡི། །དེ་ནས་ཆོ་ག་ཇི་བཞིན་དུ། །འབྱུང་མོའི་ཕྱག་རྒྱ་ཡང་དག་ཞོན། །དུར་ཁྲོད་བཞིན་དུ་འཇིགས་བྱེད་པ། །ཕྱི་ཡི་རྣལ་འབྱོར་མ་ཚོགས་རྣམས། །དེ་དག་ཀུན་ཏུ་ཡོངས་སུ་བསྐོར། །གཞག་གམ་བྲི་བར་བྱ་ཡང་རུང་། །དེ་ནི་དེ་ལྟའི་སྟན་ལ་གནས། །བཞིན་མི་སྡུག་པ་དཔུང་བཞི་མོ། །གདུག་པའི་ཁྲོ་མོ་རྣམ་བསྒྱུར་བཅས། །དེ་ལ་སོགས་པའི་རིམ་པར་ལྡན། །མཁས་པས་དཀྱིལ་འཁོར་བྲི་བར་བྱ། དེ་ནས་རྣལ་འབྱོར་གྱི་དབང་ཕྱུག་ཆེན་མོ་དེ་དག་བཅོམ་ལྡན་འདས་ལ་ཕྱག་འཚལ་ཏེ། ཡང་དང་ཡང་རང་རང་གིས་མངོན་པར་གར་བྱས་པས་མངོན་པར་མཆོད་ནས་གསོལ་བ་འདེབས་སོ། །རྣལ་འབྱོར་མ་ཡི་སྔགས་ཚོགས་དང་། །ཕྱག་རྒྱ་མ་ནི་ཅི་རིགས་པར། །གསང་བའི་གར་ནི་བདེ་ཆེན་མོ། །བཅོམ་ལྡན་དེ་ཉིད་ཉིད་ཀྱིས་གསུངས། །དེ་ནས་བཅོམ་ལྡན་འདས་རྣལ་འབྱོར་མ་ཐམས་ཅད་རྣམ་པར་སྤྲོ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྣལ་འབྱོར་མ་ཐམས་ཅད་ཀྱི་སྔགས་དང་ཕྱག་རྒྱ་དང་སྦས་པ་དང་། དེ་ཁོ་ན་ཉིད་དང་། གསང་བ་རྣམས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦ་བཛྲ་

དྷ་ར་ས་ཏྭ་ཨ་ནུ་རཱ་གི་ཎི་མ་ཧཱ་ཀྲོ་དྷེ་ཧཱུྃ་ཕཊ། ཨོྃ་སརྦ་བཛྲ་དྷ་ར་ཨཱ་ཀརྵཎི་མ་ཧཱ་ཀྲོ་དྷེ་ཤྭ་རི་ཧཱུྃ་ཧཱུྃ། ཛཱ་ཛཱ་ཧཱུྃ་ཧཱུྃ། ཨོྃ་སརྦ་བཛྲ་དྷ་ར་ཀུ་ལ་ཨ་ནུ་རཱ་གི་ཎི་མ་ཧཱ་ཀྲོ་དྷེ་ཤྭ་རི་ཧཱུྃ་ཧེ་ཧེ་ཧཱུྃ་ཕཊ། ཨོྃ་སརྦ་བཛྲ་དྷ་རོ་གྲ་མ་ཧཱ་ཀྲོ་དྷེ་ཤྭ་རི་ཧཱུྃ་སྭ་སྭ་ཧཱུྃ་ཕཊ། ཨོྃ་སརྦ་བཛྲ་དྷ་ར་མ་ཧཱ་ཏེ་ཛ་ཨ་བྷི་ཥེ་ཀེ་ཧཱུྃ་ཏྃ་ཧཱུྃ། སརྦ་བཛྲ་དྷ་ར་མ་ཧཱ་སཱུརྱ་བྷྲྀ་ཀུ་ཊེ་ཀ་རོ་ཀེ་ཏྲ་ཏ་ཊ་ཏ་ཧཱུྃ་ཕཊ། ཨོྃ་སརྦ་བཛྲ་དྷ་ར་མ་ཧཱ་ཀེ་ཏུ་ཀྲོ་དྷེ་ཤྭ་རི། མ་ཧཱ་བི་ཛ་ཡོཏྟ་ཡེ་ཧཱུྃ་ཧཱུྃ་ཏྲྃ་ཏྲྃ་ཕཊ་ཕཊ། ཨོྃ་སརྦ་བཛྲ་དྷ་ར་མ་ཧཱ་བཛྲ་ཀྲོ་དྷ་ཨཱཊྚ་ཨཱ་སི་ཧཱུྃ་ཧཱུྃ་ཏྲིཾ་ཏྲིཾ་ཏྲིཾ་ཏྲོ་ཊ་ཡ་ཏྲོ་ཊ་ཡ་ཧྲི་ད་ཡ་ཧཱུཾ་ཕཊ། ཨོྃ་སརྦ་བཛྲ་དྷདྷ་ར་མ་ཧཱ་ཀྲོ་དྷ་བྷ་ཀྵི་ཎི་ཧཱུྃ་ཧཱུྃ་བྷཀྵ་བྷཀྵ་ཧཱུྃ་ཧྲཱིཿ། ཨོྃ་སརྦ་བཛྲ་དྷ་ར་མ་ཧཱ་ཏཱིཀྵྞ་ཀྲོ་དྷེ་ཤྭ་རི་ཚིནྡ་ཚིནྡ། ཧཱུྃ་ཧཱུྃ་བཛྲ་ཏཱིཀྵྞ་ཧ་སྟེ་ཙྪེ་ད་ཡ་ཧཱུྃ་ཧཱུྃ་མ་ཊ་མ་ཊ། ཨོྃ་སརྦ་བཛྲ་དྷ་ར་ཙཀྲ་དྷ་རི་ཎི་མཱ་ཧོ་གྲ་དུ་པི་ནི་ཧཱུྃ་ཧཱུྃ། པ་ཏ་ཡ་པ་ཏ་ཡ། མ་ཧཱ་བཛྲ་ཙཀྲེ་ཎ། ཙཱུརྞ་ཡ་ཙཱུརྞ་ཡ། ཧཱུྃ་ཧཱུྃ་ཕཊ། ཨོྃ་སརྦ་བཛྲ་དྷ་ར་མ་ཧཱ་ཤྭ་ག་པྲ་བྷ་ནི་ཧཱུྃ་ཧཱུྃ་མ་ཏ་མ་ཏ་ཕཊ། ཨོྃ་སརྦ་བཛྲ་དྷ་ར་མ་ཧཱ་བི་ཤྭ་མུ་ཁི་ཧཱུྃ་ཧཱུྃ་ཕཊ། ཨོྃ་སརྦ་བཛྲ་དྷ་ར་མ་ཧཱ་བཛྲ་པཱ་ཎི་ཧཱུྃ་ཧཱུྃ་ཧཾ་ཧཾ་ཕཊ་ཕཊ། ཨོྃ་སརྦ་བཛྲ་དྷ་ར་མ་ཧཱ་བཛྲ་ཡཀྵི་ཎི་ཧཱུྃ་ཧཱུྃ་ཁ་ཁ་ཁཱ་ཧི་ཁཱ་ཧི་ཨཱ་བི་བྷ་ཨཱ་བི་བྷ་ཧཱུྃ་ཕཊ། ཨོྃ་སརྦ་བཛྲ་དྷ་ར་མ་ཧཱ་བཛྲ་བྷ་ནི་དྷ་ནི་མ་ཧཱ་ཀེ་དྷེ། བྷནྡྷ་ཡ་བྷནྡྷ་ཡ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷ་མ་ཧཱ་བཛྲ་པཱ་ཤྱ་པྲ་བེ་ཤ་ནིཧཱུྃ་ཧཱུྃ། བི་ཏ་ཡ་བི་ཏ་ཡ་ཧཱུྃ་ཕཊ། ཨོྃ་སརྦ་བཛྲ་དྷ་ར་ཧ་ལ་ད་ནི་མ་ཧཱ་ཀྲོ་དྷེ་ཤྭ་རི་ཧཱུྃ་ཧཱུྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷ་མཱ་ལི་ནི་ཧཱུྃ་ཧཱུྃ་གྷྃ་རྒྷྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷེ་གནྡྷ་བ་ཧི་ཧཱུྃ་ག་གྲི། ཨོྃ་སརྦ་བཛྲ་དྷ་རཱི་མ་ཧཱ་ཀྲོ་དྷེ་ཤྭ་རི་མ་ཧཱ་ལོ་ཀ་དྷཱ་རི་ཎི། དཱི་པ་ཡྃ་དཱི་པ་ཡྃ་ཧཱུྃ་ཧཱུྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷེ་ཤྭ་རི་མ་ཧཱ་ལཱ་སྱ་ཧཱུྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷེ་མཱ་ལེ་དྷཱ་རི་ཎི་ཧཱུྃ། ཨོྃ་སརྦ་བཛྲ་དྷ་ར་མ་ཧཱ་གཱི་ཏི་ནི་ཧཱུྃ་ཧེ་ཧེ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷ་ནཱརྟི་ཀེ་ཧཱུྃ་ཧཱུྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷ་ཨཱ་ཀརྵ་ཡ་ཛྫ་ཛྫ་ཧཱུྃ་ཧཱུྃ་ཛཿ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷ་བྷནྡྷ་བྷནྡྷ་ཧཱུྃ་བྃ། ཨོྃ་སརྦ་བཛྲ་དྷ་ར་མ་ཧཱ་ཀྲོ་དྷེ་མ་ཧཱ་བཛྲ་བ་ཤི་ནི་ཧཱུྃ་ཧཱུྃ། ཨོྃ་སརྦ་བཛྲ་དྷྷ་ར་མ་ཧཱ་ཀྲོ་དྷེ་ཤྱ་ཤྱེ་ཧཱུྃ་ཧོཿ། ཨོྃ་ཧཱུྃ་ཏྲཱྃ་ཧྲཱིཿཨཱཿ། དེ་ནས་རྣལ་འབྱོར་མ་དེ་དག་མགུ་རངས་དགའ་བར་གྱུར་ཏེ། ཡང་དབྱངས་འདིས་གསོལ་བ་འདེབས་སོ། །བདེ་བ་མཆོག་གི་རྒྱ་ཆེན་དགོངས་སུ་གསོལ། །བསམ་གྱིས་མི་ཁྱབ་བདེ་མཆོག་དབྱིངས་དང་ལྡན། །མི་གཡོ་གསུང་དང་བྲལ་བའི་དབྱངས་

སྙན་པས། །གཟུངས་ལ་རོལ་པའི་བདེ་བ་བཞེས་སུ་གསོལ། །ངོ་མཚར་ཆེན་པོ་ཆོ་འཕྲུལ་སྣང་མཛད་ཅིང་། །སྙིང་པོ་བྱང་ཆུབ་བགྲོད་པ་རྣམས་ཀྱི་ལམ་སྟོན་ཏེ། །རྒྱུད་རྣམས་ཡང་དག་གང་ལའང་མི་རྟེན་པར། །བདེ་བ་མཆོག་གི་གཟུངས་ཀྱིས་གྲོལ་བར་མཛོད། །ར་མུ་མ་ཧཱ་སུ་ཧཱུ་ཛོ་ཧི་ནི་ཛྭཱ་ལ་སུ་ཧཱུ་པཱུ་མཱུ། མ་ཧཱ་སུ་ཧཱུ་ཛོ་ཨི་ནི། ཛྭ་ལ་སུ་ཧཱུ་བ་བྷྲཱུཾ་ཛཱུ་མ་ཧཱ་སུ་ཧཱུ། ཨི་ནི་ཛྭ་ལ་སུ་ཧཱུ་ཨུ་ཛི། ཨུ་མ་ཧཱ་སུ་ཧཱུ་ཛོ། ཛ་ཨི་ནི་ཛྭ་སུ་ཧཱུ་ཨ་ལ་ལ་ལ་ཧོ། མ་ཧཱ་སུ་ཧཱུ་ར་མ་ར་མ་མ་ཧཱ་སུ་ཧཱུ། ཨ་ལ་ལ་ལ་ཧོ། མ་ཧཱ་སུ་ཏྲེ་ཎ། དེ་ནས་བཅོམ་ལྡན་འདས་རྡོ་རྗེ་ནམ་མཁའ་ལ་འགྲོ་མ་ཆེན་མོ་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ནམ་མཁའ་ལ་འགྲོ་མ་ཐམས་ཅད་ཀྱི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦ་ཏ་ཐཱ་ག་ཏ་མ་ཧཱ་བཛྲ་དྷ་ར་ཧཱུྃ་ཕཊ། ཨོྃ་བཛྲ་ཀྲོ་དྷ་གི་ནི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཧེ་མ་བ་ཏི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་ཀུ་མཱ་ར་པྲི་ཡེ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་དྲཱི་ཤྱེ་མཱ་ར་ཡ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་མུཥྚི་ཏན། བྷཱི་ཏ་ཡ་བྷཱི་ཏ་ཡ། སུམྦྷ་ནི་སུམྦྷ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་ཀྲོ་དྷ་ཡ་དྷ་ར་ལ་ལི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཀྲོ་དྷ་ཙཀྲེ་ནི། ཙྪིནྡ་ཙྪིནྡ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཨ་མྲཱི་ཏོད་པ་ཏ་ཀི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་སཽ་མཱ་ཀྲོ་དྷེ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཏནྟི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མཧཱ་མཱ་ར་ཎི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཨ་མྲི་ཏེ་ཀ་པཱ་ལ་ཧཱ་སེ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་སཽ་མྱ་ཀྲོ་དྷེ་ཤྭ་རི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཨ་མྲྀ་ཏེ་པུ་དན་དྷ་རི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་བཛྲ་པིངྒ་ལི་ཧཱུྃ་ཕཊ། ཨོྃ་བཛྲ་ཌ་ཀི་ནཱི་པི་བ་པི་ཀ་རུ་དྷི་རྃ། མ་ཧཱ་བཛྲ་བ་ལི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་ཤ་ནི་བྷཀྵ་བྷཀྵཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་ཤ་ནི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་པཱ་ཤེ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཨ་ནཱ་ཡ་ཨ་ནཱ་ཡ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་བེ་བྷི་ནི་གུ་གུ་མཱ་ར་ཡ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་ཛྭ་ལ་ཡ་བྷ་སྨིཾ་ཀུ་རུ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་པི་ག་ཏ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧ་བཛྲ་དྃ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བཛྲ་ཀི་ལི་པྲ་བི་ཤ་པྲ་བི་ཤ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་པུཥྚི་མཱྃ་སཱཤ་ནི་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་ཀ་ར་བཛྲ་དྷཱ་ར་ནི་ཧཱུྃ་ཕཊ།

ཨོྃ་བཛྲ་ཌཱ་ཀི་ནཱི་ཨཱ་ཀརྵ་ཎི་མ་ཧཱ་པིཾ་ག་རཱ་ལི་མུ་ཀུ་ཧཱུྃ་ཛྫཿཛྫཿཧཱུཾ་ཕཊ། ཨོྃ་བཛྲ་ཌཱ་ཀི་ནཱི་ཨཱ་བི་ཤ་ནེ་ཧཱུྃ་ཧཱུྃ་ཧཱུྃ་ཕཊ། ཨོྃ་བཛྲ་ཌཱ་ཀི་ནཱི་མ་ཧཱ་བནྡྷ་ཧཱུཾ་ཧཱུཾ་བྃ་བྃ་ཧཱུྃ། ཨོྃ་བཛྲ་ཌཱ་ཀི་ནཱི་མ་ཧཱ་ཏོ་ཥ་ཎི་ས་མ་ཡེ་ཧཱུྃ་ཧཱུྃ་ཨཱ་ཨཱ། བཛྲ་མ་ཧཱ་རཀྵ་ས་མཱྃ་ས་རུ་དྷི་ར་མེ་ད་པྲི་ཡ། མཧཱ་ཀུམྦྷ་ཀརྞ་ཧཱུྃ་ཧཱུྃ་ཧཱུྃ་ཧཱུྃ་ཀྵཿ། བཛྲ་མ་ཧཱ་རཱཀྵ་ས་ཨཱ་ཀཌྜྷྱ་པྲ་བེ་ཤ་ཡ། སརྦྦ་བཛྲ་ཀཱ་ལ་ཤི་ནི་[བནྔྷེ]་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ། ཨོྃ་བཛྲ་རཱཀྵ་ས་བནྡྷ་ཡ་བནྡྷ་ཡ། བི་ཥ་ཡ་བི་བི་ཥ་ན། སརྦཱ་ན་ཧཱུྃ་ཧཱུྃ་ཕཊ། བཛྲ་མ་ཧཱ་རཀྵ་ས། བྷནྡྷ་ཡ་བྷནྡྷ་ཡ། སརྦཱ་ན་མ་ཧཱ་བི་ཀྲཱི་ཏཱ་ན་ན། ཧ་གྲཱི་བ་ཧཱུྃ་ཕཊ། དེ་ནས་རྡོ་རྗེ་ནམ་མཁའ་ལ་འགྲོ་མ་རྣལ་འབྱོར་གྱི་དབང་ཕྱུག་ཆེན་མོ་དེ་དག་ཐམས་ཅད་རབ་ཏུ་མགུ་ནས། ཡིད་དགའ་བར་གྱུར་ཏེ། དབྱངས་ཆེན་མོ་འདི་འབྱིན་པར་གྱུར་ཏོ། །ཀྱེ་མ་རྡོ་རྗེ་སེམས་དཔའ་ཡི། །རྡོ་རྗེ་སྦྱོར་བ་རབ་བསྟན་པས། །མཁའ་ལ་འགྲོ་བ་སངས་རྒྱས་ཉིད། །ཅི་བདེ་བས་ནི་སྒྲུབ་པར་བྱེད། །དེ་ནས་བཅོམ་ལྡན་འདས་ཀུན་ཏུ་བཟང་པོས་ཡང་རྡོ་རྗེ་ནམ་མཁའ་ལ་འགྲོ་མ་དེ་དག་ཀུན་མགུ་དགའ་བར་བསྒྲུབ་པར་བྱ་བའི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོྃ་ཌཱ་ཀི་ནཱི་ཨཱ་ཀརྵ་ཡ་པྲ་བེ་ཤ་ཡ། བནྡྷ་ཡ་ཏོ་ཥ་ཡ་ཨཱ་སརྦཱ་ན་བཛྲ་ཌཱ་ཀི་ནཱི་ཧྲཱི་ད་ཡྃ་ཧཱུྃ་ཛྫཿ། ཛཿཧཱུཾ་བྃ་ཧོཿ ཊཀྐི་ཧཱུྃ་ཛྫཿ། ཨོྃ་ཧེ་རུ་ཀ་མ་ཧཱ་བཛྲ། ཨཱ་ཀཌྜྷྱ། ཨཱ་ཀཌྜྷྱ། པྲ་བེ་ཤཡ། པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཥ་ཡ་ཏོ་ཥ་ཡ། ཧཱུྃ་ཧཱུྃ་ཕཊ། ཨོྃ་བཛྲ་པདྨ་མ་ཧཱ་པ་ཌ་བ་མུ་ཁ། ཨ་ཀཌྜྷྱ། པྲ་བེ་ཤ་ཡ། བྷནྡྷ་ཡ། མོ་ཧ་ཡ། ཏོ་ཥ་ཡ། ཧ་ཧ་ཧི། ཁྲོ་བོའི་སྔགས་ཀྱི་ཚོགས་འདིས་རྡོ་རྗེ་རྣལ་འབྱོར་མ་དང་། མཁའ་ལ་འགྲོ་མ་དང་། ནམ་མཁའ་ལ་འགྲོ་བ་དང་། རྡོ་རྗེ་འཕྲོག་པར་བྱེད་མ་དེ་དག་ལ་སོགས་པ་དེ་དག་དགུག་པ་དང་། གཞུག་པ་དང་། དབང་དུ་བྱ་བ་ལ་སོགས་པའི་ལས་བྱ་སྟེ། གཏོར་མས་མཆོད་པ་ལ་སོགས་པའི་དམ་ཚིག་ཧེ་རུ་ཀའི་ཕྱག་རྒྱ་དང་། ཊཀྐི་རྒྱལ་པོའི་ཕྱག་རྒྱ་དང་། རྟ་མགྲིན་གྱི་ཕྱག་རྒྱ་སྦྱིན་ཏེ། ལས་ཐམས་ཅད་ལ་སྦྱོར་རོ། །རྡོ་རྗེའི་ཐལ་མོ་ཇི་ལྟ་བ་བཞིན་བཅིངས་ཏེ། ཁྲོ་བོ་གཉིས་ལྕགས་ཀྱུ་ལྟར་བྱ། སྦོམ་པོ་གཉིས་ཕན་ཚུན་རྩེ་སྦྱར་ཞིང་། ཞི་བ་གཉིས་ཀྱང་རབ་ཏུ་བསྒྲེང་། ལྷག་མ་གཉིས་བརྐྱང་སྟེ་འོད་ཟེར་ལྟར་གཏང་བ་འདི་ནི་ཕྱག་

