སྡེ་དགེའི་བཀའ་འགྱུར་པོད་བརྒྱད་ཅུ་གྱ་དྲུག་པ།

དཔལ་རྡོ་རྗེ་སྙིང་པོ་རྒྱན་ཅེས་བྱ་བའི་རྒྱུད་ཀྱི་རྒྱལ་པོ་ཆེན་པོ།

རྒྱུད་འབུམ་ཐ་པ་བཞུགས་སོ།

རྒྱ་གར་སྐད་དུ། ཤྲཱི་བཛྲ་མཎྜ་ཨ་ལཾ་ཀ་ར་ནཱ་མ་མ་ཧཱ་ཏན་ཏྲ་རཱ་ཛཱ། བོད་སྐད་དུ། དཔལ་རྡོ་རྗེ་སྙིང་པོ་རྒྱན་ཅེས་བྱ་བའི་རྒྱུད་ཀྱི་རྒྱལ་པོ་ཆེན་པོ། བླ་མ་དང་འཇམ་པའི་དབྱངས་ཀྱི་ཞབས་ཀྱི་པདྨ་ལ་སྤྱི་བོས་གུས་པར་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དང་། ནོར་བུ་དང་། རིན་པོ་ཆེ་དང་། པདྨ་དང་། ལས་ཀྱིས་བྱིན་གྱིས་བརླབས་པའི་དམ་ཚིག་གི་ཡེ་ཤེས་རྣམ་པ་སྣ་ཚོགས་པའི་ཁྱད་པར་དང་ལྡན་པ་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཅོད་པན་ཁམས་གསུམ་པའི་ཆོས་ཀྱི་རྒྱལ་པོར་དབང་བསྐུར་བར་བརྙེས་པ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་གི་ཡེ་ཤེས་རྣལ་འབྱོར་གྱི་དབང་ཕྱུག་ཆེན་པོ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་མཉམ་པ་ཉིད་ཐུགས་སུ་ཆུད་ཅིང་ལས་སྣ་ཚོགས་མཛད་པ་མ་ལུས་ཤིང་ལུས་པ་མེད་

པའི་སེམས་ཅན་གྱི་ཁམས་ཐམས་ཅད་ཀྱི་རེ་བ་ཐམས་ཅད་ཡོངས་སུ་རྫོགས་པའི་རྡོ་རྗེའི་ལས་མཛད་པ། ཐུགས་རྗེ་ཆེན་པོ་རྣམ་པར་སྣང་མཛད་ཆེན་པོ་རྟག་པ་དུས་གསུམ་དུ་གནས་པའི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ། དེ་བཞིན་གཤེགས་པ་ཐམས་ཅད་ཀྱིས་བསྟེན་ཅིང་བསྔགས་པའི་ནོར་བུ་རིན་པོ་ཆེ་ཆེན་པོ་དང་ལྡན་པ། ཁ་དོག་རྣམ་པ་སྣ་ཚོགས་པའི་དྲིལ་བུ་བཏགས་པ། རླུང་གིས་བསྐྱོད་པའི་དར་གྱི་བ་དན་དང་། མེ་ཏོག་གི་ཆུན་པོ་དང་། དྲ་བ་དང་དྲ་བ་ཕྱེད་པས་བཀླུབས་ཤིང་ཉེ་བར་མཛེས་པ། ཆོས་ཀྱི་དབྱིངས་ཐམས་ཅད་ལེགས་པར་ཡོངས་སུ་དག་པ། ཆོས་ཀྱི་དབྱིངས་ཀྱི་ཁང་བཟངས་འོད་མཐའ་ཡས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་གཙུག་ལག་ཁང་མེ་ཏོག་གི་འཁྲི་ཤིང་མཆོག་གི་སྙིང་པོའི་རྒྱན་གྱིས་བཀོད་པ། འཇིག་རྟེན་གྱི་ཁམས་ཀྱི་རྒྱུད་རྒྱ་མཚོ་རབ་ཏུ་བཀྲམ་པའི་སྤྲིན་ནམ་མཁའི་ཁམས་ཡོངས་སུ་ཁྱབ་པ། དེ་བཞིན་གཤེགས་པས་བྱིན་གྱིས་བརླབས་པ། མཐའ་ལས་འདས་པའི་སངས་རྒྱས་འཁྲུངས་པའི་དབུས། རྣམ་པར་སྣང་མཛད་ཀྱི་སྙིང་པོ་འོད་གསལ་བའི་གཞལ་མེད་ཁང་། དེ་བཞིན་གཤེགས་པའི་གནས། རྡོ་རྗེ་སྙིང་པོའི་རྒྱན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ། དེ་བཞིན་གཤེགས་པ་མི་འཁྲུང་མི་འགོག་འགོག་པར་མི་འགྱུར་བའི་ཡན་ལག་གི་སྤྱོད་ཡུལ་ཡང་དག་པའི་མཐའ་གསལ་བ། དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ། ཆོས་ཀྱི་དབྱིངས་ཀྱི་སྙིང་པོའི་ཁང་བཟངས། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ། དེ་བཞིན་གཤེགས་པ་

ཐམས་ཅད་ཀྱི་བྱང་ཆུབ་ཀྱི་སྙིང་པོ་ས་ཆེན་པོའི་དམ་པ་ལ་བཞུགས་སོ། །དེ་ལ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་དང་མཉམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། དེ་བཞིན་གཤེགས་པ་རྣམས་ཀྱིས་ཡོངས་སུ་བསྐོར་ཞིང་མདུན་དུ་བདར་ཏེ་ཆོས་སྟོན་པར་མཛད་དོ། །ཐོག་མར་དགེ་བ་བར་དུ་དགེ་བ་ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་དཀར་བ་ཆོས་ཐམས་ཅད་ཀྱི་ཚུལ་རྣམ་པར་དག་པའི་སྒོ་སྟོན་པར་མཛད་དོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གཉིས་སུ་མེད་པ་མཉམ་པ་ཉིད་ཀྱི་ཡེ་ཤེས་སེམས་དཔའ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཉི་མ། རྣམ་པར་རྒྱལ་བའི་དམ་ཚིག་འབྱུང་གནས་རྡོ་རྗེ་སྙིང་པོ། ཆོས་ཐམས་ཅད་ངོ་བོ་ཉིད་ཀྱིས་རྣམ་པར་དག་པའི་ཡེ་ཤེས་མཉམ་པ་ཉིད་བརྙེས་པ། རྒྱ་མཚོ་ལྟར་ཟབ་པ། ལས་སྣ་ཚོགས་པའི་ཕྱག་རྒྱའི་ཡེ་ཤེས་ཐོབ་པ་སྐུ་དང་གསུང་དང་ཐུགས་རྡོ་རྗེ་ནམ་མཁའ་ལྟ་བུ། སྐུ་ཆེན་པོ་རྡོ་རྗེའི་སྐུ། མཐའ་ལས་འདས་པའི་སྐུ། སྐུ་རིན་པོ་ཆེ་ཆོས་ཀྱི་སྐུ། སྤྲུལ་པའི་སྐུ། ལས་མཉམ་པ་ཉིད་ཀྱི་སྐུ། བྱང་ཆུབ་ཀྱི་སེམས་དོན་ཡོད་པ། ཡོངས་སུ་བསྡུས་པ། དགེ་བ་འཕེལ་བ། རྒྱལ་པོ་ཆེན་པོ་སྣང་བ་ཏོག །བཞད་པ་པོ། ཆོས་དང་ལྡན་པ། ཤེས་རབ་འཁོར་ལོ། སྐད་ཐམས་ཅད་པ། སྣ་ཚོགས་པ་ཅན། སྲུང་བ་པོ། གནོད་སྦྱིན་ཅན། མཚམས་སྦྱོར་བ། གཙུག་ཏོར་དུ་གྱུར་པ། མཆོག་ལྡན། རྡོ་རྗེ་ཅན། འཁོར་ལོ་ཅན། ཡེ་ཤེས་ཅན། ཁྱབ་བདག་ཆེན་པོ། སྐུ་དང་གསུང་དང་ཐུགས་རྡོ་རྗེ་ནམ་མཁའི་དབྱིངས་ཐམས་ཅད་དུ་ལེགས་པར་བཞུགས་པ། དེ་བཞིན་གཤེགས་པ་ཐམས་ཅད་ཡང་དག་པར་འདུ་བར་བྱེད་པ། རྡོ་རྗེའི་དབྱིངས་ཐམས་ཅད་ཁོང་དུ་ཆུད་པའི་ཡེ་ཤེས་སེམས་དཔའ་ནམ་མཁའི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་དང་མཉམ་པའི་རྡོ་རྗེའི་བྱིན་རླབས་ཀྱི་ཡེ་ཤེས་སྙིང་པོ། དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་

རྡོ་རྗེ་རིན་པོ་ཆེའི་དབང་བསྐུར་བ་ཆེན་པོའི་དམ་ཚིག་ནམ་མཁའི་ཁམས་ཐམས་ཅད་དུ་སྤྲོས་པས་དེ་བཞིན་གཤེགས་པའི་མངོན་པར་ཤེས་པ་མངོན་པར་བྱང་ཆུབ་པར་གྱུར་བ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཀྱི་ངོ་བོ་རྣམ་པར་དག་པ་དེ་ཡིས་ཆོས་ཐམས་ཅད་རང་བཞིན་གྱིས་དག་པ་ནམ་མཁའ་ཐམས་ཅད་ལ་ཁྱབ་པ་པོ། གཟུགས་ཐམས་ཅད་ཡོངས་སུ་མཐོང་བའི་ཡེ་ཤེས་ཀྱིས་མ་ལུས་ཤིང་ལུས་པ་མེད་པའི་སེམས་ཅན་འདུལ་བའི་སྤྱོད་པ་མཆོག་དང་ལྡན་པ། དེ་བཞིན་གཤེགས་པ་ཐམས་ཅད་དོན་ཡོད་པའི་བཀའ་ལུང་མཛད་པས་སེམས་ཅན་ཐམས་ཅད་མཉམ་པ་ཉིད་བླ་ན་མེད་པའི་ལས་སྣ་ཚོགས་པ་ཅན། རྣམ་སྣང་མི་འགྱུར་མི་བསྐྱོད་པ། །རིན་ཆེན་ཏོག་སྟེ་འོད་བྱེད་པ། །འོད་དཔག་མེད་པ་རྒྱལ་བའི་མགོན། །དོན་ཡོད་པ་ནི་ལས་ཀུན་བྱེད། །དེ་བཞིན་གཤེགས་པ་ཐམས་ཅད་ཀྱི་མེ་ལོང་ལྟ་བུའི་ཡེ་ཤེས་ཀྱི་དཀྱིལ་འཁོར། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཡེ་ཤེས་ལ་རབ་ཏུ་གནས་པ། དེ་བཞིན་གཤེགས་པ་ཐམས་ཅད་ཀྱི་སོ་སོར་རྟོག་པའི་ཡེ་ཤེས་གཉིས་སུ་མེད་པ་བརྙེས་པ་དེ་བཞིན་གཤེགས་པ་ཐམས་ཅད་ཀྱི་བྱ་བ་གྲུབ་པའི་ཡེ་ཤེས་ཡང་དག་པར་རྗེས་སུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་རྣམ་པར་དག་བ། ཆོས་ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི་སྤྱོད་ཡུལ། དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་ཅིང་མཉམ་པ་ཉིད་དམིགས་པའི་ཡེ་ཤེས་ཡོངས་སུ་དག་པ་མཐར་ཕྱིན་པ། སྟོང་པ་ཉིད་དང་། དེ་བཞིན་ཉིད་དང་། ཡང་དག་པའི་མཐའ་དང་། མཚན་མ་མེད་པ་དང་། སྨོན་པ་མེད་པ་དང་། ཚངས་པའི་གནས་པ་བཞི་པོ་དག་གིས་སངས་རྒྱས་ཀྱི་ཡེ་ཤེས་ཀྱི་ཡུལ་དུ་གྱུར་པ། སངས་རྒྱས་ཀྱི་ཡུལ་མཉམ་པ་ཉིད་ལ་དམིགས་པ། དེ་བཞིན་གཤེགས་པ་ཐམས་ཅད་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ཉིད་ལ་བྱིན་གྱིས་བརླབས་ནས། ཕྱོགས་དང་མཚམས་རྣམས་སུ་ཀུན་ཏུ་གནས་སོ། །དེ་ནས་ཡང་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་

ཕྱུག་གིས། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་སངས་རྒྱས་ཐམས་ཅད་དང་རྡོ་རྗེ་འཛིན་པ་རྣམས་སྤྱན་དྲོངས་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། འཇམ་དཔལ་གཞོན་ནུ་འཁོར་ལོས་སྒྱུར་བ་ཆེན་པོ་རབ་ཏུ་དགྱེས་པའི་ཞལ་རས་ཀྱིས་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་རྣམས་སྤྱན་དྲང་བའི་དོན་དུ་རྡོ་རྗེ་སེ་གོལ་བརྡབས་ཏེ་དེ་བཞིན་གཤེགས་པ་ཐམས་ཅད་བསྡུ་བའི་སྙིང་པོ་ཆེན་པོ་འདི་ཆེད་དུ་བརྗོད་པ། བུད་དྷ་ས་མཱ་ཛཿཨཱཿཧཱཿༀ་ཧཱུཾ་བཛྲ་ས་མཱ་ཛཿ དེ་ནས་དེ་སྐད་ཅེས་བརྗོད་པས་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་པ་རྣམས་ཀྱིས་འཇིག་རྟེན་གྱི་ཁམས་མེ་ཏོག་གི་གཞིའི་སྙིང་པོའི་རྒྱན་བཀོད་པའི་རྒྱུད་རབ་འབྱམ་རྒྱ་མཚོའི་སྤྲིན་ཡང་དག་པར་མཐོང་ངོ་། །དེ་ནས་ཡང་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་རྣམ་པར་སྣང་མཛད་ལ་དེ་བཞིན་གཤེགས་པ་རྣམས་ཐམས་ཅད་ཀྱིས་ལྷན་ཅིག་ཡང་དག་པར་སྦྱར་ནས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བློའི་ཡེ་ཤེས་ཡོངས་སུ་བསྐྱེད་དེ་གནས་ཐམས་ཅད་དུ་རྣམ་པར་གནས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རང་བཞིན་རྣལ་འབྱོར་གྱི་དབང་ཕྱུག་གིས་དེ་བཞིན་གཤེགས་པ་ཐམས་ཅད་ཉིད་དུ་བདག་ཉིད་བྱིན་གྱིས་བརླབས་ཏེ། དེ་བཞིན་གཤེགས་པ་དེ་རྣམས་དང་རྡོ་རྗེ་འཛིན་པ་རྣམས་ལ་བཀའ་སྩལ་པ། ཀྱེ་དེ་བཞིན་གཤེགས་པ་ཐམས་ཅད་ཐམས་ཅད་མཁྱེན་པའི་ཡེ་ཤེས་འཁོར་ལོས་སྒྱུར་བ་ཆེན་པོའི་སྙིང་པོ་བདག་ལ་ཡོད་པ་དེ་ངས་བཤད་པར་བྱའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །བྷྲུྃ།དེ་ནས། མི་བསྐྱོད་དེ་བཞིན་གཤེགས་པ་དང་། །རིན་ཆེན་འབྱུང་གནས་དེ་བཞིན་གཤེགས། །དེ་བཞིན་གཤེགས་པ་འོད་དཔག་མེད། །དོན་ཡོད་གྲུབ་པ་དེ་བཞིན་གཤེགས། །གཞན་ཡང་དེ་བཞིན་གཤེགས་པ་རྣམས་དང་ལྷན་ཅིག་དེ་བཞིན་གཤེགས་པ་ཐམས་ཅད་ཀྱི་ཐུགས་དཔལ་གྱི་བེའུ་ལ་རབ་ཏུ་ཞུགས་སོ། །ཞུགས་པ་ཙམ་གྱིས་དེ་བཞིན་གཤེགས་པ་ཐམས་ཅད་འཁོར་ལོ་ལ་བདེ་བ་ཐམས་ཅད་

ཡང་དག་པར་སྟོན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཞལ་བཞིར་གྱུར་ཏེ། ཞལ་བཞི་པོ་རྣམས་ཀྱིས་ཆོས་ཀྱི་དབྱིངས་དང་ནམ་མཁའི་ཁམས་མཐའ་མེད་པ་སངས་རྒྱས་ཐམས་ཅད་ཀྱི་ཡུལ་ཆོས་ཀྱི་ཚུལ་མངོན་པར་བརྟགས་པ་འདི་ཉིད་དབྱངས་ཀྱིས་ཆེད་དུ་བརྗོད་པ་འདི་ལྟ་སྟེ། རབ་ཏུ་དགའ་བ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ། བྱང་ཆུབ་སེམས་དཔའི་གནས་སོ། །ལྟ་བ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །དགའ་བ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །སྲེད་པ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །འདོད་ཆགས་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ཞེ་སྡང་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །གཏི་མུག་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ང་རྒྱལ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །མི་ཁོམ་པ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ཡིད་སིམ་པ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །སྣང་བ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ལུས་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ངག་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །ཡིད་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །གཟུགས་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །སྒྲ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །དྲི་རྣམ་པར་དག་

པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །རོ་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །རེག་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །དངོས་པོ་ཐམས་ཅད་རྣམ་པར་དག་པའི་གནས་གང་ཡིན་པ་དེ་ནི་འདི་ལྟ་སྟེ་བྱང་ཆུབ་སེམས་དཔའི་གནས་སོ། །དེའི་རྒྱུ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་སྟེ། ཆོས་ཐམས་ཅད་རང་བཞིན་གྱིས་རྣམ་པར་དག་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་གསང་སྔགས་ཐམས་ཅད་ཀྱི་དབང་ཕྱུག་གསང་སྔགས་ཐམས་ཅད་ཀྱི་འདྲེན་པ་པོ། སྔགས་ཐམས་ཅད་ཀྱི་བླ་མར་གྱུར་པ། ཐམས་ཅད་གཙུག་ཏོར་འཁོར་ལོས་སྒྱུར་བ། བསྟན་པ་ལ་བརྫི་བ་མེད་པ། འཁོར་ལོས་སྒྱུར་བའི་སྙིང་པོ་བཀའ་སྩལ་པ། བྷྲུྃ། འཇམ་དཔལ་གང་ལ་ལས་ཆོས་ཐམས་ཅད་བསྡུས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་འདི་ལན་ཅིག་ཙམ་ཡང་ཐོས་ན་དེའི་བྱང་ཆུབ་ཀྱི་སྙིང་པོ་ལ་ཐུག་པའི་བར་དུ་སྒྲིབ་པ་ཐམས་ཅད་དང་ཆོད་པ་དང་ཉོན་མོངས་པའི་སྒྲིབ་པ་དང་། ཆོས་ཀྱི་སྒྲིབ་པ་དང་ལས་ཀྱི་སྒྲིབ་པ་ཆེན་པོ་ཉེ་བར་བསགས་ཀྱང་ནམ་ཡང་དམྱལ་བ་ལ་སོགས་པའི་ངན་སོང་རྣམས་སུ་ལྟུང་བར་མི་འགྱུར་རོ། །སྡིག་པ་རྣམས་བྱས་པ་ཙམ་ན་ཡང་སྡུག་བསྔལ་མེད་ཅིང་ཟད་པར་འགྱུར་རོ། །གང་གིས་འདི་འཆང་བ་དང་། ཉི་མ་རེ་རེ་འདོན་པ་དང་། ཀློག་པ་དང་རྒྱུན་མ་ཆད་པར་ཚུལ་བཞིན་ཡིད་ལ་བྱེད་པ་དེ་ནི་སྐྱེ་བ་འདི་ཉིད་ལ་ཆོས་ཐམས་ཅད་མཉམ་པ་ཉིད་རྡོ་རྗེའི་ཏིང་ངེ་འཛིན་སོ་སོར་ཐོབ་ནས་ཆོས་ཐམས་ཅད་ཀྱི་དབང་ཕྱུག་ཏུ་འགྱུར་རོ། །ཆོས་ཐམས་ཅད་ལ་དགའ་ཞིང་མགུ་ལ་རབ་ཏུ་དགའ་བ་མྱོང་བར་འགྱུར་རོ། །བྱང་ཆུབ་སེམས་དཔའ་ཆེན་པོ་སྐྱེ་བ་བཅུ་དྲུག་ན། དེ་བཞིན་གཤེགས་པ་ཉིད་དམ་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་སླར་ཡང་ཤེས་རབ་ཀྱི་ཕ་

རོལ་ཏུ་ཕྱིན་པའི་ཚུལ་དེ་བཞིན་གཤེགས་པ་ཐམས་ཅད་ཀྱི་ཞི་བའི་ཆོས་ཉིད་མངོན་པར་བྱང་ཆུབ་པ་མངོན་པར་བསྒྲུབ་པ་འདི་སྟོན་པར་མཛད་དོ། །རྡོ་རྗེ་བརྟན་པ་ཉིད་ཀྱི་རྡོ་རྗེ་མཉམ་པ་ཉིད་མངོན་པར་རྫོགས་པར་བྱང་ཆུབ་པའི་བྱང་ཆུབ་ཆེན་པོ་དང་། དོན་གཅིག་པ་ཉིད་ཀྱིས་དོན་མཉམ་པ་ཉིད་མངོན་པར་བྱང་ཆུབ་པའི་བྱང་ཆུབ་ཆེན་པོ་དང་། རང་བཞིན་རྣམ་པར་དག་པས་ཆོས་ཉིད་མཉམ་པ་ཉིད་མངོན་པར་བྱང་ཆུབ་པའི་བྱང་ཆུབ་ཆེན་པོ་དང་། རྣམ་པར་རྟོག་པ་དང་རྣམ་པར་མི་རྟོག་པ་ཉིད་ཀྱིས་ལས་ཐམས་ཅད་མཉམ་པ་ཉིད་མངོན་པར་བྱང་ཆུབ་པའི་བྱང་ཆུབ་ཆེན་པོ་སྟེ། འཇམ་དཔལ་གང་ལ་ལས་ཆོས་ཀྱི་གནས་བཞི་པོ་འདི་ཉན་པར་བྱེད་པ་དང་། འཛིན་པ་དང་། འདོན་པ་དང་། སྒོམ་པར་བྱེད་ན་ཇི་སྲིད་བྱང་ཆུབ་སྙིང་པོ་ལ་གནས་ཀྱི་བར་དུ་སྡིག་པ་ཐམས་ཅད་ལ་ཀུན་ཏུ་སྤྱོད་པ་ཐམས་ཅད་ཀྱང་སྡིག་པ་ཐམས་ཅད་ལས་འདས་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་བྱང་ཆུབ་པར་འགྱུར་རོ། །ཨཱྃ། དེ་ནས་ཡང་བཅོམ་ལྡན་འདས་གདུག་པ་ཐམས་ཅད་འདུལ་བ་དེ་བཞིན་གཤེགས་པ་ཤཱཀྱ་ཐུབ་པས་ཆོས་ཐམས་ཅད་མཉམ་པ་ཉིད་རྣམ་པར་རྒྱལ་བས་བསྡུས་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པ་བཀའ་སྩལ་པ། འདོད་ཆགས་ཀྱི་སྤྲོས་པ་མེད་པའི་ཕྱིར་འདོད་ཆགས་སྤྲོས་པ་མེད་པའོ། །ཞེ་སྡང་གི་སྤྲོས་པ་མེད་པའི་ཕྱིར་ཞེ་སྡང་སྤྲོས་པ་མེད་པའོ། །གཏི་མུག་གི་སྤྲོས་པ་མེད་པའི་ཕྱིར་གཏི་མུག་སྤྲོས་པ་མེད་པའོ། །ཆོས་ཐམས་ཅད་སྤྲོས་པ་མེད་པའི་ཕྱིར་ཆོས་ཐམས་ཅད་སྤྲོས་པ་མེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པར་རིག་པར་བྱའོ། །འཇམ་དཔལ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པ་དང་འཛིན་ཅིང་འདོན་ལ་ཀློག་པར་བྱེད་ན་དེ་འདུལ་བའི་དབང་ཉེ་བར་བཟུང་ནས་ཁམས་གསུམ་དུ་སྐྱེས་པའི་སེམས་ཅན་རྣམས་བསད་བར་གྱུར་ཀྱང་ངན་སོང་དུ་འགྲོ་བར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་འགྱུར་རོ། །ཧཱུྃ། དེ་ནས་བཅོམ་ལྡན་

འདས་རང་བཞིན་གྱིས་རྣམ་པར་དག་པའི་ཆོས་ཉིད་བརྙེས་པའི་དེ་བཞིན་གཤེགས་པ་སླར་ཡང་ཆོས་ཐམས་ཅད་སྤྱན་རས་གཟིགས་དབང་ཕྱུག་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཀའ་སྩལ་པ། འདོད་ཆགས་ཐམས་ཅད་རྣམ་པར་དག་པའི་ཕྱིར་འཇིག་རྟེན་ན་ཡུལ་ཐམས་ཅད་རྣམ་པར་དག་པ་ཉིད་དུ་འཇུག་པར་འགྱུར་རོ། །ཞེ་སྡང་ཐམས་ཅད་རྣམ་པར་དག་པའི་ཕྱིར་འཇིག་རྟེན་ན་སྡིག་པ་ཐམས་ཅད་རྣམ་པར་དག་པ་ཉིད་དུ་འཇུག་པར་འགྱུར་རོ། །ཆོས་ཐམས་ཅད་རྣམ་པར་དག་པའི་ཕྱིར་འཇིག་རྟེན་ན་ཆོས་ཐམས་ཅད་རྣམ་པར་དག་པ་ཉིད་དུ་འཇུག་པར་འགྱུར་རོ། །ཐམས་ཅད་མཁྱེན་པའི་ཡེ་ཤེས་རྣམ་པར་དག་པའི་ཕྱིར་འཇིག་རྟེན་ན་ཐམས་ཅད་མཁྱེན་པའི་ཡེ་ཤེས་རྣམ་པར་དག་པ་ཉིད་དུ་འཇུག་པར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའི་ཕྱིར་འཇིག་རྟེན་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཉིད་དུ་འཇུག་པར་འགྱུར་རོ། །འཇམ་དཔལ་གང་ལ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པར་བྱེད་འཛིན་ཅིང་འདོན་ལ་སྒོམ་པར་བྱེད་ན་དེ་འདོད་པ་ཐམས་ཅད་ཀྱི་ནང་ན་གནས་ཀྱང་པདྨ་ལྟ་བུར་འདོད་ཆགས་ཀྱི་སྐྱོན་བློ་བུར་བའི་དྲི་མས་གོས་པར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་འགྱུར་རོ། །ཧྲཱིཿ། དེ་ནས་བཅོམ་ལྡན་འདས་ཁམས་གསུམ་པ་ཐམས་ཅད་ཀྱི་བདག་པོ་དེ་བཞིན་གཤེགས་པས་སླར་ཡང་དེ་བཞིན་གཤེགས་པ་ཐམས་ཅད་དབང་བསྐུར་བའི་འབྱུང་གནས་ཡེ་ཤེས་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་པ། དབང་བསྐུར་བྱིན་པས་ཁམས་གསུམ་པོ་ཐམས་ཅད་ཀྱི་རྒྱལ་སྲིད་ཡོངས་སུ་ཐོབ་པར་འགྱུར་རོ། །དོན་གྱི་སྦྱིན་པས་ཐམས་ཅད་ཀྱི་བསམ་པ་ཡོངས་སུ་རྫོགས་པར་འགྱུར་རོ། །ཆོས་ཀྱི་སྦྱིན་པས་ཆོས་ཐམས་ཅད་མཉམ་པ་ཉིད་ཐོབ་པར་འགྱུར་རོ། །ཟང་ཟིང་གི་སྦྱིན་པས་ཐམས་ཅད་ཀྱི་ལུས་དང་ངག་དང་ཡིད་བདེ་བ་ཐོབ་པར་འགྱུར་རོ། །ཏྲཱྃ། དེ་ནས་བཅོམ་ལྡན་འདས་དེ་བཞིན་གཤེགས་པ་

ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་བརྙེས་པ་ཐམས་ཅད་ཀྱི་ཁུ་ཚུར་འཆང་བ་དེ་བཞིན་གཤེགས་པ་རྟག་པས་སླར་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཕྱག་རྒྱ་བྱིན་གྱིས་བརླབས་པ་རྡོ་རྗེ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་སྐུའི་ཕྱག་རྒྱ་ཡོངས་སུ་གཟུང་བས་དེ་བཞིན་གཤེགས་པ་ཐམས་ཅད་ཉིད་དུ་འགྱུར་བ་དང་། གསུང་གི་ཕྱག་རྒྱ་ཡོངས་སུ་གཟུང་བས་ཆོས་ཐམས་ཅད་ཐོབ་པའི་དོན་དུ་འགྱུར་བ་དང་། ཐུགས་ཀྱི་ཕྱག་རྒྱ་ཡོངས་སུ་གཟུང་བས་ཏིང་ངེ་འཛིན་ཐམས་ཅད་ཐོབ་པའི་དོན་དུ་འགྱུར་པ་དང་། རྡོ་རྗེའི་ཕྱག་རྒྱ་ཡོངས་སུ་གཟུང་བས་སྐུ་དང་གསུང་དང་ཐུགས་ཐམས་ཅད་རྡོ་རྗེ་མཆོག་ཏུ་འགྲུབ་པའི་དོན་དུ་འགྱུར་ཏེ། འཇམ་དཔལ་གང་ལ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པར་བྱེད་འཛིན་ཅིང་འདོན་ལ་འཆད་ཅིང་སྒོམ་པར་བྱེད་ན། དེ་དངོས་གྲུབ་ཐམས་ཅད་དང་ཕུན་སུམ་ཚོགས་པ་ཐམས་ཅད་དང་། ཡེ་ཤེས་ཐམས་ཅད་དང་། ལས་ཐམས་ཅད་སྐུ་དང་གསུང་དང་ཐུགས་རྡོ་རྗེ་སེམས་དཔའ་མཆོག་གི་དངོས་གྲུབ་ཐམས་ཅད་སོ་སོར་ཐོབ་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་འགྱུར་རོ། །ཨཿ། དེ་ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པའི་དེ་བཞིན་གཤེགས་པས་སླར་ཡང་རྡོ་རྗེའི་ཡི་གེའི་འཁོར་ལོ་བསྐོར་བ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་པ། རང་བཞིན་མེད་པའི་ཚུལ་གྱིས་ཆོས་ཐམས་ཅད་སྟོང་པ་ཉིད་དང་ཆོས་ཐམས་ཅད་མཚན་མ་མེད་པ་ཉེ་བར་གཟུང་བའི་ཕྱིར་ཆོས་ཐམས་ཅད་མཚན་མས་དབེན་པ་དང་། སྨོན་པ་ལས་ཉེ་བར་གྲོལ་བའི་ཕྱིར་ཆོས་ཐམས་ཅད་སྨོན་པ་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པའི་ཕྱིར་ཆོས་ཐམས་ཅད་རང་བཞིན་གྱིས་འོད་གསལ་བའོ། །ཨྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་ནང་དུ་གནས་པའི་དེ་བཞིན་གཤེགས་པས་སླར་ཡང་འཁོར་ལོ་ཆེན་པོར་འཇུག་པ་ཞེས་བྱ་བའི་ཤེས་

རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་པ། རྡོ་རྗེ་མཉམ་པ་ཉིད་ལ་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་འཁོར་ལོར་འཇུག་པར་འགྱུར་བ་དང་། དོན་མཉམ་པ་ཉིད་ལ་ཞུགས་ནས་བྱང་ཆུབ་སེམས་དཔའ་ཆེན་པོའི་འཁོར་ལོར་འཇུག་པར་འགྱུར་བ་དང་། ཆོས་ཐམས་ཅད་མཉམ་པ་ཉིད་ལ་ཞུགས་ནས་དམ་པའི་ཆོས་ཀྱི་འཁོར་ལོར་འཇུག་པར་འགྱུར་བ་དང་། ལས་མཉམ་པ་ཉིད་ལ་ཞུགས་ནས་འཁོར་ལོ་ཐམས་ཅད་དུ་འཇུག་པར་འགྱུར་རོ། །ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པའི་སྣོད་དེ་བཞིན་གཤེགས་པས་སླར་ཡང་དེ་བཞིན་གཤེགས་པ་ཐམས་ཅད་ཀྱི་མཆོད་པ་དམ་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་པ། བྱང་ཆུབ་ཀྱི་སེམས་བསྐྱེད་པས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པ་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྐྱོབ་པས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པ་དང་། ཆོས་ཐམས་ཅད་ཡོངས་སུ་གཟུང་བས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པ་དང་ཤེས་རབ་ཀྱི་ཕ་རོལ་ཏུ་ཕྱིན་པ་འདྲི་བ་དང་། འདྲིར་འཇུག་པ་དང་། འཛིན་པ་དང་། འདོན་པ་དང་། རྗོད་པ་དང་སྒོམ་པ་སྔོན་དུ་འགྲོ་བའི་ལས་ཀྱི་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པའོ། །ཨོྃ། དེ་ནས་བཅོམ་ལྡན་འདས་གདུག་པ་ཐམས་ཅད་འདུལ་བའི་ནུས་པའི་དེ་བཞིན་གཤེགས་པས་སླར་ཡང་སེམས་ཅན་ཐམས་ཅད་འདུལ་བའི་ཡེ་ཤེས་སྙིང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཀའ་སྩལ་བ། སེམས་ཅན་ཐམས་ཅད་མཉམ་པ་ཉིད་པས་ཁྲོ་བ་མཉམ་པ་ཉིད་དང་། སེམས་ཅན་ཐམས་ཅད་འདུལ་བ་ཉིད་པས་ཁྲོ་བ་འདུལ་བ་ཉིད་དང་། སེམས་ཅན་ཐམས་ཅད་ཆོས་ཉིད་ཉིད་པས་ཁྲོ་བ་ཆོས་ཉིད་ཉིད་དང་། སེམས་ཅན་ཐམས་ཅད་རྡོ་རྗེ་ཉིད་པས་ཁྲོ་བ་རྡོ་རྗེ་ཉིད་དེ་དེ་རྒྱུ་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་འདུལ་བའི་བྱང་ཆུབ་སྟེ། ཧཿ། དེ་ནས་བཅོམ་ལྡན་འདས་ཐམས་ཅད་མཉམ་པ་

ཉིད་ལ་རབ་ཏུ་གནས་པའི་དེ་བཞིན་གཤེགས་པས་སླར་ཡང་ཆོས་ཐམས་ཅད་མཉམ་པ་ཉིད་ཀྱི་མཆོག་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཀའ་སྩལ་པ། ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དང་། ཐམས་ཅད་ཀྱི་དོན་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ཉིད་དང་ཆོས་ཐམས་ཅད་མཉམ་པ་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་མཉམ་པ་ཉིད་དང་། ཐམས་ཅད་ལས་ཉིད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ཉིད་དུ་རིག་པར་བྱའོ། །ཧྲཱིཿ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་སླར་ཡང་དེ་བཞིན་གཤེགས་པ་ཐམས་ཅད་བྱིན་གྱིས་རློབ་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཀའ་སྩལ་པ། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་བདག་ཉིད་ཐམས་ཅད་པས་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་དང་། རྡོ་རྗེའི་སྙིང་པོས་དབང་བསྐུར་བས་སེམས་ཅན་ཐམས་ཅད་རྡོ་རྗེའི་སྙིང་པོ་དང་། རིན་པོ་ཆེ་ཐམས་ཅད་ཀྱིས་དབང་བསྐུར་བས་སེམས་ཅན་ཐམས་ཅད་རིན་པོ་ཆེའི་སྙིང་པོ་དང་། ངག་ཐམས་ཅད་ལ་རབ་ཏུ་འཇུག་པས་སེམས་ཅན་ཐམས་ཅད་ཆོས་ཀྱི་སྙིང་པོ་དང་། ལས་ཐམས་ཅད་བྱེད་པའི་སྦྱོར་བས་སེམས་ཅན་ཐམས་ཅད་ལས་ཀྱི་སྙིང་པོའོ། །ཧྲཱིཿ། དེ་ནས་བཅོམ་ལྡན་འདས་མཐའ་ལས་འདས་ཤིང་མུ་མེད་པའི་མཐར་ཕྱིན་པའི་དེ་བཞིན་གཤེགས་པས་སླར་ཡང་མུ་མེད་ཅིང་མཐར་ཕྱིན་པའི་ཆོས་དང་། སླར་ཡང་འདིའི་རྟོག་པ་དང་ཡོངས་སུ་མཐར་ཐུག་པ་བྱིན་གྱིས་བརླབ་པའི་དོན་དུ་ཆོས་ཐམས་ཅད་མཉམ་པ་ཉིད་ཡོངས་སུ་མཐར་ཐུག་པས་བྱིན་གྱིས་བརླབས་པ་རྡོ་རྗེ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་བཀའ་སྩལ་པ། ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་མེད་པའི་ཕྱིར་དེ་བཞིན་གཤེགས་པ་ཐམས་ཅད་མཐའ་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པའི་ཕྱིར་དེ་བཞིན་གཤེགས་པ་ཐམས་ཅད་མུ་མེད་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་གཅིག་པ་ཉིད་ཀྱི་ཕྱིར་ཆོས་ཐམས་ཅད་གཅིག་པ་ཉིད་དང་། ཤེས་རབ་

ཀྱི་ཕ་རོལ་ཏུ་ཕྱིན་པ་ཡོངས་སུ་མཐར་ཐུག་པའི་ཕྱིར་ཆོས་ཐམས་ཅད་ཡོངས་སུ་མཐར་ཐུག་པར་འགྱུར་བ་སྟེ། འཇམ་དཔལ་གང་ལ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པར་བྱེད་འཛིན་ཅིང་འདོན་ལ་སྒོམ་པར་བྱེད་ན་དེ་ནི་དག་ཅིང་མཐར་ཕྱིན་པའི་བྱང་ཆུབ་སེམས་དཔའི་སྤྱོད་པ་མཐར་ཕྱིན་པ་ལ་གནས་པ་ཉིད་ཀྱིས་སྒྲིབ་པ་ཐམས་ཅད་ལས་རྣམ་པར་གྲོལ་བས་དེ་བཞིན་གཤེགས་པ་ཉིད་དམ་རྡོ་རྗེ་འཛིན་པ་ཉིད་མྱུར་དུ་ཐོབ་པར་འགྱུར་རོ། །བྷྱོཿ། དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་ཉིད་བརྙེས་པ། ཆོས་ཐམས་ཅད་སྤྲོས་པ་མེད་པས་སླར་ཡང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་རྡོ་རྗེ་ཆོས་མཉམ་པ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དམ་པ་ཐོག་མ་དང་ཐ་མ་དང་དབུས་ལས་གྲོལ་བའི་མཆོག་འདི་བཀའ་སྩལ་པ། བྱང་ཆུབ་སེམས་དཔའ་ཆེན་པོ་རྣམས་ཀྱི་འདོད་ཆགས་ཆེན་པོ་མཆོག་ཏུ་གྲུབ་པས་བདེ་བ་ཆེན་པོ་མཆོག་ཏུ་གྲུབ་པར་འགྱུར་བ་དང་། བྱང་ཆུབ་སེམས་དཔའ་ཆེན་པོ་རྣམས་ཀྱི་བདེ་བ་ཆེན་པོ་མཆོག་ཏུ་གྲུབ་པས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོ་མཆོག་ཏུ་གྲུབ་པར་འགྱུར་བ་དང་། བྱང་ཆུབ་སེམས་དཔའ་ཆེན་པོ་རྣམས་ཀྱི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་མཆོག་ཏུ་གྲུབ་པས་བདུད་སྡེ་ཆེན་པོ་རབ་ཏུ་འཇོམས་པ་མཆོག་ཏུ་གྲུབ་པར་འགྱུར་བ་དང་། བྱང་ཆུབ་སེམས་དཔའ་ཆེན་པོ་རྣམས་ཀྱི་བདུད་སྡེ་ཆེན་པོ་རབ་ཏུ་འཇོམས་པ་མཆོག་ཏུ་གྲུབ་པས་ཁམས་གསུམ་པོ་མཐའ་དག་གི་དབང་ཕྱུག་མཆོག་ཏུ་གྲུབ་པར་འགྱུར་བ་དང་། བྱང་ཆུབ་སེམས་དཔའ་ཆེན་པོ་རྣམས་ཀྱི་འཇིག་རྟེན་གསུམ་པོ་མཐའ་དག་གི་དབང་ཕྱུག་མཆོག་ཏུ་གྲུབ་པས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཡོངས་སུ་སྐྱོབ་པའི་སེམས་ཅན་ཐམས་ཅད་ལ་ཕན་པ་དང་བདེ་བའི་མཆོག་ཤིན་ཏུ་བདེ་བ་ཆེན་པོ་མཆོག་ཏུ་གྲུབ་པར་འགྱུར་རོ། །སྭྃ། དེ་རྒྱུ་ཅི་ཡི་ཕྱིར་ཞེ་ན། ཇི་སྲིད་འཁོར་བའི་གནས་སུ་ནི། །མཁས་པ་མཆོག་རྣམས་གནས་གྱུར་པ། །དེ་སྲིད་མཉམ་མེད་སེམས་ཅན་དོན། །མྱ་ངན་མི་

འདའ་བྱེད་པར་ནུས། །ཤེས་རབ་ཕ་རོལ་ཕྱིན་པའི་ཐབས། །ཡེ་ཤེས་བྱིན་གྱིས་བརླབས་ཀྱིས་འགྲུབ། །ལས་ནི་ཐམས་ཅད་རྣམ་དག་པས། །སྲིད་པ་དག་པར་འགྱུར་ཕྱིར་རོ། །ཆགས་སོགས་ཀྱིས་འདུལ་འཇིག་རྟེན་ནི། །ཀུན་ནས་སྲིད་པར་རྟག་སྡིག་བྱེད། །དེ་དག་རྣམ་པར་སྦྱང་དོན་དུ། །སྲིད་པའི་བར་དུ་རང་འདུལ་བྱེད། །ཇི་ལྟར་པདྨ་ལེགས་དམར་བ། །ཚོན་གྱི་སྐྱོན་གྱིས་མ་གོས་ལྟར། །བག་ཆགས་སྐྱོན་གྱི་སྲིད་པ་རུ། །རྟག་ཏུ་འགྲོ་ཕན་གོས་མི་འགྱུར། །འདོད་ཆགས་ཆེན་པོ་རྣམ་དག་པ། །བདེ་བ་ཆེན་པོ་ནོར་ཆེན་པོ། །ཁམས་གསུམ་དབང་ཕྱུག་ཐོབ་ནས་སུ། །དེ་དག་དོན་ནི་བརྟན་པར་བྱེད། །ཧཿ།འཇམ་དཔལ་གང་ལ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་འདི་ཉིན་རེ་བཞིན་དུ་ནང་པར་ལངས་ཏེ། གང་འདོན་པ་དང་ཉན་པ་དང་འཛིན་པ་དང་། རྗོད་པར་བྱེད་ན། དེས་བདེ་བ་དང་། ཡིད་བདེ་བ་ཐམས་ཅད་ཐོབ་པར་འགྱུར་ཞིང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་དངོས་གྲུབ་མཆོག་ཏུ་གྱུར་པ་སྐྱེ་བ་འདི་ཉིད་ལ་ཐོབ་པར་འགྱུར་རོ། །ཧཱུྃ། དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཉི་ཤུ་རྩ་ལྔ་པོ་འདི་དག་ནི་ངེས་པར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོ་སྟེ་འདི་ལྟར། ༀ་ནམཿསརྦྦ་བུད་དྷ་བོ་དྷི་སཏྭཱ་ནཱྃ། ཨོྃ་བོ་དྷི་ཙིཏྟ་བཛྲེ། ༀ་ས་མནྟ་བྷ་དྲ་ཙཱརྱེ་དྷི། ཨོྃ་ཙིནྟ་མ་ཎི། ཨོྃ་ཨ་ནི་རོ་དྷེ། ཨོྃ་ཛཱ་ཏི་བི་བརྟྟེ། ཨོྃ་ཛཱ་ཏི་པ་རི་ཝར་ཏེ། ཨོྃ་མ་ཧཱ་རཱ་གཱ་ངྷརྨྨཏེ། ཨོྃ་བིརྱ་ཀ་བ་ཙེ། ཨོྃ་སརྦྦ་གཱ་མི་ནི། ཨོྃ་བཛྲ་དྲྀ་ཌྷ་ཀ་བཙི་ཏེ་ཧཱོུཾ་ཕཊ། ཨོྃ་སརྦྦ་ཏ་ཐཱ་ག་ཏེ། ཨོྃ་སྭ་བྷཱ་བ་ཤུད་དྷེ། ཨོྃ་པྲཛྙཱ་པཱ་ར་མི་ཏཱ་ཛྙཱ་ན་བི་ཤུད་དྷེ། ཨོྃ་ཀརྨ་བི་ཤོ་དྷ་ནི་ཧཱུཾ། ཨོྃ་ནི་སུྃ་བྷ་བཛྲི་ཎི་ཧཱུཾ་ཕཊ། ཨོྃ་ཀརྨ་རཱ་གེ །ཨོྃ་བཛྲ་ཧཱུཾ་བཛྲེ། ཨོྃ་ཧཱུྃ་སརྦྦ་གཱ་མ་ཎི་ཨོྃ་ཧྲཱིཿ། ཨོྃ་ཨ་ཀཱ་རོ་མུ་ཁེ་ཨོཾ་པྲཛྙཱེ་པཱ་ར་མི་ཏེ།ཨོྃ་ཨ་མྦ་ཧཱུཾ། ཨོྃ་ཨཱྃ། ཨོྃ་སརྦྦ་ཏ་ཐཱ་ག་ཏ་ཀཱ་ཡ་ཨ་གྲེ །ཨོྃ་སརྦ་ཏ་ཐཱ་ག་ཏ། བཱཀ་བི་ཤོ་དྷ་ནེ། ཨོྃ་སརྦྦ་ཏ་ཐཱ་ག་ཏ་ཙིཏྟ་བཛྲེ་ཨཿ། ཨོྃ་སྥོ་ཊ་ཡ་སརྦྦ་ཨ་པཱ་ཡ་བནྡྷནཱ་ནི་པྲ་མོ་ཀྵ་ཡ་སརྦ་ཨ་པཱ་ཡ་ག་ཏི་བྷྱཿསརྦྦས་མ་ཡ་

བཛྲ་ཧཱུཾ་ཕཊ། སྡིག་པ་དྲལ་བའི་ཕྱག་རྒྱ་དང་སྔགས་སོ། །དེ་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་གསང་བ་མཆོག་གི་དངོས་གྲུབ་རྡོ་རྗེ་འཛིན་པ་ཆེན་པོའམ་དེ་དེ་བཞིན་གཤེགས་པ་ཉིད་དུ་འགྱུར་རོ། །འཇམ་དཔལ་འདི་ནི་དགེ་བའི་རྩ་བ་མ་བསྐྲུན་པའི་སེམས་ཅན་རྣམས་ཀྱི་རྣ་ལམ་དུ་གྲག་པར་མི་འགྱུར་ཞིང་དགེ་བའི་རྩ་བ་མ་བསྐྲུན་པའི་སེམས་ཅན་གྱིས་བྲི་བ་དང་བཀླག་པ་དང་བརྗོད་པ་དང་རིམ་གྲོར་བྱ་བ་དང་བླ་མར་བྱ་བ་དང་། རྗེད་པར་བྱ་བ་དང་མཆོད་པར་བྱ་བར་ཡང་ནུས་པ་མ་ཡིན་ནོ། །གཞན་དུ་ན་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་འདི་ཐ་ན་ཡི་གེ་གཅིག་ཙམ་ཡང་ཐོས་ནས་སེམས་ཅན་དེ་སངས་རྒྱས་མང་པོ་ལ་དགེ་བའི་རྩ་བ་བསྐྲུན་པར་རིག་པར་བྱ་ན་སླར་ཡང་མཐའ་དག་མ་ལུས་པ་རྫོགས་པ་ལྟ་ཅི་སྨོས། འཇམ་དཔལ་སེམས་ཅན་གང་ལ་ལ་གང་གཱའི་ཀླུང་གི་བྱེ་མ་བརྒྱད་ཅུ་སྙེད་ཀྱི་སངས་རྒྱས་བྱེ་བ་ཁྲག་ཁྲིག་ལ་ཕྱག་བྱས་བླ་མར་བྱས་རྗེད་པར་བྱས་མཆོད་པར་བྱས་ན། དེས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་འདི་ཉན་པར་ནུས་སོ། །གང་དུ་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་བའི་སའི་ཕྱོགས་དེ་མཆོད་རྟེན་དུ་གྱུར་པར་འགྱུར་ཏེ་གང་ཟག་དེ་ཡང་ཕྱག་བྱ་བའི་འོས་སུ་འགྱུར་རོ། །གང་ཆོས་ཀྱི་རྣམ་གྲངས་འདི་ཡིད་ལ་གཟུང་བ་འམ། གླེགས་བམ་དུ་བྲིས་པར་གྱུར་ན་དེ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་སྐྱེ་བ་དྲན་པར་འགྱུར་རོ། །དེ་ལ་བདུད་སྡིག་ཏོ་ཅན་གྱིས་བར་དུ་མི་གཅོད་དོ། །རྒྱལ་པོ་ཆེན་པོ་བཞི་པོ་རྣམས་དང་། གཞན་ཡང་ལྷ་རྣམས་ཀྱིས་ཕྱི་བཞིན་རྗེས་སུ་འབྲངས་ཏེ། དེ་སྲུང་བ་དང་སྐྱོབ་པ་དང་། སྦེད་པ་བྱེད་པར་འགྱུར་ཞིང་ཚུལ་མ་ཡིན་པས་དུས་བྱེད་པར་མི་འགྱུར་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་དགོངས་པར་འགྱུར་རོ། །མདོར་ན་སངས་རྒྱས་ཀྱི་ཞིང་གང་དང་གང་ཡིད་ལ་འདོད་པ་དེ་དང་དེར་སྐྱེ་བར་འགྱུར་རོ། །འཇམ་དཔལ་འདི་ལྟ་བུའི་ཕན་ཡོན་མང་པོ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་སོ། །

དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་རྡོ་རྗེའི་སྙིང་པོ་ཐམས་ཅད་ཀྱི་རྒྱན་ཐེག་པ་ཆེན་པོ་མངོན་པར་རྟོགས་པ་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཆེན་པོ་གསང་བའི་དམ་ཚིག་རྡོ་རྗེ་དབྱིངས་ཀྱི་དབང་ཕྱུག་དམ་པ་ཆེན་པོ་འཁོར་ལོས་སྒྱུར་བ་ཆེན་པོ་བཞིས་ཡོངས་སུ་བསྐོར་བ་རྡོ་རྗེ་སྙིང་པོ་རྒྱན་ཅེས་བྱ་བའི་སྙིང་པོ་འདི་ཕྱུང་ངོ་། །མཚན་ཉིད་གཅིག་པའི་ཕྱིར་ཆོས་ཐམས་ཅད་གདོད་ནས་མ་སྐྱེས་པའོ། །ནམ་མཁའ་དང་མཉམ་པའི་ཕྱིར་ཆོས་ཐམས་ཅད་སྟོང་པ་ཉིད་དོ། །སྤྲོས་པ་ཐམས་ཅད་སྤངས་པའི་ཕྱིར་ཆོས་ཐམས་ཅད་གདོད་མ་ནས་ཡོངས་སུ་དག་པའོ། །ཐམས་ཅད་ཀྱི་སེམས་གསལ་བའི་མཚན་ཉིད་ཀྱི་ཕྱིར་ཆོས་ཐམས་ཅད་ཆོས་ཀྱི་དབྱིངས་ཡོངས་སུ་རྒྱས་པའོ། །ཨཿབྷྲུཾ་ཏྲཱྃ་ཧྲཱིཿཧཱུཾ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཡི་གེའི་ཚིག་འདི་བརྗོད་པ་ཙམ་གྱིས་ཆོས་ཀྱི་དབྱིངས་ཀྱི་མཐས་ཀླས་པ་སངས་རྒྱས་ཀྱི་ཡུལ་ཐམས་ཅད་དེ་སྙེད་ཉིད་དུ་ཤིན་ཏུ་གསལ་བ་རྒྱ་ཆེན་པོས་སྣང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་སླར་ཡང་བསྡུ་བས་བྱོན་ནས། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོའི་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྙིང་པོ་རྒྱན་ཞེས་བྱ་བའི་དཀྱིལ་འཁོར་ཆེན་པོ་བཤད་པར་བྱ་ཡིས་ཉོན་ཅིག་དེ་ལེགས་པར་ཉོན་ལ་རབ་ཏུ་ཡིད་ལ་གྱིས་ཤིག་དང་བཤད་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱང་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཡེ་ཤེས་ལ་ཞུགས་ལ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོ་ཆེན་པོ་ལ་བྱིན་གྱིས་བརླབ་པར་བྱོས་ཤིག །དེ་ནས་ཡང་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་རྣམ་པར་སྣང་མཛད་ཀྱིས་གསོལ་བ་བཏབ་པའི་ཚིག་ཐོས་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་ཞུགས་ཏེ།

བྱིན་གྱིས་བརླབས་ནས་དེ་ལས་འཐོན་ཏེ། དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་རྣམ་པར་གནས་སོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབྱུང་གནས། རྡོ་རྗེ་སྙིང་པོའི་རྒྱན་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་ཀྱི་དབྱིངས་ཀྱི་རྡོ་རྗེ་ཆེན་པོ་སྙིང་པོའི་རྒྱན་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་བཀོད་པ་ཆེན་པོ་བཀའ་སྩལ་པ། དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་མཆོག་གྱུར་པ། །རྡོ་རྗེ་སྙིང་པོ་གསང་ཆེན་པོ། །དེ་བཞིན་གཤེགས་པ་ཀུན་ལྡན་དགེ། །རྡོ་རྗེ་སྙིང་པོ་དང་མཚུངས་པ། །ཁམས་རྣམས་ཐམས་ཅད་རྣམ་པར་སྤྲུལ། །སངས་རྒྱས་ཀུན་གྱི་བདུད་རྩི་དང་། །གཞན་ཡང་བཅུད་ལེན་དང་མཚུངས་པ། །དེ་བཞིན་གཤེགས་པ་ཀུན་གྱི་གསང། །རྡོ་རྗེ་ཀུན་གྱི་རང་བཞིན་གྲོང་། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ནི་རྣམ་པར་མཛེས། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཆུན་པོས་སྤྲས། །གྲྭ་ཡི་ཆ་རྣམས་ཐམས་ཅད་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་རྣམས་ཀྱིས་སྤྲས། །རྡོ་རྗེའི་ཐིག་རྣམས་ཀྱིས་སྤྲས་པའི། །ཕྱི་རོལ་དཀྱིལ་འཁོར་ཐིག་གདབ་བྱ། །དེ་ཡིའང་ཕྱི་རོལ་དུ་བྱ་བ། །དཀྱིལ་འཁོར་བདུད་རྩི་ཡི་ནི་འོང་། །ཁྱད་པར་ཇི་ལྟ་བ་བཞིན་དུ། །སྔགས་པས་ཀུན་ནས་ཡོངས་བསྐོར་བྱ། །དེ་ལྟར་རྣམ་བཞིའི་རྣམ་པ་དང་། །ཇི་སྲིད་གྲོང་ནི་རྣམ་པ་བདུན། །སྦྱོར་བ་བདུན་དང་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། །སྒོ་དང་སྒོ་ཁྱུད་རིན་ཆེན་ནི། །ཡང་དག་མཐོ་བ་ལེགས་པར་གནས། །དེ་ཡི་གྲོང་གི་ནང་དུ་ནི། །རབ་ཞུགས་འཁོར་ལོ་འདྲ་བ་རུ། །རྡོ་རྗེ་ཐིག་གིས་ཡོངས་སུ་བསྐོར། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཀ་མདུན་གནས་རྣམས་སུ། །དཀྱིལ་འཁོར་ལྔ་ཡིས་བརྒྱན་པའོ། །དེ་ལྟར་འཁོར་ལོ་རྣམ་པ་གཉིས། །ནང་གི་དཀྱིལ་འཁོར་དང་མཚུངས་པ། །ཚད་མཛེས་པ་ཡི་སྙིང་པོ་ཆེ། །རྡོ་རྗེ་འཁོར་ལོས་རྣམ་པར་བརྒྱན། །གྲུ་བཞི་པ་དང་ཟླུམ་

པོ་ཉིད། །གྲུ་གསུམ་རྣམ་པར་ཡང་དག་བྱུང་། །ཟླ་ཕྱེད་རྣམ་པ་དང་མཚུངས་པ། །དཀྱིལ་འཁོར་རྣམ་པ་བཞི་སླར་ཡང་། །སློབ་དཔོན་རྡོ་རྗེ་ཡང་དག་འབྱུང་། །ཤེས་རབ་ཆེན་པོས་རབ་བརྟག་བྱ། །དབུས་ཀྱི་དཀྱིལ་འཁོར་དབུས་སུ་ནི། །པདྨ་ཆེན་པོ་འདབ་བརྒྱད་པ། །པདྨ་རཱ་གའི་འོད་མཚུངས་ལ། །སངས་རྒྱས་གཟུགས་བརྙན་གཞག་པར་བྱ། །དཀྱིལ་འཁོར་གྱི་ནི་དབུས་ཉིད་དུ། །སངས་རྒྱས་ཐམས་ཅད་བསྡུས་པའོ། །སངས་རྒྱས་ཀྱི་ནི་ངོས་ཀུན་ཏུ། །ཤེས་རབ་ཅན་གྱིས་གཞག་བྱ་བ། །དམ་ཚིག་མཆོག་བཞི་རྣམ་བཞི་ནི། །གོ་རིམས་བཞིན་དུ་ཡང་དག་བྲི། །རྡོ་རྗེ་ཆེན་པོ་སེང་གེའི་ཁྲིར། །འཁོར་ལོ་ཅན་གྱི་ཁྱབ་བདག་གཞག །གདུགས་དཀར་རྒྱལ་བའི་གཙུག་ཏོར་དང་། །གཟི་བརྗིད་ཕུང་པོ་སྐལ་བ་ཆེ། །རྣམ་པར་འཕྲོ་བྱེད་རྣམ་རྒྱལ་ཉིད། །དེ་བཞིན་གཙུག་ཏོར་ལྔ་པོ་ནི། །སངས་རྒྱས་སྐྱོབ་པ་ཐམས་ཅད་ལ། །ཡོངས་སུ་བསྐོར་ནས་སྣམ་བུ་ལ། །དཀྱིལ་འཁོར་ཀུན་ཏུ་བྲི་བར་བྱ། །རྡོ་རྗེ་ཤུགས་ཀྱིས་སོང་ན་ནི། །དཀྱིལ་འཁོར་དག་ནི་བཞི་པོ་རུ། །མི་བསྐྱོད་ལ་སོགས་རྣམ་པ་བཞི། །རྡོ་རྗེ་རྣལ་འབྱོར་དབང་ཕྱུག་བྲི། །མི་བསྐྱོད་པ་ཡི་དཀྱིལ་འཁོར་ནི། །ཟླ་འོད་ལྟ་བུའི་མདོག་ཏུ་བྱ། །རྡོ་རྗེ་སེམས་དཔའ་སོགས་རྒྱལ་པོ། །ཀུན་མཆོག་ས་ཡི་དབང་ཕྱུག་རྣམས། །རྡོ་རྗེ་སློབ་དཔོན་སྟོབས་པོ་ཆེ། །ཤེས་རབ་ཆེན་པོས་དགོད་པར་བྱ། །རིན་ཆེན་འབྱུང་གནས་དཀྱིལ་འཁོར་དུ། །རྡོ་རྗེ་རིན་ཆེན་སོགས་ཀྱིས་དགང་། །རྡོ་རྗེ་ཆོས་སོགས་གསང་བ་ཡི། །དཀྱིལ་འཁོར་ཚེ་དཔག་མེད་པའོ། །རྡོ་རྗེ་ལས་ལ་སོགས་ལྡན་པ། །དོན་ཡོད་གྲུབ་པའི་དཀྱིལ་འཁོར་རོ། །གཉིས་པ་འཁོར་ལོའི་དཀྱིལ་འཁོར་དུ། །རྡོ་རྗེ་ཤུགས་ཀྱིས་སོང་ནས་ནི། །རྣམ་གཟིགས་ལ་སོགས་སངས་རྒྱས་རྣམས། །དཀྱིལ་འཁོར་ཀུན་ཏུ་དེར་ནི་བྲི། །རྡོ་རྗེ་སྙིང་པོ་རྒྱལ་པོ་ཆེ། །ཁྱབ་བདག་གསང་བའི་ཆོས་དབང་ཕྱུག །འདོད་པའི་དོན་ཀུན་གྲུབ་པའི་ཕྱིར། །འབད་པ་ཡིས་ནི་བྲི་བར་བྱ། །བློ་གྲོས་རྒྱ་མཚོ་མི་ཟད་བློ། །བྱམས་པ་བདག་ཉིད་ཆེན་པོ་དང་། །ནམ་མཁའི་སྙིང་པོ་གྲགས་ཆེན་པོ། །

ཀུན་ཏུ་བཟང་པོ་ཉིད་དག་དང་། །ཕྱག་ན་རྡོ་རྗེ་བདག་ཉིད་ཆེ། །ཀུན་ནས་འབར་བས་འཁྲུག་པའི་འོད། །འཇམ་དཔལ་དབྱངས་ནི་རིགས་ཀྱི་མཆོག །སངས་རྒྱས་སྲས་བཟང་དྲི་མ་མེད། །སྒྲིབ་པ་ཐམས་ཅད་ངེས་པར་སེལ། །དེ་ནས་ས་ཡི་སྙིང་པོ་མཆོག །ནམ་མཁའི་མཛོད་ནི་མཛོད་དམ་པ། །ལག་ན་རིན་ཆེན་བླ་ན་མེད། །ངན་སོང་ཀུན་ནི་འཇོམས་པ་ནི། །དྲ་བ་ཅན་གྱི་འོད་ཅེས་བྱ། །དཔའ་བོ་འདི་དག་གསང་བ་ཆེ། །དཀྱིལ་འཁོར་འདི་དག་བྲི་བར་བྱ། །འཁོར་ལོ་དེ་ནི་དོར་ནས་ནི། །བློ་གྲོས་ལྡན་པས་ཕྱིར་སོང་སྟེ། །ཤར་དུ་སངས་རྒྱས་ཐམས་ཅད་ཀྱི། །ཕྱག་རྒྱ་གོ་རིམས་བཞིན་དུ་དགོད། །འཁོར་ལོ་མཛེས་པའི་དགེ་ལེགས་ཅན། །རྡོ་རྗེ་དཔལ་བེའུ་པད་ཅེས་བྱ། །གཙུག་ཏོར་རྣམ་པ་སྣ་ཚོགས་པ། །རྡོ་རྗེ་པད་མས་རྣམ་པར་བརྒྱན། །ལྷུང་བཟེད་དང་ནི་འཁར་གསིལ་དང་། །ཆོས་གོས་ཀྱང་ནི་ཁྱད་པར་དུ། །ཤཱཀྱ་སེང་གེ་ཇི་སྲིད་པར། །སངས་རྒྱས་ཀུན་གྱིས་རབ་ཏུ་གསུངས། །གང་ཞིག་དངོས་གྲུབ་མཆོག་འདོད་པ། །དེ་རྣམས་བློ་ལྡན་བརྟན་པས་བྲི། །བྱང་དུ་འཇིག་རྟེན་དབང་ཕྱུག་གི། །ཕྱག་རྒྱའི་ཚོགས་མཆོག་དེ་བཞིན་ཏེ། །པདྨ་ཨུད་པལ་ཉིད་དང་ནི། །སྤྱི་བླུགས་པགས་པའི་གཡང་གཞི་དང་། །དབྱུག་གུའི་ཤིང་ནི་མཁས་པ་ཡིས། །མ་མྱོས་པ་རུ་བྲི་བར་བྱ། །སླར་ཡང་ལྷོ་རུ་སོང་ནས་ནི། །ཕྱ་ན་རྡོ་རྗེ་བདག་ཉིད་ཆེ། །སློབ་དཔོན་བདག་ཉིད་ཆེན་པོ་ཡིས། །ཕྱག་རྒྱ་འབད་པས་བྲི་བར་བྱ། །རྡོ་རྗེ་པཊྚ་ཤ་དང་ནི། །དྲིལ་བུ་རབ་ཏུ་མཛེས་པ་དང་། །དབྱུག་གུ་དང་ནི་ཐོ་བ་དང་། །དབྱུག་པ་རྡོ་རྗེས་མཚོན་པ་དང་། །ལྕགས་སྒྲོག་དང་ནི་རྩེ་གསུམ་ཡང་། །འདི་དག་དཔའ་བོའི་ཕྱག་རྒྱའོ། །དཀྱིལ་འཁོར་ནུབ་ཏུ་སོང་ནས་ནི། །འཇམ་པའི་དབྱངས་ནི་བློ་དང་ལྡན། །གསང་བའི་ཆོས་ནི་དམ་པའི་མཆོག །བརྩོན་འགྲུས་ཆེན་པོའི་ཕྱག་རྒྱ་བྲི། །ཨུད་པལ་འཁོར་ལོ་རྡོ་རྗེ་དང་། །རལ་གྲི་ཡང་ནི་ཁྱད་པར་དུ། །ཐོད་པ་དང་ནི་དགྲ་སྟ་ཉིད། །རྨ་བྱ་དང་ནི་སེང་གེ་ཉིད། །ཕྱག་རྒྱ་འདི་ནི་བརྩོན་འགྲུས་ཆེ། །མཁས་པ་ཡིས་ནི་དགོད་པར་བྱ། །

འཁོར་ལོའི་གྲྭ་ནི་ལེགས་གནས་པར། །རྡོ་རྗེ་སྒེག་མོ་ལ་སོགས་བྲི། །ཕྱི་ཡི་འཁོར་ལོའི་གྲྭ་རུ་ནི། །རྡོ་རྗེ་བདུག་པ་ཞེས་བྱ་སོགས། །བདག་ཉིད་ཆེན་པོ་འབད་པ་ཡིས། །མཆོད་པ་འདི་དག་བྲི་བར་བྱ། །ཕྱི་ཡི་དཀྱིལ་འཁོར་གྲྭ་རྣམས་སུ། །གཟུགས་ཀྱི་རྡོ་རྗེ་ལ་སོགས་མིན། །གཟུགས་སྒྲ་དེ་བཞིན་དྲི་དང་ནི། །ཁྱད་པར་དུ་ནི་རོ་ཉིད་དང་། །རེག་དང་ཆོས་ཀྱི་དབྱིངས་དང་ནི། །མཁས་པ་ཡིས་ནི་དགོད་པར་བྱ། །སྒོ་ཡི་ནང་ནི་ཐམས་ཅད་དུ། །སྒོ་སྐྱོང་བ་ནི་དགོད་པར་བྱ། །དེ་བཞིན་དཀྱིལ་འཁོར་གཉིས་པ་རུ། །རྡོ་རྗེ་ཤུགས་ཀྱིས་སོང་ནས་ནི། །གོ་རིམས་བཞིན་དུ་སངས་རྒྱས་ཀྱི། །ཡུམ་རྣམས་འབད་པས་བྲི་བར་བྱ། །ནམ་མཁའི་སྤྱན་ཞེས་བྱ་བ་ནི། །སངས་རྒྱས་སྤྱན་ཞེས་བྱ་བ་དང་། །ཤེས་རབ་ཕ་རོལ་ཕྱིན་མ་ཡང་། །ཕྱག་རྒྱ་ཀུན་དང་ཡང་དག་ལྡན། །ཇི་སྲིད་དེ་བཞིན་གཤེགས་རིག་མ། ། ཐམས་ཅད་ཤར་དུ་དགོད་པར་བྱ། །དེ་ནས་བློ་གྲོས་ལྡན་པ་ཡིས། །བྱང་གི་ཕྱོགས་སུ་སོང་ནས་ནི། །གོས་དཀར་མ་དང་སྒྲོལ་མ་ཆེ། །ཁྲོ་གཉེར་ཅན་དང་གྲགས་འཛིན་མ། །ཁྱད་པར་དུ་ནི་དཔལ་བདུན་དང་། །མདའ་བདུན་དང་ནི་དབྱངས་ཅན་མ། །དེ་ལ་སོགས་པའི་ལྷ་མོ་རྣམས། །བྲན་དང་བྲན་མོར་ཡང་དག་ལྡན། །དེ་བཞིན་ཕོ་ཉ་ཕོ་ཉ་མོ། །གསང་བའི་ཕྱག་རྒྱ་ལྷན་ཅིག་བྲི། །རྡོ་རྗེ་ཤུགས་ཀྱིས་སོང་ནས་ནི། །ལྷོ་ཡི་ཕྱོགས་སུ་རབ་ཕྱིན་ལ། །མཱ་མ་ཀཱི་དང་ལྕགས་སྒྲོག་དང་། །ཁབ་རྩེ་རྡོ་རྗེའི་མཚན་མ་མཆོག །དེ་ལྟར་བྲིས་ནས་བློ་ལྡན་གྱིས། །ནུབ་ཀྱི་ཕྱོགས་སུ་སོང་ནས་ནི། །དེར་ནི་ཕྱིན་ནས་ཤེས་ལྡན་གྱིས། །སྐྲ་ཅན་སྟོབས་ཆེན་བྲི་བར་བྱ། །དེ་བཞིན་འདམ་བུ་མདའ་རྒྱུ་དང་། །ལྷ་མོ་ཟླ་མཛེས་འོད་ཟེར་འདྲ། །དཀྱིལ་འཁོར་ཀུན་གྱི་མཚམས་རྣམས་སུ། །དེ་བཞིན་ཉེ་བའི་སྐྲ་ཅན་མ། ། འབད་པ་ཡིས་ནི་བྲི་བར་བྱ། །རབ་བཀྲ་ནོར་གྱི་བློ་གྲོས་དང་། །འགུགས་བྱེད་ཕོ་ཉ་ལྔ་དང་ལྡན། །གྲྭ་ཡི་ཆ་རུ་བྲི་བྱ་བ། །རྡོ་རྗེ་མདུང་རྩེ་ཞེས་བྱ་སོགས། །སྒོ་ཡི་ནང་ནི་ཐམས་ཅད་དུ། །སྒོ་སྐྱོང་བ་ནི་རྣམ་པར་བྲི། །གཞན་གྱིས་མི་ཐུབ་ལྷ་མོ་ཆེ། །དེ་བཞིན་རལ་པ་གཅིག་

མ་མཆོག །རྡོ་རྗེ་དྲེགས་མོ་ལྷ་མོ་ཆེ། །རྡོ་རྗེ་ཀུམ་བྷི་ཡང་དག་བྲི། །དེ་ནས་བློ་ལྡན་དཀྱིལ་འཁོར་ནི། །ཐམས་ཅད་ལས་ནི་འཐོན་ནས་སུ། །ཤར་གྱི་ཆ་ནི་ཐམས་ཅད་དུ། །སྔགས་པ་མཉམ་པར་གཞག་པ་ཡིས། །ཁྲོ་ཆེན་གཞན་གྱིས་མི་ཐུབ་པ། །དེ་བཞིན་མི་གཡོ་ཞེས་བྱ་དང་། །ཁམས་གསུམ་རྣམ་རྒྱལ་སྙིང་པོ་ནི། །མངའ་བདག་བརྒྱ་ཕྲག་ལྔ་ཡིས་བསྐོར། །ཤར་དུ་བྲིས་ནས་སྔགས་པ་ཡིས། །དེ་ནས་བྱང་གི་ཆར་སོང་སྟེ། །རྟ་མགྲིན་ཁྲོ་བོ་ཆེན་པོ་དང་། །སྐར་མའི་སྤྱན་ནི་ཁྱད་པར་དུའོ། །ཁྲོ་གཉེར་རིམ་པ་རྣམ་བསྒྱིངས་པ། ། ཁྲོ་བོ་བློ་ལྡན་བརྩོན་འགྲུས་ཆེ། །ཕོ་ཉ་བྲན་རྣམས་ཐམས་ཅད་དང་། །མ་མོ་སྟོང་གིས་ཡོངས་བསྐོར་བར། །འཇིག་རྟེན་མགོན་གྱིས་བཀའ་སྩལ་ཏོ། །དེ་ནས་བློ་གྲོས་ལྡན་པ་ཡིས། །ལྷོ་ཡི་ཕྱོགས་སུ་སོང་ནས་སུ། །དེར་ནི་ཕྱིན་ཏེ་བརྩོན་ཆེན་པོ། །ཁྲོ་བོ་ཆེན་པོ་སྟོབས་པོ་ཆེ། །རྡོ་རྗེ་མཚན་པས་ལེགས་མཚན་པ། །ཤེས་རབ་ཆེན་པོས་དགོད་པར་བྱ། །ཁྲོ་བོ་ཟླ་བའི་ཐིག་ལེ་དང་། །དེ་བཞིན་ཁྲོ་ཆེན་རྡོ་རྗེ་འཆང་། །ཁྲོ་བོ་གཟེགས་མ་སྟོབས་པོ་ཆེ། །ཁྲོ་བོ་བདུད་རྩི་འཁྱིལ་པ་དང་། །རྡོ་རྗེ་ས་འོག་ས་འོག་དང་། །དེ་བཞིན་འཇིགས་པའི་མིག་ཅན་དང་། །རྐང་པས་བསྣུན་པའི་རྡོ་རྗེ་མཆོག །གསང་དང་རབ་གསང་རྗེས་འགྲོ་དང་། །བྲན་དང་ཕོ་ཉ་རྗེས་འགྲོ་བ། །རྗེས་འགྲོ་ཅན་བློ་ཁྲོ་བོ་ནི། །སྟོང་ཕྲག་གསུམ་དང་ཕྱེད་ཀྱིས་བསྐོར། །དེ་ལྟར་བྲིས་ནས་བློ་ལྡན་གྱིས། །ནུབ་ཀྱི་ཕྱོགས་སུ་ཕྱིན་ནས་ནི། །དེར་ནི་སོང་སྟེ་བརྩོན་ཆེན་པོ། །གཤིན་རྗེ་མཐར་བྱེད་ཅེས་བྱ་བ། །གདོང་དྲུག་པ་ལ་ལག་དྲུག་པ། །ཁྲོ་བོ་ཡི་གེ་བདུན་ཞེས་བྱ། །ཁྲོ་བོའི་གཙོ་བོ་སྟོང་ཕྲག་ནི། །བདུན་དག་གིས་ནི་ཡོངས་བསྐོར་བའོ། །དཀྱིལ་འཁོར་ཆ་ནི་ཐམས་ཅད་དུ། །ཁྲོ་བོ་གཏུམ་པོ་ཐམས་ཅད་བྲི། །དེ་ནས་བློ་ལྡན་འོངས་ནས་སུ། །རང་རྒྱལ་རྒྱལ་བ་ཐམས་ཅད་ནི། །དཀྱིལ་འཁོར་ཀུན་ཏུ་བྲི་བར་བྱ། །དེ་ནས་སྔགས་པ་འོངས་ནས་ནི། །རྒྱལ་བ་ཉན་ཐོས་བྲི་བར་བྱ། །དེ་ནས་ཐམས་ཅད་བྲིས་ནས་སུ། །དེ་རྣམས་ཚངས་སོགས་ལྷ་

དེ་དག །དཀྱིལ་འཁོར་ཀུན་ཏུ་རྣམ་པར་བྲི། །དབང་ཕྱུག་ཆེ་དང་ཁྱབ་འཇུག་དང་། །ཟླ་བ་ཉི་མ་ཞེས་བྱ་དང་། །གཟའ་བརྒྱད་དང་ནི་འཇིག་རྟེན་སྐྱོང་། །རྒྱལ་ཆེན་རིགས་ནི་བཞི་པོ་དང་། །དེ་བཞིན་སུམ་ཅུ་རྩ་གསུམ་ཉིད། །འཐབ་བྲལ་རྣམས་དང་དགའ་ལྡན་རྣམས། །འཕྲུལ་དགའ་གཞན་འཕྲུལ་དབང་བྱེད་རྣམས། །ཚངས་ཆེན་རྣམས་དང་། འོད་ཆུང་རྣམས་དང་། ཚད་མེད་འོད་རྣམས་དང་། འོད་གསལ་རྣམས་དང་། དགེ་ཆུང་རྣམས་དང་། ཚད་མེད་དགེ་རྣམས་དང་། དགེ་རྒྱས་རྣམས་དང་། སྤྲིན་མེད་རྣམས་དང་། བསོད་ནམས་སྐྱེས་རྣམས་དང་། འབྲས་བུ་ཆེ་བ་རྣམས་དང་། མི་ཆེ་བ་རྣམས་དང་། མི་གདུང་བ་རྣམས་དང་། གྱ་ནོམ་སྣང་བ་རྣམས་དང་། ཤིན་ཏུ་མཐོང་བ་རྣམས་དང་། འོག་མིན་རྣམས་དང་། དག་པའི་གནས་པ་རྣམས་དཀྱིལ་འཁོར་ཐམས་ཅད་ཀྱི་མཚམས་སུ་དགོད་པར་བྱའོ། །དེ་ནས་དབང་ལྡན་དུ་དབང་ལྡན་དང་། དབང་པོར་དབང་པོ་དང་། མེར་མེ་ལྷ་དང་། གཤིན་རྗེར་གཤིན་རྗེ་དང་། བདེན་བྲལ་དུ་བདེན་བྲལ་དང་། ཆུར་ཆུ་ལྷ་དང་། རླུང་དུ་རླུང་ལྷ་དང་། ལུས་ངན་དུ་ལུས་ངན་རྣམས་དང་། ཕྱི་རོལ་དུ་ཁོར་ཡུག་ཆེན་པོའི་རིའི་རྒྱལ་པོ་བྲི་བར་བྱའོ། །རབ་དགའི་ནང་དུ་རྒྱ་མཚོ་ཆེན་པོ་བདུན་དགོད་པར་བྱའོ། །ཕྱི་རོལ་གྱི་ཤར་ཕྱོགས་སུ་ཁྲོ་བོ་གཞན་གྱིས་མི་ཐུབ་པ་ཞེས་བྱ་བའི་ཕྱག་རྒྱ་ཆེན་པོ་དགོད་པར་བྱའོ། །ལྷོར་རྡོ་རྗེ་འཇིགས་བྱེད་ཀྱི་སྤྱན་གྱི་ཕྱག་རྒྱ་ཆེན་པོ་དགོད་པར་བྱའོ། ། ནུབ་ཏུ་ཁྲོ་བོའི་རྒྱལ་པོ་ཆེན་པོ་གཤིན་རྗེ་གཤེད་ཀྱི་ཕྱག་རྒྱ་ཆེན་པོ་དགོད་པར་བྱའོ། །བྱང་དུ་རྟ་མགྲིན་གྱི་ཕྱག་རྒྱ་ཆེན་པོ་རྣམ་པར་དགོད་པར་བྱའོ། །དེ་ལྟ་བུའི་གྲུ་བཞི་པ། སྒོ་བཞི་པའི་དཀྱིལ་འཁོར་ཆེན་པོ་དར་དང་མེ་ཏོག་གི་ཆུན་པོ་དང་། སྒོ་ཁྱུད་དང་། གདུགས་དང་། རྒྱལ་མཚན་དང་། བ་དན་བསྒྲེང་བ། དྲ་བ་དང་དྲ་བ་ཕྱེད་པས་བཀླུབས་པ། དེ་ལྟ་བུའི་དཀྱིལ་འཁོར་ཆེན་པོ་བྲིས་ལ་བསྒོམ་པར་བྱའོ། །དེའི་ཕྱི་རོལ་དུ་འགྲོ་བ་ལྔ་པོ་གཞག་པར་བྱའོ། །དེ་བཞིན་དུ་དབུས་སུ་རིའི་རྒྱལ་པོ་ལྷུན་པོའི་ཚད་དཔག་ཚད་བརྒྱ་སྟོང་ཕྲག་དུ་མ་

རྣམ་པར་བསམས་ནས། དེའི་སྟེང་དུ་རྡོ་རྗེ་སེང་གེའི་ཁྲི་ལ་བཞུགས་པའི་སངས་རྒྱས་བཅོམ་ལྡན་འདས་གཞག་པར་བྱའོ། །དེ་ལྟར་དཀྱིལ་འཁོར་རིམ་གྱིས་བཀོད་ནས་ཉེ་བར་སྤྱོད་པ་ཐམས་ཅད་ཀྱི་ཚོགས་མཆོད་ནས་ཉེ་བར་ཞུགས་ཏེ། དགུག་པ་དང་གཞུག་པ་དང་དམ་ཚིག་གིས་བཅིངས་ནས་མཉེས་པར་བྱས་ཏེ། མཆོད་པ་དང་དབང་བསྐུར་བ་དང་བྱིན་གྱིས་བརླབ་པ་དང་སྤྲོ་བ་དང་། བསྡུ་བ་ལ་སོགས་པ་བྱས་ནས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་བསྒོམ་པར་བྱའོ། །དེ་བཞིན་དུ་བསྒོམ་པ་ལས་བླང་སྟེ་དེ་བཞིན་གཤེགས་པ་ཐམས་ཅད་དང་རྡོ་རྗེ་སེམས་དཔའི་བདག་ཉིད་ནི་རྣམ་པར་སྣང་མཛད་ངའོ་ཞེས་བསྒོམ་པར་བྱའོ། །དེ་ལྟ་བུ་ལས་ལངས་ནས་དེའི་སྙེམས་པ་འཆང་ཞིང་སྙིང་རྗེ་དང་བྱམས་པའི་འདྲེན་བྱེད་དང་མིག་གིས་ཕྱོགས་བཅུའི་འཇིག་རྟེན་གྱི་ཁམས་མཐའ་ལས་འདས་པ་རབ་འབྱམ་རྒྱ་མཚོའི་སྤྲིན་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྐུའི་སྤྲིན་གྱིས་ཀུན་ནས་བཀང་སྟེ། དེ་བཞིན་གཤེགས་པ་རབ་ཏུ་འབབ་པས་རྡོ་རྗེ་སེམས་དཔའ་ཧཱུཾ་མཛད་ཀྱི་ཕྱག་རྒྱ་རང་གི་ལུས་ལ་ཞུགས་ནས། ཕྱོགས་ཐམས་ཅད་ཧཱུཾ་གི་ཡི་གེའི་སྒྲས་རབ་ཏུ་བསྒྲག་པར་བྱའོ། ། བསྣུན་པ་བཞིས་རོལ་པ་དང་བཅས་པས་ཕྱག་རྒྱ་ལ་བཟླས་པ་བྱ་སྟེ། དམ་ཚིག་གི་ཕྱག་རྒྱ་བཅིངས་ལ། ཆོ་ག་བཞིན་དུ་རྡོ་རྗེ་སློབ་དཔོན་གྱིས་བཀུག་ནས་བཅུག་སྟེ་བཅིངས་ལ་དམ་ཚིག་ལ་གཞག་པར་བྱས་ནས་རྡོ་རྗེ་སེ་གོལ་གྱི་སྦྱོར་བ་དང་ཀུན་ནས་འབེབས་པའི་ཕྱག་རྒྱས་བདག་ཉིད་ལ་དབབ་སྟེ། སྙིང་པོ་འདི་བཞིས་དེ་བཞིན་གཤེགས་པ་ཐམས་ཅད་དང་བདག་མཚུངས་སོ་སྙམ་དུ་བསམ་པར་བྱའོ། །དེ་ལ་འདི་ནི་ཐམས་ཅད་འབེབས་པའི་སྙིང་པོ་བཞི་པོར་འགྱུར་རོ། །ཨ་ཨཱ་ཨྃ་ཨཿབདག་བྱིན་གྱིས་བརླབ་པ་ལ་སོགས་པ་བྱས་ནས་སློབ་དཔོན་གྱིས་དེ་བཞིན་གཤེགས་པ་ཐམས་ཅད་དང་བདག་མཚུངས་པ་ཡིན་ནོ་ཞེས་ང་རྒྱལ་བསྐྱེད་པར་བྱས་ནས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ལྕགས་ཀྱུའི་སེ་གོལ་གཏོགས་ནས་སངས་རྒྱས་ཐམས་ཅད་སྤྱན་དྲང་བར་བྱའོ། །དེ་ལ་སྙིང་པོ་ནི་འདི་ཡིན་ཏེ།

བཛྲ་ས་མཱ་ཛཿ། ཨཱ་གཙྪ་ཨཱ་གཙྪནྟུ། སརྦྦ་ཏ་ཐཱ་ག་ཏ། སརྦྦ་བོ་དྷི་སཏྭ་པ་རི་བྲྀ་ཏཱཿ པྲཏྱེ་ཀརྷ་ཧ་ཏེ་སྭཱ་ཧཱ་ཞེས་སོ། །ཨོཾ་བཛྲ་ས་མཱ་ཛཿ། ཨཱ་གཙྪ། ཨཱ་གཙྪ། སརྦྦ་ཏ་ཐཱ་ག་ཏཱ་བཛྲ་ཡོ་གཱི་ཤྭར། ས་ཏྤ་ན་ཡཻཿ། སྭ་ཧཱ་ཨ་ཧཱཿ། །དེ་ནས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་དང་བཅས་པ་དཀྱིལ་འཁོར་ཐམས་ཅད་ཡོངས་སུ་རྫོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་དང་རྒྱུད་དང་གཟུགས་རྣམས་དང་ལྷན་ཅིག་དཀྱིལ་འཁོར་དུ་འདུས་ནས་བྱོན་པར་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་ཕྱག་རྒྱ་ཆེན་པོ་བདག་ཉིད་རྣམ་པར་བསྒོམས་ནས་མིང་བརྒྱ་རྩ་བརྒྱད་པ་བཏོན་ལ་ཆོ་ག་ཇི་ལྟ་བ་བཞིན་དུ་མཆོད་པ་བྱས་ནས་དེ་བཞིན་གཤེགས་པ་ཐམས་ཅད་བརྟན་པར་བྱས་ནས་སྒོ་བཞི་པོ་རྣམས་སུ་རྡོ་རྗེ་ལྕགས་ཀྱུ་ལ་སོགས་པས་ལས་བྱས་ཏེ། ལས་ཆེན་པོ་དམ་པའི་ཕྱག་རྒྱས་དེ་བཞིན་གཤེགས་པ་ཐམས་ཅད་གཞུག་པར་བྱའོ། །ཨོཾ་སརྦྦ་ཏ་ཐཱ་ག་ཏ། སུ་ར་ཏ་བཛྲ་བཛྲ་སཏྭ་ཛཿཧཱུཾ་བཾ་ཧོཿཨ་དྷི་ཏིཥྠནྟུ། སརྦྦ་ཏ་ཐཱ་ག་ཏ་མ་ཧཱ་མཎྜ་ལྃ་ཞེས་སོ། །དེ་ནས་གསང་བའི་མཆོད་པ་ལ་སོགས་པ་རྣམས་ཀྱིས་མཆོད་པ་བྱས་ནས་དེ་བཞིན་གཤེགས་པ་ཐམས་ཅད་ལ་གསོལ་བ་གདབ་པར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་གསོལ་བ་འདེབས་ལགས་ཀྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་བྱིན་གྱིས་བརླབ་ཏུ་གསོལ། སེམས་ཅན་ཐམས་ཅད་ཀྱི་དོན་མཛད་དུ་གསོལ། བདག་ལ་དངོས་གྲུབ་ཐམས་ཅད་སྩལ་དུ་གསོལ། ཇི་ལྟར་བདག་གིས་དེ་བཞིན་གཤེགས་པ་ཐམས་ཅད་ཀྱི་མཆོད་པ་རབ་འབྱམ་རྒྱ་མཚོའི་སྤྲིན་རྣམས་ཀྱི་ཆོས་ཀྱི་དབྱིངས་ཀྱི་མཐས་ཀླས་པའི་སངས་རྒྱས་ཐམས་ཅད་ཀྱི་ཡུལ་ཀུན་ནས་བཀང་སྟེ་བྱིན་གྱིས་བརླབ་པར་བགྱིའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་པར་བགྱིའོ། །དེ་ནས་འདིར་རྡོ་རྗེ་སྙིང་པོའི་རྒྱན་ཆོས་ཀྱི་དབྱིངས་ཀྱི་དཀྱིལ་འཁོར་དུ་སློབ་མ་གཞུག་པའི་ཆོ་ག་རྒྱས་པར་འགྱུར་བ་ནི་དེ་ནས་གོས་དམར་པོ་ཕྲག་པར་གཟར་ཏེ་དེ་བཞིན་དེ་

བཞིན་གཤེགས་པ་ཐམས་ཅད་ལ་ཕྱག་འཚལ་བའི་ཐལ་མོ་སྦྱར་ནས། སྔགས་འདིས་སྙན་གསན་དབབ་པར་བྱ་སྟེ། ས་མ་ཡ་ཧོཿ། ས་མ་ཡ་སྟྭཾ། ས་མ་ཡ་བཛྲ་ཨ་དྷིཥྛཱ་ནཾ་ཀུ་རུ་མཱཾ། སརྦྦ་ཏ་ཐཱ་ག་ཏ་ས་མ་ཡེཥུ་མེ་ཨ་དྷི་ཏིཥྠནྟུ་སརྦྦ་བུདྡྷ་མཱཾ་པྲ་བེ་ཤ་ཡནྟུ། པྲ་ཏི་པཱ་ལ་ཡནྟུ། པཱུ་ཛཱ་ཉྩ་མེ་པྲ་ཡཙྪནྟུ། པྲ་པིཥྚོསྨི། སརྦྦ་ཏ་ཐཱ་ག་ཏ་བཛྲ་མཎྜ། ཨ་ལཾ་ཀཱ་རེ་མ་ཧཱ་བཛྲ་མཎྜ་ལེ་པྲ་ཏི་བ་ལ་ཡན་ཏུ་མཱཾ་སྟུ་ཛཉྩ་མེ་པྲ་ཡཙྪནྟུ། དེ་ནས་སློབ་དཔོན་གྱིས་དེའི་ཐལ་མོར་མེ་ཏོག་དཀར་པོའི་ཕྲེང་བ་སྔགས་འདིས་བཏགས་ནས་ནང་དུ་མེ་ཏོག་བཞི་དང་སོར་མོའི་རྩེ་མོར་མེ་ཏོག་རེ་རེ་བཅུག་ལ་དེ་ནས་སྔགས་འདི་བརྗོད་ཅིང་གཞུག་པར་བྱའོ། །ཧཱུྃ་དྷྭཾ་ཧྲཱོཾ་ཀྲུཾ་ཤྲུཾ་ཛྲུཾ་བཿཀཿ པྲྃ་ཁིཾ་ཤྲཱིཾ་ཛྲུཾ་ཧཱཾ་མཱཾ། ཨ་དྷི་ཏིཥྛམཱཾ། སརྦྦ་ཏ་ཐཱ་ག་ཏ་ས་མ་ཡ་ས་ཏྭ་པྲ་བི་ཤཱ་མི། དེ་ནས་སློབ་དཔོན་གྱིས་དེའི་གདོང་གཡོགས་བཅིངས་ལ་དེ་བཞིན་གཤེགས་པ་ཐམས་ཅད་ཀྱི་མྱ་ངན་ལས་འདས་པའི་གྲོང་ཁྱེར་ཆོས་ཀྱི་དབྱིངས་ནམ་མཁའི་ཁམས་རབ་ཏུ་ཁྱབ་པའི་སྦྱོར་བས་དེ་བཅུག་ལ་སྔགས་འདིས་མེ་ཏོག་གཏོར་བར་བྱའོ། །སྔགས་ནི་ས་མ་ཡོ་ཧཾ་ས་མ་ཡ་སྟྭཾ་ས་མ་ཡ་ཧཱུཾ། གང་ལ་མེ་ཏོག་རྣམས་ལྷུང་བ་དེ་ཉིད་དེའི་ལྷར་བྱིན་པར་བྱའོ། ། དེ་ནས་ཆོ་ག་བཞིན་དུ་སྔགས་འདིས་དབབ་པར་བྱའོ། །ན་མཿསརྦ་ཏ་ཐཱ་ག་ཏེ་བྷྱཿ། ཏ་ཊ་ཏ་ཊ། དྷ་མ་དྷ་མ། བཛྲ་ཧཱུཾ་བི་ཀྲི་ཏ་བིངྩ་ཛྫི་ཧྭཱ་དུ་རྡཱན་ཏ་ད་མ་ཀ །ཧ་སི་ཏ་ལཾ་བོ་ད་ར། ཀ་ཧ་ཀ་ཧ། ཙུ་ལུ་ཙུ་ལུ། མུཉྩ་མུཉྩ། ཨཊྚཱཊྚ་ཧཱ་ས། ད་ར་བི་ད་ར། བཛྲ་བཛྲོངྒ་ཏ། བཛྲ་ནེ་ཏྲ། བཛྲ་ཤྲོ་ཏྲ། བཛྲ་གྷྲཱ་ཎ། བཛྲ་དཾཥྚྲ་ཀིཉྩི་རཱ་ཡ་སི་པྲ་བི་ཤ །བཛྲ་པཱ་ཎེ་ཧྲཱི་ད་ཡ་མཱ་བི་ཤ །མཱ་བི་ཤ །གྷཱུརྞྞ་གྷཱུརྞྞ། པཱུརྞྞ་པཱུརྞྞ། གྷུརྞྞ་པ་ཡ། གྷཱུརྞྞ་པ་ཡ། བྷྲཱ་མ་ཡ་བྷྲཱ་མ་ཡ། པཱ་ཏ་ཡ་མོ་ཊ་ཡ། ཨ་བེ་ཤ་ཡ། ཛལྤ་ཛལྤ། ཛལྤ་པ་ཡ་ཛལྤ་པ་ཡ། ལ་གྷུ་ལ་གྷུ། སརྦྦ་ཏ་ཐཱ་ག་ཏཱ་ཛྙཱ་ཀ་ར་པྲ་བ་ར། དྷརྨྨ་ལ་བྡྷ།བི་ཛ་ཡ། ཧེ་ཧེ་བཛྲ་ཛྷཾ་ཀཱ་ར་ཧཱུྃ་ཀྲྀ་ཏ་སྭཱ་ཧཱ། དབབ་པའི་དམ་ཚིག་གོ། །དེ་ལྟར་ཕབ་ནས་ཀྱེ་ཁྱོད་ཀྱིས་གང་དགེ་བའམ་མི་དགེ་བ་མཐོང་ངམ་ཞེས་དྲིའོ། །ད་ནས་དེ་དེ་བཞིན་གཤེགས་པའམ། རྡོ་རྗེ་འཛིན་པའམ་དགེ་བའམ་

མི་དགེ་བ་བདག་གིས་འདི་ལྟ་བུ་མཐོང་ངོ་ཞེས་སྨྲ་བར་འགྱུར་རོ། །དེ་ནས་སློབ་དཔོན་གྱིས་དེ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རང་བཞིན་དུ་ཡོངས་སུ་གཞག་ལ་མིག་བཅིངས་པ་བཀྲོལ་ལ་དབང་བསྐུར་བའི་དོན་དུ་དཀྱིལ་འཁོར་གྲུ་བཞི་པ་བྱས་ལ་དེའི་དབུས་སུ་ཁ་དོག་ཐམས་ཅད་ཀྱིས་པདྨ་ཆེན་པོ་འདབ་མ་བརྒྱད་པ་ཡིད་དུ་འོང་བའམ། སེང་གེའི་ཁྲི་རང་ཉིད་ཀྱིས་བྲིས་ཏེ་དེ་ནས་དེ་ལ་དར་གྱི་བགོ་བ་དང་། མེ་ཏོག་བདུག་པ་ལ་སོགས་པ་རྣམས་ཀྱིས་མཆོད་ལ་ཁྱད་པར་དུ་གཟུགས་དང་སྒྲ་དང་དྲི་དང་རོ་དང་རེག་བྱ་དང་གདུགས་དང་། རྒྱལ་མཚན་དང་། བ་དན་ལ་སོགས་པ་ཉེ་བར་མཁོ་བ་དང་། དུང་དང་། རྫ་རྔ་དང་། རྔ་བོ་ཆེ་དང་། དུང་ལ་སོགས་པ་དང་གར་དང་། གླུ་རྣམས་ཀྱིས་ལེགས་པར་མཆོད་ནས་ཅོད་པན་ལྔའི་དབང་བསྐུར་ཏེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སློབ་དཔོན་གྱི་གོ་འཕང་ལ་སྔགས་འདིས་རབ་ཏུ་གཞག་པར་བྱའོ། །ཨོྃ་སརྦྦ་ཏ་ཐཱ་ག་ཏ་བཛྲོ་ཥྞཱི་ཥ་ཨ་བྷི་ཥིཉྩ་ཨོྃ་བཛྲ་ས་ཏྭ་ཨ་བྷི་ཥིཉྩ་ཨོྃ་བཛྲ་རཏྣ་ཨ་བྷི་ཥིཉྩ། ཨོྃ་བཛྲ་པདྨ་ཨ་བྷི་ཥིཉྩ། ཨོྃ་བཛྲ་བཛྲ་ཨ་བྷི་ཥིཉྩ་སྤྱི་བོ་དང་། དཔྲལ་བ་དང་། མགྲིན་པ་དང་། སྙིང་ག་དང་། ལྟེ་བ་དང་། རྐེད་པ་ནས་རྗེ་ངར་གྱི་བར་དུ་ཡི་གེའི་ཕྱག་རྒྱ་བཀོད་ལ་རང་གི་ལྷའི་གཟུགས་ཀྱི་སྦྱོར་བས་བལྟ་བར་བྱའོ། །དེ་དེ་ལྟར་དབང་བསྐུར་ནས་རིགས་དང་མཐུན་པའི་མིང་བྱས་ནས་རྡོ་རྗེའི་ཆོ་ག་རྣམས་བསླབ་པར་བྱའོ། །དེ་ལ་རྡོ་རྗེའི་གནས་ཚིག་རྣམས་ནི་འདི་དག་སྟེ། རང་བཞིན་གྱིས་དབྱེར་མེད་པའི་ཕྱིར་རང་གི་ལུས་རྡོ་རྗེ་སེམས་དཔའི་གནས་ཏེ། རྡོ་རྗེའི་གནས་འདིས་ལྟ་བའི་ཐིབས་པོ་ཐམས་ཅད་ངེས་པར་འཇོམས་པར་འགྱུར་རོ། །རིག་པ་ལ་འཇུག་པའི་ཕྱིར་མ་རིག་པ་རྡོ་རྗེའི་གནས་ཏེ། རྡོ་རྗེའི་གནས་འདིས་དམིགས་པའི་དངོས་པོ་ཡོངས་སུ་ཤེས་པ་ལ་འཇུག་པར་འགྱུར་རོ། །ཧཱུྃ།མངོན་པར་འདུ་བྱེད་པའི་ཕྱིར་མཚམས་མེད་པའི་མཐའ་རྡོ་རྗེའི་གནས་ཏེ། རྡོ་རྗེའི་གནས་འདིས་བལྟ་བར་གྱུར་པ་ཐམས་ཅད་ངེས་པར་རིག་པར་འགྱུར་རོ། །ཨོྃ། འདོད་ཆགས་དང་བྲལ་བའི་མཐའ་མཉམ་པ་ཉིད་ཀྱི་ཕྱིར། འདོད་ཆགས་ཀྱི་

མཐའ་རྡོ་རྗེའི་གནས་ཏེ། རྡོ་རྗེའི་གནས་འདི་འདོད་ཆགས་དང་བྲལ་བའི་ཆེད་དུ་འཇུག་གོ། །ཧ། བྱམས་པའི་མཐའ་མཉམ་པ་ཉིད་ཀྱི་ཕྱིར་ཞེ་སྡང་གི་མཐའ་རྡོ་རྗེའི་གནས་ཏེ། རྡོ་རྗེའི་གནས་འདི་ཉེས་པ་ཐམས་ཅད་གཅོད་པའི་ཆེད་དུ་འཇུག་གོ །མཻཿ། ཤེས་རབ་སྒྲོན་མ་མཉམ་པ་ཉིད་ཀྱི་ཕྱིར་གཏི་མུག་གི་མཐའི་རྡོ་རྗེའི་གནས་ཏེ། རྡོ་རྗེའི་གནས་འདིས་མུན་པ་བསལ་བར་བྱེད་པར་འགྱུར་རོ། །རྃ། སེམས་ཅན་ཐམས་ཅད་སེམས་ཅན་གཅིག་པ་སྟེ། རྡོ་རྗེའི་གནས་འདིས་སེམས་ཅན་མཉམ་པ་ཉིད་ལ་འཇུག་པའི་དོན་དང་སེམས་ཅན་གྱི་རང་བཞིན་རྟོགས་པའི་དོན་དུ་འགྱུར་རོ། །ཧྲཱི། སེམས་ཅན་ཐམས་ཅད་སེམས་གཅིག་པ་སྟེ། རྡོ་རྗེའི་གནས་འདིས་སེམས་ངེས་པ་ལ་འཇུག་པའི་དོན་དང་སེམས་རང་བཞིན་གྱིས་འོད་གསལ་བ་མངོན་པར་རྟོགས་པའི་དོན་དུ་འགྱུར་རོ། །ཨ། སངས་རྒྱས་ཐམས་ཅད་སངས་རྒྱས་གཅིག་པ་སྟེ། རྡོ་རྗེའི་གནས་འདིས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་འཇུག་པའི་དོན་དང་མཉམ་པ་ཉིད་ཀྱི་ཡེ་ཤེས་རྗེས་སུ་རྟོགས་པའི་དོན་དུ་འགྱུར་རོ། །ཨོྃ། ཆོས་ཐམས་ཅད་སངས་རྒྱས་ཀྱི་ཆོས་ཏེ། རྡོ་རྗེའི་གནས་འདིས་ཐམས་ཅད་མཁྱེན་པའི་ཡེ་ཤེས་རྗེས་སུ་རྟོགས་པར་འཇུག་པའི་དོན་དང་། རྡོ་རྗེ་ལྟ་བུའི་ཏིང་ངེ་འཛིན་རྗེས་སུ་རྟོགས་པའི་དོན་དུ་འགྱུར་རོ། །ཨཱྃ། བདུད་ཀྱི་ལས་ཐམས་ཅད་སངས་རྒྱས་ཀྱི་ལས་ཏེ། རྡོ་རྗེའི་གནས་འདི་ལས་ཐམས་ཅད་རྗེས་སུ་རྟོགས་པ་ལ་འཇུག་པའི་དོན་དང་། ལས་ཐམས་ཅད་ལས་ཡོངས་སུ་འདས་པའི་དོན་དུ་འགྱུར་རོ། །ཧཱུྃ། ངག་ཐམས་ཅད་དེ་བཞིན་གཤེགས་པའི་གསུང་སྟེ། རྡོ་རྗེའི་གནས་འདི་སྒྲ་ཇི་བཞིན་པ་ཐམས་ཅད་རྗེས་སུ་རྟོགས་པ་ལ་འཇུག་པའི་དོན་དང་། བརྗོད་པ་ལས་འདས་པའི་ཆོས་རྗེས་སུ་རྟོགས་པའི་དོན་དུ་འགྱུར་རོ། །རྡྷྃ། ཆོས་ཐམས་ཅད་མ་སྐྱེས་པ་སྟེ། རྡོ་རྗེའི་གནས་འདི་འཆི་འཕོ་མེད་པ་ལ་འཇུག་པའི་དོན་དང་། སྐྱེ་བ་དང་། རྒ་བ་དང་འཆི་བའི་ལས་འདའ་བའི་དོན་དུ་འགྱུར་རོ། །མྃ། ཆོས་ཐམས་ཅད་མ་བྱུང་བ་སྟེ། རྡོ་རྗེའི་གནས་འདི་འགོག་པ་མེད་པ་ལ་འཇུག་པའི་དོན་དང་། ཆོས་

ཐམས་ཅད་འགོག་པ་མེད་པའི་དོན་དུ་འགྱུར་རོ། །ཁྃ། འདི་ལ་རྣམ་གནས་རྣལ་འབྱོར་པ། །བདག་གིས་དེ་ཉིད་རབ་རྟོགས་ཏེ། །བདག་གིས་དེ་ཉིད་རབ་བརྟགས་ནས། །སངས་རྒྱས་ཀུན་མཚུངས་མཉམ་མེད་འགྱུར། །དེ་ལ་སོགས་པའི་དངོས་གྲུབ་ཐམས་ཅད་དང་། ཕུན་སུམ་ཚོགས་པ་ཐམས་ཅད་དང་། གཏེར་ཐམས་ཅད་དང་། འཁོར་ལོ་ཐམས་ཅད་དང་། རྡོ་རྗེ་ཐམས་ཅད་དང་། རལ་གྲི་དང་། ཡིད་བཞིན་གྱི་ནོར་བུ་དང་། དངུལ་ཆུ་དང་། བཅུད་ལེན་རྣམས་དང་། གྱེན་དུ་འགྲོ་བ་དང་། རྐང་འོག་དང་མི་སྣང་བ་དང་། རིག་པ་འཛིན་པ་དང་། འཁོར་ལོས་སྒྱུར་བ་ཉིད་དང་། བརྒྱ་བྱིན་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ཉིད་དང་། བྱང་ཆུབ་སེམས་དཔའི་ས་རྣམས་དེས་མྱུར་དུ་འགྲུབ་པར་འགྱུར་རོ། །ཧཱུྃ། ཡིད་ནི་རྩེ་གཅིག་གྱུར་པ་ཡིས། །སངས་རྒྱས་རྗེས་དྲན་བསྒོམས་ནས་ནི། །ཉི་མའི་དཀྱིལ་འཁོར་དབུས་གནས་པར། །སངས་རྒྱས་སྐུ་གཟུགས་བསྒོམ་པར་བྱ། །སྦྱོར་བ་དེ་ཡི་བཀའ་དྲིན་གྱིས། །སངས་རྒྱས་ཀུན་མཚུངས་མཉམ་མེད་འགྱུར། །ཟླ་བའི་དཀྱིལ་འཁོར་དབུས་གནས་པར། །འོད་ཀྱི་དཀྱིལ་འཁོར་རབ་གསལ་བའི། །ཀུན་ཏུ་བཟང་པོ་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །ལོ་ནི་ཕྱེད་ཀྱི་སྦྱོར་བ་ཡིས། །ཀུན་ཏུ་བཟང་པོ་འདྲ་བར་འགྱུར། །རྡོ་རྗེ་རིན་ཆེན་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །རྒྱལ་པོའི་དབང་བསྐུར་ཉིད་དམ་ནི། ། ཡང་ན་དབང་ཕྱུག་ཐོབ་པར་འགྱུར། །རྡོ་རྗེ་ཆོས་ཀྱི་ཕྱག་རྒྱ་ཆེ། །དེ་ནི་རང་གིས་བརྟན་པོར་བསྒོམ། །འཇིག་རྟེན་ཀུན་གྱི་དབང་ཕྱུག་ཀྱང་། །ཐོབ་ན་དངོས་གྲུབ་གཞན་ཅི་སྨོས། །རྡོ་རྗེ་ལས་ཀྱི་ཕྱག་རྒྱ་གང་། །དེ་བཞིན་ཉིད་ཀྱི་འོད་གསལ་བ། །རྡོ་རྗེའི་སྦྱོར་བས་དེ་བསྒོམས་པས། །རྡོ་རྗེའི་རྣལ་འབྱོར་བརྟན་པོར་འགྱུར། །དེ་ལྟ་བུའི་བྱང་ཆུབ་ཀྱི་སེམས་ཀྱི་མཆོག་བསྒོམ་པ་ཕྱག་རྒྱ་ཆེན་པོའི་ཡེ་ཤེས་ཉིད་ཡིན་ནོ། །འཁོར་ལོས་སྒྱུར་བའི་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །ཕྱག་རྒྱ་ཀུན་གྱི་བདག་ཉིད་

ཀྱི། །དམ་པའི་དོན་ཉིད་ཐོབ་པར་འགྱུར། །གཟི་བརྗིད་ཕུང་པོའི་ཕྱག་རྒྱ་ཆེ། །དམ་པའི་དོན་དུ་བསྒོམ་པར་བྱ། །གསང་བའི་རྒྱལ་སྲིད་ཐོབ་འགྱུར་ན། །དངོས་གྲུབ་གཞན་ལྟ་ཅི་ཞིག་སྨོས། །གདུགས་དཀར་གཙུག་ཏོར་ཆེན་པོ་ནི། །དམ་པའི་དོན་དུ་བསྒོམ་པར་བྱ། །གཙུག་ཏོར་ཡེ་ཤེས་ཐོབ་འགྱུར་ན། །དངོས་གྲུབ་གཞན་ལྟ་ཅི་ཞིག་སྨོས། །རྒྱལ་བའི་གཙུག་ཏོར་ཕྱག་རྒྱ་ཆེ། །དེ་ནི་ཡང་དང་ཡང་དུ་བསྒོམ། །ཆོས་ཀྱི་རྒྱལ་སྲིད་རྣམ་རྒྱལ་ཉིད། །མདོར་བསྡུས་པས་ནི་ཐོབ་པར་འགྱུར། །རྣམ་རྒྱལ་གཙུག་ཏོར་ཕྱག་རྒྱ་ཡི། ། དམ་པའི་ཡི་གེ་བསྒོམ་པར་བྱ། །ལེགས་པར་རབ་གནས་འོད་ཟེར་ཅན། །དངོས་གྲུབ་ཡེ་ཤེས་ཐོབ་པར་འགྱུར། །དེ་ལ་སོགས་པ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །གཙུག་ཏོར་རྣམས་ཀྱིས་ལེགས་བཤད་པ། །ཕྱག་རྒྱ་དེ་རྣམས་བདག་ཉིད་མཆོག །དེ་ལྟར་རྣལ་འབྱོར་པས་བསྒོམས་ན། །ལྷག་པའི་ལྷ་ནི་གཅིག་པུ་ཉིད། །ཐོག་མ་ཐ་མ་མེད་ཞི་བ། །རང་འབྱུང་མཆོག་ཏུ་མི་འགྱུར་བ། །སངས་རྒྱས་ཀུན་དང་མཉམ་སྦྱོར་བ། །རྣལ་འབྱོར་དབང་ཕྱུག་གོ་འཕང་མཆོག །སངས་རྒྱས་ཡེ་ཤེས་དྲི་མ་མེད། །བདག་ཉིད་ཆེན་པོ་ཐོབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་དམ་ཚིག་ཡེ་ཤེས་ཀྱི་ཕྱག་རྒྱ་རྣམས་སོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཡི་གེའི་རང་བཞིན་གྱི་ཡེ་ཤེས་དེ་ལ་བསླབ་པར་བྱའོ་ཞེས་བྱ་བ་ནི་རྣམ་པར་དཔྱོད་པའི་ཕྱིར་ཆོས་ཐམས་ཅད་ཀྱི་སྒོ་སྟེ་རྣམ་པར་འབྱེད་པའི་དོན་དུ་ཤེས་པར་བྱའོ། །ཨོྃ་པྃ། ཨ་ཞེས་བྱ་བ་ནི་ཆོས་ཐམས་ཅད་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོར་བཤད་དོ། །ཨཱོྃ་ཨ་ཨཱ་ཨྃ་ཨཿ། པ་ཞེས་བྱ་བ་ནི་ཆོས་ཐམས་ཅད་ཀྱི་སྒོ་སྟེ་དོན་དམ་པར་ཆོས་ཐམས་ཅད་ཀྱི་ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བལྟ་བར་བྱའོ། །ཨོཾ་པྃ། ན་ཞེས་བྱ་བ་ནི་ཆོས་ཐམས་ཅད་ཀྱི་མིང་དང་གཟུགས་དང་ཤེས་རབ་དང་ཆོས་དང་བཅས་པ་ལ་དབང་བསྒྱུར་བའི་ཕྱིར་ཆོས་ཐམས་ཅད་ཀྱི་སྒོར་བཤད་དོ། །ཨོྃ་ནྃ། ད་ཞེས་བྱ་བ་ནི་འདུལ་བ་

དང་ཞི་བའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པའི་ཕྱིར་ཆོས་ཐམས་ཅད་ཀྱི་སྒོར་བརྗོད་དོ། །ཨོྃ་དཾ། ས་ཞེས་བྱ་བ་ནི་ཐོགས་པ་མེད་པ་ལས་ཡང་དག་པར་འདས་ཤིང་། ཡོངས་སུ་ཉོན་མོངས་པ་དང་རྣམ་པར་སྤོང་བ་དང་ཟག་པ་དང་བཅས་པ་དང་ཟག་པ་མེད་པའི་སྒོ་ནས་ཕུང་པོ་དང་། ཁམས་དང་སྐྱེ་མཆེད་ལ་སོགས་པ་དོན་དམ་པའི་བདེན་པ་ལ་ཉེ་བར་ལེན་པ། མི་དམིགས་པའི་ཕྱིར་ཆོས་ཐམས་ཅད་ཀྱི་སྒོར་རྣམ་པར་གཞག་གོ། །ཨོཾ་སྲུྃ། ཏ་ཞེས་བྱ་བ་ནི་དེ་བཞིན་ཉིད་ཀྱི་རྗེས་སུ་འགྲོ་བའི་ཆོས་ཀྱི་དབྱིངས་ལ་འཇུག་པའི་ཕྱིར་ཆོས་ཐམས་ཅད་ཀྱི་སྒོར་རྣམ་པར་བལྟའོ། །ཨོྃ་ཏཾ། ཀ་ཞེས་བྱ་བ་ནི་ལས་ཀྱི་རྣམ་པར་སྨིན་པ་དང་བྲལ་བའི་ཕྱིར་ཆོས་ཐམས་ཅད་ཀྱི་སྒོར་གསལ་བར་བྱའོ། །ཨོྃ་ཀྃ །མ་ཞེས་བྱ་བ་ནི་སྒྱུ་མ་ལྟ་བུ་ཉིད་དང་དྲན་པ་མེད་ཅིང་སྙིང་རྗེ་ཆེ་བ་དང་ཤེས་རབ་རྣོ་བ་ལས་བྱུང་བའི་ཕྱིར་ཆོས་ཐམས་ཅད་ཀྱི་སྒོར་གསལ་བར་བཤད་དོ། །ཨོྃ་མྃ། ག་ཞེས་བྱ་བ་ནི་ཟབ་མོ་གཏིང་དཔག་དཀའ་བའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་གྃ །ཛ་ཞེས་བྱ་བ་ནི་སྐྱེ་བ་དང་རྒ་བ་དང་འཆི་བ་ལས་ཡོངས་སུ་རྒལ་བའི་རང་བཞིན་མི་ཕྱེད་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཛྃ། དྷ་ཞེས་བྱ་བ་ནི་ཆོས་ཀྱི་དབྱིངས་ཡོངས་སུ་མི་ཕྱེད་པའི་རྡོ་རྗེ་ཡོངས་སུ་རྫོགས་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་རྡྷྃ། ཤ་ཞེས་བྱ་བ་ནི་ཞི་གནས་དང་ལྷག་མཐོང་ཡོངས་སུ་རྫོགས་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཤྃ། ཁ་ཞེས་བྱ་བ་ནི་གང་ཟག་དང་ཆོས་ཀྱི་བདག་མེད་པ་ནམ་མཁའ་ལྟར་གསལ་ཞིང་ཆོས་ཐམས་ཅད་རང་བཞིན་གྱིས་འོད་གསལ་བའི་ཕྱིར་ཆོས་ཐམས་ཅད་ཀྱི་སྒོར་རྣམ་པར་གཞག་གོ། །ཨོྃ་ཁྃ། ཀྵ་ཞེས་བྱ་བ་ནི་གཡོ་བ་སྐྱེ་བ་མེད་པས་མི་ཟད་པའི་ཡེ་ཤེས་སོ་སོར་དམིགས་ཏེ། ཆོས་ཐམས་ཅད་ཡོངས་སུ་དག་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཀྵྃ། ང་ཞེས་བྱ་བ་ནི་ཐམས་ཅད་མཁྱེན་པའི་ཡེ་ཤེས་ཐོགས་པ་མེད་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ངཾ། ཐ་ཞེས་བྱ་བ་ནི་གནས་དང་གནས་མ་ཡིན་པ་ལ་མཁས་པས་

སངས་རྒྱས་ཀྱི་ཞིང་ཡོངས་སུ་སྦྱོང་བའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཐྃ། ཌྷ་ཞེས་བྱ་བ་ནི་མཐར་ཕྱིན་པ་དང་མུར་ཐུག་པ་མེད་པ་དང་། སྒྲིབ་པ་ཐམས་ཅད་རབ་ཏུ་སྤངས་པས་ཟད་པ་དང་མི་སྐྱེ་བའི་ཡེ་ཤེས་ཐོབ་པའི་མཆོག་ཏུ་བྱེད་པའི་ཕྱིར་ཆོས་ཐམས་ཅད་ཀྱི་སྒོར་བཤད་དོ། །ཨོྃ་ཌྷྃ། ཛྷ་ཞེས་བྱ་བ་ནི་དྲི་མའི་རྣམ་པར་དམིགས་པ་མེད་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཛྷྃ། ལུས་རྣམ་པར་འབྱེད་པ་ནི་འདོད་ཆགས་དང་བྲལ་བའི་མཐའ་ཉོན་མོངས་པ་ཐམས་ཅད་སྤངས་ཏེ་རྡོ་རྗེ་སྙིང་པོའི་ལུས་སོ་སོར་ཐོབ་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཀཱྃ །སེམས་རྣམ་པར་འབྱེད་པ་ནི་ཉེས་བ་དང་རྨོངས་པ་དང་བག་ལ་ཉལ་བ་རབ་ཏུ་སྤངས་ནས་བྱང་ཆུབ་ཀྱི་སེམས་བསྐྱེད་པ་རང་བཞིན་གྱིས་འོད་གསལ་བའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཨྃ། ངག་རྣམ་པར་འབྱེད་པ་ནི་ངག་གི་སྤྲོས་པ་ཆོས་ཀྱི་དབྱིངས་རྣམ་པར་དག་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་བཱྃ། ཚ་ཞེས་བྱ་བ་ནི་གྲིབ་མ་མ་དམིགས་ཤིང་རང་བཞིན་གྱིས་དང་བའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཚཾ། གྷ་ཞེས་བྱ་བ་ནི་གཅིག་ཏུ་འདྲེས་པ་མ་དམིགས་པའི་དོན་དམ་པར་གཉིས་སུ་མེད་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་གྷཾ། ཊ་ཞེས་བྱ་བ་ནི་ཅ་ཅོ་དང་བྲལ་བ་དང་རྡོ་རྗེ་སྙེམས་པ་འཛིན་པའི་ཕྱིར་ཆོས་ཐམས་ཅད་ཀྱི་སྒོར་བཤད་དོ། །ཨོྃ་ཊོཾ། ཕ་ཞེས་བྱ་བ་ནི་ཆོས་ཐམས་ཅད་དབུ་བ་རྡོས་པ་ལྟ་བུའི་ཚུལ་གྱིས་གསང་བའི་ཡེ་ཤེས་གསལ་བའི་ཕྱིར་ཆོས་ཀྱི་སྒོར་བཤད་དོ། །ཨོྃ་ཕྃ། ཌ་ཞེས་བྱ་བ་ནི་འཚེ་བ་ལས་གྲོལ་བའི་ནམ་མཁའ་ལ་འགྲོ་བ་གྲུབ་པས་སོ་སོར་ཐོབ་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཌཾ། ཥ་ཞེས་བྱ་བ་ནི་ཚ་སྒོམ་དམིགས་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོཾ་ཥྃ། ཆོས་ཐམས་ཅད་ཉེ་བར་ཞི་བའི་ཕྱིར་ཉེ་བར་ཞི་བ་ནི་ཆོས་ཐམས་ཅད་ཀྱི་སྒོར་རྣམ་པར་གཞག་གོ། །ཨོྃ་ཨུྃ། ཚུལ་བཞིན་ནི་ངེས་པར་འབྱུང་བའི་དོན་དུ་འཕགས་པའི་ལམ་ཡན་ལག་བརྒྱད་ལ་འཇུག་པའི་ཕྱིར་ཆོས་ཐམས་ཅད་ཀྱི་སྒོར་བལྟ་

བར་བྱའོ། །ཨོྃ་ཡོྃ། དེ་ཁོ་ན་ཉིད་ནི་སྤྲོས་པ་ཐམས་ཅད་རྣམ་པར་སྤང་བའི་ཕྱིར་ཆོས་ཐམས་ཅད་ཀྱི་སྒོར་རྣམ་པར་གཞག་གོ། །ཨོྃ་ཏྃ། མ་སྐྱེས་པའི་ཆོས་རྣམ་པར་གྲོལ་བའི་མཚན་ཉིད་ཀྱི་དོན་ཡིན་པའི་ཕྱིར་ཆོས་ཐམས་ཅད་ཀྱི་སྒོར་བཤད་དོ། །ཨོྃ་ཧུྃ། ཡོངས་སུ་གཟུང་བ་མེད་པ་ནི་འཐབ་པ་དང་རྩོད་པ་སྤངས་པའི་ཆོས་ཉིད་ཡིན་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཧྲཱོཾ། ཀུན་ནས་ཉོན་མོངས་པ་མེད་པ་ནི་མཚན་ཉིད་རྣམ་པར་དག་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཀ་ཁ་ག་གྷ་ང་། རང་བཞིན་གྱིས་འོད་གསལ་བའི་མཚན་ཉིད་གཟུང་བའི་ཕྱིར་ཆོས་ཐམས་ཅད་ཀྱི་སྒོར་གནས་སོ། །ཨོྃ་ཙ་ཚ་ཛ་ཛྷ་ཉ། སྣང་བ་ནི་གསལ་ཞིང་འབར་བའི་ཕྱིར་ཆོས་ཐམས་ཅད་ཀྱི་སྒོའོ། །ཨོྃ་ཊ་ཋ་ཌ་ཌྷ་ཎ། བསྒོམ་པ་ནི་ཆོས་ཐམས་ཅད་ཀུན་ཏུ་སྦྱོར་བ་དང་བྲལ་བ་ཡང་དག་པར་སྡུད་པའི་ཕྱིར་ཆོས་ཐམས་ཅད་ཀྱི་སྒོའོ། །ཨོྃ་ཏ་ཐ་ད་དྷ་ན། གཞི་མེད་པ་ནི་ཆོས་ཐམས་ཅད་མ་འདྲེས་པའི་ཕྱིར་ཆོས་ཐམས་ཅད་ཀྱི་སྒོར་རྣམ་པར་གཞག་གོ། །ཨོྃ་པ་ཕ་བ་བྷ་མ། བྱང་ཆུབ་ནི་ཆོས་ཐམས་ཅད་དྲི་མ་མེད་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཡ་ར་ལ་ཝ། མྱ་ངན་ལས་འདས་པ་ནི་བློ་བུར་བ་ཐམས་ཅད་ངེས་པར་དོར་བའི་མཚན་ཉིད་དང་ཆོས་ཀྱི་དབྱིངས་སོ་སོར་ཐོབ་ཅིང་མངོན་པར་ཤེས་པ་ལྔ་དང་ཡེ་ཤེས་མཁྱེན་པས་སངས་རྒྱས་ཀྱིས་ཡོངས་སུ་ཐོབ་པའི་ཕྱིར་ཆོས་ཐམས་ཅད་ཀྱི་སྒོར་བལྟ་བར་བྱའོ། །ཨོྃ་ཤ་ཥ་ས་ཧ། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་རྣམ་པར་དག་པ་རྣམ་པར་འབྱེད་པར་བྱེད་པའོ་ཞེས་སོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྒོ་རྣམ་པར་ངེས་པའོ། །དེ་ནས་རིགས་ཐམས་ཅད་ཀྱི་གསང་བའི་ཆོ་ག་རྒྱས་པར་གྱུར་པ་ནི། སྔོན་བཞིན་ངེས་པར་བྱས་ནས་ནི། །ཕྱོགས་ཀུན་མཉམ་པ་ཉིད་བསྒོམས་ནས། །རི་རབ་ཆེན་པོ་གྲུ་བཞི་པ། །རིན་ཆེན་ཀུན་གྱིས་རྣམ་པར་བརྒྱན། །དེ་ཡི་སྟེང་དུ་རྡོ་རྗེ་ཆེ། །དེ་ཡི་སྟེང་དུ་པདྨ་གཞག །འདབ་མ་བརྒྱད་པ་ཆེས་བཀྲ་བ། །རྣལ་འབྱོར་གནས་ཞེས་རྣམ་པར་བཤད། །

དབང་པོ་གཉིས་ནི་སྙོམས་འཇུག་པ། །ཡོངས་སུ་རྫོགས་པར་བདག་ཉིད་ཀྱིས། །སངས་རྒྱས་ཐམས་ཅད་ཉིད་བསྒོམས་ན། །དེ་ནས་བསྐལ་པའི་མཐར་ཐུག་གནས། །སངས་རྒྱས་ཀུན་གྱི་ཕྱག་རྒྱ་ཆེ། །འོད་ཟེར་གསལ་བའི་དཀྱིལ་འཁོར་ཅན། །རྣལ་འབྱོར་ཐམས་ཅད་བསྒོམ་པར་བྱ། །མཉམ་མེད་སངས་རྒྱས་ཀུན་དང་མཚུངས། །བྷ་ག་ཆེན་པོ་རྣལ་འབྱོར་ཆེ། །རྣལ་འབྱོར་པ་གནས་མི་ཟད་པ། །སངས་རྒྱས་ཀུན་བདག་བསྒོམས་ནས་ནི། །སངས་རྒྱས་ཀུན་དང་མཚུངས་པར་འགྱུར། །ཁམས་གསུམ་པ་ཡི་རྒྱལ་སྲིད་ཆེ། ། སེམས་ཅན་ཀུན་ལ་ཐམས་ཅད་དུ། །གང་ཚེ་རྣལ་འབྱོར་པས་བསྒོམས་ན། །དེ་ཚེ་དངོས་གྲུབ་ལག་ན་གནས། །རང་བཞིན་གྱིས་ནི་འོད་གསལ་ཆོས། །གདོད་ནས་དག་ཅིང་མ་འདྲེས་པ། །གང་ཚེ་ཡེ་ཤེས་མཐོང་བ་ནི། །དེ་ཡི་ཚེ་ན་དག་པར་འགྱུར། །སངས་རྒྱས་ཐམས་ཅད་མདོར་བསྡུས་པ། །སྣ་ཚོགས་ལས་ཀྱི་སྦྱོར་བ་ཡིས། །གང་ཚེ་རྣལ་འབྱོར་པས་བསྒོམས་ན། །སྣ་ཚོགས་ལས་ནི་བྱེད་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོའི་ཡེ་ཤེས་སོ།། །།འཁོར་ལོས་སྒྱུར་བ་རྒྱལ་པོ་ཆེ། །ཀུན་མཆོག་ས་ཡི་དབང་ཕྱུག་ནི། །རྡོ་རྗེ་སྦྱོར་བས་བསྒོམས་ན་ནི། །མཉམ་མེད་འཁོར་ལོས་སྒྱུར་བ་མཚུངས། །གཟི་བརྗིད་ཕུང་པོ་ཕྱག་རྒྱ་ཆེ། །ལེགས་པར་མཉམ་པར་གཞག་པ་བསྒོམ། །འབར་བའི་ཕྲེང་བས་འཁྲུགས་ཤིང་མཛེས། །པདྨ་རཱ་ག་མཚུངས་པའི་འོད། ། རྡོ་རྗེའི་སྦྱོར་བས་བསྒོམས་ནས་ནི། །རང་ཉིད་གཟི་བརྗིད་ཕུང་པོར་འགྱུར། །གདུགས་དཀར་རྒྱལ་བའི་གཙུག་ཏོར་གྱི། །ཕྱག་རྒྱ་ཆེན་པོ་བསྒོམས་ན་ནི། །འོད་ཟེར་གསལ་བའི་སྦྱོར་བ་ཡིས། །སེམས་ཅན་དག་པ་ཉིད་དུ་འགྱུར། །རྣམ་པར་གསལ་བའི་གཙུག་ཏོར་རྒྱ། །རལ་གྲི་འབར་བའི་འོད་ཀྱིས་འཁྲུགས། །ཟག་པ་མེད་པའི་སྦྱོར་བ་ཡིས། །མཉམ་མེད་གསལ་བའི་གཙུག་ཏོར་མཚུངས། །རྒྱལ་བའི་གཙུག་ཏོར་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །རྒྱལ་བའི་གཙུག་ཏོར་སྦྱོར་བ་ཡིས། །

དེ་ཡི་རྣམ་པའི་སྤྱོད་ཡུལ་འགྱུར། །རྡོ་རྗེ་དམ་ཚིག་ཡེ་ཤེས་ཆེ། །ལེགས་པར་མཉམ་པར་གཞག་པས་བསྒོམ། །ཀུན་ཏུ་བཟང་པོ་སོགས་གཟུགས་ཀྱིས། །མཉམ་མེད་རྡོ་རྗེ་སེམས་དཔའ་མཚུངས། །ཟླ་བའི་དཀྱིལ་འཁོར་དབུས་གནས་པ། །རྡོ་རྗེ་སེམས་དཔའ་སེམས་དཔའ་ཆེ། །བྱང་ཆུབ་སེམས་དང་མཚུངས་པའི་འོད། །གཙུག་ཏོར་ལྔ་ལྡན་སྟོབས་པོ་ཆེ། །རྡོ་རྗེའི་སྦྱོར་བས་བསྒོམས་པ་ཡིས། །རྡོ་རྗེ་སེམས་དཔའ་འདྲ་བར་འགྱུར། །རྡོ་རྗེ་རྒྱལ་པོའི་ཕྱག་རྒྱ་ཆེ། །དོན་དམ་པར་ནི་བསྒོམས་ན་ནི། ། འགྲོ་བ་ཐམས་ཅད་འགུགས་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། །རྡོ་རྗེ་ཆགས་པའི་ཕྱག་རྒྱ་ཆེ། །ལེགས་པར་མཉམ་པར་གཞག་པ་བསྒོམ། །སྐྱེ་དགུ་ཐམས་ཅད་ཆགས་འགྱུར་ན། །བུད་མེད་གཞན་ལྟ་སྨོས་ཅི་དགོས། །རྡོ་རྗེ་ལེགས་པའི་ཕྱག་རྒྱ་ཆེ། ། དམ་པའི་དོན་དུ་བསྒོམ་པར་བྱ། །ལེགས་སོ་བ་ནི་རབ་གསོལ་བས། །བུད་མེད་ཐམས་ཅད་ཚིམ་པར་བྱེད། །བྱང་ཆུབ་ཀྱི་སེམས་ཀྱི་ཕྱག་རྒྱའི་ཡེ་ཤེས་སོ།། །།རྡོ་རྗེ་རིན་ཆེན་ཕྱག་རྒྱ་ཆེ། །འབར་བའི་ཕྲེང་བས་འཁྲུགས་པའི་འོད། །དཔྲལ་བའི་ཕྱོགས་སུ་གནས་པ་བསྒོམ། །དེ་ཡིས་དར་ཐོད་དབང་བསྐུར་ཐོབ། །རྡོ་རྗེ་གཟི་བརྗིད་ཕྱག་རྒྱ་ཆེ། །ཉི་མའི་དཀྱིལ་འཁོར་མཚུངས་པའི་འོད། །སྙིང་གར་གནས་པ་བསྒོམ་པར་བྱ། །ཀུན་མཁྱེན་ཡེ་ཤེས་སྟེར་བར་བྱེད། །རིན་ཆེན་ཏོག་གི་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །སྦྱིན་པའི་ཕ་རོལ་ཕྱིན་པ་མཆོག །སྒྲུབ་པོ་དམ་པས་རྫོགས་པར་བྱེད། །རྡོ་རྗེ་བཞད་པ་ཕྱག་རྒྱ་ཆེ། །ལེགས་པར་མཉམ་པར་གཞག་པས་བསྒོམ། །རྡོ་རྗེ་བཞད་པ་ལྟར་གྱུར་ཏེ། །དེ་ནི་སྐྱེ་དགུ་དགའ་བྱེད་འགྱུར། །དབང་བསྐུར་བའི་ཕྱག་རྒྱའི་ཡེ་ཤེས་སོ།། །།པདྨ་བདེ་ཆེན་པདྨ་ལ། །དག་པའི་ཆོས་ནི་མཉམ་གཞག་པས། །དམ་པའི་དོན་དུ་བསྒོམ་པར་བྱ། །མཉམ་མེད་རྡོ་རྗེ་ཆོས་དང་མཚུངས། །ཤེས་རབ་ཡེ་ཤེས་རྡོ་རྗེ་རྣོ། །བསྒོམས་པས་དེ་ནི་རྡོ་རྗེ་འཆང་། །ཤེས་རབ་ཕ་རོལ་ཕྱིན་དག་པ། །སྟོང་

ཉིད་སྦྱོར་བས་བསྒོམས་ན་ནི། །དམ་པའི་དོན་དུ་བསྒོམ་བྱ་དེ། །མཉམ་མེད་འཇམ་དབྱངས་དང་ནི་མཚུངས། །རྡོ་རྗེ་རྒྱུ་ཡི་ཕྱག་རྒྱ་ཆེ། །ལེགས་པར་མཉམ་པར་གཞག་བསྒོམས་ནས། །ཆོས་ཀྱི་འཁོར་ལོ་ཀུན་མཆོག་རྩེ། །མདོར་བསྡུས་ནས་ནི་དེ་ཡིས་བསྐོར། །རྡོ་རྗེ་སྨྲ་བའི་ཕྱག་རྒྱ་ཆེ། །དམ་པའི་དོན་དུ་བསྒོམས་ནས་ནི། །རྡོ་རྗེ་བཟླས་པའི་ནུས་པ་ཡིས། །ལྡེམ་པོའི་ངག་ནི་དེ་ཡིས་འཆད། །ཆོས་ཀྱི་ཕྱག་རྒྱའི་ཡེ་ཤེས་སོ།། །།རྡོ་རྗེ་ལས་ཀྱི་ཕྱག་རྒྱ་ཆེ། །དམ་པའི་དོན་དུ་བསྒོམས་ན་ནི། །ཀུན་ནས་ཀུན་ནས་རང་ཉིད་ཀྱིས། ། རྡོ་རྗེ་ལས་ནི་བྱེད་པར་འགྱུར། །རྡོ་རྗེ་བསྲུང་བ་བྱམས་པ་ཆེ། །རྡོ་རྗེ་ཆོས་ཞེས་གྲགས་པ་སྟེ། །ཆོས་ཀྱི་སྦྱོར་བས་བསྒོམས་ན་ནི། །རྡོ་རྗེ་བསྲུང་བ་དང་མཚུངས་འགྱུར། །རྡོ་རྗེ་གནོད་སྦྱིན་བརྩོན་འགྲུས་ཆེ། །ཁྲོ་བོ་ཆེན་པོ་སྟོབས་པོ་ཆེ། །དམ་པའི་དོན་གྱིས་བསྒོམ་པར་བྱ། །རྡོ་རྗེ་གནོད་སྦྱིན་དང་མཚུངས་འགྱུར། །རྡོ་རྗེ་ཁུ་ཚུར་ཕྱག་རྒྱ་ཆེ། །ལུས་ངག་ཡིད་ཀྱིས་དེ་བཞིན་དུ། །རྡོ་རྗེའི་སྦྱོར་བས་བསྒོམས་ན་ནི། །རྡོ་རྗེ་ཁུ་ཚུར་འཛིན་པར་འགྱུར། །ལས་ཀྱི་ཕྱག་རྒྱའི་ཡེ་ཤེས་སོ།། །།སྒེག་མོས་མངོན་པར་དགའ་བ་སྟེར། །ཕྲེང་བ་ཡང་ནི་དབང་བསྐུར་བ། །གླུ་མས་མཛེས་པའི་སྒྲ་དབྱངས་བྱེད། །གར་མས་རྫུ་འཕྲུལ་ཐོབ་པར་འགྱུར། །དྲི་མས་བཟང་པོའི་དྲི་ཡིན་ཏེ། །མེ་ཏོག་བྱང་ཆུབ་ཡན་ལག་ཉིད། །སྒྲོན་མས་མཐའ་དག་གསལ་བའོ། །བདུག་པས་བདུག་པ་དག་ལ་བརྩོན། །ལྕགས་ཀྱུས་དབང་ཕྱུག་འགུགས་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། །ཞགས་པས་དབང་པོ་འཆིང་འགྱུར་ན། །གདུག་པའི་སེམས་ཅན་སྨོས་ཅི་དགོས། །ལྕགས་སྒྲོག་གིས་ནི་འཕྲོག་བྱེད་དང་། །ཚངས་སོགས་དབང་ཕྱུག་ཆེན་པོའང་འཆིང་། །འབེབས་པས་ཐམས་ཅད་འབེབས་འགྱུར་ན། །དམན་པའི་མི་དག་སྨོས་ཅི་དགོས། །འདི་ཉིད་ཀྱི་ནི་སྦྱོར་བ་ཡིས། །ཆོས་ཀྱི་ཡི་གེ་མཆོག་གི་ནི། །ཕྱག་རྒྱའི་ཡེ་ཤེས་རབ་སྦྱོར་བས། །སྦྱར་ཏེ་མྱུར་དུ་བསྒྲུབ་པར་བྱ། །འདི་ཡི་སྦྱོར་བ་ཤེས་པར་བྱ། །ཕྱག་རྒྱའི་འཁོར་ལོ་ཁྱད་

པར་དུ། །སྤྱི་གཙུག་སྙིང་ག་རྐང་པའི་བར། །ཡི་གེ་ཡིས་ནི་ཡོངས་གང་པར། །གཟུགས་བརྙན་གཅིག་གི་གོ་འཕང་གྱུར། །སེམས་རྩེ་གཅིག་འགྱུར་བསམ་གཏན་གྱིས། །ས་ལ་རབ་གནས་པདྨ་ནི། །དབང་ཆེན་གྱི་ནི་གནས་ཞེས་བཤད། ། དབང་པོ་གཉིས་ནི་མཚུངས་སྦྱོར་བས། །དབང་ཕྱུག་ཀྱང་ནི་བསྒྲུབ་པར་བྱ། །དབང་ཆེན་དག་ནི་གྲུ་བཞི་པ། །དབང་ཆེན་གྱི་ནི་ལས་སུ་བཤད། །ཆུ་ནི་ཟླུམ་པར་ཤེས་པར་བྱ། །པདྨའི་མཚན་མས་རྣམ་པར་མཚན། །ཞི་བར་བྱེད་པའི་ལས་དང་ལྡན། །ཞི་བའི་དོན་དུ་དེ་བཤད་དོ། །མེ་ནི་གྲུ་གསུམ་ཤེས་པར་བྱ། །སུམ་མདོ་ཡི་ནི་གནས་སུ་གནས། །དབང་དུ་བྱ་བ་བསྒྲུབ་དོན་དུ། །པདྨ་རཱ་ག་འདྲ་བའི་འོད། །མངོན་སྤྱོད་ལ་ནི་བརྩོན་འགྲུས་ཆེ། །རླུང་གི་དཀྱིལ་འཁོར་བརྗོད་བྱ་སྟེ། །རལ་གྲི་ཡི་ནི་ཕྱག་རྒྱའི་དབྱིབས། ། དབྱར་གྱི་སྤྲིན་དང་མཚུངས་པའི་འོད། །སེར་དང་དཀར་དང་དེ་བཞིན་དམར། །ནག་པོ་ཡང་ནི་ཁྱད་པར་དུ། །དང་པོའི་དཀྱིལ་འཁོར་ཚུལ་གྱིས་ནི། །ཐ་མའི་བར་དུ་རབ་ཏུ་བརྟག །དང་པོ་རྡོ་རྗེ་རབ་ཏུ་གཞག །དེ་ཡི་རྗེས་སུ་རིན་ཆེན་ཏེ། །པདྨ་དང་ནི་ལས་རྣལ་འབྱོར། །གྲུབ་པའི་གོ་འཕང་རིམ་པར་བཤད། །ཕྱག་རྒྱ་ཐམས་ཅད་ཀྱི་ཡེ་ཤེས་སོ།། །།དེ་ནས་བཅོམ་ལྡན་འདས་རྟག་པས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ཡེ་ཤེས་བཀའ་སྩལ་པ། གཉིས་དང་གཉིས་སུ་མེད་པས་ཡོངས་སུ་དག་པས་ཆོས་ཐམས་ཅད་རྣམ་པར་གྲོལ་བའི་ཕྱག་རྒྱས་རྒྱས་བཏབ་པའོ། །རྟག་པ་ཡོངས་སུ་དག་པས་ཆོས་ཐམས་ཅད་ཞི་བ་དང་མཐའ་དང་མཐའ་མེད་པའི་ཕྱག་རྒྱས་རྒྱས་བཏབ་པའོ། །ཟད་པའི་སྒོ་དང་ཟད་པའི་མཐའ་དང་ཟད་པའི་མུར་ཐུག་པ་དང་ལྡན་པས་ཆོས་ཐམས་ཅད་ཟད་པ་དང་། འདོད་ཆགས་དང་བྲལ་བའི་ཕྱག་རྒྱས་རྒྱས་བཏབ་པའོ། །མཉམ་པ་ཉིད་ཀྱི་མཐའ་རྣམ་པར་དག་པས་ཆོས་ཐམས་ཅད་ལ་སྐུར་པ་མི་འདེབས་པའི་ཕྱག་རྒྱས་རྒྱས་བཏབ་པའོ། །མིག་ལྔ་ལ་ཡང་དག་པར་འདས་པས་ཆོས་ཐམས་ཅད་ནམ་མཁའི་ཕྱག་རྒྱས་རྒྱས་བཏབ་པའོ། །

སེམས་ཅན་ཐམས་ཅད་ནམ་མཁའི་དབྱིངས་ཉིད་ཀྱི་ཕྱིར་ཆོས་ཐམས་ཅད་ནམ་མཁའི་རང་བཞིན་གྱི་ཕྱག་རྒྱས་རྒྱས་བཏབ་པའོ། །ཆོས་ཀྱི་དབྱིངས་སུ་ཡང་དག་པར་འདུ་བ་ཉིད་ཀྱི་ཕྱིར། ཆོས་ཐམས་ཅད་དབྱེར་མི་ཕྱེད་པའི་ཕྱག་རྒྱས་རྒྱས་བཏབ་པའོ། །བྱང་ཆུབ་ཀྱི་སེམས་དང་ཐ་མི་དད་པས་ཆོས་ཐམས་ཅད་བྱང་ཆུབ་ཀྱི་སེམས་ཀྱི་ཕྱག་རྒྱས་རྒྱས་བཏབ་པའོ། །ཆོས་ཀྱི་དབྱིངས་མི་ཕྱེད་པའི་མཚན་ཉིད་ཡིན་པས་ཆོས་ཐམས་ཅད་ཆོས་ཀྱི་དབྱིངས་ཀྱི་ཕྱག་རྒྱས་རྒྱས་བཏབ་པའོ། །ངོ་བོ་ཉིད་མེད་པས་ཆོས་ཐམས་ཅད་སྟོང་པ་ཉིད་ཀྱི་ཕྱག་རྒྱས་རྒྱས་བཏབ་པའོ། །འཚེ་བ་མེད་པས་ཆོས་ཐམས་ཅད་བདག་མེད་པའི་ཕྱག་རྒྱས་རྒྱས་བཏབ་པའོ། །སྐད་ཅིག་མ་ཉིད་པས་ཆོས་ཐམས་ཅད་མི་རྟག་པའི་ཕྱག་རྒྱས་རྒྱས་བཏབ་པའོ། །སྐྱེ་བ་དང་རྒ་བ་དང་འཆི་བའི་མཐའ་དང་ལྡན་པས་ཆོས་ཐམས་ཅད་སྡུག་བསྔལ་གྱི་ཕྱག་རྒྱས་རྒྱས་བཏབ་པའོ། །སྔོན་གྱི་མཐའ་དང་ཕྱི་མའི་མཐའ་དེ་བཞིན་ཉིད་པས་ཆོས་ཐམས་ཅད་དེ་བཞིན་ཉིད་ཀྱི་ཕྱག་རྒྱས་རྒྱས་བཏབ་པའོ། །གདོད་མ་ནས་ཡོངས་སུ་དག་པས་ཆོས་ཐམས་ཅད་ཡང་དག་པའི་མཐའི་ཕྱག་རྒྱས་རྒྱས་བཏབ་པའོ། །འདུས་བྱས་དང་འདུས་མ་བྱས་མཉམ་པ་ཉིད་པས་ཆོས་ཐམས་ཅད་ཆེན་པོ་སྟོང་པ་ཉིད་ཀྱི་ཕྱག་རྒྱས་རྒྱས་བཏབ་པའོ། །སྤྲོས་པའི་དམིགས་པ་རྣམ་པར་བྲལ་བས་ཆོས་ཐམས་ཅད་མཚན་མ་མེད་པའི་ཕྱག་རྒྱས་རྒྱས་བཏབ་པའོ། །རེ་བ་ཐམས་ཅད་ལས་རྣམ་པར་གྲོལ་བས་ཆོས་ཐམས་ཅད་སྨོན་པ་མེད་པའི་ཕྱག་རྒྱས་རྒྱས་བཏབ་པའོ། །དངོས་པོ་མེད་པའི་ངོ་བོ་ཉིད་ཀྱི་མཚན་ཉིད་ཀྱིས་ན་ཆོས་ཐམས་ཅད་མི་རྟག་པའི་ཕྱག་རྒྱས་རྒྱས་བཏབ་པའོ། །ཕུང་པོ་ལྔ་ཡོངས་སུ་འདུས་པའི་མཚན་ཉིད་ཀྱིས་ན་ཆོས་ཐམས་ཅད་སྡུག་བསྔལ་གྱི་ཕྱག་རྒྱས་རྒྱས་བཏབ་པའོ། །རང་བཞིན་གྱིས་བདག་མེད་པས་ཆོས་ཐམས་ཅད་བདག་མེད་པའི་ཕྱག་རྒྱས་རྒྱས་བཏབ་པའོ། །ཤིན་ཏུ་མི་གཡོ་བའི་ཕྱིར་ཆོས་ཐམས་ཅད་ཞི་བའི་ཕྱག་རྒྱས་རྒྱས་བཏབ་པའོ། །དོན་དམ་པའི་བདེན་པ་ཡང་དག་པར་འདུ་བའི་ཕྱིར་ཆོས་ཐམས་ཅད་བདེན་པའི་ཕྱག་རྒྱས་རྒྱས་བཏབ་པའོ། །འཚོ་བ་རྣམ་པར་

མི་གནས་པའི་ཕྱིར་ཆོས་ཐམས་ཅད་དྲི་མ་མེད་པའི་ཕྱག་རྒྱས་རྒྱས་བཏབ་པའོ། །མཆོག་ཏུ་མཐར་ཕྱིན་པའི་ཕྱིར་ཆོས་ཐམས་ཅད་འཁྲུག་པ་མེད་པའི་ཕྱག་རྒྱས་རྒྱས་བཏབ་པའོ། །སྔོན་གྱི་མཐའ་དང་ཕྱི་མའི་མཐའ་བཅད་པའི་ཕྱིར་ཆོས་ཐམས་ཅད་ཇི་ལྟ་བ་བཞིན་གྱི་ཕྱག་རྒྱས་རྒྱས་བཏབ་པའོ། །འཇལ་བའི་དབང་དུ་བྱེད་པ་དང་དབང་དུ་བྱ་བ་མེད་པའི་ཕྱིར་ཆོས་ཐམས་ཅད་སྒྲོ་འདོགས་པ་མེད་པའི་ཕྱག་རྒྱས་རྒྱས་བཏབ་པའོ། །བྱེད་པ་པོས་བྱས་པའི་ཕྱིར་ཆོས་ཐམས་ཅད་འཇིག་པའི་ཕྱག་རྒྱས་རྒྱས་བཏབ་པའོ། །རང་བཞིན་གྱིས་མ་བྱུང་བའི་ཕྱིར་ཆོས་ཐམས་ཅད་འབྱུང་བ་མེད་པའི་ཕྱག་རྒྱས་རྒྱས་བཏབ་པའོ། །རང་བཞིན་གྱིས་མ་སྐྱེས་པའི་ཕྱིར་ཆོས་ཐམས་ཅད་འགོག་པ་མེད་པའི་ཕྱག་རྒྱས་རྒྱས་བཏབ་པའོ། །འགག་པ་མེད་པའི་ཕྱིར་ཆོས་ཐམས་ཅད་གདོད་མ་ནས་སྐྱེ་བ་མེད་པའི་ཕྱག་རྒྱས་རྒྱས་བཏབ་པའོ། ། རྟོག་གེ་ཀུན་ཏུ་སྤྱོད་པ་ཐམས་ཅད་དང་བྲལ་བའི་ཕྱིར་ཆོས་ཐམས་ཅད་སྤྲོས་པ་མེད་པའི་ཕྱག་རྒྱས་རྒྱས་བཏབ་པའོ། །གཟུགས་རྣམ་པར་ལྟ་བ་མེད་པའི་ཕྱིར་ཆོས་ཐམས་ཅད་མཚན་ཉིད་མེད་པའི་ཕྱག་རྒྱས་རྒྱས་བཏབ་པའོ། །གནས་ཡོངས་སུ་བཅད་པའི་ཕྱིར་ཆོས་ཐམས་ཅད་ཉེ་བར་སྦྱོར་བ་མེད་པའི་ཕྱག་རྒྱས་རྒྱས་བཏབ་པའོ། །མི་མཐུན་པའི་ཕྱོགས་ཉེ་བར་མི་དམིགས་པའི་ཕྱིར་ཆོས་ཐམས་ཅད་ལ་རྗེས་སུ་སྦྱོར་བ་མེད་པའི་ཕྱག་རྒྱས་རྒྱས་བཏབ་པའོ། །མངོན་པར་འདུ་བྱེད་པ་ཐམས་ཅད་མེད་པའི་ཕྱིར་ཆོས་ཐམས་ཅད་ལས་ཀྱི་རྣམ་པར་སྨིན་པ་མེད་པའི་ཕྱག་རྒྱས་རྒྱས་བཏབ་པའོ། །སྐྱེ་བ་དང་གནས་པ་ལས་རྣམ་པར་གྲོལ་བའི་ཕྱིར་ཆོས་ཐམས་ཅད་འདུས་མ་བྱས་པའི་ཕྱག་རྒྱས་རྒྱས་བཏབ་པའོ། །ནམ་མཁའ་དང་ཁྱད་པར་མེད་པའི་ཕྱིར་ཆོས་ཐམས་ཅད་མཉམ་པ་ཉིད་ཀྱི་ཕྱག་རྒྱས་རྒྱས་བཏབ་པའོ། །མཚན་ཉིད་གཅིག་པའི་ཕྱིར་ཆོས་ཐམས་ཅད་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕྱག་རྒྱས་རྒྱས་བཏབ་པའོ། །སྙིང་པོ་མེད་པའི་ཕྱིར་ཆོས་ཐམས་ཅད་ཕུང་པོའི་ཕྱག་རྒྱས་རྒྱས་བཏབ་པའོ། །སྙིང་པོ་དང་བཅས་པ་མེད་པའི་ཕྱིར་ཆོས་

ཐམས་ཅད་ཁམས་དང་སྐྱེ་མཆེད་ཀྱི་ཕྱག་རྒྱས་རྒྱས་བཏབ་པའོ། །སངས་རྒྱས་ཐམས་ཅད་ཀྱི་སྐུ་དང་མཉམ་པ་ཉིད་ཐོབ་པས་ཆོས་ཐམས་ཅད་ཁམས་དང་སྐྱེ་མཆེད་ཀྱི་ཕྱག་རྒྱས་རྒྱས་བཏབ་པའོ། །མཐའ་གཅིག་ཏུ་འཇིག་རྟེན་གྱི་ལམ་རྣམ་པར་དག་པའི་ཕྱིར་ཆོས་ཐམས་ཅད་འཕགས་པའི་བདེན་པ་བཞིའི་ཕྱག་རྒྱས་རྒྱས་བཏབ་པའོ། །ལྷ་རྗེས་སུ་བྱེད་པའི་ཕྱིར་ཆོས་ཐམས་ཅད་ཕྱག་རྒྱ་ཆེན་པོའི་ཕྱག་རྒྱས་རྒྱས་བཏབ་པའོ། །མཐའ་གཅིག་ཏུ་ཆོས་ལ་ཕན་འདོགས་པའི་ཕྱིར་ཆོས་ཐམས་ཅད་ཆོས་ཀྱི་ཕྱག་རྒྱས་རྒྱས་བཏབ་པའོ། །ཐམས་ཅད་ཀྱི་ལས་སྣ་ཚོགས་བྱེད་པའི་ཕྱིར་ཆོས་ཐམས་ཅད་ལས་ཀྱི་ཕྱག་རྒྱས་རྒྱས་བཏབ་པའོ། །ཐམས་ཅད་དམ་ཚིག་ཐམས་ཅད་རྗེས་སུ་བསྒྲུབ་པའི་ཕྱིར་ཆོས་ཐམས་ཅད་དམ་ཚིག་གི་ཕྱག་རྒྱས་རྒྱས་བཏབ་པའོ། །སངས་རྒྱས་ཀྱི་ཆོས་ཐམས་ཅད་རབ་ཏུ་མི་གནས་པའི་ཕྱིར་ཆོས་ཐམས་ཅད་སངས་རྒྱས་ཀྱི་ཕྱག་རྒྱས་རྒྱས་བཏབ་པའོ། །ཆོས་ཐམས་ཅད་འཇིག་རྟེན་ལས་འདས་པའི་ཕྱིར་ལམ་གྱི་ཕྱག་རྒྱས་རྒྱས་བཏབ་པ་དང་། ཐེག་པ་ཆེན་པོའི་ཕྱག་རྒྱས་རྒྱས་བཏབ་པ་དང་། །གསང་སྔགས་ཀྱི་ཕྱག་རྒྱས་རྒྱས་བཏབ་པ་དང་། ཕྱག་རྒྱའི་ཕྱག་རྒྱས་རྒྱས་བཏབ་པ་དང་། དཀྱིལ་འཁོར་གྱི་ཕྱག་རྒྱས་རྒྱས་བཏབ་པ་དང་། མཉམ་པ་ཉིད་ཀྱི་ཕྱག་རྒྱས་རྒྱས་བཏབ་པ་དང་། རྡོ་རྗེ་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། ཡེ་ཤེས་ཐམས་ཅད་ཀྱི་ཕྱག་རྒྱས་རྒྱས་བཏབ་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། མེ་ལོང་ལྟ་བུའི་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། མཉམ་པ་ཉིད་ཀྱི་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། སོ་སོར་རྟོག་པའི་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། བྱ་བ་གྲུབ་པའི་ཡེ་ཤེས་ཀྱི་ཕྱག་རྒྱས་རྒྱས་བཏབ་པ་དང་། ཆོས་ཐམས་ཅད་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཀྱི་ཕྱག་རྒྱས་རྒྱས་བཏབ་པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའོ། །མུཿ། འཇམ་དཔལ་ཕྱག་རྒྱའི་ཚིག་འདི་དག་ནི་མི་མཉམ་པ་དང་མཉམ་པའི་ཡེ་ཤེས་ཀྱི་ཚིག་དེ་བཞིན་གཤེགས་པ་

ཐམས་ཅད་ཀྱིས་བྱིན་གྱིས་བརླབས་པའི་ཚིག་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པ་ཐེག་པ་ཆེན་པོའི་ཚིག་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་ཀྱི་ཕྱག་རྒྱ་ཉིད་ཀྱི་ཕྱག་རྒྱའི་ཚིག་གང་གིས། ཕྱག་རྒྱའི་ཚིག་འདི་རྣམས་ཀྱིས་ཀྱང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྐྱེད་པར་བྱེད་དོ། །སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་ཕྱག་རྒྱས་རྒྱས་བཏབ་པའོ། །ཨ་ཨྃ་ཨཿཨཱྃ། སྔགས་པས་ཕྱག་རྒྱ་འདི་ལྟ་བུས་རྒྱས་བཏབ་ན་དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱ་ཡང་དག་པར་འདུའོ། །ཧཱུྃ། མྱུར་དུ་མ་སྐྱེས་པའི་ཆོས་རྣམས་ལ་བཟོད་པ་ཐོབ་པར་འགྱུར་རོ། །ཁྃ། དེ་ནས་ད་ནི་དེ་བཞིན་གཤེགས་པ་ཐམས་ཅད་ཀྱི་སྦྱོར་བ་ཐམས་ཅད་ཀྱི་གསང་བ་ཆེན་པོའི་ཕྱག་རྒྱའི་ཡེ་ཤེས་སུ་གྱུར་པ་ནི། སྙིང་གི་དབུས་སུ་རྟག་བསྒོམ་བྱ། །པདྨ་ཆེན་པོ་འདབ་བརྒྱད་པ། །འབར་བའི་ཕྲེང་བས་འཁྲིགས་པའི་འོད། །ཟླ་བའི་དཀྱིལ་འཁོར་དབུས་སོན་པར། །དེ་ཡི་སྟེང་དུ་རྟག་བསྒོམ་པ། །ཡི་གེ་ཡི་ནི་གཙོ་བོ་མཆོག །ཐོག་མ་ཐ་མ་མེད་ཞི་བ། །ཁ་བ་བ་མོའི་འོད་འདྲ་འོད། ། དཔའ་བོ་ཀུནྡ་ཟླ་ལྟར་དཀར། །ཉི་མའི་དཀྱིལ་འཁོར་ལྟར་འོད་གསལ། །ཞི་བའི་ཆོས་ཀྱི་རང་བཞིན་སྐུ། །ཀུན་མཁྱེན་ཡེ་ཤེས་ཀྱིས་གང་བ། །དེ་བཞིན་གཤེགས་པ་ཀུན་གྱི་གསང། །ར་སཱ་ཡ་ན་དང་མཚུངས་མཆོག །ཁ་ཡིག་མཁའ་འདྲར་ཤེས་པར་བྱ། །ཐིག་ལེ་ནཱ་དས་རྣམ་པར་སྤྲས། །གསང་བ་ཆེན་པོ་མཆོག་ཏུ་མཛེས། །ཐོག་མ་ཐ་མ་མེད་པའི་བདག །དེ་ཡི་སྟེང་དུ་འོད་ཟེར་ཆེ། །འབར་བའི་ཕྲེང་བ་འཁྲུགས་པའི་འོད། །རྡོ་རྗེ་རྡོ་རྗེ་ལྟ་བུར་གནས། །སྤྱི་བོར་རྩེ་མོ་ལྔ་དང་ལྡན། །དེ་ཡི་སྟེང་དུ་རྟག་བསམས་པ། །ཡི་གེ་མཆོག་གི་གོ་འཕང་ངོ་། །མན་ངག་མཆོག་ལས་ཤེས་བྱ་སྟེ། །གཞན་དུ་ན་ནི་ང་མི་སྨྲ། །སངས་རྒྱས་མཁས་པ་ཐམས་ཅད་ཀྱིས། །མདོར་བསྡུས་ནས་ནི་འདི་གསུངས་སོ། །རྣམ་པར་གྲོལ་བ་གསུམ་ཐོབ་ནས། །ཐོབ་འགྱུར་འདི་ནི་གཞན་དུ་མིན། །ལྕེ་ནི་རྐན་

ལ་སྦྱར་བར་བྱ། །སྣ་ཡི་རྩེ་མོར་ཡི་གེ་ཧཱུྃ། །དབང་པོ་གཉིས་ནི་སྙོམས་འཇུག་པས། །ཕྱག་རྒྱའི་གོ་འཕང་ཚིག་གིས་ནི། །ཤེས་རབ་ལྡན་པས་རང་སེམས་བསྒོམ། །སྣང་བ་མེད་ཅིང་སྤྲོས་མེད་པ། །ཤིན་ཏུ་མཆོག་ཏུ་ཕྲར་ཤེས་བྱ། །ཁྱབ་བདག་བསོད་ནམས་ཡེ་ཤེས་དངོས། །བསམ་བྱ་བསམ་གཏན་བརྩོན་བྱས་ཏེ། །མིག་དང་སྒྲོན་མའི་འོད་བཞིན་དུ། །ར་ཡིག་འབར་བ་དང་ལྡན་པ། །མགྲིན་པ་འབད་པས་གཅུམ་ནས་ནི། །དཀར་པོ་སེར་པོ་སྔོན་པོའི་འོད། །དམར་པོ་ཡང་ནི་བདག་གིས་སྤྲོ། །འབར་བ་འདི་དག་འབད་པ་ཡིས། །འདི་དག་ཡང་དག་ཉེར་མཚོན་བྱ། །སྙིང་གར་གསལ་བར་བྱས་ནས་སུ། །དེ་བཞིན་ཐམས་ཅད་སྤྱི་བོར་སོང་། །གནས་དེ་ལས་ནི་འཐོན་ནས་ཀྱང་། །དབང་པོ་ཐམས་ཅད་དགང་བར་བྱས། །དེ་ལས་འཐོན་ནས་འཇིག་རྟེན་ནི། །མཚུངས་པར་ཀུན་ནས་ཐམས་ཅད་དུ། །སླར་ཡང་དེ་རུ་འོངས་ནས་ནི། །དེ་ནི་འཇུག་པར་རབ་ཏུ་བསམ། །ཡིད་ཀྱིས་དེ་ལྟར་བསྒོམས་ན་ནི། །རང་ཉིད་འཁོར་ལོས་སྒྱུར་ལྟ་བུར། །དབང་པོ་གཉིས་ནི་རབ་སྦྱོར་བས། །ལེགས་པར་མཉམ་པར་གཞག་པས་བསྒོམ། །དབང་པོ་ལྔས་ནི་དམིགས་ནས་ཡང་། །མི་རྣམས་ལུས་ནི་དག་པར་འགྱུར། །ཇི་སྙེད་བུད་མེད་ཡོན་ཏན་དང་། །ལྡན་པ་ཀུན་དུ་གནས་པ་ནི། །བཀུག་ནས་བཅུག་སྟེ་བཅིངས་ནས་སུ། །དབང་དུ་བྱ་སྟེ་བསྒྲུབ་པར་བྱ། །དེ་རྣམས་ལྷན་ཅིག་ཡོངས་བརྟེན་ནས། །སྔགས་པ་མཆོག་གི་དངོས་གྲུབ་ཐོབ། །གསང་བ་མཆོག་ཏུ་དགྱེས་པ་ན། ཤེས་རབ་ཕ་རོལ་ཕྱིན་པ་སྟེ། །ཞི་བའི་ཆོས་ཀྱི་རིམ་པ་མཆོག །ཤིན་ཏུ་མཉམ་པར་གཞག་པས་བསྒོམ། །རྡོ་རྗེ་སེམས་དཔའི་དངོས་གྲུབ་གང་། །དེ་འགྲུབ་གཞན་ལྟ་སྨོས་ཅི་དགོས། །མཆོག་ནི་རྟག་པར་ཤེས་པར་བྱ། །བར་མས་ཕུན་སུམ་ཚོགས་པ་སྟེ། །སྟོང་པ་ཉིད་དང་མཚན་མེད་མཆོག །སྨོན་པ་མེད་པ་ཞེས་སུ་གྲགས། །ཆོས་ཀུན་བདག་མེད་པ་ཡི་མཆོག །ཀུན་མཁྱེན་ཡེ་ཤེས་རྫོགས་པར་བྱེད། །ས་བཅུ་ཡི་ནི་སྟོབས་དག་གིས། །ཕ་རོལ་ཕྱིན་པ་ཐམས་ཅད་ཐོབ། །

རྡོ་རྗེ་སེམས་དཔའ་མཆོག་བསྒོམས་ནས། །རྡོ་རྗེ་སེམས་དཔའ་འདྲ་བར་འགྱུར། །དེ་ཉིད་འདི་ནི་བཅུད་ཀྱིས་ལེན། །གཉིས་སུ་མེད་པའི་ཡེ་ཤེས་མཆོག །ཐེག་ཆེན་མཆོག་ཏུ་ཡིད་འོང་བ། །སྟོང་ཉིད་བསྒོམ་པའི་བདག་ཉིད་ཅན། །གཉིས་སུ་མེད་པའི་ཡེ་ཤེས་མཆོག །གང་གིས་རྟག་ཏུ་སྒོམ་བྱེད་ན། །དེ་ཡང་རྡོ་རྗེ་འཛིན་རྒྱལ་པོ། །ཡོན་ཏན་མཆོག་ལས་སྐྱེས་པར་འགྱུར། །རྒྱན་རྣམས་ཀུན་གྱིས་རྣམ་པར་བརྒྱན། །བུད་མེད་ལུས་ངག་ཡིད་སྦྱོར་བས། །ཡོངས་རེག་ཨཱ་ལིཾ་ག་ཙུམྦས། །མཆོག་གི་དངོས་གྲུབ་ཐོབ་པར་འགྱུར། །བུད་མེད་ཁ་དོག་ལྗང་གུ་གང་། །རྒྱན་རྣམས་ཀུན་གྱིས་རྣམ་པར་བརྒྱན། །དེ་ཚེ་དེ་ནི་སྔགས་པས་བསྟེན། །མཉམ་མེད་གསང་བའི་ཡེ་ཤེས་མཚུངས། །བུད་མེད་གང་ཞིག་ཁ་དོག་དཀར། །པདྨའི་འདབ་མ་འདྲ་བའི་འོད། །དེ་དང་ལྷན་ཅིག་སྔགས་པས་བསྡད། །དམ་པའི་དངོས་གྲུབ་ཐོབ་པར་འགྱུར། །བུ་མོ་གང་ཞིག་ཁ་དོག་དམར། །ཨུཏྤ་ལ་ཡི་རྒྱན་འཆང་མ། །སྔགས་པས་དེ་དང་ལྷན་ཅིག་གནས། །ཤེས་རབ་ཕ་རོལ་ཕྱིན་མཚུངས་འགྱུར། །བུད་མེད་ཨིན་དྲ་ནཱི་ལ་མཚུངས། །གསང་བ་རྡོ་རྗེ་རྗེས་སུ་སྦྱོར། ། རིག་འཛིན་རྣམས་ཀྱི་རྒྱལ་པོ་ནི། །སྟོབས་ཆེན་གྲུབ་པར་དེ་འགྱུར་རོ། །གསང་ཆེན་མ་ར་ཀ་ཏ་མཚུངས། །གང་གིས་རྟག་ཏུ་བསྟེན་པ་ནི། །དེ་ཡང་རྡོ་རྗེ་འཛིན་རྒྱལ་པོ། །མྱུར་དུ་གསང་བའི་དམ་པར་འགྱུར། །བུད་མེད་པདྨ་རཱ་ག་འདྲ། །རྒྱན་རྣམས་ཀུན་གྱིས་རྣམ་པར་བརྒྱན། །དབང་པོ་གཉིས་ནི་སྙོམས་འཇུག་པས། །རྡོ་རྗེ་འཛིན་མ་ལྟ་བུར་བསྒྲུབ། །སངས་རྒྱས་ཀུན་དང་མཉམ་སྦྱོར་བ། །གཉིས་སུ་མེད་པའི་ཡེ་ཤེས་མཆོག །བསམ་པས་རྟག་ཏུ་བསྒོམ་པ་ནི། །མཉམ་མེད་སངས་རྒྱས་ཀུན་དང་མཚུངས། །དྲན་པ་ཉེ་བར་གཞག་པ་བཞི། །མཆོག་གིས་གནས་ཀྱིས་བསྒོམས་ན་ནི། །རྣལ་འབྱོར་མཆོག་གིས་མི་རིང་བར། །རྡོ་རྗེ་འཛིན་པ་ལྟ་བུར་འགྱུར། །ཡང་དག་སྤོང་བ་རྣམ་པ་བཞི། །ལེགས་པར་མཉམ་པར་གཞག་པ་བསྒོམ། །དབང་པོ་གཉིས་ནི་སྙོམས་འཇུག་པས། །མཉམ་མེད་

འཇིག་རྟེན་དབང་ཕྱུག་མཚུངས། །སོ་སོ་ཡང་དག་རིག་པ་བཞི། །ཤིན་ཏུ་མཉམ་གཞག་བསྒོམས་ན་ནི། །རྡོ་རྗེ་སངས་རྒྱས་ཏིང་འཛིན་མཆོག །མཉམ་མེད་འཇམ་པའི་མཆོག་དང་འདྲ། །མི་འཇིགས་པ་ནི་རྣམ་པ་བཞི། །རྡོ་རྗེའི་སྦྱོར་བས་བསྒོམ་པར་བྱ། །དབང་པོ་གཉིས་ནི་སྙོམས་འཇུག་པས། །རྡོ་རྗེ་འཛིན་པ་ལྟ་བུ་སྟེ། །རྫུ་འཕྲུལ་གྱི་ནི་རྐང་པ་བཞི། །ཤིན་ཏུ་མཉམ་གཞག་བསྒོམས་ན་ནི། །དབང་པོ་གཉིས་ནི་མཉམ་སྦྱོར་བས། །རྫུ་འཕྲུལ་ལྡན་པའི་མཆོག་ཏུ་འགྱུར། །ཚངས་པ་ཡི་ནི་གནས་བཞི་པོ། །ཚད་མེད་པ་ཡི་སེམས་ཀྱིས་ནི། །རྡོ་རྗེ་སྦྱར་བར་བདག་བསྒོམས་ན། །རྡོ་རྗེ་འཛིན་པ་ལྟ་བུར་འགྲུབ། །སྦྱོར་བའི་བདག་ཉིད་དབང་པོ་ལྔ། །དམ་པའི་དོན་གྱིས་བསྒོམས་ན་ནི། །དབང་པོ་གཉིས་ནི་སྙོམས་འཇུག་པས། །མཉམ་མེད་རྡོ་རྗེ་སངས་རྒྱས་མཚུངས། །ཡིད་ཀྱི་སྟོབས་ནི་རྣམ་པ་ལྔ། །ཤིན་ཏུ་མཉམ་གཞག་བསྒོམས་ན་ནི། །འཁོར་ལོས་སྒྱུར་བ་བརྩོན་འགྲུས་ཆེ། །སྟོབས་འཛིན་ལྟ་བུ་ཉིད་དུ་འགྱུར། །བྱང་ཆུབ་ཡན་ལག་རིན་ཆེན་བདུན། །གསང་སྔགས་སྒོམ་པས་བསྒོམས་ན་ནི། །རྟོག་པའི་ཡེ་ཤེས་སྦྱོར་བ་ཡིས། ཁྱབ་བདག་ཆོས་ཀུན་འཛིན་པར་འགྱུར། །འཕགས་པའི་ཡན་ལག་བརྒྱད་ཀྱི་ལམ། །ཀུན་མཁྱེན་ཡེ་ཤེས་རྫོགས་བྱེད་པ། །དེ་ནི་བསྒོམས་པ་ཙམ་གྱིས་ནི། །འཇིག་རྟེན་ཤེས་རབ་རབ་ཏུ་འདའ། །རྗེས་སུ་དྲན་པ་རྣམ་པ་དྲུག །བདག་ཉིད་རྩེ་གཅིག་གིས་བསྒོམས་ན། །སྔགས་པ་རྡོ་རྗེ་འཛིན་པ་རུ། །སྔགས་པ་དུས་མི་རིང་བར་འགྱུར། །སྟོབས་བཅུ་པོ་ནི་ཡང་དག་བསྒོམས། །བསྒོམ་པའི་རྣལ་འབྱོར་ད་ཉིད་ཀྱིས། །བསོད་ནམས་ཡེ་ཤེས་ཡོངས་རྫོགས་ཏེ། །རྟག་ཏུ་སྟོབས་བཅུའི་དམ་པར་འགྱུར། །ཕ་རོལ་ཕྱིན་བཅུ་ཡོངས་སུ་རྫོགས། །སྟོབས་རྣམས་དང་ནི་དབང་རྣམས་དང་། །ས་རྣམས་ཀུན་ནི་དེས་བསྐྱེད་ནས། །མྱུར་དུ་མཚན་མ་དག་པར་འགྱུར། །རྣམ་གྲོལ་གོས་ཀྱིས་བསྒྲིབས་ནས་སུ། །དེ་ཡི་ནུ་མ་ཤིན་ཏུ་བསྣུན། །རྗེ་ངར་གྱིས་ཀྱང་དེ་བཞིན་དུ། །མཆུ་ཡིས་མཆུ་ནི་ཡོངས་སུ་གཟུང་། །འབད་པས་དམ་

དུ་ཨཱ་ལིང་ག །བྱང་ཆུབ་སེམས་ནི་བསྒོམ་པར་བྱ། །རྡོ་རྗེ་ཡེ་ཤེས་བརྩོན་འགྲུས་ཆེ། །རྡོ་རྗེ་དབྱིངས་སུ་བདག་བརྟན་པས། །རྣམ་པ་སྣ་ཚོགས་ཀ་ར་ཎ། །རྣལ་འབྱོར་ཤེས་པ་དེ་བསྟེན་བྱ། །བུད་མེད་རྣམས་ཀྱི་དམ་ཚིག་འགྲུབ། །རྡོ་རྗེ་སེམས་དཔའ་མཚུངས་པར་འགྱུར། །བུད་མེད་རྣམས་ཀྱི་བྷ་གར་བསྣུན། །ལིང་ག་མྱུར་དུ་གང་བར་འགྱུར། །སྦྱོར་བ་འདི་ནི་མཁྱེན་པ་ཡིས། །སྟོབས་ཆེན་སངས་རྒྱས་རབ་ཏུ་གྲུབ། །གསང་བ་འདི་ནི་དམ་པ་སྟེ། །སངས་རྒྱས་ཀུན་གྱི་སྐྱོབ་པའོ། །གསང་བ་འདི་ཡི་སྦྱོར་བ་ཡིས། ། ཡི་གེའི་དམ་པ་འགྲུབ་པར་འགྱུར། །སངས་རྒྱས་རྣམས་ཀྱི་མ་འདྲེས་པའི། །ཆོས་སུ་གྲགས་པ་གང་ཡིན་པ། །དེ་རྣམས་སྒོམ་བྱེད་གཙོ་བོ་ནི། །དངོས་གྲུབ་ཐམས་ཅད་རབ་ཚོགས་པའོ། །མ་འདྲེས་པ་ཡི་ཆོས་བཅྭ་བརྒྱད། །སངས་རྒྱས་ཆོས་སུ་གྲགས་པ་སྟེ། །དེ་རྣམས་བསྒོམ་པ་དང་ལྡན་པས། །སངས་རྒྱས་བྱང་ཆུབ་རབ་སྟེར་བྱེད། །བསམ་གཏན་བཞི་པོ་ཐོབ་ནས་ནི། །གཟུགས་མེད་པ་ཡི་རྟག་པར་ཡང་། །འགོག་པའི་སྙོམས་པར་འཇུག་ལྡན་པས། །སངས་རྒྱས་བྱང་ཆུབ་སྒྲུབ་པ་པོ། །བྱང་ཆུབ་ཕྱོགས་ནི་སུམ་ཅུ་བདུན། ། ཆོས་ནི་མཆོག་ཏུ་རྨད་བྱུང་བ། །དེ་རྣམས་བསྒོམ་པ་དང་ལྡན་པས། །བྱང་ཆུབ་སེམས་དཔའི་སྐྱོབ་པའོ། །སྔགས་རྣམས་ཐམས་ཅད་རབ་འགྲུབ་ཅིང་། །སྦྱོར་བ་ཐམས་ཅད་ཐམས་ཅད་དུའོ། །དེས་ན་འབད་པ་ཐམས་ཅད་ཀྱིས། །སངས་རྒྱས་ཆོས་ཉིད་བསྒོམ་པར་བྱ། །འཇིག་རྟེན་འཇིག་རྟེན་འདས་པའི་ལམ། །ཡེ་ཤེས་རིན་ཆེན་རབ་རྙེད་དཀའ། །མཆོད་དང་དབང་བསྐུར་བྱིན་བརླབས་པས། །རྙེད་འགྱུར་གཞན་དུ་མ་ཡིན་ནོ། །བཤགས་དང་གསོལ་བ་གདབ་པ་དང་། །བདག་ཉིད་དབུལ་བ་དེ་བཞིན་ནོ། །སངས་རྒྱས་སོགས་ལ་ཡི་རང་ཞིང་། །དེ་བཞིན་ཡོངས་སུ་བསྔོ་བ་དང་། །བྱང་ཆུབ་སེམས་ནི་ཡང་དག་བསྐྱེད། །ཁྱད་པར་དུ་ནི་དུས་ཀུན་དུའོ། །ཐོག་མ་བར་དང་ཕྱེམ་རེད་དུ། །ཇི་ལྟ་བཞིན་དུ་རྗེས་བསྒོམས་པས། །སངས་རྒྱས་ཐམས་ཅད་བསྒྲུབ་བྱ་སྟེ། །འདི་ལ་ཐེ་ཚོམ་ཡོད་མ་ཡིན། །

འགྲོ་བ་སེམས་ཀྱིས་སྤྲོ་བ་ནི། །བརྟན་པའི་སྙིང་པོར་ལེགས་པར་བཤད། །སྟོང་ཉིད་དེ་བཞིན་ཉིད་ལས་བྱུང་། །རྡོ་རྗེ་སེམས་དཔར་དེ་བཤད་དོ། །འགྲོ་བ་ཐམས་ཅད་བཀུག་ནས་སུ། །སངས་རྒྱས་བྱང་ཆུབ་སྦྱར་བར་བྱ། །དོན་ཡོད་ཡེ་ཤེས་དག་པ་དེ། །རྡོ་རྗེ་རྒྱལ་པོ་མཆོག་ཅེས་བཤད། །རྡོ་རྗེ་ཆགས་པས་ཆགས་གྱུར་ནས། །རང་བཞིན་གྱིས་ནི་བརྟན་པར་འགྱུར། །འགྲོ་བ་མ་ལུས་ལུས་མེད་པ། །དེ་ཡི་སེམས་ནི་ཆགས་པར་བཤད། །ཆོས་རྣམས་ཀུན་ནི་རང་བཞིན་གྱིས། །རྣམ་པར་དབེན་ཞིང་གཉིས་སུ་མེད། །གང་ཚེ་དག་པའི་བདག་ཉིད་མཐོང་། །དེ་ཚེ་རྡོ་རྗེ་ལེགས་པར་བཤད། །རྡོ་རྗེ་སེམས་དཔའ་བཞི་པོ་ཡིས། །མིང་དང་བརྡ་ནི་སྦྱར་བའོ། །སངས་རྒྱས་ཀུན་དང་མཉམ་སྦྱོར་བ། །སྡོམ་པ་མཆོག་ཏུ་དམ་པའོ། །ཁམས་གསུམ་པ་ཡི་རྒྱལ་སྲིད་ཆེ། །ཚོགས་གཉིས་རྫོགས་པར་བྱས་པ་སྟེ། །ས་དང་ཕ་རོལ་ཕྱིན་མཆོག་གཙོ། །རྡོ་རྗེ་དབང་བསྐུར་ལས་བྱུང་བ། །དེ་བཞིན་གཤེགས་ཀུན་ཡེ་ཤེས་ཏེ། །རྙོག་པ་མེད་ཅིང་ཡི་གེ་མེད། །འོད་ཀྱི་དཀྱིལ་འཁོར་གཟི་བརྗིད་མཆོག །བརྟན་པ་རྟག་པ་ཉིད་དུ་འགྱུར། །ནམ་མཁའི་མཛོད་ནི་མཛོད་ཆེན་པོ། །ཆོས་རྣམས་ཐམས་ཅད་དབང་སྒྱུར་བ། །ཡིད་བཞིན་ནོར་བུ་རྡོ་རྗེ་ཆེ། །རྡོ་རྗེ་ཏོག་ནི་བླ་ན་མེད། །ཡེ་ཤེས་སྣང་བ་རིན་ཆེན་ཆེ། །རྨད་དུ་བྱུང་བ་ངེས་པར་མཐོང་། །དེ་བཞིན་གཤེགས་ཀུན་གསང་བ་ནི། །རྡོ་རྗེ་བཞད་པ་ཞེས་སུ་གྲགས། །ཆོས་ཀྱི་བདག་མེད་ལས་བྱུང་བ། །གཉིས་སུ་མེད་པའི་ཡེ་ཤེས་མཆོག །ཆོས་ཉིད་དམ་པ་བསམ་དུ་མེད། །རྡོ་རྗེ་ཆོས་ཞེས་བྱ་བར་དྲན། །རྡོ་རྗེ་བློ་གྲོས་སྣང་བ་ཆེ། །ཤེས་རབ་ཡེ་ཤེས་དྲི་མེད་མཆོག །ཟག་མེད་ཤེས་རབ་ཆེན་པོ་པ། །དེ་ནི་རྡོ་རྗེ་རྣོན་པོར་བཤད། །སངས་རྒྱས་རྣམས་ཀྱི་ཆོས་འཁོར་ལོ། །གཉིས་སུ་མེད་ལས་བྱུང་བར་མཚོན། །ཡན་ལག་བཅུ་གཉིས་རྟེན་འབྲེལ་མིང་། །རྡོ་རྗེ་རྒྱུ་ཞེས་ངེས་པར་བཤད། །དགོངས་པའི་སྐད་ནི་སྤྲོས་པའི་མཆོག །ཡུལ་རྣམས་ཀྱིས་ནི་བཤད་པ་སྟེ། །སངས་རྒྱས་ཀུན་གྱིས་བཟླས་པ་ཆེ། །

དེ་ནི་རྡོ་རྗེ་སྨྲ་བར་བཤད། །སེམས་ཅན་ཀུན་གྱི་དོན་ལ་སྦྱར། །སངས་རྒྱས་ཀུན་གྱི་མཆོད་པ་ཆེ། །གདོད་ནས་དག་པའི་རྣལ་འབྱོར་ཆེ། །དེ་ནི་རྡོ་རྗེ་ལས་སུ་བཤད། །བླ་ན་མེད་པའི་བྱམས་པ་ཆེ། །བསྲུང་བའི་བྱ་བ་གོང་ན་མེད། །དག་པའི་ཆོས་ནི་བརྩོན་ཆེན་པོ། །རྡོ་རྗེ་བསྲུང་བ་ཞེས་སུ་གྲགས། །ཤེས་རབ་ཐབས་ཀྱི་ཁྲོ་བོ་ཆེ། །སངས་རྒྱས་ཀུན་དང་རྗེས་མཐུན་པ། །ཉོན་མོངས་ཐམས་ཅད་ཟ་བ་ཆེ། །དེ་ནི་རྡོ་རྗེ་གནོད་སྦྱིན་བརྗོད། །ལུས་ངག་ཡིད་ནི་ཡང་དག་སྦྱོར། །སྒྲིབ་པ་མེད་ཅིང་ཡི་གེ་བྲལ། ། དེ་བཞིན་གཤེགས་པ་ཀུན་གྱི་གསང། །དེ་ནི་རྡོ་རྗེ་མཚམས་སྦྱོར་བཤད། །རྡོ་རྗེ་ཡེ་ཤེས་རྣལ་འབྱོར་ཆེ། །སངས་རྒྱས་ཀུན་གྱི་སྟོབས་པོ་ཆེ། །ཐོག་མ་ཐ་མ་མེད་ཞི་བ། །རིག་པ་མཆོག་ཅེས་བྱ་བར་བཤད། །དེ་ནས་ཡང་འཇམ་དཔལ་གཞོན་ནུར་གྱུར་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གླུས་དེ་བཞིན་གཤེགས་པ་ཐམས་ཅད་ལེགས་པར་མཆོད་ནས་གླུར་བླངས་པ། ཨོྃ་སརྦྦ་བུད་དྷ་པར་མེ་ཤྭ་ར་བུ་ཤུདྷྱ་ལ་ལི་ཧོཿ། སུ་བྷ་གཿ། སུ་ར་ཏཿ། མ་ཧཱ་མ་ཧཱ་ཨཱ་དི་མ་ཧཱ་བོ་དྷི་བུདྡྷ་བུདྡྷ། ཡོ་གཱི་ཤྭ་ར་ཏ་ཐཱ་ཏཱ་བྷཱ་བི་ཏྭཱཏྨ་ཀ་ཏ་ཐཱ་ག་ཏ། བྱང་ཆུབ་སེམས་བསྐྱེད་ལས་འཁྲུངས་པ། །སངས་རྒྱས་ཀུན་ལ་ཕྱག་འཚལ་ལོ། །མཆོག་གི་དབང་ཕྱུག་དམ་པའི་ཆོས། །གདོད་ནས་ཞི་བ་ལ་ཕྱག་འཚལ། །བྱང་ཆུབ་སེམས་དཔའ་སྐྱོབ་པ་པོ། །རྡོ་རྗེ་ཅན་ཀུན་ལ་ཕྱག་འཚལ། །དེ་བཞིན་གཤེགས་པ་རྡོ་རྗེ་ཆེ། །སངས་རྒྱས་བྱང་ཆུབ་ལ་ཕྱག་འཚལ། །མི་དམིགས་གོ་འཕང་ལ་གནས་པ། །མཐའ་ལས་འདས་པ་ལ་ཕྱག་འཚལ། །འདྲེན་པ་རྣམས་ཀྱི་སྟོབས་པོ་ཆེ། །ཧཱུཾ་གི་ཡི་གེ་མ་ལུས་པ། །ཐམས་ཅད་མཁྱེན་པ་མཐའ་དག་དང་། །ཤིན་ཏུ་ཡོངས་སུ་མྱ་ངན་འདའ། །འཇིག་རྟེན་དབང་ཕྱུག་མགོན་བཟང་པོ། །རྡོ་རྗེ་ཡེ་ཤེས་དྲི་མ་མེད། །རྣམ་པར་དག་པ་རྡོ་རྗེ་མཆོག །དངོས་གྲུབ་ཐམས་ཅད་རབ་གསོལ་བྱེད། །རྣལ་འབྱོར་དབང་ཕྱུག་རྣམས་ཀྱི་མགོན། །དུས་གསུམ་བསམ་པ་དབང་སྒྱུར་བ། །སེམས་ཅན་རྣམས་ལ་

ཕན་དོན་དུ། །འབྱུང་བ་ཁྱོད་ལ་ཕྱག་འཚལ་འདུད། །རྡོ་རྗེ་སྙིང་པོ་རྒྱན་ལས་དཀྱིལ་འཁོར་ཆེན་པོ་ཡོངས་སུ་རྫོགས་སྷོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་སླར་ཡང་འདུས་པར་གྱུར་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་ཞུགས་ཏེ། བཅོམ་ལྡན་འདས་རྣལ་འབྱོར་གྱི་དབང་ཕྱུག་ཆེན་པོ་རྡོ་རྗེ་སྙིང་པོ་རྒྱན་གྱི་དཀྱིལ་འཁོར་ཆེན་པོའི་ཕྱག་རྒྱའི་དོན་ཆེད་དུ་བརྗོད་པ། དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །རྡོ་རྗེ་སྙིང་པོ་ཞེས་གྲགས་པ། །སངས་རྒྱས་ཀུན་གྱི་སྐྱོབ་པའོ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་མཛེས། །སྒོ་ཁྱུད་རྡོ་རྗེའི་གཟུགས་བརྙན་དང་། །ཕྱག་རྒྱ་དང་ལྡན་རབ་ཏུ་མཛེས། །དཀྱིལ་འཁོར་དེ་ཡི་དབུས་སུ་ནི། །འཁོར་ལོ་གཉིས་ནི་རབ་ཏུ་གནས། །རྩིབས་བརྒྱད་པ་དང་བཅུ་དྲུག་རྩིབས། །རྣམ་པར་དབྱེ་བ་ལེགས་པར་བརྟག །དབུས་ཀྱི་དཀྱིལ་འཁོར་ནང་གི་ནི། །ལྟེ་བའི་གནས་སུ་ལེགས་བརྟགས་པ། །པདྨ་ཆེན་པོ་འདབ་བརྒྱད་པ། །གེ་སར་གཏམས་པས་རབ་ཏུ་མཛེས། །དེ་ཡི་ལྟེ་བའི་དབུས་སུ་ནི། །ཁྱབ་བདག་རྣལ་འབྱོར་དབང་ཕྱུག་ཆེ། །རྣམ་པར་སྣང་མཛད་བརྩོན་ཆེན་པོ། །སེམས་ཅན་ཀུན་ལ་རྗེས་བརྩེ་བས། །དེ་ཡི་ཉེ་འཁོར་ཀུན་དུ་ནི། །དེ་བཞིན་གཤེགས་པ་བརྒྱད་རྣམས་དགོད། །ཤར་དུ་དགོད་བྱ་འཁོར་ལོ་ཅན། །གཙུག་ཏོར་དཀར་པོ་ནུབ་ཏུ་གནས། །གཟི་བརྗིད་ཕུང་པོ་ལྷོ་རུའོ། །རྣམ་པར་རྒྱལ་བ་བྱང་དུ་གནས། །དབང་ལྡན་རྣམ་པར་གསལ་བར་བྲི། །མེར་ནི་སྟེང་འགྲོ་དགོད་པར་བྱ། །སྟེང་འགྲོ་ཆེན་པོ་བདེན་བྲལ་དུ། །རླུང་དུ་རྒྱལ་བ་ཆེན་པོ་གནས། །སངས་རྒྱས་གཟུགས་བརྙན་འཛིན་པའི་མཆོག། རྣལ་འབྱོར་ལྡན་པས་འདི་དག་བྲི། །མི་བསྐྱོད་པ་ནི་ཤར་དུ་དགོད། ། ལྷོ་རུ་རིན་ཆེན་འབྱུང་ལྡན་ནོ། །ནུབ་ཏུ་འོད་དཔག་མེད་པར་འགྱུར། །བྱང་དུ་དོན་ཡོད་གྲུབ་པའི་མིང་། །ཟླ་བའི་དཀྱིལ་འཁོར་ལ་བརྟེན་པའོ། །དབང་ལྡན་ཕྱོགས་ནས་བརྩམས་ནས་ནི། །རྡོ་རྗེ་སེམས་དཔའ་ལ་སོགས་བྲི། །ཐམས་ཅད་ཟླ་བའི་དཀྱིལ་འཁོར་གནས། །

འཁོར་རྣམས་ཟླ་བའི་དཀྱིལ་འཁོར་ལའོ། །ཕྲེང་བ་རྣམ་པར་དགོད་བྱ་བ། །རང་གི་ཕྱག་རྒྱ་འོད་ཟེར་འབར། །རྡོ་རྗེ་སྒེག་མོ་ལ་སོགས་པའི། །ལྷ་མོ་འབད་པས་དགོད་པར་བྱ། །རྡོ་རྗེ་བདུག་པ་ལ་སོགས་བྲི། །དེ་བཞིན་གཟུགས་ཀྱི་རྡོ་རྗེ་སོགས། ། རྡོ་རྗེ་ལྕགས་ཀྱུ་ལ་སོགས་པ། །སྒོ་སྲུང་འབད་པས་བྲི་བར་བྱ། །ཕྱི་ཡི་དཀྱིལ་འཁོར་ལ་གནས་པར། །ཀུན་དུ་བཟང་སོགས་རིམ་བཞིན་བྲི། །རང་གི་ཕྱག་རྒྱའི་འཁོར་རྣམས་དང་། །ཕོ་ཉ་ཡི་ནི་འཁོར་དག་དང་། །ཁྲོ་བོ་རྣམས་དང་མངག་པ་དང་། །དེ་བཞིན་ཕོ་ཉ་ཕོ་ཉ་མ། ། རྒྱ་མཚོ་ཡི་ནི་དཀྱིལ་འཁོར་ནི། །འོད་ཀྱི་དཀྱིལ་འཁོར་གསལ་བའོ། །ཕྱི་རུ་ཕྱི་རོལ་རྡོ་རྗེའི་མིང་། །དཀྱིལ་འཁོར་ལ་ནི་འབད་པས་བྲི། །དབང་ལྡན་ཕྱོགས་ནས་བརྩམས་ནས་སུ། །འཇིག་རྟེན་སྐྱོང་བ་བརྒྱད་པོ་བྲི། །ཚངས་པ་ཁྱབ་འཇུག་དབང་ཆེན་མིང་། །དབང་པོ་ལ་སོགས་ལྷ་ཐམས་ཅད། །མ་མོ་ཀུན་དང་སྲིང་མོ་རྣམས། །རྒྱལ་པོ་ཆེན་པོ་བཞི་དང་ཀླུ། །དེ་བཞིན་ལྷ་རྣམས་ཐམས་ཅད་དང་། །བརྩོན་འགྲུས་ཆེན་པོ་ནམ་མཁའ་ལྡིང་། །འབད་པ་ཡིས་ནི་བྲི་བར་བྱ། །དེ་ལྟའི་དཀྱིལ་འཁོར་བྲིས་ནས་སུ། །ཁྱད་པར་དུ་ནི་མཆོད་པར་བྱ། ། མེ་ཏོག་བདུག་སྤོས་རོལ་མོ་སོགས། །དེ་བཞིན་བཟའ་དང་སྟོན་མོ་སོགས། །ཕྲེང་བའི་རྒྱན་ནི་སྣ་ཚོགས་ཀྱིས། །དེ་བཞིན་གཤེགས་རྣམས་མཆོད་པར་བྱ། །དཀྱིལ་འཁོར་ཀུན་གྱི་ཆོ་ག་ཡིས། །མཆོད་པ་ཀུན་གྱིས་ཐམས་ཅད་ནས། །འཁོར་ལོ་ཀུན་གྱི་ཆོ་ག་ཡིས། །སངས་རྒྱས་ཐམས་ཅད་མཆོད་པར་བྱ། །དེ་ནས་སློབ་མ་ཐམས་ཅད་གཞུག །ཡོངས་སུ་དག་པ་ཁྱད་པར་དུ། །བྱང་ཆུབ་སེམས་ནི་བསྐྱེད་ནས་སུ། །བྱང་ཆུབ་བསླབ་པ་རྗེས་སྤྱོད་པ། །ཆོ་ག་ཤེས་པའི་སྔགས་པས་གཞུག །འདྲེན་པ་རྣམས་ལ་མཆོད་དུ་གཞུག །རྡོ་རྗེའི་དབང་བསྐུར་སྦྱོར་བ་ཡིས། །དབང་བསྐུར་བ་ནི་དེ་ནས་སྦྱིན། །སེང་གེའི་ཁྲི་ཡི་སྟེང་དུ་ནི། །དར་དང་མེ་ཏོག་ཆུན་པོས་སྤྲས། །དཀར་པོའི་གདུགས་དང་རིན་ཆེན་ཆེ། །བླ་རེ་རྒྱ་ཆེ་འབར་བ་དང་། །དེ་ཡི་གཡས་ཀྱི་དྲུང་དུ་ནི། །མཁས་པ་ཡིས་ནི་གཞག་པར་བྱ། །བ་དན་རྣམ་པ་

སྣ་ཚོགས་དང་། །སྣ་ཚོགས་རས་ཀྱིས་རབ་མཆོད་པ། །གཡོན་གྱི་དྲུང་དུ་ཐམས་ཅད་ནས། །འབད་པ་ཡིས་ནི་གཞག་པར་བྱ། །རིན་ཆེན་སྨན་ཀུན་གྱིས་གང་བའི། །བུམ་པ་ལེགས་པར་གཞག་བྱས་ཏེ། །རྡོ་རྗེ་མིང་གི་དབང་བསྐུར་གྱིས། །དེ་ལ་རང་གིས་དབང་བསྐུར་བྱ། །རྡོ་རྗེ་མིང་གིས་དབང་བསྐུར་བ། །མཁས་པ་ཡིས་ནི་སླར་ཡང་བྱ། །ཀུན་གྱི་ཅོད་པན་དབང་བསྐུར་གྱིས། །ཡང་དང་ཡང་དུ་དབང་བསྐུར་བྱ། །ཆོས་ཀྱི་ཅོད་པན་དབང་བསྐུར་དང་། །སངས་རྒྱས་ཀུན་གྱི་སྐྱོབ་པ་ནི། །སྣ་ཚོགས་ལས་ཀྱི་དབང་བསྐུར་སྦྱིན། །ཆོས་ཀྱི་དབྱིངས་དང་མཉམ་མཚུངས་པའོ། །ཆོས་ཀྱི་སྐུ་ཡི་དབང་བསྐུར་བ། །སངས་རྒྱས་ཀུན་གྱི་སྒྲོན་མ་སྦྱིན། །དེ་ལྟར་སློབ་མ་དབང་བསྐུར་བ། །ཁྱད་པར་དུ་ནི་སྔགས་པས་བྱ། །དེ་ལ་དམ་ཚིག་ཆོ་ག་ཡིས། །སྔགས་དང་ཕྱག་རྒྱས་སྦྱར་བར་བྱ། །སློབ་དཔོན་བརྙས་པར་མི་བྱ་ཞིང་། །སྒྲུབ་པོ་ཀུན་ལ་སྨད་མི་བྱ། །སྔགས་ཀྱི་སྤྱོད་པ་ཐམས་ཅད་ལ། །འདའ་བར་མི་བྱ་སྨད་མི་བྱ། །འཇིག་རྟེན་པ་ཡི་ལྷ་རྣམས་དང་། །གྲུབ་མཐའི་རིགས་པ་ཐམས་ཅད་ལ། །སྨད་པར་མི་བྱ་བླང་མི་བྱ། །དེ་ལ་མངོན་པར་དགའ་བ་སྤངས། །སྡིག་པ་ཐམས་ཅད་རྣམ་སྤང་ཞིང་། །དེ་བཞིན་བསོད་ནམས་ཐམས་ཅད་བསྡུ། །བཟའ་དང་སྟོན་མོ་དུ་མ་ལ། །བཟའ་བར་མི་བྱ་སྨད་མི་བྱ། །འདོད་པས་བཅོམ་ལྡན་སེམས་པ་སྟེ། །སངས་རྒྱས་ཀུན་གྱི་སྲས་བདག་སྐྱེས། །ཐོག་མ་ཐ་མ་མེད་ཞི་བ། །ནམ་ཡང་དོར་བར་མི་བྱའོ། །སངས་རྒྱས་ཐམས་ཅད་ཆགས་ལས་འཁྲུངས། །དེ་བཞིན་ཞེ་སྡང་རྨོངས་ལས་འཁྲུངས། །མཉམ་དང་མི་མཉམ་ཆོས་ཀུན་དང་། །དབུ་མའི་གནས་ལ་གནས་ནས་སུ། །དེ་ཉིད་དམ་ཚིག་ཤེས་ནས་སུ། །སངས་རྒྱས་བྱང་ཆུབ་ཡོང་མི་སྤོང་། །ལུས་ཅན་ཀུན་ལ་འཚེ་མི་བྱ། །ཁྱོད་ཀྱིས་སེར་སྣ་མི་བྱ་སྟེ། །ཕྲག་དོག་བྱ་བར་མི་བྱའོ། །དམ་པའི་ཆོས་ནི་སྤང་མི་བྱ། །བྱང་ཆུབ་སེམས་ནི་མཆོག་ཏུ་བདེ། །ཆང་གི་བཏུང་བ་སྤང་བྱ་སྟེ། །ཕ་རོལ་བུད་མེད་རྣམ་པར་སྤང་། །ཐམས་ཅད་མཁྱེན་པ་ཡོངས་མི་དོར། །རྟག་ཏུ་སྲོག་ཆགས་གསད་མི་བྱ། །སེམས་ཅན་

ཀུན་ལ་སྙིང་རྗེ་དང་། །བྱམས་པ་ཡང་ནི་རྣམ་པར་བསྒོམ། །སེམས་ཅན་རྣམས་ལ་ཕན་པ་ནི། །ཡང་དང་ཡང་དུ་ཡོངས་བསྡུ་བྱ། །སངས་རྒྱས་ཀུན་གྱི་རྗེས་སྐྱོབ་པ། །དམ་ཚིག་དེ་ཉིད་འདི་དག་ནི། །སློབ་མ་རྣམས་ལ་རྗེས་བརྩེ་བས། །མཁས་པ་ཡིས་ནི་བསྟན་པར་བྱ། །དེ་ནས་ཕྱག་རྒྱ་རྗེས་བཅིང་བ། །གོ་རིམས་བཞིན་དུ་བསྟན་པར་བྱ། །ཕྱག་རྒྱ་འདི་དག་ཁྱད་པར་གྱི། །མཚན་ཉིད་ཡང་དག་རབ་བཤད་བྱ། །ཐལ་མོ་བརྟན་པར་བསྡམ་པར་བྱ། །མེ་ཏོག་ཟུམ་པའི་ཚུལ་དུ་མཛེས། །སངས་རྒྱས་དཔའ་བོ་ཐམས་ཅད་ཀྱིས། །པདྨའི་ཐལ་མོ་ཞེས་སུ་བསྒྲགས། །རྩེ་མོ་ཐམས་ཅད་ལེགས་བརྐྱང་བ། །པདྨའི་ཕྱག་རྒྱ་ཞེས་སུ་བརྗོད། །རེ་རེའི་མཚམས་སུ་ངེས་བཅིངས་པ། །དེ་ནི་རྡོ་རྗེ་ཐལ་མོར་བརྟགས། །སོར་མོ་ཐམས་ཅད་ངེས་བསྡམས་པ། །རྡོ་རྗེ་བསྡམས་པས་ལེགས་བཅིངས་པ། ། སོར་མོ་བརྐྱང་སྟེ་སྟེང་དུ་བསྟན། །སངས་རྒྱས་བྱང་ཆུབ་རབ་གསོལ་བྱེད། །ཁུ་ཚུར་ནང་དུ་བྱས་ནས་ནི། །གཉིས་ཀ་སྦྱར་བས་ཡོངས་སུ་བརྟག །འཁོར་ལོས་སྒྱུར་སོགས་ཕྱག་རྒྱའོ། །དམ་པ་སྦྱིན་པ་ཡིན་པར་བཤད། །སངས་རྒྱས་དཔའ་བོ་ཐམས་ཅད་ཀྱིས། །དམ་ཚིག་ཕྱག་རྒྱ་འདི་ཡིན་ནོ། །མིང་མེད་ནང་བཅུག་ཁུ་ཚུར་གྱིས། །ཀུན་གྱི་རྩེ་མོར་ཡོངས་སུ་བརྟག །རྡོ་རྗེའི་རྣམ་པ་ལེགས་པར་སྦྱར། །རྡོ་རྗེ་ཆེན་པོ་ཞེས་སུ་བསྒྲགས། །མཐེ་ཆུང་སྲིན་ལག་ཁུ་ཚུར་ལས། །གུང་མོ་ལེགས་པར་བརྐྱང་ནས་སུ། །མཛུབ་མོས་མཐེ་བོང་ཡོངས་སུ་སྦྱར། །འཁོར་ལོས་སྒྱུར་བ་ཉིད་གསོལ་བྱེད། །བརྐྱང་པའི་རྩེ་མོ་སྦྱར་བ་ནི། །གདུགས་དཀར་ཞེས་ནི་རབ་ཏུ་གྲགས། །སྲིན་ལག་དང་ནི་མཐེ་བོང་སྦྱར། །གུང་མོ་གཉིས་ནི་བརྟག་པར་བྱ། །གཟི་བརྗིད་ཕུང་པོའི་ཕྱག་རྒྱ་ཆེ། །གཟི་བརྗིད་ཕུང་པོ་ཉིད་གསོལ་བྱེད། །དེ་ཉིད་རལ་གྲི་ལྟ་བུར་སྦྱར། །རྣམ་པར་རྒྱལ་བ་ཞེས་སུ་གྲགས། །དེ་ཉིད་རྒྱལ་བ་ཞེས་བྱ་བ། །རྡོ་རྗེ་ལྡན་པ་དེ་བཞིན་གཤེགས། །ཁུ་ཚུར་སྙིང་པོ་ལྡན་བྱས་པས། །གཙུག་ཏོར་རྣམ་པའི་འབྱུང་གནས་ཏེ། །ཐུབ་དཀའ་སངས་རྒྱས་ཐམས་ཅད་ཀྱིས། །སྟེང་དུ་

འགྲོ་བ་ཞེས་སུ་བཤད། །རྡོ་རྗེ་བསྡམས་པ་ཡོངས་སུ་སྦྱར། །དམ་ཚིག་ཀུན་གྱི་འབྱུང་གནས་ཏེ། །གུང་མོའི་རྩེ་མོ་མཆོག་ཏུ་སྦྱར། །མཐེའུ་ཆུང་དང་ནི་མཐེ་བོང་བརྐྱང་། །ལྕགས་ཀྱུ་མདའ་ཡི་སྦྱོར་བ་ཡིས། །ལེགས་སོ་བ་ནི་སྦྱར་བར་བྱ། །གུང་མོ་རྡོ་རྗེ་རིན་ཆེན་རྩེ། ། བྱེ་བ་གཟི་བརྗིད་མཆོག་གི་མཆོག །རྒྱལ་མཚན་གནས་སུ་ངེས་པར་སྦྱར། །བཞད་པའི་གནས་སུ་སྦྱར་བར་བྱ། །རྡོ་རྗེ་ཆོས་ཀྱི་ཕྱག་རྒྱ་ཆེ། །དབུ་མ་པདྨ་ལྟ་བུར་བསྐུམ། །རལ་གྲི་འཛིན་པ་འཇམ་པའི་དབྱངས། །འཁོར་ལོ་སྦྱར་བའི་འཁོར་ལོས་སྒྱུར། །ཁ་རུ་ཕྱེ་བའི་ཕྱག་རྒྱ་ཆེ། །རྡོ་རྗེ་སྨྲ་བ་ཉིད་དུ་འགྱུར། །ལས་ཀྱི་རྡོ་རྗེའི་ཕྱག་རྒྱ་ཆེ། །གར་མཚུངས་རྡོ་རྗེ་སྣ་ཚོགས་ཅན། །ཆོས་ཡོངས་སྡུད་པའི་སྦྱོར་བ་ཡིས། །རྡོ་རྗེ་བསྲུང་བར་བརྟག་པར་བྱ། །མཆེ་བ་གཉིས་ནི་རྣམ་པར་གཙིགས། །རྡོ་རྗེ་གནོད་སྦྱིན་ཞེས་སུ་བཤད། །ཁུ་ཚུར་བཅངས་པ་ཁུ་ཚུར་གྱི། །རྡོ་རྗེ་ཐལ་མོ་སྙིང་གར་གཞག །རྡོ་རྗེ་སྒེག་མོ་ཞེས་སུ་གྲགས། །ཡོངས་སུ་སྦྱར་བ་སྤྱི་བོར་གཞག །རྡོ་རྗེ་ཕྲེང་བ་ཞེས་སུ་བརྗོད། །ཐལ་མོ་སྦྱར་བ་གདོང་དུ་དགྲོལ། །རྡོ་རྗེ་གླུ་མར་རྗེས་སུ་བསྒྲགས། །འགྱེད་ཅིང་འདུད་པའི་སྦྱོར་བ་ཡིས། །དེ་ནི་རྡོ་རྗེ་གར་མར་བཤད། །པདྨའི་ཐལ་མོ་གདོང་དུ་དབྱེ། །སྤྱི་བོར་ཡོངས་སུ་སྦྱར་ལ་གཞག །སྙིང་གར་མཐེ་བོ་བསྙམས་པ་དང་། །རབ་ཏུ་བརྐྱང་བ་བྱུག་པའོ། །ལག་པ་སྟེང་དུ་ཡོངས་བརྐྱང་བ། །གཟུགས་ཀྱི་ཕྱག་རྒྱ་ཉིད་དུ་འགྱུར། །ལག་གཉིས་རྣ་བའི་ལམ་དུ་གཞག །སྒྲ་ཡི་ཕྱག་རྒྱ་ཉིད་དུ་བཤད། །དྲི་ནི་བྱུག་པའི་སྦྱོར་བ་ཡིས། །དྲི་ཡི་ཕྱག་རྒྱ་ཞེས་སུ་བརྗོད། །གདོང་དུ་སྙིམ་པ་ཕྱེ་བ་ནི། །རོ་ཡི་ཕྱག་རྒྱ་ཞེས་སུ་བསྒྲགས། །མཁའ་ལ་མྱུར་བའི་སྦྱོར་བ་ཡིས། །རེག་པ་རེག་པ་ཞེས་སུ་བཤད། །མཐེའུ་ཆུང་གཉིས་ནི་ཡོངས་སུ་སྦྱར། །མཛུབ་མོ་ལྕགས་ཀྱུའི་སྦྱོར་བ་ལས། །དེ་ཉིད་ཞགས་པའི་དབྱིབས་དང་ནི། །ལུ་གུ་རྒྱུད་ཀྱི་རྣམ་པར་བརྟག །བཞི་པ་རྡོ་རྗེ་དྲིལ་བུ་ཞེས། །རྡོ་རྗེ་འབེབས་པར་རྣམ་པར་བརྟག །ཕྱག་རྒྱ་ཀུན་དང་ཉེ་བའི་རྒྱ། །བློ་གྲོས་ལྡན་པ་རང་གིས་བརྟག །ཐལ་མོ་ཡོངས་སུ་སྦྱར་ལ་བསྡམ། །

མཛུབ་མོ་གཉིས་པོ་བསྐུམ་ནས་ནི། །རིན་པོ་ཆེ་ཡི་རྣམ་པར་བཅིང་། །ཀུན་དུ་བཟང་པོ་བློ་ལྡན་གྱིས། །དེ་ལས་རྩེ་མོ་རྩེ་མོ་བསྐུམ། །སེམས་ཀྱིས་བྱམས་པ་བསྒོམས་ནས་སོ། །མཛུབ་མོ་སྦྱར་ལ་བཅུག་ནས་ནི། །རལ་གྲིའི་རྣམ་པར་བརྟག་པ་སྟེ། །འདི་ནི་ནམ་མཁའི་སྙིང་པོ་ཡི། །ཕྱག་རྒྱར་སངས་རྒྱས་ཀུན་གྱིས་བསྔགས། །དེ་ནས་རལ་གྲིའི་མཚོན་ཆ་ཡི། །རྣམ་པ་རུ་ནི་ཉེར་གནས་པ། །ཕྱག་རྒྱ་འདི་ནི་རྣམ་འགོག་པར། །ཐམས་ཅད་ཀྱིས་ནི་ཡོངས་སུ་བརྗོད། །གར་ནི་སྡུད་པའི་སྦྱོར་བ་ཡིས། །རྡོ་རྗེ་ཐལ་མོ་རབ་ཏུ་བརྐྱང་། །པདྨའི་ལྟ་བུར་རྣམ་པར་བརྟག །པདྨའི་ལག་པ་བློ་ལྡན་གྱིས། །དེ་ཉིད་མེ་ཏོག་ཟུམ་ཚུལ་དང་། །ཨུཏྤལ་རྣམ་པར་ལྟར་མཛེས་པ། །འདི་ནི་པདྨ་སྒྲོལ་བའི་རྒྱ། །པདྨའི་མགོན་པོ་ཞེས་སུ་གྲགས། །མཆེ་བ་གཙིགས་པ་དང་ལྡན་པའི། །ཁ་དང་འདྲ་བར་ལེགས་པར་བརྟག །འདི་ནི་རྟ་མགྲིན་ཕྱག་རྒྱ་སྟེ། །ཁ་ཡི་ཕྱོགས་སུ་རབ་ཏུ་བརྟག །པདྨའི་ཐལ་མོ་དཔྲལ་བ་ཡི། །ཁྲོ་གཉེར་དུ་ནི་ཉེ་བར་སྦྱར། །རྡོ་རྗེ་ཐལ་མོ་འབེབས་པ་ཆེ། །དཔལ་གྱི་སྙིང་པོ་རིན་ཆེན་ལྡན། །ཡིད་བཞིན་ནོར་བུའི་རྣམ་པ་བཟུང་། །ཐལ་མོ་ལེགས་པར་རབ་ཏུ་བརྐྱང་། །མི་ཟད་བློ་གྲོས་ཕྱག་རྒྱ་ཆེ། །སངས་རྒྱས་ཀུན་གྱིས་རབ་ཏུ་བརྟགས། །གར་ནི་སྡུད་པའི་སྦྱོར་བ་ཡིས། །རིན་ཆེན་རྡོ་རྗེ་སྙིང་གར་གཞག །ནམ་མཁའ་མཛོད་ཀྱི་ཕྱག་རྒྱ་སྟེ། །ནམ་མཁའི་མཛོད་ཉིད་སྟེར་བར་བྱེད། །རྡོ་རྗེ་ཆེན་པོ་ལེགས་པར་བརྐྱང་། །མཐེ་ཆུང་མཐེ་བོང་ངེས་པར་བཅིང་། །ལག་པ་གཉིས་ནི་ངེས་པར་བརྟག །བློ་གྲོས་རྒྱ་མཚོའི་ཕྱག་རྒྱར་འགྱུར། །རྡོ་རྗེ་ཐལ་མོ་སྟེང་དུ་བསྒྲེང་། །མཛུབ་མོ་གཉིས་པོ་སྦྱར་བར་བྱ། །འདི་ནི་རྡོ་རྗེ་སྙིང་པོའི་རྒྱ། །རྡོ་རྗེ་སྙིང་པོས་བཀའ་སྩལ་ཏོ། །ཁུ་ཚུར་ནང་དུ་བྱས་ནས་སུ། །མཛུབ་མོ་གཉིས་པོ་རྩེ་མོ་བྱ། །འདི་ནི་འཇམ་དཔལ་ཕྱག་རྒྱ་སྟེ། །རྡོ་རྗེ་རལ་གྲི་ཞེས་སུ་བརྟག །དེ་ཉིད་ཤག་ཏིའི་རྣམ་པ་ནི། །འཇམ་པའི་དབྱངས་ནི་བློ་ལྡན་གྱིའོ། །གཤིན་རྗེ་མཐར་བྱེད་མདུང་རྩེར་འགྱུར། །མདུང་རྩེ་ཆེན་པོར་རབ་ཏུ་བརྟག།།

མཛུབ་མོ་བསྐུམ་པར་བྱས་ནས་ནི། །གུང་མོའི་སྟེང་དུ་ཡོངས་སུ་གཞག །ཞགས་པའི་རྣམ་པ་རབ་ལྡན་པས། །གཤིན་རྗེ་ཡང་ནི་འཇིགས་པར་བྱེད། །དེ་ཉིད་རལ་གྲིར་བྱས་པ་ནི། །སྐྲ་ཅན་མ་རུ་རབ་ཏུ་བཤད། །ཁུ་ཚུར་ཐམས་ཅད་ངེས་བཅིངས་ཏེ། །མཛུབ་མོ་གཅིག་ནི་བསྐུམ་པར་བྱ། །འདི་ནི་ཉེ་བའི་སྐྲ་ཅན་རྒྱར། །འཇམ་པའི་དབྱངས་ཀྱིས་བཀའ་སྩལ་ཏོ། །རྡོ་རྗེ་བསྡམས་པ་སྟེང་བཅིངས་ཏེ། །དབུ་མ་གཉིས་ནི་རྣམ་པར་སྤང་། །མཛུབ་མོ་རྡོ་རྗེའི་རྣམ་པར་བྱ། །མཐེའུ་ཆུང་དང་ནི་མཐེ་བོང་བརྐྱང་། །འདི་ནི་རྡོ་རྗེ་འཛིན་ཆེན་པོའི། །ཕྱག་རྒྱ་དོན་ཀུན་སྒྲུབ་བྱེད་ཡིན། །མཛུབ་མོ་མཐེ་བོས་བསྡམས་པ་ནི། །མཱ་མ་ཀཱིར་ནི་ཡོངས་སུ་བཤད། །མཛུབ་མོར་ལྕགས་སྒྲོག་རྣམ་པ་ལས། །གུང་མོའི་དབུ་མ་རྡོ་རྗེར་བྱ། །འདི་ནི་རྡོ་རྗེ་ལྕགས་སྒྲོག་རྒྱ། །རྡོ་རྗེ་ལྟ་བུར་ཡོངས་སུ་བཤད། །རྡོ་རྗེ་ཆེན་པོ་རྩེ་ལྔ་པ། །ཁྲོ་བོ་གཟེགས་མར་རྣམ་པར་བཤད། །མཆོག་གི་རྩེ་མོ་རྩེ་གཅིག་བྱ། །རྡོ་རྗེ་རྩེ་མོ་ཉིད་ཀྱིར་བཤད། །ལག་ན་རིན་ཆེན་ཕྱག་རྒྱ་ནི། །ལག་གཉིས་ལེགས་པར་བརྐྱང་བར་བྱ། །སོར་མོ་པདྨའི་དབྱིངས་སུ་བྱ། །སྐུལ་བྱེད་ལྷ་མོར་ཡོངས་སུ་བཤད། །ཐལ་མོ་ཡོངས་སུ་སྦྱར་བ་ལས། །མཛུབ་མོ་དང་ནི་མཐེ་བོང་དག །མིག་གི་ཚུལ་དུ་སྦྱར་བར་བྱ། །སངས་རྒྱས་སྤྱན་གྱི་རྣམ་པར་བཤད། །བཀྲ་ཤིས་ཀྱི་ནི་སྐྱིལ་ཀྲུང་བཅའ། །རྣལ་འབྱོར་རིག་པས་ལུས་བསྲང་སྟེ། །ལག་གཉིས་ལྷུང་བཟེད་འཛིན་འདྲ་བ། །བསམ་གཏན་ཕྱག་རྒྱར་རབ་ཏུ་བཤད། །འདི་ནི་རྣམ་པར་སྣང་མཛད་རྒྱ། །སངས་རྒྱས་ཀུན་གྱི་དོན་མཛད་པའོ། །མི་བསྐྱོད་པ་ཡི་ས་ལ་རེག །རིན་ཆེན་ཏོག་གི་མཆོག་སྦྱིན་བཤད། །བསམ་གཏན་ཕྱག་རྒྱ་འོད་དཔག་མེད། །ངོ་བོ་ཉིད་ཀྱི་དོན་རྟོགས་བྱེད། །དོན་ཡོད་གཟིགས་པའི་ཕྱག་རྒྱ་ནི། །མི་འཇིགས་འཇིགས་པ་མེད་པ་སྦྱིན། །བློ་ལྡན་རྣལ་འབྱོར་སྐྱིལ་ཀྲུང་གནས། །སངས་རྒྱས་ཀུན་གྱི་རང་བཞིན་བདག །མཉམ་པར་བཞག་པ་ཕྱག་རྒྱ་ཀུན། །འཆིང་བ་འམ་ནི་འཆིང་དུ་གཞུག །འཇིག་རྟེན་པ་ཡི་ཕྱག་རྒྱ་ལ། །ལག་པ་གཅིག་ནི་རབ་བརྐྱང་སྟེ།།

དབང་ལྡན་གྱི་ནི་རྩེ་གསུམ་པ། །མཐེ་བོས་མཐེའུ་ཆུང་མནན་པར་བྱ། །ལྷ་ཡི་དབང་པོའི་རྡོ་རྗེར་འགྱུར། །ལག་པ་གཡས་པས་བརྟག་པར་བྱ། །མེ་ཡི་ༀ་ཡིག་ལག་པ་དག །མཐེ་བོ་གུང་མོ་ཉིད་ལ་གཞག །གཤིན་རྗེའི་རྡོ་རྗེ་དབྱུག་པ་སྟེ། །མཛུབ་མོ་དང་ནི་མཐེ་བོང་སྦྱར། །དེ་ཉིད་ཁྱབ་འཇུག་འཁོར་ལོ་སྟེ། །འཁོར་ལོའི་ཡི་གེ་དགོད་པར་བྱ། །ལག་པ་གཅིག་གིས་ཐོད་པ་ནི། །མ་མོ་རྣམས་ཀྱིར་ཡང་དག་བཤད། །སོར་མོ་གཉིས་བསྒྲེང་རལ་གྲི་ནི། །སྲིན་པོ་བདག་ཉིད་ཆེན་པོའིའོ། །མཛུབ་མོ་མཐེ་བོང་སྦྱར་བ་ནི། །ཆུ་ལྷའི་ཞགས་པ་ཉིད་དུ་བཤད། །མཛུབ་མོ་དང་ནི་གུང་མོ་དག །རྒྱལ་མཚན་ལྟ་བུར་ལེགས་པར་བརྐྱང་། །རླུང་ལྷ་རྒྱལ་མཚན་ཕྱག་རྒྱ་ནི། །ལག་པ་གཉིས་ཀྱིས་རབ་ཏུ་བརྟག །དབུ་མ་གཅིག་པུ་ལེགས་བརྐྱང་བ། །དབྱུག་ཏོའི་ཕྱག་རྒྱར་རབ་ཏུ་བཤད། ། གནོད་སྦྱིན་ཀུན་གྱི་དབང་ཕྱུག་ནི། །ལུས་ངན་བདག་ཉིད་ཆེན་པོའོ། །མཆོད་ཕྱིར་ཐོགས་ཀྱི་ཕྱག་རྒྱ་ནི། །ཚངས་པ་ཡི་རུ་ལེགས་པར་བཤད། །དྲག་པོའི་གསལ་ཤིང་ཤེས་བྱ་སྟེ། །ལྷ་མོའི་བ་ཊེ་ས་རུ་བརྗོད། །ཚོགས་བདག་གི་ནི་སྣ་རུ་བཤད། །ཟླ་བའི་བདུད་རྩིའི་དཀྱིལ་འཁོར་རོ། །ཉི་མའི་འོད་ཟེར་སྟོང་ཕྲག་ནི། །ལག་པ་གཉིས་ཀྱིས་བསྟན་པར་བྱ། །འོད་ཀྱི་དཀྱིལ་འཁོར་སྦྱོར་བ་ཡིས། །དབང་པོའི་རྡོ་རྗེ་མཚོན་ཆ་ལྟར། །འདི་ནི་ལྷ་རྣམས་ཀུན་གྱི་རྒྱ། །དཔའ་བོ་ཀུན་གྱིས་རབ་ཏུ་གནང་། །དྲི་ཟ་རྣམས་ཀྱི་ཕྱག་རྒྱ་ནི། །གླུ་ལེན་ལྟ་བུར་རབ་ཏུ་བསྒྲགས། །དགའ་བྱེད་དབང་ཕྱུག་ཕྱག་རྒྱ་ཆེ། །རྫ་རྔའི་སྒྲ་དབྱངས་རབ་ཏུ་འབར། །སངས་རྒྱས་ཐམས་ཅད་རབ་མཆོད་ཕྱིར། །ལྷ་ཆེན་པོས་ནི་རབ་ཏུ་བརྟགས། །ཏིང་ཏིང་ཤག་འཛིན་སྦྱོར་བ་ཡིས། །མིའམ་ཅི་རྣམས་ཀྱིར་བརྗོད་བྱ། །པི་ཝང་བསྒྲེང་བའི་སྦྱོར་བ་ཡིས། །དབྱངས་ཅན་གྱིར་ནི་རྣམ་པར་བཤད། །རྟག་ཏུ་དུན་དུ་བྷི་སྒྲོག་པ། །རིག་པ་འཛིན་པ་རྣམས་ཀྱིར་བརྗོད། །ལག་གཉིས་གདེངས་ཀའི་ཚུལ་བྱས་པ། །ཀླུ་རྣམས་ཀྱིར་ནི་ལེགས་པར་བཤད། །གར་ནི་སྡུད་པའི་སྦྱོར་བ་ཡིས། །འགྱེད་དང་

འདུ་བའི་དེ་བཞིན་ནོ། །ལག་པའི་ཞགས་པ་ངེས་བཅིངས་པས། །དེ་ནི་ཕྱག་རྒྱར་རབ་ཏུ་བཤད། །འདི་རྣམས་དམ་ཚིག་ཕྱག་རྒྱ་རུ། །དེ་བཞིན་གཤེགས་རྣམས་ལེགས་པར་གསུངས། །ལས་ཀྱི་སྦྱོར་བ་འབད་པ་ཡིས། །འདི་རྣམས་ཀྱང་ནི་ཕྱག་རྒྱར་བཤད། ། ཕྱག་རྒྱ་དོར་ནས་སེམས་ཀྱི་ནི། །རིན་ཆེན་ཡང་དང་ཡང་དུ་བསམ། །རྣམ་པར་རྟོག་མེད་གདོད་ནས་ཞི། །ཆོས་དབྱིངས་མཉམ་ཞིང་མི་མཉམ་པ། །སྟོང་པ་མཁའ་འདྲར་ཤེས་ནས་སུ། །མཁས་པ་ཡིས་ནི་བསྒོམ་པར་བྱ། །འདི་དག་ཐམས་ཅད་མ་སྐྱེས་ཤིང་། །རྨི་ལམ་ལྟ་བུར་རབ་ཏུ་གནས། །དྲི་ཟའི་གྲོང་ཁྱེར་ལྟ་བུར་སྣང་། །འཚོ་བའི་འཇིག་རྟེན་ཡང་དང་ཡང་། །མིག་འཕྲུལ་ལྟ་བུར་ཤིན་ཏུ་ནི། །འགྲོ་བ་ཐམས་ཅད་རབ་ཏུ་གསལ། །མི་རྟག་སྡུག་བསྔལ་སྟོང་པ་རུ། །སྲིད་པ་ཐམས་ཅད་མདོར་བསྡུས་པ། །བདག་མེད་པ་ཞེས་མཐོང་ནས་ནི། །སངས་རྒྱས་ཀུན་དང་དཔའ་བོ་ཡིས། །སྒྱུ་མ་སྨིག་རྒྱུ་བྲག་ཅ་དང་། །ལྦུ་བ་ཆུ་ཡི་ཆུ་བུར་དང་། །གཟུགས་བརྙན་ལྟ་བུར་འཇིག་རྟེན་ནི། །དེ་ལྟར་སངས་རྒྱས་རྣམས་ཀྱིས་དགོངས། །ཐམས་ཅད་མགལ་མེའི་འཁོར་ལོ་ལྟར། །ཟོ་ཆུན་ཁྱུད་མོ་ཇི་བཞིན་དུ། །གར་གྱི་གནས་ཀྱི་ཚུལ་འདྲ་བ། །ཟླ་བ་གཉིས་དང་མཚུངས་པར་བལྟ། །རྟག་ཏུ་གློག་གི་ཕྲེང་བ་འདྲ། །སྦྲང་བུའི་སྒྲ་དང་མཚུངས་པར་གནས། །འཁོར་བ་ཤིན་ཏུ་བསླང་བ་སྟེ། །རྒོད་མའི་ཁ་དང་འདྲ་བར་གནས། །འདི་ལྟར་ཤེས་ཤིང་རྟོགས་ནས་ནི། །བསྒོམ་པའི་སྟོབས་ཀྱིས་རང་ཉིད་ཀྱིས། །སེམས་ནི་ལེགས་བསྒྲུབ་རྣལ་འབྱོར་པ། །དེ་ལ་ཕྱག་རྒྱ་རབ་ཏུ་བཤད། །སྟོང་པ་མཚན་མ་མེད་པ་དང་། །སྨོན་པ་མེད་པའི་རང་བཞིན་ལས། །ལུས་དང་ངག་དང་ཡིད་ཀྱིས་ནི། །དམ་ཚིག་གསུམ་ནི་བརྟགས་པའོ། །ཕྱག་རྒྱ་སྔགས་དང་ལྷ་ཉིད་དང་། །དེ་ཉིད་གསུམ་ནི་རབ་ཏུ་གནས། །བདག་ཉིད་སྦྱོར་བའི་རྣལ་འབྱོར་གྱིས། །མཚན་ཉིད་གཅིག་ཏུ་རྣམ་པར་གནས། །དེ་འདི་དམ་པའི་ཕྱག་རྒྱ་རུ། །སངས་རྒྱས་རྣམས་ཀྱིས་བཀའ་སྩལ་ཏོ། །ཕྱག་རྒྱ་ཡི་གེ་བྲལ་བ་སྟེ།།

རྣམ་པ་མེད་ཅིང་སྣང་བ་མེད། །དངོས་པོ་མེད་པའི་ཆོས་རྣམས་ལ། །དངོས་པོའི་དེ་ཉིད་ཉིད་དུ་བཤད། །དངོས་མེད་དངོས་པོའི་རང་བཞིན་ཡིན། །དངོས་མེད་ཉིད་ཀྱང་དངོས་པོ་ཡིན། །དངོས་དང་དངོས་མེད་རྣམ་པར་གྲོལ། །རྣལ་འབྱོར་ཡེ་ཤེས་མཆོག་ཏུ་བདེ། །རྟོག་གེ་མེད་ཅིང་སྣང་བ་མེད། །འཁྲུལ་པ་མེད་ཅིང་ཡི་གེ་མེད། །སྟོང་པ་ནམ་མཁའ་མཚུངས་པའི་སེམས། །གང་ཚེ་དེ་ལྟར་ཉིད་གྱུར་པ། །དེ་ཚེ་ཕྱག་རྒྱ་རྣམས་དང་སྔགས། །ལྷ་ཉིད་དུ་ཡང་རབ་ཏུ་བརྟག །སྔགས་ལས་ཕྱག་རྒྱ་མ་མཐོང་ཞིང་། །ཕྱག་རྒྱ་ལས་ཀྱང་སྔགས་མིན་ལ། །རང་ཉིད་ལྷ་ཡི་རྣལ་འབྱོར་ནི། །གཉིས་མེད་སྔགས་དང་ཕྱག་རྒྱར་བརྟགས། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྙིང་པོ་རྒྱན་ཅེས་བྱ་བའི་རྒྱུད་ཀྱི་རྒྱལ་པོ་ཆེན་པོ་ལས་ཕྱག་རྒྱའི་རིམ་པར་ཕྱེ་བའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཆེན་པོ་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་གསོལ་བ་བཏབ་པ།དེ་བཞིན་གཤེགས་པ་ཐམས་ཅད་ཀྱི་རིགས་བསྐྱེད་པར་མཛད་དུ་གསོལ། དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་དག་གིས་གསོལ་བ་བཏབ་པའི་ཚིག་ཉེ་བར་གསན་ནས་འོག་མིན་གྱི་གནས་ནས་བྱོན་ཏེ། དགའ་ལྡན་གྱི་གནས་སུ་བཞུགས་ནས་དགའ་ལྡན་གྱི་རིས་ཀྱི་ལྷའི་བུ་རྣམས་ལ་ཆོས་བསྟན་ནས་ཟས་གཙང་གི་རིགས་ལ་མངོན་པར་གཟིགས་ཏེ། མངོན་པར་བྱུང་བར་མཛད་ནས་བྱང་ཆུབ་ཀྱི་སྙིང་པོ་དག་ལ་ཉེ་བར་མནན་ནས་ཉེ་བར་འཁོད་དེ། བདུད་བཞི་ལས་རྣམ་པར་རྒྱལ་བར་བསྟན་ནས་བྱང་ཆུབ་ཀྱི་སྙིང་པོ་ལ་བཞུགས་པར་གྱུར་ཏེ། བཞུགས་ནས་ཀྱང་ཀུན་ནས་འཕྲོ་བའི་ཏིང་ངེ་འཛིན་སྔོན་དུ་འགྲོ་བའི་ཏིང་ངེ་འཛིན་བྱེ་བ་བརྒྱ་སྟོང་ཕྲག་བརྒྱད་ཅུ་རྩ་བཞི་ལ་སྙོམས་པར་ཞུགས་ཏེ། སྙོམས་པར་ཞུགས་ནས་ཀྱང་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེ་གོལ་གྱི་སྒྲས་དེ་བཞིན་གཤེགས་པ་ཐམས་ཅད་སྤྱན་འདྲེན་ཅིང་གསང་སྔགས་འདི་གསུངས་སོ།།

ཨོྃ་སརྦྦ་ཏ་ཐཱ་ག་ཏ་བཛྲ་ས་མཱ་ཛཿཨཱ་ཀརྵ་ཡ་སརྦྦ་ཏ་ཐཱ་ག་ཏཱ་ན་ཧཱུཾ། དེ་ནས་དེ་བཞིན་གཤེགས་པ་ཐམས་ཅད་འཁོར་དང་བཅས་པའི་དཀྱིལ་འཁོར་ཆེན་པོ་རྣམས་ལེགས་པར་བྱོན་ཏེ། ཆོས་ཀྱི་དབྱིངས་སུ་སྤྲོས་ནས་ཕྱོགས་བཅུ་མུ་མེད་པའི་འཇིག་རྟེན་གྱི་ཁམས་ཐམས་ཅད་རབ་འབྱམ་རྒྱ་མཚོའི་སྤྲིན་རྣམས་ཁྱབ་སྟེ། ནམ་མཁའི་ཁམས་ན་གནས་པ་ཐམས་ཅད་ཏིལ་གྱི་གང་བུ་ལྟར་འཛམ་བུའི་གླིང་དུ་འཁོད་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་གིས་བཀུག་ཅིང་བཅུག་སྟེ། བཅིངས་ནས་དབང་དུ་མཛད་དེ། དེ་ཉིད་ཀྱི་ཐུགས་ཀར་རབ་ཏུ་གཞག་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་གཉིས་སུ་མེད་པའི་སྦྱོར་བས་བྱིན་གྱིས་བརླབས་ཏེ། སྔགས་འདིས་རང་གི་སེམས་སོ་སོར་རྟོགས་པ་མཛད་དོ། །ཨོྃ་ཙིཏྟ་པྲ་ཏི་བེ་དྷཾ་ཀ་རོ་མི། དེའི་རྗེས་ཐོགས་ཉིད་ལ་སངས་རྒྱས་ཐམས་ཅད་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་ལོངས་སྤྱོད་རྫོགས་པ་དང་། སྤྲུལ་པའི་སྐུ་ལས་ཆོས་ཀྱི་སྐུ་རང་བཞིན་གྱིས་འོད་གསལ་བ་སེམས་རིན་པོ་ཆེ་ངེས་པར་བྱུང་སྟེ། སྤྲོས་པར་མཛད་དོ། །དེ་ཉིད་སེམས་འོད་གསལ་བ། ཐུགས་རྗེ་ཆེན་པོས་ཁྱབ་པ། དེ་བཞིན་གཤེགས་པ་ཐམས་ཅད་མཉམ་པ་ཉིད་ཀྱི་མཚན་ཉིད། གཟུང་བ་དང་འཛིན་པའི་རྙོག་པ་སྤངས་པ་ནམ་མཁའ་ལྟར་གདོད་ནས་ཞི་བ། དེ་ལས་ཐུགས་རྗེ་ཆེན་པོ་ལ་མངོན་པར་ཕྱོགས་པར་བྱས་ནས་སེམས་ཅན་གྱི་ཁམས་ཐམས་ཅད་ལ་རྣམ་པར་གཟིགས་ཏེ། མི་ཤེས་པས་རྒ་བ་དང་། འཆི་བས་རྣམ་པར་ཁྱབ་པའི་འཇིག་རྟེན་ལ་གཟིགས་ནས་སླར་ཡང་སྔགས་འདིས་བྱང་ཆུབ་ཀྱི་སེམས་བསྐྱེད་པ་ཉེ་བར་བསྟན་པ། ཨོཾ་བོ་དྷི་ཙི་ཏྟ་ཨུཏྤཱ་ད་ཡཱ་མི། བྱང་ཆུབ་ཀྱི་སེམས་བསྐྱེད་པའི་རྗེས་ཐོགས་ཉིད་ལ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་སེམས་འོད་གསལ་བ་དེ་ཡོངས་སུ་རྫོགས་པའི་ཟླ་བའི་དཀྱིལ་འཁོར་ལྟར་བྱིན་གྱིས་བརླབས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་རྣམ་པར་གཞག་གོ། །ལེགས་པར་རྣམ་པར་དག་པའི་ནམ་

མཁའ་ལྟར་དྲི་མ་མེད་པ། སྤྲོས་པ་ཐམས་ཅད་སྤངས་པ་མེ་ལོང་ལྟ་བུར་བརྟན་པར་བྱས་ནས་གནས་ཏེ། བྱང་ཆུབ་ཀྱི་སེམས་ཆེན་པོ་ལ་སྔགས་འདི་བརྗོད་དོ། །ཨོྃ་ཛྙཱ་ན་རསྨི་བི་སྲྀ་ཛ་ཧཱུྃ། དེ་ནི་རྗེས་ཐོགས་ཉིད་ལ་འོད་ཟེར་རྣམ་པ་སྣ་ཚོགས་པ་ཟླ་བའི་དཀྱིལ་འཁོར་ལས་རྣམ་པར་ཕྱུང་ངོ་། །དེ་ཕྱུང་ནས་ཀྱང་ཆོས་ཀྱི་དབྱིངས་ཀྱི་ཕོ་བྲང་དུ་ཞུགས་ཏེ། ཤེས་བྱའི་དཀྱིལ་འཁོར་ཐམས་ཅད་གསལ་བར་བྱས་ནས། སེམས་ཅན་ཐམས་ཅད་ཀྱི་སེམས་ཀྱི་རི་བོའི་རྩེ་བསྙིལ་ཏེ་རབ་ཏུ་རྟོགས་པར་བྱས་ནས་གཅིག་ཏུ་འདྲེས་ཏེ། རྡོ་རྗེའི་སྐུ་ཆེན་པོ་རྣམས་བཅོམ་ལྡན་འདས་ཀྱི་ཐུགས་ཀར་རྗེས་སུ་ཞུགས་ནས་ཟླ་བའི་དཀྱིལ་འཁོར་གྱི་དབུས་སུ་རབ་ཏུ་གནས་སོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་སྔགས་འདིས་བྱིན་གྱིས་བརླབས་སོ། །ཨོྃ་ཏིཥྛ་བཛྲ་སླར་ཡང་སྔགས་འདིས་སྤྲོས་པ། ཨོྃ་སྥ་ར་བཛྲ་སླར་ཡང་སྔགས་འདིས་བསྡུས་སོ། །ཨོྃ་སང་ཧ་ར་བཛྲ། དེ་ནས་དེ་བཞིན་གཤེགས་པ་ཐམས་ཅད་ཀྱིས་ཡེ་ཤེས་རྡོ་རྗེའི་སྙིང་པོ་འདི་ཆེད་དུ་བརྗོད་པ། ཨོྃ་ཛྙཱ་ན་བཛྲ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་སྔགས་འདིས་བྱིན་གྱིས་བརླབས་པ། ཨོྃ་སརྦྦ་ཏ་ཐཱ་ག་ཏ་ཛྙཱ་ན་བཛྲ་ཧཱུྃ། དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་མཉམ་པ་ཉིད་བརྙེས་པས་སྔགས་འདིས་བྱིན་གྱིས་བརླབས་པ། ཨོྃ་བཛྲ་ཨཱཏྨ་ཀོ྅ཧཾ། དེ་ནས་དེ་བཞིན་གཤེགས་པ་ཐམས་ཅད་བརྟན་པ་ཉིད་དུ་ཉེ་བར་གྱུར་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་གཟིགས་ནས་སྔགས་འདིས་བྱིན་གྱིས་བརླབ་པར་མཛད་དོ། །ཨོྃ་ཡ་ཐཱ་སརྦྦ་ཏ་ཐཱ་ག་ཏ་སྟ་ཐཱ་ཨ་ཧཾ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་སེམས་ཅན་ཐམས་ཅད་ཀྱི་དོན་མཛད་པའི་རྒྱུ་སངས་རྒྱས་ཐམས་ཅད་ཀྱི་སྐུ་བདག་ཉིད་སེམས་ཅན་གྱི་ཁམས་ཐམས་ཅད་དུ་ངེས་པར་བསྟན་ཏོ། །དེ་ནས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་ཀྱིས་མཐོང་ནས་

ལྷ་དང་མི་རྣམས་ཀྱིས་མངོན་པར་བྱང་ཆུབ་པས་བཅོམ་ལྡན་འདས་མངོན་པར་བྱང་ཆུབ་པ་ཞེས་སྒྲ་བསྒྲགས་སོ། །དེ་ནས་ཚངས་པས་གསོལ་བ་བཏབ་སྟེ། ཆོས་ཀྱི་འཁོར་ལོ་རབ་ཏུ་བསྐོར་ནས་དེ་དང་དེས་འདུལ་བའི་སྐྱེ་བོ་བཏུལ་ཏེ་གང་གིས་སླར་ལྡོག་པ་མེད་པ་ཉིད་དུ་གྱུར་ཏོ། །འདི་རྣམས་ནི་སངས་རྒྱས་ཀྱི་བྱང་ཆུབ་བསྒོམ་པའི་རིམ་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཏིང་ངེ་འཛིན་དེ་ལས་བཞེངས་ནས་སངས་རྒྱས་ཀྱི་བྱང་ཆུབ་བསྟན་ཏེ་སེམས་ཅན་ཐམས་ཅད་ཀྱི་དོན་མཛད་པ་ཉེ་བར་བསྒྲུབས་ནས་དེའི་ཐུགས་ཀ་ལས་རྡོ་རྗེ་ཕྱུང་སྟེ། ཉིད་ཀྱི་ཕྱག་ཏུ་གཞག་པར་གྱུར་ཏེ། དེ་ནས་འོད་ཟེར་རྣམ་པར་ཕྱུང་སྟེ། འཇིག་རྟེན་གྱི་ཁམས་ཐམས་ཅད་སྣང་བར་མཛད་ནས་སླར་ལོག་སྟེ། བཅོམ་ལྡན་འདས་ཀྱི་ཐུགས་ཀར་ཞུགས་ནས་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོའི་སྐུར་བྱིན་གྱིས་བརླབས་ཏེ་མཚན་ཉིད་ཐམས་ཅད་ཡོངས་སུ་རྫོགས་པར་རྒྱན་ཐམས་ཅད་ཀྱིས་བརྒྱན་པ། དར་དང་ཕྲེང་བས་དབང་བསྐུར་བ། ཟླ་བའི་ཁ་དོག་ལྟ་བུའི་འོད་ཟེར་ཅན་དུ་བྱིན་གྱིས་བརླབས་ཏེ་རྣམ་པར་གནས་སོ། །དེ་ནས་ཐུགས་ཀ་ནས་ཕྱུང་བའི་ཟླ་བའི་དཀྱིལ་འཁོར་ལ་བརྟེན་ཏེ། དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་དང་། རྒྱབ་དང་དྲུང་དུ་རྡོ་རྗེ་སེམས་དཔའ་དང་། རྡོ་རྗེ་ཆོས་དང་། རྡོ་རྗེ་རིན་ཆེན་དང་། རྡོ་རྗེ་ལས་ལ་སོགས་པ་བྱང་ཆུབ་སེམས་དཔའ་ཆེན་པོའི་ཕྲེང་བར་རྣམ་པར་གནས་སོ། །དེ་བཞིན་དུ་སྒེག་མོ་ལ་སོགས་པ་རྣམས་དང་བདུག་པ་ལ་སོགས་པའི་ལྷ་ཁྱད་པར་དུ་ངེས་པར་བསྐྱེད་ཅིང་གཟུགས་ལ་སོགས་པ་རྣམས་དང་ལྕགས་ཀྱུ་ལ་སོགས་པའི་ལྷ་རྣམས་བསྐྱེད་དེ་འདི་དག་གི་དཀྱིལ་འཁོར་བཀའ་སྩལ་པ། དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་མཆོག་གྱུར་པ། ། སངས་རྒྱས་དཔའ་བོ་ཐམས་ཅད་ཀྱིས། །རྡོ་རྗེ་སྙིང་པོ་ཞེས་སུ་གསུངས། །གྲུ་བཞི་པ་ལ་སྒོ་བཞི་པ། །དར་དང་མེ་ཏོག་ཕྲེང་བས་བརྒྱན། །སྒོ་ཁྱུད་དང་ནི་ཁ་ཁྱེར་དང་། །རྟ་བབས་ཀྱིས་ནི་སོ་སོར་སྤྲས། །དེ་ཡི་དབུས་སུ་ཁྲི་ཆེན་པོ། །ཀུན་ནས་ཡོངས་སུ་གྲུ་བཞི་

པ། །དེ་ཡི་སྟེང་དུ་པད་ཆེན་པོ། །གེ་སར་ལྡན་ཞིང་རབ་མཛེས་པ། །དེ་ཡི་ལྟེ་བའི་དབུས་སུ་ནི། །སངས་རྒྱས་སྐུ་གཟུགས་དགོད་པར་བྱ། །སངས་རྒྱས་ཀྱི་ནི་དྲུང་ཀུན་དུ། །སངས་རྒྱས་ཐམས་ཅད་དགོད་པར་བྱ། །སངས་རྒྱས་ཀུན་གྱི་ཉེ་འཁོར་དུ། །འཁོར་ལོས་སྒྱུར་བ་ལ་སོགས་བྲི། །ཕྱི་ཡི་གནས་ནི་ཐམས་ཅད་དུ། །སངས་རྒྱས་སྲས་པོ་རྣམ་པར་དགོད། །ཁ་དོག་སེར་པོ་གཟི་བརྗིད་ཆེ། །དབང་ཆེན་དཀྱིལ་འཁོར་རབ་འབར་བ། །ཐམས་ཅད་རྣམ་པ་སྣ་ཚོགས་རྒྱན། །བརྒྱན་པ་དེ་དག་དགོད་པར་བྱ། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་དབང་ཆེན་གྱི་དཀྱིལ་འཁོར་གྱི་ཆོ་གའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སླར་ཡང་ཆུའི་ལྷའི་དཀྱིལ་འཁོར་ཆེན་པོ་བཀའ་སྩལ་པ། དེ་ནས་ཡང་དག་བཤད་བྱ་བ། ། དཀྱིལ་འཁོར་ཆེན་པོ་མཆོག་གྱུར་པ། །ཆོས་ཀྱི་འཁོར་ལོ་འདྲ་བས་ན། །ཆོས་ཀྱི་འཁོར་ལོ་ཞེས་སུ་བརྗོད། །དེ་ཡི་ཕྱི་རོལ་གཉིས་པ་ལ། །ཟླུམ་པོ་རུ་ནི་རྟོགས་པར་བྱ། །རི་མོ་མང་པོ་སྣ་ཚོགས་པས། །སྒོ་དང་སྒོ་ཁྱུད་བརྟག་པར་བྱ། །རྟ་བབས་རྣམ་པ་སྣ་ཚོགས་པ། །དར་དང་མེ་ཏོག་ཕྲེང་བས་བརྒྱན། །དེ་ཡི་དབུས་སུ་པད་ཆེན་པོ། །གེ་སར་ལྡན་ཞིང་རབ་མཛེས་པ། །འདབ་མ་བརྒྱད་ཀྱི་ཀ་བའི་མདུན། །དཀྱིལ་འཁོར་བརྒྱན་ཀྱིས་བརྒྱན་པའོ། །དཀྱིལ་འཁོར་དེ་ཡི་དབུས་སུ་ནི། །རྒྱལ་བ་ཐམས་ཅད་དཀར་པོར་མཆོག །ཁ་བ་བ་ཞོ་ལྟར་དཀར་གསལ། །ཤེལ་དང་ཟླ་བ་ལྟ་བུའི་འོད། །ཀུནྡ་ཟླ་བ་ལྟར་དཀར་བརྟན། །ཟླ་བའི་དཀྱིལ་འཁོར་དབུས་སོན་པར། །དེ་ཡི་ཉེ་འཁོར་ཐམས་ཅད་དུ། །སངས་རྒྱས་སྲས་པོ་རྣམ་པར་དགོད། །ཐམས་ཅད་ཟླ་བ་ལྟར་དཀར་ཞིང་། །ཟླ་བའི་དཀྱིལ་འཁོར་ལ་གནས་པ། །མཚོན་ཆ་སྣ་ཚོགས་ཟླ་བ་འདྲ། །ཟླ་བ་འབར་མཚུངས་མཉམ་མེད་པ། །ཆུ་ཡི་མིང་ཞེས་བྱ་བ་ཡི། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་ཆུ་ལྷའི་དཀྱིལ་འཁོར་གྱི་ཆོ་གའོ།། །།དེ་ནས་བཅོམ་ལྡན་

འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་མེ་ལྷ་ཞེས་བྱ་བའི་དཀྱིལ་འཁོར་ཆེན་པོ་བཀའ་སྩལ་པ། དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་མཆོག་གྱུར་པ། །རྡོ་རྗེ་ཡེ་ཤེས་གཟི་བརྗིད་མཚུངས། །རྡོ་རྗེ་གཟི་བརྗིད་ཅེས་སུ་བརྗོད། །གྲུ་གསུམ་རྣམ་པ་ཉིད་དུ་བྱ། །སུམ་མདོ་རིས་ཀྱི་རྣམ་པ་མཚུངས། །འབར་བའི་ཕྲེང་འཁྲུགས་འཇིགས་པའོ། །ཁ་དོག་དམར་པོ་སྟོབས་པོ་ཆེ། །འཇིག་པའི་དུས་ཀྱི་མེ་འདྲ་བ། །རྟག་ཏུ་པདྨ་རཱ་ག་མཚུངས། །དེ་ཡི་དབུས་སུ་གཟི་བརྗིད་ཆེ། །ཉི་མའི་ཁ་དོག་སྟོབས་པོ་ཆེ། །རྡོ་རྗེ་རྩེ་གསུམ་སྣ་ཚོགས་པ། །སུམ་མདོའི་སྙིང་གར་གཞག་པར་བྱ། །བལ་པོ་སེའུའི་མེ་ཏོག་མཚུངས། །ཡ་བའི་མེ་ཏོག་དག་དང་འདྲ། །པདྨ་པདྨ་རཱ་ག་མཚུངས། །སངས་རྒྱས་དཔའ་བོ་ཡང་དག་པར། །བཟང་པོ་མཚལ་དང་མཚུངས་འདྲ་བ། །རྒྱ་སྐྱེགས་བཅུད་དང་འདྲ་བར་གནས། །དེ་ཡི་ཉེ་འཁོར་ཐམས་ཅད་དུ། །དེ་བཞིན་སངས་རྒྱས་སངས་རྒྱས་སྲས། །ཁྲོ་བོ་དང་ནི་མངག་པ་དག །མཁས་པ་ཡིས་ནི་དགོད་པར་བྱ། །དེ་དག་ཐམས་ཅད་ཁ་དོག་དམར། །གཟི་བརྗིད་ཁམས་ལ་འོད་ལྡན་པ། །འོད་ཟེར་དམར་པོ་རབ་འཕྲོ་བ། །ཉི་མའི་དཀྱིལ་འཁོར་དབུས་སོན་པར། །ཐམས་ཅད་དམར་པོའི་མཚོན་ཆ་ཅན། །དམར་པོའི་རྒྱན་གྱིས་རྣམ་པར་བརྒྱན། །དམར་པོའི་གོས་ཀྱིས་བཀབ་པའི་ལུས། །ཕྲེང་བ་དམར་པོ་མཆོག་འཛིན་པ། །འདི་ནི་གཟི་བརྗིད་གཏེར་ཞེས་བྱ། ། དཀྱིལ་འཁོར་མཆོག་ཏུ་འབར་བའོ། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་མེ་ལྷ་ཞེས་བྱ་བའི་དཀྱིལ་འཁོར་ཆེན་པོ་རྫོགས་སྷོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་སླར་ཡང་རླུང་ལྷའི་དཀྱིལ་འཁོར་བཀའ་སྩལ་པ། དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་མཆོག་གྱུར་པ། །རླུང་གི་ཁམས་དང་འདྲ་བས་ན། །རླུང་གི་དཀྱིལ་འཁོར་ཞེས་སུ་བཤད། །ཟླ་བ་ཕྱེད་པའི་རྣམ་པ་འདྲ། །དབྱར་གྱི་སྤྲིན་གྱི་འོད་དང་མཚུངས། །ཨ་ཏ་སཱི་ཡི་མེ་ཏོག་འདྲ། །ཨིན་དྲ་ནཱི་ལའི་འོད་དང་

མཚུངས། །དེ་ཡི་དབུས་སུ་པད་ཆེན་པོ། །བཻ་ཌཱུརྱ་ཡི་འོད་དང་འདྲ། །ཤིན་ཏུ་གནག་པའི་མིག་སྨན་མཚུངས། །སྔོན་དམར་གྱི་ནི་རྣམ་པར་གནས། །དེ་ཡི་ལྟེ་བའི་དབུས་སུ་ནི། །སངས་རྒྱས་དཔའ་བོ་རབ་འབར་བ། །རྒྱལ་པོ་འཁྱིལ་པ་འབར་བའི་གཟི། །མཚན་མོ་ནག་མོ་ལྟ་བུར་གནས། །ཨུཏྤལ་སྔོན་པོ་འདབ་མའི་ཚུལ། །སྟོང་པ་ནམ་མཁའ་ལྟ་བུར་གནས། །དེ་ཡི་ཉེ་འཁོར་ཐམས་ཅད་དུ། །རྒྱལ་དང་རྒྱལ་བའི་སྲས་རྣམས་བྲི། །ཁྲོ་བོ་རྣམས་དང་མངག་པ་དང་། །དེ་བཞིན་ཕོ་ཉ་ཕོ་ཉ་མོ། །ཐམས་ཅད་སྣ་ཚོགས་རྒྱན་གྱིས་བརྒྱན། །དེ་བཞིན་ནག་པོའི་གོས་གྱོན་པ། །ཁ་དོག་ནག་པོ་ཐམས་ཅད་དུ། །བ་དན་རྣམ་པ་སྣ་ཚོགས་བསྣམས། །གདུགས་ནི་རྣམ་པ་དུ་མའི་དབྱིབས། །ཁ་དོག་སྣ་ཚོགས་ལེགས་འབར་བ། །བླ་རེ་རྒྱས་པ་མཉམ་པ་ནི། །ཁ་དོག་ནག་པོ་སྣ་ཚོགས་པ། །དངོས་པོ་ཀུན་གྱི་རང་བཞིན་གྱིས། །མདོར་བསྡུས་ནས་ནི་བསྒོམ་པར་བྱ། །དཀྱིལ་འཁོར་ཆེན་པོ་འདི་ལྟ་བུ། །སངས་རྒྱས་ཀུན་གྱིས་རྗེས་སྐྱོབ་པ། །བྲིས་ནས་ཤེས་རབ་ཅན་གྱིས་བསྒོམ། །གལ་ཏེ་དངོས་གྲུབ་རང་འདོད་ནའོ། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་རླུང་ལྷའི་དཀྱིལ་འཁོར་གྱི་ཆོ་གའོ།། །།དེ་ནས་བཅོམ་ལྡན་འདས་རྣམས་དེ་བཞིན་གཤེགས་པ་ཐམས་ཅད་ཀྱིས་སླར་ཡང་བསྡུ་བས་བྱོན་པའི་ཏིང་ངེ་འཛིན་ལ་སྙོམས་པར་ཞུགས་ཏེ། བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་གསོལ་བ་བཏབ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་ཀྱི་སྒྲུབ་པའི་ཐབས་བསྐྱེད་དུ་གསོལ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་དེ་རྣམས་ཀྱིས་གསོལ་བ་བཏབ་པའི་ཚིག་ཉེ་བར་གསན་ནས། སྒྲུབ་པའི་ཐབས་ཀྱི་ཆོ་ག་མཆོག་ཏུ་གསང་བ་ཆེན་པོ་བཀའ་སྩལ་པ། སྒེག་མོ་སོགས་པས་མཆོད་པ་ཀུན། །ཡང་དག་མདོར་བསྡུས་བྱས་ནས་ནི། །སངས་རྒྱས་ཀུན་གྱི་སྐུ་ཆེན་པོར། །བདག་གིས་རྟག་ཏུ་བསྒོམ་པར་བྱ། །སྔགས་ཀྱི་ཡི་གེ་ཡང་དག་ལྡན། །འདོད་པ་སྟེར་བའི་སྐུ་རུ་བྱ། །སྒྲ་དང་

གཟུགས་དང་དེ་བཞིན་སྦྱོར། །ཡི་གེའི་ཕྲེང་བ་དེ་བཞིན་ཏེ། །ཟླ་བའི་དཀྱིལ་འཁོར་དབུས་གནས་པར། །སྔགས་པས་ཐམས་ཅད་རྣམ་པར་བསམ། །ཧཱུྃ༑ སྔགས་པས་སྙིང་གར་སོན་པ་བསྒོམ། །གསང་སྔགས་དགེ་བ་བརྗོད་ནས་སུ། །དེ་བཞིན་གཤེགས་པའི་རིགས་དག་པ། །དུང་གི་སྒྲ་རུ་རབ་ཏུ་བརྗོད། །དྲིལ་བུའི་སྒྲ་ནི་རབ་གསལ་བ། །པད་མོ་རྣལ་འབྱོར་དབང་ཕྱུག་གོ། །དུས་མིན་སྤྲིན་གྱི་ཧཱུྃ་གི་སྒྲ། །ཙ་ཊ་ཙ་ཊའི་སྒྲ་འཕྲོ་བ། །རྡོ་རྗེ་རིན་ཆེན་དབང་ཕྱུག་གི། །སྒྲ་རུ་དེ་བཞིན་གཤེགས་རྣམས་གསུང་། །ནོར་བུ་ལས་ཀྱི་རིགས་ཀྱི་ཡང་། །རྔ་ཆེན་སྒྲ་རུ་རབ་ཏུ་བཤད། །པི་ཝང་གླིང་བུ་དེ་བཞིན་གླུ། །གར་གྱི་རྒྱན་གྱི་སྒྲ་དང་ནི། །རྫ་རྔའི་ངར་སྒྲ་ཧཱུྃ་གི་སྒྲ། །སྤྱི་ཡི་ཉིད་དུ་རབ་ཏུ་བཤད། །རྟོག་པ་ཀུན་ལ་རྣམ་པར་སྦྱར། །སྒྲུབ་པའི་ཐབས་ཀྱི་ལས་རྣམས་དང་། །དེ་ནས་གཟུགས་ཀྱི་བཟླས་པ་མཆོག །གོ་རིམས་ཇི་བཞིན་རབ་ཏུ་བཤད། །དགུག་དང་གཞུག་དང་བཅིང་བ་དང་། །ལྷ་རྣམས་དབང་དུ་བྱ་བ་སྟེ། །དེ་ལ་རང་གི་ཚུལ་རབ་སྦྱར། །སྔགས་དང་ཕྱག་རྒྱ་རབ་ཏུ་སྦྱར། །དེ་རྗེས་རྣམ་པ་ཀུན་གྱི་མཆོག །རྟག་ཏུ་ལུས་ཆེན་བསམ་བྱ་བསམ། །ལྷ་ཡི་སྐུ་གཟུགས་བསྒོམ་པར་བྱ། །ལག་པའི་ཕྱག་རྒྱ་རབ་ངེས་པའི། །ཕྱག་རྒྱའང་སྙིང་གར་སོན་ཞེས་བྱ། །རང་གི་རིགས་རིམ་ཆོ་ག་ཡིས། །དེ་ཡི་ལུས་ནི་འོད་གསལ་ཞིང་། །སྒྲོན་མའི་འོད་ལྟར་གསལ་བའི་ཁྱིམ། །དེ་ལྟར་ཀུན་ནས་ཐམས་ཅད་དུ། །ཀུན་ནས་བ་སྤུའི་རྩེ་དག་ནས། །འོད་ཟེར་འབར་བའི་ཕྲེང་དགེ་བས། །གཟུགས་ཀྱི་བཟླས་པ་ཞེས་སུ་བཤད། དེ་ནས་སྦྱོར་བའི་བཟླས་པ་ནི། །གསང་སྔགས་སྒྲུབ་པོས་བརྩམ་པར་བྱ། །མཆོད་དང་བྱིན་བརླབས་དབང་བསྐུར་མཆོག །སྤྲོ་ལ་སོགས་རིམ་ཐམས་ཅད་དུ། །སྦྱོར་བའི་བཟླས་པ་གཙོ་བོ་འདི། །འབད་པ་ཡིས་ནི་རབ་ཏུ་བཤད། །སྙིང་ག་མགྲིན་པ་མཆུ་ལྕེ་མིན། །རྐན་དང་སྤྱི་བོ་ཉིད་མ་ཡིན། །ནང་མིན་ཕྱི་དང་གཉིས་པར་མིན། །ཆོས་ནི་འབའ་ཞིག་ཁོ་ན་ལ། །བཟླས་པའི་སྒྲ་ཡང་འབྱུང་མ་ཡིན།།

འདི་ནི་བཅོམ་ལྡན་རྣལ་འབྱོར་ཆེ། །ཤེས་རབ་ཕ་རོལ་ཕྱིན་གསལ་བ། །བསྒོམ་པའི་བསྔགས་པ་དེ་ཉིད་ནི། །རྣལ་འབྱོར་པ་ཡི་གནས་སུ་བཤད། །དེ་ནས་སྟེང་དུ་མདོར་བསྡུས་ཏེ། །སྙིང་གའི་དཀྱིལ་འཁོར་རབ་ཟླུམ་པ། །ཟླ་བ་གང་བ་ལྟར་བསམ་བྱ། །དྲི་མ་མེད་ཅིང་ལེགས་པར་གནས། །དེ་ལ་ཡི་གེ་རྣམ་པར་དགོད། །ཚིག་གི་ཕྲེང་བ་མ་ཆད་པ། །མུ་ཏིག་ཕྲེང་བ་ལྟར་བརྒྱུས་པ། །ཆར་སྤྲིན་གྱི་ནི་མེ་འདྲའི་འོད། །དེ་ཚེ་ཐམས་ཅད་གསལ་བར་བྱེད། །ལྷ་ཡི་ལུས་ནི་སྣང་བྱེད་ཅིང་། །ཇི་ལྟ་ཇི་ལྟར་ཡི་གེའི་ཕྲེང་། །མཆོག་གི་ལུས་ལ་རབ་འཇུག་པ། །དེ་ལྟ་དེ་ལྟར་སྔགས་ཀྱི་ལུས། །ལྷ་ཡི་བདག་ཉིད་ཉིད་དུ་འགྱུར། །མཐུ་སྟོབས་ལྷ་དབང་ཐམས་ཅད་ནི། །ཚངས་པ་ཁྱབ་འཇུག་ལས་ཆེར་ལྷག །བཟླས་པ་དེ་ཉིད་མཆོག་འདི་ནི། །སངས་རྒྱས་ཀུན་གྱིས་བསྔགས་པའོ། །ཇི་ལྟར་སེམས་ནི་བསྒོམ་པ་ཡིས། །དེ་ལྟར་དངོས་གྲུབ་མཆོག་ཏུ་འགྱུར། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་བཟླས་པའི་དེ་ཁོ་ན་ཉིད་ཀྱི་ལེའུའོ།། །།དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་བཞིན་གཤེགས་པ་ཐམས་ཅད་ཀྱི་བསྟོད་པ་རིན་པོ་ཆེ་བཀའ་སྩལ་པ། མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྒྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགོག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་

བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོང་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པ་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། ། འདི་དེ་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱས་པ་སྟེ། །ལན་ཅིག་ཙམ་ཞིག་བརྗོད་པས་ཀྱང་། །གསང་སྔགས་ཐམས་ཅད་འགྲུབ་པར་འགྱུར། །བསྟོད་པའི་རྒྱལ་པོ་འདི་ཡིས་ནི། །དེ་བཞིན་གཤེགས་དེ་ཀུན་བསྟོད་ན། །རབ་ཡངས་དངོས་གྲུབ་སྩོལ་འགྱུར་ཏེ། །བསྐལ་པར་གནས་ཤིང་བསྒལ་བར་བསྐུལ། །ལུས་ནི་གཡོ་བ་མེད་པ་རུ། །བདག་ཉིད་བརྟན་པར་བྱས་པ་ཡིས། །མགོན་པོ་ཆེན་པོ་རྣམ་སྣང་མཛད། །མི་བསྐྱོད་རིན་ཆེན་འབྱུང་གནས་དང་། །རྒྱལ་བ་དག་པ་འོད་དཔག་མེད། །དོན་གྲུབ་རྒྱལ་པོ་ཐམས་ཅད་དུ། །དངུལ་ཆུ་བཅུད་ལེན་དེ་ཉིད་དང་། །མཆོག་ཀྱང་རབ་ཏུ་སྩོལ་བར་བྱེད། །དངོས་གྲུབ་ཡིད་འོང་མ་ལུས་པ། །རྒྱས་པའི་དོན་དང་ཕུན་སུམ་ཚོགས། །རེ་བ་ཐམས་ཅད་ཡོངས་རྫོགས་པ། །ཡིད་ལ་འདོད་པ་སྟེར་བར་བྱེད། །ཡེ་ཤེས་ཚེ་དང་སྟོབས་དང་ཤུགས། །མཆོག་ཏུ་དགེ་བ་སྩོལ་བར་མཛད། །དེ་བཞིན་གཤེགས་པ་ཐམས་ཅད་ཀྱི་བསྟོད་པའི་རྒྱལ་པོ་ཞེས་བྱ་བ་རྫོགས་སྷོ།། །།དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱི་ཆོ་ག་རྒྱས་པ་བཀའ་སྩལ་པ། ཚེས་གྲངས་མེད་ཅིང་རྒྱུ་སྐར་མེད། སྨྱུང་བར་གནས་པའི་ཆོ་ག་མེད། ཇི་ལྟར་བཤད་པ་ཆོ་གས་བསླབ་པའི་གནས་ཉེ་བར་གནས་བཟུང་སྟེ་གང་ཡང་རུང་བའི་ཡིད་དགའ་བར་ཇི་ལྟར་རུང་བའི་དཀྱིལ་འཁོར་བྱས་ཏེ། མེ་ཏོག་སིལ་མ་བཀྲམ་ལ་

བདུག་སྤོས་ཀྱིས་བདུགས་ཏེ། དེ་བཞིན་གཤེགས་པ་ཐམས་ཅད་ལ་ཇི་ལྟར་ནུས་པའི་མེ་ཏོག་ལ་སོགས་པའི་མཆོད་པ་རྣམས་ཀྱིས་མཆོད་པར་བྱས་ཏེ།སྔགས་འདིས་ཡིད་ཀྱིས་ཀྱང་སྡིག་པ་བཤགས་ཏེ། ཨོཾ་སརྦྦ་པཱ་པཱ་ཏ་ཀཱ་ཡི་ཀ་བཱ་ཙི་ཀ་མ་ན་སོད་བྷཱུ་ཏཱན་རཱ་ག་དྭེ་ཥ་མོ་ཧ་མ་ད་མཱ་ན་དྷིཥྛེ་ན་ཡང་ཀྲྀ་རྟྃ་ཏན་ཏྲེ་ཀཱ་ལི་ཀཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སརྦྦ་པཱ་པཱཾ་སྥོ་ཊ་ཡཱ་མི་སྭཱ་ཧཱ། ཨོཾ་སརྦྦ་པཱ་བཱཾ་པྲ་ཏི་དེ་ཤ་ཡཱ་མི་སྭཱ་ཧཱ། དེའི་རྗེས་ཐོགས་ལ་བདག་ཉིད་ཀྱི་དངོས་པོ་དབུལ་བར་བྱ་སྟེ། ཨོཾ་སརྦྦ་ཏ་ཐཱ་ག་ཏཱ་ནཱན་ཨཱཏྨ་བྷཱ་བ་ནི་ར་ཡཱ་ཏ་ཡཱ་མི། སརྦྦ་ཏ་ཐཱ་ག་ཏཿཔྲ་ཏི་གྲྀཧྞཾ་ཏུ་མཱཾ་སྭཱ་ཧཱ། དེ་ནས་དེ་བཞིན་གཤེགས་པ་ཐམས་ཅད་ཀྱི་བསོད་ནམས་ལ་རྗེས་སུ་ཡི་རང་བ་ནི། ཨོཾ་སརྦྦ་ཏ་ཐཱ་ག་ཏ་པུ་ཎྱ་ཛྙཱ་ན་སྃ་བྷཱ་རཱན་ཨ་ནུ་མོ་ད་ཡཱ་མི་སྭཱ་ཧཱ། ཡང་དང་ཡང་དུ་བྱང་ཆུབ་ཀྱི་སེམས་བསྐྱེད་པ་རང་བཞིན་གྱིས་གྲུབ་པའི་སྔགས་ཀྱིས་བྱ་སྟེ། ཨོཾ་སརྦྦ་ཏ་ཐཱ་ག་ཏ་ས་མནྟ་བྷ་དྲ་མ་ཧཱ་བཛྲ་ས་མ་ཡྃ་མ་ཧཱ་བོ་དྷི་ཙིཏྟ་ཨུཏྤཱ་ད་ཡཱ་མི་སྭཱ་ཧཱ། དེ་ནས་བྱང་ཆུབ་ཀྱི་སེམས་བསྐྱེད་པའི་རྗེས་ཐོགས་ལ་ཟླ་བའི་ཁ་དོག་ཅན་ཟླ་བའི་དཀྱིལ་འཁོར་ལ་བཞུགས་པའི་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ས་བཅུའི་དབང་ཕྱུག་ནོར་བུ་རིན་པོ་ཆེ་ཆེན་པོའི་པད་མའི་སྙིང་པོ་སེང་གེའི་ཁྲིའི་སྟེང་དུ་བདག་ཉིད་བསམ་པར་བྱའོ། །ཨོཾ་བུད་དྷོ་ཧྃ། སྔགས་འདིས་བདག་ཡོངས་སུ་དག་པར་བྱས་ཏེ། ཨོཾ་སྭ་བྷཱ་བ་ཤུདྡྷཱཿསརྦྦ་ཏ་ཐཱ་ག་ཏཱཿསྭ་བྷཱ་བ་ཤུདྡྷོ྅ཧྃ། སྔགས་འདིས་བདག་ཉིད་ཆོས་ཀྱི་དབྱིངས་ཡངས་པ་འོད་གསལ་བའི་སྣང་བར་ཤིན་ཏུ་གནས་པར་བྱ་སྟེ། ༀ་དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧྃ། དེ་ནས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པར་བདག་ཉིད་བྱིན་གྱིས་བརླབས་ཏེ། འཇིག་རྟེན་ཐམས་ཅད་ལས་ཤིན་ཏུ་འདས་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུར་བདག་ཉིད་སྔགས་འདིས་གནས་པར་བྱ་སྟེ། ཨོཾ་པྲ་བྷེ་ཤྭ་རོ་ཧྃ། དེ་བཞིན་དུ་རིམ་པ་འདིས་ཆོས་ཀྱི་དབྱིངས་རྒྱ་ཆེན་པོར་སྤྲོས་ནས་བདག་ཉིད་སངས་རྒྱས་ཉིད་དོ། །ཞེས་ང་རྒྱལ་བསྐྱེད་ལ་བདག་སྐྱེ་དགུ་མ་ལུས་པའི་དཔུང་གཉེན་དུ་བྱས་ལ། ཆོས་ཀྱི་དབྱིངས་ཡངས་པ་འོད་གསལ་་

བར་ལྷག་པར་གནས་པར་བྱ་སྟེ། ཉེ་བར་རྒྱས་པར་ཐུན་མཚམས་བཞིར་བཟླས་པ་བརྩམ་པར་བྱ་སྟེ། ཐུན་མཚམས་གསུམ་དུ་དུས་ཇི་ལྟ་བར་ཡི་གེ་ལ་རྗེས་སུ་གཞོལ་བའི་ཡིད་ཀྱིས་འབུམ་ཕྲག་ཉི་ཤུ་བཟླས་པར་བྱ་ཞིང་ཉི་མ་རེ་རེར་སྟོང་ཕྲག་བརྒྱད་དམ་སྟོང་ཕྲག་རེ་བཟླས་ཏེ་ཇི་སྲིད་མཚན་མ་ཐོབ་པ་དེ་སྲིད་དུའོ། །ཙནྡན་དང་ག་པུར་དང་། གུར་ཀུམ་ལ་སོགས་པ་རྣམས་ཀྱིས་དཀྱིལ་འཁོར་བྱས་ཏེ། ཉེ་བར་མཁོ་བ་ཐམས་ཅད་ཀྱིས་མཆོད་པ་བྱས་ནས་ཆོ་འཕྲུལ་གྱི་ཟླ་བའམ་ས་གའི་ཉ་གང་བ་ལ་མར་གྱི་མར་མེ་སྟོང་ཕྲག་བརྒྱད་སྦར་ལ་རྡོ་རྗེ་སྐྱིལ་ཀྲུང་གིས་གནས་ཏེ་སྣ་མའི་མེ་ཏོག་གམ་མེ་ཏོག་པདྨས་དེ་བཞིན་གཤེགས་པ་ཐམས་ཅད་དང་། མཆོད་རྟེན་ལ་མཆོད་དེ་ཇི་སྲིད་འབྲུག་གི་སྒྲ་སྒྲོགས་པ་མ་ཐོས་པ་དེ་སྲིད་དུ་བཟླས་པར་བྱའོ། །དེ་ནས་དེ་བཞིན་གཤེགས་པའི་སྐུ་བདག་ལ་གསལ་བར་འགྱུར་བར་ཤེས་པར་བྱའོ། ། དེ་ནས་སྲེག་བླུགས་འབུམ་ཕྲག་གཅིག་དགང་བར་བྱས་པས་མཚན་མ་ཐམས་ཅད་གསལ་བར་འགྱུར་རོ། །བྱེ་བ་ཕྲག་བཞི་བཟླས་པས་དབང་ཕྱུག་ཆེན་པོ་ལ་སོགས་པའི་སེམས་ཅན་ཐམས་ཅད་དབང་དུ་འགྱུར་རོ། །དེ་ནས་སྒྲུབ་པ་ཆེན་པོ་བྱེད་པར་འདོད་པས་དེ་བཞིན་གཤེགས་པའི་མཐོ་གང་བའི་ཚད་ཀྱིས་དེ་བཞིན་གཤེགས་པའི་མཆོད་རྟེན་བྱས་ལ་མཆོད་རྟེན་རེ་རེའི་མདུན་དུ་སྟོང་ཕྲག་རེ་རེ་བཟླས་པའམ། ཡང་ན་དྲིའི་མཆོད་རྟེན་གྱི་དྲུང་དུ་འབུམ་ལྷག་པའི་བྱེ་བ་ཕྲག་བདུན་བཟླས་སོ། །བདེ་བར་གཤེགས་པའི་མཐོ་གང་པའི་ཚད་ཀྱི་མཆོད་རྟེན་ཉི་མ་རེ་རེ་ལ་རེ་རེ་ཇི་སྲིད་བྱེ་བ་ཕྲག་བདུན་བཟླས་པ་རྫོགས་པ་དེ་སྲིད་དུ་བྱའོ། །ཐ་མ་ཡང་མཆོད་རྟེན་འབར་བའི་འོད་དེས་སྒྲུབ་པའི་ལུས་ལ་ཞུགས་པས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ལ་སོགས་ནས་ཇི་སྲིད་དག་པའི་གནས་ཀྱི་དབང་ཕྱུག་ཆེན་པོ་ལ་སོགས་པའི་ལྷ་རྣམས་མེ་ཏོག་གི་ཆར་འབེབས་པར་འོང་བར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་ལ་སོགས་པ་འོངས་ནས་ཀྱང་སྟོད་པར་བྱེད་ཅིང་ཇི་སྲིད་ཨ་བཱི་ཙི་མནར་མེད་པའི་བར་གྱི་

སེམས་ཅན་དམྱལ་བ་ཐམས་ཅད་བསིལ་བར་འགྱུར་རོ། །ཡི་དགས་རྣམས་ཀྱང་ཡི་དགས་ཀྱི་སྡུག་བསྔལ་ལས་རྣམ་པར་གྲོལ་བར་འགྱུར་རོ། །སྡུག་བསྔལ་བ་རྣམས་ཀྱིས་སེམས་ཅན་རྣམས་ལ་གདུང་བར་མི་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་མངོན་པར་གཟིགས་པར་འགྱུར་རོ། །དེའི་རྗེས་ལ་ལུས་དང་བ་གསེར་གྱི་མདོག་ལྟ་བུ་དང་། ལོ་བརྒྱད་གཉིས་ཀྱི་རྣམ་པ་ཅན་དང་། ཏིང་ངེ་འཛིན་དང་། ཡེ་ཤེས་ཐོབ་པ་དང་། ཁ་དོག་དང་། ཚེ་དང་། སྟོབས་དང་། ཤུགས་དང་། དབང་ཕྱུག་ལ་སོགས་པའི་ཡོན་ཏན་དང་ལྡན་པ་དང་། འཇིག་རྟེན་གྱི་ཁམས་སུ་རྒྱུ་བ་དང་། འཁོར་ལོས་སྒྱུར་བ་ལྟར་ཆེ་བ་དང་། སངས་རྒྱས་ཐམས་ཅད་ཀྱིས་མངོན་པར་བསྟོད་ཅིང་སྟེང་དུ་འགྲོ་བ་དང་། རིག་པ་འཛིན་པའི་རྒྱལ་པོར་འགྱུར་བ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རིག་པ་འཛིན་པའི་རྒྱལ་པོ་རིག་པ་འཛིན་པ་བྱེ་བ་ཕྲག་བརྒྱ་སྟོང་དུ་མས་ཡོངས་སུ་བསྐོར་བ་དང་། ལྷའི་བུ་མོ་བྱེ་བ་ཕྲག་དུ་མས་ཡོངས་སུ་བསྐོར་བ་དང་། ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་སུ་རྫུ་འཕྲུལ་གྱིས་འགྲོ་བ་དང་། དེ་བཞིན་གཤེགས་པ་ཐམས་ཅད་ལ་མཆོད་པ་ཆེན་པོའི་སྤྲིན་གྱིས་ལེགས་པར་མཆོད་ཅིང་གྲུབ་པ་ཐམས་ཅད་འོད་ཀྱིས་ལྟུང་བར་འགྱུར་རོ། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་སྟན་ཕྱེད་སྟེར་བར་འགྱུར་རོ། །གཟི་བརྗིད་དང་གཟུགས་དང་དཔའ་བས་རིག་པ་འཛིན་པ་ཐམས་ཅད་ཟིལ་གྱིས་གནོན་པར་འགྱུར་རོ། །བྱང་ཆུབ་སེམས་དཔའི་ས་ཡང་སོ་སོར་ཐོབ་པར་འགྱུར་རོ། །སེམས་ཅན་ཐམས་ཅད་འདུལ་བ་ལ་མཁས་པར་འགྱུར་རོ། །ཕྱི་མའི་མཐར་ཚེ་བྱིན་གྱིས་བརླབས་ཏེ། སངས་རྒྱས་ཐམས་ཅད་བསྐྱེད་པ་མཐོང་བར་འགྱུར་རོ། །བྱང་ཆུབ་སེམས་དཔའ་ཐམས་ཅད་ཀྱི་བྱ་བ་ངེས་པར་སྟོན་པར་འགྱུར་རོ། །མཆོད་པའི་སྤྲིན་ཐམས་ཅད་འབྱུང་བར་འགྱུར་རོ། །བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱམས་པ་དང་། འཇམ་དཔལ་དང་མཚུངས་པར་འགྱུར་རོ། །དེ་བཞིན་

གཤེགས་པ་ཐམས་ཅད་ཀྱི་སྐུའི་སྒྲུབ་པའི་ཐབས་ཞེས་བྱ་བ་སྟེ་དང་པོའོ།། །།སྒྲུབ་པའི་ཐབས་གཉིས་པ་ནི་དེ་བཞིན་གཤེགས་པ་ཐམས་ཅད་མཆོད་པར་བྱ་སྟེ། གི་ཝང་ངམ་ལྡོང་རོས་པདྨའི་སྣོད་དུ་གཞག་ལ་ཇི་སྲིད་དངོས་གྲུབ་རྣམ་པ་གསུམ་བྱུང་བ་དེ་སྲིད་དུ་བཟླས་པར་བྱའོ། །སེམས་ཅན་ཐམས་ཅད་དབང་དུ་འགྱུར་བ་དང་། མི་སྣང་བ་དང་། རིག་པ་ཐམས་ཅད་འཛིན་པར་འགྱུར་བ་ཉིད་དོ། །རིག་པ་འཛིན་པར་གྱུར་ནས་ཉི་མ་སྟོང་ཤར་བའི་ཁ་དོག་དང་། ལོ་བརྒྱད་གཉིས་ཀྱི་རྣམ་པར་སྐྲ་ལི་ཞིང་འཁྱིལ་བ་དང་། གདུ་བུ་དང་ལྡན་ཞིང་ལྷའི་བུ་མོ་བྱེ་བ་ཕྲག་དུ་མས་ཡོངས་སུ་བསྐོར་ཅིང་རིག་པ་འཛིན་པའི་གྲུབ་པ་ཐམས་ཅད་ཀྱིས་ཡོངས་སུ་བསྐོར་བ་དང་། བསྐལ་པ་ཆེན་པོའི་མཐར་གནས་པ་དང་། རིག་པ་འཛིན་པ་ཐམས་ཅད་ཀྱི་དབང་ཕྱུག་ཏུ་འགྱུར་རོ། །རིམ་པ་འདིས་རྩེ་གསུམ་བསྒྲུབས་ན་དབང་ཕྱུག་ཆེན་པོར་འགྱུར་རོ། །མཆོད་ཕྱིར་ཐོགས་བསྒྲུབས་ན་ཚངས་པར་འགྱུར་རོ། །འཁོར་ལོས་ཁྱབ་འཇུག་ཏུ་འགྱུར་རོ། །གྲོག་མཁར་གྱི་རྩེ་མོའི་ས་བཟུང་སྟེ་ས་སྲུངས་ཀྱི་བུ་བྱས་ལ་དེ་ལ་ཞོན་ཏེ་བཟླས་ན་དབང་པོར་འགྱུར་རོ། །ཉི་མའི་དཀྱིལ་འཁོར་བྱས་ཏེ་དེའི་སྟེང་དུ་བསྡད་ན་ཉི་མ་དང་མཚུངས་པར་འགྱུར་རོ། །ཟླ་བའི་དཀྱིལ་འཁོར་གྱི་ཟླ་བའི་སྟེ་འདི་ཉིད་ཀྱིས་ལྷའི་བྱེ་བྲག་གང་གི་མཚན་མ་བཟུང་སྟེ། དེས་དེའི་ལོངས་སྤྱོད་ལ་སྤྱོད་པར་འགྱུར་རོ། །དེ་བཞིན་དུ་རིམ་པ་འདིས་དངུལ་ཆུའམ་བཅུད་ལེན་གང་བསྒྲུབས་པ་དེ་འགྲུབ་པར་འགྱུར་རོ། །གལ་ཏེ་མ་གྲུབ་ན་དེའི་ཚེ་སྒྲུབ་པ་ལན་བདུན་བྱའོ། །བདུན་བྱས་པས་ཅི་ནས་ཀྱང་འགྲུབ་པར་འགྱུར་རོ། །ཞེས་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བས་བཀའ་སྩལ་པ། འབུམ་ཕྲག་གསུམ་བཟླས་པས་རི་ལྷུན་པོའི་ཚད་ཙམ་གྱི་རི་བོ་ཡང་ཧཱུཾ་ཞེས་བརྗོད་པས་ལྟུང་བ་དང་། རྒྱ་མཚོ་སྐེམས་པ་དང་། ལྗོན་པ་དྲུངས་ནས་འབྱིན་པ་དང་། བུམ་པ་ནམ་མཁའ་ལ་འཕེན་པ་དང་། གླང་པོ་ཆེ་རེངས་པར་བྱེད་པ་དང་། ཕ་རོལ་གྱི་སྡེ་མངོན་པར་འཇོམས་པར་བྱེད་པ་དང་། བར་སྣང་ན་གནས་པ་

ཐམས་ཅད་ལྟུང་བར་བྱེད་དོ། །སེམས་ཅན་ཐམས་ཅད་འབེབས་པར་བྱེད་དོ། །སྒྲུབ་པ་པོ་ལས་གང་དང་གང་སྒྲུབ་པར་འདོད་པ་དེ་དང་དེ་ཐམས་ཅད་བྱེད་དོ། །ཡང་ཟླ་བ་གཅིག་ཙམ་མི་སྨྲ་བར་དེ་བཞིན་གཤེགས་པ་ཐམས་ཅད་ཀྱི་སྐུར་བདག་ཉིད་བསྒོམས་ན་སངས་རྒྱས་ཐམས་ཅད་མཐོང་བར་འགྱུར་རོ། །སྒྱུ་འཕྲུལ་དྲ་བ་ཐམས་ཅད་སྟོན་པར་འགྱུར་རོ། །ནམ་མཁའ་ལ་གནས་ཤིང་འཆག་པར་བྱེད་དོ། །མེ་འབར་བ་དང་། གློག་འགྱུ་བ་ལ་སོགས་པ་སྟོན་པར་བྱེད་དོ། །གཅིག་ཏུ་གྱུར་ནས་མང་པོར་འགྱུར་རོ། །འཇིག་རྟེན་གྱི་ཁམས་སྟོང་ཕྲག་ཀྱང་གཡོ་བར་བྱེད་དོ། །སྒྲུབ་པ་པོས་བྱེ་བ་བདུན་བཟླས་ནས་འདི་དག་ཐམས་ཅད་བསྒྲུབ་པར་བྱའོ། །རིམ་པ་འདིས་ལྷུང་བཟེད་དང་། ཆོས་གོས་དང་། སྣམ་སྦྱར་དང་། འཁར་གསིལ་ལས་གང་ཡང་རུང་བ་བཟུང་ནས་ཇི་སྲིད་རིག་པ་འཛིན་པར་གྱུར་པ་དེ་སྲིད་དུ་བཟླས་པར་བྱའོ། །སངས་རྒྱས་ཀྱི་ཞིང་ཐམས་ཅད་དུ་འགྲོ་བ་དང་། སྤྲུལ་པ་དུ་མ་བྱེད་པ་དང་། འདོད་ན་འཆི་བ་དང་། སྐད་ཅིག་ཙམ་གྱིས་འཇིག་རྟེན་གྱི་ཁམས་ཐམས་ཅད་དུ་འགྲོ་ཞིང་དེ་བཞིན་གཤེགས་པ་ཐམས་ཅད་ཀྱིས་ཉེ་བར་གནས་པར་བྱེད་དོ། ། སངས་རྒྱས་ཀྱི་གཟུགས་ཀྱིས་སངས་རྒྱས་ཀྱི་བྱ་བ་ཐམས་ཅད་ཀྱང་བྱེད་དོ། །སྒྲུབ་པའི་ཐབས་གཞན་ཡང་བདེ་བར་གཤེགས་པའི་མཐོའི་ཚད་ཀྱི་མཆོད་རྟེན་འབུམ་ཕྲག་གཅིག་བྱས་ཏེ་རྨ་མེད་པའི་རལ་གྲི་བླངས་ལ། ཆོ་འཕྲུལ་གྱི་ཟླ་བ་ཕྱེད་ལ་ཉེ་བར་སྤྱོད་པ་ཐམས་ཅད་ཀྱིས་མཆོད་དེ་བརྒྱད་པའམ་བཅུ་བཞི་པའམ་ཉ་གང་བ་ལ་སྐྱིལ་ཀྲུང་བཅས་ཏེ་ཇི་སྲིད་དུ་རལ་གྲི་འབར་བ་དེ་སྲིད་དུ་བཟླ་བར་བྱའོ། །དེའི་རྗེས་ཐོགས་ཉིད་ལ་རྔ་བོ་ཆེ་རྣམས་ཀྱི་སྒྲ་གྲག་གོ། །སྟེང་ནས་མེ་ཏོག་གི་ཆར་འབབ་པར་འགྱུར་རོ། །ལྷན་ཅིག་པ་ཇི་སྙེད་པ་དང་བཅས་པ་སྟེང་དུ་འགྲོའོ། །རིག་པ་འཛིན་པ་ཐམས་ཅད་ཀྱིས་མཆོད་པར་འགྱུར་རོ། །རིག་པ་འཛིན་པའི་རྒྱལ་པོ་ཆེན་པོར་འགྱུར་རོ། །རལ་གྲིའི་རིག་པ་འཛིན་པ་ཆེན་པོའི་འཁོར་ལོས་སྒྱུར་བ་རྣམ་པ་སྣ་ཚོགས་པའི་ཆ་ལུགས་དང་རྒྱན་འཆང་བ་འདོད་དགུ་རྒྱུ་བ་དང་། སྐད་ཅིག་ཙམ་གྱིས་

འཇིག་རྟེན་གྱི་ཁམས་ཐམས་ཅད་དུ་རྣམ་པར་སྤྱོད་པ་དང་། རྒ་ཤི་མེད་པ་དང་། ཉི་མ་རེ་རེ་ཞིང་སངས་རྒྱས་ཀྱི་བདག་ཉིད་ཆེ་བ་མཐོང་བ་དང་། མཆོད་པའི་སྤྲིན་ཐམས་ཅད་ཀྱིས་སངས་རྒྱས་ཀྱི་ཞིང་ཐམས་ཅད་དུ་མཆོད་པའི་ཆར་འབེབས་པ་དང་། བསྐལ་པ་ཆེན་པོ་སྟོང་ཕྲག་ཏུ་འཚོ་བར་འགྱུར་རོ། །དེ་ནས་སྒྲུབ་པའི་ཐབས་གཞན་ཡང་འཁོར་ལོའམ་པ་ཊི་ས་བླངས་ཏེ་འབུམ་ཕྲག་ཉི་ཤུ་བཟླས་པ་ཡོངས་སུ་རྫོགས་པ་དང་དཔལ་གྱི་སྒོར་སོང་སྟེ། ནིམ་པའི་ལོ་མ་ཚ་བའི་མར་ཁུ་ལ་བཏགས་པ་འབུམ་ཕྲག་གཅིག་སྲེག་བླུགས་བྱའོ། ། ལྷ་མ་ཡིན་གྱི་འཁྲུལ་འཁོར་ཐམས་ཅད་འབྱེད་པར་འགྱུར་རོ། །ལྷ་མ་ཡིན་གྱི་བུ་མོ་ཐམས་ཅད་འོང་བར་འགྱུར་རོ། །གལ་ཏེ་མ་གྲུབ་ན་འབུམ་ཕྲག་གཉིས་སམ་གསུམ་དུ་སྲེག་བླུགས་བྱའོ། །ལྷ་མ་ཡིན་གྱི་བུ་མོ་ཐམས་ཅད་བསྲེགས་བཞིན་དུ་འོང་བར་འགྱུར་རོ། ། འོངས་ནས་ཀྱང་སྒྲུབ་པ་པོ་ལ་ཞུ་བར་བྱེད་དེ། ཀྱེ་སྐྱེས་བུ་དཔའ་བོ་འཇུག་ཏུ་གསོལ་ཞེས་སྨྲའོ། །དེ་ནས་གྲོགས་དང་བཅས་པ་འཇུག་པར་བྱའོ། །རལ་གྲིའམ་འཁོར་ལོ་དེ་བཟུང་ནས་ལྷ་མ་ཡིན་གྱི་རིག་པ་འཛིན་པའི་རྒྱལ་པོར་འགྱུར་རོ། །ས་འོག་གི་རྫས་རྣམས་ཀྱི་མངའ་བདག་ལྷ་མ་ཡིན་གྱི་བུ་མོ་ཐམས་ཅད་ཀྱི་བདག་པོ། གསང་སྔགས་གྲུབ་པ་གཞན་ཐམས་ཅད་དང་། ལྷ་མ་ཡིན་གྱི་རིག་པ་འཛིན་པ་རྣམས་ཀྱི་དབང་ཕྱུག་ས་འོག་ཐམས་ཅད་ཀྱི་བདག་པོ་ལྷ་མ་ཡིན་ཆེན་པོའི་སྤྲུལ་པ་བྱེད་པ་པོ་བསྐལ་པ་ཆེན་པོར་གནས་པ། ཁྱབ་འཇུག་གི་འཁོར་ལོ་ཧཱུྃ་ཞེས་བྱ་བ་བརྗོད་པ་ཙམ་གྱིས་རླག་པར་བྱེད་པ། ཁྱབ་འཇུག་ཀྱང་ཧཱུྃ་ཞེས་བརྗོད་པ་ཙམ་གྱིས་རླག་པར་བྱེད་ན་གཞན་ལྟ་སྨོས་ཀྱང་ཅི་དགོས། སྒྲུབ་པའི་ཐབས་གཞན་ཡང་བདེ་བར་གཤེགས་པའི་མཆོད་རྟེན་འབུམ་ཕྲག་སུམ་ཅུ་བྱས་ཏེ་མཆོད་རྟེན་རེ་རེའི་མདུན་དུ་སྟོང་ཕྲག་བརྒྱད་བརྒྱད་བཟླ་བར་བྱའོ། །ཐམས་ཅད་ལ་ཉེ་བར་སྤྱོད་པ་ཐམས་ཅད་ཀྱིས་མཆོད་ལ་ཐ་མར་མེ་ཏོག་ཅན་གྱི་ལྕགས་ལས་བྱུང་བའི་འཁོར་ལོ་རྩིབས་དྲུག་པ་མཐོ་གང་ཙམ་པ་བཟུང་ནས་ཆོ་འཕྲུལ་གྱི་ཟླ་བ་ཕྱེད་པ་ལ་སྐྱིལ་མོ་ཀྲུང་བཅིངས་ཏེ། ཇི་

སྲིད་འབར་བ་དེ་སྲིད་དུ་བཟླས་པར་བྱའོ། །དེ་བླངས་པས་རིག་པ་འཛིན་པའི་འཁོར་ལོས་སྒྱུར་བར་འགྱུར་རོ། །རིག་པ་འཛིན་པའི་རྒྱལ་པོ་ཐམས་ཅད་ཀྱི་མངའ་བདག་དབང་ཕྱུག་ཆེན་པོ་ལ་སོགས་པའི་ལྷ་ཐམས་ཅད་འདུལ་བར་བྱེད་པ།བསྐལ་པ་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུར་འཚོ་བ་དང་། འཇིག་རྟེན་གྱི་ཁམས་སྟོང་རྫུ་འཕྲུལ་གྱིས་གནོན་པ་དང་། མཆོད་པའི་སྤྲིན་བརྒྱ་སྟོང་ཕྲག་གིས་མཆོད་པར་བྱེད་པ་དང་། སངས་རྒྱས་སྟོང་ཕྲག་མཐོང་བར་འགྱུར་རོ། །དེ་རྣམས་ལ་ཉི་མ་རེ་རེ་ཞིང་མཆོད་པ་ཆེན་པོའི་སྤྲིན་གྱིས་མཆོད་པར་བྱེད་དོ། །སྒྲུབ་པའི་ཐབས་རྒྱས་པ་གཞན་ཡང་མཆོད་རྟེན་འབུམ་ཕྲག་དྲུག་ཅུ་བྱས་ཏེ། སྔོན་དུ་བསྙེན་པ་བྱས་ལ་བྱེ་བ་བཟླས་པའོ། །དེ་ནས་མཚན་ཉིད་ཐམས་ཅད་དང་ལྡན་པའི་རོ་བླངས་ལ་ཁྲུས་བྱས་ནས་ཉེ་བར་མཁོ་བ་ཐམས་ཅད་ཀྱིས་མཆོད་དེ་ཇི་སྲིད་མ་ལངས་པ་དེ་སྲིད་དུ་བཟླ་བར་བྱའོ། །ལངས་ནས་དངུལ་ཆུ་དང་བཅུད་ལེན་དང་མི་སྣང་བ་ལ་སོགས་པ་ཐམས་ཅད་དེ་ལ་སྟེར་བར་བྱེད་དོ། །གལ་ཏེ་མི་སྟེར་ན་ཇི་སྲིད་ཁ་ལས་ལྕེ་མ་བྱུང་བ་དེ་སྲིད་དུ་བཟླ་བར་བྱའོ། །དེ་ནས་མཚོན་རྣོན་པོས་དེ་གཅད་པར་བྱའོ། །དེ་གཟུང་བས་ཉི་མ་སྟོང་གི་གཟི་བརྗིད་ཅན་རིག་པ་འཛིན་པ་ཐམས་ཅད་ཀྱི་རྒྱལ་པོ་རིག་པ་འཛིན་པ་བྱེ་བ་སྟོང་ཕྲག་དྲུག་ཅུའི་འཁོར་ཅན། ཚེ་བསྐལ་པ་བྱེ་བ་བརྒྱ་སྟོང་ཕྲག་དྲུག་ཅུ་འཚོ་བ། སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་གྱིས་འགྲོ་བ་དང་། རི་བོ་ལྷུན་པོ་བྱེ་བ་ཕྲག་སྟོང་སྒུལ་བ་དང་། གླིང་སྟོང་ཕྲག་འཕེན་པ་དང་། རྒྱ་མཚོ་སྟོང་ཕྲག་སྐེམས་པ་དང་། ལྷའི་འཇིག་རྟེན་བརྒྱ་སྟོང་ཕྲག་བསྡིགས་པ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་རྣམས་ལྷུང་བ་དང་། སྐྲ་ལི་ཞིང་འཁྱིལ་པ་དང་། ལོ་བརྒྱད་གཉིས་པའི་རྣམ་པ་དང་། རྒྱན་ཐམས་ཅད་ཀྱིས་རྣམ་པར་བརྒྱན་པ་སྟེ། སྲེག་པའི་བསྐལ་པ་ན་འཇིག་རྟེན་གྱི་ཁམས་གཞན་དུ་འགྲོ་ཞིང་རྒ་བ་དང་། འཆི་བ་མེད་པར་འགྱུར་ཞེས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་སྐད་ཅེས་བཀའ་སྩལ་ཏོ། །དེ་བཞིན་

དུ་ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་དང་། བུམ་པ་བཟང་པོ་དང་། ནོར་གྱི་ཆར་པ་དང་། ནམ་མཁའི་མཛོད་ཀྱི་ཏིང་ངེ་འཛིན་ཆེན་པོ་དང་། རིན་པོ་ཆེ་ཆེན་པོའི་ལག་པ་དང་། ནོར་རྒྱུན་གྱི་རྟོག་པ་ཆེན་པོ་དང་། སེམས་ཅན་གྱི་རེ་བ་ཐམས་ཅད་རྗེས་སུ་འགེངས་པ་དང་། འཁོར་ལོས་སྒྱུར་བའི་རྒྱལ་སྲིད་དང་། རིན་པོ་ཆེ་ཐམས་ཅད་ཀྱང་བསྒྲུབ་པར་བྱའོ། །དེ་ལ་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བསྙེན་བཀུར་བ་རིན་པོ་ཆེའོ། །དེ་ནས་སྒྲུབ་པའི་ཐབས་གཞན་ཡང་ཙནྡན་དཀར་པོ་ལས་པདྨ་སོར་དྲུག་པའི་ཚད་བྱས་ལ་པདྨ་དེ་ལག་པར་བཟུང་ནས་ཟླ་བ་དྲུག་ཏུ་སྐྱིལ་ཀྲུང་བཅིངས་ཏེ་ཉེ་བར་སྤྱོད་པ་ཐམས་ཅད་ཀྱིས་མཆོད་ནས་ཐུན་མཚམས་གསུམ་མམ་བཞིར་གྲངས་མི་གཟུང་བར་བཟླས་པར་བྱའོ། །ཟླ་བ་དྲུག་ཡོངས་སུ་རྫོགས་པ་དང་པདྨ་འབུམ་ཕྲག་བདུན་སྲེག་བླུགས་བྱའོ། །ཟླ་བ་ཉ་ནས་བསྒྲུབ་པ་བརྩམ་པར་བྱ་སྟེ། ཉེ་བར་སྤྱོད་པ་ཐམས་ཅད་ཀྱིས་མཆོད་ལ་སྐྱིལ་ཀྲུང་བཅས་ནས་མཚན་ཐོག་ཐག་བཟླས་པར་བྱའོ། །ཐོ་རངས་ཀྱི་ཚེ་རིག་པ་འཛིན་པར་འགྱུར་རོ། །སྐྲ་ལི་ཞིང་འཁྱིལ་བ་དང་། ལོ་བརྒྱད་གཉིས་ཀྱི་རྣམ་པར་རྒྱན་གྱི་ཚོགས་ཐམས་ཅད་ཀྱིས་བརྒྱན་པ། ཉི་མ་སྟོང་ཕྲག་ཤར་བའི་འོད་དང་མཚུངས་པ། རིག་པ་འཛིན་པ་བྱེ་བ་ཕྲག་དུ་མའི་འཁོར་ཅན། ལྷའི་བུ་མོ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་བ། ཚངས་པ་ལ་སོགས་པའི་ལྷ་རྣམས་མངག་གཞུག་པར་འགྱུར་རོ། །སངས་རྒྱས་ཀྱི་ཞིང་ཐམས་ཅད་དུ་སྐད་ཅིག་ཙམ་གྱིས་རྣམ་པར་རྒྱུ་བ་དང་། མཆོད་པའི་སྤྲིན་དུ་མས་དེ་བཞིན་གཤེགས་པ་རྣམས་རྣམ་པར་མཆོད་པར་འགྱུར་རོ། །དེ་བཞིན་དུ་ཨུཏྤ་ལའི་སྒྲུབ་པ་དང་། ཙནྡན་དམར་པོའི་པདྨའི་སྒྲུབ་པ་ཡང་ངོ་། །སྒྲུབ་པ་གཞན་ཡང་འབྱུང་སྟེ། ཤེལ་དང་། པདྨ་རཱ་གའམ། མུ་ཏིག་གི་འབྲས་བུའམ། རིན་པོ་ཆེ་ཡོངས་སུ་རྟོག་པར་བྱེད་པ་པོས་ཡོངས་སུ་བརྟགས་པ་ལ་བདེ་བར་གཤེགས་པའི་མཐོའི་ཚད་ཙམ་པའི་མཆོད་རྟེན་འབུམ་ཙམ་བྱས་ཏེ།

གང་ཡང་རུང་བར་གྲངས་མི་གཟུང་བར་ཇི་སྲིད་བདག་ཡོངས་སུ་དག་པར་མཐོང་བ་དེ་སྲིད་དུ་བཟླས་པར་བྱའོ། །དེའི་རྗེས་སུ་མངར་གསུམ་གྱིས་སྦགས་པའི་པདྨ་འབུམ་དང་། སྣ་མའི་མེ་ཏོག་འབུམ་ཕྲག་གསུམ་དང་། ཨ་ག་རུའི་ཡམ་ཤིང་འབུམ་དང་། ཙནྡན་གྱི་ཡམ་ཤིང་འབུམ་ཕྲག་གསུམ་དང་། ཏིལ་དང་འབྲས་འབུམ་ཕྲག་བཞི་དང་། ཞོ་ཟན་འབུམ་དང་། མར་གྱི་སྲེག་བླུགས་སྟོང་ཕྲག་གསུམ་དང་། སྨན་ཐམས་ཅད་པའི་སྲེག་བླུགས་འབུམ་ཕྲག་གཅིག་བྱས་ལ་སྦྱིན་སྲེག་ཡོངས་སུ་རྫོགས་པ་དང་། དཀར་པོའི་ཚེས་བཅྭ་ལྔ་ལ་བསྒྲུབ་པར་བྱའོ། །སྐྱིལ་མོ་ཀྲུང་བཅས་ཏེ་ཉེ་བར་སྤྱོད་པ་ཐམས་ཅད་ཀྱིས་མཆོད་ལ་ཇི་སྲིད་ནོར་བུ་རིན་པོ་ཆེ་འབར་བ་དེ་སྲིད་དུ་བཟླས་པར་བྱའོ། །འབར་ནས་ཀྱང་རིག་པ་འཛིན་པ་གཞོན་ནུ་གདོང་དུ་འགྲོ་བར་འགྱུར་རོ། །སྐྲ་ལི་ཞིང་འཁྱིལ་པ་དང་། ལོ་བརྒྱད་གཉིས་ཀྱི་རྣམ་པ་རྒྱན་ཐམས་ཅད་ཀྱིས་བརྒྱན་པ་ཕྱོགས་བཅུ་མུ་མེད་པའི་འཇིག་རྟེན་གྱི་ཁམས་རྒྱས་པར་གསལ་བར་བྱེད་པ་རིག་པ་འཛིན་པ་ཐམས་ཅད་ཀྱི་སླར་འཁོར་ལོས་སྒྱུར་བ་ཆེན་པོར་འགྱུར་རོ། །ཡིད་བཞིན་ནོར་བུའི་དངོས་གྲུབ་བྱང་ཆུབ་སེམས་དཔའ་ཆེན་པོའི་རིག་པ་འཛིན་པ་ཞེས་བརྗོད་དོ། །སངས་རྒྱས་ཐམས་ཅད་མཆོད་ཅིང་བསྙེན་བཀུར་བར་བྱེད་དོ། །སྐད་ཅིག་ཙམ་ལ་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་བསྐོར་ནས་སླར་དེ་ཉིད་དུ་འོང་བར་འགྱུར་རོ། །གལ་ཏེ་འདོད་ན་བྱང་ཆུབ་སེམས་དཔའི་ཚོགས་མངོན་པར་རྫོགས་པར་བྱས་ཏེ་ལུས་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་བཞིན་དུ་སྒྲུབ་ཐབས་ཀྱི་ལེའུ་ལ་བྲིས་སྐུ་དང་། ཤིང་ལྷམ་དང་། མུ་ཏིག་གི་ཕྲེང་བ་ཡང་ཡིད་བཞིན་གྱི་ནོར་བུའི་ཆོ་གས་བསྒྲུབ་པར་བྱའོ། །ཐམས་ཅད་དུ་འགྲུབ་པར་འགྱུར་རོ། །སྒྲུབ་པའི་ཐབས་གཞན་ཡང་མཆོད་རྟེན་བྱེ་བ་ཕྲག་སྟོང་བྱས་ཏེ་འབུམ་ཕྲག་བདུན་བཟླ་བར་བྱའོ། །ཡོངས་སུ་རྫོགས་པ་དང་མེ་ཏོག་ཅན་གྱི་ལྕགས་སམ། ལྕགས་ལྔའི་རང་བཞིན་གྱི་རྡོ་རྗེ་རྩེ་མོ་ལྔ་པ་སོར་བཅུའི་ཚད་དམ། བདེ་བར་གཤེགས་པའི་མཐོའི་ཚད་ཙམ་ཆོ་འཕྲུལ་

གྱི་ཟླ་བ་ཕྱེད་ལ་མཚན་ཐོག་ཐག་ལག་པས་རྡོ་རྗེ་དེ་བཟུང་ནས་མདུན་དུ་ཁྲིའི་སྟེང་དུ་ལག་པ་བཀབ་ལ་ཇི་སྲིད་འབར་བར་གྱུར་པ་དེ་སྲིད་དུ་བཟླ་བར་བྱའོ། །དེ་བཟུང་ནས་རྡོ་རྗེའི་རིག་པ་འཛིན་པ་འཁོར་ལོས་སྒྱུར་བ་ཆེན་པོ་ཉི་མ་བྱེ་བ་བརྒྱ་ཕྲག་དང་རྗེས་སུ་འཚམ་པ་རྡོ་རྗེ་འཆང་བ་ལྟར་གཟི་བརྗིད་དང་ལྡན་ཞིང་འོད་གསལ་བར་འཇིག་རྟེན་གྱི་ཁམས་ཐམས་ཅད་དུ་རྣམ་པར་རྒྱུ་ཞིང་དབང་ཕྱུག་ཆེན་པོ་ལ་སོགས་པའི་ལྷ་རྣམས་ལ་ཅི་བསྒོ་བ་ཉན་པར་འགྱུར། ལྷ་མ་ཡིན་རྣམས་སྐྲག་པ་དང་། སྲིན་པོ་རྣམས་འཇོམས་པ་དང་། སེམས་ཅན་ཐམས་ཅད་དེའི་ཅི་བསྒོ་བ་བྱེད་པར་འགྱུར་བར་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཆེན་པོས་དེ་སྐད་ཅེས་བཀའ་སྩལ་ཏོ། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་དེ་བཞིན་གཤེགས་པ་ཐམས་ཅད་ཀྱི་རྫས་ཀྱི་བྱ་བ་སྒྲུབ་པ་ཞེས་བྱ་བའི་སྒྲུབ་ཐབས་ཀྱི་ལེའུ་ཡོངས་སུ་རྫོགས་སྷོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་སླར་ཡང་ཏིང་ངེ་འཛིན་ལ་མཉམ་པར་བཞག་སྟེ། བཅོམ་ལྡན་འདས་ཐོག་མ་དང་ཐ་མ་མེད་པ་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་གསོལ་བ་བཏབ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོ་ཀ་ཀྵ་སྦྱར་བ་སྟེ། མཐའ་ཡས་པ་ཁ་སྦྱར་བ་ཞེས་བྱ་བ་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོ་གསང་སྔགས་ཀྱི་ཀ་ཀྵ་པུ་ཊ་བཀའ་སྩལ་པ། དེ་ནས་ཡང་དག་བཤད་བྱ་བ། །སངས་རྒྱས་ཀུན་གྱི་རྗེས་སུ་སྐྱོབ། །གསང་སྔགས་ཀ་ཀྵ་སྦྱར་ཞེས་བྱ། །གསང་ཆེན་མཆོག་ཏུ་རྨད་དུ་བྱུང་། །གྲུ་བཞི་པ་ལ་ཚད་མཛེས་པ། །ཀུན་ནས་ཡོངས་སུ་བཟང་ཞིང་དག །རེ་མིག་བཞི་བཅུ་ཞེ་དགུ་པ། །མདོར་བསྡུས་ནས་ནི་སྔགས་པས་བྱ། །དང་པོའི་ཕྲེང་བཟང་གཉིས་ལ་ནི། །ཨ་སོགས་བློ་གྲོས་ལྡན་པས་དགོད། །ཀ་སོགས་ལྷག་མའི་རེའུ་མིག་ལ། །སྔགས་པས་མདོ་རུ་བསྡུས་ཏེ་བྲི། །སྦྱོར་བ་ཇི་བཞིན་ཡི་གེ་ཀུན། །གོ་རིམས་བཞིན་དུ་དགོད་པར་བྱ། །རེའུ་མིག་སྟོང་པ་དག་ལ་

ནི། །ཀྵ་ཡིག་དང་ནི་རྡོ་རྗེ་བྲི། །རིམ་པ་འདི་དག་བཀོད་ནས་ནི། །རང་སྡེའི་འོག་ཏུ་འབར་བ་མཆོག །དང་པོ་དབྱངས་ལ་དེའི་རྗེས་སུ། །ཡི་གེ་ཕྱག་རྒྱ་མདོར་བསྡུས་པ། །ཀ་ཙ་ཊ་ཏ་པ་ཡ་ཤ། །དག་ཅིང་ཆུ་ཡི་དཀྱིལ་འཁོར་ལྡན། །འདི་རྣམས་མྱུར་དུ་འགྲུབ་པར་བྱེད། །པདྨའི་རིགས་ཀྱི་ལྷ་ཉིད་དོ། །དོན་ཀུན་གྲུབ་པར་ཡང་དག་ལྡན། །མེ་ཡི་དཀྱིལ་འཁོར་ཞེས་སུ་བཤད། །འབར་བའི་མེ་དང་མཚུངས་པའི་འོད། །ཁ་ཚ་ཋ་ཐ་ཕ་ར་ཥ། །དབང་ཆེན་གྱི་ནི་དཀྱིལ་འཁོར་ལྡན། །ག་ཛ་ཌ་ད་བ་ལ་ས། །དངོས་གྲུབ་ཀུན་བྱེད་རླུང་གཟུགས་ལྡན། །དབྱར་གྱི་སྤྲིན་ལྟར་ཤིན་ཏུ་འཇིགས། །གྷ་ཛྷ་ཌྷ་དྷ་བྷ་ཝ་ཧ། །སྟེང་འགྲོས་དངོས་གྲུབ་བྱེད་པོར་བརྗོད། །སླར་ཡང་ང་ཉ་ཎ་ནམ། །ཆོས་ཀུན་དབང་དུ་བྱེད་པ་མཆོག །ཐོག་མའི་དབྱངས་ཡིག་གང་ཡིན་པ། །དེ་ནི་དེ་བཞིན་གཤེགས་སྟོབས་བཅུ། །ཁྱད་པར་ཡན་ལག་བཅུ་གཉིས་བཤད། །དེ་བཞིན་གཤེགས་པའི་ས་བཅུ་གཉིས། །མ་ནིང་ཡི་གེ་བཞི་པོ་སྤོང་། །རྀ་རཱྀ་ལྀ་ལཱྀ་ཞེས་བྱ་བ། །དབྱངས་དང་ས་བོན་དེ་བཞིན་སྔགས། །དེ་དག་ཡི་གེ་རུ་ཡང་བཤད། །དབང་དུ་བྱེད་པའི་སྡེ་ཚན་ཀུན། །ཐིག་ལེ་སྒྲ་གཙུག་ཟླ་ཕྱེད་ཅེས། །རྗེས་དབྱངས་ཀྱི་ནི་ཕྲེང་ཞེས་བཤད། །སངས་རྒྱས་དེ་བཞིན་བྱང་སེམས་ཀྱི། །ཡི་གེར་བརྗོད་པ་དེ་བཞིན་ཞིང་། །གསལ་བྱེད་ཅེས་ཀྱིས་གསལ་བའོ། །དེ་བཞིན་ཡ་ར་ལ་ཝ་རླུང་། །མེ་དང་དབང་ཆེན་ཆུ་དག་སྟེ། །འབྱུང་བ་ཆེན་པོ་ཁམས་རྣམས་སོ། །རླུང་མེ་བདུད་རྩིའི་བཅུད་ཅེས་བཤད། །མཉམ་དང་མི་མཉམ་ཆ་དབྱེ་བས། །ཐམས་ཅད་ཉིད་ཀྱི་ལམ་ཤེས་བྱ། །ཕྱག་རྒྱ་དང་ནི་དཀྱིལ་འཁོར་སྔགས། །ཏིང་འཛིན་མདོར་བསྡུས་བཤད་པའོ། །མི་རྟག་སྡུག་བསྔལ་སྟོང་བདག་མེད། །ཆོས་རྣམས་ཀུན་གྱི་སྡོམ་དུ་བརྗོད། །སྟོང་པ་མཚན་མེད་སྨོན་མེད་པ། །རྣམ་པར་ཐར་པ་གསུམ་དུ་བཤད། །ཕུང་པོ་ཁམས་དང་སྐྱེ་མཆེད་རྣམས། །མཁས་པ་ཡིས་ནི་ཤེས་པར་བྱ། །ད་ནི་སྔགས་ཀྱི་ཀ་ཀྵའི་སྦྱོར་བ་ལ། རབ་ཏུ་བཏུས་པ་སྦྱར་བ་དང་ཕྲལ་བ་བཤད་པར་བྱའོ། །ཡི་གེ་

རྣམས་ཀྱིས་བྱང་ཆུབ་སྤྱོད། །སངས་རྒྱས་ཉིད་ཀྱང་མྱ་ངན་འདས། །ལྷན་ཅིག་ཉིད་དུ་སྦྱར་བར་བྱ། །དབྱངས་རྣམས་ཡིག་རྣམས་བསྡུས་པར་བཤད། །མཚན་ཉིད་ཀྱང་ནི་རབ་བཤད་བྱ། །དབྱངས་ནི་བྱང་ཆུབ་གཟུགས་ཉིད་དེ། །གཞན་དང་ལྷན་ཅིག་སྦྱར་བར་བྱ། །དེ་ལ་ངེས་པར་སངས་རྒྱས་ཉིད། །སྟེར་བ་ཉིད་དུ་ལེགས་པར་བཤད། །ཐོག་མར་སངས་རྒྱས་ཐམས་ཅད་ཀྱི། །གསང་སྔགས་དྲི་མ་མེད་པ་འབྱུང་། །ཐོག་མར་དབྱངས་ནི་ཐིག་ལེ་ལྡན། །རྡོ་རྗེའི་སྟེང་དུ་ཡང་དག་གནས། །འབར་བའི་ཕྲེང་ཅན་རབ་ཞི་བ། ། རྣམ་པར་འཕྲོ་བ་ཉིད་དུ་གནས། །ཟླ་བའི་དབུས་སུ་བསྒོམ་བྱ་བ། །ཀུན་གྱི་ཡེ་ཤེས་འོད་ཆེན་པོ། །ཀུན་དུ་འགྲོ་བ་རབ་ཏུ་ཐོབ། །ཐམས་ཅད་དུ་ཡང་རྙེད་པར་དཀའ། །དེ་ཉིད་བྲལ་བ་རྟག་པ་སྟེ། །ཡི་གེ་མེད་ཅིང་དབྱེར་མེད་པ། །བྱང་ཆུབ་སེམས་ཞེས་རབ་ཏུ་བཤད། ། དུང་དང་ཀུནྡ་ཟླ་ལྟར་དག །གཉིས་པའི་སྒྲ་དང་ཡང་དག་ལྡན། །དེ་ནི་ཤིན་ཏུ་རིང་པོར་ཤེས། །སངས་རྒྱས་ཀུན་གྱི་སྤྱོད་པ་སྟེ། །ས་དང་ཕ་རོལ་ཕྱིན་པ་རྣམས། །དྲོ་བའི་བཞི་པ་སྦྱར་བ་ནི། །མྱ་ངན་འདས་པ་ཞེས་སུ་བསྒྲགས། །དབྱངས་དང་ཡི་གེ་ཁྱད་པར་ཅན། །མཚན་ཉིད་རབ་ཏུ་སྦྱར་བར་བྱ། །རང་གི་ཕྱག་རྒྱ་སོགས་ལྡན་པས། །སངས་རྒྱས་བྱང་ཆུབ་རབ་སྩོལ་བྱེད། །ད་ནི་སངས་རྒྱས་ཐམས་ཅད་ཀྱི། །སྔགས་ཀྱི་དེ་ཉིད་འདིར་བཤད་བྱ། །ཐོག་མར་སྤྱོད་པ་བྱས་ནས་ནི། །གཉིས་པ་སྨྲ་བ་པོ་རུ་བཤད། ། བཞི་པའི་དབྱངས་ཀྱིས་ཀུན་ནས་མནན། །གསུམ་པ་མེ་ཡི་མིང་ཅན་ནོ། །རྒྱུད་མེད་པས་ཏེ་ཅུང་ཟད་པ། །བཞི་པ་ཡིས་ནི་གསལ་བར་བྱས། །དྲུག་པའི་སྒྲ་དང་ཐ་དད་མིན། །དེ་ཡི་སྟེང་དུ་ཐིག་ལེ་གནས། །ཆོས་ཀུན་ནམ་མཁའ་དང་མཚུངས་པར། །ཡང་དང་ཡང་དུ་བཤད་པ་ཡིན། །དེ་ནི་ལྔ་པར་ཤེས་པར་བྱ། །ཡི་གེ་ལྔ་པ་སྟོབས་པོ་ཆེ། །ཡི་གེ་ལྔ་ཡི་སྟོབས་ལྔའི་བདག་ཉིད་ལས་སྐྱེས་གཙོ། །མཐུ་སྟོབས་ཆེན་པོ་ཁྱབ་བདག་སྲིད་པའི་བདག་ཉིད་སྐྱེས། །མཐུ་སྟོབས་ཆེན་པོ་སྲིད་གསུམ་ལས་རབ་གྲོལ་བྱེད་པ། །ཡི་གེ་ལྔ་ནི་

འགྲོ་བ་དྲུག་ལས་གྲོལ་བའི་བདག །མངོན་ཤེས་དྲུག་ཀྱང་རབ་ཏུ་སྟེར་བྱེད་དྲི་མ་མེད། །དེ་ཉིད་བཅོམ་ལྡན་སྤྱོད་པ་སྟེ། །མི་བསྐྱོད་པ་ཞེས་རབ་ཏུ་གྲགས། །བྱང་སེམས་རྡོ་རྗེ་སེམས་དཔའ་སྟེ། །བསྟན་པའི་སེམས་དཔའ་རང་བྱུང་བ། །ཆོས་ཀུན་གྱི་ནི་དེ་བཞིན་ཉིད། །གང་བསྒྲགས་དེ་ཉིད་ཐམས་ཅད་དུ། །འབར་བ་མེ་ཡི་ས་བོན་ལྡན། །སྤྱོད་པ་ཡི་ནི་སྟེང་དུ་གནས། །དེ་ཉིད་བཅོམ་ལྡན་རྣལ་འབྱོར་ནི། །རིན་ཆེན་འབྱུང་ལྡན་ཞེས་སུ་བཤད། །ཆོས་རྣམས་ཀུན་གྱི་བྱེད་པ་ནི། །མེད་པ་ཉིད་དུའང་བཤད་པའོ། །མེ་ཡི་ས་བོན་ཡང་དག་ལྡན། །བཞི་པའི་དབྱངས་ཀྱིས་སྤྱི་བོ་རུ། །མནན་པ་རྒྱལ་བ་འོད་དཔག་མེད། །དེ་ཉིད་བཅོམ་ལྡན་རྣལ་འབྱོར་ནི། །སྣ་ཚོགས་དེ་བཞིན་གཤེགས་པ་ཀུན། །དྲུག་པའི་དབྱངས་དང་ཡང་དག་ལྡན། །དོན་ཡོད་པ་ཡི་སྙིང་པོར་གྲགས། ། སྡེ་ལྔ་པ་ཡི་བཞི་པ་ནི། །དངོས་དང་དངོས་མེད་རབ་རྟོགས་བྱེད། །འབར་བ་མེ་ཡི་ས་བོན་གྱིས། །འཁོར་ལོའི་དབུས་སུ་རབ་ཏུ་གནས། །དྲུག་པའི་དབྱངས་དང་ཡང་དག་ལྡན། །ཐིག་ལེ་སྒྲ་ཡིས་རྣམ་པར་སྤྲས། །འཁོར་ལོས་སྒྱུར་བ་ཡེ་ཤེས་ཆེ། །རྣམ་པར་རྒྱས་པའི་ནོར་སྟེར་བྱེད། །གང་ཞིག་སྡེ་ལྔ་པ་ཡི་མཐའ། །སྒྱུ་མའི་ཆོས་ལ་རབ་ཏུ་གནས། །དེ་ཉིད་བཅོམ་ལྡན་རྣལ་འབྱོར་ནི། །གདུགས་དཀར་ཞེས་སུ་བཤད་པའོ། །བརྒྱད་པའི་དབྱངས་དང་ཡང་དག་ལྡན། །བྱམས་པ་ཞེས་ནི་གྲགས་པ་སྟེ། །དེ་ཉིད་བཅོམ་ལྡན་རྣལ་འབྱོར་ནི། །སྤྱི་བོར་ཐིག་ལེ་མནན་པའོ། །འཇམ་པའི་དབྱངས་དང་ཡེ་ཤེས་ཆེ། །མཱ་མ་ཀཱི་རུ་དེ་བསྒྲགས་སོ། །ལྔ་པའི་དབྱངས་དང་ཡང་དག་ལྡན། །འཇམ་པའི་དཔལ་ཞེས་རབ་ཏུ་གྲགས། །སྤྱོད་པའི་གར་མཁན་རབ་རྟོགས་མིང་། །སྡིག་པ་ཐམས་ཅད་རེངས་བྱེད་དེ། །སྡིག་ཀུན་རྣམ་པར་སྦྱོང་བྱེད་པ། །རྣམ་པར་སེལ་བ་རྣམ་ཤེས་བྱ། །སྡེ་ཚན་ལྔ་པའི་གསུམ་པ་ནི། །ཕྱག་ན་རྡོ་རྗེ་སྟོབས་ཆེན་དང་། །གཤིན་རྗེ་མཐར་བྱེད་ཁྲོ་བོ་ཆེ། །ཡི་གེ་གསུམ་ནི་སྟོབས་ཆེན་པོ། །ཐོག་མར་དགུ་པ་ཡི་ནི་དབྱངས། །དེ་

ཡི་དབུས་སུ་སྤྱོད་པ་གཞག །ཐ་མར་སྣ་ཚོགས་ཞེས་བྱ་སྦྱར། །སྐུ་གསུམ་དུ་ནི་རྣམ་པར་བསྒོམ། །ཐ་མའི་སྡེ་ཚན་གསུམ་པ་ནི། །གང་ཡིན་ཀུན་ཏུ་བཟང་པོར་བཤད། །སྡེ་ཚན་དང་པོའི་གསུམ་པ་ནི། །སངས་རྒྱས་སྤྱན་ཞེས་བྱ་བའོ། །དེ་ཉིད་བཅོམ་ལྡན་མགོན་པོ་ནི། །ནམ་མཁའི་མཛོད་ཅེས་རབ་ཏུ་གྲགས། །རྡོ་རྗེ་ཁྲོ་བོ་སྟོབས་པོ་ཆེ། །དེ་ཉིད་རབ་ཏུ་གྲགས་པའོ། །འདི་ཀུན་ཐམས་ཅད་སྟོང་པ་སྟེ། །རྒྱུ་ནི་རབ་ཏུ་སྤངས་པའོ། །དབྱངས་ལྔ་དང་ནི་ཡང་དག་ལྡན། །རྡོ་རྗེ་ཧཱུྃ་མཛད་ཧཱུྃ་མཛད་དོ། །གང་ཞིག་བཞི་པའི་སྡེ་དང་པོ། །མེ་ཡིས་རབ་ཏུ་གསལ་བར་བྱས། །བཞི་པའི་དབྱངས་དང་ཡང་དག་ལྡན། །གཟི་བརྗིད་ཕུང་པོ་སྟོབས་པོ་ཆེ། །དེ་ཉིད་གང་དང་མ་སྦྱར་བ། །སྒྲོལ་མ་ཞེས་སུ་རབ་ཏུ་གྲགས། །བཞི་པ་ཡི་ནི་གཉིས་པ་གང་། །ཤེས་རབ་ཕ་རོལ་ཕྱིན་པར་ངེས། །ཐིག་ལེ་ལྷན་ཅིག་ཡང་དག་ལྡན། །སྒྲ་དང་ལྡན་པའི་མཆོག་ཏུ་གྱུར། །སྡེ་ཚན་གཉིས་པའི་གསུམ་པ་གང་། །མེ་ཉིད་དང་ནི་ཡང་དག་ལྡན། །བཞི་པའི་དབྱངས་ཀྱིས་ཡང་དག་མནན། །ཁམས་གསུམ་རྣམ་པར་རྒྱལ་པའི་མཆོག །དེ་ཉིད་བཅོམ་ལྡན་ཤེས་བྱ་བ། །སྤྱོད་པའི་གར་མཁན་ཞེས་བྱའི་མཚན། །དེ་ཡི་རྗེས་ཉིད་ལ་ནི་མེ། །དགུ་པའི་དབྱངས་དང་ཡང་དག་ལྡན། །མེ་དང་དབང་ཆེན་དུ་བརྗོད་བྱ། །གསུམ་པའི་དབྱངས་ཀྱིས་མནན་པ་ཡི། །སྡེ་ཚན་དང་པོའི་དང་པོའི་ཡིག །དེ་ཉིད་བཅོམ་ལྡན་མགོན་པོ་ནི། །འཇིག་རྟེན་མགོན་པོ་ཐུབ་པ་ཆེ། །ཡེ་ཤེས་རྒྱ་ཆེ་བསྒྲུབ་པར་བྱ། །སངས་རྒྱས་བྱང་ཆུབ་རབ་གསོལ་བྱེད། །སྡེ་ཚན་ལྔ་པ་རིན་ཆེན་མཆོག །བཞི་པའི་ས་བོན་དམ་པ་དེ། །འོག་ཏུ་མེ་ཡི་ཡན་ལག་འབར། །ཁྲོ་གཉེར་ཅན་ཞེས་རབ་ཏུ་གྲགས། །དབང་ཆེན་ཡི་གེ་དག་པ་ལ། །ཐིག་ལེ་སྒྲ་ཡིས་རྣམ་པར་བརྒྱན། །སངས་རྒྱས་སྤྱན་ཞེས་རྣམ་གྲགས་པ། །སྡིག་པ་ཐམས་ཅད་འཕྲོག་པར་བྱེད། །སྡེ་ཚན་དང་པོའི་གསུམ་པ་ནི། །ནམ་མཁའི་སྤྱན་ཞེས་བརྗོད་པའོ། །སྒྱུ་མའི་ཆོས་ལ་རབ་གནས་ནས། །གསོད་པའི་དོན་དུ་རབ་གསོལ་བྱེད། །མཱ་

མ་ཀཱི་ཞེས་བྱ་བའི་མིང་། །རིག་པ་མཆོག་ཏུ་གསང་བ་སྟེ། །རྒྱུ་མི་དམིགས་པའི་ཆོས་རྣམས་ཀྱི། །དྲི་མ་མེད་པ་སྩོལ་བར་བྱེད། །གཉིས་པའི་དབྱངས་དང་ཡང་དག་ལྡན། །འཕགས་པ་མི་གཡོ་བ་ཞེས་བྱ། །དབང་ཆེན་ས་བོན་ཡང་དག་ལྡན། ། འགྲོ་བའི་རྡོ་རྗེ་རེངས་བྱེད་ན། །གདུག་སེམས་གཞན་ཀུན་ལྟ་ཅི་སྨོས། །རླུང་གི་དཀྱིལ་འཁོར་སྦྱར་བྱས་པ། །རང་གི་ས་བོན་གནས་ཤིང་འཕྲོ། །འགྲོ་བ་ཐམས་ཅད་སྐྲོད་བྱེད་ན། །གདུག་སེམས་ཅན་གཞན་སྨོས་ཅི་དགོས། །དེ་ཉིད་མེ་དང་ལྡན་པས་ནི། །དབང་དང་དགུག་པའི་ལས་རྣམས་དང་། །བགེགས་དང་དགྲ་རྣམས་ཞི་བ་ནི། །ཁྱད་པར་མི་གཡོ་བ་ཡིས་བྱེད། །དོན་དམ་བདེན་པའི་བྱིན་གྱིས་བརླབས། །རྣམ་སྣང་མཛད་བྱ་གནས་ལས་འབྱུང་། །གཞན་གྱི་དམག་དཔུང་འཇོམས་པ་ནི། །རྒྱུ་ནི་མེ་ཡིས་གསལ་བྱས་པ། ། དྲུག་པའི་དབྱངས་དང་ཡང་དག་ལྡན། །ཐིག་ལེ་སྒྲ་ཡིས་རྣམ་པར་བརྒྱན། །འགྲོ་བ་ཐམས་ཅད་འགུགས་པར་བྱེད། །རླུང་གི་དཀྱིལ་འཁོར་གྱིས་དྲངས་པས། །ཏི་སེ་མན་དཱ་ར་ལ་སོགས། །དེ་ཡི་ཕྱེ་མར་རློག་པར་ངེས། །རྡོ་རྗེ་ལ་གནས་འཁོར་ལོ་ཡི། །དབུས་གནས་འགྲོ་ཀུན་རེངས་པར་བྱེད། །གནས་ནས་བསྐྱོད་པར་བྱེད་པ་ཡིས། །འབྱུང་པོ་རྣམས་ནི་དབང་དུ་བྱེད། །རྟག་པའི་གཟུགས་སུ་གནས་ནས་ནི། །མི་གཡོ་བ་ཡི་སྙིང་གར་སོན། །ཆོས་ཀྱི་དབྱིངས་མཚུངས་ཐོབ་ནས་ནི། །བདག་གི་བདག་ཉིད་བསྒོམ་པར་བྱ། །རླུང་གི་ས་བོན་རིན་པོ་ཆེ། །སྤྱོད་པའི་སྟེང་དུ་ཡང་དག་ལྡན། །མེ་ལས་བྱུང་བ་མེད་ལ་གནས། །འགྲོ་བ་ཐམས་ཅད་འབེབས་པར་བྱེད། །སྡེ་ཚན་དང་པོའི་དང་པོ་གང་། །ས་ཡི་ཡི་གེ་སྟེང་དུ་གནས། །སྡེ་ཚན་ལྔ་པའི་ཐ་མ་ནི། །དྲུག་པའི་སྒྲ་ཡི་སྟེང་དུ་གནས། ། འོག་ཏུ་མེ་ཡི་ས་བོན་ལྡན། །ཉི་མའི་དཀྱིལ་འཁོར་དབུས་སུ་སྟེ། །ས་གསུམ་ཐམས་ཅད་འབར་བར་བྱེད། །མེ་ཡི་ཕྱོགས་སུ་གནས་ནས་ནི། །ཕྱག་རྒྱའི་བདག་ཉིད་ཐམས་ཅད་བསྒོམ། །རླུང་ལྷ་མེ་ལྷ་ཡང་དག་སྦྱོར། །རྒྱུ་ནི་བྱེད་པ་མཚུངས་པའོ། །རྣམ་པར་སྣང་

མཛད་ཡེ་ཤེས་ཆེ། །དེ་ཉིད་ཁོ་ན་བསྒྲུབ་པར་བྱ། །དབང་ཆེན་མེ་ནི་སྦྱོར་བ་ལས། །འཁོར་ལོས་སྒྱུར་བའི་གོ་འཕང་གནས། །ཡེ་ཤེས་རྒྱ་ཆེན་བསྒྲུབ་པར་བྱ། །ཡང་ན་ཕུན་སུམ་ཚོགས་པའི་དོན། །རིག་པ་འཛིན་དང་སངས་རྒྱས་ཉིད། །རྣལ་འབྱོར་ཡེ་ཤེས་ཕུན་སུམ་ཚོགས། །སྐྱེ་བ་འདི་ལ་འགྲུབ་འགྱུར་ཏེ། །འདི་ལ་ཐེ་ཙོམ་མི་བྱའོ། །དབྱངས་དང་ཡི་གེ་ཐམས་ཅད་ལ། །སྦྱོར་བའི་དབྱེ་བས་རྣམ་པར་དབྱེ། །ཚིག་དང་ངག་གི་ཚད་རྣམས་དང་། །ཏིང་ངེ་འཛིན་དང་སྔགས་འབྱུང་བ། །སློབ་དཔོན་མན་ངག་ལས་ཤེས་བྱ། །གཞན་དུ་བྱ་བ་མ་ཡིན་ནོ། །རྡོ་རྗེ་སྙིང་པོའི་རྒྱན་ཅེས་བྱ་བའི་རྒྱུད་ཆེན་པོ་ལས་རྡོ་རྗེ་ཀ་ཀྵའི་སྦྱོར་བ་མདོར་བསྡུས་ཏེ་བསྟན་པ་སྟེ་རྒྱས་པར་སློབ་དཔོན་གྱིས་མངོན་པར་སྤྱད་པར་བྱའོ།། །།དེ་ནས་བཅོམ་ལྡན་འདས་རྣམས་སླར་ཡང་འདུས་པར་གྱུར་པས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་གསུང་གི་དཀྱིལ་འཁོར་གསོལ་བ་བཏབ་བོ།།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་གསོལ་བ་བཏབ་པའི་ཚིག་གི་རྗེས་ཉིད་ལ། འབྲུག་གི་སྒྲ་མཐའ་ཡས་པའི་ལེགས་པར་བསྒྲགས་པ། ནམ་མཁའི་མཛོད་ཀུན་ནས་རྡོ་རྗེ་རྒྱ་ཆེ་བ་ཚངས་པ་ཆེན་པོའི་སྒྲ་ཡོངས་སུ་རྫོགས་པའི་དོན་དང་། དེ་བཞིན་གཤེགས་པ་ཐམས་ཅད་ཀྱི་གསུང་གི་འཁོར་ལོའི་དཀྱིལ་འཁོར་སོ་སོར་ཡོངས་སུ་རྟོགས་པའི་དོན་དུ་དེ་བཞིན་གཤེགས་པ་ཐམས་ཅད་ཀྱི་གསུང་གྲུབ་པ་ཞེས་བྱ་བའི་དཀྱིལ་འཁོར་ཆེན་པོ་བཀའ་སྩལ་པ། དེ་ནས་ཡང་དག་བཤད་བྱ་བ། ། གསུང་གི་འཁོར་ལོའི་དཀྱིལ་འཁོར་ཆེ། །ཟླུམ་པོ་ཀུན་ནས་བཟང་པོ་སྟེ། །ཟླ་བའི་དཀྱིལ་འཁོར་ལྟ་བུར་གནས། །དེ་ཡི་སྟེང་དུ་པད་ཆེན་པོ། །འདབ་མ་བརྒྱད་ལ་གེ་སར་ཅན། །དེ་ཡི་ལྟེ་བའི་དབུས་སུ་ནི། །ཡི་གེ་མཆོག་གི་གོ་འཕང་ཉིད། །བདག་གི་དངོས་གྲུབ་བསྒོམ་པར་བྱ། །ངག་གི་དབང་ཕྱུག་འོད་ཆེན་པོ། །སྙིང་གར་ཟླ་བ་དེར་པདྨ། །དེ་ཡི་སྟེང་དུ་དུང་བརྟག་བྱ། །དུང་གི་དབུས་སུ་ལྕེ་ཡིན་ཏེ། །རྡོ་རྗེའི་རང་བཞིན་དགེ་བའོ། །དེ་ཡི་སྟེང་དུ་རིན་ཆེན་པད། །ཡང་ན་སངས་རྒྱས་གཟུགས་བརྙན་ཡང་། །འབར་ཞིང་རྐན་གྱི་མཐར་

ཁྱབ་པ། །བདུད་རྩིའི་རྒྱུན་ནི་རབ་འབབ་པ། །བ་ཡི་ཡི་གེ་སྤྱི་ཚུགས་པ། །སངས་རྒྱས་ཀྱི་ནི་སྟེང་དུ་གནས། །བདུད་རྩིའི་ཐིགས་པ་འཛག་པ་ནི། །གོ་རིམས་བཞིན་དུ་བསམ་པར་བྱ། །ཟླ་བ་ཕྱེད་དང་ཟླ་བ་གསུམ། །ཟླ་བ་བཞིའམ་ཟླ་བ་ཉིད། །ཟླ་བ་བརྒྱད་དུ་རབ་མཆོག་བསྒོམས། །དཀྱིལ་འཁོར་བཟང་པོ་བསྒྲུབ་པར་བྱ། །སྐྱིལ་ཀྲུང་གིས་ནི་ཉེར་གནས་ཏེ། །དང་པོའི་སྦྱོར་བའི་དབང་ཕྱུག་སྐྱེས། །ཆོས་ཀྱི་དབྱིངས་ནི་མཐའ་དག་ཏུ། །ཐམས་ཅད་དུ་ནི་ཡོངས་སུ་གང་། །སངས་རྒྱས་གཟུགས་བརྙན་བསྒོམ་པར་བྱ། །ཆོས་དབྱིངས་མཉམ་དང་མི་མཉམ་པ། །སངས་རྒྱས་ཀུན་གྱི་རྗེས་སྐྱོབ་པའི། །ཇི་སྙེད་རིག་པ་ཐམས་ཅད་ནི། །ལུས་དང་ངག་དང་ཡིད་རྣམས་ཀྱི། །ཕྱག་རྒྱ་དེ་རྣམས་བདག་ཉིད་མཆོག །དེ་རྣམས་ཐམས་ཅད་བདག་ཉིད་ཀྱི། །ལུས་ཀྱི་དཀྱིལ་འཁོར་ལ་འཇུག་བསམ། །དུང་གི་སྒྲ་ནི་གསལ་བ་བསམ། །པདྨའི་ཁམས་ལ་ཡང་དག་རྟེན། །པདྨའི་གེ་སར་ཐིག་ལེ་ལས། །སྒྲ་ཡི་རང་བཞིན་རྡུལ་ཕྲན་རྣམས། །མགྲིན་པར་སོན་ནས་སྒྲ་གྱུར་ཏེ། །སྒྲ་ནི་དབྱངས་ཉིད་ལྷག་པའོ། །སླར་ཡང་ལྕེ་རུ་སོན་པ་དང་། །ཡི་གེ་མཆོག་ཏུ་དགེ་བའོ། །ལྕེ་ཡི་ཡི་གེ་ཆེར་འབར་བ། །གཅིག་ནས་གཅིག་ཏུ་རྡོ་རྗེའི་ཚུལ། །ཀུན་ནས་རབ་ཏུ་འོད་གསལ་བ། །རྡོ་རྗེའི་ངག་ནི་དམ་པའི་དོན། །སྒྲ་ཡིས་ནམ་མཁའ་ཀུན་གང་བར། །སྒྲུབ་པོས་མདོ་རུ་བསྡུས་ཏེ་བཟླ། །དེ་བཞིན་དུ་ནི་སྙིང་གར་སྒྲའམ། ། ལྕེ་ལ་འོད་ཟེར་ངེས་འཕྲོས་ནས། །མཆུའམ་སོ་ལས་རབ་བཀྲ་བའི། །གལ་ཏེ་འོད་ཟེར་མཐོང་ན་ནི། །དེ་ཚེ་གྲུབ་པར་རྣམ་པར་ཤེས། །གྲུབ་པའི་ངག་ནི་དམ་པའི་དོན། །ཡང་ན་ལྷ་ནི་གཞན་པ་ཡི། །ངག་གི་སྒྲུབ་ཐབས་ཆེན་པོ་མཆོག །རང་ལྕེ་རྡོ་རྗེའི་རང་བཞིན་བསམ། ། བདག་ཉིད་རྡོ་རྗེ་སེམས་དཔའ་ཡང་། །འབར་བའི་སྒྲོན་མ་དང་མཚུངས་པ། །རང་གི་སྙིང་གི་དབུས་ཀྱི་ཆ། །ཡི་གེ་མཆོག་ཏུ་ཕྲ་བ་ཡི། །ཨ་ཡི་ཡི་གེ་མངའ་བདག་མཆོག །རྣམ་པར་བཀྲ་བ་ཉི་མ་བཞིན། །རང་གི་སྡེ་པའི་མཐར་ཐུག་མཚུངས། །ཡི་གེ་ཡི་གེར་

