བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་བཀའ་འབུམ།

ཕུར་པ་བདུད་འཇོམས་གནམ་ལྕགས་སྤུ་གྲིའི་གླེགས་བམ་བཞུགས་བྱང་ཟླ་ཤེལ་མེ་ལོང་།

༄༅། །ཨ ད རྴ ཙ ཎྜ ཀ ནྟ ཀཱི ལི པྲ དཱ རཿ ལོ ཧ ཀྵུ རཱ པུ སྟ ཀ ཤ ཀ ལི ན ནཱ མ བི ཛ ཧ རཾ ། །
༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་གླེགས་བམ་བཞུགས་བྱང་ཟླ་ཤེལ་མེ་ལོང་ཞེས་བྱ་བ་བཞུགས་སོ། །

སྡེབ་སྦྱོར་རྐང་བཞི་མཉམ་པའི་བྲིཏྟ་ལས། ཡི་གེ་དགུ་པ་བྲྀ་ཧ་ཏི་ལ་སྤྱིར་རྣམ་གྲངས་༥༡༢ཡོད་པ་ལས། འདིར་བཅོ་ལྔའི་མཚམས་ནས་ཟིན་པ་རྒྱལ་མཚན་གྱི་ཏོག་ཅེས་བྱ་བའི་པྲ་སྟ་རས་མཛེས་པར་བཅིངས་པ་དགེ།
༄༅། །མ ཎྜ ལ པ ར སྱ པྲ བྷྭ གྲ
༄༅། །དཀྱིལ་འཁོར་རྒྱ་མཚོའི་ཁྱབ་བདག་མཆོག །༄། །རབ་འབྱམས་རྒྱལ་ཀུན་འདུས་པའི་དངོས། །འཆི་མེད་པདྨ་སམྦྷ་ཝ། །
༄༅། །ཕྲིན་ལས་འདུས་པའི་ཧེ་རུ་ཀ། དཔལ་ཆེན་བཛ་ཀུ་མཱ་ར། །

༄༅། །ཧེ རུ ཀ མ ཧཱ ཤྲཱི ཀཱི ལཱ ཡ།
༄༅། །དཔལ་ཆེན་ཁྲག་འཐུང་ཀའི་ལ་ཡ། །
༄། །འཕགས་ཡུལ་པཎ་ཆེན་ཡོངས་ཀྱི་མཆོག །ཡེ་ཤེས་ལུས་ཅན་བི་མ་ལ། །༄། །ཐལ་འབྱིན་གྲུབ་པའི་རིག་འཛིན་གཙོ། །བལ་པོ་ཤའི་ལ་མཉཛུ་རྩལ། །

ཏ ཙྩ གུ ར བོ ན དྭཱ ཡ པ དྲ།
དེ་དང་གཉིས་མིན་བླ་མའི་ཞབས།
༄། །གསང་ཆེན་བཀའ་ཡི་གཉེར་འཛིན་མ། །ཌཱ་ཀིའི་གཙོ་མོ་མཚོ་རྒྱལ་ལྕམ། །༄། །ངོ་མཚར་གདམས་བའི་བཀའ་བབས་འཛིན། །གྲུབ་ཆེན་ཁྱེའུ་ཆུང་ལོ་ཙ་བ། །

༄༅། །ཙ ཀྲ སུ མ ཧཱ ལ དྐཱ རཱ ཏི ། །
༄༅། །བདེ་ཆེན་འཁོར་ལོའི་རྒྱན་དུ་བསྟི། །
༄། །གཏེར་འབྱིན་གྲུབ་པའི་འཁོར་ལོས་བསྒྱུར། །ཁྲག་འཐུང་གར་དབང་བདུད་འཇོམས་གླིང་། ༄། །ཟབ་ལམ་སྙིང་པོའི་ཤིང་རྟ་ཆེ། །འཇིགས་བྲལ་དཔའ་བོ་འགྲོ་འདུལ་གླིང་། །

མཚོ་སྐྱེས་གྲུབ་པའི་མེས་པོའི་སྒྱུ་རྩལ་གྱིས། །ཕྲིན་ལས་རོལ་པའི་ཆུ་གཏེར་བསྲུབས་པ་ལས། །གནམ་ལྕགས་སྤུ་གྲིའི་གདམས་སྲོལ་དབང་གི་རྒྱལ། །སྙིགས་མའི་རྒུད་པ་སེལ་བའི་བཙས་སུ་ཕྱུངས། །སྨོན་ལམ་ཟབ་མོས་མི་སྣང་རྒྱས་བཏབ་སྟེ། །མཁའ་འགྲོའི་གསང་མཛོད་དབྱིག་ཏུ་གཏམས་པ་ལས། དུས་བབས་འགྲོ་འདུལ་སྤྲུལ་པའི་ཟློས་གར་གྱིས། །སྐལ་བཟང་ཕན་བདེ་འཇོ་བའི་དཔྱིད་དུ་ཕྱེས། །ཉེས་པར་བཀྲལ་བའི་འདམ་གྱིས་སྦག་མིན་པར། །རྣམ་དཔྱོད་གསེར་གྱི་ཡུ་བ་ལ་བརྟེན་པའི། །ལེགས་བཤད་གོས་བཟང་འཕུར་ལྡིང་གཡོ་བ་ཅན། །ཁྲིགས་བསྡེབས་རྒྱལ་མཚན་རྩེ་མོར་ཁོ་བོས་བཀོད། །དེ་ལས་གྲུབ་གཉིས་རིན་ཆེན་འདོད་རྒུའི་ཆར། །འབེབས་པའི་ངོ་མཚར་རྣམ་གྲངས་འདི་ལྟ་ཞེས། །དབུ་འདྲེན་ཟླ་ཤེལ་དྭངས་པའི་མེ་ལོང་དུ། །དབུ་ཞབས་དོན་གྱི་གཟུགས་བརྙན་ཅིར་ཡང་འཆར། །དེ་ཡང་གཏེར་གསར་རྡོ་རྗེ་ཕུར་པའི་ཆོས་སྐོར་འདི་ཉིད་གཏེར་གཞུང་རྡོ་རྗེའི་ཚིག་རྐང་ཧ་ཅང་གབ་འཁྲུགས་ཆེ་ཞིང་མན་ངག་གི་གནད་རྣམས་བླ་མའི་ཞལ་ལས་ཤེས་དགོས་པ་ཁོ་ནར་སོང་བས། དེང་དུས་ཐོས་ཆུངགི་བླ་སློབ་ཕལ་མོ་ཆེ་ཞིག་བསྐྱེད་རྫོགས་ཀྱི་ཟབ་གནད་ལྟ་

ཅི། །ཐ་ན་ལས་སྦྱོར་ཕྲན་ཚེགས་རེའི་ཕྱག་ལེན་དང་བསྒོམ་བྱའང་གཏན་ལ་མ་ཕེབས་པའི་དབང་གིས་གང་དྲན་བྱུང་རྒྱལ་དུ་སྤྱད་པས་ཆད་ལྷག་གི་སྐྱོན་འབྱུང་བ་མང་བ་དང་། མཁས་གྲགས་ཆེན་པོ་རྣམས་ནི་བྱ་སླ་ཁྱེར་བདེ་རྔམས་ཆོས་ཁོ་ན་འདོམས་ཤིང་། རྨོངས་པ་བླུན་དད་ཅན་རྣམས་མ་དག་རྒྱུན་འབྱམས་ཀྱི་ལག་ལེན་ལ་ཕ་ཕོ་གཙང་ཞེན་དུ་གཡེང་བ་ལས་ཅི་བྱ་གཏོལ་བྲལ་དུ་སྣང་བའི་ཕྱིར། དེས་ན་ལམ་འདིའི་རིང་ལུགས་འཛིན་པ་རྣམས་ཀྱི་འཇུག་སྒོར་འདི་ལྟར་བགྱི་བའང་དོན་དང་ལྡན་པར་མཐོང་ནས། རང་ཉིད་རྩོམ་པ་པོའི་མཚན་ཉིད་གང་ཡང་མི་ལྡན་ཀྱང་སྔོན་དགེའི་བག་ཆགས་ཕྲ་མོས་ཟབ་ཆོས་འདི་དག་རང་ནོར་རང་དབང་དུ་སྤྱོད་པ་ལ་སྤོབས་པའི་བློ་མཐུ་མི་དམན་ཅིང་། གསང་བའི་གཉེར་འཛིན་ཌཱ་ཀི་སྲུང་མའི་ཚོགས་ཀྱིས་ལེགས་སོའི་དབུགས་དབྱུང་གིས་སྤྲོ་བའི་བློ་གཟེངས་བསྟོད་པར་གྱུར་པ་ལས། མཁས་ཤིང་གྲུབ་པ་བརྙེས་པའི་རྡོ་རྗེའི་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲངས་ཏེ་སྒྲུབ་ཐབས་བསྐྱེད་རྫོགས་ལས་ཁ་ཚར་དང་བཅས་པ་གཞན་ལ་ལྟོས་མ་དགོས་པའི་ཡིག་ཆ་ཕྱོགས་གཅིག་ཏུ་བསྡེབས་པར་བྱས་པ་གནམ་

ལྕགས་སྤུ་གྲིའི་ཆོས་སྐོར་གྱི་གླེགས་བམ་འདིར། ཐོག་མར་བཞུགས་བྱང་དཀར་ཆག་ལྡེབ་ ༥ལོ་རྒྱུས་ལྡེབ་ ༣༣བརྒྱུད་འདེབས་ལྡེབ་ ༡ལས་བྱང་ལྡེབ་༣༩ བསྐང་བ་གཏེར་གཞུང་ལྡེབ་༣ བསྐང་བ་བལ་ཡུལ་མ་ལྡེབ་༥ བསྐང་ཟློག་ཁ་སྐོང་ལྡེབ་༢ ཚོགས་བསྡུས་ལྡེབ་༡ ཚེ་སྒྲུབ་ལྡེབ་༥ རྒྱུན་ཁྱེར་ལྡེབ་༦ འདིར་ཉེར་མཁོ་སྨིན་ལུགས་དམ་ཅན་སྦྱི་གཏོར་ཁ་སྐོང་ཅན་ལྡེབ་༩ བླ་མ་ཡི་དམ་སྤྱིའི་གཏོར་འབུལ་ལྡེབ་༡བཅས་ཡོད། ཕུར་སྲུང་ལྡེབ་༣ སྒྲུབ་ཁོག་ལྡེབ་༢༦ ཛཔ྄་བསྐུལ་དང་སྔགས་བྱང་ལྡེབ་༣ བྱིན་འབེབས་གཏེར་གཞུང་ལྡེབ་༤ གཏོང་ཐུན་ལྡེབ་༦ སྨན་སྒྲུབ་ལྡེབ་༢༠ བདག་འཇུག་ལྡེབ་༨ སྦྱིན་སྲེག་ལྡེབ་༡༤ དྲག་སྲེག་ལྡེབ་༩ མཁྱེན་དགོངས་དམོད་བཅོལ་ལྡེབ་༦ སྨད་ལས་ལྡེབ་༥༢ དམོད་བྱང་ལྡེབ་༡ མནན་པ་ལྡེབ་༡༡ རྩ་དབང་ལྡེབ་༤༥ གཏོར་དབང་ལྡེབ༧ མན་ངག་ལས་ཚོགས་ལྡེབ་བཀའ་བསྒོ་ལྡེབ་༢བཅས་ཤོག་ལྡེབ་༢༦ སྟོད་ལས་བསྙེན་ཡིག་ལྡེབ་༥༤ སྨད་ལས་མན་ངག་ལྡེབ་༢༥ རྫོགས་རིམ་རྩ་རླུང་ལྡེབ་༢༥ དེའི་ལྷན་ཐབས་ལག་ཁྲིད་ལྡེབ་ ༣༣དེའི་སྦས་དོན་ཟབ་ཁྲིད་ལྡེབ་༢༢ ཁྲིད་རྐང་ས་བཅད་ལྡེབ་༡ ཡན་ལག་ཆོས་ལྔའི་

ཉམས་ཁྲིད་ལྡེབ་༡༢ རྫོགས་ཆེན་ལྡེབ་༣༧ སྨོན་ལམ་རྣམ་བཤདལྡེབ་༦ གཏོར་མའི་དཔེའུ་རིས་ལྡེབ་༥ སྲུང་ཟློག་ཙཀྲ་དང་ལིངྒའི་དཔེའུ་རིས་ལྡེབ་༢ སྒྲུབ་ཆེན་འདྲ་འབག་ལག་ལེན་ཟིན་བྲིས་ལྡེབ་༢༧ ཊ་ཀི་དང་ཀུན་ཐུབ་འཆམས་ཚིག་ལྡེབ་ཕུར་སྒྲུབ་སྨན་སྒྲུབ་འབྲེལ་བའི་ཡོ་བྱད་ཤོམ་ཟིན་ལྡེབ་༢ ཕུར་ཟློག་ཟིན་བྲིས་ལྡེབ་ ༣དེའི་གཏོར་མའི་ཟིན་བྲིས་ལྡེབ་༣ དབྱངས་ཡིག་ལྡེབ༢༥ བསྒྲལ་འཆམས་དང་ཟོར་འཆམས་བརྗེད་བྱང་ལྡེབ་སྤར་བྱང་སྨོན་ཚིག་ལྡེབ་༢བཅས་ལེགས་པར་བཞུགས་སོ། །ངོ་མཚར་ཕུར་གཞུང་མ་དྲོས་ཀླུང་ཆེན་ལས། །སྙིང་པོའི་ལམ་ཟབ་འཆི་མེད་བདུད་རྩིའི་རྒྱུན། །ཁྲིགས་བསྡེབས་བུམ་བཟང་བཅུད་དུ་བླངས་ཟིན་གྱི། །དོན་གཉེར་སྐལ་ལྡན་ཀུན་དགའི་ཉེར་འཚོར་མཛོད། །ལེགས་བྱས་ཁྱུང་སྔོན་བུ་ཡིས་ཉེར་དྲངས་པའི། །བསོད་ནམས་སྣང་བའི་མུ་ཁྱུད་ཅན་གྱི་ཟེར། །གདུལ་བྱའི་ཡིད་ཀྱི་ཆུ་སྐྱེས་ལ་ཕོག་པས། །རྣམ་གྲོལ་གེ་སར་དགོད་པའི་དཔལ་གྱུར་ཅིག །ཟབ་གཏེར་ཕྲིན་ལས་མི་བཟད་འཐོར་རླུང་ཆེས། །བདུད་སྡེའི་རུ་མཚོན་དུས་གཅིག་ཡོངས་

བཅིལ་ཏེ། །དགེ་མཚན་ཕྱོགས་ལས་རྣམ་རྒྱལ་ལྷའི་རྔ་སྒྲ། །ས་གསུམ་སྐྱེ་རྒུའི་རྣ་བར་རྟག་འབེབས་ཤོག །ཅེས་པའང་ཡིག་ཆ་ཡོངས་སུ་རྫོགས་པ་གྲུབ་པའི་རྗེས་ཐོག་ཟླ་བ་གསར་དུ་ཚེས་པའི་དུས་ཀྱི་རྒྱལ་ཕུར་འཛོམ་པའི་འགྲུབ་སྦྱོར་བཟང་པོ་ལ། རིག་པ་འཛིན་པའི་མིང་གིས་སྙན་པ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཤྲཱི་བི་ཛ་ཡུནཏུ།། །།

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ལོ་རྒྱུས་ཆོས་ཀྱི་བྱུང་ཚུལ་མདོ་ཙམ་སྤྲོས་པ་སྐལ་བཟང་རྣ་བའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ལོ་རྒྱུས་ཆོས་ཀྱི་བྱུང་ཚུལ་མདོ་ཙམ་སྤྲོས་པ་སྐལ་བཟང་རྣ་བའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ལོ་རྒྱུས་ཆོས་ཀྱི་བྱུང་ཚུལ་མདོ་ཙམ་སྤྲོས་པ་སྐལ་བཟང་རྣ་བའི་དགའ་སྟོན་ཅེས་བྱ་བ། །ཁྱབ་བདག་བླ་མ་བདུད་འདུལ་ཧེ་རུ་ཀའི་ངོ་བོར་བཞུགས་པའི་ཞབས་ལ་གུས་པས་ཕྱག་འཚལ་ལོ། །མི་བཟད་དྲག་ཤུལ་ནུས་པའི་གར་གྱིས་བདུད་སྡེའི་གཡུལ་ངོ་འཇོམས་པ་ལ། །མ་ལུས་རྒྱལ་ཀུན་ཕྲིན་ལས་སྟོབས་རྩལ་གཅིག་ཏུ་འཆང་བའི་དཔའ་བོ་ནི། །ཁྲག་འཐུང་རྡོ་རྗེ་སྲིན་པོ་ཞེས་གྲགས་དེ་ཡང་བླ་མའི་རྣམ་རོལ་ཏེ། །གྲུབ་གཉིས་འདོད་འཇོ་ནོར་བུའི་ཅོད་པན་བདག་གི་སྤྱི་བོའི་རྒྱན་དུ་ལེན། །རིག་འཛིན་བྱེ་བའི་ཐུགས་ཀྱི་བརྣག་པ་ཆེ། །རིག་མཆོག་

འབུམ་སྡེའི་བཅུད་ཐིག་ཀཱི་ལ་ཡ། །དཔལ་ཆེན་ཕྲིན་ལས་རོལ་པའི་བྱུང་ཚུལ་གཏམ། །དཔལ་ལྡན་སྐལ་བཟང་རྣ་བའི་དགའ་སྟོན་སྤྲོ། །དེའང་དུས་ཕུན་སུམ་ཚོགས་པ་ཀ་དག་མཉམ་ཉིད་ཆེན་པོ་འཕོ་འགྱུར་དང་བྲལ་བའི་དུས་ཀྱི་ཚེ། གནས་ཕུན་སུམ་ཚོགས་པ་འོག་མིན་ཆོས་ཀྱི་དབྱིངས་ཀྱི་ཞིང་ཁམས་སུ། སྟོན་པ་ཕུན་སུམ་ཚོགས་པ་དང་པོའི་སངས་རྒྱས་ཁྱབ་བདག་ཀུན་ཏུ་བཟང་པོས་སྐྱེ་མེད་མཐའ་བྲལ་ཆེན་པོའི་དགོངས་པ་ལས་མ་གཡོས་བཞིན་དུ་འགགས་མེད་ཀྱི་ཆོ་འཕྲུལ་བདག་ཉིད་རྩ་བའི་དཀྱིལ་འཁོར་རྡོ་རྗེ་གཞོན་ནུ་ཡབ་ཡུམ་གྱི་སྐུར་བཞེངས་ཏེ་ཐབས་ཤེས་གཉིས་སུ་མེད་པར་སྦྱོར་བ་ལས། འཁོར་

ཕུན་སུམ་ཚོགས་པ་ཕྱོགས་བཅུ་ཁྲོ་བོའི་དཀྱིལ་འཁོར་ཁྲ་ཐབས་དང་ཕུར་པ་རྫས་ཀྱི་དཀྱིལ་འཁོར་མངོན་པར་སྤྲུལ་ནས། ཆོས་ཕུན་སུམ་ཚོགས་པ་བྱི་ཏྟོ་ཏ་མ་ལ་འབུམ་སྡེ་ལ་སོགས་པ་ཕྲིན་ལས་ཕུར་པའི་རྒྱུད་མཐའ་དག་གསུངས་སོ། །རྒྱུད་དེ་དག་ཀྱང་སྟོན་པ་ཉིད་དང་། རྡོ་རྗེ་སེམས་དཔའ་དང་། ཕྱག་ན་རྡོ་རྗེ་དང་། མཁའ་འགྲོ་མ་དང་། བྲམ་ཟེ་མིའི་ཐོད་པ་ཅན་ལ་སོགས་པས་ཡང་དག་པར་བསྡུས་སོ། །དེ་ནས་མཁའ་འགྲོ་མ་དང་མིའི་ཡུལ་དུ་རིམ་གྱིས་དར་བ་ཡིན་ཏེ། སྟོན་པ་ཀུན་ཏུ་བཟང་པོས། རྒྱལ་བ་རིགས་ལྔ་དང་། རྡོ་རྗེ་གཞོན་ནུ་དང་། ལག་ན་རྡོ་རྗེ་སོགས་དང་། དེ་དག་གིས་རྒྱལ་བ་རིགས་བཞི། དེ་དག་ལས་སློབ་དཔོན་པདྨ་འབྱུང་གནས་ཀྱིས་གསན་ནོ། །ཡང་རྡོ་རྗེ་སེམས་དཔས་དགའ་རབ་རྡོ་རྗེ་ལ་བཤད། དེས་བཞད་པའི་རྡོ་རྗེ་ལ་བཤད། དེས་རྒྱལ་པོ་ཨུ་རུ་ཤ་ནེ་ལ་བཤད། དེས་ཀླུའི་བུ་མོ་རྒྱ་མཚོ་མ་ལ། དེས་རྒྱལ་པོ་ཨིནྡྲ་བྷུ་ཏི་ལ། །དེས་སློབ་དཔོན་དྷ་ན་སཾ་ཀྲྀ་ཏ་ལ། དེས་སློབ་དཔོན་པདྨ་དང་། བི་མ་ལ་མི་ཏྲ་དང་། བལ་པོ་ཤཱི་ལ་མཉྫུ་གསུམ་ལ་བཤད་དོ། །ཡང་རྡོ་རྗེ་སེམས་དཔས་རྒྱལ་པོ་ཛཿལ་གླེགས་བམ་གྱི་ཆར་ཕབ་པ་ལས་བརྒྱུད་པ་ཡང་ཡོད་དེ། ཇི་སྐད་དུ། ད་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་

གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །རྒྱལ་པོ་ཛཿཡི་ཁང་ཐོག་ཏུ། །ཐུགས་རྗེ་མཐུན་པའི་བྱིན་རླབས་ཀྱིས། །ལག་ན་རྡོ་རྗེས་སྟོན་པར་འགྱུར། །ཞེས་གསུངས་པ་ལྟར། རྒྱལ་པོ་ཛཿ ལྷ་ལྕམ་གོ་མ་དེ་ཝི། རྒྱལ་བུ་ཤ་ཀྲ་པུ་རི་ནས་རིམ་པར་བརྒྱུད་དེ་རྒྱ་བལ་བོད་གསུམ་དུ་དར་རོ། །ཡང་ཀུན་ཏུ་བཟང་པོས་རྡོ་རྗེ་གཞོན་ནུ་ལ། དེས་བྲམ་ཟེ་མིའི་ཐོད་པ་ཅན་དང་། མཁའ་འགྲོ་མ་ལས་ཀྱི་དབང་མོ་ཆེ་ལ། དེས་ཟ་ཧོར་གྱི་མཁན་པོ་པྲ་བྷ་ཧ་སྟི་དང་། སློབ་དཔོན་པདྨ་ལ་བརྒྱུད་དོ། །གཞན་ཡང་བརྒྱུད་པའི་རྣམ་གྲངས་མང་དུ་ཡོད་མོད་ཀྱང་འདིར་དེ་ཙམ་མོ། །དེ་ལྟར་བརྒྱུད་པའི་ཆུ་བོ་མ་ལུས་གཅིག་ཏུ་རྫོགས་ཤིང་ཁྱད་པར་གྱི་བཀའ་བབས་པ་ནི་དཔལ་ཆེན་ཧེ་རུ་ཀ་ཉིད་ཚེ་དབང་རིག་པ་འཛིན་པའི་སྐུར་སྣང་བ་ཨོ་རྒྱན་གྱི་སློབ་དཔོན་པདྨ་འབྱུང་གནས་ཏེ། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་རྒྱལ། །ཅེས་བརྗོད་བྱ་བཤད་ཐབས་ཕྱོགས་གཅིག་གིས་ཆོས་དང་གང་ཟག་གཉིས་ཀ་ལུང་བསྟན་པ་ལྟར་དེ་ཉིད་ཀྱི་ཆེ་བའི་

ཡོན་ཏན་ཅུང་ཟད་འཆད་པ་ལ་དྲུག་སྟེ། སྐྱེས་ཡུལ་གྱི་ཁྱད་པར་དང་། སྐྱེ་བརྒྱུད་རིགས་ཀྱི་ཁྱད་པར་དང་། སྐྱེ་གནས་རྟེན་གྱི་ཁྱད་པར་དང་། སྦྱངས་པ་ཡོན་ཏན་གྱི་ཁྱད་པར་དང་། བརྙེས་པ་དངོས་གྲུབ་ཀྱི་ཁྱད་པར་དང་། ཕྲིན་ལས་ནུས་མཐུའི་ཁྱད་པར་རོ། །དང་པོ་སྐྱེས་ཡུལ་གྱི་ཁྱད་པར་ནི། དཔལ་ཧེ་རུ་ཀའི་གནས་བཅུའི་དབུས། དུར་ཁྲོད་ཆེན་པོ་བརྒྱད་ཀྱི་གཙོ་བོ། རིག་པ་འཛིན་པའི་གསང་མཛོད། ཨོ་རྒྱན་གྱི་ཡུལ། དྷ་ན་ཀོ་ཤའི་གླིང་ཞེས་བྱ་བའོ། །གཉིས་པ་སྐྱེ་བརྒྱུད་རིགས་ཀྱི་ཁྱད་པར་ནི། རང་བཞིན་དང་སྤྱོད་པ་གཉིས་ཀས་མ་སྨད་པ་རྒྱལ་རིགས་ཨིན་དྲའི་བརྒྱུད་པ་ལས་སྟོབས་ཀྱི་འཁོར་ལོས་བསྒྱུར་བའི་རྒྱལ་པོ་བཀའ་ཁྲིམས་དང་ཆོས་ཁྲིམས་ཀྱིས་ལེགས་པར་བསྟོད་པའི་ཡབ་རྒྱལ་པོ་ཨིནདྲ་བྷུ་ཏི་ཞེས་བྱ་བའོ། །གསུམ་པ་སྐྱེ་གནས་རྟེན་གྱི་ཁྱད་པར་ནི། མངལ་གྱི་དྲི་མས་གོས་པ་མེད་པར་མེ་ཏོག་པདྨ་ལས་བརྫུས་ནས་སྐྱེས་པ་སྟེ། དེའང་མདངས་ལྡན་དྲི་མ་མེད་པའི་མཚོ་གླིང་དུ་སངས་རྒྱས་ཀྱི་བྱིན་རླབས་ལས་བྱུང་བའི་པདྨའི་སྡོང་པོ་ཁ་དོག་སྣ་ཚོགས་པའི་སྦུབས་སུ་བདེ་ལྡན་ཞིང་གི་མགོན་པོའི་ཐུགས་ཀ་ནས་གསེར་གྱི་རྡོ་རྗེ་ཧྲཱིཿས་མཚན་པ་ཞིག་སྤྲོས་པ་ལས། ཁྱེའུ་ཆུང་ལོ་བརྒྱད་པའི་ན་ཚོད་

མཚན་དང་དཔེ་བྱད་ཀྱིས་བརྒྱན་པ་རྡོ་རྗེ་དང་པདྨ་འཛིན་པ་ཞིག་ཏུ་སྤྲུལ་ཏེ་བཞུགས་ཤིང་། ལྷ་དང་མཚོ་གླིང་གི་མཁའ་འགྲོ་མ་རྣམས་ལ་ཟབ་མོའི་ཆོས་སྟོན་པར་མཛད། དེའི་ཚེ་ཡུལ་དེའི་རྒྱལ་པོ་ཨིནྡྲ་བྷུ་ཏི་ལ་སྲས་མེད་པས་དཀོན་མཆོག་མཆོད་ཅིང་དཀོར་མཛོད་སྦྱིན་པ་བཏང་བས་ཟད་དེ་རྒྱ་མཚོའི་གླིང་ནས་ཡིད་བཞིན་གྱི་ནོར་བུ་ལེན་པར་བྱོན་པའི་ལམ་ནས་ཆོས་བློན་ཀྲིཥྞ་འཛིན་གྱིས་ཐོག་མར་མཇལ། དེ་ནས་རྒྱལ་པོས་མཇལ་ཏེ་སྲས་ཀྱི་སྐལ་བར་བྱས་ཏེ་ཕོ་བྲང་དུ་སྤྱན་དྲངས། པདྨ་འབྱུང་གནས་དང་མཚོ་སྐྱེས་རྡོ་རྗེ་ཞེས་མཚན་གསོལ། ནོར་བུའི་མཐུ་ལས་བྱུང་བའི་རིན་པོ་ཆེའི་ཁྲི་སྟེང་དུ་བཞུགས་སུ་གསོལ། ཟས་གོས་རིན་པོ་ཆེའི་ཆར་གྱིས་སྐྱེ་བོ་ཐམས་ཅད་ཚིམས་པར་བྱས། གཞོན་ནུའི་རོལ་རྩེད་ཀྱི་གདུལ་བྱ་མཐའ་ཡས་པ་སྨིན་པར་མཛད། མཁའ་འགྲོ་འོད་འཆང་མ་ཁབ་ཏུ་བཞེས་ཏེ་ཨོ་རྒྱན་གྱི་རྒྱལ་སྲིད་ཆོས་བཞིན་དུ་བསྐྱངས་པས་རྒྱལ་པོ་ཐོར་ཅོག་ཅན་དུ་གྲགས་སོ། །དེའི་ཚེ་རྒྱལ་སྲིད་བཟུང་བས་གཞན་དོན་རླབས་ཆེན་མི་འགྲུབ་པར་དགོངས་ནས་ཡབ་ལ་ཞུས་ཀྱང་མ་གནང་བས། རྩེད་མོའི་གར་མཛད་པས་རྩེ་གསུམ་ཤོར་བའི་བརྫུ་བག་གིས་བདུད་བློན་གྱི་བུ་དབྱིངས་སུ་སྤར། དེ་ལ་བློན་པོ་རྣམས་ཀྱིས་བཀའ་

ཁྲིམས་དང་མཐུན་པའི་ཆད་པ་གཅོད་དགོས་གླེང་སྟེ། རབ་གསལ་ཤིང་གི་རྩེ་ལ་བསད་པར་རིགས་ནའང་རྒྱལ་བུ་ཡིན་པས་ཆད་པ་ཐ་ཆུང་སྤྱུགས་པར་བྱས་ནས། ཡབ་རྒྱལ་པོའི་སྙན་དུ་གསོལ་བས། རྒྱལ་བུ་ལ་ཐུགས་བརྩེ་ཡང་བཀའ་ཁྲིམས་གཉན་པའི་སྟོབས་ཀྱིས་རྒྱལ་བུའི་ལག་ནས་བཟུང་སྟེ། འདི་སྐད་དུ། རིན་ཆེན་མཚོ་གླིང་པདྨའི་སྡོང་པོ་ལས། །ཕ་དང་མ་མེད་རང་བྱུང་སྤྲུལ་པའི་སྐུ། །སྲས་ཀྱིས་ཕོངས་ནས་རྒྱལ་བུ་ཁྱོད་བཙལ་ནའང་། །བརྟུལ་ཞུགས་སྤྱོད་པས་བློན་པོའི་ཕྲུ་གུ་བཀུམ། །བློན་པོ་རྣམས་ཀྱིས་བཀའ་ཁྲིམས་དང་སྦྱར་ནས། །བསྡད་པའི་དབང་མེད་ཁྱོད་རང་གང་བདེར་བཞུད། །ཅེས་གསུངས་ཏེ་སྙིང་གཏུགས་ནས་བཤུམས་པ་ན། རྒྱལ་བུས་ཀྱང་། འཇིག་རྟེན་འདི་ན་ཕ་དང་མ་དཀོན་ཡང་། །ཡབ་དང་ཡུམ་གྱིས་རྒྱལ་སྲིད་ཉིད་ལ་བཀོད། །ཡུལ་ལ་ཞེན་མེད་སྤྱུགས་ཀྱང་འཇིགས་པ་མེད། །སྐྱེ་ཤི་གཉིས་མེད་བསད་ཀྱང་འཇིགས་པ་མེད། །རྒྱལ་ཁྲིམས་གཉན་པས་སྤྱུགས་པ་ཤིན་ཏུ་ལེགས། །ཡབ་ཡུམ་དག་ཀྱང་ཡུན་དུ་བདེ་བར་བཞུགས། །ལས་ཀྱི་འབྲེལ་བས་ཕྱིས་ནས་མཇལ་བར་ངེས། །ཞེས་ཞུས་ཏེ་ཡབ་ཀྱི་ཞབས་སྤྱི་བོར་བླངས་ཏེ་ཕྱག་འཚལ་བཞིན་དུ་ཕོ་བྲང་ནས་ཕྱིར་སོང་ངོ་། །དེ་ནས་དུར་ཁྲོད་ཆེན་པོ་

བསིལ་བའི་ཚལ་དང་། དགའ་བའི་ཚལ། སོ་ས་གླིང་རྣམས་སུ་བྱོན་ཏེ། རོ་ཟས་ཟོས་ཤིང་རོ་གོས་གྱོན། དུར་ཁྲོད་ཀྱི་རོ་རྣམས་ལ་ལོངས་སྤྱད། ཕོ་བྱུང་ཐམས་ཅད་བསད། མོ་བྱུང་ཐམས་ཅད་ལ་སྦྱོར་ཏེ་བརྟུལ་ཞུགས་ཀྱི་སྤྱོད་པ་མཛད་པ་ན་མཁའ་འགྲོ་བདུད་འདུལ་མ་དང་ཞི་བ་འཚོས་དབང་བསྐུར་བྱིན་གྱིས་བརླབས། དུར་ཁྲོད་ཀྱི་མཁའ་འགྲོ་རྣམས་དབང་དུ་བསྡུས་པའི་ཚེ་ཤཱནྟ་རཀྵི་ཏ་ཞེས་གྲགས། དྷ་ཀོ་ཤའི་མཚོ་གླིང་དུ་བྱོན་ཏེ་གསང་སྔགས་མཁའ་འགྲོའི་བརྡ་སྐད་ཀྱིས་བསྒྲུབས་པས་མཚོ་གླིང་གི་མཁའ་འགྲོ་དབང་དུ་བསྡུས། རྩུབ་འགྱུར་ཚལ་དུ་སྤྱོད་པ་མཛད་པས་རྡོ་རྗེ་ཕག་མོས་ཞལ་བསྟན་བྱིན་གྱིས་བརླབས། རྒྱ་མཚོའི་ཀླུ་དང་བར་སྣང་གི་གཟའ་སྐར་ཐམས་ཅད་དམ་ལ་བཏགས། གནས་གསུམ་གྱི་དཔའ་བོ་མཁའ་འགྲོ་མ་རྣམས་ཀྱིས་དངོས་གྲུབ་བསྩལ་ཏེ་མཚན་རྡོ་རྗེ་དྲག་པོ་རྩལ་དུ་གྲགས་སོ། །དེ་ནས་རྡོ་རྗེ་གདན་དུ་བྱོན་ནས་ཆོ་འཕྲུལ་སྣ་ཚོགས་བསྟན་པས། མི་རྣམས་ཀྱིས་ཁྱོད་སུ་ཡིན་དྲིས་པ་ལ། རང་བྱུང་གི་སངས་རྒྱས་ཡིན་པར་ཞལ་གྱིས་བཞེས་པ་ན་ཡིད་མ་ཆེས་ཏེ་སྐུར་པ་བཏབ་པ་ལས། དགོས་པའི་དབང་མང་དུ་གཟིགས་ནས་དམ་པའི་བཤེས་གཉེན་བསྟེན་པ་ལ་འདུན་པར་གྱུར་ཏོ། །བཞི་པ་

སྦྱངས་པ་ཡོན་ཏན་གྱི་ཁྱད་པར་ནི། དེའི་ཚེ་རྒྱ་གར་ཤར་ཕྱོགས་ཀྱི་རྒྱུད་དུ་བྱོན་ནས་བྲག་དམར་བྱ་ཁྱུང་ཚལ་ཅེས་བྱ་བ་ན་རྣལ་འབྱོར་གྱི་རྒྱུད་ལས་དངོས་གྲུབ་བརྙེས་པའི་སློབ་དཔོན་པྲ་བྷ་ཧ་སྟི་རྩལ་ཞེས་བྱ་བ་ལས་མངོན་པར་རབ་ཏུ་བྱུང་སྟེ་ཡོངས་སུ་རྫོགས་པའི་དགེ་སློང་དུ་གྱུར་པའི་མཚན་ཤཱཀྱ་སེང་གེ་ཞེས་བྱ་བར་གྲགས། དེར་མཆེད་པོ་ཤཱཀྱ་པྲ་བྷ་ཞེས་བྱ་བ་དང་ཤཱཀྱ་མི་ཏྲ་ཞེས་བྱ་བ་གཉིས་དང་ལྷན་ཅིག་ཏུ་རྣལ་འབྱོར་གྱི་རྒྱུད་ཀྱི་སྒོར་ཞུགས་ནས་དེ་ཁོ་ན་ཉིད་འདུས་པའི་རྒྱུད་ཚར་གཅིག་གསན་ཏེ་ཚིམ་མམ་ཞེས་གསུངས་པ་ན། གཉིས་པོས་ཚིམ་ཞེས་ཟེར་ནས་སོང་། ཤཱཀྱ་སེང་གེས་མ་ཚིམ་ཞེས་ཞུས་པས། སློབ་དཔོན་གྱི་ལག་མཐིལ་དུ་ཡོ་གའི་ལྷ་རྣམས་གསལ་བར་བསྟན་ནས། འདི་ལ་ཞུའམ། ང་ལ་ཞུ་གསུངས། དེར་སློབ་དཔོན་ལ་ཞུ་བྱས་པས། སློབ་དཔོན་ན་རེ། རིགས་དབང་རིག་པའི་སྲས་ཡིན་པས། །རྒྱལ་བའི་དཀྱིལ་འཁོར་ང་ལས་སྤྲུལ། །ང་ནི་ཐུགས་ཀྱི་དཀྱིལ་འཁོར་ཡིན། །ང་ལས་ཐམས་ཅད་འབྱུང་བས་ན། །ང་ཡིས་བསྟན་པ་བཞིན་དུ་ཉོན། །ཞེས་གསུངས་ནས་ཡོ་གའི་ཆོས་ཐམས་ཅད་རྫོགས་པར་བསླབ་པས་དེ་ཉིད་དུ་རྡོ་རྗེ་དབྱིངས་ཀྱི་ལྷ་སུམ་ཅུ་རྩ་བདུན་གྱི་ཞལ་གཟིགས་ཤིང་།

ལྷག་པའི་ལྷས་རྗེས་སུ་བཟུང་སྟེ་ཐུན་མོང་གི་དངོས་གྲུབ་ཀྱང་ཅི་རིགས་པ་ཐོབ་མོད་ཀྱི། ད་ནི་རྣལ་འབྱོར་ཆེན་པོ་ནང་གི་སྒོར་ཞུགས་དགོས་དགོངས་ཏེ་ཞུས་པས། ངས་ཁྱོད་ལ་དབང་བསྐུར་བའི་སྐལ་བ་དང་མི་ལྡན་པས། ནུབ་ཕྱོགས་ཨོ་རྒྱན་གྱི་ཡུལ་ན་སྨད་འཚོང་མ་ར་ནི་ལས་རབ་ཏུ་བྱུང་བ་དགེ་སློང་མ་ཀུན་དགའ་མོའམ་རྣལ་འབྱོར་མ་དྲི་མེད་མ་ཞེས་བྱ་བ་རྣལ་འབྱོར་ཆེན་པོ་ཕྱི་ནང་གསང་བའི་དབང་དང་གདམས་ངག་ལ་མཁས་པ་ཞིག་ཡོད་ཀྱི་དེར་ཞུས་ཤིག་གསུངས་པ་བཞིན། ཨོ་རྒྱན་གྱི་ཡུལ་དུ་སློབ་དཔོན་མ་ཀུན་དགའ་མོའི་སར་བྱོན་ཏེ། ཐོག་མར་གཡོག་མོ་ཆུ་ལེན་མ་ཞིག་དང་འཕྲད་པ་ལ་མཁན་མོའི་དྲུང་དུ་བདག་འདོངས་པའི་འཕྲོས་གྱིས་དང་གསུངས་པས། མོས་སློབ་དཔོན་མ་སངས་རྒྱས་དང་འདྲ་བ་ཞིག་ལ་མཁན་མོ་ཞེས་ངག་འཁྱལ་བ་འདི་འདྲ་སུ་ཡིན་ཀྱང་འཕྲིན་མི་བྱ་སྙམ་དུ་སེམས་ནས་འགྲོ་བར་བརྩམས་པ་ན། སློབ་དཔོན་གྱིས་མཁྱེན་ཏེ་ཏིང་ངེ་འཛིན་གྱིས་མོའི་བུམ་པ་བུམ་སྟེགས་དང་སྦྱར་བས་མོ་ལངས་མ་ཐུབ་པས། མོ་ན་རེ། ཁྱོད་ཀྱང་རྫུ་འཕྲུལ་ཅན་ཅིག་འདུག་སྟེ། ང་ལའང་འདི་ལྟ་བུ་ཡོད་ཟེར་ནས་མཆན་ཁུང་ནས་གསེར་གྱི་གྲི་གུག་ཞིག་ཕྱུངས་ཏེ་རང་གི་ཁོག་པ་