རྒྱའི་མཆོག་ཡིན་ནོ། །ཕྱག་རྒྱ་འདི་ནི་གཟི་བརྗིད་ཆེ། །ལྷ་དང་ལྷ་མིན་ཕྱག་བྱས་པ། །སངས་རྒྱས་རྡོ་རྗེ་འཛིན་ལ་སོགས། །བསྔགས་ཤིང་མཆོད་པ་བྱས་པ་ཡིན། །བཅིངས་པ་དེ་ཉིད་འབེབས་པ་དང་། །ཐམས་ཅད་ཚོགས་ནི་འཛུད་པར་བྱེད། །གདུག་པ་ཐམས་ཅད་གསོད་བྱེད་མ། །སྲིན་མོ་ཐམས་ཅད་ཟ་བར་བྱེད། །རྣལ་འབྱོར་དམ་པ་གནས་པ་ཡིས། །འདི་ཡིས་ལས་རྣམས་ཐམས་ཅད་བྱེད། །ལས་རྣམས་ཐམས་ཅད་སྒྲུབ་པ་པོ། །མི་ལྡན་དངོས་གྲུབ་མི་འགྱུར་ཏེ། །འདོད་ཆགས་ཞེ་སྡང་གཏི་མུག་རྣམས། །བསྙེན་པས་དངོས་གྲུབ་མྱུར་དུ་འཐོབ། །རྡོ་རྗེ་བཅིངས་པ་གཉིས་སུ་བྱས་ཏེ། རྒྱབ་གཉིས་རྒྱབ་སྦྱར་ཏེ། མཐེའུ་ཆུང་གཉིས་བརྐྱང་སྟེ། ཕན་ཚུན་བསྣོལ་ཁྲོས་པ་གཉིས་གྱེན་དུ་བསྒྲེང་སྟེ་སྙིང་གར་བསྟན་ནས། བརྐྱང་བསྐུམ་གྱི་ཚུལ་དུ་གནས་པ་འདི་ལས་ཐམས་ཅད་བྱེད་པའོ། །འདི་ཡིས་ཐམས་ཅད་ལས་ཀྱི་རྣམས། །ཇི་ཙམ་ཡིད་འདོད་བྱེད་པར་འགྱུར། །ཚེ་འདིར་སྡིག་པ་གང་བྱས་པ། །འདི་ཡིས་ཐམས་ཅད་འཕྲོག་པར་བྱེད། །དེ་དག་ཐམས་ཅད་མྱུར་འགྱུར་ཏེ། །དངོས་གྲུབ་ཡིད་བཞིན་རིན་ཆེན་ནོ། །ཇི་སྙེད་ནམ་མཁའི་ལམ་དག་ཏུ། །རྣལ་འབྱོར་འདི་ཡིས་འཕུར་བར་བྱེད། །རིག་འཛིན་མཆོག་ནི་མཚོན་པར་ཡང་། །ཆོ་ག་གྲུབ་པ་སླར་ཡང་འོང་། །ཐལ་མོ་མཉམ་པར་སྦྱར་ཏེ། སྦོམ་པོ་གཉིས་དབུས་སྦྱར། ལྷག་མ་འདབ་མ་ཁ་བྱེ་བ་ལྟར་བྱས་པ་ནི་པདྨའི་གདན་ནོ། །སྦོམ་པོ་གཉིས་རྩེ་མོ་ཐུར་དུ་བསྟན་པ་ནི་རྟ་གདོང་གིའོ། །གང་གིས་སྦྱོར་བྱས་སྐད་ཅིག་ཏུ། །དེ་ཡིས་དངོས་གྲུབ་ཆེན་པོར་འགྱུར། །བཅིངས་མ་ཐག་ཏུ་འཕུར་འགྱུར་བ། །འདོད་པ་བཞིན་དུ་ཉེ་བར་འགྲོ། །ས་འོག་དངོས་གྲུབ་འདོད་པ་བཞིན། །མྱུར་དུ་སླར་ཡང་ལྡོག་པར་འགྱུར། །དེ་ལ་སོགས་པ་མཐའ་ཡས་པ། །ཕྱག་རྒྱ་འདི་ནི་སྦྱོར་བ་དགེ། །ང་ནི་བསྟན་ཏེ་རྒྱལ་བའི་རྣམས། །རྣལ་འབྱོར་པ་ཡིས་དྲང་བར་བྱ། །རྣལ་འབྱོར་མ་རྣམས་ཐམས་ཅད་ཀྱང་། །ཕྱག་རྒྱའི་ཡན་ལག་མཆོག་དེས་སྦྱར། །དེ་ནས་ནམ་མཁའ་ལ་འགྲོ་བ་ཆེན་མོ་དེ་དག་སོགས་འདོད་པས་གཟིར་བ་རྣམས་རངས་ཏེ། རང་གི་གཟུགས་ནི་བསྒྱུར་བ་ཡིས། །བཞེངས་ཏེ་

གར་ནི་རབ་མཛད་ཅིང་། །དུར་ཁྲོད་ཀྱི་ནི་ས་ཆེན་དུ། །མགུ་བ་ཆེན་པོས་བརྟགས་པར་བྱེད། །ཕྱག་ན་ཐོད་པ་གྲི་དག་དང་། །རྡོ་རྗེ་ཁ་ཊྭཱཾ་རྣམ་པར་འཛིན། །སྐལ་ལྡན་རང་གི་ཕྱག་རྒྱས་མཚན། །དབུ་སྨུག་རྣམ་པར་བསྙེར་བའི་ཞལ། །བདེ་བའི་ཆ་ལུགས་སྦྱར་བ་ཡིས། །བདེ་བ་དམ་པ་ལོངས་སྤྱོད་མྱོང་། །རབ་ཏུ་རྨོངས་པས་བསྙེན་བྱེད་ཅིང་། །རབ་དགྱེས་ཁྲོ་ལ་གསོལ་བ་འདེབས། །ཟླ་བ་དྲི་མེད་སྟོང་རབ་རྫོགས་པའི་སྤྱན། །ཐུགས་རྗེའི་དབྱིངས་རུམ་ཉིད་དུ་བདག་ཅག་བསྐྱེད། །འགྲོ་བའི་སྡུག་བསྔལ་ཚ་བས་གདུངས་པ་ཡི། །བྱང་ཆུབ་དེས་ནི་ཀུན་ཏུ་ཚིམ་པར་མཛོད། །ཨ་ལ་ལ་ལ་ཧོ། །མཆོག་གི་རོལ་པས་ཡང་དག་སྒོ་འབྱེད་ཅིང་། །བྱང་ཆུབ་མཆོག་ལམ་སྙིང་པོ་ཉིད་འདི་སྟོན། །གསང་བའི་བདག་ཉིད་བདེ་བས་ཟིལ་གནོན་ཏེ། །རྨོངས་ཤིང་བྱིང་བའི་རྣམས་ལ་ཐུགས་རྗེས་སྒྲོལ། །ཨ་ལ་ལ་ལ་ཧོ། །ཆེ་བའི་ཡེ་ཤེས་ལྷུན་གྱིས་མངར་ལྡན་པ། །ཕྱོགས་ཀྱི་ཐུགས་རྗེས་མ་ཟིན་སྙོམས་པར་དགོངས། །བདེ་བ་མཆོག་གིས་གསང་བའི་གནས་ཉིད་དུ། །མྱ་ངན་འདའ་བའང་ལོངས་སྤྱོད་བསྟན་པས་འགྲུབ། །འཇིག་རྟེན་གསུམ་པོ་འདིར་ནི་དངོས་བསྟན་ཀྱང་། །རྨུགས་པའི་འགྲོ་བས་བདུད་རྩིའི་དངོས་མ་མཐོང་། །ཀྱེ་མའོ་མ་སྐྱེས་ཆོས་ཏེ་སྙིང་པོ་ལས་བྱུང་བ། །བསམ་གྱིས་མི་ཁྱབ་ནམ་མཁའི་མཐའ་དང་མཉམ། །རབ་ཏུ་དགྱེས་པའི་བདེ་མཆོག་འབར་བའི་གཙོ། །རིན་ཆེན་སྣ་ཚོགས་ཀུན་འདུས་འདི་ལ་གཟིགས། །སྔོན་མེད་རོལ་མོ་འདི་ལ་རོལ་མཛད་ཅིང་། །དུར་ཁྲོད་ཆེན་པོའི་དངོས་གྲུབ་སྩལ་བར་མཛོད། །འདུལ་བའི་དབང་གི་གྲུབ་པའི་ཆ་ལུགས་མི་ཟད་མ། །རྣལ་འབྱོར་མཁའ་འགྲོས་གཟི་བརྗིད་འབར་བ་འདིས། །སྡུག་བསྔལ་གསུམ་པོས་འཐོམས་ཤིང་རྨོངས་པ་ལ། །བདེ་བའི་སྤྱོད་པས་གནས་ནས་སྤྱོད་མཛད་དེ། །ཐུགས་རྗེས་པདྨའི་དབྱིངས་ལས་བསྐྱེད་པར་མཛོད། །ཨ་ལ་ལ་ལ་ཧོ། །ཇི་ལྟར་པདྨ་འདི་ལ་ཆགས་མེད་བཞིན། །སྡུག་པའི་བཅིངས་པས་མ་ཟིན་རྣམ་གྲོལ་ཏེ། །རོལ་པས་ཆུབ་པའི་ས་ལ་གནས་ཤིང་རྣམ་མཛད་པ། །འཇིག་རྟེན་གསུམ་པོ་འདི་ལ་གཟིགས་ནས་རོལ་མོ་མཛོད། །བདག་ཅག་དམ་ཚིག་

འདི་ལ་འདུས་ཤིང་སྣང་བའི་རྣམས། །མཉེས་མཛོད་ཤིན་ཏུ་བདེ་བ་བཞེངས་སུ་གསོལ། །འགལ་བའི་ཡིད་དང་མ་ཆགས་རྡོ་རྗེ་ལ། །ནམ་མཁའ་ཇི་བཞིན་མི་འགྱུར་ཚུལ་བཞིན་གནས། །ཁམས་ཀྱི་རང་བཞིན་མནབས་ཤིང་རྣམ་ཁྲོ་ཡང་། །བྱམས་པའི་ཐུགས་རྗེས་ཀུན་དུ་གནས་ཁྱབ་མཛད། །ཨེ་མའོ་བདེ་བས་བདེ་སྦྱིན་ཕྱག་འཚལ་ལོ། །རང་བཞིན་གྲུབ་པའི་བདེ་བ་དངོས་གྲུབ་གསོལ། །ཆགས་མེད་ཆགས་དང་ལྡན་པའི་ལོངས་སྤྱོད་ཀྱིས། །དམ་ཚིག་སྐྱོན་མེད་བདག་ཅག་རོལ་པ་མཛོད། །ཐུགས་རྗེ་གསལ་བའི་བྱང་ཆུབ་སེམས་ཆེན་དེས། །འགྲོ་བ་ཀུན་གྱི་བག་ཆགས་རྣམ་པར་སྦྱོངས། །རྒྱུ་དང་རྐྱེན་ལ་མ་བརྟེན་རང་བཞིན་གྲུབ། །མ་ཆགས་དྲི་མེད་ཡོངས་གསལ་ཟླ་བ་བཞིན། །འཇིག་རྟེན་གསུམ་པོ་འདིར་ནི་མངའ་མཛད་དེ། །ཐམས་ཅད་མཁྱེན་པའི་ཡེ་ཤེས་ཀུན་དུ་བདེ་བས་རྩེན། །འདི་ཡིས་གཙོ་ལ་བསྐུལ་བྱས་ན། །དཀྱིལ་འཁོར་ཉིད་དུ་དངོས་གྲུབ་བོ། །ཡིད་གདུང་མཉེན་པའི་ང་རོ་ཡིས། །དཔྱིད་ཀྱི་རྒྱལ་པོ་གླུ་བླངས་ཏེ། །མཁའ་འགྲོ་དྲ་བ་དྲི་མེད་པའི། །དགོངས་པ་ཐམས་ཅད་བསྟན་བྱས་ཏེ། །རྡོ་རྗེ་པདྨོ་ཡིད་འོང་བའི། །དངོས་གྲུབ་ཐམས་ཅད་སྦྱར་བར་བྱ། །བདེ་བྱེད་ཆེན་པོ་འདི་ཡིས་ནི། །བསྐུལ་བས་དགྱེས་པ་སྦྱིན་པར་བྱེད། །རྡོ་རྗེ་ཅན་གྱི་ཡི་གེར་ལྡན། །དུས་གསུམ་རབ་ཏུ་སྦྱར་བར་བྱ། །དེ་ནས་བཅོམ་ལྡན་འདས་ཀྱིས་རྡོ་རྗེ་ནམ་མཁའ་ལ་འགྲོ་མ་ཐམས་ཅད་ཀྱི་ཤིན་ཏུ་དགྱེས་པའི་ལོངས་སྤྱོད་དཔལ་གྱི་བདེ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་དག་ཐམས་ཅད་ལ་རྗེས་སུ་མགུ་བར་མཛད་དོ། །གཡོན་གྱི་ལག་པས་གཟུང་བྱས་ཏེ། །གསང་སྐྱེས་པདྨོ་ཕྱེ་བ་ལས། །རྡོ་རྗེ་ཆེན་པོ་གཡས་ཉིད་ཀྱིས། །བཅུག་ན་མཆོད་པ་འཐོབ་འགྱུར་ཏེ། །མཁའ་ལ་འགྲོ་བ་དྲ་བ་འདིས། །མཉེས་པས་འདི་ནས་དངོས་གྲུབ་འཐོབ། །ཨོཾ་དང་ཨོཾ་དང་མི་ཕྱེད་རྡོ་རྗེ་བདེ། །མཐའ་རུ་ཕཊ་ཀྱིས་སྟོབས་རབ་སྦྱོར་བ་ཡིས། །ཀྱེ་མའོ་བདེ་བ་མཁའ་འགྲོ་དྲ་བ་ཆེ། །རབ་དགྱེས་དབང་མོ་བདེ་བྱེད་བདེ་སྟབས་མཛོད། །རྣལ་འབྱོར་མ་ཚོགས་གསལ་རྣམས་ལ། །འདི་ཡིས་རྩེན་པ་རྣམ་བྱས་ན། །

བདེ་ཆེན་བདེ་བ་དགྱེས་པ་ཡི། །རབ་དགྱེས་དངོས་གྲུབ་འགྲུབ་པར་འགྱུར། །རྣལ་འབྱོར་མའི་ཆེ་བ་རྗེས་སུ་མཉེས་པར་བྱེད་པའི་ཡེ་ཤེས་ཀྱི་ཕྱག་རྒྱ་ཡེ་ཤེས་སོ།། །།མགོ་ལ་ཐལ་མོ་ཕྱེད་སྦྱིན་ཏེ། །ཆུ་སྐྱེས་ལ་ནི་ཡོངས་སུ་རྫོགས། །རྡོ་རྗེ་བཅིང་བ་ཡང་དག་ལྡན། །པདྨོའི་སྐྱིལ་མོ་བཅིང་བར་བྱ། །འདི་ཡིས་རྩེན་པར་བྱས་ན་ནི། །བུད་མེད་མཆོག་ནི་འགྲུབ་པར་འགྱུར། །བདེ་བ་ཆེན་པོས་གར་བྱེད་ཅིང་། །རབ་དགྱེས་བདེ་བྱེད་གནོད་བྱེད་དང་། །ཀུན་ཏུ་འཁྱུད་དང་སྤྲོད་བྱེད་དང་། །སྣ་ཚོགས་གར་གྱིས་གར་བྱས་ཏེ། །ཐམས་ཅད་ཟས་དང་རོས་དངོས་འགྲུབ། །མཆོག་གི་བདེ་བས་དངོས་གྲུབ་འགྱུར། །རྩ་བའི་ཕྱག་རྒྱ་བཅིང་བྱས་ཏེ། །སངས་རྒྱས་སྦྱོར་བ་བདེ་ཆེན་པོ། །མྱུར་བའི་ཐལ་མོས་བསྒྲུབ་པར་བྱ། །གསུམ་གྱིས་མཚམས་སུ་རབ་བྱ་ཞིང་། །མཁུར་ཙོས་སོ་ཡིས་བཏབ་བྱས་ཏེ། །མ་མཆུ་ཡང་ནས་ཡང་དུ་གཟུང་། །འོ་མ་འཛིན་པ་ཕྱིར་ཞིང་མཉེ། །གཡའ་བྱེད་པདྨོ་རྣམ་བཞི་བྱ། །པདྨོ་ཕྱི་ཕྱིར་རབ་མཉེ་ཞིང་། །ཟེ་བ་མཚན་པས་རབ་ཏུ་སྦྱར། །སེན་མོས་མཆན་ཁུང་སུམ་མདོ་དང་། །རྣ་བ་གཉིས་སུ་རབ་ཏུ་གཟུགས། །དལ་ནས་རྡོ་རྗེ་གཞུག་བྱ་ཞིང་། །ཁྲོ་བོའི་རྒྱལ་པོས་བསྐྱོད་པར་བྱ། །གཡས་ཀྱིས་ཤིན་ཏུ་བསྐྱོད་བྱས་ནས། །གཡོན་པ་ཡིས་ནི་གཏང་བར་བྱ། །སྦྱོར་བ་འདི་ཡིས་རྩེན་པ་ཡིས། །མཁའ་འགྲོའི་འཁོར་ལོ་མཆོད་པར་བྱ། །ཀྱེ་མའོ་བདེ་ཞེས་རབ་བརྗོད་དེ། །བདེ་བ་ཆེན་པོ་དབྱངས་ཀྱིས་བསྐུལ། །ཡང་དང་ཡང་དུ་འཛིན་པ་ན། །བློ་ལྡན་སྒྲུབ་པས་བསྒྲུབ་པར་བྱ། །རྣལ་འབྱོར་མ་ཐམས་ཅད་ཀྱི་མཆོད་པ་ཆེན་པོའི་སྤྲོ་བ་ཡེ་ཤེས་སོ། །དེ་དག་ཐམས་ཅད་མགུ་ནས་ནི། །རྡོ་རྗེ་འཛིན་ལ་གསོལ་བ་འདེབས། །ཉེ་བའི་ཟས་ནི་ཐམས་ཅད་དང་། །དེ་བཞིན་ཉེ་བའི་ཡོ་བྱད་རྣམས། །བདེ་བ་བསྒྲུབས་པས་སྒྲུབ་པ་པོ། །སྣ་ཚོགས་ཆེན་པོ་བསྒོ་བར་གསོལ། །བསྒྲུབ་པ་ཐམས་ཅད་སྒྲུབ་བྱེད་པས། །གདོན་མི་ཟ་དཀའ་རྟག་བགྱིད་པས། །གང་གིས་མྱུར་དུ་མཉམ་སྦྱོར་བས། །དཀྱིལ་འཁོར་རབ་ཏུ་རྣམ་བསྒྱུར་བགྱི། །དེ་ནས་བཅོམ་ལྡན་འདས་ཀྱིས་ཉེ་བའི་ཡོ་བྱད་ཁ་ཟས་ཐམས་ཅད་ཀྱི་ཕྱག་རྒྱ་