ཡོངས་སུ་གཞོལ། །ཕྲ་མོ་མཉམ་པའི་མཐར་ཐུག་ནི། །འབར་ཞིང་ཐིག་ལེ་དང་མཚུངས་ཤིང་། །སྙིང་གི་དཀྱིལ་འཁོར་གསལ་བྱེད་པ། །དེ་ཡི་འབར་བ་རབ་ཕྲ་བ། །ཇི་སྲིད་རྐན་གྱི་བར་དུ་སོན། །སླར་ཡང་ཡི་གེ་ཐམས་ཅད་ནི། །ཡང་དང་ཡང་དུ་གསལ་བྱེད་ཅིང་། ། ལྕེ་ལ་རྡོ་རྗེ་འབར་བ་ནི། །རྡུལ་ཕྲན་ལྟ་བུར་བྱེད་བཞིན་པའི། །རྡོ་རྗེ་འབར་བ་སྟོང་ཕྲག་དག །ཡང་དང་ཡང་དུ་རྣམ་པར་འདོན། །འཇིག་རྟེན་ཀུན་དུ་དེ་སོང་སྟེ། །ཆོས་དབྱིངས་མཉམ་དང་མི་མཉམ་པ། །ཡི་གེའི་རང་བཞིན་རྣམ་བཀྲ་བ། །རང་གིས་འགྲོ་བ་སྣང་བྱས་ཏེ། །སླར་ཡང་འོངས་ནས་རང་གནས་སུ། །འཇུག་པ་རུ་ནི་ཡོངས་སུ་བརྟག །ཇི་སྲིད་ཕྱོགས་ཀུན་སོང་བ་ཡི། །ཡི་གེ་ཁ་རུ་རབ་ཏུ་འཇུག །ལུས་ལ་ལུས་ཅན་གྱི་གཟུགས་བརྙན། །སེམས་ཀྱི་ཕྱག་རྒྱ་ལེགས་པར་བསམ། །དེ་ནས་སྒྲ་དང་ཡི་གེ་ནི། །ལྟེ་བར་སོང་སྟེ་ཡོངས་སུ་གནས། །ལྟེ་བ་རུ་ནི་པདྨ་མཆོག །པདྨར་རྡོ་རྗེ་དྲི་མེད་མཛེས། །དེ་ཡི་སྟེང་དུ་དུང་ཆེན་པོ། །རབ་ཏུ་འཕྲོ་བ་ཉིད་དུ་གནས། །དེ་ལས་འབར་བའི་རྣམ་པའི་སྒྲ། །བྲང་གི་གནས་ནས་ཡོངས་སུ་བྱུང་། །སླར་ཡང་མགྲིན་པར་སོན་ནས་སུ། །རྡོ་རྗེ་ལྕེ་ལ་ཡང་དག་རེག །འགྲམ་པ་སྦྱར་བའི་དབུས་སུ་ནི། །སངས་རྒྱས་གཟུགས་བརྙན་དྲི་མ་མེད། །ཁ་བ་བ་ཞོ་ལྟར་དཀར་འོད། །བཅུད་ལེན་བདུད་རྩིའི་ཐིགས་པ་འདྲ། །རྡོ་རྗེ་ལྕེ་ནི་མཐའ་དག་རྣམས། །ཡང་དང་ཡང་དུ་གསལ་བར་བྱེད། །ཏིང་ངེ་འཛིན་གྱི་རྩེར་སོན་ཏེ། །སླར་ཡང་སྙིང་ག་ཉིད་དུ་སོང་། །ཐིག་ལེ་ལས་ནི་གུག་སྐྱེད་གྱུར། །གུག་སྐྱེད་རི་མོ་རིང་པོ་ཅན། །ཆ་ཤས་རྣམ་བཞི་འདུས་པ་ལས། །དེ་ནི་ཡི་གེར་རྣམ་པར་ཤེས། །ཡི་གེ་ལས་ནི་སྒྲ་སྐྱེ་ཞིང་། །སྒྲ་ལས་ནཱ་ད་དེ་ལས་དབྱངས། །དབྱངས་ལས་ངག་ཏུ་རྣམ་པར་འགྱུར། །ཡི་གེ་ལས་ནི་ཆ་ཤས་ཚོགས། །ཚིག་རྐང་དང་ནི་ངག་ཏུ་འགྱུར། །ཚིག་རྐང་ལས་ནི་ཚིགས་བཅད་དང་། །དེ་བཞིན་དུ་ནི་གཱ་ཐཱ་དང་། །ཕྲེང་འཛིན་རྒྱུན་ཆགས་དེ་བཞིན་ཏེ། །འདི་ལྟར་སྔགས་དང་རིག་སྔགས་དང་། །རང་གི་སྙིང་པོར་རབ་འཇུག་འགྱུར། །

དེ་ནས་བཟླས་པའི་རྣལ་འབྱོར་ཆེ། །བློ་གྲོས་ལྡན་པས་བརྟན་བྱས་ཏེ། །དགུག་དང་གཞུག་དང་བཅིང་བ་དང་། །དབང་དུ་བྱས་ཏེ་བསྒྲུབ་པར་བྱ། །བཟླས་པ་འདི་ཡི་སྦྱོར་བ་ཡིས། །ཐམས་ཅད་དུ་ནི་བརྟན་པར་བྱ། །ཡིད་བཞིན་གྱི་ནི་ངག་འགྲུབ་བོ། ། རྨད་བྱུང་མཆོག་ཏུ་རྙེད་དཀའ་བའི། །ཡང་ན་ལྷ་ནི་གཞན་པ་ཡི། །ངག་འགྲུབ་ཐམས་ཅད་སྐྱོབ་རྣམས་ཀྱི། །ཡི་གེ་གཅིག་པ་གསང་ཆེན་པོ། །ངག་གི་སྒྲུབ་ཐབས་མཆོག་ཏུ་དགེ། །སངས་རྒྱས་ཀུན་གྱི་བདག་ཉིད་ནི། །ལེགས་པར་མཉམ་པར་བཞག་པས་བསྒོམ། ། རང་སྙིང་ཟ་བར་རྡོ་རྗེ་ཆེ། །འབར་བའི་ཕྲེང་བ་འཁྲུགས་པའི་འོད། །དེ་ལས་བསྟན་བཅོས་ཐམས་ཅད་ནི། །ངེས་པ་གདོན་པ་ཉིད་དུ་བྱ། །ངག་གྲུབ་པ་ཡི་ཡེ་ཤེས་འདིས། །ཐམས་ཅད་མཁྱེན་པ་ཐོབ་པར་བྱེད། །བསྟན་བཅོས་ཐམས་ཅད་རབ་འདོན་ཅིང་། །དེ་ཉིད་ཀྱང་ནི་འཆད་པར་བྱེད། །སེམས་ཅན་ཀུན་གྱིས་ཐམས་ཅད་དུ། །དངོས་པོ་ཅུང་ཟད་གང་བསམས་པ། །དེ་དག་ཐམས་ཅད་རྣམ་ཤེས་ཏེ། །སྐད་ཅིག་ཙམ་ལ་སྨྲ་བར་བྱེད། །རྡོ་རྗེ་སྙིང་པོ་རྒྱན་ཅེས་བྱ་བ་ལས་ངག་གི་སྒྲུབ་པའི་ཐབས་རྫོགས་སྷོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་སླར་ཡང་འདུས་ནས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཐུགས་ཆེན་པོ་མཆོག་གི་དབང་ཕྱུག་ལ་གསོལ་བ་བཏབ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གསང་སྔགས་ཀྱི་མཛོད་ཀྱི་ཆོ་ག་རྒྱས་པའི་སྒྲུབ་པའི་ཐབས་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཆོས་ཐམས་ཅད་ཀྱི་དབང་ཕྱུག་གིས་གསོལ་བ་བཏབ་པའི་ཚིག་ཉེ་བར་གསན་ནས་དེ་དེ་བཞིན་ནོ་ཞེས་བཀའ་སྩལ་ནས། དེ་ནས་བཅོམ་ལྡན་འདས་ཀུན་ནས་འཁོར་ལོའི་དབང་ཕྱུག་གི་རྒྱལ་པོ་ཆེན་པོས་དེ་བཞིན་གཤེགས་པ་ཐམས་ཅད་ཀྱི་གསང་སྔགས་ཀྱི་མཛོད་ཀྱི་སྒྲུབ་པའི་ཐབས་ཀྱི་རིམ་པར་ཕྱེ་བའི་ཆོ་ག་རྒྱས་པ་བཀའ་སྩལ་པ། དེ་ནས་ཡང་དག་བཤད་བྱ་བ། །འཁོར་ལོས་སྒྱུར་བའི་སྒྲུབ་པའི་ཐབས། །འཁོར་ལོ་རྩིབས་བརྒྱད་པའམ་ཡང་ན། །

རྩིབས་བཅུ་དྲུག་པར་རྣམ་པར་བྲི། །ལྟེ་བར་དེ་བཞིན་གཤེགས་པ་དགོད། །འཁོར་ལོའི་ཕྲེང་བས་རྣམ་པར་བརྒྱན། །མཐའ་རུ་རིན་ཆེན་རྣམ་པ་བདུན། །མཁས་པ་ཡིས་ནི་སྤེལ་བར་བྱ། །དེ་ཡི་ལྟེ་བར་བདག་ཉིད་ནི། །འཁོར་ལོས་སྒྱུར་བ་སྟོབས་པོ་ཆེ། །སངས་རྒྱས་ཀུན་གྱི་སྐུ་ཆེན་པོ། །ཆོས་ཀྱི་དབྱིངས་དང་མཚུངས་པའི་མཆོག །དེ་ཡི་ཕྱག་རྒྱ་བགྲང་ལས་འདས། །སྐད་ཅིག་མ་ནི་ཉིད་ལ་འཐོན། །འགྲོ་བ་ཐམས་ཅད་སྣང་བྱས་ནས། །སྔགས་ཀྱི་དབང་ཕྱུག་ཉིད་ལ་གཞུག །འཁོར་ལོའི་དངོས་གྲུབ་གཟི་བརྗིད་ཆེ། །འཁོར་ལོས་སྒྱུར་བར་བདག་ཉིད་འགྱུར། །ཆུང་དང་ཆེ་དང་དབང་ཕྱུག་དང་། །རང་དབང་འདོད་དགུར་སྤྱོད་པ་དང་། །ཀུན་དུ་འགྲོ་བ་ཉིད་དང་ནི། །ཀུན་གྱི་དབང་ཕྱུག་ཕུན་ཚོགས་འབྲས། །རྒ་དང་འཆི་བ་མེད་ཐོབ་ཅིང་། །ངེས་པར་འཁོར་ལོས་སྒྱུར་དང་མཚུངས། །གསེར་གྱི་འཁོར་ལོ་རིན་པོ་ཆེ། །དེ་བཞིན་དངུལ་དང་ཤེལ་ཉིད་དང་། །མེ་ཏོག་ཅན་གྱི་ལྕགས་ཀྱང་རུང་། །རང་གི་ལག་གིས་བཟུང་ནས་སུ། །དབང་ཆེན་དཀྱིལ་འཁོར་དབུས་སུ་ནི། །སངས་རྒྱས་ཐམས་ཅད་བསྒོམ་པར་བྱ། །འཁོར་ལོས་སྒྱུར་བ་གཟི་བརྗིད་ཆེ། །མཚན་རྣམས་ཀྱིས་ནི་རྣམ་པར་བརྒྱན། །དེ་ལྟར་བདག་ཉིད་བསྒོམས་ན་ནི། །འཁོར་ལོས་སྒྱུར་བ་ཉིད་དུ་འགྱུར། །དེ་ལ་དེའི་སྔགས་ཀྱི་ཚིག་ཏུ་གྱུར་པ་ནི། ཨོཾ་སརྦྦ་ཏ་ཐཱ་ག་ཏོཥྞཱི་ཥ་ཨ་བ་ལོ་ཀི་ཏི། མུཥྚི་ཙཀྲ་ཝརྟི་ཛྭ་ལ་ཛྭ་ལ་དྷུ་ན་བི་དྷུ་ན་ཏྲཱ་ས་ཡ་མཱ་ར་ཡ། ཨུཙྪཱ་ཊ་ཡ་ཧ་ན་བྷཉྫ་པྲོཾ་ཁི་ནི་ཀུཎྜ་ལི་ནི། ཨ་པ་རཱ་ཛི་ཏཱ་སྟྲ་དྷཱ་རི་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྩ་བའི་སྔགས་སོ། །ཨོཾ་ཨོཾ་ཨ་པ་རཱ་ཛི་ཏཱ་དྷི་ཀ་སྭཱ་ཧཱ། སྙིང་པོའོ། །ན་མཿ་ས་མནྟ་བུད་དྷཱ་ནཱཾ་ཨ་པྲ་ཏི་ཧ་ཏ་ཤཱ་ས་ནཱ་ནཱཾ་ཨ་པ་རཱ་ཛི་ཏཱ་དྷི་ཀ་སྭཱ་ཧཱ། ཆོ་གའི་སྙིང་པོའོ། །འཁོར་ལོས་སྒྱུར་བ་རང་གྲུབ་སྟེ། ། སངས་རྒྱས་ཉིད་ཀུན་ཐོབ་ནས་ནི། །ཡེ་ཤེས་ཚེ་དང་སྟོབས་དང་ཤུགས། །ཡང་ན་དབང་ཕྱུག་དམ་པ་ཀུན། །དཔའ་བོ་ཐམས་ཅད་སྟེར་བྱེད་ན། །དངོས་གྲུབ་གཞན་ལྟ་སྨོས་ཅི་དགོས། །འཁོར་ལོས་སྒྱུར་བའི་སྒྲུབ་ཐབས་སོ། །ཉི་མའི་དཀྱིལ་འཁོར་བྲི་བར་བྱ། །ནམ་

མཁའ་ལ་ནི་ཡོངས་སུ་བསྒོམ། །གཟི་བརྗིད་ཕུང་པོ་ཡེ་ཤེས་ཆེ། །སངས་རྒྱས་ཐམས་ཅད་ཐོབ་པར་འགྱུར། །གཉིས་སུ་མེད་འབྱུང་སེམས་ཀྱི་མཆོག །དཀྱིལ་འཁོར་མཆོག་ཏུ་རྨད་འབྱུང་བ། །དེ་ནི་མེ་ཡིར་ཤེས་པར་བྱ། །སངས་རྒྱས་བྱང་ཆུབ་རབ་སྒྲུབ་བྱེད། །དེ་ཡང་འཁོར་ལོ་འཛིན་རྒྱལ་པོ། །འཁོར་ལོས་སྒྱུར་བ་ལེགས་འབར་བ། །དེ་ལ་དེ་བཞིན་རིན་ཆེན་བདུན། །འཁོར་ལོའི་ཕྲེང་བས་རྣམ་པར་བརྒྱན། །འཁོར་ལོའི་དཀྱིལ་འཁོར་དབུས་གནས་པར། །ཉི་མ་རེ་རེར་བཀྲ་ཤིས་བསྒོམ། །གཟི་བརྗིད་ཕུང་པོ་སྐུ་ཆེན་པོ། །སུམ་ཅུ་རྩ་གཉིས་མཚན་འཆང་བ། །འབར་བའི་ཕྲེང་འཁྲུགས་དཔའ་བོ་ནི། །སྣང་བ་ཤར་བ་ལྟ་བུར་གནས། །དེ་ཡི་ཕྱག་རྒྱ་རྟག་ཏུ་བསམ། །ནམ་མཁའི་རྣམ་པར་ལེགས་པར་གནས། །ཆོས་ཀྱི་དབྱིངས་ཀྱི་མཐས་ཀླས་པ། །འོད་ཟེར་ཕྲེང་བས་རྣམ་པར་ཁྱབ། །དེ་དང་བདག་ཉིད་རྡོ་རྗེར་བསྒོམ། །སངས་རྒྱས་བྱང་ཆུབ་རབ་སྒྲུབ་བྱེད། །ཀུན་དུ་ཀུན་ནས་ཐམས་ཅད་དུ། །དངོས་པོ་ཀུན་ལས་འབྱུང་བར་འགྱུར། །ཡེ་ཤེས་ཚེ་དང་སྟོབས་དང་ཤུགས། །ཀུན་དུ་འགྲོ་བ་ཉིད་དང་ནི། །སངས་རྒྱས་ཐམས་ཅད་ཉིད་དག་དང་། །རྡོ་རྗེ་ཅན་ཀུན་ཉིད་དང་ནི། །གཟི་བརྗིད་མཆོག་ཀུན་ཐོབ་གྱུར་ནས། །གཟི་བརྗིད་ཕུང་པོ་འདྲ་བར་འགྱུར། །དེ་ལ་སྔགས་ཀྱི་ཚིག་ཏུ་གྱུར་པ་ནི། ཨོཾ་ཏ་ཐཱ་ག་ཏོཥྞཱི་ཥ་ཨ་བ་ལོ་ཀི་ཏེ་མཱུརྟྟི་ཏེ་ཏེ་ཛོ་རཱ་ཤི་ཛྭཱ་ལ་ཛྭཱ་ལ། དྷ་ཀ་དྷ་ཀ། ད་ར་ད་ར། བི་དྷ་བི་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྩ་བའི་སྔགས་སོ། །ཨོཾ་ཏེ་ཛོ་རཱ་ཤི་སྭཱ་ཧཱ། སྙིང་པོའོ། །ༀ་ཛྭཱ་ལ་ཏེ་ཛོ་རཱ་ཤི་ཧཱུུྃ་ཕཊ་སྭཱ་ཧཱ། ཉེ་བའི་སྙིང་པོའོ། །དག་པའི་སྔགས་ཚིག་འདི་རྣམས་ཀྱིས། །ཉི་མའི་ཡེ་ཤེས་རབ་ཏུ་གསལ། །ཀུན་དུ་འགྲོ་བ་བསྒྲུབ་པར་བྱ། །རིག་པ་འཛིན་པ་ཉིད་ཐོབ་འགྱུར། །གཟི་བརྗིད་ཕུང་པོའི་གསང་སྔགས་ཀྱི་སྒྲུབ་པའི་ཐབས་སོ།། །།ཀུན་ནས་སྣང་བ་ཞེས་བྱ་མཆོག །ཡི་གེ་གསུམ་པ་སྟོབས་པོ་ཆེ། །གསེར་གྱི་ཁ་དོག་ལེགས་འབར་ཞིང་། །གཙུག་ཏོར་སྟེང་སོན་འོད་གསལ་བ། །སྔགས་པ་རང་བདག་གིས་བསྒོམ་བྱ། །ཀུན་ནས་སྣང་བ་

ལྟ་བུར་འགྱུར། །ༀ་ཨཱཿཧཱུྃ། གསང་སྔགས་རྩེ་མོ་དམ་པ་འདི། །བསྒོམས་པ་ཙམ་གྱིས་ཐམས་ཅད་དུ། །བརྟན་པ་དང་ནི་གཡོ་བ་ཡི། །འགྲོ་ཀུན་ཀུན་ནས་སྣང་བར་འགྱུར། །ཀུན་ནས་སྣང་བའི་གཙུག་ཏོར་གྱི་སྒྲུབ་པའི་ཐབས་སོ།། །།ཆོས་ཀྱི་འཁོར་ལོ་ཕྱག་རྒྱ་ཆེ། །ལེགས་པར་མཉམ་པར་བཞག་པས་བསྒོམ། །སངས་རྒྱས་ཀུན་ཉིད་ཀུན་གྱི་མཆོག །ཆོས་ཀྱི་འཁོར་ལོ་རབ་སྐོར་བྱེད། །འཁོར་ལོ་འདི་ནི་རྩིབས་བཅུ་གཉིས། །རྩིབས་བཅུ་གཉིས་པ་ཡོངས་སུ་གནས། །རྣམ་གསུམ་གསུམ་ནི་ཡོངས་བསྐོར་བ། ། བྱ་བའི་དོན་དུ་དག་པ་སྟེར། །སངས་རྒྱས་རང་བཞིན་སྐུ་ཆེན་པོ། །ནམ་མཁའི་ཁྲུགས་ན་གནས་པ་སྟེ། །ཆོས་ཀྱི་དབྱིངས་ནི་ཁྱབ་པ་ནི། །ལེགས་པར་མཉམ་པར་བཞག་པས་བསྒོམ། །འགྲོ་བ་བརྟན་དང་གཡོ་བ་ནི། །འདི་ཀུན་རྟེན་ཅིང་འབྲེལ་འབྱུང་བ། །འདི་ནི་ཆོས་ཀྱི་ཕྱག་རྒྱ་ཆེ། །སངས་རྒྱས་བྱང་ཆུབ་རབ་སྒྲུབ་བྱེད། །དེ་ཡི་སྔགས་སུ་གྱུར་པ་ནི། །ཨོཾ་དྷུ་ན་པཱ་ཏ་ཡ་ཙྪིནྡ་ཙཀྲེ་ཎ་བཛྲི་ཎི་ཧཱུྃ། གསང་སྔགས་འདི་ནི་དཔལ་ལྡན་མཆོག །ཆོས་ཀྱི་འཁོར་ལོ་གཉིས་མེད་འཆར། །སྐད་ཅིག་ཙམ་གྱིས་ཐམས་ཅད་དུ། །དམ་པའི་ཆོས་ནི་རབ་སྐོར་བྱེད། །ཆོས་ཀྱི་འཁོར་ལོ་སྒྲུབ་པའི་ཐབས་སོ།། །།པདྨ་རཱ་གའི་རྣམ་པ་འདྲ། །སངས་རྒྱས་སྐུ་གཟུགས་ལེགས་འབར་བ། །རྣལ་འབྱོར་སྦྱོར་བའི་མཆོག་བསྒྲུབས་ན། །ཉོན་མོངས་རྡོ་རྗེ་འདྲ་བར་འགྱུར། །སྙིང་གནས་རྡོ་རྗེ་གཟུགས་བརྙན་འདྲ། །འབར་བའི་ཕྲེང་བ་འཁྲུགས་པའི་འོད། །དེ་ཡི་སྙིང་ལ་རྡོ་རྗེ་མེ། །དྲི་མ་མེད་པ་སྐྱེ་བར་འགྱུར། །ཉོན་མོངས་རྟག་ཏུ་ཡོངས་ཟད་ཅིང་། །དགྲ་རྣམས་ཀུན་ལས་རྒྱལ་བར་བྱེད། །བདེན་པ་བཞི་ནི་རྟོགས་པས་ན། །བདེན་པའི་ཡེ་ཤེས་ཐོབ་པར་འགྱུར། ། སྔགས་ནི། ཨོཾ་ཀླེ་ཤ་ཨ་ཤ་ནི་ཧཱུྃ་ཕཊ། འདི་ནི་ཉོན་མོངས་རྡོ་རྗེའི་སྔགས། །དྲག་ཅིང་དྲག་པོའི་གཞན་གནོན་པའོ། །སངས་རྒྱས་ཉིད་ཀྱང་སྟེར་བྱེད་ན། །དངོས་གྲུབ་གཞན་ལྟ་སྨོས་ཅི་དགོས། །ཉོན་མོངས་རྡོ་རྗེ་སྒྲུབ་པའི་ཐབས་སོ།། །།དབང་ཆེན་དཀྱིལ་

འཁོར་ལ་གནས་པའི། །སངས་རྒྱས་རང་བཞིན་སྟོབས་པོ་ཆེ། །བདུད་བཞི་ལས་ནི་རྣམ་རྒྱལ་བ། །ལེགས་པར་མཉམ་པར་བཞག་པས་བསྒོམ། །བདེན་པ་བཞི་ཡི་ཁུ་ཚུར་ཆེ། །ལུས་དང་ངག་དང་དེ་བཞིན་ཡིད། །ཁུ་ཚུར་སངས་རྒྱས་ཐམས་ཅད་ཀྱི། །གཉིས་མེད་སྐྱེ་བའི་མཚན་ཉིད་དེ། །རྡོ་རྗེའི་དབུས་སུ་བསྒོམ་པར་བྱ། །རང་ཉིད་སངས་རྒྱས་ཡིན་ནོ་ཞེས། །བརྟན་དང་གཡོ་བའི་འགྲོ་བ་ནི། །འདི་དག་ཐམས་ཅད་མ་སྐྱེས་པར། །རྡོ་རྗེ་ཁུ་ཚུར་བསྒོམས་ན་ནི། །རྡོ་རྗེ་ཁུ་ཚུར་འདྲ་བར་འགྱུར། །དེ་ལ་སྔགས་སུ་གྱུར་པ་ནི། །ཨོཾ་བི་ཛ་ཡེ་ཧཿ། དེ་བཞིན་གཤེགས་པའི་ཁུ་ཚུར་ཆེ། །ཤེས་རབ་ཕ་རོལ་ཕྱིན་གསལ་བ། །སྔགས་པས་རྟག་ཏུ་བསྒོམས་ན་ནི། །ཤེས་རབ་ཕ་རོལ་ཕྱིན་པ་འཐོབ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱི་སྒྲུབ་པའི་ཐབས་སོ།། །།དངོས་པོ་ཐམས་ཅད་གྱེན་འཕགས་པ། །གདོད་ནས་ཞི་ཞིང་མཚན་ཉིད་མེད། །སངས་རྒྱས་རང་བཞིན་སྐུ་ཆེན་པོ། །དཀྱིལ་འཁོར་ཆེན་པོའི་དབུས་སུའོ། །རྡོ་རྗེ་རྡོ་རྗེའི་བདག་ཉིད་བསྒོམ། །འབར་བ་ལྟ་བུའི་གཟི་བརྗིད་ཀྱིས། །འདི་ཡིས་འཇིག་རྟེན་ཐམས་ཅད་ཀྱི། །འཁོར་ལོས་སྒྱུར་བ་ཉིད་དུ་ནི། །འཇིག་རྟེན་ཀུན་གྱི་ཐམས་ཅད་དུ། །ཀུན་ནས་ཕུན་སུམ་ཚོགས་པ་ཀུན། །བཀུག་ནས་གུས་པས་སྦྱིན་པར་བྱ། །སྔགས་ནི།ཨོཾ་ཛྭ་ལ་ཛྭ་ལ་དཱི་པྱ་དཱི་པྱ་ཨུངྒ་ཏོཥྞཱི་ཥ་དྷུ་ན་དྷུ་ན་ཧཱུྃ། སྟེང་འགྲོའི་གཙུག་ཏོར་ཞེས་བྱ་བར། །སངས་རྒྱས་དཔའ་བོ་ཀུན་གྱིས་གསུངས། །འདི་ནི་བསྒྲུབས་པ་ཙམ་གྱིས་ནི། །སངས་རྒྱས་ཉིད་ཀྱང་རྙེད་དཀའ་མིན། །དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་སྒྲུབ་པའི་ཐབས་སོ།། །།སངས་རྒྱས་རང་བཞིན་ཕྱག་རྒྱ་ཆེ། །ལེགས་པར་མཉམ་པར་བཞག་པས་བསྒོམ། །ཚད་སྐྱོབ་གདུགས་དཀར་ཆེན་པོ་ནི། །ཆོས་དབྱིངས་མཉམ་དང་མི་མཉམ་པ། །ཟླ་བའི་དཀྱིལ་འཁོར་དབུས་གནས་པར། །ཟླ་བའི་ཁ་དོག་ཆེར་འབར་ཞིང་། །ཆུ་ཡི་དཀྱིལ་འཁོར་རྣམ་དག་པ། །དྲི་མེད་པུཎྜ་རཱི་ཀར་གནས། །རི་མོ་བདུན་གྱིས་ཡོངས་སུ་གང་། །བཅུད་

ཀྱིས་ལེན་གྱི་མཆོག་ལྟ་བུར། །སངས་རྒྱས་ཀུན་བདག་བསྒོམ་པར་བྱ། །དངོས་གྲུབ་འདི་ཡི་སྦྱོར་བ་ཡིས། །སེམས་ཅན་རྣམས་ལ་ཐམས་ཅད་དུ། །རེ་བ་ཐམས་ཅད་ཡོངས་རྫོགས་པ། །འདི་ནི་གཙུག་ཏོར་གདུགས་དཀར་ཆེ། །སྔགས་ནི། ཨོཾ་མ་མ་མ་མ་ཧཱུྃ་ནི། འདི་ནི་བསྒྲུབས་པ་ཙམ་གྱིས་ནི། །ཡེ་ཤེས་ཆེ་དང་སྟོབས་མགྱོགས་འགྲོ། །དཔའ་བོ་ཐམས་ཅད་ཐོབ་འགྱུར་ཞིང་། །སངས་རྒྱས་ཉིད་ཀྱང་རྙེད་དཀའ་མིན། །གདུགས་དཀར་པོའི་སྒྲུབ་པའི་ཐབས་སོ།། །།ཟླ་བའི་དཀྱིལ་འཁོར་དབུས་སུ་ནི། །འབར་བའི་ཕྲེང་འཁྲུགས་རལ་གྲི་ནི། །སྔགས་པས་སྙིང་གར་བསྒོམ་པར་བྱ། །རང་གི་བདག་ཉིད་སངས་རྒྱས་ཞེས། །སངས་རྒྱས་རང་བཞིན་སྤྲིན་ཆེན་པོས། །ནམ་མཁའི་མཐོངས་རྣམས་ཡོངས་གང་བ། །བདག་ཉིད་གཉིས་མེད་ངོ་བོ་ཡིས། །རྣལ་འབྱོར་གཅིག་ཏུ་བསྒོམ་པར་བྱ། །སྔགས་ཀྱི་ཡི་གེ་འཁོར་ལོ་ཆེ། །འབར་བའི་ཕྲེང་བ་འཁྲུགས་པའི་འོད། །སྔགས་པས་སྙིང་གར་བསྒོམ་པར་བྱ། །རྒྱལ་བ་དམ་པ་ཉིད་དུ་འགྱུར། །སྔགས་ནི། ཨོཾ་ཛྭ་ལ་ཛྭ་ལོ་ཥྞཱི་ཥ་ཛྭ་ལ་ཛྭ་ལ་བནྡྷ་བནྡྷ་ད་མ་ད་མ་དྲུ་མ་དྲུ་མ་ད་ཧ་ད་ཧ་ན་ཧཱུྃ། རྒྱལ་བའི་གཙུག་ཏོར་རལ་གྲི་ཆེ། ། ཤེས་རབ་ཡེ་ཤེས་དྲི་མ་མེད། །སྔགས་པས་ཀུན་ནས་བསྒོམས་ནས་ནི། །རྒྱལ་བའི་གཙུག་ཏོར་འདྲ་བར་འགྱུར། །རྒྱལ་བའི་གཙུག་ཏོར་གྱི་སྒྲུབ་པའི་ཐབས་སོ།། །།སངས་རྒྱས་ཀུན་གྱི་རང་བཞིན་སྐུ། །འབར་བའི་ཕྲེང་བས་འཁྲུགས་པའི་འོད། །སེང་གེའི་ཁྲི་ཡི་སྟེང་དུ་བསམ། །ཡང་ན་རྡོ་རྗེའི་གདན་ལ་གནས། །ཀུན་དུ་གཙུག་ཏོར་ཆེ་འབར་བ། །སྙིང་གར་ཡོངས་སུ་བསྒོམ་པར་བྱ། །སངས་རྒྱས་ཀུན་གྱི་བདག་ཉིད་ནི། །ཡི་གེ་དམ་པ་ཡི་ནི་གནས། །ཐོག་མ་ཐ་མ་མེད་ཞི་བ། །ཆོས་ཀྱི་སྐུ་ནི་མཆོག་ཏུ་ཆེ། །འདི་ནི་བསྒྲུབས་པ་ཙམ་གྱིས་ནི། །ཀུན་དུ་གཙུག་ཏོར་སྟོབས་པོ་ཆེ། །སྐད་ཅིག་དེ་ལ་འགྲུབ་འགྱུར་ཏེ། །རྡོ་རྗེ་སངས་རྒྱས་ཀུན་གྱི་བཀའ་བཞིན་ནོ། །སྔགས་ནི། ཨོཾ་བཛྲ་བན་དྷ་ཧཱུྃ།་གསང་སྔགས་འདི་ནི་དམ་པ་གཙོ། །སངས་རྒྱས་ཐམས་ཅད་དབང་བསྐུར་བྱེད། །རྟག་

ཏུ་རྣལ་འབྱོར་པས་བསྒོམས་ན། །དེ་ནི་ཀུན་གྱིས་དབང་བསྐུར་རོ། །ཀུན་གྱི་གཙུག་ཏོར་གྱི་སྒྲུབ་པའི་ཐབས་སོ།། །།རྡོ་རྗེ་སྙིང་པོ་རྒྱན་ཅེས་བྱ་བའི་རྒྱུད་ཆེན་པོ་ལས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་སྒྲུབ་ཐབས་ཀྱི་ཆོ་ག་རྒྱས་པའི་རིམ་པར་ཕྱེ་བ་ཡོངས་སུ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་སླར་ཡང་འདུས་པར་གྱུར་ཏེ། བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ལ་གསོལ་བ་བཏབ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཐམས་ཅད་ཀྱི་གསང་སྔགས་ཀྱི་སྒྲུབ་པའི་ཆོ་ག་རྒྱས་པ་བཀའ་སྩལ་དུ་གསོལ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་དག་གིས་གསོལ་བ་བཏབ་པའི་ཚིག་གསན་ནས་དེ་མ་ཐག་པ་ཁོ་ནར་དེ་བཞིན་གཤེགས་པ་ཐམས་ཅད་དུ་བདག་ཉིད་བྱིན་གྱིས་བརླབས་ནས་བྱང་ཆུབ་སེམས་དཔའ་ཐམས་ཅད་ཀྱི་གསང་སྔགས་ཀྱི་རིམ་པར་ཕྱེ་བ་བཀའ་སྩལ་པ། ཤེས་རབ་ཡེ་ཤེས་རྡོ་རྗེ་ཆེ། །སྙིང་གར་ཡོངས་སུ་བསྒོམས་ནས་སུ། །རལ་གྲི་སྔོན་པོ་ཕྱག་ན་བསྣམས། །དབང་ཆེན་དང་ནི་མེ་ལས་འཁྲུངས། །ཡེ་ཤེས་ཆེན་པོ་གཟི་བརྗིད་ཆེ། །འཁྲུལ་བ་མེད་ཅིང་ཡི་གེ་བྲལ། །སངས་རྒྱས་ཀུན་བདག་ཤེས་རབ་མཆོག །ཉོན་མོངས་ཐམས་ཅད་ཟད་པར་བྱེད། །རྡོ་རྗེ་ཀུན་བདག་བཀོད་པ་པོ། །ཀུན་དུ་འགྲོ་བའི་དམ་པའི་དོན། །དབྱེར་མེད་མཆོག་ཏུ་གསང་བ་པོ། །རིག་པ་མཆོག་གི་བདག་ཉིད་འདི། །ཞལ་དྲུག་པ་ལ་ཕྱག་དྲུག་མཆོག །མངོན་ཤེས་དྲུག་ལྡན་ཡི་གེ་དྲུག །རྗེས་དྲན་དྲུག་གི་སྦྱོར་བ་ཡིས། །ཕྱག་དྲུག་དམ་པ་སྟོབས་པོ་ཆེ། །གཟི་བརྗིད་ཡང་ན་སྟོབས་ཀྱིས་ཀྱང་། །ཀུན་ནས་ཡོངས་སུ་གསལ་བ་པོ། །གཟུགས་ཆེ་ལུས་ཀྱང་ཆེ་བ་སྟེ། །ནམ་མཁའི་ཁམས་ན་རྣམ་པར་གནས། ། ཡང་ན་ཕྱག་གཉིས་ཤེས་པར་བྱ། །ཏིང་ངེ་འཛིན་གནས་སྡིག་པ་བཅོམ། །དཔའ་བོ་པདྨ་ལ་གནས་པ། །ཟླ་བའི་མདོག་ཅན་འོད་པོ་ཆེ། །རྣལ་འབྱོར་པ་ཡི་ཡེ་ཤེས་ཕྲ། །ཤེས་རབ་ཕ་རོལ་ཕྱིན་པ་འབར། །གདོད་ནས་མ་སྐྱེས་པ་ཞེས་བསམ། །སངས་རྒྱས་ཡེ་ཤེས་རབ་

སྩོལ་བྱེད། །སངས་རྒྱས་རྣམས་ཀྱི་ཡེ་ཤེས་མཆོག །འཇམ་པའི་དབྱངས་ཞེས་རབ་ཏུ་གྲགས། །དེའི་སྔགས་ནི། ༀ་བཱ་ཀྱེ་དྃ་ན་མ༔ གསང་སྔགས་འདི་ནི་མཆོག་ཏུ་གསང། །གསང་ཆེན་གྱི་ནི་དམ་པར་བཞེད། །རྣམ་ཐར་གསུམ་གྱི་སྒོ་ལ་གནས། །ཕ་རོལ་ཕྱིན་དྲུག་རབ་ཏུ་གསལ། །རང་ཉིད་ཤེས་རབ་ཡིན་ནོ་ཞེས། །སྔགས་པས་རྟག་ཏུ་བསྒོམ་པར་བྱ། །དབང་པོ་དྲུག་ནི་རབ་བསྒྱུར་ཏེ། །སངས་རྒྱས་ཉིད་ནི་རྣལ་འབྱོར་ལས། །པདྨ་རཱ་ག་ལྟ་བུའི་མདོག །སྟོན་ཟླ་ལྟ་བུར་ཆེར་གསལ་བ། །སེམས་དཔའ་ཆེན་པོ་གསེར་གྱི་མདོག །སྟོབས་པོ་ཆེ་ནི་བསྒོམ་པར་བྱ། །འདི་ནི་བསྒྲུབས་པ་ཙམ་གྱིས་ནི། །ཤེས་རབ་དྲི་མ་མེད་པར་འགྱུར། །བསྟན་བཅོས་ཐམས་ཅད་རབ་སྨྲ་ཞིང་། །དབང་ཕྱུག་ཐམས་ཅད་མདུན་ན་གནས། །ཀུན་གྱི་རྒྱལ་པོ་སྔགས་པ་ཉིད། །རང་ཉིད་ཀུན་གྱི་རྒྱལ་པོ་མཚུངས། །རིག་པ་འཛིན་པ་ཐམས་ཅད་དང་། །བྱང་ཆུབ་ཀུན་གྱི་ཕ་རོལ་སོན། །དབང་ཕྱུག་ཀུན་དང་བདེ་བ་ཆེ། །ཆོས་རྣམས་ཀུན་གྱི་ཡོན་ཏན་མཆོག །རྡོ་རྗེ་འཛིན་པ་ཐམས་ཅད་དང་། །ཡང་ན་སངས་རྒྱས་ཐམས་ཅད་ཀྱི། །ཀུན་དུ་འགྲོ་བ་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དངུལ་ཆུ་བཅུད་ལེན་དེ་ཉིད་དང་། །རྐང་པས་སྤྱོད་པ་དྲི་མེད་མཆོག །རིལ་བུ་དང་ནི་མི་སྣང་བ། །ཐམས་ཅད་དུ་ནི་སྟེར་བར་འགྱུར། །དཔལ་ལྡན་འཇམ་པའི་མཆོག་འདི་ནི། །ཆོས་ཀྱི་གསུང་གི་མཆོག་ལས་འཁྲུངས། །སངས་རྒྱས་རྣམས་ཀྱི་ཚངས་པའི་དབྱངས། །འཇམ་པའི་དབྱངས་ཞེས་རབ་ཏུ་གྲགས། །འདི་ནི་བསྒྲུབས་པ་ཙམ་གྱིས་ནི། །བསམས་པའི་ཕུན་སུམ་ཚོགས་ཀུན་གྱི། །སངས་རྒྱས་ཀུན་དུ་བརྟན་འགྲོ་ན། །གཞན་པའི་ལྷ་ལྟ་སྨོས་ཅི་དགོས། །འཇམ་པའི་དབྱངས་ཀྱི་སྒྲུབ་པའི་ཐབས་སོ།། །།སྙིང་གར་པདྨ་ཆེན་པོ་ལ། །ཟླ་བའི་དཀྱིལ་འཁོར་ཡོངས་སུ་གནས། །འཇིག་རྟེན་དབང་ཕྱུག་དཔའ་བོ་ཆེ། །ཐུགས་རྗེ་ཆེན་པོའི་ཐུགས་ལྡན་པ། །ཕྱག་བཞི་པ་ལ་ཞལ་བཞི་པ། །དུང་དང་ཀུནྡ་ཟླ་ལྟར་དག །ཆོས་ཀྱི་དབྱིངས་ལས་ཡང་དག་བྱུང་། །ཆུ་ཡི་

དཀྱིལ་འཁོར་ཆེན་པོ་ལ། །བདག་ཉིད་འཇིག་རྟེན་དབང་ཕྱུག་ཆེས། །དེ་ལ་གནས་པ་དགེ་བ་བསྒོམ། །རང་བཞིན་གྱིས་ནི་འདི་ཀུན་དག །གདོད་ནས་མ་སྐྱེས་མ་བྱུང་བ། །གསང་སྔགས་ཆེན་པོ་འདི་ཡི་ནི། །སྙིང་གར་ཡོངས་སུ་བསྒོམ་པར་བྱ། །འཇིག་རྟེན་དབང་ཕྱུག་འཁོར་ལོ་ཆེ། །ཀུན་དུ་རྣམ་པར་འཕྲོས་པ་ཡི། །འབར་བའི་ཕྲེང་བས་འཁྲིགས་ཤིང་ཞི། །རལ་པའི་ཐོར་ཚུགས་འཛིན་པ་པོ། །རལ་པའི་དབུས་སུ་དཔའ་བོ་ཆེ། །འོད་དཔག་མེད་པ་ལྡན་པའི་བདག །སྟོན་ཀའི་ཟླ་བ་ལྟ་བུར་གསལ། །ཀུན་དུ་ནམ་མཁའ་ཡོངས་གང་བ། །གསང་སྔགས་སྦྱོར་བདག་བསྒོམ་པར་བྱ། །རང་ཉིད་འཇིག་རྟེན་གསུམ་རྣམ་རྒྱལ། །ཆོས་ཀྱི་དབྱིངས་ཀྱི་མཐས་ཀླས་པ། །པདྨའི་ལུས་ཀྱིས་ཡང་དག་གང་། །ཀུན་དུ་པདྨ་རྣམས་ལ་ནི། །ཟླ་བའི་དཀྱིལ་འཁོར་ཡང་དག་གནས། །ཁམས་གསུམ་རྣམ་པར་རྒྱལ་བའི་སྐུ། །ཁྱད་པར་དུ་བདག་དགང་བར་བྱ། །འགྲོ་བ་བརྟན་དང་གཡོ་བ་ཀུན། །སྣང་དང་མི་སྣང་དངོས་པོ་ནི། །ཡང་དང་ཡང་དུ་བལྟ་བར་བྱ། །གདུལ་བྱ་མ་ལུས་སེམས་ལ་ནི། །སྟོབས་པོ་ཆེས་ནི་དགང་བར་བྱ། །ཁ་དོག་དབྱིབས་ནི་འདི་བཞིན་དུ། །སྣ་ཚོགས་གཟུགས་ལ་ཆེར་འབར་བ། །ཀུན་ནས་ཡོངས་སུ་བསྡུས་ནས་ནི། །སྔགས་པའི་མདུན་དུ་གཞག་པར་བྱ། །དེ་ནས་སྔགས་པས་དེ་མ་ཐག །སླར་ཡང་རྩེ་གཅིག་སེམས་ཀྱིས་ནི། །དགུག་དང་གཞུག་དང་བཅིང་བ་དང་། །དབང་དུ་བྱ་བ་བསྒྲུབ་པར་བྱ། །འཇིག་རྟེན་དབང་ཕྱུག་ཐུབ་ཆེན་པོ། །བཅོམ་ལྡན་རྣལ་འབྱོར་ཅན་གྲུབ་ན། །དཔའ་བོ་ཐམས་ཅད་སྩོལ་འགྱུར་ཞིང་། །རང་གི་དངོས་གྲུབ་མཆོག་རྣམས་དང་། །རྣལ་འབྱོར་ཐམས་ཅད་འཛིན་ཉིད་དང་། །རྣམ་པར་རྒྱས་པའི་ནོར་སྟེར་འགྱུར། །རིག་པ་འཛིན་དང་འཁོར་ལོ་ཅན། །ས་དང་ཕ་རོལ་ཕྱིན་སོགས་དང་། །སངས་རྒྱས་རྣམས་ཀྱང་སྩོལ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །དེའི་སྔགས་ནི། ༀ་ཨཱ་རོ་ལི་ཀ །གསང་སྔགས་དཔལ་ལྡན་མཆོག་འདི་ནི། །རང་ཉིད་ཁམས་གསུམ་རྣམ་པར་རྒྱལ། །ལོངས་སྤྱོད་ཐམས་ཅད་བཀུག་

ནས་ནི། །སྐད་ཅིག་ཙམ་གྱིས་རྣམ་པར་སྟེར། །པདྨའི་སྒྲུབ་པའི་སྦྱོར་བ་ཡིས། །བདག་ཉིད་འཇིག་རྟེན་དབང་ཕྱུག་བསྒྲུབ། །འཇིག་རྟེན་གསུམ་གྱི་རྒྱལ་སྲིད་ནི། །སྲིད་པར་བཀུག་ནས་རྣམ་པར་སྟེར། །འཇིག་རྟེན་དབང་ཕྱུག་གི་སྒྲུབ་པའི་ཐབས་སོ།། །། ཐམས་ཅད་རྡོ་རྗེའི་རང་བཞིན་གཟུགས། །མེ་ཡི་དཀྱིལ་འཁོར་དགེ་བ་སྟེ། །དེ་ཡི་དབུས་སུ་བྱ་བ་ནི། །དཀྱིལ་འཁོར་རླུང་དང་རབ་མཚུངས་པ། །དེ་ཡི་དབུས་སུ་དེ་འདྲ་བསམ། །ཉི་མ་ཡི་ནི་དཀྱིལ་འཁོར་རོ། །དེ་ཡི་དབུས་སུ་གཟི་བརྗིད་ཆེ། །འབར་བ་ལྟ་བུའི་གཟི་བརྗིད་ཅན། །རྡོ་རྗེའི་ལག་པ་གཟི་བརྗིད་ཆེ། །རྒྱན་རྣམས་ཀུན་གྱིས་རྣམ་པར་བརྒྱན། །ཚངས་པའི་ཡུལ་ས་ཐམས་ཅད་དུ། །ཀུན་ནས་ཡོངས་སུ་གསལ་བར་བྱེད། །ཧཱུྃ་གི་ཡི་གེ་སྒྲ་ཟབ་མོ། །དབྱར་གྱི་སྤྲིན་དང་མཚུངས་པའི་འོད། །རྒྱལ་པོ་འཁྱིལ་པ་དང་མཚུངས་པ། །ཟར་མ་ཡི་ནི་མེ་ཏོག་འདྲ། །འབར་བ་དམར་པོས་འཁྲིགས་ཤིང་འཇིགས། །བསྐལ་པའི་མེ་དང་འདྲ་བར་གནས། །ཞལ་བཞི་པ་ལ་མཆེ་བ་བཞི། །འཇིག་པའི་དུས་ཀྱི་ཐལ་བ་འདྲ། །སྤྲིན་གྱི་སྒྲ་དང་མཚུངས་པ་ཡི། །ཧཱུྃ་གི་ཡི་གེ་བཞི་དང་ལྡན། །རྡོ་རྗེ་ཧཱུྃ་མཛད་ཅེས་བྱ་བ། །རྣལ་འབྱོར་པས་ནི་རྟག་ཏུ་བསྒོམ། །སྔགས་ཀྱི་ཚིག་ནི། ༀ་སུམ་བྷ་ནི་སུམ་བྷ་ཧཱུྃ། གྲཱིཧྞ་གྲཱིཧྞ་ཧཱུྃ། གྲྀཧྞ་པ་ཡ་གྲྀཧྞ་པ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱན། བིདྱཱ་རཱ་ཛཱ་ཧཱུྃ་ཕཊ། རྡོ་རྗེ་འཛིན་པའི་རྒྱལ་པོ་འདི། །ཀུན་མཆོག་སྲིད་པའི་དབང་ཕྱུག་གིས། །འཇིག་རྟེན་གསུམ་ཡང་འགུགས་བྱེད་ན། །བུད་མེད་གཞན་དག་སྨོས་ཅི་དགོས། །ཚངས་པ་ཁྱབ་འཇུག་དབང་ཆེན་སོགས། །ཆུང་མ་དང་བཅས་ཕྱག་རྒྱར་བཅས། །དེ་དག་ཐམས་ཅད་འགུགས་བྱེད་ན། །སྡུག་བསྔལ་ཅན་གཞན་སྨོས་ཅི་དགོས། །ཉི་མའི་དཀྱིལ་འཁོར་དབུས་གནས་པར། །རྡོ་རྗེའི་གཟུགས་བརྙན་སྙིང་གར་སོན། །དབང་པོ་གཉིས་ནི་མཉམ་སྦྱོར་བས། །རྡོ་རྗེ་ཅན་གྱིས་སྔོན་དུ་བསྒྲུབ། །བསམ་པ་ཐམས་ཅད་རྫོགས་བྱེད་པ། །བཅོམ་ལྡན་རྡོ་རྗེ་ཅན་འགྲུབ་འགྱུར། །རྒྱལ་པོ་ཐམས་ཅད་སྦྱིན་གྱུར་ན། །དངོས་གྲུབ་

གཞན་དག་སྨོས་ཅི་དགོས། །སྔགས་ནི་འདིར།ཨོཾ་ཊཀྐི་ཧཱུཾ་ཛཿ། གསང་སྔགས་འདི་ཡི་སྦྱོར་བ་ཡིས། །དམ་པའི་དོན་དུ་བསྒྲུབ་པར་བྱ། །ལོངས་སྤྱོད་ཇི་སྙེད་ཐམས་ཅད་རྣམས། །དེ་སྙེད་ཐམས་ཅད་རྣམ་པར་སྟེར། །རྡོ་རྗེ་འཛིན་པའི་བསྒྲུབ་པའོ།། །། དབང་ཆེན་དཀྱིལ་འཁོར་ལ་གནས་པའི། །བྱམས་པ་ཆེན་པོའི་བདག་ཉིད་སྐུ། །སྙིང་གར་ཟླ་བའི་གཟུགས་བརྙན་འོད། །རྡོ་རྗེ་འབར་བའི་ཕྲེང་བ་ལྡན། །འཇིག་རྟེན་ཁམས་ནི་འབྱམ་ཀླས་པ། །རང་བཞིན་གཅིག་ཏུ་བྱས་ནས་ནི། །རྡོ་རྗེ་ཡིས་ནི་སྤྲོ་བ་དང་། །དབང་བསྐུར་བ་ཡི་རང་བཞིན་དགེ། །གསེར་གྱི་ཁ་དོག་ལེགས་འབར་བ། །རལ་པའི་ཐོར་ཚུགས་འཛིན་པ་པོ། །རལ་པའི་དབུས་སུ་མཆོད་རྟེན་ཆེ། །དུང་དང་ཀུནྡ་ཟླ་འོད་བཟང། །བསྒོམས་ནས་སེམས་ཅན་ཐམས་ཅད་ལ། །བརྟན་པའི་དོན་དུ་དབང་བསྐུར་བྱ། །ཡང་ན་སེམས་ཅན་ཐམས་ཅད་ལ། །བུ་གཅིག་ལྟ་བུར་རྣམ་པར་སྤྲོ། །བསྒོམ་པའི་སྦྱོར་བས་བསྒོམས་ན་ནི། །གཉིས་མེད་མ་རྒྱལ་བ་ལས་རྒྱལ། །སྤྲོ་བ་དང་ནི་བསྡུ་བ་དང་། །ཐིམ་སོགས་ཕྱོགས་དབྱེས་རྣམ་པར་དབྱེ། །བྱམས་པས་ཀུན་ཏུ་རྣམ་པར་སྤྲོ། །ཆོས་དབྱིངས་མཉམ་དང་མི་མཉམ་པ། །ཐམས་ཅད་བདག་དང་བདག་གི་བར། །འདས་ཤིང་ཤིན་ཏུ་དྲི་མ་མེད། །རི་རབ་ལྟ་བུར་བརྟན་པའི་སེམས། །འཁྲུལ་པ་མེད་ཅིང་ཡི་གེ་བྲལ། །དེ་ལྟར་སེམས་ནི་བརྟན་བྱས་ནས། །མཉམ་མེད་སེམས་ཅན་ཀུན་དང་མཉམ། །བདག་ཉིད་བྱམས་པ་ཡིན་ནོ་ཞེས། །དགའ་ལྡན་གནས་པའི་ཚུལ་འཛིན་པ། །ཅུང་ཟད་ལི་ཞིང་འཁྱིལ་པའི་སྐྲ། །པདྨ་རཱ་ག་མཚུངས་པའི་འོད། །རིན་ཆེན་སེམས་ནི་རྣམ་དག་པས། །རང་བདག་ཉིད་ནི་བསྒོམ་པར་བྱ། །འདི་ནི་གསང་སྔགས་རང་བཞིན་གྱིས་གྲུབ་པ་ནི། ཨོཾ་ཨ་ཛི་ཏཉྫ་ཡ་སརྦྦ་སཏྭ་ས་མ་ཡཱ་ནུ་ག་ཏ་སྭཱ་ཧཱ། གསང་སྔགས་བདག་ཉིད་རྒྱལ་པོ་འདི། །བྱམས་པ་ཞེས་ནི་གྲགས་པ་སྟེ། །ཆོས་ཀྱི་དབྱིངས་དང་མཚུངས་པར་ཁྱབ། །བྱམས་པའི་ཐུགས་ནི་ཡིད་དུ་འོང་། །དང་པོའི་སྦྱོར་བའི་རྣལ་འབྱོར་གྱིས། །སྒྲུབ་པའི་ཐབས་མཆོག་བསྒོམ་པར་བྱ། །

ༀ་མཻ་ཏྲེ་ཡ་ཏྲི། འདི་ནི་བསྒྲུབས་པ་ཙམ་གྱིས་ཀྱང་། །དགའ་ལྡན་དུ་ནི་གནས་པར་འགྱུར། །སྒྲིབ་པ་ཀུན་དང་བྲལ་བའི་བདག །རང་ཉིད་ལྷ་ཡི་བུ་དང་མཚུངས། །བྱམས་པའི་སྦྱོར་བས་བསྒོམས་ན་ནི། །འདི་ནི་བྱམས་པ་ལྟ་བུར་འགྱུར། །བྱམས་པའི་སངས་རྒྱས་ཞིང་དུ་ནི། །རང་བཞིན་གྱིས་ནི་སྐྱེ་བར་འགྱུར། །དེ་མདུན་ཆོས་ནི་ལེགས་མཉན་ནས། །ས་དང་ཕ་རོལ་ཕྱིན་པ་དང་། །དབང་དང་ཏིང་འཛིན་ཐོབ་ནས་ནི། །དེ་ནི་བྱང་ཆུབ་སེམས་དཔར་འགྱུར། །མཐར་ཡང་སངས་རྒྱས་ཐམས་ཅད་ནི། །བྱམས་པའི་ཡིད་ཀྱིས་ཐོབ་པར་འགྱུར། །བྱམས་པའི་སྒྲུབ་པའི་ཐབས་སོ།། །།རང་གི་ལུས་ནི་ཐམས་ཅད་ནི། །ནམ་མཁའ་མཚུངས་པ་ཉིད་དུ་བསྒོམ། །ཆོས་བདག་མེད་པ་བསྐྱེད་ནས་ཀྱང་། །རང་ཉིད་ནམ་མཁའི་སྙིང་པོར་འགྱུར། །གསང་སྔགས་འདི་ཡི་སྦྱོར་བ་ཡིས། །མཁའ་མཚུངས་དཔེ་ལས་རྣམ་པར་འདས། །ནམ་མཁའི་འོད་ཟེར་གྱུར་པ་ཡིས། །སེམས་ཅན་རང་གི་སེམས་ལས་སྤྲོ། །ཐམས་ཅད་སེམས་ལས་སྤྲོས་ནས་ནི། །སླར་ཡང་རིམ་གྱིས་བསྡུ་བར་བྱ། །ནམ་མཁར་མཉམ་པར་འགྲོ་བ་བལྟ། །རང་གི་དེ་ཉིད་ཀྱིས་སྦྱར་བྱ། ། རིན་ཆེན་དཀྱིལ་འཁོར་དབུས་གནས་པར། །རིན་ཆེན་ཁ་དོག་འོད་པོ་ཆེ། །རྒྱན་རྣམས་ཀུན་གྱིས་ལུས་བརྒྱན་པ། །ལག་ན་རིན་ཆེན་སྟོབས་པོ་ཆེ། །རིན་ཆེན་སྦྱོར་བ་བསྒོམས་པ་ཡིས། །ནམ་མཁའི་དམ་པ་འགྲུབ་པ་ཡིན། །སྔགས་ནི། ༀ་ཨཱ་ཀཱ་ཤ་གརྡྷཱ་ཡ་སྭཱ་ཧཱ། ནམ་མཁའི་སྙིང་པོ་སྟོབས་པོ་ཆེ། །བཅོམ་ལྡན་རྣལ་འབྱོར་འགྲུབ་པར་འགྱུར། །རང་གི་དངོས་གྲུབ་ཐམས་ཅད་ནི། །སྟེར་བར་འགྱུར་དེ་དཔྱད་མི་དགོས། །དཔའ་བོ་སངས་རྒྱས་ཐམས་ཅད་ཀྱིས། །དངོས་གྲུབ་ཇི་སྙེད་བཀའ་སྩལ་པ། །ནམ་མཁའི་སྙིང་པོ་བསྒྲུབས་པ་ཡིས། །དེ་དག་ཐམས་ཅད་མྱུར་དུ་སྟེར། །ནམ་མཁའི་སྙིང་པོ་སྒྲུབ་པའི་ཐབས་སོ།། །།སངས་རྒྱས་ཀུན་གྱི་རང་བཞིན་སྐུ། །རྒྱན་རྣམས་ཀུན་གྱིས་བརྒྱན་པ་ཡིས། །ཀུན་ཏུ་བཟང་པོ་འོད་བཟང་བ། །ཟླ་བའི་དཀྱིལ་འཁོར་དབུས་སུ་ནི། །སྔགས་པས་རྟག་

ཏུ་བསྒོམ་པར་བྱ། །དངོས་གྲུབ་མཆོག་ནི་ཐོབ་པར་འགྱུར། །རང་གི་ལུས་ནི་ཇི་སྙེད་པའི། །རང་གིས་ཕྲ་རབ་རྡུལ་རྣམས་ཀྱིས། །དེ་དག་ཐམས་ཅད་མཚུངས་པར་བྱ། །སངས་རྒྱས་སྐུ་ཡི་སྐུ་ཉིད་དུ། །ཡང་ན་བ་སྤུའི་ཁུང་རྣམས་སུ། །རང་གི་འཁོར་ལོས་ཡོངས་བསྐོར་ནས། །སངས་རྒྱས་ཀུན་དང་མཚུངས་བྱས་ཏེ། །བདག་ནི་ཀུན་ཏུ་བཟང་པོ་ཞེས། །ཡི་གེ་ལྔ་པ་ཞེས་སུ་བཤད། །འདི་ཡི་སྔགས་ཆེན་བཟླས་པར་བྱ། །ཡང་ན་འདིར་ནི་ལྷ་གཞན་གྱིས། །རྟག་ཏུ་སྔགས་སུ་གྱུར་པའོ། །ཨོཾ་སཱཾ་ཧྲཱི༔ཀཱ་ཡ་སྭཱ་ཧཱ། གསང་སྔགས་རྒྱལ་པོ་ཆེ་གསང་ཞིང་། །གདོད་ནས་དག་ཅིང་རང་འབྱུང་བ། །འདི་ནི་བསྒྲུབས་པ་ཙམ་གྱིས་ནི། །ཤེས་རབ་དྲི་མ་མེད་པར་འགྱུར། །དེ་ཡི་ཡེ་ཤེས་དྲི་མེད་ཅིང་། །གཟུགས་མཛེས་པ་ནི་དེ་དང་མཚུངས། །བསྟན་བཅོས་ཐམས་ཅད་རབ་སྨྲ་བ། །ཀུན་བཟང་མཆོག་ཏུ་བདག་འགྱུར་རོ། །ཀུན་ཏུ་བཟང་པོའི་སྒྲུབ་པའི་ཐབས་སོ།། །།ཟླ་བའི་དཀྱིལ་འཁོར་དབུས་གནས་པར། །རྒྱན་རྣམས་ཀྱིས་ནི་བརྒྱན་པ་ཡི། །སྒྲིབ་པ་ཐམས་ཅད་རྣམ་སེལ་བ། །དམ་པའི་དོན་དུ་བསྒོམ་པར་བྱ། །གསང་སྔགས་འདི་ཡི་སྦྱོར་བ་དང་། ། བཅུད་ཀྱིས་ལེན་གྱིས་བདེ་བླག་ཏུ། །རིང་པོ་ཉིད་དུ་མི་ཐོགས་པར། །སྒྲིབ་པ་རྣམ་སེལ་མཚུངས་པར་འགྱུར། །སྔགས་འབྱུང་བ་ནི། ༀ་སརྦྦ་ནི་ཝ་ར་ཎ་བིཥྐམ་བྷི་ནི་སྭཱ་ཧཱ། ཨོཾ་ནི་ས་རཱ་ཡ་སྭཱ་ཧཱ། གཙོ་བོ་གསང་སྔགས་འདི་འཛིན་ལ། །རྣམ་པར་སེལ་བར་གྲགས་པ་སྟེ། །ཐམས་ཅད་བསྒོམ་པའི་སྦྱོར་བ་ཡིས། །ཕྱག་རྒྱ་ཀུན་གྱིས་ཐམས་ཅད་དུ། །གདོད་ནས་སྐྱེ་མེད་རང་བཞིན་གྱིས། །གདོད་ནས་དག་ཅིང་འགྱུར་བ་མེད། །དེ་ལྟར་ཆོས་འདི་ཤེས་ནས་ནི། །ལྷ་ཉིད་དང་ནི་མཉམ་བྱས་ནས། །རྙོག་པ་མེད་ཅིང་ཟག་མེད་པའི། །རྗེས་སུ་རྣལ་འབྱོར་གྱིས་བསྒྲུབ་བྱ། །ཨུཏྤལ་སྔོན་པོའི་འདབ་མ་ལྟར། །གསལ་བའི་རྣམ་པར་གནས་པའོ། །དབང་ཆེན་དཀྱིལ་འཁོར་ལ་བཞུགས་པའི། །མེ་ཡིས་ཡོངས་སུ་བསྐོར་བ་ཡི། །ཕྱག་ན་རལ་གྲི་གཟི་བརྗིད་ཆེ། །ཡང་ནས་ཡང་དུ་སེམས་བྱེད་ཅིང་། །དངོས་གྲུབ་

འདི་ནི་གཟི་བརྗིད་ཆེ། །རྣམ་སེལ་མཆོག་གི་དབང་ཕྱུག་ནི། །མཐའ་ལས་འདས་པའི་དངོས་གྲུབ་མཆོག །ཐམས་ཅད་ནས་ནི་སྩོལ་བ་ཉིད། །རྣམ་པར་སེལ་བ་སྒྲུབ་པའི་ཐབས་སོ།། །།དབང་ཆེན་དཀྱིལ་འཁོར་སྟེང་དུ་ནི། །རྡོ་རྗེ་ཡི་ནི་དབུས་ན་བཞུགས། །གསེར་གྱི་མདོག་ཅན་སྐུ་ཆེན་པོ། །འབར་བ་ལྟ་བུའི་གཟི་བརྗིད་ཅན། །སྙིང་གར་རྡོ་རྗེའི་ཕྱག་རྒྱ་གནས། །ས་སྙིང་ཞེས་བྱར་བདག་ཉིད་བསྒོམ། །རང་གི་ལྷག་པའི་ལྷ་སྦྱོར་བས། །རང་གི་གསང་སྔགས་བརྗོད་པར་བྱ། །ས་སྙིང་ཞེས་བྱར་བདག་བསྒོམས་ནས། །སྔགས་ཀྱི་ཡི་གེ་མཆོག་བདེ་འདི། །ༀ་ཀྵི་ཧཿརཱ་ཛ་སྭཱ་ཧཱ།བསམ་ཡས་སྔགས་མཆོག་འདི་ཡིས་ནི། །དངོས་གྲུབ་ཐམས་ཅད་རབ་སྩོལ་མཛད། །ས་ཡི་སྙིང་པོ་ཞེས་གྲགས་པ། །དམ་པའི་དོན་དུ་རྣལ་འབྱོར་པས། །སའི་སྙིང་པོའི་སྒྲུབ་པའི་ཐབས་སོ།། །།ཟད་པ་མེད་ཅིང་འཁྲུལ་པ་མེད། །ཟག་མེད་མཆོག་གི་ཤེས་རབ་ཅན། །ཟླ་བའི་དཀྱིལ་འཁོར་དབུས་སུ་ནི། །ཤེས་རབ་རྡོ་རྗེའི་བདག་ཉིད་དགེ། །བློ་གྲོས་མི་ཟད་རྙེད་དཀའ་བ། །འབད་པ་ཡིས་ནི་བསྒོམ་པར་བྱ། །མེ་ཡི་དཀྱིལ་འཁོར་དབུས་སུ་ནི། །གསེར་གྱི་མདོག་དང་ལྡན་པའི་གཟུགས། །རྒྱལ་པོ་ཆེན་པོ་ཟླ་བའི་འོད། །འོད་ཀྱི་དཀྱིལ་འཁོར་རབ་ཏུ་གསལ། །སྔགས་ནི། ཨོཾ་ཨ་ཀྵ་ཡ་མ་ཏི་སྭཱ་ཧཱ། སྔགས་ཀྱི་ཡི་གེ་གསང་བ་འདི། །ཐམས་ཅད་བློ་གྲོས་གསལ་བར་བྱེད། །ཡེ་ཤེས་མི་ཟད་འདོད་པ་ཡིས། །འབད་པ་ཡིས་ནི་བསྒྲུབ་བྱ་སྟེ། །དངོས་གྲུབ་ཀུན་གྱི་མཆོག་ཤེས་བྱ། །ཤེས་རབ་ཡེ་ཤེས་དྲི་མེད་མཛེས། །སངས་རྒྱས་ཉིད་ཀྱང་ཐོབ་གྱུར་ན། །དངོས་གྲུབ་གཞན་དག་ཅི་ཞིག་སྨོས། །བློ་གྲོས་མི་ཟད་པའི་སྒྲུབ་པའི་ཐབས་སོ།། །།ཀུན་ནས་ཤེས་རབ་ཆེན་པོ་ཅན། །ཟླ་བའི་དཀྱིལ་འཁོར་ལ་བརྟེན་པར། ། གསེར་གྱི་ཁ་དོག་གཟི་བརྗིད་ཆེ། །རྒྱན་རྣམས་ཐམས་ཅད་ཀྱིས་བརྒྱན་པའི། །གཞོན་ནུའི་གཟུགས་ཅན་རྟག་བསམ་བྱ། །རེ་བ་ཐམས་ཅད་རྫོགས་པར་མཛད། །རང་གི་ལྷག་པའི་ལྷ་སྦྱོར་བ། །ནམ་མཁའི་བདག་པོ་བདག་ཡིན་ཞེས། །ལུས་ངག་ཡིད་ཀྱིས་ཐམས་

ཅད་དུ། །ཐམས་ཅད་རིག་པས་བརྟན་པར་བྱ། །ཤིན་ཏུ་དྲི་མེད་བྱང་ཆུབ་སེམས། །རང་སྙིང་མེ་ལོང་ལྟ་བུར་བསམ། །དེ་ནས་ཡི་གེ་ཚིག་བཀོད་དེ། །མཁའ་མཛོད་བདག་ཅེས་བདག་ཉིད་ཀྱིས། །བསྒོམས་ནས་རྡོ་རྗེ་རྡོ་རྗེའི་བདག །མཁའ་ལ་རིན་ཆེན་འབྱུང་གནས་དང་། །ཡིད་བཞིན་ནོར་བུ་དཔག་བསམ་ཤིང་། །དེ་བཞིན་བུམ་པ་བཟང་པོ་སོགས། །འཇིག་རྟེན་ཀུན་གྱི་དབང་ཕྱུག་གི། །ཉེ་བར་མཁོ་བ་ཐམས་ཅད་འབབ། །འཇིག་རྟེན་ཀུན་གྱི་རྫས་ཐམས་ཅད། །ཇི་སྙེད་ཡོད་པ་དེ་དག་ཀུན། །འདིར་ནི་སྐད་ཅིག་ཙམ་ཉིད་ལ། །དངོས་གྲུབ་དམ་པ་སྩོལ་བར་འགྱུར། །ཨོཾ་ག་ག་ན་གཉྫོ་གྃ་སྭཱ་ཧཱ། ནམ་མཁའ་མཛོད་ཀྱི་དངོས་གྲུབ་ཆེ། །ནོར་གྱི་རྒྱུན་གྱི་རབ་འབེབས་པ། །ནམ་མཁའི་མཛོད་ནི་སྟོབས་པོ་ཆེ། །སྐད་ཅིག་ཙམ་གྱིས་བྱེད་པར་འགྱུར། །ནམ་མཁའ་མཛོད་ཀྱི་སྒྲུབ་པའི་ཐབས་སོ།། །། རིན་ཆེན་དཀྱིལ་འཁོར་ལས་བྱུང་བ། །རིན་ཆེན་ཕུང་པོ་ཆར་རབ་འབེབས། །རིན་ཆེན་གཟི་བརྗིད་མཆོག་ཏུ་རོལ། །ལག་ན་རིན་ཆེན་དེ་བསྒྲུབ་བྱ། །ལག་ན་རིན་ཆེན་ཕྱག་རྒྱ་ཆེ། །ཟླ་བའི་དཀྱིལ་འཁོར་དབུས་གནས་པར། །རྡོ་རྗེ་སྦྱོར་བས་བསྒོམ་པར་བྱ། །བདག་ཉིད་རིན་ཆེན་ཞེས་བྱ་དང་། །རིན་ཆེན་ཐམས་ཅད་སྩོལ་བར་མཛད། །ཐམས་ཅད་རྡོ་རྗེ་བཞིན་བདག་ཉིད། །པྲི་ཡང་ཀུ་མདོག་སྔོ་བསངས་འོད། །དབང་ཆེན་དང་ནི་མེ་ལས་བྱུང་། །ཕྱག་ན་རིན་ཆེན་ཆེར་གསལ་བ། །རབ་ཏུ་འབད་དེ་བསྒོམ་པར་བྱ། །ༀ་རཏྣ་པཱ་ཎི་ར་མུ་སྭཱ་ཧཱ། །གསང་སྔགས་འདི་ནི་བརྩོན་འགྲུས་ཆེ། །རབ་ཏུ་འབད་དེ་བསྒྲུབས་ན་ནི། །འགྲོ་བ་ཀུན་གྱི་ལག་ཏུ་ནི། །རིན་ཆེན་ཐམས་ཅད་རབ་རྩོལ་བྱེད། །ལག་ན་རིན་པོ་ཆེའི་སྒྲུབ་པའི་ཐབས་སོ།། །།ཆོས་ཀྱི་དབྱིངས་དང་མཚུངས་པའི་སེམས། །བདུད་རྩི་ཆུ་ཡིས་རབ་གང་བ། །སྟོང་གསུམ་ཞེས་ནི་བསམ་པར་བྱ། །པདྨ་གཅིག་གི་སྟེང་ན་གནས། །དེ་ཡི་སྟེང་དུ་གཟི་བརྗིད་ཆེ། །ཆུ་ལྷ་ཡི་ནི་གཟུགས་ཀྱི་མཆོག །དེ་སྟེང་དུ་ཡང་གསང་ཆེན་པོ། །མེ་ཡི་དཀྱིལ་འཁོར་དམ་པ་ཡིན། །དེ་ཡི་སྟེང་དུ་བརྩོན་འགྲུས་ཆེ། །རྩེ་མོ་བརྒྱ་པའི་

རྡོ་རྗེ་བྱུང་། །དེ་ཡི་སྟེང་དུ་པད་ཆེན་པོ། །འདབ་མ་བརྒྱ་པ་འོད་གསལ་བ། །དེ་སྟེང་རྟག་ཏུ་བསམ་པ་ནི། །བྱང་ཆུབ་སེམས་དཔའ་སྟོབས་པོ་ཆེ། །རྒྱ་མཚོའི་བློ་གྲོས་ཞེས་གྲགས་པ། །འབར་བའི་ཕྲེང་བ་འཁྲིགས་པའི་འོད། །དུང་དང་ཀུནྡ་ཟླ་བའི་འོད། །རྒྱན་རྣམས་ཀུན་གྱིས་རྣམ་པར་བརྒྱན། །དེ་ཡི་ལག་ན་ཕྱག་རྒྱ་ཆེ། །རྡོ་རྗེ་དུང་དུ་རབ་ཏུ་གྲགས། །རང་གི་ལྷག་པའི་ལྷ་སྦྱོར་བས། །རང་ཉིད་རྡོ་རྗེ་ཡིན་ནོ་ཞེས། །རྒྱ་མཚོའི་བློ་གྲོས་ཤེས་རབ་ཆེ། །སླར་ཡང་གསང་སྔགས་བཟླ་བར་བྱ། །སྔགས་ནི། ༀ་སཱ་ག་ར་མ་ཏི་ས་ར་སྭཱ་ཧཱ། སྔགས་འདི་མཆོག་དང་གཙོ་བོ་སྟེ། །ཤེས་རབ་ཡེ་ཤེས་དྲི་མེད་མཛེས། །རྡོ་རྗེའི་སྦྱོར་བས་མྱངས་ན་ནི། །ཤེས་རབ་རྒྱ་མཚོའི་བློ་གྲོས་མཚུངས། །རང་ཉིད་སངས་རྒྱས་འཇམ་པའི་དབྱངས། །ཐུགས་རྗེ་འཇིག་རྟེན་དབང་ཕྱུག་རྒྱལ། །དངོས་གྲུབ་གཞན་ལྟ་སྨོས་ཅི་དགོས། ། རྒྱ་མཚོའི་བློ་གྲོས་ཀྱི་སྒྲུབ་པའི་ཐབས་སོ།། །།དབང་ཆེན་དཀྱིལ་འཁོར་ལ་གནས་པའི། །ཨུཏྤལ་སྔོན་པོ་འདབ་འདྲའི་འོད། །རྡོ་རྗེ་སྙིང་པོ་བརྩོན་འགྲུས་ཆེ། །ཟླ་བའི་དཀྱིལ་འཁོར་དབུས་སུ་ནི། །ཇི་སྙེད་ས་སྟེང་མཐའ་དག་ཏུ། །ཁྱབ་ལ་སྡུག་ཅིང་མཐོ་བ་ཡི། ། སྲ་ཞིང་སྙིང་པོ་རྣམ་དག་པའི། །མཆོག་གི་ཡི་གེ་འགྱུར་མེད་པ། །ས་བཅུའི་དབང་ཕྱུག་མགོན་པོ་ནི། །ཆོས་ཀྱི་སྤྲིན་ལ་སྤྱོད་མཛད་པ། །བསམ་ཡས་ས་ནི་ཡང་དག་བརྙེས། །ཨིན་དྲ་ནཱི་ལ་མཚུངས་པའི་འོད། །དེ་ཡི་སྔགས་གྱུར་མཛེས་པ་ནི། །ཡི་གེ་མཆོག་ནི་སྟེང་དུ་འབར། །ཐུགས་ཀར་རྡོ་རྗེ་ཆེར་གསལ་བ། །རང་ཉིད་རྣམ་པར་འཕྲོ་བ་བཞིན། །སྔགས་ནི། ༀ་བཛྲ་གརྦྷ་ཧཱུྃ། འདི་ནི་སྔགས་མཆོག་གཙོ་བོ་སྟེ། །སངས་རྒྱས་བྱང་ཆུབ་རབ་སྒྲུབ་བྱེད། །ཡེ་ཤེས་ཡངས་པ་སྩོལ་མཛད་ཅིང་། །རྣམ་པ་ཀུན་ཏུ་ཕུན་ཚོགས་ཀུན། ། སངས་རྒྱས་ཉིད་ཀུན་སྩོལ་མཛད་ན། །དངོས་གྲུབ་གཞན་ལྟ་སྨོས་ཅི་དགོས། །དགུག་དང་གཞུག་དང་བཅིང་བ་དང་། །དབང་དུ་བྱ་བ་སྒྲུབ་པར་བྱེད། །བདག་ཉིད་རྡོ་རྗེ་ཡིན་ནོ་ཞེས། །ང་རྒྱལ་རབ་ཏུ་བསྐྱེད་ནས་ནི། །རྡོ་རྗེ་སྙིང་པོ་བཞིན་དུ་གཞན། །བདག་གི་རྣལ་

འབྱོར་བསྒོམ་པར་བྱ། །ཐུགས་ཀྱི་རྡོ་རྗེ་ཉིད་གྱུར་ནས། །ཆོས་ཀྱི་དབྱིངས་དང་མཉམ་པ་ཐོབ། །དེས་ན་རྣམ་པ་ཐམས་ཅད་ཀྱིས། །རྡོ་རྗེ་སྙིང་པོ་ཡང་དག་བྱུང་། །རྡོ་རྗེ་སྙིང་པོ་མཁའ་རྡོ་རྗེ། །སྦྱིན་བྱེད་རྩེ་མོ་དྲུག་པས་སྒྲུབ། །རྡོ་རྗེ་སྙིང་པོ་སྒྲུབ་པའི་ཐབས་སོ།། །། དབང་ཆེན་མེ་ལས་ཡང་དག་བྱུང་། །ནོར་བུ་རིན་ཆེན་འདྲ་བའི་ལུས། །ཟླ་བའི་དཀྱིལ་འཁོར་ལ་གནས་པའི། །ཉི་མའི་དཀྱིལ་འཁོར་མཚུངས་པའི་འོད། །རིན་ཆེན་འབྱུང་བ་སེམས་ཆེན་པོ། །འགྲོ་བ་སྣང་བར་བྱེད་དེ་གནས། །པདྨ་མཁའ་འདྲའི་རྣམ་པ་ཅན། །ཕྱག་རྒྱ་དེ་ཡི་སྙིང་གར་གནས། །རིན་ཆེན་སྦྱོར་བས་བསྒོམ་པར་བྱ། །རིན་ཆེན་ཆར་པ་འབབ་པར་འགྱུར། །སྔགས་ནི། ༀ་རཏྣ་ཀཱ་རཿཧྲཱིཿརཏྣཾ་ད་ད་སྭཱ་ཧཱ། རིན་ཆེན་འབྱུང་གནས་རྒྱལ་པོ་འདི། །མཆོག་རྣམས་ཀྱི་ནི་སའི་དབང་ཕྱུག །སྦྱོར་བ་ཀུན་གྱིས་བསྒྲུབ་པར་བྱ། །རྒྱ་ཆེའི་ནོར་རྣམས་སྩོལ་བར་འགྱུར། །རིན་ཆེན་འབྱུང་བའི་སྒྲུབ་པའི་ཐབས་སོ།། །།དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོ་རྒྱན་གྱི་རྒྱུད་ཆེན་པོ་ལས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྒྲུབ་པའི་ཐབས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་ཏེ་གཤེགས་ནས་བཅོམ་ལྡན་འདས་ཐོག་མ་དང་ཐ་མ་མེད་པ་དམ་པའི་ཆོས་ཀྱི་འཁོར་ལོ་བསྐོར་བ་ཆེན་པོ་ལ་གསོལ་བ་བཏབ་པ། དེ་བཞིན་གཤེགས་པ་ཐམས་ཅད་ཀྱིས་ཁྲོ་བོ་བཅོམ་ལྡན་འདས་བསྐྱེད་དུ་གསོལ། དེ་ནས་བཅོམ་ལྡན་འདས་ཁྲོ་བོ་འཁོར་ལོས་སྒྱུར་བ་ཆེན་པོས་དེ་སྐད་ཅེས་གསོལ་བ་བཏབ་མ་ཐག་ཁོ་ནར་རྡོ་རྗེ་ཁྲོ་བོའི་དཀྱིལ་འཁོར་གསང་བ་ལས་ཆེས་གསང་བ་བཀའ་སྩལ་པ། དེ་ནས་ཡང་དག་བཤད་བྱ་བ། །ཁྲོ་བོ་ཡི་ནི་དཀྱིལ་འཁོར་མཆོག །རླུང་ཁམས་རབ་ཏུ་གསལ་བ་ལ། །མེ་ནི་དབུས་ནས་དབུས་སུའོ། །དེ་ཡི་དབུས་སུ་རྡོ་རྗེ་ཆེ། །འོད་ཟེར་ལྔ་ཡི་ཕྲེང་བས་མཛེས། །དེ་ཡི་མདུན་དུ་བྱ་བ་ཡང་། །མདུང་རྩེ་འབར་བ་ཆེན་པོ་ཡི། །དེ་ཡི་གཡས་ཀྱི་ཆ་རུ་ནི། །རྡོ་རྗེ་ཆེན་པོ་འབར་ཕྲེང་ཅན། །གཡོན་ཉིད་དུ་ནི་བེ་ཅོན་ཆེ། །རིག་པའི་ཕྲེང་བས་རྣམ་པར་སྤྲས། །

རྒྱབ་ཏུ་རལ་གྲིའི་ཕྱག་རྒྱ་ནི། །རིན་ཆེན་འབར་བས་རྣམ་པར་བརྒྱན། །ཕྱི་ངོས་རྣམས་སུ་རྣམ་ཁྲོས་པའི། །ཁྲོ་བོ་ཐམས་ཅད་དགོད་པར་བྱ། །དེ་ཡི་སྔགས་ཀྱི་ཡི་གེ་གསང་། །གསང་ཆེན་མཆོག་ཏུ་འབར་བའོ། །གཞལ་དུ་མེད་ཅིང་གྲངས་མེད་མཆོག །ཆོས་དབྱིངས་མཉམ་དང་མི་མཉམ་པ། །ཡི་གེ་གཅིག་པ་གསང་ཆེན་པོ། །རྒྱུ་ཡི་དོན་དུ་རྟོགས་པར་བྱེད། །དབྱངས་ལྔ་དང་ནི་ཡང་དག་ལྡན། །ཐིག་ལེ་སྒྲ་ཡིས་རྣམ་པར་བརྒྱན། །དེ་ཉིད་གསང་བའི་མགོན་པོ་ནི། །དབྱངས་བདུན་པར་ནི་བཤད་པ་ཡིན། །ཧེ་རུ་ཀ་དཔལ་རྡོ་རྗེ་ཆེ། ། འཇིག་པའི་ཐལ་བ་མཆོག་ཏུ་འབར། །སེམས་དཔའ་སྔོན་པོ་འབར་བའི་བདག །འབར་བའི་མེ་ཡི་དཀྱིལ་འཁོར་བཞིན། །འཇིག་པ་ཆེན་པོའི་དུས་ཅན་གྱི། །ཆར་སྤྲིན་དང་ནི་འདྲ་བའི་འོད། །པདྨ་རཱ་གའི་རྣམ་པ་འདྲ། །འབར་བ་ཀུན་གྱིས་རྣམ་པར་བརྒྱན། །དུར་ཁྲོད་མེ་བཞིན་ཤིན་ཏུ་ཡང་། །གསལ་བའི་སྐྲ་ལྡན་སྟོབས་པོ་ཆེ། །རྣོ་བའི་རྡོ་རྗེ་ཆེར་འབར་བ། །ཐོད་པའི་ཅོད་པན་སྟེང་དུ་འབར། །འཇིག་པ་ཆེན་པོའི་དུས་ཅན་གྱི། །རྒོད་མ་ཁ་ཡི་མེ་ལྟར་གནས། །སྨིན་འཁྱོག་རྣམ་པར་འཁྲུགས་པ་ཅན། །གཡོན་བརྐྱངས་པ་ཡི་ཞབས་ཀྱིས་བཞུགས། །ཁྲོ་བ་ལ་སོགས་ཉམས་དང་ལྡན། །རྣམ་པ་སྣ་ཚོགས་འཁྲུགས་པའི་གདོང་། །གར་དང་སྡུད་པར་ཡང་དག་ལྡན། །འཇིག་རྟེན་སྣང་བ་གར་མཛད་པ། །ཕྱག་ནི་བརྒྱ་ཕྲག་སྟོང་དང་ལྡན། །གཅིག་ཏུ་འགྱུར་ཞིང་རྣམ་པ་མང་། །རྣམ་མང་ཞལ་ལྡན་དེ་དག་གི། །སྔོ་སེར་ལ་སོགས་མཐའ་དང་ལྡན། །ཞབས་ཀྱང་རྣམ་པ་དུ་མ་ལྡན། །སྣ་ཚོགས་མདོག་ལྡན་རྣམ་པར་འཁྲུག །དེ་ཉིད་བཅོམ་ལྡན་རྣལ་འབྱོར་ཏེ། །ཁྲོ་བོའི་རྒྱལ་པོ་སྟོབས་པོ་ཆེ། །ཤིན་ཏུ་སྡུག་ཅིང་དྲག་རྣམས་ལ། །སྒྱུ་འཕྲུལ་དྲ་བ་ཞེས་བྱར་གནས། །ཕྱག་དྲུག་ཞབས་དྲུག་སྣང་བ་ཅན། །ཞལ་དྲུག་པ་སྟེ་གསུས་པོ་ཆེ། །ཆར་སྤྲིན་མཆོག་འདྲ་ཆེར་གནག་པ། །དུས་མཐའི་མེ་དང་འདྲ་བར་གནས། །མདོག་ཆེན་རྒྱལ་པོ་འཁྱིལ་པ་འདྲ། །ཟར་མ་ཡི་ནི་མེ་ཏོག་མཚུངས། །ཁྲོ་བོ་ཐོད་པའི་ཕྲེང་བ་འཆང་། །གཤིན་

རྗེ་མཐར་བྱེད་སྟོབས་པོ་ཆེ། །དེ་ལ་སྔགས་ཀྱང་། ༀ་ཨཱཿཧཱུྃ་ཕཊ། ༀ་ཡ་མ་མ་ཐ་ན་ཧཱུྃ་ཕཊ། ༀ་ཧྲཱིཿཥྚཱིཿབི་ཀྲྀ་ཏཱ་ན་ན་ཧུྃ་སརྦྦ་ཤ་ཏྲཱུན་ནཱ་ཤ་ཡ་སྟཾ་བྷ་ཡ་ཧཱུྃ་ཕཊ། སྔགས་ཀྱི་རྒྱལ་པོ་བདག་ཉིད་འདི། །ཁྱབ་བདག་གདུལ་དཀའ་འདུལ་བ་པོ། །གཤིན་རྗེ་མཐར་མཛད་ཁྲོ་བོ་ཆེ། །སངས་རྒྱས་ཀུན་གྱི་བདག་ཉིད་གཙོ། །སངས་རྒྱས་ཐམས་ཅད་སྤྱན་འདྲེན་ཅིང་། །དབང་དུ་ཡང་ནི་མཛད་པར་གནས། །རྟག་ཏུ་གདུལ་དཀའ་འདུལ་མཛད་ཅིང་། །རྡོ་རྗེ་སྣང་མཛད་ལེགས་པར་འདུལ། །ཤིན་ཏུ་གདུག་པ་དྲག་རྣམས་ལ། །ཞི་བ་ཉེ་བར་མི་སྦྱར་ཏེ། ། ཤེས་རབ་ཐབས་ཀྱི་བདག་ཉིད་ཀྱིས། །དེ་བཞིན་གཤེགས་རྣམས་ཁྲོ་བོར་མཛད། །ཐུགས་རྗེ་ཁྲོ་བོའི་ངང་ཚུལ་ཅན། །འཇིག་རྟེན་གསུམ་ཀྱང་ངེས་སྲེག་མཛད། །དེ་བས་འབད་པ་ཐམས་ཅད་ཀྱིས། །ཤེས་རབ་ཐབས་ཀྱི་བདག་ཉིད་སྐུ། །ཐུགས་རྗེས་ཁྲོ་བོ་མ་ལུས་མཆོག ། གདུག་པ་འདུལ་བར་མཛད་པ་བསྐྱེད། །གཤིན་རྗེ་མཐར་བྱེད་ཀྱི་སྒྲུབ་པའི་ཐབས་སོ།། །།དེ་ཉིད་བཅོམ་ལྡན་རྣལ་འབྱོར་ཏེ། །ཁྲོ་བོ་གཟེགས་མ་ཞེས་སུ་གྲགས། །དམར་པོ་འབར་བའི་ཁྲོ་བོ་ཆེ། །འཇིག་པ་ཆེན་པོའི་དུས་དང་འདྲ། །ཨུཏྤལ་སྔོན་པོའི་འདབ་མ་བཞིན། ། དེ་ཡི་ཁ་དོག་རྣམ་པར་བསམ། །དྲག་པོ་ཆེན་པོའི་ཞལ་བཞི་པ། །འབར་བའི་ཕྲེང་བ་འཁྲིགས་པའི་འོད། །སྤྱན་གསུམ་པ་ལ་ཁྲོ་གཉེར་བསྙེར། །ཕྱག་དྲུག་པ་ལ་མཆོག་ཏུ་འབར། །མེ་ཡི་ཁམས་དང་འདྲ་བའི་མདོག །ལི་ཁྲིའི་མདོག་ལྟར་ཤིན་ཏུ་འབར། །དེ་ཡི་ཁྲོ་གཉེར་བསྙེར་བ་ཡིས། །གདུག་པ་འདུལ་མཛད་འབྱིན་པར་བྱེད། །ཁྲོ་བོའི་རྒྱལ་པོ་གཉིས་པ་ནི། །ཡང་དང་ཡང་དུ་བསམ་པར་བྱ། །མ་ལུས་ས་རྣམས་ཐམས་ཅད་དུ། །སོན་པའི་བདག་ཉིད་ཆེན་པོ་དེས། །འགུགས་པ་དང་ནི་དབང་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། ། སྔགས་ནི། ༀ་ཀ་ཎི་དྷུ་ཎི་ཧཱུྃ་ཕཊ། ཁྲོ་བོ་འདི་ཡི་སྔགས་འཛིན་པ། །འཇིག་རྟེན་གསུམ་མཆོག་སྟོབས་པོ་ཆེ། །ས་རྣམས་ཐམས་ཅད་སྲེག་བྱེད་ན། །སྐྱེ་བོ་གཞན་ལྟ་སྨོས་ཅི་དགོས། །ཁྲོ་བོ་གཟེགས་མ་སྒྲུབ་པའི་ཐབས་སོ།། །།དེ་ཉིད་བཅོམ་ལྡན་རྣལ་འབྱོར་ཏེ། །

རྡོ་རྗེ་སེམས་དཔའ་དེ་བཞིན་གཤེགས། །པདྨ་གར་གྱི་དབང་ཕྱུག་གྱུར། །རྟ་མགྲིན་ཞེས་སུ་བཤད་པ་ཡིན། །རྟག་ཏུ་འཆར་ཀའི་མདོག་འདྲ་བ། །རྒྱ་སྐྱེགས་མདོག་ལྟར་འབར་བ་བོ། །ཆུ་དང་གཟི་བརྗིད་ཅན་རེག་པ། །མེ་ཡི་དཀྱིལ་འཁོར་དག་དང་ལྡན། །འདོད་ལྡན་རྣམས་ལ་འདོད་པ་འབྱུང་། །གདུག་པ་ཅན་རྣམས་གདུག་པ་འབྱུང་། །ཞི་བ་ལ་ཡང་ཞི་བ་འབྱུང་། །སྟོབས་ལྡན་རྣམས་ལ་སྟོབས་ཀྱིས་སྦྱོར། །ཞལ་བཞི་པ་ལ་ཞབས་བཞི་པ། །བསམ་གཏན་བཞི་དང་མཉམ་པར་ལྡན། །ཕྱག་བཞི་པ་ལ་བརྩོན་འགྲུས་ཆེ། །སེང་གེ་ལྟར་གནས་མཆེ་བ་བཞི། །རྟ་མགྲིན་རྒྱལ་པོ་ཆེན་པོ་ནི། །དམ་པའི་དབང་ཕྱུག་བསྒྲུབ་པར་བྱ། །སྐད་ཅིག་ཉིད་ལ་བསླང་ནས་ནི། །ཐམས་ཅད་སློང་བ་བསྒྲུབ་པར་བྱ། །སྔགས་ནི། ཨོཾ་ཨ་མྲྀ་ཏོདྦྷ་བོདྦྷ་པེ་ཧཱུྃ་ཕཊ། ༀ་ཨ་མྲྀ་ཏོང་བྷ་བ་ཧཱུྃ་ཕཊ། གཡས་དང་གཡོན་གྱི་སྦྱོར་བ་ཡིས། །གཡོན་བརྐྱང་བ་ནི་རབ་ཏུ་སྦྱར། །ཁྲོ་བོའི་སྐྱིལ་ཀྲུང་བྱས་ནས་ནི། །འཇིག་རྟེན་ཐམས་ཅད་རབ་ཉེད་བྱ། །པདྨའི་དབང་ཕྱུག་རྒྱལ་པོ་འདི། །ཀུན་མཆོག་ས་ཡི་དབང་ཕྱུག་སྟེ། །རྟ་ཡི་མགྲིན་པ་སྟོབས་པོ་ཆེ། །སྟོབས་ཀྱི་སྦྱོར་བས་བསྒྲུབ་པར་བྱ། །དབང་ཕྱུག་ཆེན་པོ་ལ་སོགས་ལྷ། །ཚོགས་ཀྱི་བདག་པོ་གཞན་དག་དང་། །མི་དང་གདུག་པའི་བསམ་པ་ཅན། །ས་རྣམས་ཐམས་ཅད་དགུག་པར་བྱ། །རྟ་མགྲིན་སྒྲུབ་པའི་ཐབས་སོ།། །།དེ་ཉིད་བཅོམ་ལྡན་རྣལ་འབྱོར་དེ། །གཅིག་པུ་ཉིད་ནི་ལྷག་པའི་ལྷ། །ཤེས་རབ་ཐབས་ཀྱི་བདག་ཉིད་གྱུར། །ཁྲོ་བོ་མཆོག་ཏུ་མི་འགྱུར་བ། །ཀུན་སྦྱོར་བདག་གི་རྣལ་འབྱོར་གྱིས། །ཐུགས་རྗེས་ཁྲོ་བའི་དབང་དུ་སོང་། །དེ་ནས་སངས་རྒྱས་ཐམས་ཅད་ཀྱི། །སྣ་ཡི་རྩེ་མོར་ཡིད་ཀྱིས་ནི། །གཡོ་བ་མེད་པར་བསམ་པར་བྱ། །སློབ་དཔོན་མི་གཡོ་ཁྲོ་བོ་ཆེ། །དེ་བཞིན་གཤེགས་པ་ཐམས་ཅད་བརྟན། །རལ་གྲི་ཞགས་པ་འཛིན་པ་གསང་། །ཐོག་མ་ཐ་མ་མེད་པའི་མཆོག །པྲི་ཡང་ཀུ་ལྟར་ལྗང་བའི་གཟུགས། །འཁྲིགས་ཤིང་བྱིས་པ་ལྟ་བུར་གནས། །མ་ལུས་པ་ཡི་ས་རྣམས་ཀུན། །ཆོས་དབྱིངས་མཉམ་དང་མི་མཉམ་

པ། །ཁྲོ་བོ་མངག་པ་བྲན་དང་ནི། །ཕོ་ཉས་ཀྱང་ནི་རྣམ་པར་བརྒྱན། །སྐྱེ་བོ་ཀུན་གྱིས་ཡོངས་སུ་གང་། །སངས་རྒྱས་ཀུན་གྱི་སྤྱན་སྔ་ན། །བཀའ་ལུང་ཡང་ནི་ཡོངས་སུ་སྩོལ། །ཟད་པའི་དུས་དང་འདྲར་གནས་སོ། །སྔགས་ནི། ན་མཿས་མནྟ་བཛྲཱ་ཎཱཾ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུྃ། ཏྲ་ཀ་ཧཱྃ་མཱྃ། ཁྲོ་བོ་གཟི་བརྗིད་ཆེན་པོ་འདི། །གཟུགས་མང་མངའ་བ་སྟོབས་པོ་ཆེ། །འགྲོ་བ་ཐམས་ཅད་འགུགས་པར་བྱེད། །དབང་དུ་ཡང་ནི་མཛད་པར་གནས། །རླུང་དང་མེ་ལས་ཡང་དག་བྱུང་། །འབར་བ་ལྟ་བུའི་གཟི་བརྗིད་ཅན། །སྔགས་དང་ཕྱག་རྒྱ་སོགས་ཀུན་མཆོག །ལུས་དང་ངག་ཡིད་དེ་བཞིན་ནོ། །དགུག་དང་གཞུག་དང་བཅིང་བ་དང་། །དབང་དུ་བྱས་ནས་བསྒྲུབ་པར་བྱ། །དེ་ལ་སོགས་པ་མཐའ་ཡས་མཆོག །ནམ་མཁའི་ཁམས་ཀྱི་མཐའ་ཀླས་མཆོག །ཁྲོ་བོའི་ཕྱག་རྒྱ་རང་འབྱུང་བ། །དྲག་པོ་ཐོག་མ་ཐ་མ་མེད། །རྣམ་པར་འཕྲོ་བ་བཞིན་དུ་གནས། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྙིང་པོ་རྒྱན་གྱི་རྒྱུད་ལས་ཁྲོ་བོའི་དཀྱིལ་འཁོར་འདི་ཡོངས་སུ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་ཏེ་གཤེགས་ནས་བཅོམ་ལྡན་འདས་ལ་དེ་བཞིན་གཤེགས་པ་ཐམས་ཅད་ཀྱི་གཟུངས་ཐམས་ཅད་ཀྱི་དབང་ཕྱུག་གི་རྒྱལ་པོ་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་གཟུངས་རྣམས་ཐམས་ཅད་ཀྱི་དཀྱིལ་འཁོར་བསྐྱེད་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་གཟུངས་ཀྱི་དཀྱིལ་འཁོར་བཀའ་སྩལ་པ། དེ་ནས་ཡང་དག་བཤད་བྱ་བ། །གཟུངས་རྣམས་ཀྱི་ནི་དཀྱིལ་འཁོར་དགེ། །གྲུ་བཞི་པ་ལ་སྒོ་བཞི་པ། །རྟ་བབས་ཀྱིས་ནི་རྣམ་པར་མཛེས། །ཐིག་བཞི་དང་ནི་ཡང་དག་ལྡན། །དཀྱིལ་འཁོར་དམ་པར་རབ་ཏུ་བཤད། ། དེ་ཡི་དབུས་སུ་པད་ཆེན་པོ། །ལོ་མ་ཀུན་གྱིས་ཤིན་ཏུ་མཛེས། །ཉི་ཤུ་རྩ་ལྔའི་འདབ་མ་ལྡན། །རྡོ་རྗེ་རིན་ཆེན་ལེགས་པར་བརྒྱན། །དེ་ཡི་དབུས་སུ་རྟག་བྲི་བ། །དཔག་མེད་ཤེས་རབ་ཕ་རོལ་ཕྱིན། །དེ་ཡི་ཉེ་འཁོར་ཐམས་ཅད་དུ། །སྣ་ཚོགས་ལས་ནི་འབར་རྣམས་ལ། །

ཉི་ཤུ་རྩ་ལྔའི་དབྱེ་བ་ཡིས། །ཤེས་རབ་ཕ་རོལ་ཕྱིན་མ་བྲི། །ཤར་གྱི་འདབ་མ་ནས་བརྩམས་ཏེ། །ཐོག་མཐའ་ཉིད་ཀྱང་བརྟག་པར་བྱ། །ཕྱག་རྒྱའི་ཡི་གེ་ཅི་རིགས་པར། །གོ་རིམས་བཞིན་དུ་རྣམ་པར་དགོད། །ཕྱོགས་ཆའི་དབྱེ་བ་ཐ་དད་ཀྱིས། །ཁ་དོག་དབྱེ་བ་ཐམས་ཅད་དུ། །རྣམ་དབྱེ་མཆོག་ཏུ་སྣ་ཚོགས་པ། །ཆོས་དབྱིངས་མཉམ་དང་མི་མཉམ་པ། །དེ་ལས་འོད་ཟེར་བསམ་མི་ཁྱབ། །སྔོ་སེར་ལ་སོགས་དབྱེ་བ་ཡིས། །ཤེས་རབ་སྣང་བའི་དཀྱིལ་འཁོར་གྱིས། །འགྲོ་བ་ཐམས་ཅད་གསལ་བར་བྱ། །འདུས་པར་གྱུར་ནས་དེ་དག་ཀུན། །ལྷ་ཉིད་ཀྱི་ནི་གཟུགས་ཇི་བཞིན། །ཤེས་རབ་ཆེན་པོ་གཟུགས་ཆེན་པོ། །འབར་བཅས་མཛེས་པའི་གཟི་བརྗིད་ཅན། །དེ་ཡི་ལྟེ་བའི་དཀྱིལ་དུ་ནི། །སྔགས་ཀྱི་དཀྱིལ་འཁོར་ཀུན་ནས་བརྟེན། །སྐུ་ནི་གསེར་གྱི་མདོག་དང་འདྲ། །རྒྱན་རྣམས་ཀུན་གྱིས་རྣམ་པར་བརྒྱན། །རང་གི་ཏིང་ངེ་འཛིན་ལ་ཞུགས། །དུ་མའི་གཟུགས་ཀྱི་གཟུགས་ལྡན་མ། །ཤེས་རབ་ཕ་རོལ་ཕྱིན་མ་ནི། །སེམས་ཅན་ཁམས་ནི་རྣམ་སྦྱོང་མཛད། །ཀུན་ནས་སེམས་ཅན་རྣམས་ཀྱི་ཡུམ། །སེམས་ཅན་ཀུན་གྱི་ཐམས་ཅད་དུ། །ཐམས་ཅད་ལུས་ལ་མཉམ་པར་ཁྱབ། །སེམས་ཀྱི་རྒྱུན་བཞིན་ལེགས་པར་ཞུགས། །ཟག་པ་མེད་ཅིང་བསམ་མི་ཁྱབ། །དྲི་མ་མེད་ཅིང་ངང་གིས་སྟོང་། །ནམ་མཁའ་དང་ནི་མཚུངས་འདྲ་བ། །དངོས་དང་དངོས་མེད་རྣམ་པར་སྤངས། །ཐོག་མ་ཐ་མ་མེད་ཅིང་ཞི། །ཆོས་རྣམས་ཀུན་གྱི་དབང་ཕྱུག་སྐུ། །སྡིག་པ་ཀུན་ལས་རྣམ་པར་གྲོལ། །བདེན་པ་གཉིས་ལ་རྣམ་པར་གནས། །དམ་པ་དང་ནི་དམ་པའི་དོན། །ཆོས་ཀྱི་སྐུ་རུ་དེ་བཤད་དོ། །དབང་པོ་ཀུན་ཀྱང་རྣམ་པར་ཤེས། །སེམས་དང་ཐམས་ཅད་ཐམས་ཅད་དུ། །ཡིད་ཀྱི་རྣམ་ཤེས་ཞེས་སུ་བཤད། ། ཤེས་རབ་བློ་དང་བློ་གྲོས་དྲན། །ལྷག་མཐོང་དང་ནི་ཡེ་ཤེས་ཀུན། །ཀུན་ནས་ཉོན་མོངས་རྣམ་པར་བྱང་། །རྟག་དང་ཆད་པའི་མཐའ་དང་ལྡན། །མཐའ་གཉིས་པོ་ནི་རྣམ་པར་སྤངས། །ཀུན་རྫོབ་དང་ནི་དམ་པའི་དོན། །རྣམ་པ་གཉིས་སུ་དེ་རབ་བརྟགས། །ཇི་ལྟར་བུད་

ཤིང་ལ་བརྟེན་ནས། །མེ་ཡི་ས་བོན་གནས་པ་དང་། །ཏིལ་ལ་ཏིལ་མར་ཇི་བཞིན་ནོ། །བུར་ཤིང་རོ་བཞིན་རབ་ཏུ་བརྟག །མེ་ཏོག་དྲི་ནི་ཇི་བཞིན་ནམ། །ཞོ་ལ་མར་གསར་ཇི་བཞིན་དུ། །རྣལ་འབྱོར་པ་ཡི་ཡེ་ཤེས་བསྲུབ། །བདུད་རྩི་ལྟ་བུའི་སྙིང་པོ་འབྱུང་། ། གཙུབ་ཤིང་དང་ནི་གཙུབ་སྟན་ལས། །ཇི་བཞིན་གཙུབས་པས་མེ་འབྱུང་སྟེ། །དེ་བཞིན་ཡེ་ཤེས་རྣལ་འབྱོར་པས། །བསྲུབས་པས་ཡོངས་སུ་བརྟག་པར་བྱ། །ཤེས་བྱའི་དཀྱིལ་འཁོར་ཐམས་ཅད་ལ། །ཡང་ནས་ཡང་དུ་བསྲུབ་པར་བྱ། །མུན་པ་ཐམས་ཅད་རྣམ་སེལ་བའི། །ཉི་མའི་འོད་ཟེར་ཇི་བཞིན་བདག །ནམ་མཁའ་དྲི་མ་མེད་བརྟེན་ནས། །ཉི་མ་ཟླ་བ་ཇི་བཞིན་གནས། །འཆར་བ་ཡིས་ནི་གསལ་བྱེད་པ། །འབར་བ་སྟོང་ཕྲག་གི་ནི་སྣོད། །མུན་པ་ཀུན་འཇོམས་སྐར་མ་ལ། །ཀུན་ནས་ཀྱང་ནི་མཛེས་པ་ཡིན། །རྣལ་འབྱོར་པས་ནི་ཇི་ལྟར་སེམས། །མཁའ་བཞིན་ཤིན་ཏུ་དྲི་མ་མེད། །གཟུང་འཛིན་ལས་ནི་ངེས་པར་གྲོལ། །མཉམ་དང་མི་མཉམ་དངོས་པོ་ཀུན། །དེ་གནས་རྣལ་འབྱོར་པ་རྣམས་ཀྱི། །ཡེ་ཤེས་ཉི་ཟླ་མཚུངས་པའི་འོད། །ཤེས་རབ་ཕ་རོལ་ཕྱིན་བསྒོམས་ཏེ། །གསང་སྔགས་འདི་ནི་བསམ་པར་བྱ། །རང་བཞིན་གྱིས་ནི་དག་པའི་དངོས། །རང་བཞིན་མེད་པར་རྣམ་པར་གནས། །རང་བཞིན་གྱིས་ནི་འོད་གསལ་ཀུན། །གདོད་ནས་མ་སྐྱེས་རྙོག་པ་མེད། །ཡི་གེ་དེ་ཉིད་དེ་ལྟ་བུ། །གནས་དང་མི་གནས་རྣམ་པར་སྤངས། །སྡེ་ཚན་བཞི་པའི་གཉིས་པ་ལ། ། ཐིག་ལེ་སྒྲ་ཡིས་རྣམ་པར་བརྒྱན། །དེ་ཉིད་བཅོམ་ལྡན་མགོན་པོ་སྟེ། །ཤེས་རབ་ཕ་རོལ་ཕྱིན་མར་བཤད། །ༀ་པྲཛྙཱ་སྭཱ་ཧཱ། ༀ་ཤྲུ་ཏི་སྨྲྀ་ཏི་བི་ཛ་ཡེ་སྭཱ་ཧཱ། །སངས་རྒྱས་རྣམས་ཀྱི་ཤེས་རབ་འདིས། །བསམ་པ་ཐམས་ཅད་རྫོགས་པར་བྱེད། །ༀ་ཡྃ། འདི་ནི་སངས་རྒྱས་ཀུན་གྱི་ཡུམ། །འདི་ནི་འཁོར་ལོ་རྣམ་པར་བསྒྱུར། །འདིས་ནི་དངོས་གྲུབ་ཐམས་ཅད་དང་། །གྲུབ་པ་ཉིད་ནི་བྱེད་པར་གནས། །བསྟན་བཅོས་རབ་ཏུ་འཆད་བྱེད་དང་། །ཤེས་བྱ་ཐམས་ཅད་ཁྱད་པར་དུ། །ཐམས་ཅད་མཁྱེན་པའི་ཆོས་རྣམས་ཀུན། །དབང་ཕྱུག་དམ་པས་

ཤེས་པར་འགྱུར། །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་པའི་ཐབས་སོ།། །།ཤེས་རབ་ཕ་རོལ་ཕྱིན་གཉིས་པ། །རྫུ་འཕྲུལ་ཆེན་པོ་མཁའ་དང་མཉམ། །གསེར་གྱི་མདོག་ཅན་འབར་བ་ཅན། །ཟླ་བའི་གདན་ལ་ལེགས་པར་བཞུགས། །བརྩོན་འགྲུས་ཆེན་མོ་བསམ་གཏན་བྱ། །སྔགས་ཀྱི་ཡི་གེ་རྣམ་པར་བརྒྱན། །མཆོག་ཏུ་རྣལ་འབྱོར་མ་རྣམས་ཀྱིས། །སངས་རྒྱས་སྤྱན་ཞེས་བཏགས་པ་ཡི། །དེ་ཡི་གསང་སྔགས་རབ་བཤད་བྱ། །ཉོན་ཅིག་ས་རྣམས་འདོད་པ་རྣམས། །སྔགས་ནི། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦྦ་ཨརྠ་སཱ་དྷ་ནི་སྭཱ་ཧཱ། འདི་དེ་མཆོག་ཏུ་གསང་བ་ནི། །རྣལ་འབྱོར་མ་ལ་མཆོག་ཏུ་བཤད། །དབང་ཆེན་ཡི་གེའི་མཐར་ཐུག་པ། །བསྒོམས་པས་དགེ་བ་རབ་ཏུ་སྟེར། །ཆོས་ཀྱི་ཕྱག་རྒྱ་འདི་ཤིན་ཏུ། །སེམས་ཅན་ཐམས་ཅད་དབང་དུ་བྱེད། །དཔུང་དང་བཅས་པ་མྱུར་བཀུག་སྟེ། ། བྲན་དུ་གྱུར་ནས་ཉེ་བར་གནས། །ཕྱག་རྒྱ་གཅིག་པའི་ལྷ་མོ་ཆེ། །རོལ་ཅིང་གཡོ་བའི་ཞལ་མངའ་བ། །སྒེག་པ་ལ་སོགས་ཉམས་དང་ལྡན། །རོལ་ཅིང་སྣང་བའི་གར་མཛད་པ། །སངས་རྒྱས་སྤྱན་ནི་འགྲུབ་པར་འགྱུར། །མིག་གི་ཕྱག་རྒྱ་རབ་ཏུ་སྦྱར། །མིག་གི་ཕྱག་རྒྱ་འདི་ཤིན་ཏུ། །འཇིག་རྟེན་གསུམ་ཡང་གར་བྱེད་དོ། །སངས་རྒྱས་སྤྱན་གྱི་ཕྱག་རྒྱའི་སྒྲུབ་པའི་ཐབས་སོ།། །།ཆུ་ཡི་དཀྱིལ་འཁོར་དགྱེས་པ་ན། །བཅུད་ཀྱིས་ལེན་དང་མཚུངས་པའི་མཆོག །མཐའ་ཡས་རྒྱས་ཤིང་ཡངས་པ་ཡི། །དྲི་མ་མེད་པའི་མཁའ་ལ་གནས། ། དཀྱིལ་འཁོར་དེ་ཡི་དབུས་སུ་ནི། །ལྷ་མོ་མཆོག་ཏུ་མཛེས་པ་མོ། །འདམ་བུ་མདའ་རྒྱུའི་མདོག་ལྟར་དཀར། །གྲུབ་མ་རལ་པའི་ཅོད་པན་འཆང་། །འགྲོ་བ་མཐའ་དག་སྣང་མཛད་མ། །རྟག་ཏུ་ནམ་མཁའ་བཞིན་དུ་གནས། །སྔགས་ནི། ༀ་ཀ་ཊེ་བི་ཀ་ཊེ་ཀ་ཊྃ་ཀ་ཊེ་སྭཱ་ཧཱ། གོས་དཀར་མོ་ཡི་ཕྱག་རྒྱ་ཆེ། །དུང་དང་ཀུནྡ་ཟླ་བ་འདྲ། །སྔགས་ཀྱི་ཡི་གེའི་ཕྲེང་བ་ཆེ། །པདྨའི་རྒྱལ་པོ་རབ་ཏུ་གནས། །འགྲོ་བ་མཐའ་དག་སྣང་མཛད་ན། །སྒྲུབ་པ་པོས་ནི་བསྒྲུབ་པར་བྱ། །དམ་པའི་ལྷ་མོ་འགྲུབ་པར་འགྱུར། །པདྨའི་དཀྱིལ་འཁོར་སྒྲུབ་པའི་ཐབས། །

ཞི་བའི་རོ་དང་ཡང་དག་ལྡན། །ཞི་བའི་ཡི་གེ་མཉམ་པར་ལྡན། །ཞི་བར་མཛད་ཅིང་འཇིག་རྟེན་གྱི། །ས་གསུམ་སྒྲུབ་པར་བྱེད་པའི་ཐབས། །གོས་དཀར་མོའི་སྒྲུབ་པའི་ཐབས་སོ།། །།སྔོ་བསངས་དཀར་མོ་སྣ་ཚོགས་གཟུགས། །རྣམ་པ་སྣ་ཚོགས་རྒྱན་གྱིས་བརྒྱན། །ཟླ་བའི་དཀྱིལ་འཁོར་དབུས་གནས་པ། །སྒེག་པའི་ཉམས་ཀྱིས་ཡོངས་གང་བ། །འགྲོ་བ་མཐའ་དག་སྐྱོབ་མཛད་མ། །ཐུགས་རྗེའི་ཐུགས་དང་ལྡན་པ་ཅན། །རབ་ཏུ་འབད་དེ་བསྒྲུབ་པར་བྱ། །རོལ་པ་ཡི་ནི་ཡི་གེས་མཆོད། །སྔགས་ནི། ༀ་ཏཱ་རེ་ཏུད་ཏཱ་རེ་ཏུ་རེ་སྭཱ་ཧཱ། ཆོས་ཀྱི་ཕྱག་རྒྱ་མཐའ་ཡས་མཆོག །སྒྲོལ་མས་ལེགས་པར་རབ་ཏུ་གནས། །གསང་ཆེན་བཞིན་དུ་ཐམས་ཅད་ལ། །བཅུད་ཀྱིས་ལེན་དང་འདྲ་བའི་མཆོག །ཀུན་དུ་ཀུན་ཚེ་ཐམས་ཅད་དུ། །དངོས་གྲུབ་ཐམས་ཅད་སྩོལ་བར་མཛད། །སྒྲོལ་མའི་སྒྲུབ་པའི་ཐབས་སོ།། །།དཀྱིལ་འཁོར་ཆེན་པོའི་དབུས་སུ་ནི། །རྣལ་འབྱོར་དབང་ཕྱུག་ཆེན་མོ་མཆོག །ཕྱག་བཞི་སྤྱན་ནི་གསུམ་པ་དང་། །རལ་པའི་ཅོད་པན་དག་གིས་བརྒྱན། །འདམ་བུ་མདའ་རྒྱུའི་མདོག་ལྟར་དཀར། །དཔའ་བ་ལ་སོགས་ཉམས་ཀྱིས་བརྒྱན། །བརྩོན་འགྲུས་ཆེན་མོ་འཇིགས་སེལ་མ། །ཟླ་བའི་དཀྱིལ་འཁོར་དབུས་གནས་པར། །རབ་ཏུ་འབར་བའི་མེ་བཞིན་དུ། །ཤིན་ཏུ་གསལ་བའི་གཟི་བརྗིད་ཅན། །ཧཱུྃ་གི་ཡི་གེ་ཟབ་མོའི་སྒྲ། །ས་གསུམ་པོ་ནི་འཁྲུག་པར་མཛད། །ཁྲོ་གཉེར་ཅན་ཞེས་ལེགས་པར་གྲགས། །སྔགས་ཀྱི་ཕྲེང་བས་རྣམ་པར་བརྒྱན། །སྔགས་ནི། ༀ་བྷ་ཡ་ནཱ་ས་ནི། ཏྲཱ་ས་ནི་ཏྲཱ་སེ། ཏྲཱ་ས་ཡ། བྷྲྀ་ཀུ་ཊི་ཏ་ཊཱི། བེ་ཏཱ་ཌི་བེ་ར་ཌི་ཤྭེ་ཏེ་ཤྭེ་ཏ་ཛ་ཊི་ནི། ༀ་ཊཀྐི་ཧཱུྃ་ཛཿསྭཱ་ཧཱ། གསང་སྔགས་འདི་ནི་བརྩོན་འགྲུས་ཆེ། གསང་སྔགས་ཀུན་གྱི་བདག་ཉིད་མཆོག །འགྲོ་བ་ཀུན་ཀྱང་འགུགས་བྱེད་ན། །གདུག་པའི་སེམས་ལྟ་སྨོས་ཅི་དགོས། །ཁྲོ་གཉེར་ཅན་གྱི་སྒྲུབ་པའི་ཐབས་སོ།། །།ཉི་མའི་དཀྱིལ་འཁོར་དབུས་གནས་པར། །ཟླ་བའི་དཀྱིལ་འཁོར་རྡོ་རྗེ་ལྡན། །རྡོ་རྗེའི་ཕྲེང་བས་ཡོངས་སུ་བསྐོར། །གཟི་བརྗིད་དཀྱིལ་འཁོར་ཀུན་ནས་དཀྲིས། །དེར་གནས་རྟག་ཏུ་ལྷ་མོ་ནི། །སྟོབས་

ཆེན་པྲི་ཡང་ཀུ་ལྟར་ལྗང་། །ཕྱག་བཞི་པར་དེ་བསམ་པར་བྱ། །རྒྱན་རྣམས་ཀུན་གྱིས་རྣམ་པར་བརྒྱན། །རྣལ་འབྱོར་མ་རྣམས་ཆེར་ཞི་བ། །དངོས་གྲུབ་ཐམས་ཅད་རབ་སྩོལ་མ། །སྔགས་ཀྱི་ཡི་གེ་ཕྲེང་བ་ཆེ། །རྡོ་རྗེའི་དབུས་སོང་རབ་ཏུ་གནས། །ཁྲོ་བོ་ཧཱུྃ་མཛད་གང་བའི་མཐའ། །དཔའ་བའི་ཉམས་ལ་སོགས་པར་ལྡན། །ལྷ་མོ་འཇིག་རྟེན་གསུམ་རྨོངས་བྱེད། །དངོས་གྲུབ་ཆེན་པོ་རབ་སྩོལ་མ། །སྐད་ཅིག་ཙམ་གྱིས་འགྲོ་བ་ཀུན། །ངེས་པར་དབང་དུ་བྱེད་པར་འགྱུར། །རྡོ་རྗེ་རླུང་གི་ཕྲེང་བ་ཆེ། །རྡོ་རྗེའི་འཁོར་ལོ་རབ་ཏུ་གནས། །འཇིག་པ་ཆེན་པོའི་མེ་ལྟར་དྲག །སྣང་བ་ཆེན་མ་སྟོབས་མོ་ཆེ། །པདྨ་རཱ་གའི་རྣམ་པ་འདྲ། །རྡོ་རྗེ་འབར་བས་རྣམ་པར་བརྒྱན། །མཚན་ནི་མཱ་མ་ཀཱི་ཞེས་བྱ། །ལྷ་མོ་འཇིག་རྟེན་གསུམ་གྱིས་མཆོད། །སྔགས་ནི། ༀ་ཀུ་ལ་དྷཱ་ཏྲཱི་ཡེ་ན་མཿ། ཤྃ་ཀ་རེ། ཤཱནྟིཾ་ཀ་རེ། གྷུཊྚ་གྷུཊྚ་གྷུཊྚི་ནི། གྷཱ་ཏ་ལ་གྷུ་ཊི་ནི་སྭཱ་ཧཱ། ༀ་ཀུ་ལན་དྷཱ་རི་བན་དྷ་བན་དྷ་ཧཱུྃ་ཕཊ། གསང་སྔགས་འདི་ནི་དོན་གྱི་མཆོག །སངས་རྒྱས་ཀུན་གྱིས་གསུངས་པ་ཡིན། །ས་གསུམ་པོ་ནི་འགུགས་བྱེད་ཅིང་། །ཚངས་པ་ལ་སོགས་ལྷ་རྣམས་ཀུན། །འགྲོ་བ་ཐམས་ཅད་འགུགས་བྱེད་ལ། །རང་གི་དབང་དུ་གནས་པའང་ཡིན། །མཱ་མ་ཀཱི་སྒྲུབ་པའི་ཐབས་སོ།། །།རླུང་གི་དཀྱིལ་འཁོར་དྲག་པོ་ལ། །རྡོ་རྗེ་ལུ་གུ་རྒྱུད་ཀྱིས་བསྐོར། །དེ་ཡི་དབུས་སུ་སྣང་བ་ཆེ། །ཟླ་བའི་གཟུགས་ཀྱིས་རྣམ་པར་བརྒྱན། །དེས་སྤྲོས་པ་ལས་བདག་ཉིད་ནི། །རྡོ་རྗེ་ལུ་གུ་རྒྱུད་ཀྱི་སྐུ། །ཕྱག་བཞི་མ་ལ་ལྷ་མོ་དེ། །རྡོ་རྗེ་ཡི་ནི་རྒྱན་གྱིས་བརྒྱན། །དམར་པོ་འབར་བ་དེ་ཡིས་ནི། །ས་གསུམ་པོ་ནི་འཆིང་བར་མཛད། །ཚངས་པ་ཁྱབ་འཇུག་དབང་ཕྱུག་ཆེ། །བཀུག་ནས་དབང་དུ་མཛད་པར་གནས། །དངོས་གྲུབ་ཐམས་ཅད་འཛིན་པ་དང་། །དེ་ཡི་ཐུགས་ཀར་རྡོ་རྗེ་ཆེ། །འབར་བའི་ཕྲེང་བ་འཁྲིགས་པའི་འོད། །དེ་ཡི་འབར་བ་ལྕགས་སྒྲོག་གི། །རྣམ་པ་རྡོ་རྗེའི་མཚན་མས་མཚན། །ངེས་པར་ཕྱུང་ནས་དེ་དག་ཀུན། །ཆོས་དབྱིངས་མཉམ་དང་མི་མཉམ་པའི། །འཇིག་རྟེན་ཁམས་ནི་མཐའ་དག་ཏུ། །ཀུན་ནས་རྣམ་པར་བཀང་ནས་ཀྱང་། །བསྒོམ་བྱ་རྡོ་རྗེ་ཐམས་

ཅད་དུ། །ཁྲོ་བོ་དང་ལྡན་སྤྲོ་བའི་ཞལ། །ལྟོ་བ་འཕྱང་ཞིང་སྐུ་ཆེ་བ། །མཆེ་བ་བཞི་ཡིས་རྣམ་པར་བརྒྱན། །འབར་བ་ཡི་ནི་ཕྲེང་བ་གསལ། །གཟུགས་མཛེས་དྲག་པའི་གཟུགས་དང་ལྡན། །སྔགས་ནི། ༀ་བཛྲ་ཤྲྀཾ་ཁ་ལཱ་ཡཱདྷི་པ་ཏ་ཡེ། མ་ཧཱ་བ་ལཱ་ཡ། མ་ཧཱ་བིདྱཱ་རཱ་ཛཱ་ཡ་ཏེ་པྲ་ཛྭ་ལི་ཏ། ཧསྟཱ་ཡ་ན་མོ་ནཱི་ལ་ཀཎྛཱ་ཡ་ཀི་རཱ་ཏ་རཱུ་པ་ལམྦོ་ད་རཱ་ཡ། བྷྲྀ་ཀུ་ཊཱི་མུ་ཁཱ་ཡ། མཱ་ཛཱར་མུ་ཁཱ་ཡ། ཙ་ཏུ་དྃཥྚཱ་ཀ་རཱ་ལཱ་ཡ། ཨེ་ཧྱེ་ཧི་ཨ་སྱ་ཤ་རཱི་ར། མ་ནུ་པྲ་བི་ཤྱ། ཤི་རཾ་གྲྀཧྞ། གྲླི་བ་བ་གྲྀཧྞ། ཧསྟ་པཱ་དཾ་གྲྀཧྞ་བི་ཥ། ཨཱ་བེ་ཤ་ཡ། ཀྃ་པ་ཡ། ཀྃ་པ་ཡ། བྷྲ་མ་ཡ། བྷྲ་མ་ཡ། མཎྜ་ལ་མ་དྷྱེ། བི་ཀུརྦྦ། བི་ཀུརྦྦ། ཙཱུརྞྞ་ཙཱུརྞྞ། ཀུཊྚ་ཀུཊྚ། སྥོ་ཊ་ཡ་སྥོ་ཊ་ཡ། མརྨཱ་ཎི། ནི་ཀྲྀནྟ་ཡ། ཧྲྀ་ད་ཡ། ཙྪིནྡ། བལ་བལ། ཀིཉྩི་རཱ་ཡ་སི། དེ་བ། ནཱ་ག །ཡཀྵ། རཱཀྵ་ས། པི་ཤཱ་ཙཱན་སཱ་ད་ཡ། ས་མ་ཡ་མ་ནུ་སྨ་ར། ཛཱ་ཏི་མ་ནུ་སྨ་ར། ཧཱ་ཧཱ། ནི་དྷི་ནི་དྷི། ནི་ཥི་ནི་ཥི། བཛྲ་ཤྲྀཾ་ཁ་ལཱ། ཨཱཛྙཱ་པ་ཡ་ཏི་སྭཱ་ཧཱ། ༀ་བཛྲ་ར་ཎི་ཧཱུྃ་ཕཊ། ༀ་བཛྲི་ཎི་ཧཱུྃ་ཕཊ། ༀ་བཛྲ་ཀཱ་ལི་ཧཱུྃ་ཕཊ་སྭཱ་ཧཱ། གསང་སྔགས་འདི་ཡི་སྦྱོར་བ་ཡིས། །བཅུད་ཀྱིས་ལེན་ནི་བདེ་བ་དང་། །འགྲོ་བ་ཐམས་ཅད་འབེབས་པ་དང་། །གདུག་པ་རྣམས་ནི་འཆིང་བ་དང་། །ཚངས་པ་ལ་སོགས་ལྷ་རྣམས་དང་། །ལྷ་དང་ལྷ་མིན་ལྟོ་འཕྱེ་ཆེ། །འཇིག་རྟེན་སྐྱོང་དང་ཀླུ་རྣམས་ཀྱང་། །རང་གི་གནས་ནས་བསྐྱོད་ནས་ནི། །གྲུབ་པ་ཀུན་གྱི་དངོས་གྲུབ་ནི། །དངོས་གྲུབ་འགུགས་པར་འདོད་པ་ཡིས། །ཐམས་ཅད་གུས་པས་སྦྱིན་པར་བྱེད། །བུད་མེད་གཟུགས་ཀྱིས་བསྒྲུབ་པར་བྱ། །རྡོ་རྗེ་ལུ་གུ་རྒྱུད་མའི་སྒྲུབ་པའི་ཐབས་སོ།། །།ཟླ་བའི་དཀྱིལ་འཁོར་དབུས་གནས་པར། །པདྨ་དཀར་པོ་རབ་ཏུ་གནས། །ཕྱག་བཞི་པ་ལ་དུ་མའི་གཟུགས། །དུང་དང་ཀུནྡ་ཟླ་བ་འདྲ། །ཐུགས་ཀྱི་རྡོ་རྗེའི་དེ་ཉིད་ཡིན། །རྡོ་རྗེའི་དཀྱིལ་འཁོར་དབུས་སུ་ནི། །ཞི་བ་ལ་སོགས་ཉམས་དང་ལྡན། །ཆོས་རྣམས་ཀུན་གྱི་བདག་སྐྱེས་མཆོག །རྣལ་འབྱོར་པས་ནི་རྟག་ཏུ་བསྒོམ། །སངས་རྒྱས་བྱེ་བ་ཡང་དག་འབྱུང་། །དེར་བདག་ཡང་དག་བསྒོམ་པ་ནི། །སྐུལ་བྱེད་མ་ཞེས་ཡོངས་སུ་གྲགས། །སྔགས་ཀྱི་ཕྲེང་བའི་ཡི་གེ་ལྡན། །ཀུན་ནས་རྣམ་པར་འཕྲོ་བྱེད་པ། །

ནམ་མཁའི་ཁམས་ནི་ཡོངས་གང་བ། །ཇི་སྲིད་དེ་ཡི་སྤྱོད་ཡུལ་ཡང་། །དེ་སྲིད་དེ་ཡི་འོད་ཟེར་བསྒོམ། །རྣལ་འབྱོར་ཡེ་ཤེས་ཀྱིས་རབ་སྤྲུལ། །སྔགས་ནི། ༀ་ཙ་ལེ་ཙུ་ལེ་ཙུནྡེ་སྭཱ་ཧཱ། འདི་ཡི་སྔགས་ཀྱི་མཆོག་གཙོ་བོ། །སངས་རྒྱས་ཀུན་གྱིས་མཆོད་པ་པོ། །མཚུངས་པ་མེད་པའི་དངོས་གྲུབ་སྟེར། །ལྷ་དང་ལྷ་མིན་བཅས་པས་མཆོད། །འདི་ཡི་སྡིག་ཀུན་འཛད་བྱེད་ཅིང་། །ཕུན་སུམ་ཚོགས་ཀུན་རབ་སྩོལ་མཛད། །པདྨའི་ཕྱག་རྒྱ་ཡང་དག་ལྡན། །སངས་རྒྱས་ཉིད་ཀྱང་སྟེར་བྱེད་པའོ། །སྐུལ་བྱེད་མའི་སྒྲུབ་པའི་ཐབས་སོ།། །།གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །སངས་རྒྱས་ཀུན་བདག་དགྱེས་པ་ནི། །རྡོ་རྗེ་སེམས་དཔའ་བདེ་བའི་མཆོག །འདི་ནི་རང་བྱུང་བཅོམ་ལྡན་འདས། །གཅིག་པུ་ཉིད་ནི་ལྷག་པའི་ལྷ། །སངས་རྒྱས་ཀུན་དང་མཉམ་སྦྱོར་བ། །མཁའ་འགྲོ་མ་ཡི་དྲ་བ་སྡོམ། །འདོད་ཆགས་མེད་ཅིང་ཆགས་བྲལ་མེད། །དབུ་མར་དམིགས་པར་མི་འགྱུར་རོ། །བུད་མེད་ཀུན་གྱི་སྒྱུ་མའི་རྒྱ། །འདི་ནི་གཉིས་མེད་ཐེག་པའི་མཆོག །སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ནུས་པ་ཡི་ནི་རང་བཞིན་གྱིས། །རང་བཞིན་ཉིད་ཀྱིས་དེ་གྲུབ་བོ། །འཇིག་རྟེན་གསུམ་གྱི་བུད་མེད་འདིས། །བཀུར་བར་བྱ་བ་འོས་པ་ཡིན། །ངན་སྦྱོང་རྣམས་ཀྱིས་ཀྱང་འགྲུབ་སྟེ། །རྙེད་པ་ཀུན་དང་བདེ་དང་སྤྲོ། །ཐམས་ཅད་བུད་མེད་སྒྱུ་མས་འགྲུབ། །རང་གི་ངོ་བོ་ཡོངས་བསྒྱུར་བ། །སྣ་ཚོགས་སྒྱུ་མའི་ཕྱག་རྒྱ་འདི། །ཤེས་རབ་ཕ་རོལ་ཕྱིན་མར་བཤད། །ཀུན་ལ་སྣ་ཚོགས་ཕྱག་རྒྱ་ནི། །ཀུན་ལ་སྣ་ཚོགས་སྡོམ་པ་ཡིས། །སངས་རྒྱས་ཀུན་དང་མཉམ་པར་སྦྱོར། །སྟོང་པ་ཉིད་ཀྱིས་དེ་ཉིད་བསྐུལ། །ཀུན་ལ་ཀུན་ནས་ཐམས་ཅད་དུ། །རྣམ་ཀུན་ཀུན་ཚེ་རང་ཉིད་ཀྱིས། །སངས་རྒྱས་ཐམས་ཅད་བརྟན་དང་གཡོ། །ཐམས་ཅད་དངོས་པོ་རང་ཉིད་འགྱུར། །སེམས་དང་སེམས་ཅན་ཏིང་འཛིན་དང་། །བྱང་ཆུབ་སྤྱོད་པ་སྣ་ཚོགས་ཉིད། །ས་དང་ཕ་རོལ་ཕྱིན་སྤྱོད་པ། །དབང་ཉིད་དུ་ཡང་དེ་བཤད་དོ། །བདུད་དང་བདུད་ལས་རྒྱལ་བ་ཉིད། །སངས་རྒྱས་རྡོ་རྗེ་དེ་བཞིན་

གཤེགས། །ཐོག་མ་ཐ་མ་མེད་ཞི་བ། །བྱང་ཆུབ་སངས་རྒྱས་བཅོམ་ལྡན་དེའོ། །རྡོ་རྗེ་རྡོ་རྗེ་འཛིན་པ་ཉིད། །པདྨ་དེ་བཞིན་པདྨ་འཛིན། །ནོར་བུ་ནོར་བུ་འཛིན་པ་ཉིད། །སྣ་ཚོགས་དེ་བཞིན་སྣ་ཚོགས་འཛིན། །རལ་གྲི་རལ་གྲི་འཛིན་རྒྱལ་པོ། །འཁོར་ལོ་དེ་བཞིན་འཁོར་ལོ་འཛིན། །འཇིག་རྟེན་གསུམ་རྒྱལ་ཉིད་དང་ནི། །འདི་རྣམས་ཀྱི་ཡང་རིགས་ཉིད་འགྱུར། །དེ་ཉིད་ཆགས་དང་ཆགས་བྲལ་བ། །འདོད་དང་ཐར་པ་རུ་ཡང་འགྱུར། །དུས་གསུམ་དང་ནི་སྲིད་གསུམ་མཆོག །འཇིག་རྟེན་གསུམ་དང་ཁམས་གསུམ་པ། །བརྟན་པ་ཐམས་ཅད་དེ་ཉིད་དེ། །རྣམ་པ་སྣ་ཚོགས་ཉིད་དུ་འགྱུར། །གཡོ་བ་ཀུན་ནས་སྣ་ཚོགས་པ། །ཐམས་ཅད་དུ་ནི་དེ་འགྱུར་རོ། །དེ་ལ་སོགས་པ་སྣ་ཚོགས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་ཁམས་ཀྱི་མཐའ་ཀླས་པ། །དངོས་པོ་ཀུན་དུ་དེ་འགྱུར་རོ། །དེ་ཉིད་བཅོམ་ལྡན་རྣལ་འབྱོར་ཏེ། །གཅིག་པུ་ཉིད་ནི་ལྷག་པའི་ལྷ། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་དེ་བཞིན་གཤེགས། །དཔལ་ལྡན་སྒྱུ་མ་ཆེན་མོ་འཆང་། །རྣམ་སྣང་རྟག་པ་ཐམས་ཅད་དུ། །རྣལ་འབྱོར་དབང་ཕྱུག་གཙོ་ཆེན་ཁྱབ། །སངས་རྒྱས་འཁོར་ལོ་ཅན་མི་བསྐྱོད། །ཆེ་དང་རིན་ཆེན་འབྱུང་སྟོབས་ཆེ། །ཚེ་དཔག་མེད་པ་ཀུན་ནས་མཆོག །དོན་ཡོད་སྣ་ཚོགས་མཛད་པ་དང་། །རྡོ་རྗེ་སེམས་དཔའ་བལྟ་ན་སྡུག །དགུག་པ་མཆོག་གི་སྦྱོར་བ་དང་། །ལེགས་པར་མཛད་པ་དེ་ཉིད་ཡིན། །རིན་ཆེན་སྒྲོན་མ་དེ་བཞིན་ཏོག །རྡོ་རྗེ་བཞད་པ་སྣང་བ་ཆེ། །རྡོ་རྗེ་ཆོས་དང་རྣོ་བ་ཆེ། །རྒྱུ་དང་སྨྲ་མཆོག་བདུད་རྩི་དང་། །ལས་དང་གོ་ཆ་གནོད་སྦྱིན་ཆེ། །ཁུ་ཚུར་དེ་བཞིན་གཤེགས་པ་ཀུན། །དེ་ཉིད་བཅོམ་ལྡན་རྣལ་འབྱོར་འདི། །རྡོ་རྗེ་སེམས་དཔའ་སྟོབས་པོ་ཆེ། །རྡོ་རྗེ་ཧཱུྃ་མཛད་ཧཱུྃ་མཛད་དང་། །རྟ་མགྲིན་ཞེས་ནི་རྣམ་པར་གྲགས། ། ཧེ་རུ་ཀ་དཔལ་རྡོ་རྗེ་ཆེ། །མཆོག་གི་དབང་ཕྱུག་གཤིན་རྗེ་གཤེད། །ཁྲོ་བོ་གཟེགས་མ་སྣང་བ་ཆེ། །རྡོ་རྗེ་མེ་ནི་འོད་ཆེན་པོ། །གཟུགས་རྣམས་ཀྱི་ནི་མཆོག་གཅིག་པུ། །ཏིང་ངེ་འཛིན་ལས་དབང་སྒྱུར་མ། །ཤེས་རབ་ཕ་རོལ་ཕྱིན་མཆོག་གཙོ། །ས་དང་ཕ་རོལ་ཕྱིན་པ་སྟོབས། །ཚངས་

པའི་གནས་པ་ཆེན་པོ་བཞི། །དབང་ནི་མཆོག་ཏུ་འབར་བ་དང་། །དྲན་པ་ཉེ་བར་གཞག་པ་བཞི། །དབང་པོ་རྣམས་དང་སྟོབས་རྣམས་དང་། །རྗེས་དྲན་དྲུག་པོར་གྱུར་པ་གང་། །བསྒོམ་པར་བྱ་བར་རབ་ཏུ་གནས། །དེ་ཉིད་བཅོམ་ལྡན་གཅིག་པུ་སྟེ། །བྱང་ཆུབ་ཡན་ལག་བདུན་བཏགས་པ། །མཐའ་གཅིག་ཡོངས་སུ་རྫོགས་པར་འགྱུར། །སུམ་ཅུ་རྩ་གཉིས་མཆོག་གི་མཚན། །འཇིག་རྟེན་འདས་པའི་ལམ་པོ་ཆེ། །འཕགས་ལམ་ཡན་ལག་བརྒྱད་བཏགས་པ། །སྟོབས་བཅུ་ཡི་ནི་བཅུ་པ་ཉིད། །སངས་རྒྱས་ཆོས་ཀྱི་བདག་ཉིད་གནས། ། བྱང་ཆུབ་ཕྱོགས་ཀྱི་ཚོས་ཆེན་པོ། །རྣམ་པར་དབྱེ་བ་སུམ་ཅུ་བདུན། །མཐར་གྱིས་གནས་པའི་སྙོམས་འཇུག་ནི། །དགུ་ལ་གནས་པར་གྱུར་པ་དང་། །བསྡུ་བའི་དངོས་པོ་ཆེན་པོ་བཞིས། །སེམས་ཅན་བསྡུ་བས་སྡུད་པ་དང་། །སོ་སོ་ཡང་དག་རིག་པ་བཞི། །དེ་བཞིན་བསྲུང་བ་མི་མངའ་བ། །སྐལ་བ་ཆེན་པོའི་མི་འཇིགས་པ། །མཆོག་ཏུ་གྱུར་པ་ཉིད་དང་ནི། །བསམ་གཏན་གཟུགས་མེད་བཞི་ཕྲག་གཉིས། །ཚད་མེད་པ་ཡང་དེ་བཞིན་ནོ། །བྱང་ཆུབ་སེམས་ཀྱི་སྤྱོད་པ་གཙོ། །བདེན་པ་བཞི་ནི་སྟོན་པ་པོ། །ཀུན་ནས་ཉོན་མོངས་རྣམ་པར་བྱང༌། །ཟག་བཅས་ཟག་པ་མེད་པའི་མཆོག །དེ་ཉིད་བཅོམ་ལྡན་རྣལ་འབྱོར་ཏེ། །དབང་ཕྱུག་མཆོག་གི་དབང་ཕྱུག་དང་། །སྐྱེ་དགུའི་བདག་པོ་སྐྱེ་དགུའི་མགོན། །མཆོག་གི་བདག་ཉིད་ཅེས་སུ་བརྗོད། །ཀུན་རྫོབ་བརྗོད་པ་ཐམས་ཅད་དང་། །སྒྲ་རྣམས་ཀྱི་ནི་སྤྱོད་ཡུལ་འགྱུར། །བརྗོད་དུ་མེད་ཅིང་སྤྲོས་པ་བྲལ། །སྟོང་པ་མཁའ་མཉམ་མཚུངས་པ་མེད། །ཚིག་མཐའ་སྒྲ་ཡིས་རྣམ་དགོད་པ། །འཇིག་རྟེན་ཐ་སྙད་ཚུལ་དུ་རྟོགས། །དེ་ཚེ་ལུས་སོགས་དབྱེ་བ་ཡིས། །ས་རྣམས་ཀྱིས་ནི་ཡོངས་སུ་བརྟགས། །སྐུ་ནི་སྤྲུལ་པ་ཉིད་དུ་འགྱུར། ། ལོངས་སྤྱོད་རྫོགས་པ་ཡང་དག་བརྙེས། །རྡོ་རྗེའི་སྐུ་དང་དེ་བཞིན་དུ། །ཡེ་ཤེས་སྐུ་སོགས་ཡོངས་སུ་བརྟགས། །མཐའ་ཡས་སྐུ་དང་སྐུ་ཆེན་པོ། །རིན་ཆེན་སྐུ་ནི་འོད་བྱེད་པ། །པདྨའི་སྐུ་ནི་སྣང་བ་ཆེ། །ཐམས་ཅད་སྐུ་ནི་ལས་བཟང་བྱེད། །རྟོགས་པར་བྱ་བ་ལས་ཀྱི་སྐུ། །

རྣམ་པ་གསུམ་དུའང་དབྱེ་བར་བྱ། །དེ་ཉིད་བཅོམ་ལྡན་རྣལ་འབྱོར་ཏེ། །བྱང་ཆུབ་སེམས་ནི་འོད་གསལ་བ། །ཀུན་དུ་འོད་ཀྱི་ས་ཆེན་པོ། །ཉི་མའི་དཀྱིལ་འཁོར་གཟི་བརྗིད་ལྡན། །གཉིས་པ་བདུད་རྩིའི་འོད་ཅེས་བྱ། །ཟླ་བའི་འོད་ནི་འོད་གསལ་བ། །གསུམ་པ་ནམ་མཁའི་འོད་ཅེས་བྱ། །མཁའ་བཞིན་ལེགས་པར་རབ་ཏུ་གནས། །རྡོ་རྗེ་འོད་མཐའ་གང་ཞིག་ས། །བཞི་པ་དེ་ནི་ཡིད་འོང་བ། །བསམ་པ་བརྟན་པའི་སྦྱོར་བ་ཡིས། །རྡོ་རྗེ་ཞེས་ནི་ཡོངས་སུ་བསྒྲགས། །ལྔ་པ་རིན་ཆེན་འོད་ཅེས་བྱ། །དབང་བསྐུར་བར་ནི་རབ་ཏུ་གནས། ། དྲུག་པ་པདྨོ་འཆང་ཞེས་བྱ། །པད་བཞིན་རབ་ཏུ་རྣམ་པར་སྣང་། །རང་བཞིན་གྱིས་ནི་ཆོས་ཉིད་དག །བདག་གི་མེད་ཅིང་ཡོངས་བཟུང་མེད། །བདུན་པ་ལས་ཀྱི་འོད་ཅེས་བྱ། །སངས་རྒྱས་ཕྲིན་ལས་མཛད་པ་ཆེ། །བརྒྱད་པ་དཔེ་མེད་པ་ཞེས་བྱ། །དཔེ་ནི་དེ་ལ་ཡོད་མ་ཡིན། ། དགུ་པ་དཔེ་དང་བྲལ་ཞེས་བྱ། །དཔེ་རྣམས་ཐམས་ཅད་རབ་འཇུག་པ། །བཅུ་པ་ཤེས་རབ་འོད་ཅེས་བྱ། །སངས་རྒྱས་ས་ནི་བླ་ན་མེད། །བཅུ་གཅིག་ཀུན་མཁྱེན་ཉིད་ཅེས་བྱ། །ས་ཆེན་པོ་ནི་འོད་གསལ་བ། །བཅུ་གཉིས་སོ་སོར་བདག་རིག་པ། །རྣལ་འབྱོར་ཡེ་ཤེས་ཡོངས་རྫོགས་ཉིད། །ས་ཆེན་པོ་ནི་འདི་དག་རྣམས། །སངས་རྒྱས་རྣམས་ཀྱིས་དོན་དམ་དུ། །སངས་རྒྱས་དང་ནི་སངས་རྒྱས་ཆོས། །རྣལ་འབྱོར་ཡེ་ཤེས་གང་བརྗོད་པ། །ཐམས་ཅད་ཉིད་ནི་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་སྔགས་ཀྱི་དེ་ཁོ་ན་ཉིད་དོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་ཐོག་མ་དང་ཐ་མ་མེད་པ་ཆོས་ཀྱི་འཁོར་ལོ་ཆེན་པོ་བསྐོར་བ་རྣལ་འབྱོར་གྱི་དབང་ཕྱུག་ཆེན་པོ་ལ་གསོལ་བ་བཏབ་པ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་དག་གིས་གསོལ་བ་བཏབ་པའི་ཚིག་གི་དེ་མ་ཐག་ཉིད་དུ་དེ་བཞིན་གཤེགས་པ་ཐམས་ཅད་མཉམ་པ་ཉིད་དུ་དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་མཉམ་པར་གཞག་ནས་མཉམ་པར་གཞག་པའི་དེ་མ་ཐག་ཏུ་ཡང་

བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ལ་རྗེས་སུ་བཅུག་ནས་བཅོམ་ལྡན་འདས་རྣམ་པར་སྣང་མཛད་ཀྱི་ལུས་དང་ངག་དང་ཡིད་མཉམ་པ་ཉིད་དུ་བྱིན་གྱིས་བརླབས་ནས་རྣམ་པར་བཞུགས་སོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུར་བདག་ཉིད་རྟོགས་ནས་ཏིང་ངེ་འཛིན་ལས་བཞེངས་ཏེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་དཀྱིལ་འཁོར་ཆེན་པོ་ཡོད་དོ་ཞེས་གསུངས་ནས་ཅང་མི་གསུང་བར་བཞུགས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱིས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ཀྱི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་བཏུད་དེ་འདི་སྐད་ཅེས་གསོལ་ཏོ། །བཅོམ་ལྡན་འདས་བསྟན་དུ་གསོལ། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་ཀྱི་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་དཀྱིལ་འཁོར་ཆེན་པོ་གང་དུ་ཞུགས་པས་སེམས་ཅན་རྣམས་ཐབས་ཆུང་ངུས་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་ཐོབ་པར་འགྱུར་བ་བཀའ་སྩལ་དུ་གསོལ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ལེགས་སོ་ལེགས་སོ། ། འཇམ་དཔལ་ཁྱོད་གང་སླར་ཡང་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་རྗེས་སུ་ཞུགས་པ་ནི་འཇམ་དཔལ་ཁྱོད་ལེགས་སོ་ལེགས་སོ། །དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་དཀྱིལ་འཁོར་ཆེན་པོ་བཤད་པར་བྱའོ། ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཆེན་པོ་རྡོ་རྗེས་བྱིན་གྱིས་རློབ་པ་ཐེག་པ་ཆེན་པོའི་མངོན་པར་རྟོགས་པ་ཞེས་བྱ་བའི་དཀྱིལ་འཁོར་

འདི་བཀའ་སྩལ་པ། དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །དམ་ཚིག་ཆེན་པོ་རྡོ་རྗེ་མཆོག །སྙིང་པོ་ཆེན་པོའི་རྒྱན་ཅེས་བྱ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་མཉམ་པར་ལྡན། ། འོད་ཟེར་འབར་བས་འཁྲིགས་པའི་འོད། །རྡོ་རྗེ་སྙིང་པོ་ཡོངས་བསྐོར་བ། །བྱང་ཆུབ་ཤིང་གིས་ཉེ་བར་མཛེས། །རྡོ་རྗེ་དཀྱིལ་འཁོར་གྲྭ་རྣམས་དང་། །སྒོ་དང་སྒོ་ཁྱུད་མཚམས་རྣམས་སུ། །རྡོ་རྗེ་རིན་ཆེན་རྣམས་ཀྱིས་སྤྲས། །རྡོ་རྗེ་པདྨ་ཐམས་ཅད་དུ། །ལས་ཀྱི་རྡོ་རྗེ་ཐམས་ཅད་དུ། །འབར་བའི་ཕྲེང་བ་འཁྲིགས་པའི་འོད། །དྲིལ་བཅས་སྣ་ཚོགས་མཆོག་དང་ལྡན། །རྒྱལ་མཚན་བསྒྲེང་བ་རླུང་བསྐྱོད་པའི། །གོས་དང་མེ་ཏོག་ཆུན་པོས་སྤྲས། །ཟླ་བ་ཕྱེད་པས་ཉེ་བར་མཛེས། །རལ་གྲི་རྡོ་རྗེ་ཨུཏྤ་ལ། །ལྕགས་ཀྱུ་ལ་སོགས་སྣ་ཚོགས་བརྒྱན། །ཆུ་ཡིས་དཀྱིལ་འཁོར་ཡོངས་བསྐོར་བ། །ཁོར་ཡུག་བཞིན་དུ་རྣམ་པར་གནས། །དེ་ལའང་སྒོ་དང་སྒོ་ཁྱུད་སོགས། །མཁས་པ་ཡིས་ནི་སྤྲོ་བར་བྱ། །དེ་ཡི་ནང་དུ་བྲི་བར་བྱ། །འཁོར་ལོ་ཆེན་པོ་རབ་ཏུ་གནས། །ཆ་བརྒྱད་ཀྱིས་ནི་ཡོངས་སུ་བསྐོར། །དཀྱིལ་འཁོར་ལེགས་པར་རྣམ་པར་སྤྲས། །རྡོ་རྗེའི་ཐིག་གིས་ཡོངས་སུ་བསྐོར། །རྡོ་རྗེའི་འཁོར་ལོ་ཆེར་འབར་བ། །དེ་ཡི་དབུས་སུ་སྙིང་པོ་ཆེ། །རྡོ་རྗེའི་སྙིང་པོ་ཞེས་སུ་བཤད། །དེ་ཡི་སྟེང་དུ་རྡོ་རྗེ་ཆེ། །རྡོ་རྗེ་པདྨ་རབ་ཏུ་གནས། །པདྨའི་སྟེང་དུ་རྡོ་རྗེ་ཆེ། །འཁོར་ལོའི་དཀྱིལ་འཁོར་དག་གིས་བརྒྱན། །གསང་བ་ཆེ་བ་ཟླ་བས་བརྒྱན། །འགྲེལ་པའི་བཤད་པར་འདི་བཞིན་འདུག །དུང་དང་ཀུནྡ་ཟླ་བ་དཀར། །སངས་རྒྱས་ཀུན་གྱི་གདན་དུ་བཤད། །དེ་ཡི་སྟེང་དུ་ལེགས་བཞུགས་པ། །ཁྱབ་བདག་རྣམ་པར་སྣང་མཛད་ཆེ། །ཟླ་བའི་མདོག་ལྡན་འཛུམ་བཅས་པ། ། ཏིང་འཛིན་ལྡན་གནས་སྡིག་པ་བཅོམ། །རྡོ་རྗེའི་ཕྲེང་བས་རྣམ་པར་སྤྲས། །སྣ་ཚོགས་འབར་བས་འཁྲིགས་པའི་འོད། །རིན་ཆེན་ཆེན་པོའི་ཕྲེང་བ་ཆེས། །སྤྲས་པ་རྣམ་པར་དགོད་པར་བྱ། །དེ་སྔགས་རྟག་ཏུ་ཤེས་བྱ་བ། །ཡི་གེ་ཡི་ནི་མཆོག་གཙོ་བོ། །ཤ་སའི་སྡེ་བ་གསལ་

བྱེད་ནི། །མཆོག་གི་དབང་ཕྱུག་རྒྱུ་གཅིག་པོ། །དྲུག་པའི་དབྱངས་ཀྱིས་ལེགས་གསལ་བ། །ཐིག་ལེ་ནཱ་དས་ལེགས་པར་བརྒྱན། །རྟེན་ཅིང་འབྲེལ་འབྱུང་འཁོར་ལོ་ཡི། །དོན་ཅན་རབ་ཏུ་བསྐྱེད་པར་བྱ། །དེ་ཉིད་བཅོམ་ལྡན་རྣལ་འབྱོར་ཅན། །གཅིག་པུ་ཉིད་ནི་ལྷག་པའི་ལྷ། །ཆོས་ཀྱི་སྐུ་ནི་ཡེ་ཤེས་ཆེ། །རྡོ་རྗེ་རྣལ་འབྱོར་དབང་ཕྱུག་བཤད། །དེ་ནས་ཡང་དེ་བཞིན་གཤེགས་པ་མི་བསྐྱོད་པ་དང་། ཡེ་ཤེས་ཀྱི་འོད་ཟེར་དང་། དེ་བཞིན་གཤེགས་པ་སྤྱན་རས་གཟིགས་དབང་ཕྱུག་གི་རྒྱལ་པོ་དང་། དེ་བཞིན་གཤེགས་པ་རྡོ་རྗེ་རྣམ་པར་གནོན་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེ་ཉིད་དུ་རང་གི་བདག་ཉིད་བྱིན་གྱིས་བརླབས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་ཕྱོགས་ཐམས་ཅད་མཉམ་པ་ཉིད་དུ་དམིགས་ནས་ཕྱོགས་བཞིར་འཁོད་དོ། ། དབང་ཆེན་དཀྱིལ་འཁོར་མི་བསྐྱོད་པ། །མེ་ཡི་དཀྱིལ་འཁོར་ཡེ་ཤེས་འོད། །ཆུ་ཡི་དཀྱིལ་འཁོར་འོད་དཔག་མེད། །རྡོ་རྗེས་རྣམ་གནོན་རླུང་དཀྱིལ་འཁོར། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོའི་དམ་ཚིག་ལས་བྱུང་བ་སེམས་དཔའ་བྱིན་གྱིས་རློབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྙིང་པོའི་རྒྱན་གྱི་སྙིང་པོ་འདི་ཉིད་ཀྱི་ཐུགས་ཀ་ནས་ཕྱུང་བའོ། །ༀ་བཛྲ་ས་ཏྭ། དེ་ནས་འདི་རྣམ་པར་ཕྱུང་བ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་རྡོ་རྗེའི་འོད་ཟེར་རྣམས་ཕྱུང་སྟེ། རྡོ་རྗེའི་འོད་ཟེར་དེ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ་གསལ་བར་གྱུར་ནས། དེ་ནས་རྡོ་རྗེའི་འོད་ཟེར་དེ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ཐམས་ཅད་ཀྱི་སྐུས་འཇིག་རྟེན་གྱི་ཁམས་རྣམས་སུ་གཤེགས་ནས་འཇིག་རྟེན་གྱི་ཁམས་ཐམས་ཅད་སྣང་བར་མཛད་དེ། སེམས་ཅན་ཐམས་ཅད་ཀྱི་དོན་བྱ་བ་མངོན་པར་རྫོགས་ནས་

སླར་ཡང་གཅིག་ཏུ་འདུས་ཏེ། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོའི་སྐུར་གྱུར་ནས། བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོའི་རྡོ་རྗེ་སྙིང་པོའི་ཐུགས་ཀར་གནས་ཏེ་ཆེད་དུ་བརྗོད་པ་འདིས་ཆེད་དུ་བརྗོད་པ། ཨེ་མ་ཧོ་རྡོ་རྗེ་སྙིང་པོ་བདག ། སངས་རྒྱས་ཡེ་ཤེས་བླ་ན་མེད། །སྙིང་པོ་ཡེ་ཤེས་རྣམ་དག་པ། །རྡོ་རྗེ་སེམས་དཔའ་ཉིད་གྱུར་ནས། །བྱང་ཆུབ་སེམས་དཔའ་བརྟན་བསྐྱེད་དེ། །སངས་རྒྱས་ཡེ་ཤེས་བླ་ན་མེད། །གང་ཞིག་བརྟན་ཕྱིར་ལུས་མིན་ཡང་། །སངས་རྒྱས་སྐུ་ཉིད་དུ་གྱུར་ཏོ། །དེ་ནས་རྡོ་རྗེའི་སྐུ་བྱང་ཆུབ་སེམས་དཔའ་ཆེན་པོ་བཅོམ་ལྡན་འདས་ཀྱི་ཐུགས་ཀ་ནས་འཐོན་ནས་བཅོམ་ལྡན་འདས་མི་བསྐྱོད་པའི་ཉེ་འཁོར་ཐམས་ཅད་རྣམ་པ་བཞིས་ཕྱེ་སྟེ། དཀར་པོ་སེར་པོ་དམར་པོ་ལྗང་གུའི་མདོག་ཏུ་མངོན་པར་སྤྲུལ་ནས་རང་གི་སྔགས་ཀྱི་ཡི་གེས་ཟླ་བའི་དཀྱིལ་འཁོར་ལ་བརྟེན་ཏེ་གནས་པར་གྱུར་ཏོ། །དགུག་པའི་ཏིང་ངེ་འཛིན་ནི། ༀ་བཛྲ་རཱ་ཛཿ། རྗེས་སུ་ཆགས་པའི་ཏིང་ངེ་འཛིན་ནི། ༀ་བཛྲ་རཱ་ག །དེ་བཞིན་གཤེགས་པ་ཐམས་ཅད་ལ་ལེགས་པར་མཛད་པའི་ཏིང་ངེ་འཛིན་ནི། ༀ་བཛྲ་སཱ་དྷུ། དེ་བཞིན་དུ་རིན་ཆེན་འབྱུང་ལྡན་གྱི་དཀྱིལ་འཁོར་ལ་དབང་བསྐུར་བའི་ཏིང་ངེ་འཛིན་ནི། ༀ་བཛྲ་རཏྣ། ཉི་མའི་དཀྱིལ་འཁོར་གྱི་ཏིང་ངེ་འཛིན་ནི། ༀ་བཛྲ་ཏེ་ཛ། དེ་བཞིན་གཤེགས་པ་ཐམས་ཅད་ཀྱི་ནམ་མཁའ་མཛོད་ཀྱི་ཏིང་ངེ་འཛིན་ནི། ༀ་བཛྲ་ཀེ་ཏུ། དེ་བཞིན་གཤེགས་པ་ཐམས་ཅད་ཀྱི་བཞད་པ་ཆེན་པོའི་ཏིང་ངེ་འཛིན་ནི། ༀ་བཛྲ་ཧཱ་ས། དེ་བཞིན་དུ་འོད་དཔག་ཏུ་མེད་པའི་དཀྱིལ་འཁོར་ཡང་ཐུགས་རྗེའི་ཏིང་ངེ་འཛིན་ནི། ༀ་བཛྲ་དྷརྨྨ། ཤེས་རབ་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ནི། ༀ་བཛྲ་ཏཱིཀྵྞ། དམ་པའི་ཆོས་ཀྱི་འཁོར་ལོའི་ཏིང་ངེ་འཛིན་ནི། ༀ་བཛྲ་ཧེ་ཏུ། དེ་བཞིན་གཤེགས་པ་ཐམས་ཅད་ཀྱི་སེམས་དཔའ་སྨྲ་བའི་ཏིང་ངེ་འཛིན་ནི། ༀ་བཛྲ་བྷཱ་ཥ། དེ་བཞིན་དུ་རྡོ་རྗེ་དོན་ཡོད་པའི་དཀྱིལ་འཁོར་ལ། ལས་སྣ་ཚོགས་པའི་ཏིང་ངེ་འཛིན་ནི། ༀ་བཛྲ་ཀརྨྨ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཏིང་ངེ་འཛིན་ནི། ༀ་བཛྲ་རཀྵ། དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་ཏིང་ངེ་འཛིན་ནི། ༀ་བཛྲ་

ཡཀྵ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཁུ་ཚུར་བཅིངས་པའི་ཏིང་ངེ་འཛིན་ནི། ༀ་བཛྲ་སནྡྷི། དེ་ནས་བཅོམ་ལྡན་འདས་རྣམ་པར་སྣང་མཛད། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱའི་དམ་ཚིག་རྡོ་རྗེ་དབྱིངས་ཀྱིས་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་ཐུགས་ཀ་ནས་འདི་ཕྱུང་ངོ་། །ༀ་བཛྲ་དྷཱ་ཏུ་ཧཱུྃ། རང་གི་རིག་པ་མཆོག་ནི། ༀ་བཛྲ་དྷཱ་ཏྭཱི་ཤྭ་རི་ཧཱུྃ་བཛྲི་ཎི། དེ་ནས་དེ་བཞིན་གཤེགས་པ་མི་བསྐྱོད་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔའི་དམ་ཚིག་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་ཐུགས་ཀ་ནས་རང་གི་རིག་པ་མཆོག་འདི་ཕྱུང་བ། ༀ་ཨ་ཀྵོ་བྷྱ་ཨྃ། ༀ་ཛྙཱ་ན་མུཥྚི་ཙིཏྟ་བཛྲེ་བཛྲི་ཎི་ཧཱུྃ། དེ་ནས་དེ་བཞིན་གཤེགས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་པོ་ཆེའི་དམ་ཚིག་གི་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་ཀྱི་ཐུགས་ཀ་ནས་རང་གི་རིག་པ་མཆོག་འདི་བཀའ་སྩལ་པ། ༀ་རཏྣ་སཾ་བྷ་བ་ཏྲཱྃ། ༀ་བཛྲ་ཛྙཱ་ན་གར་བྷ་སྟི་ཧཱུྃ། དེ་ནས་དེ་བཞིན་གཤེགས་པ་འོད་དཔག་ཏུ་མེད་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ཀྱི་དམ་ཚིག་གི་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་ཀྱི་ཐུགས་ཀ་ནས་རང་གི་རིག་པ་མཆོག་འདི་བཀའ་སྩལ་པ། ༀ་ཨ་མི་ཏཱ་བྷ་ཧྲཱིཿ། ༀ་བཛྲ་དྷཱ་རི་ཎི་ཧཱུྃ། དེ་ནས་དེ་བཞིན་གཤེགས་པ་རྣམ་པར་གནོན་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ལས་ཀྱི་དམ་ཚིག་གི་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་རིག་པ་མཆོག་འདི་བཀའ་སྩལ་པ། ༀ་ཨ་མོ་གྷ་སིདྡྷི་ཨྃ། ༀ་བཛྲ་མ་ཧཱ་བ་ལེ་ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་ཡུལ་ལ་རྣམ་པར་གཟིགས་ཤིང་། དེ་བཞིན་གཤེགས་པ་ཐམས་ཅད་མཉམ་པ་ཉིད་རྣམ་པར་སྤྲོས་པའི་སྙིང་པོ་འདི་བཀའ་

སྩལ་པ། ༀ་སརྦྦ་ཏ་ཐཱ་ག་ཏ་ས་མ་ཏཱ་ཛྙཱ་ན་བཛྲ་ཧཱུྃ། དེ་ནས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་དག་བཤད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཐམས་ཅད་མཐོང་བར་གྱུར་ཏོ། །དེ་ནས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་བདག་ཉིད་རྟོགས་ནས། རྡོ་རྗེ་མཉམ་པ་ཉིད་སྤྲོས་པའི་སྙིང་པོ་བཀའ་སྩལ་པ། ༀ་བཛྲ་ས་མ་ཏཱ་ཛྙཱ་ན་བུདྡྷ་ཧཱུྃ། དེ་ནས་འདི་བཤད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྣམས་ཕྱག་ན་རྡོ་རྗེར་མཐོང་བར་གྱུར་ཏོ། །དེ་ནས་ཕྱག་ན་རྡོ་རྗེའི་ཐུགས་ཀ་ནས་ཆོས་ཐམས་ཅད་མཉམ་པ་ཉིད་སྤྲོས་པའི་སྙིང་པོ་འདི་ཕྱུང་ངོ་། །ༀ་སརྦྦ་དྷརྨྨ་ས་མ་ཏཱ་ཛྙཱ་ན་བཛྲ་ཧཱུྃ། དེ་ནས་འདི་རྣམ་པར་ཕྱུང་བ་ཙམ་གྱིས་ཀྱང་སླར་ཡང་ཕྱག་ན་རྡོ་རྗེའི་ཐུགས་ཀར་དེ་བཞིན་གཤེགས་པ་ཐམས་ཅད་ཀྱིས་དཀྱིལ་འཁོར་ཐམས་ཅད་བྱིན་གྱིས་བརླབས་པ་མཛད་ནས། དཀྱིལ་འཁོར་ཐམས་ཅད་དུ་འཁོད་པར་མཐོང་ངོ་། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་དེ་བཞིན་གཤེགས་པ་ཐམས་ཅད་མཉམ་པ་ཉིད་སྤྲོས་པའི་སྙིང་པོ་འདི་ཕྱུང་ངོ་། །ༀ་སརྦྦ་སཏྭ་ས་མ་ཏཱ་པྲ་པཉྩ་བུདྡྷ་ཧཱུྃ། དེ་ནས་འདི་ཕྱུང་བ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཕྱག་ན་རྡོ་རྗེ་རྣམ་པར་ཕྱུང་སྟེ་སླར་ཡང་དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་ན་གནས་ནས་བཀའ་ནོད་ཅིང་འཁོད་དོ། །བཅོམ་ལྡན་དེ་བཞིན་གཤེགས་པ་ཀུན། །བདག་གིས་ཇི་ལྟར་བསྒྲུབ་པར་བགྱི། །དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་རྣམས་ལ་བྱིན་གྱིས་བརླབ་པར་བྱོས་ཤིག །དེ་དེ་བཞིན་ནོ་ཞེས་གསོལ་ནས། བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་དཀྱིལ་འཁོར་ཐམས་ཅད་བྱིན་གྱིས་བརླབས་ཏེ་བརྟན་པར་གྱུར་ནས་རྡོ་རྗེ་སྒེག་མོ་ལ་སོགས་པའི་ལྷ་རྣམས་ཕྱུང་སྟེ། ལྷ་མོ་དེ་རྣམས་དཀྱིལ་འཁོར་ཐམས་ཅད་ཀྱི་གྲྭ་རྣམས་སུ་དེ་བཞིན་དུ་རྣམ་པར་གནས་སོ། །སྒོ་རྣམས་སུ་སྒོ་སྐྱོང་མ་རྣམས་དང་། མཚམས་རྣམས་སུ་གཟུགས་དང་། སྒྲ་དང་། དྲི་དང་། རོ་དང་།

རེག་བྱ་རྣམས་བཤད་དོ། །དེ་དག་གི་སྔགས་སུ་གྱུར་པ་ནི། ༀ་བཛྲི་མེ་གྷེ་ཊཱྃ་ཊཱྃ། འཁོར་ལོའི་མཚམས་སུ་གཞག་པར་བྱའོ། །ༀ་སྣེ་ཧ་བཛྲི་ཎི་ཧྃ། ༀ་ཤ་རད་བཛྲེ་ཨྃ་ཨྃ། ༀ་བཛྲི་ཎི་ཀི་ལི་ཀི་ལི་ཧཱུྃ། དེ་བཞིན་གཤེགས་པ་ཐམས་ཅད་དགྱེས་པ་ཆེན་པོའི་མཆོད་པ་ཕྱིའི་དཀྱིལ་འཁོར་གྲྭ་དང་། མཚམས་རྣམས་སུ་དྲི་རྡོ་རྗེ་ལ་སོགས་པའི་ལྷ་མོ་རྣམས་དེ་བཞིན་གཤེགས་པའི་ཉེ་བར་གནས་པར་དགོད་པར་བྱའོ། །ༀ་བཛྲ་གནྡྷེ་ཧཱུྃ། ༀ་མ་དྷུ་བཛྲི་ཎི། གྷུཾ་གྷུཾ། ༀ་མ་ནོད་བྷ་བ་བཛྲི་ཎི་ཧཱུྃ། ༀ་བཛྲི་ཤེ་ཤི་རེ་ཧོ་ཧོ། དེ་བཞིན་གཤེགས་པ་ཐམས་ཅད་ཀྱི་རོལ་པ་ཆེན་པོའི་ལྷ་མོ་སྒོའི་མཚམས་རྣམས་སུ་གཟུགས་ལ་སོགས་པའི་ༀ་བཛྲི་རཱུ་པེ། ༀ་བཛྲི་ཤཔྡེ། ཨོཾབཛྲི་གནྡྷེ། ཨོཾ་བཛྲི་ར་སེ། ༀ་བཛྲི་སྤརྴེ། མཉེས་པར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་ཤིན་ཏུ་དགའ་བ་རྡོ་རྗེའི་སྙིང་པོ་ནི། ༀ་ས་མ་ཡ་ཧོཿསུ་ར་སྟྭྃ། དགའ་བདེ་ཆེན་པོའི་རྡོ་རྗེའི་སྙིང་པོ་འདིས་དེ་བཞིན་གཤེགས་པ་ཐམས་ཅད་ཀུན་ནས་མཉེས་པས་དཀྱིལ་འཁོར་ཐམས་ཅད་ལ་བརྟན་པར་གྱུར་ནས། དངོས་གྲུབ་ཐམས་ཅད་སྩོལ་བར་མཛོད། །དགུག་དང་ལེགས་པར་རབ་གནས་དང་། །ཇི་བཞིན་གནས་སུ་སྦྱར་བ་ཉིད། །ཀུན་ནས་དགྱེས་མཛད་སངས་རྒྱས་ཀུན། །དངོས་གྲུབ་ཐམས་ཅད་རབ་སྦྱིན་དགེ། །སྔགས་ཀྱི་ཚིག་རྣམས་ཀྱང་། ༀ་ཨེ་ཧྱེ་ཧི་བྷ་ག་ཝཱན་བཛྲ་ཨྃ་ཀུ་ཤ་ཛཿ། ༀ་པྲ་བེ་ཤ་ཡ་ཧཱུྃ། སརྦྦ་ཏ་ཐཱ་ག་ཏ་ༀ་ས་མ་ཡེ་བནྡྷ་ཏིཥྛ་བྷ་ག་ཝཱན།ༀ་ཏུ་ཥྱ་ཧོ་བྷ་ག་ཝཱན་བཛྲ་ཨཱ་བེ་ཤ་ཨཿ། འདི་དག་ནི་དཀྱིལ་འཁོར་ཐམས་ཅད་ཀྱི་སྒོའི་ཕྲིན་ལས་སོ། །དེ་ལྟ་བུའི་དཀྱིལ་འཁོར་འདྲི་བ་ལ་བྱམས་པ་དང་། འཇམ་དཔལ་དང་། ཀུན་ཏུ་བཟང་པོ་དང་། སྤྱན་རས་གཟིགས་དབང་ཕྱུག་ལ་སོགས་པའི་བྱང་ཆུབ་སེམས་དཔའ་རྣམས་དགོད་པར་བྱའོ། །སྔོན་དུ་བཤད་པའི་དཀྱིལ་འཁོར་གྱི་ཆོ་གས་སློབ་མ་བཅུག་སྟེ། དབང་བསྐུར་བ་ལ་སོགས་པ་བྱས་ནས་སློབ་མ་དང་བཅས་པས་ཐབས་ཅིག་ཏུ་དེ་བཞིན་གཤེགས་པ་ཐམས་ཅད་ལ་ཉེ་བར་མཁོ་བ་ཐམས་ཅད་ཀྱིས་མཆོད་པར་བྱའོ། །དེ་ལ་དང་པོ་ཁོ་ནར་རེ་ཞིག་དཀྱིལ་འཁོར་ཐམས་ཅད་ཀྱི་སློབ་དཔོན་ནི་དམ་ཚིག་ཐམས་

ཅད་ཤེས་པ། བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དངོས་གྲུབ་ཐམས་ཅད་ཀྱིས་བྱིན་གྱིས་བརླབས་པ། དབང་བསྐུར་བ་ཐམས་ཅད་ཐོབ་པ། རྡོ་རྗེ་རྣལ་འབྱོར་གྱི་དབང་ཕྱུག་ལྟ་བུ། ཐམས་ཅད་མཁྱེན་པའི་ཡེ་ཤེས་ཀྱིས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ཕྱག་རྒྱ་ལ་བསླབ་པར་བྱའོ། །དེ་ནས་འདིར་དམ་ཚིག་གི་ཕྱག་རྒྱ་བཅིང་བར་འགྱུར་བ་ནི་སྐྱིལ་ཀྲུང་བཅིངས་ནས་དྲི་ལ་སོགས་པ་རྣམས་ཀྱིས་ལག་པ་གཉིས་བྱུགས་ནས་ཕྱག་རྒྱ་བཅིང་བ་རབ་ཏུ་བསྒྲུབ་པར་བྱའོ། །ལག་པ་གཉིས་རྡོ་རྗེ་བསྡམས་པ་བྱས་ཏེ་སོར་མོ་ཕན་ཚུན་བཅིངས་ནས་སྐྱིལ་ཀྲུང་གི་དབུས་སུ་རྡོ་རྗེ་བསྡམས་པར་གཞག་པ་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའོ། །རྡོ་རྗེ་སེམས་དཔའ་ལ་སོགས་པ་ནི་གར་གྱི་ཚོགས་ཀྱི་སྦྱོར་བས་སོ། །རྡོ་རྗེ་བསྡམས་པ་དེ་ཉིད་རྐེད་པའི་ཕྱོགས་སུ་གཟུང་བ་ནི་རྡོ་རྗེ་སེམས་དཔའི་ཕྱག་རྒྱའོ། །རྡོ་རྗེ་བསྡམས་པ་ལས་མཛུབ་མོ་ལྕགས་ཀྱུ་ལྟར་གཟུང་བ་ནི་རྡོ་རྗེ་རྒྱལ་པོའི་ཕྱག་རྒྱའོ། །དེ་ཉིད་མདའ་འཕེན་པ་ལྟ་བུའི་སྦྱོར་བ་ནི་རྡོ་རྗེ་མདའི་ཕྱག་རྒྱའོ། །དེ་ཉིད་ལས་ལེགས་སོ་བ་སྦྱིན་པས་རྒྱབ་ཏུ་འཇོག་པ་ནི་རྡོ་རྗེ་ལེགས་པའིའོ། །བྱང་ཆུབ་ཀྱི་སེམས་ཀྱི་ཕྱག་རྒྱ་རྣམས་སོ། ། རྡོ་རྗེ་བསྡམས་པ་དེ་ཉིད་དཔྲལ་བར་འཇོག་པ་ནི་རྡོ་རྗེ་རིན་ཆེན་གྱི་ཕྱག་རྒྱའོ། །རྡོ་རྗེ་བསྡམས་པ་ལས་འོད་ཀྱི་དཀྱིལ་འཁོར་གྱི་སྦྱོར་བ་ནི་རྡོ་རྗེ་ཉི་མའི་འོད་ཀྱི་དཀྱིལ་འཁོར་གྱི་ཕྱག་རྒྱའོ། །རྡོ་རྗེ་བསྡམས་པ་སྤྱི་བོར་སྦྱར་བ་ནི་ཏོག་གི་ཕྱག་རྒྱའོ། །ཁའི་ཐད་དུ་བསྐོར་བ་ནི་རྡོ་རྗེ་བཞད་པའི་ཕྱག་རྒྱའོ། །རྡོ་རྗེ་བསྡམས་པ་དེ་ཉིད་ཁའི་ཐད་དུ་བསྐོར་བ་ནི་རྡོ་རྗེ་ཆོས་ཀྱི་ཕྱག་རྒྱའོ། །དེ་ཉིད་སྙིང་གར་བྱས་པ་ནི་རྡོ་རྗེ་རལ་གྲིའི་ཕྱག་རྒྱའོ། །དེ་ཉིད་འཁོར་ལོ་ལྟར་ཡོངས་སུ་བསྐོར་བ་ནི་རྡོ་རྗེ་རྒྱུའི་ཕྱག་རྒྱའོ། །དེ་ཉིད་སྙིང་གར་བསྒྲེང་བ་ནི་རྡོ་རྗེ་སྨྲ་བའི་ཕྱག་རྒྱའོ། །ཆོས་ཀྱི་ཕྱག་རྒྱ་རྣམས་སོ། །རྡོ་རྗེ་བསྡམས་པ་དེ་ཉིད་གར་ཉིད་དུ་སྟོན་པ་ནི་ལས་སྣ་ཚོགས་པའི་ཕྱག་རྒྱའོ། །ལག་པ་གཉིས་སྤྱི་བོ་དང་སྙིང་ག་དང་མགྲིན་པར་འཇོག་པ་ནི་རྡོ་རྗེ་བསྲུང་བའི་ཕྱག་རྒྱའོ། །རྡོ་རྗེ་བསྡམས་པ་འགྲམ་པ་གཉིས་སུ་འཇོག་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །རྡོ་རྗེ་བསྡམས་

པ་དེ་ཉིད་སྙིང་གར་བཙིར་བ་ནི་རྡོ་རྗེ་ཁུ་ཚུར་གྱི་ཕྱག་རྒྱའོ། །དེ་བཞིན་དུ་སྒེག་མོ་དང་བདུག་པ་མ་ལ་སོགས་པའི་སྦྱོར་བས་ལྷ་མོ་ཐམས་ཅད་ཀྱི་ཕྱག་རྒྱ་ཐམས་ཅད་ལ་རབ་ཏུ་སྦྱར་བར་བྱའོ། །རོལ་ཅིང་རྣམ་འཁོར་དགོད་པ་དང་། །སྒེག་དང་སྙིང་རྗེའི་བདག་ཉིད་དང་། །དཔའ་དང་ཁྲོ་སོགས་ཆོས་བདག་ཉིད། །རང་ཉིད་ཞི་བའི་བདག་ཉིད་ཉམས། །ཕྱག་རྒྱ་ཐམས་ཅད་རབ་ཚོགས་པ། །གལ་ཏེ་དངོས་གྲུབ་མཆོག་འདོད་ན། །བདག་ཉིད་རྡོ་རྗེའི་གར་བྱེད་དམ། །སྐྱོབ་པ་སངས་རྒྱས་ཐམས་ཅད་ཀྱི། །ཕྱག་རྒྱ་བཅིང་བ་རབ་ཏུ་སྦྱར། །ཐམས་ཅད་གྲུབ་པར་འདོད་སོགས་ཀྱིས། །སྐྱིལ་ཀྲུང་སངས་རྒྱས་ཐམས་ཅད་ཀྱི། །དེ་ཕྱིར་གཉིས་མེད་རྡོ་རྗེ་ཅན། །སངས་རྒྱས་རྣམས་ཀྱི་དྲང་པོའི་སྐུ། །སྒེག་པའི་སྦྱོར་བས་རྡོ་རྗེ་ཅན། །སངས་རྒྱས་རྣམས་ཀྱི་ཞི་བའི་སྤྱན། །སྙེམས་བཅས་རྡོ་རྗེ་ཅན་གྱིར་དགོངས། །སངས་རྒྱས་རྣམས་དང་རྡོ་རྗེ་སྤྱན། །ཏིང་འཛིན་དབྱེ་བ་ལས་ཤེས་བྱ། །འཁྲུགས་པའི་ལྟ་སྟངས་ཁྲོ་རྣམས་ཀྱིས། །བཙུན་མོ་རྣམས་ཀྱི་རོལ་པ་ཉིད། །འཇིག་རྟེན་པ་ཡི་ལྷ་རྣམས་དང་། །སྡིག་སྤྱོད་རྣམས་ཀྱི་ལྟ་སྟངས་སྟེང་། །ཆོས་རྣམས་ཀུན་གྱི་རྗེས་འཇུག་པའི། །ཤུགས་ཀྱིས་ལྟ་སྟངས་ཕྱག་རྒྱའོ། །ཚོགས་དང་ཕོ་ཉ་ཕོ་ཉ་མོའི། །ལྟ་སྟངས་རྣམ་པ་སྣ་ཚོགས་ཉིད། །མཆུ་ཡི་ཕྱག་རྒྱ་ཡོངས་ལྡན་པ། །གཡོ་བ་མེད་ཅིང་མི་འགུལ་བ། །སངས་རྒྱས་རྣམས་ཀྱི་ཕྱག་རྒྱ་མཆོག །སངས་རྒྱས་བྱང་ཆུབ་རབ་སྦྱིན་བྱེད། །མཚམས་སྦྱོར་ཅུང་ཟད་ཡང་དག་ལྡན། ། རྣམ་འགྱུར་མེད་ཅིང་མཚུངས་མེད་གནས། །རོལ་པའི་ཡི་གེ་ཡང་དག་ལྡན། །མཆུ་ཡི་ཕྱག་རྒྱ་རྡོ་རྗེ་ཅན། །རྣམ་འགྱུར་ཅན་དང་འཁོར་བ་ཅན། །ཁྲོ་བས་སོ་ནི་ཡོངས་སུ་བསྡམ། །འདི་ནི་ཁྲོ་བའི་ཕྱག་རྒྱར་བཤད། །མཆུ་ཡི་ཕྱག་རྒྱ་གཟུགས་མཛེས་ཅན། །འཇིག་རྟེན་པ་རྣམས་མཆུའི་ཕྱག་རྒྱ། །རྣམ་འགྱུར་འཇིག་ཅིང་གཟུགས་དང་བྲལ། །ཤིན་ཏུ་བརྣག་དཀའི་འདོད་ཆགས་དང་། །སྡང་དང་རྨོངས་ལས་ཐམས་ཅད་དུ། །རོལ་ཅིང་རྣམ་འཁོར་དང་ལྡན་པ། །གཡོ་བཅས་རབ་ཏུ་འཕྲོ་བ་ཡང་། །མཆུ་ཡི་ཕྱག་རྒྱར་ཤེས་པར་བྱ། །ལྷ་མོ་ཕོ་ཉ་ཚོགས་ཀྱི་ཡང་། །

དེ་ལ་སོགས་པ་མཐའ་ཡས་མཆོག །ལྟ་སྟངས་མཆུ་ལ་སོགས་པའི་མིང་། །ཕྱག་རྒྱ་ཐམས་ཅད་མདོར་བསྡུ་བ། །སྐྱོབ་པ་རྣམས་ཀྱིས་ཀུན་ཤེས་བྱ། །ཇི་སྲིད་སྐུ་ཡི་དབྱེ་བ་དང་། །དབང་པོ་ལ་སོགས་རབ་དབྱེ་དང་། །དེ་དག་ཕྱག་རྒྱ་མཐའ་ཡས་མཆོག །སངས་རྒྱས་ཀུན་གྱིས་བརྟགས་པ་ཉིད། །སྣ་ཚོགས་སྐུ་ནི་གཟི་བརྗིད་ཆེ། །ཚད་མེད་ཡོན་ཏན་འབྱུང་བའི་གནས། །སངས་རྒྱས་རྣམས་ཀྱི་ཕྱག་རྒྱ་མཆོག །སངས་རྒྱས་བྱང་ཆུབ་རབ་སྦྱིན་བྱེད། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་དམ་ཚིག་ཆེན་པོའི་དེ་ཁོ་ན་ཉིད་གསང་བ་ཞེས་བྱ་བའི་དཀྱིལ་འཁོར་ཆེན་པོ་ཡོངས་སུ་རྫོགས་སྷོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སླར་ཡང་དེ་བཞིན་གཤེགས་པ་ཐམས་ཅད་མཉམ་པ་ཉིད་མངོན་པར་དབང་བསྐུར་བ་ཞེས་བྱ་བའི་དཀྱིལ་འཁོར་ཆེན་པོ་འདི་བཀའ་སྩལ་པ། དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །སྣ་ཚོགས་ཁམས་ནི་བསམ་ཡས་མཆོག །དར་དང་མེ་ཏོག་ཆུན་པོས་བརྒྱན། །རྡོ་རྗེ་རིན་ཆེན་རྣམས་ཀྱིས་སྤྲས། །སྣ་ཚོགས་པདྨོ་དེ་བཞིན་གཞན། ། དཀྱིལ་འཁོར་དེ་ཡི་དབུས་སུ་ནི། །སངས་རྒྱས་སྐུ་གཟུགས་ཡིད་འོང་བ། །མགོན་པོ་སུམ་ཅུ་རྩ་གཉིས་མཚན། །འབར་བ་མཆོག་གིས་བརྒྱན་པ་པོ། །དེ་སྔགས་རྟགས་སུ་ཤེས་བྱ་བ། །དང་པོའི་དབྱངས་དང་གཉིས་པའོ། །དེ་ཡི་ཉེ་འཁོར་ཐམས་ཅད་དུ། །འཁོར་ལོ་ཅན་བརྒྱད་བྲི་བར་བྱ། །དཀྱིལ་འཁོར་དེ་ཡི་དབུས་སུ་ནི། །འཁོར་ལོ་ཀུན་ཏུ་འབར་བ་གཞག །འཁོར་ལོའི་ལྟེ་བའི་དབུས་སུ་ནི། །པདྨའི་རྒྱལ་པོ་རབ་ཏུ་གནས། །སྒེག་སོགས་སངས་རྒྱས་ཐམས་ཅད་ནི། །ཇི་ལྟར་སྔོན་བཞིན་བྲི་བར་བྱ། །ཉེ་བར་མཁོ་བའི་མཆོད་ཀུན་གྱིས། །དེ་བཞིན་གཤེགས་པ་མཆོད་པར་བྱ། །དགུག་སོགས་ཆོ་གའི་སྦྱོར་བ་ནི། །དཀྱིལ་འཁོར་སྔ་མ་ཇི་བཞིན་ནོ། །དཀྱིལ་འཁོར་ཉེ་བར་སྤྱོད་པ་ཀུན། །ཆོ་ག་འདི་ནི་འབྱུང་བར་འགྱུར། །དཀྱིལ་འཁོར་ཆེན་པོའི་རྟོག་པའོ། །དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་

བཤད་བྱ་བ། །འཇིག་རྟེན་གསུམ་ལས་རྣམ་རྒྱལ་ཞེས། །བྱ་བ་རྡོ་རྗེ་ཧཱུྃ་མཛད་གྲགས། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་པ་ལྟ་བུའོ། །དེ་ཡི་དབུས་སུ་ཁྲོ་བོ་ཆེ། །འཇིག་རྟེན་གསུམ་ལས་རྣམ་རྒྱལ་ཡང་། །ཁྲོ་གཉེར་ལྡན་ཞིང་སྨིན་མ་འཁྱོག །སྤྱན་གསལ་འབར་བ་ཆེན་པོ་བ། །ཅུང་ཟད་མཆེ་བ་གཙིགས་པའི་ཞལ། །རྣམ་པར་དགོད་ཅིང་སླར་ཁྲོ་བ། །གཡོན་བརྐྱང་བ་ཡི་ཞབས་ཀྱིས་ནི། །བཀའ་ཟློག་དབང་ཕྱུག་ཆེན་པོ་གནོན། །སངས་རྒྱས་ཕྲེང་བ་སོགས་པས་སྤྲས། ། ཨིནྡྲ་ནཱི་ལ་མཚུངས་པའི་འོད། །ཕྱག་བཞི་པ་ལ་སྤྱན་གསུམ་པ། །ཞལ་བཞི་པ་ལ་ཐུབ་པར་དཀའ། །བེ་ཅོན་དང་ནི་ཞགས་པར་བརྗོད། །དང་པོ་ན་ནི་རྡོ་རྗེར་བཤད། །གཉིས་པ་ཞགས་པ་སྡིགས་མཛུབ་ཅན། །ཕྱག་གཉིས་ཁུ་ཚུར་དམ་པ་མཆོག །ཁུ་ཚུར་གཉིས་ནི་རབ་ཏུ་བརྟག །མཐེ་ཆུང་གཉིས་ནི་མཉམ་སྦྱོར་བ། །ལུ་གུ་རྒྱུད་ཀྱིས་རྣམ་པར་སྦྲེལ། །སྙིང་གར་ཕྱག་རྒྱ་ལེགས་བཞག་ནས། །སྡིགས་མཛུབ་གཉིས་ཀྱིས་བསྡིགས་པར་མཛད། །འཇིག་རྟེན་གསུམ་རྒྱལ་ཞེས་བྱ་བའི། །ཕྱག་རྒྱ་མཆོག་ཏུ་ཐུབ་པར་དཀའ། །སྔགས་ནི་མིང་གི་དེ་ཉིད་ལྡན། །འབར་བའི་ཕྲེང་བ་མཉམ་པར་འཁྲིགས། །དཀྱིལ་འཁོར་དེ་ཡི་གནས་རྣམས་སུ། །ཆ་རྣམས་ཀུན་ནི་ཐམས་ཅད་ནས། །ཕྱག་རྒྱ་ཐམས་ཅད་མཉམ་པར་བྲི། །ཟླ་བའི་དཀྱིལ་འཁོར་མཉམ་གནས་པར། །རལ་གྲི་འཁོར་ལོ་གཞུ་དང་མདའ། །དེ་བཞིན་དུ་ནི་དགྲ་སྟ་ཉིད། །དེ་ལ་སོགས་པའི་མཐའ་ཡས་མཆོག །མདོར་བསྡུས་ནས་ནི་ཕྱག་རྒྱ་དགོད། །དེ་ལྟར་ཁྲོ་བོའི་དཀྱིལ་འཁོར་ཐམས་ཅད་རྣམ་པར་བཀོད་ནས་ཉེ་བར་མཁོ་བའི་མཆོད་པ་ཐམས་ཅད་ཀྱིས་མཆོད་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་རོ། །དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །སངས་རྒྱས་དཔའ་བོ་ཐམས་ཅད་ཀྱིས། །འགྲོ་བ་འདུལ་བ་ཞེས་སུ་བཤད། །གྲུ་བཞི་པ་ལ་སྒོ་བཞི་པ། །དར་དང་མེ་ཏོག་ཆུན་པོས་བརྒྱན། །དེ་དབུས་དཀྱིལ་འཁོར་ཆེན་པོ་ནི། །ཆུ་ཞེས་བྱ་བའི་མིང་ཅན་ནོ། །དེ་ཡི་དབུས་

སུ་པད་ཆེན་པོ། །འདབ་མ་བརྒྱད་པ་ཡིད་འོང་བ། །དེ་ཡི་ལྟེ་བའི་དབུས་སུ་ནི། །འགྲོ་བ་འདུལ་བ་ཞེས་བྱ་བ། །ཟླ་བའི་འོད་ཅན་ཟླ་བའི་མདོག །རལ་པའི་ཅོད་པན་འཛིན་པ་ཅན། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པ་པོ། །སངས་རྒྱས་ཕྲེང་བ་སོགས་པས་སྤྲས། །སྐུ་རྣམས་ཐམས་ཅད་ཀུན་ནས་སྤྲོ། །མཐའ་ཡས་རབ་འབྱམ་རྒྱ་ཆེ་བའི། །ཆོས་དབྱིངས་མཉམ་དང་མི་མཉམ་ལ། །དེ་ཡི་སྔགས་སུ་ཡོངས་གྲགས་པ། །ཤ་ཥའི་སྡེ་ཡི་མཐའ་དགེ་བ། །ཀྵ་ཡིག་དོན་ལྡན་སྔོན་བྱུང་བ། །རྒྱུ་ཡི་དོན་དུ་རབ་སྒྲུབ་བྱེད། ། བཞི་པའི་དབྱངས་ཀྱིས་སྤྱི་བོར་མནན། །མེ་ཡི་ས་བོན་གསལ་བར་བྱེད། །ཐིག་ལེ་སྒྲ་ནི་མཆོག་ཏུ་སྦྱིན། །འཇིག་རྟེན་དབང་ཕྱུག་ཞེས་བྱའི་མཚན། །དེ་ཡི་ཕྱག་རྒྱ་ཡང་དག་བཤད། །པདྨོའི་ཐལ་མོ་རབ་ཏུ་བརྐྱང་། །བྲིས་པའི་ཕྱག་རྒྱར་ཡང་དག་བཤད། །དབྱུག་གུ་རིལ་བ་སྤྱི་བླུགས་བྲི། །མདུན་དུ་བགྲང་ཕྲེང་པདྨ་ཡི། །རྒྱལ་པོ་ཟླ་བའི་དཀྱིལ་འཁོར་གཞག །དེ་ལ་སོགས་པ་མཐའ་ཡས་མཆོག །ཕྱག་རྒྱ་མཆོག་ཏུ་འབར་དེ་དག །འགྲོ་བ་འདུལ་བའི་དཀྱིལ་འཁོར་དུ། །ཇི་ལྟར་རིགས་པར་དགོད་པར་བྱ། །འགྲོ་བ་འདུལ་བ་ཞེས་བྱ་བའི་དཀྱིལ་འཁོར་གྱི་རྒྱལ་པོའོ།། །།དེ་ནས་དཀྱིལ་འཁོར་ཆེན་པོ་མཆོག །གཞན་ནི་རབ་ཏུ་བཤད་པར་བྱ། །དཔའ་བོ་རིན་ཆེན་སྙིང་པོ་ཡི། །རྡོ་རྗེ་རིན་ཆེན་ཞེས་སུ་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱ། །དེ་ཡི་དབུས་སུ་རིན་ཆེན་ཆེ། །ཡན་ལག་བརྒྱད་པ་མཆོག་ཏུ་འབར། །དེ་དབུས་རིན་ཆེན་པདྨ་ནི། །རིན་ཆེན་ཕྲེང་བས་རྣམ་པར་མཛེས། །དེ་དབུས་མ་ར་ཀ་ཏ་འདྲ། །རིན་ཆེན་རྡོ་རྗེ་ཆེར་འབར་བ། །སངས་རྒྱས་ལྔ་ཡི་ཅོད་པན་ཅན། །རིན་ཆེན་ཕྲེང་བས་རྣམ་པར་མཛེས། །མདུན་དུ་ཀུན་གྱི་དབང་བསྐུར་གཙོ། ། རིན་ཆེན་དེ་ཡི་གཙོ་བོ་མཆོག །གཡས་སུ་པདྨ་རཱ་ག་སྟེ། །རྒྱབ་ཏུ་ཨིནྡྲ་ནཱི་ལའོ། །ཡིད་བཞིན་ནོར་བུ་རིན་ཆེན་གཡོན། །ཕྱག་རྒྱ་རྣམ་པ་སྣ་ཚོགས་མཆོག །སྣ་ཚོགས་རིན་ཆེན་རྣམ་པར་བརྒྱན། །དཀྱིལ་འཁོར་ཀུན་གྱི་གྲྭ་ཡི་ནི། །གནས་རྣམས་སུ་ནི་གཞག་པར་བྱ། །སངས་

རྒྱས་དཔའ་བོ་ཐམས་ཅད་ཀྱིས། །དེ་ཡི་སྔགས་སུ་ཡོངས་གྲགས་པ། །བཞི་པའི་སྡེ་ཡི་དང་པོ་གང་། །མེ་ཡི་ས་བོན་གྱིས་གསལ་བྱས། །དབྱངས་ཀྱི་གཉིས་པས་ཀུན་ནས་མནན། །དབང་སྒྱུར་བ་ནི་སྟེང་དུ་གནས། །དེ་ཡི་ཕྱག་རྒྱ་ཡང་དག་བཤད། །རིན་ཆེན་སྙིམ་པ་རྒྱབ་བསྐུམས་ཏེ། །རིན་ཆེན་རྣམ་པ་ལེགས་བྱུང་བ། །དེ་ནི་རྡོ་རྗེ་རིན་ཆེན་ནོ། །རྡོ་རྗེ་རིན་པོ་ཆེའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །རྡོ་རྗེ་ཕྲེང་བས་རྣམ་པར་མཛེས། །དེ་ཡི་དབུས་སུ་ཞལ་བཞི་པའི། །འཁོར་ལོ་བཞིན་དུ་ཡོངས་བསྐོར་བའོ། །དེ་ཡི་དབུས་སུ་པད་ཆེན་པོའོ། །ཁ་དོག་སྣ་ཚོགས་ཡོངས་འབར་བ། །དེ་ཡི་དབུས་སུ་བརྩོན་ཆེན་པོ། །རྡོ་རྗེ་སྣ་ཚོགས་ཡོངས་སུ་བྲི། །རྡོ་རྗེ་ཁུ་ཚུར་འཛིན་མཛེས་པ། །རྒྱན་རྣམས་ཀུན་གྱིས་བརྒྱན་པ་པ། །ཁ་དོག་སྣ་ཚོགས་གཟི་བརྗིད་ཆེ། །སངས་རྒྱས་ཕྲེང་བས་རྣམ་པར་མཛེས། །དེ་ཡི་སྔགས་ནི་ཡང་དག་བཤད། །བཅུ་གཉིས་པ་ཡི་དབྱངས་ཀྱི་མཐའ། །མྱ་ངན་འདས་དོན་ལེགས་གསལ་བྱས། །སྒེག་སོགས་རིག་མ་ཐམས་ཅད་ཀྱིས། །དེ་བཞིན་རང་གི་ཕྱག་རྒྱ་ཡིས། །རྡོ་རྗེའི་ཐིག་ལེ་ཡོངས་སུ་ལྡན། །སྣ་ཚོགས་བཀྲ་བ་མཆོག་ཏུ་འབར། །དེ་ཡི་དབང་བསྐུར་ཕྱག་རྒྱ་ཡིས། །མཆོད་པ་ཀུན་གྱིས་ཐམས་ཅད་ནས། །ཀུན་ནས་ཡོངས་སུ་བསྐོར་བ་ཡི། །ལས་ཀྱི་དཀྱིལ་འཁོར་བྲི་བར་བྱ། ། ལས་ཀྱི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །ཤེས་རབ་ཡེ་ཤེས་འཁོར་ལོ་ཆེ། །སྔགས་ཀྱི་ཡི་གེས་རྣམ་པར་བརྒྱན། །དེ་ཡི་དབུས་སུ་པད་ཆེན་པོ། །འདབ་མ་བརྒྱད་པ་ཤིན་ཏུ་མཛེས། །དེ་ཡི་ལྟེ་བའི་དཀྱིལ་དུ་ནི། །གཞོན་ནུ་སྣ་ཚོགས་གཟུགས་ལྡན་པ། །སྐུ་མདོག་དམར་ཞིང་འཛུམ་བཅས་པ། །སྣ་ཚོགས་གཟུགས་ཅན་རལ་གྲི་ཅན། །ཕྱག་བཞི་པ་ལ་ཞལ་བཞི་པ། །རལ་གྲིའི་ཕྲེང་བས་རྣམ་པར་བརྒྱན། །གསང་སྔགས་ཆེན་པོ་ཡི་གེ་ལྔ། །དེ་ཡི་དྲུང་དུ་ལེགས་པར་གནས། །

དབྱངས་ཀྱི་བཅུ་གཉིས་གསང་སྔགས་ནི། །ཐུགས་ཀ་རུ་ནི་ཡང་དག་གནས། །ཕྱི་རོལ་ཉིད་ནི་གྲུ་བཞི་མཛེས། །ཐིག་བཞི་དང་ནི་ཡང་དག་ལྡན། །རྟ་བབས་བཞི་དང་མཉམ་པར་སྦྱོར། །སྒོ་བཞི་ཡིས་ནི་ཤིན་ཏུ་མཛེས། །ཤེས་རབ་ཕ་རོལ་ཕྱིན་པ་ཉིད། །དེ་ལ་དཀྱིལ་འཁོར་དབུས་སུ་ནི། །གལ་ཏེ་དངོས་གྲུབ་མཆོག་འདོད་ན། །འབད་པ་ཡིས་ནི་བྲི་བར་བྱ། །སྔོན་དུ་བཤད་པའི་ཆོ་ག་ཡིས། །མཆོད་སོགས་ཆོ་ག་རྒྱས་པ་ཉིད། །གཞུག་པའི་ཆོ་ག་དེ་བཞིན་དུ། །ཇི་ལྟར་དཀྱིལ་འཁོར་འདིར་མཐོང་བཞིན། །ཤེས་རབ་ཡེ་ཤེས་ཀྱི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །ཕྱི་ཡི་དཀྱིལ་འཁོར་བྲི་བར་བྱ། །དེ་ཡི་ནང་དུ་བྲི་བྱ་བ། །ཆོས་ཀྱི་འཁོར་ལོ་བླ་ན་མེད། ། རྟེན་ཅིང་འབྲེལ་འབྱུང་ཕྲེང་བ་ནི། །འབད་པ་ཡིས་ནི་བྲི་བར་བྱ། །འཁོར་ལོའི་དབུས་སུ་བརྩོན་ཆེན་པོ། །རྡོ་རྗེའི་རྒྱུ་ནི་སྟོབས་པོ་ཆེ། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པ་པོ། །ཁ་དོག་ནག་པོ་གཟི་བརྗིད་ཆེ། །ཆོས་ཀྱི་འཁོར་ལོ་རབ་བསྐོར་མཛད། ། དེ་ཡི་སྔགས་གྱུར་མཛེས་པ་ནི། །རྒྱུ་ཡི་དོན་དུ་སོ་སོར་བསྐྱེད། །དབྱངས་དྲུག་དང་ནི་ཡང་དག་ལྡན། །ཐིག་ལེ་ཕྱི་མོས་རྣམ་པར་བརྒྱན། །རང་གི་ཡི་གེའི་ཕྲེང་བ་ཆེ། །འཁོར་ལོ་གཉིས་ཀྱིས་རྣམ་པར་བརྒྱན། །དེ་ཡི་མདུན་དུ་དུང་ཡིན་ལ། །རྒྱབ་ཏུ་ཞགས་པར་བརྗོད་པར་བྱ། །རྡོ་རྗེའི་ཐལ་མོ་ཕྱག་རྒྱ་ཆེ། །འཁོར་ལོ་བཞིན་དུ་རབ་ཏུ་གནས། །མཆོད་པ་ཐམས་ཅད་རབ་ཏུ་བརྟག །ཇི་ལྟར་དཀྱིལ་འཁོར་སྔ་མ་བཞིན། །དེ་ལྟའི་དཀྱིལ་འཁོར་བྲིས་ནས་ནི། །ཆོས་ཀྱི་འཁོར་ལོ་བླ་ན་མེད། །ཐོག་མར་ཆོས་ཀྱི་འཁོར་ལོ་བསྐོར། །དངོས་གྲུབ་ཐམས་ཅད་ཡང་དག་འབར། ། ཆོས་ཀྱི་འཁོར་ལོའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །ཐོག་མའི་དཀྱིལ་འཁོར་སྦྱོར་བ་ཡིས། །དཀྱིལ་འཁོར་ཀུན་གྱི་ཐིག་གདབ་བོ། །དེ་ཡི་དཀྱིལ་དུ་སྣང་བ་ཆེ། །མཁའ་བཞིན་ཤིན་ཏུ་འོད་གསལ་བ། །སེམས་

དཔའ་ཆེན་པོ་ནམ་མཁའི་མཛོད། །པདྨའི་རྒྱལ་པོ་རབ་ཏུ་བཞུགས། །ཟླ་བའི་མདོག་ཅན་གཟི་བརྗིད་ཆེ། །སྣ་ཚོགས་མཚོན་ཆ་འཛིན་པའི་མཆོག །གཞོན་ནུ་རབ་ཏུ་བརྗིད་པའི་ཞལ། །ནམ་མཁའི་མཛོད་ཅེས་རབ་ཏུ་གྲགས། །སངས་རྒྱས་ཕྲེང་བ་སོགས་པས་སྤྲས། ། རྡོ་རྗེ་དཀྱིལ་འཁོར་བརྒྱན་པར་མཛད། །འདི་ཡི་གསང་སྔགས་གཟི་བརྗིད་ཆེ། །དབྱངས་དགུ་པ་ལ་ཐིག་ལེ་དང་། །ནཱ་ད་ཡིས་ནི་རྣམ་པར་བརྒྱན། །སྡེ་ཚན་དང་པོའི་གསུམ་པ་ལ། །ཐིག་ལེ་ནཱ་དས་རྣམ་པར་བརྒྱན། །དེ་ཡང་གཙོ་བོའི་གསང་སྔགས་འགྱུར། །ནམ་མཁའི་མཛོད་ནི་རབ་བསྐོར་མཛད། །དེ་ལྟའི་དཀྱིལ་འཁོར་བྲིས་ནས་ནི། །སྔགས་ཀྱི་ཕྲེང་བ་མཆོག་ལྡན་པ། །མ་ལུས་པ་ཡི་ས་རྣམས་ཀུན། །ཐམས་ཅད་ནས་ནི་ནམ་མཁའི་ཚུལ། །ཏོག་ནི་ཕྱག་རྒྱར་གྱུར་པ་དེའི། །དེ་བཞིན་དུ་ནི་ངེས་པར་བཅིང་། །དེ་ལྟའི་དཀྱིལ་འཁོར་བྲིས་ནས་ནི། །ནམ་མཁའ་ཡི་ནི་མཛོད་དེ་ལ། །གལ་ཏེ་བདག་ནི་གྲུབ་འདོད་ན། །མཆོད་པ་ཀུན་གྱིས་རྣམ་པར་མཆོད། །ནམ་མཁའི་མཛོད་ཀྱི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །དཀྱིལ་འཁོར་སྔ་མའི་སྦྱོར་བ་ཡིས། །དཀྱིལ་འཁོར་ཐམས་ཅད་ཐིག་གདབ་བོ། །དཀྱིལ་འཁོར་དེ་ཡི་དབུས་སུ་ནི། །ཁྲོ་བོའི་དཀྱིལ་འཁོར་གྲུ་བཞི་པ། །དེར་ཡང་རྡོ་རྗེ་མེ་ཡི་མཆོག །དཀྱིལ་འཁོར་གྱི་ནི་མཆོག་ཏུ་འདོད། །དེ་ཡི་དབུས་སུ་གཟི་བརྗིད་ཆེ། །རྡོ་རྗེ་གནོད་སྦྱིན་བླ་ན་མེད། །ཕྱག་བཞི་པ་ལ་ཞལ་བཞི་པ། ། པདྨའི་རྒྱལ་པོ་ལ་རབ་གནས། །རྒྱན་རྣམས་ཀུན་གྱིས་བརྒྱན་པའི་ལུས། །བདུད་རྣམས་ཐམས་ཅད་རབ་འཇོམས་མཛད། །དེ་སྔགས་ཡི་གེར་གྱུར་པ་ནི། །ཤ་ཥའི་སྡེ་ཚན་མཐར་དགེ་བ། །རྒྱུ་ཡི་དོན་དུ་ལེགས་གསལ་བྱ། །ཁྲོ་བོའི་དཀྱིལ་འཁོར་ཆེན་པོ་བསྐོར། །སྔགས་ཀྱི་ཡི་གེ་ཕྲེང་བ་ཆེ། །འབད་པ་ཡིས་ནི་བྲི་བར་བྱ། །དེ་ལྟའི་དཀྱིལ་འཁོར་བྲིས་ནས་ནི། །རྡོ་རྗེ་གནོད་སྦྱིན་དེ་ཡིས་ནི། །གལ་ཏེ་དངོས་གྲུབ་མཆོག་འདོད་ན། །སྒྱུ་མ་ཐམས་ཅད་གཞོམ་པར་བྱ། །རྡོ་རྗེ་གནོད་སྦྱིན་གྱི་དཀྱིལ་འཁོར་ཆེན་པོའོ།། །།དེ་ནས་དཀྱིལ་འཁོར་ཆེན་

པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །དེ་ཡི་དབུས་སུ་འཁོར་ལོ་ཆེ། །ལྕགས་ཀྱུ་ཡིས་ནི་རྣམ་པས་མཛེས། །དབུས་སུ་བཅོམ་ལྡན་རྡོ་རྗེ་རྒྱལ། །ལྕགས་ཀྱུ་ལ་ནི་རབ་ཏུ་བཞུགས། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཐམས་ཅད་རབ་ཏུ་འབར། །རྡོ་རྗེ་ལྕགས་ཀྱུ་ཁུ་ཚུར་ཆེ། །འབར་བ་འཕྲོ་བས་རྣམ་པར་བརྒྱན། །འགྲོ་བ་ཐམས་ཅད་འགུགས་པར་མཛད། །སྔགས་ཀྱི་ཡི་གེས་ལེགས་པར་སྦྱར། །ཤ་ཥའི་སྡེ་ཡི་དྲུང་གནས་པ། །བྱེད་པའི་རྒྱུ་རུ་ལེགས་པར་གནས། །དབྱངས་དྲུག་པ་ཡིས་ལེགས་པར་ཕྱེ། །ཟླ་ཕྱེད་ཐིག་ལེས་ལེགས་པར་བརྒྱན། །ལྕགས་ཀྱུའི་ཕྱག་རྒྱ་ལེགས་པར་སྦྱར། །འགུགས་པར་བྱེད་ལ་དོན་ཡོད་པའོ། །དེ་ལྟར་དཀྱིལ་འཁོར་བྲིས་ནས་ནི། །རྡོ་རྗེ་ལྕགས་ཀྱུ་མཆོག་ཏུ་དགེ། །དགུག་པ་ལ་སོགས་ཐམས་ཅད་ལ། །འགྲོ་བ་འདུལ་བ་ཡོངས་སུ་བསྡུ། །དོན་ཡོད་རྒྱལ་པོའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །དངོས་གྲུབ་དཀྱིལ་འཁོར་བྲི་བར་བྱ། །དཀྱིལ་འཁོར་དེ་ཡི་དབུས་སུ་ནི། །དཀྱིལ་འཁོར་ལྕགས་ཀྱུའི་རྣམ་པ་ཅན། །དེ་ཡི་དབུས་སུ་གྲུ་གསུམ་གྲགས། །ལྕགས་ཀྱུ་མཆོག་ཏུ་དགེ་བའོ། །དེ་ཡི་དབུས་སུ་སེམས་དཔའ་ཆེ། །རྡོ་རྗེ་རྒྱལ་པོ་སྟོབས་པོ་ཆེ། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པ་པོ། །གཟི་བརྗིད་ཆེན་པོ་དཀར་དང་དམར། །ཞགས་པ་ལྕགས་ཀྱུ་འཛིན་དགེ་བ། །དེ་ཡི་གསང་སྔགས་ཡང་དག་བཤད། །དོན་ཡོད་འབྲས་བུ་སྩོལ་བ་བོ། །སྡེ་ཚན་གཉིས་པའི་གསུམ་པ་ནི། །གཉིས་འགྱུར་ཉིད་དུ་རྣམ་པར་གནས། །དེ་ཡི་ཐིག་ལེ་མྱ་ངན་འདས། །སྔགས་ཀྱི་ཕྲེང་བ་གཞན་གྱིས་བསྐོར། །སྒེག་མོ་ལ་སོགས་མཆོད་པ་ཆེ། །འབད་པ་ཡིས་ནི་བྲི་བར་བྱ། །སྒོ་སྐྱོང་བ་དང་མཆོད་པ་ཡང་། །སྦྱོར་བ་ཇི་བཞིན་རྣམ་པར་དགོད། །དེ་ལྟའི་དཀྱིལ་འཁོར་བྲིས་ནས་ནི། །མཆོད་པ་

ཐམས་ཅད་ཡོངས་སུ་སྒྲུབ། །རྡོ་རྗེ་རྒྱལ་པོའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །སངས་རྒྱས་དཔའ་བོ་ཐམས་ཅད་ཀྱིས། །རྡོ་རྗེ་ཆགས་པ་ཞེས་སུ་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །ཆགས་པའི་དཀྱིལ་འཁོར་བྲི་བར་བྱ། །ཐམས་ཅད་དམར་པོས་རབ་དྲེགས་པ། །དབང་དུ་བྱེད་པའི་དམ་པ་ཡིན། །དེ་ཡི་དབུས་སུ་པད་ཆེན་པོ། །འདབ་མ་བརྒྱད་པ་གེ་སར་བཅས། །དེ་ཡི་ལྟེ་བའི་དབུས་སུ་ནི། ། རྡོ་རྗེ་ཆགས་པ་བྲི་བར་བྱ། །པདྨ་རཱ་ག་མཚུངས་པའི་འོད། །ཕྱག་བཞི་པ་ལ་ཞལ་བཞི་པ། །སྤྱན་གསུམ་འོད་ཀྱི་ཕྲེང་བ་ཅན། །དེ་ཡི་ཕྱག་རྒྱ་མཆོག་ཏུ་ནི། །མཛེས་པ་ཡི་ནི་མདའ་གཞུར་འགྱུར། །རྒྱན་རྣམས་ཀུན་གྱིས་མཛེས་པའི་ལུས། །འགྲོ་བ་ཀུན་ལ་ཆེས་མཆོག་གྱུར། ། དེ་ཡི་གསང་སྔགས་མཛེས་གྱུར་པ། །རྡོ་རྗེ་ཆགས་པ་མཆོག་ཏུ་བདེ། །ཤ་ཥའི་སྡེ་ཡི་མཐར་གྱུར་པ། །ཀྵ་ཡི་ཡི་གེའི་སྔོན་དུ་གནས། །དབྱངས་དགུ་པ་དང་ཡང་དག་ལྡན། །སྔགས་ཀྱི་ཕྲེང་བས་ཡང་དག་བརྒྱན། །མེ་ཏོག་མདའ་ནི་ཡོངས་སུ་འཕེན། །རེ་བ་ཐམས་ཅད་ཡོངས་རྫོགས་མཛད། །དེ་ལྟའི་དཀྱིལ་འཁོར་བྲིས་ནས་ནི། །སངས་རྒྱས་ཐམས་ཅད་རབ་མཆོད་བྱེད། །རྡོ་རྗེ་ཆགས་པའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །རྡོ་རྗེ་ལེགས་པ་ཞེས་གྲགས་པ། །གཉིས་སུ་མེད་པའི་དགའ་བའང་འཕེལ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །དེ་ཡི་དབུས་སུ་ཆེར་མཛེས་པའི། །དཀྱིལ་འཁོར་དམ་པ་གྲུ་བཞི་པ། །དེ་ཡི་དབུས་སུ་པད་ཆེན་པོ། །ཟེ་འབྲུ་ཡིས་ནི་ཉེ་བར་མཛེས། །དེ་ཡི་ལྟེ་བའི་དཀྱིལ་དུ་ནི། །ཟླ་བའི་གཟུགས་བརྙན་ཡང་དག་འབར། །དེར་གནས་དཔའ་བོ་བསམ་པར་བྱ། །རྡོ་རྗེ་ལེགས་པ་སྟོབས་པོ་ཆེ། །དུང་དང་ཀུནྡ་ཟླ་བ་དཀར། །ཁ་བ་བ་ཞོའི་འོད་ལྟར་མཛེས། །ལེགས་སོ་སྩོལ་བ་ཚིམ་པར་མཛད། །ཏིང་ངེ་འཛིན་དབང་མང་པོ་སྒྱུར། །རྡོ་རྗེ་སྒེག་མོ་སོགས་མཆོད་པ། །དེ་བཞིན་

མེ་ཏོག་བདུག་པ་སོགས། །སྒོ་ཡི་སྐྱོང་བ་ཉིད་ཀྱང་ནི། །རབ་ཏུ་འབད་དེ་བྲི་བར་བྱ། །དེ་ཡི་སྔགས་གྱུར་མཛེས་པ་ནི། །གསང་བ་ཆེན་པོ་མཆོག་ཏུ་འབར། །ཧ་ཡི་ཡི་གེ་སྔོན་གང་དེ། །སེམས་ཅན་དོན་ནི་རབ་སྒྲུབ་བྱེད། །ཐིག་ལེ་གཉིས་དང་ཡོངས་སུ་ལྡན། ། ལེགས་སྩོལ་བས་ནི་རྣམ་པར་གནས། །དེ་ལྟའི་དཀྱིལ་འཁོར་བྲིས་ནས་ནི། །མཆོད་པ་ཐམས་ཅད་རབ་ཏུ་བསྐོར། །བདག་ཉིད་དག་པས་གཞུག་པ་སོགས། །ཐམས་ཅད་ཡོངས་སུ་སྤྱད་པར་བྱ། །རྡོ་རྗེ་ལེགས་པའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག ། ཡང་དག་རབ་ཏུ་བཤད་བྱ་བ། །རྡོ་རྗེ་གཟི་བརྗིད་ཞེས་སུ་གྲགས། །རྡོ་རྗེ་ཉི་མ་བློ་གྲོས་ལྡན། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །དཀྱིལ་འཁོར་དམ་པ་བྲི་བར་བྱ། །དེ་ཡི་ནང་དུ་བྲི་བྱ་བ། །རྡོ་རྗེ་ཉི་མ་འོད་ཆེན་པོ། །རྡོ་རྗེ་ཉི་མའི་སྟེང་དུ་ནི། །གྲུ་གསུམ་རྣམ་པ་ལས་བྱུང་བ། །དེ་ཡི་དབུས་སུ་གཟི་བརྗིད་ཆེ། །འབར་བ་ཡི་ནི་མེ་ལྟ་བུ། །པདྨ་ཆེན་པོ་འདབ་བརྒྱད་པ། །ཟེ་འབྲུ་ཡིས་ནི་ཤིན་ཏུ་མཛེས། །དེ་ཡི་ལྟེ་བའི་དཀྱིལ་དུ་ནི། །རྡོ་རྗེ་གཟི་བརྗིད་སྟོབས་པོ་ཆེ། ། བཟང་པོའི་མཚལ་དང་མཚུངས་པའི་འོད། །རྒྱ་སྐྱེགས་ཁུ་བ་མཚུངས་པའི་མདོག །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པའོ། །དེ་ཡི་སྔགས་སུ་ཡོངས་གྲགས་པ། །ཀུན་ནས་སངས་རྒྱས་མཚུངས་པ་ཉིད། །དབྱངས་ཡིག་བཅུ་གཅིག་པ་ཡི་མཐའ། ། ཉི་མའི་དཀྱིལ་འཁོར་དབུས་སུ་ནི། །སྔགས་ཀྱི་ཕྲེང་བས་ཡོངས་སུ་བསྐོར། །རང་གི་ཕྱག་རྒྱའི་མཚན་མ་ལྡན། །དེ་ལྟའི་དཀྱིལ་འཁོར་བྲིས་ནས་ནི། །སངས་རྒྱས་ཐམས་ཅད་རབ་མཆོད་བྱ། །རྡོ་རྗེ་གཟི་བརྗིད་ཀྱི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །ཡིད་བཞིན་ནོར་བུའི་རྒྱལ་མཚན་མིང་། །བདག་ཉིད་ཆེན་པོ་རྡོ་རྗེའི་ཏོག །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །ཟླ་བའི་དཀྱིལ་འཁོར་བྲི་བར་བྱ། །དཀྱིལ་འཁོར་དེ་ཡི་དབུས་སུ་ནི། །མཆོག་

ཏུ་འབར་བ་ཡི་ནི་རླུང་། །ཟླ་བ་ཕྱེད་པའི་རྣམ་པ་འདྲ། །རིན་ཆེན་རྒྱལ་མཚན་ཡོངས་བསྒྲེང་བ། །དེ་ཡི་དབུས་སུ་སེམས་དཔའ་ཆེ། །རྒྱན་རྣམས་ཀུན་གྱིས་བརྒྱན་པ་པོ། །ཞལ་བཞི་པ་ལ་གཟི་བརྗིད་ཆེ། །ཨིནྡྲ་ནཱི་ལ་མཚུངས་པའི་འོད། །རིན་ཆེན་ཆར་པ་རབ་ཏུ་འབེབས། ། ཕྱག་བཞི་པ་ལ་སྣང་བ་ཆེ། །དེ་ཡི་གསང་སྔགས་གཟི་བརྗིད་ཆེ། །སྡེ་ཚན་བཞི་པའི་དང་པོ་ལ། །མེ་ཡིས་རབ་ཏུ་གསལ་བྱས་པ། །ཏོག་གི་ཕྱག་རྒྱས་ཡོངས་སུ་བསྐོར། །སྔགས་ཀྱི་ཕྲེང་བས་རྣམ་པར་བརྒྱན། །དེ་ལྟའི་དཀྱིལ་འཁོར་བྲིས་ནས་ནི། །སངས་རྒྱས་ཐམས་ཅད་རབ་མཆོད་བྱ། །རྡོ་རྗེ་ཏོག་གི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །རྡོ་རྗེ་བཞད་པ་ཞེས་གྲགས་པ། །རྡོ་རྗེ་བཞད་པ་མཚུངས་པའི་འོད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །དཀྱིལ་འཁོར་ཆེན་པོ་བྲི་བར་བྱ། །དཀྱིལ་འཁོར་དེ་དབུས་ཟླུམ་པོ་ནི། །ཨིནྡྲ་ནཱི་ལ་མཚུངས་པའི་འོད། །དེ་བཞིན་ཆུ་ནི་གཟི་བརྗིད་ཅན། །ཕྱག་རྒྱ་འཁོར་ལོས་རྣམ་པར་མཛེས། །དཀྱིལ་འཁོར་དེ་ཡི་དབུས་སུ་ནི། །སྟོན་ཀའི་ཟླ་བ་འདྲ་བའི་འོད། ། འགྲོ་བ་མཐའ་དག་སྣང་མཛད་པ། །རྒྱན་རྣམས་ཀུན་གྱིས་བརྒྱན་པ་པོ། །ཕྱག་བཞི་པ་ལ་ཞལ་བཞི་པ། །དབང་ཕྱུག་ཐམས་ཅད་ཡང་དག་ལྡན། །དེ་ཡི་གསང་སྔགས་གསང་ཆེན་པོ། །རྒྱུ་ཡི་དོན་དུ་བསྒྲུབ་པར་བྱ། །སྟོང་པ་མངོན་བརྗོད་བསམ་མི་ཁྱབ། །རང་མིང་རྟོགས་པས་མཚན་པའོ། །དེ་ལྟའི་དཀྱིལ་འཁོར་བྲིས་ནས་ནི། །སངས་རྒྱས་ཐམས་ཅད་རབ་མཆོད་བྱ། །རྡོ་རྗེ་བཞད་པའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱས། །ཐིག་བཞི་དང་ནི་ཡང་དག་ལྡན། །དངོས་གྲུབ་དཀྱིལ་འཁོར་ཡང་དག་བྲི། །དེ་ཡི་སྟེང་དུའང་པདྨ་ཆེ། །པདྨ་མེ་ལས་ཡང་དག་བྱུང་། །གྲུ་གསུམ་མཆོག་ཏུ་མཛེས་པ་པོ། །སུམ་མདོ་རིས་ཀྱིས་རྣམ་པར་བརྒྱན། །ཆོས་དབྱིངས་ཡི་གེའི་དེ་ཁོ་ན། །ཐམས་ཅད་གཟི་བརྗིད་

བདག་ཉིད་དགེ། །དེ་ཡི་བདག་གི་དེ་ཉིད་ནི། །འཕྲོ་བའི་མ་ར་ཀ་ཏ་འདྲ། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པ་པོ། །གཉིས་པའི་མདོག་ཏུ་གྱུར་པ་ནི། །པདྨ་རཱ་ག་མཚུངས་པའི་འོད། །ཇི་སྲིད་ངག་གི་འཁོར་ལོ་ནི། །སྨྲ་བའི་དབྱེ་བས་རབ་ཏུ་གནས། །ཐམས་ཅད་སོ་སོར་གསལ་བར་བྱེད། །སྤྲིན་གྱི་དཀྱིལ་འཁོར་མཆོག་རྨད་བྱུང་། །དེ་ལྟའི་དཀྱིལ་འཁོར་བྲིས་ནས་ནི། །སངས་རྒྱས་ཐམས་ཅད་རབ་མཆོད་བྱ། །རྡོ་རྗེ་སྨྲ་བའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །དཀྱིལ་འཁོར་སྔ་མའི་སྦྱོར་བ་ཡིས། །དཀྱིལ་འཁོར་ཐམས་ཅད་བྲི་བར་བྱ། །དེ་ཡི་དབུས་སུ་གོ་ཆ་ཆེ། །རིན་ཆེན་ཀུན་གྱིས་རྣམ་པར་བརྒྱན། །དེ་ཡི་དབུས་སུ་བརྩོན་ཆེན་པོ། །རྡོ་རྗེ་བསྲུང་བ་ཡང་དག་བྲི། །ཕྱག་བཞི་པ་ལ་ཞལ་བཞི་པ། །རྒྱན་རྣམས་ཀུན་གྱིས་བརྒྱན་པ་པོ། །ཁ་དོག་སྣ་ཚོགས་གཟི་བརྗིད་ཆེ། །ཐམས་ཅད་བསྲུང་བ་མཆོག་ཏུ་དགེ། །ཕྱག་རྒྱ་སྔགས་དང་ཡང་དག་ལྡན། །གསང་བ་ཆེན་པོའི་གོ་འཕང་མཆོག །དེ་ཡི་གསང་སྔགས་གཟི་བརྗིད་ཆེ། །ཤ་ཥའི་སྡེ་ཡི་མཐར་གནས་མཆོག །མགོན་པོའི་རྒྱུར་ནི་མངོན་པར་བརྗོད། །སྟེང་དུ་ནཱ་དས་བརྒྱན་པར་བྱས། །ཀུན་ནས་ཁ་དོག་དུ་མ་ཡིས། །ཡོངས་སུ་བསྐོར་བར་བསྒོམ་པར་བྱ། །སྔགས་ཀྱི་ཕྲེང་བ་ཡོངས་སུ་ལྡན། །གློག་གི་ཕྲེང་བས་རྣམ་པར་བརྒྱན། །དེ་ལྟའི་དཀྱིལ་འཁོར་བྲིས་ནས་ནི། །མཆོད་པ་ཐམས་ཅད་རབ་བསྒྲུབ་བྱ། །རྡོ་རྗེ་བསྲུང་བའི་དཀྱིལ་འཁོར་རོ།། །།དེ་ནས་དཀྱིལ་འཁོར་ཆེན་པོ་མཆོག །ཡང་དག་རབ་ཏུ་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པར་བྱ། །ཐིག་བཞི་དང་ནི་ཡང་དག་ལྡན། །ཁུ་ཚུར་དཀྱིལ་འཁོར་བྲི་བར་བྱ། །དཀྱིལ་འཁོར་དེ་ཡི་དབུས་སུ་ནི། །རྡོ་རྗེ་པདྨ་ཡིད་འོང་བ། །གཟི་བརྗིད་ཆེན་པོ་གསེར་གྱི་མདོག །འདབ་མ་བརྒྱད་པ་ཡིད་འོང་བ། །དེ་ཡི་སྟེང་དུ་གཟི་བརྗིད་ཆེ། །རྡོ་རྗེ་ཁུ་ཚུར་སྟོབས་པོ་ཆེ། །ཕྱག་བཞི་པ་ལ་ཞལ་བཞི་པ། །སྣ་ཚོགས་རྒྱན་གྱིས་བརྒྱན་པ་པོ། །ཀུནྡ་དུང་དང་ཟླ་བ་དཀར། །

ཁུ་ཚུར་དེ་བཞིན་གཤེགས་ཀུན་གྱི། །སྐུ་དང་གསུང་དང་ཐུགས་ཁུ་ཚུར། རྡོ་རྗེ་ཉིད་དུ་མཉམ་ཉིད་མཆོག །གཉིས་སུ་མེད་པ་མཆོག་གསང་བ། །ཁུ་ཚུར་གྱིས་ནི་སྡུད་པར་བཤད། །དེ་སྔགས་མཆོག་ཏུ་དགའ་བ་ནི། །བརྗོད་དུ་མེད་ཉིད་སྩོལ་མཛད་པ། །སྡེ་ཚན་ལྔ་པའི་གསུམ་པ་ནི། །འབར་བའི་འོད་ཀྱི་དཀྱིལ་འཁོར་ཅན། །སངས་རྒྱས་རྣམས་ཀྱི་རྡོ་རྗེའི་སྐུ། །འདི་ཡི་སྔགས་ལ་རྣམ་པར་གནས། །དེ་ལྟའི་དཀྱིལ་འཁོར་བྲིས་ནས་ནི། །རྡོ་རྗེ་ཁུ་ཚུར་མཆོད་པར་བྱ། །རྡོ་རྗེ་ཁུ་ཚུར་གྱི་དཀྱིལ་འཁོར་རོ།། །།དེ་ལ་སོགས་པ་མཐའ་ཡས་མཆོག ། དཀྱིལ་འཁོར་མཆོག་ཏུ་འབར་བ་ནི། །ཆོས་ཀྱི་དབྱིངས་ཀྱི་མཐའ་ཀླས་པའི། །སངས་རྒྱས་བྱང་ཆུབ་སྩོལ་བར་མཛད། །དེ་ནས་ཡང་དག་བཤད་བྱ་བ། །འཇིག་རྟེན་པ་ཡི་དཀྱིལ་འཁོར་མཆོག །དེ་བཞིན་གྲུ་བཞིར་བྲིས་ནས་ནི། །སྒོ་ཁྱུད་ལ་སོགས་རྣམ་པར་སྤང༌། །རྩེ་གསུམ་པཊྚི་ས་དང་ནི། །དུང་དང་པདྨ་སོགས་པས་བརྒྱན། །ཐོག་མར་དབང་ཕྱུག་ཆེན་པོ་དགོད། །རྩེ་གསུམ་པ་ཡི་ཕྱག་རྒྱར་ལྡན། །ཁྱུ་མཆོག་ལ་ཞོན་མིག་གསུམ་པ། །སྟག་གི་པགས་གྱོན་ཕྱག་བཞི་པ། །ཐལ་བས་བྱུགས་ཤིང་མགོ་བོ་ལ། །རལ་པའི་ཚོགས་ནི་རབ་འཕྱང་བ། །ཆུ་ཡི་དཀྱིལ་འཁོར་དབུས་སུ་ནི། །དེ་བཞིན་གཤེགས་པ་ཐམས་ཅད་ལ། །ཕྱག་འཚལ་བ་ནི་འདི་བྲིའོ། །དེ་ཡི་སྔགས་ནི། ༀ་ཏྲི་ས་སྲུྃ་ཧཱུྃ་ཕཊ། གསང་སྔགས་འདི་ནི་ཆེར་གསང་བ། །བདག་ཉིད་ཆེན་པོ་དབང་ཕྱུག་ཆེའི། །དབང་ཕྱུག་ཆེན་པོའི་དཀྱིལ་འཁོར་རོ། །དཀྱིལ་འཁོར་ཆེན་པོ་དེ་ཉིད་ལ་དབང་ཕྱུག་ཆེན་པོའི་གནས་སུ་ནག་པོ་ཆེན་པོ་གཞག་པར་བྱའོ། །ལག་པ་སྟོང་གིས་གར་བྱེད་པ་དང་ལྡན་པའི་དགའ་བྱེད་དབང་ཕྱུག་དང་ལྷན་ཅིག་ཕྱག་བཞི་པ་སྤྱན་གསུམ་པའོ། །ལག་པ་སྟོང་གིས་གནས་པའོ། །རང་གི་སྔགས་ནི། ༀ་མ་ཧཱ་ཀཱ་ལ་ཧཱུྃ་བྷྱོཿ། ༀ་ནན་དི་ཀེ་ཤྭ་ར་ཧཱུྃ་བྷྱོ། འདི་བཟླས་ན་དངོས་གྲུབ་ཐམས་ཅད་བྱེད་དོ། །དགའ་བྱེད་དབང་ཕྱུག་དང་། ནག་པོ་ཆེན་པོའི་དཀྱིལ་འཁོར་རོ། །དེ་ཉིད་ཀྱི་ནི་ཆོ་ག་ཡིས། །དཀྱིལ་འཁོར་གྲུ་བཞི་ཐིག་གདབ་བྱ། །དེར་ནི་པདྨ་ཡང་དག་བྲི། །པདྨའི་དབུས་སུ་སྦྲང་རྩི་བྱེད། །

ལ་སོགས་མིང་པོ་གསུམ་བྲིའོ། །གཞུ་ཡི་ཕྱག་རྒྱ་ཡོངས་སུ་འཛིན། །སྦྲང་རྩི་བྱེད་དང་རྒྱལ་བ་བྱེད། །དེ་བཞིན་ཉིད་དུའང་སྒྲུབ་བྱེད་དོ། །མེ་ཏོག་མདའ་དང་ཡོངས་སུ་ལྡན། །རང་གི་མིང་རྟོགས་མཚན་མ་ཅན། །སྔགས་ནི། ༀ་མ་དྷཱུ་ཀྲིཏ་སྣྃ། ཨོཾ་སྭྃ། ཨོཾ་དྷྭ་ན་སྭ། གསང་སྔགས་འདི་ནི་འདོད་གཟུགས་ཅན། །དབང་དུ་བྱེད་པ་ཐམས་ཅད་སྒྲུབ། །སྦྲང་རྩི་རྡོ་རྗེ་ལ་སོགས་པའི་དཀྱིལ་འཁོར་རོ། །དཀྱིལ་འཁོར་གྲུ་བཞི་པ་བྲིས་ནས་དབུས་སུ་ཐིག་བཞི་གདབ་བོ། །དབུས་སུ་ཏུམ་བུ་རུའོ། །ཤར་གྱི་འདབ་མར་རྒྱལ་བའོ། །ལྷོ་རུ་རྣམ་པར་རྒྱལ་བའོ། །ནུབ་ཏུ་མི་ཐུབ་པའོ། །བྱང་དུ་གཞན་གྱིས་མི་ཐུབ་པའོ། །དེ་ལྟ་བུའི་དཀྱིལ་འཁོར་བྲིས་ནས་གོ་རིམས་ཇི་ལྟ་བ་བཞིན་དུ་གསང་སྔགས་དགོད་པར་བྱའོ། །ༀ་ཏུཾ་བུ་རུ་ཧཱུྃ། ༀ་ཛ་ཡེ་ཧཱྃ། ༀ་བི་ཛ་ཡེ་ཧཱྃ། ༀ་ཨ་ཛི་ཏེ་ཧཱྃ། ༀ་ཨ་པ་རཱ་ཛི་ཏེ་ཧཱྃ། དགའ་བ་འདི་དག་ལག་གཡོན་དུ། །ཁུ་ཚུར་གཡོན་པས་རབ་གྲུབ་སྩོལ། །འདི་ཡི་ཕྱག་རྒྱ་ཉིད་གྱུར་པ། །སངས་རྒྱས་ཀུན་གྱིས་རབ་ཏུ་བརྟགས། །ལག་པར་དགོད་པ་རབ་བཤད་བྱ། །གོ་རིམས་ཇི་ལྟ་བ་བཞིན་དུ། །ཏུམ་བུ་རུ་ནི་མཐེ་བོར་དགོད། །སྡིགས་མཛུབ་ལ་ནི་རྒྱལ་བ་གནས། ། རྣམ་རྒྱལ་གུང་མོ་ཉིད་ལའོ། །མི་ཐུབ་དེ་བཞིན་མིང་མེད་ལ། །གཞན་གྱིས་མི་ཐུབ་མཐེའུ་ཆུང་ལ། །ལག་པའི་དབུས་སུ་ཡི་གེ་ༀ། །དགོད་བྱ་དེ་ཉིད་ལག་པའི་རྒྱབ། །རྡོ་རྗེ་ཕྲེང་བའི་མཐར་ཐུག་ཏུ། །དགོད་པར་བྱ་བ་མཆོག་ཏུ་བཤད། །སྦྱོར་དང་རྣམ་པར་དབྱེ་བ་ཡང་། ། ཕྱག་རྒྱ་ཀུན་སྤྱོད་ཡོངས་སུ་བསྡུ། །སོ་སོར་བརྟན་པར་བྱ་བ་ཉིད། །སོར་མོ་རྣམས་ལ་ཁྱད་པར་དུ། །དབང་དང་དགུག་དང་རྨོངས་ལ་སོགས། །རེངས་བྱེད་ལ་སོགས་གོ་རིམས་བཞིན། །ལས་རྣམས་དག་ནི་ཐམས་ཅད་དུ། །སྔགས་པས་མཉམ་པར་གཞག་སྟེ་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་ཏེ་གཤེགས་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་དེ་བཞིན་གཤེགས་པ་ཐམས་ཅད་ཀྱི་གསང་བའི་མཚན་རྣམས་ཀྱིས་ལེགས་པར་བསྟོད་པ་མཛད་དེ། བཅོམ་ལྡན་འདས་མཉེས་པར་མཛད་

པ། བྱང་ཆུབ་སེམས་ནི་རྡོ་རྗེ་ཆེ། །སངས་རྒྱས་དེ་བཞིན་གཤེགས་པ་ཀུན། །དགྲ་བཅོམ་འདོད་ཆགས་བྲལ་བ་དང་། །ལེགས་པ་ཆོས་ཀྱི་འབྱུང་གནས་མཆོག །བློ་གྲོས་དག་པ་ཡེ་ཤེས་ཆེ། །ཐམས་ཅད་མཁྱེན་པ་ཀུན་རིག་མཆོག །མཆོག་གི་དབང་ཕྱུག་དཔའ་བ་ཆེ། །ཐོག་མ་ཐ་མ་མེད་ཁྱབ་བདག །མ་འདྲེས་མ་འདྲེས་པ་ཡི་དོན། །ཤིན་ཏུ་ཕྲ་བ་མཆོག་སྦྱིན་རྒྱལ། །རྡོ་རྗེ་ཅན་ཆེན་རྣལ་འབྱོར་ཆེ། །རྡོ་རྗེ་རྣལ་འབྱོར་དབང་ཕྱུག་མཆོག །མི་བསྐྱོད་པ་དང་མི་ཟད་མགོན། །ཆོས་དབྱིངས་གཞན་དང་གཞན་མིན་པ། །རིན་ཆེན་འབྱུང་གནས་རྡོ་རྗེ་མཆོག །དབང་བསྐུར་ཀུན་གྱི་བླ་མའི་བླ། །ཐེག་ཆེན་ཆེ་བའི་མཆོག་གི་མཆོག །དཔའ་བོ་མཆོག་ཏུ་དཔའ་བའི་མཆོག །ཟབ་ཅིང་ཡང་ལ་ཕྲ་བ་དང་། །ཐམས་ཅད་ཐམས་ཅད་དེ་བཞིན་གཤེགས། །འཁོར་ལོས་སྒྱུར་བའི་རྒྱལ་པོ་ཆེ། །ཚ་སྐྱོབ་དཀར་པོ་སྟོབས་པོ་ཆེ། །གཟི་བརྗིད་ཕུང་པོ་གཟི་བརྗིད་ཆེ། །ཕུལ་བྱུང་ཕུལ་ལས་ཕུལ་དུ་བྱུང་། །རྒྱུ་མེད་མཆོག་གི་མཆོག་དཔའ་མཆོག །གཟི་མཆོག་གཟི་བརྗིད་བྱེད་མཚུངས་པ། །རྒྱལ་བ་རྒྱལ་བ་མཆོག་ཉིད་དང་། །ལེགས་པའི་རྒྱལ་པོ་བདག་ཉིད་ཆེ། །རྡོ་རྗེ་སེམས་དཔའ་སེམས་ཆེན་པོ། །རྡོ་རྗེ་རྒྱལ་པོ་ལྕགས་ཀྱུ་ཆེ། །རྡོ་རྗེ་ཆགས་པ་མདའ་ཆེན་པོ། །རྡོ་རྗེ་ལེགས་པ་ལེགས་གྲུབ་མཛད། །རྡོ་རྗེ་རིན་ཆེན་ཆེ་མཆོག་མཆོག །རྡོ་རྗེ་གཟི་བརྗིད་ལེགས་བརྗིད་མཛད། །རྒྱལ་མཚན་ཆེན་པོ་རིན་ཆེན་ཏོག །རྡོ་རྗེ་བཞད་པ་ལེགས་བཞད་མཛད། །འཇིག་རྟེན་དབང་ཕྱུག་པདྨ་ཆེ། །ཤེས་རབ་ཡེ་ཤེས་ལེགས་རྣོ་མཛད། །ཆོས་ཀྱི་འཁོར་ལོ་ཆོས་ཆེན་པོ། །སེམས་དཔའ་སྨྲ་བ་ལེགས་བཞད་མཛད། །སྣ་ཚོགས་ལས་ནི་རྒྱལ་པོ་ཆེ། །རྡོ་རྗེ་བསྲུང་བ་ལེགས་བསྲུང་མཛད། །ཁྲོ་བོ་ཆེན་པོ་གནོད་སྦྱིན་ཆེ། །རྡོ་རྗེ་མཚམས་སྦྱོར་མཚམས་སྦྱོར་སེལ། །ཕྱག་འཚལ་སངས་རྒྱས་ཀུན་ཁྱོད་ལ། །དང་པོའི་རྣལ་འབྱོར་དབང་ཕྱུག་མཆོག །ལེགས་སོ་རྡོར་ཅན་རྣལ་འབྱོར་ཆེ། །དེ་བཞིན་གཤེགས་པ་ཐམས་ཅད་དགེ། །སྙིང་པོའི་རྒྱན་ཞེས་མཚན་གསོལ་བ། །འདི་དག་ཐམས་ཅད་ལེགས་པར་གསུངས། །སངས་

རྒྱས་རྣམས་ཀྱི་བྱང་ཆུབ་སེམས། །ཡེ་ཤེས་སྙིང་པོ་ཤིན་ཏུ་མཛེས། །གསང་བ་ཆེན་པོ་མཆོག་ཏུ་གསང་། །སྦ་བྱ་ཤིན་ཏུ་རྙེད་དཀའ་བ། །ཤེས་རབ་ཕ་རོལ་ཕྱིན་པའི་མདོ། །བརྗོད་དུ་མེད་ཅིང་ཡི་གེ་བྲལ། །རྡོ་རྗེ་སྙིང་པོ་རྒྱན་གྱི་རྒྱུད་ཆེན་པོ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་དཀྱིལ་འཁོར་འབྱུང་བ་ཞེས་བྱ་བའི་རྟོག་པ་རྒྱས་པ་འདི་ཡོངས་སུ་རྫོགས་སྷོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་ཏེ་གཤེགས་ནས། བཅོམ་ལྡན་འདས་ཐོག་མ་དང་ཐ་མ་མེད་པའི་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་གསོལ་བ་བཏབ་བོ། །དེ་ནས་བཅོམ་ལྡན་འདས་རྗོ་རྗེ་རྣལ་འབྱོར་གྱི་དབང་ཕྱུག་ཆེན་པོས་དེ་དག་གིས་གསོལ་བ་བཏབ་པའི་ཚིག་ཉེ་བར་གསན་ནས། སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་མ་ཐག་ཏུ་བཅོམ་ལྡན་འདས་མ་ཡང་སྙོམས་པར་ཞུགས་སོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་འདི་སྐད་ཅིག་ཉིད་ལ་འཇམ་དཔལ་གཞོན་ནུར་གྱུར་པ་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཡེ་ཤེས་རྡོ་རྗེ་ལ་ཞུགས་པར་གྱུར་ཏོ། ། ཞུགས་ནས་ཀྱང་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཤེས་རབ་ཡེ་ཤེས་ཀྱི་ཏིང་ངེ་འཛིན་གསལ་བར་མཛད་ཅིང་བརྟན་པར་གྱུར་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་དེ་ལས་འཐོན་ཏེ། སངས་རྒྱས་ཐམས་ཅད་ཀྱི་ཡུལ་ཆོས་ཀྱི་དབྱིངས་ཀྱི་མཐའ་ཀླས་པ་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་སྣང་བར་མཛད་ནས། སེམས་ཅན་ཐམས་ཅད་ཀྱིའང་ཤེས་རབ་དང་ཡེ་ཤེས་རྣམ་པར་སྦྱངས་ཏེ། བྱང་ཆུབ་ཀྱི་སེམས་བསྐྱེད་ནས་བཞུག་ཅིང་རྗེས་སུ་མཉེས་པར་བྱས་ནས་ལེགས་པར་མཛད་ནས་རྣམ་པར་གནས་ཏེ། རྡོ་རྗེ་སེམས་དཔའི་ཏིང་ངེ་འཛིན་ལེགས་པར་ཡོངས་སུ་རྫོགས་པར་མཛད་ནས་མངོན་པར་དབང་བསྐུར་ཏེ། གཟི་བརྗིད་དང་། ཏོག་དང་། བཞད་པ་དང་། དེ་དག་ལ་ངེས་པར་སྦྱར་ཏེ་མཆོག་གི་དབང་ཕྱུག་ཆེན་པོ་ལས་རྡོ་རྗེ་སེམས་དཔའི་ཏིང་ངེ་འཛིན་གྱིས་

ཆོས་རྟོགས་པ་ལ་ཡང་རབ་ཏུ་གནས་ནས་རྣོན་པོ་དང་། རྒྱུ་དང་། སྨྲ་བའི་སེམས་དཔའ་རྣམས་ལའང་ཐུགས་བརྟན་པར་མཛད་དེ། ཡོངས་སུ་དག་ནས་ཡང་པདྨོའི་སེམས་དཔའི་ཏིང་ངེ་འཛིན་ལ་རང་བཞིན་གྱིས་དག་པའི་དབང་ཕྱུག་ཆོས་ཉིད་གཞི་མེད་པ་ལ་སྦྱར་ནས་སྣ་ཚོགས་པའི་ལས་ཀྱི་བདག་པོ་དང་། སེམས་ཅན་ཡོངས་སུ་སྨིན་པར་བྱེད་པ་བསྲུང་བ་དང་། ཁྲོ་བོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་མཚམས་སྦྱོར་བ་རྣམས་སེམས་ཅན་གྱི་ཁམས་མཐའ་དག་ཡོངས་སུ་སྨིན་པ་དང་། བྱིན་གྱིས་བརླབས་ཏེ་སླར་ལོག་ནས་བཅོམ་ལྡན་འདས་ཀྱི་ཐུགས་ཀར་རྗེས་སུ་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཡེ་ཤེས་ལ་བཞུགས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་ཟག་མེད་ཤེས་རབ་བདག །སངས་རྒྱས་སྐྱོབ་པ་ཐམས་ཅད་ཀྱི། །ཤེས་རབ་ཤིན་ཏུ་དྲི་མེད་སེམས། །སེམས་དཔའི་ལུས་སུ་བདག་གྱུར་ཏོ། །དྲི་མེད་སངས་རྒྱས་ཐམས་ཅད་ཀྱི། །དངོས་དང་དངོས་མེད་རྣམ་དཔྱད་ན། །ཨེ་མའོ་ཆོས་ནི་བསམ་མེད་ཉིད། །བདག་གི་དབང་དུ་རྣམ་པར་གནས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་བཅོམ་ལྡན་འདས་ཀྱི་ཐུགས་ཀ་ནས་འཐོན་ནས་བྱང་ཆུབ་སེམས་དཔའ་བཅུ་དྲུག་གི་ལུས་སུ་མངོན་པར་སྤྲུལ་ཏེ། བཅོམ་ལྡན་འདས་རྣམ་པར་སྣང་མཛད་ལ་ཡོངས་སུ་བསྐོར་བའི་དེ་བཞིན་གཤེགས་པ་ཐམས་ཅད་ཀྱི་ཉེ་འཁོར་ཀུན་ཏུ་ཉི་མའི་དཀྱིལ་འཁོར་དང་། འོད་ཀྱི་དཀྱིལ་འཁོར་དང་། བྱིན་གྱིས་བརླབས་པ་ཟླ་བའི་དཀྱིལ་འཁོར་ལ་འཁོད་པར་གྱུར་ནས། བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྡོ་རྗེ་སྙིང་པོ་རྒྱན་གྱི་རྒྱུད་ལས་ཤེས་རབ་ཀྱི་ཕ་རོལ་ཏུ་ཕྱིན་པ་མདོར་བསྟན་པའི་ཆོས་ཀྱི་ཚིག་བཀའ་སྩལ་དུ་གསོལ། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་དེ་བཞིན་གཤེགས་པ་ལ་དོན་དེ་ཡོངས་སུ་ཞུ་བར་སེམས་པ་ནི་ལེགས་སོ་ལེགས་སོ། །ལེགས་པར་རབ་ཏུ་ཉོན་ལ་ཡིད་

ལ་ཟུང་ཤིག་དང་ངས་བཤད་དོ། །དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་དེ་བཞིན་གཤེགས་པ་ཐམས་ཅད་དུ་བདག་ཉིད་བྱིན་གྱིས་བརླབས་ནས་སྔགས་ཀྱི་ཚིག་འདི་དག་བཀའ་སྩལ་པ། དྲན་པ་ཉེ་བར་གཞག་པ་བཞི་ནི་ནང་གི་ལུས་དང་། ཕྱིའི་ལུས་དང་། ཕྱི་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་བརྩོན་འགྲུས་ཅན་ཤེས་བཞིན་དང་ལྡན་པ། དྲན་པ་དང་ལྡན་པས་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་བསལ་ཅིང་རྣམ་པར་སྤྱོད་དོ། །ལུས་ལ་ཀུན་འབྱུང་བའི་རྗེས་སུ་བལྟ་ཞིང་རྣམ་པར་སྤྱོད་དོ། །ལུས་ལ་ཟད་པའི་རྗེས་སུ་བལྟ་ཞིང་རྣམ་པར་སྤྱོད་དོ། །ལུས་ལ་མི་གནས་པའི་རྣམ་པར་སྤྱོད་ཅིང་འཇིག་རྟེན་དུ་གང་ཡང་ཉེ་བར་ལེན་པ་མེད་དོ། །ནང་གི་ཚོར་བ་དང་། ཕྱིའི་ཚོར་བ་དང་། ཕྱི་ནང་གི་ཚོར་བ་དང་། ནང་གི་སེམས་དང་། ཕྱིའི་སེམས་དང་། ཕྱི་ནང་གི་སེམས་དང་། ནང་གི་ཆོས་དང་། ཕྱིའི་ཆོས་དང་། ཕྱི་ནང་གི་ཆོས་ལ་ཆོས་ཀྱི་རྗེས་སུ་བལྟ་ཞིང་བརྩོན་འགྲུས་ཅན་ཤེས་བཞིན་དང་ལྡན་པ། དྲན་པ་དང་ལྡན་པས་འཇིག་རྟེན་གྱི་ཆགས་སེམས་དང་ཡིད་མི་བདེ་བ་རྣམ་པར་བསལ་ཅིང་རྣམ་པར་སྤྱོད་དོ། །ཆོས་ལ་ཀུན་འབྱུང་བའི་རྗེས་སུ་བལྟ་ཞིང་རྣམ་པར་སྤྱོད་དོ། །ཆོས་ལ་ཟད་པའི་རྗེས་སུ་བལྟ་ཞིང་རྣམ་པར་སྤྱོད་དོ། །ཆོས་ལ་མི་གནས་པའི་རྣམ་པར་སྤྱོད་ཅིང་འཇིག་རྟེན་དུ་གང་ཡང་ཉེ་བར་ལེན་པ་མེད་དོ། །རྟག་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་ལུས་དང་། ངག་དང་། སེམས་དང་། ཆོས་མཉམ་པ་ཉིད་ཀྱིས་གནས་སོ། ། ཨོཾ་ཀྃ་ཨོཾ་ཙ་ཏྭཱ་རི་སྨྲྀ་ཏྱཱ་པསྠ་ནཱ་ནཱ་ཧཱུྃ། ཡང་དག་པར་སྤོང་བ་བཞི་ནི་སྡིག་ཏོ་མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་དེ་མི་དམིགས་པའི་ཚུལ་གྱིས་འདུན་པ་སྐྱེད་ཅིང་རྩོལ་ལོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། ། སྡིག་ཏོ་མི་དགེ་བའི་ཆོས་སྐྱེས་པ་རྣམས་སྤང་བའི་ཕྱིར་འདུན་པ་ལ་སོགས་པ་དང་། དགེ་བའི་ཆོས་མ་སྐྱེས་པ་རྣམས་སྐྱེད་པའི་ཕྱིར་འདུན་པ་སྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །དགེ་བའི་ཆོས་སྐྱེས་

པ་རྣམས་འཕེལ་ཞིང་རྒྱས་པར་བྱ་བ་དང་། ཡངས་པར་བྱ་བའི་ཕྱིར་དང་། བསྒོམ་པ་ཡོངས་སུ་རྫོགས་པའི་ཕྱིར་འདུན་པ་སྐྱེད་དོ། །འབད་དོ། །བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། །སྨོན་ལམ་ཡང་དག་པར་འདེབས་སོ། །ཆོས་རྣམས་ཐམས་ཅད་དོན་དམ་པར་མི་སྤོང་བ་དང་། མི་སྤོང་བ་མ་ཡིན་པའི་ཆེད་དུ་རྟོགས་པར་བྱའོ་ཞེས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་འདི་བཀའ་སྩལ་ཏོ། །ༀ་སམྱ་ཀ་པྲ་ཧཱ་ཎ་སརྦྦ་ཏ་ཐཱ་ག་ཏ་ས་མ་ཏཱ་ཨ་དྷིཥྛ་ཨཿརཿཧཱུྃ། ཡང་དག་པར་སྤོང་བ་རྗོད་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །རྫུ་འཕྲུལ་གྱི་རྐང་པ་བཞི་ནི་འདུན་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་སྒོམ་པར་བྱེད་དོ། །བརྩོན་འགྲུས་དང་། སེམས་དང་། སྤྱོད་པའི་ཏིང་ངེ་འཛིན་སྤོང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ་སྒོམ་པར་བྱེད་དོ། ། ཤེས་རབ་ཀྱི་ཕ་རོལ་ཏུ་ཕྱིན་པ་དོན་དམ་པ་དང་། ཀུན་རྫོབ་ཀྱི་སྒོའི་ཆོས་ཐམས་ཅད་སྒྱུ་མ་སྒྱུ་མའི་མཚན་ཉིད་དུ་འཇུག་གོ་ཞེས་བཅོམ་ལྡན་འདས་ཆོས་ཐམས་ཅད་ཀྱི་འཁོར་ལོས་སྒྱུར་བས་བཀའ་སྩལ་ཏོ། །ཨོཾ་རྀ་དྷི་པཱ་ད་པཱ་ར་མི་ཏེ་ལ་བཱ་པ་ར་ཧཱུྃ་ཧཱུྃ། རྫུ་འཕྲུལ་གྱི་རྐང་པའི་ཕ་རོལ་ཏུ་ཕྱིན་པ་མཉམ་པ་ཉིད་ཀྱི་ཡེ་ཤེས་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དབང་པོ་ལྔ་ནི་དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོའོ། །བཅོམ་ལྡན་འདས་ཆོས་ཐམས་ཅད་མཉམ་པ་ཉིད་ལ་དབང་སྒྱུར་བས་སྤྲོས་པ་མེད་པའི་དབང་པོ་འདི་དག་བཀའ་སྩལ་ཏོ། །ༀ་ཨིནྡྲི་ཡཱ་བ་བོ་དྷ་པྲཛྙེ་ཨི་ཤེཉྩ་ནཿ་མ་ནྱ་ནཱ་ཡ་ག་ཏཱ་ཡ་ཨཱཿཧཱུྃ། དབང་པོ་མཉམ་པ་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །སྟོབས་ལྔ་ནི་དད་པའི་སྟོབས་དང་། བརྩོན་འགྲུས་ཀྱི་སྟོབས་དང་། དྲན་པའི་སྟོབས་དང་། ཏིང་ངེ་འཛིན་གྱི་སྟོབས་དང་། ཤེས་རབ་ཀྱི་སྟོབས་སོ་ཞེས་བཀའ་སྩལ་ཏོ། །བཅོམ་ལྡན་འདས་ཆོས་ཐམས་ཅད་མཉམ་པ་ཉིད་ལ་གནས་པ། སྟོབས་ཐམས་ཅད་རྟོགས་པ། སྤྲོས་པ་ཐམས་ཅད་དང་བྲལ་བ། གདོད་མ་ནས་དག་པས་འདི་བཀའ་སྩལ་པ།

ༀ་སརྦྦ་ཏ་ཐཱ་ག་ཏཱ་བ་ལ་ཨཿཧཱུྃ་ཧཱུྃ་བཿ། སྟོབས་འཕེལ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཚངས་པའི་གནས་པ་བཞི་ནི། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སོ། །ཨོཾ་བྲཧྨ་བི་ཧ་ར་དྷིཥྛཱ་ན་གྃ་མྃ་དྲུྃ་ཀྑྃ་ཧཱུྃ་ཏྲཱྃ། ཆོས་ཐམས་ཅད་མཉམ་པ་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་བཀའ་སྩལ་ཏོ། །ཚངས་པའི་གནས་པ་བྱིན་གྱིས་རློབ་པའོ། །སོ་སོ་ཡང་དག་པར་རིག་པ་བཞི་ནི། སྤོབས་པ་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པའོ་ཞེས་བཅོམ་ལྡན་འདས་ཆོས་ཐམས་ཅད་སྒྱུ་མའི་མཚན་ཉིད་དུ་སོ་སོ་ཡང་དག་པར་རིག་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའོ་ཞེས་བཀའ་སྩལ་ཏོ། །ༀ་པྲ་ཏི་སམྦི་དཿསྭ་ཧཱུྃ། ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །རྗེས་སུ་དྲན་པ་དྲུག་གང་ཞེ་ན། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། དགེ་འདུན་རྗེས་སུ་དྲན་པ་དང་།གཏོང་བ་རྗེས་སུ་དྲན་པ་དང་། ཚུལ་ཁྲིམས་རྗེས་སུ་དྲན་པ་དང་། ལྷ་རྗེས་སུ་དྲན་པའོ། །ཆོས་ཐམས་ཅད་གཅིག་ཏུ་རྗེས་སུ་དྲན་པ་ནི་ཆོས་ཐམས་ཅད་དོན་དམ་པ་སྟོང་པ་ཉིད་ཅེས་བྱའོ། །མཚན་ཉིད་དང་མཚན་ཉིད་མེད་པ་རྣམ་པར་སྤྱོད་པས་མཉམ་པ་ཉིད་ཀྱི་སྒོ་ཞེས་བྱ་བ་འདི་ཏིང་ངེ་འཛིན་ལ་དབང་སྒྱུར་བས་བཀའ་སྩལ་ཏོ། །ༀ་སརྦྦ་ཨ་ནུ་སྨྲྀ་ཏི་བུདྡྷྃ་སྃ་པ་དཱ་དི་ཤི་ཧཱུྃ་ཧཱུྃ་ཧཱུྃ། རྗེས་སུ་དྲན་པ་དྲུག་གི་ཤེས་རབ་བོ། །བྱང་ཆུབ་ཀྱི་ཡན་ལག་བདུན་གང་ཞེ་ན། དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་། དགའ་བ་ཡང་དག་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ། བྱང་ཆུབ་ཀྱི་ཡན་ལག་མཉམ་པ་ཉིད་སྐྱེ་བ་མེད་པའི་མཚན་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པ་བཀའ་སྩལ་ཏོ། །ༀ་སརྦྦ་ཏཱ་བོ་དྷྱྃ་ག་

ས་མ་ཏཱ་སུ་པྲ་ཏི་ཥྛི་ཏེ་དྷྲུ་བྃ། འཕགས་པའི་ལམ་ཡན་ལག་བརྒྱད་གང་ཞེ་ན། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །ལམ་ཟད་མི་ཤེས་པའི་བྱང་ཆུབ་ཀྱི་སེམས་ཆེན་པོ་ལ་འཇུག་པ་ལེགས་པར་སོ་སོར་རིག་པ་ཐམས་ཅད་མཁྱེན་པའི་ཡེ་ཤེས་སོ། །ༀ་ཨཱཪྱཱ་ཥྛཱྃ་ག་མཱརྒ་མ་ཊ། འཕགས་པའི་ལམ་ཡན་ལག་བརྒྱད་པ་མཉམ་པ་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཏིང་ངེ་འཛིན་གསུམ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ། །དེ་ལ་སྟོང་པ་ཉིད་ཀྱི་ཏིང་ངེ་འཛིན་གང་ཞེ་ན། སྟོང་པའི་རྣམ་པ་དང་། གསོག་དང་གསོབ་ཀྱི་རྣམ་པ་དང་། རང་བཞིན་མེད་པའི་རྣམ་པས་ཆོས་ཐམས་ཅད་མཚན་ཉིད་གཅིག་ཏུ་རྟོགས་པ་སེམས་རྩེ་གཅིག་པ་སྟེ། འདི་ནི་སྟོང་པ་ཉིད་ཀྱི་ཏིང་ངེ་འཛིན་ཅེས་བརྗོད་དོ། །དེ་ལ་མཚན་མ་མེད་པའི་ཏིང་ངེ་འཛིན་གང་ཞེ་ན། གང་ལ་མཚན་མར་མི་བྱེད་པ་དང་། འདོད་པ་མེད་པ་དང་།ཤེས་པ་མེད་པ་དང་། ཞི་བའི་རྣམ་པ་དང་། རྣམ་པར་བྲལ་བའི་རྣམ་པར་སེམས་རྩེ་གཅིག་པ་སྟེ། འདི་ནི་མཚན་མ་མེད་པའི་ཏིང་ངེ་འཛིན་ཅེས་བྱའོ། །དེ་ལ་སྨོན་པ་མེད་པའི་ཏིང་ངེ་འཛིན་གང་ཞེ་ན། མི་རྟག་པའི་རྣམ་པ་དང་། སྡུག་བསྔལ་བའི་རྣམ་པ་སེམས་རྩེ་གཅིག་པ་སྟེ། དེ་ནི་སྨོན་པ་མེད་པའི་ཏིང་ངེ་འཛིན་ཅེས་བྱའོ། །ཆོས་ཐམས་ཅད་རྟོགས་ནས་སྨོན་པར་མི་བྱེད་དོ། །ལྷའམ་ལྷ་ལས་གཞན་གང་ཡང་རུང་བ་དོན་དུ་མི་གཉེར་ཞིང་གསོལ་བ་འདེབས་པར་ཡང་མི་འདོད་པ་སྟེ། དངོས་པོ་ཐམས་ཅད་ལ་ཏིང་ངེ་འཛིན་ཐམས་ཅད་ཀྱི་སྒོ་ཡིས་ཀྱང་ངོ་། །ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཀྱིས་ཏིང་ངེ་འཛིན་གྱི་སྒོ་གསུམ་ཉེ་བར་རྟོགས་པར་བྱའོ། །ༀ་ཁ་ས་མཿསརྦྦ་དྷརྨྨཱཿཁྃ། དེ་ལ་སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང་། ལས་ཀྱི་རྣམ་པར་སྨིན་པ་མཁྱེན་པའི་སྟོབས་དང་། ཁམས་སྣ་ཚོགས་མཁྱེན་པའི་སྟོབས་དང་། དབང་

པོ་མཆོག་དང་མཆོག་མ་ཡིན་པ་མཁྱེན་པའི་སྟོབས་དང་། མོས་པ་སྣ་ཚོགས་མཁྱེན་པའི་སྟོབས་དང་། སྡུག་བསྔལ་འགོག་པ་སོ་སོར་མཁྱེན་པའི་སྟོབས་དང་། ཀུན་ནས་ཉོན་མོངས་པ་དང་རྣམ་པར་བྱང་བ་མཁྱེན་པའི་སྟོབས་དང་། སྔོན་གྱི་གནས་རྗེས་སུ་དྲན་པ་མཁྱེན་པའི་སྟོབས་དང་། མངོན་པར་ཤེས་པ་ལྔ་མཁྱེན་པའི་སྟོབས་དང་། ཟག་པ་ཟད་པ་མཁྱེན་པའི་སྟོབས་སོ། །དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་སོ་སོར་རྟོགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའོ། །ༀ་ད་ཤ་བ་ལ་ས་མ་ཏཱ་ཐཱ། སྟོབས་བཅུ་མཉམ་པ་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །རྣམ་པར་ཐར་པ་བརྒྱད་གང་ཞེ་ན། གཟུགས་ཅན་གྱིས་གཟུགས་རྣམས་མཐོང་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པའི་འདུ་ཤེས་དང་ལྡན་པས་ཕྱི་རོལ་གྱི་གཟུགས་རྣམས་མཐོང་བ་འདི་ནི་རྣམ་པར་ཐར་པ་གཉིས་པའོ། །བཟང་བར་མོས་པ་འདི་ནི་རྣམ་པར་ཐར་པ་གསུམ་པའོ། །གཟུགས་ཀྱི་འདུ་ཤེས་ལས་ཡང་དག་པར་འདས་ཏེ་ཐོགས་པའི་འདུ་ཤེས་རྣམས་ནུབ་པར་གྱུར་ཅིང་། སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ཏེ། ནམ་མཁའ་མཐའ་ཡས་སྐྱེ་མཆེད་ལ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་བཞི་པའོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ལ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་ལྔ་པའོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅུང་ཟད་མ་ཡོད་དོ་ཞེས་ཅུང་ཟད་མེད་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་དྲུག་པའོ། །དེ་རྣམ་པ་ཐམས་ཅད་དུ་ཅུང་ཟད་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་བདུན་པའོ། །དེ་རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་

ཏེ་འདུ་ཤེས་དང་། ཚོར་བ་འགོག་པའི་སྙོམས་པར་འཇུག་པ་ལ་ཉེ་བར་བསྒྲུབས་ཏེ་གནས་པ་འདི་ནི་རྣམ་པར་ཐར་པ་བརྒྱད་པའོ། །ཆོས་ཐམས་ཅད་སྤྲོས་པ་མེད་པའི་མཚན་ཉིད་ཀུན་ནས་ཉོན་མོངས་པ་མེད་ཅིང་རྣམ་པར་བྱང་བ་མེད་པ། བསམ་གཏན་མེད་ཅིང་། བསམ་གཏན་མེད་པ་མ་ཡིན་པ། སྙོམས་པར་འཇུག་པ་མེད་ཅིང་སྙོམས་པར་འཇུག་པ་མ་ཡིན་པ་འདི་བཀའ་སྩལ་ཏོ། །ༀ་ས་མནྟ་བྷ་དྲེ་སརྦྦ་སྭ་བྷཱ་བ་བི་ཤུདྡྷེ་རྡྷྃ་ཥྃ་ཁྃ། གནས་དང་གནས་མ་ཡིན་པ་དང་བྲལ་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །མི་འཇིགས་པ་བཞི་གང་ཞེ་ན། བདག་གིས་ཡང་དག་པར་རྫོགས་པར་སངས་རྒྱས་སོ་ཞེས་དམ་བཅས་ན་ཆོས་འདི་རྣམས་མངོན་པར་རྫོགས་པར་སངས་མ་རྒྱས་སོ་ཞེས་བྱ་བར་བདག་ལ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སྐྱེ་དགུའི་ཚོགས་གཞན་ཅི་ཡང་རུང་སྟེ། འཇིག་རྟེན་ན་ཆོས་དང་ལྡན་པར་རྒོལ་བར་འགྱུར་རོ་ཞེས་བྱ་བའི་རྒྱུ་ཡང་དག་པར་རྗེས་སུ་མ་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དེ་ལ་བདག་མེད་པ་ཐོབ་པ་དང་། བག་ཚ་བ་མེད་པ་ཐོབ་པ་དང་། མི་འཇིགས་པ་ཐོབ་པར་རྣམ་པར་སྤྱོད་དེ། ཁྱུ་མཆོག་རླབས་པོ་ཆེའི་གནས་སུ་དམ་བཅའོ། །འཁོར་གྱི་ནང་དུ་སེང་གེའི་སྒྲ་བསྒྲག་གོ། །ཚངས་པའི་འཁོར་ལོ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སྐྱེ་དགུའི་ཚོགས་གཞན་སུས་ཀྱང་རུང་སྟེ། ཆོས་དང་ལྡན་པར་བསྐོར་བར་མི་ནུས་པ་བདག་གིས་རབ་ཏུ་བསྐོར་བར་བྱའོ། །བདག་ཟག་པ་ཟད་དོ་ཞེས་དམ་བཅས་ནས་དེ་ལ་ཟག་པ་འདི་རྣམས་ཡོངས་སུ་ཟད་པར་མ་གྱུར་ཏོ་ཞེས་བྱ་བར་བདག་ལ་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སྐྱེ་དགུའི་ཚོགས་གཞན་སུའང་རུང་སྟེ། འཇིག་རྟེན་ན་ཆོས་དང་འཐུན་པར་ཞེས་བྱ་བའི་བར་དུའོ། །གང་ཡང་བདག་གིས་བར་ཆད་ཀྱི་ཆོས་སུ་བསྟན་པ་དེ་དག་ལ་བརྟེན་ན་བར་ཆད་ཀྱི་ཆོས་སུ་མི་འགྱུར་རོ་ཞེས་བྱ་བ་རྒྱས་པར་སྦྱར་རོ། །གང་ཡང་བདག་གི་ལམ་འཕགས་པའི་ངེས་པར་འབྱུང་བའི་

ལམ་དུ་བཤད་པ་དེ་ཡིས་ངེས་པར་འབྱུང་བར་མི་འགྱུར་ཏེ། ཡང་དག་པར་སྡུག་བསྔལ་ཟད་པ་དང་། ཡང་དག་པར་སྡུག་བསྔལ་མཐར་བྱ་བར་ག་ལ་འགྱུར་ཞེས་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སྐྱེ་དགུའི་ཚོགས་སུ་ཡང་རུང་སྟེ། འཇིག་རྟེན་ན་ཆོས་དང་ལྡན་པར་རྒོལ་བར་འགྱུར་རོ་ཞེས་བྱ་བའི་རྒྱུ་ཡང་དག་པར་རྗེས་སུ་མི་མཐོང་བ་ལ་སོགས་པ་ཇི་ལྟར་གྱུར་པ་ཐམས་ཅད་ཡོངས་སུ་སྤྲོས་ཏེ་བརྗོད་པར་བྱའོ། །མི་འཇིགས་པ་ནི་ཆོས་ཐམས་ཅད་མཉམ་པ་ཉིད་སྒྱུ་མའི་མཚན་ཉིད་དེ་ངར་འཛིན་པ་དང་ང་ཡིར་འཛིན་པ་དང་བྲལ་བའི་ཕྱིར་རོ། །ༀ་བཻ་ཤཱ་ར་དྱ་ས་མ་ཏཱ་པྲཱཔྟ་ཨ་ཨ་ཨྃ་ཨཿ། མཐར་གྱིས་གནས་པའི་མཉམ་པ་ཉིད་ཀྱི་སྙོམས་པར་འཇུག་པ་དགུ་གང་ཞེ་ན། འདོད་པས་དབེན་པ། སྡིག་ཏོ་མི་དགེ་བའི་ཆོས་ཀྱིས་དབེན་པ། རྟོག་པ་དང་བཅས་པ། དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པར་རྟོག་པ་དང་། རྣམ་པར་དཔྱོད་པ་ཉེ་བར་ཞི་ནས་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་པ་མེད་པ། དཔྱོད་པ་མེད་པ། ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་ལ་ཉེ་བར་བསྒྲུབས་ཏེ་གནས་སོ། །དེ་དགའ་བའི་འདོད་ཆགས་དང་བྲལ་བས་བཏང་སྙོམས་སུ་གནས་ཏེ། དྲན་པ་དང་ལྡན་ཞིང་ཤེས་བཞིན་ཅན་བདེ་བ་ལུས་ཀྱིས་མྱོང་ལ་འཕགས་པ་རྣམས་ཀྱིས་དེ་ལ་དྲན་པ་དང་ལྡན་པའི་བདེ་བ་ལ་རྣམ་པར་དཔྱོད་པ་བཏང་སྙོམས་པའོ་ཞེས་བརྗོད་པ་སྟེ། དགའ་བ་མེད་པའི་བསམ་གཏན་གསུམ་པ་ལ་ཉེ་བར་བསྒྲུབས་ཏེ་གནས་སོ། །དེ་བདེ་བ་ཡང་སྤངས། སྡུག་བསྔལ་བ་ཡང་སྤངས་ཤིང་ཡིད་བདེ་བ་དང་། ཡིད་མི་བདེ་བ་སྔ་ནས་ཀྱང་ནུབ་པས་བདེ་བ་ཡང་མེད། སྡུག་བསྔལ་བ་ཡང་མེད། བཏང་སྙོམས་པ་དང་། དྲན་པ་ཡོངས་སུ་དག་པ། བསམ་གཏན་བཞི་པ་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་ཅིང་སྣ་ཚོགས་ཀྱི་འདུ་

ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་ཞེས་ཏེ་ནམ་མཁའ་མཐའ་ཡས་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་ཞེས་རྣམ་ཤེས་མཐའ་ཡས་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅུང་ཟད་མ་ཡོད་དོ་ཞེས་ཅུང་ཟད་མེད་པའི་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་ཅུང་ཟད་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་ཉེ་བར་བསྒྲུབས་ཏེ་གནས་སོ། །དེ་རྣམ་པ་ཐམས་ཅད་དུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་དང་ཚོར་བ་འགོག་པའི་སྙོམས་འཇུག་ལ་ཉེ་བར་བསྒྲུབས་ཏེ་གནས་སོ། ། རྣམ་པར་ཐར་པ་བརྒྱད་པོ་དང་མཉམ་པ་ཉིད་རྗེས་སུ་ཐོབ་ནས་དངོས་པོར་རྟོག་པར་མི་བྱེད། དངོས་པོ་མེད་པར་རྟོག་པར་མི་བྱེད། ཆོས་ཐམས་ཅད་གཉིས་སུ་མེད་པར་རྟོགས་སོ། །འདི་ནི་མཐར་གྱིས་གནས་པའི་སྙོམས་པར་འཇུག་པ་དགུ་མཉམ་པ་ཉིད་དོ། །ༀ་ཨ་ནནྟཿབི་མོཀྵ་མུ་ཁེ་ཤུྃ། དངོས་པོ་ཐམས་ཅད་མཐར་གྱིས་གནས་པའི་རྣམ་པར་ཐར་པ་མཉམ་པ་ཉིད་ཅེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལ་ཕ་རོལ་ཏུ་ཕྱིན་པ་བཅུ་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། སྨོན་ལམ་གྱི་ཕ་རོལ་ཏུ་ཕྱིན་པ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། སྟོབས་ཀྱི་ཕ་རོལ་ཏུ་ཕྱིན་པ་དང་། ཐབས་ཀྱི་ཕ་རོལ་ཏུ་ཕྱིན་པ་དང་། ཐམས་ཅད་ཀྱི་ཕ་རོལ་ཏུ་ཕྱིན་པ་དང་། མི་མཉམ་པ་དང་མཉམ་པའི་ཕ་རོལ་ཏུ་ཕྱིན་པ་དང་། སྤྲོས་པ་མེད་པའི་ཕ་རོལ་ཏུ་ཕྱིན་པ་དང་། ཡང་དག་པའི་དོན་གྱི་ཕ་རོལ་ཏུ་ཕྱིན་པ་དང་། ཆོས་ཐམས་ཅད་ཀྱི་དེ་ཁོ་ན་ཉིད་ཀྱི་དོན་གྱི་ཕ་རོལ་ཏུ་ཕྱིན་པ་དང་། རྡོ་རྗེའི་ཕ་རོལ་ཏུ་ཕྱིན་པ་དང་། རིན་པོ་ཆེའི་ཕ་

རོལ་ཏུ་ཕྱིན་པ་དང་། པདྨའི་ཕ་རོལ་ཏུ་ཕྱིན་པ་དང་། ལས་ཀྱི་ཕ་རོལ་ཏུ་ཕྱིན་པ་དང་། ཆོས་ཐམས་ཅད་མཉམ་པ་ཉིད་ཀྱི་ཕ་རོལ་ཏུ་ཕྱིན་པ་སྟེ། བསྟན་པའི་རྗེས་སུ་རྟོགས་པའི་སྦྱོར་བས་སོ། །ༀ་སརྦྦ་པཱ་ར་མི་ཏ་ཨརྠ་པ་རི་པཱུ་ར་ཎི། ༀ་པྲཱྃ་ཧཱུྃ་ཏྃ། ཐམས་ཅད་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལ་ས་བཅུ་པོ་གང་ཞེ་ན། རབ་ཏུ་དགའ་བ་ཞེས་བྱ་བའི་ས་དང་། དྲི་མ་མེད་པ་ཞེས་བྱ་བ་དང་། འོད་བྱེད་པ་ཞེས་བྱ་བ་དང་། འོད་འཕྲོ་བ་ཞེས་བྱ་བ་དང་། སྦྱང་དཀའ་བ་ཞེས་བྱ་བ་དང་། མངོན་དུ་གྱུར་པ་ཞེས་བྱ་བ་དང་། རིང་དུ་སོང་བ་ཞེས་བྱ་བ་དང་། མི་གཡོ་བ་ཞེས་བྱ་བ་དང་། ལེགས་པའི་བློ་གྲོས་ཞེས་བྱ་བ་དང་། ཆོས་ཀྱི་སྤྲིན་ཞེས་བྱ་བ་དང་། ས་ཐམས་ཅད་དོན་གཅིག་སྟེ། འདི་ལྟར་ཡེ་ཤེས་ཀྱི་དོན་ཏོ། །ཡེ་ཤེས་ཀྱང་ཅི་ཡང་མེད་པ། ཉོན་མོངས་པ་མེད་པ། ཡི་གེ་མེད་པ། དོན་ཡོད་པ། གདོད་མ་ནས་དག་པ། དྲི་མ་མེད་པ། འོད་གསལ་བ། བརྗོད་པ་དང་བྲལ་བ་ཞེས་བྱ་བའི་དོན་ཏོ། །ༀ་བྷཱུ་མི་བི་ཤོ་དྷ་ནི་སརྦྦརྠ་པ་རི་པཱུ་ར་ཎི་བྃ་བྷྲུྃ། ས་ཡོངས་སུ་སྦྱོང་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །བྱང་ཆུབ་སེམས་དཔའི་གནས་པ་བཅུ་གང་ཞེ་ན། བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་། གཞོན་ནུར་གྱུར་པ་དང་། ལས་དང་པོ་པ་དང་།རྣལ་འབྱོར་སྤྱོད་པ་དང་། སྐྱེ་བ་ནས་སྐྱེ་བར་སྦྱོར་བ་དང་ལྡན་པ་དང་། བསམ་པ་དང་ལྡན་པ་དང་། ཕྱིར་མི་ལྡོག་པ་དང་། དབང་བསྐུར་བ་ཐོབ་པ་དང་། སྐྱེ་བ་གཅིག་གིས་ཐོགས་པ་དང་། བྱང་ཆུབ་སེམས་དཔའ་རྣམས་ཀྱི་རྣམ་པར་གནས་པ་དང་། མི་གནས་པ་དོར་བ་སྟེ། དོན་དམ་པར་གནས་པ་གཅིག་ཡིན་པའི་ཕྱིར་ཏེ། འདི་ལྟར་གནས་པ་མེད་པའོ། །ༀ་སརྦྦ་བྱ་བ་སྠཱ་ན་བི་ག་ཏེ་ཧཱུྃ། རྣམ་པར་གནས་པ་མེད་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །བྱང་ཆུབ་སེམས་དཔའ་རྣམས་ཀྱི་དབང་བཅུ་གང་ཞེ་ན། ཚེ་ལ་དབང་བ་དང་། ལས་ལ་དབང་བ་དང་། ཡོ་བྱད་ལ་དབང་བ་དང་། མོས་པ་ལ་དབང་བ་དང་། སྨོན་ལམ་ལ་དབང་བ་དང་། རྫུ་འཕྲུལ་ལ་དབང་བ་དང་། སྐྱེ་བ་ལ་དབང་བ་དང་། ཡེ་ཤེས་ལ་དབང་བ་

དང་། ཆོས་ལ་དབང་བ་དང་། སེམས་ལ་དབང་བའོ། །དབང་བ་དང་མི་དབང་བ་རང་བཞིན་གྱིས་རྣམ་པར་གྲོལ་བ་ཐམས་ཅད་ལ་དབང་བ། དབང་ཕྱུག་ཐམས་ཅད་ལ་དབང་རྗེས་སུ་ཐོབ་པ། ཆོས་ཐམས་ཅད་ལེགས་པར་སོ་སོར་རྟོགས་པ་ཉིད་ཀྱི་ཕྱིར་རོ། །ༀ་སརྦྦ་བ་ཤི་ཏེ་ཏྲཱྃ་ཏྲཱུྃ་ཧཱུྃ། ཐམས་ཅད་ལ་དབང་བ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་གང་ཞེ་ན། དེ་བཞིན་གཤེགས་པ་ལ་འཁྲུལ་པ་མི་མངའོ། །ཅ་ཅོ་མི་མངའོ། །དགོངས་པ་ཉམས་པ་མི་མངའོ། །ཐུགས་མཉམ་པར་མ་བཞག་པ་མི་མངའོ། །འདུ་ཤེས་སྣ་ཚོགས་མི་མངའོ། །མ་བརྟགས་པའི་བཏང་སྙོམས་མི་མངའོ། །འདུན་པ་ཡོངས་སུ་ཉམས་པ་མི་མངའོ། །བརྩོན་འགྲུས་ཡོངས་སུ་ཉམས་པ་མི་མངའོ། །དྲན་པ་ཡོངས་སུ་ཉམས་པ་མི་མངའོ། །ཏིང་ངེ་འཛིན་ཡོངས་སུ་ཉམས་པ་མི་མངའོ། ། ཤེས་རབ་ཡོངས་སུ་ཉམས་པ་མི་མངའོ། །རྣམ་པར་གྲོལ་བ་ཡོངས་སུ་ཉམས་པ་མི་མངའོ། །རྣམ་པར་གྲོལ་བའི་ཡེ་ཤེས་གཟིགས་པ་ཡོངས་སུ་ཉམས་པ་མི་མངའོ། །འདས་པའི་དུས་ལ་མ་ཐོགས་མ་ཆགས་པའི་ཡེ་ཤེས་གཟིགས་པ་འཇུག་གོ། །མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་གོ། །ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་གོ །སྐུའི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་བ་སྟེ་ཡེ་ཤེས་ཀྱི་རྗེས་སུ་འབྲང་ངོ་། །གསུང་གི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་བ་སྟེ་ཡེ་ཤེས་ཀྱི་རྗེས་སུ་འབྲང་ངོ་། །ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་བ་སྟེ་ཡེ་ཤེས་ཀྱི་རྗེས་སུ་འབྲང་ངོ་། །འདི་ཆོས་རྗེ་ས་སྐྱ་པའི་བསྒྱུར་འཕྲོ་ལགས། རྒྱ་དཔེ་ལ་གཏུགས་ཤིང་སློབ་དཔོན་རབ་ཞི་བཤེས་གཉེན་གྱི་འགྲེལ་པ་དང་ཡང་བསྟུན་ནས། ཞུས་དག་བྱས་ཤིང་། མི་བཅོས་སུ་མི་རུང་བ་རེ་རེ་ཙམ་འགྲེལ་པ་དང་བསྟུན་ནས་བཅོས་ཤིང་ཞུ་ཐུག་གཡར་ཁྲལ་དུ་བླངས་ནས། བུ་སྟོན་གྱིས་བགྱིས་པའོ།། །།དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ལ་ས་བཅུ་རྣམས་ཅི་ཞེ་ན། རབ་ཏུ་དགའ་བ་ཞེས་བྱ་བའི་ས་དང་། དྲི་མ་

མེད་པ་ཞེས་བྱ་བ་དང་། འོད་བྱེད་པ་ཞེས་བྱ་བ་དང་། འོད་འཕྲོ་བ་ཞེས་བྱ་བ་དང་། ཐུབ་པར་དཀའ་བ་ཞེས་བྱ་བ་དང་། མངོན་དུ་གྱུར་པ་ཞེས་བྱ་བ་དང་། རིང་དུ་སོང་བ་ཞེས་བྱ་བ་དང་། མི་གཡོ་བ་ཞེས་བྱ་བ་དང་། ལེགས་པའི་བློ་གྲོས་ཞེས་བྱ་བ་དང་། ཆོས་ཀྱི་སྤྲིན་ཞེས་བྱ་བའོ། །ས་རྣམས་ཐམས་ཅད་དོན་གཅིག་པ་སྟེ། འདི་ལྟ་སྟེ། ཡེ་ཤེས་ཀྱི་དོན་ནོ། །ཡེ་ཤེས་ཀྱང་དོན་དམ་པར་ཅི་ཡང་མེད་པ། ཉོན་མོངས་པ་མེད་པ། འགྱུར་བ་མེད་པ། དོན་ཡོད་པ། གདོད་མ་ནས་དག་པ། དྲི་མ་མེད་པ། འོད་གསལ་བ། བརྗོད་དུ་མེད་པའོ་ཞེས་པའི་དོན་གང་ཡིན་པའོ། །ༀ་བྷཱུ་མི་བི་ཤོ་དྷ་ནི་སརྦཱརྠ་པ་རི་པཱུ་ར་ཎི་བྃ་བྷྲུྃ། ས་ཡོངས་སུ་སྦྱོང་བ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །བྱང་ཆུབ་སེམས་དཔའ་རྣམས་ཀྱི་རྣམ་པར་གཞག་པ་བཅུ་རྣམས་ཅི་ཞེ་ན། བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་། བྱིས་པར་གྱུར་པ་དང་། ལས་དང་པོ་པ་དང་། རྣལ་འབྱོར་སྤྱོད་པ་དང་། སྐྱེ་བ་སྐྱེད་པ་དང་། སྦྱོར་བ་ཕུན་སུམ་ཚོགས་པ་དང་། བསམ་པ་ཕུན་སུམ་ཚོགས་པ་དང་། ཕྱིར་མི་ལྡོག་པ་དང་། དབང་བསྐུར་བ་ཐོབ་པ་དང་། སྐྱེ་བ་གཅིག་གིས་ཐོགས་པ་སྟེ། བྱང་ཆུབ་སེམས་དཔའ་རྣམས་ཀྱི་རྣམ་པར་གཞག་པ་ནི་དོན་དམ་པར་ན་རྣམ་པར་གཞག་པ་དང་བྲལ་བ་སྟེ། རྣམ་པར་གཞག་པ་གཅིག་ཉིད་ཀྱི་ཕྱིར་ན་འདི་ལྟ་སྟེ། རྣམ་པར་གཞག་པ་མེད་པའོ། །ཨོཾ་སརྦྦ་བྱ་བསྠཱ་ན་བི་ག་ཏེ་ཧཱུྃ། རྣམ་པར་གཞག་པ་མེད་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ། ། བྱང་ཆུབ་སེམས་དཔའ་རྣམས་ཀྱི་དབང་བཅུ་རྣམས་ཅི་ཞེ་ན། ཚེ་ལ་དབང་བ་དང་། ལས་ལ་དབང་བ་དང་། ཡོ་བྱད་ལ་དབང་བ་དང་། མོས་པ་ལ་དབང་བ་དང་། སྨོན་ལམ་ལ་དབང་བ་དང་། རྫུ་འཕྲུལ་ལ་དབང་བ་དང་། སྐྱེ་བ་ལ་དབང་བ་དང་། སྟོབས་ལ་དབང་བ་དང་། ཆོས་ལ་དབང་བ་དང་། སེམས་ལ་དབང་བའོ། །དབང་རྣམས་ཐམས་ཅད་ཀྱང་དོན་དམ་པར་དབང་མེད་པ་རང་བཞིན་རྣམ་པར་དབེན་པ། ཀུན་རྫོབ་ཏུ་དབང་ཕྱུག་ཐམས་ཅད་ལ་དབང་རྗེས་སུ་ཐོབ་པ་སྟེ། ཆོས་ལེགས་པར་སོ་སོར་རྟོགས་པ་ཉིད་ཀྱི་ཕྱིར་རོ། །ༀ་སརྦཱ་བ་ཤི་ཏེ་ཏྲཱྃ་བྷྲཱུྃ་ཧཱུྃ།

དབང་ཐམས་ཅད་པ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ལ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རྣམས་ཅི་ཞེ་ན། དེ་བཞིན་གཤེགས་པ་ལ་འཁྲུལ་པ་མེད་པ་དང་། ཅ་ཅོ་མེད་པ་དང་། དྲན་པ་ཉམས་པ་མེད་པ་དང་། ཐུགས་མཉམ་པར་མ་བཞག་པ་མེད་པ་དང་། ཐ་དད་པ་ཉིད་ཀྱི་འདུ་ཤེས་མེད་པ་དང་། སོ་སོར་མ་བརྟགས་པའི་བཏང་སྙོམས་མེད་པ་དང་། འདུན་པ་ཉམས་པ་མེད་པ་དང་། བརྩོན་འགྲུས་ཉམས་པ་མེད་པ་དང་། དྲན་པ་ཉམས་པ་མེད་པ་དང་། ཏིང་ངེ་འཛིན་ཉམས་པ་མེད་པ་དང་། ཤེས་རབ་ཉམས་པ་མེད་པ་དང་། རྣམ་པར་གྲོལ་བ་ཉམས་པ་མེད་ཅིང་རྣམ་པར་གྲོལ་བའི་ཡེ་ཤེས་གཟིགས་པ་ཉམས་པ་མེད་པ་དང་། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པ་དང་། མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པ་དང་། ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པ་དང་། སྐུའི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང་། གསུང་གི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་དང་། ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བའོ། །དེ་བཞིན་གཤེགས་པ་ཐམས་ཅད་ནི་ཡུལ་ཐམས་ཅད་དུ་དུས་ཐམས་ཅད་ཀྱི་ཚེ་ཐམས་ཅད་མཉམ་པ་ཉིད་ལ་ལེགས་པར་རབ་ཏུ་གནས་པ་སྟེ། སྟོང་པ་ཉིད་ལ་ཡང་དག་པར་རྗེས་སུ་རྟོགས་པ་ཉིད་ཀྱི་ཕྱིར་ན་ཤེས་རབ་ཡོངས་སུ་དག་པའོ། །ཨོཾ་ཨ་ཝེ་ཎི་ཀ་བུདྡྷ་དྷརྨྨ་སམ་ཏེ་ཨཱཿབི་ར་ཧཱུྃ་ཁྃ། མ་འདྲེས་པ་མཉམ་པ་ཉིད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ།། །།དེ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་ཅི་ཞེ་ན། ཕྱག་དང་ཞབས་ཀྱི་མཐིལ་འཁོར་ལོས་མཚན་པ་ཉིད་དེ། འདིའི་ཕྱག་དང་ཞབས་ཀྱི་མཐིལ་དག་ལ་འཁོར་ལོ་རྩིབས་སྟོང་ཅན་ལྟེ་བ་དང་བཅས་པ་མུ་ཁྱུད་དང་བཅས་པ་རྣམ་པ་ཐམས་ཅད་ཡོངས་སུ་རྫོགས་པའོ། །ཕྱག་དང་ཞབས་ཀྱི་མཐིལ་ལེགས་པར་གནས་པ་སྟེ། ཞབས་ཀྱི་མཐིལ་ཐམས་ཅད་ཀྱིས་ས་གཞི་ལ་རེག་ཅིང་དེ་

ཡང་འདིའི་མཐོ་བ་ནི་དམའ་བ་དང་དམའ་བ་ནི་མཐོ་བའོ། །ཕྱག་དང་ཞབས་ཀྱི་སོར་མོ་ངང་པའི་རྒྱལ་པོ་ལྟ་བུར་དྲ་བས་འབྲེལ་པ་སྟེ། དེ་བཞིན་གཤེགས་པ་རྣམས་ཀྱི་ཕྱག་དག་དང་། ཞབས་དེ་དག་གསེར་གྱི་མདོག་ཅན་གྱི་རི་མོའི་ཕྲེང་བ་རྣམས་ཀྱིས་རྐང་པ་བརྒྱད་པ་བཞིན་དུ་མཛེས་པའོ། །ཕྱག་དང་ཞབས་འཇམ་ཞིང་གཞོན་ཤ་ཆགས་པ་ཉིད་དེ། བཅོམ་ལྡན་འདས་འདིའི་ཕྱག་དང་ཞབས་དག་རས་བལ་འཇམ་པོ་བཞིན་དང་། སྐྱེས་ནས་ཟླ་བ་ལོན་པའི་བྱིས་པ་བཞིན་དུ་གཞོན་ཤ་ཅན་དང་། ཀ་ཙ་ལིན་ད་ལྟར་འཇམ་པ་རེག་ན་བདེ་བའོ། །བདུན་མཐོ་བར་གྱུར་ཏེ་ཕྱག་གཉིས་དག་དང་། ཞབས་གཉིས་དག་དང་། ཕྲག་གོང་དག་དང་། མགྲིན་པའི་ཕྱོགས་གཅིག་གོ། །སོར་མོ་རིང་བ་སྟེ་འདིའི་ཞབས་ཀྱི་སོར་མོ་རྣམས་རིམ་གྱིས་རིང་བ་ཉིད་དོ། །རྟིང་པ་ཡངས་པ་སྟེ་འདིའི་རྟིང་པ་ཆེ་ཞིང་ཞབས་ཀྱི་རྗེས་སུ་འཚམ་པར་ཡངས་པར་འགྱུར་རོ། །སྐུ་ཆེ་ཞིང་དྲང་བ་ཉིད་དེ་འཕྱེ་བོ་མ་ཡིན་ཞིང་ཞོམ་པ་མ་ཡིན། མ་ཚང་བ་མ་ཡིན། འཐས་པ་མ་ཡིན། ལེགས་པར་སྐྱེས་པ་རྣམ་པ་ཐམས་ཅད་པ་བདུན་དང་ལྡན་པའི་སྐུ་སྟེ། མཐོ་བ་འདིའི་སྲིད་དང་རྗེས་སུ་འཚམ་པའི་ཞེང་དུ་འགྱུར་རོ། །ཞབས་འབུར་མི་མངོན་པ་ཉིད་དེ་འདིའི་པུས་མོ་དང་ལོང་བུ་མཐོ་བར་འགྱུར་རོ། །བ་སྤུའི་རྩེ་མོ་གྱེན་དུ་ཕྱོགས་པ་སྟེ། འདིའི་བ་སྤུ་རྣམས་རྩེ་མོ་གྱེན་དུ་ཕྱོགས་པར་འགྱུར་ཞིང་བ་སྤུ་རྣམས་གཡས་ཕྱོགས་སུ་འཁྱིལ་ལ་འཁོར་བ་མིག་སྨན་གྱི་མདོག་ཅན་རྣམས་ཏེ། དེ་རྣམས་ཀྱིས་གསེར་གྱི་མདོག་ཅན་གྱི་སྐུ་མངོན་པར་གསལ་བར་བྱེད་དོ། །བྱིན་པ་རི་དགས་ཨེ་ནེ་ཡའི་ལྟ་བུ་སྟེ། བཅོམ་ལྡན་འདས་ཀྱི་བྱིན་པ་དག་ཟླུམ་པ་རི་དགས་ཨེ་ནེ་ཡ་རྣམས་ཀྱི་ལྟ་བུའོ། །ཕྱག་རིང་ཞིང་མཛེས་པ་སྟེ་རྒྱས་ཤིང་མ་བཏུད་པ་ཉིད་དུ་ཕྱག་མཐིལ་དག་གིས་རང་གི་པུས་མོའི་ལྷ་ང་ལ་རེག་པའོ། །མདོམས་ཀྱི་སྦ་བ་སྦུབས་སུ་ནུབ་པ་སྟེ། སྦུབས་ཀྱིས་རབ་ཏུ་གཡོགས་པ་གླང་པོ་ཆེའི་གསང་གནས་ལྟ་བུར་འགྱུར་རོ། །སྐུ་མདོག་གསེར་འདྲ་བ་སྟེ། འདིའི་ཁ་དོག་གསེར་ལྟ་བུར་འགྱུར་རོ། །པགས་པ་སྲབ་པ་སྟེ་ཤིན་ཏུ་འཇམ་པ་གསེར་ཤོག་ལྟར་འཇམ་པའི་པགས་པ་ཅན་དུ་འགྱུར་ཞིང་རྡུལ་མེད་པའི་ན་བཟའ་འཛིན་པའོ། །སྤུ་རེ་རེ་ནས་སྐྱེས་པ་

སྟེ། འདིའི་བ་སྤུའི་ཁུང་བུར་སྤུ་རྣམས་རེ་རེར་འགྱུར་རོ། །སྨིན་མའི་དབུས་ན་མཛོད་སྤུ་ཅན་ཏེ་འདིའི་སྨིན་མ་དག་གི་དབུས་ན་རས་སྐུད་ལེགས་པ་ལྟ་བུ་དུང་བཅག་པའི་ཁ་དོག་ཅན་གཡས་ཕྱོགས་སུ་འཁྱིལ་བར་འགྱུར་ཏེ། མཛོད་སྤུ་ཉིད་ཀྱིས་ཞལ་གསེར་གྱི་ཁ་དོག་ལྟ་བུ་ཤིན་ཏུ་གསལ་བར་བྱེད་དོ། །སྐུ་སྟོད་སེང་གེ་ལྟ་བུ་སྟེ། འདིའི་སྐུ་སྟོད་དུ་ཡངས་པ་སེང་གེའི་ལྟ་བུར་འགྱུར་རོ། །དཔུང་མགོ་ཟླུམ་པ་སྟེ་ཡོངས་སུ་ཟླུམ་པའི་མགྲིན་པ་ཅན་དུ་འགྱུར་རོ། །ཐལ་གོང་རྒྱས་པ་སྟེ། འདིའི་ཉེ་བར་རྒྱས་པར་འགྱུར་ཞིང་གསེར་ཤོག་བཞིན་དུ་རྣམ་པར་གསལ་བའི་མགྲིན་པ་ཅན་ནོ། །ཡན་ལག་སོ་སོ་རྣམས་སུ་རོ་རྣམས་མྱོང་བར་བྱེད་དོ་ཞེས་པས་ན་རོ་བྲོ་བའི་མཆོག་དང་ལྡན་པ་ཉིད་དེ། རྩ་རྣམས་ཡིན་ལ་དེ་རྣམས་ཀྱི་མཆོག་ཏུ་རླུང་དང་། མཁྲིས་པ་དང་། པད་ཀན་ལ་སོགས་པ་རྣམས་ཀྱིས་མ་དཀྲུགས་པ་ཉིད་ཀྱི་ཕྱིར་ཡང་དག་པར་གསལ་བའོ། །ཤིང་ནྱ་གྲོ་དྷ་ལྟར་ཆུ་ཞེང་གབ་པ་སྟེ། སྐྱེས་བུ་ཆེན་པོའི་ཆུ་དང་ཞེང་དག་མཉམ་པའོ། །དབུ་གཙུག་ཏོར་དང་ལྡན་པ་སྟེ། དབུ་ཟླུམ་པར་འགྱུར་ཞིང་གཙུག་ཏོར་གདུགས་ལྟ་བུས་ཡས་བཀབ་པ་གཙུག་ཏོར་ཡང་ཤིན་ཏུ་མཐོ་བའོ། །ལྗགས་རིང་བ་སྟེ་སྙན་གྱི་མཐའི་བར་དུ་ལྗགས་ཀྱི་རྩེ་མོས་རེག་པར་བྱེད་ཅིང་། དབུ་སྐྲའི་མཐར་ཐུག་པར་ཡང་དཔྲལ་བའི་མཐར་ལྗགས་ཀྱིས་ཁེབས་པའོ། །ཚངས་པའི་དབྱངས་ཏེ་འཁོར་སྟོང་ཕྲག་དུ་མར་དབྱངས་ནང་དུ་ཇི་ལྟ་བ་དེ་ལྟར་ཕྱི་རོལ་དུའང་ཐོས་ཤིང་བྱ་ཀ་ལ་པིང་ཀའི་བཞིན་དུ་སྙན་པ་ཉིད་དུ་འགྱུར་རོ། །འགྲམ་པ་སེང་གེའི་ལྟ་བུ་སྟེ། འགྲམ་པ་དག་སེང་གེའི་བཞིན་དུ་ཟླུམ་པོར་འགྱུར་རོ། །ཚེམས་དཀར་བ་སྟེ་དུང་དང་ཀུནྡ་དང་། ཟླ་བའི་ཁ་དོག་ཅན་གྱི་ཚེམས་རྣམས་སོ། །ཚེམས་མཉམ་པ་སྟེ་ཧ་ཅང་དམའ་བ་མ་ཡིན་མཐོ་བ་མ་ཡིན་མི་མཉམ་པ་མ་ཡིན་པའི་རྩེ་མོ་ཅན་གྱི་ཚེམས་རྣམས་སུ་འགྱུར་རོ། །ཚེམས་ཐགས་བཟང་བ་སྟེ་ཚེམས་རྣམས་བར་མེད་པའོ། །ཚེམས་བཞི་བཅུ་མངའ་བ་སྟེ་ཚེམས་འོག་ཏུ་ཉི་ཤུ་དང་། སྟེང་དུ་ཚེམས་ཉི་ཤུའོ། །སྤྱན་མཐོན་མཐིང་སྟེ་སྤྱན་དག་གི་སྔོན་པོ་གང་ཡིན་པ་དེ་ཤིན་ཏུ་རྣམ་པར་དག་པར་འགྱུར་ཏེ་རི་མོ་དམར་པོ་རྣམས་དང་། མ་འདྲེས་པ་ཉིད་ཀྱི་ཕྱིར་ལ་གང་དཀར་པོ་

ཡིན་པ་དེ་དཀར་པོ་ཁོ་ན་ཤིན་ཏུ་རྣམ་པར་དག་པར་འགྱུར་རོ། །རྫི་མ་བའི་ལྟ་བུ་སྟེ། སྤྱན་གྱི་རྫི་མ་རྣམས་ཁྱུ་མཆོག་གི་བཞིན་དུ་གང་འོག་མ་ཡིན་པ་དེ་རྣམས་འོག་ཁོ་ན་དང་། གང་སྟེང་མ་ཡིན་པ་དེ་རྣམས་སྟེང་ཁོ་ནར་གནས་པ་མ་འཛིངས་པ་ལེགས་པར་གཞོལ་བའོ། ། སེམས་ཅན་འགའ་ཞིག་རྣམས་ཀྱིས་དེ་བཞིན་གཤེགས་པ་གསེར་གྱི་མདོག་ཅན་དུ་མཐོང་བ་འགའ་ཞིག་རྣམས་ཀྱིས་ཤེལ་གྱི་མདོག་ཅན་དུ་མཐོང་བ་འགའ་ཞིག་རྣམས་ཀྱིས་པདྨ་རཱ་གའི་ཁ་དོག་དང་། འགའ་ཞིག་རྣམས་ཀྱིས་ཨིནྡྲ་ནཱི་ལའི་ཁ་དོག་ཅན་དང་། འགའ་ཞིག་རྣམས་ཀྱིས་མུ་ཏིག་དམར་པོའི་ཁ་དོག་ཅན་དང་། འགའ་ཞིག་རྣམས་ཀྱིས་དུང་དང་ཀུནྡ་དང་ཟླ་བ་ལྟར་དཀར་བ་དང་། འགའ་ཞིག་གིས་ཁ་དོག་སྣ་ཚོགས་པ་དང་། འགའ་ཞིག་གིས་ནམ་མཁའི་ཁ་དོག་ཅན་དང་། འགའ་ཞིག་གིས་ཁྲུ་ཕྱེད་དང་བཅུ་གསུམ་པའི་ཚད་དང་། ཇི་སྲིད་དུ་དཔག་ཚད་འབུམ་གྱི་ཚད་དམ། དཔག་ཚད་བྱེ་བའི་ཚད་དང་། ཇི་སྲིད་དུ་འཇིག་རྟེན་གྱི་ཁམས་རབ་འབྱམ་རྒྱ་མཚོའི་སྤྲིན་མཐའ་ཡས་པ་རྣམས་སུ་སྣང་བར་མཛད་པའི་འོད་ཀྱི་དཀྱིལ་འཁོར་ཅན་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བས་ཡོངས་སུ་རྒྱས་པར་མཛད་པ་དང་། ཇི་སྲིད་དུ་མེ་ཏོག་གི་གཞིའི་སྙིང་པོའི་རྒྱན་བཀོད་པའི་རྒྱ་མཚོ་རྣམས་སྣང་བར་བྱེད་ཅིང་། ཆོས་ཀྱི་དབྱིངས་ཀྱི་མཐར་ཐུག་པའི་བར་དུ་སྟེ། སངས་རྒྱས་ཐམས་ཅད་ཀྱི་ཡུལ་གདུལ་བྱའི་དབང་ལས་ཐམས་ཅད་སྣང་བར་བྱེད་ཅིང་འཇིག་རྟེན་གྱི་ཁམས་ཐམས་ཅད་དབྱངས་ཀྱིས་རྣམ་པར་རིག་པར་མཛད་པ་དང་། སྟོང་གཉིས་དང་གསུམ་དང་། ཇི་སྲིད་ནམ་མཁའི་མཐར་ཐུག་པའི་བར་ཐམས་ཅད་འོད་དང་། དབྱངས་ཀྱིས་སྣང་བར་བྱས་ནས་རྣམ་པར་རིག་པར་མཛད་པ་དང་། ཆོས་དང་། ཟང་ཟིང་དང་། དོན་མཐུན་པ་དང་། དོན་བྱ་བའི་བསྡུ་བའི་དངོས་པོ་བཞི་རྣམས་ཀྱིས་སེམས་ཅན་རྣམས་ལ་ཕན་འདོགས་ཤིང་། ཕན་བཏགས་ནས་བྱང་ཆུབ་ཆེན་པོ་ལ་རབ་ཏུ་དགོད་པར་མཛད་དོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མཉམ་པ་ཉིད་ཀྱིས་ཆོས་རྣམས་ཐམས་ཅད་མཉམ་ཞིང་མཉམ་པ་སྟེ། དེ་བཞིན་གཤེགས་པ་རྣམས་ཀྱི་མཚན་མངོན་པར་འགྲུབ་པར་བལྟ་བར་

བྱའི་མཚན་མ་ཡིན་པ་མངོན་པར་འགྲུབ་པ་ནི་མ་ཡིན་ནོ། །བྱང་ཆུབ་མཚན་ཉིད་མེད་པ་ཉིད་ཀྱི་ཕྱིར་ཆོས་རྣམས་ཐམས་ཅད་མཚན་ཉིད་མེད་པ་སྟེ། འདི་ལྟ་སྟེ། སྟོང་པ་ཉིད་ཀྱི་མཚན་ཉིད་ཅན་ནོ། །དེ་བཞིན་གཤེགས་པ་ཐམས་ཅད་ཀྱང་སྟོང་པ་ཉིད་དུ་མཉམ་པའོ། །དེ་བཞིན་གཤེགས་པ་ཐམས་ཅད་དང་། བྱང་ཆུབ་དང་། ཆོས་རྣམས་ཐམས་ཅད་ཀྱང་མཚན་ཉིད་གཅིག་པ་སྟེ། འདི་ལྟ་སྟེ། ནམ་མཁའི་མཚན་ཉིད་ཅན། སྟོང་པ་ཉིད་ཀྱི་མཚན་ཉིད་ཅན། ཞི་བའི་མཚན་ཉིད་ཅན་རྣམས་སོ་ཞེས་པའོ། །ཨོཾ་སརྦྦ་ཏ་ཐཱ་ག་ཏ་བར་ལཀྵ་ཎ་སམ་ཏཱ་དྷརྨྨ་ཏེ་ཨོཾ། མཚན་ཐམས་ཅད་མཉམ་པ་ཉིད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ།། །།དཔེ་བྱད་བརྒྱད་ཅུ་རྣམས་ཅི་ཞེ་ན། སངས་རྒྱས་བཅོམ་ལྡན་འདས་རྣམས་ནི་སེན་མོ་ཟངས་ཀྱི་མདོག་ལྟ་བུར་འགྱུར་ཏེ། སེན་མོ་སྣུམ་པ་དང་། སེན་མོ་མཐོ་བ་དང་། སེན་མོ་རྣམས་ཟླུམ་པར་གྱུར་པ་དང་། སོར་མོ་རྣམས་རིམ་གྱིས་ཕྲ་བ་དང་། སོར་མོ་རྣམས་རྒྱས་པ་དང་། རྩ་མི་མངོན་པ་དང་། རྩ་རྣམས་མདུད་པ་མེད་པ་དང་། ལོང་བུ་མི་མངོན་པ་དང་། ཞབས་མི་མཉམ་པ་མེད་པར་མཚུངས་པ་དང་། གླང་པོ་ཆེའི་སྟབས་སུ་གཤེགས་པ་དང་། སེང་གེའི་སྟབས་སུ་གཤེགས་པ་དང་། གཡས་ཕྱོགས་སུ་ལྡོག་ཅིང་གཤེགས་པ་དང་། དྲང་པོར་གཤེགས་པ་དང་། མཛེས་པར་གཤེགས་པ་དང་། རིམ་གྱིས་གཤེགས་པ་དང་། ཆེ་ཞིང་ཡངས་ལ་ཡོངས་སུ་གྱུར་པའི་པུས་མོའི་ལྷ་ང་ཅན་དང་། མཚན་ཡོངས་སུ་རྫོགས་པ་དང་། གོམ་པ་སྙོམས་པ་དང་། སྐུ་རྣམ་པར་དག་པ་དང་། སྐུ་འཇམ་པ་དང་། སྐུ་རྣམ་པར་དང་བ་དང་། སྐུ་ཞུམ་པ་མེད་པ་དང་། སྐུ་སྒུ་བ་མེད་པ་དང་། ཀུན་ཏུ་སྤྱོད་པ་གཙང་བ་དང་། ཁྱུ་མཆོག་ལྟར་ཀུན་ནས་རབ་ཏུ་དང་བ་ཅན་དང་། གཟིགས་པ་ཡོངས་སུ་དག་ཅིང་མངོན་པར་འདོད་པ་ལ་མཉམ་པའི་འོད་ཅན་དང་། དཀུ་ཟླུམ་པ་དང་། དཀུ་སྐབས་ཕྱིན་པ་དང་། དཀུ་མ་རྙོངས་པ་དང་། སྐུ་རྐེད་གཞུའི་ལག་ཅངས་ལྟ་བུ་དང་། ལྟེ་བ་ཟབ་པ་དང་། ལྟེ་བ་མི་ཡོ་བ་དང་། ལྟེ་བ་གཡས་ཕྱོགས་སུ་འཁྱིལ་བ་དང་། ལྟེ་བ་

ཐོགས་པ་མེད་པ་དང་། ཡན་ལག་དང་ཉིང་ལག་ཤིན་ཏུ་རྣམ་པར་འབྱེས་པ་དང་། པགས་པ་སྐྱོན་དང་བྲལ་བ་དང་། གནག་བག་དང་སྨེ་བ་མེད་པ་དང་། སྐུ་བརྟན་པ་དང་། ཕྱག་ཤིང་བལ་ལྟ་བུ་དང་། ཕྱག་ཡངས་པ་དང་། ཕྱག་གི་རི་མོ་སྣུམ་པ་དང་། ཕྱག་གི་རི་མོ་མི་ཡོ་བ་དང་། མཆུ་བིམྦ་ལྟ་བུ་དང་། ཞལ་ཧ་ཅང་མི་རིང་བ་དང་། མཉེན་ཞིང་སྲབ་ལ་དམར་བའི་ལྗགས་དང་། གླང་པོ་ཆེའི་ང་རོ་ཅན་དང་། སྙན་ཅིང་མཉན་པའི་དབྱངས་དང་། སྒྲ་ཕུན་སུམ་ཚོགས་པ་དང་། དབྱངས་འཇམ་པ་དང་། ཤངས་མཐོ་བ་དང་། མཆེ་བ་ཟླུམ་པ་དང་། མཆེ་བ་དཀར་བ་དང་། མཆེ་བ་བྱིན་གྱིས་ཕྲ་བ་དང་། སྤྱན་གཙང་བ་དང་། སྤྱན་ཡངས་པ་དང་། སྤྱན་མཐོན་མཐིང་དང་། རྫི་མ་གནག་པ་དང་། སྨིན་མ་སྟུག་པ་དང་། སྨིན་མ་འཇམ་པ་དང་། སྤྱན་དཀར་ནག་འབྱེས་ཤིང་པདྨའི་འདབ་མ་ལྟ་བུ་དང་། སྨིན་ཚུགས་རིང་བ་དང་། སྨིན་མའི་སྤུ་ནག་པ་དང་། སྨིན་མའི་སྤུ་ཕྲ་བ་དང་། སྨིན་མ་རྗེས་སུ་མཐུན་པ་དང་། ཁ་དོག་མ་ཉམས་པ་དང་། སྙན་མི་མཉམ་པ་མེད་པ་དང་། སྙན་སྐྱོན་དང་བྲལ་བ་དང་། དབང་པོ་ཐམས་ཅད་མ་ཉམས་ཤིང་སྐྱོན་དང་བྲལ་བ་དང་། སྐུ་ཡོངས་སུ་རྫོགས་ཤིང་མཐོ་ལ་མཆོག་ཏུ་གནས་པའི་ཞལ་གདོང་དང་། དཔྲལ་བ་ཅན་དང་། དབུ་ཤིན་ཏུ་རྒྱས་པ་དང་། དབུ་སྐྲ་གནག་པ་དང་། དབུ་སྐྲ་སྟུག་པ་དང་། དབུ་སྐྲ་འཇམ་པ་དང་། དབུ་སྐྲ་དྲི་ཞིམ་པ་དང་། དབུ་སྐྲ་མཉམ་པ་དང་། དབུ་སྐྲ་སྣུམ་པ་དང་། དབུ་སྐྲ་མ་འཁུམས་པ་དང་། དབུ་སྐྲ་མ་འཁྲུགས་པ་དང་། དཔལ་བེའུ་དང་། བཀྲ་ཤིས་དང་། གཡུང་དྲུང་འཁྱིལ་པས་བརྒྱན་པ་དང་། རྒྱལ་མཚན་ཡང་དག་པར་གནས་པ་དང་། དཔྲལ་བ་དུང་ལྟ་བུ་དང་། དབུ་མཆོག་ཏུ་མཐོ་བ་དང་། གཙུག་ཏོར་ཡར་འཕགས་པ་དང་། དབུ་གདུགས་ཀྱི་རྣམ་པ་ཅན་དང་། ཀུན་ནས་མཛེས་པ་སྟེ། དེ་བཞིན་གཤེགས་པ་རྣམས་ནི་ཚད་མེད་པའི་དཔེ་བྱད་ཅན་མཉམ་པ་ཉིད་ལ་ལེགས་པར་རབ་ཏུ་གནས་པ་གསལ་བྱེད་དང་། གསལ་བྱེད་མ་ཡིན་པ་མཉམ་པ་ཉིད་ལ་ལེགས་པར་རབ་ཏུ་གནས་པ། ཆོས་ཐམས་ཅད་གསལ་བྱེད་མེད་པར་མཉམ་པ་ཉིད་ལ་རབ་ཏུ་

ལེགས་པར་གནས་པ། མཚན་དང་དཔེ་བྱད་ཐམས་ཅད་སྒྱུ་མའི་ཆོས་དང་ལྡན་པ་ལ་ལེགས་པར་རབ་ཏུ་གནས་པ། དུས་གསུམ་གྱི་དཔེ་བྱད་མཉམ་པ་ཉིད། རྡོ་རྗེ་ལྟ་བུ་མཉམ་པ་ཉིད་ཐོབ་པ། སྟོང་པ་ཉིད་ཀྱི་ཆོས་ཐམས་ཅད་དང་། དཔེ་བྱད་མཉམ་པ་ཉིད་ཐོབ་པ། གཉིས་སུ་མེད་པའི་དོན་ལ་ལེགས་པར་ཡང་དག་པར་ཞུགས་པ་རྣམས་སོ་ཞེས་པའོ། །ཨོཾ་ཨ་ནུ་བྱཉྫ་ན་ས་མ་ཏཱ་སུ་པྲ་ཏིཥྛི་ཏ་བཛྲ་ཛྙཱ་ན་ཧཱུྃ་ལྃ་ཨྃ། དཔེ་བྱད་མཉམ་པ་ཉིད་ཅེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདུས་པར་གྱུར་ནས། བཅོམ་ལྡན་འདས་རྡོ་རྗེ་ཅན་རྣལ་འབྱོར་གྱི་དབང་ཕྱུག་ཆེན་པོ་ཅན་ལ་ལེགས་སོ་ཞེས་བྱ་བ་རྣམས་ཀྱིས་མཉེས་པར་མཛད་དོ། །ཨོཾ་བྱང་ཆུབ་སེམས་ཆེད་ཁྱོད་ལེགས་སོ། །སངས་རྒྱས་ཀུན་གྱི་བདག་ཉིད་མཆོག །སངས་རྒྱས་ཆོས་ཆེད་ཁྱོད་ལེགས་སོ། །ཏིང་འཛིན་དབང་དུ་འཇུག་པ་ཡི། །རྡོ་རྗེ་ཡེ་ཤེས་ཁྱོད་ལེགས་སོ། །རྡོ་རྗེ་སེམས་དཔའ་ཁྱོད་ལེགས་སོ། །ཚད་མེད་ཆེད་དུ་ཁྱོད་ལེགས་སོ། །ཤེས་རབ་དམ་པའི་ཆེད་དུ་ཡང་། །མདོ་སྡེ་འདི་ནི་ལེགས་པར་བཤད། །སངས་རྒྱས་སྔ་མས་མ་གསུངས་པའོ། ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་ཅན་གྱི་དབང་ཕྱུག་ཆེན་པོས་དེ་བཞིན་གཤེགས་པ་རྣམས་ཐམས་ཅད་ལ་ཕྱག་འཚལ་བ་བཞི་ཡིས་མངོན་པར་དགྱེས་པར་མཛད་དོ། །སངས་རྒྱས་ཀུན་ཁྱོད་ལ་ཕྱག་འཚལ། །ཆོས་ཀྱི་སྐུ་ཡི་མཆོག་གི་མཆོག །གདོད་མའི་སྔགས་ཀྱི་དོན་ཉིད་ལ། །རྡོ་རྗེ་ཡེ་ཤེས་སྟོབས་ཆེན་ལ། །ཤིན་ཏུ་སྒྲིབ་མེད་ཞི་བ་ལ། །རྡོ་རྗེ་ཆོས་རྣམས་ལེགས་གནས་པ། །ཐེག་པ་ཆེན་པོའི་གོ་འཕང་ཐོབ། །ཐུགས་རྗེའི་བདག་ཉིད་ཅན་གྱི་ལྷ། །གདོད་ནས་དག་པ་དཔའ་བོ་ཆེ། །དབང་ཕྱུག་དམ་པ་མཆོག་གི་མཆོག །དམ་ཆོས་མཆོག་ཏུ་འགྱུར་བ་མེད། །བདེ་གཤེགས་དེ་རྣམས་ལ་ཕྱག་འཚལ། །ཞེས་པའོ། །ན་མ་སྟུ་ཏེ། ཨོཾ་མཱྃ་ཧཱུྃ་ཧཱུྃ་ན་མོ་སྟུ་ཏེ་སྭཱ་ཧཱ། འདི་ནི་བརྗོད་པ་ཙམ་ཞིག་གིས། །སངས་རྒྱས་ཐམས་ཅད་རབ་མཆོད་པའོ། །ཞེས་པའོ།། །།

དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐམས་ཅད་བོས་ནས་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་དངོས་གྲུབ་ཐམས་ཅད་ཀྱི་དཀྱིལ་འཁོར་བསྐྱེད་པར་མཛད་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་སླར་ཡང་འདུས་པ་མཛད་ནས། བཅོམ་ལྡན་འདས་རྡོ་རྗེ་རྣལ་འབྱོར་ཅན་གྱི་དབང་ཕྱུག་ཆེན་པོ་ལ་གསོལ་བ་བཏབ་པ། བཅོམ་ལྡན་འདས་ཁྱོད་ཉིད་ཀྱིས་རིགས་ཐམས་ཅད་འཁོར་ལོ་བསྐྱེད་པར་མཛད་དུ་གསོལ། དེ་ནས་བཅོམ་ལྡན་འདས་རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོས་གསོལ་བ་བཏབ་པའི་གསུང་གིས་དེ་མ་ཐག་ཁོ་ནར་འཇམ་དཔལ་གཞོན་ནུར་གྱུར་པ་ལ་བོས་ཏེ་བཀའ་སྩལ་པ། འཇམ་དཔལ་དེ་བཞིན་གཤེགས་པ་རྣམས་ཐམས་ཅད་ཀྱི་བྱང་ཆུབ་ཀྱི་སྙིང་པོ་ཉོན་ཅིག །ཅེས་ཏེ། དེ་ནས་འདི་ལས་ཡང་དག་བཤད། །བྱང་ཆུབ་དཀྱིལ་འཁོར་བླ་ན་མེད། །རྡོ་རྗེ་ཡེ་ཤེས་གསང་བ་མཆོག །སངས་རྒྱས་སྐྱོབ་པ་ཐམས་ཅད་ཀྱིའོ། །དབེན་པའི་ས་གཞི་ཉམས་དགའ་བ། །མེ་ཏོག་ཕྲེང་བས་རྣམ་བརྒྱན་པ། །ཀུན་ཏུ་སྣ་ཚོགས་ཆ་བཟང་བ། །ཀུན་ཏུ་སྣ་ཚོགས་སྡོམ་པར་ནི། །ཀུན་ནས་སྣ་ཚོགས་བྱ་བ་རྣམས། །དམ་པའི་དོན་དུ་བསྒྲུབ་པར་བྱ། །རི་ཡི་མཆོག་གམ་གྲོང་ཁྱེར་ནི། །མེ་ཏོག་འབྲས་བུས་རྣམ་བརྒྱན་པ། །དེར་གནས་སྔགས་པས་དངོས་གྲུབ་མཆོག །གལ་ཏེ་འདོད་ན་ཡང་དག་བྲི། །གཙུག་ལག་ཁང་དང་དགོན་པའི་གནས། །རི་སྟེངས་རྣམས་སུ་ཀུན་ནས་ནི། །སངས་རྒྱས་ཀུན་གྱི་བྱ་བ་རྣམས། །དམ་པའི་དོན་དུ་བསྒྲུབ་པར་བྱ། །མ་མོའི་གནས་དང་ཞི་བའི་གནས། །དུར་ཁྲོད་ལྷ་ཡི་གནས་སུ་ནི། །རྡོ་རྗེ་འཛིན་དཔལ་བྱ་བ་རྣམས། །དོན་དམ་པར་ནི་བསྒྲུབ་པར་བྱ། །པདྨའི་སྐྱེད་མོས་ཚལ་ཀུན་དང་། །ཆུ་བོ་འདུས་པ་རྣམས་སུ་ཡང་། །ཕྱག་ན་པདྨ་དཔལ་བྱ་བ། །དམ་པའི་དོན་དུ་བསྒྲུབ་པར་བྱ། །རྒྱལ་པོའི་ཕོ་བྲང་ཉམས་དགའ་དང་། །རྒྱལ་པོའི་སྐྱེད་

ཚལ་རྣམས་སུ་ནི། །རྡོ་རྗེ་རིན་ཆེན་དེ་ཡི་ནི། །རིན་ཆེན་བྱ་བ་རྣམས་བསྒྲུབ་བྱ། །རྟགས་གཅིག་པ་དང་བ་གླང་གནས། །ཆུ་ཀླུང་འདུས་པ་རྣམས་སུ་ཡང་། །སྣ་ཚོགས་བྱ་བ་ཐམས་ཅད་རྣམས། །དམ་པའི་དོན་དུ་བསྒྲུབ་པར་བྱ། །དཔལ་ལྡན་རྡོ་རྗེ་སེམས་དཔའ་དང་། །ལྷ་རྣམས་གནས་མཆོག་ཀུན་ཏུའོ། །ནམ་མཁའ་འམ་ནི་ཕྱོགས་གཞན་དུ། །གང་དུ་མཉམ་པར་གཞག་པ་དེར། །རྟག་པ་བསོད་ནམས་མཆོག་གྱུར་པ། །བྱ་བ་ཐམས་ཅད་བསྒྲུབ་པར་བྱ། །ཕྱོགས་ཀུན་མཉམ་ཉིད་གནས་དཀྱིལ་འཁོར། །ཤེས་རབ་ཅན་གྱིས་ཐིག་གདབ་བྱ། །ཤར་ལྷོ་ནུབ་དང་བྱང་རྣམས་ཀྱི། །ཕྱོགས་སུ་དཀྱིལ་འཁོར་ཐིག་བརྒྱད་པོ། །དེ་ཡི་ཕྱི་རུ་འཁོར་ལོ་ནི། །ཁ་དོག་ལྔ་པ་ཆེར་འབར་བའོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་མཛེས་པ་སྟེ། །སྣ་ཚོགས་གོས་དང་མེ་ཏོག་ཕྲེང་། །རྔ་ཡབ་སོགས་ཀྱིས་རྣམ་བརྒྱན་པ། །དཀྱིལ་འཁོར་ཀུན་ལ་གནས་པ་ཡི། །སྒོ་དང་སྒོ་ཁྱུད་མཚམས་རྣམས་སུ། །རྡོ་རྗེ་རིན་ཆེན་རྣམས་ཀྱིས་སྤྲས། །དཀྱིལ་འཁོར་ཐམས་ཅད་བྲི་བར་བྱ། ། དཀྱིལ་འཁོར་དེ་ཡི་དབུས་སུ་ནི། །གལ་ཏེ་དངོས་གྲུབ་མཆོག་འདོད་ན། །ཟླ་བའི་དཀྱིལ་འཁོར་ལ་གནས་པ། །སངས་རྒྱས་གཟུགས་བརྙན་བྲི་བར་བྱ། །ཤར་དུ་བཅོམ་ལྡན་འཁོར་ལོ་ཅན། །རྡོ་རྗེ་སེམས་དཔའ་ཡང་དག་ལྡན། །འཁོར་ལོས་སྒྱུར་བ་ཐམས་ཅད་ནི། །སྒེག་པར་བཅས་པ་ཀུན་བྲི་བྱ། །ལྷོ་རུ་གཙུག་ཏོར་དཀར་པོ་ནི། །རིན་ཆེན་འབར་བ་ཡང་དག་ལྡན། །གཙུག་ཏོར་དཀར་པོའི་ངོས་སུ་ནི། །རྡོ་རྗེ་གཟི་བརྗིད་ལ་སོགས་བྲི། །བྱང་དུ་བརྩོན་འགྲུས་ཆེན་པོ་ནི། །གཟི་བརྗིད་ཕུང་པོ་སྟོབས་པོ་ཆེ། །སྣ་ཚོགས་རྡོ་རྗེ་སོགས་བཅས་པ། །རིམ་པ་ཀུན་ནས་བྲི་བར་བྱ། །རྡོ་རྗེ་རྣལ་འབྱོར་ཅན་གྱིས་ནི། །དབང་ཕྱུག་མགོན་པོའི་ནུབ་ཕྱོགས་སུ། །གཙུག་ཏོར་རྒྱལ་བ་བརྩོན་འགྲུས་ཆེ། །རྡོ་རྗེ་ཆོས་སོགས་དང་བཅས་པ། །ཐམས་ཅད་སྔགས་པས་བྲི་

བར་བྱ། །གལ་ཏེ་དངོས་གྲུབ་མཆོག་འདོད་ནའོ། །དབང་ལྡན་ཕྱོགས་སུ་འཕགས་པ་གནས། །མེ་མཚམས་སུ་ནི་ཆེར་འཕགས་སོ། །བདེན་བྲལ་དུ་ནི་རྣམ་རྒྱལ་ཉིད། །རླུང་དུ་དེ་བཞིན་རྣམ་འཕྲོ་བའོ། །རྡོ་རྗེ་སེམས་དཔའ་སེམས་དཔའ་ཆེ། །སེམས་དཔའ་ཀུན་གྱི་མདུན་དུ་ནི། །ཟླ་བའི་དཀྱིལ་འཁོར་དབུས་གནས་པ། །གསལ་ཞིང་འབར་འཁྲིགས་འོད་ཟེར་ཅན། །མཁས་པས་དཀྱིལ་འཁོར་རྣམས་སུ་ནི། །མཆོད་པ་རྣམས་ནི་གཞག་བྱས་ཏེ། །སྒེག་མོ་ལ་སོགས་མཆོད་པ་ཆེ། །དེ་བཞིན་གཟུགས་སྒྲ་ལ་སོགས་དང་། །བདུག་པ་ལ་སོགས་གསང་ཆེན་ནོ། །སྒོ་སྐྱོང་བ་ནི་བཞི་ཡིན་ཏེ། །ཕྱི་ཡི་དཀྱིལ་འཁོར་གནས་རྣམས་སུ། །ཀུན་ཏུ་བཟང་པོ་སོགས་རྣམས་བྲི། །དེ་ལྟར་དཀྱིལ་འཁོར་བྲི་བྱ་སྟེ། །མཆོད་པ་བྱས་ནས་སྔ་མ་བཞིན། །དེ་བཞིན་འཇུག་པ་སོགས་བྱས་ལ། །སྒྲུབ་པའི་ཐབས་ནི་བརྩམ་པར་བྱ། །རྡོ་རྗེ་རྣལ་འབྱོར་དབང་ཕྱུག་སོགས། །དཀྱིལ་འཁོར་མངོན་སུམ་མཐོང་བ་ལས། །སྔ་མ་རྟག་པ་ཇི་བཞིན་དུ། །ཕྱི་ནས་དེ་བཞིན་བྲི་བར་བྱ། །བསོད་ནམས་ཇི་བཞིན་དཀྱིལ་འཁོར་རྣམས། །ཐམས་ཅད་མཚོན་གྱིས་རབ་བརྟགས་པ། །རང་གི་ལྷག་པའི་ལྷ་ངོ་བོས། །དཀྱིལ་འཁོར་ཐམས་ཅད་བྲི་བྱར་འགྱུར། །རང་ལྷའི་བདག་ཉིད་རྣལ་འབྱོར་གྱིས། །དཀྱིལ་འཁོར་ཐམས་ཅད་རབ་ཏུ་གྲུབ། །ཆོ་ག་དམན་དང་ལྷག་པས་ཀྱང་། །འགྲུབ་པར་འགྱུར་ཏེ་སྐྱོན་མ་མིན། །ཀུན་ཏུ་སྣ་ཚོགས་སྐལ་བཟང་བ། །ཀུན་ནས་སྣ་ཚོགས་འཁོར་ལོ་ཅན། །འཁོར་ལོས་སྒྱུར་བ་བདག་ཉིད་ཆེ། །རིན་ཆེན་བདུན་གྱི་མཆོད་པ་ཆེ། །ཡོངས་སུ་རྫོགས་པའི་ཟླ་བ་ལྟར། །དཀྱིལ་འཁོར་བདུད་རྩི་འབྱུང་ཤེས་བྱ། ། སངས་རྒྱས་རྡོ་རྗེ་འཛིན་སོགས་ཀྱི། །དཀྱིལ་འཁོར་འདི་ནི་བཤད་བྱས་པའོ། །ཕྱག་ན་པདྨ་བདག་ཉིད་ཆེའི། །པདྨའི་རྣམ་པར་རྟག་ཤེས་བྱ། །རིན་པོ་ཆེ་ཡི་རིན་ཆེན་རྣམས། །དཀྱིལ་འཁོར་སྣ་ཚོགས་རྣམ་པའོ། །དཀྱིལ་འཁོར་དམན་ཞིང་དམ་

ཚིག་རྣམས། །དོར་བར་བྱས་པ་དེ་ཉིད་ནི། །གསང་བ་ཤེས་པ་མ་ཡིན་ན། །སྒྲུབ་པའི་ཐབས་ནི་འགྲུབ་མི་འགྱུར། །དེ་ཕྱིར་འབད་པ་ཐམས་ཅད་ཀྱིས། །དཀྱིལ་འཁོར་ཐམས་ཅད་ལྟ་བ་ནི། །གལ་ཏེ་དངོས་གྲུབ་མཆོག་འདོད་ན། །གདོན་མི་ཟ་བར་རྟག་ཏུ་བྱ། །བླ་མ་ལ་ནི་ཡོན་ཕུལ་ནས། །རྗེས་སུ་རིམ་པས་བསྒྲུབ་པར་བྱ། །བརྟན་པའམ་ནི་གཡོ་བ་ཡི། །རྫས་རྣམས་ཇི་སྙེད་ཐམས་ཅད་དེ། །རྩ་བ་མེ་ཏོག་འབྲས་བུ་སོགས། །བུ་མོ་ལེགས་པར་བརྒྱན་བྱས་དང་། །འདོད་པའི་ཆུང་མ་ཕུལ་བྱས་ནས། །སླར་ཡང་རིན་གྱིས་བསླུ་བར་བྱ། །གྲོང་དང་དེ་བཞིན་གཙུག་ལག་ཁང་། །ཀུན་དགའ་ར་སོགས་རྒྱལ་སྲིད་མཆོག །གང་ལ་སྦྱིན་བྱ་ཅུང་ཟད་ཡོད། །འཚོ་བ་དེ་ནི་སྦྱིན་པར་བྱ། །བདག་གི་དངོས་པོ་ཡོངས་གཏོང་བ། །སངས་རྒྱས་ཐམས་ཅད་རབ་མཆོད་པའོ། །བླ་མ་ལ་ནི་ཡོན་ཕུལ་ནས། །གསང་བ་དམ་པ་རྨད་བྱུང་བ། །མངོན་པར་དབང་བསྐུར་དེ་ནས་བྱ། །འདབ་མ་བརྒྱད་པ་ཡིད་འོང་ལ། །སློབ་མ་གཞག་ནས་ཡན་ལག་ཀུན། །ཕྱག་རྒྱ་ཀུན་ནས་བཅིངས་བྱས་ནས། ། ཁམས་ཀུན་རང་བཞིན་རྩ་བ་དང་། །ས་བོན་འབྲས་བུས་དུད་པ་ཡི། །བུམ་པ་རྣམས་ཀྱིས་དབང་བསྐུར་ཏེ། །སངས་རྒྱས་ཕྲེང་བའི་དབང་བསྐུར་ལས། །སྤྱི་བོ་དང་ནི་དཔྲལ་བ་དང་། །གཞོགས་དང་དེ་བཞིན་རྒྱབ་ཏུ་ཡང་། །སངས་རྒྱས་རིན་ཆེན་ཆེན་པོ་ཀུན། །ཅོད་པན་མཆོག་ཏུ་མི་འགྱུར་བའོ། །དཔལ་ལྡན་སངས་རྒྱས་གཙུག་ནོར་བུ། །གདུགས་དཀར་སྟེང་ན་གནས་པའོ། །རྒྱལ་སྲིད་ཀུན་གྱི་དབང་བསྐུར་གྱིས། །ཡང་དང་ཡང་དུ་དབང་བསྐུར་བྱ། །དཔལ་ཀུན་གྱིས་ནི་མངོན་མཐོ་བ། ། ཞེས་བྱའི་དབང་བསྐུར་བཤད་པའོ། །ཁམས་ཀུན་རང་བཞིན་གླང་པོ་དང་། །རྟ་ནི་མཆོག་ཏུ་འབར་བའམ། །སེང་གེའི་གདན་གནས་དབང་བསྐུར་བ། །དཔལ་གྱི་སྔགས་ནི་རྗོད་བྱེད་ཅིང་། །དཔལ་གྱིས་མངོན་མཐོ་ཞེས་བྱ་བའི། །དམ་པའི་དོན་གྱི་

དབང་བསྐུར་བ། །བཀྲ་ཤིས་སམ་ནི་དཔལ་བེའུ། །གང་ཡང་བྲིས་ནས་དབང་བསྐུར་བྱ། །སངས་རྒྱས་དཔའ་བོ་ཐམས་ཅད་ཀྱིས། །རྣམ་རྒྱལ་དབང་བསྐུར་ཞེས་བཤད་དོ། །ཙནྡན་ཆུ་དང་བུམ་པ་ཆེ། །གཞན་གྱིས་མི་ཐུབ་སྨན་བླུགས་པ། །ཀུན་ནས་དབང་བསྐུར་ཆེད་དུ་ནི། །རྟག་ཏུ་ཤེས་རབ་ཅན་གྱིས་བརྟག །གཞན་གྱིས་མི་ཐུབ་དབང་བསྐུར་མཆོག །དཀྱིལ་འཁོར་གང་གང་བྲིས་བྱས་ནས། །ཕྱག་རྒྱ་གང་དང་གང་བཀོད་པ། །དེར་ནི་དེ་དང་དེ་བརྟག་བྱ། །དེ་རྣམས་ཕྱག་རྒྱ་དམ་པར་བཤད། །དབང་བསྐུར་ཆེད་དུ་སངས་རྒྱས་རྣམས། །ལྷ་དེ་རྣམས་ནི་ཡིད་དུ་འོང་། །སྨན་གྱི་དམ་པ་མཆོག་གྱུར་པ། །སངས་རྒྱས་ཀུན་གྱིས་རབ་ཏུ་བཤད། །ཙནྡན་དང་ནི་རྒྱ་སྤོས་དང་། །ག་པུར་དེ་བཞིན་གུར་གུམ་དང་། །ཨ་ཀ་རུ་དང་ལྷ་ཡི་ཤིང་། །ཙནྡན་དམར་པོ་ཉིད་དང་ནི། །སིཾ་ཧཱ་བྱཱ་གྷྲི་དེ་བཞིན་མཆོག །ཀུན་ནས་ས་ཧ་དེ་བ་དང་། །གི་རི་ཀརྞ་ཚངས་མཆོད་སྦྱིན། །སྨན་གྱི་དམ་པ་རྣམས་སུ་བཤད། །ལྷག་གནས་ཀུན་གྱི་སྦྱོར་བ་ཡིས། །སངས་རྒྱས་མཆོད་པ་རབ་འཇུག་ཅིང་། ། དང་པོ་རྡོ་རྗེ་དབང་བསྐུར་བ། །ཤེས་རབ་ཐམས་ཅད་རབ་འཇུག་བྱེད། །རིན་ཆེན་དམ་པའི་དམ་པ་ནི། །གསེར་ལ་སོགས་ཀྱིས་ཐམས་ཅད་ནས། །སྨན་ཀུན་དང་ནི་ས་བོན་ཀུན། །འབྲུ་རྣམས་ཐམས་ཅད་བཟང་པོ་ནི། །སངས་རྒྱས་བྱིན་བརླབས་རྣལ་འབྱོར་ལས། ། དབང་བསྐུར་དོན་དུ་རབ་བརྟག་བྱ། །སངས་རྒྱས་ཀུན་གྱི་རྣལ་འབྱོར་ཆེ། །དབང་བསྐུར་དམ་པ་འོད་འབར་བའོ། །སངས་རྒྱས་ཀུན་ནས་སངས་རྒྱས་འགྱུར། །ཞེས་པའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་དུ་ཇི་ལྟར་རྙེད་པ་ཡོངས་སུ་རྫོགས་སོ།། །། རིགས་གཟུགས་སྐལ་བཟངས་མང་ཐོས་བློ་འབྱོར་སོགས། །ཕུན་ཚོགས་ལྡན་པ་དཔལ་ལྡན་ཆོས་རྗེ་ཡིས། །རྒྱུད་འདི་བསྒྱུར་ལས་ཅུང་ཟད་མ་རྫོགས་པ། །དཔལ་ལྡན་བློ་གྲོས་བརྟན་པས་རྫོགས་པར་བསྒྱུར།། །།

འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཉི་ཤུ་རྩ་ལྔ་པ་ཞེས་བྱ་བ་ཐེག་པ་ཆེན་པོའི་མདོ།

རྒྱ་གར་སྐད་དུ། ཨཱརྱ་པཉྩ་བིངྴ་ཏི་ཀ་པྲཛྙཱ་པཱ་ར་མི་ཏཱ་མུ་ཁ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཉི་ཤུ་རྩ་ལྔ་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་རབ་ཀྱི་ཟོམ་ལ་ལྷ་ཐམས་ཅད་ཀྱི་མཚན་མོའི་གནས་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལྷ་དང་། ལྷའི་བུ་དང་། ལྷ་མ་ཡིན་དང་། རླུང་ལྷ་དང་། ནམ་མཁའ་ལྡིང་དང་། ཀླུ་དང་། གནོད་སྦྱིན་དང་། མི་འམ་ཅི་དང་། སྲིན་པོ་དང་། རིག་སྔགས་འཆང་ཐམས་ཅད་དང་། འབྱུང་པོ་དང་། ལོག་འདྲེན་དང་། ཤ་ཟ་དང་། སྣང་བ་དང་། མི་སྣང་བའི་མ་མོའི་ཚོགས་ཤིན་ཏུ་མང་ཞིང་རྒྱ་ཆེ་བ་དཔག་ཚད་ལྔའི་དཀྱིལ་འཁོར་དུ་འདུས་པ་ཤ་སྟག་དང་། དགེ་སློང་སྟོང་ཉིས་བརྒྱ་ལྔ་བཅུས་བསྐོར་ཅིང་མདུན་དུ་བདར་ནས་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་རྡོ་རྗེའི་རིགས་ཐམས་ཅད་ཀྱིས་ཡོངས་སུ་བསྐོར་ཅིང་རིག་པའི་ཚོགས་དང་། ཕྱག་རྒྱའི་ཚོགས་དེ་དག་ཐམས་ཅད་དང་། རིག་སྔགས་འཆང་བྱེ་བ་ཕྲག་དུ་མས་ཡོངས་སུ་བསྐོར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བར་སྣང་ལས་བབས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་པ་དང་། དེ་ནས་བཅོམ་ལྡན་འདས་ཀྱིས་གསང་བའི་བདག་པོ་ཆེན་པོ་ལག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་ཉི་ཤུ་རྩ་ལྔ་པོ་འདི་དག་ནི་ངའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོྃ་བྱང་ཆུབ་ཀྱི་སེམས་ཀྱི་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཀུན་ཏུ་བཟང་པོའི་སྤྱོད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཡིད་བཞིན་གྱི་ནོར་བུ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་འགོག་པ་མེད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་སྐྱེ་བར་འགྱུར་བ་ཤེས་རབ་ཀྱི་ཕ་རོལ་ཏུ་ཕྱིན་

པའི་སྒོའོ། །ཨོྃ་རྣམ་པར་ཤེས་པ་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་འབར་བ་ཆེན་པོའི་ཆོས་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་བརྩོན་འགྲུས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཐམས་ཅད་དུ་འགྲོ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་རྡོ་རྗེ་ཐམས་ཅད་བརྟན་པའི་སེམས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་དེ་བཞིན་གཤེགས་པ་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་རང་བཞིན་རྣམ་པར་དག་པའི་ཆོས་ཉིད་ཡེ་ཤེས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ལས་རྣམ་པར་སྦྱོང་བ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ངེས་པར་གནོད་མཛེས་རྡོ་རྗེ་ཅན་ཕཊ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་འདོད་པ་ལ་འདོད་ཆགས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་མགྱོགས་པའི་རྡོ་རྗེ་ཅན་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཧཱུྃ་ཐམས་ཅད་དུ་འགྲོ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཧྲཱིཿཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཨ་ཞེས་བྱ་བའི་སྒོ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཨྃ་བ་ཧཱུྃ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་ཨེཾ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་དེ་བཞིན་གཤེགས་པ་ཐམས་ཅད་ཀྱི་གསུང་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །ཨོྃ་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་མི་དང་ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཉི་ཤུ་རྩ་ལྔ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །།སྐད་གསར་ཆད་ཀྱིས་བཅོས་ནས་གཏན་ལ་ཕབ་པ།།

དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་རྒྱན་གྱི་བཀོད་པ་ཞེས་བྱ་བའི་རྒྱུད་ཀྱི་རྒྱལ་པོ།

རྒྱ་གར་སྐད་དུ། སརྦ་ཏ་ཐཱ་ག་ཏ་ཀཱ་ཡ་བཱཀྩིཏྟ་གུ་ཧྱཱ་ལྃ་ཀཱ་ར་བྱཱུ་ཧ་ཏནྟྲ་རཱ་ཛཱ་ནཱ་མ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་རྒྱན་གྱི་བཀོད་པ་ཞེས་བྱ་བའི་རྒྱུད་ཀྱི་རྒྱལ་པོ། བླ་མ་དང་འཇམ་པའི་དབྱངས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་རྣལ་འབྱོར་གྱི་དབང་ཕྱུག་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཕྱག་རྒྱ་ཆེན་པོའི་དམ་ཚིག་གི་བྱིན་གྱིས་བརླབས་ཀྱིས་རྡོ་རྗེའི་སྐུ་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་རིན་པོ་ཆེ་ཆེན་པོའི་ཅོད་པན་གྱི་རྩེ་མོའི་གཙུག་ཕུད་ཀྱིས་དབང་བསྐུར་བ་བརྙེས་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཀྱི་ཏིང་ངེ་འཛིན་ཆེན་པོ་དང་ལྡན་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ལས་སྣ་ཚོགས་པ་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་མཆོད་པ་ཆེན་པོ་སྤྲོ་བའི་དམ་ཚིག་གི་གསང་བ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་དཀྱིལ་འཁོར་ཆེན་པོ་དམ་ཚིག་གི་དེ་ཁོ་ན་ཉིད་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་གསང་བ་ཆེན་པོའི་སྙིང་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཀྱི་མངའ་བདག་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཀུན་ཏུ་བཟང་པོ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་དཔེ་མེད་ཅིང་མི་མཉམ་པ་དང་མཉམ་པ་ནམ་མཁའ་ལྟ་བུ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་རིགས་དང་།སྙིང་པོ་དང་ཕྱག་རྒྱ་དང་གསང་སྔགས་དང་རིག་པ་གཉིས་སུ་མེད་པར་གྱུར་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་