གཤགས་པའི་ནང་ནས་ཡོ་ག་རྡོ་རྗེ་དབྱིངས་ཀྱི་ལྷ་སུམ་ཅུ་རྩ་བདུན་རོམ་མེར་བཞུགས་པ་བསྟན། དེའི་ཚེ་སློབ་དཔོན་མ་ཀུན་དགའ་མོས་མཁྱེན་ཏེ་མདུན་བསུས་ནས་སློབ་དཔོན་ཡི་གེ་ཧཱུྃ་དུ་བསྒྱུར་ཏེ་ཞལ་དུ་མིད། འཁོར་ལོའི་གནས་རིམ་པར་བརྒྱུད་མཐར་པདྨོར་ཕྱུངས་པས་ནང་དང་གསང་བའི་དབང་ཡོངས་སུ་རྫོགས་པར་མཛད་དེ། སླར་བྲང་ཁང་དུ་ཁྲིད་ནས་གཞན་རྗེས་སུ་བཟུང་བའི་ཕྱིར་ཕྱིའི་དབང་ཡང་ཡོངས་སུ་རྫོགས་པ་བསྐུར་ཏེ་སྒྲིབ་པ་གསུམ་སྦྱངས་པའི་ཚུལ་མཛད། གཞན་ཡང་རིག་འཛིན་ཆེན་པོ་བརྒྱད་ལས་སྒྲུབ་པ་སྡེ་བརྒྱད། སངས་རྒྱས་གསང་བ་ལས་སྒྱུ་འཕྲུལ། ཤྲཱི་སེང་ཧ་ལས་མན་ངག་རྫོགས་པ་ཆེན་པོ་སོགས། འཕགས་ཡུལ་གྱི་མཁས་གྲུབ་དུ་མ་ལས་མདོ་རྒྱུད་རིག་པའི་གནས་ཐམས་ཅད་གསན་ཅིང་སྦྱངས་པའི་ཚུལ་བསྟན་པས་ཆོས་ཐམས་ཅད་ཚར་རེ་རེས་མཁས་པར་མཁྱེན། མ་བསྒྲུབ་པར་ཡང་ལྷ་རྣམས་ཞལ་གཟིགས། མཚན་བློ་ལྡན་མཆོག་སྲེད་དུ་གྲགས་ཏེ་རྣམ་པར་སྨིན་པའི་རིག་འཛིན་མཐར་ཕྱིན་པའི་ཚུལ་བསྟན་པའོ། །ལྔ་པ་བརྙེས་པ་དངོས་གྲུབ་ཀྱི་ཁྱད་པར་ནི། དེ་ནས་ཚེ་ལ་དབང་བའི་རིག་འཛིན་སྒྲུབ་པར་དགོངས་ནས། ཟ་ཧོར་གྱི་རྒྱལ་པོ་གཙུག་ལག་འཛིན་གྱི་

སྲས་མོ་མནྡྷ་ར་བ་ཞེས་པདྨ་ཅན་གྱི་མཚན་དང་ལྡན་པ་དེ་དབང་དུ་བསྡུས་ནས་སྒྲུབ་རྟེན་གྱི་ཕྱག་རྒྱ་མོར་ཁྲིད་དེ། བྲག་ཕུག་མཱ་ར་ཏི་ཀ་ཞེས་བྱ་བ་སྒོ་ཟླ་གམ་ལ་ངོ་མཚར་གྱི་རི་མོ་རང་བྱུང་ཞིང་ཕུག་རིན་པོ་ཆེ་ཡུལ་བརྒྱད་པ་ལྟར་མཛེས་པར་གྱུར་པ་དུས་གསུམ་དུ་མེ་ཏོག་གི་ཆར་འབབ་ཅིང་རིགས་གསུམ་མགོན་པོས་བྱིན་གྱིས་བརླབས་པའི་གནས་དེར། ཚེའི་སྒྲུབ་པ་ཟླ་བ་གསུམ་མཛད་པས་མགོན་པོ་ཚེ་དཔག་མེད་དངོས་སུ་བྱོན་ནས་དབང་བསྐུར་ཏེ་ཉིད་དང་གཉིས་སུ་མེད་པར་བྱིན་གྱིས་བརླབས། ཚེའི་རྒྱུད་སྟོང་ཕྲག་བརྒྱ་གནང་བས་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས། སྐྱེ་ཤི་མེད་པ་རྡོ་རྗེའི་སྐུར་གྲུབ་ནས་ཟ་ཧོར་གྱི་རྒྱལ་ཁམས་འདུལ་བའི་དོན་དུ་གཤེགས་པ་ལས། རྒྱལ་པོས་མཐའ་མི་ངན་པ་འདིས་ངའི་བུ་མོ་བསླད་ཅིང་ཆུན་གསན་པས་འདི་ཉིད་གསོན་བསྲེག་བྱེད་ཟེར་ནས། ཡུལ་མི་རྣམས་ལས་ཙན་དན་གྱི་ཤིང་དང་ཏིལ་མར་བསྡུས་ཏེ་ལུང་པའི་མདོར་ཤིང་ཁུར་ལྔ་བརྒྱའི་དབུས་སུ་བསྲེགས་པ་ལས། དུས་གཞན་གྱི་ཚེ་ཞག་གསུམ་ན་དུ་བ་ཆད་པ་ཡིན་པ་ལ། དུས་དེར་ཞག་དགུའི་བར་དུ་དུ་བ་མ་ཆད་པ་ལ་རྒྱལ་པོ་ཡ་མཚན་སྐྱེས་ཏེ་

གཟིགས་སུ་བྱོན་པ་ན། སློབ་དཔོན་མེའི་གནོད་པས་བསྙེལ་བ་མེད་པར་ཏིལ་མར་མཚོར་འཁྱིལ་བའི་དབུས་ན་པདྨའི་སྡོང་པོའི་ཟེའུ་འབྲུ་ལས་སྐུ་ལྟེ་བ་ཡན་ཆད་ཐོན་ཏེ་གྲང་གྲང་བསིལ་བསིལ་ལྟར་བཞུགས་པ་མཐོང་བས་ཤིན་ཏུ་ངོ་མཚར་བར་གྱུར་ནས་འདི་སྐད་ཅེས། ཨེ་མ་ཧོཿ སྐུ་ནི་མི་འགྱུར་ཀུན་ཏུ་བཟང་པོའི་སྐུ། །གསུང་ནི་མི་འགག་མཉམ་ཉིད་རིག་པའི་གསུང་། །ཐུགས་ནི་མི་གཡོ་སྨྲ་བསམ་བརྗོད་ལས་འདས། །སྐུ་གསུང་ཐུགས་ལྡན་པདྨ་རྒྱལ་ལ་བསྟོད། །ཅེས་བསྟོད་དེ། །དེར་ཐམས་ཅད་ཕྱིར་མི་ལྡོག་པའི་དད་པ་ལ་བཀོད་ནས་རྒྱལ་ཁམས་ཆོས་ལ་བཙུད། སླར་ཨོ་རྒྱན་གྱི་རྒྱལ་ཁམས་འདུལ་བའི་ཕྱིར་བསོད་སྙོམས་ལ་ཕེབས་པས་ཡུལ་མི་རྣམས་ཀྱིས་ངོ་ཤེས་ཏེ་སྔོན་གྱི་བདུད་བློན་ལ་སོགས་པ་རྣམས་ཀྱིས་ཙན་དན་གྱི་མེ་ལ་བསྲེགས་པས་མཚོ་དབུས་པདྨའི་སྡོང་པོར་ཡབ་ཡུམ་གཉིས་བཞུགས་ཏེ་སེམས་ཅན་རྣམས་འཁོར་བ་ལས་སྒྲོལ་བར་མཚོན་ཕྱིར་ཐོད་ཕྲེང་སྐུ་ལ་གསོལ་བའི་རྫུ་འཕྲུལ་བསྟན་པས་པདྨ་ཐོད་ཕྲེང་རྩལ་དུ་གྲགས། རྒྱལ་པོའི་བླ་མཆོད་ལོ་བཅུ་གསུམ་མཛད། རྒྱལ་ཁམས་ཐམས་ཅད་ཆོས་ལ་བཀོད། བཀའ་འདུས་ཆོས་ཀྱི་རྒྱ་མཚོའི་སྨིན་གྲོལ་བསྩལ་ཏེ་རྒྱལ་པོ་ཡབ་ཡུམ་སོགས་ལས་ཅན་རྣམས་མཆོག་

གི་རིག་འཛིན་གྲུབ། མཚན་པདྨ་རྒྱལ་པོར་གྲགས། སྤྱོད་ཡུལ་རྣམ་པར་འཕྲུལ་པའི་མདོ་ལས་ལུང་བསྟན་པ་བཞིན་རྒྱལ་པོ་མྱ་ངན་མེད་པ་འདུལ་བའི་སླད་དུ་དགེ་སློང་དབང་པོའི་སྡེ་ཞེས་བྱ་བར་སྤྲུལ་ཏེ་ཕྱིར་མི་ལྡོག་པའི་དད་པ་ལ་སྦྱར་ནས་འཛམ་བུའི་གླིང་དུ་ནུབ་གཅིག་ལ་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་བྱེ་བ་བཞེངས། མུ་སྟེགས་ཀྱི་རྒྱལ་པོ་བསྟན་པ་ལ་གནོད་པའི་སྟོབས་ལྡན་འགའ་ཞིག་གནས་སྤར་བ་དང་ཐབས་ཀྱིས་བཏུལ། རྒྱལ་པོ་གཅིག་གིས་དུག་དྲངས་པས་ཚུགས་པར་ཆུ་བོ་གངྒ་ལ་བསྐྱུར་བས་ཆུ་གྱེན་དུ་བསྐྱིལ་ཞིང་། ནམ་མཁའ་ལ་གར་མཛད་པས་ཁྱེའུ་ཆུང་མཁའ་ལྡིར་རྩལ་དུ་གྲགས། གཞན་ཡང་སྐུ་ལ་རྫོགས་པ་སོགས་དུར་ཁྲོད་ཆེན་པོ་རྣམས་སུ་བྱོན་ཏེ་མཁའ་འགྲོ་རྣམས་ལ་གསང་སྔགས་ཀྱི་ཆོས་བསྟན། ཕྱི་ནང་གི་དྲེགས་པ་ཅན་ཐམས་ཅད་ཀྱི་སྲོག་སྙིང་བླངས་ནས་བསྟན་སྲུང་དུ་བསྐོས་པ་སོགས་མཛད་པའི་ཚེ་མཚན་ཉི་མ་འོད་ཟེར་དུ་གྲགས། རྡོ་རྗེ་གདན་དུ་མུ་སྟེགས་ཀྱི་སྟོན་པ་ལྔ་བརྒྱས་བསྟན་པ་ལ་རྒོལ་བ་རྩོམ་པའི་ཚེ་རྩོད་པ་དང་ནུས་པ་འགྲན་པས་སློབ་དཔོན་ཉིད་རྒྱལ། ཁོང་རྣམས་ཀྱིས་ངན་སྔགས་སྒྲུབ་པའི་ཚེ་མཁའ་འགྲོ་བདུད་འདུལ་མས་

ཕུལ་བའི་དྲག་སྔགས་ཀྱིས་ཕྱིར་ཟློག་སྟེ་ཐོག་ཆེན་ཕབ་ནས་སྟོན་པ་རྣམས་བསྒྲལ། གྲོང་ཁྱེར་མེས་བསྲེགས། ལྷག་མ་སངས་རྒྱས་ཀྱི་བསྟན་པ་ལ་བཙུད་ནས་ཆོས་ཀྱི་རྒྱལ་མཚན་དགུང་དུ་བསྒྲེང་བའི་ཚེ་སེང་གེ་སྒྲ་སྒྲོག་ཏུ་གྲགས་ཏེ། འདི་ཡན་ཆད་ཟག་པ་གསུམ་ཟད་ལམ་མཆོག་ཡོངས་སུ་རྫོགས་པའི་ཚེ་དབང་རིག་འཛིན་གྱི་ཚུལ་དུ་བཞུགས་པ་ཡིན་ནོ། །དེ་ནས་སློབ་དཔོན་གྱི་དགོངས་པ་ལ། སྐྱེ་ཤི་འཁོར་བའི་ཆོས་དང་ནི་བྲལ། མི་བརྗེད་པའི་གཟུངས་ནི་ཐོབ། རྣམ་པར་སྨིན་པ་དང་། ཚེ་ལ་དབང་བའི་རིག་འཛིན་ནི་བརྙེས། ཕྱག་རྒྱ་ཆེན་པོའི་རིག་འཛིན་ཞིག་བསྒྲུབ་དགོས་དགོངས་ཏེ། རྒྱ་བལ་གྱི་མཚམས་སུ་བྱོན་ནས་བལ་པོའི་རྒྱལ་པོ་དགེ་འཛིན་གྱི་སྲས་མོ་བལ་མོ་ཤཱཀྱ་དེ་བ་ལ་སྒྲུབ་རྟེན་མཛད་དེ། ཡང་ལེ་ཤོད་ཀྱི་བྲག་ཕུག་ཅེས་དགུན་དུས་ཀྱང་མེ་ཏོག་རྣམ་པར་བཀྲ་ཞིང་བཀྲ་ཤིས་བྱིན་ཆགས་པའི་གནས་དེར་དཔལ་ཡང་དག་གི་སྒོ་ནས་མཆོག་སྒྲུབ་པར་མཛད་པ་ན། ཡུལ་དེའི་ནག་པོའི་ཕྱོགས་ལ་དགའ་བའི་ལྷ་འདྲེ་གདུག་པ་ཅན་གནོད་སྦྱིན་རྒོད་མ་ཁ་དང་། བྱི་ཁུང་གློག་མ་སྤྲིན། ཀླུ་རྒྱལ་འཁྱམས་པོ་སོགས་ཀྱིས་བར་ཆད་བརྩམས་ཏེ། གནམ་ལས་ཆར་མ་བབས་ཤིང་རྩི་ཤིང་ནགས་ཚལ་དང་ལོ་ཐོག་ཐམས་ཅད་སྐམ། ཆུ་

བོ་དང་ཆུ་བྲན་ཀུན་ཀྱང་རྒྱུན་ཆད། མི་ནད་དང་ཕྱུགས་ནད་སྤྲིན་ཚོགས་པ་ལྟར་བྱུང་བའི་ཚེ། སློབ་དཔོན་གྱི་དགོངས་པ་ལ་འདི་ཅིས་ཀྱང་མ་ལན་ཏེ་བདག་བྱང་ཆུབ་སྒྲུབ་པ་ལ་བར་དུ་གཅོད་པ་ཞིག་གོ་དགོངས་ནས། བལ་པོ་ཇི་ལ་ཇི་ཟ་དང་། བལ་མོ་ཀུན་ཞི་ཞེས་བྱ་བའི་སློབ་མ་གཉིས་ལ་གསེར་ཕྱེ་མང་དུ་བསྐུར་ནས། རྒྱ་གར་དབུས་འགྱུར་གྱི་རྒྱལ་པོ་དང་པཎྜི་ཏ་རྣམས་ཀྱི་སར་བཏང་སྟེ། ང་བྱང་ཆུབ་སྒྲུབ་པ་ལ་བགེགས་ཀྱི་བར་ཆད་བྱུང་བས་རྡོ་རྗེ་གདན་གྱི་འོག་ན་ཕུར་པ་བྱི་ཏྟོ་ཏ་མ་ལ་འབུམ་སྡེ་སྦས་ཡོད་པའི་ནང་ནས་དགྲ་བགེགས་བསྒྲལ་བའི་ལས་མཐའ་ཞིག་བརྫངས་པར་མཛོད་ཅེས་བསྲིངས་པས། ཕུར་པའི་རྒྱུད་ཀྱི་དཔེ་མི་ཁུར་ཐེག་ཚད་གཉིས་བརྫངས་སོ། །དེ་ཡང་ལེ་ཤོད་དུ་ཕེབས་པ་ཙམ་གྱིས་དམ་སྲི་གསུམ་པོ་རང་ཤུགས་ཀྱིས་ཐུལ། ཆར་བབས་ཤིང་རྩི་ཤིང་ནགས་ཚལ་ལོ་འབྲས་རྣམས་སྔ་མ་ལྟར་སོར་ཆུད། ནད་མུག་རྒྱུན་ཆད་དེ་ལོ་ཕྱུགས་རབ་ཏུ་འཕེལ་ཞིང་རྒྱས་པར་གྱུར། སློབ་དཔོན་ཡབ་ཡུམ་གཉིས་ཀྱིས་ཀྱང་ལྷ་དགུའི་ཞལ་གཟིགས་ཤིང་མཆོག་གི་དངོས་གྲུབ་བརྙེས་ཏེ་ཕྱག་རྒྱ་ཆེན་པོའི་རིག་འཛིན་གྱི་སྐུར་བཞུགས་སོ། །དེར་ཕུར་བུའི་ཆོས་འདི་བཀྲ་ཤིས་ཤིང་བྱིན་རླབས་མྱུར་བས་བྱང་ཆུབ་སྒྲུབ་པ་

ལ་མེད་དུ་མི་རུང་བར་གཟིགས་ནས་ཆོས་སྐོར་རྣམས་དཔག་བསམ་གྱི་ཤིང་ལ་དཔེ་བླངས་ནས་ཡོངས་སུ་གྲགས་པའི་རྒྱུད་སྡེ་སུམ་ཅུ་རྩ་གཉིས་སུ་ཕྱེས་ཏེ། རྩ་བ་ལྟ་བུའི་རྒྱུད་གསུམ། སྡོང་པོ་ལྟ་བུའི་རྒྱུད་བཅུ། ཡལ་ག་ལྟ་བུའི་རྒྱུད་བཅུ། ལོ་མ་ལྟ་བུའི་རྒྱུད་བཞི། སྙིང་པོ་འབྲས་བུ་ལྟ་བུའི་རྒྱུད་ལྔ་རྣམས་ལས། རྩ་བའི་རྒྱུད་གསུམ་ནི། བྱི་ཏྟོ་ཏ་མ་ལ་འབུམ་སྡེའི་རྒྱུད། ཀཱི་ལ་ཡ་བཅུ་གཉིས་ཀྱི་རྒྱུད། རྣལ་འབྱོར་བླ་ན་མེད་པ་གསང་ཆེན་དམ་པའི་རྒྱུད་དོ། །སྡོང་པོའི་རྒྱུད་བཅུ་ནི། གབ་པ་འཁོར་ལོ་ནག་པོ་སྟོང་སྡེའི་རྒྱུད། ཀཱི་ལ་ཡ་མེ་ལྕེ་ཕྲེང་བའི་རྒྱུད། དྲག་པོ་མདུང་རྩེའི་རྒྱུད། འཇིག་རྟེན་སྣང་བྱེད་ཀྱི་རྒྱུད། རྡོ་རྗེ་བཀོད་པའི་རྒྱུད། དཔྱང་ཐག་ཆད་པའི་རྒྱུད། དགོངས་རྒྱུད། གསང་རྒྱུད། དུར་ཁྲོད་ཁུ་བྱུག་རོལ་པའི་རྒྱུད། ཕུར་བུ་མྱ་ངན་ལས་འདས་པའི་རྒྱུད་དོ། །ཡལ་གའི་རྒྱུད་བཅུ་ནི། ཧཱུཾ་ཀཱ་ར་སེར་བ་འབེབས་པའི་རྒྱུད། སྟོབས་པོ་ཆེ་སེར་བ་བཟློག་པའི་རྒྱུད། རྣམ་པར་རྒྱལ་པ་དབང་བསྐུར་བའི་རྒྱུད། དབྱུག་པ་སྔོན་པོ་སྦྱིན་སྲེག་གི་རྒྱུད། གཤིན་རྗེ་གཤེད་པོ་ལྷོག་པ་རྒྱབ་བརྟེན་གྱི་རྒྱུད། མི་གཡོ་མགོན་པོ་འཕྱང་དྲུག་ལས་ལ་གཟུད་པའི་རྒྱུད། རྟ་མགྲིན་ཀླུ་འདུལ་བའི་རྒྱུད། འདོད་པའི་རྒྱལ་པོ་ལས་ལ་འགྱེད་པའི་རྒྱུད། བདུད་རྩི་

འཁྱིལ་བ་སྨན་སྒྲུབ་པའི་རྒྱུད། ཁམས་གསུམ་རྣམ་རྒྱལ་ལས་དྲུག་ལ་རྦད་པའི་རྒྱུད་དོ། །ལོ་མའི་རྒྱུད་བཞི་ནི། ཤྭ་ན་དཀར་ནག་ཐུན་གྱི་རྒྱུད། རེ་མ་ཏི་སྦས་པ་ནག་པོའི་རྒྱུད། བསེའི་ལྷ་མོ་ཡང་སྦས་གཏེར་གྱི་རྒྱུད། བསེའི་སྐྱེས་བུ་འགུགས་པ་རྒྱལ་པོའི་རྒྱུད་དོ། །འབྲས་བུའི་རྒྱུད་ལྔ་ནི། སྐུའི་རྒྱུད་དཔལ་ཡེ་ཤེས་འཁོར་ལོ། གསུང་གི་རྒྱུད་པདྨ་གསང་བ། ཐུགས་ཀྱི་རྒྱུད་རྡོ་རྗེ་འབར་བ། ཡོན་ཏན་གྱི་རྒྱུད་རིན་པོ་ཆེའི་གཙུག་ལག །ཕྲིན་ལས་ཀྱི་རྒྱུད་ཀརྨ་མཱ་ལེའོ། །དེ་རྣམས་ལས་མན་ངག་གི་དོན་རྒྱས་པར་སྟོན་པ་རྡོ་རྗེ་ཁྲོས་པ་སོགས་སྙིང་པོའི་རྒྱུད་བདུན་གྱི་ཡང་བཅུད་སྒོམ་ཁོག་རྡོ་རྗེ་ཁྲོས་པར་བསྡུས་ཤིང་བཀོལ། གཞན་ཡང་གསེར་འགྲེལ་ལ་སོགས་པའི་འགྲེལ་པ། སྙིང་གཟེར་སོགས་སྒྲུབ་ཐབས། རྡོ་རྗེ་རིགས་ཀྱི་པྲ་ཁྲིད་སོགས་དཀྱིལ་ཆོག །རྡོ་རྗེ་ལས་རིམ་སོགས་ཕྲིན་ལས། སྟོད་ལས་མངོན་པར་རྟོགས་པ། སྨད་ལས་དྲག་པོ་མངོན་སྤྱོད་ཀྱི་གཟེར་ཁ་མཐའ་ཡས་པ་མཛད། རྩ་བ་འཁྲུགས་བསྡེབས་ཀྱི་བསྟན་བཅོས་རྣམས་རྒྱ་གར་གྱི་པཎྜི་ཏ་རྣམས་ལ་གཟིགས་སུ་ཕུལ་བས། ཤིན་ཏུ་མཉེས་ཏེ་སྒྲ་ཚད་ཀྱིས་གཏན་ལ་ཕབས་པས་ལུང་རིག་དང་མི་འགལ་བར་ཉམས་སུ་བླང་བདེ་བས་ཀུན་གྱིས་

བསྔགས་ཤིང་རྒྱལ་མཚན་གྱི་རྩེ་མོར་བཏགས་ཏེ་མཆོད་པ་བྱས་སོ། །དྲུག་པ་ཕྲིན་ལས་ནུས་མཐུའི་ཁྱད་པར་ནི། སློབ་དཔོན་དེ་ཉིད་ཀྱིས་འཁོར་འདས་ཀྱི་ཆོས་ཐམས་ཅད་རིག་པ་བྱང་ཆུབ་ཀྱི་སེམས་སུ་རྟོགས་པའི་ཏིང་ངེ་འཛིན་གྱི་རྩལ་རྫོགས་པས་འཇིག་རྟེན་གྱི་ལྷ་མ་སྲིན་སྡེ་བརྒྱད་མ་ལུས་པ་ཐམས་ཅད་དབང་དུ་འདུས་ཤིང་བྲན་དུ་ཁོལ་བར་གྱུར་ཏེ། ཡང་ལེ་ཤོད་ཀྱི་བྲག་ཕུག་ཏུ་རྡོ་རྗེ་ཕུར་པའི་བསྙེན་པའི་དཀྱིལ་འཁོར་རྩིབས་བརྒྱད་པ་ཞིག་བཞེངས་ཏེ་ཐུགས་དམ་མཛད་པ་ན། སྲོད་ལ་ཤྭ་ན་མ་མཆེད་བཞི་བྱུང་ནས་སྲོག་སྙིང་ཕུལ་ཏེ་དམ་ལ་བཏགས་ཤིང་། ཤྭ་ན་མུ་ཁའི་དུས་ལ་བབ། །ཅེས་པའི་བསྐུལ་དང་། ཀ་ཏཾ་ཀ་ཡེ་ཞེས་པའི་སྲོག་སྙིང་ཡང་རྩ་བར་བཀོད། ནམ་གྱི་གུང་ལ་རེ་མ་ཏཱི་མཆེད་བཞི་བྱུང་སྟེ་སྲོག་སྙིང་ཕུལ་ནས་དམ་ལ་བཏགས་ཤིང་། བདག་ཉིད་ཆེན་མོའི་དུས་ལ་བབ། །ཅེས་པའི་བསྐུལ་དང་། ཛ་ཡ་བི་ཛ་ཡེ་ཞེས་པའི་སྲོག་སྙིང་ཡང་རྩ་བར་བཀོད། ཐོ་རངས་སྐྱེས་བུ་གིང་བཞི་བྱུང་ནས་སྲོག་སྙིང་ཕུལ་ཏེ་དམ་ལ་བཏགས་ཤིང་། ཁྱེད་ཀྱི་དམ་ཚིག་དུས་ལ་བབ། །ཅེས་པའི་བསྐུལ་དང་། མཱ་ར་སེ་ན་ཞེས་པའི་སྲོག་སྙིང་ཡང་རྩ་བར་བཀོད་པར་མཛད། དེ་ནས་ཆུ་མིག་

བྱང་ཆུབ་རིས་ཀྱི་འགྲམ་མེ་ཏོག་དགུན་ཡང་མི་སྐམ་པའི་ཚལ་དེར་བྱོན་ནས་སྲོད་ལ་དགོངས་པ་ཅུང་ཞིག་མཛད་པ་ན། སྐུ་ཉམས་སུ་ལྕི་ཐིབས་སེ་བ་དང་སྤྱན་སྔར་ཡང་རིབ་རིབ་པ་ཞིག་བྱུང་བ་ཕྱག་གིས་བཟུང་སྟེ་སྤར་བུར་བཅུག་ཅིང་རྡོ་རྗེ་ཕུར་པས་རྒྱས་བཏབ་ནས་བཞག །ནངས་པར་གཟིགས་པས། བུད་མེད་འཇིགས་སུ་རུང་བ་ནམ་མཁའི་མཐོངས་སུ་སླེབ་པ་བཞི་འདུག་སྟེ། སློབ་དཔོན་གྱིས་མཁྱེན་བཞིན་དུ་ཁྱེད་ཅག་སུ་ཡིན་གསུངས་པ་ན། བདག་ཅག་ནི་བསྭེ་མོ་མཆེད་བཞི་ཞེས་ཀྱང་བྱ། ནམ་ཟླ་དུས་བཞིའི་རྒྱལ་མོ་ཞེས་ཀྱང་བྱ། སྔོན་ཡང་འཇིག་རྟེན་ཁམས་ཀྱི་མི་ཕྱུགས་ཀྱི་སྲོག་ལ་དབང་བར་བྱས། ད་དུང་ཡང་དེ་ལྟར་དབང་བསྐུར་དུ་གསོལ། ཞེས་ཟེར་ཏེ་སོ་སོའི་སྲོག་སྙིང་ཕུལ་བས། སློབ་དཔོན་གྱིས་དེ་ལྟར་དབང་མ་བསྐུར་ཏེ་རྡོ་རྗེ་ཕུར་པ་བཤད་པ་དང་། ཉན་པ་དང་། སྒོམ་སྒྲུབ་བྱེད་པ་ལ་བར་དུ་གཅོད་པའི་སྲོག་ལ་དབང་གྱིས་ཤིག་པར་དམ་བསྩལ་ནས། དར་ནག་གི་ཅོད་པན་རེ་རེ་མགོ་ལ་བཏགས། ཞིང་གི་ཕུར་པ་རེ་རེ་ལག་ཏུ་བསྐུར། དབང་གི་བསྭེ་ཁྲབ་རེ་རེ་ལུས་ལ་བཀོན། བསྐྱོད་པའི་རྟ་ཕོ་རེ་རེ་འོག་ཏུ་སྐྱོན། རྟེན་གྱི་མཚོ་བཞི་གནས་སུ་བྱིན། ཤུ་ལེན་ཏ་རིལ་སོགས་པའི་གསང་མཚན་རེ་རེའང་སོ་སོར་བཏགས་

ཤིང་། ས་བདག་ཆེན་མོའི་དུས་ལ་བབ། །ཅེས་པའི་བསྐུལ་དང་། ཨ་ཛི་ཏི་ཨ་པ་ར་ཛི་ཏེ་ཞེས་པའི་སྲོག་སྙིང་ཡང་རྩ་བར་བཀོད་པར་མཛད་དོ། གཞན་ཡང་དུས་སྐབས་ཅི་རིགས་པར། ཨོ་རྒྱན་གྱི་གླིང་ཕྲན་ཧུརྨ་ཛུ་དང་། སི་ཀོ་དྷ་ར་དང་། དྷ་ན་ཀོ་ས་དང་། རུ་སྨ་སོགས་དང་། ཏི་ར་ཧུ་ཏི་སོགས་ཐ་རུའི་རྒྱལ་ཁམས་དང་། ཀཱ་མ་རུ་ལ་སོགས་པ་རྣམས་སུ་སྐལ་བ་དང་འཚམས་པར་ཆོས་སྟོན་པ་དང་། ཐུན་མོང་གི་དངོས་གྲུབ་ཀྱིས་སེམས་ཅན་མང་པོ་ལ་ཕན་བཏགས། ཆུ་མེད་པ་རྣམས་སུ་ཆུ་བཏོན། ཆུ་ཆེན་པོ་ས་འོག་ཏུ་བཅུག །རྒྱ་གར་ཤར་ལྷོ་དབུས་གསུམ་དུ་མུ་སྟེགས་པའི་ལྷ་རྟེན་རེ་རང་བྱུང་དུ་བྱུང་བ་རྣམས་ཀྱིས་ནང་པའི་བསྟན་པ་ལ་ཤིན་ཏུ་གནོད་པའི་ཚེ། དེ་གསུམ་ཀ་རྡོ་རྗེ་ཕུར་བུའི་ནུས་པས་ཚར་བཅད། ཀཉྩིའི་ཡུལ་དུ་ནང་པའི་སྡེ་ཤིན་ཏུ་དར་བ་ལ། དུ་རུ་ཥྐའི་རྒྱལ་པོས་དམག་དྲངས་ཏེ་ཆུ་ཀླུང་ནཱི་ལར་གྲུར་ཞུགས་པའི་ཚེ་སློབ་དཔོན་གྱིས་སྡིགས་མཛུབ་མཛད་པས་གྲུ་ལྔ་བརྒྱ་ཆུར་བྱིངས། ཕྱིན་ཆད་དུ་རུ་ཥྐའི་གནོད་པ་རྒྱུན་ཆད། འགྲོ་ལྡིང་བའི་ཡུལ་དུ་བྱོན་ཏེ་མཁའ་འགྲོ་མ་སོགས་མི་མ་ཡིན་དང་མི་རྣམས་བཏུལ་ནས་སངས་རྒྱས་ཀྱི་བསྟན་པ་བཙུད། གཞན་ཧོར་དང་རྒྱ་རྣམས་འདུལ་བ་ལ་རྒྱལ་པོ་མངོན་ཤེས་ཅན་དང་རྣལ་འབྱོར་པ་

སྟོབས་ལྡན་དུ་སྤྲུལ་པ་དང་། ཞང་ཞུང་ཡུལ་དུ་ཏ་བི་ཧྲི་ཙ་ཞེས་རང་བྱུང་གི་ཁྱེའུར་སྤྲུལ་ནས་རྫོགས་ཆེན་སྙན་བརྒྱུད་ཀྱི་གདམས་པས་སྐལ་ལྡན་མང་པོ་འོད་ལུས་སུ་བསྐྱེལ་བས་མཚོན་ཡུལ་རིགས་དང་སྐད་རིགས་མི་གཅིག་པ་རྣམས་སུ་གང་འདུལ་གྱི་ཕྲིན་ལས་སྣ་ཚོགས་པས་སྐྱེ་རྒུ་རྣམས་ཐར་ལམ་དུ་བཀོད་པའི་མཛད་ཕྲིན་ནི་ཚད་བཟུང་དུ་མེད་པའོ། །དེ་ནས་བོད་ཡུལ་འདིར་ཇི་ལྟར་བྱོན་པའི་ཚུལ་ནི། འཇམ་དབྱངས་ཀྱི་རྣམ་འཕྲུལ་ཆོས་རྒྱལ་ཁྲི་སྲོང་ལྡེའུ་བཙན་ཉིད་དགུང་ལོ་ཉི་ཤུ་བཞེས་པ་ན་དམ་ཆོས་རྒྱ་ཆེར་སྤེལ་བའི་ཐུགས་འདུན་སྐྱེས་ཏེ། རྒྱ་གར་ནས་མཁན་ཆེན་བོ་ངྷི་སཏྭ་སྤྱན་དྲངས། རྟེན་འབྲེལ་དང་དགེ་བ་བཅུའི་ཆོས་བཤད། ཐུགས་དམ་གྱི་གཙུག་ལག་ཁང་ཞིག་བཞེངས་པར་བཞེད་དེ་འཁོར་འབངས་རྣམས་བསགས་ནས་འདི་སྐད་ཅེས། ཁོ་བོ་ཡབ་མེས་ཀྱི་རྗེས་སུ་ཁྱད་པར་དུ་གྱུར་པའི་ཕྱག་བཞེས་ཆེན་པོ་ཞིག་ལ་འཇུག་པར་འོས་པས། ཁྱེད་རྣམས་ཀྱིས་ངས་ཇི་ལྟར་བསྒོས་པའི་བྱ་བ་ཡལ་བར་འདོར་དུ་མེད་པར་སྒྲུབ་དགོས་ཀྱི། ཡང་ན་གཙང་ཆབ་ཟངས་ཀྱི་སྦུབས་སུ་གཞུག་གམ། དགེ་རྒྱས་བྱེ་མ་གླིང་གསེར་ཕྱེས་འགེངས་སམ། ཧས་པོ་རིའི་རྩེ་ལ་ཤེལ་གྱི་མཆོད་རྟེན་ཞང་པོ་རྒྱ་ཡུལ་ནས་མཐོང་

བ་ཞིག་བཞེངས་སམ། ཐུགས་དམ་གྱི་གཙུག་ལག་ཁང་བྲེ་ཞབས་ཙམ་ཞིག་བཞེངས་པ་རྣམས་གང་ལ་དགའ་ཞེས་ཐབས་ཀྱིས་འདམས་ཀ་བསྐོར་ཏེ་བཀའ་བསྩལ་པ་ན། ཆོས་ལ་གནག་པའི་བདུད་བློན་ཏ་ར་ཀླུ་གོང་བྱ་བ་ན་རེ། ཀྱཻ་རྒྱལ་པོ་ཆེན་པོ། ཐུགས་ནོངས་སམ། འོན་ཏེ་གདོན་གྱིས་བརླམས་པའང་སྲིད་དེ། གཙང་ཆབ་ཟངས་ཀྱི་སྦུབས་སུ་འཇུག་པ་ལ་ཟངས་ཁལ་གཅིག་ཙམ་ཡང་དཀོན་པ་མིན་ནམ། ཧས་པོ་རི་རྩེར་ཤེལ་གྱི་མཆོད་རྟེན་བཞེངས་པ་བས་ཤེལ་ཕྲེང་བརྒྱ་རྩ་ཙམ་ཡང་རྙེད་པར་དཀའ་ལ། དགེ་རྒྱས་བྱེ་མ་གླིང་གསེར་ཕྱེས་འགེངས་པར་གསེར་ཞོ་གང་ཙམ་ཡང་ཤིན་ཏུ་དཀོན་ཏེ། རྒྱལ་པོའི་ཐུགས་དགོངས་སྒྲུབ་པར་མི་ནུས་སོ་ཟེར། དེར་ཆོས་ལ་དགའ་བའི་བློན་པོ་མཆིམས་རྡོ་རྗེ་སྤྲེལ་ཆུང་ལ་སོགས་པའི་མཆིས་ནས། ཕྱག་བཞེས་སྔ་མ་གསུམ་པོ་སྒྲུབ་པར་མི་ནུས་པ་བདེན་ཡང་རྒྱལ་པོས་སྨྲ་བ་ལན་གཅིག་ཡིན་པས་བཀའ་ཐམས་ཅད་བཅག་པར་མི་འོས་ན་ཐུགས་དམ་གྱི་གཙུག་ལག་ཁང་བྲེ་ཞབས་ཙམ་ཞིག་བཞེངས་པ་འཐད་དོ་ཞེས་གླེང་སྟེ། ཆོས་རྒྱལ་དགུང་ལོ་ཉེར་གཅིག་པ་ལ་བསམ་ཡས་གཙུག་ལག་ཁང་གི་རྨངས་བཏིང་ནས་བཞེངས་པ་ན། བོད་ཀྱི་ལྷ་འདྲེ་གདུག་པ་ཅན་རྣམས་ཀྱིས་བར་ཆད་བྱས་ཏེ་ཉིན་མོ་མིས་བརྩིགས་པ་ཐམས་ཅད་མཚན་མོ་ལྷ་འདྲེས་

བཤིག་ནས་བརྩིག་ཏུ་མ་སྟེར་བ་དང་། རྒྱལ་པོ་ཉིད་ཐུགས་ཤིན་ཏུ་མུག་པར་གྱུར་ཏེ། མཁན་ཆེན་བོ་དྷི་སཏྭའི་དྲུང་དུ་བྱོན་ནས། ཀྱཻ་ལགས། བདག་ཡོན་བདག་བསམ་པ་མ་དག་པ་ཡིན་ནམ། ཁྱེད་མཁན་པོའི་བྱིན་རླབས་ཆུང་བ་ཡིན་མ་འཚལ་ཏེ། ངའི་ཐུགས་དམ་གྱི་གཙུག་ལག་ཁང་འདི་མི་འགྲུབ་པ་འདྲའོ། ཞེས་ཞུས་པས། མཁན་པོའི་ཞལ་ནས། དེ་ནི་ཁྱེད་ཡོན་བདག་བསམ་པ་མ་དག་པ་མིན་གྱི། ང་མཆོད་གནས་བྱིན་རླབས་ཆུང་བས་ལན་པ་ཡིན། ཁོ་བོ་ཕྱི་ནང་གི་སྡེ་སྣོད་ལ་མ་རྨོངས་ཀྱང་ལྷ་སྲིན་དམ་ལ་མ་ཐོགས་པས་ཉེས་སོ། །འོན་ཀྱང་རྒྱལ་པོའི་ཐུགས་དགོངས་སྒྲུབ་པའི་ཐབས་ཡོད་དེ། དེ་ནི་རྒྱ་དང་བལ་ཡུལ་གྱི་མཚམས་ན་ཨོ་རྒྱན་གྱི་སློབ་དཔོན་པདྨ་འབྱུང་གནས་ཞེས་བྱ་བ་ཚེ་ལ་དབང་བའི་རིག་འཛིན་ལ་གནས་ཤིང་རིག་པ་རྩལ་གྱི་དབང་བརྙེས་པ། ལྷ་མ་སྲིན་བྲན་བཞིན་དུ་ཁོལ་བ་ཞིག་ཡོད་པས། དེ་སྤྱན་དྲོངས་ན་དོན་ཐམས་ཅད་འགྲུབ་ནས་འོང་གསུངས། དེ་ནི་བདག་ལྟ་བུས་གནས་འདྲོངས་ནུས་པ་དཀའ་བར་མཆིས་སམ་ཞུས་པས། མཁན་པོའི་ཞལ་ནས། འོ་ཅག་རྣམས་སྨོན་ལམ་གྱི་འབྲེལ་པ་ཡོད་པས་གདན་འདྲོངས་པར་ངེས་ཏེ། འབྲེལ་པ་ཇི་ལྟར་ཡོད་ན། ཐུགས་རྗེའི་བདག་ཉིད་འཕགས་པ་སྤྱན་

རས་གཟིགས་ཀྱིས་སངས་རྒྱས་འོད་དཔག་མེད་ཀྱི་ཞབས་དྲུང་དུ་ཁམས་གསུམ་འཁོར་བ་མ་སྟོངས་ཀྱི་བར་དུ་བདག་འཚང་མ་རྒྱ་བར་དམ་བཅས་ཏེ། འགྲོ་བ་དཔག་ཏུ་མེད་པ་མྱ་ངན་ལས་འདས་པའི་སར་བསྒྲལ་ནས། ད་ནི་འཁོར་བའི་སེམས་ཅན་གཅིག་ཀྱང་ལུས་པ་མེད་དམ་སྙམ་ནས་གཟིགས་པ་ན། ཅུང་ཟད་བྲི་བའང་མངོན་པར་མི་འདུག་པས་ཐུགས་མུག་ནས་བཤུམས་པའི་སྤྱན་ཆབ་ཐིགས་པ་གཉིས་བར་སྣང་ལ་གཏོར་སྟེ། འདི་གཉིས་ལ་བརྟེན་ནས་ཀྱང་སེམས་ཅན་དཔག་ཏུ་མེད་པའི་དོན་བྱེད་པར་གྱུར་ཅིག །ཅེས་སྨོན་ལམ་བཏབ་པའི་མཐུས། མཆིལ་མའི་ཐིགས་པ་དེ་གཉིས་སུམ་ཅུ་རྩ་གསུམ་གྱི་ལྷ་གནས་སུ་བརྒྱ་བྱིན་གྱི་བུ་མོ་གང་ག་དང་གང་ཆུང་མར་གྱུར་ཏེ། ནུ་མོས་ཕུ་མོའི་ལྡུམ་ར་ནས་མེ་ཏོག་ཞིག་བརྐུས་པས་ལྷའི་འདུལ་ཁྲིམས་ཉམས་པས་ཚེ་འཕོས་ཏེ་མི་ཡུལ་དུ་བྱ་རྫི་མོའི་བུ་མོ་བདེ་མཆོག་གསལ་བྱ་བར་སྐྱེས། མོས་བྱ་འཚོས་པའི་གླ་དང་རྒྱགས་ལྷག་བསགས་ཏེ་མཆོད་རྟེན་བྱར་རུང་ཁ་ཤོར་བྱ་བ་ཞིག་བརྩིགས་པ་ལས། བྲེ་དང་སྲོག་ཤིང་མ་འབྱོངས་པར་མོ་ཚེའི་དུས་བྱས་ཏེ་དམ་ཚིག་ལྷ་མོ་པྲ་མོ་ཧཱ་བྱ་བར་སངས་རྒྱས་སོ། དེ་ལ་མི་ཡུལ་དུ་རིགས་ངན་བཞི་དང་བཤོས་པའི་བུ་བཞི་ཡོད་དེ། རྟ་རྫི། ཕག་རྫི། ཁྱི་རྫི། བྱ་རྫིའོ། །