གསུངས་པ། ཡོ་བྱད་ཕྱི་ཡི་ཐམས་ཅད་དང་། །གོས་དང་རྒྱན་ལ་སོགས་པའོ། །ཉེ་བའི་ཁ་ཟས་རྣམས་ལ་ནི། །ཤ་དང་ཁྲག་ལས་ཡང་དག་བསྒྲུབ། །འབྲས་བུ་རྩ་བ་ཚད་མེད་དོ། །མཆོག་ཏུ་བདེ་བ་ཡིད་ཚིམ་པ། །འདི་ཡིས་མཆོད་པ་བྱས་པ་ན། །མཁའ་འགྲོ་མ་ནི་དངོས་གྲུབ་འགྱུར། །བུས་པའི་ཤ་ལས་རབ་བསྒྲུབ་པའི། །འོ་མ་དམ་པས་ཐོད་པ་དགང་། །མཁའ་འགྲོ་མ་ཀུན་དབུལ་བྱས་ན། །དཀྱིལ་འཁོར་འདིར་ནི་དངོས་གྲུབ་འགྱུར། །གཏོར་མའི་མཆོད་པའི་ཡོ་བྱད་ཀྱི་ཡེ་ཤེས་སོ། །དེ་ནས་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་ཐམས་ཅད་བཞེངས་ཏེ་ཕྱག་འཚལ་ནས་ཡང་གཅིག་ཏུ་སྟུག་པོར་འདུ་བ་མཛད་དེ་བཅོམ་ལྡན་འདས་ལ་གསོལ་བ་འདེབས་སོ། །རྣལ་འབྱོར་ཀུན་གྱི་ཡེ་ཤེས་མཚན། །རྡོ་རྗེ་རྣལ་འབྱོར་མ་རྣམས་ཀྱི། །ཐམས་ཅད་བརྡ་རྣམས་དྲན་གྱུར་པ། །བཅོམ་ལྡན་འདས་ཀྱིས་བཤད་དུ་གསོལ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་རོ་མྱོང་བ་དང་འབྲེལ་བའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ནམ་མཁའ་ལ་འགྲོ་བ་དང་། མཁའ་ལ་འགྲོ་མ་ཐམས་ཅད་ཀྱི་བརྡའི་ཕྱག་རྒྱ་འདི་གསུངས་སོ། །ཀ་ནི་འདོད་པ་བྱེད་འདོད་ཕྱིར། །བདག་ནི་འདོད་ཅན་སྨྲས་ཡིན་ཏེ། །གཏི་མུག་ལྡོངས་པས་མ་བྱིན་ན། །མྱུར་དུ་དམ་ཚིག་དེ་ཉམས་སོ། །དམ་ཚིག་དམ་ཚིག་ཅན་མཐོང་ན། །ལག་པ་གཡས་པ་བརྐྱང་བྱས་ཏེ། །དེས་ཀྱང་གཡོན་པ་བརྐྱང་བ་ཡིས། །རང་གི་ནུ་མ་རབ་བསྡམས་ན། །མགོ་བོས་གཡོན་དུ་འདུད་བྱས་ནས། །ཕྱག་བྱེད་བདེ་བ་དྲིས་པ་ཡིན། །ལག་པ་གཡོན་པ་དཀུར་བརྟེན་ན། །དེ་ཡིས་ཕྱག་ནི་བྱས་པར་འགྱུར། །གཡོན་པ་མགོ་རུ་གཞག་པ་ཡི། །གཡོན་དུ་འདུད་པས་ཕྱག་ལན་ནོ། །གཡོན་གྱི་སྨིན་མ་བསྐྱོད་པ་ཡིས། །མྱུར་དུ་ཕྱག་ནི་བྱས་པར་འགྱུར། །སྦྱོར་བ་ཤིན་ཏུ་བརྩོན་པ་ཡིས། །གཡས་ཀྱི་སྨིན་མས་ཕྱག་ལན་བྱ། །གཡས་ཀྱི་ལག་པས་སྙིང་ག་རུ། །སྦྱོར་དང་ལྡན་པས་མཉེ་བྱས་ན། །འདི་ནི་རྡོ་རྗེ་སློབ་དཔོན་མཆོག །དེ་ཡི་མཚན་མར་ཤེས་པར་བྱ། །གཡོན་གྱི་ཁྲོ་མོ་བསྒྲེང་བ་ཡི། །ནམ་ཞིག་དེ་ལྟར་བསྟན་

བྱས་ན། །ལུས་ཆེ་དེ་ནི་ཁྲོས་གྱུར་ཞེས། །རྣལ་འབྱོར་པ་ཡི་རྟགས་ཞེས་བྱ། །གཡོན་དུ་འགྱིང་བ་བསྒྱིངས་པ་ཡི། །ལག་པ་སྙིང་གར་བརྐྱང་བྱ་སྟེ། །དབང་མོ་གྱེན་དུ་རྣམ་བསྟན་ན། །དེ་ཚེ་མཛའ་བར་རབ་ཏུ་བརྟག །ཆུང་ངུ་རྩེ་མོར་བྱས་པ་ཡི། །ནམ་ཞིག་བསྐྱོད་པ་མཐོང་བ་ན། །དེ་ཚེ་རིག་མ་རྣལ་འབྱོར་དབང་། །རྡོ་རྗེ་པདྨོ་རྩེན་པར་འདོད། །སྦོམ་པོ་ནམ་ཞིག་མཐོང་འགྱུར་ན། །དེ་ལ་སྟོན་མོ་སྦྱིན་པར་བྱ། །གང་ཚེ་ཤིན་ཏུ་མཐོར་སྟོན་ན། །མངོན་པའི་ང་རྒྱལ་རབ་ཏུ་བརྟག །ཁྲོ་མོ་ལྕགས་ཀྱུ་འདྲ་བྱས་ཏེ། །གང་ཚེ་སྔགས་མཁན་གྱིས་བསྟན་ན། །དེ་ཚེ་ངེས་པར་འོ་བྱས་ཏེ། །གཞན་དུ་ན་ནི་དམྱལ་བར་ལྟུང་། །དེ་ཉིད་རྣམ་པར་བཟློག་པ་ལྟར། །སྔགས་མཁན་གྱིས་ནི་མ་བསྟན་ན། །དེ་ཚེ་མྱུར་དུ་འགྲོ་བྱས་ཏེ། །གཞན་དུ་བྱས་ན་དམ་ཚིག་ཉམས། །གཞན་རྣམས་ཀྱི་ནི་ཕྱག་རྒྱ་ཡིས། །རྣལ་འབྱོར་པ་ཡིས་རྣམ་བསྐུལ་ན། །ལས་ཀྱི་སྦྱོར་བ་ཤེས་པ་ཡིས། །ལས་དེ་དག་ནི་བརྩམ་པར་བྱ། །བརྡ་ཡི་ཕྱག་རྒྱའི་ཡེ་ཤེས་སོ། །འདྲེན་པ་མེད་པའི་ཡི་གེ་ཀུན། །རྣལ་འབྱོར་པ་ཡིས་རབ་ཏུ་བརྟག །རྟག་ཏུ་ཚེག་དྲག་རྣམས་བྲལ་བ། །འདྲེན་ཚུལ་རྣལ་འབྱོར་མ་ཡིའོ། །ཨོཾ་ནི་ཐིག་ལེར་བཅས་པའི་བརྡ། །སྦྱོར་བ་སྔགས་འཛིན་རྣལ་འབྱོར་བར་བརྟག །དེ་ལ་སོགས་པ་མཐའ་ཡས་མཆོག །སྦྱོར་བའི་དཀྱིལ་དུ་བརྟག་པར་བྱ། །རྡོ་རྗེ་པདྨོ་མཉམ་པར་སྦྱོར་བས་རྗེས་སུ་མཉེས་པར་བྱེད་པ་དཔལ་དམ་ཚིག་མ་ཞེས་བྱ་བའི་ཕྱག་རྒྱའི་ཡེ་ཤེས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོ་ཆེན་པོ་ཡང་ཀུན་ཏུ་རྒྱས་འདེབས་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཕ་རོལ་ཏུ་ཕྱིན་མའི་གསང་བ་རྣལ་འབྱོར་མ་ཆེན་མོ་ཐམས་ཅད་ཀྱི་ཕྱག་རྒྱའི་ཡེ་ཤེས་འདི་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་ཕྱུང་ངོ་། །རྡོ་རྗེ་ཐལ་མོ་མཉམ་གཞག་སྟེ། །སྦོམ་པོ་སྐྱིལ་མོ་བཅིང་བར་བྱ། །ཁྲོ་མོ་གཉིས་ནི་སྦྱར་བྱ་སྟེ། །ལྷག་མ་འོད་བཞིན་གཏང་བར་བྱ། །སྙིང་གར་ཕྱག་རྒྱ་འདི་བཞག་ནས། །ཐམས་ཅད་ལས་ནི་རབ་སྦྱར་ཏེ། །སྣ་

ཚོགས་མཁའ་འགྲོའི་དཀྱིལ་འཁོར་དུ། །གདོན་མི་ཟ་བའི་དངོས་གྲུབ་བྱེད། །ཐལ་མོ་དེ་གཉིས་མཉམ་སྦྱར་ཏེ། །མཆོག་དང་རྡོ་རྗེ་མཉམ་དུ་སྦྱར། །ཆུང་ངུ་གཉིས་ཀྱང་གདོང་སྤྲད་དེ། །སྙིང་གར་དེ་བཞིན་སྦོམ་པོ་སྦྱར། །འདི་ཡིས་རྡོ་རྗེ་ཐམས་ཅད་རྣམས། །དམ་ཚིག་འཇིགས་བྱེདརབ་མཛད་ཅིང་། །སེམས་ཅན་ཐམས་ཅད་ཕན་མཛད་མ། །དེ་ནི་དངོས་གྲུབ་འགྲུབ་པར་འགྱུར། །དེ་ཉིད་ལས་ནི་རྡོ་རྗེ་དང་། །མཆོག་ཉིད་བསྒྲེང་བའི་ཚུལ་བྱས་ཏེ། །རྡོ་རྗེ་ཐལ་མོ་གནས་པ་ཡིས། །དྲང་བའི་ཚུལ་གྱིས་དྲངས་བྱས་ན། །མི་གཡེང་དེ་ནས་དངོས་གྲུབ་བོ། །གནོད་བྱེད་ཡང་དག་ལྡན་པ་འདིས། །རྒྱལ་བ་མཆོག་ཀྱང་འདྲེན་འགྱུར་ན། །ལྷ་དང་མི་ཡི་བུ་མོ་དག །ལྷ་མིན་ལ་སོགས་སྨོས་ཅི་དགོས། །ཇི་ལྟར་ཡིད་ལ་འདོད་པ་བཞིན། །འདི་ཉིད་ཀྱིས་ནི་དངོས་གྲུབ་སྟེ། །སྔགས་ཀྱི་བཟླས་པ་མཉམ་སྦྱོར་བས། །མཆོག་ཏུ་མྱུར་དུ་འདྲེན་པར་འགྱུར། །ཐལ་མོ་དེ་ཉིད་ལས་བྱུང་ཁྲོ། །རྩེ་མོ་ཡིད་ཙམ་བཀུག་བྱས་ཏེ། །ལྷག་མ་འོད་ཟེར་རྩེ་མོ་བཞིན། །དེས་ནི་མྱོས་བྱེད་ཐོབ་པ་ཡིན། །འདི་ནི་བཅིངས་མ་ཐག་ཏུ་ཡང་། །བདེ་བར་གཤེགས་ཀྱང་དབང་བསྒྱུར་ན། །ཡིད་ལས་སྐྱེས་པ་འདོད་ཆགས་ཅན། །གཏི་མུག་ཆོས་གནས་སྨོས་ཅི་དགོས། །ཅི་དགར་འདོད་ཆགས་སྦྱོར་བ་ཡིས། །དེ་ཡིས་ལས་རྣམས་བྱེད་འགྱུར་ཏེ། །ཡང་དག་སྦྱོར་བ་ཐམས་ཅད་འགྲུབ། །སྦྱོར་དང་མི་ལྡན་དངོས་གྲུབ་མེད། །སྙིང་གར་འདི་ཉིད་ཀྱིས་བྱས་ཏེ། །མགུ་བའི་སྦྱོར་བ་བདེ་ཆེན་པོས། །རྒྱལ་བ་མཆོག་ནི་མཉེས་པར་འགྱུར། །མཆོག་གི་བཅིང་བ་འདི་ཀུན་དང་། །འདི་ཡིས་ལས་རྣམས་ཐམས་ཅད་དང་། །ཡིད་ལ་བསམ་པ་བྱེད་པ་འཐོབ། །ཕན་ཚུན་དུ་ནི་མགུ་བྱེད་ཅིང་། །མགུ་བས་དངོས་གྲུབ་མྱུར་དུ་འཐོབ། །རྡོ་རྗེ་ཐལ་མོ་མཉམ་སྦྱར་ཏེ། །རྡོ་རྗེ་བཀུག་ནས་སྦོམ་པོར་སྦྱར། །ལྷག་མ་འོད་ཀྱི་ཚུལ་དུ་གཏང་། །དགའ་བྱེད་མཆོག་ནི་ཕྱག་རྒྱ་འདི། །སངས་རྒྱས་འབྲས་བུ་དངོས་གྲུབ་འཐོབ། །རྒྱལ་སྲིད་ནོར་དང་འབྲུ་ཡི་རྣམས། །དེ་བཞིན་ནོར་བུ་འདི་དངོས་གྲུབ། །དེ་ནི་དེ་མ་ཐག་ཏུ་ཡང་། །ལྷ་དང་ལྷ་མིན་མཆོད་པར་འགྱུར། །

བདག་ཉིད་ཀྱིས་ནི་འདི་བཅིངས་ཏེ། །མཁས་པ་ཡིས་ནི་དུས་མཚམས་ཕྱིར། །གནས་ལྔར་རབ་ཏུ་སྦྱོར་བ་ཡིས། །སྤྱི་བོར་དབང་ནི་བསྐུར་བྱས་ན། །རྡོ་རྗེ་འཛིན་པ་ཀུན་གྱི་དབང། །དེ་ནས་དེ་ནི་ངེས་པར་འགྱུར། །ལོ་གཅིག་ཙམ་དུ་མཉམ་སྦྱོར་བས། །ཕན་ཚུན་དུ་ནི་དབང་བསྐུར་བས། །ཁམས་གསུམ་རབ་དགྱེས་བདག་པོ་རུ། །བློ་ལྡན་རྡོ་རྗེ་མི་གཡེང་འགྱུར། །དེ་ཉིད་འཁོར་ལོ་བསྐོར་བྱས་ཏེ། །སྙིང་གར་འཁོར་ལོ་བཞིན་དུ་བསྐོར། །ཟླ་བ་གཅིག་ཙམ་མཉམ་སྦྱོར་བས། །འཁོར་ལོ་བསྐོར་བ་རབ་ཏུ་བསྒྲུབ། །དེ་ཉིད་གཡོན་པར་རབ་སྦྱར་ཏེ། །རྒྱལ་མཚན་ཚུལ་དུ་ཡང་དག་སྤྲོ། །ཞག་བདུན་དུ་ནི་མཉམ་གཞག་པས། །འཇིག་རྟེན་དུ་ནི་རྒྱལ་བར་འགྱུར། །དེ་ཉིད་ཁ་ནས་བགད་པར་སྦྱར། །མཉམ་གཞག་ཟླ་བ་གཅིག་ཙམ་གྱིས། །ལས་རྣམས་ཐམས་ཅད་རབ་གྲུབ་པ། །བགད་པ་ཙམ་གྱིས་བྱེད་པར་འགྱུར། །ཐལ་མོ་དེ་ཉིད་མཉམ་བཞག་སྟེ། །རྩེ་མོ་ཁ་ཕྱེད་རྣམ་བསྒྱུར་བས། །སྦོམ་པོ་ཟེ་བར་རྣམ་བྱས་ཏེ། །ལོ་མ་ལྷག་མ་རྒྱས་པར་བྱ། །རྣལ་འབྱོར་འདི་ནི་བཅིངས་པ་ཡིས། །སྡིག་པ་ཀུན་ལས་རབ་ཏུ་གྲོལ། །བསོད་ནམས་ཆེན་པོས་བྱིན་རློབ་སྟེ། །བདེ་བྱེད་ཐམས་ཅད་གྲུབ་པར་འགྱུར། །ཐལ་མོ་དེ་ཉིད་སྙིང་གར་སྦྱར། །མཆོག་དང་ཁྲོ་མོ་གཉིས་སྦྱར་ཏེ། །དེ་གཉིས་ཚིགས་གསུམ་རབ་ཏུ་དགུག །སྦོམ་པོ་སྐྱིལ་མོ་ཙམ་དུ་བྱ། །རྣལ་འབྱོར་དག་ཏུ་སྦྱོར་བ་ཡིས། །འདི་ཡིས་ཟླ་བ་གཅིག་བྱས་ན། །འཇིག་རྟེན་གསུམ་ལས་རྣམ་རྒྱལ་རྗེར། །དཔའ་བོ་ཆེན་པོར་དེ་འགྱུར་རོ། །ཐལ་མོ་དེ་ཉིད་མཉམ་སྦྱར་ཏེ། །རང་གི་སྙིང་གར་བསྐོར་བར་བྱ། །དེ་ནས་སྔགས་མཁན་ཆོས་སྟོན་པར། །མི་གཡེང་སེམས་ཀྱིས་དེ་འགྱུར་རོ། །སྦོམ་པོ་ལྕེ་ཡི་ཚུལ་བཞག་པས། །དེ་ཉིད་ཁར་ནི་རྣམ་བཞག་ན། །འཇིག་རྟེན་ཀུན་གྱི་ཐམས་ཅད་དག །མདོར་ན་ཞག་བདུན་ཙམ་གྱིས་ཀྱང་། །དབྱིག་དང་གསེར་དང་གོས་ལ་སོགས། །བདུད་རྩི་བཏུང་བ་མཆོག་གི་རྣམས། །འདི་ཡིས་ཐམས་ཅད་འཕྲོག་བྱེད་དེ། །འགྲུབ་པར་འགྱུར་བར་གདོན་མི་ཟ། །ཐལ་མོ་དེ་ཉིད་མཉམ་སྦྱར་ཏེ། །མཆོག་རབ་གཉིས་ནི་འོག་ཏུ་གཞུག །ཆུང་ངུ་གཉིས་དང་སྦོམ་པོ་གཉིས། །སྦྱར་ཏེ་སྙིང་གར་