དང་ཐུགས་རྡོ་རྗེ་ཡེ་ཤེས་ཕ་རོལ་ཏུ་ཕྱིན་པའི་སྙིང་པོ་ལ་དགའ་བ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ལྷག་པའི་ལྷའི་སྙིང་པོ་མཛེས་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་རྒྱན་ཆེན་པོ་བཀོད་པའི་དཀྱིལ་འཁོར་ཆེན་པོའི་སྙིང་པོ་ལ་ནམ་མཁའི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་དང་མཉམ་པའི་རྡོ་རྗེ་ཡེ་ཤེས་ཆེན་པོ་འབའ་ཞིག་དང་ཐབས་ཅིག་ཏུ་བཞུགས་སོ། །དེའང་འདི་ལྟ་སྟེ། སྒོ་མཐའ་ཡས་པ་ཞེས་བྱ་བའི་རྡོ་རྗེ་ཡུམ་ཆེན་མོ་དང་། ནམ་མཁའི་སྒོ་ཞེས་བྱ་བའི་རྡོ་རྗེ་ཡུམ་ཆེན་མོ་དང་། ཨ་བོ་ཛའི་སྒོ་ཞེས་བྱ་བའི་རྡོ་རྗེ་ཡུམ་ཆེན་མོ་དང་། འགྱུར་བ་མེད་པའི་སྒོ་ཞེས་བྱ་བའི་རྡོ་རྗེ་ཡུམ་ཆེན་མོ་དང་། ཤེས་རབ་ཀྱི་ཕ་རོལ་ཏུ་ཕྱིན་མ་ཞེས་བྱ་བའི་རྡོ་རྗེ་ཡུམ་ཆེན་མོ་དང་། གཞན་ཡང་མ་ལུས་ཤིང་ལུས་པ་མེད་པའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པའི་བརྩོན་འགྲུས་དང་ལྡན་པའི་རྡོ་རྗེ་བཙུན་མོ་སྟོང་ཕྲག་བརྒྱ་ལའང་འདི་ལྟ་སྟེ། མདའི་མཚོན་ཆའི་ལག་ཅེས་བྱ་བའི་རྡོ་རྗེ་བཙུན་མོ་དང་། དབང་ཕྱུག་ལ་ལྟ་བའི་རིམ་ཞེས་བྱ་བའི་རྡོ་རྗེ་བཙུན་མོ་དང་། ཉེ་བར་ཞི་བའི་བཞིན་རས་ཞེས་བྱ་བའི་རྡོ་རྗེ་བཙུན་མོ་དང་། གྱེན་དུ་བལྟ་བའི་བཞིན་རས་ཞེས་བྱ་བའི་རྡོ་རྗེ་བཙུན་མོ་དང་། འདོད་པའི་ཟླ་མཚན་རྡོ་རྗེ་ཞེས་བྱ་བའི་རྡོ་རྗེ་བཙུན་མོ་དང་། བརྡ་སྤྲོད་པ་མ་ཞེས་བྱ་བའི་རྡོ་རྗེ་བཙུན་མོ་དང་། འབྲི་བའི་སྒོ་ཞེས་བྱ་བའི་རྡོ་རྗེ་བཙུན་མོ་དང་། རོལ་བ་དང་ལྡན་པ་ཞེས་བྱ་བའི་རྡོ་རྗེ་བཙུན་མོ་དང་། འདོད་པའི་མཆོག་ཅེས་བྱ་བའི་རྡོ་རྗེ་བཙུན་མོ་དང་། དབང་ཕྱུག་གི་བདེ་བའི་སྒོ་ཞེས་བྱ་བའི་རྡོ་རྗེ་བཙུན་མོ་དང་། དམིགས་པའི་སྒོ་ཞེས་བྱ་བའི་རྡོ་རྗེ་བཙུན་མོ་དང་། བྲང་ལས་སྐྱེས་ཞེས་བྱ་བའི་རྡོ་རྗེ་བཙུན་མོ་སྟེ། དེ་དག་ལ་སོགས་པ་རྡོ་རྗེ་བཙུན་མོ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏོ། །གཞན་ཡང་དཔག་ཏུ་མེད་པའི་རྡོ་རྗེ་ཕོ་ཉ་མོ་ཆེན་པོ་རྣམས་དང་ཐབས་ཅིག་ཏུ་བཞུགས་ཏེ། དེ་ཡང་འདི་ལྟ་སྟེ། སྙིང་སྐུལ་བར་བྱེད་པ་ཞེས་བྱ་བའི་རྡོ་རྗེ་ཕོ་ཉ་མོ་ཆེན་མོ་དང་། གདུག་པ་ཐམས་ཅད་འགུགས་པ་ཞེས་བྱ་བའི་རྡོ་རྗེ་ཕོ་ཉ་མོ་ཆེན་མོ་དང་། རྗེས་སུ་མཉེས་པ་རྡོ་རྗེ་ཞེས་བྱ་བའི་རྡོ་རྗེ་ཕོ་ཉ་

མོ་ཆེན་མོ་དང་། ཁྲག་འགུགས་པ་ཞེས་བྱ་བའི་རྡོ་རྗེ་ཕོ་ཉ་མོ་ཆེན་མོ་དང་། ཐམས་ཅད་འཕྲོག་པ་ཞེས་བྱ་བའི་རྡོ་རྗེ་ཕོ་ཉ་མོ་ཆེན་མོ་ལ་སོགས་པའོ། །གཞན་ཡང་འཇིག་རྟེན་གྱི་ཁམས་རྒྱས་པའི་རྡོ་རྗེ་སྒོ་སྲུང་མ་ཆེན་མོ་རྣམས་དང་ཡང་ཐབས་ཅིག་སྟེ། དེའང་འདི་ལྟ་སྟེ། རྡོ་རྗེ་འབེབས་པ་ཞེས་བྱ་བའི་རྡོ་རྗེ་སྒོ་སྲུང་མ་ཆེན་མོ་དང་། དམ་ཚིག་གསུམ་ལྡན་ཞེས་བྱ་བའི་རྡོ་རྗེ་སྒོ་སྲུང་མ་ཆེན་མོ་དང་། འཇིག་པའི་ཡན་ལག་ཅན་ཞེས་བྱ་བའི་རྡོ་རྗེ་སྒོ་སྲུང་མ་ཆེན་མོ་དང་། ཐོག་མ་པ་ཞེས་བྱ་བའི་རྡོ་རྗེ་སྒོ་སྲུང་མ་ཆེན་མོ་དང་། གདུལ་དཀའ་འདུལ་ཞེས་བྱ་བའི་རྡོ་རྗེ་སྒོ་སྲུང་མ་ཆེན་མོ་ལ་སོགས་པའོ། །གཞན་ཡང་མི་མཉམ་པ་དང་མཉམ་པའི་རྡོ་རྗེ་བྲན་མོ་ཆེན་མོ་རྣམས་དང་ཡང་ཐབས་ཅིག་སྟེ། དེའང་འདི་ལྟ་སྟེ། སྐུ་གསུང་ཐུགས་ཐམས་ཅད་རྡོ་རྗེས་འཆིང་བ་མ་ཞེས་བྱ་བའི་རྡོ་རྗེ་བྲན་མོ་ཆེན་མོ་དང་། འཇིགས་པའི་མེའི་གདོང་ཞེས་བྱ་བའི་རྡོ་རྗེ་བྲན་མོ་ཆེན་མོ་དང་། གཙིགས་ཤིང་རྣམ་པར་འགྱུར་བའི་གདོང་ཞེས་བྱ་བའི་རྡོ་རྗེ་བྲན་མོ་ཆེན་མོ་དང་། འཇིག་རྟེན་གསུམ་འཆིང་བ་ཞེས་བྱ་བའི་རྡོ་རྗེ་བྲན་མོ་ཆེན་མོ་དང་། བསྐལ་པར་གནས་པ་ཞེས་བྱ་བ་ལ་སོགས་པའི་རྡོ་རྗེ་བྲན་མོ་ཆེན་མོའོ། །གཞན་ཡང་དཔེ་མེད་པའི་རྡོ་རྗེ་རོལ་པ་མོ་ཆེན་མོ་རྣམས་དང་ཡང་ཐབས་ཅིག་སྟེ། དེའང་འདི་ལྟ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དགྱེས་པ་ཞེས་བྱ་བའི་རྡོ་རྗེ་རོལ་པ་ཆེན་མོ་དང་། ཀུན་ནས་འབེབས་པ་ཞེས་བྱ་བའི་རྡོ་རྗེ་རོལ་པ་ཆེན་མོ་དང་། འཇིག་རྟེན་གསུམ་རབ་ཏུ་འཇོམས་པ་ཞེས་བྱ་བའི་རྡོ་རྗེ་རོལ་པ་ཆེན་མོ་དང་། རབ་ཏུ་དགའ་བའི་རྗེས་སུ་འགྲོ་བ་ཞེས་བྱ་བའི་རྡོ་རྗེ་རོལ་པ་ཆེན་མོ་དང་། ཐམས་ཅད་དགའ་བར་བྱེད་པ་ཞེས་བྱ་བ་ལ་སོགས་པའི་རྡོ་རྗེ་རོལ་པ་ཆེན་མོ་ལ་སོགས་པའོ། །གཞན་ཡང་ནམ་མཁའི་ཁམས་ཐམས་ཅད་རྒྱས་པར་གང་བའི་རྡོ་རྗེའི་ཡབ་རྣམས་དང་ཡང་ཐབས་ཅིག་སྟེ། དེའང་འདི་ལྟ་སྟེ། འདོད་པའི་དབང་ཕྱུག་ཅེས་བྱ་བའི་རྡོ་རྗེའི་ཡབ་ཆེན་པོ་དང་། མཁའ་འགྲོའི་རྡོ་རྗེ་དབང་ཕྱུག་དང་། དྲིའི་དབང་ཕྱུག་དང་། སྟུག་པོ་བཀོད་པ་དང་། ཟླ་བའི་འོད་དང་། འདུན་པ་སྲེལ་དང་། སྐྱེ་བོ་ཡོངས་སུ་དོར་བ་དང་། ལེགས་པར་སྦྱངས་པ་དང་། འདོད་པའི་

རྡོ་རྗེ་དང་། གདུང་བ་སྐྱེད་པ་དང་། འདུལ་བར་བྱེད་པ་དང་། གདུག་པ་ཐམས་ཅད་སེལ་བར་བྱེད་པ་དང་། དེ་ཁོ་ན་ཉིད་ཀྱི་མགོན་པོ་དང་། གནས་པ་པོ་དང་། བརྩེ་བ་ཅན་དང་། ཆོས་འཆང་དང་། བསྐྱོད་པ་པོ་དང་། སྦོ་བ་པོ་དང་། འཆིང་བ་པོ་དང་། སྐོར་བ་པོ་དང་། དེ་དག་ལ་སོགས་པ་རྡོ་རྗེ་ཡབ་རྣམས་སོ། །གཞན་ཡང་མཐའ་ཡས་པའི་རྡོ་རྗེ་ཕོ་ཉ་མོ་འཕྲོག་པའི་རྡོ་རྗེ་བྲན་པོ་རྡོ་རྗེའི་ཚོགས་དང་ཐབས་ཅིག་སྟེ། དེའང་འདི་ལྟ་སྟེ། རྡོ་རྗེ་རླུང་ཞེས་བྱ་བ་དང་། རྡོ་རྗེ་མེ་དང་། རྡོ་རྗེ་མི་འཁྲུགས་པ་དང་། རྡོ་རྗེ་ཆུ་དང་། གཞན་ཡང་རྡོ་རྗེ་རྒྱལ་པོ་ཆེན་པོ་བཞི་ལ་འདི་ལྟ་སྟེ། ཞི་བར་བྱེད་པ་དང་། རྒྱས་པར་བྱེད་པ་དང་། དབང་དུ་བྱེད་པ་དང་། མི་ཤེས་པ་ཐམས་ཅད་ཟད་པར་བྱེད་པ་སྟེ། དེ་དག་ལ་སོགས་པའོ། །གཞན་ཡང་མཆོག་ཏུ་རྒྱ་ཆེན་པོ་སངས་རྒྱས་ཀྱི་ཡེ་ཤེས་རབ་ཏུ་གནས་པའི་མཆོད་པ་དང་ལྡན་པ་བཅོམ་ལྡན་འདས་སྟོན་པ་རྟག་པ་མཆོག་གི་མངའ་བདག་སྟེ། ཀུན་ཏུ་བཟང་པོའི་སྐུ་ཡི་ནི། །འཇིག་རྟེན་གསུམ་གྱི་དཀྱིལ་འཁོར་སྤྲོས། །བཅོམ་ལྡན་རྡོར་འཛིན་ལེགས་པར་བཞུགས། །གསང་བ་རྒྱན་གྱི་སྦྱོར་བས་སོ། །དེ་ནས་དེ་བཞིན་གཤེགས་པ་ཐམས་ཅད་སྐྱེད་པར་བྱེད་པའི་ཡུམ་གསང་བའི་རྡོ་རྗེ་འདུས་པ་ཐོབ་སྟེ། དེ་བཞིན་གཤེགས་པ་ཐམས་ཅད་ཀྱི་ཡབ་དང་ལྷན་ཅིག་ཏུ་དགའ་བའི་བདེ་བ་རྗེས་སུ་བྱུང་སྟེ་འཁོར་དང་བཅས་པ་རྣམས་བཅོམ་ལྡན་འདས་ཀྱི་སྤྱན་སྔར་ལྷགས་ཏེ། རྡོ་རྗེའི་གླུ་འདིས་མངོན་པར་བསྟོད་ནས་ཞུ་བ་ཞུས་པ། སངས་རྒྱས་ཀུན་དོན་ཁྱོད་ཕྱག་འཚལ། །རྡོ་རྗེ་འབྱུང་བ་ཁྱོད་ལ་འདུད། །ཐུགས་ཀྱི་རིན་ཆེན་མཆོག་ཁྱོད་འདུད། །ཆོས་ཀྱི་བློ་གྲོས་ཁྱོད་ལ་འདུད། །ཆོས་རྣམས་ཀུན་མཆོག་ཁྱོད་ལ་འདུད། །སྣ་ཚོགས་དགོངས་པ་ཁྱོད་ལ་འདུད། །དམ་ཚིག་མཆོག་གི་མཆོག་ཁྱོད་འདུད། །རྡོ་རྗེ་སེམས་དཔའ་ཕྱག་འཚལ་འདུད། །གྲགས་པ་ཆེན་པོ་བདག་ཅག་ནི། །མགོན་པོ་ཁྱོད་ལ་ཞུ་བ་ཞུ། །སངས་རྒྱས་ཐམས་ཅད་སྐྱེད་བྱེད་ཡུམ། །དཀྱིལ་འཁོར་གྱི་ནི་དཀྱིལ་འཁོར་མཆོག །དེ་ནས་བཅོམ་ལྡན་འདས་རྡོ་རྗེ་སེམས་དཔའ་དེས་དེ་བཞིན་གཤེགས་པ་ཐམས་ཅད་ཀྱི་

རྡོ་རྗེའི་ཡུམ་རྣམས་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་ཡུམ་རྣམས་དེ་སྐད་མ་སྨྲ་ཞིག །འཇིག་རྟེན་ཐམས་ཅད་ལ་ཁྱབ་པའི་དཀྱིལ་འཁོར་གྱི་རྒྱལ་པོ་ཆེན་པོ་འདི་ལ་མ་འོངས་པའི་སེམས་ཅན་རྣམས་དད་པར་མི་འགྱུར་ཞིང་རང་གི་སེམས་ཡོངས་སུ་སུན་འབྱིན་ལ་དེས་མ་མཐོང་བའི་ཆོས་ལ་མ་དད་པས་རང་གི་སེམས་ཡང་དག་པར་སུན་ཕྱུང་སྟེ། མནར་མེད་པ་རྣམས་སུ་སྐྱེས་ནས་བསྐལ་པ་སྟོང་ཕྲག་མང་པོར་མནར་མེད་པའི་སྡུག་བསྔལ་རྗེས་སུ་འབྱུང་བར་འགྱུར་རོ། །དེ་བརྒྱ་ལམ་ན་མནར་མེད་པའི་སྡུག་བསྔལ་ལས་གྲོལ་ཏེ། མི་རྣམས་སུ་སྐྱེས་པར་གྱུར་ཀྱང་རྣམ་པར་འགྱུར་བའི་བཞིན་དུ་འགྱུར་རོ། །བརྗེད་ངས་པ་རྣམས་དང་། བློ་གྲོས་ཆུང་བ་རྣམས་དང་། ཁྱི་དང་། བྱ་རོག་དང་། བྱི་ལ་དང་། ཕག་དང་། སྟག་དང་། གླང་པོ་ཆེ་དང་། སེང་གེའི་ང་རོ་འདྲ་བདག་ཏུ་འགྱུར་རོ། །དེ་དང་འདྲེ་བར་མི་བྱ་ཞིང་བལྟ་བར་མི་བྱའོ། །དེ་ནས་དེ་བཞིན་གཤེགས་པ་ཐམས་ཅད་བསྐྱེད་པའི་ཡུམ་དེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་སེམས་ཅན་དེ་རྣམས་ཀྱི་མནར་མེད་པའི་སྡུག་བསྔལ་ཟད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། གང་གིས་འདིའི་མིང་གཟུང་ན་ཡོངས་སུ་ཟད་པར་འགྱུར་རོ། །བསོད་ནམས་དེའི་རྒྱུས་དེའི་ལས་ཀྱི་སྒྲིབ་པ་ཟད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྐལ་བ་ཅན་དུ་འགྱུར་རོ། །དེ་ནས་དེ་དག་ཡིད་དགའ་བ་སྐྱེས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བསྟན་དུ་གསོལ། བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུས་དཀྱིལ་འཁོར་ཆེན་པོའི་རྒྱལ་པོ་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་གང་མ་འོངས་པའི་སེམས་ཅན་རྣམས་ཀྱིས་དྲན་པ་ཙམ་གྱིས་སངས་རྒྱས་ཀྱི་བྱང་ཆུབ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཀུན་ཏུ་བཟང་པོ་ཆེན་པོ་འོད་འཕྲོ་བ་གསལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རང་གི་སྐུ་དང་གསུང་དང་ཐུགས་རྡོ་རྗེ་རྣམས་ལས་དེ་བཞིན་གཤེགས་པ་ཐམས་ཅད་ཀྱི་སྐུའི་དམ་པ་འདི་བཀའ་སྩལ་པ། དཀྱིལ་འཁོར་

ཀུན་གྱི་ཡུམ་གྱུར་པ། །སྟོང་ཉིད་ཡེ་ཤེས་ཉིད་དུ་བཤད། །ཅི་ཞིག་ང་ཡིས་བསྟན་པར་བྱ། །རྟོག་པ་ཐམས་ཅད་རྣམ་པར་སྤངས། །སེམས་ཅན་རྣམས་ལ་ཕན་བཞེད་པ། །གང་ཞིག་ཅུང་ཟད་བསྟན་པར་བྱ། །དེ་ཀུན་སྒྱུ་མས་སྒྱུ་མའོ། །འགྲོ་བ་སྒྱུ་མ་ལྟ་བུར་ཤེས། །དེས་ན་སྒྱུ་མ་ལྟ་བུ་ཡིས། །སྒྱུ་མ་ལྟ་བུའི་དཀྱིལ་འཁོར་བྱ། །ནམ་མཁའི་ཁམས་ཀྱིས་ཁྱབ་པ་ཡི། །ཐམས་ཅད་ཡུམ་གྱིས་ཡང་དག་འཁྲུགས། །ཕྱི་རོལ་ཡང་ནི་བརྟག་པར་བྱ། །གསང་བའི་དཀྱིལ་འཁོར་ཡུམ་རྣམས་ཀྱིས། །དབེན་ཞིང་དགའ་བའི་གནས་སུ་ནི། །ཡིད་ཀྱིལེགས་པར་འདུས་བྱས་པ། །ནམ་མཁའ་ལ་ནི་ཐིག་གིས་གདབ། །ཐོག་མར་དེ་ཡིས་དམ་པས་སོ། །དེ་ནས་རྣལ་འབྱོར་ཆེན་པོས་ཐིག །གསང་བའི་ཡུམ་གྱི་དཀྱིལ་འཁོར་རོ། །མུ་ཁྱུད་དག་གི་རྣམ་མདུན་དུ། །ཀུན་ནས་ཡོངས་སུ་བསྐོར་བར་བྱ། །དབུས་ཀྱི་ཆ་རུ་དཀྱིལ་འཁོར་ནི། །འཁོར་ལོ་ལྟ་བུར་བྲི་བར་བྱ། །ཀུན་ནས་བརྒྱད་གཉིས་མཛེས་པ་ནི། །དཀྱིལ་འཁོར་བཞི་ཡི་དབུས་སུའོ། །འཁོར་ལོའི་ལྟེ་བའི་དབུས་སུ་ནི། །པདྨ་ཟེའུ་འབྲུ་ལྡན་པ་བྲི། །མཚམས་དང་མཚམས་སུ་འདབ་མ་ནི། །ཇི་ལྟ་བ་བཞིན་བསྙེམས་བཅས་པས། །སྲད་བུ་ལྔ་ཡིས་ཡང་དག་འཁྲུགས། །སྲད་བུ་བཞི་ཡིས་ཉེ་བར་སྤྲས། །སྒོ་བཞི་དང་ནི་ཡང་དག་ལྡན། །རྟ་བབས་སེང་གེ་དག་གིས་བརྒྱན། །གདུགས་དང་རྒྱལ་མཚན་བ་དན་སོགས། །བླ་རེས་སྟེང་དུ་བྲེས་པ་དང་། །རིན་ཆེན་རྡོ་རྗེས་པད་ལྡན་སྔོན། །དཔག་བསམ་ཤིང་གི་ལྕུག་མས་ཁྱབ། །བུམ་བཟང་རིན་ཆེན་ལྡན་པའི་མཆོག །རྒྱན་ཕྲེང་གླང་པོ་ལྡན་པ་ནི། །ཕྱི་རོལ་གནས་ཏེ་ལེགས་པར་བྲིས། །རྟོག་དང་མི་རྟོག་རྣམ་སྤངས་ཏེ། །དཀྱིལ་འཁོར་རྒྱལ་པོའི་དབུས་སུ་ནི། །གསང་བ་རྒྱན་གྱི་རྡོ་རྗེ་བྱ། ། མཉམ་པར་གཞག་ཅིང་སྤྲོ་བ་ཡིས། །སེམས་ཀྱིས་བྲི་བ་ཉིད་དུ་བྱ། །དེ་ནས་ལྷ་མོ་ཞལ་བཞི་མ། །ཤེས་རབ་ཕ་རོལ་ཕྱིན་དགེ་བ། །ཕྱག་བཞི་པ་ལ་སྤྱན་ཡངས་མ། །ཕྱག་གཉིས་ཀྱིས་ནི་ཆོས་འཆད་ཅིང་། །བཞི་པའི་གཡས་པར་རྡོ་རྗེ་སྟེ། །གཡོན་པ་པདྨས་རྣམ་པར་བརྒྱན། །

དཀར་དང་དམར་པོ་ཆེར་སྔོ་བ། །སྔོ་བསངས་རིན་ཆེན་མཆོག་མཛེས་འོད། །གཙུག་ན་རིན་ཆེན་གཙུག་ཏོར་ཆེ། །གཙུག་རྒྱན་ཅོད་པན་དམ་པ་ཅན། །སྐལ་བ་ཆེན་པོ་འོད་ལྡན་མ། །རྒྱན་རྣམས་ཀུན་གྱིས་རྣམ་པར་བཀླུབས། །གོས་ཀྱིས་སྟོད་ནི་ལེགས་བསྒྲིབས་པ། ། བཞིན་གྱི་དཀྱིལ་འཁོར་འཛུམ་བཅས་ཤིང་། །སྣ་ཚོགས་གོས་ནི་ལེགས་གྱོན་པ། །དབུ་མའི་ཞལ་རས་གསེར་གྱི་འོད། །ཞབས་གཉིས་དབུས་སུ་འཁོར་ལོ་སྟེ། །མདུན་ན་རིན་ཆེན་བདུན་གནས་པ། །པདྨ་མཆོག་ལྡན་སེང་གེའི་ཁྲི། །ཟླ་བ་རྡོ་རྗེ་འཛིན་པའི་གདན། །ཉི་མའི་དཀྱིལ་འཁོར་འོད་འཕྲོ་བ། །རྒྱབ་ཏུ་ཉི་མའི་དཀྱིལ་འཁོར་ནི། །དཔའ་བོ་དེ་ཡིས་བྲི་བར་བྱ། །འདི་ཡི་མདུན་དུ་བྲི་བྱ་བ། །དཔའ་བོ་མཐའ་ཡས་པ་ཡི་ཞལ། །སྟོང་ཕྲག་དུ་མའི་ཕྱག་ལྡན་མ། །མཚན་ཉིད་ཐམས་ཅད་ཡང་དག་རྫོགས། །རྒྱན་རྣམས་ཀུན་གྱིས་རྣམ་པར་བརྒྱན། །ཕྱག་གིས་རྡོ་རྗེ་པདྨ་འཆང་། །སྣ་ཚོགས་ཕྱག་རྒྱས་ཕྱག་གཞན་དཀྲིགས། །གཙུག་ལྡན་དར་གྱི་ཅོད་པན་ཅན། །དབུ་རྒྱན་པདྨའི་བཞིན་རས་མ། །ཟླ་བའི་དཀྱིལ་འཁོར་དག་ལ་བཞུགས། །དེ་འོད་ཉི་མ་ལྟ་བུའི་འོད། །དཔའ་བོའི་རྣལ་འབྱོར་ལྡན་པ་ཡི། ། དཔའ་བོ་དེས་ནི་བྲི་བར་བྱ། །རྡོ་རྗེ་སེམས་དཔར་བདག་བསྒོམས་ཏེ། །དེར་ནི་བསྙེམས་པས་འགྲོ་བར་བྱ། །དཔའ་བོས་ལྷོ་རུ་བྲི་བྱ་བ། །གཤིན་རྗེའི་འདབ་མ་མཛེས་པ་ལ། །མཆོག་སྦྱིན་ནམ་མཁའ་དགེ་མ་ཡང་། །རིན་ཆེན་ཁྲི་ལ་ལེགས་པར་བཞུགས། །བཞིན་རས་སྔོ་ལ་སྤྱན་དཀར་བ། །འཛུམ་བཅས་ནོར་བུའི་འོག་པག་ཅན། །མགུལ་རྒྱན་རིན་ཆེན་ཕྲེང་བ་མཆོག །རྐང་གདུབ་གདུ་བུ་རིན་པོ་ཆེ། །ཡིད་བཞིན་ནོར་བུའི་ལག་པ་ཅན། །སྦྱིན་པའི་ཕ་རོལ་ཕྱིན་དགོངས་མ། །དེ་ནས་བློ་ལྡན་རབ་སོང་སྟེ། །ནུབ་ཏུ་ཡང་ནི་དེ་བཞིན་དུ། །དཔལ་དང་ལྡན་པས་ལེགས་པར་བྲི། །ཆུ་ལས་སྐྱེས་མ་ཡིད་འཕྲོག་མ། །དམར་པོའི་གོས་འཛིན་དག་པ་མ། །གཙུག་ན་ཅོད་པན་གྱིས་སྤྲས་མ། །སྦྲུལ་རྒྱན་སྣ་ཚོགས་ལུས་ཅན་མ། །དར་དང་རིན་ཆེན་གྱིས་བཀླུབས་མ། །པདྨ་འབྱེད་པའི་སྦྱོར་བ་ཡི། །ཕྱག་གི་ལོ་འདབ་དང་ལྡན་

པས། །ཟླ་བའི་གདན་ལ་ཡང་དག་བཞུགས། །ཉི་མ་དུ་མའི་སྣང་བ་ཅན། །ཇི་ལྟར་རིགས་པ་བྲི་བར་བྱ། །དེ་ནས་བྱང་དུ་ཕྱིན་ནས་སུ། །སོང་སྟེ་དཔའ་བོས་བྲི་བྱ་བ། །མི་གཡོ་བཞིན་རས་གྲགས་ཆེན་མ། །མར་གད་འབར་བ་མཚུངས་པ་མོ། །དཀར་པོའི་དར་གྱིས་ཡང་དག་བཀླུབས། །གཙུག་ན་ནོར་བུ་ཅོད་པན་བཟང། །གཙུག་རྒྱན་སྣ་ཚོགས་དག་གིས་སྤྲས། །རྡོ་རྗེ་དྲིལ་བུའི་ལག་བཀྲ་མ། །སྣ་ཚོགས་རྒྱན་དང་གོས་ལྡན་པས། །ཟླ་བའི་གདན་ལ་ཡང་དག་བཞུགས། །འོད་ཀྱིས་གཏམས་པའི་དཀྱིལ་འཁོར་མཆོག །དེ་ནས་མཚམས་ཀྱི་འདབ་མ་ལ། །མེ་ཏོག་བདུག་པ་དྲི་ལྡན་མ། །རྡོ་རྗེ་སྣང་བྱེད་དག་པ་མའི། །མཆོད་པ་སྔགས་རིག་པ་ཡིས་བྲི། །གཟུགས་སྒྲ་དྲི་དང་རོ་དང་རེག །རང་གི་བདག་པོའི་ཕྱོགས་སུའོ། །འདབ་མ་འདབ་མར་ཐམས་ཅད་དུ། །བཞད་དང་སྒེག་དང་དབྱངས་ཆེན་མོ། ། གར་གྱི་ཕྱག་རྒྱ་གྲགས་ཆེན་པོ། །སྔགས་པས་འབད་དེ་བྲི་བར་བྱ། །པདྨ་ལས་སྐྱེས་འདབ་མ་ལ། །ཐམས་ཅད་དུ་ནི་འགྲུབ་པ་བྲི། །སྒོ་རྣམས་དག་ནི་ཐམས་ཅད་ལ། །སྒོ་སྐྱོང་བ་ནི་རྣམ་བཞི་དང་། །ཕྱི་རོལ་དུ་ཡང་ལྷ་ལ་སོགས། །མིང་ནི་ཡང་དག་བྲི་བར་བྱ། །དེ་ནས་ཁྲུས་བྱས་ལུས་བྱུགསལ། །མེ་ཏོག་བདུག་སོགས་ཀྱིས་བདུགས་ཏེ། །སྣ་ཚོགས་གོས་ནི་རབ་གྱོན་ལ། །མེ་ཏོག་ཕྲེང་དང་གོས་ཀྱིས་བརྒྱན། །གཙུག་ཕུད་ཅོད་པན་དང་ལྡན་ཞིང་། །མཛེས་པའི་དར་གྱིས་ཡང་དག་བཀླུབས། །རྡོ་རྗེ་དྲིལ་བུ་ལག་པར་ལྡན། །སྦྱོར་བ་བཟང་པོའི་རྣམ་གཞག་གིས། །དེ་ནས་ཐམས་ཅད་དགུག་པར་བྱ། །རྡོ་རྗེ་མ་མོ་དཀའ་ཐུབ་ཆེ། །བཟློག་དང་རྣལ་མའི་ཕྱག་རྒྱ་ཡིས། །རྡོ་རྗེ་སེམས་དཔའ་བཟླས་ནས་སུ། །རྡོ་རྗེའི་སྦྱོར་བས་གར་བྱ་ཞིང་། །ལན་གསུམ་དུ་ནི་གཡས་བསྐོར་བས། །རྡོ་རྗེ་མ་མོའི་དཀྱིལ་འཁོར་རྣམས། །དམ་ཚིག་ལྡན་པ་ཐམས་ཅད་བྱོན། །གླུ་དབྱངས་ཀྱི་ནི་རྒྱལ་པོས་བསྐུལ། །རང་གི་སློབ་མའི་ཚོགས་གར་གྱིས། །དྲེགས་པ་ཡིས་ནི་གཡས་དང་གཡོན། །འགྱིང་བ་དང་ནི་འདུད་པར་བྱ། །འདིར་གཤེགས་འདིར་གཤེགས་སེམས་ཅན་དོན་མཛད་བརྩོན་པ་པོ། །སེར་སྣ་མི་མངའ་

སངས་རྒྱས་ཚོགས་མཆོག་མཐའ་དག་དང་། །བདེ་གཤེགས་དམ་པའི་ཡུམ་གྱུར་སྲིད་པའི་སྐྱེད་པ་པོ། །ཕ་རོལ་དོན་མཛད་དུས་ལ་དེ་རིང་བབ་པ་ལགས། །ཞེས་སོ། །དེ་ནས་དེ་དག་རང་ཉིད་ཀྱིས། །རྫུ་འཕྲུལ་རྣམ་པར་འཕྲུལ་པས་བྱོན། །མཚན་མ་དག་ནི་བཟང་པོ་རྣམས། །དཀྱིལ་འཁོར་དག་ཏུ་བལྟ་བར་བྱ། །རང་ངམ་གཞན་ལ་འབབ་སོགས་པའི། །མཚན་མ་ཇི་ལྟར་མཐོང་བ་ན། །དེ་ཚེ་ངེས་པར་མ་མོ་ནི། །བདེ་གཤེགས་ཐུགས་ཀྱི་དགོངས་པར་བྱོན། །དེ་ནས་མཆོད་ཡོན་ཞབས་བསིལ་ཆོ་ག་ཇི་བཞིན་རབ་བརྟགས་ཏེ། །དེ་ཚེ་བབས་པའི་སེམས་ཅན་བསོད་ནམས་ལྡན་ལ་དྲི་བར་བྱ། །གལ་ཏེ་དེ་ནི་མི་སྨྲ་བ་ན་ཧཱུྃ་གི་ཡི་གེ་དང་། །ལྡན་པའི་གླུ་དབྱངས་ཅན་གྱིས་ཡོངས་སུ་བསྐུལ་བ་ཉིད་དུ་བྱའོ། །དེ་ནས་ཤེས་རབ་ལྡན་མ་གཞུག །སློབ་མའི་གཙོ་བོ་ཐལ་སྦྱར་ཏེ། །མིག་ལ་མིག་དར་གྱིས་གཡོགས་ལ། །རབ་དགའ་བདག་ཡིན་ཡང་དག་དགའ། །མ་མོ་ཐམས་ཅད་ལ་དམིགས་ཏེ། །དེར་ནི་མེ་ཏོག་དོར་བར་བྱ། །མེ་ཏོག་གང་ལ་ལྷུང་གྱུར་པ། །མ་མོ་དེ་ནི་དེ་ཡིས་འགྲུབ། །དེ་ནས་གོ་རིམས་ཇི་བཞིན་དུ། །སྒོ་སྐྱོང་བ་ནས་བརྩམས་ནས་སུ། །ཤེས་རབ་ཕ་རོལ་ཕྱིན་པའི་བར། །སློབ་མ་ལ་ནི་བཤད་པར་བྱ། །དམ་ཚིག་ཐོབ་པར་གྱུར་ནས་སུ། །སྡོམ་པ་དག་ནི་གཟུང་བར་བྱ། །མ་མོའི་སྔགས་དང་ཕྱག་རྒྱ་ནི། །མཉམ་པར་གཞག་པས་བསྟན་པར་བྱ། །གཞན་དུ་སློབ་དཔོན་བློ་ངན་ནི། །ངེས་པར་དམྱལ་བར་འགྲོ་བར་འགྱུར། ། དེས་ཀྱང་ཡང་དག་དེ་འགྲུབ་ཅིང་། །མྱུར་དུ་དམྱལ་བར་འགྲོ་བར་འགྱུར། །བགེགས་དང་ལོག་པར་འདྲེན་པའམ། །རིམས་དང་གདོན་དང་དུག་སོགས་ཀྱིས། །གདུངས་ཏེ་ནད་ཀྱིས་རྒྱུན་དུ་ནི། །འཆི་བ་རུ་ཡང་འགྱུར་བ་ཡིན། །རྡོ་རྗེ་སློབ་དཔོན་སྨད་པ་ན། རྟག་ཏུ་དམྱལ་བ་ཉིད་དུ་ནི། །རབ་ཏུ་རྨོངས་པའི་སློབ་མ་འགྲོ། །མཁའ་ལས་རྡོ་རྗེ་ཇི་བཞིན་ནོ། །དེས་ན་བུ་ཀྱེ་དམ་ཚིག་ནི། །ཁྱོད་ཀྱིས་རྟག་ཏུ་སྲུང་བར་བྱོས། །མ་མོ་ཀུན་གྱི་སྡོམ་པ་ནི། །ཐེག་པ་ཆེན་པོའི་ཆོ་གས་གནས། །དེ་ནས་ཡང་བཅོམ་ལྡན་འདས་ཀྱིས་ཏིང་ངེ་འཛིན་ལ་

བཞུགས་ཏེ། རྡོ་རྗེ་འཛིན་པ་ཐམས་ཅད་ཀྱི་ཡུམ་རྣམས་ཀྱི་དམ་ཚིག་བཀའ་སྩལ་པ། །རིན་ཆེན་སེམས་ཀྱི་དམ་ཚིག་གིས། །རྣམ་པ་གསུམ་ནི་སྦྱང་བར་བྱ། །ཐོག་མཐའ་བར་གྱི་སྦྱོར་བ་ཡིས། །ཆུང་འབྲིང་མཆོག་གི་དབྱེ་བ་ཡིས། །དེ་འདྲའི་དམ་ཚིག་ཡང་དག་པ། །སངས་རྒྱས་ཀུན་གྱིས་བཀའ་སྩལ་ཏོ། །ཇི་སྲིད་སེམས་ནི་སྦྱངས་ཀྱི་བར། །འབད་པ་ཡིས་ནི་བསྒོམ་པར་བྱ། །བུད་མེད་ཐམས་ཅད་མཐོང་བ་ན། །ལན་གསུམ་དུ་ནི་བསྐོར་ནས་ཀྱང་། །སྤྱི་བོར་ཕྱག་ནི་བྱས་ནས་སུ། །ལན་གསུམ་བར་དུ་གསོལ་བ་གདབ། ། བདག་ནི་མ་ཁྱོད་བུ་ཡིན་ཏེ། །ཇི་སྲིད་བྱང་ཆུབ་ཐོབ་པར་འགྱུར། །བྱང་ཆུབ་ཡན་ལག་ནུ་མ་ལས། །བྱུང་མ་རང་གི་འོ་མས་སྐྱོངས། །དེ་ནས་སྦྱོར་ལྡན་རབ་དགེ་བའི། །དབང་བསྐུར་བ་ནི་སྦྱིན་པར་བྱ། །གསེར་ལ་སོགས་པའི་བུམ་པ་རུ། །དྲི་ཡི་ཆུས་ནི་ཡོངས་བཀང་ལ། ། དར་དང་རས་སོགས་ཀྱིས་གཡོགས་ཏེ། །མེ་ཏོག་ཆུན་པོས་མགུལ་བརྒྱན་ནས། །རིན་ཆེན་སྨན་གྱིས་རབ་བཀང་བའི། །གཅིག་ལྷག་བཅུ་དྲུག་བཟང་པོ་ལ། །མ་མོའི་སྙིང་པོ་ཉིད་ཀྱིས་ནི། །བརྒྱ་རྩ་བརྒྱད་དུ་བཟླས་པ་ཡིས། །སྔགས་ཤེས་པས་ནི་དབང་བསྐུར་རོ། ། སློབ་མ་ཞི་བ་བཟང་པོ་ཡིས། །ཐོག་མར་ཞུ་བ་བྱས་ནས་ཀྱང་། །ཞབས་གཉིས་ལ་ནི་མགོས་བཏུད་ནས། །བདག་ནི་ཆེ་གེ་མོ་རྡོ་རྗེ། །བྱང་ཆུབ་སེམས་ནི་རྣམ་བསྒོམས་པའོ། །སློབ་དཔོན་ཞབས་ཀྱི་ཆུ་སྐྱེས་ལ། །དབང་བསྐུར་ཕྱིར་ནི་ཞུ་བ་བགྱིད། །སྐལ་བ་ཆེན་པོ་བདག་ལ་སྩོལ། །སློབ་དཔོན་མཆོག་ཏུ་རྨད་བྱུང་བ། །དབང་བསྐུར་རྒྱལ་བ་ཐམས་ཅད་ཀྱིས། །སངས་རྒྱས་བྱང་ཆུབ་རབ་སྒྲུབ་པ། །དེས་ནི་བདག་གི་སེམས་ཅན་རྣམས། །དོན་གྱི་དམ་པ་བདག་གིས་བགྱི། །སངས་རྒྱས་ཀུན་གྱིས་དོན་བགྱིད་པ། །བརྟུལ་ཞུགས་བཟང་པོ་ཁྱོད་ཀྱི་དྲིན། །དེ་ནས་དབང་བསྐྲུར་སྦྱོར་བ་ཡིས། །རྡོ་རྗེ་སེམས་དཔའི་གོ་འཕང་གནས། །སློབ་མས་ཡེ་ཤེས་རྡོ་རྗེ་ཡི། །གོ་འཕང་ལ་ནི་བཞག་ནས་སུ། །བུམ་པ་བཟང་པོ་གཅིག་གམ་ནི། །ཡང་ན་བཅུ་དྲུག་དག་གམ་ནི། །ལྔའམ་ཡང་ན་བཅུ་ཡིས་ནི། །དཀྱིལ་འཁོར་

དུ་ནི་དབང་བསྐུར་རོ། །དཀྱིལ་འཁོར་གྱི་ནི་མདུན་དུ་ནི། །དཀྱིལ་འཁོར་པདྨ་བྲི་བར་བྱ། །པདྨ་འདབ་མ་བརྒྱད་པ་ལ། །གེ་སར་ལྟེ་བ་ལྡན་པར་བྲི། །དེ་ཡི་དབུས་སུ་རྡོ་རྗེ་བྲི། །སྣ་ཚོགས་རྡོ་རྗེ་འོད་ཟེར་ཕྲེང་། །དེ་ཡི་མདུན་དུ་འཁོར་ལོ་བྲི། །ཆེན་པོ་རིན་ཆེན་བདུན་གྱིས་བསྐོར། །ལྷོ་ཡི་ཕྱོགས་སུ་རིན་པོ་ཆེ། །ནུབ་ཏུ་པདྨ་ཉིད་ཡིན་ཏེ། །བྱང་དུ་རལ་གྲི་ཆེན་པོའོ། །འབར་བའི་ཕྲེང་འཁྲུགས་འོད་ཟེར་ཅན། །གྲྭ་ཡི་ཕྱོགས་ནི་ཐམས་ཅད་དུ། །མེ་ཏོག་བདུག་པ་དྲི་ཞིམ་པ། །འོད་ལྡན་པ་ནི་སྐལ་བ་ཆེ། །སྒོ་དང་སྒོ་རུ་བཞི་ཉིད་དོ། །ཕྱི་རོལ་དུ་ཡང་མི་འཆི་ཀུན། །གཅིག་ནས་གཅིག་ཏུ་རྒྱལ་སྒྲོགས་པ། །བདེ་བྱེད་གཅེར་བུའི་ཆ་ལུགས་ཏེ། །མིང་ཐོས་པ་དང་ལྡན་པའོ། །དཀྱིལ་འཁོར་དེ་ཡི་དབུས་སུ་ནི། །སློབ་མ་བསྙེམས་དང་བཅས་པ་བཞག །ཆོས་ཀྱི་རང་བཞིན་གཏམ་བརྗོད་དེ། །དེ་རིང་ཁྱོད་ནི་རིགས་སུ་སྐྱེས། །འཁོར་ལོས་སྒྱུར་བའི་རྒྱལ་པོ་ཆེ། །རྟག་པ་དམ་པའི་དབང་ཕྱུག་པ། །ཐབས་དང་ཤེས་རབ་ལྡན་པའི་དཔལ། །དག་པའི་དབང་ཕྱུག་ཀུན་གྱི་བདག །རྡོ་རྗེ་པདྨ་ལག་བྱིན་ཏེ། །གནང་བ་བཟང་པོ་རབ་ཏུ་སྦྱིན། །བུ་ཡིས་བྱ་བ་ཆེན་པོ་གྱིས། །སངས་རྒྱས་ཀུན་གྱི་གོ་འཕང་གནས། །དེར་ནི་སྦྱོར་བ་འོངས་ནས་སུ། །གསང་བའི་སྡོམ་པ་སྦྱིན་པར་བྱ། །འདི་ནི་མཆོག་ཏུ་དགའ་བ་སྟེ། །ཡུམ་རྣམས་རབ་ཏུ་རྨད་བྱུང་བའོ། །དུས་སུ་འདོད་པ་ཉིད་དུ་གྱིས། །དམ་ཚིག་མཆོག་ཏུ་གྱུར་པའོ། །བརྟུལ་ཞུགས་བཟང་པོས་ཅི་འབྱོར་པས། ། དེ་ནས་ཡོན་ནི་ཕུལ་བྱས་ནས། །སློབ་དཔོན་གྱི་ནི་ཞབས་ལ་འདུད། །མ་དང་ཆུང་མ་བུ་མོ་དང་། །སྲིང་མོ་སྲིང་མོའི་བུ་མོ་དང་། །བུ་རྣམས་དང་ནི་བདག་ཉིད་དང་། །རྒྱལ་པོ་ལོངས་སྤྱོད་གཏེར་དང་ནི། །ནོར་དང་འབྲུ་དང་གྲོང་ཤིང་རྟ། །གླང་པོ་རྟ་དང་བ་གླང་སོགས། །མ་ཧེ་དང་ནི་མ་ཧེ་མོ། །གཞན་དང་གཞན་ཡང་ཅི་འདོད་པ། །བླ་མ་ལ་ནི་ཆེན་པོས་དབུལ། །བྱ་དང་མི་བྱ་རྫས་ཀྱི་མཆོག །ཐམས་ཅད་ཀྱང་ནི་དབུལ་བར་བྱ། །དེ་ནས་བཅོམ་ལྡན་མ་རྣམས་ལ། །རྒྱན་ཕྲེང་རྣམས་དང་བཞད་གད་དང་། །སྒེག་དང་རྩེ་འཇོ་དགའ་བ་དང་། །

རབ་ཏུ་དགའ་བའི་བདེ་ཆེན་དང་། །བཟའ་བཏུང་བཅའ་བ་ལ་སོགས་པའི། །རྣམ་པ་དུ་མ་ཐམས་ཅད་ཀྱིས། །མཆོད་ནས་གཤེགས་སུ་གསོལ་བར་བྱ། །སེམས་ཅན་ཀུན་གྱི་དོན་དང་ནི། །བདག་གི་ཡང་ནི་ཆེད་ཆེར་མཛད། །བདེ་གཤེགས་གང་དུ་གཤེགས་པ་དེར། །མ་མོ་ཐམས་ཅད་གཤེགས་སུ་གསོལ། །ཤེས་རབ་ལྡན་པས་ཡོན་ཕུལ་ཏེ། །སློབ་མའི་མཆོག་དང་བཅས་པ་ཡིས། །གར་བྱས་ལག་པ་མགོར་བཞག་སྟེ། །རིམ་གྱིས་འགྱེད་དང་འདུད་པར་བྱ། །དེ་ནས་བཟང་མོ་རྣམས་མཉེས་ཏེ། །ཐམས་ཅད་སྒྲུབ་པར་བྱེད་པའི་མཆོག །བདག་གིས་སྐལ་བཟང་སྩལ་ནས་ཀྱང་། །རང་གི་སྲས་ཀྱི་གནས་སུ་གཤེགས། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཡུམ་ཆེན་མོ་རྣམས་ཀྱི་ཕྱག་རྒྱ་ཡེ་ཤེས་ཀྱི་དཀྱིལ་འཁོར་ཡོངས་སུ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་གསང་བའི་ཡུམ་བཅོམ་ལྡན་འདས་མ་རྣམས་ཀྱིས་ཡང་གསང་བ་འདུས་པ་ལས་བྱུང་བ་རང་རང་གི་སྒྲུབ་པའི་ཐབས་རྒྱས་པ་བཅོམ་ལྡན་འདས་ལ་འདི་སྐད་ཅེས་ཞུས་སོ། །ཤེས་རབ་ཡེ་ཤེས་མཆོག་སྒྲུབ་པའི། །སེམས་དཔའ་ཆེན་པོས་གསུང་དུ་གསོལ། །ཐབས་ཀྱིས་སེམས་ཅན་ཐམས་ཅད་ཀུན། །སངས་རྒྱས་བྱང་ཆུབ་འབྲས་ཐོབ་པ། །རྡོ་རྗེ་ཡེ་ཤེས་མཆོག་གྱུར་པ། །རྡོ་རྗེའི་སྐུ་སྟེ་རྡོ་རྗེ་མཆོག །དངོས་གྲུབ་ཀུན་གྱི་བདེ་སྟེར་བ། །རྡོ་རྗེ་ཆེན་པོས་གསུང་དུ་གསོལ། །ཐུགས་ཀྱི་རིན་ཆེན་ལྡན་པའི་མཆོག །གཟི་བརྗིད་རྡོ་རྗེ་སྣང་བ་ཅན། །སེམས་ཅན་རྣམས་ཀྱི་རྫུ་འཕྲུལ་དང་། །འགྲུབ་པའི་ཡོན་ཏན་འབྱུང་གནས་གསུངས། །སངས་རྒྱས་ཀུན་གྱི་རྣལ་འབྱོར་ཆེ། །རྣལ་འབྱོར་ཆེན་པོ་དབང་ཕྱུག་ཆེ། །དཔའ་བོའི་སྦྱོར་བས་གར་གནས་པའི། །དཔའ་བོ་ཆེན་པོས་བཤད་དུ་གསོལ། །ལས་ཀུན་གྱི་ནི་འབྲས་བརྙེས་པས། །སྣ་ཚོགས་མཁྱེན་པ་དབང་ཕྱུག་ཆེ། །སེམས་ཅན་རྣམས་ཀྱི་ཡབ་ཆེན་པོ། །སྣ་ཚོགས་དམ་པ་བཤད་དུ་གསོལ། །ཞེས་བྱ་བས་སོ། །དེ་ནས་བཅོམ་ལྡན་རྟག་པའི་རྒྱལ། །དམ་པའི་དབང་ཕྱུག་ཀུན་མཁྱེན་

པས། །གསུང་མཆོག་ནམ་མཁའ་དང་མཚུངས་པའི། །ཟབ་མོ་ཡི་ནི་ཆོས་བཀའ་སྩལ། །འདི་ན་སྒྲུབ་པོ་གང་ཡང་མེད། །དངོས་གྲུབ་བམ་ནི་སྒྲུབ་ཐབས་ཀྱང་། །ཐམས་ཅད་རྣམ་པར་རྟོག་ལས་བྱུང་། །རྣམ་རྟོག་ཀྱང་ནི་དམིགས་མ་ཡིན། །བདག་མེད་སངས་རྒྱས་རྣམས་ཀྱང་མེད། །ཆོས་རྣམས་མེད་ཅིང་ཆོས་ཉིད་མེད། །སྦྱོར་བ་མེད་ཅིང་སེམས་ཅན་མེད། །དེ་བཞིན་ཕ་དང་མ་ཡང་མེད། །བྱེད་པ་མེད་ཅིང་སྐྱོང་བ་མེད། །འབྲས་བུ་མེད་ཅིང་རྒྱུ་ཡོད་མིན། །ལོངས་སྤྱོད་མེད་ཅིང་ཟ་བོ་མེད། །ཤེས་མེད་ཤེས་པ་པོ་ཡང་མེད། ། རྣམ་ཤེས་མེད་ཅིང་ཤེས་བྱ་མེད། །རྫུན་མིན་བདེན་པའང་མ་ཡིན་པ། །དེས་ན་སྣང་བ་ཐམས་ཅད་ནི། །སྒྱུ་མ་ལྟ་བུ་ཉིད་ལས་བྱུང་། །དེ་ལྟར་ཆོས་རྣམས་རྣམ་རིག་པ། །གྲོལ་ནས་གོས་པར་མི་འགྱུར་ཏེ། །དངོས་གྲུབ་ཆེན་པོ་འགྲུབ་པར་འགྱུར། །སངས་རྒྱས་བྱང་ཆུབ་བདེ་ཆེན་པོ། །ཟབ་མོའི་ཆོས་ནི་ཐོས་པ་ན། མཁས་པ་གང་ཞིག་དད་གྱུར་ན། །སྙིང་པོ་ཕྱག་རྒྱ་སྔགས་རིག་རྣམས། །གདོན་མི་ཟ་བར་འགྲུབ་པར་འགྱུར། །སྦྱོར་བ་འདི་ནི་བཅོམ་ལྡན་གསུངས། །ཐམས་ཅད་དག་པར་བྱེད་པའི་མཆོག །གསང་བའི་རྒྱན་ལ་ལེགས་བཞུགས་ནས། །སེམས་ཅན་རྣམས་ལ་བསྟན་པ་པོ། །དེ་ནས་ཡུམ་རྣམས་ཚིམ་གྱུར་ཏེ། །རང་བྱུང་བ་ལ་ཞུ་བ་ཞུས། །གྲུབ་པའི་སྒྲུབ་ཐབས་རབ་སྦྱོར་བ། །མངའ་བདག་རྣལ་འབྱོར་རྣམས་ཀྱིས་གསུངས། །དེ་ནས་ཡང་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་ཡུམ་ལས་ཀྱི་དམ་ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །ནམ་མཁའི་དཀྱིལ་འཁོར་བསྒོམ་པར་བྱ། །དེ་ཡི་སྟེང་དུ་མ་ཉམས་པ། །ནམ་མཁའི་མཐའ་ཀླས་ཁྱབ་པ་ཡི། །ཕྱོགས་ཀུན་དུ་ནི་རབ་འཕྲོ་བའོ། །དེ་ཡི་སྟེང་དུ་གཟི་བརྗིད་ཆེ། །དུས་མཐའི་མེ་དང་མཚུངས་འདྲ་བ། །དེ་ཡི་སྟེང་དུ་ས་ཆེན་པོ། །གསེར་གྱི་རི་བོ་དང་མཚུངས་པ། །དེ་ཡི་སྟེང་དུ་ཆུར་ཤེས་བྱ། །ཟླ་བ་གང་བ་ཁ་བ་འདྲ། །སྔགས་པས་ཆོ་ག་བཞིན་དུ་བསམ། །རིན་ཆེན་བཞི་ཡི་རང་བཞིན་བཟང། །སྟོང་ཕྲག་བརྒྱད་

ཅུ་རྩ་བཞི་ཡི། །དཔག་ཚད་ཀྱི་ནི་ཚད་ཙམ་པ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡི་རྩེ་མོ་ཅན། །རི་བོ་ཆེན་པོ་ཅོག་བརྒྱད་པ། །དབུས་སུ་རྡོ་རྗེའི་རི་བོ་མཆོག །དེ་ཡི་སྟེང་དུ་རྡོ་རྗེ་ཆེ། །ཀུན་ཏུ་ཕྱོགས་པ་ཡོངས་སུ་བསྒོམ། །སྔོ་བསངས་མརྒད་ཏ་འདྲ་བ། །སྣ་ཚོགས་འོད་ཀྱིས་ཡང་དག་འཁྲུགས། །དེ་ཡི་སྟེང་དུ་རྡོ་རྗེ་ཆེ། །རྩེ་མོ་ལྔ་པ་རྣམ་པར་བསམ། །དཀར་པོ་ཤེལ་དང་འདྲ་བའོ། །འོད་ཟེར་ལྔ་ཡིས་རྣམ་པར་སྤྲས། །དེ་ཡི་སྟེང་དུ་རིན་པོ་ཆེ། །ཆུ་སྐྱེས་སྔོན་པོའི་འདབ་འདྲ་བ། །སྣ་ཚོགས་འོད་ཟེར་སྟོང་གི་ཕྲེང་། ། ཕྱོགས་བཅུ་ནམ་མཁའ་ཁྱབ་པའོ། །དེ་ཡི་གཙུག་ཏུ་པདྨ་ཆེ། །ནམ་མཁའ་ཁྱབ་པ་ཡི་ནི་མཆོག །ལོ་མ་སྟོང་ཕྲག་དུ་མ་ཅན། །ལྟེ་བ་དང་ནི་ཟེའུ་འབྲུས་དཀྲིགས། །དེ་ཡི་མདུན་དུ་ཉི་མ་ཆེ། །འོད་ཟེར་སྟོང་ཕྲག་དུ་མ་ཅན། །དེ་ཡི་སྟེང་དུ་ཟླ་བ་ཆེ། །དཀར་པོའི་འོད་ཟེར་འབར་བས་དཀྲིགས། །ནམ་མཁའི་ཁམས་ནི་གང་བ་ཡི། །གཟི་བརྗིད་དཀར་པོ་འཕྲོ་བའོ། །དེ་ཡི་དབུས་སུ་མ་མོ་བྲི། །དུས་གསུམ་བཞུགས་པའི་སངས་རྒྱས་ཀྱང་། །ཡོངས་སུ་དག་པ་མཁའ་འདྲ་མ། །ཟླ་བའི་དཀྱིལ་འཁོར་འཕྲོ་བ་མོ། །ཕྱག་གཉིས་མ་ལ་ཐུགས་ཞི་བ། ། བསམ་གཏན་སྤྱན་ལྡན་བསམ་གཏན་ཡིད། །བསམ་གཏན་མཆོག་གི་ཕྱག་རྒྱ་ཡི། །སེར་མོ་གཞོན་ནུ་རབ་བཞག་པ། །དཀར་པོའི་གོས་འཛིན་མཛེས་པ་མོ། །དཀར་པོ་ཡི་ནི་རྒྱན་གྱིས་བརྒྱན། །རལ་པའི་ཐོར་ཚུགས་ཅོད་པན་བཟང། །གཙུག་གི་ནོར་བུ་འོད་ལྡན་པ། ། ཡེ་ཤེས་གདན་ལ་མཉམ་པར་བཞུགས། །བ་སྤུ་རྣམས་ཀྱི་རྩེ་བུག་གནས། །རྒྱལ་བ་རབ་ཏུ་ཁྲོས་པ་སྟེ། །བྱང་ཆུབ་ཕ་རོལ་སོན་པར་མཛད། །དེ་ཡི་ཐུགས་ཀར་རྣམ་བསམ་པ། །ཡི་གེ་མཆོག་ཏུ་མི་འགྱུར་བ། །ཡི་གེ་རྣམས་ཀྱིས་ཡང་དག་དཀྲིགས། །ཐམས་ཅད་དུ་ནི་ལེགས་འཕྲོ་བའོ། །སངས་རྒྱས་རྣམས་ནི་མདུན་གནས་པ། །རབ་ཏུ་ཐལ་མོ་སྦྱོར་བའོ། །དེ་བཞིན་བྱང་ཆུབ་སེམས་དཔའ་རྣམས། །རིག་སྔགས་ཁྲོ་བོའི་ཚོགས་ཀྱང་ནི། །ཆོས་ཉན་པ་ཡི་ཚུལ་དུ་ཡང་། །དཀྱིལ་འཁོར་དུ་ནི་གཞག་པར་བྱ། །སྒོ་ཡི་ཕྱོགས་ནི་ཐམས་ཅད་

དུ། །སྒོ་སྐྱོང་བ་ནི་བཞི་རྣམས་སོ། །སྦྱིན་པ་ལ་སོགས་ཅི་རིགས་པར། །བཅུ་དྲུག་པོ་ཡང་གཞག་པར་བྱ། །མེ་ཏོག་བདུག་པ་མར་མེ་ཆེ། །ཇི་ལྟ་བ་བཞིན་གཞག་པར་བྱ། །ལྷ་ཀླུ་དེ་བཞིན་གནོད་སྦྱིན་དང་། །དྲི་ཟ་ལྷ་མིན་དམྱལ་ལས་བྱུང་། །འདི་རྣམས་ཐམས་ཅད་ལྷུན་པོ་ལ། ། ཀུན་ནས་ཡོངས་སུ་གཞག་པར་བྱ། །དེ་ནས་མེ་ཏོག་ཕྲེང་ལྡན་འཇུག །དྲི་དང་མེ་ཏོག་ཡང་དག་ལྡན། །གོས་དཀར་འཛིན་པ་དཔལ་དང་ལྡན། །རྒྱན་རྣམས་ཀུན་གྱིས་རྣམ་པར་བརྒྱན། །ཤེས་རབ་འཕྲོ་དང་ལྷན་ཅིག་ཏུ། །རྡོ་རྗེ་སེམས་དཔའ་རྗེས་དྲན་པས། །བདག་དག་པས་ནི་དག་པར་བྱ། །ཤེས་རབ་སྦྱོར་བས་གང་གནས་པས། །སྒོ་ཡི་དྲུང་དུ་ལེགས་འཁོད་ལ། །གླུ་འདི་ཡིས་ནི་སྤྱན་དྲང་བྱ། །ཐུགས་རྗེ་མངའ་བ་ཆོས་ཀྱི་དབང་ཕྱུག་སངས་རྒྱས་ཡུམ། །རང་གི་ཡབ་ཀྱི་ཚོགས་དང་སྲས་དང་བཅས་ཏེ་བྱོན། །སྤྱོན་ཅིག་སྤྱོན་ཅིག་ལྷ་དང་སྲིན་པོར་བཅས་མཆོད་པའི། །འཇིག་རྟེན་དབང་ཕྱུག་ཡང་དག་བྱང་ཆུབ་ཐུགས་མངའ་བ། །སྤྱོན་ཅིག་སྤྱོན་ཅིག་ཐུགས་རྗེའི་བདག་ཉིད་འཇིག་རྟེན་གཉེན། །ཆོས་ཀྱི་ཡི་གེ་བདེ་བར་གཤེགས་པས་རྗེས་བསྐོས་པ། །མཁའ་ལྟར་ཡོངས་དག་དྲི་མེད་དམ་བཅའ་དྲན་པར་མཛོད། །མ་མོ་རྣམས་ནི་མཆོག་གི་གླུས་བསྐུལ་བྱོན་པར་འགྱུར། །དེ་ནས་བཅོམ་ལྡན་འདས་མ་བྱོན་པར་མཐོང་ནས་རང་གི་མེ་ཏོག་གི་སྙིམ་པ་དང་། མཆོད་ཡོན་དང་། ཞབས་བསིལ་དབུལ་བར་བྱའོ། །ཨོཾ་བདག་གི་མཆོད་ཡོན་ཞབས་བསིལ་འདི། །ཅི་བདེ་བར་ཡང་བཞེས་སུ་གསོལ། །དེ་ནས་དེ་དང་ལྷན་ཅིག་ཏུ། །འདྲེས་པ་རུ་ནི་གྱུར་པར་བསམ། །ཨོཾ་སརྦ་ཏ་ཐཱ་ག་ཏ་པྲཛྙཱ་ཛྙཱ་ན་ས་མ་ཡེ་ཧཱུྃ་ས་མ་ཡ་སྟྭྃ། དེ་ནས་འདི་ཡིས་བརྟན་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཙ་ལ་ས་མ་ཡ་མ་ཙ་ལ་སྟྭྃ། དེ་ནས་འདིས་མཉེས་པར་བྱ། ཨོཾ་སརྦ་ཏ་ཐཱ་ག་ཏ་མ་ན་སན་ཏུ་སྟི་ས་མ་ཡེ་ཧཱུྃ། ཨེ་ཧྱེ་ཧི་ཛཿ ཨེ་ཧྱེ་ཧི་ཛཿ། དེ་ནས་དཔག་ཏུ་མེད་པའི་ངོ་མཚར་ཆེན་པོ་ལྟ་བའི་ཕྱིར། ཨོཾ་སརྦཱངྒ་པུཎྜ་ར་མ་ཧཱ་བྷ་ག་བཱནས་ལེ་སྨ་ར་སྨ་ར་སྥ་ར་སྥ་ར་སརྦཱངྒཱ་བཱ་ཡུ་པིཋྞུ་མ་ཧཱ་བུདྡྷ་སམུ་དྲྭན་ཧཱུྃ་ཧཱུྃ་ཨྃ། འདི་ཡིས་མ་མོ་བསྐུལ་ནས་སུ། །སངས་རྒྱས་སྤྲིན་ནི་འོད་པོ་ཆེ། །དཀྱིལ་འཁོར་བ་ལ་སྤྲོ་བར་བྱ། །དེ་

ནས་གསང་སྔགས་འདི་ཡིས་ནི། །བསྔགས་ཏེ་མེ་ཏོག་དོར་བར་བྱ། །ཨོཾ་སརྦཱངྒ་པུཎྜ་རཱི་ཀ་པྲ་ཏཱི་ཙྪ་དྷྭྃ་ཀུ་སུ་མཱཉྫ་ལིཾ་ཧཱུྃ་ཨཿ། དེ་ནས་ཇི་ལྟར་བཤད་པ་བཞིན་དུ་དཀྱིལ་འཁོར་གྱི་བུམ་པ་རྣམས་ལ་རིག་སྔགས་འདིས་ཇི་ལྟར་བཤད་པ་ལྟར་ལེགས་པར་བྱིན་གྱིས་བརླབས་ལ་རང་གིས་དབང་བསྐུར་རང་གི་སྙིང་པོ་རང་གིས་བླང་བར་བྱའོ། །དེ་ནས་ལས་ཐམས་ཅད་ཀྱི་ནུས་པ་དང་ལྡན་པ་དང་། དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ནས་མེ་ཏོག་ལ་སོགས་དང་། །བཟའ་དང་བཏུང་དང་རོ་དག་གིས། །མཆོད་ལ་སྔོན་གྱི་རིམ་པ་བཞིན། ། སློབ་མའི་རྒྱལ་པོ་གཞུག་པར་བྱ། །འཁོར་ལོས་སྒྱུར་བའི་རིམ་པ་ཡི། །སྦྱོར་བ་ཡིས་ནི་དབང་བསྐུར་རོ། །རྡོ་རྗེ་རིན་ཆེན་དེ་བཞིན་པད། །ལས་ཀྱི་རྡོ་རྗེ་དེ་བཞིན་ནོ། །ཞགས་པ་ལྕགས་ཀྱུ་དྲིལ་བུ་དང་། །ལྕགས་སྒྲོག་རྔ་ཡབ་དང་ནི་གདུགས། །རལ་གྲི་མིག་སྨན་ཐུར་མ་གཉིས། །རྒྱལ་པོའི་ཉེ་བར་སྤྱོད་པ་དང་། །དེ་ལ་རྒྱན་རྣམས་བསྟན་ནས་སུ། །དཀྱིལ་འཁོར་དེར་ནི་དབང་བསྐུར་རོ། །རྒྱལ་བའི་ཡུམ་གྱི་དབང་བསྐྲུར་བ། །ལས་ཀུན་བྱེད་པར་རབ་ཏུ་བཤད། །དམ་ཚིག་གམ་ནི་སྡོམ་པ་ཡང་། །རང་གི་སློབ་མ་ཉན་དུ་གཞུག །ཞི་བ་དང་ནི་རྒྱས་པའི་ལས། །དབང་དང་དྲག་ཤུལ་སྤྱོད་པ་ནི། །ལེགས་པར་རྣམ་པར་དག་སེམས་ཀྱིས། །ཅི་འདོད་པར་ནི་བྱ་བ་བྱོས། །ལས་རྣམས་ཀུན་གྱི་འབྲས་བུ་ཡང་། །སྦྱོར་བ་འདི་ཡིས་འགྲུབ་པར་འགྱུར། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོས་སླར་ཡང་ལས་དམ་པ་རྒྱས་པར་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །ཇི་ལྟའི་གཟུགས་ཀྱི་སྣོད་བྱས་ལ། །དཀྱིལ་འཁོར་གྱི་ནི་དབུས་སུ་གཞག །ཞོ་དང་མར་གསར་འོ་མ་ནི། །ཙནྡན་དམར་པོ་དང་བསྲེས་ཏེ། །ག་པུར་དང་ནི་ལྡན་བྱས་ལ། །ཡིད་ལ་བྱེད་པས་བཟླས་ཏེ་བསྒྲུབ། །ཟླ་བ་ཉི་མ་གཟས་བཟུང་ཚེ། །སྦྱོར་བ་བཟང་པོའི་རྣམ་གཞག་བྱ། །ཐོག་མར་མེ་ནི་སྦར་བྱས་ནས། །འབད་པ་ཡིས་ནི་རླུང་གིས་བུས། །གསེར་གྱི་སྣོད་དུ་བསྡུ་བར་བྱ། །བ་རུ་ན་ཡི་ཁུ་བས་སྦྱར། །ཉི་མ་དང་ནི་ཟླ་བ་ལ། །

སླར་ཡང་རྫས་དེ་བསྐམ་པར་བྱ། །དེ་ནས་དེ་རུ་ལྷ་མོ་ཡི། །ཁྲག་དང་ས་བོན་བླུགས་པར་བྱ། །དེ་ཡིས་མྱུར་དུ་རྫས་དག་ནི། །འགྲུབ་པར་འགྱུར་ཏེ་ཐེ་ཚོམ་མེད། །གྲུབ་ནས་ཐོག་མར་ལྷ་མོ་ལ། །ཅུང་ཟད་ཙམ་ཞིག་དབུལ་བར་བྱ། །དེ་བཞིན་དུ་ནི་སློབ་དཔོན་ལ། །སྐལ་བ་ཉིས་འགྱུར་དབུལ་བར་བྱ། །དེ་ནས་གྲུབ་པ་གཞན་རྣམས་དང་། །རང་གི་སློབ་མར་སྐལ་བ་སྦྱིན། །དེ་ནས་བྱིན་བརླབས་སྦྱོར་བ་ཡིས། །ཕྱག་རྒྱ་དང་ནི་ལྷན་ཅིག་ཏུ། །རྡོ་རྗེ་སེམས་དཔའི་ཏིང་འཛིན་གྱིས། །ཟས་ཀྱི་ས་བོན་དང་ནི་བཟའ། །སྐད་ཅིག་དེ་ལ་གཟུགས་བརྗེས་ཏེ། །རྡོ་རྗེ་སེམས་དཔའ་ལྟ་བུར་འགྱུར། །གང་དང་གང་གི་གཟུགས་རྣམས་སུ། །བསྒྲུབ་འདོད་པ་ཡི་སྔགས་པ་ཡིས། །དེ་དང་དེ་ཡི་བསམ་གཏན་གྱིས། །བློ་གྲོས་བརྟན་པས་བཟའ་བར་བྱ། །དེ་དང་དེ་ཡི་གཟུགས་སུ་ནི། །གདོན་མི་ཟ་བར་བརྗེ་བར་འགྱུར། ། གཞན་པ་ཡི་ནི་རྫས་དག་ཀྱང་། །འདི་ཉིད་ཀྱིས་ནི་བསྒྲུབ་པར་བྱ། །མིག་སྨན་གྱིས་ནི་མིག་བྱུགས་པས། །ཁོར་ཡུག་ཏུ་ནི་མི་སྣང་འགྲོ། །སྙིང་ལ་ལྡོང་རོས་ཀྱིས་བྱུགས་ན། །ཡིད་ཀྱི་སྤྱོད་ཡུལ་ཉིད་དུ་འགྲོ། །བ་བླ་ཡིས་ནི་ལུས་བྱུགས་ན། །མཁའ་ལ་ཉེ་བར་འགྲོ་བར་འགྱུར། །མིག་སྨན་ནག་པོ་བླངས་ནས་སུ། །ནག་པོའི་ཕྱོགས་ལ་བཟའ་བར་བྱ། །དེ་ཡི་བཤང་བའི་མར་ཁུ་ལས། །དུད་པ་མཁས་པས་བསྒྲུབ་པར་བྱ། །དེ་ཡིས་མིག་ལ་བྱུགས་ན་ནི། །སངས་རྒྱས་ཀྱིས་ཀྱང་མི་གཟིགས་ཤིང་། །སྟོབས་ནི་དཔལ་ལྡན་རྡོ་རྗེའི་མཚོན། ། ཉིད་འགྱུར་རྒ་དང་འཆི་བ་མེད། །མིག་སྨན་དང་ནི་བ་ལང་མར། །མ་ཧེ་དང་ནི་ར་ཉིད་དང་། །མི་ཡི་མིག་སྨན་ཉིད་དག་ནི། །མཁས་པ་ཡིས་ནི་བླངས་ནས་སུ། །སྔགས་པས་བཟུང་སྟེ་བཙོ་བར་བྱ། །མིག་སྨན་ཆེན་པོ་མཆོག་ཏུ་བཟང། །འདི་ཡིས་མིག་ལ་བྱུགས་ན་ནི། ། གྲུབ་པ་ཡིད་དུ་འོང་བར་འགྱུར། །མི་སྣང་འགྲུབ་པ་ཐམས་ཅད་ཀྱིས། །བློ་གྲོས་ཆེན་པོ་རྒྱལ་པོར་འགྱུར། །སངས་རྒྱས་ཀུན་གྱི་ས་ཆེན་པོ། །ངེས་པར་ཐོབ་འགྱུར་གཞན་དུ་མིན། །རྫས་ཀྱི་གནས་སྐབས་ལེའུ་འདི། །མཚུངས་མེད་ཆེན་པོ་ཉེར་བཤད་དོ། །གོས་

དང་གདུགས་སོགས་རལ་གྲི་དང་། །མཚོན་ཆ་དམ་པ་བསྒྲུབ་པར་བྱ། །སྙིང་པོ་སྙིང་གར་བྱས་ནས་ནི། །བསྒོམས་ན་མྱུར་དུ་འགྲུབ་པར་འགྱུར། །རྡོ་རྗེ་སེམས་དཔའ་རྒྱལ་པོ་ཆེས། །པདྨའི་སེམས་དཔའ་བཞིན་རས་མཆོག །དེ་ཡི་ཞལ་དུ་བྱས་ནས་སུ། ། དེ་དང་ལྡན་པས་བསྒོམ་པར་བྱ། །མངའ་བདག་གང་གིས་དབང་ཕྱུག་ལྟར། །སྐད་ཅིག་དེ་ལ་དེ་འགྱུར་རོ། །དེ་ཉིད་ཀྱི་ནི་སྤྱི་བོའི་ཆར། །མཆོག་གི་དམ་པ་བསམ་གཏན་བྱ། །སྐད་ཅིག་དེ་ལ་མཆོད་པ་ཆེའི། །སངས་རྒྱས་སུ་ནི་དེ་འགྱུར་རོ། །དེ་ཡི་སྤྱི་གཙུག་ཉིད་དུ་ནི། ། སྣ་ཚོགས་རྡོ་རྗེ་བསྒོམ་པར་བྱ། །དེ་ནི་ཀུན་གྱི་རྒྱལ་དབང་པོ། །ལས་ཀུན་བྱེད་པའི་དོན་འགྲུབ་འགྱུར། །རྡོ་རྗེ་སྙིང་གར་བསམ་པར་བྱ། །དེ་ཡི་དབུས་སུ་སྙིང་པོ་བལྟ། །དེ་ནས་རྡོ་རྗེ་རིག་པ་འཛིན། །མངའ་བདག་རྡོ་རྗེའི་དབང་པོ་འགྲུབ། །རིན་ཆེན་ཆེན་པོ་ཆ་བརྒྱད་པ། ། སྙིང་ག་རུ་ནི་མཁས་པས་བསྒོམ། །དེར་ནི་སྙིང་པོ་བསམ་པ་ཡིས། །རིན་ཆེན་རིག་པ་འཛིན་པར་འགྱུར། །པདྨ་ཆེན་པོ་འདབ་བརྒྱད་པ། །ཡིད་ལ་བསྒོམས་པས་སྐད་ཅིག་ལ། །པདྨ་ཆེ་ལྡན་མངའ་བདག་གིས། །པདྨའི་རིག་པ་འཛིན་པར་འགྱུར། །དེ་ལ་སོགས་པ་མཐའ་ཡས་པ། །ཇི་ལྟའི་སྦྱོར་བའི་ཆོ་ག་ཡིས། །མཆོག་དང་དམན་པ་འབྲིང་པོ་ཡི། །དངོས་གྲུབ་དམ་པ་བསྒྲུབ་པར་བྱ། །སྙིང་གར་ཟླ་བའི་དཀྱིལ་འཁོར་བསམ། །ཡི་གེ་དམ་པ་བསྒོམ་པར་བྱ། །ཇི་ལྟའི་སྦྱོར་བའི་དཀྱིལ་འཁོར་གྱིས། །ཐམས་ཅད་བདག་ཏུ་བསྒོམ་པར་བྱ། །དེ་ལས་ལངས་ཏེ་བདག་ཞི་བས། །ཟླ་འོད་ཁ་བ་ལྟར་བསིལ་བའི། །འོད་ཟེར་སྤྲིན་གྱིས་ཆེར་གཏམས་པས། །བསྒྲུབ་བྱའི་སྤྱི་བོར་གཞག་པར་བྱ། །སྐད་ཅིག་དེ་ལ་གདུག་པ་དང་། །གཟའ་དང་དུག་སོགས་རབ་འཕྲོག་ཅིང་། །ཉི་མ་གཅིག་གམ་བདུན་ནམ་ནི། །བསྒྲུབ་བྱ་ཞི་འགྱུར་གཞན་དུ་མིན། །རིན་ཆེན་དཀྱིལ་འཁོར་དབུས་གནས་པར། །སྙིང་པོའི་མཆོག་ནི་བསྒོམ་པར་བྱ། །འོད་ཟེར་སེར་པོའི་ཕྲེང་མཛེས་པ། །བསྒོམས་པས་དེ་ནི་རྒྱས་པར་བྱེད། །པདྨའི་དཀྱིལ་འཁོར་དབུས་གནས་པར། །མཉམ་པར་གཞག་པས་ལྷ་མོ་བསམ། །

དམར་པོའི་རང་བཞིན་འབར་དག་པ། །བསྒྲུབ་བྱའི་སེམས་ལ་འཕྲོ་བར་བྱ། །སླར་ཡང་སྡུད་པའི་སྦྱོར་བ་ཡིས། །རང་གི་ལུས་ལ་གཞུག་པར་བྱ། །འཁོར་ལོས་སྒྱུར་བ་ལྟ་བུ་ཡང་། །དེ་ནི་ཅི་ནས་དབང་དུ་འགྲོ། །ལས་ཀྱི་དཀྱིལ་འཁོར་དབུས་གནས་པར། །སྣ་ཚོགས་རྡོ་རྗེ་བསྒོམ་པར་བྱ། །དེ་ཡི་དབུས་སུ་ཡི་གེ་ནི། །མ་རྒད་འོད་འདྲ་བསྒོམ་པར་བྱ། །འོད་ཟེར་སྤྲིན་གྱིས་ཡང་དག་འཁྲུགས། །མཁས་པ་ཡིས་ནི་སྙིང་གར་བསམ། །བསྒྲུབ་བྱ་ལ་ནི་སྙིང་པོའི་འོད། །བསྟིམས་པའི་སྐད་ཅིག་དེ་ལ་འབབ། །རྡོ་རྗེ་གར་གྱིས་གར་བྱེད་ཅིང་། ། ཕྱག་རྒྱ་སྦྱོར་བའི་རྣལ་འབྱོར་དང་། །རྡོ་རྗེ་རྣལ་འབྱོར་མ་སྦྱོར་བའི། །ཕྱག་རྒྱས་ཐམས་ཅད་སྟོན་པར་འགྱུར། །འདས་དང་མ་འོངས་ཅི་འདོད་པ། །ལྕེ་བརྐྱང་བས་ནི་སྨྲ་བར་བྱེད། །འདོད་དང་མི་འདོད་དགེ་མི་དགེ། །རྡོ་རྗེརི་ངག་གིས་སྨྲ་བར་འགྱུར། །ཡང་ན་ལེགས་པར་སྦྱོར་བའམ། །གྲོང་གིའམ་ཐ་མལ་སྐད་དག་གིས། །འདོད་དང་མི་འདོད་དགེ་མི་དགེ། །འཚོ་བའམ་ནི་འཆི་བ་དང་། །ཉམས་དང་མི་ཉམས་རང་བཞིན་གྱི། །དེ་དག་ཐམས་ཅད་དེ་ཡིས་སྨྲ། །དེ་ལས་གཞན་དུ་དེ་མི་སྨྲ། །འདི་ནི་བཅོམ་ལྡན་རྡོ་རྗེ་ཅན། །དབང་བདག་རྡོ་རྗེའི་དབྱངས་ཀྱིས་གསུངས། །ཁྲོས་ཏེ་ལྕེ་རྩེར་བསྒོམས་ནས་སུ། །ལྷ་མོ་ཡི་ནི་སྙིང་པོའི་མཆོག །ལྕགས་ཀྱུའི་རྣམ་པ་སྤྲོས་ནས་སུ། །ཕྱག་རྒྱ་དང་ནི་ཕྱག་རྒྱའི་ལན། །རླུང་ལ་བཞག་སྟེ་སྐད་ཅིག་ལ། །ཁྲག་རྣམས་ཐམས་ཅད་དགུག་པར་བྱ། །ཆར་རྒྱུན་འབབ་པའི་སྦྱོར་བ་ཡིས། །རང་གི་ཁ་རུ་དབབ་པར་བྱ། །དེ་ནི་འཐུངས་པས་སྔགས་ཤེས་ཏེ། །མངའ་བདག་རྡོ་རྗེ་འཛིན་པར་འགྱུར། །ནམ་མཁའ་ཀུན་ཏུ་སྤྱོད་དཔལ་ལྡན། །ཉི་མའི་སྣང་བ་ལྟ་བུར་འགྱུར། །འདི་ཉིད་ཀྱི་ནི་རྣལ་འབྱོར་གྱིས། །འོ་མ་ཞོ་དང་མར་བཟང་པོ། ། མར་ཁུ་ཆུ་དང་མེ་ཏོག་ཀུན། །རླུང་གིས་དགུག་པ་ཉིད་དུ་བྱ། །ཞགས་པས་མགྲིན་པ་བཅིངས་བྱས་ཏེ། །ལྕགས་ཀྱུ་ཡིས་ནི་སྙིང་ག་ནས། །རླུང་གིས་ཀུན་ནས་བཏེག་ནས་སུ། །ལྷ་མོ་དེ་བཞིན་གནོད་སྦྱིན་མོ། །མི་མོ་དེ་བཞིན་ལྷ་མིན་མོ། །བརྒྱད་བརྒྱ་ཁོ་ན་བཟླས་པ་

ཡིས། །བུད་མེད་ཚུལ་དུ་དགུག་པར་བྱ། །བསྒྲུབ་བྱ་སྒྲུབ་བྱེད་མིང་སྤེལ་ནས། །ཀ་བ་རྩིག་པ་དེ་བཞིན་ཁྱིམ། །དྲིལ་བུ་རྣམས་དང་བུམ་རྣམས་ལའང་། །ལྷ་མོ་ཡི་ནི་སྙིང་པོ་ཡི། །བརྒྱ་བཟླས་པས་ནི་འབེབས་པར་འགྱུར། །ཤེས་རབ་ཕ་རོལ་ཕྱིན་མ་མཆོག །ཁྲོ་བ་དང་ནི་ཡང་དག་ལྡན། །གསལ་བྱེད་ཀྱིས་ནི་གསལ་བྱས་པས། །ལས་རྣམས་དག་ནི་ཐམས་ཅད་བྱ། །དུར་ཁྲོད་རོ་ནི་མ་ཉམས་པ། །མར་ངོའི་བརྒྱད་ལ་བསྡུས་ནས་སུ། །བྱང་དུ་ཕྱོགས་ཏེ་གཞག་པར་བྱ། །དེ་ཡི་ཁར་ནི་མཉམ་གཞག་པས། །གསང་སྔགས་ལེགས་པར་བཟླས་ནས་སུ། །རྫས་ཀྱི་དམ་པ་ཅི་རིགས་པ། །བ་བླ་མིག་སྨན་རྡོ་ཆུ་དང་། །ལྡོང་རོས་དང་ཡང་ཡང་ན་བཙག །དཀར་རྩི་སོལ་བ་ཉིད་དང་ནི། །གུར་གུམ་དང་ནི་རྒྱ་སྤོས་སམ། །རུ་རྟ་ཤུ་དག་ག་པུར་དང་། །ཙནྡན་དེ་བཞིན་ཨ་ཀ་རུ། །ཤ་དང་ཁྲག་ནི་ཉིད་དང་ཡང་། །དེ་བཞིན་སོར་མོའི་གདུ་བུ་ནི། །རྣལ་འབྱོར་ལྡན་པས་བཞག་ནས་ཀྱང་། །དེ་ཡི་སྟེང་དུ་བསྡད་ལ་བཟླ། །ཉི་མ་ཤར་ནས་དེ་བླངས་པས། །གྲུབ་པའི་རིག་པ་འཛིན་པར་འགྱུར། །དམན་པས་དངོས་གྲུབ་དམན་པ་སྟེ། །རབ་ཀྱིས་རབ་ཏུ་རྣམ་པར་བསྟན། །བར་མས་བར་མར་ཤེས་པར་བྱ། །མཚན་མ་མེད་ན་དབང་དུ་བྱེད། །ཅེས་སོ། །སྐྱེས་བུ་དག་ནི་ཐམས་ཅད་དང་། །བུད་མེད་དག་ནི་ཐམས་ཅད་ལ། །རེག་པ་ཙམ་གྱིས་དབང་བྱེད་ཅིང་། །མིག་ལ་བྱུགས་པ་ཡིས་ཀྱང་ངོ་། །ཙནྡན་གྱིས་ནི་ཡོངས་བྱུགས་ཏེ། །གུར་གུམ་གྱིས་ནི་ཐིག་ལེའོ། །ལ་གུ་ཡིས་ནི་བདུག་པར་བྱ། །དཀར་རྩི་སོལ་བ་བཙག་གིས་ནི། །ཇི་ལྟར་འདོད་པའི་མིང་དང་ནི། །ཡོངས་སུ་སྤེལ་ཏེ་བྲིས་པ་ཡིས། །དབང་མ་སོང་བ་དབང་འགྲོ་སྟེ། །རྡོ་རྗེ་སེམས་དཔའི་བཀའ་བཞིན་ནོ། །ཁམས་ཀྱིས་མིང་ནི་བྲིས་པ་ན། དབང་དུ་བྱེད་པའི་མཆོག་ཡིན་ནོ། །སོལ་བས་ཡོངས་སུ་འགུགས་པར་བྱེད། །དཀར་རྩི་ཡིས་ནི་དུག་འཇོམས་སོ། །ལི་ཁྲིས་སྐད་ཅིག་དེ་ཉིད་ལ། །སྨྱོ་བར་འགྱུར་བར་ཐེ་ཚོམ་མེད། །རུ་རྟ་ཨ་ག་རུས་བདུག་

པས། །དབང་དུ་བྱེད་པའི་མཆོག་ཡིན་ནོ། །སོལ་བས་ཡོངས་སུ་འགུགས་པར་བྱེད། །གནོད་སྦྱིན་མོ་ནི་ངེས་པར་འགུགས། །ཤ་དང་ཁྲག་གི་བདུག་པ་ཡིས། །སྲིན་མོ་འགུགས་པར་བྱེད་པའི་མཆོག །ཙནྡན་སིཧླའི་བདུག་པ་ཡིས། །ལྷ་ནི་འགུགས་པར་བྱེད་པའི་མཆོག །ག་པུར་ཙནྡན་བདུག་པ་ཡིས། །སངས་རྒྱས་མཆོག་ཏུ་སྤྱན་འདྲེན་པའོ། །ག་པུར་གང་གིས་ཟོས་པ་ཡིས། །གཞན་དུའང་དེ་ཡི་དབང་དུ་འགྱུར། །རིག་པ་ཆེན་མོ་ཡི་གེ་བཞི། །མཉམ་པར་གཞག་པའི་སྦྱོར་བ་ཡིས། །འཁྲུགས་པ་དང་ནི་སྤེལ་བའི་དུས། །ངེས་པར་ཤི་བ་བསྒྲུབ་པར་བྱ། །བརྟུལ་ཞུགས་ཅན་གྱིས་གང་བསྒོ་བའི། །བཀའ་ལུང་དེ་ཡིས་མྱུར་དུ་བྱེད། །ཕྲག་པར་ཁུར་དེ་བྲན་མོ་དེས། །ལྷུན་པོའི་སྟེང་དུ་སྐྱེལ་བར་འགྱུར། །གྲུབ་པ་ཡི་ནི་མཆོག་རབ་ཀྱི། །རྫས་ནི་བླངས་ནས་འོང་བར་འགྱུར། ། གཏུམ་པོ་ཡི་དགས་ཉི་མ་ཡི། །རྒྱལ་གྱི་མཚན་མོ་སོལ་བ་བཟུང་། །གཏུམ་མོའི་མེ་ཏོག་ཁུ་བ་ཡིས། །བརྟུལ་ཞུགས་བཟང་པོས་བརྟགས་ནས་སུ། །པདྨའི་ནང་དུ་གཞག་པར་བྱ། །དེ་ཉིད་མཚན་མོ་གཅིག་གམ་གསུམ། །དེ་ལས་བླངས་ཏེ་སྦྱོར་བ་ཡིས། །མཁས་པ་ཡིས་ནི་མར་ཞུ་བྱ། །དེ་ནས་ལྷའམ་གྲུབ་པའམ། །སངས་རྒྱས་ཀྱིས་ཀྱང་བསྔགས་པའམ། །རིག་སྔགས་གྲུབ་པའི་གྲིབ་མའམ། །གདོན་མི་ཟ་བར་མཐོང་བར་འགྱུར། །འགྲོ་དང་མི་འགྲོའི་སྐྱེ་བོ་རྣམས། །དབང་མ་གྲུབ་པའང་དབང་དུ་བྱེད། །རང་གི་ཁྲག་གིས་མིང་བྲིས་ལ། །དེ་ཉིད་ཀྱི་ནི་ཕྱེ་མས་དགང་། །ཇི་སྲིད་བསྐམས་པར་མ་གྱུར་པར། །དེ་སྲིད་མི་དེ་འོང་བར་འགྱུར། །གང་དང་གང་གིས་ལྷ་དག་གི། །རིམ་པ་འདི་ཡིས་མིང་བྲིས་ཏེ། །ཁྲོ་བོ་ལྡན་པས་བཟླས་པར་བྱ། །དེ་འདིས་སྐད་ཅིག་དེ་ལ་འགྲུབ། ། དེ་ཡི་བཀའ་བཞིན་བྱེད་པ་དང་། །ངང་གིས་དེ་ནི་དབང་དུ་འགྱུར། །དཀོན་མཆོག་གསུམ་ལ་གནོད་བྱེད་པ། །གསད་པའི་དོན་དུ་སྔགས་རིག་པས། །འབར་བའི་ཕྲེང་བ་ས་འཁྲུགས་པའི་འོད། །ཞལ་བཞི་པ་ལ་ཆེར་འཇིགས་པ། །ཞགས་པ་ལྕགས་ཀྱུ་ཐོད་པ་

ཅན། །བདག་ཉིད་མྱུར་དུ་བསམ་པར་བྱ། །གསང་སྔགས་དང་ནི་སྤེལ་བ་ཡིས། །མིང་ནི་སོལ་བས་བྲིས་ནས་སུ། །གདུག་པ་དེ་ནི་མནན་ནས་ཀྱང་། །རང་གི་གདུག་པའི་སེམས་ཀྱིས་བསྣུན། །འདི་ཉིད་ཀྱི་ནི་ཏིང་འཛིན་གྱིས། །ངེས་པ་རུ་ཡང་ངེས་པར་བྱེད། །ཁམས་ཀྱི་ས་བོན་དང་སྤེལ་བའི། །ཁམས་ཀྱིས་མིང་ནི་བྲིས་ནས་སུ། །ཁམས་དེ་ཡང་དག་མནན་ནས་ནི། །ཁང་པ་རུ་ནི་རྒྱུན་དུ་བཞག །དེ་ནི་མྱུར་དུ་ངེས་འགྱུར་ཏེ། །དེ་སྲིད་དུ་ནི་མི་གཡོར་གནས། །རྨ་བྱའི་སྒྲོའམ་གཙུག་ཕུད་ཀྱིས། །ཡོངས་སུ་བླངས་ལ་བསྒྲུབ་པར་བྱ། །རྨ་བྱ་ཞེས་བྱའི་རྩ་བ་ཡི། །མཁས་པ་ཡིས་ནི་ཡོངས་སུ་གཟུང་། །དམག་ལ་སྔགས་རིག་པས་བསྐོར་བས། །དེ་ནས་དམག་དཔུང་འཇིག་པ་དང་། །རྨོངས་པའམ་ནི་རེངས་པའམ། །སྐད་ཅིག་དེ་ལ་འཁོར་བར་འགྱུར། །ཁྱི་དང་ཕག་དང་བྱ་རོག་གི། །མིག་ནི་ཡོངས་སུ་བླངས་ནས་སུ། །མིག་སྨན་དང་ནི་མཉམ་པོར་བྱ། །ལྷ་མོའི་སྔགས་ཀྱིས་བསྔགས་པ་ཡིས། །སྒྲུབ་པ་པོ་ཡི་གཟུགས་རྣམས་ཀུན། །འཇིག་པར་འགྱུར་བར་ཐེ་ཚོམ་མེད། །ཙཎྜིའི་མེ་ཏོག་བཅུད་ཉིད་ཀྱིས། །ལྕགས་ཀྱིས་གཡོགས་པའི་སྦྱོར་བ་ཡིས། །དེ་ཡི་ཁ་རུ་ངེས་བཅུག་པས། །རྒ་ཤི་མེད་པར་རྣམ་པར་རྒྱུ། །རིམས་གཏོང་གཟུགས་ནི་ལེགས་བྲིས་ཏེ། །དེ་ཡི་ཁ་རུ་གནོད་བྱེད་ནི། །སྦྱོར་བ་ཡིས་ནི་བཅུག་ནས་སུ། །ཡོངས་སུ་མནན་ལ་ཤིན་ཏུ་བཟླས། །རིམས་གཏོང་དེ་ཡི་གཟུགས་ཀྱིས་ནི། །རབ་ཏུ་འཛིན་པར་གདོན་མི་ཟ། །གཟའ་འམ་ཡང་དག་ཡི་དགས་སམ། །གནོད་སྦྱིན་དང་ནི་སྲིན་པོ་དང་། །གཞན་པ་ཡི་ནི་ནད་རྣམས་ཀྱིས། །འཛིན་པ་ལ་ནི་དཔྱད་མི་དགོས། །གཤིན་རྗེ་བྲིས་ཏེ་བསྐྲད་པར་བྱ། །དེ་ཡི་ཞལ་དུ་དགྲ་བོ་སྟེ། །རྨོངས་པའི་བདག་ཉིད་མི་འགྲོ་ན། །དེ་ནི་མྱུར་དུ་ངེས་པར་འཆི། །གསད་པ་ལ་ཡང་འདི་ཉིད་ཀྱིས། །ཡོངས་སུ་མནན་ནས་ངེས་པར་བཟླ། །གང་དུ་གཏེར་ནི་ཡོད་སྙམ་གྱུར། །དེར་ནི་སྔགས་རིག་པས་

སོང་སྟེ། །ལྕེ་ཡོངས་བཟུང་ལ་བཟླས་པ་བྱ། །དེ་ཡིས་གསལ་པོའི་ཚིག་གིས་སྨྲ། །ཚད་དང་ཡོད་དང་མེད་པ་དང་། །བགེགས་དང་བགེགས་ནི་ཇི་ལྟར་གནས། །ཇི་སྲིད་དེ་ནི་དགྱེས་སྨྲ་ན། །དེ་ལ་གཏོར་མ་སྦྱིན་པར་བྱ། །གལ་ཏེ་བགེགས་ནི་མི་སྨྲ་ན། ། དེར་ནི་མཆོད་ཡོན་རབ་ཏུ་བརྟག །པུས་མོ་གཉིས་བཙུགས་གུས་པ་ཡིས། །ནོར་འཛིན་སངས་རྒྱས་ཡུམ་ལས་སོ། །ཕྱོགས་བཞི་དག་ཏུ་ཕུར་བུས་གདབ། །དེ་ནས་གནས་རྣམས་བསྐྲད་པར་བྱ། །དེ་ནས་མཚམས་ནི་བཅིང་བར་བྱ། །མཉམ་པར་བཞག་སྟེ་བསྐོར་བར་བྱ། །སྦྱོར་བ་ཤེས་པས་སྔགས་འདི་ཡིས། །དེ་ནས་རྫས་ནི་གདོན་པར་བྱ། །ཨོྃ་བ་སུ་དེ་སརྦཱརྠ་སཱ་དྷ་ཡཱ་ཡུ་དྷ་ར་རཀྵ་རཀྵ། སརྒཱརྠ་ནི་ཙ་ཡཾ་ཏྲཾ་ཏྲཾ་ཙ་ཙ་ཊ་ཊ་ཧ་ཧ་སྭཱ་ཧཱ། ཡང་ན་རིག་པ་འདི་ཡིས་ཀྱང་། །ལས་རྣམས་དག་ནི་ཐམས་ཅད་བྱ། །ཕྱོགས་བཅིང་བ་དང་དེ་བཞིན་བསྲུང་། །ཕུར་བུ་བསྐྲད་པ་དེ་བཞིན་ནོ། །རིན་ཆེན་གསུམ་ནི་ཐོག་མར་སྦྱིན། །ཆ་གཅིག་དག་ནི་ནོར་འཛིན་ལའོ། །སྡུག་བསྔལ་ཅན་ལ་ཆ་གཅིག་གོ། །གྲོགས་པོ་རྣམས་ལ་དེ་དང་མཚུངས། །ལྷག་མ་རྣམས་ནི་རིག་པས་དཔྱད། །དཀོན་མཆོག་གསུམ་ནི་ལེགས་མཆོད་བྱ། །གཞན་དུ་སྡུག་བསྔལ་ཐོབ་འགྱུར་ཏེ། །རྒྱལ་པོ་ཆོམ་རྐུན་སོགས་འཇིགས་ལས། །གལ་ཏེ་བླ་མ་དེར་བཞུགས་ན། །སྐལ་བ་བཟང་པོ་གཉིས་དབུལ་ལོ། །གཞན་པ་ཡི་ནི་སྤྱན་རྣམས་ལ། །རྡོ་རྗེ་ཐེག་པ་རྟོགས་འགྱུར་བའི། ། སྐལ་བ་རེ་ནི་སྦྱིན་པར་བྱ། །གཞན་དུ་དམ་ཚིག་གདུང་བར་འགྱུར། །འདི་ནི་བཅོམ་ལྡན་རྣལ་འབྱོར་ཅན། །གསང་བ་རྒྱན་གྱི་རྡོ་རྗེས་གསུངས། །དེ་ནས་སངས་རྒྱས་ཐམས་ཅད་ཀྱི། །ཡུམ་རྣམས་ཀྱིས་ནི་དེར་བཏུད་ནས། །དཔའ་བོ་ཆེ་ལ་ཞུ་བ་ཞུས། །རྒྱས་པ་ཡི་ནི་དཀྱིལ་འཁོར་ནི། །གསུངས་ཤིག་གསུངས་ཤིག་དཔའ་བོ་ཆེ། །ཡུམ་རྣམས་ཀུན་གྱི་དཀྱིལ་འཁོར་ནི། །རྒྱལ་པོའི་དབང་ཕྱུག་རབ་གསོལ་པ། །སེམས་ཅན་ཐམས་ཅད་འདིར་འབྱུང་བའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་

ཐམས་ཅད་ཀྱི་བདག་པོའི་དབང་ཕྱུག་དཔལ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དཀྱིལ་འཁོར་ཇི་ལྟར་སྔར་གསུངས་པ། །འོན་ཀྱང་སེང་གེའི་ཁྲི་དང་ལྡན། །དེ་ཡི་སྟེང་དུ་པདྨ་ཆེ། །དེར་ནི་རི་བོང་ཅན་དཀྱིལ་འཁོར། །དེ་ཡི་སྟེང་དུ་ཉི་མ་ཆེ། །ཉི་མ་དེར་ནི་དཀྱིལ་འཁོར་མཆོག །ཆ་བརྒྱད་པ་ལ་དབུས་རིན་ཆེན། །དེ་ཡི་སྟེང་དུ་རྒྱལ་བའི་ཡུམ། །སེར་དང་སྔོ་བའི་འོད་ཆེན་པོ། །གསེར་གྱི་རི་བོ་དང་མཚུངས་པས། །ཕྱག་གཉིས་ཀྱིས་ནི་ཆོས་འཆད་ཅིང་། ། གཡས་པ་ཡིས་ནི་མཆོག་སྦྱིན་པ། །གཡོན་གྱིས་རིན་ཆེན་ལན་བུ་མཆོད། །རྒྱན་རྣམས་ཀུན་གྱིས་རྣམ་པར་བརྒྱན། །གོས་ནི་འཕྱང་ཞིང་སྣ་ཚོགས་པ། །གཙུག་ཏོར་མུ་ཏིག་ཐོར་ཚུགས་ཅན། །དེ་ཡི་མདུན་དུ་རིན་ཆེན་བྲི། །གཡོན་དུ་བུམ་པ་བཟང་པོ་བཞག །གཡས་པ་རུ་ནི་དཔག་བསམ་ཤིང་། །རྒྱབ་ཏུ་རིན་ཆེན་ལན་བུའོ། །མཚམས་རྣམས་སུ་ནི་བུམ་པ་བརྒྱད། །གསེར་གྱི་རང་བཞིན་གཞག་པར་བྱ། །རིན་ཆེན་ལྔ་ཡིས་ཡང་དག་འཁྲུགས། །དྲི་ལྔ་དག་དང་ཡང་དག་ལྡན། །བཟའ་ལ་སོགས་པའི་རོས་གང་བའི། །བུམ་པ་བཅུ་དྲུག་ཕྱི་རོལ་དུ། །སེར་པོའི་གོས་ཀྱིས་ཡོངས་སུ་དཀྲིས། །མེ་ཏོག་སེར་པོ་སོགས་ཀྱིས་བརྒྱན། །དེ་མདུན་བློ་ལྡན་བྲི་བར་བྱ། །སྦྱིན་པའི་ཕ་རོལ་ཕྱིན་དགེ་མ། །དམར་དང་སེར་དང་ཆེས་དཀར་བ། །རིན་ཆེན་ལྡན་པའི་ཕྱག་སྦྱིན་པ། །སེར་པོའི་འོད་ལྡན་ཕྲེང་མཛེས་མ། །རིན་ཆེན་བཟང་པོ་ཀུན་གྱི་སྲས། །མཁའ་ཡི་ཉི་ཟླ་སྐར་མ་ཡིས། །ཀུན་ནས་ཡོངས་སུ་བསྐོར་བའོ། །གཙུག་ཕུད་ཅོད་པན་གོས་ལ་སོགས། །ཕྲེང་བ་དང་ལྡན་དགྱེས་པ་མོ། །དཀྱིལ་འཁོར་དེ་ཡི་ལྷོར་བྲི་བ། །ཚུལ་ཁྲིམས་ཕ་རོལ་ཕྱིན་དགེ་མ། །ཅུང་ཟད་སེར་བའི་རིན་ཆེན་ལུས། །སྣ་ཚོགས་རྒྱན་གྱིས་རྣམ་པར་བརྒྱན། །སྣ་ཚོགས་གོས་ནི་ཡོངས་སུ་གྱོན། །མཛེས་ཤིང་ཕྲེང་བའི་ཆུན་པོའི་གཙུག །གོས་ལྡན་གཙུག་ན་གཙུག་ཏོར་མཆོག །ཡིད་བཞིན་རིན་ཆེན་དམ་པའི་ཕྱག །གཡོན་པའི་སྐྱིལ་ཀྲུང་རིན་ཆེན་བཟང། །ཆོ་ག་

ཇི་བཞིན་རབ་ཏུ་བསམ། །རྒྱབ་ཏུ་བཟོད་པ་མ་ཞེས་བྱ། །ཅུང་ཟད་འཛུམ་ཞིང་སེར་མཛེས་མ། །དམར་པོའི་གོས་ནི་ལེགས་པར་གྱོན། །རིན་པོ་ཆེ་ཡི་རྒྱན་གྱིས་བརྒྱན། །ཐམས་ཅད་རིན་ཆེན་མཆོག་འདྲི་ཞིང་། །དམར་པོའི་གོས་ནི་འཕྱང་བ་མ། །གཙུག་ན་རིན་ཆེན་མཆོག་དང་ལྡན། །སེང་གེ་མཆོག་གི་ཁྲི་ལ་བཞུགས། །བྱང་དུ་བརྩོན་འགྲུས་ཆེན་མོ་ནི། །རྡོ་རྗེ་གོ་ཆས་བརྒྱན་པ་ལ། །དཔའ་མོ་རིན་ཆེན་དབྱུག་གུའི་ཕྱག །གཡས་པ་སྦྱིན་པའི་ཕ་རོལ་སོང་། །པྲི་ཡང་ཀུ་ལ་སྔོ་བསངས་དཀར། །རྡོ་རྗེ་སེང་གེའི་ཁྲི་ལ་བཞུགས། །ལྷག་མ་རྣམས་ནི་གཞག་བྱ་བ། །དཀྱིལ་འཁོར་བྱས་ཏེ་རིན་ཆེན་ལྡན། །སྒོ་དང་སྒོ་རུ་སྒོ་བ་མ། །རིན་ཆེན་ཀུན་གྱིས་རྣམ་པར་བརྒྱན། །དེ་ནས་ཕྱི་ཡི་ཕྱི་ཉིད་དུ། །རིན་ཆེན་སྙིམ་པའི་ལག་པ་མཆོག །ཕྱོགས་སྐྱོང་བ་ནི་ཐམས་ཅད་ནི། །གོ་རིམས་བཞིན་དུ་གཞག་པར་བྱ། །དེ་ཡི་ཕྱི་རོལ་ཐམས་ཅད་དུ། །མཁས་པས་ཀླུ་དང་གནོད་སྦྱིན་བྲི། །རིན་ཆེན་བུམ་པ་བཟང་པོ་དང་། །གདུགས་དང་རྒྱལ་མཚན་བ་དན་ལག །གཏོར་མ་རྣམ་པ་སྣ་ཚོགས་དང་། །ལྷ་བཤོས་རབ་ཏུ་བཟང་དགེ་བ། །བཟའ་དང་བཏུང་བའི་རོ་མཆོག་དང་། །མར་དང་ཀ་ར་ཉིད་དང་ནི། །ཞོ་དང་བུ་རམ་ཧྭགས་དང་བཅས། །འོ་མ་མར་དང་སྦྲང་རྩི་དང་། །རྒྱལ་པོའི་བཟའ་བ་དམ་པའི་མཆོག །བཟའ་བ་ལ་སོགས་རབ་མཆོག་གོ། །དེ་ནས་སྔགས་པས་འཇུག་པར་བྱ། །རྒྱན་རྣམས་ཀུན་གྱིས་བརྒྱན་ནས་སུ། །སེར་པོའི་གོས་འཛིན་དག་པ་དང་། ། ཕྲེང་ལྡན་དྲི་ཞིམ་ལྡན་པའི་ལས། །སྒོ་ཡི་ཆར་ནི་ཞུགས་ནས་སུ། །ཐོག་མར་ལྷ་ནི་སྤྱན་དྲང་བྱ། །ཕྱག་རྒྱ་བཅིངས་ཏེ་དབྱངས་སྙན་པས། །རབ་ཏུ་དགའ་བའི་ཡིད་ཀྱིས་སུ། །ལྷར་བཅས་འཇིག་རྟེན་དག་ལ་སྨན་སླད་དུ། །ཀུན་ཏུ་བཟང་པོའི་སྨོན་ལམ་དྲན་མཛོད་ལ། ། རིན་ཆེན་དམ་པ་སེང་གེའི་ཁྲིར་བཞུགས་ཏེ། །འཁོར་བཅས་ལྷ་དང་དེ་བཞིན་གཤེགས་པ་སྤྱོན། །དེ་ནས་དེ་དག་ལེགས་བྱོན་ཏེ། །སྲས་བཅས་འཁོར་དང་བཅས་རྣམས་ཀྱང་། །སེམས་ཅན་རྣམས་ལ་དངོས་གྲུབ་སྟེར། །སྒྲུབ་པ་པོ་ལ་ཁྱད་པར་དུ། །དེ་ནས་ཐལ་མོ་ལེགས་

སྦྱར་ལ། །རིན་ཆེན་གྱིས་བཀང་མེ་ཏོག་བཅས། །གསང་སྔགས་བརྗོད་དེ་གཏོར་བར་བྱ། །ཅི་བདེ་བར་ནི་བཞེས་སུ་གསོལ། །དེ་ནས་རང་གིས་དབང་བསྐུར་བྱ། །དེ་ཡི་སྔགས་དང་ཕྱག་རྒྱ་ཡིས། །ས་ལ་ལག་པས་རེག་ནས་སུ། །བསྙེམས་པ་ཡིས་ནི་འཐོན་པར་བྱ། །དེ་ནས་སློབ་མ་གཞུག་པར་བྱ། །མེ་ཏོག་དྲིས་ནི་ཡང་དག་སྡུད། །སེར་པོའི་གོས་བཟང་ཡང་དག་གྱོན། །ལག་ན་རིན་ཆེན་དྲི་བཟང་པོ། །དགའ་དང་བཅས་ཏེ་སྙིམ་པ་དེ། །སྔ་མའི་སྔགས་ཀྱིས་དོར་བར་བྱ། །གང་གི་དྲུང་དུ་ལྷུང་གྱུར་པ། །ལྷ་དེ་དེ་ཡིས་འགྲུབ་པ་ཡིན། །དེ་ནས་གཡས་ནས་རྣམ་བསྐོར་ཏེ། །སློབ་མ་དེ་ནི་འབྱུང་བར་བྱ། །བཟང་པོའི་སེང་གེའི་ཁྲིར་བཞག་སྟེ། །དབང་བསྐུར་བ་ཡི་སྦྱོར་བ་བྱ། །གདུགས་དང་རྒྱལ་མཚན་བ་དན་དང་། །མཛེས་པའི་རྔ་ཡབ་གཡོབ་པ་ཡིས། །དེ་བཞིན་དུ་ཡང་དབང་བསྐུར་ཏེ། །བུམ་པ་བརྒྱད་དམ་བཅུ་དྲུག་ལ། །དེ་ཡི་སྔགས་དང་ཕྱག་རྒྱ་ཡིས། །གོ་རིམས་ཇི་ལྟ་བ་བཞིན་ནོ། །དེ་ནས་སྦྱོར་བ་དེར་འོངས་ཏེ། །འཁོར་ལོས་སྒྱུར་བའི་རིམ་པ་ཡིས། །འཁོར་ལོ་རིན་ཆེན་བཟང་པོའི་ལག །རྒྱལ་བ་རྒྱལ་བའི་སྒྲ་དགེ་བས། ། གསང་བའི་སྦྱོར་བའི་རྣལ་འབྱོར་གྱིས། །ལྟེ་བ་རུ་ནི་དབང་བསྐུར་རོ། །འདི་བདག་གཏེར་ཅན་རིན་ཆེན་འཛིན། །རྡོ་རྗེ་རིན་ཆེན་འཛིན་པར་འགྱུར། །དམ་ཚིག་གི་ནི་དམ་པ་ཡིས། །སངས་རྒྱས་ཀུན་གྱི་དོན་རྒྱས་པ། །འབད་པས་དེ་རིང་བླངས་པ་ཡིས། །ཕོངས་པའི་དྲི་མ་འཕྲོག་པར་བྱེད། །དེ་ནས་དཔའ་བོ་འཆི་མེད་འཛིན། །རིན་ཆེན་ཚོགས་ཀྱིས་མཆོད་པར་བྱ། །གཞན་པ་ཡི་ཡང་དུ་མ་ནི། །རྒྱལ་པོ་དབང་ཕྱུག་དམ་པས་སོ། །དེ་བཞིན་དབང་བསྐུར་ལྔ་པོ་ཡིས། །སྐལ་མེད་ཀྱང་ནི་བདག་མེད་འགྱུར། །གླིང་བཞིའི་དབང་ཕྱུག་དཔལ་ལྡན་ཡང་། །གནོད་པ་མེད་པར་ཐོབ་པར་འགྱུར། །གསང་བ་ལས་ཀྱང་ཆེས་ཤིན་ཏུ། །གསང་བ་ཡི་ནི་མནའ་བསྒགས་ཏེ། །དེ་ཡི་བསྒོམ་དང་སྒྲུབ་པའི་ཐབས། །སློབ་མ་ལ་ནི་དེ་ནས་བསླབ། །གུར་གུམ་དང་ནི་ཙནྡན་དང་། །དྲི་དང་མར་མེ་བཟང་པོ་ལ། །དམ་

ཚིག་གིས་ནི་གསལ་བྱས་པ། །ལན་གསུམ་དུ་ནི་འཐུང་དུ་གཞུག །བུ་ཀྱེ་འཐུང་ཤིག་གསང་བ་ཆེ། །དམ་ཚིག་ཤིན་ཏུ་འདའ་བ་དཀའ། །གལ་ཏེ་འདི་ལས་འདས་གྱུར་ན། །མྱུར་བ་ཉིད་དུ་འཆི་བར་འགྱུར། །ཤི་ནས་ཀྱང་ནི་དམྱལ་སྡུག་བསྔལ། །རབ་མང་ངུ་འབོད་ཉིད་དུ་གནས། །གལ་ཏེ་མི་རུ་སྐྱེ་འདོད་པའམ། །ནམ་ཞིག་དངོས་གྲུབ་ཐོབ་འདོད་ན། དེ་བཞིན་ཕོངས་པའི་སྡུག་བསྔལ་ལས། །རིང་དུ་ངེས་པར་ཁྱོད་ཀྱིས་སྐྱོབས། །འདི་དག་ལེགས་ཐོས་སློབ་མ་ལ། །གསང་བའི་སྒྲུབ་ཐབས་བཤད་པར་བྱ། །ཇི་ལྟའི་རྒྱལ་རིགས་བུ་མོ་ནི། །བཟུང་ནས་གསལ་བའི་རྣལ་འབྱོར་བྱ། །ཉི་མ་བདུན་ན་ངེས་པར་འགྲུབ། །རྒྱལ་པོའི་ཕུན་ཚོགས་ཐོབ་པར་འགྱུར། །ཤེས་རབ་ཕ་རོལ་ཕྱིན་པའི་མཆོག །དཀྱིལ་འཁོར་སྦྱོར་བས་བསམ་གཏན་བྱ། །རྒྱལ་མོ་ཆོ་ག་བཞིན་བཟུང་སྟེ། །སྒྲུབ་པ་པོས་ནི་མྱུར་དུ་བསྒྲུབ། །ཉི་མ་གསུམ་གྱིས་རྒྱལ་པོ་མཆོག །གདོན་མི་ཟ་བར་ཐོབ་པར་འགྱུར། །བྲམ་ཟེའི་བུ་མོ་སྐལ་ཆེན་མོ། །ནོར་ཆེན་ལ་ནི་བསྒྲུབ་པར་བྱ། །རྗེ་རིགས་སྣ་ཚོགས་སྦྱོར་བ་ཡིས། །མཚུངས་པ་ཉིད་དུ་བསྒྲུབ་པར་བྱ། །དེ་ཡིས་དངོས་གྲུབ་མཆོག་རྙེད་དེ། །རྒྱལ་པོ་འཇིག་རྟེན་གསུམ་གྱིས་བརྗེད། །དམངས་མོ་དཔའ་བོའི་སྦྱོར་བ་ཡིས། །བསྒྲུབས་ན་སྔགས་ཀྱི་དངོས་གྲུབ་འགྱུར། །གནོད་སྦྱིན་རྒྱལ་མཆོག་གྲུབ་པ་དང་། །གནོད་སྦྱིན་རྣམས་ཀྱི་དབང་ཕྱུག་མཆོག །དམན་པའི་སེམས་སུ་བཤད་པ་དང་། །མཆོག་གིས་མཆོག་ནི་ཆེན་པོ་དང་། །བར་མས་བར་མའི་དངོས་གྲུབ་ནི། །སྐྱེ་བ་འདི་ལ་ཐོབ་པར་འགྱུར། །དེ་ནས་ལས་རྣམས་བསླབ་པར་བྱ། །ཞི་བ་དང་ནི་རྒྱས་པའི་ལས། །དེ་བཞིན་དབང་དང་མངོན་སྤྱོད་དང་། །གཞན་པ་ཡི་ཡང་སྣ་ཚོགས་ནི། །སེམས་ཅན་རྣམས་ལ་དགའ་བའོ། ། ཤེས་རབ་ཕ་རོལ་ཕྱིན་དགེ་མ། །དཀྱིལ་འཁོར་སྦྱོར་བས་བསྒོམ་པར་བྱ། །ཀུནྡ་དཀར་པོ་ཟླ་བ་འདྲ། །འོད་ཟེར་དཀར་པོས་མཛེས་པ་མོ། །སྐྱེ་བོ་ནད་པ་འཆི་ཀ་མ། །དེ་ཡི་ལུས་ལ་གཞུག་པར་བྱ། །དེ་ནས་དེ་ནི་སྟོབས་ལྡན་འགྱུར། །བརྒྱད་གཉིས་པ་ཡི་ལང་ཚོར་ལྡན། །

ནད་རྣམས་ཀུན་ལས་རྣམ་པར་གྲོལ། །རྒ་དང་འཆི་བ་རྣམ་པར་སྤངས། །བསྟན་བཅོས་ཀུན་གྱི་དོན་རིག་ཅིང་། །ཤེས་རབ་དྲན་པ་མཆོག་དང་ལྡན། །དེ་བཞིན་རང་འགྱུར་རྣལ་འབྱོར་པ། །ནམ་མཁའ་ལ་ནི་ཡང་དག་བསྒོམ། །མཛེས་པའི་རིན་ཆེན་སྣ་ཚོགས་པའི། །ཐམས་ཅད་དུ་ནི་ཆར་འབབ་པ། །འདི་ཡིས་ཕོངས་པ་རྣམ་པར་སེལ། །ཕོངས་པ་རྣམས་ལ་རབ་ཏུ་བརྟག །མཐེ་བོ་ཡི་ནི་ཚད་ཙམ་པའི། །ནོར་རྒྱུན་མ་ཡི་རྣམ་པ་བྱ། །ལྷ་མོ་ལ་ནི་མཉམ་པར་གཞག །དེ་ཡི་མདུན་དུ་གསང་སྔགས་བཟླས། ། ཇི་སྲིད་འབུམ་ཕྲག་ཁོ་ན་སྟེ། །དེ་ནས་དངོས་གྲུབ་བསྒྲུབ་པར་བྱ། །ཟླ་བ་གང་བའམ་བཅུ་བཞི་འམ། །བརྒྱད་པའམ་གཟས་གཟུང་ཉིན་པར་ལ། །མཆོད་པ་ཆེན་པོ་བྱས་ནས་སུ། །མཁས་པས་མཚན་མོ་ཐོག་ཐག་བཟླས། །དེ་ནས་དགའ་བས་གཟུགས་བརྙན་དེ། ། གདོན་མི་ཟ་བར་འབར་བར་འགྱུར། །དེ་ནས་བཟུང་སྟེ་མདོར་བསྡུ་ན། །མི་ཡི་འཁོར་ལོས་སྒྱུར་བར་འགྱུར། །བཟླས་པས་མཚན་མ་བཟང་བྱུང་ན། །རྣལ་འབྱོར་པ་ནི་ནོར་ཆེན་འགྱུར། །བར་མས་གླིང་ནི་ཐོབ་པར་འགྱུར། །ཐ་མ་ཡིས་ནི་ཁོར་ཡུག་གོ། །ཐམས་ཅད་དུ་ནི་བཟླས་ཙམ་གྱིས། །ལོངས་སྤྱོད་ཟད་པར་འགྱུར་མ་ཡིན། །རྒྱལ་པོ་ཐམས་ཅད་དབང་འགྱུར་ཞིང་། །བུད་མེད་ཐམས་ཅད་དགའ་བར་འགྱུར། །སྙིང་གར་རྣལ་འབྱོར་བྱས་ནས་སུ། །ནོར་བུ་ལག་པར་བཅངས་ནས་ནི། །ཉི་མའི་དཀྱིལ་འཁོར་ལ་གནས་བསྒོམ། ། མྱུར་དུ་རིན་ཆེན་རྒྱལ་པོར་འགྱུར། །ཕྱག་རྒྱ་འདི་ནི་བྱས་གྱུར་པས། །རྟག་ཏུ་སྒོམ་པས་བསྒོམ་པར་བྱ། །ཇི་ལྟར་འདོད་པའི་གྲུབ་རྙེད་དེ། །རྡོ་རྗེ་འཛིན་པ་ཇི་བཞིན་ནོ། །ཞེས་བཅོམ་ལྡན་འདས་རྡོ་རྗེ་སེམས་དཔས་བཀའ་སྩལ་ཏོ། །དེ་ནས་སྦྱོར་བ་ཇི་བཞིན་དུ། །ཡུམ་དེ་རྣམས་ནི་ལེགས་བྱོན་ནས། །ལས་ཀྱི་དཀྱིལ་འཁོར་ལེགས་གནས་པ། །སྟོན་པ་ལ་ནི་ཞུ་བ་ཞུས། །གང་དུ་རྒྱལ་བ་ཀུན་བཞུགས་ནས། །བླ་ན་མེད་པའི་དོན་མཛད་པ། །སེམས་ཅན་ཀུན་ལ་བདེ་སླད་དུ། །མྱུར་དུ་ལས་ནི་འགྲུབ་པ་ལེགས། །དེ་ནས་བཅོམ་ལྡན་འདས་

ལས་ཐམས་ཅད་ཀྱི་དམ་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་གྱི་དམ་པ་དེ་རྣམས་ལ་ལས་ཀྱི་དཀྱིལ་འཁོར་བཀའ་སྩལ་པ། རླུང་གི་དཀྱིལ་འཁོར་བྲི་བར་བྱ། །དེ་ཡི་དབུས་སུ་གྲུ་གསུམ་པ། །དེ་ཡི་སྟེང་དུ་ལྷ་མོ་བཞག །འབར་བའི་མེ་དང་མཚུངས་པ་ལ། །ཞལ་བཞི་མ་ལ་ཆེར་འཇིགས་པ། །མཆེ་བ་རབ་ཏུ་གཙིགས་པ་མོ། །ཐོདཔའི་ཕྲེང་བའི་ཅོད་པན་ཅན། །རྡོ་རྗེ་ལྕགས་ཀྱུ་ཐོད་པ་དང་། །ཞགས་པ་གཡས་དང་གཡོན་པར་འཛིན། །པགས་པ་ཆེན་པོ་གོས་སུ་གྱོན། །ཁྲོ་མོ་མིག་འབྲས་རབ་ཕྱུང་བ། །མཆེ་བས་མཆུ་མནན་ཞལ་ཆེན་མོ། །དེ་ཡི་མདུན་དུ་བྲི་བྱ་བ། །མཐའ་མའི་ཞལ་ནི་མདོར་བསྡུས་པ། །སྣ་ཚོགས་གཏུམ་དང་དྲག་པོའི་ཞལ། །དུ་མའི་ཕྱག་གིས་ཡང་དག་འཁྲུགས། །ཞགས་པ་ལྕགས་ཀྱུ་ཐོད་སོགས་དང་། །རྡོ་རྗེ་ཅན་གྱི་སོག་ལེ་འཛིན། །ཐོད་པས་ལུས་ལ་བྲེས་གྱུར་ཅིང་། །ཅོད་པན་ཆེན་པོས་འཇིགས་བྱེད་མོ། །གཤིན་རྗེ་དཔའ་བོས་བྲི་བྱ་བ། །མཐའ་གདོང་དམ་པ་ཡི་ནི་མཆོག །སྔོན་པོ་འབར་བའི་རང་བཞིན་ཁྲོས། །མགོ་བོའི་ཕྲེང་བས་རྣམ་པར་བརྒྱན། ། ཐོད་པའི་ཕྲེང་བའི་ཅོད་པན་ཅན། །སྟག་གི་པགས་པའི་ཤམ་ཐབས་ཅན། །རལ་གྲི་རིན་ཆེན་ཐོད་པ་དང་། །རིན་ཆེན་དབྱུག་གུ་འཛིན་པའི་མཆོག །དེ་ནས་ལྷ་མོ་ལེགས་བྲི་བ། །པདྨའི་ཞལ་མ་འཇིགས་ཆེན་མོ། །དམར་མོ་ཕྱག་ན་ཉི་ཟླ་འཛིན། །བསྐལ་པའི་མེ་དང་མཚུངས་པ་མོ། །གཡོན་པ་རུ་ནི་ཁྲོ་མོ་ཆེ། །མ་བཅོམ་མ་ནི་སྐ་རགས་མགུལ། །ལས་ཀྱི་རྡོ་རྗེ་དྲིལ་ལྡན་མཆོག །མཆེ་བ་རྣམ་པར་གཙིགས་པའི་ཞལ། །གཙུག་ན་ཐོད་པ་འཇིགས་སུ་རུང་། །རབ་གཏུམ་སྟོབས་དང་གསལ་བ་མོ། །སྦྱོར་ལྡན་ཆོ་ག་རིག་པས་བྲི། ། ཕྱི་རོལ་དུ་ནི་ལེགས་བྲི་བ། །ཁྲོ་བཅས་འཇིགས་པ་དང་བཅས་པ། །རལ་པའི་ཐོར་ཚུགས་ཆེན་པོ་ཅན། །ཁྲག་གིས་གང་བའི་ཐོད་པ་དང་། །ཕྱག་རྒྱ་བཟང་པོས་ཕྱག་མཚན་པའོ། །དེ་ཡི་ཕྱི་རུ་ལྷ་རྣམས་ནི། །སྙིམ་པ་རབ་སྦྱར་ཡི་དམ་པ། །ཐམས་ཅད་དུ་ནི་ཡོངས་

སུ་གཞག །འཇིག་རྟེན་སྐྱོང་བ་གཞག་པར་བྱ། །སྒོ་རྣམས་དག་ནི་ཐམས་ཅད་དུ། །སྒོ་སྐྱོང་བ་ཡང་དེ་བཞིན་དུ། །དེ་ནས་གཏོར་མའི་ཆོ་ག་ནི། །ཤ་བཅས་བཏུང་བ་རོ་དང་ལྡན། །དེ་ནས་གོ་ཆ་བཅིངས་གྱུར་པས། །ཐོད་པའི་ཅོད་པན་ཆེན་པོ་དང་། །ཁྲག་གམ་ཆང་གིས་བཀང་བའམ། །ཐོད་པ་ལྡན་པས་འཇུག་པར་བྱ། །ཐམས་ཅད་འགྲུབ་པའི་མ་མོ་རྣམས། །འདི་ཡིས་སྤྱན་ནི་དྲང་བར་བྱ། །དཀོན་མཆོག་གསུམ་ལ་གནོད་བྱེད་པའི། །གསད་པའི་དོན་དུ་མ་མོ་རྣམས། །དེ་རིང་ཉིད་དུ་དཀྱིལ་འཁོར་འདིར། །འཇིགས་ཆེན་མ་རྣམས་ཐམས་ཅད་གཤེགས། །འཇིགས་པའི་སྒྲ་དང་ཆེར་གཏུམ་དང་། །ཁ་ནས་འོད་ཟེར་སྟོང་ཕྲག་ནི། །མཐོང་བ་དང་ནི་ཐོས་པ་ན། མཚན་མར་ཡང་ནི་ཤེས་པར་བྱ། །དེ་ནས་དེ་ཡིས་ཨརྒྷ་སྦྱིན། །ཅི་བདེར་བཞེས་ཤིག་འཇིགས་མཛད་མ། །གདུག་པ་ཆེན་པོ་གསོལ་བར་མཛོད། །གདུག་གཏུམ་འཇིགས་པར་བྱེད་པ་ཡིས། །དེ་ནས་བདག་ལ་དབང་བསྐུར་ཏེ། །ཐོད་པར་གནས་པའི་རོ་ཡིས་ནི། །སྲང་ཙམ་གྱིས་ནི་ཤ་ཟོས་ནས། །མ་མོ་ཐམས་ཅད་བསྒྲུབ་པར་བྱ། །དེ་ནས་མངོན་སྤྱོད་ལས་རྣམས་ཀུན། །དམ་ཚིག་བསྲུང་བ་ཡིས་ནི་བྱ། །དཀོན་མཆོག་གསུམ་ལ་གནོད་བྱེད་དང་། །བླ་མ་རྣམས་ལ་འཁྱལ་སྨྲ་བ། །རྟག་ཏུ་གསོད་པར་ལྷ་མོ་རྣམས། །བགྱིད་པར་བདག་ནི་རྗེས་སུ་གཟུང་། །དེ་ནས་ཆོ་ག་དེ་ཉིད་ཀྱིས། །སློབ་མའི་དམ་པ་གཞུག་པར་བྱ། །ཁྲོ་བོའི་ལྷ་ལ་བསྐུལ་ནས་སུ། ། མེ་ཏོག་དམར་པོ་དོར་བར་བྱ། །བདག་གི་མེ་ཏོག་དམ་པ་འདི། །ཅི་བདེ་བར་ནི་བཞེས་སུ་གསོལ། །བདུག་པ་འདི་ནི་བཟུང་ནས་སུ། །གསོལ་བྱེད་འདི་ནི་གསོལ་བར་མཛོད། །ལྷ་མོ་གང་ལ་ལྷུང་གྱུར་པ། །དེ་ཡིས་དེ་ལ་མཆོག་གསོལ་ལོ། །དེ་ནས་དབང་བསྐྲུར་བྱིན་ནས་སུ། །དཀྱིལ་འཁོར་གྱི་ནི་མདུན་བཞག་སྟེ། །ཐོད་པ་རུ་ནི་གནས་པ་ཡི། །ཁྲག་གིས་དབང་ནི་བསྐུར་བར་བྱ། །དེ་ནས་སྒོ་རུ་བོས་ནས་སུ། །དམ་ཚིག་འབད་པས་འཛིན་དུ་གཞུག །རབ་ཏུ་གདུག་པའི་སྙིང་གི་ཁྲག །བཟང་པོ་འདི་ནི་འཐུང་ཞིག་བུ། །ཟོ་ཤིག་ཟོ་ཤིག་

ཤ་ཆེན་པོ། །བཏུང་བ་འཇིགས་པ་ཆེན་པོ་འཐུང་། །གཞན་དུ་ན་ནི་འཆི་འགྱུར་ཏེ། །མཁའ་འགྲོ་མ་དང་གཟའ་རྣམས་དང་། །གནོད་སྦྱིན་སྲིན་པོ་གཏུམ་པོ་ཡི། །རིང་པོར་མི་ཐོགས་རབ་ཏུ་ཟ། །དེ་ནས་མངོན་སྤྱོད་ལས་རྣམས་ནི། །སྟོང་ཕྲག་དག་ནི་བསླབ་པར་བྱ། །དེ་ཡི་སྦྱོར་བའི་རྣལ་འབྱོར་གྱིས། །རང་ཉིད་ཁྲོ་བོར་བཟུང་གྱུར་པས། །གནོད་བྱེད་ཐམས་ཅད་གསད་པར་བྱ། །དགྲ་རྣམས་ཐམས་ཅད་བཟའ་བར་བྱ། །གདུག་པ་ཐམས་ཅད་བཅའ་བར་བྱ། །སྲིན་པོ་ཐམས་ཅད་གཞོམ་པར་བྱ། །མཐའ་ཡས་ཞལ་མའི་སྦྱོར་བ་ཡིས། །གསད་དང་གཟུང་བ་དེ་ཡིས་བྱ། །ཞལ་བཞི་མ་ཡི་སྦྱོར་བ་ཡིས། །ཐམས་ཅད་འགུགས་པའི་དམ་པའང་ཡིན། །མཁའ་གདོང་མ་ཡིས་ཐམས་ཅད་དུ། །རིན་པོ་ཆེ་ཡི་ཚོགས་འབྱུང་ངོ་། །པདྨའི་ཞལ་གྱི་སྦྱོར་བ་ཡིས། །ཆང་གི་དམ་པ་བཏུང་བར་བྱ། །མ་བཅོམ་མ་ཡི་སྦྱོར་བ་ཡིས། །ཤ་ནི་འགུགས་པའི་མཆོག་ཡིན་ནོ། །ནམ་མཁའ་རེངས་པ་ཆེན་པོ་སྟེ། །དམག་དཔུང་འབྱོར་པའི་དམ་པའོ། །རྨུགས་དང་རྨོངས་པ་ཐམས་ཅད་དུ། །དཔྱད་པ་རུ་ནི་མི་བྱའོ། །སྔར་བཤད་པ་ཡི་ལས་རྣམས་དང་། །མ་བཤད་པ་ལ་ཅི་འདོད་པ། །བཟླས་པ་ཙམ་གྱིས་ཀུན་བྱ་སྟེ། །ཐམས་ཅད་དུ་ནི་ཐེ་ཚོམ་མེད། །དུར་ཁྲོད་ཀྱི་ནི་ཐལ་བ་ལ། །དགྲ་བོའི་གཟུགས་ནི་འབད་པས་བྱ། །མིང་དང་སྤེལ་བར་བྱས་ནས་སུ། །མ་མོའི་རལ་གྲིས་གཏུབ་པར་བྱ། །དེ་ནས་ཉི་མ་བདུན་ན་ནི། །བརླག་པར་འགྱུར་བར་གདོན་མི་ཟ། །གང་ལུས་ཇི་ལྟར་བཅད་གྱུར་པ། །དེ་དང་དེ་ཡི་ཡན་ལག་འཆད། །ཞལ་བཞི་མ་ཡི་སྦྱོར་བ་ཡིས། །སྔགས་པ་མཉམ་པར་བཞག་པས་བཅད། །དེ་ཡི་མགྲིན་པར་ཞགས་པ་ནི། །མཁས་པས་སྤྲོས་ཏེ་བཅིང་བར་བྱ། །ལྕགས་ཀྱུས་སྙིང་གར་ཕུག་ནས་སུ། །རླུང་གིས་བསྐྱོད་དེ་དྲང་བར་བྱ། །དེ་ནས་དེ་ཡི་མིང་བསྐུལ་ནས། །དེ་ནི་ཤེས་རབ་ལྡན་པས་དགུག །དམན་དང་མཆོག་གི་དབྱེ་བ་ཡིས། །འདི་ཡི་འབྲས་བུ་ང་ཡིས་བཤད། །མདོར་བསྡུས་པས་ནི་ཤེས་པར་བྱ། །སྔགས་པའི་རྒྱལ་པོའི་སྦྱོར་བ་

ཡིས། །ཞེས་སོ། །དེ་ནས་བཅོམ་ལྡན་འདས་མ་དེ་བཞིན་གཤེགས་པ་ཐམས་ཅད་ནི། དེ་ཡིས་དངོས་གྲུབ་གསོལ་མི་འགྱུར། །ཉེ་བར་འཚེ་བ་འཇིགས་རྣམས་དང་། །གདོན་དང་གནོད་སྦྱིན་སྲིན་པོར་བཅས། །མི་བཟད་ནད་ཀྱིས་བཏབ་ནས་སུ། ། ཤི་ནས་མནར་མེད་ཉིད་དུ་འགྱུར། །དེ་ནས་དེ་བཞིན་དབང་བསྐུར་གྱི། །དཀྱིལ་འཁོར་ལ་བཞག་ཡུམ་རྣམས་ཀྱིས། །དབང་བསྐུར་གསང་བའི་དམ་ཚིག་སྦྱིན། །གསང་བའི་སྒྲུབ་ཐབས་ཉན་དུ་གཞུག །རང་ཡུམ་མ་མོའི་ས་བོན་གྱིས། །རང་གི་རྣམ་རྟོག་བདག་ཡུམ་མིན། །ལྟ་བུས་ཡབ་གྱུར་བསྒྲུབས་ན་ནི། །ཉི་མ་བདུན་ན་རབ་ཏུ་འགྲུབ། །སངས་རྒྱས་ཀུན་གྱི་ཡབ་སྟོན་པ། །ཀུན་མཁྱེན་ཡེ་ཤེས་སྤྱོད་ཡུལ་ཏེ། །དྲག་པོ་ཀུན་དང་བདེ་ཆེན་པོ། །ཡེ་ཤེས་ཀུན་གྱི་མཆོག་གི་མཆོག །ཤེས་རབ་ཀྱིས་ནི་ཐམས་ཅད་བསྒྲུབ། ། ལས་རྒྱས་པ་ཡི་དམ་པའི་མཆོག །བྱེ་བྲག་ཏུ་ནི་བསྐུལ་ནས་སུ། །བྱང་ཆུབ་ཀྱི་ནི་ཡོན་ཏན་གྱི། །ཐམས་ཅད་དུ་ནི་འོད་གསལ་བའི། །དངོས་གྲུབ་ཐམས་ཅད་བསྒྲུབ་པར་བྱ། །ཤེས་རབ་ཀྱི་ནི་ལས་དབྱེ་བས། །གཟུགས་དང་དབྱིབས་ཉིད་དག་གིས་སོ། །ཕྱག་རྒྱ་དང་ནི་ཕྱག་རྒྱའི་ལན། །དེ་བཞིན་དཀྱིལ་འཁོར་དམ་ཚིག་དང་། །བཟའ་བ་དང་ནི་ཉེར་སྤྱོད་པ། །གཏོར་མ་ལྷ་བཤོས་ཉིད་དང་ནི། །ཤིན་ཏུ་བདེ་བའི་སྟན་ཉིད་དང་། །དེ་དང་དེ་ནི་ངེས་པར་སྦྱར། །བཟླས་དང་བསམ་གཏན་ས་བོན་ནི། །རང་གི་ལུས་ཁྱབ་པ་ཉིད་དོ། །གསང་སྔགས་དག་ནི་ཐམས་ཅད་ལས། །གསང་སྔགས་འདི་ནི་རབ་ཏུ་བསྔགས། །ཚེ་འདིར་དམ་པའི་རྗེས་གྲུབ་ཅིང་། །གདོན་མི་ཟ་བར་ཐོབ་པར་འགྱུར། །འདི་ནི་བཅོམ་ལྡན་ཀུན་རྡོ་རྗེ། །ཡེ་ཤེས་འབྱུང་གནས་མངའ་བདག་གསུངས། །ལས་ཀུན་གྱི་ནི་སྦྱོར་བ་ཡིས། །འདི་ནི་སྒྱུ་མས་འགྲོ་ལ་བཞུགས། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་དེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཕྱག་རྒྱའི་ཡེ་ཤེས་མཆོག་ཏུ་དགེ། །ཡེ་ཤེས་ཆེན་པོས་གསུང་དུ་གསོལ། །གང་གིས་མངོན་པར་རྒྱས་བཏབ་ཀུན། །མངའ་བདག་

དུས་མི་རིང་བར་འགྲུབ། །དེ་ནས་བཅོམ་ལྡན་འདས་ཀྱིས་ཡང་ཏིང་ངེ་འཛིན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །ཕྱག་རྒྱ་རྟགས་སུ་ཡང་དག་བཤད། །ཐ་སྙད་ཙམ་དུ་རྣམ་པར་བཏགས། །སངས་རྒྱས་ཀུན་གྱིས་ཀླ་ཀློའི་སྐད། ། ཕྱག་རྒྱ་ཐམས་ཅད་ཡང་དག་བཤད། །འོན་ཀྱང་མགོན་པོ་མཆོག་གིས་བརྟགས། །ལག་པའི་རྣམ་དགོད་མཚན་མ་ཉིད། །གང་གིས་ཡིད་ཆེས་ལེགས་སྐྱེ་རྣམས། །དམ་ཚིག་ཤེས་པའི་ལྷ་རྣམས་ནི། །སྒྲུབ་པོ་རྣམས་ཀྱིས་རབ་བསྐུལ་ན། །གྲུབ་པའི་དམ་པ་རབ་ཏུ་སྩོལ། །དུས་ལས་ཐམས་ཅད་བྱོན་ནས་སུ། །སླར་ཡང་གཤེགས་པ་ཉིད་དུ་འགྱུར། །ལག་པ་ཟླ་བ་ཉི་མར་བྱ། །ཤེས་རབ་ཐབས་སུ་རབ་ཏུ་བརྟག །དེ་ནས་སྔགས་པས་ཡོངས་སུ་སྦྱར། །རང་གི་ས་བོན་དག་གིས་མཚན། །ཨོཾ་པྲཛྙོ་པཱ་ཡ་ས་མཱ་ཡོ་ག། །དེ་ནས་ཐལ་མོ་ངེས་པར་སྦྱར། །ཕན་ཚུན་རྗེས་སུ་རྟོགས་ཆེན་པོ། །ཁུ་ཚུར་ཤིན་ཏུ་གཞག་པར་བྱ། །ཁུ་ཚུར་བསྡམས་པ་ལྟ་བུར་བཅིང་། །སོ་སོ་རུ་ནི་སྦྱོར་བར་བྱ། །སྙིང་གི་དབུས་སུ་ངེས་པར་བཟུང་། །གཡོན་པའི་སྟེང་དུ་ལག་པ་གཡས། །བཞག་སྟེ་སོར་མོ་སོ་སོར་བྱ། ། ལག་གཡས་བསྒྲེང་ནས་ཕྱོགས་ཀུན་ཏུ། །འཁོར་ལོའི་སྦྱོར་བས་སྤྲོ་བར་བྱ། །རྡོ་རྗེ་སྒོ་ལྕགས་ལྟ་བུར་བསྐུམ། །སོར་མོ་ཐམས་ཅད་རྩིབས་སུ་བྱ། །ཨོཾ་སརྦ་དྷརྨ་ཙཀྲ་ས་མཱ་ཡེ། དེ་བཞིན་གཡོན་པ་ཡོངས་སུ་སྤྲོ། །སོར་མོ་རྩིབས་ཀྱིསྦྱོར་བ་ཡིས། །ཤེས་རབ་སྟེང་དུ་བསྒྲེང་བར་བྱ། །གཡས་པ་ཡང་ནི་དེ་བཞིན་ནོ། །རྩེ་མོ་ཅུང་ཟད་སྦྱར་བར་བྱ། །ཆོས་ཀྱི་ལས་ནི་ཆེན་པོ་བྱེད། །དེ་ཉིད་མཉམ་དུ་བསྐུམས་པ་ནི། །ལས་ཀྱི་ཕྱག་རྒྱ་ཞེས་སུ་གྲགས། །དེ་བཞིན་མིང་མེད་བྱས་ནས་སུ། །ལྷག་མ་རྣམས་ནི་གདོང་དུ་སྦྱར། །ཕྱག་རྒྱ་ཆེན་པོ་ཤིན་ཏུ་ནི། །དངོས་གྲུབ་ཐམས་ཅད་རབ་ཏུ་གསོལ། །ཕྱག་རྒྱ་འདི་རྣམས་བསྡམས་ནས་ནི། །རང་ཉིད་ཤེས་རབ་བདག་པོར་འགྱུར། །ཀུན་ཏུ་བཟང་པོ་རྒྱལ་པོ་ཆེ། །ལྷ་དང་ལྷ་མིན་བཅས་པས་མཆོད། །ཅེའོ། །དེ་ནས་མ་མོ་དེ་རྣམས་ཀུན། །སླར་ཡང་གཙོ་བོ་

ལ་བསྟོད་ནས། །ཤེས་རབ་ཆེན་པོ་རྣམ་བཞི་ཡི། །ཕྱག་རྒྱ་ཞུ་བ་རྣམ་པར་བྱས། །ཕྱག་རྒྱ་བཞི་ཡི་རབ་ཀྱི་མཆོག །བཅོམ་ལྡན་འདས་ཀྱིས་བཀའ་སྩོལ་ཅིག །གསང་བའི་ཕྱག་རྒྱའི་ཡལ་ག་མཆོག །ཤེས་རབ་ཐབས་ཀྱི་ལུས་བཟང་བ། །གང་ཞིག་གསང་བའི་རྣལ་འབྱོར་ནི། །གང་གིས་རྣལ་འབྱོར་པ་བདེ་བ། །རྫུ་འཕྲུལ་འཕེལ་དང་ཡང་དག་པའི། །རྫུ་འཕྲུལ་སྐྱེ་བ་འདིར་རྙེད་པ། །བཅོམ་ལྡན་སྟོན་པས་བཀའ་སྩལ་པ། །གསང་བའི་ཕྱག་རྒྱ་རྒྱལ་བའི་གཞི། །གང་གིས་མྱུར་དུ་སྒྲུབ་པོ་ཀུན། །རབ་ཏུ་བདེ་བར་གནས་པས་འགྲུབ། །དེ་ནས་བཅོམ་ལྡན་རྡོ་རྗེ་ཅན། །མཉེས་ཏེ་གསང་བའི་དམ་པ་གསུངས། །ཕྱག་རྒྱའི་ཕ་རོལ་ཕྱིན་པ་རྣམས། །བདེ་བ་ཆེན་པོ་རབ་ཏུ་བསྒྲུབ། །རྡོ་རྗེ་ཐལ་མོ་དམ་པར་བསྡམས། །རྡོ་རྗེ་དབུས་སུ་གཞག་པར་བྱ། །གསང་བའི་དམ་ཚིག་ཅེས་སུ་བསྒྲགས། ། གསང་བའི་རྣལ་འབྱོར་རབ་ཏུ་སྒྲུབ། །དེ་ཉིད་རྡོ་རྗེ་ལྟ་བུར་བྱ། །བསྐྱོད་པས་བདེ་བ་སྐྱེད་པར་བྱེད། །འདི་ནི་ཆོས་འཛིན་ཞེས་བྱ་བའི། །ཕྱག་རྒྱ་གསང་བ་སྒྲུབ་པའོ། །གཡོན་པར་ཐབས་ནི་བསྐུམས་ནས་སུ། །བསྐྱོད་པས་བདེ་བ་འགུགས་པར་བྱེད། །དག་པའི་ལས་ཞེས་རབ་ཏུ་གྲགས། །བདེ་བ་ཐམས་ཅད་རབ་སྩོལ་བྱེད། །དེ་ཉིད་ཁ་དང་རྐན་ལ་ནི། །སྦྱར་བ་ཆེན་མོ་ཞེས་སུ་བཤད། །རྡོ་རྗེ་ཕན་ཚུན་ཡང་དག་སྦྱར། །ལྕགས་ཀྱུའི་ཁ་ནི་བསྐྱོད་པར་བྱ། །ཁ་ནི་ཕན་ཚུན་ཡོངས་སྦྱར་བ། །གསང་བའི་ཞགས་པ་ཞེས་སུ་གྲགས། ། དེ་བཞིན་བསྐུམ་པར་བྱས་ནས་སུ། །དམ་དུ་བསྡམས་ཏེ་བཅིང་བར་བྱ། །འདི་ནི་གསང་བ་བསྡམས་པའི་རྒྱ། །ཡེ་ཤེས་བསྡམས་པ་རབ་ཏུ་འགྲུབ། །ཐམས་ཅད་རྡོ་རྗེ་ལྟར་རྡོ་རྗེ། །དེ་བཞིན་བསྐྱོད་ཅིང་བསྐོར་བར་བྱ། །དེ་འདི་གསང་བ་རབ་ཚིམ་པ། །ཚིམ་པའི་དོན་ནི་སྟེར་བར་བྱེད། །ལྷག་མ་ཕྱག་རྒྱ་ཆེན་པོ་རུ། །ཤེས་བྱ་ཕྱག་རྒྱ་མདོར་བསྡུས་པའོ། །དེ་ཉིད་ལས་ཀྱི་ཕྱག་རྒྱ་མཆོག །ལས་ཀྱི་དབྱེ་བས་སྦྱར་བར་བྱ། །ཞེས་སོ། །དེ་ནས་མ་མོ་དེ་རྣམས་ཀུན། །ཡིད་ནི་ཚིམ་ཞིང་མགུ་བ་ཡིས། །རྡོ་རྗེ་སེམས་དཔར་མཚན་

ཡངས་པའི། །ལེགས་སོ་བ་ནི་ངེས་པར་ཕུལ། །ལེགས་སོ་ལེགས་སོ་གསང་ཆེན་པོ། །ལེགས་སོ་ལེགས་སོ་མཆོད་ཆེན་པོ། །ལེགས་སོ་ལེགས་སོ་རྣལ་འབྱོར་ཆེ། །ལེགས་སོ་ལེགས་སོ་རབ་ཚིམ་མཛད། །དེ་ནས་བཅོམ་ལྡན་འདས་མ་རྣམས་དང་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཙུན་མོ་རྣམས་ཀྱིས་དགྱེས་པའི་དཀྱིལ་འཁོར་ཞུ་བ་བཅོམ་ལྡན་འདས་ལ་ཞུས་པ། སངས་རྒྱས་རང་བཞིན་ཁྱོད་ལ་འདུད། །སྤྱོད་པའི་རིན་ཆེན་ཁྱོད་ལ་འདུད། །དམ་པའི་རྒྱུར་གྱུར་ཁྱོད་ལ་འདུད། །སྣ་ཚོགས་མཛད་པ་ཁྱོད་ལ་འདུད། ། དཔའ་བོ་འདུལ་བ་ཁྱོད་ལ་འདུད། །གསང་བའི་ཆོས་ལྡན་ཁྱོད་ལ་འདུད། །ཞི་བའི་ཐུགས་ལ་ཕྱག་འཚལ་འདུད། །མགོན་པོ་ཁྱོད་ལ་བདག་ཅག་ཞུ། །བདག་གིས་དཀྱིལ་འཁོར་ཞུ་བའི་ཕྱིར། །མངའ་བདག་རྒྱལ་དང་སེམས་ཅན་རྣམས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་བཙུན་མོའི་དཀྱིལ་འཁོར་བཀའ་སྩལ་པ། དེ་ལྟའི་དཀྱིལ་འཁོར་བྲིས་ནས་སུ། །དབུས་སུ་ཕ་རོལ་ཕྱིན་མ་དགོད། །དྷཱི་ཞེས་བྱ་བ་ཤེས་རབ་ཅན། །ཐབས་དང་ལྡན་པས་གསལ་བྱས་པ། །འདི་ཡིས་སྔགས་པ་འཇིགས་མེད་པར། །ཟླ་བ་ཕྱེད་ཀྱིས་ངེས་པར་འགྱུར། །རིག་པ་འདི་ཡིས་དེ་ཡི་ནི། །ལས་རྣམས་ཐམས་ཅད་བྱེད་པ་དང་། །དབང་དང་དགུག་དང་དབྱེ་བ་དང་། །ཚིམ་དང་འཕྲོག་དང་འབྲས་ཆེན་པོ། །ཞི་བས་ཞི་བ་ཞེས་སུ་བཤད། །བརྙེས་མ་ཞེས་པས་རྒྱས་པར་བཤད། ། དབང་དང་དགུག་དང་དབྱེ་བ་ལ། །བྱེད་མའོ་དབང་ལ་དྲག་མོ་ཡིན། །ཤ་ཡི་མཐའ་རུ་བདུད་གསོད་མ། །གསོད་པ་དང་ནི་སྤེལ་བར་བྱ། །འགྲོ་བ་དང་ནི་ཡང་དག་ལྡན། །སོར་མོ་ཞགས་པས་དཀྲི་བར་བྱ། །ཐམས་ཅད་དུ་ནི་དྲག་པོ་དགུག །དྲག་པོ་དྲག་པོའི་གོ་འཕང་གནས། །འདི་ཡི་ཆོ་ག་ལྡན་པ་ཡིས། །ལས་ཀྱི་ཚོགས་ཀྱི་མཆོག་ཀུན་བྱ། །སེམས་ལ་རྣལ་འབྱོར་ལེགས་བསམས་ཏེ། །བརྒྱད་བརྒྱ་ཁོ་ན་བཟླས་པ་ཡིས། །དབང་བཅས་ཉིད་དམ་དབང་ཆེན་པོ། །སྟོབས་ཀྱིས་མགོ་བོ་མནན་ནས་སུ། །མ་མོའི་ཚོགས་

ཀུན་དེ་ཡིས་བཟླ། །དུས་མི་རིང་བར་འགྲུབ་པར་འགྱུར། །གཟི་བརྗིད་ཆེན་པོས་བཀའ་བཞིན་དུ། །མགོ་བོས་ཉེ་བར་ཕྱག་འཚལ་ཏེ། །འདི་ཡི་མ་མོ་ཐམས་ཅད་ཀུན། །གཟི་བརྗིད་ཀྱི་ནི་གཟི་ལྡན་པ། །སྔགས་ཀྱི་རྒྱལ་པོ་འོད་ལྡན་པས། །གོ་རིམས་ཇི་ལྟ་བ་བཞིན་དུ། །དཔེ་ཟླ་མེད་པའི་དངོས་གྲུབ་་བྱེད། །གྲུབ་པའི་ལམ་ལ་རབ་ཏུ་གནས། །སངས་རྒྱས་རྡོ་རྗེ་འཛིན་པ་ཡི། །འཕྲུལ་དང་རྣམ་པར་འཕྲུལ་པ་ཡིས། །འདི་ནི་སྟོན་པ་ཆེན་པོས་གསུངས། །མ་སྐྱེས་སྐྱེ་བ་མེད་ལ་བཞུགས། །རྟག་པ་སྟོན་པ་ཐམས་ཅད་པ། །ནམ་མཁའ་ཉི་ཟླ་དྲི་མ་མེད། །དེ་དག་ཐམས་ཅད་རབ་དགའ་སྟེ། །དངོས་པོ་སྤངས་པའི་བཙུན་མོ་ཡིས། །གར་དང་གླུ་དང་སིལ་སྙན་མཆོག །བཞད་དང་སྒེག་པའི་སྦྱོར་བ་ཡིས། །བུད་མེད་སྒྱུ་མའི་རྣམ་འཕྲུལ་དང་། །གླིང་བུ་པི་བང་རྫ་རྔ་སོགས། །ཏིང་ཏིང་ཤག་དང་དུང་སྒྲ་དང་། །རོ་དང་རེག་པ་དྲི་ཆེན་པོ། །གཟུགས་དང་སྒྲ་སོགས་བདེ་ལྡན་པས། །དཔའ་ཆེན་ལ་ནི་མཆོད་བྱས་ནས། །སྙེམས་དང་བཅས་པས་ཕྱག་འཚལ་ཏེ། །སླར་ཡང་མགོན་པོ་ལ་གསོལ་བཏབ། །རྡོ་རྗེ་བཙུན་མོའི་དཀྱིལ་འཁོར་རྣམས། །མགོན་པོ་ཅི་ཡི་ཕྱིར་མི་གསུང་། །ཡབ་རྣམས་ཀྱི་ནི་ཐམས་ཅད་དང་། །ཡུམ་རྣམས་ཀྱི་ནི་མདོར་བསྡུས་པ། །མཆོད་པ་ཡང་ནི་ཐམས་ཅད་དེ། །བྲན་བཅས་ཕོ་ཉ་ཕོ་ཉ་མོ། །འཇིག་རྟེན་པ་ནི་མཐའ་དག་གི། །གཙོ་བོ་ཆེན་པོས་གསུང་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཡང་དེ་བཞིན་གཤེགས་པ་ཐམས་ཅད་གཉིས་སུ་མེད་པ་རྣམ་པར་འཕྲུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་དག་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལ་གཞུག་པ་དང་། དགུག་པ་དང་། བཅིང་བ་དང་། མཉེས་པར་བྱ་སྟེ། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་གཉིས་སུ་མེད་པ་བསྒྱིངས་པ་དང་ལྡན་པ་ལ་མཉམ་པར་བཞག་སྟེ་བཞུགས་སོ། །དེ་ནས་ཡང་བདེ་བ་ཡོངས་སུ་སྐྱེས་པ་རབ་ཏུ་དགྱེས་པའི་སངས་རྒྱས་ཐམས་ཅད་ལྷན་ཅིག་བསྐྱོད་པ་དང་བཅས་པ་བྲན་དང་བཅས་པས་

དེ་ལ་འདི་སྐད་ཅེས་གསོལ་ཏོ། །མགོན་པོ་དབང་ཕྱུག་རྡོ་རྗེ་སེམས། །རྡོ་རྗེ་སྣང་བ་མཛེས་པའི་སྐུ། །གསང་བ་རྒྱན་གྱི་དཀྱིལ་འཁོར་ནི། །དཔའ་བོ་ཆེན་པོས་གསུང་དུ་གསོལ། །གང་གིས་རྒྱལ་བ་ཀུན་བསྐྱེད་པ། །བྱང་ཆུབ་སེམས་དཔའ་གྲགས་ཆེན་པོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གསང་བ་རྒྱན་གྱི་བཀོད་པ་དཀྱིལ་འཁོར་ཆེན་པོའི་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསོལ་ཏོ། །ཨེ་མ་སངས་རྒྱས་ཐམས་ཅད་ཀྱིས། །ཞུ་བ་རབ་ཏུ་ཞུས་པ་ནི། །གང་ཕྱིར་ང་ལ་དངོས་མེད་ཀྱང་། །ཞུ་བ་ཞུས་པ་ཐམས་ཅད་ཐོས། །གསང་བ་ཆེན་པོའི་སྨོན་ལམ་དང་། །དེ་བཞིན་སྙིང་རྗེའི་ཕ་རོལ་ཕྱིན། །དྲན་པ་མེད་ལས་དྲན་པ་ཡང་། །དྲན་འགྱུར་དྲན་པོ་བཞིན་གནས་པ། །སངས་རྒྱས་ཀུན་གྱི་གསང་ཆེན་པོ། །ཤེས་རབ་ཕ་རོལ་ཕྱིན་དགེ་བ། །ཆོས་དང་ཆོས་མིན་རྣམ་པར་སྤངས། །བརྗོད་དུ་མེད་པ་བཤད་པར་བྱ། །དེ་ནས་སངས་རྒྱས་བཅོམ་ལྡན་འདས་ཀྱིས་བདག་ཉིད་དེ་རྣམས་དེ་བཞིན་གཤེགས་པ་ཐམས་ཅད་ཀྱི་གསང་བ་རྒྱན་གྱི་བཀོད་པའི་དཀྱིལ་འཁོར་གྱི་རྒྱལ་པོ་བཀའ་སྩལ་པའི་ཕྱིར་སླར་ཡང་གླུའི་དབྱངས་འདིས་ཞུ་བ་ཞུས་པ། ཆོས་དབྱིངས་མི་གཡོ་བདེ་ལ་ལེགས་བཞུགས་དམ་པའི་ཐུགས། །ཕྱོགས་བཅུ་མཐའ་ཡས་སངས་རྒྱས་ཀྱིས་ཞབས་ལེགས་བཏུད་པ། །བདེ་མཆོག་ལྷ་ཡི་ལྷ་སྟེ་ས་དབང་འཇིག་རྟེན་བླ། །དཀྱིལ་འཁོར་བདེ་བ་མཆོག་ལ་བཞུགས་གསོལ་བདེ་ཆེན་གྱི། །ས་གཉིས་གཙུག་གིས་ཕྱག་བྱས་བདེ་ལྡན་པདྨའི་གཙུག་ཏོར་གྱིས། །རྣམ་པ་ཀུན་ཏུ་གར་མཛད་སྦྱོར་བའི་དཀྱིལ་འཁོར་དམ་པ་གསུངས་ཤིག་ཀྱེ། འགྲོ་ཀུན་ཕན་དགོངས་རབ་ཏུ་བཞུགས་གསོལ་མཆོད་པ་ཆེན་པོ་ཀྱེ། །ཆ་ལུགས་རྣམ་པ་དུ་མས་འགྲོ་ཀུན་འདུལ་མཛད་ཀུན་གྱི་དམ་པ་ཀྱེ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་ཅིང་བསྐུལ་བའི་ཚིག་ཉིད་ཀྱི་ཐུགས་ལ་བཞག་ནས།དེ་བཞིན་གཤེགས་པ་ཐམས་ཅད་ཀྱིས་དཀྱིལ་འཁོར་བསྒྱུར་བ་ཆེན་པོ་རབ་

ཏུ་ཚིམ་པ་བདེ་བ་ལ་ལོངས་སྤྱོད་པ་རྣམ་པར་བསྒྱིངས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་བྱིན་གྱིས་བརླབས་ཏེ། བདེ་བ་ཆེན་པོ་འཁོར་ལོས་སྒྱུར་བ་ལ་རབ་ཏུ་གནས་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་རབ་ཏུ་ཕྱུང་ངོ་། །དཀྱིལ་འཁོར་སྔ་མ་བཞིན་བྲིས་ལ། །དེ་ཡི་ལྟེ་བར་འདི་དགོད་དོ། །རྡོ་རྗེ་ཆེན་པོ་བསམ་གཏན་པ། །འདོད་པའི་དབང་ཕྱུག་དག་དང་ལྡན། །དེ་བཞིན་གཤེགས་པ་ཀུན་གྱི་ཡབ། །ཀུན་གྱི་ཐོག་མཐར་རབ་བྱུང་བ། །དེ་ལ་སོགས་པའི་རིམ་པ་ཡིས། །ཐམས་ཅད་ཀུན་ཏུ་བརྟག་པར་བྱ། །པདྨའི་ལོ་མ་རྩིབས་ལ་ནི། །རང་གི་ཆོས་དང་རབ་ཏུ་སྤེལ། །མ་མོ་རྣམས་ནི་ཐམས་ཅད་ཀྱི། །མཆོད་པ་ལ་སོགས་རབ་ཏུ་བརྟག །སྒོ་རུ་སྒོ་བ་ཡོངས་སུ་བརྟག །སྒོ་ཡི་ཕྱི་རུ་སྒོ་སྐྱོང་བ། །བཙུན་མོ་ལྷན་ཅིག་སྤྱོད་བཅས་པ། །ཀུན་ནས་ལྷ་རྣམས་གཞག་པར་བྱ། །དེ་ནས་རང་གི་ས་བོན་གྱིས། །ཀླུ་དང་གནོད་སྦྱིན་འཕར་མ་གཞན། །དྲི་ཟ་རྣམས་དང་མིའམ་ཅི། །ལྷ་མིན་མཁའ་ལྡིང་དེ་བཞིན་ནོ། །འཇིག་རྟེན་སྐྱོང་བ་ཐམས་ཅད་ནི། །སྒོ་རུ་གཉིས་གཉིས་གཞག་པར་བྱ། །གདོན་དང་དུག་དང་རིམས་དང་ནད། །ཡི་དགས་ཤ་ཟ་སྲིན་པོ་དང་། །དམྱལ་བ་བརྒྱད་པོ་ཕྱོགས་བརྒྱད་ཀྱི། །འཁོར་ལོའི་ཕྱི་རུ་གཞག་པར་བྱ། །དེ་ནས་འཁོར་ལོའི་མུ་ཁྱུད་བྲི། །ཆེན་པོ་རིན་ཆེན་བདུན་རང་བཞིན། །དེ་ཡི་སྒོ་རུ་བྲི་བྱ་བ། །ཤར་དུ་འདོད་ཆགས་སྐྱེ་གནས་ལག །ཞེ་སྡང་དྲག་པོ་ལུས་གནག་པ། །བྱང་དུ་ལེགས་པར་བྲི་བར་བྱ། །གཏི་མུག་ནུབ་ཏུ་བྲི་བར་བྱ། །ལྷོ་རུང་རྒྱལ་ཉིད་ཡིན་ནོ། །སོག་ལེ་དང་ནི་གོས་ནག་པོ། །དེ་བཞིན་དབྱུག་གུ་འཇིགས་ཆེན་པོ། །འདི་རྣམས་ཕྱག་རྒྱར་བརྟགས་པའོ། །དེ་ནས་ཇི་ལྟ་བ་བཞིན་འཇུག །དེ་ནས་གསང་བ་རྡོ་རྗེའི་ཕྱག་རྒྱ་ངེས་པར་བཅིངས་པའི་ལག་པར་གྱུར་པས་རང་གི་དམ་ཚིག་རྗེས་སུ་དྲན་པས་ཕྱག་རྒྱ་དེ་ཉིད་ཀྱིས་འགུགས་པའི་རྣམ་པ་དང་རྡོ་རྗེའི་གླུ་འདིས་བསྐུལ་ཏེ་དཀྱིལ་འཁོར་ཐམས་ཅད་སྤྱན་དྲང་བར་བྱའོ། །

འདིར་གཤེགས་འདིར་གཤེགས་སངས་རྒྱས་ཞལ་རས་སངས་རྒྱས་དཔལ། །བདེ་བར་གཤེགས་པ་ཡུམ་དང་བཅས་པ་མཐའ་དག་གིས་བསྐོར་ཏེ། །འདིར་གཤེགས་འདིར་གཤེགས་པདྨའི་སྤྱན་རས་པད་ལས་འཁྲུངས། །དམ་ཚིག་རྣམ་དག་རྣམས་ཀྱི་དཔའ་བོ་དམ་པའི་ཕྱག །གླུ་དབྱངས་རྒྱལ་པོ་འདི་ཡིས་ནི། །རྡོ་རྗེའི་བློ་གྲོས་ངེས་པར་བསྐུལ། །བྱོན་འགྱུར་སོང་ཤིག་སོང་ཤིག་ཅེས། །འཁོད་ཅིག་འཁོད་ཅིག་འཁོད་པར་བྱ། །ཚིམ་ཞིང་ཚིམ་ལ་རབ་ཏུ་ཚིམ། །ཞུགས་ཤིག་ཞུགས་ཤིག་འཇུག་པར་བྱ། །ཀྭ་ཀྱེ་ཞེས་བརྗོད་བསྐུལ་བ་ཡིས། །ས་ལ་གནས་ཀུན་རབ་ཏུ་འབེབས། །དེ་ནས་མེ་ཏོག་དོར་བར་བྱ། །བཅོམ་ལྡན་བདེ་བར་བཞེས་སུ་གསོལ། །ལྷ་དབང་གང་ལ་ལྷུང་འགྱུར་བཟུང་། །དེ་ཡི་སྒྲུབ་ཐབས་བརྩམ་པར་བྱ། །ཡང་ན་ཡིད་ལ་གང་འདོད་པའི། །སྒྲུབ་བྱེད་སྒྲུབ་པོ་དམ་པས་བྱེད། །དེ་ཉིད་དུ་ནི་དབང་བསྐུར་བ། །རྣལ་འབྱོར་པ་ནི་མཁས་པས་བླང་། །དེ་ནས་སློབ་མ་གཞུག་པར་བྱ། །རྒྱན་རྣམས་ཀུན་གྱིས་རྣམ་པར་བརྒྱན། །དར་ལ་སོགས་པས་གདོང་གཡོགས་ཏེ། །ཕྱག་རྒྱ་བཅིངས་པའི་ལག་བཟང་པོས། །དེ་བཞིན་དུ་ནི་མེ་ཏོག་དོར། །ས་མ་ཡ་སྟྭཾ་བདག་གིས་བརྗོད། །མེ་ཏོག་གང་ལ་ལྷུང་གྱུར་པ། །དེ་ཡི་སྦྱོར་བས་དབང་བསྐུར་བྱ། །ཡང་ན་གང་འདོད་རྣལ་འབྱོར་གྱིས། །སྦྱོར་བ་བསྒོམས་ཏེ་དབང་བསྐྲུར་བྱ། །ཡང་ན་བདག་པོའི་རྣལ་འབྱོར་གྱིས། །གལ་ཏེ་དེ་ནི་སྦྱོར་ལྡན་འགྱུར། །གདུགས་དང་རྒྱལ་མཚན་བླ་རེ་སོགས། །བྷྲྀང་ག་ར་ཡི་བུམ་པ་དང་། །རྔ་ཡབ་རྣམ་པ་སྣ་ཚོགས་དང་། །སེང་གེའི་ཁྲི་ནི་བཟང་པོ་དང་། །གསེར་དང་དངུལ་གྱི་དབྱུག་གུ་དང་། །རིན་ཆེན་དབྱུག་གུ་དུ་མ་ནི། །དགྱེས་པའི་དཀྱིལ་འཁོར་ཉིད་དུ་བཞག །དབང་བསྐུར་སྤྲོ་བ་ཆེན་པོ་ཡིས། །དེ་ཡི་སྟན་ལ་བཞག་ནས་སུ། །རྣལ་འབྱོར་ལྡན་པས་དབང་བསྐུར་རོ། །དབང་བསྐུར་ཇི་ལྟར་རིགས་པ་ཡིས། །གསང་བའི་སྦྱོར་བས་དབང་བསྐུར་རོ། །ཐོག་མར་སྡོམ་པ་ལྡན་པ་ཡིས། །དེ་ནི་དམ་ཚིག་འཛིན་དུ་གཞུག །འདིར་ནི་ང་ཡི་དམ་ཚིག་ཟུང་། །

ཕྱི་དང་གསང་བ་རྣམ་པ་བཞི། །སངས་རྒྱས་ཀུན་གྱི་སྡོམ་པ་ནི། །སངས་རྒྱས་ཡེ་ཤེས་རབ་གསལ་བྱེད། །གདུག་པ་ཐམས་ཅད་གསད་པར་བྱ། །འཇུངས་པ་རྣམས་ཀྱི་ནོར་དབྲོག་བྱ། །ལྟ་བ་ངན་ལ་བརྫུན་དུ་སྨྲ། །སྲོག་ཆགས་གསོད་ལ་སྨྲ་བར་བྱ། གཞན་གྱི་བུད་མེད་མངོན་བགྲོད་པར། །ཅི་བདེ་བར་ནི་ཕྲོགས་ཤིག་བུ། །གཞན་རྫས་འཕྲོག་པར་བྱེད་རྣམས་དང་། །དཀོན་མཆོག་གསུམ་ལ་འགལ་བྱེད་པ། །གསད་དང་གཞོམ་པར་བྱ་བ་དང་། །དེ་བཞིན་ཁྲག་རྣམས་བཏུང་བ་རུ། །འབད་པ་ཡིས་ནི་ཐམས་ཅད་བྱོས། །དམ་ཚིག་རྣམ་པ་གསུམ་པོ་ཡིས། །དེ་ནས་ཡོན་ནི་ཕུལ་ནས་སུ། །བླ་མ་ལ་ནི་གུས་པ་ཡིས། །ཞབས་ལ་མགོ་བོས་ངེས་གཏུགས་ཏེ། །རང་ལུས་རྒྱལ་པོའི་ལོངས་སྤྱོད་དང་། །ཆུང་མའམ་ཡང་ན་བུ་མོ་དང་། །བུ་རྣམས་དང་ནི་བྲན་ཉིད་དང་། ། སྲིང་མོ་སྲིང་མོའི་བུ་མོ་དང་། །མ་དང་རང་གི་མནའ་མ་དང་། །གྲོང་དང་ཡུལ་གྱི་ལོངས་སྤྱོད་དང་། །ཤིང་རྟ་འགྲོ་དང་གླང་པོ་དང་། །རྣམ་པར་བཀྲ་བའི་རྟ་རྣམས་དང་། །ནོར་གྱིས་གང་བའི་གྲོང་རྣམས་དང་། །བ་ལང་མ་ཧེ་ར་རྣམས་དང་། །ལུག་རྒོད་རྣམས་དང་གཞན་རྣམས་དང་། །རྔ་མོ་མཛེས་མའི་རྔ་མོ་མོ། །གཞན་ཡང་གཞན་ཡང་གང་འདོད་པ། །ཇི་ལྟར་རིགས་པས་མཆོད་པར་བྱ། །རིམ་བཞིན་རང་གི་སློབ་མའི་ཚོགས། །མགོན་པོ་མཆོད་ནས་གཤེགས་སུ་གསོལ། །གང་གཞན་རྡོ་རྗེ་སྤུན་ལ་ཡང་། །དེ་ནས་སྒྲུབ་ཐབས་དམ་པ་བསླབ། །སྲོག་དང་ཐུར་སེལ་སྦྱོར་བ་ཡིས། །སེམས་ཀྱི་བརྟན་པ་ཉིད་དུ་བྱ། །ཟླ་བ་ཉ་བ་ལྟ་བུར་དགང་། །ཆ་ཤས་དག་ནི་བཅུ་དྲུག་ཀྱང་། །དེ་ཡི་དབུས་སུ་རྣམ་བསམ་པ། །གཙོ་ཆེན་འདོད་པའི་དབང་ཕྱུག་གོ། །མདོར་བསྡུས་ནས་ནི་སྤྲོ་བར་བྱ། །བརྟུལ་ཞུགས་ཅན་གྱིས་རང་ལུས་བསམ། །བདག་ཉིད་འདོད་པའི་དབང་ཕྱུག་རྒྱལ། །འདོད་པའི་ཟིལ་གྱིས་མནན་ནས་སུ། །རྣལ་འབྱོར་ཅན་བདག་དཔལ་ལྡན་འགྲུབ། །ལྷ་དབང་བཅས་པས་ཕྱག་འཚལ་ཞིང་། །ནད་དང་མྱ་ངན་འཇིགས་པ་སེལ། །རྒ་དང་འཆི་བ་རྣམ་པར་

སྤངས། །ཟླ་བ་གཅིག་ཙམ་བཟླས་པ་ཡིས། །དཔའ་བོས་ལས་ཀུན་བྱེད་པར་འགྱུར། །ཞི་དང་རྒྱས་དང་དེ་བཞིན་དབང། །དྲག་ཤུལ་སྤྱོད་པའི་རིམ་པ་ཡིས། །དགུག་དང་དབབ་པའི་ལས་རྣམས་ནི། །སྐད་ཅིག་ཙམ་ཞིག་བསྐུལ་བ་ཡིས། །སྔགས་པས་ཐམས་ཅད་བྱེད་པར་འགྱུར། །སྔགས་ཀྱི་སྦྱོར་བས་སྔགས་ཟློས་པས། །འདི་ནི་བཅོམ་ལྡན་རྣལ་འབྱོར་གསུང་། །ཡན་ལག་ལྔ་ལས་སྐྱེས་པ་གཟུང་། །འབྱུང་པོའི་ཉི་མ་མཚན་མོ་གུང་། །ལྕགས་གསུམ་གྱིས་ནི་དཀྲིས་བྱས་ལ། །རང་གི་ཁ་རུ་གཞུག་པར་བྱ། ། བདག་ཉིད་རྣལ་འབྱོར་ལྡན་པས་བཟླས། །དེ་ནི་ནང་པར་མཐོང་མི་འགྱུར། །ལྷར་བཅས་གྲུབ་པའི་སེམས་ཅན་གྱིས། །ཐམས་ཅད་རྣམ་པ་ཀུན་ཏུའོ། །བསྐལ་པར་གནས་ཤིང་ཤེས་རབ་ཆེ། །བསྟན་བཅོས་ཐམས་ཅད་རབ་ཏུ་མཁས། །གཟུགས་དང་ལང་ཚོ་ཕུན་སུམ་ཚོགས། །རིག་པ་འཛིན་པའི་མངའ་བདག་འགྱུར། །བཅུ་བཞིའི་ཉིན་པར་ཤི་བ་ཡི། །རྡོལ་པའི་གཡོན་གྱི་རྩིབ་ལོགས་ནི། །སྦྱོར་བས་བཟུང་སྟེ་འཕུར་འགྲོ་མི། །གཟུགས་བརྙན་ལག་པ་བཞི་པ་བྱ། །ཞགས་པ་ལྕགས་ཀྱུ་རྩེ་གསུམ་མཚན། །གཡོན་པར་ཐོད་པ་འཛིན་པ་པོ། །རླུང་གི་དཀྱིལ་འཁོར་ལ་གནས་པ། །སྤྱན་གསུམ་རྣམ་པར་གཙིགས་པ་པོ། །ཐོད་པའི་ཕྲེང་བའི་ཅོད་པན་ཅན། །གཏུམ་ལྡན་སྟ་ཟུར་ཆེན་པོ་པ། །འཇིགས་པ་ཆེན་པོའི་དུར་ཁྲོད་དུ། །རྣལ་འབྱོར་ལྡན་པས་དེ་བཞག་སྟེ། །ཆོ་ག་ཇི་བཞིན་མཆོད་པར་བྱ། །གསང་སྔགས་རྒྱལ་པོ་བཟླས་པར་བྱ། །ཐོདཔའི་ཕྲེང་བའི་ཅོད་པན་ཅན། །ཁྲག་དང་ཤ་དང་མར་ཁུ་ཡིས། །དེ་ནས་ལྷ་མོ་དེ་འགྲུབ་བོ། །མཚན་མ་ཡང་ནི་བལྟ་བར་བྱ། །མཚན་མ་ཡིས་ནི་དངོས་གྲུབ་ཆེ། །དུས་མི་རིང་བར་བཟང་པོ་འཐོབ། ། དམན་པས་དམན་པའི་དངོས་གྲུབ་སྟེ། །བར་མ་ཡིས་ནི་བར་མའོ། །མཚན་མ་མེད་ན་ཆུང་ངུ་ནི། །རབ་ཏུ་འགྲུབ་པར་དཔྱད་མི་དགོས། །ལྷ་མིན་བཟང་པོ་དགུག་པར་བྱ། །མི་དང་མདའ་ནི་བསྐུལ་བ་ཡིས། །དེ་ཡི་སྐད་ཅིག་ཉིད་ལ་བྱེད། །ཁྲག་ཉིད་ཀྱིས་ནི་བྲིས་པ་ཡི། །

དབང་དུ་བྱ་བའང་འདི་ཉིད་ཀྱིས། །དེ་བཞིན་བུད་མེད་ཐམས་ཅད་དགུག །འགྲུབ་པའི་རྫས་ཀྱང་མིང་ཉིད་ཀྱིས། །དགུག་པའི་སྦྱོར་བས་དགུག་པར་བྱ། །དམག་དཔུང་རྣམ་པར་བཟློག་པ་ནི། །རྒྱལ་མཚན་རྩེ་མོར་རྣམ་གཞག་གོ། །རེངས་དང་རྨུགས་པར་བྱེད་པ་དང་། །རྨོངས་དང་འཆིང་བ་དེ་བཞིན་དུ། །གྱིབ་དང་གསད་པ་ཐམས་ཅད་ནི། །ཆོ་ག་དག་དང་ལྡན་པས་བྱེད། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་རྣམས་དང་ཡབ་རྣམས་ཀྱིས་བཅོམ་ལྡན་འདས་ལ་གསང་བ་རྒྱན་གྱི་དཀྱིལ་འཁོར་གྱིས་དཀྱིལ་འཁོར་གྱི་ཞུ་བ་ཆེན་པོ་འདི་ཞུས་པ་དང་། གང་ལ་བཞུགས་ནས་རྒྱལ་བ་ཀུན། །ཡུམ་དང་ཡབ་རྣམས་དེ་བཞིན་དུ། །དེ་ཡི་སྦྱོར་བས་སྦྱོར་བདག་ཉིད། །སེམས་ཅན་རྣམས་ནི་སྣོད་དུ་མཛོད། །གསང་བ་རྒྱན་གྱི་དཀྱིལ་འཁོར་གྱི། །རྣལ་འབྱོར་ཆེན་པོའི་རྣམ་དབྱེ་བ། །གང་གིས་མ་འོངས་མི་རྣམས་ནི། །བདེ་བས་སངས་རྒྱས་ཉིད་ལ་འཇོག །དེ་ནས་བཅོམ་ལྡན་རྡོ་རྗེ་ཅན། །འཛུམ་དང་བཅས་པའི་སྤྱན་རྒྱས་པ། །གསང་བ་རྒྱན་གྱི་དཀྱིལ་འཁོར་ནི། །གསང་བ་ཆེན་པོ་བཀའ་སྩལ་པ། །གང་ཕྱིར་བདག་ཉིད་དཀྱིལ་འཁོར་བཤད། །སེམས་ཅན་དག་པའི་རྡོ་རྗེ་ཅན། །བདག་ཉིད་གསང་བའི་རྒྱན་ཞེས་བྱ། །སྙིང་པོ་ཕྱག་རྒྱ་སྔགས་ཉིད་དེ། །བདག་ཉིད་རིག་སྔགས་དམ་ཚིག་ཀྱང་། །གང་ཕྱིར་བདག་ཉིད་སྡོམ་པ་སྟེ། །བདག་ཉིད་བཤད་དང་འཆད་པའོ། །ཕ་དང་མ་རྣམས་དེ་བཞིན་ཏེ། །དངོས་གྲུབ་སྒྲུབ་པོ་ལས་ཀྱི་མཆོག །བདེ་དང་སྡུག་བསྔལ་ཁམས་གསུམ་པ། །ཞེས་སོ། །དེ་ནས་བཅོམ་ལྡན་འདས་ལ་དེ་བཞིན་གཤེགས་པ་ཐམས་ཅད་ཀྱི་ཡུམ་དང་ཡབ་རྣམས་ཀྱིས་འདི་སྐད་ཅེས་གསོལ་ཏོ། །དེ་ཕྱིར་གསུངས་ཤིག་བཅོམ་ལྡན་འདས། །བདེ་བར་གཤེགས་པས་གསུང་དུ་གསོལ། །སངས་རྒྱས་བྱང་ཆུབ་སེམས་ཀུན་གྱིས། །ཕན་དང་བདེ་བ་ཐོབ་པའི་ཕྱིར། །ཞེས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡུམ་དང་ཡབ་ཉེ་བར་ལོངས་སྤྱོད་པ་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་

ཀྱི་སྐུ་དང་གསུང་དང་ཐུགས་རྡོ་རྗེ་ལས་འདི་བྱུང་ངོ་། །སྔོན་བཤད་ཆོ་གའི་རིམ་པ་ཡིས། །དཀྱིལ་འཁོར་ཡང་དག་བྲིས་ནས་སུ། །དེ་ཡི་དབུས་སུ་བདག་བསམ་བྱ། །དཀར་དང་དམར་དང་འོད་ཆེན་པོ། །སྣ་ཚོགས་རྒྱན་གྱིས་ལུས་ལ་སྤྲས། །དམར་པོའི་ཕྲེང་བ་གཙུག་ཏོར་ཅན། །སྣ་ཚོགས་གོས་ནི་ལེགས་མནབས་པ། །དམར་པོའི་འོད་ཀྱི་བླ་གོས་ཅན། །ཕྱག་བཟང་གཡོན་ན་དྲིལ་བུ་སྟེ། །བསྙེམས་བཅས་འཛུམ་བག་ལྡན་པའི་ཞལ། །ཕྱག་གཞན་ན་ནི་རྡོ་རྗེ་ཅན། །སྙིང་གར་རབ་ཏུ་གསོར་མཛད་པ། །པདྨ་རྒྱས་འདྲའི་སྤྱན་མངའ་བ། །ཞལ་གྱི་དཀྱིལ་འཁོར་ཉི་ཤར་མཚུངས། །རྡོ་རྗེ་སེང་གེའི་ཁྲི་ལ་བཞུགས། །དམར་པོའི་གོས་ནི་འཕྱང་བ་པོ། །མདོར་བསྡུས་ནས་ནི་བྲི་བར་བྱ། །གཡོན་དུ་ཤེས་རབ་ཡོངས་སུ་བྲི། །སྔོན་བཤད་པ་ཡི་གཟུགས་ཅན་ལ། །གཡས་པའི་ཕྱག་ནི་འཕྱར་བའོ། །ལྷོ་རུ་སྦྱིན་པ་ཆེན་མོ་ནི། །ཕྱག་རབ་རིན་ཆེན་སྩོལ་བ་མོ། །བྱང་དུ་བཟོད་པ་ཆེན་མོ་ནི། །བྱམས་པའི་ཡ་ལད་འཛིན་པ་མོ། །མདུན་དུ་བརྩོན་འགྲུས་ཆེན་མོ་ནི། །རྡོ་རྗེའི་ལག་པ་ཆེར་བཟང་བ། །ཤར་དང་ལྷོ་ཡི་མཚམས་སུ་ནི། །བསམ་གཏན་ཕ་རོལ་ཕྱིན་མ་བྲི། །བསམ་གཏན་ཕྱག་ཅན་སྤྱན་ཡངས་མ། །ཟླ་བའི་དཀྱིལ་འཁོར་འོད་བཟང་བའོ། །བདེན་བྲལ་དུ་ནི་འཕེལ་མ་བྲི། །རིན་པོ་ཆེ་ཡི་རྒྱན་གྱིས་བརྒྱན། །ནོར་གྱི་རྒྱན་ནི་སྟོང་ཕྲག་གིས། །སེམས་ཅན་མང་པོ་བདེ་བར་བྱེད། །སྨོན་ལམ་བྲི་བྱ་རླུང་གི་ནི། ། མཚམས་སུ་ཡང་དག་མཚོན་པར་བྱ། །དབྱངས་སྙན་པ་ཡི་ངག་བརྗོད་པས། །སེམས་ཅན་ཐམས་ཅད་སྐུལ་བར་བྱེད། །བློ་གྲོས་ལྡན་པས་དབང་ལྡན་དུ། །ཐབས་ཀྱི་ཡེ་ཤེས་སློབ་པ་མོ། །ལག་པ་གཉིས་ཀྱིས་གར་བྱེད་པ། །སྒེག་དང་དགའ་བས་འཁྲུགས་པ་བྲི། ། དཔའ་བོས་ཤར་སྒོར་བྲི་བྱ་བ། །ཤེས་རབ་ཕ་རོལ་ཕྱིན་དགེ་མ། །ཡེ་ཤེས་ལྕགས་ཀྱུ་མཛེས་པའི་ཕྱག །དམར་པོའི་དར་གྱིས་མངོན་པར་མཛེས། །དབང་ནི་ནུབ་ཀྱི་སྒོ་རུ་ནི། །འཆིང་བའི་བདག་ཉིད་བྲི་བར་བྱ། །ཤིན་ཏུ་བྱི་རུ་དང་མཚུངས་པ། །རྡོ་རྗེ་ལྕགས་སྒྲོག་

འཛིན་པ་མོ། །བྱང་གི་སྒོ་རུ་བྲི་བྱ་བ། །སྟོབས་ཀྱི་ཕ་རོལ་ཕྱིན་མ་མཆོག །རྒྱལ་བ་ཐམས་ཅད་མཉེས་བྱེད་པ། །དྲིལ་བུ་བཟང་པོ་འཁྲོལ་བའི་བདག །གཤིན་རྗེ་ཆོ་འཕྲུལ་བྲི་བར་བྱ། །འབར་བའི་སྤྲིན་གྱིས་ཡང་དག་འཁྲུགས། །ཕྱག་ན་རྡོ་རྗེ་ཞགས་བཀྲ་བ། །རྡོ་རྗེའི་གློག་ཕྲེང་དང་མཚུངས་མའོ། །ང་ཡི་མདུན་དུ་ཤེས་ལྡན་གྱིས། །འདོད་པའི་དབང་ཕྱུག་བརྒྱན་པ་བྲི། །པདྨ་རཱ་གའི་འོད་གསལ་བ། །མདའ་དང་གཞུ་ནི་འཛིན་པའི་མཆོག །དེ་ཡི་མདུན་དུ་དཀར་པོ་བྲི། །ཟླ་བའི་འོད་འདྲ་གྲགས་ཆེན་པོ། །ཟླ་བ་ཤར་ཀའི་འོད་མཛེས་པ། །འཛུམ་བག་ཅན་ལ་གཞོན་ནུའི་གཟུགས། །རྡོ་རྗེ་འདུན་པ་ཆེར་དམར་བ། །མདའ་ལྔ་དང་ནི་གཞུ་འཛིན་པ། །སྐྱེ་བ་འཇོམས་པ་དཔའ་བོ་ནི། །ལག་ན་འཁོར་ལོ་གཟི་བརྗིད་མཆོག །དེ་ཡི་གཡོན་དུ་བྲི་བྱ་བ། །དཀར་དང་དམར་བའི་འོད་ཆེན་པོ། །རྡོ་རྗེ་ཛང་སྒྲོགས་རྒྱལ་པོ་ནི། །དྲིལ་བུ་འཁྲོལ་བ་དང་ལྡན་པ། །དེ་ཡི་རྒྱབ་ཏུ་བྲི་བར་བྱ། །གསེར་དང་གུར་གུམ་དང་འདྲ་བའོ། །ལྷོ་ཡི་ཕྱོགས་སུ་བྲི་བྱ་བ། །མཁའ་འགྲོའི་དབང་ཕྱུག་དཔལ་དང་ལྡན། །སྔོན་པོ་ཆར་སྤྲིན་དང་འདྲ་བ། །ལག་ན་རལ་གྲི་རིན་ཆེན་ལྡན། །དེ་མདུན་དཔའ་ཆེན་འདོད་པ་ཡི། །རྒྱལ་པོ་བདག་ཉིད་ཆེན་པོ་བྲི། །འོད་ཟེར་དམར་པོ་ལག་ན་གཞུ། །རིན་ཆེན་འབར་བས་རྣམ་པར་བརྒྱན། །དེ་ཡི་ལྷོ་རུ་བྲི་བྱ་བ། །རྡོ་རྗེ་རྣམ་པར་སྨོད་པ་མཆོག །ཉི་མའི་དཀྱིལ་འཁོར་ལག་པ་ཅན། །རབ་ཏུ་རྣོ་བའི་འབར་བའི་ཕྲེང་། །རྡོ་རྗེ་དམ་པ་འདུལ་མཛད་དཔལ། །རྡོ་རྗེ་རིན་ཆེན་མཆོག་གི་ཏོག །ཁ་དོག་དཀར་པོ་ཆེར་སྤྲོ་བ། །གོས་སྔོན་རྣམ་པར་འཕྱང་བ་བོ། །རྡོ་རྗེ་ཌཱ་ཀིའི་དབང་ཕྱུག་རིགས། །ལག་ན་རིན་ཆེན་ཤིན་ཏུ་མཛེས། །དེ་ཡི་རྒྱབ་ཏུ་བྲི་བྱ་བ། །དགོད་དང་བཅས་པའི་བཞིན་རས་མཆོག །ང་ཡི་རྒྱབ་ཏུ་བྲི་བྱ་བ། །དྲི་ཡི་དབང་ཕྱུག་དབང་ཕྱུག་ཆེ། །ལག་ན་པདྨ་སྙིང་གར་འཆང་། །བན་དུའི་མེ་ཏོག་རྣམ་པ་འདྲ། །དེ་ལ་མངོན་པར་ཕྱོགས་པ་ཡི། །རྡོ་རྗེ་སྒྲོལ་བ་སྤྱན་མཛེས་བྲི། །དཀར་སེར་བཟང་པོ་སྣ་ཚོགས་པ། །ལག་ན་ཨུཏྤལ་

སྔོན་པོ་བཟང། །དེ་ཡི་གཡོན་དུ་དག་པ་ཡིས། །ལག་ན་འཁོར་ལོ་ཆེས་དཀར་བྲི། །སྔོན་པོས་ལེགས་པའི་གནས་ཐོབ་པ། །མཆོག་ཏུ་འཛུམ་པའི་བཞིན་རས་ཅན། །ལོ་མའི་རྩེ་མོ་རྒྱབ་ཏུ་བྲི། །ལག་ན་ཡིད་བཞིན་ནོར་བུ་མཆོག །ཁ་དོག་སྔོ་བསངས་དཔའ་ཆེན་པོ། །སེམས་དཔའ་ལྡན་པའི་ཐུགས་ཆེན་པོ། །དེ་ཡི་ལྷོ་ཡི་ཆ་རུ་ནི། །ཆོས་འཆད་མཆོག་ནི་བྲི་བར་བྱ། །རྒྱུ་མཚན་ཕྱག་ལྡན་རབ་དཀར་བ། །ཉི་མ་ཤར་ཀའི་སྣང་བ་འདྲ། །ང་ཡི་བྱང་དུ་བྲི་བྱ་བ། །སྟུག་པོ་བཀོད་པ་གྲགས་ཆེན་པོ། །ཤིན་ཏུ་ལྗང་བའི་མརྒད་མཚུངས། །ལས་ཀྱི་རྡོ་རྗེ་མཆོག་འཛིན་པའོ། །དེ་ཡི་མདུན་དུ་བྲི་བྱ་བ། །རྡོ་རྗེ་སྐྱོང་བ་ཡིད་འཕྲོག་བཀྲ། །བཞད་བཅས་རྡོ་རྗེའི་ལག་པ་ཅན། །རྒྱན་རྣམས་ཀུན་གྱིས་རྣམ་པར་བརྒྱན། །དེ་ཡི་ལྷོ་རུ་བྲི་བྱ་བ། །འགྲོ་བའི་རྩེ་མོ་ལེགས་བརྒྱན་པ། །ལྷང་ཚེར་ནག་པོ་བུང་བ་འདྲ། །རྡོ་རྗེའི་གསལ་ཤིང་འཛིན་པ་པོ། །རྒྱབ་ཏུ་རྡོ་རྗེ་འཆིང་བ་བྲི། །ལག་པ་ཡང་དག་སྦྱར་བསྡམས་པ། །རིན་ཆེན་ཀུན་གྱི་འོད་དག་ཅིང་། །འཛུམ་བཅས་མཆོག་ཏུ་ངོ་མཚར་བ། །འཁོར་བྱེད་གཡོན་དུ་བྲི་བར་བྱ། །ལག་ན་མགལ་མེའི་འཁོར་ལོ་ཅན། ། ལེགས་སྔོ་དར་ལ་བབ་པ་པོ། །རབ་རྒྱས་པདྨ་ལྟ་བུའི་ཞལ། །དེ་ནས་སྒོ་ཡི་ཆ་དག་ཏུ། །སྒོ་བ་རྣམ་པ་བཞི་པོ་བྲི། །ཤར་དུ་རྡོ་རྗེ་མི་གཡོ་བ། །ལག་ན་རྡོ་རྗེ་ལྕགས་ཀྱུ་ཆེ། །ལྷོ་ཡི་སྒོ་རུ་རྡོ་རྗེ་མེ། །ལག་ན་རྡོ་རྗེ་ཞགས་པ་འབར། །ནུབ་ཏུ་རླུང་ནི་སྔོན་པོ་སྟེ། །རྡོ་རྗེ་ལྕགས་སྒྲོག་འཛིན་པའོ། །ལུས་ངན་དུ་ནི་ཆུ་བྲི་སྟེ། །ཞགས་པ་ལྡན་པའི་དྲིལ་བུ་འཛིན། །དེ་ནས་སྦྱོར་ལྡན་འོངས་ནས་སུ། །དཀྱིལ་འཁོར་གྱི་ནི་ཤར་དུ་བྲི། །ཤར་དུ་མདའ་ཡི་མཚོན་ཆ་ལག །རབ་འབར་པདྨ་ལྟར་འབར་བ། །ལྷོ་རུ་ཆེན་པོ་དབང་ཕྱུག་ཅན། ། སྔོན་མོ་དབང་ཕྱུག་རྡོ་རྗེ་མ། །ལག་ན་རིན་ཆེན་སྙེ་མ་ཅན། །རིན་པོ་ཆེ་ཡི་རྒྱན་གྱིས་བརྒྱན། །རྡོ་རྗེ་ཉེར་ཞི་དཀར་མཛེས་མ། །རྒྱབ་ཏུ་རྟག་ཏུ་བྲི་བར་བྱ། །ལག་ན་པདྨ་བཟང་པོ་འཛིན། །པདྨའི་ཕྲེང་བས་རྣམ་པར་བརྒྱན། །རྡོ་རྗེ་སྟེང་ཞལ་མཛེས་མ་ནི། །སྔོ་བསངས་ཀུན་

ཀུན་གྱི་ཡོན་ཏན་ལྡན། །ལུས་ངན་དུ་ནི་ཤེས་ལྡན་གྱིས། །གཡས་སུ་རྡོ་རྗེ་རྩེ་གཅིག་བྲི། །ཤར་གྱི་མཚམས་སུ་རྡོ་རྗེ་ནི། །དུས་ཚིགས་ཞེས་བྱ་བཟང་མོ་བྲི། །དབྱར་གྱི་སྤྲིན་ལྟར་མཛེས་པ་མོ། །ལག་ན་བདུག་སྤོས་གྲགས་ཆེན་མོ། །ནུབ་ཀྱི་མཚམས་སུ་རི་རི་ཏ། །ལག་ན་མེ་ཏོག་ཕྲེང་བ་འབར། །ཅུང་ཟད་དམར་ལ་དཀར་བ་མོ། །སྣ་ཚོགས་རྒྱན་གྱིས་རྣམ་པར་བརྒྱན། །ནུབ་བྱང་དུ་ནི་བྲི་བྱ་བ། །ལག་ན་ཡི་གེ་སྣ་ཚོགས་བྲི། །ལག་ན་སྒྲོན་མེ་རབ་དམར་བ། །ཅུང་ཟད་སྔོ་བའི་གོས་གྱོན་པ། །དྲི་ཡི་གླང་པོ་ལྟར་འགྱིང་བའི། ། རོལ་པ་ལྡན་མ་མཁས་པས་བྲི། །སྔོ་བསངས་དམར་པོ་མཐོན་མཐིང་འདྲ། །རབ་ཏུ་དགོད་ཅིང་མིག་མཛེས་་མ། །རྡོ་རྗེའི་ལག་པ་མིག་མཛེས་མའོ། །དེ་ཡི་ཤར་དུ་བྲི་བྱ་བ། །རྡོ་རྗེ་མཆོག་གི་འོད་ལྡན་པའི། །རྡོ་རྗེ་དབང་ཕྱུག་བདེ་བ་མའོ། །དེ་བཞིན་ལྷོ་རུ་བྲི་བྱ་བ། །གསེར་སོགས་དང་ནི་མཐོན་མཐིང་འདྲ། །རིན་ཆེན་སྒྲོན་མ་རིན་ཆེན་ལག །འོད་མཆོག་ལྡན་པའི་ལྷ་མོ་ནི། །ནུབ་ཀྱི་དཀྱིལ་འཁོར་དག་ལ་བྲི། །འོད་ཀྱིས་སྣང་ཞིང་མཛེས་པ་ལ། །ལག་ན་འོད་ཟེར་ལེགས་མཛེས་པའོ། །རྡོ་རྗེ་བྲང་སྐྱེས་ཆེར་བཀྲ་བ། །སྣ་ཚོགས་རྒྱན་གྱིས་རྣམ་པར་བརྒྱན། །ལག་ན་སྣ་ཚོགས་གོས་ལྡན་པ། །བྱང་དུ་རྟག་ཏུ་བྲི་བར་བྱ། །དེ་བཞིན་སྦྱོར་བས་བྲིས་ནས་སུ། །ཕོ་ཉ་མོ་ཡང་ལེགས་པར་བྲི། །སྙིང་སྐུལ་བྱེད་པ་མཛེས་མ་ནི། །ཤར་དུ་ལེགས་པར་བྲི་བར་བྱ། །རྡོ་རྗེ་མྱུ་གུ་མདའ་ལྡན་དམར། །མིག་གཉིས་དང་ནི་གོས་སྔོན་པོའོ། ། དེ་དང་ཉེ་བར་དཔའ་མོ་ནི། །ལག་ན་ལྕགས་ཀྱུ་ཞགས་པ་མཆོག །གདུག་པ་འགུགས་པའི་ལྷ་མོ་བྲི། །སྔོ་བསངས་དམར་ལ་ལེགས་བརྗིད་པའོ། །རྗེས་སུ་མཉེས་མའི་ཕོ་ཉ་ཆེ། །ནུབ་ཏུ་རྟག་ཏུ་བྲི་བར་བྱ། །རྒྱལ་བ་ཐམས་ཅད་མཉེས་བྱེད་མ། །པགས་པའི་ཞགས་པས་ལག་པ་མཛེས། །ཁྲག་འགུགས་པ་ཡི་ཕོ་ཉ་མོ། །བྱང་དུ་གནས་པ་བྲི་བར་བྱ། །མདོག་གནག་པ་ལ་ཆེར་ཟ་བ། །ལག་ན་ཐོད་པ་ལེགས་མཛད་པའོ། །ཐམས་ཅད་འཕྲོག་པའི་ཕོ་ཉ་མོ། །མེ་ཡི་མཚམས་སུ་བྲི་བར་བྱ། །རྡོ་རྗེ་ལྕགས་ཀྱུ་ཞགས་པ་མཆོག །དམར་

གནག་དཀའ་ཐུབ་ཆེན་པོ་མའོ། །དེ་ཡི་བྱང་དུ་དཔའ་བོ་ཡིས། །སྒོ་སྐྱོང་སྟོབས་ཆེན་བྲི་བར་བྱ། །རྡོ་རྗེ་འབེབས་མ་ལེགས་དམར་བ། །ལག་མཐིལ་དྲིལ་བུ་དང་ལྡན་པའོ། །དམ་ཚིག་གསུམ་ལྡན་སྤྱན་གསུམ་མ། །རྩེ་གསུམ་རྡོ་རྗེ་འཛིན་པ་མོ། །འཇིགས་པའི་ལུས་ཅན་ཆེར་གསལ་མ། །འོད་ཟེར་དམར་པོ་འབར་བས་འཁྲུགས། །འབར་བའི་མེ་ལྕེའི་ལག་པ་ཅན། །མེ་ཡི་ཕྱོགས་སུ་ཡང་དག་བརྟེན། །ལྷ་མོ་ཆེན་མོ་ཐོག་མ་མ། །ལག་ན་རྡོ་རྗེའི་གཙུབ་ཤིང་ཅན། །དམར་ཞིང་སྔོ་བ་བྲི་བྱ་སྟེ། །ཇི་ལྟ་བ་ཡི་རིམ་པས་སོ། །གདུལ་དཀའ་འདུལ་བའི་ལྷ་མོ་ནི། །སྒོ་སྐྱོང་བ་ཡི་གནས་ན་གནས། །དཔའ་མོ་རྡོ་རྗེ་དབྱུག་གུའི་ལག །བྱིན་ཟ་འབར་བ་དང་མཚུངས་མའོ། །དེ་ནས་བྲན་མོ་བྲི་བར་བྱ། །རང་གི་ཕྱག་རྒྱས་ལག་པ་མཚན། །འཇིག་རྟེན་གསུམ་འཆིང་བྲན་མོ་ནི། །ནུབ་ཏུ་ཡང་དག་བྲི་བར་བྱ། །འཆིང་བ་ཆེན་པོའི་ལག་པ་ཅན། །རབ་དམར་གུར་གུམ་འོད་ཟེར་ཅན། །བྲན་མོ་འཇིགས་པའི་མེ་གདོང་མ། །སྒྲོན་བཅས་ལག་པའི་རྩེ་མོ་མཆོག །རབ་གནག་པ་ལ་ལུས་ཆེན་མོ། །ཆོ་ག་ཇི་བཞིན་རྟག་ཏུ་བྲི། །བྲན་མོ་གཙིགས་ཤིང་རྣམ་འགྱུར་གདོང་། ། འཁྲུག་པའི་ཚུལ་ལ་རབ་འཇིགས་མ། །ལག་ན་ཐོད་པ་རློན་པ་ཅན། །ཤིན་ཏུ་དམར་ཞིང་འོད་ཆེན་མོ། །སྐུ་གསུང་ཐུགས་འཆིང་བྲན་མོ་ནི། །ཤར་དུ་ཡང་དག་བྲི་བར་བྱ། །དཀར་ཞིང་དམར་ལ་ལུས་ཆེ་བ། །ཞགས་པ་ལྕགས་ཀྱུའི་ལག་པ་མཆོག །དེ་ནས་རོལ་པ་མོ་བྲི་བྱ། །གོ་རིམས་ཇི་ལྟ་བ་བཞིན་ནོ། །དེ་བཞིན་གཤེགས་པ་དགྱེས་མ་ནི། །མཛེས་ཤིང་རིན་ཆེན་གྱིས་ཉེར་བརྒྱན། །མདའ་གཞུའི་ལག་ཅན་དམར་བ་མོ། །གོས་དང་ཕྲེང་བ་དམར་པོ་འཛིན། །བྱང་དུ་སྔགས་པས་བྲི་བྱ་བ། །ཀུན་ནས་འབེབས་མ་ཆེ་བའི་མཆོག །མཛེས་པའི་ལག་པ་འཛིན་པ་མོ། །བདེ་བ་འབེབས་ལ་ལེགས་པར་གནས། །འཇིག་རྟེན་གསུམ་འཇོམས་ཁྲོ་མོ་ནི། །རྡོ་རྗེ་རོལ་པ་མོ་ཞེས་བྱ། །དྲག་ཤུལ་ཆེན་པོས་སྡིགས་པར་བྱེད། །མཉམ་པར་བཞག་པས་ཤར་དུ་བྲི། །རབ་ཏུ་དགའ་བ་རྗེས་རྟོག་མ། །

སྔགས་པ་སྤྲོ་བས་རྒྱབ་ཏུ་བྲི། །འདོད་ཆགས་ཕྱག་རྒྱའི་ལག་པ་མ། །འགྲོ་བའི་གཙོ་བོ་མཉེས་པར་མཛད། །དགའ་བྱེད་ཅེས་བྱ་བྲི་བར་བྱ། །ཐམས་ཅད་རྡོ་རྗེ་རོལ་པ་མོ། །དགའ་བོའི་རྩེ་འཇོའི་ལག་ཅན་བཀྲ། །རྒྱན་རྣམས་ཀུན་གྱིས་བརྒྱན་པ་ནི། །སྔགས་པ་ཆོ་ག་ཤེས་པས་བྲི། །རྡོ་རྗེ་ཧཱུྃ་མཛད་ལེགས་གནས་པས། །ཕྱི་རོལ་རྡོ་རྗེ་བྲི་བར་བྱ། །རང་གི་རིག་མ་གཡོན་དུ་གནས། །དབང་པོར་མིག་གསུམ་བྲི་བར་བྱ། །རྡོ་རྗེ་ཅན་གྱི་རྩེ་གསུམ་འཛིན། །གཡས་པ་ཡིས་ནི་ཕྱག་འཚལ་ཞིང་། །རང་གི་ཆུང་མ་སོགས་པས་བསྐོར། ། ཆུ་ལྷར་ཚངས་པ་ཆེན་པོ་ནི། །གདོང་པ་བཞི་པ་བྲི་བར་བྱ། །སྒོ་རུ་སྒོ་བ་ཆེན་པོ་ནི། །རྡོ་རྗེ་ལྕགས་ཀྱུ་སྟོབས་པོ་ཆེ། །ཀུན་ནས་དམར་ཞིང་ཆེར་གཏུམ་པ། །སངས་རྒྱས་མཆོག་ཏུ་སྤྱན་འདྲེན་པའོ། །ལྷོ་རུ་ལེགས་པར་གནས་པའི་མཆོག །ལག་ན་ཞགས་པ་དམ་པ་བྲི། ། སེམས་དཔའ་གྲགས་པ་ཆེན་པོ་དང་། །སངས་རྒྱས་རྣམས་ནི་འཇུག་པར་བྱེད། །འཆིང་བྱེད་དྲག་པོ་ཆེན་པོ་ནི། །བརྟན་པའི་རྡོ་རྗེ་ཡང་དག་བྲི། །བལ་པོ་སེའུ་ཡི་མེ་ཏོག་མཚུངས། །རགས་ཤིང་སྟན་ལས་མི་གཡོ་བའོ། །ནེ་ཙོ་ཁུག་རྟ་དང་མཚུངས་པའི། །མཉེས་བྱེད་མཆོག་ནི་བྲི་བར་བྱ། །སངས་རྒྱས་ཐམས་ཅད་མཉེས་བྱེད་ཅིང་། །རིག་སྔགས་ཕ་རོལ་ཕྱིན་རྣམས་ཀྱང་། །རྡོ་རྗེ་དབྱུག་གུའི་ལག་པ་མཛེས། །ཞི་བ་སོགས་ཀྱིས་ཡོངས་སུ་བསྐོར། །གཤིན་རྗེ་འཁོར་ལོའི་ལག་པ་ནི། །ཤིན་ཏུ་མཛེས་པའི་རྡོ་རྗེས་མཚན། །སེར་པོའི་གོས་འཛིན་གནག་པ་པོ། །མཚོན་ཆ་སོགས་པས་ཡོངས་སུ་བསྐོར། །ལུས་ངན་དུ་ནི་དབང་པོ་བྲི། །རྡོ་རྗེའི་ལག་པ་རབ་ཏུ་མཛེས། །དེ་ནས་མཆོད་པའི་རྣམ་པ་བྲི། །རྡོ་རྗེ་མེ་ཏོག་ཆེན་པོའི་གཟུགས། །ལག་ན་མེ་ཏོག་སྙིམ་པ་མཛེས། །མེ་ཏོག་ཕྲེང་བས་རྣམ་པར་བརྒྱན། ། སྔགས་པས་རྡོ་རྗེ་བདུག་པ་བྲི། །ཡིད་སིམ་བྱེད་པའི་དམ་པ་ནི། །ལག་ན་བདུག་པ་མིག་ཡངས་མ། །འཁུར་ཚོས་ཅུང་ཟད་དཀར་བ་མའོ། །ལྷ་མོ་རྡོ་རྗེ་སྣང་བྱེད་མ། །གསེར་བསྲེགས་པ་ཡི་མདོག་འདྲ་ལ། །ལག་ན་སྒྲོན་མ་མཁས་པས་བྲི། །རྒྱན་རྣམས་ཀུན་གྱིས་

རྣམ་པར་བརྒྱན། །དྲི་ཞིམ་ལུས་ལ་ཆ་ལུགས་བཟང། །ལག་ན་དྲི་ཡི་སྣོད་མཛེས་མ། །ཨུཏྤལ་སྔོན་པོའི་ལོ་མ་མཚུངས། །མཛེས་པའི་གཟུགས་ལ་ཡིད་འཕྲོག་མའོ། །གཟུགས་ཀྱི་རྡོ་རྗེ་མཛེས་པའི་གཟུགས། །རྒྱན་རྣམས་ཀུན་གྱིས་རྣམ་པར་བརྒྱན། །ལག་ན་རྡོ་རྗེ་མེ་ལོང་འཛིན། །འཛུམ་བཅས་དགོད་པའི་དཀྱིལ་འཁོར་ཅན། །སྒྲ་ཡི་རྡོ་རྗེ་སྣ་ཚོགས་ལུས། །དཀར་དང་སྔོ་བའི་ལུས་དང་ལྡན། །པི་ཝང་གླིང་བུ་ཏིང་ཏིང་སོགས། །སྒྲོགས་པ་ཤེས་རབ་ཅན་གྱིས་བྲི། །རོ་ཡི་རྡོ་རྗེ་སྐལ་ཆེན་མོ། །ལག་ན་རོ་ཡི་སྣོད་འཛིན་པ། །རྒྱན་རྣམས་ཐམས་ཅད་ཡང་དག་རྫོགས། །མཚན་ཉིད་ཀུན་དང་ཡང་དག་ལྡན། །རྡོ་རྗེ་རེག་བྱ་སྔོ་བསངས་ཆེ། །ཆུ་སྐྱེས་སྔོན་པོ་འདབ་འདྲའི་མིག །རྣམ་པར་གསལ་ཞིང་ཆེར་དགོད་པ། །རང་གི་དཔུང་པ་བསྡམས་པ་མོ། །བཞད་པའི་རྡོ་རྗེ་བོད་བཅས་པ། ། རྣལ་འབྱོར་པས་ནི་མདོར་བསྡུས་ཏེ། །བྲི་བྱ་སྣ་ཚོགས་གོས་འཛིན་དཀར། །རྒྱན་རྣམས་ཐམས་ཅད་འཛིན་པ་མའོ། །རྡོ་རྗེ་སྒེག་མོ་དཀར་མོ་ཆེ། །སྒེག་དང་བཅས་ཤིང་ཡིད་དུ་འོང་། །རྐེད་པར་ཁུ་ཚུར་གཉིས་བཞག་ཅིང་། །མཛེས་པའི་ཕྲེང་བའི་ཆུན་པོ་བཙུགས། ། རྡོ་རྗེ་གླུ་མཁན་ལེགས་དམར་ལུས། །གླུ་ལེན་པ་ལ་རབ་ཏུ་བརྩོན། །ཆུ་སྐྱེས་དམར་པོ་རྒྱས་འདྲའི་བཞིན། །གླུ་ལེན་ལག་པ་རབ་ཏུ་མཛེས། །རྡོ་རྗེ་གར་མ་མཁས་པས་བྲི། །གར་དང་བཅས་པའི་ལག་པ་ཅན། །སྔོ་བསངས་དཀར་པོ་ཆེར་དཀར་བ། །མིག་ཆེ་བ་ལ་འཛུམ་བཅས་མཆོག །རྡོ་རྗེ་སིལ་སྙན་དྲག་མོ་ཆེ། །དུར་དུ་ར་ཡི་རྔ་མཛེས་རྡུང་། །རྡོ་རྗེ་རྔ་ཆེན་ལྷ་མོ་ཆེ། །རྔ་ཆེན་རྡུང་བ་བྲི་བར་བྱ། །རྫ་རྔ་མ་ནི་མཁས་པས་བྲི། །རྫ་རྔ་རྡུང་བར་བྱེད་པ་མོ། །ལྷ་མོ་མུ་ཀུཎྜ་རྡུང་མ། །མུ་ཀུཎྜ་མ་བཞིན་མཛེས་མའོ། །པ་ཊ་ཧ་ནི་རྡུང་བྱེད་མ། །རྡོ་རྗེ་པ་ཊ་ཧ་ཞེས་བྱ། །རྫ་རྔ་ཆེན་པོ་རྡུང་བྱེད་མ། །རྡོ་རྗེ་རྫ་རྔ་མཛེས་མ་བྲི། །གུཉྫ་རྡུང་བྱེད་དགའ་བ་མོ། །དགོད་བཅས་པདྨའི་མིག་ཅན་མ། །རྡོ་རྗེ་གུཉྫ་དཔའ་བོས་བྲི། །ལས་ཀུན་གྱི་ནི་དམ་པ་འགྲུབ། །ལག་ན་རྡོ་རྗེ་ཏིང་ཏིང་ཤག །རྡོ་རྗེ་ཏིང་ཏིང་ཤག་བྲི་

བྱ། །ལག་ན་རྡོ་རྗེ་ཅང་ཏེ་མ། །ཁ་དོག་དཀར་མོ་འོད་ཟེར་ཆེ། །འཁར་རྔ་རྡུང་བའི་ལག་པ་ཅན། །རྡོ་རྗེ་འཁར་རྔ་མ་བྲི་བྱ། །རྒྱུད་གཅིག་པི་ཝང་སྦྲེང་བ་བྲི། །རྡོ་རྗེ་པི་ཝང་སྦྲེང་བ་མོ། །པི་ཝང་རྒྱུད་གསུམ་སྦྲེང་བའི་རྒྱ། །པི་ཝང་རྒྱུད་གསུམ་སྦྲེང་བ་བྲི། །རྡོ་རྗེ་འཁར་ཁྲོལ་ལྷ་མོ་ཆེ། །དམར་པོ་ཡི་ནི་གོས་བགོས་པའོ། །རྡོ་རྗེ་གླིང་བུ་རྣལ་འབྱོར་པས། །གླིང་བུ་འབུད་པ་ལྡན་པ་བྲི། །རྡོ་རྗེ་པི་ཝང་སྐལ་ཆེན་མ། །པི་ཝང་སྦྲེང་ལ་རབ་སྤྲོ་བའོ། །རྡོ་རྗེ་འབུད་དུང་འབད་པས་བྲི། །དུང་དཀར་འབུད་པའི་རང་བཞིན་ཅན། །དུང་མ་ལག་ན་ཟངས་དུང་འཛིན། །འདོད་པའི་གཟུགས་མཆོག་འཛིན་པ་མོ། །རྒྱལ་བའི་དྲིལ་བུས་ལག་པ་མཛེས། །ཁྲོལ་བ་ཡང་དག་བྲི་བར་བྱ། །ལེགས་སྤྲོ་བ་ལ་གཟི་བརྗིད་ཆེ། །རྣམ་པར་རྒྱལ་ལ་སྦྲོ་བྱེད་མའོ། །པདྨ་གར་གྱི་དབང་ཕྱུག་དམར། །པདྨ་དམར་པོ་ཁ་འབྱེད་མ། །གར་གྱི་སྒྱུ་མས་རབ་གནས་པའི། །ལག་པ་སྟོང་ལྡན་བྲི་བར་བྱ། །རིན་ཆེན་གར་མ་ལྷ་མོ་ཆེ། །གར་གྱི་བདག་ཉིད་ལེགས་པར་བྲི། །ལག་ན་རིན་ཆེན་སྙེ་མ་ཅན། །ལག་པ་དུ་མ་གདོང་བརྒྱ་པའོ། །རྡོ་རྗེ་གར་མ་བསྙེམས་བཅས་མ། ། ལུས་མཆུ་བ་དན་དང་ལྡན་པ། །རྣལ་འབྱོར་པས་ནི་ཆོ་ག་བཞིན། །རྡོ་རྗེ་སྦྱོར་བས་རབ་གནས་བྲི། །སྣ་ཚོགས་གར་མ་སྐལ་ཆེན་མོ། །རྡོ་རྗེ་ཐལ་མོ་སྤྱི་བོར་འཇོག །འཛུམ་བཅས་པ་ལ་མིག་མཛེས་མའོ། །སྣ་ཚོགས་སྒྱུ་མ་ལེགས་སེམས་མ། །སྨིན་མ་སྒྱུར་བའི་མིག་མཛེས་མ། །སྤྲོས་བཅས་གདོང་གི་རྣམ་འགྱུར་ཅན། །མཐོང་ན་དགའ་མ་འཛུམ་པའི་བཞིན། །གདོང་གི་དཀྱིལ་འཁོར་སྔོ་བསངས་མཆོག །རྡོ་རྗེ་མཐོང་མ་སྐལ་ཆེན་མོ། །རབ་ཏུ་དགོད་ཅིང་མིག་རྒྱས་མའོ། །རྣལ་འབྱོར་ཆེན་པོས་བྲི་བྱ་བ། །རྣལ་འབྱོར་མིག་གིས་ལྟ་བ་མོ། ། རབ་ཏུ་གསལ་བས་འཁྲུགས་པ་ཅན། །འཁོར་ལོ་སྐོར་བ་ལྟར་བྱེད་མ། །སྙིང་གར་ལག་པ་འཇོག་པ་ནི། །སྡིག་པ་མ་ལུས་འཇོམས་པར་བྱེད། །རྫི་མར་བཅས་པའི་མིག་གཉིས་ནི། །སྟེང་དང་འོག་ཏུ་འཕགས་པ་ཡིས། །མཐོང་བ་འགུགས་བྱེད་བདེ་ཆེན་གྱིས། །སངས་

རྒྱས་ཐམས་ཅད་དབང་དུ་བྱེད། །སྒོ་རུ་སྒོ་བ་ཆེན་པོ་ནི། །རྡོ་རྗེ་ལྕགས་ཀྱུ་སྟོབས་པོ་ཆེ། །ཐམས་ཅད་སྲུང་ཞིང་ཆེར་གཏུམ་པ། །སངས་རྒྱས་མཆོག་ཏུ་སྤྱན་འདྲེན་པའོ། །སྒོ་རུ་ལེགས་པར་གནས་པའི་མཆོག །ལག་ན་ཞགས་པ་དམ་པ་བྲི། །སེམས་དཔའ་གྲགས་པ་ཆེན་པོ་དང་། །སངས་རྒྱས་རྣམས་ནི་འཇུག་པར་བྱེད། །འཆིང་བྱེད་དྲག་པོ་ཆེན་པོ་ནི། །བརྟན་པའི་རྡོ་རྗེ་ཡང་དག་བྲི། །བལ་པོ་སེའུ་ཡི་མེ་ཏོག་མཚུངས། །རགས་ཤིང་རྣམ་པར་གཡོ་བའི་གདོང་། །ནེ་ཙོ་ཁུག་རྟ་དང་མཚུངས་པའི། །མཉེས་བྱེད་མཆོག་ནི་བྲི་བར་བྱ། །རིག་སྔགས་ཕ་རོལ་ཕྱིན་རྣམས་དང་། །སངས་རྒྱས་ཐམས་ཅད་མཉེས་པར་བྱེད། །དབང་པོར་གཞོན་ནུ་བྲི་བར་བྱ། །གཤིན་རྗེར་གཤིན་རྗེ་ཉིད་ཡིན་ནོ། །ཆུ་ལྷར་ཆུ་ལྷ་བྲི་བར་བྱ། །ལུས་ངན་པོ་ནི་བྱང་ཕྱོགས་སུ། །འདི་དག་བསྡུས་ཏེ་བྲི་བར་བྱ། ། འཁོར་གྱིས་མདུན་དུ་བདར་བའོ། །ཕྱི་རུ་དམྱལ་བ་བརྒྱད་པོ་བྲི། །ཡི་དགས་ཀྱང་ནི་ཐམས་ཅད་དུ། །རྡོ་རྗེ་ཧཱུྃ་མཛད་ལ་གནས་པ། །སྔགས་པས་ཆོ་ག་བཞིན་བྲིས་ཏེ། །ཕྱི་ཡི་རྡོ་རྗེ་བྲི་བར་བྱ། །རང་གི་རིག་མ་གཡོན་དུ་གནས། །དང་པོར་མིག་གསུམ་ལེགས་པར་བྲི། །རྡོ་རྗེ་ཅན་གྱི་རྩེ་གསུམ་འཛིན། །གཡས་པ་ཡིས་ནི་ཕྱག་འཚལ་ཞིང་། །རང་གི་ཆུང་མ་སོགས་པས་བསྐོར། །ཆུ་ལྷར་ཚངས་པ་ཆེན་པོ་ནི། །གདོང་པ་བཞི་པ་བྲི་བར་བྱ། །རྡོ་རྗེ་དབྱུག་གུའི་ལག་པ་མཆོག །ཞི་བ་ལ་སོགས་རྣམས་ཀྱིས་བསྐོར། །གཤིན་རྗེར་འཁོར་ལོའི་ལག་པ་ཅན། །རྡོ་རྗེས་མཚན་ཅིང་རབ་ཏུ་མཛེས། །སེར་པོའི་གོས་འཛིན་གནག་པ་པོ། །དཔལ་མོ་ལ་སོགས་རྣམས་ཀྱིས་བསྐོར། །ལུས་ངན་དུ་ནི་དབང་པོ་བྲི། །རྡོ་རྗེའི་ལག་པ་རབ་ཏུ་མཛེས། །མིག་སྟོང་པ་ནི་ཆེ་བའི་ལུས། །བདེ་སོགས་སོགས་ཀྱིས་མདུན་དུ་བདར། །དབང་ལྡན་དུ་ནི་དབང་ལྡན་བྲི། །མེ་ཡི་ཕྱོགས་སུ་མེ་ལྷའོ། །བདེན་བྲལ་དུ་ནི་བདེན་བྲལ་གྲགས། །རླུང་དུ་རླུང་ལྷ་ཉིད་ཡིན་ནོ། །ཤར་གྱི་སྒོ་རུ་དཔུང་བཟང་བྲི། །མུཎྜ་ཊ་ནི་ནུབ་ཏུའོ། །ལུས་ངན་དུ་ནི་གྲུབ་པ་བྲི། །ལྷོ་རུ་བདུད་རྩི་འཁྱིལ་

པའོ། །ཆོ་ག་འདིས་ནི་སྔགས་ཤེས་པས། །དཀྱིལ་འཁོར་བཟང་པོ་བྲིས་ནས་སུ། །སངས་རྒྱས་ཐམས་ཅད་དགུག་པར་བྱ། །ཡབ་ཡུམ་གཙོ་བོ་དམ་པ་རྣམས། །ཆོ་ག་ཇི་བཞིན་སྔགས་པས་གཞུག །དཀྱིལ་འཁོར་ལ་ནི་དཀྱིལ་འཁོར་བདག ། རྡོ་རྗེ་ལྕགས་ཀྱུའི་ལག་པ་ཡིས། །ཆོ་ག་ཇི་བཞིན་བདག་བརྒྱན་ཏེ། །རྡོ་རྗེ་སེམས་དཔར་བསྙེམས་བྱས་ནས། །སྙེམས་དང་བཅས་པས་ལངས་ནས་སུ། །གསང་བའི་སེམས་དཔའ་དབང་བསྐུར་ཏེ། །འདི་ཡིས་སྤྱན་ནི་མྱུར་དུ་དྲང་། །ཡབ་དང་ཡུམ་བཅས་སངས་རྒྱས་སྲས་བཅས་པ། །བྲན་དང་གཉེན་བཅས་ཉེ་དུ་དང་བཅས་ཤིང་། །དཔལ་མཆོག་རྡོ་རྗེ་སེམས་དཔའ་ཡོངས་མཉེས་པའི། །ལྷ་དང་ལྷ་མོས་ལེགས་བསྐོར་འདིར་གཤེགས་ཤིག །གླུ་འདི་ཡིས་ནི་བསྐུལ་བ་ཡིས། །དེ་བཞིན་གཤེགས་པ་ཐམས་ཅད་བྱོན། །བྱོན་ནས་དངོས་གྲུབ་ཆེན་པོ་ནི། །སྒྲུབ་པ་པོ་ལ་སྩོལ་བར་འགྱུར། །ཡང་ན་མཚན་མ་གནང་འགྱུར་ཏེ། །འབབ་པའམ་སྣང་བ་བལྟ་བར་བྱ། །གལ་ཏེ་བསོད་ནམས་རབ་དམན་ན། །དེ་ཡིས་ཅི་ཡང་མཐོང་མི་འགྱུར། །དེ་ནས་སླར་ཡང་གསོལ་བ་གདབ། །ཡང་དང་ཡང་དུ་བསྐུལ་བར་བྱ། །ལྷ་ཡི་རྣལ་འབྱོར་དེ་ཉིད་ཀྱིས། །ང་རྒྱལ་ཡང་དང་ཡང་བྱས་ཏེ། །མཆོད་པ་ཤིན་ཏུ་ཆེན་པོ་བྱ། །དེ་ནས་མཆོད་ཡོན་ཞབས་བསིལ་ཡང་། །གསང་བའི་དེ་ཉིད་ཀྱིས་བསྐུལ་ཏེ། །སྔགས་ཀྱི་དེ་ཉིད་རིག་པས་དབུལ། །སངས་རྒྱས་ཀུན་བདག་ཕྱག་ན་རྡོ་རྗེ་ནི། །མཛེས་པའི་ཤེས་རབ་ཀྱིས་འཁྱུད་སྦྱོར་ལྡན་པས། །ཡབ་ཡུམ་སྲས་བཅས་འཁོར་བཅས་ཕོ་ཉ་སོགས། །བྲན་བཅས་སྐྱེ་བོའི་ཚོགས་ཀྱིས་བསྐོར་ནས་བྱོན། །སེམས་ཅན་ཀུན་ལ་ཕན་དགྱེས་པ། །ཁྱོད་ལ་བདག་ཉིད་ཞུ་བ་བགྱིད། །འདི་ནི་ཁྱོད་ཀྱི་དུས་ལགས་པས། །སེམས་ཅན་དོན་མཆོག་མཛད་དུ་གསོལ། །གསོལ་བ་བཏབ་ཅིང་བསྐུལ་བས་ཀྱང་། །གལ་ཏེ་མཚན་མ་བྱུང་གྱུར་ན། །རྡོ་རྗེ་སེམས་དཔའི་རྣལ་འབྱོར་ནི། །དེ་ཚེ་སློབ་མ་འབད་པས་བསྒོམ། །རྡོ་རྗེ་པདྨའི་ཡན་ལག་བཅིང་། །སྦྱོར་བས་དཀྱིལ་འཁོར་ཉིད་དུ་

གཞུག །དེ་ནས་སྒོ་རུ་མཁས་པས་བཞག །དམ་ཚིག་དམ་པ་ཉན་དུ་གཞུག །མ་དང་སྲིང་མོ་ཉིད་དང་ཡང་། །དེ་བཞིན་བུ་མོ་དག་ཀྱང་ནི། །སོམ་ཉི་རྣམ་པར་བྲལ་སེམས་ཀྱིས། །ཁྱོད་ཀྱིས་རྟག་ཏུ་བསྟེན་པར་བྱ། །སེམས་ཅན་ཐམས་ཅད་གསད་བྱ་ཞིང་། ། བརྟུལ་ཞུགས་སྤྱོད་པ་བསྐྱང་བར་བྱ། །འཇུངས་པ་རྣམས་ཀྱི་ནོར་ཕྲོགས་ཏེ། །སྐྱེ་བོ་སྡུག་བསྔལ་ཅན་ལ་སྦྱིན། །རྡོ་རྗེ་རྣལ་འབྱོར་མི་སྦྱོར་བས། །ཡང་ན་བདག་ཉིད་ཀྱིས་ཀྱང་སྤྱད། །དཀོན་མཆོག་གསུམ་ལ་མཆོད་བྱ་ཞིང་། །བླ་མ་ལ་ནི་གུས་པར་བྱ། །བརྫུན་གྱི་ཚིག་ཀྱང་སྨྲ་མི་བྱ། །ཆང་ནི་བཏུང་བར་མི་བྱའོ། །དམ་ཚིག་དུས་ནི་མ་གཏོགས་ཤིང་། །བྱིན་གྱིས་བརླབས་པའི་དམ་ཚིག་དང་། །གཞན་ཡང་བདེ་བར་བྱ་ཕྱིར་དང་། །སློབ་དཔོན་མཉེས་པར་བྱ་དོན་དང་། །དཀོན་མཆོག་གསུམ་ལ་ཕན་པའི་ཕྱིར། །རྫུན་གྱི་ཚིག་ནི་རྟག་ཏུ་སྨྲོས། །གཞན་གྱི་བུད་མེད་བགྲོད་པར་བྱ། །དམ་ཚིག་དོན་དུ་སྦྱོར་ལྡན་པས། །གཞན་པ་ཡང་ནི་ཐམས་ཅད་ཀྱང་། །སེམས་ཅན་དོན་ལ་བརྩོན་པས་བྱ། །གསང་བའི་དམ་ཚིག་འདི་དག་ནི། །བློ་གྲོས་ལྡན་པས་བསྒྲག་མི་བྱ། །དམ་ཚིག་ལྡན་པ་མ་གཏོགས་པ། བླ་མའི་བཀའ་གནང་སྔགས་པ་ཡིས། །སངས་རྒྱས་ཀུན་གྱི་གསང་ཆེན་པོ། །ལག་ན་རྡོ་རྗེས་བྱིན་བརླབས་པ། །གལ་ཏེ་རྨོངས་པའི་བདག་ཉིད་ཀྱིས། །དམ་ཚིག་དམ་པ་འདི་འདས་ན། །རྡོ་རྗེ་རྡོ་རྗེའི་མངའ་བདག་ཆེ། །རྒྱལ་པོ་འདིས་ནི་ངེས་པར་གསོད། ། ཀུན་ནས་འབར་བའི་རྡོ་རྗེ་ཡིས། །ལུས་ཀྱི་སྤྱི་བོ་འགེམས་པར་འགྱུར། །དེ་ནས་འདི་ཡིས་མེ་ཏོག་གི། །ཕྲེང་བ་བཟང་པོ་དོར་བར་བྱ། །ཨོཾ་སརྦ་ཏ་ཐཱ་ག་ཏ་མཱ་ཏཱ་པི་ཏྲིྃ་པ་ཏི་མ་ཧཱ་སུ་ཁ་ས་མནྟ་བྷ་དྲ་པྲ་ཏཱིཙྪི་དྃ་པུཥྤཉྫ་ལིྃ་མྲྀ་དུ་ཛཿཧཱུྃ་བོ་ཧོཿབྷ་ག་ཝན་མ་ཧཱ་སུ་ཁ་ས་མནྟ་བྷ་དྲ་ས་མ་ཡ་སྟྭྃ་ས་མ་ཡོ྅་ཧྃ། འདི་ཡིས་བཟུང་སྟེ་མྱུར་བ་རུ། །རྡོ་རྗེ་སེམས་དཔའ་སྙིང་རྗེ་ཆེ། །དེ་ནི་བླངས་ཏེ་སྤྱི་གཙུག་ཏུ། །བློ་གྲོས་བཟང་པོས་བཅིང་བར་བྱ། །སྔགས་པའི་རྒྱལ་པོས་སྔགས་འདི་ཡིས། །དེ་ནས་མིག་ནི་རབ་ཏུ་དབྱེ། །ཨོཾ་བཛྲ་ཛཱ་ན་མ་ཧ་ནེ་ཏྲ་ཨུདྡྷ་ཊ་ཡ་ཏི་ཙཀྵུ་ཥི།

མགོན་པོ་ཆེན་པོ་ལྟོས་ཤིག་བུ། །སངས་རྒྱས་ཀུན་གྱི་བདག་པོ་མཆོག །ཡེ་ཤེས་ཆེན་པོ་ཀུན་གྱི་མཆོག །རྡོ་རྗེ་སེམས་དཔའ་བདེ་ཆེན་པོ། །རིམ་པ་ཇི་བཞིན་ལེགས་བསྟན་ཏེ། །དབང་བསྐུར་ཕྱིར་ནི་གསོལ་བ་གདབ། །དབང་བསྐུར་བ་ནི་ཡིད་འོང་བ། །སྐལ་བ་ཆེན་པོ་བདག་ལ་གསོལ། །གསང་བ་ཡི་ནི་རྒྱན་ཞེས་པར། །རྒྱལ་བས་གང་སྔོན་བཀའ་སྩལ་པ། །གསང་བའི་སྦྱོར་དེ་བདག་ལ་ནི། །རྒྱལ་བ་ཀུན་དངོས་སྩལ་དུ་གསོལ། །དེ་བཞིན་དཀྱིལ་འཁོར་བུམ་པ་ཡིས། །དེ་བཞིན་དབང་བསྐུར་སྦྱིན་པར་བྱ། ། སློབ་མ་ཆེན་པོ་རྣམ་པ་ལྔ། །དེར་ནི་སྦྱོར་བས་བོས་ནས་སུ། །གསང་བའི་རྒྱན་ཞེས་བྱ་བ་ཡིས། །དངོས་གྲུབ་ཤེས་པས་དབང་བསྐུར་རོ། །གསང་བའི་སྦྱོར་བའི་རྣམ་འཕྲུལ་གྱིས། །དེར་ནི་མཆུ་ཡིས་ལེགས་བཟུང་སྟེ། །ལྕེ་ཡི་རྩེ་མོ་མཁས་པས་སྦྱར། །རྡོ་རྗེའམ་ཡང་ན་ཆུ་སྐྱེས་ཀྱིས། །ཕྱག་རྒྱ་དང་ནི་ཕྱག་རྒྱའི་ལན། །དེ་ནས་འཛིན་མ་རྣམ་པར་སྦྱིན། །དེ་ཉིད་ལ་ཡང་མཁས་པས་སྦྱིན། །གསང་བ་རྒྱན་གྱི་སྦྱོར་བ་ཡིས། །གསང་བའི་བདེ་བ་བསྒྲུབ་པར་བྱ། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །དེ་ནས་ཡོན་ནི་དབུལ་བར་བྱ། །བླ་མར་ཕྱག་འཚལ་མཆོད་བྱས་ནས། །མ་དང་བུ་མོ་ཉིད་དང་ཡང་། །སྲིང་མོ་ཡི་ནི་བུ་མོ་དང་། །སྲིང་མོའམ་ཡང་ན་ཆུང་མ་དང་། །རྒྱལ་པོ་ལོངས་སྤྱོད་སྐྱེ་བོའི་ཚོགས། །གྲོང་དང་ཡུལ་འཁོར་གྲོང་ཁྱེར་དང་། །ནོར་དང་རིན་ཆེན་ལ་སོགས་དང་། །གཞན་ཡང་ཅི་དང་ཅི་འདོད་པ། ། མཁོ་བའི་ལོངས་སྤྱོད་གུས་པ་ཡིས། །བླ་མའི་ཞབས་ལ་ཕྱག་འཚལ་ཏེ། །དངོས་གྲུབ་ཀུན་གྱི་དོན་གྱི་ཕྱིར། །དཀྱིལ་འཁོར་པ་ཡང་ལེགས་པར་མཆོད། །ཕ་དང་སྤུན་ཡང་མཆོད་པར་བྱ། །དེ་བཞིན་སྤུན་ཟླའི་བུ་ཡང་མཆོད། །བཟའ་བཏུང་ཡིད་དུ་འོང་བ་དང་། །གོས་དང་རྒྱན་དང་མེ་ཏོག་དང་། །དེ་བཞིན་དྲི་དང་བདུག་པ་སོགས། །ཇི་ལྟར་བདོག་པ་ཐམས་ཅད་ཀྱིས། །མཆོད་པར་བྱས་ཏེ་གཏང་བར་བྱ། །ལྷ་རྣམས་དག་ནི་ཐམས་ཅད་ལ། །དེ་བཞིན་དུ་ནི་མཆོད་པར་བྱ། །གསང་སྔགས་རྒྱལ་པོ་གཤེགས་སུ་གསོལ། །བཛྲ་མུཿཞེས་

བརྗོད་པས་གཤེགས། །དེ་ནས་སྔགས་པས་སློབ་མའི་མཆོག་དེ་ལ། །གསང་བ་རྣམ་པར་འཛིན་ལ་གསང་བ་ཡི། །རྒྱལ་པོས་གསལ་མཛད་རྒྱལ་བའི་གསང་བདག་གིས། །གསང་བ་མཐའ་དག་ལེགས་པར་བསླབ་པར་བྱ། །གསང་བའི་ཕྱག་རྒྱ་མིག་ཡངས་མ། །བློ་གྲོས་བརྟན་པས་བསྒྲུབ་པར་བྱ། །རང་བྱིན་བརླབ་པའི་རིམ་པ་ཡིས། །ཤེས་རབ་ཀྱིས་ནི་བྱིན་གྱིས་བརླབ། །བདག་ཉིད་སེམས་དཔར་ལེགས་བསྒོམས་ཏེ། །གསང་བ་རྒྱན་གྱི་སྦྱོར་བ་ཡིས། །ཉི་མ་བདུན་གྱིས་ལེགས་འགྲུབ་པར། །འགྱུར་བ་འདི་ལ་ཐེ་ཙོམ་མེད། །ལྷ་མོ་ཤེས་རབ་ཆེ་དེ་ཡང་། །རང་ཉིད་རྡོ་རྗེ་འཆང་གཙོ་སྟེ། །ནམ་མཁའ་ཀུན་གྱི་མཆོག་དཔའ་བོ། །རྒ་དང་འཆི་བ་མེད་པར་འགྱུར། །འདོད་པའི་དབང་ཕྱུག་རྣལ་འབྱོར་ཆེ། །བདག་ཉིད་འདོད་པར་བསྒོམ་པ་ཡིས། །འདོད་པའི་ལོངས་སྤྱོད་འགྲུབ་པར་འགྱུར། །འདོད་པའི་དབང་ཕྱུག་གཙོ་བོ་སྟེ། །དེ་ཡང་འདོད་པའི་དབང་ལྷ་མོར། །འགྲུབ་འགྱུར་འདི་ལ་ཐེ་ཚོམ་མེད། །འདོད་པའི་ཁམས་ཀྱི་དབང་ཕྱུག་ཀུན། །བྲན་དང་འདྲ་བར་འཁོལ་བར་འགྱུར། །ནམ་མཁའི་དཀྱིལ་འཁོར་ཡིད་འོང་བར། །མཁའ་འགྲོའི་ས་བོན་བསྒོམ་པར་བྱ། །དེ་ནི་སྦྱོར་བས་སྤྲོས་ནས་སུ། །རང་གི་སྙིང་གར་གཞུག་པར་བྱ། །བཅུག་ནས་རིན་ཆེན་ཆེན་པོ་ནི། །སྲིད་པ་འཇོམས་པར་བསྒོམ་པར་བྱ། །ཡིད་བཞིན་རིན་ཆེན་རང་བཞིན་མཛེས། །ཉི་མ་བདུན་ན་དེ་འགྱུར་རོ། །འདམ་སྐྱེས་དམར་པོའི་དབུས་སུ་ནི། །འབད་པས་ཀུན་ནས་དྲི་ཡིས་དགང་། །དྲི་ཡི་དབང་ཕྱུག་རྒྱལ་པོ་ཆེ། །བདག་ཉིད་སེམས་དཔའ་ཡིད་ཆེས་བསྒོམ། །དེ་ནས་མྱུར་དུ་བློ་ལྡན་ཏེ། །དྲི་ཟའི་བདག་པོའི་བདག་པོར་འགྱུར། །དྲི་ཡིས་མྱུར་བ་ཉིད་དུ་ནི། །བརྟན་དང་གཡོ་བའི་དུག་འགུགས་བྱེད། །དོན་ཡོད་ཀྱི་ནི་དཀྱིལ་འཁོར་དུ། །སྙིང་པོ་སྙིང་གི་སྦྱོར་བ་བསམ། །ཡིད་ལ་བསམས་པའི་དངོས་གྲུབ་འགྱུར། །དེ་ཡི་ཕྱག་རྒྱའང་དེ་དང་མཚུངས། །རིན་ཆེན་གྱི་ཡང་རིན་ཆེན་ཆེ། །རིན་ཆེན་གྱི་ནི་མིག་འོད་གསལ། །དེ་བཞིན་དྲི་དང་ལྡན་པ་ནི། །སྒྲུབ་པ་པོ་ཡིས་འགྲུབ་པར་འགྱུར། །དེ་ལ་སོགས་པའི་དབྱེ་བ་ཡིས། །ལྷ་

གཞན་དག་ཀྱང་རིག་པར་བྱ། །དཀྱིལ་འཁོར་རམ་ནི་དམ་ཚིག་ཀྱང་། །བསྒོམས་པས་མྱུར་དུ་འགྲུབ་པར་འགྱུར། །སྙིང་པོ་སྔགས་དང་ཕྱག་རྒྱ་དང་། །རིག་སྔགས་ཀྱི་ཡང་སྦྱོར་བ་ཡིས། །དེ་རྣམས་ཀྱིས་ནི་དེ་ཉིད་ནི། །བསྒོམས་ན་མྱུར་དུ་ངེས་པར་འགྲུབ། །འདི་ནི་བཅོམ་ལྡན་རྣལ་འབྱོར་ཅན། །གསང་བ་རྒྱན་བདག་དམ་པས་གསུངས། །ཕྱག་རྒྱ་བཞི་ཡི་མཆོག་གི་མཆོག །ཕྱག་རྒྱ་ཐམས་ཅད་འགྲུབ་པར་འགྱུར། །ཞེས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཡབ་དང་། ཡུམ་དེ་རྣམས་ཀྱིས་གསོལ་པ། མྱུར་དུ་སྦྱོར་བ་མཆོག་བསྒྲུབས་པས། །སྒྲུབ་པ་པོས་ནི་ཇི་ལྟར་འགྲུབ། །དེ་དག་ཐམས་ཅད་མྱུར་དུ་གསུངས། །བཅོམ་ལྡན་རྡོ་རྗེ་འཆང་བདག་གིས། །སྙིང་པོ་སྔགས་དང་ཕྱག་རྒྱ་དང་། །རིག་སྔགས་ཀྱང་ནི་ལེགས་པར་སྒྲུབ། །བཙུན་མོ་མཆོག་གི་གནས་དབང་ཕྱུག །དཔའ་བོ་ཆེན་པོས་གསུང་དུ་གསོལ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་རྒྱལ་བ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་དེ་བཞིན་གཤེགས་པ་ཐམས་ཅད་ཀྱི་ཡབ་དང་ཡུམ་རྣམས་ཀྱི་ཞུ་བའི་ཚིག་རྡོ་རྗེ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་རྣམ་པར་ཕྱུང་ངོ་། །ལྷ་རྣམས་ཀྱི་ནི་སྙིང་པོ་དང་། །སྔགས་དང་ཕྱག་རྒྱ་དེ་བཞིན་དུ། །དཀྱིལ་འཁོར་དུ་ནི་ལེགས་པར་བཤད། །ཇི་ལྟར་སྔོན་དུ་ཁ་དོག་སོགས། །དེ་ནས་དེ་བཞིན་གཤེགས་པ་ཐམས་ཅད་ཀྱིས་སླར་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུང་དུ་གསོལ། །སེམས་ཅན་རྣམས་ལ་ཕན་བདེའི་ཕྱིར། །རྣལ་འབྱོར་མ་ཡི་ཕྱག་རྒྱ་དང་། །མཚན་མ་ལ་སོགས་དམ་པ་རྣམས། །དེ་ནས་བཅོམ་ལྡན་ཀུན་ཏུ་བཟང། །རྡོ་རྗེ་དམ་པ་གསོར་མཛད་ནས། །ལག་པའི་མཚན་མ་བཀའ་སྩལ་པ། །གང་གིས་ལྷ་རྣམས་མཚོན་འགྱུར་བའོ། །ལག་པ་ཟླ་བ་ཉི་མ་རུ། །མཁས་པ་ཡིས་ནི་བསམ་པར་བྱ། །ཤེས་རབ་ཐབས་ཀྱི་ས་བོན་ནི། །རྣལ་འབྱོར་ཅན་གྱིས་རྟག་ཏུ་སྤྲོ། །སླར་ཡང་སྡུད་པའི་སྦྱོར་བ་

ཡིས། །རྡོ་རྗེ་པདྨར་རྣམ་བསམ་བྱ། །དེ་ནས་ཤེས་རབ་ཕ་རོལ་ཕྱིན། །སོར་མོའི་རྩེ་རྨོར་དགོད་པར་བྱ། །དེ་ཉིད་སྦྱོར་བས་བསྡུས་ནས་སུ། །ཕན་ཚུན་ངེས་པར་སྦྱར་བར་བྱ། །རྡོ་རྗེ་པདྨ་མཉམ་སྦྱར་བའི། །བདེ་བ་མྱངས་པས་འགྲུབ་པར་འགྱུར། །འཆིང་བ་ཆེན་པོས་བཅིངས་ནས་སུ། །ལྷ་མོའི་ས་བོན་གྱིས་མཚན་པའི། །གསང་སྔགས་རྒྱལ་པོ་སྔགས་རིག་པས། །ཡང་དང་ཡང་དུ་བྱིན་གྱིས་བརླབ། །བཅངས་ཏེ་འོད་ལྡན་རྣམ་པ་གཉིས། །བརྐྱངས་ནས་རྩེ་མོ་སྦྱར་བར་བྱ། །དེ་འདི་སྙིང་པོ་ཞེས་བྱ་བའོ། །གཉིས་པ་གྲགས་པ་ལྡན་པ་ཡིན། །སྙིང་པོ་ཡིས་ནི་མཚན་བྱས་ནས། །རིམ་གྱིས་སྙིང་གར་བསྐོར་བར་བྱ། །རྡོ་རྗེ་མཉམ་པར་སྦྱར་བྱས་ཏེ། །དེར་ནི་བཅིངས་པ་གཞུག་པར་བྱ། །འདི་ནི་དམ་ཚིག་ངེས་བྱ་སྟེ། །དམ་ཚིག་མ་ལུས་སྒྲུབ་པར་བྱེད། །འདི་ཡིས་ལྷ་མོ་མཐའ་ཡས་ཞལ། ། ཐམས་ཅད་དུ་ནི་ངེས་པར་འགྲུབ། །དེ་ཉིད་བསྡིགས་པ་ལྟ་བུར་སྦྱར། །ལས་ཀུན་བྱེད་པའི་མཆོག་ཏུ་འགྱུར། །རྡོ་རྗེ་གཉིས་ནི་པདྨ་ཡི། །སྦྱོར་བར་བསྟན་པ་མཆོག་ཏུ་རྨད། །དེ་ལས་ཕྱི་རོལ་བསྐུམས་པ་ནི། །གསུམ་པ་རུ་ནི་འགྱུར་བ་ཡིན། །སྙིང་ག་རུ་ནི་སྙིང་པོ་བསམ། །སྙིང་དགའ་བྱེད་པ་ཞེས་བྱར་བརྗོད། །རྡོ་རྗེ་གཉིས་པོ་དེ་བཞིན་སྦྱར། །དམ་ཚིག་བདག་བྱེད་ཉིད་དུ་འགྱུར། །དེ་ཉིད་ཀུན་གྱི་འབྱུང་གནས་གསལ། །ཆེན་པོའི་ལས་ནི་བྱེད་པར་འགྱུར། །དེ་ཉིད་མཛོད་སྤུར་སྦྱར་བའི་བརྗིད། །ཕྱག་རྒྱ་བདག་ཉིད་ཆེན་པོར་འགྱུར། ། དེ་ཉིད་ཆུ་སྐྱེས་རྣམ་པ་རུ། །སྙིང་གར་བཞག་པ་སྙིང་པོ་མཆོག །དེ་བཞིན་རྡོ་རྗེ་མཉམ་སྦྱར་བ། །དམ་ཚིག་བདག་ཉིད་དག་ཏུ་འགྱུར། །སྙིང་གར་ཀུན་བསྡིགས་སྦྱོར་བ་ཡིས། །རབ་རྒྱས་པ་ཡི་བཞིན་རས་མཆོག །བསྙེམས་པ་བྱེད་པ་ཐམས་ཅད་ཀྱང་། །འདིས་ནི་ལས་བྱེད་འགྲུབ་པ་ཡིན། །དེ་ཉིད་ཁ་རུ་སྦྱར་བས་ནི། །ཕྱག་རྒྱ་ཆེན་པོ་རབ་ཏུ་འགྲུབ། །དེ་ཉིད་འོད་ལྡན་རྩེ་མོ་ནི། །ཐུར་དུ་བསྟན་ཏེ་སྙིང་གར་གཞག །འདི་ནི་འགྱུར་བ་མེད་པ་ཡི། །སྙིང་པོའི་སྙིང་པོའི་ཆོས་སྒྲུབ་བྱེད། །དེ་ཉིད་སྙིང་གར་ཡོངས་སུ་བསྐོར། །སྙིང་གི་དཀྱིལ་འཁོར་

ཉིད་དུ་བཟུང་། །འདི་ནི་དམ་ཚིག་དངོས་གྲུབ་ཆེ། །བདག་ཉིད་ཆེན་པོས་བསླབ་པར་བྱ། །ལས་ཀྱི་རྡོ་རྗེ་མཉེས་པ་ཡིས། །ལས་རྣམས་ཐམས་ཅད་རབ་སྒྲུབ་བྱེད། །དབབ་དང་འཁོར་བ་ཉིད་དང་ནི། །གར་བྱེད་ཆེན་པོ་དེ་བཞིན་དུ། །དེ་བཞིན་ཐལ་མོ་སྦྱར་ནས་སུ། །སྙིང་གར་བཞག་པ་སྙིང་པོར་བཤད། །སྤྱི་བོར་བསྐོར་བར་བྱས་པ་ནི། །དམ་ཚིག་ཅེས་བྱ་བདག་ཉིད་ཆེ། །སྟེང་དུ་བསྡིགས་པ་ལས་སུ་འགྱུར། །མཆོད་པ་མ་ལུས་རབ་སྒྲུབ་བྱེད། །སྙིང་པོ་ལ་སོགས་འོག་ཏུ་གཟུང་། །ཆོས་ལ་སོགས་པར་ཡོངས་སུ་བརྟག །དེ་ཉིད་བརྐྱང་སྟེ་སྙིང་གར་བཞག །སྙིང་པོ་ཞེས་སུ་ལེགས་པར་བཤད། །བསྐོར་བ་དམ་ཚིག་ཞེས་བྱ་སྟེ། །ལས་ཀྱང་ཐམས་ཅད་དེ་བཞིན་ནོ། །དེ་ལས་ཐལ་མོ་རྡོ་རྗེ་གཉིས། །སྟེང་བསྒྲེང་སྙིང་པོ་ལ་སོགས་བཞིན། །སྔོན་བཤད་ལྷ་མོ་ཐམས་ཅད་ཀྱི། ། གསང་སྔགས་རིག་པར་ཤེས་པར་བྱ། །གཉིས་སུ་བྱས་ལ་གཡས་མིན་པས། །བསྒྲུབ་བྱའི་མགྲིན་པ་བཟུང་ནས་སུ། །མངོན་པར་ཕྱོགས་ཏེ་གཞག་པར་བྱ། །གཟུགས་ཀྱི་སྙིང་པོ་ཆེས་ཆེ་བའོ། །དེ་ཉིད་ཁ་ཡི་ཕྱོགས་བཞག་པ། །སྒྲ་ཡི་སྙིང་པོ་ཡིད་འཕྲོག་པའོ། །དེ་ཉིད་ཅུང་ཟད་བསྐུམས་ནས་སུ། །ལྕེ་ཡི་རྣམ་པས་ཁ་རུ་གཞག །རོ་མྱང་བ་ཡི་སྦྱོར་བ་ཡིས། །དེ་ཉིད་ལ་ཡང་རྣམ་པ་བཞི། །ཕྱག་རྒྱ་སྔགས་པས་ཤེས་པར་བྱ། །རོ་འཕྲོག་པ་ཡི་ལས་རྣམས་སོ། །དེ་ནི་གཉིས་སུ་བྱས་ནས་སུ། །གཡས་པའམ་ནི་གཡོན་པ་ཡིས། ། སྙིང་གར་ལེགས་སྦྱར་སྦྱོར་བདག་གིས། །རེག་པའི་ཕྱག་རྒྱ་ངོ་མཚར་ཆེ། །འདི་ཡིས་ཆོས་དང་དམ་ཚིག་དང་། །ལས་ཀྱང་རབ་ཏུ་སྐྱེ་བ་ཡིན། །ཆོ་ག་ཤེས་པས་རྣལ་འབྱོར་སྦྱར། །རེག་པས་འབེབས་པའི་མཆོག་ཡིན་ནོ། །དེ་བཞིན་སྦྱར་བ་སོ་སོར་བྱ། །གཡོན་པ་རྐེད་པར་གཞག་པར་བྱ། །གཡས་པ་ཁ་ཡི་ཕྱོགས་སུ་བཟུང་། །ཁྲོ་བོའི་ཚུལ་གྱིས་དེ་བཞིན་དུ། །འདི་ནི་བཞད་ལྡན་ཞེས་བྱ་བའི། །ཕྱག་རྒྱ་མཆོག་ཏུ་རྨད་བྱུང་བའོ། །དེའམ་བཀྲོལ་ཏེ་སྔ་མ་བཞིན། །རྐེད་པ་རུ་ནི་ལེགས་པར་གཞག །དེ་ལས་ལངས་ཏེ་སླར་ཡང་ཁར། །མཁས་

པས་དལ་གྱིས་བསྐྱོད་པར་བྱ། །དེ་གཉིས་སྙིང་གར་ཡོངས་སུ་སྦྱར། །བསྙེམས་པས་སྡུད་དང་འགྱེད་པར་བྱ། །ཇི་སྲིད་སྤྱི་བོར་གཏུགས་པ་ཡིས། །ཆོས་དང་ལ་སོགས་ཀུན་ཏུ་འགྱུར། །སྙིང་པོ་ལ་སོགས་སྔགས་རིག་པས། །ཕྱག་རྒྱ་འདི་ཡིས་རྒྱས་བཏབ་ན། ། དངོས་གྲུབ་ཐམས་ཅད་ཐོབ་འགྱུར་ཏེ། །རྡོ་རྗེ་སེམས་དཔའི་བཀའ་བཞིན་ནོ། །ཐལ་མོ་མཉམ་པོར་ལེགས་པར་སྦྱར། །གཡོན་པའི་སྟེང་དུ་དེ་བཞིན་གཞན། །དེ་དག་སྙིང་གར་བསྒྲེང་བར་བྱ། །དེ་ནི་ཕན་ཚུན་ཤེས་རབ་ཡིན། །སྔགས་པ་ཆེན་པོས་སྦྱར་བར་བྱ། །གཞན་ནི་སྦྱོར་བས་རྣམ་པར་སྤྲོ། །འདི་ནི་ཆོས་ཀྱི་ཕ་རོལ་ཏུ། །འགྲོ་བའི་ཆོས་ཀྱི་མཆོག་ཏུ་བཤད། །དེ་བཞིན་ཐལ་མོ་མཉམ་པོར་སྦྱར། །སྙིང་གར་གཡོན་པར་གཞག་པར་བྱ། །འོད་ལྡན་རྡོ་རྗེའི་གདོང་པ་དང་། །མདོར་བསྡུས་ནས་ནི་སྦྱར་ནས་སུ། །གཡས་པ་ཐུར་དུ་འཕྱང་བར་བྱ། །དེ་བཞིན་སྟེང་བསྟན་མཆོག་སྦྱིན་ནོ། །མེ་ཏོག་སྙིམ་པ་ཡང་དག་སྦྱར། །རྡོ་རྗེ་གཉིས་ནི་དབུས་སུ་བཞག །བཟོད་པ་གཉིས་པོ་དེ་ལ་སྦྱར། །སྦྱིན་པ་དག་ནི་ཕྱི་རུ་བསྐུམ། །དེ་ནི་སྟེང་དུ་ལེགས་པར་བཞག །འདི་ནི་སངས་རྒྱས་ཐམས་ཅད་ཀྱི། །ཡིད་བཞིན་རྒྱལ་པོའི་འབྲས་བུ་སྟེར། །དེ་ནི་སྦྱོར་བས་སོ་སོར་བྱ། །གཡོན་པ་སྙིང་གར་ཡོངས་སུ་བཞག །གཡས་པ་སྤྲོ་བའི་སྦྱོར་བ་ཡིས། །ཡོངས་སུ་བསྐོར་ཞིང་བསྐོར་ནས་སུ། །གཡས་པ་རུ་ནི་གཞག་པར་བྱ། །རྡོ་རྗེ་ཐལ་མོ་བརྐྱང་ནས་སུ། །རྡོ་རྗེའི་སྟེང་དུ་འོད་མཛེས་མ། །ཕྱི་རོལ་བསྐུལ་བའི་སྦྱོར་བ་ཡིས། །དེ་ཡི་སྟེང་དུ་གདོང་པ་བཞག །ཕྱག་རྒྱ་འདི་ནི་ཕྱག་རྒྱ་ཆེ། །བརྩོན་འགྲུས་ཕ་རོལ་ཕྱིན་དགེ་མའོ། །དེ་བཞིན་ལག་པ་སྟེང་དུ་སྦྱར། །རྩིབས་མཆོག་རིན་ཆེན་མ་རུ་འགྱུར། །ལྷག་མའི་བྱ་བ་དེ་ཉིད་ཀྱིས། །དེ་བཞིན་ཞག་གཅིག་བསམ་པར་བྱ། །སྦྱོར་བ་དེ་ཡིས་བཅིང་བ་རུ། །སྔགས་ཤེས་གཙོ་བོ་སྔགས་པས་བྱ། །རྡོ་རྗེ་ཐལ་མོ་མཉམ་པར་སྦྱར། །ཁྲོ་མོ་རྡོ་རྗེའི་སྦྱོར་བ་ཡིས། །སྙིང་གར་བློ་གྲོས་ལྡན་པས་བཟུང་། །དེ་ནི་ལྕགས་ཀྱུའི་རྣམ་པ་ཡིས། །བལྟས་ནས་ལུས་ཅན་

འགུགས་པར་བྱེད། །དེ་ལས་སོར་མོའི་རྩེ་མོ་རྣམས། །ཅུང་ཟད་བསྣོལ་ཏེ་བརྐྱང་བར་བྱ། །རྡོ་རྗེ་མཆེ་བ་ལྟ་བུར་བསྒྲེང་། །ཁ་སྦྱར་སྒྲོལ་བྱེད་ངོ་མཚར་ཆེ། །རྒྱ་འདི་རྣམས་ཀྱིས་རྒྱས་བཏབ་ན། །ལས་རྣམས་ཐམས་ཅད་བྱེད་པར་འགྱུར། །དེ་ལས་ཐལ་མོ་སྦྱར་ནས་སུ། །གཟི་བརྗིད་རྡོ་རྗེ་དེ་བཞིན་ནོ། །དེ་ལྟར་ལྕགས་ཀྱུས་དགུག་པ་སྟེ། །དེ་ཡི་མཐའ་གདོང་ཞགས་པའོ། །སོག་ལེའི་ཐལ་མོ་ངེས་པར་ནི། །འདིར་ནི་ཐོད་པ་ཉིད་དུ་འགྱུར། །འདི་ནི་གཉིས་པ་ཉིད་ཡིན་ཏེ། །ལས་ཀུན་གྱི་ནི་དམ་པ་སྒྲུབ། །དེ་བཞིན་བཅིང་བ་ལེགས་བཅིངས་ནས། །རབ་ཏུ་སྦྱིན་པ་བརྐྱང་བར་བྱ། །གཡས་པ་སྟེང་དུ་བྱས་ནས་སུ། །བསད་པ་ལྟ་བུར་བཅིང་བར་བྱ། །འདི་ནི་རྡོ་རྗེ་མདུང་ཐུང་སྟེ། །སྲིན་པོ་ཐམས་ཅད་ཕྱེ་མར་བྱེད། །འདིར་ནི་དེ་བཞིན་ཐོད་པ་དང་། །ཞགས་པ་ལྕགས་ཀྱུ་ཉིད་དང་ཡང་། །སོག་ལེ་དང་ནི་གྲི་ཐུང་ནི། །རྡོ་རྗེ་ཐལ་མོའི་ཆོ་གས་བྱ། །རྡོ་རྗེ་ཐལ་མོ་སོ་སོར་བྱ། །ལག་པ་གཡས་པ་སྟེང་དུ་ནི། །རིན་ཆེན་ལྟ་བུར་བྱས་ལ་གཟུང་། །སོར་མོ་ཐམས་ཅད་སྤྲོ་བར་བྱ། །གཡོན་པའང་དེ་བཞིན་སྤྲོ་བར་བྱ། །དེ་དག་ཉི་ཟླར་ཤེས་པར་བྱ། །ཐལ་མོ་བསྒྲེང་སྟེ་ཤེས་རབ་དང་། །ལས་ཀྱི་རྡོ་རྗེ་རྩེ་མོ་སྦྱར། །འདིར་ནི་ལས་རྣམས་ཐམས་ཅད་ཀྱི། །སྣ་ཚོགས་ལས་མཆོག་སྒྲུབ་པར་བྱེད། །དེ་བཞིན་དགུག་དང་ཞགས་པ་དང་། །ཐོད་པ་རྡོ་རྗེ་ཉིད་ཡིན་ནོ། །དེ་ལས་ཐལ་མོ་ཐོད་པ་ཡི། །ཕྱག་རྒྱའི་དབུས་སུ་བུ་ག་ནི། །སྒྲོན་མ་ཅན་ཞེས་ལེགས་བཤད་དེ། །འདི་ནི་རྡོ་རྗེ་ངོ་མཚར་ཆེ། །ཞགས་པ་ལྕགས་ཀྱུ་དེ་བཞིན་དུ། །སློབ་དཔོན་བློ་གྲོས་ལྡན་པས་ཤེས། །གཟུངས་རྣམས་དང་ནི་ཐམས་ཅད་ཀྱི། །སྔར་བཤད་པ་ཡི་ཕྱག་རྒྱ་ཉིད། །ཐོད་པ་རྡོ་རྗེའང་ཤེས་པར་བྱ། །ཕན་ཚུན་གཅིག་ལ་གཅིག་ཏུ་ནི། །ཐམས་ཅད་གཟུངས་ཀྱི་ཕྱག་རྒྱ་རུ། །དཀྱིལ་འཁོར་དུ་ནི་རབ་ཏུ་བསྒྲགས། །འདི་རྣམས་སྦྱོར་བ་ཇི་ལྟ་བར། །དཀྱིལ་འཁོར་བཞི་ནི་རྟག་པ་རུ། །རྡོ་རྗེ་སློབ་དཔོན་གྱིས་བྱ་སྟེ། །ཕྱག་ན་རྡོ་རྗེའི་བཀའ་བཞིན་ནོ། །འདི་ནི་བཅོམ་ལྡན་རྣལ་འབྱོར་གསུང་། །ཀུན་བཟང་བདག་ཉིད་ཆེན་

པོ་པ། །སེམས་ཅན་ཀུན་མཆོག་ལས་ཀྱི་མཆོག །སངས་རྒྱས་མཆོག་གཙོ་མངའ་བདག་ཆེ། །ཞེས་སོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཡང་འཕགས་པ་སྤྱན་རས་གཟིགས་དབང་ཕྱུག་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་དག་ཐམས་ཅད་ལ་ཡང་དང་ཡང་དུ་གཟིགས་ཏེ། སེམས་ཅན་ཐམས་ཅད་བརྩོན་འགྲུས་ཞན་པ་སྤོབས་པ་དམན་པ་ལ་མོས་པར་གཟིགས་ནས་དེ་རྣམས་ལ་བཀའ་བསྒོ་བ། དབང་པོའི་མ་མོ་རྣམས་ཀྱིས་ཤོད། །རང་རང་གི་ནི་སྒྲུབ་སྣ་ཚོགས། །དེ་ནས་དེ་རྣམས་ལེགས་ཚིམ་ནས། །རྡོ་རྗེ་ཅན་ལ་གསོལ་བ་ནི། །ཉི་མའི་དཀྱིལ་འཁོར་དབུས་གནས་པར། །རྡོ་རྗེ་དཀྱིལ་འཁོར་བསྒོམ་པར་བྱ། །དེ་ཡི་སྟེང་དུ་རྡོ་རྗེ་ཆེ། །རྡོ་རྗེ་ལ་ནི་དང་པོ་མཆོག །ཉི་མ་གསེར་མདོག་དང་མཚུངས་པར། །གསང་སྔགས་ཤེས་པས་དེ་བསྒོམ་བྱ། །རང་གི་ལུས་ལས་སྤྲོས་ནས་སུ། །རང་གི་རྣམ་པར་བསམ་པར་བྱ། །དེ་ནས་སྔགས་བདག་འགྲུབ་པར་འགྱུར། །སྔགས་ཀྱི་དེ་ཉིད་བདག་པོ་ཆེར། །ཀུན་ཏུ་འགྲོ་བ་སྣ་ཚོགས་ཆེ། །རྡོ་རྗེ་སེམས་དཔའ་འདྲ་བ་གཞན། །གཉིས་པའི་དེ་ཉིད་བསྒོམ་པ་ནི། །དཀྱིལ་འཁོར་པདྨ་ལས་བྱུང་བ། །དམར་པོའི་གོས་ལ་གཟི་བརྗིད་ཆེ། །འབར་བ་དག་ནི་མེ་དང་མཚུངས། །རང་ལས་སྤྲོ་བྱ་ཐམས་ཅད་དུ། །འཇིག་རྟེན་དབང་ཕྱུག་ལྟ་བུར་འགྱུར། །དཀྱིལ་འཁོར་དབང་ཆེན་གཞག་པར་བྱ། །དཀྱིལ་འཁོར་ལ་ནི་ཆེར་དགེ་མ། །དང་པོའི་ལྷ་མོ་དྲོད་དང་ལྡན། ། རང་གི་ལུས་ལ་ངེས་པར་ཁྱབ། །བསྡུས་ནས་བདག་དང་འདྲ་བའི་བདག །ཡིད་བཞིན་ནོར་བུའི་སྣང་བར་འགྱུར། །རླུང་གི་དཀྱིལ་འཁོར་དབུས་སོན་པར། །འགྲོ་བའི་སྒོ་གཏན་ལྷ་མོ་ནི། །རང་ལུས་ལུས་ལྡན་ཐམས་ཅད་དུ། །ལྗང་གུ་དང་ནི་ལྗང་སེར་མ། །ལས་ཀུན་སྒྲུབ་པའི་དམ་པ་ཡིས། །རྡོ་རྗེ་འཛིན་པ་དཔལ་ལྡན་འགྱུར། །མ་མོ་བཞི་དང་ཡང་དག་ལྡན། །ཤེས་རབ་ཡེ་ཤེས་དམ་པ་གནས། །དཀྱིལ་འཁོར་ཀུན་གྱི་དམ་པ་རུ། །མཁས་པ་ཡིས་ནི་བསྒོམ་པར་བྱ། །ཀུན་གྱི་བདག་པོ་དཔལ་དང་ལྡན། །ཀུན་བཟང་མངའ་བདག་ཆེན་པོར་འགྱུར། །

བསམ་གཏན་དཀྱིལ་འཁོར་སྦྱོར་བ་ཡིས། །ཐམས་ཅད་ཉིད་ནི་བསྒྲུབ་པར་བྱ། །ཆོས་ཀྱི་ཡི་གེ་ཡང་དག་སྦྱར། །ལྷ་མིན་བདག་པོར་བདག་འགྱུར་རོ། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །གསང་བ་རྒྱན་གྱི་བཀོད་པའི་རྒྱུད་ཀྱི་རྒྱལ་པོ་ཆེན་པོ་ལས། དེ་བཞིན་གཤེགས་པ་ཐམས་ཅད་ཀྱི་ཡུམ་གྱི་ཕྱག་རྒྱའི་ཡེ་ཤེས་མཆོག་གི་དཀྱིལ་འཁོར་ཡོངས་སུ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་དང་དེ་བཞིན་གཤེགས་པ་ཐམས་ཅད་ཀྱི་ཡབ་འཁོར་དང་བཅས་པ་རྣམས་སླར་ཡང་འདུས་པར་གྱུར་ཏེ། བཅོམ་ལྡན་འདས་ཀུན་ཏུ་བཟང་པོ་ཆེན་པོ་ལ་གླུ་དབྱངས་ཀྱི་རྒྱལ་པོ་འདིས་གསོལ་བ་བཏབ་པ། ཐམས་ཅད་ཁྱབ་པའི་ཡེ་ཤེས་ཆེ། །མཁའ་ལ་རླུང་ལྟར་ཆེར་གཤེགས་པ། །ཡབ་ཀྱི་ཕྱག་རྒྱའི་ཡེ་ཤེས་བཟང། །ཀུན་མཆོག་དམ་པས་བཤད་དུ་གསོལ། །དེ་ནས་བཅོམ་ལྡན་འདས་ཀུན་ཏུ་བཟང་པོས་དེ་བཞིན་གཤེགས་པ་ཐམས་ཅད་ཀྱི་རྒྱལ་པོ་མཆོག་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡེ་ཤེས་ཆེན་པོའི་ཕྱག་རྒྱ་དང་དཀྱིལ་འཁོར་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྒྱས་པ་ལས་ངེས་པར་ཕྱུང་ངོ་། །དབུས་སུ་ཉི་མ་ཆེན་པོ་ནི། །ཧཱུྃ་ཡིག་སྦྱོར་བས་བསམ་པར་བྱ། །སོར་མོ་ཀུན་གྱི་རྩེ་གནས་སུ། །ས་བོན་ལྔ་ཡི་ཡབ་དགོད་བྱ། །ཚིགས་ཀྱི་ནང་ནི་ཐམས་ཅད་དུ། །ཡི་གེ་ཐམས་ཅད་རྣམ་པར་བསམ། །ཉི་མའི་དཀྱིལ་འཁོར་དག་ལ་ནི། །བཟང་པོ་ཐམས་ཅད་རྣམ་བསམ་བྱ། །འཁོར་ལོ་ཆེན་པོ་ཕྱག་རྒྱའི་ཚུལ། །ལག་པ་གཡོན་པར་བསམ་པར་བྱ། །དེ་ཡི་དབུས་སུ་ཤེས་རབ་ཆེ། །དེ་བཞིན་གཞན་ཡང་དགོད་པར་བྱ། །དེ་ནས་སྤྲོ་བའི་དེ་ཉིད་ནི། །གསང་སྔགས་འདི་ཡིས་སྦྱར་བར་བྱ། །ཨོཾ་པྲཛྙོ་པཱ་ཡས་མ་ཡོ་གེ་ཧཱུྃ་ཨ། དེ་ནས་ཕན་ཚུན་སྦྱར་བྱས་ནས། །རྡོ་རྗེ་ཐལ་མོར་རབ་ཏུ་གནས། །རྡོ་རྗེ་བསྡམས་པར་བྱས་ནས་སུ། །རྡོ་རྗེ་བསྡམས་པར་རྣམ་པར་བསམ། །དེ་ནས་ཤེས་རབ་ཆེ་བསྒྲེང་སྟེ། །རྩེ་མོ་ཅུང་ཟད་བསྐུམ་པར་བྱ། །འདོད་པའི་དབང་ཕྱུག་སྙིང་པོར་འགྱུར། །སྙིང་གར་བཞག་ན་སྙིང་པོ་འགྲུབ། །དེ་ཉིད་བསྡིགས་པའི་སྦྱོར་བ་ཡིས། །

ལས་ཀྱི་མཆོག་ཏུ་འགྱུར་བ་ཡིན། །དེ་ཉིད་སྙིང་གར་བསྡམས་པ་ནི། །ཕྱག་རྒྱ་ཆེན་པོ་ཞེས་སུ་གྲགས། །ཐམས་ཅད་ཀྱིས་ཀྱང་མདོར་བསྡུས་པའི། །ལས་རྣམས་ཐམས་ཅད་རབ་སྒྲུབ་བྱེད། །དེ་བཞིན་ལེགས་པར་བཅིང་བར་བྱ། །སྦྱིན་པའི་ཕ་རོལ་ཕྱིན་པ་གཉིས། །ཕྱི་ཡི་རྒྱབ་ཏུ་བསྐུམ་པར་བྱ། །མཁའ་འགྲོའི་དབང་ཕྱུག་སྙིང་དགའ་བའོ། །ཤེས་རབ་དག་ནི་དེ་བཞིན་སྦྱར། །དམ་ཚིག་ཅེས་པར་རབ་ཏུ་གྲགས། །ལྷག་མ་རྣམ་པར་སྤྲོ་བར་བྱ། །ལས་ཀྱི་གནས་འཁོད་ཆེན་པོར་གྲགས། །ཤེས་རབ་དག་ནི་ཟུམ་ཚུལ་གྱིས། །དྲི་ཡི་དབང་ཕྱུག་རབ་དགྱེས་པའོ། །བཟོད་དང་བརྩོན་འགྲུས་གདོང་པ་གཉིས། །ལོ་མའི་ཚུལ་དུ་བརྐྱང་བར་བྱ། །དམ་ཚིག་སྒྲུབ་པ་སྟེར་བར་བཤད། །འདི་ལས་རྩེ་མོ་རྣམ་ཕྱེ་བ། །ལས་ཀུན་བྱེད་པ་ཞེས་བཤད་དེ། །རེ་བ་ཐམས་ཅད་རྫོགས་པར་བྱེད། །དེ་ཉིད་རྩེ་མོར་སྙིང་གར་སྦྱར། ། བདག་ཉིད་ཆེན་པོའི་ཕྱག་རྒྱ་མཆོག །རྒྱལ་པོ་མཆོག་ལྟའི་རྒྱལ་པོ་རུ། །འདི་ཡིས་མྱུར་དུ་འགྲུབ་པར་འགྱུར། །རྡོ་རྗེ་བསྡམས་པས་ཤེས་རབ་མགོ། །དྲིལ་བུའི་དམ་པ་སྙིང་པོ་མཆོག །བཟོད་དང་བརྩོན་འགྲུས་གདོང་སྦྱར་བ། །དམ་ཚིག་མཉམ་པ་ཉིད་དུ་གནས། །ཅུང་ཟད་གདོང་པ་བསྐུམ་པར་བྱ། །ལས་བྱེད་པ་ཡི་མཆོག་ཏུ་འགྱུར། །གདོང་པ་ལེགས་པར་བརྐྱང་ནས་སུ། །སྟེང་དུ་ཤེས་རབ་རྩེ་མོ་གཅིག །འདི་ནི་ཆེན་པོར་ཤེས་བྱ་སྟེ། །དབང་ཕྱུག་ཐམས་ཅད་བྱེད་པའི་མཆོག །སྣ་ཚོགས་བྱེད་པ་མཆོག་གི་མཆོག །འདི་ཡིས་མྱུར་དུ་འགྲུབ་པར་འགྱུར། །རང་གི་བསྡམས་ལས་ཤེས་རབ་བསྒྲེང་། །རྡོ་རྗེ་སྲ་བའི་ཆོས་དང་ལྡན། །གདོང་པ་ཕྱེ་སྟེ་རིན་པོ་ཆེ། །འདི་ནི་དམ་ཚིག་ལྡན་པའི་མཆོག །དེ་གཉིས་དེ་བཞིན་རྣམ་པར་གཞག །སྦྱིན་པའི་ཕ་རོལ་ཕྱིན་དགེ་དག །རབ་བརྐྱང་བཞི་ཡི་སེམས་དཔའ་ཡི། ། ལས་རྣམས་ཐམས་ཅད་བྱེད་པར་བཤད། །དེ་བཞིན་ཚུལ་ཁྲིམས་ཕ་རོལ་ཕྱིན། །འདི་ནི་ཆེན་པོ་དམ་པའོ། །བསྡམས་ལས་བཟོད་དང་བརྩོན་འགྲུས་དག །ལེགས་པར་བརྐྱང་སྟེ་བསྟོད་པ་ནི། །སྙིང་པོའི་ཟླ་བ་ལྟར་བཅིངས་པ། །དམ་ཚིག་འོད་ཟེར་འཕྲོ་བའོ། །ཕན་ཚུན་

གྱི་ནི་གདོང་སྦྱར་བ། །འདི་ནི་ལས་བྱེད་དམ་པ་སྟེ། །ལྷག་མ་ཁུ་ཚུར་ལྟར་བྱས་པ། །ཕྱག་རྒྱ་ཆེན་པོ་ཞེས་སུ་འགྲུབ། །རྡོ་རྗེ་བསྡམས་པ་ལེགས་པར་བཅིང་། །རྩེ་མོའི་རྣམ་པར་སྦྱར་བར་བྱ། །ཤེས་རབ་འབའ་ཞིག་རྩེ་མོར་བྱ། །ལྷག་མ་དག་ནི་དེ་བཞིན་ནོ། ། ལྷག་མ་བསྡམས་ཏེ་གཞུག་པར་བྱ། །སྙིང་པོ་ཆོས་ནི་བྱེད་པའི་མཆོག །ཁུ་ཚུར་གཡོན་པ་གཡོན་དུ་བཟུང་། །རྡོ་རྗེ་རྡོ་རྗེ་ཅན་གྱིས་བརྐྱང་། །གཡས་པའི་སྦྱིན་པ་བརྐྱང་ནས་ནི། །རྣ་བའི་རྩ་བར་དགུག་པར་བྱ། །འདི་ནི་ལས་བྱེད་ཤེས་བྱ་སྟེ། །སངས་རྒྱས་བྱང་ཆུབ་རབ་སྒྲུབ་བྱེད། །རྡོ་རྗེ་བསྡམས་པ་བརྐྱང་ནས་སུ། །སྙིང་གར་འཁོར་ལོའི་ཚུལ་དུ་བྱ། །གཡས་པའི་རྩེ་རྨོ་ལྕགས་ཀྱུར་བྱ། །སྦྱིན་པ་སྦྱིན་པའི་ཕ་རོལ་སོན། །དེ་བཞིན་བཅིང་བ་ལེགས་བསྡམ་བྱ། །གཉིས་ཀ་དེ་བཞིན་ལྕགས་ཀྱུ་སྟེ། །དེ་ལྟར་འོག་མ་བཅུག་ནས་སུ། །སྙིང་གར་བཞག་པ་ལས་རྗེས་འབྲང་། །དེ་ཉིད་དགུག་པར་སྦྱོར་བ་ནི། །ཐམས་ཅད་དགུག་པ་རབ་ཏུ་འགྲུབ། །དེ་བཞིན་སྦྱིན་པ་བསྐུམས་ནས་སུ། །ཡང་དང་ཡང་དུ་བརྐྱང་བར་བྱ། །སྙིང་གར་བསྐོར་བ་ཞེས་སུ་བཤད། །དེ་ཉིད་འོག་ཏུ་བསྟན་པ་ནི། །དམ་ཚིག་ཅན་ཞེས་རབ་ཏུ་གྲགས། ། རྡོ་རྗེ་ཆོས་སུ་བཤད་པ་སྟེ། །ཁ་རུ་གཡོ་བར་བྱེད་པ་མཆོག །ལས་ལས་རྣམ་པར་ཚིམ་ཞེས་བྱ། །ལས་ཀུན་བྱེད་པའི་དམ་པ་སྟེར། །ལག་པ་བཅིངས་པ་ལས་བགྲོལ་ཏེ། །ཤེས་རབ་མཛོད་དུ་རབ་ཏུ་བརྟག །འདི་ནི་དམ་ཚིག་ཆེར་མཛེས་པ། །དེ་ཕྱིར་དེ་ལྟར་ཆོས་མཛད་དོ། ། གཡས་པས་རབ་ཏུ་བསྒྲིམས་པ་ནི། །མི་སྣང་མཛོད་དེ་དེས་ན་ལས། །རིན་ཆེན་པདྨ་ལྡན་པའི་གདོང་། །སྙིང་གར་བཞག་པ་སྙིང་པོར་འགྱུར། །བསྡམས་ནས་གོ་ཆར་བྱས་ནས་སུ། །བསྐོར་བ་དམ་ཚིག་ཅེས་སུ་འདོད། །འཁྱུད་པ་ཆོས་ལྡན་ཞེས་སུ་གྲགས། །བསྣུན་པ་ལས་བྱེད་པ་རུ་བརྗོད། །བསྡམས་ལས་ཉི་མ་རྣམ་པར་སྤྲོ། །བསྐོར་བ་དམ་ཚིག་མཆོག་ཡིན་ནོ། །ལག་པའི་མཐའ་མ་ཆོས་ཆེན་པོ། །ཀུན་སྡུད་ལས་ཀུན་བྱེད་པའོ། །བསྡམས་ལས་སྦྱིན་པ་བསྒྲེང་བར་བྱ། །རྩེ་མོ་གསུམ་བྱ་གནས་མཛེས་པའོ། །དེ་ཉིད་སྟེང་དུ་བསྐོར་ནས་སུ། །

སྤྲོས་པས་ཆོས་སྒྲུབ་བྱེད་པའོ། །རྡོ་རྗེ་བ་རུ་སྦྱར་བ་ལས། །དབང་བསྐུར་དམ་པ་སྒྲུབ་པར་བྱེད། །དེ་ཉིད་སྟེང་དུ་སྤྲོ་བ་ནི། །ལས་ཀུན་བྱེད་པའི་མཆོག་ཡིན་ནོ། །སྙིང་གར་ལེགས་བཟུང་སྙིང་པོ་སྟེ། །མཛོད་སྤུར་བཞག་པ་དམ་ཚིག་མཆོག །ཁར་བཞག་པ་ནི་ཆོས་ཤེས་བྱ། ། ལས་རྣམས་ཐམས་ཅད་རབ་སྒྲུབ་པའོ། །འདི་ནི་བཅོམ་ལྡན་རྡོ་རྗེ་ཅན། །རེ་བ་ཀུན་རྫོགས་མཛད་པས་གསུངས། །རྡོ་རྗེ་བསྡམས་པ་རྣམ་པར་བཅིངས། །པདྨའི་རྣམ་པ་མཆོག་ཏུ་བྱ། །སྟེར་བྱེད་པ་ནི་མིག་ལྟར་བྱ། །སྙིང་གར་བཞག་པ་ཀུན་མཆོག་འགྲུབ། །དེ་ཉིད་མིག་བཞག་ལས་ཡིན་ནོ། །བཞད་པས་ཆོས་དེ་དམ་པའི་ཆོས། །དམ་ཚིག་གསང་བའི་མིག་ཡིན་ཏེ། །པདྨའི་མཛོད་ལ་རབ་ཏུ་གནས། །ཐལ་མོ་ཡང་དག་སྦྱར་བ་ནི། །སྙིང་པོ་མཆོག་ཏུ་རྨད་བྱུང་བའོ། །ཁ་ནི་ཅུང་ཟད་ཕྱེ་བ་ནི། །དམ་ཚིག་མཆོག་གི་མཆོག་ཡིན་ནོ། །སྙིང་གར་ཤིན་ཏུ་གསལ་ཕྱེ་བ། །མ་ལུས་ལས་ནི་རབ་ཏུ་སྒྲུབ། །རྡོ་རྗེའི་ནང་དུ་པདྨ་ནི། །ཆོས་ཏེ་མཆོག་ཏུ་རྨད་བྱུང་བའོ། །འདི་རྣམས་ཀྱིས་ནི་མྱུར་འགྲུབ་སྟེ། །སྔགས་པས་སྔགས་ཀྱིས་བསྐུལ་བས་སོ། །དེ་བཞིན་འཆིང་བ་ལེགས་བཅིངས་ཏེ། །སྙིང་གར་འཁོར་ལོ་ཉིད་དུ་བྱ། །འཁོར་ལོ་གསུམ་པ་ཉིད་དུ་འགྱུར། །རྩིབས་བཞེས་ལེགས་བརྒྱན་ཆོས་སུ་བལྟ། །བསྐོར་བ་ལས་ཀྱི་རྡོ་རྗེའོ། །འདི་རྣམས་ཇི་ལྟ་བཞིན་སྦྱར་ན། །གྲུབ་པའི་དམ་པ་འགྲུབ་པར་འགྱུར། །རྡོ་རྗེ་བསྡམས་པ་ལེགས་བསྒྲེང་སྟེ། །ཤེས་རབ་མྱུ་གུ་དག་ཏུ་བྱ། །སྦྱིན་པ་རིན་ཆེན་ལྟར་བྱས་པ། །སེམས་དཔའི་གནས་སུ་ངེས་པར་སྦྱར། །འདི་ནི་སངས་རྒྱས་ཐམས་ཅད་ཀྱི། །ལས་རྣམས་ཐམས་ཅད་རབ་སྒྲུབ་པའོ། །སྙིང་གར་ཆོས་ཀྱི་དམ་ཚིག་དང་། །སྙིང་པོ་རིག་སྔགས་ལེགས་པར་སྦྱར། །དེ་བཞིན་ཤེས་རབ་གཉིས་པོ་སྒྲེང་། །འོག་གི་འཁྲུག་པ་དེ་བཞིན་ནོ། །མཐེ་ཆུང་བཟང་པོའི་ཁ་སྦྱར་བ། །ཀུན་གོང་རྡོ་རྗེ་ལྡན་པར་བྱ། །གནས་ནི་བཞི་ཡི་སྦྱོར་བ་ཡིས། །ཕྱག་རྒྱ་བཞི་ནི་རབ་ཏུ་འགྲུབ། །སྤྱི་བོར་ལས་སུ་བཤད་པ་སྟེ། །སྙིང་གར་སྙིང་པོ་བརྟག་པར་བྱ། །བསྐོར་བ་ཡིས་ནི་དམ་ཚིག་སྟེ། །ངག་གིས་ཀུན་བསྐུལ་ཆོས་ཡིན་ཏེ། །བཅོམ་ལྡན་རྡོ་རྗེ་ཅན་

གྱིས་གསུངས། །བཅིངས་ནས་ཤེས་རབ་དག་ནི་བསྒྲེང་། །འོད་ལྡན་དག་ནི་རྩ་བར་སྦྱར། །འདི་ནི་དང་པོར་ཤེས་པར་བྱ། །ཐམས་ཅད་ནས་ནི་ཐམས་ཅད་འགྲོ། །བཅིངས་ལས་དེ་བཞིན་ཤེས་རབ་ཅིག །རྩེ་མོ་མཆེ་བ་གདུག་ཡིད་འཕྲོག །དེ་བཞིན་དུ་ནི་འདི་སྦྱར་བས། །ལས་རྣམས་ཐམས་ཅད་རབ་སྒྲུབ་པའོ། །གསང་བའི་བཅིང་བ་ལེགས་བཅིངས་ཏེ། །རྡོ་རྗེ་ནང་དུ་དེ་བཞིན་ནོ། །སྙིང་གར་རྣལ་འབྱོར་པ་ཡིས་སྦྱར། །ཇི་སྙེད་ལས་ཀྱི་མིང་བཟང་པོ། །རྡོ་རྗེ་རབ་བརྐྱང་མགྲིན་པར་གཟུང་། །ཀུན་ཏུ་བསྐོར་བ་རབ་ཏུ་བྱ། །འདི་ཡིས་ལས་རྣམས་ཐམས་ཅད་ནི། །བྱེད་འགྱུར་བསྲུང་སོགས་གོ་འཕང་བཟང། །ལྷག་མ་ཆོ་ག་བཞིན་རྣལ་འབྱོར། །རྣལ་འབྱོར་དེ་ཉིད་རབ་ཏུ་སྦྱར། །ཕྱག་རྒྱ་རྟགས་དང་མི་རྣམས་ནི། །ལྷ་རྣམས་ཀུན་ལ་སྦྱར་བར་བྱ། །འདི་ནི་བཅོམ་ལྡན་རྣལ་འབྱོར་ཆེའི། །དབང་ཕྱུག་དཔལ་རྡོར་སེམས་དཔས་གསུངས། །དེ་ནས་དེ་རྣམས་ལེགས་ཚིམ་ནས། །ཕྱག་འཚལ་ནས་ནི་ཐལ་སྦྱར་ཏེ། །ཞུ་བ་རྡོ་རྗེ་བླ་ན་མེད། །དཔའ་བོ་རྡོ་རྗེ་ཅན་ལ་ཞུས། །ཡོངས་སུ་རྟོག་པ་ཀུན་སྤངས་པའི། །སངས་རྒྱས་རྣམས་ནི་རང་བྱུང་ལ། །ཡབ་དང་ཡུམ་ནི་བླ་ན་མེད། །ཅི་ཕྱིར་འདི་དག་བརྟག་པ་ལགས། །འཁོར་བ་ལས་ནི་ལེགས་པ་ཡི། །སངས་རྒྱས་ཇི་ལྟར་འབྱུང་བ་ལགས། །གྲོང་གི་ཆོས་ནི་བསྟེན་པ་ལས། །ཇི་ལྟར་ཐར་པ་རབ་ཏུ་འགྲུབ། །གང་དུ་རྣལ་འབྱོར་པ་གྲོལ་འགྱུར། །གང་ན་འཆི་བ་རབ་ཏུ་གནས། །གང་གིས་རྣལ་འབྱོར་པ་རབ་འགྲུབ། །གང་ལས་རྣལ་འབྱོར་པ་ཞེས་བགྱི། །གསང་སྔགས་ཇི་ལྟར་གསང་སྔགས་ལགས། །སྙིང་པོ་ཞེས་བྱའི་སྙིང་པོ་གང་། །ཕྱག་རྒྱས་གང་ཕྱིར་ཕྱག་རྒྱར་འགྱུར། །རིག་སྔགས་རིག་པ་ཇི་ལྟར་ལགས། །ཇི་ལྟར་ལྷ་རྣམས་དགུག་པ་དང་། །གཞུག་པ་རྣལ་འབྱོར་པ་ཡས་བགྱིད། །རྣམ་པར་གྲོལ་རྣམས་བཅིང་བ་དང་། །མཉེས་དང་བསྐུལ་བ་དེ་བཞིན་དུ། །ཇི་ལྟར་གཉིས་སུ་མེད་འགྱུར་ཞིང་། །ཙུམ་པ་འཁྱུད་པ་ཉིད་དང་ཡང་། །མཐོང་ནས་རྗེས་སུ་ཆགས་པ་དང་། །ལག་པའི་དགོས་པ་ཇི་སྙེད་པས། །ཕྱག་རྒྱ་ཇི་ལྟར་འགྲུབ་པར་འགྱུར། །གར་དང་གླུ་དང་ཆེར་དགོད་པ། །

སྒེག་དང་སྨྲ་བ་ཇི་ལྟར་ལགས། །གཟུགས་དང་སྒྲ་དང་དེ་བཞིན་དྲི། །གཙོ་བོ་རོ་དང་རེག་པར་འགྱུར། །མེ་ཏོག་བདུག་པ་མཆོག་དང་དྲི། །མར་མེ་གསལ་བ་མཆོག་གང་ལགས། །མཆོད་པ་ཐམས་ཅད་ཇི་ལྟར་འགྲུབ། །ཇི་ལྟར་མཆོད་པས་འགྲུབ་པར་འགྱུར། །རྒྱལ་བས་ཞུ་བ་འདི་དག་གིས། །ཕྲེང་བ་རྡོ་རྗེ་ཅན་ལ་ཞུས། །ཞེས་སོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་ཞུ་བ་ཐམས་ཅད་རྣམ་པར་དཔྱོད་པ་ལོངས་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཞུ་བ་རྒྱས་པ་འདི་དག་ཕྱུང་ངོ་། །ཤེས་རབ་ཡུམ་དུ་ལེགས་བཤད་དེ། །ཡབ་ནི་ཐབས་ལ་མཁས་པའོ། །འདི་ནི་བསྟེན་པ་ཉིད་ཀྱིས་ནི། །གྲོང་ལས་ཐར་པ་རབ་ཏུ་འགྲུབ། །བག་ཆགས་སྦྱོར་བ་དང་ལྡན་པས། །གཉི་ག་དག་ནི་གདོན་ཡིན་ཏེ། །གྲོལ་དང་མ་གྲོལ་ཞེས་སུ་བཤད། །དེ་ནི་རྣལ་འབྱོར་པ་རུ་བརྗོད། །གསང་སྔགས་ཡིད་དུ་བཤད་པ་སྟེ། །སྙིང་པོ་ཡང་ནི་དེ་བཞིན་ནོ། །ཡིད་ལ་རྣམ་པར་གཞག་ན་ནི། །གསང་སྔགས་མཁས་པས་འགྲུབ་པར་འགྱུར། །ཐར་པ་ཆོས་ཀྱི་རྒྱ་མཚོ་ཡིན། །ལྷ་རྣམས་གང་ལ་རྒྱས་བཏབ་པའི། །ཕྱག་རྒྱ་འདི་ཡིས་འགྲུབ་འགྱུར་ཏེ། །དངོས་གྲུབ་བདེ་བ་བླ་ན་མེད། །རིག་སྔགས་ཡེ་ཤེས་མ་ལུས་ཏེ། །རིག་སྔགས་ཕ་རོལ་ཕྱིན་པར་བཤད། །དེ་ཤེས་པ་ནི་འགྲུབ་འགྱུར་ཏེ། །གྲུབ་ནས་བདེ་བ་རྣམ་པ་གསུམ། །ཤེས་རབ་ལ་ནི་ཤེས་རབ་ནི། །གཞུག་དང་དགུག་པ་དེ་བཞིན་ནོ། །གཤེགས་སུ་གསོལ་བ་བཏང་བར་ཤེས། །བཅིངས་པ་བརྟན་པར་བྱེད་པའོ། །མཉེས་པ་ཡིས་ནི་ལེགས་ཚིམ་ཡིན། །བསྐུལ་བ་འཕྲོ་བ་ཉིད་དུ་བཤད། །བསམ་པ་གཅིག་ཏུ་གྱུར་པ་ནི། །གཉིས་སུ་མེད་པ་ཞེས་སུ་བརྟགས། །རོ་གཅིག་དེ་ཉིད་བཤད་པ་ནི། །འཇིག་རྟེན་པ་ཡི་ལྷ་རུ་བརྗོད། །ཙུམ་པ་རྡོ་རྗེ་རྣལ་འབྱོར་ཏེ། །རྡོ་རྗེ་ཡེ་ཤེས་ཞེས་སུ་བཤད། །ཤེས་དང་མི་ཤེས་མཉམ་སྦྱོར་བས། །རྡོ་རྗེའི་ཡེ་ཤེས་ཞེས་བཤད་དོ། །ཤེས་དང་མི་ཤེས་མཉམ་སྦྱོར་བས། །ཙུམ་པ་ན་ཞེས་ངེས་པར་བཤད། །གནས་པས་རྟགས་ཞེས་བཤད་པ་སྟེ། །རྟགས་ནི་ལུས་ཞེས་བརྗོད་པ་

ཡིན། །དེ་ཡི་འཁྱུད་པ་རེག་པར་ཤེས། །ཆགས་པ་མཐོང་བའི་ཕྱག་རྒྱའོ། །ལག་པའི་འོད་རྣམས་ལྷ་མོ་སྟེ། །རྡོ་རྗེ་པདྨ་མཉམ་བགྲོད་པའོ། །ཕྱག་རྒྱ་འདི་ལས་ཕྱག་རྒྱ་སྟེ། །ལག་པའི་དགོད་པའི་སྦྱོར་བས་སོ། །གར་དང་གླུ་སོགས་རྣམས་ཀྱིས་ནི། །ལྷ་རྣམས་ཐམས་ཅད་མཉེས་པར་འགྱུར། །འདི་རྣམས་ཀྱིས་ནི་སངས་རྒྱས་རྣམས། །མཆོད་ན་དངོས་གྲུབ་ཐམས་ཅད་སྟེར། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །གསང་བ་རྒྱན་གྱི་བཀོད་པའི་རྒྱུད་ཆེན་པོ་ལས་གསང་བ་རྒྱན་གྱི་བཀོད་པ་ཞེས་བྱ་བའི་དཀྱིལ་འཁོར་གྱི་རྒྱལ་པོ་ཡོངས་སུ་རྫོགས་སོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་རྣམས་ཀྱིས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ལ་དེ་བཞིན་གཤེགས་པ་ཐམས་ཅད་ཀྱི་མཆོད་པ་དང་མཆོད་པའི་ལན་དང་། ཕྱག་རྒྱ་དང་ཕྱག་རྒྱའི་ལན་དང་། གར་དང་གར་གྱི་ལན་དང་། གླུ་དང་གླུའི་ལན་དང་། སིལ་སྙན་དང་སིལ་སྙན་གྱི་ལན་དང་། རྣམ་འགྱུར་དང་རྣམ་འགྱུར་གྱི་ལན་དང་། དབྲོག་པ་དང་དགུག་པའི་ལན་དང་། བརྡ་དང་བརྡའི་ལན་དང་། བྲི་བ་དང་བྲི་བའི་ལན་དང་། བལྟ་བ་དང་བལྟ་བའི་ལན་དང་། དམ་ཚིག་དང་དམ་ཚིག་གི་ལན་དང་། དཀྱིལ་འཁོར་དང་དཀྱིལ་འཁོར་གྱི་ལན་དང་། གསང་བ་དང་གསང་བའི་ལན་དང་། གསང་ཆེན་དང་གསང་ཆེན་གྱི་ལན་དང་། དེ་ཁོ་ན་ཉིད་དང་དེ་ཁོ་ན་ཉིད་ཀྱི་ལན་ལ་སོགས་པ་རྣམས་དང་། གླུའི་རྒྱལ་པོ་འདིས་གསོལ་བ་བཏབ་པར་གྱུར་ཏོ། །སངས་རྒྱས་སེམས་ཅན་ཀུན་གྱི་དོན། །ཡེ་ཤེས་ཀུན་དོན་ཐམས་ཅད་མཛད། །ཐམས་ཅད་ཁྱབ་པ་སེམས་ཅན་དོན། །གཉིས་དང་གཉིས་མེད་ཕྱག་འཚལ་བསྟོད། །འདི་དག་ཐམས་ཅད་གསུང་དུ་གསོལ། །སྒྲུབ་པ་པོ་ལ་ཕན་དགྱེས་པས། །སྒྲུབ་པ་དངོས་གྲུབ་དག་དགའ་བ། །གང་གིས་དངོས་གྲུབ་འགྲུབ་འགྱུར་བ། །དེ་ནས་བཅོམ་ལྡན་འདས་ཀུན་ཏུ་བཟང་པོས་ཐམས་ཅད་མཁྱེན་པའི་ཡེ་ཤེས་ལ་ལྟ་བ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །མེ་ཏོག་བདུག་པ་དྲི་ཞིམ་དང་། །གོས་བཟང་རྒྱན་དང་བཟའ་བ་དང་། །བཏུང་དང་རོ་དང་སྒྲོན་མ་གསལ། །མལ་ཁྲི་སྟན་དག་ཡིད་འོང་བ། །འདི་

ཡིས་སངས་རྒྱས་ཐམས་ཅད་མཆོད། །ཡིད་ནི་བདེ་བར་གནས་པར་བྱེད། །སློབ་དཔོན་རྡོ་རྗེ་ཅན་དང་ནི། །ཁྱད་པར་དུ་ནི་སྒྲུབ་པོས་བྱ། །དགོད་དང་སྒེག་དང་དེ་བཞིན་གླུ། །སིལ་སྙན་གར་ནི་རབ་དགའ་བ། །མཆོད་པའི་ལན་ཏེ་ཤིན་ཏུ་ནི། །སངས་རྒྱས་ཕྱག་རྒྱས་འགྲུབ་པར་འགྱུར། ། གཟུགས་དང་སྒྲ་དང་དེ་བཞིན་དྲི། །རོ་དང་རེག་པ་ཡིད་འོང་བ། །འདི་ནི་མཆོད་པའི་ལན་དུ་འགྲུབ། །སངས་རྒྱས་བྱང་ཆུབ་བདེ་བ་ཆེ། །ཕྱག་རྒྱ་སྐྱེས་བུའི་རྣམ་པ་སྟེ། །ཕྱག་རྒྱའི་ལན་ནི་རང་གཟུགས་ཏེ། །གཉིས་པ་ཕྱག་རྒྱ་ཆེན་པོ་སྟེ། །ཕྱག་རྒྱའི་ལན་ནི་ལས་བཟང་ཅན། ། ཕྱག་རྒྱ་རང་གི་བདག་པོར་ཤེས། །ཕྱག་རྒྱའི་ལན་ནི་སྒྲུབ་པ་པོ། །ཇི་སྲིད་དབྱེ་བ་སྟོང་ཕྲག་ནི། །དབྱེ་བའི་གཞི་རུ་བརྟག་པར་བྱ། །ཞེས་སོ། །གར་ནི་གར་གྱི་སྦྱོར་བ་ཡིས། །གར་གྱི་ལན་ནི་གར་མཁན་མའོ། །ཇི་སྲིད་དབྱེ་བ་སྟོང་ཕྲག་ཀྱང་། །དབྱེ་བ་བཞི་རུ་བརྟག་པར་བྱ། །ཀུན་ཏུ་བཟང་པོ་ལ་བརྟེན་ནས། །ཇི་སྲིད་ལས་ཀྱི་རྗེས་འབྲང་བའོ། །ལས་ཀྱི་སྦྱོར་ལ་ཡང་དག་བསྟེན། །ཇི་སྲིད་བཟང་པོའི་རྗེས་འབྲང་བའོ། །བླ་འོག་ཡང་དག་བསྐྱོད་པ་ཡིས། །གར་དང་སྟེང་གི་གར་བསྐོར་བ། །རྟོག་པའི་སྦྱོར་བས་བརྟག་པར་བྱ། །རྟོག་པ་ཡིས་ནི་རབ་ཏུ་གསུང་། ། ཇི་ལྟའི་སིལ་སྙན་རྡུང་སྤྱད་ནི། །རྡུང་བའི་བདག་ཉིད་ཅན་གྱིས་དཀྲོལ། །དེ་ལས་བྱུང་བའི་སིལ་སྙན་ལན། །གསིལ་བས་སིལ་སྙན་ཉིད་དུ་བརྗོད། །སྔགས་ཀྱི་ཡི་གེའི་ཆོ་ག་སྦྱར། །ཇི་སྲིད་ལས་མཆོག་སྤྱོད་ཡུལ་བ། །དེ་ནས་སྦྱོར་བས་འཐོན་ནས་སུ། །ཀུན་ཏུ་བཟང་པོར་འགྲོ་བར་བྱ། །སྒྲོགས་པས་གྲུབ་ཅེས་བརྗོད་པ་སྟེ། །འདྲེན་པ་གསུམ་ལས་ལེགས་པར་འབྱུང་། །དབྱངས་རྣམས་རྣམ་དྲུག་ཤེས་པར་བྱ། །གླུ་ཡི་ཕྱག་རྒྱ་ཞེས་སུ་འགྲུབ། །དེ་ནས་སྦྱོར་བས་འཐོན་ནས་སུ། །ཇི་སྲིད་མགོ་དང་སྙིང་གར་སོན། །མགྲིན་པ་སྣ་ཡི་སྦྱོར་བ་དང་། ། མགུལ་པ་གཡོ་བ་ཉིད་ཀྱིས་སོ། །འགྱུར་བས་རྣམ་པར་འགྱུར་བ་སྟེ། །ལན་དང་གཏོང་བའི་ཆོ་ག་རིམ། །ཆོས་རྣམས་ཐམས་ཅད་བླང་བ་དང་། །གདོན་གྱི་ཚོགས་རྣམས་ཟློག་པ་སྟེ། །རྣམ་འགྱུར་ལས་ནི་སླར་ཡང་འདིར། །སེམས་ཀྱི་རྣམ་པར་རྟོག་པའོ། །ཇི་སྲིད་ལས་ནི་རྗེས་

སྦྱོར་བ། །སངས་རྒྱས་རྣམས་ཀྱི་རྗེས་སུ་འབྲང་། །སེམས་དང་ལུས་ཀྱི་རྣམ་བསྒྱིངས་པས། །གདུག་པ་ཐམས་ཅད་བཟློག་པར་བྱ། །ལག་པ་རྐང་པའི་རིམ་པ་ཀུན། །རྣམ་འགྱུར་གྱི་ནི་ལན་ཡིན་ནོ། །དབྲོག་པ་དགུག་པར་ཤེས་བྱ་སྟེ། །གཏོང་བ་དག་ནི་དབྲོག་པའི་ལན། །དབྲོག་པ་མཆོག་ཏུ་ཤེས་བྱ་བ། །བགེགས་ཀྱི་གནས་ནི་རབ་གནོན་པའོ། །དབྲོག་པའི་ལན་ནི་རབ་བཟློག་སྟེ། །བསྡིགས་པའི་རྐང་པ་དགོད་པར་ཤེས། །བརྡ་ནི་དྲན་པའི་དོན་དུ་སྟེ། །ཕན་ཚུན་ཡོངས་སུ་བརྗོད་པ་ཡིས། །འགྲུབ་དང་མི་འགྲུབ་སྦྱོར་བ་རྣམས། །སློབ་དཔོན་སློབ་མ་སོགས་པས་བསྒྲུབ། །བརྡ་ལན་ལྷ་མོ་རྣམས་ཀྱིས་ནི། །བསྐུལ་དང་སོ་སོར་བསྐུལ་བའོ། །དྲི་བ་སྨྲ་དང་འདྲི་བ་སྟེ། །མཐོང་ནས་འདྲི་བ་འདྲི་བའི་ལན། །ལེགས་པའི་གཟུགས་མཐོང་བལྟ་བ་སྟེ། །ལྷ་ཡི་ཡེ་ཤེས་སྤྱོད་ཡུལ་ལོ། །བལྟ་བའི་ལན་ནི་དེ་ལས་སླར། །སྦྱོར་བ་མཆོག་གིས་སྦྱོར་བའོ། །ལྷ་དང་ལྷ་མོ་རྣམས་ཀྱི་ནི། །གཡས་གཡོན་བལྟ་བ་བལྟ་བ་སྟེ། །ཇི་སྙེད་བལྟ་བའི་སྦྱོར་བ་ཡིས། །སྒྲུབ་པར་བྱེད་པའི་ལན་ཡིན་ནོ། །དམ་ཚིག་སངས་རྒྱས་ཐམས་ཅད། །བཀའ་རྟགས་བྱས་པ་ཉིད་དུ་འདོད། །གང་ཕྱིར་ཐོས་པ་འཛིན་པ་ཡི། །སྒྲུབ་པོ་ལན་དུ་ཤེས་པར་བྱ། །དཀྱིལ་འཁོར་ལུས་སུ་བཤད་པ་སྟེ། །ཡེ་ཤེས་ལྔ་ཡིས་བྱིན་བརླབ་པའོ། །དཀྱིལ་འཁོར་ལན་ནི་ལྷ་མོ་རྣམས། །གཅིག་ཏུ་བྱེད་པའི་དམ་པའོ། །གསང་བ་སྦས་པར་བཤད་པ་སྟེ། །གསང་བའི་ལན་ནི་ལེགས་སྦས་པའོ། །གསང་ཆེན་སེམས་ཀྱི་འདུ་ཤེས་ཏེ། །བདེ་བའི་རྣམ་པར་རྟོག་པའོ། །སོ་སོར་རྟོག་པ་ལྷ་མོ་དང་། །ལྷ་ཡི་བདེ་བ་བདེ་ཆེན་པོ། །སངས་རྒྱས་སྲས་བཅས་ཐམས་ཅད་ཀྱིས། །གསང་ཆེན་ལན་དུ་བརྗོད་པའོ། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །དེ་ནས་དེ་རྣམས་སླར་ཡང་འདུས་པར་གྱུར་ཏེ། ཡང་བཅོམ་ལྡན་འདས་ལ་ལེགས་པར་བསྐུལ་བ། རྡོ་རྗེ་སེམས་དཔའ་བདེ་རབ་མཆོག །ཤེས་རབ་མཆོག་རབ་གྲོལ་བའོ། །མཆོད་པའི་ཡེ་ཤེས་ལེགས་འགྲུབ་པའི། །གསང་བ་ཆེན་པོ་གསུང་དུ་གསོལ། །དེ་ནས་བཅོམ་ལྡན་འདས་ཀུན་ཏུ་བཟང་པོས་སླར་

ཡང་གསང་བ་ཆེན་པོ་མཆོད་པ་ཆེར་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃཧཱུྃ་ཧཱུྃ་ཧཱུྃ། ག་ག་རི་ག་ག་རི་ག་ག་ག་ག་རི་ག་རི། ར་ར་ར། ག་རི་ག་ག །ཏེ་ཏེ་ཏེ་ཏེ། ཧེ་ཏེ་ཏེ་ཏེ་ཏེ་ཏེ། ན་ཏེ་ཏེ་ཏེ་ཎྞཱ་ཏེ་ཏེ། ན་ཏེ་ཏེ་ཛཱ་ཏེཏྟ། ཛཱ་ཏེ་ཏཏྟ། ཛ་ཏེ། རི་ཏི་རཱ། ཏེ་ཏ་ཏེ་ཛཱ་ཏེ་ཏཱི་རི་ར་ཏེ། ཏ་རི་ཏ་རི། ཏེ་ཏ་རི་ཧཱུྃ། རི་རི་ཧཱུྃ། ཏེ་ཛཱ་ཏེ་ཏེ་ཧཱུྃ། ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །སངས་རྒྱས་ཀུན་གྱི་བདག་པོ་མཆོག །རྡོ་རྗེ་སེམས་དཔའ་ཀུན་གྱི་རྗེ། །གླུ་ཡི་ཕྱག་རྒྱ་རབ་གསལ་བའོ། །དེ་ནས་རོལ་མོའི་ཕྱག་རྒྱ་ཡི། ། རྣལ་འབྱོར་ཆེན་པོ་ཐུགས་རྗེའི་བདག་ཉིད་ཅན་གྱིས་གསུངས་པ། ལྷ་དང་ལྷ་མོ་རྒྱལ་བདག་དང་། །གང་གིས་མྱུར་དུ་མཚུངས་འགྱུར་བ། །ཨོཾ་ཧཱུྃ་བྷྱོ་གྷེ་ཊ་ཧཱུྃ། ཨོཾ་ཧཱུྃ་བྷྱོ་གྷེ་ཊ་ཧཱུྃ། གྷེ་ཊ་ཧཱུྃ། གྷེ་ཊ་ཧཱུྃ། རུ་ལུ་རུ་ལུ། གྷེ་ཊུ་གྷེ་ཊུཾ། གྷེ་ཊུ་གྷེ་ཊུཾ། །གྷེ་ཊ་གྷེ་ཊ། ཧཱུྃ་ཊ་ནཱ་ཌ་ཡོ། ཧཱུྃ་ཊ་ན་ཌ་ཡོ། ཧཱུྃ་ཊ་ནཱ་ཌ་ཡོ། ཊ་ར་ཎཱཾ། ཊ་ར་ཎཱཾ། ཊཱ་ཎ་ཊཱ་ཎ་ཊཱྃ་ཊ། ཊཱཾ་ཊ། ཊཱ་ཎ་ཊ་ཎ་ཊཾ་ཊཱ། ཊཱ་ཊཱཾ། ཎིཊྚཾ་ཎཊྚ། ཎིཊཱཾ། ཨོཾ་དུཿདུཿདུཿདུཿ། ཨོཾ་དུཿདུཿ་དཱུཿདཱུཿདཱུཿདཱུཿདཱུཿདུཿདུཿདུཿདུཿཊཾ་ཊཾ། ཌ་དྷཱཾ་དྷཱཾ། དྷ་དྷ་དྷ་དྷཱཾ། དྷ་དྷ་དྷ། ཛྷ་ཛྷཱཾ། ཛྷ་ཛྷཱཾ། ཛྷི་ཛྷཱཾ། ཛྷཱ་ཛྷཱ་ཛྱ་ཛྷཱ། ཛྷི་ཛྷ། ཛྷི། ཛྷཱཾ་ཛྷཱཾ་ཛྷཱ། ཛྷཱི་ཛྷཱཾ་ཛྷཱཾ་ཛྷཱཾ། སྣ་ཡི་སྦུབས་སུ་དཀྲོལ་བ་དང་། ། ལག་པའི་མཐིལ་དང་ཁ་དག་གིས། །སིལ་སྙན་སྦྱོར་བས་བསིལ་བར་བྱ། །ངེས་པར་མྱུར་དུ་རབ་ཏུ་འགྲུབ། །གཡས་དང་གཡོན་གྱི་སྦྱོར་བ་དང་། །ཆང་ཟུང་ལྟ་བའི་རིམ་པ་ཡིས། །སྒེག་ཅིང་དཔའ་བ་མི་སྡུག་པ། །དགོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་སོགས་ཀྱི། །ཉམས་ཀྱི་ངོ་བོ་ལེགས་བསླབས་པའི། །གང་གིས་རྣལ་འབྱོར་ཅན་འགྲུབ་འགྱུར། །གར་གྱི་དབང་ཕྱུག་གཙོ་བོ་ཆེ། །བཅུད་ནི་ཟླ་བ་སོགས་མཛེས་པ། །ཤ་སོགས་བཟའ་བའི་དཀྱིལ་འཁོར་དང་། །ཙནྡན་ལ་སོགས་བྱུག་པ་དང་། །མེ་ཏོག་ལ་སོགས་ཕྲེང་མཛེས་དང་། །བུད་མེད་བཟང་མོའི་རིགས་རྣམས་ཀྱིས། །དམ་ཚིག་བྱིན་བརླབས་སྦྱོར་བ་ལས། །རྫས་རྣམས་ཐམས་ཅད་བསྒྲུབ་པར་བྱ། །ཕཊ་ཡིག་ཧཱུྃ་དང་བཅས་པ་ཡིས། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །སྦྱོར་ལྡན་ཀུན་ལ་གནས་ནས་སུ། །གཡས་

པ་ཡི་ཡང་གར་སྦྱོར་ལས། །རྡོ་རྗེ་བསྡམས་པའི་སྦྱོར་བ་ཡིས། །སྙིང་གར་དེ་བཞིན་བསྒྲེང་བར་བྱ། །ཡང་ནི་གཉིས་པ་ཉིད་ཀྱང་སྟེ། །ཤེས་རབ་གང་ཡིན་རྡོ་རྗེར་བྱ། །སྐར་མ་ལྕགས་ཀྱུ་དེ་བཞིན་འདིར། །འདིར་ནི་བསྙེམས་བཅས་རྗེས་སུ་ཆགས། །དེ་ལས་རྡོ་རྗེའི་སྦྱོར་བ་སྦྱར། །ཡང་དང་ཡང་དུ་དགྲོལ་བར་བྱ། །འདི་ཡིས་ལས་རྣམས་ཐམས་ཅད་ནི། །བྱེད་འགྱུར་འདི་ལ་གདོན་མི་ཟ། །དེ་ཉིད་སྙིང་གར་ཁུ་ཚུར་ཏེ། །རྡོ་རྗེ་གདོང་པ་སྐར་མའི་ཁ། །རང་གི་གནས་སུ་བཞག་པ་དེ། །དབང་བསྐུར་བ་ནི་གཉིས་པའོ། །དེ་ཉིད་བསྙེམས་པས་ཆེར་བསྟན་ཏེ། །ཡང་དང་ཡང་དུ་ཡོངས་སུ་བསྐྱོད། །དེ་ཉིད་འོད་ཟེར་རྣམ་པ་རུ། །ཐམས་ཅད་དུ་ནི་སྤྲོ་བར་བྱ། །དེ་ཉིད་ཁ་རུ་བསྟན་པ་ནི། །རྡོ་རྗེ་བཤད་པར་རྣམ་པར་བ་ཤད། །འདི་རྣམས་ཀྱིས་ནི་དོན་རྣམས་ཀུན། །མཁས་པ་ཡིས་ནི་བསྒྲུབ་པར་བྱ། །དེ་ཉིད་པདྨའི་སྦྱོར་བ་དང་། །མིག་གིས་སྦྱོར་བ་གཉིས་པའོ། །ཤེས་རབ་སྐར་་མ་དེ་ནས་བསྒྲེང་། །ལྟེ་བར་བྱས་པ་འཁོར་ལོ་ཅན། །རྡོ་རྗེ་སྨྲ་བ་ལྕེ་ཡི་རྩེར། །རོ་རྣམས་མ་ལུས་འཕྲོག་པར་བྱེད། །འདི་དག་གིས་ནི་ལས་རྣམས་ཀུན། །པདྨའི་འོད་ཀྱིས་རབ་ཏུ་བྱ། །དེ་བཞིན་ཁུ་ཚུར་ལེགས་པར་སྦྱར། །ཤེས་རབ་ཀྱིས་ནི་སྙིང་གར་བསྣུན། །དེ་ལས་གཉིས་པ་སྣ་ཚོགས་ཆེ། །སྙིང་གར་ཡོངས་སུ་བསྐོར་བར་བྱ། །སྐར་མ་རྡོ་རྗེའི་རྣམ་པ་མཆོག །བཟོད་དང་གཟི་བརྗིད་མཆེ་བ་མཛེས། །དེ་ཉིད་དམ་དུ་བསྡམས་པ་ནི། །འཆིང་བའི་ལས་ནི་བྱེད་པའི་མཆོག །འདི་རྣམས་ཀྱིས་ནི་ཐམས་ཅད་སྒྲུབ། ། ཕྱག་རྒྱ་དང་ནི་ཕྱག་རྒྱའི་ལན། །གཡས་དང་གཡོན་གྱི་སྦྱོར་བ་ཡིས། །ལས་ཀྱི་དམ་པ་མ་ལུས་པའོ། །ཞེས་བཅོམ་ལྡན་འདས་ཀུན་ཏུ་བཟང་པོས་བཀའ་སྩལ་ཏོ། །དེ་ནས་བཅོམ་ལྡན་སྣ་ཚོགས་ཆེ། །པདྨ་རིན་ཆེན་རྡོར་མཆོག་འཛིན། །གསང་བ་རྒྱན་གྱིས་དཀྱིལ་འཁོར་གྱི། །དཔལ་ཆེན་ལ་ནི་ཞུ་བ་ཞུས། །སངས་རྒྱས་དཀྱིལ་འཁོར་དོན་ཕྱིར་དང་། །མ་མོ་རྣམས་ཀྱི་དོན་དམ་ནི། །ཡོངས་སུ་རྟོག་པ་ཐམས་ཅད་སྤངས། །སངས་རྒྱས་ཀུན་མཆོག་དམ་པའི་གསང། །དཀྱིལ་འཁོར་ཐམས་ཅད་བརྒྱན་པ་ཡིས། །མཛེས་པས་བཅོམ་ལྡན་གསུང་དུ་གསོལ། །དེ་ནས་

བཅོམ་ལྡན་འདས་ཀུན་ཏུ་བཟང་པོས་དེ་དག་གིས་གསོལ་བ་བཏབ་པ་ལ་འདི་སྐད་ཅེས་བཀའ་སྩལ་ཏོ། །དང་པོ་དང་ནི་གཉིས་པ་དང་། །དྲུག་དང་ལྔ་དང་དེ་བཞིན་བཅུ། །མདོར་བསྡུས་ནས་ནི་བསྒོམ་པར་བྱ། །རྡོ་རྗེ་རིན་ཆེན་ཆུ་སྐྱེས་ལས། །རང་གི་དཀྱིལ་འཁོར་གོ་རིམས་ཀྱིས། །གསང་སྔགས་འཛིན་པས་གནས་ལྔར་དགོད། །དཀར་དང་སེར་པོ་ཆེས་དམར་བ། །སྔོན་པོའི་འོད་ཟེར་གློག་ལས་བྱུང་། །ཐ་མ་ཀུན་གྱི་ཐོག་མ་རུ། །འོད་ཟེར་བཟང་པོ་སྦྱར་བར་བྱ། །རྡོ་རྗེ་རྣལ་འབྱོར་ཆོ་ག་ལ། །གནས་ནས་བསྒོམ་དང་བཟླས་པ་སྦྱར། །འདི་ནི་དཀྱིལ་འཁོར་མིང་ཡིན་ཏེ། །དཀྱིལ་འཁོར་རྒྱལ་བ་རྣམས་ཀྱི་རྟེན། །བརྟེན་པས་སྒྲུབ་པོ་ཤིན་ཏུ་ཡང་། །དུས་མི་རིང་བར་ས་སྟེངས་འགྲུབ། །འདི་ནི་བཅོམ་ལྡན་རྡོ་རྗེ་ཅན། །ཀུན་སྦྱར་དྲི་མ་མེད་པའི་གཙོ། །སངས་རྒྱས་ཀུན་གྱི་རྒྱལ་པོ་ཆེ། །སྐྱེ་དང་འཆི་བ་འཇོམས་པས་གསུངས། །དེ་ནས་རྒྱལ་བ་ཐམས་ཅད་དང། །སྦྱོར་བའི་མ་དང་ཡུམ་རྣམས་ནི། །ལེགས་ཚིག་རྡོ་རྗེ་སེམས་དཔའ་ནི། །བདེ་བ་ཆེ་ལ་ལེགས་ཞེས་གསོལ། །རྡོ་རྗེ་ཀུན་གྱི་བདག་པོ་གཙོ། །སངས་རྒྱས་དབྱངས་ཀྱིས་བསྟོད་པར་བྱས། །རྡོ་རྗེ་གླུ་སོགས་སྦྱར་བ་ཡིས། །དབང་བསྐུར་ཀུན་གྱི་མཆོག་ལྡན་གཙོ། །དཔལ་ལྡན་སངས་རྒྱས་སངས་རྒྱས་བདག་པོ་ཚུལ། །སངས་རྒྱས་ས་ནི་རྒྱལ་རྣམས་ཆུབ་མཛད་རྫོགས་སངས་རྒྱས། །སངས་རྒྱས་སྲས་པོ་ངེས་པར་མཐའ་དག་སངས་རྒྱས་ཀྱིས། །སྦྱོར་བས་བློ་གྲོས་སྦྱིན་རྣམས་ལེགས་པར་ཚིམ་མཛད་པ། །དཔལ་གྱི་རྡོ་རྗེ་དྲི་མེད་རྡོ་རྗེ་ཡེ་ཤེས་རྡོར། །རྡོ་རྗེའི་སྣང་བས་འཇིག་རྟེན་རབ་ཏུ་གསལ་མཛད་པ། །བསྡུས་པའི་རྡོ་རྗེ་སྦྱོར་བ་ལྡན་པས་ལེགས་བཏོན་ཏེ། །རྡོ་རྗེའི་བདག་ཉིད་ངོ་བོར་མཛད་པའི་མཛེས་རྡོ་རྗེ། །དཔལ་གྱི་རིན་ཆེན་རིན་ཆེན་འབྱུང་གནས་རིན་ཆེན་སྤྲིན། །རིན་ཆེན་རྣམས་ལ་རིན་ཆེན་གྱིས་དགྱེས་རིན་ཆེན་མཛེས། །མཛེས་པའི་བརྗིད་ལྡན་རིན་ཆེན་རྒྱལ་མཚན་གྱི། །སྐྱེ་བོ་རྣམས་ཀྱི་ཕོངས་དང་སྡིག་པ་རྣམས་བཅོམ་ནས། །དཔལ་གྱི་པདྨ་པདྨ་དམ་པའི་བླ་མ་པད་སེམས་དཔལ། །པདྨས་རབ་དགྱེས་པདྨ་ལས་འཁྲུངས་པདྨ་ཡི། །དྲ་བས་པདྨ་མཐའ་དག་ངེས་པར་རྒྱལ་མཛད་དེ། །པདྨའི་རིགས་ལ་འཇོག་

པར་མཛད་པའི་པད་བཟང་པོ། །སྣ་ཚོགས་དཔལ་ལྡན་ཀུན་གྱི་བདག་པོ་སྣ་ཚོགས་མཁྱེན། །སྣ་ཚོགས་དབང་ཕྱུག་སྣ་ཚོགས་ཡུམ་གྱིས་མ་གོས་པ། །སེམས་ཅན་རྣམས་ནི་འདུལ་ལེགས་འཇོག་མཛད་སྣ་ཚོགས་པ། །ཅི་དགའ་འདོད་ལ་རིག་པ་དམ་པ་གནང་དུ་གསོལ། ། ཞེས་སོ། །དེ་ནས་དེ་རྣམས་ཀྱིས་སླར་ཡང་སེམས་ཅན་མ་ལུས་པ་འདུལ་བའི་དོན་དུ་འདི་སྐད་ཅེས་བསྟོད་པ། སངས་རྒྱས་ཚུལ་ཁྱོད་ཕྱག་འཚལ་ལོ། །སངས་རྒྱས་འབྱུང་བ་ཁྱོད་ལ་འདུད། །སངས་རྒྱས་ཡེ་ཤེས་ཁྱོད་ཕྱག་འཚལ། །སངས་རྒྱས་གཟི་བརྗིད་ཕྱག་འཚལ་འདུད། །སངས་རྒྱས་དཔའ་བོ་ཁྱོད་ལ་འདུད། །རྡོ་རྗེ་ཁྲོ་བོའི་ཡིད་ལས་འཁྲུངས། །སྡིག་པ་བཅོམ་པ་ཁྱོད་ཕྱག་འཚལ། །སྡིག་པ་བསལ་ལ་ཕྱག་འཚལ་འདུད། །ཕྱག་ན་རིན་ཆེན་ཁྱོད་ཕྱག་འཚལ། །གཙུག་ན་རིན་ཆེན་གཟི་བརྗིད་ཅན། །སྡུག་བསྔལ་བཅོམ་པ་ཁྱོད་ལ་འདུད། །ཐམས་ཅད་གྲུབ་ལ་ཕྱག་འཚལ་འདུད། །ཆོས་ཀྱི་དག་པ་ཁྱོད་ལ་འདུད། །པདྨ་དག་པ་རྟོགས་པའི་ཕྱིར། །འདོད་ཆགས་ཆགས་པ་ཁྱོད་ལ་འདུད། །འདོད་ཆགས་བྲལ་ལ་ཕྱག་འཚལ་འདུད། །སྣ་ཚོགས་རྡོ་རྗེ་ཁྱོད་ལ་འདུད། །སྣ་ཚོགས་སྦྱོར་བ་ཁྱོད་ཕྱག་འཚལ། །སྣ་ཚོགས་ཚུལ་ཅན་ཁྱོད་ལ་འདུད། ། སྣ་ཚོགས་བདེ་ལྡན་ཕྱག་འཚལ་འདུད། །བསྟོད་པའི་རྒྱལ་པོ་འདི་ཡིས་ནི། །ཆོས་དང་ལྡན་པ་ཐམས་ཅད་དུ། །ཉིན་རེ་ཞིང་ནི་སྟོད་བྱེད་ན། །བསམ་པའི་དངོས་གྲུབ་ཐོབ་པར་འགྱུར། །དེ་ནས་བཅོམ་ལྡན་འདས་ཀུན་ཏུ་བཟང་པོས་སླར་ཡང་དེ་བཞིན་གཤེགས་པ་ཐམས་ཅད་ཀྱི་ཆོས་ཤེས་རབ་དང་ཡེ་ཤེས་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ཀྱི་དབང་ཕྱུག་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཀུན་གྱི་གསང། །གསང་བ་རྒྱན་ཅེས་བྱ་བ་ནི། །སེམས་དཔའ་ཆེན་པོ་ལེགས་པར་ཟུང་། །སེམས་དཔའ་ཆེན་པོ་ནི་དགའ་བས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དབང་ཕྱུག་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དཔའ་བོ་ཆེན་པོ་ཅི་གསུང་བ། །རང་བྱུང་ཡེ་ཤེས་ཕ་རོལ་སོན། །ཆོས་ཀུན་དབང་ཕྱུག་

དཔལ་དང་ལྡན། །འཇིག་རྟེན་གསུམ་གྱི་སྡིག་འཇོམས་པས། །ཇི་སྐད་གསུངས་བཞིན་སྙིང་ལ་ནི། །ལེགས་གཟུང་དྲི་མེད་ཡེ་ཤེས་བཟང། །རྡོ་རྗེ་སེམས་དཔས་བཀའ་སྩལ་པ། །བདེ་བ་ཆེན་པོ་བདག་གིས་བཟུང་། །ཞེས་སོ། །བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་པ་དང་། སངས་རྒྱས་དང་བྱང་ཆུབ་སེམས་དཔའ་ཡབ་དང་ཡུམ་གྱི་ཚོགས་དང་བཅས་པ་འཁོར་དང་བཅས་པའི་དཀྱིལ་འཁོར་ཇི་ལྟ་བུའི་རྡོ་རྗེ་ལ་ལེགས་པར་གནས་པ་དེ་དག་ཐམས་ཅད་རྡོ་རྗེ་སེམས་དཔའི་གསང་སྔགས་རྗེས་སུ་དྲན་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གསང་བ་རྒྱན་གྱི་བཀོད་པ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ་ཡོངས་སུ་རྫོགས་སྷོ།། །།རྒྱ་གར་གྱི་མཁན་པོ་བརྡ་སྤྲོད་པ་ཆེན་པོ་བདེ་བར་གཤེགས་པའི་དཔལ་ཞེས་བྱ་བ་དང་། སྒྱུར་བྱེད་ཀྱི་མཁས་པ་སྒྲའི་གཞུང་ལུགས་ལ་བློ་གྲོས་དཀར་བ་ཀུན་དགའ་རྒྱལ་མཚན་གྱིས་དཔལ་ས་སྐྱའི་དབེན་གནས་དམ་པར་བསྒྱུར།། །།མདའ་ལྔའི་གཙུག་ལྡན་ཡིད་ཀྱི་སྲུབ་ཤིང་གི། །དྲེགས་པའི་དྲ་བ་རྣམ་པར་དྲལ་བའི་ཕྱིར། །རྒྱུད་རྒྱལ་རྒྱ་མཚོའི་རྒྱལ་པོ་ལྟར་ཟབ་འདི། །བསྒྱུར་ལ་འགལ་གང་འདི་ལ་འཕགས་རྣམས་དགོངས།།

འཕགས་པ་གསང་བ་ནོར་བུ་ཐིག་ལེ་ཞེས་བྱ་བའི་མདོ།

རྒྱ་གར་སྐད་དུ། ཨཱརྱ་གུ་ཧྱ་མ་ཎི་ཏི་ལ་ཀཱ་ན་མ་སཱུ་ཏྲ། བོད་སྐད་དུ། འཕགས་པ་གསང་བ་ནོར་བུ་ཐིག་ལེ་ཞེས་བྱ་བའི་མདོ། བླ་མ་དང་འཇམ་པའི་དབྱངས་ཀྱི་ཞབས་ཀྱི་རྡུལ་རྙོག་པ་མེད་པ་ལ་གུས་པར་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་བྱིན་གྱིས་བརླབས་པའི་དམ་ཚིག་གི་ཡེ་ཤེས་རྣམ་པ་སྣ་ཚོགས་པ་ཁྱད་པར་དུ་འཕགས་པ་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཅོད་པན་ཁམས་གསུམ་པའི་ཆོས་ཀྱི་རྒྱལ་པོར་དབང་བསྐུར་བ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ལེགས་པར་ཁོང་དུ་ཆུད་པས་ལས་སྣ་ཚོགས་མཛད་པ། མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་མཛད་པ།

ཐུགས་རྗེ་ཆེན་པོ་རྣམ་པར་སྣང་མཛད་རྟག་པ་དུས་གསུམ་གྱི་དམ་ཚིག་ལ་རྣམ་པར་གནས་པའི་སྐུ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱིས་བསྟེན་ཅིང་བསྟོད་པའི་ནོར་བུ་རིན་པོ་ཆེ་ཆེན་པོའི་རྩེ་མོའི་ཁང་པ་བརྩེགས་པ། ཁ་དོག་རྣམ་པར་བཀྲ་བའི་དྲིལ་བུ་དང་ལྡན་པ། རླུང་གིས་བསྐྱོད་པའི་དར་གྱི་བ་དན་དང་། མེ་ཏོག་གི་ཆུན་པོ་དང་། དྲ་བ་དང་། དྲ་བ་ཕྱེད་པ་དང་། ཟླ་བས་ཉེ་བར་མཛེས་པའི་འོག་མིན་གྱི་ལྷའི་རྒྱལ་པོའི་ཁང་བཟངས་ན་བཞུགས་སོ། །བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་དགུ་དང་ཐབས་ཅིག་པ་ལ་འདི་ལྟ་སྟེ། བྱང་ཆུབ་སེམས་དཔའ་ལག་ན་རྡོ་རྗེ་དང་། སྤྱན་རས་གཟིགས་དབང་ཕྱུག་དང་། ནམ་མཁའི་སྙིང་པོ་དང་། རྡོ་རྗེ་ཁུ་ཚུར་དང་། བྱང་ཆུབ་ཀྱི་སེམས་བསྐྱེད་པ་དང་ལྡན་པས་ཆོས་ཀྱི་འཁོར་ལོ་རབ་ཏུ་བསྐོར་བ་དང་། ནམ་མཁའ་མཛོད་དང་། བདུད་ཀྱི་སྟོབས་ཐམས་ཅད་རབ་ཏུ་འཇོམས་པ་དང་། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་དགུ་དང་། གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་གཞལ་དུ་མེད་ཅིང་བགྲང་བ་ལས་འདས་པའི་དེ་བཞིན་གཤེགས་པ་རྣམས་ཀྱིས་འདི་ལྟ་སྟེ། དཔེར་ན་ཏིལ་གྱི་གང་བུ་ལྟར་འཛམ་བུའི་གླིང་ཡོངས་སུ་གང་བར་མཐོང་ངོ་། །དེ་བཞིན་གཤེགས་པའི་སྐུ་རེ་རེ་ལས་ཀྱང་གཞལ་དུ་མེད་ཅིང་གྲངས་ལས་འདས་པའི་དེ་བཞིན་གཤེགས་པའི་ཞིང་མཐོང་བར་གྱུར་ཅིང་། སངས་རྒྱས་ཀྱི་ཞིང་དེ་དག་ཐམས་ཅད་ན་ཡང་ཆོས་ཀྱི་ཚུལ་འདི་ཉིད་སྟོན་པར་མཛད་དོ། །དེ་ནས་བཅོམ་ལྡན་འདས་རྣམ་པར་སྣང་མཛད་ནམ་མཁའི་ཁམས་ཐམས་ཅད་ལ་སྐུ་དང་། གསུང་དང་། ཐུགས་རྡོ་རྗེ་རྟག་ཏུ་བཞུགས་པ། དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་བགྲོད་པའི་རྡོ་རྗེའི་དབྱིངས་ཐམས་ཅད་ཐུགས་སུ་ཆུད་པའི་ཡེ་ཤེས་སེམས་དཔའ་ནམ་མཁའི་དབྱིངས་ཐམས་ཅད་ཀྱི་རྡུལ་རྡོ་རྗེས་བྱིན་གྱིས་བརླབས་པ་ལས་བྱུང་བའི་ཡེ་ཤེས་ཀྱི་སྙིང་པོ་ནམ་མཁའི་ཁམས་ཐམས་ཅད་ལ་འཕྲོ་བའི་རང་བཞིན་གྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་མངོན་པར་ཡོངས་སུ་མཁྱེན་པ། དེ་

བཞིན་གཤེགས་པ་ཐམས་ཅད་ཀྱི་བདག་གི་རང་བཞིན་དག་པས་ཆོས་ཐམས་ཅད་ངོ་བོ་ཉིད་རྣམ་པར་དག་པ་ནམ་མཁའ་ཐམས་ཅད་ལ་ཁྱབ་པའི་གཟུགས་ཐམས་ཅད་ལེགས་པར་གཟིགས་པའི་ཡེ་ཤེས་ཀྱིས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་འདུལ་བའི་སྤྱོད་པའི་མཆོག་ཏུ་གྱུར་པ། དེ་བཞིན་གཤེགས་པ་ཐམས་ཅད་ཀྱི་དོན་ཡོད་པའི་ཡེ་ཤེས་མཛད་པ་དང་ལྡན་པས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་ཐུགས། དེ་བཞིན་གཤེགས་པ་ཐམས་ཅད་འགུགས་པའི་དམ་ཚིག་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའི་ཡེ་ཤེས་ཀྱི་དབང་ཕྱུག་དང་། དེ་བཞིན་གཤེགས་པ་ཐམས་ཅད་ཀྱི་ལེགས་པ་དང་། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེ་ཆེན་པོས་དབང་བསྐུར་བའི་རིན་པོ་ཆེ་དང་། དེ་བཞིན་གཤེགས་པ་ཐམས་ཅད་ཀྱི་ཉི་མའི་འོད་ཟེར་གྱི་དཀྱིལ་འཁོར་དང་། དེ་བཞིན་གཤེགས་པ་ཐམས་ཅད་ཀྱི་ཡིད་བཞིན་གྱི་ནོར་བུ་ཆེན་པོའི་རིན་པོ་ཆེའི་ཏོག་དང་། དེ་བཞིན་གཤེགས་པ་ཐམས་ཅད་ཀྱི་བཞད་གད་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་དག་པ་ཆེན་པོའི་ཆོས་དང་། དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་། ཡེ་ཤེས་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གསུང་ཆེན་པོ་དང་། དེ་བཞིན་གཤེགས་པ་ཐམས་ཅད་ཀྱི་ལས་སྣ་ཚོགས་པ་དང་། དེ་བཞིན་གཤེགས་པ་ཐམས་ཅད་ཀྱིས་བསྲུང་བ་དང་། དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་སྐྱོང་བའི་རྡོ་རྗེ་གནོད་སྦྱིན་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དགོངས་པ་ཕྱག་རྒྱ་ཐམས་ཅད་ཀྱི་ཡེ་ཤེས་དང་ལྡན་པ་སྟེ། ཀུན་ཏུ་བཟང་དང་དོན་ཡོད་པ། །འཆི་མེད་རབ་ཏུ་དགའ་བའི་གཙོ། །ནམ་མཁའི་སྙིང་པོ་གཟི་བརྗིད་ཆེ། །རིན་ཆེན་ཏོག་སྟེ་ཆེར་འཛུམ་པ། །སྤྱན་རས་གཟིགས་དང་དབང་ཕྱུག་ཆེ། །འཇམ་དཔལ་ཀུན་གྱི་སྙིང་པོ་དང་། །བརྗོད་བྲལ་སྣ་ཚོགས་པ་ཡི་ལས། །དཔའ་བོ་གཏུམ་པོ་དམ་པོར་འཛིན། །རྡོ་རྗེ་ལྕགས་ཀྱུ་མདའ་ཚིམ་པ། །རིན་ཆེན་ཉི་མ་རྒྱལ་མཚན་འཛུམ། །ཆོས་མཛོད་མཛེས་པའི་འཁོར་ལོ་

གསུང་། །ལས་དང་ཆོས་དང་འཇིགས་བྱེད་འཛིན། །ཐོག་མ་ཐ་མ་མེད་ཞི་བ། །མ་རུངས་ཁྲོ་དང་བཟོད་པ་ཆེ། །གནོད་སྦྱིན་སྲིན་པོ་དམ་པ་བརྟན། །གཟི་ཆེན་དཔའ་བོ་ཁྱབ་བདག་ཆེ། །ཨུ་མའི་བདག་པོ་སྐྱེ་དགུའི་མགོན། །འཇུག་སྲེད་རྒྱལ་འདོད་ཐུབ་པ་ཆེ། ། འཇིག་རྟེན་སྐྱོང་དང་མཁའ་དང་ས། །འཇིག་རྟེན་གསུམ་དང་ཁམས་གསུམ་པ། །འབྱུང་ཆེན་སེམས་ཅན་དོན་རབ་མཛད། །ཐམས་ཅད་སེམས་ཅན་ཕ་ཆེན་པོ། །འཁོར་བ་མྱ་ངན་འདས་དང་བརྟག །ཡང་དག་མཚོ་དང་མཆོད་ཆེན་པོ། །སངས་རྒྱས་དག་པ་ཐེག་པ་ཆེ། །སྲིད་པ་གསུམ་པོའང་དེ་ཡིན་ནོ། །དེ་དག་ལ་སོགས་པའི་ཡོན་ཏན་བྱེ་བ་བརྒྱ་སྟོང་དུ་མ་དང་ལྡན་པའི་བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་དུ་མས་ཡོངས་སུ་བསྐོར་ཏེ་དཀྱིལ་འཁོར་ཆེན་པོ་དེ་ལ་བཞུགས་ནས་ཆོས་སྟོན་པར་མཛད་དོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་བདག་པོ་བཅོམ་ལྡན་འདས་རྣམ་པར་སྣང་མཛད་ཀྱི་སྤྱན་སྔར་ཟླ་བའི་དཀྱིལ་འཁོར་ལ་བརྟེན་ཏེ་འཁོད་ནས་ཐོག་མ་དང་ཐ་མ་མེད་པའི་བཅོམ་ལྡན་འདས་ལ་གསོལ་པ། བཅོམ་ལྡན་འདས་མཆོག་ཏུ་གསང་བ་ཆེན་པོའི་ཐིག་ལེ་ཞེས་བགྱི་བའི་ཏིང་ངེ་འཛིན་གྱི་ཁྱད་པར་བཀའ་སྩལ་དུ་གསོལ། གང་གིས་སེམས་ཅན་རྣམས་ལ་གསང་བའི་དེ་ཁོ་ན་ཉིད་ཀྱི་དམ་ཚིག་དེ་བདག་གིས་བཤད་པར་བགྱི་ལགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་གསང་བའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་པ། ལག་ན་རྡོ་རྗེ་གསང་བའི་དམ་པ་གང་གིས་སེམས་ཅན་ཐམས་ཅད་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་དེ་བཤད་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་གང་གིས་བདག་གསང་བའི་བདག་པོར་འགྱུར་བ་བཀའ་སྩལ་དུ་གསོལ། དེ་ནས་དེ་བཞིན་གཤེགས་པ་དེ་དག་ཐམས་ཅད་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་ཞུགས་པར་གྱུར་ཏོ། །དེ་ནས་བཅོམ་ལྡན་འདས་དེ་

བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་དག་ཐམས་ཅད་མི་ཕྱེད་པར་མཛད་དེ། དེ་བཞིན་གཤེགས་པའི་སྐུ་དེ་དག་ཐམས་ཅད་དང་མི་ཕྱེད་པར་གྱུར་ནས་བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་ལ་ཆེད་དུ་བརྗོད་པ་འདིས་ཆེད་དུ་བརྗོད་པ། ཨེ་མའོ་བདག་ནི་ཐབས་ཆེན་པོ། །རབ་ཏུ་གསང་བ་ཐིག་ལེ་ཡི། །ཏིང་འཛིན་གང་ཕྱིར་གྲུབ་པ་ཡང་། །གསང་བ་ཉིད་ནི་ཞུ་བར་བྱེད། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་བཅོམ་ལྡན་འདས་ཀྱི་ཐུགས་ཀ་ནས་འཐོན་ནས་ཕྱག་ཏུ་འཁོད་པར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་གསང་བའི་ཐིག་ལེ་ཞེས་བགྱི་བ་ཅི་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་རབ་ཏུ་གསང་བའི་ཐིག་ལེ་འདི་ནི་མཆོག་ཏུ་གསང་བའོ། །ཆེས་ཤིན་ཏུ་གསང་བའོ། །དེ་བཞིན་གཤེགས་པ་ཐམས་ཅད་བསྐྱེད་པའོ། །དེ་བཞིན་གཤེགས་པ་ཐམས་ཅད་ཉིད་སྦྱིན་པའོ། །དེ་བཞིན་གཤེགས་པ་ཐམས་ཅད་བརྟན་པར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་བདེ་བ་དང་། ཡིད་བདེ་བ་རྗེས་སུ་རིག་པའི་དོན་དུ་དེ་བཞིན་གཤེགས་པ་ཐམས་ཅད་ཀྱི་ཐུགས་སུ་བྱོན་པའོ། །དེ་བཞིན་གཤེགས་པ་ཐམས་ཅད་ཀྱི་ཡབ་བོ། །དེ་བཞིན་གཤེགས་པ་ཐམས་ཅད་ཀྱི་ཡུམ་མོ། །འདི་ནི་གསང་བའི་མཛོད་དོ། །འདི་ཉིད་པདྨའོ། །འདི་ཉིད་རྡོ་རྗེའོ། །འདི་ཉིད་དམ་ཚིག་སྟེ། དེ་ཉིད་ཀྱིས་ན་ལག་ན་རྡོ་རྗེ། དམ་ཚིག་མི་ཤེས་པའི་མདུན་དུ་སྨྲ་བར་མི་བྱའོ། །དེའི་ཕྱིར་ལག་ན་རྡོ་རྗེ་ངས་འགའ་ལ་ཡང་མ་བཤད་དོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་སླར་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་ཕྱིར་གང་འགའ་ཞིག་ལ་སྨྲ་བར་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ལེགས་སོ་ཞེས་བྱ་བ་གནང་སྟེ། ལེགས་སོ་རྡོ་རྗེ་སེམས་དཔའ་ཁྱོད། །རྡོ་རྗེ་རིན་ཆེན་ཁྱོད་ལེགས་སོ། །ལེགས་སོ་རྡོ་རྗེ་ཆོས་ཁྱོད་ཀྱིས། །རྡོ་རྗེ་ལས་ཁྱོད་རབ་

ལེགས་སོ། །མདོ་སྡེ་འདི་ནི་ལེགས་བཤད་པ། །རྡོ་རྗེ་ཐེག་པ་བླ་ན་མེད། །དེ་བཞིན་གཤེགས་པ་ཀུན་གྱི་གསང། །ཐེག་པ་ཆེན་པོ་མདོར་བསྡུས་པ། །དག་པས་རྣམ་པར་བསྒྲུབས་ཙམ་གྱིས། །བདེ་བླག་ཏུ་ནི་སངས་རྒྱས་ཐོབ། །བདེ་བ་ཟད་མེད་མི་ཟད་པ། ། སྐྱེ་བ་འདི་ལ་འགྲུབ་པར་བྱེད། །ཅེས་སོ། །ལག་ན་རྡོ་རྗེ་དེས་ན་ཤིན་ཏུ་གསང་བའི་ཐིག་ལེ་ལས་ཀྱང་མཆོག་ཏུ་གསང་བ་ཞེས་བྱ་བ་ཐེག་པ་ཆེན་པོའི་མདོ་སྡེ་འདི་ལེགས་པར་སྦ་བར་བྱའོ། །སེམས་ཅན་གང་ཁ་ཅིག་ཉེ་བར་སྐྲག་པ་དང་བཅས་པ་ཡོད་ལ། གང་ཁ་ཅིག་དད་པ་དང་ལྡན་པས་ཐེག་པ་ཆེན་པོ་གླང་པོ་ཆེའི་ཕྲག་ཏུ་ཞོན་པ་དག་ཡོད་དོ། །དེ་དག་ལས་དང་པོ་ལ་ནི་གསང་སྔགས་དང་ཕྱག་རྒྱ་དང་གསང་བ་ཐམས་ཅད་བཤད་པར་མི་བྱ་ཞིང་། གསང་བ་ཐམས་ཅད་བསྟན་པར་མི་བྱའོ། །དད་པ་ཅན་དཀྱིལ་འཁོར་ཆེན་པོར་དབང་བསྐུར་བ་ཐོབ་པ་དག་ལ་དེ་དག་ཐམས་ཅད་བཤད་པར་བྱའོ། ། ལེགས་པར་གསང་བའི་ཏིང་ངེ་འཛིན་གྱི་ཐིག་ལེ་འདི་ནི་ཆེས་ཤིན་ཏུ་གསང་བ་རབ་ཏུ་གནས་པའི་སློབ་དཔོན་ལ་བཤད་པར་བྱའོ། །གང་ཞིག་རྒྱུད་འདི་བཤད་པ་ཙམ་ན་སེམས་ཅན་དད་པས་རྗེས་སུ་འབྲང་བ་དང་། གང་དག་ཆེས་ཤིན་ཏུ་དགའ་བ་སྐྱེ་བ་དེ་དག་ནི་སྔོན་གྱི་སངས་རྒྱས་རྣམས་ཀྱིས་ལུང་བསྟན་པར་ཤེས་པར་བྱའོ། །དེ་དག་ལ་འབད་པས་གདམས་པ་དང་བཅས་པ་བསྟན་པར་བྱའོ། །སེམས་ཅན་གང་ཁ་ཅིག་ཉན་ཐོས་ཀྱི་ཐེག་པ་དང་ལྡན་པ་དེ་དག་ལ་ལོ་རྒྱུས་ཙམ་ཡང་མི་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་ཕྱིར་དེ་དག་ལ་ལོ་རྒྱུས་ཙམ་ཡང་མི་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཉོན་ཅིག །སེམས་ཅན་དེ་དག་གིས་ལྷའི་རིས་མ་མཐོང་ཞིང་དམ་ཚིག་ལ་རབ་ཏུ་སྨོད་པར་བྱེད་པ་དེ་དག་ལ་གལ་ཏེ་སྨྲས་ན། ལོ་རྒྱུས་ཙམ་གྱིས་ཀྱང་དམྱལ་བར་རབ་ཏུ་ལྟུང་བར་འགྱུར་རོ། །དེ་ནས་བཅོམ་ལྡན་འདས་ལ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་རྡོ་རྗེ་ཀུན་ནས་འབར་རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པ་འདིས་རིགས་

ཐམས་ཅད་སྲེག་པར་བྱེད་དོ། །བཅོམ་ལྡན་འདས་དེ་དག་ནི་ཚུལ་བཞིན་མ་ཡིན་པར་འཆི་བའི་དུས་བགྱིད་པར་བགྱིའོ། །ཞེས་སོ། །དེ་ནས་ཡང་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཉན་ཐོས་ཀྱི་ཐེག་པ་པ་དེ་དག་གི་ནང་དུ་བཤད་པར་མི་བགྱི་ལགས་ན། དེའི་ཕྱིར་བཅོམ་ལྡན་འདས་ཀྱིས་ཤིན་ཏུ་ཆེས་གསང་བའི་ཐིག་ལེ་ཞེས་བྱ་བ་ཐེག་པ་ཆེན་པོའི་སྙིང་པོ་དཀྱིལ་འཁོར་ཆེན་པོ་འདི་དམ་ཚིག་ཇི་སྲིད་བདེ་བ་དང་། ཡིད་བདེ་བ་ཐམས་ཅད་བསྐྱེད་པའི་དོན་དུ་བཀའ་སྩལ་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་སྤྲོ་བའི་སྦྱོར་བའི་དཔའ་བོའི་ཏིང་ངེ་འཛིན་གྱིས་དེ་བཞིན་གཤེགས་པ་དེ་དག་ཐམས་ཅད་གཅིག་ཏུ་མཛད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཏིང་ངེ་འཛིན་དེ་ལས་བཞེངས་ནས། དེ་བཞིན་གཤེགས་པ་ཐམས་ཅད་སྤྱན་འདྲེན་པ་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་གྱི་ཁྱད་པར་དུ་མ་ལ་མཉམ་པར་བཞག་ནས། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་མ་ལུས་ཤིང་ལུས་པ་མེད་པ་སེམས་ཅན་གྱི་ཁམས་ཐམས་ཅད་འགུགས་པ་བདེ་བ་དང་ཡིད་བདེ་བ་བསྐྱེད་པའི་དོན་དུ་ཇི་སྲིད་ཏིང་ངེ་འཛིན་དམ་པ་འགྲུབ་པའི་དོན་དུ་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་བཀའ་སྩལ་པ། སོ་སོའི་སྒྲུབ་པའི་ཐབས་རྒྱ་ཆེ་བས་མདོར་བསྡུས་ཏེ་ཆོ་ག་རྒྱས་པར་གྱུར་པ་ནི་ལག་ན་རྡོ་རྗེ་དང་པོ་རེ་ཞིག་སྔགས་པས་ལག་པ་གཉིས་ཨའི་རྣམ་པ་ལས་ཟླ་བའི་དཀྱིལ་འཁོར་དུ་བསམ་པར་བྱའོ། །ཨའི་རྣམ་པ་དེ་དྲི་མ་མེད་པའི་གཟུགས་ལ་དཀར་བ་བདུད་རྩིའི་རང་བཞིན་ཅན་ཏེ། དེ་ཉིད་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལྷོ་ཕྱོགས་ཀྱི་ཟླ་བའི་དཀྱིལ་འཁོར་ལ་འཁོད་པར་གྱུར་ནས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསོལ་པ། བཅོམ་ལྡན་འདས་ཅིའི་ཕྱིར་ལག་པ་གཉིས་ཟླ་བའི་དཀྱིལ་འཁོར་དུ་བལྟ་བར་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་

གཤེགས་པ་ཐམས་ཅད་ཀྱི་དམ་པ་གྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་སེམས་དཔའ་ལག་ན་རྡོ་རྗེ་ལ་བཀའ་སྩལ་པ། འདིར་ལག་པ་གཉིས་ཟླ་བ་ལ་རྡོ་རྗེ་ཕྲ་མོ་ནས་ཀྱི་ཚད་ཙམ་དཀར་པོ་འོད་ཟེར་དང་ལྡན་པ་སྔགས་འདིས་བསྒོམ་པར་བྱ་སྟེ། ཧཱུྃ། དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་འཚལ་བར་བགྱི། རྡོ་རྗེ་དེས་ཅི་ཞིག་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཉོན་ཅིག །རྡོ་རྗེ་ཐལ་མོ་དམ་དུ་བཅིངས་ནས་གསང་སྔགས་འདིས་རང་གི་སྤྱི་བོར་དགྲོལ་བར་བྱའོ། །ༀ་སྭ་བྷཱ་བ་བི་ཤུད་དྷཱཿ་སརྦྦ་དྷརྨཱཿསྭ་བྷཱ་བ་ཤུདྡྷོ྅ཧྃ། དེ་ནས་བདག་ཉིད་ཤེལ་དག་པའི་རང་བཞིན་དྲི་མ་མེད་ཅིང་གསལ་བའི་གཟུགས་སུ་སྔགས་པས་བསྒོམ་པར་བྱའོ། །དེ་ནས་སྡོམ་པ་གཟུང་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་ཆེ་གེ་མོ་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་སྙིང་པོ་བྱང་ཆུབ་ལ་ཐུག་གི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པར་བདག་གིས་གཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པར་གཟུང། །རྡོ་རྗེ་དྲིལ་བུ་ཕྱག་རྒྱ་ཡང་། །དེ་ཉིད་སོ་སོར་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རྡོ་རྗེ་རིགས་མཆོག་ཆེན་པོ་ལ། །སྦྱིན་པ་རྣམ་བཞི་རྟག་ཏུ་སྦྱིན། །ཉིན་རེ་བཞིན་ནི་དུས་དྲུག་ཏུ། །རིན་ཆེན་རིགས་ཆེན་རྣལ་འབྱོར་གྱི། །དམ་ཚིག་ཡིད་དུ་འོང་བའོ། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་

ཅད་ལྡན་པར་ནི། །དེ་ཉིད་སོ་སོར་གཟུང་བར་བགྱི། །མཆོད་པའི་ལས་ཀྱང་ཅི་ནུས་པས། །ལས་ཀྱི་རིགས་མཆོག་ཆེན་པོ་ཡི། །བྱང་ཆུབ་སེམས་ནི་བླ་ན་མེད། །དམ་པ་རབ་ཏུ་བསྐྱེད་པ་དང་། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་སྒྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་དགོད། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་བདག་པོས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སྡོམ་པ་བཟུང་སྟེ་ཕྱག་རྒྱ་ཆེན་པོ་ལ་གནས་ནས་སྔགས་པས་ཆོས་ཐམས་ཅད་བདག་མེད་པར་བསྒོམ་པར་བྱའོ། །འདི་དག་ཐམས་ཅད་ཕྱི་རོལ་དང་ནང་དུ་རྟོག་པས་བརྟགས་པ་ལས་གཞན་འགའ་ཡང་མི་གནས་སོ་ཞེས་དེ་ལྟར་སྙིང་ལ་བཞག་སྟེ་འདི་སྐད་ཅེས་འདུ་བྱེད་ཐམས་ཅད་ནི་མི་རྟག་ཅིང་རང་བཞིན་གྱིས་འོད་གསལ་ལ་གདོད་མ་ནས་མ་སྐྱེས་པ་ཉིད་དོ་ཞེས་བརྗོད་པར་བྱའོ། །དེ་ནས་ཡང་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་མདུན་དུ་ཟླ་བའི་དཀྱིལ་འཁོར་ལ་འཁོད་དེ་བཅོམ་ལྡན་འདས་ལ་གསོལ་པ། བཅོམ་ལྡན་འདས་སེམས་རང་བཞིན་གྱིས་འོད་གསལ་བ་ཇི་ལྟར་བསྒོམ་པར་བགྱི་བ་ཅུང་ཟད་བཀའ་སྩལ་དུ་གསོལ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་སེམས་སོ་སོར་རིག་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཁྱོད་ཀྱིས་སེམས་རང་བཞིན་གྱིས་འོད་གསལ་བ་དེ་ནི་ཟླ་བའི་དཀྱིལ་འཁོར་གྱི་རྣམ་པའི་བདག་ཉིད་ནམ་མཁའི་དཀྱིལ་མ་ལུས་པ་ཁྱབ་པའི་འོད་ཀྱི་དཀྱིལ་འཁོར་མཛེས་པ། དཔག་ཚད་བརྒྱ་སྟོང་ལས་ལྷག་པ། ཨ་ལ་སོགས་པའི་རྣམ་པའི་ཡི་གེ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨྃ་ཨཿཞེས་བྱ་བ་དེ་དག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་རྣམ་པ་བསྒོམ་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བདག་ཉིད་ཟླ་བའི་དཀྱིལ་འཁོར་གྱི་རྣམ་

པར་བསྒོམས་པས་བདག་ཉིད་ཟླ་བའི་དཀྱིལ་འཁོར་གྱི་རྣམ་པར་མཐོང་ངོ་། །དེ་ནས་བཅོམ་ལྡན་འདས་ཀྱི་གཡོན་གྱི་ཟླ་བའི་དཀྱིལ་འཁོར་ལ་འཁོད་དེ་དོན་ཡོད་གྲུབ་པའི་གཟུགས་སུ་གནས་སོ། །ཡང་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་འཁོད་དེ་ཆེད་དུ་བརྗོད་པ་འདིས་ཆེད་དུ་བརྗོད་པ། ཨེ་མ་སངས་རྒྱས་ཐམས་ཅད་ཀྱི། །ཐོག་མེད་གྲུབ་པའི་དོན་ཡོད་བདག །ཇི་ལྟར་ཟླ་བའི་དཀྱིལ་འཁོར་ཏེ། །བདག་ཉིད་ཟླ་བའི་དཀྱིལ་འཁོར་གནས། །དེ་ནས་ཡང་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་རྒྱབ་ཀྱི་ཟླ་བའི་དཀྱིལ་འཁོར་ལ་འཁོད་དེ། བཅོམ་ལྡན་འདས་རྣམ་པར་སྣང་མཛད་ཆེན་པོ་ལ་གསོལ་བ་བཏབ་པ། ཟླ་བའི་དཀྱིལ་འཁོར་དེ་ཇི་ལྟར་བལྟ་བར་བགྱི། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་ཟླ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། མ་ལུས་ཤིང་ལུས་པ་མེད་པའི་འཇིག་རྟེན་གྱི་ཁམས་རབ་ཏུ་རྒྱས་པའི་ཚད་ཀྱི་དེ་བཞིན་གཤེགས་པ་ཐམས་ཅད་ཉིད་ཀྱི་ཐུགས་ཀར་ཞུགས་པར་མཛད་དོ། །ཞུགས་ནས་ཀྱང་གཅིག་ཏུ་མི་ཕྱེད་པར་གྱུར་ཏེ། ནམ་མཁའི་ཁམས་ཐམས་ཅད་རབ་ཏུ་རྒྱས་པའི་ཚུལ་དུ་རྣམ་པར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་བྱང་ཆུབ་ཀྱི་ཟླ་བ་དེ་བཤད་པར་བྱའོ། །ཟླ་བ་དེའི་སྟེང་དུ་བདག་ཉིད་བྱང་ཆུབ་ཀྱི་ཟླ་བའི་ཚུལ་དུ་བསྒོམ་པར་བྱ་སྟེ། ཤིན་ཏུ་དྲི་མ་མེད་པ་ནམ་མཁའ་དང་མཚུངས་པའི་གཟུགས་རྣམ་པར་རྟོག་པ་ཐམས་ཅད་སྤངས་པའི་མཆོག །གནས་ངན་ལེན་ཐམས་ཅད་ལས་རྣམ་པར་གྲོལ་བ། བདེ་བ་དང་ཡིད་བདེ་བ་ཐམས་ཅད་མྱོང་བའི་དོན་དང་། ཇི་སྲིད་ནམ་མཁའ་དང་མཉམ་པའི་དྲི་མ་མེད་པ་སྔོན་མཐོང་བའི་ཟླ་བ་ལྟ་བུ་ཀ་ལ་སོགས་པའི་གཟུགས་ཀྱིས་སངས་རྒྱས་ཀྱི་ཡོན་ཏན་འཇུག་པ་སྟེ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཨ་ལྃ་ཀྵཿ། ཀ་ལ་སོགས་པའི་ཡི་གེ་འདི་དག་སྐར་མ་ལ་སོགས་པའི་གཟུགས་སུ་ཞུགས་ཏེ། གཅིག་ཏུ་མི་ཕྱེད་པར་གྱུར་པ་ལས་ཟླ་བའི་དཀྱིལ་འཁོར་ཉིད་དུ་བསམ་པར་བྱའོ། །ཡང་

ལག་ན་རྡོ་རྗེ་ཟླ་བའི་དཀྱིལ་འཁོར་དེ་ལ་ནམ་མཁའི་ཁམས་ཐམས་ཅད་རབ་ཏུ་རྒྱས་པའི་ཚད་ཀྱི་རྡོ་རྗེ་རྩེ་མོ་ལྔ་པ་ཞི་བ་འོད་ཟེར་དང་བཅས་པ་བསྒོམ་པར་བྱའོ། །དེ་ནས་ཡང་གསང་བའི་བདག་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྡོ་རྗེ་དེ་ཇི་ལྟར་བསྒོམ་པར་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་སེམས་དཔའ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་དང་གཅིག་ཏུ་མཛད་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྡོ་རྗེ་དེ་སེམས་དཔའ་རྡོ་རྗེའི་གཟུགས་སུ་བསྒོམ་པར་བྱ་སྟེ། ནམ་མཁའི་ཁམས་ཐམས་ཅད་རབ་ཏུ་རྒྱས་པའི་ཚད་ཀྱི་རྡོ་རྗེ་འབར་བས་རྣམ་པར་བརྒྱན་པ། རྒྱན་ཐམས་ཅད་ཀྱིས་རྣམ་པར་བཀླུབས་པ། ལུས་ཐམས་ཅད་སངས་རྒྱས་ཀྱི་གཟུགས་བརྙན་གྱི་ཚུལ་གྱིས་གང་ཞིང་དང་བ། ལག་པ་གཡོན་པས་དྲིལ་བུ་འཛིན་པ། གཡས་པའི་ལག་པས་རྡོ་རྗེ་སྙིང་གར་བརྟེན་པ། ཞལ་ཅུང་ཟད་བཞད་པར་སྔགས་པས་བསམ་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སྔགས་ནི་འདི་ཡིན་ཏེ། ༀ་བཛྲ་ཨཱཏྨ་ཀོ྅ཧྃ། དེ་ནས་ཡང་བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །དེ་ནས་སེམས་དཔའ་རྡོ་རྗེའི་གཟུགས་དེ་བཞིན་གཤེགས་པའི་སྐུར་སྔགས་པས་སྔགས་འདིས་བསྒོམ་པར་བྱ་སྟེ། ༀ་ཡ་ཐཱ་སརྦྦ་ཏ་ཐཱ་ག་ཏཱ་སྟ་ཐཱ་ཨ་ཧྃ། དེ་ནས་སུྃ་གྱི་ཡི་གེ་ལས་སྔགས་པས་རི་རབ་བསམས་ལ་སྟེང་དང་འོག་གི་སྒོར་སུྃ་དགོད་པར་བྱའོ། །དེ་ནས་ཧཱུྃ་གི་ཡི་གེ་ལས་ཁང་པ་བརྩེགས་པ་བསམ་པར་བྱ་སྟེ། གྲུ་བཞི་པ་ལ་སྒོ་བཞི་པ། །རྡོ་རྗེ་འབར་བ་ཡང་དག་ལྡན། །ཁ་དོག་སྣ་ཚོགས་དག་དང་བཅས། །སྣ་ཚོགས་ཀ་བས་ཉེ་བར་མཛེས། །དྲ་བ་དྲ་བ་ཕྱེད་པས་སྤྲས། །ཟླ་བ་ཟླ་བ་ཕྱེད་པས་སྤུད། །ནོར་བུ་དང་མུ་ཏིག་གི་ཕྲེང་བས་ཉེ་བར་མཛེས་པ། རིན་པོ་ཆེའི་རྒྱན་དུ་མ་དང་།དར་དང་། འཕན་དང་། མེ་ཏོག་གི་ཆུན་པོས་ཉེ་བར་སྤུད་པ། དེ་དག་ལ་སོགས་པའི་ཡོན་ཏན་གྱིས་ཁྱད་པར་དུ་འཕགས་པའི་ཁང་པ་བརྩེགས་པ་སྔགས་པས་

བསམ་པར་བྱའོ། །དེ་ནས་བདག་ཉིད་རྣམ་པར་སྣང་མཛད་དུ་བྱས་ཏེ། སླར་ཡང་བདག་ཉིད་རྡོ་རྗེ་སེམས་དཔའི་གཟུགས་སུ་གཟུགས་བརྙན་གྱི་སྦྱོར་བས་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་གང་བ་རྡོ་རྗེའི་ཕྲེང་བས་རྣམ་པར་བརྒྱན་པ་བསྒོམས་ཏེ། དེ་ནས་ཧཱུྃ་གི་ཡི་གེ་དེ་ཉིད་ཀྱིས་རྡོ་རྗེ་སེམས་དཔའི་ལུས་ཀྱི་སྙིང་གར་ཟླ་བའི་དཀྱིལ་འཁོར་བསྒོམས་ལ། དེ་ནས་རྡོ་རྗེ་སེམས་དཔའི་ཡི་གེ་བཀོད་དེ། རྡོ་རྗེ་སེམས་དཔའ་དང་ཡི་གེ་དེ་དག་ཡོངས་སུ་སོན་པ་ལས་རྡོ་རྗེ་རྩེ་མོ་ལྔ་པ་ཞི་ཞིང་དཀར་བ་བསྒོམ་པར་བྱའོ། །དེ་ནས་ཡང་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་རྡོ་རྗེ་དེ་ཇི་ལྟར་བསྒོམ་པར་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་པ། རྡོ་རྗེ་དེ་ཡོངས་སུ་གྱུར་པ་ལས་སྣ་ཚོགས་རྡོ་རྗེ་བསྒོམ་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་སྣ་ཚོགས་རྡོ་རྗེ་ཁུམས་ལགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་བསྐྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །རྡོ་རྗེ་དེ་ཉིད་འོད་ཟེར་དང་བཅས་སྙེམས་པ་དང་བཅས་པའི་རྡོ་རྗེ་སེམས་དཔའི་གཟུགས་ཅུང་ཟད་བཞད་པའི་ཞལ་རས་དང་ཕྱག་གཉིས་རྡོ་རྗེ་གསོར་བར་བྱེད་པ། སངས་རྒྱས་ལྔའི་ཅོད་པན་ཅན། སྟེང་ན་དེ་བཞིན་གཤེགས་པ་ཐམས་ཅད་ཀྱི་བདག་པོ་བཞུགས་པ། དཔྲལ་བ་དང་ཉེ་བར་མི་བསྐྱོད་པ། གཡས་སུ་རིན་ཆེན་འབྱུང་ལྡན། རྒྱབ་ཏུ་འོད་དཔག་ཏུ་མེད་པ། གཡོན་པའི་དྲུང་དུ་དོན་ཡོད་གྲུབ་པ་ཅན། དེ་ལྟ་བུའི་ཡོན་ཏན་གྱི་ཁྱད་པར་དང་ལྡན་པ་རྡོ་རྗེ་སེམས་དཔའི་གཟུགས་སུ་བསྒོམ་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་དེ་ལྟ་བུའི་རྡོ་རྗེ་སེམས་དཔའི་གཟུགས་སུ་བསྐྱེད་ནས་སླར་ཡང་བཅོམ་ལྡན་འདས་ཀྱི་སྤྱན་སྔར་འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཉིད་རྡོ་རྗེ་སེམས་དཔའི་གཟུགས་སུ་མཐོང་ལགས་སོ། །དེ་ནས་བཅོམ་ལྡན་འདས་དེ་

བཞིན་གཤེགས་པ་ཐམས་ཅད་ཀྱི་བདག་པོས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ལ་ལེགས་སོ་ཞེས་གནང་བ། ལེགས་སོ་རྡོ་རྗེ་སེམས་དཔའ་པོ། །རྡོ་རྗེ་རིན་ཆེན་ཁྱོད་ལེགས་སོ། །ལེགས་སོ་རྡོ་རྗེ་ཆོས་ཁྱོད་ཀྱི། །རྡོ་རྗེ་ལས་ནི་ཁྱོད་ལེགས་སོ། །མདོ་སྡེ་འདི་ནི་ལེགས་བཤད་པ། །རྡོ་རྗེ་ཐེག་པ་བླ་ན་མེད། །དེ་བཞིན་གཤེགས་པ་ཀུན་གྱིས་གསང། །ཐེག་པ་ཆེན་པོ་མངོན་བསྡུས་པའོ། །ཞེས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཁྱོད་ལ་ཐམས་ཅད་བཤད་པར་བྱའོ། །དེ་ནས་རྡོ་རྗེ་ཐལ་མོ་སྦྱར་ནས་བརྐྱང་སྟེ་སྔགས་འདིས་ལག་ན་རྡོ་རྗེ་དབབ་པ་བསྐྱེད་པར་བྱའོ། །ཨོཾ་བཛྲ་ཨཱ་བེ་ཤ་ཨཱ་བེ་ཤ་ཨཿ། དེ་ནས་རྡོ་རྗེ་དབབ་པ་བསྐྱེད་ནས་སེམས་དཔའ་རྡོ་རྗེ་བཅིངས་ལ་དམ་ཚིག་བསྒྲག་པར་བྱ་སྟེ། ས་མ་ཡ་སྟྭྃྂ། དེ་ནས་དམ་ཚིག་བྱིན་ལ་ཡི་གེ་བརྒྱ་པ་བརྗོད་པར་བྱ་སྟེ། ༀ་ཏིཥྛ་བཛྲེ་དྲྀ་ཌྷོ་མེ་བྷ་བ། ཨ་ནུ་རཀྟོ་མེ་བྷ་བ། སུ་ཏོ་ཥྱོ་མེ་བྷ་བ། ཤཱ་ཤྭ་ཏོ་མེ་བྷ་བ། ཧྲྀ་ད་ཡཾ་མེ་ཨ་དྷི་ཏིཥྛ། སརྦྦ་སིདྡྷིམྨེ་པྲ་ཡཙྪ། སརྦྦ་ཀརྨྨ་སུ་ཙ་མེ་ཙིཏྟྃ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏོ་བཛྲ་མཱ་མེ་མུཉྩ་བཛྲཱི་བྷ་བ་བཛྲ་སཏྭ་ཨཱཿ། དེ་ནས་རྡོ་རྗེ་ཁུ་ཚུར་གྱིས་རྡོ་རྗེ་མེ་ཏོག་སྤྱི་བོར་སྔགས་འདིས་གཞག་པར་བྱ་སྟེ། པྲ་ཏཱི་ཙྪ་བཛྲ་ཧོཿ། སྔགས་པས་དེ་མེ་ཏོག་གི་ཕྲེང་བར་བསམ་པར་བྱས་ལ། དེ་ནས་ཕྲེང་བ་དེ་བླངས་ལ་སྔགས་འདིས་སྤྱི་བོར་བཅིང་བར་བྱ་སྟེ། ༀ་པྲ་ཏི་གྲྀཧྞ་ཏྭྃ་ཨི་མྃ་སཏྭ་མ་ཧཱ་བ་ལ། དེ་ནས་ཕྲེང་བ་དེ་བཞིན་གཤེགས་པ་ཐམས་ཅད་ཀྱི་ངོ་བོར་བལྟ་བར་བྱའོ། །དེ་ནས་སྔགས་འདིས་གདོང་དབྱེ་བར་བྱ་སྟེ། ༀ་བཛྲ་སཏྭ་སྭ་ཡན་ཏེ་ཨཱརྱ་ཙཀྵུད་གྷ་ཊ་ན་ཏ་ཏ་པར་ཨུངྒྷ་ཊ་ཡ་ཏེ་སརྦྦ་ཙཀྵུ་བཛྲ་ཙཀྵུ་ར་ནུཏྟ་རྀ་ཧེ་བཛྲ་པཱ་ཤྱ། དེ་ནས་ནམ་མཁའི་དཀྱིལ་ན་བཞུགས་པའི་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་མཐོང་ན་དེ་ནས་གྲུབ་པར་ཤེས་པར་བྱའོ། །གལ་ཏེ་སྣང་བ་ཙམ་མཐོང་ན་ཡང་དེས་དངོས་གྲུབ་ལ་ཉེ་བར་གྱུར་པ་ཡིན་ནོ། །དེ་ནས་རྡོ་རྗེས་བྱིན་གྱིས་བརླབས་པའི་དྲིའི་ཆུས་སྔགས་པས་བདག་ལ་སྔགས་འདིས་དབང་བསྐུར་བར་བྱ་སྟེ།

བཛྲ་ཨ་བྷི་ཥིཉྩ། དེ་ནས་ཕེག་རྡོབ་གསུམ་དང་སེ་གོལ་གདབ་པར་བྱ་སྟེ། བཛྲ་ཏུ་ཥྱ་ཧོཿ། དེ་ནས་སྔགས་འདིས་རྡོ་རྗེ་བླང་སྟེ། ༀ་ཨཱརྱ་ཨ་བྷི་ཥེ་ཀ་ཏཱ་སྟྭྃ། སི་བུདྡྷེ་བཛྲ་ཨ་བྷི་ཥེ་ཀ་ཏཱ་ཨི་དྃ་ཏེ་སརྦྦ་བུདྡྷ་ཏྭྃ་གྲྀཧྞ་བཛྲཱྃ་སུ་སིདྡྷ་ཡེ། དེ་ནས་རྡོ་རྗེ་སེམས་དཔའ་རང་ཉིད་དམ་དེ་བཞིན་གཤེགས་པ་སྟོན་པར་མཛད་དོ། །གལ་ཏེ་སློབ་དཔོན་དུ་གྱུར་ན་དེ་ནས་དམ་ཚིག་གི་ཕྱག་རྒྱ་དང་སྔགས་འདིས་བདག་ཉིད་དབང་བསྐུར་བར་བྱའོ། །ༀ་བཛྲ་ཨ་དྷི་བ་ཏི་ཏྭྃ་ཨ་བྷི་ཥིཉྩཱ་མི་ཏིཥྛ་བཛྲ་སམ་ཡ་སྟྭྃ། དེ་ནས་བདག་ལ་ཕྱག་རྒྱ་འདི་དང་སྔགས་འདིས་དབང་བསྐུར་ཏེ། ༀ་བཛྲ་སཏྭ་ཏྭཱྃ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ་ཧེ་བཛྲ་ནཱ་མ། སེམས་དཔའ་གང་གི་མིང་དུ་གྱུར་པའི་མིང་དེ་ལ་བརྗོད་པར་བྱའོ། །དེ་ནས་བརྟན་པར་བྱ་བའི་ཕྱིར་བརྗོད་པ། འདི་དེ་སངས་རྒྱས་ཐམས་ཅད་དེ། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་ཟུང་། །རྡོ་རྗེ་སེམས་དཔའི་བརྟུལ་ཤུགས་བརྟན། །དེ་ནས་དངོས་གྲུབ་ཐམས་ཅད་ཀྱི་དེ་ཁོ་ན་ཉིད་དབབ་པ་བསྐྱེད་པར་བྱ་སྟེ། ༀ་སརྦྦ་ཏ་ཐཱ་ག་ཏ་སིདྡྷི། བཛྲ་ཨེ་ཥ་ཏྭཱྃ་དྷཱ་ར་ཡཱ་མི་བཛྲ་སཏྭ་ཧི་ཧི་ཧི་ཧི་ཧཱུྃ་ཧོཿ། དེ་ནས་བདག་ལ་རྡོ་རྗེ་སེམས་དཔའི་དམ་ཚིག་བརྗོད་པར་བྱ་སྟེ། ༀ་མ་ཧཱ་སཏྭ་ས་མ་ཡ་སྟྭྃ་ཧྃ། དེ་ནས་དེ་ལྟར་བྱིན་གྱིས་བརླབས་ཏེ། སླར་ཡང་ཡི་གེ་བརྒྱ་པ་བརྗོད་པར་བྱ་སྟེ། ༀ་ཏིཥྛ་བཛྲ་ས་མ་ཡ་སྟྭྃ། ས་མ་ཡ་སཏྭཱ་ཧྃ་དྲྀ་ཌྷོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། ཤཱ་ཤྭ་ཏོ་མེ་བྷ་བ། ཧྲྀ་ད་ཡྃ་མེ་ཨ་དྷི་ཏིཥྛ་སརྦྦ་སིདྡྷིམྨེ་པྲ་ཡཙྪ། སརྦྦ་ཀརྨྨ་སུ་ཙ་མེ་ཙིཏྟྃ་ཤྲེ་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿ། བྷ་ག་བཱན་སརྦྦ་ཏ་ཐཱ་ག་ཏ་བཛྲ་མཱམེམུཉྩ་བཛྲཱི་བྷ་བ་བཛྲ་སཏྭ་ཨཿ། དེ་ནས་ཡང་དེ་བཞིན་དུ་རྡོ་རྗེ་སེམས་དཔའི་ཚུལ་དུ་ལག་པ་གཡོན་པར་དྲིལ་བུ། ལག་པ་གཡས་པར་རྡོ་རྗེ་སྙིང་གར་བཞག་ལ། ཐམས་ཅད་སྔོན་གྱི་ཇི་ལྟ་བ་བཞིན་བསྒོམས་ཏེ། བསྒོམ་པའི་རིམ་པ་དེས་རྡོ་རྗེ་སེམས་དཔའ་ཉིད་དམ་དེ་བཞིན་གཤེགས་པ་ཉིད་ཐོབ་པར་འགྱུར་རོ། ། འདི་ཡིས་ཏིང་ངེ་འཛིན་ཐམས་ཅད་དང་དགའ་བ་ཟློས་པ་ཐམས་ཅད་ལ་སྔགས་པས་ཐོག་མ་ཁོ་ནར་འདི་ལྟར་བསྒོམས་ཏེ་བྱའོ། །གསང་བ་ཆེན་པོ་རྟོག་པའི་རྒྱལ་པོ་རྡོ་རྗེ་ཐིག་ལེ་ལས་སེམས་སོ་སོར་རིག་པ་ལ་སོགས་པ་རྒྱས་པ་རྫོགས་སྷོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་

ཅད་ཀྱི་བདག་པོས་ཟླ་བའི་དཀྱིལ་འཁོར་དེ་ལ་བཞུགས་ནས་དཔའ་བོའི་ཏིང་ངེ་འཛིན་ལ་ཞུགས་ཏེ། དེ་བཞིན་གཤེགས་པ་དང་། རྡོ་རྗེ་སེམས་དཔའ་དང་། ལག་ན་རྡོ་རྗེ་ལ་སོགས་པ་དེ་དག་ཐམས་ཅད་ཉིད་ཀྱི་ཐུགས་ཀ་ནས་ཕྱུང་སྟེ། དེ་ནས་དེའི་རྗེས་སུ་དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་རྣམ་པར་སྣང་མཛད་ཆེན་པོ་ཐོག་མ་དང་ཐ་མ་མེད་པ་ལ་མཚན་བརྒྱ་རྩ་བརྒྱད་པ་འདིས་གསོལ་བ་བཏབ་པར་གྱུར་ཏོ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང། །ཕྱག་ན་རྡོ་རྗེར་ཕྱག་འཚལ་བསྟོད། །རྡོ་རྗེ་རྒྱལ་པོ་བློ་བཟང་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས། །དོན་ཡོད་རྒྱལ་པོ་རྡོ་རྗེ་མཆོག །རྡོ་རྗེ་འགུགས་ལ་ཕྱག་འཚལ་བསྟོད། །རྡོ་རྗེ་ཆགས་པ་བདེ་བ་ཆེ། །རྡོ་རྗེ་མདའ་སྟེ་དབང་དུ་བྱེད། །འདོད་པ་ཆེན་པོ་རྡོ་རྗེ་ཆེ། །རྡོ་རྗེ་གཞུ་ལ་ཕྱག་འཚལ་བསྟོད། །རྡོ་རྗེ་སེམས་དཔའ་སེམས་དཔའ་མཆོག ། རྡོ་རྗེ་ཚིམ་པ་ཆེར་དགྱེས་པ། །རབ་དགྱེས་རྒྱལ་པོ་རྡོ་རྗེ་མཆོག །རྡོ་རྗེ་དགྱེས་པར་ཕྱག་འཚལ་བསྟོད། །རྡོ་རྗེ་རིན་ཆེན་དོན་བཟང་མཆོག །རྡོ་རྗེ་ནམ་མཁའ་ནོར་བུ་ཆེ། །ནམ་མཁའི་སྙིང་པོ་རྡོ་རྗེ་ཕྱུག །རྡོ་རྗེ་སྙིང་པོར་ཕྱག་འཚལ་བསྟོད། །རྡོ་རྗེ་གཟི་བརྗིད་ཆེར་འབར་བ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་འོད་ཟེར་གཟི་བརྗིད་ཆེ། །རྡོ་རྗེ་སྒྲོན་མར་ཕྱག་འཚལ་བསྟོད། །སེམས་ཅན་དོན་རབ་རྡོ་རྗེ་ཏོག །རྡོ་རྗེ་རྒྱལ་མཚན་ལེགས་ཚིམ་པ། །རྡོ་རྗེ་ཏོག་སྟེ་རྡོ་རྗེ་ཆེ། །ཕྱག་འཚལ་རྡོ་རྗེ་སྐུ་ཁྱོད་ལ། །རྡོ་རྗེ་གད་མོ་གད་རྒྱངས་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགྱེས་རྡོ་རྗེ་མཆོག །ཕྱག་འཚལ་རྡོ་རྗེ་དགྱེས་ཁྱོད་ལ། །སེམས་ཅན་དོན་རབ་རྡོ་རྗེ་ཆོས། །རྡོ་རྗེ་པདྨ་ལེགས་དག་པ། །འཇིག་རྟེན་དབང་ཕྱུག་རྡོ་རྗེའི་སྤྱན། །ཕྱག་འཚལ་རྡོ་རྗེ་སྤྱན་ཁྱོད་ལ། །རྡོ་རྗེ་རྣོན་པོ་ཐེག་པ་ཆེ། །རྡོ་རྗེ་མཛོད་སྟེ་མཚོན་ཆ་ཆེ། །འཇམ་དཔལ་རྡོ་རྗེ་ཟབ་མོ་སྟེ། །རྡོ་རྗེ་བློ་གྲོས་ཁྱོད་ཕྱག་འཚལ། །རྡོ་རྗེ་རྒྱུ་སྟེ་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་ལས་སྐྱེས་པ། །ཕྱག་འཚལ་རྡོ་རྗེ་རྒྱན་ཁྱོད་ལ། །རྡོ་རྗེ་སྨྲ་བ་རིགས་བཟང་མཆོག རྡོ་རྗེ་བཟླས་པ་ལེགས་གྲུབ་གསོལ། །མི་སྨྲ་རྡོ་རྗེ་དངོས་གྲུབ་མཆོག །ཕྱག་འཚལ་རྡོ་རྗེ་གསུང་ཁྱོད་ལ། །རྡོ་རྗེ་ལས་རབ་

རྡོ་རྗེས་མཚན། །ལས་ཀྱི་རྡོ་རྗེ་ཀུན་འགྲོ་མཛེས། །རྡོ་རྗེ་དོན་ཡོད་ཆེར་ཡངས་པ། །སྣ་ཚོགས་རྡོ་རྗེ་ཁྱོད་ཕྱག་འཚལ། །རྡོ་རྗེ་བསྲུང་བ་བརྟན་པ་ཆེ། །རྡོ་རྗེ་ཆོས་ཏེ་ཆེར་སྲ་བ། །འཐབ་དཀའ་ཤིན་ཏུ་དཔའ་བའི་མཆོག །རྡོ་རྗེ་བརྩོན་འགྲུས་ཁྱོད་ཕྱག་འཚལ། །རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་ཆེར་འཇིགས་པ། །བདུད་རབ་འཇོམས་པའི་རྡོ་རྗེ་གྲག །ཕྱག་འཚལ་རྡོ་རྗེ་གཏུམ་ཁྱོད་ལ། །རྡོ་རྗེ་མཚམས་ཏེ་ལེགས་བསྙེན་པ། །རྡོ་རྗེ་འཆིང་བ་རབ་འགྲོལ་བ། །རྡོ་རྗེ་ཁུ་ཚུར་དམ་ཚིག་མཆོག །རྡོ་རྗེ་ཁུ་ཚུར་ཁྱོད་ཕྱག་འཚལ། །ཁྱོད་ཀྱི་མཚན་བརྒྱ་རྩ་བརྒྱད་པ། །དགེ་བ་འདི་ནི་གང་འཛིན་པ། །རྡོ་རྗེ་མིང་གི་དབང་ལ་སོགས། །ཀུན་གྱི་དམ་པས་དབང་བསྐུར་བའོ། །རྡོ་རྗེ་འཛིན་པ་ཆེན་པོ་ཡི། །མཚན་འདི་རྣམས་ཀྱིས་ཡོན་ཏན་ཚོགས། །རྟག་ཏུ་དབྱངས་ཀྱིས་སྟོད་བྱེད་ན། །དེ་ཡང་རྡོ་རྗེ་འཛིན་པ་མཚུངས། །མཚན་བརྒྱ་རྩ་བརྒྱད་འདི་དག་གིས། །བདག་ཅག་རྣམས་ཀྱིས་མངོན་བསྟོད་པའི། །ཐེག་པ་ཆེན་པོ་མངོན་རྟོགས་པའི། །ཚུལ་ཆེན་པོ་ནི་རྣམ་པར་སྤྲོས། །མགོན་པོ་ཁྱོད་ལ་ཞུ་བ་བགྱིད། །ཆོ་ག་དམ་པ་གསུང་དུ་གསོལ། །སངས་རྒྱས་ཀུན་གྱི་འཁོར་ལོ་ཆེ། །དཀྱིལ་འཁོར་ཆེན་པོ་མཆོག་གི་ནི། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་ཉེ་བར་གསན་ནས། དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་དབྱིངས་ཞེས་བྱ་བའི་དཀྱིལ་འཁོར་ཆེན་པོའི་མཆོག་འདི་བཀའ་སྩལ་པ། འདི་དག་ཐམས་ཅད་རྒྱུད་གཞན་ལས་བཤད་པས་ན་འདིར་མདོར་བསྡུས་པའི་ཆོ་ག་རྒྱས་པ་ནི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོ། རྡོ་རྗེ་འཆང་ཆེན་པོ། དེ་བཞིན་གཤེགས་པ་ཐམས་ཅད་ཀྱི་ཡབ། དེ་བཞིན་གཤེགས་པ་ཐམས་ཅད་ཀྱི་ཡུམ་གྱིས་དེ་བཞིན་གཤེགས་པ་དེ་རྣམས་དང་། བྱང་ཆུབ་སེམས་དཔའ་དེ་རྣམས་ཉིད་ཀྱི་ཐུགས་ཀར་བཅུག་ནས་གཅིག་ཏུ་མི་ཕྱེད་པར་གྱུར་ནས་སྤྲོ་བ་དང་བསྡུ་བའི་སྦྱོར་བས་ཕྱག་ན་རྡོ་རྗེའི་མདུན་དུ་གཞག་ནས་དེ་བཞིན་གཤེགས་པ་ཐམས་ཅད་ཀྱི་

དཔའ་བོའི་ཏིང་ངེ་འཛིན་གྱི་ཚུལ་ལ་བཞུགས་སོ། །དེ་ནས་བཅོམ་ལྡན་འདས་རྡོ་རྗེ་འཛིན་པའི་རྒྱལ་པོ་ཆེན་པོ་བྱང་ཆུབ་སེམས་དཔའ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྟོན་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཆར་འབེབས་པར་བྱེད་པས་བཅོམ་ལྡན་འདས་ཐོག་མ་དང་ཐ་མ་མེད་པ་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོ་ལ་གསོལ་བ་བཏབ་པ། བཅོམ་ལྡན་འདས་སངས་རྒྱས་ཉིད་སྒྲུབ་པའི་ཐབས་བཀའ་སྩལ་དུ་གསོལ། གང་གིས་སེམས་ཅན་ཐམས་ཅད་ཀྱི་སངས་རྒྱས་ཉིད་བདག་གིས་སྦྱིན་པར་བགྱིའོ། །དེ་ནས་ཅི་ཚུལ་གཞན་ནམ་ཐེག་པ་ཆེན་པོའི་ཚུལ་གྱིས་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཐེག་པ་ཆེན་པོའི་ཚུལ་གྱིས་སངས་རྒྱས་ཉིད་སྒྲུབ་བོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅི་དཀྱིལ་འཁོར་གྱི་ཚུལ་གྱིས་སངས་རྒྱས་ཉིད་སྒྲུབ་བམ། འོན་ཏེ་གསང་བའི་ཚུལ་གྱིས་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་གསང་བའི་ཚུལ་གྱིས་སངས་རྒྱས་ཉིད་བསྒྲུབ་པར་བྱ་སྟེ། ལག་ན་རྡོ་རྗེ་ངས་ཀྱང་གསང་བའི་ཚུལ་དེས་དབང་བསྐུར་ནས་ལག་ན་རྡོ་རྗེ་གསང་བའི་ཚུལ་དེས་ང་ཡང་ཡང་དག་པར་རྫོགས་པར་སངས་རྒྱས་སོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱོད་སློབ་དཔོན་གང་གིས་དབང་བསྐུར་བ་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་གསང་བ་ཞེས་བྱ་བའི་སློབ་དཔོན་དེས་དབང་བསྐུར་རོ། །གང་གིས་གསང་བའི་དེ་ཐོབ་ནས་སངས་རྒྱས་ཉིད་བརྙེས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གསང་བ་དེའི་རང་བཞིན་གང་ལགས། དེས་ཆོས་གང་གསུང་བར་མཛད་ཅི་སྦྱོར་བ་གཞན་གསུངས་སམ། འོན་ཏེ་ཟབ་མོའི་ཚུལ་ཁྱོད་ལ་བསྟན་པ་ལགས།

བཅོམ་ལྡན་འདས་གསང་བ་དེའི་རང་བཞིན་མ་འཚལ་བས་ཅི་ཞིག་ལགས། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་འདིས་ཆོས་མ་བསྟན་ཅིང་ཅུང་ཟད་ཀྱང་མ་བཤད་དོ། །འོན་ཀྱང་ལག་ན་རྡོ་རྗེ་རང་གི་ཤེས་རབ་ཀྱི་ཚུལ་དང་། ཤེས་རབ་ཀྱི་ཁྱད་པར་གྱིས་བདག་ཉིད་གསང་བ་བསྙེན་པ་བརྩམ་པར་བྱའོ། །དེ་ནས་གསང་བ་བརྟེན་པ་ལས་གང་དག་འོ་མའི་ཐིགས་པ་འོད་ཟེར་དང་བཅས་པར་གྱུར་པ་དང་། དེ་ནས་འོད་ཟེར་གྱི་ཕྲེང་བ་ལས་དེ་བཞིན་གཤེགས་པ་ཐམས་ཅད་ཀྱི་སྐུ་རྣམས་རྣམ་པར་ཕྱུང་སྟེ། དེ་བཞིན་གཤེགས་པའི་སྐུ་དེ་རྣམས་ལས་འོད་ཟེར་གྱི་ཕྲེང་བ་འཁྲུགས་པའི་རྡོ་རྗེའི་གཟུགས་དང་། ཁྲོ་བོའི་གཟུགས་རྣམས་དབྱུང་བར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟ་ནའང་གསང་བ་དེ་བསྟེན་པ་ཉིད་ཇི་ལྟ་བུའི་རྣམ་པས་འགྲུབ་པ་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དང་པོ་རེ་ཞིག་ཇི་ལྟར་བྱ་བ་ངས་ཁྱོད་ལ་བཤད་པར་བྱ་ཡིས་ཉོན་ཅིག །སྔགས་པས་རེ་ཞིག་བདག་གི་ཏིང་ངེ་འཛིན་སྔོན་དུ་འགྲོ་བར་བྱ་སྟེ། བདག་ཉིད་བསྐྱེད་ནས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལྷ་མོ་ཆེན་མོ་དང་། རིག་པའི་རྒྱལ་མོ་ཐམས་ཅད་བསྒྲུབ་པར་བྱའོ། །དེ་ནས་ཕྱིས་གསང་བ་ཉིད་བསྟེན་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཐོག་མ་དང་ཐ་མ་མེད་པ་ལ་འདི་སྐད་ཅེས་གསོལ་ཏོ། །ཇི་ལྟ་བུའི་རྣམ་པས་ལྷ་མོ་དེ་རྣམས་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་འགའ་ཞིག་དད་པ་དང་ལྡན་པ་ཡོད་པ་དེ་དག་ནི་རྩེ་གཅིག་པའི་སེམས་ཀྱིས་བདག་སྒྲུབ་པར་འདོད་ལ། དེ་དག་སྦྱོར་བ་མི་ཤེས་ཤིང་ནུས་པ་དང་མི་ལྡན་པས་དེ་རྣམས་ཀྱི་ཚེ་ཟད་པར་གྱུར་ཀྱང་ལྷ་མོ་རྣམས་ཀྱི་ཐུགས་རྗེའི་ཐུགས་སྐྱེ་བར་མི་འགྱུར་ཞིང་སེམས་ཀྱི་གསལ་བ་ཡང་མི་བྱེད་པ་དེས་ན་ལག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱོར་བ་ཤེས་པར་བྱའོ། །དེ་

ཉིད་ཀྱི་ཕྱིར་ལག་ན་རྡོ་རྗེ་ཕྱག་རྒྱ་དང་། སྔགས་ཐམས་ཅད་དང་ལེགས་པར་ལྡན་པས་ཇི་ཙམ་ཞིག་གི་ཉི་མའི་ངེས་པས་འགྲུབ་པར་འགྱུར་རོ། །དེའི་ཕྱིར་ལག་ན་རྡོ་རྗེ་རྒྱུད་འདི་ནི་ལྷ་ཐམས་ཅད་དང་། ལྷ་མོ་རྣམས་དང་། རིག་པའི་རྒྱལ་མོ་རྣམས་ཀྱི་སྦྱོར་བ་ལེགས་པར་ལྡན་པས་སྒྲུབ་པར་བྱེད་པའོ། ། དེས་ན་ལག་ན་རྡོ་རྗེ་སྔགས་པ་གསང་སྔགས་ཀྱི་བདག་པོ་གསང་བའི་བདག་པོར་བཤད་དོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྔགས་པ་མ་ལགས་པ་གསང་བའི་བདག་པོ་མ་ལགས་པས་བཅོམ་ལྡན་འདས་ཇི་ལྟར་གསང་བ་དང་སྔགས་རྣམས་ཀྱི་བདག་པོར་འགྱུར་བ་དེ་ལྟར་མཛད་དུ་གསོལ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དེས་ན་སྔགས་པས་རེ་ཞིག་དངོས་གྲུབ་གཞན་བསྒྲུབ་པར་བྱའོ། །དེ་བསྒྲུབས་ན་ལས་ཐམས་ཅད་བྱེད་དོ། །བསྐྲད་པ་དང་། གསད་པ་དང་། དབང་དུ་བྱ་བ་དང་། རེངས་པ་དང་། དགུག་པ་ལ་སོགས་པ་རྣམས་བསྒྲུབ་པར་བྱའོ། །སངས་རྒྱས་ཉིད་ཀྱི་དངོས་གྲུབ་ལ་སོགས་པ་རྣམས་ཀྱང་འགྲུབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐོག་མར་བསྒྲུབ་པར་བགྱི་བ་གང་ལགས། ཅི་རིག་པའི་རྒྱལ་མོ་བསྒྲུབ་པར་བགྱིའམ། འོན་ཏེ་དབང་དུ་བྱ་བ་ལ་སོགས་པ་བསྒྲུབ་པར་བགྱིའམ། ཡང་ན་རལ་གྲི་ལ་སོགས་པ་བསྒྲུབ་པར་བགྱི། བཅོམ་ལྡན་འདས་དེའི་ཕྱིར་ཐོག་མར་དངོས་གྲུབ་གང་བསྒྲུབ་པ་བདག་ལ་བཀའ་སྩལ་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་ལེགས་སོ་ཞེས་གནང་བ། ལག་ན་རྡོ་རྗེ་ལེགས་སོ་ལེགས་སོ། །དེའི་ཕྱིར་ལག་ན་རྡོ་རྗེ་རིག་པའི་རྒྱལ་མོ་ཐོག་མར་བསྒྲུབ་པར་བྱ་སྟེ། གང་གིས་སེམས་ཅན་རྣམས་ལ་གསང་བ་སྟེར་བར་འགྱུར་རོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟ་བུའི་རྣམ་པས་ལྷ་མོ་དེ་བསྒྲུབ་པར་བགྱི་བ་བཀའ་སྩལ་དུ་གསོལ། དེ་ནས་བཅོམ་ལྡན་འདས་

ཀྱིས་ལག་ན་རྡོ་རྗེ་ལ་བཀའ་སྩལ་ཏོ། །ལག་ན་རྡོ་རྗེ་རྣམ་པ་གཞན་ལས་རྣམ་པ་གང་བཤད་པ་དེ་ཁྱོད་ཀྱིས་སྒྲུབ་པ་བཟོད་པར་བྱོས་ཤིག །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་གཞན་གང་བདག་གིས་བཟོད་པར་བགྱི། དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་སེམས་ཅན་ཀིམ་པ་ཀའི་འབྲས་བུ་ལྟ་བུ་དག་ཡོད་དེ། ཕྱི་རོལ་གྱི་གཟུགས་ཕུན་སུམ་ཚོགས་ཤིང་ནང་གི་ཆ་དྲི་མ་བྲོ་ཞིང་བྲོ་བ་ཉམས་པ་ཡོངས་སུ་ཞུ་ནས་འཆི་བ་ལ་སོགས་པར་ནུས་པ་དེ་ལྟ་བུའི་སེམས་ཅན་གང་ཕྱི་རོལ་གྱི་གསང་བ་བཤད་པ་ཙམ་གྱིས་སྤྲོ་ཞིང་ནང་དུ་སླར་བརྟགས་པས་དད་པ་དང་མི་ལྡན་ཞིང་ཉན་ཐོས་ཀྱི་ཐེག་པ་དག་ལ་རབ་ཏུ་གསལ་བ་དེ་དག་ལ་རྒྱུད་འདི་བཤད་པར་མི་བྱའོ། །ལག་ན་རྡོ་རྗེ་དེའི་ཕྱིར། ལྷ་མོ་ཐམས་ཅད་ཀྱི་རང་གི་ཕྱག་རྒྱ་དང་། སྔགས་རྣམས་ཀྱིས་མཉེས་པའི་སྦྱོར་བས་དེ་རྣམས་བསྒྲུབ་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་གང་གིས་མཉེས་པའི་གསང་སྔགས་ཤེས་པར་བགྱི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་པ། ལག་ན་རྡོ་རྗེ་འདི་ནི་མཉེས་པའི་གསང་སྔགས་ཀྱིས་མ་ཡིན་ཏེ། ལག་ན་རྡོ་རྗེ་སྦྱོར་བའི་དབང་གིས་དེ་རྣམས་བསྒྲུབ་པར་བྱའོ། །ལག་ན་རྡོ་རྗེ་ཉོན་ཅིག །རྣམ་པ་གང་གིས་རིག་པའི་ལྷ་མོ་དང་བཅས་པའི་ལྷ་རྣམས་འགྲུབ་ཅིང་གྲུབ་ནས་སངས་རྒྱས་ཉིད་སྟེར་བ་དེ་ཁྱོད་ལ་གོ་རིམས་བཞིན་དུ་བཤད་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་ཇི་ལྟ་བུས་ནི་ལྷ་མོ་དེ་རྣམས་ཀྱིས་སངས་རྒྱས་ཉིད་སྟེར་བ་བཀའ་སྩལ་དུ་གསོལ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྣམ་པ་གང་གིས་ལྷ་མོ་དེ་རྣམས་འགྲུབ་པ་དང་། གསང་བའི་དེ་ཁོ་ན་གང་གིས་ལྷ་མོ་དེ་རྣམས་ཀྱིས་ལེགས་པར་འགྲུབ་པར་འགྱུར་བ་བཤད་པར་བྱ་ཡིས་ཉོན་ཅིག །དེ་ནས་

བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །སྔགས་པ་གང་གིས་ལྷ་མོ་གང་བསྒྲུབ་པར་རིགས་པ་དེ་དེས་བསྒྲུབ་པར་བྱ་སྟེ། རང་གི་ཕྱག་རྒྱ་དང་སྔགས་ཀྱི་སྦྱོར་བས་ལྷ་མོ་དེ་བཀུག་ནས་མདུན་དུ་གཞག་པར་བྱའོ། །དེ་ནས་བདག་ཉིད་སྔོན་བཤད་པའི་རིམ་པས་རྡོ་རྗེ་སེམས་དཔའི་སྐུར་བསྒོམས་ལ་རྡོ་རྗེ་སེམས་དཔའི་སྐུ་དེས་ལྷ་མོ་དེ་མཉེས་པར་བྱའོ། །དེ་ནས་མཉེས་ཏེ་གདོན་མི་ཟ་བར་དངོས་གྲུབ་སྩོལ་བར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་གང་གིས་མཉེས་པར་འགྱུར། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྡོ་རྗེ་སེམས་དཔའི་སྐུ་དེས་ལྷ་མོ་དེའི་གསང་བའི་བྷ་གར་ཉིད་ཀྱིས་རྡོ་རྗེས་བསྟེན་པར་བྱའོ། བསྟེན་པས་བདེ་བ་ཉིད་དུ་འགྱུར་ཏེ། དེ་ནས་ལྷ་མོ་དེ་དགྱེས་ཏེ་མཆོག་སྩོལ་བར་འགྱུར་རོ། །དེ་ཇི་ལྟར་བུད་མེད་རང་ཉིད་ཀྱི་བདག་པོ་ལ་དགའ་བར་ལྟ་བ་ལྟར་དེ་བཞིན་དུ་ལྷ་མོ་དེའང་གསང་སྔགས་འཛིན་པ་དེ་ལ་དགའ་བའི་དབང་གིས་ལྟ་བར་འགྱུར་རོ། །དགའ་བའི་དབང་གིས་ཚིམ་པར་འགྱུར་རོ། །འདི་བཞིན་དུ་བུད་མེད་གཞན་བསྟེན་པས་ཀྱང་མཆོག་སྟེར་ན་ལྷ་མོས་ལྟ་སྨོས་ཀྱང་ཅི་དགོས། ལག་ན་རྡོ་རྗེ་དཔེར་ན་རྡོ་རྗེ་རགས་པས་བསྣུན་པའི་བུད་མེད་བདག་པོ་གཞན་མི་འདོད་པ་དེ་བཞིན་དུ་ལྷ་མོ་དེའང་གསང་བས་བསྣུན་པ་ན་སྔགས་པ་གཞན་འདོད་པ་མ་ཡིན་ནོ། །དེ་བཞིན་དུ་གསང་བའི་སྦྱོར་བས་ལྷ་མོ་གང་ཞི་བའི་ཚུལ་གྱིས་ཞི་བའི་ཚུལ་འགྲུབ་པར་འགྱུར་རོ། །གང་ཁྲོ་མོའི་ཚུལ་གྱིས་ཁྲོ་མོའི་ཚུལ་འགྲུབ་པར་འགྱུར་རོ། །འོན་ཀྱང་ཁྲོ་བོ་རྡོ་རྗེ་ཧཱུྃ་མཛད་ཀྱི་ཚུལ་བཟུང་ནས་རྡོ་རྗེ་གནྡྷ་རཱི་ལ་སོགས་པའི་ལྷ་མོ་སྔགས་པས་བསྒྲུབ་པར་བྱའོ། །འཇིག་རྟེན་དབང་ཕྱུག་གི་ཚུལ་གྱིས་སྒྲོལ་མ་ལ་སོགས་པ་བསྒྲུབ་པར་བྱའོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་ནས་རེ་ཞིག་ཁྲོ་བོའི་ཚུལ་ཇི་ལྟར་རྣམ་པར་གཞག་པར་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། རྡོ་རྗེ་ཧཱུྃ་མཛད་ཀྱི་སྦྱོར་བ་དེ་ཉིད་ཀྱིས་བཅོམ་ལྡན་འདས་མ་རྡོ་རྗེ་གནྡྷ་རཱི་ཞེས་བྱ་བ་

རིག་པའི་ལྷ་མོ་བསྒྲུབ་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་སྐད་ཅེས་བཀའ་སྩལ་ནས་གཅིག་ཏུ་འདྲེས་པར་གྱུར་ཏེ། ཁམས་གསུམ་རྣམ་པར་རྒྱལ་བའི་ཏིང་ངེ་འཛིན་གྱིས་རྡོ་རྗེ་ཧཱུྃ་མཛད་དེ་དང་། རྡོ་རྗེ་གནྡྷ་རཱི་ལྷན་ཅིག་ཏུ་སེམས་ཅན་གདུག་པ་ཅན་ཐམས་ཅད་གདུལ་བའི་དོན་དུ་ངེས་པར་ཕྱུང་ངོ་། །དེ་ནས་རྡོ་རྗེ་ཧཱུྃ་མཛད་ལྷ་མོ་དེའང་ཤིན་ཏུ་དགའ་བའི་མིག་གིས་ལྟ་ཞིང་ཆེད་དུ་བརྗོད་པ་འདིས་ཆེད་དུ་བརྗོད་པ། ཨེ་མ་ཁྲོ་བོ་ཐམས་ཅད་ཀྱི། །རྡོ་རྗེ་ཁྲོ་བོ་བླ་ན་མེད། །མཛེས་མ་འདི་ནི་ཐོབ་ནས་སུ། །གདུག་པ་ཐམས་ཅད་གདུལ་བར་བྱ། །དེ་ནས་ཕྱག་ན་རྡོ་རྗེས་རྡོ་རྗེ་ཧཱུྃ་མཛད་དེ་ལ་འདི་སྐད་ཅེས་སྨྲས་སོ། །ལེགས་སོ་རྡོ་རྗེ་ཧཱུྃ་མཛད། ལྷ་མོ་འདི་ཐོབ་ནས་སངས་རྒྱས་ཉིད་བྱོས་ཤིག །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་གང་གིས་ལྷ་མོ་འདི་སྒྲུབ་པ་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཉོན་ཅིག །གང་མཉེས་པས་དེ་རྣམས་འགྲུབ་པར་འགྱུར་བ་ལྷ་མོ་ཐམས་ཅད་ཀྱི་སྒྲུབ་པའི་ཐབས་བཤད་པར་བྱའོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །རྡོ་རྗེ་གནྡྷ་རཱི་འདི་ཁྲོ་བོའི་ཚུལ་གྱིས་བསྒྲུབ་པར་བྱའོ། །ལག་ན་རྡོ་རྗེ་སྔགས་པ་དེས་རྡོ་རྗེ་ཧཱུྃ་མཛད་ཀྱི་ཚུལ་དུ་གནས་ནས་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ཏེ། རང་གི་ལུས་བྱིན་གྱིས་བརླབས་ནས་སླར་ཡང་སྐྱིལ་ཀྲུང་བྱས་ལ། ཁམས་གསུམ་རྣམ་པར་རྒྱལ་བའི་སྔགས་བརྗོད་པར་བྱའོ། །ༀ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། གྲྀཧྞ་གྲྀཧྞ་ཧཱུྃ་ཧཱུྃ་ཕཊ། གྲྀཧླ་པ་ཡ་གྲྀཧྞཱ་པ་ཡ་ཧཱུྃ་ཧཱུྃ་ཕཊ། ༀ་ཨཱ་ན་ཡ་ཧོཿབྷ་ག་བཱན་བིདྱཱ་རཱ་ཛ་ཧཱུྃ་ཧཱུྃ་ཕཊ། ཅེས་ལན་གསུམ་བརྗོད་ལ་དེ་ནས་བསྒྲུབ་པར་བྱའོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་མོ་དེའི་སྙིང་པོ་གང་གིས་འགྲུབ་པར་འགྱུར་བ་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་རྡོ་རྗེ་ཆེན་པོ་ཁྲོ་བོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནས་ཁམས་གསུམ་དྲལ་བའི་ཏིང་ངེ་འཛིན་གྱི་རིག་པ་བཀའ་སྩལ་པ། གང་གིས་ལྷ་ལ་སོགས་པའི་གདོན་

ཐམས་ཅད་འཇིགས་ཤིང་སྡུག་བསྔལ་བས་བརྒྱ་བྱིན་གྱི་ཕ་རོལ་གནོན་པ་ལྟ་བུ་ཡང་འབྱེར་བར་འགྱུར་རོ། །འདི་བཟླས་པ་ཙམ་གྱིས་སྐྱེ་བོ་ཐམས་ཅད་དགའ་བར་འགྱུར་རོ། །ཁྲོ་བོའི་ཚུལ་གྱིས་གདུག་པ་ཐམས་ཅད་འཇོམས་པར་བྱེད་དོ། །ཐམས་ཅད་སྐྲོད་པར་བྱེད་དོ། །ཐམས་ཅད་རེངས་པར་བྱེད་དོ། །ལག་ན་རྡོ་རྗེ་དེའི་ཕྱིར་སྔགས་པས་ཚུལ་འདིས་བཟླས་པར་བྱ། བཀླག་པར་བྱའོ། །ན་མ་ཥྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བྷ་ག་བ་ཏེ། བཛྲ་གནྡྷ་རི། ཨ་ནེ་ཀ་རསྨི་ཤ་ཏ་ས་ཧ་སྲ་པྲ་ཛྭ་ལི་ཏ་དཱིཔྟ། ཛཱ་ཡཻ་ཨུ་གྲ་བྷཱིཥྨ་བྷ་ཡཱ་ནི་ཀཱ་ཡཻ། ཡོ་གི་ནྱཻ། བྷཱིསྨ་བྷ་གི་ནྱཻ། ཁཌ་མུ་ཁཱ་ཡེ། དྭཱད་ཤ་ནེ་ཏྲཱ་ཡཻ། དྭཱ་ད་ཤཱ་བྷུ་ཛཱ་ཡཻ། བི་ཀཱིརྞྞ་ཀེ་ཤཱ་ཡཻ། ཨ་ནེ་ཀ་རཱུ་པི་བིདྷ་བི་ཤྭ་དྷཱ་རི་ཎྱཻ། ཨེ་ཧྱེ་ཧི་བྷ་ག་བ་ཏི་མ་ཧཱ་བཛྲ་གནྡྷ་རི་ཏྲ་ཡཱ་ཎཱྃ་རཏྣཱ་ནཱྃ། ས་ཏྱེ་ན་ཨཱ་ཀཌྜྷྱ། ཨ་ཀདྦྷྱ། བ་ལ་དེ་བྃ། མ་ཧེ་ཤྭ་རྃ། བྲཧྨ་ཎྃ། ཨིནྡྲྃ། ཙནྡྲྃ། ཡ་མྃ། བ་རུ་ཎྃ། བ་ཡུྃ། ཀུ་བེ་རྃ། དྷྲྀ་ཏ་རཱཥྚཾ། བི་རུ་ཌྷ་ཀྃ །བི་རཱུ་པཀྵྃ། ཤྃ་ཀུ་ཀརྞྞྃ། ཀོརྞྞྃ། སྠཱུ་ལ་ཀཧྞ། མ་ཧཱ་ཀཱ་ལྃ། ནནྡི་ཀེ་ཤྭ་རྃ། བྷྀ་གི་རི་ཏི། ནཱ་ཡ་ཀྃ །བི་ནཱ་ཡ་ཀྃ །པཱཉྩི་ཀྃ །དཱ་མ་ཀྃ ལོ་ཧ་ཀྃ །ཥིཥྚི། དེ་བི་ཀོ་ཊི་གི་རི་ཀོ་ཊ། ཨོྃ་ཀཱ་རི། དུརྒཱྃ། ཀ་ཏྱཱ་ཡ་ནི། ཙཎྜ་ཀ་ཏྱཱ་ཡ་ནི། ཨེ་ཥ་ནི། ནཻ་རཱིཏྱཱྃ། ཀཱ་ལི་མྃ་མ་ཧཱ་ཀཱ་ལི། བྷ་དྲ་ཀཱ་ལིཾ། བཛྲ་ཀཱ་ལིཾ། ཙཱུརྞྞ་ཀཱ་ལིཾ། ཀྵུ་དྲ་ཀཱ་ལིཾ། ཤཀྟིཾ། ཤ་ལི་ཀ་བརྟི། ཤ་ཏཱཀྵིཾ། ཨིནྡྲ་ཎི། བྲཧྨ་ཎི། ཀཽ་མཱ་རཱི། མ་ཧེ་ཤྭ་རྃ། སུ་བྷ་གྃ །རཽ་དྲི། ཙཱ་མུ་ཎྜྃ། བཱ་རཱ་ཧཱི། ཀཽ་བེ་རཱི། ཡེ་ཙ་ཨ་ནྱེ་ས་མ་ཡེ་ན་ཏིཥྛནྟི་ཏན། ཨཱ་བརྟ་ཡི་ཥྱཱ་མི་ཤི་གྷྲྃ་གྲྀཧྞྃ། ཨོཾ་ལ་ལ་ལ་ལ། ཧུ་ལུ་ཧུ་ལུ། ཙུ་ལུ་ཙུ་ལུ། མུ་ལུ་མུ་ལུ། དྷ་མ་དྷ་མ། རྃ་ག་རྃ་ག །རྃ་གཱ་པ་ཡ་རྃ་ག་པ་ཡ། པུ་ར་པུ་ར། པཱུ་ར་ཡ་པཱུ་ར་ཡ། ཨཱ་ན་ཡ། ཨཱ་ན་ཡ། ཨཱ་བི་ཤ། ཨཱ་བི་ཤ། ཨཱ་བེ་ཤ་ཡ། ཨཱ་བེ་ཤ་ཡ། བྷ་ག་བ་ཏི་མ་ཧཱ་བཛྲ་གནྡྷ་རི་སིདྡྷཉྩཎྜ་བཛྲ་པཱ་ཎི་རཱ་ཛྙཱ་པ་ཡ་ཏི་ཧྲཱིཿ།ཧཿ།ཧཿ།ཧཿ།ཧཿ།ཧཱུཾ་ཕཊ་སྭཱ་ཧཱ། ལག་ན་རྡོ་རྗེ་དེའི་ཕྱིར་འདི་བཟླས་པ་ཙམ་གྱིས་དགུག་པར་མི་ནུས་པའི་རི་བོ་ལ་སོགས་པ་རྣམས་ཀྱང་འགུགས་པར་བྱེད་དོ། །དེ་ནས་བཅོམ་ལྡན་འདས་ཀྱིས་སྒྲུབ་པའི་ཐབས་ཀྱི་ཆོ་ག་བཀའ་སྩལ་པ། དཀར་བའི་ཕྱོགས་ཀྱི་ཚེས་གཅིག་ནས་བརྩམས་ཏེ་ཇི་སྲིད་ཚེས་བརྒྱད་ཀྱི་བར་དུ་སྟོང་ཕྲག་བརྒྱད་བཟླའོ། །དེ་ནས་འགྲུབ་པར་

འགྱུར་རོ། །གྲུབ་ནས་ལས་ཐམས་ཅད་བྱེད་དོ། །གུ་གུལ་གྱི་བདུག་པས་བདེ་བར་འགུགས་པར་བྱེད་དོ། །འདི་དག་ཐམས་ཅད་ཕྱི་རོལ་གྱི་ལམ་ལ་བཤད་དོ། །གང་ཞིག་ཡང་ཐེག་པ་ཆེན་པོ་གླང་པོ་ཆེའི་ཕྲག་ཏུ་ཡང་དག་པར་ཞོན་པ་དེ་རྣམས་ལ་དེས་པ་གང་ཞིག་ཡོད། དེས་རྡོ་རྗེ་གནྡྷ་རཱིའི་སྔགས་དང་ཕྱག་རྒྱས་བཀུག་སྟེ་ཁམས་གསུམ་རྣམ་པར་རྒྱལ་བ་བཅིང་སྟེ་གུང་མོ་ཕན་ཚུན་ཡོངས་སུ་སྦྱར་ལ། མཐེའུ་ཆུང་འོག་ཏུ་བསྟན་ཏེ་ནོར་བུའི་རྣམ་པར་བྱས་པའི་ཕྱག་རྒྱ་འདི་ནི་བཅོམ་ལྡན་འདས་ཀྱི་དམ་ཚིག་སྦྱིན་པའོ། །དེ་ནས་རྩ་བའི་ཕྱག་རྒྱར་གྱུར་པ་ན། རྡོ་རྗེ་ཐལ་མོ་དམ་བཅིངས་ནས། །ཐལ་མོ་སྟེང་དུ་དབྱེ་བར་བྱ། །གུང་མོ་དག་ནི་རྩེ་མོར་བྱ། །མིང་མེད་གདོང་ནི་ལེགས་པར་སྦྱར། །མཐེ་བོང་གཉིས་པོ་སྦྱར་ནས་སུ། །རྩེ་མོའི་སྟེང་དུ་གཞག་པར་བྱ། །འདི་ནི་བཅོམ་ལྡན་རྩ་བའི་རྒྱ། །དེ་ཉིད་མཐེ་བོང་སྐྱིལ་ཀྲུང་གདན་གྱི་ཕྱག་རྒྱའོ། །དེ་ཉིད་ཡོངས་སུ་གཏང་བའི་སྦྱོར་བས་གཏང་བའི་ཕྱག་རྒྱའོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོན་ཀྱང་ཇི་ལྟ་བུའི་རྣམ་པས་སེམས་ཅན་དབང་དུ་བགྱིད་པར་འགྱུར། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྡོ་རྗེ་ཧཱུྃ་མཛད་ཀྱི་ཏིང་ངེ་འཛིན་གྱི་སྔགས་འདིས་བཅོམ་ལྡན་འདས་མ་བསྒོམས་ལ་བརླ་གཉིས་སུ་བཞག་སྟེ་དམ་དུ་འཁྱུད་ནས་དེའི་རྩ་བའི་གདོང་གི་མཆུ་སོས་བཟུང་སྟེ། དེའི་བྷ་གར་རྡོ་རྗེ་སོན་པར་བྱས་ལ་དེ་ནས་ལྷ་མོ་དེ་འདི་སྐད་སྨྲ་སྟེ། ཨ་ཧོ་སུ་ཁ་ཞེས་དེ་ལྟ་བུའི་སྦྱོར་བའི་རྣམ་པས་ལྷ་མོ་དེ་གྲུབ་ནས་དེ་ནས་ལས་ཐམས་ཅད་བྱེད་དོ། །མར་གྱིས་བཏགས་པའི་ཙནྡན་གྱི་ཤིང་གིས་བསྲེག་བླུགས་བྱས་ན་ཚངས་པ་ལ་སོགས་པའི་ལྷ་རྣམས་དབང་དུ་འགྱུར་རོ། །གྱུར་ནས་ཀྱང་ཅི་བགྱི་བཀའ་ལུང་སྩོལ་ཅིག་ཅེས་སྨྲ་བར་འགྱུར་རོ། །མཚན་གཅིག་གིས་དེ་དག་ཐམས་ཅད་བྱེད་དོ། །དེ་ནས་མི་རྣམས་དབང་དུ་བྱ་བར་འདོད་པས་ལྷ་མོ་དེ་ཉིད་ཏིང་ངེ་འཛིན་གྱིས་ཡུངས་ཀར་སྐྱ་བོ་ལ་ཅུང་ཟད་ཅིག་བྱིན་གྱིས་བརླབས་ལ། དེས་བྲམ་ཟེ་ལ་བསྣུན་པས་དེ་དབང་དུ་འགྱུར་རོ། །རྒྱལ་རིགས་ལ་ཡང་དེ་ཉིད་ཀྱི་ཆོ་གའོ། །དེ་ཉིད་ཀྱི་ཏིང་ངེ་འཛིན་གྱིས་སྐྱུ་རུ་ར་ལ་མངོན་པར་བསྔགས་ཏེ། རྗེའུ་རིགས་ལ་བྱིན་ན་དེ་དབང་དུ་འགྱུར་

རོ། །དེ་ཉིད་ཀྱི་ཏིང་ངེ་འཛིན་གྱིས་ཅུད་ཏོག་ལ་མངོན་པར་བསྔགས་ཏེ། དམངས་རིགས་ལ་བྱིན་པས་དེ་དབང་དུ་འགྱུར་རོ། །འདི་དག་གི་རིམ་བཞིན་དུ་རིགས་དང་རྗེས་སུ་མཐུན་པའི་བུད་མེད་རྣམས་ལ་བྱིན་པས་ཀྱང་དབང་དུ་འགྱུར་རོ། །དེ་ཉིད་ཀྱིས་དུར་ཁྲོད་ཀྱི་ཐལ་བ་ལ་མངོན་པར་བསྔགས་ཏེ། གང་གི་ཁྱིམ་དུ་གཞག་པ་དེ་འཆི་བར་འགྱུར་རོ། །དེ་ཉིད་ཀྱི་ཏིང་ངེ་འཛིན་གྱིས་དྲག་པོའི་ལྟ་སྟངས་ཀྱིས་གང་ལ་བལྟས་པ་དེ་འཆི་བར་འགྱུར་རོ། །ཁྲོ་བོའི་ལྟ་སྟངས་ཀྱིས་གང་ལ་བལྟས་པ་དེ་བསྐྱོད་པར་འགྱུར་རོ། །ལྷ་ཐམས་ཅད་དང་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་དང་ང་ལྟ་བུ་ཡང་སྐྱོད་པར་བྱེད་དོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྦྱོར་བའི་རྒྱལ་པོ་ཆེན་པོ་འདིས་འདི་ལྟར་སངས་རྒྱས་རྣམས་ཀྱང་སྐྲོད་ལགས་ན་གཞན་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཐེག་པ་ཆེན་པོའི་ཚུལ་འདིས་གང་ཅུང་ཟད་བསྒྲུབས་པ་དེ་ཐམས་ཅད་གདོན་མི་ཟ་བར་འགྲུབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་བཟླས་བརྗོད་ཀྱི་རིམ་པ་དེ་གང་གིས་སྟོང་ཕྲག་བརྒྱད་བཟླས་པས་འགྲུབ་པར་འགྱུར་བ་ལགས། བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉན་ཐོས་ཀྱི་ཐེག་པ་ཅན་རྣམས་ཀྱི་བཟླས་པའི་གྲངས་དང་། ཉི་མའི་གྲངས་བཤད་པ་ཡིན་ཏེ། ཉན་ཐོས་ཀྱི་ཐེག་པ་ལ་དད་པས་རྗེས་སུ་འབྲང་བ་དེ་རྣམས་ཀྱིས་སྐྱེ་བ་དུ་མར་སངས་རྒྱས་ཉིད་ཐོབ་པར་མི་འགྱུར་ཏེ། གལ་ཏེ་དེ་རྣམས་ཀྱིས་གྲུབ་ཀྱང་ཚེ་འདིར་རྒྱལ་པོའི་ལོངས་སྤྱོད་ལ་སོགས་པ་ཐོབ་པར་འགྱུར་རོ། །གང་དག་ཐེག་པ་ཆེན་པོའི་ཤིང་རྟ་ལ་ཡང་དག་པར་ཞོན་པ་དེ་རྣམས་ཀྱིས་ཉིན་གཅིག་ཙམ་གྱིས་ཀྱང་འདི་ལྟར་སངས་རྒྱས་ཉིད་ཀྱང་ཐོབ་པར་འགྱུར་ན། ཉི་མ་མང་པོས་དངོས་གྲུབ་གཞན་ལྟ་སྨོས་ཀྱང་ཅི་དགོས། ལག་ན་རྡོ་རྗེ་ཤིང་རྟ་ལ་སོགས་པའི་ཐེག་པ་གླང་པོ་ཆེ་དང་། རྟ་མཆོག་དང་ལྡན་པ་ལ་ནི་ནམ་དུ་ཡང་ཆུད་ཟོས་པ་མེད་པར་མངོན་པར་འདོད་པའི་ཡུལ་དུ་ཕྱིན་པ་དེ་བཞིན་དུ་ཐེག་པ་ཆེན་པོ་ཡང་དག་པའི་རྗེས་སུ་

གདམས་པ་དང་། ལེགས་པར་ལྡན་པ་གང་དུ་ཡང་མི་གནས་པར་འགྲོ་བས་ནི་རྣམ་པར་སྣང་མཛད་ཉིད་དམ། རྡོ་རྗེ་འཛིན་པའམ། གཞན་ཉིད་དུ་ཕྱིན་པར་རིག་པར་བྱའོ། །ལག་ན་རྡོ་རྗེ་དེའི་ཕྱིར་ཐེག་པ་ཆེན་པོའི་ཚུལ་ལ་གནས་པ་ལ་ནི་རྣམ་པར་རྟོག་པ་ཅུང་ཟད་དང་མི་ལྡན་པར་འགྱུར་རོ། །དེས་ན་ཆོས་ཐམས་ཅད་རྣམ་པར་མི་རྟོག་པར་ཡོངས་སུ་གཟུང་བར་བྱའོ། །དེའི་ཕྱིར་ལག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་ལྷ་མོ་ཐམས་ཅད་ཀྱི་བདག་པོ་རང་ཡིན་ནོ། །ཞེས་སྒོམ་པས་བསྒོམ་པར་བྱའོ། །ལག་ན་རྡོ་རྗེ་དེ་བཞིན་དུ་ལྷ་མོ་ཐམས་ཅད་ཀྱི་རྡོ་རྗེ་བསྒོམ་པའི་ཁྱད་པར་གང་གིས་ལས་ཐམས་ཅད་བྱས་ཏེ་སངས་རྒྱས་ཉིད་སྒྲུབ་པར་བྱེད་པ་སླར་ཡང་བཤད་པར་བྱའོ། །ལག་ན་རྡོ་རྗེ་ཉོན་ཅིག །ཁྲོ་བ་དང་ལྡན་པའི་སྔགས་པ་ཅུང་ཟད་ཙམ་བྱེད་པ་ན་ཚུལ་འདིས་བཅོམ་ལྡན་འདས་མ་རྡོ་རྗེ་གནྡྷ་རཱིའི་བྷ་གར་ཞུགས་ཏེ། ཕྲ་མོའི་སྦྱོར་བས་རྩ་བརྒྱད་གཅིག་ཏུ་བྱས་ཏེ། རྩ་གཅིག་ལས་འཛག་པ་དང་ལྡན་པར་རྣམ་པར་བསམ་པར་བྱའོ། །སྔགས་པས་གལ་ཏེ་དབང་དུ་བྱ་བར་འདོད་ན་དེས་ཁ་དོག་དམར་པོར་རྣམ་པར་བསམ་མོ། །ཞུ་བ་དམར་པོ་དེ་ལས་བདག་ཉིད་རྡོ་རྗེ་ཧཱུྃ་མཛད་ཀྱི་གཟུགས་སུ་རྣམ་པར་བསམ་པར་བྱའོ། །རྡོ་རྗེ་ཧཱུྃ་མཛད་ཀྱི་གཟུགས་དེས་སེམས་ཅན་ཐམས་ཅད་དབང་དུ་བྱེད་དོ། །ཐོགས་པ་མེད་པར་འགྲོ་བར་འགྱུར་རོ། །གལ་ཏེ་གསོད་པར་འདོད་ན་དེ་ནས་དེའི་རྩ་ཁ་དོག་ནག་པོ་སོལ་བའི་རྣམ་པ་ལྟ་བུར་བསམས་ལ། དེའི་ཞུ་བ་དམར་པོ་ལས་བདག་ཉིད་རྡོ་རྗེ་ཧཱུྃ་མཛད་ཀྱི་གཟུགས་སུ་སྔགས་པས་བསྒོམས་པར་བྱས་ཏེ། རྡོ་རྗེ་ཧཱུྃ་མཛད་ཀྱི་གཟུགས་ཀྱིས་དེ་ལས་རྡོ་རྗེ་དང་། དེ་ལས་རྩེ་གསུམ་དང་། དེ་ལས་རལ་གྲི་དང་། དེ་ལས་ཞགས་པ་དང་། དེ་ལས་ལྕགས་ཀྱུ་དང་། དེ་ལས་མདའ་དང་། དེ་ལས་མདུང་ཐུང་རྣམས་ཀྱིས་གང་གསོད་པར་འདོད་པ་དེ་གསད་པར་བྱའོ། །བསྐྲད་པ་ལ་ཡང་འདི་ཉིད་ཀྱིས་བྱའོ། །གལ་ཏེ་སངས་རྒྱས་ཉིད་སྒྲུབ་པར་འདོད་ན་རྩ་དེ་དག་ཁ་དོག་དཀར་པོར་བསམས་ལ། དེའི་ཞུ་བའོ་མ་དང་མཚུངས་པ་ལས་བདག་ཉིད་རྡོ་རྗེ་ཧཱུྃ་མཛད་ཀྱི་གཟུགས་སུ་བསྒོམས་ཏེ། དེ་ནས་སངས་རྒྱས་ཉིད་དམ། རྣམ་པར་སྣང་མཛད་ཉིད་དམ། རྡོ་རྗེ་འཛིན་པ་ཉིད་བསྒྲུབ་པར་བྱའོ། །ཡང་ན་བཅོམ་ལྡན་འདས་རྣམ་པར་སྣང་

མཛད་གང་ཡིན་པ་དེ་ཉིད་སངས་རྒྱས་ཡིན་ལ། རྡོ་རྗེ་སེམས་དཔའ་གང་ཡིན་པ་དེ་ཉིད་སངས་རྒྱས་ཡིན་པས་དེའི་ཕྱིར་ལག་ན་རྡོ་རྗེ་གཅིག་ཉིད་བཟླས་པས་ལས་ཐམས་ཅད་བྱེད་པར་འགྱུར་རོ། །རིམ་པ་འདི་ཉིད་ཀྱིས་རི་བོ་ཡང་རྣམ་པར་སྙིལ་བར་བྱེད་ཅིང་ཇི་སྲིད་ས་ཕྱོགས་ཀྱང་འབྱེད་པར་བྱེད་དོ། །རིམ་པ་འདི་ཉིད་ཀྱིས་ལྷའི་སྐུར་བསྐྱེད་པས་ལས་ཐམས་ཅད་བྱེད་དོ། །ཡང་ན་གསང་བའི་ལྷའི་སྐུར་བདག་ཉིད་བསྐྱེད་ན་སློབ་དཔོན་དེས་སངས་རྒྱས་ཉིད་ཐོབ་པར་འགྱུར་ཏེ། དེའི་ཕྱིར་སློབ་དཔོན་ཞེས་བརྗོད་དོ། །དེ་གང་གི་ཚེ་ཉན་ཐོས་ཀྱི་ཚུལ་གྱིས་རྗེས་སུ་གདམས་པ་ལ་སོགས་པ་སྟེར་ན་དེའི་ཚེ་དེ་སློབ་དཔོན་མ་ཡིན་ཞིང་དགྲ་ཉིད་དུ་རིག་པར་བྱའོ། །དེ་ནས་གསང་བ་ཉིད་སྟེར་ན་དེ་བཅོམ་ལྡན་འདས་རྡོ་རྗེ་སེམས་དཔའ་ཇི་ལྟ་བ་བཞིན་དུ་རིག་པར་བྱའོ། །དེ་གཏམ་འབའ་ཞིག་ཙམ་སྨྲ་ན་ཡང་དེའི་མདུན་དུ་འཁོད་དེ། འདི་ལྟར་རྐང་པ་དག་ལ་ཕྱག་འཚལ་ཏེ་ཐལ་མོ་སྦྱར་ལ་མཉན་པར་བྱའོ། །མཉམ་པ་ཙམ་ནས་སློབ་མ་དེས་ཉན་ཐོས་ཀྱི་ཐེག་པ་ཅན་རྣམས་ཀྱི་ནང་དུ་འཁོད་པར་མི་བྱ། གནས་པར་མི་བྱ་སྟེ། དེ་ཅིའི་ཕྱིར་ཞེ་ན། འདི་ལྟར་དད་པས་རྗེས་སུ་འབྲང་བ་དེ་ལ་ཐེག་པ་ཆེན་པོ་སུན་འབྱིན་པའི་ཕྱིར་རོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཉན་ཐོས་ཀྱི་ཐེག་པ་ཅན་གྱི་ནང་དུ་གནས་པར་མི་བགྱི་ལ། གལ་ཏེ་གནས་ན་ཡང་ཐེག་པ་ཆེན་པོའི་ཚུལ་འདིས་ལགས་ཀྱིས། ཕྱི་རོལ་གྱི་ཚུལ་གྱིས་མ་ལགས་སོ། །དེ་ནས་ཡང་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་ལ་ཐེག་པ་ཆེན་པོའི་གཏམ་ཙམ་བགྱིད་པ་དེ་ལ་ཡང་བདག་ཕྱག་འཚལ་ལགས་སོ། །རྗེད་པར་བགྱིད་དོ། །བླ་མར་བགྱིད་དོ། །མཆོད་པར་བགྱིའོ། །བཅོམ་ལྡན་འདས་དེའི་ཕྱིར་འདི་ཆོས་སྨྲ་བ་ལགས་ཀྱིས། གཞན་ནི་ཆོས་སྨྲ་བ་མ་ལགས་ཤིང་ལོག་པར་སྨྲ་བ་ལགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེའི་ཕྱིར་སྐྱེས་བུ་ཆེན་པོ་གང་ལ་ལ་རྒྱུད་འདི་ཐོས་ནས་འཛིན་ན་དེ་ང་དང་འདྲ་བའམ། ཁྱོད་དང་འདྲ་བར་ཤེས་པར་བྱ་ཞིང་། ངའི་སྙིང་ལ་གནས་ནས་དེས་མཉན་པར་དེ་ལྟར་རིག་པར་བྱ་སྟེ། དེའི་ཕྱིར་

ལག་ན་རྡོ་རྗེ་ལ་ངས་ཀྱང་དེ་ལ་ཕྱག་འཚལ་ལོ། །དེས་ན་ལག་ན་རྡོ་རྗེ་འདི་ནི་ཆོས་སྨྲ་བ་ཡིན་གྱི། གཞན་ནི་ཆོས་སྨྲ་བ་མ་ཡིན་ནོ། །ལག་ན་རྡོ་རྗེ་དེའི་ཕྱིར་ཐེག་པ་ཆེན་པོའི་སློབ་དཔོན་བཤད་པའི་ཚུལ་ཁྱད་པར་དུ་འཕགས་པའམ། བརྗོད་པ་ཙམ་ཁྱད་པར་དུ་འཕགས་པ་དང་མི་ལྡན་ཡང་གང་ལ་ལར་འགའ་ཞིག་གིས་འགལ་བར་ཡིད་ཀྱིས་སེམས་ན་ཡང་དེ་རབ་ཏུ་མྱོས་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་རྡོ་རྗེ་ཀུན་ནས་འབར་ཞིང་མེ་ལྕེ་གཅིག་ཏུ་འགྱུར་བ་འདིས་དེའི་རིགས་བརྒྱུད་དང་བཅས་པ་བསྲེག་པར་བགྱི། དངོས་གྲུབ་ཐམས་ཅད་བསྲེག་པར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེས་ལྷ་མོ་སྒྲོལ་མའི་ཕྱག་རྒྱ་བཅིངས་ཏེ། སྤྱན་དྲངས་ལ་མདུན་དུ་གཞག་སྟེ། དེ་ནས་སྔགས་པས་བྷ་གར་ཞུགས་ཏེ་ལུས་དང་རྩ་གཅིག་ཏུ་བྱས་ནས་འོ་མའི་མདོག་ཏུ་བསམས་ཏེ། དེ་ལས་འཇིག་རྟེན་དབང་ཕྱུག་གི་གཟུགས་སུ་བསྐྱེད་དོ། །ཡང་ལྷ་མོ་སྒྲོལ་མ་སྦྱོར་བ་འདིས་འཇིག་རྟེན་དབང་ཕྱུག་གི་ཏིང་ངེ་འཛིན་གྱིས་བསྟེན་པར་བྱའོ། །དེ་ནས་ལྷ་མོ་དགྱེས་ནས་མཆོག་སྩོལ་བར་འགྱུར་རོ། །དེ་ནས་ལྷ་མོ་དེ་རྨི་ལམ་དུ་འོངས་ཏེ་འཁྱུད་ནས་རྒྱན་ཐམས་ཅད་ཀྱིས་བརྒྱན་ཅིང་ཡིད་དུ་འོང་བ་རོལ་ཅིང་དགོད་ལ་རྣམ་པར་ལྟ་བ་མཐོང་སྟེ་དེ་ནས་དེས་སྨྲས་པ། ཁྱོད་ཀྱིས་བདེ་བ་འདི་ཟུང་ལ་དེས་སངས་རྒྱས་ཉིད་དུ་བྱོས་ཤིག །དེ་ནས་ཟླ་བ་དྲུག་ན་འགྲུབ་པར་ཤེས་པར་བྱའོ། །ཡང་ན་བུད་མེད་གཞན་མཐོང་ན་ཡང་ལྷ་མོ་དེ་ཉིད་མཐོང་བ་ཡིན་པར་ཤེས་པར་བྱའོ། །དེ་ལྟ་ན་སྐྱེ་བ་འདིར་འགྲུབ་པར་འགྱུར་རོ། །དེ་ནས་གསང་བ་ཤེས་པར་འདོད་ན་དེས་འཇིག་རྟེན་དབང་ཕྱུག་གི་ཏིང་ངེ་འཛིན་གྱིས་འཇིག་རྟེན་དབང་ཕྱུག་གི་གཟུགས་སུ་བྱས་ཏེ། ལག་པ་གཉིས་བརྐྱང་ལ་ལག་པ་གཡས་པ་ཧའི་ཡི་གེ་ལས་ཟླ་བའི་དཀྱིལ་འཁོར་དུ་བསྒོམ་ཞིང་གཡོན་པ་ཨའི་ཡི་གེ་ལས་ཟླ་བའི་དཀྱིལ་འཁོར་མདུན་དུ་འཕགས་པ་སྤྱན་རས་གཟིགས་དབང་ཕྱུག་གི་སྐུ་བསམས་ལ། དེའི་འོད་ཟེར་གྱིས་སྔགས་པ་བདག་ཉིད་བསམ་པར་བྱའོ། །དེ་ནས་གལ་ཏེ་ལག་པ་གཉིས་སྟེང་དུ་བཀྲོལ་

ན་དགེ་བར་ཤེས་པར་བྱའོ། །གལ་ཏེ་འོག་ཏུ་གནས་ན་དགེ་བ་ཡང་མ་ཡིན་མི་དགེ་བ་ཡང་མ་ཡིན་པར་ཤེས་པར་བྱའོ། །གལ་ཏེ་རྒྱབ་ཏུ་སོན་པར་གྱུར་ན་མི་དགེ་བར་ཤེས་པར་བྱའོ། །དེ་ནས་བཅོམ་ལྡན་འདས་ལྷ་མོ་སྐུལ་བྱེད་མ་བསྒྲུབ་པར་འདོད་ན། དེས་དེའི་བྷ་གའི་དབུས་སུ་ཕྱག་ན་རྡོ་རྗེའི་སྐུར་བདག་ཉིད་བསྒོམས་ཏེ། དེའི་རྩ་དང་ཞུ་བའི་སྦྱོར་བ་དཀར་པོ་ལས་བདག་ཉིད་རྡོ་རྗེ་སེམས་དཔའི་སྐུར་བསྐྱེད་དེ། ལྷ་མོ་དེ་བསྟེན་པའི་སྦྱོར་བའི་ཕྱག་རྒྱ་དང་སྔགས་ཀྱིས་བསྟེན་པར་བྱའོ། །དེ་ནས་དེའི་ཁ་དོག་གི་དབྱེ་བས་ལས་བྱེད་དེ། རྒྱས་པ་ལ་ཁ་དོག་སེར་པོ། ཞི་བ་ལ་ཁ་དོག་དཀར་པོ། དབང་ལ་ཁ་དོག་དམར་པོ། མངོན་སྤྱོད་ལ་ཁ་དོག་ནག་པོའོ། །འདི་ལྟར་བསྒོམས་ན་གོ་རིམས་སུ་ལས་རྣམས་བྱེད་དོ། །འདི་དག་གི་ནང་ནས་གང་ལ་ལའི་གཟུགས་སུ་ལྷ་མོ་དེ་དེའི་རྨི་ལམ་དུ་འཁྱུད་པ་ལ་སོགས་པ་བྱེད་ན་ཉི་མ་གཅིག་ཁོ་ན་ལ་འགྲུབ་པར་ཤེས་པར་བྱའོ། །ཡང་ན་ལྷ་མོ་དེ་བུད་མེད་གཞན་གྱི་གཟུགས་སུ་སྟོན་པར་བྱེད་ན་དེ་ནས་སྐྱེ་བ་འདིར་འགྲུབ་པར་ཤེས་པར་བྱའོ། །དེ་ནས་ཁྲོ་གཉེར་ཅན་བསྒྲུབ་པར་འདོད་ན་དེས་དོན་ཡོད་པའི་ཞགས་པའི་ཏིང་ངེ་འཛིན་གྱིས་དེའི་བྷ་གའི་དབུས་ཀྱི་རྩའི་གདོང་དུ་སྔགས་པ་བདག་ཉིད་དོན་ཡོད་ཞགས་པའི་གཟུགས་སུ་བསྒོམས་ཏེ། དེ་ནས་དོན་ཡོད་ཞགས་པའི་ཚུལ་གྱིས་དེའི་པདྨ་དང་། རྡོ་རྗེའི་སྦྱོར་བས་ལྷ་མོ་དེ་ཇི་སྲིད་གཙུག་ཏོར་བདེ་བའི་བར་དུ་བསྟེན་པར་བྱའོ། །དེ་ནས་མཉེས་ཏེ་མཆོག་སྩོལ་བར་འགྱུར་རོ། །རྡོ་རྗེ་དང་པདྨའི་རིམ་པའི་དེ་ཉིད་ཀྱིས་གང་འདོད་པ་དེ་བསྒྲུབ་པར་བྱའོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྡོ་རྗེ་དང་པདྨའི་སྦྱོར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྡོ་རྗེ་ཞུ་བ་ཞེས་བཤད་པ་ཇི་ལྟར་རྡོ་རྗེ་འབིགས་པར་བྱེད་པ་ལྟར་ཞུ་བ་ཡང་འབིགས་པར་བྱེད་པའོ། །པདྨའི་སྦྱོར་བ་ནི་པདྨའི་ཡེ་ཤེས་ནི་དེ་ཁོ་ན་ཉིད་ཀྱི་ཡེ་ཤེས་སོ། །ཇི་ལྟར་པདྨ་ཁ་བྱེ་བ་ཉིད་ན་སྐྱེ་བོ་ཐམས་ཅད་ཀྱི་དགའ་བར་འགྱུར་བ་བཞིན་དུ་བྷ་གའི་པདྨ་ཡང་དེ་བཞིན་ནོ། །ཡང་ན་འདི་ལྟར་པདྨ་འདམ་ལས་སྐྱེས་ཀྱང་འདམ་དེས་མ་གོས་པ་དེ་བཞིན་དུ་བྷ་ག་འདི་ལས་སྐྱེས་པ་ཡང་སྡིག་པའི་སྐྱོན་གྱིས་མ་གོས་པའི་ཚུལ་འདིས་པདྨ་ཞེས་བཤད་དོ། །དེ་ནས་རྡོ་རྗེ་དང་པདྨའི་

སྦྱོར་བས་གཞལ་དུ་མེད་པ་བྱེ་བ་ཕྲག་བརྒྱ་སྟོང་བགྲང་བ་ལས་འདས་པའི་སངས་རྒྱས་ཉིད་དུ་འགྱུར་ཏེ། རྒྱུ་དེས་ན་སློབ་དཔོན་འདི་སངས་རྒྱས་ཉིད་དུ་བཤད་དོ། །ཡང་ན་སྔགས་པ་འགའ་ཞིག་བདག་ཉིད་བྷ་གའི་དབུས་སུ་སྒོམ་པར་མི་ནུས་ན་འོན་ཀྱང་རྩ་དེ་རྣམས་འཛག་པ་དང་ལྡན་པའི་དམར་པོ་དང་། དཀར་པོ་དང་། སེར་པོ་དང་། སྔོན་པོའི་རྣམ་པར་བསམས་པས་དེ་ནས་ལས་ཐམས་ཅད་ཀྱི་དངོས་གྲུབ་ཇི་ལྟར་རིགས་པར་ཐོབ་པར་འགྱུར་རོ། །ཡང་ན་དེ་ཡང་མ་ནུས་ན་འོན་ཀྱང་རང་གི་ཚུལ་ཁོ་ནའི་རིགས་པས་བུད་མེད་དེ་རྣམས་རང་གི་ལྷ་མོའི་གཟུགས་སུ་བསམས་ཏེ། བུད་མེད་དེ་དེ་དག་གི་ཞུ་བ་བཏུང་ཞིང་འཐུང་དུ་བཅུག་པས་དེ་ནས་ངེས་པར་སངས་རྒྱས་ཉིད་བྱེད་པར་འགྱུར་རོ། །ལག་ན་རྡོ་རྗེ་དེའི་ཕྱིར་གསང་བའི་སྦྱོར་བ་དོར་ནས་གཞན་པས་སངས་རྒྱས་ཉིད་མ་ཡིན་ནོ། །ལག་ན་རྡོ་རྗེ་དེའི་ཕྱིར་རང་གི་ཏིང་ངེ་འཛིན་གྱིས་ཚུལ་འདི་ཉིད་ཀྱི་སྦྱོར་བས་རིག་པའི་ལྷ་མོ་ཐམས་ཅད་ཀྱང་བསྒྲུབ་པར་བྱ་སྟེ་འདི་ལ་ཐེ་ཚོམ་མི་བྱའོ། །ཡང་ན་ལག་ན་རྡོ་རྗེ་གལ་ཏེ་རང་གི་བཟང་མོ་མ་རྙེད་ན་གཞན་གྱིའང་མཐའ་གཅིག་ཏུ་བཟུང་སྟེ་ཞུ་བ་བཏུང་བ་ལ་སོགས་པ་བྱ་སྟེ། དེ་ནས་དེ་འགྲུབ་པར་འགྱུར་རོ། །ཡང་ན་ཡུལ་གྱི་གཟུགས་འཚོང་མ་ལ་བདག་གིས་ཚུལ་འདིས་བསྟེན་པར་བྱའོ། །གལ་ཏེ་དེའང་མ་རྙེད་ན་དེ་ནས་རང་གི་སྙིང་གའི་རིག་པའི་ལྷ་མོ་བསམས་ཏེ། བསྟེན་པས་གལ་ཏེ་དེ་བསམས་པ་ན་སྔགས་པ་དེའི་ཞུ་བ་རེད་པར་གྱུར་ན་དེ་ནས་དངོས་གྲུབ་འཐོབ་པར་ཤེས་པར་བྱའོ། །གལ་ཏེ་ཞུ་བ་བརྟན་པར་གྱུར་པ་ནའང་སྐྱེས་བུ་དེས་འགྲུབ་པར་ཤེས་པར་བྱའོ། །བརྗོད་པ་འདི་ཕྱི་རོལ་གྱི་ཚུལ་ཅན་ལ་བཤད་པར་མི་བྱ་སྟེ་ཆེར་བྱོལ་བར་འགྱུར་རོ། །མཆོག་ཏུ་གསང་བའི་མཛོད་རྟོག་པའི་རྒྱལ་པོ་ཆེན་པོ་ལས་ལྷ་མོའི་རྒྱུད་ཀྱི་ཆོ་ག་རྒྱས་པ་ཡོངས་སུ་རྫོགས་སྷོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐམས་ཅད་ཀྱི་བདག་པོ། དེ་བཞིན་གཤེགས་པ་ཐམས་ཅད་ཀྱི་ཡབ། དེ་བཞིན་གཤེགས་པ་ཐམས་ཅད་ཀྱིས་བསྟེན་པ། རེ་བ་ཐམས་ཅད་ཡོངས་སུ་རྫོགས་པར་བྱེད་པ། སེམས་ཅན་ཐམས་ཅད་ལ་ཕན་པ་རྗེས་སུ་མཛད་པ། དེ་བཞིན་གཤེགས་པ་ཐམས་ཅད་ཀྱི་མཛད་པ་པོ་དེས་ཕྱོགས་བཅུ་ན་རྣམ་པར་བཞུགས་

པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་བཅུག་ཅིང་བཅུག་ནས་གཅིག་ཏུ་གྱུར་ཏེ། འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བའི་དཀྱིལ་འཁོར་བཀའ་སྩལ་པ། དེའི་དཀྱིལ་འཁོར་གྲུ་བཞི་པ། སྒོ་བཞི་པ། ཀ་བ་བརྒྱད་ཀྱིས་ཉེ་བར་སྤྲས་པ། དྲ་བ་དང་དྲ་བ་ཕྱེད་པས་མཛེས་པ། ཟླ་བ་དང་ཟླ་བ་ཕྱེད་པས་བརྒྱན་པ། དར་གྱི་བ་དན་དང་མེ་ཏོག་གི་ཆུན་པོས་ཉེ་བར་སྤུད་པ། སྒོ་བཞིར་དཀྱིལ་འཁོར་བཞི་དང་ལྡན་པ། གསེར་ལ་སོགས་པའི་ཕྱེ་མའི་རྡུལ་ཚོན་གྱིས་མཛེས་པ། ཕྱི་རོལ་གྱི་ཆ་སྒོ་བཞི་པ་ལ་དེ་ཉིད་ཀྱི་རྣམ་པས་བརྒྱན་པའི་དཀྱིལ་འཁོར་བྲི་བར་བྱའོ། ། དེའི་དབུས་སུ་མི་བསྐྱོད་པ་ལ་སོགས་པ་རྣམ་པར་གཞག་པར་བྱའོ། །དཀྱིལ་འཁོར་བཞི་པོ་རྣམས་སུ་དེ་བཞིན་གཤེགས་པ་རྣམས་དང་། སྒོ་བཞིར་སྒོ་སྐྱོང་བ་རྣམས་ལེགས་པར་གཞག་པར་བྱའོ། །རིག་པའི་ལྷ་མོ་དེ་དག་དཀྱིལ་འཁོར་གྱི་གྲྭར་ཡོངས་སུ་གཞག་པར་བྱའོ། །ཕྱི་རོལ་གྱི་དཀྱིལ་འཁོར་དུ་བྱང་ཆུབ་སེམས་དཔའ་བཅུ་དྲུག་དང་། ཕྱིའི་དཀྱིལ་འཁོར་གྱི་མཚམས་སུ་རྡོ་རྗེ་མེ་ཏོག་མ་ལ་སོགས་པ་གཞག་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་སྤྱན་སྔར་ཟླ་བའི་དཀྱིལ་འཁོར་ལ་བརྟེན་པར་གྱུར་པས་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བ་ཞེས་གྲགས་ལགས་ན། ཅིའི་ཕྱིར་འཇིག་རྟེན་གསུམ་ཞེས་བགྱི། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་འཇིག་རྟེན་གསུམ་ཞེས་བྱ་བ་ནི་མཐོ་རིས་དང་། མི་ཡུལ་དང་། རྐང་འོག་ན་གནས་པ་རྣམས་སུ་བརྗོད་དོ། །འདི་རྣམས་ཀྱི་ནང་ན་གདུག་པ་ཅན་གྱི་སེམས་ཅན་གང་ལ་ལ་དག་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་མི་འགྲོ་བ་དེ་རྣམས་འདུལ་ཞིང་རྣམ་པར་རྒྱལ་བས་དེའི་དོན་དུ་དཀྱིལ་འཁོར་དེ་ཡང་མིང་ཙམ་ཁོ་ན་མ་ཡིན་ནོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་ཇི་ལྟ་བུས་དེ་རྣམས་རྣམ་པར་དུལ་བར་འགྱུར། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་དེ་རྣམས་ཐམས་

ཅད་དང་། སྒོ་སྐྱོང་བ་དང་། ལྷ་མོ་རྣམས་དང་། ཕྱིའི་དཀྱིལ་འཁོར་གྱི་ནང་ན་རྣམ་པར་གནས་པ་རྣམས་ཉིད་ཀྱི་ཐུགས་ཀར་བཅུག་སྟེ། བཅུག་ནས་ཀྱང་གཅིག་ཏུ་མཛད་ནས་ཟླ་བའི་དཀྱིལ་འཁོར་གྱི་སྟེང་དུ་བཞུགས་ཏེ། སངས་རྒྱས་ལྔའི་ཅོད་པན་གྱི་རྣམ་པ་དང་། རྒྱན་ཐམས་ཅད་ཀྱིས་བརྒྱན་པ། བདེ་བ་དང་། ཡིད་བདེ་བ་ཐམས་ཅད་རྗེས་སུ་མྱོང་བའི་དོན་དང་། ཉོན་མོངས་པ་ཐམས་ཅད་སྦྱང་བའི་དོན་དུ་ཟླ་བའི་དཀྱིལ་འཁོར་གྱི་སྟེང་དུ་གནས་པའི་ཟླ་བའི་དཀྱིལ་འཁོར་ཡོངས་སུ་དྲི་མ་མེད་ཅིང་སའི་ཕྱོགས་མཐའ་དག་ཁྱབ་པར་བརྗོད་དོ། །དེ་ནས་ཡང་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཟླ་བའི་དཀྱིལ་འཁོར་འདི་སུས་སྤྲུལ་པའང་བགྱིས་པ་ལགས། དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །སུས་ཀྱང་མ་བྱས་ཤིང་སུས་ཀྱང་མ་སྤྲུལ་པའོ། །ལག་ན་རྡོ་རྗེ་དང་པོ་རེ་ཞིག་སེམས་སོ་སོར་རྟོགས་པར་བྱ་སྟེ། སྟོང་པ་ཉིད་ཀྱི་ཚུལ་དུ་བསྒོམ་པའི་དོན་ཏོ། །དེ་ནས་ཨའི་ཡི་གེ་ལས་ནམ་མཁའ་དང་མཚུངས་པའི་ཟླ་བའི་དཀྱིལ་འཁོར་བསམ་པར་བྱ་སྟེ། ཇི་ལྟར་ནམ་མཁའ་རྟག་པའི་ཚུལ་དུ་གནས་པ་དེ་བཞིན་དུ་ཟླ་བའི་དཀྱིལ་འཁོར་འདིའང་ཡིན་ནོ། །དེ་ལ་ཨ་ལ་སོགས་པའི་དབྱངས་ཀྱི་ཡི་གེ་མེད་པའི་ཚུལ་དུ་རྣམ་པར་གཞག་གོ། །ཡང་ཀ་ལ་སོགས་པའི་ཡི་གེ་བདུད་རྩིའི་ཚུལ་དུ་རྣམ་པར་གཞག་གོ། །དེ་དག་ཐམས་ཅད་ཡོངས་སུ་གྱུར་པ་ལས་ནམ་མཁའི་ཚུལ་དུ་བལྟ་བར་བྱའོ། །དེ་ནས་སེམས་སོ་སོར་རྟོགས་པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་ཟླ་བ་གཉིས་པ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་བྱང་ཆུབ་ཟླ་བ་གཉིས་པ་ཤིན་ཏུ་དྲི་མ་མེད་ཅིང་རྣམ་པར་རྟོག་པ་ཐམས་ཅད་འཕྲོག་པ་སྟེ། རྣམ་པར་རྟོག་པ་མ་ལུས་པ་འཕྲོག་པར་བྱེད་པས་ན་རྣམ་པར་རྟོག་པ་ཐམས་ཅད་འཕྲོག་པ་སྟེ། ཕུལ་དུ་བྱུང་ཞིང་བླ་ན་མེད་པའི་དོན་ཏོ། །ལག་ན་རྡོ་རྗེ་དེའི་ཕྱིར་བྱང་ཆུབ་ཟླ་བ་ཞེས་བཀའ་སྩལ་ཏོ། །གང་ཞིག་ཐོབ་པས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་གྱུར་པའོ། །ཟླ་བ་དེ་ཀ་ལ་སོགས་པའི་ཡི་གེ་སངས་རྒྱས་ཀྱི་

ཡོན་ཏན་དང་ལྡན་པའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡི་གེ་དེ་རྣམས་ཀྱི་རང་བཞིན་གང་ལགས། ཇི་ལྟ་བུའི་རྣམ་པས་སངས་རྒྱས་ཀྱི་ཡོན་ཏན་རྣམས་དང་ལྡན་པ་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །ཀ་ལ་སོགས་པའི་ཡི་གེ་འདི་རྣམས་གང་ལས་བྱུང་བ་དང་། ཇི་ལྟ་བུའི་རང་བཞིན་དང་། གང་གིས་སྤྲུལ་པ་ཉོན་ཅིག །ཀ་སྒྲོགས་པ་ཞེས་བྱ་བའི་འཇིག་རྟེན་གྱི་ཁམས་ནས་དེ་འོངས་ཏེ་སངས་རྒྱས་ཀྱི་ཡོན་ཏན་ལྟ་བ་སྟེ། དེ་དག་ཐམས་ཅད་རྣམ་པར་སྣང་མཛད་ཀྱི་རང་བཞིན་དེ་བཞིན་གཤེགས་པའི་སྐུ་སྟེ། ནམ་མཁའ་དང་མཉམ་པའི་སྐུ་ཞེས་བྱ་བའི་དོན་ཏོ། །མི་ཕྱེད་པའི་རང་བཞིན་དང་། དང་བའི་རང་བཞིན་ཟླ་བའི་དཀྱིལ་འཁོར་གྱི་གཟུགས་ཀྱིས་གདུགས་སུ་གྱུར་པ། ས་ཕྱོགས་མཐའ་དག་ཁྱབ་པ། སྐྱེ་བ་དང་། རྒ་བ་དང་། འཆི་བ་དང་། སྡུག་བསྔལ་བ་དང་། ཡིད་མི་བདེ་བ་དང་། གདུང་བ་ལ་སོགས་པ་འགོག་པར་བྱེད་པ། བདུད་རྩིའི་རང་བཞིན་འཛག་པ། འཇིག་རྟེན་གསུམ་གྱི་རྣམ་པར་རྟོག་པ་འཕྲོག་པ། དེ་ལ་གནས་ཤིང་ཏཱ་ཊ་མ་ཊའི་རང་བཞིན་དེ་འཕྲོ་མེད་ལྡན་པ་ཞེས་བྱ་བའི་དོན་དུ་ཋའི་ཡི་གེ་དང་ལྡན་པའི་སྦྱོར་བ་མང་པོའི་དོན་ཏོ། །ཊའི་ཡི་གེ་དང་ལྡན་པས་རི་བོའི་ཚོགས་དང་། ཎའི་ཡི་གེ་དང་ལྡན་པས་ཤིན་ཏུ་འཇམ་པ་ཅན་སྐར་མ་ལ་སོགས་པའི་གཟུགས་ཀྱིས་དེ་ལ་འཇུག་སྟེ། ཇི་ལྟར་སྐར་མ་དྲི་མ་མེད་ཅིང་འོད་དང་ལྡན་པ་དེ་བཞིན་དུ་དེའང་སངས་རྒྱས་ཀྱི་ཡོན་ཏན་དྲི་མ་མེད་པ་ཞེས་བྱ་བའི་དོན་ཏོ། །སྦྱིན་པ་དང་ཚུལ་ཁྲིམས་དང་ལྡན་པ་འཛིན་པའི་རང་བཞིན་དེ་ཇི་ལྟར་ས་འཛིན་པའི་རི་བོས་རྣམས་འཛིན་པ་དེ་བཞིན་དུ་དེས་ཀྱང་སེམས་ཅན་རྣམས་འཛིན་པའོ། །སེམས་ཅན་མེད་པ་རྣམས་ཀྱི་སྡིག་པའི་གྲོགས་པོ་དང་ལྡན་པ་གཞོམ་པའི་དོན་གྱི་ཡུམ་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསང་བ་བསྐུལ་བ་འདིས་བསྟོད་པ། ལེགས་སོ་དཔལ་མཆོག་རྡོ་རྗེ་མཆོག །སངས་རྒྱས་ཀུན་གྱི་ཡབ་ཆེན་པོ། །ལེགས་པའི་རྣལ་འབྱོར་སྦྱོར་བའི་མཆོག །ལེགས་པའི་མཆོག་རབ་བསྟོད་

ཕྱག་འཚལ། །ལེགས་པའི་སྔགས་མཆོག་ཕྱག་རྒྱའི་མཆོག །ཡེ་ཤེས་མཆོག་རབ་རབ་ཀྱི་རབ། །ལེགས་པའི་ལས་ཆེན་གྲགས་པའི་མཆོག །རྡོ་རྗེ་མཆོག་རབ་བསྟོད་ཕྱག་འཚལ། །ལེགས་པའི་རིན་ཆེན་མཆོག་ཆོས་མཆོག །སྙིང་པོ་རིག་སྔགས་དམ་ཚིག་མཆོག ། རྡོ་རྗེ་ཡེ་ཤེས་གསལ་བའི་མཆོག །དཀྱིལ་འཁོར་མཆོག་རབ་བསྟོད་ཕྱག་འཚལ། །ཡེ་ཤེས་རྣམ་དག་ཀུན་གྱི་མཆོག །སྟོང་ཉིད་མཆོག་ལ་མཉམ་པར་གཞག །བརྩོན་འགྲུས་ལེགས་མཆོག་སེམས་དཔའི་མཆོག །ཤེས་རབ་རབ་མཆོག་བསྟོད་ཕྱག་འཚལ། །ཡེ་ཤེས་ཀྱི་ནི་ཡུམ་རྣམས་ཀྱི། །སྙིང་པོ་བཅོམ་ལྡན་འདས་ཀྱིས་གསུངས། །ཕྱག་རྒྱ་སྔགས་དང་རིག་པ་དང་། །སྡོམ་དང་དམ་ཚིག་ཆེན་པོ་དང་། །དེ་ནས་བཅོམ་ལྡན་འདས་ཀྱིས་རྣལ་འབྱོར་ཆེན་པོ་གསང་བའི་རྒྱན་གྱི་དཀྱིལ་འཁོར་ཟབ་མོའི་ཆོས་ཡུམ་རྣམས་ཀྱི་དབྱངས་ཀྱི་དཀྱིལ་འཁོར་བཀའ་སྩལ་པ། སྙིང་པོའི་ཕྱག་རྒྱ་སྔགས་རིག་རྣམས། །ཐ་སྙད་ཙམ་དུ་རྣམ་པར་གནས། །དེ་ལས་བྱུང་བའི་སྔགས་བདག་གིས། །དབྱེ་བ་བཞིན་དུ་བརྟག་པར་བྱ། །སྙིང་པོ་ཕྱག་རྒྱ་སྔགས་རིག་རྣམས། །གཞན་དུ་ཐ་སྙད་མཐོང་མ་ཡིན། །རིག་པའང་ཚོར་བའི་རྣམ་པ་ཡི། །མཚན་ཉིད་དུ་ནི་ཤེས་རབ་བཤད། །གསལ་བྱེད་ཀྱིས་ནི་ལེགས་གསལ་བྱས། །སྙིང་པོ་ཐ་སྙད་ཙམ་དུ་བཤད། །ཡུམ་རྣམས་ཀུན་གྱི་ཤེས་བྱ་བ། །གོ་རིམས་ཇི་ལྟ་བ་བཞིན་དུ། །དཀྱིལ་འཁོར་གྱི་ནི་འཁོར་ལོར་གཞག །ཤེས་རབ་ས་བོན་དབྱངས་ཡིག་བཞི། །རྩིབས་ལ་ཡུམ་གྱི་ས་བོན་ནོ། ། ཡབ་ཀྱི་ས་བོན་འདབ་མ་ལ། །ལྷག་མ་ཕྱི་རོལ་ཤེས་པར་བྱ། །དཔྱོད་པ་དེ་ལྟ་བུ་བཤད་དོ། །དེ་ནས་སྤྱན་དྲང་དེ་ཉིད་ཀྱིས། །ཆོས་ཀྱི་དབྱིངས་ནི་བརྗོད་པར་བྱ། །དཀྱིལ་འཁོར་སྔ་མ་བཞིན་བྲིས་ལ། །སློབ་དཔོན་ཆོ་ག་རིག་པ་ཡིས། །དེ་ཚེ་ཇི་ལྟའི་ཆས་ཞུགས་ཏེ། །དཀྱིལ་འཁོར་དམ་པར་འཇུག་པར་བྱ། །ཆོས་ཀྱི་རང་བཞིན་དག་བརྗོད་དེ། །འགྲོ་བ་འདི་ནི་ཐ་སྙད་ཙམ། །ཆོས་ཀྱི་དེ་ཉིད་རྗེས་དྲན་པས། །མེ་ཏོག་སྙིམ་པས་དོར་བར་བྱ། །དེ་ནས་རང་ཉིད་དབང་བསྐུར་ཏེ། །རང་ཉིད་ཀྱང་ནི་ཐ་སྙད་ཙམ། །ཆོས་རྣམས་ཀུན་གྱི་དབང་ཕྱུག་རྒྱལ། །དམ་པའི་དབང་ཕྱུག་འགྲུབ་པར་འགྱུར།

འཇིག་རྟེན་འཇིག་རྟེན་འདས་པ་ཡི། །གསང་སྔགས་ཐམས་ཅད་འགྲུབ་པར་འགྱུར། །སྔགས་པ་ཞུགས་པ་ཙམ་གྱིས་ཏེ། །དབང་བསྐུར་བས་ནི་སྨོས་ཅི་དགོས། །འདི་ཉིད་ཀྱི་ནི་སྦྱོར་བ་ཡིས། །སློབ་མའི་དམ་པ་གཞུག་པར་བྱ། །ཆོས་ཀྱི་དེ་ཉིད་བཤད་ནས་སུ། །དཀར་པོའི་རས་ཀྱིས་གདོང་གཡོགས་ཏེ། །དེ་བཞིན་མེ་ཏོག་དོར་བར་བྱ། །ཆོས་དབྱིངས་ཀྱིས་ནི་བདག་གིས་བཞེས། །དེ་ནི་དམ་ཚིག་ཉན་དུ་གཞུག །དམ་ཚིག་ཤེས་པའི་སློབ་མ་ནི། །མ་གཏོགས་གཞན་ནི་སུ་ལ་ཡང་། །ཁྱོད་ཀྱིས་མ་མོ་བསྒྲག་མི་བྱ། །གལ་ཏེ་རྨོངས་པས་བསྒྲགས་སྤྲོས་པ། །དམ་པ་རྣམས་ལ་ཕན་གདགས་པ་ལ་སོགས་པའི་སྦྱོར་བས་ཕན་པ་དང་། ཐེག་པ་ཆེན་པོའི་ཚུལ་གྱིས་སེམས་ཅན་ཐམས་ཅད་ཀྱི་རེ་བ་ཐམས་ཅད་རྫོགས་པར་བྱེད་དོ། །གསང་བའི་མཆོད་པ་ཐམས་ཅད་དང་ལྡན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེར་བར་བྱེད་དོ། །སེམས་ཅན་ཐམས་ཅད་ཀྱི་ཆགས་པའི་ངང་ཚུལ་སྒེག་པའི་རོ་དང་ཡང་དག་པར་ལྡན་པ་སྐྱེས་པ་དང་བུད་མེད་ལ་སོགས་པ་དབང་དུ་བྱེད་པའི་རང་བཞིན་དང་། དོན་གྲུབ་ཐམས་ཅད་བྱེད་པ་དུང་གི་སྒྲ་དང་ལྡན་པས་འཇིག་རྟེན་གསུམ་གྱི་སྒྲའི་འདྲེན་པ་སེམས་ཅན་ཐམས་ཅད་ལ་ཕན་པ་རྗེས་སུ་མཛད་པ། ཧཱ་ཧཱའི་རྣམ་པའི་གད་རྒྱངས་དང་ལྡན་པའི་སྙིང་རྗེ་ཅན་བདུད་རྩིའི་རྒྱུན་གྱི་ཡི་གེའི་སྦྱོར་བས་བུད་མེད་དང་སྐྱེས་པ་རྣམས་ཀྱི་བདེ་བའི་མཆོག་སྟེར་བར་མཛད་པའོ། །ལག་ན་རྡོ་རྗེ་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་དང་རབ་ཏུ་ལྡན་པ་རྣམས་ཀྱིས་དེ་དག་ཐམས་ཅད་བསྒོམ་པར་བྱའོ། ། དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱི་སྤྱན་སྔར་ཟླ་བའི་དཀྱིལ་འཁོར་ལ་བརྟེན་པར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་གང་གིས་སེམས་ཅན་གང་གདུག་པའི་སེམས་དང་ལྡན་པ་དེ་རྣམས་འདུལ་བར་འགྱུར་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་རྡོ་རྗེ་སེམས་དཔའི་དམ་ཚིག་འབྱུང་བ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་སེམས་དཔའ་སྐུ་སྙེམས་པ་དང་བཅས་ཤིང་དཀར་བ། རྒྱན་ཐམས་ཅད་ཀྱིས་བརྒྱན་པ། འབར་བའི་འོད་ཟེར་གྱི་རྣམ་པ་ཅན། རྡོ་རྗེ་

གསོར་བར་མཛད་པ། རེ་བ་ཐམས་ཅད་ཡོངས་སུ་སྐོང་བ། རྡོ་རྗེ་སེམས་དཔའ་ཉིད་ངེས་པར་སྟེར་བ་པོ་ངེས་པར་ཕྱུང་ངོ་། །རྡོ་རྗེ་སེམས་དཔའི་སྐུ་དེས་རི་རབ་རི་ལ་གནས་པའི་ལྷ་ཐམས་ཅད་རྡོ་རྗེ་ལྕགས་ཀྱུས་བཀུག་སྟེ། རྡོ་རྗེ་ཞགས་པས་བཅིངས་ནས་རྡོ་རྗེ་འབེབས་པས་བཅུག་སྟེ་རྡོ་རྗེ་དྲིལ་བུས་ཚིམ་པར་མཛད་དོ། །སྒྲུབ་པར་མཛད་དོ། །ཛཿཧཱུྃ་བྃ་ཧོཿ། ལག་ན་རྡོ་རྗེ་ཕྱི་ནས་ལྷ་རྣམས་ཀྱི་སྟོབས་ཀྱིས་གདུག་པའི་སེམས་ཅན་རྣམས་བསྒྲུབ་པར་བྱའོ། །དེ་ནས་སེམས་ཅན་དེ་རྣམས་ཐེག་པ་ཆེན་པོའི་ཚུལ་གྱི་ཤིང་རྟ་ལ་ཡང་དག་པར་ཞོན་པ་དང་། དཀྱིལ་འཁོར་དང་། དམ་ཚིག་གི་སྦྱོར་བ་དང་ཡང་དག་པར་ལྡན་པ་དང་། དཀྱིལ་འཁོར་ཆེན་པོ་མཐོང་བ་ཙམ་གྱིས་དམ་ཚིག་ཐམས་ཅད་ཤེས་པར་འགྱུར་རོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟ་ནའང་རྣམ་པ་ཇི་ལྟ་བུས་གདུག་པ་ཅན་གྱི་སེམས་ཅན་འཇུག་པར་བགྱི། དེ་ནས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོས་ལག་ན་རྡོ་རྗེ་ལ་བཀའ་སྩལ་པ། ཉོན་ཅིག་ལག་ན་རྡོ་རྗེ་རྡོ་རྗེ་ཧཱུྃ་མཛད་ཀྱི་ཚུལ་གྱི་ཚུལ་དེ་ཉིད་ཀྱིས་སེམས་ཅན་དེ་རྣམས་བཀུག་སྟེ་གཞུག་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ཚུལ་དེ་ཉིད་ཀྱིས་རྡོ་རྗེ་ཧཱུྃ་མཛད་ཀྱི་གཟུགས་འཛིན་པར་གྱུར་ཏོ། །དེ་ནས་རྡོ་རྗེ་ཧཱུྃ་མཛད་ཆེར་གཏུམ་ཞིང་ཁྲོ་བ་གནོད་སྦྱིན་གྱི་བདག་པོ་ཆེན་པོ་མཆུ་དང་མཆེ་བ་རྣམ་པར་གཙིགས་ཤིང་ཞལ་བཞི་པ། ཁྲོ་བོ་ཆེན་པོའི་སྐུ་འཇིག་རྟེན་གསུམ་པོ་མཐའ་དག་འབར་བའི་འོད་ཀྱི་རྣམ་པ་ཅན། རྡོ་རྗེ་འོད་ཟེར་གྱི་ཕྲེང་བ་དུ་མ་ལས་རྡོ་རྗེ་ཧཱུྃ་མཛད་ཀྱི་སྐུ་དུ་མ་ཕྱུང་བ། སྣང་བ་ཆེན་པོ་དང་ལྡན་པ། རྡོ་རྗེ་འབར་བ་ཆེན་པོའི་མཚོན་ཆ་ཅན་བྱུང་སྟེ་འདི་ལྟ་བུའི་སྐུ་འཛིན་པས་བཅོམ་ལྡན་འདས་རྣམ་པར་སྣང་མཛད་ཆེན་པོའི་སྤྱན་སྔར་ཟླ་བའི་དཀྱིལ་འཁོར་ལ་བརྟེན་པར་གྱུར་པར་བཀས་གནང་བར་གསོལ་པ། བདག་གིས་ཅི་བགྱི་བ་བཀས་གནང་དུ་གསོལ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་རྡོ་རྗེ་ཧཱུྃ་མཛད་ལ་བཀའ་སྩལ་པ། གདུག་པ་ཅན་གྱི་སེམས་ཅན་འདི་རྣམས་ཁུག་ལ་ཆུག་ཤིག །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཧཱུྃ་མཛད་ཀྱིས་བཅོམ་ལྡན་འདས་ཀྱི་བཀའ་ཉེ་བར་ཐོས་ནས་མི་ཡུལ་དང་། བར་སྣང་དང་། རྐང་

འོག་ན་གནས་པའི་ལྷ་རྣམས་དང་། མཁའ་འགྲོ་མ་ལ་སོགས་པ་རྣམས་དང་། གཟའ་ཐམས་ཅད་དེའི་སྐད་ཅིག་ཙམ་ལ་བཀུག་ནས། ཀྱེ་གྲོགས་པོ་དག་ཁོ་བོའི་དཀྱིལ་འཁོར་དུ་ཞུགས་ཤིག །ཁོ་བོའི་བཀའ་སྩལ་པ་ཉོན་ཅིག །དེ་ནས་སེམས་ཅན་ཕྲ་མོ་དེ་དག་ཞུགས་ཏེ། བཅོམ་ལྡན་འདས་བདག་ཅག་གིས་བཀའ་ལུང་ཇི་ལྟར་བགྱི། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་རྣམས་ལ་འདི་སྐད་ཅེས་བཀའ་སྩལ་ཏོ། །སྲོག་ཆགས་གསོད་པ་ལ་སོགས་པའི་མི་དགེ་བ་རྣམས་མ་བྱེད་ཅིག །སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་སོང་ཤིག ། བཅོམ་ལྡན་འདས་བདག་ཅག་གིས་དེ་ལྟར་བགྱིའོ་ཞེས་གསོལ་ཏེ་ཕྱིར་བྱུང་ངོ་། །དེ་ནས་ལྷ་ལ་སོགས་པ་དེ་དག་ཕན་ཚུན་མགྲིན་གཅིག་ཏུ་འདི་སྐད་ཅེས་སྨྲས་ཏེ། འུ་བུ་ཅག་དཀྱིལ་འཁོར་འདིར་འཇུག་པ་འདི་ཀོ་སུ་ཞིག །དེ་ནས་ཕྱག་ན་རྡོ་རྗེ་ཧཱུྃ་མཛད་དེས་སེམས་ཅན་དེ་རྣམས་ལ་བཀའ་བསྒོ་བ། ཀྱེ་གདུག་པ་ཅན་གྱི་སེམས་ཅན་དག་ཁོ་བོའི་བཀའ་བཞིན་བྱོས་ཤིག །ཁོ་བོའི་རྐང་པ་ལ་གཏུགས་ལ་ཁོ་བོའི་དཀྱིལ་འཁོར་དུ་ཞུགས་ཤིག །དེ་ནས་ལྷ་ལ་སོགས་པ་དེ་རྣམས་དེའི་བཀའ་ཉེ་བར་ཐོས་ནས་འདི་སྐད་ཅེས་སྨྲའོ། །ཁྱོད་ཀྱི་མིང་ཅི། ཅིའི་ཕྱིར་ཁོ་བོ་ཅག་གིས་ཁྱོད་ཀྱི་ངག་མཉན་པར་བྱ། དེ་ནས་ཁྲོ་བོ་ཆེན་པོ་རྡོ་རྗེ་ཧཱུྃ་མཛད་ཀྱིས་བྱང་ཆུབ་སེམས་དཔའ་ཆེན་པོ་དེས་རྡོ་རྗེ་འབར་བ་དེས་ལྷ་ལ་སོགས་པ་དེ་རྣམས་ལྷན་ཅིག་ཁྲོས་ཏེ་རྩོད་པ་ཆེན་པོ་བྱས་པས་དེ་དག་ཐམས་ཅད་འགྱེལ་བར་གྱུར་ཏོ། །དེ་ནས་གདུག་པ་ཅན་གྱི་སེམས་ཅན་དེ་རྣམས་བརྒྱལ་བར་གྱུར་ཏེ། སླར་ཡང་ལག་པས་ཐལ་མོ་སྦྱར་ཏེ་བྱང་ཆུབ་སེམས་དཔའ་ཆེན་པོ་དེ་ལ་གསོལ་པ། བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་དེ་ལྟར་བདག་ཅག་གིས་བགྱིའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་ལྷ་ལ་སོགས་པ་དེ་དག་དཀྱིལ་འཁོར་དུ་བཅུག་སྟེ་བསྟན་ཏོ། །དཀྱིལ་འཁོར་མཐོང་ནས་རྣམ་པར་སྣང་མཛད་ཆེན་པོའི་ཞབས་གཉིས་ལ་གཏུགས་ཏེ་རྒྱང་དུ་གནས་ནས་འདི་སྙམ་དུ་སེམས་ཀྱིས་བསམས་པ། བཅོམ་ལྡན་འདས་འདི་ནི་འདི་ལྟར་བདག་ཉིད་ཆེ་བ་འདི་ལྟ་བུའི་བྲན་ཡང་སྟོབས་དང་ལྡན་པའོ། །ཨེ་མའོ་ཆོས་ཀྱི་བདག་ཉིད་ཆེན་པོ་གང་གི་བྲན་གྱི་ངག་ཙམ་གྱིས་

ཀྱང་། ལྷ་ལ་སོགས་པ་འདི་དག་བརྒྱལ་བར་གྱུར་ཏོ་སྙམ་སེམས་སོ། །དེ་ནས་རྡོ་རྗེ་ཧཱུྃ་མཛད་ཀྱིས་དེ་དག་ཐམས་ཅད་ལ་སྐྱབས་གསུམ་དང་། སྡོམ་པ་དང་། བསླབ་པ་བྱིན་ཏེ། རྡོ་རྗེའི་ཆུས་གཏོར་ནས་རྡོ་རྗེ་སྤྱི་བོར་བཞག་ནས་འདི་སྐད་ཅེས་བཀའ་སྩལ་ཏོ། །ཀྱེ་ལྷ་དག་ཆོས་འདི་ལས་འདའ་བར་མ་བྱེད་ཅིག །དེ་ནས་ལྷ་ལ་སོགས་པ་དེ་རྣམས་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །ཕྱག་ན་རྡོ་རྗེ་གང་ཡང་འགའ་ཞིག་ཐེག་པ་ཆེན་པོ་ལ་སྨོད་པར་འགྱུར་བ་དེའི་སྲོག་བདག་གིས་བླང་བར་བགྱིའོ། །གང་དག་ཐེག་པ་ཆེན་པོ་ལ་གནས་པ་དེའི་གནས་སུ་རིང་དུ་གནས་ཏེ། སྒོ་བཞི་དང་། ཕྱོགས་བཅུར་ཡོངས་སུ་བསྐྱབ་པ་ལ་སོགས་པ་བགྱི་ལགས་སོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་སྤྱན་སྔར་ཟླ་བའི་དཀྱིལ་འཁོར་ལ་བརྟེན་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་དཔའ་ཆེན་པོ་ལྟ་བུ་ནམ་མཁའི་མཐོངས་ན་ནམ་མཁའ་ལྟར་སྔོ་བ། ལག་ན་རྩེ་གསུམ་འཛིན་པ། ཚད་ནམ་མཁའི་ཁམས་ཐམས་ཅད་དང་མཚུངས་པར་ཁྱབ་པའི་རལ་པའི་ཐོར་ཚུགས་འཆང་བ། ཚོགས་དུ་མས་ཡོངས་སུ་བསྐོར་བ། ཟླ་བ་ཕྱེད་པ་འཛིན་པ། ཅུང་ཟད་དགོད་པའི་རང་བཞིན་ཅན། སྙེམས་པ་དང་བཅས་པས་རྔམ་པར་གནས་པ་འདི་སུ་ཞིག་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་ལྷ་ཆེན་པོ་ཞེས་བརྗོད་པ་སྙེམས་པའོ། །ང་འཇིག་རྟེན་གསུམ་པོ་ཐམས་ཅད་ཀྱི་བདག་པོའོ། །གཞན་གང་ཡིན་པ་འགུགས་པར་བྱེད་པའོ་ཞེས་འདི་ལྟ་བུའི་སྙེམས་པའི་རྣམ་པར་འཕྲུལ་པ་ཆེན་པོས་གནས་པའོ། །ལག་ན་རྡོ་རྗེས་གསོལ་པ། བཅོམ་ལྡན་འདས་གདུག་པ་འདི་ཅི། འཇིག་རྟེན་གསུམ་གྱི་བདག་པོ་ཉིད་ཀྱིས་གནས་ལགས་སམ། ལག་ན་རྡོ་རྗེ་དེ་དེ་བཞིན་ནོ། །དེ་ནས་བྱང་ཆུབ་སེམས་དཔའ་ལག་ན་རྡོ་རྗེ་ཁྲོ་བ་དང་བཅས་པའི་གདོང་པས་རྡོ་རྗེ་ཧཱུྃ་མཛད་ཀྱི་སྐུ་ཉི་མ་བྱེ་བ་སྟོང་ཕྲག་བཅུ་གཉིས་ཀྱི་སྣང་བ་དང་མཚུངས་པ། ཆུ་གཏེར་ཆེན་པོའི་སྒྲ་སྒྲོགས་པ། འཇིག་པའི་དུས་ཀྱི་རླུང་གིས་དཀྲུགས་པ་ལྟར་ནམ་མཁའི་ཁམས་ཐམས་ཅད་ཁྱབ་པའི་ཁྲོ་བོ་ཆེན་པོའི་སྐུར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་

གནས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གདུག་པ་ཅན་གྱི་སེམས་ཅན་འཇིག་རྟེན་གསུམ་གྱི་བདག་པོར་གནས་པ་འདི་རྡོ་རྗེ་འབར་བ་འདིས་འཁོར་དང་བཅས་པའི་ལུས་ཐམས་ཅད་བསྲེག་པར་བགྱིའོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཧཱུྃ་མཛད་ཀྱིས་འཇིག་རྟེན་གསུམ་གྱི་བདག་པོའི་མདུན་དུ་དེ་ལྟ་བུའི་སྐུར་གྱུར་པས་འཁོད་དོ། །དེ་ནས་འཇིག་རྟེན་གསུམ་གྱི་བདག་པོ་བདག་ཉིད་ཀྱི་འཁོར་རྣམས་ཀྱིས་གཡུལ་ཆེན་པོ་འགྱེད་པར་བརྩམས་སོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་འཁོར་དང་བཅས་པ་དེ་རྣམས་ལ་རྡོ་རྗེ་ཀུན་ཏུ་འབར་ཞིང་མེ་ལྕེ་གཅིག་ཏུ་གྱུར་པས་བསྣུན་པར་གྱུར་ཏོ། །དེ་ནས་འཇིག་རྟེན་གསུམ་གྱི་བདག་པོས་དེ་དག་ཐམས་ཅད་གསད་པར་མཐོང་ནས་སྙིང་འདར་ཞིང་ཆུང་མ་དང་བཅས་པ་ལྕགས་གསུམ་གྱི་ར་བས་བསྐོར་ཏེ་གནས་སོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཧཱུྃ་མཛད་ཀྱིས་རྡོ་རྗེ་དེ་དང་མཚོན་ཆ་དེ་དག་ཐམས་ཅད་ཀྱིས་དེའི་ལྕགས་གསུམ་གྱི་ར་བ་ཤིན་ཏུ་བསྲེགས་ཏེ། འཇིག་རྟེན་གསུམ་གྱི་བདག་པོ་ལྷ་ཆེན་པོ་ཆུང་མ་དང་བཅས་པ་དེ་ལ་ལྕགས་ཀྱུ་དེ་དང་རྡོ་རྗེས་བསྣུན་ཅིང་བཀུག་ནས་ཞབས་གཉིས་ཀྱི་དྲུང་དུ་བསྐྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །གདུག་པ་ཅན་གྱི་སེམས་ཅན་བཀུག་པ་འདི་ལ་ད་བདག་གིས་ཇི་ལྟར་བགྱི། དེ་སྐད་ཅེས་གསོལ་པ་དང་། སྐབས་དེ་ཉིད་དུ་ཆུང་མ་དང་བཅས་ཏེ་ལྷ་ཆེན་པོ་ལངས་ནས་སླར་བྲོས་པར་གྱུར་ཏོ། །སོང་ནས་ཀྱང་དེར་ནམ་མཁའི་ཚད་ཙམ་གྱི་བཤང་བ་དང་། གཅི་བ་ཤིན་ཏུ་མནམ་པའི་དྲི་དུ་མ་དང་ལྡན་པ་མི་གཙང་བའི་ར་བས་བསྐོར་ཏེ་གནས་སོ། །དེ་ནས་རྡོ་རྗེ་ཧཱུྃ་མཛད་ཀྱིས་རྣམ་པར་བལྟས་པ་དང་། གདུག་པ་ཅན་གྱི་སེམས་ཅན་དེ་མ་མཐོང་སྟེ་བར་སྣང་དུ་རྣམ་པར་བལྟས་པས་ཚུལ་དེ་ལྟ་བུ་མི་གཙང་བའི་ར་བས་བསྐོར་ཏེ་གནས་པ་གཟིགས་སོ། །དེ་ནས་ཀུན་ནས་འབར་རབ་ཏུ་འབར་བའི་རྡོ་རྗེ་དེས་ར་བ་དེ་བཤིག་སྟེ་ལྷ་ཆེན་པོ་ཆུང་མ་དང་བཅས་པ་དེ་བཀུག་ནས་བསྒྱེལ་ཏེ་ཞབས་གཡོན་པའི་འོག་ཏུ་དེའི་མགོ་མནན་ནས། གཡས་པས་ལྷ་མོ་ཨུ་མའི་ནུ་མ་རྒྱས་པ་དག་མནན་ཏེ་འདི་སྐད་ཅེས་བཀའ་སྩལ་ཏོ། །ཀྱེ་སེམས་ཅན་གདུག་པ་ཅན་ཁྱོད་ལ་ཇི་ལྟར་བྱ། དེ་

ནས་ལྷ་དེ་རྣམས་འཇིག་རྟེན་གསུམ་གྱི་བདག་པོ་དེ་འདི་ལྟ་བུའི་གནས་སྐབས་སུ་གྱུར་པར་མཐོང་ནས་ངོ་མཚར་དུ་གྱུར་ཅིང་སྐྲག་པ་དང་བཅས་པས་འདི་སྙམ་དུ་སེམས་ཏེ། ཀྱེ་མའོ་འཇིག་རྟེན་གསུམ་གྱི་བདག་པོའི་གནས་སྐབས་བདག་ནི་བཟང་གི་དེ་ནི་དེ་ལྟ་མ་ཡིན་ནོ་སྙམ་མོ། །དེ་ནས་ལྷ་ཆེན་པོས་ལྷ་དེ་རྣམས་མཐོང་ནས་དཔའ་ཚན་བསྐྱེད་དེ། བྱང་ཆུབ་སེམས་དཔའ་དེ་ལ་འཇིག་རྟེན་གསུམ་འཇིགས་པར་བྱེད་པའི་འཇིགས་བྱེད་ཀྱི་ཀུ་ཆོ་ཆེན་པོས་འཇིག་རྟེན་གསུམ་དུ་ཆེར་བསྒྲགས་པས་འཇིགས་པ་བསྐྱེད་པར་བརྩམས་སོ། །དེ་ནས་བྱང་ཆུབ་སེམས་དཔའ་ཆེན་པོ་དེས་ལྷ་ཆེན་པོ་དེ་ཞབས་གཡོན་པས་ཆེས་ཤིན་ཏུ་བརྫི་བ་མཛད་ཀྱང་དེ་ལྟ་ནའང་དེ་སྒྲ་གཅོགས་པར་མ་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོས་ཆ་གཅིག་རྡོ་རྗེ་ཧཱུྃ་མཛད་ཀྱི་གཟུགས་སུ་གནས་ནས་གཞན་ཕྱག་ན་རྡོ་རྗེའི་གཟུགས་སུ་བཅོམ་ལྡན་འདས་ཀྱི་ཐད་དུ་སོང་སྟེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གདུག་པ་ཅན་འདིའི་སྒྲ་ཆེན་པོ་འབྱིན་པ་ལ་བདག་གིས་ཇི་ལྟར་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་བགེགས་ཐམས་ཅད་རྣམ་པར་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་ཀྱི་ཐུགས་ལས་སྙིང་པོ་འདི་ཕྱུང་ངོ་། །ཧཱུྃ། སྙིང་པོ་འདིས་རྡོ་རྗེའི་ཞབས་ཀྱི་སྤྱི་བོར་བསྣུན་ནོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྙིང་པོ་དེའི་མིང་ཅི་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་སྙིང་པོ་དེ་ནི་སེམས་ཅན་གདུག་པ་ཅན་ཐམས་ཅད་ཀྱི་སྙིང་འདྲ་ལ་བར་བྱེད་པའོ། །དེ་ནས་རྡོ་རྗེ་ཧཱུྃ་མཛད་ཀྱིས་དེ་སྐད་ཅེས་ཐོས་ནས་ཅུང་ཟད་འཛུམ་པའི་བཞིན་གྱིས་འཇིག་པ་ཆེན་པོའི་རླུང་གི་ཤུགས་ཀྱིས་བདས་པའི་རྒྱ་མཚོའི་དབའ་རླབས་བརྡབས་པའི་སྒྲ་ལྟ་བུས་ཧཱུྃ། སེམས་ཅན་གདུག་པ་ཅན་འདུག་ཤིག་འདུག་ཤིག་ཅེས་སྨྲ་ཞིང་ཞབས་གཡོན་པས་སྤྱི་བོར་བརྒྱབ་ནས་བསྣུན་ནོ། །དེ་ནས་ལྷ་མོ་དེས་ལག་པ་ཐལ་མོ་སྦྱར་བ་སྤྱི་བོར་གཞག་ནས་འདི་སྐད་ཅེས་སྨྲ་བར་བྱེད་དོ། །ཨེ་མའོ་གཟི་བརྗིད་ཆེན་པོ་འདི་གང་གི་ཕྱིར་འཇིག་རྟེན་གསུམ་ལས་

རྣམ་པར་རྒྱལ་བའི་བདག་གི་བདག་པོ་ཡང་ཞབས་གཡོན་པས་ཀུན་ནས་མནན་ནས་འདིའི་བྲན་མོ་ཉིད་མཆོག་སྟེ་ང་ཡང་འདིའི་ཆུང་མ་བྱ་སྙམ་ཞེས་སྨྲའོ། །བདག་གང་གི་ཕྱིར་འདི་ལྟ་བུའི་སྡུག་བསྔལ་མྱོང་བ་བཟོད་པ་བས་དེ་ནས་ཡང་དེས་རྗེས་སུ་བསམས་པ། བདག་གི་བདག་པོ་འཇིག་རྟེན་གསུམ་གྱི་དབང་ཕྱུག་འདི་གཟུགས་བཟང་ཡང་སྟོབས་དང་ལྡན་པ་མ་ཡིན་ནོ་སྙམ་མོ། །དེ་ནས་རྡོ་རྗེ་ཧཱུྃ་མཛད་ཀྱིས་དེའི་སེམས་མཁྱེན་ཏེ། སླར་ཡང་ཁྲོ་བ་དང་བཅས་པའི་ལྟ་སྟངས་ཀྱིས་གཟིགས་ཏེ། ཨེ་མའོ་བུད་མེད་འདི་ནི་ཤིན་ཏུ་གཟུགས་དང་ལྡན་ལ་ཡིད་དུ་འོང་བའོ་ཞེས་གསུངས་སོ། །དེ་ནས་ལྷ་ཆེན་པོ་དེས་སླར་ཡང་ཡན་ལག་དང་ཉིང་ལག་བསྐྱོད་ཅིང་སོས་མཆུ་ཟ་བར་བྱེད་དོ། །དེ་ནས་བཅོམ་ལྡན་འདས་རྡོ་རྗེ་ཧཱུྃ་མཛད་ཀྱིས་དེ་ལ་གཟིགས་ཏེ། ཁྲོ་བ་དང་བཅས་པས་རྡོ་རྗེའི་མཚོན་ཆ་དེས་ཀུན་ནས་བསྣུན་ཏེ་བསད་པར་གྱུར་ཏོ། །དེ་ནས་ལྷ་མོ་དེ་འདི་སྐད་ཅེས་སྨྲ་ཞིང་ངུ་བར་བྱེད་དོ། །ཇི་ལྟར་བདག་གི་བདག་པོ་འཇིག་རྟེན་གསུམ་གྱི་མངའ་བདག་དེ་འདིས་བསད་ན་ད་བདག་གིས་ཇི་ལྟར་བྱ་ཞེས་སྨྲའོ། །དེ་ནས་རྡོ་རྗེ་ཧཱུྃ་མཛད་ཀྱིས་ཡང་ལྷ་མོ་དེ་ཞབས་གཡོན་པས་ཤིན་ཏུ་བརྫིས་ཏེ་བསད་པར་བརྩམས་སོ། །དེ་ནས་ལྷ་མོ་དེ་འདར་བའི་ཡིད་ཀྱིས་འདི་སྐད་སྨྲས་སོ། །བཅོམ་ལྡན་འདས་ཅི་བདག་འགུམས་པར་མཛད་དམ། བདག་ཁྱོད་ཀྱི་བྲན་མོར་མཆིའོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཧཱུྃ་མཛད་སླར་ཡང་ཡ་མཚན་དང་བཅས་པའི་ལྟ་སྟངས་ཀྱིས་དེ་ལ་གཟིགས་ཏེ། བུད་མེད་མཛེས་མ་འདི་བཅོམ་ལྡན་འདས་ལ་བླ་མའི་ཡོན་དུ་དབུལ་བར་བྱའོ་སྙམ་དུ་དགོངས་སོ། ། དེ་ནས་ལྷ་མོ་དེས་ཕྱག་ན་རྡོ་རྗེ་ལ་གསོལ་པ། བྱང་ཆུབ་སེམས་དཔའ་ཐུགས་རྗེ་ཆེན་པོ་འདིའི་སྲོག་ཡོངས་སུ་བསྐྱབ་ཏུ་གསོལ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལྷ་མོ་དེའི་ཚིག་གསན་ནས་ཐུགས་རྗེ་དང་ལྡན་པའི་ཐུགས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་སེམས་དཔའ་ཆེན་པོ་འདི་ཐོང་ཤིག །སྐལ་བ་དང་ལྡན་པ་འདི་སངས་རྒྱས་ཉིད་དུ་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདུག་པ་ཅན་གྱི་སེམས་ཅན་འདི་ཇི་ལྟར་སྐལ་བ་དང་ལྡན་པ་ལགས། དེ་ནས་བཅོམ་

ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་སྐལ་བ་དང་ལྡན་པ་ཡིན་གྱིས་དེས་ན་ཐོང་ཤིག །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་འཇིག་རྟེན་གསུམ་གྱི་བདག་པོ་ལ་འཆི་བ་ཡོངས་སུ་འཚོ་བར་བྱེད། ༀ་བཛྲ་སཏྭ་ཧཱུྃ། རྡོ་རྗེ་ཞེས་བྱ་བའི་སྔགས་ཀྱིས་འཚོ་བར་མཛད་ནས་འདི་སྐད་ཅེས་བཀའ་སྩལ་ཏོ། །བཟང་མོ་འདི་གལ་ཏེ་སྟེར་ན་དེ་ནས་གཏང་བར་བྱའོ། །དེ་ནས་ལྷ་ཆེན་པོ་སྡུག་བསྔལ་མང་པོ་དེ་ལས་ལངས་ཏེ་ཤིན་ཏུ་སྟོབས་ཞན་པས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཅི་བགྱི་བ་བཀའ་སྩལ་དུ་གསོལ། ཆུང་མ་འདི་ལྟ་སྨོས་ཀྱང་ཅི་འཚལ། གཞན་ཡང་བླ་མའི་ཡོན་དུ་དབུལ་བར་བགྱི། དེ་ནས་ཕྱག་ན་རྡོ་རྗེས་ལྷ་ཆེན་པོ་དེ་བཀྲོལ་ལོ། བཀྲོལ་ནས་དེ་ལ་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་སེམས་དཔའ་ཆེན་པོ་ཁྱོད་ཀྱི་དཀྱིལ་འཁོར་དུ་ཞུགས་ལ་ཁྱོད་ཀྱི་བཀའ་བཞིན་དུ་བགྱིའོ། །དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཧཱུྃ་མཛད་ཀྱིས་དེ་ལ་སྡོམ་པ་གནང་བ་དེང་འདི་ནས་བརྩམས་ཏེ་སྲོག་ཆགས་གསོད་པ་ལ་སོགས་པ་མ་བྱེད་ཅིག །དེ་ནས་གདོང་བཅིངས་པ་བཀྲོལ་ཏེ། དཀྱིལ་འཁོར་བསྟན་ཏོ། །དེ་ནས་ལྷ་ཆེན་པོས་དཀྱིལ་འཁོར་དེ་མཐོང་ནས་ངོ་མཚར་དུ་གྱུར་ཏེ། ཨེ་མའོ་དཀྱིལ་འཁོར་འདི་ནི་ཤིན་ཏུ་མཛེས་སོ་ཞེས་སྨྲའོ། །དེ་ནས་བྱང་ཆུབ་སེམས་དཔའ་ཆེན་པོ་དབང་ཕྱུག་ཆེན་པོས་དེ་བཞིན་གཤེགས་པ་ཐམས་ཅད་ཀྱི་བདག་པོ་དེ་མཐོང་ནས། ཀྱེ་མའོ་སྡིག་ཅན་བདག་ཇི་ལྟར་འདིའི་བཀའ་བཞིན་ཐོག་མ་ཉིད་དུ་མ་བྱས་སོ། །ཞེས་ཡིད་ལ་བྱེད་དེ་མྱ་ངན་དུ་གྱུར་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལྷ་ཆེན་པོ་དེ་ལ་རྡོ་རྗེ་དེས་རྡོ་རྗེའི་ཆུས་དབང་བསྐུར་རོ། །དབང་བསྐུར་བ་ཉིད་ན་ཐལ་བའི་དབང་ཕྱུག་ཏུ་ལུང་བསྟན་ཏེ་ཐལ་བས་ཁེབས་པའི་འཇིག་རྟེན་གྱི་ཁམས་སུ་ཐལ་བའི་དབང་ཕྱུག་ཅེས་བྱ་བའི་དེ་བཞིན་གཤེགས་པའོ། །ཞེས་རྡོ་རྗེའི་མིང་འདིའི་དབང་གིས་དབང་བསྐུར་རོ། །དེ་ནས་དེ་བཞིན་གཤེགས་པ་ཐལ་བའི་དབང་ཕྱུག་གིས་བཅོམ་ལྡན་འདས་རྣམ་པར་སྣང་མཛད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བླ་མ་ལ་ཡོན་དབུལ་བའི་རེད་པ་ཅུང་ཟད་མཆིས་ན་བཅོམ་ལྡན་འདས་དེ་བཞེས་

སུ་གསོལ། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐལ་བའི་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །གང་བླ་མ་ལ་ཡོན་དབུལ་བ་ནི་ཁྱོད་ཀྱིས་ཚུལ་འདི་ལས་འདའ་བར་མི་བྱ་བ་ཉིད་དང་། གཞན་ལ་ཡང་ནམ་དུའང་སྨྲ་བར་མ་བྱེད་ཅིག །དེ་ནས་ཡང་ལྷ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་ལྟ་ལགས་མོད་ཀྱང་ཅི་ནས་ཀྱང་བླ་མའི་ཡོན་བཞེས་སུ་གསོལ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་སེམས་དཔའ་ཆེན་པོ་དེ་ལ་འདི་སྐད་ཅེས་སྨྲའོ། །བླ་མའི་ཡོན་ཅི་དབུལ་བ་དེ་ངས་བླང་བར་བྱའོ། །དེ་ནས་སེམས་དཔའ་ཆེན་པོ་དེས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བདག་གི་ཆུང་མ་འདི་དབུལ་བར་བགྱི་ཞིང་། རྫས་ལ་སོགས་པའང་དབུལ་བར་བགྱིའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཆུང་མ་འདི་བླང་བར་བགྱིའམ། འོན་ཏེ་རྫས་ལ་སོགས་པ་བླང་བར་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྫས་ཀྱིས་ཅི་ཞིག་བྱ། གལ་ཏེ་ཆུང་མ་འདི་དབུལ་ན་ཁྱོད་ཀྱིས་ཟུང་ཤིག །རྣམ་པར་རྟོག་པ་ཅི་ཡང་མི་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བྱང་ཆུབ་སེམས་དཔའ་ཆེན་པོ་དེ་ལ་འདི་སྐད་ཅེས་བཀའ་སྩལ་པ། སེམས་དཔའ་ཆེན་པོ་བདག་ལ་ཆུང་མ་བྱིན་ཅིག །དེ་ནས་བྱང་ཆུབ་སེམས་དཔའ་ཆེན་པོ་ཐལ་བའི་དབང་ཕྱུག་དགའ་ཞིང་རངས་ཏེ་རབ་ཏུ་མགུ་བའི་ཡིད་ཀྱིས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་ཆུང་མ་དེ་ཕུལ་ལོ། །དེ་ནས་ལྷ་མོ་དེས། ཕྱག་ན་རྡོ་རྗེ་ཤིན་ཏུ་གཞོན་པ། མཛེས་པའི་བདག་ཉིད་ཅན་མཐོང་ནས་དགའ་ཞིང་རངས་ཏེ། བདག་སྐལ་བ་དང་ལྡན་ནོ་སྙམ་བསམས་ཏེ་དེ་ལ་གསོལ་པ། ཨེ་མའོ་བཅོམ་ལྡན་འདས་ཀྱི་ཆོས་ནི་སེམས་ཅན་རྣམས་ཀྱི་ཕྱིར་འདི་ལྟ་བུའི་གཟུགས་སུ་བསྒྱུར་ཏེ་འཇིགས་པའི་གཟུགས་འཛིན་པ་ནི་བདག་གི་བདེ་བ་དང་ཡིད་བདེ་བ་བསྐྱེད་པའི་དོན་དུ་དཀྱིལ་འཁོར་དུ་འཇུག་པ་ཐོབ་པའི་དོན་དུ་ལགས་སོ། །དེ་ནས་དེ་བཞིན་གཤེགས་པ་ཐལ་བའི་དབང་ཕྱུག་ཡིད་ལ་འདི་ལྟར་སེམས་པར་གྱུར་ཏེ། ཨེ་མའོ་འདི་ནི་ངོ་མཚར་ཆེ་སྟེ་བདག་གི་ཆུང་མ་འདིས་བདག་བགྲང་བར་མི་

བྱེད་དོ་སྙམ་མོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐལ་བའི་དབང་ཕྱུག་ཅེས་བྱ་བ་དེ་ལ་ཐལ་བས་ཁེབས་པའི་འཇིག་རྟེན་གྱི་ཁམས་སུ་དབང་བསྐུར་རོ། །ཁྱོད་འཇིག་རྟེན་གྱི་ཁམས་དེར་སོང་ཤིག །དེ་ནས་དེ་བཞིན་གཤེགས་པ་ཐལ་བའི་དབང་ཕྱུག་དེ་དེ་བཞིན་གཤེགས་པ་ཐམས་ཅད་དང་འཇིག་རྟེན་གྱི་ཁམས་དེར་དབང་བསྐུར་བ་ཙམ་གྱིས་སོང་ངོ་། །དེ་ནས་ལྷ་མོ་དེ་དེའི་གཟུགས་ཕུན་སུམ་ཚོགས་པ་རང་གིས་མཐོང་ནས་སླར་ཡང་སྨྲས་པ། འདིའི་བྲན་མོ་མཆོག་ཏུ་འགྱུར་རམ་མ་ཡིན་ཏེ། དེའི་ཆུང་མ་མཆོག་ཏུ་འགྱུར། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་མཛེས་མ་དེ་བླངས་ཏེ་བཅོམ་ལྡན་འདས་ཀྱི་སྤྱན་སྔར་གནས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གི་བླ་མའི་ཡོན་བཅོམ་ལྡན་འདས་བཞེས་སུ་གསོལ། ཁྱོད་ལ་བདག་གིས་མཛེས་མ་འདི་དབུལ་བར་བགྱིའོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ཁྱོད་ཉིད་ལ་ཞོག་ཤིག །དེ་ནས་ལྷ་མོ་དེ་སླར་ཡང་འདི་སྙམ་དུ་སེམས་པར་གྱུར་ཏོ། །གལ་ཏེ་དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་ལ་བདག་བླ་མའི་ཡོན་དུ་འདིས་ཕུལ་བ་དེ་ལྟ་ན་འདིའི་བྲན་ཉིད་དུ་གྱུར་ཀྱང་བདག་སྐལ་བ་དང་ལྡན་ནོ་སྙམ་མོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མཛེས་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་དེ་ལྟར་བྱའོ། །དེ་ནས་བཅོམ་ལྡན་འདས་ཀྱིས་དེ་བཟུང་སྟེ་རྣམ་པར་བརྟགས་ནས་རྡོ་རྗེའི་ཆུས་དབང་བསྐུར་ཏེ། བརླ་ཟུང་གི་སྟེང་དུ་གཞག་ནས་དེ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་རིགས་ཀྱི་ལྷ་མོ་ཆེན་མོ་ཁྱོད་ཡིན་ནོ། །དེ་ནས་ལྷ་མོ་དེས་འདི་ལྟ་བུའི་བཀའ་ཉེ་བར་ཐོས་ནས་དགའ་ཞིང་རངས་པའི་ཡིད་ཀྱིས་གནས་སོ། །དེ་ནས་ཡང་ལྷ་ལ་སོགས་པ་དང་གཟའ་རྣམས་ཀྱིས་བཅོམ་ལྡན་འདས་ལྷ་མོ་ཆེན་མོ་དང་བཅས་པ་ཕྱག་ན་རྡོ་རྗེ་དང་ཐབས་ཅིག་པ་དཀྱིལ་འཁོར་ཆེན་པོ་ལ་ལན་གསུམ་དུ་གཡས་ནས་བསྐོར་ཞིང་རྒྱང་ནས་ཕྱག་བྱས་ཏེ་འགྲོ་བ་བཀའ་ནོད་ཅིང་གནས་སོ། །དེ་

ནས་བཅོམ་ལྡན་འདས་ཀྱིས་དེ་རྣམས་ལ་བཀའ་སྩལ་པ། ཐེག་པ་ཆེན་པོ་འདི་འབད་པས་ཤིན་ཏུ་བསྲུང་བར་བྱོས་ཤིག །དེ་ནས་ལྷ་དེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་ལ་དག་ཐེག་པ་ཆེན་པོ་ལ་སྨོད་ཅིང་ཐེག་པ་ཆེན་པོ་སུན་འབྱིན་པའི་སེམས་ཅན་དག་བྱུང་ན་དེ་བདག་ཅག་རྣམས་ཀྱིས་ཚར་གཅད་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཐེག་པ་ཆེན་པོ་སུན་འབྱིན་པ་རྣམས་ཇི་ལྟར་ནུས་པས་ཚར་གཅད་པར་བྱོས་ཤིག །དེ་ནས་ལྷའི་བུ་དེ་དག་ཅ་ཅོའི་སྒྲས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་སོང་ངོ་། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་མཛེས་མ་དེ་དེང་སང་ནས་བརྩམས་ཏེ་རྡོ་རྗེ་གར་མ་ཞེས་རྡོ་རྗེའི་མིང་གི་དབང་གིས་དབང་བསྐུར་རོ། །གཡོན་གྱི་ཟླ་བའི་དཀྱིལ་འཁོར་གྱི་གྲྭར་རྣམ་པར་གཞག་སྟེ། དེ་དང་ལྷན་ཅིག་རྩེ་བའི་སྦྱོར་བས་གནས་སོ། །དེ་ནས་ལྷ་མོ་དེ་ལ་སངས་རྒྱས་དེས་བཀའ་དྲིན་དམ་པ་མཛེས་པའི་ཡོན་ཏན་སྟོང་ཕྲག་དང་ལྡན་པར་གྱུར་ཏོ། །དེ་ནས་བཅོམ་ལྡན་འདས་དེ་དང་ཐབས་ཅིག་ཏུ་ཨཱ་ལིང་ག་དང་ཙུམ་པའི་སྦྱོར་བས་ཤིན་ཏུ་བདེ་བས་བགྱིས་ཤིང་གནས་སོ། །དེ་ནས་ཡང་ལྷའི་དབང་པོ་བརྒྱ་བྱིན་ལྷའི་བུ་བརྒྱ་སྟོང་དུ་མ་དང་ན་ཆུང་མ་སྟོང་ཕྲག་དུ་མས་ཡོངས་སུ་བསྐོར་ཅིང་ཁྲི་སྟན་བཟང་པོ་དང་། གླུ་དབྱངས་སྙན་པ་སྒྲོགས་པ་དང་ལྷན་ཅིག་ལྷགས་ཏེ། རྣམ་པ་སྣ་ཚོགས་པའི་མེ་ཏོག་གི་ཆར་ཆེན་པོ་ཕབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་རྣམ་པ་སྣ་ཚོགས་ཤིང་བཀྲ་བའི་མེ་ཏོག་གི་ཆར་སུས་ཕབ་པ་ལགས། ཁྲི་སྟན་བརྒྱ་སྟོང་ཕྲག་དུ་མ་དང་ལྷགས་པ་འདི་སུ་ཞིག་ལགས། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོས་ཀུན་ཏུ་བཟང་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་རྣམ་པར་གཟིགས་སོ། །གཟིགས་ཏེ་དེ་ནས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ལྷ་རྣམས་ཀྱི་དབང་པོ་བརྒྱ་བྱིན་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་ལྷགས་པ་ཡིན་ནོ། །དེ་ནས་ཕྱག་ན་རྡོ་རྗེ་སྙེམས་པ་དང་བཅས་པས་རྡོ་རྗེ་གསོར་ཞིང་ཤིན་ཏུ་ཁྲོས་ཏེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྡོ་རྗེ་ཀུན་ཏུ་འབར་རབ་ཏུ་འབར་བ་འདིས་དེའི་སྟོབས་གཞོམ་པར་བགྱིའོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་མི་མཐུན་པར་འཛིན་པའི་སེམས་ཀྱིས་མ་འོངས་ཀྱིས་དེས་ན་ཁྱོད་དེ་ལྟར་མ་བྱེད་ཅིག །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ཕྱིའི་ཚུལ་གྱི་ལྷ་མོ་དེ་ཉིད་ཀྱི་སྐུ་ལ་བཅུག་སྟེ་བཞུགས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ལྷགས་ཏེ། ལན་གསུམ་དུ་བསྐོར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་དཀྱིལ་འཁོར་ཆེན་པོ་འདིར་གཞུག་ཏུ་གསོལ། གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཉིད་བསྒྲུབ་པར་བགྱིའོ། །དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་དཀྱིལ་འཁོར་དུ་བཅུག་སྟེ། བཅུག་ནས་འཁོར་དང་བཅས་པ་དེ་ལ་རྡོ་རྗེའི་ཆུས་དབང་བསྐུར་ཏེ། དེ་ནས་བྱུང་ནས་ལྷ་རྣམས་ཀྱི་དབང་པོ་བརྒྱ་བྱིན་ཐེག་པ་ཆེན་པོར་སེམས་བསྐྱེད་དུ་བཅུག་གོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འཁོར་དང་བཅས་པ་དཀྱིལ་འཁོར་ཆེན་པོར་ཞུགས་ཏེ། སྐྱབས་གསུམ་བཟུང་ནས་བཅོམ་ལྡན་འདས་ལ་བླ་མའི་ཡོན་དབུལ་བའི་སེམས་ནས་བཅོམ་ལྡན་འདས་ཅི་ཞིག་དབུལ་བར་བགྱི། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་གཉིས་ལ་གཏུགས་ཏེ་རང་གི་མཛེས་མ་བླངས་ནས་ཕུལ་ལོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །བུད་མེད་འདི་ཁྱོད་ཉིད་ལ་ཞོག་ཤིག །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དགའ་བའི་སླད་དུ་ཅི་ནས་ཀྱང་འདི་བཞེས་སུ་གསོལ། གཞན་དུ་ན་བདག་ཇི་ལྟར་སློབ་མར་མཆི། དེ་ནས་བཅོམ་ལྡན་འདས་ཀྱིས་དེ་ལྟར་མཛད་དེ་བླངས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་ཚིམ་ཞིང་རབ་ཏུ་དགའ་བས་བཅོམ་ལྡན་འདས་རྣམ་པར་སྣང་མཛད་དང་། ཕྱག་ན་རྡོ་རྗེའི་དཀྱིལ་འཁོར་ཆེན་པོ་ལ་ལན་བརྒྱ་སྟོང་ཕྲག་དུ་མར་བསྐོར་བ་བྱས་ཏེ་འཁོར་དང་བཅས་པ་སོང་ངོ་། །དེ་ནས་བཅོམ་ལྡན་

འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོས་མཛེས་མ་དེ་རྣམ་པར་བརྟགས་ནས་རྡོ་རྗེའི་ཆུས་དབང་བསྐུར་ཏེ། ཤིན་ཏུ་སྒེག་པ་ཉིད་དུ་གཟིགས་ནས་རྡོ་རྗེ་སྒེག་མོ་ཞེས་མིང་དུ་བཏགས་སོ། །དེ་ནས་རྡོ་རྗེ་གར་མ་ཕྱུང་སྟེ་དེ་ལ་ཆེད་དུ་བརྗོད་པས་ཆེད་དུ་བརྗོད་པ། ཨེ་མའོ་ཐེག་པ་ཆེན་པོའི་ཚུལ་འདི་ནི་ངོ་མཚར་ཆེ་སྟེ། གང་གིས་དེ་བཞིན་གཤེགས་པ་ཉིད་ཐོབ་ནས་མཛེས་མ་ཤིན་ཏུ་གཟུགས་དང་ལྡན་པ་བདེ་བ་ཆེན་པོ་སྟེར་བ་རྙེད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷ་མོ་གཞན་ཡང་ཕྱུང་སྟེ་དཀྱིལ་འཁོར་དེ་ཡོངས་སུ་གང་བར་མཛད་དོ། ། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་སླར་ཡང་དཔུང་གི་ཚོགས་ཡན་ལག་བཞི་པ་དང་བཅས་པ་དེར་ལྷགས་སོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དཔུང་གི་ཚོགས་ཡན་ལག་བཞི་པ་དང་བཅས་པ་དེ་གཟིགས་ཏེ་ཡིད་རབ་ཏུ་འཁྲུགས་པར་གྱུར་ནས།བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདུད་སྡིག་ཅན་དཔུང་གི་ཚོགས་ཡན་ལག་བཞི་དང་བཅས་ཏེ་ལྷགས་པ་འདི་སུ་ཇི་ལྟ་བུ་ཞིག་ལགས། དེ་ནས་བཅོམ་ལྡན་འདས་ཀྱིས་དགོངས་ཏེ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་འདི་ནི་བདུད་སྡིག་ཏོ་ཅན་འོངས་པ་མ་ཡིན་གྱི། འོན་ཀྱང་འདི་ཀཽ་ཤི་ཀ་ཡིན་ནོ། །དེ་ནས་ཕྱག་ན་རྡོ་རྗེ་རབ་ཏུ་ཁྲོས་ཏེ་རྡོ་རྗེ་གསོར་ཞིང་བཅོམ་ལྡན་འདས་ཅི་ཕྲག་དོག་གི་སེམས་ཀྱིས་འོངས་ན་རྡོ་རྗེ་འདིས་དེ་དག་བསྲེག་ཕར་བགྱིའོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེ་ལྟར་མ་བྱེད་ཅིག །བླ་མའི་ཡོན་གཞན་ཡང་དབུལ་བའི་ཕྱིར་ལྷགས་པ་ཡིན་ནོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དེར་འོངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བླ་མའི་ཡོན་གཞན་ཡང་དབུལ་བར་འཚལ་ན་བཞེས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་ང་ལ་སྦྱིན་པར་འདོད་པ་དེ་ཁྱོད་ཉིད་ལ་ཞོག་ཤིག །ཀཽ་ཤི་ཀ་བླ་མའི་ཡོན་ནི་གང་ཐེག་པ་ཆེན་པོའི་ཚུལ་བསྲུང་བ་ཉིད་ཡིན་ནོ། །བརྒྱ་བྱིན་གྱིས་གསོལ་པ། དེ་ལྟ་ལགས་མོད་ཀྱང་འདི་དག་བཞེས་སུ་གསོལ་ཞེས་གསོལ་ཏེ། བླ་མའི་ཡོན་ཕུལ་ནས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ། ལྷ་

རྣམས་ཀྱི་དབང་པོ་བརྒྱ་བྱིན་འཁོར་དང་བཅས་པ་སོང་ངོ་། །དེ་ནས་པདྨོའི་ལུས་ཅན་ལ་སོགས་པ་གཞན་རྣམས་ཀྱང་ལྷགས་ཏེ་མཆོད་ནས་སོང་ངོ་། །ཉན་ཐོས་ཀྱི་ཐེག་པ་ཅན་རྣམས་ཀྱང་ལྷགས་ཏེ་མཆོད་ནས་སོང་ངོ་། །རྒྱས་པར་རྒྱུད་གཞན་རྣམས་ནས་བཤད་པའི་ཕྱིར་འདིར་མ་བཤད་དོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅི་བཅོམ་ལྡན་འདས་སྒྲུབ་པའི་ཐབས་རྒྱས་པ་མདོར་བསྡུས་ཏེ་མཛད་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གང་གིས་ཉན་ཐོས་ཀྱི་ཐེག་པའི་ལོ་རྒྱུས་མ་བཤད་ལགས། དེའི་ཏིང་ངེ་འཛིན་བསྒོམ་པ་བསྟན་པར་འགྱུར་རོ། །ལག་ན་རྡོ་རྗེ་སྡིག་པ་ཅན་གྱི་སེམས་ཅན་ཐེག་པ་ཆེན་པོར་གཞུག་པར་མི་བྱའོ། །དེ་དག་དྲན་པ་ཙམ་དུའང་མི་བྱའོ། །ལག་ན་རྡོ་རྗེས་གསོལ་པ། བཅོམ་ལྡན་འདས་རྒྱུ་གང་གི་ཕྱིར་དྲན་པ་ཙམ་ཡང་མི་བགྱི་ལགས། བཀའ་སྩལ་པ། ལག་ན་རྡོ་རྗེ་ཇི་སྲིད་ཉན་ཐོས་ཀྱི་ཐེག་པའི་གཏམ་བྱས་པ་དེ་སྲིད་དུ་དམ་ཚིག་འཇོམས་པས་དེའི་ཕྱིར་གསང་བའི་ཐེག་པ་ལ་མངོན་པར་བརྟེན་པས་དེ་དག་རིང་དུ་ཡོངས་སུ་དོར་བར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཉན་ཐོས་ཀྱི་ཐེག་པ་པ་རྣམས་ཇི་ལྟར་སུན་དབྱུང་བར་བགྱི། དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་གང་ལ་ལ་དག་གསང་བའི་ཐེག་པ་ཆེན་པོར་དབང་བསྐུར་བ་དེ་རྣམས་ཉན་ཐོས་ཀྱི་ཐེག་པ་པ་རྣམས་ཀྱི་ནང་དུ་གལ་ཏེ་འགའ་ཞིག་གི་ཚེ་ཞུགས་ན་དེ་ལ་ཉན་ཐོས་ཀྱི་ཐེག་པ་པ་དེ་དག་ཆེས་བཞད་གད་བྱེད་དེ། ཨེ་མའོ་ཐེག་པ་འདི་ནི་ངོ་མཚར་རྨད་དོ་ཞེས་ཅ་ཅོའི་སྒྲ་ཆེན་པོ་བྱེད་པར་འགྱུར་རོ། །དེ་ནས་དེ་རྣམས་ལ་ཐེག་པ་ཆེན་པོ་པས་ནུས་པའི་མཐུ་བསྟན་པར་བྱའོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པ་ཇི་ལྟ་བུས་ནུས་པ་བསྟན་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་སྒྱུ་འཕྲུལ་ཆེན་མོ་ཞེས་བྱ་བའི་རིག་པ་ཡོད་དེ། དེ་རྙེད་ནས་གང་འདོད་པ་དེ་བྱའོ། །ལག་ན་རྡོ་རྗེ་དེ་ལ་འདི་ནི་སྒྱུ་འཕྲུལ་ཆེན་མོ་ཞེས་བྱ་བའི་རིག་

པའོ། །ན་མོ་བྷ་ག་བ་ཏེ། མ་ཧཱ་མཱ་ཡ། ཏྲཻ་ལོཀྱ་དཱྃ་ནི་མ་ཧཱ་བིདྱཱ་ཨཱ་ཀརྵ་ཎི་མོ་ཧ་ནི། ཙྪེ་ད་ནི། མཱ་ར་ནི། ཀར་དྷ་ནི། མ་ཧཱ་ཨིནྡྲཱ་ཛ་ལ་ཀཱ་རི་ཎི། དེ་བ་ནཱ་ན་ཡ། ཨ་སུ་རཱ་ནཱ་ཀདྷ། ཡཀྵ་རཱཀྵ་ས་གན་དྷརྦ། ཀིནྣ་ར། བིདྱཱ་དྷཱ་ར་ཎ། ཨཱ་ཀརྵ་ཡ། ཨཱ་ཀརྵ་ཡ། དཪྵ་ཡ། དཪྵ་ཡ། བིཥྞུ་དརྵ་ཡ། དརྵ་ཡ། བྲཧྨ་ཎཱ་ན། དརྵ་ཡ། དརྵ་ཡ། ཏྲཻ་ལོཀྱྃ་དརྵ་ཡ། དརྵ་ཡ། ཨཱ་ན་ཡ། ཨཱ་ན་ཡ། མ་ཧཱ་མོ་ཧེ། ཨེ་ཧྱེ་ཧི་བྷ་ག་བ་ཏེ། མ་ཧཱ་མཱ་ཡེ། ཨ་ནེ་ཀ་ཀུ་ཧ་ཀ་ས་ཧ་སྲ་ཀུ་ལེ། མ་ད་ནི། ཛཱི་བ་ན་ཧི་ཏཱ་རཱ།བ་བ་ཧཱུཾ་ལེ། ཧེ་ཧེ། རུ་རུ། ཧ་ར་ཧ་ར། པྲཱ་ཎཱ་ན། ཁཱ་ཧི་ཁཱ་ཧི། གྲྀཧྞ་གྲྀ ཧྞ། པཱ་ཏནི། བྷྲ་མ་ཎི་མུ་རཙྪ་ནི་ཧཱུྃ་ཧཱུྃ། ཧཿཧཿཕཊ་ཧཱུྃ་ཧཿསྭཱ་ཧཱ། འདི་ནི་བཅོམ་ལྡན་འདས་མ་གསང་བ་བསྲུངས་པས་མཆོག་གང་དུ་གསང་བ་འགྲུབ་པའི་རིག་པ་སྒྱུ་འཕྲུལ་དྲ་བ་ཞེས་བྱ་བའི་རིག་པའི་དབང་ཕྱུག་དོན་ཡོད་པ་གྲུབ་པའི་གཟུགས་ཅན་བཅོམ་ལྡན་འདས་མ་གསང་བའི་འཇིག་རྟེན་གྱི་དབང་ཕྱུག་སེམས་ཅན་ཐམས་ཅད་ཀྱི་དབང་ཕྱུག་རྗེས་སུ་བྱེད་མ། གདུག་པ་ཐམས་ཅད་འདུལ་མ། འདིའི་ཆོ་ག་ནི། སྔོན་དུ་བསྙེན་པ་སྟོང་བཟླས་ལ་དེ་ནས་ཟླ་བ་གཟས་བཟུང་བ་ན་ཉིན་མཚན་དུ་སྨྱུང་བར་གནས་ཏེ། གཟས་བཟུང་བ་མ་མཐོང་བར་ཇི་སྲིད་ཟླ་བ་མ་གྲོལ་བ་དེ་སྲིད་དུ་བཟླས་ལ་སྔ་དྲོ་ཁྲུས་བྱས་ཏེ་བིལ་བའི་ཡམ་ཤིང་མར་ལ་བཏགས་པའི་ཉི་ཤུ་རྩ་གཅིག་བསྲེག་པར་བྱའོ། །དེ་ནས་བྲམ་ཟེ་ལ་སྟོན་མོ་བྱས་ཏེ། དེ་དག་ལས་རྗེས་སུ་བླངས་པས་དེ་ནས་དེ་འགྲུབ་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་གྲུབ་ནས་ཅི་བགྱིད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལས་ཐམས་ཅད་བྱེད་པར་འགྱུར་རོ། །རྨ་བྱའི་སྒྲོ་ཡོངས་སུ་གཟུང་ལ་རིག་སྔགས་འདིས་ལན་བདུན་མངོན་པར་བསྔགས་པའི་སྒྲོ་དེས་ངོ་མཚར་སྟོང་ཕྲག་བྱེད་པར་འགྱུར་རོ། །དེ་ནས་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེས་ངོ་མཚར་སྟོང་ཕྲག་ཇི་ལྟ་བུ་བགྱིད་པར་འགྱུར། དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་གང་ལ་ལ་ཐེག་པ་ཆེན་པོ་ལ་སྨོད་པར་བྱེད་ན་དེ་ནི་མངོན་སུམ་དུ་ཚར་གཅད་པར་བྱ། ནམ་མཁའ་

ལ་སྒྲོ་བསྐོར་ན་དེ་ནས་ནམ་མཁའ་ལ་གནས་པའི་ལྷ་ཐམས་ཅད་བསྟན་པར་བྱའོ། །སྒྲོ་ནམ་མཁའ་ལ་སྟེང་དུ་གཟུང་ན་ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ལ་སོགས་པ་དང་། བརྒྱ་བྱིན་དང་། ཟླ་བ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་ལ་སོགས་པ་ཁང་བཟངས་དུ་མས་གང་བ་ནམ་མཁར་བསྟན་པར་བྱའོ། །ལག་ན་རྡོ་རྗེ་སྒྲོ་དེ་སྟེང་དུ་གཟུང་ན་སྦྱོར་བ་དེ་དག་ཕྱེད་པར་འགྱུར་རོ། །ལག་ན་རྡོ་རྗེ་སྦྱོར་བ་གཞན་ཡང་བཤད་པར་བྱ་སྟེ། ཆུ་ཁྱོར་བ་གང་ལ་རིག་པ་འདི་ཡོངས་སུ་བཟླས་ཏེ། དེ་ནམ་མཁའ་ལ་གཏོར་ནས་སྤྲིན་འབབ་པ་བསྟན་པར་བྱའོ། །སྒྲོ་སྟེང་དུ་བསྐོར་ན་སླར་དེ་དག་ཐམས་ཅད་མེད་པར་འགྱུར་རོ། །གཞན་ཡང་བཤད་པར་བྱ་སྟེ། ཐལ་བ་ལ་ཅུང་ཟད་བཟླས་ཏེ་གྲོང་དང་གྲོང་ཁྱེར་ལ་སོགས་པའི་དབུས་སུ་གཏོར་ན་གྲོང་ལ་སོགས་པ་བསྲེག་པ་བསྟན་པར་བྱའོ། །སྒྲོ་སྟེང་དུ་བསྐོར་ན་སླར་ཞི་བར་འགྱུར་རོ། །ལག་ན་རྡོ་རྗེ་གཞན་ཡང་བཤད་པར་བྱ་སྟེ། གང་གི་ཚེ་སྔགས་པ་མཐའ་གཅིག་ཏུ་སོང་སྟེ་ཆོམ་རྐུན་ལ་སོགས་པ་མཐོང་བ་ན་དེ་ནས་བྱེ་མ་སྤར་བར་བླངས་ལ་རིག་པ་ཅུང་ཟད་ཅིག་བཟླས་ཏེ་ཕྱོགས་བཞིར་གཏོར་བར་བྱའོ། །དཔུང་གི་ཚོགས་གླང་པོ་དང་། རྟ་ལ་སོགས་པ་སྟོང་ཕྲག་མཐོང་བར་འགྱུར་རོ། །དེ་ནས་ཆོམ་རྐུན་ལ་སོགས་པའི་སེམས་ཅན་གདུག་པ་ཅན་དོགས་པ་དང་བཅས་པས་ཉེ་འཁོར་དུ་འོང་བར་མི་འགྱུར་རོ། །སྒྲོ་སྟེང་དུ་བསྐོར་ན་དེ་ནས་མེད་པར་འགྱུར་རོ། །ལག་ན་རྡོ་རྗེ་སྒྲོ་དེ་ཉིད་ཀྱིས་ཕ་རོལ་གྱི་བུད་མེད་བཀུག་ལ་འདོད་པར་བྱའོ། །ལག་ན་རྡོ་རྗེ་གལ་ཏེ་གདུག་པ་གསད་པར་འདོད་ན་སྒྲོ་དེ་ཉིད་ཀྱི་སྦྱོར་བས་ཁྲོ་བ་དང་བཅས་པས་དེའི་མིང་ནས་བརྗོད་ཅིང་བསྐོར་བས་འཆི་བར་འགྱུར་ཞིང་སླར་ཡང་འཆི་བར་འགྱུར་རོ། །སྒྲོ་དེ་ཉིད་ཀྱིས་ཇི་ལྟར་བསམས་པའི་རྫས་འོང་བར་འགྱུར་རོ། །དེ་ཉིད་ཀྱིས་ཕ་རོལ་གྱི་སྔགས་རེངས་པར་བྱེད་དོ། །ཡང་སྒྲོ་དེ་ཉིད་སྟེང་དུ་བསྐོར་བས་གྲོལ་བར་འགྱུར་རོ། །འདི་ཉིད་ཀྱིས་གང་ཡིད་ལ་འདོད་པའི་བུད་མེད་འགུགས་པར་བྱེད་དོ། །ལྟོས་འགྲོ་ཆེན་པོས་ཟོས་པ་ཡང་འབེབས་པར་འགྱུར་ཞིང་འཚོ་བར་བྱེད་དོ། །སྦྲུལ་ནག་པོས་ཟོས་པ་ཡང་སློང་ཞིང་མི་བཟད་

པའི་དུག་ཀྱང་མེད་པར་བྱེད་དོ། །རིམས་དང་ནད་ཐམས་ཅད་ཀྱང་སྒྲོས་ཞི་བར་བྱེད་དོ། །ཇི་ལྟར་མ་བཤད་པའི་ལས་རྣམས་བྱེད་དོ། །རྟག་ཏུ་བཟླས་ན་འཆི་བ་ལས་རྒྱལ་བར་འགྱུར་རོ། །ལག་ན་རྡོ་རྗེ་འདི་དག་ནི་སྒྱུ་འཕྲུལ་ཆེན་མོ་ཞེས་བྱ་བའི་རིག་པ་སྒྲུབ་པའི་ཐབས་དང་བཅས་པ་སྟེ། ཚུལ་འདི་ཉིད་ཀྱིས་འཇིག་རྟེན་ཐམས་ཅད་དབབ་པར་བྱའོ། །འདི་ནི་ཉན་ཐོས་ཀྱི་ཐེག་པ་པ་རྣམས་སྐྲག་པར་བྱེད་པའི་རིག་པ་སྟེ། སངས་རྒྱས་ཉིད་སྒྲུབ་པར་བྱེད་པ་མ་ཡིན་ནོ། །སྔགས་ཀྱི་སྒྲུབ་པ་འབའ་ཞིག་གིས་སངས་རྒྱས་ཉིད་སྒྲུབ་པར་བྱེད་པ་ཅུང་ཟད་ཀྱང་མེད་ལ་འོན་ཀྱང་སྒོམ་པའི་རིམ་པས་ཡིན་ནོ། །གསང་བའི་ཚུལ་དང་ལྡན་པའི་སྒོམ་པའི་རིམ་པ་དེས་འགྲུབ་པར་འགྱུར་རོ། །ལག་ན་རྡོ་རྗེ་དེས་ན་འཇིག་རྟེན་པ་དགའ་བའི་ཕྱིར་དངོས་གྲུབ་ཕྲ་མོ་འདི་སྔགས་པས་བསྒྲུབ་པར་བྱ་སྟེ། སངས་རྒྱས་ཀྱི་ཕྱིར་མ་ཡིན་ནོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་སྔགས་ཀྱི་ཚུལ་གྱིས་སངས་རྒྱས་ཉིད་བགྱིད་པར་མི་ནུས་ན་རྣམ་པ་ཇི་ལྟ་བུས་སངས་རྒྱས་ཉིད་བགྱིད་པར་རྟོག་པར་འཚལ་ལོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་གསང་བའི་ཚུལ་གྱིས་སངས་རྒྱས་ཉིད་བསྒྲུབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཉོན་ཅིག །གསང་བ་མཆོག་གི་དབང་ཕྱུག་ཐེག་པ་ཆེན་པོ་དོར་ནས་ཚུལ་གཞན་གྱིས་བསྐལ་པ་བྱེ་བ་བརྒྱར་ཡང་སངས་རྒྱས་ཉིད་བྱ་བར་མི་ནུས་སོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཐེག་པ་ཆེན་པོའི་ཚུལ་བཀའ་སྩལ་དུ་གསོལ། གང་གིས་སེམས་ཅན་ཐམས་ཅད་ལ་སངས་རྒྱས་ཉིད་སྦྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཐེག་པ་ཆེན་པོ་ཞེས་བྱ་བ་མཆོག་ཏུ་གསང་བའི་མཛོད་ཉོན་ཅིག །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་

འདས་མཛོད་ཅེས་བགྱི་བའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་འདི་ལ་མཛོད་ཅེས་བྱ་བ་ནི་བྷ་གའི་གཞིའི་གནས་སོ། །ཞུ་བ་ཅན་དང་དེའི་མཛོད་གཅིག་ཏུ་བྱས་ཏེ། རྡོ་རྗེ་སེམས་དཔའི་གཟུགས་སུ་བདག་ཉིད་བསམ་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་ལག་ན་རྡོ་རྗེ་དང་། རྡོ་རྗེ་གར་མ་དང་། རྡོ་རྗེ་སྒེག་མོ་དག་དང་ཐབས་ཅིག་ཏུ་རྣམ་པ་དུ་མ་ཨཱ་ལིང་ག་དང་། ཙཱུ་ཥ་ན་ལ་སོགས་པ་མཛད་ཅིང་བསྟེན་ནས་བཏུང་བར་མཛད་དོ། །དེ་ནས་ལག་ན་རྡོ་རྗེ་སྔགས་པའི་ཚུལ་འདི་ལྟར་ཙཱུ་ཥ་ན་དང་། ཙུམྤ་ན་ལ་སོགས་པས་བྷ་གའི་ནང་དུ་སོང་བར་བྱ་སྟེ། བདག་ཉིད་རྡོ་རྗེ་སེམས་དཔའི་གཟུགས་སུ་མངོན་པར་བྱང་ཆུབ་པ་རྣམ་པ་ལྔས་བསྐྱེད་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཅི་ལགས། ཕྱི་རོལ་དུ་གནས་ནས་མངོན་པར་བྱང་ཆུབ་པ་རྣམ་པ་ལྔ་བགྱི་བར་མི་ནུས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཕྱི་རོལ་དུ་གནས་པའམ། ཕྱི་རོལ་གྱི་ཚུལ་གྱིས་སམ། བྷ་ག་བསྟེན་པ་ཙམ་གྱིས་བྱང་ཆུབ་སྒྲུབ་པར་ནུས་པ་མ་ཡིན་ཏེ། འོན་ཀྱང་སྦྱོར་བ་འདིས་གལ་ཏེ་བྷ་ག་བསྟེན་ན་དེ་ནི་མངོན་པར་བྱང་ཆུབ་པ་རྣམ་པ་ལྔ་སྒོམ་པ་པོར་འགྱུར་རོ། །བཅོམ་ལྡན་འདས་ཇི་ལྟར་བསྒོམ་པར་བགྱི། ལག་ན་རྡོ་རྗེ་དེས་རྩའི་ཞུ་བས་བདག་ཉིད་ཟླ་བའི་དཀྱིལ་འཁོར་གྱི་རྣམ་པར་བལྟ་བར་བྱའོ། །ཡང་བྱང་ཆུབ་ཟླ་བའི་ཚུལ་དང་རྩ་ཐམས་ཅད་གཅིག་ཏུ་བྱས་ཏེ། བདག་ཉིད་བྱང་ཆུབ་ཟླ་བར་བསྒོམ་པར་བྱའོ། །འོ་མ་དེ་ལས་བདག་ཉིད་རྡོ་རྗེའི་གཟུགས་སུ་བསམས་ལ། དེ་ལས་ཡང་རྡོ་རྗེ་སེམས་དཔའི་སྐུར་རྣམ་པར་བསྒོམ་པར་བྱའོ། །ཡང་ཐམས་ཅད་ལྷན་ཅིག་གཅིག་ཏུ་གྱུར་པ་ལས་དེ་བཞིན་གཤེགས་པ་ཐམས་ཅད་ཀྱི་སྐུར་བསྒོམ་པར་བྱའོ། །དེ་དེ་བཞིན་གཤེགས་པ་ཐམས་ཅད་ཀྱི་བདག་པོ་རྣམ་པར་སྣང་མཛད་ཆེན་པོ་དང་མཚུངས་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཅི་ལགས། རྩའི་སྦྱོར་བ་འདི་དག་མ་གཏོགས་པར་ཚུལ་གཞན་གྱིས་མངོན་པར་བྱང་ཆུབ་པ་རྣམ་པ་ལྔ་བསྒོམ་

པར་མི་ནུས་པ་ལགས་སམ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་རྩའི་སྦྱོར་བ་འདི་ཉིད་ཀྱིས་མངོན་པར་བྱང་ཆུབ་པ་རྣམ་པ་ལྔ་བསྒོམ་པར་བྱའི་གཞན་གྱིས་མ་ཡིན་ནོ། །གསོལ་པ། ཅིའི་ཕྱིར། བཀའ་སྩལ་པ། ལག་ན་རྡོ་རྗེ་ཕྱི་རོལ་གྱི་ཟླ་བའི་དཀྱིལ་འཁོར་གྱི་རྣམ་པས་མངོན་པར་བྱང་ཆུབ་པ་དེ་མི་ནུས་ཏེ། འབད་པ་ཆེན་པོས་ཀྱང་ཅུང་ཟད་ཙམ་ཡང་བྱ་བར་ནུས་པ་མ་ཡིན་ནོ། །དཔེར་ན་ནམ་མཁའི་ཆུ་སྐྱེས་རྣམ་པ་གང་གིས་ཀྱང་བསྒྲུབ་པར་ནུས་པ་མ་ཡིན་པ་བཞིན་ནོ། །དེའི་ཕྱིར་གསང་བ་ཞེས་བཤད་དོ། །གསང་བའི་ཚུལ་འདིས་ངལ་བ་མེད་པར་སངས་རྒྱས་ཉིད་དམ་རྡོ་རྗེ་འཛིན་པ་ཉིད་བསྒྲུབ་པར་བྱ་བ་དང་། སྦྱོར་བ་གཞན་གྱིས་མ་ཡིན་ནོ། །དེའི་ཕྱིར་བཅོམ་ལྡན་འདས་བདེ་བར་གཤེགས་པའི་ཐིག་ལེའི་ཉི་མས་ཕྱོགས་རྣམ་པར་གསལ་བ་དེས་སེམས་ཅན་ཐམས་ཅད་ལ་ཕན་པའི་ཕྱིར་གསང་བའི་སྦྱོར་བ་འདི་ཉིད་གསལ་བར་མཛད་དོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟ་ནའང་གསང་བའི་ཚུལ་གྱི་རྣམ་པ་ཡང་དག་པར་བདག་ལ་མ་གསུངས་ལགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་མཆོག་ཏུ་གསང་བའི་མཛོད་ཀྱི་ཐིག་ལེ་ཞེས་བྱ་བ་སངས་རྒྱས་ཐམས་ཅད་སྦྱིན་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་སྐྱེད་པ་པོ་ཉོན་ཅིག །ངས་ཀྱང་ཚུལ་འདིས་སངས་རྒྱས་ཉིད་མཛད་ལ། ཁྱོད་ཀྱིས་ཀྱང་ཚུལ་འདིས་སངས་རྒྱས་ཉིད་བསྒྲུབ་པར་བྱའོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཇི་སྲིད་བ་སྤུའི་བུ་ག་ཡོད་པ་དེ་སྲིད་ལ་རྩ་རྣམས་རྡུལ་ཕྲ་རབ་ཀྱི་གཟུགས་སུ་བསྒོམ་པར་བྱའོ། །དེ་ནས་རྡོ་རྗེ་གར་མའི་གཟུགས་སུ་བསྒོམས་ནས་དེའི་བྷ་གའི་དབུས་སུ་རྡོ་རྗེ་གར་མའི་གཟུགས་རྩའི་རང་བཞིན་ལས་ཨ་ལ་སོགས་པའི་ཡི་གེ་འབབ་པའི་ངོ་བོར་བསམ་པར་བྱའོ། །དེ་ནས་མི་འབབ་པའི་རྩ་ལྔ་ཀ་ལ་སོགས་པའི་གཟུགས་སུ་བསམ་པར་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་བསམས་ལ། དེའི་འོ་མ་ལས་བདག་ཉིད་བྷ་གའི་དབུས་སུ་རྡོ་རྗེ་

སེམས་དཔའི་སྐུར་བསྒོམ་པར་བྱའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྩ་དེའི་གཟུགས་དང་རང་བཞིན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་རྩ་དེ་རྣམས་ཀྱི་ནང་ནས་གཅིག་ནི་རྩ་ཆེན་པོ་གཙོ་བོར་གྱུར་པ་སྟེ། རྩ་གཞན་ཐམས་ཅད་ནི་དེ་ལ་རྣམ་པར་གནས་པའོ། །དེའི་རང་བཞིན་ནི་བསིལ་བའི་རང་བཞིན་ཏེ། དེ་རྙེད་ནས་རྡོ་རྗེ་འཛིན་པ་ཉིད་དམ་རྣམ་པར་སྣང་མཛད་ཉིད་ཐོབ་པར་འགྱུར་རོ། །གང་ཡང་ཅུང་ཟད་དྲོ་བ་ན་དེ་ནས་འཇིག་རྟེན་དབང་ཕྱུག་གི་སྐུ་ཐོབ་པར་འགྱུར་རོ། །གང་ཡང་ཤིན་ཏུ་དྲོ་བ་དང་ལྡན་ན་དེ་བསྒོམས་ན་རྡོ་རྗེ་ཧཱུྃ་མཛད་ཀྱི་སྐུར་འགྱུར་རོ། །དེ་ནས་ཁྲོ་བོའི་གཟུགས་སུ་གྱུར་ནས་ཇི་སྲིད་ཁྲོ་བོའི་གཟུགས་སུ་གྱུར་པ་དེ་སྲིད་བསྒོམ་པར་བྱ་སྟེ། ཞི་བའི་སྐུ་དང་ལྷན་ཅིག་ཏུ་བྱས་ནས་དེ་ནས་ཉི་མའི་དཀྱིལ་འཁོར་རོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལགས། བུད་མེད་བསྟེན་པ་ཙམ་གྱིས་སངས་རྒྱས་ཉིད་ཐོབ་པ་ལགས་སམ། འོན་ཏེ་གཞན་པས་ཀྱང་ལགས། བཅོམ་ལྡན་འདས་ཀྱིས་བཀའ་སྩལ་པ། སྦྱོར་བ་དང་ལྡན་པའི་བུད་མེད་བསྟེན་པ་དེ་མ་གཏོགས་པ་གཞན་གྱིས་སངས་རྒྱས་ཉིད་ཐོབ་པར་མི་འགྱུར་ཏེ། གཞན་ཐམས་ཅད་ནི་རྣམ་པར་གཡེང་བ་ཡིན་ནོ། །ལག་ན་རྡོ་རྗེ་དེའི་ཕྱིར་སྔགས་པས་ལྷ་མོ་གང་རྙེད་པ་དེ་བརླ་ཟུང་གི་སྟེང་དུ་བཞག་ལ་ཙུམྦ་དང་། ཨཱ་ལིང་ག་ལ་སོགས་པ་བྱས་ཏེ་ཡོངས་སུ་བསྟེན་པ་དེ་ནས་འཐུངས་ཏེ་དེ་ཡང་སོ་སོར་འཇིབ་ཏུ་གཞུག་གོ། །དེ་ནས་བྷ་གའི་དབུས་སུ་རྩ་དེའི་འོ་མ་བདག་ཉིད་དང་གཅིག་ཏུ་བྱས་ལ། རང་གི་སྔགས་ཀྱི་རྒྱལ་པོས་བདག་ཉིད་འདོད་པ་ཡིན་ནོ་ཞེས་བསྒོམས་ཏེ། རྡོ་རྗེ་སེམས་དཔའི་སྐུ་དཀར་པོའི་རྣམ་པ་དང་བར་བསྒོམ་པར་བྱའོ། །ལག་ན་རྡོ་རྗེ་དེའི་ཕྱིར་རྩ་གཅིག་པོ་དེ་ནི་སངས་རྒྱས་ཐམས་ཅད་ཀྱི་ཡུམ་སྟེ། ཕྱི་རོལ་གྱི་ཚུལ་ཅན་ལ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་མ་ཞེས་བཤད་དོ། །དེ་ལས་ངེས་པར་བྱུང་བ་ནི་སངས་རྒྱས་ཐམས་ཅད་དོ། །དེའི་ཕྱིར་ལག་ན་རྡོ་རྗེ་ཞུ་བའི་རྒྱུན་འཐུངས་པ་ཙམ་གྱིས་རྡོ་རྗེ་སེམས་དཔའི་སྐུ་ཡོངས་སུ་ཐོབ་པར་འགྱུར་རོ། །ལག་ན་རྡོ་རྗེ་

གཞན་ཡང་བཤད་པར་བྱ་སྟེ། བ་སྤུའི་བུ་གར་གནས་པའི་རྩ་རྣམས་ལས་འཛག་པ་དང་ལྡན་པའི་ཐིགས་པ་གནས་གསུམ་དུ་ཁྱད་པར་དུ་འཕགས་པས་གནས་ཏེ། སྤྱི་བོར་བུམ་པའི་གཟུགས་ལ་བདུད་རྩིའི་ཚུལ་ཅན་བདུད་རྩིའི་རང་བཞིན་བདུད་རྩི་འཛག་པ་བསམ་པར་བྱའོ། །གཞན་ཡང་སྙིང་གའི་གནས་སུ་པདྨའི་རྣམ་པ་ཁ་དོག་དཀར་པོ་མར་སར་དང་མཚུངས་ཤིང་ཡོངས་སུ་གཞོན་པ་ལ་བུམ་པའི་བདུད་རྩི་འཛག་པ་ཙམ་གྱིས་པདྨ་རྟས་པར་བྱེད་པར་བསམ་པར་བྱའོ། །དེ་ནས་གསང་བའི་གནས་སུ་ཡི་གེ་ཨེའི་རྣམ་པ་གྲུ་གསུམ་པ་ཁ་དོག་རྣམ་པ་སྣ་ཚོགས་པས་སྤྲས་པ། ཀ་ལ་སོགས་པའི་ཡི་གེ་ཡོངས་སུ་གྱུར་པ་ལས་རྩ་ལྔའི་སྒོ་ལས་བྱུང་བའི་བདུད་རྩིའི་རྒྱུན་གཅིག་འབབ་པར་བསམས་ཏེ། བདུད་རྩིའི་རྒྱུན་དེ་ལས་བདག་ཉིད་རྡོ་རྗེ་སེམས་དཔའི་སྐུ་བདུད་རྩིའི་ངོ་བོ་མི་ཕྱེད་པར་བསྒོམ་པར་བྱའོ། །ལག་ན་རྡོ་རྗེ་དེའི་ཕྱིར་རྩ་ཐམས་ཅད་ཀྱི་ནང་ནས་གཅིག་པོ་དེ་གཙོ་བོ་ཡིན་ཏེ། དེ་ཉིད་སངས་རྒྱས་ཉིད་སྟེར་བར་བྱེད་པ་ཡིན་ནོ། །དེའི་ཕྱིར་རྣམ་པ་འདི་ལྟར་དུ་བསྒོམས་ན་བདུད་རྩིའི་ངོ་བོ་དང་མི་ཤིགས་པར་འགྱུར་རོ། །ལུས་འདི་ཉིད་ཀྱི་སྐྲ་དཀར་དང་གཉེར་མ་དོར་ནས་བདེ་བར་གཤེགས་པའི་སྐུ་རྣམས་མཐོང་བར་འགྱུར་རོ། །བདག་ཉིད་ཀྱང་གཟུགས་བརྙན་གྱི་ཚུལ་དུ་མཐོང་བར་འགྱུར་རོ། །འདིར་གནས་ནས་ཀྱང་བསྐལ་པའི་ལས་རྣམས་ཀྱང་ཤེས་པར་འགྱུར་རོ། །ལག་ན་རྡོ་རྗེ་དེའི་ཕྱིར་འདི་བསྒོམ་པར་བྱའོ། །ལག་ན་རྡོ་རྗེ་དེས་ན་ཚུལ་འདིས་བུད་མེད་བསྒོམ་པ་ན་གལ་ཏེ་རྨི་ལམ་དུ་རྡོ་རྗེ་སེམས་དཔའ་དབང་བསྐུར་བར་མཛད་ན་དེ་ནས་ཟླ་བ་ཕྱེད་ཚུན་ཆད་དུ་འགྲུབ་པར་ཤེས་པར་བྱའོ། །གལ་ཏེ་ཡང་སློབ་དཔོན་དུ་གྱུར་པས་སྟོན་པར་མཛད་ན་དེ་ནས་ཟླ་བ་དྲུག་ན་འགྲུབ་པར་ཤེས་པར་བྱའོ། །འགའ་ཞིག་ཏུ་ལྷའི་གཞལ་མེད་ཁང་དུ་བཅུག་ནས་དེ་བཞིན་གཤེགས་པའི་གཟུགས་བརྙན་མཐོང་ན་དེ་ནས་ལོ་གཅིག་ན་འགྲུབ་པར་ཤེས་པར་བྱའོ། །དེ་ནས་ལྷའི་གཞལ་མེད་ཁང་དུ་བསྡད་ནས་ཙཱུ་ཥ་ན་ལ་སོགས་པའི་སྦྱོར་བས་བདག་ཉིད་འབར་བ་མཐོང་ན་དེ་ནས་མྱུར་དུ་འགྲུབ་པར་འགྱུར་བར་ཤེས་པར་བྱའོ། །འགའ་ཞིག་ཏུ་སྣང་བ་མཐོང་ན་དེ་ནས་སྐྱེ་བ་འདིར་འགྲུབ་པར་ཤེས་པར་བྱའོ། །ཡང་ན་རྨི་ལམ་དུ་བྷ་གར་ཨཱ་ལིང་ག་དང་

ཙཱུ་ཥ་ན་མཐོང་ན་དེ་ནས་སྐྱེས་བུ་དེ་འགྲུབ་པར་ཤེས་པར་བྱའོ། །འབད་མི་དགོས་པར་འགྲུབ་པར་འགྱུར་རོ། །ལག་ན་རྡོ་རྗེ་དེའི་ཕྱིར་ཙཱུ་ཥ་ན་ལ་སོགས་པ་དང་ལྡན་པའི་མངོན་པར་བྱང་ཆུབ་པ་རྣམ་པ་ལྔའི་རིམ་པས་སྔགས་པས་རྩའི་སྦྱོར་བ་ལ་སྦྱང་བར་བྱའོ། །གང་གི་ཕྱིར་ཨེའི་ཡི་གེ་རྣམ་པ་སྣ་ཚོགས་པ་སྟེ། ཇི་ལྟར་ཁ་དོག་དམར་པོ་རྡོ་རྗེ་ཧཱུྃ་མཛད་ཀྱི་གཟུགས་སུ་བསྒོམས་ན་དེ་ནས་སེམས་ཅན་ཐམས་ཅད་དབང་དུ་བྱེད་དོ། །དེ་ནས་གསད་པར་འདོད་ན་དེའི་ཚེ་རྩ་ནག་པོའི་རྣམ་པས་རྡོ་རྗེ་ཧཱུྃ་མཛད་ཁ་དོག་ནག་པོར་བདག་ཉིད་བསྒོམས་ལ་དེས་གསད་པར་བྱའོ། །དེ་ནས་བསྐྲད་པར་འདོད་ན་བདག་ཉིད་རྡོ་རྗེ་ཧཱུྃ་མཛད་ཀྱི་གཟུགས་སུ་སྔར་བཤད་པས་བསྒོམས་ལ་བསྒྲུབ་བྱ་རྔ་མོ་ལ་ཞོན་པར་བལྟས་ན་དེ་ནས་བསྐྲད་དེ་ཡུལ་གཞན་དུ་གཏོང་བར་བྱེད་དོ། །ལག་ན་རྡོ་རྗེ་དེའི་ཕྱིར་ལས་ཐམས་ཅད་གསང་བ་ལ་ཡོངས་སུ་བརྟེན་པ་ཡིན་ནོ། །དེས་ན་འདི་གསང་བ་ལས་ཀྱང་གསང་བ་ཉིད་དུ་རིག་པར་བྱའོ། །རྩའི་སྦྱོར་བ་འདི་ཉིད་ཀྱིས་སངས་རྒྱས་ཉིད་དམ་རྡོ་རྗེ་འཛིན་པ་ཉིད་བསྒྲུབ་པར་བྱའོ། །གང་ཡང་ཕྱི་རོལ་གྱི་ཚུལ་ལ་གནས་པ་དེ་དག་རྣམས་ནི་བོང་བུ་དང་མཚུངས་པ་སྟེ་ཁུར་ཁུར་བ་ལས་འབྲས་བུ་མེད་པར་ཤེས་པར་བྱའོ། །ལག་ན་རྡོ་རྗེ་དེའི་ཕྱིར་ཁྱོད་ཀྱིས་འདི་དག་ཤེས་པར་བྱོས་ལ་སེམས་ཅན་གྱི་དོན་གྱིས་ཤིག །ང་ཡང་ཚུལ་འདིས་གནས་པ་ཡིན་ནོ། །ལག་ན་རྡོ་རྗེ་དེའི་ཕྱིར་སེམས་ཅན་ཐམས་ཅད་ཀྱི་བསམ་པ་ཤེས་པར་བྱོས་ལ་ཆོས་སྟོན་པར་གྱིས་ཤིག །གཞན་དུ་ན་ཁྱོད་ཀྱང་མི་མཐུན་པ་སྤྱོད་པར་འགྱུར་ན་སེམས་ཅན་གཞན་ལྟ་སྨོས་ཀྱང་ཅི་དགོས། རྒྱུད་གཞན་དུ་ན་ཨེའི་ཡི་གེ་འདི་དོན་དུ་བཤད་དོ། །འདིར་ཕྱི་རོལ་གྱི་ཚུལ་ལ་རྩ་བཅུའི་ཚུལ་གྱིས་དེ་ཁོ་ན་ཉིད་བཅུར་ཤེས་པར་བྱའོ། །དོན་དམ་པར་ནི་དེ་ཁོ་ན་ཉིད་བཅུ་ཡང་མ་ཡིན་ལ་ལྔ་ཡང་མ་ཡིན་ཏེ། གཅིག་པོ་ཉིད་དོན་དམ་པ་ཡིན་ནོ། །གང་རྩའི་གཙོ་བོ་མ་ལུས་ཤིང་ལུས་པ་མེད་པའི་སངས་རྒྱས་ཉིད་སྦྱིན་པ་པོ་སྟེ་གང་ཞེས་ཐོབ་པས་སངས་རྒྱས་ཉིད་དུ་སོང་ཞིང་འགྲོ་བ་འགྲོ་བར་འགྱུར་བ་ཡིན་ནོ། །རྒྱུད་གཞན་དུ་རྒྱས་པར་མ་བཤད་དོ། །ལག་ན་རྡོ་རྗེ་འདི་ནི་རྣལ་འབྱོར་དང་། ཤིན་ཏུ་རྣལ་འབྱོར་དང་། གསང་ཆེན་དང་། གསང་བའི་རྩའི་སྦྱོར་བ་དང་བཅས་པ་བྱ་བ་

ཁྱོད་ལ་གསལ་བར་བྱས་ཀྱིས་ང་ལ་བླ་མའི་ཡོན་བྱིན་ཅིག །ཐེག་པ་ཆེན་པོ་རབ་ཏུ་སྟོན་པ་པོ་འཕགས་པ་མ་ཡིན་པ་གཞན་ལ་ཡང་ཅི་ནས་ཀྱང་བླ་མའི་ཡོན་བདག་ཉིད་ཀྱི་བར་དུའང་དབུལ་བར་བྱ་བ་ཡིན་ན། གཞན་ལྟ་སྨོས་ཀྱང་ཅི་དགོས། ལག་ན་རྡོ་རྗེ་སེམས་གཞན་དུ་མ་བྱེད་ཅིག །རབ་ཏུ་མྱོས་པར་འགྱུར་རོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ཞིག་དབུལ་བར་བགྱི། ཁྱོད་ལ་ཡོངས་སུ་མ་རྫོགས་པ་འགའ་ཞིག་མཆིས་ལགས་སམ། བཀའ་སྩལ་པ། ལག་ན་རྡོ་རྗེ་ཐམས་ཅད་ཡོངས་སུ་རྫོགས་མོད་ཀྱང་དབུལ་བར་བྱ་བ་ཡིན་ནོ། །གསོལ་པ། ཅི་ཞིག་དབུལ་བར་བགྱི། བཀའ་སྩལ་པ། འདི་དག་དབུལ་བར་བྱ་བ་སྟེ། སྐལ་བ་དང་མི་ལྡན་པའི་སེམས་ཅན་རྣམས་ལ་འདིའི་དགོངས་པ་བཤད་པར་མི་བྱའོ། །ཉན་ཐོས་ཀྱི་ཐེག་པ་ཅན་ལ་རྒྱུད་འདིའི་གླེགས་བམ་ཙམ་ཡང་ནམ་ཡང་བསྟན་པར་མི་བྱ་སྟེ། དེའི་མདུན་དུ་མིང་ཙམ་ཡང་གསལ་བར་མི་བྱའོ། །ལག་ན་རྡོ་རྗེས་གསོལ་པ། བཅོམ་ལྡན་འདས་བདག་གིས་ཉན་ཐོས་ཀྱི་ཐེག་པ་ཅན་རྣམས་ལ་བཤད་པར་མི་བགྱི་ཞིང་དེའི་གནས་སུའང་འདུག་པར་མི་བགྱི་སྟེ། དེའི་གནས་སུ་འཇུག་པ་དང་། བཤད་པར་བགྱི་བས་བདག་ལ་ཅི་ཞིག་བགྱི།བཅོམ་ལྡན་འདས་ཅིའི་སླད་དུ་དེ་བདག་ལ་གསལ་བར་མི་བགྱིད། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ཐེག་པ་ཆེན་པོའི་རང་བཞིན་སྔར་བཤད་པ་ཁྱོད་བརྗེད་དམ། ལག་ན་རྡོ་རྗེ་ཉན་ཐོས་ཀྱི་ཐེག་པ་པ་ཁོ་ནར་མ་ཟད་སེམས་ཅན་གཞན་ཡང་སྔགས་པ་རྣམས་དང་། ཐ་ན་དེ་བཞིན་གཤེགས་པ་ཐམས་ཅད་ལ་ཡང་གསང་བ་འདི་ཤེས་ན་དེ་དུས་འདི་ཉིད་ལ་རྡོ་རྗེ་སྒེག་མོ་དང་། རྡོ་རྗེ་གར་མ་ལས་སྐྱེས་པ་སྟེ་ང་ཅི་འདྲ་བ་དང་ཁྱོད་ཅི་འདྲ་བ་དེ་འདྲར་ཤེས་པར་བྱའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཤིན་ཏུ་ཟབ་པའི་ཚུལ་གསང་བ་ཐམས་ཅད་གནས་པ། རྩའི་སྦྱོར་བ་དེ་སེམས་ཅན་རྣམས་ཀྱིས་ཇི་ལྟར་འཚལ་བར་འགྱུར། བདག་གིས་དེ་དག་ལ་བསྟན་པར་བགྱིའམ། འོན་ཏེ་མ་ལགས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་

ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ཁྱོད་ཀྱིས་ཀྱང་སློབ་མ་རྣམས་སམ་སྔགས་པ་རྣམས་ལ་རྒྱུད་འདི་གསལ་བར་མི་བྱའོ། །ཕྱག་ན་རྡོ་རྗེས་གསོལ་པ། བཅོམ་ལྡན་འདས་ཅི་ལགས། གསང་བའི་དབང་བསྐུར་བའི་སྔགས་པ་རྣམས་ལ་ཡང་གསལ་བར་མི་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་སེམས་ཅན་གང་ལ་ལ་དད་པའི་བསམ་པ་ཕུན་སུམ་ཚོགས་པ་དང་ལྡན་པ་རྒྱུད་འདི་ཤེས་པར་འདོད་པ་དེ་དག་ལ་བུད་མེད་བསྙེན་པ་ཙཱུ་ཥ་ན་ལ་སོགས་པའི་སྦྱོར་བས་གསང་བ་ཆེན་པོའི་མཆོད་པ་བྱས་ཏེ། རྗེས་སུ་གདམས་པ་དང་བཅས་པ་དེ་དག་ཐམས་ཅད་ལ་འབད་པས་བཤད་པར་བྱའོ། །གང་ལ་ལ་རྒྱུད་འདི་ལ་སྡང་བར་བྱེད་ན་དེ་དག་ལ་དེ་ལྟར་རྡོ་རྗེ་ཧཱུྃ་མཛད་ཀྱི་སྐུར་གནས་ཏེ། རྡོ་རྗེ་ཧཱུྃ་མཛད་ཀྱི་ཚུལ་གྱིས་ཡོངས་སུ་ཁྲོས་ཏེ་འབར་བ་དང་ལྡན་པར་སྤྲོས་ལ་དེའི་གནས་འབར་བར་བསམ་པར་བྱའོ། །དེ་ནས་དེའི་འཁོར་དང་བཅས་པ་བརླག་པར་འགྱུར་རོ། །གལ་ཏེ་སྔགས་པ་གསོ་བར་འདོད་ན་དེའི་གནས་ཕྱེད་ཚིག་པ་ལ་བདུད་རྩིའི་རང་བཞིན་གྱི་རྡོ་རྗེའི་རིགས་རྣམས་བསམས་ན་དེ་དག་འཚོ་བར་འགྱུར་རོ། །ལག་ན་རྡོ་རྗེ་དེའི་ཕྱིར་འདི་གང་སུ་ལ་ཡང་བཤད་པར་མི་བྱའོ། །མཆོག་ཏུ་གསང་བ་ཐིག་ལེའི་མཛོད་ཀྱི་རྟོག་པ་ལས་གསང་བའི་དེ་ཁོ་ན་ཉིད་སྦས་པ་མཐའ་དག་གི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེ་བཞིན་གཤེགས་པ་ཐམས་ཅད་བརྟན་པར་མཛད་ནས། ཕྱག་ན་རྡོ་རྗེའི་ལུས་དེ་དག་གཅིག་ཏུ་གྱུར་ནས་རྒྱ་མཚོ་དེའི་འགྲམ་འཛམ་བུའི་གླིང་གི་བྱང་གི་མཚམས་སུ་རྡོ་རྗེ་སྒེག་མོ་དང་། རྡོ་རྗེ་གར་མ་དང་ཐབས་ཅིག་ཏུ་སྔོན་བཤད་པའི་ཙུམྦ་ན་དང་། ཨཱ་ལིང་ག་ལ་སོགས་པའི་སྦྱོར་བས་རྒྱལ་པོ་ཆེན་པོ་རོལ་པས་རྡོ་རྗེ་སྒེག་མོ་དང་། རྡོ་རྗེ་གར་མའི་གོ་འཕང་ལ་གནས་པའི་ཁྲི་ལྔ་བརྒྱ་ཕྲག་ལྔའི་བཙུན་མོ་སྟོང་ཕྲག་རྒྱན་ཐམས་ཅད་ཀྱིས་རྣམ་པར་བརྒྱན་ཅིང་ཡིད་དུ་འོང་བ་དང་ཐབས་ཅིག་ཏུ་བཞུགས་སོ། །དེ་ནས་ཕྱག་ན་རྡོ་རྗེས་གསོལ་པ། འདི་དག་གི་མིང་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་དག་རྣམ་པ་བཞིས་གནས་ཏེ། འདི་ལྟར་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་ཁ་དོག་

དཀར་མོ་ལོ་བརྒྱ་ཕྲག་གཉིས་ཀྱི་རྣམ་པའི་གཟུགས་ཅན་རྣལ་འབྱོར་མའི་དབང་ཕྱུག་ཁྲི་ཕྲག་གཅིག་གིས་ཡོངས་སུ་བསྐོར་ནས་ཛ་ལནྡྷ་རའི་ཞིང་ན་རི་བོ་ཞེས་བྱ་བ་ལ་གནས་ནས་ཇི་ལྟར་བཅོམ་ལྡན་འདས་ཕྱག་ན་རྡོ་རྗེ་བཞུགས་པ་དེར་རྟག་ཏུ་འགྲོ་བ་དང་འོང་བར་བྱེད་དོ། །གཞན་ཡང་འདོད་པས་མྱོས་མ་ཞེས་བྱ་བའི་རྣལ་འབྱོར་མའི་དབང་ཕྱུག་ཁ་དོག་སྔོ་བསངས་མིག་རྣམ་པར་རྒྱས་པ་རྣལ་འབྱོར་མའི་དབང་ཕྱུག་ཁྲི་ཕྲག་ཕྱེད་དང་གསུམ་དང་ཐབས་ཅིག་ཏུ་ལྷོ་ཕྱོགས་ཀྱི་རྒྱུད་རི་བོ་ཀི་ཀིནྡྷ་རི་འཇུག་པའི་སྒོར་གནས་ནས་གང་གི་ཚེ་ཕྱག་ན་རྡོ་རྗེ་གསང་བའི་ཆོས་སྟོན་པ་དེའི་ཚེ་རྟག་ཏུ་འགྲོ་བ་དང་འོང་བར་བྱེད་དོ། །གཞན་ཡང་གསེར་གྱི་མིག་ཅན་ཞེས་བྱ་བའི་རྣལ་འབྱོར་མའི་དབང་ཕྱུག་དེ་ཡང་ཁ་དོག་དཀར་བ་ཁྲི་ཕྲག་གསུམ་གྱི་འཁོར་དང་ལྷན་ཅིག་ཀཱ་མ་རུ་པའི་སྒོར་གནས་ནས་དེ་བཞིན་དུ་རྒྱུན་དུ་འགྲོ་བ་དང་འོང་བར་བྱེད་དོ། །གཞན་ཡང་བདེ་བ་ཐམས་ཅད་ལ་དགའ་བ་ཞེས་བྱ་བའི་རྣལ་འབྱོར་མའི་དབང་ཕྱུག་ཐམས་ཅད་དུ་གནས་པ་ཐམས་ཅད་ཀྱི་གཟུགས་ཅན་ཐམས་ཅད་ལ་བྱམས་པའི་ཚུལ་དུ་གནས་པ་ཁྲི་ཕྲག་བརྒྱ་སྟོང་ཕྲག་དུ་མའི་འཁོར་དང་ལྷན་ཅིག་གང་གི་ཚེ་སྔགས་པ་གསང་བ་སྟོན་པ་ན་དེའི་མདུན་དུ་དེ་གནས་སོ། །དེའི་ཕྱིར་བདེ་བ་ཐམས་ཅད་ལ་དགའ་མ་ཞེས་བྱའོ། །དེ་ནས་གཞོན་ནུ་མ་བཟང་པོ་ཞེས་བྱ་བའི་རྣལ་འབྱོར་མའི་དབང་ཕྱུག་དེ་ཕྱག་ན་རྡོ་རྗེའི་ཚུལ་ཇི་སྲིད་མངོན་སུམ་དུ་སངས་རྒྱས་ཉིད་སྟེར་བར་གྱུར་པ་དེ་སྲིད་དུ་དེ་ཡིས་བསྟེན་པར་བྱའོ། །དེ་ནས་གསད་པར་འདོད་ན་ལྷ་མོ་དེ་ཉིད་འབར་བ་དང་ལྡན་པ་མདོག་ནག་མོ་ལག་ན་མཚོན་ཆ་ཐམས་ཅད་འཛིན་པ་བསྒོམས་ན་དཔུང་གི་ཚོགས་ཡན་ལག་བཞི་དང་བཅས་པ་ཡང་གསོད་པར་བྱེད་དོ། །གལ་ཏེ་བསྐྲད་པར་འདོད་ན་དེ་ཉིད་ཅུང་ཟད་དམར་ཞིང་སྔོ་བའི་ཁ་དོག་ཅན་རླུང་དང་ལྷན་ཅིག་མ་སྦྱོར་བ་དེ་ཉིད་ཀྱིས་རླུང་གི་དཀྱིལ་འཁོར་ལ་ཀུན་ཏུ་བསྟེན་པར་གྱུར་པས་སྐད་ཅིག་དེ་ཉིད་ལ་སྐྲོད་པར་བྱེད་དོ། །གལ་ཏེ་དབང་དུ་བྱ་བར་འདོད་ན་དེ་ནས་ཁ་དོག་དམར་པོར་བསམས་ལ་དེས་བཀུག་སྟེ་སྐད་ཅིག་དེ་ལ་རྐང་པའི་དྲུང་དུ་འོང་བར་འགྱུར་རོ། །དེ་ནས་རེངས་པར་བྱ་བར་འདོད་ན་ལྷ་མོ་ཁ་དོག་སེར་མོར་བསམས་ལ་དེ་བསྒྲུབ་བྱ་ལྕགས་ཀྱི་རིས་རྫིས་པར་བསམས་ལ། དཔུང་གི་ཚོགས་ཡན་

ལག་བཞི་ཡང་རེངས་པར་བྱེད་དོ། །འདི་དག་ཐམས་ཅད་ཡིད་ཀྱིས་བསམ་པར་བྱའོ། །ལག་ན་རྡོ་རྗེ་གཞན་ཡང་བཟའ་བ་བཤད་པར་བྱ་སྟེ། གང་ཟོས་པ་ཙམ་གྱིས་སྐྲ་དཀར་དང་གཉེར་མ་སེལ་བར་འགྱུར་ཞིང་ལོ་བརྒྱ་ཕྲག་སྟོང་དུ་འཚོ་བར་འགྱུར་རོ། །འདི་ལྟ་སྟེ་བྱ་རོག་ཚང་བཟང་པོ་སྣུམ་པ་བཟུང་ལ་པགས་པ་དོར་ཏེ་ཞིབ་ཏུ་བྱས་ལ་དེའི་ཤ་ལྕགས་ཀྱི་སྣོད་དུ་ཏིལ་མར་དང་བཙོ་བར་བྱའོ། །ཀ་ར་སྲང་བཅུ་དང་འོ་མ་སྲང་ཉི་ཤུ་དང་ལྷན་ཅིག་གཅིག་ཏུ་བྱས་ལ་སླར་ཡང་ཇི་སྲིད་བྱ་རོག་མི་གྲག་པ་དེ་སྲིད་དུ་བཙོ་བར་བྱའོ། །དེ་ནས་མར་དང་ཀ་ར་དང་ལྷན་ཅིག་ཞག་བདུན་དུ་བཟའ་བར་བྱའོ། །ལོ་བརྒྱའི་སྐྲ་དཀར་དང་། ལུས་ཀྱང་བུང་བ་ལྟ་བུ་དང་།སྟོབས་དང་ལྡན་ཞིང་ཤིན་ཏུ་སྲ་བར་འགྱུར་རོ། །ལོ་ལྔ་བརྒྱར་འཚོའོ། །སླར་ཡང་བཅུད་ལེན་གྱི་ཆོ་ག་བཤད་པར་བྱ་སྟེ། སྔགས་པ་མཉམ་པར་བཞག་པར་གྱུར་པས་རྡོ་རྗེ་སྒེག་མོའི་འོ་མ་སྦྱོར་བ་དེ་ཉིད་ཀྱིས་བསམས་ལ། བདག་ཉིད་ཚིམ་པ་དང་ལྡན་པར་བསམ་པར་བྱའོ། །དེ་ནས་ཉོན་མོངས་པ་ཐམས་ཅད་ཞི་བར་འགྱུར་རོ། །འགའ་ཞིག་ཏུ་རྣལ་འབྱོར་གྱི་དབང་ཕྱུག་ཏུ་བསམས་ལ་དེའི་ཞུ་བ་བཏུང་བར་བྱའོ། །འགའ་ཞིག་ཏུ་མངོན་སུམ་དུ་གྱུར་པས་བུད་མེད་བསྟེན་ཏེ་དེ་ཉིད་ཀྱི་ཏིང་ངེ་འཛིན་གྱིས་དེ་དང་རང་གི་ཞུ་བ་ལྷན་ཅིག་ཏུ་བཏུང་བར་བྱའོ། །དེ་ནས་རྡོ་རྗེའི་ལུས་དང་མི་ཕྱེད་པར་འགྱུར་རོ། །བཅུད་ལེན་གྱི་ཆོ་ག་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོ་དང་། རྣལ་འབྱོར་གྱི་དབང་ཕྱུག་དེ་དག་ཐམས་ཅད་དང་། ཕྱག་ན་རྡོ་རྗེའི་སྐུ་དང་གཅིག་ཏུ་མཛད་ནས་ཕྱག་ན་རྡོ་རྗེའི་སྐུར་གྱུར་ཏོ། །དེ་ནས་རྒྱལ་པོ་ཆེན་པོ་ཕྱག་ན་རྡོ་རྗེས་ལྷ་མོ་དེ་དག་ཐམས་ཅད་ལ་དགྱེས་པ་དང་བཅས་པའི་སྤྱན་གྱིས་གཟིགས་སོ། །དེ་ནས་རྣལ་འབྱོར་མའི་དབང་ཕྱུག་དེ་དག་ཐམས་ཅད་ཀྱིས་ཕྱག་ན་རྡོ་རྗེ་ལ་བལྟས་ནས་འདི་སྐད་ཅེས་སྨྲས་སོ། །བཅོམ་ལྡན་འདས་སེམས་ཅན་གང་གསང་བའི་ཚུལ་ལ་ཞུགས་ན་དེ་དག་གིས་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་ལགས། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་དག་ལ་འདི་སྐད་ཅེས་བཀའ་སྩལ་ཏོ། །

སྔོན་སྤྱད་པའི་གསང་བའི་ཚུལ་གྱིས་སངས་རྒྱས་ཉིད་བསྒྲུབ་པར་བྱའོ། །དེ་ནས་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་ཐོག་མ་དང་ཐ་མ་མེད་པའི་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སེམས་ཅན་དེ་དག་གིས་བྷ་ག་བསྟེན་པ་ཙམ་གྱིས་སངས་རྒྱས་ཉིད་བགྱིད་དམ། ཡང་ན་དེའི་གསང་བ་བསྒོམས་པས་ལགས། དེ་ནས་རྒྱལ་པོ་ཆེན་པོ་ཕྱག་ན་རྡོ་རྗེས་དེ་དག་ལ་འདི་སྐད་ཅེས་བཀའ་སྩལ་ཏོ། །བསྒོམ་པའི་རིམ་པས་བསྒྲུབས་ཏེ་ཕྱི་ནས་རྣམ་པར་རྟོག་པ་མེད་པའི་སེམས་ཀྱིས་བསྟན་ནས་བདག་ཉིད་ཕྱག་ན་རྡོ་རྗེའི་སྐུའམ། རྣམ་པར་སྣང་མཛད་ཀྱི་སྐུའམ། འཇིག་རྟེན་དབང་ཕྱུག་གི་སྐུའམ། རྡོ་རྗེ་ཧཱུྃ་མཛད་ཀྱི་སྐུའམ། འདོད་པའི་ལྷའི་སྐུ་བསྒྲུབ་པར་བྱའོ། །རྩ་དེའི་འོ་མ་ལས་ཟླ་བའི་དཀྱིལ་འཁོར་གྱི་རྣམ་པ་བསྒོམས་ལ། ཟླ་བའི་དཀྱིལ་འཁོར་དེ་ལས་བདག་ཉིད་རྡོ་རྗེ་སེམས་དཔའི་སྐུའམ། རང་གི་ལྷའི་སྐུར་བསྒོམ་པར་བྱའོ། །རྩ་དེ་ཉིད་ཁ་དོག་ནག་པོར་བསམས་ནས་དེ་ལས་བདག་ཉིད་རྡོ་རྗེ་ཧཱུྃ་མཛད་ཀྱི་སྐུར་བསྒོམ་པར་བྱའོ། །རྩ་དེ་ཉིད་དམར་སྐྱའི་རྣམ་པའི་རིམ་པ་དེ་ཉིད་ཀྱིས་བསྒོམས་ནས་བདག་ཉིད་འཇིག་རྟེན་དབང་ཕྱུག་གི་སྐུར་ལས་ཀྱི་དབྱེ་བས་བསྒོམ་པར་བྱའོ། །རྩ་དེ་ཉིད་ཁ་དོག་སྔོ་བསངས་ནམ་མཁའ་ལྟ་བུར་བསྒོམས་ནས་རྡོ་རྗེ་རྣོན་པོའི་སྐུར་བསྒོམས་ན་དེ་ནས་ལས་ཀྱི་དབྱེ་བས་རྩ་དེ་དག་གི་སྦྱོར་བས་བདག་ཉིད་བསྒོམས་ན་དེ་ནས་གདོན་མི་ཟ་བར་འགྲུབ་པར་འགྱུར་རོ། །དེ་ནས་སྔགས་པ་དེས་ཐུན་མཚམས་བཞིར་སེམས་གཞན་དུ་མ་ཡེངས་པར་བསྒོམས་པ་ཉིད་ཀྱིས་ཟླ་བ་དྲུག་ཉིད་ན་འགྲུབ་པར་འགྱུར་རོ། །དེ་ནས་གཞོན་ནུ་མ་བཟང་མོ་ཞེས་བྱ་བའི་རྣལ་འབྱོར་མའི་དབང་ཕྱུག་དེས་རྒྱལ་པོ་ཆེན་པོ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་སེམས་ཅན་དེ་རྣམས་ཀྱིས་དགུག་པ་ལ་སོགས་པའི་ལས་བགྱིད་པ་ལགས། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་ལ་འདི་སྐད་ཅེས་བཀའ་སྩལ་ཏོ། །གལ་ཏེ་སྔགས་པས་སྐྱེས་བུ་དགུག་པར་འདོད་ན་དེ་ནས་དེའི་བྷ་གའི་དབུས་སུ་བདག་ཉིད་ཅུང་ཟད་དཀར་བའི་རྣམ་པ་ཁྲོ་བ་དང་བཅས་པའི་བཞིན་ཅན་ཕྱག་དྲུག་པ་སྦྱོར་བ་དེ་ཉིད་ཀྱི་ཕྲ་མོའི་སྒྲས་བསྒོམས་ན་རྡོ་རྗེ་དེས་

བསྒྲུབ་བྱའི་སྙིང་གར་བསྣུན་ཅིང་ཞགས་པས་མགྲིན་པ་བཅིངས་ཏེ་ལྕགས་ཀྱུས་བཀུག་ལ་བཅུག་ནས་བསྒོམ་པར་བྱའོ། །དེ་ནས་རྒྱལ་པོ་ཡང་འགུགས་པར་བྱེད་ན་སྐྱེ་དགུ་གྲོང་གི་མི་ལ་སོགས་པ་ལྟ་ཅི་སྨོས། རིག་པ་འཛིན་པ་འགུགས་ན་རྒྱལ་པོ་ལྟ་ཅི་སྨོས། དེ་ནས་བུད་མེད་དབང་དུ་བྱ་བར་འདོད་ན་དེ་ནས་བྷ་གའི་དབུས་སུ་ཕྲ་མོའི་སྒྲའི་སྦྱོར་མེ་དེ་ཉིད་ཀྱིས་བདག་ཉིད་རྟ་མགྲིན་གྱི་གཟུགས་ཁ་དོག་དམར་པོར་བསྒོམས་ཏེ། རྡོ་རྗེ་དེས་ལྷ་མོ་ཆེན་མོ་དེའི་སྙིང་གར་བསྣུན་ན་དེ་ནས་དེ་རྣམ་པར་མྱོས་པས་དཔག་ཚད་བརྒྱའི་ཕྱེད་ན་གནས་པ་རྣམས་ཀྱང་འོང་བར་འགྱུར་ན་གྲོང་གི་མཐའ་དང་ཁྱིམ་གྱི་མཐའ་ན་གནས་པ་ལྟ་སྨོས་ཀྱང་ཅི་དགོས། དེ་ཉིད་ཀྱིས་རིག་པ་འཛིན་པའི་ཆུང་མའམ། དྲི་ཟའི་ཆུང་མའམ། གནོད་སྦྱིན་གྱི་ཆུང་མའམ། འཇིག་རྟེན་གསུམ་གྱི་བདག་པོའི་ཆུང་མའམ། བརྒྱ་བྱིན་གྱི་ཆུང་མའང་འགུགས་པར་བྱེད་ན་རྒྱལ་པོ་ཆེའི་ལྷ་མོ་ཆེན་མོའམ། གྲོང་གི་བུ་མོ་ལྟ་སྨོས་ཀྱང་ཅི་དགོས། མཆོག་གི་སྦྱོར་བས་དམན་པ་ལ་མི་བྱ་ཞིང་དམན་པའི་སྦྱོར་བས་མཆོག་ལ་མི་བྱ་སྟེ་དམ་ཚིག་ཉམས་པར་འགྱུར་རོ། །དམན་པའི་སྦྱོར་བས་མཆོག་བསྒྲུབ་པར་ནུས་པའང་མ་ཡིན་ཏེ་ཡན་ལག་མ་ཡིན་པའི་ཕྱིར་རོ། །དེ་ནས་ཕྱོགས་འགའ་ཞིག་ཏུ་གནས་ཏེ་ཉིན་མཚན་དུ་གསང་བ་བསྟེན་པར་བྱས་ན་ཟླ་བ་དྲུག་ཁོ་ན་ལ་འགྲུབ་པར་འགྱུར་ཞིང་བསྐལ་པའི་དངོས་པོ་དག་ཀྱང་མཐོང་ཞིང་རིང་དུ་གནས་པའི་ངག་དག་ཀྱང་ཐོས་ལ་ཇི་སྲིད་སངས་རྒྱས་ཉིད་ཀྱང་ཐོབ་པར་འགྱུར་བ་འདི་ལ་ཐེ་ཚོམ་མེད་དོ། །ཇི་ལྟར་རྡོ་རྗེ་སྒེག་མོའི་རིགས་ཀྱི་ལྷ་མོ་ཆེན་མོའི་སྒྲུབ་ཐབས་ལྟར་རྡོ་རྗེ་སྒེག་མོའང་དེ་བཞིན་དུ་ཐམས་ཅད་སྔོན་གྱི་རིམ་པས་བསྒྲུབ་པར་བྱའོ། །སྦྱོར་བ་འདི་ཉིད་ཀྱིས་རྣལ་འབྱོར་མའི་དབང་ཕྱུག་དེ་རྣམས་ཀྱང་བཀུག་ལ་བསྟེན་པར་བྱའོ། །དེ་ནས་རྣལ་འབྱོར་མའི་དབང་ཕྱུག་འཁོར་དང་བཅས་པ་དེ་དག་ཕྱག་ན་རྡོ་རྗེའི་ཞབས་ལ་གཏུགས་ཏེ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚུལ་འདི་ཉིད་ཀྱིས་བདག་ཅག་ཀྱང་འགྲུབ་པར་འགྱུར་ལགས་སོ། །དེ་ནས་འདོད་པས་མྱོས་མ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་རྡོ་རྗེའི་ཞུ་བས་རྟག་ཏུ་བསྟེན་པར་བགྱིད་ན། དེའི་སྔོན་

དུ་མཆིས་ཏེ་སྔགས་པ་དེས་བདག་པོ་བགྱིས་ཏེ་བདག་དེའི་རྗེས་སུ་མཆི་བར་བགྱིའོ། །དེ་ནས་གསེར་གྱི་མིག་ཅན་ཞེས་བྱ་བའི་རྣལ་འབྱོར་མའི་དབང་ཕྱུག་གིས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་བྷ་གའི་དབུས་སུ་བདག་ཉིད་ཞུགས་ནས་རྟག་ཏུ་བསྟེན་པར་བགྱིད་ན་བདག་དེའི་བྲན་མོར་གྱུར་ཏེ། རྟག་ཏུ་དེར་གནས་པར་བགྱི་ཞིང་ནམ་དུ་ཡང་འོང་བ་དང་འགྲོ་བར་མི་བགྱི་ལགས་སོ། །དེ་ནས་སྐྱེ་བོ་ཐམས་ཅད་ཀྱི་ཡིད་དུ་འོང་བ་ཞེས་བྱ་བའི་རྣལ་འབྱོར་མའི་དབང་ཕྱུག་གིས་བཅོམ་ལྡན་འདས་ཐོག་མ་དང་ཐ་མ་མེད་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གིས་བདག་རྟག་ཏུ་གསང་བའི་ཚུལ་གྱིས་སེམས་ཤིང་དྲན་པར་འགྱུར་བའམ། དྲན་པར་བགྱིད་ན་དེ་ལ་བདག་གདོན་མི་ཟ་བར་སངས་རྒྱས་ཉིད་སྟེར་བར་གྱུར་ཅིག །དེ་ནས་ཕྱག་ན་རྡོ་རྗེས་རྣལ་འབྱོར་མའི་དབང་ཕྱུག་དེ་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ཅན་གང་ཐེག་པ་ཆེན་པོའི་ཚུལ་འདི་ལ་ཞུགས་པར་གྱུར་པ་དེ་ལ་བཅུད་ལེན་གྱི་སྦྱོར་བ་འདིས་སྟོབས་དང་ལྡན་པར་བྱའོ། །ལྕགས་ཀྱི་ཕྱེ་མ་དང་། ཨ་ཏི་བ་ལ་མ་ཧཱ་བ་ལའི་རྩ་བ་འོ་མ་དང་ལྷན་ཅིག་སྦྱར་ལ་ཀ་ར་དང་ལྡན་པར་བྱས་ཏེ་འཚོ་བར་བྱའོ། །དེ་ནས་ཆོ་གས་རྣལ་འབྱོར་པས་བཟའ་བར་བྱའོ། །ཤ་དང་མར་གྱི་བཟའ་བ་བྱའོ། །དེ་ནས་སྟོབས་ཆེན་པོ་དང་ལྡན་པར་གྱུར་ནས་སྡིག་པས་གོས་པར་མི་འགྱུར་རོ། །ད་ནི་གཞན་ཡང་བཤད་པར་བྱ་སྟེ། ནམ་མཁའི་ཡུལ་ལམ་ཡུལ་གཞན་དུ་རྡོ་རྗེའི་འཁོར་ལོ་རྡོ་རྗེ་བརྒྱད་དང་ལྡན་པ་བདུད་རྩིའི་རང་བཞིན་ཟླ་བའི་དཀྱིལ་འཁོར་ལྟ་བུར་བདག་ཉིད་སྟོབས་དང་ལྡན་པར་བྱ་བའི་དོན་དུ་བསྒོམ་པར་བྱ་སྟེ། དེས་སྟོབས་ཆེན་པོ་དང་ལྡན་པར་འགྱུར་རོ། །དེ་ནས་གསད་པའི་དོན་དུ་རྡོ་རྗེའི་འཁོར་ལོ་དེ་ཉིད་འབར་ཞིང་གསལ་བའི་རྣམ་པ་མེ་སྟག་འཕྲོ་བ་ཅན་དེའི་ཁང་པའི་ཡུལ་ལམ་གྲོང་ཁྱེར་དུ་བབ་པར་བསྒོམ་པར་བྱའོ། །དེ་ནས་དེའི་སྐད་ཅིག་ལ་རིགས་དང་བཅས་པ་བརླག་པར་འགྱུར་རོ། །དེ་ནས་དབང་དུ་བྱ་བའི་དོན་དུ་འཁོར་ལོ་དེ་ཉིད་ཁ་དོག་དམར་པོ་བནྡུ་ཀའམ། ཛ་བའི་མེ་ཏོག་གི་ཁ་དོག་ལྟ་བུའི་ཕྱོགས་ཐམས་ཅད་ཁྱབ་པ་པོ་འདིས་བསྒྲུབ་བྱ་བཀུག་པར་བསྒོམས་པས་དབང་དུ་འགྱུར་རོ། །རྡོ་རྗེ་འཁོར་ལོའི་སྦྱོར་བ་འདི་ཉིད་ཀྱིས་རྒྱལ་པོ་དང་། བློན་

པོ་དང་། མདུན་ན་འདོན་པ་ལ་སོགས་པ་རྣམས་ཀྱང་དབང་དུ་འགྱུར་རོ། །དེ་ནས་རྒྱལ་པོའི་ལྷ་མོ་ཆེན་མོ་དགུག་པར་འདོད་ན་རྡོ་རྗེ་འཁོར་ལོ་དེ་ཉིད་དམར་པོར་བལྟ་བར་བྱས་ལ། དེ་འཁོར་ལོ་ལ་གཞག་སྟེ་རླུང་གིས་བསྣུན་པས་རང་གི་རྐང་པའི་དྲུང་དུ་སྔས་སུ་གཏུགས་པར་བསྒོམ་པར་བྱས་པས་དེ་ནས་ཉིན་མཚན་དེ་ན་དེ་འགུགས་པར་འགྱུར་རོ། །དེ་ནས་བྱང་ཆུབ་སེམས་དཔའ་ཆེན་པོ་རྒྱལ་པོ་ཕྱག་ན་རྡོ་རྗེས་སླར་ཡང་འདུས་པར་གྱུར་ཏེ། རྡོ་རྗེ་སྒེག་མོས་སོགས་པ་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །སྔགས་པ་གང་ལ་ལ་རྒྱུད་འདིའི་དོན་མི་བསྒོམ་པ་དེ་ལྟ་ན་ཡང་གླེགས་བམ་དུ་གྱུར་པའང་ཁྱིམ་དུ་བཅང་བར་བྱའོ། །གང་ཡང་ཚུལ་འདི་ལ་གནས་པར་ཤེས་པར་བྱའོ། །གང་ཞིག་ཡང་གུས་པ་སྔོན་དུ་འགྲོ་བས་སྒོམ་པར་བྱེད་ན་རྡོ་རྗེ་སེམས་དཔའ་ཇི་ལྟ་བ་བཞིན་དུ་ཤེས་པར་བྱའོ། །འདི་གང་སུ་ལའང་བཤད་པར་མི་བྱ་སྟེ། ཅིའི་ཕྱིར་ཞེ་ན། གདུག་པ་ཅན་གྱི་སེམས་ཅན་འགའ་ཞིག་ཡོད་པས་དེའི་མདུན་དུ་བཤད་པར་མི་བྱ་བ་ཡིན་ནོ། །སློབ་དཔོན་གྱིས་རྡོ་རྗེ་འཛིན་པ་ལྟ་བུ་ལ་ཡང་གསང་བའི་དབང་བསྐུར་བ་སྔོན་དུ་སོང་བས་སློབ་མར་བྱས་ནས་བཤད་པར་བྱ་སྟེ། གཞན་དུ་ནི་མ་ཡིན་ནོ། ། སློབ་མ་དེས་ཀྱང་ཙནྡན་ལ་ཟླ་བའི་དཀྱིལ་འཁོར་བྱས་ཏེ་དེར་སློབ་དཔོན་བཞུགས་སུ་གསོལ་ལ། རྒྱན་ལ་སོགས་པ་ཐམས་ཅད་ཀྱིས་བརྒྱན་པར་བྱས་ཏེ་བཅོམ་ལྡན་འདས་རྣམ་པར་སྣང་མཛད་ཇི་ལྟ་བུ་དེ་ལྟར་བྱས་ནས་བསྟོད་པ་ལ་སོགས་པ་དག་བྱའོ། །དེས་ན་ཉན་ཐོས་ཀྱི་ཐེག་པ་ཅན་ལ་སོགས་པ་རྣམས་ལ་ནམ་དུ་ཡང་ལོ་རྒྱུས་ཙམ་ཡང་མི་བྱ་ཞིང་གླེགས་བམ་ཙམ་ཡང་བསྟན་པར་མི་བྱའོ། །ཐེག་པ་འདི་པ་དང་ལྷན་ཅིག་གཅིག་ཏུ་ལོངས་སྤྱོད་པར་བྱ་ཞིང་གཅིག་ཏུ་གནས་པར་བྱ་སྟེ། རྣམ་པར་རྟོག་པ་ཅི་ཡང་མི་བྱའོ། །འདི་ནི་བཅོམ་ལྡན་འདས་ཕྱག་ན་རྡོ་རྗེ་ལ་བཀའ་སྩལ་པ། མཆོག་ཏུ་གསང་བའི་མཛོད་ཅེས་བྱ་བ་ཐེག་པ་ཆེན་པོའི་མདོ་ལས། གསང་བའི་དེ་ཁོ་ན་ཉིད་སྦས་པའི་མཆོག་གི་ཐིག་ལེ་ཞེས་བྱ་བའི་གསང་བའི་འབྱུང་གནས་རྫོགས་སྷོ།། །།དམ་པའི་རྒྱུད་འདི་གངས་ཅན་འདི་ན་སྔོན། །རྣམ་པ་ཀུན་ཏུ་བསྒྱུར་བ་མ་རྙེད་ནས། །མཁས་པ་བདེ་བར་གཤེགས་པའི་དཔལ་དང་ནི། །སྒྲ་

རིག་ཀུན་དགའ་རྒྱལ་མཚན་བདག་གིས་བསྒྱུར། །དམ་པའི་བཀས་བསྐུལ་ནས་ནི་གུས་པ་ཡིས། །དཔལ་ལྡན་ས་སྐྱའི་གཙུག་ལག་ཁང་དུ་བསྒྱུར། །དགེ་བ་འདི་ཡིས་སེམས་ཅན་ཐམས་ཅད་ཀྱིས། །གསང་དོན་རྟོགས་ནས་སངས་རྒྱས་སར་འགྲོ་ཤོག། །།

རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཤིན་ཏུ་རྒྱས་པ་མདོ་སྡེའི་དབང་པོའི་རྒྱལ་པོ་ཞེས་བྱ་བའི་ཆོས་ཀྱི་རྣམ་གྲངས།

རྒྱ་གར་སྐད་དུ། མ་ཧཱ་བཻ་རོ་ཙ་ན་ཨ་བྷི་སཾ་བོ་དྷི་བི་ཀུརྦྦ་ཏི་ཨ་དྷིཥྛཱ་ན་བཻ་པུལྱ་སཱུ་ཏྲ་ཨིནྡྲ་རཱ་ཛཱ་ནཱ་མ་དྷརྨྨ་པཪྱཱ་ཡ། བོད་སྐད་དུ། རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཤིན་ཏུ་རྒྱས་པ་མདོ་སྡེའི་དབང་པོའི་རྒྱལ་པོ་ཞེས་བྱ་བའི་ཆོས་ཀྱི་རྣམ་གྲངས།བམ་པོ་དང་པོ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་བྱིན་གྱིས་རློབ་པ། རྡོ་རྗེ་ཆེན་པོ་རྒྱ་ཆེ་བ། ཆོས་ཀྱི་དབྱིངས་ཀྱི་ཕོ་བྲང་། རྡོ་རྗེ་འཛིན་ཐམས་ཅད་འདུ་བ། དེ་བཞིན་གཤེགས་པའི་མོས་པས་རྣམ་པར་རོལ་པ། མཐའ་དང་དབུས་མེད་ཅིང་རྩེ་མོ་མཐོ་བ། རིན་པོ་ཆེའི་རྒྱལ་པོས་ཤིན་ཏུ་ལེགས་པར་བརྒྱན་པ་འབྱུང་བའི་ཁང་བཟངས་ཆེན་པོ་རིན་པོ་ཆེའི་རྒྱལ་པོའི་ནང་ན། བྱང་ཆུབ་སེམས་དཔའི་ལུས་ཀྱི་སེང་གེའི་ཁྲི་ལ་བཞུགས་ཏེ། འདི་ལྟ་སྟེ། རྡོ་རྗེ་འཛིན་ནམ་མཁའ་དྲི་མ་མེད་པ་དང་། ནམ་མཁའ་ལ་རྣམ་པར་འགྲོ་བ་དང་། ནམ་མཁའ་འབྱུང་བ་དང་། གོས་སྣ་ཚོགས་གྱོན་པ་དང་། སྣ་ཚོགས་སུ་རྒྱུ་བ་དང་། ཆོས་ཐམས་ཅད་མཉམ་པ་ཉིད་ལ་གནས་པ་དང་། སེམས་ཅན་གྱི་ཁམས་མཐའ་ཡས་པ་ཡོངས་སུ་སྐྱོབ་པའི་རྡོ་རྗེ་དང་། སྲེད་མེད་ཀྱི་བུའི་སྟོབས་ཅན་དང་། སྲེད་མེད་ཀྱི་བུ་ཆེན་པོའི་སྟོབས་ཅན་དང་། རྡོ་རྗེ་བཟང་དང་། རྡོ་རྗེ་མཆོག་གི་ཤུགས་འཆང་བ་དང་། དྲི་མ་མེད་པའི་རྡོ་རྗེ་དང་། རྡོ་རྗེ་མཆོག་འཆང་བ་དང་། དེ་བཞིན་གཤེགས་པའི་གོ་ཆ་དང་། དེ་བཞིན་གཤེགས་པའི་གོ་འཕང་དུ་འབྱུང་བ་དང་། སྤྲོས་པ་མེད་པ་ལ་གནས་པ་དང་། དེ་བཞིན་གཤེགས་པའི་སྟོབས་བཅུ་ལས་ངེས་པར་སྐྱེས་པ་དང་། དྲི་མ་མེད་པའི་མིག་དང་། གསང་བ་པའི་བདག་པོ་ཕྱག་ན་རྡོ་རྗེ་དང་། དེ་དག་ལ་སོགས་ཏེ། སངས་རྒྱས་ཀྱི་ཞིང་བཅུའི་རྡུལ་ཕྲ་རབ་

ཀྱི་རྡུལ་སྙེད་ཀྱི་རྡོ་རྗེ་འཛིན་རྣམས་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱམས་པ་དང་། འཇམ་དཔལ་དང་། སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་དག་གིས་ཀྱང་བསྐོར་ཅིང་མདུན་གྱིས་བལྟས་པ་ལ་འདི་ལྟ་སྟེ། དེ་བཞིན་གཤེགས་པའི་ཉི་མ་དུས་གསུམ་ལས་འདས་པར་བྱིན་གྱིས་བརླབས་ནས། སྐུ་དང་། གསུང་དང་། ཐུགས་མཉམ་པ་ཉིད་ཀྱི་གཞི་ཞེས་བྱ་བའི་ཆོས་ཀྱི་སྒོའི་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དེ་དག་དང་། གསང་བ་པའི་བདག་པོ་ལ་སྩོགས་པ་རྡོ་རྗེ་འཛིན་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱིས་བརླབས་ཀྱིས་སྐུ་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་སོ། །དེ་བཞིན་དུ་གསུང་དང་ཐུགས་མཉམ་པ་ཉིད་བཀོད་པ་མི་ཟད་པའི་མཛོད་རྣམ་པར་བསྒྱིངས་པ་ལ་ཞུགས་ཏེ། འོན་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའམ་གསུང་ངམ་ཐུགས་ལ་ནི་འཇུག་པའམ་ལྡོག་པ་མི་དམིགས་སོ། །ཐམས་ཅད་དུ་ཡང་བཅོམ་ལྡན་འདས་རྣམ་པར་སྣང་མཛད་ཀྱི་སྐུའི་ཕྲིན་ལས་ཐམས་ཅད་དང་། གསུང་གི་ཕྲིན་ལས་ཐམས་ཅད་དང་། ཐུགས་ཀྱི་ཕྲིན་ལས་ཐམས་ཅད་སེམས་ཅན་གྱི་ཁམས་ཐམས་ཅད་ལ་ཀུན་ཏུ་གསང་སྔགས་ཀྱི་ཚུལ་གྱི་ཚིག་འདི་དག་གིས་ཆོས་སྟོན་པར་མཐོང་བ་ནི་འདི་ལྟ་སྟེ། སེམས་ཅན་ལས་ཀྱི་ཚེ་རྣམ་པར་བསྐྱེད་པ་རྣམས་སེམས་དང་པོ་བསྐྱེད་པ་ནས་ཉེ་བར་བཟུང་སྟེ། ས་བཅུའི་བར་ལ་གནས་པ་འདི་ཉིད་ལ་ཡོངས་སུ་རྫོགས་པར་བྱ་བ་དང་། ལས་ཀྱི་ཚེ་བཀག་པ་རྣམས་ཀྱང་སྲིད་པའི་མྱུ་གུ་མངོན་པར་འགྲུབ་པར་བྱ་བའི་ཕྱིར་རྡོ་རྗེ་འཛིན་པའི་ལུས་འདྲ་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་། ཕྱག་ན་པདྨའི་ལུས་འདྲ་བ་ཕྱོགས་བཅུ་ན་གསང་སྔགས་ཀྱི་ཚུལ་གྱི་ཚིག་རྣམ་པར་དག་པའི་ཚིག་དག་གིས་ཆོས་སྟོན་པ་དག་ཀྱང་མཐོང་ངོ་། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེ་འཁོར་འདུས་པ་དེ་ཉིད་ན་འདུག་པ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐམས་ཅད་མཁྱེན་

པའི་ཡེ་ཤེས་བརྙེས་ནས་ཐམས་ཅད་མཁྱེན་པའི་ཡེ་ཤེས་དེ་སེམས་ཅན་རྣམས་ལ་རྣམ་པར་ཕྱེ་སྟེ། ཚུལ་སྣ་ཚོགས་དང་། བསམ་པ་སྣ་ཚོགས་དང་། ཐབས་སྣ་ཚོགས་དག་གིས་སྟོན་ཅིང་། ཁ་ཅིག་ལ་ནི་ཉན་ཐོས་ཀྱི་ཐེག་པའི་ཚུལ། ཁ་ཅིག་ལ་ནི་རང་སངས་རྒྱས་ཀྱི་ཐེག་པའི་ཚུལ། ཁ་ཅིག་ལ་ནི་ཐེག་པ་ཆེན་པོའི་ཚུལ། ཁ་ཅིག་ལ་ནི་མངོན་པར་ཤེས་པ་ལྔའི་ཚུལ། ཁ་ཅིག་ལ་ནི་ལྷར་སྐྱེ་བར་བྱ་བ་དང་། ཁ་ཅིག་ལ་ནི་མིར་སྐྱེ་བར་བྱ་བ་ནས་ལྟོ་འཕྱེ་ཆེན་པོ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅིར་སྐྱེ་བར་བྱ་བའི་བར་དུ་ཆོས་སྟོན་པ་ལགས། དེ་ལ་སེམས་ཅན་ལ་ལ་སངས་རྒྱས་ཀྱིས་གདུལ་བར་བྱ་བདག་གིས་ནི་སངས་རྒྱས་ཀྱི་གཟུགས་སུ་མཐོང་། ལ་ལས་ནི་ཉན་ཐོས་ཀྱི་གཟུགས་སུ། ལ་ལས་ནི་རང་སངས་རྒྱས་ཀྱི་གཟུགས་སུ། ལ་ལས་ནི་བྱང་ཆུབ་སེམས་དཔའི་གཟུགས་སུ། ལ་ལས་ནི་དབང་ཕྱུག་ཆེན་པོའི་གཟུགས་སུ། ལ་ལས་ནི་ཚངས་པའི་གཟུགས་སུ། ལ་ལས་ནི་སྲེད་མེད་ཀྱི་བུའི་གཟུགས་སུ། ལ་ལས་ནི་རྣམ་ཐོས་ཀྱི་བུའི་གཟུགས་སུ་ནས། ལ་ལས་ནི་ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་བར་དུ་མཐོང་སྟེ། རང་རང་གི་ཚིག་བརྗོད་པའི་ཚུལ་དག་དང་། སྤྱོད་ལམ་སྣ་ཚོགས་སུ་མཐོང་ལ། ཐམས་ཅད་མཁྱེན་པའི་ཡེ་ཤེས་དེ་ཡང་འདི་ལྟར་དེ་བཞིན་གཤེགས་པའི་རྣམ་པར་གྲོལ་བའི་རོར་རོ་གཅིག་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན་ནམ་མཁའི་ཁམས་ནི་རྟོག་པ་དང་། རྣམ་པར་རྟོག་པ་ཐམས་ཅད་དང་བྲལ་བ་སྟེ། མི་རྟོག་རྣམ་པར་མི་རྟོག་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་རྟོག་པ་ཐམས་ཅད་དང་བྲལ་བ་སྟེ། མི་རྟོག་རྣམ་པར་མི་རྟོག་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་ན། ས་ཆེན་པོ་འདི་ནི་སེམས་ཅན་ཐམས་ཅད་ཀྱི་གསོས་སུ་གྱུར་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་གསོས་སུ་གྱུར་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། མེའི་ཁམས་ནི་བུད་ཤིང་ཐམས་ཅད་སྲེག་པས་

ནམ་ཡང་ཡོངས་སུ་བས་པར་མི་འགྱུར་ལགས་སོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་མི་ཤེས་པའི་བུད་ཤིང་ཐམས་ཅད་སྲེག་པས་ནམ་ཡང་ཡོངས་སུ་བས་པར་མི་འགྱུར་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། རླུང་གི་ཁམས་ནི་རྡུལ་ཐམས་ཅད་སེལ་བར་བགྱིད་པ་ལགས་སོ། །བཅོམ་ལྡན་འདས་དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་མི་ཤེས་པའི་རྡུལ་ཐམས་ཅད་སེལ་བར་མཛད་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་བགྱི་ན། ཆུའི་ཁམས་ནི་སེམས་ཅན་ཐམས་ཅད་ཀྱི་ལུས་སིམ་པར་བགྱིད་པ་ལགས་སོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ཀྱང་ལྷ་དང་བཅས་པའི་འཇིག་རྟེན་རབ་ཏུ་སིམ་པར་བགྱིད་པ་ལགས་ན། བཅོམ་ལྡན་འདས་ཡེ་ཤེས་འདིའི་རྒྱུ་ནི་གང་ལགས། རྩ་བ་ནི་གང་ལགས། མཐར་ཐུག་པ་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་གང་ཁྱོད་ང་ལ་དོན་འདི་འདྲི་བ་ནི་ཡང་ལེགས་སོ། །དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོའོ། །མཐར་ཐུག་པ་ནི་ཐབས་སོ། །གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན། རང་གི་སེམས་ཡང་དག་པ་ཇི་ལྟ་བ་བཞིན་ཡོངས་སུ་ཤེས་པ་སྟེ། དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ།། གསང་བ་པའི་བདག་པོ་དེ་ལ་ནི་ཆོས་རྡུལ་ཙམ་ཡང་མེད་ཅིང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་དེ་ནི་ནམ་མཁའི་མཚན་ཉིད་དེ། དེ་ལ་བྱང་ཆུབ་པར་བྱེད་པ་ཡང་མེད་ལ། བྱང་ཆུབ་པར་བྱ་བའང་འགའ་ཡང་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་ལ་མཚན་ཉིད་མེད་པའི་ཕྱིར་ཏེ། གསང་བ་པའི་བདག་པོ་ཆོས་ཐམས་ཅད་ཀྱང་མཚན་ཉིད་མེད་པ་འདི་ལྟ་སྟེ། ནམ་མཁའི་མཚན་ཉིད་དོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐམས་ཅད་མཁྱེན་པ་ཉིད་ནི་གང་ནས་ཡོངས་སུ་བཙལ་བར་བགྱི། གང་གིས་ནི་བྱང་ཆུབ་

མངོན་པར་རྫོགས་པར་འཚང་རྒྱ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་བྱང་ཆུབ་དང་ཐམས་ཅད་མཁྱེན་པ་ཉིད་ནི་རང་གི་སེམས་ལས་ཡོངས་སུ་བཙལ་བར་བྱའོ། །དེ་ཅིའི་ཕྱིར་ཞེ་ན། སེམས་དེ་ནི་རང་བཞིན་གྱིས་ཡོངས་སུ་དག་པ་ཡིན་ཏེ། དེ་ནི་ནང་ན་མེད། ཕྱི་རོལ་ན་ཡང་མེད། གཉིས་ཀའི་བར་ན་ཡང་མི་དམིགས་སོ། །གསང་བ་པའི་བདག་པོ་སེམས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་མ་གཟིགས། གཟིགས་པར་མི་འགྱུར་ཏེ། སྔོན་པོར་མ་ཡིན། སེར་པོར་མ་ཡིན་དམར་པོར་མ་ཡིན། དཀར་པོར་མ་ཡིན། ཁ་དོག་ལེ་བརྒན་དུ་མ་ཡིན། ཤེལ་གྱི་ཁ་དོག་ཏུ་མ་ཡིན། ཐུང་ངུར་མ་ཡིན། རིང་པོར་མ་ཡིན། ཟླུམ་པོར་མ་ཡིན། གྲུ་བཞིར་མ་ཡིན། སྣང་བར་མ་ཡིན། མུན་པར་མ་ཡིན། སྐྱེས་པར་མ་ཡིན། བུད་མེད་དུ་མ་ཡིན། མ་ནིང་དུ་མ་ཡིན་ནོ། །གསང་བ་པའི་བདག་པོ་སེམས་དེ་ནི་འདོད་པའི་ཁམས་ཀྱི་རང་བཞིན་མ་ཡིན། གཟུགས་ཀྱི་ཁམས་ཀྱི་རང་བཞིན་མ་ཡིན། གཟུགས་མེད་པའི་ཁམས་ཀྱི་རང་བཞིན་མ་ཡིན་ནོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པའི་འགྲོ་བ་སེམས་ཅན་རིས་མཐུན་པའི་རང་བཞིན་མ་ཡིན་ནོ། །གསང་བ་པའི་བདག་པོ་སེམས་དེ་ནི་མིག་ལ་མི་གནས། རྣ་བ་མ་ཡིན། སྣ་ལ་མ་ཡིན། ལྕེ་ལ་མ་ཡིན། ལུས་ལ་མ་ཡིན། ཡིད་ལ་མི་གནས་སོ། ། དེ་ཅིའི་ཕྱིར་ཞེ་ན། སེམས་དེ་ནི་ནམ་མཁའི་མཚན་ཉིད་དེ། དེའི་ཕྱིར་རྟོག་པ་དང་། རྣམ་པར་རྟོག་པ་ཐམས་ཅད་དང་བྲལ་བའོ། །དེ་ཅིའི་ཕྱིར་ཞེ་ན། ནམ་མཁའི་རང་བཞིན་གང་ཡིན་པ་དེ་ནི་སེམས་ཀྱི་རང་བཞིན་ནོ། །སེམས་ཀྱི་རང་བཞིན་གང་ཡིན་པ་དེ་ནི་བྱང་ཆུབ་ཀྱི་རང་བཞིན་ཏེ། གསང་བ་པའི་བདག་པོ་དེ་ལྟར་ན་སེམས་དང་། ནམ་མཁའི་དབྱིངས་དང་། བྱང་ཆུབ་འདི་ནི་གཉིས་སུ་མེད་དེ་གཉིས་སུ་བྱར་མེད་དོ། །དེ་ཡང་སྙིང་རྗེའི་རྩ་བ་ཅན། ཐབས་ཀྱི་ཕ་རོལ་ཏུ་ཕྱིན་པས་ཡོངས་སུ་གཟུང་བ་སྟེ། གསང་བ་པའི་བདག་པོ་དེ་བས་ན་རྣམ་གྲངས་འདིས་ཀྱང་འདི་ལྟར་ང་

བྱང་ཆུབ་སེམས་དཔའི་འཁོར་གྱི་ནང་དུ་ཆོས་གང་དང་གང་སྟོན་པ་དེ་ཐམས་ཅད་ནི། བྱང་ཆུབ་ཀྱི་སེམས་ཡོངས་སུ་དག་པར་བྱ་བ་དང་། སེམས་ཡོངས་སུ་ཤེས་པར་བྱ་བའི་ཕྱིར་ཡིན་པར་རིག་པར་བྱའོ། །གསང་བ་པའི་བདག་པོ་དེ་ལྟ་བས་ན་རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་ཡོངས་སུ་ཤེས་པར་འདོད་པས་རང་གི་སེམས་ཉིད་ཡོངས་སུ་ཤེས་པར་བྱའོ། །གསང་བ་པའི་བདག་པོ་ཅི་ལྟར་རང་གི་སེམས་ཡོངས་སུ་ཤེས་པར་བྱ་ཞེ་ན། འདི་ལྟ་སྟེ། རྣམ་པར་རམ། ཁ་དོག་ཏུའམ། དབྱིབས་སུའམ། ཡུལ་དུའམ། གཟུགས་སུའམ། ཚོར་བར་རམ། འདུ་ཤེས་སུའམ། འདུ་བྱེད་དུའམ། རྣམ་པར་ཤེས་པར་རམ། བདག་ཏུའམ། བདག་གིར་རམ། གཟུང་བར་རམ། འཛིན་པར་རམ། དག་པར་རམ། མ་དག་པར་རམ། ཁམས་སུའམ། སྐྱེ་མཆེད་དུའམ། རྣམ་པ་ཐམས་ཅད་ཀྱི་བར་དུ་ཡོངས་སུ་བཙལ་ཀྱང་མི་དམིགས་པ་ཡིན་ཏེ། གསང་བ་པའི་བདག་པོ་འདི་ནི་བྱང་ཆུབ་སེམས་དཔའི་བྱང་ཆུབ་ཀྱི་སེམས་རྣམ་པར་དག་པའི་སྒོ་ཞེས་བྱ་བ་ཆོས་སྣང་བའི་སྒོ་ཆོས་སྣང་བའི་ཚུལ་དང་པོ་སྟེ། གང་ལ་གནས་ན་བྱང་ཆུབ་སེམས་དཔའ་རྣམས་ཚེགས་ཆུང་ངུས་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འཐོབ་ཅིང་། དེ་ཐོབ་པས་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་དང་ལྷན་ཅིག་འགྲོགས་པ་ཐོབ་པར་འགྱུར། མངོན་པར་ཤེས་པ་ལྔ་དག་ཀྱང་ཐོབ་པར་འགྱུར། སྐད་དང་སྒྲ་དང་དབྱངས་མཐའ་ཡས་པའི་གཟུངས་ཀྱང་ཐོབ་པར་འགྱུར། སེམས་ཅན་གྱི་བསམ་པ་རྗེས་སུ་ཤེས་པ་དང་། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་འཁོར་བ་ན་ཡོངས་སུ་མི་ཉམས་པའི་ཆོས་ཅན་དུ་འགྱུར། སེམས་ཅན་གྱི་དོན་བྱ་བ་དག་ལ་ཡོངས་སུ་མི་སྐྱོ་བར་འགྱུར། འདུས་མ་བྱས་ཀྱི་ཚུལ་ཁྲིམས་ལ་རབ་ཏུ་གནས་པ་དང་། ལོག་པར་ལྟ་བ་རྣམ་པར་སྤངས་པ་དང་། ཡང་དག་པར་ལྟ་བ་རྟོགས་པར་ཁོང་དུ་ཆུད་པར་འགྱུར་བ་ཡིན་ནོ། །གསང་བ་པའི་བདག་པོ་གཞན་ཡང་སྒྲིབ་པ་ཐམས་ཅད་སྤོང་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི། མོས་པའི་སྟོབས་སྐྱེས་པས་ཚེགས་ཆུང་དུས་སངས་རྒྱས་ཀྱི་ཆོས་ཐམས་ཅད་ཡོངས་སུ་

རྫོགས་པར་བྱེད་དེ། གསང་བ་པའི་བདག་པོ་མདོར་ན་རིགས་ཀྱི་བུའམ། རིགས་ཀྱི་བུ་མོ་དེ་ནི་ཡོན་ཏན་དཔག་ཏུ་མེད་པ་དང་ལྡན་པར་འགྱུར་རོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཡོངས་སུ་ཞུས་པ། བཅོམ་ལྡན་འདས་ཇི་ལྟར་བྱང་ཆུབ་ཏུ་སེམས་བསྐྱེད་པ་ཞེས་བགྱི་བ་ལགས། བྱང་ཆུབ་འབྱུང་བའི་སེམས་སྐྱེས་པའི། །མཚན་ཉིད་ཇི་ལྟར་འཚལ་བར་བགྱི། །སེམས་མཁྱེན་པ་ནི་རྣམས་ཀྱི་མཆོག །དཔའ་ཆེན་ཡེ་ཤེས་ལས་བྱུང་བ། །ཇི་སྙེད་ཅིག་ལས་འདས་ནས་ནི། །སྐྱེ་བར་འགྱུར་བ་བསྟན་དུ་གསོལ། །མགོན་པོ་སེམས་ཀྱི་མཚན་ཉིད་དང་། །དུས་ཀྱང་རྒྱ་ཆེར་བཤད་དུ་གསོལ། །དེ་དག་བསོད་ནམས་ཅི་འདྲ་དང་། །སྤྱོད་པ་ཅི་འདྲར་འགྱུར་བ་དང་། །སེམས་ལ་སེམས་ཀྱི་ཁྱད་པར་ཡང་། །ཐུབ་པ་ཆེན་པོས་བསྟན་དུ་གསོལ། །དེ་སྐད་གསོལ་ནས་དེ་ཡི་ཚེ། །བཅོམ་ལྡན་རྣམ་པར་སྣང་ཆེན་གྱིས། །ཕྱག་ན་རྡོ་རྗེ་ཆེར་འབྱུང་ལ། །ལེགས་སོ་བུ་ཞེས་འདི་སྐད་གསུངས། །ཐེག་པ་ཆེན་པོའི་གོ་འཕང་མཆོག །སེམས་ཀྱི་རྒྱུད་ཀྱི་མཚན་ཉིད་ནི། །རྫོགས་སངས་རྒྱས་ཀྱི་གསང་བའི་མཆོག །རྟོག་གེ་ཀུན་གྱིས་མི་ཤེས་པ། །ཐམས་ཅད་ཁྱོད་ལ་བཤད་པར་བྱ། །ཡིད་གཅིག་བསྡུས་ལ་མཉན་པར་གྱིས། །སེམས་ནི་བརྒྱ་རྩ་དྲུག་ཅུ་ལས། །འདས་ནས་བྱང་ཆུབ་ཉིད་ཀྱི་ཕྱིར། །བསོད་ནམས་ཆེས་འབྱུང་སྙིང་པོ་སྟེ། །བྱང་ཆུབ་འབྱུང་བ་སྐྱེ་བར་འགྱུར། །ནམ་མཁའ་ལྟ་བུར་དཔག་མེད་ཅིང་། །གོས་པ་མེད་དེ་ཅི་བཞིན་གནས། །ཆོས་ཀུན་གྱིས་ནི་མི་སྒུལ་ཏེ། །གཟོད་ནས་ཞི་ཞིང་མཚན་ཉིད་མེད། །དཔག་མེད་ཡེ་ཤེས་ཀྱིས་བསྒྲུབས་པ། །ཡང་དག་རྫོགས་སངས་རྒྱས་སྟོན་པ། །མཆོད་དང་སྤྱོད་པས་བསྒྲུབས་པའི་ཕྱིར། །བྱང་ཆུབ་ཕྱིར་ནི་དང་པོར་འདོད། །གསང་བ་པའི་བདག་པོ་དེ་ལ་འཁོར་བ་ཐོག་མ་མེད་པ་ན་བྱིས་པ་སོ་སོའི་སྐྱེ་བོ་རྣམས་ངར་འཛིན་པ་དང་ང་ཡིར་འཛིན་པ་ལ་མངོན་པར་ཞེན་པས་བདག་གི་ཁྱད་པར་གྲངས་མེད་པ་རབ་ཏུ་བརྟགས་ཏེ། གསང་བ་པའི་བདག་པོ་དེ་ལ་བདག་གི་ངོ་བོ་ཉིད་ལ་མ་དཔྱད་པར་བདག་གོ་ཞེས་ངར་འཛིན་པ་ཀུན་ནས་བསླང་ངོ་། །གཞན་དག་ནི་དུས་ལས་བྱུང་བ་དང་། འཛིན་པ་པོས་སྤྲུལ་པ་དང་། ངེས་པར་

འབྱུང་བ་དང་འདི་ལྟ་སྟེ། དབང་ཕྱུག་དང་། འབྱིན་པ་པོ་དང་། དུས་དང་། གཙོ་བོ་དང་། བྱེད་པ་པོ་དང་། བྱེད་པ་པོ་མ་ཡིན་པ་དང་། རྣལ་འབྱོར་དང་། ཚད་མ་དང་། དག་པ་དང་། མ་དག་པ་དང་། ནང་གི་བདག་དང་། སྐྱེས་བུ་དང་། ཁྱབ་བདག་དང་། སྲོག་དང་། གང་ཟག་དང་། རྣམ་པར་ཤེས་པ་དང་། ཀུན་གཞི་དང་། ཤེས་པ་པོ་དང་། མཐོང་བ་པོ་དང་། གཟུང་བ་དང་། འཛིན་པ་དང་། ཤེས་པ་དང་། ཤེས་བྱ་དང་། ཁོང་དུ་ཆུད་པར་བྱ་བ་དང་། ཤེད་ལས་སྐྱེས་པ་དང་། ཤེད་བུ་དང་། བརྗོད་པར་བྱ་བ་དང་། བརྗོད་པར་བྱ་བ་མ་ཡིན་པར་རྟོག་སྟེ། གསང་བ་པའི་བདག་པོ་བདག་གི་ཁྱད་པར་དེ་ལྟ་བུ་ལ་སོགས་པ་རྣལ་འབྱོར་འདོད་པའི་རྣལ་འབྱོར་པ་དག་གིས་ཐར་བར་འདོད་པས་སྔོན་བརྟགས་པ་ཡིན་ནོ། །གསང་བ་པའི་བདག་པོ་གཞན་ཡང་བྱིས་པ་སོ་སོའི་སྐྱེ་བོ་ཕྱུགས་དང་མཚུངས་པ་རྣམས་ལས་བརྒྱ་ལམ་ན། རེས་འགའ་ཞིག་ཆོས་ཀྱི་འདུ་ཤེས་འབྱུང་བ་ནི་འདི་ལྟ་སྟེ། སྨྱུང་བར་གནས་པ་ལ་གནས་པར་བྱའོ། །ཞེས་དེ་ཙམ་ཞིག་སེམས་ལ་བྱས་ཏེ། མགུ་བ་བསྐྱེད་ནས་ཕྱི་ཕྱིར་ཞིང་དེ་ཉིད་ལ་གོམས་པར་བྱེད་དེ། གསང་བ་པའི་བདག་པོ་དེ་ནི་དགེ་བའི་ལས་སྐྱེ་བའི་ས་བོན་ལྟ་བུ་སྟེ་སེམས་དང་པོའོ། ། དེ་རྒྱུ་དེ་ཉིད་ཀྱི་མཚན་མ་དང་བཅས་པའི་ཉི་མ་དེ་དང་དེ་དག་ལ་ཕ་མ་དང་། བུ་དང་། བུ་མོ་དང་། མཛའ་བཤེས་དང་། ཉེ་དུ་དག་ལ་སྦྱིན་པ་སྦྱིན་པར་བྱེད་དེ། འདི་ནི་མྱུ་གུ་ལྟ་བུ་སྟེ་གཉིས་པའོ། །གཞན་ཡང་སྦྱིན་པ་དེ་ཉིད་མི་ཤེས་པ་དག་ལ་ཡང་སྦྱིན་པར་བྱེད་དེ། འདི་ནི་སྡོང་བུ་ལྟ་བུ་སྟེ་གསུམ་པའོ། །གཞན་ཡང་སྦྱིན་པ་དེ་ཉིད་སྣོད་དུ་རུང་བ་ཡོངས་སུ་ཚོལ་ཞིང་སྦྱིན་པར་བྱེད་དེ། འདི་ནི་ལོ་མ་ལྟ་བུ་སྟེ་བཞི་པའོ། །གཞན་ཡང་སྦྱིན་པ་དེ་ཉིད་བླ་མའམ་རོལ་མོ་མཁན་ལ་དགའ་བཞིན་དུ་སྦྱིན་པར་བྱེད་དེ། འདི་ནི་མེ་ཏོག་ལྟ་བུ་སྟེ་ལྔ་པའོ། །གཞན་ཡང་སྦྱིན་པ་དེ་ཉིད་ཡིད་དགའ་བ་དག་ལ་སྦྱིན་པར་བྱེད་དེ། འདི་ནི་འབྲས་བུ་ལྟ་བུ་སྟེ་དྲུག་པའོ། །གསང་བ་པའི་བདག་པོ་གཞན་ཡང་མཐོ་རིས་སུ་སྐྱེ་བར་བྱ་བའི་ཕྱིར་ཚུལ་ཁྲིམས་བསྲུང་སྟེ། འདི་ནི་གསོས་སུ་གྱུར་པ་སྟེ་བདུན་པའོ། །གསང་བ་པའི་བདག་པོ་གཞན་ཡང་སེམས་དེ་ལྟ་བུ་ཉིད་ཀྱིས་

འཁོར་བར་རྒྱུ་བ་ན། དགེ་བའི་བཤེས་གཉེན་ལ་ལ་ཞིག་ལས་ཚིག་འདི་སྐད་ཐོས་ཏེ། ལྷ་འདི་དག་ནི་ལྷ་ཆེན་ཏེ། །ཐམས་ཅད་ལ་ནི་བདེ་བ་སྟེར། །དེ་ལ་ཁྱོད་ཀྱིས་གུས་མཆོད་དང་། །ཐམས་ཅད་འབྱོར་པ་ཉིད་དུ་འགྱུར། །དེ་དག་ཀྱང་ནི་འདི་ལྟ་སྟེ། །དབང་ཕྱུག་དང་ནི་ཚངས་པ་དང་། །དེ་བཞིན་ཁྱབ་འཇུག་བདེ་བྱེད་དང་། །དྲག་པོ་སྐེམ་བྱེད་དེ་བཞིན་དུ། །ཉི་མ་ཟླ་བ་ཆུ་ལྷ་ཉིད། །ལུས་ངན་ནོར་སྦྱིན་བརྒྱ་བྱིན་དང་། །མིག་མི་བཟང་དང་སྣ་ཚོགས་འབྱུང་། །གཤིན་རྗེ་དུས་མཚན་མྱ་ངན་འདས། །འཇིག་རྟེན་གཙོ་ཞེས་བྱ་བ་དང་། །མེ་དང་རྣམ་པར་འདུད་པའི་བུ། །དེ་བཞིན་ལྷ་མོ་དཀའ་ཐུབ་ཟློག །པདྨ་དང་ནི་འཇོག་པོ་ཀླུ། །ནོར་ལྡན་དང་ནི་དུང་ཞེས་བྱ། །ཀརྐོ་ཊ་ཀ་པདྨ་ཆེ། །རིགས་ཅན་དང་ནི་གདེངས་ཀ་མང་། །རྟག་ཏུ་མཐའ་ཡས་ཐོག་མའི་ལྷ། །དེ་བཞིན་ལྷ་དང་དྲང་སྲོང་མཆོག །རིག་བྱེད་རིག་བྱེད་སྐྱེས་བུ་ཡིན། །མཁས་པས་མཆོད་པ་གྱིས་ཤིག་ཅེས། །དེ་ལས་དེ་འདྲའི་ཚིག་ཐོས་ནས། །ཡིད་ནི་ཡང་དག་མགུ་གྱུར་ཏེ། །དེ་ཚེ་རབ་ཏུ་གུས་ལྡན་པས། །དེ་དག་ལ་ནི་ནན་ཏན་བྱེད། །གསང་བ་པའི་བདག་པོ་འདི་ནི་བྱིས་པ་སོ་སོའི་སྐྱེ་བོ་འཁོར་བ་ན་ཀུན་ཏུ་འཁྱམ་པ་རྣམས་ཀྱི་དབུགས་འབྱིན་པའི་མཆོག་ཡིན་ཏེ། འདི་ནི་སྟོབས་སུ་གྱུར་པ་སྟེ། སེམས་བརྒྱད་པར་རྒྱལ་བ་རྣམས་ཀྱིས་བཤད་དོ། །གསང་བ་པའི་བདག་པོ་གཞན་ཡང་ཁྱད་པར་རྟོགས་པ་ཅི་སྐད་དུ་ཡོངས་སུ་བསྒྲགས་པའི་ཁྱད་པར་དེ་དང་དེ་དག་ལ་ཁྱད་པར་དུ་གནས་པ་རྣམས་ལ་འབའ་ཞིག་པ་ཉིད་ཀྱི་དོན་དུ་བློ་སྐྱེ་ཞིང་། དེ་ཡང་ཡོད་དོ་ཡོད་དོ་ཞེས་སྟོང་པ་ཉིད་ཁོ་ན་ལ་དངོས་པོར་སེམས་ཏེ། གསང་བ་པའི་བདག་པོ་དེ་དག་གིས་ནི་སྟོང་པ་ཉིད་རབ་ཏུ་མི་ཤེས་སོ། །སྟོང་པ་ཉིད་ནི་དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། གཉི་ག་ཡང་མ་ཡིན་ཏེ། དེ་ལ་རྟོག་པའམ། མི་རྟོག་པ་ཡང་མེད་ན། དེ་ལ་ཅི་ལྟར་སྟོང་པ་ཞེས་བརྟག་པར་བྱ། གང་དག་སྟོང་ཉིད་མི་ཤེས་པ། །དེ་དག་མྱ་ངན་འདས་མི་ཤེས། །དེ་ཕྱིར་དངོས་དང་དངོས་མེད་པ། །འཇིག་པས་སྟོང་ཉིད་ཤེས་པར་བྱ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་གསོལ་བ་བཏབ་པ། བཅོམ་ལྡན་

འདས་སེམས་ཀྱི་ཁྱད་པར་དེ་དག་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་སེམས་ཀྱི་ཁྱད་པར་གྱི་མཚན་ཉིད་ཉོན་ཅིག །གསང་བ་པའི་བདག་པོ་དེ་ལ་སེམས་འདི་ནི་འདོད་ཆགས་ཀྱི་སེམས་དང་། འདོད་ཆགས་དང་བྲལ་བའི་སེམས་དང་། ཞེ་སྡང་གི་སེམས་དང་། བྱམས་པའི་སེམས་དང་། གཏི་མུག་གི་སེམས་དང་། ཤེས་རབ་ཀྱི་སེམས་དང་། གཏན་ལ་ཕབ་པའི་སེམས་དང་། ཐེ་ཙོམ་གྱི་སེམས་དང་། མུན་པར་གྱུར་པའི་སེམས་དང་། སྣང་བར་གྱུར་པའི་སེམས་དང་། སྡུད་པའི་སེམས་དང་། འཐབ་པའི་སེམས་དང་། རྩོད་པའི་སེམས་དང་། མི་རྩོད་པའི་སེམས་དང་། ལྷའི་སེམས་དང་། ལྷ་མ་ཡིན་གྱི་སེམས་དང་། ཀླུའི་སེམས་དང་། མིའི་སེམས་དང་། བུད་མེད་ཀྱི་སེམས་དང་། དབང་ཕྱུག་གི་སེམས་དང་། ཚོང་པའི་སེམས་དང་། ཞིང་པའི་སེམས་དང་། ཆུ་བོའི་སེམས་དང་། ལྟེང་ཀའི་སེམས་དང་། ཁྲོན་པའི་སེམས་དང་། ཀུན་ཏུ་བསྲུང་བའི་སེམས་དང་། སེར་སྣའི་སེམས་དང་། ཁྱིའི་སེམས་དང་། བྱི་ལའི་སེམས་དང་། ནམ་མཁའ་ལྡིང་གི་སེམས་དང་། བྱི་བའི་སེམས་དང་། གླུའི་སེམས་དང་། གར་གྱི་སེམས་དང་། སིལ་སྙན་གྱི་སེམས་དང་། ཁྱིམ་གྱི་སེམས་དང་། སེང་གེའི་སེམས་དང་། འུག་པའི་སེམས་དང་། བྱ་རོག་གི་སེམས་དང་། སྲིན་པོའི་སེམས་དང་། ཚེར་མའི་སེམས་དང་། ས་འོག་གི་སེམས་དང་། རླུང་གི་སེམས་དང་། ཆུའི་སེམས་དང་། མེའི་སེམས་དང་། འདམ་གྱི་སེམས་དང་། རྙོག་པའི་སེམས་དང་། ཚོན་རྩིའི་སེམས་དང་། ཤིང་ལེབ་ཀྱི་སེམས་དང་། འཁྲུལ་པའི་སེམས་དང་། དུག་གི་སེམས་དང་། ཞགས་པའི་སེམས་དང་། ལྕགས་སྒྲོག་གི་སེམས་དང་། སྤྲིན་གྱི་སེམས་དང་། ཞིང་གི་སེམས་དང་། ལན་ཚྭའི་སེམས་དང་། སྤུ་གྲིའི་སེམས་དང་། རི་རབ་ལྟ་བུའི་སེམས་དང་། རྒྱ་མཚོ་ལྟ་བུའི་སེམས་དང་། ཕུག་ལྟ་བུའི་སེམས་དང་། སྐྱེ་བར་གྱུར་པའི་སེམས་སོ། །གསང་བ་པའི་བདག་པོ་དེ་ལ་འདོད་ཆགས་ཀྱི་སེམས་གང་ཞེ་ན། ཆགས་

པ་ཅན་ཆོས་ཀུན་ཏུ་སྟེན་པའོ། །འདོད་ཆགས་དང་བྲལ་བའི་སེམས་གང་ཞེ་ན། འདོད་ཆགས་དང་བྲལ་བའི་ཆོས་ཀུན་ཏུ་སྟེན་པའོ། །ཞེ་སྡང་གི་སེམས་གང་ཞེ་ན། སྡང་བས་ཆོས་ཀུན་ཏུ་སྟེན་པའོ། །བྱམས་པའི་སེམས་གང་ཞེ་ན།བྱམས་པ་དང་ལྡན་པས་ཆོས་སྟེན་པའོ། ། གཏི་མུག་གི་སེམས་གང་ཞེ་ན། གང་མི་དཔྱོད་པར་ཆོས་སྟེན་པའོ། །ཤེས་རབ་ཀྱི་སེམས་གང་ཞེ་ན། ཁྱད་པར་ལས་ཁྱད་པར་གཞན་རྟོགས་པར་བྱ་སྟེ་ཆོས་སྟེན་པའོ། །གཏན་ལ་ཕབ་པའི་སེམས་གང་ཞེ་ན། བཀའ་དང་བླ་མའི་ཚིག་བཞིན་བྱེད་པ་ཉིད་དོ། །ཐེ་ཚོམ་གྱི་སེམས་གང་ཞེ་ན། ཅི་ལྟར་ཡོངས་སུ་གཟུང་བ་ངེས་པ་དག་ལ་སོམ་ཉི་སྟེན་པ་ཉིད་དོ། །མུན་པར་གྱུར་པའི་སེམས་གང་ཞེ་ན། སོམ་ཉི་མེད་པ་ལ་སོམ་ཉིར་འདུ་ཤེས་པའོ། །སྣང་བར་གྱུར་པའི་སེམས་གང་ཞེ་ན། སོམ་ཉི་མེད་པ་ལ་སོམ་ཉི་མེད་པར་སྟེན་པའོ། །སྡུད་པའི་སེམས་གང་ཞེ་ན། དུ་མ་གཅིག་ཏུ་བྱེད་པའོ། །འཐབ་པའི་སེམས་གང་ཞེ་ན། ཕན་ཚུན་རྩོད་པ་ཉིད་དོ། །རྩོད་པའི་སེམས་གང་ཞེ་ན། གང་བདག་ཉིད་དང་བདག་ཉིད་དུ་རྩོད་པའོ། །མི་རྩོད་པའི་སེམས་གང་ཞེ་ན། མཉམ་པས་མཚུངས་པར་ལྟ་བའོ། །ལྷའི་སེམས་གང་ཞེ་ན། ཡིད་ཀྱིས་བདག་ཉིད་ལ་རློམ་སེམས་སུ་བྱེད་པའོ། །ལྷ་མ་ཡིན་གྱི་སེམས་གང་ཞེ་ན། གང་འཁོར་བ་ཉིད་ལ་སྨོད་པའོ། །ཀླུའི་སེམས་གང་ཞེ་ན། གང་ལོངས་སྤྱོད་ཆེན་པོ་ཉིད་དུ་བྱ་བའི་ཕྱིར་སེམས་པའོ། །མིའི་སེམས་གང་ཞེ་ན། དེ་ཉིད་ཀྱི་དོན་དུ་སེམས་པའོ། །བུད་མེད་ཀྱི་སེམས་གང་ཞེ་ན། འདོད་པ་ཁོ་ནའི་ཕྱིར་ཆོས་སྟེན་པའོ། །དབང་ཕྱུག་གི་སེམས་གང་ཞེ་ན། གང་བདག་གིས་ཐམས་ཅད་བསམས་སོ་སྙམ་དུ་རློམ་སེམས་སུ་བྱེད་པའོ། །ཚོང་པའི་སེམས་གང་ཞེ་ན། གང་བསྡུ་བ་བྱས་ཏེ་རྣམ་པར་སྤེལ་ནས་ཕྱིས་སྟེན་པའོ། །ཞིང་པའི་སེམས་གང་ཞེ་ན། གང་ཐོས་པ་རྣམ་པ་དུ་མ་ཚོལ་ཞིང་ཕྱིས་སྟེན་པའོ། །ཆུ་བོའི་སེམས་གང་ཞེ་ན། གང་མཐའ་གཉིས་ལ་ལྟོས་ཤིང་སྟེན་པའོ། །ལྟེང་ཀའི་སེམས་གང་ཞེ་ན། གང་སྲེད་པས་སྟེན་པའོ། །ཁྲོན་པའི་སེམས་གང་ཞེ་ན། གང་མི་ཟབ་པ་ལ་ཟབ་པར་སེམས་པའོ། །ཀུན་ཏུ་བསྲུང་

པའི་སེམས་གང་ཞེ་ན། འདི་ཉིད་བདེན་གྱི་གཞན་ནི་གཏི་མུག་གོ་སྙམ་དུ་སེམས་པའོ། །སེར་སྣའི་སེམས་གང་ཞེ་ན། བདག་ཉིད་བསྟེན་ཅིང་གཞན་ལ་མི་སྟེར་བའོ། །བྱི་ལའི་སེམས་གང་ཞེ་ན། གང་མཆོད་པ་ལ་ལྟོས་ཏེ་སྟེན་པའོ། །ཁྱིའི་སེམས་གང་ཞེ་ན། གང་ཆུང་དུས་ཀྱང་མགུ་བར་འགྱུར་བའོ། །ནམ་མཁའ་ལྡིང་གི་སེམས་གང་ཞེ་ན། གང་ཕྱོགས་འཛིན་པས་ཆོས་ལ་སྟེན་པའོ། །བྱི་བའི་སེམས་གང་ཞེ་ན། འཆིང་བ་ཐམས་ཅད་གཅད་པའི་ཕྱིར་སེམས་པའོ། །གླུའི་སེམས་གང་ཞེ་ན། བདག་གིས་དབྱངས་སྒྲ་སྣ་ཚོགས་ཀྱི་གླུས་སེམས་ཅན་རྣམས་གཟུང་བར་བྱའོ་སྙམ་པའོ། །གར་གྱི་སེམས་གང་ཞེ་ན། བདག་གིས་རྫུ་འཕྲུལ་སྣ་ཚོགས་ཀྱིས་གཞན་དག་ཡང་དག་པར་འཛིན་པ་གཞུག་གོ་སྙམ་དུ་སེམས་པའོ། །སིལ་སྙན་གྱི་སེམས་གང་ཞེ་ན། བདག་གིས་ཆོས་ཀྱི་རྔ་བརྡུང་ངོ་སྙམ་པའོ། །ཁྱིམ་གྱི་སེམས་གང་ཞེ་ན། བདག་གི་ལུས་ཀུན་ཏུ་བསྲུང་བའི་ཕྱིར་སྟེན་པའོ། །སེང་གེའི་སེམས་གང་ཞེ་ན། གང་ཐམས་ཅད་ཟིལ་གྱིས་གནོན་པ་སྟེན་པའོ། །འུག་པའི་སེམས་གང་ཞེ་ན། གང་མཚན་མོ་སེམས་པའོ། །བྱ་རོག་གི་སེམས་གང་ཞེ་ན། གང་ཐམས་ཅད་དུ་སྐྲག་པས་སེམས་པའོ། །སྲིན་པོའི་སེམས་གང་ཞེ་ན། དགེ་བས་མི་དགེ་བ་རྣམས་སྒྲུབ་པའོ། །ཚེར་མའི་སེམས་གང་ཞེ་ན། གང་ཐམས་ཅད་དུ་འགྱོད་པ་སེམས་པའོ། །ས་འོག་གི་སེམས་གང་ཞེ་ན། སའི་འོག་གི་དོན་དུ་སེམས་པའོ། །རླུང་གི་སེམས་གང་ཞེ་ན། གང་ཐམས་ཅད་དུ་ཐམས་ཅད་སྒྲུབ་པའོ། །ཆུའི་སེམས་གང་ཞེ་ན། གང་མི་དགེ་བ་ཐམས་ཅད་བཀྲུ་བའི་ཕྱིར་སྟེན་པའོ། །མེའི་སེམས་གང་ཞེ་ན། གང་དཀའ་ཐུབ་ཉིད་ཀྱིས་གདུང་བར་བྱེད་པའོ། །འདམ་གྱི་སེམས་གང་ཞེ་ན། གང་བདག་གི་ཉེས་པས་གཞན་ལ་སྐུར་བའོ། །རྙོག་པའི་སེམས་གང་ཞེ་ན། གང་ཕ་རོལ་གྱི་ཉེས་པ་འཛིན་པས་སེམས་ལ་རྙོག་པ་སྐྱེད་པའོ། །ཚོན་རྩིའི་སེམས་གང་ཞེ་ན། གང་དེ་ལ་ཆགས་པ་ཉིད་དུ་སྟེན་པའོ། །ཤིང་ལེབ་ཀྱི་སེམས་གང་ཞེ་

ན་གང་དགེ་བའི་གཞན་སྤོང་བས་སྟེན་པའོ། །ནོར་བའི་སེམས་གང་ཞེ་ན། གཞན་བཟུང་ཞིང་གཞན་ཁོ་ནར་སེམས་པའོ། །དུག་གི་སེམས་གང་ཞེ་ན། གང་ཤིན་ཏུ་དངོས་པོ་མེད་པ་ཉིད་སེམས་པའོ། །ཞགས་པའི་སེམས་གང་ཞེ་ན། གང་ཐམས་ཅད་དུ་བདག་ཉིད་བཅིངས་ཤིང་འདུག་པའོ། །ལྕགས་སྒྲོག་གི་སེམས་གང་ཞེ་ན། གང་རྐང་པ་གཉིས་ལ་འདུག་སྟེ་སེམས་པའོ། །སྤྲིན་གྱི་སེམས་གང་ཞེ་ན། གང་ཆུ་དག་ལ་སེམས་པའོ། །ཞིང་གི་སེམས་གང་ཞེ་ན། རང་གི་ལུས་ཉིད་ཡོངས་སུ་སྦྱོང་བར་བྱེད་པའོ། །ལན་ཚྭའི་སེམས་གང་ཞེ་ན། གང་ཞིག་གང་གིས་སེམས་པར་བྱེད་པ་དེ་ལ་ཡང་སེམས་པའོ། །སྤུ་གྲིའི་སེམས་གང་ཞེ་ན། གང་རབ་ཏུ་བྱུང་བ་ཙམ་ལ་སྟེན་པའོ། །རི་རབ་ལྟ་བུའི་སེམས་གང་ཞེ་ན། གང་མཐོ་བར་གྱུར་ནས་སེམས་པའོ། །རྒྱ་མཚོ་ལྟ་བུའི་སེམས་གང་ཞེ་ན། གང་རང་གི་ལུས་ཉིད་ལ་མཆོག་ཏུ་འཛིན་ཅིང་འདུག་པའོ། །ཕུག་ལྟ་བུའི་སེམས་གང་ཞེ་ན། གང་སྔར་ངེས་པར་གྱུར་ལ་ཕྱིས་དེ་ཉིད་ཀྱིས་འགྱུར་བར་སྟེན་པའོ། །དེ་ལ་སྐྱེ་བར་གྱུར་པའི་སེམས་གང་ཞེ་ན། གང་གི་སེམས་འདུ་བྱེད་གང་ཁོ་ན་དང་སྐྱེས་པ་དེ་ཁོ་ན་དང་ལྷན་ཅིག་ཏུ་འགྲོ་བའོ། །གསང་བ་པའི་བདག་པོ་དེ་ལྟར་ན་གཅིག་གཉིས་གསུམ་བཞི་ལྔ་གཉིས་སུ་བསྒྱུར་བ་བྱས་པས། འཇིག་རྟེན་པའི་སེམས་བརྒྱ་དྲུག་ཅུ་བསྐལ་པ་གསུམ་གྱིས་འདས་ནས། འཇིག་རྟེན་ལས་འདས་པའི་སེམས་སྐྱེ་སྟེ། འདི་ལྟ་སྟེ། འདི་ནི་ཕུང་པོ་ཙམ་ཉིད་དེ། །བདག་ནི་ནམ་ཡང་ཡོད་མ་ཡིན། །དབང་པོའི་གྲོང་ཁྱེར་ཁམས་རྣམས་ཀྱིས། །འཇིག་རྟེན་དོན་མེད་རྣམ་པར་ཉམས། །ཡན་ལག་བཅུ་གཉིས་རྟེན་འབྲེལ་འདི། །ཉོན་མོངས་ལས་ཀྱིས་ཀུན་ནས་བསླང་། །མ་རིག་ས་བོན་ལས་བྱུང་བ། །བྱེད་པོ་ལ་སོགས་རྣམ་པར་སྤངས། །དེ་ལྟར་ཞི་ཞིང་ཤིན་ཏུ་ཟབ། །རྟོག་གེ་ཀུན་གྱིས་ཤེས་པར་དཀའ། །ཉེས་པ་ཐམས་ཅད་རྣམ་སྤངས་པ། །སངས་རྒྱས་རྣམས་ཀྱིས་སྔོན་བསྟན་པའོ། །གསང་བ་པའི་བདག་པོ་དེ་ལ་འཇིག་རྟེན་ལས་འདས་པའི་སེམས་ལ་གནས་པ་རྣམས་ལ་ཡང་ཕུང་པོ་ལ་ཡོད་དོ་སྙམ་པའི་བློ་ཉེ་བར་

སྐྱེའོ། །ནམ་ཕུང་པོ་དག་ལ་འདོད་ཆགས་དང་བྲལ་བར་སྐྱེད་པ་དེའི་ཚེ་ལྦུ་བ་དང་། ཆུའི་ཆུ་བུར་དང་། སྒྱུ་མ་དང་། སྨིག་རྒྱུ་དང་མཚུངས་པར་འཇིག་པས་རྣམ་པར་གྲོལ་བར་འགྱུར་ཏེ། འདི་ལྟ་སྟེ། ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ། ཆོས་ཉིད་ཀྱི་རང་གི་ངོ་བོ་ཞི་བའི་དབྱིངས་རྟོགས་པར་འགྱུར་རོ། །གསང་བ་པའི་བདག་པོ་འཇིག་རྟེན་ལས་འདས་པའི་སེམས་ཕྱིན་ཅི་ལོག་དང་། ཕྱིན་ཅི་མ་ལོག་པའི་སེམས་ཀྱི་ཁྱད་པར་བརྒྱད་དང་འབྲེལ་པ། ལས་དང་ཉོན་མོངས་པའི་དྲ་བ་དང་བྲལ་བ་འདི་ནི་རྣལ་འབྱོར་པ་དག་བསྐལ་པ་གཅིག་གིས་འདའ་བར་བྱེད་དོ། །གསང་བ་པའི་བདག་པོ་གཞན་ཡང་ཐེག་པ་ཆེན་པོས་བགྲོད་པ་གཞན་གྱི་དྲིང་མི་འཇོག་པ་རྣམས་ལ་ཆོས་ལ་བདག་མེད་པའི་སེམས་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་སྔོན་སྤྱད་པ་སྤྱོད་ཅིང་ཕུང་པོའི་གནས་རྣམ་པར་འཇིག་པ་ན་ངོ་བོ་ཉིད་ཡོངས་སུ་ཤེས་པའི་ཕྱིར་སྒྱུ་མ་དང་། སྨིག་རྒྱུ་དང་། གཟུགས་བརྙན་དང་། བྲག་ཅ་དང་། མགལ་མེའི་འཁོར་ལོ་དང་། དྲི་ཟའི་གྲོང་ཁྱེར་ལྟ་བུའི་འདུ་ཤེས་སྐྱེས་སོ། །གསང་བ་པའི་བདག་པོ་དེའི་ཕྱིར་དེ་དག་གི་སེམས་ཀྱི་དབང་དུ་བྱས་པས་ཆོས་ལ་བདག་མེད་པ་ཉིད་ཀྱང་སྤང་བར་བྱ་སྟེ། རང་གི་སེམས་ནི་གཟོད་མ་ནས་མ་སྐྱེས་པའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་ངོ་བོ་ཉིད་ཡོངས་སུ་ཤེས་པའི་ཕྱིར་སེམས་ལ་སྔོན་གྱི་མཐའ་དང་། ཕྱི་མའི་མཐའ་མི་དམིགས་ཏེ། རྣལ་འབྱོར་པ་དག་འདི་ཡང་བསྐལ་པ་གཉིས་ཀྱིས་འདའ་བར་བྱེད་དོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པར་བསོད་ནམས་དང་ཡེ་ཤེས་ཀྱི་ཚོགས་དཔག་ཏུ་མེད་པ་བསགས་པ་རྣམས་ལ་ཤེས་རབ་དང་ཐབས་དཔག་ཏུ་མེད་པས་ཡོངས་སུ་བཟུང་བ། ལྷ་དང་ལྷ་མ་ཡིན་དུ་བཅས་པའི་འཇིག་རྟེན་གྱིས་ཕྱག་བྱས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་ལས་ཡང་དག་པར་འདས་པ། བརྒྱ་བྱིན་དང་། ཚངས་པའི་དབང་པོ་དང་། ཉེ་

དབང་ལ་སོགས་པས་ཕྱག་བྱས་པ་འདི་ལྟ་སྟེ། སྟོང་པ་ཉིད་ཀྱི་ངོ་བོ་ཉིད་རྫས་མེད་པ། མཚན་ཉིད་མེད་པ། མཚན་མ་མེད་པ། སྤྲོས་པ་ཐམས་ཅད་ལས་འདས་པ། ནམ་མཁའ་ལྟར་དཔག་ཏུ་མེད་པ། ཆོས་ཐམས་ཅད་ཀྱི་གོ་སྐབས་སུ་གྱུར་པ། འདུས་བྱས་དང་འདུས་མ་བྱས་ཀྱི་ཁམས་དང་བྲལ་བ། ལས་དང་བྱ་བ་མེད་པ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་བྲལ་བ་ཤིན་ཏུ་ངོ་བོ་ཉིད་མེད་པའི་སེམས་སྐྱེ་སྟེ། གསང་བ་པའི་བདག་པོ་འདི་ནི་བྱང་ཆུབ་ཀྱི་སེམས་དང་པོ་ཞེས་རྒྱལ་བ་རྣམས་ཀྱིས་གསུངས་སོ། ། དེ་དག་ཉོན་མོངས་ལས་ལས་གྲོལ། །ལས་དང་ཉོན་མོངས་ལྡན་པའང་ཡིན། །དེ་དག་འཇིག་རྟེན་སྦྱིན་གནས་ཏེ། །དེ་དག་རྟག་མཆོད་རི་མོར་བྱ། །གསང་བ་པའི་བདག་པོ་གཞན་ཡང་། མོས་པ་ཡིས་ནི་སྤྱོད་པའི་ས། །སེམས་གསུམ་རྣམ་པར་སྒོམ་པ་སྟེ། །ཕ་རོལ་ཕྱིན་རྣམས་སྤྱོད་པ་དང་། །བསྡུ་བ་དག་ནི་བཞི་པོ་ཡིས། །མོས་པའི་ས་ནི་མཚུངས་པ་མེད། །དཔག་ཏུ་མེད་ཅིང་བསམ་མི་ཁྱབ། །དཔག་མེད་ཡེ་ཤེས་འབྱུང་བ་ནི། །སེམས་བཅུ་དག་གིས་འཐོབ་པར་འགྱུར། །ངས་གང་ཅུང་ཟད་བརྗོད་པ་ནི། །ཐམས་ཅད་འདི་ཡིས་འཐོབ་པར་འགྱུར། །དེ་ཕྱིར་ཐམས་ཅད་མཁྱེན་པ་ཡིས། །མོས་པ་ཞེས་ནི་བྱ་བར་བཤད། །བློ་ལྡན་བསྐལ་པ་གཅིག་གིས་ནི། །ས་ལས་ཡང་དག་འདའ་བར་འགྱུར། །འདི་ཡི་ཡང་ནི་བཞི་ཆ་ཡིས། །མོས་པ་ལས་ཀྱང་འདའ་བར་འགྱུར། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །མགོན་པོ་ཁྱབ་བདག་ཁྱོད་ཀྱིས་ནི། །སེམས་ཀྱི་མཚན་ཉིད་བསྟན་ལགས་ན། །དབུགས་འབྱིན་རྣམ་པ་དུ་ཐོབ་ནས། །མཆོག་སྐྱེས་དེ་དག་དབུགས་ཕྱིན་འགྱུར། །དེ་སྐད་གསོལ་ནས་བཅོམ་ལྡན་འདས། །རྣམ་པར་སྣང་མཛད་ཆེན་པོ་ཡིས། །དེ་ཚེ་ཕྱག་ན་རྡོ་རྗེ་ལ། །ཡིད་བསྡུས་འདི་ནི་ཉོན་ཅེས་གསུངས། །གསང་བ་པའི་བདག་པོ་དེ་ལ་ནམ་བྱིས་པ་སོ་སོའི་སྐྱེ་བོ་དག་མི་དགེ་བའི་ལས་སྤངས་ཏེ་དགེ་བའི་ལས་བྱེད་པ་དེའི་ཚེ་དགེ་བས་དབུགས་ཕྱིན་པ་ཡིན་ནོ། །ནམ་བདག་གི་དེ་ཁོ་ན་ཉིད་

ཡང་དག་པ་ཅི་ལྟ་བ་བཞིན་དུ་རབ་ཏུ་ཤེས་པ་དེའི་ཚེ་བདག་ལ་བརྟེན་ནས་དབུགས་ཕྱིན་པ་ཡིན་ནོ། །ནམ་ཕུང་པོ་ཡོངས་སུ་གཟུང་བ་བྱས་ཏེ་རང་གི་ངོ་བོ་ཉིད་ལ་རྣམ་པར་དཔྱད་ནས་བདག་ལ་བརྟེན་པ་ཡོངས་སུ་གཏོང་བ་དེའི་ཚེ་བདག་མེད་པས་དབུགས་ཕྱིན་པ་ཡིན་ནོ། ། ནམ་ཕུང་པོ་རྣམས་སྤངས་ནས་ཆོས་ཀྱི་དམིགས་པ་ལ་གནས་པ་དེའི་ཚེ་ཆོས་ཀྱི་དབུགས་ཕྱིན་པ་ཡིན་ནོ། །ནམ་ཆོས་རྣམས་སྤངས་ནས་མི་སྐྱེ་བ་ལ་གནས་པ་དེའི་ཚེ་ཆོས་ལ་བདག་མེད་པས་དབུགས་ཕྱིན་པ་ཡིན་ནོ། །ནམ་ཕུང་པོ་དང་། ཁམས་དང་། སྐྱེ་མཆེད་ཐམས་ཅད་དང་། གཟུང་བ་དང་། འཛིན་པ་དང་། བདག་དང་སྲོག་ལ་སོགས་པ་དང་། ཆོས་དང་མི་སྐྱེ་བདག་ཀྱང་སྟོང་པ་ཉིད་ཀྱི་ངོ་བོ་ཉིད་དུ་ཡང་ངོ་བོ་ཉིད་མེད་དོ་ཞེས་སྟོང་པའི་ཡེ་ཤེས་སྐྱེས་པ་དེའི་ཚེ་ཆོས་ཐམས་ཅད་ཀྱི་ངོ་བོ་ཉིད་མཉམ་པ་ཉིད་ཀྱིས་དབུགས་ཕྱིན་པ་ཡིན་ནོ། །གསང་བ་པའི་བདག་པོ་དེའི་ཚེ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་བཞི་བཅུས་རྟེན་ཅིང་འབྲེལ་པར་འབྱུང་བ་རྣམས་བསྒོམས་ཏེ་གསང་སྔགས་ཀྱི་ཚུལ་རྟོགས་པར་ཁོང་དུ་ཆུད་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། སྒྱུ་མ་དང་། སྨིག་རྒྱུ་དང་། རྨི་ལམ་དང་། གཟུགས་བརྙན་དང་། དྲི་ཟའི་གྲོང་ཁྱེར་དང་། བྲག་ཅ་དང་། ཆུ་ཟླ་དང་། ཆུའི་ཆུ་བུར་དང་། འཁྲུལ་པ་དང་། མགལ་མེའི་འཁོར་ལོ་ལྟ་བུར་རྣམ་པར་བསྒོམ་མོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་འདི་ལྟར་སོ་སོར་བརྟག་པར་བྱ་སྟེ། དེ་ལ་སྒྱུ་མ་གང་ཞེ་ན། འདི་ལྟ་སྟེ། སྨན་དང་སྔགས་ཀྱི་སྦྱོར་བ་བྱེད་པ་དག་གི་སྦྱོར་བ་ལས་དངོས་པོ་རྣམ་པ་ཐ་དད་པ་སྣ་ཚོགས་མིག་དང་ཡིད་འཕྲོག་པ་སྔོན་མ་མཐོང་བ་དག་ཀྱང་སྟོན་ཏེ། དེ་དག་ནི་ཕན་ཚུན་ཕྱོགས་བཅུར་འགྲོ་བ་དང་འོང་བ་མེད་དོ། །དེ་ཅིའི་ཕྱིར་ཞེ་ན། སྒྱུ་མ་ནི་རང་བཞིན་གྱིས་སྟོང་པའི་ཕྱིར་ཏེ། དེ་བཞིན་དུ་གསང་སྔགས་སྦྱོར་བར་བྱེད་པ་དག་གི་སྦྱོར་བ་ལས་ཐམས་ཅད་འབྱུང་ངོ་། །གསང་བ་པའི་བདག་པོ་གཞན་ཡང་སྨིག་རྒྱུ་ནི་རང་བཞིན་གྱིས་སྟོང་པ་སྟེ། དེ་ཡང་འདུ་ཤེས་ཀྱི་

ཐ་སྙད་དུ་འདོགས་ཤིང་ཐ་སྙད་ཀྱང་སྒྲུབ་པར་བྱེད་དོ། །དེ་བཞིན་དུ་འདུ་ཤེས་འདི་ཡང་གསང་སྔགས་སོ་ཞེས་ཐ་སྙད་དུ་འདོགས་ཤིང་ཐ་སྙད་ཀྱང་སྒྲུབ་པར་བྱེད་དོ། །གསང་བ་པའི་བདག་པོ་གཞན་ཡང་རྨི་ལམ་ན་བདག་ཉིད་ཉིན་གཅིག་དང་། སྐད་ཅིག་དང་། ཡུད་ཙམ་དང་། ལོ་ལ་སོགས་པར་འདུག་ཅིང་བདེ་བ་དང་སྡུག་བསྔལ་རྣམ་པ་མང་པོ་མྱོང་བར་མཐོང་ལ། སད་ན་ཅི་ཡང་མི་མཐོང་བ་དེ་བཞིན་དུ་གསང་སྔགས་ཀྱི་ཚུལ་འདི་ཡང་རྨི་ལམ་ལྟ་བུར་ཁོང་དུ་ཆུད་པར་བྱའོ། །གསང་བ་པའི་བདག་པོ་གཞན་ཡང་གསང་སྔགས་ཀྱི་དངོས་གྲུབ་འབྱུང་བ་ནི་གཟུགས་བརྙན་ལྟ་བུར་རིག་པར་བྱ་སྟེ། དཔེར་ན་གདོང་དང་མེ་ལོང་ལ་བརྟེན་ནས་བཞིན་གྱི་གཟུགས་བརྙན་འབྱུང་བ་ལྟར། གསང་སྔགས་ཀྱི་དངོས་གྲུབ་ཀྱང་དེ་དང་འདྲ་བར་རིག་པར་བྱའོ། །གསང་བ་པའི་བདག་པོ་གཞན་ཡང་གྲུབ་པའི་གནས་ནི། དྲི་ཟའི་གྲོང་ཁྱེར་ལྟ་བུར་བལྟའོ། །གསང་བ་པའི་བདག་པོ་གཞན་ཡང་གསང་སྔགས་ཀྱི་སྒྲ་ནི་བྲག་ཅ་ལྟ་བུར་རིག་པར་བྱ་སྟེ། དཔེར་ན་སྒྲ་ལ་བརྟེན་ནས་བྲག་ཅ་འབྱུང་བ་ལྟར་གསང་སྔགས་ཀྱི་ཚུལ་འདི་ཡང་དེ་དང་འདྲ་བར་རིག་པར་བྱའོ། །གསང་བ་པའི་བདག་པོ་གཞན་ཡང་ཟླ་བ་ཤར་ན་ཆུའི་ནང་དུ་གཟུགས་བརྙན་མཐོང་ནས་ཆུ་ཟླ་ཞེས་བརྗོད་པ་དེ་བཞིན་དུ་སྔགས་པ་དེ་ཉིད་ཀྱང་ཆུ་ཟླ་བཞིན་དུ་རིག་སྔགས་འཆང་ཞེས་བརྗོད་དོ། །གསང་བ་པའི་བདག་པོ་གཞན་ཡང་། ཅི་ལྟར་ཆར་པ་བབ་པ་ན། ཆུ་ཡི་ཆུ་བུར་རྣམས་འབྱུང་བ། །དེ་བཞིན་གསང་སྔགས་གྲུབ་པ་ཡི། །སྤྲུལ་པ་རྣམ་པ་སྣ་ཚོགས་འདོད། །གསང་བ་པའི་བདག་པོ་གཞན་ཡང་། །སེམས་ཅན་མེད་ཅིང་སྲོག་དང་ནི། །བྱེད་པ་པོ་ཡང་མེད་པ་སྟེ། །དངོས་པོ་ཐམས་ཅད་སྟོང་པ་ལ། །འཁྲུལ་པ་ཁོ་ན་སྣང་བར་ཟད། །གསང་བ་པའི་བདག་པོ་གཞན་ཡང་། ཅི་ལྟར་འགའ་ཞིག་བདག་ཉིད་ཀྱི། །ལག་ན་མགལ་མེ་ཐོགས་ནས་ནི། །བསྐོར་ན་འཁོར་ལོ་ལྟར་སྣང་བ། །དེ་བཞིན་སྟོང་པ་དག་ལས་འབྱུང་། །གསང་བ་པའི་བདག་པོ། འདི་ནི་ཐེག་པ་ཆེན་པོའི་གཞི། མི་མཉམ་པ་དང་མཉམ་པའི་གཞི། ངེས་པའི་གཞི། ཡང་དག་པར་རྫོགས་པའི་སངས་རྒྱས་ཀྱི་གཞི།

མཐར་གྱིས་ཐེག་པ་ཆེན་པོ་ལ་འཛེག་པའི་གཞི་སྟེ། ཡེ་ཤེས་སྣ་ཚོགས་ཆེར་འབྱུང་བ། །ནོར་གྱི་དབྱིག་འདི་ཤེས་ན་ནི། །ཀུན་གྱི་སེམས་ཀྱི་བྱེ་བྲག་ཀྱང་། །ཅི་བཞིན་ཡང་དག་རབ་ཏུ་ཤེས། །བཅོམ་ལྡན་འདས་རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། སེམས་ཀྱི་ཁྱད་པར་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཉིད་ཀྱིས་མངོན་པར་རྫོགས་པར་སངས་རྒྱས་པའི་ཆོས་ཀྱི་དབྱིངས་བསམ་གྱིས་མི་ཁྱབ་པ། སེམས་ཀྱིས་ལས་ཡང་དག་པར་འདས་པ། བཅོམ་ལྡན་འདས་ཀྱིས་ཐབས་དང་ཚུལ་སྣ་ཚོགས་དག་གིས་བསམ་པ་དང་མོས་པ་ཅི་ལྟ་བ་བཞིན་དུ་སེམས་ཅན་རྣམས་ལ་བསྟན་པ་དེ་ནི་ངོ་མཚར་ཆེ་ལགས་སོ། །བཅོམ་ལྡན་འདས་ཡང་གསང་སྔགས་སྤྱོད་པའི་ཚུལ་སྙིང་རྗེ་ཆེན་པོའི་སྙིང་པོ་འབྱུང་བ་དཀྱིལ་འཁོར་གྱི་རྒྱལ་པོ་ཆེན་པོ་ཡོངས་སུ་རྫོགས་པར་བགྱི་བ་བཤད་དུ་གསོལ། དེ་ནི་མ་འོངས་པའི་དུས་ན་སེམས་ཅན་མང་པོ་དག་གི་དོན་དང་ཕན་པ་དང་བདེ་བར་འགྱུར་ལགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དཀྱིལ་འཁོར་སྤྱོད་པའི་ཚུལ་བསྟན་པའི་ཆོས་ཀྱི་རྣམ་གྲངས། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པ་ཉོན་ཅིག །དེ་ནས་བཅོམ་ལྡན་འདས་རྣམ་པར་སྣང་མཛད་ཆོས་ཀྱི་དབྱིངས་ཀྱི་དགོངས་པ་མ་རྫོགས་ཤིང་། སེམས་ཅན་གྱི་ཁམས་མ་ལུས་པ་བསྒྲལ་བར་དམ་བཅའ་བ་མཛད་པས། དེ་བཞིན་གཤེགས་པས་ཐམས་ཅད་དང་ཐབས་ཅིག་ཡང་དག་པར་མོལ་ནས་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་སྐུའི་ཡན་ལག་ཐམས་ཅད་ནས་དེ་བཞིན་གཤེགས་པའི་སྐུས་སེམས་དང་པོ་བསྐྱེད་པ་ནས་བཟུང་སྟེ། ས་བཅུ་པའི་བར་དུ་སེམས་ཅན་ལ་ཕན་

པའི་དོན་མཛད་པ་རྣམས་བྱུང་ངོ་། །བྱུང་ནས་ཀྱང་ཕྱོགས་བཅུ་ཀུན་ཏུ་བསྐོར་ཏེ་སླར་ལོག་ནས་བཅོམ་ལྡན་འདས་ཀྱི་སྐུའི་ནང་རང་གི་གནས་སུ་ཞུགས་སོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དཀྱིལ་འཁོར་རྣམ་པར་དགོད་པ་ཉོན་ཅིག །རེ་ཞིག་དང་པོར་སློབ་དཔོན་ཡིད་བྱང་ཆུབ་ཀྱི་སེམས་ལ་ཞུགས་པ། ཤེས་རབ་དང་ལྡན་པ། བརྟན་པ་སྙིང་རྗེ་ཅན། སྒྱུ་རྩལ་དག་ལ་མཁས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་རྟག་ཏུ་མཁས་པ། ཐེག་པ་གསུམ་གྱི་ཁྱད་པར་ཤེས་པ། གསང་སྔགས་ཀྱི་དེ་ཁོ་ན་ཉིད་ཀྱི་དོན་ལ་མཁས་པ། བསམ་པ་ཤེས་པ། སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པ་དཀྱིལ་འཁོར་བྲི་བའི་ལས་བྱེད་པར་གནང་ཞིང་དབང་བསྐུར་བ། རིགས་བཙུན་གསང་སྔགས་སྤྱོད་པ་ལ། །མངོན་པར་བརྩོན་ཞིང་གཏན་ལ་ཕབ། །སྦྱོར་ལ་མཁས་ཤིང་ཟུང་ཐུབ་ལ། །བྱང་ཆུབ་སེམས་ལ་རྣམ་པར་གནས། །གསང་བ་པའི་བདག་པོ་སློབ་དཔོན་དེ་ལྟ་བུ་ནི་རྒྱལ་བའི་སྲས་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རབ་ཏུ་བསྔགས་སོ། །གསང་བ་པའི་བདག་པོ་དེ་ལ་སློབ་དཔོན་ལ་གཞན་གྱིས་གསོལ་བ་བཏབ་ཀྱང་རུང་། ཡང་ན་བདག་གིས་སེམས་ཅན་དག །སྣོད་དུ་རུང་ཞིང་ཉེས་བྲལ་བ། །མོས་མང་བརྟན་ལ་དད་པ་ཅན། །གཞན་ལ་ཕན་དགའ་མཐོང་ནས་ནི། །དེ་ལྟ་བུ་ཡི་སློབ་མ་དེ། །ཤེས་ནས་སློབ་དཔོན་བདག་ཉིད་ཀྱིས། །མ་གསོལ་བར་ནི་དེ་བོས་ཏེ། །ཕན་འདོད་ཕྱིར་ནི་འདི་སྐད་བྱ། །ཁྱོད་ནི་ཚུལ་ཆེན་སྣོད་ཡིན་གྱིས། །བུ་ཚུར་ཐེག་པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་བཞུགས་པ་དག །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་

སྦྱོར་བ་མཉམ་མེད་དེ། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །སྙིང་རྗེ་གྱུར་པའི་ཡིད་ཀྱིས་ནི། །དེ་ལྟར་ལན་མང་གཟེངས་བསྟོད་དེ། །སློབ་མ་དེ་བརྟན་ཤེས་ནས་ནི། །ས་གཞི་ལེགས་པར་ཡོངས་བརྟག་བྱ། །མེ་ཏོག་འབྲས་བུ་ལྡན་པའི་རི། །གཙང་ཞིང་ཡིད་འོང་ཆུ་ཡི་གནས། །དེ་དག་དཀྱིལ་འཁོར་བྲི་བ་ཡི། །ལས་ལ་སངས་རྒྱས་ཀུན་གྱིས་བསྔགས། །གང་ན་འབབ་ཆུ་མང་པོ་དག ། ངང་པ་བཞད་ཀྱིས་བརྒྱན་ཡོད་པ། །དེར་ནི་སྔགས་པ་བློ་ཅན་གྱིས། །སྙིང་རྗེ་འབྱུང་བའི་དཀྱིལ་འཁོར་བྲི། །སངས་རྒྱས་རྣམས་དང་རང་མགོན་དང་། །དེ་བཞིན་རྒྱལ་བའི་ཉན་ཐོས་ཀྱིས། །ས་ཕྱོགས་གང་དག་བསྙེན་པ་ནི། །དེ་དག་ཐུབ་པས་རྟག་ཏུ་བསྔགས། །ཕྱོགས་གཞན་རྣམ་པ་སྣ་ཚོགས་པ། །ལྷ་ཁང་ཀུན་དགའ་བཟང་པོ་དང་། །ཁྱིམ་དང་ཡང་ཐོག་ཉམས་དགའ་དང་། །མཚེའུ་དང་སྐྱེད་མོས་ཚལ་མཛེས་དང་། །མཆོད་རྟེན་གྲ་གང་བ་ལང་ལྷས། །འབབ་ཆུ་འདུས་པའི་མདོ་དག་དང་། །ལྷ་ཡི་གནས་རྣམས་ཐམས་ཅད་དང་། ། དེ་བཞིན་ཁང་པ་སྟོང་པར་ཡང་། །སློབ་མ་དག་ལ་ཕན་འདོད་ཕྱིར། །ནན་ཏན་དུ་ནི་དཀྱིལ་འཁོར་བྲི། །ཡང་ན་ཡིད་དུ་འོང་བའི་ས། །གང་ཡང་རུང་བར་བྲི་བར་བྱ། །གསང་བ་པའི་བདག་པོ་དེ་ལ་ས་གཞི་ཡོངས་སུ་སྤྱད་པར་བྱ་བ་ནི། རྡོ་དང་། བོང་པ་དང་། གྱོ་མོ་དང་། གསེག་མ་མེད་ཅིང་སྐྲ་དང་། ཕུབ་མ་དང་། སོལ་བ་དང་། ཐལ་བ་དང་། ཚེར་མ་དང་། རུས་པ་དང་། སྡོང་དུམ་དང་། ཟུག་རྔུ་བསལ་བ། གྲོག་སྦུར་དང་། སྲིན་བུ་དང་། སྲོག་ཆགས་མེད་ཅིང་ཉེས་པ་ཐམས་ཅད་སྤངས་པའི་གནས་ནི་ལྷ་རྣམས་ལ་རབ་ཏུ་ཤིས་སོ། ། དེ་ལ་ཚེས་གྲངས་དང་། རྒྱུ་སྐར་དང་། གཟའ་དང་། བྱེད་པ་དང་། ཡུད་ཙམ་བཟང་པོའི་མཚན་མ་དང་ལྡན་པའི་ཉི་མ་ལ་སྔ་དྲོའི་དུས་ཀྱི་ཚེ་ལྟས་བཟང་པོས་མཚོན་པ་ལ་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། སའི་ལྷ་མོ་ལ་སྦྲན་པའི་ཚིགས་སུ་བཅད་པ་གཉིས་བསྒྲག་

པར་བྱའོ། །སངས་རྒྱས་སྐྱོབ་པ་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་གྱི། །ས་དང་ཕ་རོལ་ཕྱིན་དག་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ལས་ནི། །རྒྱལ་བར་བྱ་སྟེ་དཀྱིལ་འཁོར་བྲི། །ས་ལ་ལག་པས་རེག་བྱས་ཤིང་། །དེ་ལྟར་ལན་མང་སྦྲན་ནས་ནི། །པུས་མོ་གཉིས་ནི་སར་བཙུགས་ནས། །མེ་ཏོག་སྤོས་ཀྱིས་མཆོད་པ་བྱ། །མཆོད་ནས་སྔགས་པས་དེ་ནས་ནི། །དེ་བཞིན་གཤེགས་ལ་ཕྱག་འཚལ་ཏེ། །དེ་ནས་ཆོ་ག་འདི་དག་གིས། ། མཁས་པས་ས་གཞི་སྦྱང་བར་བྱ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་མཚན་མ་མི་མངའ་སྟེ། །ཆོས་ཀྱི་སྐུ་ལ་རྣམ་པར་བཞུགས། །མཚན་མེད་འདུས་མ་བྱས་པ་ཡི། །མཚུངས་པ་མེད་པའི་ཆོས་སྟོན་ན། །དཔའ་བོ་ཆེན་པོ་ཅི་སླད་དུ། །མཚན་མར་བཅས་པའི་ཆོ་ག་འདི། །གསང་སྔགས་སྤྱད་པ་བསྟན་པར་མཛད། །འདི་ནི་ཆོས་ཉིད་ཚུལ་མ་ལགས། །དེ་སྐད་གསོལ་ནས་བཅོམ་ལྡན་འདས། །རྣམ་པར་སྣང་མཛད་ཆེན་པོ་ཡིས། །དེ་ཚེ་ཕྱག་ན་རྡོ་རྗེ་ལ། །ཆོས་ཀྱི་མཚན་ཉིད་འདི་ཉོན་གསུངས། །ཆོས་ནི་རྟོག་དང་བྲལ་བ་སྟེ། །ཀུན་རྟོག་ཐམས་ཅད་སྤངས་པ་ཡིན། །དེ་ལ་སེམས་དང་སེམས་བྱུང་གི། །རྟོག་པ་རབ་ཏུ་སྤོང་བར་འགྱུར། །ང་ཡིས་ཆོས་མངོན་སངས་རྒྱས་པ། །དེ་ནི་མཁའ་ལས་བྱུང་བ་སྟེ། །ལོག་པར་རྟོག་པའི་སྤྱོད་ཡུལ་བ། །བྱིས་པ་རྣམས་ཀྱིས་མི་ཤེས་སོ། །ཡུལ་དུས་མཚན་མ་ལ་སོགས་པ། །མུན་གྱིས་བསྒྲིབས་པ་རྣམས་འདོད་དེ། །དེ་དག་གཟུང་བར་བྱ་བའི་ཕྱིར། །ཆོ་ག་འདི་ཡང་བརྗོད་པ་ཡིན། །ཡུལ་མེད་དུས་ཀྱང་མེད་པ་སྟེ། །བྱ་བ་མེད་ཅིང་བྱེད་པ་ཡང་། ། ཆོས་རྣམས་ཀུན་ལ་ཡོང་མེད་དེ། །ཆོས་རྣམས་ཉི་ཚེ་འབའ་ཞིག་གོ། །གསང་བའི་བདག་པོ་འོན་ཀྱང་ནི། །སེམས་ཅན་དག་ནི་བློ་ཞན་ཅིང་། །བྱ་བ་ཙམ་གྱིས་རྨོངས་པ་དག །དངོས་པོའི་དོན་ལ་ཆགས་པ་རྣམས། །མ་འོངས་དུས་ན་འབྱུང་བར་འགྱུར། །འདི་ལྟའི་ཚུལ་

ནི་མི་ཤེས་པས། །ཡུལ་དང་དུས་དང་བྱ་བ་ལས། །དགེ་དང་མི་དགེའི་མཚན་མ་ཡིས། །རྨོངས་པ་འབྲས་བུ་འདོད་བྱེད་དེ། །སེམས་དཔའ་ཆེན་པོ་དེ་དག་ཕྱིར། །ཆོ་ག་འདི་ནི་བརྗོད་པ་ཡིན། །གསང་བ་པའི་བདག་པོ་དེ་ལ་ཅི་སྐད་བསྟན་པའི་གནས་གང་ཡང་རུང་བར་ས་གཞི་རབ་ཏུ་འཐས་པར་བཅགས་ཏེ། བའི་ལྕི་བ་ས་ལ་མ་ལྷུང་བ་དང་བའི་གཅིན་དུ་བསྲེས་པས་བྱུག་གོ། །དེ་ནས་སྔགས་འདིས་བསང་གཏོར་བྱས་ཏེ་བསྔགས་སོ། །ན་མཿས་མནྟ་བུདྡྷཱ་ནཱཾ། ཨ་པྲ་ཏི་ས་མེ། ག་ག་ན། ས་མ་ཏཱ་ནུ་ག་ཏེ། པྲ་ཀྲྀ་ཏི། བི་ཤུདྡྷེ། དྷརྨྨ་དྷཱ་ཏུ་བི་ཤོ་དྷ་ནི་སྭཱཧཱ། དེ་ཡི་འོག་ཏུ་སྔགས་པ་ནི། །ལངས་ནས་དེ་ཡི་དབུས་སུ་ང་། །པདྨ་དཀར་པོའི་གདན་ལ་བཞུགས། །ཐོར་ཚུགས་དང་ནི་དབུ་རྒྱན་འཆང་། །འོད་ཟེར་ཁ་དོག་སྣ་ཚོགས་པས། །ཀུན་ནས་ཡོངས་སུ་བསྐོར་བར་བསམ། །དེ་ནས་རྫོགས་པའི་སངས་རྒྱས་བཞི། །བློ་དང་ལྡན་པས་ཕྱོགས་སུ་བསམ། །དེ་བཞིན་གཤེགས་པ་རིན་ཆེན་ཏོག །ཉི་མ་འཆར་ཀ་ལྟ་བུར་བསམ། །ལྷོ་རུ་རྒྱལ་བ་དཔའ་བོ་ནི། །མེ་ཏོག་ཀུན་རྒྱས་ཞེས་བྱ་བ། །གསེར་གྱི་ཁ་དོག་འབར་བར་བཅས། །ཉེས་པ་བཅོམ་པ་ཏིང་འཛིན་གནས། །བྱང་ཕྱོགས་སུ་ནི་མི་འཁྲུགས་པ། །ནད་དང་བྲལ་བ་ཏིང་འཛིན་གནས། །ནུབ་ཕྱོགས་འོད་དཔག་མེད་པ་སྟེ། །རྒྱལ་བ་ལྔ་པོ་འདི་རྣམས་ནི། །བསམས་ཏེ་དེ་ནས་སྔགས་པ་ཡིས། །རྒྱལ་བའི་གནས་དབུས་འདུག་ནས་སུ། །མི་གཡོ་བདག་ཉིད་ཆེན་པོའམ། །ཡང་ན་འཇིག་རྟེན་གསུམ་རྒྱལ་གྱི། །གསང་སྔགས་དོན་ཀུན་སྒྲུབ་པ་ཡིས། །ས་ནི་ཡོངས་སུ་གཟུང་བར་བྱ། །དབུས་སུ་དཀྱིལ་འཁོར་བཟང་པོ་དག །ཙནྡན་དག་གིས་བྱ་བ་ནི། །དང་པོ་གཅིག་ནི་ང་ཡི་ཡིན། །གཉིས་པ་སྐྱོབ་པ་ཐམས་ཅད་ཀྱིའོ། །གསུམ་པ་དེ་དང་མཉམ་བྱ་བ། ། ཐེ་ཙོམ་མེད་པར་ཡུམ་གྱི་ཡིན། །བཞི་པ་ལག་ན་པདྨའི་སྟེ། །ལྔ་པ་ཕྱག་ན་རྡོ་རྗེའི་ཕྱིར། །དྲུག་པ་མི་གཡོ་མགོན་གྱི་སྟེ། །མ་ཟད་འོག་ཏུ་ལེགས་པར་བྱ། །དེ་བཞིན་གཤེགས་རྣམས་རྗེས་དྲན་ནས། །མེ་ཏོག་སྤོས་ལ་སོགས་ཕུལ་ཏེ། །མཉམ་པར་བཞག་ནས་གུས་