དེ་ལྟར་བུ་བཞིས་མ་ཡི་དགེ་བའི་ལས་འཕྲོ་བླངས་ཏེ་མཆོད་རྟེན་གྱི་བྲེ་དང་སྲོག་ཤིང་བཙུགས་ནས་འཕྲོ་རྫོགས་པར་འབྱོངས། རབ་གནས་བྱས་ཏེ་བུ་སོ་སོས་སྨོན་ལམ་བཏབ་པ་ནི། ནང་གི་ཆེ་ཤོས་ན་རེ། དགེ་བ་འདི་ཡིས་བདག་སྐྱེ་བ་ཕྱི་མ་ལ་ཆོས་སྐྱོང་བའི་རྒྱལ་པོ་ཞིག་ཏུ་གྱུར་ཅིག །ཅེས་དང་། དེའི་འོག་མས། མཁན་པོ་བྱང་ཆུབ་སེམས་དཔའ་ཞིག་ཏུ་གྱུར་ཅིག །ཅེས་དང་། དེའི་འོག་མས། བསྟན་པ་སྲུང་བའི་སྔགས་འཆང་མཐུ་སྟོབས་ཅན་དུ་གྱུར་ཅིག །ཅེས་དང་། ཐ་ཆུང་གིས། སངས་རྒྱས་ཀྱི་བསྟན་པ་འཛིན་སྐྱོང་སྲུང་བར་མཛད་པའི་ཕུ་བོ་གསུམ་གྱི་ཕྲིན་ལས་པར་གྱུར་ཅིག ཅེས་སྨོན་ལམ་བཏབ་བོ། །དེའི་དུས་ཀྱི་ཆེ་བ་རྒྱལ་པོ་ཉིད་ཡིན། དེའི་འོག་མ་བདག་ཡིན། དེའི་འོག་མ་སློབ་དཔོན་པདྨ་ཡིན། དེའི་འོག་མ་ཆོས་བློན་སྦ་མི་ཁྲི་གཞེར་ཡིན་ཏེ། དེ་ཕོ་ཉར་རྫོང་བར་གྱིས་ཤིག །ཅེས་གསུངས་སོ། །དེ་སྐད་གསུངས་པ་བཞིན་གཡོག་དང་བཅས་པ་ལ་བྱ་དགའ་ཆེར་བསྩལ་ཏེ་གསེར་གྱི་པ་ཏྲ་དང་གསེར་ཕྱེ་མང་དུ་བསྐུར་ནས་སྤྱན་འདྲེན་དུ་བརྫངས་པ་ན། སློབ་དཔོན་གྱིས་མཁྱེན་ཏེ་ཕོ་ཉ་བ་ལ་ཐུགས་བརྩེ་བར་དགོངས་པས་རྒྱ་གར་གྱི་ཡུལ་ནས་རྫུ་འཕྲུལ་གྱིས་མང་ཡུལ་

རྫའི་རབ་གཡའི་རི་གོང་གི་བྲག་ཕུག་ཏུ་བྱོན་ནས་བཞུགས་པ་དང་ལམ་ཁར་མཇལ་ཏེ། མཁྱེན་བཞིན་དུ་གར་འགྲོ་གསུངས་པས། དེ་རྣམས་ཀྱིས་ངེད་བོད་ཀྱི་རྒྱལ་པོས་སློབ་དཔོན་ཆེན་པོ་པདྨ་གདན་འདྲེན་དུ་བཏང་བས་རྒྱ་གར་དུ་འགྲོ་ཞེས་ཞུས་པ་དང་། སློབ་དཔོན་ཞབས་ས་ལ་མ་རེག་བར་ས་ལ་བཞུགས་ཏེ། དེ་ནི་ང་ཡིན་ཏེ་ཁྱེད་རྣམས་རེ་འཕྱི་ང་ཟླ་བ་གསུམ་དུ་འདིར་བསྡད་པ་ཡིན་གསུངས་པས། ཐམས་ཅད་དད་པ་སྐྱེས་ཏེ་ཐུགས་རྗེ་རེ་ཆེ་ཟེར་ནས་ཕྱག་བཙལ་བསྐོར་བ་བྱས་ཤིང་གསེར་གྱི་པ་ཏྲ་དང་གསེར་ཕྱེ་རྣམས་ཕུལ་བས། ད་རུང་ཕུལ་ཅིག་གསུངས་པའི་ཚེ། རང་རང་གི་གོས་ལྷམ་ཡང་ཕུལ། ད་རུང་ཕུལ་ཅིག་གསུངས་པས། རང་རང་བརྐྱང་ཕྱག་བཙལ་ཏེ་ལུས་ཕུལ་བས། ཤིན་ཏུ་མཉེས་ཏེ་གསུངས་པ། བོད་ཀྱི་དད་པ་ལ་གཡོ་ཟོལ་ཨེ་འདུག་བལྟས་པ་ཡིན་གྱི། གསེར་གྱིས་ཅི་བྱེད། འདོད་ན་སྣང་སྲིད་ཐམས་ཅད་གསེར་དུ་ཡོད་གསུངས་ནས། ཕུལ་བའི་གསེར་རྣམས་གཏོར་བས། བང་ཆེན་པ་རྣམས་སེམས་ཕངས་ཅུང་ཟད་སྐྱེས་པ་ལ། ཐུ་བར་བྱེ་མ་བླུགས་ཏེ་དར་གཅིག་ན་གསེར་དུ་སོང་བས་ངོ་མཚར་སྐྱེས་སོ། །དེར་སྔོན་གྱི་སྨོན་ལམ་གྱི་འབྲེལ་བ་ཡོད་པས་ང་བོད་དུ་འདོང་ངོ་གསུངས་ནས་གནང་།

རིམ་བཞིན་བྱོན་པ་ན། བོད་ཀྱི་ལྷ་འདྲེ་རྣམས་ལས་ཆོས་ལ་དཀར་བ་དགྲ་ལྷའི་རྒྱལ་པོ་པཱུ་ཙ་མེ་གྷ་ཞེས་ཀྱང་བྱ། འོ་ཡུག་གཙང་བཙན་ཞེས་ཀྱང་བྱ། དགེ་བསྙེན་རྡོ་རྗེ་ལེགས་པ་ཞེས་ཀྱང་བྱ་བ་མཆེད་སུམ་བརྒྱ་དྲུག་ཅུ་དང་བཅས་པས་མདུན་བསུས་ཏེ་ཕྱག་བྱས་ཤིང་དམ་ལ་བཏགས། དེ་ནས་དཔལ་ཐང་ལ་བྱོན་པ་ན་བོད་ཀྱི་ལྷ་འདྲེ་མོ་རིགས་རྣམས་ལས་མཐུ་རྩལ་ཆེ་བ། བདུད་མོ་བཞི། གནོད་སྦྱིན་བཞི། སྨན་མོ་བཞི་སྟེ། བརྟན་མ་བཅུ་གཉིས་ཀྱིས་བར་ཆད་བྱས་ནས་གནམ་ལྕགས་ཀྱི་ཐོག་བཅུ་གཉིས་དུས་གཅིག་ལ་ཕབ་པ་ན། སློབ་དཔོན་གྱིས་སྡིགས་མཛུབ་ཀྱི་རྩེ་ལ་བླངས་ཏེ་ཀླད་ལ་བསྐོར་བས་སོལ་དུམ་བཅུ་གཉིས་སུ་ནག་ཧྲུལ་གྱིས་སོང་བས། གཞན་བཅུ་གཅིག་སྐྲ་སྟེ་སྲོག་སྙིང་ཕུལ་ནས་དམ་ལ་བཏགས། མཐུ་ཆེ་ཤོས་གཅིག་དེར་མ་ཐུལ་བར་བྲོས། སློབ་དཔོན་འུ་ཡུག་བཞི་སྒྲོམ་གྱི་རོང་ལ་བྱོན་པ་ན། མོས་རི་གཡས་གཡོན་གཉིས་ལག་པས་བླངས་ཏེ་ཕན་ཚུན་འཕང་བའི་བར་དུ་བཅད་པར་བརྩམས་པ་ན། སློབ་དཔོན་ཉིད་སྟེང་དུ་ཡེར་གྱིས་བྱོན་པས་མོ་བྲེད་དེ་བྱང་གི་གནམ་མཚོ་ལ་བྲོས་པས་སློབ་དཔོན་གྱིས་ཕྱག་མཚན་རྡོ་རྗེ་མཚོ་ནང་དུ་འཕངས་པས་མོའི་མིག་ཡ་གཅིག་བཅད། མཚོ་ཁོལ་ཏེ་ཚ་

བའི་རྦལ་གྱིས་ཤ་རུས་དཀར་ཟང་གིས་ཕྱེ་ནས་བྱུང་བས་སྐྲག་སྟེ། སྟོན་པའི་ཞལ་སྐྱིན་རྡོ་རྗེ་ཐོད་ཕྲེང་བསྩལ། །བར་ཆད་མི་བགྱི་དགོངས་པ་ཡུད་ཙམ་གློད། །ཅེས་ཟེར་ཞིང་ཞབས་སྤྱི་བོར་བླངས་ཏེ་སྲོག་སྙིང་ཕུལ་ནས་དམ་ལ་བཏགས། དེ་ནས་བྱང་ལམ་གྲིམས་ནས་བྱོན་པ་ན། བྱང་སྣ་བརྒྱད་ཀྱི་ཇག་ནས་ཆིབས་མུག་རོ་འགྲམ་ནག་ཁྱེར་བ་ལ། གཟའི་གདོང་མོ་བཞི་བྲན་དུ་བཀོལ་ཏེ་སེར་བ་རྟ་མགོ་ཙམ་ཕབ། དེ་ནས་འདམ་སྙིང་གྲོང་ངོས་ལ་བྱོན་ཏེ། ཐང་ལྷའི་གངས་འདབས་སུ་དར་དཀར་གྱི་སྦྲ་ཞིག་ཕུབ་སྟེ་ཞག་འགར་བསྙེལ་གསོ་བར་བཞེད་པའི་ནུབ་མོ་གཉན་ཆེན་ཐང་ལྷས་བར་ཆད་བྱས་ཏེ། མཚན་རིང་གནམ་ལྕགས་ཀྱི་ཐོག་ཕབ་པ་ན། སློབ་དཔོན་གྱིས་སྦྲ་དཀར་རྡོ་རྗེའི་གུར་དུ་མཛད་པས་ཐོག་ཐམས་ཅད་འདྲེད་དེ་ཉེ་ལམ་ན་མཚོ་ཆུང་ཞིག་ཡོད་པའི་ནང་དུ་རིབས་རིབས་སོང་། ནངས་པར་གཟིགས་པས། ཐོག་གི་རྦལ་གྱིས་མཚོ་ནང་ཡོད་པའི་སྲོག་ཆགས་ཐམས་ཅད་ཤི་ནས་མཚོ་དམར་ཉོག་ལ་སོང་འདུག་པའི་དོན་དུ་ངན་སོང་སྦྱོང་བའི་ཆོ་ག་མཛད་དེ་སེམས་ཅན་ཤི་བ་རྣམས་བྱང་ཆུབ་ལ་བཀོད། ཐང་ལྷ་ལ་ཐུགས་ཆེར་ཁྲོས་ཏེ་མཐུ་རྩལ་ཅན་ཅིག་འདུག་གི་གསུངས་ནས་ཉིད་ཀྱི་སྡིགས་མཛུབ་ཀྱི་རྩེ་ལས་མེ་སྦར་ཏེ་གངས་རྩེ་ནས་བཞུ་བ་ན། ཐང་ལྷ་སྐྲག་སྟེ་ཁྱེའུ་ཆུང་གཡུའི་ཟུར་

ཕུད་ཅན་གཅིག་ཏུ་བྱས་ནས། མགོ་སློབ་དཔོན་གྱི་པང་དུ་བཞག །རྐང་པ་ཁམས་ཀྱི་གཡར་མོ་ཐང་དུ་བརྐྱངས་ཏེ། སློབ་དཔོན་ཆེན་པོ་ལགས། བདག་སུ་ཡིན་མཁྱེན་ནམ་ཟེར་བ་ལ། མཁྱེན་བཞིན་དུ་ཁྱོད་སུ་ཡིན་ཆ་མ་མཆིས་སོ་གསུངས་པས། ཁོ་ན་རེ། བདག་ནི་གཉན་ཆེན་པོ་ཐང་ལྷ་ཡར་ཞུར་ཞེས་ཀྱང་བྱ། དྲི་ཟའི་རྒྱལ་པོ་ཟུར་ཕུད་ལྔ་པ་ཞེས་ཀྱང་བྱ་སྟེ། བོད་ཡུལ་འདི་ན་གནས་པའི་ཕོ་བདུད་མ་ལུས་པའི་དཔོན་ཡིན་ཏེ། ཁྲིམས་ལན་གདུགས་ཚོད་ལ་གཤེགས་པར་ཞུ་ཞེས་རང་གི་གནས་སུ་སྤྱན་དྲངས་ཏེ་བསྙེན་བཀུར་བྱས། སྲོག་སྙིང་ཕུལ་ནས་དམ་ལ་བཏགས་སོ། དེའི་ཚེ་ཁྱོད་ཕོ་བདུད་ཐམས་ཅད་ཀྱི་དཔོན་ཡིན་ན་ཕོ་བདུད་གང་ལ་གནས་པ་རྣམས་ངའི་མདུན་འདིར་བསྡུས་ཤིག་གསུངས་པས། ཁོས་སྤྱུགས་པ་ལན་གསུམ་གྱིས་བསྡུས་པ་ན། དང་པོ་བོད་ཡུལ་ན་མཐུ་རྩལ་ཆེ་བའི་རྒྱལ་པོ་བཞི། སྡེ་དཔོན་བཞི། དམག་དཔོན་བཞི། བདུད་པོ་བཞི། ལས་མཁན་ལྔ་སྟེ་ཉི་ཤུ་རྩ་གཅིག་སྤུངས་ཀྱིས་བྱུང་། ལན་གཉིས་པས་དེའི་འོག་ན་མཐུ་ཆེ་བའི་ཕོ་བདུད་རྣམས་འདུས། ལན་གསུམ་པས་བོད་ཀྱི་ལྷ་འདྲེ་ཕོ་བདུད་མ་ལུས་པ་རྣམས་གནམ་ས་བར་སྣང་གང་བ་ཙམ་ཞིག་འདུས་པ་ལས། ཐམས་ཅད་མ་ལུས་

པའི་སྲོག་སྙིང་བླངས་ཏེ་དམ་ལ་བཏགས། ཁྱད་པར་དགེ་བསྙེན་ཉེར་གཅིག་པོ་དབང་དུ་བསྡུས་ནས་དམ་ཉམས་སྒྲོལ་བའི་གིང་དུ་བསྐོས། ལྷའི་དགེ་བསྙེན་དུ་མིང་བཏགས། རྡོ་རྗེ་ཕུར་པའི་བསྟན་པ་སྲུང་བར་ཁས་བླངས་སོ། །དེ་ནས་ཀླུང་ཤོད་རོང་ལ་བྱོན་ཏེ་གདོང་པོ་ཆེར་ཉི་ཚེ་བའི་སེམས་ཅན་དམྱལ་བ་མང་པོའི་དོན་མཛད། དེ་ནས་ཟུར་ཕུག་རྐྱང་བུའི་ཚལ་དུ་ཟ་འོག་གི་གུར་གཅིག་ཕུབ་ནས་ཞག་བདུན་གྱི་བར་དུ་དགོངས་པ་ལ་བཞུགས་ཏེ་བོད་ཀྱི་ལྷ་འདྲེ་མ་ལུས་པ་དམ་ལ་བཏགས་སོ། །དེར་ཕོ་ཉ་བ་རྣམས་ཀྱིས་རྒྱལ་པོའི་སྤྱན་སྔར་ཕྱིན་ཏེ། ཇི་ལྟར་བསྒོ་བའི་བཀའ་ལེགས་པར་སྒྲུབ་སྟེ་སློབ་དཔོན་ནི་ཟུར་ཕུག་རྐྱང་བུའི་ཚལ་དུ་ཕྱགས་ཕེབས་སོ་ཞེས་གསོལ་པས། རྒྱལ་པོ་དགྱེས་ཏེ། མཆོད་པའི་ཡོ་བྱད་རྣམས་དང་རོལ་མོ་སྣ་ཚོགས་ཀྱིས་མདུན་བསུས་ནས་ཕོ་བྲང་བསམ་ཡས་འོམ་བུའི་ཚལ་དུ་གདན་དྲངས་པ་ན། མངའ་བདག་རྒྱལ་པོ་དང་། སློབ་དཔོན་གཉིས་ཕྱག་ལ་མ་འཆམས་ཏེ། རྒྱལ་པོའི་དགོངས་པར། ང་འདྲེ་མགོ་ནག་གི་རྗེ། བདུད་རྔོག་ཆགས་ཀྱི་རྟེན། བྱང་ཆུབ་སེམས་དཔའི་གདུང་བརྒྱུད་ཡིན་པས་ང་ལ་ཐོག་མར་ཕྱག་འཚལ་དུ་འོང་སྙམ། སློབ་དཔོན་གྱི་དགོངས་པར། བདག་སྐྱེ་ཤི་སྤངས་པའི་རིག་འཛིན་གྲུབ་བརྙེས་ཀྱི་སྔགས་འཆང་ལྷ་མ་སྲིན་སྡེ་བརྒྱད་ཐམས་ཅད་བྲན་དུ་ཁོལ་བ་ཡིན་པས་ང་ལ་ཕྱག་འཚལ་དུ་འོང་སྙམ། དེར་

སློབ་དཔོན་གྱིས་ང་ཆེ་ང་བཙན་གྱི་མགུར་གསུངས་ཤིང་ཕྱག་གིས་དེང་ཙམ་མཛད་པས་རྒྱལ་པོའི་ན་བཟའ་ཕྱེད་མེས་གཞོབ་ཏུ་ཚིག་པས། རྒྱལ་པོ་རབ་ཏུ་ནོངས་ཏེ་ཕྱག་བྱས་སོ། །དེ་ལྟར་སློབ་དཔོན་བྱོན་པ་ཙམ་གྱིས་བོད་ཀྱི་ལྷ་འདྲེ་གདུག་པ་ཅན་ཐམས་ཅད་ཀྱི་གདུག་རྩུབ་ཞི་ཞིང་དབང་དུ་འདུས། སླར་ཡང་ཧས་པོ་རིར་བྱོན་ནས་བོད་ཁམས་ཀྱི་ལྷ་སྲིན་ནག་ཕྱོགས་གདུག་པ་ཅན་རྣམས་ལ་བཀའ་ནན་དམ་བསྒྲག་བསྩལ་ཏེ་ཕྱག་རྒྱ་གཉན་པོའི་ཟིལ་འོག་ཏུ་མནན། ཅི་བགྱིའི་འབངས་སུ་རྩིས་ལ་ཕབ། རྡོ་རྗེ་ཕུར་པའི་དཀྱིལ་འཁོར་ལ་བརྟེན་ནས་ས་གཞི་ལས་སུ་རུང་བར་གནང་། ནམ་མཁའ་ལ་རྡོ་རྗེའི་གར་མཛད་པའི་གྲིབ་མ་གར་བྱུང་སར་བསམ་ཡས་ཀྱི་རྔས་བཏིང་ནས་བཞེངས་པའི་ཚེ། རྒྱལ་པོ་དང་ཀླུ་གཉིས་སློབ་དཔོན་གྱིས་གྲོགས་པོ་བྱེད་དུ་བཅུག་སྟེ་གསེར་ཕྱེ་ཁལ་དགུ་བཅུ་སྐྱེས་སུ་བྱིན། གཞན་ཡང་ལྕགས་རྣམས་རཱ་ཧུ་ལས་བྱིན། ཤིང་རྣམས་མིའམ་ཅིའི་རྒྱལ་པོ་ལྗོན་པས་བྱིན། ལྷ་མ་སྲིན་སྡེ་བརྒྱད་རྣམས་ཀྱིས་ཀྱང་རང་རང་གིས་ཅི་འབྱོར་བའི་ཡོ་བྱད་དང་བཅས། དཔལ་གྱི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཉིན་མོ་མིས་བརྩིགས་པ་ལས་ནུབ་མོ་ལྷ་འདྲེས་བརྩིགས་པས་མཐོ་

བར་གྱུར་ཏེ། རི་རབ་གླིང་བཞི་གླིང་ཕྲན་ཉི་ཟླ་ལྕགས་རི་དང་བཅས་པའི་ཚུལ་དུ་ཡོད་པ་དང་། རྒྱལ་པོའི་ཐུགས་དགོངས་རྫོགས་ཕྱིར་བཙུན་མོ་གསུམ་གྱིས་གཙུག་ལག་ཁང་གསུམ་དང་བཅས་པ་ལོ་ལྔ་ལ་གྲུབ། དེ་ནས་བསམ་ཡས་ཀྱི་རབ་གནས་མངའ་གསོལ་མཛད་པར་བཞེད་ནས། སློབ་དཔོན་གྱིས་རྒྱལ་པོ་ལ་མཆོད་པའི་ཡོ་བྱད་ཤོམས་ཤིག་གསུངས་པས་རྒྱལ་པོ་ཐུགས་མ་བདེ་བར་གྱུར་ནས། གལ་ཏེ་མཆོད་པའི་ཡོ་བྱད་རྣམས་ཕྱོགས་གཅིག་ཏུ་བཤམས་ན་ནི་གླིང་ཕྲན་ལ་སོགས་པའི་ཕྱོགས་གཞན་གྱི་ལྷ་རྣམས་ཀྱིས་མི་གཟིགས་ཤིང་། སོ་སོར་བཤམས་ན་མཆོད་པའི་ཡོ་བྱད་ཀྱི་དབང་དམའ་རུ་སོང་གིས་དོགས་པ་ལ། སློབ་དཔོན་གྱི་ཞལ་ནས། རྒྱལ་པོ་ཆེན་པོ་ཐུགས་གཡེལ་མི་འཚལ་གྱི། མཆོད་པ་ཀུན་དབུ་རྩེ་དཀར་ཞལ་གྱི་ཐང་ལ་ཤོམས་མཛོད་ཅེས་གསུངས་པ་བཞིན་བཤམས་པ་དང་། སློབ་དཔོན་གྱིས་དགོངས་པ་མཛད་པས། གཙུག་ལག་ཁང་འོག་ཁང་དང་གླིང་ཕྲན་གྱི་ལྷ་རྣམས་ལྟད་མོའི་ཁྲོམ་དུ་འཚོགས་པ་ལྟར་དཀར་ཞལ་གྱི་ཐང་ལ་བྱོན། བར་ཁང་དང་སྟེང་ཁང་གི་ལྷ་རྣམས་གཙུག་ལག་ཁང་གི་རྩེར་སྤུངས་ཀྱིས་བྱོན། གྱང་རིས་རྣམས་གོས་ལྟོ་སྦྱར་ཕྱི་ནང་ལོག་པ་བཞིན་དུ་ལྷ་ཁང་རྣམས་

ཀྱི་ཕྱི་ལོགས་སུ་བཀྲ་ལམ་གྱིས་བྱོན་ཏེ། རབ་ཏུ་གནས་པར་མཛད་པ་ན། དབུས་ཀྱི་གཙོ་བོ་བྱང་ཆུབ་ཆེན་པོ་ཞལ་འཛུམ་པ་དང་བཅས་པའི་འོད་བྱུང་། སྒོ་སྲུང་ཁྲོ་བོའི་རྒྱབ་ཡོལ་ལས་མེ་འབར་བ་ཀུན་གྱིས་མཐོང་། ཨཱརྱ་པཱ་ལོའི་གླིང་གི་རྟ་མགྲིན་གྱིས་རྟ་སྐད་ཐེང་གསུམ་བཏོན་པ་འཛམ་གླིང་སུམ་གཉིས་ཀྱིས་ཐོས། མཆོད་རྟེན་དཀར་པོའི་སྲོག་ཤིང་མཐོན་ཀའི་འཁོར་ལོ་བཅུ་གསུམ་རྒྱལ་པོ་ཆེན་པོ་བཞིས་མངོན་སུམ་དུ་བཙུགས་སོ། །དེ་ནས་དཔལ་གྱི་བསམ་ཡས་མཆིམས་ཕུའི་ཡང་དབེན་ལ་སོགས་པར་མངའ་བདག་ཡབ་སྲས། མཁར་ཆེན་མཚོ་རྒྱལ། འབངས་རིགས་ཉེར་ལྔ་གཙོ་བོར་གྱུར་པའི་སྐལ་ལྡན་རྣམས་ལ་ཡོ་ག་རྣམ་པ་གསུམ་དང་འབྲེལ་བའི་ཟབ་ཆོས་ཐུན་མོང་མ་ཡིན་པ་དཔག་ཏུ་མེད་པ་གནང་ཞིང་། ཁྱད་པར་རྡོ་རྗེ་ཕུར་པའི་རྒྱུད་སྒྲུབ་ཐབས་དང་བཅས་པ་རྒྱ་ཆེར་གསུངས། འདི་དུས་ལྷ་སྲིན་རྣམས་ཀྱིས་སློབ་དཔོན་ལ་ཐོ་འཚམས་ཕྱིར་ཀླད་ཀྱི་རྫ་མོ་བསྙིལ་བ་སློབ་དཔོན་གྱིས་ཧཱུཾ་ཞེས་གསུངས་པས་རྫ་མོ་ཉིལ་བ་ཡར་ལོག་སྟེ་ཡི་གེ་ཧཱུཾ་གི་གཟུགས་སུ་གནས་པར་དེང་སང་རྫ་མོ་ཧཱུཾ་འདྲ་མར་གྲགས། མཆིམས་སྣ་ནམ་ཤུད་བུ་གསུམ་གྱིས་ཡར་ལུང་ཤེལ་གྱི་བྲག་ཕུག་ཏུ་ཕུར་པ་བསྒྲུབས་པས་དྲོད་ཚད་

ཕུལ་དུ་བྱུང་སྟེ། མཆིམས་ཤཱཀྱ་པྲ་བྷས་འོན་ཅང་རྡོར་བྲག་ལ་ཕུར་པ་བཏབ་པས་བྲག་ཆོ་ལོ་ཙམ་དུ་གྲུམ་པར་གྱུར། སྣ་ནམ་རྡོ་རྗེ་བདུད་འཇོམས་ཀྱིས་ཡར་གཙང་གི་གཙང་ཆུ་འདོམས་པའི་ཆུ་ལ་བཏབ་པས་ཕུར་པ་མ་བཏོན་གྱི་བར་དུ་ཆུ་འབབ་མ་ནུས། ཤུད་བུ་དཔལ་གྱི་སེང་གེས་ལྷ་སའི་ཟང་ཡག་ལ་བཏབ་པས་སྤང་ལ་མེ་འབར། མེ་ཤི་མ་ཐག་ཏུ་རྩྭ་སྐྱེས་སོ། །དེ་ལྟར་སློབ་དཔོན་གྱི་ནུས་པ་ལ་བདུད་བློན་རྣམས་སྐྲག་ནས་གཤེགས་པར་ཞུས་པས་སླར་རྒྱ་གར་དུ་གཤེགས་པའི་སྤྲུལ་པ་བསྟན། མཆོད་ཡོན་ལྐོག་ཏུ་བཀའ་འགྲོས་ཏེ་སྐུ་དངོས་མཚོ་རྒྱལ་སོགས་ལས་ཅན་གྱི་འཁོར་དང་བཅས་བོད་ཡུལ་གྱི་ས་གཞི་རྟ་རྨིག་ཙམ་ཡང་མ་ལུས་པར་ཞབས་ཀྱིས་བཅགས། མངའ་རིས་སྐོར་དུ་གངས་བྲག་ཉི་ཤུ། དབུས་གཙང་དུ་སྒྲུབ་གནས་ཉེར་གཅིག །མདོ་ཁམས་སུ་གནས་ཆེན་ཉེར་ལྔ། སྟོད་སྨད་བར་གསུམ་གྱི་སྦས་ཡུལ་རྒྱལ་པོ་གསུམ། ལུང་ལྔ། ལྗོངས་གསུམ། གླིང་གཅིག །དེ་རེ་རེ་ལའང་རྩ་བ་དང་ཡན་ལག་མེ་ཏོག་འབྲས་བུའི་ཚུལ་དུ་ཡོད་པ་ལ་སོགས་པ་གངས་བྲག་རི་མཚོ་ཐམས་ཅད་སྒྲུབ་གནས་སུ་བྱིན་གྱིས་བརླབས། ཕྱིས་སུ་དབོན་སྲས་བདུད་སྤྲུལ་པས་བསྟན་པ་བསྣུབ་པར་མཁྱེན་ནས་

རྒྱལ་པོ་ལ་མ་འོངས་པའི་ལུང་བསྟན་མང་པོ་བསྩལ། གསང་སྔགས་ཀྱི་བསྟན་པ་མི་ནུབ་པ་དང་། རྟོག་གེ་བས་བསླད་ཅིང་བཅོས་སུ་མེད་པས་བྱིན་རླབས་མི་ཡལ་བ་དང་། གདུལ་བྱ་རིམ་པར་འབྱུང་བ་སོགས་ལ་དགོངས་ནས། རྒྱལ་པོའི་བླ་གཏེར་བརྒྱ་དང་། ཐུགས་གཏེར་ཆེན་པོ་ལྔ། ཟབ་པའི་གཏེར་ཆེན་ཉེར་ལྔ་གཙོ་བོར་གྱུར་པའི་མིང་ཅན་མིང་མེད་ཀྱི་གཏེར་ཁ་གྲངས་ལས་འདས་པར་སྦས། འདོན་པའི་དུས། འདོན་པ་པོའི་གང་ཟག །ལས་ཅན་ཆོས་བདག་སོགས་ལུང་བསྟན་ལུང་བསྟན་རེ་རེ་བཞིན་བསྩལ། མོན་ཁ་ནེ་རིང་སེང་གེ་རྫོང་སོགས་སྟག་ཚང་མིང་ཅན་བཅུ་གསུམ་དུ་ཁྲོ་བོ་འཆོལ་བ་འཇིགས་སུ་རུང་བའི་སྐུར་བཞེངས་ནས་བོད་ཀྱི་ལྷ་སྲིན་དྲེགས་པ་ཅན་ཆེ་ཕྲ་ཐམས་ཅད་དམ་ལ་བཏགས་ཤིང་གཏེར་གྱི་སྲུང་མར་གཉེར་དུ་གཏད་པའི་ཚེ་རྡོ་རྗེ་གྲོ་བོ་ལོད་དུ་གྲགས། ཕྱི་རབས་ཡིད་ཆེས་པའི་ཕྱིར་དུ་བུམ་ཐང་རྡོ་རྗེ་བརྩེགས་པ་ལ་སོགས་པར་སྐུ་རྗེས། གནམ་མཚོ་ཕྱུག་མོ་སོགས་ཀྱི་ཕྱག་རྗེས། སྤ་གྲོའི་བྲག་དཀར་སོགས་ལ་ཞབས་རྗེས། གཞན་ཡང་སྒྲུབ་གནས་ཐམས་ཅད་གུ་རུ་ཡབ་ཡུམ་གྱི་ཕྱག་ཞབས་ཀྱི་རྗེས་སོགས་ངོ་མཚར་ཅན་གྱི་བཀོད་པ་གྲངས་ལས་འདས་པར་བཞག །ལྷ་སྲས་མུ་རུབ་བཙད་པོ་བཏང་ནས་བྷ་ཏ་

ཧོར་གྱི་སྒོམ་གྲྭ་བཅོམ། ཀ་ཅ་རྣམས་ཁྱེར་བའི་རྗེས་སུ་རྒྱལ་པོ་ཤིང་བྱ་ཅན་འབྲངས་ནས་འོང་བ་གུ་རུ་དྲག་པོའི་སྐུར་བཞེངས་ཏེ་དམ་ལ་བཏགས་ནས་གཙུག་ལག་ཁང་གི་དཀོར་སྲུང་ལ་བསྐོས། ཁྲི་སྲོང་གཤེགས་པའི་རྗེས་སུ་མུ་ཏིག་བཙན་པོ་རྒྱལ་སར་བཀོད། ཁྲ་འབྲུག་ཏུ་བཀའ་འདུས་སྒྲུབ་ཆེན་མཛད་ནས་རྒྱལ་སྲས་ལྷ་རྗེ་ལ་ཟབ་ཆོས་ཀྱི་གཉེར་གཏད། དེ་ནས་ལྷོ་ནུབ་སྲིན་པོའི་ཁ་གནོན་ལ་གཤེགས་པར་ཉེ་བ་ན་བོད་ཀྱི་རྒྱལ་བློན་འབངས་དང་བཅས་པ་རྣམས་ཀྱིས་བཤོལ་བཏབ་ཀྱང་མ་ཐེབས། རེ་རེ་བཞིན་དུ་གཞལ་གདམས་དང་ཐུགས་བརྩེའི་བསླབ་བྱ་རྒྱས་པར་བསྩལ། ཇོ་མོ་གསུམ་གྱིས་གུང་ཐང་གི་ལ་ཐོག་བར་སྐྱེལ་ཆུང་བྱས་ཏེ་སྐུ་རྗེས་སུ་འབྲང་བར་ཞུས་པས། ཁྱེད་རྣམས་ཀྱིས་མི་མ་ཡིན་གྱི་གཟི་མི་བཟོད་དེ་སྲོག་གི་བར་ཆད་དུ་འགྲོ་བ་ཡིན་པས་འདི་ནས་ལོག་ཅིག་གསུངས་ནས་ཡུན་རིང་དུ་མཉེས་པར་བྱས་པའི་སྐྱེས་ལན་དུ་ཟབ་མོའི་མན་ངག་གནང་བར་བཞེད་ནས། དེ་མ་ཐག་ཧཱུཾ་ཧཱུཾ་ཧཱུཾ་གསུངས་པ་དང་། རྡོ་རྗེ་ཕུར་པའི་ལྷ་ཚོགས་རྣམས་ཐུགས་ཀ་ནས་སྤྲོས་ཏེ་མངོན་སུམ་དུ་སྣང་བར་མཛད་ནས། ཁྱེད་རྣམས་ཡི་དམ་གྱི་ལྷ་ལ་དབང་ཞུའམ། ངལ་དབང་ཞུ་ཞེས་གསུངས་པ་ན། ཅོག་རོ་བཟའ་ན་རེ། སློབ་དཔོན་ལས་ངོ་མཚར་དང་སྐུ་

དྲིན་ཆེ་བ་མ་མཆིས་ཀྱང་ཡེ་ཤེས་ཀྱི་ལྷ་དངོས་སུ་མཇལ་བ་འདི་ལ་བདག་ནི་ཡི་དམ་གྱི་ལྷ་ལ་དབང་ཞུ་ཟེར། མཁར་ཆེན་བཟའ་ན་རེ། ཡི་དམ་གྱི་ལྷ་ལས་ཁྱད་པར་ཆེ་བ་མ་མཆིས་ཀྱང་དེའང་གུ་རུའི་ཐུགས་ཀྱི་ཆོ་འཕྲུལ་ལགས་པས་བདག་ནི་སློབ་དཔོན་ཉིད་ལ་དབང་ཞུ་ཟེར། ཨ་ཙ་ར་གསལ་ལེ་ན་རེ། གང་ལེགས་ཆ་མེད་པས་གང་ལེགས་པ་ཞིག་ལ་ཞུ་ཟེར་རོ། །དེར་སློབ་དཔོན་གྱིས་སཾ་ཧ་ར་ཎ་ཧཱུཾ་གསུངས་ནས་ལྷ་ཚོགས་རྣམས་ཐུགས་ཀར་བསྡུས་པས་ཅོག་རོ་བཟའ་ལ་དབང་བསྐུར་མཁན་མ་བྱུང་སྟེ། ཕྱི་བོན་ཚུལ་དུ་གྱེར་དང་བཅོལ་བསྐུལ་ཙམ་ལ་བརྟེན་ཏེ་བཤད། མཁར་ཆེན་བཟའ་ལ་ཟབ་མོའི་དབང་དང་གདམས་པ་མ་ལུས་པ་རྫོགས་པར་གནང་ནས། ཁྱོད་ཀྱིས་གསལ་ལེ་སྨིན་པར་གྱིས་ཤིག་གསུངས་ནས་གསལ་ལེ་མཁར་ཆེན་བཟའ་ལ་གཏད་དོ། །དེའི་དུས་སུ་སློབ་དཔོན་ལ་མཁར་ཆེན་བཟས་ཞུ་དོན་བཞི་ཕུལ་ཏེ། བདག་ཅག་བུད་མེད་འདྲ་བ་ཉོན་མོངས་པ་ཆེ་བས་ཉོན་མོངས་ཐུལ་བའི་ཆོས་ཞིག་ཞུ། བདག་ཅག་བུད་མེད་འདྲ་བ་དགྲ་མང་བས་མཐུ་ཆེ་བའི་ཆོས་ཞིག་ཞུ། བདག་ཅག་བུད་མེད་འདྲ་བ་ཤེས་རབ་ཆུང་བས་ཚིག་ཉུང་ལ་དོན་འདྲིལ་བའི་ཆོས་ཞིག་ཞུ། བདག་ཅག་བུད་མེད་འདྲ་བ་ངང་ཐུང་བས་འགྲུབ་ཐག་ཉེ་བའི་ཆོས་ཞིག་ཞུ། །ཞེས་ཞུས་པས།

ཐུགས་ཟིན་གྱི་ཤེས་རབ་མ་ལ་བརྩེ་བས་དགོངས་ཏེ་སློབ་དཔོན་ཉིད་ཀྱི་ཞལ་གཟིགས་ཟབ་མོ་ཐུགས་ཀྱི་སྒྲུབ་པ་རྩ་གསུམ་མན་ངག་ཁྱད་པར་ཅན་གནད་ཀྱི་ཞལ་གདམས་དང་བཅས་པ་གསུངས་ཏེ། ལྷ་རྣམས་ཀྱིས་ཕུལ་བའི་རྟ་མཆོག་ལ་ཆིབས། དཔའ་བོ་མཁའ་འགྲོས་མཆོད་པའི་བཀོད་པ་དཔག་ཏུ་མེད་པ་དང་བཅས་རྔ་ཡབ་གླིང་དུ་བྱོན། དེར་ཟངས་མདོག་དཔལ་རིའི་རྩེ་མོར་སྲིན་པོའི་རྒྱལ་པོ་རཀྵ་ཐོད་ཕྲེང་གནས་སྤར་ཏེ་དེའི་གསོབ་ཏུ་ཞུགས། ཕོ་བྲང་པདྨ་འོད་ཀྱི་བཀོད་པ་བསམ་ལས་འདས་པར་སྤྲུལ་ཅིང་། སྲིན་པོའི་གླིང་བརྒྱུད་དུའང་སྤྲུལ་པ་རེ་རེ་རྒྱལ་པོའི་ཚུལ་བཞུགས་ནས་ཆོས་སྟོན། འཛམ་བུའི་གླིང་གི་མི་རྣམས་སྲོག་གི་འཇིགས་པ་ལས་བསྐྱབས་ཏེ། ད་ལྟ་མཐར་ལམ་ལྷུན་གྱིས་གྲུབ་པའི་རིག་འཛིན་དྲུག་པའི་རྒྱལ་ཚབ་ཀྱི་ཚུལ་དུ་འཇིག་རྟེན་འདི་མ་སྟོངས་ཀྱི་བར་དུ་གཡོ་བ་མི་མངའ་བར་བཞུགས་སོ། །སྤྱིར་སློབ་དཔོན་ཆེན་པོ་འདིའི་ཆེ་བའི་ཡོན་ཏན་དང་ཕྲིན་ལས་ཀྱིས་གདུལ་བྱ་འདུལ་ཚུལ་རྣམས་ནི་འཕགས་པ་ས་བཅུ་པ་གནས་པ་རྣམས་ཀྱིས་ཀྱང་བསམ་པར་མི་ནུས་ཤིང་། སངས་རྒྱས་རྣམས་ཀྱིས་བསྐལ་བརྒྱའི་བར་དུ་གསུངས་ཀྱང་རྫོགས་མཐའ་མངོན་པ་མ་ཡིན་ལ། བྱེ་བྲག་སྐུ་དངོས་ཀྱིས་འགྲོ་དོན་བསྐྱངས་ཚུལ་ནི་རྒྱ་གར་དུ་ལོ་སུམ་སྟོང་དྲུག་བརྒྱ་བཞུགས་པར་གསུངས་མོད། མཁས་པ་རྣམས་ཀྱིས་ཕྱེད་ལོའི་དབང་དུ་བཞེད་པར་སྣང་ཞིང་། བོད་ཡུལ་དུ་ལོ་བརྒྱ་དང་བཅུ་གཅིག་བཞུགས་པ་ཕྱེད་ལོའི་