རབ་ཏུ་གཞུག །ཡིད་ལ་དགའ་བའི་ལས་རྣམས་ཐམས་ཅད་བྱེད། །སྒྱུ་མའི་མཐུ་དང་སྲིད་པ་མཐར་བྱེད་པ། །རྟག་ཏུ་བློ་ལྡན་ལོ་ནི་ཕྱེད་གཉིས་ཀྱིས། །ཁམས་གསུམ་རྒྱལ་སྲིད་མཐུ་ཆེན་ཐོབ་པར་འགྱུར། །ཐལ་མོ་དེ་ཉིད་མཉམ་སྦྱར་ཏེ། །རང་གི་མ་མཆུ་དབུས་ཉིད་ནས། །སྦོམ་པོ་རོ་འཐོབ་ཚུལ་གྱིས་ནི། །ཁྲོ་མོ་འཁོར་ལོ་ཡང་དག་སྤྲོ། །ཞག་བདུན་དུ་ནི་བསྒྲིམས་པ་ཡིས། །འདི་ཡིས་ཁྲག་འདྲེན་དངོས་གྲུབ་སྟེ། །ཤ་ཟས་བཟའ་བ་ལས་ཀུན་བྱེད། །ཐལ་མོ་ཉིད་ནི་བཅིངས་བྱས་ནས། །རྡོ་རྗེ་གཉིས་ནི་པདྨོར་སྦྱོར། །སྦོམ་པོའི་ཟུར་ནི་སྦྲེལ་ནས་ཀྱང་། །ཆུང་ངུ་གཉིས་ཀྱང་དེ་བཞིན་ཏེ། །མགྲིན་པ་ནས་ནི་རྩེ་མོ་བརྐྱང་། །ཐམས་ཅད་ལས་ནི་སྦྱར་བྱས་ཏེ། །འདི་ཡིས་གདུག་པ་ཐམས་ཅད་དག །རབ་ཏུ་སྦྱར་བས་འཇིགས་པར་འགྱུར། །ཐལ་མོ་དེ་ཉིད་མཉམ་གཞག་ནས། །བཅིང་བ་དམ་པོས་བཅིང་བར་བྱ། །སྦོམ་པོ་གཉིས་ནི་ནང་དུ་གཞུག །ཁྲོ་མོ་གཉིས་ཀྱང་བསྐུལ་བར་བྱ། །འདི་ཡིས་གདུག་པ་ཐམས་ཅད་དག །འཛུམས་པར་རབ་ཏུ་བྱས་པར་འགྱུར། །སྐད་ཅིག་ཏུ་ནི་གནོད་བྱེད་དེ། །དེ་བཞིན་བསྡུས་དང་བཙིར་བར་འགྱུར། །ཕྱག་རྒྱ་འདི་ཡིས་རྒྱས་བཏབ་པས། །དེ་ནི་དངོས་གྲུབ་ཐམས་ཅད་ཀྱི། །དངོས་གྲུབ་ཆེན་པོ་བདག་པོ་དང་། །ཐམས་ཅད་ལས་དོན་འགྲུབ་པར་འགྱུར། །ཕྱག་རྒྱ་འདི་ཡིས་རྒྱས་བཏབ་པས། །རིམ་པར་མྱུར་དུ་འགྲོ་འོང་བྱེད། །ལོ་གཅིག་གི་ནི་སྦྱོར་བ་ཡིས། །ལས་རྣམས་ཐམས་ཅད་སྒྲུབ་པར་བྱེད། །རྡོ་རྗེ་རྣལ་འབྱོར་མ་རྣམས་ཀུན་གྱི་ལས་ཐམས་ཅད་བྱེད་པའི་ཕྱག་རྒྱའོ། །དེ་ནས་རྣལ་འབྱོར་མ་དེ་དག་ཐམས་ཅད་རབ་ཏུ་མགུ་ནས་ངོ་མཚར་དུ་གྱུར་ཏེ། རྣམ་པར་འགྱུར་བས་གར་མཛད་ཅིང་། །ཧི་ཧི་ཞེས་པས་གླུ་རུ་ལེན། །ཧ་ཧ་ཞེས་པས་རབ་ཏུ་མགུ། །ཧོ་ཧོ་ཞེས་པས་མཉེས་པར་བྱེད། །ཧེ་ཧེ་ཞེས་པས་འབོད་པར་བྱེད། །ཧཱུྃ་ཧཱུྃ་ཞེས་པས་གད་པར་བྱེད། །ཧཱ་ཧཱ་ཞེས་པས་སྐྱོད་པར་བྱེད། །ཕཊ་ཕཊ་ཞེས་པས་གསོད་པར་བྱེད། ཧཱུྃ་ཧཱུྃ་ཞེས་པས་ཕུར་བུས་འདེབས། །ཛཱ་ཛཱ་ཞེས་པས་འདྲེན་པར་བྱེད། །ས་ས་ཞེས་པས་དམ་པར་

བྱེད། །དགེ་བ་དབང་ཕྱུག་ང་རོ་མཆོག །ཧཱུྃ་བྷྲུྃ་ཞེས་པས་གསོད་པར་བྱེད། །ཧཱུྃ་བྷྲཱུྃ་ཧཱུྃ་བྷྲཱུྃ། ཧཱུྃ་ཧཱུྃ་ཞེས་པས་འབར་བར་བྱེད། །ཏྲུྃ་ཏྲུྃ་ཞེས་པས་གཟི་བརྗིད་བྱེད། །ཏྲིཾ་ཏྲིཾ་ཞེས་པས་འདྲེན་པར་བྱེད། །ཏྲཾ་ཏྲྃ་ཞེས་པས་མཆོད་པར་བྱེད། །དངོས་གྲུབ་ཐམས་ཅད་འབྲས་བུ་སྨིན། །ཧྲྃ་ཧྲུྃ་ཞེས་པས་རྨོངས་པར་བྱེད། །དྷྲིཾ་དྷྲིཾ་ཞེས་པས་འཛུམས་པར་བྱེད། །ཧྲིཾ་ཧྲིཾཞེས་པས་འདྲེན་པར་བྱེད། །ཧཱུྃ་ཧཱུྃ་ཞེས་པས་འཕྱན་པར་བྱེད། །ཧྲོྃ་ཧྲོྃ་ཞེས་པས་རྨོངས་པར་བྱེད། །ཧྲ་ཧྲ་ཞེས་པས་གནོན་པར་བྱེད། །ཧོ་ཧོ་ཞེས་པས་མཉེས་པར་བྱེད། །ཧྃ་ཧྃ་ཞེས་པས་སྲུང་བར་བྱེད། །ཧཱུྃ་ཧཱུྃ་ཞེས་པས་གསོད་པར་བྱེད། །ཧུ་ཧུ་ཞེས་པས་མགུ་བར་བྱེད། །ཏྲྃ་ཏྲྃ་ཞེས་པས་བདུག་པར་བྱེད། །གྷུྃ་གྷུྃཞེས་པས་ཕྲེང་བར་བྱེད། །གྃ་གྃ་ཞེས་པས་དྲི་རུ་བྱེད། །རྃ་རྃ་ཞེས་པས་བརྒྱལ་བར་བྱེད། །དེ་ནས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་འཁོར་ལོའི་ཚོགས་རྣམས་ངོ་མཚར་ཆེར་གྱུར། རྨད་དུ་བྱུང་བ་ཆེན་པོར་གྱུར་ཏེ། རང་གི་སེམས་མགུ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་པོ་ཀུན་ཏུ་བཟང་པོ་ཆེན་པོ་ལ་ཕྱག་འཚལ་ཏེ་གསོལ་བ་འདེབས་སོ། །གཉིས་མེད་མཆོག་ཏུ་རྨད་བྱུང་བ། །བཅོམ་ལྡན་དེ་ཉིད་བཤད་དུ་གསོལ། །གང་གིས་སེམས་ཅན་གྲུབ་པ་འདི། །གསང་བ་སྦས་པ་གྲུབ་པར་འགྱུར། །གར་དང་གླུ་དང་བཞད་པ་ཆེ། །སྒེག་མོ་རོལ་པ་བདེ་བ་མཆོག །སིལ་སྙན་གླིང་བུ་རྣམ་སྣ་ཚོགས། །བརྡབ་དང་རྒྱུད་རྣམས་རབ་འབྱོར་པ། །གསང་རྒྱུད་ཆོ་གའི་རིམ་པ་རྣམས། །རྫུ་འཕྲུལ་བློ་ཡི་ཆེ་བ་ཆེ། །དངོས་གྲུབ་ཐམས་ཅད་གྲུབ་པ་ཡིས། །སྔགས་རྒྱལ་ཁྱོད་ཀྱིས་བཤད་དུ་གསོལ། །དེ་ནས་བཅོམ་ལྡན་སངས་རྒྱས་རྣམས། །ཐམས་ཅད་བདག་པོ་རྒྱལ་པོ་ཆེ། །ཐོག་མ་མེད་ནས་སྤྱོད་རྨད་བྱུང་། །སྣ་ཚོགས་ཆེན་པོ་རྣམ་མི་རྟོག །སྣ་ཚོགས་ཡེ་ཤེས་ཡོན་ཏན་ཆེ། །བླ་མེད་ཆོས་ཀུན་དབང་པོ་སྟེ། རིག་དང་སྔགས་ཀྱི་བདག་པོ་ཆེ། །དེ་ཉིད་ཆེན་པོ་སྙིང་པོ་མཆོག །བློ་རྨོངས་ཕྱག་རྒྱ་རྒྱས་འདེབས་ཏེ། །རྒྱས་འདེབས་རྨོངས་བྱེད་ཟ་བ་

བོ། །གཏོང་དང་བྱེད་པ་ཁྱབ་པ་ཆེ། །བསྐྱོད་པ་སྡིག་པ་འཕྲོག་པར་བྱེད། །སྡིག་པའི་ཆོས་རྣམས་སེལ་བར་བྱེད། །དུས་ངན་འདོད་བྱེད་ཁྲོས་པ་པོ། །གཏི་མུག་ཆོས་རྗེས་འདེབས་པར་བྱེད། །ས་དང་བར་སྣང་དེ་བཞིན་བདེ། །དེ་བཞིན་རྣལ་འབྱོར་པ་ལ་སྦྱིན། །ཚངས་དང་གཏོགས་འདོད་དབང་ཆེན་པོས། །དེ་ལ་ཕྱག་དང་མཆོད་པར་བྱེད། །དེ་ཉིད་སྐྱོང་བྱེད་སྐྱོབ་པ་པོ། །གསང་བའི་གསང་བ་བདེ་བ་ཆེ། །ཟླ་གསང་ཐིག་ལེ་ལས་བྱུང་བའི། །སྦས་པ་ཆེན་པོ་གསང་བ་སྟོན། །ཉིད་ཀྱི་སྐུ་གསུང་ཐུགས་རྡོ་རྗེ། །བདེ་བ་ཆེན་པོ་འབྱིན་མཛད་དོ། །སྐལ་ལྡན་ཉེ་བར་ལོངས་སྤྱོད་ཀུན། །བུད་མེད་ཐམས་ཅད་དབང་དུ་བྱེད། །རང་འབྱུང་མཚན་དུ་ཐིག་ལེ་སྟེ། །བཅུ་གསུམ་དྲ་བ་དབུ་རུ་ལྡན། །འདི་ཡིས་བུད་མེད་བསྐྱེད་བྱས་ཏེ། །ས་བོན་གྱིས་ནི་རྒྱལ་པོ་འདུ། །འོད་ཟེར་གཟི་བརྗིད་འབར་བ་ཅན། །རང་ལས་མྱུ་གུར་འདྲ་བ་ཡིས། །འོག་གི་ཕྱོགས་སུ་གཞག་པ་ནི། །ཧྲྃ་བྱས་མྱུར་དུ་དྲང་བར་བྱ། །དང་པོ་དྲང་བ་གཉིས་དྲངས་པས། །ཚེག་དྲག་དེས་ནི་ལྕགས་ཀྱུ་བྱས། །ལྷ་དང་ལྷ་མིན་མཆོག་གི་བདག །ཁམས་གསུམ་ཐམས་ཅད་དྲང་བར་བྱེད། །འདི་ཡི་ཚུལ་གྱིས་སྦྱོར་བ་ཡིས། །ཕན་ཚུན་དུ་ནི་བསྒྲུབས་བྱས་ནས། །རྨད་བྱུང་རྣམ་པ་སྣ་ཚོགས་ཀྱི། །དངོས་གྲུབ་བྱེད་པ་སྦྱིན་པར་བྱེད། །བདག་ཉིད་རང་བཞིན་མཐོང་བར་བྱ། །སྦྱོར་ལྡན་ཟླ་བའི་གཟུགས་ཉིད་དུ། །དེ་སྟེ་ས་བོན་གཞག་པར་བྱ། །དེ་ཉིད་དེ་ཉིད་ཐབས་ཀྱིས་གནས། །སྔགས་ཀྱི་སྦྱོར་བ་རབ་སྦྱོར་བས། །དེ་ནས་སྔགས་མཁན་དེར་འགྲུབ་བོ། །དེ་ཉིད་སྔགས་དང་སྙིང་པོ་དང་། །ཕྱག་རྒྱ་རིག་དང་མི་ལྡན་པས། །སངས་རྒྱས་རྡོ་རྗེ་སེམས་དཔའ་ཡང་། །འགྲུབ་པ་ཉིད་དུ་ཡོང་མི་འགྱུར། །དེ་ཉིད་ནང་དུ་སྦྱར་བྱས་ན། །སྙིང་པོ་སྙིང་གར་སྦྱོར་བ་ཡིས། །ཕྱག་རྒྱ་ཕྱག་རྒྱས་སྦྱར་བར་བྱ། །སྔགས་དང་སྔགས་ཀྱི་འབྲུ་བསྒོམས་ཏེ། །རིག་མ་རིག་མ་ཉིད་དུ་སྦྱར། །འདི་ཡིས་མྱུར་དུ་དངོས་གྲུབ་སྟེ། །མགྱོགས་པར་འགྲོ་བ་རབ་ཏུ་འགྲུབ། །སངས་རྒྱས་ཀུན་གྱི་ས་ཆེན་པོར། །འབྱུང་དང་འབྱུང་ལས་འགྱུར་བ་ཉེ། །རྣལ་འབྱོར་འབྱོར་དོན་སྒྲུབ་པ་པོ། །དཔའ་བོ་ཆེན་པོ་འགྲོ་འོང་བྱེད། །དེ་ནས་

དེ་བཞིན་གཤེགས་པ་ཐམས་ཅད་རབ་ཏུ་མགུ་རངས་པར་གྱུར་ཏེ། རྡོ་རྗེའི་དབྱངས་འདི་བསྒྲགས་སོ། །ཀྱེ་མའོ་ཀུན་ཏུ་བཟང་པོ་ཡི། །རྡོ་རྗེའི་ཐེག་པ་བླ་ན་མེད། །བཤད་པ་གསང་བ་ཞེས་བགྱི་བ། །དེ་ཉིད་དོན་དུ་བསྒྲུབ་པ་སྟེ། །སྙིང་པོ་ཕྱག་རྒྱ་དམ་ཚིག་ནི། །སྔགས་རིག་རང་གི་ལྷ་ཉིད་དེ། །བདག་གི་དེ་ཉིད་ཇི་བཞིན་པ། །གསང་བ་རྒྱལ་བ་མཆོག་གིས་གསུངས། །དཀྱིལ་འཁོར་དང་ནི་དམ་ཚིག་དང་། །གསང་བ་སྦས་པ་དེ་ཉིད་དེ། །འཇིག་རྟེན་གསུམ་གྱིས་འདུད་པའི་རིམ། །དཔའ་བོ་ཆེན་པོས་རབ་ཏུ་བསྒྲགས། །རྡོ་རྗེ་པདྨོ་རྣམ་མཛད་པས། །རིག་མ་དང་ནི་ལྷན་ཅིག་རྩེན། །གདུག་པ་ཐམས་ཅད་མཉེ་བྱ་དང་། །དམ་ལ་ཞེ་སྡང་བཟའ་བ་དང་། །སློབ་དཔོན་སྨོད་ལ་བསྒྲལ་བ་དང་། །གཟུངས་མའི་བདག་པོར་བསྒྲུབ་པ་དང་། །སངས་རྒྱས་ཐམས་ཅད་བསྐྱེད་བྱ་དང་། །རབ་དགྱེས་བདག་ཉིད་བསྐུལ་བ་དང་། །སྡིག་པ་ཐམས་ཅད་སྦྱང་བ་དང་། །བུད་མེད་ཐམས་ཅད་འདོད་བྱ་དང་། །བདུད་རྣམས་ཐམས་ཅད་དྲང་བྱ་དང་། །རྡོ་རྗེ་ཀུན་ཏུ་གཞུག་བྱ་དང་། །པདྨོའི་གནས་ནི་དགང་བྱ་དང་། །བསྒྲུབ་དང་ཉེ་བར་བསྒྲུབ་པ་དང་། །ཤིན་ཏུ་སྦྱོར་དང་སྦྱོར་ཆེ་བ། །སྦྱོར་བ་རབ་སྦྱོར་སྦྱོར་སྐྱེ་བ། །དེ་རྣམས་དེ་ཉིད་མཁྱེན་པ་པོ། །བདེ་བ་ཆེན་པོ་ཉིད་ཀྱིས་གསུངས། །བསྒྲུབ་པ་ཡི་ནི་སྦྱོར་ཆེ་བ། །སྦྱོར་དང་སྦྱོར་མར་ཡང་དག་སྦྱོར། །དེ་ཉིད་གསལ་བར་སེམས་དཔའ་ཆེ། །ཕན་པར་དགོངས་པ་ཉིད་ཀྱིས་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བའི་མདོ་རྗེས་སུ་དྲིས་པ། རང་གི་ཐུགས་ལ་བཞག་སྟེ། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་བ། སངས་རྒྱས་ཀུན་གྱི་དམ་ཚིག་ནི། །ཀུན་དུ་སྦྱོར་བ་མཉམ་པར་ལྡན། །དེ་ཉིད་ཕྱག་རྒྱ་ཆེན་པོ་སྟེ། །ཡེ་ཤེས་ལྔ་ཡིས་རྗེས་སུ་བསྐྱེད། །དཀྱིལ་འཁོར་ཕྱག་རྒྱ་བཞི་པ་སྟེ། །ཕྱག་རྒྱ་ཆེན་པོས་རྗེས་སུ་བསྒྲུབས། །རྡོ་རྗེ་སེམས་དཔའ་བསྐྱེད་མཛད་དེ། །ཀྱེ་མའོ་བདེ་བ་རྣམ་པར་འབྱུང་། །སྙིང་པོ་ཡེ་ཤེས་ཞེས་བྱ་སྟེ། །ཡེ་ཤེས་བཞི་དང་ཡང་དག་ལྡན། །ཕྱག་རྒྱ་ཡེ་ཤེས་ཕྱག་རྒྱ་ཆེ། །དམ་ཚིག་མཆོག་ནི་རིག་

མའོ། །སྔགས་ཀྱི་ཡི་གེ་ཚུལ་འདྲ་བ། །ཡི་གེའི་ཕྱག་རྒྱ་དོན་ཆེན་སྦྱིན། །འདི་ཡིས་བསྒྲུབ་པ་བྱས་པའི་གཟུངས། །བདག་གི་དེ་ཉིད་ལྷ་དེ་ཉིད། །དེ་དག་དེ་ཉིད་ཅི་བཞིན་པར། །ང་ཡིས་གསང་བ་རབ་ཏུ་བསྒྲགས། །དམ་ཚིག་མ་ཡིན་མི་ཤེས་ལ། །སྔགས་རིག་པས་ནི་བསྟན་མི་བྱ། །ཕྱག་རྒྱ་ཐམས་ཅད་གསང་བྱ་སྟེ། །དམ་ཚིག་རྒྱས་འདེབས་གསང་བ་ཡིན། །དེ་ཉིད་ལྷ་ཡི་སྦྱོར་བ་ནི། །གསང་བ་གསང་བ་རབ་ཏུ་བསྒྲུབ། །རྡོ་རྗེ་པདྨོ་རྣམ་མཛད་པས། །རོལ་པ་ཕྱི་ནང་སྦྱོར་བ་ཡིས། །རིག་དང་ལྷན་ཅིག་རྩེན་བྱ་བ། །སྤྲོད་པ་དང་ནི་འཁྱུད་པ་དང་། །དེ་བཞིན་མཆུ་ནི་སོ་ཡིས་གཟུང་། །རྡོ་རྗེ་བརྟན་པ་གཞུག་པར་བྱ། །གཡས་དང་གཡོན་གྱི་ཚུལ་གྱིས་ནི། །བསྐྱོད་ཅིང་རྣམ་པར་གར་བྱའོ། །གདུག་པ་ཐམས་ཅད་མཉེ་བྱ་སྟེ། །ནུ་མ་མཆན་ཁུང་མཁུར་ཚོས་གཉིས། །འགྲམ་པ་དང་ནི་བརླ་གཉིས་རྒྱབ། །རྐང་པ་ལག་པ་འཇམ་པོ་གཉིས། །མཉེ་བའི་སྦྱོར་བ་འདི་ཡིས་ནི། །མཛའ་བ་ཆེན་པོ་དེ་འགྲུབ་བོ། །འདོད་པའི་དོན་གྱི་བར་གཅོད་དང་། །དམ་ལ་ཞེ་སྡང་བཟའ་བ་དང་། །ཞེ་སྡང་ཅན་གྱིས་ཟོས་འགྱུར་བ། །ཁྱད་པར་གཞན་དང་གཞན་ཡང་བཟའ། །རྟག་པར་མི་ཕྱོགས་སྨྲ་བ་དང་། །བླ་མ་སྨོད་རྣམས་བསྒྲལ་བར་བྱ། །ཤ་དང་ཁྲག་དང་ཀླད་པ་རྣམས། །དྲངས་ཏེ་ཚོགས་ཀྱི་མཆོད་པར་བྱ། །འདི་ནི་གསང་བ་དྲག་པོ་སྟེ། །རྡོ་རྗེ་སློབ་དཔོན་སྨོད་པ་དང་། །བླ་མ་སྨོད་བྱེད་བརྩོན་པ་ལ། །དམ་ཚིག་ཕྱིར་ནི་བསྒྲུབ་པར་བྱ། །གཏི་མུག་དེ་ནི་འགྲུབ་མི་འགྱུར། །སྡུག་བསྔལ་བ་ཡང་འཐོབ་འགྱུར་ཏེ། །ཐམས་ཅད་ནད་དང་ཁྲོས་ཆེན་དང་། །འཇིགས་བྱེད་ཉེ་བར་འཚེ་བ་ཡིས། །བསྐལ་པ་གྲངས་མེད་བྱེ་བ་རུ། །སྡུག་བསྔལ་ཆེན་པོ་སྟེན་བྱེད་ཅིང་། །འོ་དོད་འབོད་པར་སྦྲུལ་གྱི་བདག །བསྟིར་མེད་ཆེན་པོ་བརླག་པར་འགྲོ། །ལུས་ངག་སེམས་ནི་བདེ་དམ་པ། །རིག་མ་ཀུན་ལ་བསྐྱོད་བྱས་ཏེ། །བྱང་ཆུབ་ཆེན་པོ་བདེ་བ་ཡིས། །ཚུལ་བཞིན་དུ་ནི་བསྔགས་པར་བྱ། །བསྐུལ་བའི་སྙིང་པོ་འདི་སྨྲས་ཏེ། །ཛཿཞེས་སྐད་ཅིག་སྐད་ཅིག་ཏུ། །རང་གི་གནས་ནས་གནས་པ་ཡིས། །དེ་ཉིད་ལས་ནི་བསྐྱོད་པར་བྱ། །བཅུ་དྲུག་ཆ་དང་