པ་རུ། །ཚིག་ཏུ་འདི་སྐད་སྨྲ་བར་བྱ། །མགོན་པོ་ཐུགས་རྗེའི་བདག་ཉིད་ཅན། །ཐམས་ཅད་བདག་ལ་དགོངས་སུ་གསོལ། །སྲས་བཅས་སང་གི་གདུགས་འདས་ནས། །ས་གཞི་ཡོངས་སུ་གཟུང་བ་མཛོད། །དེ་སྐད་ཀྱི་ནི་ཚིག་སྨྲས་ནས། །གསང་སྔགས་འདི་ནི་བརྗོད་པར་བྱ། །ན་མཿས་མནྟ་བུདྡྷཱ་ནཱྃ། སརྦྦ་ཏ་ཐཱ་ག་ཏཱ་དྷིཥྛཱ་ནཱ་དྷིཥྛ་ཏེ། ཨ་ཙ་ལེ། བི་མ་ལེ་སྨ་ར་ཎེ། པྲ་ཀྲྀ་ཏི་པ་རི་ཤུདྡྷེ་སྭཱ་ཧཱ། དེ་ནས་སྔགས་པ་ལངས་ནས་སུ། །སྙིང་རྗེར་གྱུར་པའི་ཡིད་ཀྱིས་ནི། །ནུབ་ཀྱི་ཕྱོགས་སུ་གནས་ནས་སུ། །ནང་གི་བདག་ཉིད་རྣམ་དག་པས། ། བྱང་ཆུབ་སེམས་ནི་སེམས་བྱེད་ཅིང་། །དེ་ཉིད་དུ་ནི་ཉལ་བར་བྱ། །དེ་ནས་སྔགས་པས་རྨི་ལམ་བལྟ། །བྱང་ཆུབ་སེམས་དཔའ་གྲགས་ཆེན་ནམ། །ཡང་ན་སངས་རྒྱས་བཅོམ་ལྡན་འདས། །སེམས་ཅན་རྣམས་ལ་ཕན་བྱའི་ཕྱིར། །དཀྱིལ་འཁོར་བྲི་བའི་ལས་རྣམས་ལ། །བདག་ཉིད་ཀུན་རྩོལ་འབད་པའམ། །བདག་ཉིད་ལ་ནི་འདི་སྐད་དུ། །སེམས་ཅན་ཆེན་པོ་བུ་ཁྱོད་ལེགས། །དཀྱིལ་འཁོར་མྱུར་དུ་བྲིས་ཤིག་ཅེས། །སྤྲོ་བ་བསྐྱེད་པ་མཐོང་ཡང་རུང་། །དེ་ནས་དེ་ཡི་ཕྱི་དེ་ཉིན། །སློབ་མ་དད་ཅིང་རིགས་བཙུན་པ། ། དེ་བཞིན་དཀོན་མཆོག་གསུམ་ལ་དད། །ཟབ་མོ་ཡི་ནི་བློ་དང་ལྡན། །སྤྲོ་བ་ཆེ་ཞིང་ཚུལ་ཁྲིམས་ལྡན། །བཟོད་དང་ལྡན་ཞིང་སེར་སྣ་མེད། །དཔའ་ལ་ཡི་དམ་བརྟན་པ་ནི། །བཅུའམ་བརྒྱད་དམ་བདུན་ནམ་ལྔ། །གཅིག་གཉིས་བཞི་ལས་ལྷག་ཀྱང་རུང་། ། དཔྱད་མི་དགོས་པར་གཟུང་བར་བྱ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཞུས་པ། བཅོམ་ལྡན་འདས་དཀྱིལ་འཁོར་འདིའི་མིང་ཅི་ལགས། ཅིའི་སླད་དུ་དཀྱིལ་འཁོར་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་དཀྱིལ་འཁོར་འདི་ནི་སངས་རྒྱས་འབྱུང་བ་སྟེ། དཀྱིལ་ནི་སྙིང་པོ་ཞེས་བྱའོ། །འཁོར་ནི་རྫོགས་པ་སྟེ། དེའི་གོང་ན་སྙིང་པོར་གྱུར་པ་གཞན་མེད་པས། དེ་བས་ན་དཀྱིལ་འཁོར་ཞེས་བྱའོ། །གསང་བ་པའི་བདག་པོ་འོན་ཀྱང་དཀྱིལ་འཁོར་རྒྱས་པ་འདི་ནི། སེམས་ཅན་གྱི་ཁམས་

མ་ངེས་པ་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་སྟེ། དེ་ནི་དེ་བཞིན་གཤེགས་པ་རྣམས་ཀྱིས་བསྐལ་པ་གྲངས་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་བྱིན་གྱིས་བརླབས་སོ། །གསང་བ་པའི་བདག་པོ་དེ་ལྟ་བས་ན་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་དེ་བཞིན་གཤེགས་པ་རྣམས་ནི་སེམས་ཅན་གཅིག་གི་ཕྱིར་བྱང་ཆུབ་མངོན་པར་རྫོགས་པར་འཚང་རྒྱ་བ་མ་ཡིན། གཉིས་ཀྱི་ཕྱིར་མ་ཡིན། གསུམ་གྱི་ཕྱིར་མ་ཡིན། འོན་ཀྱང་ཐུགས་རྗེ་ཆེན་པོའི་དབང་དུ་གྱུར་བ་དག་སེམས་ཅན་གྱི་ཁམས་མ་ལུས་པ་ཡོངས་སུ་བསྐྱབ་པའི་ཕྱིར་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ། དེ་དག་གིས་སེམས་ཅན་གྱི་ཁམས་རྣམ་པ་དུ་མ་ལ་བསམ་པ་ཇི་ལྟ་བ་བཞིན་དུ། སེམས་ཅན་རྣམས་ལ་ཆོས་འཆད་པར་རིག་པར་བྱའོ། །གསང་བ་པའི་བདག་པོ་ཐེག་པ་ཆེན་པོ་ལ་གོམས་པར་མ་བྱས་པ་རྣམས་ནི་གསང་སྔགས་སྤྱོད་པའི་ཚུལ་མཐོང་ངམ་ཐོས་ན་སེམས་ལ་དགའ་བའམ། དང་བ་ཅུང་ཟད་ཀྱང་ཡང་དག་པར་མི་སྐྱེ་ཡི། གསང་བ་པའི་བདག་པོ་གང་དག་གིས་སྔོན་ཐེག་པ་ཆེན་པོ་གསང་སྔགས་སྤྱད་པའི་ཚུལ་སྒོ་མཐའ་ཡས་སྒྲུབ་པ་ལ་གོམས་པར་བྱས་པ་དེ་དག་ནི་རྡོ་རྗེ་སེམས་དཔའ་ཡིན་ཏེ། དེ་རྣམས་ཉིད་ཀྱི་དོན་གྱི་ཕྱིར་གྲངས་ཀྱི་ཚད་འདི་བྱས་སོ། །འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པ་བསྒྲལ་བར་ཡི་དམ་བཅའ་བ་ཁོ་ནར་བྱ་སྟེ། དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་རྣམས་ཡོངས་སུ་གཟུང་བར་བྱའོ། །དེ་ནས་དེ་དག་བོས་ལ་གསུམ་ལ་སྐྱབས་སུ་གཏང་བར་ཡང་བྱའོ། །སྡིག་པ་མི་བྱ་བ་རྣམས་ཀྱང་བསྒོ་བར་བྱའོ། །དེ་ནས་དེ་དག་ལ་སྤོས་དང་མེ་ཏོག་ལ་སོགས་པ་སྦྱིན་ནོ། །དེ་དག་དུས་གསུམ་དུ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ཡང་འཛིན་དུ་གཞུག་གོ། །འཛིན་དུ་བཅུག་ནས་སྔགས་པ་ཡིས། །དེ་ནས་སོ་ཤིང་དག་ཀྱང་སྦྱིན། །རྩེ་གཅིག་མཉམ་པར་བཞག་པ་དག །ཤར་རམ་བྱང་དུ་ཁ་བསྟན་ཏེ། །ཨུ་དུམ་བཱ་ར་ཨ་

ཤྭཏྠ། །ཤིན་ཏུ་བཟང་པོ་བསྲུང་བྱས་ཤིང་། །མེ་ཏོག་དྲི་ལ་སོགས་བསྐུས་པའི། །སོ་ཤིང་དག་ནི་འཆར་གཞུག་གོ། །སེམས་ཅན་སྣོད་རུང་སྣོད་མི་རུང་། །བོར་བ་ཉིད་ལས་བརྟག་པར་བྱ། །དེ་ནས་ལག་པ་གཡོན་པ་ལ། །སྐུད་པ་མདུད་པ་གསུམ་ལྡན་པ། །བདག་ཉིད་མཉམ་པར་བཞག་པ་ཡིས། །ལེགས་པ་རུ་ནི་བཅིང་བར་བྱ། །དེ་ལྟར་ཡོངས་སུ་གཟུང་ལྡན་པའི། །སློབ་མ་ཉེས་པ་མེད་རྣམས་ལ། །བསམ་པ་བརྟན་པར་བྱ་བའི་ཕྱིར། །འདི་ལྟར་སྤྲོ་བ་བསྐྱེད་པར་བྱ། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་གཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །གལ་ཏེ་རྨི་ལམ་དག་ཏུ་ནི། །གཙུག་ལག་ཁང་དང་ཀུན་དགའ་བཟང། །ཁང་པ་བཟང་པོ་སྣ་ཚོགས་དང་། །དེ་བཞིན་དུ་ནི་ཡང་ཐོག་དང་། །རལ་གྲི་ཡིད་བཞིན་ནོར་བུ་དང་། །གདུགས་དང་མེ་ཏོག་སྣ་ཚོགས་དང་། །བུད་མེད་བཟང་མོ་གོས་དཀར་ཅན། །སྡུག་པའི་གཉེན་དང་བུ་དག་དང་། །གླེགས་བམ་དེ་བཞིན་བྲམ་ཟེ་དང་། །སངས་རྒྱས་དང་ནི་རང་སངས་རྒྱས། །དེ་བཞིན་རྒྱལ་བའི་ཉན་ཐོས་དང་། །བྱང་ཆུབ་སེམས་དཔའ་བདག་ཉིད་ཆེ། །གལ་ཏེ་འབྲས་བུ་ཐོབ་པ་དང་། །མཚོ་དང་རྒྱ་མཚོ་ལས་རྒལ་མཐོང་། །དེ་བཞིན་དུ་ནི་ནམ་མཁའ་ལས། །བཀྲ་ཤིས་ཡིད་དུ་འོང་བའི་ཚིག །འདོད་པའི་འབྲས་བུ་འབྱུང་བར་གྲག །དེ་ལ་སོགས་པའི་རྨི་ལམ་ནི། །བཟང་པོ་ཞེས་ནི་བྱ་བར་བརྟག །མཁས་པས་དེ་ལས་བཟློག་པ་ཡི། །རྨི་ལམ་ངན་པར་ཤེས་པར་བྱ། །བརྟུལ་ཞུགས་བཟང་པོ་ཁྱོད་རྣམས་ཀྱིས། །ནང་པར་ཐམས་ཅད་ང་ལ་ཟློས། །སློབ་མ་དེ་དག་རྣམས་ལ་ནི། །དེ་སྐད་བསྒོ་ནས་ཆོས་ཀྱང་བཤད། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི།

།དེ་བཞིན་གཤེགས་པ་རྣམས་སུ་འགྱུར། །ཡོད་དང་མེད་ལས་རྣམ་པར་འདས། །ནམ་མཁའ་བཞིན་དུ་དྲི་མ་མེད། །ཟབ་མོ་རྟོག་གེ་ཐམས་ཅད་ཀྱིས། །རབ་ཏུ་མི་རྟོགས་གནས་མེད་པ། །སྤྲོས་པ་ཀུན་དང་བྲལ་བ་སྟེ། །སྤྲོས་པ་རྣམས་ཀྱིས་རྣམ་པར་སྤྲོས། །ལས་དང་བྱ་བ་ལ་སོགས་བྲལ། །བདེན་པ་གཉིས་ལ་གནས་པ་ཡི། །ཐེག་པ་རབ་ཀྱི་མཆོག་འདི་ནི། །ཚུལ་ལ་གནས་ན་ཐོབ་པར་འགྱུར། །དེ་ནས་བཅོམ་ལྡན་འདས་ལ་རྡོ་རྗེ་འཛིན་སྤྲོས་པ་མེད་པར་གནས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དུས་གསུམ་དུ་སྒྲིབ་པ་མ་མཆིས་པའི་ཡེ་ཤེས་ཀྱི་སྡོམ་པ་གང་ལ་བྱང་ཆུབ་སེམས་དཔའ་རྣམས་གནས་ན་སངས་རྒྱས་དང་བྱང་ཆུབ་སེམས་དཔའ་རྣམས་མཉེས་པར་འགྱུར་བ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྡོ་རྗེ་འཛིན་སྤྲོས་པ་མེད་པར་གནས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལུས་དང་། ངག་དང་། ཡིད་གཅིག་ཏུ་འཇུག་ཅིང་ཆོས་ཐམས་ཅད་ལ་རྩོམ་པ་མེད་ཅིང་བྱ་བ་མེད་པའི་སྡོམ་པ་གང་ཡིན་པ་དེ་རིགས་ཀྱི་བུ་ཉོན་ཅིག །དེ་ཡང་གང་ཞེ་ན། སངས་རྒྱས་དང་བྱང་ཆུབ་སེམས་དཔའ་རྣམས་ལ་བདག་གི་ལུས་ཡོངས་སུ་གཏོང་བ་གང་ཡིན་པའོ། །དེ་ཅིའི་ཕྱིར་ཞེ་ན། གང་གིས་བདག་གིས་ལུས་ཡོངས་སུ་གཏོང་བ་དེས་ནི་དངོས་པོ་གསུམ་ཡོངས་སུ་བཏང་བ་ཡིན་ཏེ། དངོས་པོ་གསུམ་ཡོངས་སུ་བཏང་བ་དེ་ཡང་གང་ཞེ་ན། འདི་ལྟ་སྟེ། ལུས་དང་། ངག་དང་། ཡིད་དོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔས་ལུས་དང་ངག་དང་ཡིད་གསུམ་གྱི་སྡོམ་པས་བསྡམ་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ལུས་དང་ངག་དང་ཡིད་ཡོངས་སུ་མ་བཏང་བར་བསླབ་པ་འཛིན་པར་མི་བྱེད་དོ། །དེ་ནས་ཕྱི་དེ་ཉིན་བཅོམ་ལྡན་འདས་རྣམ་པར་སྣང་མཛད་ལ་ཕྱག་བྱས་ཏེ། བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ལ་བུམ་པ་སྤོས་ཆུས་བཀང་བ་ལ་འཇིག་རྟེན་གསུམ་ལས་རྣམ་པར་རྒྱལ་བས་མངོན་པར་བསྔགས་ཏེ་སྒོ་དང་པོར་བཞག་ལ་མཁས་པས་སྐྱེ་བོ་ཀུན་ལ་དེས་བསང་གཏོར་

བྱའོ། །དེ་ནས་སེམས་སྦྱང་བའི་ཕྱིར་སྤོས་ཆུ་གཙང་མ་བླུད་དོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །དཀྱིལ་འཁོར་གྱི་ནི་སློབ་དཔོན་དག །གསང་སྔགས་སྒྲུབ་ལ་འབད་པ་ན། །གང་གི་དུས་སུ་དཀྱིལ་འཁོར་དུ། །སེམས་དཔའ་ཆེན་པོ་བྱིན་རློབ་པའི། །དུས་དང་ཚོད་ནི་ཀུན་མཁྱེན་པ། །སྨྲ་བའི་མཆོག་གིས་བཀའ་སྩོལ་ཅིག །དེ་སྐད་གསོལ་ནས་བཅོམ་ལྡན་གྱིས། །རྡོ་རྗེ་འཛིན་ལ་བཀའ་སྩལ་པ། །དཀྱིལ་འཁོར་དོན་དུ་གཉེར་བ་ལ། །རྟག་ཏུ་མཚན་མོ་བྲེ་བར་བྱ།། །།བམ་པོ་གཉིས་པ། ལག་ན་རྡོ་རྗེ་དེ་སློབ་དཔོན་གྱིས་སངས་རྒྱས་ཐམས་ཅད་ལ་ཕྱག་བྱས་ལ་ཚོན་སྣ་ཚོགས་སྲད་བུ་ཐོགས་ཏེ། བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་བྱིན་གྱིས་བརླབས་ལ། ཤར་དུ་སྲད་བུ་བྲེ་བ་ནི། །ལྟེ་བའི་ཐད་ཀར་བཟུང་ནས་སུ། །བར་སྣང་ལ་ནི་གཟུང་བར་བྱ། །དེ་ནས་ལྷོ་ཕྱོགས་སོང་ནས་སུ། །བྱང་ཕྱོགས་སུ་ནི་བྲེ་བར་བྱ། །དེ་ནས་སྲད་བུ་གཉིས་པ་ནི། །རང་གིས་བླངས་ནས་དེ་ཉིད་དུ། །དེ་བཞིན་གཤེགས་པ་རྗེས་དྲན་ཅིང་། །ཤར་ཕྱོགས་བལྟས་ཏེ་བྲེ་བར་བྱ། །དེ་ནས་ལྷོ་ཕྱོགས་སོང་ནས་ནི། ། བྱང་ཕྱོགས་སུ་ནི་བྲེ་བར་བྱ། །བློ་ཅན་དེ་ནས་སླར་ལོག་ནས། །བདེན་བྲལ་ཕྱོགས་སུ་གནས་ནས་ནི། །བྱང་ཕྱོགས་སུ་ནི་བྲེ་བར་བྱ། །དེ་ནས་གཡས་སུ་བསྒྱུར་བར་བྱ། །བསྒྱུར་ཏེ་དེ་རུ་འདུག་ནས་ནི། །ལྷོ་ཕྱོགས་སུ་ནི་བྲེ་བར་བྱ། །དེ་ནས་གནས་དེ་བཏང་ནས་སུ། །མེ་ཡི་ཕྱོགས་སུ་གནས་ནས་ནི། །སྔགས་པས་གསང་སྔགས་ཆོ་གར་གནས། །ཤར་དུ་སྲད་བུ་བྲེ་བར་བྱ། །དེ་ནས་དེ་བཞིན་དབང་ལྡན་ཕྱོགས། །སོང་ནས་ནུབ་ཏུ་ཁ་བལྟས་ཏེ། །རླུང་གི་ཕྱོགས་ཀྱི་བར་དུ་ནི། །བྱང་ཕྱོགས་སུ་ནི་བྲེ་བར་བྱ། །སྔགས་པ་ཡིས་ནི་དེ་ལྟ་བུར། ། ཀུན་ནས་གྲུ་བཞི་ལྷམ་པར་བྱ། །དེ་ནས་དབུས་སུ་ཞུགས་ནས་སུ། །དེ་ལ་ཆ་ནི་གསུམ་དུ་བརྟག །ས་རྣམས་ཐམས་ཅད་ཀུན་ཏུ་ཡང་། །ཆ་གསུམ་དག་ཏུ་བརྟགས་ནས་ནི། །ཆ་རྣམས་ཀྱང་ནི་རེ་རེ་ལ། །ཆ་གསུམ་དུ་ནི་རབ་ཏུ་བརྟག །ཆ་གཅིག་ཅིག་ནི་བསྐོར་བ་ཡི།

འཁོར་བར་བྱས་ཏེ་ལྷག་མ་ཡི། །ཆ་གཉིས་པོ་ནི་ལྷ་ཉིད་ཀྱི། །གནས་སུ་ངེས་པར་བྱ་བ་ཡིན། །བློ་དང་ལྡན་པས་ཕྱོགས་བཞི་རུ། །སོ་སོའི་ཕྱོགས་ཆར་སྒོ་ཁྱུད་ནི། །སྡོམ་བརྩོན་ཅན་གྱིས་ནན་ཏན་དུ། །ལྷ་རྣམས་གཙོ་བོའི་གནས་སུ་བྱ། །དེ་ལྟར་རིམ་པས་ལེགས་ཕྱེ་བ། །འདི་དག་ཐམས་ཅད་བྱས་ནས་ནི། །དབུས་སུ་པདྨ་དཀར་པོ་མཆོག །དེ་ནི་སྙིང་པོ་ཞེས་སུ་བསྒྲགས། །དཀྱིལ་འཁོར་སྙིང་པོ་འབྱུང་བ་ཀུན། །དེས་ནི་སྙིང་པོ་ཅན་དུ་བྱས། །དེ་ཡི་ཚད་ཀྱང་སོར་བཅུ་དྲུག །ཡན་ཆད་དུ་ནི་བཤད་པ་ཡིན། །འདབ་མ་བརྒྱད་པ་ལེགས་པར་རྫོགས། །ཟེ་བར་ལྡན་པ་ཤིན་ཏུ་བཟང། །འདབ་མའི་བར་ནི་ཐམས་ཅད་དུ། །ཀུན་ནས་རྡོ་རྗེ་བྲི་བར་བྱ། །དེ་ཡི་སྙིང་པོའི་དབུས་སུ་ནི། །རྒྱལ་མཆོག་གཙོ་བོ་གསེར་གྱི་མདོག །འབར་བཅས་ཐོར་ཚུགས་དབུ་རྒྱན་ཅན། །འོད་ཟེར་དག་གིས་ཀུན་ནས་བསྐོར། །མགོན་པོ་ནད་དང་བྲལ་བ་ནི། །ཏིང་ངེ་འཛིན་དུ་གནས་པར་བྲི། །དེ་ཡི་ཤར་དུ་བློ་ལྡན་གྱིས། །སངས་རྒྱས་རྣམས་ཀྱི་ཕྱག་རྒྱ་ནི། །གྲུ་གསུམ་ཐམས་ཅད་ཐལ་ཀར་ཉིད། །པདྨའི་སྟེང་ན་ཁོར་ཡུག་ཏུ། །འོད་ཟེར་དཀར་པོས་ཡོངས་བསྐོར་བ། །རབ་ཏུ་བསྒྲིམས་ཏེ་བྲི་བར་བྱ། །དེ་ཡི་བྱང་དུ་མཁས་རྣམས་ཀྱིས། །སྐྱོབ་པ་དག་ནི་ཀུན་གྱི་ཡུམ། །གསེར་གྱི་མདོག་ཅན་འབར་དང་བཅས། །ན་བཟའ་དག་ནི་དཀར་པོ་མནབས། །ཀུན་ཏུ་རྣམ་པར་སྣང་མཛད་པ། །ཏིང་ངེ་འཛིན་དུ་གནས་པར་བྲི། །མགོན་པོ་ཡི་ནི་བྱང་ཕྱོགས་སུ། །སྤྱན་རས་གཟིགས་དབང་དཔའ་བོ་ནི། །པདྨ་དཀར་པོའི་སྟན་ལ་འདུག །དུང་དང་ཀུནྡ་ཟླ་བ་འདྲ། །དབུ་ལ་འོད་དཔག་མེད་བཞུགས་པ། །བཞིན་ནི་བག་ཙམ་འཛུམ་པ་བྲི། །དེ་ཡི་གཡས་སུ་ལྷ་མོ་ནི། །སྒྲོལ་མ་གྲགས་པ་ཆེན་མོ་དེ། །དགེ་ཞིང་འཇིགས་པ་སེལ་བ་སྟེ། །སྔོ་བསངས་མོ་ལ་སྣ་ཚོགས་གཟུགས། །བུད་མེད་དར་ལ་བབ་པའི་ཚད། །ཐལ་སྦྱར་མེ་ཏོག་ཨུཏྤལ་ཐོགས། །འོད་ཟེར་དག་གིས་ཀུན་བསྐོར་ཅིང་། །གོས་ནི་དཀར་པོ་གྱོན་པར་བྲི། །གཡོན་དུ་ལྷ་མོ་ཁྲོ་གཉེར་ཅན། །སྔགས་དེའི་ཕྲེང་བ་ལག་ན་འཆང་། །མིག་གསུམ་

པ་ལ་ཐོར་ཚུགས་ཅན། །ཁ་དོག་མདོག་ནི་དཀར་མོ་ལ། །འོད་ཟེར་དཀར་པོ་སེར་པོ་དང་། །དམར་པོ་རྣམས་ཀྱིས་བསྐོར་བར་བྲི། །ཁྲོ་གཉེར་ཅན་དང་ཉེ་བར་ནི། །མཐུ་ཆེན་ལག་ན་པདྨ་ཐོགས། །བརྩེ་བ་ཆེན་པོ་གོས་དཀར་གྱོན། །འོད་ཟེར་དག་གིས་བསྐོར་བ་ཡི། ། དཔའ་བོ་ཡང་དག་བྲི་བྱ་སྟེ། །དེ་ཡི་པདྨ་ཁ་མ་བྱེ། །དེ་ཡི་དྲུང་དུ་བློ་ཅན་གྱིས། །རིག་སྔགས་ལྷ་མོ་གྲགས་ལྡན་མ། །གསེར་གྱི་ཁ་དོག་ལྟ་བུ་ཅན། །རྒྱན་རྣམས་ཀུན་གྱིས་བརྒྱན་པ་སྟེ། །ལག་པ་གཡོན་པས་པྲི་ཡང་ཀུའི། །སྙེ་མ་ཡིད་འོང་འཛིན་པར་བྲི། །སྒྲོལ་མ་ཡི་ནི་ཉེ་འཁོར་དུ། །བློ་དང་ལྡན་པས་གོས་དཀར་མོ། །ཐོར་ཚུགས་ཅན་ལ་གོས་དཀར་གྱོན། །ལག་ན་པདྨ་ཐོགས་པར་བྲི། །དེ་ཡི་འོག་ཏུ་སྔགས་པ་ཡིས། །རིག་སྔགས་རྒྱལ་པོ་སྟོབས་པོ་ཆེ། །ཁ་དོག་ཉི་མ་འཆར་ཀ་བཞིན། །པདྨ་དཀར་པོས་རྣམ་པར་བརྒྱན། ། འབར་བའི་ཕྲེང་ཅན་མི་བཟད་ཅིང་། །སྤུ་དག་སེང་གེ་ལྟར་འདུག་པ། །སྤྱན་རས་གཟིགས་དབང་བློ་ལྡན་གྱི། །རྟ་མགྲིན་ཅན་ཞེས་གྲགས་པ་བྲི། །སངས་རྒྱས་རྣམས་ཀྱི་ལྷོ་ཕྱོགས་སུ། །བྱང་ཆུབ་སེམས་དཔའ་སྐྱོབ་རྣམས་ཀྱི། །ཕྱག་རྒྱ་ཡིད་བཞིན་ནོར་བུ་ཞེས། ། གྲགས་པ་སྐལ་བ་ཆེན་པོ་ཅན། །རེ་བ་ཐམས་ཅད་རྫོགས་བྱེད་པ། །པདྨ་དཀར་ལ་འདུག་པར་བྲི། །མགོན་པོ་རྣམ་སྣང་མཛད་ཆེན་གྱི། །ལྷོ་ཡི་ཕྱོགས་སུ་རྡོ་རྗེ་འཛིན། །རེ་བ་ཐམས་ཅད་སྐོང་བྱེད་པ། །མདོག་ནི་པྲི་ཡང་ཀུ་ལྟ་བུ། །ལྗང་སེར་རམ་ནི་མ་རྒད་ལྟར། །སྔོ་བསངས་མགོན་པོ་དབུ་རྒྱན་ཅན། །སེམས་དཔའ་ཆེན་པོ་རྒྱན་ཀུན་གྱིས། །རྣམ་པར་བརྒྱན་ཅིང་མཐའ་ཡས་པར། །འཇུག་པ་རྒྱ་ཆེན་རྡོ་རྗེར་བཅས། །འོད་ཟེར་དག་གིས་བསྐོར་བར་བྲི། །དེ་ཡི་གཡས་སུ་ལྷ་མོའི་མིང་། །མཱ་མ་ཀཱི་ཞེས་བྱ་བ་དེ། །རྡོ་རྗེའི་རྒྱན་གྱིས་བརྒྱན་པ་སྟེ། །ལག་ན་རྡོ་རྗེ་ཐོགས་པ་བྲི། །དེ་ཡི་འོག་ཏུ་ལྷ་མོ་ནི། །རྡོ་རྗེ་རྩེ་མོ་སྟོབས་ཆེན་དེ། །ཕོ་ཉ་རྣམས་ཀྱིས་ཡོངས་བསྐོར་ཅིང་། །བཞིན་ནི་བག་ཙམ་འཛུམ་པར་བྲི། །གཡོན་རོལ་དུ་ནི་སྔགས་པ་ཡིས། །རྡོ་རྗེ་ལུ་གུ་རྒྱུད་ཅེས་པ། །ལག་ན་རྡོ་རྗེ་ལུ་གུ་རྒྱུད། །རང་གི་ཕོ་

ཉ་རྣམས་ཀྱིས་བསྐོར། །པྲི་ཡང་ཀུ་ལྟར་ལྗང་སེར་མདོག །རྡོ་རྗེའི་མཚན་མས་ལེགས་མཚན་བྲི། །ལག་ན་རྡོ་རྗེའི་འོག་ལོགས་སུ། །ཁྲོ་ཟླ་གཙོ་བོ་ཞེས་བྱ་བ། །བགེགས་ཆེན་དགྲ་ནི་ཞི་བྱེད་པ། །ཁྲོ་བོ་འཇིག་རྟེན་གསུམ་དུ་གྲགས། །མིག་གསུམ་མཆེ་བ་བཞི་པ་སྟེ། །ཁ་དོག་དབྱར་གྱི་ཆར་སྤྲིན་འདྲ། །རབ་ཏུ་རྒོད་པའི་སྒྲ་ཡང་འབྱིན། །རྡོ་རྗེའི་རྒྱན་གྱིས་རྣམ་པར་བརྒྱན། །འཁོར་ནི་མཐའ་ཡས་ཁྲོ་བོ་ཡི། །དབང་ཕྱུག་རྣམས་ཀྱིས་ཡོངས་བསྐོར་བ། །ལག་པ་སྟོང་ཕྲག་བརྒྱ་དག་ནི། །མཚོན་ཆ་སྣ་ཚོགས་ཐོགས་ཤིང་གདེངས། །ཁྲོ་བོ་ཆེན་པོ་འདི་འདྲ་བ། །པདྨའི་སྟེང་ན་འདུག་པར་བྲི། །དེ་ཡི་ནུབ་ཏུ་སོང་ནས་ནི། །རྡོ་རྗེ་འཛིན་པ་མང་པོ་དག །ལག་ན་མཚོན་ཆ་སྣ་ཚོགས་ཐོགས། །ཁ་དོག་སྣ་ཚོགས་སྟོབས་པོ་ཆེ། །འོད་ཟེར་དག་གིས་ཡོངས་བསྐོར་བ། །སེམས་ཅན་ཀུན་དོན་བྱེད་པར་བྲི། །གསང་སྔགས་མགོན་པོའི་འོག་ལོགས་སུ། །བདེན་བྲལ་གྱི་ནི་ཕྱོགས་ཀྱི་ཆར། །མི་གཡོ་ཞེས་བྱ་ལག་ན་ནི། །རལ་གྲི་ཞགས་པ་ལེགས་པར་ཐོགས། །ཟུར་ཕུད་སྤྱི་བོའི་གཡོན་དུ་འཕྱང་། །རབ་ཏུ་བརྒྱན་ཅིང་མིག་གཅིག་ཡོ། །རང་གི་འོད་ཀྱི་ནང་ན་གནས། །ཁྲོ་དང་བཅས་པས་བྲག་ལ་འདུག །བཞིན་ནི་ཁྲོ་གཉེར་རབ་ཏུ་བསྙེར། །བྱིས་པའི་གཟུགས་ཅན་མཁྲང་བག་ཅན། །བྲིས་ནས་བློ་ལྡན་རླུང་ཕྱོགས་སུ། །སོང་ནས་བཅོམ་ལྡན་འདས་ཀྱི་ནི། །ཁྲོ་བོ་འཇིག་རྟེན་གསུམ་ལས་རྒྱལ། །འབར་བའི་ཕྲེང་ཅན་མི་བཟད་པ། །ལག་ན་རྡོ་རྗེ་རྩེ་བྲན་རྒྱན། །བཀའ་ལུང་ནོད་པ་ལྟར་འདུག་ཅིང་། །ཟད་པའི་དུས་དང་འདྲར་གནས་པ། །ནན་ཏན་དུ་ནི་བྲི་བར་བྱ། །དེ་ལྟར་ནང་དུ་བྲི་བ་ནི། །རྒྱས་དང་བཅས་པར་བཤད་པ་ཡིན། །དེ་ནས་སྔགས་པ་ཕྱིར་བྱུང་ནས། །ངེས་པར་གཉིས་པའི་ཆ་དག་ལ། །ཤར་གྱི་ཕྱོགས་ཀྱི་ནང་དུ་ནི། །ཆ་ནི་གཉིས་སུ་ཕྱེ་བ་ལ། །སྒོ་ཁྱུད་ཀྱི་ནི་ནང་རོལ་དུ། །སྔགས་པས་རྒྱལ་བ་ཤཱཀྱ་ཐུབ། །གསེར་གྱི་ཁ་དོག་འབར་དང་བཅས། །མཚན་མཆོག་སུམ་ཅུ་རྩ་གཉིས་ལྡན། །མགོན་པོ་ན་བཟའ་ངུར་སྨྲིག་མནབས། །ཁྱབ་བདག་བསྟན་པའི་དོན་

མཛད་པ། །པདྨ་དཀར་པོའི་སྟན་ལ་བཞུགས། །ཆོས་འཆད་ཚུལ་དུ་བཞུགས་པར་བྲི། །དེ་ཡི་གཡས་སུ་ལྷ་མོ་ནི། །སངས་རྒྱས་སྤྱན་ཞེས་བྱ་བ་སྟེ། །ལྷ་མོ་ཅུང་ཟད་འཛུམ་པའི་ཞལ། །འོད་ཀྱི་དཀྱིལ་འཁོར་འདོམ་གང་བ། །མཚུངས་མེད་སྐུ་ནི་རབ་ཏུ་དང་། །དེ་ནི་ཤཱཀྱ་ཐུབ་པའི་ཡུམ། །དེ་ཡི་གཡས་སུ་ལྷ་མོ་ནི། །རིག་སྔགས་མཛོད་སྤུ་ཞེས་གྲགས་པ། །པདྨའི་སྟེང་ན་འདུག་པ་སྟེ། །དུང་ཟླ་ཀུནྡ་ལྟ་བུའི་མདོག །ལག་ན་ཡིད་བཞིན་ནོར་བུ་ཐོགས། །རེ་བ་ཀུན་རྫོགས་བྱེད་པ་བྲི། །དེ་ནས་སྔགས་པས་གཡོན་རོལ་དུ། །ཤཱཀྱ་སེང་གེ་སྐྱོབ་པ་ཡི། །གཙུག་ཏོར་གཟི་ཅན་བརྩོན་འགྲུས་ཆེ། །གདུགས་དཀར་པོ་དང་རྒྱལ་བའི་གཙུག །གཙུག་ཏོར་རྣམ་པར་རྒྱལ་ཉིད་དང་། །གཟི་བརྗིད་ཕུང་པོ་སྐལ་ཆེན་དང་། །རྣམ་པར་འཐོར་ཞེས་རྣམ་གྲགས་པ། །ལྔ་པོ་ཡང་དག་བྲི་བར་བྱ། །ཤཱཀྱ་ཏོག་ནི་མཐུ་ཆེན་གྱི། །གཙུག་ཏོར་ལྔ་པོ་འདི་དག་ནི། །གནས་ནི་ལྔ་རྣམས་ཉིད་དུ་ནི། །རབ་ཏུ་བསྒྲིམས་ཏེ་བྲི་བར་བྱ། །དེ་ཡི་བྱང་དུ་སོང་ནས་སུ། །གནས་གཙང་རྣམས་ནི་བྲི་བར་བྱ། །དབང་ཕྱུག་ཀུན་ཏུ་མེ་ཏོག་དང་། །འོད་ཀྱི་ཕྲེང་བ་ཉིད་དང་ནི། །ཡིད་མགྱོགས་དང་ནི་རྣམ་གྲགས་ཏེ། །དེ་དག་ཐམས་ཅད་ལེགས་པར་བྲི། །མཛོད་སྤུ་ཡི་ནི་གཡས་ལོགས་སུ། །གཙུག་ཏོར་ཆེན་པོ་ཆེར་འབྱུང་དང། །དེ་བཞིན་གྱེན་དུ་འབྱུང་ཉིད་དང་། །སྒྲ་དབྱངས་མཐའ་ཡས་པ་ཡང་སྟེ། །གཙུག་ཏོར་གསུམ་པོ་ཁོ་ན་ནི། །བསྒྲིམས་ཏེ་ཡང་དག་བྲི་བར་བྱ། །གཙུག་ཏོར་ལྔ་པོ་སྟོབས་ཆེན་རྣམས། །དཀར་པོ་སེར་སྐྱ་སེར་པོར་བྱ། །གསུམ་པོ་གཞན་ནི་དཀར་པོ་དང་། །སེར་པོ་དང་ནི་དམར་པོར་བྱ། །ཀུན་ཀྱང་འོད་ཟེར་མང་པོ་ཅན། །རྒྱན་རྣམས་ཀུན་གྱིས་བརྒྱན་པ་ཡི། །དེ་དག་སྨོན་ལམ་སྟོབས་ཆེན་དེ། །རེ་བ་ཐམས་ཅད་རྫོགས་བྱེད་པའོ། །དེ་ནས་སྔགས་པས་མེ་ཕྱོགས་སུ། །མེ་ནི་དྲང་སྲོང་ཆེ་རྣམས་དང་། །བཅས་ཤིང་མེ་ཡི་ནང་ན་འདུག །ཐལ་བའི་སོར་རིས་གསུམ་གྱིས་མཚན། །དཔའ་བོ་ཐམས་ཅད་རབ་ཏུ་དམར། །སྙིང་ག་སུམ་མདོ་རིས་མཚན་ཅིང་། །མེ་ལྕེ་འབར་བའི་དབུས་ན་འདུག།

བགྲང་ཕྲེང་གུནྡེ་ཐོགས་པར་བྲི། །དེ་ནས་ལྷོ་ཡི་ཕྱོགས་ཀྱི་ཆར། །གཤིན་རྗེའི་གཙོ་བོ་ལག་པ་ན། །དབྱུག་པ་ཐོགས་ཤིང་མ་ཧེ་ཞོན། །ཁ་དོག་དབྱར་གྱི་ཆར་སྤྲིན་འདྲ། །མ་མོ་རྣམས་དང་དུས་མཚན་དང་། །འཆི་བདག་རྣམས་ཀྱིས་བསྐོར་བར་བྲི། །བདེན་བྲལ་ཕྱོགས་སུ་བདེན་བྲལ་ནི། །ལག་ན་རལ་གྲི་འཇིགས་པ་བྲི། །དེ་ནས་ཀྱང་ནི་བློ་ལྡན་པ། །མྱུར་དུ་བྱང་གི་ཕྱོགས་སོང་སྟེ། །ལྷ་ཡི་རྒྱལ་པོ་རི་རབ་ལ། །འདུག་ཅིང་ལྷ་རྣམས་ཀྱིས་བསྐོར་བ། །ལག་ན་རྡོ་རྗེ་ཅོད་པན་ཅན། །རྒྱན་ཀུན་གྱིས་ནི་བརྒྱན་པར་བྲི། །དེ་ནས་དེ་ཡི་ཤར་དུ་ནི། །ཆུ་ལྷ་ལག་ན་ཞགས་ཐོགས་བྲི། །དེ་ཡི་ཡང་ནི་ཤར་ཕྱོགས་སུ། །ཉི་མ་ཤིང་རྟའི་སྟེང་འདུག་བྲི། །དེ་ཡི་གཡས་དང་གཡོན་དུ་ནི། །རྒྱལ་དང་རྣམ་པར་རྒྱལ་བ་བྲི། །དེ་ཡི་གཡས་སུ་ཚངས་པ་ནི། །གདོང་བཞི་པ་ལ་ཐོར་ཚུགས་ཅན། །ཨོཾ་ཞེས་བྱ་བ་ལྷུར་ལེན་པ། ། ངང་པ་པདྨའི་སྟེང་འདུག་བྲི། །དེ་ཡི་ནུབ་ཏུ་བྲི་བ་ནི། །ས་ཡི་ལྷ་དང་དབྱངས་ཅན་དང་། །ཁྱབ་འཇུག་སྐེམ་བྱེད་དེ་བཞིན་རླུང་། །བདེ་བྱེད་དེ་བཞིན་ཟླ་བ་སྟེ། །ནུབ་ཀྱི་ཕྱོགས་སུ་གནས་ནས་ནི། །རབ་ཏུ་ནན་ཏན་བྱས་ཏེ་བྲི། །བྲིས་ནས་སྔགས་པས་དེ་ནས་ནི། །ཡིད་ལ་འཁྲུལ་པ་མེད་པ་རུ། །གསང་སྔགས་མགོན་པོའི་འོག་ལོགས་སུ། །ཁྲོ་ཆེན་གཞན་གྱིས་མི་ཐུབ་ཅེས། །བྱ་བ་ཉིད་དང་ལྷ་མོ་ནི། །གཞན་གྱིས་མི་ཐུབ་མ་དང་ནི། །ས་བདག་ལག་ན་བུམ་པ་ཐོགས། །གུས་པར་ཡང་དག་གནས་པར་བྲི། །ཀླུ་ཆེན་དགའ་བོ་བསྙེན་དགའ་དག །ཤཱཀྱ་སེང་གེ་སྐྱོབ་པ་ཡི། །སྒོ་དྲུང་གཉིས་སུ་མངོན་ཕྱོགས་པར། །རབ་ཏུ་བསྒྲིམས་ཏེ་བྲི་བར་བྱ། །གཞན་ཡང་ཤཱཀྱ་ཐུབ་པ་ཡི། །རྒྱུད་རྣམས་ཀུན་ལས་དཀྱིལ་འཁོར་དུ། །སྔགས་དང་ཕྱག་རྒྱ་གང་བཤད་པ། །དེ་དག་ཀྱང་ནི་མཁས་པས་བྲི། །སྔགས་པ་དེ་ནས་ཕྱིར་བྱུང་ནས། །ཆ་གསུམ་པ་ནི་ངེས་པ་ལ། །རྡོ་རྗེ་དམ་པ་སྦྱིན་པ་ནི། །གུར་གུམ་ལྟ་བུའི་མདོག་ཅན་ཏེ། །སྤྱི་བོ་ཟུར་ཕུད་ལྔ་དང་ལྡན། །བྱིས་པ་གཞོན་ནུའི་གཟུགས་ཅན་ལ། །ཨུཏྤལ་སྔོན་པོ་རྡོ་རྗེ་ཅན། །ལག་པ་གཡོན་ན་ཐོགས་པ་སྟེ། །པདྨ་དཀར་པོའི་སྟན་

ལ་འདུག །རབ་ཏུ་འཛུམ་པའི་བཞིན་དུ་གནས། །འོད་ཟེར་མཚན་ཉིད་བཟང་པོ་ཡིས། །ཀུན་ཏུ་འཁོར་བར་སྔགས་པས་བྲི། །དེ་ཡི་བྱང་དུ་གཞོན་ནུ་ནི། །དྲ་བའི་འོད་ཅན་ལག་པ་ན། །རིན་ཆེན་དྲ་བ་ཐོགས་པ་སྟེ། །སྣ་ཚོགས་པ་ཡི་རྒྱན་གྱིས་བརྒྱན། །པདྨ་དམར་པོའི་སྟན་ལ་འདུག །རྒྱལ་བའི་སྲས་ལ་བལྟ་བ་བྲི། །རྡོ་རྗེ་དམ་པ་སྦྱིན་པ་ཡི། །གཡོན་དུ་ཕོ་ཉ་མོ་ལྔ་བྲི། །སྐྲ་ཅན་དང་ནི་ཉེ་སྐྲ་ཅན། །སྣ་ཚོགས་མ་དང་ནོར་ཅན་མ། །དེ་བཞིན་འགུགས་མ་ཞེས་བྱ་བ། །འདི་དག་བློ་ལྡན་ཕོ་ཉ་མོའོ། །དེ་དག་གི་ནི་འོག་ཟད་དུ། ། ཕྱག་བརྙན་མ་ནི་ལྔ་རྣམས་དང་། །གཞོན་ནུ་དྲ་བའི་འོད་ཅན་གྱི། །འཁོར་གཉིས་པོ་ཡང་བྲི་བར་བྱ། །དེ་ནས་སྔགས་པས་ལྷོ་ཕྱོགས་སུ། །བྱང་ཆུབ་སེམས་དཔའ་གྲགས་ཆེན་པོ། །སྒྲིབ་པ་ཐམས་ཅད་རྣམ་སེལ་གཙོ། །ཡིད་བཞིན་ནོར་བུ་ཐོགས་པ་བྲི། །དེ་ཡི་ཆ་གཉིས་བོར་ནས་ནི། །དཔའ་བོ་ངོ་མཚར་ཅན་དང་ནི། །སེམས་ཅན་ཀུན་ལ་མི་འཇིགས་སྦྱིན། །ངན་སོང་ཐམས་ཅད་སྤོང་བ་དང་། །དེ་བཞིན་སྐྱོང་སེམས་བློ་གྲོས་དང་། །བློ་ཅན་སྙིང་རྗེས་གདུངས་པ་དང་། །བྱམས་པ་མངོན་དུ་འབྱུང་བ་དང་། །གདུང་བ་ཐམས་ཅད་ཞི་བྱེད་དང་། །དེ་བཞིན་བློ་གྲོས་བསམ་ཡས་ཏེ། །མཁས་པས་བརྒྱད་པོ་བྲི་བར་བྱ། །བྱང་གི་ཕྱོགས་སུ་སོང་ནས་ནི། །ས་ཡི་སྙིང་པོ་འབར་དང་བཅས། །བཟོད་དང་དེས་པ་ཕུན་ཚོགས་བྲི། །དེ་ཡི་སྟན་ནི་མཁས་པ་ཡིས། །འབྱུང་ཁུངས་ཀུན་དང་ལྡན་པ་ཡིས། ། རིན་ཆེན་ཀུན་གྱིས་ཉེར་བརྒྱན་པ། །དེ་ཡི་སྟེང་ན་རིན་ཆེན་བཞིའི། །པདྨ་ཡང་དག་གནས་པ་ནི། །ཡིད་དུ་འོང་བ་བསམ་བྱ་སྟེ། །བྱང་ཆུབ་སེམས་དཔའ་གྲགས་ཆེན་པོ། །དེ་ཡི་སྟེང་ན་འདུག་པར་བྲི། །དེ་ཡི་འཁོར་ནི་ཡོན་ཏན་གཙོ། །མཐའ་ཡས་ཤིན་ཏུ་གྲངས་མེད་དེ། །དེ་ཡི་ནང་ན་བྱང་ཆུབ་སེམས། །རིན་ཆེན་འབྱུང་གནས་རིན་ཆེན་ལག །ས་འཛིན་ཉིད་དང་ལག་ན་ནི། །རིན་ཆེན་ཕྱག་རྒྱ་ཅན་དང་ནི། །ལྷག་པའི་བསམ་པ་བརྟན་པ་ཉིད། །གྲགས་ཆེན་འདི་དག་བྲི་བར་བྱ། །དེ་བཞིན་སྔགས་པས་ནུབ་ཕྱོགས་སུ། །དཔའ་

བོ་ནམ་མཁའི་སྙིང་པོ་ནི། །གཟི་བརྗིད་ཆེན་པོ་གོས་དཀར་གྱོན། །ལག་ན་རལ་གྲི་ཐོགས་བསམ་སྟེ། །རྒྱལ་སྲས་པདྨའི་སྟན་སྟེང་ན། །ལེགས་པར་འདུག་པར་བྲི་བར་བྱ། །བདག་ཉིད་ཆེན་པོ་དེའི་འཁོར་དུ། །གྲགས་པ་དག་ཀྱང་བྲི་བར་བྱ། །དེའི་འཁོར་དཔའ་བོ་ཆེན་པོ་ནི། །ནམ་མཁའ་དྲི་མེད་བློ་གྲོས་མཁའ། །བློ་གྲོས་རྣམ་དག་ཉིད་དང་ནི། །སྤྱོད་པ་ཡི་ནི་བློ་གྲོས་དང་། །བློ་བརྟན་པ་ཞེས་བྱ་བ་སྟེ། །དེ་དག་རབ་ཏུ་བསྒྲིམ་བྲི་ཞིང་། །རྟག་ཏུ་དཔའ་བོ་འདི་རྣམས་དང་། །ལྷན་ཅིག་གོ་རིམས་བཞིན་དུ་བསམ། ། དེ་ནས་གསང་བ་པའི་བདག་པོ་ཕྱག་ན་རྡོ་རྗེས་ཐམས་ཅད་དང་ལྡན་པའི་འཁོར་རྣམས་ལ་བལྟས་ནས། བཅོམ་ལྡན་འདས་རྣམ་པར་སྣང་མཛད་ལ་རིང་ཞིག་ཏུ་མིག་མི་འཛུམས་པར་བལྟས་ཏེ། ཆེད་དུ་གླེང་པ་འདི་གླེང་ཞིང་ཚིག་ཏུ་སྨྲས་པ། འཇིག་རྟེན་དུ་ནི་ཀུན་མཁྱེན་རྣམས། ། ཨུ་དུམ་བཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །བསྐལ་པ་བྱེ་བ་དུ་མ་རུ། །སྡིག་པ་བགྱིས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ལགས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་འཚལ། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །དེའི་ཚེ་ཐམས་ཅད་དང་ལྡན་པའི་འཁོར་དེ་དག་དང་། རྡོ་རྗེ་འཛིན་དེ་དག་གིས་མགྲིན་གཅིག་ཏུ་མཐུན་པར་ཚིག་སྨྲས་པ།གསང་སྔགས་སྤྱོད་པའི་དབང་གྱུར་པ། །དཔའ་བོ་ཆེན་པོ་ལེགས་སོ་ལེགས། །ཁྱོད་ཀྱི་ཡིད་ལ་གང་བསམ་པ། །མཉམ་མེད་ཐམས་ཅད་མཁྱེན་ལ་ཞུས། །སྔགས་རྒྱུད་རྟོགས་པར་ཤེས་པ་ཡི། །བྱང་ཆུབ་སེམས་དཔའ་གཞན་རྣམས་དང་། །སྔགས་སྤྱད་འབྲས་བུ་ལ་གནས་པ། །བདག་ཅག་ཐམས་ཅད་དབང་དུ་གྱུར།།

དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །ཚོན་ཞེས་བགྱི་བ་དེ་གང་ལགས། །ཅི་སླད་འདི་ནི་ཚོན་ཞེས་བགྱི། །ཚོན་ནི་ཇི་ལྟར་དགྱེ་བར་བགྱི། །གང་ཞིག་ཐོག་མར་གཏང་བར་བགྱི། །རྟ་བབས་རྣམས་དང་དེ་བཞིན་དུ། །སྒོ་ཁྱུད་རྣམས་ཀྱི་ཚད་དང་ནི། །སྒོ་ཡི་ཚད་ཀྱང་ཅི་འདྲར་བགྱི། །མགོན་པོ་ཡིས་ནི་བཤད་དུ་གསོལ། །ལྷ་བཤོས་མེ་ཏོག་བྱུག་སྤོས་དང་། །བུམ་པ་རྣམས་ཀྱང་རྒྱས་པར་གསུངས། །སློབ་མ་ཅི་ལྟར་གཟུད་པ་དང་། །དེ་ནི་ཅི་ལྟར་དབང་བསྐུར་དང་། །བླ་མ་ལ་ནི་ཡོན་དབུལ་དང་། ། སྦྱིན་སྲེག་གནས་ཀྱང་བདག་ལ་གསུངས། །གསང་སྔགས་མཚན་ཉིད་ཅི་འདྲ་ལགས། །ཏིང་ངེ་འཛིན་དུ་བཞེད་པ་གང་། །དེ་སྐད་གསོལ་ནས་བཅོམ་ལྡན་འདས། །ཆོས་ཀུན་དབང་ཕྱུག་ཐུབ་པ་ཡིས། །རྡོ་རྗེ་འཛིན་ལ་འདི་སྐད་གསུངས། །ཡིད་གཅིག་ཏུ་ནི་ཚུར་ཉོན་ཅིག ། ཐེག་ཆེན་འབྲས་བུ་འབྱུང་བ་ཡི། །གསང་སྔགས་སྤྱོད་པའི་ཚུལ་གྱི་མཆོག །སེམས་དཔའ་ཆེན་པོ་ཁྱོད་ཀྱིས་ནི། །གང་དག་དྲིས་པ་བཤད་པར་བྱ། །སེམས་ཅན་ཁམས་ནི་ཞེན་བྱེད་ཅིང་། །འདི་ནི་ཆོས་དབྱིངས་རོ་ཡིན་པར། །སངས་རྒྱས་རྣམས་ཀྱིས་སྔོན་གསུངས་ཏེ། །དེ་ཕྱིར་འདི་ནི་ཚོན་ཞེས་བྱ། །ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །དཀར་པོ་ཐོག་མར་གཏང་བར་བྱ། །དེ་ཡི་འོག་ཏུ་དམར་པོ་སྟེ། །དེ་ནས་སེར་པོ་གཏང་བར་བྱ། །དེ་ཡི་འོག་ཏུ་ལྗང་གུ་གཏང་། །ཀུན་གྱི་ནང་རོལ་ནག་པོ་སྟེ། ། ཚོན་གྱི་ཆོ་ག་དེ་ལྟར་བཤད། །རྟ་བབས་རྣམས་ཀྱི་ཚད་ཀྱང་ནི། །དཀྱིལ་འཁོར་དབུ་མ་དང་མཉམ་མོ། །སྒོ་ཁྱུད་དག་ཀྱང་དེ་དང་མཉམ། །པདྨ་སོར་ནི་བཅུ་དྲུག་བཤད། །དང་པོའི་སྒོ་ནི་སྙིང་པོ་ཡི། །དཀྱིལ་འཁོར་དང་ནི་མཉམ་ཞེས་བྱ། །འཇིགས་མེད་དག་གི་རིམ་གྱིས་ནི། །བསྐྱེད་དེ་དེ་ལས་ལྷག་ཤེས་བྱ། །སྒོ་རྣམས་ཀྱི་ནི་བར་བར་དུ། །སྒོ་སྲུང་རྣམས་ནི་གཞག་པར་བྱ། །ཏིང་ངེ་འཛིན་ནི་མདོར་ན་སེམས། །ཡང་དག་མགུ་བ་ཡིན་པར་བཤད། །སེམས་དཔའ་ཆེན་པོ་ཁྱད་པར་ནི། །ཡིད་གཅིག་བསྡུས་ལ་མཉན་པར་གྱིས། །

སངས་རྒྱས་ཀུན་གྱི་ཏིང་འཛིན་ནི། །སྟོང་པ་ཉིད་ཅེས་རྒྱལ་བས་གསུངས། །དེ་ནི་སེམས་ཡོངས་ཤེས་པ་ལས། །ཐོབ་པར་འགྱུར་གྱི་གཞན་ལས་མིན། །དེ་དག་ཉིད་ནི་སྤངས་པ་སྟེ། །རྫོགས་སངས་རྒྱས་ཀྱི་ཡིན་པར་འདོད། །སྟོང་པ་ཆེན་པོ་ཞེས་བྱ་སྟེ། ། ཀུན་མཁྱེན་ཡེ་ཤེས་རྫོགས་བྱེད་པའོ། །དེ་བས་རྣམ་པ་ཐམས་ཅད་དུ། །སྟོང་ཉིད་རྟག་ཏུ་དྲན་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་སངས་རྒྱས་ཐམས་ཅད་དང་ཐབས་ཅིག་ཏུ་ཡང་དག་པར་མོལ་ནས། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་སོ་སོའི་ཚུལ་དུ་གསུངས་སོ། །དེའི་ཚེ་ཡང་སངས་རྒྱས་ཐམས་ཅད་དང་རྒྱུད་གཅིག་པའི་སྟོབས་ཀྱི་ཤུགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། བྱང་ཆུབ་སྙིང་པོར་འདུག་ནས་སུ། །བདུད་ནི་རྣམ་པ་བཞི་བཅོམ་པས། །དེ་ནས་དཔའ་བོ་ཆེན་པོ་ཞེས། །ཚངས་ལ་སོགས་པ་ལྷ་ཚོགས་རྣམས། །འཇིགས་པ་ཐམས་ཅད་མེད་པའི་སྒྲ། །དགའ་བཞིན་དུ་ནི་སྒྲོགས་པར་བྱེད། །དེ་ཕྱིན་ཅད་ནི་ང་དཔའ་བོ། །དཔའ་བོ་ཆེན་པོ་ཞེས་སུ་གྲགས། །སྐྱེ་བ་མེད་པ་ངས་རྟོགས་པ། །ཚིག་གི་སྤྱོད་ཡུལ་རྣམས་སྤངས་ཤིང་། །ཉེས་པ་ཐམས་ཅད་མེད་པ་སྟེ། །རྒྱུ་དང་རྐྱེན་དང་བྲལ་བ་ཡིན། །སྟོང་པའི་ཡེ་ཤེས་མཁའ་འདྲ་བ། །མུན་པ་ཀུན་དང་བྲལ་གྱུར་ཅིང་། །ཤིན་ཏུ་དྲི་མེད་དེ་ཁོ་ན། །ཅི་ལྟར་འབྱུང་བ་ང་ལས་བྱུང་། །ཀུན་མཁྱེན་ཙམ་གྱི་ཚུལ་དུ་གནས། །ཀུན་མཁྱེན་སངས་རྒྱས་མཚན་ཉིད་དོ། །ང་ཡི་དེ་ཉིད་དམ་པ་འདི། །འཇིག་རྟེན་སྣང་བར་བྱེད་པ་སྟེ། །བྱིན་གྱིས་བརླབས་ཀྱི་སྟོབས་ཀྱིས་ནི། །ཡིག་འབྲུ་རྣམས་སུ་བསྟན་ནས་སུ། །སེམས་ཅན་རྣམས་ལ་སྙིང་བརྩེའི་ཕྱིར། །ངས་ནི་ཐམས་ཅད་རབ་ཏུ་བཤད། །དེ་ནས་དཔལ་ལྡན་རྡོ་རྗེ་འཛིན། །ངོ་མཚར་གྱུར་ནས་མིག་གདངས་ཏེ། །ཐམས་ཅད་མཁྱེན་ལ་མགོ་བོ་ཡིས། །ཕྱག་འཚལ་ནས་ནི་ཚིག་འདི་སྨྲས། །སངས་རྒྱས་ཀུན་གྱི་ཐབས་དང་ནི། །ཤེས་རབ་བསམ་ཡས་

ངོ་མཚར་ཆེ། །སྤྲོས་པ་ཀུན་དང་བྲལ་བ་ཡི། །ཆོས་རྟོགས་ནས་ནི་རང་བྱུང་རྣམས། །འཇིག་རྟེན་ཀུན་གྱི་རེ་བ་ཀུན། །ཡོངས་སུ་རྫོགས་པར་བྱེད་པ་སྟོན། །གསང་སྔགས་མཚན་ཉིད་དེ་ལྟ་བུ། །བདེན་པ་གཉིས་ལ་ལེགས་གནས་པ། །སེམས་ཅན་ཀུན་གྱིས་ཤེས་ན་ནི། །འཇིག་རྟེན་ཀུན་གྱི་མཆོད་གནས་འགྱུར། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་ཚིགས་སུ་བཅད་པ་དེ་དག་གསོལ་ནས། བཅོམ་ལྡན་འདས་རྣམ་པར་སྣང་མཛད་ལ་མིག་མི་འཛུམས་པའི་ལྟ་བས་བལྟས་ནས་ཅང་མི་སྨྲ་བར་འདུག་གོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་སངས་རྒྱས་ཀྱི་ས་ལ་གནས་པ་རྣམས་ཀྱི་ཏིང་ངེ་འཛིན་གྱི་ཚུལ་ནི། དོགས་པ་དང་ནི་བྲལ་བ་རུ། །འཇིག་རྟེན་མཚན་ཉིད་ཤེས་ནས་ནི། །དགོས་པའི་ས་ལ་གནས་དེ་རྣམས། །སངས་རྒྱས་ས་ལ་གནས་པ་ཡིན། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་ས་བརྒྱད་པའི་དབང་ཕྱུག་རྣམས་ཀྱི་ཏིང་ངེ་འཛིན་གྱི་ཚུལ་ནི། ཆོས་རྣམས་ཐམས་ཅད་མི་དམིགས་ཤིང་། ། སྲིད་དང་སྐྱེ་བ་རྣམ་སྤངས་པའི། །འཇིག་རྟེན་སྒྱུ་མ་ལྟར་ཤེས་ནས། །འཇིག་རྟེན་འཇིག་རྟེན་དབང་དུ་འདོད། །གསང་བ་པའི་བདག་པོ་གཞན་ཡང་ཉན་ཐོས་དམིགས་པ་དང་བཅས་པའི་ས་ལ་གནས་པ་རྣམས་སྐྱེ་བ་དང་འཇིག་པར་རྟོགས་ནས། མཐའ་གཉིས་བཤིག་པས་རྒྱུ་མི་དམིགས་པའི་ཕྱིར་ཤིན་ཏུ་དངོས་པོ་མེད་པའི་ཡེ་ཤེས་མི་སྤྱོད་དེ། འདི་ནི་ཉན་ཐོས་རྣམས་ཀྱི་ཏིང་ངེ་འཛིན་གྱི་ཚུལ་ལོ། །གསང་བ་པའི་བདག་པོ་རང་སངས་རྒྱས་རྒྱུ་དང་འབྲས་བུ་རྣམ་པར་བཤིག་ནས་བརྗོད་དུ་མེད་པའི་ཆོས་ཀྱི་ཚུལ་ལ་གནས་པ་རྣམས་ནི་ཆོས་ཐམས་ཅད་བརྗོད་དུ་མེད་དོ་སྙམ་པའི་ཡེ་ཤེས་འཇུག་སྟེ། ངག་ཤིན་ཏུ་འགོག་པའི་ཏིང་ངེ་འཛིན་ལ་ཡང་དག་པར་རིག་པར་བྱེད་པ་འདི་ནི་རང་སངས་རྒྱས་རྣམས་ཀྱི་ཏིང་ངེ་འཛིན་གྱི་ཚུལ་ལོ། །གསང་བ་པའི་བདག་པོ་གཞན་ཡང་འཇིག་རྟེན་པ་རྣམས་རྒྱུ་ལས་འབྲས་བུ་དང་། ལས་ལས་འབྱུང་བའམ་ལྡོག་

པར་རྟོག་ཅིང་གཞན་གྱི་དབང་གིས་སྟོང་པ་ཉིད་ཀྱི་ཏིང་ངེ་འཛིན་ཀུན་ཏུ་སྐྱེ་བར་འགྱུར་ཏེ། འདི་ནི་འཇིག་རྟེན་པ་རྣམས་ཀྱི་ཏིང་ངེ་འཛིན་གྱི་ཚུལ་ལོ། །གསང་བ་པའི་བདག་པོ། འདི་ནི་ཏིང་ངེ་འཛིན་གྱི་ཚུལ། །ཡིན་ཏེ་དེ་ལ་གནས་པ་ཡི། །སངས་རྒྱས་དང་ནི་རང་སངས་རྒྱས། །བྱང་ཆུབ་སེམས་དཔའ་སྐྱོབ་རྣམས་དང་། །ཉན་ཐོས་དེས་པ་སྡིག་བཅོམ་པར། །གྲགས་པ་གང་དག་ཡིན་པ་དང་། །འཇིག་རྟེན་པ་ཡི་ལྷ་གང་ཡིན། །གསང་སྔགས་སྤྱད་པའི་ཆོ་གའི་ཚུལ། །སེམས་ཅན་རྣམས་ལ་ཕན་འདོད་པས། །དཔའ་བོ་དེ་ཚེ་འཆད་པར་བྱེད། ། དེ་ནས་ཡང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་སྔགས་རྣམས་ཀྱི་གསང་སྔགས་ཀྱི་མཚན་ཉིད་ཉོན་ཅིག །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས། བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེ་ལ། །རྫོགས་སངས་རྒྱས་ཀྱི་གསང་སྔགས་ནི། །ཚིག་དང་མིང་དང་བརྡ་ཡིས་མཚན། །ཚིག་དེ་དབང་དུ་གྱུར་པས་ན། །གསང་སྔགས་དོན་རྣམས་ཐམས་ཅད་སྒྲུབ། །ཁ་ཅིག་སྐུལ་བའི་ཚིག་དང་ལྡན། །ཁ་ཅིག་རང་མིང་ཐོག་མར་སྨོས། །ཧཱུྃ་དང་ཕཊ་དང་ལྡན་པ་ནི། །གཙུག་ཏོར་རྣམས་ཀྱི་ཡིན་པར་བསྒྲགས། །ཟུང་ཟོ་ཆོམས་ཤིག་ཅེས་པ་དང་། །སྣུན་སོད་དྲོལ་ཅིག་ཅེས་པ་ནི། །ཕྱག་བརྙན་རྣམས་དང་ཁྲོ་བོ་ཡི། །གསང་སྔགས་ཡིན་པར་འདྲེན་པས་གསུངས། ། ན་མཿསྭཱ་ཧཱ་ལ་སོགས་ལྡན། །ཏིང་ངེ་འཛིན་ནི་རྟོགས་པས་མཚན། །ཞི་བའི་ཡི་གེ་རྣམ་པར་དག །རེ་བ་ཐམས་ཅད་རྫོགས་བྱེད་པའི། །གསང་སྔགས་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་སྐྱོབ་པའི་ཡིན། །ཉན་ཐོས་རྣམས་ཀྱི་གསང་སྔགས་ནི། །གཅིག་པོ་གཞི་ནི་གཅིག་ལ་གནས། །རང་སངས་རྒྱས་ཀྱིའང་དེ་བཞིན་ཏེ། །ཁྱད་པར་དག་ནི་བཤད་བྱ་ན། །ཏིང་ངེ་འཛིན་གྱི་ཁྱད་པར་ལས། །ལས་ཚེ་རྣམ་པར་སྦྱང་ཞེས་བྱ། །གསང་བ་པའི་བདག་པོ་གཞན་ཡང་གསང་སྔགས་རྣམས་ཀྱི་མཚན་ཉིད་ནི། སངས་རྒྱས་ཐམས་

ཅད་ཀྱིས་མ་བྱས། བྱེད་དུ་མ་བཅུག །རྗེས་སུ་ཡི་རང་བ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ནི་ཆོས་རྣམས་ཀྱི་ཆོས་ཉིད་དེ། འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་དེ་ནི་ཡེ་ནས་གནས་པ་སྟེ། དེ་ཡང་འདི་ལྟར་གསང་སྔགས་རྣམས་ཀྱི་གསང་སྔགས་ཀྱི་ཆོས་ཉིད་དོ། །གསང་བ་པའི་བདག་པོ་དེ་ལ་གང་གི་ཚེ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ། ཐམས་ཅད་གཟིགས་པ་འཇིག་རྟེན་དུ་བྱུང་བ་དེའི་ཚེ། ཆོས་ཉིད་དེ་ཚུལ་སྣ་ཚོགས་དང་དགོངས་པ་སྣ་ཚོགས་ཀྱིས། སེམས་ཅན་བསམ་པ་སྣ་ཚོགས་པ་རྣམས་ལ་ཚིག་སྣ་ཚོགས་པ་རྣམས་ཡིག་འབྲུ་སྣ་ཚོགས་དང་། ཡུལ་གྱི་ངེས་པའི་ཚིག་ཏུ་བརྗོད་པ་སྣ་ཚོགས་དང་། དབྱངས་སྣ་ཚོགས་སུ་གོ་བ་རྣམས་སུ་བྱིན་གྱིས་བརླབས་ཏེ། གསང་སྔགས་ཀྱི་ཚུལ་འཆད་དོ། །ཅི་ལྟར་ན་དེ་བཞིན་གཤེགས་པ་རྣམས་གསང་སྔགས་ཀྱི་ཚུལ་ཡིག་འབྲུ་དག་ཏུ་བྱིན་གྱིས་རློབ་ཅེ་ན། གསང་བ་པའི་བདག་པོ་དེ་ལ་དེ་བཞིན་གཤེགས་པ་རྣམས་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཡང་དག་པར་བསྒྲུབས་པའི་བདེན་པའི་ཚིག་གང་ཡིན་པ་དང་། འཕགས་པའི་བདེན་པ་བཞི་དང་། དྲན་པ་ཉེ་བར་གཞག་པ་བཞི་དང་། རྫུ་འཕྲུལ་གྱི་རྐང་པ་བཞི་དང་། དེ་བཞིན་གཤེགས་པའི་སྟོབས་བཅུ་དང་། ཕ་རོལ་ཏུ་ཕྱིན་པ་དྲུག་དང་། བྱང་ཆུབ་ཀྱི་ཡན་ལག་རིན་པོ་ཆེ་བདུན་དང་། ཚངས་པའི་གནས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་གང་དག་ཡིན་པ་དང་། གསང་བ་པའི་བདག་པོ་མདོར་ན་དེ་བཞིན་གཤེགས་པ་རྣམས་ཀྱི་ཐམས་ཅད་མཁྱེན་པའི་ཡེ་ཤེས་གང་ཡིན་པ་དེ་ཐམས་ཅད་དེ་བཞིན་གཤེགས་པ་རྣམས་ཉིད་ཀྱི་བསོད་ནམས་དང་། ཡེ་ཤེས་ཀྱི་སྟོབས་དང་། སྔོན་གྱི་སྨོན་ལམ་མཁྱེན་པའི་སྟོབས་དང་། ཆོས་ཀྱི་དབྱིངས་ཀྱི་བྱིན་གྱི་རླབས་ཀྱི་སྟོབས་ཀྱི་བྱིན་གྱིས་བརླབས་ནས། སེམས་ཅན་རྣམས་ལ་སྐལ་བ་ཅི་ལྟ་བ་བཞིན་དུ་གསང་སྔགས་ཀྱི་ཆོ་ག་ཡང་དག་པར་རབ་ཏུ་སྟོན་ཏོ། །གསང་སྔགས་ཀྱི་ཆོ་ག་དེ་ཡང་གང་ཞེ་ན། གཟོད་ནས་མ་སྐྱེས་པའི་ཕྱིར་ཨ་ནི་ཆོས་ཐམས་ཅད་ཀྱི་སྒོའོ། །དགོངས་པ་དང་བྲལ་བའི་ཕྱིར་ཀ་

ནི་ཆོས་ཐམས་ཅད་ཀྱི་སྒོའོ། །ནམ་མཁའ་དང་འདྲ་བར་དམིགས་སུ་མེད་པའི་ཕྱིར་ཁ་ནི་ཆོས་ཐམས་ཅད་ཀྱི་སྒོའོ། །འགྲོ་བ་ཐམས་ཅད་དམིགས་སུ་མེད་པའི་ཕྱིར་ག་ནི་ཆོས་ཐམས་ཅད་ཀྱི་སྒོའོ། །གཅིག་ཏུ་འཕུངས་པ་དམིགས་སུ་མེད་པའི་ཕྱིར་གྷ་ནི་ཆོས་ཐམས་ཅད་ཀྱི་སྒོའོ། །འཆི་འཕོ་ཐམས་ཅད་དང་བྲལ་བའི་ཕྱིར་ཙ་ནི་ཆོས་ཐམས་ཅད་ཀྱི་སྒོའོ། །གྲིབ་མ་ཐམས་ཅད་དང་མཚུངས་པའི་ཕྱིར་ཚ་ནི་ཆོས་ཐམས་ཅད་ཀྱི་སྒོའོ། །སྐྱེ་བ་དམིགས་སུ་མེད་པའི་ཕྱིར་ཛ་ནི་ཆོས་ཐམས་ཅད་ཀྱི་སྒོའོ། །དྲི་མ་དམིགས་སུ་མེད་པའི་ཕྱིར་ཛྷ་ནི་ཆོས་ཐམས་ཅད་ཀྱི་སྒོའོ། །ང་རྒྱལ་དམིགས་སུ་མེད་པའི་ཕྱིར་ཊ་ནི་ཆོས་ཐམས་ཅད་ཀྱི་སྒོའོ། །བསྐྱེད་པ་དམིགས་སུ་མེད་པའི་ཕྱིར་ཋ་ནི་ཆོས་ཐམས་ཅད་ཀྱི་སྒོའོ། །འཁྲུག་པ་དམིགས་སུ་མེད་པའི་ཕྱིར་ཌ་ནི་ཆོས་ཐམས་ཅད་ཀྱི་སྒོའོ། །བསླུ་བ་དང་ཡོངས་སུ་བྲལ་བའི་ཕྱིར་ཌྷ་ནི་ཆོས་ཐམས་ཅད་ཀྱི་སྒོའོ། །དེ་བཞིན་ཉིད་དམིགས་སུ་མེད་པའི་ཕྱིར་ཏ་ནི་ཆོས་ཐམས་ཅད་ཀྱི་སྒོའོ། །གནས་དམིགས་སུ་མེད་པའི་ཕྱིར་ཐ་ནི་ཆོས་ཐམས་ཅད་ཀྱི་སྒོའོ། །འདུལ་བ་དམིགས་སུ་མེད་པའི་ཕྱིར་ད་ནི་ཆོས་ཐམས་ཅད་ཀྱི་སྒོའོ། །ཁམས་དམིགས་སུ་མེད་པའི་ཕྱིར་དྷ་ནི་ཆོས་ཐམས་ཅད་ཀྱི་སྒོའོ། །དོན་དམ་པའི་བདེན་པ་དམིགས་སུ་མེད་པའི་ཕྱིར་པ་ནི་ཆོས་ཐམས་ཅད་ཀྱི་སྒོའོ། །ལྦུ་བ་དང་འདྲ་བར་སྙིང་པོ་མེད་པའི་ཕྱིར་ཕ་ནི་ཆོས་ཐམས་ཅད་ཀྱི་སྒོའོ། །ངག་གི་ལམ་དང་བྲལ་བའི་ཕྱིར་བ་ནི་ཆོས་ཐམས་ཅད་ཀྱི་སྒོའོ། །སྲིད་པ་ཐམས་ཅད་དམིགས་སུ་མེད་པའི་ཕྱིར་བྷ་ནི་ཆོས་ཐམས་ཅད་ཀྱི་སྒོའོ། །འཆི་བ་དམིགས་སུ་མེད་པའི་ཕྱིར་མ་ནི་ཆོས་ཐམས་ཅད་ཀྱི་སྒོའོ། །ཐེག་པ་ཐམས་ཅད་དམིགས་སུ་མེད་པའི་ཕྱིར་ཡ་ནི་ཆོས་ཐམས་ཅད་ཀྱི་སྒོའོ། །རྡུལ་ཐམས་ཅད་དང་བྲལ་བའི་ཕྱིར་ར་ནི་ཆོས་ཐམས་ཅད་ཀྱི་སྒོའོ། །མཚན་ཉིད་མི་དམིགས་པའི་ཕྱིར་ལ་ནི་ཆོས་ཐམས་ཅད་ཀྱི་སྒོའོ། །རང་བཞིན་གྱིས་ཞི་བའི་ཕྱིར་ཤ་ནི་ཆོས་ཐམས་ཅད་ཀྱི་སྒོའོ། །རང་བཞིན་གྱིས་བླུན་པ་ཉིད་ཀྱི་ཕྱིར་ཥ་ནི་ཆོས་ཐམས་ཅད་ཀྱི་སྒོའོ། །བདེན་པ་ཐམས་ཅད་དམིགས་སུ་མེད་པའི་ཕྱིར་ས་ནི་ཆོས་ཐམས་ཅད་ཀྱི་སྒོའོ། །རྒྱུ་

དམིགས་སུ་མེད་པའི་ཕྱིར་ཧ་ནི་ཆོས་ཐམས་ཅད་ཀྱི་སྒོའོ། །གསང་བ་པའི་བདག་པོ་ང་དང་ཉ་དང་ཎ་དང་ན་དང་མ་ནི་ཏིང་ངེ་འཛིན་ཐམས་ཅད་ལ་དབང་སྒྱུར་བ་སྟེ། མཐུ་ཐམས་ཅད་དང་ལྡན་པ། རབ་ཏུ་མྱུར་བར་དགོས་པའི་དོན་རབ་ཏུ་སྒྲུབ་པར་བྱེད་པ་ཡིན་ནོ། །གསང་བ་པའི་བདག་པོ་གསང་སྔགས་ཀྱི་ཚུལ་ཏིང་ངེ་འཛིན་གྱི་སྒོ་འདི་ནི་རེ་བ་ཐམས་ཅད་ཡོངས་སུ་རྫོགས་པར་བྱེད་པ། དེ་བཞིན་གཤེགས་པ་ཐམས་ཅད་ཀྱི་རྣམ་པར་སྨིན་པའི་འབྲས་བུ་བསམ་གྱིས་མི་ཁྱབ་པ། རྣམ་པ་ཐམས་ཅད་ཀྱི་མཆོག་དང་ལྡན་པ། གསང་སྔགས་ཀྱི་དེ་ཁོ་ན་ཉིད་ཀྱི་དོན་ངེས་པ། དུས་གསུམ་ལས་ཤིན་ཏུ་འདས་པ། ནམ་མཁའ་ལྟར་དྲི་མ་མེད་པ་སྟེ། བསམ་ཡས་སེམས་ཀྱི་ས་ལ་གནས། །ལས་དང་བྱ་བ་དག་ལས་བྱུང་། །སྤྱད་པའི་ས་ནི་རྗེས་ཐོབ་ནས། །བསམ་ཡས་འབྲས་བུ་སྦྱིན་པར་བྱེད། །འདི་ནི་དེ་ཉིད་དམ་པ་སྟེ། །སངས་རྒྱས་ཀུན་གྱིས་རབ་ཏུ་བསྟན། །གསང་སྔགས་ཆོ་ག་འདི་ཤེས་ནས། །སྔགས་པས་དངོས་གྲུབ་ཐོབ་པར་འགྱུར། །སྒྲ་ཞེས་བྱ་བ་དེ་ཉིད་མཆོག །གསང་སྔགས་རྣམས་ཀྱི་གསང་སྔགས་མཚན། །སྔགས་པས་ཡིད་ལ་སེམས་ན་ནི། །འཆི་འཕོ་མེད་པའི་གནས་འཐོབ་བོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསང་སྔགས་ཀྱི་མཚན་ཉིད་ཀྱི་ཚུལ་བསམ་གྱིས་མི་ཁྱབ་པའི་ཆོས་ཀྱི་རྣམ་གྲངས་བསྟན་པ། བཅོམ་ལྡན་འདས་ངོ་མཚར་ལགས་སོ། །དེ་ནི་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་ཏེ། བཅོམ་ལྡན་འདས་གང་དག་གསང་སྔགས་ཀྱི་ཚུལ་འདི་ལ་དད་པའི་སེམས་ཅན་དེ་དག་ཀྱང་ཐུན་མོང་མ་ལགས་པའི་ཡོན་ཏན་དང་ལྡན་པར་འགྱུར་རོ། །བཅོམ་ལྡན་འདས་གཞན་ཡང་དཀྱིལ་འཁོར་གྱི་ཡོ་བྱད་ཀྱི་ཆོ་ག་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །དེ་ནས་སྔགས་པ་དེ་ཡིས་སུ། །མེ་ཏོག་སེར་པོ་དཀར་པོ་དམར། །ཡིད་དུ་འོང་བས་ནན་ཏན་དུ། །ལྷ་རྣམས་ལ་ནི་མཆོད་པ་བྱ། །པདྨའམ་ཡང་ན་ཨུཏྤ་

ལ། །ནཱ་ག་གེ་སར་པུ་ན་ག །ཙམ་པ་ཨ་ཤོ་ཏི་ལ་ཀ་།པ་ཏ་ལ་དང་ས་ལའང་རུང་། །དེ་ལ་སོགས་པའི་མེ་ཏོག་རྣམས། །ཡིད་དུ་འོང་ཞིང་བལྟ་ན་སྡུག །བཀྲ་ཤིས་པ་ལ་སྔགས་པ་ཡིས། །མཁས་པས་ནན་ཏན་མཆོད་པར་བྱ། །ཙནྡན་ཏ་གར་སྤྲྀ་ཀ་དང་། ། གུར་ཀུམ་དང་ནི་རུ་རྟའང་རུང་། །སྤོས་མཆོག་རབ་ཏུ་བཟང་པོ་ནི། །སྣ་ཚོགས་ཡིད་དུ་འོང་བ་དབུལ། །ཨ་ག་རུའམ་སྒྲོན་ཤིང་ངམ། །ག་པུར་དང་ནི་ཙནྡན་དང་། །སཱ་ལའི་ཐང་ཆུ་བཀྲ་ཤིས་པའམ། །ཤི་རི་བ་ས་ཀ་ཡང་རུང་། །གཞན་ཡང་བདུག་སྤོས་སྣ་ཚོགས་པ། །བཀྲ་ཤིས་འཇིག་རྟེན་རྣམ་གྲགས་པ། །ཡིད་འོང་སྔགས་པས་ཆོ་ག་བཞིན། །ལྷ་རྣམས་ལ་ནི་དབུལ་བར་བྱ། །དེ་ནས་གཞན་ཡང་སེམས་དཔའ་ཆེ། །ལྷ་བཤོས་ལས་ཀྱི་ཆོ་ག་ཉོན། །འོ་ཐུག་འབྲས་ཆན་ཞོ་སྦྱར་ནས། །ལ་ཕུག་དང་ནི་ཁུར་སྐྱ་དང་། །གོར་བོད་ཀ་ར་ཡིད་འོང་དང་། །ཁཎྜའི་བཅའ་བ་བཟང་པོ་དང་། །པུ་རི་ཀ་དང་ཀ་རི་ཀ །དེ་བཞིན་མ་ཐུ་ཤི་ར་དང་། །ཕེ་ན་ཨ་ཤོག་བར་ཏི་དང་། །པར་པ་ཏ་ཡང་དབུལ་བར་བྱའོ།དེ་ལ་སོགས་པའི་བཟའ་བ་དང་། །ཤིང་ཏོག་རྣམས་ནི་སྣ་ཚོགས་དང་། །ཧྭགས་དང་ལི་ཁ་ར་རྣམས་དང་། །བུ་རམ་སྦྲང་རྩི་མར་དག་དང་། །བཏུང་བ་རྣམ་པ་སྣ་ཚོགས་དང་། །ཞོ་དང་འོ་མ་རྒྱས་པར་དབུལ། །མར་མེ་རྣམ་པ་སྣ་ཚོགས་པ། །གཙང་ཞིང་ཤིན་ཏུ་བཟང་པོ་ཡི། །འབྲུ་མར་རབ་ཏུ་དྲི་ཞིམ་པས། །རབ་ཏུ་བཀང་སྟེ་དབུལ་བར་བྱ། །ཕྱོགས་སུ་གདུགས་དང་བ་དན་རྣམས། ། ཁ་དོག་སྣ་ཚོགས་རབ་ཏུ་བསྒྲེང་། །རྟ་བབས་བཟང་པོ་རྣམས་ཀྱང་ནི། །དྲིལ་བུ་དང་བཅས་རབ་ཏུ་དབུལ། །ཡང་ན་ཡིད་ཀྱི་མཆོད་པ་ནི། །ཐམས་ཅད་ནན་ཏན་བསྐྱེད་དེ་བྱ། །དེ་ནས་བུམ་པ་བརྒྱད་དམ་ནི། །བཅུ་དྲུག་རྒྱས་པར་བླངས་ནས་སུ། །སྨན་དང་རིན་ཆེན་ཐམས་ཅད་བླུགས། །སྤོས་ཀྱི་ཆུས་ནི་རབ་ཏུ་བཀང་། །ལྡུམ་བུ་དག་གིས་ཁ་བརྒྱན་ཏེ། །དེ་བཞིན་འབྲས་བུས་ཁ་ཡང་དགང་། །མེ་ཏོག་སྤོས་ལ་སོགས་པས་བརྒྱན། །ཤིན་ཏུ་བཟང་པོ་བསྲུང་བ་བྱས། །མགྲིན་པ་རས་ཀྱིས་བཅིངས་པ་རྣམས། །མཁས་པས་རྣམ་པར་དགོད་

པར་བྱ། །ལྷ་ཡི་གཙོ་བོ་རྣམས་ལ་ནི། །རས་ནི་ཟུང་རེ་ཟུང་རེ་དབུལ། །སེམས་དཔའ་ཆེན་པོ་ཕལ་རྣམས་ལ། །ཡ་རེ་དབུལ་བར་རབ་ཏུ་བསྒྲགས། །མཆོད་པ་དེ་ལྟར་བྱས་ནས་ནི། །སློབ་མ་དཀྱིལ་འཁོར་དྲུང་བཀུག་སྟེ། །སྔགས་པས་ཆུ་ཡིས་བསང་གཏོར་བྱ། ། དྲི་དང་མེ་ཏོག་སྦྱིན་པར་བྱ། །དེ་བཞིན་གཤེགས་པ་དྲན་བྱས་ནས། །བྱང་ཆུབ་སེམས་ཀྱང་འཛིན་དུ་གཞུག །དེས་ན་རྒྱལ་བའི་རིགས་དགེ་ལ། །ཐམས་ཅད་རབ་ཏུ་སྐྱེས་པར་འགྱུར། །ཆོས་ཀྱི་དབྱིངས་ལས་བྱུང་བ་ཡི། །ཕྱག་རྒྱ་དེ་དག་རྣམས་ལ་བཅིང་། །ཆོས་ཀྱི་འཁོར་ལོའང་བཅིངས་ནས་ནི། །རྡོ་རྗེ་སེམས་དཔས་བྱིན་གྱིས་བརླབས། །དེ་ནས་སངས་རྒྱས་ཀུན་གྱི་ནི། །དམ་ཚིག་སྡོམ་བརྩོན་ཅན་གྱིས་བཅིངས། །དེ་ཚེ་སྔགས་ཀྱི་ཆོ་ག་བཞིན། །རས་ལ་ལན་གསུམ་གདབ་པར་བྱ། །སྙིང་རྗེར་གྱུར་པའི་ཡིད་ཀྱིས་སུ། །དེ་དག་གི་ནི་གདོང་ཡང་དགབ། ། དམ་ཚིག་ལན་གསུམ་བཟླས་ནས་ནི། །སྤྱི་བོར་ཡི་གེ་ར་ཞེས་པ། །ཀླད་ཀྱི་ཀོར་བཅས་བརྗིད་དང་ལྡན། །འབར་བའི་ཕྲེང་བ་རྣམ་པར་འཕྲོ། །ཟླ་བ་འཆར་ཀ་ལྟ་བུ་ཡི། །ཁ་དོག་དཀར་པོ་གཞག་པར་བྱ། །སྐྱོབ་པ་ཀུན་གྱི་སྤྱན་སྔར་ནི། །དེ་ནས་མེ་ཏོག་འདོར་དུ་གཞུག །མེ་ཏོག་གང་ལ་བབ་པ་དེ། །སྔགས་པས་དེ་ལ་སྦྱིན་པར་བྱ། །དཀྱིལ་འཁོར་དང་པོའི་སྒོ་དྲུང་དུ། །སྒོ་ཁྱུད་ཀྱི་ནི་དབུས་ཀྱི་ཆ། །དཀྱིལ་འཁོར་གྱི་ནི་སྒོ་གཉིས་ཀྱི། །བར་དུ་སློབ་མ་གཟུང་བར་བྱ། །དེར་གནས་པ་ལ་ཆོ་ག་ཀུན། །རིམ་པ་བཞིན་དུ་ལེགས་པར་བྱ། །སློབ་མ་སྡིག་དང་བྲལ་བ་ཀུན། །དེ་ལྟར་ལེགས་པར་བཙུད་ནས་ནི། །དེ་དག་ཞི་བར་བྱ་བའི་ཕྱིར། །སྦྱིན་སྲེག་ཆོ་ག་བཞིན་དུ་བྱ། །སྙིང་པོའི་དཀྱིལ་འཁོར་གྱི་ནི་མདུན། །དཀྱིལ་འཁོར་གཉིས་པའི་རྒྱབ་རོལ་གྱི། །དཀྱིལ་འཁོར་གྱི་ནི་དབུས་ཀྱི་ཆར། །མ་ཡེངས་པ་ཡི་སེམས་ཀྱིས་བྱ། ། མེ་ཐབ་ཁྲུ་གང་ཙམ་གྱི་ནི། །ཚད་དུ་རབ་ཏུ་བསྒྲགས་པ་ཡིན། །ཁ་རན་སོར་བཞི་ཚད་དུ་བྱ། །དབུས་སུ་རྡོ་རྗེ་རབ་ཏུ་བརྟག །དེ་ནས་སྔགས་པའི་གཡས་ལོགས་སུ། །སྦྱིན་སྲེག་གི་ནི་ཡོ་བྱད་གཞག །གཡོན་གྱི་ཕྱོགས་སུ་སློབ་མ་རྣམས། །ཙོག་ཙོག་པོར་ནི་འཁོད་དུ་གཞུག།

སྡོམ་བརྩོན་བདག་ཉིད་ས་སྟེང་དུ། །ཀུ་ཤ་བཏིང་བའི་སྟན་ལ་འདུག །ཡང་ན་ཚོན་རྩི་དམར་པོ་མཆོག །རབ་ཏུ་བཟང་པོ་བླངས་ནས་སུ། །དེ་ཡིས་མེ་ཡི་གནས་རྣམས་ཀུན། །སྔགས་པས་མདོ་རུ་བྲི་བར་བྱ། །ཀུ་ཤ་དག་གིས་གཡས་ཕྱོགས་ནས། །ཐམས་ཅད་ཁོར་ཡུག་དགྲམ་པ་ནི། །མང་པོས་བསྐོར་བའི་ཚུལ་དུ་དགྲམ། །སྤོས་ཀྱི་ཆུ་ཡིས་བསང་གཏོར་བྱ། །དེ་ནས་སེམས་ཅན་ཕན་བྱེད་པའི། །མེ་ནི་ཐབ་ཁུང་ནང་བསམས་ཏེ། །བརྟུལ་ཞུགས་བཟང་པོས་དགང་བླུགས་མཆོག །གསང་སྔགས་འདི་ཡིས་སྦྱིན་པར་བྱ། །ན་མཿས་མནྟ་བུད་དྷཱ་ནཱཾ། ཨགྣ་ཡེ་སྭཱ་ཧཱ། དེ་ནས་སློབ་མ་རེ་རེ་ནས། །མཁས་པས་ལག་པ་གཡོན་པ་ཡིས། །གཡས་པའི་མཐེ་བོང་བཟུང་ནས་སུ། །མཉམ་པར་བཞག་པས་སྦྱིན་སྲེག་བྱ། །ཡིད་ནི་མཉམ་པར་བཞག་ནས་སུ། །སྲེག་བླུགས་རེ་རེ་ལས་ཀྱང་ནི། །གསང་སྔགས་ཆོ་ག་བཞིན་ཟློས་ཤིང་། །ཉི་ཤུ་རྩ་གཅིག་སྦྱིན་སྲེག་བྱ། །ན་མཿས་མནྟ་བུད་དྷཱ་ནཱཾ། ཨོཾ་མ་ཧཱ་ཤཱནྟ་ག་ཏ་ཤཱནྟི་ཀ་ར་པྲ་ཤ་མ་དྷརྨྨ་ནི་ར་ཛཱ་ཏ། ཨ་བྷཱ་བ་སྭ་བྷཱ་བ་དྷརྨྨ་ས་མ་ཏཱ་པྲཱཔྟེ་སྭཱ་ཧཱ། སྦྱིན་སྲེག་རྗེས་ལ་སྔགས་པ་ཡིས། །སློབ་མ་རྣམས་ལ་ཡོན་བསླང་བ། ། གསེར་དང་དངུལ་དང་རིན་ཆེན་དང་། །རྟ་དང་དེ་བཞིན་གླང་པོ་དང་། །རྔ་མོ་བ་ལང་མ་ཧེ་གོས། །གཞན་ཡང་དངོས་པོ་ཅི་ཡང་རུང་། །དེ་ཚེ་སློབ་མས་གུས་པར་ནི། །དད་པ་རབ་ཏུ་ལྡན་པ་ཡིས། །སེམས་ལ་དགའ་བ་བསྐྱེད་ནས་སུ། །བླ་མ་ལ་ནི་ཡོན་དབུལ་ལོ། །ཡང་ན་ཅི་ནས་བླ་མ་དེ། །རབ་ཏུ་མགུ་བར་འགྱུར་བར་བྱ། །དེ་ལྟར་བྱས་ནས་བདག་བསྲུང་སྟེ། །སློབ་མ་དེ་བོས་བསྒོ་བ་ནི། །འདི་ནི་བསོད་ནམས་ཞིང་ཡིན་ཞེས། །སེམས་ཅན་ཀུན་གྱི་དོན་གྱི་ཕྱིར། །སྐྱོབ་པ་རྣམས་ནི་ཀུན་གྱིས་གསུངས། །རྣམ་དག་ཡོན་ཏན་རྒྱས་པ་ཡི། །དགེ་འདུན་ལ་ནི་ཀུན་གྱིས་བྱིན། །དགེ་འདུན་ལ་ཕུལ་འབྲས་བུ་ཆེ། །སྐྱེས་བུ་མཁས་པ་གང་དག་གིས། །དགེ་འདུན་ལ་ནི་ཡོན་ཕུལ་ན། །ལོངས་སྤྱོད་ཆེན་པོ་མི་ཟད་པ། །འཇིག་རྟེན་འཐད་པ་སྐྱེ་བར་འགྱུར། །དེ་བས་ཐམས་ཅད་མཐུན་པར་ནི། །སེམས་ལ་དགའ་བ་བསྐྱེད་ནས་སུ། །སངས་རྒྱས་བསྔགས་པའི་

དགེ་འདུན་ལ། །ཅི་ནུས་པར་ནི་མཆོད་སྟོན་བྱ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། སེམས་དཔའ་ཆེན་པོ་དབང་བསྐུར་བ། །སྔོན་གྱི་སངས་རྒྱས་ཀྱིས་བཤད་པ། །རྒྱས་པ་རུ་ནི་བཤད་པར་བྱ། །ཡིད་གཅིག་བསྡུས་ཏེ་ལེགས་པར་ཉོན། །གསང་བ་པའི་བདག་པོ་དེ་ལ་སློབ་དཔོན་གྱིས་རྩ་བའི་དཀྱིལ་འཁོར་གྱི་མདུན་དུ་བར་ཁྲུ་དོ་བོར་ནས་ཕྱི་རོལ་གྱི་ས་ལ་དཀྱིལ་འཁོར་གཉིས་པ་གྲུ་བཞི་པ་སྒོ་གཅིག་པ་བྲིའོ། །གྲྭ་བཞིར་རྡོ་རྗེ་འཛིན་པ་བཞི་དགོད་དེ། བཞི་གང་ཞེ་ན། འདི་ལྟ་སྟེ། སྤྲོས་པ་མེད་པར་གནས་པ་དང་།ནམ་མཁའ་དྲི་མ་མེད་པ་དང་། དྲི་མ་མེད་པའི་མིག་དང་། གོས་སྣ་ཚོགས་གྱོན་པ་རྣམས་སོ། །དབུས་སུ་པདྨ་ཆེན་པོ་འདབ་མ་བརྒྱད་པ་ཟེ་བ་དང་བཅས་པ་གཞག་སྟེ། འདབ་མ་བཞི་ལ་བྱང་ཆུབ་སེམས་དཔའ་གྲོགས་སུ་གྱུར་པ་སྔོན་གྱི་སྨོན་ལམ་གྱི་མཐུ་ཅན་བཞི་བྲི་བར་བྱ་སྟེ། འདི་ལྟ་སྟེ། གཟུངས་ཀྱི་དབང་ཕྱུག་རྒྱལ་པོ་དང་། དྲན་པ་དང་ཤེས་བཞིན་ཅན་དང་། ཕན་པའི་ལྷག་པའི་བསམ་པ་ཅན་དང་། སྙིང་རྗེ་ཅན་ནོ། །འདབ་མ་གཞན་རྣམས་ལ་ནི་ཕྱག་བརྙན་བཞི་བྲི་སྟེ། བཞི་གང་ཞེ་ན། འདི་ལྟ་སྟེ། སེམས་ཀྱི་ཁྱད་པར་ལ་སྤྱོད་པ་དང་། འདོད་པ་ཡོངས་སུ་རྫོགས་བྱེད་དང་། མ་ཆགས་པ་དང་། རྣམ་པར་གྲོལ་བའོ། །དབུས་སུ་ནི་ཆོས་ཀྱི་དབྱིངས་བསམ་གྱིས་མི་ཁྱབ་པའི་གཟུགས་གཞག་གོ། །དེ་ནས་རིན་པོ་ཆེའི་བུམ་པ་བཞི་རིན་པོ་ཆེ་དང་། སྨན་ཐམས་ཅད་བླུགས་པ། ཀུན་ཏུ་བཟང་པོ་དང་། །བྱམས་པ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ངན་སོང་ཐམས་ཅད་སྤོང་བ་རྣམས་ཀྱིས་བྱིན་གྱིས་བརླབས་པས་སྤྱི་བོ་ནས་དབང་བསྐུར་རོ། །པདྨ་འདབ་མ་དེ་ལ་ནི། །སྔགས་པ་བདག་གིས་དེ་བཞག་ནས། །སྤོས་དང་མེ་ཏོག་གིས་མཆོད་དེ། །མར་མེ་མཆོད་ཡོན་སྦྱིན་པར་བྱ། །གདུགས་དང་རྒྱལ་མཚན་བ་དན་དང་། །རྔ་སྒྲ་ཡིད་དུ་འོང་བ་དང་། །བཀྲ་ཤིས་རྒྱ་ཆེན་སྙན་པ་ཡི། །ཚིག་གིས་ལེགས་པར་མངོན་དགའ་བྱ། །སྐྱོབ་པ་རྣམས་ཀྱི་སྤྱན་སྔ་རུ། །དེ་ནི་བསྒྲིམས་ཏེ་དབང་བསྐུར་རོ། །སྤོས་དང་མེ་ཏོག་བཟང་པོ་ཡིས།

དེ་ལ་ཡང་ནི་མཆོད་པ་བྱ། །དེ་ནས་གསེར་གྱི་ཐུར་མ་ནི། །ཐོགས་ཏེ་མདུན་དུ་འདུག་ནས་སུ། སློབ་མའི་སྙིང་ལ་འབབ་པའི་ཚིག །འདི་སྐད་ཅེས་ནི་སྨྲ་བར་བྱ། །སྔོན་གྱི་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་བཞིན། །བུ་ཁྱོད་ཀྱིས་ནི་མི་ཤེས་པའི། །ལིང་ཏོག་རྒྱལ་བ་རྣམས་ཀྱིས་བསལ། །དེ་ནས་མེ་ལོང་བླངས་ནས་སུ། །ཆོས་ཀྱི་མཚན་ཉིད་བཤད་པར་བྱ། །ཆོས་རྣམས་གཟུགས་བརྙན་ལྟ་བུ་སྟེ། །དང་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་བྱུང་བ་སྟེ། །ངོ་བོ་ཉིད་མེད་གནས་མེད་པ། །དེ་ལྟར་མཚན་ཉིད་བཤད་པར་བྱ། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་རྐང་པའི་བར་འོག་ཏུ། །ཆོས་ཀྱི་འཁོར་ལོ་གཞག་པར་བྱ། །དེ་ནས་ལག་པ་གཡས་པར་ཡང་། །ཤིན་ཏུ་བཟང་པོའི་དུང་བྱིན་ཏེ། །ཆོས་ཀྱི་དུང་ནི་བླ་མེད་པ། །ཀུན་ཏུ་རྒྱས་པར་བུས་ནས་སུ། །དེ་རིང་ཕན་ཅད་འཇིག་རྟེན་ལ། །སྐྱོབ་པ་རྣམས་ཀྱི་འཁོར་ལོ་བསྐོར། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་ཁྱོད། །གསང་སྔགས་སྤྱད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་འདོགས་བྱས་པ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཁྱོད་ལ་རྣམ་པ་ཀུན་ཏུ་སྲུང་། །དེ་ནས་སློབ་མ་དེ་བསླང་ལ། །སྔགས་པ་སྙིང་རྗེར་གྱུར་པ་ཡི། །ཡིད་ཀྱིས་ནང་དུ་བཅུག་ནས་ནི། །དེ་ལ་དམ་ཚིག་བསྟན་པར་བྱ། །དེ་རིང་ཕན་ཅད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །ཡོངས་སུ་གཏང་བར་མི་བྱའོ། །ཁྱོད་ཀྱིས་སེར་སྣ་དང་ནི་གང་། །སེམས་ཅན་གནོད་པ་མི་བྱའོ། །དམ་ཚིག་འདི་དག་སངས་རྒྱས་ཀྱིས། །བརྟུལ་ཞུགས་བཟང་པོ་ཁྱོད་ལ་བཤད། །ཅི་ལྟར་རང་གི་སྲོག་བསྲུང་བ། །དེ་ལྟར་ཁྱོད་ཀྱིས་འདི་དག་སྲུངས། །སློབ་མས་བླ་མའི་རྐང་པ་ལ། །དད་ཅིང་གུས་པས་ཕྱག་བྱས་ནས། །ཤིན་ཏུ་ངེས་པའི་ཡིད་ཀྱིས་ནི། །དེ་དག་ཐམས་ཅད་ཁས་བླང་

ངོ་། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་གྱི་རྒྱལ་པོ་ཆེན་པོ་འདིའི་དམ་ཚིག་ལ་ཞུགས་པར་གྱུར་པ་དེའི་བསོད་ནམས་ཅི་ཙམ་ཞིག་མངོན་པར་འདུས་བགྱིས་པར་རིག་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སེམས་དང་པོ་བསྐྱེད་པ་ནས་ཉེ་བར་བཟུང་སྟེ་དེ་བཞིན་གཤེགས་པ་ལས་བྱུང་བའི་བསོད་ནམས་མངོན་པར་འདུས་བྱས་པ་ཅི་ཙམ་པ་རིགས་ཀྱི་བུའམ། རིགས་ཀྱི་བུ་མོ་དེ་དག་གི་བསོད་ནམས་མངོན་པར་འདུས་བྱས་པ་ཡང་དེ་ཙམ་དུ་རིག་པར་བྱའོ། །གསང་བ་པའི་བདག་པོ་རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་བལྟ་སྟེ། རིགས་ཀྱི་བུ་དང་རིགས་ཀྱི་བུ་མོ་དེ་དག་ནི་དེ་བཞིན་གཤེགས་པའི་ཞལ་དང་ཐུགས་ལས་སྐྱེས་པའི་སྲས་ཡིན་པར་རིག་པར་བྱའོ། །རིགས་ཀྱི་བུ་དང་རིགས་ཀྱི་བུ་མོ་དེ་དག་ཕྱོགས་གང་ན་གནས་པ་དེར་དེ་བཞིན་གཤེགས་པ་དེས་ཆེན་པོ་དགོངས་མི་དགོས་པར་འགྱུར་རོ། །གསང་བ་པའི་བདག་པོ་དེ་ལྟ་བས་ན་དེ་བཞིན་གཤེགས་པ་ལ་མཆོད་པར་འདོད་པའི་རིགས་ཀྱི་བུ་དང་རིགས་ཀྱི་བུ་མོ་རྣམས་ཀྱིས་དེ་དག་ལ་མཆོད་པར་བྱའོ། །དེ་བཞིན་གཤེགས་པ་ལ་བལྟ་བར་འདོད་པ་རྣམས་ཀྱིས་དེ་དག་ལ་བལྟ་བར་བྱའོ། །དེ་ནས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་དེ་དག་དང་། ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་དེང་སླན་ཅད་རིགས་ཀྱི་བུ་དང་རིགས་ཀྱི་བུ་མོ་དེ་རྣམས་ལ་རིམ་གྲོར་བགྱི་ཞིང་མཆོད་པར་བགྱིའོ། །བཅོམ་ལྡན་འདས་དེ་ཅིའི་སླད་དུ་ཞེ་ན། རིགས་ཀྱི་བུ་དང་རིགས་ཀྱི་བུ་མོ་དེ་དག་ཉིད་སངས་རྒྱས་བཅོམ་ལྡན་འདས་རྣམས་སུ་བལྟ་བར་བགྱི་བ་ལགས་སོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་དེ་དག་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་དང་རྡོ་རྗེ་འཛིན་དེ་རྣམས་དང་། ཐམས་ཅད་དང་ལྡན་

པའི་འཁོར་རྣམས་ལ་བཀའ་སྩལ་པ། རིགས་ཀྱི་བུ་དག་དེ་བཞིན་གཤེགས་པ་རྣམས་ཀྱི་གསང་སྔགས་ཀྱི་ཚིག་གསུང་གི་འཁོར་ལོའི་དཀྱིལ་འཁོར་མཐའ་ཡས་པར་འཇུག་པ་རྒྱ་ཆེན་པོ་ལས་བྱུང་བ་སྣ་ཚོགས་ཀྱི་གཟུགས་ཀྱི་ནོར་བུ་དང་འདྲ་བ། རེ་བ་ཐམས་ཅད་ཡོངས་སུ་རྫོགས་པར་བྱེད་པ། བསོད་ནམས་ཀྱི་ཚོགས་དཔག་ཏུ་མེད་པ་བསགས་པ། ཐོགས་པ་མེད་པའི་རྟོག་པ་ལ་གནས་པ། དུས་གསུམ་དུ་ཆགས་པ་མེད་པའི་སྟོབས་དང་ལྡན་པ་དག་ཡོད་དོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ཕྱག་ན་རྡོ་རྗེ་དང་། རྡོ་རྗེ་འཛིན་དེ་རྣམས་དང་། ཐམས་ཅད་དང་ལྡན་པའི་འཁོར་དེ་དག་གིས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་དེའི་དུས་ལ་བབ་བོ། །བདེ་བར་གཤེགས་པ་དེའི་ཚོད་ལ་བབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྗགས་ཀྱི་དབང་པོ་འདོད་པ་ཐམས་ཅད་ཡོངས་སུ་རྫོགས་པར་རྣམ་པར་སྤྲུལ་པས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཀུན་ཏུ་གཡོགས་ནས། ཆོས་ཀྱི་རྒྱལ་མཚན་གྱི་ཏོག་རྒྱ་ཆེན་པོ་ཡོངས་སུ་དག་པའི་རྩེ་མོ་ལ་བལྟ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་འདི་ལྟར་དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་དབྱིངས་ཁྱབ་པ། སེམས་ཅན་གྱི་ཁམས་མ་ལུས་པ་རྣམས་ཡོངས་སུ་བསྐྱབ་པའི་སྒྲ་འབྱིན་པ། རིག་སྔགས་ཀྱི་རྒྱལ་མོ་སྟོབས་ཆེན་མོ་བསྲུང་བ་ཆེན་མོ་འདི་གསུངས་སོ། །ན་མཿསརྦྦ་ཏ་ཐཱ་ག་ཏེ་བྷྱཿསརྦྦ་བྷ་ཡ་བི་ག་ཏེ་བྷྱོ་བི་ཤྭ་མུ་ཁེ་བྷྱཿསརྦྦ་ཐཱ་ཁཾ་རཀྵ་མ་ཧཱ་བ་ལེ་སརྦྦ་ཏ་ཐཱ་ག་ཏ་པུ་ཎྱ་ནིར་ཛཱ་ཏེ། ཧཱུྃ་ཧཱུྃ་ཏྲ་ཏ་ཏྲ་ཏ་ཨ་པྲ་ཏི་ཧ་ཏེ་སྭཱ་ཧཱ། སངས་རྒྱས་མཁས་པ་ཐམས་ཅད་ཀྱིས། །རིག་སྔགས་འདི་གསུངས་མོད་ལ་ནི། །དེ་ཚེ་སངས་རྒྱས་ཞིང་འདི་དག །རྣམ་པ་དྲུག་ཏུ་གཡོས་པར་གྱུར། །བྱང་ཆུབ་སེམས་དཔའ་དེ་ཀུན་གྱིས། །ངོ་མཚར་གྱུར་པའི་མིག་གདངས་ནས། །སངས་རྒྱས་ཀུན་གྱི་སྤྱན་སྔར་ནི། །ཡིད་དུ་འོང་བའི་ཚིག་སྨྲས་པ། །ཨེ་མའོ་སངས་རྒྱས་ཐམས་ཅད་ཀྱིས། །བསྲུང་བ་རབ་ཏུ་སྟོབས་ཆེན་འདི། །སེམས་ཅན་ཐམས་ཅད་བསྲུང་བ་དང་། །བསྐྱབ་ཅིང་སྦ་བའི་ཕྱིར་གསུངས་ཏེ། །གང་གི་སྙིང་ལ་

བསྲུང་གནས་པ། །དེ་དག་ལ་ནི་འཇིགས་པ་མེད། །གསང་སྔགས་མཐུ་ཆེན་དྲན་བྱས་ན། །བགེགས་དང་ལོག་འདྲེན་ཐམས་ཅད་དང་། །སྲིན་པོ་འཇིགས་པའི་གཟུགས་ཅན་ནི། །དེ་དག་ཐམས་ཅད་འཇིག་པར་འགྱུར། །དེ་ནས་ཡང་བཅོམ་ལྡན་འདས་ཀྱིས་ཆོས་ཀྱི་དབྱིངས་རྒྱ་ཆེན་པོར་བྱིན་གྱིས་བརླབས་ནས། དེའི་ཚེ་ཆོས་ཀྱི་དབྱིངས་ཀྱི་མཛོད་ཀྱི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དམ་ཚིག་ལ་འཇུག་པའི་རིག་སྔགས་འདི་བྱུང་ངོ་། །ན་མཿས་མནྟ་བུད་དྷཱ་ནཱཾ། ཨ་ས་མེ། ཏྲི་ས་མེ། ས་མ་ཡེ་སྭཱ་ཧཱ། དེ་ནས་དེ་མ་ཐག་ཏུ་སངས་རྒྱས་ཀྱི་ཞིང་ཐམས་ཅད་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དུ་དམ་ཚིག་ལ་འཇུག་པའི་རིག་སྔགས་ཀྱི་སྒྲ་གང་ཞིག་ཐོས་ནས་མཁས་པ་རྣམས་ཆོས་ཐམས་ཅད་ལས་འདའ་བར་མི་འགྱུར་བ་གྲག་པར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་ཆོས་ཀྱི་དབྱིངས་ཀུན་ཏུ་འབྱུང་བའི་གསང་སྔགས་གསུངས་པ། ན་མཿས་མནྟ་བུད་དྷཱ་ནཱཾ། དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧྃ། ཆོས་ཀྱི་དབྱིངས་སུ་བྱིན་གྱིས་བརླབ་པའོ། །ན་མཿས་མནྟ་བཛྲཱ་ཎཱཾ། བཛྲ་ཨཱཏྨ་ཀོ྅ཧྃ། རྡོ་རྗེ་སེམས་དཔར་བྱིན་གྱིས་བརླབ་པའོ། །ན་མཿས་མནྟ་བཛྲཱ་ཎཱཾ། བཛྲ་ཀ་བ་ཙ་ཧཱུྃ། རྡོ་རྗེ་གོ་ཆའོ། །ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་ཙཀྵུར་བྱ་བ་ལོ་ཀཱ་ཡ་སྭཱ་ཧཱ། དེ་བཞིན་གཤེགས་པའི་སྤྱན་ནོ། །ན་མཿས་མནྟ་བུད་དྷཱ་ནཱཾ། བི་ཤུདྡྷ་གནྡྷོདྡྷ་བ་སྭཱ་ཧཱ། བྱུག་སྤོས་ཀྱི་སྔགས་སོ། ། ན་མཿས་མནྟ་བུད་དྷཱ་ནཱཾ། མ་ཧཱ་མཻ་ཏྲྱ་བྷྱུད་ག་ཏ་སྭཱ་ཧཱ། མེ་ཏོག་གི་སྔགས་སོ། །ན་མཿས་མནྟ་བུད་དྷཱ་ནཱཾ། དྷརྨྨ་དྷཱ་ཏྭ་ནུ་ག་ཏ་སྭཱ་ཧཱ། བདུག་སྤོས་ཀྱི་སྔགས་སོ། །ན་མཿས་མནྟ་བུད་དྷཱ་ནཱཾ། སརྦྦ་ཏ་ཐཱ་ག་ཏ་ར་ཙི་སྥ་ར་ཎ་ཨ་བ་བྷཱ་ས་ག་ག་ནོཏྟ་རེ་བྷྱཿསྭཱ་ཧཱ། མར་མེའི་སྔགས་སོ། །ན་མཿས་མནྟ་བུད་དྷཱ་ནཱཾ། ག་ག་ན་ས་མ་ས་མ་སྭཱ་ཧཱ། མཆོད་ཡོན་གྱི་སྔགས་སོ། །ན་མཿས་མནྟ་བུད་དྷཱ་ནཱཾ། ག་ག་ན་ནཱནྡ་སྥ་ར་ཎ་བི་ཤུདྡྷ་དྷརྨྨ་ནིར་ཛ་ཏ་སྭཱ་ཧཱ། གཙུག་ཏོར་གྱི་སྔགས་སོ། །ན་མཿས་མནྟ་བུད་དྷཱ་ནཱཾ། པྲ་ཙཎྜ་བཛྲ་ཛྭ་ལ་བི་སྥུ་ར་ཧཱུྃ། དེ་བཞིན་གཤེགས་པའི་གོ་ཆའོ། །ན་མཿས་མནྟ་བུད་དྷཱ་

ནཱཾ། ཛྭཱ་ལ་མཱ་ལིན་ཏ་ཐཱ་ག་ཏ་ར་ཙི་སྭཱ་ཧཱ། ཀུན་ཏུ་འབར་བའོ། །ན་མཿས་མནྟ་བུད་དྷཱ་ནཱཾ། མ་ཧཱ་ཏ་ཐཱ་ག་ཏ་ཛི་ཧྭ་སྱ་དྷརྨྨ་པྲ་ཏིཥྛི་ཏ་སྭཱ་ཧཱ། དེ་བཞིན་གཤེགས་པའི་ལྗགས་ཀྱིའོ། །དཀྱིལ་འཁོར་དུ་དགོད་པའི་སྔགས་ཀྱི་མཛོད་དོ།། །།བམ་པོ་གསུམ་པ། དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ལ་ཕྱག་ན་རྡོ་རྗེས་ཞུས་པ། བཅོམ་ལྡན་འདས་ཅི་ལྟར་ན། དཀྱིལ་འཁོར་བྲི་བའི་ཚེ་ན་ནི། །བགེགས་རྣམས་ཞི་བར་འགྱུར་བ་ལགས། །གསང་སྔགས་སྒྲུབ་པའི་ཚེ་ན་ཡང་། །ལོག་འདྲེན་རྣམས་ནི་མ་མཆིས་འགྱུར། །གསང་སྔགས་རྣམས་ཀྱང་ཅི་ལྟར་བསྒྲུབ། །དེ་ཡི་འབྲས་བུ་ཅི་འདྲར་འགྱུར། །དེ་སྐད་གསོལ་ནས་དེ་ཡི་ཚེ། །བཅོམ་ལྡན་རྣམ་སྣང་མཛད་ཆེན་གྱིས། །འདི་སྐད་ཅེས་ནི་བཀའ་སྩལ་ཏོ། །སེམས་དཔའ་ཆེན་པོ་ལེགས་སོ་ལེགས། །ཁྱོད་ཀྱིས་ཡོངས་སུ་དྲིས་པ་གང་། །ཐམས་ཅད་ཁྱོད་ལ་བསྟན་པར་བྱ། །སྔོན་ཅད་སེར་སྣ་བསྟེན་པའི་ཕྱིར། །བགེགས་ནི་རང་གི་སེམས་ལས་བྱུང་། །དེ་ཡི་རྒྱུ་ནི་གཞིག་པའི་ཕྱིར། །གང་དུ་སེམས་དང་སེམས་བྱུང་བའི། །རྟོག་པ་ཐམས་ཅད་སྤོང་བ་དང་། །རྣམ་པར་རྟོག་པ་ལས་བྱུང་བའི། །སྤྲོས་པ་ཐམས་ཅད་འགག་འགྱུར་བའི། །བྱང་ཆུབ་སེམས་ཞེས་བཤད་པ་ཡིན། །སྔགས་པས་བྱང་ཆུབ་སེམས་དྲན་ཞིང་། །མི་གཡོ་བ་ནི་ཡིད་ལ་བཟླས། །དེ་ཡི་ཕྱག་རྒྱ་བཅིངས་ན་ནི། །བགེགས་རྣམས་ཐམས་ཅད་འཇིག་པར་འགྱུར། །གསང་བ་པའི་བདག་པོ་དེ་ལ་རླུང་བཅིང་བ་འདི་ཉོན་ཅིག །ཨ་ཞེས་བྱ་བར་བདག་བསྒྱུར་ཏེ། །ཧ་ཞེས་བྱ་བར་ཡིད་ལ་བཟླས། །རླུང་གི་ཕྱོགས་སུ་གནས་ནས་ནི། །ས་ལ་སྤོས་ཀྱི་ཐིག་ལེ་དག །བདུན་ཉིད་ལེགས་པར་བྱས་ནས་སུ། །ཁམ་ཕོར་གྱིས་ནི་དགབ་པར་བྱ། །ཁམ་ཕོར་རི་རབ་ཆེན་པོ་རུ། །ཡང་དང་ཡང་དུ་བསམ་པར་བྱ། ། དེ་ཡི་སྟེང་དུ་ཨ་ཞེས་པ། །ཀླད་ཀོར་བཅས་པ་རྒྱས་པར་བསམ། །རླུང་བཅིང་ཆེན་པོ་དེ་ལྟ་བུ། །སྔོན་གྱི་རྒྱལ་བ་རྣམས་ཀྱིས་བཤད། །སེམས་དཔའ་ཆེན་པོ་ཆུ་ཡི་ཡང་། །ཡིད་གཅིག་བསྡུས་ཏེ་མཉན་པར་གྱིས། །སྔགས་པས་ར་ཞེས་བྱ་བ་ནི། །ཐམས་ཅད་དམར་པོ་

སྟོབས་ཆེན་བསམ། །འབར་བའི་ཕྲེང་ཅན་མི་བཟད་པ། །ཁྲོ་བོ་ལག་ན་རལ་གྲི་ཐོགས། །ས་ལ་སྤྲིན་གྱི་གཟུགས་བྲིས་ནས། །རལ་གྲིའི་ཕྱག་རྒྱས་གདབ་པར་བྱ། །ཕྱོགས་ཀུན་ནས་ནི་ལངས་པའི་སྤྲིན། །དེ་མ་ཐག་ཏུ་འཇིག་པར་འགྱུར། །ཡང་ན་སྔགས་པ་མི་གཡེང་བས། ། དེ་དག་ཕུར་བུས་གདབ་བྱ་སྟེ། །མཁས་པ་རྡོ་རྗེར་གྱུར་ནས་སུ། །ཐམས་ཅད་རྡོ་རྗེ་ཕུར་བུས་བཏབ། །ཡང་ན་བགེགས་རྣམས་ཐམས་ཅད་ནི། །ཞི་བར་བྱ་བ་ཡང་བཤད་དེ། །སྔགས་པ་དཀྱིལ་འཁོར་དབུས་གནས་ནས། །མི་གཡོ་སྟོབས་ཆེན་གསང་སྔགས་ནི། །ཤིན་ཏུ་མི་བཟད་གསང་སྔགས་ཀྱི། །དཀྱིལ་འཁོར་དག་ལ་གནས་པར་བསམ། །དེ་ཡི་གཟུགས་བརྙན་བྱས་ནས་ནི། །རྐང་པ་གཡོན་པས་སྤྱི་བོར་གཟེར། །འོན་ཏང་དེ་ནི་ཞིར་འགྱུར་བའམ། །དོགས་པ་མེད་པར་འཆི་བར་འགྱུར། །དེ་ཡི་གཟུགས་བརྙན་བྱས་ནས་སུ། ། སྐེ་ཙེ་དུག་ཁྲག་བསྲེས་པ་ཡིས། །བྱུགས་ནས་སྔགས་པས་བསྐམས་ནས་ནི། །གདོན་དེ་མྱུར་དུ་འཚིག་པར་འགྱུར། །དེ་ནི་མེ་ལ་བསྐམས་པ་དང་། །དུག་གིས་བསྐུས་ན་ངེས་པར་ནི། །ཚངས་པའམ་འོན་ཏེ་བརྒྱ་བྱིན་ཡང་། །དེ་ཡི་མོད་ལ་མྱུར་དུ་འཚིག །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན་བདག་གིས་འདི་ལྟར་མཇལ་ཏོ། །བཅོམ་ལྡན་འདས་རང་གི་དཀྱིལ་འཁོར་གྱི་གནས་ལ་གནས་ན་ལྷ་རྣམས་བྱིན་གྱིས་རློབ་པར་བྱེད་དོ། །དེ་ཉིད་དུ་གནས་ན་དེ་བཞིན་གཤེགས་པའི་བཀའ་ལས་ཀྱང་འགལ་བར་མི་བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་རང་གི་རིགས་ལ་གནས་པ་དེ་ནི་གསང་སྔགས་ཐམས་ཅད་ཀྱི་དམ་ཚིག་ལགས་སོ། །བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་ཀྱང་རང་གི་གནས་ལ་གནས་ནས་ཀྱང་དོན་ཐམས་ཅད་བསྒྲུབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་དེ་དེ་བཞིན་ཏེ། ཅི་སྐད་སྨྲས་པ་དེ་བཞིན་ནོ། །གསང་བ་པའི་བདག་པོ། གཞན་ཡང་གང་གིས་ཁ་དོག་གང་གསུངས་

པ། །དེ་ཉིད་དེ་ཡི་དཀྱིལ་འཁོར་ཏེ། །ལྷ་ཡི་གཟུགས་ནི་དེ་ལྟ་བུར། །སྔོན་གྱི་སངས་རྒྱས་རྣམས་ཀྱིས་བསྟན། །དེ་ལ་གསང་བ་པའི་བདག་པོ་མ་འོངས་པའི་དུས་ན་སེམས་ཅན་བློ་ཞན་པ་མ་དད་པ་གང་དག་བསྟན་པ་འདི་ལ་དད་པར་མི་འགྱུར་ཞིང་ཡིད་གཉིས་དང་སོམ་ཉི་མང་བ། ཐོས་པ་ཙམ་སྙིང་པོར་འཛིན་པ། སྒྲུབ་པ་ལ་མི་ཕྱོགས་པ་དག་འབྱུང་བར་འགྱུར་ཏེ། དེ་དག་ནི་བདག་ཉིད་ཀྱང་མ་རུང་ལ་གཞན་ཡང་ཕུང་བར་བྱེད་པ་ཡིན་ནོ། །འདི་སྐད་དུ་འདི་ནི་ཕྱི་རོལ་པ་རྣམས་ལ་ཡོད་དེ། སངས་རྒྱས་རྣམས་ཀྱིས་གསུངས་པ་ནི་མ་ཡིན་ནོ་ཞེས་སྨྲ་བར་འགྱུར་གྱི། མི་བླུན་པོ་དེ་དག་གིས་འདི་ལྟར་བཅོམ་ལྡན་འདས་ཐམས་ཅད་མཁྱེན་པ། ཆོས་ཐམས་ཅད་ལ་མངའ་བརྙེས་པ། སེམས་ཅན་གྱི་དོན་རྟོགས་པར་ཐུགས་སུ་ཆུད་པ་དེས། སྔོན་སེམས་ཅན་རྣམས་ལ་ཕན་པར་བཞེད་ནས། འདི་དག་ཐམས་ཅད་བཤད་དོ་ཞེས་བྱ་བར་ནི་མི་ཤེས་སོ། །ཆོས་རྣམས་ཀྱི་ནི་ཆོས་ཀྱི་མཚན། །བླུན་པོ་དེས་ནི་དེ་མི་ཤེས། །ཆོས་རྣམས་ཀུན་གྱི་མཚན་ཉིད་ནི། །སྟོང་པ་ཉིད་དུ་ཡང་དག་གསུངས། །སྔགས་པ་རྟག་ཏུ་དེར་གནས་ནས། །རབ་ཏུ་ངེས་པར་ལས་བྱའོ། །བགེགས་ཞི་བར་བྱ་བའི་རིམ་པར་ཕྱེ་བ་རྒྱས་པའོ།། །།དེ་ནས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་དེ་དག་དང་། ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་རྣམས་ཀྱིས་བཅོམ་ལྡན་འདས་རྣམ་པར་སྣང་མཛད་ལ་ཕྱག་འཚལ་ནས། སྙིང་རྗེ་ཆེན་པོ་འབྱུང་བའི་དཀྱིལ་འཁོར་ཆེན་པོ་འདིར་ཆོས་ཀྱི་དབྱིངས་རྣམ་པར་དག་པའི་སྒོ་ཅི་ལྟར་རྟོགས་པ་རང་རང་གི་ཚིག་ཏུ་བརྗོད་པའི་ཚིག་གིས་གསང་སྔགས་རྣམས་སྨྲ་བར་འདོད་ནས་བཅོམ་ལྡན་འདས་ལ་གསོལ་བ་བཏབ་བོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་དེ་དག་དང་། རྡོ་རྗེ་འཛིན་དེ་དག་ལ་མི་ཉམས་པའི་ཆོས་ཉིད་དུ་བྱིན་གྱིས་བརླབས་ནས་བཀའ་སྩལ་པ། རིགས་ཀྱི་བུ་དག་ཆོས་ཀྱི་དབྱིངས་ཅི་ལྟར་རྟོགས་པ་བཞིན་སེམས་ཅན་གྱི་ཁམས་རྣམ་པར་སྦྱོང་བའི་གསང་སྔགས་ཀྱི་ཚིག་རྣམས་སྨྲོས་ཤིག །དེ་ནས་དེའི་ཚེ་བྱང་ཆུབ་སེམས་དཔའ་ཀུན་ཏུ་བཟང་པོས་སངས་རྒྱས་ཀྱི་རྒྱན་གྱི་ཡུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་

སྟོབས་ཐོགས་པ་མེད་པའི་གསང་སྔགས་སྨྲས་པ། ན་མཿས་མནྟ་བུད་དྷཱ་ནཱཾ། ས་མནྟཱ་ནུ་ག་ཏི་བ་ར་ཛ་དྷརྨྨ་ནིར་ཛཱ་ཏ་མ་ཧཱ་མ་ཧཱ་སྭཱ་ཧཱ། ཀུན་ཏུ་བཟང་པོའིའོ། །དེ་ནས་བྱང་ཆུབ་སེམས་དཔའ་བྱམས་པས་བྱམས་པ་ཆེན་པོ་ཀུན་ཏུ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་སྙིང་པོ་སྨྲས་པ། ན་མཿས་མནྟ་བུད་དྷཱ་ནཱཾ། ཨ་ཛ་ཏན་ཛ་ཡཱ་སརྦྦ་སཏྭ་ཨཱ་ཤ་ཡཱ་ནུ་ག་ཏ་སྭཱ་ཧཱ། བྱམས་པའི་འོ། །དེ་ནས་ཡང་བྱང་ཆུབ་སེམས་དཔའ་ནམ་མཁའི་སྙིང་པོ་རྣམ་པར་དག་པའི་ཡུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་སྨྲས་པ། ན་མཿས་མནྟ་བུད་དྷཱ་ནཱཾ། ཨཱ་ཀཱ་ཤ་ས་མ་ཏཱ་ནུ་ག་ཏ་བི་ཙི་ཏྲྃ་བ་ར་དྷ་ར་སྭཱ་ཧཱ། ནམ་མཁའི་སྙིང་པོའིའོ། །དེ་ནས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་སྙིང་རྗེ་ཆེན་པོའི་སྙིང་སྟོབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་སྨྲས་པ། ན་མཿས་མནྟ་བུད་དྷཱ་ནཱཾ། ཨཱ་ས་ཏཱ་ཧྲྀ་ཏ་ཨངྦྷུད་ག་ཏ་ཏྲཱྃ་ཏྲཱྃ་རཱྃ་རཱྃ་སྭཱ་ཧཱ། སྒྲིབ་པ་ཐམས་ཅད་རྣམ་པར་སེལ་བའི་འོ། །དེ་ནས་བྱང་ཆུབ་སེམས་དཔའ་ཀུན་ཏུ་སྤྱན་རས་གཟིགས་དབང་ཕྱུག་ཀུན་ཏུ་སྤྱན་རས་གཟིགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་སྙིང་པོ་འཁོར་དང་བཅས་པ་སྨྲས་པ། ན་མཿས་མནྟ་བུད་དྷཱ་ནཱཾ། སརྦྦ་ཏ་ཐཱ་ག་ཏ་ཨ་བ་ལོ་ཀི་ཏ་ཀཱ་རུ་ཎཱ་མཱ་ཡཱ་ར་ར་ར་ཧཱུྃ་ཛཿསྭཱ་ཧཱ། སྤྱན་རས་གཟིགས་དབང་ཕྱུག་གིའོ། །ན་མཿས་མནྟ་བུད་དྷཱ་ནཱཾ། ཛཾ་ཛཾ་ས་སྭཱ་ཧཱ། མཐུ་ཆེན་ཐོབ་ཀྱིའོ། །ན་མཿས་མནྟ་བུད་དྷཱ་ནཱཾ། ཀཱ་རུ་ཎོངྦྷ་བེ་ཏཱ་རེ་ཏཱ་རི་ཎི་སྭཱ་ཧཱ། ལྷ་མོ་སྒྲོལ་མའིའོ། །ན་མཿ ས་མནྟ་བུད་དྷཱ་ནཱཾ། སརྦྦ་བྷ་ཡ་ཏྲཱ་ས་ནི་ཧཱུྃསྥོ་ཊ་ཡ་སྭཱ་ཧཱ། ཁྲོ་གཉེར་ཅན་མའིའོ། །ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་བི་ཤ་ཡ་སཾ་བྷ་བེ། པདྨ་མཱ་ལི་ནི་སྭཱ་ཧཱ། གོས་དཀར་ཅན་མའིའོ། །ན་མཿས་མནྟ་བུད་དྷཱ་ནཱཾ། ཧཱུྃ་ཁ་ད་བནྡྷ་སྥོ་ཊ་ཡ་སྭཱ་ཧཱ། རྟ་མགྲིན་གྱིའོ། །དེ་ནས་བྱང་ཆུབ་སེམས་དཔའ་སའི་སྙིང་པོ་རྡོ་རྗེ་མི་ཤིགས་པ་རྟོག་པའི་ཡུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་སྨྲས་པ། ན་མཿས་མནྟ་བུད་དྷཱ་ནཱཾ། ཧ་ཧ་ཧ་སུ་ཏ་ནུ་སྭཱ་ཧཱ། སའི་སྙིང་པོའིའོ། །དེ་ནས་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་སངས་རྒྱས་ཀྱི་

བྱིན་གྱི་རླབས་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་སྙིང་པོ་སྨྲས་པ། ན་མཿས་མནྟ་བུད་དྷཱ་ནཱཾ། ཧེ་ཧེ་ཧེ། ཀུ་མཱ་ར་ཀ །བི་མུཀྟི། ས་ཐ་སྠི་ཏི། སྨ་ར་སྨ་ར། པྲ་ཏི་ཏ་ན་སྭཱ་ཧཱ། འཇམ་དཔལ་གྱིའོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེ་མི་ཕམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་སྙིང་པོ་འཁོར་དང་བཅས་པ་སྨྲས་པ། ན་མཿས་མནྟ་བཛྲཱ་ཎཱཾ། ཙཎྜ་མ་ཧཱ་རོ་ཥ་ཎ་ཧཱུྃ། ཕྱག་ན་རྡོ་རྗེའིའོ། །ན་མཿས་མནྟ་བཛྲཱ་ཎཱཾ། ཏྲི་ཊ་ཏྲི་ཊ། ཛ་ཡནྟི་སྭཱ་ཧཱ། མཱ་མ་ཀཱིའིའོ། །ན་མཿས་མནྟ་བུད་དྷཱ་ནཱཾ། ཧཱུྃ་བནྡྷ་ཡ་བནྡྷ་ཡ། མོ་ཊ་ཡ་མོ་ཊ་ཡ། བཛྲོངྦྷ་བེ་སརྦྦ་ཏྲ་ཨ་པྲ་ཏི་ཧ་ཏེ་སྭཱ་ཧཱ། རྡོ་རྗེ་ལུ་གུ་རྒྱུད་ཀྱིའོ། །ན་མཿས་མནྟ་བཛྲཱ་ཎཱཾ། ཧྲཱིཿཧཱུྃ་ཕཊ་སྭཱ་ཧཱ། ཁྲོ་ཟླ་གཙོ་བོའི་འོ། །ན་མཿས་མནྟ་བཛྲཱ་ཎཱཾ། སརྦྦ་དྷ་རྨྨ་ནི་རྦྷེད་ནི་བཛྲ་སུ་ཙི་བ་ར་དེ་སྭཱ་ཧཱ། རྡོ་རྗེ་རྩེ་མོའི་འོ། །ན་མཿས་མནྟ་བཛྲཱ་ཎཱཾ། ཧཱུྃ་ཧཱུྃ་ཧཱུྃ་ཕཊ་ཕཊ། ཛཾ་ཛཾ་སྭཱ་ཧཱ། རྡོ་རྗེ་འཛིན་པ་ཀུན་གྱིའོ། །ན་མཿས་མནྟ་བཛྲཱ་ཎཱཾ། ཧེ་ཧེ་ཀིཉྩི་རཱ་ཡ་སི་གྲྀཧྞ་གྲྀཧྞ་ཁཱ་ད་ཁཱ་ད་པ་རི་པཱུ་ར་ཡ་ས་པྲ་ཏི་ཛྙཱ་ན་སྭཱ་ཧཱ། ཕྱག་བརྙན་ཐམས་ཅད་ཀྱིའོ། །དེ་ནས་དེའི་ཚེ་བཅོམ་ལྡན་འདས་ཤཱཀྱ་ཐུབ་པ་རིན་པོ་ཆེའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཉིད་ཀྱི་སྙིང་པོ་འཁོར་དང་བཅས་པ་དག་གསུངས་པ། ན་མཿས་མནྟ་བུད་དྷཱ་ནཱཾ། སརྦྦ་ཀླེ་ཤ་ནི་ཤུད་དྷཱ་ན་སརྦྦ་དྷརྨྨ་བ་ཤི་ཏ་པྲཱ་པྟ་ག་ག་ན། ས་མ་ས་མ་སྭཱ་ཧཱ། ཤཱཀྱ་ཐུབ་པའི་འོ། །ན་མཿས་མནྟ་བུད་དྷཱ་ནཱཾ། བ་ར་དེ་བ་ར་པྲཱཔྟེ་ཧཱུཾ། མཛོད་སྤུའི་འོ། །ན་མཿས་མནྟ་བུད་དྷཱ་ནཱཾ། བྃ་བྃ་ཧཱུྃ་ཧཱུྃ་ཕཊ་སྭཱ་ཧཱ། གཙུག་ཏོར་ཐམས་ཅད་ཀྱིའོ། །ན་མཿས་མནྟ་བུད་དྷཱ་ནཱྃ། །དྷྲིཾ་དྷྲིཾ་རིཾ་རིཾ་ཛྲི་ཛྲི་སྭཱ་ཧཱ། ཁྲོ་བོ་གཞན་གྱིས་མི་ཐུབ་པ་ཞེས་བྱ་བའིའོ། །ན་མཿས་མནྟ་བུད་དྷཱ་ནཱཾ། ཨ་པ་རཱ་ཛི་ཏ་ཛཱ་ལ་ན་ཏི་ཛྷ་ཊི་ཏ་སྭཱ་ཧཱ། གཞན་གྱིས་མི་ཐུབ་པའི་འོ། །ན་མཿས་མནྟ་བུད་དྷཱ་ནཱཾ། པྲི་ཐི་བྱཻ་སྭཱ་ཧཱ། སའི་འོ། ། ན་མཿས་མནྟ་བུད་དྷཱ་ནཱཾ། བིཥྞ་བེ་སྭཱ་ཧཱ། ཁྱབ་འཇུག་གིའོ། །ན་མཿས་མནྟ་བུད་དྷཱ་ནཱཾ། རུ་དྲཱ་ཡ་སྭཱ་ཧཱ། དྲག་པོའིའོ། །ན་མཿས་མནྟ་བུད་དྷཱ་ནཱཾ། བཱ་ཡ་བེ་སྭཱ་ཧཱ། རླུང་ལྷའི་འོ། །ན་མཿས་མནྟ་བུད་དྷཱ་ནཱཾ། ས་ར་སྭ་ཏྱཻ་སྭཱ་ཧཱ། དབྱངས་ཅན་གྱིའོ། །ན་མཿས་མནྟ་བུད་དྷཱ་ནཱཾ། རཱཀྵ་སཱ་དྷི་པ་

ཏ་ཡེ་སྭཱ་ཧཱ། བདེན་བྲལ་གྱིའོ། །ན་མཿས་མནྟ་བུད་དྷཱ་ནཱཾ། བཻ་བ་སཏྭཱ་ཡ་སྭཱ་ཧཱ། གཤིན་རྗེའི་འོ། །ན་མཿས་མནྟ་བུད་དྷཱ་ནཱཾ། མྲྀ་ཏ་ཡེ་སྭཱ་ཧཱ། འཆི་བདག་གིའོ། །ན་མཿས་མནྟ་བུད་དྷཱ་ནཱཾ། ཀཱ་ལ་རཱ་ཏྲི་ཡེ་སྭཱ་ཧཱ། དུས་མཚན་གྱིའོ། །ན་མཿས་མནྟ་བུད་དྷཱ་ནཱཾ། མཏྲི་བྷྱཿསྭཱ་ཧཱ། མ་མོ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཤ་ཀྲཱ་ཡ་སྭཱ་ཧཱ། བརྒྱ་བྱིན་གྱིའོ། །ན་མཿས་མནྟ་བུད་དྷཱ་ནཱཾ། ཨ་པཱཾ་པ་ཏ་ཡེ་སྭཱ་ཧཱ། ཆུ་ལྷའི་འོ། །ན་མཿས་མནྟ་བུད་དྷཱ་ནཱཾ། ཨཱ་དི་ཏྱཱ་ཡ་སྭཱ་ཧཱ། ཉི་མའི་འོ། །ན་མཿས་མནྟ་བུད་དྷཱ་ནཱཾ། པྲ་ཛ་པ་ཏ་ཡེ་སྭཱ་ཧཱ། ཚངས་པའི་འོ། །ན་མཿས་མནྟ་བུད་དྷཱ་ནཱཾ། ཙནྡྲཱ་ཡ་སྭཱ་ཧཱ། ཟླ་བའི་འོ། །ན་མཿས་མནྟ་བུད་དྷཱ་ནཱཾ། མེ་བྷ་ཤ་ནི་ཡེ་སྭཱ་ཧཱ། དགའ་བོ་དང་བསྙེན་དགའ་བོའིའོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་བསྟན་པ་དོན་ཡོད་པར་གྲུབ་པར་བཞེད་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡུམ་རིག་སྔགས་ཀྱི་རྒྱལ་མོ་གསུངས་པ། ན་མཿས་མནྟ་བུད་དྷཱ་ནཱཾ། ག་ག་ན་བ་ར་ལཀྵ་ཎེ་ག་ག་ན་ས་མ་སརྦྦོ་ད་ག་ཏ་ཏི་ས་ར་སཾ་བྷ་བེ་ཛྭ་ལ་ན་མོ་ཨ་མོ་གྷཱ་ནཱན་སྭཱ་ཧཱ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡུམ་ནམ་མཁའི་སྤྱན་གྱིའོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་བགེགས་ཐམས་ཅད་ཞི་བར་བྱ་བའི་ཕྱིར་གཟི་བརྗིད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བགེགས་ཆེན་པོ་འཇོམས་པའི་གསང་སྔགས་འདི་གསུངས་སོ། །ན་མཿས་མནྟ་བཛྲཱ་ཎཱཾ། ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུྃ། ཏྲག་ཧ་མཱ། འཕགས་པ་མི་གཡོ་བའི་འོ། །ན་མཿས་མནྟ་བཛྲཱ་ཎཱཾ། ཧ་ཧ་ཧ། བིསྨ་ཡེ། སརྦྦ་ཏ་ཐཱ་ག་ན་བི་ཥ་ཡ་སཾ་བྷ་ཡ་ཏྲཻ་ལོཀྱ་བི་ཛ་ཡ་ཧཱུྃ་ཛ་སྭཱ་ཧཱ། ཁམས་གསུམ་ལས་རྣམ་པར་རྒྱལ་བའི་འོ། །ན་མཿས་མནྟ་བུད་དྷཱ་ནཱཾ། ཧེ་ཏུ་པྲ་ཏྱ་ཡ་བི་ག་ཏེ་དྷརྨྨ་ནི་རཱ་ཛ་ཏ་ཧཱུྃ། ཉན་ཐོས་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ།ཐ། རང་སངས་རྒྱས་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། སརྦྦ་བུདྡྷ་བོ་དྷི་སཏྭ་ཧྲྀ་ད་ཡཾ་ནི་བེ་ཤ་ནི་ན་མཿསརྦྦ་བིདྱཱ་སྭཱ་ཧཱ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱིའི་སྙིང་པོའོ། །ན་མཿས་མནྟ་བུད་དྷཱ་ནཱཾ། ལོ་ཀ་ལོ་

ཀ་ཀ་རཱ་ཡ། སརྦྦ་དེ་བ། ནཱ་ག །ཡཀྵ། གནྡྷར་བཱ། ཨ་སུ་ར། ག་རུ་ཌ། ཀིན་ར། མ་ཧོ་ར་ག་ཧྲྀ་ད་ཡན། ནྱ་ཀ་རི་ཥ་ཡ་བི་ཙི་ཏྲ་ག་ཏི་སྭཱ་ཧཱ། ལྷ་ལ་སོགས་པ་སྤྱིའི་སྙིང་པོའོ། །ན་མཿས་མནྟ་བུད་དྷཱ་ནཱཾ། སརྦ་ཐཱ། བཱི་མ་ཏི། བི་ཀི་ར་ཎ། དྷརྨྨ་དྷཱ་ཏུ་ནིར་ཛཱ་ཏ་སཾ་སཾ་ཧ་སྭཱ་ཧཱ། བྱང་ཆུབ་སེམས་དཔའ་ཐམས་ཅད་ཀྱིའོ། །ན་མཿས་མནྟ་བུད་དྷཱ་ནཱཾ། དུནྡཱནྟ་མ་ཧཱ་རོ་ཥ་ཎ་ཁཱ་ཊ་ཡ་སརྦྦཱན་ཏ་ཐཱ་ག་ཏ་ཨཱ་ཛྙཱཾ་ཀུ་རུ་སྭཱ་ཧཱ། སྒོ་སྲུང་གདུལ་དཀའ་བ་ཞེས་བྱ་བའི་འོ། །ན་མཿས་མནྟ་བུད་དྷཱ་ནཱཾ། ཧེ་མ་ཧཱ་པྲ་ཙནྜ་ཨ་བྷི་མུ་ཁ་གྲིཧྞ་ཁཱ་ད་ཡ། ཀིཉྩི་རཱ་ཡ་སི་ས་མ་ཡ་མ་ནུ་སྨ་ར་སྭཱ་ཧཱ། སྒོ་སྲུང་མངོན་དུ་ཕྱོགས་པའི་འོ། །ན་མཿས་མནྟ་བུད་དྷཱ་ནཱཾ། སརྦྦ་ཏྲ་ཨ་ནུ་ག་ཏེ། བནྡྷ་སཱི་མཱཾ། མ་ཧཱ་ས་མ་ཡ་ནིར་ཛཱ་ཏེ་སྨ་ར་ཎེ། ཨ་པྲ་ཏི་ཧ་ཏེ། དྷ་ཀ་དྷ་ཀ །ཙ་ར་ཙ་ར། བྷནྡྷ་བྷནྡྷ། ད་ཤ་དི་ཤན་སརྦྦ་ཏ་ཐཱ་ག་ཏ། ཨ་ནུ་ག་ཏེ། པྲ་བ་ར་དྷརྨྨ་ལབྔྷ་བི་ཛ་ཡེ་བྷ་ག་བ་ཏི་བི་ཀུ་རི་བི་ཀུ་ལེ་ལེ་ལུ་བུ་པྲི་སྭཱ་ཧཱ། མཚམས་ཆེན་མོ་གཅོད་པའི་འོ། །ན་མཿས་མནྟ་བུད་དྷཱ་ནཱཾ། ཨ། བྱང་ཆུབ་ཀྱིའོ། །ཨཱ་སྤྱོད་པའི་འོ། །ༀ་རྫོགས་པར་སངས་རྒྱས་པའི་འོ། །ཨ་མྱ་ངན་ལས་འདས་པའི་འོ། །ན་མཿས་མནྟ་བཛྲཱ་ཎཱཾ། ཧཱ། འཇིག་རྟེན་གསུམ་ལས་རྣམ་པར་རྒྱལ་བའིའོ། །ན་མཿས་མནྟ་བཛྲཱ་ཎཱཾ། ཧཱཾ། འཕགས་པ་མི་གཡོ་མགོན་གྱིའོ། །ན་མཿས་མནྟ་བུད་དྷཱ་ནཱཾ། ཨ། སྒྲིབ་པ་ཐམས་ཅད་རྣམ་པར་སེལ་བའི་འོ། །ན་མཿས་མནྟ་བུད་དྷཱ་ནཱཾ། ས། སྤྱན་རས་གཟིགས་དབང་ཕྱུག་གིའོ། །ན་མཿས་མནྟ་བུད་དྷཱ་ནཱཾ། བ། ཕྱག་ན་རྡོ་རྗེའིའོ། །ན་མཿས་མནྟ་བུད་དྷཱ་ནཱཾ། མཾ། འཇམ་དཔལ་གྱིའོ། །ན་མཿས་མནྟ་བུད་དྷཱ་ནཱཾ། ག། ནམ་མཁའི་སྤྱན་གྱིའོ། །ན་མཿས་མནྟ་བུད་དྷཱ་ནཱཾ། རཾ། ཆོས་ཀྱི་དབྱིངས་ཀྱིའོ། །ན་མཿས་མནྟ་བུད་དྷཱ་ནཱཾ། ཁཱཾ། དཔའ་བོ་ཆེན་པོའི་འོ། །ན་མཿས་མནྟ་བུད་དྷཱ་ནཱཾ། ཛཾ། ཆུའི་དབང་པོའི་འོ། །ན་མཿས་མནྟ་བུད་དྷཱ་ནཱཾ། ཏཾ། ལྷ་མོ་སྒྲོལ་མའིའོ། །ན་མཿས་མནྟ་བུད་དྷཱ་ནཱཾ། ཧྲཱིཿ། ཁྲོ་གཉེར་ཅན་མའི་འོ། །ན་མཿས་མནྟ་བུད་དྷཱ་ནཱཾ། པཾ། གོས་དཀར་ཅན་གྱིའོ། །ན་མཿས་མནྟ་བུད་དྷཱ་ནཱཾ། སཾ། མཐུ་ཆེན་ཐོབ་ཀྱིའོ། །ན་མཿས་མནྟ་བུད་དྷཱ་ནཱཾ། ཧཾ།

རྟ་མགྲིན་གྱིའོ། །ན་མཿས་མནྟ་བུད་དྷཱ་ནཱཾ། ཡཾ། གྲགས་འཛིན་མའིའོ། །ན་མཿས་མནྟ་བུད་དྷཱ་ནཱཾ། སཾ། ཕྱག་ན་རིན་ཆེན་གྱིའོ། །ན་མཿས་མནྟ་བུད་དྷཱ་ནཱཾ། ཛཱ། དྲ་བའི་འོད་ཀྱིའོ། །ན་མཿས་མནྟ་བུད་དྷཱ་ནཱཾ། བྷ། ཤཱཀྱ་ཐུབ་པའི་འོ། །ན་མཿས་མནྟ་བུད་དྷཱ་ནཱཾ། ཧཱྃ་ནྱྃ་རུྃ། གཙུག་ཏོར་གསུམ་གྱིའོ། །ན་མཿས་མནྟ་བུད་དྷཱ་ནཱཾ། ལཾ། གདུགས་དཀར་པོའི་འོ། །ན་མཿས་མནྟ་བུད་དྷཱ་ནཱཾ། ཤཾ། གཙུག་ཏོར་རྒྱལ་བའི་འོ། །ན་མཿས་མནྟ་བུད་དྷཱ་ནཱཾ། སཾ། གཙུག་ཏོར་རྣམ་པར་རྒྱལ་བའི་འོ། །ན་མཿས་མནྟ་བུད་དྷཱ་ནཱཾ། ཏྲིཾ། གཟི་བརྗིད་ཕུང་པོའི་འོ། ། ན་མཿས་མནྟ་བུད་དྷཱ་ནཱཾ། ཧཱུྃ། རྣམ་པར་འཐོར་བའི་འོ། །ན་མཿས་མནྟ་བུད་དྷཱ་ནཱཾ། ཧཱུྃ། གཞན་གྱིས་མི་ཐུབ་པའི་འོ། །ན་མཿས་མནྟ་བུད་དྷཱ་ནཱཾ། བཱི། སའི་འོ། །ན་མཿས་མནྟ་བུད་དྷཱ་ནཱཾ། ཀི་ལི། སྐྲ་ཅན་མའི་འོ། །ན་མཿས་མནྟ་བུད་དྷཱ་ནཱཾ། དི་ལི། ཉེ་སྐྲ་ཅན་མའི་འོ། ། ན་མཿས་མནྟ་བུད་དྷཱ་ནཱཾ། མི་ལི། སྣ་ཚོགས་མའི་འོ། །ན་མཿས་མནྟ་བུད་དྷཱ་ནཱཾ། ཧི་ལི། ནོར་ལྡན་མའི་འོ། །ན་མཿས་མནྟ་བུད་དྷཱ་ནཱཾ། ཧ་ས་ནཱཾ། ངོ་མཚར་ཅན་གྱིའོ། །ན་མཿས་མནྟ་བུད་དྷཱ་ནཱཾ། ར་ས་ནཱཾ། སེམས་ཅན་ཐམས་ཅད་ལ་མི་འཇིགས་པ་སྦྱིན་པའི་འོ། །ན་མཿས་མནྟ་བུད་དྷཱ་ནཱཾ། དརྴ་ནཱཾ། ངན་སོང་ཐམས་ཅད་སྦྱོང་བའི་འོ། །ན་མཿས་མནྟ་བུད་དྷཱ་ནཱཾ། བི་ཧ་ས་ནཱཾ། ཡོངས་སུ་སྐྱོང་སེམས་བློ་གྲོས་ཀྱིའོ། །ན་མཿས་མནྟ་བུད་དྷཱ་ནཱཾ། ཋཾ། བྱམས་པ་ཆེན་པོ་མངོན་པར་འབྱུང་བའི་འོ། །ན་མཿས་མནྟ་བུད་དྷཱ་ནཱཾ། ཡཾ། སྙིང་རྗེ་གདུངས་པའི་འོ། །ན་མཿ ས་མནྟ་བུད་དྷཱ་ནཱཾ། ཨི། གདུང་བ་ཐམས་ཅད་ཞི་བར་བྱེད་པའི་འོ། །ན་མཿས་མནྟ་བུད་དྷཱ་ནཱཾ། ཨཾ། བསམ་གྱིས་མི་ཁྱབ་པའི་བློ་གྲོས་ཅན་གྱིའོ། །ན་མཿས་མནྟ་བུད་དྷཱ་ནཱཾ། ཏྲྃ། རིན་ཆེན་འབྱུང་གནས་ཀྱིའོ། །ན་མཿས་མནྟ་བུད་དྷཱ་ནཱཾ། ཥཾ། ཕྱག་ན་རིན་ཆེན་གྱིའོ། །ན་མཿས་མནྟ་བུད་དྷཱ་ནཱཾ། ཊཾ། ས་འཛིན་གྱིའོ། །ན་མཿས་མནྟ་བུད་དྷཱ་ནཱཾ། ཨྃ། གཟུངས་ཐོབ་པའི་འོ། །ན་མཿས་མནྟ་བུད་དྷཱ་ནཱཾ། ཌྷཾ། ཕྱག་ན་རིན་ཆེན་ཕྱག་རྒྱའི་འོ། །ན་མཿས་མནྟ་བུད་དྷཱ་ནཱཾ། ནཾ། བསམ་པ་བརྟན་པའི་འོ། །ན་མཿས་མནྟ་བུད་དྷཱ་ནཱཾ། ཧཱཾ། ནམ་མཁའ་དྲི་མེད་ཀྱིའོ།།

ན་མཿས་མནྟ་བུད་དྷཱ་ནཱཾ། རཱཾ། ནམ་མཁའི་བློ་གྲོས་ཀྱིའོ། །ན་མཿས་མནྟ་བུད་དྷཱ་ནཱཾ། ག་ཏཾ། བློ་གྲོས་རྣམ་པར་དག་པའི་འོ། །ན་མཿས་མནྟ་བུད་དྷཱ་ནཱཾ། ངྷཱིྃ། སྤྱོད་པའི་བློ་གྲོས་ཀྱིའོ། །ན་མཿས་མནྟ་བུད་དྷཱ་ནཱཾ། ཧཱུྃ། བརྟན་པའི་བློ་གྲོས་ཀྱིའོ། །ན་མཿས་མནྟ་བུད་དྷཱ་ནཱཾ་།ངྷྲིྃ་ཤྲིྃ་ཧྃ་བྲྃ། ཕྱག་བརྙན་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཀྵ་ད་ཧ་ར་ཡྃ་ཀྃ །བྱང་ཆུབ་སེམས་དཔའ་ཇི་སྐད་གསུངས་པ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། མ་ནོ་མཱ་ཡེ་དྷརྨྨ་སཾ་བྷ་བེ་བི་བྷ་བེ་ཀ་ཋ་ནེ་སཾ་ས་ནེ། གནས་གཙང་མ་པ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཀྲྃ་ཀེ་རི། སྲིན་པོ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཧྲཱིཿཧ། མཁའ་འགྲོ་མ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཡཀྵ་བཱིརྱ་དྷ་རི། གནོད་སྦྱིན་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། མི་ཙི་མི་ཙི། ཤ་ཟ་མོ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། གུྃ་གུྃ་ཨིྃ་ཨིྃ། འབྱུང་པོ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ར་ཊྃ་ར་ཊྃ། བྲྃ་ཊྃ་བྲྃ་ཊྃ། ལྷ་མ་ཡིན་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ག་ར་ལཾ་བི་ར་ལཾ། ལྟོ་འཕྱེ་ཆེན་པོ་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཧ་ས་ནཱཾ། བཱི་ཨ་ས་ནཱཾ། མིའམ་ཅི་རྣམས་ཀྱིའོ། །ན་མཿས་མནྟ་བུད་དྷཱ་ནཱཾ། ཨ་ཏི་ཙ་ལཱ་ར་ན་མ་ནོ་མཻ། མི་རྣམས་ཀྱིའོ། །གསང་བ་པའི་བདག་པོ་ངས་དེ་ལ་སོགས་པ་ཐམས་ཅད་ཀྱི་གསང་སྔགས་བཤད་དེ། དེ་ལ་གསང་སྔགས་ཐམས་ཅད་ཀྱི། །སྙིང་པོ་དེས་པས་མཉན་པར་གྱིས། །ཨ་ཞེས་བྱ་བ་སྔགས་ཀུན་གྱི། །སྙིང་པོ་ཡིན་པར་ཡང་དག་བཤད། །དེ་ལ་གསང་སྔགས་ཀུན་གནས་ཏེ། །དེ་ལྟར་སྔགས་རྣམས་རྣམ་པར་ངེས། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། སྤྱིའི་གསང་སྔགས་ཀྱི་མཛོད་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་སྔགས་ཅི་ལྟར་སྒྲུབ་པ་དང་། བསྒྲུབས་པའི་འབྲས་བུ་གང་ཡིན་པ་འདི་ཉོན་ཅིག །ཡི་གེ་དང་ནི་ཡི་གེར་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམས་པས་ཡིད་ལ་ནི། །བཟླས་བརྗོད་འབུམ་

ཕྲག་གཅིག་བྱའོ། །ཡི་གེ་བྱང་ཆུབ་སེམས་ཡིན་ཏེ། །གཉིས་པ་སྒྲ་ཞེས་བྱ་བ་ཡིན། །གཞི་ནི་རང་གི་ལྷ་གཞག་པ། །རང་གི་ལུས་ཀྱི་གནས་ལ་བྱ། །གཞི་གཉིས་པ་ནི་རྫོགས་སངས་རྒྱས། །རྐང་གཉིས་མཆོག་ཏུ་ཤེས་པར་བྱ། །ཟླ་བའི་དཀྱིལ་འཁོར་རྣམ་དག་པ། ། སྔགས་པས་དེ་ལ་གནས་པར་བསམ། །ཡི་གེ་རྣམས་ནི་གོ་རིམས་བཞིན། །དེ་ཡི་དབུས་སུ་ལེགས་པར་དགོད། །སླར་སྡུད་པ་ཡི་ཚིག་གིས་ནོན། །སྲོག་དང་རྩོལ་བ་རྣམ་པར་སྦྱངས། །སྲོག་ཅེས་བྱ་བ་རླུང་དུ་བཤད། །རྩོལ་བ་དྲན་པ་ཞེས་བྱ་སྟེ། །དེ་གཉིས་བསྡམས་པ་བྱས་ནས་སུ། །སྔོན་དུ་བསྙེན་པ་ལེགས་པར་བྱ། །དེ་ནས་སྔགས་པས་ཟླ་གཅིག་ཏུ། །ཤིན་ཏུ་བསྡམས་ཏེ་བཟླས་བརྗོད་བྱ། །གསང་སྔགས་སྔོན་དུ་སྤྱད་པ་ནི། །གཞི་གཅིག་ནས་ནི་གཅིག་ཏུ་འཇུག །གྲགས་ཆེན་སངས་རྒྱས་ཐམས་ཅད་ཀྱིས། །སྔར་སྤྱད་པ་ཞེས་བཤད་པ་ཡིན། །དེ་ཕྱིན་ཅད་ནི་གང་ཅུང་ཟད། །མེ་ཏོག་སྤོས་ལ་སོགས་དབུལ་ཞིང་། །སངས་རྒྱས་ཉིད་དུ་འགྱུར་བྱའི་ཕྱིར། །དེ་ཚེ་བྱང་ཆུབ་ཏུ་ཡང་བསྔོ། །སྔགས་པས་འཇིགས་མེད་དེ་ལྟ་བུ། །ཟླ་གཉིས་པ་ལ་བཟླས་བརྗོད་བྱ། །དེ་ནས་ཟླ་བ་ཉ་བའི་ཚེ། །མི་དེ་སྒྲུབ་ལ་འཇུག་པར་བྱ། །རི་རྩེ་དང་ནི་བ་ལང་ལྷས། །དེ་བཞིན་འབབ་ཆུའི་མདོ་དག་དང་། །ལམ་གྱི་བཞི་མདོ་མཚན་གཅིག་དང་། །མ་མོའི་གནས་སམ་ཞི་གནས་སུ། །དཀྱིལ་འཁོར་ནན་ཏན་བྲི་བྱ་བ། །ཐམས་ཅད་རྡོ་རྗེའི་ཁང་པར་བྱས། །དེས་ནི་དེར་གནས་བསྲུང་བྱས་ནས། །སྒྲུབ་པ་ལ་ནི་ནན་ཏན་བྱ། །དེར་ནི་མཚན་མོ་ནམ་ཕྱེད་དམ། །ཡང་ན་ཉི་མ་འཆར་བའི་ཚེ། །འདི་ལྟའི་ལྟས་རྣམས་འབྱུང་འགྱུར་ཏེ། །བློ་དང་ལྡན་པས་དེ་ཤེས་བྱ། །ཧཱུྃ་ཞེས་པ་དང་རྔ་སྒྲ་དང་། །དེ་བཞིན་ས་ནི་གཡོ་བ་དང་། །ཡིད་དུ་འོང་བའི་ཚིག་ཀྱང་རུང་། །དེ་ནི་ནམ་མཁའ་ལས་གྲག་ན། །མཚན་མ་དག་ནི་དེ་རྣམས་ཀྱིས། །ཡིད་བཞིན་རྗེས་གྲུབ་ཤེས་བྱ་སྟེ། །སངས་རྒྱས་རྐང་གཉིས་མཆོག་རྣམས་ཀྱིས། །དེ་ཡི་འབྲས་བུར་ཡང་དག་བཤད། །དེ་ལྟར་སྔགས་ཀྱི་ཚུལ་གནས་པ། །དེ་ནི་ངེས་པར་སངས་

རྒྱས་འགྱུར། །དེ་བས་རྣམ་པ་ཐམས་ཅད་དུ། །སྔགས་ཉིད་རྟག་ཏུ་དྲན་པར་བྱ། །སྔོན་གྱི་སངས་རྒྱས་མཐུ་ཆེན་གྱིས། །དེ་ནི་དྲན་པར་བྱ་བའང་བཤད། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། འཇིག་རྟེན་པའི་དངོས་གྲུབ་བསྒྲུབ་པའི་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས། རེ་བ་ཐམས་ཅད་ཡོངས་སུ་རྫོགས་པར་བྱེད་པ། དུས་གསུམ་མཐའ་ཡས་པའི་སྒོ་ངེས་པའི་ཡེ་ཤེས་ཡོངས་སུ་རྫོགས་པར་བྱེད་པའི་ཆོས་ཀྱི་ཚིག་རྣམས་གསུངས་སོ། །མཁའ་ལྟར་དྲི་མེད་ངོ་བོ་ཉིད་མེད་པ། །རྣམ་མང་ཡེ་ཤེས་སྣ་ཚོགས་སྦྱིན་པར་བྱེད། །ངོ་བོ་ཉིད་ཀྱིས་རྟག་ཏུ་སྟོང་པ་ཉིད། །རྐྱེན་ལ་རག་ལས་ཟབ་ཅིང་བལྟ་བར་དཀའ། །ཁྱད་པར་འགྲོ་བ་རྣམས་ལ་རྟག་པ་རུ། །རྣམ་པར་བསམས་པའི་འབྲས་བུ་མཆོག་སྦྱིན་བྱེད། །ཇི་ལྟར་ནམ་མཁའ་ཆགས་མེད་སྤྱོད་ཡུལ་ཅན། །འགྲོ་བ་ཀུན་གྱི་གནས་སུ་གྱུར་པ་ལྟར། །དེ་བཞིན་རྣམ་པར་དག་པའི་ཆོས་ཉིད་འདི། །སྲིད་གསུམ་མ་ལུས་འབྱོར་པ་འབྱུང་བར་བྱེད། །མཆོག་སྐྱེས་མཁས་པ་གང་ཞིག་འདིར་སྤྱོད་ན། །རྒྱལ་བ་ཀུན་དང་སྤྱོད་ཡུལ་གཅིག་པར་འགྱུར། །རྒྱལ་བས་ཅི་སྐད་གསུངས་པའི་ཆོས་ཉིད་ནི། །ཤིན་ཏུ་རྣམ་དག་ཐམས་ཅད་སྣང་བྱེད་པ། །དེ་ལས་གོ་འཕང་རྙེད་དཀའ་གཞན་མེད་དོ། །ཡངས་པའི་ཆོས་ནི་ཟབ་ལ་འགྲིབ་མེད་ཅིང་། ། མཉམ་མེད་འཇིག་རྟེན་ཕན་བྱེད་དེ་ལ་ནི། །རྣམ་རྟོག་རྣམ་པར་སྤངས་ཏེ་སྤྱད་པར་གྱིས། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་ཚིགས་སུ་བཅད་པ་དེ་དག་གསུངས་ནས། ཐམས་ཅད་དང་ལྡན་པའི་འཁོར་ཚོགས་པ་ལ་གཟིགས་ནས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་རྣམས་ལ་བཀའ་སྩལ་པ། རིགས་ཀྱི་བུ་དག་གང་གིས་ན་སེམས་ཅན་རྣམས་མཐོང་བའི་ཆོས་ཁོ་ན་ལ་དགའ་བ་དང་མགུ་བ་ཐོབ་ནས་བདེ་བ་ལ་རེག་པར་འགྱུར་བ་རང་རང་གི་ཆོས་ཀྱི་དབྱིངས་ཀྱི་མཐུ་རླབས་སུ་གྱུར་པ། དངོས་གྲུབ་སྒྲུབ་པའི་ཚིག་རྣམས་སྟོན་ཅིག །དེ་སྐད་ཅེས་

བཀའ་སྩལ་པ་དང་། རྡོ་རྗེ་འཛིན་རྣམས་ཀྱིས་བཅོམ་ལྡན་འདས་རྣམ་པར་སྣང་མཛད་ལ་ཕྱག་འཚལ་ནས། ཆོས་ཀྱི་རྗེས་བཀའ་ཅི་སྐད་སྩལ་པ་བཞིན་འཚལ་ལོ་ཞེས་གསོལ་ཏོ། །བཅོམ་ལྡན་འདས་ཉིད་ལ་གསོལ་བ་བཏབ་པ་བདག་ཅག་ལ་ཐུགས་བརྩེ་བའི་སླད་དུ་དངོས་གྲུབ་སྒྲུབ་པའི་ཚིག་རྣམས་བཅོམ་ལྡན་འདས་ཉིད་ཀྱིས་བསྟན་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་གང་བདག་ཅག་རང་གིས་རྟོགས་པ་བཅོམ་ལྡན་འདས་ཀྱི་སྤྱན་སྔར་བཤད་པ་དེ་ནི་རབ་ཏུ་དཀའ་ལགས་སོ། །དེ་ལྟར་ལགས་པས་མ་འོངས་པའི་འགྲོ་བ་རྣམས་ཀྱི་དོན་དང་། ཕན་པ་དང་བདེ་བའི་སླད་དུ་བཅོམ་ལྡན་འདས་ཉིད་ཀྱིས་ལེགས་པར་རབ་ཏུ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་རྡོ་རྗེ་འཛིན་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ལེགས་སོ་ལེགས་སོ། །དེ་བཞིན་གཤེགས་པས་བསྟན་པའི་ཆོས་འདུལ་བ་འདི་ལ་ཕན་ཡོན་ཆེ་བའི་ཆོས་གཅིག་ཡོད་པ་ནི་འདི་ལྟ་སྟེ། ངོ་ཚ་ཤེས་པའོ། །ངོ་ཚ་ཤེས་པ་དང་ལྡན་པའི་རིགས་ཀྱི་བུ་དང་རིགས་ཀྱི་བུ་མོ་ནི་མཐོང་བའི་ཆོས་འདི་ལ་ཆོས་གཉིས་རབ་ཏུ་མྱུར་བར་འབྱུང་སྟེ། གཉིས་གང་ཞེ་ན། མི་བྱ་བའི་ལས་མི་བྱེད་པ་དང་། དམ་པ་རྣམས་ཀྱིས་བསྔགས་པའོ། །ཡང་གཉིས་ཏེ། ཁོང་དུ་མ་ཆུད་པ་ཁོང་དུ་ཆུད་པ་དང་། སངས་རྒྱས་དང་བྱང་ཆུབ་སེམས་དཔའ་རྣམས་དང་ལྷན་ཅིག་འགྲོགས་པ་ཐོབ་པར་འགྱུར་བའོ། །ཡང་གཉིས་ཏེ། ཚུལ་ཁྲིམས་ལ་རབ་ཏུ་གནས་པར་འགྱུར་བ་དང་། ལྷ་དང་མི་རྣམས་སུ་སྐྱེ་བ་འཐོབ་པར་འགྱུར་རོ། །དེ་ལྟ་བས་ན་ལེགས་པར་རབ་ཏུ་ཡིད་ལ་ཟུང་ཤིག་དང་། འདི་ལྟ་སྟེ། སྒྲུབ་པར་སྦྱོར་བའི་ཚིག་གང་རྣམས་ཀྱིས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་གསང་སྔགས་རྣམས་ལས་མྱུར་དུ་གསང་སྔགས་ཀྱི་དངོས་གྲུབ་འཐོབ་པར་འགྱུར་བ། གསང་སྔགས་སྒྲུབ་པ་འགྲུབ་པར་སྦྱོར་བའི་ཚིག་རྣམས་བཤད་དོ། །དེ་ལ་དང་པོར་རེ་ཞིག་དཀྱིལ་འཁོར་མཐོང་བ། བླ་མས་གསང་སྔགས་བསྒྲུབ་པར་གནང་། བྱང་ཆུབ་ཏུ་སེམས་བསྐྱེད་པ། དད་པ་ཅན་སེར་སྣ་མེད་པ།

སྙིང་རྗེ་ཅན་དུལ་བ་རྟེན་ཅིང་འབྲེལ་པར་འབྱུང་བ་རྣམ་པར་དབྱེ་བ་ལ་མཁས་པ། སྡོམ་པ་བཟུང་བ། རང་གི་བསླབ་པ་ལ་གནས་པ། །ཐབས་ལ་མཁས་ཤིང་རབ་ཏུ་བརྟན། །དུས་དང་དུས་མ་ཡིན་པའང་ཤེས། །འཇིགས་པ་མེད་ཅིང་མཁས་ལ་གཏོང་། །བཟོད་དང་ལྡན་ཞིང་བྱམས་པའི་ཡིད། །གསང་སྔགས་སྤྱོད་ལ་རབ་ཏུ་བརྩོན། །གསང་སྔགས་དེ་ཉིད་དོན་ལ་མཁས། །བསམ་གཏན་བྱེད་ལ་དགའ་བ་ཡིན། །སྒྲུབ་པ་པོ་ནི་སྒྲུབ་ལ་ཤིས། །གསང་བ་པའི་བདག་པོ་དེ་ལ་འདོད་པའི་ཁམས་ཀྱི་དབང་ཕྱུག་ལ་མྱོས་པར་བྱེད་པ་ཞེས་བྱ་བའི་རིག་སྔགས་ཡོད་དེ། དེས་འདོད་པ་ན་སྤྱོད་པའི་ལྷའི་བུ་ཐམས་ཅད་མྱོས་པས་བརྒྱལ་བར་བྱེད་ཅིང་། མེ་ཏོག་མང་པོ་སྣ་ཚོགས་དང་ལྡན་པའི་ས་ཕྱོགས་ཉམས་དགའ་བ་རྣམས་ཀྱང་སྟོན་ལ། ཡོངས་སུ་སྤྱད་པ་དང་ཉེ་བར་སྤྱད་པ་རྣམ་པ་ཐ་དད་པ་སྣ་ཚོགས་རྣམས་ཀྱང་མངོན་པར་སྤྲུལ་ནས། གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་སྦྱིན་ལ། བདག་ཉིད་ཀྱང་ཡོངས་སུ་སྤྱོད་དོ། །འདི་ལྟ་སྟེ། ལྷའི་བུ་དབང་ཕྱུག་ཆེན་པོ་ལ་ཡིད་མགྱོགས་ཞེས་བྱ་བའི་རིག་སྔགས་ཡོད་དེ། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སེམས་ཅན་གྱི་དགོས་པ་བྱེད་ཅིང་། ཉེ་བར་སྤྱད་པ་དང་། ཡོངས་སུ་སྤྱད་པ་ཐམས་ཅད་ཀྱང་མངོན་པར་སྤྲུལ་ནས། གནས་གཙང་མའི་རིས་ཀྱི་ལྷའི་བུ་རྣམས་ལ་ཡང་སྦྱིན་ལ་བདག་ཉིད་ཀྱང་ཀུན་ཏུ་སྤྱོད་དོ། །འདི་ལྟ་སྟེ། དཔེར་ན་མིག་འཕྲུལ་མཁན་ནི་གསང་སྔགས་རྣམས་ཀྱིས་ཀུན་དགའི་ར་བ་དང་། མཚོ་དང་། འབབ་ཆུ་དང་། མི་ལ་སོགས་པ་རྣམ་པ་ཐ་དད་པ་སྣ་ཚོགས་སྟོན་ཏོ། །འདི་ལྟ་སྟེ་དཔེར་ན། ལྷ་མ་ཡིན་རྣམས་ནི་གསང་སྔགས་ཀྱི་སྒྱུ་མ་རྣམས་སྟོན་ཏོ། །འདི་ལྟ་སྟེ་དཔེར་ན། གསང་སྔགས་དག་གིས་ནི་དུག་དང་རིམས་ལ་སོགས་པ་མེད་པར་འགྱུར་རོ། །འདི་ལྟ་སྟེ་མ་མོ་ཞེས་བྱ་བའི་ལྷ་མོ་རྣམས་ནི་གསང་སྔགས་ཀྱིས་སེམས་ཅན་རྣམས་ལ་ནད་འགོ་བ་གཏོང་ངོ་། །འདི་ལྟ་སྟེ་དཔེར་ན། གསང་སྔགས་ཀྱིས་ནི་མེའི་ཚ་བ་མེད་པར་བྱས་ནས་གྲང་བར་བྱེད་པར་འགྱུར་རོ། །རིགས་ཀྱི་བུ་དག་དཔེའི་ཚིག་འདི་རྣམས་ཀྱིས་གསང་སྔགས་ཀྱི་མཐུ་ལ་མངོན་པར་དད་པར་

བྱའོ། །གསང་སྔགས་ཀྱི་མཐུ་དེ་ཡང་གང་ཞེ་ན། གསང་སྔགས་རྣམས་ལས་བྱུང་བ་ཡང་མ་ཡིན། རྫས་ལས་འཇུག་པ་ཡང་མ་ཡིན། སྦྱོར་བ་པོས་ལས་དམིགས་པ་ཡང་མ་ཡིན་མོད་ཀྱི། རིགས་ཀྱི་བུ་དག་འོན་ཀྱང་གསང་སྔགས་ཀྱི་བྱིན་གྱི་རླབས་ཀྱི་ཆོས་ཉིད་འབྱུང་བ་ལས་འདའ་བར་ཡང་མི་འགྱུར་ཏེ། དུས་གསུམ་ལས་འདས་པའི་ཕྱིར་དང་། རྟེན་ཅིང་འབྲེལ་པར་འབྱུང་བ་ཟབ་མོ་བསམ་གྱིས་མི་ཁྱབ་པ་ལས་མངོན་པར་གྲུབ་པའི་ཕྱིར་རོ། །རིགས་ཀྱི་བུ་དག་དེ་ལྟ་བས་ན་ཆོས་ཉིད་ཀྱིས་བསམ་གྱིས་མི་ཁྱབ་པའི་ངོ་བོ་ཉིད་རྟོགས་པར་ཁོང་དུ་ཆུད་པས་རྟག་ཏུ་རྒྱུན་མི་འཆད་པར་གསང་སྔགས་ཀྱི་ཚུལ་གྱི་རྗེས་སུ་འཇུག་པར་བྱའོ། །དེ་ནས་ཡང་བཅོམ་ལྡན་འདས་དུས་གསུམ་དུ་ཆགས་པ་མེད་པའི་སྟོབས་ཀྱི་གཞི་བྱིན་གྱིས་རློབ་པ། དེ་བཞིན་གཤེགས་པའི་གནས་བསམ་གྱིས་མི་ཁྱབ་པའི་རྒྱན་རྣམ་པར་དག་པའི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་ཆོས་ཀྱི་དབྱིངས་མ་ལུས་པ་ཅི་སྙེད་ཡོད་པ་རྣམ་པར་རིག་པར་བྱེད་པའི་སྒྲ་རྣམས་ལས་ཆོས་ཀྱི་དབྱིངས་ཀྱི་གནས་ཀྱི་སྟོབས། མི་མཉམ་པ་དང་མཉམ་པའི་སྟོབས། ཡང་དག་པར་རྫོགས་པའི་སངས་རྒྱས་ཀྱི་མོས་པ་ལས་བྱུང་བ། གནས་སྐབས་བཞི་དབྱངས་གཅིག་ལས་བྱུང་བས་ཆོས་ཀྱི་དབྱིངས་ཐམས་ཅད་ཁྱབ་པར་བྱས་ཏེ། ནམ་མཁའ་དང་མཉམ་པར་གྱུར་ནས་བྱུང་བ། ན་མཿསརྦྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ་སརྦྦ་ཐཱ། ཨ་ཨཱ་ཨྃ་ཨཿ། ཡང་དག་པར་རྫོགས་པའི་སངས་རྒྱས་ཀྱི་སྙིང་པོ་དེ་དག་བྱུང་མ་ཐག་ཏུ། དེ་ནས་ཡང་ཆོས་ཀྱི་དབྱིངས་ཐམས་ཅད་ངེས་པར་སྒྲོགས་པའི་སྒོ་དག་ནས་ཡང་དག་པར་རྫོགས་པའི་སངས་རྒྱས་ཀྱི་སྙིང་པོའི་ཚིག་གིས་མཚན་པ་རྣམ་པར་རིག་པའི་དབྱངས་ཀྱི་སྒྲ་གཅིག་ནས་གཅིག་ཏུ་མངོན་པར་གྲག་གོ། །བྱང་ཆུབ་སེམས་དཔས་དེ་ཐོས་ནས། །ངོ་མཚར་གྱུར་པའི་མིག་ཕྱེ་སྟེ། །ཀུན་མཁྱེན་བསྙུན་དང་བྲལ་བ་ལ། །ཚིག་སྙན་འདི་སྐད་ཅེས་གསོལ་ཏོ། །ཨེ་མའོ་གསང་སྔགས་སྤྱད་པ་ལས། །སངས་རྒྱས་རྐང་གཉིས་མཆོག་རྣམས་ཀྱིས། །གང་གིས་འདི་ཀུན་ཁྱབ་པ་ཡི། །ཡེ་

ཤེས་ཡངས་པ་ཆེན་པོ་བྱུང་། །དེ་བས་རྣམ་པ་ཐམས་ཅད་དུ། །སངས་རྒྱས་བསྔགས་པའི་སྙིང་པོ་ལ། །ནང་གི་བདག་ཉིད་རྣམ་དག་པས། །རྟག་ཏུ་མངོན་པར་བརྩོན་པར་བྱ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་སྙིང་པོ་རྣམས་སྒྲུབ་པ་བྱུང་སྟེ། སྐྱེད་མོས་ཚལ་ལམ། གཙུག་ལག་ཁང་ངམ། ཕུག་གམ། ཡིད་གང་དུ་དབེན་པ་དེར་བྱང་ཆུབ་ཀྱི་སེམས་བསྒོམ་ཞིང་། ནམ་མཚན་མ་མ་བྱུང་གི་བར་དེ་སྲིད་དུ་འདུག་པར་བྱའོ། །དེ་ནས་སྙིང་པོ་དེ་དག་ལས་གང་རུང་བ་ཅིག་གཟུང་སྟེ། ཐེ་ཙོམ་མེད་པར་གྱུར་གྱི་བར་དུ་གཞི་བསྒྲུབ་པར་བྱའོ། །དེ་ནས་སྙིང་པོ་སྙིང་གར་བཞག་ནས་ཡིད་བསྒྲུབ་པར་བྱ་སྟེ། ཤིན་ཏུ་རྣམ་པར་དག་པ། དྲི་མ་མེད་པ་བརྟན་པ་རབ་ཏུ་མི་གཡོ་བ། རྣམ་པར་མི་རྟོག་པ། མེ་ལོང་ལྟ་བུ། རབ་ཏུ་ཕྲ་བ་ལ་མངོན་པར་བལྟ་ཞིང་རྟག་ཏུ་གོམས་པའི་སྦྱོར་བས་རང་གི་ལུས་རང་གི་ལྷའི་ལུས་སུ་མཐོང་གི་བར་དུ་བྱའོ། །གཞི་གཉིས་པ་ནི་ཡང་དག་པར་རྫོགས་པའི་སངས་རྒྱས་མེ་ལོང་གི་དཀྱིལ་འཁོར་དེ་ཉིད་ཀྱི་ནང་ན་པདྨའི་རྒྱལ་པོ་ཆེན་པོ་ལ་བཞུགས་པ་ཕུག་ན་བཞུགས་པ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ། ཐོར་ཚུགས་དང་དབུ་རྒྱན་དང་འོད་ཟེར་མཐའ་ཡས་པས་བསྐོར་བ། རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བ། ནམ་མཁའ་བཞིན་གཟོད་མ་ནས་ཞི་བ་སྟེ། དེ་ལ་སྒྲ་གནས་པར་བསམ་ཞིང་། མཉམ་པར་གཞག་པས་བཟླས་བརྗོད་བྱ། །དེ་ནས་སྔོན་དུ་བསྙེན་པ་ནི། །འབུམ་ཕྲག་གཅིག་ཏུ་བྱ་བར་བཤད། །དེ་ནས་ཟླ་བ་གཉིས་པ་ལ། །མེ་ཏོག་དྲི་ལ་སོགས་པ་དབུལ། །སེམས་ཅན་རྣམས་ལ་རྣམ་མང་པོའི། །ཕན་པ་ཉེ་བར་སྒྲུབ་བྱེད་ཅིང་། །རྙེད་དང་མ་རྙེད་རྣམ་སྤངས་ཏེ། །ཟླ་བ་གཞན་ལ་བཟླས་བརྗོད་བྱ། །དེ་ལ་དེ་རུ་སྦྱོར་བ་འདི། །མཉམ་པར་བཞག་པས་བསམ་པར་བྱ། །བདག་གི་བསོད་ནམས་མཐུ་ཡིས་ནི། །སེམས་ཅན་ཐམས་ཅད་བདེ་གྱུར་ཅིག །ཐམས་ཅད་ནད་ཀྱང་མེད་པར་ཤོག །ཡང་ན་དེ་བཞིན་གཤེགས་བསྔགས་པའི། །འདོད་པ་ཕུན་སུམ་ཚོགས་གྱུར་ཅིག །ཡང་ན་སེམས་ཅན་ཐམས་ཅད་ཀྱང་། །རེ་བ་ཐམས་ཅད་ཡོངས་རྫོགས་པ། །སྒྲིབ་པ་མེད་པའི་ཚུལ་གྱིས་སུ། །མ་ཐོགས་པར་ནི་

གྲུབ་པར་ཤོག །དུད་འགྲོ་གཅིག་ལ་གཅིག་ཟ་བའི། །སྡུག་བསྔལ་ནམ་ཡང་འབྱུང་མ་གྱུར། །ཡི་དགས་རྣམས་ལ་ཟས་སྐོམ་སོགས། །ཐོགས་པ་མེད་པར་འབྱུང་བར་ཤོག །སེམས་ཅན་དམྱལ་བའི་སྡུག་བསྔལ་གང་། །མི་བཟད་རྣམ་པ་སྣ་ཚོགས་པ། །བདག་གི་བསོད་ནམས་མཐུ་ཡིས་ནི། །དེ་དག་མྱུར་དུ་ཞི་བར་གྱུར། །སེམས་ཅན་སྡུག་བསྔལ་ཐམས་ཅད་ལ། །སྙིང་རྗེ་ཆེན་པོ་བསྐྱེད་ནས་ནི། །བསྒྲུབ་པ་དེ་དང་གཞན་དག་ཀྱང་། །དེས་ནི་ཡང་དང་ཡང་དུ་བསམ། །ཅི་ལྟར་བསམས་པ་འགྲུབ་བྱའི་ཕྱིར། །བྱིན་གྱིས་བརླབས་ཀྱི་གནས་གསུམ་གྱིས། །དེ་དག་ཐམས་ཅད་བྱིན་བརླབ་ཅིང་། །ཡིད་ལ་སྔགས་ཀྱང་བཟླས་བརྗོད་བྱ། །བདག་གི་བསོད་ནམས་སྟོབས་དང་ནི། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་ཀྱིས་སུ། །སེམས་ཅན་རྣམས་ལ་ཕན་འདོགས་པས། །དོན་རྣམས་གང་དག་བསམས་པ་ཀུན། །སེམས་ཅན་ཁམས་ནི་མ་ལུས་འདིར། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །དེ་ནས་བཅོམ་ལྡན་འདས་ཀྱིས་དེའི་ཚེ་རིག་སྔགས་ཀྱི་རྒྱལ་མོ་སྟོབས་ནམ་མཁའ་དང་འདྲ་བ་ནམ་མཁའི་མཛོད་འབྱུང་བ་གསུངས་སོ། །ན་མཿསརྦྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏད་ཁཾ་ཨུཊྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། འདི་ལན་གསུམ་བཟླས་ན་ཅི་ལྟར་བསམས་པའི་དོན་ཐམས་ཅད་ཐོགས་པ་མེད་པར་འབྱུང་བར་འགྱུར་རོ། །དེ་ནས་ཟླ་བ་ཉ་བའི་ཚེ། །མི་དེ་སྒྲུབ་ལ་འཇུག་པར་བྱ། །རི་རྩེ་དང་ནི་བ་ལང་ལྷས། །ཆུ་མདོའམ་ཡང་ན་དུར་ཁྲོད་དམ། །ལམ་གྱི་བཞི་མདོའམ་ཤིང་གཅིག་དྲུང་། །མ་མོའི་གནས་སམ་ཞི་གནས་སུ། །བགེགས་རྣམས་ཐམས་ཅད་མྱོས་འགྱུར་བའི། །དཀྱིལ་འཁོར་དེས་པས་མཉན་པར་གྱིས། །ཀུན་ཏུ་གྲུ་བཞི་ལྷམ་པ་སྟེ། །སྒོ་གཅིག་པ་ལ་མུ་རན་ཅན། །ཐམས་ཅད་ཁ་དོག་སེར་པོ་ཡིས། །རྡོ་རྗེའི་དཀྱིལ་འཁོར་མཆོག་བྲིས་ནས། །རྡོ་རྗེ་སྦྲེལ་བའི་ཚུལ་གྱིས་སུ། །རྡོ་རྗེ་ཕན་ཚུན་འབྲེལ་བར་བྱ། །སྒོར་ནི་སྒོ་སྲུང་གཉིས་བྲི་བ། །གདུལ་དཀའ་དང་ནི་མངོན་ཕྱོགས་གཉིས། །མིག་དམར་ཁྲོ་དང་བཅས་པ་ལ། །ཁྲོས་ཤིང་སྡིགས་པར་བྱེད་པ་བྲི། །མདུང་རྩེ་

གསུམ་ས་གྲྭ་རྣམས་སུ། །ནན་ཏན་དུ་ནི་བྲི་བར་བྱ། །དབུས་སུ་རྡོ་རྗེའི་གདན་ཡིད་འོང་། །ཁ་ནི་ཀུན་ཏུ་བལྟ་བ་བྲི། །དེའི་སྟེང་པདྨ་ཆེན་པོ་ནི། །འདབ་མ་བརྒྱད་པ་གེ་སར་བཅས། །རྒྱལ་བ་ཀུན་ལ་ཕྱག་བྱས་ནས། །སྨོན་ལམ་ཉེ་བར་སྒྲུབ་བྱེད་ཅིང་། །ཕྱག་ན་རྡོ་རྗེ་བློ་ཅན་གྱི། །རྡོ་རྗེའི་ཕྱག་རྒྱ་བཅིངས་ནས་སུ། །དེར་ནི་བསྲུང་བྱས་དེར་འདུག་སྟེ། །སྦྱངས་པའི་རྫས་ནི་བླངས་ནས་སུ། །ནང་གི་བདག་ཉིད་རྣམ་དག་པས། །མཚན་གཅིག་ཐལ་བྱུང་བཟླས་བརྗོད་བྱ། །དེར་ནི་ནམ་གྱི་ཕྱེད་དུས་སམ། །ཡང་ན་ཉི་མ་འཆར་བའི་ཚེ། །རྫས་དེ་ཡོངས་སུ་འགྱུར་བ་ནི། །འབར་ཕྲེང་ཅན་གྱི་གཟི་བརྗིད་བཞིན། །སྔགས་པ་རང་གིས་དེ་བླངས་ན། །ནམ་མཁའ་ལ་ནི་འགྲོ་བར་འགྱུར། །བསྐལ་པར་གནས་ཤིང་གཟི་བརྗིད་ཆེ། །རྒྱལ་སྲས་དེ་ནི་འདོད་ན་འཆི། །འཇིག་རྟེན་ཁམས་ནི་གཞན་དུའང་འགྲོ། །གཙོ་བོ་སྣ་ཚོགས་གཟུགས་འཆང་བ། །རྫས་ལས་བྱུང་བའི་སྔགས་བསྒྲུབས་པས། །དཔལ་ལྡན་མཆོད་པ་རབ་ཏུ་བྱེད། །འདི་ནི་ཉམས་པར་མི་འགྱུར་བའི། །རྫས་ཀྱི་དངོས་གྲུབ་ཡིན་པར་བཤད། །གསང་བ་པའི་བདག་པོ་དེ་ལ་བརྟག་པ་འདི་རྒྱུ་མཚན་དུ་མཛད་ནས། འཇིག་རྟེན་གྱི་ཁམས་ཐམས་ཅད་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐབས་ཀྱི་ཕ་རོལ་ཏུ་ཕྱིན་པ་རྟོགས་པར་ཐུགས་སུ་ཆུད་པ་རྣམས་ཀྱི་བརྟག་པ་དེ་ཉིད་རང་བཞིན་གྱིས་སྟོང་པར་མཁྱེན་ཀྱང་ཐབས་ཀྱི་ཕ་རོལ་ཏུ་ཕྱིན་པའི་སྟོབས་ཀྱིས་འདུས་མ་བྱས་པ་གདགས་པར་བཏགས་ཏེ། ཡོངས་སུ་བསྒྱུར་བའི་ཚུལ་དུ་མཐོང་བའི་ཆོས་ལ་བདེ་བར་གནས་པར་བྱ་བའི་ཕྱིར། ཆོས་ཀྱི་དབྱིངས་ཀྱི་མཐུ་རླབས་པོ་ཆེ་སེམས་ཅན་རྣམས་ལ་ངེས་པར་སྟོན་ཏེ། དེས་དེ་རྣམས་ཡིད་རབ་ཏུ་དགའ་ཞིང་ཚེ་རིང་པོ་ཡང་རབ་ཏུ་ཐོབ་ནས། འདོད་པའི་ཡོན་ཏན་ལྔ་དག་གིས་རྩེ་དགའ་ཡོངས་སུ་སྤྱོད་པ། སངས་རྒྱས་བཅོམ་ལྡན་འདས་རྣམས་ལ་མཆོད་ཅིང་འཇིག་རྟེན་ཐམས་ཅད་དང་མི་མཐུན་པའི་ལམ་འདི་གྲུབ་པར་འགྱུར་རོ། །དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་ཀྱིས་ཀྱང་དོན་གྱི་དབང་འདི་གཟིགས་ནས། གསང་སྔགས་སྤྱད་པའི་ཚུལ་གྱི་ཆོ་ག་ཐུགས་དགྱེས་བཞིན་དུ་འཆད་

དོ། །དེ་ཅིའི་ཕྱིར་ཞེ་ན། གང་བསྐལ་པ་དུ་མར་སྩོལ་ཞིང་འབད་དེ་བྱ་དཀའ་བ་རྣམས་བརྩམས་ཀྱང་འཐོབ་པར་མི་འགྱུར་བ་དེ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་ཚེ་འདི་གཅིག་ཁོ་ན་ལ་འཐོབ་པར་འགྱུར་རོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་དེ་བཞིན་གཤེགས་པའི་རྒྱལ་མཚན་ནམ། རལ་གྲིའམ། གདུགས་སམ། མཆིལ་ལྷམ་མམ། ཡིད་བཞིན་གྱི་ནོར་བུའམ། ལིག་བུ་མིག་གམ། གིའུ་ཝང་བླངས་ཏེ། བཟླས་བརྗོད་སུམ་འབུམ་བྱས་ལ་དེ་ལྟར་བསྒྲུབས་ན་དེ་བཞིན་དུ་འགྲུབ་པར་འགྱུར་རོ། །གསང་བ་པའི་བདག་པོ་གཞན་ཡང་རིགས་ཀྱི་བུའམ་རིགས་ཀྱི་བུ་མོ་ཐབས་དང་ལྡན་པས་ཡིད་ལ་འདོད་པའི་དངོས་པོ་རྣམས་བསྒྲུབས་ན། དེ་དག་རང་གི་སེམས་ཀྱི་དབང་ཙམ་ཁོ་ནས་ཡོངས་སུ་འགྲུབ་པར་འགྱུར་རོ། །གསང་བ་པའི་བདག་པོ་གང་དག་རྒྱུ་ལས་འབྲས་བུ་མངོན་པར་འདོད་པའི་མི་བླུན་པོ་དེ་དག་ནི། གསང་བ་པའི་བདག་པོ་གསང་སྔགས་རྣམས་ཀྱི་གསང་སྔགས་མཚན་ཉིད་རབ་ཏུ་མི་ཤེས་པ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་ནི་བྱེད་པར་མ་གསུངས་ཏེ། །འབྲས་བུའང་དེ་ལ་ཡོད་མ་ཡིན། །རྒྱུ་ནི་རྒྱུ་ཡིས་སྟོང་པ་ན། །དེ་ནི་ཅི་ལྟར་རྒྱུར་ཡང་འགྱུར། །དེ་བས་གསང་སྔགས་འབྲས་བུ་ནི། །རྒྱུ་དང་ལས་བྲལ་ཤེས་པར་བྱ། །གང་ཚེ་མཚན་མ་མེད་པ་ཡི། །ཏིང་འཛིན་ཅི་ལྟ་བཞིན་རེག་པ། །དེ་ཚེ་སྔགས་པས་དངོས་གྲུབ་ནི། །ཡིད་ལས་ཡང་དག་བྱུང་བ་འཐོབ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀྱི་གཞི་རྣམས་དངོས་གྲུབ་ཏུ་བསྒྲུབ་པའི་ཚིག་གང་གིས་རིགས་ཀྱི་བུ་དང་རིགས་ཀྱི་བུ་མོ་རྣམས་མཐོང་བའི་ཆོས་ཉིད་ལ་རབ་ཏུ་དགའ་ཞིང་བདེ་བ་ལ་རེག་པར་གནས་ལ། ཆོས་ཀྱི་དབྱིངས་ལས་ཀྱང་འགལ་བར་མི་འགྱུར་བ་དེ་ཡང་བཤད་དུ་གསོལ། བཅོམ་ལྡན་འདས་དེ་ཅིའི་སླད་དུ་ཞེ་ན། ཆོས་ཀྱི་དབྱིངས་ནི་བསམ་གྱིས་མི་ཁྱབ་པའི་དབྱིངས་ལགས་ཏེ། དེ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

སངས་རྒྱས་རྣམས་ཀྱིས་བསྟན་ཏོ། །བཅོམ་ལྡན་འདས་དེ་ལྟ་ལགས་པས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་ན་ཆོས་ཀྱི་དབྱིངས་དབྱེར་མེད་པ་རྟོགས་པར་ཁོང་དུ་ཆུད་པར་བགྱི་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་ལེགས་སོ་ལེགས་སོ། །གསང་བ་པའི་བདག་པོ་གང་ཁྱོད་དེ་བཞིན་གཤེགས་པ་ལ་དོན་འདི་ཡོངས་སུ་དྲི་བར་སེམས་པ་དེ་ནི་ཡང་ལེགས་སོ། །དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། གསང་བ་པའི་བདག་པོ་ཕྱག་ན་རྡོ་རྗེ་བཅོམ་ལྡན་འདས་ལ་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེ་ལ་ཨ་ཞེས་བྱ་བའི་སྒྲུབ་པ་འབྱུང་སྟེ། གཙུག་ལག་ཁང་ངམ་ཕུག་གམ། གནས་གང་ཡང་རུང་སྟེ་ཡན་ལག་ཐམས་ཅད་དུ་ཨ་ཞེས་བྱ་བ་གཞག་ལ་བཟླས་བརྗོད་སུམ་འབུམ་བྱའོ། །དེ་ནས་ཟླ་བ་ཉ་བའི་ཚེ་ཅི་འབྱོར་པས་མཆོད་པ་བྱས་ལ་ཅི་སྲིད་དུ་བྱང་ཆུབ་སེམས་དཔའ་ཀུན་ཏུ་བཟང་པོའམ། འཇམ་དཔལ་ལམ། རྡོ་རྗེ་འཛིན་ཆེན་པོ་གང་ཡང་རུང་བ་ཞིག་འོངས་ཏེ།མགོ་ལ་ཉུག་གམ་ལེགས་སོ་ཞེས་ཟེར་གྱི་བར་དུ་བཟླས་བརྗོད་བྱའི། དེ་ནས་ཕྱག་བྱས་ཏེ་མཆོད་ཡོན་ཕུལ་ན་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་པར་འགྱུར་རོ། །དེ་བཞིན་དུ་སེམས་ཡང་བ་དང་། ལུས་ཡང་བ་གོམས་པར་བྱ་ཞིང་བཟླས་བརྗོད་བྱས་ན་དེའི་ལུས་རྣམ་པར་དག་པ་དང་། སེམས་རྣམ་པར་དག་པར་འགྱུར་རོ། །ཨ་ཞེས་བྱ་བ་རྣམ་པར་བཞག་སྟེ། བཟླས་བརྗོད་བྱས་ན་རྣ་བ་རྣམ་པར་དག་པར་འགྱུར་རོ། །འོན་ཏེ་སྲོག་གཟུང་བར་འདོད་ན་ཨ་ཞེས་བྱ་བ་སྲོག་དང་ལྷན་ཅིག་ཏུ་བྱས་ལ་དུས་གསུམ་དུ་བསམ་པ་བྱས་ན་ཡུན་རིང་དུ་གནས་པར་འགྱུར་རོ། །དེ་ཉིད་ཀྱི་སྟེང་དུ་ཀླད་ཀོར་གཞག་ན་གནས་པ་དང་འགྲོ་བའི་དུག་ཐམས་ཅད་འབྱིན་ཏོ། །དེ་ནས་གཟི་ཅན་དབང་དུ་བྱ་བར་འདོད་ན། ཨ་ཞེས་བྱས་པ་བདག་ཏུ་བྱས། །པ་ལས་དེ་བཞིན་མི་དབང་པོ། །གཅིག་ལ་པདྨ་གཞག་པར་བྱ། །གཞན་ལ་ཡང་ནི་དུང་བཞག་

སྟེ། །གཅིག་ལ་གཅིག་ནི་གདོང་བལྟས་ན། །དེ་ཡི་མོད་ལ་དབང་དུ་འགྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེ་བཞིན་གཤེགས་པ་རྣམས་ཀྱི་ཐུགས་ལས་བྱུང་བ་ཞེས་བྱ་བ། ལས་དང་བྱ་བས་རྣམ་པར་རོལ་པ་སྤྱོད་པའི་རོལ་མོ་རིམ་པར་ཕྱེ་བ་རྒྱས་པ་ཁམས་བཞི་ཡང་དག་པར་བསྡུ་བར་བསྡུས་པ། སེམས་ཀྱི་རྒྱལ་པོ་ལ་གནས་པ། ནམ་མཁའ་ལྟར་ཀུན་ཏུ་ཁྱབ་པ། མཐོང་བ་དང་མ་མཐོང་བའི་འབྲས་བུ་མང་བ། ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་མངོན་སུམ་པ། གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་རེ་བ་ཐམས་ཅད་ཡོངས་སུ་རྫོགས་པར་བྱེད་པ། ལས་སྣ་ཚོགས་དང་ལྡན་པ། སེམས་ཅན་ཐམས་ཅད་ལ་ཕན་འདོགས་པ་ཡོད་ཀྱིས། དེ་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །ལག་ན་རྡོ་རྗེ་དེ་ལ་སྤྱོད་པའི་རོལ་མོ་ལས་དང་བྱ་བ་མངོན་པར་འགྲུབ་པའི་འབྲས་བུ་ཕལ་ཆེ་བ། ལུས་ཅན་ཀུན་ཀྱི་མངོན་སུམ་པ་གང་ཞེ་ན། ཆོ་ག་ཤེས་པས་ཐོག་མར་ནི། །བདག་གི་དེ་ཉིད་རིམ་བཞིན་བྱ། །སྔགས་པ་སྔ་མ་བཞིན་འདུག་ལ། །དེ་བཞིན་གཤེགས་པ་དྲན་བྱས་ཏེ། །བདག་ཉིད་ཨ་ཞེས་བྱ་བ་ནི། །ཀླད་ཀོར་བཅས་དང་རྒྱས་བྱས་པ། །ཐམས་ཅད་ཤིན་ཏུ་སེར་ཞིང་བཟང་། །གྲུ་བཞི་རྡོ་རྗེས་མཚན་བྱས་ཏེ། །སྔགས་པས་དེར་གནས་རྫོགས་པ་ཡིས། ། སངས་རྒྱས་ཀུན་གྱི་གཙོ་བོ་བསམ། །འདི་ནི་སངས་རྒྱས་ཐམས་ཅད་ཀྱིས། །བདག་གི་དེ་ཉིད་ཡིན་པར་གསུངས། །ནམ་ཞིག་སྔགས་པས་བདག་གི་ནི། །དེ་ཉིད་དོགས་པ་མེད་གྱུར་པ། །དེ་ཚེ་འཇིག་རྟེན་ཐམས་ཅད་ལ། །ཕན་པ་བྱེད་པ་ཉིད་དུ་འགྱུར། །ངོ་མཚར་སྣ་ཚོགས་དག་དང་ལྡན། །མིག་འཕྲུལ་ཅན་གྱི་གནས་ལ་འདུག །སྔགས་པ་ནམ་ཞིག་མཉམ་བཞག་ན། །སྲིད་པ་རབ་ཏུ་དོག་པ་ན། །ཐོག་མེད་དུས་ནས་མི་ཤེས་པས། །བསགས་པའི་ལས་དེ་ཀུན་ཟད་འགྱུར། །བླ་ན་མེད་པའི་བྱང་ཆུབ་སེམས། །སེམས་དེ་ནམ་ཞིག་སྒོམ་བྱེད་པ། །དེ་ཚེའང་

སྔགས་པ་རྣལ་འབྱོར་པ། །ཆུ་ཡིས་པདྨ་ལྟ་བུར་ནི། །དགེ་དང་མི་དགེ་འབྲས་འབྱུང་བའི། །ལས་ཀྱི་རྟོག་པས་མི་གོས་ན། །འདི་བདག་ཉིད་ནི་རྒྱལ་མཆོག་ཏུ། །བསྒྱུར་ན་སྨོས་ཀྱང་ཅི་ཞིག་དགོས།། །།བམ་པོ་བཞི་པ། དེ་ནས་བཅོམ་ལྡན་འདས་རྣམ་པར་སྣང་མཛད་བདུད་བཞི་ལས་རྒྱལ་བ་རྡོ་རྗེ་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེའི་ཡི་གེའི་ཚིག་བདུད་བཞི་ལས་རྒྱལ་བར་བྱེད་པ། རྒྱུད་དྲུག་ལས་རྣམ་པར་གྲོལ་བར་བྱེད་པ། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པ་འདི་རྣམས་གསུངས་སོ། ། ན་མཿས་མནྟ་བུད་དྷཱ་ནཱཾ། ཨ་བཱི་ར་ཧཱུྃ་ཁྃ། དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེ་དང་། རྡོ་རྗེ་འཛིན་དེ་དག་དང་། བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དེ་དག་དང་། ཐམས་ཅད་དང་ལྡན་པའི་འཁོར་འདུས་པ་དེ་དག་ཐམས་ཅད་ངོ་མཚར་དུ་གྱུར་ནས། མིག་མི་འཛུམས་པར་ཐམས་ཅད་མཁྱེན་པ་ལ་སྤྱི་བོས་ཕྱག་འཚལ་ཏེ། ཚིག་འདི་སྐད་ཅེས་བརྗོད་དོ། །བྱང་ཆུབ་སེམས་དཔའ་སྐྱོབ་རྣམས་དང་། །སངས་རྒྱས་ཀུན་གྱི་ནོར་གྱི་དབྱིག །འདིས་ནི་གང་དག་སངས་རྒྱས་དང་། །བྱང་ཆུབ་སེམས་དཔའ་སྐྱོབ་རྣམས་དང་། །རང་སངས་རྒྱས་དང་ཉན་ཐོས་པ། །མཁས་པས་དེ་དག་འཇིག་རྟེན་འདིར། །སངས་རྒྱས་ཡེ་ཤེས་བླ་མེད་པ། །དཔེ་མེད་ཡེ་ཤེས་ཐོབ་ནས་སུ། །རྫུ་འཕྲུལ་སྣ་ཚོགས་རྣམ་འཕྲུལ་པས། །ས་སྟེང་ཀུན་ཏུ་རྣམ་པར་སྤྱོད། །དེ་བས་འདི་དག་སོ་སོ་ཡི། །ཆོ་ག་རྒྱས་པ་དག་དང་ལས། །སྣ་ཚོགས་དགོད་པ་ཐམས་ཅད་ཀྱང་། །བསྟན་པ་འདི་ལ་བཤད་དུ་གསོལ། །དེས་ནི་གསང་སྔགས་སྤྱོད་པ་ཡི། །ཐེག་ཆེན་བླ་ན་མེད་པ་ལ། །སེམས་ཅན་རྣམས་ནི་དགའ་བཞིན་དུ། །མཐོང་བའི་ཆོས་ལ་གནས་པར་འགྱུར། །དེ་སྐད་གསོལ་ནས་བཅོམ་ལྡན་གྱིས། །འཇམ་པའི་གསུང་གིས་བཀའ་སྩལ་པ། །ཁྱེད་རྣམས་མཐུན་པར་རྩེ་གཅིག་ཏུ། །མཉམ་པར་ཞོག་ལ་འདི་ཉོན་ཅིག །དེའི་ཚེ་ས་གཞི་རྡོ་རྗེ་ཆེན་པོར་བྱིན་གྱིས་བརླབས་ཏེ། ཉིད་ཀྱི་སྐུ་ལས་བྱང་ཆུབ་ཀྱི་སྙིང་པོ་ཉེ་བར་བསྟན་པར་བཞེད་ནས་གསུངས་པ། ཨ་ནི་མཆོག་ཏུ་ཤེས་བྱ་བ། །དབང་ཆེན་དཀྱིལ་འཁོར་ལྡན་པ་སྟེ། །

ཕྱི་རོལ་དང་ནི་ནང་དུ་ཡང་། །རྡོ་རྗེ་དཀྱིལ་འཁོར་ཤེས་པར་བྱ། །དེར་འདུག་ནས་ནི་ཐམས་ཅད་བསམ། །རྣལ་འབྱོར་གནས་ཞེས་བཤད་པ་ཡིན། །ཨ་ནི་སྲོག་གི་དམ་པ་སྟེ། །འགུགས་པར་བྱེད་པའི་མཆོག་ཏུ་བཤད། །ནམ་ཞིག་ཀླད་ཀོར་གྱིས་མནན་ན། །ལུས་ཅན་ཀུན་གྱི་སེལ་བར་འགྱུར། །སྔགས་པས་ནམ་ཞིག་ཟླ་གཅིག་ཏུ། །རྡོ་རྗེ་ཅན་གྱིས་རྒྱ་བཅིངས་ནས། །དུས་གསུམ་བཟླས་བརྗོད་བྱས་ན་ནི། །མི་ཤེས་གྲོང་ཁྱེར་འཇོམས་པར་འགྱུར། །ལྷ་དང་ལྷ་མིན་རྣམས་ཀྱིས་ཀྱང་། །མི་ཕྱེད་ཤིན་ཏུ་བརྟན་པར་འགྱུར། །བདག་ཉིད་རྙེད་པ་གྲུབ་བྱའི་ཕྱིར། །རྒྱས་པའི་ལས་ནི་གང་ཅུང་ཟད། །དེ་ཀུན་རྟག་ཏུ་སྔགས་པ་ཡིས། །དཀྱིལ་འཁོར་གྱི་ནི་དབུས་སུ་བྱ། །གསེར་གྱི་ཁ་དོག་འབར་དང་བཅས། །ཐོར་ཚུགས་དབུ་རྒྱན་འཆང་བ་ཡི། །རྫོགས་པའི་སངས་རྒྱས་ཏིང་འཛིན་ཞུགས། །དབང་ཆེན་གྱི་ནི་གཞི་ཞེས་བྱ། །རྡོ་རྗེ་པདྨ་རལ་གྲི་དང་། །དེ་བཞིན་དང་པར་བཤད་པ་དང་། །གསེར་དག་དང་ནི་ས་དག་དང་། །ཡང་ན་ཡིད་བཞིན་ནོར་བུའང་རུང་། །དེ་ལ་སོགས་པའི་རྫས་རྣམས་ནི། །དབང་ཆེན་དུ་ནི་བསྒོམས་ཏེ་བསྒྲུབ། །མནན་པ་དག་ཀྱང་བཤད་པར་བྱ། །འདི་ནི་ཁྱོད་ཀྱིས་མཉམ་བཞག་ཉོན། །སྔགས་པས་མདོར་ན་རི་རབ་ནི། ། རྩེ་མོ་བརྒྱད་པ་བསམ་པར་བྱ། །དེ་ཡི་སྟེང་དུ་པདྨ་གཞག །དེ་ཡི་རྗེས་ལ་རྡོ་རྗེའོ། །དེའི་སྟེང་རྣལ་འབྱོར་པ་ཡིས་ནི། །ཡི་གེ་དམ་པ་གཙོ་བོ་སྟེ། །དེ་ཡིས་སྤྱི་བོར་མནན་ན་ནི། །དེ་ནི་མི་གཡོ་གནས་པར་འགྱུར། །སྨན་ལ་ཡང་ནི་ལན་བརྒྱ་རུ། །བཟླས་བརྗོད་བྱས་ཏེ་མིས་འཐུངས་ན། ། སྔོན་གྱི་ལས་ལས་བྱུང་བ་ཡི། །དེ་ཡི་ནད་རྣམས་འབྱང་བར་འགྱུར། །དེ་ནས་གཞན་ཡང་དེས་པ་ཡིས། །བ་ཞེས་བྱ་བ་དམ་པ་ཉོན། །གངས་དང་འོ་མ་དུང་འདྲ་བ། །ལྟེ་བའི་དབུས་ནས་བྱུང་བ་སྟེ། །པདྨ་དཀར་པོ་འདབ་མ་ནི། །དེ་ཡི་དབུས་ན་རབ་ཏུ་གནས། །མགོན་པོ་དམ་པ་རབ་ཏུ་ཞི། །སྟོན་ཀའི་ཟླ་བའི་འོད་དང་འདྲ། །དེ་ཡི་དཀྱིལ་འཁོར་ངོ་མཚར་ཅན། །རྫོགས་པའི་སངས་རྒྱས་རྣམས་ཀྱིས་བཤད། །ཀུན་ཏུ་དཀར་པོ་བསམ་པར་བྱ། །ཁྱུད་ཀོར་རིམ་པ་དགུས་ཀྱང་བསྐོར། །གདུང་བ་ཐམས་ཅད་ཞི་བྱེད་པ། །སྨུག་ཟིལ་འདུས་པའི་ནང་ན་གནས། །འོ་

མ་མུ་ཏིག་ཕྲེང་དཀར་དང་། །ཤེལ་དང་ཟླ་བའི་འོད་འདྲ་བའི། །ཆུ་རྒྱུན་རྣམས་ཀྱིས་ཁོར་ཡུག་ཏུ། །ཀུན་ནས་རབ་ཏུ་འབབ་པ་བཞིན། །སྔགས་པས་ཡིད་ལ་བསམས་ན་ནི། །གདུང་བ་ཀུན་ལས་ཐར་བར་འགྱུར། །མཉམ་པར་གཞག་པས་དངོས་འདི་རྣམས། ། དཀྱིལ་འཁོར་འདིར་ནི་བསྒྲུབ་པར་བྱ། །མར་སར་འོ་མ་མུ་ཏིག་ཕྲེང་། །དེ་བཞིན་ཁྱུ་མཆོག་ཤེལ་ཀྱང་རུང་། །ཞོ་འམ་ཡང་ན་ཆུ་ཡང་རུང་། །དེ་ལ་སོགས་པའི་རྫས་རྣམས་ནི། །དངོས་གྲུབ་སྣ་ཚོགས་གྲུབ་ཕྱིར་བསྒྲུབ། །ཚེ་ནི་རིང་བར་འགྱུར་བ་དང་། །གཟུགས་ནི་ངོ་མཚར་ཆེར་འགྱུར་དང་། །ནད་རྣམས་ཀུན་ལས་ཐར་བ་དང་། །སྐལ་བ་བཟང་པོ་མཆོག་འགྱུར་དང་། །ཡིད་རྣོ་འཛིན་པར་ནུས་པ་དང་། །ཤེས་རབ་ཤིན་ཏུ་དྲི་མེད་པ། །སྒྲུབ་པའི་རྫས་ནི་འདི་རྣམས་ཀྱིས། །དེ་དག་ཐམས་ཅད་མྱུར་དུ་འགྲུབ། །དཀྱིལ་འཁོར་དཔལ་དང་ལྡན་པ་འདི། །ཞི་བར་བྱེད་པར་བཤད་པ་ཡིན། །ཀླད་ཀྱི་ཀོར་དང་བཅས་བྱས་ན། །སེལ་བར་བྱེད་པའི་མཆོག་ཏུ་འགྱུར། །ར་ཞེས་བྱ་བ་ཡང་དག་མཆོག །འོད་ཅན་རྣམས་ཀྱི་འོད་ཅེས་བྱ། །དེས་ནི་ལས་རྣམས་གང་ཅུང་ཟད། །མཚམས་མེད་ལྔ་ལས་བྱུང་བ་ཡང་། །རྣལ་འབྱོར་ཤིན་ཏུ་མཉམ་གཞག་ནས། ། བསམས་ན་དེ་ཀུན་ཟད་པར་འགྱུར། །ཡིད་འོང་ཐམས་ཅད་རབ་ཏུ་དམར། །གྲུ་གསུམ་པ་ཡི་ཚུལ་དུ་གནས། །ཞི་བ་འབར་བའི་ཕྲེང་བས་འཁྲིགས། །སུམ་མདོའི་རིས་མཚན་སྙིང་གར་གཞག །རྣལ་འབྱོར་པ་ནི་དེར་འདུག་ནས། །ར་ནི་ཀླད་ཀོར་བཅས་པར་བསམ། །མི་འཇིགས་པས་ནི་ཅི་རིགས་པར། །དངོས་པོ་དེ་དག་དེས་སྒྲུབ་བོ། །ཉི་མ་དང་ནི་གཟའ་ཀུན་དང་། །དེ་བཞིན་བསྒྲིམས་ཏེ་མེ་དང་ནི། །དབང་དུ་བྱ་བའི་རྫས་རྣམས་དང་། །ཡང་ན་འཁོན་པར་འགྱུར་བ་དང་། །བསྐམ་པ་དང་ནི་གསད་པ་དང་། །དེ་བཞིན་དགར་དང་གནོད་པ་དག །མེ་དང་ལྷན་ཅིག་འདི་སྦྱར་ན། །དེ་དག་ཐམས་ཅད་བྱེད་པར་འགྱུར། །ཧ་ཞེས་བྱ་བ་དམ་པ་མཆོག །རླུང་ནི་ཐམས་ཅད་ཡང་དག་འབྱུང་། །རྒྱུ་དང་ལས་དང་འབྲས་བུ་དང་། །གང་གིས་ས་བོན་རྣམས་སྐྱེ་བ། །འདི་ནི་ཀླད་ཀོར་བཅས་སྦྱར་ན། །དེ་དག་ཐམས་ཅད་འཇིག་པར་བྱེད། །དེ་ཡི་གཟུགས་

ཀྱང་བཤད་པ་ནི། །ཁ་དོག་ནག་ལ་འོད་པོ་ཆེ། །མི་བཟད་འབར་བའི་ཕྲེང་བས་འཁྲིགས། །ཀུན་ཏུ་ཡང་ནི་རྣམ་པར་འཕྲོག །མཁས་པས་སྨིན་མའི་མཚམས་སུ་ནི། །དཀྱིལ་འཁོར་ལ་ནི་གནས་པར་བསམ། །དེ་ནི་མཐིང་ག་ཟླ་གམ་འདྲ། །ཏོག་དང་བཅས་པར་བ་དན་གཡོ། །ཡི་གེ་རབ་ཏུ་མི་འགྱུར་བ། །སྔགས་པས་དེར་གནས་བསམ་པར་བྱ། །དཀྱིལ་འཁོར་དེ་ཡི་དབུས་སུ་ནི། །གང་གིས་མཐོང་བ་ཁོ་ན་ལ། །སེམས་ཅན་རྣམས་ཀྱི་དོན་བྱེད་པའི། །དངོས་པོ་རྣམས་ནི་དེ་ཚེ་བསྒྲུབ། །མཁའ་ལ་འགྲོ་བ་ཉིད་དང་ནི། །ཡང་ན་རྫུ་འཕྲུལ་རྐང་པ་དང་། །ལྷ་ཡི་མིག་དང་རྣ་བ་དང་། །སྔགས་པས་དེ་བཞིན་འཐོབ་པ་དང་། །མི་སྣང་བ་ལ་སོགས་ཀུན་དང་། །དབྱེ་བ་དག་ཀྱང་གང་གསུངས་པ། །སྔགས་པ་མཉམ་པར་གཞག་པ་ཡིས། །དཀྱིལ་འཁོར་གནས་ན་དེ་ཀུན་བྱེད། །འདི་ནི་སྙིང་པོ་བྱང་ཆུབ་འདིར། །བྱང་ཆུབ་སེམས་དཔའ་གྲགས་ཆེན་རྣམས། །རྒྱུ་ཀུན་དམིགས་སུ་མེད་སྒོ་ནས། །བདུད་ལས་རྣམ་པར་རྒྱལ་བར་བྱེད། །རྒྱུ་མེད་པས་ན་འབྲས་བུའང་མེད། །ལས་ཀྱང་ཡོད་པ་མ་ཡིན་ཏེ། །དངོས་པོ་དེ་གསུམ་མེད་པས་ན། །སྟོང་པའི་ཡེ་ཤེས་ཐོབ་པར་འགྱུར། །རྫོགས་པའི་སངས་རྒྱས་མཐུ་ཆེན་གྱིས། །དེའི་གཟུགས་ཡང་དག་བཤད་པ་ནི། །ཀླད་ཀོར་བཅས་པར་ལྡན་པ་སྟེ། །ཁྃ་ནི་སྟོང་པའི་མཆོག་ཅེས་བྱ། །རལ་གྲི་ཕྱག་རྒྱར་ལྡན་པ་ཡིས། །བསྒྲུབ་པར་བྱ་བ་ངེས་པར་བསྒྲུབ། །རལ་གྲི་ཞགས་པ་འཁོར་ལོ་དང་། །ལྕགས་མདའ་དེ་བཞིན་ཐོ་བ་སྟེ། །རྫས་དེ་རྣམས་དང་ལྡན་ན་ནི། །གོ་འཕང་དམ་པ་སྒྲུབ་པར་བྱེད། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་ནམ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་བདག་ཉིད་ཨ་ཞེས་བྱ་བའི་རང་གི་ངོ་བོར་བསྒྱུར་ནས། ཕྱི་དང་ནང་དུ་བཅས་པའི་དངོས་པོ་ཐམས་ཅད་ལ་མི་ལྟ་བར་གྱུར་ཅིང་། བོང་བ་དང་རྡོ་བ་དང་གསེར་དུ་མཚུངས་ལ། འདོད་ཆགས་དང་ཞེ་སྡང་ལ་སོགས་པའི་ཉེས་པ་རྣམས་དང་། སྡིག་པའི་ལས་རྣམ་པར་སྤངས་པ། དེ་ཚེ་དེ་ནི་

དག་འགྱུར་བ། །ཐུབ་པ་རྫོགས་པའི་སངས་རྒྱས་བཞིན། །དེས་ནི་ལས་རྣམས་ཐམས་ཅད་ནུས། །ཉེས་པ་ཐམས་ཅད་རྣམ་པར་སྤངས། །དེ་ནས་གཞན་སྔགས་རྣལ་འབྱོར་ལ། །གཞོལ་ཞིང་ཆོ་ག་ཤེས་པ་ཡིས། །སེམས་ཅན་རྣམས་ལ་ཕན་འདོད་པས། །བ་ཞེས་བྱ་བའི་ལས་བྱའོ། །སྙིང་རྗེ་ལས་བྱུང་སེམས་ཀྱིས་ནི། །འཇིག་རྟེན་སྡུག་བསྔལ་ལ་དམིགས་ནས། །མགོན་པོ་དེ་ཡིས་བདག་ཉིད་ཀྱི། །ལུས་ནི་ཐམས་ཅད་ཉིད་དུ་ཡང་། །གངས་དང་བ་ཡི་འོ་མ་ལྟར། །དཀར་བའི་རྒྱུན་གྱིས་ཡོངས་སུ་དགང་། །དེ་ཚེ་ངེས་པ་བསྐྱེད་ནས་སུ། །ཡན་ལག་རྣམས་ནི་ཐམས་ཅད་ཀྱི། །བ་སྤུའི་བུ་ག་ཀུན་ནས་ཀྱང་། །ཤིན་ཏུ་དྲི་མེད་ཆུ་རྒྱུན་དབྱུང་། །ཆུ་ཡིས་ས་ནི་མ་ལུས་པ། །འདི་དག་ཡོངས་སུ་དགང་བར་བྱ། །གང་གིས་ཆུ་འདི་འཐུངས་པའམ། །ལག་པས་ཀྱང་ནི་རེག་ཀྱང་རུང་། །དེ་ཀུན་ངེས་པར་བྱང་ཆུབ་ཏུ། །འགྱུར་ཏེ་འདི་ལ་དོགས་པ་མེད། །ཡན་ལག་ཀུན་ཏུ་ར་ཞེས་པ། །འབར་བའི་ཕྲེང་བ་ཞི་བས་འཁྲིགས། །ཀུན་ཏུ་རྣམ་པར་འཕྲོ་བ་ནི། །ཤིན་ཏུ་མཉམ་པར་བཞག་པས་བསམ། །དེ་ཚེ་རྣལ་འབྱོར་པ་ཡིས་ཕྱིར། །འབར་བ་ཀུན་ཏུ་སྣང་བྱེད་པ། །བཏང་ན་ར་ཡིས་རྣམ་སྤྲུལ་པས། །སྔགས་པ་འདོད་པ་བཞིན་དུ་བྱེད། །ར་ཞེས་བྱ་བ་རོ་སྟོད་དུ། །བ་ཞེས་བྱ་བ་ལྟེ་བ་ཁུང་། །འབར་བ་དང་ནི་ཆུ་འབབ་པ། །དེ་ཚེ་ཅིག་ཆར་སྟོན་པར་འགྱུར། །དམྱལ་བ་གྲང་བའི་སྡུག་བསྔལ་རྣམས། །རས་ནི་ཤིན་ཏུ་ཞི་བར་བྱེད། །སྔགས་པ་སྔགས་ཀྱི་ཚུལ་གནས་པས། །བས་ཀྱང་ཚ་ལ་སོགས་པ་ཞི། །ཧ་ཞེས་བྱ་བ་བ་དན་བཅས། །ར་ཞེས་བྱ་བའི་འོག་ཏུ་གཞག །སྡིག་དང་ལྡན་པའི་མི་རྣམས་ཀྱང་། །དེ་ཡིས་ལས་རྣམས་མྱུར་དུ་བསྒྲུབ། །སྔགས་པ་དབང་ཆེན་ལ་འདུག་ནས། །ཆུ་ཡི་ལས་ནི་བརྩམ་པར་བྱ། །སེལ་བ་ལ་སོགས་ཐམས་ཅད་ཀྱང་། །བྱེད་འགྱུར་འདི་ལ་ཐེ་ཙོམ་མེད། ། རླུང་ནི་ཀུན་ཏུ་འགྲོ་བར་གསུངས། །ཐམས་ཅད་འཇིག་པར་བྱེད་པའང་དེ། །རྣམ་པ་སྣ་ཚོགས་ཐ་དད་པའི། །ལས་རྣམས་དབྱེ་བ་ལས་བྱུང་བ། །གཟུགས་ཀྱི་དཀྱིལ་འཁོར་དབུས་སུ་ནི། །ཆོ་ག་འདི་ཡིས་རབ་ཏུ་བྱ། །ཡིད་ཡོངས་སུ་སྦྱོང་ཞིང་བཟླས་བརྗོད་བྱས་ན་ཡིད་རྣམ་པར་དག་པར་འགྱུར་

རོ། །ལུས་ཡང་བར་གོམས་པར་བྱེད་ཅིང་འཆག་བཞིན་དུ་བཟླས་བརྗོད་བྱས་ན་རྫུ་འཕྲུལ་ཀྱི་རྐང་པ་འཐོབ་པར་འགྱུར་རོ། །ཙོག་པུར་འདུག་ལ་ཨ་ཞེས་བྱ་བ་རྣམ་པར་བཞག་སྟེ། ཟླ་བ་གཅིག་ཏུ་བཟླས་བརྗོད་བྱས་ན་ལྷའི་རྣ་བ་འཐོབ་པར་འགྱུར་རོ། །གསང་བ་པའི་བདག་པོ་དངོས་གྲུབ་ཀྱི་གོ་འཕང་དེ་ལྟ་བུ་ལ་སོགས་པ་དག་ནི་ཡིད་ལས་བྱུང་བ་ཡིན་ནོ། །གསང་བ་པའི་བདག་པོ་རྣམ་པར་བསམས་པ་ཙམ་ཁོ་ནས་དངོས་པོ་གཟུགས་ཅན་མ་ཡིན་པ་རྣམས་ཀྱི་འདུ་བྱེད་རྣམ་པ་ཐ་དད་པ་སྣ་ཚོགས་རྣམས་ལས་ཐམས་ཅད་ཀྱི་ས་བོན་གྱི་བྱ་བ་ཚིག་ཏུ་བརྗོད་པ་ཙམ་ལས་འབྱུང་བ་ལ་ལྟོས། གསང་བ་པའི་བདག་པོ་གཞན་ཡང་དེ་བཞིན་གཤེགས་པ་ཐམས་ཅད་དང་རྗེས་སུ་མཐུན་པ་སེམས་ཅན་ཐམས་ཅད་ཀྱི་བསམ་པ་དང་མཐུན་པ་སེམས་ཅན་ཡང་དག་པར་མགུ་བར་མཛད་པ་སྟེ། བྱང་ཆུབ་སེམས་དཔའ་ལས་ཐམས་ཅད་དང་གསང་སྔགས་སྤྱད་པ་སྤྱོད་པ་རྣམས་ཀྱི་མདུན་ན་གཟུགས་བརྙན་ལྟ་བུར་བཞུགས་སོ། །དེ་བཞིན་གཤེགས་པ་དེ་ནི་རྣམ་པར་མི་རྟོག་ཅིང་ཡིད་ཀྱི་ཡུལ་ལས་ཡང་དག་པར་འདས་པ། དུས་དང་ཡུལ་དང་བྱ་བ་དང་ལས་དང་ཆོས་དང་ཆོས་མ་ཡིན་པ་རྣམས་སྤངས་ཀྱང་། གསང་སྔགས་སྤྱོད་པ་ལས་བྱུང་བའི། །ཐམས་ཅད་མཁྱེན་པའི་གོ་འཕང་སྩོལ། །དེ་བས་ཀུན་མཁྱེན་དངོས་གྲུབ་དང་། །གོ་འཕང་མཆོག་ཀྱང་བསྒྲུབ་པར་བྱ། །དེ་ནས་དཔལ་ལྡན་རྡོ་རྗེ་འཛིན། །ངོ་མཚར་གྱུར་ནས་མིག་བགྲད་དེ། །དེ་ཚེ་རྡོ་རྗེ་འོད་ཟེར་ནི། །མེ་སྟག་འཕྲོ་བ་འདྲར་གསོར་ཞིང་། །སངས་རྒྱས་ཞིང་ནི་འདི་ཐམས་ཅད། །ཀུན་ཏུ་སྣང་བར་བྱས་ནས་སུ། །ཆོས་ཀུན་དབང་ཕྱུག་ཐུབ་པ་ལ། །ཚིག་སྙན་འདི་སྐད་ཅེས་གསོལ་ཏོ། །སྔགས་ཀྱི་འཇུག་པ་བཤད་ལགས་ན། །འཇུག་པ་དེ་ཡང་མ་རྟོགས་ན། །གསང་སྔགས་གང་ནས་འོང་བ་དང་། །གང་དུ་འགྲོ་བ་གཙོ་ཁྱོད་ཀྱིས། །དེ་ཀུན་བདག་ལ་བཤད་དུ་གསོལ། །གོ་འཕང་དམ་པ་ཁྱོད་ལས་མེད། །ཁྱོད་ནི་ཅི་ལྟར་ཆུ་རྣམས་ཀྱི། །རྒྱ་མཚོ་བཞིན་དུ་ཆོས་ཀུན་གནས། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། སེམས་དཔའ་ཆེན་པོ་དཀྱིལ་འཁོར་གྱི། །གནས་ནི་ཡིད་

ཅེས་བཤད་པ་ཡིན། །སྙིང་ནི་གསང་སྔགས་གནས་ཡིན་པར། །ཤེས་ན་འབྲས་བུ་ཐོབ་པར་འགྱུར། །དཀར་པོ་སེར་པོ་དམར་པོ་གང་། །ཡིད་ཀྱིས་སེམས་པར་བྱེད་པ་སྟེ། །དེ་ལ་ཡོངས་སུ་གཅོད་པ་གང་། །དེ་ནི་སེམས་ཀྱི་བྱེད་པ་ཡིན། །སེམས་ནི་མགུ་ནས་ངེས་གྱུར་པ། །དེ་ནི་སྙིང་ཞེས་བཤད་པ་ཡིན། །དེར་གནས་པ་ཡི་གསང་སྔགས་རྣམས། །འབྲས་བུ་རྒྱ་ཆེར་སྟེར་བར་འགྱུར། །དེ་རུ་པདྨ་བསམ་པ་ནི། །འདབ་མ་བརྒྱད་པ་ཟེ་བར་བཅས། །ཨ་ཞེས་བྱ་བ་འབར་ཕྲེང་འཁྲིགས། །བཟང་པོ་དེ་རུ་གནས་པ་ནི། །ཞི་བ་ཀུན་ཏུ་རྣམ་པར་གཡོ། །གཙོ་བོ་སྣ་ཚོགས་གཟུགས་མངའ་བ། །གློག་སྟོང་དག་ནི་འཁྱུག་པ་བཞིན། །སྣང་བ་ཀུན་ཏུ་སྟོན་པ་ནི། །མེ་ལོང་ཕུག་ན་གནས་པ་བཞིན། །ཆུ་ཡི་ཟླ་བའི་རྣམ་པ་བཞིན། །ཐམས་ཅད་ན་ཡང་མདུན་ན་གནས། །སྔགས་པ་གསང་སྔགས་གནས་འདུག་པས། །ཡིད་ནི་དེ་ལྟར་ཤེས་ནས་སུ། །དེ་ནས་སྔགས་པས་སྟོང་དུ་ཡང་། །ཀླད་པའི་རྒྱས་ཀྱི་དབུས་སུ་ནི། །ཀླད་ཀོར་བཅས་པའི་མཚན་མ་ཅན། །ཨ་ཞེས་བྱ་བ་དེར་བསམས་ཏེ། །ཤེལ་དང་ཟླ་བ་གངས་འདྲ་བ། །དྲི་མེད་དག་པ་མཐོང་བ་ནི། །ཞི་བ་ཆོས་ཀྱི་རང་བཞིན་སྐུ། །ཐམས་ཅད་ཀྱི་ནི་གཞི་ཞེས་བྱ། །དེ་ལས་གསང་སྔགས་དངོས་གྲུབ་ནི། །སྣ་ཚོགས་གཟུགས་ཅན་ཐོབ་པར་འགྱུར། །དེ་བཞིན་གཤེགས་པའི་གནས་མཐོང་ན། །མཐོ་རིས་དང་ནི་བྱང་གྲོལ་འཐོབ། །ར་ཞེས་བྱ་བ་མར་མེ་བཞིན། །འབར་བ་མིག་ཏུ་བཞག་ནས་སུ། །མགྲིན་པ་ཅུང་ཟད་དགུ་པོར་བྱས། །ལྕེ་ཡང་དཀན་ལ་སྦྱར་ནས་ནི། །སྙིང་གའི་དབུས་སུ་རྣམ་བལྟ་ཞིང་། །མཉམ་པར་བཞག་སྟེ་ཡིད་ལ་བལྟ། །དྲི་མེད་ཤིན་ཏུ་རྣམ་དག་པ། །རྟག་ཏུ་མེ་ལོང་བཞིན་དུ་གནས། །དེ་ཉིད་ཡིད་ཀྱི་ཡང་དག་པར། །སྔོན་གྱི་རྒྱལ་བ་རྣམས་ཀྱིས་གསུངས། །ཡིད་ཀྱིས་སྣང་བྱས་ལམ་ལ་ནི། །རྣམ་པར་ཤེས་པ་སྣང་བར་འགྱུར། །དེ་ནས་སྔགས་པས་རྫོགས་སངས་རྒྱས། །རྐང་གཉིས་གཙོ་བོ་མཐོང་བར་འགྱུར། །དེ་མཐོང་སྔགས་པས་དངོས་གྲུབ་ནི། །རབ་ཏུ་རྟག་པར་ཐོབ་པར་འགྱུར། །དེ་ནས་གོང་དུ་བསྒྱུར་ནས་སུ། །ཡི་གེ་ཡོངས་སུ་བསམ་པ་ནི། །ལ་ཞེས་བྱ་བ་ཀླད་ཀོར་

བཅས། །མིག་གི་གནས་སུ་བསམ་པར་བྱ། །འདི་ཀུན་སྟོང་པར་མཐོང་ན་ནི། །གོ་འཕང་མི་ཉམས་ཐོབ་པར་འགྱུར། །ཡེ་ཤེས་རླབས་པོ་ཆེ་འམ་ནི། །ཡང་ན་མངོན་ཤེས་ལྔ་པོ་དང་། །རིག་སྔགས་འཆང་འགྱུར་དངོས་གྲུབ་དང་། །ཚེ་རིང་གཞོན་ནུར་འགྱུར་བ་གང་། །གལ་ཏེ་ཐོབ་པར་འདོད་ན་ནི། །ཅི་སྲིད་འདི་ནི་མ་བསྙེན་པར། །དེ་སྲིད་ཐོབ་པར་མི་འགྱུར་རོ། །གསང་སྔགས་ཡེ་ཤེས་ལས་བྱུང་བ། །འདི་ནི་དེ་ཉིད་ཡེ་ཤེས་མཆོག །བྱང་ཆུབ་སེམས་དཔའ་སྐྱོབ་པ་དང་། །སངས་རྒྱས་ཀུན་གྱི་ནོར་གྱི་དབྱིག །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་དེས་པ་དག་དང་ནི་། །སངས་རྒྱས་ཡེ་ཤེས་མཆོག་གྱུར་པ། །ཡེ་ཤེས་དཔེ་མེད་ཐོབ་ནས་སུ། །དེ་ཡིས་ས་སྟེང་ཐམས་ཅད་ན། །གནས་ཤིང་དེ་ལ་གཏམ་ཡང་ཟེར། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དངོས་གྲུབ་བསྒྲུབ་པའི་དེ་ཁོ་ན་ཉིད་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའི་གཟུགས་གང་གིས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལྷའི་གཟུགས་ལ་དམིགས་ནས་བདག་ཉིད་རང་གི་ལྷའི་གཟུགས་སུ་བསྒྱུར་བས་ཐེ་ཙོམ་མ་མཆིས་པར་དངོས་གྲུབ་ཐོབ་པར་འགྱུར་བའི་ལྷའི་གཟུགས་བྱིན་གྱིས་རློབ་པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་གང་ཁྱོད་ང་ལ་དོན་འདི་ཡོངས་སུ་འདྲི་བ་ནི་ལེགས་སོ་ལེགས་སོ། །དེའི་ཕྱིར་ལེགས་པར་རབ་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས། གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེ་ལ་ལྷའི་གཟུགས་ནི་རྣམ་པ་གསུམ་སྟེ། ཡི་གེ་དང་ཕྱག་རྒྱ་དང་གཟུགས་སོ། །

དེ་ལ་ཡི་གེ་ལ་ཡང་རྣམ་པ་གཉིས་ཏེ། སྒྲ་དང་བྱང་ཆུབ་ཀྱི་སེམས་སོ། །ཕྱག་རྒྱའི་གཟུགས་ལ་ཡང་རྣམ་པ་གཉིས་ཏེ། གཟུགས་དང་བཅས་པ་དང་གཟུགས་དང་བཅས་པ་མ་ཡིན་པའོ། །གསང་བ་པའི་བདག་པོ་ལྷའི་གཟུགས་ཀྱང་རྣམ་པ་གཉིས་ཏེ། ཡོངས་སུ་དག་པ་དང་ཡོངས་སུ་མ་དག་པའོ། །དེ་ལ་ཡོངས་སུ་དག་པ་ནི་མི་རྟོག་པའི་ངོ་བོ་སྟེ།མཚན་མ་ཐམས་ཅད་དང་བྲལ་བའོ། །ཡོངས་སུ་མ་དག་པ་ནི་མཚན་མ་དང་བཅས་པའི་གཟུགས་ཏེ། ཁ་དོག་དང་དབྱིབས་སོ། །དེ་ལ་ལྷའི་གཟུགས་རྣམ་པ་གཉིས་ཀྱིས་དགོས་པ་རྣམ་པ་གཉིས་འགྲུབ་པར་འགྱུར་ཏེ། མཚན་མ་དང་བཅས་པས་ནི་མཚན་མ་དང་བཅས་པའོ། །མཚན་མ་མེད་པས་ནི་མཚན་མ་དང་བཅས་པའི་དངོས་གྲུབ་ཀྱང་འགྲུབ་པར་འགྱུར་རོ། །མཚན་མར་བཅས་པས་མཚན་བཅས་ཀྱི། །དངོས་གྲུབ་རྒྱལ་བ་དམ་པ་བཞེད། །མཚན་མ་མེད་ལ་གནས་པས་ནི། །མཚན་མ་ཅན་ཡང་བསྒྲུབ་ཏུ་རུང་། །དེ་བས་རྣམ་པ་ཐམས་ཅད་དུ། །མཚན་མ་མེད་པ་བསྟེན་པར་བྱ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ལྷའི་ཏིང་ངེ་འཛིན་གཏན་ལ་དབབ་པ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ། མཚན་མ་མེད་པའི་ཏིང་ངེ་འཛིན་བསྒྲུབ་པར་འདོད་པས་འདི་ལྟར་བསམ་པར་བྱའོ། །མཚན་མ་རྣམས་གང་ནས་བྱུང་། ཅི་བདག་གི་ལུས་སམ། བདག་གི་སེམས་སམ་བདག་གི་ཡིད་ལས་བྱུང་། དེ་ལ་ལུས་ནི་ལས་ལས་སྐྱེས་པ་སྟེ། རྩྭ་དང་ཤིང་དང་བོང་བ་ལྟ་བུ་ངོ་བོ་ཉིད་ཀྱིས་བྱ་བ་མེད་པ། བླུན་པའམ་ཕྱི་རོལ་གྱི་རྣམ་པ་ལྟ་བུ་ལ་བཟོས་བྱས་པའི་གཟུགས་ལྟ་བུར་བརྟག་པར་བྱའོ། །ཅི་ལྟར་བཟོས་བྱས་པའི་གཟུགས་དེ་ལ་མི་ཞིག་གིས་ཁྲོས་ཏེ། མེའམ། དུག་གམ། མཚོན་ཏམ། ཆུའམ། རྡོ་རྗེས་བཤིག་གམ། བསྲེགས་སམ། བཅད་ཀྱང་མི་དགའ་བ་ཅུང་ཟད་ཀྱང་མེད་ལ། བཟའ་བའམ།

བཏུང་བའམ། བཀྲུ་བའམ། བྱུག་པའམ། སྤོས་སམ། ཕྲེང་བའམ། གོས་སམ། ཙནྡན་ནམ། ག་བུར་ལ་སོགས་པ་ལྷ་དང་མིའི་ཡོ་བྱད་རྣམ་པ་སྣ་ཚོགས་ཀྱིས་མཆོད་ཀྱང་མི་དེ་ལ་དགའ་བར་འགྱུར་བ་མེད་དོ། །དེ་ཅིའི་ཕྱིར་ཞེ་ན། གང་ངོ་བོ་ཉིད་ཀྱིས་སྟོང་པའི་གཟུགས་དེ་ལ་རང་གི་ང་རྒྱལ་ཀུན་ནས་བླང་བའི་ཕྱིན་ཅི་ལོག་གིས་ཡང་དག་པ་མ་ཡིན་པའི་རྟོག་པ་ལས་བྱུང་བའི་མཆོད་པའམ། གནོད་པར་བྱེད་པའི་མི་གང་ཡིན་པ་དེ་ནི་བྱིས་པའི་རང་བཞིན་ཅན་ཡིན་ནོ། །གསང་བ་པའི་བདག་པོ་དེ་ལྟར་ལུས་ལ་ལུས་ཀྱི་རྗེས་སུ་སོང་བའི་དྲན་པ་ངོ་བོ་ཉིད་ཀྱིས་སྟོང་པ་བསྒོམ་པར་བྱའོ། །གསང་བ་པའི་བདག་པོ་གཞན་ཡང་སེམས་ནི་ངོ་བོ་ཉིད་མེད་པ། མཚན་མ་ཐམས་ཅད་དང་བྲལ་བ། ངོ་བོ་ཉིད་ཀྱིས་སྟོང་པར་བསམ་པར་བྱའོ། །གསང་བ་པའི་བདག་པོ་སེམས་ལ་ནི་དུས་གསུམ་མེད་དོ། །དུས་གསུམ་དང་བྲལ་བ་གང་ཡིན་པ་དེ་ནི་ངོ་བོ་ཉིད་ཀྱིས་མཚན་མ་དང་བྲལ་བའོ་སྙམ་དུ་བསམ་པར་བྱའོ། །གསང་བ་པའི་བདག་པོ་གཞན་ཡང་བྱིས་པ་སོ་སོའི་སྐྱེ་བོ་རྣམས་ཡིད་མཚན་མ་དང་བཅས་པར་རྟོག་སྟེ། འདི་ནི་ཡང་དག་པ་མ་ཡིན་པའི་ཀུན་ཏུ་རྟོག་པའི་ཚིག་བླ་དགས་སོ། །ཡང་དག་པ་མ་ཡིན་པ་གང་ཡིན་པ་དེ་ནི་མ་སྐྱེས་པའོ་ཞེས་བྱ་བར་ནི་རབ་ཏུ་མི་ཤེས་སོ། །གསང་བ་པའི་བདག་པོ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་དེ་ལྟར་བསམས་ན་མཚན་མ་མེད་པའི་ཏིང་ངེ་འཛིན་ཐོབ་པར་འགྱུར་རོ། །གསང་བ་པའི་བདག་པོ་ནམ་མཚན་མ་མེད་པའི་ཏིང་ངེ་འཛིན་ལ་གནས་པར་གྱུར་པ་དེའི་ཚེ། དེ་ལ་དེ་བཞིན་གཤེགས་པས་གསུངས་པའི་གསང་སྔགས་རྣམས་མངོན་དུ་ཕྱོགས་ཤིང་གཞོལ་བར་འགྱུར་རོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། མཚན་མ་མེད་པའི་ཏིང་ངེ་འཛིན་རིམ་པར་ཕྱེ་བའོ།། །།གསང་བ་པའི་བདག་པོ་གཞན་ཡང་བཟླས་བརྗོད་གསང་བ་བཤད་པར་བྱའོ། །གཅིག་པུས་གཅིག་གམ་གཅིག་གིས་གཅིག །ཡིད་ཀྱིས་བཟླས་བརྗོད་བྱ་བའམ། ཡང་ན་ཤུབ་བུ་རྣམ་གཉིས་པ། །རྣལ་

འབྱོར་མཆོག་གིས་བརྟག་པར་བྱ། །སྔགས་པ་ཡན་ལག་ཉམས་སྦྱར་བར། །བཟླས་བརྗོད་གཞན་དུ་མི་བྱའོ། །ཕྱི་དང་ནང་གི་སྦྱོར་བ་ཡིས། །ཡན་ལག་བཞི་པ་ངས་བཤད་པ། །དེ་ཡང་འཇིག་རྟེན་པ་ཡི་སྟེ། །དམིགས་པ་ཅན་ནི་བླ་མེད་པའོ། །སླར་སྡུད་པ་ཡི་ཚིག་གིས་ནོན། །ལྷ་ཡི་རྗེས་སུ་སོང་བའི་ཡིད། །བཤུབས་ཏེ་བཟླས་བརྗོད་བྱེད་པའི་མཆོག །དམིགས་པ་ཅན་ལ་བསྟན་པ་ཡིན། །ཡིད་ཀྱི་འཇིག་རྟེན་འདས་ཤེས་བྱ། །སླར་སྡུད་ལ་སོགས་རྣམ་པར་སྤངས། །ལྷ་དང་གཅིག་ཏུ་བྱེད་པ་དང་། །ཐ་དད་མ་ཡིན་འཛིན་པ་ཡི། །ཡིད་ཀྱིས་རང་བཞིན་དབྱེར་མེད་བྱ། །གཞན་དུ་བྱ་བ་མ་ཡིན་ནོ། །གསང་སྔགས་གྲངས་ནི་སུམ་འབུམ་དུ། །ཕལ་ཆེར་ངས་ནི་བཤད་པ་དག །ལུས་ཅན་སྡིག་དང་བྲལ་བ་ཡི། །སྔགས་པ་རྣམ་པར་དག་པ་ལ། །བཟླས་བརྗོད་གྲངས་ནི་བསྟན་པ་སྟེ། །གཞན་དུ་བྱ་བ་མ་ཡིན་ནོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། འཇིག་རྟེན་པ་དང་འཇིག་རྟེན་ལས་འདས་པའི་བཟླས་བརྗོད་ཀྱི་དེ་ཁོ་ན་ཉིད་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས། བྱམས་པ་དང་སྙིང་རྗེ་ཆེན་པོའི་སྤྱན་གཉིས་ཀྱིས་ཀྱང་སེམས་ཅན་གྱི་ཁམས་ཐམས་ཅད་ལ་གཟིགས་ཏེ། བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་ཡན་ལག་ཐམས་ཅད་ནས་དུས་གསུམ་དུ་མ་ཆགས་པའི་སྟོབས་ཅན་ཞེས་བྱ་བའི་རིག་སྔགས་ཀྱི་རྒྱལ་མོ་འབྱུང་ངོ་། །ཏདྱ་ཐཱ། ག་ག་ན་ས་མེ། ཨ་པྲ་ཏི་ས་མེ། སརྦ་ཏ་ཐཱ་ག་ཏ་ས་མ་ཏཱ་ནུ་ག་ག་ཏེ། ག་ག་ན་བ་ར་ལཀྵ་ཎེ་སྭཱ་ཧཱ། རིགས་ཀྱི་བུ་རིག་སྔགས་ཀྱི་རྒྱལ་མོ་འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པའི་སྤྱོད་ཡུལ་ཅན་ཏེ། འདི་ཡིས་བྱིན་བརླབས་སངས་རྒྱས་དང་། །བྱང་ཆུབ་སེམས་དཔའ་གྲགས་ཆེན་རྣམས། །གང་དུ་སྡུག་བསྔལ་འགག་འགྱུར་བའི། །ཆོས་ཉིད་ཆགས་མེད་ཐོབ་པར་འགྱུར། །དེ་ནས་བཅོམ་ལྡན་

འདས་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་རྗེས་སུ་དགོངས་ནས། བདག་ཉིད་དང་ཕྱག་ན་རྡོ་རྗེ་གཉི་ག་གཟོད་མ་ནས་མ་སྐྱེས་པ་ཉིད་དུ་བྱིན་གྱིས་བརླབས་ཏེ། ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་རྣམས་ལ་བཀའ་སྩལ་པ། རིགས་ཀྱི་བུ་དག་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་སངས་རྒྱས་ཀྱི་མཛད་པས་སོ་སོར་ཉེ་བར་གནས་པའི་ཡི་གེ་འཁོར་ལོ་བསྐོར་བ་ཞེས་བྱ་བའི་དཀྱིལ་འཁོར་སྤྱད་པ་རིམ་པར་ཕྱེ་བ་རྒྱས་པར་ཉོན་ཅིག །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ལ་ཕྱག་ན་རྡོ་རྗེས་ཕྱག་འཚལ་ཏེ། རྡོ་རྗེའི་པདྨའི་སྟན་དེ་ལས་རྡོ་རྗེ་དབབ་པའི་ཚུལ་དུ་བབས་ནས་བཅོམ་ལྡན་འདས་ལ་མངོན་པར་བསྟོད་པ། ཕྱག་འཚལ་བྱང་ཆུབ་སེམས་ཁྱོད་ལ། །ཕྱག་འཚལ་བྱང་ཆུབ་འབྱུང་ཁྱོད་ལ། །སྤྱོད་གཟུགས་ཁྱོད་དང་ས་དང་ནི། །ཕ་རོལ་ཕྱིན་ལ་ཕྱག་འཚལ་ལོ། །ཕྱག་འཚལ་ཐོག་མར་བྱེད་ཁྱོད་ལ། །སྟོང་པ་ཉིད་ལ་འདུད་ཕྱག་འཚལ། །བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་དེ་སྐད་དུ་མངོན་པར་བསྟོད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྗེ་བདག་ཅག་ལ་ཐུགས་བརྩེ་བའི་སླད་དུ། གང་དག་དང་ལྡན་ན་བདག་ཅག་རྣམས་སེམས་ཅན་གྱི་དོན་བགྱིད་པར་འགྱུར་བ་དང་། གསང་སྔགས་སྤྱད་པ་ཅི་སྐད་གསུངས་པ་བཞིན་ཡོངས་སུ་རྫོགས་པར་འགྱུར་བ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ང་ནི་འཇིག་རྟེན་དང་པོ་ཡི། །འཇིག་རྟེན་མགོན་ཞེས་བསྒྲགས་པ་ཡིན། །བླ་མེད་གཟོད་ནས་ཞི་བ་ནི། །མཉམ་པ་མེད་པའི་ཆོས་བཤད་དོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་གསུངས་ནས། བྱིན་གྱི་རླབས་གང་གིས་བྱིན་དུ་བརླབས་ན་བྱང་ཆུབ་སེམས་དཔའ་དེ་རྣམས་དང་། རྡོ་རྗེ་འཛིན་དེ་རྣམས་ཀྱིས་བཅོམ་ལྡན་འདས་བྱང་ཆུབ་ཀྱི་སྙིང་པོ་མཆོག་དམ་པ་ལ་བཞུགས་པ་ནམ་མཁའ་བཞིན་དུ་སྤྲོས་པ་མེད་པ། སྤྱོད་པ་ལ་གཉིས་སུ་མེད་པའི་རྣལ་འབྱོར་གྱི་

མཚན་ཉིད་ལས་ཀྱི་རྣམ་པར་སྨིན་པ་བཞིན་དུ་མཐོང་བར་འགྱུར་བ་དེ་ལྟ་བུའི་བྱིན་གྱིས་བརླབ་པ་མཛད་དོ། །དེའི་ཚེ་བཅོམ་ལྡན་འདས་ཀྱི་ཡན་ལག་དང་། དེ་བཞིན་གཤེགས་པའི་སྐུ་ཐམས་ཅད་ནས་འཇིག་རྟེན་པ་དང་འཇིག་རྟེན་ལས་འདས་པ་རྣམས་དང་། ཉན་ཐོས་དང་རང་སངས་རྒྱས་དང་། བསམ་པ་དང་བསམ་གཏན་དུ་བྱ་བ་དང་། དངོས་གྲུབ་བསྒྲུབ་པར་མངོན་པར་བརྩོན་པ་ཐམས་ཅད་ཀྱི་སྲོག་དང་འདྲ་བ། ཡི་གེ་ཐམས་ཅད་ཀྱི་འཚོ་བར་གྱུར་པ། སྲོག་ཏུ་གྱུར་པ། སྐྱབས་སུ་གྱུར་པ། དཔུང་གཉེན་དུ་གྱུར་པ་འདི་བྱུང་ངོ་། །ན་མཿས་མནྟ་བུད་དྷཱ་ནཱཾ། ཨ། རིགས་ཀྱི་བུ་དག་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་སངས་རྒྱས་ཀྱི་མཛད་པ་སོ་སོར་ཉེ་བར་གནས་པ་ཡིན་ཏེ། ཆོས་ཐམས་ཅད་ནི་ཨ་ཞེས་བྱ་བའི་སྒོ་ནས་འཇུག་གོ། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་དེ་བཞིན་གཤེགས་པ་རྣམས་མཐོང་བར་འདོད་པ་དང་། མཆོད་པར་འདོད་ལ་བྱང་ཆུབ་ཀྱི་སེམས་མངོན་སུམ་བྱ་བར་འདོད་པ། བྱང་ཆུབ་སེམས་དཔའ་རྣམས་དང་འགྲོགས་པར་འདོད་པ། སེམས་ཅན་རྣམས་ཀྱི་དོན་བྱ་བར་འདོད་པ། དངོས་གྲུབ་མངོན་པར་འདོད་པ། རྣམ་པ་ཐམས་ཅད་དུ་རྣམ་པ་ཐམས་ཅད་མཁྱེན་པ་ཉིད་ཐོབ་པར་འདོད་པས་དེ་བཞིན་གཤེགས་པ་རྣམས་ཀྱི་སྙིང་པོ་འདི་ལ་བརྩོན་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་གྱི་རྒྱལ་པོ་འདིའི་ཆོ་ག་དགོད་པ་དང་། ལྷའི་གནས་གཏན་ལ་དབབ་པ་དང་། ཏིང་ངེ་འཛིན་རྣམ་པར་སྤྲུལ་པ་དང་། གསང་སྔགས་སྤྱད་པ་དང་། བསམ་པར་བྱ་བ་གསུངས་པ་དེ་ལ་སློབ་དཔོན་གྱིས་ཐམས་ཅད་མཁྱེན་པ་ཉིད་ཀྱི་སྒོ་ཨ་ཞེས་བྱ་བ་ལ་གནས་ཏེ་སྲད་བུ་བླངས་ལ། སངས་རྒྱས་ཐམས་ཅད་ལ་ཕྱག་བྱས་ནས་སྲད་བུ་ཤར་ཕྱོགས་ལོགས་སུ་བྲེས་ཏེ་གཡས་སུ་བསྐོར་ལ། བྱང་ཕྱོགས་སུ་ཁ་བལྟས་ནས་སྲད་བུ་བྲེས་ཏེ། ནུབ་ཕྱོགས་སུ་ཁ་

བལྟས་ལ་བསྒྱུར་ཏེ་ཐིག་གདབ་བོ། །དེ་ནས་བདག་ཉིད་རྡོ་རྗེ་སེམས་དཔའ་ལག་ན་རྡོ་རྗེར་དེའི་ཕྱག་རྒྱའམ། ཡི་གེ་བ་ཞེས་བྱ་བས་བྱིན་གྱིས་བརླབས་ཏེ། ནང་དུ་ཞུགས་ལ་སྙིང་པོའི་དཀྱིལ་འཁོར་བྲི་བར་བྱའོ། །དེ་བཞིན་དུ་དཀྱིལ་འཁོར་གཉིས་པ་ལ་ཡང་འདི་ལྟར་བདག་ཉིད་གཟོད་མ་ནས་ཞི་བ། གཉིས་སུ་མེད་པའི་རྣལ་འབྱོར་གྱི་གཟུགས། དེ་བཞིན་གཤེགས་པའི་གཟུགས་སྙིང་པོ་ཉིད་ཀྱི་རང་གི་ངོ་བོར་བྱིན་གྱིས་བརླབས་ལ། དེ་ནས་དེ་བཞིན་གཤེགས་པའི་གནས་པ་མངོན་དུ་བྱེད་ཅིང་སྲད་བུ་བྲེས་ལ། ཕྱི་རོལ་གྱི་དཀྱིལ་འཁོར་དེ་ལས་སུམ་གཉིས་ལྷའི་གནས་སུ་བཞག་སྟེ། སུམ་ཆ་འཁོར་སར་བྱའོ། །དཀྱིལ་འཁོར་ལྷག་མ་གཉིས་ཀྱང་དེ་བཞིན་དུ་རྣམ་པར་ཕྱེ་ལ་ལྷའི་གནས་བཤམ་པར་བྱའོ། །དེ་ནས་ཡང་བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་དེའི་ཕྱག་རྒྱས་བྱིན་གྱིས་བརླབས་ལ། ཆོས་ཀྱི་དབྱིངས་རྒྱ་ཆེན་པོར་བྱིན་གྱིས་བརླབས་ཏེ། ཐོག་མར་ཚོན་རྩི་དཀར་པོ་བླངས་ལ་འདི་ལྟར་བྱིན་གྱིས་བརླབ་པར་བྱའོ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རྣམ་སྦྱོང་བ། །འདི་ནི་བདག་ཉིད་དེ་བཞིན་གཤེགས། །ཉེས་པ་ཐམས་ཅད་རྣམ་པར་སྤངས། །དེ་ལྟར་བློ་ཅན་གྱིས་བསམས་ན། །དེར་ནི་ར་ཞེས་བྱ་བ་ཡང་། །ཞི་བ་འབར་བའི་ཕྲེང་ཅན་མདོག །དུང་ཟླ་ཀུནྡ་འདྲ་བ་བསམ། །དེ་ནས་ཚོན་རྩི་གཉིས་པ་ནི། །དམར་པོ་བླངས་ནས་ནན་ཏན་དུ། །ཡི་གེ་ཨ་ཞེས་བྱ་བ་ནི། །འབར་བ་ཀླད་ཀོར་བཅས་པར་བསམ། །རྒྱལ་བ་ཐུབ་དཀའ་དམ་པ་སྟེ། །ཉི་མ་དང་པོར་འཆར་བ་བཞིན། ། དེ་ནས་སྔགས་པས་ཚོན་གསུམ་པ། །ཁ་དོག་སེར་པོ་བླང་བར་བྱ། །མཁས་པས་དེ་ནས་ག་ཞེས་པ། །དེ་ཚེ་ཆོ་ག་བཞིན་དུ་བསམ། །དེ་བཞིན་གསེར་འོད་ཐུབ་པ་ནི། །གསེར་གྱི་ཁ་དོག་འབར་དང་བཅས། །ཏིང་འཛིན་གནས་ཤིང་སྡིག་བཅོམ་པ། །ཀུན་ཏུ་རྣམ་པར་སྣང་བ་ཡིན། །དེ་ནས་མར་གད་འདྲ་བ་ཡི། །ཚོན་རྩི་འཁོར་བ་ལས་སྒྲོལ་བ། །བ་ཞེས་བྱ་བ་དེ་རུ་གཞག །བྱང་ཆུབ་སྙིང་པོའི་ཐུབ་ཆེན་ཏེ། །དཔའ་བོ་ཁ་དོག་ལྗང་འདྲ་བ། །ཀུན་ཏུ་འཇིགས་པ་མེད་པར་བྱེད། །དེ་ནས་ཚོན་རྩི་ནག་པོ་དེ། །མཁས་པ་ཡིས་ནི་བླངས་ནས་

སུ། །དེར་ནི་ཧ་ཞེས་བྱ་བ་བསམ། །འབར་བའི་ཕྲེང་བ་རྣམ་པར་འཕྲོ། །དུས་མཐའི་མེ་ལྟར་མི་བཟད་པ། །ལག་ན་རྡོ་རྗེ་རྩེ་བྲན་རྒྱན། །བདུད་སྡེ་སྡང་བ་ཐམས་ཅད་ལ། །རྣམ་པ་ཀུན་ཏུ་སྡིགས་པར་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་དེའི་ཚེ་ཏིང་ངེ་འཛིན་དེ་ལས་བཞེངས་ནས་མཐའ་ཡས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་རྣམ་པར་སྣང་མཛད་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་ཐམས་ཅད་དུ་ཐོགས་པ་མེད་པའི་སྟོབས་ཞེས་བྱ་བའི་རིག་སྔགས་ཀྱི་རྒྱལ་མོ་དེ་བཞིན་གཤེགས་པ་ཐམས་ཅད་ཀྱི་ཡུལ་ལས་བྱུང་བ་འདི་ཕྱུང་ངོ་། །ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦ་མུ་ཁེ་བྷྱཿ། ཨ་ས་མེ་བ་ར་མེ། ཨ་ཙ་ལེ། ག་ག་ནེ། སྨ་ར་ཎེ། སརྦ་ཏྲཱ་ནུ་ག་ཏེ་སྭཱ་ཧཱ། དེ་ནས་ཚོན་གྱི་ཆོ་ག་བྱིན་གྱིས་བརླབས་ནས། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླགས་སམ། ཕྱག་བྱས་ཏེ། རིག་སྔགས་ཀྱི་རྒྱལ་མོ་འདི་ལན་བརྒྱད་དུ་བཟླས་བརྗོད་བྱའོ། །དེ་ནས་ལངས་ཏེ་དཀྱིལ་འཁོར་བསྐོར་ལ་ནང་དུ་ཞུགས་ནས། བྱམས་པ་ཆེན་པོ་དང་སྙིང་རྗེ་ཆེན་པོའི་སྟོབས་ཀྱིས་སྒྲུབ་པ་པོ་ལ་དམིགས་ཏེ། བདག་ཉིད་བ་ཞེས་བྱ་བས་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབས་ལ། རྡོ་རྗེ་དམ་པ་སྦྱིན་པ་དང་ལྷན་ཅིག་ཏུ་སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་བྲི་བར་བྱའོ། །དེ་ལ་ནང་གི་དཀྱིལ་འཁོར་གཏན་ལ་དབབ་པ་ནི་འདི་ཡིན་ཏེ། དབུས་སུ་བཅོམ་ལྡན་འདས་རྣམ་པར་སྣང་མཛད་ཆེན་པོ་པདྨ་དཀར་པོ་ལ་བཞུགས་པ། དབུ་ཐོར་ཚུགས་དང་དབུ་རྒྱན་ཅན། དར་རམ་རས་ཀྱི་སྨད་གཡོགས་དང་། དར་ལའི་སྟོད་གཡོགས་མནབས་པ། གསེར་གྱི་ཁ་དོག་ལྟ་བུ་འབར་བའི་ཕྲེང་བས་འཁྲིགས་པ། ཕྱག་རྒྱའམ་གཟུགས་སམ་ཡི་གེའི་འབྲུར་བྲིའོ། །ཨ། ཤར་ཕྱོགས་སུ་སངས་རྒྱས་ཐམས་ཅད་ཀྱི་ཆོས་སྐུའི་ངོ་བོ་ཨ་ཞེས་བྱ་བ་ཀླད་ཀོར་དང་བཅས་པའོ། །ཨྃ། དབང་ལྡན་ཕྱོགས་སུ་སངས་རྒྱས་ཐམས་ཅད་ཀྱི་ཡུམ་བཅོམ་ལྡན་འདས་མ་ནམ་མཁའི་སྤྱན་བྲིའོ། །ཡང་ན་ཡི་གེ་ག་ཞེས་བྱ་བ་བྲིའོ། །ག །མེའི་ཕྱོགས་སུ་བྱང་ཆུབ་སེམས་དཔའ་ཐམས་ཅད་ཀྱི་ཕྱག་རྒྱ་ཡིད་བཞིན་གྱི་ནོར་བུའམ་ཡི་གེ་ཀ་ཞེས་བྱ་བ་བྲིའོ།།

ཀ །བྱང་ཕྱོགས་སུ་ལག་ན་པདྨ་འཁོར་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་དག་དང་ལྷན་ཅིག་ཏུ་པདྨའི་ཕྱག་རྒྱའམ། ཡི་གེ་ས་ཞེས་བྱ་བ་བྲིའོ། །ས། ལྷོ་ཕྱོགས་སུ་ཆ་གསུམ་བོར་ཏེ། གསང་བ་པའི་བདག་པོ་ལག་ན་རྡོ་རྗེ་འཁོར་དང་བཅས་པ་རྡོ་རྗེའི་ཕྱག་རྒྱའམ་ཡི་གེ་བ་ཞེས་བྱ་བ་བྲིའོ། །བ། དེའི་ཆ་གསུམ་བོར་ལ་རྡོ་རྗེ་འཆང་ཐམས་ཅད་ཀྱི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི། ཧཱུྃ། དེ་ནས་བདེན་བྲལ་གྱི་ཕྱོགས་སུ་བཅོམ་ལྡན་འདས་རྣམ་པར་སྣང་མཛད་ཀྱི་འོག་ལོགས་སུ་མི་གཡོ་བ་ཕ་བོང་གི་སྟེང་ན་འདུག་པ། ལག་ན་རལ་གྲི་དང་ཞགས་པ་ཐོགས་པ། འབར་བའི་ཕྲེང་བ་འཁྲིགས་པ། བགེགས་ཐམས་ཅད་ལ་བསྡིགས་པ་དེའི་ཕྱག་རྒྱའམ་ཡི་གེར་བྲིའོ། །དེའི་ཡི་གེའི་འབྲུ་ནི་ཧྃ། རླུང་གི་ཕྱོགས་སུ་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་བགེགས་ཆེན་པོ་འཇོམས་པ། གྱེན་དུ་འབར་བའི་ཕྲེང་བ་ཅན། རབ་ཏུ་འཇིག་པ་ཆེན་པོའི་དུས་ཀྱི་མེའི་གཟུགས་འདྲ་བ། འཇིགས་པ་ཡང་འཇིགས་པར་བྱེད་པ། ལག་ན་རྡོ་རྗེ་འོད་འཕྲོ་བ་ཅན་ཐོགས་པ་དེའི་ཕྱག་རྒྱའམ་ཡི་གེ་བྲིའོ། །དེ་ལ་ཡི་གེའི་འབྲུ་ནི་འདིའོ། །ཧ། དེ་ནས་ཕྱོགས་བཞིར་སྲུང་བ་ཆེན་མོ་བཞི་དགོད་དོ། ། དེ་ལ་ཤར་ཕྱོགས་སུ་མི་འཇིགས་པ་ཞེས་བྱ་བའི་སྲུང་བ་ཆེན་མོ་གསེར་གྱི་ཁ་དོག་འདྲ་བ་གོས་དཀར་པོ་གྱོན་པ། ཡིད་ཙམ་ཁྲོ་བོའི་གདོང་ལག་ན་དབྱུག་པ་ཐོགས་པ་དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །ཙ། བྱང་ཕྱོགས་སུ་ནི་འཇིགས་པ་ཐམས་ཅད་མེད་པར་བྱེད་པ་ཞེས་བྱ་བའི་སྲུང་བ་ཁ་དོག་དཀར་མོ། ལག་ན་རལ་གྲི་ཐོགས་ཤིང་གོས་དཀར་པོ་གྱོན་པ། འབར་བ་དང་བཅས་པ་འཇིགས་པ་ཐམས་ཅད་མེད་པ་དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །པ། ནུབ་ཕྱོགས་སུ་གདུལ་དཀའ་ཞེས་བྱ་བའི་སྲུང་བ། ཨ་ཤོ་ཀ་དམར་པོའི་མདོག་འདྲ་བ། གོས་དམར་པོ་གྱོན་པ། བཞིན་འཛུམ་པ། ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་བལྟ་བ་དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །ས། ལྷོ་ཕྱོགས་སུ་མ་ཐུལ་བ་རྡོ་རྗེས་འདུལ་བ་ཞེས་བྱ་བའི་སྲུང་བ་ཆེན་མོ་ཁ་དོག་ནག་

མོ། བཞིན་ཁྲོ་གཉེར་བསྙེར་བ། སྨད་གཡོགས་ནག་པོ་གྱོན་པ་ཐོར་ཚུགས་དང་ཅོད་པན་ཅན་ཐམས་ཅད་དང་ལྡན་པའི་འཇིག་རྟེན་གྱི་ཁམས་རང་གི་འབར་བས་མངོན་པར་སྣང་བར་བྱེད་པ། ལག་ན་དབྱུག་པ་ཐོགས་པ། བགེགས་ཆེན་པོ་མེད་པར་བྱེད་པའི་ཕྱག་རྒྱའམ། ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །ཀྵ། དེ་དག་ཐམས་ཅད་ཀྱང་འཁོར་དང་བཅས་པ། ཕྱག་བརྙན་དང་བཅས་པར་པདྨ་དཀར་པོ་ལ་འདུག་པར་བྲིའོ། །དེ་ལྟར་བློ་ཅན་གྱིས་བཀོད་ནས། །སྔགས་པ་སྔགས་ལ་གཞོལ་བ་ཡིས། །ཆོ་ག་བཞིན་དུ་ཕྱིར་བྱུང་ནས། །གཉིས་པའི་ཆ་ནི་ངེས་པ་ལ། །ཤཱཀྱའི་རིགས་ནི་དགའ་བྱེད་པ། །ཐུབ་པའི་རྒྱལ་པོ་བྲི་བར་བྱ། །མགོན་པོ་ན་བཟའ་ངུར་སྨྲིག་མནབས། །མཚན་མཆོག་སུམ་ཅུ་རྩ་གཉིས་ལྡན། །བསྟན་པ་ཡི་ནི་དོན་མཛད་ལྷ། །སེམས་ཅན་ཀུན་ལ་མི་འཇིགས་སྦྱིན། །སྔགས་པས་ཕྱག་རྒྱ་དགོད་པ་ནི། །ལྷུང་བཟེད་ཆོས་གོས་ལ་སོགས་པའམ། །ཡང་ན་མཁས་པས་ཡི་གེར་བཞག། །དེ་ཡི་ཆོ་ག་དམ་པ་འདིའོ། །བྷ། དེ་ནས་ཕྱི་རོལ་གྱི་དཀྱིལ་འཁོར་དུ་བདག་ཉིད་ཆོས་ཀྱི་དབྱིངས་ཀྱི་ངོ་བོ་ཉིད་དུ་བྱིན་གྱིས་བརླབས་ལ། བྱང་ཆུབ་ཀྱི་སེམས་སུ་གྱུར་པའི་ཡིད་ཀྱིས་ཆ་གསུམ་བོར་ཏེ། བཅོམ་ལྡན་འདས་རྣམ་པར་སྣང་མཛད་ལན་གསུམ་རྗེས་སུ་དྲན་པར་བྱས་ནས་ཚོན་དེ་ཉིད་བླངས་ཏེ། ཤར་ཕྱོགས་ཀྱི་ཆ་གསུམ་པར་རྡོ་རྗེ་དམ་པ་སྦྱིན་པ་གཞོན་ནུའི་གཟུགས་ཅན་ལག་པ་གཡོན་པ་ན་ཨུཏྤལ་མཐིང་གའི་སྟེང་ན་རྡོ་རྗེ་ཅན་ཐོགས་པ། རྒྱན་ཐམས་ཅད་ཀྱིས་བརྒྱན་པ། དར་རམ་རས་ཀྱི་སྨད་གཡོགས་གྱོན་པ། དར་ལའི་སྟོད་གཡོགས་ཅན། ཁ་དོག་གུར་གུམ་ལྟ་བུ། སྤྱི་བོར་ཟུར་ཕུད་ལྔ་པ་དེའི་ཕྱག་རྒྱ་འམ་ཡི་གེར་བྲིའོ། །དེའི་སྔགས་ནི་འདིའོ། །ན་མཿས་མནྟ་བུད་དྷཱ་ནཱཾ། མྃ། དེའི་གཡས་ཕྱོགས་སུ་དྲ་བ་ཅན་གྱི་འོད་གཞོན་ནུའི་གཟུགས་ཅན་རྣམ་པ་ཐམས་ཅད་ཀྱི་མཆོག་དང་ལྡན་པ། ལག་ན་རིན་པོ་ཆེའི་དྲ་བའམ། ལྕགས་ཀྱུ་ཐོགས་པ་ཕྱག་རྒྱའམ་ཡི་གེའི་འབྲུར་བྲིའོ། །དེ་ལ་ཡི་གེའི་འབྲུ་ནི་འདིའོ། །ཚ། དེ་ནས་ལྷོ་ཕྱོགས་སུ་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ཞེས་བྱ་བ་གསེར་གྱི་ཁ་དོག་འདྲ་བ། ཐོར་

ཚུགས་དང་ཅོད་པན་ཅན།ལག་ན་ཡིད་བཞིན་གྱི་ནོར་བུ་ཐོགས་པ་དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །ཨཱ། དེ་ནས་བྱང་ཕྱོགས་སུ་བྱང་ཆུབ་སེམས་དཔའ་སའི་སྙིང་པོ་ཞེས་བྱ་བ་སྐུ་མདོག་ལྗང་གུ། ལག་ན་པདྨ་ཐོགས་པ། རྒྱན་ཐམས་ཅད་ཀྱིས་བརྒྱན་པ། དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེ་ནི་འདིའོ། །ཨི། ནུབ་ཕྱོགས་སུ་བྱང་ཆུབ་སེམས་དཔའ་ནམ་མཁའི་སྙིང་པོ་ཞེས་བྱ་བ་རྣམ་པ་ཐམས་ཅད་ཀྱི་མཆོག་དང་ལྡན་པ། གོས་དཀར་པོ་གྱོན་པ་འབར་བ་དང་བཅས་པ། ལག་ན་རལ་གྲི་ཐོགས་པ་དེའི་ཕྱག་རྒྱའམ་ཡི་གེར་བྲིའོ། །དེ་ལ་ཡི་གེའི་འབྲུ་ནི་འདིའོ། །ཨཱི། ཆོས་ཀྱི་དབྱིངས་ལ་གཞོལ་བ་ཡི། །སྔགས་པ་དེ་ནས་འདུག་ནས་སུ། །ཆོས་ཀྱི་དབྱིངས་ཀྱི་རང་བཞིན་གྱི། །བྱང་ཆུབ་སེམས་སུ་གྱུར་པའི་ཡིད། །ཤར་ཕྱོགས་ཁ་བལྟས་གནས་ནས་ནི། །རྡོ་རྗེ་ཅན་གྱི་རྒྱ་བཅིངས་ནས། །དེ་ནས་ལས་ཀྱི་རྡོ་རྗེར་གྱུར། །ནན་ཏན་དུ་ནི་མཆོད་པ་བྱ། །ཀུན་ཏུ་ཁྱབ་པའི་ཡིད་ཀྱིས་སུ། །སངས་རྒྱས་སྐྱོབ་པ་ཐམས་ཅད་ཀྱི། །དམ་ཚིག་ཅེས་བྱའི་རྒྱ་བསྟན་ནས། །གསང་སྔགས་ལན་གསུམ་བཟླས་པར་བྱ། །སློབ་མ་གཙང་མ་ཆོ་ག་བཞིན། །བོས་ཏེ་དཀྱིལ་འཁོར་མདུན་དུ་ནི། །དེ་དག་གསུམ་ལ་སྐྱབས་སུ་བཏང་། །དེ་ནས་བྱང་ཆུབ་སེམས་ཀྱང་བསྐྱེད། །ཆོས་ཀྱི་དབྱིངས་ཀྱི་རང་བཞིན་གྱི། །ཕྱག་རྒྱ་དེ་དག་ཀུན་ལ་བཅིང་། །དེ་ནས་ཆོས་ཀྱི་འཁོར་ལོའི་བཅིང་། །ཡིད་ཀྱིས་དེ་ཡི་གཟུགས་བསྒྱུར་ཏེ། །རས་ཀྱིས་གདོང་པ་བཀབ་ནས་སུ། །སྙིང་རྗེར་གྱུར་པའི་ཡིད་ཀྱིས་སུ། །བྱང་ཆུབ་ཚོགས་ནི་རྫོགས་བྱའི་ཕྱིར། །ལག་པ་སྟོང་པར་མི་བྱའོ། །དམ་ཚིག་གི་ནི་དམ་པ་འདི། །དེ་དག་ཀུན་གྱི་རྣ་བར་བསྒྲགས། །སངས་རྒྱས་རྣམས་ཀྱི་དམ་ཚིག་ནི། །དེ་ནས་དེ་ལ་བདག་གིས་བཅིང་། །བྱང་ཆུབ་སེམས་གྱུར་ཡིད་ཀྱིས་སུ། །དེ་ནས་མེ་ཏོག་འདོར་དུ་གཞུག །མེ་ཏོག་གང་དུ་བབ་གྱུར་པ། །དེ་ནི་སྔགས་པས་དེ་ལ་སྦྱིན། །ལུས་ཅན་ཀུན་ལ་དམ་ཚིག་ཕྱིར། །ཆོ་ག་དེ་ལྟར་རབ་ཏུ་བྱ། །དེ་ནས་དཔལ་ལྡན་རྡོ་རྗེ་འཛིན། །གཙོ་བོ་དེ་ལ་ཡང་ཞུས་པ། །མགོན་པོ་སྨྲ་བའི་མཆོག་གྱུར་པས། །དབང་བསྐུར་བ་ཡི་ཆོ་ག་གསུངས། །

དེ་སྐད་གསོལ་ནས་བཅོམ་ལྡན་འདས། །ཆོས་ཀྱི་དབྱིངས་ལ་གཞོལ་བ་ཡིས། །རྡོ་རྗེ་འཛིན་ལ་འདི་སྐད་གསུངས། །ཆོས་རྣམས་ཀུན་ལ་དབང་བའི་ཕྱིར། །ཆོ་གའི་མཆོག་ནི་ངས་བཤད་ཀྱིས། །ཡིད་གཅིག་བསྡུས་ཏེ་ཆོ་ག་ཉོན། །གསང་བ་པའི་བདག་པོ་དེ་ལ་སློབ་དཔོན་གྱིས་བདག་ཉིད་དེ་བཞིན་གཤེགས་པའི་གཟུགས་སུ་དེའི་སྔགས་སམ། ཕྱག་རྒྱས་བྱིན་གྱིས་བརླབ་བོ། །དེ་ནས་སློབ་མ་རྣམས་བོས་ལ་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་པདྨའི་རྒྱལ་པོ་ཆེན་པོ་ལ་གཞག་སྟེ། ཡན་ལག་ཀུན་འབྱུང་བའི་ཕྱག་རྒྱ་བཅིངས་ལ། བྱང་ཆུབ་སེམས་དཔའ་ཆེན་པོ་བཞིས་བྱིན་གྱིས་བརླབས་པ། རིན་པོ་ཆེ་སྣ་བཞིའི་བུམ་པའི་ཆུས་སྤྱི་བོ་ནས་དབང་བསྐུར་བར་བྱའོ། །ཨ་ནི་ཀླད་ཀོར་བཅས་པ་རུ། །མཁས་པས་སྤྱི་བོར་བཞག་ནས་ནི། །ཨ་ཞེས་བྱ་བ་སྙིང་གར་གཞག །ར་ཞེས་བྱ་བ་བྲང་དུ་གཞག །ཡང་ན་ཨ་ནི་ཀུན་ཏུ་གཞག །གསེར་གྱི་ཁ་དོག་འབར་དང་བཅས། །ཐོར་ཚུགས་དང་ནི་དབུ་རྒྱན་ཅན། །པདྨ་དཀར་པོའི་གདན་ལ་བཞུགས། །རྒྱལ་བའི་མཆོག་ནི་ཏིང་འཛིན་གནས། །ཡི་གེའི་འཁོར་ལོ་རིམ་པར་ཕྱེ་བ་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས། བྱང་ཆུབ་སེམས་དཔའ་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེ་བཞིན་གཤེགས་པ་རྣམས་ལ་དེ་བཞིན་གཤེགས་པའི་རྒྱན་དུ་གྱུར་པ་ཆོས་ཀྱི་དབྱིངས་རྟོགས་པའི་མཚན་མར་གྱུར་པའི་ཕྱག་རྒྱ་རིམ་པར་ཕྱེ་བ་རྒྱས་པ་གང་གིས་བརྒྱན་ན་བྱང་ཆུབ་སེམས་དཔའ་རྣམས་འཁོར་བ་ན་འཁོར་བའི་ཚེ། འགྲོ་བ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་མཚན་མས་བཏབ་པས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་འབྱོལ་བར་འགྱུར་ཞིང་། དེ་རྣམས་ཀྱང་དེ་དག་གི་ངག་ཉན་པར་འགྱུར་བ་ཡོད་ཀྱིས། དེ་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་དེའི་དུས་ལ་བབ་བོ། །བདེ་བར་གཤེགས་པ་དེའི་ཚོད་ལ་བབ་བོ། །དེ་ནས་བཅོམ་ལྡན་འདས་ཀྱིས་དེའི་ཚེ་སྟོབས་ཐོགས་པ་མེད་པའི་གནས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་རིག་སྔགས་ཀྱི་རྒྱལ་མོ་ཐམས་ཅད་དུ་ཐོགས་པ་མེད་པའི་སྟོབས་ཅན། མི་མཉམ་པ་དང་མཉམ་པའི་སྟོབས་ཅན། དམ་ཚིག་ལ་འཇུག་པར་བྱེད་པ། སྟོབས་གསུམ་དང་ལྡན་པ་བྱུང་ངོ་། །ན་མཿས་མནྟ་བུད་དྷཱ་ནཱཾ། ཨ་ས་མེ་ཏྲི་ས་མེ། ས་མ་ཡེ་སྭཱ་ཧཱ། གསང་བ་པའི་བདག་པོ་རིག་སྔགས་ཀྱི་རྒྱལ་མོ་འདི་ནི་དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་སྟོན་པར་བྱེད་པ། ཆོས་གསུམ་གྱི་ལམ་གྱི་མཚམས་ལས་མི་འདའ་བར་བྱེད་པ། ས་དང་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་དེ་ཡིན་ཏེ། དེའི་ཕྱག་རྒྱ་ནི་འདི་ཡིན་ནོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། མཐེ་བོ་གཉིས་བསྒྲེང་ངོ་། །རྒྱ་འདི་ཕྱག་རྒྱ་ཆེན་པོ་སྟེ། །སངས་རྒྱས་སྐྱོབ་པ་ཀུན་གྱི་ཡིན། །སངས་རྒྱས་ཀུན་གྱི་དམ་ཚིག་ནི། །ཕྱག་རྒྱ་འདི་ལ་རབ་ཏུ་གནས། །ལག་པ་དག་ནི་གཉིས་ཀ་ཡང་། ། བློ་དང་ལྡན་པས་ཁུ་ཚུར་བཅངས། །མཐེ་བོ་གཉིས་ནི་ནང་དུ་གཞུག །མཛུབ་མོ་གཉིས་ནི་བསྒྲེང་བར་བྱ། །རྒྱ་འདི་ཕྱག་རྒྱ་ཆེན་པོ་སྟེ། །ཆོས་དབྱིངས་རྣམ་པར་སྤྱོད་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅་ཧྃ། དེ་བཞིན་དུ་ལག་པ་གཉིས་ཀྱི་སོར་མོ་ཐམས་ཅད་བཟློག་སྟེ་བསྣོལ་ལ་མཐེ་བོ་གཉིས་སྤྲད་དོ། །ཕྱག་རྒྱ་དཔལ་དང་ལྡན་པ་འདི། །ཆོས་ཀྱི་འཁོར་ལོ་ཞེས་སུ་བསྒྲགས། །འཇིག་རྟེན་མགོན་པོ་སྐྱོབ་རྣམས་ཀྱི། །འཁོར་ལོ་རབ་ཏུ་འདི་བསྐོར་རོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། བཛྲ་ཨཱཏྨ་ཀོ྅ཧྃ། དེ་བཞིན་དུ་ལག་པ་གཉིས་ཕྱག་འཚལ་བའི་ཐལ་མོ་སྦྱར་ལ་མཛུབ་མོ་གཉིས་མཐེ་བོ་གཉིས་ཀྱི་སྟེང་དུ་གཞག་སྟེ། རལ་གྲི་ལྟ་བུར་བྱའོ། །སངས་རྒྱས་སྐྱོབ་པ་ཐམས་ཅད་ཀྱི། །ཕྱག་རྒྱ་ཆེན་པོ་རལ་གྲིའི་རྒྱ། །འདིས་ནི་ལྷན་ཅིག་སྐྱེས་པ་ཡི། །འཇིག་ཚོགས་ལྟ་བ་གཅོད་པར་བྱེད། །གསང་

སྔགས་ནི། ན་མཿས་མནྟ་བུད་དྷཱ་ནཱཾ། མ་ཧཱ་ཁཌྒ་བི་ར་ཛ་དྷརྨྨ་སནྡ་རྴི་ཀ་ས་ཧ་ཛ་སད་ཀཱ་ཡ་དྲྀཥྚི་ཙྪེ་ད་ཀ་ཏ་ཐཱ་ག་ཏཱ་དྷི་མུཀྟི་ནིར་ཛཱ་ཏ་བི་རཱ་ག་དྷརྨྨ་ནིར་ཛཱ་ཏ་ཧཱུྃ། དེ་བཞིན་དུ་ལག་པ་གཉིས་ཐལ་མོ་ཁོང་སྟོང་དུ་སྦྱར་ཏེ། མཛུབ་མོ་གཉིས་ཀྱིས་མཐེ་བོ་གཉིས་དཀྲིས་པ་དུང་ལྟ་བུར་བྱའོ། །ཕྱག་རྒྱ་དཔལ་ལྡན་དམ་པ་འདི། །ཆོས་ཀྱི་དུང་ཞེས་རྣམ་པར་བསྒྲགས། །འདིས་ནི་འཇིག་རྟེན་འདི་དག་ན། །སངས་རྒྱས་བྱང་ཆུབ་སེམས་དཔའ་རྣམས། །ཞི་བ་མྱ་ངན་འདས་འགྲོ་བ། །རྡུལ་དང་བྲལ་བའི་ཆོས་འཆད་དོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། སརྦྦ་ཐཱ་ཨོྃ། དེ་བཞིན་དུ་ལག་པ་གཉིས་ཀྱི་སོར་མོ་ཀུན་ཐལ་མོ་སྦྱར་བ་ལས་བརྒྱང་སྟེ་དྲིལ་བུ་ལྟ་བུར་བྱས་ལ། མཐེ་བོ་གཉིས་དང་མཐེའུ་ཆུང་གཉིས་རྩེ་གཅིག་ཏུ་སྤྲད་དེ། མཛུབ་མོ་གཉིས་དང་གུང་མོ་སྤྲད་དོ། །པདྨ་དམ་པ་དཔལ་ལྡན་འདི། །སངས་རྒྱས་སྐྱོབ་པ་ཐམས་ཅད་ཀྱི། །མི་ཤིགས་རྡོ་རྗེའི་གདན་ཡིན་ཏེ། །དེར་ནི་འདྲེན་པ་འཚང་རྒྱ་ཞིང་། །རྒྱལ་བ་སྲས་རྣམས་ཐམས་ཅད་ནི། །འདི་ལས་སྐྱེ་དང་བྱང་ཆུབ་འགྱུར། །གསང་སྔགས་ནི། ན་མཿས་མནྟ་བུད་དྷཱ་ནཱཾ། ཨ། དེ་བཞིན་དུ་ལག་པ་གཉིས་ཁུ་ཚུར་བཅངས་ལ། གུང་མོ་གཉིས་གཤིབས་ཏེ་བསྒྲེང་ལ། མཛུབ་མོ་གཉིས་བཀུག་སྟེ་ངོས་གཉིས་སུ་གཞག་ལ་རྡོ་རྗེ་ལྟར་བྱ། མཐེ་བོ་གཉིས་དང་མཐེའུ་ཆུང་གཉིས་བསྒྲེང་སྟེ་གཞག །སྲིན་ལག་གཉིས་ལག་པའི་ནང་དུ་གཞུག་གོ། །ཕྱག་རྒྱ་ཆེན་པོ་རྡོ་རྗེའི་རྒྱ། །མི་ཤེས་གྲོང་ཁྱེར་འཇིག་པ་སྟེ། །སངས་རྒྱས་རྣམས་ཀྱི་ཡེ་ཤེས་འདི། །ཉིད་ཀྱིས་བྱིན་གྱིས་བརླབས་ཏེ་བསྟན། །གསང་སྔགས་ནི། ན་མཿས་མནྟ་བཛྲཱ་ཎཱཾ། ཧཱུྃ། དེ་བཞིན་དུ་ལག་པ་གཉིས་ཁུ་ཚུར་བཅངས་ལ་གུང་མོ་གཤིབས་ཏེ་བསྒྲེང་། མཛུབ་མོ་གཉིས་ངོས་ནས་བཀུག་སྟེ་སྦྱར་རོ། །གཙུག་ཏོར་ཕྱག་རྒྱ་རྒྱ་ཆེན་ཏེ། ། གཙུག་ཏོར་ཞེས་ནི་བསྒྲགས་པ་ཡིན། །འདི་ནི་བཅིངས་པ་ཙམ་གྱིས་ཀྱང་། །རྒྱལ་བ་མཆོག་ཏུ་འགྱུར་བ་ཡིན། །འདིའི་སྔགས་ནི། ན་མཿས་མནྟ་བུད་དྷཱ་ནཱཾ། ཧཱུྃ་ཧཱུྃ། ལག་པ་གཡས་པ་ཁུ་ཚུར་བཅངས་ལ་སྨིན་མཚམས་སུ་གཞག་གོ། །རྒྱལ་བ་དམ་པས་ཕྱག་རྒྱ་འདི། །

མཛོད་སྤུ་ཞེས་ནི་རབ་ཏུ་བསྒྲགས། །འདི་ནི་བཅིངས་པ་ཙམ་གྱིས་སུ། །རྒྱལ་བ་མཆོག་ཏུ་འགྱུར་བ་ཡིན། །འདིའི་སྔགས་ནི། ན་མཿས་མནྟ་བུད་དྷཱ་ནཱཾ། ཨ་ཧྃ་ཛཿ། བློ་ལྡན་རྣལ་འབྱོར་ཚུལ་གནས་ཏེ། །ལག་གཉིས་ལྟེ་བའི་ཐད་ཀར་ནི། །ལྷུང་བཟེད་འཛིན་པའི་ཚུལ་དུ་བྱ། ། ལྷུང་བཟེད་ཕྱག་རྒྱ་ཞེས་སུ་བསྒྲགས། །རྒྱ་འདི་ཤཱཀྱ་ཐུབ་པའི་སྟེ། །ལྷུང་བཟེད་ཆེན་པོ་ཞེས་བྱའོ། །འདིའི་གསང་སྔགས་ནི། ན་མཿས་མནྟ་བུད་དྷཱ་ནཱཾ། བྷ། དེ་བཞིན་དུ་ལག་པ་གཡས་པ་གྱེན་དུ་བསྒྲེང་ལ་མི་འཇིགས་པ་སྦྱིན་པ་ལྟ་བུར་བྱའོ། །སེམས་ཅན་ཀུན་ལ་མི་འཇིགས་པ། །དེ་ཡིས་རབ་ཏུ་སྦྱིན་པར་འགྱུར། །གང་ཞིག་རྒྱ་ཆེན་དེ་བཅིངས་ན། །མི་འཇིགས་ཕྱག་རྒྱ་ཞེས་བསྒྲགས་སོ། །འདིའི་སྔགས་ནི། །ན་མཿས་མནྟ་བུད་དྷཱ་ནཱཾ། སརྦྦ་ཐཱ་ཛི་ན་ཛི་ན་བྷ་ཡ་ནཱ་ཤ་ན་སྭཱ་ཧཱ། དེ་བཞིན་དུ་ལག་པ་གཡས་པ་སྨད་དེ་དམ་པ་སྦྱིན་པ་ལྟར་བྱའོ། །འདི་ནི་དམ་པ་སྦྱིན་རྒྱ་ཞེས། །འཇིག་རྟེན་མགོན་པོ་རྣམས་ཀྱིས་བསྒྲགས། །འདི་ནི་བཅིངས་པ་ཙམ་གྱིས་སུ། །རྒྱལ་མཆོག་དམ་པ་སྩོལ་བར་འགྱུར། །འདིའི་གསང་སྔགས་ནི། ན་མཿས་མནྟ་བུད་དྷཱ་ནཱཾ། བ་ར་ད་བཛྲ་ཨཱཏྨ་ཀོ྅་ཧྃ་སྭཱ་ཧཱ། ལག་པ་གཡས་པ་ཁུ་ཚུར་བཅངས་ཏེ་མཛུབ་མོ་བརྐྱང་ལ་དཔྲལ་བ་ཁྲོ་གཉེར་ལྟ་བུར་བྱའོ། །ཕྱག་རྒྱ་ཆེན་པོ་རྒྱ་ཆེན་འདི། །སངས་རྒྱས་སྐྱོབ་པ་ཐམས་ཅད་ཀྱི། །བདུད་ནི་རྣམ་པར་བསྡིགས་ཞེས་བྱ། །ཕུང་བྱེད་ཐམས་ཅད་འཇིག་པར་བྱེད། །འདི་ནི་བཅིངས་པ་ཙམ་གྱིས་སུ། །བདུད་སྡེ་ཤིན་ཏུ་མི་བཟད་དང་། ། བགེགས་དང་ལོག་འདྲེན་གཞན་དག་ཀྱང་། །ཐེ་ཚོམ་མེད་པར་རབ་ཏུ་འབྱེར། །འདིའི་གསང་སྔགས་ནི་འདིའོ། །ན་མཿས་མནྟ་བུད་དྷཱ་ནཱཾ། མ་ཧཱ་བ་ལ་བ་ཏི་ད་ཤ་བ་ལ་ཏེ་ཛོདྦྷ་བེ་མ་ཧཱ་མཻ་ཏྲྱ་ངྷྱུ་ད་ག་ཏེ་སྭཱ་ཧཱ། དེ་བཞིན་དུ་ལག་པ་གཡས་པ་ཁུ་ཚུར་བཅངས་ལ་གུང་མོ་གཉིས་དང་སྲིན་ལག་གཉིས་བརྐྱང་སྟེ། མཐེ་བོ་དེ་དྲུང་དུ་གཞག་གོ། །འདི་ནི་སངས་རྒྱས་མགོན་རྣམས་ཀྱི། །ཐུགས་རྗེ་ལས་བྱུང་སྤྱན་ཡིན་ཏེ། །མིག་གི་སྟེང་དུ་མཁས་པས་གཞག །དེ་ལས་སངས་རྒྱས་སྤྱན་དུ་འགྱུར། །འདིའི་གསང་སྔགས་ནི། ན་མཿས་མནྟ་བུད་དྷཱ་ནཱཾ། ག་ག་ན་བ་ར་ལཀྵ་ཎ་

ཀ་རུ་ཎ་མཱ་ཡ་ཏ་ཐཱ་ག་ཏ་ཙཀྵུཿསྭཱ་ཧཱ། དེ་བཞིན་དུ་ལག་པ་གཉིས་གཅིག་ཏུ་སྦྱར་ལ། སོར་མོ་རྣམས་ཕན་ཚུན་བསྣོལ་བའི་ཁུ་ཚུར་བཅིངས་ཏེ། མཛུབ་མོ་གཉིས་བསྒྲེང་ལ་བཀུག་སྟེ་སྤྲད་ལ་ཟླུམ་པོར་བྱ། འདི་ནི་ཞགས་པ་མཆོག་ཅེས་གྲགས། །སྡང་བ་ཐམས་ཅད་འཇིག་པར་བྱེད། །སྔགས་པས་འདི་བཅིངས་དེ་ཡི་ཚེ། །རྟག་ཏུ་སྡང་བ་བཅིངས་པར་འགྱུར། །འདིའི་གསང་སྔགས་ནི་འདི་ཡིན་ནོ། །ན་མཿས་མནྟ་བུད་དྷཱ་ནཱཾ། ཧེ་ཧེ་མ་ཧཱ་པཱ་ཤ་པྲ་ས་རོ་དཱ་རྱ་སཏྭ་དྷཱ་ཏུ་བི་མོ་ཙ་ཀ །ཏ་ཐཱ་ག་ཏ་ཨ་དྷི་མུཀྟི་ནི་ར་ཛ་ཏ་སྭཱ་ཧཱ། དེ་བཞིན་དུ་ལག་པ་གཉིས་གཅིག་ཏུ་སྦྱར་ཏེ། ཁུ་ཚུར་བཅངས་ལ་མཛུབ་མོ་བསྒྲེང་སྟེ། ཚིགས་གསུམ་པ་བཀུག་ལ་ལྷག་མ་རྣམས་ནི་གདུ་བུའི་ཚུལ་དུ་གནས་པར་བྱའོ། །སངས་རྒྱས་སྐྱོབ་པ་ཐམས་ཅད་ཀྱི། །ལྕགས་ཀྱུ་ཞེས་ནི་འདི་བཤད་དོ། །བྱང་ཆུབ་སེམས་དཔའ་བདག་ཉིད་ཆེ། །ས་བཅུ་དག་ལ་གནས་པ་དང་། །སྡང་བར་སེམས་པ་གཞན་དག་ཀྱང་། །ཐམས་ཅད་རབ་ཏུ་འགུགས་པར་བྱེད། །འདིའི་གསང་སྔགས་ནི། ན་མཿས་མནྟ་བུད་དྷཱ་ནཱཾ། ཨ་སརྦྦ་ཏྲ་ཨ་པྲ་ཏི་ཧ་ཏ་ཏ་ཐཱ་ག་ཏ། ཨཾ་ཀུ་ཤ་བོ་དྷི་ཙཱརྱ་པ་རི་པཱུ་ར་ཀ་སྭཱ་ཧཱ། ལྕགས་ཀྱུའི་ཕྱག་རྒྱ་ལས་གུང་མོ་གཉིས་བཀུག་སྟེ་དེ་ཉིད་དུ་སྦྱར་རོ། །འདི་ནི་དེ་བཞིན་གཤེགས་པའི་ཐུགས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཛྙཱ་ནོ་དྦྷ་བ་སྭཱ་ཧཱ། ཕྱག་རྒྱ་དེ་ཉིད་ལས་སྲིན་ལག་གཉིས་བསྒྲེང་ལ་ལྷག་མ་རྣམས་དེ་བཞིན་དུ་གཞག་གོ། །དེ་བཞིན་གཤེགས་པའི་ལྟེ་བའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་མྲྀ་ཏོདྡྷ་བ་སྭཱ་ཧཱ། ཕྱག་རྒྱ་དེ་ཉིད་ལས་མཐེའུ་ཆུང་བསྒྲེང་ལ་ལྷག་མ་རྣམས་དེ་བཞིན་དུ་གཞག་གོ། །རྐེད་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་ག་ཏི་སཾ་བྷ་བ་སྭཱ་ཧཱ། དེ་བཞིན་དུ་ལག་པ་གཉིས་ཁོང་སྟོང་དུ་སྦྱར་ལ། མཛུབ་མོ་གཉིས་བཀུག་སྟེ་ནང་དུ་གཞུག །སྲིན་ལག་གཉིས་ཀྱང་དེ་བཞིན་དུ་བྱ། མཐེ་བོ་དང་མཐེའུ་ཆུང་གཉིས་ཅུང་ཟད་དགུག །གུང་མོ་གཉིས་གཤིབས་ཏེ་བསྒྲེང་ངོ་། །འདི་ནི་དེ་བཞིན་གཤེགས་པའི་མཛོད་ཀྱི་ཕྱག་རྒྱ་སྟེ། འདིའི་གསང་སྔགས་ནི། ན་མཿ

ས་མནྟ་བུད་དྷཱ་ནཱཾ། རྃ་རྃ་རྃ་སྭཱ་ཧཱ། ཕྱག་རྒྱ་དེ་ཉིད་ལས་སྲིན་ལག་གཉིས་ཕྱུང་ལ་བསྒྲེང་སྟེ་གཞག་གོ། །མཚམས་ཆེན་པོ་གཅད་པའི་ཕྱག་རྒྱ་སྟེ། འདིའི་གསང་སྔགས་ནི་འདི་ཡིན་ནོ། །ན་མཿས་མནྟ་བུད་དྷཱ་ནཱཾ། བེ་ལུ་པུ་རི་བི་ཀུ་རི་བི་ཀུ་ལེ་སྭཱ་ཧཱ། མཚམས་ཆེན་པོ་གཅད་པའོ། །དེ་ཉིད་ལས་གུང་མོ་གཉིས་བཀུག་ལ་མཐེ་བོང་གཉིས་བསྒྲེང་ངོ་། །སྲུང་བ་ཆེན་པོའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏེ་བྷྱཿསརྦྦ་བྷ་ཡེ་བི་ག་ཏེ་བྷྱོ་བི་ཤྭ་མུ་ཁེ་བྷྱཿ། སརྦ་ཐཱ་ཧཾ་ཁཾ་རཀྵ་མ་ཧཱ་བ་ལེ་སརྦྦ་ཏ་ཐཱ་ག་ཏ་པུ་ཎྱ་ནིར་ཛཱ་ཏེ་ཧཱུྃ་ཧཱུྃ་ཏྲ་ཊ་ཏྲ་ཊ། ཨ་པྲ་ཏི་ཧ་ཏེ་སྭཱ་ཧཱ། མི་བཟོད་པ་ཞེས་བྱ་བ་བསྲུང་བ་ཆེན་མོའོ། །དེ་བཞིན་དུ་མཛུབ་མོ་གཉིས་བརྐྱང་ལ་མཐེ་བོང་གཉིས་ནང་དུ་གཞུག་གོ། །ཀུན་ཏུ་འབར་བ་ཞེས་བྱ་བའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཛྭཱ་ལ་མཱ་ལི་ནི་ཏ་ཐཱ་ག་ཏ་ཨརྩི་སྭཱ་ཧཱ། ཀུན་ཏུ་འབར་བའོ། །དེ་བཞིན་དུ་ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། མཛུབ་མོ་གཉིས་ཀྱིས་ངོས་ནས་དཀྲིའོ། །འདི་ནི་དེ་བཞིན་གཤེགས་པའི་གོ་ཆའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། པྲ་ཙཎྜ་བཛྲ་ཛ་ཡ་བི་སྥུ་ར་ཧཱུྃ། དེ་བཞིན་གཤེགས་པའི་གོ་ཆའོ། །ཕྱག་རྒྱ་དེ་ཉིད་ལས་མཛུབ་མོ་གཉིས་དང་མཐེ་བོ་གཉིས་གཅིག་ཏུ་སྦྱར་རོ། །དེ་བཞིན་གཤེགས་པའི་ལྗགས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་ཛི་ཧྭ་སིདྡྷི་དྷརྨྨ་པྲ་ཏི་ཥྛི་ཏེ་སྭཱ་ཧཱ། དེ་བཞིན་གཤེགས་པའི་ལྗགས་སོ། །ཕྱག་རྒྱ་དེ་ཉིད་ལས་མཛུབ་མོ་གཉིས་དང་སྲིན་ལག་གཉིས་བཀུག་ལ་ནང་དུ་སྦྱར། མཐེ་བོ་གཉིས་བསྒྲེང་ལ་ཅུང་ཟད་བཀུག་སྟེ། རྩེ་མོ་གུང་མོ་ལ་ཕྱོགས་པར་བྱ། མཐེའུ་ཆུང་གཉིས་ནི་བརྒྱང་ལ་མཐེ་བོ་གཉིས་སྔ་མ་བཞིན་ནོ། །འདི་ནི་དེ་བཞིན་གཤེགས་པའི་ཞལ་ཆེན་པོའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་མ་ཧཱ་བཱ་ཀྟྲེ་བི་ཛྙཱ་ན་མ་ཧོ་ད་ཡ་སྭཱ་ཧཱ། དེ་བཞིན་གཤེགས་པའི་ཞལ་ལོ། །ཕྱག་རྒྱ་དེ་ཉིད་ལས་མཛུབ་མོ་བཀྲོལ་ལ། ནང་དུ་བཅུག་སྟེ་དགུ་བོར་བྱས་ལ་བསྟོད་དེ་གཟུང་ངོ་། །དེ་བཞིན་གཤེགས་པའི་མཆེ་བའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་

ག་ཏ་མ་ཧཱ་དྃ་ཥྚྲ་ས་ར་ས་རཱ་གྲ་ས་མ་པྲ་བྷཱ་ཀ་སརྦྦ་ཏ་ཐཱ་ག་ཏ་བི་ཥ་ཡ་སཾ་བྷ་བ་སྭཱ་ཧཱ། དེ་བཞིན་གཤེགས་པའི་མཆེ་བའོ། །ཕྱག་རྒྱ་དེ་ཉིད་ལས་མཛུབ་མོ་གཉིས་བསྒྲེང་སྟེ་གཟུང་ལ་ཚིགས་གསུམ་པ་དགུག་གོ། །དེ་བཞིན་གཤེགས་པའི་སོ་སོ་ཡང་དག་པར་རིག་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་ཙིནྟ་ཨནྡྷུ་ཏ་རཱུ་པ་པཱ་བ་ག་སཾ་པྲ་ཏི་བིདྱཱ་བི་ཤུདྡྷ་སྭ་ར་སྭཱ་ཧཱ། དེ་བཞིན་གཤེགས་པའི་སོ་སོ་ཡང་དག་པར་རིག་པའོ། །དེ་བཞིན་དུ་ལག་པ་གཉིས་གཅིག་ཏུ་ཐལ་མོ་ཁོང་སྟོང་དུ་སྦྱར་ཏེ་མཐེ་བོ་གཉིས་དང་མཐེའུ་ཆུང་གཉིས་ནང་དུ་བཅུག་ལ་གཅིག་ཏུ་སྤྲད་དོ། །འདི་ནི་སྟོབས་བཅུའི་ཕྱག་རྒྱ་སྟེ། གསང་སྔགས་ལ། ནམཿས་མནྟ་བུད་དྷཱ་ནཱཾ། ད་ཤ་བ་ལ་ག་དྷ་ར་ཧཱུྃ་སྃ་ཛྃ་སྭཱ་ཧཱ། སྟོབས་བཅུའི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་མཐེ་བོ་གཉིས་ཀྱི་རྩེ་མོར་མཛུབ་མོ་གཉིས་བཀུག་སྟེ་སྦྱར་རོ། །དྲན་པ་ཉེ་བར་གཞག་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་སྨྲྀ་ཏི་སཏྭ་ཧི་ཏ་ཨ་བྷྱུངྒ་ཏ་ག་ག་ན་ས་མ་ས་མ་སྭཱ་ཧཱ། དྲན་པ་ཉེ་བར་གཞག་པའི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་སྲིན་ལག་གཉིས་མཐེ་བོའི་སྟེང་དུ་གཟུང་ངོ་། །གསང་སྔགས་ལ། ན་མཿས་མནྟ་བུད་དྷཱ་ནཱཾ། སརྦྦ་དྷརྨྨ་ས་མ་ཏཱ་པྲཱཔྟ་ཏ་ཐཱ་ག་ཏ་ཨ་ནུ་ག་ཏ་སྭཱ་ཧཱ། ཆོས་ཐམས་ཅད་མཉམ་པ་ཉིད་དུ་རྟོགས་པར་བྱེད་པའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་གཅིག་ཏུ་སྦྱར་ཏེ། མཛུབ་མོ་གཉིས་ཀྱིས་གུང་མོ་གཉིས་དཀྲིས་ལ་ལྷག་མ་རྣམས་ནི་དེ་བཞིན་དུ་གཞག་གོ། །ཀུན་ཏུ་བཟང་པོའི་ཡིད་བཞིན་གྱི་ནོར་བུའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ས་མནྟཱ་ནུ་ག་ཏ་བི་རཱ་ཛ་དྷརྨྨ་ནིར་ཛཱ་ཏ་མ་ཧཱ་མ་ཧཱ་སྭཱ་ཧཱ། ཡིད་བཞིན་གྱི་ནོར་བུའི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་མཛུབ་མོ་གཉིས་གུང་མོ་གཉིས་ཀྱི་ནང་དུ་བཀུག་ལ་གཞག །ལྷག་མ་རྣམས་ནི་སྔ་མ་བཞིན་ནོ། །འདིའི་གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་ཙི་ཏེཉྫ་ཡ་སརྦྦ་སཏྭཱ་ཤ་ཡཱ་ནུ་ག་ཏ་སྭཱ་ཧཱ། བྱམས་པའི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་མཐེ་བོ་གཉིས་ནང་དུ་གཞུག་གོ། །གསང་སྔགས་ལ།

ན་མཿས་མནྟ་བུད་དྷཱ་ནཱཾ། ཨཱ་ཀཱ་ཤ་ས་མ་ཏཱ་ནུ་ག་ཏ་བི་ཙི་ཏྲཾ་བ་ར་དྷ་ར་སྭཱ་ཧཱ། ནམ་མཁའི་སྙིང་པོའི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་སྲིན་ལག་གཉིས་དང་མཐེའུ་ཆུང་གཉིས་ནང་དུ་བཅུག་ལ། མཛུབ་མོ་གཉིས་གུང་མོ་གཉིས་དང་ལྷན་ཅིག་ཏུ་སྦྱར་རོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་ཏ་སཏྭ་ཧི་ཏ་ཨ་བྷྱུངྒ་ཏ་ཏྲྃ་ཏྲྃ་རྃ་རྃ་སྭཱ་ཧཱ། སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་དང་གསང་སྔགས་སོ།། །།བམ་པོ་ལྔ་པ། དེ་བཞིན་དུ་ལག་པ་གཉིས་གཅིག་ཏུ་སྦྱར་ལ་སོར་མོ་ཐམས་ཅད་དྲིལ་བུ་འདྲ་བར་ཁ་དབྱེ། མཐེ་བོ་གཉིས་དང་མཐེའུ་ཆུང་གཉིས་གཅིག་ཏུ་སྦྱར། ལྷག་མ་རྣམས་ནི་པདྨ་ལྟ་བུར་བྱའོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། སརྦྦ་ཏ་ཐཱ་ག་ཏ་ཨ་བ་ལོ་ཀི་ཏ་ཀ་རུ་ཎཱ་མཱ་ཡ་ར་ར་ར་ཧཱུྃ་ཛཿསྭཱ་ཧཱ། སྤྱན་རས་གཟིགས་དབང་ཕྱུག་གི་པདྨའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་ཐལ་མོ་ཁོང་སྟོང་དུ་སྦྱར་ལ་པདྨ་ཁ་མ་བྱེ་བ་ལྟ་བུར་བྱའོ། །པདྨའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཛྃ་ཛྃ་ས་སྭཱ་ཧཱ། མཐུ་ཆེན་པོ་ཐོབ་པའི་པདྨའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་ཁུ་ཚུར་བཅངས་ལ་མཛུབ་མོ་གཉིས་རྩེ་མོ་ཅན་དུ་བསྒྲེང་སྟེ། མཐེ་བོ་གཉིས་ཀྱང་དེའི་དྲུང་དུ་གཞག་གོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏཱ་རེ་ཏཱ་རེ་ཎི་ཀ་རུ་ཎོངྦྷ་བེ་སྭཱ་ཧཱ། ལྷ་མོ་སྒྲོལ་མའི་འོ། །ཕྱག་རྒྱ་དེ་ཉིད་ལས་མཛུབ་མོ་གཉིས་གཅུས་ཏེ་བསྒྲེང་ངོ་། །ལྷག་མ་རྣམས་ནི་སྔ་མ་བཞིན་ནོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། སརྦྦ་བྷཱ་བ་སན་ཏྲཱ་ས་ནི་ཧཱུྃ་སྥོ་ཊ་ཡ་སྭཱ་ཧཱ། ཁྲོ་གཉེར་ཅན་མའི་འོ། །དེ་བཞིན་དུ་ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། སྲིན་ལག་གཉིས་དང་མཐེ་བོ་གཉིས་ནང་དུ་གཞུག་གོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏ་བི་ཥ་ཡ་སམྦྷ་བ་པདྨ་མཱ་ལཱི་ནཱི་སྭཱ་ཧཱ། གོས་དཀར་ཅན་གྱིའོ། །ཕྱག་རྒྱ་དེ་ཉིད་ལས་མཐེ་བོ་གཉིས་གྱེན་དུ་བསྒྲེང་ལ་མཛུབ་མོ་གཉིས་ཀྱི་རྩེ་མོ་དེའི་དྲུང་དུ་བར་ནས་གང་ཙམ་གྱིས་ཆོད་པར་གཞག་གོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཁཱ་ད་བྷཉྫསྥོ་ཊ་ཡ་སྭཱ་ཧཱ། རྟ་མགྲིན་གྱི་ཕྱག་རྒྱ་དང་གསང་སྔགས་སོ། །ཕྱག་རྒྱ་

དེ་ཉིད་ལས་སྲིན་ལག་གཉིས་དང་། མཐེའུ་ཆུང་གཉིས་ཀྱང་གྱེན་དུ་བསྒྲེང་ལ་ལྷག་མ་རྣམས་ནི་དེ་བཞིན་དུ་ཁུ་ཚུར་བཅངས་པའི་ཚུལ་དུ་གཞག་གོ། །དེའི་གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧ་ཧ་ཧ་སུ་ན་ཏ་ནུ་སྭཱ་ཧཱ། སའི་སྙིང་པོའི་ཕྱག་རྒྱ་དང་གསང་སྔགས་སོ། ། དེ་བཞིན་དུ་ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། གུང་མོ་གཉིས་ཀྱིས་སྲིན་ལག་གཉིས་དཀྲིས་ཏེ། མཛུབ་མོ་གཉིས་ཀྱང་མཐེ་བོང་གཉིས་ཀྱི་སྟེང་དུ་བཀུག་སྟེ་གཞག །ལྷག་མ་རྣམས་ནི་སྔ་མ་བཞིན་ནོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་ཀུ་མཱ་ར་ཀ་བི་མུཀྟི་པ་ཐེ་སྟི་ཥྛ་ཏེ། སྨ་ར་སྨ་ར་པྲ་ཏི་ཛྙཱ་ན་སྭཱ་ཧཱ། འཇམ་དཔལ་གྱི་ཕྱག་རྒྱ་དང་གསང་སྔགས་སོ། །ལག་པ་གཡོན་པ་ཁུ་ཚུར་བཅངས་ཏེ་མཛུབ་མོ་དགུག་གོ། །དྲ་བའི་འོད་ཀྱི་ལྕགས་ཀྱུའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་ཀུ་མཱ་ར་ཡ་ག་ཏ་སྭ་བྷཱ་བ་སྠི་ཏ་སྭཱ་ཧཱ། དྲ་བའི་འོད་ཀྱི་ཕྱག་རྒྱ་དང་གསང་སྔགས་སོ། །ཕྱག་རྒྱ་དེ་ཉིད་ལས་སོར་མོ་ཐམས་ཅད་དགུ་བོར་བྱའོ། །གཞོན་ནུ་དྲི་མ་མེད་ཀྱི་འོད་ཀྱི་ཨུཏྤ་ལའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་ཀུ་མཱ་ར་བི་ཙི་ཏྲ་ག་ཏི་ཀུ་མཱ་ར། པྲ་ཏི་ཛྙཱ་མ་ནུ་སྨ་ར་སྭཱ་ཧཱ། དྲི་མ་མེད་པའི་འོད་ཀྱི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཡས་པ་ཁུ་ཚུར་བཅངས་ལ་མཛུབ་མོ་དང་གུང་མོ་གཉིས་གཤིབས་ཏེ་གྱེན་དུ་བསྒྲེང་ངོ་། །སྐྲ་ཅན་གྱི་ཕྱག་རྒྱ་སྟེ་གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་ཀུ་མཱ་རི་ཀླེ་ཤ་ཙྪེ་ད་ཡ་ཨཱ་ཛྙཱ་ནཱན་སྨ་ར་པྲ་ཏི་ཛྙཱ་ན་སྭཱ་ཧཱ། སྐྲ་ཅན་གྱི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཡས་པ་ཁུ་ཚུར་བཅངས་ལ་གུང་མོ་གྱེན་དུ་བསྒྲེང་སྟེ་མདུང་རྩེ་ལྟ་བུར་བྱ། ཉེ་སྐྲ་ཅན་གྱི་མདུང་རྩེའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། བཾནྡྷ་ཡ་ཨཛྙཱ་ཧེ་ཀུ་མཱ་རི་ཀེ་སྭཱ་ཧཱ། ཉེ་སྐྲ་ཅན་གྱི་མདུང་རྩེའི་ཕྱག་རྒྱ་དང་གསང་སྔགས་སོ། །ལག་པ་གཉིས་ཁུ་ཚུར་བཅངས་ཏེ། གུང་མོ་གཉིས་བརྐྱང་ལ་མཛུབ་མོ་གཉིས་ངོས་སུ་སྦྱར་སྣ་ཚོགས་མའི་དབྱུག་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཀུ་མཱ་རི་ཀེ་ཨཱ་ཛྙཱ་ན་པུ་ར་བི་དྭཾ་ས་ནི་སྭཱ་ཧཱ། དེ་བཞིན་དུ་ལག་པ་གཡོན་པ་ཁུ་ཚུར་བཅངས་ལ་སྲིན་

ལག་དང་མཐེའུ་ཆུང་གཉིས་བསྒྲེང་ངོ་། །ནོར་ཅན་གྱི་རྒྱལ་མཚན་གྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་སྥུ་ར་ཛྙཱ་ན་ཀེ་ཏུ་སྭཱ་ཧཱ། ནོར་ཅན་གྱི་རྒྱལ་མཚན་གྱི་ཕྱག་རྒྱ་དང་གསང་སྔགས་སོ། །ལག་པ་གཡས་པ་ཁུ་ཚུར་བཅངས་ལ། མཛུབ་མོ་བསྒྲེང་སྟེ་རྩེ་མོ་དགུག་གོ། །འགུགས་མའི་ལྕགས་ཀྱུའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨཱ་ཀརྵ་ཡ་སརྦྦཾ་ཀུ་རུ་ཨཱ་ཛྙཱ་ན་ཀུ་མཱ་ར་སྱ་སྭཱ་ཧཱ། འགུགས་མའི་ལྕགས་ཀྱོའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་ཁུ་ཚུར་བཅངས་ལ། མཛུབ་མོ་གཉིས་བསྒྲེང་སྟེ་ཚིགས་གསུམ་པ་དགུག་གོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་བི་སྨ་ཡ་ནི་ཡེ་སྭཱ་ཧཱ། ཕྱག་བརྙན་མ་རྣམས་ཀྱི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཡས་པ་ཁུ་ཚུར་བཅངས་ཏེ། གུང་མོ་བསྒྲེང་ལ་ཚིགས་གསུམ་པ་དགུག་གོ། ། ངོ་མཚར་ཅན་གྱི་རྡོ་རྗེའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། བི་མ་ཏི་ཙྪེ་ད་ཀ་སྭཱ་ཧཱ། ངོ་མཚར་གྱི་རྡོ་རྗེ་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཡས་པའི་དཔུང་པ་བསྟོད་ལ། ལག་པ་མི་འཇིགས་པ་སྦྱིན་པ་ལྟ་བུར་བྱ། མི་འཇིགས་པ་སྦྱིན་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་བྷ་ཡནྡཱ་ཏ་སྭཱ་ཧཱ། མི་འཇིགས་པ་སྦྱིན་པའི་ཕྱག་རྒྱ་དང་གསང་སྔགས་སོ། །ལག་པ་དེ་ཉིད་མས་ཡར་འདྲེན་པའི་ཚུལ་དུ་བྱའོ། །ངན་སོང་སྤོང་བའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཨ་བྷྱུང་དྷ་ར་སཏྭ་དྷཱ་ཏུ་ན་སྭཱ་ཧཱ། ངན་སོང་སྤོང་བའི་ཕྱག་རྒྱ་དང་གསང་སྔགས་སོ། །ལག་པ་དེ་ཉིད་བྲང་དུ་གཞག་གོ། །ཡོངས་སུ་སྐྱོང་སེམས་བློ་གྲོས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་མ་ཧཱ་མ་ཧཱ་སྨ་ར་པྲ་ཏི་ཛྙཱ་སྭཱ་ཧཱ། ཡོངས་སུ་སྐྱོང་སེམས་བློ་གྲོས་ཀྱི་ཕྱག་རྒྱ་དང་གསང་སྔགས་སོ། །ལག་པ་དེ་ཉིད་མེ་ཏོག་འཛིན་པའི་ཚུལ་དུ་བྱའོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། སཏྭེ་བཇྲོདྡྷ་བ་སྭཱ་ཧཱ། བྱམས་པ་འབྱུང་བའི་ཕྱག་རྒྱ་དང་གསང་སྔགས་སོ། །ལག་པ་དེ་ཉིད་སྙིང་གར་གཞག་ལ་གུང་མོ་ནང་དུ་དགུག་གོ། །གསང་སྔགས་ལ།

ན་མཿས་མནྟ་བུད་དྷཱ་ནཱཾ། ཀ་རུ་ཎོདྦྷ་བ་སྭཱ་ཧཱ། སྙིང་རྗེས་བརླན་པའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཡས་པ་མཆོག་སྦྱིན་པའི་ཚུལ་དུ་བྱའོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་བ་ར་ད་བ་ར་པྲཱཔྟ་སྭཱ་ཧཱ། གདུང་བ་ཐམས་ཅད་ཞི་བར་བྱེད་པའི་འོ། །ལག་པ་དེ་ཉིད་ཡིད་བཞིན་གྱི་ནོར་བུ་འཛིན་པའི་ཚུལ་དུའོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། སརྦྦ་ཤ་པ་རི་པཱུ་ར་ཀ་སྭཱ་ཧཱ། བློ་གྲོས་བསམ་གྱིས་མི་ཁྱབ་པ་དང་ལྡན་པའི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་ཁུ་ཚུར་བཅངས་ལ། གུང་མོའི་སོར་མོ་གཉིས་ཕྱུང་སྟེ་བརྐྱང་ངོ་། །སའི་སྙིང་པོའི་མེ་ཏོག་གི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧ་ཧ་ཧ་བིསྨ་ཡེ་སྭཱ་ཧཱ། སའི་སྙིང་པོའི་ཕྱག་རྒྱ་དང་གསང་སྔགས་སོ། །ལག་པ་གཡས་པ་ཁུ་ཚུར་བཅངས་ལ། སོར་མོ་གསུམ་བརྐྱང་ངོ་། །རིན་ཆེན་འབྱུང་གནས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧེ་ཧེ་མ་ཧཱ་མ་ཧཱ་སྭཱ་ཧཱ། རིན་ཆེན་འབྱུང་གནས་ཀྱི་ཕྱག་རྒྱ་དང་གསང་སྔགས་སོ། །ལག་པ་དེ་ཉིད་ལས་སྲིན་ལག་བརྐྱང་སྟེ་གྱེན་དུ་བསྒྲེང་ངོ་། །གསང་སྔགས་ལ། ན་མཿས་མནྟ་བུད་དྷཱ་ནཱཾ། རདྦྷ་བ་སྭཱ་ཧཱ། ཕྱག་ན་རིན་ཆེན་གྱི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་བསྣོལ་ཏེ་རྒྱབ་སྦྱར་ལ། གཡོན་པའི་མཐེ་བོས་གཡས་པའི་མཐེའུ་ཆུང་འཁྱུད་དེ། དེ་བཞིན་དུ་གཡས་པས་ཀྱང་གཡོན་པ་ལ་འཁྱུད་ལ་ལྷག་མ་རྣམས་རྡོ་རྗེ་ལྟ་བུར་བྱའོ། །ས་འཛིན་གྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། དྷ་ར་ཎཱི་པྲཱཔྟ་སྭཱ་ཧཱ། ས་འཛིན་གྱི་ཕྱག་རྒྱ་དང་གསང་སྔགས་སོ། །ཕྱག་ན་རིན་ཆེན་ཕྱག་རྒྱ་ནི་རྡོ་རྗེ་རྩེ་ལྔ་སྟེ་སྔ་མ་བཞིན་ནོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། རཏྣ་ནིར་ཛཱ་ཏེ་སྭཱ་ཧཱ། ཕྱག་ན་རིན་ཆེན་གྱི་ཕྱག་རྒྱ་དང་གསང་སྔགས་སོ། ཕྱག་རྒྱ་དེ་ཉིད་ལས་སོར་མོ་རྣམས་དགོད་པར་བྱའོ། །བསམ་པ་བརྟན་པའི་ཕྱག་རྒྱ་སྟེ། གསང་སྔགས་ལ། ནམཿས་མནྟ་བུད་དྷཱ་ནཱཾ། བཛྲ་སཾ་བྷ་བ་སྭཱ་ཧཱ། བསམ་པ་བརྟན་པའི་ཕྱག་རྒྱ་དང་གསང་སྔགས་སོ། །ལག་པ་གཉིས་དེ་བཞིན་དུ་བྱ་བ་ནི་ནམ་མཁའི་སྙིང་པོའི་རལ་གྲིའི་

ཕྱག་རྒྱ་སྟེ། གསང་སྔགས་ལ། ནམཿས་མནྟ་བུད་དྷཱ་ནཱཾ། ག་ག་ན་ནཱནྟ་ཙ་ར་སྭཱ་ཧཱ། འཕགས་པ་ནམ་མཁའི་སྙིང་པོའི་ཕྱག་རྒྱ་དང་གསང་སྔགས་སོ། །འཁོར་ལོའི་ཕྱག་རྒྱ་སྔ་མ་བཞིན་དུ་བྱས་པ་ནི་ནམ་མཁའི་བློ་གྲོས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཙཀྲ་བརྟི་སྭཱ་ཧཱ། ནམ་མཁའི་བློ་གྲོས་ཀྱི་ཕྱག་རྒྱ་དང་གསང་སྔགས་སོ། །དུང་གི་ཕྱག་རྒྱ་སྔ་མ་བཞིན་དུ་བྱས་པ་ནི་རྣམ་པར་དག་པའི་བློ་གྲོས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། དྷརྨྨ་སཾ་བྷ་བ་སྭཱ་ཧཱ། རྣམ་པར་དག་པའི་བློ་གྲོས་ཀྱི་ཕྱག་རྒྱ་དང་གསང་སྔགས་སོ། །པདྨའི་ཕྱག་རྒྱ་སྔ་མ་བཞིན་དུ་བྱས་པ་ནི་སྤྱོད་པའི་བློ་གྲོས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། པདྨ་མཱ་ལཱ་ཡ་སྭཱ་ཧཱ། སྤྱོད་པའི་བློ་གྲོས་ཀྱི་ཕྱག་རྒྱ་དང་གསང་སྔགས་སོ། །ཨུཏྤ་ལའི་ཕྱག་རྒྱ་སྔ་མ་བཞིན་ལས་ཁ་མ་བྱེ་བར་བྱས་པ་ནི་ནམ་མཁའ་དྲི་མ་མེད་པའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཛྙཱ་ནོདྦྷ་བ་སྭཱ་ཧཱ། ནམ་མཁའ་དྲི་མ་མེད་པའི་ཕྱག་རྒྱ་དང་གསང་སྔགས་སོ། །རྡོ་རྗེ་སྔ་མ་བཞིན་དུ་བྱས་པ་ནི་བརྟན་པའི་བློ་གྲོས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། བཛྲ་ཀཱ་ར་སྭཱ་ཧཱ། བརྟན་པའི་བློ་གྲོས་ཀྱི་ཕྱག་རྒྱ་དང་གསང་སྔགས་སོ། །དེ་བཞིན་དུ་ལག་པ་གཉིས་གཅིག་ཏུ་སྦྱར་ཏེ། སྲིན་ལག་གཉིས་ནང་དུ་བཅུག་ལ་གུང་མོ་དང་། མཐེ་བོང་གཉིས་དང་། མཐེའུ་ཆུང་གཉིས་བསྒྲེང་སྟེ་མཛུབ་མོ་གཉིས་གུང་མོའི་ངོས་སུ་བཀུག་ལ་བར་ནས་གང་ཙམ་གྱིས་མ་རེག་པར་གཞག་གོ། །ཕྱག་ན་རྡོ་རྗེའི་ཕྱག་རྒྱ་སྟེ་རྡོ་རྗེའོ། །གསང་སྔགས་ལ། ན་མཿས་མནྟ་བཛྲཱ་ཎཱན། ཙཎྜ་མ་ཧཱ་རོ་ཥ་ཎ་ཧཱུྃ། རྡོ་རྗེ་འཛིན་གྱིའོ། །ཕྱག་རྒྱ་དེ་ཉིད་ལས་མཐེ་བོ་གཉིས་དང་མཐེའུ་ཆུང་གཉིས་ནང་དུ་གཞུག་གོ །མཱ་མ་ཀཱིའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཏྲི་ཊ་ཏྲི་ཊ་ཛ་ཡནྟི་སྭཱ་ཧཱ། མཱ་མ་ཀཱིའི་འོ། །དེ་བཞིན་དུ་ལག་པ་གཉིས་རྒྱབ་སྤྲད་ལ་སོར་མོ་རྣམས་ཕན་ཚུན་བསྣོལ་ཏེ་གཅུས་ལ་བསྡམས་ཏེ། གཡོན་པའི་མཐེ་བོས་གཡས་པའི་མཐེ་བོ་མནན་ལ་བསྡམ་མོ། །རྡོ་རྗེ་ལུ་གུ་རྒྱུད་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ།

ཧཱུྃ་བནྡྷ་བནྡྷ། མོ་ཊ་ཡ་མོ་ཊ་ཡ། བཛྲོདྦྷ་བེ། སརྦྦ་ཏྲ་པྲ་ཏི་ཧ་ཏེ་སྭཱ་ཧཱ། རྡོ་རྗེ་ལུ་གུ་རྒྱུད་ཀྱི་ཕྱག་རྒྱ་དང་གསང་སྔགས་སོ། །རྡོ་རྗེའི་ཕྱག་རྒྱ་དེ་ཉིད་ལས་མཐེ་བོ་གཉིས་ཅུང་ཟད་བཀུག་ལ་མཛུབ་མོ་གཉིས་ཀྱང་དེ་ལ་ཕྱོགས་པར་བྱའོ། །རྡོ་རྗེ་ཁྲོ་ཟླ་གཙོ་བོའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཧྲཱིཿཧཱུྃ་ཕཊ་སྭཱ་ཧཱ། ཁྲོ་ཟླ་གཙོ་བོའི་འོ། །དེ་བཞིན་དུ་ལག་པ་གཉིས་ཁུ་ཚུར་བཅངས་མཛུབ་མོ་གཉིས་གཤིབས་ཏེ་བསྒྲེང་ངོ་། །རྡོ་རྗེ་རྩེ་མོའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། སརྦྦ་དྷརྨྨ་ནི་ད་ན་བཛྲཱ་སཱུ་ཙི་བ་ར་དེ་སྭཱ་ཧཱ། རྡོ་རྗེ་རྩེ་མོའི་འོ། །དེ་བཞིན་དུ་ལག་པ་གཉིས་ཁུ་ཚུར་བཅངས་ལ་སྙིང་གར་གཞག་གོ། །རྡོ་རྗེ་ཁུ་ཚུར་གྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཊ་ཡ་བཛྲ་སཾ་བྷ་བེ་སྭཱ་ཧཱ། རྡོ་རྗེ་ཁུ་ཚུར་གྱིའོ། །ལག་པ་གཡོན་པ་ཁུ་ཚུར་བཅངས་པའི་མཛུབ་མོ་གྱེན་དུ་བསྒྲེང་སྟེ་ཁྲོས་པ་བཞིན་དུ་བསྡིགས་པར་བྱ་བ་ནི་གདུལ་དཀའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། དུར་དཱནྟ་མ་ཧཱ་རོ་ཥ་ཎ་ལཱ་ད་ཡ་སརྦྦན་ཀུ་རུ་ཏ་ཐཱ་ག་ཏ་ཨཱ་ཛྙཱ་ན་སྭཱ་ཧཱ། གདུལ་དཀའི་འོ། །ལག་པ་གཡས་པ་ཁུ་ཚུར་བཅངས་ལ་གདབ་པའི་ཐབས་སུ་བྱའོ། །མངོན་ཕྱོགས་ཀྱི་ཐོ་བའི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཧེ་ཨ་བྷི་མུ་ཁ་མ་ཧཱ་ཙཎྜ་གྲཱིཧྞ་ཁཱ་ད་ཡ་ཀིཉྩི་ར་ཡ་སི་ས་མ་ཡ་མ་ནུ་སྨ་ར་སྭཱ་ཧཱ། མངོན་ཕྱོགས་ཀྱིའོ། །སྔ་མ་བཞིན་ལྷུང་བཟེད་འཛིན་པའི་ཚུལ་དུ་བྱས་པ་ནི་ཤཱཀྱ་ཐུབ་པའི་ལྷུང་བཟེད་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། སརྦྦ་ཀླེ་ཤ་ནི་སཱུ་ད་ན་སརྦྦ་དྷརྨྨ་པ་ཤཱི་ཏ་པྲཱཔྟ་ག་ག་ན་ས་མ་སྭཱ་ཧཱ། ཤཱཀྱ་ཐུབ་པའི་འོ། །མཛོད་སྤུའི་ཕྱག་རྒྱ་ནི་སྔ་མ་བཞིན་ནོ། །ལག་པ་གཡས་པའི་སོར་མོ་ཀུན་རྩེ་མོ་སྦྱར་ཏེ་སྤྱི་བོའི་སྟེང་དུ་གཞག་གོ། །གཙུག་ཏོར་ཐམས་ཅད་ཀྱི་ཕྱག་རྒྱ་སྟེ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། བྃ་བྃ་ཧཱུྃ་ཧཱུྃ་ཕཊ་སྭཱ་ཧཱ། གཙུག་ཏོར་ཐམས་ཅད་ཀྱི་ཕྱག་རྒྱ་དང་གསང་སྔགས་སོ། །ལག་པ་གཡོན་པ་ཁུ་ཚུར་བཅངས་ལ་གུང་མོ་དང་མཛུབ་མོ་གཉིས་བརྐྱང་སྟེ། སྲིན་ལག་དང་མཐེའུ་ཆུང་གི་རྩེ་མོར་མཐེ་བོ་གཞག་ལ་གཡས་པའི་མཛུབ་མོ་དང་གུང་མོ་གཉིས་གཡོན་པའི་མཐིལ་དུ་གཞུག །

མཐེ་བོ་ཡང་སྔ་མ་བཞིན་དུ་བྱའོ། །མི་གཡོ་མགོན་གྱི་ཕྱག་རྒྱ་རལ་གྲི་ཤུབས་སུ་བཅུག་པའོ། །འཇིག་རྟེན་གསུམ་ལས་རྣམ་པར་རྒྱལ་བའི་ནི་རྡོ་རྗེ་སྟེ། སྔ་མ་བཞིན་ནོ། །དེ་བཞིན་དུ་ལག་པ་གཉིས་གཅིག་ཏུ་སྦྱར་ལ་སྲིན་ལག་དང་མཐེའུ་ཆུང་གཉིས་ནང་དུ་བཅུག་གོ། །གུང་མོ་གཉིས་གཤིབས་ཏེ་བསྒྲེང་ལ་མཛུབ་མོ་གཉིས་བཀུག་སྟེ། གུང་མོའི་ཚིགས་གསུམ་པར་གཞག །མཐེ་བོ་གཉིས་མིག་ལྟ་བུར་བྱ། སངས་རྒྱས་དང་བྱང་ཆུབ་སེམས་དཔའི་ཡུམ་གྱི་ཕྱག་རྒྱ་སྟེ་གཙུག་ཏོར་རོ། །ལག་པ་གཡོན་པ་བརྐྱང་སྟེ་ཁ་སྦུབ་སྟེ། ལག་པ་གཡས་པ་ཁུ་ཚུར་བཅངས་ལ་མཛུབ་མོས་གདུགས་ལྟ་བུར་གཟུང་ངོ་། །གདུགས་དཀར་པོའི་ཕྱག་རྒྱ་སྟེ། གདུགས་སོ། །ཁྃ། གཙུག་ཏོར་རྒྱལ་བའི་ནི་རལ་གྲི་སྟེ་སྔ་མ་བཞིན་ནོ། །ཤྃ། རྣམ་པར་རྒྱལ་བའི་འཁོར་ལོ་སྟེ་སྔ་མ་བཞིན་ནོ། །སིྃ། །རྣམ་པར་འཐོར་བའི་ལྕགས་ཀྱུ་སྟེ། ལག་པ་གཡས་པ་ཁུ་ཚུར་བཅངས་ལ་མཛུབ་མོ་བཀུག་སྟེ་གཞག་གོ །ཧཱུྃ། གཟི་བརྗིད་ཕུང་པོའི་ནི་གཙུག་ཏོར་ཏེ་སྔ་མ་བཞིན་ནོ། །གསང་སྔགས་ལ། ཏྲྀཾ། ཆེར་འབྱུང་བའི་ཕྱག་རྒྱ་ནི། །རྡོ་རྗེའི་ཕྱག་རྒྱ་ཞེས་སུ་གྲགས། ཨུྃ། གྱེན་དུ་འབྱུང་བའི་ཕྱག་རྒྱ་ནི། །པདྨ་བཟང་པོའི་སྔ་མ་བཞིན། །ཏུྃ། །མཐའ་ཡས་པ་ཡི་དབྱངས་སྒྲ་ནི། །དུང་ནི་ཡིན་པར་ངས་བཤད་དོ། །རུྃ། །ལག་པ་གཡས་པ་ཁུ་ཚུར་བཅངས་ལ་སྨིན་མཚམས་སུ་གཞག་པ་ནི་མཛོད་སྤུའི་ཕྱག་རྒྱ་ཡིད་བཞིན་གྱི་ནོར་བུའོ། །སྤྱན་གྱི་ནི་གཙུག་ཏོར་སྔ་མ་བཞིན་ཏེ། བྱེ་བྲག་ཏུ་རྡོ་རྗེས་མཚན་པའོ། ། ག། ལག་པ་གཡས་པ་པདྨ་འཛིན་པའི་ཐབས་སུ་སྙིང་གར་གཞག་ལ། ལག་པ་གཡོན་པ་ཐལ་མོ་བསྣུན་པའི་ཚུལ་དུ་བརྐྱང་པ་ནི་གཞན་གྱིས་མི་ཐུབ་པའི་ཕྱག་རྒྱའོ། །གསང་སྔགས་ནི། དྷིཾ་དྷིཾ་རིཾ་རིཾ་ཛི་རི་ཛི་རི། ལག་པ་གཉིས་ཁུ་ཚུར་བཅངས་ལ་མཐེ་བོ་གཉིས་གྱེན་དུ་བསྒྲེང་བ་ལས་དགུག་གོ། །གཞན་གྱིས་མི་ཐུབ་པ་ཞེས་བྱ་བའི་ཁའི་ཕྱག་རྒྱའོ། །ཨ་པ་ར་ཛི་ཏ་ཛ་ཡནྟི་ཊི་ཏེ་སྭཱ་ཧཱ། ལག་པ་གཡས་པ་འགྲམ་པར་བསྟན་པ་ནི་དབང་ཕྱུག་གི་ཕྱག་རྒྱའོ། །ཕྱག་རྒྱ་དེ་ཉིད་ལས་གུང་མོ་དང་མཛུབ་མོ་གཉིས་གཅུས་པ་ལྟ་བུར་གཟུང་ངོ་། །ཀུན་ཏུ་མེ་ཏོག་གི་ཕྱག་རྒྱའོ། །ཕྱག་

རྒྱ་དེ་ཉིད་ལས་མཐེ་བོ་ནང་དུ་གཞུག་གོ། །འོད་ཀྱི་ཕྲེང་བ་ཅན་གྱི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་དང་མཐེའུ་ཆུང་གཉིས་མེ་ཏོག་འཛིན་པ་ལྟ་བུར་བྱའོ། །ཡིད་མགྱོགས་ཀྱི་ཕྱག་རྒྱའོ། །ལག་པ་གཡས་པའི་སྲིན་ལག་གི་སྟེང་དུ་མཐེ་བོ་གཞག་ལ། མཛུབ་མོ་དང་གུང་མོ་དང་མཐེའུ་ཆུང་གསུམ་བརྐྱང་སྟེ་རྣ་བའི་སྟེང་དུ་གཞག་གོ། །ལག་པ་གཡོན་པ་ཡང་དེ་བཞིན་དུ་བྱ། སྒྲ་རྣམ་པར་སྒྲོགས་པའི་ཕྱག་རྒྱའོ། །ལག་པ་གཉིས་གཅིག་ཏུ་སྦྱར་ལ། མཐེ་བོ་གཉིས་རྩེ་སྤྲད་དེ་ཟླུམ་པོ་བྱ། སོར་མོ་ལྷག་མ་རྣམས་ཀྱི་རྩེ་མོ་དགུག་པ་ནི་བུམ་པའི་ཕྱག་རྒྱའོ། །དེ་བཞིན་དུ་ལག་པ་གཡས་པ་མི་འཇིགས་པ་སྦྱིན་པའི་ཚུལ་དུ་བྱས་ལ་མཐེ་བོ་ནང་དུ་གཞག་པ་ནི་མི་གཉེར་བའི་ཕྱག་རྒྱའོ། །ལག་པ་དེ་ཉིད་མི་འཇིགས་པ་སྦྱིན་པ་ལྟ་བུར་བྱས་ལ་མཐེའུ་ཆུང་གི་ཚིགས་གཉིས་པར་གཞག་གོ། །དྲང་སྲོང་རྣམས་ཀྱི་སྤྱིའི་ཕྱག་རྒྱ་སྟེ། གོ་རིམས་ནི་ཅི་ལྟར་རིགས་པར་བྱའོ། །དེ་བཞིན་དུ་ལག་པ་གཉིས་གཅིག་ཏུ་སྦྱར་ལ་མཛུབ་མོ་དང་མཐེའུ་ཆུང་གཉིས་ནང་དུ་བཅུག་སྟེ། ལྷག་མ་རྣམས་གཅིག་ཏུ་བསྡུས་ལ་བསྟོད་དེ་གཟུང་བ་ནི་གཤིན་རྗེའི་བེ་ཅོན་གྱི་ཕྱག་རྒྱའོ། །ལག་པ་གཡས་པ་ཁ་བུབ་སྟེ། དྲིལ་བུ་འདྲ་བར་བྱས་པ་ནི་འཆི་བདག་གི་ཕྱག་རྒྱ་སྟེ་དྲིལ་བུའོ། །དེ་བཞིན་དུ་ལག་པ་གཡོན་ཁུ་ཚུར་བཅངས་ལ། མཛུབ་མོ་དང་གུང་མོ་གཉིས་བསྒྲེང་བ་ནི་དུས་མཚན་མོའི་ཕྱག་རྒྱའོ། །ཕྱག་རྒྱ་དེ་ཉིད་ལས་གུང་མོ་གྱེན་དུ་བསྒྲེང་བ་ནི་དྲག་མོའི་ཕྱག་རྒྱ་སྟེ་ཏྲི་ཤཱུ་ལའོ། །ཕྱག་རྒྱ་དེ་ཉིད་ལས་པདྨ་འཛིན་པའི་ཚུལ་དུ་བྱས་པ་ནི་ཚངས་པའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་གུང་མོའི་རྒྱབ་ཀྱི་ཚིགས་གསུམ་པོར་སྤྲད་པ་ནི་གཞོན་ནུ་མའི་མདུང་ཐུང་གི་ཕྱག་རྒྱའོ། །ཕྱག་རྒྱ་དེ་ཉིད་ལས་མཛུབ་མོ་མཐེ་བོའི་རྩེ་མོར་གཞག་གོ། །ཁྱབ་འཇུག་མའི་འཁོར་ལོའི་ཕྱག་རྒྱའོ། །ཕྱག་རྒྱ་དེ་ཉིད་ལས་མཐེ་བོ་གྱེན་དུ་བསྒྲེང་ངོ་། །ཕག་མོའི་ཕྱག་རྒྱ་སྟེ་ཐོ་བའོ། །ཕྱག་རྒྱ་དེ་ཉིད་ལས་ལག་པ་སྣོད་ལྟ་བུར་བྱའོ། །ཙ་མུཎྜིའི་ཕྱག་རྒྱ་སྟེ་ཐོད་པའོ། །བདེན་བྲལ་གྱི་ཕྱག་རྒྱ་རལ་གྲི་ནི་སྔ་མ་བཞིན་ནོ། །ཁྱབ་འཇུག་གི་ཕྱག་རྒྱ་འཁོར་ལོ་ཡང་སྔ་མ་བཞིན་ནོ། །དེ་བཞིན་དུ་ལག་པ་