དབང་དུ་བྱས་ན། ཁྲི་སྲོང་དགུང་ལོ་ཉེར་གཅིག་པ་ལ་གུ་རུ་བོད་དུ་ཕེབས། དྲུག་ཅུ་རྩ་དགུ་པ་ལ་རྒྱལ་པོ་འདས། དེ་རྗེས་ལོ་བདུན་དང་ཟླ་བ་དྲུག་བཞུགས་པར་གསལ་བས་ལོ་ཧྲིལ་པོ་ལྔ་བཅུ་རྩ་ལྔ་དང་ཟླ་བ་དྲུག་བཞུགས་པ་ཡིན་ནོ། །སློབ་དཔོན་དེ་ལ་ཕུར་པའི་སློབ་མ་མང་ཡང་མཆོག་ཏུ་བཀའ་བབས་པ་ནི་ཇོ་མོ་མཚོ་རྒྱལ་ཡིན་ཏེ། དེས་མོན་ཁ་ནེ་རིང་སེང་གེ་རྫོང་གི་བྲག་ཕུག་ཏུ་ཕུར་པའི་དཀྱིལ་འཁོར་ཞལ་ཕྱེས་ཏེ་བསྒྲུབས་པས་ཞག་ཉེར་གཅིག་ནས་ཕུར་པ་ཐམས་ཅད་བཞད་ཅིང་འོད་འཕྲོ་བ་དང་བྲོ་འཁྲབ་པ་བྱུང་། དེར་ཇོ་མོའི་དགོངས་པ་ལ། མ་མོ་འགྲུབ་ན་ཁྲག་ཟོར་འཕང་། གཤིན་རྗེ་འགྲུབ་ན་འཁོར་ལོ་བསྐོར། །གིོང་པོ་འགྲུབ་ན་ལས་ལ་རྦད། ཕུར་པ་འགྲུབ་ན་གདབ་ལས་བྱ། །ཞེས་པ་ལས། བདག་ལ་བདོ་བའི་དགྲ་ནི་མེད། སུ་ལ་བརྡེག་གམ་སྙམ་སྟེ་བསྙེན་ཕུར་བསྒྲིལ་བ་ལས། བདག་ལ་དགྲ་མེད་ཀྱང་ཕ་མེས་ཀྱི་སྲོག་གཅོད་པའི་ཟ་འདྲེ་ལ་གདབ་སྙམ་དུ་དགོངས་པ་དང་། བསྙེན་ཕུར་ཕྱག་ནས་ཤོར་ཏེ་ནམ་མཁའ་ལ་འཕུར་བས། ཕ་ཡུལ་གྱི་ཁང་པའི་ལྟག་ན་འདྲེ་དེ་གནས་པའི་སྐྱེར་ཕུང་གཅིག་ཡོད་པ་ལ་བབས་ཏེ་སྐྱེར་ཕུང་རྩ་བ་ནས་བསྲེགས་ཤིང་ཟ་འདྲེ་དེ་ཉིད་དུ་བསྒྲལ། ཕུར་པ་དེ་དབོན་བརྒྱུད་རྣམས་ཀྱིས་བཅངས་ཏེ་གདེངས་པ་ཙམ་

གྱིས་ལྷ་འདྲེ་མང་པོ་བཏུལ་བས་མཁར་ཆེན་བཟའ་འདྲེ་འདུལ་གྱི་བརྒྱུད་པ་ཞེས་ཟམ་མ་ཆད་པར་བྱུང་། ཇོ་མོ་འདིས་ནི་སྒྲོལ་བ་ཚད་དུ་ཕྱིན་པས་མཚོན་གྱིས་བསད་པའི་མི་རོ་ཡང་གསོན་པོར་སློང་ནུས་པ་ཡིན་ནོ། །དེ་ལྟར་རྡོ་རྗེ་ཕུར་པའི་ཆོས་འདིའི་བྱིན་རླབས་ཀྱི་རྟགས་ཚན་གཞན་ལས་ཁྱད་པར་དུ་འཕགས་པ་སྟེ། དེའང་སློབ་དཔོན་པདྨ་འབྱུང་གནས་ཀྱིས་ཙན་དན་ནགས་ཚལ་ལ་ཐེབས་ཏེ། རྒྱ་གར་དུ་ཙན་དན་གྱི་ནགས་ཚལ་ལ་མེ་ཤོར་ནས་ཞག་མང་པོར་མེ་མ་ཤི་བར་ནགས་ཚལ་ཀུན་ཟད་དུ་ཉེ། སེམས་ཅན་མང་པོ་ཤི་ཞིང་ལ་ལ་ཤི་ལ་ཁད་དུ་གྱུར་པ་ལ། སེང་ལྡེང་གི་ཕུར་པ་སོར་བརྒྱད་པ་གཅིག་བཏབ་པས། མེ་ཤི་སྟེ་ནགས་ཚལ་སྔར་ལས་ཕུན་སུམ་ཚོགས་པ་སྐྱེས། སེམས་ཅན་ཤི་བ་དང་ཤི་ལ་ཁད་པ་རྣམས་གསོས། ཙན་དན་ནགས་ལ་ཐེབས་ཟེར་ཡང་འབྱུང་བ་མེ་ལ་ཐེབས་པ་ཡིན་ནོ། །པཎ་ཆེན་བི་མ་ལ་མི་ཏྲས་ཆུ་བོ་གངྒཱ་ལ་ཐེབས་ཏེ། སློབ་དཔོན་གྱིས་ཆུ་བོ་གངྒཱའི་འགྲམ་དུ་སྒྲུབ་པ་མཛད་པས་དེའི་སྔགས་ཀྱི་ཟེར་ཕྱོགས་དེའི་ཀླུ་ཆེན་པོ་གཅིག་གིས་མ་བཟོད་ནས་ཕྱིའི་རྒྱ་མཚོ་གནམ་དུ་བཅོལ། སྐྱིན་ཐང་དྲག་པོ་ཕབ། ཆུ་བོ་གངྒཱའི་ལུད་དེ་ལུང་པར་མི་ཤོང་བར་བྱས་བྱུང་བ་ལ། སློབ་དཔོན་གྱིས་ཕུར་པ་སོར་བརྒྱད་པ་

གཅིག་བཏབ་པས། གངྒཱ་ཡར་མར་དུ་ཆད་དེ་བར་དུ་ལམ་དོད་ནས་ཕྱིན་ཆོག་པ་བྱུང་། གངྒཱའི་ཆུ་ལ་ཐེབས་ཟེར་ཡང་ཀླུ་ལ་ཐེབས་པའོ། །བལ་པོ་ཤཱི་ལ་མཉྫུས་མཎྜ་ལའི་མཁརགོང་ལ་ཐེབས་ཏེ། རྒྱ་གར་དུ་ཕྱི་ནང་གཉིས་མ་འཆམ་པ་ན། ཡུལ་གྱི་རྒྱལ་པོ་ན་རེ། ཞག་གསུམ་རྩོད་ན་རྩོད་པ་གྱིས་ཤིག །སུ་རྒྱལ་བ་དང་རྫུ་འཕྲུལ་སུ་ཆེ་བ་དེའི་ཞབས་ནས་འདེགས་སོ་ཟེར། དེར་རྩོད་པའི་དུས་དུ་སློབ་དཔོན་གྱིས། བརྗོད་རྒྱུ་ཐམས་ཅད་ཐ་སྙད་མཐའ་ལ་གནས། །དོན་མ་མཐོང་བར་གྲོལ་བར་ག་ལ་འགྱུར། །མུ་སྟེགས་འཆལ་པའི་གཏམ་གྱིས་ཅི་ཞིག་བྱ། །ཆོས་ཀྱི་རྒྱལ་མཚན་ཆེན་པོ་འཛུགས་པར་བྱ། །ཞེས་གསུངས་ནས་ཕུར་པ་བསྒྲིལ་བས། མཎྜལ་ཞེས་བྱ་བའི་གྲོང་ཁྱེར་ཆེན་པོ་གཅིག་གི་རྒྱབ་ན་མཁར་གོང་གི་བྲག་ཆེན་པོ་ཞིག་ཡོད་པ་ལས། བྲག་དེ་ཉིལ་ནས་མུ་སྟེགས་ཀྱི་གྲོང་ཁྱེར་ཐམས་ཅད་བཅོམ། མུ་སྟེགས་རྣམས་ལ་ལ་ཁྲག་སྐྱུགས་ཏེ་ཤི། ལ་ལ་ལྕེ་གས། ལ་ལ་མིག་འབྲས་བྲུལ་ནས་ཐམས་ཅད་ཚེ་བཅད་དེ། ནང་པ་སངས་རྒྱས་པའི་བསྟན་པ་དར་བར་བྱས་སོ། །བྲག་མཁར་གོང་ལ་ལ་ཐེབས་ཟེར་ཡང་མུ་སྟེགས་པའི་དཔུང་ཚོགས་ལ་ཐེབས་པའོ། །ཇོ་མོ་མཁར་ཆེན་

བཟའ་མཚོ་རྒྱལ་གྱིས་དགུང་གི་ཕོ་རོག་ལ་ཐེབས་ཏེ། སྐབས་ཤིག་ན་ཕྲེང་བ་ན་བཟའི་ཁར་བཞག་སྟེ་དབུ་སྐར་བསིལ་བ་ལས། བྱ་རོག་གིས་ཕྲེང་བ་ཁྱེར་བ་ལ་བརྟག་པས་བྱ་རོག་བདུད་ནག་པོ་བཀྲག་མེད་ཀྱི་སྤྲུལ་པས་བར་ཆོད་བྱེད་པར་མཁྱེན་ནས། བྱ་རོག་གི་གྲིབ་མ་ལ་ཕུར་པ་བཏབ་པས། བྱ་རོག་ས་ལ་ལྷུང་ནས་ཤིའོ། །བྱ་རོག་ལ་ཐེབས་ཟེར་ཡང་བདུད་ལ་ཐེབས་པའོ། །མིང་པོ་དཔལ་གྱི་དབང་ཕྱུག་གིས་རྩིབས་ཀྱི་སྤྱང་ཀི་སྔོན་པོ་ལ་ཐེབས་ཏེ། འོ་ཡུག་མཁར་སྣ་རུ་བཞུགས་པའི་སྐབས་ཤིག །བྱང་ཕྱོགས་ནས་ཚོང་པ་མང་པོ་འོང་བ་ལ་ཚོང་ལྷ་རྒྱལ་པོ་ཤེལ་གིང་གིས་བྱེད་པ་ལས། ལན་གཅིག་རྒྱལ་པོ་ཁྲོས་ཏེ་བྱང་སྤྱང་བཅུ་བཞིས་རྟ་བོང་རྣམས་བསད་ནས་མཐར་མི་ལ་ཟ་རུ་བྱུང་བས། ཚོང་པས་ལྷ་འདྲེའི་ཆོ་འཕྲུལ་ཡིན་པར་ཤེས་ནས། ཡུལ་ན་བྱིན་རླབས་ཆེ་བ་སུ་ཡོད་དྲིས་པས། མཁར་ཆེན་དཔལ་གྱི་དབང་ཕྱུག་བཞུགས་ཟེར། དེའི་དྲུང་དུ་ཕྱིན་ནས་ཞུས་པས། དེར་སྤྱང་ཀིའི་རྗེས་ས་ལ་ཕུར་བཏབ་པས། སྤྱང་ཀི་བཅུ་བཞི་པོ་དངོས་སུ་མཁར་བའི་སྣ་ནས་མར་ལ་ཧྲི་ལི་ལི་འདྲིལ་ཏེ་སྙིང་ཤུན་ཁུད་དུ་བྱུང་། སྤྱང་ཀི་ལ་ཐེབས་ཟེར་ཡང་རྒྱལ་པོ་ཤེད་གིང་ལ་ཐེབས་པའོ། །དེ་ལ་སོགས་པ་ཕུར་པ་སྒྲུབ་པའི་རིག་འཛིན་

རྣམས་ཀྱིས་བརྣག་པའི་ཡུལ་ལ་མ་ཐེབས་པ་མེད་ཅིང་བར་ཆད་ཀྱི་དཔུང་ལས་རྣམ་པར་རྒྱལ་ཏེ་དངོས་གྲུབ་ཆེན་པོ་བརྙེས་པར་གྱུར། གཤིན་རྗེ་གཤེད་ཀྱི་རིགས་སྔགས་འཆང་བའི་བརྟུལ་ཞུགས་གྲུབ་པ་ཡང་རྡོ་རྗེ་ཕུར་པའི་ནུས་མཐུས་དཔའ་བཀོང་བར་བྱས་པ་ཡིན་ཏེ། ངམ་འབྲེ་གསལ་ལེའི་སློབ་མ་ལང་ལབ་བྱང་ཆུབ་རྡོ་རྗེས་ཕུར་པ་བསྒྲུབ་པས་དགྲ་ཕ་སྤུན་བཅོ་བརྒྱད་པོ་ཐམས་ཅད་ཚར་བཅད། སྙན་གྲགས་ཀྱིས་ཕྱོགས་ཀུན་ཏུ་ཁྱབ་ཀྱང་སྦྱིན་འབྲས་ཆུང་བས་ཕོངས་ཏེ་སྐབས་རེར་ལུག་རྫི་བྱེད་ཅིང་ཡོད་ཙ་ན། དེ་དུས་ར་ལོ་ཙཱ་བ་རྡོ་རྗེ་གྲགས་སྐུ་བསོད་དང་མཐུ་ཆེ་བས་བོད་ཀྱི་མི་ཆེན་དགེ་བཤེས་རྣམས་ཀྱིས་ཕྱག་དང་བཀུར་སྟི་མ་བྱས་ན་སྐད་ཅིག་ལ་སྒྲོལ་བ་ཡིན་ཏེ། ཁོང་ལ་ཞེ་ས་མ་བྱས་པས་སྲས་དར་མ་མདོ་སྡེ་སོགས་ས་ཐོབ་ཀྱི་སེམས་དཔའ་བཅུ་གསུམ་དང་། གཉན་ལོ་ཙཱ་བ་དར་མ་གྲགས་སོགས་རང་མཉམ་གྱི་ལོ་ཙཱ་བ་བཅུ་གསུམ་སོགས་མང་པོ་བསྒྲལ་བ་ཡིན་ཅིང་། དེ་དུས་ལོ་ཙཱ་བ་ལ་ལང་ལབ་ཀྱིས་ཕྱག་མ་བཙལ་བ་ལ། མི་བླུན་པོ་གཅིག་ཡིན་འོང་དགོངས་པ་ལས། སླར་མི་རྣམས་ཀྱིས་ཁོང་ཕུར་པ་ལ་མཁས་ཤིང་མཐུ་ནུས་ཆེ་བ་ཡིན་ཀྱང་སྐུ་བསོད་ཆུང་བས་ད་ལྟ་གཞན་གྱི་ལུག་རྫི་བྱེད་དགོས་པ་ལགས་བྱས་པས། འོ་ན་ཁོ་ང་རྒྱལ་གྱིས་ཁོངས་སྦོས་ནས་ང་ལ་ཕྱག་མི་བྱེད་པ་ཡིན་འོང་སྟེ་ཁོ་ལ་དོ་ནུབ་ཀྱི་ཚེ་ལས་མེད་ཀྱི་སྒུར་ནད་སྡོད་ཅིག་གསུངས། ཆོས་ཐུན་གྲོལ་བ་དང་རྡོ་རྗེ་འཇིགས་བྱེད་ཀྱི་གསོད་པའི་སྦྱོར་བ་བཞིའི་བཅའ་གཞི་

མཛད་དེ། ཁྱད་པར་སྦྱིན་སྲེག་གི་སྐབས་སུ་ར་ལོ་ཙཱ་བ་ཉིད་རྡོ་རྗེ་འཇིགས་བྱེད་དངོས་ཀྱི་སྐུར་གྱུར་ནས། ལིངྒ་ལ་ལང་ལབ་དགུག་གཞུག་གི་བདེན་བརྡར་ལན་གསུམ་བྱས་པར། དུས་དེར་ལང་ལབ་ནི་ལུག་འཚོ་བ་ཉིད་ལས་གཞན་ཅིའང་མི་བྱེད་མོད་ཀྱི། དགུག་འདྲེན་དང་པོའི་དུས་སུ་དཀྱིལ་འཁོར་གྱི་མཐའ་བསྐོར་ནས་རྩང་ཕུར་རྣམས་ཕྱུངས་ཏེ་ཆར་དུ་བབས་ནས་ཐོ་ཕྱིའི་གྲྭ་པ་རྣམས་རྨས། བར་པ་ལ་ཟ་གསོད་དང་ཁྲོ་བོ་བཅུའི་ལྕགས་ཕུར་གྱི་ཆར་བབས་ནས་འཁོར་རྣམས་ཁྱིམ་གྱི་ཕུག་ཏུ་བྲོས་དགོས་པ་བྱུང་། ཐ་མའི་ཚེ་ནམ་མཁའི་ཁམས་མེ་དཔུང་དང་ཟུར་སྒྲས་གང་སྟེ། དེར་སྟེང་དུ་བལྟས་པ་ན། རྡོ་རྗེ་གཞོན་ནུའི་སྐུ་རི་དིལ་ཆད་པ་ཙམ་ལྕགས་སྲེག་ལས་གྲུབ་པ་སྟོད་ཁྲོ་བོ་སྨད་ཕུར་བུ་ཐུགས་ཀ་ན་ཕུར་པ་དྲུག་ཏུ་འདྲིལ་ཞིང་ཧཱུྃ་ཕཊ་ཀྱི་སྒྲ་སྒྲོགས་པ་ཞིག་ར་ལོ་ཙཱ་བའི་ཐོག་ཏུ་འབབ་ལ་ཁད་ཟ་ཟ་རྔམ་རྔམ་དུ་འདུག་པ་རབ་ཏུ་སྐྲག་སྟེ། དེ་ཉིད་དུ་བཟོད་པར་གསོལ། ལང་ལབ་ལ་གུས་འདུད་བྱེད་པར་དམ་བཅས་པས་ཚེ་འཕྲུལ་རྣམས་ཡཞལ་ནས་སོང་། དེ་ནུབ་ལང་ལབ་སྤྱན་དྲངས་ཏེ་ཕྱག་དང་བསྙེན་བཀུར་རྒྱ་ཆེན་པོ་བྱས་སོ། དུས་དེར་མི་རྣམས་ཀྱིས། ཕུར་པ་མཁན་པོ་གཤིན་རྗེའི་མཐུ་རྡུགས། ཞེས་པའི་གཏམ་

ཡང་རྒྱ་ཆེར་གྲགས་སོ། །དེ་ལྟར་རྡོ་རྗེ་ཕུར་པའི་ལམ་སྲོལ་འདི་ལ་སློབ་དཔོན་ཆེན་པོ་ནས་བཀའ་ནས་བཀའ་རུ་བརྒྱུད་པའི་བཀའ་མ་རྒྱལ་པོ་ལུགས། ཇོ་མོ་ལུགས། འཁོན་ལུགས་གསུམ་ལས་གཙོ་བོར་གྱེས་པའི་སྣ་ནམ་ལུགས། ལྕམ་ལུགས། རྒྱ་ལུགས། རོང་ལུགས། སྐྱི་ལུགས། འོ་བྲན་ལུགས། དཔྱལ་ལུགས། གཞན་ཡང་སོ་ཟུར་གནུབས་གསུམ་དང་། རམ་འགོས་ཁྱུང་གསུམ། རྒྱུས་ལུགས་གུར་ལུགས་སོགས་བཀའ་སྲོལ་མཐའ་ཡས་པ་ཞིག་བྱུང་ན་གངས་ཆེན་གྱི་ལྗོངས་ཕལ་ཆེར་ཕུར་པ་གྲུབ་པའི་རིག་འཛིན་གྱིས་ཁྱབ་པར་གྱུར་པ་ལས། དེང་སང་ཡང་འཁོན་ལུགས། རོང་ལུགས། རོག་ལུགས་རྣམས་ཀྱི་དབང་མན་ངག་ཕྱག་བཞེས་ཀྱིས་བརྒྱན་པ་དང་། རྒྱུད་སྡེ་རབ་འབྱམས་ཀྱི་ལུང་རྒྱུན་བཅས་མ་ཉམས་པར་བཞུགས་པ་བཞིན་ཁོ་བོས་ཀྱང་ལེགས་པར་ཐོབ་པ་ཡིན་ནོ། །༈ ། ད་ནི་ཟབ་མོ་གཏེར་གྱི་གསང་མཛོད་ལས་བྱོན་པའི་རྡོ་རྗེ་ཕུར་པ་བདུད་འཇོམས་གནམ་ལྕགས་སྤུ་གྲིའི་ཆོས་སྐོར་འདི་ཉིད་སྒོས་ཀྱི་བབས་ཚུལ་མདོ་ཙམ་གླེང་བར་བྱ་སྟེ། དེའང་ཇི་སྐད་དུ། ཤིན་ཏུ་ཟབ་པའི་མཐར་ཐུག་སྙིང་པོ་རྣམས༔ སྤྱིར་ཡང་བོད་རྣམས་གསར་ངེས་ཆེ་བ་དང་༔

སྙིགས་མའི་འགྲོ་ལ་ལྷག་པར་སྙི་བརྩེ་བས༔ མཐའ་དབུས་ཐམས་ཅད་གཏེར་གྱིས་བཀང་ནས་བཞག༔ ལས་ཅན་བུ་དང་འཕྲད་པའི་སྨོན་ལམ་བཏབ༔ མ་འོངས་དུས་སུ་རྟོག་གེ་ཐ་སྙད་མཁན༔ སྒོམ་ཆེན་ལ་སོགས་ཕྱོགས་དང་རིས་དྲེགས་ཅན༔ རང་ཆེ་འབྱིན་ཅིང་གཏེར་ལ་རྩོད་ན་ཡང་༔ སྙིགས་མའི་ཆོས་བྱེད་ཕལ་ཆེར་གཏེར་གྱིས་འདྲེན༔ ཟབ་ལ་ཁ་ཚང་མ་བསྒྲིབས་མཐའ་རྒྱས་ཤིང་༔ གདམས་པ་སྣ་རེས་གང་ཟག་གྲོལ་བར་ངེས༔ ཞེས་དང་། ང་ཡིས་བོད་ཁམས་གཏེར་གྱིས་བཀང་ནས་ཡོད༔ དངོས་གྲུབ་འདོད་ན་གཏེར་གནས་ཀུན་ནས་ལོངས༔ ཞེས་སོགས་གསུངས་པ་ལྟར། སྤྱིར་དེང་སང་བཀའ་མ་རྣམས་དུས་དབང་གིས་རིམ་པ་ནུབ་ཅིང་ཚོང་དུས་ཀྱི་འོ་མ་ལྟར་འཆལ་བའི་ཚེ། ལས་འཕྲོ་སད་པའི་སྐལ་ལྡན་རྣམས་གཏེར་ཆོས་ཀྱི་སྒོ་ནས་རང་དང་གཞན་གྱི་དོན་རླབས་པོ་ཆེ་དཀའ་བ་མེད་པར་འགྲུབ་པར་འགྱུར་བ་དང་། སྙིགས་མའི་སྐྱེ་རྒུ་རྣམས་ཀྱི་ཕན་བདེའི་རྩ་ལག་དུས་བབས་ཀྱི་ཟབ་གཏེར་ལ་རག་ལས་པར་དགོངས་ནས། སྔར་བཤད་པ་ལྟར་གངས་རིའི་ཕྲེང་བས་བསྐོར་བའི་ལྗོངས་འདིའི་རི་བྲག་མཚོ་གསུམ་གཙུག་ལག་ཁང་སོགས་སུ་ཆོས་ནོར་དམ་རྫས་ལ་སོགས་པའི་གཏེར་ཁ་བསམ་གྱིས་མི་ཁྱབ་པ་སྦས།

ཁྱད་པར་གཏེར་དུ་བཞུགས་པའི་ཟབ་ཆོས་ཕལ་མོ་ཆེ་མཁའ་འགྲོ་བརྡའི་ཡི་གེས་བཅིངས་པར་མཛད་པ་སྟེ། གསང་རྒྱུད་ལས། མཁའ་འགྲོ་བརྡ་ལ་བརྟེན་པ་སྟེ། །བརྡ་དང་བརྡ་ཡི་ལེན་ལ་མཁས། །དོན་གྱི་ངོ་བོ་བརྡ་ལ་སྦྱོར། །མཁའ་འགྲོ་བརྡ་ཡི་སྲོག་ཅན་ནོ། །ཞེས་དང་། གཞན་ཡང་། གཏེར་ཡིག་སྤྲུལ་པའི་སྐུ་ཡིན་ཏེ། །སྒྲ་ཚིག་གོ་བ་གསུང་ཡང་ཡིན། །ཞེས་གསུངས་པ་ལྟར། བརྡ་ལ་བརྟེན་པའི་མཁའ་འགྲོའི་ཡི་གེ་ནི་དེ་དང་སྐལ་མཉམ་གྱི་གང་ཟག་ལས་གཞན་གྱིས་ཁྲོལ་མི་སྲིད་པས། གཏེར་ཡིག་སྤྲུལ་པའི་སྐུ་རྡོ་རྗེའི་གཟུགས་རྣམ་པ་ཐམས་ཅད་པ་དེ་ཉིད་ལས་འཕྲོ་དང་སྐལ་བར་ལྡན་པའི་གང་ཟག་གིས་གནས་དུས་སྨོན་ལམ་ཟབ་མོའི་རྟེན་འབྲེལ་གྱིས་བརྡའི་དོན་ཁྲོལ་ནས་ཇི་བཞིན་གཏན་ལ་ཕེབས་པ་མཚོན་པའི་ཕྱིར། ཨོ་རྒྱན་སངས་རྒྱས་གཉིས་པའི་བཀའ་རྟགས་ཕྱག་རྒྱའི་རི་མོ་དངོས་ལ་ཐུག་པས་གང་ཟག་ཕལ་པའི་བརྒྱུད་པས་བར་དུ་མ་ཆོད་ཅིང་ཁུངས་བཙུན་པ་དང་། བརྡ་མ་བཅོས། ཚིག་མ་འཁྲུལ། དོན་མ་ནོར་བར་མཁའ་འགྲོ་གསང་བའི་བརྡ་བསྒྱུར་བས་གཞུང་ཟབ་ཅིང་བྱིན་རླབས་ཆེ་བ་དང་། སྐལ་བ་དང་མི་ལྡན་པའི་གང་ཟག་བློ་ཇི་ལྟར་སྒྲིན་ཀྱང་དམུས་ལོང་གིས་གླང་ཆེན་དཔྱད་པ་ལྟར་ཕྱོགས་

ཙམ་ཡང་བརྟག་མི་བཟོད་པས་གཏེར་སྟོན་སྐྱེས་བུ་ཉིད་ཕལ་པའི་སྤྱོད་ཡུལ་ལས་འདས་པར་ཡིད་ཆེས་པ་ཡིན་ནོ། །དེ་ལྟར་ངོ་མཚར་རྨད་དུ་བྱུང་བ་ཟབ་མོ་གཏེར་གྱི་ཕྱོགས་ལའང་སྤྱིར་རྩ་གསུམ་ཆོས་སྐྱོང་ལས་རབ་འབྱམས་དང་བཅས་པའི་གདམས་སྐོར་བསམ་གྱིས་མི་ཁྱབ་ཅིང་། བྱེ་བྲག་སྤུ་གྲི་རྣམ་གསུམ་གཙོ་བོར་གྱུར་པའི་རྡོ་རྗེ་ཕུར་པའི་བཀའ་སྲོལ་མཐའ་ཡས་པ་ཞིག་བྱོན་པ་ལས། འདིར་ནི་འབྲོག་བན་ཁྱེའུ་ཆུང་ལོ་ཙཱའི་གདམས་སྐལ་དུ་གནང་བ་ཟབ་གསང་མཁའ་འགྲོའི་སྙིང་ཐིག་གི་ཆོས་སྐོར་ཏེ། དེའང་ལོ་ཙཱ་བ་འདི་ཉིད་སྔོན་གྱི་དུས་ན་རིག་འཛིན་ནུས་ལྡན་རྡོ་རྗེའི་སྐུར་བཞེངས་ནས་བསྐལ་བཟང་གི་སངས་རྒྱས་སྟོང་རྩར་དབང་བསྐུར་ཞིང་བྱིན་རླབས་མཛད། དེ་ནས་རིམ་བཞིན་འཕགས་ཡུལ་དུ་དགྲ་བཅོམ་ཤཱ་རིའི་བུ། ཆོས་བློན་ཀྲྀཥྞ་འཛིན། སློབ་དཔོན་ཧཱུྃ་ཀཱ་ར་སོགས་གང་འདུལ་གྱི་བཀོད་པ་ངོམས་ཤིང་། བོད་ལྗོངས་མུན་པའི་གླིང་འདིར་སྤྲུལ་པའི་མཁན་སློབ་ཆོས་རྒྱལ་རྣམས་ཀྱིས་བསྟན་པའི་ཉིན་བྱེད་གསར་དུ་འདྲེན་པར་མཛད་པའི་ཚེ་འབངས་རིགས་ཉེར་ལྔའི་ནང་ཚན་ལས་ལོ་ཙཱ་བའི་ཚུལ་དུ་བསྟན་ཏེ། གདུང་རུས་འབྲོག་མ་ཡིན་ཅིང་སྐུ་གཞོན་ནུའི་དུས་ནས་ལོ་ཙཱ་མཁྱེན་པས་མཚན་ཡང་དེ་

ལྟར་གྲགས། སློབ་དཔོན་གྱི་དྲུང་དུ་གསང་སྔགས་ཀྱི་ཆོས་ཐམས་ཅད་ལ་མཁས་པར་བསླབ་ས། རྟེན་ཁྱིམ་པ་སྟེ་སྔགས་འཆང་གོས་དཀར་ལྕང་ལོ་ཅན་གྱི་ཚུལ་དུ་བཞུགས། བླ་རྫོགས་ཐུགས་གསུམ་སོགས་སྤྱི་དང་ཁྱད་པར་གྱི་གདམས་སྐོར་ཐུན་མོང་མ་ཡིན་པ་རྣམས་རྫོགས་པར་གསན། ཕྲིན་ལས་ཕུར་པའི་བཀའ་བབས་ཏེ་མོན་ཁ་ནེ་རིང་སེང་གེ་རྫོང་དུ་བསྒྲུབ་པས་གྲུབ་པའི་མཚན་མ་མངོན་དུ་བརྙེས། རྫུ་འཕྲུལ་གྱིས་ནམ་མཁའི་བྱ་རྣམས་ཀྱང་ལྟ་སྟངས་དང་སྡིག་མཛུབ་ཙམ་གྱིས་འགུགས་པར་ནུས། གུ་རུའི་ཐུགས་ཀྱི་སྲས་སུ་གྱུར་ཏེ་དགོངས་པ་གུ་རུ་ཉིད་དང་མཉམ་པར་བསྔགས། སྤྲུལ་པའི་རྣམ་རོལ་དུ་མས་སྙིགས་དུས་ཀྱི་གདུལ་བྱ་དཔག་ཏུ་མེད་པའི་དོན་འབྱུང་བར་ལུང་བསྟན་ཅིང་ངོ་མཚར་གནས་དང་ཆོས་ནོར་དམ་རྫས་བགྲངས་ཀྱིས་མི་ལང་བའི་གཉེར་གཏད། མཁའ་འགྲོ་མཚོ་རྒྱལ་དང་ལྷན་ཅིག་གདམས་སྐོར་རྣམས་དྷཱ་ཀི་གསང་བའི་བརྡ་རིས་སུ་བཏབ་ནས་ཁྱད་པར་འཕགས་པའི་དམ་རྫས་རྣམས་དང་བཅས་བོད་དང་བོད་ཆེན་པོའི་ལྗོངས་ཀྱི་མཐའ་དབུས་གཏེར་གནས་ཀུན་རྒྱས་བཏབ་པར་མཛད་པ་བཞིན། དུས་ལ་བབས་པའི་ཚེ་ན་འགྲོ་འདུལ་སྤྲུལ་པའི་

སྒྱུ་འཕྲུལ་རིམ་པར་བྱོན་པས་ཟབ་མོའི་གསང་མཛོད་བརྟོལ་ཏེ་བསྟན་འགྲོའི་ཕན་བདེ་མཆོག་ཏུ་སྤེལ་བར་མཛད་ཅིང་། ཁྱད་པར་དེང་སང་སྙིགས་མའི་སྟོབས་ཤུགས་ཤིན་ཏུ་བདོ་ཞིང་བོད་ཁམས་ཀྱི་སྐྱེ་འགྲོར་མཐའ་མིའི་དཔུང་གིས་ལྷག་པར་འཚེ་བའི་སྐབས་འདིར་སློབ་དཔོན་ཆེན་པོའི་ཕྲིན་ལས་ཀྱི་ཕོ་ཉ་བར་ཁྱེའུ་ཆུང་ལོ་ཙཱ་བ་ཉིད་བསམ་བཞིན་དུ་མིའི་སྲིད་པ་ཉེ་བར་བཟུང་བ་ནི་གཏེར་ཆེན་བདུད་འཇོམས་གླིང་པ་བསྩལ་ཏེ། དེ་ལ་རིག་འཛིན་ཆེན་པོ་འདི་ནི་སངས་རྒྱས་བླ་མ་དང་ཨོ་རྒྱན་གླིང་པ་སོགས་སྔོན་གྱི་གཏེར་རྙིང་བཅུ་ཕྲག་ཙམ་ནས་ཤིན་ཏུ་གསལ་བར་ལུང་བསྟན་པ་ལྟར། སྨད་མདོ་ཁམས་སྒང་དྲུག་ལས་ཤར་མི་ཉག་ར་བ་སྒང་གི་སའི་ཐིག་ལེ་ཝ་ཞབས་སེང་གེ་བྲག་དཀར་རམ་འདྲ་ལྕགས་ཁུང་ཞེས་པའི་གནས་སུ། ཡབ་གནུབས་ཀྱི་རུས་བརྒྱུད་ཨ་བརྟན་ཞེས་པ་དང་། ཡུམ་དམུ་ཚ་བོ་རྫོགས་ཞེས་པའི་སྲས་སུ་རབ་བྱུང་བཅུ་བཞི་པའི་ཤིང་མོ་ལུག་གི་ལོ་ཆོ་འཕྲུལ་ཟླ་བའི་ཡར་ཚེས་བཅུ་ལ་སྐུ་འཁྲུངས། བལྟམས་པའི་ཚེ་ཁ་བ་མེ་ཏོག་གི་དབྱངས་ཅན་བབས་པ་དང་སྦྲ་ཁང་ལ་འཇའ་ཚོན་གྱི་ལྡིང་གུར་ཕུབ་པ་སོགས་ངོ་མཚར་བའི་ལྟས་མང་པོ་བྱུང་། དེ་ནས་དགུང་ལོ་གསུམ་གྱི་བར་དུ་དཔའ་བོ་མཁའ་འགྲོའི་ཚོགས་ཀྱིས་སྲུང་སྐྱོབ་མེལ་ཚེ་བྱེད་པ་དང་། སྐབས་འགར་

རྒྱལ་བསེན་དམ་སྲིས་བར་ཆད་རྩོམ་པ་སོགས་གཟིགས་སྣང་སྣ་ཚོགས་པ་ཤར། སྐབས་ཤིག་མཁའ་འགྲོ་མ་བསྐྱེད་ཡུམ་མའི་ཚུལ་ཅན་ཞིག་གིས་བྱང་ཕྱོགས་བཻ་ཌཱུརྱ་སྣང་བའི་ཞིང་ཁམས་སུ་ཁྲིད་པར་མཛད་པ་ན། དེར་བཅོམ་ལྡན་འདས་གདོན་མི་ཟ་བའི་རྒྱལ་པོ་ཞེས་བྱ་བ་དང་མཇལ་ཏེ་དབང་དང་བྱིན་རླབས་བསྩལ་ནས་རྒྱལ་ཚབ་ཏུ་མངའ་གསོལ་བའི་སྣང་ཉམས་བྱུང་བ་ལ་བརྟེན་ནས་སྔོན་གནས་ཀྱི་བག་ཆགས་སད་ཅིང་ལྷ་སྔགས་ཏིང་ངེ་འཛིན་མང་པོ་རྗེས་སུ་དྲན་པའི་མཐུས་བར་ཆད་ཀྱི་དཔུང་ལས་རྒྱལ་བར་གྱུར། སྐུ་རྩེད་ཀྱི་དུས་སུ་ཆུ་ཀླུང་ཆེན་པོ་རྦ་རླབས་རབ་ཏུ་འཁྲུགས་པའང་ཐོགས་མེད་དུ་བརྒལ་བ་དང་། རི་ཆེན་པོ་ཁོང་གསེང་ཐལ་མ་འབིགས་པ་སོགས་རྫུ་འཕྲུལ་ཡ་མ་ཟུང་དུ་བསྟན་ཅིང་། མནལ་ལམ་གང་བྱུང་ཐོག་ཏུ་ཁེལ་བའི་ལུང་བསྟན་ཤ་སྟག་བསྩལ་བ་ལ་བརྟེན་ཡབ་ཡུམ་གཉིས་ཀྱིས་མཆོག་ཏུ་གཅེས་པར་འཛིན་ཅིང་ཧ་ཅང་རྒོད་བག་ཆེ་བས་རྟག་པར་བསྲུང་དགོས་པ་བྱུང་། དགུང་ལོ་བཅུ་པའི་ཐོག་ཞང་པོས་བུ་ཟླར་ཁྲིད་ནས་དེའི་ཁྱིམ་དུ་རེ་ཞིག་བཞུགས་དགོས་པ་བྱུང་བའི་ཚེ་ཕྱུགས་འཚོ་བ་སོགས་ལས་ཀ་སྣ་ཚོགས་བཀོལ་བ་ན། སྐྱེར་མདས་ཁྲོ་ཟངས་ལྕགས་ཡོབ་མཁར་གཞོང་ཐམས་ཅད་

ཁྲོལ་མར་ཕུག་ཅིང་བཅག་གྲུམ་ཤ་སྟག་བྱས་པས། ཞང་པོ་དང་སྲུ་མོ་རྣམས་ཀྱིས་ན་རེ། བུ་འདི་ཐེའུ་རང་གིས་རྒྱུད་བརླམ་པ་ཡིན་འདུག་པ་ཡི་གེ་ཞིག་བསླབ་ན་བནྡྷེ་རེ་ཨེ་འོང་། དེ་མིན་མི་སྐྱ་བྱས་ན་མི་ཕུང་རང་བརླག་བྱེད་མཁན་ཞིག་འོང་ངེས་རེད་ཟེར་ནས་ཆོས་སློབ་པར་གཏོང་རྩིས་བྱས། དེར་མཁའ་འགྲོ་མས་ལུང་བསྟན་པ་བཞིན་ཚེ་རབས་ལས་ཀྱིས་འབྲེལ་བའི་བླ་མ་བྱང་སེམས་སྒྲིབ་པ་རྣམ་སེལ་གྱི་སྤྲུལ་པར་གྲགས་པ་མཉྫུའི་མཚན་ཅན་གྱི་ཞབས་ལ་བཏུད་དེ་ཆོས་སྒོར་བཞུགས། འབྲི་ཀློག་སོགས་བརྡ་བསྟན་པ་ཙམ་གྱིས་ཐོགས་མེད་དུ་མཁྱེན། རིམ་པར་སྔོན་འགྲོའི་ཁྲིད་བཀའ་དང་། གོང་མ་རིག་འཛིན་བདུད་འདུལ་རྡོ་རྗེའི་གཏེར་ཆོས་སྐོར་གྱི་དབང་ལུང་རྣམས་གསན་ཏེ་གྲོ་ལོད་ལ་ཉམས་བཞེས་མཛད་པས་དངོས་གྲུབ་ཀྱི་མཚན་མ་ཐོབ། གུ་རུ་རིན་པོ་ཆེའི་ཞལ་དངོས་སུ་བསྟན་ནས་རྫོགས་པ་ཆེན་པོའི་ལྟ་བ་ངོ་སྤྲོད་ཅིང་འབྱུང་འགྱུར་གྱི་ལུང་བསྟན་དང་བསླབ་བྱ་མང་པོ་བསྩལ། གཞན་སྐུ་ཚེ་དེ་ཉིད་ལ་སྦྱངས་བརྩོན་གྱི་ངལ་བ་ལ་གཏན་ནས་མ་ལྟོས་པར་སྔོན་གོམས་ཀྱི་ལས་འཕྲོ་རིམ་པར་སད་ཅིང་། དུས་སྐབས་ཅི་རིགས་པར་ཡུམ་ཆེན་ཁྲོས་མ། ས་ར་ཧ། རིག་འཛིན་བརྒྱད། རྗེ་འབངས་ལོ་པཎ། ཀློང་ཆེན་རབ་འབྱམས་སོགས་ཀྱི་ཡེ་ཤེས་སྒྱུ་མའི་སྐུས་ཡང་ཡང་རྗེས་

སུ་བཟུང་བས་ཟབ་རྒྱས་ཀྱི་ཆོས་ཚུལ་རྣམས་ལ་མཁྱེན་རབ་ཀྱི་རྩལ་ཁ་ཕྱོགས་མེད་དུ་འབར། ཀ་དག་ལྷུན་གྲུབ་ཀྱི་ལམ་ལ་སྒོམ་མེད་ཆུ་བོའི་རྒྱུན་གྱི་ཏིང་ངེ་འཛིན་རྣལ་འབྱོར་དུ་མཛད་པས་རྟོགས་པ་ཀློང་དུ་གྱུར་ནས་ཆོས་ཉིད་ཀྱི་བདེན་པ་མངོན་སུམ་གཟིགས་ཏེ་རིག་པ་ཚད་ལ་ཕེབས་པའི་སྟོབས་ཀྱིས་དག་པའི་སྣང་བ་འབྱམས་སུ་ཀླས་པས་སྐད་ཅིག་རེའི་ཚེ་ནའང་གྲངས་མེད་པའི་ཞིང་ཁམས་སུ་རྒྱལ་བའི་རྫུ་འཕྲུལ་གྱི་བཀོད་པ་དཔག་ཏུ་མེད་པ་གཟིགས། རིགས་གསུམ་མགོན་པོས་སྐུ་གསུང་ཐུགས་ཀྱི་ཕྱག་རྒྱས་དབང་བསྐུར་ཞིང་དོན་བརྒྱུད་ཀྱི་བྱིན་རླབས་འཕོས་པའི་རྟེན་འབྲེལ་ལས་ཆོས་ཉིད་ནམ་མཁའ་མཛོད་ཀྱི་བརྡ་རང་ཤུགས་སུ་གྲོལ་ཏེ་དགོངས་པའི་གཏེར་ཁ་ཀློང་ནས་རྡོལ། གུ་རུ་ཡབ་ཡུམ་དང་མཁའ་འགྲོ་མ་རྣམས་ཀྱིས་ལུང་གིས་སྐབས་ཕྱེས་ཏེ་ཡང་ཡང་རྗེས་སུ་བསྐུལ་བ་ལྟར། དགུང་ལོ་ཉེར་ལྔ་བཞེས་པ་ས་མོ་ལུག་གི་ལོ་ཆུ་སྟོད་ཟླ་བའི་ཚེས་བཅུའི་ཉིན་སྨར་གྱི་རྦ་གཏེར་བྲག་ནས་བྱེ་མ་ཨ་ཀྲོང་ལས་གྲུབ་པའི་སྒྲོལ་མའི་སྐུ་དང་། ས་ར་ཧའི་ཕྱག་ཕྲེང་། གཏེར་གྱི་ཁ་བྱང་རྣམས་དང་། སླར་ཡང་དངུལ་རྒོད་ཅེས་པའི་བྲག་ནས་གཏེར་གྱི་ཡང་བྱང་བཅས་བཏོན་པར་མཛད། དེར་གསལ་བ་ལྟར་མགོ་ཟླ་བའི་ཤེས་རབ་ཕྱོགས་ཀྱི་ཚེས་