ཡང་དག་ལྡན། །ཟླ་བ་གསང་བའི་ཐིག་ལེ་ལ། །མེ་ཏོག་དང་ནི་འདྲ་བ་ཉིད། །རླུང་གིས་ཕུལ་བ་བསྐྱོད་པར་བྱ། །དེ་ནི་བསྐྱོད་པས་འགྲུབ་པ་སྟེ། །དེ་བཞིན་དུ་ཡང་བསྐུལ་བར་བྱ། །རྒྱུན་གྱི་ཕྲེང་ནི་འོད་གསལ་བཞིན། །བློ་ལྡན་རྟག་ཏུ་བསྒྲུབ་པར་བྱ། །བདུད་རྣམས་ཐམས་ཅད་འདྲེན་པ་ནི། །ལྷ་མོ་རྣམས་ནི་སྙིང་པོར་བཤད། །ཞགས་པའི་ཚུལ་གྱིས་གཞུག་པ་དང་། །དེ་བཞིན་དགང་བ་བཅིང་བའོ། །བསྒྲུབ་པ་ལྷ་ཡི་སྦྱོར་བ་སྟེ། །རྗེས་སུ་སྒྲུབ་པ་ལྷ་མོའི་དོན། །སྒྲུབ་པ་ཆེན་པོ་གཉི་གའི་རྒྱ། །མཉམ་པར་སྦྱོར་བ་རྡོ་རྗེའི་མཆོག །ཉེ་བར་སྒྲུབ་པ་གཉི་ག་གནས། །ཤིན་ཏུ་སྒྲུབ་པ་བདེ་དམ་པ། །སོ་ཡི་རྩེ་མོས་མཆུ་བཟུང་སྟེ། །མ་མཆུ་མཆོག་ནི་བསྡམ་པར་བྱ། །སྦྱོར་བ་རབ་སྦྱོར་སྐལ་ལྡན་པའི། །རབ་དགྱེས་རོ་མྱང་བདེ་དམ་པ། །ལྷ་དང་ལྷ་ཉིད་ཡང་དག་སྦྱོར། །འདི་ནི་གཉིས་སུ་མེད་ཅེས་བྱ། །སྙིང་པོ་ཕྱག་རྒྱ་སྔགས་རིག་གིས། །ཉིད་ཀྱི་གཟུགས་ནི་བསྒྲུབ་བྱ་སྟེ། །བདག་ནི་སེམས་དཔའོ་ཞེས་བསམས་ན། །འདི་ནི་གཉིས་མེད་མྱུར་དུ་འགྱུར། །གཟུགས་དང་སྒྲ་ལ་སོགས་པའི་ལྷའི། །དངོས་གྲུབ་ཐམས་ཅད་བསྒྲུབ་པར་བྱ། །སྦྱོར་དང་རབ་སྦྱོར་སྦྱོར་ཆེ་བ། །རྒྱལ་བ་ཀུན་གྱི་མཆོག་གིས་གསུངས། །བཅོམ་ལྡན་རྡོ་རྗེ་སྦྱོར་བ་སྟེ། །རབ་ཏུ་སྦྱོར་བ་མཁའ་ལ་འགྲོ། །ཕྱག་རྒྱ་དེ་དག་རབ་སྦྱོར་བ། །སྦྱོར་བ་ཆེན་པོ་བསྒྲགས་པ་ཡིན། །འདི་ཡིས་དཔའ་བོ་ཐམས་ཅད་དང་། །སངས་རྒྱས་ཀུན་དང་མཉམ་སྦྱོར་བ། །སྦྱོར་བའི་དབང་པོ་བདེ་བ་ཆེ། །ཚེ་འདི་ཉིད་ལ་འཐོབ་པར་འགྱུར། །ཕྱག་རྒྱ་འདི་ཡིས་རྒྱས་བཏབ་ན། །རྡོ་རྗེའི་བདག་པོ་ཆེན་པོར་འགྱུར། །མཉམ་པར་སྦྱོར་བ་སྦྱར་བ་ཡིས། །འཇིག་རྟེན་གསུམ་པོ་མྱུར་དུ་རྒྱལ། །ཡང་དག་སྦྱོར་བ་སྦྱར་ཚུལ་གྱིས། །དྲངས་ཏེ་རབ་ཏུ་བཅུག་ནས་ཀྱང་། །རྡོ་རྗེ་བརྟན་པོས་བསྐུལ་བྱས་ཏེ། །ཤིན་ཏུ་འདོད་པས་འདོད་པ་བསྐྱེད། །མཁའ་འགྲོ་ཐམས་ཅད་ཐབས་མཁས་ལྡན། །རྒྱས་དང་དེ་བཞིན་ཟག་པར་བྱ། །འདི་ནི་ཡང་དག་སྦྱོར་བ་སྦས། །སྦས་པ་རྣལ་བྱོར་མ་དཀྱིལ་ལོ། །འདི་ཡིས་ཡང་དག་དངོས་གྲུབ་བླང་། །རྫུ་འཕྲུལ་ཆེན་པོ་འབྲས་

བུ་འཐོབ། །སངས་རྒྱས་བྱང་ཆུབ་བདེ་ཆེ་དང་། །བྱང་ཆུབ་མཆོག་རབ་ཡང་དག་འཐོབ། །གསང་བ་ཆེན་པོ་རྨད་འབྱུང་བ། །དེ་དག་དེ་ཉིད་སྦས་པ་ཆེ། །སངས་རྒྱས་རྣམས་ཀྱིས་དྲིས་པའི་རྒྱ། །ང་ཡིས་ཡང་དག་རབ་ཏུ་བསྟན། །གང་གིས་ཡང་དག་ལྡན་མཐོང་དང་། །བདག་པོ་ཆེན་པོ་མཆོད་བྱེད་ན། །དེ་ཡིས་སྟོན་པ་ཀུན་མཐོང་སྟེ། །རྒྱལ་བ་མཆོག་ལ་མཆོད་པར་འགྱུར། །སྲིད་པ་གཅོད་པ་པོར་འགྱུར་ཏེ། །འགྲོ་བའི་སྟོན་པ་མཆོག་ཏུ་འགྱུར། །དེ་ལ་ལྷ་ཀུན་མཆོད་བྱེད་ཅིང་། །སྐད་ཅིག་སྐད་ཅིག་ཕྱག་ཀྱང་བྱེད། །ཇི་ལྟར་སྟོན་པ་རྫོགས་སངས་རྒྱས། །ཕན་བྱེད་འཇིག་རྟེན་སྐྱེས་གྱུར་པ། །སྣ་ཚོགས་ཡེ་ཤེས་རྗེས་བསྡུས་པས། །རྣལ་འབྱོར་ཆེན་པོར་དེ་བཞིན་འགྱུར། །རང་གིས་དམ་ཚིག་བསྲུངས་པ་ཡིས། །རྡོ་རྗེ་སེམས་དཔའ་བདེ་སྐྱེ་བ། །རྡོ་རྗེ་སེམས་དཔའི་སྦྱོར་ལྡན་པས། །དངོས་གྲུབ་ཆེན་པོ་དེས་འཐོབ་བོ། །རྡོ་རྗེ་སེམས་དཔའི་མཚན་བཏབ་ལ། །ཅུང་ཟད་མི་འགྲུབ་ཡོད་མེད་དེ། །ཕྱག་རྒྱ་ཀུན་གྱི་བདེ་བ་ཆེ། །བདག་ཉིད་སོ་སོར་རྗེས་སུ་འགྲུབ། །རབ་དགྱེས་མཚན་དང་མཛའ་ཆེན་མོ། །རོ་དང་རེག་པའི་ཆེ་བའི་ཆེ། །རྡོ་རྗེ་སེམས་དཔའ་སྦྱོར་བ་ཡིས། །དཔྱད་མི་དགོས་པར་འགྲུབ་པར་འགྱུར། །དེ་ནས་དེ་དག་མགུ་འགྱུར་ཏེ། །རྡོ་རྗེ་སེམས་དཔའ་བདེ་ཆེ་བ། །སྦྱོར་བ་འདོད་པའི་གཟིར་བ་ཡིས། །སྦྱོར་བ་ཆེན་པོས་མཉེས་པར་མཛད། །ར་མ་ར་མ་སམ་ཧོ་མ་ཧཱ་ས་ཏྭ། །རབ་དགྱེས་གདོན་མི་ཟ་ལ་བཞུགས། །སངས་རྒྱས་ཀུན་དང་མཉམ་སྦྱོར་བ། །ཟླ་གསང་ཐིག་ལེར་ཡང་དག་ལྡན། །བདག་ཅག་ཀུན་ཀྱང་དམ་ཚིག་སྟེ། །སྐལ་ལྡན་དྲི་མེད་རབ་དགྱེས་ཀྱི། །རྣལ་འབྱོར་མ་སྙིང་མཆོག་ཉིད་དུ། །སྦྱོར་ཆེན་ཉིད་ཀྱིས་རོལ་པ་མཛོད། །ཐེག་པ་ཆེན་པོ་བདེ་ཆེ་ཡི། །པདྨོ་རྡོ་རྗེ་རིན་ཆེན་གྱིས། །རྣལ་འབྱོར་མ་ཀུན་དཀྱིལ་འཁོར་དུ། །རབ་དགྱེས་ལོངས་སྤྱོད་ཉིད་བསྟེན་མཛོད། །བདག་ཅག་ཐམས་ཅད་ཉེས་བྲལ་ཏེ། །གནོད་མེད་དེ་ནི་གསེར་དང་འདྲ། །དེ་ཉིད་ཐམས་ཅད་གྲུབ་ཆེན་པོ། །རབ་དགྱེས་བདག་ཉིད་ཉིད་བསྟེན་མཛོད། །སྤྲོད་

པ་འཁྱུད་པ་སྦས་པ་དང་། །གཞུག་པ་དང་ནི་གཏོང་བའི་མཆོག །འདི་ནི་སྒྱུ་མའི་བརྟན་པ་ཡིས། །དེད་དཔོན་རབ་ཏུ་བརྟག་པ་མཛོད། །དེ་ནས་བཅོམ་ལྡན་འདས་བདེ་བ་ཆེན་པོ་ཀུན་དུ་བཟང་པོས་འདོད་པ་ཐམས་ཅད་ཉེ་བར་ལོངས་སྤྱོད་པའི་རྣམ་པར་རྒྱལ་བའི་དཔལ་ཞེས་བྱ་བའི་ཆོས་ཐམས་ཅད་མཉམ་པ་ཉིད་ཀྱི་སྦས་པ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། རྣལ་འབྱོར་མ་ཐམས་ཅད་ཀྱི་ཤིན་ཏུ་དགྱེས་པ་ཆེན་པོའི་ཀུན་དུ་འཁྱུད་པ་དང་། སྤྲོད་པ་དང་། གཞུག་པ་དང་། འདྲེན་པ་དང་། རབ་ཏུ་བསྐུལ་བ་དང་། མཉེ་བ་དང་། ཐིགས་པ་དང་། ཚོར་བར་བྱ་བ་དང་། བསྐྱོད་པ་དང་། ཀུན་དུ་བསྐྱོད་པ་དང་། བཅིང་བའི་རྡོ་རྗེ་དང་། པདྨ་ཆེན་མོ་མཉམ་དུ་སྦྱོར་བ་ལ་ཡང་དག་པར་ཞུགས་ཏེ། ཤིན་ཏུ་དགྱེས་པའི་བདེ་བ་ཆེན་པོས། བདེ་བས་ཀུན་དུ་རྒྱས་པར་མཛད་ཅིང་། དེ་བཞིན་གཤེགས་པ་ཐམས་ཅད་དང་། གཟུངས་མའི་ཚོགས་ཐམས་ཅད་ལ་བསྐྱོད་པ་དང་། རབ་ཏུ་དགྱེས་པ་དང་། རབ་ཏུ་རྣམ་པར་འབྱིན་ཅིང་ཤིན་ཏུ་དགྱེས་པ་ཆེན་པོའི་བདེ་བའི་མཉམ་པ་ཉིད་ཀྱི་ཚོགས་ཀྱིས་ནམ་མཁའི་དབྱིངས་ཐམས་ཅད་ཀུན་དུ་རྒྱས་པར་བྱས་ཏེ་གནས་སོ། །དེ་ནས་རྣལ་འབྱོར་མ་ཆེན་མོ་ཤིན་ཏུ་དགྱེས་པའི་བདག་ཉིད་ཆེན་པོ་དེ་དག་ཉིད་མགུ་ཞིང་བདེ་བར་གྱུར་ཏེ། ཀྱེ་མའོ་བདེ་བ་བདེ་བ་ཆེ། །རྫོགས་སངས་རྒྱས་ནི་མགུ་བ་ཆེ། །བདེ་བ་ཆེན་པོ་རངས་པར་འགྱུར། །ཀྱེ་མའོ་བདེ་བ་བདེ་བ་ཆེ། །བདེ་བ་ཉིད་ཀྱིས་ཕྱག་བྱེད་དེ། བྱང་ཆུབ་སེམས་དཔའ་སེམས་ཆེན་པོ། །མགུ་བ་ཆེན་པོའི་བདེ་དང་ལྡན། །ཀྱེ་མའོ་བདེ་བ་བདེ་བ་ཆེ། །འཇིགས་ཤིང་སྐྲག་པས་སྡུག་པར་བྱེད། །ཁྲོས་པ་ཆེན་པོ་མཁའ་འགྲོ་མ། །རབ་ཏུ་མི་བཟད་དུག་དང་འདྲ། །བདེ་བྱེད་ཆེན་པོའི་རོལ་པ་ཡིས། །བདེ་བྱེད་ཆེ་ལ་མཆོད་པར་བྱེད། །སྐལ་བ་ཆེན་པོ་སྲིན་མོ་དང་། །བདེ་བྱེད་བདེ་བས་རབ་རྨོངས་པ། །མཆོད་པའི་སྤྲིན་ཕུང་བདེ་ལྡན་པའི། །རྒྱ་ཆེན་མཆོག་གིས་མཆོད་པར་བྱེད། །དྲག་མོ་ཆེན་མོ་མ་ལྟ་བུ། །རབ་ཏུ་གཏུམ་པ་མེ་འདྲ་བ། །འོངས་ནས་བདེ་བྱེད་ཆེན་མོ་ཡིས། །གཙོ་བོ་མཆོག་ལ་མཆོད་པར་བྱེད། །ལྷ་དང་ལྷ་མོ་ཐམས་

ཅད་ཀྱང་། །ཀླུ་མོ་དང་ནི་རྟ་གདོང་ཡང་། །འོངས་ནས་བདེ་བ་སྦྱོར་བ་ཡིས། །ཡིད་དུ་འོང་བས་མཆོད་པར་བྱེད། །དེ་ནས་དབང་པོ་ལྷ་ཆེན་པོ། །བདག་ཉིད་ཆེན་པོ་ལྷ་ཡི་ལྷ། །ཀྱེ་མའོ་བདེ་བ་སྣ་ཚོགས་ཉིད། །སྣ་ཚོགས་སྦྱོར་བ་བདེ་བ་ཆེ། །མགུ་ཞིང་རབ་ཏུ་རངས་པ་ཡིས། །ལྷ་ཡི་ལྷ་ནི་སྔོན་དུ་འགྲོ། །དཔའ་བོ་བདེ་ལ་ཕྱག་བྱས་ཏེ། །ཀྱེ་མའོ་བདེ་བ་བདེ་བ་ཆེ། །རང་གི་བདེ་བས་མངོན་མཆོད་ཅིང་། །འཇིགས་ཤིང་སྐྲག་པས་མཉེས་པར་བྱེད། །ཚད་མེད་རངས་པ་བཞད་པ་ཆེ། །གླུ་གར་མཆོག་ཏུ་ལྡན་པ་དང་། །བཟའ་དང་བཅའ་བ་ཤ་ཆེན་དང་། །སིལ་སྙན་ཕྲེང་བ་རོ་ཆེན་དང་། །གླིང་བུ་རྒྱུད་མངས་རྫ་རྔ་དང་། །པི་ཝང་པ་ལ་ཀི་ག་ཧ་ལ་ལེ། །སྟག་དང་དཔའ་བོ་འཇིགས་པ་དང་། །ཞི་དང་རྨད་འབྱུང་འཇིགས་བྱེད་དང་། །བདག་དང་ཁྲོས་དང་སྤྱན་རྒྱས་པས། །སྐད་ཅིག་སྐད་ཅིག་མཆོད་བྱེད་ཅིང་། །བྱེད་པ་དང་ནི་བཟློག་པ་དང་། །འཕྲོག་པ་དང་ནི་གཞུག་པ་དང་། །སིད་ཅེས་པ་དང་ཧཱུྃ་ཧཱུྃ་དང་། །ཧ་ཧ་ཞེས་པས་མཉེས་བྱེད་ཅིང་། །རབ་དགྱེས་བདག་ཉིད་བདེ་བ་ཡི། །རང་གི་ཆུང་མས་མཉེས་པར་བྱེད། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་རབ་ཏུ་དགྱེས་པ་བདེ་བ་ཆེན་པོས། ནམ་མཁའ་དང་ནམ་མཁའི་སྐབས་ཐམས་ཅད་ལ་གནས་པའི་སངས་རྒྱས་ཐམས་ཅད་དང་བྱང་ཆུབ་སེམས་དཔའ་དང་། རང་རྒྱལ་དང་ཉན་ཐོས་དང་། རང་བཞིན་གྱིས་འགག་པ་དང་། ངོ་བོ་ཉིད་མེད་པའི་ཆོས་ཉིད་ཀྱི་ཡེ་ཤེས་ལ་གནས་པ་རྣམས་ཤིན་ཏུ་དགྱེས་པ་ཆེན་པོའི་བདེ་བའི་ཐབས་དང་། ཤེས་རབ་ཀྱི་བདེ་བས་བཀུག་སྟེ་དབང་བསྐུར་ནས། ཤིན་ཏུ་དགྱེས་པ་ཆེན་པོའི་བདེ་བའི་ཏིང་ངེ་འཛིན་ལ་ཡང་དག་པར་འཇོག་པ་དང་། ཤིན་ཏུ་དགྱེས་པ་ཆེན་པོའི་བདེ་བའི་ཆོས་ཉིད་ཀྱི་རྒྱལ་པོ་རྗེས་སུ་སྐྱོང་ཞིང་མི་མཉམ་པ་དང་མཉམ་པ། ནམ་མཁའ་དང་མཉམ་པའི་འཇིག་རྟེན་གྱི་ཁམས་ཆེན་པོ་མ་ལུས་པའི་སེམས་ཅན་གྱི་ཁམས་རྣམས་སུ་རབ་ཏུ་གཟིགས་པས་གཟིགས་ནས། འཇིག་རྟེན་དང་། ལྷར་བཅས་པ་རྣམས་ལ་བདེ་བ་ཆེན་པོས་ཁྱབ་པར་མཛད་དོ། །སེམས་ཅན་དང་རིགས་