གཉིས་གཡོན་ཕྱོགས་ནས་བསྟོད་དེ་བསྐོར་བ་ནི་དགའ་བོ་དང་བསྙེན་དགའ་བོའི་སྤྲིན་གྱི་ཕྱག་རྒྱའོ། །ཕྱག་རྒྱ་དེ་ཉིད་ལས་སོར་མོ་གསུམ་གྱེན་དུ་བསྒྲེང་བ་ནི་བདེ་བྱེད་ཀྱི་མདུང་རྩེ་གསུམ་པའི་ཕྱག་རྒྱའོ། །ཕྱག་རྒྱ་དེ་ཉིད་ལས་སོར་མོ་དེ་དག་དྲང་པོར་བྱས་པ་ནི་ཨུ་མ་པ་ཏི་སྱའི་ཕྱག་རྒྱའོ། ། ཟླ་བའི་ཕྱག་རྒྱ་ནི་པདྨ་སྔ་མ་བཞིན་ཏེ། ཁྱད་པར་དུ་དཀར་པོ་བྱའོ། །ལག་པ་དེ་ཉིད་གཉིས་ཀ་གཤིབས་ཏེ་བཀན་ལ་མཛུབ་མོ་དང་སྲིན་ལག་གཉིས་ངོས་སུ་དགུག་གོ། །ཉི་མའི་ཕྱག་རྒྱ་སྟེ་ཤིང་རྟའོ། །ལག་པ་དེ་གཉིས་ཀ་གཅིག་ཏུ་ཐལ་མོ་སྦྱར་ལ་གུང་མོ་དང་། སྲིན་ལག་གཉིས་གཞུ་འདྲ་བར་བྱའོ། །རྒྱལ་བ་དང་རྣམ་པར་རྒྱལ་བའི་ཕྱག་རྒྱའོ། །བ་དན་གྱི་ཕྱག་རྒྱ་ནི་སྔ་མ་བཞིན་ཏེ་རླུང་གིའོ། །དེ་བཞིན་དུ་ལག་པ་གཡོན་པ་ལྟེ་བའི་ཕྱོགས་སུ་བཀན་ལ་སོར་མོ་གཉིས་བསྒྲེང་སྟེ་གཟུང་ངོ་། །ལག་པ་གཡས་པ་དེ་ལ་ཕྱོགས་པར་བྱས་ཏེ། པི་བང་ལེན་པ་ལྟ་བུར་བྱས་པ་ནི་དབྱངས་ཅན་གྱི་ཕྱག་རྒྱ་སྟེ་པི་བང་ངོ་། །ཆུ་ལྷའི་ཕྱག་རྒྱ་ནི་ཞགས་པ་སྟེ་སྔ་མ་བཞིན་ནོ། །དབྱངས་ཅན་གྱི་ཕྱག་རྒྱ་སྟེ་དེ་ཉིད་ལས་མཛུབ་མོ་དགུག་གོ། །ལྷ་མ་ཡིན་རྣམས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ག་ར་ལ་ཡཾ་སྭཱ་ཧཱ། ཕྱག་རྒྱ་དེ་ཉིད་ལས་སྲིན་ལག་བརྐྱང་ངོ་། །དྲི་ཟའི་ཕྱག་རྒྱ་སྟེ་གསང་སྔགས་ལ། བི་ཤུདྡྷ་སྭ་ར་བ་ཧི་ནེ་སྭཱ་ཧཱ།ཕྱག་རྒྱ་དེ་ཉིད་ལས་མཛུབ་མོ་དགུག་གོ། །གནོད་སྦྱིན་ཐམས་ཅད་ཀྱི་ཕྱག་རྒྱ་སྟེ། གསང་སྔགས་ལ། ཡཀྵེ་ཤྭ་ར་སྭཱ་ཧཱ། ཕྱག་རྒྱ་དེ་ཉིད་ལས་མཐེ་བོ་དང་མཐེའུ་ཆུང་གཉིས་རྩེ་མོ་སྦྱར་རོ། །གནོད་སྦྱིན་མ་རྣམས་ཀྱི་ཕྱག་རྒྱ་སྟེ། གསང་སྔགས་ལ། ཡཀྵ་བིདྱཱ་དྷཱ་རཱི་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་བརྐྱང་ངོ་། །ཤ་ཟ་རྣམས་ཀྱི་ཕྱག་རྒྱ་སྟེ། གསང་སྔགས་ལ། པི་ཤཱ་ཙེ་ག་ཏི་སྭཱ་ཧཱ། གུང་མོ་དེ་ཉིད་བཀུག་ལ་གཟུང་ངོ་། །ཤ་ཟ་མོ་རྣམས་ཀྱི་ཕྱག་རྒྱ་སྟེ། གསང་སྔགས་ལ། མི་ཙི་མི་ཙི་སྭཱ་ཧཱ། དེ་བཞིན་དུ་ལག་པ་གཉིས་གཅིག་ཏུ་སྦྱར་ལ་མཐེ་བོ་གཉིས་གྱེན་དུ་བསྒྲེང་སྟེ་གཟུང་ངོ་། །གཟའ་ཐམས་ཅད་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། གྲ་ཧེ་ཤྭརྱ་པྲཱཔྟ་ཛྱོ་ཏིར་མ་ཡ་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་དང་མཐེ་བོ་

གཉིས་བཟློག་སྟེ་སྦྱར་རོ། །རྒྱུ་སྐར་ཐམས་ཅད་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ནཀྵ་དྲ་ནི་ར་ནཱ་ད་ནཱི་ཡེ་སྭཱ་ཧཱ། ཕྱག་རྒྱ་དེ་ཉིད་ལས་སྲིན་ལག་གཉིས་བཀུག་སྟེ་ལག་མཐིལ་དུ་གཞག་གོ། །གསང་སྔགས་ལ། ན་མཿས་མནྟ་བུད་དྷཱ་ནཱཾ། རཱཀྴ་སཱ་དྷི་པ་ཏ་ཡེ་སྭཱ་ཧཱ། སྲིན་པོ་རྣམས་ཀྱི་ཕྱག་རྒྱ་དང་གསང་སྔགས་སོ། །ལག་པ་གཡས་པ་ཁར་གཞག་སྟེ་ལྕེ་ལ་རེག་པར་བྱའོ། །མཁའ་འགྲོ་མ་རྣམས་ཀྱི་ཕྱག་རྒྱ་སྟེ། གསང་སྔགས་ལ། ན་མཿས་མནྟ་བུད་དྷཱ་ནཱཾ། ཧྲཱིཿཧ། གསང་བ་པའི་བདག་པོ་དེ་ལྟ་བུ་ལ་སོགས་པ་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མོས་པ་ལས་བྱུང་བ། བྱང་ཆུབ་སེམས་དཔའི་མཚན་མར་གྱུར་པའི་ཕྱག་རྒྱ་རབ་འབྱམ་རྣམས་ཏེ། གསང་བ་པའི་བདག་པོ་འོན་ཀྱང་ཅི་ཙམ་དུ་ཡན་ལག་བསྐྱོད་པ་དེ་དག་ཀུན་ཕྱག་རྒྱ་རྒྱས་པར་རིག་པར་བྱའོ། །ཅི་ཙམ་དུ་ལྕེ་བསྐྱོད་པ་དེ་དག་ཀུན་ཀྱང་གསང་སྔགས་བསྟན་པར་རིག་པར་བྱའོ། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་བྱང་ཆུབ་ཀྱི་སེམས་དང་ལྡན་པའི་ཡིད་ཀྱིས་དེ་བཞིན་གཤེགས་པའི་ས་ལ་གནས་ཏེ་དཀྱིལ་འཁོར་བྲི་བར་བྱའོ། །གཞན་དུ་བྱས་ན་སངས་རྒྱས་དང་བྱང་ཆུབ་སེམས་དཔའ་རྣམས་དང་། བྱང་ཆུབ་ཀྱང་བསླུས་པར་འགྱུར་ཏེ། དམ་ཚིག་ལས་འདས་པས་ངེས་པར་ངན་སོང་དུ་འགྲོ་བར་འགྱུར་རོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཕྱག་རྒྱ་རིམ་པར་ཕྱེ་བ་རྒྱས་པའོ།། །།དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་ཐམས་ཅད་དུ་འཇུག་པའི་སྒོའི་ཆོས་ཀྱི་རྣམ་གྲངས་ཉོན་ཅིག །གསང་བ་པའི་བདག་པོ་དེ་ལ་བྱང་ཆུབ་སེམས་དཔས་ཨ་ཞེས་བྱ་བ་ལ་གནས་ཏེ། དགོས་པ་ཐམས་ཅད་བསྒྲུབ་པར་བྱའོ། །ན་མཿས་མནྟ་བུད་དྷཱ་ནཱཾ། ཨ། ན་མཿས་མནྟ་བུདྷཱ་ཎཱཾ། ས། ན་མཿས་མནྟ་བཛྲ་ཎཱཾ། བ། ཀ་ཁ་ག་གྷ། ཙ་ཚ་ཛ་ཛྷ། ཊ་ཋ་ཌ་ཌྷ། ཏ་ཐ་ད་དྷ། པ་ཕ་བ་བྷ་མ།

ཡ་ར་ལ་ཝ། ཤ་ཥ་ས་ཧ། ང་ཉ་ཎ་ན། ན་མཿས་མནྟ་བུད་དྷཱ་ནཱཾ།ཨ། ན་མཿས་མནྟ་བུད་དྷཱ་ནཱཾ། སཱ། ན་མཿས་མནྟ་བཛྲཱ་ཎཱཾ། བཱ། ཀཱ་ཁཱ་གཱ་གྷཱ། ཙཱ་ཚཱ་ཛཱ་ཛྷཱ། ཊཱ་ཋཱ་ཌཱ་ཌྷཱ། ཏཱ་ཐཱ་དཱ་དྷཱ། པཱ་ཕཱ་བཱ་བྷཱ་མཱ། ཡཱ་རཱ་ལཱ་ཝཱ། ཤཱ་ཥཱ་སཱ་ཧཱ། དཱ་ཉཱ་ཎཱ་ནཱ། ན་མཿས་མནྟ་བུད་དྷཱ་ནཱཾ། ཨྃ། ན་མཿ ས་མནྟ་བུད་དྷཱ་ནཱཾ། སྃ། ན་མཿས་མནྟ་བཛྲཱ་ཎཱཾ། པྃ། ཀྃ་ཁྃ་གྃ་གྷྃ། ཙྃ་ཚྃ་ཛྃ་ཛྷྃ། ཊྃ་ཋྃ་ཌྃ་ཌྷྃ། ཏྃ་ཐྃ་དྃ་དྷྃ། པྃ་ཕྃ་བྃ་བྷྃ་མྃ། ཡྃ་རྃ་ལྃ་ཝྃ། ཤྃ་ཥྃ་སྃ་ཧྃ། ངྃ་ཉྃ་ཎྃ་ནྃ། ན་མཿས་མནྟ་བུད་དྷཱ་ནཱཾ། ཨཿ། ན་མཿས་མནྟ་བུད་དྷཱ་ནཱཾ། སཿ། ན་མཿས་མནྟ་བཛྲཱ་ཎཱཾ། བཿ། ཀ་ཁ་ག་གྷ། ཙ་ཚ་ཛ་ཛྷ། ཊ་ཋ་ཌ་ཌྷ། ཏ་ཐ་ད་དྷ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ང་ཉ་ཎ་ན། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། གསང་བ་པའི་བདག་པོ་དེ་ལྟར་ན་འདི་ནི་ཡི་གེའི་ཚུལ་ལ་མཁས་པའི་ཆོས་ཀྱི་རྣམ་གྲངས་ཏེ། གསང་སྔགས་ཀྱི་ཚུལ་ལ་རྣམ་པར་གནས་པའི་ཆོ་ག །ལྷ་ཡོངས་སུ་གཟུང་བའི་ཆོ་ག དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་དུ་བརླབས་པ། ཡང་དག་པར་རྫོགས་པའི་སངས་རྒྱས་ཀྱི་ཚུལ་ལ་མཁས་པ། བྱང་ཆུབ་སེམས་དཔའི་སྤྱད་པ་སྤྱོད་པའི་རོལ་མོ་སྟེ། འདས་པ་དང་ད་ལྟར་དང་མ་འོངས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བཤད་འཆད་འཆད་པར་འགྱུར་རོ། །གསང་བ་པའི་བདག་པོ་ངས་ནི་སངས་རྒྱས་ཀྱི་ཞིང་རབ་འབྱམ་གང་དག་ན། དེ་བཞིན་གཤེགས་པ་རྣམ་པ་ཐམས་ཅད་དུ་འཇུག་པའི་སྒོ་ཆོས་ཀྱི་རྣམ་གྲངས་འདི་མི་འཆད་པ་མ་མཐོང་ངོ་། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས། གསང་སྔགས་ཀྱི་ཆོ་ག་ཤེས་པར་འདོད་ན་ཐམས་ཅད་དུ་འཇུག་པའི་སྒོ་ཆོས་ཀྱི་རྣམ་གྲངས་ལ་མངོན་པར་བརྩོན་པར་བྱའོ། །ཀ་དང་ཙ་དང་ཊ་དང་ཏ་དང་པ་རྣམས་ཐོག་མ་དང་ཐ་མ་དང་། དབུས་དང་ལྡན་ན་ཏིང་ངེ་འཛིན་གྱི་ཚོགས་ལ་འཇུག་པས་བྱང་ཆུབ་དང་སྤྱོད་པ་དང་། ཡང་དག་པར་རྫོགས་པའི་སངས་རྒྱས་མྱ་ངན་ལས་འདས་པ་དང་བཅས་པར་ཐོབ་པར་བྱེད་དོ། །དེ་བས་ན་གསང་སྔགས་ཀྱི་ཆོ་ག་ལ་དང་པོ་ལ་སོགས་པའི་ཐ་སྙད་དང་

ལྡན་པར་གྱུར་པ་དེ་དག་ཉིད་ཐོག་མ་དང་ཐ་མ་དང་དབུས་དང་ལྷན་ཅིག་ཏུ་གྱུར་པར་ཤེས་པར་བྱ་སྟེ། གསང་སྔགས་ཀྱི་ཚིག་རེ་རེ་ལ་ཅི་ལྟར་འདོད་པར་ངེས་པར་སྦྱར་བར་བྱའོ། །བློ་ཡིས་རྣམ་པར་རྟོགས་ན་ནི། །དེ་དག་བླ་མེད་གནས་མཆོག་སྟེ། །དེ་ལྟར་འདི་ནི་འཁོར་ལོ་གཅིག་སྟེ་འཁོར་ལོ་བཞིན་དུ་ཡོངས་སུ་འཁོར་བ་ནི་ཡི་གེའི་འཁོར་ལོའོ། །སྔགས་པས་ཡི་གེའི་འཁོར་ལོ་དེ་ཤེས་ན་རྟག་ཏུ་ཅི་ལྟར་བཅོམ་ལྡན་འདས་རྣམ་པར་སྣང་མཛད་འཁོར་ལོ་བསྐོར་བ་བཞིན་དུ་རྣམ་པར་མཛེས་པར་འགྱུར་རོ། །རྣམ་པ་ཐམས་ཅད་དུ་འཇུག་པའི་སྒོ་ཆོས་ཀྱི་ཡི་གེའི་ཚུལ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ཀྱིས་དེ་བཞིན་གཤེགས་པའི་སྤྱན་གྱིས་སེམས་ཅན་གྱི་ཁམས་ཐམས་ཅད་ལ་གཟིགས་ནས། ཆོས་ཀྱི་དབྱིངས་མི་ཟད་པ་བཀོད་པ་བསྟན་པ་དང་གསང་སྔགས་ཀྱི་སྤྱད་པ་མངོན་པར་བསྒྲུབ་པ་འདི་ཉིད་ཀྱིས་སེམས་ཅན་རྣམས་མ་ལུས་པ་གདོན་པར་ཐུགས་དམ་བཅས་པ་ཡོངས་སུ་རྫོགས་པར་བྱ་བའི་ཕྱིར་ཆོས་ཀྱི་དབྱིངས་ཀྱི་མཛོད་ཀྱི་མཐུ་རླབས། དེ་བཞིན་གཤེགས་པའི་མཉམ་པ་ཉིད་བཀོད་པའི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་ནས་དེ་ཉིད་ཀྱི་ཚེ་སེམས་ཅན་གྱི་ཁམས་མ་ལུས་པ་ངེས་པར་འབྱུང་བར་བྱེད་པའི་སྒོ་བ་སྤུའི་བུ་ག་ཐམས་ཅད་ནས་བསམ་པ་ཇི་ལྟ་བ་བཞིན་ལས་དང་ཚེ་དང་རྣམ་པར་སྨིན་པའི་འབྲས་བུ་ཟ་བ་དང་། ཟར་འཇུག་པའི་གཟུགས་དང་། ཁ་དོག་དང་། དབྱིབས་དང་། ང་རོ་དང་། འགྲོ་བ་དང་། སྤྱོད་པ་དང་། ངེས་པའི་ཚིག་བརྗོད་པ་སེམས་ཅན་ཐམས་ཅད་སོ་སོ་སོ་སོར་ཡང་དག་པར་མགུ་བར་བྱེད་པ། ཆོས་ཀྱི་དབྱིངས་ཀྱིས་རྣམ་པར་བསྐྱེད་པའི་སྐུ་རྣམས་བྱུང་བར་གྱུར་ཏོ། །བྱུང་ནས་ཀྱང་ནམ་མཁའ་དང་མཉམ་པའི་འཇིག་རྟེན་གྱི་ཁམས་རབ་འབྱམ་རྣམས་སུ་སྒྲ་དབྱངས་གཅིག་གིས་ཆོས་ཀྱི་དབྱིངས་ཁྱབ་པར་རྣམ་པར་རིག་པར་བྱེད་པ། དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་འདི་སྒྲོགས་པར་གྱུར་ཏོ། །ཆོས་ཀྱི་མཚན་ཉིད་གང་ལས་ནི། །ཆོས་རྣམས་དག་ནི་ཐམས་ཅད་དང་།

སངས་རྒྱས་རྣམས་དང་ཉན་ཐོས་དང་། །རང་རྒྱལ་སྐྱོབ་པ་རྣམས་དང་ནི། །བྱང་ཆུབ་སེམས་དཔའ་དཔའ་བོ་དང་། །དེ་བཞིན་རྒྱལ་བ་མཆོག་རྣམས་དང་། །སེམས་ཅན་སྣོད་ཀྱི་འཇིག་རྟེན་དག །བཏགས་པ་རིམ་པ་བཞིན་འབྱུང་ཞིང་། །ཆོས་རྣམས་སྐྱེ་དང་གནས་པ་དག །གང་ལས་རྟག་ཏུ་འབྱུང་འགྱུར་བ། །ཤེས་རབ་ཐབས་དང་ལྡན་འགྱུར་ཞིང་། །ཡིད་གཉིས་སོམ་ཉི་དང་བྲལ་བ། །རྫོགས་སངས་རྒྱས་ཀྱིས་རབ་བཤད་པའི། །ལམ་འདི་ཁྱེད་ཀྱིས་བསྒོམ་པར་གྱིས། །དེ་ནས་དེ་བཞིན་གཤེགས་པའི་སྐུ་ཆོས་ཀྱི་དབྱིངས་ལས་བྱུང་བ་དེ་དག་གིས་ཆོས་ཀྱི་དབྱིངས་ཐམས་ཅད་རང་གི་སྐུ་རྣམ་པར་རིག་པར་བྱེད་པ། སྤྲུལ་པའི་སྤྲིན་གྱིས་ཡོངས་སུ་བཀང་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀྱི་དབང་ཙམ་གྱིས་བ་སྤུའི་བུ་ག་ཐམས་ཅད་ནས་སངས་རྒྱས་འབྱུང་བ་གཅིག་ནས་གཅིག་ཏུ་བརྒྱུད་པ་བྱིན་གྱིས་བརླབས་ཏེ། རང་རང་གི་ཆོས་ཀྱི་དབྱིངས་ཀྱི་གནས་སུ་ཞུགས་པར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་བའི་དཀྱིལ་འཁོར་རྣམ་པར་དགོད་པ་ལྷ་རྣམས་ཀྱི་གནས་ཡང་དག་པར་གནས་པར་བསམ་པ་ས་བོན་དང་བཅས་པས་མཚན་པ་ཡོད་ཀྱིས། དེ་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ཕྱག་ན་རྡོ་རྗེ་བཅོམ་ལྡན་འདས་ལ་ཉན་ཏོ། །བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་པ། དང་པོར་སྔགས་པས་དཀྱིལ་འཁོར་དེ། །རང་གི་ལུས་ལ་དགོད་བྱས་ཏེ། །རྐང་པ་ནས་ནི་ཆུ་སོ་ལ། །ཐུག་གི་བར་དུ་ས་ཡིར་བསམ། །དེ་ནས་གྲོང་དུ་སྙིང་གའི་བར། །སྡོམ་བརྩོན་ཅན་གྱིས་ཆུ་ཡིར་བསམ། །ཆུ་ཡི་ཡན་ཅད་མེ་ཡི་སྟེ། །མེ་ཡི་ཡན་ཅད་རླུང་ཡིན་ནོ། །བསམས་ནས་དེ་ནས་མཁས་པ་ཡིས། །ས་ལ་གཟུགས་བརྙན་གཞག་པར་བྱ། །དེ་ནས་ཕྱག་ན་རྡོ་རྗེ་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དང་གསུང་དང་ཐུགས་ཀྱི་ས་ལ་ཞུགས་ནས་ཆོས་མཉམ་པ་ཉིད་ལ་བལྟས་ཏེ། མ་འོངས་པའི་

སྐྱེ་བོ་རྣམས་ལ་བརྟགས་ནས་རིག་སྔགས་ཀྱི་རྒྱལ་པོ་ཐེ་ཙོམ་ཐམས་ཅད་གཅོད་པར་བྱེད་པ་འདི་སྨྲས་སོ། །ན་མཿས་མནྟ་བུད་དྷཱ་ནཱཾ། ཨ་ས་མ་པ་ཏི་དྷརྨྨ་དྷཱ་ཏུ་ཀཱ་རྱ་ག་ཏི་ག་ཏཱ་ནཱཾ། སརྦྦ་ཐཱ། ཨྃ་ཁྃ་ཨྃ་ཨ། སྃ་ས་ཧྃ་ཧ། རྃ་ར་བྃ་བ་སྭཱ་ཧཱ། ཧཱུྃ་མ་ཧཱ་སྭཱ་ཧཱ། རྃ་ར་སྭཱ་ཧཱ། གསང་བ་པའི་བདག་པོ་ཕྱག་ན་རྡོ་རྗེས་གསང་སྔགས་ཀྱི་རྒྱལ་པོ་ཆེན་པོ་འདི་སྨྲས་མ་ཐག་ཏུ་དེ་ནས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱི་ཕྱག་གཡས་པ་བརྐྱང་སྟེ་ཕྱག་ན་རྡོ་རྗེའི་སྤྱི་བོར་བཞག་ནས་ལེགས་སོ་ཞེས་བྱ་བ་བྱིན་ཏེ། འདི་སྐད་ཅེས་གསུངས་སོ། ། རིགས་ཀྱི་བུ་གང་ཁྱོད་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དང་གསུང་དང་ཐུགས་ཀྱི་ས་ལ་ཞུགས་ནས། ཐམས་ཅད་དུ་གསང་སྔགས་ཀྱི་ཚུལ་ལ་མཉམ་པ་ཉིད་དུ་གནས་པའི་བྱང་ཆུབ་སེམས་དཔའ་རྣམས་ལ་སྣང་བར་བྱ་བར་འདོད་པའི་ཕྱིར། གསང་སྔགས་ཀྱི་རྒྱལ་པོ་འདི་སྨྲས་པ་ལེགས་སོ་ལེགས་སོ། །དེ་ཅིའི་ཕྱིར་ཞེ་ན། བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཀྱི་སྙིང་པོ་ལ་བཞུགས་ཏེ། ཚིག་བཅུ་གཉིས་པོ་འདི་དག་གིས་ཆོས་ཀྱི་དབྱིངས་རྣམ་པར་དཔྱད་ཅིང་བདུད་བཞི་ཕམ་པར་བྱས་ནས་ཆོས་ཀྱི་དབྱིངས་ནས་བྱུང་བ་འདི་དག་གནས་གསུམ་ནས་བྱུང་སྟེ། བདུད་སྡིག་ཅན་རྣམས་བཏུལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་སྐུ་དང་གསུང་དང་ཐུགས་མཉམ་པ་ཉིད་བརྙེས་ནས་ནམ་མཁའ་ཚད་མེད་པའི་ཕྱིར་སྐུ་ཚད་མེད་པ་བརྙེས་པར་གྱུར། དེ་བཞིན་དུ་གསུང་དང་ཐུགས་ཚད་མེད་པ་ཡང་བརྙེས་པར་གྱུར་ཏོ། །དེ་ལྟར་ཡེ་ཤེས་ཚད་མེད་པ་དང་ལྡན་ཞིང་། ཆོས་ཐམས་ཅད་ལ་དབང་ཐོབ་པས་འདི་ལྟར་གསང་སྔགས་ཀྱི་རྒྱལ་པོ་ཚིག་བཅུ་གཉིས་པོ་འདི་དག་ཉིད་ལས་བརྩམས་ཏེ། ཆོས་འཆད་དོ། །རིགས་ཀྱི་བུ་ཁྱོད་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དང་གསུང་དང་ཐུགས་མཉམ་པ་ཉིད་ལ་ཞུགས་པས་ན་རྫོགས་པའི་སངས་རྒྱས་བཞིན་དུ་སྣང་ངོ་། །ཐམས་ཅད་མཁྱེན་པ་རྫོགས་སངས་རྒྱས། །བཅོམ་ལྡན་རྣམ་པར་སྣང་མཛད་ལ། །སྔགས་སྤྱད་ཚིག་མཆོག་ཞུས་ཤིག་དང་། །ཆོ་ག་

རྒྱས་པ་བཀའ་སྩལ་ཏོ། །ངེད་ཀྱང་སྔོན་ནི་འདི་རྣམས་ཀྱིས། །བླ་མེད་བྱང་ཆུབ་རྟོགས་ནས་སུ། །མྱ་ངན་འདས་ལམ་འགྲོ་བ་ཡི། །མཉམ་པ་མེད་པའི་ཆོས་བཤད་པ། །འཇིག་རྟེན་ཁམས་ན་བཞུགས་པ་ཡི། །རྫོགས་སངས་རྒྱས་རྣམས་དཔང་དུ་གྱུར། །དེ་ནས་དཔལ་ལྡན་རྡོ་རྗེ་འཛིན། །བསམ་པ་མཆོག་རབ་མགུ་གྱུར་པ། །རྫོགས་སངས་རྒྱས་ཀྱིས་བྱིན་བརླབས་པས། །འདི་སྐད་ཅེས་ནི་ཚིག་སྨྲས་པ། །ཆོས་འདི་རྣམས་ནི་མཚན་ཉིད་མེད། །ངོ་བོ་ཉིད་མེད་གནས་མེད་པ། །ལས་དང་ཚེ་ལས་རྣམ་པར་གྲོལ། །རྫོགས་པའི་སངས་རྒྱས་འདྲ་བར་འདོད། །ཐུགས་རྗེས་མངའ་ནི་མཛད་པ་ཡི། །མགོན་པོ་རྣམས་ཀྱི་ཐབས་ཀྱིས་ནི། །རྣམ་པར་སྤྲུལ་ནས་ཆོས་རྣམས་ཀྱི། །མཚན་ཉིད་འདི་དག་རྟོགས་པར་འགྱུར། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་ཆེད་དུ་བརྗོད་པའི་ཚིགས་སུ་བཅད་པ་དེ་སྨྲས་ནས། མ་འོངས་པའི་འགྲོ་བ་རྣམས་ལ་བལྟས་ཏེ། སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་ཆེན་པོ་འདིའི་ཐེ་ཙོམ་གཅད་པའི་ཕྱིར་བཅོམ་ལྡན་འདས་རྣམ་པར་སྣང་མཛད་ལ་ཞུས་པ། སེམས་ཅན་ཀུན་གྱི་དོན་གྱི་ཕྱིར། །ཀུན་མཁྱེན་སྙུན་དང་བྲལ་བའོ། །ཐེ་ཙོམ་ཐམས་ཅད་གཅོད་མཛད་པ། །འདྲེན་པ་ཁྱེད་ལ་ཞུ་བ་ནི། །དཀྱིལ་འཁོར་གྱི་ནི་སྔོན་རོལ་དུ། །ཅི་ཞིག་བགྱི་བ་འདྲེན་པས་གསུངས། །ཐུབ་པ་ཆེན་པོ་སློབ་དཔོན་དང་། །སློབ་མའང་རྣམ་པ་དུ་རུ་བཤད། །ས་གཞི་ཅི་འདྲར་འཚལ་བར་བགྱི། །དེ་ཡང་ཅི་ལྟར་སྦྱང་བར་བགྱི། །ཅི་ལྟར་ས་ནི་དག་པར་འགྱུར། །ཅི་ལྟར་དེ་ནི་བརྟན་པ་ལགས། །སློབ་མའི་དགོས་པ་གང་གིས་བགྱི། །སྦྱང་བའང་འདྲེན་པས་བཀའ་སྩོལ་ཅིག །དག་པའི་མཚན་མ་ཅི་འདྲ་དང་། །གང་གིས་དེ་དག་བསྲུང་བར་བགྱི། །ས་ནི་གང་གིས་བྱིན་གྱིས་བརླབ། །དེར་ནི་དང་པོ་གང་གིས་བརྟག །ས་ཡི་ཆ་ལས་ཐིག་གདབ་པའི། །སྲད་བུ་རྣམ་པ་དུ་འཚལ་བགྱི། །མཆོད་པ་རྣམ་པ་དུར་འཚལ་བགྱི། །མེ་ཏོག་བདུག་སྤོས་ཅི་འདྲར་དང་། །མེ་ཏོག་དང་ནི་བདུག་སྤོས་དག །ཅི་ལྟར་དབུལ་བ་འདྲེན་པས་གསུང་། །ལྷ་བཤོས་སྦྱིན་སྲེག་ལས་རྣམས་ཀྱང་། །གང་དག་ལས་ནི་

ཇི་ལྟར་བགྱི། །ལྷ་རྣམས་ཀྱི་ནི་གདན་དག་ཀྱང་། །གང་ལ་གང་གིས་བགྱི་བ་གསུངས། །ཁ་དོག་དབྱིབས་དང་གཟུགས་རྣམས་ཀྱང་། །གོ་རིམས་བཞིན་དུ་མགོན་པོས་གསུངས། །ལྷ་རྣམས་དང་ནི་ཕྱག་རྒྱ་དང་། །གདན་གྱི་ཚད་ཀྱང་བཤད་དུ་གསོལ། །ཕྱག་རྒྱ་རྣམས་ནི་གང་ནས་བྱུང་། །ཅི་ཕྱིར་ཕྱག་རྒྱ་ཞེས་ཀྱང་བགྱི། །དབང་བསྐུར་རྣམ་པ་དུ་འཚལ་བགྱི། །དམ་ཚིག་རྣམ་པ་དུ་ཞིག་མཆིས། །སྔགས་སྤྱད་པ་ལ་བརྩོན་པ་ཡི། །སྔགས་པ་བྱང་ཆུབ་སེམས་དཔའ་དང་། །ཐམས་ཅད་མཁྱེན་པར་ཅི་ལྟར་འགྱུར། །ཅི་ལྟར་བདེན་པ་མཐོང་བར་འགྱུར། །དངོས་གྲུབ་རྣམ་པ་དུ་འཚལ་བགྱི། །གྲུབ་པའི་དུས་ཀྱང་བཀའ་སྩོལ་ཅིག །གྲུབ་ནས་ནམ་མཁར་འགྲོ་བ་དང་། །ཅི་ལྟར་མི་སྣང་འགྱུར་བ་དང་། །གཙོ་བོ་ལུས་འདི་མ་བོར་བར། །ཅི་ལྟར་ལྷ་ཡི་ལུས་ཐོབ་འགྱུར། །སྤྲུལ་པ་རྣམས་ནི་སྣ་ཚོགས་པ། །དེ་ལ་གང་ནས་འབྱུང་བར་འགྱུར། །ཉི་ཟླ་མེ་དང་ཕྱོགས་རྣམས་དང་། །རྒྱུ་སྐར་གཟའ་དང་སྐར་མ་དང་། །ཡུད་ཙམ་དང་ནི་ཐང་ཅིག་དང་། །རྒ་དང་འཆི་དང་རྒུད་པ་དང་། །ལྟས་ངན་དག་ནི་ཐམས་ཅད་ཀྱང་། །དེ་ལ་ཅི་ལྟར་འབྱུང་མི་འགྱུར། །རྐང་གཉིས་གཙོ་བོ་སངས་རྒྱས་དང་། །སྔགས་པ་ཅི་ལྟར་འབྲལ་མི་འགྱུར། །སྦྱིན་སྲེག་ལས་དང་མེ་དག་དང་། །ཚིམ་པར་བགྱི་བ་དུ་འཚལ་བགྱི། །ལྷ་རྣམས་ཀྱང་ནི་སོ་སོ་ཡི། །ངོ་བོ་ཉིད་ནི་འདྲེན་པས་གསུངས། །འཇིག་རྟེན་པ་ཡི་སྔགས་རྣམས་དང་། །དེ་བཞིན་འཇིག་རྟེན་འདས་པ་ཡི། །ཚད་དང་འབྲས་བུ་གྲངས་རྣམས་དང་། །ཏིང་ངེ་འཛིན་གྱི་ཁྱད་པར་དང་། །ལས་ཀྱི་རྣམ་པ་གང་དུ་སྨིན། །ཅི་ལྟར་རྣམ་པར་སྨིན་མི་འགྱུར། །སྔགས་པ་རྣམས་ནི་ནམ་ཞིག་ན། །ལས་དང་ཚེ་ལས་རྣམ་གྲོལ་འགྱུར། །དེ་ནས་ཀུན་མཁྱེན་རྫོགས་སངས་རྒྱས། །བཅོམ་ལྡན་སྙུན་དང་བྲལ་བ་ཡིས། །རྡོ་རྗེ་འཛིན་ལ་འདི་སྐད་གསུངས། ། སྙིང་རྗེ་ཆེན་པོའི་རྩ་ལས་འབྱུང་། །གསང་བའི་དཀྱིལ་འཁོར་རྣམ་དགོད་པ། །ལྷ་རྣམས་ཀྱི་ནི་རྣམ་ངེས་པ། །ཐེག་པ་ཆེན་པོའི་གོ་འཕང་མཆོག །རྫོགས་སངས་རྒྱས་ཀྱི་རབ་གསུང་བ། །དཔའ་བོ་ཆེར་འབྱུང་ཁྱོད་ཀྱིས་གང་། །ཡོངས་སུ་དྲིས་པ་དེ་ལེགས་སོ། །ལག་ན་རྡོ་རྗེ་སྟོབས་

ཆེན་ལ། །མདོར་ནི་བསྡུས་ནས་བཤད་པར་བྱ། །དཀྱིལ་འཁོར་གྱི་ནི་སྔོན་རོལ་དུ། །བྱ་བ་རྣམས་ནི་དེས་པས་ཉོན། །སོ་སོའི་ལས་རྣམས་འདོད་པ་ཡིས། །ཚུལ་ཤེས་པས་ནི་ཅི་རིགས་པར། །རང་གི་ཏིང་འཛིན་ལ་གནས་ཏེ། །རིག་སྔགས་རྒྱལ་པོ་སྟོབས་པོ་ཆེ། །ཡན་ལག་བཅུ་གཉིས་ཚིག་འབྱུང་བ། །གོ་རིམས་བཞིན་དུ་བཟླས་བརྗོད་བྱ། །གསང་སྔགས་ཕྱག་རྒྱ་རྟོགས་ཤེས་པའི། །སློབ་དཔོན་རྣམ་པ་གཉིས་ཤེས་བྱ། །ཟབ་དང་མི་ཟབ་བྱེ་བྲག་ལས། །དེ་ཡི་མཚན་ཉིད་ཤེས་པར་བྱ། །ཟབ་མོ་རྒྱ་ཆེར་ཤེས་པར་བྱ། །ལུས་ཅན་རྣམས་ནི་ཡིད་མི་རྟོན། །སངས་རྒྱས་རྣམས་ཀྱི་སྲས་མཆོག་སྟེ། །མཐོང་བའི་ཆོས་ནི་རྣམ་པར་སྤངས། །གཉིས་པ་མཐོང་བའི་ཆོས་རྣམས་ཀྱིས། །མྱོས་པར་གྱུར་པ་དམིགས་པ་ཅན། །སངས་རྒྱས་རྐང་གཉིས་མཆོག་རྣམས་ཀྱིས། །འཇིག་རྟེན་པ་ཡི་དཀྱིལ་འཁོར་ཀུན། །དེ་ཡིས་བྲི་བར་བྱ་བའི་ཕྱིར། །རྗེས་སུ་གནང་ཞིང་དབང་ཡང་བསྐུར། །དུས་དང་དུས་མིན་བྱེ་བྲག་ལས། །སློབ་མ་རྣམ་བཞིར་ཤེས་བྱ་སྟེ། །གཅིག་ནི་དེ་ཡི་མོད་ལས་བསྒྲུབ། །གཉིས་སུ་བསྒྲུབ་དང་གཉི་གར་མིན། །མཚན་ཉིད་ཐམས་ཅད་རྫོགས་པ་ཡི། །སློབ་མ་དེ་ནི་རྒྱལ་བའི་མཆོག །ས་ནི་དང་པོར་ཤེས་བྱ་བ། །སེམས་ཀྱི་སར་ནི་བཤད་པར་བྱ། །སྦྱང་བ་སྔར་ནི་བསྟན་པ་སྟེ། །དེ་ཡིས་དེ་ནི་ཡོངས་སུ་སྦྱང་། །ནམ་ཞིག་ཉེས་དང་བྲལ་བ་ན། །སེམས་ཀྱི་ས་ནི་མི་འཇིགས་པ། །དེ་ཚེ་དེ་ནི་དག་པ་སྟེ། །ཉེས་པ་ཐམས་ཅད་རྣམ་པར་སྤངས། །མངོན་པར་བྱང་ཆུབ་མཐོང་བས་ན། །དེ་ལྟར་དེ་ནི་བརྟན་ཞེས་བྱ། །དེ་ལས་གཞན་དུ་ས་སྦྱོང་བ། །དེ་ནི་དག་པར་མི་འགྱུར་རོ། །སྔགས་པ་རྟོག་ལ་གནས་ནས་སུ། །གང་ཞིག་ས་སྦྱོང་བྱེད་པ་ནི། །བྱང་ཆུབ་སེམས་ནི་རྣམ་སྤངས་པས། །གསང་བའི་བདག་པོ་དེ་མི་འདག །དེ་བས་རྟོག་པ་རྣམ་སྤངས་ནས། །ས་ཀུན་རྣམ་པར་སྦྱང་བར་བྱ། །ང་ཡིས་དཀྱིལ་འཁོར་རྣམས་ཀྱི་ནི། །ཆོ་ག་རྒྱས་པ་གང་བསྟན་པ། །དེ་དག་ཐོག་མར་བསྟན་པ་ནི། །རྨོངས་པ་རྣམས་ཀྱིས་མི་ཤེས་ཏེ། །རྟོག་པ་སྡུག་བསྔལ་རྒྱུར་གྱུར་པ། །ཅི་

སྲིད་མ་སྤངས་བར་དུ་ནི། །འཇིག་རྟེན་འདི་ནས་སངས་རྒྱས་མིན། །ཀུན་མཁྱེན་ཞེས་ཀྱང་མི་བྱའོ། །སློབ་མ་རྣམས་ལ་ནན་ཏན་དུ། །བྱང་ཆུབ་སེམས་ཀྱིས་སྦྱང་བར་བྱ། །བསྲུང་བ་མི་གཡོ་མགོན་པོའམ། །ཁམས་གསུམ་རྣམ་པར་རྒྱལ་བས་བྱ། །སློབ་མ་ནམ་ཞིག་དམིགས་པ་ཡིས། །ནམ་ཡང་གཡོས་པར་མི་འགྱུར་བ། །དེ་ཚེ་དྲི་མེད་ནམ་མཁའ་བཞིན། །ཡང་དག་པར་ནི་དག་པར་འགྱུར། །ས་བྱིན་གྱིས་བརླབ་དང་པོ་ནི། །རྫོགས་སངས་རྒྱས་ཀྱིས་བྱ་བར་བཤད། །གཉིས་པ་སེམས་ཀྱི་དབང་གིས་ཏེ། །འདིར་ནི་གཞན་དུ་མི་བྱའོ། ། སྲད་བུ་རྣམ་པ་བཞིར་བཤད་དེ། །དཀར་པོ་སེར་པོ་དམར་པོ་དང་། །ནག་པོ་ཞེས་ནི་བྱ་བར་བརྗོད། །ལྔ་པ་ནམ་མཁའ་ལྟ་བུར་བཤད། །བར་སྣང་ལ་ནི་བཟུང་ནས་སུ། །དེར་ནི་དཀྱིལ་འཁོར་བརྟག་པར་བྱ། །སྲད་བུ་དག་ནི་གཉིས་པ་ཡིས། །ས་ལ་དཀྱིལ་འཁོར་དགོད་པར་བྱ། །སངས་རྒྱས་རྣམས་ནི་ཐམས་ཅད་དང་། །དེ་སྲས་བློ་ཅན་རྣམས་ཀྱི་གདན། །པདྨ་ཡིད་ལས་བྱུང་བའི་མཆོག །བཀྲ་ཤིས་འཇིག་རྟེན་རྣམས་ཀྱི་སྔགས། །རང་རྒྱལ་དང་ནི་དགྲ་བཅོམ་པ། །ཕྱོགས་གཅིག་ཤེས་པར་གང་གྲགས་པ། །དེ་དག་སྟན་དུ་ཤེས་བྱ་བ། །པདྨ་ལས་བྱུང་འདབ་མའོ། །འཇིག་རྟེན་གྱི་ནི་ལྷ་རྣམས་གང་། །ཚངས་ལ་སོགས་པ་འཇིག་རྟེན་གྲགས། །དེ་དག་སྟན་ནི་པདྨ་དམར། །རྒྱལ་པོ་རྣམས་ཀྱིས་བསྔགས་པའོ། །ཕལ་པ་རྣམས་ཀྱི་ཅི་རིགས་པར། །ས་ཡི་བྱེ་བྲག་དག་ལས་སམ། །མཆོད་པ་རྣམ་བཞིར་ཤེས་བྱ་སྟེ། །ཕྱག་འཚལ་ཐལ་མོ་སྦྱར་བ་དང་། །དེ་བཞིན་བྱམས་དང་སྙིང་རྗེ་དང་། །མེ་ཏོག་བདུག་སྤོས་འཇིག་རྟེན་པའི། །སོར་མོ་ལས་བྱུང་མེ་ཏོག་རྣམས། །སྐྱོབ་པ་ཀུན་ལ་དབུལ་བར་བྱ། །ཡན་ལག་ཀུན་འབྱུང་ཕྱག་རྒྱ་ནི། །བཅིངས་ནས་བྱང་ཆུབ་སེམས་བསྒོམས་ཏེ། །སོ་སོར་མགོན་པོ་ཐམས་ཅད་དང་། །དེ་སྲས་རྣམས་ལ་ནན་ཏན་བྱའོ། །འདི་ནི་སྐྱོན་མེད་མེ་ཏོག་སྟེ། །རབ་ཏུ་བསུང་ཞིམ་རྣམ་པར་མཛེས། །ཆོས་ཀྱི་དབྱིངས་ཀྱི་ལྗོན་ཤིང་རྣམས། །རྒྱལ་བ་མཆོད་པའི་ཕྱིར་བྱུང་བ། །ཏིང་འཛིན་དབང་གིས་སྒྱུར་བ་ཡི། །སྔགས་ཀྱིས་དེ་དག་བྱིན་གྱིས་བརླབས། །ཆོས་ཀྱི་དབྱིངས་

ལས་བྱུང་བ་ཡི། །སྤྲིན་མང་རྒྱ་ཆེ་དམ་པ་རྣམས། །སངས་རྒྱས་རྣམས་ཀྱི་སྤྱན་སྔར་ནི། །དེ་ཚེ་རྟག་ཏུ་ཆར་བཞིན་འབབ། །ལྷ་རྣམས་ཕལ་པ་གཞན་ལ་ནི། །མེ་ཏོག་འདི་རྣམས་བསྒྲགས་པ་སྟེ། །རང་གི་སྔགས་རྒྱུད་རྒྱས་ཤེས་པས། །ཅི་ལྟར་རིགས་པ་དབུལ་བར་བྱ། །དེ་བཞིན་མེ་ཏོག་བྱུག་སྤོས་རྣམས། །ཅི་ལྟར་རིགས་པར་རྣམ་པར་བསམ། །མཐེ་བོ་སྲིན་ལག་སྦྱར་བ་ནི། །བཀྲ་ཤིས་པ་ཞེས་བཤད་པ་སྟེ། །དེ་ཡིས་མེ་ཏོག་དེ་བླངས་ནས། །རང་གི་སྙིང་གའི་ཕྱོགས་ནས་དབུལ། །འཇིག་རྟེན་པ་ཡི་ལྷ་རྣམས་ལ། །ལྟེ་བའི་ཐད་ཀ་ནས་ཞེས་བྱ། །བདུག་སྤོས་རྡོ་རྗེ་ཁུ་ཚུར་རམ། །ཡང་ན་པདྨའི་ཕྲེང་བ་ཡིས། །བར་སྣང་ལ་ནི་བཟུང་ནས་སུ། །འཇིག་རྟེན་མགོན་སྐྱོབ་རྣམས་ལ་དབུལ། །དེ་ལས་གཞན་པ་འཇིག་རྟེན་པའི། །ལྷ་རྣམས་ལ་ནི་གོ་རིམས་བཞིན། །ཕྱི་དང་ནང་གི་བྱེ་བྲག་གིས། །སྦྱིན་སྲེག་རྣམ་པ་གཉིས་ཤེས་བྱ། ། ལས་དང་ཚེ་ལས་རྣམ་པར་གྲོལ། །སླར་ཡང་ས་བོན་འབྱུང་བ་སྟེ། །ལས་འདོད་པ་ཡིས་སྦྱིན་སྲེག་བྱ། །ནང་གི་སྦྱིན་སྲེག་ཞེས་སུ་བཤད། །ཕྱི་རོལ་གྱི་ནི་གསུམ་ལྡན་ཞིང་། །གནས་གསུམ་དང་ནི་གསུམ་ལ་གནས། །ལས་གསུམ་གྱི་ནི་ལས་གྲུབ་པ། །འཇིག་རྟེན་པ་ཡི་སྦྱིན་སྲེག་མཆོག །སྦྱིན་སྲེག་ལས་ནི་མི་ཤེས་པས། །གང་དག་གཞན་དུ་བྱེད་པ་ནི། །སྔགས་ཀྱི་ཤེས་པ་སྤངས་པ་སྟེ། །གླེན་དེས་འབྲས་བུ་མི་ཐོབ་བོ། །དེ་བཞིན་གཤེགས་པས་གསང་སྔགས་དང་། །དེ་བཞིན་རྫོགས་སངས་རྒྱས་ཀྱིས་གསུངས། །དཀར་དང་སེར་དུ་ཤེས་པར་བྱ། །ཕྱག་ན་རྡོ་རྗེ་ཐམས་ཅད་པ། །འཇིག་རྟེན་དབང་ཕྱུག་གསང་སྔགས་ནི། །ལས་ཀྱི་བྱེ་བྲག་དག་ལས་དཀར། །ཀུན་ཏུ་གྲུ་བཞི་ལྷམ་པ་དང་། །གོ་རིམས་བཞིན་དུ་ཟླུམ་པོ་དང་། །གྲུ་གསུམ་དང་ནི་ཟླ་གམ་འདྲ། །དབྱིབས་ནི་ལེགས་པར་བཤད་པ་ཡིན། །གཟུགས་ནི་གཉིས་སུ་ཤེས་བྱ་སྟེ། །བུད་མེད་དང་ནི་སྐྱེས་པ་ཉིད། །ཡང་ན་ཀུན་ཏུ་ཐམས་ཅད་ཀྱི། །ཁ་དོག་དབྱིབས་དང་གཟུགས་རྣམས་ཏེ། །བསམ་ཡས་ཡེ་ཤེས་ལས་བྱུང་བ། །དེ་བས་དེ་རྣམས་བསམ་ཡས་ཏེ། །ཡེ་ཤེས་མཁྱེན་གྱི་ཡེ་ཤེས་ནི། །སེམས་ཅན་དོན་ཕྱིར་ཐ་དད་གྱུར། །ཡིད་

ཀྱི་རྒྱ་ནི་ཅི་ཙམ་པ། །སྟན་དང་ཕྱག་རྒྱ་དག་དང་ནི། །ལྷ་ཡི་ཚད་ཀྱང་གོ་རིམས་བཞིན། །དེ་ཙམ་དུ་ནི་ཤེས་པར་བྱ། །སངས་རྒྱས་གང་ནས་བྱུང་བ་ནས། །ཕྱག་རྒྱ་རྣམས་ཀྱང་དེ་ནས་བྱུང་། །ཆོས་ལས་བྱུང་བའི་སློབ་མ་རྣམས། །ཆོས་ཀྱི་ཕྱག་རྒྱས་གདབ་པར་བྱ། ། དེ་བས་མདོར་ན་ཆོས་ཀྱི་དབྱིངས། །མཚན་མ་ཕྱག་རྒྱ་ཡིན་པར་བཤད། །དབང་བསྐུར་གསུམ་དུ་ཤེས་བྱ་སྟེ། །དེ་བས་ནན་ཏན་མཉན་པར་གྱིས། །ཕྱག་རྒྱས་གང་ཞིག་དབང་བསྐུར་བ། །ལས་དང་བྱ་བ་སྤངས་པ་སྟེ། །སྐྱོབ་པ་རྣམས་ཀྱི་དབང་བསྐུར་བ། །དེ་ནི་མཆོག་སྟེ་དང་པོ་ཡིན། །གཉིས་པ་ལས་དང་བྱ་བ་ཡིས། །ཀུན་ནས་བསླང་བར་ཡང་དག་བཤད། །གསུམ་པ་ཡིད་ཀྱིར་ཤེས་བྱ་སྟེ། །ཡུལ་དང་དུས་ནི་སྤངས་པའོ། །བླ་མ་ལེགས་པར་མགུ་བྱས་ནས། །ཕན་པར་བྱེད་པ་གང་སྨྲས་པའི། །དབང་བསྐུར་འདི་ནི་མཆོག་ཡིན་པར། །རྫོགས་པའི་སངས་རྒྱས་རྣམས་ཀྱིས་བསྒྲགས། །སངས་རྒྱས་རྣམས་ཀྱི་མདོར་ན་ནི། །དམ་ཚིག་ཅན་རྣམས་ལྔར་བཤད་དེ། །དཀྱིལ་འཁོར་འདི་ནི་མཐོང་བ་ལས། །དམ་ཚིག་ཤེས་པ་གཅིག་ཅེས་བྱ། །དེ་ལ་ཕྱག་རྒྱ་མི་བསྟན་ཅིང་། །སྔགས་ཀྱང་སྦྱིན་པར་མི་བྱའོ། །བྱང་ཆུབ་སེམས་ཀྱི་བྱེ་བྲག་ལས། །སྔགས་དང་ཕྱག་རྒྱ་ཡོངས་སུ་བཟུང་། །དཀྱིལ་འཁོར་མཐོང་ཞེས་བྱ་བ་འདི། །དམ་ཚིག་ཅན་གཉིས་ཤེས་བྱ་སྟེ། །དཀྱིལ་འཁོར་དང་ནི་ཕྱག་རྒྱ་མཐོང་། །ལས་དང་བྱ་བ་ལ་ཡང་སྦྱར། །བླ་མས་ལུང་ནི་མ་བྱིན་པ། །དེ་ཡང་དམ་ཚིག་ཤེས་པར་བཤད། །ཕྱག་རྒྱ་དཀྱིལ་འཁོར་བྲི་བ་རྣམས། །དེ་ཚེ་ཆོ་ག་བཞིན་དུ་བསྟན། །གསང་བའི་ཡེ་ཤེས་འབྱུང་བ་ཡི། །དབང་བསྐུར་མེད་པའི་སྔགས་པའང་ཡིན། །གསང་བའི་དཀྱིལ་འཁོར་དབུས་སུ་ནི། །སྔགས་པ་ཆོ་གས་དབང་བསྐུར་བ། །དམ་ཚིག་ཤེས་པ་ལྔར་ཤེས་བྱ། །དམ་ཚིག་ཅན་ཞེས་གཞན་མི་བྱ། །བརྟུལ་ཞུགས་བཟང་པོ་བྱང་ཆུབ་ཕྱིར། །གང་ཞིག་སེམས་ནི་བསྒོམ་པ་ན། །སྔགས་པ་གནས་གསུམ་མི་དམིགས་པ། །དེ་ནི་བྱང་ཆུབ་སེམས་དཔའ་ཡིན། །ཐབས་ཀྱི་སྙིང་སྟོབས་བསྐྱེད་ནས་སུ། །སེམས་ཅན་དོན་ལ་སྦྱོར་བ་ན། །དམིགས་སུ་མེད་པའི་སྤྱོད་ཐོབ་

པ། །རྒྱལ་བའི་མཆོག་ཏུ་ཤེས་པར་བྱ། །ཐོག་མ་ནས་ནི་ཞི་བའི་ཆོས། །ངོ་བོ་ཉིད་ནི་མེད་པ་ལ། །གང་གིས་སེམས་ནི་རི་རབ་བཞིན། །གནས་པ་དེ་ནི་བདེན་པ་མཐོང་། །འདི་བདེན་འདི་ནི་ཡང་དག་པ། །དེ་བཞིན་དུ་ནི་མི་བསླུ་བ། །ཅི་ལྟར་སངས་རྒྱས་བདེན་གཟིགས་པ། ། དེ་བཞིན་སྔོན་ནི་ངས་མཐོང་བའི། །བྱང་ཆུབ་སེམས་ཐོབ་གང་ཡིན་དེ། །དངོས་གྲུབ་དེ་ལས་གཞན་ཅི་དགོས། །དེ་ལས་གཞན་དུའང་དངོས་གྲུབ་ནི། །རྣམ་པ་དག་ནི་ལྔར་འདོད་དེ། །སྤྱོད་པའི་རྗེས་སུ་འཇུག་པ་དང་། །དེ་བཞིན་ས་ནི་གནོན་པ་དང་། །འཇིག་རྟེན་མངོན་ཤེས་ལྔར་འདོད་དང་། །སངས་རྒྱས་ཉིད་དང་གང་གཞན་ནོ། །རྒྱུད་ལས་རྒྱུད་དུ་གྱུར་པ་ཡི། །ལས་ནི་ཅི་སྲིད་མ་ཉམས་ཤིང་། །རྣམ་སྨིན་རྣམ་པར་མི་སྨིན་པ། །དངོས་གྲུབ་དག་གི་དུས་སུ་འདོད། །མདོར་ན་གང་ཚེ་དུས་གཅིག་ཏུ། །ལས་དང་སྐྱེ་བ་འཕངས་གྱུར་པ། །དེ་ཚེའང་སྔགས་པས་དངོས་གྲུབ་ནི། །ཡིད་ལས་ཡང་དག་བྱུང་བ་འཐོབ།། །།བམ་པོ་དྲུག་པ། གྲུབ་ནས་མཁའ་ལ་འགྲོ་བ་ནི། །ཅི་ལྟར་སྒྱུ་མ་འཇིགས་མེད་བཞིན། །སྔགས་ཀྱི་དྲ་བས་རྨོངས་བྱེད་པ། །ཅི་ལྟར་མིག་འཕྲུལ་ཆེན་པོ་བཞིན། །གང་ལ་ལུས་དང་ངག་མེད་པ། །དྲི་ཟའི་གྲོང་ཁྱེར་ཅི་བཞིན་ཏེ། །དེ་བཞིན་མི་སྣང་འགྱུར་ཞེས་བྱ། །དེ་ནི་དེ་ན་གནས་པ་ཡིན། །ཅི་ལྟར་ཉལ་བའི་རྨི་ལམ་ན། །སུམ་ཅུ་རྩ་གསུམ་གནས་སུ་ཕྱིན། །ལུས་ཀྱང་སྤངས་པ་མ་ཡིན་ལ། །དེ་ཉིད་ཀྱིས་ཀྱང་དེ་མ་སོང་། །དེ་བཞིན་རྣལ་འབྱོར་ཉིད་ཀྱིས་ཀྱང་། །སྔགས་པ་སྔགས་ལ་གནས་པ་དག །བསོད་ནམས་བྱ་བའི་ལས་རྣམས་ཀྱིས། །འཇའ་དང་འདྲ་བའི་ལུས་ཀྱང་འཐོབ། །ལུས་དང་ངག་ཡིད་ལས་བྱུང་བའི། །གསང་སྔགས་ཡིད་བཞིན་ནོར་བུ་འདྲ། །དེ་ལས་རྣམ་པར་བསམས་པའི་དོན། །མ་བརྟགས་པར་ཡང་འབྱུང་བར་འགྱུར། ། ཅི་ལྟར་ནམ་མཁའ་ཕྱོགས་རྣམས་སུ། །འདུས་བྱས་སྤྱོད་ཡུལ་ཐམས་ཅད་ཀྱིས། །མི་གོས་དེ་བཞིན་སྔགས་པ་ཡང་། །རྟོག་པའི་སྤྱོད་ཡུལ་ཀུན་གྱིས་སོ། །འདི་ཀུན་འདུ་ཤེས་ཙམ་དུ་ནི། །ནམ་ཞིག་དེ་ལྟར་བསྒོམས་གྱུར་ཅིང་། །རྣམ་པར་བསྒོམས་ན་སྔགས་པ་དེ། །

རྫོགས་སངས་རྒྱས་དང་ལྷན་ཅིག་དགའ། །སངས་རྒྱས་རྐང་གཉིས་གཙོ་བོ་ཡིས། །སྦྱིན་སྲེག་གཉིས་སུ་བཤད་པ་ནི། །ཕྱི་རོལ་གྱི་དང་ནང་གི་སྟེ། །དེ་ཡང་ཚིམ་པར་བྱ་དང་བཅས། །ལྷ་རྣམས་ཀྱི་ནི་སོ་སོ་ཡི། །རང་བཞིན་ཡོངས་སུ་མཁྱེན་ནས་སུ། ། འཇིག་རྟེན་པ་ཡི་སྔགས་རྣམས་ཀྱི། །ཚད་དག་ལེགས་པར་གསུངས་པ་ནི། །དབང་ཕྱུག་ལ་སོགས་མཐུ་ཆེན་རྣམས། །བཀུར་བའི་ལྷ་རྣམས་གང་ཡིན་པ། །དེ་དག་གིས་ནི་གང་བྱས་པའི། །སྔགས་དང་ཕྱག་རྒྱ་སྟོབས་ཆེན་རྣམས། །འབྲས་བུ་ཕལ་ཆེར་འཕྲལ་དུ་སྟེར། །ཚད་ནི་བཤད་པ་དེ་ཡིན་ནོ། །འོན་ཀྱང་སྐྱེ་དང་འཇིག་པ་ཡི། །ཆོས་ཅན་དེ་དག་བརྟན་པ་མེད། །འཇིག་རྟེན་འདས་པའི་སྔགས་རྣམས་ཀྱི། །ཐོག་མའི་བྱེད་པ་མེད་པའོ། །ལས་དང་སྐྱེ་བ་ཀུན་བཅད་པ། །ཉེས་པ་གསུམ་བྲལ་རྒྱལ་བ་དང་། །རང་རྒྱལ་བསེ་རུ་ལྟ་བུ་དང་། །དེ་བཞིན་རྒྱལ་བའི་ཉན་ཐོས་དང་། །བྱང་ཆུབ་སེམས་དཔའ་རྣམས་ཀྱིས་ཀྱང་། །གསང་སྔགས་ཚད་ནི་སྔོན་བཤད་པ། །དུས་གསུམ་ལས་ནི་ཤིན་ཏུ་འདས། །རྟེན་ཅིང་འབྲེལ་པ་ལས་བྱུང་བ། །མཐོང་དང་མ་མཐོང་འབྲས་བུ་ཅན། །ངག་ཡིད་ལུས་ལས་བྱུང་བའོ། །འཇིག་རྟེན་པ་ཡི་འབྲས་བུའི་ཚད། །བསྐལ་པ་གཅིག་ཏུ་བཤད་པ་ཡིན། །ཡང་དག་རྫོགས་པའི་སངས་རྒྱས་ཀྱི། །གསང་སྔགས་འབྲས་བུ་བསྐལ་པ་འདས། །སངས་རྒྱས་དྲང་སྲོང་ཆེན་པོ་དང་། །རྒྱལ་སྲས་རྣམས་ཀྱི་ཏིང་འཛིན་ནི། །མཚན་མ་མེད་ཅིང་དག་པའོ། །འཇིག་རྟེན་པ་ཡི་མཚན་མར་བཅས། །རྣམ་པར་སྨིན་པ་འདི་ཉིད་ལ། །ལས་ཀྱི་འབྲས་བུ་སྨིན་འགྱུར་བ། །ནམ་ཞིག་དངོས་གྲུབ་ཐོབ་པ་ན། །དེ་ཚེ་ལས་ཀྱང་ལྡོག་པར་འགྱུར། །སེམས་ནི་ངོ་བོ་ཉིད་མེད་ཕྱིར། །རྒྱུ་དང་འབྲས་བུ་རྣམས་སྤངས་ཤིང་། །ལས་དང་ཚེ་ལས་རྣམ་གྲོལ་བ། །ནམ་མཁའ་ལྟ་བུར་འགྱུར་བ་ཡིན། །གསང་བ་པའི་བདག་པོ་གཞན་ཡང་ཕྱག་རྒྱའི་གཟུགས་སུ་དགོད་པ་རིམ་པར་ཕྱེ་བ་ལྷ་རྣམས་གནས་པ་བྱིན་གྱིས་རློབ་པ། ཏིང་ངེ་འཛིན་ལྔ་རྟོགས་པ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ། ཆོས་ཀྱི་དབྱིངས་རྟོགས་པ་། སྤྱོད་ཡུལ་

དུ་གྱུར་པ། སེམས་ཅན་གྱི་ཁམས་མ་ལུས་པ་བསྒྲལ་བར་ཡི་དམ་བཅས་པ་རྣམས་ཀྱི་དོན་དང་ཕན་པ་དང་བདེ་བའི་ཕྱིར། སྔོན་གྱི་སངས་རྒྱས་རྣམས་ཀྱིས་མངོན་པར་རྫོགས་པར་སངས་རྒྱས་པ་དེ་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ཇི་ལྟར་འཚལ་ལོ་ཞེས་གསོལ་ནས། ཕྱག་ན་རྡོ་རྗེ་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དང་པོར་ཡང་དག་པར་རྫོགས་པའི་སངས་རྒྱས་ཀྱི་དཀྱིལ་འཁོར་དགོད་པ་རིམ་པར་ཕྱེ་བ་གང་ལགས། འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པ་བྱུང་བ་གསང་བ་བས་ཀྱང་ཆེས་གསང་བ། སྙིང་རྗེ་ཆེན་པོའི་སྙིང་པོ་འབྱུང་བ་ཞེས་བྱ་བ་ཡོད་ཀྱིས། དེ་བྲི་བའི་ཆོ་ག་ཉོན་ཅིག །ཀུན་ཏུ་གྲུ་བཞི་ལྷམ་པ་ལ། །སྒོ་གཅིག་པ་ནི་སྟེགས་བུར་བཅས། །བཟང་པོ་རྡོ་རྗེ་རྣམས་ཀྱིས་མཚན། །དབུས་སུ་རྡོ་རྗེ་རྩེ་བརྒྱད་པ། །དེའི་སྟེང་པདྨ་བྲི་བ་ནི། །ས་བོན་དང་བཅས་རྒྱས་པར་བྱས། །དེ་ཡི་སྟེང་དུ་པདྨ་ཆེ། །ཕྱག་རྒྱ་ཀླད་ཀོར་གྱིས་མཛེས་བྱས། །འདབ་མ་བརྒྱད་རྣམས་ལེགས་པར་རྫོགས། །ཟེ་བརབཅས་པ་ཤིན་ཏུ་བཟང་། །འདབ་མ་རྣམས་ནི་ཐམས་ཅད་ལ། །ཡན་ལག་བཅུ་གཉིས་ཚིག་བཀོད་པ། །དེ་རྣམས་དབུས་ན་མགོན་བཞུགས་པ། །རྫོགས་པའི་སངས་རྒྱས་རྐང་གཉིས་གཙོ། །དཀྱིལ་འཁོར་བརྒྱད་ཀྱི་འཁོར་རྣམས་ཀྱིས། །ཁོ་ར་ཁོར་ཡུག་ཡོངས་བསྐོར་བ། །སྙིང་རྗེ་ལས་བྱུང་དཀྱིལ་འཁོར་འདི། །མཆོག་ཏུ་ཤེས་པར་བྱ་བ་སྟེ། །ལུང་བཞིན་དཀྱིལ་འཁོར་རྣམས་དང་ནི། །ལས་དང་ལུས་དང་དངོས་གྲུབ་དང་། །དགོད་པ་རྣམས་ཀྱང་དེས་པ་ཡིས། །འདི་ལས་བྱུང་བ་ཤེས་པར་བྱ། །གསང་བ་པའི་བདག་པོ་གཞན་ཡང་དེ་བཞིན་གཤེགས་པ་རྣམས་ཀྱི་དཀྱིལ་འཁོར་ནི། ཟླ་བའི་དཀྱིལ་འཁོར་འདྲ་ཞིང་མདོག །དུང་ལྟ་བུ་ཡི་དབུས་ན་ནི། །སངས་རྒྱས་ཀུན་གྱི་གྲུ་གསུམ་པ། །པདྨ་དཀར་པོའི་སྟེང་ན་གནས། །ཀླད་ཀོར་བཅས་པའི་མཚན་གྱིས་བཏབ། །རྡོ་རྗེའི་མཚན་མས་མཚན་པ་སྟེ། །དཔྱད་མི་དགོས་པས་ཀུན་ནས་ནི། །

འོད་ཟེར་དག་ནི་གཉིས་བྱ་བ། །གསང་སྔགས་མགོན་ལས་བྱུང་ནས་སུ། །དེ་ནི་ཕྱོགས་བཅུ་རྣམས་སུ་སོང་། །གསང་བ་པའི་བདག་པོ་གཞན་ཡང་། །སྤྱན་རས་གཟིགས་དབང་དཀྱིལ་འཁོར་ནི། །ངེས་པས་ནན་ཏན་མཉན་པར་གྱིས། །ཀུན་ཏུ་གྲུ་བཞི་ལྷམ་པ་ལ། །དབུས་སུ་དུང་འདྲ་གཞག་པར་བྱ། །དེ་ཡི་སྟེང་དུ་པདྨ་ནི། །ས་བོན་བཅས་བྱས་རྒྱས་པར་བྲི། །དེའི་སྟེང་དུ་ཡང་རྡོ་རྗེ་ཆེ། །རྡོ་རྗེ་ལས་ཀྱང་པདྨ་ཆེ། །ཐམས་ཅད་ས་བོན་རྣམས་ཀྱིས་མཚན། །རང་གི་ས་བོན་ལེགས་པར་སྦྱར། །སྒྲོལ་མ་དང་ནི་ཁྲོ་གཉེར་ཅན། །དེ་བཞིན་གོས་དཀར་ཅན་དང་ནི། །རིག་སྔགས་ལོངས་སྤྱོད་ཅན་མ་དང་། །མཐུ་ཆེན་ཐོབ་པའང་ནན་ཏན་བྱ། །དཔལ་རྣམས་ཀུན་དང་ཕྱག་བརྙན་མ། །དཀྱིལ་འཁོར་འདི་ཡི་དབུས་སུ་ནི། །ཕྱག་རྒྱའི་མཚན་མ་དབང་ཐོབ་རྣམས། །ཁྱད་པར་དུ་ནི་བྲི་བར་བྱ། །རྟ་མགྲིན་ཅན་གྱི་བྱ་བ་ནི། །གྲུ་གསུམ་ཚུལ་དུ་འདུག་པ་སྟེ། །དཀྱིལ་འཁོར་མཚན་མ་བཟང་པོས་བཏབ། །ཉི་མ་འཆར་བའི་ཁ་དོག་འདྲ། །རིག་སྔགས་རྒྱལ་དང་བཅས་པར་ནི། །མཁས་པས་རྣམ་པར་དགོད་པར་བྱ། །གསང་བ་པའི་བདག་པོ་གཞན་ཡང་ཁྱོད་ཉིད་ཀྱི་དཀྱིལ་འཁོར་མདོར་བཤད་པར་བྱའོ། །ཀུན་ཏུ་གྲུ་བཞི་ལྷམ་པ་ལ། །རྡོ་རྗེའི་མཚན་མ་རྣམས་ཀྱིས་མཚན། །ཐམས་ཅད་སེར་པོ་ཡིད་དུ་འོང༌། །དབུས་ན་པདྨ་རབ་ཏུ་གནས། །དེ་ཡི་དབུས་སུ་བྱ་བ་ནི། །བུམ་པ་ཟླ་བའི་འོད་འདྲ་བ། །འདི་ནི་མཚན་མ་རྣམས་ཀྱིས་མཚན། །ཀླད་ཀོར་གྱིས་ཀྱང་རྣམ་པར་བརྒྱན། །དེ་སྟེང་དུ་ཡང་རླུང་ཆེན་ནི། །དབྱར་གྱི་ཆར་སྤྲིན་འདྲ་བའི་མདོག །བ་དན་གཡོ་བ་སྔགས་པས་བྱ། །ཀླད་ཀོར་གྱིས་ཀྱང་རྣམ་པར་བརྒྱན། །དེ་སྟེང་དུ་ཡང་གྲུ་གསུམ་པ། །རབ་ཏུ་འཇིགས་པའི་གཟུགས་ཅན་ཏེ། །འཇིག་པར་བྱེད་པའི་མེ་འདྲ་བ། །སུམ་མདོའི་རིས་མཚན་མཚན་གྱིས་བཏབ། །འབར་ཕྲེང་འཁྲིགས་པ་འཇིགས་འཇིགས་ལྟ། །ཉི་མ་འཆར་བའི་གཟུགས་འདྲ་བའོ། །དེ་ཡི་དབུས་སུ་པདྨ་ཆེ། །དུས་མཐའི་མེ་འོད་འདྲ་བའོ། །པད་ཆེན་སྟེང་དུ་རྡོ་རྗེ་ནི། །འབར་བའི་ཕྲེང་བ་འཕྲོ་བ་ཅན། །ཧཱུྃ་ཞེས་བྱ་བའི་སྒྲ་དང་ལྡན། །དམ་པ་ས་བོན་རྣམས་ཀྱིས་མཚན། །དཔའ་བོ་

ཁྱོད་ཀྱི་དཀྱིལ་འཁོར་འདི། །རྒྱལ་བའི་གཙོ་བོ་རྣམས་ཀྱིས་གསུངས། །མཱ་མ་ཀཱི་དང་ལུ་གུ་རྒྱུད། །དེ་བཞིན་རྡོ་རྗེའི་རིགས་ལས་བྱུང་། །རྡོ་རྗེ་ལྕགས་ཀྱུ་རྡོ་རྗེ་རྩེ། །གསང་སྔགས་རྒྱལ་པོ་མཐུ་ཆེན་དག །དཀྱིལ་འཁོར་ཆེན་པོའི་ནང་དུ་ནི། །ཀུན་ཀྱང་ཁོངས་སུ་ཆུད་པར་བྱ། །ལས་རྣམས་ཤིན་ཏུ་འགྲུབ་བྱའི་ཕྱིར། །ཕྱག་རྒྱ་དཀྱིལ་འཁོར་ས་བོན་དང་། །ཁ་དོག་ཁྱད་པར་གོ་རིམས་བཞིན། །དེ་དག་ཅི་ལྟར་རིགས་པར་བྱའོ། །དེ་ནས་གཞན་ཡང་རྡོ་རྗེ་འཛིན། །ཆེན་པོ་གཙོར་བཤད་འདི་རྣམས་ཏེ། །ནམ་མཁའ་དྲི་མེད་རྡོ་རྗེས་འཁོར། །རྡོ་རྗེ་མཆེ་བ་དེས་པ་དང་། ། རྣམ་པར་གྲགས་པ་སྐལ་ཆེན་དང་། །རྡོ་རྗེ་མགོན་པོ་མཆོག་འཛིན་དང་། །རྡོ་རྗེ་ཞི་བ་རྡོ་རྗེ་ཆེ། །རྡོ་རྗེ་མཐིང་ག་རྡོ་རྗེ་གཞན། །རྡོ་རྗེ་པདྨ་ཡངས་པའི་མིག །རྡོ་རྗེ་བཟང་པོ་རྡོ་རྗེ་ཉིད། །སྤྲོས་པ་མེད་པར་གནས་པ་དང་། །ནམ་མཁའ་མཐའ་ཡས་འགྲོ་བའོ། །དེ་རྣམས་དཀྱིལ་འཁོར་བཤད་པ་ནི། །དཀར་པོ་སེར་པོ་དམར་པོ་དང་། །ནག་པོ་ཡིན་པར་ཡང་དག་བཤད། །དེ་ནས་གཞན་ཡང་ཕྱག་རྒྱའི་གཟུགས། །རྩེ་གསུམ་པ་དང་རྩེ་གཅིག་པ། །གཞན་ཡང་གཉིས་དང་གཉིས་མ་ཡིན། །ཕྲེང་བ་ལྟ་བུ་དེ་བཞིན་གཞན། །ཁ་དོག་བྱེ་བྲག་ལས་ཤེས་བྱ། ། འདི་རྣམས་ཀུན་ཀྱང་མཐུ་ཆེན་ཏེ། །རྣམ་པར་རྒྱལ་དང་ལྡན་པའོ། །མི་གཡོ་མགོན་གྱི་དཀྱིལ་འཁོར་ནི། །རླུང་དང་མེ་ཡི་ཡིན་པར་འདོད། །ང་ཡི་དྲུང་གི་འོག་ལོགས་སུ། །བདེན་བྲལ་གྱི་ནི་ཕྱོགས་ཆར་བྲི། །རང་གི་ས་བོན་མཚན་མར་ལྡན། །རལ་གྲི་ཕྱག་རྒྱ་ལེགས་པར་སྦྱར། ། ཡང་ན་ཞགས་པ་བྱ་ཡང་རུང་། །བློ་ལྡན་དེ་ཡིས་བྲི་བར་བྱ། །འཇིག་རྟེན་གསུམ་ལས་རྣམ་རྒྱལ་གྱིའང་། །བྱེ་བྲག་ཏུ་ནི་རླུང་གི་དབུས། །རྡོ་རྗེ་ཅན་གྱི་མཚན་དང་ལྡན། །གནས་གསུམ་དག་ལ་འདུག་པའོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་རྣམས་ཀྱི་ཡུམ་གྱི་གཟུགས་ཀྱི་དཀྱིལ་འཁོར་དགོད་པ་འབྱུང་སྟེ། དེ་ལ་རེ་ཞིག་དཀྱིལ་འཁོར་ནི། །གསེར་གྱི་ཁ་དོག་གྲུ་བཞི་པ། །རྡོ་རྗེའི་མཚན་མས་མཚན་པ་སྟེ། །འདི་ནི་དཀྱིལ་འཁོར་དམ་པ་ཡིན། །དེ་ནས་གཞན་ཡང་ལྷ་མོའི་གཟུགས། །དེ་ཡི་དབུས་སུ་པདྨ་ཆེ། །ཐམས་ཅད་སེར་པོ་འབར་

དང་བཅས། །དེར་ཡང་གཙུག་ཏོར་གཞག་པ་ནི། །ཆ་གསུམ་ལ་ནི་གནས་པར་བྱ། །དབུས་མའི་ཆ་ནི་བོར་ནས་སུ། །དེར་ཡང་སྤྱན་ནི་བྲི་བར་བྱ། །རང་གི་འོད་འབར་དབུས་ན་གནས། །མདོར་ན་ས་བོན་ལྡན་པར་བྱ། །བྱང་ཆུབ་སེམས་དཔའ་ཐམས་ཅད་ཀྱི། །ཡིད་བཞིན་ནོར་བུ་རྒྱལ་བས་གསུངས། །དེ་ཡི་དཀྱིལ་འཁོར་བཤད་པ་ནི། །ཆུ་ཡི་ཡིན་ཏེ་ཐམས་ཅད་སྒོ། །ཤིན་ཏུ་དྲི་མེད་རབ་ཏུ་ཞི། །རེ་བ་ཐམས་ཅད་རྫོགས་བྱེད་པའོ། །དེ་ནས་ཤཱཀྱ་སེང་གེའི་ཡང་། །དེས་པས་དཀྱིལ་འཁོར་མཉན་པར་གྱིས། །དེར་ནི་དབང་ཆེན་ཞེས་བྱ་བ། །ཁ་དོག་སེར་པོས་ཉེ་བར་བརྒྱན། །ཀུན་ཏུ་གྲུ་བཞི་ལྷམ་པ་ལ། །དབུས་སུ་རྡོ་རྗེ་སྔ་མ་བཞིན། །དེ་ཡི་སྟེང་དུ་པདྨ་ནི། །ཀུན་ཏུ་ཁ་དོག་སེར་པོ་གཞག །དེ་སྟེང་ལྷུང་བཟེད་ཆེན་པོ་སྟེ། །རྡོ་རྗེས་མཚན་པ་འབར་དང་བཅས། །ཡང་ན་ཆོས་གོས་འཁར་གསིལ་དག །གོ་རིམས་བཞིན་དུ་གཞག་པར་བྱ། །གཙུག་ཏོར་ལྔ་པོ་གང་བསྒྲགས་པ། །དེ་རྣམས་ཕྱག་རྒྱ་ཤེས་བྱ་བ། །གདུགས་དཀར་པོས་ནི་གདུགས་སུ་བྱ། །རྒྱལ་བའི་གཙུག་ཏོར་བློ་ལྡན་ནི། །མཚན་མ་རལ་གྲིར་གཞག་པ་ནི། །འོད་ཟེར་རྣམས་ནི་འཕྲོ་བར་བྱ། །རྣམ་པར་རྒྱལ་བའི་འཁོར་ལོ་ཡིན། །རྣམ་པར་འཐོར་བའི་ལྕགས་ཀྱུར་འདོད། །གཟི་བརྗིད་ཕུང་པོ་སྐལ་ཆེན་གྱི། །གཙུག་ཏོར་བཟང་པོ་ཡིན་པར་འདོད། །ཆེར་འབྱུང་བའི་ནི་རྡོ་རྗེ་ཡིན། །མངོན་པར་འབྱུང་བ་པད་མར་འདོད། །དུང་ནི་མཐའ་ཡས་སྒྲ་དབྱངས་ཀྱི། །ཁ་དོག་བྱེ་བྲག་ལས་ཤེས་བྱ། །མཛོད་སྤུའི་ཡིད་བཞིན་ནོར་བུ་ཡིན། །སྤྱན་གྱི་ཡང་ནི་འདི་ཉོན་ཅིག །གཙུག་ཏོར་ཐམས་ཅད་སེར་པོ་སྟེ། །རྡོ་རྗེའི་མཚན་མས་མཚན་པར་བྱེད། །གཞན་གྱིས་མི་ཐུབ་མ་ཡིས་ནི། །ལག་པ་ངོ་མཚར་པདྨ་ཅན། །གཞན་གྱིས་མི་ཐུབ་ཞེས་བྱ་བའི། །ཁ་ཆེན་པདྨ་གནག་ལ་གནས། །གཙང་མར་གནས་པ་གང་གྲགས་པ། །གཙང་མར་རྟོགས་པའི་སྤྱོད་ཡུལ་ཅན། །དེ་དག་གི་ནི་ཕྱག་རྒྱ་ཡི། །མཚན་ཉིད་དགོད་པ་དེས་པས་ཉོན། །སེམས་དཔའི་ལག་དང་དགེ་བའི་ལག །འཛུམ་པའི་ལག་ཀྱང་དེ་བཞིན་གཞན། །ལག་ན་མེ་ཏོག་ནམ་མཁའི་ལག །ཆོ་ག་རྒྱས་པར་བྲི་བར་བྱ། །ས་ཡི་ལྷ་མོའི་བུམ་

པ་སྟེ། །ཆུ་ཡི་དཀྱིལ་འཁོར་རྡོ་རྗེས་མཚན། །གཉེར་བའི་ལག་པ་མེ་ཡི་སྟེ། །དྲང་སྲོང་རྣམས་དང་བཅས་པར་བྲི། །འོད་སྲུང་དང་ནི་གཽ་ཏ་མ། །མརྐྐ་ཎ་དང་གརྒྒ་དང་། །བསིསྠ་དང་ཨངྒི་རས། །མེ་ཡི་གནས་ཀྱི་ནང་ན་འདུག །རིག་བྱེད་ལག་པར་ནན་ཏན་དུ། །དེ་དག་གོ་རིམས་བཞིན་དུ་བྲི། །གཤིན་རྗེའི་བེ་ཅོན་བྲི་བ་ནི། །རླུང་གི་དཀྱིལ་འཁོར་ནང་ན་འདུག །འཆི་བདག་གི་ནི་དྲིལ་བུ་ཡིན། །དུས་མཚན་ཕྱག་རྒྱ་བ་དན་ནོ། །དྲག་པོའི་ཆུང་མའི་མདུང་རྩེ་གསུམ། །ཚངས་པའི་ཆུང་མའི་པདྨར་དྲན། །གཞོན་ནུའི་ཆུང་མའི་མདུང་ཐུང་ཡིན། །ཁྱབ་འཇུག་ཆུང་མའི་འཁོར་ལོ་ཉིད། །གཤིན་རྗེའི་ཆུང་མའི་ཐོ་བར་ཤེས། །འཇིགས་བྱེད་ཆུང་མའི་མི་ཐོད་ཡིན། །དེ་དག་རླུང་གི་དཀྱིལ་འཁོར་གྱི། །ནང་དུ་ཆུད་པར་བྱ་བ་ནི། །བྱ་རྒོད་བྱ་རོག་དེ་བཞིན་ཁྱི། །ཝ་རྣམས་ཀྱིས་ཀྱང་ཡོངས་བསྐོར་བར། །ལས་རྣམས་གྲུབ་པར་འདོད་པ་ཡིས། །ཅི་ལྟར་རིགས་པར་བྲི་བར་བྱ། །བདེན་བྲལ་གྱི་ནི་རལ་གྲིར་བྲི། །ཁྱབ་འཇུག་གི་ནི་འཁོར་ལོར་བྱ། །སྐེམ་བྱེད་ཀྱི་ནི་མདུང་ཐུང་ཡིན། །དགའ་བོ་ཉེ་དགའ་གཉིས་ཀྱི་སྤྲིན། །གཉིས་ཀའི་གློག་དང་བཅས་པར་ཏེ། །གཟུགས་ནི་མདོག་སྔོ་ཆུ་དང་བཅས། །ཤཱཀྱ་སེང་གེའི་དཀྱིལ་འཁོར་གྱི། །སྒོ་ཡི་ཕྱོགས་ནི་གཉིས་སུ་དགོད། །བདེ་བྱེད་ཀྱི་ནི་མདུང་རྩེ་གསུམ། །དཀའ་ཟློག་རྩེ་གསུམ་གདེངས་པོར་བཤད། །བུམ་པ་དཀར་པོ་པདྨར་བཅས། །ཟླ་བའི་ཕྱག་རྒྱ་ཡིན་པར་དྲན། །ཉི་མའི་དབང་ཆེན་དཀྱིལ་འཁོར་ལ། །གནས་པའི་ཤིང་རྟ་ཡིན་ཞེས་བྱ། །རྒྱལ་དང་རྣམ་པར་རྒྱལ་བ་ཡི། །དབང་ཆེན་མཚན་མའི་གཞུ་ཅན་ནོ། །རླུང་གི་ཕྱོགས་སུ་རླུང་རྣམས་ཀྱི། །བ་དན་ཕྱག་རྒྱ་བྲི་བར་བྱ། །དབྱངས་ཅན་གྱི་ནི་པི་བང་ཡིན། །ཆུ་ནི་ཞགས་པ་འཛིན་པར་བྲི། །བདག་ཉིད་ཆེན་པོ་དེའི་དཀྱིལ་འཁོར། །ཆུ་ཡི་ཡིན་པར་ཤེས་པར་བྱ། །ས་བོན་རྣམས་ཀྱིས་བཏབ་པ་དང་། །མཚན་མ་རྣམས་ཀྱིས་མཚན་པར་བྱའོ། །ཤཱཀྱ་ཏོག་གི་དཀྱིལ་འཁོར་དུ། །དེ་ལ་སོགས་པའི་མཚན་རྣམས་ཀྱིས། །དཀྱིལ་འཁོར་རྣམས་ནི་གོ་རིམས་བཞིན། །དེ་དབུས་ཕྱག་རྒྱ་གཞག་པ་ནི། །ས་བོན་རྣམས་དང་བཅས་པར་བྱ། །གཞན་ཡང་

མཆོག་སྦྱིན་རྡོ་རྗེ་ཡི། །དཀྱིལ་འཁོར་ནན་ཏན་མཉན་པར་གྱིས། །ཀུན་ཏུ་གྲུ་བཞི་ལྷམ་པ་ལ། །རྡོ་རྗེའི་མཚན་མས་མཚན་པ་སྟེ། །དེ་ཡི་དབུས་སུ་བྱ་བ་ནི། །དཀྱིལ་འཁོར་མེ་ལས་བྱུང་བའོ། །དེའི་དབུས་ཕྱག་རྒྱ་གཞག་པ་ནི། །ཨུཏྤལ་ཞེས་བྱ་གཟུགས་བཟང་བ། ། འཇམ་དབྱངས་བློ་དང་ལྡན་པ་ཡི། །རང་གི་སྔགས་ཀྱིས་གཟི་བསྐྱེད་པ། །དེ་ཡི་གནས་ནི་ཆོ་ག་བཞིན། །རང་གི་ས་བོན་ཉིད་ཀྱིས་བཏབ། །མཐའ་མ་ཁོ་ར་ཁོར་ཡུག་ཏུ། །ཨུཏྤལ་རྣམས་ཀྱིས་ཁེབས་པར་བྱ། །དེ་ཡི་དབུས་སུ་བྲི་བ་ནི། །དཔའ་བོ་འདི་རྣམས་གོ་རིམས་བཞིན། །དེ་ལ་དྲ་བ་ཅན་གྱི་འོད་ཀྱི་ཕྱག་རྒྱ་ནི་ལྕགས་ཀྱུའོ། །གཞོན་ནུ་རིན་ཆེན་ཅོད་པན་གྱི་ནི་རིན་པོ་ཆེའོ། །གཞོན་ནུ་དྲི་མེད་འོད་ཀྱི་ནི་ཨུཏྤལ་ཁ་མ་བྱེ་བའོ། །འཇམ་དབྱངས་བློ་དང་ལྡན་པ་ཡི། །མངག་གཞུག་མར་ནི་གང་གྲགས་པ། །དེ་རྣམས་ཀྱི་ནི་འཇིགས་མེད་པས། །ཅི་ལྟར་རིགས་པར་ཤེས་བྱ་བ། །སྐྲ་ཅན་གྱི་ནི་ཕྱག་རྒྱ་ནི། །རལ་གྲི་ཡིན་པར་ཤེས་པར་བྱ། །ཉེ་སྐྲ་ཅན་གྱི་མདུང་རྩེ་གསུམ། །སྣ་ཚོགས་མ་ཡི་དབྱུག་པར་བཤད། །ནོར་ལྡན་མ་ཡི་རྒྱལ་མཚན་གསུངས། །འགུགས་མ་ཡི་ནི་ལྕགས་ཀྱུ་ཡིན། །དེ་དག་ཐམས་ཅད་ཨུཏྤ་ལའི། །མཚན་མ་དག་གིས་མཚན་པར་བྱ། །ཅི་སྐད་གསུངས་པའི་ཕྱག་བརྙན་མ། །དེ་དག་ཕྱག་རྒྱ་གང་གི་ན། །ལྷོ་ཡི་ཕྱོགས་སུ་ནན་ཏན་དུ། །སྒྲིབ་པ་རྣམ་སེལ་བརྩོན་འགྲུས་ཆེའི། །ཕྱག་རྒྱ་ལེགས་པར་བྲི་བ་ནི། །ཡིད་བཞིན་ནོར་བུ་ཞེས་བྱ་བ། །མེ་ཡི་དཀྱིལ་འཁོར་ནང་ན་འདུག །འཁོར་དང་བཅས་པ་གོ་རིམས་བཞིན། །འཁོར་རྣམས་ཀྱི་ནི་རྒྱས་པ་རུ། །ཕྱག་རྒྱ་འདི་རྣམས་ཤེས་པར་བྱ། །ངོ་མཚར་ཅན་གྱི་ཕྱག་རྒྱ་ནི། །བུམ་པའི་སྟེང་ན་རྡོ་རྗེ་རྩེ་གཅིག་པའོ། །མི་འཇིགས་པ་སྦྱིན་པ་ནི་མི་འཇིགས་པ་སྦྱིན་པའི་ལག་པའོ། །ངན་སོང་ཐམས་ཅད་སྤོང་བའི་ནི་ལག་པ་མས་ཡར་གྱེན་དུ་འདྲེན་པ་ལྟ་བུར་བྱའོ། །སྐྱོང་སེམས་བློ་གྲོས་ཀྱི་སྙིང་རྗེའི་ལག་པ་བྲང་དུ་གཞག་པའོ། །བྱམས་པ་ཆེན་པོ་གྱེན་དུ་འབྱུང་བའི་ནི་མེ་ཏོག་འཛིན་པའི་ལག་པའོ། །བློ་ཅན་སྙིང་རྗེས་གདུངས་པའི་ནི་ལག་པ་སྙིང་གར་གཞག་ལ་གུང་མོ་ནང་དུ་དགུག་པའོ། །གདུང་བ་ཐམས་ཅད་

ཞི་བར་བྱེད་པའི་ནི་ལག་པ་མཆོག་སྦྱིན་པའི་སོར་མོ་རྣམས་ལས་ཆུའི་རྒྱུན་འཛག་པའོ། །བློ་གྲོས་བསམ་གྱིས་མི་ཁྱབ་པ་དང་ལྡན་པའི་ལག་པ་ནི་ཡིད་བཞིན་གྱི་ནོར་བུ་ཐོགས་པའོ། །དེ་དག་ཐམས་ཅད་ཀྱང་པདྨ་ལ་གནས་ཤིང་དཀྱིལ་འཁོར་གྱི་ནང་དུ་ཆུད་པར་བྱའོ། །བྱང་ཕྱོགས་སུ་སའི་སྙིང་པོའི་ཕྱག་རྒྱ་ནི། དབང་ཆེན་དཀྱིལ་འཁོར་ནང་གནས་པ། །སྟན་ནི་སྔ་མ་བཞིན་དུ་གཞག །དེའི་སྟེང་པདྨ་ཆེན་པོ་སྟེ། །ཁ་དོག་ཀུན་ལྡན་འབར་དང་བཅས། །དེའི་སྟེང་བ་དན་ཆེན་པོ་སྟེ། །རྩེ་ལ་རིན་ཆེན་ཆེན་པོ་གཞག །དེ་ནི་གཟུགས་ཀྱི་མཆོག་ཡིན་ཏེ། །ཕྱག་རྒྱའི་གཟུགས་སུ་འདིར་བཤད་དོ། །དེ་ཡི་འཁོར་ནི་གྲངས་མེད་པ། །གཙོ་བོའི་ཡོན་ཏན་མཐའ་ཡས་ཏེ། །དེ་ལ་དེ་རྣམས་ཕྱག་རྒྱ་ཡང་། །ནན་ཏན་བསྐྱེད་དེ་བྲི་བ་ནི། །རིན་ཆེན་འབྱུང་གནས་ཀྱི་ཕྱག་རྒྱ་ནི། རྡོ་རྗེ་རྩེ་གསུམ་པ་རིན་པོ་ཆེའི་སྟེང་ན་འདུག་པའོ། །རིན་ཆེན་ལག་གི་ནི་རྡོ་རྗེ་རྩེ་གཅིག་པ་རིན་པོ་ཆེའི་སྟེང་ན་འདུག་པའོ། །ས་འཛིན་གྱི་ནི་རྡོ་རྗེ་ཁ་གཉིས་པ་རིན་པོ་ཆེའི་སྟེང་ན་འདུག་པའོ། །ཕྱག་ན་རིན་ཆེན་ཕྱག་རྒྱ་ནི་རྡོ་རྗེ་རྩེ་ལྔ་པ་རིན་པོ་ཆེའི་སྟེང་ན་འདུག་པའོ། །བསམ་པ་བརྟན་པའི་ནི་རྡོ་རྗེ་རྒྱ་གྲམ་རིན་པོ་ཆེའི་སྟེང་ན་འདུག་པ་སྟེ། ཕྱག་རྒྱ་ཐམས་ཅད་ཀྱང་དཀྱིལ་འཁོར་གྱི་ནང་དུ་ཆུད་པར་བྱའོ། །ནུབ་ཕྱོགས་སུ་ནམ་མཁའི་སྙིང་པོའི་ཕྱག་རྒྱ་ནི། ཆུ་ཡི་དཀྱིལ་འཁོར་ཡིད་འོང་བར། །པདྨ་དཀར་པོ་སྟན་ཆེན་ལ། །དེའི་དབུས་རལ་གྲི་ཞགས་པ་ནི། །སོ་ནི་ཤིན་ཏུ་རྣོ་བའི་མཆོག །རང་གི་ས་བོན་རྣམས་ཀྱིས་བཏབ། །མཁས་པས་དེར་ནི་གཞག་པར་བྱ། །དེ་ཡི་འཁོར་རྣམས་བྲི་བ་ནི། །ཕྱག་རྒྱའི་གཟུགས་རྣམས་གོ་རིམས་བཞིན། །དེ་ལ་ནམ་མཁའ་དྲི་མེད་ཀྱི་ཕྱག་རྒྱ་ནི། རླུང་གི་དཀྱིལ་འཁོར་གྱི་དབུས་སུ་འཁོར་ལོ་མཚན་དང་བཅས་པའོ། །ནམ་མཁའི་བློ་གྲོས་ཀྱི་ཕྱག་རྒྱ་ནི་དཀྱིལ་འཁོར་གྱི་དབུས་ན་དུང་ངོ་། ། རྣམ་པར་དག་པའི་བློ་གྲོས་ཀྱི་ཕྱག་རྒྱ་ནི་པདྨ་དཀར་པོ་རླུང་གི་དཀྱིལ་འཁོར་གྱི་དབུས་ན་འདུག་པའོ། །སྤྱོད་པའི་བློ་གྲོས་ཀྱི་ཕྱག་རྒྱ་ནི་རླུང་གི་དཀྱིལ་འཁོར་གྱི་དབུས་ན་དུང་གི་སྟེང་ན་ཨུཏྤ་ལ་གཞག་པའོ། །བློ་གྲོས་བརྟན་པའི་ཕྱག་རྒྱ་ཡང་རླུང་གི་དཀྱིལ་འཁོར་གྱི་དབུས་ན་རྡོ་རྗེ་པདྨའི་སྟེང་

ན་འདུག་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། གསང་བའི་དཀྱིལ་འཁོར་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བའི་དཀྱིལ་འཁོར་དུ་འཇུག་པའི་ཆོ་ག་གསུངས་པ། ཀུན་ཏུ་བསླབ་པའི་སྔགས་པ་ནི། །གསང་བའི་དཀྱིལ་འཁོར་ལ་མཁས་པས། །དེ་ཚེ་སློབ་མའི་སྡིག་པ་ཀུན། །ཆོ་ག་བཞིན་དུ་བསྲེག་པར་བྱ། །ཅི་ནས་སླར་ཡང་མི་སྐྱེ་བར། །དེ་ཡི་འཚོ་བའང་བསྲེག་པར་བྱ། །བསྲེགས་ཏེ་ཐལ་བར་གྱུར་ནས་ཀྱང་། །དེ་ནི་སླར་ཡང་གསོ་བར་བྱ། །ཡི་གེ་ཡིས་ནི་མི་འགྱུར་བསྲེག །འཚོ་བས་སླར་ཡང་གསོ་བར་བྱ། །འཚོ་བས་ཐམས་ཅད་གསོས་ནས་ནི། །ཀུན་ཏུ་དག་ཅིང་དྲི་མ་མེད། །ཡན་ལག་བཅུ་གཉིས་ཚིག་རྣམས་ནི། །དེ་ཡི་མོད་ལ་དགོད་པར་བྱ། །བྱང་ཆུབ་སེམས་དཔའ་སྐྱོབ་རྣམས་དང་། །སངས་རྒྱས་རྣམས་ཀྱི་དམ་ཚིག་འདི། །སངས་རྒྱས་རྣམས་དང་ཉན་ཐོས་དང་། །འཇིག་རྟེན་རྣམས་ཀྱིས་བཀུར་བ་ཡིན། །གསང་བའི་དཀྱིལ་འཁོར་དབུས་གནས་པའི། །དམ་ཚིག་འདི་ནི་སུས་རིག་པ། །རྒྱུད་རྣམས་ཀུན་ཏུ་ཞུགས་པ་དང་། །དཀྱིལ་འཁོར་ཀུན་ལ་དབང་བ་ཡིན། །སྔགས་འཆང་དེ་ནི་ང་དང་འདྲ། །དམ་ཚིག་ཅན་ནི་གཞན་མི་བྱ། །གསང་བའི་དཀྱིལ་འཁོར་དུ་འཇུག་པ་རིམ་པར་ཕྱེ་བའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས། བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཆོ་ག་གང་དག་གིས་བདག་ཉིད་ལྷའི་གཟུགས་སུ་བརྟན་པར་གྱུར་པར་ཤེས་པ་དང་།ཤེས་ནས་ཀྱང་རང་གི་ལྷའི་ཚུལ་དུ་གནས་ནས། དངོས་གྲུབ་ཐོབ་པར་འགྱུར་བ་གསང་བའི་ཕྱག་རྒྱ་བརྒྱད་པོ་གསང་བ་དང་བཅས་པ། ལྷའི་གནས་བྱིན་གྱིས་རློབ་པར་འགྱུར་བ། རང་གི་གསང་སྔགས་ཀྱིས་མཚན་པ། དཀྱིལ་འཁོར་དང་ལྡན་པ། རང་གི་ལྷའི་རྣལ་འབྱོར་དུ་བྱ་བ་ཡོད་དེ། ཕྱག་རྒྱ་བརྒྱད་པོ་དེ་ཡང་

གང་ཞེ་ན། ལག་པ་གཉིས་ཁོང་སྟོང་དུ་སྦྱར་ལ་མཐེའུ་ཆུང་གཉིས་དང་མཛུབ་མོ་གཉིས་འབར་བ་ལྟ་བུར་དགྱེད་དོ། །བཅོམ་ལྡན་འདས་ཉིད་ཀྱི་གཟི་བརྗིད་འབྱུང་བའི་ཕྱག་རྒྱ་སྟེ། དེའི་དཀྱིལ་འཁོར་ནི་གྲུ་གསུམ་ལ་སུམ་མདོའི་རིས་མཚན་ཅན་འབར་བ་དང་བཅས་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། རྃ་ར་སྭཱ་ཧཱ། ཕྱག་རྒྱ་དེ་ཉིད་ལས་མཛུབ་མོ་གཉིས་བཀུག་སྟེ། མཐེ་བོའི་སྟེང་དུ་བ་དན་ལྟ་བུར་གཟུང་ངོ་། །བཅོམ་ལྡན་འདས་ཀྱི་རྡོ་རྗེ་མི་ཤིགས་པའི་ཕྱག་རྒྱ་སྟེ། དཀྱིལ་འཁོར་ནི་ཡི་གེ་འབར་བ་འདྲ་བ་རྡོ་རྗེ་འབར་བ་དང་བཅས་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། བྃ་བ་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་དང་སྲིན་ལག་གཉིས་བརྐྱང་ལ། ལྷག་མ་རྣམས་སྔ་མ་བཞིན་དུ་གཞག་གོ། །པདྨོའི་སྦུབས་ཀྱི་ཕྱག་རྒྱ་སྟེ། དཀྱིལ་འཁོར་ནི་ཟླ་བའི་དཀྱིལ་འཁོར་འདྲ་བ། པདྨའི་མཚན་མ་ཅན་ནོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། སཾ་ས་སྭཱ་ཧཱ། ཕྱག་རྒྱ་དེ་ཉིད་ལས་མཐེའུ་ཆུང་གཉིས་འོག་ཏུ་གཞུག་གོ། །སངས་རྒྱས་ཀྱི་གསུང་དབྱངས་བཀོད་པའི་རྒྱན་གྱི་ཕྱག་རྒྱ་སྟེ། དཀྱིལ་འཁོར་ནི་ཟླ་བ་གང་བ་ལྟ་བུ་བ་དན་དང་བཅས་པ་ཀླད་ཀོར་གཉིས་པས་མཚན་པའོ། །གསང་སྔགས་ནི། ན་མཿ ས་མནྟ་བུད་དྷཱ་ནཱཾ། ཧྃ་ཧ་སྭཱ་ཧཱ། དེ་བཞིན་དུ་ལག་པ་གཉིས་ཁོང་སྟོང་དུ་ཐལ་མོ་སྦྱར་ལ། མཐེ་བོ་གཉིས་སོ་སོར་ཕྱེ་སྟེ་ལྷག་མ་རྣམས་ཅུང་ཟད་ཙམ་སྙིམ་པ་ལྟ་བུར་བྱའོ། །འདི་ནི་བཅོམ་ལྡན་འདས་ཀྱི་ཡན་ལག་ཐམས་ཅད་འབྱུང་བའི་ཕྱག་རྒྱ་སྟེ། དཀྱིལ་འཁོར་ནི་བུམ་པ་ཟླ་བ་འདྲ་བ་རྡོ་རྗེས་མཚན་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། ཨཾ་ཨ་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་གཉིས་བཀུག་ལ་ལྷག་མ་རྣམས་དེ་བཞིན་དུ་གཞག་གོ། །འདི་ནི་བཅོམ་ལྡན་འདས་ཀྱི་གཟུངས་ཀྱི་ཕྱག་རྒྱ་སྟེ། དེའི་དཀྱིལ་འཁོར་ནི་འཇའ་འདྲ་བ་མཚན་མ་ཐམས་ཅད་དང་ལྡན་པའོ། །རྡོ་རྗེའི་བ་དན་འཕྱར་བའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། བུདྡྷ་དྷཱ་ར་ཎི་སྨྲྀ་ཏི་བ་ལ་དྷཱ་ར་ཎཱི་ཀ་རི་དྷ་ར་དྷ་ར། དྷཱ་ར་ཡ་དྷཱ་ར་ཡ། ས་བྷ་ག་བ་ཏེ། ཨཱ་ཀཱ་རཱ་བཱ་ཏི་ཨ་ས་མེ་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་གཉིས་ཕྱུང་སྟེ་མཐེའུ་ཆུང་གཉིས་གུང་མོ་གཉིས་

ཀྱིས་བཀུག་ལ་སྤྱི་བོར་སྦྱར་རོ། །འདི་ནི་བཅོམ་ལྡན་འདས་ཀྱི་ཆོས་གནས་པའི་ཕྱག་རྒྱ་སྟེ། དཀྱིལ་འཁོར་ནི་ནམ་མཁའི་ཁ་དོག་ཐམས་ཅད་དང་ལྡན་པ་ཀླད་ཀོར་གཉིས་ཀྱིས་མཚན་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། ཨ་བེ་ད་བེ་དྱཱེ་ཨ་སྭཱ་ཧཱ། ཕྱག་རྒྱ་དེ་ཉིད་ལས་གུང་མོ་གཉིས་ཕན་ཚུན་བསྣོལ་མར་གཟུང་ངོ་། །འདི་ནི་བཅོམ་ལྡན་འདས་ཀྱི་རྣལ་འབྱོར་འཛིན་པའི་ཕྱག་རྒྱ་སྟེ། དེའི་དཀྱིལ་འཁོར་ནི་ནམ་མཁའ་སྟེ། ཁྱད་པར་དུ་སྔོ་ལ་ཀླད་ཀོར་ཅན་སྙེམས་པ་དང་བཅས་པའོ། །གསང་སྔགས་ནི། ན་མཿས་མནྟ་བུད་དྷཱ་ནཱཾ། མ་ཧཱ་ཡོ་ག་ཡོ་གཱི་ནཱི་ཡོ་གེ་ཤྭ་རཱ། ཁཉྫ་རི་ཀེ་སྭཱ་ཧཱ། གསང་བ་པའི་བདག་པོ་འདི་དག་ནི་གསང་བ་པའི་ཕྱག་རྒྱ་སྟེ། དེ་བཞིན་གཤེགས་པ་རྣམས་ཀྱི་རབ་ཏུ་གསང་བ་ཡིན་གྱིས། དབང་བསྐུར་བ་དང་། ཆོ་རིགས་བཙུན་པ་དང་། སྤྲོ་བ་ཅན་དང་། ཡི་དམ་ལ་བརྟན་པ་དང་། བླ་མ་ལ་གུས་པ་དང་། བྱས་པ་གཟོ་བ་དང་། གཙང་སྦྲ་ཆེ་བ་དང་། བདག་གི་ལུས་དང་སྲོག་ལ་ཡང་མི་ལྟ་བ་མ་གཏོགས་པ་གཞན་དུ་སུ་ལ་ཡང་མ་སྦྱིན་ཅིག །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། གསང་བའི་ཕྱག་རྒྱ་བརྒྱད་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཆེན་པོ་དེའི་ཚེ་མ་འོངས་པའི་འགྲོ་བ་རྣམས་ལ་གཟིགས་ནས། ཐམས་ཅད་ཀྱི་རྗེས་སུ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་ནས་འདི་ལྟར་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་གནས་ཤིང་། སྒོ་ཁྱུད་དང་རྟ་བབས་རིན་པོ་ཆེ་སྣ་ལྔས་རབ་ཏུ་རྣམ་པར་སྤྲས་པས་བརྒྱན་པ། བ་དན་ཁ་དོག་དུ་མ་དང་ལྡན་པ་བསྒྲེང་བས་རྒྱ་ཆེ་བ། རིན་པོ་ཆེ་ཆེན་པོའི་བླ་རེ་བྲེས་པ། རིན་པོ་ཆེའི་དྲིལ་བུ་དང་། རྔ་མ་དཀར་པོ་དང་། དར་དང་གོས་མང་པོ་དཔྱངས་པ། རིན་པོ་ཆེའི་ཀ་བ་ཕྱོགས་བརྒྱད་དུ་བཙུགས་པ། པདྨའི་མཚེའུ་ཆུ་དྲི་ཞིམ་པོ་ཡན་ལག་བརྒྱད་དང་ལྡན་པས་ཡོངས་སུ་གང་བ། ངང་པ་དང་། ངུར་པ་དང་། བཞད་ཀྱི་སྒྲ་གྲག་པ་དུས་ཐམས་ཅད་པའི་མེ་ཏོག་སྣ་ཚོགས་

ཀྱི་ཤིང་ལྗོན་པས་ཕྱོགས་བརྒྱད་དུ་བརྒྱན་པ། རིན་པོ་ཆེ་སྣ་ལྔའི་ཕྲེང་བ་དང་སྲད་བུས་ལེགས་པར་བསྐོར་བ། ས་གཞི་ཀ་ཙ་ལིན་ད་འཇམ་པོ་ལྟར་རེག་ན་བདེ་ཞིང་རབ་ཏུ་འཇམ་པ་དང་། རྔ་སྒྲ་དང་སིལ་སྙན་གྱི་སྒྲ་ཡིད་དུ་འོང་ཞིང་སྙན་པ་རྣམ་པ་དུ་མ་གྲག་པ། བྱང་ཆུབ་སེམས་དཔའ་མང་པོའི་བསོད་ནམས་ཀྱིས་བསགས་པའི་སྟན་དང་། ཁང་པ་དང་། གཞལ་མེད་ཁང་ཡིད་ལས་བྱུང་བ་དང་ལྡན་པར་གྱུར་ཏོ། །པདྨའི་རྒྱལ་པོ་ཆེན་པོ་དེ་བཞིན་གཤེགས་པའི་མོས་པ་ལས་བྱུང་བ། ཆོས་ཀྱི་དབྱིངས་རྟོགས་པའི་མཚན་མས་མཚན་པ་ཡང་བྱུང་བར་གྱུར་ཏོ། །དེའི་དབུས་ན་དེ་བཞིན་གཤེགས་པའི་སྐུ་ཆོས་ཀྱི་དབྱིངས་ལ་གཞོལ་བ། སེམས་ཅན་གྱི་བསམ་པ་དང་མོས་པ་ཅི་ལྟ་བ་བཞིན་དུ་མགུ་བར་མཛད་པར་བཞུགས་ཏེ། དེ་བཞིན་གཤེགས་པ་དེའི་ཡན་ལག་ཐམས་ཅད་ནས་སྐུ་ཅིས་ཀྱང་མི་ཚུགས་པའི་སྟོབས་དང་ལྡན་པ། སྟོབས་བཅུ་ལ་མོས་པ་ལས་བྱུང་བ། ཁ་དོག་དང་དབྱིབས་རྣམ་པ་དུ་མས་བདག་གི་སྐུ་བརྒྱན་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བསོད་ནམས་ཀྱིས་རྣམ་པར་བསྐྱེད་པ་དག་བྱུང་བར་གྱུར་ཏོ། །དེ་དག་བྱུང་ནས་ཐམས་ཅད་དང་ལྡན་པའི་འཇིག་རྟེན་གྱི་ཁམས་སུ་སྒྲ་མངོན་པར་གོ་བར་མཛད་ཅིང་ཆེད་དུ་གླེང་བ་འདི་གླེངས་སོ། །ཨེ་མའོ་སངས་རྒྱས་ཐམས་ཅད་ཀྱི། །ཤེས་རབ་ཐབས་ནི་བསམ་མི་ཁྱབ། །གནས་མེད་པ་ནི་རྟོགས་གྱུར་ནས། །གནས་དང་བཅས་པའི་ཆོས་ཀྱང་འཆད། །གང་དག་གིས་ནི་ཆོས་རྣམས་ཀྱི། །ཆོས་ཀྱི་མཚན་ཉིད་རྙེད་མེད་པ། །ཤེས་པ་དེས་ནི་འདྲེན་ཀུན་གྱིས། །གང་བརྙེས་རྙེད་པ་ཐོབ་པར་འགྱུར། །དེ་དག་གིས་ཆེད་དུ་གླེང་བ་དེ་ཆེད་དུ་གླེངས་ནས་དེ་དག་སླར་ཡང་དེ་བཞིན་གཤེགས་པའི་ཆོས་ཀྱི་སྐུ་བསམ་གྱིས་མི་ཁྱབ་པ་ལ་ཞུགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། རིགས་ཀྱི་བུ་ནང་གི་དཀྱིལ་འཁོར་ཉོན་ཅིག །གསང་བ་པའི་བདག་པོ་ལུས་ཀྱི་ས་གཞི་གང་ཡིན་པ་དེ་ཆོས་ཀྱི་དབྱིངས་ཀྱི་རང་བཞིན་གྱི་སྔགས་དང་ཕྱག་རྒྱའི་བྱིན་གྱི་

རླབས་ཀྱིས་བྱིན་དུ་བརླབ་པར་བྱ་སྟེ། རང་བཞིན་གྱིས་རྣམ་པར་དག་པའི་ཕྱིར་རོ། །དེ་ནས་བདག་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབས་ཏེ། རྡུལ་ཐམས་ཅད་དང་བྲལ་བ། བདག་དང་། སེམས་ཅན་དང་། སྲོག་དང་། གསོ་བ་དང་། ཤེད་ཅན་དང་། ཤེད་ལས་སྐྱེས་པ་དང་། བྱེད་པ་པོ་ལ་སོགས་པའི་ཟུག་རྔུའི་སྐྱོན་དང་བྲལ་བ་ལ། གྲུ་བཞི་ལ་སྒོ་བཞི་དང་ལྡན་པ། ནུབ་ཕྱོགས་ཀྱི་སྒོ་རྟག་ཏུ་ཕྱེ་བ། སྒོ་ཁྱུད་དང་སྟེགས་བུས་བརྒྱན་པའི་དབུས་ན་པདྨོའི་རྒྱལ་པོ་ཆེན་པོ་ཡིད་ལས་བྱུང་བ། འདབ་མ་བརྒྱད་པ་སྡོང་བུ་དང་བཅས་པ། ཟེ་བ་རྒྱས་ཤིང་ཤིན་ཏུ་མཛེས་པར་བྱུང་བ་དེའི་དབུས་ན་ཡང་། དེ་བཞིན་གཤེགས་པའི་སྐུ་དང་གསུང་དང་ཐུགས་འཇིག་རྟེན་ཐམས་ཅད་ལས་འདས་པ། སེམས་ཀྱི་ས་ལས་ཡང་དག་པར་འདས་པ། སེམས་ཀྱི་ས་རྗེས་སུ་ཐོབ་པ། འདོད་པའི་འབྲས་བུ་ཁྱད་པར་ཅན་སྩོལ་བར་བསམ་མོ། །དེའི་ཤར་ཕྱོགས་སུ་དེ་བཞིན་གཤེགས་པ་རིན་པོ་ཆེའི་ཏོག་གོ། །ལྷོ་ཕྱོགས་སུ་དེ་བཞིན་གཤེགས་པ་མེ་ཏོག་ཀུན་ཏུ་རྒྱས་པའི་རྒྱལ་པོའི་དབང་པོའོ། །བྱང་ཕྱོགས་སུ་དེ་བཞིན་གཤེགས་པ་རྔ་སྒྲ་ཅན་ནོ། །ནུབ་ཕྱོགས་སུ་དེ་བཞིན་གཤེགས་པ་འོད་དཔག་ཏུ་མེད་པའོ། །ཤར་ལྷོའི་ཕྱོགས་མཚམས་སུ་ནི་བྱང་ཆུབ་སེམས་དཔའ་ཀུན་ཏུ་བཟང་པོའོ། །བྱང་ཤར་མཚམས་སུ་ནི་སྤྱན་རས་གཟིགས་དབང་ཕྱུག་གོ། །ལྷོ་ནུབ་ཀྱི་མཚམས་སུ་ནི་འཇམ་དཔལ་གཞོན་ནུར་གྱུར་པའོ། །ནུབ་བྱང་གི་མཚམས་སུ་ནི་བྱམས་པའོ། །ཟེ་བ་ཀུན་ལ་ནི་བྱང་ཆུབ་སེམས་དཔའི་ཡུམ་དང་ཕ་རོལ་ཏུ་ཕྱིན་པ་དྲུག་དང་། ཏིང་ངེ་འཛིན་རྣམས་བྲིའོ། །འོག་ཏུ་ནི་རིག་སྔགས་དང་ཁྲོ་བོའི་ཚོགས་རྣམས་བྲིའོ། །སྡོང་བུ་ལ་ནི་ཕྱག་ན་རྡོ་རྗེའོ། །ལྷག་མ་རྣམས་ནི་རྒྱ་མཚོ་ཆེན་པོའོ། །མར་མེ་མེ་ཏོག་བདུག་སྤོས་དང་། །བཤོས་དང་བདུག་པ་ཡིད་ལས་བྱུང་། །ལུས་ཅན་རྣམས་ཀྱི་དམ་ཚིག་ཕྱིར། །ཐམས་ཅད་སྔགས་པས་བསམ་པར་བྱ། །འོག་གི་ས་གཞི་ཐམས་ཅད་ལ། །ལྷ་ལ་སོགས་པ་གྲངས་མེད་པའང་། །བདག་ཉིད་ཆེན་པོའི་དཀྱིལ་འཁོར་འདིར། །སྔགས་པས་ནན་ཏན་བསྐྱེད་དེ་བྲི། །རང་གི་ལུས་ནི་བདག་ཉིད་ཀྱིས། །ར་ཞེས་བྱ་བས་རྣམ་སྦྱངས་

ནས། །སྔགས་པ་རྣལ་འབྱོར་སྟན་ལ་འདུག །དེ་བཞིན་གཤེགས་པ་རྗེས་དྲན་ཞིང་། །སློབ་མ་རྣམས་ཀྱི་སྤྱི་བོར་ནི། །ཀླད་ཀོར་བཅས་པའི་ཨ་བཞག་སྟེ། །འཇིགས་པ་མེད་པའི་བདག་ལུས་ལ། །དེ་ནས་མེ་ཏོག་འདོར་དུ་གཞུག །བརྟགས་ནས་དེ་ལ་བསྟན་པར་བྱ། །ཡང་ན་དེ་ལ་རིག་སྔགས་སྦྱིན། །ལུས་ཅན་རྣམས་ཀྱི་དམ་ཚིག་ཕྱིར། །འདི་ནི་དཀྱིལ་འཁོར་གཙོ་བོར་འདོད། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། གསང་བའི་དཀྱིལ་འཁོར་དུ་གཟུད་པ་ལ་འཇུག་པའི་རིམ་པར་ཕྱེ་བ་རྒྱས་པའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ལ་ཕྱག་ན་རྡོ་རྗེས་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོན་དུ་ཚིགས་སུ་བཅད་པའི་དབྱངས་ཀྱིས་རིག་སྔགས་ཀྱི་བརྟུལ་ཞུགས་ཞུས་པ། ཅི་ལྟར་བརྟུལ་ཞུགས་སྤྱད་པ་ལགས། ། ཚུལ་ཁྲིམས་ལ་གནས་ཅི་ལྟ་བུ། །གང་ན་ཅི་ལྟར་གནས་ཀྱང་རུང་། །མ་ཆགས་པར་ནི་ཅི་ལྟར་སྤྱོད། །དུས་ནི་ཅི་སྲིད་ལོན་གྱུར་ན། །བརྟུལ་ཞུགས་ཡོངས་སུ་རྫོགས་པར་འགྱུར། །དེའི་མཐུ་ཅི་ལགས་འཚལ་བར་གྱིས། །གནས་ནི་གང་དུ་བགྱི་བ་ལགས། །དུས་དང་ཡུལ་དང་བྱ་བ་ལས། །ཆོས་དང་ཆོས་མིན་རྣམ་སྤངས་པར། །དེ་ནི་ཅི་ལྟར་མྱུར་དུ་འགྱུར། །ཚད་ཀྱང་འདྲེན་པས་བཀའ་སྩོལ་ཅིག །གང་གིས་དངོས་གྲུབ་ཐོབ་འགྱུར་བ། །སངས་རྒྱས་རྣམས་ཀྱིས་སྔོན་བསྟན་པ། །མ་འོངས་འགྲོ་བའི་དོན་གྱི་ཕྱིར། །རྫོགས་པའི་སངས་རྒྱས་རྐང་གཉིས་གཙོ། །ཐམས་ཅད་མཁྱེན་ལ་བདག་ཞུ་བ། །རྒྱལ་བའི་གཙོ་བོ་དཔང་དུ་བཞུགས། །དེ་སྐད་གསོལ་ནས་བཅོམ་ལྡན་འདས། །རྣམ་སྣང་མཛད་ཆེན་དེ་ཡི་ཚེ། །སེམས་ཅན་རྣམས་ལ་བརྩེ་བའི་ཕྱིར། །འདི་སྐད་ཀྱི་ནི་ཚིག་གསུངས་སོ། །ལག་ན་རྡོ་རྗེ་མཐུ་བོ་ཆེ། ། སེམས་དཔའ་ཆེན་པོ་དཔའ་བོ་ལེགས། །སྔོན་གྱི་སངས་རྒྱས་ཀྱིས་གསུངས་པའི། །བརྟུལ་ཞུགས་དམ་པ་བརྟན་པར་བྱའོ། །འཇིག་རྟེན་ལ་ནི་ཕན་བྱེད་པའི། །དངོས་གྲུབ་གང་གིས་ཐོབ་འགྱུར་བ། །རིག་པའི་བརྟུལ་ཞུགས་ལས་བྱུང་བའི། །བརྟུལ་ཞུགས་སངས་རྒྱས་བཞིན་

དུ་གནས། །བདག་གི་དེ་ཉིད་བསྐྱེད་ནས་ནི། །རྟག་ཏུ་ཐེ་ཚོམ་མེད་པའི་ཡིད། །གང་ཚེ་རྟག་ཏུ་མཉམ་བཞག་པ། །དེ་ཚེ་བརྟུལ་ཞུགས་སྤྱད་པ་ཡིན། །བྱང་ཆུབ་སེམས་དང་ཆོས་རྣམས་དང་། །བསླབ་དང་ལས་དང་འབྲས་བུ་གང་། །མཚན་ཉིད་གཅིག་ཏུ་ལྡན་འགྱུར་ཅིང་། །ལས་དང་བྱ་བ་རྣམ་སྤངས་པའི། །ཚུལ་ཁྲིམས་སངས་རྒྱས་བཞིན་ཞེས་བྱ། །ཚུལ་ཁྲིམས་ལྡན་ཞེས་གཞན་མི་བྱ། །ཆོས་རྣམས་ཀུན་ལ་དབང་ཐོབ་ཅིང་། །སེམས་ཅན་དོན་རྟོགས་ཁོང་དུ་ཆུད། །གསེར་དང་བོང་རྡོ་མཉམ་གྱུར་ན། །དེ་ནི་མྱུར་དུ་མ་ཆགས་སྤྱོད། ། གསང་སྔགས་ཀྱི་ནི་གྲངས་དག་ལས། །འབུམ་གྲངས་ཅི་སྙེད་བསྟན་གྱུར་པ། །དུས་ནི་དེ་སྲིད་ལོན་གྱུར་ན། །བརྟུལ་ཞུགས་ཡོངས་སུ་རྫོགས་པར་འགྱུར། །དབང་ཆེན་གྱི་ནི་དངོས་པོ་ཡིས། །དབང་ཆེན་དཀྱིལ་འཁོར་ལ་གནས་ཏེ། །རྡོ་རྗེ་ཅན་གྱི་རྒྱ་བཅིངས་ལ། །ཟས་སུ་རྟག་ཏུ་འོ་མ་འཐུང་། །སྲོག་དང་རྩོལ་བ་རབ་བསྡམས་ནས། །སྔགས་པས་ཟླ་བ་གཅིག་ཏུ་བཟླས། །དེ་ནས་ཟླ་བ་གཉིས་པ་ལ། །ཆུ་ཡི་དཀྱིལ་འཁོར་དང་ལྡན་པར། །པདྨའི་ཕྱག་རྒྱ་བཅིངས་ནས་སུ། །དེ་ཚེ་ཟས་སུ་ཆུ་བཏུང་ངོ་། །དེ་ནས་ཟླ་བ་གསུམ་པ་ལ། །མེ་ཡི་ངོས་ལ་གཞོལ་བྱས་ཏེ། ། མ་བླངས་པ་ཡི་ཟས་ཟ་ཞིང་། །རལ་གྲི་ཕྱག་རྒྱ་དང་ལྡན་པས། །ལུས་དང་ངག་ཡིད་ལས་བྱུང་བའི། །སྡིག་པ་ཐམས་ཅད་བསྲེག་པར་བྱ། །བཞི་ལ་རླུང་དང་ལྡན་བྱས་ཏེ། །ཟས་སུ་རྟག་ཏུ་རླུང་བཟའོ། །དེ་ནས་འཁོར་ལོའི་ཕྱག་རྒྱ་བཅིང་། །མཉམ་པར་གཞག་སྟེ་གསང་སྔགས་བཟླས། །དབང་ཆེན་དང་ནི་ཆུའི་ངོས་ལ། །རྣལ་འབྱོར་གཞོལ་བ་འདུག་ནས་སུ། །ཟླ་བ་ཡར་གྱི་ངོ་ལ་ནི། །དེ་ནས་ཟླ་བ་ལྔ་པ་ལ། །རྙེད་དང་མ་རྙེད་རྣམ་སྤངས་ཏེ། །སྔགས་པ་ཀུན་ཏུ་ཆགས་མེད་ན། །རྫོགས་པའི་སངས་རྒྱས་བཞིན་དུ་འགྱུར། །རླུང་དང་མེར་ནི་ལྡན་བྱས་ནས། ། ཉེས་པ་ཀུན་དང་རྣམ་བྲལ་ཞིང་། །རྙེད་དང་མ་རྙེད་རྣམ་སྤངས་ཏེ། །ཟླ་བ་གཞན་ལ་བཟླས་བརྗོད་བྱ། །བརྒྱ་བྱིན་ཚངས་ལ་སོགས་པའི་ལྷ། །ཤ་ཟ་ལྟོ་འཕྱེ་སྲིན་པོ་རྣམས། །རྒྱང་རིང་ནས་ནི་ཕྱག་འཚལ་ཞིང་། །ཐམས་ཅད་སྲུང་བའང་བྱེད་པར་འགྱུར། །དེ་དག་ཐམས་ཅད་བཀའ་ཉན་

ཅིང་། །དེ་ཡི་བཀའ་བཞིན་བྱེད་པར་འགྱུར། །སྨན་དང་མི་དང་ལྷ་རྣམས་དང་། །རིག་སྔགས་རྣམས་དང་གསང་སྔགས་ཀུན། །ཅི་དག་བགྱི་ཞེས་ཚིག་སྨྲ་ཞིང་། །དེ་ཡི་དྲུང་དུ་འཁོད་པར་འགྱུར། །བགེགས་དང་ལོག་འདྲེན་མ་རུངས་དང་། །སྲིན་པོ་དང་ནི་མ་མོ་རྣམས། །གསང་སྔགས་འཛིན་པ་མཐོང་བའི་ཚེ། །རྒྱང་རིང་ནས་ནི་ཕྱག་འཚལ་འགྱུར། །རིག་པའི་བརྟུལ་ཞུགས་ལ་གནས་པའི། །སྔགས་ཤེས་གང་ན་འདུག་པ་ཡི། །གནས་དེ་རབ་ཏུ་འཇིག་པ་ཡི། །མེ་ལྟར་འབར་ཞིང་འཇིགས་པར་འགྱུར། །དབང་ཕྱུག་གོ་འཕང་ཐམས་ཅད་འཐོབ། །དེས་པ་རྫོགས་པའི་སངས་རྒྱས་བཞིན། །དཔལ་ལྡན་གདུལ་དཀའ་འདུལ་བ་པོ། །རྡོ་རྗེ་འཛིན་ཆེན་དཀའ་ཐུབ་ཅན། །སེམས་ཅན་ཀུན་ལ་ཕན་བྱེད་པ། །སྙིང་རྗེ་འཇིག་རྟེན་དབང་པོ་བཞིན། །ཟླ་བ་དྲུག་རྣམས་འདས་གྱུར་ན། །འདོད་པའི་དངོས་གྲུབ་འབྲས་བུ་འཐོབ། ། བདག་ཉིད་དང་ནི་གཞན་ལ་ཡང་། །རྟག་པར་རྗེས་སུ་ཕན་པར་བྱེད། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། རིག་སྔགས་ཀྱི་བརྟུལ་ཞུགས་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་ཡང་གསང་སྔགས་རྣམས་དང་། དཀྱིལ་འཁོར་རྣམས་ཀྱི་སྙིང་པོ་ཞུས་པ། གསང་སྔགས་ཀུན་གྱི་སྙིང་པོ་གང་། །ཅི་ཞིག་འཚལ་ན་སློབ་དཔོན་འགྱུར། །དེ་སྐད་གསོལ་ནས་བཅོམ་ལྡན་འདས། །དེའི་ཚེ་རྣམ་སྣང་མཛད་ཆེན་གྱིས། །རྡོ་རྗེ་འཛིན་ལ་བཀའ་སྩལ་པ། །སེམས་དཔའ་ཆེན་པོ་ལེགས་སོ་ལེགས། །ཡེ་ཤེས་གསང་བས་ཆེས་གསང་ཞིང་། །གསང་སྔགས་ཡེ་ཤེས་ཆེར་འབྱུང་བ། །བུ་ཁྱོད་ལ་ནི་བཤད་པར་བྱ། །མ་ཡེངས་ཡིད་ཀྱིས་མཉན་པར་གྱིས། །ཨ་ནི་གསང་སྔགས་ཐམས་ཅད་ཀྱི། །སྙིང་པོ་ཡིན་པར་ཡང་དག་བཤད། །འདི་ལས་བྱུང་བའི་གསང་སྔགས་ནི། །གྲངས་མེད་རྣམས་ཀྱང་འབྱུང་བར་འགྱུར། །སྤྲོས་པ་ཐམས་ཅད་ཞི་བ་ཡི། །ཡེ་ཤེས་མཐའ་དག་སྐྱེ་བར་འགྱུར། །གསང་བ་པའི་བདག་པོ་ཅི་ལྟར་ན་ཨ་ཞེས་བྱ་བ་གསང་སྔགས་ཐམས་ཅད་ཀྱི་སྙིང་པོ་ཡིན་ཞེ་ན། རྫོགས་པའི་

སངས་རྒྱས་རྐང་གཉིས་གཙོས། །ཨ་ནི་གཙོ་བོ་ཡིན་པར་གསུངས། །དེ་བས་འདི་ཀུན་ཐམས་ཅད་དེ། །ཡན་ལག་ཀུན་ལ་རྣམ་པར་གནས། །ཡན་ལག་རྣམས་ཀྱང་ཅི་རིགས་པར། །རྟག་པར་ཀུན་ཏུ་རིག་པར་གྱིས། །ཡི་གེ་རྣམས་ཀྱིས་ཐམས་ཅད་ཁྱབ། །ཡི་གེ་རྣམས་ཀྱང་དེ་ཡིས་ཁྱབ། །ཡི་གེ་རྣམས་ལ་སྒྲ་འབྱུང་བ། །ཆ་དང་ཆ་ལས་བྱུང་བའོ། །དེ་བས་འདི་ཀུན་ཐམས་ཅད་དེ། །ལུས་ནི་སྣ་ཚོགས་ལས་བྱུང་བའོ། །དེ་ཡི་དགོད་པ་ཡང་དག་བསྟན། །སྙིང་པོ་དག་ནི་དེས་པས་ཉོན། །སྙིང་གར་སྙིང་པོ་བཞག་ནས་ནི། །ཡན་ལག་རྣམས་ལ་ཡན་ལག་དགོད། །བློ་ལྡན་རྣལ་འབྱོར་སྟན་འདུག་སྟེ། །བདག་ལུས་རྫོགས་སངས་རྒྱས་ཀྱི་སྐུར། །བྱས་ནས་དེ་བཞིན་གཤེགས་པ་རྣམས། །དྲན་པར་བྱས་ཏེ་འདི་ཀུན་བྱ། །གང་གིས་ཡེ་ཤེས་རྒྱ་ཆེན་ཏེ། །ཆོ་ག་བཞིན་དུ་ཤེས་གྱུར་ན། །དེ་ཚེ་སངས་རྒྱས་མཐུ་ཆེན་གྱིས། ། དེ་ནི་སློབ་དཔོན་ཡིན་པར་བཤད། །དེ་བས་དེ་ཉིད་དེ་བཞིན་གཤེགས། །དེ་ཉིད་རྫོགས་སངས་རྒྱས་ཞེས་བྱ། །སངས་རྒྱས་བྱང་ཆུབ་སེམས་དཔའ་དང་། །ཚངས་པ་ཁྱབ་འཇུག་དབང་ཕྱུག་ཆེ། །ཉི་མ་ཟླ་བ་ཆུ་ལྷ་དང་། །བརྒྱ་བྱིན་དང་ནི་སྐྱེ་དགུའི་བདག །དུས་དང་གཤིན་རྗེའང་དེ་ཉིད་དེ། །ས་ཡི་ལྷ་དང་དབྱངས་ཅན་ཏེ། །བྲམ་ཟེ་དང་ནི་ཁྲུས་བྱེད་ཉིད། །ཚངས་པར་སྤྱོད་པ་ཞེས་ཀྱང་བྱ། །དགེ་སློང་དཔལ་ལྡན་ཟག་པ་ཟད། །གསང་བ་ཐམས་ཅད་འཛིན་པ་པོ། །ཐམས་ཅད་མཁྱེན་དང་ཐམས་ཅད་གཟིགས། །ཆོས་ཀུན་དབང་ཕྱུག་གཙོ་བོ་སྟེ། །གང་ཞིག་བྱང་ཆུབ་སེམས་བརྟན་ཞིང་། །སྒྲ་ཤེས་པ་ནི་ལྷུར་ལེན་གང་། །ཆོས་རྣམས་ཀུན་ལ་མ་ཆགས་པ། །རྣམ་པ་ཀུན་ཏུ་ཀུན་ཤེས་བྱ། །ཡི་གེའི་འཁོར་ལོ་ཐམས་ཅད་ནི། །གང་གི་ལུས་ལ་རྣམ་གནས་པ། །དེ་ནི་སྔགས་པ་གསང་སྔགས་འཆང་། །དཔལ་ལྡན་སྔགས་རྒྱལ་རྡོ་རྗེ་འཛིན། ། སྨིན་མཚམས་དབུས་སུ་ཡི་གེ་ཧཱུྃ། །རྡོ་རྗེ་ཅན་གྱི་གཞི་ཡིན་ནོ། །བྲང་དུ་ཡི་གེ་ས་ཞེས་བྱ། །ཕྱག་ན་པདྨའི་གཞི་ཞེས་བྱ། །ང་ནི་སྙིང་གའི་གནས་གཞག་པ། །ཀུན་གྱི་རྗེ་སྟེ་དབང་ཕྱུག་ཡིན། །རྒྱུ་དང་མི་རྒྱུ་སྣ་ཚོགས་པས། །མཐའ་དག་ངས་ནི་རབ་ཏུ་ཁྱབ། །ཨ་ཞེས་བྱ་བ་སྲོག་གི་

མཆོག །བ་ཞེས་བྱ་བ་ཚིག་ཏུ་བཤད། །ར་ཞེས་བྱ་བ་མེ་ཞེས་བརྗོད། །ཧཱུྃ་ཞེས་བྱ་བ་ཁྲོ་བོར་བཤད། །ཁ་ནི་ནམ་མཁར་ཤེས་པར་བྱ། །ཀླད་ཀོར་སྟོང་པའི་མཆོག་ཅེས་བྱ། །གང་ཤེས་སློབ་དཔོན་ཞེས་བྱ་བ། །འདི་ནི་ཡང་དག་དམ་པ་ཡིན། །དེ་བས་རྣམ་པ་ཐམས་ཅད་དུ། ། རྫོགས་སངས་རྒྱས་སྔགས་ཞེས་འདི་ལ། །རྟག་ཏུ་བརྩོན་པར་བྱས་ན་ནི། །འཆི་འཕོ་མེད་པའི་གོ་འཕང་འཐོབ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། སློབ་དཔོན་གྱི་དེ་ཁོ་ན་ཉིད་ཤེས་པ་རིམ་པར་ཕྱེ་བའོ།། །།ཡི་གེ་ཅི་ལྟར་དགོད་པ་དག །རྫོགས་སངས་རྒྱས་ཀྱིས་ལེགས་བསྟན་པ། །དེ་བས་ཀུན་ཏུ་མཉན་པར་གྱིས། །ཀ་ནི་ལྐོག་མར་ཤེས་པར་བྱ། །ཁ་ནི་རྐན་ལ་གཞག་པར་བྱ། །ག་ནི་མགྲིན་པར་ཤེས་པར་བྱ། །གྷ་ནི་མགུལ་པའི་གནས་སུ་གཞག །ཙ་ནི་ལྕེ་ལ་གཞག་པར་བྱ། །ཚ་ནི་ལྕེ་ཡི་དབུས་སུ་གཞག །ཛ་ནི་ལྕེ་ཡི་རྩེ་མོ་ལ། །ཛྷ་ནི་ལྕེ་ཡི་རྩ་བ་ལ། །ཊ་ནི་བྱིན་པར་ཤེས་པར་བྱ། །ཋ་ནི་བརླ་ལ་གཞག་པར་བྱ། །ཌ་ནི་རྐེད་པར་གཞག་པར་བཤད། །ཌྷ་ནི་རྐང་པ་གཉིས་ལ་གཞག །ཏ་ནི་ཆུ་སོར་གཞག་པར་བཤད། །ཐ་ནི་ལྟོ་བར་ཤེས་པར་བྱ། །ད་ནི་མཆན་ཁུང་གཉིས་སུ་གཞག །དྷ་ནི་རྩིབ་ལོགས་གཉིས་སུ་གཞག །པ་ནི་རྒྱབ་ཏུ་ཤེས་པར་བྱ། །ཕ་ནི་བྲང་དུ་ཤེས་པར་བྱ། །བ་ནི་དཔུང་མགོ་གཉིས་སུ་གཞག །བྷ་ནི་ལག་པ་གཉིས་སུ་གཞག །མ་ནི་ཡིད་ཀྱི་གནས་སུ་གཞག །དེ་ཚེ་ཚུལ་བཞིན་ཤེས་པར་བྱ། །ཡ་ནི་ཕོ་མཚན་ཡིན་ཞེས་གསུངས། །ར་ནི་ནམ་མཚོང་ཡིན་པར་བཤད། །ལ་ནི་རྒྱ་ཆེན་ཤེས་བྱ་བ། །སྐྱོབ་པ་དེ་ཡི་འཕྲལ་བ་ཡིན། །ཨི་ཨཱི་མིག་གཉིས་ཡིན་ཞེས་བྱ། །ཨུ་ཨཱུ་མཆན་ཁུང་ཡིན་པར་བཤད། །ཨེ་ཨཻ་རྣ་བ་གཉིས་ཤེས་བྱ། །ཨོ་ཨཽ་འགྲམ་པ་གཉིས་སུ་འདོད། །ཨཾ་ནི་རྫོགས་སངས་རྒྱས་པའི་གནས། །ཨཿནི་མྱ་ངན་འདས་པ་ཡིན། །ཆོ་ག་བཞིན་དུ་ཀུན་ཤེས་ནས། །བརྟུལ་ཞུགས་མཆོག་གིས་སངས་རྒྱས་བྱོས། །ཐམས་ཅད་མཁྱེན་པའི་ནོར་གྱི་དབྱིག །གང་གི་སྙིང་ལ་རྟག་གནས་པ། །འཇིག་

རྟེན་ན་ནི་དེ་ཀུན་ཤེས། །དེས་པས་ཐམས་ཅད་མཁྱེན་པ་བཞིན། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བཀོད་པ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསླབ་པའི་གཞི་ཐབས་དང་ཤེས་རབ་ཀྱིས་ཡོངས་སུ་ཟིན་པ་གང་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེ་ཙོམ་དང་ཡིད་གཉིས་མ་མཆིས་ཤིང་། འཁོར་བ་ན་འཁོར་བའི་ཚེ་ཉམས་པར་མི་འགྱུར་བ་དག་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་དེ་བཞིན་གཤེགས་པའི་སྤྱན་གྱིས་ཆོས་ཀྱི་དབྱིངས་ཐམས་ཅད་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་བྱང་ཆུབ་སེམས་དཔའི་སྤྱད་པའི་ཚུལ་ལ་མཁས་པའི་བསྟན་པ་གང་ལ་གནས་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེག་པ་ཆེན་པོ་རྟོགས་པ་ཁོང་དུ་ཆུད་པར་འགྱུར་བ་དེ་ཉོན་ཅིག །གསང་བ་པའི་བདག་པོ་དེ་ལ་བྱང་ཆུབ་སེམས་དཔས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ལས་སླར་ལྡོག་པར་བྱ། བརྫུན་དུ་སྨྲ་བ་དང་། ངག་རྩུབ་པོ་དང་། ཕྲ་མ་ཟེར་བ་དང་། ཚིག་ཀྱལ་པ་སྨྲ་བ་ལས་སླར་ལྡོག་པར་བྱའོ། ། བརྣབ་སེམས་དང་། གནོད་སེམས་དང་། ལོག་པར་ལྟ་བ་ལས་སླར་ལྡོག་པར་བྱའོ། །གསང་བ་པའི་བདག་པོ་གང་ལ་བསླབས་ན་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་རྣམས་དང་སྤྱོད་པ་མཚུངས་པར་བསླབ་པར་འགྱུར་བ་བྱང་ཆུབ་སེམས་དཔའི་བསླབ་པ་ནི་འདི་དག་ཡིན་ནོ། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་ལ་ཡང་དགེ་བ་བཅུའི་ལས་ཀྱི་ལམ་འདི་རྣམས་བཤད། བཅོམ་ལྡན་འདས་འཇིག་རྟེན་པ་མུ་སྟེགས་བྱེད་རྣམས་ཀྱང་

དགེ་བ་བཅུའི་ལས་ཀྱི་ལམ་འདི་རྣམས་ཡང་དག་པར་བླངས་ཏེ་གནས་ལགས་ན། བཅོམ་ལྡན་འདས་འདི་ལ་ཁྱད་པར་ནི་ཅི་ཞིག་མཆིས། ཐ་དད་དུ་བགྱི་བ་ནི་ཅི་ཞིག་མཆིས། དེ་སྐད་གསོལ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལེགས་སོ་ལེགས་སོ། །གསང་བ་པའི་བདག་པོ་ཁྱོད་ཀྱིས་གང་དེ་བཞིན་གཤེགས་པ་ལ་དོན་འདི་ཞུས་པ་ནི། གསང་བ་པའི་བདག་པོ་ཡང་ཁྱོད་ལེགས་སོ། །གསང་བ་པའི་བདག་པོ་དེའི་ཕྱིར་རབ་ཏུ་རྣམ་པར་དབྱེ་བའི་ཚུལ་དང་ཚུལ་གཅིག་ཏུ་བསྟན་པའི་ཆོས་ཀྱི་རྣམ་གྲངས་བསྟན་གྱིས་ཉོན་ཅིག །གསང་བ་པའི་བདག་པོ་དེ་ལ་ངས་གང་ཉན་ཐོས་རྣམས་ལ་བསླབ་པ་བསྟན་པ་གང་ཡིན་པ་དེ་ནི། ཐབས་དང་ཤེས་རབ་ཏུ་མི་ལྡན་པ་བཀའ་གྲུབ་པར་བྱེད་པ། ཕྱོགས་གཅིག་ཤེས་པ་རྟོགས་པ་སྟེ། དེ་བས་ན་དེ་དག་དང་དགེ་བ་བཅུའི་ལས་ཀྱི་ལམ་དེ་དག་མཚུངས་པར་མི་འགྱུར་རོ། །འཇིག་རྟེན་པ་རྣམས་ནི་བདག་གི་དངོས་པོ་ལ་མངོན་པར་ཞེན་པ་དང་། གཞན་གྱི་རྐྱེན་གྱིས་འཇུག་གོ། །ཐེག་པ་ཆེན་པོས་འགྲོ་བའི་བྱང་ཆུབ་སེམས་དཔའ་རྣམས་ནི་ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པའི་ཕྱིར་གཞན་གྱི་དྲིང་མི་འཇོག་ཅིང་ཐབས་དང་ཤེས་རབ་ཀྱིས་ཡོངས་སུ་ཟིན་པར་བདག་དང་གཞན་དང་གཉི་གའི་དོན་བྱེད་པ་ལ་འཇུག་གོ། །དེ་ལྟ་བས་ན་གསང་བ་པའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་དང་ཐབས་ཀྱིས་ཡོངས་སུ་ཟིན་པར་ཆོས་ཐམས་ཅད་ལ་འཇུག་པའི་ཕྱིར་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་བྱམས་པ་ཆེན་པོ་དང་། ཐུགས་རྗེ་ཆེན་པོའི་སྤྱན་གྱིས་སེམས་ཅན་གྱི་ཁམས་རྣམས་ལ་གཟིགས་ནས། བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། དེ་ལ་བྱང་ཆུབ་སེམས་དཔས་ཆེད་དུ་བསམས་ཏེ་སྲོག་གཅོད་པ་ལས་སླར་ལྡོག་པར་བྱའོ། །དབྱུག་པ་སྤོང་ཞིང་འཁོན་དུ་འཛིན་པ་སྤང་བར་བྱའོ། །དེས་བདག་ལ་ཅི་ལྟ་བ་བཞིན་དུ་གཞན་གྱི་སྲོག་ཀྱང་བསྲུང་བར་བྱའོ། །གཞན་དུ་ན་གང་ཟག་དེ་ལྟ་བུ་དང་དངོས་པོ་དེ་ལྟ་བུ་ལ་བདག་གིས་སྡིག་པ་ཁས་བླངས་ལ། ལས་དེ་བྱ་བ་ནི་མ་གཏོགས་ཏེ། དེ་

ཡང་འཁོན་དུ་འཛིན་པ་མེད་ཅིང་སྙིང་རྗེར་གྱུར་པའི་ཡིད་ཀྱིས་བྱའོ། །མ་བྱིན་པར་ལེན་པ་ལས་སླར་ལྡོག་པར་བྱ་སྟེ། དེས་གཞན་གྱི་ཡོངས་སུ་གཟུང་བའི་ལོངས་སྤྱོད་ལ་ཆགས་པ་བསྐྱེད་པར་ཡང་མི་བྱ་ན། གཞན་གྱི་ལོངས་སྤྱོད་ལ་མ་བྱིན་པར་ལེན་པ་ལྟ་སྨོས་ཀྱང་ཅི་དགོས། གཞན་དུ་ན་སེམས་ཅན་གང་དག་སེར་སྣ་ཅན་འཇུངས་པ་སྦྱིན་པ་མི་བྱེད་ཅིང་། བསོད་ནམས་མི་བྱེད་པ་དེ་དག་མཐོང་ན། གང་ཟག་དེ་ལྟ་བུ་དག་ལ་སེར་སྣ་སྤང་བའི་ཕྱིར་བྱ་བ་ནི་མ་གཏོགས་ཏེ། བདག་གིས་ཀྱང་དེ་ལ་ཆགས་པའི་སེམས་མེད་པར་དེའི་ཆེད་དུ་སྦྱིན་པ་སྦྱིན་པར་བྱའོ། །དུས་དུས་སུ་སྦྱིན་པའི་བསྔགས་པ་བརྗོད་པར་བྱའོ། །གལ་ཏེ་བྱང་ཆུབ་སེམས་དཔའ་དེ་ལ་ཆགས་པའམ། འདོད་པའི་སེམས་བསྐྱེད་པར་གྱུར་ན། གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་བྱང་ཆུབ་ཀྱི་ཡན་ལག་ལས་ཉམས་པ། ཆོས་འདུལ་བ་ལས་བཅོས་སུ་མེད་པའི་ལྟུང་བར་འགྱུར་བར་རིག་པར་བྱའོ། །འདོད་པས་ལོག་པར་གཡེམ་པ་ལས་སླར་ལྡོག་པར་བྱ་སྟེ། དེས་གཞན་གྱིས་ཡོངས་སུ་བཟུང་བའི་ཆུང་མ་དང་རིགས་དང་མཚན་མ་དང་། ཆོས་ཀྱིས་བསྲུངས་པ་རྣམས་ལ་ཆགས་སེམས་ཀྱང་བསྐྱེད་པར་མི་བྱ་ན། ཡན་ལག་མ་ཡིན་པར་སྤྱོད་པའམ། དབང་པོ་གཉིས་སྤྲོད་པ་ལྟ་སྨོས་ཀྱང་ཅི་དགོས། གཞན་དུ་ན་དངོས་པོ་དེ་ལྟ་བུ་དག་ལ་བྱ་བ་ནི་མ་གཏོགས་སོ། །བརྫུན་དུ་སྨྲ་བ་ལས་སླར་ལྡོག་པར་བྱ་སྟེ། དེས་ཆེད་དུ་བསམས་ཏེ་གང་གིས་སངས་རྒྱས་ཀྱི་བྱང་ཆུབ་བསླུས་པར་འགྱུར་བའི་བརྫུན་གྱི་ཚིག་སྲོག་གི་ཕྱིར་ཡང་སྨྲ་བར་མི་བྱའོ། །འདི་ལྟར་སངས་རྒྱས་ཀྱི་བྱང་ཆུབ་ལས་འདའ་བར་འགྱུར་བ་དེ་ནི། གསང་བ་པའི་བདག་པོ་བྱང་ཆུབ་སེམས་དཔའ་ཐེག་པ་ཆེན་པོ་ལ་གནས་པའི་བརྫུན་ཆེན་པོ་ཡིན་ནོ། །གསང་བ་པའི་བདག་པོ་རྣམ་གྲངས་དེས་ཀྱང་ཁྱོད་ཀྱིས་འདི་ལྟར་བདེན་པའི་ཚིག་ཡོངས་སུ་མི་གཏང་བར་རིག་པར་བྱའོ། ། གསང་བ་པའི་བདག་པོ་གཞན་ཡང་ཚིག་རྩུབ་པོ་ལས་སླར་ལྡོག་པར་བྱ་སྟེ། དེས་སེམས་ཅན་རྣམས་ལ་མཉེན་པ་དང་། འཇམ་པ་དང་། ཡིད་ལ་བབ་པ་དེ་ལྟ་བུའི་ཚིག་སྨྲ་བར་བྱའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་འདི་ལྟ་སྟེ། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་

དོན་བྱ་བའི་ཐོག་མར་འགྲོ་བ་ནི་ཚིག་འཇམ་པ་ཡིན་པའི་ཕྱིར་རོ། །གཞན་དུ་ན་སེམས་ཅན་འགྲོ་བ་མི་བཟད་པའི་རྒྱུ་ཅན་རྣམས་ལ་གནས་དེ་དང་དེ་དག་ཏུ་བྱང་ཆུབ་སེམས་དཔའ་ཚིག་རྩུབ་པོར་སྨྲ་བ་ནི་མ་གཏོགས་སོ། །གསང་བ་པའི་བདག་པོ་གཞན་ཡང་ཕྲ་མ་སྨྲ་བ་ལས་སླར་ལྡོག་པར་བྱ་སྟེ། དེས་ཅི་ནས་ཀྱང་དབྱེན་དུ་མི་འགྱུར་བ་དང་གནོད་པར་མི་འགྱུར་བ་དེ་ལྟར་བསྒྲུབ་པར་བྱའོ། །བྱང་ཆུབ་སེམས་དཔའ་རྣམས་ནི་སེམས་ཅན་དབྱེ་བ་ལ་ཞུགས་པ་མ་ཡིན་ནོ། །གཞན་དུ་ན་སེམས་ཅན་རྣམས་ལ་ལྟ་བའི་གནས་དེ་ལྟ་བུ་དག་ཏུ་བྱིང་བར་གྱུར་པ་མཐོང་ན། ཅི་ནས་ཀྱང་སེམས་ཅན་དེ་དག་འདི་ལྟར་ཐམས་ཅད་མཁྱེན་པའི་ཚུལ་གཅིག་པ་འདི་ལ་རབ་ཏུ་གནས་པར་འགྱུར་བ་དེ་ལྟ་བུའི་རྣམ་པས་རབ་ཏུ་འབྱེད་པར་བྱེད་པ་ནི་མ་གཏོགས་སོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔས་ཚིག་ཀྱལ་པ་སྨྲ་བ་ལས་སླར་ལྡོག་པར་བྱ་སྟེ། དེས་ཡུལ་དང་དོན་དང་དུས་དང་ལྡན་པ། དོན་གྱི་རྗེས་སུ་འཇུག་པ། སེམས་ཅན་ཐམས་ཅད་ཀྱི་ཡིད་དུ་འོང་བ་རྣ་བའི་ལམ་རྣམ་པར་སྤྱོད་པ་དེ་ལྟ་བུའི་ཚིག་སྨྲ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཚིག་སྣ་ཚོགས་དང་ལྡན་པ་ཡིན་ནོ། །གཞན་དུ་ན་བྱང་ཆུབ་སེམས་དཔའ་སྒྲུང་གི་གཏམ་གླེང་བ་སྔོན་དུ་བྱས་ཏེ། སེམས་ཅན་རྣམས་མགུ་བར་བྱས་ནས། སངས་རྒྱས་ཀྱི་ཆོས་ལ་རབ་ཏུ་དགོད་པར་འདོད་པས། དོན་དང་མི་ལྡན་པའི་ཚིག་ཀྱང་སྨྲ་བར་བྱ་བ་ནི་མ་གཏོགས་ཏེ། དེ་ལྟར་ན་བྱང་ཆུབ་སེམས་དཔའ་འཁོར་བ་ན་རྒྱུ་ཡང་བར་དུ་གཅོད་པ་མེད་པར་འགྱུར་རོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔས་བརྣབ་སེམས་ལས་སླར་ལྡོག་པར་བྱ་སྟེ། དེས་གཞན་གྱི་ལོངས་སྤྱོད་དང་གཞན་གྱི་ནོར་ལ་ཆགས་པའི་སེམས་ཀྱང་བསྐྱེད་པར་མི་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་སེམས་ཞུམ་པ་མ་ཡིན་ནོ། །གལ་ཏེ་བྱང་ཆུབ་སེམས་དཔའ་བདག་ལ་སེམས་ཆགས་པར་གྱུར་ན། ཐམས་ཅད་མཁྱེན་པ་ཉིད་ཀྱི་སྒོའི་ཕྱོགས་གཅིག་ལས་ཉམས་པར་འགྱུར་རོ། །གསང་བ་པའི་བདག་པོ་བྱང་ཆུབ་སེམས་དཔའ་རབ་ཏུ་དགའ་བ་བསྐྱེད་ཅིང་དེས་འདི་ལྟར་བསམ་པར་བྱའོ། །གང་བདག་གིས་བྱ་དགོས་པ་དེ་དག་གིས་རང་འབྱོར་པར་གྱུར་པ་

དེ་ལེགས་སོ་སྙམ་ནས་སེམས་ཅན་དེ་དག་གི་ལོངས་སྤྱོད་དེ་དག་ཆུད་མི་ཟ་བ་ལ་ཡང་དང་ཡང་དུ་དགའ་བ་བསྐྱེད་པར་བྱའོ། །གསང་བ་པའི་བདག་པོ་གཞན་ཡང་གནོད་སེམས་ལས་སླར་ལྡོག་པར་བྱ་སྟེ། དེས་ཐམས་ཅད་དུ་བཟོད་པ་མང་བ་དང་། བྱམས་པ་དང་། ཁོང་ཁྲོ་བ་མེད་ཅིང་སེམས་སྙོམས་པར་བྱའོ། །དེས་མཛའ་བོ་ལ་ཅི་ལྟ་བ་བཞིན་དུ་དགྲ་ལ་ཡང་དེ་བཞིན་དུ་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་ཡིད་ཀྱིས་གནས་ངན་ལེན་དང་ལྡན་པ་མ་ཡིན་གྱི། བྱང་ཆུབ་སེམས་དཔའ་ནི་རང་བཞིན་གྱིས་བསམ་པ་ཡོངས་སུ་དག་པ་ཡིན་ནོ། ། གསང་བ་པའི་བདག་པོ་དེ་བས་ན་བྱང་ཆུབ་སེམས་དཔས་གནོད་སེམས་བྲལ་བར་བྱའོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔས་ལོག་པར་ལྟ་བ་མེད་པར་བྱ་སྟེ། དེས་ཡང་དག་པར་ལྟ་བ་དང་། འཇིག་རྟེན་ཕ་རོལ་ལ་འཇིགས་པར་ལྟ་བ་དང་། གཡོ་མེད་པ་དང་། གྱ་གྱུ་མེད་པ་དང་། སྒྱུ་མེད་པ་དང་། དྲང་བ་དང་། སངས་རྒྱས་དང་ཆོས་དང་དགེ་འདུན་ལ་བསམ་པ་ངེས་པར་བྱའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་ལོག་པར་ལྟ་བ་ནི་བྱང་ཆུབ་སེམས་དཔའི་ཁ་ན་མ་ཐོ་བ་ཆེན་པོ་སྟེ། དགེ་བའི་རྩ་བ་ཐམས་ཅད་གཅོད་པར་འགྱུར་བའོ། ། འདི་ནི་མི་དགེ་བའི་རྩ་བ་ཐམས་ཅད་ཀྱི་ཕྱི་མོའོ། །གསང་བ་པའི་བདག་པོ་དེ་ལྟ་བས་ན་ཐ་ན་བཞད་གད་ཙམ་དུ་ཡང་ལོག་པར་ལྟ་བ་བསྐྱེད་པར་མི་བྱའོ། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་རྣམས་ལ་དགེ་བ་བཅུའི་ལས་ཀྱི་ལམ་འདི་རྣམས་ཀྱི་སྡོམ་པ་ཉམས་པ་དང་ཤིན་ཏུ་རྩ་བ་ནས་ཆད་པར་མི་འགྱུར་བ་དང་། བཅོམ་ལྡན་འདས་བྱང་ཆུབ་སེམས་དཔའ་རྒྱལ་སྲིད་ཀྱི་དབང་ཕྱུག་དང་། ཁྱིམ་དང་། ཆུང་མ་དང་། བུ་དང་། བུ་མོ་དང་། ཉེ་དུ་དང་། སྣག་གི་གཉེན་མཚམས་རྣམས་ཀྱིས་ཡོངས་སུ་བསྐོར་ཅིང་ལྷ་དང་མིའི་བདེ་བ་མྱོང་བར་བགྱིད་ཀྱང་ཅི་ལྟར་ལྟུང་བར་མི་འགྱུར་བ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལེགས་

སོ་ལེགས་སོ། །གསང་བ་པའི་བདག་པོ་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་། བྱང་ཆུབ་སེམས་དཔའ་རྣམས་ཀྱི་འདུལ་བའི་ལྟུང་བ་རྣམ་པར་ངེས་པ་ལ་མཁས་པ་བཤད་དོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་ནི་རྣམ་པ་གཉིས་ཏེ། གཉིས་གང་ཞེ་ན། འདི་ལྟར་ཁྱིམ་པ་དང་། རབ་ཏུ་བྱུང་བའོ། །དེ་ལ་བྱང་ཆུབ་སེམས་དཔའ་ཁྱིམ་པ་ནི། ཁྱིམ་ན་གནས་ཤིང་བསླབ་པའི་གཞི་ལྔ་གཟུང་སྟེ། ཐབས་དང་ཚུལ་སྣ་ཚོགས་ཀྱིས་རྒྱལ་སྲིད་ལ་དབང་བྱེད་དོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་ཡུལ་དང་དུས་ཀྱི་དབང་གིས་ཐམས་ཅད་མཁྱེན་པ་ཉིད་འཐོབ་པར་འདོད་པ་ནི། འདི་ལྟར་ཐབས་ཀྱིས་ཡོངས་སུ་ཟིན་པར་གླུ་དང་། རོལ་མོ་དང་། མིག་འཕྲུལ་ལ་སོགས་པའི་བཟོའི་གནས་རྣམ་པ་སྣ་ཚོགས་སྟོན་ཅིང་། ཐབས་དང་ཚུལ་དེ་དང་དེ་དག་གིས་བསྡུ་བའི་དངོས་པོ་བཞིས་སེམས་ཅན་རྣམས་ཡོངས་སུ་སྡུད་དེ། དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་རོ། །དེ་ལ་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ལོག་པར་ལྟ་བ་རབ་ཏུ་སྤངས་པ་ཡིན་ཏེ། བྱང་ཆུབ་སེམས་དཔའ་ཁྱིམ་པས་བསླབ་པའི་གཞི་དེ་ལྔ་བཟུང་ནས། བསླབ་པ་ཅི་སྐད་བསྟན་པ་རྣམས་ལ་སློབ་ཅིང་དད་པས། སྔོན་གྱི་དེ་བཞིན་གཤེགས་པ་རྣམས་ཀྱི་རྗེས་སུ་བསླབ་པར་བྱའོ། །འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་བླ་ན་མེད་པ་དེ་བཞིན་གཤེགས་པས་བསྔགས་པ་ལ་གནས་ཏེ། འདུས་བྱས་ཀྱི་ཚུལ་ཁྲིམས་ལ་ཐབས་དང་ཤེས་རབ་ཀྱིས་ཡོངས་སུ་ཟིན་པར་སྤྱོད་ཅིང་། ལྟུང་བའི་རྩ་བ་བཞི་ནི་སྲོག་གི་ཕྱིར་ཡོངས་སུ་ཉམས་པར་མི་བྱའོ། །བཞི་གང་ཞེ་ན། འདི་ལྟ་སྟེ། དམ་པའི་ཆོས་སྤོང་བ་དང་། བྱང་ཆུབ་ཀྱི་སེམས་གཏོང་བ་དང་། སེར་སྣ་བྱེད་པ་དང་། སེམས་ཅན་ལ་གནོད་པ་བྱེད་པའོ། །དེ་ཅིའི་ཕྱིར་ཞེ་ན། འདི་དག་ནི་ཐབས་དང་ཤེས་རབ་ཏུ་མི་ལྡན་པ། རང་བཞིན་གྱིས་ཉོན་མོངས་པ་ཅན་ཏེ་སླར་གསོར་མི་རུང་བའོ། །དེ་ཅིའི་ཕྱིར་ཞེ་ན། གང་དག་འདས་པའི་སངས་རྒྱས་དང་། །དེ་བཞིན་གང་དག་མ་བྱོན་དང་། །གང་ཡང་ད་ལྟའི་

མགོན་པོ་རྣམས། །ཐབས་དང་ཤེས་རབ་ལྡན་པ་ལ། །བསླབས་ནས་བླ་མེད་བྱང་ཆུབ་ནི། །འདུས་མ་བྱས་པ་དེ་འཐོབ་བོ། །ཐབས་དང་མི་ལྡན་ཡེ་ཤེས་དང་། །བསླབ་པ་དག་ཀྱང་བཤད་པ་ནི། །དཔའ་བོ་ཆེན་པོ་ཉན་ཐོས་རྣམས། །དེ་ལ་གཟུད་པའི་ཕྱིར་བཤད་དོ། ། རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། བྱང་ཆུབ་སེམས་དཔའི་བསླབ་པ་ཐབས་དང་ལྡན་པ་རིམ་པར་ཕྱེ་བའོ།། །།བམ་པོབདུན་པ།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ཏེ་བསྟན་པ་དོན་ཡོད་པར་གྲུབ་པར་བཞེད་ནས། གསང་སྔགས་ཐམས་ཅད་ཀྱི་དབང་ཕྱུག །གསང་སྔགས་ཀྱི་རྒྱལ་པོ། གསང་སྔགས་ཐམས་ཅད་ཀྱི་མགོན་པོ། གཟི་བརྗིད་ཆེན་པོ། དམ་ཚིག་གསུམ་ལ་གནས་པ། ལམ་གསུམ་ཡོངས་སུ་རྫོགས་པར་བྱེད་པ་བཤད་པའི་ཕྱིར། ཕྱག་ན་རྡོ་རྗེ་སྟོབས་ཆེན་ལ། །འཇམ་པའི་གསུང་གིས་བཀའ་སྩལ་པ། །གསང་སྔགས་རྣམས་ཀྱི་གསང་སྔགས་མགོན། །དཔའ་བོ་མ་ཡེངས་ཡིད་ཀྱིས་ཉོན། །དེའི་ཚེ་ཡེ་ཤེས་དམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡེ་ཤེས་སྣ་ཚོགས་འབྱུང་བ་འོད་ཟེར་བརྒྱ་འཕྲོ་བའི་གསང་སྔགས་འདི་གསུངས་སོ། །ན་མཿས་མནྟ་བུད་དྷཱ་ནཱཾ། ཨྃ། ལག་ན་རྡོ་རྗེ། འདི་ནི་གསང་སྔགས་ཐམས་ཅད་ཀྱི། །མགོན་པོ་གཟི་བརྗིད་ཆེན་པོ་སྟེ། །འདི་ནི་བདག་ཉིད་རྫོགས་སངས་རྒྱས། །ཆོས་ཀུན་དབང་ཕྱུག་ཐུབ་པ་ཡིན། །མི་ཤེས་མུན་ནག་ཀུན་འཇོམས་པ། །ཉི་མ་ཤར་བ་བཞིན་དུ་སྣང་། །ཐུབ་པ་ཆེན་པོའི་བདག་ཉིད་ཀྱིས། །འདི་ལྟ་བུར་ནི་བྱིན་བརླབས་ཏེ། །སེམས་ཅན་རྣམས་ལ་ཕན་བཞེད་ཕྱིར། །སྤྲུལ་པ་རྣམས་ནི་སྤྲུལ་པར་མཛད། །འདི་ནི་སེམས་ཅན་རྣམ་དག་གི །སེམས་དཔའ་འབྱུང་བ་ཅི་སྙེད་པ། །དེ་སྙེད་ཀྱི་ནི་སྤྲུལ་པ་ཡི། །གོ་འཕང་དམ་པ་མཛད་པར་འགྱུར། །དེ་བས་རྣམ་པ་ཐམས་ཅད་དུ། །རྫོགས་སངས་རྒྱས་ཀྱི་ཐབས་འདོད་པས། །ནང་གི་བདག་ཉིད་རྣམ་དག་པས། །རྟག་ཏུ་མངོན་པར་བརྩོན་པར་བྱ། །རྣམ་པར་སྣང་མཛད་ཆེན་པོ་མངོན་

པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བརྒྱ་འབྱུང་བ་བསྟན་པ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་སངས་རྒྱས་བཅོམ་ལྡན་འདས་རྣམས་གང་གི་ཚེ་ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་དང་ལྡན་པའི་ས་ཐོབ་པར་གྱུར་པ་དེའི་ཚེ། སངས་རྒྱས་བཅོམ་ལྡན་འདས་དེ་དག་བདག་ཉིད་དམ་ཚིག་གསུམ་གྱི་ལམ་ལ་གནས་པ་གཟིགས་སོ། །གསང་བ་པའི་བདག་པོ་དེའི་ཚེ་ཡང་བཅོམ་ལྡན་འདས་དེ་ཡེ་ཤེས་ཆེན་པོ་མངོན་པར་ཤེས་པ་དབང་བསྐུར་བ་དང་ལྡན་པ། གཟུངས་ཀྱི་ཚུལ་དུ་སངས་རྒྱས་ཀྱི་མཛད་པ་ཉེ་བར་སྟོན་ཏོ། །དེ་ཉིད་ཀྱི་ཚེ་སངས་རྒྱས་བཅོམ་ལྡན་འདས་དེ་དག་སེམས་ཅན་ཐམས་ཅད་ལ་སངས་རྒྱས་ཀྱི་མཛད་པས་དམ་ཚིག་གསུམ་གྱི་ལམ་སྟོན་པ་ཉེ་བར་གནས་པར་འགྱུར་རོ། །གསང་བ་པའི་བདག་པོ་ངའི་གསུང་གི་འཁོར་ལོའི་དཀྱིལ་འཁོར་སྤྲུལ་པ་རྒྱ་ཆེན་པོ་འཇིག་རྟེན་གྱི་ཁམས་མཐའ་ཡས་པར་ཁྱབ་པ། རྣམ་པར་དག་པའི་སྒོ། སེམས་ཅན་ཐམས་ཅད་ཀྱི་རེ་བ་ཅི་ལྟ་བ་བཞིན་དུ་མགུ་བར་བྱེད་པ། ཆོས་ཀྱི་དབྱིངས་སོ་སོར་རྣམ་པར་རིག་པར་བྱེད་པའི་སྒོ་ནི། ད་ལྟ་འདི་ལྟར་བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་གྱི་ཁམས་ནམ་མཁའི་ཁམས་ཀྱིས་ཀླས་པ་མ་ལུས་པར་སངས་རྒྱས་ཀྱི་བྱ་བ་བྱེད་པ་ལ་ཞུགས་ཀྱང་། གསང་བ་པའི་བདག་པོ་དེ་ལ་སེམས་ཅན་རྣམས་ཀྱིས་འདི་ནི་བཅོམ་ལྡན་འདས་ཀྱི་གསུང་གི་འཁོར་ལོའི་དཀྱིལ་འཁོར་བྱུང་བ་སྟེ། སངས་རྒྱས་ཀྱི་གསུང་རྣམ་པར་བཀོད་པའི་རྒྱན་གྱི་སྙིང་པོ་འབྱུང་བའི་སངས་རྒྱས་ཀྱི་སྐུ། སེམས་ཅན་རེ་བ་ཅི་ལྟ་བ་བཞིན་དུ་མགུ་བར་མཛད་པ་བྱུང་བ་ཡིན་ནོ་ཞེས་བྱ་བ་རབ་ཏུ་མི་ཤེས་པ་ལ་ལྟོས། འོན་ཀྱང་བྱང་ཆུབ་སེམས་དཔའ་འཇིག་རྟེན་གྱི་ཁམས་མཐའ་ཡས་པ་རྒྱ་མཚོ་སྙེད་ཀྱི་སྒོར་ཆོས་ཀྱི་དབྱིངས་མངོན་པར་རྫོགས་པར་བྱང་ཆུབ་པར་བྱ་བ་ལ་བརྩོན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལས་བྱུང་བ་རྣམས། འཇིག་རྟེན་གྱི་ཁམས་ཀྱི་རིས་རྒྱ་མཚོའི་མེ་ཏོག་གི་གཞིའི་སྙིང་པོའི་རྒྱན་ཅན་འདིར། ངས་

ཡོངས་སུ་གཟུང་བས་བསམ་པ་སྣ་ཚོགས་རྣམ་པར་དག་པའི་སྒོ་རྣམས་ཀྱིས་སངས་རྒྱས་ཀྱི་ཞིང་རྣམས་ནི་ཡོངས་སུ་སྦྱོང་། བྱང་ཆུབ་ཀྱི་སྙིང་པོ་ནི་མངོན་པར་སྒྲུབ། བྱང་ཆུབ་ཏུ་ནི་མངོན་པར་འཚང་རྒྱ། ཆོས་ཀྱི་འཁོར་ལོ་ནི་བསྐོར། སངས་རྒྱས་ཀྱི་མཛད་པ་ནི་བྱིན་གྱིས་རློབ་ཅིང་། དེའི་གོང་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་འདོད་པས། སེམས་ཚད་མེད་པའི་ཕྱིར་ལུས་ཚད་མེད། ལུས་ཚད་མེད་པའི་ཕྱིར་ཡེ་ཤེས་ཚད་མེད། ཡེ་ཤེས་ཚད་མེད་པའི་ཕྱིར་སེམས་ཅན་ཚད་མེད། སེམས་ཅན་ཚད་མེད་པའི་ཕྱིར་ནམ་མཁའི་ཁམས་ཚད་མེད་པ་རབ་ཏུ་འཐོབ་བོ། །གསང་བ་པའི་བདག་པོ་དེ་ལྟར་ན་སེམས་ཅན་ཚད་མེད་པས་ཚད་མེད་པ་བཞི་རབ་ཏུ་འཐོབ་པར་འགྱུར་རོ། །ཐོབ་ནས་ཀྱང་སྟོབས་བཅུའི་སྟོབས་དང་ལྡན་པ། བདུད་བཞི་ལས་རྒྱལ་བ། ཁྱུ་མཆོག་དང་། སེང་གེའི་སྒྲ་སྒྲོགས་པ། ཡང་དག་པར་རྫོགས་པའི་སངས་རྒྱས་སུ་འགྱུར་རོ། །རྫོགས་པའི་སངས་རྒྱས་ཀྱིས་གསུངས་པའི། །སྙིང་པོ་སྒོ་བརྒྱ་འདི་བཟླས་ནས། །གོ་འཕང་དམ་པ་འདི་དག་ཀུན། །དཔའ་བོ་དེ་དག་རྣམས་ཀྱིས་རྟོགས། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། འབྲས་བུའི་སྦྱོར་བ་བསྟན་པ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །སྔགས་རྣམས་ཀྱི་ནི་སྔགས་འབྱུང་བའི། །སྔགས་ཀྱི་མགོན་པོ་འདི་བཤད་པ། །ངོ་མཚར་ཆེའོ་བཅོམ་ལྡན་འདས། །ཐུབ་པ་ཆེན་པོ་གནས་གང་དུ། །གང་གིས་ཅི་ལྟར་འཚལ་བར་བགྱི། །དེ་ལས་སྔགས་རྣམས་འབྱུང་བ་ནི། །གང་གིས་ཅི་ལྟར་བདག་ལ་གསུངས། །མགོན་པོ་སྨྲ་བ་རྣམས་ཀྱི་མཆོག །འདི་ཀུན་བདག་ལ་བཤད་དུ་གསོལ། །དེ་སྐད་གསོལ་ནས་བཅོམ་ལྡན་འདས། །ཆོས་ཀྱི་དབང་ཕྱུག་ཐུབ་པ་ཆེ། །ཀུན་མཁྱེན་བཅོམ་ལྡན་སྣང་མཛད་ཀྱིས། །དེ་ཚེ་འཇིག་རྟེན་ཁམས་ཀུན་དུ། །ཡོངས་སུ་ཁྱབ་པར་གྱུར་པའི་ཚིག །འཇམ་པའི་གསུང་གིས་བཀའ་སྩལ་པ། །ལག་ན་རྡོ་རྗེ་མཐུ་བོ་ཆེ། །སེམས་དཔའ་ཆེན་པོ་ལེགས་སོ་ལེགས། །

སངས་རྒྱས་རྣམས་ཀྱི་གསང་བའི་མཆོག །ངོ་མཚར་ཆེན་པོ་རབ་ཏུ་གསང་། །རྟོག་གེ་ཀུན་གྱིས་མི་ཤེས་པ། །ཐམས་ཅད་ཁྱོད་ལ་བཤད་པར་བྱ། །གང་དག་ཐེག་ཆེན་དཀྱིལ་འཁོར་ནི། །སྙིང་རྗེ་འབྱུང་བར་དབང་བསྐུར་ཞིང་། །གང་དག་དྲང་ཞིང་མཉེན་པ་དང་། །རྟག་ཏུ་སྙིང་རྗེ་གང་ཆེ་དང་། །གང་དག་ནམ་ཡང་བྱང་ཆུབ་ལ། །དམིགས་པ་ཅན་དུ་མི་བལྟ་བ། །དེ་དག་རྣམས་ཀྱི་སྙིང་པོ་ནི། །བདག་ཉིད་ཆེན་པོར་ཤེས་པར་འགྱུར། །འདྲེན་པ་གང་ན་བཞུགས་པ་ཡི། །དེ་ཡི་གནས་ནི་སྙིང་ག་སྟེ། །པདྨ་ཡིད་ལས་བྱུང་བ་ནི། །འདབ་མ་བརྒྱད་པ་རབ་མཛེས་པ། །དཀྱིལ་འཁོར་ཟླ་བ་ལྟ་བུ་ནི། །དྲི་མེད་མེ་ལོང་འདྲ་བ་ལ། །དེ་ལ་གསང་སྔགས་མགོན་པོ་ནི། །མཐུ་ཆེན་རྟག་ཏུ་གནས་པ་བཞུགས། །གསེར་གྱི་ཁ་དོག་འབར་དང་བཅས། །སྡིག་དང་བྲལ་བའི་ཏིང་འཛིན་གནས། །ཉི་མ་བཞིན་དུ་བརྟག་པར་དཀའ། །དེ་ཡིས་འགྲོ་བ་འདི་དག་ཀུན། །ཕྱི་རོལ་དང་ནི་ནང་དུ་ཡང་། །ཀུན་ཏུ་ཁྱབ་པར་བྱིན་གྱིས་བརླབས། །མེ་ལོང་ཡིད་དུ་ཤེས་པར་བྱོས། །ཤེས་རབ་མིག་ཀྱང་དེ་བཞིན་ཏེ། །སྔགས་པ་ཤེས་རབ་མིག་གིས་སུ། །མེ་ལོང་ལ་ནི་རྣམ་བལྟས་ན། །དེ་ནི་རང་གཟུགས་རྫོགས་སངས་རྒྱས། །མཚན་ཉིད་རབ་ཏུ་ཞི་བ་མཐོང་། །དེ་ཚེ་ལུས་ལ་ལུས་ཀྱི་གཟུགས། །ཡིད་ལ་ཡིད་ལས་བྱུང་བ་ནི། །དག་ཅིང་རྣམ་པར་མཛེས་པ་དག །བདག་གི་ལས་ཀྱིས་བྱུང་བར་གྱུར། །དེ་ནས་དེ་ཡི་འོད་ཟེར་ནི། །གང་གིས་སྔགས་པ་སངས་རྒྱས་ཀྱི། །སྤྱོད་པ་ཐམས་ཅད་རབ་བྱེད་པ། །ཀུན་ནས་རྣམ་པར་སྣང་བར་འགྱུར། །དེ་བཞིན་བདག་ཉིད་དག་པ་ཡིས། །བལྟས་པ་འམ་ནི་སྨྲས་པས་ཀྱང་། །ཡིད་ལ་བསམས་པའི་དགོས་པ་ནི། །ཐམས་ཅད་བྱེད་པར་འགྱུར་བ་ཉིད། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་འདི་ལྟར་ལུས་ལ་ལུས་ཀྱི་གཟུགས་བསྐྱེད་པར་བྱའོ། །ཡང་དག་པར་རྫོགས་པའི་སངས་རྒྱས་ལས་ལྷག་པ་ནི་གང་ཡང་མེད་དེ། ཅི་ལྟར་བདག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལ་སོགས་པ་འབྱུང་

བ་ཆེན་པོ་བཞིའི་ནང་དུ་གཏོགས་པ་ཡིན་ལ། དེ་དག་ཀྱང་ངོ་བོ་ཉིད་ཀྱིས་སྟོང་པ། མིང་ཙམ་གྱིས་བསྡུས་པ། ནམ་མཁའ་དང་མཚུངས་ཤིང་འདྲ་བ། གཟུང་དུ་མེད་པ། རྒྱུ་དང་ལས་ལས་བྱུང་བ་སྟེ། གཟུགས་བརྙན་དང་འདྲ་བ་དེ་བཞིན་དུ་དེ་བཞིན་གཤེགས་པ་རྣམས་ཀྱིས་མངོན་པར་རྫོགས་པར་སངས་རྒྱས་སོ། །དེ་དག་ཀྱང་ཕན་ཚུན་རྟེན་ཅིང་འབྲེལ་བར་འབྱུང་བའི་རྒྱུན་མ་ཆད་པར་འབྲེལ་བ་སྟེ། གང་ལ་བརྟེན་ནས་སྐྱེས་པ་དེ་ནི་གཟུགས་བརྙན་དང་འདྲ་བར་འབྱུང་ངོ་། །དེ་ལྟ་བས་ན་ཕན་ཚུན་རྟེན་ཅིང་འབྲེལ་བར་འབྱུང་བའི་ཕྱིར། ལྷ་གང་ཡིན་པ་དེ་བདག་ཡིན། བདག་གང་ཡིན་པ་དེ་ནི་ལྷ་ཡིན་ནོ་ཞེས་དེ་ལྟར་ལུས་ཀྱིས་གཟུགས་ལྷའི་སྐུར་བསྐྱེད་པར་བྱའོ། །གསང་བ་པའི་བདག་པོ་ཆོས་ལ་བརྟེན་ནས་རྟོགས་པ་འབྱུང་། རྟོགས་པ་ལ་བརྟེན་ནས་ཀྱང་ཆོས་འབྱུང་བ་ལ་ལྟོས། དེ་གཉིས་ཀྱང་རང་བཞིན་གྱིས་སྟོང་པའི་ཕྱིར་ཕན་ཚུན་བྱེད་པ་པོ་དང་ལས་སུ་རྣམ་པར་འཇོག་པར་ཡང་མི་བྱེད་དོ། །གསང་བ་པའི་བདག་པོ་ཅི་ལྟར་ན་ཡིད་ལ་ཡིད་ལས་བྱུང་བའི་གཟུགས་བསྐྱེད་པར་བྱ་ཞེ་ན། གསང་བ་པའི་བདག་པོ་འདི་ལྟ་སྟེ། དཀར་པོའམ། སེར་པོའམ། དམར་པོ་ཡིད་ལ་བྱས་ན་ཡིད་དེའི་རྣམ་པར་ཤེས་པ་ལ་ཞེན་པར་འགྱུར་ཏེ། དེས་ན་དེ་ལྟ་བུས་དགོས་པ་ཡང་དེ་ལྟ་བུ་ཁོ་ན་མངོན་པར་སྒྲུབ་པར་བྱེད་དོ། །གསང་བ་པའི་བདག་པོ་འདི་ལྟ་སྟེ། ཡིད་ལ་དཀྱིལ་འཁོར་བསམས་ནས་སུ། །རིམས་ནད་ཅན་ལ་གཞག་ན་ནི། །དེ་ཡི་མོད་ལ་སྐྱེ་བོ་ནི། །རིམས་ལས་ཐར་འགྱུར་དོགས་པ་མེད། ། ཡིད་མེད་པར་ཡང་དཀྱིལ་འཁོར་ཡོད་པ་མ་ཡིན་ལ། དཀྱིལ་འཁོར་མེད་པར་ཡང་ཡིད་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དཀྱིལ་འཁོར་དང་མཚན་ཉིད་གཅིག་པའི་ཕྱིར་རོ། །གསང་བ་པའི་བདག་པོ་འདི་ལྟ་སྟེ། སྒྱུ་མ་མཁན་གྱིས་སྒྱུ་མའི་མི་ཞིག་གིས་མི་གཞན་ཞིག་སྤྲུལ་ན། གསང་བ་པའི་བདག་པོ་དེ་ཅི་སྙམ་དུ་སེམས། དེ་ལ་ཁྱད་པར་ཅི་ཞིག་ཡོད། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །མི་དེ་གཉིས་ཀ་ལ་ཡང་ཁྱད་པར་མ་མཆིས་སོ། །བཅོམ་ལྡན་

འདས་དེ་ཅིའི་སླད་དུ་ཞེ་ན། མི་དེ་གཉིས་ཀ་ཡང་ཡང་དག་པ་མ་ཡིན་པ་ལས་བྱུང་བ་དང་། སྒྱུ་མ་ཡང་རང་བཞིན་གྱིས་སྟོང་པའི་སླད་དུའོ། །གསང་བ་པའི་བདག་པོ་དེ་བཞིན་དུ་ཡིད་ལས་བྱུང་བའི་དངོས་པོ་དང་ཡིད་གང་ཡིན་པ་དེ་གཉིས་ཀ་ཡང་རྣམ་པར་བརྟགས་པ་ཡིན་པའི་ཕྱིར་ངོ་བོ་ཉིད་ཀྱིས་སྟོང་པའི་ཕྱིར་རོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བརྒྱ་པ་རྣམ་པར་དགོད་པ་སྒྲུབ་པ་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་སྔགས་ཀྱི་མགོན་པོའི་སྐུ་དང་ལུས་སུ་དབྱེར་མེད་པ་ཉོན་ཅིག །ཡིད་ལས་གྱུར་པ་ལས་བྱུང་ཞིང་། །ཡིད་ཀྱང་ཤིན་ཏུ་རྣམ་སྦྱངས་ནས། །མགོན་པོ་དེ་ན་བཞུགས་པ་ལ། །འོད་ཟེར་སྐུ་ལས་བྱུང་བ་རྣམས། །ཡན་ལག་གི་ནི་ཡན་ལག་ནས། །རྟག་པར་ཀུན་ཏུ་རྣམ་པར་འཕྲོ། །ཚུལ་འདི་དག་ནི་མ་ཤེས་པས། །རྨོངས་པ་རྣམས་ཀྱིས་ཡོངས་མི་ཤེས། །ལུས་ཀྱི་བྱེ་བྲག་ཅི་སྙེད་པ། །བརྗོད་པ་ལས་ནི་མང་དུ་གྱུར། །དེ་བཞིན་སྔགས་ཀྱི་མགོན་པོ་ཡི། །བྱེ་བྲག་དག་ཀྱང་གྲངས་མེད་གསུངས། ། ཅི་ལྟར་ཡིད་བཞིན་ནོར་བུ་ནི། །དཔལ་ལྡན་འདོད་པའི་དོན་སྒྲུབ་པ། །དེ་བཞིན་འཇིག་རྟེན་སྒྲོན་མ་ཡི། །སྐུ་ཡང་དོན་རྣམས་ཐམས་ཅད་སྒྲུབ། །གསང་བ་པའི་བདག་པོ་ཆོས་ཀྱི་དབྱིངས་རྣམ་པར་མི་རྟོག་པ་ཅི་ལྟར་དགོས་པ་ཐམས་ཅད་མངོན་པར་སྒྲུབ་ཅེ་ན། གསང་བ་པའི་བདག་པོ་འདི་ལྟ་སྟེ་དཔེར་ན། ནམ་མཁའི་ཁམས་ནི་སེམས་ཅན་ཡང་མ་ཡིན། སྲོག་ཀྱང་མ་ཡིན། ཤེད་ལས་སྐྱེས་པ་ཡང་མ་ཡིན། བྱེད་པ་པོ་ཡང་མ་ཡིན། ཚོར་བ་པོ་ཡང་མ་ཡིན། གཟུང་བ་ཡང་མ་ཡིན། འཛིན་པ་ཡང་མ་ཡིན་ཞིང་། རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་མོད་ཀྱི། འོན་ཀྱང་སེམས་ཅན་གྱི་ཁམས་མ་ལུས་པ་རྣམས་འགྲོ་བ་དང་འོང་བ་ལ་སོགས་པ་ཐམས་ཅད་བྱེད་དེ། འདི་ལ་ནི་དོགས་པ་མེད་དོ། །དེ་བཞིན་རྣམ་པར་མི་རྟོག་པའི། །ཐམས་ཅད་མཁྱེན་པ་གནས་མེད་འདི། །འགྲོ་བ་རྣམས་ཀྱི་ཕྱི་དང་ནང་། །ཐམས་

ཅད་ངེས་པ་ཉིད་དུ་སྒྲུབ། །དེ་ནས་ཡང་བཅོམ་ལྡན་འདས་ཀྱིས་སེམས་ཅན་གྱི་ཁམས་མ་ལུས་པ་རྣམ་པར་སྤྱོད་པའི་ཚིག་རྣམས་ཀྱིས་ཏིང་ངེ་འཛིན་སྒྲུབ་པའི་ཚིག །བསམ་གྱིས་མི་ཁྱབ་པའི་ཚིག་ཡོངས་སུ་གྱུར་པའི་སྒོའི་ཚིག་གསུངས་པ། གང་གི་ཚེ་ན་ཐོག་མ་ནས། ། ཅུང་ཟད་སྐྱེའམ་འཇིག་མེད་པ། །དེ་ཚེ་རྣལ་འབྱོར་ཅན་དག་གི །སྟོང་པའི་ཡེ་ཤེས་ཅི་ལྟར་སྐྱེ། །གང་ཚེ་ཆོས་ཞེས་བྱ་བ་དེ། །ངོ་བོ་ཉིད་ཀྱིས་མི་རྙེད་པ། །དེ་ཚེ་ནམ་མཁའ་འདྲ་བའི་སེམས། །བྱང་ཆུབ་འབྱུང་བ་སྐྱེ་བར་འགྱུར། །དེ་ཚེ་འཇིག་རྟེན་ཀུན་མཐུན་པའི། །སྙིང་རྗེ་དག་ཀྱང་སྐྱེ་བར་འགྱུར། །མིང་ཙམ་གྱི་ནི་ཚུལ་དུ་གནས། །སངས་རྒྱས་མིང་དུ་འདིར་བརྗོད་དོ། །དེ་ཚེ་སྟོང་དང་མི་སྟོང་ཞེས། །ཡང་དག་ཏུ་ནི་མིང་དུ་འདོགས། །དེ་ལ་གཅིག་གཉིས་གསུམ་ལ་སོགས། །གྲངས་ཀྱི་དབྱེ་བའང་འབྱུང་བར་འགྱུར། །དེ་ལྟར་དཔའ་བོ་སྟོང་པ་དེ། །རང་བྱུང་རྣམས་ཀྱི་བྱིན་བརླབས་ལས། །ཨ་ལ་སོགས་པ་རིམ་བཞིན་འཕེལ། །ཨ་བ་ཀ་ཁ་ག་གྷ། ཙ་ཚ་ཛ་ཛྷ། ཊ་ཋ་ཌ་ཌྷ། ཏ་ཐ་ད་དྷ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ང་ཉ་ཎ་ན། རྣམས་ནི་གསང་བ་པའི་བདག་པོ་ཨ་ཞེས་བྱ་བའི་མཚན་མས་བྱིན་གྱིས་བརླབས་པའི་སྟོང་པ་ཉིད་ཀྱི་མཐུ་རླབས་ཏིང་ངེ་འཛིན་གྱི་ཚུལ་སྒྲུབ་པ་ལ་ལྟོས། གསང་བ་པའི་བདག་པོ་ཨ་ཞེས་བྱ་བ་ཉིད་རྣམ་པ་སྣ་ཚོགས་སུ་བཀོད་པའི་བདག་ཉིད་དུ་གནས་སོ། །དེ་ཡང་ཆོས་ཐམས་ཅད་མ་སྐྱེས་པའོ་ཞེས་རང་གི་ངོ་བོ་ཉིད་མངོན་པར་སྟོན་ཏོ། །ཁ་ཅིག་ཏུ་ནི་བརྗོད་དུ་མེད་པའི་དོན་དུ་བའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ཀྱི་དགོས་པ་དང་བྲལ་བའི་དོན་དུ་ཀའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ནམ་མཁའ་འདྲའོ་ཞེས་ཁའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་འགྲོ་བ་མེད་པའོ་ཞེས་གའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་གཅིག་ཏུ་འཕུངས་པ་མང་བའོ་ཞེས་གྷའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་འཆི་འཕོ་མེད་པའོ་ཞེས་ཙའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་སྟོན་ཀའི་སྤྲིན་དང་འདྲའོ་

ཞེས་ཚའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་སྐྱེ་བ་མེད་པའོ་ཞེས་ཛའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་རྙོག་པ་དང་བྲལ་བའོ་ཞེས་ཛྷའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ང་རྒྱལ་དང་བྲལ་བའོ་ཞེས་ཊའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་བསྐྱེད་པ་དང་བྲལ་བའོ་ཞེས་ཋའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་འཁྲུལ་བ་དང་བྲལ་བའོ་ཞེས་ཌའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་བསླུ་བ་དང་བྲལ་བའོ་ཞེས་ཌྷའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་དེ་བཞིན་ཉིད་དང་བྲལ་བའོ་ཞེས་ཏའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་གནས་དང་བྲལ་བའོ་ཞེས་ཐའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་སྦྱིན་པ་དང་བྲལ་བའོ་ཞེས་དའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ཁམས་དམིགས་སུ་མེད་པའོ་ཞེས་དྷའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་དོན་དམ་པའི་བདེན་པ་དམིགས་སུ་མེད་པའོ་ཞེས་པའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་དབུ་བ་ལྟར་སྙིང་པོ་མེད་པའོ་ཞེས་ཕའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་སྲིད་པ་དམིགས་སུ་མེད་དོ་ཞེས་པའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་འཆི་བ་དམིགས་སུ་མེད་དོ་ཞེས་མའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་ཐེག་པ་དམིགས་སུ་མེད་དོ་ཞེས་ཡའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་རྡུལ་དང་བྲལ་བའོ་ཞེས་རའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་མཚན་ཉིད་དམིགས་སུ་མེད་དོ་ཞེས་ལའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ཞི་བ་དང་བྲལ་བའོ་ཞེས་ཤའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་རང་བཞིན་གྱིས་བེམས་པོའོ་ཞེས་ཥའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་ལ་བདེན་པ་དམིགས་སུ་མེད་དོ་ཞེས་སའི་གཟུགས་ཀྱིས་སྟོན་ཏོ། །ཁ་ཅིག་ཏུ་ནི་ཆོས་ཐམས་ཅད་རྒྱུ་དང་བྲལ་བའོ་ཞེས་ཧའི་གཟུགས་ཀྱིས་

སྟོན་ཏོ། །གསང་བ་པའི་བདག་པོ་དེ་ལྟར་ན་ཏིང་ངེ་འཛིན་སྒྲུབ་པའི་སྒོར་རེ་རེ་ལས་ཀྱང་ཏིང་ངེ་འཛིན་སྒྲུབ་པའི་སྒོ་སུམ་ཅུ་རྩ་གཉིས་སུ་རིག་པར་བྱའོ། །གསང་བ་པའི་བདག་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་གང་ཡིན་པ་དེ་དག་ཀྱང་། འདི་དག་ཉིད་ལས་བྱུང་བ་ལ་ལྟོས། ང་དང་ཉ་དང་ཎ་དང་ན་རྣམས་ནི་ཏིང་ངེ་འཛིན་ཐམས་ཅད་ལ་དབང་བྱེད་པ་སྟེ། དེ་རྣམས་ལས་ཡང་དག་པར་རྫོགས་པའི་སངས་རྒྱས་ཀྱི་དཔེ་བྱད་བཟང་པོ་རྣམས་ཀྱང་མངོན་པར་བསྒྲུབ་པར་བལྟའོ། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས། འདི་ལྟར་སངས་རྒྱས་ཀྱི་དགོངས་པ་མཐར་ཕྱིན་པ། སེམས་བཅུ་རྣམ་པ་བཅུར་བསྒྱུར་བའི་ཚད་ལས་ཡི་གེ་བརྒྱ་འབྱུང་བའི་དམ་ཚིག་བསྟན་པར་ཤེས་པར་བྱའོ། །རྫོགས་སངས་རྒྱས་ཀྱིས་འདི་དག་ཀུན། །ཆུབ་པར་བྱས་ཤིང་རྒྱས་པར་བྱས། །ང་ལའང་ཐམས་ཅད་ཡོད་པས་ན། །ང་ནི་རྒྱལ་མཆོག་ཀུན་སངས་རྒྱས། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། བདག་ཉིད་སྒྲུབ་པའི་རིམ་པར་ཕྱེ་བའོ།། །།གསང་བ་པའི་བདག་པོ་གཞན་ཡང་འདི་དག་ཐམས་ཅད་ནི་ཏིང་ངེ་འཛིན་གྱི་ཚུལ་སྒྲུབ་པའི་ཚིག་རྣམས་ཏེ། སྟོང་པ་ཉིད་འདིས་བྱིན་གྱིས་བརླབས་ན་ཆོས་ཐམས་ཅད་ལ་དབང་མཛད་པ་རྫོགས་པའི་སངས་རྒྱས་ཅི་ལྟ་བ་བཞིན་དུ་འགྱུར་རོ། །དེ་བས་ཡི་གེ་ལྷ་ཡིན་ཏེ། །ཨ་ཞེས་བྱ་བ་གོ་འཕང་མཆོག །ཡི་གེ་རྣམས་ཀྱིས་ཡོངས་བསྐོར་ཅིང་། །ཐམས་ཅད་དུ་ཡང་རྣམ་པར་སྣང་། །ལྷ་དེ་མཚན་ཉིད་མེད་པ་སྟེ། །མཚན་གཞི་མཚན་ཉིད་སྤངས་པ་ཡིན། །མཚན་ཉིད་མེད་པའི་ལྷ་ལས་ནི། །མཚན་ཉིད་འདི་དག་བྱུང་བར་གྱུར། །སྒྲ་ལས་སུ་ནི་ཡི་གེ་བྱུང་། །ཡི་གེ་ལས་ནི་གསང་སྔགས་བྱུང་། །སྔགས་ལས་འབྲས་བུ་འབྱུང་བར་ཡང་། །སྐྱོབ་པ་རྣམས་ནི་ཀུན་གྱིས་གསུངས། །སྒྲ་ནི་སྟོང་པར་ཤེས་བྱ་སྟེ། །འགྲོ་བ་རྣམ་པ་ཐམས་ཅད་དུ། །མི་རྟོག་བཞིན་དུ་ཅི་ལྟ་བར། །དེས་ནི་འདི་ཀུན་སྟོང་པ་ཡིན། །སྟོང་མིན་སྒྲ་ཡང་ཡོད་པ་ཡིན། །སྦྱོར་བ་དག་ཀྱང་ཀུན་

ཏུ་བསྟན། །སྒྲ་དེ་རྟོགས་པར་གྱུར་ན་ནི། །ལྷ་ཡི་གནས་དང་ཏིང་ངེ་འཛིན། །ཡི་གེ་དགོད་པ་སྦྱར་བ་དང་། །ཡི་གེ་རྣམས་ཀྱིས་ཀུན་བསྟན་པས། །གསང་སྔགས་མང་པོ་ཞེས་བྱ་བར། །ཐ་སྙད་གདགས་པའི་གནས་སུ་འགྱུར། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བརྒྱ་པའི་སྔགས་ཀྱི་ཆོ་ག་རིམ་པར་ཕྱེ་བའོ།། །།ཅི་ལྟར་ནམ་མཁའ་ཕྱོགས་རྣམས་ནི། །ཀུན་ལ་རྟག་པར་མི་གནས་པ། །དེ་བཞིན་ཆོས་རྣམས་ཐམས་ཅད་ལ། །གསང་སྔགས་མགོན་པོ་མི་གནས་སོ། །ཅི་ལྟར་དངོས་རྣམས་ནམ་མཁའ་ལ། །གནས་ཤིང་རྟག་ཏུ་རྣམ་སྣང་ཡང་། །དེ་ནི་གནས་སུ་མི་འགྱུར་བ། །གསང་སྔགས་མགོན་པོའང་དེ་བཞིན་ནོ། །ནམ་མཁའ་དུས་གསུམ་ལ་སོགས་དང་། །ཅི་ལྟར་བྲལ་བར་འདོད་པ་བཞིན། །དེ་ལྟར་གསང་སྔགས་མགོན་པོ་ཡང་། །དུས་གསུམ་མེད་ཀྱང་རྣམ་པར་སྣང་། །མིང་ཙམ་དུ་ནི་གདགས་པའི་གནས། །བྱེད་པ་པོ་ལ་སོགས་དང་བྲལ། །ནམ་མཁའ་ལ་ནི་ཐ་སྙད་དུ། །མཁས་པ་རྣམས་ནི་འདོགས་པར་བྱེད། །མིང་མ་གཏོགས་པར་ཅུང་ཟད་ཀྱང་། །ཡོད་པ་མ་ཡིན་ནམ་མཁའ་བཞིན། ། དེ་བཞིན་གསང་སྔགས་དབང་ཕྱུག་ཀྱང་། །ཐ་སྙད་ཙམ་དུ་སྣང་བར་ཟད། །མེ་དང་ཆུ་དང་རླུང་མ་ཡིན། །ས་དང་ཉི་མའང་མ་ཡིན་ཞིང་། །ཟླ་བ་ལ་སོགས་གཟའ་ཀུན་མིན། །ཉིན་པར་དང་ནི་མཚན་མོའང་མིན། །སྐྱེ་བ་དང་ནི་འགག་པའང་མིན། །འཆི་བ་དང་ནི་རྒུད་པའང་མིན། །སྐད་ཅིག་མ་ཡིན་ཡུད་ཙམ་མིན། །ལོ་ལ་སོགས་པའང་མ་ཡིན་ཞིང་། །འཇིག་པ་དང་ནི་ཆགས་པའང་མིན། །བསྐལ་པའི་གྲངས་ཀྱང་ཡོད་མ་ཡིན། །དགེ་དང་མི་དགེ་ལས་བྱུང་བའི། །འབྲས་བུའང་ཡོད་པ་མ་ཡིན་ནོ། །ཀུན་མཁྱེན་གོ་འཕང་འདོད་པ་ཡིས། །རྟོག་པ་རྣམ་པ་སྣ་ཚོགས་པ། །དེ་ཀུན་གང་ལ་མེད་གྱུར་པ། །དེ་ལ་རྟག་ཏུ་བརྩོན་པར་བྱ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། རྫོགས་པར་བྱང་ཆུབ་པའི་ངོ་བོ་ཉིད་བསྟན་པའི་རིམ་པར་ཕྱེ་བའོ།། །།

དེ་ནས་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་དམ་ཚིག་གསུམ་ཞེས་བགྱི་བ་དེ་ཆོས་གང་གི་ཚིག་བླ་དགས་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ཁྱོད་ཀྱིས་ང་ལ་གང་ཞུས་པ་དེ་ལེགས་སོ་ལེགས་སོ། །དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས། གསང་བ་པའི་བདག་པོ་ཕྱག་ན་རྡོ་རྗེ་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཆོས་ཀྱི་ཁྱད་པར་གང་ལས་ཆོས་ཀྱི་ཁྱད་པར་རྣམ་པ་གསུམ་སྒྲིབ་པ་མེད་པའི་ཚུལ་གྱིས་འབྱུང་བར་འགྱུར་བ་དེ་ནི་དམ་ཚིག་གསུམ་སྟེ། ཆོས་ཀྱི་ཁྱད་པར་དེ་ཡང་གང་ཞེ་ན། ཆོས་ཞེས་བྱ་བ་ནི་དང་པོའི་སེམས་ཏེ། རྣམ་པར་བསྒོམས་པའི་རང་བཞིན་དང་། དེའི་རྗེས་ལས་བྱུང་བའི་ཤེས་རབ་དང་། དེས་ཀྱང་ཡང་དག་པ་ཅི་ལྟ་བ་བཞིན་དུ་ཡོངས་སུ་ཤེས་ནས། རྟོག་པའི་དྲ་བ་མ་ལུས་པ་དང་བྲལ་བའི་སེམས་བསྐྱེད་པ་ནི་བྱང་ཆུབ་ཀྱི་མཚན་ཉིད་དོ། །གཉིས་པ་ནི་རྣམ་པར་མི་རྟོག་པ་སྟེ། རྫོགས་པའི་སངས་རྒྱས་ཀྱི་གོ་འཕང་ངོ་། །གསང་བ་པའི་བདག་པོ་ཡང་དག་པ་ཅི་ལྟ་བ་བཞིན་མཐོང་ནས་ཀྱང་སེམས་ཅན་གྱི་ཁམས་མ་ལུས་པ་ལ་བལྟས་ནས་སྙིང་རྗེའི་དབང་དུ་གྱུར་པས། དམིགས་སུ་མེད་པ་དེ་ཉིད་འདི་ལྟ་སྟེ། སྤྲོས་པ་ཐམས་ཅད་དང་བྲལ་བ། མཚན་ཉིད་མེད་པའི་བྱང་ཆུབ་ལ་སེམས་ཅན་རྣམས་རབ་ཏུ་དགོད་པར་བྱའོ་སྙམ་པའི་བྱང་ཆུབ་ཀྱི་སེམས་སྐྱེ་བ་དེ་ནི་དམ་ཚིག་གསུམ་མོ། །གསང་བ་པའི་བདག་པོ་གཞན་ཡང་དམ་ཚིག་གསུམ་གང་ཞེ་ན། དང་པོའི་སེམས་ནི་སངས་རྒྱས་ཏེ། །གཉིས་པ་ཡང་ནི་ཆོས་ཞེས་བྱ། །དེ་དང་ལྷན་ཅིག་བྱུང་བའི་སེམས། །དགེ་འདུན་ཞེས་ནི་བཤད་པ་ཡིན། །དཔའ་བོ་དམ་ཚིག་དེ་གསུམ་ནི། །འདྲེན་པ་རྣམས་ཀྱིས་ཁྱོད་ལ་བཤད། །དེ་ཚེ་སྣ་ཚོགས་ཚུལ་གྱི་སྒོས། །དཔའ་བོ་སེམས་ཅན་ཕན་འདོད་པས། །དམ་ཚིག་གསུམ་པོ་འདི་དག་ལ། །གནས་ནས་བྱང་

ཆུབ་སྤྱད་པ་སྤྱོད། །གསང་བ་པའི་བདག་པོ་གང་གི་ཚེ་སྐུ་གསུམ་ལ་མངའ་མཛད་པ་དེ་དག་རྫོགས་པར་སངས་རྒྱས་པར་གྱུར་པ་དེའི་ཚེ་ཡང་དག་པར་རྫོགས་པའི་སངས་རྒྱས་དེ་དག་འདི་ལྟར་དང་པོར་སྤྲུལ་པའི་སྐུ་གཅིག་པུར་བྱིན་གྱིས་བརླབས་ནས་བསྟན་པ་གཞག་པ་མཛད་དོ། །གསང་བ་པའི་བདག་པོ་གཞན་ཡང་སྐུ་གཅིག་པོ་དེ་ཉིད་རྣམ་པ་གསུམ་དུ་འཇོག་པ་ནི་འདི་ལྟར་སངས་རྒྱས་དང་། ཆོས་དང་། དགེ་འདུན་ནོ། །གསང་བ་པའི་བདག་པོ་གཞན་ཡང་དེ་ཉིད་ཐེག་པ་གསུམ་དུ་འཇོག་པས་སྟོན་ཏོ། །དེའི་ཚེ་སངས་རྒྱས་ཀྱི་བྱ་བ་ཐམས་ཅད་བྱས་ནས་ཡོངས་སུ་མྱ་ངན་ལས་འདས་པ་སྟོན་ཅིང་སེམས་ཅན་རྣམས་ཡོངས་སུ་སྨིན་པར་མཛད་དོ། །གསང་བ་པའི་བདག་པོ་མི་འདོད་པ་དང་། ལེ་ལོ་ཅན་དང་། འདུ་འཛི་ཅན་དང་། སྔགས་ལ་ཡིད་མི་ཆེས་པ་དང་། ཡོ་བྱད་མང་པོ་སོགས་པ་མ་གཏོགས་པར་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་གང་དག་དམ་ཚིག་གསུམ་པོ་ཡོངས་སུ་ཤེས་པ་དང་ལྡན་པ། གསང་སྔགས་ཀྱི་ཆོ་ག་སྒྲུབ་པ་དེ་དག་ལ་རྟོག་པ་ལས་བྱུང་བའི་བགེགས་མེད་པ་ལ་ལྟོས། ཆང་བཏུང་བ་དང་ཁྲི་ལ་ཉལ་བ་གཉིས་ནི་མི་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དམ་ཚིག་གསུམ་སྤྱད་པ་རིམ་པར་ཕྱེ་བའོ།། །།ཅི་ལྟར་དེ་བཞིན་གཤེགས་པ་ལགས། །ཅི་ལྟར་རྒྱལ་བ་མཆོག་ཏུ་འགྱུར། །ཅི་ལྟར་བྱང་ཆུབ་སེམས་དཔའ་ལགས། །ཅི་ལྟར་སངས་རྒྱས་ཞེས་ནི་བགྱི། ། ཐུབ་པ་ཆེན་པོས་བདག་གི་ནི། །ཐེ་ཙོམ་འདི་དག་བསལ་དུ་གསོལ། །བྱང་ཆུབ་སེམས་དཔའ་གྲགས་ཆེན་རྣམས། །ཐེ་ཙོམ་ཡིད་གཉིས་བསལ་ནས་སུ། །སྤྱོད་པའི་རྒྱ་མཚོ་བླ་མེད་པ། །ཐེག་ཆེན་ལ་ནི་སྤྱོད་པར་འགྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་གང་ཁྱོད་ང་ལ་ཞུ་བ་ལེགས་སོ་ལེགས་སོ། །དེའི་ཕྱིར་ཐེག་པ་ཆེན་པོའི་ཚུལ་བཤད་ཀྱིས་ཉོན་ཅིག །བྱང་ཆུབ་ནམ་མཁའི་མཚན་ཉིད་དེ། །ཀུན་ཏུ་རྟོག་

པ་ཐམས་ཅད་སྤངས། །གང་ཞིག་དེ་རྟོགས་འདོད་པ་དེ། །བྱང་ཆུབ་སེམས་དཔའ་ཞེས་བྱའོ། །གང་གིས་ས་བཅུ་བསྒྲུབས་ནས་ནི། །དབང་བཅུ་ལེགས་རྟོགས་ཁོང་དུ་ཆུད། །སྟོང་པ་སྒྱུ་མ་འདྲ་བའི་ཆོས། །རྣམ་པ་ཐམས་ཅད་མཁྱེན་ཅིང་འདིར། །འཇིག་རྟེན་ཀུན་གྱི་ཚུལ་མཁྱེན་པ། །སངས་རྒྱས་ཞེས་ནི་བྱ་བ་ཡིན། །ཆོས་ནི་ནམ་མཁའི་མཚན་ཉིད་དེ། །གཉིས་སུ་མེད་ཅིང་མཚན་ཉིད་གཅིག །སྟོབས་བཅུས་རྫོགས་པར་སངས་རྒྱས་པ། །དེ་ནི་རྫོགས་སངས་རྒྱས་ཞེས་བྱ། །འདུ་ཤེས་ཙམ་ཡང་སྤངས་པའི་ཕྱིར། །རང་གི་ངོ་བོ་བསྟན་དུ་མེད། །ཡེ་ཤེས་རང་རིག་བྱ་བ་ནི། །དེ་ནི་དེ་བཞིན་གཤེགས་པར་བཤད། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དེ་བཞིན་གཤེགས་པ་བསྟན་པ་རིམ་པར་ཕྱེ་བའོ།། །།ལག་ན་རྡོ་རྗེ་གཞན་ཡང་དུས་གཅིག་གི་ཚེ་ན་ང་བྱང་ཆུབ་སེམས་དཔར་གྱུར་ཏེ་བྱང་ཆུབ་སེམས་དཔའི་སྤྱད་པ་སྤྱོད་ཅིང་ཚངས་པའི་འཇིག་རྟེན་ན་འདུག་པ་ན། ཚངས་པས་ང་ལ་ཀྱེ་ཚངས་པ་ཆེན་པོ་མེ་ལ་རྣམ་པ་དུ་ཡོད་པར་ཤེས་པར་བྱ་ཞེས་དྲིས་པ་དང་ངས་དེ་ལ་འདི་སྐད་ཅེས་སྨྲས་སོ། །མེ་ང་རྒྱལ་ཅན་གང་ཡིན་པ་དེ་ནི་རང་བྱུང་བའོ། །དེ་ཡི་འོག་ཏུ་ཚངས་པའི་བུ་སྟེ་དེ་ལས་སྐྱེས་པ་ཡིན་ནོ། །འཇིག་རྟེན་པའི་མེ་པ་བ་ཀ། །ཚངས་པའི་བུ་ནི་དང་པོ་ཡིན། །དེའི་བུ་ཚངས་པའི་ཟས་དེའི་ཡང་། །བྷ་ར་ཏ་ཞེས་བྱ་བར་བཤད། །དེའི་བུ་བཻ་ཤྭ་ན་ར་ད། །ཧ་བ་ན་དང་བསྲེག་བྱ་ལེན། །ངོས་བསྲུང་ཨ་ཐར་པ་ན་ཡི། །བུ་ཡིན་པར་ནི་རྒྱ་མཚོར་གྲགས། །རླུང་ཞེས་བྱ་བའི་མེ་དེ་ནི། །མངལ་དུ་འཇུག་པའི་ཆོ་གར་བཤད། །དེ་ནས་མི་ཁྲུས་བྱ་བ་ལ། །དེ་བཞིན་པ་བ་མ་ནར་ཤེས། །བཀྲ་ཤིས་ཞེས་བྱ་མཚམས་ཀྱི་མཐར། །བཙས་པའི་ལས་ལ་པྲ་གལྦྷའོ། །མིང་འདོགས་མེ་ནི་པར་ཐི་བ། །དེ་བཞིན་རྐན་དབབ་པ་ལ་གཙང་། །ཤད་བི་ཞེས་བྱ་གཙུག་ཕུད་ལ། །བརྟུལ་ཞུགས་སྦྱིན་ལ་ཀུན་འབྱུང་ངོ་། །ཉི་མ་ཞེས་པ་ཕྱུགས་སྦྱིན་ལའོ། །བག་མ་ལེན་ལ་སྦྱོར་བྱེད་བཤད། །ཨགྨེ་ཡིས་ནི་ཁྱིམ་ཁ་སྲོ། །ཉེ་བར་འབུལ་ལ་མེ་ཉིད་དོ། །པ་བ་ཀ་ཞེས་བྱ་བའི་མེ། །སྣ་ཚོགས་ལྷ་ལ་སྦྱར་བར་བཤད། །

ཁྱིམ་བདག་ལ་ནི་ཚངས་པའི་མེ། །དེ་བཞིན་ནོར་འབུལ་བ་ལ་ཞི། །དེ་བཞིན་ཕྱུགས་ནི་བཅིང་བ་ལ། །ཨ་བ་ནི་ཀ་ཞེས་བྱའི་མེ། །ལྟུང་བ་ལ་ནི་བི་ཙི་ཙི། །བཙོས་སྦྱིན་ལ་ནི་ས་ཧ་ས། །དུས་ཀྱི་མཚམས་ལ་ཧ་བིར་ཤེས། །དེ་བཞིན་ཟླ་བ་གནས་ལ་གཏེར། །མྲྀ་ཊ་ཞེས་བྱ་དགང་བླུགས་ལ། །ཞི་ལ་ད་རུ་ནར་འདོད་དོ། །བྱས་མཐའི་མེ་ནི་གཤིན་རྗེའོ། །དེ་བཞིན་རྒྱས་ལ་སྟོབས་སྦྱིན་པའོ། །དྲག་ཤུལ་སྤྱད་པ་ཐམས་ཅད་ལ། །ཁྲོ་བོའི་མེ་ནི་རབ་ཏུ་བསྒྲགས། །འདོད་ལས་སྐྱེས་ཞེས་བྱ་བའི་མེ། །དེ་ནི་དབང་གི་དོན་དུ་བཤད། །ནགས་ཚལ་སྲེག་ལ་ཕོ་ཉའི་མེ། །ཁོང་པའི་མེ་ནི་ཛ་ཐ་ར། །བཟའ་བར་བྱ་བ་ཤ་ཟར་བཤད། །རྒོད་མའི་ཁ་ནི་རྒྱ་མཚོ་ནའོ། །ཟད་ཚེ་འཇིགས་པ་ཞེས་བྱ་སྟེ། །དུས་མཐའི་མེ་ནི་ཡང་དག་བསྒྲགས། །འདི་ནི་མེ་རྣམས་མདོར་བསྡུས་ནས། །དེས་པ་ཁྱོད་ལ་བཤད་པ་སྟེ། །རིག་བྱེད་ཐོས་པ་སྤྱོད་རྣམས་ཀྱིས། །ཚངས་པའི་བུ་དག་བརྗོད་པ་ཡིན། །བཞི་བཅུ་རྩ་བཞི་འདི་དག་ནི། །དེ་ཡི་ཚེ་ན་ངས་བསྟན་ཏོ། །གསང་བ་པའི་བདག་པོ་དེ་ལ། །མེ་རྣམས་རང་བཞིན་མི་ཤེས་པར། །གང་དག་སྦྱིན་སྲེག་བྱེད་པ་དེ། །སྦྱིན་སྲེག་མ་ཡིན་ལེགས་བྱས་མིན། །ལས་ཀྱི་འབྲས་བུའང་ཡོད་མི་འགྱུར། །ངས་བྱང་ཆུབ་མངོན་པར་རྫོགས་པར་སངས་རྒྱས་ནས་ནི་མེ་བཅུ་གཉིས་བསྟན་ཏེ། དེ་དག་ཀྱང་གང་ཞེ་ན། ཡེ་ཤེས་མེ་ནི་དང་པོ་སྟེ། །དེ་ནི་དབང་ཆེན་ཞེས་སུ་བསྒྲགས། །ཁ་དོག་སེར་པོའི་མདོག་ཅན་ལ། །མདོག་དང་རྒྱས་དང་སྟོབས་རབ་སྟེར། །འབར་བའི་ཕྲེང་ཅན་ཏིང་ངེ་འཛིན། །ཡེ་ཤེས་རྫོགས་བྱེད་ཡིན་ཞེས་བྱ། །གཉིས་པ་འཛིན་བྱེད་ཅེས་བྱ་སྟེ། །སྟོན་ཀའི་ཟླ་བའི་འོད་དང་འདྲ། །དཔལ་ལྡན་གོས་ནི་དཀར་པོ་བགོས། །བགྲང་ཕྲེང་རིལ་བ་སྤྱི་བླུགས་ཐོགས། །གསུམ་པ་རླུང་ཞེས་བྱ་བ་སྟེ། །མདོག་ནི་གནག་ལ་རྩུབ་པའོ། །བཞི་པ་དམར་པོ་ཞེས་བྱ་སྟེ། །ནུབ་ཀའི་མཚམས་ཀྱི་དམར་ཐག་འདྲ། །ལྔ་པ་མྲྀ་ཌ་ཞེས་བྱ་བ། །སྤུན་ལ་ཁ་དོག་ཁམ་པ་སྟེ། །མགྲིན་པ་རིང་ཞིང་གཟི་བརྗིད་ཆེ། །ཀུན་ལ་ཕན་ནི་འདོགས་པར་བཤད། །དྲུག་པ་ཁྲོ་བོ་ཞེས་བྱ་སྟེ། །མིག་ཡོན་དུད་པའི་ཁ་དོག་འདྲ། །གྱེན་དུ་སྐྲ་བརྫེས་སྒྲ་

ཆེན་འབྱིན། །མཆེ་བ་བཞི་པ་སྟོབས་པོ་ཆེ། །བདུན་པ་ལྟོ་བ་ཞེས་བྱ་སྟེ། །རྣོ་ལ་ཁ་དོག་ཀུན་དང་ལྡན། །བརྒྱད་པ་ཟད་པ་ཞེས་བྱ་བ། །གློག་གི་འོད་ཟེར་འགྱུར་བ་འདྲ། །དགུ་པ་ཡིད་ལས་སྐྱེས་ཞེས་བྱ། །སྣ་ཚོགས་གཟུགས་ཅན་སྟོབས་པོ་ཆེ། །བཅུ་པ་འཇིག་རྟེན་འཛིན་པ་ཡིན། །ཤ་ཟའི་མེ་ནི་དེ་ལས་གཞན། །རྨུགས་བྱེད་ཅེས་པ་བཅུ་གཉིས་ཏེ། །སེམས་ཅན་ཐམས་ཅད་རྨུགས་བྱེད་པའོ། །གསང་བ་པའི་བདག་པོ་དེ་ལྟར། །མེ་ཡི་གཟུགས་ནི་བྱིན་བརླབས་ཏེ། །བདག་གི་རང་གི་གཟུགས་དང་ནི། །རྫས་ཀྱང་དེ་ཡི་ངོ་བོར་བྱ། །འདི་ནི་ཕྱི་ཡི་སྦྱིན་སྲེག་སྟེ། །དངོས་གྲུབ་འདོད་པས་སྦྱིན་སྲེག་བྱ། །གསང་བ་པའི་བདག་པོ་ནང་གི་ནི་རང་བཞིན་གཅིག་པ་སྟེ། གནས་གསུམ་གཅིག་ཏུ་བྱ་བའི་ཚུལ་གྱིས་གསུམ་དང་ལྡན་པ་ན་ནང་གི་སྦྱིན་སྲེག་ཡིན་ནོ། །གསང་བ་པའི་བདག་པོ་བྱམས་པ་ཆེན་པོ་དང་། སྙིང་རྗེ་ཆེན་པོ་དང་ལྡན་པ་ནི་ཞི་བའོ། །དགའ་བ་དང་ལྡན་པ་ནི་རྒྱས་པའོ། །ཁྲོ་བོའི་མེས་ནི་དྲག་ཤུལ་སྤྱད་པ་བྱ་སྟེ། ཁྲོ་བོ་ཉིད་བཙན་པར་བྱས་ལ་ཊ་དང་ཕའི་བར་དུ་མིང་བཅུག་སྟེ། གཟུགས་བརྙན་ཡང་ཁྲོ་བོའི་དཀྱིལ་འཁོར་དུ་གཞག་ལ་ཁྲོ་བ་ཐུལ་བས་བྱའོ། །དབུས་སུ་ནི་རླུང་གི་མེ་གཞག་གོ། ། གསང་བ་པའི་བདག་པོ་དེ་ལྟར་ཅི་སྐད་བསྒྲགས་པའི་གནས་དེ་དང་དེ་དག་ཏུ་ཅི་ལྟར་རིགས་པ་དང་། ཅི་ལྟར་ལྡན་པར་སྦྱིན་སྲེག་བྱའོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས། མེ་ཡི་ཐབ་ཁུང་ཅི་ལྟར་བགྱི། །བསང་གཏོར་དག་ཀྱང་ཅི་ལྟར་བགྱི། །ཀུ་ཤའི་རྩྭ་ཡང་ཅི་ལྟར་དགྲམ། །ཅི་ལྟར་བསམ་པ་བདག་ལ་གསུངས། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ། དེ་ལ་མེ་ཡི་ཐབ་ཁུང་ནི། ། ཀུན་ཏུ་ཁྲུ་གང་ཙམ་གྱི་ཚད། །ཁ་ཁྱེར་སོར་བཞིའི་ཚད་དུ་བྱ། །རྡོ་རྗེའི་མཚན་མ་དག་གིས་མཚན། །ཐབ་ཁུང་གི་ནི་གཡས་ཕྱོགས་ནས། །ཀུ་ཤའི་རྩྭ་ནི་རློན་པ་དགྲམ། །རྩེ་མོ་དག་ཀྱང་རྩ་བས་དཀྲི། །རྩ་བ་དག་ཀྱང་རྩེ་མོས་དཀྲི། །འདིར་ནི་བསང་གཏོར་གཡས་ཕྱོགས་ནས།།

ཀུ་ཤ་བསྐོར་བ་བཞིན་དུ་བྱ། །བྱུག་སྤོས་མེ་ཏོག་བདུག་སྤོས་དག །མྲྀ་ཌའི་མེ་ལ་དབུལ་བར་བྱ། །ཞུགས་ཐབ་དེར་ནི་མྲྀ་ཌའི་མེ། །མེ་ཏོག་གཅིག་གིས་རང་གིས་གཟུགས། སྔགས་པ་སྡོམ་བརྩོན་ཅན་གྱིས་གཞག །བསང་གཏོར་དག་ཀྱང་དེ་ནས་བྱ། །དགང་བླུགས་རང་གི་གསང་སྔགས་ཀྱིས། །མཁས་པས་དེ་ལ་དབུལ་བར་བྱ། །དེ་ནས་ཞི་བའི་སྦྱིན་སྲེག་གམ། །ཡང་ན་རྒྱས་པའི་སྦྱིན་སྲེག་བྱ། །འཇིག་རྟེན་པ་ཡི་སྦྱིན་སྲེག་འདི། །ཕྱི་རོལ་པ་ཞེས་གསུངས་པ་ཡིན། །གཞན་ཡང་ནང་གི་སྦྱིན་སྲེག་ནི། །ལས་དང་ཚེ་དག་བཀག་པ་སྟེ། །དེ་ནི་ཡིད་ཀྱིས་ཤེས་པར་བྱ། །གཟུགས་དང་སྒྲ་ལ་སོགས་པ་སྤངས། །མིག་དང་། རྣ་བ་དང་། སྣ་དང་། ལྕེ་དང་། ལུས་རྣམས་ནི། ཡིད་ལས་སྐྱེས་པ།སེམས་ཀྱི་རྒྱལ་པོ་ལ་གནས་པ་སྟེ། ཀུན་ཏུ་རྟོག་པས་བསྐྱེད་པ་འདི་དག་དང་། བྱང་ཆུབ་ཀྱི་སེམས་དང་། ཡུལ་དང་། མིག་ལ་སོགས་པ་དང་། རླུང་གི་མེ་ཡང་འཕྲོ་བ་མེད་པའི་ཤེས་རབ་ཀྱིས་བཀག་སྟེ། ཡིད་ཀྱི་མེ་ལ་སྦྱིན་སྲེག་བྱའོ། །དེ་ནི་ནང་གི་སྦྱིན་སྲེག་ཅེས། །དེས་པ་ཁྱོད་ལ་བསྟན་པ་ཡིན། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་བཀའ་སྩལ་པ། ཁྱེད་རྣམས་ཀྱིས་ཆོས་ཀྱི་རྣམ་གྲངས་འདི་ལ་བག་ཡོད་པར་གནས་པས་སྤྱད་པར་བྱའོ། །ང་ཡི་སྲས་རྣམས་མ་གཏོགས་པར། །གཞན་སུ་ལ་ཡང་མ་བྱིན་ཅིག །དེ་དག་མཚན་ཉིད་བཤད་པར་བྱ། །ཐམས་ཅད་ཀྱིས་ཀྱང་མཉན་པར་གྱིས། །ཉི་མའི་རིགས་ལས་སྐྱེས་པ་དང་། །ང་རྒྱལ་ཅན་ལ་བློ་ཡང་ཞིབ། །བྱས་པ་གཟོ་ཞིང་ཆོས་ཀྱང་འདོད། །ཆོས་ཀྱང་ཤེས་ཤིང་ཆོས་ལ་འབད། །ཁ་དོག་དག་ཀྱང་སྔོ་བསངས་ལ། །བཞིན་ཡང་ཤིན་ཏུ་བཟང་བ་དང་། །སྣ་དབྱིབས་མཐོ་ལ་རྩེ་མོ་རྣོ། །མགོ་དང་དཔྲལ་བའི་དབྱེས་ཆེ་བ། །དེ་ཀུན་ང་ཡི་སྲས་ཡིན་ཏེ། །བསྟན་པའི་དོན་ལ་སེམས་པ་ཡིན། །དེ་དག་ལ་ནི་ནན་ཏན་དུ། །འདི་ནི་རྟག་ཏུ་སྦྱིན་པར་བྱ། །དེ་ནས་དེ་དག་ཐམས་ཅད་ཡིད་རབ་ཏུ་དགའ་ནས་སྟོན་པས་བཀའ་སྩལ་པ་བཞིན་དུ་བགྱིའོ་ཞེས་

སྨྲས་སོ། །དེ་ནས་དེའི་ཚེ་ཐམས་ཅད་ཀྱིས། །དེ་བཞིན་གཤེགས་ལ་ཕྱག་འཚལ་ཏེ། །མཆོད་པ་དག་ཀྱང་ལེགས་བྱས་ནས། །སྤྱན་སྔར་འཁོད་ནས་ཐལ་སྦྱར་ཏེ། །འདི་སྐད་ཅེས་ནི་ཚིག་ཏུ་སྨྲས། །ཆོས་ཀྱི་ཚུལ་འདི་འཇིག་རྟེན་ན། །ཅི་ལྟར་ཡུན་རིང་ཀུན་གནས་པར། །མགོན་པོ་བྱིན་གྱིས་བརླབས་ཀྱི་ཚིག །བསྟན་པ་འདི་ལ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་དེའི་ཚེ་ཆོས་ཀྱི་རྣམ་གྲངས་འདི་ལ་བྱིན་གྱིས་བརླབས་པའི་ཚིག་གསུངས་པ། ན་མཿས་མནྟ་བུད་དྷཱ་ནཱཾ། སརྦྦ་ཐཱ། ཤིཾ་ཤིཾ། ཏྲྃ་ཏྲྃ། གུྃ་གུྃ། དྷ་རཾ་དྷ་རཾ། སྠཱ་པ་ཡ་བུད་དྷཱ་སཏྱ་བཱ་ཀ དྷརྨྨ་སཏྱ་བཱ་ཀ །སཾ་གྷ་སཏྱ་བཱ་ཀ་ཧཱུྃ་ཧཱུྃ་བེ་ད་བི་དི་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། རྡོ་རྗེ་འཛིན་དེ་དག་དང་། བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་དེ་དག་ཡི་རངས་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཤིན་ཏུ་རྒྱས་པ་ཆེན་པོའི་མདོ་སྡེའི་རྒྱལ་པོ་ལས། གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཆོ་ག་ཇི་སྙེད་པ་རིམ་པར་ཕྱེ་བ་ཉི་ཤུ་རྩ་ལྔ་པ་རྫོགས་སོ།། །།དེ་ནས་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་སྨྲས་སོ། །གང་དག་འདི་ལྟར་སྒྲུབ་པར་ལྷུར་ལེན་པ་དེ་དག་ལ་ཕན་པ་དང་བདེ་བར་བྱ་བའི་ཕྱིར། བསྟན་པ་འདི་ལ་དེ་དག་བཅིང་བ་བདག་གིས་བཤད་ཀྱིས་ཡིད་གཅིག་ཏུ་བསྡུས་ལ་ཉོན་ཅིག །རྐང་པ་གཡོན་པ་བཏེག་ནས་ནི། །གཡས་པ་བརྟན་པོར་ལེགས་པར་གཟུགས། །མིག་ནི་རྐེད་པའི་ཕྱོགས་སུ་བལྟ། །ལག་པ་གཉིས་ཀ་གདེག་པར་བྱ། །གཡས་བརྐྱང་གདེངས་ཀའི་ཚུལ་དུ་གནས། །འཁོར་ལོ་ཡང་དག་ལྡན་པ་བཅིང་། །འཁོར་ལོའི་ཕྱག་རྒྱ་རབ་སྦྱར་བས། །ཕྱོགས་ཀུན་ཏུ་ནི་གཞོམ་པར་བྱ། །ཕྱག་རྒྱ་སྟོབས་ཆེན་མཐོང་ནས་ནི། །རྡོ་རྗེ་འཛིན་པ་བདག་ཉིད་དམ། །གང་དག་འཇིག་རྟེན་པ་ཡང་རུང་། །དེ་དག་ཐམས་ཅད་འཇིག་པར་འགྱུར། །རྐང་པ་གཉིས་ནི་མཉམ་བཞག་ནས། །

ཧཱུྃ་ཞེས་བྱ་བ་འབྲུག་སྐད་སྒྲོགས། །རྔམ་ཞིང་སོས་ནི་མ་མཆུ་མནན། །ཁྲོ་དང་བཅས་པསམགོ་བསྟོད་དེ། །བསྡིགས་ན་ཆོམས་པར་འགྱུར་བ་ཡིན། །རྐང་པ་གཉིས་ནི་རྟིང་སྤྲད་ནས། །མདུང་གི་ཕྱག་རྒྱས་དེ་དག་ཀུན། །བཅོམ་ན་མོད་ལ་ཐལ་བར་འགྱུར། །གོམ་གཅིག་མྱུར་དུ་བོར་ནས་ནི། །རྐང་པ་བཏེག་སྟེ་ལུས་བསྒྱུར་ནས། །གཞུ་ཡི་ཚུལ་གྱིས་ས་སྟེང་ཀུན། །ཀུན་ནས་གཞོམ་པར་བྱས་ནས་ནི། །ལྷ་དང་ལྷ་མིན་གནོད་སྦྱིན་རྣམས། །གང་དག་ས་སྟེང་གནས་པ་འདིར། །གང་ཚེ་སྔགས་པ་འདིར་གནས་ན། །བགེགས་ནི་རྟག་ཏུ་མེད་པར་བྱེད། །རྐང་པ་གཡོན་པ་བརྐྱང་ནས་ནི། །ལག་གཉིས་པདྨ་ལྟར་སྦྱར་ཏེ། །སྔགས་པ་འབར་བས་ཀླད་ལ་བསྐོར། །རྐང་པས་སེང་གེའི་སྟབས་བཞིན་འདོར། །ཁྲོ་དང་བཅས་པས་བགེགས་བཅོམ་ན། །གལ་ཏེ་སངས་རྒྱས་ཀྱིས་བྱས་ཀྱང་། །བགེགས་དེ་ཐལ་བར་བརླགས་པའམ། །ཐེ་ཙོམ་མེད་པར་འཆི་བར་འགྱུར། །མཁས་པས་རྒྱུད་རྣམས་ཐམས་ཅད་ལས། །དངོས་གྲུབ་ཅི་སྙེད་གསུངས་པ་རྣམས། །དེ་དག་ཐམས་ཅད་མདོར་བསྡུ་ན། །རྣམ་པ་བཞིར་ནི་མ་ལུས་འདུས། །ལས་ཀྱི་དང་པོ་ཞི་བ་སྟེ། །དེ་བཞིན་གཞན་ཡང་རྒྱས་པ་དང་། །དབང་དང་དྲག་ཤུལ་སྤྱོད་པའི་ལས། །རྣམ་པ་འདི་བཞིར་རབ་ཏུ་བསྒྲགས། །དེ་ལ་ཐར་པ་ལ་སོགས་པའི་དངོས་གྲུབ་དང་། གདོན་ལ་སོགས་པའི་གནོད་པ་ཞི་བར་བྱ་བ་དང་། ཚེ་རིང་བར་བྱ་བ་ནི་ཞི་བའོ། །ཡིད་བཞིན་གྱི་ནོར་བུ་དང་། རལ་གྲིའི་རིག་སྔགས་འཆང་དང་། འཁོར་ལོས་སྒྱུར་བའི་རྒྱལ་སྲིད་ལ་སོགས་པ་དང་། ནོར་བསྒྲུབ་པ་གང་ཡང་རུང་སྟེ། དེ་དག་ཐམས་ཅད་ནི་རྒྱས་པའོ་ཞེས་གསང་སྔགས་ལ་མཁས་པ་རྣམས་སྨྲའོ། །སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། རྒྱལ་པོ་དང་། བློན་པོ་ལ་སོགས་པ་དང་། ལྷ་དང་ཀླུ་དང་གནོད་སྦྱིན་དང་གནོད་སྦྱིན་མོ་དང་ལྷ་མ་ཡིན་མོ་དང་ཤ་ཟ་མོ་ལ་སོགས་པ་དབང་དུ་བྱ་ཞིང་དགུག་པ་ནི་དབང་དུ་བྱ་བའོ་ཞེས་རིག་སྔགས་འཆང་རྣམས་སྨྲའོ། །བཅིང་བ་དང་། གནོད་པར་བྱ་བ་དང་།

ཡན་ལག་གཅད་པ་དང་དགར་བ་དང་སྡང་བར་བྱ་བ་དང་གསད་པ་དང་བསྐམ་པ་ལ་སོགས་པ་མདོར་ན་སེམས་ཅན་རྣམས་ཀྱི་ལུས་ལ་གནོད་པར་བྱ་བ་གང་ཡང་རུང་སྟེ། དེ་དག་ཐམས་ཅད་ནི་དྲག་ཤུལ་སྤྱོད་པ་ཡིན་ནོ་ཞེས་རིག་སྔགས་འཆང་རྣམས་སྨྲའོ། ། སྦྱིན་སྲེག་ཚིམ་བྱེད་ལས་རྣམས་ཀྱིས། །གསང་སྔགས་དངོས་གྲུབ་མྱུར་དུ་སྟེར། །ལྷ་རྣམས་ཐམས་ཅད་བྱིན་རློབ་ཅིང་། །དམ་པ་དག་ཀྱང་སྦྱིན་པར་བྱེད། །ཉུང་ངམ་མ་འབྱོར་ཆོ་ག་ཉམས། །ཡི་གེ་གུག་སྐྱེད་ལྷག་གམ་ཆད། །མནན་ཏམ་བགེགས་ཀྱིས་ཟིན་པ་གང་། ། དེ་དག་ཐམས་ཅད་སྦྱོང་བར་བྱེད། །སྦྱིན་སྲེག་མེད་པར་ལས་རྣམས་ལས། །དངོས་གྲུབ་པར་ཡང་མི་འགྱུར་རོ། །དེ་ཉིད་ཕྱིར་ན་སྦྱིན་སྲེག་གི། །ལས་ངེས་པ་ལ་བརྩོན་པར་བྱ། །ཞི་བ་དང་རྒྱས་པ་དང་དབང་དུ་བྱ་བ་དང་། དྲག་ཤུལ་སྤྱད་པའི་བྱེ་བྲག་ལས་སྦྱིན་སྲེག་གི་བྱེ་བྲག་དབྱེ་བར་བྱའོ། །དེ་ལ་རེ་ཞིག་ཞི་བའི་ལས་ཀྱི་སྦྱིན་སྲེག་ངེས་པ་ནི། གྲོང་གི་བྱང་ཕྱོགས་སུ་རྒྱང་གྲགས་གཅིག་ཙམ་དུ་སོང་ལ། ས་གཞི་ལེགས་པར་བརྟག་པར་བྱ་སྟེ། ཆུ་བོ་གང་གཱའི་ངོས་སམ། པདྨའི་མཚོ་འགྲམ་མམ། འབབ་ཆུའི་འགྲམ་མམ། མཚོ་གླིང་དུ་ཡང་རུང་ས་གཞི་ཁ་དོག་དཀར་པོ་ལ་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ཏེ་ས་ལ་བསྐུལ་བ་དང་སྦྱང་བ་ལ་སོགས་པ་བྱས་ལ། ཟླ་བ་ཡར་གྱི་ངོའི་ཚེས་ལྔའམ། བཞི་འམ། བཅུ་འམ། ཟླ་བ་ཉ་ལ་དཀྱིལ་འཁོར་བརྩམ་པ་འདི་ལྟར་བྱའོ། །ཁྲུམས་སྨད་དང་གྲེ་དང་སྐག་དང་། མཆུ་ནི་ཞི་བའི་རྒྱུ་སྐར་ཡིན་པར་བཤད་དོ། །གཟའ་ཟླ་བ་དང་། པ་བ་སངས་དབང་བ་ལ་དང་པོར་ལས་བརྩམ་པར་བྱའོ། །དེ་ནས་བདག་ཉིད་སྤྱན་རས་གཟིགས་དབང་ཕྱུག་གི་སྐུར་བསྒྱུར་ལ། བཅོམ་ལྡན་འདས་རྣམ་པར་སྣང་མཛད་རལ་གྲིའི་ཕྱག་རྒྱའམ་ཡི་གེ་ཨ་ཞེས་བྱ་བའི་འབྲུར་པདྨ་ལ་གཞག་གོ། །ཨ། དེ་ནས་བྱང་ཕྱོགས་སུ་སངས་རྒྱས་ཐམས་ཅད་ཀྱི་ཕྱག་རྒྱ་གྲུ་གསུམ་པོའམ། ཡི་གེའི་འབྲུ་པདྨོའི་སྟེང་དུ་གཞག་གོ། །ཨྃ། སངས་རྒྱས་རྣམས་ཀྱི་ནུབ་ཕྱོགས་སུ་ནམ་མཁའི་སྙིང་པོ་རལ་གྲིའི་ཕྱག་རྒྱའམ་ཡི་གེའི་འབྲུར་གཞག་གོ །ཨཱི། ནམ་

མཁའི་སྙིང་པོའི་ནུབ་ཕྱོགས་སུ་འཇམ་དཔལ་ཏེ། དེ་ཡང་ཨུཏྤ་ལའི་ཕྱག་རྒྱའམ་ཡི་གེའི་འབྲུར་གཞག་གོ། །མཱྂ། དེའི་ནུབ་ཕྱོགས་སུ་ནམ་མཁའི་སྤྱན་ཕྱག་རྒྱའམ་ཡི་གེའི་འབྲུར་གཞག་གོ། །གཱྂ། སངས་རྒྱས་རྣམས་ཀྱི་ཤར་ཕྱོགས་སུ་ཤཱཀྱ་ཐུབ་པ་ལྷུང་བཟེད་ཀྱི་ཕྱག་རྒྱའམ། ཡི་གེའི་འབྲུར་གཞག་གོ། །བྷཱ།དེའི་དྲུང་དུ་མཛོད་སྤུའི་ཡིད་བཞིན་གྱི་ནོར་བུའི་ཕྱག་རྒྱའམ་ཡི་གེའི་འབྲུར་གཞག་གོ། །བྷྲུ། དེ་ནས་བྱང་ཆུབ་སེམས་དཔའ་རྣམས་ཀྱི་ཡིད་བཞིན་གྱི་ནོར་བུའི་ཕྱག་རྒྱ་ཡི་གེའི་འབྲུ་དང་བཅས་པར་བྲི་སྟེ། དེ་ལ་ཡི་གེའི་འབྲུ་ནི་འདིའོ། །ཀ །དེ་ནས་རྣམ་པར་སྣང་མཛད་ཆེན་པོའི་གཡས་ལོགས་སུ་སྤྱན་རས་གཟིགས་དབང་ཕྱུག་པདྨའི་ཕྱག་རྒྱའམ་ཡི་གེའི་འབྲུར་གཞག་གོ། །ས། སྤྱན་རས་གཟིགས་དབང་ཕྱུག་གི་གཡོན་ལོགས་སུ་མཐུ་ཆེན་ཐོབ་པ་པདྨའི་ཕྱག་རྒྱའམ་ཡི་གེའི་འབྲུར་གཞག་གོ། །མ། མཐུ་ཆེན་ཐོབ་ཀྱི་དྲུང་དུ་ཁྲོ་གཉེར་ཅན་རིལ་བ་སྤྱི་བླུགས་ཀྱི་ཕྱག་རྒྱའམ་ཡི་གེའི་འབྲུར་གཞག་གོ། །བྷྲྀ། པདྨ་འཛིན་པའི་གཡས་རོལ་དུ་ལྷ་མོ་སྒྲོལ་མ་ཨུ་ཏྤ་ལའི་ཕྱག་རྒྱའམ་ཡི་གེའི་འབྲུར་གཞག་གོ། །ཏཱྃ། དེའི་དྲུང་དུ་གོས་དཀར་ཅན་པདྨའི་ཕྱག་རྒྱའམ་ཡི་གེའི་འབྲུར་གཞག་གོ། ། པྃ། བཅོམ་ལྡན་འདས་ཀྱི་གཡོན་ལོགས་སུ་རྡོ་རྗེ་འཛིན་རྡོ་རྗེའི་ཕྱག་རྒྱའམ་ཡི་གེའི་འབྲུར་གཞག་གོ །བྃ། དེའི་གཡས་ལོགས་སུ་མཱ་མ་ཀཱི་རྡོ་རྗེའི་ཕྱག་རྒྱའམ་ཡི་གེའི་འབྲུར་གཞག་གོ །མཱ། དེའི་དྲུང་དུ་རིག་པའི་རྒྱལ་མོ་གནོད་མཛེས་རྡོ་རྗེའི་ཕྱག་རྒྱའམ་ཡི་གེའི་འབྲུར་གཞག་གོ། །སྃ། རྡོ་རྗེ་འཛིན་གྱི་གཡོན་ལོགས་སུ་བདུད་རྩི་ཐབ་སྦྱོར་རྡོ་རྗེའི་ཕྱག་རྒྱའམ་ཡི་གེའི་འབྲུར་གཞག་གོ། །མྲྀ། དེའི་དྲུང་དུ་རྡོ་རྗེ་འཛིན་ཐམས་ཅད་རྡོ་རྗེའི་ཕྱག་རྒྱའམ་ཡི་གེའི་འབྲུར་གཞག་གོ། །ཧཱུྃ། བཅོམ་ལྡན་འདས་ཀྱི་འོག་ལོགས་སུ་མེ་ཡི་ཕྱོགས་སུ་མི་གཡོ་བ་རལ་གྲིའི་ཕྱག་རྒྱའམ་ཡི་གེའི་འབྲུར་གཞག་གོ །ཧཱྃ། བཅོམ་ལྡན་འདས་ཀྱི་འོག་ལོགས་བདེན་བྲལ་གྱི་ཕྱོགས་སུ་འཇིག་རྟེན་གསུམ་ལས་རྣམ་པར་རྒྱལ་བ་རྡོ་རྗེ་བེ་ཅོན་གྱི་ཕྱག་རྒྱའམ་ཡི་གེའི་འབྲུར་གཞག་གོ །ཧཱ། སྒོ་དྲུང་གཉིས་སུ་ཀླུའི་རྒྱལ་པོ་དགའ་བོ་

དང་བསྙེན་དགའ་བོ་གཉིས། དགའ་བོ་དང་བསྙེན་དགའ་བོ་ཞེས་པའི་མིང་དུ་གཞག་གོ། །སྒོ་ཁྱུད་རྣམས་ཀྱི་ནང་དུ་བསྲུང་བ་བཞི་དགོད་དེ། ཤར་ཕྱོགས་སུ་རལ་གྲི་དང་ཡི་གེའི་འབྲུའོ། །ཙ། བྱང་ཕྱོགས་སུ་རལ་གྲི་དང་ཡི་གེའི་འབྲུའོ། །བ། ནུབ་ཕྱོགས་སུ་བེ་ཅོན་དང་ཡི་གེའི་འབྲུའོ། །ས། ལྷོ་ཕྱོགས་སུ་བེ་ཅོན་དང་ཡི་གེའི་འབྲུའོ། །ཀྵ། དེ་ནས་ཕྱི་རོལ་གྱི་རི་མོའི་ནང་རོལ་དུ་གནས་ཀྱི་དཀྱིལ་འཁོར་ཆུང་ངུ་ལ་གནས་གཙང་མ་ལྔ་རྣམས་བྲི་བ་ནི། དཀྱིལ་འཁོར་དང་པོ་ལ་སྃ་སྃ་སྭཱ་ཧཱ། ཞེས་བྱའོ། །གཉིས་པ་ལ་མ་ནོ་མ་ཡ་ཞེས་བྱའོ། ། གསུམ་པ་ལ་དྷརྨྨཱ་སཾ་བྷ་བ་ཞེས་བྱའོ། །བཞི་པ་ལ་བི་བྷ་བ་ཞེས་བྱ་བའོ། །ལྔ་པ་ལ་ཀ་ཏ་ན་ན་ཞེས་བྱ་བའོ། །ཡང་ན་གནས་ཀྱི་དཀྱིལ་འཁོར་ཆུང་ངུ་ལ་སྃ་སྃ་སྭཱ་ཧཱ་ཞེས་བྱ་བ་ཡང་གཞག་ཏུ་རུང་ངོ་། །བདག་གི་ལྷའི་ནི་རིགས་གང་དུ་གཏོགས་པ་དེའི་རིགས་ཀྱི་བདག་པོའི་གནས་སུ་རང་གི་ཕྱག་རྒྱའམ་ཡི་གེའི་འབྲུར་གཞག་པར་བྱའོ། །དེ་ནས་ཕྱི་རོལ་གྱི་རི་མོའི་ནང་ཐོག་ཐག་ཏུ་པདྨ་བྲིའོ། །དེ་ནས་དཀྱིལ་འཁོར་གྱི་སྒོའི་གཡས་རོལ་དུ་འཁོར་སའི་ནང་རོལ་དུ། མེ་ཡི་ཐབ་ཁུང་བྱ་ནི། །ཁོ་ར་ཁོར་ཡུག་ཟླུམ་པོ་ལ། །ཁྲུ་གང་ཙམ་གྱི་ཚད་དུ་བྱ། །ཟབས་སུ་སོར་ནི་བཅུ་གཉིས་ཚད། །དེ་ཡི་སྟེང་དུ་ཁ་རན་ནི། །ཀུན་ནས་སོར་བཞིའི་ཚད་དུ་བྱ། །དེ་ཡི་ཞབས་ཀྱི་དབུས་སུ་ནི། །འཁོར་ལོའི་འཕང་དུ་སོར་གཅིག་བྱ། །དེ་ནས་འདུག་ལ། དམ་ཚིག་གི་ཕྱག་རྒྱ་བཅིངས་ཏེ། དམ་ཚིག་གི་གསང་སྔགས་བརྗོད་ལ། ཡི་གེ་ས་དང་པདྨའི་ཕྱག་རྒྱས་བདག་ཉིད་སྤྱན་རས་གཟིགས་དབང་ཕྱུག་ཏུ་བྱིན་གྱིས་བརླབས་ཏེ། ཡི་གེ་ཨ་རང་གི་དཀྱིལ་འཁོར་ལ་གནས་པ་ལས་རྣམ་པར་སྣང་མཛད་ཆེན་པོའི་སྐུ་ཅི་ལྟ་བ་བཞིན་དུ་གྱུར་པར་བསམས་ལ། ཉིད་ཀྱི་ཕྱག་རྒྱ་ཡང་བསྟན་པར་བྱའོ། །དེ་ནས་རལ་གྲིའི་ཕྱག་རྒྱ་བཅིངས་ལ། ཡི་གེ་ཨ་ལས་བདག་ཉིད་རྣམ་པར་སྣང་མཛད་ཆེན་པོའི་སྐུར་བྱིན་གྱིས་བརླབས་ཏེ། དཀྱིལ་འཁོར་གྱི་ཡི་གེ་ཐམས་ཅད་སོ་སོའི་ལྷའི་གཟུགས་སུ་གྱུར་པར་བསམས་ལ། སོ་སོའི་ཕྱག་རྒྱ་རྣམས་ཀྱང་བསྟན་ཏོ། །དེ་ནས་འཕགས་པ་མི་གཡོ་བའི་སྔགས་ཟློས་ཤིང་ལས་ཀྱི་

རྡོ་རྗེ་བཅིངས་ལ་ལྷ་རྣམས་སོ་སོའི་འཁོར་ན་ཅི་སྙེད་བཞུགས་པ་ལ་བྱུག་སྤོས་དང་། མེ་ཏོག་ལ་སོགས་པ་དབུལ་ལོ། །ཡི་གེ་རས་ཀྱང་རྡུལ་དང་བྲལ་བའོ་སྙམ་པའི་ཏིང་ངེ་འཛིན་མངོན་དུ་བྱས་ལ། བྱུག་སྤོས་དང་མེ་ཏོག་ལ་སོགས་པ་སོ་སོའི་གསང་སྔགས་རྣམས་ཀྱིས་མངོན་པར་བསྔགས་ཏེ། བྱུག་སྤོས་ལ་སོགས་པ་ལ་སོ་སོའི་སྙིང་པོའི་སྔགས་ཀྱིས་ཀྱང་མངོན་པར་བསྔགས་ལ་དབུལ་ལོ། །བྱུག་སྤོས་འདི་བཞེས་ཏེ་བདག་ལ་ཐུགས་དཔག་མཛོད་ཅིག་ཅེས་སོ་སོར་བསྐུལ་བར་ཡང་བྱའོ། །དེ་བཞིན་དུ་ཐམས་ཅད་ལ་ཡང་སྦྱར་རོ། །ན་མཿ ས་མནྟ་བུད་དྷཱ་ཎཱཾ། ཏྲ་ཊ་ཨ་མོ་གྷ་ཙཎྜ་མ་ཧཱ་རོ་ཥ་ཎ། སྥོ་ཊ་ཡ་ཧཱུྃ་ཏྲ་ཊ་ཧྃ་མ།འཕགས་པ་མི་གཡོ་བའི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། བི་ཤུདྡྷེ་གནྡྷོདྦྷ་བ་སྭཱ་ཧཱ། བྱུག་སྤོས་ཀྱི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། མ་ཧཱ་མཻ་ཏྲྱ་བྷྱུངྒ་ཏེ་སྭཱ་ཧཱ། མེ་ཏོག་གི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། དྷརྨ་དྷཱ་ཏྭཱ་ནུ་ག་ཏེ་སྭཱ་ཧཱ། བདུག་སྤོས་ཀྱི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། ཏ་ཐཱ་ག་ཏཱརྩི་སྥ་ར་ཎ་ཨ་བ་བྷཱ་ས་ག་ག་ནོ་དརྱ་སྭཱ་ཧཱ། མར་མེའི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། ཏྲཻ་ཡ་དྷྭི་ཀཱ་ནཱཾ། ཨ་ར་ར། པ་ར་ར། བ་ལི་དེ། བ་ལིཾ་དྷ་དཱ་ཧི་སྭཱ་ཧཱ། ལྷ་བཤོས་ཀྱི་གསང་སྔགས་སོ། །ན་མཿས་མནྟ་བུད་དྷཱ་ནཱཾ། ག་ག་ན་ས་མ་ས་མ་སྭཱ་ཧཱ། མཆོད་ཡོན་གྱི་གསང་སྔགས་ཏེ། ཐོག་མ་དང་ཐ་མར་ཡང་སྦྱར་རོ། །སྙིང་པོའི་གསང་སྔགས་བརྗོད་པའི་ཆོ་ག་ནི། ༀ་བྷ་ག་བཱན་བཻ་རོ་ཙ་ན། ཨི་དཾ་གཾ་དྷི་པྲ་ཏི་གྲྀ་ཧྱ་ཨི་དཾ་མེ་ཀཱརྱཾ་ཀུ་རུ་སྭཱ་ཧཱ། དེ་བཞིན་དུ་ཐམས་ཅད་ལ་སྦྱར་རོ། །ཞི་བའི་ཆོ་ག་ལ་ནི་ཙནྡན་དཀར་པོ་ག་བུར་དང་སྦྱར་བ་དབུལ་ལོ། །མ་འབྱོར་ན་པུ་ཤེལ་ཙེ་དབུལ་ལོ། །དེ་བཞིན་དུ་མེ་ཏོག་པདྨ་དཀར་པོ་དང་། སྣ་མའི་མེ་ཏོག་དང་། མེ་ཏོག་མ་ལི་ཀ་དང་། མེ་ཏོག་ཡུག་ཏི་ཀ་ལ་སོགས་པ་མེ་ཏོག་དཀར་པོ་དྲི་ཞིམ་པ། བཀྲ་ཤིས་པ་གང་ཡིན་པ་དེ་དག་དབུལ་ལོ། །ཞི་བའི་ཆོ་ག་ལ་བདུག་སྤོས་ནི། ག་བུར་དང་། ཙནྡན་ནམ། ཡང་ན་ཤི་བ་ས་ཀ་དབུལ་ལོ། །ལྷ་བཤོས་ཀྱང་ཞོ་དང་འབྲས་ཆན་ལ་

སོགས་པ་དཀར་པོ་དབུལ་ལོ། །མར་མེ་ཡང་མར་གྱི་མར་མེ་སྣོད་དཀར་པོའི་ནང་དུ་བླུགས་ཏེ་དབུལ་ལོ། །དུང་ལ་སོགས་པ་སྣོད་དཀར་པོའི་ནང་དུ་ཙནྡན་དང་། ག་བུར་དང་། མེ་ཏོག་དཀར་པོ་སྦྱར་བའི་ཆུ་བླུགས་པའི་མཆོད་ཡོན་དབུལ་ལོ། །དེ་ལྟར་ཅི་སྐད་བཤད་པའི་མཆོད་པ་བྱས་ནས། དེ་ནས་ཕྱིར་བྱུང་སྟེ། བདག་ཉིད་སྤྱན་རས་གཟིགས་དབང་ཕྱུག་ཏུ་བྱིན་གྱིས་བརླབས་ལ། ཕྱི་རོལ་དུ་ཕྱོགས་ཀྱི་གཏོར་མ་སྦྱིན་པ་ནི། འབྲས་ཡོས་བཅས་ཤིང་ཏིལ་དང་བཅས། །ཆུ་དང་བཅས་ཤིང་འབྲས་ཆན་བཅས། །མེ་ཏོག་དང་བཅས་སྲན་ཆན་བཅས། ། ཀྲི་སར་བཅས་ཤིང་སྣུམ་བག་མང་། །གཏོར་མ་འདི་འདྲ་སློབ་དཔོན་གྱིས། །ལག་པས་བླངས་ནས་དགའ་བཞིན་དུ། །ཕྱོགས་ཀུན་ཏུ་ནི་གཏོར་བྱ་ཞིང་། །བདུག་སྤོས་མཆོད་ཡོན་དག་ཀྱང་དབུལ། །ཐོག་མར་དབང་ལྡན་ཕྱོགས་སུ་ནི། །གཞུ་ཅན་ཚོགས་དང་བཅས་ལ་དབུལ། །དེ་ནས་དབང་པོའི་ཕྱོགས་སུ་ཡང་། །མཁས་པས་དབང་པོ་ཉིད་ལ་དབུལ། །དེ་ནས་སྔགས་པ་མི་འཇིགས་པས། །མེ་ཡི་ཕྱོགས་སུ་དབུལ་བར་བྱ། །དེ་ནས་སྔགས་པ་འཇིགས་མེད་པས། །གཤིན་རྗེའི་ཕྱོགས་སུ་དབུལ་བར་བྱ། །སྔགས་རིག་བདེན་བྲལ་ཕྱོགས་སུ་ནི། །བདེན་བྲལ་ཚོགས་དང་བཅས་ལ་དབུལ། །ཆུ་ལྷའི་ཕྱོགས་སུ་ཀླུ་རྣམས་ལ། །འཇིགས་མེད་གསང་སྔགས་ཟློས་ཤིང་དབུལ། །བདག་པོར་བཅས་ལ་ཕུལ་ནས་སུ། །རླུང་གི་ཕྱོགས་སུ་འགྲོ་བར་བྱ། །སྔགས་ཤེས་པ་ནི་དེར་སོང་ནས། །རླུང་ལྷ་ཚོགས་དང་བཅས་པ་ལ། །རང་གི་མིང་ནས་སྨོས་ནས་སུ། །རང་གི་སྔགས་ཀྱིས་གཏོར་མ་དབུལ། །བྱང་གི་ཕྱོགས་སུ་སོང་ནས་ནི། །ཡིད་ནི་རབ་ཏུ་དང་བྱས་ཏེ། །བདག་གི་དངོས་གྲུབ་ཐོབ་འདོད་པས། །གནོད་སྦྱིན་རྣམས་ལ་གཏོར་མ་དབུལ། །སྲིན་པོ་རྣམས་དང་ཤ་ཟ་དང་། །འབྱུང་པོ་ཤ་རྗེན་ཅན་རྣམས་དང་། །སེམས་ཅན་རྣམ་པ་སྣ་ཚོགས་ལ། །མཁས་པས་གཏོར་མ་ཕྱོགས་སུ་གཏོར། །ས་ཕྱོགས་དེ་ཡི་སེམས་ཅན་ནི། །ཤིང་དང་གེལ་པ་ལ་གནས་པ། །བློ་ལ་གང་དང་གང་

དྲན་པ། །དེ་དང་དེ་ལ་གཏོར་མ་སྦྱིན། །ཕྱོགས་ཀྱི་གཏོར་མའི་སྔགས་ནི། དབང་ལྡན་གྱི་ཕྱོགས་སུ།རུ་དྲཱ་ཡ་སྭཱ་ཧཱ། དབང་པོའི་ཕྱོགས་སུ། ཤ་ཀྲཱ་ཡ་སྭཱ་ཧཱ། མེའི་ཕྱོགས་སུ། ཨགྣ་ཡེ་སྭཱ་ཧཱ། གཤིན་རྗེའི་ཕྱོགས་སུ། བཻ་བ་སྭཱ་ཧཱ། བདེན་བྲལ་གྱི་ཕྱོགས་སུ། རཱཀྵ་སཱ་དྷི་པ་ཏ་ཡེ་སྭཱ་ཧཱ། ཆུ་ལྷའི་ཕྱོགས་སུ། མེ་གྷ་ཤ་ན་ཡེ་སྭཱ་ཧཱ། རླུང་གི་ཕྱོགས་སུ། བཱ་ཡ་བེ་སྭཱ་ཧཱ། ཀུ་བེ་རའི་ཕྱོགས་སུ། ཡཀྴ་བིདྱཱ་དྷ་རི་སྭཱ་ཧཱ། ཀྲཾ་ཀི་རི་སྭཱ་ཧཱ། སྲིན་པོ་རྣམས་ཀྱིའོ། །མི་ཙི་མི་ཙི་སྭཱ་ཧཱ། ཤ་ཟ་རྣམས་ཀྱིའོ། །གུ་ཨི་གུ་ཨི་སྭཱ་ཧཱ། འབྱུང་པོ་རྣམས་ཀྱིའོ། །དེ་ལྟར་ཀུན་ཏུ་གཏོར་མ་གཏོར་ལ། ལག་པ་བཀྲུས་ཏེ་ཉེ་རེག་བྱས་ལ། དེ་ནས་ནང་དུ་ཞུགས་ཏེ་སངས་རྒྱས་ཐམས་ཅད་ལ་ཕྱག་འཚལ་ནས། བསྲེག་པར་བྱ་བའི་རྫས་གང་ཅུང་ཟད་ཅི་ཡོད་པ་དེ་དག་ཐམས་ཅད་འཕགས་པ་མི་གཡོ་བས་བསངས་ཏེ་གཡས་རོལ་དུ་གཞག་གོ། །གཡོན་རོལ་དུ་ནི་མཆོད་ཡོན་གྱི་སྣོད་གཉིས་རྩྭ་ཀུ་ཤ་དང་། སྤོས་ཆུར་སྦྱར་བ་བླུགས་ཏེ་གཞག་ལ། གཅིག་ནི་འཕགས་པ་མི་གཡོ་བས་བཟླས་སོ། །གཅིག་ནི་རྡོ་རྗེ་དམ་པས་སྦྱིན་གྱིས་བཟླས་སོ། །ཞུགས་ཐབ་ཀྱི་ཁོར་ཡུག་ཏུ་རྩྭ་ཀུ་ཤ་བསྐོར་བའི་ཐབས་སུ་དགྲམ་མོ། །བདག་རང་གར་འདུག་པའི་གཞིར་ཡང་རྩྭ་ཀུ་ཤ་བསྐོར་བའི་ཐབས་སུ་གདིང་ངོ་། །ཤིང་ཨུ་དུམ་བཱ་ར་དང་། ཨ་ཤྭཏྠའི་དགང་གཟར་དང་། བླུགས་གཟར་དང་།མར་བཞུས་པ་ཡང་མདུན་དུ་གཞག་གོ། །དེ་ནས་མེའི་ཐབ་ཁུང་ཙནྡན་གྱིས་བསྐུས་ཏེ་མེ་ཏོག་དཀར་པོ་དྲི་ཞིམ་པོའི་སིལ་མ་ཡང་བཀྲམ་ལ། བྲམ་ཟེའི་ཁྱིམ་ནས་མེ་བླངས་ལ། ཁྲོ་བོའི་རྒྱལ་པོས་བསང་གཏོར་བྱས་ཏེ། ཤིང་པླཀྵ་དང་། ཨུ་དུམ་བཱ་རའི་བུད་ཤིང་ལ་རླུང་ཡབ་ཀྱིས་མེ་སྤར་རོ། །དེར་ཁ་བྱང་ཕྱོགས་སུ་བལྟས་ཏེ་འདུག་ལ། ལག་པ་གཉིས་བྱུག་སྤོས་ཀྱིས་བསྐུས་ཏེ། དམ་ཚིག་གི་ཕྱག་རྒྱ་ལ་སོགས་པ་བཅིངས་ལ། བདག་ཉིད་རྣམ་པར་སྣང་མཛད་ཆེན་པོའི་སྐུ་ཆུའི་དཀྱིལ་འཁོར་ལ་གནས་པ་ཅི་ལྟ་བ་བཞིན་དུ་ཕྱག་རྒྱ་དང་། གསང་སྔགས་ཀྱིས་བྱིན་གྱིས་བརླབ་

བོ།།དེ་ནས་མེའི་ཐབ་ཁུང་གི་ཞབས་སུ་ཆུའི་དཀྱིལ་འཁོར་བསམས་ལ། ཆུའི་དབུས་སུ་སྔར་བཞིན་དུ་ཡི་གེ་གཞག་པ་ལས། མེའི་གཟུགས་སུ་གྱུར་པ་དུང་དང་། མེ་ཏོག་ཀུནྡ་དང་། ཟླ་བའི་མདོག་དང་འདྲ་བ། ཐོར་ཚུགས་ཅན། མིག་གསུམ་པ། ལག་པ་བཞི་པ། ལག་ན་བགྲང་ཕྲེང་དང་། རིལ་བ་སྤྱི་བླུགས་དང་། བེ་ཅོན་ཐོགས་པ་དང་། མི་འཇིགས་པ་སྦྱིན་པ་དང་། གོས་དཀར་པོ་བགོས་པ་དང་། སྲད་བུ་དཀར་པོ་སེ་རལ་ཁར་ཐོགས་པ། སྙིང་གི་སུམ་མདོའི་རིས་མཚན་ཅན། ཡི་གེ་རས་མཚན་པ། མེ་ལྕེ་དཀར་པོ་འཕྲོ་བ། ཡེ་ཤེས་ཀྱི་རང་བཞིན་ཅན་དེ་ལྟ་བུའི་མེ་ལྷ་བསམས་ལ། འཕགས་པ་མི་གཡོ་བས་བསྔགས་པའི་ཆུ་སྔར་བཤམས་པས། མེ་ལ་བསྐོར་བའི་ཐབ་ཏུ་བསང་གཏོར་བྱའོ། །རྡོ་རྗེ་དམ་པ་སྦྱིན་གྱིས་ཀྱང་ལན་གསུམ་དུ་བྱའོ། །ན་མཿས་མནྟ་བུད་དྷཱ་ནཱཾ། མྃ་སྭཱ་ཧཱ། རྡོ་རྗེ་དམ་པ་སྦྱིན་གྱིའོ། །དེ་ནས་མེ་ལ་རང་གི་གསང་སྔགས་ཀྱིས་བྱུག་སྤོས་དང་། མེ་ཏོག་ལ་སོགས་པ་དབུལ་ལོ། །དེ་ནས་མངར་གསུམ་ལས་སྲེག་བླུགས་གསུམ་བྱིན། དགང་གཟར་ཆང་པས་གཟུང་ལ། མར་གྱི་དགང་བླུགས་གསུམ་སྦྱིན་ནོ། །དེ་ནས་ཤིང་ཨུ་དུམ་བཱ་རའམ། ཨ་ཤྭཏྠའི་རྩེ་མོའི་ཡམ་སྲེག་ཤིང་གཉིས་མར་ལ་སྨྱུགས་པ་བདུན་བསྲེག་གོ། །དེ་ནས་ཡང་མར་གྱི་དགང་བླུགས་གསུམ་བྱིན་ལ། བསང་གཏོར་སྔ་མ་བཞིན་དུ་བྱའོ། །ན་མཿས་མནྟ་བུད་དྷཱ་ནཱཾ། ཨོཾབ་ར་དཱ་ག་ན་ཡེ་ཤཱནྟིཾ་ཀུ་རུ་སྭཱ་ཧཱ། དེ་བཞིན་དུ་ལྷ་ཐམས་ཅད་ལ་ཡང་སོ་སོར་སྦྱིན་སྲེག་བྱས་ལ། བསང་གཏོར་བྱའོ། །ན་མཿས་མནྟ་བུད་དྷཱ་ནཱཾ། ཧཱུཾ་ཨ་མ་ཧཱ་ཤཱནྟི་ག་ཏ་ཤཱནྟི་ཀ་ར། པྲ་ཤ་མ་དྷརྨྨ་ནིར་ཛཱ་ཏ། ཨ་བྷཱ་བ་སྭ་བྷཱུ་བ་དྷརྨྨ་ས་མནྟ་པྲཱཔྟ། ཨ་མུ་ཀ་སྱ་སྭ་སྟི། ཤཱནྟིཾ་བཾ་ཀུ་རུ་སྭཱ་ཧཱ།ཞི་བའི་གསང་སྔགས་སོ། །དེ་ནས་སངས་རྒྱས་ཐམས་ཅད་བསམས་ལ། ནང་གི་བདག་ཉིད་རྣམ་པར་དག་པས་ཅི་ལྟ་བ་བཞིན་དུ་བྱང་ཆུབ་ཀྱི་སེམས་བསྒོམ་

མོ། །དེ་ནས་ཟླ་བའི་དཀྱིལ་འཁོར་ལ་རང་གི་རིག་སྔགས་བཞག་སྟེ། རང་གི་ལྷའི་ཕྱག་རྒྱ་བཅིངས་ལ། རང་གི་ལྷའི་གཟུགས་སུ་བསྒོམ་མོ། །དེ་ནས་ཡང་སྔ་མ་བཞིན་དུ་དགང་བླུགས་གསུམ་ལ་སོགས་པ་ཕུལ་ཏེ། བསྐོར་བའི་ཐབ་ཏུ་བསང་གཏོར་ཡང་བྱས་ལ། བདག་གི་རྒྱུད་ལས་བྱུང་བའི་རྫས་རྣམས་ཅི་སྲིད་མི་སྐྱོ་བའི་བར་དུ་སྦྱིན་སྲེག་བྱའོ། །སྐྱོ་བར་གྱུར་ན། རྫོགས་པའི་སངས་རྒྱས་ཀྱི་སྐུར་བལྟས་ཏེ། ཡང་བྱང་ཆུབ་ཀྱི་སེམས་བསྒོམ་མོ། །དེ་ནས་མཆོད་ཡོན་ཕུལ་ལ། ལྷ་རྣམས་ལ་ཕྱག་བྱས་ཏེ། སླར་གཤེགས་སུ་གསོལ་ལོ། །ལྷ་ཐམས་ཅད་སླར་གཤེགས་སུ་གསོལ་ནས། ཕྱག་རྒྱའི་ཚོགས་རྣམས་གོས་སར་པས་གཡོགས་ལ། ཕྱི་དེ་ཉིན་ཡང་སྔ་མ་བཞིན་དུ། ལྷ་རྣམས་སོ་སོའི་དཀྱིལ་འཁོར་ལ་གནས་པར་བསམས་ཏེ། ཆོ་གའི་རིམ་པ་དེ་ཉིད་ནམ་ཞི་བར་གྱུར་གྱི་བར་དུ་བྱའོ། །ཆོ་ག་ཤེས་པའི་སྔགས་གྲུབ་པ། །གང་ཞིག་ཆོ་ག་འདི་ཡིས་སུ། །ལེ་ལོ་མེད་པར་ཞི་བྱས་ན། །ཞི་བ་ཉིད་དུ་འཐོབ་པར་འགྱུར། །ཟླ་བ་ཕྱེད་ཀྱི་ཁམས་རིས་གཅིག །ངེས་པ་ཉིད་དུ་ཞི་བར་འགྱུར། ། རྒྱལ་པོ་ལ་ནི་ཞག་བཅུ་གཉིས། །ཡུལ་ཕྱོགས་སུ་ནི་ཞག་བཅུས་སོ། །དེ་ལ་ཞི་བའི་ཆོ་གའི་ལས་བྱེད་པས་ཆོ་ག་འདི་ལྟར་སྤྱད་པར་བྱའོ། །གོས་དཀར་བགོས་ཤིང་གཙང་ལ་ཞི། །བྱང་ཆུབ་སེམས་ལ་རབ་ཏུ་གཞོལ། །ཀུ་ཤ་བཏིང་བའི་སྟན་ལ་ཉལ། །དེ་ལས་བྱས་པའི་བསང་བྱེད་ཐོགས། །ནས་བཙོས་པའམ་འོ་མ་འཐུང་། །ཡིད་ནི་སྦྱིན་སྲེག་བྱེད་ལ་འཇུག །དུས་གསུམ་སྦྱིན་སྲེག་བཟླས་བརྗོད་ཀྱིས། །ཞི་བའི་ཆོ་ག་སྤྱད་པར་བྱའོ། །ཞབས་བསིལ་རྡོ་རྗེ་མཆོག་སྦྱིན་གྱིས། །བསང་གཏོར་མི་གཡོ་མགོན་གྱིས་སོ། །འདིར་ནི་རེ་ཞིག་མདོར་བསྡུས་ན། །སྦྱིན་སྲེག་ཆོ་གར་བསྒྲགས་པ་ཡིན། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཞི་བའི་སྦྱིན་སྲེག་གི་ཆོ་ག་རིམ་པར་ཕྱེ་བའོ།། །

དེ་ནས་གཞན་ཡང་སྐལ་ཆེན་པོ། །སྔགས་ལ་མཁས་པ་རྣམས་ཀྱིས་སྔོན། །སེམས་ཅན་རྣམས་ལ་ཐུགས་བརྩེ་ནས། །སྦྱིན་སྲེག་རྒྱས་པ་ཆེ་བྱེད་པ། །ཕན་པར་བཞེད་ནས་བཤད་པ་ཡང་། །ཡིད་གཅིག་བསྡུས་ཏེ་མཉན་པར་གྱིས། །དེ་བས་རྣམ་པ་ཐམས་ཅད་དུ། །རྒྱས་པའི་ཆོ་ག་སྤྱད་པར་བྱ། །གྲོང་ངམ་ཡང་ན་ལྗོངས་དག་གི།ཤར་གྱི་ཕྱོགས་སུ་གནས་བཅས་ནས། །སྔ་མ་བཞིན་དུ་ངེས་པ་ཡི། །ས་གཞི་ལེགས་པར་བརྟག་པར་བྱ། །རི་ཡི་རྩེ་འམ་ཕྱུགས་ལྷས་སམ། །མཆོད་རྟེན་རིང་བསྲེལ་ཅན་དག་ཏུ། །རྒྱས་པའི་ལས་ནི་སྒྲུབ་བྱེད་པའི། ། དཀྱིལ་འཁོར་ཤེས་རབ་ཅན་གྱིས་བྲི། །མཁས་པས་ལས་ཀྱི་ཆོ་ག་ཡིས། །ས་ནི་ལེགས་པར་བརྐོས་ནས་སུ། །དབུས་སུ་རིན་ཆེན་འབྲུ་དང་ནི། །སྨན་དང་བཅས་པ་བསྲེས་གཞག་སྟེ། །དེར་ཡང་ས་ནི་སེར་པོ་ཡིས། །ས་ནི་ལེགས་པར་དགང་བར་བྱ། །མཉམ་ཞིང་ལེགས་པར་བཅགས་ནས་ནི། །དེ་ཡི་འོག་ཏུ་དཀྱིལ་འཁོར་བྲི། །འདིར་ཡང་རེ་ཞིག་སྔགས་པ་ཆོ་ག་ལ་མཁས་པས་བདག་ཉིད་རྡོ་རྗེ་དམ་པ་སྦྱིན་པར་བསྒོམ་ཞིང་། རང་གི་དཀྱིལ་འཁོར་ལ་གནས་པས། དེའི་གསང་སྔགས་དང་ཕྱག་རྒྱས་བྱིན་གྱིས་བརླབས་ལ། འཕགས་པ་མི་གཡོ་བས་མཚམས་གཅད་པ་དང་ས་ཡོངས་སུ་གཟུང་བ་བྱའོ། །ཟླ་བ་ཡར་གྱི་ངོའི་ཚེས་གསུམ་མམ་ལྔའམ་བདུན་ནམ་ཡང་ན་ཟླ་བ་ཉ་ལ་ཡང་རུང་སྟེ། གཟའ་བཟང་པོ་གཟའ་ལྷག་གམ། ཕུར་བུའམ། རྒྱུ་སྐར་གྲོ་བཞིན་དང་། མོན་གྲུ་དང་། སྣྲོན་དང་། སྣར་མ་ལ། བདག་ཉིད་རྣམ་པར་སྣང་མཛད་ཆེན་པོར་བྱིན་གྱིས་བརླབས་ཏེ། སྲད་བུ་སེར་པོ་བླངས་ལ་གྲངས་དང་ཚད་སྔ་མ་བཞིན་དུ་དཀྱིལ་འཁོར་གྱི་ཐིག་གདབ་བོ། དེ་ནས་དཀྱིལ་འཁོར་བསྐོར་ཏེ་ནང་དུ་ཞུགས་ལ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླགས་ལ་ཕྱག་ཀྱང་བྱས་ཏེ། ཡང་བདག་ཉིད་རྣམ་པར་སྣང་མཛད་དུ་བྱིན་གྱིས་བརླབས་ལ་ཚོན་རྩི་སེར་པོ་བླངས་ཏེ། དེར་ནི་ཡི་གེ་ཀ་བཞག་པ། །དེ་ཚེ་ཐུབ་པ་གསེར་ཐུབ་ནི། །གསེར་གྱི་ཁ་དོག་འབར་དང་བཅས། །ཏིང་འཛིན་གནས་ཤིང་སྡིག་བཅོམ་པའོ། །དེ་ནས་དཀྱིལ་འཁོར་རྟ་བབས་ཅན་བྲིས་ལ་ནུབ་ཕྱོགས་ཀྱི་སྒོ་རྟག་ཏུ་དབྱེའོ། །ཕྱི་

རོལ་རི་མོ་གྲུ་བཞི་པ་གསུམ་གྱིས་བསྐོར་ལ། དཀྱིལ་འཁོར་དུ་ལྷ་རྣམས་དགོད་པ་སྔ་མ་བཞིན་དུ་བྱའོ། །དེ་ལ་ཁྱད་པར་ནི་འདི་ཡོད་དེ། འཕགས་པ་ནམ་མཁའི་སྙིང་པོའི་གནས་སུ་ཀུན་དུ་བཟང་པོ་རིན་པོ་ཆེའི་རྒྱལ་མཚན་གྱི་ཕྱག་རྒྱ་ཡི་གེ་ས་དང་བཅས་པ་གཞག་གོ། །ས །མཛོད་སྤུའི་གནས་སུ་འཕགས་པ་རྨུགས་འཛིན་ཤིང་ཏོག་པཱི་ཛ་པུ་རའི་ཕྱག་རྒྱ་དང་ཡི་གེ་ཛཾ་བདུད་རྩིའི་མཚན་ཉིད་ཅན་དང་བཅས་པར་གཞག་གོ །ཛྃ། འཕགས་མ་ཁྲོ་གཉེར་ཅན་གྱི་གནས་སུ་གྲགས་ལྡན་མ་མེ་ཏོག་པྲི་ཡང་ཀུའི་ཕྱག་རྒྱ་ཡི་གེ་ཡ་དང་བཅས་པར་གཞག་གོ། །ཡ། འཕགས་མ་གོས་དཀར་ཅན་གྱི་གནས་སུ་ནི་དཔལ་ཆེན་མོ་འཕགས་མ་དཀར་མོ་ཞེས་བྱ་བ་པདྨའི་ཕྱག་རྒྱ་དང་ཡི་གེའི་འབྲུར་གཞག་གོ །ཤྲཱི། འཕགས་པ་གནོད་མཛེས་ཀྱི་གནས་སུ་ནི་དཔུང་བཟང་རྡོ་རྗེའི་ཕྱག་རྒྱ་དང་ཡི་གེའི་འབྲུར་གཞག་གོ །ཧཱུྃ། བདུད་རྩི་ཐབ་སྦྱོར་གྱི་གནས་སུ་ནི་རྡོ་རྗེའི་སྡེ་རྡོ་རྗེའི་ཕྱག་རྒྱ་དང་ཡི་གེའི་འབྲུར་གཞག་གོ །ས། གནས་གཙང་མ་པ་རྣམས་ཀྱི་གནས་སུ་ནི་བརྒྱ་བྱིན་དང་འཇིག་རྟེན་སྐྱོང་བ་བཞི་དགོད་དོ། །དེ་ནས་ཕྱི་རོལ་གྱི་རི་མོ་གཉིས་ཀྱི་ནང་ལོགས་ཁོ་ར་ཁོར་ཡུག་དང་གྲྭ་ཐམས་ཅད་དུ་རྡོ་རྗེ་བྲིའོ། །དེ་ནས་དཀྱིལ་འཁོར་གྱི་གཡས་ལོགས་འཁོར་སའི་ནང་དུ་མེའི་ཐབ་ཁུང་བྱ་བ་ནི། གྲུ་བཞི་ལྷམ་པ་ཁ་རན་ཅན། །རྒྱར་ནི་ཁྲུ་དོའི་ཚད་དུ་བྱ། །རྡོ་རྗེ་ཡིས་ནི་འཁོར་བར་བསྐོར། །ཟབས་སུ་ཁྲུ་གང་ཙམ་གྱི་ཚད། །ཁ་རན་མཐེའུ་ཆུང་མཐོ་གང་ཚད། །འཇིམ་པ་སེར་པོའི་སྐྱོང་ནུལ་བསྐུ། །པདྨའི་ཕྱག་རྒྱ་མཛུབ་གང་ཚད། །འཕང་དུ་སོར་བཞིའི་ཚད་དུ་བྱ། །དུས་གསུམ་དུ་བ་ལང་གི་ལྕི་བ་ས་ལ་མ་ལྷུང་བས་བསྐུའོ། །དེ་ནས་སྔ་མ་བཞིན་དུ་དཀྱིལ་འཁོར་གྱི་བདག་པོའི་ལྷ་ལ་སོགས་པ་རྣམ་པ་དང་། མཚན་མ་ཅི་ལྟ་བ་བཞིན་དུ་བསམས་ཏེ། བྱུག་སྤོས་དང་མེ་ཏོག་ལ་སོགས་པས་མཆོད་པར་བྱའོ། །དེ་ལ་ཁྱད་པར་ནི་འདི་ཡོད་དེ་གང་གི་ཚེ་བཅོམ་ལྡན་འདས་རྣམ་པར་སྣང་མཛད་གནས་སུ་བཞུགས་སུ་གསོལ་བ་དང་། བྱུག་སྤོས་དང་མེ་ཏོག་ལ་སོགས་པས་མཆོད་པ་བྱེད་པ་དེའི་ཚེ།བདག་ཉིད་རྡོ་རྗེ་དམ་པ་སྦྱིན་དུ་བྱིན་གྱིས་བརླབས་ཏེ་བྱའོ། །འདིར་བྱུག་སྤོས་དང་། མེ་ཏོག་ལ་སོགས་པའི་

ཁྱད་པར་བཤད་པར་བྱ་སྟེ། གུར་གུམ་ག་བུར་བསྲེས་པས་ནི། །རྒྱས་པ་དག་ལ་བྱུག་སྤོས་མཆོག །དྲི་ཞིམ་ཁ་དོག་སེར་པོ་ཡང་། །དེ་མ་རྙེད་ན་སྦྱར་བར་བྱ། །མེ་ཏོག་ཙམ་པ་རབ་ཏུ་བཟང། །ཡུ་ཏི་སྣ་མ་སེར་པོ་དང་། །དེ་ལས་གཞན་པའང་དྲི་ཞིམ་པ། །སེར་པོ་དག་ནི་དབུལ་བར་བྱ། །གུར་གུམ་ཨ་ཀ་རུ་དང་སྦྱར། །ཤ་ཁ་ར་དང་སྦྱར་བ་དག །རྒྱས་པའི་ལས་རྣམས་འགྲུབ་བྱའི་ཕྱིར། །བདུག་སྤོས་མཁས་པས་དབུལ་བར་བྱ། །གུ་གུལ་དང་ནི་ཙནྡན་ཡང་། །མར་དང་སྦྱར་བ་བདུག་སྤོས་མཆོག །སྲ་རྩི་པོག་ནི་གུར་གུམ་བསྲེས། །བདུག་སྤོས་སྔགས་ལ་མཁས་པས་དབུལ། །མར་མེ་སྣོད་ནི་གསེར་གྱི་བཟང། །ཡང་ན་ཁམ་པའི་སེར་པོའང་རུང་། །མཁས་པས་རས་ནི་སེར་པོ་ཡི། །མར་མེའི་སྙིང་པོ་སེར་པོ་དབུལ། །སྤོས་ཀྱི་འབྲུ་མར་བཟང་པོ་ཡིས། །དེ་ཡི་སྣུམ་ནི་དྲི་ཞིམ་བྱའོ། །ཡང་ན་ཏིལ་གྱི་འབྲུ་མར་གྱིས། །མར་མེ་གཙང་མ་དབུལ་བར་བྱ། །འབྲས་ཆན་སེར་པོ་སྲན་ཚོད་ཅན། །མར་དང་བཅས་པ་ཤིན་ཏུ་བཟང། །ཚོད་མ་རྣམས་ཀྱང་སེར་པོར་བྱ། །ཤིང་ཏོག་བག་ཅོས་དེ་བཞིན་ནོ། །སྤོས་ཆུས་མེ་ཏོག་སེར་པོ་དང་། །དེ་བཞིན་འབྲས་དང་དཱུར་བའི་རྩྭ། །སྣོད་ཀྱང་སེར་པོར་བླུགས་པ་དག །རྒྱས་པ་ལ་ནི་མཆོད་ཡོན་ཤིས། །དེ་ལྟར་མཆོད་པ་ཅི་ལྟ་བ་བཞིན་དུ་བྱས་ཏེ། དེ་ནས་བདག་ཉིད་རྡོ་རྗེ་དམ་པ་སྦྱིན་དུ་བྱིན་གྱིས་བརླབས་ལ། ཕྱི་རོལ་དུ་བྱུང་སྟེ་ཕྱོགས་ཀྱི་གཏོར་མ་སྦྱིན་ནོ། །དེ་ནས་ཉེ་རེག་བྱས་ཏེ་ནང་དུ་ཞུགས་ལ། སངས་རྒྱས་ཐམས་ཅད་ལ་ཕྱག་བྱས་ཏེ་མེའི་ཐབ་ཁུང་གི་དྲུང་དུ་བསྲེག་པར་བྱ་བ་ལ་སོགས་པ་སྔགས་ཀྱིས་བསང་བ་རྣམས། སྔ་མ་བཞིན་དུ་གཞག་ལ། ས་ལ་རྩྭ་ཀུ་ཤ་བཏིང་བའི་སྟེང་དུ་པདྨའི་སྐྱིལ་མོ་ཀྲུང་བཅས་ཏེ་འདུག་ནས། བདག་ཉིད་རྣམ་པར་སྣང་མཛད་ཆེན་པོའི་སྐུར་བསམས་ཏེ་ཁང་པའི་ནང་བྱུག་སྤོས་སེར་པོས་ཞུགས་ཐབ་བསྐུས་ལ་མེ་ཏོག་སེར་པོ་སིལ་མ་ཡང་བཀྲམ། རྩྭ་ཀུ་ཤ་ཡང་བཏིང་སྟེ། རྒྱལ་རིགས་ཀྱི་ཁྱིམ་མམ་རྒྱལ་པོའི་ཕོ་བྲང་ནས་མེ་བླངས་ཏེ་བསང་གཏོར་བྱས་ཏེ། ཤིང་པླཀྵ་དང་ཨུ་

དུམ་བཱ་རས་མེ་སྤར་ལ། དེ་ནས་མེའི་ཐབ་ཁུང་གི་ཞབས་སུ་དབང་ཆེན་གྱི་དཀྱིལ་འཁོར་བསམས་ཏེ། དེར་ཡི་གེ་ཡ་ཀླད་ཀོར་དང་བཅས་པ་པདྨ་ལ་གནས་པ་བསམ་མོ། །ཡྃ། ཡི་གེ་ར་ལས་ཐབ་ཁུང་གི་ནང་ནས་མེ་བྱུང་བར་བསམ་པ་ནི། གསེར་གྱི་ཁ་དོག་ལྟ་བུའི་ཐོར་ཚུགས་ཅན། མིག་གསུམ་པ། གདོང་པ་བཞི་པ། ལག་ན་བགྲང་ཕྲེང་དང་རིལ་བ་སྤྱི་བླུགས་ཐོགས་པ་དང་དམ་པ་སྦྱིན་པ། གོས་སེར་པོ་བགོས་པ། སྲད་བུ་སེར་པོ་སེ་རལ་ཁར་ཐོགས་པ།སོར་རིས་གསུམ་གྱིས་བྱུགས་པ། སུམ་མདོའི་རིས་མཚན་ཅན། ཡི་གེ་རས་མཚན་པ། གསེར་གྱི་ཁ་དོག་འདྲ་བ། མེ་ལྕེ་འབར་བ་ཀུན་དུ་འཕྲོ་བ། མཐུ་ཆེན་པོ་དང་ལྡན་པ། གསང་སྔགས་ཀྱི་རྒྱལ་པོའི་འོད་ཟེར་ལས་བྱུང་བའི་མེ་དེ་ལྟ་བུ་བསམས་ཏེ། དེ་ནས་བསང་གཏོར་བྱ་བ་དང་། ཁ་བཀྲུ་བ་དང་།མཆོད་ཡོན་དབུལ་བར་བྱས་ལ། བྱུག་སྤོས་དང་མེ་ཏོག་ལ་སོགས་པ་རང་གི་སྔགས་ཀྱིས་སྦྱིན་ནོ། །ན་མཿས་མནྟ་བུདྡྷཱ་ནཱན། ༀ་ཨགྣ་ཡེ་སྭཱ་ཧཱ། དེ་ནས་འོ་ཐུག་སྦྲང་རྩི་དང་མར་ལ་སོགས་པ་སྦྱར་བའམ།ཏིལ་ནག་པོ་མར་དང་སྦྱར་བའི་སྲེག་བླུགས་གསུམ་བྱིན་ཏེ། དེ་ནས་ཤིང་བིལ་བའི་དགང་གཟར་དང་བླུགས་གཟར་གྱིས་མར་གྱི་དགང་བླུགས་བདུན་སྦྱིན་ནོ། །དེ་ནས་ཤིང་པླཀྵ་འམ། ཨུ་དུམ་བཱ་རའི་དབུས་ཀྱི་ཆ་ལས་བྱུང་བའི་ཡམ་སྲེག་ཤིང་སྦོམས་སུ་ཆང་གང་པ་ལ་སྲིད་ཁྲུ་གང་བ་མར་ལས་སྨྱུགས་པའི་སྲེག་བླུགས་གསུམ་བྱིན་ལ་ཡང་དགང་བླུགས་གསུམ་སྦྱིན་ནོ། །དེ་ནས་དེ་སྔ་མ་བཞིན་དུ་ལྷའི་གཟུགས་རྣམས་བསམས་ཏེ་སྙིང་པོ་དེ་དང་དེས་སྲེག་བླུགས་གསུམ་དབུལ་ལོ། །དེ་ནས་སངས་རྒྱས་ཐམས་ཅད་བསམས་ཏེ། བྱང་ཆུབ་ཀྱི་སེམས་བསྒོམས་ལ་བདག་གི་ལྷའི་གཟུགས་བསམས་ཏེ་སྔ་མ་བཞིན་དུ་སྲེག་བླུགས་གསུམ་ཕུལ་ནས་བདག་གི་དངོས་གྲུབ་བསྒྲུབ་པ་ལས་བཤད་པའི་རྫས་ལས་སྦྱིན་སྲེག་བྱའོ། །ཐོག་མར་ཨོྃ་ཞེས་བརྗོད་པ་ལ་མཇུག་ཏུ་གྲགས་པ་དང་དཔལ་དང་ལོངས་སྤྱོད་དང་དགེ་བ་དང་ནོར་ལ་སྭཱ་ཧཱ། ཞེས་བྱ་བར་སྦྱར་རོ། །ཡང་ན་བདག་གིས་ཅི་ལྟར་བསམས་པའི་དངོས་གྲུབ་ཀྱི་

རྫས་ལ་སྭཱ་ཧཱ་ཞེས་བྱ་ཞིང་སྲེག་བླུགས་དབུལ་ལོ། །དེ་ཅི་ལྟ་བ་བཞིན་དུ་སྦྱིན་སྲེག་བྱས་ནས་བྱང་ཆུབ་ཀྱི་སེམས་ལ་སོགས་པའི་རིམ་པ་དེ་ཉིད་སྔ་མ་བཞིན་དུ་བྱའོ། །འདིར་ཡང་སྒྲུབ་པ་པོས་ཆོ་ག་སྤྱད་པ་ནི། གོས་ནི་སེར་པོ་བགོ་བར་བྱ། །བསང་བྱེད་སེར་པོ་གཙང་མ་ཐོགས། །སེམས་ནི་བརྟན་ཞིང་མཐུ་ཡང་ཆེ། །ཤིན་ཏུ་མི་སྨྲ་སེར་སྣ་མེད། །བྱང་ཆུབ་སེམས་ལ་རྟག་ཏུ་དགའ། །དུས་གསུམ་ཆོ་ག་ཐོག་མར་བྱེད། །ནས་ཆན་བཙོས་པའམ་འོ་མ་འཐུང་། །རྒྱས་པའི་ལས་ནི་བརྩམ་པར་བྱ། །གང་ཞིག་འདི་ཡིས་རྒྱས་པ་ཡི། །ལས་ནི་ལེགས་པར་རྩོམ་བྱེད་པ། །དེ་ཡི་ཡིད་ལ་གང་བསམས་པའི། །རྒྱས་པ་མྱུར་དུ་འགྲུབ་པར་འགྱུར། །རལ་གྲི་འཁོར་ལོ་རྡོ་རྗེ་དང་། །ལྡོང་རོས་མིག་བསྐུ་གི་ཝང་དང་། །ཡིད་བཞིན་ནོར་བུ་བུམ་པ་གོས། །ནོར་གྱི་ཆར་འབབ་མཆིལ་ལྷམ་དང་། །གདུགས་དང་ཤིང་རྟ་བཞོན་པ་དང་། །དེ་བཞིན་ཁང་པ་བརྩེགས་པ་དང་། །པདྨ་བུམ་པ་མདུང་རྩེ་གསུམ། །བགྲང་ཕྲེང་བེ་ཅོན་གུན་དྷེ་དང་། །པི་བང་མདུང་ཐུང་མདའ་ཡང་རུང་། །ལྷུང་བཟེད་དང་ནི་འཁར་གསིལ་ལམ། །ཡང་ན་རྫས་ནི་གང་འདོད་པ། །དཀྱིལ་འཁོར་འདིར་ནི་བསྒྲུབ་པར་བྱ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས།རྒྱས་པའི་སྦྱིན་སྲེག་གི་ལས་ཀྱི་ཆོ་ག་རིམ་པར་ཕྱེ་བའོ།། །།དེ་ནས་གཞན་ཡང་སྦྱིན་སྲེག་འདི། །དབང་གི་ལས་ནི་རབ་སྒྲུབ་པ། །འཇིག་རྟེན་སྒྲོན་མ་མཛད་པ་ཡིས། །བརྩེ་བར་གྱུར་པའི་ཐུགས་ཀྱིས་གསུངས། །དེ་ནི་མ་ལུས་བཤད་པར་བྱས། །འབྱོར་པ་འདོད་པས་ང་ལ་ཉོན། །ཐོག་མར་ས་གཞི་བརྟག་པ་ནི། །གྲོང་ངམ་ཡང་ན་ལྗོངས་དག་གི།མེ་ཡི་ཕྱོགས་སུ་གནས་བཅས་ཏེ། །སྐྱེ་བོ་མེད་པའི་ཁང་སྟོང་ངམ། ། ཤིང་གཅིག་དྲུང་ངམ་དུར་ཁྲོད་དམ། །ཡང་ན་བདེ་བྱེད་གནས་སུའམ། །མ་མོའི་གནས་སམ་ཕུག་ཀྱང་རུང་། །སྔགས་པས་དཀྱིལ་འཁོར་བྲི་བ་ནི། །མར་གྱི་ངོ་ཡི་ཚེས་དགུ་ལ། །དབང་གི་ལས་ནི་བརྩམ་པར་བྱ། །གཟའ་ནི་ཉི་མའམ་མིག་དམར་ལ། །རྒྱུ་སྐར་

རྒྱལ་དང་སྨིན་དྲུག་དང་། །མཆུ་དང་ས་ག་དག་ལ་ནི། །མཁས་པས་དཀྱིལ་འཁོར་བྲི་བར་བྱ། །དེ་ལ་དང་པོར་སྔགས་པས་བདག་ཉིད་ཕྱག་ན་རྡོ་རྗེར་བྱིན་གྱིས་བརླབས་ལ། ས་ཁ་དོག་དམར་པོ་ལ། ས་སྦྱང་བ་དང་ཡོངས་སུ་གཟུང་བ་ལ་སོགས་པ་བྱས་ཏེ། དེ་ནས་བདག་ཉིད་རྣམ་པར་སྣང་མཛད་ཆེན་པོར་བྱིན་གྱིས་བརླབས་ལ་འཕགས་པ་མི་གཡོ་བས་བཟླས་པའི་སྲད་བུ་ལེ་བརྒན་དུ་བཙེས་པ་བླངས་ཏེ། དཀྱིལ་འཁོར་ཐིག་གདབ་པ་ནི། གྲུ་གསུམ་པ་ལ་སྒོ་ཤར་ཕྱོགས་སུ་གཏོད་པ། སྒོ་ཁྱུད་དང་རྟ་བབས་དང་མུ་རན་གྱི་ཆ་ལེགས་པར་བྱས་ཏེ། དེ་ནས་ཚོན་རྩི་དམར་པོ་ནི། །ཤིན་ཏུ་བཟང་པོ་བླངས་ནས་སུ། །ཡི་གེ་འབར་བ་བཞག་པ་ནི། །ར་ཡི་ཡི་གེ་ཀླད་དང་བཅས། །ཉི་མ་འཆར་བ་འདྲ་བ་སྟེ། །ཤིན་ཏུ་གདུལ་དཀའ་རྒྱལ་བའི་མཆོག །དེ་ལྟར་ཚོན་རྩི་བྱིན་བརླབས་ལ། །སངས་རྒྱས་ཐམས་ཅད་དྲན་བྱས་ཏེ། །དཀྱིལ་འཁོར་ཀུན་དུ་བྲི་བ་ནི། །ཁྲུ་གསུམ་ཡང་ན་ཁྲུ་ལྔའམ། །ཡང་ན་བདུན་ནམ་དགུ་ཡང་རུང་། །གསང་སྔགས་དངོས་གྲུབ་རྗེས་མཐུན་པར། །རྣམ་པ་གསུམ་དུ་དབྱེ་བར་བྱ། །ལྷ་རྣམས་དགོད་པ་སྔ་མ་བཞིན། །མཁས་པས་རིགས་ཀྱི་བདག་པོས་བྱ། །ལྷག་མ་རྣམས་ནི་ཅི་རིགས་པར། །མཁས་པ་ཡིས་ནི་དགོད་པར་བྱ། །དེ་ལ་ནམ་མཁའི་སྙིང་པོའི་གནས་སུ་སྐྲ་ཅན་དང་ཉེ་སྐྲ་ཅན་གཉིས་བེ་ཅོན་དང་ཞགས་པའི་ཕྱག་རྒྱར་གཞག་གོ། །གནོད་མཛེས་ཀྱི་གནས་སུ་ནི་རྡོ་རྗེ་ལྕགས་ཀྱུ་མདའི་ཕྱག་རྒྱར་གཞག་གོ། ། གཙུག་སྤྱོད་ཀྱང་མདའི་ཕྱག་རྒྱར་གཞག་གོ། །ཕྱི་རོལ་དུ་ནི་ཕྱག་བརྙན་བཞི་ཞགས་པའི་ཕྱག་རྒྱར་བྲིའོ། །དེ་ནས་སྔ་མ་བཞིན་དུ་ཆོ་ག་ཐམས་ཅད་བྱའོ། །བྱུག་སྤོས་དང་མེ་ཏོག་ལ་སོགས་པ་ཡང་དམར་པོ་དབུལ་ལོ། །མེའི་ཐབ་ཁུང་ཡང་སྔ་མའི་གནས་སུ་བྱ་སྟེ། སྲིད་དུ་སོར་ཉི་ཤུའི་ཚད་ལ་ཁ་རན་སོར་གཉིས་པ་ཁ་ཕར་བལྟས་པར་བྱའོ། །ཟབས་སུ་མཐོ་ཆུང་ངུ་གང་ལ་དབུས་སུ་རྡོ་རྗེ་སོར་བརྒྱད་པས་དམར་པོས་བསྐུས་པ་བྱའོ། །མེའི་ཐབ་ཁུང་དེ་ནི་གྲུ་གསུམ་ལ་ཟུར་གསུམ་དུ་བྱའོ། །དེ་ནས་བདག་ཉིད་ཕྱག་ན་རྡོ་རྗེར་བྱིན་གྱིས་བརླབས་

ལ་ཕྱི་རོལ་ཏུ་གཏོར་མ་སྦྱིན་ནོ། །དེ་ནས་བཙོ་བླག་མཁན་གྱི་ཁྱིམ་ནས་མེ་བླངས་ལ་སྔ་མ་བཞིན་བསང་གཏོར་བྱ།སེང་ལྡེང་གི་ཤིང་ངམ་ཨ་ཤོ་ཀའམ་ཤིང་ཀ་ར་བཱི་རས་མེ་སྤར་ལ། དེ་བཞིན་དུ་བདག་ཉིད་རྣམ་པར་སྣང་མཛད་དུ་བྱིན་གྱིས་བརླབས་ཏེ། མེའི་ཐབ་ཁུང་གི་ཞབས་སུ་མེའི་དཀྱིལ་འཁོར་བསམས་ལ་ཡི་གེར་གཞག་གོ། །ཡི་གེ་ར་དེ་ཡང་འབར་བའི་ཕྲེང་བ་ལ་འོད་འཕྲོ་བ་ལས་མེའི་གཟུགས་སུ་གྱུར་པར་བསམ་པ་ནི། ཉི་མ་འཆར་བ་འདྲ་བ་གདུལ་དཀའ་བ་མིག་གསུམ་པ་ཐོར་ཚུགས་ཁམ་པ་ལག་པ་བཞི་པ་ལག་ན་བེ་ཅོན་དང་ཞགས་པ་དང་བགྲང་ཕྲེང་དང་གུན་དྷེ་ཐོགས་པ། གོས་དམར་པོ་གྱོན་ཞིང་སྲད་བུ་དམར་པོ་སེ་རལ་ཁར་ཐོགས་པ་ཡི་གེ་རས་མཚན་པ། མེ་ལྕེ་འབར་བ་དམར་པོའི་འོད་འཕྲོ་བ་དེ་ལྟ་བུའི་མེ་བསམས་ཏེ་བསང་གཏོར་བྱས་ལ་མཆོད་ཡོན་ཕུལ་ཏེ་རང་གི་གསང་སྔགས་ཀྱིས་བྱུག་སྤོས་དང་མེ་ཏོག་ལ་སྩོགས་པ་བྱིན་ལ། དེ་ནས་ཤིང་ཀ་ར་བཱི་རའི་ཡམ་སྲེག་ཤིང་ཡུངས་མར་དང་ཙནྡན་དམར་པོ་ལ་སྨྱུགས་པའི་སྲེག་བླུགས་བདུན་སྦྱིན་ནོ། །དེ་ནས་དཀྱིལ་འཁོར་དུ་བཀོད་པའི་ལྷ་རྣམས་ལ་སྲེག་བླུགས་བདུན་ཕུལ་ཏེ། སྔ་མ་བཞིན་དུ་བདག་གི་ལྷའི་གཟུགས་བསམས་ལ་གཞག་སྟེ། དེ་བཞིན་དུ་སྲེག་བླུགས་ཕུལ་ལ་ཆོ་ག་ལས་བྱུང་བའི་རྫས་རྣམས་སྦྱིན་སྲེག་བྱའོ། །མཇུག་ཏུ་ཡང་བྱང་ཆུབ་ཀྱི་སེམས་བསྒོམ་པ་ལ་སོགས་པའི་ཆོ་ག་དེ་བཞིན་དུ་བྱའོ། །ཆོ་ག་འདི་ཡང་དཀྱིལ་འཁོར་གྱི་ཡོ་བྱད་ཐམས་ཅད་དམར་པོར་བྱའོ། །མེའི་གནས་ཀྱང་དུས་གསུམ་དུ་ཙནྡན་དམར་པོས་བྱུག་ཅིང་མེ་ཏོག་དམར་པོ་སིལ་མས་དགྲམ་མོ། །དཔལ་ལྡན་གོས་ནི་དམར་པོ་བགོས། །བྱུག་སྤོས་ཕྲེང་བ་དམར་པོས་བརྒྱན། །སྲད་བུ་དམར་པོ་སེ་རལ་ཐོགས། །བྱང་ཆུབ་སེམས་ཀྱི་བྱེ་བྲག་ཤེས། །ཟས་སུ་སྲན་ཆུང་ཅི་ཚེ་ཟ། །ཡང་ན་ཟས་སུ་ཤིང་ཏོག་ཟ། །དགའ་ཞིང་འཛུམ་མུལ་མི་སྨྲ་ཐུབ། །སེམས་དང་སེམས་ནི་རྗེས་སུ་སྦྱོར། །རྟག་ཏུ་བཟླས་དང་སྦྱིན་སྲེག་བྱེད། །ལྷ་ཡི་གཟུགས་ནི་སེམས་པ་ཡི། །མི་ཡིས་དབང་དུ་བྱ་བ་ཡི། །དངོས་གྲུབ་མ་ལུས་བརྩམ་པར་བྱ། །

གང་ཞིག་ཆོ་ག་འདི་ཡིས་སུ། །ཆོ་ག་ཤེས་པས་ལས་བརྩམས་ན། །གཟི་བརྗིད་ཅན་ནམ་དེ་ཡི་བུ། །ཟླ་བ་གཅིག་གིས་དབང་དུ་འགྱུར། །སྦྱིན་སྲེག་ཟླ་བ་གཉིས་བྱས་ན། །ཕྱག་བརྙན་ཕོ་མོས་གནོད་སྦྱིན་མ། །དེ་བཞིན་ས་འོག་བུ་མོ་དག །སྔགས་པས་མྱུར་དུ་ཁུགས་པར་འགྱུར། །འདི་ནི་རེ་ཞིག་མདོར་བསྡུས་ཏེ། །དབང་གི་སྦྱིན་སྲེག་བསྒྲགས་པ་ཡིན། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དབང་དུ་བྱ་བའི་སྦྱིན་སྲེག་གི་ཆོ་ག་རིམ་པར་ཕྱེ་བའོ།། །།ད་ནི་དྲག་ཤུལ་སྤྱོད་པ་ཡི། །ཆོ་ག་མ་ལུས་བཤད་པར་བྱ། །གནོད་སྦྱིན་ལྟོ་འཕྱེ་ཡི་དགས་གཏུམ། །ལྷ་མིན་དྲི་ཟ་མི་འམ་ཅི། །སེམས་ཅན་གནོད་དགའ་སྡང་བ་དང་། །དེ་བཞིན་བགེགས་དང་ལོག་འདྲེན་དང་། །འབྱུང་པོ་མ་མོ་སྲིན་པོ་དང་། །མཁའ་འགྲོ་དང་ནི་ལུས་སྲུལ་དང་། །མི་ཡང་རྒྱགས་དྲེགས་མཐུ་ལྡན་ཞིང་། །དྲག་པོའི་ལས་བྱེད་སྡང་བའང་རུང་། །དེ་དག་འདུལ་ཕྱིར་སྔགས་ཤེས་པས། །དྲག་ཤུལ་ལས་ནི་བརྩམ་པར་བྱ། །ཉེས་པ་ཆུང་ངུ་དག་ལ་ནི། །དྲག་པོའི་ཆོ་ག་མི་བརྩམ་མོ། །གྲོང་གི་ལྷོ་ཡི་ཕྱོགས་སུ་ནི། །སྡོམ་བརྩོན་ས་གཞི་ནག་པོ་ལ། །དུར་ཁྲོད་དབེན་པའང་དགོན་པ་འམ། །སྐྱེད་མོས་ཚལ་རྙིང་ཞི་གནས་སུ། །མར་གྱི་ངོ་ཡི་ཚེས་བརྒྱད་དམ། །ཡང་ན་ཚེས་ནི་བཅུ་བཞི་ལ། །གཟའ་ནི་སྤེན་པ་མིག་དམར་དང་། །རྒྱུ་སྐར་རླུང་ལས་བྱུང་བ་དང་། །མེ་བཞི་དང་ནི་ནག་པ་དང་། །ཐ་སྐར་དང་ནི་དེ་བཞིན་དབོ། །ནབ་སོ་དང་ནི་ས་རི་དང་། །རྒྱུ་སྐར་དེ་དག་དྲག་པོ་སྟེ། །དེ་དག་གང་ཡང་རུང་བ་ལ། །སྔགས་པ་གཤིན་རྗེ་བཞིན་ཁྲོས་པས། །དགྲ་ཡི་སྲོག་ནི་གཅོད་བྱེད་པའི། །དཀྱིལ་འཁོར་འཇིགས་པ་བྲི་བར་བྱ། །སྔགས་པ་བདག་ཉིད་རང་གི་རྒྱས། །རྡོ་རྗེ་སེམས་དཔར་བྱིན་བརླབས་ཏེ། །སྔགས་ལ་འཇིགས་པ་མེད་པ་ཡིས། །ས་གཞི་སྔ་མ་བཞིན་དུ་སྦྱང་། །དེ་ནས་མི་གཡོ་མཐུ་ཆེན་གྱིས། །ཡོངས་སུ་གཟུང་ལ་སོགས་བྱས་ནས། །རང་གི་ཡི་གེའི་ཕྱག་རྒྱ་ཡིས། །དེ་ནས་རྣམ་སྣང་མཛད་དུ་བྱ། །

བུ་མོ་གཞོན་ནུས་བཀལ་བ་ཡི། །སྲད་བུ་སྔོན་པོ་དེར་བླངས་ནས། །དཀྱིལ་འཁོར་ནན་ཏན་ཐིག་གདབ་པ། །གྲུ་གསུམ་ཕྱི་རོལ་ཟླུམ་པོར་བྱ། །ཁྲུ་བཞི་ཁྲུ་ལྔ་ཁྲུ་བརྒྱད་དམ། །དེ་བཞིན་བཅུ་གཉིས་ཁྲུ་བཅུ་དྲུག །ཅི་ལྟར་ལས་ཀྱི་རྗེས་མཐུན་པར། ། མཁས་པས་ཚད་ནི་བརྟག་པར་བྱ། །དེ་ནས་དུར་ཁྲོད་ཐལ་བའམ། །མཁས་པས་ཚོན་རྩི་ནག་པོ་ལ། །ཡི་གེ་ཧ་ནི་དེར་བཞག་པ། །མེ་ལྕེ་འབར་བའི་ཕྲེང་བ་འཕྲོ། །དུས་མཐའི་མེ་ལ་འཇིགས་པའི་གཟུགས། །དབྱར་གྱི་ཆར་སྤྲིན་འདྲ་བའི་མདོག །ཁ་ནི་མཆེ་བ་གཙིགས་པ་ལ། །ལག་ན་རྡོ་རྗེ་ཅོད་པན་ཅན། །བདུད་ཀྱི་སྡེ་ནི་ཐམས་ཅད་དང་། །སྡང་བ་ཐམས་ཅད་སྡིགས་བྱེད་པ། །ཚོན་ལ་མཁས་པས་ཚོན་དེ་དག །དེ་འདྲའི་ཡི་གེ་བཞག་ནས་ནི། །ཤེས་རབ་ཅན་གྱིས་དཀྱིལ་འཁོར་བྲི། །བ་དན་མང་པོ་མཚན་མས་མཚན། །རྟ་བབས་དང་ནི་སྒོ་ཁྱུད་བཅས། །སྒོ་ཡི་ཆ་ནི་ལེགས་པར་ཕྱེ། །ལྷ་ཡི་གཙོ་བོ་གཞག་པ་ནི། །སྔ་མ་བཞིན་དུ་བརྟག་པར་བྱ། །བྱང་ཕྱོགས་སྒོ་ནི་ཕྱེ་ནས་སུ། །ལྷག་མའི་སྒོ་རྣམས་གཅད་པར་བྱ། །དེ་ནས་འཕགས་པ་ནམ་མཁའི་སྙིང་པོའི་གནས་སུ་ཁྲོ་བོའི་རྒྱལ་པོ་གཤིན་རྗེའི་གཤེད་གསལ་ཤིང་གི་ཕྱག་རྒྱར་བྲིའོ། །མཛོད་སྤུའི་གནས་སུ་ཁྲོ་བོའི་རྒྱལ་པོ་འཕགས་པ་གཞན་གྱིས་མི་ཐུབ་པ་ཞེས་བྱ་བར་རྡོ་རྗེ་དང་དགྲ་སྟའི་ཕྱག་རྒྱར་བྲིའོ། །མཐུ་ཆེན་ཐོབ་དང་འཕགས་མ་ཁྲོ་གཉེར་ཅན་དང་འཕགས་མ་སྒྲོལ་མའི་གནས་རྣམས་སུ། དོན་ཡོད་པའི་ཞགས་པ་དང་རལ་པ་གཅིག་མ་དང་། རྟ་མགྲིན་རྣམས་ཞགས་པ་དང་དགྲ་སྟ་དང་རྡོ་རྗེ་བེ་ཅོན་གྱི་ཕྱག་རྒྱ་རྣམས་སུ་གོ་རིམས་བཞིན་དུ་གཞག་པར་བྱའོ། །གནོད་མཛེས་ཀྱི་གནས་སུ་ཁྲོ་ཟླ་གཙོ་བོའི་རྡོ་རྗེའི་ཕྱག་རྒྱར་གཞག་གོ། །འཕགས་པ་མི་གཡོ་བ་ཡང་བེ་ཅོན་གྱི་ཕྱག་རྒྱར་གཞག་གོ། ། སྒོ་དྲུང་དུ་ནི་གདུལ་དཀའ་དང་མངོན་དུ་ཕྱོགས་གཉིས་བེ་ཅོན་གྱི་ཕྱག་རྒྱར་གཞག་གོ། །གནས་གཙང་མ་པ་རྣམས་ཀྱི་གནས་སུ། གཤིན་རྗེའི་འཆི་བདག་དང་དུས་མཚན་མོ་དང་ལྷན་ཅིག་ཏུ་གཞག་གོ། །བདེན་བྲལ་ཡང་རལ་གྲིའི་ཕྱག་རྒྱར་གཞག་གོ། །འཁོར་སའི་ནང་

དུ་མེའི་ཐབ་ཁུང་སྒོ་ལ་ཕྱོགས་པར་བྱའོ། །དཀྱིལ་འཁོར་གྱི་ཕྱི་རོལ་ཁོ་ར་ཁོར་ཡུག་ཏུ་བ་དན་རྣམས་བྲིའོ། །མེའི་ཐབ་ཁུང་ནི་དབང་གི་ལས་ཀྱི་མེའི་ཐབ་ཁུང་བཞིན་དུ་བྱས་ཏེ། བྱེ་བྲག་ཏུ་ཕྱི་རོལ་གྱི་མུ་རན་ཟླུམ་པོར་བྱས་ལ་བ་དན་མང་པོས་མཚན་པར་བྱའོ། །དཀྱིལ་འཁོར་ཀྱི་ལྷ་རྣམས་སྔ་མ་བཞིན་དུ་སོ་སོའི་གཟུགས་བསམས་ཏེ་མཆོད་པའི་ཆོ་ག་བྱའོ། །དེ་ནས་ལྷ་རྣམས་ཅི་ལྟ་བ་བཞིན་མཆོད་ནས་བདག་ཕྱག་ན་རྡོ་རྗེར་བྱིན་གྱིས་བརླབས་ལ་ཕྱི་རོལ་དུ་ཕྱོགས་ཀྱི་གཏོར་མ་སྔ་མ་བཞིན་དུ་སྦྱིན་ནོ། །དེ་ལ་བྱུག་སྤོས་ལ་སོགས་པའི་ཁྱད་པར་ནི་ཙནྡན་དམར་པོ་དང་དུ་རུ་སྐ་སོལ་བ་དང་བསྲེས་པའི་བྱུག་སྤོས་ནག་པོ་དབུལ་ལོ། །མེ་ཏོག་ཨུཏྤལ་མཐིང་ག་དང་། ཨ་པ་རཱ་ཛི་ཏ་མཐིང་ག་འམ། གཞན་ཡང་མེ་ཏོག་སྔོན་པོ་རྣམས་དབུལ་ལོ། །བདུག་སྤོས་ནི་སྲ་རྩི་པོག་བུ་རམ་དང་སྦྱར་བ་དབུལ་ལོ། །མར་མེ་ནི་ཡུངས་མར་ཚ་བ་སྙིང་པོ་སྔོན་པོ་ཅན་མར་མེའི་སྣོད་ནག་པོའི་ནང་དུ་དབུལ་ལོ། །བཤོས་ནི་ཀྲི་སར་དང་གཞན་ཡང་ཚ་བ་དང་། ཁ་བ་ལ་སོགས་པ་བཟའ་བ་དང་ཚོད་མ་ཁ་དོག་ནག་པོ་རྣམས་དབུལ་ལོ། །སྲན་ཆན་དང་ཀྲི་ས་ར་དང་ཤ་དང་ཉ་བཙོས་པ་དང་རྗེན་པ་རྣམས་ཕྱོགས་ཀྱི་གཏོར་མར་སྦྱིན་ནོ། །གཏོར་མའི་ཆོ་ག་ཅི་ལྟ་བ་བཞིན་དུ་བྱས་ནས་གདོལ་པའི་ཁྱིམ་མམ་དུར་ཁྲོད་ནས་མེ་བླངས་ཏེ་ཁྲོ་བོའི་རྒྱལ་པོས་བསང་གཏོར་བྱས་ལ། དུར་ཁྲོད་ཀྱི་ཤིང་ངམ། ཤིང་བ་ལ་ཏ་ཀའམ། བ་རུ་རའི་ཤིང་གིས་མེ་སྤར་ལ། བདག་ཉིད་རྣམ་པར་སྣང་མཛད་ཆེན་པོར་བྱིན་གྱིས་བརླབས་ཏེ་མེའི་ཐབ་ཁུང་གི་ཞབས་སུ་རླུང་གི་དཀྱིལ་འཁོར་བསམས་ལ་དེར་ཡི་གེ་ཧཱུྃ་གཞག་གོ །ཡི་གེ་ཧཱུྃ་དེ་ལས་མེའི་གཟུགས་སུ་གྱུར་པར་བསམས་པ་ནི་ཁ་དོག་ནག་པོ་ཤིན་ཏུ་མི་བཟད་པ། མིག་གསུམ་པ། གདོང་བཞི་པ་མི་གཡོ་བ་དུད་ཁའོ། །བལྟ་དཀའ་བ། ཁམ་པ་པོ། ཐོར་ཚུགས་དུད་ཁ་ཅན། ཆར་སྤྲིན་སྔོན་པོ་ལྟ་བུའི་འོད་ཟེར་ཅན། གསུས་པོ་ཆེ་གོས་སྔོན་པོ་གྱོན་ལ་སྲད་བུ་སྔོན་པོ་སེ་རལ་ཁར་ཐོགས་པ། ཁ་ནས་མཆེ་བ་བཞི་གཙིགས་པ་ཁྲོ་བ་དང་བཅས་ཤིང་

ཁ་གདངས་པ། ལག་ན་རལ་གྲི་དང་ཞགས་པ་དང་བེ་ཅོན་དང་རིལ་བ་སྤྱི་བླུགས་ཐོགས་པ་སྙིང་ག་སུམ་མདོའི་རིས་མཚན་ཅན། ཡི་གེ་རས་མཚན་པ། གདོང་ཁྲོ་གཉེར་བསྙེར་བ། ཧཱུྃ་ཞེས་བྱ་བ་དང་བཅས་པ་འབར་བ་གནག་ཅིང་རྩུབ་པ་ཟངས་ལྟ་བུའི་འོད་ཟེར་འཕྲོ་བའི་ཕྲེང་བ་ཅན། འཇིག་པའི་དུས་མངོན་དུ་བྱུང་བ་བཞིན་དུ་འདུག་པ་དེ་ལྟ་བུའི་མེ་བསམས་ནས་བསང་གཏོར་བྱས་ཏེ། བྱུག་སྤོས་ལ་སོགས་པ་རང་གི་རིག་སྔགས་ཀྱིས་སྦྱིན་ནོ། །ༀ་ཨགྣ་ཡེ་ཛཱ་ཧི་ཏྲད་ཊ་ཧཱུྃ་ཕཊ། དེ་ནས་ཡུངས་མར་ཚ་བ་དང་སྦྱར་བའི་ཀྲི་ས་རའི་སྲེག་བླུགས་གསུམ་སྦྱིན་ལ། དུག་དང་ཁྲག་དང་སྐེ་ཚེའི་སྲེག་བླུགས་བདུན་སྦྱིན་ནོ། །ཡང་ན་ཤིང་བྷ་ལ་ཏ་དང་། བ་རུ་རའི་ཤིང་གི་ཡམ་སྲེག་ཤིང་རྩེ་མོ་རྣོན་པོར་གཞོགས་པ་ཡུངས་མར་ཚ་བ་དང་སྐེ་ཚེར་སྨྱུགས་པ་སྦྱིན་ནོ། །དེ་ནས་དཀྱིལ་འཁོར་གྱི་བདག་པོ་ལ་སོགས་པའི་ལྷ་རྣམས་སྔ་མ་བཞིན་དུ་བསམས་ཏེ་རྫས་དེ་དག་ཉིད་ལས་རང་གི་རིག་པས་སྲེག་བླུགས་དབུལ་ལོ། །དེ་ནས་རང་གི་ལྷ་སྔ་མ་བཞིན་དུ་བསམས་ཏེ་བཞག་ལ། རང་གི་རིག་པ་ལས་བྱུང་བའི་རྫས་ཅི་ལྟ་བ་བཞིན་དུ། མཛུབ་མོ་དང་མཐེ་བོས་གཟུང་སྟེ་ཁྲོ་བ་དང་བཅས་པར་གསང་སྔགས་ཟློས་ཤིང་། ཕཊ་དང་བཅས་པར་ཅི་སྲིད་འདོད་པ་དེ་སྲིད་དུ་སྲེག་བླུགས་དབུལ་ལོ། །དེ་ནས་སྔ་མ་བཞིན་དུ་བྱང་ཆུབ་ཀྱི་སེམས་བསྒོམ་པ་ལ་སོགས་པས་ངལ་བསོ་བར་བྱའོ། །སྔགས་པ་གང་ཞིག་འདི་ལྟ་བུའི། །རབ་ཏུ་དྲག་པོའི་ལས་བྱེད་པ། །དེ་ནི་སུམ་ཅུ་རྩ་གསུམ་གྱི། །གནས་ཀྱང་རྩ་མཆོག་བཞིན་དུ་སྲེག །འདིར་ཡང་ཆོ་ག་འདི་ལྟར་བྱའོ། །དཔལ་ལྡན་གོས་ནི་སྔོན་པོ་བགོས། །བྱུག་སྤོས་ཕྲེང་བ་སྔོན་པོས་བརྒྱན། །སྲད་བུ་སྔོན་པོ་སེ་རལ་ཐོགས། །བྱང་ཆུབ་སེམས་ལ་རྟག་ཏུ་གཞོལ། །ཚ་དང་ཁ་དང་བསྐ་བ་དང་། །ཀྲི་ས་ར་ཡི་ཁ་ཟས་བཟའ། །ལྷ་རྣམས་དགོད་པའི་དོན་ལ་མཁས། །གཙང་ཞིང་མཆོག་ཏུ་ཚུལ་ཁྲིམས་ལྡན། །སྤྲོ་བ་ཆེ་ཞིང་དཔའ་སྙིང་ཅན། །ཁྲོས་པ་འཇིག་རྟེན་མཐར་བྱེད་བཞིན། །ལྷོ་ཕྱོགས་ཁ་བལྟས་མི་སྨྲ་ཞིང་། །འདུག་པའི་ཐབས་ནི་

ཙོག་བུར་འདུག །སྦྱིན་སྲེག་བཟླས་ལ་རྟག་ཏུ་འབད། །བསྲུང་དང་བསྐྱབ་པ་དག་ལ་མཁས། །མཚན་མོ་སྦྱིན་སྲེག་བྱེད་པ་ཡིས། །དྲག་ཤུལ་སྤྱད་པ་བརྩམ་པར་བྱ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དྲག་ཤུལ་སྤྱད་པའི་སྦྱིན་སྲེག་གི་ཆོ་ག་རིམ་པར་ཕྱེ་བའོ།། །།དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས། །བྱང་ཆུབ་སེམས་དཔའི་སྤྱད་པ་སྤྱོད་པ་པ་རྣམས་ལ། སྟོང་པ་ཉིད་གཉིས་སུ་མེད་པའི་སྤྱོད་ཡུལ།རྟེན་ཅིང་འབྲེལ་པར་འབྱུང་བའི་སྙིང་པོ་རྣམ་པར་མི་རྟོག་པའི་ཡེ་ཤེས་འཐོབ་པའི་རྒྱུ། སྤྲོས་པ་ཐམས་ཅད་དང་བྲལ་བ་གསལ་ཞིང་དག་པ། ཡིད་ཀྱིས་བསྒྲུབས་པ། ཡོངས་སུ་རྫོགས་པ། ཡོངས་སུ་རྫོགས་པར་བྱེད་པ། ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་ཆོས་བཤད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་སྤྱན་རས་གཟིགས་དབང་ཕྱུག །དེའི་ཚེ་ཐམས་ཅད་མཁྱེན་པའི་ཡེ་ཤེས་ཀྱི་ཏིང་ངེ་འཛིན་ལ་སྙོམས་པར་ཞུགས་ནས་གསང་བ་པའི་བདག་པོ་ཕྱག་ན་རྡོ་རྗེ་ལ་སྨྲས་པ། གསང་བ་པའི་བདག་པོ། །ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ། སྟོང་པ་ཉིད་ཀྱི་རྗེས་སུ་ཞུགས་པ། གསང་སྔགས་ཐམས་ཅད་ཀྱི་དངོས་གྲུབ་སྩོལ་བ། གནས་མེད་པ། མཚན་ཉིད་མེད་པ། ངོ་བོ་ཉིད་མེད་པ། མཚན་གཞི་དང་མཚན་ཉིད་དང་བྲལ་བ། ཐེག་པ་ཆེན་པོ་ཐོབ་པར་བྱེད་པ། བདུད་རྩི་སྦྱིན་པ་དེ་སྔགས་ཀྱི་ཚུལ་ལ་རྣམ་པར་གནས་པའི་རྗེས་སུ་ཞུགས་པ་རྣམས་ཀྱིས་ཅི་ལྟར་འཐོབ་པར་འགྱུར། དེ་སྐད་ཅེས་སྨྲས་པ་དང་། གསང་བ་པའི་བདག་པོ། །ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་གསང་བ་སྟོན་པས་བཅོམ་ལྡན་འདས་རྣམ་པར་སྣང་མཛད་ཀྱི་ཞལ་དུ་བལྟས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་ལྟ་བ། སྙིང་རྗེ་ཆེན་པོ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དེ་བདག་ལ་འདྲི་ཞིང་མཆིས་ན། བཅོམ་ལྡན་འདས་འགྲོ་བ་ལ་ཕན་པར་བྱེད་པ།

ཐེག་པ་ཆེན་པོ་ཐོབ་པར་བྱེད་པ། མཚན་ཉིད་མེད་ཅིང་གཉིས་སུ་མེད་པའི་སྤྱོད་ཡུལ། གསང་སྔགས་ཐམས་ཅད་ཀྱི་ཚུལ་གྱི་དངོས་གྲུབ་སྩོལ་བ། རྟེན་ཅིང་འབྲེལ་པར་འབྱུང་བའི་སྙིང་པོའི་ངོ་བོ་ཉིད། ཆོས་ཀྱི་དབྱིངས་ཀྱི་རྗེས་སུ་ཞུགས་པ། །ཕྱོགས་བཅུའི་འཇིག་རྟེན་གྱི་ཁམས་འབྱུང་བར་བྱེད་པ། སྟོང་པ་ཉིད་ཀྱི་ངོ་བོ་ཉིད་ཀྱི་སྤྱོད་ཡུལ་གྱི་ཆོས་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། ཐེག་པ་གསུམ་ཡོངས་སུ་རྫོགས་པར་མཛད་པ། ཐམས་ཅད་མཁྱེན་པའི་ཡེ་ཤེས་ཐོབ་པར་མཛད་པ། རྣམ་པར་རྟོག་པ་ཐམས་ཅད་ཀྱི་རྒྱ་མཚོ་ལས་སྒྲོལ་བ། སེམས་ཅན་ཐམས་ཅད་ལ་དགོངས་པ། གསང་སྔགས་ཐམས་ཅད་ཀྱི་དངོས་གྲུབ་སྩོལ་བ། བགེགས་ཐམས་ཅད་སྐྲག་པར་མཛད་པ། འབྱུང་པོ་ཐམས་ཅད་འགུགས་པ། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་བསམ་གྱིས་མི་ཁྱབ་པ། གཟུགས་མེད་པ། སྒྲ་མེད་པ། དྲི་མེད་པ། རོ་མེད་པ། རེག་མེད་པ། གནས་མེད་པ། ཡིད་མེད་པ། རྣམ་པར་ཤེས་པ་མེད་པ། ཡི་གེ་མེད་པ། སྤྱོད་ཡུལ་མེད་པ། བརྗོད་དུ་མེད་པ། སྤྲོས་པ་མེད་པ། མ་འདྲེས་པས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཆོས་གང་རྒྱུས་བྱུང་དེའི་རྒྱུ་དང་། །དེ་རྣམས་ཀྱི་ནི་འགོག་པ་ཡང་། །གང་ཡིན་དེ་བཞིན་གཤེགས་པས་གསུངས། ། དེ་སྐད་གསུངས་ནས་དགེ་སྦྱོང་ཆེ། །གཞན་དབང་ཡོད་པ་མ་ཡིན་ཕྱིར། །གྲུབ་པ་ཡང་ནི་གཞན་དུ་གྱུར། །གཉིས་པོ་ཡོད་པ་མ་ཡིན་ཏེ། །རྣམ་ཤེས་བརྒྱད་པོ་དེ་གཉིས་མཚན། །དེ་ནས་འཁོར་མང་པོ་འདུས་པ་དེ་རྣམས། སོ་སོའི་ཡེ་ཤེས་མངོན་པར་འདུས་བྱས་པའི་རྫུ་འཕྲུལ་གྱི་མཐུས། བསམ་པ་ཐ་དད་པ་དང་། བློ་གྲོས་ཐ་དད་པས་ཚིགས་སུ་བཅད་པ་གཉིས་གསུངས་པའི་དོན་ཅི་ལྟར་རྗེས་སུ་མཐུན་པར་ཁོང་དུ་ཆུད་ནས་བྱང་ཆུབ་སེམས་དཔའ་དེ་རྣམས་ཀྱིས་བཅོམ་ལྡན་འདས་ལ་ལེགས་སོ་ལེགས་སོ་ཞེས་གསོལ་ནས་

ལེགས་པར་ཕུལ་ལོ། །གསང་སྔགས་ཚུལ་ལ་ལེགས་གནས་གང་། །རྫོགས་སངས་རྒྱས་ཀྱིས་བསྔགས་པ་ཡི། །ཡང་དག་ཉིད་འདི་སྒོམ་འགྱུར་བ། །དེ་དག་སངས་རྒྱས་ཉིད་དུ་འགྱུར། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་བཅོམ་ལྡན་འདས་རྣམ་པར་སྣང་མཛད་ཀྱི་བྱིན་གྱིས་བརླབས་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཟློས་པ་རྣམ་རྟོག་ལས་འདས་པའི། །མ་འདྲེས་སེམས་ནི་ཉིད་ཀྱིས་སུ། །དངོས་གྲུབ་ཀྱང་ནི་འཐོབ་འགྱུར་ན། །འདུས་བྱས་ཆོས་ལྟ་སྨོས་ཅི་འཚལ། །གང་གིས་རྟ་དང་འདྲ་བའི་སེམས། །མཉམ་པར་གཞག་པས་བཏུལ་ནས་སུ། །བྱམས་དང་སྙིང་རྗེ་བརྟན་བྱས་ན། །དངོས་གྲུབ་བརྟན་པ་མོད་ལ་འཐོབ། །ཆོས་རྣམས་རྟག་ཏུ་མ་སྐྱེས་པ། །དེ་ཡི་ས་བོན་ཨ་ཡི་མཆོག །རྒྱལ་བ་དམ་པ་རྣམས་ཀྱིས་གསུངས། །ཨ་ནི་སྟོང་པ་ཉིད་ཅེས་བགྱི། ། ཡི་གེའི་ཕྱི་མོ་ཕྱི་མོ་ཀུན། །དེ་བཞིན་འདྲེན་ལྡན་གང་གི་ཕྱིར། །མི་འགྱུར་མི་འགྱུར་དང་ལྡན་པ། །དེ་ཕྱིར་བསམ་པར་བགྱི་བ་ལགས། །ཨ་དང་ཨུ་ཞེས་པ་དང་ནི། །རྀ་དང་ལྀ་དང་ཨཾ་མཆོག་སྣང་། །ཨ་མཆོག་སྣང་བའི་དམ་པ་སྟེ། །འདི་ལས་ཐར་པ་ཐོབ་ཅེས་བཤད། །ཀ་ཡི་རིས་དང་ཙ་ཡི་རིས། །དེ་བཞིན་ཊ་ཡི་རིས་མཆོག་དང་། །ཏ་ཡི་རིས་དང་པ་ཡི་རིས། །མཐུན་པའི་སྒྲར་བཅས་ལྔ་དང་ནི། །ཡ་ར་ལ་བ་ཤ་ལ་སོགས། །ཐམས་ཅད་རྒྱལ་མཆོག་ཡོངས་སུ་རྫོགས། །འདི་དག་རྒྱ་ཆེན་དོན་གྱི་མཆོག །རྣམ་པ་མང་པོའི་དོན་རྣམས་བགྱིད། ། ཨ་ཞེས་བགྱི་བས་བྱང་ཆུབ་འཐོབ། །དེ་བཞིན་ཨི་ནི་འགུགས་པ་སྟེ། །ཨུ་ཞེས་བགྱི་བས་གསོད་པ་འགྲུབ། །རྀ་ནི་དབང་གི་ལས་ལ་སྟེ། །ཨོ་ནི་སྲིན་པོ་འཇོམས་པ་ལགས། །ཨཻ་ཞེས་བགྱི་བ་འཆིང་བར་བཞེད། །ཨཽ་ནི་ཀླུ་ཡི་སྙིང་པོ་སྟེ། །ཀུན་ཀྱང་མཆོག་དང་དམ་པ་ལགས། །ཡི་གེ་འདྲེན་པ་ཐམས་ཅད་དང་། །ར་དང་ཚེག་དྲག་ལྡན་པ་ནི། །ཆོས་ཀྱི་དབྱིངས་དང་རྟག་ལྡན་པར། །བསམ་གཏན་བཟླས་བྱས་དངོས་གྲུབ་འཐོབ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་

རས་གཟིགས་དབང་ཕྱུག་ལ། ས་བཅུ་རྟོགས་པར་ཁོང་དུ་ཆུད། །སེམས་དཔའ་ཆེན་པོ་ལེགས་སོ་ལེགས། །བདེར་གཤེགས་ཡང་དག་མི་ཟད་པའི། །དེ་ཉིད་ཐམས་ཅད་ཁྱོད་ཀྱིས་བཤད། །ལག་ན་རྡོ་རྗེས་སྨྲས་པ་ཡི། །རབ་ཏུ་གསང་བ་ཁྱོད་ཀྱིས་རྟོགས། །ཞེས་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །དཔའ་བོ་ཆོས་དབྱིངས་རང་བཞིན་གྱི། །འཁོར་ལོ་བསྐོར་བ་རྒྱལ་བའི་མཆོག །བྱང་ཆུབ་སེམས་ཀྱིས་ལེགས་བསྡམས་ཏེ། ། འཇིག་རྟེན་དཔའ་བོའི་ཕྱག་རྒྱ་དང་། །མི་སྐྱེ་བ་ཡི་ཡི་གེ་ཡིས། །དེ་བཞིན་བདག་ཉིད་བསམས་ནས་སུ། །སྟོང་པ་གཉིས་སུ་མེད་སྦྱོར་བས། །ལས་རྣམས་ཐམས་ཅད་བསྒྲུབ་པར་བྱ། །ཆོས་དབྱིངས་རྣམ་པར་དག་པའི་བདག །ས་བོན་ཡི་གེ་དང་ལྡན་པར། །བསམས་ནས་མཉམ་གཞག་དད་པ་ཡིས། །བཟླས་ན་དངོས་གྲུབ་ཐོབ་པར་འགྱུར། །ཁྲུས་དང་བཤགས་ལ་སོགས་པ་དང་། །རབ་ཏུ་དབེན་པར་ལྷུར་ལེན་དང་། །ཕྱག་རྒྱ་ཡི་གེ་ཕྲེང་སེམས་པའི། །ཟློས་པས་དངོས་གྲུབ་བརྟན་པ་འཐོབ། །ཆོས་ཀྱི་དབྱིངས་དང་ལྡན་གྱུར་པ། ། སྔགས་འདི་རྣམས་ཀྱིས་བསྒྲུབས་ན་ནི། །འགྲོ་དང་མི་འགྲོའི་ཁམས་གསུམ་ན། །གྲུབ་པར་མི་འགྱུར་དངོས་དེ་མེད། །གསང་བ་པའི་བདག་པོ་དེ་ལྟ་བས་ན་བཟླས་བརྗོད་བྱེད་པས་རང་གི་དཀྱིལ་འཁོར་དུ་དབང་བསྐུར་བའི་ཆོ་ག་དེ་ལ་འཁོར་ལོ་བསྐོར་བར་གཞག་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས་བསྒོམ་པའི་ཡི་གེ་དགོད་པ་དང་། དབང་བསྐུར་བ་རྣམ་པར་ཕྱེ་བའོ།། །།དེ་ནས་བཅོམ་ལྡན་འདས་ལ། ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་དབྱིངས་བསམ་གྱིས་མི་ཁྱབ་པ། སེམས་ཀྱིས་ལས་ཡང་དག་པར་འདས་པ་ཉིད་ཀྱིས་མངོན་པར་རྫོགས་པར་སངས་རྒྱས་པ། བྱང་ཆུབ་སེམས་དཔའ་རྣམས་ལ་ཐབས་སྣ་ཚོགས་ཀྱིས་བསམ་པ་དང་མོས་པ་ཅི་ལྟ་བ་བཞིན་དུ་བཤད་དུ་གསོལ། བདེ་

བར་གཤེགས་པ་བཤད་དུ་གསོལ། དེ་ལ་རེ་ཞིག་ཐོག་མར་ཆོ་ག་འདིས་སྡིག་པ་སོ་སོར་བཤགས་པར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་ནམ་སྙིང་པོ་བྱང་ཆུབ་ལ་མཆིས་ཀྱི་བར་དུ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ། བདག་གིས་སྡིག་པ་མི་དགེ་བའི་ལས་གང་བགྱིས་པ་དང་། བགྱིད་དུ་སྩལ་བ་དང་། རྗེས་སུ་ཡི་རང་བ་དེ་དག་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་སོ་སོར་བཤགས་སོ། །དེ་ལྟར་ལན་གཉིས་དེ་ལྟར་ལན་གསུམ་དུ་བྱའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་གསུམ་ལ་སྐྱབས་སུ་འགྲོ་བ་གཟུང་བར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སངས་རྒྱས་བཅོམ་ལྡན་འདས་ལ་སྐྱབས་སུ་མཆིའོ། །དེ་བཞིན་གཤེགས་པའི་ཆོས་ཀྱི་སྐུ་ཞི་བ། བླ་ན་མེད་པ་སོ་སོ་རང་གིས་རིག་པ་ལ་སྐྱབས་སུ་མཆིའོ། །ཕྱོགས་བཞིའི་བྱང་ཆུབ་སེམས་དཔའ་ཆེན་པོ་འཕགས་པ་ཕྱིར་མི་ལྡོག་པའི་དགེ་འདུན་ལ་སྐྱབས་སུ་མཆིའོ། །དེ་ལྟར་ལན་གཉིས་དེ་ལྟར་ལན་གསུམ་དུ་བྱའོ། །དེ་ནས་བདག་དབུལ་བ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་དུས་ཐམས་ཅད་དུ་ཡོང་ཡེ་དབུལ་གྱིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་ཐུགས་བརྩེ་བའི་སླད་དུ་བདག་བཞེས་སུ་གསོལ། དེ་ལྟར་ལན་གཉིས་དེ་ལྟར་ལན་གསུམ་དུ་བྱའོ། །དེ་ནས་དམ་ཚིག་གི་ཕྱག་རྒྱ་བཅིངས་ལ་གསང་སྔགས་བརྗོད་པར་བྱའོ། །ན་མཿས་མནྟ་བུདྡྷཱ་ནཱན། ཨ་ས་མེ་ཏྲི་ས་མེ་ས་མ་ཡེ་སྭཱ་ཧཱ། དེ་ནས་ཆོས་ཀྱི་དབྱིངས་སུ་བྱིན་གྱིས་བརླབ་བོ། །ན་མཿས་མནྟ་བུདྡྷཱ་ནཱན།

དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅་ཧྃ། དེ་ནས་བདག་ཉིད་རྡོ་རྗེ་སེམས་དཔར་བྱིན་གྱིས་བརླབ་བོ། །ན་མཿས་མནྟ་བུདྡྷཱ་ནཱན། བཛྲ་ཨཱཏྨ་ཀོ྅་ཧྃ། དེ་ནས་བྱང་ཆུབ་ཏུ་སེམས་བསྐྱེད་པར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ།བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ། ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ།དངོས་པོ་ཐམས་ཅད་དང་བྲལ་བ། ཕུང་པོ་དང་ཁམས་དང་སྐྱེ་མཆེད་དང་གཟུང་བ་དང་འཛིན་པ་རྣམ་པར་སྤངས་པ། ཆོས་བདག་མེད་པ་མཉམ་པ་ཉིད་ཀྱི་ཕྱིར་རང་གི་སེམས་གདོད་མ་ནས་མ་སྐྱེས་པ།སྟོང་པ་ཉིད་ཀྱི་ངོ་བོ་ཉིད་དུ་ཅི་ལྟར་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བདག་གིས་ཀྱང་བསྐྱེད་དོ། །དེ་ལྟར་ལན་གཉིས་ལན་གསུམ་དུ་བྱའོ། ། དེ་ནས་གང་བའི་ཕྱག་རྒྱ་སྤྱི་བོར་བཅིངས་ལ་དེ་བཞིན་གཤེགས་པའི་འཁོར་ཐམས་ཅད་དུ་སྤོས་དང་མེ་ཏོག་ལ་སོགས་པའི་སྤྲིན་བསམས་ཏེ། རིག་སྔགས་ཀྱི་རྒྱལ་མོ་འདི་ལན་གསུམ་དུ་བརྗོད་པར་བྱའོ། །ན་མཿས་མནྟ་བུདྡྷཱ་ནཱྃ། ཨ་བྷིསྨ་ཡེ་སྥ་ར་ཎ་ཧི་མཱྃ། ག་གན་ཁཾ་དྷརྨྨ་དྷཱ་ཏྭཱ་ཀཱ་ཤ་ས་མ་ཏཱ་ཡ་སརྦྦ་ཏ་ཐཱ་ག་ཏ་པ་རི་ཥ་དཱ་མཎྜ་ལེ། མ་མ་པྲ་ཎི་དྷི་པུཎྱ་ཛྙཱ་ན་བ་ལེ་ན་སརྦྦ་ཏ་ཐཱ་ག་ཏ་བ་ལེ་ན། དྷརྨ་དྷཱ་ཏྭ་དྷིཥྛ་ན་བ་ལེ་ན་ཙ་སྭཱ་ཧཱ། གང་བའི་ཕྱག་རྒྱ་ནི་སྤྱི་བོར་པདྨ་ཁ་བྱེ་བ་འདྲ་བར་བྱ་བ་གང་ཡིན་པ་སྟེ། དེ་ནི་གང་བའི་ཕྱག་རྒྱའི་མཚན་ཉིད་དོ། ། བཟླས་བརྗོད་ཀྱི་ཆོ་ག་རིམ་པར་ཕྱེ་བའོ།། །།དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས། ཆོས་ཀྱི་དབྱིངས་བསམ་གྱིས་མི་ཁྱབ་པ་རྣམ་པར་རོལ་པ་བསྟན་ནས། ཡང་ཡུལ་བསམ་གྱིས་མི་ཁྱབ་པ་བསྟན་པར་བཞེད་པས། དབུའི་གཙུག་ཏོར་ནས་ཆོས་ཀྱི་མཛོད་ཅེས་བྱ་བ་སེམས་ཅན་གྱི་ཁམས་མཐའ་ཡས་པའི་སེམས་ཀྱི་ཐིབས་པོ་སྣང་བར་བྱེད་པའི་འོད་ཟེར་གྱི་དྲ་བ་བྱུང་ངོ་། །དེ་ནས་འོད་ཟེར་ཆེན་པོའི་དྲ་བ་བཀོད་པ་དེ། དེ་བཞིན་གཤེགས་པའི་བྱིན་གྱིས་བརླབས་པ་རྒྱ་ཆེན་པོ་རྣམ་པར་རོལ་པས་ཆོས་ཀྱི་དབྱིངས་