བཅུའི་སྔ་དྲོར་གསེར་སྨད་རྔ་རོལ་སྟག་རྩེའི་གཡས་ལོགས། ཤྭ་བྲག་རྡོ་རྗེ་ཅན་ནས་ཟབ་གཏེར་བཞེས་པའི་སྐབས་སུ། གཏེར་སྲུང་མཁའ་འགྲོ་མས་དངོས་སུ་གླུ་བླངས་པ་གཏེར་གྲོགས་སོགས་ཀྱིས་ཀྱང་ཐོས་ཤིང་། བྲག་གཡང་ཤིན་ཏུ་གཟར་བ་མེ་ལོང་གི་ངོས་ལྟར་འཇམ་པའི་ངོས་འཇའ་འོད་ཀྱི་ཐེམ་སྐས་གསལ་བ་ལས་ཐོགས་མེད་དུ་བྱོན་ནས་མཐོ་དམན་གཞུ་འདོམས་ལྔ་ཙམ་གྱི་སར་གཏེར་སྒོ་བྲག་སྲུབ་ཟླ་གམ་དབྱིབས་སུ་ཡོད་པ་ཉིད་ཕྱེས་པའི་ནང་ནས། ཕུར་པ་བདུད་འཇོམས་གནམ་ལྕགས་སྤུ་གྲིའི་ཐུགས་སྒྲུབ་གསང་རྒྱ་ཅན་གྱིས་གཙོས་རྩ་གསུམ་ཆོས་སྐྱོང་དང་བཅས་པའི་གདམས་སྐོར་གཏེར་སྒྲོམ་བདུན་ཕྲག་ཙམ་བཞེས་ཏེ་ཤུལ་དུ་གཏེར་ཚབ་བཅུག་ནས་གཏེར་སྒོ་སླར་རྒྱས་བཏབ་པར་མཛད། དེའི་ཚེ་ཁ་བྱང་དུ། འཇའ་འོད་འབར་བ་བརྒྱུད་འཛིན་གྲོལ་བའི་ལྟས༔ མེ་ཏོག་འབབས་པ་བསོད་ནམས་རྒྱས་པའི་མཚན༔ དྲི་བཟང་འཐུལ་བ་བྱིན་རླབས་མ་ཡལ་ལྟས༔ ཉི་འོད་འབར་ན་འཛམ་གླིང་ཁྱབ་པའི་རྟགས༔ སྲོག་སྐྱོབ་ཐུབ་ན་འགྲོ་བའི་སྡུག་བསྔལ་སེལ༔ དགོས་ལྔ་འཛོམ་ན་ལེགས་པའི་ཡོན་ཏན་ལྡན༔ རྟེན་འབྲེལ་ཀུན་འཛོམ་ཕྱོགས་ལས་རྣམ་པར་རྒྱལ༔ ཅེས་གསུངས་པའི་ལྟས་མཚན་རྣམས་ཀུན་གྱི་མཐུན་སྣང་དུ་

གྲུབ་པ་བྱུང་། དེ་སྐབས་ཡུལ་གྱི་མི་དྲག་སྐྱ་སེར་འགའ་ཞིག་ན་རེ། བྱང་ཐང་དགུན་ཟླའི་ནང་དུ་རི་ཀླུང་མེད་པར་འཇའ་ཚོན་གྱིས་གང་ལུགས་ལ་བལྟས་ན། ངེད་ཀྱི་གཞིས་བདག་ལ་མ་རུངས་པ་ཞིག་བྱས་པ་འདྲ་བས་ཁྱོད་ཀྱིས་གཏེར་ནས་གང་བཏོན་ཐམས་ཅད་ངེད་ལ་མ་སྤྲད་ན་དམག་གི་ལས་ཀ་ཞིག་མི་བྱེད་རེ་ཟེར་བ་བྱུང་ཚེ། ཨོ་རྒྱན་ཆེན་པོས། ལས་འཕྲོ་ང་ཡི་གཏེར་དང་འཕྲད་པའི་ཚེ༔ རྒྱ་བོད་ལྷ་འདྲེ་མ་རུང་ཐམས་ཅད་འཚོགས༔ ལེགས་པ་ལྟར་བསྟན་ཉེས་པ་སྣ་ཚོགས་གཏོང་༔ ཀི་སྒྲ་དི་རིར་ཧབ་ཤ་བྱེད་པ་འབྱུང་༔ ཞེས་གསུངས་པ་ལྟར་ལོས་ཡིན། ཁྱོད་ཚོས་དམག་དྲོངས་ལ་ཤོག་དང་བཟོ་ཐབས་ལེགས་པ་ཡོད་གསུངས་ནས་རྟོག་མེད་དུ་བཞུགས་པས་མཐར་དགྲ་གྱོད་རང་ཡལ་དུ་སོང་། བར་སྐབས་རྒིས་ལི་ཚང་ཞེས་པ་ཞིག་གིས་སྦྱིན་བདག་ཞུས་ཏེ་རེ་ཞིག་དེར་བཞུགས་པས་བླ་དྭགས་སུ་རྒིས་ལི་གཏེར་སྟོན་ཞེས་གྲགས། སྐུ་གཞོན་པའི་སྐབས་འདིར་སྦས་པའི་རྣལ་འབྱོར་ཞིག་པོའི་ཚུལ་དུ་བཞུགས་ཤིང་ཡབ་ཡུམ་མཁོས་སྟབས་ཞན་པ་སོགས་ཀྱིས་བརྙས་བཅོས་བྱེད་པའང་འགའ་ཞིག་བྱུང་ཞིང་། ཁྱད་པར་བྱང་འབྲོག་ཨར་ཇག་མང་པོས་ཉིད་དང་གྲྭ་སློབ་

སྦྱིན་བདག་རྣམས་ལ་གནོད་འཚེ་སྐྱེལ་བར། གཉོམ་ཆུང་ངང་དུ་བཞུགས་པས་ས་མི་ཟིན་པར་དགོངས་ནས་དགོངས་ནས་བཀའ་སྲུང་ཤན་རྒོད་ཆེན་པོ་དང་གཟའ་བདུད་དུག་གི་སྤུ་གྲི་བསྐུལ་བས་གནོད་བྱེད་མཁན་རྣམས་འགའ་ཞིག་གི་མིག་ལོང་། ལ་ལ་སྨྱོས། ཕལ་ཆེར་སྙིང་ཁྲག་ཁ་ནས་སྐྱུགས་ཏེ་ཤི། ཁྱིམ་འཁོར་མི་ཕྱུགས་རྣམས་ཁ་ཕུང་རྗེས་མེད་དུ་སོང་བས། དེ་ནས་བཟུང་རྒིས་ལི་གཏེར་སྟོན་ཚང་ལ་དགྲ་མ་བྱེད་མིན་པ་མཐུ་རྒྱག་འོང་ཞེས་གླེང་སྟེ་མཐུའི་གྲགས་པས་ཡུལ་ཕྱོགས་དེ་དག་ཁྱབ། རིམ་བཞིན་སྨར་མདོ་བཀྲ་ཤིས་དགའ་འཁྱིལ་དང་། འབྲོས་ཕུག་མཁའ་འགྲོའི་འདུ་གླིང་དུ་བྱོན་ནས་དེར་གདན་མཛད་ནས་བཞུགས། སྐབས་ཤིག་མཁའ་འགྲོ་མ་རྣམས་ཀྱིས་ཟངས་མདོག་དཔལ་རིར་གདན་དྲངས་ནས་ལོ་བཅུ་གཉིས་སུ་བཞུགས་ཏེ་གུ་རུ་རིན་པོ་ཆེ་ལས་མདོ་སྔགས་རྒྱུད་སྡེ་རྒྱ་མཚོའི་སྨིན་གྲོལ་གསན་ཅིང་རྒྱལ་ཚབ་ཏུ་མངའ་གསོལ་བའི་ཐུགས་ཉམས་ཤར། གཞན་ཡང་ཨོ་རྒྱན་རང་བྱུང་། བསིལ་བ་ཚལ། རི་བོ་རྩེ་ལྔ། སིནྡྷུའི་གྲོང་ཁྱེར། གྲུ་འཛིན། ལྕང་ལོ་ཅན། གཡུ་ལོ་བཀོད་སོགས་ས་སྤྱོད་དང་མཁའ་སྤྱོད་ཀྱི་ཞིང་ཁམས་མང་པོར་བྱོན་ཏེ་རིག་འཛིན་དྷཱ་ཀི་རྣམས་ལས་ཆོས་གསན་པ་དང་། དཔའ་བོ་མཁའ་འགྲོ་ཚོགས་དང་

ལྷན་དུ་ཚོགས་ཀྱི་འཁོར་ལོའི་འདུ་བ་ལ་ལོངས་སྤྱོད་པ་སོགས་གཟིགས་སྣང་མཐའ་ཡས། དེ་ནས་ལུང་བྱང་ལྟར་ས་མོ་གླང་གི་ལོར་ཟབ་གཏེར་གྱི་བཀའ་རྒྱ་ཁྲོལ་ཞིང་ཆོས་བདག་མཁའ་འགྲོའི་ཚོགས་ཀྱིས་བསྐུལ་མ་བྱུང་བ་བཞིན། ཐོག་མར་ཕུར་པའི་ཤོག་སེར་ཞལ་ཕྱེས་ཏེ་གཏན་ལ་ཕབ་པ་ན། ས་ཕྱོགས་ཐམས་ཅད་འུར་སྒྲ་དང་བཅས་ཏེ་རབ་ཏུ་གཡོས་ཤིང་འབྲུག་སྒྲ་དྲག་པོ་ལྡིར། ཁ་བ་མེ་ཏོག་གི་དབྱིབས་ཅན་བབས། བཞུགས་གནས་ཐམསཅད་འཇའ་ཚོན་གྱི་དྲྭ་བས་སྦྲེལ་ཞིང་། རླུང་འཚུབས་ཤིསག་གཡོས་པས་ཤོག་སེར་གཏན་ལ་ཕབ་ཟིན་གྱི་དཔེ་ལྡེབ་ཁ་ཤས་ཡོད་པ་རྣམས་ཕྱོགས་ཀུན་ཏུ་ཁྱེར་བ་སོགས། ནག་ཕྱོགས་ཐུལ་བ་དང་། བརྒྱུད་འཛིན་བཀྲ་ཤིས་ཤིང་གྲོལ་བ་ཐོབ་པ་དང་། ཟབ་ཆོས་ཕྱོགས་ཀུན་ཏུ་ཁྱབ་ཅིང་དར་བའི་རྟེན་འབྲེལ་གྱི་མཚན་མ་མཆོག་ཏུ་གྱུར། གཏེར་གནས་དེ་ཉིད་ནས་ལྷན་ཅིག་ཏུ་བཞེས་པའི་རྩ་གསུམ་ཆོས་སྐྱོང་གི་གདམས་སྐོར་གཞན་རྣམས་ཀྱང་རིམ་བཞིན་གཏན་ལ་ཕབ་པར་མཛད། དེ་ཙ་ན་ཕྱོགས་ཀྱི་སྐྱེས་ཆེན་དུ་མས་ཀྱང་ཆོས་དང་གང་ཟག་རྩོད་བྲལ་དུ་ཡོངས་སུ་བསྔགས་ཤིང་ཉིན་མོར་བྱེད་པའི་དཀྱིལ་འཁོར་ཆུ་འཛིན་གྱི་སྒྲིབ་གཡོགས་ལས་གྲོལ་བ་བཞིན་སྙན་གྲགས་ཕྱོགས་ཀུན་ཏུ་ཁྱབ།

བཀའ་བབས་ལུང་ཟིན་གྱི་ཆོས་བདག་རྣམས་ཀྱིས་གཙོས་སློབ་མའི་འདུ་བ་ཡང་དྲི་ལྡན་གྱི་པདྨོའི་བུང་བའི་ཚོགས་བཞིན་རྒྱུན་ཆད་མེད་པར་འདུས་པ་ལ་སྨིན་གྲོལ་གྱི་བདུད་རྩི་འཆང་སྤེལ་ཁོ་ནས་དུས་འདས། མཆོག་དམན་སུ་ལའང་ངོ་སྲུང་ཚུལ་འཆོས་ཀྱི་ཕྱོགས་ཙམ་མི་གནང་བར་གང་ཤར་ཐུག་ཕྲད་བྱུང་རྒྱལ་གྱི་སྤྱོད་པ་བསྐྱངས་པས་ཀུན་གྱིས་བག་ཚ་བའི་གནས་སུ་བྱེད། ལུང་ཟིན་གྱི་ལས་རྒྱ་མ་དག་ལས་བྱང་ཆུབ་སེམས་དཔའི་སྤྲུལ་པའི་མྱུ་གུ་འགའ་ཞིག་བྱོན་པ་ཡང་བསྟན་འགྲོའི་གསོས་སུ་སྨན་ངེས་པ་ཅན་ཤ་སྟག་བྱུང་། ཁ་བྱང་ལྟར་ན། མདོ་སྨད་གཡུང་དྲུང་ལྕགས་རྩེ། ལྕགས་རི་ཅན། ཨ་མྱེ་དྲིལ་དཀར། རྨ་ཡུལ་ཨོ་རྒྱན་པད་ཞྭ། བྲག་དཀར་སྤྲེལ་རྫོང་། སྤུ་བོ་དྭགས་རི་གསང་བ་གཉན་པོ། སྤུ་རི་དྭགས་རྫོང་ཕུག །ཀོང་སྨད་རྒྱལ་སེང་འདམ། ལྷ་རི་ཐོད་དཀར། བསམ་ཡས་མཆོད་རྟེན་དཀར་པོ། གཙང་གི་ཆུ་ལུང་བྲག་དམར་ཏེ། དེ་རྣམས་སུ་རང་སྐལ་གྱི་ཟབ་གཏེར་ཇི་སྙེད་པ་ཞིག་མཆིས་པར་སྣང་ཡང་ཉམས་སུ་ལེན་པའི་གང་ཟག་གིས་ནུས་ན་རྩ་བའི་ཟབ་ཆོས་གདམས་སྐོར་འདི་ཙམ་གྱིས་དོན་འགྲུབ་པར་དགོངས་ནས་འབྱིན་པའི་ཐུགས་རྩོལ་མ་གནང་། ཁྱད་པར་སྦས་ཡུལ་པདྨ་བཀོད་ཀྱི་འཆི་མེད་ཡང་གསང་གི་གནས་སྒོ་འབྱེད་པ་

པོར་གུ་རུ་ཡབ་ཡུམ་གྱིས་ཡང་ནས་ཡང་དུ་བསྔགས་ཤིང་རྗེས་སུ་བསྐུལ་བ་ལྟར་གནས་དེར་ཆིབས་ཞལ་བསྒྱུར་བར་བཞེད་ནའང་། སྐབས་དེའི་སྐྱེ་འགྲོ་སྤྱི་མཐུན་གྱི་བསོད་ནམས་དང་སྐལ་བའི་ཉེར་ལེན་གྱིས་རེ་ཞིག་རྟེན་འབྲེལ་འཕྲོ་ཅན་དུ་གྱུར། ཐུགས་སྲས་ཞལ་སློབ་ཀྱི་རིགས་ཀྱང་བརྒྱུད་འཛིན་གཞན་དོན་ལ་དབང་བའི་གཏེར་སྟོན་བཅུ་ཕྲག །ཚེ་གཅིག་ལ་ཟུང་འཇུག་འཇའ་ལུས་འགྲུབ་པའི་སྐྱེས་བུ་བཅུ་གསུམ། གྲུབ་པ་བརྙེས་པའི་རིག་འཛིན་བརྒྱ། ཐུན་མོང་གི་དངོས་གྲུབ་ཐོབ་པ་སྟོང་། ཐར་པའི་ལམ་སྣེ་ཟིན་པ་ཁྲི། འབྲེལ་བ་ཐོབ་པ་འབུམ་ཕྲག་མང་པོ་འབྱུང་བར་གསུངས་ཤིང་། ཟབ་ཆོས་ཀྱི་ཕྲིན་ལས་ཀྱང་མཐའ་ནས་མཐའ་རུ་རྒྱས་པར་འགྱུར་བའི་ལུང་དོན་རྣམས་མངོན་དུ་གྱུར། དེར་སྐུ་དངོས་ཀྱི་གདུལ་བྱ་དེ་ཙམ་དུ་དགོངས་ཏེ་ཐུགས་སྲས་བུ་སློབ་ཀྱི་ཚོགས་ལ་ད་ནི་མཐའ་དམག་ཀླ་ཀློའི་སྡེ་དཔུང་རིམ་བཞིན་དབུས་སུ་ལུད་དེ་བདེ་བའི་གོ་སྐབས་ཉུང་བས་ན། གུ་རུའི་སྦས་པའི་ཡུལ་ལྗོངས་སུ་བསྐྱོད་རན་པ་ཡིན་པས་ཁྱེད་རྣམས་གནས་དེར་གསོལ་བ་ཐོབ་ལ་སོང་། ང་ཡང་དེར་འགྲོ་བ་ཡིན་པས་ཁྱེད་ཅག་གི་སྔོན་དུ་ང་རྒན་པོ་སླེབས་པ་ཞིག་བྱེད་ནས་འོང་གསུངས་ཏེ་དགུང་ལོ་དྲུག་ཅུ་རྩ་དགུ་པ་ཆུ་ཡོས་ཟླ་༡༡ཚེས་༨ལ་བསྙུན་གྱི་རྣམ་པ་སོགས་མི་

མངའ་བར་པདྨ་འོད་ཀྱི་ཕོ་བྲང་ཆེན་པོར་གཤེགས་པའི་སྐབས་སྒྲ་དང་འོད་དང་མེ་ཏོག་གི་ཆར་སོགས་ངོ་མཚར་བའི་ཆོ་འཕྲུལ་མཐའ་ཡས་ཤིང་། ཁྱད་པར་སྐུ་གདུང་ཡང་འོད་དུ་ཡལ་བའི་ལྷག་མ་བྱིས་པ་ལོ་བརྒྱད་ཀྱི་ཚོད་ཙམ་ལུས་པ་ཉིད་ཞུགས་སུ་ཕུལ་བས་གདུང་ཆེན་ལྔ་དང་རིང་བསྲེལ་དུ་མའི་ཕུང་པོར་གྱུར་ཏོ། །དེ་ལྟར་གཏེར་འབྱིན་གྲུབ་པའི་སྤྱི་རྗེ་མཆོག་ལས་ཉིད་ཀྱི་ཟབ་གཏེར་ཡོངས་སུ་རྫོགས་པའི་སྨིན་གྲོལ་རྒྱབ་བརྟེན་དང་བཅས་པ་གདམས་ངག་བུམ་པ་གང་བྱོས་སུ་བདག་གི་བླ་མ་འགྱུར་མེད་ངེས་དོན་དབང་པོས་གསན་པ་ཡིན་ཏེ། འཁོར་ལོའི་མགོན་པོ་འདི་ནི་སངས་རྒྱས་སྨན་གྱི་བླ་མའི་རྣམ་འཕྲུལ་དུ་ཡོངས་སུ་གྲགས་པ་ལྟར་བྱང་ཆུབ་སེམས་དཔའི་ངང་ཚུལ་མ་སྦས་ལྷུག་པར་སྟོན་ཅིང་སུམ་ལྡན་རྡོ་རྗེ་འཛིན་པ་མཁས་གྲུབ་ཆེན་པོའི་གོ་སར་བཞུགས། གཏེར་ཆེན་བླ་མའི་ནང་ཐུགས་ཀྱི་སྲས་ཐུན་མོང་མ་ཡིན་པར་གྱུར་ཅིང་ཁྱད་པར་གྱི་བརྒྱུད་གཏད་པ་བཞིན་ཕྱིས་སུ་ཁོ་བོ་ཅག་ལ་གདམས་སྐོར་རྣམས་ཀྱི་སྨིན་གྲོལ་བསྩལ་བའི་ཆེ། ཉིད་རིགས་བདག་གཏེར་ཆེན་ཆོས་ཀྱི་རྒྱལ་པོའི་སྐྱེ་སྲིད་འཁྲུལ་པའི་དྲི་མ་དང་བྲལ་བ་ལགས་ན་སྐུ་ལུས་ཀྱི་བཀོད་པ་ན་བསྒྲེས་གཞོན་གོ་བརྗེས་པ་ཙམ་ལས་དོན་བརྒྱུད་ཀྱི་དགོངས་པ་ལ་འཕོ་འགྱུར་བྲི་གང་མི་མངའ་བ་ནི་ཞུ་མ་དགོས། ཚིག་བརྒྱུད་ཀྱི་བྱིན་རླབས་ཉམས་མེད་པར་མཆོད་པའི་ཚུལ་དུ་ཕུལ་ཟིན་པ་ལགས་པས་ཐུགས་ཀྱི་བཞེད་པ་སྐོང་བར་མཛོད་ཅེས་གསུངས། ཨ་ཏི་ཀ་དག་ལྷུན་

གྲུབ་ཀྱི་ལམ་ལས་ཉམས་སྣང་གོང་འཕེལ་རིག་འཛིན་གཉིས་པའི་ས་ལ་གཤེགས་ཤིང་། རྡོ་རྗེ་ཕུར་པའི་རྣལ་འབྱོར་ལ་བརྟེན་ནས་སྐུ་ཚེ་དང་མཛད་ཕྲིན་བར་ཆད་མེད་པར་མཐར་ཕྱིན་པ་ཡིན་ནོ། །དེ་ལྟ་ན་རྒྱལ་བ་ཐམས་ཅད་ཀྱི་ཕྲིན་ལས་གཅིག་ཏུ་ལས་གཅིག་ཏུ་བསྡུས་པའི་རང་གཟུགས་དཔལ་ཆེན་རྡོ་རྗེ་གཞོན་ནུ་ཞེས་སྲིད་ཞིའི་ཁམས་ན་ཆེ་བཙན་འགྲན་ཟླ་དང་བྲལ་བ་འདི་ཉིད། མཆོག་ཐུན་མོང་གི་དངོས་གྲུབ་རྣམ་པ་གཉིས་བདེ་བླག་ཏུ་སྩོལ་བ་དང་། སྙིགས་མའི་དུས་འདིར་བྱང་ཆུབ་སྒྲུབ་པ་ལ་ཉེ་བར་འཚེ་བའི་བདུད་བགེགས་དམ་སྲི་རྒྱ་འདྲེ་འགོང་པོ་མཐའ་དམག་གི་གཡུལ་ངོ་ལ་སོགས་པ་འཇོམས་པ་ལ་ཡི་དམ་གཞན་ལས་ཀྱང་ཆེས་ཁྱད་པར་དུ་འཕགས་པའི་རྒྱུ་མཚན་གྱིས། རྒྱ་བོད་མཁས་གྲུབ་ཕལ་མོ་ཆེས་ཐུགས་དམ་ལྷག་པའི་ལྷ་ཐུན་མོང་མ་ཡིན་པར་བསྙེན་ཅིང་ཡོངས་སུ་གྲགས་པ་སྟེ། སློབ་དཔོན་ཆེན་པོའི་ཞལ་གདམས་སུ། སྤྱིར་ཡི་དམ་གྱི་གཙོ་བོ་རྡོ་རྗེ་ཕུར་བ་ལ་བྱ༔ ཡི་དམ་གཞན་བསྒྲུབ་ཀྱང་རྡོ་རྗེ་གཞོན་ནུ་སྲུང་མའི་ཚུལ་དུ་བསྒྲུབ༔ ཅེས་དང་། འདི་ཉིད་ཀྱི་ཁ་བྱང་ལས། སྤྱིར་ནི་ལྔ་བདོ་དུས་ཀྱི་ཐ་མའི་ཚེ༔ ཕྲིན་ལས་ལས་ཀྱི་གདུལ་བྱ་དུས་བབས་པས༔ དཔལ་ཆེན་རྡོ་རྗེ་གཞོན་ནུ་མ་གཏོགས་པ༔ ལྷ་གཞན་བསྒྲུབ་ཀྱང་ལམ་དུ་འགྲོ་དཀའ་ཞིང་༔

གྲུབ་འབྲས་མངོན་དུ་འགྱུར་བ་ཤིན་ཏུ་དཀོན༔ བདག་འདྲ་རིག་འཛིན་པདྨ་ཐོད་ཕྲེང་ངས༔ གངས་ཅན་བོད་ཀྱི་ས་གནས་ཐམས་ཅད་དུ༔ ཕུར་རྒྱུད་འདྲ་མིན་བརྒྱ་ཙམ་གཏེར་དུ་སྦས༔ སྙིང་པོའི་ཡང་ཞུན་བཅུད་དུ་དྲིལ་བ་ཡི༔ གདམས་པའི་མཆོག་གྱུར་འདི་ལས་ཡོད་རེ་ཀན༔ ཉམས་སུ་ལེན་པའི་ལས་ཅན་སྐལ་ལྡན་རྣམས༔ འབྲེལ་བ་ཙམ་གྱིས་རིག་འཛིན་གྲལ་དུ་འཁོད༔ འདི་ཉིད་སྒྲུབ་རྒྱུན་འཛིན་པའི་ཡུལ་དེ་རུ༔ བདེ་ལེགས་ཀུན་འབྱུང་ཕྱོགས་ལས་རྣམ་རྒྱལ་འགྱུར༔ ཞེས་གསུངས་པ་ལྟར། ཁྱད་པར་གཏེར་ཁ་འདི་ལ་རྡོ་རྗེ་ཕུར་པའི་གདམས་སྐོར་གྱི་བཀའ་བབས་པའི་གནད་ཀྱིས་ཐལ་འབྱིན་རྣམ་བཞིའི་ལམ་གྱི་རིམ་པ་མཐའ་དག་ཁ་ཚང་ཞིང་དོན་འདྲིལ་བ་དང་། མན་ངག་ལས་ཚོགས་དང་བཅས་པ་གཏེར་ཁ་གཞན་ལ་མ་གྲགས་པའི་ངོ་མཚར་ཁྱད་ཆོས་ཀྱི་ཆེ་བ་དུ་མ་དང་ལྡན་པའི་ཕྱིར། ཟབ་ཆོས་འདི་ལྟ་བུ་དང་མཇལ་བ་ནི་དབུལ་པོའི་ལག་ཏུ་ཡིད་བཞིན་གྱི་ནོར་བུ་རྙེད་པ་ལས་ཀྱང་འཚེང་ཆེ་བ་ཡིན་པས་བརྒྱུད་འཛིན་ལས་ཅན་གྱི་གང་ཟག་རྣམས་ནས་རབ་ཏུ་གཅེས་པའི་ནོར་གྱི་དབྱིག་ཏུ་བཟུང་བར་རིགས་པ་ཡིན་ནོ། །ཕྲིན་ལས་རོལ་པའི་གདམས་སྲོལ་དབང་གི་རྒྱལ། །རྒྱ་བོད་གྲུབ་རིག་གཙུག་གིས་ཡོངས་བསྙེན་ནས། །བསྟན་པའི་རྒྱལ་མཚན་བརྟན་པར་བསྒྲེངས་པའི་གཏམ། །དུས་ཀྱི་མཐར་ཡང་

རྣ་བའི་བདུད་རྩིར་བྱས། །ཁུངས་ལྡན་ཆོས་འབྱུང་ཀུན་གསལ་སྒེག་མོའི་མཁར། །ཡོངས་བརྟེན་ལོ་རྒྱུས་ངག་ཚིག་རྟ་ལྗང་ཅན། །དོན་བཟང་ངོ་མཚར་འཛུམ་ཕྲེང་སྤྲོས་པ་ན། །བློ་གསལ་ཡིད་ཀྱི་པད་ཚལ་འབྱེད་མིན་ནམ། །རྣམ་དཔྱོད་གོ་སྐབས་ཡངས་པའི་དོ་ར་རུ། །ལེགས་བཤད་གསར་པའི་ཟློས་གར་ཅི་བསྒྱུར་བ། །དེ་ཀུན་བསྟན་འགྲོར་སྨན་པའི་ས་བོན་ཏེ། །ཡ་མཚན་འདོད་པ་འཇོ་བའི་དཔལ་དུ་ཤོག །དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ལོ་རྒྱུས་ཆོས་ཀྱི་བྱུང་ཚུལ་མདོ་ཙམ་སྤྲོས་པ་སྐལ་བཟང་རྣ་བའི་དགའ་སྟོན་ཅེས་བྱ་བ་འདི་ནི། རྗེས་སུ་འཇུག་པའི་སྐྱེ་བོ་རྣམས་ཡིད་ཆེས་ངེས་ཤེས་ཀྱི་སྒོ་འབྱེད་པའི་སླད་དུ་དམིགས་ཏེ། ལྷ་རིགས་ཀྱི་བནྡྷེ་རིག་སྔགས་འཆང་བ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེས་རང་ལོ་སུམ་ཅུ་རྩ་གཉིས་པའི་ཐོག་ཏུ་སོན་པ་ན་ཚོད་ལྡན་གྱི་ལོ་དབོ་ཉ་བའི་ཡར་ཚེས་བཅོ་ལྔ་ལ་མཁན་ལྗོངས་ཕུན་ཚོགས་དགའ་ཚལ་གྱི་བསྟི་གནས་སུ་ལེགས་པར་སྦྱར་བ་སྟེ། འདིས་ཀྱང་ཟབ་གཏེར་རྡོ་རྗེ་ཕུར་བུའི་ཆོས་ཚུལ་འདི་ཉིད་ཕྱོགས་སུ་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་གྲོང་ཁྱེར་གསུམ་གྱི་ཡིད་ཅན་མཐའ་དག་བཅོམ་ལྡན་འདས་ཤྲཱི་བཛྲ་ཀུ་མཱ་རའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱམངྒ་ལ་ཛ་ཡནྟུ།། །།

དཔལ་རྡོ་རྗེ་ཕུར་བུ་ཐུགས་ཀྱི་སྒྲུབ་པ་གསང་བའི་རྒྱ་ཅན་བདུད་འཇོམས་གནམ་ལྕགས་སྤུ་གྲིའི་ལས་བྱང་ཁྲག་འཐུང་མངོན་པར་རོལ་པའི་དགའ་སྟོན།

༄༅། །དཔལ་རྡོ་རྗེ་ཕུར་བུ་ཐུགས་ཀྱི་སྒྲུབ་པ་གསང་བའི་རྒྱ་ཅན་བདུད་འཇོམས་གནམ་ལྕགས་སྤུ་གྲིའི་ལས་བྱང་ཁྲག་འཐུང་མངོན་པར་རོལ་པའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་ཐུགས་ཀྱི་སྒྲུབ་པ་གསང་བའི་རྒྱ་ཅན་བདུད་འཇོམས་གནམ་ལྕགས་སྤུ་གྲིའི་ལས་བྱང་ཁྲག་འཐུང་མངོན་པར་རོལ་པའི་དགའ་སྟོན་ཅེས་བྱ་བ། ཁྱབ་བདག་བླ་མ་རྡོ་རྗེ་ཐོད་ཕྲེང་རྩལ་དང་བདུད་འདུལ་ཧེ་རུ་ཀ་གཉིས་སུ་མེད་པའི་ཞབས་ལ་གུས་པས་ཕྱག་འཚལ་ལོ། །མི་བཟད་འཇིགས་རུང་སྒེག་པའི་ལང་ཚོར་གཏུམ་ཆེན་ཉི་མ་འབུམ་གྱི་གཟི་འབར་དྲག་པོའི་གར་གྱི་ས་གསུམ་གཡོ། །རབ་ཏུ་གཤེ་བའི་ང་རོའི་གད་རྒྱང་འབྲུག་སྒྲ་སྟོང་ལྡིར་རིག་སྔགས་ཐོག་མདའ་བདུད་སྡེའི་ཀླད་པ་ཚལ་པར་འགེམས། །ཟབ་གསལ་གཉིས་མེད་སྙིང་རྗེའི་ཡེ་ཤེས་ཟུང་འཇུག་

བདེ་ཆེན་ཉམས་བརྒྱར་རོལ་བས་མཁའ་ཁྱབ་ཞི་བའི་དབྱིངས་སུ་སྦྱོར། །མ་ལུས་རྒྱལ་བའི་ཕྲིན་ལས་རང་གཟུགས་ཧེ་རུ་ཀ་དཔལ་དཔའ་བོ་ཆེན་པོས་གྲུབ་པའི་གནས་ལ་དབུགས་འབྱིན་མཛོད། །དེ་ཡི་ཕྲིན་ལས་རིག་མཆོག་འབུམ་སྡེའི་བཅུད། །གསང་བའི་རྒྱ་ཅན་མཁའ་འགྲོའི་སྙིང་གི་ཁྲག །བདུད་འཇོམས་གནམ་ལྕགས་སྤུ་གྲིར་འབྲེལ་བའི་གཞུང་། །ཁྲག་འཐུང་རོལ་པའི་དགའ་སྟོན་འདིར་སྤྲོ་ན། །བདུད་འདུལ་ཐོད་ཕྲེང་རྩལ་འཆང་ཡབ་དང་ཡུམ། །གསང་འཛིན་ཌཱ་ཀི་སྲུང་མར་བཅས་རྣམས་ཀྱིས། །དགྱེས་པའི་འཛུམ་གྱིས་གནང་བའི་སྐབས་ཕྱེས་ལ། །བར་ཆད་

གཡུལ་ལས་རྒྱལ་བའི་ཤིས་པ་སྩོལ། །[དེ་ཡང་གང་ཞིག་རྩ་བའི་དཀྱིལ་འཁོར་དུ་དབང་བསྐུར་བ་ཚུལ་བཞིན་ཐོབ་ཅིང་སྤྱི་དང་བྱེ་བྲག་གི་དམ་ཚིག་ལ་ཡང་དག་པར་གནས་པའི་རྣལ་འབྱོར་པ་དངོས་གྲུབ་རྣམ་པ་གཉིས་ཀྱི་ཆེད་དུ་ལྷག་པར་མོས་པ་བརྟན་པོ་དོན་དུ་གཉེར་བ་རྣམས་ཀྱིས་ནི་ལྷག་པའི་ལྷ་མཆོག་འདི་ཁོ་ན་བསྙེན་ཅིང་སྒྲུབ་པའི་ཚུལ་ན་ནན་ཏན་དུ་འབད་པའི་བྱ་སྟེ། རྒྱལ་བ་ཐམས་ཅད་ཀྱི་ཕྲིན་ལས་ནུས་པ་སྟོབས་སུ་གྱུར་པའི་རང་གཟུགས་ལས་སྙིགས་དུས་ཀྱི་བར་ཆད་བདུད་དགྲ་དམ་སྲིའི་དཔུང་རྣམས་སྐད་ཅིག་ཉིད་ལ་འདུལ་ཞིང་མཆོག་ཐུན་གྱི་དངོས་གྲུབ་བདེ་བླག་ཏུ་སྩོལ་བ་ལ་ཡི་དམ་གཞན་ལས་ཀྱང་ཐུགས་རྗེའི་རྩལ་ལྷག་པར་དུ་མྱུར་བའི་ཕྱིར་རྒྱ་བོད་རིག་འཛིན་གྲུབ་པ་ཡོངས་ཀྱི་ཐུགས་དམ་གསང་བའི་ལྷ་གཅིག་ཉིད་དུ་ངེས་པ་ཡིན་ནོ། །དེས་ན་དེའི་ཕྲིན་ལས་ཀྱི་རིམ་པ་ཉམས་སུ་ལེན་པར་འདོད་པས་ཐོག་མར་དུར་ཁྲོད་དམ་མཚན་ཉིད་ཚང་ཞིང་ཡིད་དང་མཐུན་པའི་གནས་སུ་སྒྲུབ་པའི་ཁང་པ་བྱི་དོར་ལེགས་པར་བྱས་ལ་སྤྱན་གཟིགས་སྣ་ཚོགས་པས་མཛེས་པར་བརྒྱན། དམ་ཚིག་གི་བྲིས་སྐུ་སོགས་བྱིན་རླབས་ཅན་གྱི་རྟེན་ཁྱད་པར་ཅན་བཀྲམ་པའི་མདུན་དུ་ཕྱི་ནང་གསང་བའི་དམ་རྫས་མཆོད་པའི་དངོས་པོ་རྣམས་ཚར་དུ་དངར་བ་དང་། གཞན་ཡང་ཚོགས་པ་དང་གཏོར་མའི་ཡོ་བྱད་རོལ་མོའི་ཁྱད་པར་སོགས་ཉེ་བར་མཁོ་བའི་ཆ་རྐྱེན་ཐམས་ཅད་མ་ཚང་བ་མེད་པར་འདུ་བྱས་ལ། ཆོ་ག་དངོས་ཀྱི་ལས་རིམ་ལ་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ལ། སྐྱབས་འགྲོ་སེམས་བསྐྱེད་ཚོགས་བསགས་དང་། །བགེགས་བསྐྲད་

མཚམས་བཅད་ཉེས་ལྟུང་བཤགས། །བརྡ་སྒོ་དབྱེ་ཞིང་ཕྱག་འཚལ། །དམ་བཟུང་བྱིན་དབང་མཆོད་བརླབ་བོ། །ཞེས་རྣམ་གྲངས་བཅུ་གཅིག་ཏུ་ཡོད་པ་ལས།] [དང་པོ་སྐྱབས་སུ་འགྲོ་བ་ནི།] ཕྱོགས་བཅུ་དུས་གསུམ་གྱི་སྐྱབས་ཡུལ་བླ་མ་རིག་འཛིན་རྒྱལ་བ་སྲས་དང་བཅས་པ་ཐམས་ཅད་དཔལ་ཆེན་རྗེ་གཞོན་ནུའི་དཀྱིལ་འཁོར་གྱི་འཁོར་ལོའི་རྣམ་པར་རོལ་པ་མདུན་གྱི་ནམ་མཁར་བཛྲ་ས་མཱ་ཛཿ[ས་མཁས་ཁྱབ་ཏུ་སད་པར་མོས་ལ། མཆོག་ཏུ་གུས་ཤིང་གདུང་བས་མངོན་པར་བཏུད་དེ།] ན་མོ༔ བླ་མ་རིག་འཛིན་ཡི་དམ་མཁའ་འགྲོའི་ཚོགས༔ སངས་རྒྱས་ཆོས་མཆོག་འཕགས་པའི་དགེ་འདུན་ལ༔ འདི་བཟུང་བླ་མེད་བྱང་ཆུབ་མ་ཐོབ་བར༔ བདག་སོགས་རྩེ་གཅིག་གུས་པས་སྐྱབས་སུ་མཆི༔ [ཞེས་ལན་གསུམ་གྱིས་སྐྱབས་སུ་འགྲོ།] [གཉིས་པ་སེམས་བསྐྱེད་པ་ནི། མཐའ་ཡས་པའི་འགྲོ་བ་ཐམས་ཅད་བྱང་ཆུབ་ཆེན་པོར་སྒྲོལ་འདོད་ཀྱི་ལྷག་བསམ་བརྟན་པོས།] ན་མོ༔ རྒྱུད་དྲུག་འཁོར་བར་འཁྱམས་པའི་ཕ་མ་རྣམས༔ མ་ལུས་རྣམ་མཁྱེན་སངས་རྒྱས་ཐོབ་བྱའི་ཕྱིར༔ བདག་གིས་ཡང་གསང་བླ་མེད་བསྒྲུབ་ནས་ནི༔ འགྲོ་རྣམས་སངས་རྒྱས་ལམ་འགོད་སེམས་བསྐྱེད་དོ༔ [ཞེས་ལན་གསུམ་གྱིས་སེམས་བསྐྱེད།] [གསུམ་པ་ཚོགས་བསགས་པ་ནི། སྐྱབས་ཡུལ་དུ་སད་པ་ཉིད་ཚོགས་ཀྱི་ཞིང་བླ་ན་མེད་པར་ཤེས་པས།] རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་

ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བསྒྲངས་པའི་དགེ་བ་རྣམས། །བསྡུས་ནས་བྱང་ཆུབ་མཆོག་ཏུ་བསྔོ། །[ཞེས་ཚོགས་བསགས་པའི་མཐར།] ཛཿཧཱུཾ་བཾ་ཧོཿས་སྐྱབས་ཡུལ་དགྱེས་པ་ཆེན་པོས་འོད་དུ་ཞུ་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་[བསམ་མོ། །][བཞི་པ་བགེགས་བསྐྲད་པ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ [ཅེས་པའི་སྔགས་ཀྱི་སྒྲ་གདངས་ཀྱིས་སད་པས།] བདག་ཉིད་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་རང་སྣང་གི་ཡུམ་དང་བཅས་པ་དུར་ཁྲོད་དྲག་པོའི་རྒྱན་ཐམས་ཅད་རྫོགས་ཤིང་གཟི་བརྗིད་དུས་མཐའི་མེ་ལྟར་འབར་བའི་སྐུར་གྱུར་[པར་མོས་པའི་ང་རྒྱལ་བསྐྱེད་དེ། བགེགས་ཀྱི་གཏོར་མ།] ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུཾ་ཚིནྡྷ་ཚིནྡྷ་ཧཱུཾ་ཕཊ་[ཀྱིས་བསང་།] ཨོཾ་སྭ་བྷྭ་ཝ་ཤུངྔྷཿསརྦ་དྷརྨཱཿསྭབྷཱ་ཝ་ཤུངྔྷོཉཧཾཿ[གིས་སྦྱང་།] སྟོང་པའི་