ཐམས་ཅད་དང་། གནས་ཐམས་ཅད་དང་། སྤྱོད་པ་དང་མི་སྤྱོད་པར་བཅས་པ་དང་། འབྱུང་བ་དང་། འབྱུང་བ་ལས་གྱུར་པ་དང་། སའི་འོག་དང་། ཕུང་པོ་དང་། ཁམས་དང་། སྐྱེ་མཆེད་དང་། བསགས་པའི་དབང་པོ་ལྔ་དང་། རྣམ་པར་ཤེས་པ་དང་། ཤེས་བྱ་དང་། བདག་དང་། བདག་གི་དང་། སྣ་ཚོགས་དང་། སྣ་ཚོགས་མ་ཡིན་པ་དང་། བུས་པ་དང་། རྒན་པོ་དང་། གཞོན་ནུ་དང་། བུད་མེད་དང་། སྐྱེས་པ་དང་། སྐྱེས་པ་མ་ཡིན་པ་དང་། སྲོག་དང་། རབ་ཏུ་ཟད་པ་དང་། འཇིགས་པ་དང་། མི་འཇིགས་པ་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཤེས་པ་དང་། མི་ཤེས་པ་དང་། ཤེས་རབ་དང་། ཐབས་དང་། ཁྱབ་པ་དང་། ཁྱབ་བྱེད་དང་། ཟླ་བ་དང་། དབང་ཆེན་དང་། ཉི་མ་དང་། མེ་དང་། གཤིན་རྗེ་དང་། ཆུ་བདག་དང་། ལུས་སྲུལ་པོ་དང་། ཚངས་པ་དང་། གཏོགས་འདོད་དང་། དབང་ཕྱུག་ཆེན་པོ་དང་། ལྷ་མོ་དང་། སྐལ་བ་དང་ལྡན་པ་དང་། སྐལ་བ་དང་མི་ལྡན་པ་དང་། དངོས་པོ་དང་། དངོས་པོ་མེད་པ་དང་། མཚན་དང་། རྡོ་རྗེ་དང་། པདྨོ་དང་། རིན་པོ་ཆེ་དང་། རལ་གྲི་དང་། ཐོ་བ་དང་། དབྱིག་པ་དང་། རྩེ་གསུམ་པ་དང་། འཁོར་ལོ་དང་། སྦྱོར་བ་དང་། རབ་ཏུ་སྦྱོར་བ་དང་། སྟོང་པ་དང་། སྟོང་པ་ཆེན་པོ་དང་། མཆོག་ཏུ་སྟོང་པ་དང་། ཤིན་ཏུ་སྟོང་པ་དང་། སྟོང་པ་རབ་ཏུ་སྟོང་པ་དང་། བྱང་ཆུབ་དང་། བྱང་ཆུབ་ཀྱི་སེམས་དང་། ཡི་གེ་དང་། ཡི་གེ་མེད་པ་དང་། དྲ་བ་དང་། ལྕུག་མ་དང་། ཆ་དང་། ཆ་མེད་པ་དང་། ཐིག་ལེ་དང་། རོ་དང་། རོ་ཆེན་པོ་དང་། ཡིད་ལ་བྱེད་པ་མེད་པ་དང་། རྟག་པ་དང་། ཞི་བ་དང་། མི་ཟད་པ་དང་། ཐར་པ་དང་། ཐར་བྱེད་དང་། གྲོལ་བ་དང་། རིགས་པ་དང་། ཉོན་མོངས་པ་མེད་པ་དང་། ནམ་མཁའ་དང་། སྐབས་དང་། སྐབས་མེད་པ་རྣམས་ལ་གཅིག་ཏུ་སྟུག་པོར་གྱུར་ཏེ། རྣམ་པར་ཕྱེ་ནས་མི་སྣང་བའི་ཚུལ་དུ་གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བཙུན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། ཐབས་ཀྱི་ཕ་རོལ་ཏུ་ཕྱིན་མ་དང་། སྨོན་ལམ་གྱི་ཕ་རོལ་ཏུ་ཕྱིན་མ་དང་། རྡོ་རྗེའི་ཕ་རོལ་ཏུ་ཕྱིན་མ་རྣམས་ཀྱིས། བཅོམ་ལྡན་འདས་དེ་

བཞིན་གཤེགས་པ་ཐམས་ཅད་ཀྱི་བདག་པོ་ཤིན་ཏུ་དགྱེས་པ་རྡོ་རྗེ་གདོན་མི་ཟ་བ་ཆེན་པོ་གསང་བ་ཆེན་པོའི་དགོངས་པ་ངེས་པར་འགྲེལ་པ་ཆེན་པོ་ལ་ཕྱག་མཛད་དེ། མངོན་སུམ་དུ་ཡང་དག་པར་བསྐུལ་ནས་དྲིས་པ། སུ་ར་ཏ་སྟྭྃ་མ་སི་ཧོ། །གང་ཕྱིར་འདོད་པ་བདེ་བ་ཆེ། །གང་གིས་འདོད་ལས་བྱང་ཆུབ་འགྱུར། །འདོད་ཆགས་བྲལ་བ་ཇི་ལྟར་བདེ། །གང་གིས་ཞེ་སྡང་རྡོ་རྗེ་ཆེ། །གང་གིས་གཏི་མུག་རྒྱལ་བ་ཆེ། །གང་གིས་འདོད་ཆགས་པདྨོར་འགྱུར། །གང་གིས་ང་རྒྱལ་ནམ་མཁའི་བདག ། གང་གིས་ཕྲག་དོག་གདོན་མི་ཟ། །བྱང་ཆུབ་སེམས་ནི་ཇི་ལྟར་བདེ། །གང་གིས་བདེ་བྱེད་མཆོད་པར་འགྱུར། །མཆོད་པ་ཡིས་ནི་ཇི་ལྟར་འགྲུབ། །ཇི་ལྟར་གཟུངས་དང་མཉམ་སྦྱོར་བས། །ཡི་གེ་མཆོག་ནི་འགྲུབ་པར་འགྱུར། །ཇི་ལྟར་འདོད་པའི་ཡོན་ཏན་ལྔ། །བསྙེན་པ་ཡིས་ནི་མྱུར་དུ་འགྲུབ། །ཇི་ལྟར་གསང་བ་མཉམ་སྦྱོར་བས། །རྨད་དུ་བྱུང་བའི་དབང་བསྐུར་འགྱུར། །ཇི་ལྟར་པདྨོ་མཉམ་སྦྱོར་བས། །དཀྱིལ་འཁོར་རབ་ཏུ་ཞུགས་པར་འགྱུར། །ཇི་ལྟར་དྲི་ཆུ་བྱང་ཆུབ་དང་། །ཁྲག་དང་སྣང་མཛད་ཆེན་པོ་ཡིས། །དམ་ཚིག་ཉིད་དུ་ཇི་ལྟར་འགྱུར། །ཇི་ལྟར་བཏུང་བ་རབ་ཏུ་བརྟག །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདག་པོ་ཀུན་དུ་བཟང་པོ་ཆེན་པོས། རྡོ་རྗེ་ཕ་རོལ་ཏུ་ཕྱིན་མའི་གསང་བ་ཆེན་མོ་དེ་དག་ཐམས་ཅད་ལ་རང་གི་བདེ་བས་མཉེས་པར་བྱས་ཏེ། མི་མཉམ་པ་དང་མཉམ་པའི་སྦས་པ་ཆེན་པོ་ཤིན་ཏུ་སྦས་པ། མཆོག་ཏུ་གསང་བའི་དྲིས་ལན་ཆེན་པོ་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་ཕྱུང་ངོ་། །ངན་སོང་གསུམ་གྱི་འཇིགས་བྱེད་དུ། །སེམས་ཅན་ཉོན་མོངས་སྡང་བྱས་པས། །དེ་ཕྱིར་ང་ནི་རྡོ་རྗེ་ཆེ། །ཞེ་སྡང་ཞེས་ནི་བསྒྲགས་པ་ཡིན། །ངན་སོང་འཇིགས་པ་ཆེན་པོ་རུ། །སེམས་ཅན་ཐམས་ཅད་རྨོངས་བྱེད་པས། །དེ་ཕྱིར་འདི་ནི་གཏི་མུག་སྟེ། །རྟག་པ་ཐུབ་པ་མཆོག་ཡིན་ནོ། །ཐབས་དང་ཤེས་རབ་ཚུལ་ཉིད་ཀྱིས། །འགྲོ་བ་ཐམས་

ཅད་དགའ་བྱེད་ཅིང་། །པདྨོའི་ཚུལ་དུ་རབ་རྟོགས་ཕྱིར། །དེ་ཕྱིར་འདོད་ཆགས་ཞེས་བྱའོ། །བདེ་ཆེན་སྦྱིན་པའི་སྤྲིན་གྱིས་ནི། །སེམས་ཅན་ཐམས་ཅད་ང་རྒྱལ་བསྐྱེད། །ནམ་མཁའི་བདེ་བ་བསྡུས་པའི་ཕྱིར། །དེ་ཕྱིར་མཁའ་ཆེན་ང་རྒྱལ་ཡིན། །རོ་ལ་སོགས་པས་མཉམ་སྦྱོར་བས། །ཕྲག་དོག་རྡོ་རྗེ་གདོན་མི་ཟ། །སྣ་ཚོགས་པདྨོ་རབ་འཇུག་ཕྱིར། །དེ་ཡི་ཕྱིར་ནི་སྣ་ཚོགས་ཆེ། །འདོད་ཆགས་བྲལ་བ་དགའ་མེད་ཕྱིར། །བདག་ནི་རབ་དགྱེས་སྦས་པ་ཆེ། །འདོད་པ་མ་གཏོགས་བདེ་བྱེད་མེད། །བདེ་ཆེ་འདོད་པ་ང་ཡིན་ནོ། །འདོད་ཆགས་མེད་པར་བྱང་ཆུབ་མེད། །བྱང་ཆུབ་མེད་ནའང་འདོད་ཆགས་མེད། །སྡིག་པའི་ནང་ན་ཆགས་བྲལ་ཏེ། །སངས་རྒྱས་བདེ་མཆོག་མཉེས་བྱེད་པས། །འདོད་ཆགས་འདོད་ལས་བདེ་བྱེད་ཀྱི། །བདེ་བ་མཆོག་ཏུ་རྨད་འབྱུང་འགྱུར། །བྱང་ཆུབ་སེམས་མེད་བདེ་བྱེད་གཞན། །འཇིག་རྟེན་གསུམ་པོ་འདིར་མེད་དོ། །ཐམས་ཅད་བྱང་ཆུབ་སེམས་ངོ་བོ། །བདེ་བ་ཀུན་གྱིས་ཚིམ་པར་འགྱུར། །བོ་ཞེས་པ་ནི་རྡོ་རྗེར་བཤད། །དྷི་ཞེས་པ་ནི་གཟུངས་མའི་མཆོག །ཅི་ཞེས་པ་ནི་ཟག་པར་བཤད། །ཏ་ཞེས་པ་ནི་བདེ་བ་ཆེ། །མཆོད་པ་མེད་པས་བདེ་བྱེད་མེད། །བདེ་བ་མེད་པས་མགུ་བ་མེད། །མགུ་བས་དངོས་གྲུབ་ཐོབ་པར་འགྱུར། །གྲུབ་ན་བདེ་བྱེད་རྟག་པ་ཡི། །ཕྱག་ན་རྡོ་རྗེ་བདེ་བ་ཆེ། །འདོད་པའི་བདེ་བས་མཆོད་བྱེད་ཅིང་། །ཚེ་འདི་ཉིད་ལ་འཐོབ་པར་འགྱུར། །བདེ་བ་ཀུན་གྱི་གཞིར་གྱུར་པའི། །ཆོས་ཀྱི་དབྱིངས་ནི་རྣམ་པར་འཛིན། །རྡོ་རྗེ་འཛིན་ཕྱིར་གཟུངས་མ་སྟེ། །ཧྲཱི་ཞེས་པ་ནི་པདྨོ་འཛིན། །འདི་དང་མཉམ་པར་སྦྱོར་བ་ཡིན། །ཡི་གེ་མྱུར་དུ་འགྲུབ་པར་འགྱུར། །འདོད་པ་ལྔ་ཡི་ཡོན་ཏན་ཀུན། །རྫོགས་སངས་རྒྱས་ཀྱིསྤྲུལ་པ་སྟེ། །སངས་རྒྱས་རྣམས་དང་རྡོ་རྗེ་འཛིན། །མཁའ་འགྲོ་སྒྱུ་མའི་ལོངས་སྤྱོད་དེ། །དེ་ཕྱིར་འདོད་པའི་ཡོན་ཏན་ལྔ། །དེ་ཡིས་བསྙེནན་གྲུབ་པར་འགྱུར། །སྔགས་ཀྱི་སྐུ་འཛིན་དཔལ་དང་ལྡན། །དབང་ཕྱུག་མཆོག་གིས་སྔགས་རྒྱལ་ལོ། །རྡོ་རྗེ་སེམས་ཀྱི་ཐུགས་ལས་སྐྱེས། །མཚན་ཅན་མཆོག་ཏུ་སྦས་པར་བཤད། །དེ་དང་མཉམ་དུ་སྤྱོད་པ་ཡིས། །མཆོག་གི་དབང་ནི་བསྐུར་བར་འགྱུར། །པདྨོའི་དཀྱིལ་འཁོར་ཞེས་བྱ་བས། །དཀྱིལ་འཁོར་ཐམས་ཅད་སྒྲུབ་པར་བྱེད། །བློ་ལྡན་དེ་རུ་

ཞུགས་གྱུར་ནའོ། །དམ་ཚིག་སྦས་པ་ཚོགས་ཀྱི་རྣམས། །དྲི་ཆུ་བྱང་ཆུབ་དམར་པོ་མཆོག །ཤ་ཆེན་སྦྲང་རྩི་མར་ཉིད་ཀྱིས། །ལུས་ལ་ཀུན་ཏུ་ཁྱབ་གནས་ཏེ། །དེ་ཡི་ཕྱིར་ནི་དམ་ཚིག་ཆེ། །དམ་ཚིག་འདི་ཡིས་དངོས་གྲུབ་སྟེ། །དམ་ཚིག་ཡི་གེར་ལྡན་པ་ཡིས། །སྦྱོར་ཅེས་སྦྱང་དང་བསྐྱེད་བྱས་ན། །བཟའ་བ་དངོས་གྲུབ་ཐོབ་པར་འགྱུར། །དེ་ནས་ཕ་རོལ་ཕྱིན་མ་ཀུན། །པདྨོའི་གཟིགས་པ་རྒྱས་པ་ཡི། །འཛུམ་བཅས་གཡོན་ནས་གར་མཛད་ཅིང་། །རྟག་པ་ལ་ནི་ཡང་གསོལ་པ། །རིགས་དེ་རྣམ་པ་དུ་རུ་བསྟན། །ཇི་ལྟར་སྦས་པ་གསུམ་ཞེས་བགྱི། །སྣ་ཚོགས་ཆེན་པོ་དེ་དག་ཀུན། །བདེ་ལ་གནས་པས་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་མཉམ་པ་ཉིད་ཀྱི་བདེ་བ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཕ་རོལ་ཏུ་ཕྱིན་མའི་དེ་ཁོ་ན་ཉིད་རབ་ཏུ་ཕྱུང་ངོ་། །ང་ཉིད་སྦྱོར་བ་བཅོམ་ལྡན་འདས། །རྡོ་རྗེ་སེམས་དཔའ་དོན་ཆེན་སྦྱིན། །རིགས་ཀྱི་ཁྱད་པར་ལྔ་རྣམས་ཀྱིས། །སྤྱོད་བཅས་མི་སྤྱོད་རྣམས་ལ་རོལ། །རྟག་པ་མི་བསྐྱོད་རིན་ཆེན་མཆོག །འཇིག་དབང་གདོན་མི་ཟ་གྲུབ་རྣམས། །རིགས་ནི་རྣམ་པ་བརྒྱད་བསྟན་ཏེ། །མདོ་རུ་བསྡུས་ན་རྣམ་པ་ལྔ། །ལུས་དང་ངག་དང་ཡིད་རྣམས་ཀྱིས། །ཁྱད་པར་ཐེག་པ་རྣམ་པ་གསུམ། །དེ་ཉིད་གསུམ་པོ་རྡོ་རྗེ་མངའ། །བདེ་བའི་གནས་ལ་རོལ་པ་མཛད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་ཏུ་ངོ་མཚར་དུ་གྱུར་ཏེ། །རང་གི་སྡོམ་པ་གསོལ་བ་འདེབས་སོ། །སྡོམ་པ་དངོས་གྲུབ་ཀུན་སྦྱིན་པ། །བརྟུལ་ཞུགས་དཀའ་ཐུབ་སྔགས་མཁན་གྱི། །དམ་ཚིག་མཆོག་ཏུ་བསྲུང་བ་རྣམས། །བཅོམ་ལྡན་གསང་བ་ཉིད་ཀྱིས་གསུངས། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་མཆོག་ཏུ་ཤིན་ཏུ་དགྱེས་པའི་བདེ་བ་ལ་མངོན་པར་ཆགས་པས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པས་མཁྱེན་ཏེ། ཞལ་རབ་ཏུ་བཞད་པས་རྒྱས་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་འདི་ཕྱུང་ངོ་། །སྐུ་དང་གསུང་དང་ཐུགས་སྦས་པས། །ནན་ཏན་དུ་ནི་བསྲུང་བར་བྱ། །བསྲུངས་པ་ཡིས་