ཀྱི་ཕོ་བྲང་ནམ་མཁའི་ཁམས་ལྟར་རྒྱ་ཆེ་བ་ན་བཞུགས་པའི་དེ་བཞིན་གཤེགས་པ་རྣམས་ལ་བསྐོར་བ་བྱས་ནས། སེམས་ཅན་ཐམས་ཅད་ཀྱི་འཁོར་ཀྱི་དཀྱིལ་འཁོར་ཐམས་ཅད་དུ་སྣང་བར་བྱས་ཏེ་སེམས་ཅན་གྱི་ཁམས་མ་ལུས་པ་ཡོངས་སུ་བསྐྱབ་པ་ལ་སྦྱར་ནས་སེམས་ཅན་དམྱལ་བ་དང་དུད་འགྲོ་དང་ཡི་དགས་ཀྱི་འགྲོ་བར་སྐྱེས་པ་རྣམས་ཀྱང་ཚིམ་པར་བྱས་ཏེ། ལྷ་དང་མིའི་འཇིག་རྟེན་རྣམས་ཀྱང་དེ་བཞིན་གཤེགས་པའི་སྙིང་པོ་སྟུག་པོ་བཀོད་པའི་ཁོངས་སུ་གཏོགས་པར་བྱིན་གྱིས་བརླབས་ནས་ཆོས་ཀྱི་དབྱིངས་བསམ་གྱིས་མི་ཁྱབ་པ་ཡང་དེ་བཞིན་གཤེགས་པའི་བསོད་ནམས་ཀྱི་སྟོབས་བྱིན་གྱིས་བརླབས་རྒྱུ་མཐུན་པ་བསམ་གྱིས་མི་ཁྱབ་པས་བྱིན་དུ་བརླབས་ཏེ་ཆོས་ཀྱི་དབྱིངས་ཀྱི་དགོས་པ་མ་རྫོགས་པས་སྙིང་རྗེ་ཆེན་པོའི་སྙིང་པོ་འབྱུང་བའི་མཛོད་ཅེས་བྱ་བ། སེམས་ཅན་གྱི་ཁམས་མ་ངེས་པ་ཡོངས་སུ་སྐྱོབ་པའི་སྙིང་པོ་དཀྱིལ་འཁོར་གྱི་རྒྱལ་པོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་དང་མཉམ་པ་སྙེད་ལ་བཀའ་སྩལ་པ། རིགས་ཀྱི་བུ་དག་སེམས་ཅན་གྱི་ཁམས་མ་ངེས་པ་ཡོངས་སུ་སྐྱོབ་པའི་སྙིང་པོའི་རྒྱལ་པོ་དེ་བཞིན་གཤེགས་པ་ཐམས་ཅད་འབྱུང་བ་ཞེས་བྱ་བ་དཀྱིལ་འཁོར་གང་ལ་རྟེན་ན་བྱང་ཆུབ་སེམས་དཔའ་རྣམས་ཚེགས་ཆུང་ངུས་དེ་བཞིན་གཤེགས་པའི་ས་ཐོབ་པར་འགྱུར་ཞིང་ཆོས་ཀྱི་དབྱིངས་བསམ་གྱིས་མི་ཁྱབ་པ་ཡང་མངོན་སུམ་དུ་བྱེད་པར་འགྱུར་བ་ཡང་ཡོད་དོ། ། དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་དང་མཉམ་པ་དེ་དག་གིས་མགྲིན་གཅིག་ཏུ་སྨྲས་པ། བཅོམ་ལྡན་འདས་དེའི་དུས་ལ་བབ་ཅིང་བདེ་བར་གཤེགས་པ་དེའི་ཚོད་ལ་བབ་སྟེ་བཅོམ་ལྡན་འདས་ལེགས་ལགས་ཀྱིས། བཅོམ་ལྡན་འདས་ཀྱིས་བདག་ཅག་ལ་ཐུགས་བརྩེ་བའི་སླད་དུ། དཀྱིལ་འཁོར་ཆེན་པོ་བཀོད་པ་བྱིན་གྱིས་རློབ་པ་གང་ལགས་པ་དེ་དག་བཤད་དུ་གསོལ། ཆོས་རྗེ་ཆོས་ཀྱི་དབང་ཕྱུག་སྟེ། །ཆོས་ཀྱི་དབང་ཕྱུག་མཐར་བྱེད་བྲལ། །ཡེ་ཤེས་ཆེ་མངའ་

སྟོན་པ་སྟེ། །ས་ཡི་དབང་ཕྱུག་གཅིག་པུ་ལགས། །དོན་གྲུབ་ཚོགས་ཀྱང་གྲུབ་པ་སྟེ། །ཁུར་ལས་རྒལ་ཞིང་སྲིད་མཐར་ཕྱིན། །སྨན་པའི་རྒྱལ་ཆེན་དེ་ཉིད་མཁྱེན། །འགག་པ་མི་མངའ་ཆད་མི་མངའ། །མཐའ་གཉིས་རྣམ་པར་སྤངས་པ་ལགས། ། དེ་བཞིན་ཉིད་དང་ཡང་དག་མཐའ། །སྤྲོས་མེད་རྟོགས་པར་ཐུགས་སུ་ཆུད། །སྐྱབས་དང་གནས་དང་གླིང་དང་ནི། །མྱ་ངན་འདས་དང་ཞི་བའང་ལགས། །ཐར་པ་རིམས་ནད་མི་མངའ་དག །རྡུལ་སྐྱོན་དང་ནི་བྲལ་བ་ལགས། །བརྗོད་དང་ཀུན་བརྗོད་བྲལ་བ་དེ། །དངོས་པོ་ཐམས་ཅད་རྣམ་པར་འཇིག །དེ་ལྟར་རྡོ་རྗེ་འཛིན་དེ་ཀུན། །རྟག་ཏུ་ཡིད་རབ་དགའ་བ་ཡིས། །མཚན་ནི་ཡང་དག་བསྒྲགས་བྱས་ནས། །རྣམ་པར་འདྲེན་ལ་གསོལ་བ་འདེབས། །ཀུན་མཁྱེན་དཔའ་ཆེན་སྙུན་བྲལ་གྱིས། །དེ་དག་གིས་གསོལ་ཐུགས་ཆུད་ནས། ། སྙིང་རྗེ་ཆེན་པོའི་སྙིང་པོ་ནི། །འབྱུང་བའི་དཀྱིལ་འཁོར་བཤད་ཅེས་གསུངས། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀྱིལ་འཁོར་འདིའི་མིང་ཅི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དཀྱིལ་འཁོར་འདིའི་མིང་ནི་སངས་རྒྱས་མེད་པའི་འཇིག་རྟེན་གྱི་ཁམས་རྣམས་སུ་སངས་རྒྱས་འབྱུང་བ་ཀུན་དུ་སྟོན་པའོ། ། དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ནམ་མཁའ་ལྟ་བུའོ་ཞེས་གསུངས་པ་མ་ལགས་སམ། ནམ་མཁའ་ལ་ནི་སྐྱེ་བ་ཡང་མ་མཆིས་འགག་པ་ཡང་མ་མཆིས་སོ། །བཅོམ་ལྡན་འདས་དེ་བཞིན་དུ་དེ་བཞིན་གཤེགས་པ་རྣམས་ལ་ཡང་སྐྱེ་བ་ཡང་མ་མཆིས་འགག་པ་ཡང་མ་མཆིས་ན། བཅོམ་ལྡན་འདས་དེ་ཅིའི་སླད་དུ་འདི་སྐད་དུ་འདི་ནི་སངས་རྒྱས་མེད་པའི་འཇིག་རྟེན་གྱི་

ཁམས་རྣམས་སུ་སངས་རྒྱས་འབྱུང་བ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་གང་གི་ཚེ་སྤྲུལ་པའི་སངས་རྒྱས་ཡོངས་སུ་མྱ་ངན་ལས་འདས་པར་གྱུར་པ་དེའི་ཚེ་འཇིག་རྟེན་གྱི་ཁམས་དེ་དག་ཏུ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་དཀྱིལ་འཁོར་ཆེན་པོ་བཀོད་པ་བྱིན་གྱིས་རློབ་པས་སེམས་ཅན་རྣམས་ཡོངས་སུ་སྨིན་པར་བྱེད་དོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ངོ་མཚར་ལགས་ཏེ། གང་ན་སེམས་ཅན་འདོད་ཆགས་དང་ཞེ་སྡང་དང་གཏི་མུག་དང་གཡོ་དང་སྒྱུ་དང་ཐེ་ཙོམ་གྱི་བསམ་པ་ཅན་དད་པ་ཐ་དད་པ་རྣམས་ཀྱི་བསམ་པ་ཅི་ལྟ་བ་བཞིན་ཡོངས་སུ་རྫོགས་པར་བགྱིད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་ཤིན་ཏུ་དཀའ་བ་བགྱིད་པར་རིག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་རིགས་ཀྱི་བུ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན་གྱིས་རིགས་ཀྱི་བུ་དེ་དག་གིས་ནི་སངས་རྒྱས་མང་པོ་ལ་དགེ་བའི་རྩ་བ་བསྐྲུན་པར་རིག་པར་བྱའོ། །ཆོས་སྣང་བའི་སྒོ་གསུམ་གྱིས་ཀྱང་ངེས་པར་བྱུང་བ་ཡིན་ཏེ་གསུམ་གང་ཞེ་ན་འདི་ལྟ་སྟེ། སྙིང་རྗེ་ཆེན་པོའི་ཚུལ་གྱི་སྒོ་སྣང་བའི་ཚུལ་དང་ཆོས་ཟབ་མོའི་ཚུལ་གྱི་སྒོ་སྣང་བའི་ཚུལ་དང་དེ་བཞིན་གཤེགས་པ་ལ་མཆོད་པ་དང་བཀུར་སྟི་བྱེད་པའི་ཚུལ་ཏེ་རིགས་ཀྱི་བུ་དེ་དག་ནི་ཆོས་སྣང་བའི་ཚུལ་གྱི་སྒོ་འདི་གསུམ་དང་ལྡན་པར་རིག་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་བྱམས་པ་དང་ཐུགས་རྗེ་ཆེན་པོའི་སྤྱན་གཉིས་ཀྱིས་ཆོས་ཀྱི་དབྱིངས་ཀྱི་ཕོ་བྲང་ཆེན་པོ་ན་གནས་པའི་བྱང་ཆུབ་སེམས་དཔའ་རྣམས་ལ་གཟིགས་ནས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ།ལག་ན་རྡོ་རྗེ་སློབ་དཔོན་གྱི་མཚན་ཉིད་ཉོན་ཅིག །དེ་ལ་རེ་ཞིག་སློབ་དཔོན་བྱང་ཆུབ་ཏུ་སེམས་བསྐྱེད་པ་བྱང་ཆུབ་སེམས་དཔའི་བསླབ་པ་ལ་སྤྱོད་པ་བྱང་ཆུབ་སེམས་དཔའི་སྡོམ་པས་བསྡམས་པ་

སྙིང་རྗེ་ཅན་དད་པ་ཆེ་བ་ཆོས་ཟབ་མོ་ལ་གནས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་མཁས་པ་སྒྱུ་རྩལ་རྣམས་ལ་མཁས་ཤིང་བཟོ་བ་གཙང་ཞིང་བག་ཡོད་པ། གསང་སྔགས་སྤྱད་པ་དག་དང་ནི། །ཕྱག་རྒྱ་དཀྱིལ་འཁོར་ལས་ལ་བསླབས། །དཀྱིལ་འཁོར་བྱ་བའི་ལས་བྱ་བར། །བླ་མ་ལས་ནི་ལུང་ཐོབ་པ། །སངས་རྒྱས་ཆོས་དང་ཚོགས་མཆོག་ལ། །གང་ཞིག་ཡིད་གཉིས་མེད་གྱུར་ཅིང་། །སེམས་ཅན་ཁམས་ནི་མ་ལུས་པ། །ཡོངས་སུ་བསྐྱབ་པའི་ཕྱིར་བརྩོན་པ། །མཁས་པ་དེས་ནི་སངས་རྒྱས་ཀྱི། །དཀྱིལ་འཁོར་དག་ནི་བྲི་བར་འོས། །མཚན་རྣམས་ཐམས་ཅད་ཡོངས་རྫོགས་བརྟན། །ཡིད་གཞུངས་པ་ལ་དཔའ་སྙིང་ཅན། །བདག་གང་སློབ་མ་རྣམས་ཀྱིའང་རུང་། །བགེགས་ནི་ཞི་བར་བྱེད་པར་ནུས། །ཡང་དག་བདེན་པའི་དོན་རྟོགས་ལ། །གང་གི་མོས་པ་རྒྱ་ཆེ་ཞིང་། །བཟོད་དང་ལྡན་ལ་ང་རྒྱལ་མེད། །རླབས་པོ་ཆེ་ཡི་ལས་བྱེད་ཅིང་། །དེ་ནི་རླབས་པོ་ཆེ་ལ་དད། །བྱང་ཆུབ་སེམས་དཔའ་སྐྱོབ་པ་དང་། །སངས་རྒྱས་རྣམས་ཀྱི་སྨོན་ལམ་དག །ཐོས་ནས་ཕྱི་ཕྱིར་དགའ་བ་དང་། །རྟག་ཏུ་མགུ་བར་འགྱུར་བ་དང་། །གསང་སྔགས་སྤྱོད་ལ་བརྩོན་པ་དང་། ། བཟླས་བརྗོད་བརྗོད་ལ་གང་འབད་དང་། །གཅམ་སྒྱུ་ཐམས་ཅད་མི་སེམས་ལ། །འཇིག་རྟེན་ཆོས་ལ་མི་ལྟ་ཞིང་། །སྔགས་ལ་གཞོལ་བའི་སྔགས་པ་ནི། །ཡོན་ཏན་དེ་ལ་སོགས་ལྡན་ན། །སློབ་དཔོན་སྟོན་པས་བཀུར་བ་ཡིན། །ཡང་ན་ཆོས་རྣམས་ཐམས་ཅད་ནི། ། རྣམ་པར་དབེན་ལ་གང་གནས་པ། །དེ་ཡང་སངས་རྒྱས་ཐམས་ཅད་ཀྱི། །སངས་རྒྱས་འབྱུང་བ་སྟོན་པར་འོས། །ཡང་ན་རྫོགས་པའི་སངས་རྒྱས་ཀྱིས། །བསྔགས་པའི་དམ་ཚིག་གསུམ་ཤེས་སམ། །ཉེས་པ་ཐམས་ཅད་རྣམ་སྤངས་པ། །དེ་ལ་གནས་པའི་སྔགས་པ་ནི། །ཡོན་ཏན་ཀུན་དང་མི་ལྡན་ཡང་། །དེ་ཡང་དཀྱིལ་འཁོར་འདྲི་བར་འོས། །དེ་ལྟའི་ཡོན་ཏན་ཀུན་ལྡན་ན། །ལས་ཀྱི་ཆོ་ག་མཐོང་བ་ཡིས། །འཇིག་རྟེན་པ་ཡི་དཀྱིལ་འཁོར་དང་། །འཇིག་རྟེན་འདས་ཀུན་བྱ་བར་འོས། །དེ་སློབ་དཔོན་ལ་གཞན་གྱིས་བསྐུལ་

ན་སློབ་མ་དོན་དུ་གཉེར་ཞིང་དེ་ལ་དད་པར་ཤེས་ན། དེ་ལྟར་ཤེས་ནས་སློབ་དཔོན་དེས། །ས་གཞི་ལེགས་པར་བརྟག་པར་བྱ། །མཚོ་དང་ཀུན་དགའི་སྐྱེད་མོས་ཚལ། །རྫིང་བུ་རྣམས་ཀྱིས་ཀུན་བརྒྱན་ཅིང་། །འབྲས་བུ་མེ་ཏོག་ལྡན་པ་ཡི། །ལྗོན་ཤིང་དེ་བཞིན་ལྡུམ་བུ་དང་། །གེལ་པ་དམ་པ་ཉམས་དགའ་བ། །འབྲས་བུ་མེ་ཏོག་ལྡན་པ་དང་། །ངང་པ་ཁྲུང་ཁྲུང་རྨ་བྱ་དང་། །བཞད་དང་ནེ་ཙོ་ཤ་རི་རྣམས། །གང་གི་ཡུལ་ན་ཡོད་པ་ཡི། །ཡུལ་དེ་ནན་ཏན་བསྐྱེད་དེ་བསྟེན། །མེ་ཏོག་འབྲས་བུ་ལྡན་རི་དང་། །གཙང་ཞིང་ཡིད་འོང་རྫིང་བུ་དང་། །འབབ་ཆུ་ཆུ་ནི་ཞིམ་པོ་དང་། །ཆུ་ཀླུང་གཡས་ནས་འཁོར་བ་ཅན། །དེར་ནི་སྔགས་པ་བློ་ལྡན་གྱིས། །དཀྱིལ་འཁོར་ལོངས་སྤྱོད་འཕེལ་བར་བྲི། །ཡུལ་ནི་ཤིན་ཏུ་སྣུམ་པ་དང་། །གཙུག་ལག་ཁང་དང་ཁང་པ་དང་། །ལྷ་ཡི་གནས་དང་ཕྱུགས་ལྷས་དང་། ། ཤིང་གཅིག་ལམ་གྱི་བཞི་མདོར་ཡང་། །ཞི་བའི་ལས་ལས་ཞི་བ་ཡི། །དཀྱིལ་འཁོར་ཤེས་རབ་ཅན་གྱིས་བྲི། །ཁང་པ་སྟོང་པའམ་དུར་ཁྲོད་དམ། །སྣུམ་མེད་དྲག་པོའི་ལས་ཅན་དང་། །ངན་ཅིང་རྩུབ་ལ་འཇིགས་པ་ཅན། །དེ་བཞིན་ཚང་ཚིང་མི་བཟད་འཇིགས། ། དེ་ལ་སོགས་པའི་གནས་རྣམས་སུ། །དྲག་པོའི་ལས་ཀྱི་དཀྱིལ་འཁོར་བྲི། །དྲག་པོར་དྲག་པོའི་ལས་རྣམས་བྱ། །ཞི་བར་ཞི་བའི་ལས་བྱའོ། །རྒྱས་པར་རྒྱས་པ་ཉིད་ཡིན་ཏེ། །དེ་ནི་རྒྱས་པའི་ཆོ་གའོ། །ཡང་ནི་ཡིད་ནི་གང་དག་ཏུ། །ངེས་པར་དགའ་བ་སྐྱེ་འགྱུར་བ། །ཡུལ་དེར་དཀྱིལ་འཁོར་བྲི་བ་ཡི། །ལས་ནི་ལེགས་པར་སྦྱར་བར་བྱ། །གང་གི་སེམས་ནི་རྣམ་དག་ཅིང་། །ཐེ་ཙོམ་ལ་སོགས་རྣམས་སྤངས་པ། །དེ་ལས་ལས་རྣམས་ཐམས་ཅད་ནི། །འགྲུབ་པར་འགྱུར་བ་དོགས་པ་མེད། །རྣམ་པར་རྟོག་པ་སྤངས་པ་ཡི། ། རྣམ་པར་མི་རྟོག་བྱང་ཆུབ་ཡིན། །དེ་ཡང་རྣམ་རྟོག་སྤངས་པ་ཡིས། །ཐོབ་པར་འགྱུར་གྱི་གཞན་གྱིས་མིན། །དེ་བས་རྣམ་པ་ཐམས་ཅད་དུ། །བློ་ལྡན་ཡིད་གཉིས་སྤངས་ནས་སུ། །འཇིག་རྟེན་ཀུན་ལ་ཕན་འདོད་པས། །ཤེས་རབ་ཅན་གྱིས་དཀྱིལ་འཁོར་

བྲི། །ཡུལ་མེད་དུས་ཀྱང་ཡོད་མ་ཡིན། །བྱ་བ་མེད་ཅིང་བྱེད་པའང་མེད། །ཆོས་རྣམས་དག་ནི་ཐམས་ཅད་ལ། །ཆོས་ཉིད་འབའ་ཞིག་ཡོད་པ་ཡིན། །བྱིས་པ་མི་ཤེས་པས་བསྒྲིབས་པ། །རྒྱུ་དང་རྐྱེན་གྱིས་བརྒྱལ་བས་ན། །སྟོང་པའི་ཆོས་ནི་མ་རྟོགས་པས། །རྟག་ཏུ་བདུད་ཀྱི་དབང་དུ་གྱུར། །དེ་ལྟས་སྟོན་པ་ཡེ་ཤེས་མངའ། །སྤྲོས་མེད་རྟོག་པར་མཁྱེན་པ་ཡིས། །རྣམ་རྟོག་ཐམས་ཅད་སྤངས་པ་ཡི། །ཆོས་ནི་གཞལ་དུ་མེད་པར་བཤད། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་སངས་རྒྱས་ཐམས་ཅད་ཀྱི་རྒྱན་བཀོད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་པ་དང་སྨིན་མཚམས་ནས་སངས་རྒྱས་ཀྱི་ཞིང་ཐམས་ཅད་ཀྱི་རྒྱན་ཞེས་བྱ་བའི་འོད་ཟེར་བྱུང་ངོ་། །བྱུང་ནས་ཀྱང་ཀུན་ཏུ་སྣང་བར་གྱུར་ཏོ། །སངས་རྒྱས་ཀྱི་ཞིང་འདི་ཀུན་ཏུ་སྣང་བར་བྱས་ནས་ཀྱང་གང་གི་རྣམ་པ་དང་ཡོན་ཏན་གྱི་མཐའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་རྟོགས་པར་མི་ནུས་པ་ལྷའི་སྒོ་ཁྱུད་ཀྱིས་རབ་ཏུ་བརྒྱན་པ་དེ་བཞིན་གཤེགས་པའི་རྣམ་པར་སྨིན་པ་ལས་གྱུར་པ། མེ་ཏོག་གི་གཞིའི་སྙིང་པོ་བཀོད་པའི་རྒྱན་ཅན་འདི་དག་ཐམས་ཅད་ལག་མཐིལ་བཞིན་དུ་མཉམ་པར་གྱུར་ཏོ། །དེ་ལྟར་དེ་བཞིན་གཤེགས་པའི་བཀོད་པ་བསམ་གྱིས་མི་ཁྱབ་པ་བྱིན་གྱིས་བརླབས་ནས་འོད་ཟེར་དེ་དག་གསང་བ་པའི་བདག་པོ་ཕྱག་ན་རྡོ་རྗེའི་སྤྱི་བོར་མི་སྣང་བར་གྱུར་ཏོ། ། འོད་ཟེར་དེ་དག་མི་སྣང་བར་གྱུར་མ་ཐག་ཏུ་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀྱིལ་འཁོར་ཆེན་པོ་བཀོད་པ་བྱིན་གྱིས་རློབ་པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དཀྱིལ་འཁོར་ཆེན་པོ་བཀོད་པ་བྱིན་གྱིས་རློབ་པ་ཉོན་ཅིག་བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས་ཕྱག་ན་རྡོ་རྗེ་བཅོམ་ལྡན་འདས་ལ་ཉན་པ་དང་།

བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་དེ་ལ་ཅི་སྐད་དུ་བསྒྲགས་པའི་གནས་རྣམས་སུ་དཀྱིལ་འཁོར་ཀྱི་ཚད་ཁྲུ་གང་པ་ཡན་ཅད་དཔག་ཚད་མན་ཆད་ཀྱི་ཚད་དུ་བྱའོ། །དཔག་ཚད་གཅིག་ལས་ལྷག་པར་ནི་མི་བྱའོ། །དེ་ལ་ས་གཞི་མཉམ་ལ་འཇམ། །བྱུག་སྤོས་དག་གིས་ལེགས་པར་བསྐུས། །ཡང་ན་འཇིམ་པ་གཙང་མ་ཡིས། །སྔགས་པས་ནན་ཏན་བསྐུ་བར་བྱ། །དེ་ནས་ཕུར་བུ་སོར་བརྒྱད་པ་ལ་ལས་ཐམས་ཅད་པའི་གསང་སྔགས་ཀྱིས་བརྒྱ་རྩ་བརྒྱད་བཟླས་ཏེ་གྲྭ་བཞིར་མཉམ་པར་བཏབ་ན་དཀྱིལ་འཁོར་ཀུན་ཏུ་ཅིས་ཀྱང་མི་ཚུགས་པར་བྱིན་གྱིས་བརླབས་པར་འགྱུར་རོ། །ན་མཿས་མནྟ་བཛྲཱ་ཎཱན། ཧཾ་ཀོ་ཊ་ཡ་ས་མེ་མ་ཧཱ་ཙཎྜ་ལི་ཧཱུྃ་ཕཊ། དེ་ནས་ཕྱི་དེ་ཉིན་དཀྱིལ་འཁོར་གྱི་ཡོ་བྱད་རྣམས་བསགས་ཏེ་སྟ་གོན་བྱས་ལ་ལས་ཐམས་ཅད་ཀྱི་གསང་སྔགས་སམ་འཕགས་པ་མི་གཡོ་བས་བསྲུང་བ་བྱས་ཏེ་དཀྱིལ་འཁོར་གྱི་བྱང་ཕྱོགས་སུ་འཇོག་ཏུ་གཞུག་གོ། །ཡང་ན་བྱིན་གྱིས་བརླབས་ལ་བདག་ཉིད་ཀྱིས་གཞག་གོ། །དེ་ནས་ཕྱི་དེ་ཉིན་སློབ་མ་རྣམས་གཟུང་བར་བྱ་སྟེ་དད་པ་ཆེ་བ་གཙང་སྦྲ་ཆེ་བ་ཆོས་ལ་འབད་པ་ཆོ་རིགས་བཙུན་པ། མོས་པ་རྒྱ་ཆེ་བ་གཅིག་གམ་གཉིས་སམ་གསུམ་མམ་ཅི་སྙེད་འདོད་པ་རྣམས་གཟུང་ངོ་། །ལས་ཐམས་ཅད་པའམ་འཕགས་པ་མི་གཡོ་བའམ་མི་བཟོད་པའི་གསང་སྔགས་ཀྱིས་བུ་མོས་བཀལ་བའི་སྐུད་པའམ། སྐུད་པ་གཞན་ནམ་ཡང་ན་རྩྭ་ཀུ་ཤ་ཡང་རུང་མདུད་པ་གསུམ་བོར་ལ། དེ་ནས་སྔགས་ཀྱིས་བརྒྱ་འམ་ནི། །ཡང་ན་ལྷག་པར་མངོན་བསྔགས་ཏེ། །སློབ་མའི་ལས་རྣམས་འགྲུབ་པའི་ཕྱིར། །དཔུང་པ་གཡོན་པར་བཅིང་བར་བྱ། །ཨུ་དུམ་བཱ་རའི་སོ་ཤིང་ནི། །མེ་ཏོག་དྲི་ལ་སོགས་པས་བསྐུས། །ཤིན་ཏུ་བཟང་པོ་བསྲུང་བ་བྱས། །སོར་བརྒྱད་ཚད་ལ་རྩེ་གཅིག་པ། །བཟང་པོ་ཡིད་དུ་འོང་བ་དག །དེ་ནས་མཁས་པས་སྦྱིན་པར་བྱ། །ཤར་རམ་བྱང་དུ་ཁ་བལྟས་ཏེ། །སོ་ཤིང་དག་ནི་བཅའ་བར་བྱ། །དེ་ནས་བློ་ལྡན་མི་བཟའ་ཞིང་། །དཔྱད་པ་མེད་པར་དོར་བར་བྱ། །

གང་དུ་ལྷུང་བར་གྱུར་པ་ནི། །དེ་བཞིན་དེ་ལས་གྲུབ་པར་འགྱུར། །ཤེས་རབ་ཕ་རོལ་ཕྱིན་ལ་སོགས། །མདོ་སྡེའི་ཆོས་ནི་ཉན་དུ་གཞུག །སློབ་མ་སྐྱོ་བར་བྱ་བའི་ཕྱིར། །ཆོས་གཏམ་ཤིན་ཏུ་བཟང་པོ་བྱ། །གལ་ཏེ་རྨི་ལམ་བཟང་པོའམ། །ངན་པ་དག་ནི་མཐོང་གྱུར་ན། །བདག་གི་སྐལ་བ་བརྟག་པའི་ཕྱིར། །བླ་མ་ལ་ནི་དེ་དག་བསྙད། །མཆོད་རྟེན་ཀུན་དགའ་གཙུག་ལག་ཁང་། །གླེགས་བམ་དང་ནི་ལྷ་རྣམས་དང་། །ཡིད་བཞིན་ནོར་བུ་རིན་ཆེན་གོས། །ཡང་ན་མེ་ཏོག་འབྲས་བུ་རྙེད། །རལ་གྲི་འཁོར་ལོ་པི་བང་དང་། །གྲུབ་པའི་རྫས་ནི་སྣ་ཚོགས་རྣམས། །གང་གིས་རྨི་ལམ་ཐོབ་གྱུར་རྨིས། །དེ་ཡི་དངོས་གྲུབ་ཡིད་བཞིན་འགྱུར། །ཉི་ཟླ་མེ་དང་མཚོན་དག་གམ། །དེ་བཞིན་རྒྱ་མཚོ་རྒལ་བ་དང་། །གླང་པོ་ཆེ་དག་ཞོན་མཐོང་བ། །དེ་ནི་དངོས་གྲུབ་འཐོབ་མི་དཀའ། ། དེ་ལ་སོགས་པའི་རྨི་ལམ་ནི། །བཟང་པོས་འགྲུབ་པ་དམ་པ་བརྟག །རྨི་ལམ་བཟློག་པ་མི་བཟད་པ། །འཇིགས་པ་མཐོང་ན་མི་འགྲུབ་པོ། །བོང་བུ་རྔ་མོང་ཁྱི་དང་ནི། །ཆུ་བྱ་སྟག་དང་བྱི་ལ་ཝ། །མི་ནི་འབྲུ་མར་ལུས་བསྐུས་དང་། །གཅེར་བུ་རྩུབ་ལ་མི་སྡུག་པ། །དེ་ལ་སོགས་པའི་རྨི་ངན་རྣམས། །བློ་ལྡན་མི་ཡིས་སྤང་བར་བྱ། །ཡང་ན་དངོས་རྣམས་རྨི་ལམ་དང་། །དྲི་ཟའི་གྲོང་ཁྱེར་བཞིན་ཤེས་ནས། །བློ་དང་ལྡན་པས་རྨི་ལམ་རྣམས། །སྙིང་པོ་མེད་པར་བཤད་པར་བྱ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས། འདི་ལྟ་བུའི་ཆོས་རྣམས་ལ་དང་པོ་ཉིད་ནས་བློ་བརྟན་པར་འགྱུར་བ་དེའི་རྒྱུ་ནི་གང་རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་རིགས་ཀྱི་བུ་དེ་དག་ནི་སྙིང་རྗེ་ཆེན་པོ་དང་ལྡན་ཞིང་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པར་ལྟ་ལ། སོ་སོའི་སྐྱེ་བོ་རྣམས་ཀྱི་མཚན་ཉིད་ཀྱང་ཕྱིན་ཅི་ལོག་ཅིང་མཚན་ཉིད་དང་བྲལ་བ་གཅིག་ཏུ་ཤེས་ཏེ་དེས་ན་

དེ་དག་ཐམས་ཅད་ལ་བློ་བརྟན་ཞིང་ངེས་པ་ཡིན་ནོ། །དེ་ནས་ཡང་བཅོམ་ལྡན་འདས་ཀྱིས་ཆོས་ཀྱི་དབྱིངས་བསམ་གྱིས་མི་ཁྱབ་པའི་རྒྱ་ཆེན་པོ་བྱིན་གྱིས་བརླབས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་དཀྱིལ་འཁོར་ཆེན་པོ་བཀོད་པ་བྱིན་གྱིས་རློབ་པ་ཉོན་ཅིག །དེ་ལ་དང་པོར་སློབ་དཔོན་གྱིས་གཙང་སྦྲ་བྱས་ཏེ་བདེན་བྲལ་གྱི་ཕྱོགས་སུ་གནས་ལ། དཀྱིལ་འཁོར་གྱི་ས་ལ་རྣམ་པར་དབྱེ་བ་བྱས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ལ་ཆོས་ཀྱི་དབྱིངས་རྣམ་པར་དག་པ་ཡང་དྲན་པར་བྱས་ཏེ་མཐའ་ཡས་པ་རྒྱ་ཆེ་བ་རབ་འབྱམ་བཀོད་པ་བྱིན་གྱིས་རློབ་པ་ལ་བལྟའོ། །བལྟས་ནས་ཀྱང་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ལ་ཚོན་སྣ་ལྔའི་སྲད་བུའམ། ཡང་ན་མཁས་པས་བློས་ཀྱང་རུང་། །ལྷ་ཡི་གནས་རྣམས་ངེས་པ་ནི། ། ཤེས་རབ་ཅན་གྱིས་རྣམ་པར་དབྱེ། །ཀུན་ཏུ་གྲུ་བཞི་ལྷམ་པ་ལ། །སྒོ་བཞི་རྟ་བབས་དང་ཡང་བཅས། །སྒོ་ཁྱུད་རབ་འབྱམ་རྒྱ་ཆེན་ལྡན། །རྣམ་པར་དག་པ་སེམས་ཀྱིས་བྲིས། །རིན་ཆེན་ལྔ་ཡི་ཕྱེ་མའམ། །ཡང་ན་སཱ་ལུའི་ཕྱེ་མའང་རུང་། །ཡང་ན་སྤོས་སམ་ཐལ་བས་ཀྱང་། །དཀྱིལ་འཁོར་སྔགས་པས་བྲི་བར་བྱ། །གྲུ་བཞི་པ་ལ་སྒོ་བཞི་པ། །ནུབ་ཀྱི་སྒོ་ནི་དབྱེ་བར་བྱ། །དེ་ནས་རིག་སྔགས་རྒྱལ་མོ་ནི། །མི་བཟད་སྲུང་བ་ཆེན་མོ་འམ། །ཡང་ན་མི་གཡོ་དྲན་པར་བྱ། །རྫོགས་པའི་སངས་རྒྱས་དྲན་བྱས་ནས། །བདེན་བྲལ་གྱི་ནི་ཕྱོགས་སུ་འགྲོ། །དེ་ནས་སྲད་བུ་བྲེས་ནས་སུ། །བསྐོར་བ་བྱས་ཏེ་སླར་ལོག་ནས། །དེ་ནས་བློ་དང་ལྡན་པ་ནི། །ནུབ་དང་བྱང་གི་ཕྱོགས་སུ་འགྲོ། །དེར་ཡང་ཤར་དུ་ཁ་བལྟས་ནས། །ཤར་གྱི་ཕྱོགས་སུ་སྲད་བུ་བྲེ། །དེ་ལྟར་སྲད་བུ་ཚུལ་ཤེས་པས། ། རྟག་པར་ཐོག་པ་ཉིད་དུ་བྱ། །དེ་ནས་དབུས་སུ་འདུག་ནས་ནི། །མགོན་པོ་ངན་སོང་ཀུན་སྤོང་དང་། །མི་མཆོག་འོད་དཔག་མེད་པ་དང་། །དེ་བཞིན་སྒྲིབ་པ་ཀུན་སེལ་དང་། །ཐུབ་པ་མེ་ཏོག་ཀུན་རྒྱས་དང་། །རྒྱལ་བ་རྣམ་པར་སྣང་མཛད་དང་། །ཐུབ་ཆེན་བདུད་

ལས་རྒྱལ་བ་དང་། །དེ་བཞིན་མི་འཁྲུགས་ཞེས་བྱ་དང་། །སངས་རྒྱས་རྔ་ཡི་སྒྲ་དབྱངས་ཅན། །དེ་བཞིན་གཤེགས་པ་རྗེས་དྲན་ནས། །དེར་ཡང་དཀའ་ཐུབ་ཅན་གྱིས་ནི། །ནན་ཏན་བསྐྱེད་དེ་ཆ་གསུམ་བརྟག །དེ་ལྟར་ལས་ལ་མཁས་པ་ཡིས། ། ས་ནི་ལེགས་པར་བརྟགས་ནས་སུ། །བྱང་ཆུབ་སེམས་དཔའ་བློ་ལྡན་དང་། །སངས་རྒྱས་རྣམས་ཀྱི་ཡུམ་ཡང་བཀླག །ཡང་ན་ཟབ་མོའི་མདོ་སྡེ་གཞན། །ས་རྣམས་གཏན་ལ་འབེབས་པ་བཀླག །བཀླགས་ནས་བློ་དང་ལྡན་པ་ཡིས། །ཀུན་ཏུ་བདུག་སྤོས་བསྐོར་ནས་སུ། །རྒྱལ་བ་མཆོག་གི་སྲས་རྣམས་དང་། །སངས་རྒྱས་རྣམས་ལ་ཕྱག་བྱས་ནས། །སངས་རྒྱས་ཀུན་གྱི་སྐུ་གཟུགས་སམ། །ཕྱག་རྒྱ་མཁས་པས་བྲི་བར་བྱ། །ཡང་ན་གཞན་ནི་གང་ཡང་རུང་། །དེ་དག་ཐམས་ཅད་བྲི་བར་བྱ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་སྦྱོར་བ་གང་དག་དང་ལྡན་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཚེགས་ཆུང་ངུས་སེམས་ཅན་གྱི་ཁམས་མཐའ་ཡས་པ་ཡང་སྲིད་པའི་རྒྱ་མཚོ་ལས་སྒྲོལ་བར་འགྱུར་བ་ཆོས་ཀྱི་དབྱིངས་བསམ་གྱིས་མི་ཁྱབ་པའི་ཚུལ་སྒྲུབ་པའི་སྦྱོར་བ་ཡོད་དོ། །དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྒྲུབ་པའི་གཞི་གང་དང་ལྡན་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཆོ་ག་ཐམས་ཅད་ཡོངས་སུ་རྫོགས་པར་བགྱིད་ཅིང་དེ་བཞིན་གཤེགས་པ་རྣམས་ཀྱང་མཉེས་པར་བགྱིད་པའི་སྒྲུབ་པའི་གཞི་དེ་དག་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་རྣམ་པར་སྣང་མཛད་ཀྱིས་ཆོས་ཀྱི་དབྱིངས་ཀྱི་ཚུལ་རྒྱ་ཆེན་པོ་བྱིན་གྱིས་བརླབས་སྒྲུབ་པའི་གཞི་རྒྱ་ཆེན་པོས་བྱིན་དུ་བརླབས་ནས་སྦྱོར་བ་བཟང་པོ་བཤད་དོ། །གསང་བ་པའི་བདག་པོ་དེ་ལས་འཁོར་ལོས་སྒྱུར་བ་ནི་དཀྱིལ་འཁོར་

གྱི་ཚད་དཔག་ཚད་གཅིག་ཙམ་བྲི་བར་བྱ་སྟེ་གནས་ཙནྡན་བཟང་པོ་སྦྲུལ་གྱི་སྙིང་པོ་དམ་པ་ལས་བྱས་པའི་ཁང་པ་དྲིལ་བུ་གཡེར་ཀ་ཆེན་པོ་དང་རིན་པོ་ཆེའི་བླ་རེ་བྲེས་པ། ཨ་ག་རུ་བཟང་པོའི་བདུག་སྤོས་སྣ་ཚོགས་ཀྱིས་བདུགས་པ་འཛམ་བུའི་གསེར་གྱི་སྲད་བུས་བསྐོར་བ་རིན་པོ་ཆེ་སྣ་ཚོགས་ཀྱི་དྲིལ་བུ་གཡེར་ཀའི་དྲ་བས་སྟེང་བརྒྱན་པ་རྔ་སྒྲ་སྙན་པ་སྣ་ཚོགས་ཀྱི་སྒྲ་གྲག་པ། ཕྱོགས་བཞི་ན་རྟ་བབས་སྣ་ཚོགས་མུ་ཏིག་གི་ཕྲེང་བས་བཏགས་པ་ཚོན་སྣ་ཚོགས་སུ་བཙོས་པའི་གོས་ཀྱིས་བཀླུབས་པ་བཀོད་པ་དང་རྒྱན་སྣ་ཚོགས་ཀྱིས་སྤྲས་པ་རིན་པོ་ཆེའི་སྒྲོན་མ་སྣ་ཚོགས་ཀྱིས་ཀྱང་རྣམ་པར་གསལ་བར་བྱའོ། །དེ་ནས་དེ་བཞིན་གཤེགས་པ་འདུས་པའི་ནང་ན་འདུག་བཞིན་དུ་བདག་ཉིད་ཆོས་ཀྱི་དབྱིངས་རྣམ་པར་དག་པའམ་དེའི་རྣམ་པ་ལ་དམིགས་པར་བྱིན་གྱིས་བརླབས་ལ་ཆོས་འབྱུང་བའི་ཕྱག་རྒྱའམ་དམ་ཚིག་གི་ཕྱག་རྒྱ་བཅིངས་ཏེ། སྟོང་པའི་ངོ་བོ་ཉིད་ཀྱི་རྗེས་སུ་སོང་བ་རྣམས་སངས་རྒྱས་དང་བྱང་ཆུབ་སེམས་དཔའི་སྡོམ་པ་དང་བྱང་ཆུབ་ཀྱི་སེམས་འཛིན་དུ་གཞུག་གོ། །དེ་ནས་བླ་ན་མེད་པའི་ཡེ་ཤེས་ཀྱི་མིག་རྣམ་པར་དག་པར་བྱ་བའི་ཕྱིར་དམ་ཚིག་བསྟན་པར་བྱའོ། ། དེ་ལ་ནང་གི་དཀྱིལ་འཁོར་གྱི་ཕྱག་རྒྱ་ནི་འདི་རྣམས་ཡིན་ནོ། །ཤར་ཕྱོགས་སུ་སངས་རྒྱས་ཐམས་ཅད་ཀྱི་ཕྱག་རྒྱ་གྲུ་གསུམ་པ་པདྨའི་སྟེང་ན་འདུག་པར་བྲིའོ། །དེའི་གསང་སྔགས་ནི་འདིའོ། །ན་མཿསརྦྦ་བུདྡྷ་བོ་དྷི་ས་ཏྭཱ་ནཱན། ཨ་སརྦྦ་ཏྲ་ཎ་ཀི་སྭཱ་ཧཱ། བཅོམ་ལྡན་འདས་ཀྱི་གཡས་རོལ་དུ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕྱག་རྒྱ་ཡིད་བཞིན་གྱི་ནོར་བུའི་རྒྱལ་མཚན་བྲིའོ། །དེའི་གསང་སྔགས་ནི། ན་མཿས་མནྟ་བུདྡྷ་བོ་དྷི་ས་ཏྭཱ་ནཱན། ས་མནྟ་ཨ་མྲྀ་ཏེ་ཛྭ་ལ་སྭཱ་ཧཱ། དེའི་འོག་ཏུ་ཀུན་དུ་བཟང་པོའི་ཕྱག་རྒྱ་རལ་གྲི་དང་གནས་ཀྱི་དཀྱིལ་འཁོར་ཆུང་ངུ་བྲིའོ། །གསང་སྔགས་ནི། ན་མཿསརྦྦ་བུདྡྷ་བོ་དྷི་ས་ཏྭཱ་ནཱན། བཛྲ་རཱ་ཛ་མཱ་ལ་སྭཱ་ཧཱ། སངས་རྒྱས་ཐམས་ཅད་ཀྱི་ཕྱག་རྒྱའི་གཡོན་རོལ་དུ་ཆོས་ཀྱི་འཁོར་ལོའི་ཕྱག་རྒྱ་བྲིའོ། །དེའི་འོག་ཏུ་བཅོམ་ལྡན་འདས་ཤཱཀྱ་ཐུབ་པའི་ཕྱག་རྒྱ་ལྷུང་བཟེད་དང་ཆོས་

གོས་བྲིའོ། །བཅོམ་ལྡན་འདས་ཀྱི་གཡས་ལོགས་སུ་ནམ་མཁའི་སྤྱན་གྱི་ཕྱག་རྒྱ་ཅན་གཙུག་ཏོར་འདྲ་བ་པདྨའི་སྟེང་དུ་འདུག་པར་བྲིའོ། །བཅོམ་ལྡན་འདས་མའི་འོག་ལོགས་སུ་རྡོ་རྗེ་དམ་པ་སྦྱིན་གྱི་ཕྱག་རྒྱ་ཨུཏྤ་ལའི་སྟེང་དུ་རྡོ་རྗེ་གཞག་པ་བྲིའོ། །འཕགས་པ་ཀུན་དུ་བཟང་པོའི་བྱང་ཕྱོགས་སུ་བྱམས་པའི་ཕྱག་རྒྱ་རིལ་བ་སྤྱི་བླུགས་བྲིའོ། །བཅོམ་ལྡན་འདས་ཀྱི་ནུབ་ཕྱོགས་སུ་སྤྱན་རས་གཟིགས་དབང་ཕྱུག་གི་ཕྱག་རྒྱ་པདྨ་བྲིའོ། །བཅོམ་ལྡན་འདས་ཀྱི་བྱང་ཕྱོགས་སུ་མཐའ་ཡས་པ་འཕྲོ་བ་རྒྱ་ཆེན་པོ་མི་གཡོ་བ་རྒྱལ་པོའི་ཕྱག་རྒྱ་བྲིའོ། ། བྱང་ཆུབ་སེམས་དཔའ་རྣམས་ཀྱི་ལྷོ་ཕྱོགས་སུ་རྡོ་རྗེ་འཛིན་ཐམས་ཅད་ཀྱི་ཕྱག་རྒྱ་བྲིའོ། །དེ་ནས་ཕྱི་རོལ་གྱི་དཀྱིལ་འཁོར་ཆ་གསུམ་དུ་བྱས་པ་ལ་འཁོར་སའི་སྣམ་བུ་བོར་ཏེ། ཤར་ཕྱོགས་སུ་ཕོ་ཉའི་ཚོགས་ཐམས་ཅད་ཀྱི་ཕྱག་རྒྱ་བྲིའོ། །དེ་དག་གི་ཤར་ལྷོའི་མཚམས་སུ་ཕོ་ཉ་མོ་ཐམས་ཅད་ཀྱི་ཕྱག་རྒྱ་བྲི་སྟེ། ཕོ་ཉ་མོ་རྣམས་ཀྱི་ཕྱག་རྒྱ་ནི་ལྕགས་ཀྱུའོ། །ཚོགས་རྣམས་ཀྱི་ཕྱག་རྒྱ་ནི་ཞགས་པའོ། །ལྷོ་དང་བྱང་གི་ངོས་སུ་བྲན་ཕོ་བྲན་མོ་རྣམས་ཀྱི་ཕྱག་རྒྱ་བྲི་སྟེ་དེ་ལ་བྲན་ཕོ་རྣམས་ཀྱི་ཕྱག་རྒྱ་ནི་རལ་གྲིའོ། །བྲན་མོ་རྣམས་ཀྱི་ཕྱག་རྒྱ་ནི་ཁད་ག་རི་དང་རྡོ་རྗེའི་ཁབ་བྲིའོ། །དེ་ནས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླག་གོ། །བཀླགས་ནས་ལངས་ལ་དཀྱིལ་འཁོར་བསྐོར་བ་བྱས་ཏེ་སངས་རྒྱས་བཅོམ་ལྡན་འདས་རྣམས་ལ་ཕྱག་ཀྱང་བྱས་ལ་སློབ་མ་བྱང་ཆུབ་ཏུ་སེམས་བསྐྱེད་པ་དད་པ་ཅན་གཙང་སྦྲ་ཆེ་བ་ཡི་དམ་ལ་བརྟན་པ་སྡོམ་པ་བཟུང་བ་འགྲོ་བ་ཐམས་ཅད་ཡོངས་སུ་བསྐྱབ་པའི་བསམ་པ་ཅན་སྙིང་རྗེ་ཆེ་བ་གདོང་རས་ཀྱིས་གཡོགས་པ་ལག་པ་མི་སྟོང་པ་དེ་ལ་སེམས་རྩེ་གཅིག་ཏུ་དམིགས་པ་རྣམས་དཀྱིལ་འཁོར་བསྐོར་བ་བྱས་ཏེ་དཀྱིལ་འཁོར་གཉིས་པའི་སྒོ་ཁར་འགྲེང་ལ་གང་བའི་ཕྱག་རྒྱའམ་ཆོས་འབྱུང་བའི་ཕྱག་རྒྱའམ་དམ་ཚིག་གི་ཕྱག་རྒྱ་བཅིངས་ཏེ་དམ་ཚིག་བརྗོད་ལ་དཀྱིལ་འཁོར་དུ་གཟུད་དོ། །དེ་ནས་མེ་ཏོག་འདོར་དུ་གཞུག་གོ། །མེ་ཏོག་གར་བབ་པ་དེར་དེའི་ལྷ་ཡིན་ནོ། །དེ་ལྟར་དམ་ཚིག་བརྟན་པ་ཅན་གྱིས་སློབ་དཔོན་ལ་སྟོན་པའི་འདུ་ཤེས་བསྐྱེད་

དོ། །སློབ་དཔོན་གྱིས་ཀྱང་བུའི་འདུ་ཤེས་བསྐྱེད་པར་བྱའོ། །དེ་ནས་སེམས་ཀྱི་རྒྱུད་རབ་དང་འབྲིང་དང་ཐ་མ་ལ་བལྟས་ནས་གསང་སྔགས་སྤྱད་པ་ལ་འཇུག་པའི་རྣལ་འབྱོར་གྱི་ཆོ་ག་སྦྱིན་ནོ། །དེ་ལྟར་བྱས་ན་དཀྱིལ་འཁོར་ཆེན་པོ་བཀོད་པ་འདིར་དམ་ཚིག་མཐོང་བར་འགྱུར་རོ། ། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་ཞུགས་ཀྱང་རུང་མ་ཞུགས་ཀྱང་རུང་དམ་ཚིག་ཏུ་ཞུགས་པར་འགྱུར་རོ། །དེ་ལྟར་དཀྱིལ་འཁོར་ཆེན་པོར་བྱིན་གྱིས་བརླབས་ཤིང་སྡིག་པ་ཐམས་ཅད་དང་བྲལ་བ་དེ་བཞིན་གཤེགས་པའི་རིགས་ལས་བྱུང་བ། སེམས་ཅན་གྱི་ཁམས་མཐའ་ཡས་པ་ཡོངས་སུ་བསྐྱབ་པ་ཡིད་ལ་བྱེད་པ་དེས་གསང་སྔགས་སྤྱད་པའི་རྣལ་འབྱོར་གྱི་ཆོ་ག་རྗེས་སུ་དྲན་པར་བྱའོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཆོས་ཀྱི་དབྱིངས་ཀྱི་གནས་ན་འཁོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་བྱམས་པ་ཆེན་པོ་དང་ཐུགས་རྗེ་ཆེན་པོའི་སྤྱན་གཉིས་ཀྱིས་གཟིགས་ནས། ཞལ་ཅུང་ཟད་འཛུམ་ཞིང་དེ་བཞིན་གཤེགས་པའི་སོ་སོ་ཡང་དག་པར་རིག་པ་ལ་འཇུག་པའི་ཚུལ་གྱིས་བླ་ན་མེད་པའི་ཆོས་ཀྱི་དབྱིངས་ཤིན་ཏུ་རྣམ་པར་དག་པར་བསྟན་པར་བཞེད་དེ། སྲིད་པའི་རྒྱ་མཚོ་ཐམས་ཅད་ལས་བསྒྲལ་བར་ཡི་དམ་བཅས་པ་ཞེས་བྱ་བའི་བཞད་པ་ཆེན་པོ་མཛད་ནས་གཙུག་ཏོར་ཆེན་པོའི་དཀྱིལ་འཁོར་ནས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་ཡུལ་འབྱུང་བ་ཞེས་བྱ་བའི་འོད་ཟེར་བྱུང་ངོ་། །འོད་ཟེར་དེ་བྱུང་ནས་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ནམ་མཁའི་དབྱིངས་ཀྱིས་ཀླས་པ་ན་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ན་འཁོད་པའི་བྱང་ཆུབ་སེམས་དཔའ་ཐམས་ཅད་ནི་སྣང་བར་བྱས་ཆོས་ཀྱི་དབྱིངས་བསམ་གྱིས་མི་ཁྱབ་པ་ལ་འཇུག་པའི་ཡུལ་ནི་བསྟན། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་རྣམས་ལ་ནི་བལྟས་ཆོས་ཀྱི་དབྱིངས་རྣམ་པར་དག་པ་མཐའ་ཡས་པ་ནི་དམིགས་པར་བྱས། ཆོས་ཀྱི་དབྱིངས་རྣམ་པར་རོལ་པ་ནམ་མཁའ་དང་མཉམ་པའི་རྗེས་སུ་འགྲོ་བ་ཆོས་མཉམ་པ་ཉིད་བསྟན་

པ་རྣམ་པར་རོལ་པའི་སྒོ་ནས་ནི་རྣམ་པར་རོལ་ནས། དེ་བཞིན་གཤེགས་པའི་དགེ་བའི་རྩ་བ་རྣམ་པར་སྨིན་པ་བསམ་གྱིས་མི་ཁྱབ་པ་ལས་མངོན་པར་གྲུབ་པ་དང་། དེ་བཞིན་གཤེགས་པའི་དགོངས་པ་ལས་མངོན་པར་གྲུབ་པ་མོས་པའི་རླུང་གི་དཀྱིལ་འཁོར་གྱིས་སངས་རྒྱས་ཀྱི་ཞིང་བཀོད་པ་རྣམ་པ་བཅུས་རབ་ཏུ་བརྒྱན་པ་མཛད་དེ། ནམ་མཁའི་ངོས་ལ་བཀོད་པ་ཆེན་པོའི་དཀྱིལ་འཁོར་གྱི་བྱིན་གྱིས་བརླབས་བཤམ་པ་བྱས་ཏེ་གནས་པར་གྱུར་ཏོ། །འོད་ཟེར་ཆེན་པོ་དེ་དག་གནས་པར་གྱུར་མ་ཐག་ཏུ་གསང་བ་པའི་བདག་པོ་ཕྱག་ན་རྡོ་རྗེའི་སེམས་ལ་སེམས་ཀྱི་རྟོག་པ་འདི་ལྟ་བུ་བྱུང་བར་གྱུར་ཏོ། །ཅི་ཙམ་དུ་དེ་བཞིན་གཤེགས་པའི་དགོངས་པ་ལས་བྱུང་བའི་འོད་ཟེར་སྔོན་མ་མཐོང་བའི་བཀོད་པ་བསྟན་པ་འདི་དག་རྣམ་པར་བཀོད་པ་སྣ་ཚོགས་ཀྱིས་ནམ་མཁའི་ངོས་ནི་ཁེབས་པར་བྱས་དེ་བཞིན་གཤེགས་པའི་རྣམ་པར་རོལ་པ་ཆེན་པོ་རྣམས་ནི་བསྟན་ནས་དེ་བཞིན་གཤེགས་པའི་ཞལ་དུ་མི་སྣང་བར་གྱུར་པ་ནི་ངོ་མཚར་ཏོ། །དེ་བས་ན་ངེས་པར་དེང་བཅོམ་ལྡན་འདས་སོ་སོ་ཡང་དག་པར་རིག་པ་ཆེན་པོ་མངོན་པར་སྒྲུབ་པའི་ཚུལ་རྣམ་པར་དག་པས་མཉམ་པ་ཉིད་ལ་འཇུག་པ་རྣམ་པར་དག་པའི་གཞི་དེ་བཞིན་གཤེགས་པ་ཐམས་ཅད་རྣམ་པར་རོལ་པའི་ཆོས་ཀྱི་རྣམ་གྲངས་བཤད་པར་བཞེད་དོ། །དེའི་ཕྱིར་བདག་བཅོམ་ལྡན་འདས་ལ་ཞུའོ་སྙམ་མོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པ་ནས། བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་བར་དུ་བདག་རྟག་ཏུ་ཞམ་རིང་ལ་མཆིས་མཆིས་ན། བཅོམ་ལྡན་འདས་ཀྱིས་ཅི་ལྟར་ད་ལྟར་བཞད་པ་ཆེན་པོ་སྔར་མཛད་ནས་དབུའི་གཙུག་ཏོར་གྱི་དཀྱིལ་འཁོར་ནས་འོད་ཟེར་སྟོང་ཕྲག་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་བྱུང་ནས་འོད་ཟེར་དེ་རྣམས་ཀྱིས་ཀྱང་འཇིག་རྟེན་ཁམས་ན་ནམ་མཁའི་དབྱིངས་ཀྱི་མཐས་ཀླས་པ་སྣང་བར་བགྱིད་པའི་ངོ་མཚར་འདི་ལྟ་བུ་ནི་བདག་གིས་སྔོན་ཆད་མ་མཐོང་ལགས་

སོ། །དེ་ལ་བདག་འདི་སྙམ་དུ་དེང་བཅོམ་ལྡན་འདས་བདག་ཅག་ལ་སོ་སོ་ཡང་དག་པར་རིག་པ་ཆེན་པོ་ལ་འཇུག་པའི་ཚུལ་སྒྲུབ་པ་རྣམ་པར་དག་པའི་གཞི་ཆོས་ཀྱི་རྣམ་གྲངས་དེ་བཞིན་གཤེགས་པ་ཐམས་ཅད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བཤད་པ་བཞེད་པ་ནི་བདག་ཅག་གིས་རྙེད་པ་ལེགས་པར་རྙེད་དོ་སྙམ་བགྱིད་དོ། །བཅོམ་ལྡན་འདས་དེ་ལྟ་བས་ན་ལེགས་ལགས་ཀྱིས། བདག་ཅག་ལ་ཐུགས་བརྩེ་བའི་སླད་དུ་སོ་སོ་ཡང་དག་པར་རིག་པ་ཆེན་པོ་ལ་འཇུག་པའི་ཚུལ་སྒྲུབ་པ་རྣམ་པར་དག་པའི་གཞི་དེ་བཞིན་གཤེགས་པ་ཐམས་ཅད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པའི་ཆོས་ཀྱི་རྣམ་གྲངས་བཤད་དུ་གསོལ། དེ་ནི་དུས་སླད་མའི་འགྲོ་བ་རྣམས་ལ་ཡང་སྣང་བར་བགྱིད་པར་འགྱུར་བ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལེགས་སོ་ལེགས་སོ། །གང་ཁྱོད་དོན་འདི་འདྲི་བ་ནི་ཡང་ལེགས་སོ། །གསང་བ་པའི་བདག་པོ། །དེའི་ཕྱིར་ལེགས་པར་ཉོན་ལ་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་དེ་བཞིན་གཤེགས་པ་ཐམས་ཅད་ཀྱི་སོ་སོ་ཡང་དག་པར་རིག་པ་ལ་འཇུག་པ་སྒྲུབ་པའི་ཚུལ་རྣམ་པར་དག་པར་མཉམ་པ་ཉིད་ལ་འཇུག་པ་རྣམ་པར་དག་པའི་གཞི་ཆོས་ཀྱི་རྣམ་གྲངས་དེ་བཞིན་གཤེགས་པ་ཐམས་ཅད་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བཤད་པར་བྱའོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས། གསང་བ་པའི་བདག་པོ་ཕྱག་ན་རྡོ་རྗེ་བཅོམ་ལྡན་འདས་ལ་ཉན་པ་དང་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་སྟོང་པ་ཉིད་ཀྱི་གཞི་ནི་མངོན་པར་རྫོགས་པར་བྱང་ཆུབ་པའི་གཞིའོ། །ནམ་མཁའ་དང་མཉམ་པའི་གཞི་ནི་མངོན་པར་རྫོགས་པར་བྱང་ཆུབ་པའི་གཞིའོ། །མཚན་ཉིད་མེད་པའི་གཞི་ནི་མངོན་པར་རྫོགས་པར་བྱང་ཆུབ་པའི་གཞིའོ། །དེ་བཞིན་གཤེགས་པའི་གཞི་ནི་མངོན་པར་རྫོགས་པར་བྱང་ཆུབ་པའི་གཞིའོ། །དེ་ལྟར་མངོན་པར་རྫོགས་པར་བྱང་ཆུབ་

པའི་གཞི་འདི་དག་བྱང་ཆུབ་སེམས་དཔས་བསྒོམ་པར་བྱའོ། །གསང་བ་པའི་བདག་པོ་འདི་ནི་དེ་བཞིན་གཤེགས་པ་ཐམས་ཅད་ཀྱི་སོ་སོ་ཡང་དག་པར་རིག་པ་ལ་འཇུག་པ་སྒྲུབ་པའི་ཚུལ་རྣམ་པར་དག་པས་མཉམ་པ་ཉིད་ལ་འཇུག་པའི་གཞི་ཆོས་ཀྱི་རྣམ་གྲངས་ཡིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཆོས་ཀྱི་དབྱིངས་རྒྱ་ཆེན་པོ་རབ་འབྱམ་མཐའ་ཡས་པ་བྱིན་གྱིས་བརླབས་ནས།ནམ་མཁའ་དྲི་མ་མེད་པའི་རྒྱལ་པོ་རྣམ་པར་སྨིན་པ་ནམ་མཁའ་ལྟར་རྒྱ་ཆེ་ཞིང་མཐའ་ཡས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དབུའི་གཙུག་ནས་དེ་བཞིན་གཤེགས་པ་ཐམས་ཅད་ཀྱི་ཡུལ་སྣང་བ་ཡུལ་བསམ་གྱིས་མི་ཁྱབ་པ་རབ་འབྱམ་སྟོན་པ་ཞེས་བྱ་བའི་འོད་ཟེར་བྱུང་ངོ་། །བྱུང་ནས་ཀྱང་དེ་བཞིན་གཤེགས་པ་ཐམས་ཅད་དང་རྗེས་སུ་མཐུན་པ་བསྟན་ཏེ། བཅོམ་ལྡན་འདས་རྣམ་པར་སྣང་མཛད་ལ་བསྐོར་བ་ལན་བརྒྱ་སྟོང་དུ་མ་བྱས་ཏེ་འཇིག་རྟེན་གྱི་ཁམས་རྣམ་པ་བཅུར་སྣང་བ་ཆེན་པོས་གསལ་བར་བྱས་ཏེ་སྟེང་གི་ནམ་མཁའ་ལ་གནས་ནས། གསང་བའི་སྙིང་པོའི་དཀྱིལ་འཁོར་ཆེན་པོ་བཤམ་པ་བྱས་ཏེ་དམ་ཚིག་ཆེན་པོ་གསུམ་གྱི་སྣང་བས། འཇིག་རྟེན་གྱི་ཁམས་ནམ་མཁའི་དབྱིངས་ཀྱི་མཐས་ཀླས་པ་སྣང་བར་བྱས་ནས་སེམས་ཅན་གྱི་ཁམས་རྣམས་ལ་དམ་ཚིག་གསུམ་གྱི་མྱུ་གུ་སྐྱེ་བར་བྱིན་གྱིས་བརླབས་ཏེ། འོད་ཟེར་དག་ནམ་མཁའ་ལས་ལྷགས་ནས་ཕྱག་ན་རྡོ་རྗེའི་སྤྱི་བོར་བབས་སོ། །འོད་ཟེར་དག་ཕྱག་ན་རྡོ་རྗེའི་སྤྱི་བོར་བབས་མ་ཐག་ཏུ་དེ་ནས་དེའི་མོད་ལ་གསང་བ་པའི་བདག་པོ་ཕྱག་ན་རྡོ་རྗེས་དེ་བཞིན་གཤེགས་པའི་ཡུལ་འབྱུང་བ་ཞེས་བྱ་བའི་ཏིང་ངེ་འཛིན་ཆེན་པོ་ཐོབ་པར་གྱུར་ཏེ། དེ་ཐོབ་པས་དེ་བཞིན་གཤེགས་པའི་ས་ལ་གཉིས་སུ་མེད་པར་གནས་པ་ཐོབ་པར་གྱུར་ཏོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེ་དེ་བཞིན་གཤེགས་པའི་ཡེ་ཤེས་ཀྱི་དགའ་བས་ཡིད་ཚིམ་པར་གྱུར་ནས། མིག་གཉིས་མི་འཛུམས་པར་བཅོམ་ལྡན་འདས་རྣམ་པར་སྣང་མཛད་ལ་ཡུད་ཙམ་ཞིག་

བལྟས་ཏེ་བཞིན་ཅུང་ཟད་འཛུམ་ཞིང་བཅོམ་ལྡན་འདས་ལ་ཡིད་ཀྱིས་ཞུས་པ།ཅི་ལྟར་དེ་བཞིན་གཤེགས་པ་ལགས། །ཅི་ལྟར་རྒྱལ་བ་དམ་པ་ལགས། །ཅི་ལྟར་བྱང་ཆུབ་སེམས་དཔའ་ལགས། །ཅི་ལྟར་སངས་རྒྱས་ཞེས་ཀྱང་བགྱི། །མགོན་པོ་བདག་གི་ཐེ་ཙོམ་འདི། །ཐུབ་པ་ཆེན་པོས་བསལ་དུ་གསོལ། །བྱང་ཆུབ་སེམས་དཔའ་གྲགས་ཆེན་རྣམས། །ཐེ་ཙོམ་ཡིད་གཉིས་སྤངས་ནས་སུ། །སྤྱད་པའི་རྒྱལ་པོ་ཐེག་ཆེན་ལ། །རྒྱལ་བའི་སྲས་ནི་སྤྱོད་པར་འགྱུར། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ། །ཁྱོད་དོན་འདི་ལྟ་བུ་འདྲི་བར་སེམས་པ་ནི་ལེགས་སོ་ལེགས་སོ། །གསང་བ་པའི་བདག་པོ་ཆོས་ཀྱི་ཚུལ་སྒྲུབ་པའི་གཞི་འདི་ལྟ་བུ་ཐོས་ནས་སྐྲག་པར་མི་འགྱུར། ཤིན་ཏུ་སྐྲག་པར་མི་འགྱུར་བའི་སེམས་ཅན་དེ་ནི་དཀོན་ནོ། །གསང་བ་པའི་བདག་པོ་རིགས་ཀྱི་བུ་དེ་དག་ནི་སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན་གྱི། སངས་རྒྱས་སྟོང་ཕྲག་དུ་མ་ལ་དགེ་བའི་རྩ་བ་བསྐྲུན་པ་ཡིན་པར་རིག་པར་བྱའོ། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་ཐོག་མ་ཉིད་དུ་ཐེག་པ་ཆེན་པོ་རྟོགས་པར་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་ཐེག་པ་ཆེན་པོ་རྟོགས་པར་ཁོང་དུ་ཆུད་པའི་བྱང་ཆུབ་སེམས་དཔའ་ནི་ཚེགས་ཆུང་ངུ་ཁོ་ནས་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱོད་པ་སྒྲུབ་པར་འགྱུར་རོ། །འདི་ལྟར་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་འདི་ནི་མངོན་པར་ཤེས་པ་ཆེན་པོ་ཡོངས་སུ་སྦྱོང་བ་ཡིན་ནོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། གསང་བ་པའི་བདག་པོ་ཕྱག་ན་རྡོ་རྗེ་བཅོམ་ལྡན་འདས་ལ་ཉན་ཏོ། །དེ་ལ་བཅོམ་ལྡན་འདས་ཀྱིས་འདི་སྐད་

ཅེས་བཀའ་སྩལ་ཏོ། །ཆོས་རྣམས་ནམ་མཁའི་མཚན་ཉིད་དེ། །གཉིས་སུ་མེད་ཅིང་མཚན་ཉིད་གཅིག །གཞི་བཅུས་རྫོགས་པར་སངས་རྒྱས་པ། །དེ་ནི་རྫོགས་སངས་རྒྱས་ཞེས་བྱ། །འདུ་ཤེས་ཙམ་ཡང་སྤངས་པའི་ཕྱིར། །རང་གི་ངོ་བོ་བསྟན་མེད་ཅིང་། །ཡེ་ཤེས་ཀྱིས་ནི་རང་རིག་པ། །དེ་ནི་དེ་བཞིན་གཤེགས་པར་བཤད། །བྱང་ཆུབ་ནམ་མཁའི་མཚན་ཉིད་དེ། །རྟོག་པ་ཐམས་ཅད་སྤངས་པ་ཡིན། །གང་ཞིག་དེ་རྟོགས་འདོད་པ་དེས། །བྱང་ཆུབ་སེམས་དཔའ་ཞེས་བྱའོ། །ས་བཅུ་པོ་དག་བསྒྲུབས་ནས་ནི། །དབང་རྣམས་རྟོགས་པར་ཁོང་དུ་ཆུད། །ཆོས་རྣམས་སྟོང་པ་སྒྱུ་མ་བཞིན། །གང་གིས་འདིར་ནི་ཀུན་རྟོགས་ཤིང་། །འཇིག་རྟེན་ཀུན་གྱི་རྒྱུད་ཤེས་པ། །སངས་རྒྱས་ཞེས་ནི་བྱ་བ་ཡིན། །གསང་བ་པའི་བདག་པོ་དེ་ལྟར་དེ་དག་ནི་བྱང་ཆུབ་སེམས་དཔའི་སེམས་ཀྱི་གནས་སྐབས་རྣམ་པར་གཞག་པ་ཡིན་ནོ། །གསང་བ་པའི་བདག་པོ་རྣམ་གྲངས་དེས་ཀྱང་འདི་ལྟར་བྱང་ཆུབ་སེམས་དཔའ་རྣམས་ཀྱི་རང་གི་སེམས་རྣམ་པར་གཞག་པ་སྒྲུབ་པ་ནི་མེད་པར་རིག་པར་བྱའོ། །དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཐེག་པ་ཆེན་པོ་མངོན་པར་རྟོགས་པའི་ཆོས་ཀྱི་རྣམ་གྲངས་ལེགས་པར་བཤད་པ་ནི་བཅོམ་ལྡན་འདས་ངོ་མཚར་ལགས་སོ། །བདེ་བར་གཤེགས་པ་ཤིན་ཏུ་ངོ་མཚར་ལགས་སོ། །བཅོམ་ལྡན་འདས་རིགས་ཀྱི་བུ་དེ་དག་ནི་འགྲོ་བ་ལྔའི་འཁོར་བ་ན་འཁོར་བའི་ཚེ་ངན་འགྲོ་ངན་སོང་གི་འཇིགས་པའམ་བདུད་ཀྱི་ལས་ཀྱི་འཇིགས་པའམ་མི་ཁོམ་པར་སྐྱེ་བའི་འཇིགས་པ་མཆིས་པར་བདག་མི་སྨྲའོ། །ཅིའི་སླད་དུ་ཞེ་ན། བྱང་ཆུབ་སེམས་དཔའ་ཆེན་པོ་ཐེག་པ་ཆེན་པོ་མངོན་པར་རྟོགས་པ་ལ་གནས་པ་ནི་འཇིག་རྟེན་དང་ལྷན་ཅིག་ཏུ་གནས་ཀྱང་འཇིག་རྟེན་ལས་འདས་པའི་ལམ་མི་གཏོང་ཞིང་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཐབས་ཀྱིས་འཇིག་རྟེན་གྱི་བྱ་བ་ཐམས་ཅད་ཀྱང་སྟོན་ཏོ། །

ཐེག་པ་ཆེན་པོ་མངོན་པར་རྟོགས་པ་ལས་ཡོངས་སུ་ཉམས་པར་ཡང་མི་འགྱུར་རོ། །དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་གསང་བ་ཆེན་པོའི་སྙིང་པོའི་དཀྱིལ་འཁོར་བཤད་དུ་གསོལ། དེ་ནི་སྐྱེ་བོ་མང་པོ་ལ་ཕན་པ་དང་བདེ་བར་འགྱུར་ལགས་སོ། །དེ་སྐད་ཅེས་གསོལ་པ་དེང་།བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེའི་ཕྱིར་ཉོན་ལ་ལེགས་པར་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་གསང་བའི་སྙིང་པོའི་དཀྱིལ་འཁོར་བཤམ་པ་བཤད་པར་བྱའོ། །དེ་ལ་རེ་ཞིག་སློབ་དཔོན་དམ་ཚིག་གསུམ་རྣམ་པར་དབྱེ་བ་ལ་མཁས་ཤིང་བདག་ཀྱང་དམ་ཚིག་གསུམ་ལ་གནས་པ་ཡིན་ནོ། །གསང་བ་པའི་བདག་པོ། །དེ་ལ་དམ་ཚིག་གསུམ་པོ་དེ་གང་ཞེ་ན་ཆོས་ཀྱི་ཁྱད་པར་གསུམ་སྟེ་ཆོས་ཀྱི་ཁྱད་པར་གང་ལ་དུས་གསུམ་དུ་གཏོགས་པའི་དུས་ན་སྒྲིབ་པ་མེད་པའི་ཚུལ་གྱིས་འཇུག་པ་དེ་ནི་དམ་ཚིག་གསུམ་ཞེས་བྱའོ། །གསང་བ་པའི་བདག་པོ་ཆོས་ཀྱི་ཁྱད་པར་དེ་ཡང་གང་ཞེ་ན། གསང་བ་པའི་བདག་པོ་སེམས་ནི་ཆོས་ཀྱི་ཁྱད་པར་ཏེ། གསང་བ་པའི་བདག་པོ་དེ་ལ་སེམས་ཀྱི་རྣམ་པར་རྟོག་པ་ཐམས་ཅད་མེད་པ་ཡོངས་སུ་ཤེས་པའི་གང་ཡིན་པ་དེ་ནི་རྫོགས་པའི་སངས་རྒྱས་མཐོང་བའོ། །འདིའི་ཆོས་ཀྱི་དབྱིངས་རྟོགས་པའི་རང་རིག་པའི་རྣམ་པ་གང་ཡིན་པ་དེ་ནི་དེ་བཞིན་གཤེགས་པའི་མཚན་ཉིད་ཡིན་ནོ། །གང་ལུས་དང་ངག་དང་ཡིད་འཇུག་པ་དེ་ནི་སྤྲུལ་པའི་མཚན་ཉིད་ཡིན་ནོ། །གསང་བ་པའི་བདག་པོ་དེ་ནི་དམ་ཚིག་གསུམ་ཡིན་ཏེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་མ་རྟོགས་ན་མུ་སྟེགས་ཅན་གཞན་དག་གིས་ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱིས་པ་མི་ཤེས་པས་བསྒྲིབས་པ། །ཚུལ་འདི་ཤེས་པར་མ་གྱུར་རྣམས། །སངས་རྒྱས་གཞན་དུ་ཚོལ་བར་བྱེད། །འདི་ན་གནས་པར་ཡོང་མ་རྟོགས། །འཇིག་རྟེན་ཁམས་གཞན་གང་ནས་ཀྱང་། །སངས་རྒྱས་རྙེད་པར་ཡོད་

མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་བསྟན་ཏོ། །དེ་ལྟ་བས་ན་རྣལ་འབྱོར་པས། །རྟག་ཏུ་ཡིད་གཉིས་སྤངས་ནས་ནི། །སེམས་ཀྱི་ཁྱད་པར་རྣམ་གསུམ་བརྟག །དེ་ནས་དམ་ཚིག་གསུམ་ཤེས་འགྱུར། ། དེ་ནས་ཡང་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་གསུངས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་དེ་ལ་སློབ་དཔོན་དམ་ཚིག་གསུམ་ཤེས་པར་བྱ་བ་ལ་མཁས་པས་བདག་ཉིད་ཆོས་ཀྱི་དབྱིངས་སུ་མོས་པར་བྱས་ལ་དེ་ལ་དམིགས་པའི་སྦྱོར་བས་ས་གཞི་རྣམ་པར་སྦྱང་བར་བྱའོ། །དེ་ལྟར་དེས་ས་གཞི་རྣམ་པར་སྦྱངས་ནས་ནམ་མཁའི་དབྱིངས་ལྟ་བུ་ལ་ཡང་དག་པར་གཞོལ་བས་བདག་ནི་ཆོས་ཀྱི་དབྱིངས་སྒྲིབ་པ་མེད་པའི་ཡེ་ཤེས་ཀྱི་ཡུལ་ཡིན་ནོ་སྙམ་དུ་བདག་ཉིད་རྣམ་པར་སྣང་མཛད་དུ་བྱིན་གྱིས་བརླབ་པོ། །དེ་ལྟར་བདག་ཉིད་བྱིན་གྱིས་བརླབས་ལ། ཆོས་ཀྱི་དབྱིངས་རྣམ་པར་དག་པའི་ཕྱིར། གཉིས་སུ་མེད་པའི་སྦྱོར་བས་བདག་གི་ལུས་ལ་དཀྱིལ་འཁོར་ཡིན་པའམ། དཀྱིལ་འཁོར་བདག་གི་ལུས་ཡིན་པར་བྱིན་གྱིས་བརླབས་ཏེ། རང་གི་སེམས་ཀྱིས་བྱས་པའི་ཚོན་སྣ་ལྔའི་ཕྱེ་མའམ་གཞན་ཡང་རུང་སྟེ་ཆོ་ག་སྔ་མས་རྣམ་པར་དབྱེ་བར་བྱའོ། །གསང་བ་པའི་བདག་པོ། །དེ་ནི་སེམས་ཅན་སྡུག་བསྔལ་བ་རྣམས་ཡོངས་སུ་བསྐྱབ་པའི་ཕྱིར། གསང་བ་པའི་བདག་པོ་སྙིང་པོའི་དམ་ཚིག་ལ་འཇུག་པའི་ཆོ་ག་བྱའོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་བྱིན་གྱིས་བརླབས་པ་གང་གིས། བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་དེ་བཞིན་གཤེགས་པའི་ཡེ་ཤེས་ཀྱང་ཚེ་འདི་ཉིད་གཅིག་པུས་ཐོབ་པར་འགྱུར་བ་དེ་ལྟ་བུའི་ཆོས་ཀྱི་བྱིན་གྱིས་བརླབ་པ་མཛད་དོ། །དེ་ནས་བཅོམ་ལྡན་འདས་ཀྱིས་བྱམས་པ་ཆེན་པོ་དང་ཐུགས་རྗེ་ཆེན་པོའི་སྤྱན་གཉིས་ཀྱིས་སེམས་ཅན་གྱི་ཁམས་ལ་གཟིགས་ནས། གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་བྱིན་གྱིས་བརླབས་སྒྲུབ་པའི་གཞི་གང་གིས་དེ་

བཞིན་གཤེགས་པ་རྣམས་ཐམས་ཅད་མཁྱེན་པའི་ཡེ་ཤེས་ཐོབ་པར་དཀའ་བ་ཡང་བསོད་ནམས་མ་བྱས་པའི་སེམས་ཅན་རྣམས་ཀྱི་ཕ་རོལ་གྱི་རྒྱུད་ལ་ཡང་རབ་ཏུ་འཇོག་པར་འགྱུར་བ་ཆོས་ཀྱི་དབྱིངས་ཀྱི་བྱིན་གྱིས་བརླབས་ཀྱི་གཞི་ཉོན་ཅིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་བཅོམ་ལྡན་འདས་སྟོབས་བཅུའི་སྟོབས་དང་ལྡན་པ་མི་འཇིགས་པ་བཞིའི་ཁྱུ་མཆོག་སེང་གེའི་སྒྲ་སྒྲོགས་པ་རྣམས་ཀྱི་ཡེ་ཤེས་ལ་མངའ་བ་ནི་ངོ་མཚར་ཏོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་མཁས་པའི་རང་བཞིན་ཅན་སུ་ཞིག་ཐམས་ཅད་མཁྱེན་པའི་ཡེ་ཤེས་འདི་འདྲ་བའི་དོན་དུ་ནམ་མཁའི་དབྱིངས་ཀྱི་མཐས་ཀླས་པའི་བསྐལ་པར་ཡང་སེམས་ཅན་དམྱལ་བའི་སྡུག་བསྔལ་མི་བཟད་པ་ཡང་བཟོད་པར་མི་བགྱིད། བཅོམ་ལྡན་འདས་དེ་ལྟ་བས་ན་རིགས་ཀྱི་བུ་མཁས་པ་འདི་ལ་སློབ་པར་འཚལ་བས་དེ་བཞིན་གཤེགས་པའི་རྗེས་སུ་བསླབ་པར་བགྱིའོ། །བཅོམ་ལྡན་འདས་དེ་ལྟ་བས་ན་ལེགས་ལགས་ཀྱིས་བདག་ཅག་ལ་ཐུགས་བརྩེ་བའི་སླད་དུ་ཆོས་ཀྱི་དབྱིངས་ཀྱི་བྱིན་གྱིས་བརླབས་ཀྱི་གཞི་དེ་དག་བཤད་དུ་གསོལ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ནམ་མཁའི་མཚན་ཉིད་དང་མཚུངས་པའི་ཕྱིར་ཆོས་ཐམས་ཅད་ནི་མཚན་ཉིད་གཅིག་པའོ། །ཆོས་ཀྱི་དབྱིངས་དམིགས་སུ་མེད་པའི་ཕྱིར་ཆོས་ཐམས་ཅད་ནི་སྟོང་པ་ཉིད་ཀྱི་བྱིན་གྱིས་བརླབས་ཀྱི་མཚན་ཉིད་དོ། །གསང་བ་པའི་བདག་པོ་གང་དག་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ནས་བྱང་ཆུབ་ཀྱི་སྙིང་པོ་ལ་འདུག་གི་བར་དུ་བསྒོམས་ཤིང་ལན་མང་དུ་བྱས་པའི་ཆོས་ཀྱི་དབྱིངས་ཀྱི་བྱིན་གྱིས་བརླབས་ཀྱི་གཞི་ཡིན་ཏེ་གསང་བ་པའི་བདག་པོ་དེ་ལྟ་བས་ན་དེ་བཞིན་གཤེགས་པ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་དེ་ཡིན་ནོ། །རིགས་ཀྱི་བུ་ང་བྱང་ཆུབ་ཀྱི་སྙིང་པོ་ན་འདུག་པ་ན་ཡང་འདི་དག་

སེམས་སེམས་པ་ལས་རྣམ་པར་རྟོག་པ་ཐམས་ཅད་སྤངས་པ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཐོབ་པར་གྱུར་ཏོ། །སྒྲ་དབྱངས་མཐའ་ཡས་པར་སྒྲོགས་པ་ཞེས་བྱ་བའི་གཟུངས་ཀྱི་སྒོ་དང་། བདུད་བཞི་ཕམ་པར་བྱེད་པའི་དབྱངས་ཞེས་བྱ་བའི་རིག་སྔགས་ཀྱི་རྒྱལ་མོ་གནས་མེད་པ། ནམ་མཁའི་སྤྱོད་ཡུལ་མཚན་ཉིད་མེད་པ་འགྲོ་བ་པོ་མེད་པ་བྱེད་པ་པོ་དང་ཚོར་བ་པོ་མེད་པ་འཇིག་རྟེན་གྱི་འགྲོ་བ་ཐམས་ཅད་ལས་འདས་པ་ཡང་ཐོབ་པར་གྱུར་ཏོ། །གསང་བ་པའི་བདག་པོ་དེ་ལ་རིག་སྔགས་ཀྱི་རྒྱལ་མོ་ཆེན་མོ་མཐའ་ཡས་ཤིང་རབ་འབྱམ་རྒྱ་ཆེ་བ་བསྟན་པར་བྱ་བ་དེ་དག་གང་ཞེ་ན། ན་མ་སྟྲཻ་ཡ་དྷྭཱི་ཀཱ་ནཱཾ་བུདྡྷ་ག་ཏེ་པྲ་ཏིཥྛི་ཏེ་བྷྱཿ། ཨ་པྲ་ཏི་ཧ་ཏ་ཤཱ་ས་ནེ་བྷྱཿ། མ་ཧཱ་ཀྲྀ་པེ་བྷྱཿ། ག་ག་ན་ཨ་མ་ལ་རཱུ་པ་དྷཱ་ར་ཎཱི་ཏ་ཐཱ་རཱུ་པ་བི་བྷ་བ་བི་བྷ་བེ་ན། པ་ར་རཱུ་པ་དྷ་རེ་མ་ཧཱ་ཀྲྀ་པེ་བི་མ་ལེ། སརྦྦ་ག་ཏེ་བི་ཤོ་དྷ་ནི། དེ་ལ་འདི་ནི་རྡོ་རྗེའི་ཚིག་མཉམ་པ་མེད་པ་ཡིན་ནོ། །ཨ་མ་ཧཱ་བི་སྨ་ཡེ་ཧཱུྃ་ཁྃ། ཕྱག་ན་རྡོ་རྗེ་འདི་ནི་ནམ་མཁའ་ལྟར་དྲི་མ་མེད་པ་ཞེས་བྱ་བའི་རིག་སྔགས་ཀྱི་རྒྱལ་མོ་སྟེ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱིས་བྱིན་དུ་བརླབས་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་ཡུམ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་རྣམས་གང་ན་རིག་སྔགས་ཀྱི་རྒྱལ་མོ་འདི་མི་འཆད་ཅིང་མི་བརྗོད་པའི་སངས་རྒྱས་ཀྱི་ཞིང་དེ་ངས་མ་མཐོང་ངོ་། །གསང་བ་པའི་བདག་པོ་རྣམ་གྲངས་དེས་ཀྱང་འདི་ལྟར་གསང་བའི་སྙིང་པོའི་དཀྱིལ་འཁོར་དང་། ཕྱག་རྒྱ་དང་། དམ་ཚིག་འདི་ལ་འཇུག་པར་འདོད་པའི་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས། གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་རྒྱལ་པོ་འདི་ལ་མངོན་པར་བརྩོན་པར་བྱའོ་ཞེས་བྱ་བར་རིག་པར་བྱའོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་

དཔའི་སྤྱད་པ་སྤྱོད་པ་རྣམས་གསང་སྔགས་ཀྱི་རང་བཞིན་ཅི་ལྟར་སྟོན། ཆོས་ཐམས་ཅད་ལ་དབང་ཐོབ་པའི་བར་དུ་ཅི་ལྟར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་འདི་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པས་སློབ་དཔོན་ལས་དབང་ནོད་པར་བྱའོ། །འདི་སྙམ་དུ་སློབ་དཔོན་འདི་ནི་བདག་གི་སྟོན་པ་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བསྐུལ་བའོ། །སྙམ་དུ་ཡང་སེམས་བསྐྱེད་པར་བྱའོ། །དེ་དེ་ནས་ཐལ་མོ་སྦྱར་ཏེ་ཉེ་བར་སོང་ལ་གསོལ་བ་གདབ་པོ། །སློབ་དཔོན་གྱིས་ཀྱང་དེ་དོན་དུ་གཉེར་བར་ཤེས་ནས་སྙིང་རྗེ་ཆེན་པོ་མངོན་སུམ་དུ་བྱས་ཏེ་ཚིག་འདི་སྐད་ཅེས་སྨྲ་བར་བྱའོ། །རིགས་ཀྱི་བུ་ལོངས་དེ་བཞིན་གཤེགས་པའི་སྤྱན་བླ་ན་མེད་པ་དེ་ཁྱོད་ལ་བསྟན་པར་བྱའོ། །དེ་ནས་ས་གཞི་ཡིད་དུ་འོང་བ་བརྟགས་ལ་ཆོ་ག་སྔ་མས་ས་གཞི་སྦྱངས་ཏེ། དཀྱིལ་འཁོར་གྲུ་བཞི་ལ་སྒོ་གཅིག་པ་ལྷ་རྣམ་པར་དབྱེ་བའི་གནས་ལེགས་པར་བརྟགས་པ། མཆོད་པའི་གནས་རྣམ་པ་སྣ་ཚོགས་བཀོད་པ་བསྒྲུབས་པ། སྤོས་ཆུ་དྲི་ཞིམ་པོས་བཀང་བའི་བུམ་པ་དབུས་སུ་བཞག་པ་བྲིས་ལ་སློབ་མ་པདྨའི་སྟེང་ན་འདུག་པ། རང་གི་ལྷའི་གཟུགས་བདག་ཡིན་པར་དམིགས་པ་ལ་གནས་པ་ཡིད་བྱང་ཆུབ་ཀྱི་སེམས་སུ་གྱུར་པ། འགྲོ་བ་མཐའ་དག་ཡོངས་སུ་བསྐྱབ་པའི་བསམ་པ་ཅན། དེ་བཞིན་གཤེགས་པའི་རིགས་སུ་འགྱུར་བར་འདོད་པ་དག་བུམ་པ་དེས་སྤྱི་བོ་ནས་དབང་བསྐུར་རོ། །འདི་སྐད་དུ་རིགས་ཀྱི་བུ་ཁྱོད་དེ་བཞིན་གཤེགས་པའི་རིགས་སུ་སྐྱེས་སོ། །དེ་བཞིན་གཤེགས་པའི་སྤྱན་ཕྱེའོ་ཞེས་ཀྱང་སྨྲ་བར་བྱའོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་ལྷའི་གཟུགས་ནི་དེ་བཞིན་གཤེགས་པའི་སྐུ་ཅི་སྙེད་པའམ། སེམས་དཔའ་མཐའ་

ཡས་པ་ཐམས་ཅད་ཀྱི་ཆ་ལུགས་ཀྱི་བྱེ་བྲག་ཀྱང་རུང་སྟེ། གསང་སྔགས་དང་། ཕྱག་རྒྱས་བྱིན་གྱིས་བརླབས་པ་ལས་འགྱུར་བར་རིག་པར་བྱའོ། །གསང་བ་པའི་བདག་པོ་གསང་སྔགས་དང་། ཕྱག་རྒྱས་བྱིན་གྱིས་བརླབ་པ་ཡང་ཅི་ལྟ་བུ་ཡིན་ཞེ་ན། གསང་བ་པའི་བདག་པོ་དེ་ལ་དབང་བསྐུར་བའི་ཚེ། སློབ་དཔོན་གྱིས་པདྨའི་ཕྱག་རྒྱས་གདན་སྲ་ཞིང་བརྟན་པ་བསམ་གྱིས་མི་ཁྱབ་པ་རྡོ་རྗེ་ལྟར་མི་ཤིགས་པ་ཡོངས་སུ་བརྟག་པ་ནི། གསེར་རམ་ཟངས་སམ་འཇིམ་པ་ལས་བྱས་པའམ་རི་མོར་བྲིས་པ་གཞག་སྟེ་བྱའོ། །དེའི་སྟེང་ན་འདུག་པ་ལ་ཆོས་ཐམས་ཅད་ལ་དབང་ཐོབ་པར་བྱ་བའི་ཕྱིར། སྤོས་ཆུ་དྲི་ཞིམ་པོས་བཀང་བའི་བུམ་པས་སྤྱི་བོ་ནས་དབང་བསྐུར་བར་བྱའོ། །སློབ་དཔོན་བདག་ཉིད་ཀྱང་ཅི་ལྟར་རྗེས་སུ་མཐུན་པར་མོས་པར་བྱ་བའམ་དེའི་ཕྱག་རྒྱས་རྗེས་སུ་མཐུན་པའི་བྱ་བ་བྱའོ། །ཆོས་ཀྱི་དུང་གི་ཕྱག་རྒྱ་དང་། གསང་སྔགས་ཀྱིས་ཀྱང་དེ་བཞིན་གཤེགས་པའི་གསུང་གི་འཁོར་ལོའི་དཀྱིལ་འཁོར་བྱིན་གྱིས་བརླབ་པར་བྱའོ། །རལ་གྲིའི་ཕྱག་རྒྱ་དང་། གསང་སྔགས་ཀྱི་ནི་འཇིག་ཚོགས་ལ་ལྟ་བ་མཐའ་དག་གཞོམ་པར་བྱིན་གྱིས་བརླབ་པར་བྱའོ། །དེ་བཞིན་གཤེགས་པའི་ཆོས་ཀྱི་འཁོར་ལོའི་ཕྱག་རྒྱ་དང་། གསང་སྔགས་ཀྱིས་ནི་དེ་བཞིན་གཤེགས་པའི་ཆོས་ཀྱི་འཁོར་ལོ་བྱིན་གྱིས་བརླབ་པར་བྱའོ། །རྡོ་རྗེའི་ཕྱག་རྒྱ་དང་། གསང་སྔགས་ཀྱིས་ནི་མི་ཤེས་པའི་གྲོང་ཁྱེར་གཞིག་པར་བྱིན་གྱིས་བརླབ་པར་བྱའོ། །གཙུག་ཏོར་གྱི་ཕྱག་རྒྱ་དང་། གསང་སྔགས་ཀྱིས་ནི་སྤྱི་གཙུག་བལྟར་མི་སྣང་བ་བྱིན་གྱིས་བརླབ་པར་བྱའོ། །མཛོད་སྤུའི་ཕྱག་རྒྱ་དང་། གསང་སྔགས་ཀྱིས་ནི་མཛོད་སྤུ་དང་ལྡན་པར་བྱིན་གྱིས་བརླབ་པར་བྱའོ། །ཡན་ལག་ཐམས་ཅད་བྱུང་བའི་ཕྱག་རྒྱ་དང་། གསང་སྔགས་ཀྱིས་ནི་ཡན་ལག་ཐམས་ཅད་བྱིན་གྱིས་བརླབ་པར་བྱའོ། །གསང་བ་པའི་བདག་པོ་དེ་ལ་པདྨའི་ཕྱག་རྒྱ་འབྱུང་སྟེ། ལག་པ་གཉིས་གཅིག་ཏུ་སྦྱར་ལ་མཁྲིག་མ་ནས་

བཀྱེད་དེ་སོར་མོ་ཐམས་ཅད་མགོ་མཉམ་པར་བརྐྱང་ངོ་། །ཕྱག་རྒྱ་འདི་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གདན་ཡིན་ཏེ་དམ་པ་མཐུ་ཆེན་པོའོ། །གསང་སྔགས་འདི་ནི་ངོ་མཚར་ཆེ་བ་ཐམས་ཅད་ཀྱི་སྒོ་སྟེ། ན་མཿས་མནྟ་བུདྡྷཱ་ནཱན། ག་ག་ནཱ་མ་ལ་པྲ་བྷཱ་བཛྲཱ་བྷེ་དྱ་ནཱ་མ་ཧ་ཀྲྀ་པཱཏྨ་ཀཿ། དེ་ལ་འདི་དག་ནི་རྡོ་རྗེའི་ཚིག་མཉམ་པ་མེད་པའོ། །ཨ་ཏི་བིསྨ་ཡ་མ་ཧཱ་ཀྲྀ་པཱཏྨ་ཛཿཧཱུྃ། ལག་པ་གཉིས་བསྣོལ་ཏེ་རྒྱབ་སྦྱར་ལ་སོར་མོ་རྣམས་ཕན་ཚུན་སླས་པའི་ཚུལ་དུ་བསྣོལ་ཏེ། གཡོན་པའི་མཐེ་བོ་རྒྱབ་ཏུ་བཟློག་ལ་གཡས་པའི་མཐེ་བོས་སེན་མོ་ལ་སྦྱར་རོ། །རྒྱ་འདི་ཕྱག་རྒྱ་ཆེན་པོ་སྟེ། །ཆོས་ཀྱི་འཁོར་ལོ་ཞེས་སུ་བསྒྲགས། །འཇིག་རྟེན་མགོན་པོ་སྐྱོབ་རྣམས་ཀྱིས། །འཁོར་ལོ་དམ་པ་འདི་བསྐོར་རོ། །ན་མཿས་མནྟ་བུདྡྷཱ་ནཱན། ཏ་ཐཱ་ག་ཏ་ཨ་མྲྀ་ཏེ་བི་ཛ་ཡ་བརྞ་ན་སརྦྦ་ཛ་ཡ་ག་ཏ་དྷརྠ་ཀཱ་རི་མ་ཧཱ་ཀྲྀ་པེ་ཧཱུྃ་ཧཾ་ཏྲ་ཧི་མ་ཧཱད་བྷཱུ་ཏེ་ཧཱུྃ། གསང་བའི་ཕྱག་རྒྱ་ལས་མཐེ་བོ་གཉིས་ལག་མཐིལ་དུ་བཅུག་ལ། མཛུབ་མོ་གཉིས་ཀྱིས་རྩ་བ་དཀྲིས་ཏེ་ལྷག་མ་རྣམས་སོ་ན་གཞག་ལ་བསྒྲེང་ངོ་། །འཇིག་རྟེན་མགོན་པོ་སྐྱོབ་རྣམས་ཀྱིས། །ཕྱག་རྒྱ་སེམས་ཅན་ཐམས་ཅད་ཀྱི། །དོན་རྣམས་རྟག་ཏུ་མྱུར་བྱེད་འདི། །ཆོས་ཀྱི་དུང་ཞེས་རྣམ་པར་གྲགས། །ན་མཿས་མནྟ་བུདྡྷཱ་ནཱན། ཏྱ་ད་དྷྭ་བྷ་ག་བ་ཏི་པྲ་ཏིཥྛཱ་ཏེ། ཨ་ནནྟ་རུ་ས་ར་བི་ནིར་གྷོ་ཥྃ། སརྦ་ཏ་ཐཱ་ག་ཏ་བཱཀ་པྲ་ས་ར་བིསྨ་ཡ་ཀ་དྷ་ར་མ་ཧཱ་དྷ་ར་མ་ཧཱ་དྷ་ར་མཥྐ་སརྦྦ་སཏྭ་སནྟོ་ཤ་ནཱ་རཱ་མ་ཧཱ་མ་ཧཱ་ཧཱུྃ། གང་བའི་ཕྱག་རྒྱ་དེ་ཉིད་ལས་མཛུབ་མོ་གཉིས་བཀུག་སྟེ་མཐེ་བོའི་སེན་མོའི་སྟེང་དུ་རལ་གྲིའི་ཚུལ་དུ་གཟུང་ངོ་། །ཕྱག་རྒྱ་རབ་ཏུ་མཐུ་ཆེན་འདི། །རལ་གྲིའི་ཕྱག་རྒྱར་རྣམ་པར་གྲགས། །སེམས་ཅན་ཀུན་གྱི་འཇིགས་ཚོགས་ལྟ། ། ལྷན་ཅིག་སྐྱེས་པའང་གཅོད་པ་ཡིན། །ན་མཿས་མནྟ་བུདྡྷཱ་ནཱན། ཨ་མ་ཧཱ་ཁཌྒ་པྲཛྙཱ་ཏེ་ཛི་ཏ་སཏ་ཀཱ་ཡ་དྲྀཥྚི་ཙྪིནྡ་ན་ཀཱ་ར། ཏ་ཐཱ་ག་ཏཱ་དྷི་མུཀྟི་ནིར་ཛཱ་ཏ་བི་དྷུ་ཏ་སྃ་ཀལྤ་མ་ཧཱ་མ་ཧཱ་ཧཱུྃ་ཛཿ། ཕྱག་རྒྱ་དེ་ཉིད་ལས་མཛུབ་མོ་གཉིས་ཕྱི་རོལ་དུ་བརྐྱང་སྟེ། གུང་མོ་

གཉིས་ཀྱི་ཚིགས་གསུམ་པར་ནས་གང་ཙམ་གྱིས་མ་རེག་པར་བཟུང་ལ། རྡོ་རྗེ་ལྟ་བུར་བྱས་ཏེ་མཐེ་བོ་དང་སྲིན་ལག་དང་མཐེའུ་ཆུང་གཉིས་ནང་དུ་གཞུག་གོ །སངས་རྒྱས་འཇིག་རྟེན་མགོན་པོ་ཡི། །ཕྱག་རྒྱ་རབ་ཏུ་བསྒྲགས་པ་འདི། །མི་ཤེས་གྲོང་ཁྱེར་འཇིག་པ་ཡི། །རྡོ་རྗེའི་ཕྱག་རྒྱར་རྣམ་པར་གྲགས། །དེའི་གསང་སྔགས་ནི། ན་མཿས་མནྟ་བུདྡྷཱ་ནཱན། མ་ཧཱ་བིསྨ་ཡ་ཏེ་ཛོད་བྷ་བ་མ་ཧཱ་ཙཎྜ་དུར་དན་ཏཱ་ཏྲ་བྷཉྫ་ཧཱ། རྡོ་རྗེའི་ཕྱག་རྒྱ་དེ་ཉིད་ལས་མཛུབ་མོ་གཉིས་གུང་མོ་གཉིས་ཀྱི་ངོས་སུ་གཙུག་ཏོར་ལྟ་བུར་གཟུང་ངོ་། །འདི་ནི་གཙུག་ཏོར་ཕྱག་རྒྱ་སྟེ། །འཇིག་རྟེན་མགོན་པོ་སྐྱོབ་པ་ཡིན། །གང་གིས་ཕྱག་རྒྱ་འདི་བཅིངས་པ། །དེ་ལ་འདི་ནི་གཙུག་ཏོར་འགྱུར། །དེའི་གསང་སྔགས་ནི། ན་མཿས་མནྟ་བུདྡྷཱ་ནཱན། སརྦྦ་ཏྲ་ཨ་པྲ་ཏི་ཧ་ཏ་བྷ་བ་ཏི་དྷརྨྨ་ཏཱ་བ་ལི་ནཱན། སརྦྦ་ཏ་ཐཱ་ག་ཏ་ནོ་དུ་དྷརྱ་བ་ཤ་ཡ། མ་ཧཱ་བུདྷཱ་སརྦྦ་ཏ་ཐཱ་ག་ཏ། ཨ་དྷིཥྛཱ་ན་ཨ་དྷིཥྛཱ་ཏེ་སྥུ་ར་མ་ཧཱ་མ་ཧོཥྞཱི་ཥ་སྭཱ་ཧཱ། ལག་པ་གཡས་པ་ཁུ་ཚུར་བཅངས་ལ་སྨིན་མཚམས་སུ་གཟུང་ངོ་། །རྒྱ་འདི་རྒྱལ་བ་མཆོག་རྣམས་ཀྱི། །མཛོད་སྤུར་རྟག་ཏུ་རྣམ་པར་བསྒྲགས། །དེའི་སྔགས་ནི། ན་མཿས་མནྟ་བུདྡྷཱ་ནཱན། ཨ་ཤི་ཁེན་དུ་བ་མ་པྲ་བྷ་སརྦྦ་སཏྭ་ཀླེ་ཤ་སནྟ་པ་པྲ་ཤ་མ་ནཱ་ག་ར་མ་ཧཱ་ཏི་དྷ་ར། སརྦྦ་ཏ་ཐཱ་ག་ཏ་ཨ་ལྃ་ཀཱ་ར་མ་ཧཱ་པུ་རུ་ཥ་རཱུ་པ་དྷ་ར་ཀ་ཀོ་ཏི་ག་ཏ་སྭཱ་ཧཱ། གསང་བ་པའི་བདག་པོ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་སངས་རྒྱས་ཀྱི་བྱ་བ་ལ་ཉེ་བར་གནས་པ་དེ་གང་ཡིན་པ་དེ་དག་ནི་གསང་སྔགས་དང་ཕྱག་རྒྱ་འདི་དག་ཡིན་ནོ། །གསང་བ་པའི་བདག་པོ་དེ་ལྟ་བས་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའ་གསང་སྔགས་དང་ཕྱག་རྒྱ་འདི་དག་གིས་བྱིན་གྱིས་བརླབས་པ་རྣམས་ནི་ཡིད་བཞིན་གྱི་ནོར་བུ་གཟུགས་སྣ་ཚོགས་པ་དང་འདྲ་བའི་ལུས་རྣམས་ཀྱིས་སེམས་ཅན་གྱི་ཁམས་རྣམས་སུ་སེམས་ཅན་གདུལ་བའི་དབང་གིས་ཇི་ལྟར་རྗེས་སུ་མཐུན་པའི་ལུས་རྣམས་སྟོན་

ཏོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་བའི་སྙིང་པོའི་དཀྱིལ་འཁོར་ལ་སྡོམ་པ་གང་དང་ལྡན་ན་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལུས་དང་ངག་དང་ཡིད་བསྡམས་ཤིང་སྤྱོད་པར་འགྱུར་བའི་སྡོམ་པ་དང་བྱང་ཆུབ་ཀྱི་སེམས་ཡོད་དོ། །གསང་བ་པའི་བདག་པོ་དེ་ལ་སྡོམ་པ་གང་ཞེ་ན། བསྡམ་པ་ནི་སྡོམ་པ་སྟེ་ལུས་དང་ངག་དང་ཡིད་རྣམས་བསྡུས་ཤིང་ཡོངས་སུ་བསྡུས་པ་ཕྱི་དང་ནང་གི་སྡུག་བསྔལ་སེལ་བར་འགྱུར་བ་དེ་ནི་སྡོམ་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པས་སྡོམ་པ་ཅི་ལྟར་གཟུང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་འདི་ལ་སློབ་དཔོན་གྱིས་ལྷ་སྤྱན་དྲང་བ་བྱས་ལ་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་བཀླགས་ཏེ། དཀྱིལ་འཁོར་ལ་ཕྱོགས་ཏེ་དེར་འདུག་ལ་སློབ་མ་རྣམས་ལ་བོས་ཏེ་འདི་སྐད་དུ་བུ་དུས་གསུམ་དུ་སྒྲིབ་པ་མེད་པར་གནས་པ། དམ་ཚིག་ཆེན་པོ་ལ་འཇུག་པའི་སྡོམ་པ་ནོས་ཤིག་ཅེས་བསྒོ་བར་བྱའོ། །དེས་ཀྱང་ཐལ་མོ་སྦྱར་པུས་མོ་བཙུགས་ཏེ་འདི་སྐད་དུ་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དེང་གི་དུས་འདི་ནས་བཟུང་སྟེ། ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སློབ་དཔོན་གྱིས་བདག་ལ་དམ་ཚིག་ཆེན་པོ་ལ་འཇུག་པའི་སྡོམ་པ་སྩལ་དུ་གསོལ། སྟོན་པའི་བཀའ་སྤྱི་བོས་ནོད་པར་འཚལ་ལོ་ཞེས་སྨྲ་བར་བྱའོ། །དེ་ནས་སློབ་དཔོན་གྱིས་ཀྱང་འདི་སྐད་དུ་རིགས་ཀྱི་བུ་དགོངས་ཤིག །བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་ཁྱོད་ཀྱིས་བྱང་ཆུབ་ཀྱི་སྙིང་པོ་ལ་

འདུག་གི་བར་དུ་ལྷག་པའི་བསམ་པས་སངས་རྒྱས་དང་། བྱང་ཆུབ་སེམས་དཔའ་རྣམས་ལ་བདག་དབུལ་བར་བྱའོ། །གསང་བ་པའི་བདག་པོ་འདི་ནི་དམ་ཚིག་ཆེན་པོ་ལ་འཇུག་པ་ཞེས་བྱ་བའི་སྡོམ་པ་ཡིན་ཏེ། སྡོམ་པ་འདི་ལ་གནས་པའི་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ནི་ཚུལ་ཁྲིམས་ཤིན་ཏུ་བསྡམས་ཤིང་། དེ་བཞིན་གཤེགས་པའི་ཚུལ་ཁྲིམས་བླ་ན་མེད་པ་ལ་རབ་ཏུ་གནས་པ་ཡིན་ནོ། །གསང་བ་པའི་བདག་པོ་དེ་ལྟ་བས་ན་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པའི་སྒོ་འདི་ལ་སློབ་པར་འདོད་པའི་བྱང་ཆུབ་སེམས་དཔས་དམ་ཚིག་ཆེན་པོ་ལ་འཇུག་པ་འདི་ལ་མངོན་པར་བརྩོན་པར་བྱའོ། །གསང་བ་པའི་བདག་པོ་བྱང་ཆུབ་སེམས་དཔའ་སེམས་གང་དང་ལྡན་ན་དེ་བཞིན་གཤེགས་པའི་རིགས་སུ་སྐྱེས་ཤིང་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་རབ་ཏུ་གནས་པར་འགྱུར་བའི་བྱང་ཆུབ་ཀྱི་སེམས་དེ་ཡང་ཉོན་ཅིག །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་བྱང་ཆུབ་ཀྱི་སེམས་དེ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་དེ་ལ་བྱང་ཆུབ་གང་ཞེ་ན། བྱང་ཆུབ་ནི་ནམ་མཁའི་ངོ་བོ་ཉིད་དོ། །ནམ་མཁའ་ཡང་གཟུགས་མེད་བསྟན་དུ་མེད་གཟུང་དུ་མེད་པའོ། །བྱང་ཆུབ་ཀྱི་མཚན་ཉིད་གང་ཡིན་པ་སེམས་ཀྱི་མཚན་ཉིད་ཀྱང་དེ་ཡིན་ནོ། །གསང་བ་པའི་བདག་པོ་དེ་ལྟ་བས་ན་སེམས་དང་ནམ་མཁའ་དང་བྱང་ཆུབ་འདི་དག་ནི་གཉིས་སུ་མེད་དོ། །འདི་ལ་ཆོས་རྣམས་མཉམ་པ་ཉིད་དུ་རྟོགས་པ་ཆོས་ཀྱི་དབྱིངས་ཁོང་དུ་ཆུད་པ་གང་ཡིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིན་ནོ། །དེ་ལ་མི་སྐྱེ་བའི་ཚུལ་དང་མི་དམིགས་པའི་ཚུལ་གྱིས་

སེམས་སྐྱེ་བ་གང་ཡིན་པ་དེ་ནི། གསང་བ་པའི་བདག་པོ་བྱང་ཆུབ་ཀྱི་སེམས་ཞེས་བྱའོ། །གསང་བ་པའི་བདག་པོ་གཞན་ཡང་བྱང་ཆུབ་སེམས་དཔའ་གནས་ཀྱི་གཞི་ལྔས་བྱང་ཆུབ་མངོན་པར་རྟོགས་པར་འགྱུར་ཏེ། ལྔ་གང་ཞེ་ན། གསང་བ་པའི་བདག་པོ་འདི་ལ་བྱང་ཆུབ་སེམས་དཔའ་རྣམས་དངོས་པོ་ཐམས་ཅད་དང་བྲལ་བར་མངོན་པར་རྟོགས་པར་འགྱུར་རོ། །ཁ་ཅིག་ནི་ཕུང་པོ་དང་། ཁམས་དང་། སྐྱེ་མཆེད་དང་། གཟུང་བ་དང་། འཛིན་པ་རྣམ་པར་སྤངས་པ་སྟོང་པ་སྒྱུ་མ་ལྟ་བུར་མངོན་པར་རྟོགས་པར་འགྱུར་རོ། །ཁ་ཅིག་ནི་ཆོས་ལ་དམིགས་པས་སོ། །གསང་བ་པའི་བདག་པོ་འོན་ཀྱང་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པས། འདི་ལྟར་དངོས་པོ་ཐམས་ཅད་དང་བྲལ་བ་ཕུང་པོ་དང་ཁམས་དང་། སྐྱེ་མཆེད་དང་། གཟུང་བ་དང་། འཛིན་པ་རྣམ་པར་སྤངས་པ་ཆོས་བདག་མེད་པ་མཉམ་པ་ཉིད་ཀྱིས་རང་གི་སེམས་ཐོག་མ་ནས་མ་སྐྱེས་པ་སྟོང་པ་ཉིད་ཀྱི་ངོ་བོ་ཉིད་དུ་རྟོགས་པར་བྱའོ། །གསང་བ་པའི་བདག་པོ་དེ་ལ་དངོས་པོ་ཐམས་ཅད་དང་བྲལ་བ་ཞེས་བྱ་བ་དེ་ནི་དེ་བཞིན་གཤེགས་པས་འདི་ལ་བདག་གམ། སེམས་ཅན་ནམ། སྐྱེ་བའམ། ཤེད་ལས་སྐྱེས་པ་ཡོད་པ་མ་ཡིན་གྱི་ཕུང་པོ་དང་། ཁམས་དང་། སྐྱེ་མཆེད་ཙམ་དུ་ཟད་དོ་ཞེས་འཇིག་རྟེན་པའི་ལམ་ཡོངས་སུ་སྤང་བར་བསྟན་པ་ཡིན་ནོ། །ཕུང་པོ་ཁམས་དང་། སྐྱེ་མཆེད་དང་། གཟུང་བ་དང་། འཛིན་པ་རྣམ་པར་སྤངས་པ་ཞེས་བྱ་བ་ནི་ཉན་ཐོས་ཀྱི་ལམ་མངོན་པར་རྟོགས་པ་ཡོངས་སུ་ཤེས་པའི་སྒོ་ནས། བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་མངོན་པར་རྟོགས་པ་རྣམ་པར་གཞག་པ་ཡིན་ནོ། །ཆོས་བདག་མེད་པ་མཉམ་པ་ཉིད་ཀྱིས་ནི་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་རང་གི་སེམས་ཐོག་མ་ནས་མ་སྐྱེས་པར་མཐོང་ཞིང་སྟོང་པ་ཉིད་ཀྱི་

ངོ་བོ་ཉིད་རྫས་མེད་པ་མཚན་ཉིད་མེད་པར་མངོན་པར་རྟོགས་པར་འགྱུར་རོ། །གསང་བ་པའི་བདག་པོ་དེ་ལྟ་བས་ན། བྱང་ཆུབ་སེམས་དཔས་གནས་མེད་པ་སྒྲིབ་པ་མེད་པ་སྤྲོས་པ་ཐམས་ཅད་དང་བྲལ་བའི་སེམས་བསྐྱེད་པར་བྱའོ། ། གསང་བ་པའི་བདག་པོ་རྣམ་གྲངས་འདིས་ཀྱང་འདི་ལྟར་ཐེག་པ་ཆེན་པོ་ལ་ཡང་དག་པར་གནས་པའི་བྱང་ཆུབ་སེམས་དཔའ་རྣམས་ལ་གསང་སྔགས་སྤྱད་པའི་ཚུལ་སྒྲུབ་པ་རྣམ་པར་ཐར་པའི་སྒོ་མ་གཏོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཕན་འདོགས་པ་མེད་པར་རིག་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་བསྐལ་པ་དུ་མར་འབད་ཅིང་བཙལ་ཏེ། གཏང་དཀའ་བ་རྣམས་ཀྱང་བྱས་པས་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་ཚེ་འདི་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ཡང་ཅིའི་ཕྱིར་ཞེ་ན། གསང་བ་པའི་བདག་པོ་ཚེ་ཞེས་བྱ་བ་དེ་ནི་དེ་བཞིན་གཤེགས་པས་སྐྱེ་བ་ལ་འདུ་ཤེས་སུ་བྱ་བར་ཟད་དོ། །བྱང་ཆུབ་སེམས་དཔའ་དེ་རྣམས་ཀྱི་འདུ་ཤེས་དེ་ཡང་ཆོས་ཐམས་ཅད་ཀྱི་ངོ་བོ་ཉིད་ཁོང་དུ་ཆུད་པའི་ཏིང་ངེ་འཛིན་ཐོབ་པའི་སྔོན་རོལ་ཉིད་དུ་འགགས་པའི་ཕྱིར་རོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་གསང་བའི་སྙིང་པོའི་དཀྱིལ་འཁོར་དང་། ཕྱག་རྒྱའི་དམ་ཚིག་འདི་ལ་འཇུག་པར་འདོད་པའི་བྱང་ཆུབ་སེམས་དཔའ་ཆོས་ལྔ་རྒྱང་རིང་དུ་སྤང་བར་བྱའོ། ། ལྔ་གང་ཞེ་ན། སེར་སྣ་དང་སེམས་ཅན་ལ་གནོད་པ་དང་། ཐེ་ཙོམ་དང་ལེ་ལོ་དང་གསང་སྔགས་ལ་སོགས་པ་ལ་མ་གུས་པ་སྟེ། གསང་བ་པའི་བདག་པོ་ཆོས་འདི་ལྔ་ནི་བྱང་ཆུབ་སེམས་དཔའ་ཚེ་འདི་ཉིད་ལ་འཇིག་རྟེན་ལས་འདས་པའི་ལམ་དུ་འཇུག་པར་

འདོད་པ་རྣམས་ཀྱིས་རྒྱང་རིང་དུ་སྤང་བར་བྱའོ། །གསང་བ་པའི་བདག་པོ་ཆོས་འདི་རྣམས་ལ་གནས་པའི་བྱང་ཆུབ་སེམས་དཔའ་དེ་ལ། བྱང་ཆུབ་ཀྱི་སྤྱད་པ་ཅུང་ཟད་ཀྱང་ཡོངས་སུ་རྫོགས་པར་ང་མི་སྨྲའོ། །གསང་བ་པའི་བདག་པོ། དེ་ཅིའི་ཕྱིར་ཞེ་ན། ཆོས་འདི་རྣམས་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སེམས་ཀྱི་བར་དུ་གཅོད་པ་ཆེན་པོའོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་གསང་བའི་སྙིང་པོ་འདིའི་དམ་ཚིག་ལ་གནས་པར་གྱུར་པ་དེའི་བསོད་ནམས་ཅི་ཙམ་ཞིག་འཕེལ་བར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ནམ་མཁའི་དབྱིངས་ཀྱི་མཐའ་རྟོགས་པར་ནུས་སམ། གསོལ་པ། བཅོམ་ལྡན་འདས་ནམ་མཁའི་དབྱིངས་ཀྱི་ཚད་མ་མཆིས་པས་དེའི་ཚད་གཟུང་བར་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། ནམ་མཁའི་དབྱིངས་ཀྱི་མཐའ་ནི་རྟོགས་པར་ནུས་ཀྱང་སྲིད་ཀྱི་གསང་བའི་སྙིང་པོའི་དཀྱིལ་འཁོར་དུ་དམ་ཚིག་མཐོང་བའི་རིགས་ཀྱི་བུའམ་རིགས་ཀྱི་བུ་མོའི་བསོད་ནམས་མངོན་པར་འདུས་བྱས་པ་གང་ཡིན་པའི་བསོད་ནམས་དེའི་ཚད་ནི་རྟོགས་པར་མི་ནུས་སོ། །དེ་ཅིའི་ཕྱིར་ཞེ་ན། གསང་བ་པའི་བདག་པོ་དཀྱིལ་འཁོར་འདི་ནི་སངས་རྒྱས་འབྱུང་བ་མཐོང་ངོ་། །གསང་བ་པའི་བདག་པོ་དཀྱིལ་འཁོར་ཞེས་བྱ་བ་ནི། སྙིང་པོ་གཙོ་བོ་སྙིང་པོ་ཐམས་ཅད་ཀྱི་མཐར་ཕྱིན་པ་སྟེ་དེའི་གོང་ན་དེ་བཞིན་གཤེགས་པའི་དཀྱིལ་འཁོར་མེད་དོ། །དགེ་བའི་རྩ་བ་ཐམས་ཅད་ཀྱི་སྙིང་པོར་གྱུར་པ་གནས་སུ་གྱུར་པ་སྐྱབས་སུ་གྱུར་པའོ། །གསང་བ་པའི་བདག་པོ་དེ་ལྟ་བས་ན་རིགས་ཀྱི་བུའམ་རིགས་ཀྱི་བུ་མོ་དཀྱིལ་འཁོར་དང་ཕྱག་རྒྱ་དང་དམ་ཚིག་འདི་ལ་འཇུག་པར་འདོད་པས། དཀྱིལ་འཁོར་དང་ཕྱག་རྒྱ་དང་དམ་ཚིག་ལ་འཇུག་

པ་ཐོབ་པར་འགྱུར་བ་གང་ན་བ་དེར་འཇིག་རྟེན་གྱི་ཁམས་མེ་མ་མུར་གྱིས་ཡོངས་སུ་གང་བ་ལ་ཡང་རྐང་པ་གཉིས་ཀྱིས་འབོགས་ཏེ་འགྲོ་བར་བྱའོ། །བྱང་ཆུབ་སེམས་དཔའ་གསང་སྔགས་ཀྱི་སྒོ་ནས། བྱང་ཆུབ་སེམས་དཔའི་སྤྱད་པ་སྤྱོད་པ་དེ་རྣམས་ལ་ཡང་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་དགེ་བའི་བཤེས་གཉེན་གྱི་འདུ་ཤེས་དང་། ཕ་མའི་འདུ་ཤེས་དང་མཁན་པོའི་འདུ་ཤེས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེ་དག་ལ་ནི་བདག་གི་ཤ་དང་ཁྲག་གིས་མཆོད་ན་ཡང་ལན་ལོན་པར་མི་འགྱུར་ན་མཆོད་པ་གཞན་གྱིས་ལྟ་ག་ལ་ནུས། གསང་བ་པའི་བདག་པོ་གང་ལ་བརྟེན་ནས་སེམས་ཅན་དམྱལ་བའི་རྒྱུན་ཆད་པར་འགྱུར་ཞིང་དུད་འགྲོའི་སྐྱེ་གནས་སུ་འགྲོ་བ་དང་། གཤིན་རྗེའི་འཇིག་རྟེན་པའི་ཕུང་པོ་མེད་པར་འགྱུར་བའི་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་ཀྱང་བྱང་ཆུབ་སེམས་དཔའི་སྤྱད་པ་སྤྱོད་པ་དེ་དག་ལ་ཅི་ལྟར་ལན་ལྡོན་པར་འགྱུར། བྱང་ཆུབ་སེམས་དཔའ་དེ་དག་ནི་མི་མཉམ་པ་དང་མཉམ་པ་ལ་གནས་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་དུ་བརླབས་པ་ནམ་མཁའ་ལྟར་གནས་མེད་པའི་སྤྱོད་ཡུལ་ཅན་ཡིན་པར་རིག་པར་བྱའོ། །གསང་བ་པའི་བདག་པོ་ངས་ཁྱོད་ལ་བསྒོ་བར་བྱའོ། །ཤེས་པར་བྱའོ། །མ་འོངས་པའི་དུས་ན་མི་བླུན་པོ་དམིགས་པ་ཅན་ལ་ལྟ་བ་འཇིག་ཚོགས་ལ་ལྟ་བ་མངོན་པར་ཞེན་པ་བློ་ཕྱིན་ཅི་ལོག་ཏུ་གྱུར་པ་བདག་གི་སེམས་ཀྱི་གནས་གཏན་ལ་མ་ཕེབས་པ་རྣམས་རྣམ་པར་འཁྲུལ་ནས་འདི་སྐད་དུ། འདི་ནི་སངས་རྒྱས་ཀྱིས་གསུངས་པ་མ་ཡིན་གྱི་འདི་དག་ནི་རང་བཟོ་ཅན་གྱིས་རང་བཟོར་བྱས་པ་ཡིན་ནོ་ཞེས་ཟེར་བ་དག་འབྱུང་བར་འགྱུར་རོ། །གསང་བ་པའི་བདག་པོ་མི་བླུན་པོ་དེ་དག་ནི་འགྲོ་བ་གཉིས་སུ་འགྲོ་བར་རིག་པར་བྱ་སྟེ། གཉིས་གང་ཞེ་ན་འདི་ལྟ་སྟེ། སེམས་ཅན་དམྱལ་བ་དང་དུད་འགྲོའོ། །གསང་བ་པའི་བདག་པོ་དེ་དག་ལ་དགེ་བའི་རྩ་བའི་རྒྱུ་ཅུང་ཟད་ཀྱང་ཡོད་པར་ང་མེ་

སྨྲའོ། །དེ་ཅིའི་ཕྱིར་ཞེ་ན། དེ་དག་ནི་རྩ་བ་ཚད་པར་བྱེད་པ་ལ་ཞུགས་པ་སྟེ། སངས་རྒྱས་ཀྱི་བྱང་ཆུབ་ལ་བར་དུ་གཅོད་པར་བྱེད་པ་བདུད་ཀྱིས་ཟིལ་གྱིས་ནོན་པ་ཤེས་རབ་འཆལ་པའི་རང་བཞིན་ཅན་ཐེག་པ་ཆེན་པོ་ལ་གོམས་པར་མ་བྱས་པ་ཉན་ཐོས་ཀྱི་ཐེག་པ་ལ་སྙིང་པོར་འདུ་ཤེས་པ་རྣམས་འབྱུང་བར་འགྱུར་རོ། །རིགས་ཀྱི་བུའམ་རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་ལ་མངོན་པར་བརྩོན་པར་འགྱུར་བ་དེ་དག་ལ་ཚུལ་ཁྲིམས་འཆལ་པ་སྡིག་པའི་ཆོས་སྤྱོད་པ་དེ་དག་ལ་སངས་རྒྱས་ཀྱི་བྱང་ཆུབ་ག་ལ་ཡོད་ཅེས་མི་སྙན་པ་སྨྲ་བར་འགྱུར་ཏེ། མི་བླུན་པོ་དེ་དག་གིས་མི་སྙན་པ་དེ་སྨྲས་པས་ངན་འགྲོ་གཉིས་སུ་ལྷུང་སྟེ། གསང་སྔགས་ཀྱི་སྤྱད་པ་སྤྱོད་པ་དེ་ནི་འདི་ལྟར་བཅོམ་ལྡན་འདས་ཐམས་ཅད་མཁྱེན་པ་དེས། སེམས་ཅན་རྣམས་ལ་ཕན་གདགས་པའི་ཕྱིར་འདི་དག་ཐམས་ཅད་གསུངས་སོ། །དེ་དག་ལ་སྡང་བའི་སེམས་བསྐྱེད་པས་སྡུག་བསྔལ་གྱི་སྐལ་བ་ཅན་དུ་འགྱུར་རོ། །དེ་ཅིའི་ཕྱིར་ཞེ་ན། དེ་དག་ནི་དེ་བཞིན་གཤེགས་པའི་གསང་བ་འཛིན་པ་ལྷ་དང་བཅས་པའི་འཇིག་རྟེན་གྱིས་ཕྱག་བྱ་བར་འོས་པར་ཡིན་པར་རིག་པར་བྱའོ། །དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་སྙེད་ལ་བཀའ་སྩལ་པ། རིགས་ཀྱི་བུ་དེ་རྣམས་བསྲུང་བ་དང་བསྐྱབ་པ་དང་། སྦ་བའི་ཕྱིར་རིགས་ཀྱི་བུ་ཁྱོད་ཀྱི་ལག་ཏུ་གཏད་ཀྱིས། ཁྱོད་ཀྱིས་རིགས་ཀྱི་བུ་དེ་རྣམས་རྟག་ཏུ་རྒྱུན་མི་འཆད་པར་བསྲུང་བར་གྱིས་ཤིག །ཡོངས་སུ་བསྐྱབ་པར་གྱིས་གནོད་པ་ལས་ཀྱང་བཟློག་པར་གྱིས་ཤིག །དེ་སྐད་ཅེས་བཀའ་སྩལ་པ་དང་། ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་སྙེད་པོ་དེ་དག་གིས་མགྲིན་གཅིག་ཏུ་ཚིག་འདི་སྐད་སྨྲས་སོ། །བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་རྗེས་ཅི་སྐད་བཀའ་སྩལ་པ་དེ་བཞིན་དུ་ཐམས་ཅད་བགྱིའོ། །རིགས་ཀྱི་བུ་

དེ་དག་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་བསྲུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དག་ལེགས་སོ་ལེགས་སོ། །ཁྱོད་ཀྱིས་ཅི་ནས་ཀྱང་སྟོན་པའི་བསྟན་པ་འཇིག་པར་མི་འགྱུར་བ་དེ་ལྟར་གྱིས་ཤིག །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་རྡོ་རྗེ་འཛིན་དེ་དག་ཐམས་ཅད་ལ་སྨྲས་པ། གྲོགས་པོ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བྱ་དཀའ་བ་བརྒྱ་སྟོང་དུ་མར་བསྒྲུབས་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡིན་ཏེ། དེ་བས་ན་ཁྱེད་ཐམས་ཅད་ཀྱིས་ནན་ཏན་བསྐྱེད་དེ་དེ་དག་བསྲུང་བར་གྱིས་ཤིག །དེ་ཅིའི་ཕྱིར་ཞེ་ན། འདིས་ནི་བདག་ཅག་དེ་བཞིན་གཤེགས་པའི་བཀའ་བཞིན་བྱེད་པའོ། །ཞེས་བྱ་བར་འགྱུར་རོ། ། དེ་བཞིན་གཤེགས་པའི་བསྟན་པ་བསྲུང་བའོ། །ཞེས་བྱ་བར་འགྱུར་རོ། །མི་མཉམ་པ་དང་མཉམ་པའོ། །ཞེས་བྱ་བར་འགྱུར་རོ། །སྟོབས་བཅུ་འཛིན་པའོ། །ཞེས་བྱ་བར་འགྱུར་རོ། །དེ་བས་ན་ཆོས་ཀྱི་རྣམ་གྲངས་འདི་བསྲུང་བ་དང་། བསྐྱབ་པ་དང་། སྦ་བའི་ཕྱིར་བདག་ཅག་རྣམས་ཀྱིས་རྟག་ཏུ་བརྩོན་པར་བྱའོ། །རིགས་ཀྱི་བུ་དེ་དག་ཀྱང་བསྲུང་བ་དང་། བསྐྱབ་པ་དང་སྦ་བའི་ཕྱིར་བརྩོན་པར་བྱའོ། །དེ་སྐད་ཅེས་སྨྲས་པ་དང་། རྡོ་རྗེ་འཛིན་དེ་དག་གིས་མགྲིན་གཅིག་ཏུ་སྨྲས་པ། བདག་གིས་ཅི་ནས་ཀྱང་སྟོན་པའི་བསྟན་པ་ཡུན་རིང་དུ་གནས་པར་འགྱུར་བ་དང་། འཇིག་པར་མི་འགྱུར་བར་བྱ་བ་འདི་ནི་ངེས་པར་བྱ་དགོས་སོ་ཞེས་སྨྲས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་མ་འོངས་པའི་འགྲོ་བ་ལ་གཟིགས་ནས་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བྱ་བའི་ཕྱིར། ཐུགས་རྗེ་ཆེན་པོ་ཐོག་མར་བྱས་ནས་གསང་སྔགས་ཀྱི་ཚིག་འདི་དག་གསུངས་སོ། །ན་མ་སྟྲཻ་ཡ་དྷྭི་ཀཱ་ནཱན། སརྦྦ་ཏ་ཐཱ་ག་ཏཱ་ནཱན། སརྦྦ་ཏ་ཐཱ་ག་ཏཱ་ས་མ་ཏཱ་ག་ཏི་ག་ཏེ། ཨེ་ཀདྡྷརྨྨ་སམ་བྷ་སརྦྦ་ས་

ར་ཎེ་བི་ཙི་ཏྲ་རཱུ་པ་དྷཱ་རི་ཎཱི། སརྦྦ་ས་ཏ་ཏྲ་ཨ་བྷི་པྲཱ་ཡ་བ་རི་པཱུ་ར་ཎི། སརྦྦ་བོ་དྷི་ས་ཏ་ཏྲ་ག་ཏ་མཱ་ན་སེ། ཏྲ་ཧི་མཾ་སརྦྦ་ངྷརྨྨ་ས་མ། མ་ཧཱ་མ་ཧཱི་བཻ་རོ་ཙ་ན་གརྦྷ་སཾ་བུདྡྷ། སརྦྦ་ཏ་ཐཱ་ག་ཏ། ཨ་དྷིཥྛི་ཏེ་ཏྲ་ཧི་ཏེ་བྷ་ག་བ་ཏེ་ཧཱུྃ། དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱིས་རྗེས་སུ་གནང་བ། བཅོམ་ལྡན་འདས་རྣམ་པར་སྣང་མཛད་ཀྱིས་བྱིན་གྱིས་བརླབས་ཀྱིས་སྙིང་རྗེ་ཆེན་པོ་མངོན་དུ་བྱས་ཏེ། འདི་ཉིད་ཀྱི་རྒྱུད་ཕྱི་མ་སྨྲས་པ། དང་པོར་སློབ་དཔོན་གཙང་སྦྲ་བྱས་ཏེ། ཆོས་ཀྱི་དབྱིངས་སུ་གྱུར་པའི་ཡིད་ཀྱིས་བདག་རྣམ་པར་སྣང་མཛད་དུ་དེའི་ཕྱག་རྒྱ་དང་།གསང་སྔགས་ཀྱིས་བསྒྱུར་ཏེ་དཀྱིལ་འཁོར་བྲིའོ། །སྔགས་པ་གསང་སྔགས་ཆོ་ག་ལ། །རྟག་པར་ཆོ་ག་སྔ་མ་ཡིས། །ཕྱེ་མ་དཀར་པོ་བླངས་ནས་སུ། །སྙིང་རྗེར་གྱུར་པའི་ཡིད་ཀྱིས་ནི། །རྟག་ཏུ་མི་གཡོ་དྲན་བྱས་ཏེ། །དང་པོར་ཚོན་རྩི་དགྱེ་བར་བྱ། །དེ་ནས་ཚོན་རྩི་གཉིས་པ་ནི། །དམར་པོ་བླངས་ནས་དགྱེ་བར་བྱ། །ཚོན་རྩི་གསུམ་པ་སེར་པོ་ཡང་། །ཤིན་ཏུ་ངེས་པར་དགྱེ་བར་བྱ། །དེ་ནས་མརྒད་འདྲ་བ་དགྱེ། ། དེ་ནས་ཨན་ད་རྙིལ་འདྲར་དགྱེ། །གང་གི་ཁ་དོག་ཅི་འདྲར་གསུངས། །དེ་ཡི་དཀྱིལ་འཁོར་དེ་ཉིད་དོ། །ལྷ་ཡི་ཁ་དོག་དེ་བཞིན་ཏེ། །ཞི་དང་རྒྱས་དང་དྲག་སྤྱོད་པ། །དེ་ཡི་གསང་སྔགས་དེ་ཉིད་འདོད། །འདི་ནི་གསང་བ་བསྟན་པ་ཡིན། །དེ་བཞིན་གཤེགས་པའི་གསང་སྔགས་གང་། །དེ་དག་དབང་ཆེན་ཡིན་པར་བསྒྲགས། །ཕྱག་ན་པདྨའི་ཆུ་ཡི་ཡིན། །རྡོ་རྗེ་ཅན་གྱི་རླུང་གི་ཡིན། །ཕོ་ཉ་ལ་སོགས་བྲན་རྣམས་དང་། །ཁྲོ་བོའི་མིང་དུ་གང་གཏོགས་པ། །ཀུན་དུ་ཐོགས་མེད་སྤྱོད་པ་རྣམས། །ཀུན་གྱི་དཀྱིལ་འཁོར་མེ་དང་རླུང་། །ཡང་ན་འདི་དག་ཐམས་ཅད་ཀྱང་། །ནུས་པའི་མཐུ་ནི་ཀུན་དང་ལྡན། །སྟོང་པ་ཉིད་ཀྱི་བདུད་རྩིས་ངོམས། །སྙིང་རྗེའི་མིག་ནི་དྲི་མ་མེད། །བྱམས་པའི་གོ་ཆ་ལེགས་པར་བགོས། །དགའ་བ་དྲི་མེད་རྩལ་དང་ལྡན། །སྲིད་པའི་རྒྱ་མཚོར་བྱིང་བ་ཡི། །སེམས་

ཅན་འདོན་པར་རབ་ཏུ་བརྩོན། །འཁོར་བ་ན་ཡང་མི་གནས་ཤིང་། །མྱ་ངན་འདས་ལའང་གནས་མ་ཡིན། །ཡང་དག་མཐའ་ལ་ངེས་བྱས་ཤིང་། །སེམས་ཅན་རྣམས་ཀྱི་དོན་བྱེད་པའོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་བལྟས་ནས་ཚིག་སྨྲས་པ།ཐམས་ཅད་མཁྱེན་པ་སྡིག་བྲལ་བ། །སྟོན་པ་བཅོམ་པར་ལྡན་པ་འདིས། །བགེགས་རྣམས་འབྱུང་བར་འགྱུར་བའི་གནས། །གཏན་ལ་བབ་པར་བཤད་འགྱུར་བ། །གྲོགས་པོ་ཀུན་གྱིས་མཉན་པར་གྱིས། །བགེགས་ནི་རྣམ་པ་དུ་མ་སྟེ། །ལྷ་དང་ལྷ་མིན་གནོད་སྦྱིན་མི། །དེ་ལ་བགེགས་ནི་རྣམ་གཉིས་ཏེ། །ཕྱི་དང་ནང་གི་སྤྱོད་ཡུལ་ལོ། །གློ་ལུ་དབུགས་བརྣངས་རིམས་དང་སྐྱུག །སྐྱ་རྦབ་ནད་དང་ཡི་ག་འཆུ། །དེ་ལ་སོགས་པའི་རིམས་རྣམས་ནི། །རླུང་གྲང་ཚ་བ་ལ་སོགས་ལས། །མི་བཟད་ངོ་བོ་ཅན་འབྱུང་བ། །ནང་གི་ཡིན་པར་ཤེས་པར་བྱ། །ཕྱི་རོལ་གྱི་ནི་བགེགས་ཆེན་རྣམས། །མི་དང་དེ་བཞིན་མི་མིན་ཏེ། །ཡེ་ཤེས་ཚེར་མ་དེ་དག་ནི། །སྤྱོད་པ་རྣམ་པ་སྣ་ཚོགས་ཀྱིས། །འཇིག་རྟེན་གཞིག་པའི་ཕྱིར་འབྱུང་སྟེ། །དཀའ་ཐུབ་གནས་ན་རྨོངས་པར་བྱེད། །ལས་ཀྱི་ཆོ་ག་མཐོང་བ་ཡིས། །དེ་རྣམས་སླར་ནི་བཟློག་པར་བྱ། །ཚ་བར་གྱུར་ནས་འོངས་པའི་བགེགས། །བསིལ་བས་ཉེ་བར་ཞི་བར་བྱ། །ཤེས་རབ་ཅན་གྱིས་གཉེན་པོ་ཡིས། །དེ་དག་སོ་སོར་གསོ་བར་བྱ། །ཡང་ན་བགེགས་རྣམས་ཐམས་ཅད་ལ། །སྔགས་པས་ངེས་པར་མཚམས་བཅད་པ། ། བགེགས་རྣམས་ཀུན་ལ་ཡེ་ཤེས་ནི། །ཞི་བར་བྱེད་པའི་མཆོག་ཏུ་བཤད། །འཕགས་པ་རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པར་སྤྲུལ་པ་བྱིན་གྱིས་རློབ་པ་ཐེག་པ་ཆེན་པོའི་མདོ་སྡེའི་རྒྱལ་པོ་གསང་བ་པའི་མཆོག་རིམ་པར་ཕྱེ་བ་ལས། དེ་བཞིན་གཤེགས་པ་འབྱུང་བ་ཞེས་བྱ་བའི་དཀྱིལ་འཁོར་ཆེན་པོ་བྱིན་གྱིས་རློབ་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང་། ཞུ་ཆེན་གྱི་ལོཙྪ་བ་བན་དེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་རྒྱལ་པོ་འཕགས་པ་མི་གཡོ་བ་དེའི་སྟོབས་དཔག་ཏུ་མེད་པ་རྟུལ་ཕོད་པ་འདུལ་བར་གསུངས་པ་ཞེས་བྱ་བའི་རྟོག་པ།

རྒྱ་གར་སྐད་དུ། ཨཱརྱ་ཨ་ཙ་ལ་མ་ཧཱ་ཀྲོ་དྷ་རཱ་ཛ་སྱ་སརྦ་ཏ་ཐཱ་ག་ཏ་ཏ་སྱ་བ་ལ་ཨ་པ་རི་མི་ཏ་བཱི་ར་བི་ན་ཡ་སྭཱ་བྱཱ་ཏོ་ནཱ་མ་ཀལྤ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་རྒྱལ་པོ་འཕགས་པ་མི་གཡོ་བ་དེའི་སྟོབས་དཔག་ཏུ་མེད་པ་རྟུལ་ཕོད་པ་འདུལ་བར་གསུངས་པ་ཞེས་བྱ་བའི་རྟོག་པ། རྗེ་བཙུན་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རླུང་ལ་བཞུགས་ཏེ། རིན་པོ་ཆེ་སྣ་ཚོགས་བཀོད་པ་རིན་པོ་ཆེའི་གཞལ་ཡས་ཁང་བྱེ་བ་གྲངས་མེད་པ་དུ་མས་བཀོད་ཅིང་ཡོངས་སུ་བསྐོར་བ།བསམ་གྱིས་མི་ཁྱབ་ཅིང་གྲངས་མེད་པའི་དེ་བཞིན་གཤེགས་པའི་བསོད་ནམས་ལས་འཁྲུངས་པའི་བྱང་ཆུབ་སེམས་དཔའི་སེང་གེའི་ཁྲི་བཤམས་པ་རིན་པོ་ཆེས་སྤྲས་པ། འཇིག་རྟེན་གྱི་ཁམས་གྲངས་མེད་པ་རྣམ་པར་སྣང་བར་བྱེད་པ་རིན་པོ་ཆེ་སྣ་ཚོགས་ཀྱི་ལྕགས་རིས་ཡོངས་སུ་བསྐོར་ཅིང་ཤིན་ཏུ་ཡིད་འཕྲོག་པ། སྟེང་དུ་རིན་པོ་ཆེ་སྣ་ཚོགས་ཀྱིས་སྤྲས་པའི་རིན་པོ་ཆེའི་བླ་བྲེས་ནམ་མཁའི་ཁམས་གོ་འབྱེད་པར་སྣང་བར་བྱེད་པ་བསམ་གྱིས་མི་ཁྱབ་པའི་པདྨའི་རྒྱལ་པོ་རིན་པོ་ཆེ་སྣ་བདུན་གྱི་རྒྱུ་ལས་ཡང་དག་པར་བྱུང་བ། སེམས་ཅན་ཐམས་ཅད་ཀྱི་བསམ་པ་སྣ་ཚོགས་ཡོངས་སུ་དགའ་བར་བྱེད་པ། འོད་ཟེར་ཆེན་པོ་ཕུལ་དུ་བྱུང་བ་གསལ་བར་བྱེད་ཅིང་མུན་ནག་ཐམས་ཅད་རབ་ཏུ་དང་བར་བྱེད་པ། བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ལས་འཁྲུངས་པའི་སེང་གེའི་ཁྲི་བསམ་གྱིས་མི་ཁྱབ་པ་བྱེ་བ་དུ་མས་ཡོངས་སུ་བསྐོར་བ། བྱང་ཆུབ་སེམས་དཔའ་གྲངས་མེད་པས་ཡོངས་སུ་བསྐོར་བ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་དུ་མས་ཡོངས་སུ་བསྐོར་བ་དེར་བཅོམ་ལྡན་འདས་བཞུགས་ནས་ཆོས་སྟོན་ཏོ། །འདི་ལྟ་སྟེ། འཕགས་པ་སྤྱན་རས་གཟིགས་དབང་ཕྱུག་དང་། འཇམ་དཔལ་དང་། ཀུན་དུ་

བཟང་པོ་དང་། བྱམས་པ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཞི་བའི་བློ་གྲོས་དང་། སྣ་ཚོགས་བཀོད་པ་དང་། ནམ་མཁའ་མེ་ཏོག་འཆང་དང་། ནམ་མཁའི་སྙིང་པོ་དང་། ཤིན་ཏུ་རྣམ་དག་དང་། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཆེན་པོས་ཡོངས་སུ་བསྐོར་བ། ཉན་ཐོས་བྱེ་བ་ཕྲག་དུ་མ་འདི་ལྟ་སྟེ། ཤཱ་རིའི་བུ་དང་། མཽད་གལ་དང་། རྟ་ཐུལ་དང་། འོད་སྲུང་ལ་སོགས་པས་ཡོངས་སུ་བསྐོར་བ། གྲགས་ཆེན་སྙན་པ་ཆེན་པོ་བརྒྱ་བྱིན་དང་། ཚངས་པ་དང་། ཁྱབ་འཇུག་དང་། ལུས་ངན་པོ་ལ་སོགས་པས་ཡོངས་སུ་བསྐོར་ཞིང་། བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པའི་ཐུགས་ཀྱིས་ཆོས་སྟོན་པ་འདི་ལྟ་སྟེ། གསང་སྔགས་ཀྱི་ཚུལ་ལ་འཇུག་པ་ལ་སོགས་པའི་ཆོས་ཀྱི་རྣམ་གྲངས་གང་ཐོས་པར་བྱེད་པའི་བྱང་ཆུབ་སེམས་དཔའ་དེ་དག་དང་། ཉན་ཐོས་དེ་དག་དང་། ཐམས་ཅད་དང་ལྡན་པའི་འཁོར་དེ་དག་དང་། བསམ་གྱིས་མི་ཁྱབ་པའི་སེམས་ཅན་གྱི་ཁམས་ཀྱི་བསམ་པ་སྣ་ཚོགས་ལ་དགོས་པ་སྣ་ཚོགས་ཀྱི་སྤྱོད་ལམ་གྱིས་ཞུགས་ཤིང་རྫུ་འཕྲུལ་གྱི་ཆོ་འཕྲུལ་རྣམས་མཛད་དོ། །བསམ་གྱིས་མི་ཁྱབ་པའི་སངས་རྒྱས་རྣམས་བསྙེན་བཀུར་དང་། ཡོངས་སུ་མཉེས་པར་མཛད་དོ། །སངས་རྒྱས་ཀྱི་རྫུ་འཕྲུལ་གྱི་ཆོ་འཕྲུལ་དུ་མ་རྣམས་ཀྱང་གཟིགས་སོ། །སངས་རྒྱས་ཀྱི་སྤྲུལ་པ་དུ་མ་ཡང་མངོན་པར་སྤྲུལ་པ་མཛད་དོ། །བཀོད་པ་ཆེན་པོ་ཡང་བསྐྱེད་པར་མཛད་དོ། །མདོར་ན་ཐམས་ཅད་གང་དང་གང་གིས་སེམས་ཅན་གྱི་དོན་དུ་གཟིགས་པ་དེ་དང་དེ་མཛད་དོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་འཁོར་ཆེན་པོ་རྣམས་ལ་གཟིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་བདག་གིས་སྣ་ཚོགས་དུ་མའི་གསུང་གི་འཁོར་ལོའི་དཀྱིལ་འཁོར་རྣམ་པར་ཕྱུང་སྟེ་ཚིག་དང་ཡི་གེ་དུ་མ་བཀོད་པ་སེམས་ཅན་སྣ་ཚོགས་

མགུ་བར་བྱེད་པ། ཕྱག་རྒྱ་དང་སྔགས་སྣ་ཚོགས་ཀྱིས་རྣམ་པར་མཚན་པར་གྱུར་པ། འགྲོ་བ་སྣ་ཚོགས་ཀྱི་ཁྱད་པར་བརྗོད་པ། སྡུག་བསྔལ་སྣ་ཚོགས་རབ་ཏུ་ཞི་བར་བྱེད་པ། དབང་ཕྱུག་དུ་མ་དང་ལྡན་ཞིང་ཡིད་འཕྲོག་པའི་ཡི་གེ་གཅིག་དང་། སྟོང་ཕྲག་བརྒྱད་དང་། གྲངས་མེད་པ་དང་།བྱེ་བ་ཕྲག་གསུམ་དང་། རྗེས་འཇུག་དང་། རིང་པོ་དང་། ཐུང་ངུ་དང་། ང་རོ་དང་། གསལ་བྱེད་ཀྱི་མཚན་མས་མཚན་པ། དེ་བཞིན་གཤེགས་པའི་ཆོས་ཀྱི་དབྱིངས་བཅུ་ལ་སོགས་པའི་བྱང་ཆུབ་སེམས་དཔའི་དཔེ་དང་། ཉན་ཐོས་དང་། རང་སངས་རྒྱས་དང་། འཇིག་རྟེན་པའི་མངོན་པར་ཤེས་པ་ལྔ་དང་། ལྷའི་གནས་ལ་སོགས་པའི་དབྱེ་བ་དང་། མིའི་འགྲོ་བ་དང་། ཡི་དགས་དང་། དུད་འགྲོའི་འགྲོ་བ་ལ་ཐུག་པར་ཕྱེ་ཞིང་བཅད་པ་རྣམས་གང་བདག་གིས་སེམས་ཅན་རྣམས་ལ་ཕན་པའི་ལྷག་པའི་བསམ་པ་བྱེ་བ་ཕྲག་གྲངས་མེད་པ་བདུན་ཅུ་རྩ་བདུན་གྱི་སེམས་ཅན་རྣམས་ཀྱི་དོན་དུ་གསུངས་པ་ཡིན་ནོ། །དེ་ཡང་གཞི་དང་མེ་ཏོག་གི་སྙིང་པོས་བརྒྱན་པའི་འཇིག་རྟེན་ཁམས་འདིར་དར་བར་འགྱུར་རོ། །གསང་བའི་བདག་པོ་བྱེ་བ་ཕྲག་གྲངས་མེད་པ་བདུན་ཅུ་རྩ་བདུན་པོ་དེ་རྣམས་ཀུན་གྱི་ནང་ནས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་དང་། ཕྱག་ན་རྡོ་རྗེ་དང་། འཇམ་དཔལ་ལ་སོགས་པའི་བྱང་ཆུབ་སེམས་དཔའ་རྣམས་ལ་བདག་གིས་ཐབས་སྣ་ཚོགས་ཀྱི་ཆོ་གའི་སྒོ་བསྟན་ཏེ། གསང་བའི་བདག་པོ་དེ་རྣམས་ལ་ནི་མངག་གཞུག་དང་། མངག་གཞུག་མ་དང་། ཕོ་ཉ་དང་། ཕོ་ཉ་མོ་ལ་སོགས་པ་དེ་རྣམས་ཀྱི་ཕྱག་རྒྱ་དང་། སྔགས་དང་། རྟོག་པའི་ཆོ་ག་ཡང་རྒྱས་པར་བསྟན་ཏོ། །ལས་སྣ་ཚོགས་དང་ལྡན་པའི་སྒྲུབ་པའི་ཐབས་ཀྱང་བསྟན་ཏེ། སྒྲུབ་ཐབས་སྣ་ཚོགས་ཡང་དག་ལྡན། །རས་རིས་ཆོ་ག་རྣམ་པར་བསྟན། །ཡང་ན་ལས་ཀྱི་ཆོ་ག་དབྱེ། །གང་དུ་སྟོབས་ཆེན་གསང་བའི་ལས། །སྦྱིན་སྲེག་དག་ནི་བདག་གིས་བསྟན། །ལྷག་མ་དེ་བཞིན་ཡུལ་གནས་གཞན། །དེ་ནས་མ་ལུས་མེ་ཐབ་དང་། །དེ་བཞིན་ཞི་བ་རྒྱས་པ་དང་། །དབང་དུ་བྱ་དང་མངོན་སྤྱོད་དང་། །དེ་ནས་

དུས་ཀྱི་ཁྱད་པར་དང་། །དཀྱིལ་འཁོར་ཡང་ནི་དེ་བཞིན་བསྟན། །ཕྱག་རྒྱ་དག་ཀྱང་མ་ལུས་པར། །ས་བོན་དང་ནི་མཚན་མ་དང་། །གསང་བ་ཡི་ནི་སྔགས་ཉིད་དང་། །རིགས་ཀྱི་མཚན་མ་དེ་བཞིན་སྐུ། །མ་ལུས་པ་ཡི་དབྱིབས་དང་ཡང་། །དེ་ལྟ་བུ་ལ་སོགས་པའི་ལས། །དེ་དག་ཐམས་ཅད་བདག་གིས་བསྟན། །མི་གཡོ་ཞེས་བྱའི་རྟོག་པ་ནི། །དེ་ནི་སླར་ཡང་བདག་གིས་བཤད། །དག་པའི་སེམས་དཔའ་བློ་ལྡན་གྱིས། །སྔགས་པས་གང་ཞིག་བསྒྲུབ་བྱ་ཡི། །བསམ་གྱིས་མི་ཁྱབ་སྣ་ཚོགས་ལས། །གསང་སྔགས་ཀྱི་ནི་སྒྲུབ་ཐབས་ཞིག །རྟོག་པ་འདི་རུ་མདོར་བསྡུས་ནས། །དེ་ཡི་ཆོ་ག་ཡང་དག་བཤད། །ཡང་དག་རྫོགས་སངས་རྒྱས་བསྙེན་ཅིང་། །སྒྲུབ་པས་གོ་འཕང་ཐོབ་པར་འགྱུར། །དེ་བཞིན་གཤེགས་པའི་སྲས་ཀྱི་མཆོག །ཆོས་ཞེས་བྱ་བར་སྐྱེ་བར་འགྱུར། །སངས་རྒྱས་ཞིང་ནི་མ་ལུས་པར། །དེ་ནི་ཀུན་དུ་དག་པར་འགྱུར། །རྟག་པར་རྒྱུན་དུ་རྣམ་རྟོག་མེད། །ནམ་མཁའ་ཡི་ནི་ལམ་ལ་གནས། །གཟུགས་ཅན་ལུས་ལ་བརྟེན་ནས་སུ། །སེམས་ཅན་བྱེ་བྲག་ཐུགས་སུ་ཆུད། །སེམས་ཅན་ཞི་བ་གདུལ་དཀའ་དང་། །བགེགས་ཆེན་དང་ནི་ལོག་པར་འདྲེན། །དེ་ནས་གདུལ་བར་བྱ་བའི་ཕྱིར། །རྫོགས་སངས་རྒྱས་ཀྱིས་རྟག་ཏུ་སྤྲུལ། །མཚན་ནི་མི་གཡོ་ཅེས་བསྒྲགས་པ། །ཁྲོ་བོ་འཕགས་པ་སྟོབས་པོ་ཆེ། །དཔལ་ལྡན་གདུལ་དཀའ་འདུལ་མཛད་པ། །སངས་རྒྱས་རྣམས་ཀྱི་སྲས་ཀྱི་སྲས། །དེ་འདིར་རྒྱལ་མཆོག་རྣམས་དང་ནི། །དེ་བཞིན་རྒྱལ་སྲས་ཀྱིས་རྟག་པར། །ཕྱག་འཚལ་ཚངས་པ་ལ་སོགས་དང་། །ལུས་ཅན་ཐམས་ཅད་ཀུན་ཏུ་མཆོད། །སངས་རྒྱས་རྣམས་ནི་བྱས་པ་གཟོ། །དེ་བཞིན་དུ་ནི་སངས་རྒྱས་སྲས། །འདི་ཀུན་སྨོན་ལམ་ཡོངས་རྫོགས་ཤིང་། །བསམ་གྱིས་མི་ཁྱབ་ཡེ་ཤེས་རྫོགས། །མི་གཡོ་ཞེས་བྱའི་ས་ཐོབ་པས། །མི་གཡོ་འདི་ཡང་དེ་ཡི་མཚན། །བདུད་རྣམས་ཀུན་གྱིས་མི་གཡོ་བས། །རྟག་པའི་ཡེ་ཤེས་དྲི་མེད་བཟང་། །རྟོག་པའི་རྒྱལ་པོ་རྫུ་འཕྲུལ་ཆེ། །བཤད་ཀྱིས་བུ་ཁྱོད་ཚུར་ཉོན་ཅིག །

སངས་རྒྱས་ཀུན་གྱིས་བྱིན་གྱིས་བརླབས། །ཆོས་ཀྱི་དབྱིངས་སུ་རབ་གཞོལ་བས། །རྟག་ཏུ་ཚེ་དང་ནད་མེད་མཆོག །དངོས་གྲུབ་མྱུར་དུ་སྩོལ་མཛད་པ། །རྟག་ཏུ་བགེགས་རྣམས་སེལ་བྱེད་ཅིང་། །དེ་བཞིན་བདུད་རྣམས་རབ་ཏུ་འཇོམས། །སེམས་ཅན་རྣམས་ནི་བདེ་བའི་ཕྱིར། །རྟོག་པ་འདི་ནི་རབ་ཏུ་བཤད། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཐམས་ཅད་དང་ལྡན་པའི་འཁོར་དེ་དག་མགྲིན་གཅིག་གི་ངག་གིས་གསོལ་པ། སེམས་ཅན་ཐམས་ཅད་ཀྱི་དོན་དང་བདག་ཅག་ལ་ཐུགས་བརྩེ་བ་བསྐྱེད་དེ་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་གསོལ་བ་བཏབ་པ་དེ་མཁྱེན་ནས་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་འོད་ཟེར་ཆེན་པོས་སྣང་བར་བྱས་ནས། དཔལ་གྱི་བེའུ་ལས་བྱུང་བ་ཞེས་བྱ་བའི་འོད་ཟེར་བྱུང་སྟེ། འོད་ཟེར་བྱེ་བ་ཁྲག་ཁྲིག་བརྒྱ་སྟོང་དུ་མ་གྲངས་མེད་པས་ཡོངས་སུ་བསྐོར་བ་བྱས་ནས་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་འདི་ནས་བཟུང་སྟེ། ཇི་སྲིད་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་ཀྱི་ཞིང་རྡུལ་ཕྲ་རབ་དང་མཉམ་པའི་འཇིག་རྟེན་གྱི་ཁམས་ནས་ནམ་མཁའི་ཁམས་ཀྱི་མཐའ་གཏུགས་པའི་བར་དུ་དེ་ཁྱབ་ནས་གཡས་ཕྱོགས་ནས་བསྐོར་ཏེ། དེ་བཞིན་དུ་བྱང་ཕྱོགས་དང་། ནུབ་དང་། ལྷོ་དང་། ཤར་གྱི་ཕྱོགས་དང་། ཕྱོགས་བཅུའི་འཇིག་རྟེན་གྱི་ཁམས་ཀྱི་བར་དུ་ཁེབས་པར་བྱས་སོ། །འཇིག་རྟེན་གྱི་ཁམས་དེ་རྣམས་ན་བཞུགས་པའི་བྱང་ཆུབ་སེམས་དཔའ་དེ་ཐམས་ཅད་ཀྱིས་ཚིགས་སུ་བཅད་པ་འདི་སྨྲས་སོ། །ཤཱཀྱའི་མགོན་པོ་རྫོགས་སངས་རྒྱས། །གཟི་བརྗིད་ཆེན་པོ་གང་བཞུགས་པ། །ཆོས་ཀྱི་དབྱིངས་ལས་བྱུང་བ་ཡི། །རྒྱལ་བའི་སྲས་པོ་ཐམས་ཅད་གཤེགས། །དེ་རུ་དྲི་མེད་དམ་ཆོས་ཉོན། །གསང་སྔགས་སྤྱོད་པའི་ཚུལ་དགེ་བ། །

གང་ཐོབ་འཇིག་རྟེན་མགོན་པོས་ནི། །བྱང་ཆུབ་འདུས་མ་བྱས་པ་བརྙེས། །དེ་ནས་འོད་ཟེར་དེས་ཚིགས་སུ་བཅད་པ་འདི་ཐོས་ནས་སླར་ལོག་སྟེ་བཅོམ་ལྡན་འདས་ཀྱི་དཔལ་བེའུ་ཉིད་དུ་ཞུགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེན་པོ་དེ་རྣམས་རང་རང་གི་འཇིག་རྟེན་གྱི་ཁམས་ནས་ཁྲོ་བོའི་མཐུས། བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་ལྷགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཐམས་ཅད་དང་ལྡན་པའི་འཁོར་རྣམས་ཀྱི་སེམས་རྩེ་གཅིག་པར་མཁྱེན་ནས་སླར་ཡང་རྡོ་རྗེ་བསྒྱིངས་པ་བསྲེགས་པའི་མེ་ལྕེ་ཀུན་དུ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །ཀུན་ཏུ་རབ་ཏུ་གཡོས་སོ། ། འགུལ། རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག །འཁྲུགས། རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ། འཇིག་རྟེན་དུ་ཤིན་ཏུ་སྣང་བ་དཔག་ཏུ་མེད་པར་བྱུང་བར་གྱུར་ཏོ། །གཞན་ཡང་བསམ་གྱིས་མི་ཁྱབ་པའི་ཆོ་འཕྲུལ་མཐོང་ངོ་། །སྙོམས་པར་ཞུགས་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ། བདུད་ཐམས་ཅད་རབ་ཏུ་འཇོམས་པར་བྱེད་པ། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ། ཆོས་ཀྱི་དབྱིངས་གྲངས་མེད་པར་སེམས་ཅན་གྱི་ཁམས་རྣམ་པར་གྲོལ་བར་བྱེད་པ། དེ་བཞིན་གཤེགས་པ་ཐམས་ཅད་ཀྱི་སྟོང་པ་ཉིད་ཀྱི་རང་བཞིན་གྱི་ཏིང་ངེ་འཛིན་རྣམ་པར་རྟོག་པ་མེད་པའི་ཡེ་ཤེས་ཀྱི་མེ་ཡང་དག་པར་བྱུང་བ། བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་ཀྱི་སྙིང་པོ་ཉེ་བར་སྟོན་པ། སྣ་ཚོགས་པའི་གསུང་གིས་འཁོར་ལོའི་དཀྱིལ་འཁོར་རབ་ཏུ་སྒྲུབ་པ། བྱང་ཆུབ་སེམས་དཔའ་རྣམས་ཀྱི་ཡབ། སེམས་ཅན་ཉོན་མོངས་པའི་མུན་

ནག་ཏུ་ལྷུང་བ་ཐམས་ཅད་ཀྱི་སྣང་བར་གྱུར་པ། ངན་སོང་དང་། ངན་འགྲོར་ལྟུང་བ་ཐམས་ཅད་ཀྱི་དེད་དཔོན། སྡུག་བསྔལ་བས་ཉམ་ཐག་པ་རྣམས་ཀྱི་བདེ་བར་གྱུར་པ། མདོར་ན་སེམས་ཅན་རྣམས་ཀྱི་སྡུག་བསྔལ་གང་དང་གང་ལྡན་པ་དེ་དང་དེར་རབ་ཏུ་ཞི་བར་བྱེད་པའི་གསང་སྔགས་ཀྱི་རྒྱལ་པོ་ཁྲོ་བོ་ཆེན་པོའི་རྒྱལ་པོའི་སྙིང་པོ་འདི་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་རོ། །ན་མཿསརྦྦ་ཤ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ་ཧཱྃ། བཅོམ་ལྡན་འདས་ཀྱིས་ཁྲོ་བོའི་སྙིང་པོ་འདི་གསུངས་མ་ཐག་ཏུ་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་འདིའི་བདུད་ཀྱི་གནས་ཐམས་ཅད་དང་། བདུད་ཀྱི་རིས་དེ་དག་དང་། གང་སེམས་ཅན་ཐམས་ཅད་མོག་མོག་པོར་བྱས་ཏེ། སེམས་ཅན་སྡུག་བསྔལ་བ་རྣམས་ནི་བདེ་བ་ཐམས་ཅད་དང་ལྡན་པར་བྱེད་པའི་སྣང་བ་མཛད་དེ། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱས་ནས་མ་ལུས་པའི་སྲིད་པའི་བདག་པོའི་ས་གཞི་རབ་ཏུ་འགུལ་བར་གྱུར་ཏོ། །གཞན་ཡང་འཇིག་རྟེན་དུ་བསམ་གྱིས་མི་ཁྱབ་པའི་ངོ་མཚར་རབ་ཏུ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་གསང་བ་པའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་འདི་ནི་ཁྲོ་བོའི་རྒྱལ་པོ་དེ་བཞིན་གཤེགས་པའི་སྙིང་པོ་མཆོག་གི་དེ་ཁོ་ན་ཉིད། སྟོང་ཉིད་འདི་ལས་གཞན་དག་བྱུང་། །ཆོས་ཀྱི་དབྱིངས་ཀྱི་བདག་ཉིད་དེ། །འདི་ལས་རྒྱལ་བ་བྱུང་བ་མཐོང་། །འདི་རུ་རྒྱལ་བ་ཐམས་ཅད་བཞུགས། །སྲིད་པའི་ཁམས་ནི་འདི་ལས་སྤྲུལ། །འདས་པའི་སངས་རྒྱས་ཐམས་ཅད་དང་། །མ་བྱོན་པ་དེ་དེ་བཞིན་གཞན། །ཐམས་ཅད་འདི་ལས་ཡང་དག་བྱུང་། །ནམ་མཁའ་ལྟ་བུ་དྲི་མ་མེད། །སྤྲོས་པ་ཐམས་ཅད་རྣམ་པར་བྲལ། །ངག་གི་སྤྱོད་ཡུལ་རྣམ་པར་སྤངས། །རྟག་པར་སྤྲོས་པ་མེད་པ་ཉིད། །ནམ་མཁའ་ལྟ་བུར་གནས་པ་ཡིན། །ཐ་སྙད་སྔོན་དུ་བྱས་ནས་ནི། །གསང་སྔགས་རྗེས་སུ་བརྗོད་པ་ཡིན། །ཐ་སྙད་ཀྱང་ནི་རྟོག་པ་སྟེ། །དེ་ཉིད་དུ་ནི་བརྗོད་པ་མེད། །ཐ་སྙད་ལ་ནི་བརྟེན་ནས་སུ། །སྐྱོབ་པས་

དེ་ཉིད་གསུངས་པ་ཡིན། །སེམས་ཅན་མེད་དེ་སྒྱུ་མ་བཞིན། །ཡིད་ཀྱིས་བསྒོམ་པར་བྱ་བ་ཡིན། །ལ་ལར་སྒྱུ་མ་ཅི་བཞིན་དུ། །རང་བཞིན་མེད་པར་ཡང་གྱུར་ཏེ། །སྟོང་ཉིད་དེ་ཡི་རང་བཞིན་དུ། །ཐ་སྙད་རྣམས་ནི་རྟོགས་པར་བྱ། །དེ་ལྟར་གསང་སྔགས་མགོན་པོ་འདི། །རང་བཞིན་མེད་པར་མཉམ་པར་མཛེས། །འདོད་པའི་དོན་རྣམས་སྩོལ་བ་ཡང་། །ཐམས་ཅད་ཀྱང་ནི་རྫོགས་པར་བྱེད། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་ཐམས་ཅད་དང་ལྡན་པའི་འཁོར་དང་། ཚངས་པ་དང་། དབང་པོ་ལ་སོགས་པ་རྣམས་ཤིན་ཏུ་ངོ་མཚར་རྨད་དུ་གྱུར་ཅིང་སྙིང་པོ་རྣམས་སྤངས་ཏེ། དེ་ཐམས་ཅད་བཅོམ་ལྡན་འདས་ཤཱཀྱ་ཐུབ་པ་ལ་བལྟས་ནས། ཚིག་འདི་དག་མགྲིན་གཅིག་གི་ངག་གིས་གསོལ་པ། བཅོམ་ལྡན་འདས་བདག་ཅག་གིས་སྔོན་ཆད་མ་ཐོས་པའི་ཆོས་ཀྱི་འཁོར་ལོ་འདི་བསྐོར་བ་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་བདག་ཅག་མཆོག་ཏུ་བདེ་བ་དང་ལྡན་པར་འགྱུར་རོ། །བཅོམ་ལྡན་འདས་འདི་ནི་བསམ་གྱིས་མི་ཁྱབ་པ་ལགས་སོ། །བཅོམ་ལྡན་འདས་འདི་ནི་ཉན་ཐོས་ཐམས་ཅད་དང་། རང་སངས་རྒྱས་རྣམས་ཀྱི་སྤྱོད་ཡུལ་མ་ལགས་སོ། །བཅོམ་ལྡན་འདས་བདུད་སྡིག་ཏོ་ཅན་རྣམས་དང་། བགེགས་ཀྱི་གཟུགས་ཅན་ཐམས་ཅད་ཀྱིས་བགོམ་པར་མི་ནུས་ལགས་སོ། །བཅོམ་ལྡན་འདས་འདི་ནི་སེམས་ཅན་ཐམས་ཅད་ཀྱི་དོན་དམ་པའི་ཡིད་བཞིན་གྱི་ནོར་བུ་ལགས་སོ། །བཅོམ་ལྡན་འདས་འདི་ནི་མངོན་པར་འདོད་པའི་དོན་སྐོང་བ་ལགས་སོ། །བཅོམ་ལྡན་འདས་འདི་ནི་དེ་བཞིན་གཤེགས་པའི་བསྟན་པ་དང་། སེམས་ཅན་རྣམས་ཀྱི་སྲུང་མ་ལགས་སོ། །བཅོམ་ལྡན་འདས་འདི་ནི་སྲིན་པོ་དང་གྲུལ་བུམ་ལ་སོགས་པ་ཐམས་ཅད་ཀྱིས་འདའ་བར་མི་ནུས་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་བྱང་ཆུབ་སེམས་དཔའ་ཆེན་པོ་དེ་དག་དང་། ལྷ་ལ་སོགས་

པའི་འཁོར་དེ་རྣམས་ལ་ལེགས་སོ་ཞེས་བྱ་བ་བྱིན་ཏེ། གཙུག་ལག་ལེགས་སོ་ལེགས་སོ། །སླར་ཡང་གཙུག་ལག་ངེས་པར་ལེགས་སོ། །དེ་ལྟར་གཙུག་ལག་འདིའི་ཚིག་བརྗོད་པ་མཛེས་པ་དེ་ལྟར་ཇི་ལྟ་བ་དེ་བཞིན་དུ་ཡིན་ནོ། །འོན་ཀྱང་གཙུག་ལག་གི་བསྟན་པ་སྲུང་བར་བྱེད་པའི་ཁྲོ་བོའི་རྒྱལ་པོ་ཆེན་པོའི་སྙིང་པོའི་གཞུང་འདི་བདག་གིས་གཏི་མུག་གི་མུན་པས་གཡོགས་པའི་སེམས་ཅན་སྡུག་བསྔལ་བ་རྣམས་ལ་བལྟས་ནས་གསུངས་ཏེ། འདི་ནི་ཉན་པར་མ་ནུས་པའི། །གོ་འཕང་རྫོགས་སངས་རྒྱས་ཀྱིས་གསུངས། །དེ་རྣམས་ཐེ་ཙོམ་ཕྱིར་བདག་གིས། ། ཡེ་ཤེས་སྒྲོན་མེ་ཡང་དག་སྤར། །བྱིས་པ་སྡུག་བསྔལ་ཡང་དག་ཁེངས། །ས་གཞི་སྟེང་ནི་འདི་ན་གནས། །ཚུལ་འདི་རབ་ཏུ་མི་ཤེས་པས། །ཁྱིམ་གྱི་བཅིང་བ་དམ་པོས་བཅིངས། །དེ་ནས་བཅོམ་ལྡན་འདས་ལ་གསང་བའི་བདག་པོ་ལག་ན་རྡོ་རྗེས་མིག་གཉིས་འབྲུ་ཚུགས་སུ་བལྟས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་འདི་ནི་མཐུ་ཆེ་ལགས་སོ། །བཅོམ་ལྡན་འདས་ཁྲོ་བོའི་རྒྱལ་པོ་དེའི་སྙིང་པོའི་གཟི་བརྗིད་དང་མཐུ་ནི་བདག་གིས་མི་བཟོད་ལགས་སོ། །བཅོམ་ལྡན་འདས་ཁྲོ་བོའི་རྒྱལ་པོའི་སྙིང་པོ་འདི་ནི་གདུལ་དཀའ་འདུལ་བ་ལགས་སོ། །བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། གསང་བའི་བདག་པོ་འདི་ནི་ཅི་སྐད་དུ་སྨྲས་པ་དེ་བཞིན་ནོ། །འོན་ཀྱང་གསང་བའི་བདག་པོ་བདག་ནི་གསང་སྔགས་ཀྱི་རྒྱལ་པོ་འདིའི་མཐུས་ཉོན་མོངས་པ་ཐམས་ཅད་དང་བདུད་ཅི་སྙེད་ལས་རྒྱལ་ལོ། །གསང་བའི་བདག་པོ་གང་ཡང་བདག་གིས་འཇིག་རྟེན་གྱི་ཁམས་ན་འདོད་པ་ཐ་དད་པ་སྣ་ཚོགས་ཀྱིས་སེམས་ཅན་རྣམས་དགའ་བར་བྱེད་པའི་གསུང་གི་འཁོར་ལོའི་དཀྱིལ་འཁོར་འཇིག་རྟེན་གྱི་ཁམས་སྣ་ཚོགས་པའི་བསམ་པ་ཐ་དད་པ་རྣམས་ལ་བསྟན་པ་དེ་རྣམས་ནི་འདིའི་བྱིན་གྱིས་བརླབས་ཀྱིས་བདག་གིས་བསྟན་ཏོ། །གང་ཡང་གསང་བའི་བདག་པོ་བྱང་ཆུབ་སེམས་དཔའ་ཆེན་པོ་དབང་ཐང་ཐམས་ཅད་ཐོབ་པའི་ཡེ་ཤེས་ཀྱི་སྟོབས་རྟུལ་ཕོད་པ་བརྙེས་པ་འདི་ཡང་སྙིང་པོའི་བྱིན་

གྱིས་བརླབས་ཀྱི་ཡིན་ནོ། །གཅིག་ཏུ་སེམས་ཅན་དོན་རབ་བརྩོན། །ས་གཞི་ལ་ནི་རྣམ་པར་བཞུགས། །སེམས་ཅན་རྣམས་ལ་ཕན་འདོད་པས། །སྤྲུལ་པ་རྣམས་ཀྱང་འགྱེད་པར་མཛད། །མཆོད་ཅིང་མཉེས་པར་རྟག་ཏུ་ནི། །རྒྱལ་བ་ཞིང་ན་ཡང་དག་བཞུགས། །ཇི་སྲིད་ཕྱོགས་རྣམས་གནས་ཀྱི་བར། །རྟག་པར་རྒྱུན་དུ་མཆོད་འགྱུར་བའི། །སངས་རྒྱས་ཀུན་ནི་མཉམ་པ་རུ། །བྱང་ཆུབ་ཅེས་བྱ་འདི་ལ་བཞུགས། །རང་བཞིན་མེད་པའི་ཆོས་རྣམས་ནི། །སྐྱེ་བ་དང་ནི་འགགས་པ་ཡིན། །ཐ་སྙད་ལ་ནི་བརྟེན་གནས་སུ། །གང་ཞིག་སྒྱུ་མ་བཞིན་དུ་གསུངས། །སྒྱུ་མ་སྟོང་པ་ཉིད་ཡིན་ལྟར། །ཆོས་རྣམས་མཚན་ཉིད་དེ་བཞིན་ནོ། །འོན་ཀྱང་གསང་བའི་བདག་པོ་བདག་གིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མེད་ཀྱི་བསྐལ་པ་སྙེད་དུ་སེམས་ཅན་སྣ་ཚོགས་ཀྱི་ལུས་བླངས་ནས་སྡུག་བསྔལ་སྤྱད་དེ་མགོ་དང་། ལག་པ་དང་། རྐང་པ་དང་། མིག་དང་། ཡན་ལག་གི་མཆོག་དང་། ཆུང་མ་དང་། བུ་དང་། བུ་མོ་དང་། གླང་པོ་དང་། གླང་དང་། ཤིང་རྟ་ལ་སོགས་པ་དང་། གཞན་ཡང་ཕྱི་རོལ་གྱི་དངོས་པོ་རྣམས་ཡོངས་སུ་བཏང་སྟེ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ནས་བསམ་གྱིས་མི་ཁྱབ་པའི་འཇིག་རྟེན་གྱི་ཁམས་སྣ་ཚོགས་པ་རྣམས་ཀྱི་ཚུལ་གྱིས་བསམ་པ་སྣ་ཚོགས་དང་། འདོད་པ་སྣ་ཚོགས་པ་ལ་སྒྲ་དབྱངས་དང་། ཚིག་དང་། ཡི་གེ་བསྟན་ཅིང་སྤྱོད་ལམ་སྣ་ཚོགས་ཀྱི་མཚན་མའི་ཆ་བྱད་དང་། དབྱིབས་ཀྱི་ཁྱད་པར་ཅན་གྱིས་བདག་གིས་སེམས་ཅན་རྣམས་ཀྱི་དོན་བྱས་ཤིང་གང་བྱང་ཆུབ་ཀྱི་སྙིང་པོར་བདུད་བཞི་བཅོམ་པ་དེ་ཐམས་ཅད་གསང་སྔགས་ཀྱི་རྒྱལ་པོ་འདིའི་མཐུས་བྱས་སོ། །འདི་ནི་སངས་རྒྱས་རྣམས་འཕེལ་བར་བྱེད་པ་བདུད་ལས་ཀྱང་རྒྱལ་བར་བྱེད་པ་བསྟན་པ་ཐམས་ཅད་ཀྱི་དོན་ཡོད་པར་བྱེད་པ། གཞན་ཡང་སྣ་ཚོགས་མ་ལུས་པའི་བགེགས་ལས་ཀྱང་རྒྱལ་བར་བྱེད་པ་སྟེ། འདི་ལས་གཉིས་པ་གཞན་ཡོད་མིན། །སངས་རྒྱས་རྣམས་ཀྱིས་མི་འགྱུར་སྔགས། །དེ་བས་སྙིང་གར་གཞག་ནས་ཀྱང་། །ཅི་ལྟར་བདེ་བར་རྣམ་པར་གནས། །

སྡང་བར་བྱེད་པའི་བགེགས་ཀྱང་མེད། །གླགས་ཚོལ་གཞན་ཡང་ཡོད་མ་ཡིན། །རྟག་ཏུ་དགྲ་ཡི་འཇིགས་པའང་མེད། །རྐུན་ལ་སོགས་པའི་འཇིགས་པའང་མེད། །འཇིགས་པ་ཀུན་ལས་རྣམ་པར་གྲོལ། །དེ་ཡི་སྙིང་གར་གནས་བསྒོམས་པས། །བདག་ནི་ཡུན་རིངས་བསྒྲལ་བ་རུ། །འཁོར་བའི་རྒྱ་མཚོ་འཇིགས་པ་ལས། །རྫོགས་སངས་རྒྱས་ཀྱིས་བསྔགས་པའི་གཙོ། །གོ་འཕང་བདག་གིས་ཇི་ལྟར་འཐོབ། །བདག་གིས་ཅི་ཡང་ཐོབ་མེད་པར། །ཚུལ་འདི་ལས་ནི་རྣམ་སྤྱོད་ནས། །དེ་འདིར་མི་འགྱུར་ཐོབ་པར་བྱ། །སངས་རྒྱས་ཉིད་ཀྱིས་རྒྱས་པ་ཐོབ། །རྫོགས་སངས་རྒྱས་ཀྱིས་གསུངས་པ་ཡི། །གསང་སྔགས་སྒྲུབ་ཐབས་བསྟེན་པར་བྱ། །དེ་ནས་ཡིད་བཞིན་ནོར་བུའི་འོད། །སྐུ་ནི་འདི་རུ་ཐོབ་པར་འགྱུར། །གང་ཞིག་ཚུལ་འདིར་གནས་པ་ཡི། །དེ་རྣམས་ཀྱི་ནི་དངོས་གྲུབ་ཕྱིར། །གང་ཚེ་སྔགས་པས་མཉམ་གཞག་པས། །དེ་བས་མ་བརྙེས་པ་ཡང་འཐོབ། །འདིས་ནི་མི་ཕྱེད་པ་ཡང་འབྱེད། །མི་རྒྱལ་བ་ལས་མ་ལུས་རྒྱལ། །སྟོབས་ཆེན་གསང་སྔགས་བཟླས་པ་ཡིས། །རྫོགས་སངས་གོ་འཕང་སྦྱིན་པར་བྱེད། །དྲན་དང་རྟོགས་དང་སེམས་པ་ཡི། ། སྔགས་རིག་གང་དུ་སོང་གྱུར་པ། །མེ་ནི་འབར་བ་ཇི་ལྟ་བར། །སྔགས་པ་གསལ་བར་མཐོང་བར་འགྱུར། །གང་ཚེ་གསང་སྔགས་རྒྱལ་པོ་བསྟེན། །དེ་ལས་འབྲས་མེད་ཅི་ཡང་མེད། །གསང་སྔགས་སྟོབས་ཆེན་དྲན་པ་ནི། །ལས་ནི་འདོད་པ་བྱེད་པར་འགྱུར། །སྔགས་ཀྱི་མགོན་པོ་མ་ལུས་པ། །འདི་ནི་མྱུར་དུ་འགྲུབ་པར་འགྱུར། །གང་ཚེ་གསང་སྔགས་འབྲས་འདོད་པས། །འདིར་ནི་ཐེ་ཙོམ་མི་བྱའོ། །དེ་ནས་བྱང་ཆུབ་སེམས་དཔའ་དེ་དག་དང་། ཐམས་ཅད་དང་ལྡན་པའི་འཁོར་དེ་དག་ངོ་མཚར་བའི་སྙིང་པོ་མ་སྤངས་པར་སྒྲ་སྐད་གཅིག་ཏུ་དུངས་པའི་དབྱངས་ཀྱིས་གསོལ་པ། ཨེ་མའོ་སངས་རྒྱས་བསམ་མི་ཁྱབ། །སེམས་ཅན་དོན་རྣམས་ཐུགས་སུ་ཆུད། །རྟོག་པ་མེད་པའི་རང་བཞིན་ཡང་། །བསམ་མི་ཁྱབ་པའི་གོ་འཕང་ཤོད། །གང་ཞིག་འཆང་བར་བྱེད་པའི་མི། །དེ་ཡི་ངན་འགྲོ་རྣམ་པར་བཅད། །

གང་གིས་ལག་ཏུ་ཆུད་པ་ལྟར། །དེ་ཡི་དངོས་གྲུབ་ལག་མཐིལ་གནས། །འཇིགས་པ་མེད་ཅིང་ང་ཡིར་མེད། །དོགས་པ་ཐམས་ཅད་རྣམ་པར་སྤངས། །ཟད་པར་ས་ལ་བཞུགས་ནས་སུ། །སེམས་ཅན་ལ་ནི་མ་བསམ་བྱེད། །གསང་སྔགས་རྒྱལ་པོ་སྐྱོབ་པ་ཡིས། །བདག་ཅག་ཐམས་ཅད་སྐྱོབ་པར་བྱེད། །འདོད་པའི་དོན་ནི་བྱེད་འདོད་པས། །གསུངས་པ་ཡིད་ཀྱིས་སྒོམ་པར་བྱེད། །དེ་ནས་ཐམས་ཅད་དང་ལྡན་པའི་འཁོར་འདི་དག་ཚིག་འདི་བརྗོད་ནས་དེ་མ་ཐག་ཏུ་ཅང་མི་སྨྲ་བར་གྱུར་ཏོ། །དེ་ནས་ཐམས་ཅད་ངོ་མཚར་དུ་གྱུར་ཏེ་སྤྱན་རྒྱས་ཤིང་ཤཱཀྱའི་རིགས་དགའ་བ་ལ་གསོལ་བ་འདེབས་པའི་ཚིག་གི་ནུས་པ་མེད་དོ། །དེ་ནས་ནམ་མཁར་གནས་པའི་བྱང་ཆུབ་སེམས་དཔས་ངོ་མཚར་འདི་ཐོས་ནས་བཅོམ་ལྡན་འདས་ཤཱཀྱ་ཐུབ་པ་ལ་སྟེང་གི་ནམ་མཁའ་ལ་སྣ་ཚོགས་པའི་མེ་ཏོག་གིས་སྙིམ་པ་བཀང་སྟེ་བཅོམ་ལྡན་འདས་ལ་ཚིགས་སུ་བཅད་པས་མངོན་པར་བསྟོད་པ། རྟག་ཏུ་དག་ཅིང་དྲི་མེད་པ། །རྟག་པར་རྒྱུན་དུ་རྟོག་པ་མེད། །རྟག་ཏུ་རྟོག་པ་མེད་པར་བཞུགས། །དཔའ་བོ་ཆེན་པོ་ཕྱག་འཚལ་བསྟོད། །ཁྱོད་ཀྱི་ཆོས་ཀུན་གཡོ་བ་མེད། །ཐམས་ཅད་ལེགས་སྦྱར་སྤྱོད་ཡུལ་བས། ། རྟག་ཏུ་གཡོ་བ་མེད་མཁྱེན་པས། །སྤྲོས་དང་བྲལ་ལ་ཕྱག་འཚལ་བསྟོད། །སེམས་ཅན་རྣམས་ལ་ཕན་འདོད་པས། །སྤྱོད་པ་སྤྱད་པ་གསུངས་པ་སྟེ། །དག་པ་རྣམས་ནི་ཡང་དག་འབྱུང་། །དག་པའི་སེམས་དཔའ་ཕྱག་འཚལ་བསྟོད། །ཇི་ལྟར་ནམ་མཁའ་བཞིན་དུ་དག །རྡུལ་ཕྲན་ཐམས་ཅད་རྣམ་པར་སྤངས། །དེ་ལྟར་མགོན་ཁྱོད་སྐུ་ཡང་ནི། །ཀུན་དུ་རྟོག་པ་ཐམས་ཅད་སྤངས། །ཤེལ་སྒོང་བཞིན་དུ་ཤིན་ཏུ་དག །ནམ་མཁའ་ལྟ་བུར་སྤྲོས་པ་མེད། །དངོས་པོ་ཐམས་ཅད་རྣམ་དག་པས། །ཡེ་ཤེས་རྒྱ་མཚོ་ཕྱག་འཚལ་བསྟོད། །ནམ་མཁའ་ལ་ནི་འཇའ་ཚོན་ལྟར། །གཙོ་བོ་ཁྱོད་ནི་རྟག་ཏུ་མཐོང་། །དེ་ལྟར་དག་པའི་སེམས་ཅན་གྱིས། །རྟག་ཏུ་གཙོ་བོ་ཁྱོད་མཐོང་ངོ་། །ངན་འགྲོ་ཐམས་ཅད་རྣམ་པར་གྲོལ། །དཔའ་བོ་ཆེན་པོ་ཁྱོད་ཉིད་འཁྲུངས། །དབྱིངས་ཀྱི་སྙིང་པོ་ཡང་དག་བྱུང་། །ཡེ་ཤེས་གཅིག་ཏུ་

གཟི་བརྗིད་ཆེ། །ས་གཞི་ཐམས་ཅད་ངེས་པ་རུ། །སེམས་ཅན་སྡུག་བསྔལ་ཀུན་ཏུ་གཟིགས། །སྡུག་བསྔལ་འདི་ནི་ཟད་བྱས་ནས། །བླ་མེད་གོ་འཕང་འདྲ་བར་འགྱུར། །གསང་སྔགས་རྣམས་ཀྱི་གཙོ་སྔགས་འདི། །ཆོས་རྣམས་ཀྱི་ནི་བློ་འཕེལ་བར། །རྒྱལ་བའི་སྲས་པོ་ཐམས་ཅད་བསྐྱེད། །གཙོ་བོ་ཁྱོད་ཀྱིས་གསུངས་པ་ཡིས། །དང་པོ་ཐམས་ཅད་ཡང་དག་འགྱུར། །རྒྱལ་བ་བདག་ཉིད་རྒྱུ་མེད་འཁྲུངས། །ལས་དང་སྐྱེ་བས་རྣམ་པར་གྲོལ། །རྒྱལ་མཆོག་གཙོ་བོར་འཁྲུངས་པར་འགྱུར། །ཡེ་ཤེས་མེ་ལྕེ་རང་བཞིན་མེད། །འདུས་བྱས་ཐམས་ཅད་རྣམ་པར་སྤངས། །ཆོས་ཀྱི་དབྱིངས་ཀྱི་རང་བཞིན་གཅིག །རྒྱལ་བ་བླ་མེད་ཕྱག་འཚལ་འདུད། །ཅེས་པས་སོ། །དེ་ནས་གསང་བའི་བདག་པོ་ལག་ན་རྡོ་རྗེས་བཅོམ་ལྡན་འདས་ལ་ཚིགས་སུ་བཅད་པས་སྔགས་ཀྱི་ཚིག་གི་དོན་ཞུས་པ། བཅོམ་ལྡན་གསང་སྔགས་ཇི་ལྟར་བསྒྲུབ། ། སྒྲུབ་པའི་ཐབས་ནི་ཇི་ལྟར་ལགས། །སྒྲུབ་ཐབས་རྩ་བ་ཅི་ཞེས་བྱ། །ཇི་ལྟར་ཡང་ནི་དེ་བསྟན་ལགས། །ཇི་ལྟར་སེམས་ནི་དག་པའི་ཕྱིར། །གཙོ་བོ་འདི་ནི་ཅི་ཞིག་བསྒོམ། །ཇི་ལྟར་དེ་ནི་འབྲས་བུ་མེད། །སྔགས་པ་ཡིས་ནི་བརྟེན་པར་བྱ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་ནི་བརྟན་བྱས་ནས། །སྔགས་ཀྱི་དངོས་གྲུབ་བརྗོད་པར་བྱ། །སྔགས་ཀྱི་དངོས་གྲུབ་བྱའི་ཆོ་ག །གཞན་དུ་ཐམས་ཅད་འབྲས་བུ་མེད། །ཇི་ལྟར་རྩ་བ་བསྐྱེད་མིན་ན། །ཤིང་གི་མེ་ཏོག་འབྲས་བུ་མེད། །དེ་ལྟར་གསང་སྔགས་འབྲས་བུ་ཤེས། །བྱང་ཆུབ་སེམས་ནི་རྩ་བ་ཡིན། །བྱང་ཆུབ་སེམས་ནི་བསྐྱེད་ནས་སུ། །བླ་ན་མེད་པའི་གོ་འཕང་འཐོབ། །འདི་ལ་གནས་པའི་ཆོས་ཀུན་ནི། །སྐྱེ་དང་གནས་པས་འབྱུང་བ་སྟེ། །དངོས་པོ་ཐམས་ཅད་མདོར་བསྡུས་ནས། །རང་བཞིན་མེད་ཅིང་བསམ་དུ་མེད། །བྱང་ཆུབ་སེམས་ནི་ངེས་པར་འཐོབ། །གཞན་དུ་འབའ་ཞིག་པར་འགྱུར་རོ། །བུ་ནི་སེང་གེ་འདྲ་ཡིན་ཏེ། །སྟོང་ཉིད་འདུས་བྱས་སྒོམ་པར་བྱེད། །སྲིད་པ་ཐམས་ཅད་སྒྱུ་མ་ཡིན། །གང་ཞིག་བསམ་པའི་འབྲས་བུར་གནས། །

མུ་སྟེགས་རྣམས་ཀྱི་འདོད་བཤད་པ། །བདག་དང་སྲོག་དང་གང་ཟག་བཅས། །གཙོ་བོ་སྐྱེས་བུར་བཤད་པ་དང་། །གང་དུ་ཁྱབ་པར་གནས་པ་དང་། །དེ་ལྟར་འཁོར་བ་རྣམས་བརྟགས་ནས། །འཁོར་བའི་དངོས་པོ་འབའ་ཞིག་སྟེ། །མངོན་པའི་ང་རྒྱལ་གྱིས་རྨོངས་ནས། །བྱིས་པ་སྡུག་བསྔལ་བདེན་པ་ཅན། །ལོག་པའི་ཞགས་པས་བཅིངས་པ་ཡི། །སྡུག་བསྔལ་བ་དེ་རྣམས་བལྟས་ནས། །དེ་རྣམས་ཀུན་ལ་བརྗོད་པ་ཡིན། །འདི་སྐད་གསུང་ནི་བཀའ་སྩལ་ཏོ། །སྲོག་མེད་སེམས་ཅན་ཀྱང་ཡོད་མིན། །བྱེད་པ་པོ་མེད་གཙོ་བོའང་མེད། །ཁྱབ་པ་མེད་ཅིང་དངོས་པོའང་མེད། །རྫས་ལ་སོགས་པའི་རང་བཞིན་མེད། །ལོག་ཤེས་རང་བཞིན་ཞགས་པ་ནི། །སྲིད་པའི་འཆིང་བ་རྣམ་པར་སྤངས། །དངོས་པོ་ཐམས་ཅད་རྣམ་པར་བྲལ། །སྣ་ཚོགས་ཇི་བཞིན་རྣམ་བསྒོམས་པས། །དངོས་པོ་ཀུན་ལས་རྣམ་པར་གྲོལ། །སྟོང་པ་ཉིད་ཀྱི་གོ་འཕང་འཐོབ། །ཕྱི་རོལ་ནང་གི་ཁྱད་པར་གྱིས། །དེ་ལྟར་ཐམས་ཅད་རྣམ་པར་བསྒོམ། །དབུ་བ་ཆུ་བུར་དང་སྒྱུ་མ། །སྟོང་ཉིད་འབའ་ཞིག་ལས་ལྡང་སྟེ། །དེ་ལྟར་ཐམས་ཅད་རྣམ་བསྒོམས་ནས། །ཡེ་ཤེས་གོ་འཕང་ངོ་རྣམས་རྟོག །སྡིག་པའི་ཆོ་ག་ལས་གྲོལ་ནས། །འཆི་མེད་གོ་འཕང་དུ་གྲོལ་འགྱུར། །ཕུང་པོ་ཁམས་དང་སྐྱེ་མཆེད་དང་། །གཞན་ཡང་གཟུང་འཛིན་རྣམས་ལས་འདས། །ཀུན་མཁྱེན་ཡེ་ཤེས་ཞགས་པ་ནི། །འཆི་བའི་དོན་དུ་རབ་ཏུ་བརྟག །གང་དུ་ཕུང་པོ་ཁམས་མེད་ཅིང་། །སྐྱེ་མཆེད་རྣམས་ནི་འབྱུང་བ་མེད། །དངོས་པོ་ཀུན་ལས་རྣམ་གྲོལ་བར། །རྒྱལ་བ་མཆོག་གིས་རྟག་ཏུ་གསུངས། །གང་དུ་ཀུན་གཞི་རྣམ་ཤེས་མེད། །བདག་མེད་གང་ཟག་ཀྱང་ཡོད་མིན། །སངས་རྒྱས་བྱང་ཆུབ་ས་སྟེང་འདི། །གང་དུ་ཐམས་ཅད་སྒྱུ་མར་གསུངས། །ང་ནི་ཀུན་མཁྱེན་མངའ་བརྙེས་པ། །སེམས་ཅན་དོན་རྣམས་ཐུགས་སུ་ཆུད། །ཆོ་ག་བྱ་བ་ལ་ཞུགས་ཕྱིར། །བུ་ལ་མ་ལུས་པར་བཤད་དོ། །གང་ཞིག་ཀུན་གཞི་ཡོད་པ་དང་། །གལ་ཏེ་རྣམ་ཤེས་ཀྱང་ཡོད་པ། །དེ་ཡི་བདག་ཉིད་བདག་གི་བུ། །ཡོད་དོ་ཞེས་ཀྱང་བསྟན་གྱུར་པ། །དངོས་པོའི་གདོན་

གྱིས་བརླམས་པ་ཡི། །བྱིས་པས་སྡུག་བསྔལ་རྣམས་མཐོང་ནས། །བདག་གིས་གཞུག་པར་བྱ་ཕྱིར་བུ། །ཆོ་ག་རྒྱས་པ་གསུངས་པ་ཡིན། །སེམས་ཅན་མེད་ཅིང་སྲོག་ཀྱང་མེད། །གང་ཟག་མེད་ཅིང་བྱེད་པོའང་མེད། །རྣམ་ཤེས་མེད་ཅིང་ཀུན་གཞི་མེད། །གང་ལ་བདག་མེད་དབང་ཕྱུག་མེད། །སྐྱེས་བུ་མེད་ཅིང་ཁྱབ་པའང་མེད། །དངོས་པོ་མེད་ཅིང་སྒྱུ་ཡང་མེད། །དངོས་པོ་ཀུན་ལས་རྣམ་པར་གྲོལ། །དམ་ཆོས་དྲི་མ་མེད་པ་བཤད། །དེ་ཉིད་མཆོག་གི་གཙོ་བོ་སྟེ། །རྫོགས་སངས་རྒྱས་ཀྱི་གོ་འཕང་བསྟེན། །རྟག་པར་རྒྱུན་དུ་གོ་འཕང་བསྟེན། །རྟག་ཏུ་རྒྱུན་དུ་བསྒོམ་པར་བྱ། །བྱང་ཆུབ་སེམས་ནི་རྣམ་པར་བསྒོམ། །གཟུང་དང་འཛིན་པ་རྣམ་གྲོལ་བར། །དངོས་པོ་ཐམས་ཅད་རྣམ་པར་སྦྱང་། །ཕུང་པོ་ཁམས་དང་སྐྱེ་མཆེད་དང་། །ཐམས་ཅད་སྟོང་ཉིད་སྒྱུ་མ་ལྟར། །བྱང་ཆུབ་སེམས་ནི་བསྡུས་པ་ཉིད། ། བྱང་ཆུབ་སེམས་དཔའ་བློ་ལྡན་གྱིས། །དེ་ལྟར་ཡིད་ཀྱིས་བསྒོམ་པར་བྱ། །ཕུན་སུམ་ཚོགས་པ་ཐམས་ཅད་ཉེ། །གང་ཞིག་སངས་རྒྱས་ཉིད་ཀྱི་ཐུགས། །བག་ཡོད་པས་ནི་རྟག་བསྟེན་ན། །བྱང་ཆུབ་སེམས་ཀྱི་མྱུ་གུ་འཆར། །བསྙེན་པར་གྱུར་ན་འབྲས་བུ་ཆུང་། ། གསང་སྔགས་སྤྱོད་པས་གང་དག་སྐྱེ། །ཡིད་བཞིན་ནོར་བུ་ལྟ་བུའི་སྐུ། །བྱང་ཆུབ་སེམས་ཀྱིས་འཐོབ་པར་འགྱུར། །ནམ་མཁའ་ལྟ་བུར་གོས་མེད་པའི། །སྐུ་ནི་ཀུན་དུ་འཐོབ་པར་འགྱུར། །བྱང་ཆུབ་སེམས་ནི་བསྒོམ་པ་ཡི། །བསོད་ནམས་བསམ་གྱིས་མི་ཁྱབ་བཤད། །སངས་རྒྱས་རྫུ་འཕྲུལ་ཆེ་ཀུན་གྱིས། །འབྲས་བུའང་བསམ་གྱིས་མི་ཁྱབ་གསུངས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་སྟན་ལས་ལངས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། རྡོ་རྗེའི་སྐབས་སུ་རྟོལ་བ་བླངས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡེ་ཤེས་རྒྱ་མཚོ་ལས་བྱུང་བའི། །ཁྱོད་ཀྱི་སྲས་པོ་ང་མཉེས་གཤིན། །འདི་དག་ཤིན་ཏུ་སོམ་ཉི་ཟ། །བདག་གིས་ཇི་ལྟར་རྟོགས་པར་བགྱི། །གང་ཡང་བྱམས་པ་ལ་སོགས་གཞན། །ས་བཅུ་མ་ལུས་པ་ཐམས་ཅད། །འདི་ལ་ཐེ་

ཚོམ་འཚལ་ཞིང་མཆིས། །ཐུབ་པ་ཆེན་པོ་བཤད་དུ་གསོལ། །གང་ཞིག་སེམས་ཅན་དོན་མ་བྱས། །བསོད་ནམས་ཡེ་ཤེས་རྣམ་པར་སྤངས། །དེ་རྣམས་ལ་ནི་ཐུགས་བརྩེའི་ཕྱིར། །བཅོམ་ལྡན་འདས་ལ་འདི་གསོལ་འདེབས། །དེ་རིང་བདག་ལ་མ་ལུས་པར། །སེམས་ཅན་ཕན་པར་བརྩོན་པས་གསུངས། །འདི་ཡི་མཐུ་སྟོབས་ཀྱང་ནི་ཅི། །འདི་ཡི་ཕ་རོལ་གནོན་པ་ཅི། །མི་གཡོ་ཞེས་བྱའི་གཙོ་ཁྱོད་ཀྱིས། །འདིར་ནི་ཇི་ལྟར་ཡང་དག་གསུངས། །འདི་ལས་གཞན་པའི་གོ་འཕང་མེད། །འདི་དག་ཐམས་ཅད་གསུང་དུ་གསོལ། །གང་གི་གོ་འཕང་དེ་འགྲུབ་པའི། །དཀྱིལ་འཁོར་ཡང་ནི་བཤད་དུ་གསོལ། །གང་གིས་ས་སྟེངས་འདི་ཐོབ་པའི། །བསམ་མི་ཁྱབ་པའི་གོ་འཕང་གསུངས། །གསང་སྔགས་ཀྱི་ནི་ཚད་ཀྱང་གསུངས། །དཀྱིལ་འཁོར་ཡང་ནི་ཇི་ལྟར་ལགས། །མགོན་པོ་འདི་ལ་ཐེ་ཚོམ་ཟ། །གང་འདིར་འགྲོ་བ་ལ་ཕན་ཕྱིར། །སྔགས་ཀྱི་དངོས་གྲུབ་དེ་བཞིན་གསུངས། །དེ་ཉིད་ལས་ཀྱི་དབྱེ་བ་ཡང་། །མངོན་སྤྱོད་ཀྱང་ནི་རབ་ཏུ་བཤད། །ཞི་དང་རྒྱས་དང་དབང་དག་གིས། །མགོན་པོས་ཇི་ལྟར་ཆེར་མྱུར་བར། །སྔགས་བཟླས་པ་ཡི་འབྲས་བུ་མཆིས། །མགོན་པོས་བཟླ་བའི་མཚན་ཉིད་ནི། །ས་སྟེངས་འདིར་ནི་དེ་ཇི་ལྟར། །མེ་ཐབ་ཀྱི་ནི་ཆོ་ག་དང་། །དེ་ཡང་ཚིམ་དང་བསང་གཏོར་དག །ཁྲོ་བོའི་རྒྱལ་པོ་དང་ལྡན་པ། །མགོན་པོས་དེ་དག་ཐམས་ཅད་གསུངས། །ཉི་མ་གཅིག་གི་ཉིན་ཕྱེད་ནས། །ཟླ་བ་བརྒྱད་པའི་སྐད་ཅིག་ཏུ། །དངོས་གྲུབ་དག་ནི་ཡང་དག་གསུངས། །དུག་གི་ལས་ཀྱི་གསོ་སྤྱད་དང་། །རྫས་ཀྱིས་སྦྱོར་བའི་ལས་སྣ་ཚོགས། །མངོན་པར་བརྗོད་པ་ཡང་དག་འབྱུང་། །མ་ལུས་པ་ནི་བཤད་དུ་གསོལ། །གང་གིས་དངོས་གྲུབ་ཐོབ་པ་ཡི། །མགོན་པོ་གཞན་ནི་མ་མཆིས་ཏེ། །གཙོ་བོ་ཁྱོད་སྤངས་གཞན་མེད་དོ། །བྱང་ཆུབ་སེམས་དཔའ་དཔའ་བོ་རྣམས། །ཉན་ཐོས་རང་རྒྱལ་རྫུ་འཕྲུལ་ཆེ། །གང་ཡང་འཇིག་རྟེན་པར་གྲགས་པའི། །ཚངས་སོགས་རྫུ་འཕྲུལ་ཆེར་བཤད་པ། །དེ་རྣམས་ཀྱི་ཡང་མགོན་སྐྱབས་ནི། །གཙོ་བོ་ཁྱོད་སྤངས་གཞན་མ་མཆིས། །དེ་ནས་བྱམས་པ་ལ་

སོགས་པའི་བྱང་ཆུབ་སེམས་དཔའ་རྣམས་དང་། ཕྱག་ན་རྡོ་རྗེ་ལ་སོགས་པས་སླར་ཡང་བཅོམ་ལྡན་འདས་ལ་གསོལ་བ་བཏབ་པ། ཆོས་ཀྱི་རྒྱལ་པོ་སྔགས་ཀྱི་སྒོ། །བཅོམ་ལྡན་འདས་ཀྱིས་བཤད་དུ་གསོལ། །བྱང་ཆུབ་སེམས་དཔའི་སྤྱད་སྤྱོད་པའི། །བྱང་ཆུབ་སེམས་དཔའི་དོན་གྱི་ཕྱིར། །གསང་སྔགས་སྤྱོད་པའི་སྒྲུབ་པའི་ཐབས། །གང་གིས་བཅོམ་ལྡན་ཉིད་ཀྱིས་གཟིགས། །ཆོས་ཀྱི་དགའ་བདེ་ཐོབ་པ་ནི། །ས་གཞིའི་སྟེང་ན་རྣམ་པར་གནས། །གསང་སྔགས་མཉེས་པར་རབ་བརྩོན་ཞིང་། །མཐོང་བའི་ཆོས་ལ་བདེ་ཐོབ་པའི། ། སེམས་ཅན་ས་སྟེངས་གནས་པ་ཡི། །ཐེ་ཙོམ་མེད་པར་འབྱུང་བར་འགྱུར། །ཐམས་ཅད་དབང་ཕྱུག་གོ་འཕང་འཐོབ། །འཇིགས་པ་ཐམས་ཅད་རྣམ་པར་སྤངས། །གསང་སྔགས་རྒྱལ་པོ་རྫུ་འཕྲུལ་ཆེ། །འཇིག་རྟེན་འདི་རུ་བྱུང་བར་འགྱུར། །སྡང་བའི་སྲིན་པོ་ཐམས་ཅད་དང་། །འབྱུང་པོ་གདོན་དང་ཤ་ཟ་དང་། །འཇིགས་སུ་རུང་དང་དྲག་ཤུལ་ལས། །སེམས་ཅན་རྣམས་ལ་གནོད་བཤད་པ། །གསང་སྔགས་སྟོབས་ཆེན་དྲན་པ་ཡིས། །དེ་དག་ཐམས་ཅད་འབྱུང་མི་འགྱུར། །ས་སྟེངས་སེམས་ཅན་མ་རུངས་པ། །རྣམ་པ་སྣ་ཚོགས་གཞན་ཡང་བཤད། །དེ་རྣམས་གདུལ་བར་བྱ་བའི་ཕྱིར། །རྟོག་པ་འདི་ནི་རབ་ཏུ་གསུངས། །ལྷ་དང་ཀླུ་དང་གནོད་སྦྱིན་དང་། །གྲུལ་བུམ་དང་ནི་ལུས་སྲུལ་པོ། །སྨྱོ་བྱེད་རྒྱུ་སྐར་ཐམས་ཅད་དང་། །མ་རུངས་གཟའ་སོགས་བཤད་པ་དང་། །སེམས་ཅན་སྡིག་ཅན་དེ་རྣམས་ལ། ། ཁྲོ་བོ་འདི་ནི་རབ་ཏུ་གསུངས། །ཚངས་སོགས་གདོན་གྱི་ཚོགས་ཀུན་དང་། །དེ་བཞིན་རྒྱལ་པོ་ཉན་ཐོས་དང་། །ས་བཅུའི་བྱང་ཆུབ་སེམས་དཔའ་ཡིས། །གང་ཞིག་བཤད་པར་མི་ནུས་ཤིང་། །དེ་དག་ཐམས་ཅད་ཐལ་བར་རློག །གསང་སྔགས་བཟླས་པ་རྫུ་འཕྲུལ་ཆེ། །སྙིང་ལ་གནས་པ་ཡང་དག་བསམ། །གསང་སྔགས་ཞེས་བྱ་མཐོང་དཀའ་ཞིང་། །མ་ལུས་པ་རུ་ཐལ་བར་བརླགས། །ཚངས་པ་ལ་སོགས་དཀྱིལ་འཁོར་དང་། །བྱང་ཆུབ་སེམས་དཔའ་བདག་ཉིད་ཆེ། །དབང་པོའི་གནས་བཅུ་བདག་པོ་ཡིས། །འདི་ནི་བཟོད་པར་མི་ནུས་ཏེ། །

ཁྲོ་བོའི་རྒྱལ་པོ་རོལ་པ་ནི། །སྡང་བའི་སེམས་ཅན་ཅི་ནས་ཀྱང་། །རས་བལ་འདའ་བ་མཚུངས་པར་བརྟག །མིང་ནས་སྨོས་པ་ཙམ་གྱིས་ནི། །ཕྱོགས་བཅུ་རྣམས་སུ་འབྱེར་བར་འགྱུར། །དེ་བས་རྣམ་པ་ཐམས་ཅད་ཀྱིས། །གསང་སྔགས་འདི་རུ་བཟླས་པ་ནི། །རྟག་པར་རྒྱུན་དུ་དྲན་པར་བྱ། །གསང་སྔགས་དངོས་གྲུབ་འདོད་པ་ཡིས། །ཐམས་ཅད་དུ་ནི་འཇིགས་མེད་པར། །སྔགས་གནས་ས་སྟེངས་འདི་རུ་བྱ། །གསང་སྔགས་མགོན་པོ་དྲན་པ་དང་། །འཆང་བ་དང་ནི་རྟག་ཏུ་ཟློས། །མེ་ཡི་ནང་དུ་གནས་པ་ནི། །མཆེ་བ་གཙིགས་པ་ཡི་ནི་སྐུས། །འབྱེར་ཏེ་རྟག་ཏུ་འཇིགས་པ་མེད། །མཐོ་རིས་ཐེམ་སྐས་ལྟ་བུར་དགའ། །འཇིགས་ཤིང་སྐྲག་པས་འཁྲིགས་པ་ན། །རྒྱལ་པོ་ཆེན་པོས་འཇིགས་པ་སེལ། །ཆོམ་རྐུན་གསེབ་ཏུ་ཆུད་པ་ན། །སེང་གེ་རྣམ་པར་བསྒྱིངས་པའི་སྐུ། །ཁྲོ་བོའི་རྒྱལ་པོ་རྫུ་འཕྲུལ་ཆེ། །དེ་ཡིས་རྟག་ཏུ་དྲན་པར་བྱས། །རིམས་དང་སོ་མིག་གཟེར་ཟུག་དང་། །རྐེད་པའི་རྩིབ་ལོགས་ལུས་ལས་བྱུང་། །རྣམ་པ་སྣ་ཚོགས་ཀུན་འབྱུང་བའི། །ས་སྟེངས་ལུས་ཅན་ནད་རྣམས་ནི། །གསང་སྔགས་དྲན་པ་ཙམ་ཉིད་ཀྱིས། །དེ་དག་ཐམས་ཅད་ཟད་པར་འགྱུར། ། ཁྲོ་རྒྱལ་བསམ་གྱིས་མི་ཁྱབ་པའི། །མཐུ་དང་སྟོབས་ནི་རྟུལ་ཕོད་པའི། །ཀུན་མཁྱེན་ལས་གཞན་ས་སྟེངས་ན། །རྟག་ཏུ་བཟོད་གནས་སུ་ཞིག་ཡོད། །འཁོར་ལོས་སྒྱུར་བའི་མཐུ་སྟོབས་ནི། །ཇི་ལྟར་སྨྲ་བར་མི་ནུས་པ། །དེ་བཞིན་ཁྲོ་རྒྱལ་བསྒྱིངས་པ་ཡིས། །བརྗོད་པར་ཡང་ནི་མི་ནུས་སོ། །ཇི་ལྟར་འཁོར་ལོས་སྒྱུར་བ་ཡི། །ཡོན་ཏན་མི་གཡོས་བགྲང་མི་ནུས། །དེ་བཞིན་ཁྲོ་བོའི་རྒྱལ་པོ་ཡི། །སྟོབས་ནི་བརྗོད་པར་མི་ནུས་སོ། །རྡོ་རྗེ་པདྨའི་རིགས་ཞེས་པའི། །ཁྲོ་བོའི་རྒྱལ་པོ་ཐམས་ཅད་ཀྱང་། །ཁྲོ་བོའི་མངག་གཞུག་ཕོ་ཉ་དང་། །བཀའ་ཉན་ཕོ་ཉ་རྫུ་འཕྲུལ་ཆེ། །དེ་རྣམས་ཀྱིས་ནི་ཁྲོ་བོ་འདི། །འཁོར་ལོས་སྒྱུར་བ་ཞེས་སུ་བརྗོད། །ཁྲོ་བོའི་རྒྱལ་པོ་བློ་ལྡན་གྱིས། །མཐུ་སྟོབས་དེ་ལྟར་བཤད་པ་ནི། །སངས་རྒྱས་ཀུན་གྱི་དཔལ་གཅིག་འདི། །དེ་ཡི་དཔའ་བོ་ཞེས་སུ་བཤད། །གང་གསུངས་བདེན་པའི་ཚིག་གྱུར་པས། །

མི་སླུ་བ་ནི་ཉིད་ཡིན་ནོ། །དེ་ཕྱིར་འདི་ནི་མི་གཡོ་བས། །མི་གཡོ་བ་ཞེས་མངོན་པར་བརྗོད། །མི་གཡོ་བ་ཡི་ས་ཐོབ་པ། །བསམ་གཏན་རྩེ་གཅིག་བློ་ཡིས་གནས། །ཉན་ཐོས་ས་ལ་སོགས་པ་ཡི། །བདུད་རྣམས་ཀུན་གྱིས་མི་གཡོ་བ། །དེ་ནས་མགོན་པོས་མཚན་གསོལ་ཏོ། ། རྫོགས་པའི་སངས་རྒྱས་རྐང་གཉིས་མཆོག །བྱང་ཆུབ་སེམས་དཔའ་དཔའ་བོ་རྣམས། །འདི་ནི་དོན་ཀུན་འགྲུབ་པར་བྱེད། །གང་ཡང་འདས་པའི་སངས་རྒྱས་དང་། །གང་ཡང་དེ་བཞིན་མ་བྱོན་པ། །མགོན་པོ་ད་ལྟར་བཞུགས་པ་གང་། །འགྲོ་ལ་ཕན་ཕྱིར་ཆོ་ག་ནི། །དེ་དག་ཀུན་གྱིས་འདི་གསུངས་པ། །སངས་རྒྱས་སྤྱན་ཞེས་བྱ་བར་བཤད། །སེམས་ཅན་ཁམས་ནི་ཐམས་ཅད་ཀྱི། །བསྟན་པ་གང་ཡིན་བསྲུང་བར་མཛད། །སངས་རྒྱས་ཀུན་གྱི་སྤྲུལ་པ་གང་། །བྱང་ཆུབ་སེམས་དཔའ་མཐུ་ཆེན་གྱིས། །གང་ཡང་གསང་སྔགས་གྲངས་མེད་པ། ། སེམས་ཅན་ཕན་འདོགས་བཞུགས་པར་གསུངས། །ལག་ན་རྡོ་རྗེ་བློ་ལྡན་པ། །འདི་དག་ཐམས་ཅད་ཡང་དག་བཤད། །མི་གང་སྡིག་པས་བསྒྲིབས་མེད་ཀྱི། །སེམས་ཅན་སྣང་བ་སྐྱེད་པར་བྱེད། །མི་ཕྱེད་པ་ཡི་ཞགས་པས་བཅིངས། །བླ་ན་མེད་པའི་གོ་འཕང་འགྱུར། ། ཁྲོ་བོའི་རྒྱལ་པོ་བློ་དང་ལྡན། །སྔགས་པས་མ་བསྒྲུབས་པ་ཡང་འགྲུབ། །ཁྲོ་བོའི་རྒྱལ་པོའི་བྱིན་རླབས་ཀྱིས། །འདོད་པ་མ་ལུས་འགྲུབ་པར་འགྱུར། །དེ་ནས་ཐམས་ཅད་དང་ལྡན་པའི་འཁོར་དེ་དག་ངོ་མཚར་ཏེ། དགའ་ཞིང་མིག་རྒྱས་པས་མགྲིན་གཅིག་དང་ངག་གཅིག་ཏུ་ཚིག་སྙན་པོས་གསོལ་པ། ཨེ་མའོ་སངས་རྒྱས་ཐམས་ཅད་ནི། །ཐབས་དང་ཤེས་རབ་བསམ་དུ་མེད། །ཐུགས་རྗེར་གྱུར་པའི་ཐུགས་ཀྱིས་ནི། །མཚུངས་མེད་དམ་ཚིག་བཤད་དུ་གསོལ། །གང་ཡང་སེམས་ཅན་འཇིགས་པས་འཁྲིགས། །ས་སྟེངས་ཐམས་ཅད་འཇིགས་མེད་ཅིང་། །གང་གིས་གུས་ཆེན་རང་བཞིན་གྱིས། །དེ་ཡི་ངན་འགྲོ་སྟོངས་པར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྲོ་བོའི་རྒྱལ་པོའི་དཀྱིལ་འཁོར་འདིར་

ཞུགས་པ་ཙམ་གྱིས་སེམས་ཅན་ཐམས་ཅད་རྒྱལ་པོའི་དབང་ཕྱུག་གི་གོ་འཕང་འཐོབ་པར་འགྱུར་བ། བགེགས་དང་ལོག་འདྲེན་ཐམས་ཅད་ཀྱིས་འཚེ་བར་མི་ནུས་པ། དངོས་གྲུབ་མྱུར་དུ་འཐོབ་པར་བྱེད་པ། དབང་ཕྱུག་ཐམས་ཅད་ཡང་དག་པར་ལྡན་པར་བྱེད་པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་སླར་ཡང་ཤིན་ཏུ་ལེགས་སོ། །ཁྱོད་ཀྱིས་ཁོ་བོ་ལ་གསོལ་བ་བཏབ་པའི་དོན་འདི་རིགས་ཀྱི་བུ་ཉོན། ཁྲོ་བོའི་རྒྱལ་པོའི་དཀྱིལ་འཁོར་འདི་གང་གིས་ཐོས་པས་ས་སྟེངས་སུ་ཐམས་ཅད་ངོ་མཚར་ཞིང་མིག་རྒྱས་ཏེ་ནུས་པ་མེད་པས་བཟོད་པར་མི་ནུས་ཏེ། དེ་ནས་ས་སྟེངས་སུ་འགྱེལ་བར་འགྱུར་ཏེ། དེ་ནས་བཅོམ་ལྡན་འདས་ཀྱིས་དེའི་ཚེ་བདུད་ཐམས་ཅད་སྲེག་པའི་མེ་ལྕེ་ཡང་དག་པར་བྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་ཀྱི་རྒྱལ་པོ་འདི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པ། དུས་གསུམ་ཀུན་གྱི་བྱང་ཆུབ་སེམས་དཔའ་མ་ལུས་པ་སྐྱེད་པར་བྱེད་པ། སེམས་ཅན་ཐམས་ཅད་ཀྱི་དོན་གསལ་བར་བྱེད་ཅིང་ཡོད་པ། དེ་བཞིན་གཤེགས་པ་ཐམས་ཅད་བསོད་ནམས་བསམ་གྱིས་མི་ཁྱབ་པ་ལས་འཁྲུངས་པ། སེམས་ཅན་ཐམས་ཅད་ཀྱིས་ཤིན་ཏུ་མཐོང་བར་དཀའ་བ། མཐོང་བའི་བགེགས་རྣམས་རབ་ཏུ་འཇོམས་པ། ངན་འགྲོ་ཐམས་ཅད་རྣམ་པར་སྦྱོང་བར་བྱེད་པ། ནད་ཐམས་ཅད་རབ་ཏུ་ཞི་བར་བྱེད་པ། བསམ་པ་ཐམས་ཅད་ཡོངས་སུ་རྫོགས་པར་བྱེད་པ། གདོན་མ་རུངས་པ་ཐམས་ཅད་ལ་གསོ་སྦྱོང་མཛད་པ། བདུད་ཀྱི་དགྲ་ཐམས་ཅད་ལས་རབ་ཏུ་ཞི་བར་མཛད་པའི་སྔགས་བཀའ་སྩལ་པ། ནམཿསརྦྦ་ཏ་ཐཱ་ག་ཏེ་བྷྱཿ། སརྦྦཱ་ཤ་པ་རི་པཱུ་ར་ཀེ་བྷྱཿ། སརྦྦ་ཐཱ། ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུྃ་ཏྲཊ་ཧཱཾ་མཱཾ། བཅོམ་ལྡན་འདས་ཀྱིས་གསང་སྔགས་ཀྱི་རྒྱལ་པོ་བཀའ་སྩལ་མ་ཐག་ཏུ་ཐམས་ཅད་དང་ལྡན་པའི་འཁོར་དེ་དག་ཆུ་ཤིང་གི་སྡོང་བུ་ལྟ་བུ་དང་ནགས་ཚལ་

ཆེན་པོ་ལྟ་བུར་བབ་ཅོལ་དུ་ཁས་བུབ་ཏུ་འགྱེལ་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་པ་དང་། ལྡེག་པ་དང་། འགུལ་བ་དང་། རབ་ཏུ་འགུལ་བ་དང་། གཡོས་པ་དང་། རབ་ཏུ་གཡོས་པ་དང་། ཆེམ་ཆེམ། རབ་ཏུ་ཆེམ་ཆེམ་མོ། །ཤར་ཕྱོགས་མཐོ་ན་ནུབ་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ་བར་གྱུར་ཏོ། །གཞན་ཡང་ངོ་མཚར་ཞིང་རྨད་དུ་བྱུང་བ་མཐོང་སྟེ་ངོ་མཚར་ཆེ་བར་གྱུར་པའི་འཇིག་རྟེན་གྱི་ཁམས་རྣམས་སུ་སངས་རྒྱས་ཀྱི་ཞིང་ཁམས་སྣ་ཚོགས་པ་ཡང་མཐོང་ངོ་། །གང་ཡང་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་འདིའི་བགེགས་སྣ་ཚོགས་དང་། སྲིན་པོ་དང་བདུད་ཀྱི་རིགས་སྣ་ཚོགས་དང་། གཞན་ཡང་གདུག་པའི་སེམས་དང་ལྡན་པ་དེ་དག་ཐམས་ཅད་ཐལ་བར་བརླགས་ཏེ། ཁ་ཅིག་ཁ་སྦུབ་ཏུ་ནི་གནས། ། འཇིག་པའི་བསྐལ་པ་ལྟ་བུར་ནི། །དུད་པ་དུད་སྐྱར་ཀུན་དུ་གནས། །ཉི་མ་ཟླ་བ་རྫུ་འཕྲུལ་ཆེ། །འདི་ཡི་སྣང་བའང་མུན་པར་འགྱུར། །མུན་ནག་སྨག་ནི་ཤིན་ཏུ་འཇིགས། །གློག་འགྱུ་ཡུལ་ན་འཇིགས་སུ་རུང་། །ཕྱོགས་ཀུན་དུ་ནི་འོ་དོད་འབོད། །ས་གཞི་ཐམས་ཅད་ཀུན་དུ་འཁྲུག ། གཟའ་དང་རྒྱུ་སྐར་ཚོགས་ཀུན་དང་། །གང་ཡང་ལྷ་ཡི་གཙོ་བོ་གཞན། །དེ་དག་ཐམས་ཅད་འཇིགས་དངངས་ནས། །སེམས་མེད་ཁ་སྦུབ་ཏུ་ནི་འགྱེལ། །ལྷ་མིན་མིའམ་ཅི་དང་ཀླུ། །གནོད་སྦྱིན་སྲིན་པོ་ལུས་སྲུལ་པོ། །འདི་རྣམས་ལུས་ཀྱིས་མ་བཟོད་པས། །དུག་གིས་བཏབ་བཞིན་གཉིད་ཡུར་ཏེ། །འདི་དག་ཐམས་ཅད་གཅིག་ཏུ་འབར། །བསྐལ་པའི་མེ་ལས་ཡང་དག་བྱུང་། །འདི་དག་ཐམས་ཅད་འབར་ཞིང་མཆེད། །སངས་རྒྱས་ཞིང་ནི་ཀུན་ནས་ཀྱང་། །བྱང་ཆུབ་སེམས་དཔའ་བདག་ཉིད་ཆེ། །ས་བཅུ་གནས་ཀྱི་དབང་ཕྱུག་རྣམས། །དེ་ཡང་གཉིད་བྲོ་ཡུར་བར་འགྱུར། །ཁ་སྦུབ་ཏུ་ནི་ས་ལ་འགྱེལ། །ཁྲོ་མོ་མངག་གཞུག་བཀའ་ཉན་པ། །ཕོ་ཉ་ཕོ་མོ་བྲན་དང་བཅས། །ལུས་འདིའི་ཚུགས་ནི་མི་ཐུབ་པར། །སེམས་སྟོར་ཁ་སྦུབ་འགྱེལ་བར་གྱུར། །གང་ཡང་ཉན་ཐོས་བསེ་རུ་དང་། །འཇིག་རྟེན་རྫུ་འཕྲུལ་ཆེན་པོ་གཞན། །ལྕགས་ནི་

ཤིང་ཕྱེ་ཐུལ་བ་ལྟར། །དེ་ཡང་གནས་སུ་འགྱེལ་བར་འགྱུར། །ཚངས་པ་བརྒྱ་བྱིན་ལ་སོགས་ལྷ། །ལྷ་མིན་གནོད་སྦྱིན་རྫུ་འཕྲུལ་ཆེ། །དེ་དག་ཐམས་ཅད་ཐལ་བར་འགྱུར། །སྡུག་བསྔལ་འཁྲིགས་པར་འགྱུར་ན་ནི། །ཆུང་ཟད་སླར་ཡང་ཕན་ཚུན་དུ། །བྱེད་ཅིང་འཇིགས་པས་ཚིག་སྨྲས་ཏེ། །བུ་གཅིག་འདི་ནི་ཇི་ལྟར་འགྱུར། །ས་གཞི་འདི་དག་ཤིན་ཏུ་འཇིགས། །བདེ་གཤེགས་གོ་འཕང་མ་གཏོགས་པ། །ཞི་བ་ཅི་ཡང་མ་མཐོང་ངོ་། །བདུད་དང་བགེགས་ཀྱི་གཟུགས་རྣམས་ཀྱང་། །རྣམ་པ་སྣ་ཚོགས་ཡང་དག་གནས། །ལུས་ནི་འགྱུར་བ་ལྟ་བུ་རུ། །ས་སྟེངས་ན་ནི་ཤིང་བཞིན་གནས། །ཚངས་པ་ལ་སོགས་ཡུལ་རྣམས་ནི། །འདི་དག་ཐམས་ཅད་འབར་བར་མཐོང་། །མནར་མེད་གྱུར་པའི་ལུས་ཀྱང་ནི། །དུད་ཀ་དུད་སྐྱར་ཀུན་ཏུ་གནས། །སངས་རྒྱས་ཞིང་ནི་མ་ལུས་པ། །འདི་དག་ཐམས་ཅད་སྲེག་པར་བྱེད། །སྙིང་རྗེ་ཞུགས་ཤིང་ཡང་དག་ལྡན། །ཕྱག་ན་རྡོ་རྗེས་འདི་སྐད་གསོལ། །སེམས་ཅན་དོན་དུ་མ་བསམས་པས། །བཅོམ་ལྡན་བཀོད་པ་བསྡུ་རུ་གསོལ། །བྱིས་པ་སྡུག་བསྔལ་རྟེན་ཅན་གྱིས། །འདི་ནི་བཟོད་པར་མི་ནུས་སོ། །འགྲོ་བའི་སེམས་ཅན་ཀུན་གྱི་མགོན། །ཐུགས་རྗེ་རྣམས་ནི་བྱུང་བར་མཛད། །ཐུགས་བརྩེ་གཅིག་པུའི་རི་ལས་འཁྲུངས། །སེམས་ཅན་སྡུག་བསྔལ་འགྲོལ་མཛད་པའི། །འགྲོ་བའི་མགོན་པོ་ཁྱོད་གཅིག་པུ། །གཉེན་དུ་གྱུར་པའང་ཁྱོད་ཁོ་ན། །འཁོར་བའི་རྒྱ་མཚོ་ལས་སྒྲོལ་བའི། །མཉན་པ་ཡང་ནི་ཁྱོད་གཅིག་པུ། །ནད་རྣམས་ཐམས་ཅད་གསོ་མཛད་པའི། །ཁྱོད་ཉིད་གཅིག་པུ་སྨན་པར་འགྱུར། །དམ་པའི་ལམ་སྟོན་པ་ཡང་ཁྱོད། །ཁྱོད་ནི་འཁོར་བའི་རྒྱ་མཚོར་ཕ། །ས་སྟེངས་ཉིད་ནི་ཁྱོད་འབའ་ཞིག །མགོན་པོ་ཐུགས་རྗེ་བསྐྱེད་ནས་ནི། །ས་གཞི་ཐམས་ཅད་ཡང་དག་འཕེལ། །དཔག་བསམ་ཤིང་བཞིན་དོན་གཉེར་བའི། །ཡང་དག་དཔའ་བོ་བྱང་ཆུབ་སེམས། །ས་བཅུའི་གནས་ཀྱི་དབང་ཕྱུག་རྣམས། །མགོན་པོ་ཁྱོད་ཉིད་གཅིག་པུས་འཕེལ། །ཐུགས་རྗེ་པདྨ་འདམ་སྐྱེས་བཞིན། །སེམས་ནི་ངན་པར་འགྱུར་བ་ཡི། །

འགྲོ་བའི་མགོན་པོས་བསྲེག་པར་མཛོད། །སྙིང་པོ་མེད་པ་ལྟ་བུར་འགྱུར། །ཆུ་ཤིང་གི་ནི་སྡོང་པོ་བཞིན། །ཕྱེ་མ་ལེབ་བཞིན་སྐྱེ་བོ་རྣམས། །དྲག་ཏུ་བོད་པའི་ལུང་ཐོབ་པ། །བསྲེགས་ཀྱང་ཟུག་རྔུ་མི་འབྱུང་སྟེ། །དེ་བཞིན་འདིར་ནི་བྱིས་པ་རྣམས། །བགེགས་དང་ལོག་འདྲེན་ཐམས་ཅད་དང་། །གྲངས་མེད་བཅུ་ཡི་སྟོབས་ཀྱི་བདག །གསང་སྔགས་རྒྱལ་པོ་བརྗོད་པ་ཡིས། །དེ་དག་ཐམས་ཅད་ཐལ་བར་བརླག །དེ་བས་རྣམ་པ་ཐམས་ཅད་ཀྱིས། །བཅོམ་ལྡན་ཁྱོད་ལ་བདག་གསོལ་འདེབས། །ཁྱོད་ཀྱི་སྲས་པོ་བདག་མཉེས་གཤིན། ། བདག་གི་དེ་ནི་གསན་པའི་རིགས། །དེ་ནས་བཅོམ་ལྡན་འདས་ཤཱཀྱ་ཐུབ་པ་ཐུགས་རྗེ་དང་ལྡན་པའི་ཐུགས་མངའ་བས་ཕྱག་ན་རྡོ་རྗེ་སེམས་ཅན་ལ་ཕན་པའི་ཕྱིར། ཐུབ་པ་མཆོག་གི་གཙོ་བོ་ལ། །གསོལ་བ་བཏབ་པའི་ཚིག་འདི་ནི། ཤིན་ཏུ་རྒྱ་ཚ་བུ་ལགས་སོ། ། དེ་ནས་བཅོམ་ལྡན་འདས་ཀྱིས་དེའི་ཚེ་སེམས་ཅན་ཐམས་ཅད་ཀྱི་སྲོག་འབྱུང་ཞིང་ཡེ་ཤེས་འཁྲུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་རིག་པའི་རྒྱལ་མོ་འདི་སེམས་ཅན་ཐམས་ཅད་ལ་ཕན་པར་བྱེད་པ། འདུས་བྱས་ཐམས་ཅད་རབ་ཏུ་འགྱུར་བར་བྱེད་པ། འཇིགས་པ་ཐམས་ཅད་རབ་ཏུ་འཇིགས་པར་བྱེད་པ། དགྲ་ཐམས་ཅད་དང་མེ་དང་ཆུ་སེལ་བར་བྱེད་པ། སེམས་ཅན་ཐམས་ཅད་ཀྱི་དཔལ་ཕུན་སུམ་ཚོགས་ཤིང་སྐལ་བ་བཟང་པོ་ཐོབ་པར་བྱེད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། ཉན་ཐོས་དང་། རང་རྒྱལ་སྐྱེད་པར་བྱེད་པ། འཇིགས་པ་ཐམས་ཅད་སྲེག་པར་བྱེད་པ། རྣམ་པར་འཚེ་བ་ཐམས་ཅད་འཇོམས་པར་བྱེད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བཞེད་པ་གསུངས་པ། ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦཱ་ཤ་པ་རི་པཱུ་ར་ཀེ་བྷྱཿ། སརྦྦ་ཐཱ། ༀ་སརྦྦ་སྃ་སྐཱ་ར་པ་རིཥྐཱ་ར་བི་ཤུད་དྷ། དྷརྨྨ་ཏེ་མ་ཧཱ་ན་ཡ་པ་རི་བཱ་རེ་སྭཱ་ཧཱ། དེ་ནས་འདི་གསུངས་པ་ཙམ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་བདེ་བ་ཐམས་ཅད་གཏད་ཅིང་ཀུན་ནས་རྒྱལ་བ་དང་ལྡན་པ། དབང་ཕྱུག་གོ་

འཕང་བརྙེས་པ་ནི། །རང་གི་ལུས་ལ་སེམས་བཅུག་པས། །ངང་ཚུལ་བཟང་པོར་ཡང་དག་འབྱུང་། །སྡིག་པ་ཐམས་ཅད་རབ་ཏུ་ཞི། །བཅོམ་ལྡན་འདས་ནི་གཟིགས་པར་འགྱུར། །རིག་པར་གྱུར་པའི་སེམས་དང་ལྡན། །ཐམས་ཅད་རང་གི་སྲོག་དང་ལྡན། །རྫུ་འཕྲུལ་རྟུལ་ཕོད་པར་གྱུར་པ། །ཤིན་ཏུ་ངོ་མཚར་གོ་འཕང་འཐོབ། །དེ་ནི་རྒྱལ་མཆོག་སྤྱན་སྔར་གནས། །རང་གཞན་བརྟུལ་ཞུགས་བརྟན་འགྱུར་བ། །རིག་པ་འདི་ཡི་མཐུ་སྟོབས་ཀྱིས། །རང་གི་རྫུ་འཕྲུལ་གཡུལ་ལས་རྒྱལ། །ས་སྟེངས་ཕ་རོལ་གནོན་པ་འབྱུང་། །ཐམས་ཅད་དབང་ཕྱུག་གོ་འཕང་འཐོབ། །བདུད་ཀུན་གྱི་ནི་གཙོར་གྱུར་པ། །ས་སྟེངས་གྱུར་ཏོ་ཅོག་ཀུན་ནི། །འཇིགས་པ་ཐམས་ཅད་རྣམ་པར་བྲལ། །ངན་འགྲོ་ཞེས་ནི་གང་བཤད་པའི། །ཤིན་ཏུ་སྡུག་བསྔལ་གཏིང་གནས་ཏེ། །ངན་འགྲོ་ཐམས་ཅད་རྣམ་དྲལ་ནས། །བདེ་བ་ཡི་ནི་སྣོད་དུ་འགྱུར། །དམྱལ་བའི་མེ་ཞེས་བྱ་བ་ཡི། །ཤིན་ཏུ་བལྟ་དཀའ་འཇིགས་རུང་དེ། །དེ་ཚེ་ལྷག་པར་བསིལ་བར་འགྱུར། །སྟོན་ཀའི་ཟླ་བའི་ཆ་ལྟར་གནས། །གང་ཡང་དམྱལ་བ་ཞེས་བཤད་པ། །ཤིན་ཏུ་གྲང་བའི་མུན་ནག་འཁྲིགས། །དྲག་ཤུལ་མེ་ཆེན་འབར་བ་བཞིན། །དེ་དག་ཐམས་ཅད་དྲོ་བར་འགྱུར། །ཡི་དགས་ཞེས་བྱའི་སྡུག་བསྔལ་གང་། །ཤིན་ཏུ་མི་བཟད་འཇིགས་སུ་རུང་། །རིག་པ་འདི་ཡི་མཐུ་སྟོབས་ཀྱིས། །འདི་དག་ཐམས་ཅད་བྲལ་བར་འགྱུར། །གང་ཡང་འཁོར་དེ་ཐམས་ཅད་ནི། །སྡུག་བསྔལ་གྱིས་ནི་སེམས་གདུངས་པ། །བདེ་བ་ཐམས་ཅད་ཡང་དག་གཏད། །ཕན་ཚུན་དུ་ནི་དགའ་གཏམ་སྨྲ། །བགེགས་ཆེན་ལོག་པར་འདྲེན་པ་དང་། །གཞན་ཡང་སྲོག་ཆགས་གྱུར་པ་གཞན། །ས་སྟེངས་འབྱུང་པོ་རང་སེམས་གནས། །དེས་པར་གྱུར་ནས་འདི་རྣམས་ནི། །གཅིག་ལ་གཅིག་ནི་བལྟ་བར་འགྱུར། ། བྱང་ཆུབ་སེམས་དཔའ་དཔའ་བོ་དང་། །ཚངས་པ་ལ་སོགས་རྫུ་འཕྲུལ་ཆེ། །རང་སེམས་མཛེས་པར་རྣལ་མར་ནི། །དེ་རྣམས་ཐམས་ཅད་བདེ་བ་འཐོབ། །ཕོ་ཉ་མངག་གཞུག་བཀའ་ཉན་རྩོལ། །འབྱུང་པོ་གདོན་དང་ཤ་ཟ་དང་། །ཐམས་ཅད་དབང་ཕྱུག་གོ་འཕང་འཐོབ། །

ས་གཞི་སྟེང་ན་རྣམ་པར་གནས། །གང་ཡང་བྱང་ཆུབ་སེམས་དཔའ་བརྟན། །ཐམས་ཅད་དང་ནི་ལྡན་པ་ཡི། །རྫུ་འཕྲུལ་ཆེན་པོ་འཁོར་རྣམས་ཀྱིས། །འགྲོ་ལ་ཕན་ཕྱིར་ཚིག་གསོལ་པ། །ཨེ་མའོ་ཀུན་མཁྱེན་མཚུངས་པ་མེད། །ཐབས་ཀྱི་ཡེ་ཤེས་བསམ་མི་ལང་། །ས་སྟེངས་ཁྱོད་མ་གཏོགས་པ་ཡི། །འབྱུང་འགྱུར་གཞན་ནི་སུ་ཞིག་ཡོད། །མཐའ་ཡས་བདེ་བའི་སྣོད་དུ་ནི། །འདི་དག་ཐམས་ཅད་གང་འཛིན་མཛད། །ཐམས་ཅད་དབང་ཕྱུག་གོ་འཕང་བརྙེས། །ས་ཡི་སྟེང་ན་རྣམ་པར་གནས། །སྲིད་པ་སྡུག་བསྔལ་སྔར་ཡང་མེད། །དེ་ལྟར་ཤིན་ཏུ་མི་བཟད་འཇིགས། །ཐམས་ཅད་སངས་རྒྱས་སྲས་སུ་འགྱུར། །སེམས་ཅན་ཀུན་ལ་ཕན་དགའ་བས། །སེམས་ནི་རྩེ་གཅིག་གྱུར་པ་ཡིས། །སྙན་པ་ཡི་ནི་ཚིག་གིས་གསོལ། །ཀུན་གྱི་གཉེན་དུ་གྱུར་པ་ནི། །སངས་རྒྱས་ཉིད་ལས་གཞན་པ་མེད། །སེམས་ནི་སྨད་པའི་རྒྱུ་གྱུར་པའང་། །སོ་སོ་ནས་ནི་བདེ་བར་མཛད། །སྐྱེས་པས་ཡང་དག་བསྟན་པ་ནི། །ཇི་སྲིད་མྱ་ངན་མ་འདས་པ། །དེ་སྲིད་བར་དུ་འཁོར་བར་ཞུགས། །སངས་རྒྱས་ཐེག་པ་ཚུལ་གྱི་མཆོག །བྱང་ཆུབ་སེམས་དཔའ་ཐམས་ཅད་དང་། །ཚངས་པ་ལ་སོགས་འཁོར་རྣམས་ནི། །ཐམས་ཅད་སྟན་ལས་ལངས་གྱུར་ཏེ། །གཙོ་བོ་གང་ན་བཞུགས་པ་དེར། །བྱང་ཆུབ་སེམས་དཔའ་ཡོངས་སུ་བསྐོར། །ཚངས་སོགས་རྫུ་འཕྲུལ་ཆེ་བའི་ལྷ། །ལྷན་ཅིག་ཡང་དག་པར་ལྷགས་ཏེ། །བླ་མེད་གོ་འཕང་གསོལ་བ་འདེབས། །སེམས་ཅན་ཀུན་ལ་ཕན་བཞེད་པ། །རྫོགས་སངས་རྒྱས་ལ་བསྐོར་བ་བྱས། །འཇིག་རྟེན་མགོན་ལ་རབ་བཏུད་ནས། །འདི་སྐད་ཀྱི་ནི་ཚིག་གསོལ་ཏོ། །ཨེ་མའོ་སངས་རྒྱས་ཆེ་བའི་བདག །སེམས་ཅན་ཀུན་ལ་སྨན་པར་དགྱེས། །འཇིག་རྟེན་མགོན་པོ་སྐྱོབ་པ་ཡི། །ཐབས་ནི་མཚུངས་མེད་བསམ་མི་ཁྱབ། །གང་གིས་འདིར་ནི་གནས་པར་བྱས། །སྡུག་བསྔལ་རྒྱ་མཚོ་རྣམ་པར་སྦྱོང་། །འགྲོ་ལ་སྨན་པ་ཁྱོད་མཐོང་ན། །བདེ་བ་ཡང་དག་འབྱུང་བར་འགྱུར། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཐུགས་རྗེ་དང་ལྡན་པའི་ཐུགས་ཟབ་པས། སྒྲ་དབྱངས་

འདི་སྐད་ཀྱིས་ཚིག་བཀའ་སྩལ་པ། བྱང་ཆུབ་སེམས་དཔའ་རྫུ་འཕྲུལ་ཆེ། །རྫུ་འཕྲུལ་ལྡན་པ་ཁྱེད་མ་འཇིགས། །རྫོགས་སངས་རྐང་གཉིས་མཆོག་གི་ནི། །བསམ་གྱིས་མི་ཁྱབ་འདི་དག་གསུངས། །དེ་འདྲའི་ཆོས་ནི་བརྟེན་པ་ནི། །སྡུག་བསྔལ་གང་གིས་སླར་ཡང་ནི། །འཁོར་བར་དེ་ལྟར་འཆིང་འགྱུར་བ། །བསྙེན་པར་གྱུར་པས་འབྱུང་མི་འགྱུར། །རྫོགས་སངས་རྐང་གཉིས་མཆོག་གི་ནི། །ཐེག་པ་ཆེན་པོ་ཡང་དག་གསུངས། །ལམ་ནི་ཡང་དག་བསྡུས་ནས་ནི། །ཐམས་ཅད་སྡུག་བསྔལ་ལས་རབ་གྲོལ། །དེ་ནི་མཆོག་གི་དེ་ཉིད་ཞི། ། སངས་རྒྱས་རྣམས་ཀྱི་ཐེག་པར་བརྗོད། །ཐེག་པ་དམ་པ་འདི་བཟུང་ནས། །སངས་རྒྱས་ངེས་པར་གདོན་མི་ཟ། །འདས་པའི་སངས་རྒྱས་ཀུན་དང་ནི། །དེ་བཞིན་གང་ཡང་མ་བྱོན་པ། །མགོན་པོ་ད་ལྟར་བཞུགས་པ་རྣམས། །འགྲོ་ལ་ཕན་པའི་ཚུལ་ཉིད་ལས། །དེ་དག་ཐམས་ཅད་ཡང་དག་གཟུང་། །སྡུག་བསྔལ་ཞི་བ་ཐོབ་པར་འགྱུར། །དེ་ཕྱིར་རྣམ་པ་ཐམས་ཅད་ཀྱི། །འདི་ལྟ་བུ་ཡི་དམ་ཆོས་བསྟེན། །གཙོ་བོ་འདི་ནི་བསྙེན་གྱུར་ན། །སྡུག་བསྔལ་རྣམས་ནི་སེལ་བར་བྱེད། །གང་ཡང་བྱང་ཆུབ་སེམས་དཔའ་གཞན། །ཚངས་པ་ལ་སོགས་རྫུ་འཕྲུལ་ཆེ། ། སེམས་ཅན་ཕན་པར་ཞུགས་པ་ཡི། །སྤྱན་སྔར་སྙན་པའི་ཚིག་འདི་གསོལ། །མགོན་པོ་ཁྱོད་ཀྱིས་ཅི་ཞིག་གསུངས། །བདག་གི་ཡིད་ཀྱང་རྟེན་གཞན་མེད། །ཁྱོད་ཉིད་སྐྱབས་སུ་གྱུར་པ་ལས། །མཆོག་གཞན་ཞིག་ནི་ཡོད་མ་ཡིན། །ཀུན་གྱིས་དབང་ཕྱུག་གོ་འཕང་བརྙེས། །རང་གི་རྫུ་འཕྲུལ་སྙེམས་ཚུལ་གྱུར། །འཇིགས་པ་ཀུན་དང་རྣམ་པར་བྲལ། །སྡུག་བསྔལ་ཐམས་ཅད་རྣམ་པར་སྤངས། །སངས་རྒྱས་ཆོས་དང་དགེ་འདུན་ལ། །རྫུ་འཕྲུལ་ཆེན་པོ་གུས་པར་ལྡན། །ཐེག་པ་ཆེན་པོར་ཡང་དག་གནས། །བྱང་ཆུབ་མཛད་པ་ལ་སོགས་འཐད། །ཅེས་པའོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་སོགས་པ་ཐམས་ཅད་དང་ལྡན་པའི་འཁོར་དེ་དག་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་གསོལ་བ་བཏབ་པ། བཅོམ་ལྡན་འདས་ཆོས་ཀྱི་རྒྱལ་པོ་བདག་ཅག་ལ་ཐུགས་བརྩེ་བ་བསྐྱེད་དེ། སེམས་ཅན་ཐམས་

ཅད་དབང་ཕྱུག་གི་གོ་འཕང་ཐོབ་པར་བྱེད་པ། ནད་ཐམས་ཅད་གསོ་སྦྱོང་མཛད་པ། དཔལ་ཐམས་ཅད་དང་ལྡན་པ། དུས་མ་ཡིན་པ་དང་། བགེགས་ཐམས་ཅད་འཇོམས་པར་བྱེད་པ་དང་། དགྲ་ཐམས་ཅད་དང་། ཉེ་བར་འཚེ་བ་དང་། ཆོམ་རྐུན་དང་། མི་རྒོད་དང་། རྒྱལ་པོའི་གནོད་པ་དང་། སེང་གེ་དང་། སྟག་ལ་སོགས་པ་དང་། རིམས་དང་། སྐྲན་དང་། མཚན་བར་རྡོལ་བ་དང་། སྡིག་སྦྲུལ་གྱི་གནོད་པ་ཐམས་ཅད་འཇོམས་པར་བྱེད་པ། གང་གིས་ཁྲོ་བོའི་རྒྱལ་པོའི་དཀྱིལ་འཁོར་གྱི་ཆོས་ཉིད་མཐོང་བས་སེམས་ཅན་ཐམས་ཅད་ཀྱིས་དབང་ཕྱུག་གི་གོ་འཕང་ཐོབ་པར་འགྱུར་བ་བཤད་དུ་གསོལ། དེ་སྐད་ཅེས་གསོལ་བཅོམ་ལྡན་འདས། །ཤཱཀྱའི་མགོན་པོ་རྫུ་འཕྲུལ་ཆེ། །རྡོ་རྗེ་བྱུང་བ་ཆེ་བའི་བདག །སྙན་པའི་ཚིག་གིས་བཀའ་སྩལ་པ། །ས་སྟེངས་ཀྱི་ནི་དཀྱིལ་འཁོར་མཆོག །བཤད་པར་བྱ་ཕྱིར་བུ་ཁྱོད་ཉོན། ། སྐྱོབ་པ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་གསང་བ་ནི། །ཁྱོད་ལ་ཡང་དག་བཤད་པར་བྱ། །ཕན་པའི་སེམས་ཀྱིས་ཚུར་ལ་ཉོན། །ཁྲོ་བོའི་རྒྱལ་པོའི་དཀྱིལ་འཁོར་ནི། །འདི་དག་ཐམས་ཅད་མ་གསུངས་པ། །ངན་པས་སེམས་ནི་འཁྲིགས་པ་ལ། ། བུ་ཁྱོད་ཀྱིས་ནི་སྦྱིན་མི་བྱ། །རེ་ཞིག་སློབ་དཔོན་རབ་ཏུ་བཤད། །བུ་ཁྱོད་མཉམ་པར་གཞག་པས་ཉོན། །དེ་ནི་ཀུན་དུ་རབ་གནས་འགྱུར། །གང་མང་ཅུང་ཟད་བདག་གིས་བཤད། །ཚུལ་ཁྲིམས་ཕུན་ཚོགས་སྙིང་རྗེར་ལྡན། །བཟོད་དང་བརྩོན་ལྡན་ལེགས་པར་གནས། །གཙང་ཞིང་ཆོ་ག་ཕུན་སུམ་ཚོགས། །བླ་མ་ཡང་ནི་སྨོད་མི་བྱེད། །བདག་ཉིད་ཇི་བཞིན་གཞན་ཕན་བལྟ། །སྦྱིན་ལ་དགའ་ཞིང་ཆེད་དུ་བརྩོན། །བདེན་པའི་ཚིག་དང་ཡང་དག་ལྡན། །གཏོང་ཕོད་ལ་དགའ་མཉེས་གཤིན་པ། །ལུས་ཀུན་ཡོན་ཏན་ཕུན་སུམ་ཚོགས། །སངས་རྒྱས་ཉན་ཐོས་རྒྱལ་སྲས་རྣམས། །རྟག་ཏུ་མཆོད་པར་འགྱུར་བ་དང་། །བླ་མ་ལ་གུས་ང་རྒྱལ་མེད། །འགྲོ་ལ་གཅིག་ཏུ་ཕན་ཞིང་དགེ །བློ་གྲོས་ཟབ་མོ་ཡང་དག་ལྡན། །དུས་དང་དུས་མིན་ཤེས་དང་ལྡན། །དབང་པོ་དོན་གྱི་ཆ་རིག་པ། །རྟག་ཏུ་སེམས་ཅན་ཕན་པར་དགའ། །

གསང་སྔགས་མཉེས་པར་ཤིན་ཏུ་བརྩོན། །དཀྱིལ་འཁོར་འདི་རུ་རབ་ཏུ་བསྔགས། །རྫུ་འཕྲུལ་ཆེན་པོ་ལྷ་རྣམས་དང་། །སངས་རྒྱས་ཉན་ཐོས་ཆོས་རྣམས་དང་། །སྐྱོབ་པ་བྱང་ཆུབ་སེམས་དཔའ་ཡང་། །ཆ་ཤས་རིག་ནས་རྟག་པ་ཡང་། །ཟབ་མོའི་དོན་ནི་རབ་ཏུ་བསྟན། །སེར་སྣ་ཡང་ནི་ཡོད་མ་ཡིན། །ཁྲོ་བོ་གང་ཡང་བརྩེ་བར་སྨྲ། །བསྡུ་བ་བཞི་ཡི་ངང་ཚུལ་ཤེས། །ཕ་རོལ་ཕྱིན་པ་དྲུག་གིས་བརྒྱན། །བྱང་ཆུབ་སེམས་དཔའི་གོ་ཆ་བགོས། །སྒྱུ་མ་ལྟ་བུའི་གོ་འཕང་གནས། །ཉན་ཐོས་རྣམས་ཀྱི་ཇི་བཞིན་བཤད། ། བདེན་པ་བཞི་ནི་སྒོམ་བྱེད་པ། །སྔགས་པས་དེ་བཞིན་འདིར་གསུངས་པ། །བྱང་ཆུབ་སེམས་ཀྱིས་བསྒོམ་པའོ། །བྱང་ཆུབ་སེམས་དཔའ་བློ་ལྡན་གྱིས། །འདི་ནི་ཡིད་ཀྱིས་སྒོམ་བྱེད་པ། །བསམ་པའི་ཡེ་ཤེས་ཐོབ་པར་བྱེད། །ཐེག་པ་ཆེན་པོ་ལས་བྱུང་བ། །བསྡུ་བའི་དངོས་པོ་རྣམ་བཞི་དང་། །ཕ་རོལ་ཕྱིན་ཉིད་དྲུག་ཏུ་འདོད། །བསམ་མི་ཁྱབ་པའི་འབྲས་སྩོལ་བ། །ཤེས་རབ་ཅན་དེ་སྒོམ་པར་བྱེད། །ལྗང་གུ་དཀར་དང་སེར་བ་དང་། །མདོར་ན་ནག་པོར་གྱུར་ཀྱང་རུང་། །རིང་དང་ཐུང་ཡང་མདངས་བཟང་བ། །ཕྱག་གིས་པུས་མོར་སློབ་པ་ཉིད། །རྟག་པར་རྒྱུན་དུ་ཞལ་རིང་ཞིང་། །མགོ་བོ་མཉམ་པར་རྣམ་པར་རྒྱས། །སྨིན་མཚམས་མ་ཆད་ཤངས་མཐོ་བ། །རྐང་པའི་ལོང་བུ་ཆུང་ཟད་དམར། །ཡོན་ཏན་ཐམས་ཅད་ཡང་དག་བརྒྱན། །སྡིག་པའི་རྒྱ་མཚོ་རྣམ་པར་སྦྱོང་། །ཆོས་རྣམས་ཐམས་ཅད་མཆོད་པར་བྱ། །དེ་ཉིད་ཀྱང་ནི་སྟོན་པར་བྱེད། །དཀྱིལ་འཁོར་རྣམས་ཀྱི་ཆ་ཤེས་པ། །སྔགས་དང་ཕྱག་རྒྱའི་ཚོགས་ཀྱང་ངོ་། །རྗེས་གནང་དང་ནི་དབང་བསྐུར་འཐོབ། །གང་ཞིག་ཡང་དག་ཡེ་ཤེས་འགྱུར། །བླ་མ་ལ་གུས་ལྷ་དང་ནི། །སྔགས་དང་ཕྱག་རྒྱ་བསྡུས་དང་ལྡན། །གསང་སྔགས་རྒྱལ་པོའི་གསང་སྔགས་ཤེས། །སེམས་ཅན་མཉེས་ཤིང་བརྩེ་བ་སྨྲ། །བཟླས་དང་སྦྱིན་སྲེག་དེ་ཉིད་ཤེས། །ཞི་དང་རྒྱས་པའི་དེ་ཉིད་ཤེས། །མངོན་སྤྱོད་དང་ནི་དབང་བྱ་ཤེས། །སྔགས་དང་ཕྱག་རྒྱ་ཤིན་ཏུ་སྦྱོར། །བླ་མ་ཡང་དག་བསྟེན་པ་ཡང་། །སྟོན་པ་བཞིན་དུ་

སེམས་པར་བྱེད། །འབྱུང་པོ་ཐམས་ཅད་མཆོད་པར་བྱེད། །འཇིག་རྟེན་པ་ཡང་དེ་ཉིད་རིག །སེམས་ཅན་སྙོམ་མེད་ཕུན་སུམ་ཚོགས། །སྤྲོ་བ་དང་ནི་བསྟན་པར་འགྱུར། །གང་གི་དབང་ཕྱུག་ཤེས་རབ་སྔགས། །ཐམས་ཅད་དབང་དུ་བྱེད་པ་ཡིན། །ཁྲོ་བོ་རྣམས་ནི་རྟག་ཏུ་བཟླས། ། ལྷ་མཉེས་པ་ལ་ཆེད་དུ་བྱེད། །ཚུལ་ཁྲིམས་དང་ལྡན་ཕུན་སུམ་ཚོགས། །སྐུ་དང་གསུང་ལས་ཡང་དག་བྱུང་། །བརྟུལ་ཞུགས་ཀྱིས་ནི་ཡང་དག་བརྒྱན། །རྟག་པར་ཐམས་ཅད་སྐྱོང་བར་བྱེད། །དེ་ལྟར་ཡོན་ཏན་མདོར་བསྡུས་པའི། །མཚན་ཉིད་བདག་གིས་བསྟན་པ་ཡིན། །འདི་རྣམས་ཡང་དག་ཡོངས་ཤེས་པ། །སློབ་དཔོན་དུ་ནི་རབ་ཏུ་བསྔགས། །སྔགས་ཀྱི་བཟླས་པའི་ཆོ་ག་ནི། །གཞན་དུ་ན་ནི་འབྲས་མེད་བུ། །གསང་སྔགས་རང་གིས་མི་འགྲུབ་ཅིང་། །གཞན་ལ་བསྟན་ཡང་འགྲུབ་པ་མེད། །དཀྱིལ་འཁོར་འབྲས་བུ་བཅས་པ་མིན། །སྔགས་ཀྱི་སྒྲུབ་ཐབས་དག་ཀྱང་མེད། །བསྲུང་བར་བྱ་བ་ཀུན་ཀྱང་མིན། །སྦྱིན་སྲེག་ལྷ་ཡང་མེད་པ་སྟེ། །འདི་ནི་སྒོམ་པ་མེད་གྱུར་པའི། །མཚན་ཉིད་འདི་ནི་རྣམ་པར་སྤངས། །དེ་བས་རྣམ་པ་ཐམས་ཅད་ཀྱི། །སློབ་དཔོན་མཚན་ཉིད་བསྔགས་པ་ཡིན། །དེ་བས་གསང་བའི་ཡེ་ཤེས་འདི། །སངས་རྒྱས་ཐམས་ཅད་འབྱུང་བར་ནི། །གསུངས་པ་རུ་ནི་ཤེས་པར་བྱ། །གཞན་དུ་ན་ནི་འབྲས་མེད་འགྱུར། །སློབ་དཔོན་དང་ནི་སློབ་མ་ཡིས། །རྟག་ཏུ་བག་ཡོད་གྱུར་པས་ཀྱང་། །རྟག་པར་རྒྱུན་དུ་བསྲུང་བར་བྱ། །བདག་ཉིད་སྲོག་ནི་ཇི་བཞིན་ནོ། །བསྐལ་པ་བྱེ་བ་བརྒྱར་ཡང་ནི། །སངས་རྒྱས་འབྱུང་བ་ཤིན་ཏུ་དཀོན། །དེ་ཡང་ས་སྟེངས་གཙོ་བོ་ཡིས། །བཤད་པ་ཡིས་ནི་ཤིན་ཏུ་དཀོན། །དེ་ཕྱིར་རྣམ་པ་ཐམས་ཅད་ཀྱིས། །ཡོན་ཏན་ཀུན་གྱིས་ཡང་དག་བརྒྱན། །སློབ་དཔོན་གྱིས་ནི་རྟག་པ་རུ། །གསང་སྔགས་ཡི་གེ་བཅྭ་ལྔ་བཟླས། །འབུམ་ཕྲག་གཅིག་ནི་བཟླས་གྱུར་ནས། །སྦྱིན་སྲེག་ཀྱང་ནི་བརྩམ་པར་བྱ། །དེ་ལྟར་བྱས་པའི་སྔགས་ཤེས་པས། །དཀྱིལ་འཁོར་མཆོག་ནི་བྲི་བར་བྱ། །གདུག་པ་མེད་ཅིང་བགེགས་ཀྱང་མེད། །གཞན་ཡང་འབྱུང་ཚོགས་ལ་སོགས་མེད། །མཐུ་སྟོབས་ཀྱིས་ནི་བགེགས་བྱེད་པ། །

གོ་འཕང་འབྲས་བུ་ཡོད་མ་ཡིན། །ཐམས་ཅད་དབང་ཕྱུག་གོ་འཕང་འཐོབ། །ཀུན་ཀྱང་བདེ་བས་ཡང་དག་བརྒྱན། །འཇིགས་པ་ཐམས་ཅད་རྣམ་པར་བྲལ། །ཐེ་ཙོམ་མེད་པར་འགྱུར་བ་ཡིན། །གཞན་དུ་ཐམས་ཅད་འབྲས་བུ་མེད། །བགེགས་ཀྱིས་གླགས་ནི་བཙལ་ནས་སུ། །སྔགས་པའི་ལུས་ནི་འཕྲོག་པར་བྱེད། །ཆོ་གའི་འབྲས་བུ་བྱ་བ་མེད། །དེ་ལྟར་བྱས་ན་སྔགས་པ་བདག །དཀྱིལ་འཁོར་མཆོག་ནི་བྲི་བར་བྱ། །སངས་རྒྱས་ཅིག་ཤོས་གོ་འཕང་ནི།དེ་ནི་ཐམས་ཅད་འགྲུབ་པར་འགྱུར། །དབུ་ལ་ས་གཞི་ཡང་དག་བཤད། །མཉམ་པར་གཞག་པའི་ཡིད་ཀྱིས་ཉོན། །དཀྱིལ་འཁོར་མཛེས་མཆོག་རྨད་དུ་བྱུང་། །འདི་ནི་གང་དུ་བྲི་བ་ནི། །ཆུ་ཀླུང་མཚོ་བྲན་ཡང་དག་བཤད། །རི་བོ་མེ་ཏོག་འབྲས་བུས་བརྒྱན། །སྐྱེད་མོས་ཚལ་དུའང་བཤད་པ་སྟེ། །སྤུ་སྡུག་རྨ་བྱས་རྣམ་པར་བརྒྱན། །ཀུན་དགའ་ར་བ་ཁང་བཟངས་དགའ། །ཕྱུགས་ལྷས་བྲེས་དང་བཞི་མདོ་དང་། །གཞན་ཡང་ཕྱི་རོལ་གང་ཞིག་ཏུ། །གཙུག་ལག་ཁང་དང་རི་སུལ་དང་། །ཁང་པ་བརྩེགས་དང་ཁང་པ་དང་། །མཚན་མ་གཅིག་པ་ཇི་བཞིན་དུ། །ཆུ་ཀླུང་ཀུན་དགའ་ར་བ་དང་། །དེ་ཡི་ཁོང་གསེབ་ཁྱད་པར་དུའོ། །གཞན་ཡང་རྣམ་པ་སྣ་ཚོགས་པའོ། །གང་དུ་ཡིད་ལ་འདོད་པར་བྱ། །དེ་ལ་སོགས་པའི་གནས་རྣམས་ལས། །གང་ཡང་རུང་བའི་གནས་བཟུང་སྟེ། །ལྷ་ནི་སྤྱན་ཡང་དྲང་བྱས་ནས། །ཡང་དང་ཡང་དུ་མཆོད་པར་བྱ། །ཡིད་ཉིད་ཀྱིས་ནི་གཤེགས་སུ་གསོལ། །ཕྱོགས་ནི་རབ་ཏུ་བཅིང་བར་བྱ། །རང་ཉིད་གོ་ཆ་བགོས་ནས་གནས། །ལུས་ལ་གཙུག་ཏོར་ཡང་དག་བརྒྱན། །ལག་ཏུ་རྡོ་རྗེ་ཐོགས་ནས་ནི། །ལྷ་ནི་ཡིད་ཀྱིས་བྱོན་པར་བསམ། །དེ་ལྟར་བདག་ཉིད་གནས་ནས་སུ། །སྐྱེ་བོ་བསྲུང་བ་དགོད་པར་བྱ། ། དེ་རུ་བདག་ཉིད་བྱིན་བརླབས་ཏེ། །ས་གཞི་གཞན་ལ་ཤིན་ཏུ་བསྡད། །པུས་མོ་གང་ཙམ་བརྐོས་ནས་ནི། །འབུ་སྲིན་རྣམ་པར་བསལ་བར་བྱ། །སྐྱོན་ནི་དུ་མ་དང་བྲལ་བ། །འབད་པས་སླར་ཡང་བརྡུང་བར་བྱ། །བ་ཡི་རྣམ་ལྔས་བྱུགས་ནས་ནི། །མེ་ཏོག་བདུག་པ་

དགའ་བར་མཆོད། །ས་གཞི་ཡི་ནི་ཕྱོགས་ཀུན་དུ། །གཏོར་མ་རབ་ཏུ་གཏང་བར་བྱ། །མེ་ཏོག་སིལ་མ་གཅལ་དུ་དགྲམ། །དྲི་དང་བདུག་པ་ཆོ་ག་རིམ། །སྦྱིན་སྲེག་ཆོ་ག་བཞིན་དུ་བྱ། །རྣལ་འབྱོར་དགེ་བར་འདོད་པ་ཡིས། །དེ་ལྟར་རབ་ཏུ་འབད་པ་ཡིས། །གནས་སུ་ཉི་མ་གཅིག་ཏུ་བྱ། །ལེགས་པར་སྦྱངས་པར་གྱུར་པ་ལ། །ལྷ་ནི་སྤྱན་ཡང་དྲང་བར་བྱ། །ཁྱད་པར་དུ་ནི་གཏོར་མ་དང་། །དྲི་དང་མེ་ཏོག་ཡང་དག་དབུལ། །ཤེས་རབ་བློ་ལྡན་མཚན་མ་བསླང་། །དགེ་དང་མི་དགེའི་འབྲས་བུ་འབྱུང་། །གལ་ཏེ་རྨི་ལམ་བཟང་མཐོང་ན། ། ཡིད་ནི་སྤྲོ་བར་གྱུར་པ་ཡིས། །བདག་དང་གཞན་ནི་བསྒྲུབ་བྱའི་ཕྱིར། །དཀྱིལ་འཁོར་རྒྱལ་པོ་བྲི་བར་བྱ། །ངན་ན་ཤེས་རབ་ཅན་གྱིས་སྤང་། །འཇིགས་དང་རྩུབ་པའི་མི་དགེ་སྟེ། །བདག་དང་གཞན་ལ་དངོས་གྲུབ་མེད། །དེ་ལ་འབྲས་མེད་འབྲས་བུ་འབྱུང་། །དཀྱིལ་འཁོར་དངོས་གྲུབ་འདོད་པ་ཡི། །ཤེས་རབ་ཅན་གྱིས་དེ་དབུས་བྲི། །དེ་ནི་ཁྲུ་བརྒྱད་དེ་བཞིན་དུ། །བཅུ་དྲུག་དག་གི་གྲངས་ཀྱང་ཡོད། །རྒྱལ་བ་མཆོག་གིས་རྟག་ཏུ་ནི། །གཙོ་བོ་ལྔ་ནི་རབ་ཏུ་གསུངས། །དེ་རུ་ཆ་གཉིས་སུ་བགོས་ནས། །ཁྲུ་ཚད་གང་ནི་ཕྱི་རོལ་ཡིན། །ཆ་གཅིག་ཡང་དག་བཤད་པ་ནི། །དབུས་ཆ་ཡིན་པར་རབ་ཏུ་བརྟག །ཁྲུ་ཚད་གང་དུ་གནས་པ་དེར། །དབུས་སུ་སངས་རྒྱས་བསྟན་པ་ཡིན། །གཉིས་པ་རྒྱལ་བའི་སྲས་པོ་སྟེ། །མདོ་རུ་བསྡུས་ནས་བསྟན་པ་ཡིན། །གཉིས་པའི་ཕྱི་རོལ་གནས་པའི་ཆ། །དེར་ཡང་དེ་བཞིན་རབ་ཏུ་བརྟག །ཁྲུ་ཚད་གང་དུ་མདོར་བསྡུས་ན། །ཆ་ནི་ཐམས་ཅད་རབ་ཏུ་བརྟག །སྒོ་བཞི་རྟ་བབས་དང་བཅས་པ། །བུམ་པ་ཡི་ནི་རྒྱན་གྱིས་བརྒྱན། །ས་གཞི་ཐམས་ཅད་འབར་བ་ལྟར། །སྒོ་དང་མཚམས་སུ་རྡོ་རྗེ་སྟེ། །མཚམས་རྣམས་སུ་ནི་གཙོ་བོ་རུ། །བུམ་པ་ཐམས་ཅད་ངེས་པར་གནས། ། རྡོ་རྗེ་རྟ་བབས་བཅིངས་པ་དང་། །ཞགས་པས་བཅིངས་པ་རྣམ་པར་བརྒྱན། །འདི་དག་ཐམས་ཅད་ཀུན་བྱས་ནས། །དབུས་སུ་པདྨ་འདབ་བརྒྱད་བཅས། །དེ་ཡི་སྙིང་པོ་མཛེས་པར་ནི། །དེ་ལ་བུམ་པ་ཡང་དག་གནས། །བུམ་པ་ཡི་ནི་སྟེང་གི་སྣོད། །པདྨ་དཀར་པོ་གནས་པ་

དེར། །དེ་ལ་བཞུགས་པ་འགྲོ་བའི་མགོན། །གཙོ་བོ་བསྟན་པའི་དོན་མཛད་པ། །སྐྱོབ་པ་ཤཱཀྱའི་མགོན་པོ་ཡི། །ལྷུང་བཟེད་ཕྱག་རྒྱ་རྟག་ཏུ་བྲི། །དེ་ནས་དེ་ཡིས་ཀུན་དུ་ཁྱབ། །དཀྱིལ་འཁོར་ཕུན་སུམ་ཚོགས་པ་འབྱུང་། །འདི་ལྟར་སོར་མོ་བཅུ་དྲུག་ནི། ། སྐྱོབ་པ་དེ་ཡི་དཀྱིལ་འཁོར་ཡིན། །དེ་ཡིས་ཐམས་ཅད་རབ་ཏུ་བཤད། །ལྷག་མ་སྣམ་བུ་གཡས་སྐོར་དུ། །བྱང་གི་ཕྱོགས་ལ་བརྟེན་ནས་ནི། །སྐྱོབ་པ་འཇིག་རྟེན་དབང་ཕྱུག་བཞུགས། །པདྨའི་སྟེང་དུ་རྡོ་རྗེ་ནི། །ཁ་དོག་དཀར་པོ་གཟི་བརྗིད་ཆེ། །བྱམས་པ་ཡི་ནི་གོ་ཆ་བགོས། །བྱམས་པའི་བདག་ཉིད་ལས་བྱུང་བའི། །དབང་ལྡན་ཕྱོགས་སོན་ཕྱག་མཚན་ནི། །དེ་ནི་སྤྱི་བླུགས་ཕྱག་རྒྱ་སྟེ། །ངོ་མཚར་རྟུལ་ཕོད་བསམ་མི་ཁྱབ། །ཀུན་དུ་བཟང་པོ་རྟག་ཏུ་བྲི། །མེ་རུ་མཚོན་ནས་བཞུགས་པ་ནི། །གཙོ་བོ་ཡིད་བཞིན་ནོར་བུ་བསྣམས། །ཡེ་ཤེས་རྒྱ་མཚོ་ཡོངས་སུ་གང་། །ཟབ་མོའི་དོན་ནི་རྣམ་པར་བསྒོམ། །དབང་པོ་ཕྱོགས་ལ་བརྟེན་ནས་ནི། །ཡེ་ཤེས་ཨུཏྤལ་བསྣམས་པ་བཞུགས། །གཤིན་རྗེའི་གནས་སུ་ཉེར་མཆིས་པ། །ཀུན་གྱི་དགྲ་ཡི་གཤེད་དུ་འབྱུང་། །གནས་དེར་བཞུགས་པའི་མགོན་པོ་ནི། །རྡོ་རྗེ་རྩེ་མོའི་རིགས་སུ་འབྱུང་། །བདེན་བྲལ་ཕྱོགས་སུ་བརྟེན་པས་ནི། །རླུང་སོགས་དེ་ཡི་དབུས་སུ་བཞུགས། །ཡེ་ཤེས་རལ་གྲི་གོ་ཆ་བགོས། །ཁྲོ་བོའི་རྒྱལ་པོ་སྟོབས་ཆེན་བཞུགས། །ཁྲོ་བོ་གྲངས་མེད་པ་ཡི་མགོན། །ཀུན་དུ་འཁོར་གྱིས་ཡོངས་སུ་བསྐོར། །དཀྱིལ་འཁོར་ཡོན་ཏན་རྒྱ་མཚོ་ནི། །ཀུན་ནས་གསལ་བར་གྱུར་པ་ཡིན། །རླུང་གི་ཕྱོགས་ལ་བརྟེན་ནས་ནི། །རྒྱལ་བ་ཀུན་བདག་ལས་བྱུང་བཞུགས། །ཐམས་ཅད་ཡེ་ཤེས་ཉེ་བར་མཚོན། །འོད་ཀྱི་དཀྱིལ་འཁོར་ཡོངས་སུ་རྫོགས། །ཆུ་བདག་ཕྱོགས་སུ་བརྟེན་ནས་སུ། །རྡོ་རྗེ་ཕྱག་རྒྱ་ཤིན་ཏུ་སྦྱོར། །པདྨ་དམར་པོའི་སྟེང་ན་བཞུགས། །མཛེས་པས་དུས་ཟད་ལྟ་བུར་བཞུགས། །ནུབ་ཀྱི་ཕྱོགས་སུ་བརྟེན་ནས་སུ། །གང་ཡང་ས་བཅུའི་གནས་དབང་ཕྱུག །དེ་ཡང་ཇི་བཞིན་བཀོད་ནས་གཞག །རང་གི་ཕྱག་རྒྱའི་མཚན་མས་མཚན། །དེ་ལ་འོག་གི་ཆར་གནས་

དང་། །སྟེང་གི་ཕྱོགས་ཀྱི་ཆ་ཉིད་དུ། །བདག་ཉིད་ཆེན་པོ་སྐྱོན་བྲལ་བ། །དེ་དག་ཀུན་ལ་དཔའ་བོ་བཞུགས། །དབུས་སུ་གཅིག་པུ་བཞུགས་པར་འགྱུར། །སོ་སོར་བྱང་ཆུབ་ལ་བརྟེན་ནས། །ཤཱ་རིའི་བུ་ནི་བདག་ཉིད་ཆེ། །དེ་ནས་ཡེ་ཤེས་ནམ་མཁའ་མཁྱེན། །རྫུ་འཕྲུལ་ཡུལ་ནི་མཆོག་ཏུ་འགྱུར། །མཽད་གལ་བུ་ཡང་ཉིད་དང་ནི། །འོད་སྲུང་བདག་ཉིད་ཆེན་པོ་ནི། །རྒྱལ་མཆོག་དེ་ནས་ས་སྟེངས་སུ། །རྟ་ཐུལ་དང་ནི་བ་ལང་བདག །དྲག་ཤུལ་དབང་ཆེན་ཆངས་བུ་ཅན། །བ་ར་དྭ་ཛ་ཉིད་དང་ནི། །ཀུན་དགའ་བོ་ནི་དགའ་ཞེས་བཤད། ། སྒྲ་གཅན་འཛིན་ཡང་རིམ་ཇི་བཞིན། །འདི་རུ་ཇི་བཞིན་བཀོད་ནས་གཞག །ལྷུང་བཟེད་ཆུ་སྐྱེས་རྣམ་པར་བརྒྱན། །ཕྱག་ན་རྡོ་རྗེ་སྲས་པོ་ཀུན། །དཔུང་བཟངས་ལ་སོགས་དེ་བཞིན་ཀུན། །ཕྱག་ན་རྡོ་རྗེ་ཉེ་བར་ནི། །དེ་རྣམས་ཇི་བཞིན་བཀོད་ནས་གཞག །དམ་ཆོས་སྲས་པོར་བཤད་པར་ནི། །གང་ཡང་འཇམ་དཔལ་ལ་སོགས་གཞན། །འཇམ་དབྱངས་དང་ནི་ཉེ་བར་དུ། །དེ་དག་ཐམས་ཅད་གཞག་པར་བྱ། །གང་ཡང་ཁྲོ་བོ་ཡང་དག་བཤད། །ཕྱག་ན་རྡོ་རྗེའི་རིགས་ལས་འབྱུང་། །ལྷོ་ཡི་ཕྱོགས་སུ་བརྟེན་ནས་སུ། །འདི་ནི་རིམ་པ་བཞིན་དུ་གཞག །རྡོ་རྗེ་དགྲ་སྟ་ཡང་དག་ལྡན། །རྡོ་རྗེ་ཐོ་བ་དེ་བཞིན་ནོ། །ཤིན་ཏུ་དྲག་ཤུལ་ཡང་དག་བཤད། །འབར་བའི་ཕྲེང་བའི་འོད་ཀྱིས་འཁྲིགས། །ཁྲོ་བོར་ཡང་དག་བཤད་པ་ནི། །རྟ་མགྲིན་ཤིན་ཏུ་མཐོང་བར་གནས། །ཁྲོ་གཉེར་ཅན་དང་ཡང་དག་རོལ། །སྒྲོལ་མར་གྲགས་པའང་རྙེད་པར་དཀའ། །རང་གི་ཕྱག་རྒྱ་མཚན་མར་ལྡན། །བརྩོན་པས་དེར་ཡང་བྲི་བར་བྱ། །སྒྲོལ་མ་ཁྲོ་གཉེར་ཅན་དག་བྲི། །རིག་མ་བཅོམ་ལྡན་མ་དེ་བཞིན། །མཱ་མ་ཀཱི་དང་ལྕགས་སྒྲོག་བཤད། །ནམ་མཁའ་སངས་རྒྱས་སྤྱན་དང་ནི། །རྨ་བྱ་འོད་ཟེར་ཅན་ཉིད་དང་། །དུག་སེལ་རི་ཁྲོད་ལོ་མ་ཅན། །རང་གི་ཕྱག་རྒྱ་མཚན་མར་ལྡན། །སྐལ་བ་ཆེན་པོ་དེ་ཡང་བྲི། །བྱང་གི་ཕྱོགས་ལ་བརྟེན་ནས་སུ། །ཤིན་ཏུ་རྫུ་འཕྲུལ་ཆེ་བར་བཞུགས། །ཕྱག་རྒྱ་གང་ཚེ་གཟུགས་ཅན་མ། །སྐུ་ལ་རྒྱན་གྱིས་རྣམ་པར་བརྒྱན། །ཕོ་ཉ་ཕོ་མོ་དེ་

བཞིན་དུ། །མངག་གཞུག་ཕོ་མོ་ཤིན་ཏུ་རྩུབ། །རང་གི་ཕྱག་རྒྱ་མཚན་མར་ལྡན། །ནུབ་ཀྱི་ཕྱོགས་སུ་བྲི་བར་བྱ། །ས་ཡི་དཀྱིལ་འཁོར་ཞེས་བཤད་པ། །རྒྱལ་བའི་བདག་ཉིད་ལས་འཁྲུངས་ལྷ། །འཇིག་རྟེན་སྐྱོང་བ་ལ་སོགས་བྲི། །ས་སྟེངས་དམ་ཚིག་གནས་པ་ནི། །ལྷ་ཡི་རྒྱལ་པོ་ལྷ་མིན་ཆེ། །ཚངས་པ་ཁྱབ་འཇུག་དབང་ཕྱུག་ཆེ། །རང་གི་ཕྱག་རྒྱའི་མཚན་མར་བཅས། །ཤར་གྱི་ཕྱོགས་ལ་བརྟེན་ནས་བྲི། །གང་ཡང་དྲང་སྲོང་བཤད་པ་ནི། །སྣ་ཚོགས་བཤེས་གཉེན་འགྲོ་སྐྱོང་དང་། །ངན་སྤོང་གཤིན་རྗེ་མ་དང་མཚུངས། །གཞན་ཡང་ཤིན་ཏུ་མཐོང་བ་དཀའ། །རིག་བྱེད་བདེན་པ་ཡང་དག་ལྡན། །དེ་ནི་བྱང་གི་ཕྱོགས་སུ་བྲི། །ཉི་མ་ཟླ་བ་ཆུ་བདག་དང་། །མེ་ཡང་ཤིན་ཏུ་མཐོང་བར་དཀའ། །གནོད་སྦྱིན་དབང་པོ་རྟག་ཏུ་ནི། །ལྷོ་ཡི་ཕྱོགས་ཆར་བྲི་བར་བྱ། །གང་ཡང་མ་མོར་ཡང་དག་བཤད། །ས་སྟེངས་ཤིན་ཏུ་དྲག་པ་ནི། །རང་གི་མཆོད་པའི་ཕྱག་དང་ལྡན། །དེ་ཡང་ནུབ་ཀྱི་ཕྱོགས་སུ་བྲི། །གང་ཡང་སྲིང་མོར་བཤད་པ་ནི། །སྣ་ཚོགས་གཟུགས་ཅན་འཕྲུལ་མོ་ཆེ། །སེམས་ཅན་ཕན་པ་ཤིན་ཏུ་བརྩོན། །དེ་ཡང་དེ་ཡི་ཕྱོགས་བརྟེན་བཞུགས། །ཤར་གྱི་སྒོ་ན་ནག་པོ་བཞུགས། །རྫུ་འཕྲུལ་ཆེན་པོ་སྐྱོང་ཞིང་སྲུང་། །དགའ་བྱེད་བྱང་གི་སྒོ་སྲུང་ཞིང་། །དེ་བཞིན་ལྷོ་ན་ངན་སྤོང་ངོ་། །ནུབ་སྒོར་ཡང་དག་བཤད་པ་ནི། །བགེགས་ཆེན་རིགས་ལས་ཡང་དག་བྱུང་། །རང་གི་ཕྱག་རྒྱ་མཚན་མར་བཅས། །རྫུ་འཕྲུལ་ཆེན་པོ་སྲུང་ཞིང་བཞུགས། །བུ་གཅིག་མདོར་ན་འདི་དག་ནི། །ཤིན་ཏུ་རྒྱས་པར་བསྟན་པ་ཡིན། །སངས་རྒྱས་ཀུན་ནོར་ཐམས་ཅད་པ། །ས་སྟེངས་ན་ནི་གཞན་མ་མཐོང་། །རྟག་ཏུ་བག་ཡོད་པར་གྱུར་པས། །བདག་ཉིད་སྲོག་ནི་ཇི་བཞིན་པ། །དེ་ལྟར་མཛེས་པའི་རང་བཞིན་སྲུང་། །སངས་རྒྱས་ཐམས་ཅད་ཀྱིས་ནི་སྲུང་། ། བྱིས་པ་སོ་སོ་སྐྱེ་བོ་ལ། །ཁྱོད་ཀྱིས་ཡིད་ཆེས་པར་མི་བྱ། །རྨོངས་པ་དེ་ན་རང་རླག་ཅིང་། །གཞན་ཡང་རླག་པར་བྱེད་པར་འགྱུར། །བདག་གིས་དམ་ཆོས་བཤད་པ་འདི། །སྡུག་བསྔལ་ཐམས་ཅད་གྲོལ་བར་བྱེད། །དེ་ནི་རླག་པར་བྱེད་པ་ནི། །མི་ཤེས་བསྒྲིབས་པས་འབྱུང་བར་

འགྱུར། །རྫོགས་པའི་སངས་རྒྱས་ཀྱིས་གསུངས་པའི། །མཆོག་འདི་དད་པ་མེད་པ་དང་། །སྡིག་ཅན་འཇིགས་ཤིང་རྩུབ་པ་ཡི། །དྲག་ཤུལ་མཆེད་པར་གྱུར་པ་ལ། །བུ་ཡིས་ཅུང་ཟད་མི་སྦྱིན་པར། །ཁྱོད་ལ་རྫོགས་སངས་རྒྱས་ཀྱིས་གསུངས། །རྫོགས་སངས་རྐང་གཉིས་དམ་པ་ཡིས། །ཤིན་ཏུ་གསང་བར་ཡང་དག་གསུངས། །ཁྲོ་བོའི་རྒྱལ་པོའི་དཀྱིལ་འཁོར་ནི། །འདི་དག་ཐམས་ཅད་བཤད་མི་བྱ། །རྟག་ཏུ་བག་ཡོད་གྱུར་པས་ན། །རྒྱལ་བའི་བསྟན་པ་བསྲུང་བར་བྱ། །དཀྱིལ་འཁོར་མ་མཐོང་བ་ལ་ནི། །འདི་ནི་སྟོན་ཅིང་སྟེར་བ་ན། ། སྐྱོབ་པ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་བསླུ་བར་བགྱི། །སྡུག་བསྔལ་ཀུན་གྱི་སྡེར་གྱུར་པ། །སྡིག་པ་ཅན་དུ་ངེས་པར་འགྲོ། །སྡིག་ཅན་དེ་ཡི་གསང་སྔགས་ཀྱི། །དངོས་གྲུབ་ངེས་པར་འབྱུང་མི་འགྱུར། །བསྟན་པའི་དོན་ནི་མཛད་པ་ཡིས། །གཙོ་བོ་དཔལ་ལྡན་རྡོ་རྗེ་འཛིན། །དཀྱིལ་འཁོར་མ་མཐོང་སྟོན་བྱེད་ཀྱི། །མགོ་བོ་རྡོ་རྗེས་འགེམས་པར་བྱེད། །དེ་ཡིས་གསང་སྔགས་མི་འགྲུབ་ཅིང་། །བགེགས་རྣམས་ཀྱིས་ཀྱང་བརླག་པར་འགྱུར། །སྔགས་ཀྱི་སྒྲུབ་པ་འབྲས་བུ་མེད། །དེ་ཕྱིར་སངས་རྒྱས་ཀྱིས་གསུངས་པའི། །གསུང་འདི་བུ་ཁྱོད་ཚུར་ཉོན་ལ། །རྣ་ཐོས་ཙམ་དུའང་མི་སྦྱིན་ཏེ། །དམ་ཚིག་རྫོགས་སངས་རྒྱས་ཀྱིས་གསུངས། །སངས་རྒྱས་ཀྱིས་གསུངས་དམ་ཚིག་ནི། །གང་ཞིག་ཤིན་ཏུ་འདའ་བྱེད་ན། །འཇིག་རྟེན་གསུམ་བཞུགས་རྫོགས་སངས་རྒྱས། །དབང་ཕྱུག་བསླུས་པར་གྱུར་པ་ཡིན། །དེ་ནས་ཐམས་ཅད་དང་ལྡན་པའི་འཁོར་དེ་དག་ངོ་མཚར་དུ་གྱུར་ནས་མིག་བལྟས་ཏེ། ཤིན་ཏུ་ངོ་མཚར་ཡིད་ཀྱིས་སུ། །འདི་སྐད་ཀྱི་ནི་ཚིག་གསོལ་ཏོ། །ཨེ་མའོ་སངས་རྒྱས་བསམ་དུ་མེད། །ཐུགས་རྗེའི་དབང་གིས་གྱུར་པ་ཡིན། །རྒྱུ་དང་མི་རྒྱུ་མི་ཤེས་ལ། །དམ་ཆོས་འདི་ནི་རབ་ཏུ་གསུངས། །དེ་རྣམས་ཀྱི་ནི་ངན་འགྲོ་བཅད། །སྡུག་བསྔལ་ཐམས་ཅད་འཇིག་པར་མཛད། །གང་གི་ལག་ན་གནས་པ་དེ། །བསམ་མི་ཁྱབ་པར་སངས་རྒྱས་གསུངས། །བགེགས་དང་ལོག་པར་འདྲེན་པ་དང་། །སྡིག་ཅན་ཤིན་ཏུ་སྐྲག་པ་གང་། །

སྔགས་པས་དཀྱིལ་འཁོར་མཐོང་བ་ཡིས། །དེ་དག་ཐམས་ཅད་ཞི་བར་འགྱུར། །འདི་ཀུན་གང་དུ་གནས་པ་ནི། །དམ་པའི་ཆོས་ནི་གནས་མེད་དོ། །སྡིག་པ་འདི་དག་ཐམས་ཅད་དག །དེ་ཚེ་འཇིགས་པ་ལས་གྲོལ་འགྱུར། །ཐམས་ཅད་དབང་ཕྱུག་གོ་འཕང་ངོ་། །སེམས་ཅན་ཐམས་ཅད་དབང་བྱེད་པ། །ཐེ་ཙོམ་མེད་པར་རབ་ཏུ་འགྱུར། །སེམས་ཅན་ས་འོག་གནས་པ་དང་། །ཇི་སྲིད་གདུག་པའི་སེམས་ཅན་རྣམས། །ས་ལ་གནས་པའི་བར་དུ་ནི། །དེ་ཀུན་དབང་དུ་བྱས་ནས་ནི། །མངག་གཞུག་དེ་དག་ཉན་པར་གནས། །ས་གཞི་མཐིལ་གྱི་ལྷ་ལ་སོགས། །ལྷ་འམ་ལྟོ་འཕྱེ་ཆེས་འདི་ནི། །ཅུང་ཟད་གང་དུ་གནས་པ་དེར། །བདག་ཉིད་ཆེན་པོ་སྲུང་བར་བྱེད། །ཐམས་ཅད་བཀའ་བསྒོ་རབ་ཏུ་བྱེད། །ལྷ་གང་གནོད་སྦྱིན་མི་ཡི་བདག །ས་གཞི་སྟེང་གི་རྒྱལ་པོ་འདིར། །ཅི་བགྱི་ཞེས་ནི་སྨྲ་བར་གནས། ། བགེགས་ཀྱིས་ཉེ་བར་འཚེ་བ་དང་། །ནད་ཀྱིས་སྡུག་བསྔལ་གཟིར་བར་བྱེད། །རྒྱལ་པོ་གདུག་པས་སྔངས་པར་བྱེད། །ཐམས་ཅད་འཕྲོག་པར་བྱེད་པ་དང་། །མ་མོ་གདུག་པས་འདེབས་པར་བྱེད། །སེང་གེ་སྟག་དང་ཆུ་དེ་བཞིན། །ས་གཞིའི་སྟེང་འདིར་མཁའ་འགྲོ་མ། །སྲིན་པོ་ལྟོ་འཕྱེ་འཇིགས་པ་དང་། །ཡུལ་འཁོར་དུ་ནི་མུ་གེས་ཡོག །ནད་རྣམས་ཀུན་གྱིས་འཇིགས་པར་བྱེད། །རིམས་དང་གློ་ནད་དབུགས་མི་བདེ། །ལྷོག་པ་དང་ནི་མཚན་པར་རྡོལ། །མགོ་དང་མིག་གི་ཟུག་གཟེར་དང་། །ལྟོ་བར་ཟུག་གཟེར་འདེབས་པ་དང་། །ནད་རྣམས་ཀུན་གྱིས་འདེབས་པ་དང་། །ཉེ་བར་འཚེ་བ་ཀུན་གྱིས་གདུངས། །ཡུན་དུ་བཀྲེན་པར་གྱུར་པ་དང་། །འཐབ་དང་ཐབ་མོ་རྩོད་པ་དང་། །རྒྱལ་པོ་ཆོམ་རྐུན་ཕོ་ཉ་སོགས། །ཐ་སྙད་དུ་ནི་གྱུར་པ་ནའང་། །བསྲུང་ཆེན་འདི་ནི་ཟུང་ཅིག་པར། །རྒྱལ་བ་མཆོག་གིས་རྟག་ཏུ་གསུངས། ། གནོད་སྦྱིན་ལ་སོགས་ལྷ་ཡི་བདག །འབྱུང་པོ་གནོད་སྦྱིན་མིའམ་ཅི། །གང་ཡང་ས་སྟེངས་གནས་པ་ཡི། །དམ་ཚིག་ལ་ནི་གནས་པ་ཀུན། །དམ་ཚིག་དགུར་ནི་གསུངས་པ་ལས། །དེ་རྣམས་ཐམས་ཅད་མི་འདའོ། །རྫོགས་སངས་རྐང་གཉིས་མཆོག་གིས་ནི། །གསུངས་པའི་

བསམ་མི་ཁྱབ་པ་ཀུན། །བསམ་མི་ཁྱབ་པའི་ལས་གསུངས་པ། །འབྲས་བུའང་བསམ་མི་ཁྱབ་པར་འབྱུང་། །དེ་ནས་བཅོམ་ལྡན་འདས་ཀྱིས་དེའི་ཚེ་འཁོར་དེ་དག་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །བདུད་ཐམས་ཅད་ཀྱིས་འདའ་བར་མི་བྱ་བའི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པའི་ཚིག་འདི་ཤིན་ཏུ་ངོ་མཚར་ཏོ། །དེ་ནས་བཅོམ་ལྡན་ཤཱཀྱ་ཐུབ། །ཡིད་ནི་མགུ་བར་གྱུར་པ་ཡིས། །སྙན་པ་ཡི་ནི་ཚིག་གསུངས་པ། །རྡོ་རྗེ་དག་ནི་ཆེན་པོ་བྱུང་། །ལེགས་སོ་དཔའ་བོ་ཡེ་ཤེས་ཆེ། །སླར་ཡང་རྡོ་རྗེ་འཛིན་ཁྱེད་ལེགས། ། བསམ་མི་ཁྱབ་པའི་ལས་སྣ་ཚོགས། །རྒྱལ་སྲས་ཁྱེད་ལ་བཤད་པར་བྱ། །རྒྱལ་མཆོག་གཙོ་བོས་གསུངས་པ་ཡི། །བསམ་མེད་ཡེ་ཤེས་རྟུལ་ཕོད་པ། །གང་གིས་ངེས་པ་འགྲུབ་པ་ཡི། །དེ་དག་ཐམས་ཅད་སྤྱད་པར་བྱ། །དཀྱིལ་འཁོར་དུ་ནི་འཇུག་པ་དང་། །མཆོད་པའི་ལས་དང་གཏོར་མ་དང་། །དྲི་དང་མེ་ཏོག་ལ་སོགས་དགེ། །བཤད་ཀྱིས་བུ་ཁྱོད་ཚུར་ལ་ཉོན། །གང་གིས་ཡང་དག་བསམ་མི་ཁྱབ། །བླ་ན་མེད་པའི་གོ་འཕང་འཐོབ། །ནང་གི་སངས་རྒྱས་རང་བཞིན་གནས། །ཕྱོགས་བཞི་རུ་ནི་ཁོར་ཡུག་ཏུ། །སྐུ་ནི་སྣ་ཚོགས་མངའ་བ་ཡི། །བྱང་ཆུབ་སེམས་དཔའ་མདུན་བདར་ཏེ། །ཇི་སྙེད་ནམ་མཁའི་མཐས་གཏུགས་པ། །དེ་སྙེད་སེམས་ཀྱི་སྤྱོད་ཡུལ་ཡིན། །མངོན་གསུངས་བཞིན་དུ་ཡང་དག་བལྟ། །ཡོན་ཆབ་དབུལ་ལ་མདུན་བྱས་ཏེ། །སངས་རྒྱས་ཐམས་ཅད་སྙན་གསན་དབབ། །བྱང་ཆུབ་སེམས་དཔའ་ཉན་ཐོས་བཅས། ། གཞན་ཡང་བྱ་བ་བྱས་པ་དང་། །འཇིག་རྟེན་པ་ཡི་ཆོ་གའི་རིམ། །མཆོད་པའི་ཆོ་ག་རྒྱས་པ་རུ། །ཡང་དག་ཆོ་ག་ཤེས་པར་བྱ། །ཇི་སྲིད་སྐུ་ཡི་དཀྱིལ་འཁོར་ནི། །ཡང་ནི་ཕྱིར་ཞིང་བལྟས་ནས་ནི། །བསམ་མི་ཁྱབ་པའི་མཆོག་སྩོལ་ལ། །ཕྱོགས་བཅིང་བ་ནི་རབ་ཏུ་བྱ། །ཐུགས་རྗེའི་ཐུགས་ཅན་གྱུར་པ་དང་། །བསམ་མི་ཁྱབ་པའི་འབྲས་སྩོལ་བ། །ཐམས་ཅད་སེམས་ཀྱིས་བཞུགས་པར་ནི། །འཇིག་རྟེན་མགོན་པོས་སླར་ཡང་ནི། །དེ་ལྟར་སེམས་ཀྱིས་བསམས་ནས་ཀྱང་། །དྲི་དང་མེ་ཏོག་དབུལ་བར་བྱ། །ཁྱད་པར་དུ་ཡང་གཏོར་མ་ནི། །ཆོ་ག་བཞིན་དུ་དབུལ་

བར་བྱ། །བྱིན་ནས་སྟེང་གི་སངས་རྒྱས་རྣམས། །ཐུགས་རྗེར་གྱུར་པའི་ཐུགས་མངའ་བ། །བལྟས་ནས་འཁོར་བའི་སྡུག་བསྔལ་ནི། །གཙོ་བོ་དེ་རུ་བལྟ་བར་བྱ། །དེ་ནས་ལག་པས་མེ་ཏོག་དང་། །བདུག་པ་བླངས་ནས་སྙིང་གར་གཞག །དེ་ལ་གསོལ་བ་གདབ་པར་བྱ། །ཐུགས་རྗེའི་རོ་གཅིག་ཏུ་གྱུར་པ། །འགྲོ་བ་ཕན་པར་མཛད་པ་ཡི། །ཇི་སྙེད་རྫོགས་སངས་རྒྱས་བཞུགས་པ། །དེ་སྙེད་བདག་གིས་འདོད་པ་ཡི། །འབྲས་བུ་ཡང་དག་ཐོབ་པར་མཛོད། །དེ་ལྟར་ཕྱོགས་རྣམས་ཐམས་ཅད་དུ། །རྒྱལ་བའི་གནས་སུ་གསོལ་བ་གདབ། །དེ་ནས་ཡང་དག་བསམ་བྱས་པའི། །རྗེས་སུ་རྒྱལ་བའི་སྲས་པོ་ཡང་། །ཡོན་ཆབ་ལ་སོགས་ཆོ་ག་ཡིས། །དྲི་དང་མེ་ཏོག་སོགས་སླར་ཡང་། །མངོན་སུམ་བཞིན་དུ་སྐྱོབ་བ་ནི། །མཉམ་གཞག་གྱུར་པས་མཆོད་པར་བྱ། །རང་གི་སྐུར་གྱུར་ཐམས་ཅད་ནི། །དེ་བཞིན་རང་གི་མཚོན་ཆར་ལྡན། །རང་གི་ཆ་བྱད་མཚོན་ཆར་ལྡན། །འཇིགས་པ་མེད་པར་བསམ་པར་བྱ། །འདི་དག་ཐམས་ཅད་མཆོད་སྦྱིན་ཕྱག །ཅོད་པན་མགོ་བོར་གནས་པར་བཤད། །བསམ་པ་ཐམས་ཅད་རྫོགས་མཛད་པ། །སྐལ་བ་ཆེན་པོ་བསམ་པར་བྱ། །དེ་ལྟར་དཀྱིལ་འཁོར་མགོན་པོ་ནི། །མཆོད་སྦྱིན་བདག་ཉིད་བསམ་པར་བྱ། །གཙོ་བོ་བསྟན་ལ་སྨན་མཛད་པ། །རྣམ་པ་ཀུན་དུ་བསམ་པར་བྱ། །དེ་ནས་མཁས་པས་མར་མེ་དང་། །མཆོད་ཡོན་ཞལ་བསིལ་ཤིན་ཏུ་མཛེས། །དྲི་དང་མེ་ཏོག་མར་མེ་དང་། །བདུག་པ་གཏོར་མ་དེ་བཞིན་དུ། །ཞལ་ཟས་དེ་ལ་དབུལ་བར་བྱ། །ཆན་དང་འོ་ཐུག་དེ་བཞིན་ནོ། །རས་ཀྱིས་མགྲིན་པ་བཅིངས་པ་ཡི། །བུམ་པ་བཅུ་དྲུག་གཞག་པར་བྱ། །གདུགས་དང་རྒྱལ་མཚན་བ་དན་དང་། །རྟ་དང་གླང་པོ་བཞོན་པའི་མཆོག །དྲིལ་བུའི་སྒྲ་ནི་རབ་ཏུ་སྙན། །རོལ་མོ་རིན་ཆེན་ཁྱད་པར་དུ། །བྱེ་བ་གྲངས་ནི་མེད་པ་ཡི། །མཆོག་ཉིད་ཀྱང་ནི་དབུལ་བར་བྱ། །ཁྱད་པར་དུ་ཡང་སྙན་པའི་སྒྲ། །དབྱངས་གླུ་སོས་དལ་ཡིད་འཕྲོག་པ། །དྲིལ་བུའི་རོལ་མོ་ཁྱད་པར་དུ། །དཀྱིལ་འཁོར་དགེ་བ་མཆོད་པར་བྱ། །དེ་ལྟར་ཆོ་ག་བཞིན་མཆོད་ནས། །སོར་མོ་བཅུ་ཡི་ཐལ་སྦྱར་ཏེ། །སྨོན་ལམ་

རབ་ཏུ་འཕེལ་བྱའི་ཕྱིར། །རྒྱལ་མཆོག་ལ་སོགས་རབ་ཏུ་འདུད། །དེ་ནས་དེ་བྱུང་སློབ་མ་ནི། །བློ་ལྡན་དཀྱིལ་འཁོར་དུ་བོས་ཏེ། །དེ་ཚེ་གསུམ་ལ་སྐྱབས་འགྲོ་སྦྱིན། །དཀོན་མཆོག་གསུམ་ལ་གུས་པར་ལྡན། །བྱང་ཆུབ་སེམས་ནི་རྣམ་དཔྱད་པ། །མ་ལུས་པར་ནི་གཟུང་བར་བྱ། །རྟག་ཏུ་བླ་མ་ལ་གུས་ཤིང་། །བློ་གྲོས་ཟབ་མོ་ཡང་དག་ལྡན། །སྤྲོ་ཆེན་བློ་གྲོས་ཕུན་སུམ་ཚོགས། །བཟླས་ལ་དགའ་ཞིང་ཆེད་དུ་བྱེད། །བསྔགས་ཤིང་ཚུལ་ཁྲིམས་ཕུན་སུམ་ཚོགས། །གཏོང་ལ་དགའ་ཞིང་ཤིན་ཏུ་བརྩོན། །དབང་པོ་དྲུག་ནི་རབ་ཏུ་ལྡན། །སྒྱུ་རྩལ་ཆོ་ག་རྣམ་པར་མཁས། །སྤྲོ་བ་ཆེ་དང་སེམས་དཔར་ལྡན། །བྱས་པ་ཤེས་ཤིང་བྱས་པ་གཟོ། །ཕ་དང་མ་ལ་ཤིན་ཏུ་གུས། །དཀོན་མཆོག་གསུམ་ལ་ཤིན་ཏུ་ངེས། །སངས་རྒྱས་ཉན་ཐོས་ཆོས་རྣམས་དང་། །འཇིག་རྟེན་པ་རྣམས་མཆོད་པར་བྱེད། །དད་པ་དང་ནི་ཐུགས་རྗེར་ལྡན། ། ནད་མེད་དབང་པོ་མ་ཚང་མེད། །སེམས་ཅན་ཕན་པར་ཡང་དག་ལྡན། །སྡིག་པའི་སྒྲ་ནི་རབ་ཏུ་འཇོམས། །ལོག་པའི་ལྟ་བ་རྣམ་པར་བྲལ། །ཡང་དག་ལྟ་བ་ཡང་དག་བརྟེན། །སེར་ཞིང་ལྗང་གུ་དཀར་བ་དང་། །ནག་པར་གྱུར་ཀྱང་མདངས་བཟང་བ། །གང་ཡང་ལུས་ནི་རབ་ཏུ་དྲང་། །མགོ་བོ་ཤིན་ཏུ་རྒྱས་བཅས་པ། །སྣ་ལྡན་སྨིན་མཚམས་བར་མ་ཆད། །མིག་དང་རྫི་མ་ཡང་དག་ལྡན། །གང་ཡང་མཉམ་པ་ཉིད་དུ་རྒྱས། །དེ་བཞིན་མགོ་བོ་གདུགས་ལྟ་བུ། །རྐེད་པ་རྒྱས་ཤིང་ཡང་དག་ལྡན། །རྐང་པ་ཤིན་ཏུ་གནས་པ་དང་། །དེ་སོགས་ཡོན་ཏན་ཡང་དག་ལྡན། །དེ་ཚེ་བླ་མས་བརྟགས་ན་ནི། །ལྔ་འམ་བརྒྱད་ནི་གཟུང་བར་བྱ། །གྲངས་མེད་ཡང་དག་འདོད་ཚད་ནི། །དེ་ནས་དེ་ལ་སྦྱིན་པར་བྱ། །གསུམ་ལ་སྐྱབས་འགྲོ་སྡིག་པ་བཤགས། །བདག་ཉིད་དབུལ་བ་དེ་དག་ལ། །སངས་རྒྱས་བྱང་ཆུབ་ཆེད་དུ་སྦྱིན། ། བྱང་ཆུབ་སེམས་ནི་མ་ལུས་པ། །བློ་གྲོས་ལྡན་པའི་མི་ཡིས་གཟུང་། །དེ་དག་མ་ལུས་ཡང་དག་བྱ། །སླར་ཡང་དམ་ཆོས་བཤད་པར་བྱ། །བསྐལ་པ་བྱེ་བ་གྲངས་མེད་དུ། །དལ་འབྱོར་ཤིན་ཏུ་རྙེད་པར་དཀའ། །ཨུ་དུམ་བཱ་རའི་མེ་ཏོག་ལྟར། །བརྒྱ་ལམ་ན་ནི་རེས་འགའ་ཞིག །

དེ་བས་ཀྱང་ནི་འཇིག་རྟེན་མགོན། །སྐྱོབ་པ་ཤིན་ཏུ་རྙེད་པར་དཀའ། །གཙོ་བོ་གསང་སྔགས་ཚུལ་ཡང་ནི། །ས་སྟེངས་སུ་ཡང་དེ་བཞིན་ནོ། །ཤིན་ཏུ་སྡུག་བསྔལ་འཇིགས་པ་ཡང་། །འཁོར་བའི་རྒྱ་མཚོ་འདི་རུ་བུ། །ས་སྟེངས་གསང་སྔགས་མ་གཏོགས་པ། ། སྐྱོབ་པ་སུ་ཡང་མ་མཐོང་ངོ་། །དེ་བས་རྣམ་པ་ཐམས་ཅད་ཀྱི། །འཁོར་བའི་སྐྱོན་ནི་སྤོང་འདོད་པས། །རྒ་དང་ན་དང་འཇིགས་པ་དང་། །འཆི་བའི་འཇིགས་པ་རྩུབ་བལྟས་ནས། །ལམ་མཆོག་འདི་ནི་བསྟེན་པ་ན། །སྡུག་བསྔལ་ཐམས་ཅད་རྒྱུན་ཆད་འགྱུར། །གདོས་ཆད་པས་བཅིང་མཐའ་ཡས་དང་། །གཞན་ཡང་སྡུག་བསྔལ་བ་ཡི་ཚོགས། །ལམ་མཆོག་འདི་ནི་བསྟེན་པ་ན། །གང་དུ་མི་འབྱུང་ཤིན་ཏུ་དཀོན། །ཉེ་དུ་མཛའ་བོ་སྡུག་བསྔལ་དང་། །གྲོགས་པོ་གཉེན་དང་སྣག་གཉེན་མཚམས། །ལོངས་སྤྱོད་ཕུན་ཚོགས་སྡུག་བསྔལ་དང་། །ནད་ཀྱི་སྡུག་བསྔལ་གྱིས་གདུངས་དང་། །ཟས་ཀྱིས་འཇིགས་པའི་སྡུག་བསྔལ་དང་། །གང་ཡང་ས་སྟེངས་འཁོར་གནས་པས། །ཚུལ་འདི་བསྟེན་པར་གྱུར་པ་ན། །འབྱུང་བ་རུ་ནི་མི་འགྱུར་རོ། །བཅུ་དང་བརྒྱད་དང་དེ་ནས་ལྔ། །གསུམ་ལ་སྐྱབས་འགྲོ་དུས་ཁྲིམས་ནི། །བསླབ་པ་བྱིན་ཏེ་བླང་བར་བྱ། །སངས་རྒྱས་བསྟན་པ་ཤིན་ཏུ་དཀོན། །སྡོམ་པ་ཡང་དག་བླངས་ནས་སུ། །ལུས་ཅན་རྣམས་ཀྱི་སྲོག་བཞིན་དུ། །བསྡམས་པར་གྱུར་པ་བསྲུང་བར་བྱ། །དལ་བ་ཕུན་སུམ་ཚོགས་པ་དཀོན། །གསང་སྔགས་སྤྱོད་པ་ལས་བྱུང་བའི། །དང་པོ་ཉམས་གཅིག་བསྟེན་པར་བྱ། །ཡིད་བཞིན་ནོར་བུ་ལྟ་བུའི་སྐུ། །ཞི་བའི་སངས་རྒྱས་གོ་འཕང་འཐོབ། །ལམ་འདི་མཆོག་སྟེ་དཔལ་དང་ལྡན། །བསམ་གྱིས་མི་ཁྱབ་འབྲས་བུ་སྩོལ། །མི་གཡོ་བས་ནི་བསྟེན་གྱུར་ནས། །བླ་ན་མེད་པའི་གོ་འཕང་འགྱུར། །འདི་ནི་མཆོག་གི་དེ་ཉིད་ཞིང་། ། སྡུག་བསྔལ་ཐམས་ཅད་རྣམ་པར་སྤངས། །ཤིན་ཏུ་གུས་པ་དང་ལྡན་པ། །ཐེག་པ་ཆེན་པོ་འཐོབ་པར་འགྱུར། །དེ་བས་ཁྱོད་ཀྱིས་ཐེག་ཆེན་ལ། །སླུ་བ་མེད་པར་གུས་པར་གྱིས། །གང་གིས་ཁྱོད་ནི་འགྲོ་བ་ན། །དེ་བཞིན་གཤེགས་པ་འབྱུང་བར་འགྱུར། །སེམས་ཅན་ཀུན་

ལ་ཕན་པའི་ཡིད། །བསམ་པ་ཐམས་ཅད་རྫོགས་པར་བྱེད། །ཁྱེད་ནི་ཐེག་པ་གསུམ་འཆད་པ། །ཚུལ་ལས་གནས་པ་དེ་ནས་འབྱུང་། །ཟབ་མོ་ཡི་ནི་བློ་གྲོས་ལྡན། །ཟབ་མོའི་དོན་ནི་སྟོན་བྱས་པ། །རྒྱལ་བའི་ཚུལ་ནི་སྟོན་པ་ན། །དེ་ལས་ཐེ་ཚོམ་མེད་པ་འབྱུང་། །གདོད་ནས་ཞི་ལ་གནས་མེད་པའི། །དམ་པའི་ཆོས་ནི་དེ་ནས་བཤད། །སེམས་ཅན་སུས་ཐོས་ཐམས་ཅད་ཀྱང་། །རྒྱལ་བའི་སྲས་སུ་སྐྱེ་བར་འགྱུར། །འདི་ན་བདག་མེད་སྲོག་ཀྱང་མེད། །དབང་ཕྱུག་ཀྱང་མེད་བྱེད་པའང་མེད། །འཇིག་རྟེན་བྱེད་པོ་སེམས་ཅན་མེད། །སྐྱེས་པ་མེད་ཅིང་མ་ནིང་མེད། །གང་ཟག་ཀྱང་མེད་གནས་ཀྱང་མེད། །གང་དུ་ཚོར་བ་བྱེད་པ་མེད། །གཙོ་བོ་ཡོད་མིན་ཁྱབ་པའང་མེད། །ཕྲ་བ་མེད་ཅིང་གསལ་བའང་མེད། །རྒྱུ་འམ་གཞན་ཡང་མེད་པ་སྟེ། །རང་གི་ངོ་བོ་རང་བཞིན་མེད། །བདག་གི་བ་ཡི་རང་བཞིན་མེད། །ས་སྟེངས་ན་ནི་རྟག་པ་མེད། །ཐམས་ཅད་སྒྱུ་མིའི་ལས་བྱུང་ལྟར། །བྱེད་པོ་ལ་སོགས་རྣམ་པར་སྤངས། །འདི་དག་ཐམས་ཅད་སྟོང་པར་ལྟ། །ཡེ་ཤེས་གོ་འཕང་དུ་ནི་བརྟག །བདག་དང་སྲོག་ལ་སོགས་པ་ཀུན། །བྱིས་པ་འབའ་ཞིག་གིས་ནི་བརྟགས། །འདི་ན་བདག་མེད་སེམས་ཅན་མེད། །འདོད་མེད་འབའ་ཞིག་ལས་བྱུང་བ། །སྒྱུ་མ་དང་ནི་སྨིག་རྒྱུ་དང་། །དྲི་ཟའི་གྲོང་ཁྱེར་རྨི་ལམ་ལྟར། །དངོས་པོ་ཐམས་ཅད་སྟོང་པ་ཉིད། །ཆུ་ཤིང་ལྟ་བུར་ཡང་དག་གནས། །གཟུང་དུ་མེད་ཅིང་བརྗོད་དུ་མེད། །དབུ་བ་ཆུ་བུར་ལྟ་བུར་གནས། །སྒྱུ་མ་སྐྱེ་བ་སྐྱེ་བ་མེད། ། ནམ་མཁའ་ལྟ་བུར་སྟོང་པ་ཉིད། །ནམ་མཁའ་ལྟ་བུར་གོས་པ་མེད། །དག་པར་ཀུན་དུ་ཡང་དག་གནས། །ཞི་བའི་མཆོག་གི་དེ་ཉིད་དེ། །རྣམ་པ་མཆོག་གིས་རྟག་ཏུ་གསུངས། །དེ་འདིར་ཡེ་ཤེས་མཆོག་ཐོབ་པའི། །དེ་བཞིན་གཤེགས་པ་འབྱུང་འགྱུར་རོ། །དེ་ནས་སྔགས་པས་གསོལ་འདེབས་པའི། །སློབ་མ་སྡིག་དང་བྲལ་བྱེད་པ། །རལ་གྲིའི་ཕྱག་རྒྱས་བསྲུང་བ་བྱ། །དེ་ཡི་རྗེས་སུ་གོ་ཆ་བགོ། །ཆོ་ག་ཤེས་པས་བསྲུང་བར་བྱ། །སློབ་མ་ལ་ནི་ཕན་འདོད་པས། །སྔགས་ཀྱིས་ཚིམ་པར་བྱེད་པ་ཡི། །ཡི་གེ་བཅྭ་ལྔ་སྔགས་པ་ཡིས། །ཐམས་

ཅད་དུ་ནི་རབ་བརྗོད་དོ། །ཡང་དག་སྔགས་ཀྱིས་བསང་གཏོར་བྱ། །གདོང་ནི་རས་ཀྱིས་བཅིངས་ནས་སུ། །མགོ་བོ་ས་ལ་བཏུད་པར་བྱ། །དཀོན་མཆོག་གསུམ་ལ་སེམས་ཕྱོགས་ཏེ། །སྙིང་རྗེ་དང་ནི་ལྡན་པའི་སེམས། །སྐྱོབ་པ་ཐམས་ཅད་མངོན་སུམ་དུ། །གྱུར་པར་བསམས་ཏེ་གཞུག་པར་བྱ། །ཀུན་ཀྱང་དབང་ཕྱུག་གོ་འཕང་འཐོབ། །འཛིན་པ་ཐམས་ཅད་རྣམ་པར་སྤངས། །ཇི་བཞིན་འདོད་པའི་སངས་རྒྱས་ཀྱང་། །ཐེ་ཚོམ་མེད་པར་འབྱུང་བར་འགྱུར། །བླ་མ་ལ་ནི་ཡོན་ཕུལ་ནས། །དབང་བསྐུར་བར་ནི་གསོལ་བ་གདབ། །གུས་པར་གྱུར་པའི་རང་སྲོག་གིས། །བླ་མ་ལ་ནི་འདུད་པར་བྱ། །བླ་མ་ལ་ནི་དབུལ་བའི་ཡོན། །རང་གི་ལུས་ནི་སྙན་མནན་ནས། །བདག་ཉིད་དངོས་པོ་དབུལ་བར་བྱ། །གཞན་དུ་འབྲས་བུ་མེད་པར་འགྱུར། །རིན་ཆེན་གླང་པོ་རྟ་དང་ཕྱུགས། །གཞན་ཡང་ཡིད་ལ་གང་བཞེད་པ། །སློབ་མའི་བློ་བདག་གུས་པ་ཡིས། །དེ་དག་ཐམས་ཅད་དབུལ་བར་བྱ། །དེ་བཞིན་ན་བཟའ་རབ་ཏུ་དབུལ། །བླ་མ་གང་གིས་མཉེས་བྱས་ཤིང་། །བླ་མ་ལ་ནི་ཡོན་ཕུལ་བས། །བསམ་མི་ཁྱབ་པའི་འབྲས་བུ་གསུངས། །དེ་བས་རྣམ་པ་ཐམས་ཅད་ཀྱིས། །རྒྱལ་བ་སྐྱེས་མཆོག་འདི་མཆོད་བྱ། ། རྫོགས་སངས་རྒྱས་སུ་དེ་འདིར་བཤད། །ས་བཅུའི་གནས་ཀྱི་དབང་ཕྱུག་དང་། །འཇིག་རྟེན་སྐྱོང་བ་ཐམས་ཅད་བཤད། །བརྒྱ་བྱིན་ལ་སོགས་བདུད་ཚོགས་བཞིན། །ཚངས་པ་ཁྱབ་འཇུག་དྲག་པོ་དང་། །ཀླུ་མོ་དུལ་བའི་སྲས་པོ་དང་། །གཟའ་དང་རྒྱུ་སྐར་ཚོགས་ཐམས་ཅད། །ཕུང་པོ་ཡང་ནི་རྫུ་འཕྲུལ་ཆེ། །ཟག་པ་ཟད་པ་བཤད་པ་དང་། །ཐམས་ཅད་དེ་ཉིད་དུ་བརྗོད་དོ། །དཔལ་ལྡན་གདུལ་དཀའ་འདུལ་མཛད་པ། །ཕྱག་ན་རྡོ་རྗེ་ས་སྟེངས་འདི། །དཔལ་ལྡན་བསྟན་པའི་དོན་མཛད་པ། །དམ་པའི་ལམ་གྱི་གདམས་ངག་ཅན། །རྫོགས་སངས་རྒྱས་ཀྱི་ཇི་བཞིན་སྐུ། །ཡོན་ཏན་ཀུན་གཅིག་ཡང་དག་བཤད། །སློབ་དཔོན་གྱི་ནི་ཡོན་ཏན་གཟུང་། །སྐྱོན་ནི་ནམ་ཡང་མ་ཡིན་ཏེ། །ཡོན་ཏན་བཟུང་བས་དངོས་གྲུབ་འཐོབ། །སྐྱོན་རྣམས་ཀྱིས་ནི་དངོས་གྲུབ་བརླག །དེ་ཡི་གྲིབ་མ་འགོམ་པ་ནི། །མཆོད་རྟེན་བཤིག་པ་ཞེས་སུ་བཤད། །

བསམ་མི་ཁྱབ་པའི་འབྲས་སྟེར་བ། །འདི་ནི་སངས་རྒྱས་ལྟ་བུར་བལྟ། །བརྟན་དང་གཡོ་བ་ཡི་གསང་བ། །མཆོག་ནི་ཐམས་ཅད་སྟོན་བྱེད་ལ། །ཁྱེད་ཀྱིས་སློབ་དཔོན་སྨོད་པ་དང་། །རྨི་ལམ་དུ་ཡང་ཕྲད་མི་བྱ། །གང་ཡང་སློབ་དཔོན་སྨོད་པ་དེ། །བགེགས་དང་ལོག་པར་འདྲེན་པས་འཛིན། །སྡིག་ཅན་སེམས་ཅན་ཐག་རིང་དུ། །ས་སྟེངས་སུ་ནི་སྤང་བར་བྱ། །མནར་མེད་ལ་སོགས་འཇིགས་རུང་བས། །དམྱལ་བར་ཡང་དག་བརྟན་པ་གང་། །སློབ་དཔོན་ལ་ནི་སྨོད་པ་གང་། །དེ་རུ་ཡང་དག་འཚེད་པར་འགྱུར། །དེ་བས་རྣམ་པ་ཐམས་ཅད་དུ། །སངས་རྒྱས་འབྲས་བུ་འདོད་པ་ཡིས། །བསམ་གྱིས་མི་ཁྱབ་འབྲས་སྟེར་བ། །འདི་ནི་རྨད་བྱུང་གུས་པས་མཆོད། །དབང་བསྐུར་ཆོ་ག་རྒྱས་པར་ནི། །བཤད་པར་བྱ་ཡིས་བུ་ཁྱོད་ཉོན། །གང་དུ་དབང་བསྐུར་བར་གྱུར་ན། །འཇིག་རྟེན་སངས་རྒྱས་ལྟ་བུར་བལྟ། །དེ་རུ་པདྨ་འདབ་བརྒྱད་པ། ། ཁྲུ་གང་ཚད་དུ་བརྗོད་པ་ཡིན། །ནང་ན་གནས་པའི་རྡོ་རྗེ་ནི། །འོད་ཟེར་གྱིས་ནི་རྣམ་པར་བརྒྱན། །བུམ་པ་བརྒྱད་ནི་ཡོངས་རྫོགས་པར། །གཙང་མའི་ཆུ་ཡིས་རབ་ཏུ་བཀང་། །མགྲིན་པ་རས་ཡུག་བཟང་པོས་བཅིངས། །ལོ་འདབ་བཟང་པོས་ཁ་བརྒྱན་བྱས། །ཁྲོ་བོའི་རྒྱལ་པོས་བསྔགས་ནས་ནི། །སྨན་དང་རིན་ཆེན་ཀུན་གྱིས་བཀང་། །གདུགས་དང་རྒྱལ་མཚན་བ་དན་དང་། །རོལ་མོའི་སྒྲ་སོགས་ཡིད་འཕྲོག་པ། །སྙན་ཅིང་རྒྱ་ཆེ་བ་ཡི་ཚོགས། །རབ་བསྔགས་ཀུན་དུ་མངོན་དགའ་བས། །སྔགས་པས་དེ་ཚེ་དབང་བསྐུར་ཏེ། །སྐྱོབ་པ་མངོན་སུམ་བཞིན་དུ་བྱ། །དབང་བསྐུར་བྱས་མ་ཐག་ཏུ་ནི། །དཔལ་ལྡན་བྱང་ཆུབ་རྟོགས་ཕྱིར་སྦྱིན། །དེ་ནས་བཟུང་སྟེ་བུ་ཁྱོད་འདི། །ས་སྟེངས་སངས་རྒྱས་སྲས་པོ་ནི། །བརྟན་དང་གཡོ་བས་མཆོད་པ་རུ། །བྱང་ཆུབ་སེམས་དཔས་གཟུང་བར་བྱ། །དེ་ནི་མ་མཐོང་བར་གྱུར་པས། །བྱང་ཆུབ་སེམས་དཔའ་བརྗོད་པ་ཡིན། །བདུད་དང་བགེགས་དང་སྦྲུལ་དང་ནི། །གཞན་ཡང་ལོག་པར་འདྲེན་པ་ཡིན། །རྒྱལ་སྲས་བྱང་ཆུབ་སེམས་དཔའ་ནི། །དེ་ཕྱིར་མཐོང་བར་མི་འགྱུར་རོ། །མ་བསྒྲུབས་པ་ཡང་མྱུར་དུ་འགྲུབ། །བདུད་རྣམས་ཐམས་ཅད་འཇོམས་པར་བྱེད། །དཀྱིལ་འཁོར་

འདིར་ནི་དབང་བསྐུར་བ། །དེ་ནི་ངེས་པར་སངས་རྒྱས་ཉིད། །འདིར་ནི་སྡུག་བསྔལ་འཇིགས་རུང་བའི། །སྡུག་བསྔལ་སླར་ཡང་འབྱུང་མི་འགྱུར། །ཐམས་ཅད་དབང་ཕྱུག་གོ་འཕང་འཐོབ། །འཇིགས་པ་ཐམས་ཅད་རྣམ་པར་སྤངས། །ཡོན་ཏན་ཀུན་གྱིས་དེ་བཞིན་བརྒྱན། །སློབ་མ་ལ་ནི་སྨན་བྱའི་ཕྱིར། །དེ་ནས་སྦྱིན་སྲེག་རབ་ཏུ་བརྩམ། །ཐབ་ཁུང་དག་ཀྱང་བྱ་བ་སྟེ། །དེ་ལ་ཁ་རན་དང་བཅས་ནས། །དེ་ཡི་དབུས་ནས་རྡོ་རྗེ་ནི། །ཞི་བ་ཆེད་དུ་རྨད་དུ་བྱུང་། །དེ་ཡི་ཐབ་ཁུང་ཁོར་ཡུག་ཏུ། །དྲིས་ཀྱང་རྗེས་སུ་བྱུག་པར་བྱ། །མེ་ཡི་ཐབ་ནི་ཁྲུ་གང་དུ། ། དེ་བཞིན་གཤེགས་པས་ཡང་དག་གསུངས། །མེ་ནི་ཀུན་དུ་འབྱུང་བའི་ཤིང་། །མེ་ཐབ་འདི་རུ་མེ་སྦར་བྱ། །དེ་ནས་མཆོད་ཡོན་ཞལ་བསིལ་བྱ། །བསང་གཏོར་ས་སྟེངས་སུ་ནི་བརྗོད། །ཀུ་ཤ་རྩེ་མོ་དགྲམ་པར་བྱ། །སླར་ཡང་རྩ་བས་བསྐོར་བར་བྱ། །དེ་ལྟར་འདི་དག་ཐམས་ཅད་བྱ། ། མར་དང་སྦྲང་རྩི་བྱུག་པས་མཛེས། །གང་ཞིག་ཡམ་ཤིང་ལས་རྣམས་ཀྱིས། །རྣམ་པར་མཁས་པས་སྦྱིན་སྲེག་བྱ། །སེམས་ནི་སྙིང་རྗེ་དང་ལྡན་པ། །སློབ་མ་རེ་རེ་བརྗོད་ནས་སུ། །དཔལ་ལྡན་སྲེག་བླུགས་བསྲེག་པར་བྱ། །ཉི་ཤུ་ཐམ་པ་ཉིད་ཀྱང་ངོ་། །འདི་དག་ཐམས་ཅད་བྱས་ནས་སུ། །སེམས་ནི་སྙིང་རྗེ་དང་ལྡན་པ། །རྒྱལ་མཆོག་ཐམས་ཅད་རབ་བཏུད་ནས། །དེ་ནས་སྨོན་ལམ་གདབ་པར་བྱ། །བཅོམ་ལྡན་བདག་གིས་གང་བསགས་པའི། །བསོད་ནམས་གྲངས་མེད་གཞལ་མི་ལང་། །དེས་ནི་འགྲོ་བ་མ་ལུས་པ། །བླ་མེད་གོ་འཕང་འཐོབ་པར་ཤོག །སེམས་ཅན་བྱེ་བ་གྲངས་མེད་གང་། །གཞན་ཡང་ངན་འགྲོར་གྱུར་པ་གང་། །བདག་གི་བསོད་ནམས་མཐུ་ཡིས་ནི། །ཐམས་ཅད་བདེ་དང་ལྡན་གྱུར་ཅིག །གང་ཞིག་ཡི་དགས་སྡུག་བསྔལ་དང་། །གང་ཡང་ངན་འགྲོར་གྱུར་པ་རྣམས། །བདག་གི་བསོད་ནམས་མཐུ་ཡིས་ནི། །དེ་དག་ཐམས་ཅད་བྲལ་འགྱུར་ཤོག །ཇི་སྙེད་སེམས་ཅན་ཐམས་ཅད་ཀྱང་། །སྡུག་བསྔལ་སྣ་ཚོགས་ཉིད་དག་དང་། །དེ་དག་ཐམས་ཅད་ཞི་གྱུར་ནས། །འགའ་ཡང་སྡུག་བསྔལ་མ་གྱུར་ཅིག །ཇི་སྙེད་སེམས་ཅན་ཉེས་སྤྱད་པས། །ལུས་

དང་ངག་དང་ཡིད་ལས་བྱུང་། །སེམས་ཅན་ཐམས་ཅད་དེ་མ་གྱུར། །ཀུན་ཀྱང་བདེ་དང་ལྡན་གྱུར་ཅིག །དེ་ནས་རྒྱལ་མཆོག་ཀུན་བཏུད་ནས། །དྲི་དང་མེ་ཏོག་སོགས་ཐོགས་ཏེ། །སྟེང་དང་འོག་ཏུ་བལྟས་གྱུར་པས། །དེ་ནས་རབ་ཏུ་བསྡུ་བའི་ཕྱིར། །དེ་ནས་སླར་ཡང་བརྗོད་པར་བྱ། ། སྐྱོབ་པ་ཐམས་ཅད་མངོན་སུམ་དུ། །བདག་ལ་སླར་ཡང་བརྩེ་བའི་ཕྱིར། །བཅོམ་ལྡན་སྲས་དང་བཅས་པ་ཡང་། །ཇི་སྲིད་བདག་ནི་དོན་གྲུབ་པར། །བདག་ཉིད་ཆེན་པོ་སླར་བྱོན་མཛོད། །དེ་ནས་གཏོར་མ་མེ་ཏོག་དང་། །དྲི་དང་བཅས་པའི་རྡུལ་ཚོན་ལ། །སྔགས་པ་དངོས་གྲུབ་མཆོག་འདོད་པས། །ལག་པས་རེག་པར་མི་བྱའོ། །དེ་ནས་རང་གིས་བྱིན་བརླབས་ཏེ། །ས་ལ་འདུག་ནས་གོས་ཕུད་པས། །འབད་པར་གྱུར་པས་བསྡུས་ནས་ནི། །ཆུ་བོ་ལ་ནི་བསྐུར་བར་བྱ། །དེ་ལྟར་རབ་ཏུ་འབད་པས་ཀྱང་། །ཉི་མ་གཉིས་པ་ཤར་བ་ལ། །དེ་ཚེ་དངོས་གྲུབ་ཀུན་བྱེད་པའི། །ཕྱག་རྒྱ་ཤེས་རབ་ཅན་གྱིས་བསྟན། །གང་ཞིག་བཅིངས་པ་ཙམ་གྱིས་ནི། །དེ་ལ་ལྷ་ནི་ཉེ་བར་འགྱུར། །ས་སྟེངས་ཤིན་ཏུ་སྡུག་བསྔལ་གནས། །སེམས་ཅན་ཐམས་ཅད་འདུལ་བྱེད་པ། །འཇིགས་པ་བརྟན་དང་གཡོ་བ་ཡི། །འཇིག་རྟེན་ཀུན་གྱིས་མི་མཐོང་ངོ་། ། སངས་རྒྱས་ཀུན་གྱིས་བྱིན་གྱིས་བརླབས། །ཕུན་སུམ་ཚོགས་པ་ཡང་དག་ལྡན། །ཕྱག་རྒྱ་རྟག་ཏུ་འགྲུབ་པར་ནི། །ཐེ་ཙོམ་མེད་པར་འབྱུང་བར་འགྱུར། །རལ་གྲི་ཡི་ནི་ཕྱག་རྒྱ་བཤད། །དེ་ནས་དེ་ཡི་འོག་ཏུ་ནི། །གོ་ཆ་བཤད་པར་བྱ་ཡིས་ཉོན། །མགོ་བོར་ཡང་ནི་ཐོ་བར་བཅས། ། སྤྱི་བོར་རྡོ་བ་དག་དང་ལྡན། །བཀའ་རྟགས་ཕྱག་རྒྱ་སྙིང་གར་ཏེ། །ཕྱོགས་བཅིང་བར་ནི་རབ་ཏུ་བྱ། །དེ་བཞིན་མར་མེ་དྲི་ཕྱག་རྒྱ། །གཏོར་མའི་ཕྱག་རྒྱ་བདུག་པ་ཡང་། །མེ་ཏོག་ཞལ་ཟས་ཕྱག་རྒྱ་དང་། །སྤྱན་དྲང་བ་ནི་ཉིད་དང་ནི། །དེ་བཞིན་གཤེགས་པ་རྒྱལ་སྲས་དང་། །ཉན་ཐོས་དང་ཡང་ཕོ་ཉ་སོགས། །འཇིག་རྟེན་པ་ནི་ཐམས་ཅད་དང་། །དེ་བཞིན་དྲང་སྲོང་ཚོགས་རྣམས་དང་། །སྲིང་མོ་ཡང་དག་བཤད་པ་དང་། །མ་མོ་ཡང་ནི་བདུན་ཉིད་དང་། །དེ་དག་རྣམས་ནི་མ་ལུས་པ། །ས་སྟེངས་སུ་ནི་རྒྱས་པར་ཉོན། །ཚམ་ངམ་སྐད་ཅིག་མི་གཡོ་བར། །ཕན་པའི་

དོན་དུ་བུ་ཚུར་ཉོན། །གང་ཞིག་བརྗོད་པ་ཙམ་གྱིས་སུ། །བགེགས་དང་ལོག་པར་འདྲེན་པ་འཇོམས། །མཛུབ་མོ་དང་ནི་གུང་མོ་དག །བློ་དང་ལྡན་པས་དྲང་པོར་བརྐྱང་། །སྲིན་ལག་དང་ནི་མཐེའུ་ཆུང་ཉིད། །མཐེ་བོ་ཡིས་ནི་བརྟེན་པར་མནན། །ལག་པ་གཡས་པས་དེ་ལྟར་བྱ། །རལ་གྲི་ཡང་དག་ལྡན་བཅས་ཏེ། །རལ་གྲི་ཤུབས་སུ་བཅུག་པ་ལས། །སླར་ཡང་ཀུན་ནས་འབྱུང་བར་བྱ། །འབར་བ་ལྟ་བུར་འཇིགས་པ་ནི། །ཕྱོགས་ཀུན་དུ་ནི་བསྐོར་བར་བྱ། །འདི་ནི་དཔལ་ལྡན་རལ་གྲི་འཆང་། །ཡེ་ཤེས་རལ་གྲི་རྒྱལ་བའི་སྲས། །གང་ཞིག་མི་ཤེས་ལས་བྱུང་བ། །ཡེ་ཤེས་རང་བཞིན་རལ་གྲིས་གཅོད། །དེ་ཕྱིར་རྣམ་པ་ཐམས་ཅད་དུ། །བགེགས་ཀྱི་རྒྱལ་པོ་ཀུན་འཇོམས་ལ། །རྒྱུན་དུ་ཉིན་རེ་དུས་གསུམ་དུ། །ཕྱག་རྒྱ་རབ་ཏུ་བཅིང་བར་བྱ། །གཡོན་པའི་ཁུ་ཚུར་དམ་པོར་བཅིང་། །མཛུབ་མོ་མཐེ་བོང་ནང་དུ་ནི། །བཅུག་པ་སྡིགས་མཛུབ་བསྐུམས་ཡིན་ཏེ། །བཅུག་པ་དེ་ནི་ཞགས་པར་བརྗོད། །དཔལ་ལྡན་ཕྱག་རྒྱ་འདི་འཆང་བ། །ཞགས་པའི་ཕྱག་རྒྱ་ཞེས་སུ་གྲགས། །ས་བཅུ་གནས་ཀྱི་དབང་ཕྱུག་རྣམས། །ཀུན་ནས་རབ་ཏུ་འགུགས་འགྱུར་ན། །གདུག་པའི་སེམས་ཅན་དམྱལ་བ་ལྟར། །གང་ལས་ཅི་ཡི་ཕྱིར་མི་བལྟ། །གུང་མོའི་སོར་མོ་ཡང་དག་སྦྱར། །ཕན་ཚུན་དུ་ནི་རྩེ་སྤྲད་དེ། །མཛུབ་མོ་དང་ནི་མིང་མེད་དག །ཀུན་ནས་ལག་པའི་ནང་དུ་བཅུག །མཐེ་བོ་དེ་ལ་ཁ་བསྟན་མནན། །མཐེའུ་ཆུང་དང་པོར་གཞག་པ་ནི། །རྫོགས་སངས་རྐང་གཉིས་མཆོག་གིས་ནི། །འདི་ནི་གོ་ཆའི་ཕྱག་རྒྱར་གསུངས། །ཡེ་ཤེས་རལ་གྲི་སྙིང་ག་དང་། །ཡན་ལག་ལྔ་ལའང་རྣམ་པར་དགོད། །དེ་ཚེ་ཕྱག་རྒྱས་གོ་ཆ་བགོ། །ཕྱག་རྒྱ་སེམས་ཅན་སྡོམ་པ་ཡིན། །དེ་ལྟར་རབ་ཏུ་འབད་པར་བྱ། །སློབ་མ་སྡིག་དང་བྲལ་བྱེད་པ། །ཕུན་སུམ་ཚོགས་ཀུན་འགྲུབ་བྱའི་ཕྱིར། །དེ་ཚེ་དབང་བསྐུར་སྦྱིན་པར་བྱ། །བཟླས་པའི་ཚེ་དང་གཞན་རྣམས་སུ། །ཆོ་ག་བཞིན་དུ་བསྲུང་བར་བྱ། །བགེགས་ཀྱི་རྣམ་པར་རྣམས་དང་ནི། །གཞན་ཡང་དགྲ་བོ་བྱུང་བ་ལ། །བདག་དང་གཞན་གཉིས་བསྒྲུབ་བྱའི་ཕྱིར། །འདི་ནི་རྟག་ཏུ་སྦྱར་བར་བྱ། །ལག་པ་ཕན་ཚུན་གཟུང་ནས་སུ། །

ལག་པ་གཉིས་ནི་བརྟན་པོར་བྱ། །མཛུབ་མོ་གཉིས་ནི་གྱེན་དུ་བསྒྲེང་། །མགོ་བོའི་ཕྱག་རྒྱ་ཞེས་སུ་བཤད། །ལག་པ་གཉིས་ཀྱི་བྱ་བ་ནི། །སོ་སོར་ཁུ་ཚུར་བཅིང་བར་བྱ། །གསང་བ་པ་ཡི་ལག་པ་ཡིས། །གཡོན་པའི་མཐེ་བོ་ནས་གཟུང་སྟེ། །གཡས་པའི་མཐེ་བོང་གྱེན་དུ་བསྒྲེང་། ། རྡོ་རྗེ་ལྟ་བུར་གཞོམ་པ་ནི། །མེ་ནི་ཆེན་པོ་ལྟ་བུར་འབར། །ལག་པ་རྡོ་རྗེ་ལྟ་བུར་གནས། །སྔགས་པ་གང་ལ་ཁྲོས་གྱུར་པ། །ལྷ་དང་ཀླུ་མོ་འཁོར་དང་ནི། །གནོད་སྦྱིན་ལྟོ་འཕྱེ་སྲིན་པོ་དང་། །གྲུལ་བུམ་དང་ནི་ལུས་སྲུལ་པོ། །ལྷ་མིན་ཡི་དགས་མི་འམ་ཅི། །གང་ཡང་བགེགས་ནི་བྱེད་པ་གཞན། །གླང་པོ་རྟ་དང་ཤིང་རྟ་དང་། །གང་ཡང་རྒྱ་མཚོ་སྙེམས་པ་དང་། །གང་ཡང་རྒྱལ་པོ་གདུག་པ་དང་། །འདི་ནི་བསྟན་ལ་གནོད་བྱེད་པ། །གདུག་པའི་སེམས་ཅན་དེ་རྣམས་ནི། །གདུལ་པའི་ཕྱིར་དང་བརླག་པའི་ཕྱིར། །དེ་བཞིན་དངོས་གྲུབ་མྱུར་བའི་ཕྱིར། །ཕྱག་རྒྱ་ཆེན་པོ་རབ་ཏུ་སྦྱར། །སྔགས་དང་ལྷན་ཅིག་དགོད་པར་བྱ། །བདག་ཉིད་ལས་བྱུང་ལྷ་རྣམས་ཀྱིས། །དཀྱིལ་འཁོར་ལ་ནི་རབ་ཏུ་གནས། །རྒྱུ་དང་འབྲས་བུ་སྦྱར་བར་བྱ། །གཡས་པའི་ཕྱག་རྒྱ་ཁུ་ཚུར་བཅིང་། །གུང་མོ་གྱེན་དུ་རྣམ་པར་བསྒྲེང་། །རྫོགས་སངས་རྒྱས་ཀྱི་དབང་ཕྱུག་གིས། །འདི་ནི་སྤྱི་གཙུག་དག་ཏུ་གསུངས། །ལག་པ་གཡོན་པ་ཁུ་ཚུར་བཅིང་། །མཛུབ་མོ་གུང་མོ་བསྒྲེངས་ནས་ནི། །དེ་ནི་གཡོན་པ་རྟག་ཏུ་བཅིང་། །འདི་ནི་བཀའ་རྟགས་ཕྱག་རྒྱར་གྲགས། །ལག་པ་གཉིས་ཀྱི་ཁུ་ཚུར་ནི། །བཅིངས་ནས་ཕན་ཚུན་བཙིར་བར་བྱ། །གཅིག་ཏུ་བརྟན་པར་བཙུགས་པ་ནི། །རྡོ་བ་ལྟ་བུར་ཡང་དག་བཤད། །གཡས་པ་ཁུ་ཚུར་དམ་དུ་བཅིང་། །མཁས་པས་སྙིང་གར་གཞག་པར་བྱ། །རྫོགས་སངས་རྐང་གཉིས་དམ་པ་ཡིས། །སྙིང་གའི་ཕྱག་རྒྱ་ཞེས་སུ་བཤད། །གུང་མོ་དང་ནི་མཛུབ་མོ་ཉིད། །མཐེ་བོ་སོ་སོར་བརྐྱང་ནས་སུ། །གཉིས་ཀའང་འདི་ལྟར་གནས་བྱས་ནས། །ཕྱོགས་བཅུར་ཡོངས་སུ་སྤྲོ་བར་བྱ། །འདིས་ནི་ཕྱོགས་བཅུ་བཅིངས་བྱས་ནས། །མཁས་པས་སྔགས་ཀྱི་བཟླས་པ་བྱ། །ལག་པ་གཉིས་ནི་ཐལ་སྦྱར་ནས། །གུང་མོ་ནང་དུ་སྦྱར་བར་བྱ། །རྫོགས་སངས་རྐང་

གཉིས་དམ་པ་ཡིས། །དྲི་ཡི་ཕྱག་རྒྱ་ཞེས་སུ་བཤད། །ལག་པ་ཕྱི་རོལ་བསྒྲིལ་ནས་ནི། །མཐེ་བོ་གུང་མོ་གྱེན་དུ་བསྒྲེང་། །མཐེའུ་ཆུང་ནི་བསྒྲེང་ནས་གཞག །རྒྱལ་དང་རྒྱལ་སྲས་རྣམས་ཀྱིས་ཀྱང་། །མར་མེའི་ཕྱག་རྒྱ་ཞེས་སུ་བཤད། །སླར་ཡང་ལག་པ་ཕྱིར་བཀྲོལ་ནས། །ཕྱིན་ཅི་ལོག་བྱས་གུང་མོ་དང་། །མཛུབ་མོ་མཐེ་བོང་སྔ་མ་བཞིན། །ཚིགས་པ་ཤིན་ཏུ་བརྟན་པར་བྱ། །སྔགས་དང་ལྷན་ཅིག་བཅས་པ་ནི། །གཏོར་མའི་ཕྱག་རྒྱ་ཞེས་སུ་བརྗོད། །ལག་པའི་ཤུབས་ཀྱི་ཕྱག་རྒྱ་ནི། །ཤུབས་ནི་ལྟ་བུར་རབ་ཏུ་མཛེས། །བདུག་སྤོས་ཕྱག་རྒྱ་མདོར་བསྡུས་ན། །རྒྱལ་བ་སྐྱེས་བུ་མཆོག་གིས་གསུངས། །གུང་མོ་མིང་མེད་སྦྱར་བཀུག་ནས། །མཐེ་བོ་སྟེང་ན་རྣམ་པར་མནན། །དེ་ལྟར་གཡོན་པ་ཡང་བྱས་ན། །མེ་ཏོག་ཕྱག་རྒྱ་ཞེས་སུ་བརྗོད། །ལག་པ་འོག་ཏུ་ཐལ་སྦྱར་ནས། །གུང་མོ་དང་ནི་སྲིན་ལག་དང་། ། མཛུབ་མོ་ཡང་ནི་བཀུག་ནས་སུ། །མཐེའུ་ཆུང་ཕྱི་རོལ་ཉིད་དུ་གནས། །མཐེ་བོང་དེར་ནི་མངོན་ཕྱོགས་པ། །ཞལ་ཟས་ཀྱི་ནི་ཕྱག་རྒྱར་བརྗོད། །པརྱཾ་ཀཱ་ཤཱིན་སྔགས་ཤེས་པས། །ལག་པ་དག་ནི་ལྷུང་བཟེད་སྦྱར། །མཐེ་བོ་དག་ནི་བཀུག་བྱས་ནས། །བློ་ལྡན་དེ་ཡི་རྩ་བར་སྦྱར། །གསང་སྔགས་ཤེས་པས་སྤྱན་དྲང་བྱ། །སྐྱོབ་པ་ཤཱཀྱ་སེང་གེ་ཡི། །དཔའ་བོ་ཆོས་གོས་ངུར་སྨྲིག་བསྣམས། །གཙོ་བོ་བསྟན་པའི་དོན་མཛད་པ། །མཐའ་ཡས་འཇིག་རྟེན་རབ་འབྱམ་ཁམས། །ཤིན་ཏུ་མཉམ་པར་གཞག་པ་ཡང་། །ཤེས་རབ་ཅན་གྱིས་རྟག་བསམས་ན། །བརྣག་པའི་འབྲས་བུ་ཐོབ་པར་འགྱུར། །ལག་པ་གཉིས་ནི་ཐལ་སྦྱར་ནས། །མཁས་པས་མཛུབ་མོ་བཀུག་ནས་སུ། །རྩེ་མོར་མཐེ་བོང་གཞག་པ་ནི། །རྒྱལ་སྲས་རྟག་ཏུ་འགུགས་པར་བྱེད། །ལག་པ་པདྨ་ལྟར་བྱས་ནས། །སོར་མོ་གུང་མོ་མིང་མེད་ཙམ། །འདི་རྣམས་ཐམས་ཅད་འགུགས་པར་བྱེད། །ཉན་ཐོས་རྣམས་དང་ས་སྟེངས་བཞུགས། །གང་ཡང་ཕོ་ཉ་མ་ཚོགས་བཤད། །ཕོ་ཉ་ཡང་ནི་རྫུ་འཕྲུལ་ཆེ། །དེ་རྣམས་ཕྱག་རྒྱ་བཤད་པ་ནི། །ས་སྟེངས་ལྕགས་ཀྱུས་འགུགས་པར་བྱེད། །གཡས་པ་ཁུ་ཚུར་དམ་པོར་བཅིང་། །བརྟན་པོར་རབ་ཏུ་