ངང་ལས་བྷྲཱུཾ་ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བལྟས་ལ། ཨོཾ་ཨཱཿཧཱུཾ། ཞེས་བརླབས། སརྦ་བྷུ་ཏ་ཨ་ཀརྵ་ཡ་ཛཿ[ས་མགྲོན་བཀུག] ། སརྦ་བིགྷྣཱན་ན་མ༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞེ་དཾ་བ་ལིནྟེ་སྭཱཧྭ། [ཞེས་ལན་གསུམ་གྱིས་བསྔོས་ལ། བཀའ་བསྒོ་བ་ནི།] ཧཱུཾ་ཧཱུཾ་ཧཱུཾ༔ ང་ནི་དཔལ་ཆེན་རྡོ་རྗེ་གཞོན་ནུ་ཆེ༔ གདོད་ནས་མ་བཅོས་ཆོས་དབྱིངས་ཡེ་ཤེས་ལྷ༔ གཞོམ་གཞིག་བྲལ་བ་རྡོ་རྗེ་སྲིན་པོའི་སྐུ༔ འཁོར་འདས་ཡོངས་ཁྱབ་འཁོར་འདས་ཡོངས་ཀྱི་བདག༔ སྣང་སྲིད་འདི་ན་དྲེགས་ཅན་གང་སུ་དག༔ འཇིགས་བྲལ་རྡོ་རྗེ་གཞོན་ནུའི་བཀའ་ལ་ཉོན༔ ཧཱུཾ༔ གསང་བ་བླ་ན་མེད་པའི་དཀྱིལ་འཁོར་འདིར༔ བལྟ་བར་མི་དབང་སྐལ་མེད་གདོན་བགེགས་ཚོགས༔ ལས་ཀྱི་ལན་ཆགས་གླུད་གཏོར་འདིས་འཁོར་གྱི༔ སོ་སོ་རང་རང་གནས་སུ་འགྲོ་བར་གྱིས༔ བཀའ་ལས་འདས་ན་མགོ་བོ་ཚལ་པར་འགེམས༔ དམ་ལས་འདས་ན་ལུས་སེམས་བསྲེག་པར་འགྱུར༔ དེ་བས་ད་ལྟ་ཉིད་དུ་ཕྱིར་དེངས་ཤིག༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ༔ ཨོཾ་སུམྦྷ་ནི་སུམྦྷ་ནི་ཧཱུཾ༔ གྲྀཧྞ་གྲྀཧྞ་ཧཱུཾ༔ གྲྀཧྞ་པ་ཡ་གྲྀཧྞ་པ་ཡ་ཧཱུཾ༔ ཨ་ན་ཡ་ཧོ༔ བྷ་

ག་ཝན༔ བིདྱ་རཱ་ཛ་ཡ་ཧཱུཾ་ཕཊ༔ [ ཅེས་རབ་ཏུ་འཇིགས་པའི་ཚམ་རྔམས་དྲག་པོ་བཅས་པས་བསྐྲད་དོ། །][ལྔ་པ་མཚམས་བཅད་པ་ནི། རང་གི་ཐུགས་ཀ་ནས་སྤྲོས་པའི་ཁྲོ་ཚོགས་ཕུར་བུ་འབར་བའི་སྤྲིན་གྱིས་ལོག་པར་འདྲེན་པ་ཐམས་ཅད་ཚར་བཅད་དེ་སླར་འདུས་པ་ལས་རྡོ་རྗེ་ཕུར་བུའི་ར་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་ལ།] ཧཱུཾ༔ བདག་ཉིད་དཔལ་ཆེན་རྡོ་རྗེ་གཞོན་ནུ་ཡི༔ སྐུ་ལས་ཁྲོ་ཚོགས་མཚོན་ཆ་མེ་དཔུང་དང་༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོས༔ གཞོམ་བྲལ་སྲ་མཁྲེག་རྡོ་རྗེའི་གུར་ཆེན་པོ༔ ཡེ་ཤེས་འོད་ཟེར་མཚོན་ཐུན་རབ་ཏུ་འཁྲུགས༔ མི་འཇིགས་ནམ་མཁའི་རྡོ་རྗེས་རྒྱས་གདབ་བོ༔ ཨོཾ་ཛྙཱ་ན་པཉྩ་རཀྵ་ཙཀྲ་རཀྵ་རཾ་རཀྵ༔ སྟེང་ཡང་རྡོ་རྗེ་ཕུར་པའི་བླ་བྲེ་ལ༔ རྡོ་རྗེ་ཕུར་པའི་ཐོག་ཆེན་ཆར་ལྟར་འབེབས༔ འོག་ཀྱང་རྡོ་རྗེས་ཕུར་པའི་ས་གཞི་ལ༔ རྡོ་རྗེ་ཕུར་པའི་འདུ་འཕྲོ་མེ་ལྟར་འབར༔ ཕྱོགས་མཚམས་མ་ལུས་རྡོ་རྗེ་ཕུར་པས་གཏམས༔ རྡོ་རྗེ་ཕུར་པའི་ཚྭ་ཚྭ་སྐར་ལྟར་འཁྲུགས༔ སྟེང་འོག་ཕྱོགས་མཚམས་སྲུང་ཟློག་ཁྲོ་བོས་གཏམས༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ཨོཾ་ཧཱུཾ་སརྦ་ཀྲོ་ངྷ་གརྫ་ཧནྡྷ་པ་ཙ་བྷནྡྷ་ཧུ་ལུཏིཥྛ་ཚིནྡྷ་བྷིནྡྷ་སྥོ་ཊ་ཡ་རཀྵ་རཀྵ༔ ཧཱུཾ༔ འཁོར་བ་མྱང་འདས་ཆེན་པོར་ཡོངས་སྒྲོལ་བ༔ ཕྱོགས་རིས་བྲལ་བའི་བྱང་ཆུབ་སེམས་ཀྱི་སྤྲིན༔ མི་ཤིགས་མི་འགྱུར་རང་བྱུང་ལྷུན་གྲུབ་པའི༔

རྡོ་རྗེ་སྲུང་བའི་གུར་ཁང་ཆེན་པོའོ༔ ཨ་ངྷརྨ་ངྷཱ་ཏུ་ཛྙཱ་ན་བྷྲཱུཾ་སྭཱཧཱ༔ བྷྲཱུཾ༔ སྣོད་ཀྱི་འཇིག་རྟེན་འོག་མིན་ཆོས་དབྱིངས་མཁའ༔ བཅུད་ཀྱི་སེམས་ཅན་རྡོ་རྗེ་ཕུར་པའི་ལྷ༔ རང་བྱུང་རྣམ་དག་གཞལ་ཡས་ཆེན་པོ་ལ༔ བགེགས་དང་ལོག་པར་འདྲེན་པའི་མིང་ཡང་མེད༔ ཧཱུཾ་ཨོཾ་སྭཱ་ཨཾ་ཧཱཿབྷྲཱུཾ་བཛྲ་ཀཱི་ལི་ཀཱི་ལ་ཡ་སརྦ་མ་ཧཱ་ཀྲོ་དྷ་ཧཱུཾ་ཕཊ༔ སརྦ་བིགྷྣཱན་མཱ་ར་ཡ་ཕཊ༔ ཨོཾ་བཛྲ་ཙཀྲ་ཏིཀྵྞ་ཀརྨ་ཀཱི་ལ་ཡ་ཛྭ་ལ་རཾ་རཾ༔ བཛྲ་བི་ཤྭ་ཀྲོ་དྷ་ཛྭ་ལ་མཎྜལ་ཧཱུཾ་ཕཊ༔ [ཅེས་མཚམས་གཅོད་དོ། །][དྲུག་པ་བཤགས་པ་བྱ་བ་ནི། བླ་མ་རིག་འཛིན་རྡོ་རྗེ་ཕུར་བུའི་དཀྱིལ་འཁོར་མཁའ་ཁྱབ་ཏུ་སད་པའི་སྤྱན་སྔར་འགྱོད་ཚངས་ཀྱི་བསམ་པ་དྲག་པོས།] ཧཱུཾ༔ བདེ་གཤེགས་རྒྱལ་བ་ཞི་ཁྲོ་ཡོངས་རྫོགས་ལྷ༔ ཆོས་སྐུ་ཁྱབ་བརྡལ་ལོངས་སྐུ་སྤྲིན་ཕུང་འཁྲིགས༔ སྤྲུལ་སྐུ་འགྲོ་དོན་རྫོགས་མཛད་ཕུར་པའི་ལྷ༔ རྡོ་རྗེ་གཞོན་ནུའི་ལྷ་ཚོགས་མ་ལུས་དགོངས༔ ཐོག་མེད་དུས་ནས་འཁོར་འདས་བདག་གཞན་ཚུལ༔ ཆོས་རྣམས་རིས་མེད་མཉམ་རྫོགས་ཀློང་ཡངས་ལ༔ འཁྲུལ་པའི་དབང་གིས་ཐ་དད་སོ་སོར་བཟུང་༔ དོན་དམ་དབྱེར་མེད་ངང་དུ་མཐོལ་ཞིང་བཤགས༔ བཟོད་པར་བཞེས་ནས་ཚངས་པའི་དངོས་གྲུབ་སྩོལ༔ ཨ༔ ཡེ་གཞི་གདོད་མའི་སངས་རྒྱས་ཆོས་ཀྱི་སྐུ༔ ལམ་སྣང་མ་རིག་དབང་གིས་རང་ཞལ་བསྒྲིབས༔

གཟུང་འཛིན་ལམ་གྱི་འཁོར་བའི་འཆིང་བ་ཀུན༔ གནས་ལུགས་ཀ་དག་ཀུན་བཟང་ཀློང་དུ་བཤགས༔ བཛྲ་ས་མ་ཡ་ཤུདྡྷེ་ཨ༔ [ཞེས་དང་ཡི་གེ་བརྒྱ་པ་བཟླའོ། །][བདུན་པ་བརྡ་སྒོ་དབྱེ་བ་ནི། སྣང་སྲིད་ཀ་དག་དབྱིངས་ཀྱི་ཀློང་ན་རང་བཞིན་ལྷུན་གྲུབ་ཡེ་ཤེས་རྡོ་རྗེ་ཕུར་པའི་དཀྱིལ་འཁོར་གདོད་ནས་བཞུགས་པ་ཉིད་ཐབས་དང་བརྡས་མཚོན་ནས་རང་སྣང་གི་འཆར་སྒོ་མཁའ་ཁྱབ་ཏུ་ཕྱེས་པར་བསམ་ཞིང་།] ཧཱུཾ༔ སྣང་བ་ཁྱབ་བརྡལ་ལྷུན་འབྱམས་གཞལ་ཡས་ན༔ རང་རིག་མ་བཅོས་ཀ་དག་ཆོས་ཀྱི་སྐུ༔ རང་གསལ་འགག་མེད་ཡེ་ཤེས་རང་ཤར་བས༔ བརྡལ་ཁྱབ་ཆོས་དབྱིངས་ཡེ་ཤེས་འཆར་སྒོ་ཕྱེས༔ བཛྲ་བྲ་བེ་ཤ་ཡ་ཕཊ༔ [བརྒྱད་པ་བརྡ་ཕྱག་འཚལ་བ་ནི། དེ་ལྟར་རང་རིག་ཡེ་ཤེས་ཀྱི་ལྷ་རང་གསལ་འདུ་འབྲལ་མེད་པར་བཞུགས་པ་ཉིད་མངོན་སུམ་རང་ཞལ་མཇལ་བ་ལ་ངོ་མཚར་བའི་བློས།] ཧཱུཾ༔ རང་བྱུང་ལྷུན་གྲུབ་ཡེ་ཤེས་མེ་རྫོགས་ཤིང་༔ རང་རིག་སྐུ་གསུམ་ཡོངས་རྫོགས་དཀྱིལ་འཁོར་ལྷ༔ མ་རིག་དབང་གིས་རང་དང་ཞལ་མ་མཇལ༔ ད་ནི་རང་ངོ་རང་ཞལ་མཇལ་ཕྱག་འཚལ༔ ཨོཾ་ཨཱཿཧཱུཾ་བཛྲ་ཛྙཱ་ན་ཀུ་མཱ་ར་ན་མོ༔ [དགུ་པ་དམ་བཅའ་བ་ནི། ལྷན་སྐྱེས་ཀྱི་རིག་པ་རྡོ་རྗེ་གཞོན་ནུའི་ངོ་བོ་ཉིད་གློ་བུར་རྟོག་པས་བསྒྲིབས་ནས་མཐུ་རྩལ་མ་འབྱིན་པ་དེ་སྒྲིབ་པའི་སྦུབས་ལས་འཐོན་ཏེ་རྡོ་རྗེ་གསུམ་གྱི་དངོས་གྲུབ་མངོན་དུ་མ་གྱུར་བར་ཐུགས་དམ་འདི་ལས་མི་འདའོ་སྙམ་པས།] ཧཱུཾ༔ ལྷན་སྐྱེས་ཡེ་ཤེས་རྡོ་རྗེ་གཞོན་ནུ་ཆེ༔ གཞན་གྱིས་མ་བཅོས་རང་ངོར་རང་

དམ་བཅས༔ ད་ནི་རང་རིག་ཡེ་ཤེས་རྟོགས་པའི་ལྷ༔ མ་འགྲུབ་བར་དུ་མི་གཏོང་བསྒྲུབ་ལགས་སོ༔ ཨོཾ་བཛྲས་མ་ཡ་ཧཱུཾ༔ [བཅུ་པ་བྱིན་དབབ་པ་ནི། བླ་མ་རིག་འཛིན་དཔལ་ཆེན་ཕུར་བུའི་དཀྱིལ་འཁོར་གྱི་ལྷ་ཚོགས་ནམ་མཁའ་ལ་སྤྲིན་ཕུང་གཏིབས་པ་ལྟར་བྱོན་ཏེ་སྣོད་བཅུད་ཐམས་ཅད་དག་པ་རབ་འབྱམས་ཡེ་ཤེས་ཀྱི་རོལ་པ་ཆེན་པོར་བྱིན་གྱིས་བརླབས་པར་བསམ་ཞིང་།] ཧཱུཾ་ཧཱུཾ་ཧཱུཾ༔ ཁྱབ་བརྡལ་འོག་མིན་ཆོས་དབྱིངས་ཆེན་པོའི་མཁའ༔ གཞོམ་བྲལ་མི་ཤིགས་རྡོ་རྗེའི་གཞལ་ཡས་ནས༔ སྐུ་ལྔ་ལྷུན་གྲུབ་རྡོ་རྗེ་ཕུར་པའི་ལྷ༔ ཡབ་ཡུམ་སྲས་འཁོར་མ་ལུས་བཀའ་སྡོད་བཅས༔ མི་གནས་ཡེ་ཤེས་ངང་ལས་མ་གཡོས་ཀྱང་༔ ཐུགས་རྗེའི་རོལ་པ་གཟུགས་ཀྱི་སྐུར་བཞེངས་ལ༔ གསང་ཆེན་རོལ་པའི་དུར་ཁྲོད་ཆེན་པོ་འདིར་༔ གཤེགས་ནས་དབང་བྱིན་དངོས་གྲུབ་སྩོལ་བ་དང་༔ སྒྲུབ་པའི་གནས་ཡུལ་སྒྲུབ་པོ་སྒྲུབ་རྫས་ལ༔ གཞལ་ཡས་བཀོད་པ་ལྷ་སྔགས་ཆོས་ཉིད་ཀྱི༔ རོལ་པ་ཆེན་པོའི་ངང་དུ་བྱོན་ཕོབ་ཅིག༔ ཨོཾ་ཨཱཿཧཱུཾ་སརྦ་མ་ཧཱ་གུ་རུ་ངྷེ་ཝ་ཌཱ་ཀི་ནཱི་ཧ་རི་ནི་ས་བཛྲ་ཀཱི་ལི་ཀཱི་ལ་ཡ་སརྦ་ཀྲོ་ངྷ་ས་པ་རི་ཝཱ་ར་བཛྲ་ས་མ་ཡ་ཛ་ཛཿཨ་བེ་ཤ་ཡ་ཨ་ཨཱ༔ [ཞེས་སྤོས་དང་རོལ་མོར་བཅས་པས་བྱིན་དབབ་བོ། །][བཅུ་གཅིག་པ་མཆོད་རྫས་བརླབ་པ་ནི། རཾ་ཡཾ་ཁཾ་གིས་བསང་སྦྱང་།] བདག་

གི་ཐུགས་ཀ་ནས་རཾ་ཡཾ་ཁཾ་འཕྲོས་པ་ཡེ་ཤེས་ཀྱི་མེ་རླུང་ཆུར་གྱུར་པས་མཆོད་རྫས་ཀྱི་ཉེས་སྐྱོན་དངོས་འཛིན་བག་ཆགས་དང་བཅས་པ་ཐམས་ཅད་བསྲེག་གཏོར་བཀྲུས་ཏེ་སྟོང་པར་སྦྱངས། སྟོང་པའི་ངང་ལས་གནས་ཁང་འོག་མིན་གསང་ཆེན་རོལ་པའི་གཞལ་མེད་ཁང་ཕུན་སུམ་ཚོགས་པར་ཨ་ལས་རིན་པོ་ཆེ་དང་བྷཉྫ་འབར་བའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུཾ་ཡིག་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་སོགས་ལྷ་རྫས་ཕྱིའི་མཆོད་སྤྲིན་དང་། ཁྲག་གི་མཆོད་ཡོན། དུག་ཆུའི་ཞབས་བསིལ། དབང་པོའི་མེ་ཏོག །ཚིལ་ཆེན་གྱི་དུད་སྤྲིན། ཞུན་ཆེན་གྱི་སྒྲོན་མེ། མཁྲིས་པའི་དྲི་ཆབ། མཱཾ་སའི་ཞལ་ཟས། ཐོད་རྔའི་རོལ་མོ་སོགས་རང་བྱུང་ནང་གི་དམ་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ཁྲག་འཐུང་ཁྲོ་བོའི་དཀྱིལ་འཁོར་གྱི་འཁོར་ལོའི་ཞིང་ཐམས་ཅད་དུ་ཁྱབ་པར་འཆར་བས་ནམ་མཁའི་མཐའ་ཀླས་པར་གང་བར་[བསམ་ལ།] ཨོཾ་བཛྲ་ཨརྒྷཾ་ཨཱཿཧཱུཾ༔ [དེ་བཞིན་དུ་སྦྱར་ཏེ།] པཱདྱཾ་[ནས།] ཤཔྡའི་[བར་དང་།] རཱུ་པ་[ནས།] དྷརྨ་དྷཱ་ཏུའི་[བར་གྱིས་ཕྱི་ནང་གི་མཆོད་པ་རྣམས་བརླབས། བདུད་རྩི་བསང་སྦྱང་།] སྟོང་པའི་ངང་ལས་སྨན་སྣོད་བྷནྡྷ་འབར་བའ་གཞལ་ཡས་ཁང་དུ་བཅུད་རྫས་རིགས་ལྔ་ཡབ་

ཡུམ་སྙོམས་པར་ཞུགས་ཤིང་ཞུ་བ་ལས་བྱང་སེམས་དཀར་དམར་རོ་གཅིག་པའི་རང་བཞིན་དམ་ཚིག་དང་ཡེ་ཤེས་གཉིས་སུ་མེད་པའི་བདུད་རྩིའི་རྒྱ་མཚོས་ཡོངས་སུ་གང་བར་[བསམ་ལ།] ཨོཾ་ཨཱཿཧཱུཾ་མ་ཧཱ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ༔ [ཞེས་ལན་བདུན་བརྗོད། རཀྟ་བསང་སྦྱང་།] སྟོང་པའི་ངང་ལས་དམར་གྱི་དུང་ཆེན་འབར་བའི་སྣོད་དུ་ར་ལས་ཁམས་གསུམ་འཁོར་བའི་བག་ཆགས་ཀྱི་ཞེན་སྣང་རྩད་ནས་བཅད་པའི་ཆགས་མེད་རཀྟའི་རྒྱ་མཚོ་རྦ་རླབས་མཁའ་ལ་འཕྱོ་ཞིང་གཡོ་བ་ཟེགས་མ་ལས་ཞིང་ཆེན་གྱི་ལྷུ་དུམ་འཁྲུགས་པར་བསམ་ལ། ཨོཾ་ཨཱཿཧཱུཾ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋཱ༔ [ཞེས་ལན་བདུན། གཏོར་མ་བསང་སྦྱང་།] སྟོང་པའི་ངང་ལས་ལྕང་ལོར་བཅས་པའི་ཀ་པཱ་ལ་སྟོང་གསུམ་དང་མཉམ་པའི་ནང་དུ་གཏོར་མ་ཤ་ལྔའི་རང་བཞིན་ལྷུན་པོ་ལྟར་སྤུངས་པ་ལས་འདོད་ཡོན་གྱི་ལྷ་མོ་གྲངས་མེད་པར་འཕྲོ་བས་ཟག་པ་མེད་པའི་མཆོད་སྤྲིན་རྒྱུན་མི་འཆད་པར་སྤྲོ་བའི་བདག་ཉིད་ཅན་དུ་གྱུར་[པར་བསམ་ལ།] ཨོཾ་ཨཱཿཧཱུཾ་མ་ཧཱ་མ་ལིཾ་ཏ་ཏེ་ཛྭ་བ་ལིཾ་ཏ་བྷ་ལ་བྷ་ཏི་གུ་ཧྱས་མ་ཡ་ཧཱུཾ་ཧྲཱིཿཋཱ༔ [ ཞེས་ལན་བདུན་དང་།] ཨོཾ་ཧཱུཾ་ཏྲཱཾ་ཧྲཱིཿཨཱཿམཱུཾ་ལཱཾ་མཱཾ་པཱཾ་ཏཱཾ༔ བོ་དྷི་ཙིཏྟ་ག་ཎ་གུ་ཧྱ་ཏ་ན་ག་ན་ས་རྦ་པཱུ་ཛ་ཧོ༔ བཛྲ་སྥ་ར་ཎ་ཁཾ༔ [ཞེས་ཕྱི་ནང་གསང་བའི་འདོད་ཡོན་གྱི་དངོས་པོ་ཐམས་ཅད་ཀུན་ཏུ་བཟང་པོའི་མཆོད་སྤྲོན་གྱི་རོལ་པར་སྤེལ་ལོ། །དེ་དག་ནི་སྔོན་དུ་འགྲོ་བའི་རིམ་

པའོ། །][གཉིས་པ་དངོས་གཞིའི་ལས་རིམ་ལའང་། དམ་ཚིག་གསལ་གདབ་བྱིན་དབང་བསྐུར། །ཡེ་ཤེས་སྤྱན་དྲངས་བཞུགས་སུ་གསོལ། །ཕྱག་མཆོད་བསྟོད་གསོལ་ཛཔ྄་ལ་བསྐུལ། །ཛཔ྄་བཟླས་ཐུན་མཚམས་རྣལ་འབྱོར་རོ། །ཞེས་རྣམ་གྲངས་བཅུ་གཅིག་ཏུ་ཡོད་པ་ལས།] [དང་པོ་དམ་ཚིག་འཁོར་ལོ་གསལ་གདབ་པ་ལ་གཉིས། རྒྱུ་ཏིང་ངེ་འཛིན་གསུམ་གྱིས་ཁོག་དབུབ་པ་དང་། འབྲས་བུ་རྟེན་དང་བརྟེན་པའི་དཀྱིལ་འཁོར་གྱི་བསྐྱེད་པའོ། །སྔ་མ་ལའང་གསུམ་གྱི། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། གནས་ལུགས་སྟོང་པ་ཉིད་ཀྱི་རྡོ་རྗེ་སོ་སོ་རང་རིག་པའི་ཡེ་ཤེས་ཀྱི་ངོ་བོར་འབར་བས་དུག་ལྔའི་རྣམ་རྟོག་དབྱིངས་སུ་བཆད་པ་ཀ་དག་ནམ་མཁའ་ལྟ་བུའི་ངང་ལ་བློ་བཞག་སྟེ།] ཧཱུཾ༔ རྡོ་རྗེ་ཁྲོས་པས་ཞེ་སྡང་མ་ལུས་གཅོད༔ མཚོན་ཆ་སྔོན་པོ་རབ་ཏུ་འབར་བ་ནི༔ མཁའ་དབྱིངས་ཀློང་ནས་ཐིགས་པ་ཧྲིག་གེར་ཤར༔ སྲོག་གི་གོ་རུ་སྟོང་གསལ་ཆུ་རེ་བ༔ སྙིང་གི་དཀྱིལ་དུ་འཛིན་མེད་ལྷན་ནེར་བསྒོམ༔ ཨོཾ་མ་ཧཱ་ཤུནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཏྨ་ཀོཉཧཾ༔ [གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི།] དེ་ལྟར་མ་རྟོགས་པའི་འགྲོ་བ་རྣམས་ཀྱི་འཁྲུལ་པའི་སྡུག་བསྔལ་རྩད་ནས་གཅོད་པར་བྱའོ་སྙམ་དུ་སྙིང་རྗེའི་འོད་ཟེར་ཆེན་པོ་སེམས་ཅན་གྱི་ཁམས་ཐམས་ཅད་དུ་ཁྱབ་པར་སྤྲོ་ཞིང་། ཧཱུཾ༔ སྟོང་ཉིད་སྙིང་རྗེས་མ་རྟོགས་ཀུན་བསྒྲལ་བ༔ མནར་ཅིང་བསད་གཅོད་མནན་པ་མ་ཡིན་ཏེ༔ ཕུང་པོ་འགྱུར་མེད་རྡོ་རྗེར་གཏམས་བྱས་ནས༔ རྣམ་པར་ཤེས་པ་རང་བྱུང་རྡོ་རྗེར་སྒོམ༔ ཡེ་ཡིན་

རྡོ་རྗེ་གཞོན་ནུའི་རིག་འཛིན་རྣམས༔ འཇིགས་བྲལ་སྲིད་པ་རྡོ་རྗེར་སྒྲུབ་མཛོད་ཅིག༔ ཡེ་ནས་སྲིད་པ་རྡོ་རྗེ་ཕུར་པའི་ལྷ༔ ཡེ་ཤེས་ཁྲོ་རྒྱལ་ཆེན་པོ་འགྲུབ་པར་མཛོད༔ མ་ཧཱ་ཤུཛྙཱ་ན་དྷརྨ་དྷཱ་ཏུ་ཨཏྨ་ཀོཉཧཾ༔ [གསུམ་པ་རྒྱུའི་ཏིང་ངེ་འཛིན་ནི། སྟོང་པ་ཉིད་དང་སྙིང་རྗེ་དབྱེར་མེད་པའི་དབྱིངས་ནས་དཀྱིལ་འཁོར་པ་ཐམས་ཅད་འབྱུང་བའི་རྒྱུའམ་ས་བོན་ཧཱུཾ་ཡིག་སྔོན་པོ་ཡེ་ཤེས་ལྔའི་འོད་ཟེར་འབར་བ་ཞིག་ཏུ་ལམ་གྱིས་ཤར་བར་བསམ་ཞིང་།] ཧཱུཾ༔ ཆོས་དབྱིངས་སྐྱེ་བ་མེད་པའི་ངང་ཉིད་ལས༔ ཆོས་ཀུན་མ་ལུས་རང་བྱུང་རྒྱུ་ལས་བྱུང་༔ ཐམས་ཅད་རྒྱུ་ལས་མ་བྱུང་གང་ཡང་མེད༔ རང་རིག་རྒྱུ་ཡི་ངོ་བོ་ཧཱུཾ་དུ་གསལ༔ ཧཱུཾ་ཙིཏྟ་བཛྲ་ས་མ་ཏི་ཛཿཧཱུཾ་བཾ་ཧོ༔ [ཞེས་གསལ་གདབ། གཉིས་པ་ལ་གཉིས་ཀྱི། དང་པོ་རྟེན་འབྱུང་བ་རིམ་བརྩེགས་གཞལ་ཡས་ཁང་དང་བཅས་པ་བསྒོམ་པ་ནི། སྲུང་འཁོར་གྱི་ནང་དུ་རྒྱུའི་ཧཱུཾ་ཡིག་ལས་སོ་སོའི་ས་བོན་རིམ་པར་སྤྲོས་པ་ལས་བྱུང་བའི་འབྱུང་བ་རིམ་བརྩེགས་རི་རབ་ཀྱི་རྩེར་དུར་ཁྲོད་བརྒྱད་མེ་དང་བཅས་པས་བསྐོར་བའི་དབུས་སུ་དཔལ་ཆེན་པོའི་ཕོ་བྲང་ཕྱི་རིན་པོ་ཆེའི་རང་བཞིན་ལ་ནང་ཐོད་མཁར་འབར་བའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ་སྐད་ཅིག་གི་གསལ་བར་བསམ་ཞིང་།] ཧཱུཾ་ཨ༔ ཆོས་སྐུ་སྐྱེ་བ་མེད་པའི་ངང་ཉིད་ལས༔ ཨེ་ལས་ནམ་མཁའ་མཐའ་དབུས་མེད་པར་བརྡལ༔ ཡཾ་ལས་སྟོབས་ལྡན་རླུང་གི་དཀྱིལ་འཁོར་ལྗང་༔ ར་ལས་

རཀྟའི་རྒྱ་མཚོ་རྦ་ཀློང་འཁྲུགས༔ སུཾ་ལས་དབང་ཆེན་མཱཾ་སའི་ས་གཞི་བརྡལ༔ ཀེཾ་ལས་རུས་པའི་རི་རབ་གྲུ་གསུམ་བརྗིད༔ རཾ་ལས་བསྐལ་པའི་མེ་དཔུང་ཕྱོགས་བཅུར་འབར༔ ཨེ་ཡཾ་ར་སུཾ་ཀེཾ་རཾ་སྥ་ར་ཎ་ཕཊ༔ སཾ་ཧ་ར་ཎ་ཧཱུཾ༔ ཧཱུཾ༔ རང་ཉིད་རྡོ་རྗེ་ཆོས་དབྱིངས་ཁྱབ་བརྡལ་ལས། རང་བྱུང་ཡེ་ཤེས་ལྔ་ལྡན་དཀྱིལ་འཁོར་ནི༔ སྣ་ཚོགས་པདྨ་འདབ་སྟོང་བརྡལ་བའི་ལྟེར། རབ་ཡངས་ཨིནྡྲ་ནཱི་ལའི་ས་གཞིའི་ཁྱོན། །ཕྱི་རོལ་ཁོར་ཡུག་འཇིགས་པའི་དུར་ཁྲོདབརྒྱད། །མཆོད་རྟེན་ཤིང་མེ་སྤྲིན་ཆུ་གྲུབ་པ་དང་། །ལྷ་ཀླུ་ཕྱོགས་སྐྱོང་མ་མོ་ཞིང་སྐྱོང་བརྒྱད། །ཤ་ཟ་རོ་ལང་གསར་རྙིང་བམ་རོའི་ཚལ། །དེ་མཐར་གཞོམ་མེད་སྲུང་བའི་གུར་ཆེན་པོ། །མི་ཕྱེད་རབ་འབར་ཕྲེང་བས་ཡོངས་དཀྲིགས་དབུས། །རིན་ཆེན་བཻཌཱུརྱ་ཡི་བྲག་རིའི་སྟེང་། །སྣ་ཚོགས་རྡོ་རྗེའི་ལྟེ་བ་ལ་གནས་པའི། །བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས། །ཐར་པ་ཆེན་པོའི་གཞལ་མེད་ཁང་ཆེན་པོ། །གྲུ་བཞི་སྒོ་བཞི་ཤེལ་གསེར་རཱ་ག་དང་། །མརྒད་བཻཌཱུརྱ་ཡི་རང་བཞིན་ཅན། །ནོར་བུ་རིམ་ལྔའི་རྩིག་སྟོང་རིན་པོ་ཆེའི། །ཕ་གུ་སེར་པོ་དེ་སྟེང་མུ་ཏིག་གི །དྲྭ་བ་དྲྭ་ཕྱེད་ཤར་བུ་མདའ་ཡབ་མཛེས། །ཁང་བརྩེགས་དབུས་ཕྱུར་བུམ་པ་བྲེ་སུལ་དང་། །ཆོས་འཁོར་གདུགས་བཟང་

རྡོ་རྗེ་ནོར་བུའི་ཏོག །སྣ་ཚོགས་རིན་ཆེན་འོད་འཕྲོ་རྨང་གི་གཞིར། །འདོད་སྣམ་དམར་པོ་གཟུངས་མས་མཆོད་སྤྲིན་སྤྲོ། །སྒོ་ཁྱུད་གློ་འབུར་རྟ་བབ་བཞི་བཞིར་ལྡན། །པདྨ་ཆོས་འཁོར་རི་དྭགས་གསེར་གདུག་སྤྲས། །ངོ་མཚར་ཡིད་འོང་རྒྱན་བཀོད་ཚད་མེད་པས། །སྟེང་འོག་ཕྱོགས་རྣམས་ཀུན་ཏུ་མཛེས་བྱས་ནང་། །འབར་བའི་བར་ཁྱམས་རཀྟའི་རྒྱ་མཚོ་འཁྱིལ། །ཕོ་བྲང་ནང་མ་དུར་ཁྲོད་གཞལ་ཡས་ཁང་། །རིམ་གསུམ་ཐོད་པའི་རྩིག་པ་ཁྲག་ཞག་གིས། །སྤྱིན་ཐབས་སྦྱར་ཞིང་གནམ་ལྕགས་གཟེར་གྱིས་གཏམས། །ཤ་ཆེན་འཇིམ་ཞལ་ས་བདག་ཀྭ་གདན་ལ། །ལྷ་ཀླུའི་ཀྭ་གདུང་གཟའ་སྐར་དྲལ་ཕྱམ་ཅན། ཤ་ཆེན་འདོད་སྣམ་ཕ་གུར་ཐོད་པས་དཀྲིགས། །རྒྱུ་རློན་རུས་པའི་དྲྭ་ཕྱེད་ཐོད་ཚལ་དང་། །ལྕང་ལོའི་རྔ་ཡབ་དྲིལ་གཡེར་རླུང་བསྐྱོད་འཕྱང་། །རྐང་ལག་ཤར་བུ་སྒལ་ཚིགས་མདའ་ཡབ་བསྟར། །རུ་དྲའི་ལྤགས་པ་ཐོག་ཕུབ་ཙིཏྟའི་ཏོག །ཉི་ཟླའི་མཐོང་དཀར་ཞིང་ཆེན་ཞིང་ཆུང་དང་། །གཡང་གཞིའི་རྒྱལ་མཚན་འཕན་གདུགས་བླ་བྲེས་བརྒྱན། །སྒོ་ཁྱུད་སྤངས་པའི་སྒོ་བཞི་སྦྲུལ་ནག་གཞིར། །མཁའ་ལྡིང་རུས་སྦལ་ཡ་ཐེམ་མ་ཐེམ་བྱས། །ཆུ་སྲིན་ལྕིབ་ཁུང་ཞིང་གི་སྒོ་གླེགས་སོགས། །རབ་འཇིགས་དུར་ཁྲོད་དྲག་པོའི་ཆོས་རྣམས་ཀུན། །

ཡོངས་རྫོགས་དྭངས་ཤིང་སྒྲིབ་མེད་འོད་འབར་དབུས། །གྲུ་གསུམ་མཐིང་ནག་ཟླ་གམ་རིན་ཆེན་འབར། །འཁོར་ལོ་མུ་ཁྱུད་ཐོད་ཕྲེང་ར་བར་བཅས། །ངོ་མཚར་ཡེ་ཤེས་རྒྱལ་བའི་ཕོ་བྲང་གསལ༔ ཡེ་ནས་རང་བྱུང་ལྷུན་གྲུབ་ཆེན་པོར་བསྒོམ༔ ཧཱུཾ་བྷྲཱུཾ་སྥ་ར་ཎ་ཕཊ༔ སཾ་ཧ་ར་ཎ་ཧཱུཾ༔ [ཞེས་རྟེན་གཞལ་ཡས་ཁང་གི་བཀོད་པ་གསལ་གདབ། གཉིས་པ་བརྟེན་པ་ལྷའི་དཀྱིལ་འཁོར་བསྒོམ་པ་ལ་གསུམ་ལས། དང་པོ་བདག་ཉིད་རྩ་བའི་དཀྱིལ་འཁོར་བསྐྱེད་པ་ནི། སྔར་གྱི་རྒྱུའི་ས་བོན་ལས་འོད་ཟེར་སྤྲོ་བསྡུའི་སྦྱོར་བས་བདག་ཉིད་དཔལ་ཆེན་པོའི་སྐུར་ཡོངས་སུ་རྫོགས་པར་བསམ་ཞིང་།] བཛྲ་མ་ཏྲཾ་རུ་དྲ་ཀྲོ་དྷི་ཏིར་བཾ༔ མ་སུ་རྱ་མཎྜ་ལ༔ ཨ་ཙནྡྲ་མཎྜ་ལ༔ པཾ་པདྨ་མཎྜ་ལ༔ ཧཱུཾ་སྥ་ར་ཎ་ཕཊ༔ སཾ་ཧ་ར་ཎ་ཧཱུཾ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ༔ ཧཱུཾ༔ རང་བྱུང་ཕོ་བྲང་ཨེ་ཡི་གཞལ་ཡས་དབུས༔ པདྨ་ཉི་ཟླ་འབར་བའི་གདན་སྟེང་དུ༔ བདུད་བཞི་རྒྱལ་བསེན་དྲེགས་པ་བསྣོལ་བའི་སྟེང༔ རང་རིག་རྒྱུ་ཡི་ཧཱུཾ་མཐིང་མེ་འབར་བབས༔ འོད་འཕྲོས་རྒྱལ་བ་རྒྱ་མཚོ་མཆོད་པས་མཉེས༔ རྒྱུད་དྲུག་འཁོར་བའི་བག་ཆགས་དབྱིངས་སུ་བསྒྲལ༔ འཁོར་འདས་ཡོངས་ཀྱི་སྲོག་བཅུད་ནུས་མཐུ་བསྡུས༔ རྒྱུ་ཡི་ས་བོན་ཧཱུཾ་ལ་བཅུད་དུ་དྲིལ༔ ཧཱུཾ་ཉིད་ཡོངས་གྱུར་ཡེ་ཤེས་འོད་ལྔའི་ཀློང་༔ གནམ་ལྕགས་རྡོ་རྗེ་ཧཱུཾ་

མཐིང་འཕྲོ་འདུ་ལས༔ བདག་ཉིད་ཡེ་ནས་མ་བཅོས་རྫོགས་པའི་ལྷ༔ རྒྱལ་ཀུན་ཕྲིན་ལས་ཡོངས་འདུས་ཆེ་བའི་མཆོག༔ དཔལ་ཆེན་རྡོ་རྗེ་གཞོན་ནུ་ཁྲོ་བོའི་རྒྱལ༔ མཐིང་ནག་རབ་འཇིགས་ཁྲོ་གཏུམ་གཟི་བརྗིད་འབར༔ ཞལ་གསུམ་ཕྱག་དྲུག་མི་སྡུག་སྲིན་པོའི་གཟུགས༔ གཡས་ཞལ་རབ་དཀར་འཇིགས་པའི་གད་རྒྱང་སྒྲོགས༔ གཡོན་ཞལ་དམར་གསལ་རྔམས་བརྗིད་ཕཊ་སྒྲ་སྒྲོགས༔ ཞལ་གདངས་ལྗགས་འདྲིལ་མཆེ་གཙིགས་ཁྲོ་གཉེར་བསྡུས༔ དམར་ཟླུམ་སྤྱན་དགུ་སྡང་མིག་ཕྱོགས་བཅུར་གཡོ༔ སྨ་ར་སྨིན་མར་མེ་ཡི་ཚྭ་ཚྭ་འཕྲོ༔ དབུ་སྐྲ་དམར་སེར་སྲིད་པའི་རྩེ་མོར་བརྫིས༔ ཁྲག་འཐུང་རིགས་ལྔའི་ཅོད་པན་སྤྲིན་ལྟར་གཏིབས༔ ཕྱག་གཡས་དང་པོས་རྡོ་རྗེ་རྩེ་དགུ་དང་༔ བར་མས་གནམ་ལྕགས་རྡོ་རྗེ་རྩེ་ལྔ་བསྣམས༔ གཡོན་གྱི་དང་པོས་སྡིག་མཛུབ་མེ་དཔུང་འབར༔ བར་མས་ཁ་ཊྭཱཾ་རྩེ་གསུམ་གདེངས་སྟབས་འཕྱར༔ ཐ་གཉིས་རི་རབ་ཕུར་བུ་འདྲིལ་ཞིང་འདེབས༔ གཡས་ཀྱི་དང་རུ་རྡོ་རྗེ་རྩེ་དགུ་ལ༔ སྤུ་གྲི་འབར་བའི་གཤོགས་པར་མེ་ཞགས་འཕྲོ༔ གཡོན་གྱི་དང་རུ་ནོར་བུ་འབར་བ་ལ༔ རལ་གྲིའི་གཤོག་པར་རྡོ་རྗེའི་སེར་ཆེན་འཕྲོ༔ ཞབས་བཞི་གྱད་ཀྱི་འདོར་སྟབས་ཚུལ་དུ་བསྒྲད༔ ཐལ་

ཆེན་ཚོམ་བུར་རཀྟའི་ཐིག་ལེ་དང་༔ ཞག་གི་ཟོ་རིས་བྱུག་པའི་རྗེས་སུ་འཆང་༔ གླང་ཆེན་ཀོ་རློན་མི་ལྤགས་གཡང་གཞི་དང་༔ སྟག་ལྤགས་ཤམ་ཐབས་མནབས་པའི་གོས་སུ་ཀླུབས༔ ཐོད་ཕྲེང་ཚར་གསུམ་སྦྲུལ་རིགས་ཆུན་པོས་བརྒྱན༔ གར་དགུའི་ཉམས་དང་ལྡན་པའི་པང་གཡོན་དུ༔ སྦྱོར་བའི་ཡུམ་ཆེན་འཁོར་ལོ་རྒྱས་འདེབས་མ༔ མཐིང་སྐྱ་ཞལ་གཅིག་ཕྱག་གཉིས་ཡབ་ལ་འཁྲིལ༔ ཕྱག་གཡས་ཁ་ཊྭཱཾ་གཡོན་པས་དུང་དམར་སྟོབ༔ གཟིག་ཤམ་རུས་རྒྱན་གསོལ་ཞིང་གད་རྒྱང་སྒྲོགས༔ བདེ་སྟོང་ཉམས་ལྡན་འཇིགས་པའི་ལང་ཚོ་རྒྱས༔ རང་མདངས་ཡེ་ཤེས་མེ་དཔུང་ཀློང་དུ་གསལ༔ གཡོན་དུ་སྒྲོལ་ཡུམ་ཨེ་ཀ་ཛ་ཊཱི་སྨུག༔ ཕྱག་གཡས་དགྲ་སྙིང་གཡོན་པས་ལྕགས་སྤྱང་འགྱེད༔ རལ་པ་འབྲུ་གཅིག་མིག་གཅིག་མཆེ་བ་གཅིག༔ ནུ་གཅིག་ཁྲག་འབེབས་སྤྲིན་དཀར་ན་བཟའ་གསོལ༔ གར་སྟབས་བསྒྱུར་ཞིང་འཁོར་འདས་མངའ་དབང་མཛད༔ གཙོ་མཆོག་སྤྱི་བོར་འཇིགས་བྱེད་ག་རུ་ཌ༔ གནམ་ལྕགས་རྡོ་རྗེའི་རྭ་དང་མཆུ་སྡེར་ཅན༔ མེ་གཤོག་བརྡེབ་ཅིང་ཀླུ་གཉན་ཟས་སུ་ཟ༔ སྤྱན་མིག་བསྒྲད་པས་སྣང་སྲིད་འོད་ཀྱིས་འགེངས༔ ངར་སྐད་དྲག་པོས་ཀླུ་བརྒྱད་མགོ་བོ་