ནི་བསོད་ནམས་ཆེ། །དངོས་གྲུབ་ཤིན་ཏུ་སྐྱེ་བར་འགྱུར། །དེ་ནི་འདི་ཡིས་རྒྱ་ཆེ་བའི། །ཡིད་ཀྱིས་ཁ་དོག་དབྱིབས་ཆེན་གྱི། །ཕྱག་རྒྱ་བཅིངས་ལ་སོགས་པས་བཏབ། །སྦས་པའི་སྐུ་ནི་རབ་བསྒྲུབ་བྱ། །རྡོ་རྗེ་གསུང་དུ་རབ་སྦྱོར་བར། །ཆོས་ཀྱི་ངོ་བོ་ཕྱག་རྒྱས་བརྗོད། །ངག་སྦས་གསང་བར་བརྗོད་པ་ནི། །ང་རོ་སྦས་པ་རྡོ་རྗེའི་གསུང་། །རང་སེམས་རབ་ཏུ་འབིགས་པ་ཡིས། །ཟླ་བ་རྡོ་རྗེ་རྣམ་པར་བསྒོམ། །རང་བཞིན་གསུམ་པོ་གཅིག་ཏུ་བསྒོམ། །འདི་ནི་ཡིད་སྦས་ཆེན་པོ་ཡིན། །འདི་ནི་དེ་ཉིད་རྒྱ་ཆེན་མཆོག །རྒྱུན་དུ་བསྒོམ་པ་རྣམས་བྱས་ཏེ། །གསུམ་བསྒོམས་པས་ནི་འགྲུབ་པར་འགྱུར། །གཞན་མིན་རྡོ་རྗེ་འཛིན་གྱིས་གསུངས། །སྦས་གསུམ་ལ་སོགས་ཆོ་ག་ཡིས། །ཕྱག་རྒྱ་ཐམས་ཅད་རྒྱས་བཏབ་སྟེ། །དེ་བས་ནན་ཏན་ཐམས་ཅད་ཀྱིས། །སྦས་གསུམ་རྣམ་པར་སྦ་བར་བྱ། །རྡོ་རྗེ་མཆོག་འཛིན་ཆེན་པོ་དང་། །གཙོ་བོ་ཆེན་པོས་བྱིན་གྱིས་རློབ། །བླུན་པོ་གང་གིས་འདས་བྱས་ན། །རྡོ་རྗེ་འཛིན་པའང་སྐད་ཅིག་འཇིག །སེམས་དཔའ་ཆེ་དང་བྲལ་གྱུར་ན། །ངན་སོང་གསུམ་དུ་ཡང་དང་ཡང་། །ཇི་ཙམ་ནམ་མཁའི་དཀྱིལ་འཁོར་བ། །ཤིན་ཏུ་མི་བཟད་སྨིན་པར་འགྱུར། །དེ་ནས་དམ་ཚིག་དེ་དག་ཀུན། །རྡོ་རྗེ་འཛིན་ལ་མགུ་གྱུར་ཏེ། །འཇམ་པོའི་ཕྱག་གིས་གར་མཛད་ཅིང་། །གཡོན་གྱིས་ཕྱག་བྱས་སླར་གསོལ་པ། །གར་དབང་རྣམ་གནོན་གནོན་པར་གར་མཛད་ཅིང་། །མཐའ་ཡས་ཕྱག་ནི་བཅུ་པའི་བསྒྱིངས་པ་ཡིས། །པདྨོའི་ལོ་མ་འཇམ་པོ་བརྒྱད་ཕྱེ་ནས། །གཉིས་མིན་བདེ་བར་རྡོ་རྗེ་འཇོག་མཛད་དེ། །སྦས་པ་དེ་ཉིད་མི་མཉམ་སད་པར་འགྱུར། །རྡོ་རྗེ་འདམ་སྐྱེས་ཟླ་བ་ཡང་དག་འདུ། །ཐབས་དང་ཤེས་རབ་དགྱེས་པ་བདེ་བྱེད་སོགས། །བདེ་གཤེགས་རྣམས་ཀྱི་སྦས་པ་ཉིད་ཀྱིས་ཤོད། །སྦྱོར་དང་སྦྱོར་མིན་ཡང་དག་སྦྱོར། །ཞི་བའི་ཐལ་མོ་མཆོག་ཏུ་བདེ། །འདོད་པ་ལྔ་ཡི་ཡོན་ཏན་འགྲུབ། །སངས་རྒྱས་བྱང་ཆུབ་རབ་བསྒྲུབས་པའོ། །དེ་ནས་བཅོམ་ལྡན་དམ་ཚིག་རྒྱལ། །རྡོ་རྗེ་སེམས་དཔའ་བདེ་བ་ཆེ། །དེ་ཉིད་སྦས་པ་བསྐུལ་བ་ཡིས། །སྦས་པ་མ་ལུས་འཆད་པར་མཛོད། །རྡོ་རྗེ་པདྨོ་མཉམ་སྦྱོར་བས། །ཆོ་གར་ལྡན་པས་གང་དབང་བསྐུར། །བདེ་བར་འདོད་པའི་སློབ་དཔོན་གྱིས། །དེ་ཉིད་འདི་ནི་དེ་ལ་བསྟན། །འདི་ལ་ཁྲུས་

མེད་ཉེས་པ་མེད། །དཀའ་ཐུབ་མེད་དེ་དཀའ་བའང་མེད། །སངས་རྒྱས་ཐམས་ཅད་མཉམ་སྦྱོར་བ། །ང་ཉིད་སྦྱོར་བས་འགྲུབ་པར་འགྱུར། །ལུས་དང་ངག་སེམས་རྡོ་རྗེ་ཡི། །རྡོ་རྗེ་སེམས་དཔའ་ཉིད་དུ་འགྱུར། །རྡོ་རྗེ་དབབ་པ་སྐྱེས་གྱུར་ན། །ཇི་ཙམ་འདོད་པ་ནམ་མཁར་འཕུར། །སྙིང་གར་རྡོ་རྗེ་ཁུ་ཚུར་བཅིངས། །རྡོ་རྗེ་ལྟ་བས་རྣམ་བལྟས་ཏེ། །དགྱེས་པའི་ཚུལ་གྱིས་བསྙེན་བྱས་ན། །རྡོ་རྗེ་སེམས་དཔའ་སྐད་ཅིག་འགྱུར། །རྣམ་སྒེག་དགྱེས་པའི་རྣམ་གནོན་པས། །རབ་དགྱེས་སར་ནི་འགྲོ་བྱེད་དེ། །སངས་རྒྱས་བདེ་བ་ཆེན་པོ་དང་། །གྲུབ་པ་ཡིས་ཀྱང་མཆོད་བྱེད་ཅིང་། །རྡོ་རྗེ་སེམས་དཔའི་རྒྱ་ཆེ་མཆོག །འགྱིང་བའི་ལངས་པས་གར་བྱེད་པས། །བདེ་བྱེད་ཟླ་བའི་འོད་འདྲ་ཞིང་། །ལས་ཀྱི་ཁྱད་པར་ལས་སོགས་གནོན། །སྦས་པའི་གར་གྱིས་གར་བྱས་པས། །སྦས་པ་སྦྱོར་བའི་བདག་ཉིད་འགྲུབ། །སྣ་ཚོགས་དཀྱིལ་འཁོར་གར་བྱེད་ཅིང་། །ལག་པ་མང་པོ་རྣམ་བསྒྱུར་དང་། །ཕྱིར་བརྐྱང་དབྱིངས་སུ་ལྡན་པ་དང་། །ཁྲོ་བར་དྲི་མེད་ལྟ་བ་ཡིས། །གདུལ་དཀའ་གནོན་པ་འཇིགས་བྱེད་པའི། །འཇིག་རྟེན་གསུམ་པོ་རྣམ་རྒྱལ་འགྱུར། །མེ་འབར་ཉི་མའི་དབུས་ཉིད་དུ། །ཁྲོ་བོ་ཧཱུྃ་མཛད་བསྒོམ་བྱས་ན། །མྱུར་དུ་འཇིག་རྟེན་དོན་བསྒྲུབ་ཕྱིར། །འཇིག་རྟེན་གསུམ་པོ་རྣམ་རྒྱལ་འགྱུར། །ལྷ་མོ་བཞི་དང་མཉམ་སྦྱོར་བས། །སུ་ར་ཏ་སྟྭྃ་ཞེས་སྨྲ་ཞིང་། །ཧ་ར་ཐིག་ལེ་ཚུལ་སྦྱར་ན། །རབ་དགྱེས་དེ་མ་ཐག་ཏུ་འགྱུར། །རབ་དགྱེས་མཆོག་ཏུ་བརྟག་པ་ཡིས། །ས་ཆེན་རྣལ་འབྱོར་འགྲོ་འགྱུར་ཏེ། །ལྷ་མོ་བཞི་དང་འགྲོགས་པ་ཡིས། །སེམས་ཅན་རྣམས་ཀྱི་དོན་ཀུན་བྱེད། །དེ་ནས་དེ་བཞིན་གཤེགས་པ་དེ་དག་ཐམས་ཅད་བདེ་བ་ཆེན་པོ་ལ་ཕྱག་བཞེས་ནས་གསོལ་པ། ཐལ་མོ་ཡང་དག་སྦྱར་བྱས་ཏེ། །ཕྱག་རྒྱ་དེ་ཉིད་ཉིད་ཀྱིས་ཤོད། །རྡོ་རྗེ་མཆོག་ལ་གསོལ་བ་འདེབས། །བདེ་བའི་བདག་ཉིད་མཆོད་པ་ཤོད། །གཟུགས་དང་སྒྲ་དང་དྲི་ཆེ་དང་། །རོ་དང་རེག་པ་ཡིད་འོང་བ། །ཐུགས་རྗེ་ཆེན་པོས་བསྒྲུབས་པ་ཡིས། །དཔའ་བོ་ཆེན་པོ་ཉིད་ཀྱིས་ཤོད། །དེ་ནས་བཅོམ་ལྡན་བདེ་བྱེད་ཆེ། །རྡོ་རྗེ་སེམས་དཔའ་བདག་པོ་ཆེ། །ཕྱག་རྒྱ་བཅིངས་པ་བདེ་བ་ཆེ། །དེ་ཉིད་མཆོག་ནི་བཤད་

པར་མཛད། །དང་པོ་ཆོས་ཀྱི་ཕྱག་རྒྱ་སྟེ། །གཉིས་པ་དམ་ཚིག་ཕྱག་རྒྱ་ཡིན། །གསུམ་པ་ཕྱག་རྒྱ་ཆེན་པོ་སྟེ། །བཞི་པ་ལས་ཀྱི་ཕྱག་རྒྱར་བཤད། །དེ་ནས་སྐུ་གསུང་ཐུགས་རྡོ་རྗེ། །ཇི་ལྟར་འགྱིང་བཞིན་བསྒོམ་བྱ་བ། །སྣ་ཚོགས་ཡེ་ཤེས་རྗེས་སུ་དག །སྣ་ཚོགས་ཆེན་པོས་འཆད་པར་མཛད། །རྟག་པའི་སྐུ་ནི་སེར་པོ་སྟེ། །མི་བསྐྱོད་རྡོ་རྗེ་དཀར་པོ་ཡིན། །ནམ་མཁའི་སྙིང་པོ་མཐིང་ག་ཆེ། །ཚེ་དཔག་མེད་པ་པདྨོ་དམར། །སྣ་ཚོགས་ཁ་དོག་རྒྱ་ཆེ་མཆོག །འོད་ཟེར་ཕྲེང་བ་རྨད་བྱུང་བའི། །གདོན་མི་ཟ་བ་རྡོ་རྗེ་ཆེ། །དོན་ཆེན་བྱེད་པ་བསམ་པར་བྱ། །རང་རང་རིགས་ཀྱི་གནས་ཉིད་དུ། །མྱུར་དུ་ནམ་མཁའ་འགྲོ་བྱེད་ཅིང་། །རིགས་ཀྱི་ལྷ་མོ་བཞི་རྣམས་ཀྱིས། །རོལ་པ་དང་ནི་མཆོད་པར་བྱེད། །སྣ་ཚོགས་སྦྱོར་བ་བདེ་ཆེ་བའི། །ལྷ་མོ་བཞི་དང་མཉམ་སྦྱོར་བ། །རྡོ་རྗེ་སྦྱོར་བ་དག་བསྒོམ་བྱས་ན། །རྡོ་རྗེ་སེམས་དཔའ་བདག་ཉིད་འགྱུར། །རྡོ་རྗེ་སེམས་སོགས་སེམས་དཔའ་མཆོག །རྡོ་རྗེ་ལ་སོགས་གདན་ཞུགས་པར། །རང་གི་འཁོར་ལོ་མཆོག་གིས་བརྒྱན། །རང་གི་ཕྱག་རྒྱར་གནས་པར་བསམ། །པདྨོའི་གདན་གྱི་ཚུལ་གྱིས་ནི། །བརྩེ་དང་ལྡན་པའི་བསྒོམ་བྱས་ཏེ། །སྙིང་པོ་སྦས་དོན་གར་བྱས་པས། །སྦས་པ་ཆེ་ལ་བདེ་བྱེད་ན། །འགྱིང་བའི་བདེ་བར་ལྡན་པ་ཡི། །རྡོ་རྗེ་ཆེན་པོ་དེ་འགྲུབ་སྟེ། །སྣ་ཚོགས་དཀྱིལ་འཁོར་རབ་ཉེ་བར། །སྣ་ཚོགས་ཆེན་པོ་འགྲོ་བར་འགྱུར། །བདེ་བ་ཆེན་པོ་ཐམས་ཅད་འགྲུབ་པའི་སྦྱོར་བ་ཆེན་པོའི་བདེ་བ་ཞེས་བྱ་བའི་ཕྱག་རྒྱ་རབ་ཏུ་རྒྱས་པའོ།། །།དེ་ནས་ཕྱག་རྒྱ་བཅིང་བཤད་དེ། །རྟག་ལ་སོགས་པའི་དེ་ཁོ་ན། །གང་གིས་མྱུར་དུ་བཅིངས་པ་ཡིས། །སངས་རྒྱས་དངོས་གྲུབ་བདེ་ཆེར་འགྲོ། །ཐབས་ནི་གཡས་ཀྱི་ལོགས་སུ་བྱ། །དེ་བཞིན་ཤེས་རབ་གཡོན་པར་ཏེ། །ཞི་བའི་ཐལ་མོ་གསུམ་ཉིད་ཀྱིས། །སྦྱོར་བའི་ཚུལ་གྱིས་བསྡུ་བར་བྱ། །སོར་མོ་ཐམས་ཅད་བར་བར་དུ། །མཉམ་དུ་སྦྱོར་བས་ཁྱད་པར་སྦྱིན། །རྡོ་རྗེ་ཡི་ནི་ཐལ་མོ་འདིས། །སངས་རྒྱས་ཐམས་ཅད་ཉིད་དུ་བསྒྲུབ། །འདི་ནི་བཅིངས་པ་ཙམ་གྱིས་ཀྱང་། །ནམ་མཁའི་སྙིང་པོའི་གནས་སུ་འགྲོ། །འདི་ཉིད་ཤིན་ཏུ་བཅིངས་པ་ཡིས། །གསུམ་དུ་སྦྱོར་བས་མཆོད་

པར་བྱ། །དེ་ཉིད་ལས་ནི་སོར་མོ་ཀུན། །ཀུན་དུ་བསྐུམས་ཏེ་བཅིང་བར་བྱ། །རྡོ་རྗེའི་བཅིང་བ་བསྡུས་པས་ནི། །བཅིང་བར་ལྡན་པར་རྣམ་བསྒྱུར་ཏེ། །དེ་ཉིད་སྦོམ་པོ་རབ་བཅུག་ནས། །ཁྲོ་མོའི་རྩེ་མོ་རབ་ཏུ་དགུག །འདི་ནི་རྡོ་རྗེ་རིགས་ཀྱི་བཅིང་། །རྡོ་རྗེ་སེམས་དཔའ་ཉིད་འགྲུབ་བྱེད། །དེ་བཞིན་བཅིངས་པ་རྣམ་བཞག་སྟེ། །སྦོམ་པོ་ཁྲོ་མོའི་རྩེ་མོ་སྦྱར། །འདི་ནི་བཅིང་བ་བཅིང་བ་ཆེ། །ནམ་མཁར་འགྲོ་བ་ཉེ་བར་སྒྲུབ། །དེ་ཉིད་བཅིང་བ་བཅིང་བྱས་ཏེ། །ཁྲོ་མོ་གཉིས་པོ་མཚན་བཞིན་དུ། །རྩེ་མོ་སྤྲད་དེ་དགུག་བྱ་བ། །བཅིང་བ་འདི་ཡིས་པདྨོ་སྒྲུབ། །བཅིང་བ་དེ་ཉིད་རབ་ཏུ་སྦོམ། །བདེ་བར་བཅུག་ནས་བསྡམ་བྱས་ཏེ། །ལས་ཀྱི་བཅིང་བ་སྦྱོར་བ་ཡིས། །དོན་ཡོད་མཆོག་གི་རིགས་སུ་འགྲོ། །བཅིང་བ་དེ་ཉིད་བཅིང་བྱས་ཏེ། །སྦོམ་དང་ཁྲོ་མོའི་རྩེ་མོ་སྦྱར། །གཡས་པའི་སྦོམ་པོ་རྡོ་རྗེ་ཡིས། །དེ་ཡི་དབུས་སུ་བཅུག་བྱ་བ། །དེ་འདི་བཅིང་བ་ཆེན་པོ་སྟེ། །རབ་དགྱེས་རོ་ནི་སྒྲུབ་བྱེད་པ། །གང་གིས་བཅིངས་པ་ཙམ་གྱིས་ནི། །རབ་ཏུ་དགྱེས་པ་ཉིད་ཐོབ་བོ། །དངོས་གྲུབ་ཐམས་ཅད་བདེ་བ་ཆེ། །དེ་ཡིས་འདི་ཚེ་འཐོབ་གྱུར་ཏེ། །ཕྱག་རྒྱ་བཅིང་བའི་ཆོ་ག་ཡིས། །སངས་རྒྱས་ཐམས་ཅད་རབ་ཏུ་གནས། །ཕྱག་རྒྱ་བཅིང་བའི་ཡེ་ཤེས་རྣམ་པར་རྒྱས་པའོ།། །།བཅིང་བ་ལྔ་ཡི་ཆོ་ག་ཡིས། །གཅིག་གིས་རྣལ་འབྱོར་བསྒྲུབ་མི་བྱ། །དྲུག་ནི་སྦྱོར་བས་སྦྱོར་བྱས་ན། །དེ་མ་ཐག་ཏུ་རབ་དགྱེས་འགྱུར། །བཅིང་བ་ལྔ་ཡི་ཕྱག་རྒྱའོ། །དེ་བཞིན་བཅིང་བ་གཉིས་བྱས་ཏེ། །གཡོན་གྱི་སྙིང་གར་བཅིང་བར་བྱ། །གཡས་ཀྱི་རྩེ་མོ་བསྒྲེང་བྱས་ཏེ། །རྡོ་རྗེའི་ཚུལ་གྱིས་གཟུང་བར་བྱ། །ཕྱག་རྒྱ་འདི་ནི་བྱང་ཆུབ་བདེ། །སངས་རྒྱས་ཐམས་ཅད་གཅིག་ཏུ་བསྒྲུབ། །གདོན་མི་ཟ་བར་ཚེ་འདི་ལ། །རྟག་པ་འདྲ་བ་ཐོབ་པར་བྱེད། །གཡོན་པ་དེ་ཉིད་སྙིང་གར་གཞག །གཡས་པ་ས་ལ་རེག་བྱས་པས། །ས་ལ་བདེ་བ་རོལ་པ་ཡིས། །འདི་ཡིས་མི་ཟད་ཐོབ་པར་འགྱུར། །དེ་བཞིན་སྙིང་གར་གཡོན་པ་གཞག །ལག་པ་གཡས་པ་རབ་སྦྱིན་བྱ། །འདི་ཡིས་རིན་ཆེན་སྐལ་ལྡན་སོགས། །ནམ་མཁའ་ཉེ་བར་འགྲུབ་པར་འགྱུར། །དེ་བཞིན་གཡོན་པ་སྙིང་གར་གཞག །གཡས་ཀྱང་གཞག་སྟེ་ཏིང་