ལྡན་བྱས་ཏེ། །མཛུབ་མོ་ཤེས་རབ་ཅན་གྱིས་བརྐྱང་། །ཚིགས་པ་གསུམ་པ་བཅག་པར་བྱ། །ལག་པ་གཡས་པས་གཡོན་པ་ཡི། །མཁྲིག་མ་ནས་ནི་གཟུང་བ་ཡིས། །ས་སྟེངས་ཕོ་ཉ་མོ་ལ་སོགས། །བརྟན་པར་གྱུར་པས་དགུག་པར་བྱ། །ལག་པ་ཕྱི་རོལ་དཀྱིལ་ནས་སུ། ། གུང་མོ་གྱེན་དུ་རྣམ་པར་བསྒྲེང་། །མཛུབ་མོ་དྲང་པོར་བྱས་ནས་ནི། །དེ་དང་རབ་ཏུ་སྤྲད་པར་བྱ། །ནང་གི་ཆ་རུ་བཀུག་ནས་སུ། །མཐེ་བོ་མི་མཐུན་པ་རུ་གཞག །འཇིག་རྟེན་པ་ཡི་ཕྱག་རྒྱ་སྟེ། །བཀུག་པ་རུ་ནི་རབ་ཏུ་གྲགས། །ཕྱག་རྒྱ་འདི་དག་ཉིད་ལ་ཡང་། །གཡོན་པ་རབ་ཏུ་ཕྲལ་བ་ཡི། །གཡས་པ་དྲང་སྲོང་ཐམས་ཅད་དང་། །བརྟུལ་ཞུགས་གནས་པ་དགུག་པ་ཡིན། །ལག་པ་གཡོན་པ་དྲང་བྱས་ནས། །མཁས་པས་གུང་མོ་དགུག་པར་བྱ། །མཛུབ་མོ་སོར་མོ་ཡང་བཀུག་ནས། །དཔལ་ལྡན་ཕྱག་རྒྱ་འདི་འཆང་བ། །སྲིང་མོ་རྣམས་ཀྱི་རབ་ཏུ་གྲགས། །སྲིང་མོ་དངོས་གྲུབ་མཛད་པ་ཅན། །དམ་པར་གྱུར་པ་སྤྱན་དྲང་བྱ། །གཡས་པ་དྲང་པོར་བརྐྱང་ནས་སུ། །སོར་མོ་གསུམ་ནི་དྲང་པོར་བརྐྱང་། །དེ་རུ་མཛུབ་མོ་བཀུག་པ་ཡི། །རྩེ་མོ་མཐེ་བོས་རེག་པར་བྱ། །ཕྱག་རྒྱ་འདི་ཡིས་ངེས་པ་རུ། །མ་མོ་བདུན་ཉིན་འགུགས་པར་བྱེད། །རྫོགས་སངས་རྐང་གཉིས་དམ་པ་ཡིས། །ཕྱག་རྒྱ་འདི་ནི་ཡང་དག་གསུངས། །རྟག་ཏུ་བག་ཡོད་པར་གྱུར་པས། །ས་གཞི་དཀྱིལ་འཁོར་བསྲུང་བར་བྱ། །ཕྱག་རྒྱ་འདི་ནི་འཆང་བ་དཀོན། །རྒྱལ་བ་མཆོག་གིས་རབ་ཏུ་གསུངས། །ཕྱག་རྒྱ་འདི་དེ་ལ་བརྟེན་ན། །བསམ་གྱིས་མི་ཁྱབ་འབྲས་བུ་འཐོབ། །དེ་བས་རྣམ་པ་ཐམས་ཅད་དུ། །བསམ་མི་ཁྱབ་པའི་འབྲས་འདོད་ཅིང་། །དངོས་གྲུབ་འདོད་པར་གྱུར་པ་ཡིས། །སྔགས་པས་རྟག་ཏུ་གཟུང་བས་ན། །བགེགས་དང་ལོག་པར་འདྲེན་པ་དང་། །ཀླུ་དང་སྲིན་པོ་གདུག་པ་ཀུན། །གནོད་སྦྱིན་གྲུལ་བུམ་མི་འམ་ཅི། །ཡི་དགས་ལུས་སྲུལ་ལྟོ་འཕྱེ་ཆེ། །ཕྱག་རྒྱ་འདི་ཡིས་བསྲུངས་པ་ཡིས། །གླགས་ལྟའི་གོ་སྐབས་མི་རྙེད་དོ། །གཞན་ཡང་གདུག་པའི་སེམས་ཅན་དང་། །གང་ཡང་ནད་ནི་འཇིགས་རུང་བ། །དེ་དག་ཐམས་ཅད་མི་འབྱུང་སྟེ། །ཕྱག་རྒྱ་འདི་ཡིས་ཤིན་ཏུ་བསྲུངས། །

འཇིགས་པ་ཐམས་ཅད་རྣམ་པར་བྲལ། །ཀུན་ཀྱང་དབང་ཕྱུག་ཡང་དག་ལྡན། །དེ་དག་ཐམས་ཅད་མི་འབྱུང་སྟེ། །འདི་རུ་དོགས་པ་སྤྱད་མི་བྱ། །སེམས་ཅན་ལམ་ལྡན་ཡོད་པ་གང་། །ཤིན་ཏུ་དྲག་ཤུལ་ལས་བྱེད་པ། །ཞི་བའི་ཐུགས་ཀྱིས་བདེ་གཤེགས་ཀྱིས། །གདུལ་བ་རུ་ནི་མི་ནུས་པ། །དེ་རྣམས་རབ་ཏུ་གདུལ་བའི་ཕྱིར། །ཁྲོ་བོ་འདི་ནི་རྙེད་པར་དཀའ། །བདེ་བར་གཤེགས་པས་མཛེས་པར་གསུངས། །བསམ་མི་ཁྱབ་པའི་འབྲས་སྟེར་བ། །སྣ་ཚོགས་བསམ་མི་ཁྱབ་པའི་ལས། །བསམ་མི་ཁྱབ་པར་བཤད་པ་ནི། །དེ་ཕྱིར་འདི་ཡང་བསམ་མི་ཁྱབ། །དམ་ཚིག་ཡེ་ཤེས་བཤད་པ་འདི། །བརླག་པ་རུ་ནི་འབྱུང་བར་འགྱུར། །སངས་རྒྱས་ལ་ནི་བསླུས་པས་ན། །གསང་སྔགས་འབྲས་བུ་ཀུན་མི་འབྱུང་། །བྱང་ཆུབ་ཚོགས་ནི་འགྲུབ་བྱའི་ཕྱིར། །དམ་ཚིག་རྟག་ཏུ་བསྲུང་བར་བྱ། །དམ་ཚིག་བསྲུངས་པས་དངོས་གྲུབ་ཀྱི། །འབྲས་བུ་ཡང་ནི་འབྱུང་བར་འགྱུར། །རྟག་ཏུ་གཡོ་བ་མེད་འགྱུར་བས། །ལུས་ཅན་རྣམས་ཀྱིས་ཕྱག་རྒྱ་དགོད། །བུ་མེད་པ་ཡང་བུ་རྙེད་འགྱུར། །མ་གྲུབ་པ་ཡང་ཐམས་ཅད་འགྲུབ། །གང་ཚེ་བུ་མ་ཆགས་པ་ཡང་། །ལུས་ཅན་འདོད་པ་མངལ་དུ་འཆགས། ། དེ་ཚེ་ཡང་དག་རབ་སྦྱར་བའི། །ཕྱག་རྒྱ་དོན་ཀུན་འགྲུབ་པར་བྱེད། །དཀྱིལ་འཁོར་འཇུག་པ་ཞེས་བཤད་པ། །ཕྱག་རྒྱ་བཤད་པ་འདི་ཡིན་ནོ། །གཞན་དུ་ལུས་ཅན་ཐམས་ཅད་ཀྱིས། །ཆོ་ག་ཉམས་པས་འབྲས་བུ་མེད། །དབང་ཕྱུག་སོགས་རྒྱལ་གང་སུ་དག །མི་ཡི་མཆོག་དང་མཚུངས་པ་འཐོབ། །འདི་ནི་དེ་ཡི་ཆོ་གའི་ལམ། །ས་སྟེངས་ན་ནི་གཞན་མ་མེད། །ཐམས་ཅད་དབང་ཕྱུག་གོ་འཕང་འཐོབ། །འཇིགས་པ་ཐམས་ཅད་རྣམ་པར་སྤངས། །ཕྱག་རྒྱ་འཆང་བར་གྱུར་པ་ཡིས། །སེམས་ཅན་ཐམས་ཅད་དབང་ཐོབ་འགྱུར། །ཚམ་ངམ་མཚན་ཉིད་ས་སྟེངས་སུ། །རྒྱས་པར་བཤད་ཀྱིས་ཚུར་ལ་ཉོན། །གང་ཞིག་བཅིངས་པ་ཙམ་གྱིས་ནི། །བསམ་མི་ཁྱབ་པའི་གོ་འཕང་འཐོབ། །གང་ཡང་ས་སྟེངས་གདུག་པ་ཅན། །ལྷ་དང་ཀླུ་དང་གནོད་སྦྱིན་དང་། །ལྟོ་འཕྱེ་སྲིན་པོ་མིའམ་ཅི། །འབྱུང་པོ་གདོན་དང་ཤ་ཟ་དང་། །གང་

ཡང་བགེགས་གཞན་ལོག་པར་འདྲེན། །དེ་རྣམས་འཇོམས་པར་བྱ་བའི་ཕྱིར། །ཚམ་ངམ་འཛིན་པ་སློབ་པ་ཉིད། །གནས་གསུམ་ན་ནི་གནས་རྣམས་ལ། །མཉམ་གཞག་གྱུར་པར་རབ་སྦྱར་ནས། །དེ་ནི་བརླག་པར་འགྱུར་བའམ། །འཆི་བར་འགྱུར་བར་ཐེ་ཚོམ་མེད། ། དམ་ཚིག་སྟེར་བའི་གནས་གནས་ལ། །སྤྱི་བོར་མེ་ཏོག་ཐལ་སྦྱར་ཏེ། །རྒྱལ་བ་ཐམས་ཅད་མཆོད་བྱས་ནས། །ཡང་དང་ཡང་དུ་ཕྱག་ཀྱང་བྱ། །དེ་ནས་མཉམ་པར་གཞག་གྱུར་པས། །ས་སྟེངས་ཕྱག་རྒྱ་འཆིང་བས་འཆིང་། །རྐང་པ་ཡ་གཅིག་བཏེག་ནས་སུ། །མ་རུངས་པ་ཡི་ལྟ་སྟངས་དབབ། །ཁྲོ་དང་བཅས་པས་གཞག་པར་བྱ། །རྐང་པའི་འོག་ཏུ་ལྟ་སྟངས་དབབ། །ལག་པ་གཡས་པ་བསྒྲེང་བར་བྱ། །གཡོན་པ་སྙིང་གར་ཡང་དག་གཞག །རྐང་པ་བགྲད་ནས་གཞག་པར་བྱ། །སྐུ་ལས་ཧཱུྃ་ཡིག་འོད་ཟེར་འབར། །བརྟན་དང་གཡོ་བའི་བགེགས་སམ་གཞན། །འོག་ཏུ་བསྣུན་པར་ཡང་དག་གནས། །རྐང་པ་མནན་ནས་བསྣུན་པ་ཡིས། །ལྷ་དང་ལྷ་མིན་གཡོ་བར་བྱེད། །ས་གསུམ་ཡང་ནི་གཡོ་བ་དང་། །ཤིན་ཏུ་མི་བཟད་སྲེག་པར་བྱེད། །ཐམས་ཅད་བསྲེག་པར་གྱུར་པ་ན། །དེ་དང་ཉེ་བའི་དྲུང་དུ་འཁོར། ། བདག་རང་ཁྲོ་བོ་ལྟ་བུ་ཡིས། །ཞགས་པའི་ཕྱག་རྒྱ་ཐོགས་ནས་ནི། །ཞགས་པའི་ཕྱག་རྒྱས་བཅིང་བར་བྱ། །ཕྱོགས་བཅུ་ཀུན་ན་གནས་པ་ཡི། །ཞགས་པའི་ཕྱག་རྒྱ་དེ་བཅིངས་ཏེ། །ཤིན་ཏུ་གདུང་བར་བྱེད་པའོ། །ཧ་ཧ་ཞེས་སྒྲོགས་རབ་ཏུ་འཕྲུལ། །ལ་ལ་ཐལ་བར་བརླག་པར་འགྱུར། །བདེ་གཤེགས་ཆེ་བའི་བདག་ཉིད་ཅན། །དེ་དག་ཐམས་ཅད་སྙན་པའི་ཚིག །སྐལ་བ་ཆེན་པོ་བཀའ་བསྒོ་སྩོལ། །བདག་ཅག་ཁྱེད་ཀྱི་བཀའ་ལྟར་བགྱིད། །བདག་ནི་ཡིད་བཞིན་མ་ཡིན་པས། །བཀའ་བསྒོ་གཅོག་པར་མི་བགྱིད་དོ། །དེ་ནས་དེ་རྣམས་དམ་ཚིག་ནི། །བདེ་བར་གཤེགས་པ་ཆེན་པོས་གསུངས། །སངས་རྒྱས་ཆོས་དང་དགེ་འདུན་ཡང་། །ཁྱོད་ཀྱིས་ཡིད་ལ་བྱ་བར་འོས། །བཀའ་བསྒོ་གྱུར་པ་ཐམས་ཅད་ཀྱིས། །ཁྱོད་ཀྱིས་བསྟན་པ་རྣམས་ཀྱང་བསྲུངས། །སྔགས་པ་བདག་ཉིད་ཆེན་པོ་ཡི། །

བཀའ་བསྒོ་བ་ནི་གཅག་མི་བྱ། །ཀུན་ལ་གནོད་པ་མི་བྱ་སྟེ། །བགེགས་ནི་ནམ་ཡང་མ་བྱེད་ཅིག །སངས་རྒྱས་ཆོས་དང་ཡིད་ལྡན་པའི། །བཀའ་བསྒོ་བཅག་པར་མི་འགྱུར་རོ། །སྔགས་པ་ཡི་ནི་བཀའ་བསྒོ་བ། །ནམ་ཡང་བཅག་པ་མ་ཡིན་ཏེ། །གལ་ཏེ་གསོལ་བ་དོན་གཉེར་ན། །དམ་ཚིག་འདི་ལྟར་འབྲས་བུ་སྟེར། །གལ་ཏེ་ཁྱོད་ནི་བཀའ་གཅོག་ན། །སྔགས་པ་ཆེ་བའི་བདག་ཉིད་ཀྱིས། །སྔགས་པས་ཀྱང་ནི་ཧཱུཾ་བརྗོད་ན། །རྟག་ཏུ་ཐལ་བར་རློག་པར་འགྱུར། །འདི་ནི་དཔལ་ལྡན་རྡོ་རྗེ་འཆང་། །ཁྲོ་བོ་ཆེན་པོ་སྟོབས་པོ་ཆེ། །རྡོ་རྗེས་མགོ་བོ་ཨརྫ་ཀའི། །དོག་པ་བཞིན་དུ་འགེམས་པར་བྱེད། །དེ་དག་ཐམས་ཅད་མྱོས་ནས་སུ། །འཇིགས་པར་གྱུར་པས་ཚིག་སྨྲས་པ། །སྔགས་པས་ཇི་ལྟར་བཀའ་སྩལ་པའི། །བཀའ་བསྒོ་གཅོག་པར་མི་བགྱིད་དོ། །ཉིད་ལ་བཀུར་སྟི་ཇི་བཞིན་བགྱིད། །བསྲུང་བར་ཡང་ནི་ཤིན་ཏུ་བགྱིད། ། རྟག་ཏུ་རྗེས་སུ་འབྲེལ་པར་ནི། །གྱུར་པར་སྔགས་པ་ལ་བགྱིད་དོ། །བདེ་བར་གཤེགས་པས་གསུངས་པའི་གནས། །དམ་པའི་ཆོས་ནི་བསྲུང་བར་བགྱིད། །བསྟན་པ་ཡང་ནི་བསྲུང་བར་ནི། །ཇི་སྲིད་གནས་ཀྱི་བར་དུ་བགྱིད། །དེ་ལྟར་བདེ་གཤེགས་ཀྱིས་བསྒོས་ཏེ། །དམ་ཚིག་ལ་ནི་ངེས་པར་སྦྱར། །བདག་ཉིད་ཆེན་པོ་རྡོ་རྗེ་ཅན། །བདེ་བར་གཤེགས་པ་ཚིམ་པར་མཛོད། །གལ་ཏེ་བགེགས་ཀྱིས་བསྟན་པ་ལ། །གནོད་པ་རུ་ནི་བྱེད་གྱུར་དང་། །གལ་ཏེ་སེམས་ཅན་རྣམས་ལ་ཡང་། །འགའ་ཞིག་གནོད་པར་བྱེད་པ་ཡི། །བདེ་གཤེགས་ཐུ་བོ་སྲས་གཅིག་པོ། ། རྡོ་རྗེ་ཁྱོད་ནི་བདག་ཉིད་ཆེ། །ང་ཡི་བཀའ་ཡིས་རྟག་ཏུ་ནི། །ཁྱོད་ཀྱི་མགོ་བོ་རྡོ་རྗེས་འགེམས། །དེ་ནས་དཔལ་ལྡན་རྡོ་རྗེ་འཆང་། །མགུ་བར་གྱུར་པའི་ཐུགས་ཀྱིས་སུ། །སྐུ་ནི་སྟན་ལས་བཞེངས་མཛད་དེ། །བདེ་བར་གཤེགས་གསུངས་བཀའ་བསྒོ་བ། །ཐལ་མོ་སྦྱར་ཏེ་པུས་མོ་བཙུགས། །བཀའ་སྩལ་སྤྱི་བོར་འཇོག་པར་བགྱིད། །མགོན་པོ་ཁྱོད་ཀྱི་ཆོས་ཀྱི་སྲས། །བུ་ནི་བདག་ལ་བཀའ་བསྒོ་སྩོལ། །དུས་གསུམ་པ་ནི་བཀའ་བསྒོ་བ། །བདག་ནི་དེ་བཞིན་སྐྱོང་བར་བགྱིད། །དེ་ནས་རྡོ་རྗེ་རྒྱལ་ཆེན་བདག །ཀུན་མཁྱེན་དཀྱིལ་འཁོར་སྤྱན་སྔ་རུ། །རྔ་སྒྲ་ཟབ་མོ་

ཡི་ནི་དབྱངས། །སྙན་པའི་གསུང་ནི་བཀའ་སྩལ་པ། གང་ཡང་རྫུ་འཕྲུལ་ཆེ་ཀུན་དང་། །གཞན་ཡང་བགེགས་དང་སྲིན་པོ་ཉོན། །སྔགས་པ་བདག་ཉིད་ཆེན་པོ་ཡི། །བཀའ་ནི་གཅག་པར་མི་བྱའོ། །གལ་ཏེ་བཀའ་ནི་གཅོག་བྱེད་ཅིང་། །གལ་ཏེ་སེམས་ཅན་གནོད་པ་དང་། །ས་སྟེངས་ཀྱི་ནི་དཀྱིལ་འཁོར་དུ། །གལ་ཏེ་བསྟན་ལ་གནོད་བྱེད་ན། །བདག་གི་རྡོ་རྗེ་འབར་བ་ཡིས། །སྲས་དང་དཔུང་དུ་བཅས་པ་ནི། །གང་ཡང་ལྷ་དང་ལྷ་མིན་གྱི། །ལྷ་ཡི་བཞོན་པའམ་ཡང་ན་གནས། །བདེ་གཤེགས་བཀའ་བསྒོ་ཡང་གནས་པས། །ཐམས་ཅད་ཐལ་བར་རློག་པར་བྱེད། །བདག་ཉིད་ཆེན་པོ་རྡོར་འབྱུང་བ། །དེ་ནས་དེ་རུ་ཚིག་སྨྲས་པ། །དཔའ་བོ་ཁྱོད་ཀྱིས་ཅི་བསྒོ་བ། །བདག་ཅག་བཀའ་བསྒོ་དབང་དུ་བགྱིད། །དེ་ནས་རྐང་པ་གཡོན་བརྐྱང་ནས། །ལག་པ་ཕན་ཚུན་བཅིངས་ནས་ནི། །བགེགས་ཡོད་པ་ཡི་གནས་སུ་བསྣུན། །དེ་ཉིད་ཀྱི་ནི་གཡས་ཀྱི་ནི། །འཁོར་ལོའི་ཕྱག་རྒྱས་བསྣུན་གྱུར་ན། །ཐལ་བའི་རྡུལ་དུ་རློག་པར་འགྱུར། །གལ་ཏེ་བགེགས་ནི་བྱེད་གྱུར་ན། །ས་བཅུའི་བྱང་ཆུབ་སེམས་དཔའ་ཡིས། །གལ་ཏེ་ཚངས་སོགས་གྱུར་པ་དང་། །ལྷ་ཡང་དེ་ནི་བརླག་པར་འགྱུར། །ལག་པ་གཡོན་པ་གནས་སུ་གཞག །གཡས་པ་མགོ་བོར་བཞག་ནས་ནི། །འབྱུང་པོར་གྱུར་པའི་བགེགས་ལ་བསྣུན། །སླར་ཡང་གཡོན་པ་བསྡུས་ནས་ནི། །བསྐལ་པའི་མེ་ལྕེ་ལྟར་བྱུང་སྟེ། །རྡོ་རྗེའི་ཐལ་མོས་བསྣུན་པར་བྱ། །ས་གཞི་ཕྱེ་མ་ལྟར་འགྱུར་ཏེ། །གདུག་པའི་སེམས་ཅན་ལྟ་ཅི་སྨོས། །ཁྲོ་བའི་སོ་ཡིས་མ་མཆུ་མནན། །མིག་ནི་ཁྲོ་གཉེར་དང་ལྡན་པའི། །རྡོ་རྗེ་ཐལ་མོ་ལེགས་སྦྱར་བས། །སྲིད་གསུམ་ཐམས་ཅད་འཇོམས་པར་བྱེད། །ལུས་ཀྱི་གཡོན་པ་བརྐྱང་གྱུར་པས། །རྡོ་རྗེ་ཡི་ནི་ཕྱག་རྒྱས་བསྣུན། །སྲིད་གསུམ་ཐལ་བར་རློག་འགྱུར་ན། །གདུག་པའི་སེམས་ཅན་སྨོས་ཅི་དགོས། །རྐང་པ་མཉམ་པར་གནས་ནས་ནི། །མཛུབ་མོ་གཡོན་པ་དཔྲལ་བར་སྦྱར། །གཡས་པ་སྟེང་དུ་བཏེག་པ་ཡི། །མཛུབ་མོ་རྩེ་མོ་རབ་ཏུ་འབར། །བགེགས་ཡོད་པ་ཡི་གནས་སུ་བསྣུན། །ཞལ་ནས་ཡི་གེ་ཧཱུཾ་གིས་བརྒྱན། །རྩ་བའི་ཕྱག་རྒྱ་ཡིས་བསྣུན་པས། །ལུས་ནི་བསྐལ་པའི་མེ་ལྟར་བལྟ། །གལ་ཏེ་

རྡོ་རྗེའི་ལུས་གྱུར་ཀྱང་། །དེ་ནི་བརླག་པར་འགྱུར་བ་ཡིན། །རྐང་པ་མི་མཉམ་གྱ་ཚོམ་གཞག །ལག་པ་སྟེང་དུ་དབྱུག་པ་བསྒྲེང་། །གཡས་ཀྱིས་ཡོངས་སུ་བསྐོར་ནས་ནི། །བགེགས་ཀྱི་གཟུགས་ལ་སྣུན་པར་བྱེད། །དབྱུག་པའི་ཕྱག་རྒྱས་བསྣུན་པ་ཡིས། །འབར་བ་ལྟ་བུ་ལུས་ལས་བྱུང་། །ཐེ་ཚོམ་མེད་པར་ཐལ་བར་རློག །གདོན་མི་ཟ་བར་འཆི་བར་འགྱུར། །གཡོན་བརྐྱང་བ་ཡི་རྐང་པ་མནན། །ལག་པ་གཡས་པ་མགོ་བོར་བཏེག །གཡོན་པའི་རྐང་པ་བཏེག་ནས་ནི། །མི་སྡུག་ཞལ་ནས་ཧཱུྃ་བརྗོད་པས། །རི་རྒྱལ་ལྷུན་པོའང་འགས་པར་བྱེད། །རྒྱ་མཚོ་ཡང་ནི་སྐམ་པར་འགྱུར། །དཔལ་ལྡན་ཕྱག་རྒྱ་འདི་འཆང་བ། །འདི་ནི་བརྟུལ་ཞུགས་ལེགས་པར་གནས། །གང་ཡང་རིས་སོགས་བཤད་པ་དང་། །བགེགས་དང་ཤིན་ཏུ་མི་བཟད་རྣམས། །དེ་རྣམས་འཇོམས་པར་བྱ་བའི་ཕྱིར། །ཕྱག་རྒྱ་འདི་ནི་རབ་ཏུ་སྦྱར། ། རས་བལ་འདའ་བ་རླུང་ཁྱེར་བཞིན། །དེ་དག་ཐམས་ཅད་ཐལ་བར་རློག །ཡི་གེ་ཧཱུྃ་གི་སྒྲ་དང་ལྡན། །ཐོ་བ་མགོ་བོར་བཏེག་པར་བྱ། །གཡོན་པ་སྙིང་གར་ཡང་དག་གཞག །སླར་ཡང་གཡས་པ་སྟེང་ན་གནས། །མཁས་པས་འཁོར་ལོར་གྱུར་པ་ཡིས། །མཉམ་པར་སྦྱར་བས་བསྣུན་བྱས་ན། །བགེགས་ཀུན་བརླག་པ་ཉིད་དུ་ནི། །མདོར་བསྡུས་ནས་ནི་བརྗོད་པར་བྱ། །ཕྱག་རྒྱ་མཚན་མ་གཞན་གྱིས་ནི། །གང་གིས་བཟློག་པར་མི་ནུས་པ། །གསུངས་པའི་ཕྱག་རྒྱ་འདི་ཡིས་ནི། །འདིར་ནི་འཇོམས་པར་ཐེ་ཚོམ་མེད། །ས་ལ་རྐང་པ་བཞག་ནས་ནི། ། རྡོ་རྗེའི་ཕྱག་རྒྱ་ལེགས་པར་སྦྱར། །རྡོ་རྗེའི་མེ་ནི་འབར་བ་ལྟར། །བལྟས་ན་དེ་རུ་བདག་མེད་ཀྱང་། །ཁྲོས་པས་ཡ་སོས་མ་མཆུ་མནན། །གདུག་པའི་སེམས་ཅན་རྣམས་ལ་བསྣུན། །རྡོ་རྗེའི་ཕྱག་རྒྱ་བསྣུན་པ་ཡིས། །ཤིན་ཏུ་མི་བཟད་སྲེག་པར་འགྱུར། །ཤིན་ཏུ་མི་བཟད་བསྡུས་ནས་ནི། །བཀའ་བསྒོའི་ལམ་ནི་གདོན་པར་བྱེད། །སྔགས་པ་ཡིད་ལ་ཅི་འདོད་པ། །དེ་ཚེ་དེ་ལ་སྦྱིན་པར་བྱེད། །གཞན་དུ་འགལ་ཚབས་ཅན་འགྱུར་ཏེ། །སྔགས་པའི་ལུས་ནི་བརླག་པར་འགྱུར། །བསྐལ་པའི་མེ་དང་མཚུངས་གྱུར་པས། །ཧཱ་ཧཱ་ཞེས་སྒྲོགས་རྣམ་བརྒྱན་པ། །བློ་

ལྡན་ཞགས་པའི་ཕྱག་རྒྱ་ཡིས། །ཀུན་ནས་འགུགས་པར་བྱེད་པ་ཡིས། །གལ་ཏེ་རྡོ་རྗེ་འཛིན་རང་ཡང་། །རལ་གྲིའི་ཕྱག་རྒྱ་བསྣམས་ནས་ནི། །སྔགས་པ་ཧཱུཾ་གིས་སྒྲོགས་པས་ཀྱང་། །དེ་ནི་བསྐམས་ནས་བརླག་པར་ནི། །ཐེ་ཚོམ་མེད་པར་འགྱུར་བ་རུ། །རྒྱལ་བ་མཆོག་གིས་རྟག་ཏུ་གསུངས། །རྐང་པ་མཉམ་པོར་གཞག་ནས་གནས། །མཆན་ཁུང་དག་ཏུ་ལག་པ་གཞུག །སླར་ཡང་ལག་པ་དགབ་པར་བྱ། །སོ་ཡིས་མཆུ་མནན་དེ་བཞིན་ནོ། །སླར་ཡང་གཡོན་བརྐྱང་བ་ཡི་གནས། །ལག་པ་གཡས་པ་ཕྱར་ནས་ནི། །གཡོན་པ་སྙིང་གར་རྣམ་པར་དགོད། །བསྐལ་པའི་མེ་ནི་ལྟ་བུར་བྱུང་། །བགེགས་ཀྱི་གནས་སུ་བསྣུན་ནས་ནི། །དེ་མ་ཐག་ཏུ་ཐལ་བར་རློག །རྐང་པ་ཁྱོག་པོར་བྱས་ནས་ནི། །ལག་པ་གཡས་དང་གཡོན་པ་ཉིད། །བརླ་ལ་བཟུང་ནས་བསྟོད་པར་བྱ། །ཁྲོས་པས་ཡ་སོས་མ་མཆུ་མནན། །འོག་ཏུ་ལྟ་སྟངས་དབབ་པར་བྱ། །བགེགས་རྣམས་ཐམས་ཅད་བསྡུས་ནས་ནི། །བློ་དང་ལྡན་པས་མཆན་ཁུང་གཞུག །ཐམས་ཅད་གདུང་བ་ཉིད་དུ་འགྱུར། །གང་ཡང་ཀླུ་དང་སྲིན་པོ་དང་། །འཇིགས་པ་ཆེན་པོའི་བགེགས་དང་ནི། །གང་ཡང་སྐྱེ་བོ་རྣམ་འཚེ་བ། །ཕྱག་རྒྱ་འདི་ནི་སྦྱར་བ་ཡིས། །དེ་དག་ཐམས་ཅད་བརླག་པར་འགྱུར། །ལག་པ་རྒྱབ་ཏུ་བཏང་ནས་ནི། །གཡས་ཀྱིས་རྣམ་པར་བསྒྱུར་བར་བྱ། །ཡང་ན་མི་མཐུན་གྱ་ཚོམ་གནས། །རྡོ་རྗེ་ཐོ་བ་བརྡེག་པར་བྱ། །བགེགས་ཀྱི་གནས་སུ་ཉེར་སོང་སྟེ། །ཁྲོ་བོའི་ལྟ་སྟངས་དབབ་པར་བྱ། །གལ་ཏེ་ས་སྟེངས་རྡོ་རྗེ་འཛིན། །བགེགས་ཀྱི་གཟུགས་ལ་བསྣུན་ནས་ནི། །དེ་ནི་བརླག་པར་གྱུར་ནས་ནི། །འདི་ནི་ཐེ་ཙོམ་མེད་པར་འཆི། །གཡོན་བརྐྱང་བ་ཡི་རྐང་པ་ཡིས། །སྔགས་པ་ཤར་དུ་ཕྱོགས་གྱུར་པས། །ཞགས་པའི་ཕྱག་རྒྱ་གོ་ཆ་བཟང། །མེ་ཡི་འོད་དང་མཚུངས་པར་འབར། །ས་བཅུའི་གནས་ཀྱི་དབང་ཕྱུག་གིས། ། བགེགས་རྣམས་ཐམས་ཅད་འགུགས་པར་བྱེད། །ཀུན་ནས་འགུགས་པར་བྱས་ནས་ནི། །རལ་གྲི་ཕྱག་རྒྱ་གཅོད་པར་བྱེད། །ཐམས་ཅད་འགུགས་པར་གྱུར་པ་ན། །ཤིན་ཏུ་མི་བཟད་ཆོ་ངེས་འདེབས། །དེ་རིང་བདག་ཅག་རྣམས་ཀྱིས་དྲན། །མ་ལ་བུ་དང་བུ་མོ་རྣམས། །

ཡང་ནི་སྡུག་བསྔལ་ཁྱེད་འདི་གཟིགས། །འདི་ནི་འཆི་བ་ཉིད་དུ་འགྱུར། །གལ་ཏེ་གསོན་པར་འདོད་ན་ནི། །བགེགས་ནི་རབ་ཏུ་མ་བྱེད་ཅིག །སྔགས་པ་བདག་ཉིད་ཆེན་པོ་ཡི། །བཀའ་བསྒོ་གཅག་པར་མི་བྱའོ། །བགེགས་ཀྱི་ལག་ཏུ་གསོན་པར་གཞག ། སླར་ཡང་གཡས་ཀྱིས་སོང་བ་ཡིས། །རྐང་པས་མྱུར་དུ་མནན་པར་བྱ། །བདག་ཉིད་རི་རབ་ཏུ་གྱུར་པར། །བསམས་ནས་བདག་ཉིད་ཆེན་པོ་འདི། །ཁམས་གསུམ་དག་ནི་མ་ལུས་པར། །ཐམས་ཅད་མནན་པ་ཉིད་དུ་འགྱུར། །གང་ཡང་བགེགས་དང་ལོག་འདྲེན་གཞན། །སྔགས་པས་ཧཱུྃ་སྒྲ་སྒྲོགས་པ་ལས། །དེར་ནི་སླར་ཡང་གླགས་མི་ཚོལ། །གནས་པ་ཡང་དག་བཤད་པ་འདི། །གསང་སྔགས་ཀུན་གྱི་གསང་བ་ཡིན། །གལ་ཏེ་སྔགས་ཀྱི་འབྲས་འདོད་ན། །འདི་ནི་གང་ལའང་མི་བཤད་དོ། །རང་གི་བདག་ཉིད་ལྷ་ཡི་སྐུ། །དེ་ནི་ཕྱག་རྒྱ་དཀྱིལ་འཁོར་ལྡན། །རང་གི་མཚན་མ་ས་བོན་དང་། །རང་བཞིན་ཕྱི་རུ་བཅོས་པ་ནི། །རྟག་པར་རྒྱུན་དུ་བསྣུན་པར་བྱ། །གཞན་དུ་ན་ནི་འབྲས་བུ་མེད། །མདོར་བསྡུས་ནས་ནི་འདི་རུ་བུ། །བདག་གིས་གསང་བ་གསུངས་པ་ཡིན། །ཕྱག་རྒྱ་མཚན་མ་ཆོ་ག་ནི། །འདི་ནི་ཀུན་དུ་མ་འཆད་ཅིག །གང་ཡང་སྡིག་ཅན་སེམས་ཅན་གཞན། །བླ་མ་ལ་སྨོད་འཇིགས་སུ་རུང་། །ཕ་དང་མ་ནི་མི་ཤེས་ཤིང་། །གང་ཡང་དཀོན་མཆོག་གསུམ་ལ་སྨོད། །འཇིགས་པའི་གཟུགས་ཅན་དད་པ་མེད། །གང་ཡང་མཚམས་མེད་ལྔ་བྱེད་པ། །སེམས་དཔའ་མེད་ཅིང་སྙོམ་པ་དང་། །སྤྲོ་བ་མེད་ཅིང་སྙོམ་ལས་ལྡན། །སེར་སྣའི་དྲི་མའི་འདམ་འདིར་བྱིང་། །གང་ཡང་རྟག་ཏུ་གནས་པ་ནི། །སངས་རྒྱས་ཀྱིས་གསུངས་གསང་བ་ནི། །དེ་རྣམས་ལ་ནི་བཤད་མི་བྱ། །གང་ཡང་གདུག་པའི་སེམས་ཅན་གཞན། །རྟག་ཏུ་སྡིག་པའི་ལས་ཅན་དེ། །ཁྲོ་བོའི་རྒྱལ་པོ་མི་བཟླ་ཞིང་། ། དཀྱིལ་འཁོར་ཡང་ནི་བསྟན་མི་བྱ། །གསང་སྔགས་མི་ཤེས་ཕྱག་རྒྱ་མེད། །གང་ཡང་བླ་མ་སུན་འབྱིན་པ། །དེ་རྣམས་འགའ་ཡང་རྒྱལ་བ་ཡིས། །གསུངས་པའི་ནུས་པ་ཀུན་མི་སྤྱད། །གསང་བ་ཅུང་ཟད་གང་ཡོད་པ། །ཁྲོ་བོའི་མིང་ཅན་སྙིང་པོ་འདི། །སེམས་ཅན་རྣམས་

ལ་ཕན་འདོད་པས། །དེ་ནི་མ་ལུས་བདག་གིས་བཤད། །གསང་བ་འདི་ལ་བརྟེན་ནས་ནི། །གང་ཡང་འདས་པའི་སངས་རྒྱས་དང་། །འགྲོ་ལ་ཕན་ཕྱིར་འབྱུང་འགྱུར་བའི། །གང་ཡང་མགོན་པོ་མ་བྱོན་པ། །འགྲོ་ལ་ཕན་པའི་ཚུལ་གྱིས་ནི། །མགོན་པོ་ད་ལྟར་བཞུགས་པ་གང་། ། དེ་ཀུན་མགོན་པོས་བསམ་དུ་མེད། །ཡེ་ཤེས་རྟུལ་ཕོད་མཚུངས་པ་མེད། །རྣམ་པར་དཔྱད་ན་བསམ་དུ་མེད། །རྙོག་པ་མེད་པའི་དམ་ཆོས་ནི། །ཞིང་དུ་བཤད་པར་གྱུར་པ་ཡང་། །ཐམས་ཅད་དུ་ནི་བདུད་ལས་རྒྱལ། །གཟོད་ནས་ཞི་ལ་གནས་མེད་པ། །ཆོས་ཀྱི་འཁོར་ལོ་བསྐོར་བར་འགྱུར། །སྦས་གསང་མཉམ་པའི་ཡེ་ཤེས་ནས། །བདག་གིས་གང་ཡང་མ་བསྟན་པ། །ས་སྟེངས་དཀྱིལ་འཁོར་གསང་བ་སྟེ། །མ་ལུས་པར་ནི་བདག་གིས་གསུངས། །མགོན་པོ་གྲངས་མེད་འདས་པ་དང་། །གང་ཡང་འབྱུང་བར་འགྱུར་བ་གཞན། །འགྲོ་ལ་ཕན་ཕྱིར་འདི་བཞུགས་པའི། །གང་ཡང་ད་ལྟར་འབྱུང་འགྱུར་བའི། །ཀུན་གྱིས་གསང་བའི་ཡེ་ཤེས་གང་། །བསམ་གྱིས་མི་ཁྱབ་འབྲས་སྩོལ་བ། །གསང་བའི་ཡེ་ཤེས་ཕ་རོལ་གནོན། །དེ་དག་མ་ལུས་བདག་གིས་གསུངས། །གང་ཞིག་རྒྱུད་ཀུན་ཏུ་གསུངས་པ། །གསང་བ་མཆོག་གིས་རྨད་དུ་དབྱུང་། །དེ་དག་མ་ལུས་པ་རུ་གསུངས། །བསམ་མི་ཁྱབ་པའི་འབྲས་སྩོལ་བ། །ཐམས་ཅད་དབང་ཕྱུག་གོ་འཕང་འཐོབ། །བདེ་བ་ཐམས་ཅད་ཡང་དག་གཏད། །འཇིགས་པ་ཐམས་ཅད་རྣམ་བྲལ་བར། །ལུས་ཅན་ཐམས་ཅད་འབྱུང་བར་འགྱུར། །འདི་ནི་མྱུར་དུ་དངོས་གྲུབ་བྱེད། །བསམ་གྱིས་མི་ཁྱབ་འབྲས་བུ་སྩོལ། །སེམས་ཅན་ཐམས་ཅད་བསྲུང་བ་ཡི། །གསང་བའི་ཕ་རོལ་གནོན་པ་གསུངས། །དེ་བས་རྣམ་པ་ཐམས་ཅད་དུ། །གསང་བའི་གསང་བ་ཡང་དག་འབྱུང་། །རྟག་ཏུ་བག་ཡོད་པར་གྱུར་པས། །བསྲུང་བའི་དོན་དུ་རྒྱལ་བས་གསུངས། །སྔགས་པ་བདག་ཉིད་ཆེན་པོ་ཡིས། །མཆོག་ཏུ་ཡིད་འོང་ཡང་དག་བཤད། །གསང་བའི་ཡེ་ཤེས་རྟུལ་ཕོད་པ། །སྔགས་པས་མ་བསྒྲུབས་པ་ཡང་འགྲུབ། །གསང་བའི་ཡེ་ཤེས་ཕ་རོལ་གནོན། །གང་ལའང་བཤད་པར་མི་བྱ་སྟེ། །རྫོགས་སངས་རྐང་གཉིས་མཆོག་གིས་ནི། །མགོན་པོས་

བསམ་གྱིས་མི་ཁྱབ་གསུངས། །རྒྱལ་པོ་མེད་ཅིང་གདུག་པའང་མེད། །བགེགས་དང་ལོག་པར་འདྲེན་པ་མེད། །སྲིན་པོ་གནོད་སྦྱིན་དབང་པོ་མེད། །གདུག་པའི་གཟའ་དང་མ་མོ་མེད། །དུས་མིན་འཆི་དང་འཇིགས་པ་མེད། །ནད་ཀྱིས་ཀུན་དུ་འཁྲུག་པ་མེད། །མཁའ་འགྲོ་མ་དང་ཤ་ཟའང་མེད། །སེང་གེ་སྟག་ལ་སོགས་པའང་མེད། །ཆུ་ཡི་འཇིགས་པ་ཆེན་པོའང་མེད། །རིམས་སོགས་འཇིགས་སུ་རུང་བའང་མེད། །གནོན་པོ་ལ་སོགས་ཀུན་ཀྱང་མེད། །དེ་བཞིན་ཐོག་གི་འཇིགས་པ་མེད། །མི་རྒོད་ཆོམ་རྐུན་ལ་སོགས་མེད། །གཞན་ཡང་དེ་བཞིན་ཡམས་མེད་ཅིང་། །དེ་རུ་མུ་གེའི་འཇིགས་པ་མེད། །བདུད་ཀྱི་འཇིགས་པའང་དེ་བཞིན་མེད། །ཡུལ་འཁོར་གཞན་གྱིས་འཇིགས་པ་མེད། །དེ་ལ་འགོ་ནད་འཇིགས་པ་མེད། །ལྷོག་པ་མཚན་བར་རྡོལ་བ་མེད། །ནད་ལ་སོགས་པ་ཐམས་ཅད་མེད། །གཞན་ཡང་འཇིགས་པར་བྱེད་པ་མེད། །ས་གཞི་ཐམས་ཅད་ཡོད་པ་ཡི། །ས་གཞི་སྟེང་འདིར་གནས་པ་ཡི། །འདི་ནི་གང་གི་ལག་ན་གནས། །གང་གི་སྙིང་གར་གནས་པ་དེ། །འཇིགས་པ་ཐམས་ཅད་རྣམ་བྲལ་བས། །མི་ཡི་སྐྱེས་བུ་ཐོབ་པར་འགྱུར། །བདག་གིས་དཀའ་བས་རབ་བཙལ་ཏེ། །དེ་བཞིན་སྲོག་ལ་ལྟོས་མེད་པར། །མགོན་པོ་གྲངས་མེད་རབ་མཉེས་པས། །གོ་འཕང་མཆོག་འདི་ཐོབ་པར་འགྱུར། །ཡེ་ཤེས་ཤིན་ཏུ་རྙེད་དཀའ་བའི། །ཡང་དག་འདི་ནི་བདག་གིས་འཐོབ། །སེམས་ཅན་དོན་དུ་བསམ་མེད་པར། །གྲངས་མེད་བཞིན་དུ་རྣམ་པར་གནས། །ད་ལྟར་བདག་གིས་སངས་རྒྱས་ཉིད། །བྱང་ཆུབ་སྙིང་པོར་ཡང་དག་བཞུགས། །ཕྱག་རྒྱ་འདི་ནི་བསྟན་པ་ཡིས། །ཡང་དག་པར་ན་བདུད་ལས་རྒྱལ། །སྲིད་གསུམ་འདི་ནི་འཇིགས་པ་འཁྲིགས། །སེམས་ཅན་སྡུག་བསྔལ་ཡང་དག་ཁེངས། །འཇིག་རྟེན་གསུམ་ན་འབད་པ་ཡིས། །བདག་གིས་མ་ལུས་པར་བསྒྲལ་ཏོ། །མ་ལུས་སངས་རྒྱས་ཆེ་བའི་བདག །སེམས་ཅན་དོན་དུ་བསྟན་པ་ཡིས། །དེ་དག་ཐམས་ཅད་བདག་གིས་ནི། །ཕྱག་རྒྱ་འདི་ཡི་མཐུ་ཡིས་བྱས། །མཚུངས་མེད་ཡེ་ཤེས་ས་ཐོབ་ཅིང་། །ས་སྟེངས་ཀུན་མཁྱེན་ས་ཐོབ་པས། །དེ་བས་བདག་ནི་ཀུན་མཁྱེན་མཛོད། །

དམ་པའི་གོ་འཕང་བགྲོད་ནས་བཞུགས། །སྣ་ཚོགས་འཇིག་རྟེན་འགྲོ་ཤེས་ནས། །དམྱལ་བ་ལ་སོགས་འཇིགས་པ་ཡིས། །སྡུག་བསྔལ་གྱིས་གདུངས་མཐོང་ནས་ནི། །ཐུགས་རྗེར་ལྡན་པའི་ཐུགས་ཀྱིས་སུ། །གསང་སྔགས་ཚུལ་གྱིས་འབྲས་འབྱུང་བ། །བསམ་མི་ཁྱབ་པའི་དམ་ཆོས་བཤད། །ཇི་བཞིན་གསུངས་པའི་འཇིག་རྟེན་གསུམ། །ཡང་དག་ཡེ་ཤེས་རྣམ་པར་བསྒྱིངས། །གསང་སྔགས་ཆོ་ག་རྒྱས་པར་ནི། །དེ་ནི་འདི་རུ་བདག་གིས་གསུངས། །དེ་བས་རྣམ་པ་ཐམས་ཅད་ཀྱིས། །བདག་གིས་དམ་ཆོས་བཤད་པ་འདི། །རྟག་ཏུ་བག་ཡོད་པར་གྱུར་པས། །ཆོ་ག་རྒྱས་པར་བཤད་པར་བྱ། །གསང་བའི་ཕྱག་རྒྱས་རབ་གསུངས་པ། །དམ་ཚིག་མི་ཤེས་ལ་མི་བཤད། །སངས་རྒྱས་ཐམས་ཅད་བསླུས་གྱུར་ཅིང་། །གསང་སྔགས་འབྲས་བུ་མི་འབྱུང་ངོ་། །དེ་རྣམས་ངན་འགྲོར་ལྟུང་འགྱུར་གྱི། །འབྲས་བུ་གཞན་དུ་འབྱུང་བ་མེད། །གལ་ཏེ་སེམས་ཅན་ཐམས་ཅད་ནི། །དམ་ཚིག་ཉམས་པར་གྱུར་ན་ནི། །འབད་པས་བླ་མ་མཉེས་བྱས་ནས། །ས་སྟེངས་དམ་ཚིག་གཟུང་བར་བྱ། །གསང་བ་ས་སྟེངས་བཤད་པ་ཡི། །ཕྱག་རྒྱ་དེ་ནས་བཅིང་བར་བྱ། །དེ་ལྟར་བྱས་པའི་ཆོ་ག་ཤེས། ། སྔགས་དང་ཕྱག་རྒྱ་ཤིན་ཏུ་སྦྱར། །བསམ་མི་ཁྱབ་པའི་སྐུ་འཐོབ་སྟེ། །གཞན་དུ་ན་ནི་འབྲས་མེད་འགྱུར། །དེ་ནས་བཅོམ་ལྡན་ཤཱཀྱ་ཐུབ། །ཐུགས་རྗེ་དང་ནི་ལྡན་པའི་ཐུགས། །རྡོར་བྱུང་བདག་ཉིད་ཆེན་པོ་ལ། །སྙན་པའི་ཚིག་གིས་བཀའ་སྩལ་པ། །གསང་སྔགས་དོན་ཀུན་གྲུབ་བྱེད་པ། །བཤད་པར་བྱ་ཡིས་ཚུར་ལ་ཉོན། །བསམ་མི་ཁྱབ་པའི་འབྲས་བུ་མང་། །ཡང་ནི་བདེ་བར་གཤེགས་པས་གསུངས། །བསམ་གྱིས་མི་ཁྱབ་ལས་སྣ་ཚོགས། །བསམ་གྱིས་མི་ཁྱབ་འབྲས་བུ་གནོན། །གསང་སྔགས་འཆང་བ་འདི་དག་ལྡན། །དེ་ཕྱིར་འདི་ཡང་བསམ་མི་ཁྱབ། །གང་གིས་རྫོགས་སངས་རྒྱས་གསུངས་པ། །རྫུ་འཕྲུལ་ཆེན་པོ་རྒྱལ་གྱུར་པ། །བསྲུང་བའང་འགའ་ཞིག་འཇིག་རྟེན་ནི། །ཐམས་ཅད་ཆགས་པས་གཟིར་གྱུར་པ། །དེ་ནི་བཤད་པར་བྱ་ཡིས་བུ། །ཕན་པར་གྱུར་པའི་ཡིད་ཀྱིས་ཉོན། །མཐོང་བའི་

ཆོས་ལ་འབྲས་བུ་ནི། །གཞན་དུ་འབྲས་བུ་མེད་པར་འགྱུར། །དེ་ནས་བཅོམ་ལྡན་འདས་ཤཱཀྱ་ཐུབ་པས་དེའི་ཚེ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ། ངན་འགྲོ་ཐམས་ཅད་རྣམ་པར་གྲོལ་བར་བྱེད་པ། ཚེ་དང་ནད་མེད་པ་ལ་སོགས་པ་ནད་ཐམས་ཅད་རབ་ཏུ་ཞི་བར་བྱེད་པ། མཆོག་ཏུ་སངས་རྒྱས་པ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསང་སྔགས་ཀྱི་རྒྱལ་པོ་འདི་བཀའ་སྩལ་པ། ན་མཿསརྦྦ་ཤཱ་པ་རི་པཱུར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཨ་ཙ་ལ་ཀཱ་ཎ། ནཊྚནཊྚ། མོཊྚ་མོཊྚ། མཊྚ་མཊྚ། ཏཊྚ་ཏཊྚ། ཏིཥྛ་ཏིཥྛ། ཨཱ་བེ་ཤ་ཨཱ་བེ་ཤ །ཨཱཿམཏྟ་མཱ་ལ་ཀ །དྷ་ཎ་དྷ་ཎ། ཏྲྀ་ཎི་ཏྲྀ་ཎི། ཁཱ་ད་ཁཱ་ད། བི་གྷྣཱཾ་མཱར་ཡ་མཱ་ར་ཡ། དུཥྚཾ། རཀྵ་རཀྵ། སཏཾ། ། ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཛ་ཡ་བཛྲ་ཕཊ། ཧཱུྃ་ཧཱུྃ་ཧཱུྃ། ཏྲྀ་བ་ལི་ཏ་རྃ་ག །ནརྟ་ཀ །ཧྃ་ཧྃ་ཧྃ། ཨ་ཙ་ལ་ཙེ་ཊ་ཕཊ་ཕཊ་ཡཿ། ཨཱཿཧཱུྃ་ཨ་སམྃ། ཏྲི་ཀ་ཏྲཱ་ཊ། མ་ཧཱ་པ་ལ་ཤཱ་ཏ་ཡ། ས་མཱ་ན་ཡ། ཏྲཱྃ་མཱྃ་ཧཱྃ། ཤུདྷྱ་ཏུ་ལོ་ཀཿ། ཏུཥྱ་ཏུ་བཛྲཱི་ན་མོ་སྟྭ་པྲ་ཏི་ཧ་ཏ་བ་ལེ་བྷྱཿ། ཛྭཱ་ལ་ཛྭཱ་ལ། ཏྲཱ་ཊ་ཨ་ས་ཧ་ན་མཿསྭཱ་ཧཱ། བཅོམ་ལྡན་འདས་ཀྱིས་མཆོག་ཏུ་གསང་བ་ཆེན་པོའི་སྙིང་པོ་འདི་གསུངས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ། འགུལ། རབ་ཏུ་འགུལ། ཀུན་དུ་རབ་ཏུ་འགུལ། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ། གཡོས་རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག །འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར། ཤར་ཕྱོགས་མཐོ་ན་ནུབ་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ་སྟེ་སྣང་བ་ཆེན་པོ་འཇིག་རྟེན་དུ་བྱུང་བར་གྱུར་ཏོ། །གཞན་ཡང་ངོ་མཚར་རྨད་དུ་བྱུང་བ་འཇིག་རྟེན་དུ་མཐོང་ངོ་། །བགེགས་དང་ལོག་འདྲེན་ཐམས་ཅད་དང་། །གང་ཡང་སྲིན་པོ་འཇིགས་པ་དང་། །ཤ་ཟ་གདུག་པའི་སེམས་ཅན་དང་། །གང་ཡང་བདུད་དང་འཇིགས་

སུ་རུང་། །གནོད་སྦྱིན་ཀླུ་དང་མིའམ་ཅི། །གྲུལ་བུམ་དང་ནི་ལུས་སྲུལ་པོ། །གང་ཡང་ལྷ་མིན་ཚོགས་དང་ཡང་། །གང་ཡང་གཟའ་དང་མ་མོ་རྣམས། །རས་བལ་འདའ་བ་རླུང་ཁྱེར་བཞིན། །དེ་དག་ཐམས་ཅད་ཐལ་བར་རློག །ཟབ་མོ་ཡི་ནི་དབྱངས་ཀྱི་སྒྲ། །ཕྱོགས་ཀུན་དུ་ནི་གྲགས་པར་གྱུར། །འཇིགས་པ་ཆེན་པོའི་སྐར་མདའ་ལྟུང་། །འཇིགས་སུ་རུང་བའི་གློག་ཀྱང་འཁྲུགས། །ས་གཞི་ཐམས་ཅད་འབར་བ་ལྟར། །ས་སྟེངས་ཀུན་ན་མེ་ཕུང་ངོ་། །ཕྱོགས་ཀུན་འཇིགས་པ་ཆེན་པོར་གྱུར། །ས་གཞི་དཀྱིལ་འཁོར་ཀུན་འཁྲུགས་གྱུར། །མུན་ནག་འཇིགས་པ་ཆེན་པོ་རུ། །ས་གཞི་དཀྱིལ་འཁོར་མཐོང་བར་གྱུར། །སངས་རྒྱས་ཉན་ཐོས་ལྷ་དང་ནི། །བྱང་ཆུབ་སེམས་དཔའ་རྫུ་འཕྲུལ་ཆེ། །ལམ་གོལ་བ་ཡི་ཡིད་ཅན་ལ། །དེ་དག་ཐམས་ཅད་ངོ་མཚར་འགྱུར། །ཀུན་མཁྱེན་སྤྱན་སྔར་འདུག་ནས་ནི། །སྙན་པ་ཡི་ནི་ཚིག་འདི་གསོལ། །ཀུན་མཁྱེན་བཀོད་པ་བསྡུ་བར་མཛོད། །སེམས་ཅན་སྡུག་བསྔལ་ཀུན་དུ་འཁྲུགས། །ས་གཞི་སྙིང་པོར་གྱུར་པ་འདིར། །ཚུལ་འདི་བཟོད་པར་མི་ནུས་སོ། །དེ་ཀུན་ཀུན་མཁྱེན་བཞེངས་ནས་ནི། །ཏིང་ངེ་འཛིན་ནི་སྟོང་འགྱུར་བས། །སྐྱོབ་པ་བྱང་ཆུབ་སེམས་དཔའ་ཡི། །སྙན་པའི་ཚིག་གིས་བཀའ་སྩལ་པ། །བྱང་ཆུབ་སེམས་དཔའ་མ་འཇིགས་ཤིག །གང་ཡང་འཇིགས་པས་གཟིར་བའི་ལྷ། །གཞན་ཡང་གདུག་པའི་སེམས་ཅན་ནི། །འཇིག་རྟེན་པ་དང་རྒྱུ་མི་རྒྱུ། །རྫོགས་སངས་རྐང་གཉིས་དམ་པ་ཡིས། །འདི་ནི་བསམ་དུ་མེད་པར་བཤད། །དེ་ནས་སེམས་ཅན་ཐམས་ཅད་ཀྱིས། །བདེ་བ་ཐམས་ཅད་ཡང་དག་འཐོབ། །ཐམས་ཅད་དབང་ཕྱུག་གོ་འཕང་འཐོབ། །སྡུག་བསྔལ་ཐམས་ཅད་རྣམ་པར་སྤངས། །བསམ་པ་ཐམས་ཅད་རྫོགས་ནས་ནི། །དེ་མ་ཐག་ཏུ་ས་སྟེངས་འགྱུར། །ཁྲོ་བོའི་རྒྱལ་པོའི་སྙིང་པོ་འདི། །རྒྱལ་བ་མཆོག་གིས་རྟག་ཏུ་གསུངས། །སྟོབས་ཆེན་འདི་ནི་མི་མཐོང་བས། །ཁྲོ་བོའི་རྒྱལ་པོ་རང་ཉིད་གནས། །གནས་མེད་པ་ལ་སྦྱར་མི་བྱ། །གསང་སྔགས་གསང་བ་ཕ་རོལ་གནོན། །རང་ཉིད་དེ་བཞིན་གཤེགས་པ་སྟེ། །འདི་ནི་ཁྲོ་བོའི་

གཟུགས་ཀྱིས་བཞུགས། །ལས་རྣམས་སྣ་ཚོགས་ཡང་དག་ལྡན། །གསང་སྔགས་འདི་ནི་བཟླས་པས་འགྲུབ། །མཚམས་མེད་ལྔ་པོ་བྱས་པ་ཡང་། །འདི་ཡིས་མྱུར་དུ་འགྲུབ་པར་འགྱུར། །ཚེས་གྲངས་མེད་ཅིང་རྒྱུ་སྐར་མེད། །སྨྱུང་གནས་ཡང་ནི་མེད་པར་མཛད། །ཁྲུས་ཀྱི་བྱ་བ་ཐམས་ཅད་མེད། །དྲི་སོགས་ཆོ་གའི་རིམ་པ་མེད། །རས་རིས་མེད་ཅིང་གནས་ཡོད་མིན། །དུས་ཀྱི་ཆོ་གའི་རིམ་པ་མེད། །སྡིག་པ་ཀུན་དང་ལྡན་པས་ཀྱང་། །གང་དུ་ཡང་དག་གནས་སྒྲུབ་པ། །སླར་ཡང་བཅོམ་ལྡན་འདས་ཀྱིས་ནི། །ཐུགས་རྗེ་དང་ནི་ལྡན་པའི་ཐུགས། །རྡོར་འབྱུང་ཆེ་བའི་བདག་ཉིད་ལ། །སྙན་པའི་ཚིག་གིས་བཀའ་སྩལ་པ། །གསང་སྔགས་རྒྱལ་པོ་རྫུ་འཕྲུལ་ཆེ། །ཁྲོ་རྒྱལ་ཉེ་བའི་སྙིང་པོ་ནི། །དངོས་གྲུབ་མྱུར་དུ་སྩོལ་མཛད་པ། །བཤད་པར་བྱ་ཡིས་བུ་ཚུར་ཉོན། །ཡིད་ལ་འདོད་པའི་ཆོ་ག་ཉིད། །བསམ་གྱིས་མི་ཁྱབ་ལས་དང་ལྡན། །གསང་སྔགས་ཆེན་པོ་འདི་བསྒྲུབས་ནས། །བསམ་གྱིས་མི་ཁྱབ་འབྲས་བུ་སྟེར། །རྫོགས་སངས་མཆོག་ཏུ་གསང་བ་ནི། །བརྟན་དང་གཡོ་བས་མི་ཤེས་པ། །བསམ་པ་ཐམས་ཅད་རྫོགས་མཛད་ན། །རྒྱལ་བ་མཆོག་གིས་རྟག་ཏུ་གསུངས། །ན་མཿ སརྦྦ་ཤཱ་པ་རི་པཱུར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ་ཏྲ་ཊ། ཨ་མོ་གྷ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུཾ། ཏྲཱ་ས་ཡ་ཧཱུཾ། ཏྲ་ཀ་ཧཱྃ་མྃ། ཕྱག་ན་རྡོ་རྗེའི་འདིར་འདི་ཡི། །ཁྲོ་བོ་ཆེན་པོའི་ཉེ་སྙིང་ངོ་། །ལས་ཀུན་ནུས་པ་ཅན་འདི་ནི། །སྔགས་ཀྱི་རྒྱལ་པོ་རྫུ་འཕྲུལ་ཆེ། །ཡིད་འདོད་བསམ་གྱིས་མི་ཁྱབ་པ། །མ་བསྒྲུབས་པ་ཡི་ལས་ཀྱང་བྱེད། །རྒྱུད་རྒྱལ་གཞན་པ་རྣམས་སུ་ནི། །ཆོ་ག་རྒྱས་པར་གསུངས་པ་གང་། །འདི་ཉིད་ཀྱི་ནི་ཆོ་ག་ཡིས། །དེ་ཡང་གྲངས་མེད་བསྒྲུབ་པར་བྱ། །ཁྲོ་བོའི་མངག་གཞུག་བཀའ་ཉན་པ། །ཕོ་ཉ་ཕོ་མོ་རྫུ་འཕྲུལ་ཆེ། །ཆོ་ག་འདི་ཡི་རིམ་པ་ཡིས། ། དེ་ཡང་ཇི་ལྟར་རིགས་པས་སྒྲུབ། །གང་ཡང་འཇིག་རྟེན་པ་ཡི་ལྷ། །གང་ཡང་ཁྱབ་འཇུག་ལ་སོགས་ཀླུ། །གཟའ་དང་རྒྱུ་སྐར་སོགས་ཐམས་ཅད། །གྲུལ་བུམ་དང་ནི་ལུས་སྲུལ་པོ། །གནོད་སྦྱིན་ལྷ་མིན་མིའམ་ཅི། །གནོད་སྦྱིན་མོ་དང་ཤ་ཟ་དང་། །གང་ཡང་སྲིན་པོ་དང་ནི་མི། །དྲང་

སྲོང་མཁའ་འགྲོ་མ་དེ་བཞིན། །མ་མོ་དང་ནི་སྲིན་མོ་ཉིད། །གང་ཡང་འཇིག་རྟེན་པར་བཤད་པ། །དེ་ཡང་ཆོ་ག་འདི་ཉིད་ཀྱིས། །ཐེ་ཚོམ་མེད་པར་བསྒྲུབ་པར་བྱ། །ན་མཿསརྦྦ་ཤཱ་པ་རི་པཱུ་ར་ཀེ་བྷྱཿ སརྦྦ་ཏ་ཐཱ་ག་ཏེ་བྷྱཿ སརྦྦ་ཐཱ། ཧ་ན་ཧ་ན། མཱ་ར་ཡ་ཛྙཱ་ན་ཁངྒ་ཕཊ། རལ་གྲིའི་ཕྱག་རྒྱའི་སྔགས་སོ། །ན་མཿསརྦྦ་ཤཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། གྲཱིཧྞ་གྲཱིཧྞ། ཀཌྷ་ཀཌྷ། པཱ་ཤེ་ན། བནྡྷ་བནྡྷ། མ་ཧཱ་མ་ཏྱེ་དྷ་རྨྨ་ཏེ་སྭཱ་ཧཱ། ཞགས་པའི་ཕྱག་རྒྱའི་སྔགས་སོ། །ན་མཿསརྦྦ་ཤཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། རཀྵ་རཀྵ། ཧ་ན་ཧ་ན། ཀུཊྚ་ཀུཊྚ། མཱ་ར་ཡ་མཱ་ར་ཡ། དུཥྚ་བི་ནཱ་ཡ་ཀཾ་ཧཱུྃ་ཛཿ། གོ་ཆའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། དྷ་ར་དྷ་ར། བཛྲཱ་ནཱི་ལ་ཁཌྒ་པཱ་ཤ་དྷ་རཱ་དྷ་ཡ་སྭཱ་ཧཱ། སྤྱི་གཙུག་གི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། བྷཉྫ་བྷཉྫ། ད་ཧ་པ་ཙ་བྷ་སྨཱི་ཀུ་རུ། ཧ་ན་ཧ་ན། བཛྲཱ་གྣི་ནཱ་ཧཱུྃ་ཕཊ། ཐོ་བའི་ཕྱག་རྒྱའི་སྔགས་སོ། །ན་མཿསརྦྦ་ཤཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཤཱནྟ་མཱུ། ད་ཧ་ད་ཧ། ས་དྷ་ཡ་ས་དྷ་ཡ། ཛ་ཡ་ཛ་ཡ། བི་ཛ་ཡ་བི་ཛ་ཡ་ཀཱིརྟྟི་སྭཱ་ཧཱ། མགོ་བོའི་ཕྱག་རྒྱའི་སྔགས་སོ། །ན་མཿ སརྦྦ་ཤཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། བྷཱུ་ར་དྷ་ར་ཨ་ཙིནྟྱ་པ་ལ་བི་ཀྲ་མ། ༀ་བྷཱུརྦྷུ་བ། རཀྵ་རཀྵ་སརྦྦཾ་སྭ་ཧ། རྡོ་རྗེའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། བཛྲ་ཧྲྀཏ། ད་མ་ད་མ་ཧཱུྃ། བཛྲ་མ་ཏྱིཾ་གི་སྭཱ་ཧཱ། སྙིང་གའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཧཱུྃ་ད་ཧ་ད་ཧ། ཀིཾ་ཙི་རཱ་ཡ་སི། ཨཱ་ན་ཡ་ཤི་གྷྲྃ་རཀྵ་རཀྵ། བན་དྷ་བན་དྷ། དུཥྚཱྃ་ད་མ་ད་མ་སྭཱ་ཧཱ། ཕྱོགས་བཅིང་བའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ།སརྦྦ་ཐཱ། ༀ་དྷུ་ན་དྷུ་ན། མ་ཧཱ་པཱ་ཤ་ཁཌྒ་དྷ་ར། སརྦྦ་སཱ་པ་རི་པཱུ་ར་ཀེ་བྷྱཿསྭཱ་ཧཱ། བཀའ་རྟགས་ཀྱི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ག་ག་ན་གཾ་དྷོད་བྷ་བེ་མ་ཧཱ་ས་མ་ཡ། པ་རི་པཱུ་ར་ཀེ་སྭཱ་ཧཱ། དྲིའི་ཕྱག་རྒྱའི་སྔགས་སོ། །ན་མཿ

སརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏོ་བྷྱཿ། སརྦྦ་ཐཱ། བི་ཤུད་དྷི་ཛྙཱ་ནཱརྩྪི་སཾ་བྷ་བེ་ག་ག་ན་ནཱནྟཿསྭཱ་ཧཱ། མར་མེའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཤུད་དྷ་དྷརྨྨ་ཏེ་ཤུད་དྷྱ་ཤུད་དྷྱ། གྲཱིཧྞ་གྲཱིཧྞ། སརྦྦ་སཱ་པ་རི་པཱུ་ར་ཀེ་སྭཱ་ཧཱ། གཏོར་མའི་ཕྱག་རྒྱའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། བི་ཤུད་དྷ་མ་ཧཱ་ཛྙཱ་ན་སཾ་བྷ་བེ་དཱིཔྟ་དཱིཔྟ། མ་ཧཱ་ན་ཡེ་སྭཱ་ཧཱ། བདུག་པའི་ཕྱག་རྒྱའི་སྔགས་སོ། །ན་མཿ་སརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ག་ག་ན་བི་ཀྲནྟ་གཱ་མ་ནི་མ་ཧཱ་ཤུད་དྷ་ན་ཡེ་སྭཱ་ཧཱ། མེ་ཏོག་གི་ཕྱག་རྒྱའི་སྔགས་སོ། །ན་མཿསརྦྦ་ཤཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཧ་ན་ཧ་ན། པ་ར་མ་བི་ཤུད་དྷེ། དྷརྨྨ་ན་ཡེ་པ་རི་པཱུ་ར་ཀེ་སྭཱ་ཧཱ། ཞལ་ཟས་ཀྱི་ཕྱག་རྒྱའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཨཱཿསཏྭ་ཧི་ཏོ། དྱཏ། ད་མ་ད་མ། སརྦྦ་སཱ་པ་རི་པཱུ་ར་ཀེ་སྭཱ་ཧཱ། དཔའ་བོ་ཆེན་པོ་སྤྱན་དྲང་བའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏ་བྷྱཿ། སརྦྦ་ཐཱ། བི་ཤུད་དྷ་བི་ཤུད་དྷ། སཏྭ་སྃ་བྷ་བེ་ཨཱ་ན་ཡ། ཨ་ནཾ་ཡ། མ་ཧཱ་ན་ཡེ་སྭཱ་ཧཱ། བྱང་ཆུབ་སེམས་དཔའ་སྤྱན་དྲང་བའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། བི་ཤུད་དྷ་སཏྭ། ཧ་ཧ། ཧ་ན་ཧ་ན། ད་མ་ད་མ། མ་ཧཱ་ན་ཡེ་སྭཱ་ཧཱ། ཉན་ཐོས་སྤྱན་དྲང་བའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ༀ་བཛྲ་ཨཱ་ཀརྵ་ཡ། ཤཱི་གྷྲྃ། ད་ཧ་ད་ཧ། པ་ཙ་པ་ཙ། མ་ཧཱ་ན་ཡ་བ་རི་བཱ་རེ་སྭཱ་ཧཱ། ཕོ་ཉ་མོ་ལ་སོགས་པ་སྤྱན་དྲང་བའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། མ་ཐ་མ་ཐ། ཨཱ་ན་ཡ་ཨཱ་ན་ཡ། པྲ་བེ་ཤ་ཡ་པྲ་བེ་ཤ་ཡ། སརྦྦ་བྷཱུ་ཏཱཾ་སརྦྦ་དེ་བཱཾ། ཏམ་ཏམ།མ་ཧཱ་ན་ཡ་པ་རི་བཱ་རེ་ཧཱུྃ་སྭཱ་ཧཱ། འཇིག་རྟེན་པ་རྣམས་སྤྱན་དྲང་བའི་སྔགས་སོ། །ན་མཿསརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ས་ཏྱ་ས་ཏྱ། མ་ཧཱ་ས་ཏྱ། ད་མ་ད་མ། མ་ཧཱ་ད་མ། ཨཱ་ཀརྵ་ཡ། ཨཱ་ཀརྵ་ཡ། ས་ཏྱ་བཱ་དི། མ་ཧཱ་ན་ཡ་བི་ཤུད་དྷེ་སྭཱ་ཧཱ། དྲང་སྲོང་རྣམས་

སྤྱན་དྲང་བའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཛ་ཡ་ཛ་ཡ། བི་ཛ་ཡ་བི་ཛ་ཡ། མ་ཧཱ་སཏྱ་བཱ་དི་ནི་སརྦྦ་ཧི་ཏེ་སྭཱ་ཧཱ། སྲིང་མོ་རྣམས་སྤྱན་དྲང་བའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ཧྲཱིཿཧ་ཧ། མ་ཐ་མ་ཐ། ད་མ་ད་མ། ཧ་ན་ཧ་ན། མ་ཧཱ་ན་ཡེ། མཱ་ར་མཱ་ར་ཧཿསྭཱ་ཧཱ། མ་མོ་རྣམས་སྤྱན་དྲང་བའི་སྔགས་སོ། །ན་མཿསརྦྦསཱཔ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་ཏེ་བྷྱཿ། སརྦྦ་ཐཱ། ༀ་ཧ་ན་ཧ་ན་བཛྲ་ཧཱུྃ་ཕཊ། སརྦྦ་དུཥྚ་གྲ་ཧྃ། མ་ཐ་མ་ཐ། བྷཉྫ་བྷཉྫ། སརྦྦ་བིགྷྣ། ད་མ་ད་མ། སརྦྦ་དུཥྚཾ་ཨོཾ་ཧཱུྃ་ཕཊ་སྭཱ་ཧཱ། ཐུན་མོང་གི་ནི་ཚམ་ངམ་དུ། །རིག་འདི་འཇིག་རྟེན་གཙོ་བོས་གསུངས། །ཕྱག་རྒྱ་རྣམས་ནི་མ་ལུས་དང་། །སྔགས་ནི་རྒྱས་པར་གསུངས་པ་ཡིན། །དོན་ཀུན་སྒྲུབ་པར་བྱེད་པའི་སྔགས། །འདི་ནི་མྱུར་དུ་འགྲུབ་བྱེད་ཅིང་། །བསམ་གྱིས་མི་ཁྱབ་འབྲས་སྩོལ་བ། །ཤིན་ཏུ་གསང་བ་ཡང་དག་གསུངས། །ཕྱག་རྒྱ་དང་ནི་ལྷན་ཅིག་སྦྱར། །དྲི་དང་མེ་ཏོག་བདུག་པ་དང་། །གཏོར་མ་ཡང་ནི་མ་ལུས་པ། །སུས་ཀྱང་གཞོམ་པར་མི་ནུས་སོ། །ཕྱོགས་བཅིང་བ་དང་དེ་ནས་བཟའ། །གཞན་ཡང་ཡིད་ལ་ཅི་འདོད་འབྱུང་། །དེ་ཀུན་སྔགས་དང་བཅས་པ་ཡི། །ཕྱག་རྒྱར་སྦྱར་བས་འགྲུབ་པར་འགྱུར། །དེ་ནས་བཅོམ་ལྡན་འདས་ཀྱིས་ནི། །ཕྱག་ན་རྡོ་རྗེ་བཀའ་སྩལ་པ། །ཁྲོ་བོའི་རྒྱལ་པོ་རྣམ་པར་ཤུལ། །འདི་ནི་ཁྱོད་ལ་རྗེས་སུ་སྦྱིན། །ཞི་བ་དང་ནི་རྒྱས་པ་དང་། །དེ་བཞིན་མངོན་སྤྱོད་དབང་དུ་བྱ། །དེ་བཞིན་སྣ་ཚོགས་གྱུར་པ་དང་། །ཁྱོད་ལ་རག་ལུས་མཆོག་ཏུ་འདོད། །བསོད་ནམས་དུ་མ་ལས་འཁྲུངས་པ། །མཚན་དང་དཔེ་བྱད་བཟང་པོས་འབར། །མཚན་རྣམས་ཐམས་ཅད་ཡོངས་སུ་རྫོགས། །ཕྱག་རྒྱ་བརྐྱང་བས་སྔོན་འགྲོ་བས། །བདག་གིས་རྫོགས་སངས་རྒྱས་དབང་བསྐུར། །བདེ་གཤེགས་ལས་འཁྲུངས་རྡོ་རྗེ་ཅན། །ཟབ་མོ་དབྱངས་ཀྱི་སྒྲ་ཡིས་ནི། །བདེ་བར་གཤེགས་པས་ཀུན་གསུངས་པ། །ཁྲོ་བོའི་རྒྱལ་པོའི་ཆོ་གའི་རིམ། །རིམ་པ་ཇི་བཞིན་གསུངས་པ་ཉིད། །ཁྱོད་ཉིད་གཅིག་ཏུ་བརྟན་གཡོ་བའི། །སྙན་པ་དག་ནི་བསྲུང་བར་གནས། །དམ་པའི་ཆོས་ནི་སྤྲུལ་པའི་སྐུ། །ས་སྟེངས་ན་ནི་ཞི་བར་

འགྱུར། །སངས་རྒྱས་ཀུན་གྱི་སྤྱན་སྔར་ནི། །ས་སྟེངས་ཁྱོད་ཉིད་གཅིག་པུ་གནས། །འདས་དང་མ་བྱོན་པར་གྱུར་དང་། །འགྲོ་ལ་ཕན་ཕྱིར་བཞུགས་པ་རྣམས། །ཁ་ལོ་སྒྱུར་བ་ཁྱོད་གཅིག་པུ། །བླ་ན་མེད་པའི་གོ་འཕང་འཐོབ། །རྡོ་རྗེ་སེམས་དཔའ་བློ་ལྡན་པ། །སླར་ཡང་ཕྱག་རྒྱར་གཞག་པས་ཀྱང་། །དབང་ཆེན་ཐམས་ཅད་གཡོས་ནས་ནི། །ས་གཞི་རྣམ་པ་དྲུག་ཏུ་བསྐྱོད། །དེ་དག་ཐམས་ཅད་མངོན་གྱུར་ཏེ། །སངས་རྒྱས་དམ་ཆོས་བསམ་མེད་པས། །བསམ་གྱིས་མི་ཁྱབ་གོ་འཕང་འཐོབ། །ས་སྟེངས་རྡོ་རྗེ་སེམས་དཔའི་བདག །ནམ་མཁའ་མཛོད་ཀྱི་འོད་ཟེར་ཐོབ། །འཕགས་པ་ཆེན་པོ་རྨད་འབྱུང་ཆེ། །འཇིག་རྟེན་ཡང་དག་འབྱུང་འགྱུར་ཏེ། །ས་གཞི་སྙིང་པོ་འདི་རུ་ཡིན། །དེ་ནས་བཅོམ་ལྡན་རྒྱལ་གྱུར་པས། །ས་བཅུའི་བྱང་ཆུབ་སེམས་དཔའ་ལ། །བརྟན་དང་གཡོ་བའི་གསང་བ་རྣམས། །སྙན་པའི་གསུང་གིས་བཀའ་སྩལ་པ། །ཁྱོད་ནི་བདག་གིས་ཚིམ་པར་བྱ། །བདག་ཉིད་ཆེན་པོ་རྡོ་རྗེ་འཆང་། །རྟག་ཏུ་བག་ཡོད་པར་གྱུར་པས། །བདག་ཉིད་ཆེན་པོས་དེ་ཉིད་བྱ། །དེ་ནས་བཅོམ་ལྡན་འདས་ཞི་བ། །ཆོས་ཀྱི་དབྱིངས་ལ་མཆོག་ཏུ་གཞོལ། །ཆོས་ཉིད་གཅིག་པུ་ཐུགས་ཆུད་ནས། ། ཀུན་མཁྱེན་ཅང་མི་གསུང་བར་འགྱུར། །དེ་ནས་འཁོར་རྣམས་ཐམས་ཅད་ཀྱིས། །ངོ་མཚར་པ་ཡི་ཚིག་གསོལ་པ། །སངས་རྒྱས་ཆེ་བ་བསམ་མི་ཁྱབ། །འཇིག་རྟེན་མགོན་པོས་བསྟན་པ་ཉིད། །དེང་ནས་བཟུང་སྟེ་བདག་ཅག་ཀུན། །རྟག་པ་གཅིག་པུ་མཐར་ཕྱིན་འགྱུར། ། བདག་ཉིད་ཆེན་པོའི་རྡོ་རྗེ་ཅན། །བདེ་བར་གཤེགས་པས་གཏད་པར་འགྱུར། །འཁོར་རྣམས་ཤིན་ཏུ་དགའ་བ་ཡིས། །སྙན་པ་ཡི་ནི་ཚིག་གིས་སྨྲས། །སྐལ་བ་ཆེན་པོ་མཆོག་ཏུ་གྱུར། །ཅི་བགྱི་ཡི་ནི་བཀའ་བསྒོ་སྩལ། །དེ་ནས་དཔལ་ལྡན་རྡོ་རྗེ་འཆང་། །མེ་སྟག་འཕྲོ་བར་གྱུར་པ་ཡིས། །ཐུགས་རྗེར་ལྡན་པའི་ཤུགས་ཀྱིས་སུ། །འཁོར་རྣམས་ལ་ནི་བཀའ་སྩལ་པ། །ཁྲོ་རྒྱལ་རས་རིས་ཆོ་ག་ནི། །རྫུ་འཕྲུལ་ཆེན་པོ་དེ་ཉིད་ཉོན། །གང་ཞིག་སྔགས་ཀྱི་སྒོ་ནས་ནི། །བྱང་ཆུབ་སེམས་དཔའི་སྤྱད་པ་སྤྱོད། །སྔགས་ཀྱི་སྒྲུབ་ཐབས་ལས་

གསུངས་པའི། །དོན་ནི་དེ་ནས་ཐོབ་པར་འགྱུར། །སྔགས་པ་འཆང་བར་གྱུར་པ་དཀོན། །ལུས་ཅན་རྣམས་ཀྱིས་བཟོད་མི་ནུས། །གདུག་པ་ལོག་པར་འདྲེན་པ་ཀུན། །འཇིགས་པའི་གཟུགས་ཅན་སྲིན་པོ་རྣམས། །རིང་པོ་ནས་ནི་རང་མི་མཐོང་། །དཔའ་བོ་དྲེགས་པ་བཅོམ་པ་བཞིན། །ནད་རྣམས་ཐམས་ཅད་རྣམ་པར་གྲོལ། །འཇིགས་པ་ཐམས་ཅད་རྣམ་པར་སྤངས། །ཐམས་ཅད་དབང་ཕྱུག་གོ་འཕང་ནི། །གང་ཞིག་ལག་པའི་ནང་དུ་འཐོབ། །རྒྱུ་སྐར་མེད་ཅིང་གཟའ་སོགས་མེད། །མ་མོ་མེད་ཅིང་ལྷ་ཡང་མེད། །འཇིགས་པ་ཀུན་ལས་རྣམ་གྲོལ་བར། །ས་གཞིའི་དཀྱིལ་འཁོར་འདི་རུ་འགྱུར། །སེམས་ཅན་ཐམས་ཅད་དབང་ཐོབ་ཅིང་། །ས་སྟེངས་སྔགས་ཤེས་རྒྱལ་པོ་ནི། །འཁོར་བཅས་ཀྱིས་མཆོད་སྙན་པར་སྨྲ། །རས་བྲིས་མཐོང་བ་ཤིན་ཏུ་གསལ། །སྐྲ་དང་བྲལ་བ་དེས་བརྟགས་པའི། ། དཔའ་བོས་བཙོངས་པའི་རས་བླངས་ཏེ། །དྲི་དཀར་ཆུ་ཡིས་བཀྲུས་ནས་ནི། །ཀུནྡ་ཟླ་བ་ལྟ་བུར་གཙང་། །ཇི་སྲིད་ངུར་སྨྲིག་མཛེས་པ་རུ། །སླར་ཡང་བྱེད་དུ་གཞུག་པར་བྱ། །བདུག་པ་ཡིས་ནི་བདུག་པར་མཛེས། །ཐམས་ཅད་དུ་ནི་གཙང་སྦྲ་བྱ། །དེ་ནས་དེ་ལྟར་བྱས་ནས་ནི། །ས་གཞི་རབ་ཏུ་བྱུག་པར་བྱ། །དེ་ལ་ཡིད་ནི་དྲི་ཞིམ་སྤོས། །ཤིན་ཏུ་མཛེས་པར་བྱུག་པར་བྱ། །གདུགས་དང་རྒྱལ་མཚན་བ་དན་དང་། །རྔ་དང་དྲིལ་བུ་སྒྲ་སྙན་མཆོག །རྒྱུ་སྐར་ཉི་མ་བཟང་པོ་ལ། །རྩ་བའི་སྔགས་ནི་རབ་བསྔགས་པ། །ཡིད་དུ་འོང་བའི་བུམ་པ་ནི། །དྲི་ཡི་ཆུ་ཡིས་ཡོངས་བཀང་ནས། །སྔགས་པས་ཆོ་ག་བཞིན་དུ་གཞག །ཞལ་ཟས་གཏོར་མ་ཆོ་ག་བཞིན། །དེ་ལྟར་འདི་ཀུན་བྱས་པ་ཡིས། །རྒྱ་ཆེ་བར་ནི་བྱས་པའི་ཆར། །རོལ་མོའི་ལས་ནི་ལེགས་བསླབས་པས། །སྐལ་བ་ཆེན་པོ་དེ་རུ་བོད། །དེ་ནས་གསོ་སྦྱོང་སྦྱིན་པར་བྱ། །བྱང་ཆུབ་སེམས་ནི་ཁྱད་དུ་འོང་། །སྐལ་བ་ཆེན་པོ་དེ་མཆོད་བྱ། །གོས་དང་རྒྱན་གྱིས་བརྒྱན་པ་ཡིས། །དེ་ནི་ཡང་དག་པར་མཆོད་ནས། །དེ་ནས་ཤིན་ཏུ་དབེན་པ་རུ། །དེ་ནས་བློ་ལྡན་ཐིག་གདབ་བྱ། །རས་ཀྱིས་ཁ་ནས་གཡོག་

པར་བྱ། །ཁ་ཚར་དང་བཅས་རིང་པོར་གཞག །བློ་ལྡན་དེ་དབུས་བྲི་བ་ནི། །ཁྲོ་བོ་ཤིན་ཏུ་མཐོང་དཀའ་བ། །ལྟོ་བ་ཆེ་ལ་ཤིན་ཏུ་ཁྲོས། །ལག་འགྲོའི་བདག་པོ་ཕྱག་བཞི་པ། །ཞལ་ནི་རྣམ་འགྱུར་ཟུར་གྱིས་གཟིགས། །ལྗགས་ལ་རཀྟ་རྣམ་པར་འཛག ། མཆེ་བ་གཙིགས་ཤིང་ཤིན་ཏུ་འཇིགས། །སྤྲིན་ཕུང་གཏིབས་པ་ལྟ་བུའི་འོད། །སྤྱན་དག་ཉི་མ་འཆར་ཀ་འདྲ། །གསུམ་པ་དུ་བ་ལྟ་བུའོ། །གར་མཛད་ཧཱི་སྒྲོགས་པར་བྱུང་བ། །ཀླུ་ཡི་འོད་ཀྱིས་ཚོགས་རང་བཞིན། །ཐོད་པ་རློན་པའི་ཕྲེང་བ་ནི། །ཚར་བཞི་ལྟ་བུར་བལྟས་པ་ཡི། ། འཇིགས་པ་ཆེན་པོའི་དབུ་ལ་བརྒྱན། །གཡོན་ངོས་ཟུར་ཕུད་རྣམ་པར་འཕྱང་། །མེ་སྟག་དང་བཅས་མེ་འོད་ཀྱིས། །རྡོ་རྗེ་གཡས་ཀྱི་ཕྱག་ནའོ། །འོད་ཟེར་འབར་བ་ལྷག་པ་ཡི། །རལ་གྲི་གཉིས་པ་ན་ནི་བསྣམས། །གཡོན་པ་ཡིས་ནི་ཞགས་པ་བསྣམས། །གཉིས་པ་ཡིས་ནི་སྡིགས་མཛུབ་མཛད། །སྐུ་ལ་སྦྲུལ་གྱི་རྒྱན་གྱིས་བརྒྱན། །ནོར་རྒྱས་བུ་ཡིས་སྐ་རགས་བྱས། །ཐོད་པ་རློན་པའི་ཕྲེང་བ་ནི། །མཆོད་ཕྱིར་ཐོགས་སུ་སྤྲས་པ་ནི། །དཔའ་བོ་ན་བཟའ་ངུར་སྨྲིག་བསྣམས། །རིན་ཆེན་རྡོ་བའི་སྟེང་དུ་ནི། །གཡས་བརྐྱང་བ་ཡི་ཞབས་ཀྱིས་བཞུགས། ། འོག་ཏུ་བགེགས་ནི་བྲི་བར་བྱ། །བསྲེགས་པས་འབར་བར་གྱུར་པ་ཡིས། །མྱོགས་པོ་རུ་ནི་གྱུར་པའོ། །རྩ་དང་རྒྱུ་མ་རྣམ་པར་འབྱུང་། །ཁྲག་འཛག་ལྟ་བུར་གནས་པ་ཡིན། །འོག་ཏུ་བློ་ལྡན་སྒྲུབ་པ་པོ། །པུས་མོ་དག་ནི་ས་ལ་བཙུགས། །སྤོས་ཀྱི་སྣོད་ཀྱིས་བྲེལ་བའི་བདག ། མཆོད་ཡོན་སྣོད་ནི་འཛིན་པར་བརྩོན། །འདི་ནི་རས་བྲིས་རབ་མཆོག་ཏུ། །རྫོགས་སངས་རྒྱས་ཀྱིས་རབ་ཏུ་གསུངས། །རས་བྲིས་འདི་ཡིས་དེ་མ་ཐག །སྔགས་པའི་མ་གྲུབ་པ་ཡང་འགྲུབ། །ཁྲོ་བོའི་རྒྱལ་པོ་ངོ་མཚར་བ། །ཐམས་ཅད་གདུང་བྱེད་ཡང་དག་བྲི། །ཤེས་རབ་ཆེན་པོས་རི་མོ་མཁན། །སྟོན་མོ་དྲངས་ཏེ་ཡོན་ཡང་སྦྱིན། །པིར་ནི་སར་པའི་མཚན་མ་དང་། །རྫ་མཁན་སྣོད་ནི་སར་པ་སྟེ། །མཚན་མ་བྱེ་བྲག་ཕྱེད་པའོ། །ཡང་ན་ཐམས་ཅད་འབྱུང་བ་ཡིན། །དེ་ལྟར་ཐམས་ཅད་གྱུར་བལྟས་ནས། །དྲི་ཡི་རས་ཀྱིས་དགབ་པར་བྱ། །

ས་སྟེངས་ཤིན་ཏུ་གསང་བ་སྟེ། །སུ་ལའང་བསྟན་པར་མི་བྱའོ། །གང་གིས་ཁྲོ་བོ་འདི་མཐོང་བ། །མི་ཤེས་དྲན་པ་འཁྲུལ་བར་འགྱུར། །སྐྱེ་བོ་ནད་ཀྱིས་འཁྲིགས་ནས་ནི། །དེ་མ་ཐག་ཏུ་བརླག་པར་འགྱུར། །སྔགས་པ་དངོས་གྲུབ་འདོད་པ་ཡིས། །རྟག་ཏུ་བག་ཡོད་པར་གྱུར་པས། །སྔགས་པས་རྟག་ཏུ་རས་བྲིས་འདི། །རྟག་པར་རྒྱུན་དུ་བསྲུང་བར་བྱ། །སྔགས་ཀྱི་སློབ་དཔོན་དག་གིས་བཤད། །རྫོགས་པའི་སངས་རྒྱས་དཔའ་བོ་རྣམས། །འདི་རྣམས་བསམ་གྱིས་མི་ཁྱབ་པའི། །ཡོན་ཏན་རབ་ཏུ་སྒྲུབ་པར་བྱེད། །ས་སྟེངས་དཀྱིལ་འཁོར་རྩ་བའི་སྔགས། །ཡོན་ཏན་གནས་སུ་གྱུར་པ་ཡིས། །དེ་དག་ཐམས་ཅད་བསྒྲུབ་པར་བྱ། །གསང་སྔགས་མ་ལུས་བསམ་མི་ཁྱབ། །བསམ་གྱིས་མི་ཁྱབ་འབྲས་བུ་འབྱུང་། །གསང་སྔགས་སྐུ་ཆེན་ཁྲོ་བོ་འདི། །བཅོམ་ལྡན་ཐུབ་པ་ཞེས་ནི་བྱ། །ཁྲོ་བོའི་རྒྱལ་པོ་བློ་ལྡན་གྱིས། ། གསང་སྔགས་འདི་ནི་བཀླགས་པས་འགྲུབ། །ཁྲོ་རྒྱལ་འདི་ནི་བསམ་མི་ཁྱབ། །སྔགས་ཀྱང་བསམ་གྱིས་མི་ཁྱབ་འདོད། །ཐམས་ཅད་བསམ་མེད་གོ་འཕང་འཐོབ། །བཀླགས་པས་འགྲུབ་པར་གསུངས་པ་ཡིས། །སྔགས་པ་བདག་གིས་མི་ནུས་སོ། །སྔགས་པ་བློ་དང་ལྡན་པ་ནི། །གལ་ཏེ་མཚམས་མེད་ལྔ་བྱས་ཀྱང་། །སྐྱེ་བོ་དེ་ཡི་བསམ་པ་ནི། །ཡོངས་སུ་རྫོགས་པར་བྱེད་པ་ཡིན། །དེ་བས་རྣམ་པ་ཐམས་ཅད་དུ། །སྔགས་འདི་འབྲས་བུ་བསམ་མེད་འབྱུང་། །རྟག་ཏུ་མངོན་པར་སྦྱངས་གྱུར་ན། །སྔགས་པའི་འབྲས་བུ་བསམ་མེད་འབྱུང་། ། རས་བྲིས་གཉིས་པར་གྱུར་པ་ནི། །བཤད་ཀྱིས་ཕན་པའི་སེམས་ཀྱིས་ཉོན། །ཡོན་ཏན་རྒྱ་ཆེ་བསམ་མི་ཁྱབ། །རྫོགས་སངས་རྒྱས་ཀྱིས་ཡང་དག་གསུངས། །ངུར་སྨྲིག་རས་ནི་བླངས་ནས་སུ། །དྲི་ཡི་ཆུ་ཡིས་ཡོངས་སུ་དགང་། །ཚེས་གྲངས་མེད་ཅིང་རྒྱུ་སྐར་མེད། །གསོ་སྦྱོང་སྨྱུང་བ་ལ་སོགས་མེད། །རི་མོ་མཁན་བཟང་བཙལ་ནས་སུ། །མཁས་པས་རི་མོ་བྲི་བར་བྱ། །སངས་རྒྱས་མགོན་པོ་རྫོགས་སངས་རྒྱས། །ཏིང་ངེ་འཛིན་རྣམས་རིམ་བྲལ་བ། །འཁོར་ལོས་སྒྱུར་བར་གྱུར་པའི་སྐུ། །འོད་ཟེར་སྣ་ཚོགས་ཉམས་པའི་འོད། །བྱང་ཆུབ་དཔག་

བསམ་ཤིང་དང་ནི། །གདུགས་དང་རྒྱལ་མཚན་རྣམ་པར་བརྒྱན། །ལོགས་སུ་འདབ་ཆགས་རྒྱལ་པོ་ནི། །སྙིམ་པ་མེ་ཏོག་གིས་བཀང་བྱ། །གཡས་ན་བཞུགས་པའི་དཔའ་བོ་ནི། །ཐུབ་པ་ཆེན་པོ་འཇིག་རྟེན་གཙོ། །སྣ་ཚོགས་པ་ཡི་རྒྱན་གྱིས་བརྒྱན། །བླ་གོས་ཕྲག་པ་གཅིག་ཏུ་གཟར། །ཐལ་མོ་སྦྱར་ཏེ་འདུད་པ་ནི། །རྟག་ཏུ་བཞུགས་པ་བལྟ་བར་བྱ། །གཡོན་གྱི་དྲུང་ན་བཞུགས་པ་ནི། །སྙེམས་ཚུལ་དང་བཅས་ཞལ་བཞད་པ། །གཡས་ཀྱི་ཕྱག་གིས་སྤྱི་བོར་ནི། །རྡོ་རྗེ་འདི་ནི་རབ་འབར་བསྣམས། །དཔའ་བོ་ཆེན་པོ་ཅོད་པན་ཅན། །རྒྱན་རྣམས་ཀུན་གྱིས་རྣམ་པར་བརྒྱན། །རས་བྲིས་ཆ་ཡི་མཚན་མ་ནི། །བསམ་པ་ཐམས་ཅད་རྫོགས་པར་བྱེད། །འོག་ཏུ་ཁྲོ་བོ་མི་གཡོ་བ། །རལ་གྲི་ཞགས་པས་རྣམ་པར་བརྒྱན། །རྡོ་བ་དམར་པོའི་གདན་སྟེང་ན། །འོད་ཟེར་ཚོགས་ཀྱི་ནང་ན་བཞུགས། །འབར་བའི་འོད་ཀྱིས་ཁོར་ཡུག་བསྐོར། །མཆུ་ཡིས་མཆུ་མནན་ཟུར་མིག་གཟིགས། །བགེགས་ཀུན་སྲེག་པར་གྱུར་པ་ནི། །དུས་ཟད་མེ་འོད་ལྟ་བུར་འབྱུང་། །སྒྲུབ་པ་པོ་ནི་དངོས་སོང་བལྟ། །སྤོས་ཀྱི་ཁང་བུ་ལག་ན་ཐོགས། །པུས་མོ་གཉིས་ནི་ཡང་དག་བཙུགས། །རྒྱལ་བའི་སྲས་ལ་སེམས་སོང་བ། །དེ་ཡི་འོག་ཏུ་ཁྲོ་བོ་གཙོ། །ཁམས་གསུམ་བརྟན་པར་རྣམ་པར་གནོན། །བཀའ་གནང་བ་ཡི་ལམ་གྱུར་ཅིང་། །དེ་བཞིན་གཤེགས་པ་ལ་གཟིགས་པ། །རིན་ཆེན་སྣ་བདུན་རང་བཞིན་དང་། །སྡོང་བུ་རྒྱས་ལ་ཟེ་བར་བཅས། །འཛིན་པའི་ཀླུ་ཡི་བུ་མོ་ནི། ། དེ་བཞིན་གཤེགས་པ་ལྟ་བུར་འགྱུར། །པདྨ་དཀར་པོ་མགོན་པོ་ནི། །འཇིག་རྟེན་གཙོ་བོ་ཐུགས་རྗེའི་བདག །པདྨ་དམར་པོ་ཡང་དག་བཤད། །བདེ་གཤེགས་ལས་བྱུང་རྡོ་རྗེ་ཅན། །དེ་ལྟར་འདི་དག་ཀུན་བྱས་པའི། །རས་བྲིས་རྒྱལ་པོ་རྫུ་འཕྲུལ་ཆེ། །རས་བྲིས་འདི་ནི་མཐོང་བ་ཡིས། །སྡིག་པ་ཐམས་ཅད་རྣམ་པར་སྤངས། །རྟོག་པའི་ཞགས་པ་འཇིགས་པས་འཁྲིགས། །ངན་སོང་རྣམས་ནི་རྒྱུན་ཆད་འགྱུར། །ཐམས་ཅད་དབང་ཕྱུག་གོ་འཕང་འཐོབ། །རྒྱལ་བ་སྐྱེས་མཆོག་འབྱུང་བར་འགྱུར། །གཟའ་རྣམས་ཀུན་གྱིས་གཟུང་བ་དང་། །ནད་རྣམས་

ཀུན་གྱིས་ཉེན་པ་དང་། །འཇིགས་པ་ཀུན་གྱིས་འདིར་ཟིན་རྣམས། །ཆོ་ག་མཐོང་བས་གྲོལ་བར་འགྱུར། །སེམས་ཅན་ཀུན་ལ་བརྩེ་བར་འགྱུར། །སེམས་ཅན་ཐམས་ཅད་དབང་དུ་བྱེད། །ཐམས་ཅད་དབང་ཕྱུག་གོ་འཕང་འཐོབ། །རྟག་ཏུ་རས་བྲིས་བལྟ་བར་བྱ། །རྟག་ཏུ་བག་ཡོད་པར་གྱུར་ནས། །གཙང་ཞིང་ཚུལ་ཁྲིམས་རྣམ་པར་བརྒྱན། །རས་བྲིས་ཡང་དག་མཆོད་བྱས་ནས། །དེ་ཡི་ཚེ་ན་སངས་རྒྱས་འཐོབ། །དེ་ནས་རྡོ་རྗེ་འཆང་ཆེན་བདག །ཐུགས་ནི་རྣལ་འབྱོར་གཅིག་པུར་བཞུགས། །སེམས་ཅན་བདེ་བ་སྟེར་བ་ཡི། །འདོད་པར་གྱུར་པའི་རྟོག་པ་གསུངས། །ཞི་བ་དང་ནི་རྒྱས་པ་དང་། །དབང་དུ་བྱ་དང་མངོན་སྤྱོད་དེས། །ལས་འདི་མདོ་རུ་བསྡུས་ནས་ནི། །སྔགས་པས་ས་སྟེངས་དཀྱིལ་འཁོར་དུ། །རས་བྲིས་སྒྲུབ་པར་འདོད་པ་ནི། །རྫུ་འཕྲུལ་ཆེ་དེ་རྟག་ཏུ་ཉོན། །དཔའ་བོ་གཅིག་གི་བདག་ཉིད་ཆེ། །གཙོ་བོ་བསྟན་པའི་དོན་མཛད་པའི། །ལུས་ཅན་ཀུན་ལ་གསུངས་པ་ཡི། །དེ་ཡི་རྟོག་པ་ཡང་དག་བཤད། །མགོན་པོ་འཕྲལ་དུ་ལས་མཛད་པ། །རྟག་ཏུ་གདུལ་དཀའ་འདུལ་མཛད་པ། །རྒྱལ་པོ་ངན་པར་བཤད་པ་དང་། །བསྟན་ལ་གནོད་པ་བྱེད་པ་ཅན། །དེ་རྣམས་བརླག་པར་བྱ་བའི་ཕྱིར། ། ཁྲོ་བོ་འདི་ནི་རབ་ཏུ་སྦྱར། །གང་ཡང་འདི་རུ་གསུངས་པ་གཞན། །བསྟན་པ་ལ་ནི་གནོད་བྱེད་པ། །གནོད་སྦྱིན་སྲིན་པོ་གྲུལ་བུམ་དང་། །ལྷ་སོགས་མིའམ་ཅིར་བཅས་པ། །དེ་རྣམས་གཞོམ་པར་བྱ་བའི་ཕྱིར། །ཁྲོ་བོའི་རྒྱལ་པོ་རབ་ཏུ་སྦྱར། །ནད་རྣམས་ཐམས་ཅད་རབ་ཏུ་གྲོལ། །ཕ་རོལ་ཡུལ་འཁོར་རྣམ་པར་འཇོམས། །འདི་ན་དམག་དཔུང་བྱེད་འགྱུར་བ། །གདུག་པའི་སེམས་ཅན་བདུད་རྣམས་ལ། །ཁྲོ་བོའི་རྒྱལ་པོ་རབ་སྦྱར་ན། །བསམ་མི་ཁྱབ་པའི་སྟོབས་གནོན་ཏོ། །བསྐྲད་པ་དང་ནི་གསོད་པ་ཉིད། །འཇིག་རྟེན་གསུམ་པོ་བརླག་པའམ། ། རྟག་ཏུ་སྨྱོ་བར་བྱེད་པ་ན། །འདི་ནི་རྟག་ཏུ་སྦྱར་བར་བྱ། །མགོན་པོའི་རས་བྲིས་མཆོག་གང་གི། །ལག་ཏུ་ཆུད་པར་གྱུར་པ་ན། །དེ་ནི་ས་སྟེངས་སྙིང་པོ་རུ། །ལུས་ཅན་འཚོ་བ་འབྲས་བུ་བཅས། །དེ་ཚེ་དཀྱིལ་འཁོར་རབ་ཏུ་བཞུགས། །ཕྱག་རྒྱའི་ལས་ནི་རྣམ་པར་སྦྱར། །

གུས་པར་འཛིན་པའི་སྔགས་པ་ནི། །གཙང་ཞིང་ངང་ཚུལ་རྣམ་པར་བརྒྱན། །བླ་མ་མཉེས་པར་ཡང་དག་བྱེད། །ཆོ་གའི་རིམ་པ་ཡོན་ཕུལ་བ། །གསང་སྔགས་གང་ཡང་རུང་གཟུང་ནས། །ཕྱག་རྒྱ་སྦྱིན་པ་ཡོངས་སུ་གཟུང་། །བླ་མ་ལ་ནི་རྗེས་གནང་ཐོབ། ། ས་སྟེངས་སྒྲུབ་པ་བརྩོན་པར་བྱེད། །དུར་ཁྲོད་དང་ནི་རི་བོའི་རྩེ། །ལམ་གྱི་བཞི་མདོ་འམ་མཚན་མ་གཅིག །གང་དུ་ཡིད་ནི་ཉམས་དགའ་བའི། །གནས་དེ་ཉིད་དུ་བརྩམ་པར་བྱ། །སློང་མོ་གཅིག་པུའི་ཟས་ཟ་འམ། །ཡང་ན་རྩ་བ་འབྲས་སོགས་ཟ། །དབེན་ཞིང་ཅ་ཅོ་མེད་པའི་སར། ། དེ་རུ་འབུམ་ཕྲག་གཅིག་བཟླས་བྱ། །འབུམ་ཕྲག་ཡོངས་སུ་རྫོགས་ནས་ནི། །ཨ་པ་མརྒའི་ཡམ་ཤིང་སོགས། །མངར་གསུམ་དང་ནི་ལྡན་པར་བསྲེག །འབུམ་ཕྲག་གཅིག་ཏུ་ཚང་བ་ན། །དེ་ནས་ཟླ་བ་ཉ་ཡི་ནི། །དུས་ཚིགས་ཀྱི་ནི་སྔོན་དུ་བསྡད། །སྒྲུབ་ཐབས་འདི་ནི་རྟོགས་པ་ཡིས། །བསྲུང་བའི་ཆོ་ག་ཚུལ་བཞིན་བྱ། །རལ་གྲི་ལ་སོགས་མཚོན་ཆ་གསུངས། །ཡང་ན་གང་ཡང་རུང་བ་གསུངས། །དེར་གནས་འདི་ནི་རབ་ཏུ་ཞུགས། །སྒྲུབ་པ་པོ་ཡི་གང་ཟག་བཞུགས། །ནམ་ཕྱེད་སྒྲ་ནི་བྱུང་བ་ན། །རས་བྲིས་མདུན་དུ་བཞུགས་སུ་གསོལ། ། གསང་སྔགས་བཟླས་ཏེ་ཐུན་གཞག་ལ། །འདི་ནི་ནང་གི་རྣམ་དག་གནས། །དེ་ནས་དེ་ཡི་མཚན་མ་ནི། །དེར་ནི་དུ་མ་འབྱུང་བར་འགྱུར། །སྙན་པའི་རྔ་ཡི་སྒྲ་མང་ནི། །ཡང་ན་མེ་ཏོག་ཆར་དུ་འབབ། །གནས་སུ་ལྷ་ཡི་བུ་འོངས་ཏེ། །སྣ་ཚོགས་རྔ་ཡི་སྒྲ་དང་ཡང་། །མིའམ་ཅིས་ནི་རྣམ་བརྒྱན་པ། །གླུ་ནི་སྙན་པར་ལེན་པར་བྱེད། །ཚངས་དང་བརྒྱ་བྱིན་ལ་སོགས་ལྷ། །རྫུ་འཕྲུལ་ཆེན་པོ་དེར་འོངས་ནས། །མེ་ཏོག་གི་ནི་ཆར་ཡང་འབེབས། །འདུད་ཅིང་ཤིན་ཏུ་བཀའ་སྩོལ་ཞུ། །རིག་པ་འཛིན་པས་མེ་ཏོག་གི། །ཆར་པས་ས་སྟེངས་ཁེངས་པར་ཕབ། ། སྣ་ཚོགས་རྔ་ཡི་སྒྲ་དང་ནི། །རབ་ཏུ་བདེ་ཞིང་ཡིད་འཕྲོག་པ། །ས་སྟེངས་དེ་རུ་ཀུན་ཁེངས་པར། །གླུ་སྙན་པ་ཡི་སྒྲ་ཡང་ལེན། །བྱང་ཆུབ་སེམས་དཔའ་ཆེན་པོའི་བདག །ས་བཅུའི་གནས་ཀྱི་དབང་ཕྱུག་རྣམས། །བྱང་ཆུབ་སེམས་དཔའ་བློ་ལྡན་པས། །ཐུགས་རྗེ་ཅན་བདག་

བཀའ་སྩོལ་ཏེ། །དཔའ་བོ་ཆེན་པོ་བུ་ཁྱོད་ལེགས། །སྲིད་པའི་རྒྱ་མཚོ་རྣམ་པར་རྒལ། །བུ་ཁྱོད་བླ་མེད་གོ་འཕང་ནི། །རྟུལ་ཕོད་པ་ཡི་གནས་ཐོབ་པའོ། །བྱང་ཆུབ་སེམས་དཔའ་མཉམ་ཉིད་འགྱུར། །འགྲོ་ལ་གཅིག་པུ་ཕན་པར་འགྱུར། །བུ་ཁྱོད་སངས་རྒྱས་ཐམས་ཅད་དེ། ། སྐྱོན་རྣམས་ཐམས་ཅད་རྣམ་པར་སྤངས། །དེ་ནས་ཤར་གྱི་ཕྱོགས་ཆ་རུ། །གྲངས་མེད་དུ་མའི་ཚད་གྱུར་པ། །ལྷ་ཡི་བཞོན་པའི་མེ་ཏོག་ལྡན། །སླར་ཡང་དེ་ཡི་མདུན་ན་གནས། །རིན་ཆེན་གདུ་བུའི་དྲ་བ་ནི། །ཕྱོགས་ཀུན་དུ་ནི་ཀུན་དུ་གཏིབས། །མུ་ཏིག་གི་ནི་ཆུན་འཕྱང་ཅན། ། གདུགས་དང་རྒྱལ་མཚན་བ་དན་སྤྲས། །རིན་ཆེན་སྣ་ཚོགས་རང་བཞིན་གདུགས། །ཉི་མ་ལྟ་བུར་སྣང་བར་བྱེད། །སྟེང་དུ་རིན་ཆེན་བླ་རེ་ཡིས། །རི་བོའི་ཕྱོགས་དང་མཉམ་པར་ཕུབ། །བྱེ་བ་དུ་མའི་རིག་འཛིན་ནི། །ཀུན་ཀྱང་ལྷབ་ལྷུབ་རྒྱན་གྱིས་སྤྲས། །ཀུན་ནས་ཡོངས་སུ་བསྐོར་ནས་ནི། །དེ་ཡི་མདུན་དུ་མོད་ལ་གནས། །སྔགས་པ་དངོས་གྲུབ་འདོད་པ་ཡིས། །ཕྱག་ན་རྡོ་རྗེ་དཔལ་དང་ལྡན། །དེ་ནི་མྱུར་བར་བཟླས་པར་བྱ། །རྫུ་འཕྲུལ་ཆེན་པོ་བྱོན་གྱི་བར། །བདག་ཉིད་ཆེན་པོ་དེར་བྱོན་ནས། །མཚན་མ་འདི་དག་འབྱུང་བར་འགྱུར། །ས་གཞི་རྣམ་པ་དྲུག་ཏུ་གཡོས། ། ས་གཞི་མེ་ཏོག་གཅལ་དུ་འགྲེམས། །ཆེ་བའི་བདག་ཉིད་སྣ་ཚོགས་དྲི། །ས་སྟེངས་རབ་ཏུ་ཞིམ་པོར་འགྱུར། །ཕྱོགས་བཞི་རུ་ནི་རྔ་ཡི་སྒྲ། །རོལ་མོ་ལ་སོགས་བརྡུང་བ་འབྱུང་། །ཧ་ཧ་ཞེས་སྒྲོགས་སྒྲ་ཆེན་པོ། །སྒྲ་ནི་ཕྱོགས་བཅུར་ཐོས་པར་འགྱུར། །དེར་བྱོན་བདག་ཉིད་ཆེན་པོ་ལ། །ཡིད་ནི་དད་པར་གྱུར་པ་ཡིས། །མཆོད་ཡོན་ཞལ་བསིལ་བརྗོད་ནས་དབུལ། །དྲི་དང་མེ་ཏོག་རིམ་ཇི་བཞིན། །དེ་ནས་མྱུར་བར་བརྗོད་བྱ་བ། །ལེགས་པར་འོངས་སོ་བརྗོད་པར་བྱ། །སྡིག་པའི་དགྲ་ཡིས་ཟིན་པ་ན། །དཔའ་བོ་ཆེན་པོ་བདག་སྡུག་བསྔལ། །མགོན་ཁྱོད་བདག་ལ་བརྩེ་བར་མཛོད། །དེ་ནས་བདག་ཉིད་ཆེན་པོ་འདི། །ཕྱག་ན་རྡོ་རྗེ་རྫུ་འཕྲུལ་ཆེ། །སྔགས་པ་བློ་དང་ལྡན་པ་ལ། །སྙན་པའི་ཚིག་གིས་བཀའ་སྩལ་པ། །དཔའ་བོ་ཆེན་པོ་བུ་ཁྱོད་ལེགས། །རྙེད་པར་དཀའ་བ་ཁྱོད་ཀྱིས་མཐོང་། །ཁྲོ་བོའི་རྒྱལ་པོ་རྫུ་འཕྲུལ་ཆེ། །བུ་ཁྱོད་ཀྱིས་ནི་འདི་བསྒྲུབས་

པས། །ཤིན་ཏུ་སྡུག་བསྔལ་ལང་ལོང་འཁྲིགས། །འཁོར་བའི་རྒྱ་མཚོ་ལས་ཁྱོད་བརྒལ། །སླར་ཡང་སྐྱེ་བའི་འཇིགས་པ་མེད། །འཆི་བའི་འཇིགས་པ་འཇིགས་རུང་མེད། །རྫོགས་སངས་སེམས་ཅན་མཉེས་གཤིན་པ། །བདག་ཉིད་ཆེན་པོ་རྣམས་མཐོང་བ། ། ཕྱོགས་བཅུ་དག་ན་བཞུགས་པའི་མགོན། །རྟག་ཏུ་དམ་ཆོས་གསུང་བར་འགྱུར། །དེ་ལྟར་རིག་ནས་འདི་ཡིས་ནི། །བདག་ཉིད་ལག་པ་ནས་གཟུང་སྟེ། །བདག་ཉིད་ཆེན་པོའི་བཞོན་པ་ནི། །བསམ་མེད་ཡོན་ཏན་ཀུན་འབྱུང་བ། །བསྐྱོན་དེར་གནས་པར་གྱུར་ནས་ནི། །སྔགས་ཤེས་ཇི་ཙམ་འདོད་ཀྱི་བར། །སངས་རྒྱས་ཞིང་རྣམས་སྟོན་པར་བྱེད། །སེམས་དཔའ་བསོད་ནམས་ཉེར་འཚོ་བས། །དེ་ཙམ་ཚམ་ཚོམ་མེད་པར་འགྲོ། །དེ་ནས་དེ་ཚེ་ཆེ་བའི་བདག །ལྷ་ཡི་བཞོན་པ་མཛེས་པ་ལ། །དེ་རུ་བསྐྱོན་པར་གྱུར་ནས་ནི། །དེ་ནས་རྡོ་རྗེ་ཅན་གྱུར་པ། །མི་གཡོ་རྫུ་འཕྲུལ་ཆེ་ལྡན་ཚིམ། །དེ་ནས་ལྷ་ཡི་བཞོན་པ་བཅིབས། །རིག་པ་འཛིན་པའི་ཚོགས་ཀྱིས་བསྐོར། །གླུ་ཆེན་རྔ་ཡི་སྒྲ་དང་ནི། །རིག་པ་འཛིན་པའི་གླུ་སྒྲ་སྒྲོགས། །བྱེ་བ་དུ་མ་བསམ་མེད་པའི། །རིག་པ་འཛིན་པའི་མཁའ་ལྡིང་གིས། །དེ་ཡི་ཚེ་ན་བསྐོར་ནས་གྲོལ། །འདི་ནི་སངས་རྒྱས་ཞིང་རྣམས་སུ། །རིག་པ་འཛིན་པ་ཐམས་ཅད་ཀྱི། །འཁོར་ལོས་སྒྱུར་བའི་མཁའ་ལྡིང་ཡིན། །བསམ་གྱིས་མི་ཁྱབ་ཡོན་ཏན་བརྙེས། །བསྐལ་པ་གྲངས་མེད་པ་རུ་འཚོ། །ཉི་མ་དང་ནི་ཟླ་བའི་འོད། །དཔལ་ལྡན་གདུལ་དཀའ་འདུལ་མཛད་པ། །བློ་བཟང་གིས་ནི་ཀུན་སྤྱད་ན། ། སངས་རྒྱས་ཞིང་ནི་གྲངས་མེད་ན། །མཆོད་གནས་འདི་ནི་སྣང་བར་བྱེད། །བསམ་མེད་པ་ཡི་དམ་ཆོས་ཉན། །བློ་ལྡན་གང་ཞིག་ཐོས་གྱུར་པས། །སངས་རྒྱས་ཡོན་ཏན་བསམ་མེད་འབྱུང་། །ཁྲོ་བོའི་རྒྱལ་པོ་བློ་ལྡན་པའི། །དངོས་གྲུབ་འདི་ནི་ཡང་དག་བཤད། །གཞན་ཡང་གཞན་ལ་ཅི་རིགས་པར། །མཚུངས་མེད་སྲུང་བར་བྱེད་དེ་ཉོན། །རས་བྲིས་གཉིས་པ་འདི་ཡིས་ནི། །བསམ་གྱིས་མི་ཁྱབ་གྲངས་མེད་ལས། །རྫོགས་པའི་སངས་རྒྱས་ཁྱེད་ཀྱིས་མཁྱེན། །ཤཱཀྱ་ཞེས་བྱ་བས་ནི་གསུངས། །ཞི་བ་དང་ནི་རྒྱས་པ་དང་། །དབང་དང་མངོན་སྤྱོད་

དེ་བཞིན་དུ། །རས་བྲིས་གཉིས་པར་ཚུལ་བཞིན་དུ། །ཇི་ལྟར་རིགས་པར་བྱ་བ་ཡིན། །རས་བྲིས་གཉིས་པ་འདི་ཡིས་ནི། །རྒྱལ་བས་སྒྲུབ་ཐབས་གང་གསུངས་པ། །གལ་ཏེ་ས་སྟེངས་སྒྲུབ་བྱེད་ན། །འདི་ནི་ཉིད་དུ་ཆོ་གས་བསྒྲུབ། །སྒྲུབ་ཐབས་ཆོ་ག་བསམ་མི་ཁྱབ། །འདི་ནི་བསམ་མི་ཁྱབ་པས་གསུངས། །འབྲས་བུ་བསམ་གྱིས་མི་ཁྱབ་པ། །རྫོགས་སངས་རྐང་གཉིས་མཆོག་གིས་གསུངས། །ཚེས་གྲངས་མེད་ཅིང་རྒྱུ་སྐར་མེད། །འདི་ལས་སྨྱུང་བར་གནས་པ་མེད། །ལྷག་མ་ལྷག་མ་མིན་ཡང་རུང་། །སླར་ཡང་འབད་པས་བསྒྲུབ་པར་བྱ། །འབུམ་ཕྲག་གཅིག་ནི་བཟླས་བརྗོད་ན། །མཚམས་མེད་ལྔ་བྱས་སྔགས་པས་ཀྱང་། །ལས་རྣམས་ཐམས་ཅད་ཀུན་ནས་སུ། །བདག་ཉིད་རྒྱལ་བའི་སྐྱེས་མཆོག་འགྱུར། །གསོ་སྤྱད་ལ་སོགས་དཱུར་བས་བྱས། །ཡང་ན་བརྗོད་དེ་བཏབ་པས་སོ། །རིམས་སོགས་ནད་ཀྱིས་བཏབ་པ་དང་། །གདུག་པ་རྣམས་གསོ་བྱེད་པ་དང་། །ནད་རྣམས་ཀུན་གྱིས་ཟིན་པ་དང་། །གཟའ་ཀུན་གྱིས་ནི་རབ་གཟིར་བ། །རས་བྲིས་སྤྱན་སྔར་རབ་གཞག་སྟེ། །ཁྲོ་བོའི་སྔགས་ཀྱིས་བསྔགས་པའོ། །བུམ་པ་ཆུ་ཡིས་ཡོངས་བཀང་ནས། །ནད་ཀྱིས་བཏབ་པའི་མི་ཁྲུས་བྱ། །མཆོག་ཏུ་བདེ་བ་སྦྱིན་པ་ན། །དེ་རྣམས་རྣལ་མར་སོས་པར་འགྱུར། །ས་སྟེངས་གདོན་གྱིས་ཟིན་པ་ཡི། །སྦྱིན་སྲེག་དག་ནི་ཡང་དག་གསུངས། །དཱུར་བ་མངར་གསུམ་གྱིས་བཏགས་པ། །གདོན་རྣམས་ཞི་ཕྱིར་སྦྱིན་སྲེག་བྱ། །སྲིན་པོ་ཡང་ནི་བཤད་པ་དང་། །མཁའ་འགྲོ་མ་དང་རྫུ་འཕྲུལ་ཆེ། །ཤ་ཟ་དང་ནི་གྲུལ་བུམ་དང་། ། མ་མོ་རྫུ་འཕྲུལ་ཆེ་གསུངས་པ། །གཞན་ཡང་གདུག་པ་བྱེད་པ་ཡིས། །ས་སྟེངས་སེམས་ཅན་འཚེ་བྱེད་གང་། །དེ་རྣམས་གཞོམ་པར་བྱ་བའི་ཕྱིར། །ཁྲོ་བོའི་རྒྱལ་པོ་རབ་ཏུ་སྦྱར། །ནད་རྣམས་དང་ནི་གདོན་དག་ལ། །སྨན་གྱི་ཤིང་གི་ཡམ་ཤིང་ནི། །ཨ་རུ་སྐྱུ་རུ་ལ་སོགས་པས། ། སྦྱིན་སྲེག་འདི་ནི་རབ་ཏུ་སྦྱར། །རྒྱལ་སྲིད་ཐོབ་པར་འདོད་པ་ཡིས། །ས་གཞི་སྟེང་ན་གནས་པ་གང་། །དེ་ཡི་ཆོ་ག་འདི་ནི་མཆོག །པདྨའི་ཆོ་ག་སྦྱིན་སྲེག་རིམ། །པདྨ་ཆུ་ལ་འབུམ་ཕྲག་གཅིག །མངར་གསུམ་གྱིས་བཏགས་འདོད་པ་ཡིས། །རས་བྲིས་སྤྱན་སྔར་སྦྱིན་སྲེག་བྱ། །རྒྱལ་པོ་

འདོད་པར་གྱུར་པ་ཡིས། །ཆོ་ག་ཡང་དག་ཚུལ་བཞིན་བྱ། །བློན་པོ་ཐོབ་པར་འདོད་ན་ནི། །དེ་ཡི་ཆོ་ག་འདི་ནི་བཤད། །ཀུ་མུ་ད་ནི་འབུམ་ཕྲག་གསུམ། །འབྲས་བུ་འདོད་པས་སྦྱིན་སྲེག་བྱ། །དེ་ནི་རྒྱལ་པོའི་བློན་པོ་ཉིད། །གང་ཞིག་འདོད་པས་འགྲུབ་པར་འགྱུར། ། ཨ་པ་མརྒ་འབྲས་དག་ནི། །མངར་གསུམ་གྱིས་ནི་བཏགས་ནས་སུ། །སྦྱིན་སྲེག་འབུམ་ཕྲག་གཅིག་བྱས་ན། །ཡུལ་གྱི་བདག་པོའམ་གྲོང་ཁྱེར་འཐོབ། །དྲི་ཞིམ་རྫས་རྣམས་འབུམ་ཕྲག་བདུན། །རས་བྲིས་མདུན་དུ་སྦྱིན་སྲེག་བྱ། །དེ་ནས་སྔགས་པའི་ཡིད་ལ་ནི། །ཅི་འདོད་པ་ནི་ཐོབ་པར་འགྱུར། །གལ་ཏེ་བུད་མེད་བུ་མེད་པས། །བུ་ནི་དོན་དུ་གཉེར་བྱེད་ན། །དཱུར་བ་ཏིལ་དང་འབྲས་སོགས་པས། །སྦྱིན་སྲེག་བྱས་ན་བུ་རྙེད་འགྱུར། །ཁྱོ་ནི་དབང་དུ་བྱེད་འདོད་པས། །དེ་ཡི་གཟེགས་མ་འབུམ་ཕྲག་བསྲེག །བདག་པོ་དབང་དུ་གྱུར་པ་ཡིན། །པདྨའི་ཟེ་བ་པྲི་ཡང་ཀུ། །ཀ་ལི་ཀ་བཅས་བསྲེག་པར་བྱ། །མི་འཁྲུགས་པ་ཡི་ནོར་རྙེད་ཅིང་། །ཤིན་ཏུ་ཡིད་གཅུགས་འབྱུང་བ་ཡིན། །སོ་བའི་འབྲུ་ཡི་སྦྱིན་སྲེག་གིས། །ཡིད་འདོད་མི་ཟད་པ་རུ་བཤད། །འབྲས་ཀྱི་སྦྱིན་སྲེག་བྱས་པ་ཡིས། །མི་ཟད་པ་ཡི་ནོར་ཡང་འབྱུང་། །པདྨའི་ས་བོན་བིལ་བའི་འབྲས། །ཀུ་མུ་ད་ཡི་འབྲས་བསྲེགས་ན། །དེ་ནི་མི་ཟད་ལོངས་སྤྱོད་འཐོབ། །འབྲས་བུ་ཐམས་ཅད་སྦྱིན་སྲེག་པས། །ས་གཞི་རྒྱལ་སྲིད་ཐོབ་པར་འགྱུར། །ཚྭ་དང་ནིམ་པའི་སྦྱིན་སྲེག་གིས། །དགྲ་བོ་དེ་མ་ཐག་ཏུ་འཆི། །དཔའ་བོ་གཅིག་པ་མཐོང་དཀའ་བའི། ། རས་བྲིས་ལེགས་པར་བཀྲམ་ནས་སུ། །དེ་ཡི་སྤྱན་སྔར་རབ་སྦྱར་བྱ། །གཉེན་པོ་གནོད་བྱེད་མངོན་སྤྱོད་ནི། །གནོད་སྦྱིན་ཆེ་དང་རྒྱལ་པོ་ཆེ། །ས་སྟེངས་རང་སེམས་སྙེམས་ཚུལ་ཅན། །མངོན་པའི་ང་རྒྱལ་ང་རྒྱལ་ཆེ། །གདུག་ཅིང་གདུག་པའི་ལས་བྱེད་པ། །དཀོན་མཆོག་གསུམ་ལ་གནོད་བྱེད་དང་། །ཆད་རྟག་གསང་སྔགས་དམ་པ་སྤངས། །གསང་སྔགས་མཆོད་པར་མི་བྱེད་ཅིང་། །དེར་གུས་རྟེན་པ་སྨོད་པར་བྱས། །བཟླས་པས་སུན་ནི་འབྱིན་པ་སྟེ། །དེ་རྣམས་ཕ་རོལ་གནོན་པས་ན། །ལས་ཀྱི་ཆོ་ག་མཐོང་བ་ཡིས། །དེ་རྣམས་ཉིད་ལ་སྦྱར་བར་བྱ། །

སྡིག་པའི་ཡུལ་ཅན་ཆོས་མེད་པ། །འབྱུང་པོ་ཐམས་ཅད་སྲེག་པར་བྱེད། །དེ་རྣམས་ལ་ནི་ལས་སྦྱར་ན། །དེ་མ་ཐག་ཏུ་སྲོག་འཆད་འགྱུར། །སྦྲུལ་གྱི་ཤུབས་ནི་བླངས་ནས་སུ། །དུག་དང་ལྷན་ཅིག་ཕྱེ་མར་བཏབ། །དེ་ནས་ནིམ་པའི་འདབ་བླངས་ལ། །དགྲ་བོའི་མིང་ནི་བྲི་བར་བྱ། ། དབེན་པའི་ས་ཕྱོགས་སུ་གནས་ཏེ། །དུག་གིས་རྟག་ཏུ་བྲི་བར་བྱ། །ཐོད་པ་ལྔ་ནི་བླངས་ནས་སུ། །ཡུངས་མར་གྱིས་བྱུགས་བཀང་ནས་ནི། །ནིམ་པའི་ཤིང་ལ་བློ་ལྡན་གྱིས། །ཆོ་ག་བཞིན་མེ་སྤར་བར་བྱ། །གསུམ་གྱིས་སྒྱེད་པུ་བྱས་ནས་སུ། །གཅིག་ནི་སྟེང་དུ་གཞག་པར་བྱ། །བཞི་པ་ཡུངས་ཀར་གྱིས་བཀང་བ། །དེ་ཡི་སྟེང་དུ་གཞག་པར་བྱ། །སྦྲུལ་གྱི་ཤུབས་ནི་བླངས་ནས་སུ། །མི་དེ་ནང་དུ་གཞུག་པར་བྱ། །དུམ་བུ་རེ་རེར་གཏུབས་ནས་སུ། །ཐོད་པ་རེ་རེར་གཞུག་པར་བྱ། །བརྒྱ་རྩ་བརྒྱད་ནི་མངོན་བསྔགས་ནས། །རས་བྲིས་བྱང་དུ་ཞལ་གཟིགས་ཏེ། །སྔགས་པ་ལྷོ་རུ་ཕྱོགས་པར་བྱ། །ཁྲོས་པས་ཙོག་ཙོག་པོར་འདུག་སྟེ། །སྐྲ་གྲོལ་བ་ཡི་ཁྲོ་བོ་ཉིད། །སྔགས་པས་གདུག་པ་གཙོ་བོར་བྱ། །ཐར་པར་གྱུར་གྱི་བར་དུ་ནི། །འདི་ནི་ཉིན་ཕྱེད་ན་བྱས་ན། །དེ་མ་ཐག་ཏུ་སྲོག་འཆད་འགྱུར། །འཆི་ལྟས་ཀྱི་ནི་འདབ་མ་བླངས། །ཤུན་པའམ་ནི་རྩ་བར་བཅས། །རང་གི་ཁྲག་ནི་ཉིད་དག་དང་། །ཡུངས་མར་དག་ནི་ཡང་དག་ལྡན། །ཚྭ་དང་རྒྱ་སྐྱེགས་ཉིད་དང་ནི། །འདི་དག་ཐམས་ཅད་གཅིག་བྱས་ཏེ། །དབེན་པ་ཡི་ནི་གནས་དག་ཏུ། །རས་བྲིས་བྱང་དུ་ཞལ་བསྟན་ཏེ། །སྔགས་པ་ལྷོ་ཡི་ཕྱོགས་སུ་ཕྱོགས། །མེ་ཡི་ཐབ་ཁུང་བྱས་ནས་སུ། །ཚ་བའི་ཤིང་གིས་ཁྱད་པར་དུ། །ཡམ་ཤིང་ཡང་ནི་རབ་ཏུ་བྱ། །ཚ་བའི་ཤིང་ནི་འབའ་ཞིག་གིས། །དེ་ཉིད་ཀྱིས་ནི་སྦར་བར་བྱ། །སྟོབས་ཆེན་མེ་ཡི་ཐབ་ཁུང་དུ། །ལས་ཀྱི་ཆོ་ག་མཐོང་བ་ཡིས། །སྲེག་བླུགས་བདུན་དུ་བསྲེག་པར་བྱ། །དེ་ནི་ཁྲོ་བོའི་གཟུགས་ཅན་ཏེ། །དེ་རུ་ཡེ་ཤེས་མེ་ནི་སྤར། །རལ་གྲིའི་ཕྱག་རྒྱ་བཅིངས་ནས་ནི། །མཁས་པས་སྔགས་ཀྱི་བཟླས་པ་བྱ། །ཁྲོས་པས་སྲེག་བླུགས་སྟོང་ཕྲག་བརྒྱད། །དེ་ཡི་ཐབ་ཏུ་དབུལ་བར་བྱ། །དང་པོ་བུ་ནི་འཆི་བར་འགྱུར། །གཉིས་པ་ལ་ནི་བཞོན་པར་བཅས། །གསུམ་པ་ལ་ནི་ཡུལ་འཁོར་ཀུན། །བཞི་

པ་ལ་ནི་རང་སྲོག་གོ། །བསྟན་པ་ཡི་ནི་ལས་འདི་ནི། །ཉི་མ་གཅིག་གིས་འབྱུང་བར་འགྱུར། །ཡང་ན་ཡུལ་འཁོར་འཇིག་པའམ། །ས་གཞིའི་བདག་པོ་འཆི་བར་འགྱུར། །རླུང་ནག་ཆར་པ་དེ་བཞིན་བདུད། །མེ་ཡིས་ཚིག་པར་ཡང་འགྱུར་ཏེ། །ཆར་ཆེན་མི་བཟད་པ་ཡི་རླུང་། ། རྡུལ་ཚུབ་ཆར་པ་འབྱུང་བར་འགྱུར། །ཕ་རོལ་དམག་ཚོགས་ཁྲོས་པས་འཚེ། །སྟག་དང་སེང་གེའི་མཆེ་བས་འདེབས། །ཕྱོགས་ཀུན་ནས་ནི་འབྱུང་བ་ཡི། །གནོད་པ་ཆེན་པོ་འབྱུང་བར་འགྱུར། །གདུག་པའི་ལས་ནི་བྱས་པ་ཡིས། །ཉི་མ་དེ་ལ་འབྱུང་བར་འགྱུར། །སྔགས་པ་དང་བ་མེད་པས་ན། །དེ་ནི་ཞི་བར་ག་ལ་འགྱུར། །ཚངས་པ་ལ་སོགས་ལྷ་ཚོགས་དང་། །འཇིག་རྟེན་སྐྱོང་དང་རྫུ་འཕྲུལ་ཆེ། །འཇིག་རྟེན་པ་ཡི་ལྷ་ཀུན་དང་། །གང་ཡང་མ་མོར་བཤད་པ་གཞན། །བྱང་ཆུབ་སེམས་དཔའ་བདག་ཉིད་ཆེ། །ས་བཅུ་གནས་ཀྱི་དབང་ཕྱུག་དང་། །རྫུ་འཕྲུལ་ཆེན་པོ་སངས་རྒྱས་དང་། །སྔགས་པས་ས་སྟེངས་གནས་པ་དང་། །དེ་ནི་བསྲུང་བར་མི་ནུས་ཏེ། །རྒྱལ་པོ་ཁྲོས་པར་གྱུར་པ་ཡིས། །དེ་ནི་བསྲུང་བར་མི་ནུས་སོ། །རང་གི་ཁྲག་གིས་ལན་ཚྭ་བཏགས། །ཚ་བ་ཡང་ནི་ཁྱད་པར་དུའོ། །བདག་ཉིད་ལྷོ་ཕྱོགས་སུ་བལྟས་ཏེ། །རས་བྲིས་བྱང་དུ་ཞལ་ཕྱོགས་ལ། །མེ་ཡི་ཐབ་ཁུང་བྱས་པ་རུ། །ཚེར་མ་ཅན་གྱི་མེ་སྤར་ཏེ། །ཀུན་ནས་ཁྲོས་བཅས་གདུག་པ་ཡིས། །དེ་ནས་དགྲ་བོའི་མིང་བཟུང་ལ། །ཙོག་ཙོག་པུར་འདུག་ཡང་དག་བསྲེག །སྲེག་བླུགས་བདུན་ཕྲག་གསུམ་གཉིས་སམ། །སྟོང་ཕྲག་གསུམ་དུ་མངོན་བསྔགས་ནས། །གདུག་པའི་ལས་ཀྱིས་སྦྱིན་སྲེག་བྱ། །དང་པོ་ལ་ནི་བུ་ཡིན་ཏེ། །གཉིས་པ་ལ་ནི་ཆུང་མར་བཤད། །གསུམ་པ་ལ་ནི་བདག་ཉིད་འགྲོ། །བཞི་པ་ལ་ནི་བཞོན་པ་དཔུང་། །ལྔ་པ་ལ་ནི་རང་གི་ཡུལ། །དྲུག་པ་ལ་ནི་རིགས་རྒྱུད་གཉེན། །བདུན་པ་ཐེ་ཙོམ་མེད་པར་ནི། །ས་གཞིའི་སྟེང་དུ་ཐལ་བར་རློག །ཐུན་ཕྱེད་དང་ནི་དབྱུ་གུ་འམ། །ཉི་མ་ཕྱེད་ནས་ཁྲོས་པ་ཡིས། །ཐགས་ཟངས་རིས་ཀྱང་འཆི་འགྱུར་ན། །སྐྱེ་བོ་ཕྲ་མོ་ལྟ་ཅི་སྨོས། །གལ་ཏེ་བདེ་ལེགས་འགྱུར་འདོད་ན། །རང་གི་ཡུལ་འཁོར་ཕོ་བྲང་འདིར། །འོ་མའི་སྲེག་བླུགས་སྟོང་ཕྲག་གིས། །དེ་

མ་ཐག་ཏུ་རྣལ་མར་འགྱུར། །གསང་སྔགས་འཆང་བས་ས་སྟེངས་སུ། །རྟག་ཏུ་ཡུལ་མེད་བྱེད་འདོད་དམ། །དགྲ་བོ་མྱོས་པར་བྱེད་པ་འམ། །ཡང་ན་དབྱེ་བར་འདོད་པ་ན། །མི་རུས་ཕྱེ་མ་ཚྭ་དང་ནི། །སྐེ་ཚེ་དང་ནི་གནོད་སྦྱིན་འཁྲིགས། །རས་བྲིས་སྤྱན་སྔར་སྲེག་བླུགས་བྱ། ། སྲེག་བླུགས་བདུན་གསུམ་ཡང་ན་ལྷག །སྲེག་བླུགས་ལས་ནི་ཟིན་པ་ན། །ཐེ་ཚོམ་མེད་པར་མྱོས་པར་འགྱུར། །དེ་ནི་ཞི་བར་འདོད་པ་ན། །དཱུར་བའི་འདབ་མ་འོ་མས་བཏགས། །སྟོང་ཕྲག་གཅིག་ཏུ་སྲེག་བླུགས་བྱ། །གལ་ཏེ་སྔགས་པ་འདོད་པ་ན། །དེ་ཡི་ཚེ་ན་རྣལ་མར་འགྱུར། ། དུག་ཉིད་དང་ནི་ཁྲག་དང་ནི། །རུས་པའི་ཕྱེ་མ་ཡང་དག་ལྡན། །ནིམ་པའི་ས་བོན་ལྡན་པ་ནི། །ཡུངས་མར་གྱིས་བཏགས་མཉེ་བར་བྱ། །རས་བྲིས་བྱང་དུ་ཞལ་བལྟས་ལ། །མྱོས་བྱེད་ཤིང་གི་མེ་དག་ལ། །ཁྲོས་དང་ལྡན་པས་སྲེག་བླུགས་ནི། །ཉི་ཤུ་རྩ་གཅིག་སྦྱིན་སྲེག་བྱ། །བརྒྱ་རྩ་བརྒྱད་ནི་སྔགས་བྱས་ནས། །སྟན་ལ་ཙོག་ཙོག་པུར་འདུག་ཅིང་། །སྲེག་བླུགས་ལས་ནི་རྫོགས་པ་ན། །དུ་བ་མེ་ནི་ཀུན་དུ་འཁྲིགས། །བུ་དང་ཕྱུགས་དང་གཉེན་བཅས་པའི། །དགྲ་ཡི་སྲོག་ནི་འཆད་པར་འགྱུར། །མི་ཡི་རུས་པའི་ཕྱེ་མ་བླངས། །དེ་ནས་ནིམ་པ་ལྔ་པར་བླང་། ། བདག་ཉིད་ཀྱི་ནི་ཁྲག་གམ་ནི། །ཡུངས་མར་གྱིས་ནི་བཏགས་བྱས་ལ། །རས་བྲིས་བྱང་དུ་ཞལ་ཕྱོགས་ཏེ། །སྲེག་བླུགས་བདུན་དུ་སྦྱིན་སྲེག་བྱ། །བུ་དང་ཕྱུགས་དང་ཉེ་དུར་བཅས། །དགྲ་སྲོག་དེ་མ་ཐག་ཏུ་སྐེམ། །སེམས་ཅན་གདུག་པའི་རྒྱལ་པོ་དང་། །གཞན་ཡང་ལྷ་ལ་སོགས་པ་དང་། །མ་མོ་རྣམས་ཀྱིས་ས་སྟེངས་སུ། །སྔགས་པ་ལ་ནི་གནོད་བྱེད་པ། །དེ་རྣམས་གཞོམ་པར་བྱ་བའི་ཕྱིར། །སྦྱོར་བ་འདི་ནི་བརྩམ་པར་བྱ། །སྐེ་ཚེ་དུག་གིས་དེ་བཞིན་བཏགས། །ནིམ་པའི་འབྲས་བུ་ཡང་དེ་བཞིན། །ཅི་རིགས་སྦྱིན་སྲེག་བྱས་གྱུར་ན། །དེ་མ་ཐག་ཏུ་སྲོག་འཆད་འགྱུར། །རྩེ་གཅིག་པ་ཡི་ཡིད་ཀྱིས་སུ། །དེ་ཉིད་ཚོགས་རྣམས་མཉན་པར་གྱིས། །གང་གིས་འཕྲལ་དུ་འབྲས་བུ་འབྱུང་། །གསང་བའི་སྦྱོར་བ་བཤད་པར་བྱ། །ནིམ་པའི་འདབ་མ་དུག་གིས་བཏགས། །དེ་ལ་ཁྲག་གིས་མིང་བྲི་བྱ། །ཚ་བ་གསུམ་གྱིས་མེ་སྤར་ཏེ། །

སྔགས་པ་རྟག་ཏུ་ལྷོ་རུ་ཕྱོགས། །རས་བྲིས་བྱང་དུ་ཕྱོགས་པས་དགྲམ། །སྟན་ལ་ཙོག་ཙོག་པུར་འདུག་སྟེ། །ཁྲོས་པའི་ཡིད་ཀྱིས་བསྲེག་པར་བྱ། །སྲེག་བླུགས་བདུན་ལ་ཉི་ཤུ་སྔགས། །རིགས་རྒྱུད་ཕྱུགས་དང་གཉེན་བཅས་པའི། །དགྲ་བོ་དེ་ཡི་ཚེ་ན་འཆི། །དབྱུག་གུ་ཕྱེད་དམ་ཡུད་ཙམ་ཅིག །གང་དུ་ལ་ལར་གནས་ནས་ནི། །སྔགས་པའི་དགྲ་བོ་གནོད་བྱེད་ལ། །སྦྱོར་བ་འདི་ནི་བརྩམ་བྱས་ན། །དགྲ་བོ་དེ་མ་ཐག་ཏུ་འཆི། །ཚིག་འདི་གཞན་དུ་མ་ཡིན་ནོ། །རང་གི་ཁྲག་གིས་ཚ་གསུམ་བཏགས། །དགྲ་བོ་ཡི་ནི་གཟུགས་བརྙན་བྱ། །བློ་ལྡན་ནིམ་པའི་འདབ་མ་ལ། །མིང་བྲིས་གང་དུ་གཞུག་པར་བྱ། །ས་སྟེངས་ནིམ་པའི་ཤིང་ཡང་དག །མཁས་པས་རྣམ་པར་བླངས་ནས་སུ། །ཡང་དག་ཆོ་ག་ཤེས་པ་ཡིས། །དུག་གིས་བསྒོས་ཏེ་བྱུག་པར་བྱ། །ཆོ་ག་བཞིན་དུ་དུག་བྱུགས་ལ། །སྐད་ཅིག་དེ་ལ་སྤར་བར་བྱ། །སྔགས་པ་ལྷོ་རུ་ཕྱོགས་པ་དང་། ། རས་བྲིས་རྟག་ཏུ་བྱང་དུ་ཕྱོགས། །ཙོག་ཙོག་པུར་འདུག་རྒྱུད་ཁྲོས་པ། །འབར་ཞིང་མཆེད་པའི་མེ་ལྟ་བུར། །དགྲ་བོ་ཡི་ནི་མིང་སྨོས་ན། །དེ་ཉིད་ཀྱི་ཡང་བྱ་བ་ནི། །སྲེག་བླུགས་གསུམ་དུ་སྦྱིན་བསྲེགས་ན། །དགྲ་བོ་མོད་ལ་འཆི་བར་འགྱུར། །བུ་དང་རང་གི་རིགས་རྒྱུད་བཅས། །ཆུང་མ་དང་བཅས་བུ་དང་གཉེན། །དེ་བཞིན་གཤེགས་པས་བསྲུངས་གྱུར་ཀྱང་། །དེ་མ་ཐག་ཏུ་ཐལ་བར་ལོག །གཅིག་གིས་བདག་ཉིད་བརླག་འགྱུར་ཏེ། །གཉིས་པ་ཡིས་ནི་ཆུང་མའོ། །གསུམ་པས་བུ་དང་གཉེན་ལ་སོགས། །འདིར་ནི་འཆི་བར་ཐེ་ཙོམ་མེད། །ནིམ་པ་བདག་ཉིད་ཆེན་པོ་ཡིས། །ཡན་ལག་ལྔ་ནི་བླངས་ནས་ནི། །རང་གི་ཁྲག་དང་དུག་ལྡན་པ། །ནིམ་པ་ལྔ་ནི་བཏགས་ནས་སུ། །དེ་ཡི་གཟུགས་བརྙན་བྱས་པ་དང་། །དགྲ་བོའི་མིང་ནི་བྲིས་པ་དག །དེ་ནི་གཏུབས་ནས་སྲེག་བླུགས་ནི། །བརྒྱད་ཉིད་ཀྱང་ནི་བསྲེག་པར་བྱ། །བུ་དང་ཕྱུགས་དང་གཉེན་དུ་བཅས། །སྐྱེ་བོ་དེ་ཡི་མོད་ལ་འཆི། །གལ་ཏེ་དགྲ་བོ་སྐྱོབ་བྱེད་པ། །བདེ་བྱེད་དེ་ནས་ཁྱབ་འཇུག་དང་། །ཚངས་པས་ཡང་དག་བསྲུངས་གྱུར་དང་། །མ་མོས་སྲུང་བར་བྱེད་པ་དང་། །གཞན་ཡང་སྙན་པར་གྲགས་པ་ཡི། །བརྒྱ་བྱིན་ལ་སོགས་ལྷ་དབང་གིས། །སྔགས་པས་དང་བ་མེད་པས་ན། །དེ་ཆེ་བསྲུང་བར་

མི་ནུས་སོ། །ཐུགས་བརྩེ་ལྡན་པའི་ཐུགས་ཀྱིས་ནི། །སྔགས་པ་གང་ཚེ་དང་བ་ན། །དཱུར་བ་དང་ནི་བསྲེས་པ་ཡི། །འོ་མའི་སྲེག་བླུགས་དེ་ཚེ་བསྲེག །མཆོག་ཏུ་བདེ་བ་གཏད་པས་ན། །དེ་ནས་རྣལ་མ་དག་ཏུ་འགྱུར། །གོས་རློན་པ་ནི་བླངས་ནས་སུ། །རྒྱ་སྐྱེགས་ཁུ་བས་རྣམ་པར་བཏགས། ། དུང་གི་ཕྱེ་མ་ཉིད་དག་དང་། །དུག་དང་སྐེ་ཚེ་ཡང་དག་ལྡན། །དབེན་པའི་གནས་སུ་འདུག་ནས་ནི། །ནིམ་པའི་ཤིང་ལ་མེ་སྤར་ཏེ། །གསང་ཤེས་གང་ཞིག་ཁྲོས་པ་དང་། །སྔགས་ཤེས་གཏུམ་པར་གྱུར་པ་ཡིས། །ཉི་མ་ཕྱེད་ཀྱི་ཆར་གནས་ནས། །སྲེག་བླུགས་བདུན་དུ་བསྲེགས་པ་ན། ། སྔགས་པ་དོགས་མེད་གསང་བར་གནས། །དེ་ནས་བརྗོད་པས་སྦྱིན་སྲེག་བྱ། །དང་པོ་སྲེག་བླུགས་སྦྱར་བ་ཡིས། །དུག་དང་ཕོལ་མིག་རྣམ་པར་ལྡན། །གཉིས་པ་ལ་ནི་ཉིན་བཞི་པ། །གསུམ་པ་ལ་ནི་རིམས་ཆེན་པོ། །བཞི་པ་ལ་ནི་ལུས་བསྐམས་འགྱུར། །ལྔ་པ་ལ་ནི་དྲན་པ་མེད། ། དྲུག་པ་ལྷག་མ་ཅུང་ཟད་ཙམ། །བདུན་པ་ལ་ནི་སྲོག་འགྲོ་བའོ། །སྔགས་པའི་ལས་ནི་འགྲུབ་བྱའི་ཕྱིར། །གསང་བ་འདི་ནི་བཤད་པ་ཡིན། །མདོར་བསྡུས་ནས་ནི་བཤད་བྱ་ཡིས། །རྫུ་འཕྲུལ་ཆེན་པོ་རྟག་ཏུ་ཉོན། །སྔགས་པ་དང་བ་མེད་པས་ན། །གཞན་དུ་ན་ནི་འཚོ་མི་ནུས། །ཇི་སྲིད་སྔགས་པ་དང་མེད་པར། །དེ་ནི་གང་ལས་ཞི་བར་འགྱུར། །ཇི་སྲིད་སྔགས་རྒྱལ་མཉེས་པ་དང་། །ཐུགས་བརྩེས་བརླན་པ་དེ་ཡི་ཚེ། །ཞི་བ་རུ་ནི་འགྱུར་བ་ཡིན། །དུག་དང་ནིམ་པ་སྒོག་སྐྱ་དང་། །དུང་གི་ཕྱེ་མ་ཉིད་དང་ནི། །རས་བྲིས་ཉེ་བའི་དྲུང་དུ་ནི། །ཉི་ཤུ་ཐམ་པ་བསྲེག་པར་བྱ། ། གཉེན་དང་འཁོར་དང་ཕྱུགས་བཅས་པའི། །དགྲ་བོ་རྩད་ནས་བཅད་པར་འགྱུར། །གསང་སྔགས་འཛིན་པ་མ་གཏོགས་པ། །དེ་བཞིན་དེ་ཚེ་སུ་ཡིས་ནུས། །ཚ་བ་གསུམ་དང་ལན་ཚྭ་དང་། །དུག་དང་རང་སྐྱུར་བཅས་པ་དང་། །ཡུངས་མར་དང་ནི་སྐྲ་དང་ཡང་། །སྦྲུལ་གྱི་ཤུབས་ནི་ཉིད་དག་དང་། །ནིམ་པའི་འདབ་མ་འབྲས་བུར་བཅས། །མི་ཡི་རུས་པའི་ཕྱེ་མ་དང་། །སྐེ་ཚེ་དང་ནི་དུང་ཕྱེ་དང་། །སྒོག་བཙོང་དང་ནི་སྒོག་སྐྱ་ཉིད། །འདི་རྣམས་ཕྱེ་མར་བྱས་ནས་སུ། །ཚེར་མའི་མེ་ལ་མཉམ་གཞག་པའི། །སྔགས་པས་དེ་ནི་སྲེག་བླུགས་བྱ། །དགྲ་བོའི་མིང་ནི་མྱུར་

སྨོས་ནས། །སྲེག་བླུགས་གཅིག་ནི་བསྲེགས་གྱུར་ན། །དགྲ་བོ་དེ་ནི་མོད་དུ་བརླག །གསུམ་དང་བདུན་དང་དེ་ནས་གཅིག །དགྲ་བོ་སྲེག་བླུགས་སྦྱིན་བསྲེགས་ན། །རང་གི་ཕ་ཚན་ཡུལ་འཁོར་བཅས། །ཉེ་དུ་ཕྱུགས་རྣམས་བརླག་པར་འགྱུར། །གལ་ཏེ་མཁས་པས་དགྲ་བོ་ནི། །སྨྱོ་བར་བྱ་བར་འདོད་པ་ཡིས། །ཡན་ལག་གཟུགས་བརྙན་བྱས་ནས་སུ། །ལྔ་ནི་འབྲས་བུར་བཅས་པ་དང་། །དྷ་དུ་ར་ཡི་སྲེག་བླུགས་བདུན། །དེ་མ་ཐག་ཏུ་སྨྱོ་བར་འགྱུར། །ཚ་བ་གསུམ་དང་ལན་ཚྭ་ཉིད། །རྟག་པ་ཉིད་དུ་བསྲེགས་གྱུར་ན། །ནད་ཆེན་པོས་ནི་ཟིན་གྱུར་ནས། །ཤིང་སྐམ་བཞིན་དུ་བསྐམས་པར་འགྱུར། །ཛམ་བི་ར་ལི་རང་སྐྱུར་བཅས། །རྒྱུན་དུ་བསྲེགས་པ་ཉིད་གྱུར་ན། །གྲང་བའི་རིམས་ནི་ཚབས་པོ་ཆེས། །དེ་མ་ཐག་ཏུ་འཇོམས་པར་འགྱུར། །ཞི་ལ་འོ་མའི་སྦྱིན་སྲེག་གིས། །ཐམས་ཅད་དུ་ནི་བརྗོད་པ་ཡིན། །ཁྭ་ཡི་སྒྲོ་ནི་བླངས་ནས་སུ། །ཨེ་རཎྜ་ཡི་མར་ཁུས་བཏགས། །དྷ་དུ་ར་ཡི་མེ་ལ་ནི། །སྲེག་བླུགས་ཉི་ཤུ་ཐམ་པ་བསྲེག །ཁྭ་ཏ་བཞིན་དུ་ཕྱོགས་ཀུན་དུ། །དེ་མ་ཐག་ཏུ་དགྲ་བོ་འཁྱམ། །ལན་ཚྭ་དུག་དང་ཀུན་དུ་ལྡན། །མི་ཡི་རུས་པ་སྐེ་ཚེར་བཅས། །ཡུངས་ཀར་ཀུན་དུ་ལྡན་པ་རྣམས། །ནིམ་པའི་མེ་ནི་མི་བཟད་པར། །དགྲ་བོའི་སྲེག་བླུགས་བྱས་གྱུར་ན། །དེ་མ་ཐག་ཏུ་ཐལ་བར་རློག །བ་ལང་མཁྲིས་པ་ལན་ཚྭར་ལྡན། །རྒྱ་སྐྱེགས་ཁུ་བར་བཅས་པ་རྣམས། །བསྲེགས་ན་དགྲ་བོ་ཉམས་ནས་ནི། །དེ་མ་ཐག་ཏུ་འཆི་བར་འགྱུར། །སྒེའུ་གཤེར་གྱི་ཁུ་བར་ལྡན། །དེ་བཞིན་ལན་ཚྭ་ཚ་བ་གསུམ། །དེ་ཡིས་གཟུགས་བརྙན་བྱས་ནས་སུ། །དུར་ཁྲོད་ཀྱི་ནི་མགལ་དུམ་བླངས། །དེ་ཉིད་ལ་ནི་མེ་སྤར་ཏེ། །མིང་ནི་གཟུགས་བརྙན་ནང་དུ་གཞུག །གང་དུ་ཅུང་ཟད་ཅི་ཡོད་པ། །རྐང་པའི་རྩེ་མོ་ཐུག་པར་བསྲེག །ཡུལ་དང་ཡུལ་འཁོར་བཅས་པ་དང་། །འདིར་ནི་བུ་ཕྱུགས་གཉེན་དུ་བཅས། །བདག་ཉིད་དང་ནི་ཆུང་མར་བཅས། །འདིར་ནི་མོད་དུ་ཐལ་བར་རློག །མཁས་པས་སོལ་བའི་ཐལ་བ་ཡིས། །དགྲ་བོའི་གཟུགས་བརྙན་བྲིས་ནས་སུ། །རྐང་པས་རབ་ཏུ་མནན་ནས་སུ། །ཀུན་ནས་ཁྲོས་པས་བཟླས་པ་བརྩམ། །གཟེར་ཟུག་ཚབས་པོ་ཆེས་འདེབས་

ཤིང་། །ཕོལ་མིག་ཆེན་པོ་འབྱུང་བར་འགྱུར། །ས་གཞི་ཀུན་དུ་མྱོས་འགྱུར་བར། །དེ་མ་ཐག་ཏུ་འགྱུར་བ་ཡིན། །གསང་སྔགས་འཛིན་པ་མ་གཏོགས་པ། །ས་སྟེངས་གཞན་མ་སུ་ཡིས་ནུས། །འོ་མ་ཅན་ཤིང་ཡམ་ཤིང་དང་། །དཀར་གསུམ་སྦྱིན་སྲེག་བྱས་པ་ཡིས། །སྐྱེ་བོ་དེ་ནི་རྣལ་མར་འགྱུར། །སྔགས་པའི་བཀའ་དྲིན་བཟང་པོས་སོང་། །སྤངས་པ་རབ་ཏུ་བླངས་ནས་སུ། །མཁས་པས་ཁང་པ་སྟོང་པར་བྱ། །ནིམ་པའི་འདབ་མར་དགྲ་ཡི་མིང་། །ཐམས་ཅད་དུག་གིས་བྱུགས་ནས་སུ། །སླར་ཡང་རབ་ཏུ་བསྐམ་པར་བྱ། །ནིམ་པའི་འདབ་མར་དགྲ་ཡི་མིང་། ། རང་གི་ཁྲག་གིས་བྲིས་ནས་སུ། །དེ་ཡི་ནང་དུ་བཅུག་ནས་སུ། །རྒྱུས་པས་རབ་ཏུ་བསྒྲིམ་པར་བྱ། །ཚ་བ་གསུམ་གྱིས་མེ་སྤར་ཏེ། །སྲེག་བླུགས་གསུམ་དུ་སྦྱིན་སྲེག་བྱ། །སྔགས་པས་འཇིག་རྟེན་གསུམ་བརླག་ན། །གདུག་པའི་ས་བདག་སྨོས་ཅི་དགོས། །གལ་ཏེ་ཞི་བར་བྱེད་འདོད་ན། །སྙིང་རྗེ་ཡིས་ནི་སེམས་བརླན་ཅིང་། །འོ་མ་ཅན་ཤིང་ཡམ་ཤིང་ནི། །འོ་མས་བཏགས་ནས་ཏིལ་དང་འབྲས། །སྲེག་བླུགས་བརྒྱ་རྩ་བདུན་བསྲེགས་ན། །དེ་མ་ཐག་ཏུ་ཞི་བར་འགྱུར། །བྱ་རྒོད་ཤ་དང་དེ་བཞིན་འུག །བྱི་ལ་ཡི་ནི་ཤ་རྣམས་དང་། །ནེའུ་ལེའི་སྤུ་ནི་བླངས་ནས་སུ། ། སྤུན་པའི་མེ་ལ་བསྲེགས་གྱུར་ན། །སྲེག་བླུགས་གསུམ་ཙམ་ཉིད་ཀྱིས་སུ། །མྱུར་བ་ཉིད་དུ་དབྱེ་བར་འགྱུར། །བྱ་རྒོད་རུས་པ་སྦྲུལ་རུས་རྣམས། །མི་ཡི་ཁ་ཡི་རུས་པ་རྣམས། །འདི་རྣམས་སེར་རྩིར་གཏུབས་ནས་སུ། །ཁྱིམ་གྱི་དྲུང་དུ་སྦས་ནས་ནི། །གལ་ཏེ་བདེ་བྱེད་ཀྱིས་བསྲུངས་ཀྱང་། །དེ་མ་ཐག་ཏུ་དགྲ་བོ་བརླག །དུག་དང་བདག་ཉིད་ཁྲག་དང་ནི། །ལན་ཚྭ་ཚ་བ་གསུམ་དེ་བཞིན། །འདི་ཡིས་གཟུགས་བརྙན་བྱས་སུ། །དགྲ་བོའི་མིང་ནི་རབ་ཏུ་གཞུག །ནིམ་པའི་ཤིང་ལ་མེ་སྤར་ཏེ། །ཁྲོ་བོའི་མེ་ནི་ཡང་དག་མཆོད། །གང་དུ་ཅུང་ཟད་ཅི་ཡོད་པ། །སྲེག་བླུགས་གསུམ་ནི་བསྲེག་པར་བྱ། །སྲེག་བླུགས་གཅིག་ནི་བྱས་པ་ཡིས། །བདག་ཉིད་བུ་དང་ཆུང་མའོ། །གཉིས་ཀྱིས་རང་གི་གཉེན་ཚོགས་ཉིད། །གསུམ་པས་ཡུལ་འཁོར་བཞོན་དཔུང་བཅས། །རང་བྱུང་བས་ནི་བསྲུངས་གྱུར་ཀྱང་། །ཐལ་བ་ཉིད་དུ་རློག་པར་འགྱུར། །བདག་

ཉིད་ཀྱི་ནི་སྟོབས་ཀྱིས་སུ། །རས་ནི་རློན་པ་ཀུན་དུ་བྱ། །བསྒྲུབ་བྱའི་མིང་ནི་སྨོས་ནས་སུ། །དེ་འོག་དེ་བཞིན་གཟུགས་བརྙན་བྱ། །མགོ་བོ་རྡོག་པས་རབ་མནན་ཏེ། །ཁྲོས་པས་ཡ་སོས་མ་མཆུ་མནན། །བརྒྱད་ཀྱི་ཆ་ནི་བཟླས་པ་ན། །ནད་ནི་ཆེན་པོས་འདེབས་པར་བྱེད། །རིམས་དང་བརྒྱལ་བར་འགྱུར་བ་སྟེ། །མཆེར་པའི་ནད་དང་མཚན་བར་རྡོལ། །ནད་རྣམས་ཐམས་ཅད་ཀུན་དུ་ལྡན། །ཆུ་སྲི་བས་ནི་ཟིན་འགྱུར་ཞིང་། །རིགས་རྒྱུད་ཕྱུགས་དང་གཉེན་དུ་བཅས། །དགྲ་བོ་དེ་མ་ཐག་ཏུ་འགྱུར། །གསང་སྔགས་འཆང་བ་མ་གཏོགས་པ། ། གཞན་མ་ནུས་པ་སུ་ཞིག་ཡོད། །སྐྲ་དང་རྐང་པའི་སར་གནས་པ། །དགྲ་བོ་དེ་ནི་བླང་བར་བྱ། །དེ་ཡི་གཟུགས་བརྙན་བྱས་ནས་ནི། །དུག་དང་སྐེ་ཚེ་བཅས་པ་རྣམས། །ཚེར་མའི་མེ་ལ་སྦྱིན་སྲེག་བྱ། །དགྲ་བོ་མོད་དུ་བརླག་པར་འགྱུར། །དགྲ་བོའི་རུས་པའི་ཕྱེ་མ་ནི། །དུག་དང་རང་སྐྱུར་ཡང་དག་ལྡན། །དགྲ་བོའི་གཟུགས་ནི་བྱས་ནས་སུ། །ནིམ་པའི་ཤིང་ནི་མེར་བསྲེགས་ན། །གསོ་བར་མི་ནུས་ནད་ཀྱིས་ནི། །སྐྱེ་བོ་དེ་མ་ཐག་ཏུ་འདེབས། །གསང་སྔགས་འཆང་བ་མ་གཏོགས་པ། །གསོ་ནུས་གཞན་མ་སུ་ཞིག་ཡོད། །ནིམ་པ་དུག་དང་ཚ་བ་གསུམ། །དྷ་དུ་ར་ཡི་འབྲས་བུ་རྣམས། །འདི་རྣམས་གཅིག་ཏུ་བྱས་ནས་ནི། །གཟུགས་བརྙན་རབ་ཏུ་བྱ་བ་ཡིན། །དེ་ཡི་ལུས་པོ་གཏུབས་བསྲེགས་ན། །དེ་མ་ཐག་ཏུ་སྲོག་འཆད་འགྱུར། །ཁྲག་དང་ལན་ཚྭ་དུག་དང་ནི། །དེ་ཉིད་གཅིག་ཏུ་བྱས་ནས་སུ། །ཨརྒའི་ཤིང་མེ་དེ་བཞིན་དུ། །སྲེག་བླུགས་གསུམ་ནི་སྲེག་པར་བྱེད། །དབྱུག་གུ་གཅིག་གམ་ཐུན་ཕྱེད་ན། །དེ་མ་ཐག་ཏུ་ས་སྟེངས་འཆི། །ཡུངས་མར་གྱིས་ནི་བཏགས་བྱས་ལ། །རས་བྲིས་བྱང་དུ་ཕྱོགས་བྱས་ཏེ། །ལན་ཚྭ་ནིམ་པའི་འདབ་མ་དང་། །ཚ་བའི་མར་ཁུས་དེ་བཞིན་དུ། །སྲེག་བླུགས་ལན་བདུན་ཙམ་ཉིད་ནི། །སྔགས་པས་གང་དུ་གནས་པས་བསྲེག །སྲེག་བླུགས་ལན་བདུན་བསྲེགས་པ་ན། །ས་སྟེངས་དེ་མ་ཐག་ཏུ་འཆི། །རང་གི་ཁྲག་དང་ཚ་བ་གསུམ། །ཡུངས་མར་དང་ནི་ཡང་དག་ལྡན། །ཚེར་མའི་མེ་ལ་བསྲེགས་གྱུར་ན། །དེ་མ་ཐག་ཏུ་ཐལ་བར་རློག །ཨརྒ་ནུ་ཧི་འོ་མ་དང་། །དེ་བཞིན་དུ་

ནི་ཕག་པའི་བྲུན། །དུར་ཁྲོད་མེ་ལ་བསྲེགས་པ་ན། །དེ་མ་ཐག་ཏུ་མོད་ལ་བརླག །བྱི་ཚེར་ཕག་པའི་སྤུ་དེ་བཞིན། །སྲེག་བླུགས་ལན་གསུམ་བསྲེགས་གྱུར་ན། །འཕྲལ་དུ་མོད་ལ་བརླག་པར་འགྱུར། །ནིམ་པའི་ལོ་མ་ན་ལེ་ཤམ། །དུག་དང་ཡུངས་མར་ཉིད་དག་ནི། །ལན་བདུན་རབ་ཏུ་སྲེག་བླུགས་ན། །འཕྲལ་དུ་སྲོག་ནི་འཆད་པར་འགྱུར། །ཁྭ་ཡི་རུས་པ་མི་རུས་དང་། །ནེའུ་ལེ་ཡི་རུས་པ་ཉིད། །ཕྱེ་མར་བཏགས་ནས་ཞི་བར་བྱ། །ཡུངས་མར་ཡང་དག་ལྡན་པ་རུ། །ནིམ་པའི་ཤིང་གི་མེར་བསྲེགས་ན། །གྲོང་དང་གྲོང་ཁྱེར་དུ་བཅས་པའི། །དགྲ་བོ་འཕྲལ་དུ་བརླག་པར་འགྱུར། །འུག་པའི་རུས་པ་སྟག་གི་སྤུ། །ཐོད་པའི་རུས་པ་ལེགས་པར་སྦྱར། །དགྲ་བོའི་སྒོ་རུ་བྲུས་ནས་སྦ། །དེ་མ་ཐག་ཏུ་སྐྲོད་པར་འགྱུར། །སྟག་གི་རུས་པ་ནེའུ་ལེའི་སྤུ། །དེ་བཞིན་དུ་ནི་ཁྱི་ཡི་སྤུ། །ཚེར་མའི་མེ་ལ་བསྲེགས་གྱུར་ན། །དེ་མ་ཐག་ཏུ་འབྱེད་པར་འགྱུར། ། ས་ཏིའི་མེ་ཏོག་ན་ལེ་ཤམ། །ནིམ་པའི་ལོ་མ་དེ་བཞིན་དུག །ཐམས་ཅད་གཅིག་ཏུ་བྱས་ནས་ནི། །བརྒྱ་རྩ་བརྒྱད་དུ་བསྲེག་པར་བྱ། །གང་གི་མིང་ནས་སྨོས་ནས་སུ། །བློ་ལྡན་མེ་ཡིས་བསྲེགས་པ་ན། །ས་སྟེངས་པ་ནི་མ་ལུས་པ། །འཇིག་རྟེན་དུ་ནི་འབྱེད་པར་འགྱུར། །དྷ་དུ་ར་ཡི་ས་བོན་དང་། །དེ་བཞིན་ནིམ་པའི་འབྲས་བུ་དང་། །དུག་དང་ལན་ཚྭ་ཉིད་དག་ནི། །བརྒྱ་རྩ་བརྒྱད་དུ་བསྲེགས་ནས་ནི། །བུ་དང་ཕྱུགས་དང་ཉེ་དུར་བཅས། །ཐེ་ཚོམ་མེད་པར་ཐལ་བར་རློག །སྦྲུལ་དང་ནེའུ་ལེ་ནག་པོ་དང་། །ཁྭ་ཡི་རུས་པ་ཡང་དག་ལྡན། །རྩངས་པ་ཡི་ནི་མགོ་བོ་རྣམས། ། ཆ་ནི་མཉམ་པོར་བྱས་ནས་སུ། །རང་གི་ཁྲག་དང་བཏགས་ནས་སུ། །སྡོང་བུ་གཅིག་པུ་བྱས་པ་ཡིན། །བརྒྱ་རྩ་བརྒྱད་ནི་མངོན་བསྔགས་ནས། །དགྲ་བོའི་སྒོ་ཁར་སྤར་བར་བྱ། །བུ་དང་ཕྱུགས་དང་གཉེན་དུ་བཅས། །དགྲ་བོ་དེ་ཡི་ཚེ་ན་འཆི། །མི་ཡི་ཞག་ནི་ཉིད་དག་དང་། །ཐལ་བ་ཐོད་པར་བླངས་ནས་སུ། །རྒྱ་སྐྱེགས་ཁུ་བ་ཡང་དག་ལྡན། །བསྡོམས་ནས་རིལ་གཅིག་རབ་ཏུ་བྱ། །ཁྲ་ཡི་རུས་པ་ནང་དུ་གཞུག །དགྲ་བོའི་སྒོ་ཁར་གཞག་པ་ན། །བདག་ཉིད་གྲོང་དང་དེ་བཞིན་བཅས། །དགྲ་བོ་དེ་ཡི་ཚེ་ན་བརླག །དྷ་དུ་ར་ཡི་བདག་ཉིད་ལྔ། །བླངས་ནས་དུག་དང་

ཚ་བ་གསུམ། །སྲེག་བླུགས་ལན་གསུམ་བསྲེགས་ནས་ནི། །དེ་མ་ཐག་ཏུ་དགྲ་འཆི་འགྱུར། །ནེའུ་ལེའི་ཤ་ནི་ཡང་དག་བླངས། །མཁས་པས་རབ་ཏུ་བསྐམ་པར་བྱ། །དུག་དང་ཚྭ་ནི་ཡང་དག་ལྡན། །སྲེག་བླུགས་ལན་གསུམ་བསྲེགས་པ་ན། །ནད་ནི་སྣ་ཚོགས་ཀུན་བྱུང་ནས། །འཕྲལ་དུ་སྲོག་ནི་འཆད་པར་འགྱུར། །ལས་འདི་རབ་ཏུ་སྦྱར་བྱས་ན། །དེ་མ་ཐག་ཏུ་འགྲུབ་པར་འགྱུར། །སོལ་བ་དང་ནི་ལན་ཚྭ་ཉིད། །ཚ་བ་གསུམ་ནི་མཉམ་པོར་བསྒོས། །ཡུངས་མར་དང་ནི་ཡང་དག་ལྡན། །དེ་ནས་གཟུགས་བརྙན་བྱས་ནས་སུ། །ཚེར་མ་ཡི་ནི་མེ་སྤར་ཏེ། །རས་བྲིས་བྱང་དུ་ཕྱོགས་པ་དང་། །སྔགས་པ་ལྷོ་རུ་ཕྱོགས་གྱུར་ཅིང་། །ཁྲོས་པས་མེ་ནི་རབ་འབར་འགྱུར། །སྲེག་བླུགས་ལན་གསུམ་ཉིད་དུ་ནི། །དགྲ་བོའི་གཟུགས་བརྙན་བསྲེག་པར་བྱ། །གཅིག་གིས་བུ་ནི་འཆི་བར་འགྱུར། །གཉིས་པས་ཆུང་མ་ཕྱུགས་དང་གཉེན། ། གསུམ་པས་བདག་ཉིད་ཡུལ་འཁོར་དང་། །ཕྱུགས་དང་གཉེན་དུ་བཅས་པ་རྣམས། །དེ་མ་ཐག་ཏུ་ཐལ་བར་རློག །སྔགས་པའི་བཀའ་དྲིན་མེད་པར་ནི། །སླར་ཡང་ཞི་བར་ག་ལ་ནུས། །བརྒྱ་རྩ་བརྒྱད་ལས་ལྷག་པ་ཡི། །འོ་མའི་སྲེག་བླུགས་དེ་ནས་དབུལ། །དེ་ཚེ་དེ་རུ་རང་གི་ནི། ། འཁོར་ཕྱུགས་གཉེན་འདབ་རྣམས་དང་ནི། །དེ་བཞིན་དུ་ནི་ཞི་བར་འགྱུར། །དྷ་དུ་ར་ཡི་འབྲས་བླངས་ནས། །ཁང་ས་ཀུན་དུ་བྲུ་བར་བྱ། །ནིམ་པ་ཞེས་བྱའི་ལོ་མ་འདིར། །དགྲ་བོའི་མིང་ནི་བྲི་བར་བྱ། །དུག་དང་ཁྲག་ནི་ཡང་དག་ལྡན། །དེ་ཡིས་རྟག་ཏུ་དགྲ་བོ་བྲི། །ཚ་བ་གསུམ་དང་ལན་ཚྭ་ཉིད། །ཁྲག་གིས་གང་བར་དགང་བར་བྱ། །དེ་རུ་མིང་ནི་བཅུག་ནས་སུ། །སྐྲ་ཡིས་ཡོངས་སུ་བྲེ་བར་བྱ། །ནིམ་པའི་མེ་ལ་ཡུངས་མར་གྱིས། །ཅུང་ཞིག་ཙམ་དུ་བཙོ་བར་བྱ། །རང་གི་ཡུལ་འཁོར་ཕྱོགས་ཀུན་འཇོམས། །རང་གི་ལྷ་རུ་གྱུར་པ་གང་། །ཁམས་གསུམ་པ་ཡི་བདག་པོ་ཡིས། །ཐེ་ཚོམ་མེད་པར་ཐལ་བར་རློག །གདུག་པའི་སེམས་ཅན་ལྟ་ཅི་སྨོས། །རྒྱལ་པོ་རྫུ་འཕྲུལ་ཆེན་པོ་ཡང་། །རང་བྱུང་བས་ནི་བསྲུངས་གྱུར་ཀྱང་། །དེ་དག་ཐམས་ཅད་བརླག་པར་འགྱུར། །སྦྱོར་བ་འདི་ལ་བརྟེན་ནས་སུ། །ཐུགས་རྗེར་གྱུར་པའི་ཡིད་

ཀྱིས་སུ། །བསྟན་པ་ཡི་ནི་དོན་བྱེད་པར། །ས་སྟེངས་འདིར་ནི་ཐེ་ཙོམ་མེད། །ཡང་དག་བསམ་མི་ཁྱབ་པ་འདི། །ཁྲོ་བོའི་རྒྱལ་པོས་རྣམ་པར་འཕྲུལ། །རྟག་ཏུ་བག་ཡོད་པར་གྱུར་པས། །ཐུགས་རྗེའི་རོ་ལ་གནས་པ་ཡིས། །བསྟན་པ་དག་ནི་བསྲུང་བའི་ཕྱིར། །དམ་པ་འདི་ནི་སྦྱར་བར་བྱ། །ནིམ་པའི་འབྲས་བུ་ཡང་དག་བླངས། །དེ་ནས་ཚ་བ་གསུམ་གྱིས་དགང་། །ཁྱད་པར་ནིམ་པའི་འདབ་མ་ལ། །དགྲ་བོའི་མིང་ནི་བྲིས་ནས་སུ། །ལྔ་ཡི་བདག་ཉིད་ཡང་དག་བླང་། །དེ་ཚེ་ཆོ་ག་བཞིན་མེ་སྤར། །ཡུངས་མར་གྱིས་ནི་བཀང་བྱས་ཏེ། །ཐོད་པ་དང་ནི་དུག་ཉིད་ཀྱང་། །གང་དུ་ཅུང་ཟད་གནས་ནས་ནི། །བཅུག་སྟེ་སྔགས་པས་བཙོ་བར་བྱ། །དགྲ་བོ་དེ་ནི་མོད་དུ་འཆི། །ཡུལ་འཁོར་ཕྱུགས་བཅས་དེ་བཞིན་ནོ། །ཉེ་བར་འཚེ་བ་ཐམས་ཅད་དང་། །དུག་དང་རླུང་དང་སྐྱེ་གནས་ནད། །མུ་གེ་དང་ནི་ཡུལ་འཕོ་དང་། །རླུང་གི་ཆར་དབབ་ཀུན་དུ་འཁྲིགས། །སྲིན་པོ་འབྱུང་པོའི་ཚོགས་ཀུན་གྱིས། །ས་སྟེངས་ཀུན་དུ་ཁེངས་པར་འགྱུར། །གསང་སྔགས་འཆང་བ་མ་གཏོགས་པ། །ཅུང་ཟད་སྐྱོབ་པ་ཡོད་པ་མིན། །སྙིང་རྗེའི་སེམས་ནི་བསྐྱེད་ནས་སུ། །འགྲོ་བ་གཟིར་བ་ལ་བལྟས་ཏེ། །ཉི་ཤུ་རྩ་གཅིག་འོ་མ་ཡིས། །དགང་བླུགས་དེ་ཚེ་དབུལ་བར་བྱ། ། སྔགས་པའི་བཀའ་དྲིན་བཟང་པོ་ཡིས། །དེ་ཡི་ཚེ་ནི་ཞི་བར་འགྱུར། །སྔགས་པ་བློ་ལྡན་མ་མཉེས་ན། །གཞན་དུ་ཞི་བར་ག་ལ་འགྱུར། །སྔགས་ཀྱི་དངོས་གྲུབ་བྱ་བའི་ཕྱིར། །ཡང་དག་སྦྱོར་བ་འདི་སྦྱོར་ན། །བསྟན་པ་བསྲུང་བའི་དོན་ཕྱིར་དང་། །གདུག་པ་རྣམས་ནི་གཞོམ་ཕྱིར་དང་། ། རྒྱལ་པོ་འམ་ནི་གདུག་པ་ཅན། །བསྟན་ལ་གནོད་པ་བྱེད་པ་རྣམས། །དེ་རྣམས་ཚར་གཅད་པ་ཡི་ཕྱིར། །ཤིན་ཏུ་འགྲུབ་པར་བྱེད་པ་ཡི། །ཡང་དག་འདི་ནི་རབ་སྦྱར་ན། །དེ་མ་ཐག་ཏུ་བརླག་པར་འགྱུར། །མི་རུས་དུག་གི་ཕྱེ་མ་དང་། །ཁྱི་ཡི་རུས་པ་ཉིད་དག་དང་། །དེ་བཞིན་སྐེ་ཚེ་རྒོད་རུས་དང་། །ཡུངས་མར་སྦྲུལ་གྱི་ཤུབས་དེ་བཞིན། །ནིམ་པ་ཡང་དག་ལྔ་བདག་ཉིད། །རྒྱ་སྐྱེགས་ལན་ཚྭ་ཉིད་དག་སྟེ། །འདི་དག་ཐམས་ཅད་གཅིག་བསྡུས་ནས། །ཚེར་མའི་མེ་ནི་མི་བཟད་པ། །བདག་ཉིད་ཁྲོ་བོ་མེ་ལྟ་བུས། །སྲེག་བླུགས་གསུམ་ནི་བསྲེག་པར་བྱ། །དེ་རུ་བདུད་

ནི་འཚེ་འགྱུར་ཞིང་། །ནད་རྣམས་མང་པོས་ཀུན་དུ་འཁྲིགས། །བུ་ཕྱུགས་གཉེན་དུ་བཅས་པ་ཡི། །རྒྱལ་པོའང་བརླག་པར་འགྱུར་བ་ཡིན། །རྒྱལ་པོ་གདུག་པའི་སེམས་ལྡན་པ། །སྔགས་པ་ལ་ནི་འཚེ་བ་ནི། །སྦྱོར་བ་འདི་ནི་རབ་བརྩམས་ནས། །སྔགས་པ་མོད་དུ་ཡང་དག་འགྱུར། །ཚ་བ་གསུམ་དང་ལན་ཚྭ་དུག །སྐྱེ་ཚེ་བསྲེགས་པ་ཉིད་དང་ནི། །ཚ་བ་ཚ་བའི་མར་དང་ཡང་། །རྒྱ་སྐྱེགས་ཁུ་བ་སྦྲུལ་གྱི་ཤུབས། །འདི་རྣམས་གཅིག་ཏུ་བྱས་ནས་སུ། །དེ་ཡི་ཚེ་ན་གཟུགས་བརྙན་བྱ། །ཚ་བ་ཡིས་ནི་ཀུན་དུ་དགང་། །ཚ་བའི་མེ་ནི་ཡང་དག་ལྡན། །དེ་ཉིད་ལ་ནི་མིང་བྲིས་ནས། །མི་བཟད་མེ་ལ་བསྲེགས་གྱུར་ན། །དགྲ་བོ་དེ་ཡི་མོད་ལ་འཆི། །གང་ཚེ་སྔགས་པ་ལྟོས་མེད་ན། །གཞན་དུ་དུག་གི་མཚན་མ་དང་། །ཡང་ན་མི་བཟད་ཕོལ་མིག་དང་། །ནད་ཆེན་པོས་ནི་ཀུན་དུ་དཀྲིགས། །རིམས་དང་བརྒྱལ་ནད་འབྱུང་བར་འགྱུར། ། མེས་བསྲེགས་ཆར་པ་ཆེན་པོ་འབབ། །དེ་ནས་རྡོ་རྗེ་ཐོགས་ནས་ཀྱང་། །ནད་ཆེན་རྟག་པའི་རིམས་ཀྱིས་ནི། །བུ་དང་ཕྱུགས་དང་གཉེན་དུ་བཅས། །ཐེ་ཚོམ་མེད་པར་འཆི་འགྱུར་ཏེ། །སྔགས་པ་ཞེ་བ་གནག་པས་སོ། །གང་ཚེ་སླར་ཡང་མཉེས་ནས་སུ། །ཐུགས་རྗེ་གཏད་པའི་སེམས་གྱུར་ན། །ནད་ཀུན་ལས་ནི་རྣམ་གྲོལ་བར། །ས་སྟེངས་དེ་མ་ཐག་ཏུ་འགྱུར། །གདུག་པའི་ལས་ནི་མདོར་བསྡུས་པ། །ངོ་མཚར་ཅན་འདི་ཡང་དག་གསུངས། །ས་སྟེངས་སྙིང་པོ་འདི་སྔགས་པའི། །མྱུར་བའི་ལས་ནི་ཡང་དག་བཤད། །ཏིང་འཛིན་ཡུལ་ནི་བསམ་མི་ཁྱབ། ། རྫུ་འཕྲུལ་ཡུལ་ཡང་བསམ་མི་ཁྱབ། །ཕ་རོལ་གནོན་པའང་བསམ་མི་ཁྱབ། །རྫོགས་སངས་རྐང་གཉིས་དམ་པ་ཡིས། །ཀུན་ཀྱང་བསམ་གྱིས་མི་ཁྱབ་གསུངས། །ཡོན་ཏན་འདི་ནི་སུ་ཡིས་ནུས། །ཡོན་ཏན་རྨད་དུ་བྱུང་བ་སྟེ། །ཇི་སྲིད་སེམས་ནི་སྤྱོད་གྱུར་པ། །དེ་སྲིད་ལས་ནི་བསྡུས་པ་ཡིན། །བྱང་ཆུབ་སེམས་དཔའ་རྫུ་འཕྲུལ་ཆེ། །རྫོགས་སངས་རྒྱས་ཀྱིས་ཀུན་དུ་གསུངས། །ཞི་བ་དང་ནི་རྒྱས་པ་དང་། །དེ་བཞིན་དབང་དུ་བྱ་བའི་ལས། །རྒྱུད་གཞན་ལས་ཀྱང་གསུངས་པ་ཡི། །དེ་དག་ཐམས་ཅད་འདི་རུ་བྱེད། །ཇི་སྲིད་དེ་རུ་གསང་སྔགས་ནི། །ས་སྟེངས་

དཀྱིལ་འཁོར་དེ་གསུངས་པ། །དེ་ཀུན་རྟོག་པའི་རྒྱལ་པོ་ནི། །རྫུ་འཕྲུལ་ཆེན་པོ་འདི་བསྒྲུབ་བྱ། །ཞི་བ་འོ་མ་དཱུར་བ་ཡིས། །འདབ་མ་བསྲེགས་པས་སྦྱིན་སྲེག་བྱ། །དཀར་གསུམ་མངར་རམ་སྦྱིན་སྲེག་གམ། །འབྲས་བུ་ཉིད་ཀྱང་མཉམ་བཞག་པ། །གཞན་ཡང་འབྲས་བུའི་ཚུལ་དང་ནི། །ཡང་ན་འོ་མ་ཅན་གྱི་ཤིང་། །སོ་བ་འབྲུ་ནི་དེ་བཞིན་ནོ། །རིན་ཆེན་སྣ་ཚོགས་ལས་བྱུང་བ། །ལས་ཀྱི་ཁྱད་པར་ཆོ་ག་ནི། །ཞི་བར་གང་ཞིག་རབ་བསྒྲགས་པ། །མེ་ཐབ་དེ་བཞིན་བདག་ཉིད་དང་། །གང་ཞིག་གནས་ནི་རབ་ཏུ་གྲགས། །ཞི་བའི་ལས་རྣམས་གསུངས་པ་ཡི། ། ཕྱོགས་ནི་གང་ཞིག་ཡང་དག་གསུངས། །གང་ཞིག་ཡམ་ཤིང་གསུངས་པ་ཡི། །ཚད་ནི་གང་ཞིག་རབ་ཏུ་གྲགས། །གཞན་ཡང་གང་ཞིག་རབ་གྲགས་པ། །དེ་དག་ཐམས་ཅད་འདི་རུ་བྱ། །དེ་ལ་ཞི་བ་ཉིད་འདི་ནི། །དེ་དག་ཐམས་ཅད་འདི་རུ་སྦྱར། །གང་ཞིག་དབང་གྱུར་བཤད་པ་ནི། ། ལས་ནི་དབྱེ་བའང་དེ་ནས་ནི། །མེ་ཐབ་ཇི་བཞིན་བདག་ཉིད་དང་། །ཕྱོགས་ཀྱི་ཆ་འམ་ཡང་ན་གནས། །ཆོ་ག་སྣ་ཚོགས་ཡང་དག་འཁྲིགས། །གཞན་དུ་གང་ཞིག་གསུངས་པ་ཡི། །བདག་ཉིད་ཆེན་པོ་དབང་གི་ལས། །དངོས་གྲུབ་འདོད་པའི་སྔགས་པ་ཡིས། །དེ་དག་ཐམས་ཅད་འདི་རུ་སྦྱར། །རྫོགས་སངས་སེམས་ཅན་མཉེས་གཤིན་པས། །རྒྱས་པ་ཡང་ནི་ཡང་དག་གསུངས། །ཆོ་ག་སྣ་ཚོགས་ཟས་དང་ནི། །སྣ་ཚོགས་ལས་ནི་ལེགས་སྦྱར་བ། །ཕྱོགས་ཀྱི་ཁྱད་པར་གསུངས་པ་དང་། །དེ་ནས་ཡང་ནི་མེ་ཡི་ཐབ། །གཞན་ཡང་ཅུང་ཟད་ཅི་གསུངས་པ། །བྱང་ཆུབ་སྙིང་པོ་སོགས་གསུངས་པ། །བདག་ཉིད་རྙེད་པ་ལེགས་འཚོ་བ། །དེ་དག་ཐམས་ཅད་རྒྱས་པར་སྦྱར། །འདི་ཀུན་ཡང་དག་བཤད་པ་ནི། །ཁྲོ་བོའི་རྒྱལ་པོའི་རྣམ་འཕྲུལ་ཡིན། །ས་བཅུ་གནས་ཀྱི་དབང་ཕྱུག་དང་། །གང་ཡང་སུས་ཀྱང་མི་ནུས་པ། །འདི་ཀུན་མོད་ལ་མྱུར་དུ་ནི། །དྲན་པ་ཙམ་གྱིས་ཀྱང་བསྒྲུབ་བྱ། །ཁྲོ་བོ་ཆེ་བདག་བསམ་མི་ཁྱབ། །རྫོགས་སངས་རྒྱས་ཀྱིས་རབ་ཏུ་གསུངས། །དེ་ཡི་འབྲས་བུ་བསམ་མི་ཁྱབ། །གང་ཞིག་ལག་ཏུ་ཆུད་གྱུར་པ། །དེ་ཡི་ངན་སོང་སྟོངས་པར་འགྱུར། །འཇིགས་པ་ཐམས་ཅད་འཁྲིགས་པ་དང་། །བགེགས་ཆེན་ཡང་ནི་

འཇིགས་པར་བྱེད། །གང་ཡང་ནད་ནི་ཐམས་ཅད་འདོད། །འཇིགས་པ་འདི་ནི་ཐམས་ཅད་དང་། །སྡིག་པ་ཐམས་ཅད་ཀུན་དུ་འཁྲིགས། །འདི་ནི་དྲན་པ་འབའ་ཞིག་གིས། །དེ་དག་ཐམས་ཅད་མེད་པར་འགྱུར། །འཇིགས་པ་ཐམས་ཅད་འཁྲིགས་པ་དང་། །ཐམས་ཅད་ལྡན་པའི་འཁོར་བལྟས་ན། །ས་སྟེངས་ཡིད་ནི་མཆོག་ཏུ་བདེ། །བྱང་ཆུབ་སེམས་དཔའ་ཐམས་ཅད་ཀྱང་། །ངོ་མཚར་སྤྱན་རྒྱས་པ་ཕྱེ་ནས། །རྡོ་རྗེ་འཛིན་པ་བློ་ལྡན་གྱིས། །སྙན་པ་ཡི་ནི་ཚིག་གིས་གསོལ། །དཔའ་བོ་སེམས་དཔའ་ཆེན་པོ་ལེགས། །རྡོ་རྗེའི་རིགས་ལས་ཡང་དག་འབྱུང་། །བྱས་ཤེས་ཁྱོད་ནི་སངས་རྒྱས་ཀུན། །རྫུ་འཕྲུལ་ཆེན་པོའི་སྲས་གཅིག་ཁྱོད། །བདག་ཉིད་ཆེན་པོ་མི་གཡོ་བའི། །རྟོག་པ་འདི་རུ་གསུངས་པ་གང་། །གང་གི་ལག་ཏུ་ཆུད་གྱུར་པ། །དེ་ཡི་ལག་ན་དངོས་གྲུབ་གནས། །ཡོན་ཏན་བསམ་མི་ཁྱབ་ལྡན་པའི། །བསམ་གྱིས་མི་ཁྱབ་སྒྲུབ་པའི་ཐབས། །ངོ་མཚར་དུ་མ་དང་ལྡན་པ། །གསང་སྔགས་འདི་ནི་འཆང་བ་པོ། །བདག་ཅག་ཀྱང་ནི་དེ་བཀའ་ཉན། །ལྷ་དང་ལྷ་མིན་བཅས་པའི་ཀླུ། །རྒྱབ་ཕྱོགས་རྗེས་སུ་འབྲང་བར་ནི། །སྔགས་པ་དེ་ལ་འབྱུང་བར་འགྱུར། །སེམས་ཅན་ཐམས་ཅད་སྐལ་བཟངས་སུ། ། མཉེས་དགའ་བར་ནི་འབྱུང་བར་འགྱུར། །བགེགས་སུ་གྱུར་པ་ཐམས་ཅད་ནི། །སྔགས་པའི་བཀའ་སྒོ་བྱེད་པར་འགྱུར། །དེ་ནས་བཅོམ་ལྡན་འདས་ཀྱིས་བགེགས་ཐམས་ཅད་འཇོམས་པར་བྱེད་པའི་རྡོ་རྗེ་ཀུན་དུ་འབར་བར་བྱེད་པའི་མེ་ལྕེ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་རེ་ཞིག་སངས་རྒྱས་ཀྱི་ཞིང་འདི་ཉིད། འགུལ། རབ་ཏུ་འགུལ། ཀུན་དུ་རབ་ཏུ་འགུལ། གཡོས། རབ་ཏུ་གཡོས། ཀུན་དུ་རབ་ཏུ་གཡོས། ལྡེག་རབ་ཏུ་ལྡེག ཀུན་དུ་རབ་ཏུ་ལྡེག །འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་མོ། །དེ་ནས་རེ་ཞིག་སངས་རྒྱས་ཀྱི་ཞིང་འདི་ཉིད་བགེགས་ཐམས་ཅད་དང་། ལོག་པར་འདྲེན་པ་རྣམས་དང་། གང་ཡང་ཁ་ཅིག་འདི་ན་གདུག་པའི་སེམས་དང་ལྡན་པ་གཞན་གྱི་སྲོག་འཕྲོག་ཅིང་གླགས་

ཚོལ་བའི་སྲིན་པོ་དང་། འཇིགས་པའི་གཟུགས་ཅན་ལོག་པར་འདྲེན་པ་དེ་རྣམས་རྡོ་རྗེ་གར་གྱི་དབང་ཕྱུག་གི་གཟི་བརྗིད་ཀྱིས་བསྲེགས་ཤིང་གནས་མེད་ལ། གང་ཡང་སངས་རྒྱས་ཆོས་ལ་ནི། །གུས་པ་ཡིས་ནི་སྐྱབས་སོང་བས། །གང་ཞིག་སྐྱེ་བོ་དེ་ལུས་ལ། །སྡུག་བསྔལ་ཅི་ཡང་ཡོད་མ་ཡིན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། སྔར་མེད་པ་ཡི་བགེགས་ཀྱི་གཟུགས། །བསྒྲུབ་བྱ་བ་ཡི་ཆོ་ག་ནི། །ཕྱག་ན་རྡོ་རྗེ་ཚུར་ལ་ཉོན། །མི་ཤེས་པ་ཡི་སེམས་བསྒྲིབས་པས། །རྒྱུད་ནི་མི་ཤེས་པར་གྱུར་པ། །དེ་ནི་བགེགས་ཀྱིས་ཟིལ་མནན་ཅིང་། །འདིར་ནི་སྔགས་ལ་དད་ལྡན་ན། །སེལ་བ་རུ་ནི་གྱུར་པ་སྟེ། །ཡངས་པ་ཡི་ནི་མཆོག་ཏུ་འགྱུར། །ལས་ཀྱིས་རྒྱུད་དང་འབྲས་བུ་ནི། །ལེགས་བྱས་ཉེས་བྱས་དེ་བཞིན་དུ། །ལོག་པའི་རྒྱལ་པོ་ཟིལ་མནན་ཅིང་། །དེ་དག་ཐམས་ཅད་བརྙས་པ་བྱེད། ། ལོག་པའི་ཀུན་རྟོག་མང་པོ་ཡིས། །དམྱལ་བར་མྱུར་དུ་སྐྱེ་བར་འགྱུར། །ལྟས་ངན་ལས་ཀྱི་འབྲས་བུ་ཀུན། །དེ་ནས་གསོ་སྦྱོང་ཡོད་མ་ཡིན། །དེ་ནས་གསང་བའི་བདག་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་གཏུགས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བཤད་དུ་གསོལ། བདེ་བར་གཤེགས་པས་བཤད་དུ་གསོལ། བགེགས་རྣམས་ཀྱི་སྔ་ན་མེད་པའི་གཟུགས་སུ་གྱུར་པ། མ་འོངས་པའི་བྱིས་པའི་སེམས་ཅན་རྣམས་ཤེས་རབ་ཆུང་བས། བགེགས་རྣམས་སྔར་མེད་པའི་འབྱུང་བའི་རྒྱུ་མི་འཚལ་བས་ན་དེ་རྣམས་བསལ་བར་བྱ་བའི་ཕྱིར། གཙོ་བོས་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། བགེགས་རྣམས་ཞགས་པས་བཅིངས་པས་ནི། །སྔོན་གྱི་ལས་ལ་རག་ལས་ཡིན། །སེར་སྣ་གོམས་པའི་སྦྱོར་བ་ཡིས། །འདོད་པའི་དངོས་པོ་ལ་གནོད་པས། །སེམས་ནི་རྟོག་པའི་སྐྱོན་གྱིས་ནི། །སྔགས་པ་ལ་ནི་བགེགས་སྐྱེ་འགྱུར། །དེ་རྣམས་གཞོམ་པར་བྱ་བའི་ཕྱིར། །སེམས་ནི་བྱང་ཆུབ་གཏད་པར་བྱ། །བགེགས་རྣམས་ཐམས་ཅད་རྣམ་པར་འཇིག །ཐོག་མ་མེད་པའི་འཁོར་བའི་ཟོམ། །གང་ཡང་སྡིག་པ་ཅུང་ཟད་པ། །

ཐོག་མེད་སྲིད་པའི་འཁོར་ལོ་ནི། །བྱང་ཆུབ་སེམས་ཀྱི་མཐུ་ཡིས་སུ། །དེ་དག་ཐམས་ཅད་ཟད་པར་འགྱུར། །བྱང་ཆུབ་སེམས་ནི་སེམས་ཆེན་པོ། །སེམས་ཀྱི་ཉེས་པ་རྣམ་པར་སྤངས། །ཐོག་མ་མེད་པའི་སྡིག་པའི་སྐྱོན། །ནགས་མཚམས་མེ་ཡིས་སྲེག་པར་འགྱུར། །སྔགས་པས་སེམས་ལ་མཁས་པས་ན། །ལས་རྣམས་ཐམས་ཅད་བསྲེག་པར་འགྱུར། །འདི་ལྟར་བྱང་ཆུབ་སེམས་འཛིན་ན། །འདོད་པའི་དངོས་གྲུབ་ཐོབ་པར་འགྱུར། །གང་ཞིག་བྱང་ཆུབ་སེམས་བསྐྱེད་པ། །གོས་མེད་དྲི་མ་མེད་ཅིང་བརྟན། །ཐེ་ཚོམ་མེད་པ་ཉིད་དུ་ནི། ། དེ་ཡི་དངོས་གྲུབ་ལག་ན་གནས། །བྱང་ཆུབ་སེམས་ནི་མ་བསྐྱེད་ཅིང་། །དད་དང་བརྩོན་འགྲུས་རྣམ་པར་སྤངས། །སྐྱེས་བུ་བཀའ་བསྒོ་བྱེད་པ་ནི། །འདིས་ནི་དངོས་གྲུབ་ཡོད་མ་ཡིན། །ཕྱག་ན་རྡོ་རྗེ་བྱང་ཆུབ་ཏུ་སེམས་བསྐྱེད་པ་ལ་སོགས་པ་དམ་ཚིག་འདིས་སྔགས་པས་སྔགས་བསྒྲུབས་ན་བགེགས་རྣམས་བགེགས་བྱེད་པར་མི་འགྱུར་ཏེ། དེ་ཅིའི་ཕྱིར་ཞེ་ན། ཕྱག་ན་རྡོ་རྗེ་དེ་ནི་ལྷ་དང་འཇིག་རྟེན་པ་རྣམས་ཀྱིས་ཕྱག་བྱ་བའི་འོས་ཡིན་ནོ། །སླར་བརྗོད་ཅིང་དགོངས་ཏེ། བགེགས་དང་། ལོག་པར་འདྲེན་པ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ཡི་དགས་དང་། ཤ་ཟ་རྣམས་ཤིན་ཏུ་རྒྱང་རིང་པོ་ནས་ས་སྟེངས་སུ་སྔགས་འཆང་བ་མཐོང་བས་སྤྲོ་བ་བསྐྱེད་དེ་ཕྱག་བྱེད་དོ། །སྐྱོན་རྣམས་ཐམས་ཅད་རྣམ་པར་གྲོལ། །བསོད་ནམས་ཐམས་ཅད་ཤིན་ཏུ་བསགས། །བྱང་ཆུབ་ཚོགས་ནི་ཡང་དག་ལྡན། །བླ་མ་སངས་རྒྱས་ཀུན་དང་མཉམ། །དེ་ནས་ཕྱག་ན་རྡོ་རྗེས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བགེགས་ཀྱི་སྔར་གྱི་གཟུགས་ཀྱི་གཟུགས་རྣམས་སྒྲུབ་པ་པོ་ལ་སྦྱར་བ་ལ་ཇི་ལྟར་འགྱུར། བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ་གང་གི་ཚེ་སྔགས་པ་བགེགས་ཀྱིས་ཟིལ་གྱིས་མནན་པ་དེའི་ཚེ་རིམས་དང་ཚད་པའི་ནད་དང་། བཀྲེས་སྐོམ་དུ་གྱུར་ཅིང་སྙོམ་ལས་ལ་དགའ་ལ་ངེས་པ་ལོག་སྟེ་ཐེ་ཚོམ་ཟ་བར་འགྱུར་རོ། །ནད་དང་། འཚེ་བ་དང་། བདག་ཉིད་ཀྱི་ལྷ་ཁ་ཕྱིར་བལྟས་ཤིང་ལྷ་རྣམས་ནི་དམིགས་ཀྱིས་སེལ་བར་བྱེད་པ་དེའི་ཚེ་གསང་བའི་བདག་པོ་

སྔགས་པ་བགེགས་ཀྱིས་ཟིལ་གྱིས་མནན་པ་ཡིན་པར་རིག་པར་བྱའོ། །གསང་བའི་བདག་པོ་དེའི་ཚེ་སློབ་དཔོན་གྱིས་བགེགས་ཐམས་ཅད་ཟློག་པར་བྱེད་པའི་ཁྲོ་བོའི་རྒྱལ་པོ་མི་གཡོ་མགོན་པོའི་དཀྱིལ་འཁོར་བྲིས་ཏེ། བགེགས་ཐམས་ཅད་བཅོམ་ནས་དབང་བསྐུར་བར་བྱའོ། །དེ་ལ་གསང་བའི་བདག་པོ་དཀྱིལ་འཁོར་ནི་འདི་ཡིན་ཏེ། ཁོར་ཡུག་ཏུ་ནི་གྲུ་བཞི་སྟེ། ཁ་ཁྱེར་ཀུན་ནས་ཁོར་ཡུག་ཏུའོ། །རྡོ་རྗེ་བཅིང་བའི་སྦྱོར་བ་ཉིད། །རྡོ་རྗེ་ཕན་ཚུན་བཅིངས་སྦྲེལ་བྱ། །ཁྲུ་བརྒྱད་དང་ནི་བཞི་དང་ལྔ། །བཅུ་དང་བཅུ་དྲུག་པ་ཉིད་དམ། །ཁྲུ་གང་འམ་ནི་ཁྲུ་གཉིས་པ། ། ཇི་ལྟར་འབྱོར་པ་མཛེས་པར་བྱ། །དེ་རུ་སྒོ་གཅིག་པ་ཡིན་ཏེ། །རྡོ་རྗེའི་གུར་ནི་སྦྱར་བར་བྱ། །རྡོ་རྗེའི་ར་བ་ཀུན་དུ་བསྐོར། །དཀྱིལ་འཁོར་དམ་པ་བྲི་བར་བྱ། །དེ་ཡི་དབུས་སུ་དཔའ་བོ་ནི། །པདྨའི་སྟེང་ན་ཡང་དག་བཞུགས། །དེ་ཡི་ཤར་དུ་སངས་རྒྱས་ཀྱི། །ཡུམ་ནི་ནམ་མཁའི་སྤྱན་ཡིན་ནོ། ། དེ་ཡི་གཡོན་དུ་བྲི་བྱ་བ། །ནམ་མཁའི་དྲི་མེད་རྡོ་རྗེ་ཅན། །གཡས་ཀྱི་ཕྱོགས་སུ་ཤུགས་ཆེན་པོ། །འཕྲོ་བ་རྡོ་རྗེ་ཕྲེང་བ་ཅན། །དཔའ་བོ་ཆེན་པོ་གཡོན་ཕྱོགས་སུ། །རྡོ་རྗེ་ཕྱག་ཅན་རྡོ་རྗེ་ཅན། །དཔའ་བོ་ཆེན་པོ་གཡས་ངོས་སུ། །ཁྲོ་ཆེན་སྙེམས་ཚུལ་ཞེས་བྱ་བ། །འོག་ཏུ་ངོས་སུ་མགོན་པོ་ནི། །མི་གཡོ་བ་ནི་སྟོབས་ཆེན་པོ། །ཁྲོ་བོ་ཆེན་པོ་རལ་གྲིའི་ཕྱག །ཁམས་གསུམ་རྣམས་ནི་གཅོད་པར་བྱེད། །སྒོ་ཡི་ཕྱོགས་སུ་བྲི་བྱ་བ། །མཐོང་དགའ་མངོན་ཕྱོགས་དེ་བཞིན་ནོ། །དེ་ལྟར་འདི་དག་ཀུན་བྱས་ན། །ཁ་དོག་ནག་དང་དམར་པོ་རུ། །ཁྲོ་བའི་གཟུགས་ནི་གཞག་ནས་སུ། །བུམ་པ་རྣམས་ནི་མངོན་པར་བསྔགས། །ཁ་ནི་བ་གླང་ལ་སོགས་བརྒྱན། །ཁ་ནས་ས་བོན་གྱིས་བཀང་སྟེ། །མགྲིན་པ་གོས་ཀྱིས་ཡང་དག་བཅིངས། །མེ་ཏོག་ཆུན་འཕྱང་ཉེ་བར་སྤྲས། །རིན་ཆེན་སྣ་ལྔ་འབྲུ་སྣ་ལྔ། །སྨན་ཆེན་པོ་ནི་ཡང་དག་ལྡན། །དྲི་ཆུ་ཡིས་ནི་རབ་ཏུ་བཀང་། །ལྷ་རྣམས་ཐམས་ཅད་དགོད་པར་བྱ། །དྲི་དང་མེ་ཏོག་སོགས་དགེ་བས། །ཇི་ལྟར་རྙེད་པས་མཆོད་པར་བྱ། །མི་གཡོ་བདག་ཉིད་ཆེན་པོ་ཡིས། །དབང་བསྐུར་བས་ནི་རབ་ཏུ་བྱ། །དེ་རུ་དཀྱིལ་འཁོར་གཉིས་པོ་ནི། །དཀྱིལ་འཁོར་མངོན་པར་ཕྱོགས་དེ་

ནས། །ཀུན་ནས་གྲུ་བཞི་པ་ཡིན་ཏེ། །ཁྲུ་དོ་པའམ་ཁྲུ་བཞི་པ། །དབུས་སུ་པདྨ་བྲི་བར་བྱ། །བར་དུ་རྡོ་རྗེ་རྣམ་འཕྲོ་བ། །རྡོ་རྗེའི་ཕྲེང་བས་ཁོར་ཡུག་ཏུ། །རྡོ་རྗེ་བཅིང་པས་བསྐོར་བར་བྱ། །དེ་ཡི་དཀྱིལ་དུ་བཞག་ནས་ནི། །འདིར་ནི་འབདཔས་དབང་བསྐུར་བྱ། །མི་གཡོ་བདག་ཉིད་ཆེན་པོ་ཡིས། །རལ་གྲིའི་ཕྱག་རྒྱ་དེ་ནས་བཅིང་། །སྙིང་ག་ནས་ནི་སྙིང་གར་སྦྱིན། །ཀུན་ནས་འབར་བའི་ཕྲེང་བ་ཅན། །བགེགས་རྣམས་ཀུན་ལས་རྣམ་གྲོལ་ནས། །རྡོ་རྗེ་འཛིན་པའི་དངོས་གྲུབ་འཐོབ། །སྡིག་པ་ཐམས་ཅད་རྣམ་པར་གྲོལ། །བགེགས་ནི་ཐམས་ཅད་རྣམ་པར་སྤངས། ། ཆོས་ཀུན་ཡོན་ཏན་གྱིས་བརྒྱན་པ། །ཇི་བཞིན་འདོད་པའི་དངོས་གྲུབ་འཐོབ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཤད་དུ་གསོལ། ཁྲོ་བོའི་རྒྱལ་པོ་དེ་བཞིན་གཤེགས་པ་ཐམས་ཅད་ཀྱིས་བཀའ་བསྒོ་མཛད་པ་ཅན་མཐུ་སྟོབས་ཆེན་པོས་གསང་བའི་རྟོག་པ་གང་གིས་སྒྲུབ་པ་པོ་རྣམས་ལ་མ་འོངས་པའི་དུས་ན་དངོས་གྲུབ་འབྱུང་བར་འགྱུར་བ། སེམས་ཅན་མང་པོའི་དོན་དུ་ཕན་པ་དང་བདེ་བ་བྱེད་པར་འགྱུར་བ། བགེགས་ཐམས་ཅད་རྣམ་པར་སྤངས་པ་སྔགས་ཀྱང་འགྲུབ་པར་འགྱུར་བ་དེ་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ལེགས་སོ་ལེགས་སོ། །ལག་ན་རྡོ་རྗེ་སླར་ཡང་ལེགས་སོ། །ཁྱོད་ཀྱིས་སེམས་ཅན་ཐམས་ཅད་ལ་ཕན་ཞིང་བདེ་བའི་ཕྱིར་དང་། མ་འོངས་པའི་སེམས་ཅན་གྱི་དོན་གྱི་ཕྱིར་ཁྲོ་བོའི་རྒྱལ་པོ་ཆེན་པོ་ཐམས་ཅད་དུ་ཐོགས་པ་མེད་པ། རྟུལ་ཕོད་པ་དེ་བཞིན་གཤེགས་པ་ཐམས་ཅད་ཀྱིས་རྗེས་སུ་གནང་བ། ལས་ཐམས་ཅད་བྱེད་པར་ནུས་པ། དངོས་གྲུབ་སྒྲུབ་པར་བྱེད་པ་ཡོངས་སུ་འདྲི་བར་བྱེད་པ་ལེགས་པར་ཉོན་ལ་ཡིད་ལ་ཟུང་ཤིག་དང་ང་ཡིས་བཤད་དོ། །དེ་ལ་ལག་ན་རྡོ་རྗེ་སློབ་དཔོན་དེ་བཞིན་གཤེགས་པའི་གོ་འཕང་ལ་གནས་པས་ཁྲོ་བོ་ཆེན་པོའི་དཀྱིལ་འཁོར་ཆེན་པོ་བྲི་བར་བྱ་སྟེ། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དེ་ལ་བཅོམ་ལྡན་དཔའ་བོ་ཆེ། །ཆོས་ནི་ཐམས་ཅད་ཡང་དག་ལྡན། །

དེ་ཡི་གཡས་དང་གཡོན་ངོས་སུ། །ནམ་མཁའ་དྲི་མེད་ཤུགས་ཆེན་པོ། །རྡོ་རྗེ་འཛིན་པ་གཉིས་བྲི་བྱ། །འོག་ཏུ་ཁྲོ་བོ་ཆེན་པོ་ནི། །མི་གཡོ་བ་ནི་སྟོབས་པོ་ཆེ། །ཕྱག་ན་རལ་གྲི་ཟུར་གྱིས་གཟིགས། །འཆི་བདག་མཐར་བྱེད་མངོན་སུམ་བཞིན། །མེ་ཡི་དཀྱིལ་འཁོར་ལ་བཞུགས་པ། ། རླུང་དང་ལྷན་ཅིག་སྦྱར་བར་བྱ། །མཁས་པས་དྲི་དང་མེ་ཏོག་སོགས། །སྔ་མ་བཞིན་དུ་མཆོད་ནས་སུ། །ངོ་མཚར་བཀྲ་ཤིས་ཐམས་ཅད་ཀྱིས། །སྔགས་པས་མངོན་པར་དབང་བསྐུར་བྱ། །ཕྱག་རྒྱ་དེ་ནི་བདག་ཉིད་ཀྱིས། །སློབ་དཔོན་བློ་དང་ལྡན་པ་ཡི། །བླ་མ་ལ་ནི་ཡོན་ཕུལ་ནས། །སྦྱིན་སྲེག་ལས་ནི་ཡང་དག་བརྩམ། །རི་ཡི་རྩེ་མོར་གྱུར་པ་དང་། །ཕྱུགས་ལྷས་ཆུ་འགྲམ་བཞི་མདོའི་ལམ། །མེ་ནི་གནས་པ་ཉིད་དག་གམ། །དུར་ཁྲོད་དང་ནི་གཞི་གནས་སུ། །སློང་མོའི་ཟས་ནི་ཟ་བ་དང་། །ཡང་ན་འདབ་མ་བཙོས་པ་ཉིད། །དབེན་པའི་གནས་སུ་མི་སྨྲ་བས། །འབུམ་ཕྲག་གསུམ་དུ་བཟླས་བརྗོད་པ། །སྔོན་དུ་བསྙེན་པ་བཤད་པ་ཡིན། །མཚན་མ་ཆོ་ག་བཞིན་ཤེས་ནས། །མཁས་པས་དངོས་གྲུབ་སྒྲུབ་པར་བྱེད། །རལ་གྲིའི་ཆོ་ག་བཞིན་བྱ་བ། །ཆག་གས་མེད་པ་སོར་བཞི་པ། །མཐེའུ་ཆུང་སོར་གཉིས་དང་བཅས་པ། །སྒྲུབ་པའི་རང་བཞིན་ཤིང་ལས་བྱས། །ལྟེ་བར་རྣམ་པ་སྣ་ཚོགས་བྲི། །བ་ཡི་རྣམ་ལྔས་བཀྲུས་ནས་སུ། །དྲི་དང་མེ་ཏོག་སོགས་ཀྱིས་མཆོད། །སྔགས་པས་དཀྱིལ་འཁོར་བྲིས་ནས་སུ། །སྔ་མ་དེ་བཞིན་དེ་བསྒྲུབ་བྱ། །སྔགས་པས་པདྨའི་སྟན་གནས་ཏེ། །རལ་གྲི་ཡུ་བ་ནས་ཐོགས་པ། ། ཁྲོ་བོ་སྒོམ་པར་ལྡན་པ་ཡིས། །གསང་སྔགས་གཡེང་བ་མེད་པར་བཟླ། །མཚན་མོ་ཕྱེད་དམ་ཡང་ན་དེ། །ཉི་མ་ཤར་བའི་དུས་ཉིད་དུ། །རལ་གྲི་རབ་ཏུ་འབར་གྱུར་ནས། །ཐམས་ཅད་དུ་ནི་སྣང་བར་བྱེད། །རིག་པ་ལུས་ནི་རྗེས་ནས་སུ། །ནམ་མཁའ་སྤྱོད་ཡུལ་དག་ཏུ་འགྱུར། ། བར་གྱི་བསྐལ་པར་ཀུན་དུ་གནས། །རང་འདོད་དུས་ན་འཆི་བར་འགྱུར། །རིག་འཛིན་རྒྱལ་པོ་ཀུན་དང་ནི། །རིག་པ་འཛིན་པ་ཀུན་གྱིས་མཆོད། །ལྷ་ཡི་བཞོན་པ་སྣ་ཚོགས་པ། །ལྷ་ཡི་ཚོགས་ནི་བསྟེན་པ་ཡིན། །དེ་ནས་ཞགས་པ་སྒྲུབ་པར་འདོད་ན་སྔར་བཞིན་དུ་འབུམ་ཕྲག་

གསུམ་བཟླས་ནས་དེ་བཞིན་དུ་གསེར་རམ་དངུལ་ལམ་ཟངས་ཀྱི་རང་བཞིན་གྱི་ཞགས་པ་བྱས་ཏེ། མཚན་མ་ཤེས་ནས་དཀྱིལ་འཁོར་བྲིས་ཏེ་བསྒྲུབས་ན་དེ་བཞིན་དུ་རིག་པ་འཛིན་པར་འགྱུར་རོ། །རིག་པ་འཛིན་པའི་རྒྱལ་པོ་ཐམས་ཅད་ཀྱི་བསྐལ་པར་གནས་སོ། ། དེ་ལྟར་རལ་གྲི་དང་། རྒྱལ་མཚན་དང་། ནོར་བུ་དང་། གིའུ་ཝང་དང་། གདུགས་དང་། ལྕགས་ཀྱུ་བསྒྲུབས་པར་གྱུར་ན་དེ་བཞིན་དུ་འགྲུབ་པོ། །དེ་ནས་རྒྱལ་པོ་དབང་དུ་བྱ་བར་འདོད་ན་ཀུ་ཤའི་རང་བཞིན་ལ་གཟུགས་བརྙན་བྱས་ནས་རྐང་པ་གཡོན་པས་མནན་ལ་ཇི་སྲིད་རྒྱལ་པོ་རང་ཉིད་འོངས་ནས་འཁོར་དང་བཅས་པ་དབང་དུ་འགྱུར་བ་དེ་སྲིད་དུ་བཟླས་པ་བྱའོ། །དེ་ནས་ལྷ་སྒྲུབ་པར་འདོད་ན་ཐང་ཤིང་གི་རང་བཞིན་གྱི་གཟུགས་བརྙན་བྱས་ལ་ཇི་སྲིད་དུ་ལྷ་འོངས་ཀྱི་བར་དེ་སྲིད་དུ་བཟླས་པ་བྱའོ། །འོངས་ནས་སྨྲ་བ་སྒྲུབ་པར་བྱེད་དེ་སྔགས་པ་གང་འདོད་པ་དེ་གནང་བར་སྟེར་རོ། ། དེ་བཞིན་དུ་ཀླུ་སྒྲུབ་པར་འདོད་པས་ནཱ་ག་གེ་སར་གྱི་ཤིང་ལས་ཀླུའི་གཟུགས་བརྙན་བྱས་ནས་སྔར་གྱི་བཞིན་དུ་འབུམ་ཕྲག་གསུམ་བཟླས་ཏེ། ཇི་སྲིད་དུ་ཀླུ་ཐམས་ཅད་དབང་དུ་གྱུར་པ་དེ་སྲིད་དུ་བཟླས་པ་བྱའོ། །དེ་བཞིན་དུ་གནོད་སྦྱིན་སྒྲུབ་པར་འདོད་པས་གསེར་ལས་གནོད་སྦྱིན་གྱི་གཟུགས་བྱས་ལ་སྔར་བཞིན་དུ་འབུམ་ཕྲག་གསུམ་བཟླས་ཏེ་ཇི་སྲིད་དུ་གནོད་སྦྱིན་ཐམས་ཅད་འོངས་ཏེ་བཀའ་བསྒོ་སྒྲུབ་པར་བྱེད་པ་དེ་སྲིད་ཀྱི་བར་དུ་བཟླས་པ་བྱའོ། །དེ་ནས་དྲི་ཟ་སྒྲུབ་པར་འདོད་པས་འོད་མའི་རང་བཞིན་ལས་དྲི་ཟའི་གཟུགས་བརྙན་བྱས་ལ་སྔར་བཞིན་དུ་འབུམ་ཕྲག་གསུམ་བཟླས་ཏེ་ཇི་སྲིད་དུ་དྲི་ཟ་འོངས་ནས་སྨྲ་བར་འགྱུར་བ་དེ་སྲིད་ཀྱི་བར་དུ་བཟླས་པར་བྱའོ། །དེ་བཞིན་དུ་ནམ་མཁའ་ལྡིང་སྒྲུབ་པར་འདོད་པས་འཇིམ་པའི་རང་བཞིན་ལས་ནམ་མཁའ་ལྡིང་བྱས་ལ་སྔར་བཞིན་དུ་འབུམ་ཕྲག་གསུམ་བཟླས་ན་ནམ་མཁའ་ལྡིང་ཐམས་ཅད་བཀའ་སྩལ་པ་བཞིན་བྱེད་དོ། །དེ་ལྟར་སྲིན་པོ་སྒྲུབ་པར་འདོད་པས་དུར་ཁྲོད་ཀྱི་སོལ་བས་སྲིན་པོའི་གཟུགས་བྲིས་ལ་རྐང་པ་གཡོན་པས་མནན་ཏེ་ཇི་སྲིད་དུ་སྲིན་པོ་ཐམས་ཅད་སྨྲ་བ་སྒྲུབ་པར་བྱེད་པ་དེ་སྲིད་དུ་བཟླས་པ་བྱའོ། །དེ་ལྟར་སྐྱེས་པ་དང་བུད་མེད་རྣམས་ཀྱང་ཀུན་དུ་སྦྱར་ན་དེ་བཞིན་དུ་འགྲུབ་པོ། །དེ་ལྟར་ལག་ན་རྡོ་རྗེ་ཇི་ལྟ་ཇི་

ལྟར་ཁྲོ་བོའི་རྒྱལ་པོ་འདི་སྦྱར་ན་དེ་ལྟ་དེ་ལྟར་ལས་ཐམས་ཅད་བྱེད་དོ། །ཐམས་ཅད་དུ་ཐོགས་པ་མེད་པའི་མཐུ་ཆེན་པོ་ཁྲོ་བོའི་རྒྱལ་པོ་ཆེན་པོ་འདི་སངས་རྒྱས་ཐམས་ཅད་ཀྱིས་རྗེས་སུ་གནང་བར་གྱུར་པ་ལས་ཐམས་ཅད་ཡང་དག་པར་ལྡན་པ་བཀླགས་པ་ཙམ་གྱིས་འགྲུབ་པའི་ཁྲོ་བོའི་རྒྱལ་པོ་འདི་ལ་རྟོག་པ་ཐམས་ཅད་ཀྱི་ཆོ་ག་སྦྱར་བར་བྱའོ། །བྱང་ཆུབ་ཏུ་སེམས་མ་བསྐྱེད་པ་དང་། མ་དད་པ་དང་། སོམ་ཉི་ཟ་བ་རྣམས་སྤངས་ནས་གནང་བ་ཐོབ་པར་གྱུར་པས་རྟོག་པ་ཐམས་ཅད་ཀྱི་ཆོ་ག་སྦྱར་བར་བྱའོ། །དགུག་པ་དང་། དབང་དུ་བྱ་བ་དང་། གསད་པ་དང་སྐེམ་པ་རྣམས་ལ་ཇི་ལྟ་ཇི་ལྟར་ཀུན་དུ་སྦྱར་བ་དེ་ལྟ་དེ་ལྟར་དོན་ཡོད་པ་ཐོགས་པ་མེད་པ་འདི་སྦྱར་བར་བྱའོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དཀྱིལ་འཁོར་སྒྲུབ་པའི་ཐབས་དང་ནི། །བགེགས་ཀྱི་སྔོན་གྱི་གཟུགས་བརྙན་རྣམས། །བཅོམ་ལྡན་འདས་ཀྱིས་བཤད་དུ་གསོལ། །བསྒྲུབ་པར་བྱ་བ་པོའི་ཆོ་ག །བགེགས་ནི་སྣ་ཚོགས་པ་ཉོན་ཅིག །རྟག་ཏུ་སེམས་ནི་གཡེང་འགྱུར་ཞིང་། །གསང་སྔགས་རྣམས་ནི་ཁ་ཕྱིར་བལྟ། །བཟླས་པ་བསམ་གཏན་དགའ་བ་མིན། །གནས་དང་ལྷ་ཡི་ལས་རྣམས་དང་། །སྦྱིན་སྲེག་དབང་བསྐུར་ལས་དང་ནི། །ལྷ་རྣམས་ཁ་ནི་ཕྱི་རུ་བལྟ། །སྔགས་པ་བགེགས་ལ་མངོན་པར་འཚེ། །ཡི་དམ་མེད་པར་གྱུར་པ་དང་། །ཡུལ་གཞན་གྱི་ནི་རྣམ་པར་རྟོག །རྣམ་རྟོག་མང་པོ་འབྱུང་བ་དང་། །དད་པ་མེད་ཅིང་སྙོམ་ལས་ཆེ། །དེ་བཞིན་ཡན་ལག་འབིགས་པར་བྱེད། ། དུས་ཀྱི་དབང་གིས་རྣམ་པར་བསྒྱིངས། །ཁྲོ་བ་ཅན་ནི་ཉིད་དུ་འབྱུང་། །ཐེ་ཚོམ་དག་ནི་སྐྱེ་འགྱུར་ཞིང་། །སླར་ཡང་དེ་ཡི་དངོས་གྲུབ་མེད། །དེ་ལ་སོགས་པའི་སྐྱོན་རྣམས་ནི། །བགེགས་ཀྱི་གཟུགས་སུ་བསྟན་པ་ཡིན། །རྩོད་དང་བྲང་འགྲོ་ཀླུ་དང་ནི། །ཡམས་ནི་འབྱུང་བར་གྱུར་པ་དང་། །རིམས་དང་ཚ་ནད་བགེགས་ཀྱིས་ཉེན། །དེ་བཞིན་དུ་ནི་སྒྲུབ་པ་པོ། །གཟའ་ཡི་དཀྱིལ་འཁོར་དགེ་བ་རུ། །དབང་ནི་རབ་ཏུ་བསྐུར་བར་བྱ། །དེ་ལྟར་སྦྱངས་པའི་སྔགས་པ་ཡིས། །བགེགས་རྣམས་ཐམས་ཅད་འཇིགས་མེད་པར། །སླར་ཡང་རང་གི་ཡི་དམ་ལྷ། །སྦྱིན་

སྲེག་དང་བཅས་བསྒོམ་པར་བྱ། །ཏིལ་རྣམས་དང་ནི་མར་རྣམས་ནི། །མཉམ་པར་བཞག་པས་སྟོང་ཕྲག་བསྲེག །གསང་སྔགས་ཀྱིས་ནི་ཚིམ་བྱ་ཞིང་། །སྦྱིན་སྲེག་ཆོ་ག་བཞིན་དུ་བྱ། །མངོན་པར་འདོད་པ་བསྒྲུབ་པའི་ཕྱིར། །སླར་ཡང་མཉེས་པ་བརྩམ་པར་བྱ། །དེ་ནས་ཡང་ནི་རྡོ་རྗེ་འཛིན། །བཅོམ་ལྡན་སླར་ཡང་བཀའ་སྩལ་པ། །བགེགས་རྣམས་སྔ་ན་མེད་པའི་གཟུགས། །ཕན་པའི་ཡིད་ཀྱིས་ཚུར་ལ་ཉོན། །དཀྱིལ་འཁོར་སྒྲུབ་པའི་ཐབས་ལ་ཡང་། །ཆོ་གའི་ལས་རྣམས་སྦྱར་བར་བྱ། །གང་ཚེ་ངོ་མཚར་ཅན་གྱི་ལས། །སྔགས་པ་མཁས་པ་ཡིས་ནི་བྱ། །གང་གི་སྐྱོན་དང་ལྡན་པ་ཡི། །བགེགས་དང་ལོག་པར་འདྲེན་པ་རྣམས། །སེམས་ཅན་རྣམས་ལ་བགེགས་བྱེད་པ། །མི་བཟད་འཇིགས་པས་འཇིགས་པར་བྱེད། །གནས་སོགས་ཆོ་ག་ཉམས་པ་དང་། །དེ་བཞིན་ལྷ་ཉིད་གཟིར་བ་དང་། །སྔགས་རྣམས་འགོམ་པར་བྱེད་པའི་དོན། །བདག་ཉིད་ཆེན་པོ་གཟི་བརྗིད་འབར། །གང་དུ་གཏོར་མའི་ཆོ་ག་ལས། །ཆོ་ག་བཞིན་དུ་གྱུར་པར་བྱ། །གང་དུ་མཆོད་པ་བྱས་གྱུར་དང་། །གང་ཞིག་བརྙས་པ་ཞི་བར་འགྱུར། །རླུང་ཆར་དེ་བཞིན་སོལ་བ་དང་། །ཡི་གེ་ཧཱུྃ་གི་སྒྲ་སྒྲོགས་ཤིང་། ། གནས་གཅིག་སྔར་ནི་སྒྲ་འབྱིན་དང་། །གློག་འཁྱུག་པ་ཡི་སྒྲ་དང་ནི། །མེ་ཡིས་བསྲེག་ཅིང་ཆེར་འཇིགས་པའི། །གླང་ཆེན་མི་བཟད་སྒྲ་སྐད་འདོན། །བོང་བུ་རྔ་མོ་སྤྲེའུ་འདྲ་བ། །ཤིན་ཏུ་མི་བཟད་རོ་ལངས་རྣམས། །ཧ་ཧའི་སྒྲ་ནི་རབ་ཏུ་སྒྲོགས། །འབར་བའི་མེ་ཡིས་དཀྲིགས་པའི་འོད། །རླུང་གི་དཀྱིལ་འཁོར་གཟུགས་ཅན་རྣམས། །ལ་ལར་མཆེད་ནས་འབར་ཞིང་བྱུང་། །སེང་གེའི་སྒྲ་ནི་སྒྲ་ཆེན་པོ། །སྣ་ཚོགས་གཟུགས་ཅན་རྣམ་པར་འཕྲུལ། །སྐྲག་པ་ཡང་ནི་སྐྱེད་པར་བྱེད། །མི་གཡོ་བ་ནི་སྟོབས་པོ་ཆེ། །ཁྲོ་བོའི་རྒྱལ་པོ་རབ་ཏུ་སྦྱར། །ནུས་པས་ཡང་ནི་འཇོམས་པར་བྱེད། །སྔགས་ཀྱིས་རྨོངས་པར་བྱེད་འགྱུར་ཞིང་། །མི་བཟད་པ་རྣམས་རེངས་པར་བྱེད། །ཡི་གེ་ཧ་ཡི་གཟུགས་ཅན་དབྱིབས། །མེ་ཡི་ཚུལ་ལྟར་རིགས་པ་སྟེ། །བརྩོན་ཆེན་ཐམས་ཅད་དམར་པོ་སྟེ། །སྐྱོན་རྣམས་འཇོམས་པ་རལ་གྲིའི་ཕྱག །གདུག་པ་ཐམས་ཅད་

སྡིགས་མཛུབ་པ། །གཡོན་པའི་ཕྱག་ན་ཞགས་པ་བསྣམས། །འབར་བའི་ཕྲེང་བའི་དཀྱིལ་ན་བཞུགས། །བསྐལ་པའི་མེ་ནི་བཞིན་དུ་གནས། །ཧཱུྃ་སྒྲ་ཕཊ་ཀྱི་སྒྲ་དང་བཅས། །མཆེ་བ་གཙིགས་ཤིང་ཟུར་མིག་གཟིགས། །གདུག་པ་ཐམས་ཅད་ཕྱོགས་བཅུ་རུ། །ཡི་གེ་ཧཱུྃ་ནི་ཁྲོ་བོ་བཅུ། །ཕྱོགས་ཀུན་དུ་ནི་བརླག་པར་འགྱུར། །ཧ་ཧ་རབ་ཏུ་སྒྲོགས་པར་བྱེད། །རྡོ་རྗེའི་མེ་ཡིས་བསྲེགས་པ་དང་། །ཕན་ཚུན་དུ་ནི་འཚེ་འགྱུར་ཞིང་། །ཕྱོགས་ཀུན་དུ་ནི་བརླག་པར་འགྱུར། །བདག་ཉིད་རྣལ་འབྱོར་ལ་གནས་ནས། །དཔའ་བོ་ཆེན་པོའི་གོ་འཕང་འཐོབ། །ཁྲོ་བོའི་རྒྱལ་པོ་རབ་ཏུ་སྦྱར། །བགེགས་དང་ལོག་འདྲེན་ཐམས་ཅད་ལ། །ཡི་གེ་ཧ་ཡི་མེ་ཡི་ཚུལ། །མངོན་སུམ་བཞིན་དུ་འཇོམས་པར་བྱེད། །ཡི་གེ་ཧཱུྃ་གི་སྒྲ་དང་ལྡན། །ལོག་པར་འདྲེན་པ་ཐམས་ཅད་འཇོམས། །ཡི་གེ་ཧཱུྃ་ནི་རླུང་གི་ཚུལ། །སྤྲིན་རུམ་གཏིབས་པ་མཉམ་པའི་འོད། །སྤྲིན་གྱི་ཡི་གེ་ཧཱུྃ་འུར་གྱིས། །གདུག་པ་ཐམས་ཅད་འཐོར་བར་བྱེད། །ཡི་གེ་ཧ་ནི་མེ་ཡི་ཚུལ། །རབ་ཏུ་འབར་བ་རྡོ་རྗེའི་ཕྱག །ཡི་གེ་ཧཱུྃ་གི་སྒྲ་དང་ལྡན། །ལྟ་སྟངས་ཐམས་ཅད་བསྡུ་བར་བྱ། །བདག་ཉིད་ཡི་གེ་ཧར་བྱས་ནས། །ཐམས་ཅད་དམར་ཞིང་ཁྲོས་དང་བཅས། །འཇིགས་པའི་སྒྲ་ཅན་ཆེར་འཇིགས་པ། །ཕྱག་ན་ཞགས་པ་ཁྲོས་དང་བཅས། །སྔགས་འཆང་ཞགས་པའི་ཕྱག་རྒྱ་ཡིས། །བགེགས་རྣམས་ཐམས་ཅད་དགུག་པར་བྱ། །བགེགས་རྣམས་ཐམས་ཅད་བཀུག་ནས་ནི། །བཅིངས་ནས་རབ་ཏུ་སྐྲག་པར་བྱ། །ཡང་ན་བགེགས་རྣམས་ཐམས་ཅད་ལ། །ཤིན་ཏུ་གཏུམ་ཤིང་ཁྲོས་པ་ཡིས། །དེ་རྣམས་ཀྱི་ནི་གཟུགས་བྱས་ཏེ། །ཞགས་པའི་ཕྱག་རྒྱས་བཀུག་ནས་སུ། །བརྡེག་པར་བྱ་ཞིང་རྟོག་པར་བྱ། །གཅད་པ་དང་ནི་བསྲེག་པར་བྱ། །བགེགས་རྣམས་ཐམས་ཅད་བརླག་པར་འགྱུར། །ཚངས་པ་མདུན་ན་གནས་གྱུར་ཀྱང་། །དེ་མ་ཐག་ཏུ་བྱེར་ནས་ནི། །ཐེ་ཚོམ་མེད་པར་འཆི་བར་འགྱུར། །ཡང་ན་བགེགས་རྣམས་ཐམས་ཅད་ནི། །གདུལ་བ་སླར་ཡང་བཤད་པར་བྱ། །ས་ལ་བགེགས་ནི་བྲིས་ནས་སུ། །མགོ་བོ་རྐང་པས་མནན་ཅིང་གཟིར། །ཉེན་ནས་རབ་ཏུ་འདར་གྱུར་ཏེ། །ཐེ་ཚོམ་མེད་པར་འཆི་བར་འགྱུར། །ཡང་ན་བགེགས་རྣམས་ཐམས་

ཅད་ནི། །ཚར་གཅད་པ་ནི་སླར་ཡང་བཤད། །འཛིན་པ་ཡི་ནི་རང་བཞིན་ལས། །དེ་ཡི་གཟུགས་བརྙན་བྱས་ནས་སུ། །སྔགས་པས་དེ་ནི་མེས་གདུངས་ན། །འདི་ནི་མྱུར་དུ་བསྲེགས་པས་འཛིན། །བརྒྱ་བྱིན་དང་མཚུངས་བགེགས་ཀྱང་ནི། །དེ་ཡི་མོད་ལ་མྱུར་དུ་འགྲོ། །དེ་བཞིན་ཉིད་དུ་བགེགས་གཞན་རྣམས། །ཐུན་མོང་དུ་ནི་ཡང་བཤད་བྱ། །སྔགས་པས་ཁྲོས་དང་བཅས་པ་ཡིས། །དེ་རྣམས་གཟུགས་ནི་ཡང་དག་བྱ། །སྐེ་ཚེ་དང་ནི་དུག་གིས་བསྐུས། །ལན་ཚྭས་ཀྱང་ནི་བྱུག་པར་བྱ། །མེ་ལ་ཡང་ནི་བསྲེགས་པ་ཡི། །དེ་ཡི་མོད་ལ་མྱུར་དུ་འཚིག །ཡང་ན་བགེགས་རྣམས་ཐམས་ཅད་ནི། །ཕུར་བུས་གདབ་པ་སླར་ཡང་བཤད། །དེ་ཡི་གཟུགས་བརྙན་བྱས་ནས་སུ། །རྡོ་རྗེ་ཕུར་བུས་གདབ་པར་བྱ། །བཏབ་པས་རབ་ཏུ་ཞི་འགྱུར་ཞིང་། །ཐེ་ཚོམ་མེད་པར་འཆི་བར་འགྱུར། །ཡང་ན་བགེགས་རྣམས་ཐམས་ཅད་ཀྱི། །རེངས་པ་ཡང་ནི་བཤད་པར་བྱ། །དེ་ཡི་གཟུགས་བརྙན་བྱས་ནས་སུ། །ལུས་ལ་རི་རབ་རྣམ་པར་བསམ། །ལྕོག་བརྒྱད་དང་ནི་ལྡན་པ་ཡི། །རྡོ་རྗེས་ཡང་དག་མནན་པར་བྱ། །དེ་ནས་རབ་ཏུ་ཞི་འགྱུར་ཞིང་། །འཆི་བར་འགྱུར་བར་ཐེ་ཚོམ་མེད། །ལྷ་ཚངས་པ་ཡི་བགེགས་རྣམས་ཀྱང་། །མྱུར་དུ་མི་གཡོ་བརྟན་པར་གནས། །དེ་ནས་ཀུན་གྱིས་ཀུན་ཐམས་ཅད། །སྤྱི་ཡི་ལས་ནི་སྤྱད་པར་བྱ། །དེ་ཡི་གཟུགས་བརྙན་བྱས་ནས་སུ། །སྦྱིན་སྲེག་ལས་ནི་ཡང་དག་བརྩམ། །མཚོན་གྱིས་གཏུབ་ཅིང་བཅད་ནས་སུ། །རྐང་པ་ནས་བརྩམས་སྦྱིན་སྲེག་བྱ། །བཅད་པར་གྱུར་པས་དེ་མ་ཐག །བརླག་པར་འགྱུར་བར་ཐེ་ཚོམ་མེད། །དེ་ལྟར་ཀུན་ལ་ཀུན་དུ་ནི། །མཁས་པས་ལས་ནི་བྱ་བས་ན། །ཁ་ཅིག་གདུག་པའི་སེམས་ལྡན་པའི། །བགེགས་རྣམས་ཐམས་ཅད་བརླག་པར་འགྱུར། །རྡེག་ཅིང་གཅོད་ལ་ཕུར་བུས་འདེབས། །འབིགས་ཤིང་དེ་བཞིན་རྟོག་པར་བྱེད། ། བསྲེག་དང་གང་ཡང་ཚར་གཅོད་གཞན། །བྱང་ཆུབ་སེམས་ཀྱིས་བརྒྱན་པ་ཡི། །སྔགས་པས་དེ་དག་ཐམས་ཅད་བྱ། །ཤིན་ཏུ་གདུག་པའི་སེམས་རྣམས་ནི། །ཕ་རོལ་སྲོག་ནི་གཅོད་པར་བྱེད། །སེམས་ཅན་རྣམས་ནི་རྣམ་པར་འཚེ། །གང་ཞིག་ཕན་པ་ཉིད་ཀྱི་གཞི། །སྙིང་རྗེ་ཆེན་པོ་

བསྐྱེད་ནས་སུ། །སངས་རྒྱས་ཆོས་ནི་རྗེས་དྲན་པར། །སངས་རྒྱས་ཀུན་གྱི་ཇི་བཞིན་བརྗོད། །གདུག་པའི་ལས་ནི་བྱ་བ་ཡིན། །དེ་ནས་དཔལ་ལྡན་རྡོ་རྗེ་འཆང་། །ངོ་མཚར་སྤྱན་ཕྱེ་རྒྱས་པ་ཡིས། །ཆོས་ཀྱི་དབང་ཕྱུག་ཐུབ་པ་ཡི། །སྙན་པའི་ཚིག་གིས་བཀའ་སྩལ་པ། །ཨེ་མའོ་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་བསམ་མི་ཁྱབ། །སེམས་ཅན་མི་ཕན་བྱེད་པ་ཡི། །ཇི་སྲིད་མིང་ནི་བགགས་ནས་སུ། །དེ་སྲིད་བློ་ནི་ངན་འགྲོ་ཡི། །ཕན་དང་མི་ཕན་རྣམ་རྟོག་རྣམས། །མནར་མེད་སྡུག་བསྔལ་གཞོལ་བ་རུ། །རབ་ཏུ་ཞུགས་ནས་འགྲོ་བར་འགྱུར། །དེ་ནས་ཕྱག་ན་རྡོ་རྗེས་སླར་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྲོ་བོའི་རྒྱལ་པོ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་རྗེས་སུ་གནང་བར་གྱུར་པ། སྔགས་དང་ཕྱག་རྒྱ་དང་སྔགས་ཀྱི་རིམ་པར་ཕྱེ་བ་གང་མྱུར་བ་ཉིད་དུ་ཕྱག་རྒྱའི་མཚན་པས་མཚན་པ། ལྷ་ཐམས་ཅད་དང་། ཀླུ་དང་། གནོད་སྦྱིན་དང་། སྲིན་པོ་རྣམས་ལྷན་ཅིག་སྦྱར་བས་ལས་ཐམས་ཅད་བྱེད་པར་འགྱུར་བའི་དོན་ཡོད་ཅིང་ཐོགས་པ་མེད་པར་གྱུར་པ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །ལག་ན་རྡོ་རྗེ་སླར་ཡང་ལེགས་སོ། །ད་ལེགས་པར་ཉོན་ལ་རབ་ཏུ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལ་ལེགས་སོ་ཞེས་ཕྱག་ན་རྡོ་རྗེས་བཅོམ་ལྡན་འདས་ལ་གསོལ་ཏོ། །སླར་ཡང་བཅོམ་ལྡན་འདས་ཀྱིས་འདི་ཉོན་ཅིག་ཅེས་བཀའ་སྩལ་ཏོ། །རྐང་པ་མཉམ་པར་གཞག་པས་གནས། །ཕྱག་འཚལ་བ་ཡི་ཐལ་མོ་སྦྱར། །མཐེ་བོང་དག་ནི་གནས་བྱས་ནས། །སངས་རྒྱས་ཐམས་ཅད་གདུད་པར་བྱ། །རྡོ་རྗེ་བཀོད་པའི་སྦྱོར་བ་ཡིས། །ཐལ་མོ་སྟེང་དུ་བརྐྱང་བར་བྱ། །སླར་ཡང་མདུན་དུ་བྱ་བ་ཡིན། །སླར་ཡང་ཐལ་མོ་སྦྱར་བྱས་ནས། །རྒྱབ་ཉིད་དུ་ནི་གཞག་པར་བྱ། །ཐལ་མོ་བཀོད་པའི་སྦྱོར་བ་ཡིས། །སླར་ཡང་མདུན་དུ་བྱ་བ་ཡིན། །ཁྲོས་པས་ཧཱུྃ་གི་སྒྲ་སྒྲོགས་ཤིང་། །བདུད་ཀྱི་རིགས་ལ་བསྡིགས་པར་བྱ། །རྐང་པ་བཀོད་པའི་སྦྱོར་བ་ཡིས། །ལག་པ་དག་ནི་གཉིས་ཀ་ཡང་། །གཉིས་ཀའི་

སྡིགས་མཛུབ་སྦྱོར་བ་ཡིས། །བགེགས་དང་ལོག་པར་འདྲེན་པ་རྣམས། །སྡིག་པ་ཐམས་ཅད་ཀུན་འབྱུང་བའི། །སྡིགས་མཛུབ་ཀྱིས་ནི་འབྱེར་བར་འགྱུར། །སླར་ཡང་རྐང་པ་བགྲད་ནས་སུ། །རྡོ་རྗེའི་ས་གཞིར་གཞག་པར་བྱ། །ས་འོག་རིམ་བདུན་བར་དུ་ནི། །ཐམས་ཅད་དུ་ནི་སྦྱར་བར་བྱ། །ལག་པ་སྦྱར་བའི་སྦྱོར་བ་ཡིས། །རྐང་པ་ཡ་གཅིག་ས་ལ་གནས། །དེ་བཞིན་དུ་མ་བུ་ཕྲ་མོ་རུ། །བགེགས་རྣམས་ཐམས་ཅད་འཇོམས་པར་བྱེད། །མ་བསྒྲུབས་པ་ལ་རབ་ཏུ་སྦྱར། །དཀོན་མཆོག་གསུམ་གྱི་རལ་གྲི་འབྱུང་། །གང་ཞིག་བཀོད་པའི་སྦྱོར་བ་ཡིས། །ཀླད་ལ་ཡོངས་སུ་བསྐོར་བར་བྱ། །ཡི་གེ་ཧཱུྃ་གི་སྒྲ་སྒྲོགས་ཤིང་། །རལ་གྲི་ཕྱག་རྒྱ་བཅིང་བར་བྱེད། །གཉིས་པ་ཤུབས་ཀྱི་རྩེ་མོ་ནས། །བསྟན་ལ་གནོད་པ་བྱེད་པ་དང་། །སྔགས་པ་བླ་མ་ངན་སྨྲ་ཟེར། །གང་དག་སེམས་ཅན་གཞན་ལ་འཚེ། །གང་ཡང་ལྷ་ལ་སྨོད་པར་བྱེད། །ལྷ་དང་གསང་བ་པ་དང་སྤྲུལ། །ལྷ་མིན་སྲིན་པོ་འཇིགས་སུ་རུང་། །དེ་རྣམས་ཐམས་ཅད་གཞོམ་པར་བྱ། །གནོད་པ་དེ་ཡང་ལན་གཉིས་གསུམ། །གུས་པས་གལ་ཏེ་བཟོད་གསོལ་ན། །གསང་སྔགས་ཚོགས་ནི་དེ་མཉེས་ན། །ཇི་བཞིན་འདོད་པའི་དངོས་གྲུབ་འཐོབ། །སླར་ཡང་རྡོ་རྗེ་རྐང་པ་ཡིས། །རྐང་པ་མཉམ་པར་གཞག་ནས་གནས། །ལག་པ་ཕན་ཚུན་ཁུ་ཚུར་བཅིང་། །མཛུབ་མོ་སྦྱར་བའི་སྦྱོར་བ་ཡིས། །དཔྲལ་བའི་སྟེང་དུ་བཟློག་ལ་གཞག །རྐང་པ་བཀོད་དེ་སྦྱར་བ་དང་། །ཡ་སོས་མ་མཆུ་མནན་ཏེ་ཁྲོས། །འབྲུག་གི་ཧཱུྃ་གི་སྒྲ་སྒྲོགས་པ། །བགེགས་རྣམས་ཐམས་ཅད་འགེམས་པར་ནི། ། ཡི་གེ་ཧཱུྃ་གིས་ཐེ་ཚོམ་མེད། །རྡོ་རྗེའི་ལྟ་སྟངས་འབར་བ་ཆེ། །གདུག་པ་ཐམས་ཅད་རྣམ་པར་འཇོམས། །ཐིག་ལེ་ཞེས་ནི་བསྒྲགས་པ་ཡིས། །ཕྱག་རྒྱ་དོན་ཀུན་སྒྲུབ་པར་བྱེད། །སྔགས་པ་གང་ཞིག་སྒྲུབ་པ་ནི། །གང་དང་གང་ནི་རབ་སྦྱར་བ། །དེ་དང་དེ་རུ་དོན་ཡོད་པར། །བྱེད་པར་འགྱུར་ཏེ་ཐེ་ཚོམ་མེད། །རྡོ་རྗེ་རྐང་པའི་སྦྱོར་བ་ཡིས། །རྐང་པ་སྟེང་དུ་གདེག་པར་བྱ། །སངས་རྒྱས་ཀུན་ལ་གུས་ཕྱག་བྱ། །སོར་མོ་ཕན་ཚུན་ཁུ་ཚུར་བཅང་། །ཁ་ཡི་ཚུལ་དུ་བྱས་ནས་ནི། །ཁ་ཡི་ཐད་ཀར་སྦྱར་བར་བྱ། །དཀྱིལ་འཁོར་སྒྲུབ་པའི་ཐབས་དང་ནི། །དེ་བཞིན་དུ་ཡང་ལས་རྣམས་དང་། །

ཕྱོགས་ཀུན་ལས་ནི་བྱུང་བ་ཡི། །སྤྲིན་ཆེན་ཡང་ནི་འདུས་ནས་སུ། །འབྲུག་ཆེན་སྒྲ་ནི་རབ་ཏུ་ལྡིར། །དེར་ཡང་གློག་ནི་འཁྱུག་པ་དང་། །སྐུ་ཆེན་པོ་ནི་ཧ་ཧ་སྒྲོགས། །ཆར་གྱི་རྒྱུན་ནི་ཡང་དག་འབབ། །དུས་མཐའ་ལྟ་བུར་ཡང་དག་བྱུང་། །འདི་ནི་ཁ་རུ་གཞུག་པར་བྱ། །མི་བཟད་པ་ཡི་སྐུ་ཆེན་གྱིས། །ཁ་ཡི་ཕྱག་རྒྱའང་འཛིན་པར་བྱེད། །བཟུང་བ་ཙམ་གྱིས་བརླག་པ་རུ། །མ་ལུས་པར་ནི་འགྱུར་བ་ཡིན། །དེ་ནས་ཁྲོ་བོ་རབ་འབར་བ། །གཟི་བརྗིད་ཆེན་པོ་ཞལ་ཆེ་བ། །འདི་ནི་བཀུག་ནས་ཟོས་པ་ན། །བགེགས་ཀྱི་རྒྱལ་པོ་ཐམས་ཅད་བརླག །ཁྲོ་བོ་མི་གཡོ་བ་ཡི་སྐུ། །ཇི་ལྟ་ཇི་ལྟར་རབ་སྦྱར་ནས། །འཇིགས་པའི་གཟུགས་ཅན་བགེགས་སྲིན་པོ། །དེ་ལྟ་དེ་ལྟར་བརླག་པར་འགྱུར། །ཁ་ཡི་ཕྱག་རྒྱ་སྦྱོར་ལྡན་པས། །སྔགས་པས་ཀུན་དུ་སྦྱར་བར་བྱ། །འདི་ནི་དོན་ཡོད་ཐོགས་པ་མེད། །སངས་རྒྱས་ཀུན་གྱིས་རབ་ཏུ་མཆོད། །སླར་ཡང་རྡོ་རྗེའི་རྐང་པ་སྦྱར། །ཕྱག་འཚལ་ཐལ་མོ་སྤྱི་བོར་སྦྱར། །སྔོན་བཞིན་རྐང་པ་མཉམ་བྱས་ནས། །རྐང་པ་བཏེག་ནས་གཡེང་བར་བྱ། །ལག་པ་ཡང་ནི་ཕན་ཚུན་དུ། །གཡས་པ་དང་ནི་གཡོན་པ་ན། །ཞགས་པ་རལ་གྲི་ཐོགས་ནས་སུ། །རྡོ་རྗེ་དོར་ནས་ཡང་དག་གནས། །གཡོན་པ་ས་ཡི་ཆ་ལ་གཞག །གཡས་པ་མཚོན་ཆ་དང་བཅས་ཀྱང་། །ཞགས་པས་བཀུག་སྟེ་བཞག་ནས་ནི། །རལ་གྲིས་གཟུགས་བརྙན་བཅད་ན་ནི། །ཚངས་པ་འམ་ནི་བརྒྱ་བྱིན་ཡང་། །དེ་མ་ཐག་ཏུ་མྱུར་བར་གཅོད། །འདི་ནི་དཔལ་ལྡན་ཞགས་པ་བསྣམས། །རལ་གྲིའི་ཕྱག་རྒྱ་སྦྱར་བ་ཡིས། །སྔགས་པས་སྦྱར་བ་ཙམ་གྱིས་ནི། །གདུག་པ་ཐམས་ཅད་བསྒྲུབ་པར་བྱ། །ཐལ་མོ་བཏབ་སྟེ་སྦྱར་ནས་སུ། །འཁོར་ལོ་ལྟ་བུར་རབ་བསྐོར་བྱ། །སྔགས་པས་བསྐོར་ཞིང་དྲངས་ནས་ནི། །རྐང་པ་སྔར་བཞིན་སྦྱར་བར་བྱ། །ཕྱག་འཚལ་བ་ཡི་ཐལ་མོ་སྦྱར། །ཕན་ཚུན་སོ་སོར་ཁུ་ཚུར་བཅིང་། །གཉིས་ཀའི་མཛུབ་མོ་རྩེ་སྦྱར་ཏེ། །རྡོ་རྗེ་རྩེ་གཅིག་རྣམ་པར་བྱ། །གདུག་པ་ཀུན་ལ་གདབ་པ་དང་། །འབིགས་པར་ཡང་དག་བརྗོད་པ་ཡིན། །བགེགས་རྣམས་ཐམས་ཅད་རླག་བྱེད་པའི། །བསྲུང་བ་ལ་སོགས་རབ་ཏུ་སྦྱར། །ལག་པ་གཉིས་ནི་མཉམ་བྱས་ནས། །ཁུ་ཚུར་སྦྱར་ཏེ་བཅིང་བར་བྱ། །གུང་མོ་རྩེ་མོ་

སྤྲད་དེ་སྦྱར། །མཛུབ་མོ་རྡོ་རྗེའི་རྣམ་པར་བྱ། །གུང་མོ་ལ་སྦྱར་རྡོ་རྗེ་ནི། །ཕྱག་རྒྱ་ཆེན་པོའི་ཕྱག་རྒྱ་སྟེ། །གདུག་པ་ཐམས་ཅད་རླག་པར་བྱེད། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །ཇི་སྙེད་པའི་དོན་ཡོད་པའི་ཐོགས་པ་མེད་པ་སྟོབས་གནོན་པའི་ཁྲོ་བོའི་རྒྱལ་པོ་མི་བཟད་པའི་ཕྱག་རྒྱ་ཇི་ལྟ་ཇི་ལྟར་སྒྲུབ་པ་པོས་སྦྱར་བ་དེ་ལྟ་དེ་ལྟར་དངོས་གྲུབ་སྟེར་བར་བྱེད་པ། བགེགས་ཐམས་ཅད་འཇོམས་པར་བྱེད་པའི་ཁྲོ་བོའི་རྒྱལ་པོ་ཆེན་པོའི་རྟོག་པའི་སྒྲུབ་པའི་ཐབས་འདི་སེམས་ཅན་ཐམས་ཅད་ལ་ཕན་པ་དང་། བདེ་བར་བྱ་བའི་ཕྱིར་བདག་ཀྱང་བཤད་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་གང་དེའི་དུས་ལ་བབ་པར་སེམས་ན་ཤོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་བཅོམ་ལྡན་འདས་ཀྱིས་གནང་བ་ཐོབ་སྟེ། བསམ་པ་ཐམས་ཅད་ལ་མཉེས་གཤིན་པའི་རོལ་པས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ནས། དངོས་གྲུབ་ཐམས་ཅད་ཀྱི་མཆོག་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། ། བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་རེ་ཞིག་འཇིག་རྟེན་གྱི་ཁམས་ཐམས་ཅད་སྣང་བ་ཆེན་པོས་སྣང་བར་བྱས་ཏེ། སངས་རྒྱས་ཀྱི་ཞིང་ཐམས་ཅད་རྡོ་རྗེ་འཆང་གི་སྐུས་གང་བར་བྱས་ནས། ཕྱོགས་བཅུར་བསྐོར་ཏེ། སླར་ཡང་བཅོམ་ལྡན་འདས་ཉིད་ཀྱི་སྐུ་ལ་ཞུགས་པར་འགྱུར། ཁྲོ་བོའི་རྒྱལ་པོ་ཆེན་པོའི་སྒྲུབ་ཐབས་སུ་གྱུར་པ་རྫུ་འཕྲུལ་ཆེན་པོ་རྣམས་ཉོན་ཅིག །ལོ་འདབ་ལ་སོགས་པ་ཟ་ཞིང་འབུམ་ཕྲག་གསུམ་བཟླས་པ་བྱའོ། །དེ་ནས་ཞག་གསུམ་འདུག་ནས་རས་བྲིས་ཀྱི་མདུན་དུ་མཆོད་པ་ཆེན་པོ་བྱས་ཏེ། དེའི་མདུན་དུ་ནིམ་པའི་ཡམ་ཤིང་གིས་མེ་སྤར་ཏེ། མར་གྱིས་བཏགས་པའི་ཡུངས་ཀར་དཀར་པོ་སྙིང་པོའི་སྔགས་ཀྱིས་སྟོང་ཕྲག་བརྒྱད་སྦྱིན་སྲེག་བྱ་སྟེ། སྔོན་དུ་བསྙེན་པ་བྱས་པས་སོ། །དེ་ལ་ཁྲོ་བོའི་རྒྱལ་པོ་ཆེན་པོའི་སྒྲུབ་ཐབས་ནི་འདི་ཡིན་ཏེ། དཀྱིལ་འཁོར་བྲིས་ནས་རལ་གྲིའི་ཕྱག་རྒྱ་བཅིངས་ཏེ། སྐྱིལ་ཀྲུང་བཅས་ནས་ཇི་སྲིད་

དུ་རིག་པ་འཛིན་པར་གྱུར་གྱི་བར་དུ་བཟླས་པ་བྱའོ། །རིག་པ་འཛིན་པ་ཐམས་ཅད་ཀྱིས་མཆོད་ཅིང་བསྐལ་པར་གནས་ལ་འདོད་པའི་འཆི་བའི་དུས་མེད་དེ་སངས་རྒྱས་ཀྱི་ཞིང་ཐམས་ཅད་དུ་སྤྱོད་ལ་དེ་བཞིན་གཤེགས་པ་ཐམས་ཅད་མཆོད་ཅིང་སེམས་ཅན་ཐམས་ཅད་ཀྱི་དོན་བྱེད་དོ། །སླར་ཡང་འབུམ་ཕྲག་གསུམ་བཟླས་པ་བྱས་ན་གང་འདོད་པའི་ལས་རྣམས་ཐམས་ཅད་བྱེད་དོ། །ཚིག་རྣལ་མར་འབེབས་སོ། །ཤིང་སྒྱེལ་བར་བྱེད་དོ། །ནམ་མཁའ་ནས་འདབ་ཆགས་ལྟུང་བར་བྱེད་དོ། །མཚེའུ་སྐེམས་པར་བྱེད་དོ། །རླུང་གཞན་དུ་བྱེད་དོ། །ཟླ་བ་གཟས་ཟིན་པའི་ནུབ་མོ་འདུག་ནས་བ་ལྕི་ས་ལ་མ་ལྷུང་བས་དཀྱིལ་འཁོར་བྱས་ལ་དྲི་ཞིམ་པོའི་མེ་ཏོག་སིལ་མ་བཀྲམ་སྟེ་རས་བྲིས་སམ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་གྱི་སྤྱན་སྔར་སེའུ་དང་རིགས་མཐུན་པའི་མར་སྲང་གཅིག་ཟངས་མའི་སྣོད་དུ་བཅུག་སྟེ་སེང་ལྡེང་གི་མེ་སྤར་ཏེ་གདུང་ཞིང་བཟླས་པས་དངོས་གྲུབ་གསུམ་འབྱུང་ངོ་། །དེ་ནས་རིའི་རྩེ་མོར་གནས་བཅས་ཏེ། ཟས་མི་ཟ་བར་བཟླས་པ་འབུམ་བྱས་ན་གཏེར་མཐོང་བར་འགྱུར་རོ། །ཕྱུགས་ངས་ཞི་བར་འདོད་ན་འོ་མའི་སྲེག་བླུགས་སྟོང་ཕྲག་གཅིག་བསྲེགས་པས་ཞི་བར་འགྱུར་རོ། །རྩ་དཱུར་བ་མངར་གསུམ་གྱིས་བཏགས་ནས་སྦྱིན་སྲེག་འབུམ་བྱས་ན་ཕྱུགས་ངས་ཆེན་པོ་ཞི་བར་འགྱུར་རོ། །པདྨ་རྣམས་ཞོ་དང་སྦྲང་རྩི་དང་མར་གྱིས་བཏགས་ཏེ་སྦྱིན་སྲེག་འབུམ་བྱས་ན་མཆོག་གསོལ་བ་གསུམ་མཐོང་བར་འགྱུར་རོ། །རྒྱ་མཚོར་འགྲོ་བ་ན་ཆུ་ཀླུང་གི་ཆུའི་ནང་དུ་ཞུགས་ཏེ་འབུམ་ཕྲག་གསུམ་བཟླས་ན་ཡུལ་དུ་ཕྱིན་པར་འགྱུར་རོ། །ཇི་ལྟ་བའི་ཁ་དོག་གི་མེ་ཏོག་བསྲེགས་ན་དེ་ལྟ་བུའི་ཁ་དོག་གི་གོས་རྙེད་པར་འགྱུར་རོ། །སོ་བ་བསྲེགས་པས་སོ་བའང་མི་ཟད་པར་འགྱུར་རོ། །ནས་ཀྱི་སྦྱིན་སྲེག་གིས་ཁྱིམ་བདག་ཆེན་པོར་འགྱུར་རོ། །པྲི་ཡང་ཀུས་དབང་དུ་བྱེད་དོ། ། སྤོས་ཤིང་གིས་འཁོར་གཡོག་མང་བར་འགྱུར་རོ། །མངར་གསུམ་གྱིས་བཏགས་པའི་བིལ་བའི་འབྲས་བུ་སྦྱིན་སྲེག་འབུམ་བྱས་ན་རྒྱལ་པོར་འགྱུར་རོ། །རས་བྲིས་ཀྱི་ཆོ་ག་ཇི་བཞིན་པ་ནི་འདི་ཡིན་ཏེ་འཕགས་པ་མི་གཡོ་བ་ཞལ་གཅིག་པ་དཔའ་བོའི་ན་བཟའ་ངུར་སྨྲིག་མནབས་པ་

ཟུར་མིག་གིས་གཟིགས་པའི་ཕྱག་ན་རལ་གྲི་དང་ཞགས་པ་བསྣམས་པ། ཁྲོ་གཉེར་རིམ་པར་ལྡན་པའི་ཞལ་འཇིག་རྟེན་གསུམ་འཇིགས་པར་མཛད་པ་ངུར་སྨྲིག་མནབས་པ་བྲི་བར་བྱའོ། །དེ་ནས་རྒྱ་མཚོར་སོང་སྟེ་རས་བྲིས་བཀྲམ་ནས་ལུས་ལ་གོས་གཙང་མ་བགོས་ཏེ། དོགས་པ་མེད་ཅིང་ལྐུགས་པ་སློང་མོ་ཟ་བས་འབུམ་ཕྲག་ལྔ་བཟླའོ། །ཐ་མའི་ཉིན་ཞག་འདུག་ནས་ཙ་ན་ཀའི་ཡམ་ཤིང་གིས་ཁྲི་ཕྲག་གཅིག་སྦྱིན་སྲེག་བྱས་ན་མི་གཡོ་བ་མཐོང་ཞིང་དེ་བཞིན་གཤེགས་པ་ཡང་ཉེ་བར་སྤྱོད་ལ་ཏིང་ངེ་འཛིན་རྙེད་ནས་བྱང་ཆུབ་སེམས་དཔའི་ཏིང་ངེ་འཛིན་ཐོབ་པར་འགྱུར་རོ། ། ཡང་ན་དུར་ཁྲོད་ཀྱི་རས་ལ་འཕགས་པ་མི་གཡོ་མགོན་པོ་བྲིས་ལ་བདག་ཉིད་ཀྱི་ཁྲག་གིས་སྤྱན་ཕྱེ་བ་བྲི་བར་བྱའོ། །སྒྲུབ་པ་པོ་ཤར་དུ་ཕྱོགས་ཏེ་ཕྱི་ནས་རས་བྲིས་ཁ་སྤྲོད་དུ་དགྲམ་སྟེ་དུས་གསུམ་དུ་ཁྲུས་བྱ་ཞིང་གོས་རློན་པ་བགོས་ཏེ་ལྐུགས་པས་འབུམ་ཕྲག་གསུམ་བཟླས་པར་བྱའོ། །མར་ངོའི་ཚེས་བརྒྱད་ཀྱི་ཞག་ལ་འདུག་སྟེ། འབྱུང་པོ་ཐམས་ཅད་ལ་ཤའི་གཏོར་མ་བྱིན་ནས་རོ་ཆེན་པོའི་སྟེང་དུ་ཁྲི་ཕྲག་གཅིག་བཟླས་པ་བྱའོ། །དེ་ནས་རོ་དེའི་ལུས་འགུལ་བར་འགྱུར་ཏེ། འཇིགས་པར་མི་བྱའོ། །དེ་ནས་ཁའི་ནང་དུ་པདྨ་ཁ་ཕྱེ་བའི་ལྟེ་བ་མཐོང་བར་འགྱུར་ཏེ་བླངས་ནས་བཟུང་བས་རིག་པ་འཛིན་པར་འགྱུར་ཞིང་ལྷའི་གཟུགས་ཀྱིས་ཚངས་པའི་འཇིག་རྟེན་དུ་སྤྱོད་དོ། །ཡང་ན་རས་བྲིས་ཀྱི་མདུན་དུ་ཟླ་བ་དྲུག་ཏུ་ཐུན་གསུམ་དུ་བཟླས་ཤིང་ཇི་ལྟར་འབྱོར་པའི་མཆོད་པ་བྱས་ནས་ཨ་ག་རུའི་བདུག་པས་བདུགས་ན་ཡུལ་གྱི་བདག་པོར་འགྱུར་རོ། །རྒྱལ་མཚན་ལ་སྟོང་ཕྲག་གཅིག་བསྔགས་ནས་དམག་གི་མངོན་དུ་བཟུང་ན་ཕ་རོལ་གྱི་དམག་ཚོགས་གཡུལ་ཉེས་པར་འགྱུར་རོ། །དམག་ཚོགས་རེངས་པར་འདོད་པས་སྐུ་ཆེན་པོ་སྐུ་མདོག་སེར་པོ་ཞལ་བཞི་ལ་ཕྱག་བཞི་པ་མདོག་མི་སྡུག་པ། མཆེ་བ་གཙིགས་ཤིང་འཇིགས་སུ་རུང་བ་འབར་བའི་ཕྲེང་བ་དཀྲིགས་པས་ཕ་རོལ་གྱི་དཔུང་བཟུང་བ་ལྟ་བུར་བསམ་པ་འམ། བྲིས་ནས་བསྟན་ན་ཕ་རོལ་གྱི་དམག་ཚོགས་རེངས་པར་འགྱུར་རོ། །རྩོད་པར་འདོད་པས་ཁྭ་དང་འུག་པའི་སྒྲོས་སྦྱིན་སྲེག་བྱས་ན་རྩོད་པ་འབྱུང་བར་འགྱུར་རོ། །དགྲ་བོ་མྱོས་པར་འདོད་པས་སྲེག་བླུགས་འབུམ་སྦྱིན་སྲེག་བྱའོ། །སྦྱིན་སྲེག་

བྱས་པས་མི་གཡོ་བའི་མངག་གཞུག་པས་མགུལ་ནས་བཅིངས་ཏེ་ལྷོའི་ཕྱོགས་སུ་ཁྱེར་ནས་མྱོས་ཤིང་ཁྲག་ཏུ་སྐྱུག་ཅིང་སྐྲག་པར་དགྲའི་ལུས་བལྟས་པས་རིགས་རྒྱུད་དང་བཅས་པ་བརླག་པར་འགྱུར་རོ། །མིའི་རུས་པ་ལ་བརྒྱ་རྩ་བརྒྱད་མངོན་པར་སྔགས་ནས་བཏགས་ན་གང་གི་མིང་ནས་སྨོས་པ་དེའི་མོད་དུ་རིམས་ཀྱིས་བཏབ་པར་འགྱུར་རོ། །ནིམ་པའི་འབྲས་བུ་མར་ཁུས་བཏགས་ནས་སྦྱིན་སྲེག་བྱས་ན་ཉི་མ་གསུམ་གྱིས་དགྲ་བོ་བརླག་པར་འགྱུར་རོ། །ཚྭ་དང་འཇིམ་པས་དགྲ་བོའི་གཟུགས་བརྙན་བྱས་ལ་མྱོས་བྱེད་ཀྱི་ཚེར་མས་བཙུགས་ཏེ་གཏུབས་ཤིང་བཅད་པའི་སྦྱིན་སྲེག་བྱས་ན་དེ་མ་ཐག་ཏུ་བརླག་པར་འགྱུར་རོ། །དགྲ་བོའི་མིང་ནས་སྨོས་ཤིང་ས་ལ་མ་རི་ཞེས་བྱ་བ་བརྒྱ་རྩ་བརྒྱད་བསྲེགས་པས་དགྲ་བོ་དབུལ་བར་འགྱུར་རོ། །དབང་དུ་བྱ་བར་འདོད་ན་ལན་ཚྭའི་རང་བཞིན་གྱི་གཟུགས་བརྙན་བྱས་ཏེ་གཅད་ནས་སྦྱིན་སྲེག་བྱས་ན་སྐྱེས་བུ་ཆེན་པོ་ཉི་མ་བདུན་གྱིས་དབང་དུ་འགྱུར་རོ། །ཛཱ་ཏི་ཁ་འབུས་པའི་སྦྱིན་སྲེག་འབུམ་བྱས་ན་གནོད་སྦྱིན་མོ་དབང་དུ་འགྱུར་རོ། །འཕྲུལ་བྱེད་ཀྱི་འདབ་མས་སྦྱིན་སྲེག་བྱས་པས་སྨྱོ་བར་འགྱུར་རོ། །ལན་ཚྭའི་སྦྱིན་སྲེག་གིས་ལྷའི་བུ་མོ་ཡང་འགུགས་སོ། །གུ་གུལ་གྱི་སྦྱིན་སྲེག་གིས་རྒྱལ་པོ་ཐོབ་པར་འགྱུར་རོ། །རས་བྲིས་གཞན་གྱི་ཆོ་ག་འདི་ཡིན་ཏེ། དབུས་སུ་བཅོམ་ལྡན་འདས་ཤཱཀྱ་ཐུབ་པ་དེའི་གཡས་སུ་འཇམ་དཔལ་རྒྱན་ཐམས་ཅད་ཀྱིས་བརྒྱན་པ། གཡོན་དུ་རྡོ་རྗེ་འཛིན་པ་ཞལ་ཅུང་ཟད་འཛུམ་པ་ཕྱག་ན་རྡོ་རྗེ་བསྣམས་པ་བྲི་བར་བྱའོ། །དེའི་སྤྱན་སྔར་འབུམ་ཕྲག་ལྔ་བཟླས་པས་ལས་ཐམས་ཅད་བྱེད་ནུས་པར་འགྱུར་ཏེ། ཕ་རོལ་གྱི་དམག་ཚོགས་ལ་ནད་འབྱུང་བར་འགྱུར་རོ། །སྤྱན་གྱི་ཕྱག་རྒྱ་བཅིངས་ཏེ་ཁྲོས་པས་ཡི་གེ་ཧཱུྃ་ལ་སོགས་པའི་མཐའ་ཅན་གྱི་སྔགས་བཟླས་པས་དགྲ་བོ་གདོན་ཆེན་པོས་འཛིན་པ་འམ་ངེས་པར་བརླག་པར་འགྱུར་རོ། །དུར་ཁྲོད་ཀྱི་ཐལ་བ་ལ་ལན་འབུམ་བཟླས་ནས་གང་ལ་བྱིན་པ་དེ་བྲན་དུ་འགྱུར་རོ། །གིའུ་ཝང་ལ་ལན་བདུན་བཟླས་ནས་ཐིག་ལེ་བྱས་པས་སྐྱེ་བོ་ཐམས་ཅད་དགའ་བར་འགྱུར་ཞིང་མི་མཐོང་བར་འགྱུར་རོ། །བགེགས་ཐམས་ཅད་དང་ལོག་པར་འདྲེན་པ་ལ་སོགས་པ་

འབར་བར་འགྲུབ་པར་འགྱུར་རོ། །བདག་ཉིད་ལ་བཀོད་ནས་དཔག་ཚད་བརྒྱ་ནས་ཀྱང་ཚངས་པ་དང་སྲིན་པོ་གྲོལ་བར་བྱེད་དོ། །སྦྲུལ་ནག་པོས་ཟིན་པ་ཟླ་བ་དྲུག་ནས་མནན་པར་འདོད་ན་ཁྲོས་པས་རལ་གྲིའི་ཕྱག་རྒྱ་བྲིས་ལ་ལྟོ་འཕྱེ་ཆེན་པོའི་རིགས་ལྡན་གྱིས་བསྐོར་ཏེ། དེ་ནས་རལ་གྲི་ལ་སྟོང་ཕྲག་གཅིག་མངོན་པར་བསྔགས་ནས་དབུས་སུ་དེ་ལྟ་བུར་འབར་བ་འདྲ་བ་དགོད་པར་བྱ་སྟེ་དེ་ནད་པ་ལ་བསྟན་ན་ངེས་པར་འཇུག་གོ། །འཕགས་པ་མི་གཡོ་བ་སྤྱན་གཅིག་པའི་སྙིང་པོ་ཐུན་གསུམ་དུ་བརྒྱ་རྩ་བརྒྱད་བཟླས་ན་རྟག་ཏུ་འབྲེལ་པར་འགྱུར་རོ། །དབེན་པའི་ས་ཕྱོགས་སུ་ཟན་གྱི་ཆང་བུ་བྱིན་ན་མཆོག་ཆེན་པོ་སྩོལ་བར་འགྱུར་ཏེ། སྙིང་པོའི་ཕྱག་རྒྱ་བཅིངས་ཏེ་ཁྲོས་པས། ཡི་གེ་ཧཱུྃ་བཟླས་ན་སྤྲིན་དྲལ་བར་བྱེད་དོ། །ཚེར་མ་སྐྱེ་ཚེས་བཏགས་པའི་སྦྱིན་སྲེག་བྱས་ན་རླུང་གི་ཆར་པ་གཏུན་ཤིང་ལྟར་འཇོག་གོ། །སྒྲུབ་པ་པོ་ལ་བསྲུང་བ་ཆེན་པོ་བྱེད་དོ། །མི་རྣམས་རྐང་པ་གཡོན་པ་མནན་པས་བསྒྲུབས་ན་བཀའ་ཉན་པར་འགྱུར་རོ། །ལྷ་དང་མི་རྣམས་ཀྱི་གཟུགས་བརྙན་བྱས་ནས་གཅད་ན་འཆད་པར་འགྱུར་རོ། །ལྷ་དང་མི་ཐམས་ཅད་ཀྱི་གཟུགས་བརྙན་བྱས་ནས་དེ་ལྕགས་ཀྱི་ཕུར་བུས་བཏབ་པས་ཕུར་བུ་དང་ལྡན་པར་འགྱུར་རོ། །དེ་ནས་འཆིང་བར་འདོད་པར་གྱུར་ན་སྐུད་པ་སེར་པོ་ལ་མངོན་པར་བསྔགས་ཏེ་གཟུགས་དཀྲིས་ནས་བཅིངས་པར་འགྱུར་རོ། །བཙིར་བར་འདོད་ན་ལྷ་ལ་སོགས་པའི་གཟུགས་བརྙན་བྱས་ནས་སྟེང་དུ་སྤང་ལེབ་ཀྱིས་མནན་ན་བཙིར་བར་འགྱུར་རོ། །དེ་ནས་བརྡེག་པར་འདོད་ན་མི་ལ་སོགས་པའི་གཟུགས་བརྙན་བྱས་ཏེ་རེའུ་སླུད་བུས་བྲབས་ན་དགུ་ཞིང་འོངས་ནས་བཀའ་བསྒོ་བྱེད་དོ། །གནོན་པར་འདོད་ན་ལྷ་དང་མི་ཐམས་ཅད་ཀྱི་གཟུགས་བརྙན་བྱས་ཏེ་སྤང་ལེབ་ལ་སོགས་པས་མནན་ན་གནོན་པར་འགྱུར་རོ། །དེ་ལྟར་ཁྲོ་བོའི་རྒྱལ་པོ་རྫུ་འཕྲུལ་ཆེན་པོ་འདི་ཇི་ལྟ་ཇི་ལྟར་སྦྱོར་བ་དེ་ལྟ་དེ་ལྟར་ལས་གཞན་ངོ་མཚར་ཆེ་བ་ཡང་སྟོང་ཕྲག་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཁྲོ་བོའི་རྒྱལ་པོ་ཆེན་པོའི་སྔགས་བཀའ་སྩལ་པ། ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦ་བི་ཤྭ་མུ་ཁ་བྷྱཿ། སརྦྦ་ཐཱ། ཨོྃ་ཙཎྜ་མ་ཧཱ་རོ་ཥ་ཎ་ཧཱུྃ་ཏྲཱཊ་མ་ཧཱ་ཙཎྜ་ཨ་ཙ་ལ་ཀཱ་ཎ། ཧཱུྃ་ཧཱུྃ་ཧཱུྃ། ཨ་པྲ་

ཏི་ཧ་ཏ། ཏ་ཐཱ་ག་ཏཱ་ཛྙཱཾ་སྨ་ར་ཧཱུྃ་ཕཊ་ཕཊསྭཱ་ཧཱ། དེ་ནས་ཕྱག་ན་རྡོ་རྗེས་སླར་ཡང་ཁྲོ་བོ་ཆེན་པོ་ཐོགས་པ་མེད་པའི་ཆོ་གའི་སྙིང་པོ་དཔའ་བོ་གཅིག་པ་བཀའ་སྩལ་པ། ན་མཿསྟྲཻ་ཡ་དྷྭི་ཀཱ་ནཱྃ། ཏ་ཐཱ་ག་ཏཱ་ནཱྃ་ཧཱྃ། བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཀའ་སྩལ་མ་ཐག་ཏུ་དེ་ནས་སྐད་ཅིག་དེ་ལ་འཇིག་རྟེན་གྱི་ཁམས་ཐམས་ཅད་སྣང་བ་ཆེན་པོས་སྣང་བར་བྱས་ནས་དེ་ལ་འཇིག་རྟེན་གྱི་ཁམས་ཐམས་ཅད་ཀྱི་གང་བདུད་དང་བདུད་ཆེན་པོ་འཇིགས་སུ་རུང་བའི་གཟུགས་ཅན་དང་ལྷ་དང་ཀླུ་དང་གནོད་སྦྱིན་ལ་སོགས་པ་དེ་ཁྲོ་བོ་ཆེན་པོའི་གཟི་བརྗིད་ཀྱིས་བསྲེགས་པར་གྱུར། གང་དང་གང་རང་རང་གི་དེར་སོང་སྟེ་བཅོམ་ལྡན་འདས་བསྐྱབ་ཏུ་གསོལ། བདེ་བར་གཤེགས་པ་བསྲེགས་པ་ལས་བསྐྱབ་ཏུ་གསོལ། དེ་ནས་དེ་བཞིན་གཤེགས་པ་དེ་རྣམས་ཀྱིས་རང་རང་གི་ཞིང་རྣམས་ཀྱི་བགེགས་ཆེན་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྲོ་བོ་ཆེན་པོ་མི་གཡོ་བ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ་མཛད་པ། གདུག་པ་ཐམས་ཅད་རབ་ཏུ་འཇོམས་པར་བྱེད་པ་དྲན་པར་གྱིས་ཤིག །གཞན་དུ་ཁྱོད་རྣམས་ཀྱི་མགོ་བོ་ཕྱག་ན་རྡོ་རྗེའི་རྡོ་རྗེས་ཚལ་པ་བརྒྱར་འགས་པར་འགྱུར་རོ། །གང་ཞིག་སྒྱུ་མ་ལྟ་བུར་སེམས་སྐྱེད་ཅིག །སེམས་ཅན་ཐམས་ཅད་ལ་ཕན་པ་དང་བདེ་བའི་སེམས་སྐྱེད་ཅིག །སེམས་ཅན་སྡིག་པ་ཐམས་ཅད་དང་བྲལ་བ་དྲན་པར་གྱིས་ཤིག །རིགས་ཀྱི་བུ་དག་ཁྲོ་བོའི་རྒྱལ་པོ་ཆེན་པོ་སྡུག་བསྔལ་ཐམས་ཅད་དང་བྲལ་བ་དྲན་པར་གྱིས་ཤིག །དེ་ནས་གདུག་པ་དེ་ཐམས་ཅད་ཁྲོ་བོའི་རྒྱལ་པོ་ཆེན་པོ་དེ་ཉིད་ལ་སྐྱབས་སུ་སོང་སྟེ་བཅོམ་ལྡན་འདས་བདག་ནི་སའི་ཕྱོགས་སུ་ཉེ་བར་གནོད་པར་མི་བགྱིད་དོ། །གང་ན་ཁྲོ་བོའི་རྒྱལ་པོ་ཆེན་པོ་འདི་ཉིད་བཞུགས་པ་དེ་བསྲུང་བར་བགྱིའོ། །ཉེ་བར་དགོས་པ་བསྐྱེད་དོ། །ཉེ་བར་འཚེ་བ་ཐམས་ཅད་ཀྱང་གཞོམ་པར་བགྱིའོ། ། ཞེས་དམ་ཚིག་བྱས་ནས་བཅོམ་ལྡན་འདས་ཀྱི་ཞབས་ཀྱི་དྲུང་དུ་ལྷགས་ནས་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་སླར་ཡང་ཁྲོ་བོའི་རྒྱལ་པོ་ཆེན་པོ་སྤྱོད་པའི་ཆོ་ག་ཡང་སྒྲུབ་པ་པོ་རྣམས་ལ་བཀའ་སྩལ་པ། ཁྲོ་བོའི་རྒྱལ་པོ་ཆེན་པོ་འདི་གང་ལྐུགས་

པས་མི་བཟློག་པར་ཡལ་ག་དང་། རྩ་བ་དང་། འབྲས་བུ་ཟ་བ་འམ། ཆུ་དང་། རླུང་ཟ་བར་གྱུར་པའི་སྐྱེ་བོས་དབེན་པའི་གནས་སུ་བཟླས་པ་བྱའོ། །ཁྲོ་བོའི་རྒྱལ་པོ་དོན་ཡོད་ཅིང་ཐོགས་པ་མེད་པ་འདི་དཀོན་མཆོག་གསུམ་ལ་རྒྱབ་ཀྱིས་ཕྱོགས་པའི་སེམས་དང་ལྡན་པ་ང་རྒྱལ་ཆེ་བ་མངོན་པའི་ང་རྒྱལ་ཅན་གྱི་གདུག་པའི་སྲིན་པོ་ལ་སོགས་པ་སྦྱར་བར་བྱའོ། །ཕན་པའི་སེམས་ཀྱིས་བྱང་ཆུབ་མཆོག་ཏུ་སེམས་བསྐྱེད་པར་དད་པས་དཀོན་མཆོག་གསུམ་ལ་དང་བར་གྱུར་པར་བསྒྲུབ་པར་བྱའོ། །རྟོག་པ་གཞན་གྱི་ཆོ་གས་ཀྱང་དམན་པའི་སེམས་ཅན་སྡུག་བསྔལ་བ་རྣམས་ནི་སྦྱར་བར་མི་བྱའོ། །དཀོན་མཆོག་གསུམ་ལ་མོས་ཤིང་དད་པ་ལ་ཁྲོ་བོའི་རྒྱལ་པོ་ཆེན་པོ་སྦྱར་བར་བྱའོ། །མཚམས་མེད་པ་ལྔ་བྱེད་པས་ཀྱང་གདོན་མི་ཟ་བར་ཆོ་ག་ཇི་ལྟར་མངོན་པར་འདོད་པའི་དངོས་གྲུབ་ཐོབ་པོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་ནས་དཔལ་ལྡན་རྡོ་རྗེ་འཆང་། །ཐུགས་རྗེ་དང་ནི་ལྡན་པའི་ཐུགས། །སེམས་ཅན་ཁམས་ནི་མ་ལུས་པ། །འདི་ཀུན་རྣམ་པར་གཟིགས་ནས་སུ། །འགྲོ་ལ་ཕན་པ་མཛད་པ་ཅན། །སྙན་པ་ཡི་ནི་ཚིག་གིས་གསོལ། །བཅོམ་ལྡན་ཆོས་རྣམས་ཐམས་ཅད་ཀྱི། །ཁྱོད་ཉིད་གཅིག་པུ་དབང་ཕྱུག་གཙོ། ། ཁྱོད་ཉིད་གཅིག་པུ་ཀུན་མཁྱེན་དེ། །ཐམས་ཅད་མཁྱེན་པའི་ནམ་མཁའ་ཅན། །ཁྱོད་ནི་སྐྱོབ་མེད་སེམས་ཅན་གྱི། །སྐྱོབ་པ་དཔུང་གཉེན་ཐམས་ཅད་ཡིན། །སེམས་ཅན་ཀུན་གྱི་ཁྱོད་གཅིག་པུ། །མཆོག་ཏུ་མཉེས་གཤིན་པ་ཡི་ཕ། །ཉོན་མོངས་ནད་རྣམས་གསོ་མཛད་པ། །སྨན་པའི་རྒྱལ་པོ་ཁྱོད་གཅིག་པུ། །ཁྱོད་ནི་སེམས་ཅན་ཐམས་ཅད་ཀྱི། །གཙོ་བོ་མཆོག་ཏུ་གཞོལ་བ་ཡིན། །བདག་ལ་འདིར་ནི་ཁྱོད་གཅིག་པུ། །གཙོ་བོ་བདག་ལ་གཞན་མ་མཆིས། །སེམས་ཅན་རྣམས་ལ་ཕན་འདོད་པས། །གང་ཞིག་བདག་ཉིད་ཁྱོད་ལ་ཞུ། །ཐུགས་རྗེ་དང་ནི་ལྡན་པའི་ཐུགས། །མགོན་པོ་དེ་ནི་བདག་ལ་གསུངས། །སེམས་ཅན་ཇི་ལྟར་བདེ་བར་འགྱུར། །ཇི་ལྟར་སྡུག་བསྔལ་རྟེན་ཅན་དུ། །གང་གིས་འདིར་ནི་གྱུར་པ་ཡིན། །དེ་རྣམས་བདག་ལ་གཙོ་བོས་གསུངས། །རྒྱལ་པོ་མི་རྒོད་ཆོམ་རྐུན་དང་། །དེ་བཞིན་དུ་ནི་མེ་དང་ཆུ། །ནད་དང་མུ་གེ་བདུད་རྣམས་དང་། །དེ་བཞིན་དུས་མིན་

འཆི་བས་འཇིགས། །ཆར་ཆེས་པ་དང་ཆར་མི་འབབ། །རྟག་ཏུ་ཡམས་ཀྱིས་འཚེ་བས་ཏེ། །མགོན་པོ་འདི་རུ་ཇི་ལྟར་ཡང་། །བརྒྱ་ལ་མི་འགྱུར་བ་ཞིག་ཡིན། །དཔལ་གྱིས་མཛེས་པར་བརྒྱན་པ་ཡི། །དབང་དུ་བྱ་བ་ཉིད་དང་ནི། །སེམས་ཅན་ཐམས་ཅད་བརྩེ་བར་ནི། །ཐམས་ཅད་ཇི་ལྟར་འབྱུང་བར་འགྱུར། །ངན་དོག་ངན་པ་དེ་ཇི་ལྟར། །ཇི་ལྟར་ལུས་པོ་དམན་པར་འགྱུར། །དུ་བའི་མདོག་ཅན་ཧྲུད་ཧྲུད་པོ། །དེ་ནས་གཡེང་བ་ཉིད་དག་ནི། །སྔགས་པ་དག་ལ་འབྱུང་མི་འགྱུར། །ཉེ་བར་འཚེ་བ་རྣམ་པར་སྤངས། །འདི་ཀུན་ཇི་ལྟར་བརྩེ་བ་ལེགས། །ལོངས་སྤྱོད་དང་ཡང་ལོངས་སྤྱོད་འཕེལ། ། ཉལ་བ་དང་ནི་འདུག་པ་དང་། །འགྲོ་བ་འམ་ནི་འདུག་པ་ན། །སྔགས་པ་ཇི་ལྟར་བདེ་བ་རུ། །དེ་ནི་རྟག་ཏུ་འགྱུར་བ་ཡིན། །དེ་ལ་ལྷ་ནི་མངོན་སྤྱོད་ཅིང་། །རྗེས་སུ་འབྲེལ་བ་ཇི་ལྟར་འགྱུར། །ལས་ཀྱི་དངོས་གྲུབ་ཇི་ལྟར་ནི། །མྱུར་བ་ཉིད་དུ་འགྱུར་བ་ཡིན། །སྲིན་པོ་ལྟོ་འཕྱེ་གྲུལ་བུམ་དང་། །ཡི་དགས་གཅན་གཟན་སྦྲུལ་དེ་བཞིན། །གང་ཡང་རྟག་ཏུ་འཚེ་བས་འདེབས། །ཇི་ལྟར་འཚེ་བས་མི་འགྱུར་ལགས། །ཞི་བ་དང་ནི་རྒྱས་པ་འམ། །དེ་བཞིན་དབང་དང་མངོན་སྤྱོད་ཀྱི། །ལས་ནི་ཇི་ལྟར་མྱུར་གྲུབ་ནས། །དོན་ཡོད་པར་ནི་འགྱུར་བ་ལགས། །འདི་ཀུན་སྐལ་བ་ཆེན་པོ་ནི། །ད་ལྟར་ཡང་ནི་གསུང་བར་རིགས། །ཆོས་ཀྱི་དབང་ཕྱུག་ཐུབ་པ་ཡིས། །འདི་སྐད་ཀྱི་ནི་ཚིག་གསན་ནས། །ཕྱག་ན་རྡོ་རྗེ་དེས་ཆེན་ལ། །སྙན་པའི་གསུང་གིས་བཀའ་སྩལ་པ། །ལེགས་སོ་བུ་གཅིག་དཔའ་བོ་ཆེ། །ཕྱག་ན་རྡོ་རྗེ་སྟོབས་པོ་ཆེ། །རྫུ་འཕྲུལ་ཆེ་ཉིད་སླར་ཡང་ལེགས། །ང་ཡི་བསྟན་ལ་ཁྱོད་ཉིད་དེ། །ཁྱོད་ཉིད་གཅིག་པུ་བདག་གི་སྲས། །རྟག་ཏུ་རྗེས་སུ་འཕེལ་བྱེད་པ། །ང་ཡི་བསྟན་པ་བསྲུང་བ་ཡང་། །ཁྱོད་ཉིད་ཀྱི་ཡང་ལག་ན་གནས། །རྒྱལ་བའི་སྲས་པོ་ཁྱོད་གཅིག་པུ། །གཙོ་བོ་དབང་ཕྱུག་ཁ་ལོ་སྒྱུར། །ཁྱོད་ཉིད་གཅིག་པུ་ལ་རག་ལས། །བྱང་ཆུབ་ཐམས་ཅད་ལག་མཐིལ་གནས། ། གང་ཞིག་ཁྱོད་ཀྱིས་ཞུས་པ་ཡིས། །བུ་གཅིག་འདི་ནི་ངོ་མཚར་ཏོ། །གསང་བ་མཆོག་གི་རྨད་དུ་བྱུང་། །མ་ལུས་པར་ནི་བཤད་པར་བྱ། །གང་ཞིག་བདག་གི་སྙིང་ལ་གནས། །དེ་ནི་གཞན་གྱིས་བྱིན་གྱིས་བརླབས། །ཆོས་རྣམས་ཀུན་གྱི་གསང་བ་ཡང་། །དེ་ནས་གཞན་དུ་མ་གསུངས་པ། །དཔའ་བོ་ཁྱོད་ལ་མ་

ལུས་པར། །བཤད་པར་བྱ་ཡིས་ཚུར་ལ་ཉོན། །གང་གིས་དངོས་གྲུབ་མྱུར་ཐོབ་པའི། །གསང་བ་གང་ཞིག་གནས་པ་ཡང་། །མཆོག་གི་གཟུགས་ཅན་ལྷན་ཅིག་ཏུ། །ས་སྟེངས་འདི་ནི་རྣམ་པར་གནས། །གཙུག་ལག་ཁང་ནི་སྣ་ཚོགས་མདོག །དེ་བཞིན་སྣ་ཚོགས་གཟུགས་འཆང་བ། །རྫུ་འཕྲུལ་ཆེན་པོ་མཐུ་ཆེ་བ། །དེ་བཞིན་རྒྱལ་བའི་སྲས་པོ་འཆང་། །རྒྱལ་བའི་ཆོས་རྣམས་ཡང་དག་ལྡན། །དཀོན་མཆོག་གསུམ་ལ་མཆོག་ཏུ་གཞོལ། །འདི་རྣམས་མཆོད་ཅིང་ཡང་མཆོད་ལ། །གནོད་པ་བྱེད་པ་སྲེག་པར་འགྱུར། །དེ་ནི་རྒྱལ་བའི་བདེན་པས་བཅིང་། །སེམས་ཅན་ཐམས་ཅད་དབང་དུ་བྱེད། །འཁྲིག་པ་བརྟེན་པར་གྱུར་པ་དང་། །མེ་ནི་གང་ཞིག་སྡིག་བྱེད་པ། །ཚངས་སྤྱོད་དང་ནི་དེ་བཞིན་གཞན། །ས་སྟེངས་སྐྱེ་བོ་གང་ཅུང་ཟད། །འདི་ཀུན་འདིར་ནི་རྣམ་པར་འཚེ། །ལྷ་རྣམས་ཀྱི་ཡང་དེ་བཞིན་གྲོང་། །གདུག་ཅིང་མདོག་སྡུག་པ་ཡི་ལུས། །གནོད་སེམས་བདག་ཉིད་རྣམ་པར་འཚེ། །བརྟན་དང་གཡོ་བ་ཕྱག་འཚལ་ནས། །འཇིག་རྟེན་འདི་ནི་རྣམ་པར་སྤངས། །ས་སྟེངས་བསྟན་པ་མ་གཏོགས་པར། །དེ་རྣམས་བསྟན་པ་ཅུང་ཟད་མེད། །གང་གིས་བདེ་བ་མྱོང་བྱེད་པ། །ཁྱོད་ཀྱིས་ཀྱང་ནི་མཉན་པར་རིགས། །སྔགས་པས་དང་པོ་ཀུན་བྱས་ནས། །རྫོགས་སངས་རྒྱས་ནི་ཉི་མའི་འོད། །ཀུན་མཁྱེན་དབང་ཕྱུག་བློ་དང་ལྡན། །སྤྲོས་པ་ཐམས་ཅད་འདི་ལས་གཞན། །ཤིན་ཏུ་རྣམ་པར་དག་པའི་ཆོས། །གདོད་ནས་ཞི་བ་ཆེན་པོའི་གནས། །སྐྱོན་རྣམས་ཐམས་ཅད་རྣམ་པར་གྲོལ། །ཕུན་སུམ་ཚོགས་པ་ཐམས་ཅད་བྱེད། །འདི་ནི་དཀོན་མཆོག་གསུམ་གཙོ་བོ། །བསམ་པ་ཐམས་ཅད་རྫོགས་པར་བྱེད། །གཟའ་རྣམས་གཟུགས་དང་མཚན་མ་དང་། །ཆ་བྱད་དང་ནི་དབྱིབས་ཉིད་ཀྱང་། །བརྟན་དང་གཡོ་བས་མི་ཤེས་པས། །བཤད་པར་བྱ་ཡིས་བུ་ཁྱོད་ཉོན། །བདག་གིས་ཡེ་ཤེས་གནས་པ་འདི། །མཛེས་པའི་ཚུལ་ཅན་རྨད་དུ་བྱུང་། །ས་ཡི་དཀྱིལ་འཁོར་ཀུན་དུ་ནི། །བུ་གཅིག་ཁོ་བོས་མ་གསུངས་སོ། །གཟའ་རྣམས་ཀྱི་ནི་མཆོག་གི་གཟུགས། །མཆོག་ཏུ་རྨད་འབྱུང་བསམ་མི་ཁྱབ། །མཆོག་ཏུ་མཛེས་པར་གྱུར་པ་སྟེ། །ཁྲོས་ཤིང་བཞིན་མི་སྡུག་པ་ཡི། །མཛེས་པའི་གཟུགས་ཅན་ལ་བརྟེན་ནས། །རང་ཉིད་མཛེས་ཤིང་ཕན་པར་གནས། །

གང་ཚེ་གཟུགས་ནི་བསམ་མི་ཁྱབ། །མཆོག་ཏུ་མཛེས་པར་གྱུར་པ་སྟེ། །དེ་ཚེ་འདི་ནི་བསམ་མི་ཁྱབ། །དྲང་སྲོང་བསམ་གཏན་སྤྱོད་ཡུལ་མིན། །ཞི་བ་སེམས་ཅན་ལ་བྱ་ཞིང་། །ཁྲོས་པ་ཉིད་ནི་ཁྲོས་པ་ཉིད། །སེམས་ཅན་ལ་འདི་ཞི་བ་རུ། །དེ་ཡི་ཚེ་ན་ཀུན་དུ་སྤྱོད། །སངས་རྒྱས་ཆོས་དང་དེ་བཞིན་དུ། །དགེ་འདུན་མཁས་པས་མཆོད་བྱས་ན། །དེ་ཡི་གཟུགས་ནི་ཉེར་མཚོན་ཏེ། །དེ་ཡི་ཚེ་ན་མཆོད་པར་བྱ། །ཞི་བ་ཞི་བ་ཤེས་པར་བྱ། །རྒྱས་པ་ཡང་ནི་རིམ་ཇི་བཞིན། །མངོན་སྤྱོད་ཞེས་བྱ་བ་འདི་དང་། །དབང་དུ་བྱ་བའི་གཟུགས་མཚན་ཉིད། །འདི་དག་ཐམས་ཅད་མདོར་བསྡུས་ན། །དེ་ནི་རྒྱས་པར་གསུངས་པ་ཡིན། ། ཤིན་ཏུ་མཉམ་པར་གཞག་མཆོད་པས། །ཞི་བ་ལ་སོགས་འདི་ཡང་མིན། །ཕུན་སུམ་ཚོགས་པ་ཀུན་བྱེད་པའི། །དཀོན་མཆོག་གསུམ་ནི་མངོན་དུ་མཆོད། །ཡིད་ནི་བསྡམས་པར་གྱུར་པ་དང་། །དབང་པོ་ལྔ་ནི་བསྡམས་པ་ཡིས། །དྲི་མ་དཀར་ཆེན་ཞག་ཏུ་ལོན། །ལུས་ལ་བསྒོས་ནས་ཁྲུས་ཀྱིས་བརྒྱན། །ཤིན་ཏུ་དབེན་ཞིང་ཕྱུགས་མེད་པར། །འདི་ནི་འོང་བར་སོང་ནས་ནི། །བ་ལྕི་ལ་སོགས་རྟག་ཏུ་བྱུགས། །དྲི་ཡིས་ཉེ་བར་བྱུགས་ནས་ནི། །ཁ་དོག་སེར་དང་དམར་བ་དང་། །དཀར་པོའམ་དེ་བཞིན་ལྗང་གུ་དང་། །ནག་པོ་ཡང་དག་གསུངས་པ་ཡིན། །ཁ་དོག་ཡོངས་སུ་བཟུང་བྱས་ནས། ། མཁས་པས་ཇི་ལྟར་རིག་པ་ཉིད། །ཡིད་དུ་འོང་བའི་དཀྱིལ་འཁོར་བྱ། །སངས་རྒྱས་སེར་པོ་བྱ་བ་སྟེ། །ཆོས་ནི་དཀར་པོ་ཉིད་དུ་བྱ། །དགེ་འདུན་ལྗང་གུར་བྱ་བ་སྟེ། །གསང་བ་འདི་ནི་ཡང་དག་གྲགས། །གཟའ་རྣམས་ཁ་དོག་བྱེ་བ་ཡིས། །དཀྱིལ་འཁོར་དག་ནི་ཉེ་བར་མཚོན། །མཁས་པས་དེ་ཡི་འོག་ཏུ་ནི། །སྔགས་པའི་ལུས་ནི་རྟག་ཏུ་བྱ། །ཕྱག་རྒྱ་འཆང་བའི་ཕྱོགས་བྲིས་ཏེ། །རང་གི་ཕྱག་རྒྱ་ཁ་དོག་མཚན། །དཀྱིལ་འཁོར་གྱི་ནི་ཚད་དག་ནི། །སོར་མོ་བཅུ་དྲུག་རབ་ཏུ་གྲགས། །ཡང་ན་གང་ལྟར་ཡིད་དགའ་བ། །དེ་ལྟར་ཡང་དག་བརྩམ་པར་བྱ། །ཁ་དོག་ཇི་ལྟར་ཉེར་མཚོན་པ། །དྲི་དང་མེ་ཏོག་ལ་སོགས་དབུལ། །མཉམ་པར་གཞག་པས་སོ་སོ་རུ། །འདི་རྣམས་ཀྱི་ནི་གསང་སྔགས་བཟླས། །སེམས་ནི་རྩེ་གཅིག་གྱུར་པ་ཡིས། །བདེ་གཤེགས་བདག་ཉིད་བསྒོམས་ནས་སུ། །གཟའ་རྣམས་སོ་སོར་མདུན་གནས་ནས། །གསང་སྔགས་བརྗོད་པར་བྱ་བ་ཡིན། །དེ་

ནས་གསང་སྔགས་འདི་ཡིས་ནི། །བསམ་པ་ཐམས་ཅད་ཡོངས་རྫོགས་བྱེད། །ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦ་སཱ་པ་རི་པཱུ་ར་ཀེ་བྷྱཿ། སརྦྦ་ཏ་ཐཱ་ག་བྷཀྟི་སྭཱ་ཧཱ། སརྦྦ་ཏྲ་ཡྃ། ཨཱཿ་ཨཱ་དི་ཏྱ། སུ་བི་ཤུད་དྷྱཿ། ཉི་མ་དང་། ཟླ་བ་དང་། གནོན་པོ་དང་། མིག་དམར་གྱིའོ། །བི་བུདྷ་ཕ་ཀ ། གཟའ་ལྷག་གིའོ། །ༀ་བྷོ་ག་སྤ་ད་ཡཿ། ཕུར་བུའི་འོ། །ༀ་ཨ་སུ་རོ་དྷ་མ་ཧོཿ། པ་སངས་ཀྱིའོ། །ཨོཾ་ཀྲྀཥྞ་བརྞྞ་ཕ་ཀ །སྤེན་པའི་འོ། །ༀ་བི་ཀྲྀ་ཏ་བཀྟྲ་རུ་ཙི་སྭཱ་ཧཱ། སྒྲ་གཅན་གྱིའོ། །ཡང་ནི་གསང་སྔགས་རེ་རེ་ནི། །བདུན་ཕྲག་བརྒྱ་རྩ་བདུན་དུ་བཟླས། །སྣ་ཚོགས་གཟུགས་ཅན་གཟའ་རྣམས་ནི། །དེ་ལྟར་ཐམས་ཅད་མཆོད་པར་བྱ། །སྐལ་བཟངས་སྐྱེ་བར་འགྱུར་བ་དང་། །ལོངས་སྤྱོད་རྒྱ་ཆེན་སྩོལ་བར་འགྱུར། །རྒྱལ་པོ་མི་རྒོད་ཆོམ་རྐུན་སོགས། །སྲིན་པོ་ལྟོ་འཕྱེ་གྲུལ་བུམ་རྣམས། །དེ་ཀུན་འབྱུང་བར་མི་འགྱུར་ཏེ། །དེ་ཡི་འཇིགས་པ་ནམ་ཡང་མིན། །ནད་རྣམས་ཀུན་ལས་རྣམ་པར་གྲོལ། ། སྡུག་བསྔལ་ཐམས་ཅད་རྣམ་པར་སྤངས། །ཐམས་ཅད་དབང་ཕྱུག་གོ་འཕང་འཐོབ། །ཐེ་ཚོམ་མེད་པར་འབྱུང་བར་འགྱུར། །གང་ཡང་གཟིར་བ་ཉིད་འགྱུར་བ། །གཟིར་བའི་རང་བཞིན་འགྱུར་བ་གནས། །ཆོ་ག་བཞིན་དུ་མཆོད་པ་ཡིས། །ཕན་པ་དེ་ལ་འབྱུང་མི་འགྱུར། །རྟག་ཏུ་བདེ་བས་གནས་གྱུར་ཅིང་། །བརྩེར་ལྡན་སེམས་ཅན་མཉེས་གཤིན་པ། །སེམས་ནི་དང་ཞིང་མཉེས་པ་སྟེ། །སེམས་ཅན་ཀུན་ལ་ཕན་པར་དགའ། །དངོས་གྲུབ་ལས་ནི་ཕན་ཡོན་ནི། །ཞི་བའི་སེམས་ནི་མཉམ་པར་གཞག །དེ་ཡི་ཕྱི་རོལ་བཙུན་པར་བརྟེན། །ཀུན་གྱི་གཙོ་བོ་དབང་ཕྱུག་སྟེ། །རྒྱལ་པོ་སྒྱུ་འཕྲུལ་ཆེན་པོ་དང་། །གདུག་པའི་སེམས་ཅན་འདུལ་བྱེད་པར། །ཐེ་ཚོམ་མེད་པར་འབྱུང་འགྱུར་ཏེ། །རྒྱལ་བ་བདེན་པ་གསུང་བས་གསུངས། །ཆར་ཆེས་པ་དང་ཆར་མི་འབབ། །མུ་གེ་བྱུང་དང་རྩོད་པར་སོང་། །དཀྱིལ་འཁོར་མཆོད་པར་གྱུར་པ་ན། །དེ་ལ་དེ་ནི་འབྱུང་མི་འགྱུར། །ཞི་བ་དང་ནི་རྒྱས་པ་དང་། །གལ་ཏེ་ལས་འདི་རྩོམ་པ་ན། །དྲི་ནི་ཆོ་ག་བཞིན་གསུངས་པས། །དང་པོར་འདིར་ནི་མཆོད་པར་བྱ། །འདི་ནི་སྡིག་དང་ལྡན་པས་ཀྱང་། །དེ་ནི་མྱུར་དུ་འགྲུབ་པར་འགྱུར། །ནད་རྣམས་ཀུན་ལས་རྣམ་པར་གྲོལ། །ཉེས་པ་ཐམས་ཅད་རྣམ་པར་སྤངས། །སྡིག་པ་ཐམས་ཅད་

རྣམ་པར་གྲོལ། །རྩོད་པ་ཐམས་ཅད་རྣམ་པར་སྤངས། །ཐམས་ཅད་རྟག་ཏུ་བདེ་བར་ནི། །ཐེ་ཚོམ་མེད་པར་འབྱུང་བར་འགྱུར། །དེ་ལྟར་མཆོད་པའི་ཆོ་ག་ཡིས། །གལ་ཏེ་བསོད་ནམས་བྱས་མཆོད་ན། །ལྷ་ཡི་ཚོགས་རྣམས་ཀུན་མཉེས་ནས། །དངོས་གྲུབ་རྒྱ་ཆེན་སྩོལ་བར་འགྱུར། །གདུག་པའི་ལོག་པར་འདྲེན་པ་ཀུན། །སྲིན་པོ་འཇིགས་པའི་གཟུགས་ཅན་རྣམས། །སྔགས་པ་བཟླས་པར་བརྩོན་པ་ལ། །དེ་ནི་དེ་ལ་འཚེ་མི་བྱེད། །རྟག་ཏུ་སྣ་ཚོགས་ནད་མེད་ཅིང་། །ལོངས་སྤྱོད་ཕུན་སུམ་ཚོགས་པ་རུ། །དེ་ནི་རྟག་ཏུ་འགྱུར་བ་སྟེ། །ཆོ་ག་བཞིན་དུ་མཆོད་པ་ཡིས། །རྒྱལ་པོ་ཡང་ནི་དབང་དུ་འགྱུར། །གང་ཡང་གདུག་པ་སྟོབས་པོ་ཆེ། །འཇིགས་པའི་གཟའ་སོགས་ཐམས་ཅད་དང་། །མཁའ་འགྲོ་མ་ཡང་སྟོབས་ཆེན་མོ། །དེ་ལ་ཀུན་དུ་ཕྱག་འཚལ་བར། །ཐེ་ཚོམ་མེད་པར་འབྱུང་བར་འགྱུར། །དེ་ལྟར་རྣམ་པ་ཐམས་ཅད་ཀྱིས། །ཐམས་ཅད་དུ་ནི་མཆོད་ནས་སུ། །བདེ་བ་ཉིད་དུ་ཀུན་དུ་ཤེས། །སྡུག་བསྔལ་རྒྱ་མཚོ་རྣམ་པར་སྤངས། །སྣ་ཚོགས་ཕུན་སུམ་ཚོགས་པས་མཛེས། །དེ་བཞིན་རྟག་ཏུ་རྒྱལ་པོར་བཅས། །ཐམས་ཅད་དུ་ནི་སྙན་པར་སྨྲ། །ཀུན་ཀྱང་དབང་ཕྱུག་རྣམ་པར་བརྒྱན། །མཆོག་ཏུ་སྐལ་བ་བཟང་འགྱུར་བ། །དེ་ནི་ཀུན་དུ་ཐེ་ཚོམ་མེད། །དེ་སྐད་གསུངས་ནས་རྣལ་འབྱོར་ཆེ། །ཐུབ་པ་ཆོས་ཀུན་དབང་ཕྱུག་ནི། །ཅང་མི་གསུང་བ་ཉིད་དུ་གྱུར། །དེ་ཚེ་འཁོར་རྣམས་འདི་སྐད་གསོལ། །དཔའ་བོ་ཆེན་པོ་སེམས་དཔའ་ལེགས། །ཐམས་ཅད་མཁྱེན་པའི་རིམས་ནད་བྲལ། །སྔགས་ཀྱི་དེ་ཉིད་དོན་ངེས་པ། །ཐམས་ཅད་མ་ལུས་པ་རུ་གསུངས། །མགོན་པོ་སེམས་ཅན་ཤིན་ཏུ་མེད། །སྤྱན་སྔ་རུ་ནི་བརྗོད་པའི་ཚུལ། །གསང་སྔགས་རྒྱ་མཚོ་རྒྱ་ཆེན་ལས། །སྙིང་པོ་འདི་ནི་བཏུས་ནས་བསྡུས། །ཐོབ་པས་འཇིགས་མེད་འདི་མངོན་འགྱུར། །དེ་ཀུན་ཐེ་ཚོམ་མེད་པ་རུ། །ས་འོག་གནས་པ་ཀུན་བྱས་ནས། ། སྡུག་བསྔལ་ཀུན་ལས་རྣམ་པར་གྲོལ། །བདེ་བ་ཐམས་ཅད་ཡང་དག་ལྡན། །དེ་ཚེ་ཐམས་ཅད་འབྱུང་འགྱུར་ཞིང་། །ནད་རྣམས་ཐམས་ཅད་རྣམ་པར་སྤངས། །གདུག་པ་འཇིགས་པའི་གཟུགས་ཅན་དང་། །སྲིན་པོ་གང་ཡང་མཆེ་བ་ཅན། །གསང་བའི་ཕྱག་རྒྱ་མཐོང་བ་ཡིས། །དེ་དག་ཐམས་ཅད་

བརླག་པར་འགྱུར། །གཟའ་མཆོད་པ་རབ་འབྱམ་གྱི་རིམ་པར་ཕྱེ་བའོ།། །།མི་གཡོ་མགོན་པོ་ཞེས་བྱ་བ། །སེམས་ཅན་རྗེས་སུ་སྲུང་བར་བྱེད། །འཇམ་པའི་དཔལ་གྱི་དཀྱིལ་འཁོར་སྟོན། །དེ་ཚེ་དངོས་གྲུབ་མཛེས་པ་ཀུན། །རྡོ་རྗེ་རལ་གྲི་སོགས་དེ་བཞིན། །ཕྱིས་ཀྱི་དཀྱིལ་འཁོར་ནང་དུ་ནི། །སྔགས་པས་ཆོ་ག་བཞིན་དུ་བསྒྲུབ། །ལས་ཀྱི་ཆོ་ག་མཐོང་བ་ཡིས། །ས་གཞི་དག་པར་ཡང་དག་བལྟ། །སློབ་མ་རྣམས་ལ་ཕན་འདོད་པས། །འབད་པས་དཀྱིལ་འཁོར་ཀུན་དུ་བྲི། །ཀུན་ནས་ཁྲུ་ཚད་ལྔ་ཡིན་ཏེ། །ཁྱམས་ཀྱིས་སོ་སོར་རྣམ་པར་བརྒྱན། །རྟ་བབས་རྣམ་པར་བཙུགས་པ་ནི། །ནུབ་ཀྱི་སྒོ་ནི་བསྒོམ་པར་བྱ། །སྒོ་ཡི་ལས་ནི་འཇིགས་མེད་པར། །བྱང་ཕྱོགས་ཀྱི་ནི་རབ་ཏུ་བྱ། །གཞན་དུ་གང་ཞིག་རབ་བྱེད་ན། །རིང་པོར་མི་ཐོགས་ངེས་པར་བརླག །སྔར་གྱི་བཞིན་དུ་ཆོ་ག་ཡིས། །གྲུ་བཞི་རུ་ནི་ཐིག་གདབ་བྱ། །སྒོ་ཁྱུད་དང་ནི་ཁྱམས་དང་ལྡན། །སྣམ་བུས་ཀྱང་ནི་ཡང་དག་བརྒྱན། །དེ་ནས་སྔགས་པས་དབུས་ཀྱི་ཆར། །རལ་གྲིའི་ཕྱག་རྒྱ་གཟུགས་བཟང་ལྡན། །མེ་ཡི་དཀྱིལ་འཁོར་དབུས་སུ་ནི། །རིན་ཆེན་རྡོ་བར་ལེགས་པར་གནས། །འབར་བའི་ཕྲེང་བ་གཟི་བརྗིད་འཁྲིགས། །ཉི་མ་འཆར་ཀའི་འོད་དང་མཚུངས། །རང་གི་ས་བོན་ས་བོན་གྱིས། །རྫོགས་པའི་སངས་རྒྱས་བསྒོམ་བྱ་བྲི། །འདི་ནི་བྱིན་གྱིས་བརླབས་བའི་སྔགས། །ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦ་བི་ཤྭ་མུ་ཁེ་བྷྱཿ། ཧེ་ཧེ་ཧེ། ཨཱ་ཛྙཱ་པ་རི་མཱརྒ་ཎ་ཨཱ་གཙྪ་བྷ་ག་བན་སཱི་གྷྲཾ་སྭཱ་ཧཱ། དེ་ཡི་བྱང་དུ་བྲི་བ་ནི། །བུམ་པ་རྡོ་རྗེ་མཚན་མ་ཅན། །ཞི་བ་འབར་བའི་ཕྲེང་བས་འཁྲིགས། །འཇིག་རྟེན་གཙོ་བོ་དེ་རང་བཞིན། །ལྷོ་ཡི་ཕྱོགས་སུ་མགོན་པོ་ཡིས། །རྡོ་རྗེ་འབད་པས་བྲི་བར་བྱ། །མེ་ཡི་དཀྱིལ་འཁོར་དབུས་སུ་ནི། །ཕྱག་ན་རྡོ་རྗེ་བློ་ལྡན་པས། །དབང་ལྡན་ཕྱོགས་ལ་བརྟེན་ནས་ནི། །མཛེས་པའི་གཟུགས་བརྙན་ཕྱག་རྒྱ་བྲི། །རིན་ཆེན་རྡོ་བར་བཞུགས་ཤིང་འབར། །ཡིད་བཞིན་ནོར་བུ་ཞེས་སུ་བཤད། །ཁྲོ་རྒྱལ་ཕྱག་རྒྱ་རྟུལ་ཕོད་རོལ། །སྟེང་དུ་པདྨ་བྲིས་ནས་ནི། །སངས་རྒྱས་ཐམས་ཅད་

དེ་རུ་བཞུགས། །མེ་ཡི་ཕྱོགས་ལ་བརྟེན་ནས་ནི། །རབ་ཏུ་འབད་པས་རྡོ་རྗེ་བྲི། །འབར་བའི་ཕྲེང་བ་འཇིགས་སུ་རུང་། །པདྨ་ལ་ནི་རབ་ཏུ་བཞུགས། །བློ་དང་ལྡན་པས་འོག་ཏུ་ནི། །ཁྲོ་བོའི་རྒྱལ་པོ་མངག་གཞུག་བྲི། །རྡོ་རྗེ་རྡོ་བའི་སྟེང་ན་གནས། །རྡོ་རྗེ་འབར་བས་ཡོངས་སུ་བསྐོར། །རླུང་གི་དཀྱིལ་འཁོར་དབུས་སོན་པར། །རྟག་ཏུ་འབར་བས་འཁྲིགས་པ་ཡི། །ཞགས་པའི་ཕྱག་རྒྱ་དེ་ལ་བྲི། །དེ་ནས་གཉིས་པའི་ཆ་ལ་ནི། །ཕོ་ཉ་མོ་ནི་ཀུན་ནས་བྲི། །བརྟན་པ་ཞེས་བྱའི་ཕོ་ཉ་མོ། །བྱང་ཕྱོགས་སུ་ནི་ཡང་དག་གནས། ། ཆུ་ཡི་དཀྱིལ་འཁོར་ལ་བཞུགས་པར། །མཁའ་གསོད་མ་ནི་དེ་ལ་བྲི། །ལྷོ་ཡི་ཕྱོགས་སུ་རྣམ་འཇིགས་མ། །ཉི་མའི་དཀྱིལ་འཁོར་དབུས་ན་བཞུགས། །བགེགས་རྣམས་ཀུན་ནས་འཇིགས་པར་བྱེད། །འཇིག་པ་ཡི་ནི་མེ་ལྟར་འབར། །འཁོར་ལོ་རྡོ་བའི་སྟེང་དུ་བྲི། ། དེ་ཡི་གཡོག་འཁོར་དག་གི་དོན། །རབ་ཏུ་འབད་དེ་བྲི་བར་བྱ། །མཁའ་གསོད་མ་ནི་སྣམ་བུ་ལ། །གཏུན་ཤིང་དང་ནི་ཐོ་བ་ཉིད། །རབ་ཏུ་འབད་པས་བྲི་བར་བྱ། །སླར་ཡང་ནུབ་ཕྱོགས་སུ་སོན་པར། །བཅོམ་ལྡན་མ་ནི་འཇིགས་པ་བྲི། །མཛོད་སྤུ་ཞེས་ནི་བཤད་པ་ཡི། །ཕྱག་རྒྱ་ཤར་གྱི་ཆ་ལ་བྲི། །ལྷ་མོ་པད་དཀར་སྟེང་ན་བཞུགས། །རིན་ཆེན་ཕྲེང་བས་རྣམ་པར་བརྒྱན། །དེ་ལྟར་ཀུན་ནས་ངེས་ལ་ནི། །སྔགས་པས་ཕྱག་རྒྱ་དགེ་བའི་ཚོགས། །རང་གི་ས་བོན་ངེས་སྦྱར་བས། །དཀྱིལ་འཁོར་མཆོག་གི་རྨད་དུ་བྱུང་། །སྔགས་པས་འདི་ཀུན་ཆོ་ག་བཞིན། །དྲི་དང་མེ་ཏོག་སོགས་དགྱེས་མཆོད། །དེ་ནས་ཕྱག་ན་རྡོ་རྗེས་བྱིན་གྱིས་བརླབ་པའི་སྔགས་གསུངས་པ། །ལག་པ་ཐལ་མོ་སྦྱར་ནས་ནི། །སོར་མོ་གུང་གི་ནང་ཉིད་དུ། །དཔལ་ལྡན་ཕྱག་རྒྱ་འདི་འཆང་བ། །པདྨའི་མཛོད་ཅེས་མངོན་པར་བཤད། །སྐྱོབ་པ་ཐམས་ཅད་མངོན་སུམ་དུ། །དཀྱིལ་འཁོར་བྱིན་གྱིས་རློབ་པར་བྱེད། །སྔགས་ནི་འདིའོ། །ན་མཿསརྦྦ་ཏ་ཐཱ་ག་ཏེ་བྷྱཿ། སརྦྦ་སུ་ཁེ་བྷྱཿ། ཧཱུྃ་ཧཱུྃ། བཿབཿམྃ་མྃ་སྭཱ་ཧཱ། སྔགས་འདིས་ཕྱག་རྒྱ་དང་ལྡན་པར་སྤྱན་དྲང་བ་དང་། གཤེགས་སུ་

གསོལ་བ་ལ་སོགས་པ་ཆོ་ག་བཞིན་དུ་བྱའོ། །འདི་ནི་འཇམ་དཔལ་གྱི་དཀྱིལ་འཁོར་གྱི་རྒྱལ་པོ་ཆེན་པོ་སྟེ། བསྟན་པ་བསྲུང་བའི་ཕྱིར་དང་། དམ་པའི་ཆོས་གནས་པ་དང་། སེམས་ཅན་རྣམས་བསྲུང་བའི་ཕྱིར་མཆོག་ཏུ་གསང་བའི་མི་གཡོ་མགོན་པོ་སངས་རྒྱས་ཐམས་ཅད་ཀྱིས་གསུངས་སོ། །གང་འདིར་བཞུགས་ནས་ཕྱོགས་ན་ཕྱག་རྒྱའི་ཡེ་ཤེས་ལེགས་པར་བསླབས་ན། རྒྱུད་ཐམས་ཅད་ཀྱི་གསང་བའི་སྙིང་པོ་དཀྱིལ་འཁོར་དུ་མཆོག་ཏུ་ཞུགས་པ་ཡིན་ནོ། །འཇམ་དཔལ་གྱི་དཀྱིལ་འཁོར་འདི་སུ་ལ་ཡང་བཤད་པར་མི་བྱའོ། །དེ་ཅིའི་སླད་དུ་ཞེ་ན། དཀྱིལ་འཁོར་འདི་ནི་མཆོག་ཏུ་གསུངས་པ་ཡིན་པས་སོ། །སྔགས་པ་གང་ཞིག་གཞན་དུ་བྱེད། །དཀྱིལ་འཁོར་ཆོ་ག་ཉམས་པ་ཡིས། །སློབ་མ་དང་བཅས་གདོན་མི་ཟ། །ཐེ་ཚོམ་མེད་པར་བརླག་པར་འགྱུར། ། དེ་ནས་འཇམ་དཔལ་གྱི་དཀྱིལ་འཁོར་འདིར་ཞུགས་པས་མཚམས་བཅིང་བར་བྱ་སྟེ་གཞན་དུ་མ་ཡིན་ནོ། །སློབ་དཔོན་གྱིས་དཀྱིལ་འཁོར་བྲིས་ཏེ་ཞུགས་ནས། ཚམ་ངམ་གྱི་ལས་རྣམས་ལ་སློབ་མ་སྦྱར་བར་བྱའོ། །དེ་ནས་ཕྱག་ན་རྡོ་རྗེས་སླར་ཡང་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཉོན་ཅིག །ཕ་རོལ་གྱི་སྟོབས་དཔག་ཏུ་མེད་པ་གནོན་པའི་རས་རིས་ཀྱི་ཆོ་ག་ནི་རིན་ལྷག་པ་བཅལ་བའི་རས་སྐྲ་ལ་སོགས་པ་དང་བྲལ་བ་བླངས་ཏེ། ཁྲོ་བོའི་རྒྱལ་པོ་དཔའ་བོ་གཅིག་པ་ལག་པ་གཡས་པ་བཏེག་པ། ཞབས་གཡས་པ་སྟེང་དུ་བཏེག་པ། ཞབས་གཡོན་པ་ཡང་གྱེན་དུ་བསྒྲེང་བ། ཕྱག་གཡོན་པ་སྡིགས་མཛུབ་ཀྱིས་བསྡིགས་པར་མཛད་པ། ཞལ་རྣམ་པར་མི་སྡུག་པ་ནང་སྟེང་དུ་འབར་བར་གནས་པ་དེ་བཞིན་གཤེགས་པས་སྟེང་ནས་ཕྱག་གཉིས་ཀྱིས་དབུགས་འབྱིན་པར་མཛད་པ། མེ་ཏོག་རྒྱལ་པོ་ནི་བྱང་དུའོ། །གཡས་སུ་ནི་བཅོམ་ལྡན་འདས་རྣམ་པར་སྣང་མཛད། འོག་ཏུ་ནི་སྒྲུབ་པ་པོས་སྤོས་ཀྱི་སྣོད་ཀྱིས་ལག་པ་སྒྲེང་བ། ཁྲོ་བོའི་རྒྱལ་པོ་ལ་བལྟ་བ་བྲིའོ། །འཇམ་དཔལ་མི་གཡོ་

མགོན་པོ་འདི་རས་རིས་ཀྱི་ཆོ་ག་སེམས་ཅན་རྣམས་ལ་ཕན་པར་འདོད་པས་བདག་གིས་བཤད་དོ། །འཇམ་དཔལ་མི་གཡོ་མགོན་པོའི་སྒྲུབ་ཐབས་ཀྱི་ཆོ་ག་གང་ཐབས་སླ་བས་དངོས་གྲུབ་ཆེན་པོ་ཐོབ་པ་ཉོན་ཅིག །འདིར་དང་པོར་རེ་ཞིག །སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔས། གངས་རི་ལ་སོགས་པ་ཡིད་དགའ་བའི་གནས་རྣམས་སུ་གཅིག་པུ་སློང་མོ་ཟ་ཞིང་རས་བྲིས་འདིའི་སྤྱན་སྔར་སྔོན་དུ་བསྙེན་པ་འབུམ་ཕྲག་གཅིག་བྱའོ། །དེ་ནས་རི་རྩེའི་ཟོམ་ལ་གནས་བཅས་ཏེ། འབུམ་ཕྲག་གསུམ་བཟླས་པ་བྱའོ། །དེ་ནས་ཉ་ལ་ཇི་ལྟར་འབྱོར་པའི་མཆོད་པ་བྱས་ནས་མཚན་རངས་པར་བཟླས་པ་བྱའོ། །ནང་པར་ཐོ་རངས་སམ་ཉི་མ་ཤར་ནས་མཚན་མ་རྣམས་འབྱུང་སྟེ། ཉི་མ་འགྱུར་ལྡོག་བྱེད་ཅིང་མུན་པར་ཡང་འགྱུར་རོ། །ཕྱོགས་བཞིར་ཧ་ཧ་ཞེས་སྒྲོགས་པའི་སྒྲ་ཆེན་པོ་ཐོས་པར་འགྱུར་རོ། །ཁྲོ་བོའི་རྒྱལ་པོ་མེ་ཏོག་གི་ཆུན་འཕྱང་གཡོ་བར་འགྱུར་བ་དང་། ས་གཞི་གཡོ་ཞིང་འབྲུག་གི་སྒྲ་ཆེམ་ཆེམ་སྒྲོགས་པ་དང་། རིག་པ་འཛིན་པ་རྣམས་ཀྱིས་མེ་ཏོག་གི་ཆར་འབེབས་སོ། །འདིའི་དྲུང་དུ་ཁྲོ་བོའི་རྒྱལ་པོ་ཆེན་པོ་རང་ཉིད་ལྷ་ཐམས་ཅད་དང་ཀླུ་ལ་སོགས་པས་བསྐོར་ནས་བྱོན་ནོ། །དེའི་དུས་སུ་དམྱལ་བའི་སྡུག་བསྔལ་རབ་ཏུ་ཞི་བར་འགྱུར་རོ། །དེ་ནས་ཡོན་ཆབ་ཕུལ་ཏེ་ཕྱག་བྱས་ནས་གནས་པར་བྱའོ། །དེ་ནས་ཁྲོ་བོའི་རྒྱལ་པོ་གསུང་བར་འགྱུར་ཏེ་བུ་གཅིག་མཆོག་སྦྱིན་པར་བྱའོ་ཞེས་པ་དང་། རིག་པ་འཛིན་པ་འམ། རྒྱལ་པོ་འམ། མི་སྣང་བ་འམ། གང་འདོད་པ་དེ་བླང་བར་བྱའོ། །གལ་ཏེ་རིག་འཛིན་དུ་འགྱུར་ན་བརྒྱད་གཉིས་ལོ་ལོན་པའི་ཆ་བྱད་ལག་ན་རལ་གྲི་ཐོགས་པ། ལྷའི་བཞོན་པ་ལ་བཅིབས་པ། རིག་པ་འཛིན་པ་མང་པོས་བསྐོར་བ། རིག་པ་འཛིན་པ་ཐམས་ཅད་ཀྱིས། བཀུར་སྟི་ཆེན་པོས་ཕྱག་བྱེད་པ་སངས་རྒྱས་ཀྱི་ཞིང་ཁམས་མང་པོས་བསྐོར་བ། སངས་རྒྱས་བཅོམ་ལྡན་འདས་རྣམས་ཀྱིས་མཆོད་པ་བྱེད་པར་འགྱུར་ཏེ། བསྐལ་

པར་འཚོ་བར་འགྱུར་རོ། །ཡང་ན་མིག་སྨན་གྲུབ་པར་འདོད་ན་ལིག་བུ་མིག་དང་། ཨུཏྤ་ལ་སྔོན་པོ་དང་། རུ་རྟ་རྣམས་གཅིག་ཏུ་བྱས་ནས་ཟངས་ཀྱི་སྣོད་དུ་བཅུག་སྟེ། ཟླ་བ་གཟས་ཟིན་པ་ན་ཇི་སྲིད་དུ་དུ་བ་བྱུང་བ་དེ་སྲིད་དུ་བཟླས་པ་བྱའོ། །དེ་མིག་ལ་བསྐུས་ན་འདོད་པའི་ཁམས་སུ་མི་སྣང་བར་འགྱུར་རོ། །དེ་ནས་རལ་གྲི་སྒྲུབ་པར་འདོད་ན། རལ་གྲི་ཆག་གས་མེད་པ་ཐོགས་ཏེ་མར་ངོའི་བརྒྱད་དམ་བཅུ་བཞི་ལ་རས་རིས་ལ་མཆོད་པ་རྒྱ་ཆེན་པོ་བྱས་ནས། བསྲུང་བའི་རལ་གྲི་ལག་པ་གཡས་སུ་ཐོགས་ལ་ཇི་སྲིད་དུ་འཕྲོ་བར་འགྱུར་བ་དེ་སྲིད་དུ་བཟླས་པ་བྱའོ། །འབར་བ་འམ། འཕྲོ་བ་ན་རང་གཅིག་པུ་རིག་པ་འཛིན་པར་འགྱུར་རོ། །འབར་བས་ནི་རིག་པ་འཛིན་པའི་རྒྱལ་པོར་འགྱུར་རོ། །ཐོགས་པ་མེད་པས་ཕ་རོལ་གྱི་སྟོབས་གནོན་པ་གང་གི་དྲུང་དུ་མཐོང་ན་མཐོང་བ་དེ་དང་བ་ཐོབ་པར་འགྱུར་རོ། །དེ་ནས་རྡོ་རྗེ་འཛིན་པ་སྒྲུབ་པར་འདོད་ན། ཁྲོ་ཆུའི་ལྕགས་ཀྱི་རྡོ་རྗེ་སོར་བཅུ་དྲུག་པ། ངོས་གཉིས་ཀ་རྩེ་གསུམ་པ་ཙནྡན་དམར་པོས་བྱུགས་ལ། ཆོ་འཕྲུལ་གྱི་ཟླ་བའི་ཚེས་གཅིག་ནས་བརྩམས་ཏེ། རས་རིས་ལ་མཆོད་པ་རྒྱ་ཆེན་པོ་བྱས་ལ་ཉི་མ་རེ་རེ་བཟླས་པ་བྱའོ། །དེ་ནག་ཉ་ལ་མཆོད་པ་རྒྱ་ཆེན་པོ་བྱས་ནས་མར་གྱི་མར་མེ་བརྒྱ་ཐམ་པ་སྤར་ཏེ།ཀུ་ཤའི་ཆུན་པོ་ལ་ཉེ་བར་འདུག་ལ། རྡོ་རྗེ་ལག་པ་གཉིས་ཀས་གཟུང་ནས་ཇི་སྲིད་འབར་བ་དེ་སྲིད་དུ་བཟླས་ནས། དེ་བཟུང་བས་འཁོར་དང་བཅས་པ་རིག་པ་འཛིན་པའི་འཁོར་ལོས་སྒྱུར་བ་ཐོབ་པར་འགྱུར་རོ། །དེ་ལྟར་འཁོར་ལོ་དང་མདུང་ལ་སོགས་པའི་མཚོན་ཆ་རྣམས་དང་། གོས་དང་། མཆིལ་ལྷམ་དང་། ཚངས་སྐུད་ལ་སོགས་པ་རྟོག་པ་གཞན་གྱི་ཆོ་ག་ཡང་བསྒྲུབ་པར་བྱའོ། ། སྔ་མ་བཞིན་དུ་དངོས་གྲུབ་གསུམ་འབྱུང་ངོ་། །དེ་ནས་ནོར་སྒྲུབ་པར་འདོད་ན། སེང་ལྡེང་གི་ཡམ་ཤིང་རྣམས་ཞོ་དང་མར་གྱིས་སྦགས་ནས་སྟོང་ཕྲག་བརྒྱད་སྲེག་བླུགས་བྱས་ན་ནོར་སྩོལ་བར་འགྱུར་རོ། །རྒྱ་མཚོར་འབབ་པའི་འགྲམ་དུ་སོང་ནས་ཙནྡན་གྱིས་

སྦགས་པའི་པདྨ་རྣམས་སྟོང་ཕྲག་བརྒྱད་ཅུ་ཆུ་བོ་ལ་བསྐུར་ན་པདྨའི་ཕུང་པོ་དང་མཉམ་པའི་ནོར་ཐོབ་པར་འགྱུར་རོ། །ལྷ་དབང་དུ་བྱ་བར་འདོད་ན། ཨ་ག་རུའི་ཡམ་ཤིང་རྣམས་ཞོ་དང་སྦྲང་རྩི་དང་མར་གྱིས་བཏགས་ནས་སྲེག་བླུགས་བྱས་ན་དབང་དུ་འགྱུར་རོ། ། གསུམ་པོ་དེས་བཏགས་པའི་འབྲས་བསྲེགས་ན་སྔགས་མི་ཟད་པར་འགྱུར་རོ། །གནོད་སྦྱིན་དབང་དུ་བྱ་བར་འདོད་ན། མངར་གསུམ་གྱིས་བཏགས་པའི་གུ་གུལ་གྱི་རིལ་བུས་སྲེག་བླུགས་བསྲེགས་པས་དབང་དུ་འགྱུར་རོ། །མྱ་ངན་མེད་ཀྱི་ཡམ་ཤིང་གིས་ནི་གནོད་སྦྱིན་མོ་དབང་དུ་འགྱུར་རོ། །རྒྱལ་པོ་ལ་ཡུངས་ཀར་གྱི་སྲེག་བླུགས་བྱས་ན་རྒྱལ་པོ་དབང་དུ་འགྱུར་རོ། །རྒྱ་མཚོར་འབབ་པའི་ཆུ་ཀླུང་གི་འགྲམ་དུ་སོང་ནས་པདྨ་འབུམ་ཕྲག་གཅིག་སྦྱིན་སྲེག་བྱས་ན་དཔལ་འདུས་ནས་ནོར་སྩོལ་བ་འམ། ཡུལ་ཕྱོགས་གཅིག་པའི་རྒྱལ་སྲིད་སྟེར་རོ། །དེ་ནས་འབུམ་ཕྲག་གསུམ་བྱས་ནས་བྱིན་ནས་སྟེངས་ཀུན་གྱི་བདག་པོར་འགྱུར་རོ། །འབུམ་ཕྲག་ལྔ་བྱིན་ན་འཛམ་བུ་གླིང་གི་བདག་པོར་འགྱུར་རོ། །ལྷ་མ་ཡིན་གྱི་བུ་གའི་སྒོར་རས་རིས་བཞག་ནས་འབུམ་ཕྲག་གསུམ་བཟླས་ན་སྔགས་ཐམས་ཅད་འབྱུང་སྟེ། དོགས་པ་མེད་པར་ཞུགས་ན་བཅུད་ཀྱིས་ལེན་ལ་སོགས་པ་འབྱུང་བར་འགྱུར་རོ། །དེ་ནས་དེ་ཉིད་དུ་གནས་ན་ཁྱབ་འཇུག་གི་འཁོར་ལོས་འཇིགས་པ་བྱ་བ་འབྱུང་ངོ་། །ཡར་ངོའི་ཚེས་གཅིག་ནས་བརྩམས་ཏེ་ཛཱ་ཏིའི་མེ་ཏོག་སྟོང་ཕྲག་བརྒྱད་དུ་བཅོམ་ལྡན་འདས་ཀྱི་མཐེ་བོར་རེག་པར་བྱའོ། །ཅི་སྲིད་དུ་ཞབས་ཀྱི་མཐེ་བོང་ལས་འོད་ཟེར་བྱུང་གི་བར་དུ་བཏགས་ན་སྒྲུབ་པ་པོའི་ལུས་དེ་མ་ཐག་ཏུ་མི་སྣང་ཞིང་དབུ་སྐྲ་ལྕང་ལོ་འཁྱིལ་པར་འགྱུར་རོ། །འཁོར་དང་བཅས་པ་རིག་པ་འཛིན་པའི་རྒྱལ་པོ་ཐོབ་པར་འགྱུར་ཏེ་བསྐལ་པར་གནས་སོ། །ས་ལ་པདྨ་འདབ་མ་བརྒྱད་པ་གཅིག་བྲིས་ཏེ་དེའི་སྟེང་དུ་འདུག་ནས་སྟོང་ཕྲག་བརྒྱ་བཟླས་ནས་གཞི་གར་གནས་པདྨར་གནས་ཏེ་འཁོར་སྟོང་དང་ལྡན་པ་བསྐལ་པར་གནས་སོ། །དེ་ནས་གཏེར་བླང་བར་འདོད་

ན་གང་ན་གཏེར་ཡོད་པ་དེ་རུ་བུམ་པ་སྐུད་པ་ནག་པོས་དཀྲིས་ལ་ཙནྡན་གྱིས་བྱུགས་ལ་ཆུས་བཀང་སྟེ་སྟོང་ཕྲག་བརྒྱད་དུ་མངོན་པར་བསྔགས་ནས་དེར་གཞག་པར་བྱའོ། །ས་དེ་གས་ནས་ཆུ་ཡིས་ས་ལ་གཏོར་ལ་ཁྲུ་གང་ཙམ་ས་ལ་བརྐོས་ཏེ་བླང་བར་བྱའོ། ། དེ་ནས་སེང་གེ་སྒྲུབ་ན་གྲོག་མཁར་གྱི་ས་ལ་སེང་གེ་བྱས་ལ་གིའུ་ཝང་གིས་བྱུགས་ལ་དཀྱིལ་འཁོར་དུ་གཞག་སྟེ། མཆོད་པ་ཆེན་པོ་བྱས་ལ་ཇི་སྲིད་དུ་གཡོ་བའི་བར་དུ་བཟླས་ན་སེང་གེར་འགྱུར་ཏེ་རྒྱབ་ཏུ་ཞོན་པས་སྐྲ་ལི་བ་འཁྱིལ་བར་འགྱུར་ཞིང་བདག་ཉིད་སྔ་ལྟས་ཐོབ་ནས་ལོ་ཁྲི་ཕྲག་གཅིག་ཏུ་འཚོའོ། །འཇམ་དཔལ་འཕགས་པ་མི་གཡོ་བའི་རྟོག་པ་གསུངས་པའི་ཆོ་ག་འདི་བསྒྲུབས་ན་དེ་ནི་མྱུར་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ། རྗེས་སུ་ཡི་རང་ནས་སྟན་ལས་ལངས་ནས་སོང་ངོ་། །འཕགས་པ་ཁྲོ་བོའི་རྒྱལ་པོ་ཆེན་པོ་མི་གཡོ་བ་དེ་བཞིན་གཤེགས་པ་ཐམས་ཅད་ཀྱི་སྟོབས་དཔག་ཏུ་མེད་པ་ཕ་རོལ་གནོན་པས་འདུལ་བར་གསུངས་པ་ཞེས་བྱ་བའི་རྟོག་པ་རྫོགས་སོ།། །།མེ་ཉག་རྒྱལ་པོའི་བཀའ་ལུང་གིས། རྒྱ་གར་གྱི་མཁན་པོ་ཨུ་ལ་ཤ་མ་རཀྵི་ཏའི་ཞལ་སྔ་ནས་ལོཙྪ་བ་གླན་དགེ་སློང་དར་མ་བློ་གྲོས་ཀྱིས་བསྒྱུར་ཅིང་ཞུས་ཏེ། དགེ་སློང་ཡོན་ཏན་རྡོ་རྗེས་གསོལ་བ་བཏབ་པའོ།། །།ཕྱིས་སུའང་ཆོས་ཀྱི་རྒྱལ་པོ་བཀྲ་ཤིས་རབ་བརྟན་དཔལ་བཟང་པོའི་བཀས་བསྐུལ་བ་བཞིན། ལོ་ཙཱ་བ་དགེ་སློང་ཆོས་སྐྱོང་བཟང་པོས་རྒྱའི་དཔེ་ལ་ལེགས་པར་གཏུགས་ཏེ་གཏན་ལ་ཕབ་པ་དང་། སླར་ཡང་མིའི་དབང་པོ་ཆེན་པོ་བཀྲ་ཤིས་རབ་བརྟན་སོག་པོ་འཕགས་ཀྱི་ཞལ་སྔ་ནས་ཀྱི་སྐུ་རིང་ལ། དགེ་སློང་ཨཱ་ནནྡ་མངྒ་ལཾ་གྱིས་དཔལ་འཁོར་བདེ་ཆེན་གྱི་གཙུག་ལག་ཁང་དུ། བི་ཀྲ་མ་ལ་ཤཱི་ལའི་གཙུག་ལག་གི་རྒྱ་དཔེ་ལ་གཏུགས་ནས། མི་འཆོས་སུ་མི་རུང་བ་རྣམས་ལེགས་པར་བཅོས་ཏེ་དག་པར་བགྱིས་པའོ།། །