འགེམས༔ ནོར་བུའི་གཙུག་རྒྱན་དགོས་འདོད་ཆར་དུ་འབེབས༔ ཀུན་བཟང་ཡབ་ཡུམ་རིགས་ཀྱི་བདག་པོར་ཤར༔ མཉམ་གཞག་སྐྱིལ་ཀྲུང་མཚན་དཔེའི་གཟི་བྱིན་འབར༔ ཡེ་ཤེས་འོད་ལྔ་འཁྲིགས་པའི་ཀློང་དུ་གསལ༔ ཧཱུཾ༔ ཕྱི་རིམ་གནམ་ལྕགས་འཁོར་ལོ་རྩིབས་བཞི་ལ༔ པད་ཉི་དགྲ་གདོན་ཕོ་མོ་བསྣོལ་བའི་སྟེང་༔ ཡེ་ཤེས་རང་མདངས་ཀཱི་ལ་རིགས་ལྔ་ནི༔ གཡས་སུ་སྐུ་མཆོག་བུངྔྷ་ཀཱི་ལ་མཐིང་༔ གཡས་དཀར་གཡོན་དམར་ཞལ་གསུམ་ཕྱག་དྲུག་པཿ གཡས་གཉིས་གནམ་ལྕགས་རྡོ་རྗེ་འཁོར་ལོ་དང་༔ གཡོན་གཉིས་ཁ་ཊྭཱཾ་བསྐལ་པའི་མེ་དཔུང་བསྣམས༔ ཐ་གཉིས་གནམ་ལྕགས་ཕུར་པ་འདྲིལ་ཞིང་འདེབས༔ སྐུ་སྨད་དུང་ཕུར་ཟུར་གསུམ་རྣོ་དབལ་ལྡན༔ ཤར་དུ་ཐུགས་མཆོག་བཛྲ་ཀཱི་ལ་དཀར༔ གཡས་སྔོ་གཡོན་དམར་ཞལ་གསུམ་ཕྱག་དྲུག་པ༔ གཡས་གཉིས་རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་འགུགས་བྱེད་ལྕགས་ཀྱུ་ཐོད་ཁྲག་བསྣམས༔ ཐ་གཉིས་རིན་ཆེན་དངུལ་གྱི་ཕུར་པ་འདྲིལ༔ སྐུ་སྨད་དངུལ་ཕུར་གསུམ་རྣོ་ངར་ལྡན༔ ལྷོ་རུ་ཡོན་ཏན་རཏྣ་ཀཱི་ལ་སེར༔ གཡས་དཀར་གཡོན་དམར་ཞལ་གསུམ་ཕྱག་དྲུག་པ༔ གཡས་

གཉིས་རིན་ཆེན་འབར་བ་དགྲ་སྟྭ་དང་༔ གཡོན་གཉིས་ཞགས་པ་དང་ནི་དུང་ཁྲག་བསྣམས༔ ཐ་གཉིས་རིན་ཆེན་གསེར་གྱི་ཕུར་པ་འདྲིལ༔ སྐུ་སྨད་གསེར་ཕུར་ཟུར་གསུམ་རྣོ་ངར་ལྡན༔ ནུབ་ཏུ་གསུང་མཆོག་པདྨ་ཀཱི་ལ་དམར༔ གཡས་དཀར་གཡོན་སྔོ་ཞལ་གསུམ་ཕྱག་དྲུག་པ༔ གཡས་གཉིས་པདྨ་རལ་གྲི་འབར་བ་དང་༔ གཡོན་གཉིས་ཐོད་ཁྲག་སྡོམ་བྱེད་ལྕགས་སྒྲོག་བསྣམས༔ ཐ་གཉིས་རིན་ཆེན་ཟངས་ཀྱི་ཕུར་པ་འདྲིལ༔ སྐུ་སྨད་ཟངས་ཕུར་ཟུར་གསུམ་རྣོ་ངར་ལྡན༔ བྱང་དུ་ཕྲིན་ལས་ཀརྨ་ཀཱི་ལ་ལྗང་༔ གཡས་དཀར་གཡོན་དམར་ཞལ་གསུམ་ཕྱག་དྲུག་པ༔ གཡས་གཉིས་རྒྱ་གྲམ་ཐོད་དབྱུག་འབར་བ་དང་༔ གཡོན་གཉིས་མེ་དཔུང་འབེབས་བྱེད་དྲིལ་བུ་བསྣམས༔ ཐ་གཉིས་རིན་ཆེན་གཡུ་ཡི་ཕུར་པ་འདྲིལ༔ སྐུ་སྨད་ལྕགས་ཕུར་ཟུར་གསུམ་རྣོ་དབལ་ལྡན༔ ཀུན་ཀྱང་རྔམས་བརྗིད་ཁྲོ་གཏུམ་འབར་བའི་སྐུ༔ ཧ་ཧ་ཧཱུཾ་ཕཊ་འབྲུག་སྟོང་སྒྲ་བཞིན་སྒྲོགས༔ རྡོ་རྗེའི་གཤོག་པ་དུར་ཁྲོད་དབལ་ཆས་བརྒྱན༔ སྐེད་པ་ཆུ་སྲིན་རྔམས་པའི་སྦྲུལ་ཆུང་སྐྱུག༔ སྐུ་སྨད་ཕུར་དཔལ་རྒྱལ་བསེན་སྙིང་གར་གཟིར༔ སྤྱི་བོར་རིགས་ཀྱི་མཁའ་ལྡིང་ཁྱུང་ཆེན་ལྡིང་༔

ཡེ་ཤེས་མེ་དཔུང་དམར་ནག་འབར་བའི་ཀློང་༔ རང་འདྲའི་ཁྲོ་ཆུང་སྐར་ལྟར་འཕྲོ་ཞིང་འཁྲུགས༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ [ཅེས་རྩ་བའི་དཀྱིལ་འཁོར་ཧེ་རུ་ཀ་ཡབ་ཡུམ་དང་དེའི་ཐུགས་ཡེ་ཤེས་ཀྱི་སྒྱུ་འཕྲུལ་ཀཱི་ལ་རིགས་ལྔ་བཅས་གསལ་གདབ། །][གཉིས་པ་ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནི། གཙོ་བོ་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱི་སྤྲིན་སོ་སོའི་གནས་སུ་བབས་པ་ཡོངས་སུ་གྱུར་པ་ལས་ཁྲོ་བོའི་དཀྱིལ་འཁོར་རབ་འབྱམས་ལྷུན་གྱིས་རྫོགས་པར་བསམ་ཞིང་།] ཧཱུཾ༔ ཐབས་ཤེས་བདེ་སྟོང་སྙོམས་ཞུགས་བྱང་ཆུབ་སེམས༔ ཡེ་ཤེས་སྒྱུ་འཕྲུལ་ཧཱུཾ་ཡིག་བཅུ་རུ་སྤྲས༔ སྟེང་འོག་ཕྱོགས་མཚམས་འཁོར་ལོ་རྩིབས་བཅུའི་དབུས༔ པདྨ་ཉི་ཟླ་འབར་བའི་གདན་སྟེང་དུ༔ མངོན་སྤྱོད་ལས་ལ་བསྔགས་པའི་ཧེ་རུ་ཀ༔ སྟེང་ཕྱོགས་ལྷ་གདོན་ཕོ་མོ་བསྣོལ་བའི་སྟེང་༔ ཧཱུཾ་མཛད་སྔོ་སྐྱ་ཞལ་གསུམ་ཕྱག་དྲུག་པཿ གཡས་དཀར་གཡོན་དམར་རབ་འཇིགས་ཁྲོ་གཏུམ་བརྔམསཿ བར་ཕྱག་མདའ་འགེངས་དགྲ་བགེགས་སྙིང་ལ་གཟིརཿ ཡུམ་མཆོག་སྒྲ་འབྱིན་སྔོ་སྐྱ་གཡོན་ནས་འཁྲིལ༔ སྤྲུལ་པའི་ཟ་གསོད་ཕག་དང་སྨྲིག་བུའི་གདོང་༔ ཨོཾ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ༔ གརྫ་གརྫ་ཧཱུཾ་ཕཊ༔ ཤར་ཕྱོགས་དྲི་ཟ་ཕོ་མོ་བསྣོལ་བའི་སྟེང་༔ རྣམ་རྒྱལ་དཀར་པོ་ཞལ་གསུམ་ཕྱག་དྲུག་པ༔ གཡས་

ཞལ་ལྗང་ནག་གཡོན་ཞལ་སེར་ནག་འབར༔ བར་མའི་ཕྱག་ན་འཁོར་ལོ་ཏྲི་ཤུལ་བསྣམས༔ ཡུམ་མཆོག་སྙེམས་མ་དཀར་མོ་གཡོན་ནས་འཁྲིལ༔ སྤྲུལ་པའི་ཟ་གསོད་སྟག་དང་བྱ་རྒོད་གདོང་༔ ཨོཾ་བཛྲ་ཀྲོ་དྷ་བི་ཛ་ཡ་ཧཱུཾ༔ ཧ་ན་ཧ་ན་ཧཱུཾ་ཕཊ༔ ཤར་ལྷོ་མེ་ལྷ་ཕོ་མོ་བསྣོལ་བའི་སྟེང་༔ དབྱུག་སྔོན་མཐིང་ག་ཞལ་གསུམ་ཕྱག་དྲུག་པ༔ གཡས་ཞལ་དཀར་གསལ་གཡོན་ཞལ་དམར་ནག་རྔམས༔ བར་མའི་ཕྱག་ན་མེ་དཔུང་དབྱུག་ཏོ་བསྣམས༔ ཡུམ་མཆོག་སྡེར་མོ་སྔོ་སྐྱ་གཡོན་ནས་འཁྲིལ༔ སྤྲུལ་པའི་ཟ་གསོད་གཡག་དང་བྱ་རོག་གདོང་༔ ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ༔ ད་ཧ་ད་ཧ་ཧཱུཾ་ཕཊ༔ ལྷོ་ཕྱོགས་གཤིན་རྗེ་ཕོ་མོ་བསྣོལ་བའི་སྟེང་༔ གཤིན་རྗེ་སེར་ནག་ཞལ་གསུམ་ཕྱག་དྲུག་པ༔ གཡས་ཞལ་སྔོ་ནག་གཡོན་ཞལ་ལྗང་ནག་འབར༔ བར་མའི་ཕྱག་ན་བེ་ཅོན་དགྲ་སྟྭ་བསྣམས༔ དུར་ཁྲོད་བདག་མོ་སེར་གསལ་གཡོན་ནས་འཁྲིལ༔ སྤྲུལ་པའི་ཟ་གསོད་ཤ་བ་འུག་པའི་གདོང་༔ ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ༔ པ་ཙ་པ་ཙ་ཧཱུཾ་ཕཊ༔ ལྷོ་ནུབ་སྲིན་པོ་ཕོ་མོ་བསྣོལ་བའི་སྟེང་༔ མི་གཡོ་ལྗང་ནག་ཞལ་གསུམ་ཕྱག་དྲུག་པ༔ གཡས་ཞལ་སྔོ་ནག་གཡོན་ཞལ་སྨུག་ནག་རྔམས༔ བར་མའི་ཕྱག་ན་རལ་གྲི་

ཞགས་པ་བསྣམས༔ ཡུམ་མཆོག་གཏུན་ཁུང་ལྗང་མོ་གཡོན་ནས་འཁྲིལ༔ སྤྲུལ་པའི་ཟ་གསོད་གཟིག་དང་ཁྭ་ཏའི་གདོང་༔ ཨོཾ་བཛྲ་ཀྲོ་དྷ་ཨརྱ་ཨ་ཙ་ལ་ཧཱུཾ༔ བྷནྡྷ་བྷནྡྷ་ཧཱུཾ་ཕཊ༔ ནུབ་ཕྱོགས་ཆུ་ལྷ་ཕོ་མོ་བསྣོལ་བའི་སྟེང་༔ རྟ་མགྲིན་དམར་ནག་ཞལ་གསུམ་ཕྱག་དྲུག་པ༔ གཡས་ཞལ་དཀར་གསལ་གཡོན་ཞལ་སྔོ་ནག་འཇིགས༔ བར་མའི་ཕྱག་ན་སྤུ་གྲི་ཞགས་པ་བསྣམས༔ ཡུམ་མཆོག་གཏུམ་མོ་དམར་སྐྱ་གཡོན་ནས་འཁྲིལ༔ སྤྲུལ་པའི་ཟ་གསོད་བྱི་ལ་པུ་ཤུད་གདོང་༔ ཨོཾ་བཛྲ་ཀྲོ་དྷ་ཧྱ་གྲཱི་ཝ་ཧཱུཾ༔ ཧུ་ལུ་ཧུ་ལུ་ཧཱུཾ་ཕཊ༔ ནུབ་བྱང་རླུང་ལྷ་ཕོ་མོ་བསྣོལ་པའི་སྟེང་༔ འདོད་རྒྱལ་དམར་སྐྱ་ཞལ་གསུམ་ཕྱག་དྲུག་པ༔ གཡས་ཞལ་གསེར་གསལ་གཡོན་ཞལ་ལྗང་ནག་འབར༔ བར་མའི་ཕྱག་ན་རྔ་ཡབ་ཐོད་ཁྲག་བསྣམས༔ ཡུམ་མཆོག་མདའ་སྙེམས་དམར་སྐྱ་གཡོན་ནས་འཁྲིལ༔ སྤྲུལ་པའི་ཟས་གསོད་སྤྱང་ཀུ་ཁྲ་ཡི་གདོང་༔ ཨོཾ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུཾ་ཕཊ༔ ཏིཥྛ་ཏིཥྛ་ཧཱུཾ་ཕཊ༔ བྱང་ཕྱོགས་གནོད་སྦྱིན་ཕོ་མོ་བསྣོལ་བའི་སྟེང་༔ བདུད་རྩི་ལྗང་ནག་ཞལ་གསུམ་ཕྱག་དྲུག་པ༔ གཡས་ཞལ་སེར་ནག་གཡོན་ཞལ་དུད་ཁ་འབར༔ བར་མའི་ཕྱག་ན་རྒྱ་གྲམ་དབྱུག་ཏོ་བསྣམས༔ ཡུམ་

མཆོག་རླུང་བྱིན་ལྗང་མོ་གཡོན་ནས་འཁྲིལ༔ སྤྲུལ་པའི་ཟ་གསོད་སེང་གེ་ཕ་ཝཾ་གདོང་༔ ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུཾ༔ ཚིནྡྷ་ཚིནྡྷ་ཧཱུཾ་ཕཊ༔ བྱང་ཤར་དབང་ལྡན་ཕོ་མོ་བསྣོལ་བའི་སྟེང་༔ ཁམས་གསུམ་རྣམ་རྒྱལ་ཞལ་གསུམ་ཕྱག་དྲུག་སེར༔ གཡས་ཞལ་དཀར་གསལ་ཡོན་ཞལ་ལྗང་ནག་རྔམས༔ བར་མའི་ཕྱག་ན་མདའ་གཞུ་འགེངས་ཤིང་འཕེན༔ ཡུམ་མཆོག་གསོད་བྱེད་སེར་མོ་གཡོན་ནས་འཁྲིལ༔ སྤྲུལ་པའི་ཟ་གསོད་དོམ་དང་སྲེ་མོང་གདོང་༔ ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ༔ བྷིནྡྷ་བྷིནྡྷ་ཧཱུཾ་ཕཊ༔ འོག་ཕྱོགས་ས་བདག་ཕོ་མོ་བསྣོལ་བའི་སྟེང་༔ སྟོབས་ཆེན་དུད་ཁ་ཞལ་གསུམ་ཕྱག་དྲུག་པ༔ གཡས་ཞལ་སྔོ་ནག་གཡོན་ཞལ་སེར་ནག་འབར༔ བར་མའི་ཕྱག་ན་རལ་གྲི་སྦྲུལ་ཞགས་བསྣམས༔ ཡུམ་མཆོག་བསྐུལ་བྱེད་དུད་ཁ་གཡོན་ནས་འཁྲིལཿ སྤྲུལ་པའི་ཟ་གསོད་དྲེད་དང་བྱི་བའི་གདོང་༔ ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུཾ༔ སྥོ་ཊ་སྥོ་ཊ་ཧཱུཾ་ཕཊ༔ རང་བྱུང་འཇིགས་པའི་ཁྲོ་རྒྱལ་ཆེན་བཅུ༔ ཀུན་ཀྱང་ཞལ་གདངས་ལྗངས་འདྲིལ་མཆེ་བ་གཙིགས༔ སྤྱན་དགུ་སྡང་མིག་བར་སྣང་ཁམས་སུ་གཟིགས༔ སྨ་ར་སྨིན་མ་དམར་སེར་མེ་འོད་འཕྲོ༔ དབུ་སྐྲ་དམར་སེར་སྲིད་པའི་རྩེ་མོར་

འབར༔ ཐོད་སྐམ་དབུ་རྒྱན་དར་གྱི་ཅོད་པན་སྤྲས༔ རྡོ་རྗེའི་གཤོག་པ་བསྐལ་པའི་མེ་དཔུང་འབར༔ དང་པོའི་ཕྱག་གཉིས་རྡོ་རྗེ་དུང་ཁྲག་དཀྲུགས༔ ཐ་མ་གཉིས་ན་གནམ་ལྕགས་ཕུར་པ་འདྲིལ་༔ ཞབས་བཞི་འདོར་སྟབས་གདོན་ཚོགས་མ་ལུས་གནོན༔ ཤེས་རབ་ཡུམ་གྱི་ཆ་འཛིན་ཁྲོ་མོ་བཅུས༔ ཕྱག་གཡས་དྲིལ་འཛིན་གཡོན་པས་ཐོད་ཁྲག་སྟོབ༔ ཡབ་ཡུམ་གཉིས་མེད་དུར་ཁྲོད་ཆས་རྫོགས་ཤིང་༔ དབུ་ལ་སྟོབས་ཆེན་ཡེ་ཤེས་ཁྱུང་གིས་བརྒྱན༔ སྒེག་དཔའ་འཇིགས་རུང་དྲག་པོའི་གད་མོ་སྒྲོགས༔ ཟ་བྱེད་གསོད་བྱེད་གཏུམ་རྔམས་ཚོགས་བཅས་རྣམས༔ སྐུ་མདོག་རྒྱན་ཆ་ཡབ་ཡུམ་ཆ་འཛིན་ཅིང་༔ ཕྱག་གཉིས་ལྕགས་ཀྱུ་ཕུར་པ་དགྲ་ལ་འདེབས༔ སྤྲུལ་པའི་ཁྲོ་ཚོགས་མཚོན་ཐུན་རླུང་ལྟར་འཚུབས༔ དམ་སྲི་ལོག་འདྲེན་འདུལ་བའི་དཔལ་དུ་ཤར༔ [ཞེས་ཁྲོ་བོའི་དཀྱིལ་འཁོར་སྤྲུལ་པའི་ལས་མཁན་དང་བཅས་པ་གསལ་གདབ} [གསུམ་པ་ཕུར་བུ་རྫས་ཀྱི་དཀྱིལ་འཁོར་ཞར་བྱུང་སྒོ་སྐྱོང་སྲུང་མར་བཅས་པ་བསྐྱེད་པ་ནི། སླར་ཡང་གཙོ་བོ་ཡབ་ཡུམ་གྱི་བྱང་སེམས་འོད་ཀྱི་གོང་བུ་སོ་སོའི་ས་བོན་གྱི་རྣམ་པར་སྤྲོས་པ་ཡོངས་སུ་གྱུར་པ་ལས་ལྷ་དེ་དང་དེའི་རོལ་པ་མངོན་དུ་གསལ་བར་བསམ་ཞིང་།] ཧཱུཾ༔ ཕྱི་རིམ་ཟླ་གམ་དམར་ནག་གཉེར་གཅིག་ཁར༔ པད་ཉི་དགྲ་

གདོན་ཕོ་མོ་བསྣོལ་བའི་སྟེང་༔ རང་བྱུང་རྒྱུ་ཡི་ཧཱུཾ་ཡིག་འཕྲོ་འདུ་ལས༔ སྲས་མཆོག་ཁྲོ་བོ་ཁྲ་ཐབས་ཉེར་གཅིག་ནི༔ མདུན་དུ་ཐུགས་ཀྱི་སྲས་བདུན་མཐིང་ནག་འབར༔ གཡས་དཀར་གཡོན་དམར་མི་སྲུན་རྔམས་པའི་ཞལ༔ གཡས་སུ་སྐུ་ཡི་སྲས་བདུན་ལྗང་ནག་རྔམས༔ གཡས་སྔོ་གཡོན་སེར་གཤིན་རྗེ་ཁྲོས་པའི་ཞལ༔ གཡོན་དུ་གསུང་གི་སྲས་བདུན་དམར་ནག་བརྗིད༔ གཡས་དཀར་གཡོན་ལྗང་མིའུ་ཐུང་ཁྲོད་པའི་ཞལ༔ སྐུ་སྟོད་ཁྲོ་རྒྱལ་ཞལ་གསུམ་ཕྱག་དྲུག་པ༔ གཡས་གཉིས་རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་ཁ་ཊྭཱཾ་བསྐལ་པའི་མེ་དཔུང་བསྣམས༔ ཐ་གཉིས་རི་རབ་ཕུར་བུ་དགྲ་ལ་འདྲིལ༔ དུར་ཁྲོད་ཆས་རྫོགས་རྡོ་རྗེའི་གཤོག་པ་གདེངས༔ སྐུ་སྨད་ཕུར་དབལ་དགྲ་གདོན་སྙིང་གར་གཟིར༔ བསྐལ་པའི་མེ་འབར་དྲག་སྔགས་ཐོག་སེར་འཕྲོ༔ སྟོང་ཕྲག་བརྒྱད་ཅུའི་བགེགས་ཀྱི་གཤེད་མར་གྲུབ༔ ཨོཾ་ཀརྨ་ཀྲོ་ངྷ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ཧཱུཾ༔ རང་བྱུང་ལྷུན་གྱིས་གྲུབ་པའི་སྒོ་བཞི་རུ༔ ཤར་སྒོར་ཛཿ ལས་དཀར་མོ་པུ་ཤུད་གདོང་༔ ཕྱག་གཡས་དངུལ་ཕུར་གཡོན་པས་ལྕགས་ཀྱུ་འཛིན༔ ལྷོ་སྒོར་ཧཱུཾ་ལས་སེར་མོ་ཀང་ཀའི་གདོང་༔ ཕྱག་གཡས་གསེར་ཕུར་གཡོན་པས་

ཞགས་པ་འཛིན༔ ནུབ་སྒོར་བཾ་ལས་དམར་མོ་སྲིན་བྱའི་གདོང་༔ ཕྱག་གཡས་ཟངས་ཕུར་གཡོན་པས་ལྕགས་སྒྲོག་འཛིན༔ བྱང་སྒོར་ཧོཿལས་ལྗང་མོ་ཁྲ་ཡི་གདོང་༔ ཕྱག་གཡས་ལྕགས་ཕུར་གཡོན་པས་དྲིལ་བུ་འཛིན༔ ཀུན་ཀྱང་གཟིག་ཤམ་རུས་རྒྱན་མེ་དཔུང་འབར༔ ཕྲིན་ལས་བཞི་སྒྲུབ་པར་ཆད་རྡུལ་དུ་རློག༔ ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷཱ་ཏ་ཡ་མ་མ་ཤཱི་གྷྲཾ་ཀརྨ་ཀ་རེ་ཡེ་ཧཱུཾ་ཕཊ༔ དཀྱིལ་འཁོར་ཆེན་པོའི་བར་ཁྱམས་ཁོར་ཡུག་ཏུ༔ ཤྭ་ན་མ་བཞི་བདག་ཉིད་ཆེན་མོ་བཞི༔ ས་བདག་མ་བཞི་སྐྱེས་བུ་གིང་བཞི་དང་༔ དབང་ཕྱུག་ཉི་ཤུ་རྩ་བརྒྱད་ལ་སོགས་པ༔ བཀའ་སྡོད་དམ་ཅན་རྒྱ་མཚོ་སྤྲིན་ལྟར་གཏིབས༔ ཨོཾ་སརྦ་མ་ཧཱ་གུ་རུ་དེ་ཝ་ཌཱ་ཀི་ནཱིཿ བཛྲ་ཀཱི་ལི་ཀཱི་ལ་ཡ༔ སརྦ་དྷརྨ་པཱ་ལ༔ སརྦ་ཀྵེ་ཏྲ་པཱ་ལ༔ སརྦ་ལོ་ཀ་པཱ་ལ༔ བཛྲ་ས་མ་ཏི་སྟྭཾ༔ [ཞེས་ཉི་མ་དང་འོད་ཟེར་གྱི་ཚུལ་དུ་ལྷ་མིའི་ཁྲོམ་ཚོགས་པ་བཞིན་གསལ་བར་བསྐྱེད་དོ། །] [གཉིས་པ་བྱིན་གྱིས་བརླབ་ཅིང་དབང་བསྐུར་བ་ནི། དཀྱིལ་འཁོར་གསུམ་གྱི་ལྷ་ཚོགས་རྣམས་ཀྱི་གནས་གསུམ་དུ་ཨོཾ་ཨཱཿཧཱུཾ་དཀར་དམར་མཐིང་གསུམ་གྱིས་མཚན་པར་བསམ་ལ།] ཧཱུཾ༔ ཐབས་ཀྱི་སྤྱོད་པས་འགྲོ་བའི་དོན་ཕྱིར་དུ༔ བྱམས་དང་སྙིང་རྗེས་གང་ལ་གང་འདུལ་བ༔ དུས་གསུམ་སངས་རྒྱས་ཕྲིན་ལས་རྫོགས་

མཛད་པའི༔ དབང་བསྐུར་བྱིན་རླབས་དངོས་གྲུབ་འདིར་སྩོལ་ཅིག༔ ཨོཾ་ཨཱཿཧཱུཾ༔ ཧཱུཾ་ཨོཾ་སྭཱ་ཨཾ་ཧཱ༔ མཱུཾ་ལཱཾ་མཱཾ་པཱཾ་ཏཱཾ༔ ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སིངྔྷི་ཨ་བྷི་ཥིཉྩ་ཧཱུཾ༔ [ཞེས་པས།] དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཡིག་འབྲུ་གསུམ་གྱི་རྣམ་པར་བསྡུས་ཏེ་རྒྱས་བཏབ་པས་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་དབྱེར་མེད་དུ་གྱུར་པ་ལ། སླར་ཡང་ཡེ་ཤེས་ལྔའི་རང་བཞིན་ཅན་གྱི་ས་བོན་བྱུང་བ་སྤྱི་བོར་གནས་པ་ཡོངས་སུ་གྱུར་པས་དབང་བསྐུར། སྐུ་ལྔའི་བདག་ཉིད་ཁྲག་འཐུང་རིགས་ལྔའི་ཅོད་པན་གྱིས་དབུ་བརྒྱན་པར་[བསམ་མོ། །] [གསུམ་པ་ཡེ་ཤེས་ཀྱི་འཁོར་ལོ་སྤྱན་དྲངས་པ་ནི།] རང་གི་ཐུགས་ཀའི་ཧཱུཾ་ཡིག་ལས་བྱུང་བའི་འོད་ཟེར་གྱིས་བསྐུལ་བས་འོག་མིན་གསང་ཆེན་རོལ་པའི་ཞིང་ནས་དུས་གསུམ་གྱི་སངས་རྒྱས་སྲས་དང་བཅས་པ་ཐམས་ཅད་ཆོས་དབྱིངས་སྤྲོས་བྲལ་བདེ་བ་ཆེན་པོའི་ངང་ལས་འབར་བའི་ཕྱག་རྒྱ་རྡོ་རྗེ་སྲིན་པོའི་དཀྱིལ་འཁོར་འཁོར་ལོའི་རྣམ་པར་བཞེངས་ཏེ་ཆོ་འཕྲུལ་བསམ་གྱིས་མི་ཁྱབ་པའི་བཀོད་པ་དང་བཅས་ཏེ་མདུན་གྱི་ནམ་མཁར་སད་པར་བསམ་ཞིང་། ཧཱུཾ༔ ཆོས་དབྱིངས་བརྡལ་བ་ཆེན་པོའི་ཀློང་དཀྱིལ་ནས༔ རང་བྱུང་ལྷུན་གྱིས་གྲུབ་པའི་ཡེ་ཤེས་ལྷ༔ འཁྲུལ་སྣང་ལམ་གྱི་རུ་དྲ་ཡོངས་སྒྲོལ་དཔལ རྡོ་རྗེ་གཞོན་ནུ་ཡབ་ཡུམ་གཤེགས་སུ་གསོལ༔

ཆོས་ཉིད་སྒྱུ་མར་རོལ་པའི་དུར་ཁྲོད་ནས༔ རང་བཞིན་མ་འགགས་རྣམ་འགྱུར་ཆོ་རོལ་མང་༔ ཉོན་མོངས་རང་ཚུལ་རང་ཉིད་འཇོམས་མཛད་དཔལ༔ ཀཱི་ལ་རིགས་ལྔ་ཁྲོ་བཅུ་ཡབ་ཡུམ་སྲས༔ ཁྲ་ཐབས་ཉེར་གཅིག་སྒོ་མ་བཞི་དང་བཅས༔ ཆོས་ཀྱི་དབྱིངས་ནས་སྤྱན་འདྲེན་གཤེགས་སུ་གསོལ༔ བདག་འཛིན་རོ་ལ་རོལ་པའི་དུར་ཁྲོད་ནས༔ མ་ངེས་གར་བསྒྱུར་མི་སྲུན་སྒྲོལ་མཛད་པ༔ བཀའ་སྡོད་ཕུར་སྲུང་རྒྱ་མཚོ་འཁོར་དང་བཅས༔ མ་ཐོགས་སྒྲུབ་པའི་གནས་འདིར་གཤེགས་སུ་གསོལ༔ ཨོཾ་བཛྲ་གུ་རུ་དེ་ཝ་ཌཱ་ཀི་ནཱི༔ བཛྲ་ཀཱི་ལི་ཀཱི་ལ་ཡ་སརྦ་མ་ཧཱ་ཀྲོ་དྷ་ཀྲོ་དྷི་སརྦ་པ་རི་ཝཱ་ར་བཛྲ་ས་མ་ཡ་ཛ་ཛ༔ སརྦ་དྷརྨ་པཱ་ལ་སརྦ་ཀྵེ་ཏྲ་པཱ་ལ་སརྦ་ས་མ་ཡ་ཛཿ ཛཿཧཱུཾ་བཾ་ཧོ༔ [ཞེས་ལྷ་རྣམས་དཀྱིལ་འཁོར་མེ་རི་དང་བཅས་པ་ནམ་མཁའ་ལ་སྤྲིན་ཕུང་གཏིབས་པ་བཞིན་བྱོན་པར་བསམ་མོ། །] [བཞི་པ་བཞུགས་སུ་གསོལ་བ་ནི།] ཧཱུཾ༔ དཔལ་ཆེན་རྡོ་རྗེ་གཞོན་ནུ་སྲས་འཁོར་བཅས༔ པད་ཉི་བདུད་དཔུང་བསྣོལ་བའི་གདན་སྟེང་དུ༔ དམ་ཚིག་ཡེ་ཤེས་དབྱེར་མེད་རོ་གཅིག་ཏུ༔ དགྱེས་པར་དགོངས་ཤིང་བརྟན་པར་བཞུགས་སུ་གསོལ༔ ཨོཾ་བཛྲས་མ་ཡ་ཏིཥྛ་ལྷན༔ [ཞེས་སྤྱན་དྲངས་པའི་ཡེ་ཤེས་ཀྱི་འཁོར་ལོ་བསྐྱེད་པའི་དམ་ཚིག་པ་དང་གཉིས་མེད་དུ་བཞུགས་པར་མོས།] [ལྔ་པ་

ཕྱག་འཚལ་བ་ནི། ཡེ་ཤེས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཇལ་བ་ལ་ཤིན་ཏུ་སྤྲོ་བའི་ཚུལ་གྱིས།] ཧཱུྃ༔ རང་བྱུང་ལྷན་སྐྱེས་ཡེ་ཤེས་རིག་པའི་ལྷ༔ སྐྱེ་མེད་ཀ་དག་རྡོ་རྗེ་གཞོན་ནུ་ཆེ༔ སྣང་སྟོང་གཉིས་མེད་སྒྱུ་འཕྲུལ་རོལ་པ་ལ༔ གཉིས་མེད་སྒྱུ་མའི་གར་གྱིས་ཕྱག་འཚལ་ལོ། ན་མོ་པཱུ་རུ་ཤ་ཡ་ཧོ༔ [ཞེས་ཕྱག་བྱ།] [དྲུག་པ་མཆོད་པ་འབུལ་བ་ལ་གཉིས་ཀྱི། དང་པོ་ཐུན་མོང་ཉེར་སྤྱོད་འདོད་ཡོན་གྱི་མཆོད་པ་ནི། རང་ལས་སྤྲུལ་པའི་ལྷ་མོ་རྣམས་ཀྱིས་མཆོད་པ་སྤྲིན་ཆེན་པོ་སྤྲོས་ཏེ་སྟོབ་པའི་སྒོ་ནས་དཀྱིལ་འཁོར་པ་དགྱེས་པ་བསྐྱེད་པར་བསམ་ཞིང་]ཧཱུཾ༔ དཔལ་ཆེན་རྡོ་རྗེའི་གཞོན་ནུའི་དཀྱིལ་འཁོར་དུ༔ གཉིས་མེད་སྣ་ཚོགས་གར་མཁན་རྣམ་འགྱུར་གྱིས༔ ཉེར་སྤྱོད་འདོད་ཡོན་མཆོད་སྤྲིན་རྒྱ་མཚོའི་ཚོགས༔ འབུལ་ལོ་བཞེས་ནས་དངོས་གྲུབ་བསྩལ་དུ་གསོལ༔ ཨོཾ་བཛྲ་ཨརྒྷ་པཱ་དྱཾ་ནས་ཤཔྡ་རཱུ་པ་སོགས། སྤརྴེ་དྷརྨ་པྲ་ཏཱིཙྪ་པཱུ་ཛ་ཧོཿ [ཞེས་པ་ཙམ་མམ། རྒྱས་པར་སྤྲོ་ན་ཕྱི་ནང་གི་མཆོད་པ་སོ་སོར་འབུལ་བ་ལ་གཉིས་ཀྱི། དང་པོ་ལའང་གསུམ་ལས། ཐོག་མར་ལྷ་རྫས་ཉེར་སྤྱོད་ཀྱི་མཆོད་པ་ནི།] འཇིག་རྟེན་འདིའམ་འཇིག་རྟེན་གཞན་དག་ན། །དྭངས་བསིལ་རྙོག་མེད་ཡི་གར་ལེགས་འོངས་པའི། །མཆོད་ཡོན་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ཨ་རྒྷཾ་པྲ་ཏཱིཙྪ་སྭཱཧཱ། །འཇིག་རྟེན་

འདིའམ་འཇིན་རྟེན་གཞན་དག་ན། །དག་བྱེད་ཙནྡན་གུར་གུམ་སོགས་སྦྱར་བའི། །ཞབས་བསིལ་རྣམ་པ་ཇི་སྙེད་ཡོད་པ་ཀུན༔ ། བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་པཱ་དྱཾ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །ཆུ་དང་ཐང་སྐྱེས་མཛེས་སྡུག་རྣམ་བཀྲ་བའི། །མེ་ཏོག་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་པུཥྤེ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །ལྷན་ཅིག་སྐྱེས་དང་ཡོངས་སུ་སྦྱར་བ་ཡི། །བདུག་སྤོས་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའོ་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་དྷུ་པེ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །རིན་ཆེན་ཉི་ཟླ་སྒོན་མེ་ལ་སོགས་པའི། །སྣང་གསལ་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་ཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ཨཱ་ལོ་ཀེ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །དྲི་ཞིམ་ངད་ལྡང་སིམ་པ་མཆོག་སྐྱེད་པའི། དྲི་ཆ་བརྣམ་པ་ཇི་

སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་གནྡྷེ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །ལྷ་ཡི་བདུད་རྩི་རོ་མཆོག་བརྒྱ་ལྡན་པའི། །ཞལ་ཟས་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ནཻ་དྱ་པྲ་ཏཱིཙྪ་སྭཱཧཱ། །འཇིག་རྟེན་འདིའམ་འཇིག་རྟེན་གཞན་དག་ན། །གླུ་དབྱངས་ཡིད་འཕྲོག་སྙན་འགྱུར་དང་ལྡན་པའི། །རོལ་མོ་རྣམ་པ་ཇི་སྙེད་ཡོད་པ་ཀུན། །བདུད་འདུལ་ཁྲོ་བོའི་དཀྱིལ་འཁོར་འཁོར་བཅས་མཆོད། །ཨོཾ་ཀརྨ་མ་ཧཱ་ཀྲོ་དྷ་ཤྲཱི་བྲ་ཀུ་མཱ་ར་ས་པ་རི་ཝཱ་ར་ཤཔྡ་པྲ་ཏཱིཙྪ་སྭཱཧཱ། [ཞེས་དང་། འདོད་ཡོན་ལྔའི་མཆོད་པ་ནི།] གཟུགས་མ་མཐིང་གའི་ཕྱག་ན་མེ་ལོང་ཐོགས། །མ་ངེས་གཟུགས་ཀྱི་བྱེ་བྲག་བསམ་ཡས་སྤེལ། །བདུད་འདུལ་ཁྲོ་བོའི་དཀྱིལ་འཁོར་ལྷ་ལ་འབུལ། །བཞེས་ནས་བླ་མེད་དངོས་གྲུབ་བསྩལ་དུ་གསོལ། ཨོཾ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། །སྒྲ་མ་དམར་གསལ་ཕྱག་ན་པི་ཝཱཾ་བསྒྱུར། །མ་ངེས་སྒྲ་ཡི་བྱེ་བྲག་བསམ་ཡས་སྤེལ། །བདུད་འདུལ་ཁྲོ་བོའི་དཀྱིལ་འཁོར་ལྷ་ལ་འབུལ། །བཞེས་ནས་བླ་མེད་དངོས་གྲུབ་བསྩལ་དུ་གསོལ། །ཨོཾ་ཤཔྡ་

ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། དྲི་མེད་དཀར་མོ་ཕྱག་ན་དུང་ཆོས་བསྒྲེང་། །མ་ངེས་དྲི་ཡི་བྱེ་བྲག་བསམ་ཡས་སྤེལ། །བདུད་འདུལ་ཁྲོ་བོའི་དཀྱིལ་འཁོར་ལྷ་ལ་འབུལ། །བཞེས་ནས་བླ་མེད་དངོས་གྲུབ་བསྩལ་དུ་གསོལ། །ཨོཾ་གནྡྷེ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། །རོ་མོ་སེར་གསལ་ཕྱག་ན་ཞལ་ཟས་འཛིན། །མ་ངེས་རོ་ཡི་བྱེ་བྲག་བསམ་ཡས་སྤེལ། །བདུད་འདུལ་ཁྲོ་བོའི་དཀྱིལ་འཁོར་ལྷ་ལ་འབུལ། །བཞེས་ནས་བླ་མེད་དངོས་གྲུབ་བསྩལ་དུ་གསོལ། །ཨོཾ་ར་ས་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། །རེག་མ་ལྗང་གུའི་ཕྱག་ན་ན་བཟའ་བསྣམས། །མ་ངེས་རེག་བྱའི་བྱེ་བྲག་བསམ་ཡས་སྤེལ། །བདུད་འདུལ་ཁྲོ་བོའི་དཀྱིལ་འཁོར་ལྷ་ལ་འབུལ། །བཞེས་ནས་བླ་མེད་དངོས་གྲུབ་བསྩལ་དུ་གསོལ། །ཨོཾ་སྤརྴེ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། །[སྒེག་སོགས་ལྷ་མོའི་མཆོད་པ་ནི།] རྡོ་རྗེ་སྒེག་མོས་དགའ་བས་མཆོད་བྱ་ཞིང་། །རྡོ་རྗེ་ཕྲེང་མོས་རབ་ཏུ་བརྒྱན་བྱས་ཏེ། །རྡོ་རྗེ་གླུ་མས་གསང་བའི་གླུ་བླངས་ནས། །རྡོ་རྗེ་གར་མས་མཛེས་པའི་གར་བསྒྱུར་མ། །ཕྱོགས་བཅུའི་འཇིག་རྟེན་ནམ་མཁའི་ཁམས་བཀང་ནས། །བདུད་འདུལ་ཁྲོ་བོའི་དཀྱིལ་འཁོར་ལྷ་ཚོགས། །རྣམ་དག་མོས་པའི་བློ་ཡིས་བདག་འབུལ་ན། །བཞེས་ཤིག་ཀཱི་ལ་ཡ་ཡི་དངོས་