འཛིན་གནས། །འདི་ཡིས་ཚེ་དཔག་མེད་པ་ཉིད། །ཚེ་འདི་ཉིད་ལ་ཐོབ་པར་འགྱུར། །དེ་བཞིན་གཡོན་པ་སྙིང་གར་སྦྱར། །ལག་པ་གཡས་པ་མི་འཇིགས་སྦྱིན། །འཇིགས་པ་མ་ལུས་རབ་སྒྲོལ་བ། །སྡིག་པ་གདུག་པ་འཇིགས་པ་ཆེ། །འདི་ཡིས་ཐམས་ཅད་འཕྲོག་པར་བྱེད། །གདོན་མི་ཟ་བའི་ངེས་པ་ཡི། །དེ་ནི་ཆེན་པོའི་ཆེན་པོར་འགྱུར། །དེ་ཉིད་བཅིང་བ་གཉིས་བྱས་ཏེ། །གཡོན་པ་གཡོན་དུ་སྦྱར་བར་བྱ། །གཡས་ནི་སྙིང་གར་གཟུང་བྱས་ཏེ། །བརྗིད་པས་རབ་ཏུ་བཞད་ཅིང་གནས། །བདེ་བ་ཆེན་པོ་ཐབས་གནས་པས། །འདི་ཡིས་རབ་དགྱེས་ཉིད་འགྱུར་ཏེ། །བདེ་མཆོག་ཉིད་དུ་སྒྲུབ་པ་པོ། །ཚེ་འདི་ཉིད་ལ་ཐེ་ཙོམ་མེད། །དེ་བཞིན་བཅིང་བ་བཅིང་བྱས་ཏེ། །སྦྱོར་དང་ལྡན་པས་བརྟན་པར་བྱ། །སྦོམ་པོའི་རྩེ་མོ་པདྨོའི་གནས། །གཡོན་གྱི་ཁྲོ་མོའི་རྩེ་མོར་སྦྱར། །གཡས་པ་ཡི་ནི་སྦོམ་པོ་ཡིས། །མངོན་སུམ་རྡོ་རྗེར་བྱས་པ་ཡིས། །བཅུག་ནས་བདེ་བ་སྤྱོད་བྱ་ཞིང་། །སྐད་ཅིག་སྐད་ཅིག་བསྡམ་པར་བྱ། །དེ་འདི་སངས་རྒྱས་ཐམས་ཅད་ཀྱི། །དགྱེས་པ་དགྱེས་མཆོག་སྒྲུབ་པ་པོ། །འདི་ནི་བཅིངས་པ་ཙམ་གྱིས་ཀྱང་། །ཡང་དག་རྡོ་རྗེ་དགྱེས་པ་འཐོབ། །རབ་དགྱེས་བདེ་མཆོག་ལོངས་སྤྱོད་ཀྱི། །བཙུན་མོ་དངོས་གྲུབ་ཉིད་དུ་འགྱུར། །གཡས་ནི་མཚན་མས་བགྲང་བྱས་ཏེ། །ལྕགས་ཀྱུའི་ཚུལ་དུ་གཞག་པར་བྱ། །རྡོ་རྗེ་འདོད་མ་ལྕགས་ཀྱུ་སྟེ། །རྡོ་རྗེ་འདོད་བྱེད་བཙུན་མོ་ཡི། །དང་པོར་འདྲེན་པ་དེ་ཉིད་བཞག །ཐ་མར་ཧ་ར་ཐིག་ལེར་བྱ། །རྡོ་རྗེ་དགྱེས་པ་བདེ་འཐོབ་བྱེད། །མིང་ནི་དབུས་སུ་བྲི་བར་བྱ། །འདི་ཡིས་སྙིང་གར་བྱས་པ་ཡིས། །དེ་བཞིན་གཤེགས་པ་བདེ་མཆོག་འགྲོ། །ཕྱག་རྒྱ་བཞི་དང་འགྲོགས་པ་ཡིས། །ལུས་འདིས་ཚེ་འདི་འགྲུབ་པར་འགྱུར། །རབ་དགྱེས་སྦྱོར་བར་ཡང་དག་ལྡན། །ཕྱག་རྒྱ་བཞི་དང་མཉམ་འགྲོགས་ཤིང་། །རྡོ་རྗེ་འགྱིང་ལ་སོགས་སྤྲོད་པས། །རྣལ་འབྱོར་འདི་ནི་བཅིངས་པ་ཡིས། །རབ་དགྱེས་ལ་སོགས་མ་ལུས་པ། །རབ་དགྱེས་རོ་ལ་བསྒྱིངས་མ་ཡིས། །སྐད་ཅིག་ཉིད་དུ་འདྲེན་པར་འགྱུར། །དེ་བཞིན་སྦོམ་མོའི་རྩེ་མོར་སྦྱར། །སྙིང་རྗེ་ཆེན་པོ་དེར་གཞག་པ། །སྐལ་བ་ཆེན་པོ་རྡོ་རྗེ་སྤྱན། །དེ་ཉིད་དོན་ཀུན་སྟོན་བྱེད་མ། །འདི་ནི་ཡང་དག་བཅིངས་པ་ཡིས། །རྡོ་རྗེ་རྟག་པའི་སྤྱན་དུ་འགྱུར། །ཡོད་དང་མེད་པ་རྣམ་སྤངས་པ། །དངོས་པོ་ཐམས་

ཅད་མཐོང་བར་འགྱུར། །རྡོ་རྗེའི་ཐལ་མོ་བརྟན་བྱ་སྟེ། །ཁྲོ་མོ་རྩེ་མོ་ཟླུམ་པོ་ཡི། །མཐོན་པོར་མཚན་དང་འདྲ་བྱས་ཏེ། །སྦོམ་པོར་རྡོ་རྗེ་བརྟན་པ་ཆེ། །དེ་འདི་བཅོམ་ལྡན་འདས་མ་མཆོག །རྡོ་རྗེ་པདྨོའི་བདེ་འཐོབ་བྱེད། །རྣལ་འབྱོར་འདི་ནི་བཅིངས་པ་ཡིས། །སྦས་པ་ཆེན་པོའི་དགྱེས་པ་འཐོབ། །དེ་ནས་ལྷ་མོ་ཆེན་མོ་དག །སྤྲོ་བ་ཆེ་བས་གར་མཛད་ཅིང་། །རྡོ་རྗེ་བདེ་བྱེད་བདག་ཉིད་ལ། །བདུད་དང་བཅས་པས་ཕྱག་བྱས་ཏེ། །ཆོས་ཀྱི་ཡི་གེ་ཐབས་གནས་ནས། །དེ་ཉིད་ཆོས་ཀྱི་གསོལ་བ་འདེབས། །ཆོས་ཀྱི་ཕྱག་རྒྱ་བདེ་བ་ཆེ། །རྡོ་རྗེ་བཅོམ་ལྡན་བཤད་དུ་གསོལ། །སྒྲུབ་པ་པོས་ནི་རབ་བསྒྲིམས་ན། །གང་གིས་ལྷ་ནི་འགྲུབ་པར་འགྱུར། །གང་གིས་མྱུར་དུ་བྱིན་བརླབས་པས། །སངས་རྒྱས་བྱང་ཆུབ་རབ་བསྒྲུབ་སྟེ། །བདེ་བྱེད་གཉིས་ཀྱིས་སྤྲོ་ཆེ་བ། །དེ་བཞིན་གཤེགས་པས་གནས་འཇུག་འགྱུར། །དེ་ནས་བཅོམ་ལྡན་འདས་ཀྱིས་ལྷ་མོ་ཐམས་ཅད་ཀྱིས་གསོལ་བ་བཏབ་པ་མཁྱེན་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་སྦས་པ་ལས་ཆོས་ཀྱི་ཕྱག་རྒྱ་ཆེན་པོའི་ཚིག་འདི་ཕྱུང་ངོ་། །བཅུ་གསུམ་བདག་ཉིད་འདྲེན་པ་སྟེ། །ཐིག་ལེ་ལྷར་ནི་ཡང་དག་ལྡན། །ཐ་མར་ཧ་ར་ཐིག་ལེར་གནས། །རབ་ཏུ་དགྱེས་པ་རྡོ་རྗེ་དགྱེས། །སྙིང་གར་ཕྱག་རྒྱ་འདི་བྱས་ནས། །དགའ་བྱེད་ལྷན་ཅིག་རྩེན་བྱེད་ཅིང་། །སྤྱོད་དང་མི་སྤྱོད་འགྲུབ་འགྱུར་ཏེ། །རྣལ་འབྱོར་བདེ་བ་ཆེན་པོར་འགྲོ། །དེ་བཞིན་འདྲེན་པ་ཐོག་མར་བྱ། །རྡོ་རྗེ་འདོད་པ་ཀྱོ་བ་མཆོག །ཧ་ར་ཐིག་ལེ་ཡང་དག་ལྡན། །ཆ་གཉིས་གསུམ་པ་སྦྱར་བྱས་པ། །འདི་ནི་སྙིང་གར་བཞག་བྱས་ན། །བདེ་བར་ནམ་མཁའ་འགྲོ་འགྱུར་ཏེ། །བདེ་བ་ཤིན་ཏུ་རྟག་པ་ཡི། །འདི་ཡིས་མཆོག་ཏུ་དངོས་གྲུབ་བོ། །འདྲེན་པ་དེ་ཉིད་ཐོག་མར་གཞག །ལྟོས་ལྟོས་ཞེས་པ་ཧཱུྃ་དང་ལྡན། །སྐལ་བ་ཆེན་པོ་རྡོ་རྗེ་སྤྱན། །དབུས་སུ་བསྐུལ་བས་འགྲུབ་པར་འགྱུར། །འཕྲུལ་གྱི་སྤྱན་ལྔ་ནོར་ཆེ་བ། །འདི་ཡིས་རྣལ་འབྱོར་འགྲུབ་འགྱུར་ཏེ། །རྡོ་རྗེ་བྱང་ཆུབ་དགྱེས་པ་ཆེ། །སངས་རྒྱས་ཐམས་ཅད་མཐོང་བར་འགྱུར། །དང་པོར་འདྲེན་པ་དེ་ཉིད་གཞག །ཐ་མར་ཧ་ར་ཐིག་ལེར་བྱ། །རྡོ་རྗེ་དགྱེས་པ་བདེ་འཐོབ་བྱེད། །མིང་ནི་དབུས་སུ་བྲི་བར་བྱ། །འདི་ཡིས་སྙིང་གར་བྱས་པ་ཡིས། །དེ་བཞིན་གཤེགས་པ་བདེ་མཆོག་འགྲོ། །ཕྱག་རྒྱ་བཞི་དང་འགྲོགས་པ་ཡིས། །ལུས་འདིས་འདི་ཚེ་འགྲུབ་པར་འགྱུར། །རབ་དགྱེས་སྦྱོར་བར་ཡང་དག་ཞོན། །ཕྱག་རྒྱ་བཞི་དང་མཉམ་

འགྲོགས་ཤིང་། །རྡོ་རྗེ་འགྱིང་ལ་སོགས་སྤྲོད་པས། །བཅོམ་ལྡན་འདོད་མ་འགྲུབ་པར་འགྱུར། །ཆོས་ཀྱི་དེ་ཁོ་ན་ཉིད་ཀྱི་དོན་གྱི་ཡེ་ཤེས་ཀྱི་ཕྱག་རྒྱའོ།། །།དེ་ནས་བཅོམ་ལྡན་སྦྱོར་བ་ཆེ། །ཐོག་མ་ཐ་མ་མེད་པ་མཆོག །གདུག་པ་ཐམས་ཅད་གདུལ་བའི་ཕྱིར། །རྡོ་རྗེ་ཁྲོ་བོར་དེ་འགྱུར་རོ། །མདུན་དུ་ཐོག་མའི་ལྷ་ཉིད་དུ། །རྡོ་རྗེ་ཧཱུྃ་མཛད་ཉི་མ་འབར། །ཉི་མ་བཅུ་གཉིས་གཟི་བརྗིད་ཆེ། །མེ་འབར་རབ་ཏུ་འབར་བར་ལྡན། །འཁོར་གྱི་འཁོར་ལོ་དེ་དག་ཀུན། །དུར་ཁྲོད་ཀྱི་ནི་རྒྱན་མཆོག་གིས། །བརྒྱན་ཏེ་གདུག་པའི་ཚོགས་རྣམས་ལ། །དེ་ནི་ཡང་དག་རོལ་པ་མཛད། །ཁྲོ་ཆེན་མཆོག་འདུལ་ཕྱག་རྒྱ་འདི། །སྔགས་ནི་རང་གི་སྙིང་གར་བསྒོམ། །ཁྲོ་མོའི་བུ་མོའི་མདུན་དུ་བསྐོར། །ཁྲོ་མོ་ཆེན་མོ་དེ་འགྲུབ་བོ། །འདི་ཡིས་གདུག་པ་ཐམས་ཅད་རྣམས། །ཧཱུྃ་བྱས་མྱུར་དུ་བརྒྱབ་པར་འགྱུར། །དེ་དག་གདུག་པ་གདུག་པ་ཆེ། །འཇིགས་ཤིང་འཁྲུགས་ཏེ་རབ་ཏུ་འཇིག །སྐྱོབས་ཤིག་སྐྱོབས་ཤིག་ཅེས་སྨྲ་ཞིང་། །རྡོ་རྗེ་གཙོ་ལ་དྲན་པར་བྱེད། །ཕྱག་རྒྱ་འདི་ནི་མཉམ་པར་གཞག །འགྲོ་བ་ཐམས་ཅད་དབབ་བྱ་སྟེ། །ལས་མཆོག་ཐམས་ཅད་སྒྲུབ་པ་པོས། །དགྲ་ཡི་རྣམས་ནི་གཞིག་པར་བྱ། །སྦྱོར་དང་ལྡན་པས་འབུམ་བཟླས་ཏེ། །ལས་རྣམས་ཐམས་ཅད་བྱེད་པ་ན། །གདོན་མི་ཟ་བར་ཀུན་འགྱུར་ཏེ། །རྡོ་རྗེ་སེམས་དཔའ་འང་བསྒྲུབ་པར་ནུས། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །ཁྲོ་བོའི་ཕྱག་རྒྱའི་ཡེ་ཤེས་སོ། །དེ་ནས་སངས་རྒྱས་ཆེ་དེ་དག །སངས་རྒྱས་ཉིད་སྐྱེས་ཐམས་ཅད་མཆོག །གཟུངས་མ་རྣལ་འབྱོར་མ་ཐམས་ཅད། །རང་གི་འཁོར་གྱི་འཁོར་ལོའི་ཚོགས། །ཕན་ཚུན་བདེ་བ་ལྡན་པ་ཡི། །དགའ་བས་འཁོར་རྣམས་འཕགས་འགྱུར་ཏེ། །རང་གི་བདེ་བྱེད་སྐྱེས་པར་འབྲེལ། །སྐལ་བ་ཆེན་མོ་རྩེན་པར་བྱེད། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོས་རང་གི་འཁོར་གྱི་འཁོར་ལོའི་ཚོགས་རྣམས་ལ་ཡང་དང་ཡང་དུ་གཟིགས་ཏེ་དེ་བཞིན་གཤེགས་པ་ཐམས་ཅད་ཀྱི་འདྲེན་པའི་རིག་མའི་སྙིང་པོ་འདིས་སྡུད་པ་མཛད་དོ། །ཨོཾ་བཛྲ་ཨྃ་ཀུ་ཤ་དུ་རུ་དུ་རུ། ཨེ་ཧྱེ་ཧི་ཀཌྜྷྱ་བི་ཀཌྜྷྱྱ། སརྦཱན་བརྵ་ཏ་ཙ་ཀྲ་སཉྩ་ཡ། བཛྲ་ཨྃ་ཀུ་ཤ་ཧཱུྃ་ཕཊ། འདི་ཡིས་ཕྱག་རྒྱ་རྡོ་རྗེ་ཡི། །བཅིང་བ་གཉིས་ནི་དམ་བྱས་ཏེ། །རྡོ་རྗེ་ཁྲོ་མོ་དགྲོལ་བར་བྱ། །རྡོ་རྗེ་ཁྲོ་བ་རབ་སྦྱར་བ། །རྡོ་རྗེ་ཀྱོ་བ་ཞེས་བྱའོ། །འགྲོ་དང་རི་བོ་སེམས་ཅན་རྣམས། །ཕྱག་རྒྱ་འདི་ཡིས་ཀུན་བཀུག་སྟེ། །འདོད་པས་འགྱིང་བའི་ཡིད་རྟག་རྣམས། །མི་ཡི་བུ་མོ་སྨོས་ཅི་དགོས། །

རྡོ་རྗེ་བཅིངས་པ་མཉམ་གཞག་སྟེ། །གཡོན་གྱི་སྟེང་དུ་དེ་བཞིན་གཞག །དབུས་སུ་སྦོམ་མོ་གཞག་པར་བྱ། །རྡོ་རྗེ་འདྲེན་པ་གཟི་བརྗིད་ཆེ། །རྡོ་རྗེ་བཅིང་བ་བསྡམ་བྱས་ཏེ། །རྡོ་རྗེ་སྦོམ་མོ་རྩེ་མོ་སྤྲད། །བདག་ནི་རྡོ་རྗེ་ཞེས་བསྒོམ་ཞིང་། །བཅིང་བ་དེ་ནི་དགྲོལ་བར་བྱ། །དེ་ཉིད་བཅིང་བ་དམ་བྱས་ཏེ། །དབང་དང་ཆུང་ངུའི་རྩ་བའི་མཚམས། །རྡོ་རྗེ་སྦོམ་པོ་ནུས་བྱས་ཏེ། །རབ་དགྱེས་བདག་ཉིད་བསྐྱོད་པར་བྱ། །དེ་ལས་རྡོ་རྗེ་མཆོག་གཉིས་བསྐྱེད། །མདུད་པའི་ཚུལ་དུ་སྦྱར་བར་བྱ། །གཞུག་པ་དང་ནི་འདྲེན་པའི་མཆོག །འདི་ཡིས་ཐམས་ཅད་དངོས་གྲུབ་པས། །རྣལ་འབྱོར་ཕྱག་རྒྱ་འདི་ཉིད་ཀྱིས། །དྲངས་ཏེ་བཅུག་ནས་བཅིང་བྱས་ཏེ། །དབང་དུ་བྱས་ནས་བསྒྲུབ་པར་བྱ། །དེ་ནས་དེ་དག་ཐམས་ཅད་དྲངས་བཅུག་བཅིངས་དགའ་བར་བསྐྱེད་ནས། རང་གི་རབ་ཏུ་དགྱེས་པའི་བདེ་བ་ཆེན་པོས་རང་གི་རྒྱལ་སྲིད་རྗེས་སུ་སྐྱོང་ཞིང་རྡོ་རྗེ་ཆོས་ལ་བཀའ་སྩལ་པ། སངས་རྒྱས་ཀུན་གྱི་ཚུལ་ཆེན་པོ། །དགའ་བྱེད་ཟླ་གསང་ཐིག་ལེ་ཡི། །རབ་དགྱེས་བདག་ཉིད་གསང་བ་འདི། །སེམས་དཔའ་ཆེན་པོ་ཁྱོད་ཀྱིས་ཟུང་། །དེ་ནས་གདན་ལས་མྱུར་བཞེངས་ཏེ། །ཐལ་མོ་སྦྱར་ཏེ་ཕྱག་བཞེས་ནས། །ཆོས་ཀྱི་ངོ་བོར་ཚིག་སྨྲས་པ། །བདེ་བ་ཆེན་པོ་བདག་གིས་བླངས། །རང་བདེ་ལོངས་སྤྱོད་གར་བྱས་ཏེ། །རྡོ་རྗེ་ཚེ་ཡིས་འདི་སྐད་སྨྲས། །རྡོ་རྗེ་ཆོས་ནི་སྣ་ཚོགས་ཆེ། །སྣ་ཚོགས་པདྨོ་གར་རབ་བྱེད། །དེ་ནས་ཕ་རོལ་ཕྱིན་དེ་ཀུན། །རབ་དགྱེས་ལོངས་སྤྱོད་གར་བྱེད་ཅིང་། །བདེ་བྱེད་ཆེན་པོས་བདག་ཉིད་རྗེས། །ལེགས་པ་ཞེས་པ་སྦྱིན་བྱེད་དེ། །ལེགས་སོ་ལེགས་སོ་བདེ་བ་ཆེ། །ལེགས་སོ་ལེགས་སོ་ཡེ་ཤེས་ཆེ། །ལེགས་སོ་ལེགས་སོ་སྣ་ཚོགས་ཆེ། །ལེགས་སོ་ལེགས་སོ་དགྱེས་པ་ཆེ། །བཅོམ་ལྡན་འདས་དགྱེས་པའི་ཐུགས་ཀྱིས་དེ་སྐད་ཅེས་བཀའ་སྩལ་ནས། ཕ་རོལ་ཏུ་ཕྱིན་མའི་འཁོར་ཆེན་མོ་དེ་དག་མངོན་པར་དགའ་བར་གྱུར་ཏོ། །ཟླ་གསང་ཐིག་ལེ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ་མཆོག་ཏུ་གསང་བ་ཡོངས་སུ་རྫོགས་སྷོ།། །། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ། གསུང་རབ་དོན་རྟོགས་སློབ་དཔོན་གྱིས། །ལྷག་པར་བཀྲོལ་ཏེ་བསྟན་པ་ལ། །ཅི་རིགས་བསྒྱུར་བའི་བསོད་ནམས་ཀྱིས། །སེམས་ཅན་སེམས་བདེ་ཐོབ་པར་སྨོན། །མངྒ་ལྃ། །