གྲུབ་སྩོལ། །ཨོཾ་བཛྲ་ལཱ་སྱ་ཧཱུཾ། ཨོཾ་བཛྲ་མཱ་ལྱ་ཏྲཱཾ། ཨོཾ་བཛྲ་གཱིརྟི་ཧྲཱི༔ ཨོཾ་བཛྲ་ནཱིརྟི་ཨ། རྡོ་རྗེ་བདུག་པས་མ་ལུས་ཚིམ་བྱས་ནས། །རྡོ་རྗེ་མེ་ཏོག་མ་ཡིས་མཛེས་པར་དཀྲི། །རྡོ་རྗེ་སྒྲོན་མེ་མ་ཡིས་དགྱེས་བསྐྱེད་དེ། །རྡོ་རྗེ་དྲི་མས་དྲི་ཞིང་བྱུག་བྱས་པ། །ཕྱོགས་བཅུའི་འཇིག་རྟེན་ནམ་མཁའི་ཁམས་བཀང་ནས། །བདུད་འདུལ་ཁྲོ་བོའི་དཀྱིལ་འཁོར་ལྷ་ཚོགས་ལ། །རྣམ་དག་མོས་པའི་བློ་ཡིས་བདག་འབུལ་ན། །བཞེས་ཤིག་ཀཱི་ལ་ཡ་ཡི་དངོས་གྲུབ་སྩོལ། །ཨོཾ་བཛྲ་དྷུ་པེ་ཧཱུཾ། ཨོཾ་བཛྲ་པུཥྤེ་ཏྲཱཾ། ཨོཾ་བཛྲ་ཨཱ་ལོ་ཀེ་ཧྲཱི༔ ཨོཾ་བཛྲ་གནྡྷེ་ཨ། [གཉིས་པ་ནང་དུར་ཁྲོད་དྲག་པོའི་ཉེར་སྤྱོད་ཀྱི་མཆོད་པ་ནི།] ཧཱུཾ༔ དམར་ཆེན་ཁྲག་གི་ཡོན་ཆབ་འཁྱིལ་བ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་ཨརྒྷཾ་པྲ་ཏཱིཙྪ་སྭཱཧཱ༔ ཧཱུཾ༔ ཆུ་སེར་རྒྱ་མཚོའི་ཞབས་བསིལ་གཏམས་པ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་པཱ་དྱཾ་པྲ་ཏཱིཙྪ་སྭཱཧཱ༔ ཧཱུཾ༔ དབང་པོ་རྣམ་ལྔའི་མེ་ཏོག་བཀྲམ་པ་འདི༔ རྡོ་རྗེ་སྲིན་པོའི་ལྷ་ཚོགས་

མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་པུཥྤཾ་པྲ་ཏཱིཙྪ་སྭཱཧཱ། ཧཱུཾ༔ ཤ་ཆེན་ཚིལ་ཆེན་བདུག་སྤོས་དམ་པ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་དྷཱུ་པཾ་པྲ་ཏཱིཙྪ་སྭཱཧཱ༔ ཧཱུཾ༔ ཞུན་ཆེན་མར་མེ་ཉི་ལྟར་གསལ་བ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་དཱི་པཾ་པྲ་ཏཱིཙྪ་སྭཱཧཱ༔ ཧཱུཾ༔ མཁྲིས་པའི་དྲི་ཆབ་མཚོ་ལྟར་འཁྱིལ་བ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་གནྡྷཾ་པྲ་ཏཱིཙྪ་སྭཱཧཱ༔ ཧཱུཾ༔ ཤ་རུས་ཞལ་ཟས་རི་ལྟར་སྤུངས་པ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་ནེ་ཝི་དྱ་པྲ་ཏཱིཙྪ་སྭཱཧཱ། ཧཱུཾ༔ རྐང་གླིང་

ཐོད་རྔ་སྙན་པ་རྗིད་རོལ་མོ་འདི༔ རྡོ་རྗེ་སྲིན་པོའི་ལྷ་ཚོགས་མཉེས་པའི་རྫས༔ བདུད་འདུལ་མེ་རི་འབར་བའི་དལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་མ་ཧཱ་ཤྨ་ཤ་ནཱ་པཱུ་ཛ་ཤཔྡ་པྲ་ཏཱིཙྪ་སྭཱཧཱ༔ [ཞེས་འབུལ། གཉིས་པ་ཁྱད་པར་གྱི་མཆོད་པ་ལ་ལྔ་ལས། དང་པོ་བདུད་རྩིའི་མཆོད་པ་ནི། སྨན་འཆི་མེད་བདུད་རྩིའི་རྒྱ་མཚོ་ལས་མཐེབ་སྲིན་ཉི་ཟླའི་གའུས་བཅུས་ཏེ་ཕུལ་བས་བདེ་བ་ཆེན་པོའི་རོས་མཉེས་པར་བསམ་ལ།] ཧཱུཾ་ཧྲཱི༔ རང་བྱུང་གདོད་ནས་རྣམ་པ་དག༔ རྩ་བརྒྱད་སྟོང་ལ་སྦྱར་བའི་སྨན༔ རིགས་ལྔ་དམ་ཚིག་ལྔ་ཡི་དངོས༔ ཡེ་ཤེས་ལྔ་རྫོགས་གྲུབ་པའི་རྫས༔ རྒྱུད་ལྔའི་སེམས་ཅན་ཀུན་སྒྲོལ་བ༔ དུག་ལྔ་སེལ་བའི་སྨན་ཆེན་པོ༔ དཔའ་བོའི་རོ་དང་མཉམ་སྦྱར་བའི༔ འཆི་མེད་བདུད་རྩི་ར་སཱ་ཡ༔ རྒྱལ་བའི་དཀྱིལ་འཁོར་ཡོངས་རྫོགས་ལྷ༔ མཆོག་གསུམ་རྩ་གསུམ་རྒྱ་མཚོ་དང་༔ རིག་འཛིན་གྲུབ་ཐོབ་རྒྱ་མཚོའི་ཚོགས༔ བརྒྱུད་པ་དགུ་ལྡན་བླ་མ་ལ༔ རྣམ་དག་བདུད་རྩིའི་མཉེས་མཆོད་འབུལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་སརྦ་པ་ཉྩ་ཨ་མྲྀ་ཏ་ཁ་རཾ་ཁཱ་ཧི༔ གྲུ་གསུམ་མཐིང་ནག་འབར་བའི་དཀྱིལ་འཁོར་དུ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔

ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨམྲྀ་ཏ་ཁ་རཾ་ཁཱ་ཧི༔ ཕྲིན་ལས་ལྷུན་གྲུབ་ཕྱོགས་བཞིའི་རྩིབས་བཞི་རུ༔ སྲས་མཆོག་ཁྲོ་རྒྱལ་ཀཱི་ལ་རིགས་ལྔ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ གནམ་ལྕགས་འཁོར་ལོ་འབར་བའི་རྩིབས་སྟེང་དུ༔ ཡེ་ཤེས་ཁྲོ་བཅུ་ཡབ་ཡུམ་སྲས་བཅས་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ལོག་འདྲེན་ཚར་གཅོད་དྲག་པོའི་དཀྱིལ་འཁོར་དུ༔ ཁྲ་ཐབས་ཆེན་པོ་ཉི་ཤུ་རྩ་གཅིག་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དཀྱིལ་འཁོར་ཆེན་པོ་མཉམ་པའི་སྒོ་བཞི་རུ༔ ཕོ་བྲང་སྐྱོང་བའི་སྒོ་མ་རྣམ་བཞི་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ མ་ལྟར་བྱམས་ཤིང་སྲིང་ལྟར་གདུང་མཛད་མ༔ ཤྭ་

ན་ས་བདག་བདག་ཉིད་མ་བཞི་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བསྭེ་ལྕགས་དུང་སོགས་སྐྱེས་བུ་གིང་བཞི་དང་༔ དབང་ཕྱུག་ཆེན་མོ་ཉི་ཤུ་རྩ་བརྒྱད་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ མ་བདུན་སྲིང་བཞི་འབར་མ་ལངྐ་སོགས༔ ཕུར་སྲུང་དམ་ཅན་རྒྱ་མཚོའི་ཚོགས་རྣམས་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཁ་རཾ་ཁཱ་ཧིཿ བོད་ཁམས་སྐྱོང་བའི་བརྟན་མ་བཅུ་གཉིས་སོགས༔ ཕ་རོལ་ནག་ཕྱོགས་བཟློག་པའི་སྲུང་མ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ [ཞེས་ཕུལ་བའི་མཐར་དངོས་གྲུབ་བླང་བ་ནི།] ཨོཾ་ཨཱཿཧཱུཾ༔ བླ་མ་རིག་འཛིན་སྙོམས་འཇུག་ཟག་བྲལ་རྒྱུན༔ མུ་ཏིག་དཀར་པོ་ཐིག་ལེ་དྲི་མ་མེད༔ ཙནྡན་སྨུག་པོ་རྨ་མེད་པདྨའི་མཁར༔ གཉིས་མེད་བདེ་ཆེན་བདེ་བྲལ་

དགའ་བཞིའི་རྩེ༔ བསྭེ་ཕོར་བཀྲ་ཤིས་རཏྣའི་སྣོད་དུ་བསྐྱིལ༔ རྣམ་དག་བདུད་རྩིའི་རྒྱུ་ནི་བྱང་ཆུབ་སེམས༔ བདུད་རྩིའི་ངང་ནི་གཉིས་མེད་རོལ་པར་གནས༔ བདུད་རྩིའི་ལས་ནི་རྣམ་པར་རྟོག་སྒྲིབ་སྦྱངས༔ བདུད་རྩིའི་དོན་ནི་སྐྱེ་འཆི་གཞོམ་གཞིག་བྲལ༔ རྒྱལ་ཀུན་མཉེས་མཆོད་དངོས་གྲུབ་བླང་བ་ནི༔ གཡོན་པའི་མཚན་འཛིན་རྡོ་རྗེ་ཐལ་སྦྱར་ལ༔ མཐེབ་སྲིན་རྩེ་སྦྱར་ཟླ་དཀྱིལ་འབྲུ་ལྔ་བཀོད༔ ལྕེ་ཡི་དམ་ཚིག་རྡོ་རྗེ་པདྨོ་ལ༔ རྡོ་རྗེ་ཅན་གྱིས་གསལ་བར་ཧཱུཾ་བསྒོམ་སྟེ༔ རེག་མྱོང་བླ་མེད་བྱང་ཆུབ་བདེ་བླག་རྙེད། ཨོཾ་སརྦ་མ་ཧཱ་གུ་རུ་ངྷེ་ཝ་ཌཱ་ཀི་ནཱི་བཛྲ་ཀཱི་ལི་ཀཱི་ལ་ཡ༔ ཀཱ་ཡ་སིངྔྷ་ཨོཾ༔ ཝཱ་ཀ་སིདྡྷི་ཨཱཿ ཙིཏྟ་སིངྔྷི་ཧཱུཾ༔ སརྦ་སིདྡྷི་ཧྲཱིཿ [ཞེས་ཆོད་ཡུམ་རྣམས་ཀྱི་གསང་བ་གསུམ་གྱི་དངོས་གྲུབ་ཨོཾ་ཨཱཿཧཱུཾ་གི་རྣམ་པར་བདུད་རྩིའི་སྟེང་དུ་གནས་པ་རིམ་བཞིན་བླངས་ནས་མྱང་བས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་བསམ་མོ། །] [གཉིས་པ་གཏོར་མའི་མཆོད་པ་ནི། སྣང་སྲིད་དམ་རྫས་གཏོར་མའི་རང་བཞིན་འདོད་ཡོན་ལྔའི་ལོངས་སྤྱོད་མཁོ་རྒུར་ལྡན་པས་ཐུགས་དམ་བསྐང་བར་བསམ་ཞིང་།] ཧཱུཾ༔ སྣང་བ་ཁྱབ་བརྡལ་གཞོང་པ་རུ༔ སྲིད་པ་བཅུད་ཀྱི་གཏོར་མ་བཤམས༔ དམ་རྫས་དཔལ་གྱི་གཏོར་ཆེན་པོ༔ རྡོ་རྗེ་སྲིན་པོའི་ཚོགས་ལ་འབུལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་པས་རི་ཝཱ་ར་མཧཱ་བ་ལིཾ་ཏ་ལ་ཁཱ་ཧི༔ [གསུམ་པ་རཀྟའི་མཆོད་པ་

ནི། འཁོར་བ་ཁྲག་གི་རྒྱ་མཚོ་ཕུལ་བས་འཁོར་བ་གནས་ནས་སྟོང་པར་བསམ་ཞིང་།] ཛཿ དམ་ཚིག་ཆེན་པོའི་ཐུགས་དམ་དུས་ལ་བབ༔ དངོས་གྲུབ་བར་ཆད་བྱེད་པའི་དགྲ་དང་བགེགས༔ གདུག་ཅིང་སྡང་བའི་སེམས་དང་ལྡན་པ་ཡི༔ ཉོན་མོས་རྩ་བ་འཁོར་བའི་ཁྲག་ཆེན་པོ༔ ཁམས་གསུམ་འཁོར་བ་མ་ལུས་སྟོང་བྱའི་ཕྱིར༔ དུང་ཆེན་སྣོད་དུ་དམར་ཆེན་རྦ་ཀློང་འཁྲུགས༔ དཀྱིལ་འཁོར་ལྷ་ཚོགས་རྣམས་ཀྱི་ཞལ་དུ་འབུལ༔ དྲག་པོ་མཐུ་ཡི་དངོས་གྲུབ་བསྩལ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་པ་རི་ཝཱ་ར་མ་ཧཱ་རཀྟ་ལ་ཁ་རཾ་ཁཱ་ཧི༔ [བཞི་པ་དུག་གསུམ་བསྒྲལ་བའི་མཆོད་པ་ནི། གདུག་པ་ཅན་གྱི་ཤ་ཁྲག་རུས་པའི་ཕུང་པོ་ཞལ་དུ་བསྟབ་པས་དུག་གསུམ་རང་གནས་སུ་དག་པར་བསམ་ཞིང་།] ཧཱུཾ༔ རྡོ་རྗེ་ཁྲོ་རྒྱལ་ཆེན་པོའི་མཐུ་སྟོབས་ཀྱིས༔ དགྲ་བགེགས་བྱད་མ་དམ་སྲི་འབྱུང་པོའི་ཚོགས༔ མངོན་སྤྱོད་དྲག་པོ་ཚུལ་གྱིས་མྱུར་བསྒྲལ་ནས༔ གཏི་མུག་ཤ་ཆེན་རི་བོ་སྤུངས་སེ་སྤུད༔ འདོད་ཆགས་ཁྲག་གི་རྒྱ་མཚོ་མེ་རེ་རེ༔ ཞེ་སྡང་ཀེང་རུས་གྲམ་ཁྲོད་ཉི་ལི་ལི༔ རྡོ་རྗེ་ཕུར་པའི་ལྷ་ཚོགས་ཞལ་དུ་འབུལ༔ ཕྲིན་ལས་རྣམ་བཞི་མ་ལུས་མྱུར་འགྲུབ་མཛོད༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་ས་པ་རི་ཝཱ་ར་མ་ཧཱ་མཱཾ་ས་རཀྟ་ཀེཾ་ནི་རི་ཏ་ལ་ཁ་རཾ་ཁཱ་ཧི༔ [ལྔ་པ་སྦྱོར་སྒྲོལ་གྱི་མཆོད་པ་ནི། ཤེས་རབ་དབྱིངས་ཀྱི་གཏུན་ཁུང་དུ་རིག་པའི་ཡེ་ཤེས་གཏུན་

བུའི་སྦྱོར་བས་དགྲ་བགེགས་རྣམས་བསྒྲལ་ཏེ་རྟོག་ཚོགས་བདེ་བ་ཆེན་པོའི་དབྱིངས་སུ་སྦྱོར་བར་བསམ་ཞིང་།] ཧཱུཾ༔ ཁྲོ་རྒྱལ་རྡོ་རྗེའི་གཏུན་བུ་ཡིས༔ བཀའ་ལས་དམ་ཉམས་དགྲ་བགེགས་རྣམས༔ ཁྲོ་མོ་འབར་བའི་གཏུན་དུ་བརྡུང་༔ ལྷ་ཡང་རུང་སྟེ་རྡུལ་དུ་རློག༔ ཁ་ཊཾ་ཁ་ཊཾ་ཁ་ཊཾ༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ བཛྲ་ཡཀྵ་ཀྲོ་དྷ་ཀྲོ་དྷི་ཁཱ་ཧི་ཁཱ་ཧི་ཁཱ་ཧི༔ ཧ་ཧ་ཧ༔ ཧི་ཧི་ཧི༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ [ཅེས་མཆོད་པའི་རིམ་པ་རྣམས་ཀྱང་དོན་དམ་པར་དམིགས་མེད་སྤྲོས་མཐའ་དང་བྲལ་བ་ཆོས་ཉིད་བསམ་གྱིས་མི་ཁྱབ་པའི་ཡེ་ཤེས་སུ་རོ་མཉམ་པར་བལྟའོ། །][བདུན་པ་བསྟོད་པ་ནི། ལྷ་ཚོགས་རྣམས་ཀྱི་ཆེ་བའི་ཡོན་ཏན་མཐའ་ཡས་པ་ལ་རབ་ཏུ་ངོ་མཚར་ཞིང་དང་བའི་ཡིད་ཀྱིས།] ཧཱུཾ༔ གྲུ་གསུམ་མཐིང་ནག་འབར་བའི་དཀྱིལ་འཁོར་དུ༔ བདུད་འདུལ་འཇིགས་བྱེད་ཁྲོ་རྒྱལ་ཧེ་རུ་ཀ༔ སྐུ་མདོག་མཐིང་ནག་ཞལ་གསུམ་ཕྱག་དྲུག་པ༔ སྒེག་དཔའ་འཇིགས་རུང་རྒོད་གཤེ་དྲག་ཤུལ་དང་༔ སྙིང་རྗེ་རྔམས་དང་ཞི་ཚུལ་གར་དགུར་ལྡན༔ གཡས་གཉིས་རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་བསྐལ་པའི་མེ་དཔུང་ཁ་ཊྭཱཾ་བསྣམས༔ ཐ་གཉིས་རི་རབ་ཕུར་པ་འདྲིལ་ཞིང་འདེབས༔ དུར་ཁྲོད་ཆས་བརྒྱད་དཔལ་གྱི་ཆས་བཅུ་སོགས༔ སྐུ་ཡི་ཡོན་ཏན་རྫོགས་ལ་ཕྱག་འཚལ་བསྟོད༔ འཇིགས་པའི་ཧ་ཧར་དགོད་པས་འཁོར་འདས་དབང་༔ ཧཱུཾ་སྒྲ་དྲག་པོས་རུ་དྲའི་ཀླད་པ་འགེམས༔

ཕཊ་ཀྱི་སྒྲ་སྒྲོགས་སྲིད་གསུམ་འཁོར་བ་འཇིགས༔ དཔལ་ཆེན་རྡོ་རྗེ་གཞོན་ནུའི་གསུང་ལ་བསྟོད༔ ཐུགས་ཀྱི་སྤྲུལ་པ་མ་ངེས་སྣ་ཚོགས་གར༔ བདུད་དང་ལོག་རྟོག་དགྲ་བགེགས་ཐལ་བར་རློག༔ འཁོར་བ་ཡོངས་སྒྲོལ་ཡེ་ཤེས་དབྱིངས་སུ་སྦྱོར༔ དཔལ་ཆེན་རྡོ་རྗེ་གཞོན་ནུའི་ཐུགས་ལ་བསྟོད༔ དུས་གསུམ་རྒྱལ་བ་མ་ལུས་འདུས་པའི་དཔལ༔ ཡོན་ཏན་ཡོངས་རྫོགས་དྲག་པོའི་སྐུ་མངའ་བ༔ རིགས་དང་དཀྱིལ་འཁོར་ཀུན་གྱི་ངོ་བོ་ཉིད༔ ཁྱབ་བདག་སྤྱི་དཔལ་ཆེན་པོར་ཕྱག་འཚལ་བསྟོད༔ འཁོར་འདས་ཡོངས་ཀྱི་ཁྱབ་བདག་ཀུན་བཟང་མོ༔ རིགས་ཀུན་རྒྱལ་བའི་དགྱེས་པའི་བསྐྱེད་མཛད་ཅིང་༔ གཉིས་མེད་མཉམ་པར་སྦྱོར་བའི་ཡུམ་མཆོག་མ༔ འཁོར་ལོ་རྒྱས་འདེབས་མ་ལ་ཕྱག་འཚལ་བསྟོད༔ མེ་ལོང་ཡེ་ཤེས་དབྱིངས་ལས་སྐུར་བཞེངས་པ༔ བཛྲ་ཀཱི་ལ་ཡ་ལ་ཕྱག་འཚལ་བསྟོད༔ མཉམ་ཉིད་ཡེ་ཤེས་དབྱིངས་ལས་སྐུར་བཞེངས་པ༔ རཏྣ་ཀཱི་ལ་ཡ་ལ་ཕྱག་འཚལ་བསྟོད༔ སོར་རྟོག་ཡེ་ཤེས་དབྱིངས་ལས་སྐུར་བཞེངས་པ༔ པདྨ་ཀཱི་ལ་ཡ་ལ་ཕྱག་འཚལ་བསྟོད༔ བྱ་གྲུབ་ཡེ་ཤེས་དབྱིངས་ལས་སྐུར་བཞེངས་པ༔ ཀརྨ་ཀཱི་ལ་ཡ་ལ་ཕྱག་འཚལ་བསྟོད༔ ཆོས་དབྱིངས་ཡེ་ཤེས་དབྱིངས་ལས་སྐུར་བཞེངས་པ༔ ཐིག་ལེ་ཉག་གཅིག་སྐུ་ལ་ཕྱག་འཚལ་བསྟོད༔ མ་རིག་ལོག་རྟོག་

རུ་དྲ་སྒྲོལ་མཛད་དཔལ༔ ཡེ་ཤེས་ཁྲོ་རྒྱལ་བཅུ་ལ་ཕྱག་འཚལ་བསྟོད༔ ཁམས་གསུམ་འཁོར་བ་དབྱིངས་སུ་སྒྲོལ་མཛད་མ༔ ཆོས་ཉིད་ཁྲོ་མོ་བཅུ་ལ་ཕྱག་འཚལ་བསྟོད༔ བསྟན་པའི་རུ་དྲ་རྩད་ནས་གཅོད་མཛད་མ༔ ཟ་གསོད་སྤྲུལ་པའི་ཚོགས་ལ་ཕྱག་འཚལ་བསྟོད༔ གྲུ་གསུམ་ཟླ་གམ་དམར་པོའི་ཨེ་སྟེངས་སུ༔ ཁྲ་ཐབས་ཉེར་གཅིག་སྐུ་ལ་ཕྱག་འཚལ་བསྟོད༔ རྣམ་བཞིའི་ཕྲིན་ལས་ལྷུན་གྲུབ་ཕོ་བྲང་ན༔ ཡེ་ཤེས་སྒོ་མ་བཞི་ལ་ཕྱག་འཚལ་བསྟོད༔ མཐའ་དམག་དུས་ཀྱི་འཁྲུགས་པ་བཟློག་མཛད་པ༔ ཕུར་སྲུང་བཀའ་སྐྱོང་རྒྱ་མཚོའི་ཚོགས་ལ་བསྟོད༔ [ཅེས་བསྟོད་དོ། །][བརྒྱད་པ་གསོལ་བ་གདབ་པ་ནི། དེ་ལྟར་མཆོད་ཅིངབསྟོད་པ་ལས་བྱུང་བའི་འབྲས་བུ་མཆོག་གི་དངོས་གྲུབ་ལ་རྩེ་གཅིག་ཏུ་འདོད་པའི་གདུང་ཤུགས་དྲག་པོས་བསྐུལ་ཏེ།] ཧོ༔ དུས་གསུམ་རྒྱལ་བ་མ་ལུས་འདུས་པའི་དཔལ༔ རྡོ་རྗེ་གཞོན་ནུ་ཡབ་ཡུམ་སྲས་འཁོར་བཅས༔ ཐུགས་རྗེ་བརྩེ་བས་བདག་ལ་དགོངས་སུ་གསོལ༔ སྒྲུབ་པའི་རྣལ་འབྱོར་རྡོ་རྗེའི་མཆེད་ལྕམ་ལ༔ མ་འགྱང་མྱུར་དུ་དབང་བྱིན་དངོས་གྲུབ་སྩོལ༔ བདག་ཉིད་ཕུར་བུ་སྒྲུབ་པའི་རིག་འཛིན་ལ༔ གྲུབ་པའི་རྟགས་དང་མཚན་མ་སྟོན་པ་དང་༔ ཁམས་གསུམ་འཁོར་བ་མྱང་འདས་དང་སྒྲོལ་བའི༔ དོན་གཉིས་ལྷུན་གྲུབ་མཐུ་

རྩལ་དབང་ཐོབ་ཅིང་༔ རྡོ་རྗེ་གཞོན་ནུའི་གོ་འཕང་མྱུར་ཐོབ་མཛོད༔ ཨོཾ་བཛྲ་ས་མ་ཡ་ཨོཾ༔ ཨཱཿབཛྲ་ས་མ་ཡ་ཨཱཿཧཱུཾ་བཛྲ་ས་མ་ཡ་ཧཱུཾ༔ [དགུ་པ་ནོངས་པ་བཤགས་པ་ནི། ཆོ་གའི་ཡན་ལག་མ་ཚང་བ་སོགས་ཉེས་པའི་ཚོགས་ལ་གནོད་འགྱོད་དང་བཅས།] ཧཱུཾ༔ དཀྱིལ་འཁོར་ལྷ་ཚོགས་སྤྱན་སྔ་རུ༔ བདག་གི་སྒོ་གསུམ་ཉོན་འཁྲུལ་གྱིས༔ ཉེས་བྱས་ཉམས་ཆག་རྟོག་སྒྲིབ་ཀུན༔ མ་ལུས་བཤགས་སོ་བླན་ཆད་སྡོམ༔ མི་སྒྲིབ་ཚངས་པའི་དངོས་གྲུབ་སྩོལ༔ ཞེས་དང་། ཨོཾ་བཛྲ་ཧེ་རུ་ཀ་ས་མ་ཡ་མ་ནུ་པཱ་ལ་ཡ༔ བཛྲ་ཧེ་རུ་ཀ་ནོ་པ་ཏིཥྛ་ཌྀ་ཌྷོ་མེ་བྷ་ཝ༔ སུ་ཏོ་ཥྱོ་མེ་བྷ་ཝ༔ སུ་པོ་ཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིངྔྷི་མྨེ་པྲ་ཡཙྪ༔ སརྦ་ཀརྨ་སུ་ཙ་མེ༔ ཙིཏྟཾ་ཤྲེ་ཡ༔ ཀུ་རུ་ཧཱུཾ༔ ཧ་ཧ་ཧ་ཧ་ཧོ༔ བྷ་ག་ཝཱ་ན་སརྦ་ཏ་ཐཱ་ག་ཏ༔ ཧེ་རུ་ཀ་མཱ་མེ་མུཉྩ༔ ཧེ་རུ་ཀ་བྷ་ཝ་མ་ཧཱ་ས་མ་ཡ་ས་ཏྭ་ཨཱཿཧཱུཾ་ཕཊ༔ [ཅེས་བཟླའོ། །][བཅུ་པ་ཛཔ྄་བཟླ་བ་ལ་གཉིས་ལས། དང་པོ་ཐུགས་དམ་བསྐུལ་བ་ནི། ལྷ་ཚོགས་ཐམས་ཅད་བསྙེན་སྒྲུབ་ཛཔ྄་ཀྱི་རིམ་པ་ལ་དགོངས་པ་མངོན་དུ་བསྐུལ་བར་བསམ་ཞིང་།] ཧཱུཾ༔ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས༔ བསྐུལ་ལོ་བསྐུལ་ལོ་མི་མངོན་དབྱིངས་ནས་བསྐུལ༔ སྐུ་ཡི་སྤྲུལ་པས་ནམ་མཁའི་ཁམས་གང་ཞིང་༔ གསུང་གི་ང་རོ་འབྲུག་སྟོང་སྒྲ་བཞིན་སྒྲོགས༔ ཐུགས་ཀྱི་སྤྲུལ་པས་

འཁོར་བ་དབྱིངས་སུ་བཤིག༔ ཡོན་ཏན་སྤྲུལ་པས་བདག་སྣང་ཆོས་སྐུར་སྒྲོལ༔ ཕྲིན་ལས་སྤྲུལ་པས་བརྒྱུད་འཛིན་རྗེས་སུ་ཟུངས༔ གསང་ཆེན་རོལ་པའི་དཀྱིལ་འཁོར་ཆེན་པོ་འདིར༔ དབང་དང་བྱིན་རླབས་དངོས་གྲུབ་རྒྱ་མཚོར་བསྐྱིལ༔ བདག་ཉིད་ཕུར་བུ་སྒྲུབ་པའི་རིག་འཛིན་ལ༔ དོན་གཉིས་ལྷུན་གྲུབ་མཐུ་ཡི་དངོས་གྲུབ་སྩོལ༔ ས་མ་ཡ་ཀཱ་ཡ་ཝཱ་ཀ་ཙིཏྟ་བཛྲ་སྭབྷཱ་ཝ་ཨདྨ་ཀོཉཧཾ༔ ཞེས་བསྐུལ། [གཉིས་པ་བཟླས་པ་དངོས་ལ་ལྔ་ལས། དང་པོ་སྐུ་ཕྱག་རྒྱ་ལ་དམིགས་པའི་ཛཔ྄་དགོངས་ནི།] སངས་རྒྱས་ཀུན་གྱི་ཡེ་ཤེས་སྐུ༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པའི༔ སྐུ་ཡི་དབྱིག་ཏུ་བདག་བསྐྱེད་ཅིག༔ [ཅེས་དཀྱིལ་འཁོར་གསུམ་གྱི་ལྷ་ཚོགས་སྤྱི་དང་ཁྱད་པར་བདག་རྩ་བའི་དཀྱིལ་འཁོར་ཡབ་ཡུམ་ཞལ་ཕྱག་རྒྱན་ཆ་ལུགས་ཕྲ་མོའི་བར་མ་ཡེངས་པར་གསལ་བའི་ངང་ནས་བཟླའོ། །གཉིས་པ་གསུང་ཡི་གེ་ལ་དམིགས་པའི་ཛཔ྄་དགོངས་ནི། སྔར་གྱི་གསལ་སྣང་བརྟན་པ་གཞིར་བྱས་ནས།] བདག་ཉིད་གཙོ་བོའི་ཐུགས་ཙིཏྟ་རིན་པོ་ཆེ་ཟུར་བརྒྱད་པའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་རྡོར་སེམས་མཐིང་གསལ་ཞལ་གཅིག་ཕྱག་གཉིས་རྡོར་དྲིལ་འཛིན་ཅིང་ཞབས་བརྐྱང་བསྐུམ་དུ་བཞུགས་པ་རྒྱན་ཆ་ལུགས་ཡོངས་སུ་རྫོགས་པའི་

ཐུགས་ཀར་ཉི་མ་ལ་གནས་པའི་ཏིང་ངེ་འཛིན་སེམས་དཔའ་རྡོ་རྗེ་སྔོན་པོ་རྩེ་དགུ་པའི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱུཾ་ཡིག་མཐིང་ག་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་བཻ་ཌཱུརྱ་ཞུན་མའི་མདངས་ཅན་གཡས་བསྐོར་དུ་འཁོད་པར་གསལ་གདབ། [ བཟླས་པའི་རྐྱེན་གྱིས་བསྐུལ་བས།] དེ་ལས་འོད་ཟེར་དཔག་ཏུ་མེད་པ་འཕྲོས། རྒྱལ་བ་སྲས་དང་བཅས་པ་རྣམས་ལ་མཉེས་པའི་མཆོད་པ་ཕུལ་ཞིང་ཐུགས་དམ་གྱི་རྒྱུད་བསྐུལ། རིགས་དྲུག་གི་སེམས་ཅན་ཐམས་ཅད་ལ་ཕོག་པས་ལས་ཉོན་རྣམ་སྨིན་གྱི་སྒྲིབ་པ་སྦྱངས་ནས་བདེ་ཆེན་གྱི་ཞིང་ལ་བཀོད། དམ་ཅན་སྲུང་མའི་ཚོགས་ལ་ཕོག་པས་སྔོན་གྱི་ཐ་ཚིག་བསྐུལ་ཏེ་ལས་ལ་བཙུད། རིག་འཛིན་བླ་མ་མཆེད་ལྕམ་རྣམས་ལ་ཕོག་པས་ཐུགས་དམ་དབྱིངས་སུ་བསྐང་། དགྲ་བགེགས་ཐམས་ཅད་ལ་ཕོག་པས་གནོད་འཚེའི་གདུག་རྩུབ་ཚར་བཅད། འོད་ཟེར་སླར་འདུས་ཏེ་དཀྱིལ་འཁོར་གསུམ་ལ་ཐིམ་པས་མཐུ་བསྐྱེད་དབང་ཐོབ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་ཐོབ་པར་[བསམ་ལ་བཟླ་ཞིང་། གཞན་ཡང་འགལ་མེ་ཀླད་ལ་བསྐོར་བ་ལྟ་བ་དང་། བུང་བ་ཚང་ཞིག་པ་ལྟ་བུ་དང་། མགར་གྱི་ཚྭ་ཚྭ་སྤྲོ་བ་ལྟ་བུ་དང་། གྲུབ་མཐའ་ལམ་དུ་ལོངས་པའི་ཚུལ་གྱིས་བཟླས་པ་སོགས་

བྱ་སྟེ། དེ་དག་གི་གནད་ནི་མན་ངག་ཁོ་ན་ལས་རྟོགས་པར་བྱའོ། །གསུམ་པ་ཐུགས་ཆོས་ཉིད་ལ་དམིགས་པའི་ཛཔ྄་དགོངས་ནི།] སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེར་གཏམས་བྱས་ནས༔ རྣམ་པར་ཤེས་པ་རྡོ་རྗེར་བསྒོམ༔ [ཞེས་ཐུགས་དམིགས་མེད་ནམ་མཁའི་དཀྱིལ་ལྟར་དག་པ་རང་བཞིན་གྱིས་སྟོང་པའི་ངང་ལས་རིག་རྩལ་འགགས་མེད་དཀྱིལ་འཁོར་རྣམ་པ་གསུམ་དུ་གསལ་བ་རྟོག་པ་མེད་པར་ཤར། ཤར་དུས་ཉིད་ནས་རང་བཞིན་མེད་པར་དག་པ་སྐྱེ་མེད་ཀྱི་ངང་ལ་རིག་པ་འཛིན་མེད་ཚོགས་དྲུག་ལྷུག་པར་བཞག་སྟེ་བསམ་མེད་མཐའ་བྲལ་དྭངས་སང་ངེ་བའི་ངང་ནས་གྲགས་སྟོང་འཛིན་མེད་དུ་བཟླའོ། །བཞི་པ་ཡོན་ཏན་དབང་དང་དངོས་གྲུབ་བླང་བ་ལ་དམིགས་པའི་ཛཔ྄་དགོངས་ནི་སྟོད་ལས་བྱང་ཆུབ་སྒྲུབ་པའི་ལས་ཀྱི་པྲ་ཁྲིད་དང་། ལྔ་པ་ཕྲིན་ལས་ལ་དང་དམིགས་པའི་ཛཔ྄་དགོངས་སྤུ་གྲིའི་སྔགས་དྲུག་བཟླ་ཚུལ་སྨད་ལས་དགྲ་བགེགས་སྒྲོལ་བའི་ལས་རིམ་དུ་གསལ་བས་ཤེས་སོ། །དེ་དག་གི་སྐབས་སུ་བཟླ་བའི་སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཱན་བཾ་ཧཱུཾ་ཕཊ༔ ཛཿཧཱུཾཨཱ༔ [ཞེས་རྩ་བའི་སྔགས་སོ། །] ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔ ཨ་ཛི་ཏེ་ཨ་པ་རཱ་ཛི་ཏེ༔ མཱ་ར་སེ་ན་པྲ་མ་རྔྷ་ན་ཡེ་སརྦ་བིགྷྣཱན་བཾ་ཧཱུཾ་ཕཊ༔ [ཅེས་གཞི་སྙིང་གཅིག་ཏུ་དྲིལ་བའོ། །] མ་རཀྨོ་ཡཀྨོ༔ ཀ་ལ་རུ་པ་སྙིང་རྩ་ལ་ཡཾ་ཡཾ༔ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་

ཕྲིལ༔ སྲོག་རྩ་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག༔ སོད་སོད༔ ངྷ་ཏི་མ་མ་ཀརྨ༔ ཤཱིགྷྲཾ་ཀ་ར་ཡེ༔ མཱ་ར་སེ་ན༔ པྲ་མཱརྔྷ་ན་ཡེ་ཧཱུཾ་ཕཊ༔ [ཅེས་དྲག་སྔགས་འདུས་པ་སྟེ། བསྙེན་སྒྲུབ་ལས་སྦྱོར་གྱི་འགྲོས་དང་སྦྱར་ཏེ་བཟླའོ། །][བཅུ་གཅིག་པ་ཐུན་མཚམས་ཀྱི་བྱ་བ་ནི། ཐུན་ལས་ལྡང་བར་བརྩམས་པ་ན་སླར་ཡང་ཐུགས་དམ་བསྐུལ་བའི་དོན་དུ་སྨན་རཀ་གཏོར་མ་སོགས་ཀྱིས་མཆོད་པ་དགྱེས་པར་བསམ་ལ།] ཧཱུཾ༔ འབར་བའི་དཀྱིལ་འཁོར་རྡོ་རྗེ་ཕུར་པའི་ལྷ༔ དངོས་གྲུབ་མྱུར་སྟེར་ཕྱི་ནང་གསང་བ་ཡི༔ ཀུན་བཟང་མཆོད་སྤྲིན་རྒྱ་མཚོ་འབུལ་བ་ནི༔ ཐབས་དང་ཤེས་རབ་མཉམ་སྦྱོར་བདུད་རྩི་དང་༔ འཁོར་བ་ཡོངས་སྒྲོལ་རཀྟའི་རྒྱ་མཚོ་འཁྱིལ༔ བདག་འཛིན་རུ་དྲ་བདག་མེད་དབྱིངས་བསྒྲལ་བའི༔ གཏི་མུག་ཤ་ཆེན་རི་བོ་རི་ལྟར་སྤུངས༔ འདོད་ཆགས་ཁྲག་ཆེན་རྒྱ་མཚོ་མཚོ་ལྟར་བསྐྱིལ༔ ཞེ་སྡང་རུས་པའི་གྲམ་ཁྲོད་རྫ་ལྟར་བསྙིལ༔ ཕུང་ཁམས་སྐྱེ་མཆེད་དབང་པོ་ཡུལ་ལྔར་བཅས༔ ཉེར་སྤྱོད་འདོད་ཡོན་མཆོད་སྤྲིན་རྒྱན་དུ་ཤར༔ གུས་པས་འབུལ་ལོ་དངོས་གྲུབ་ཆར་ལྟར་ཕོབ༔ མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ མ་ཧཱ་བ་ལིཾ་ཏ་ཁ་རཾ་ཁཱ་ཧི༔ མ་ཧཱ་སརྦ་གུ་ཧྱ་པཱུ་ཛ་ཁཱ་

ཧིཿ [ཞེས་མཆོད་ཅིང་།] ཧཱུཾཿ སྲིད་གསུམ་གདུག་པ་མ་ལུས་བསྒྲལ་བ་དང་༔ ང་རྒྱལ་ཞེན་པ་ཡོངས་སུ་གཞོམ་པའི་ཕྱིར༔ རྡོ་རྗེ་སྲིན་པོའི་ལྷ་ཚོགས་འཁོར་བཅས་ལ༔ གཉིས་མེད་རྩེ་གཅིག་གུས་པས་ཕྱག་འཚལ་བསྟོད༔ སྲིད་པ་རྡོ་རྗེ་ཕུར་བུར་བསྒྲུབ་པ་དང་༔ དབང་དང་དངོས་གྲུབ་མ་ལུས་བླང་བའི་ཕྱིར༔ ཡེ་ཤེས་ཁྲོ་རྒྱལ་འཁོར་བཅས་གཤེགས་སུ་གསོལ༔ ཁྲོ་ཆེན་འབར་བའི་འཁོར་བཅས་གཤེགས་ནས་ཀྱང་༔ རྟགས་དང་མཚན་མ་མྱུར་དུ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་བསྩལ་དུ་གསོལ༔ ཛཿཧཱུཾ་བཾ་ཧོཿ བཛྲ་ཀཱི་ལི་ཀཱི་ལ་ཡ་སརྦ་སིངྔྷི་ཕ་ལ་ཧཱུཾ་ཨཱ༔ [ཞེས་བསྟོད་དེ་འདོད་པའི་དོན་ལ་གསོལ་བ་ནན་ཏན་དུ་གདབ་བོ། །དེ་དག་ནི་དངོས་གཞིའི་རིམ་པའོ། །][གསུམ་པ་རྗེས་ཀྱི་ལས་རིམ་ལའང་། ཚོགས་མཆོད་བསྐུལ་དང་ཆད་མདོ་གཏོང་། །ཟོར་ལས་བརྟན་སྐྱོང་རྟ་བྲོ་བརྡུང་། །གཏང་རག་བཟོད་གསོལ་དཀྱིལ་འཁོར་བསྡུ། །སྨོན་ལམ་ཤིས་བརྗོད་བྱ་བའོ། །ཞེས་རྣམ་གྲངས་བཅུ་གཅིག་ཏུ་ཡོད་པ་ལས] [དང་པོ་ཚོགས་ཀྱི་མཆོད་པ་ལ་ལྔ་ལས། དང་པོ་བྱིན་གྱིས་བརླབས་པ་ནི། མཱཾ་ས་དང་ཛ་གད་ཀྱིས་མཚོན་དམ་རྫས་སུ་འོས་པའི་བཟའ་བཅའ་བཏུང་བའི་དངོས་པོ་ཅི་འབྱོར་པ་ལེགས་པར་བཤམས་ལ་བདུད་རྩིས་བྲན་ཅིང་།] ཨོཾ་སརྦ་དྲ་བྱཾ་བི་ཤོ་ངྷ་ནི་ཧཱུཾ་ཕཊ༔ [ཅེས་སྤྱིར་བསངས།] ཧཱུཾ༔ རང་ཉིད་ལྷ་ཡི་ཐུགས་ཀ་ནས༔ ཚོགས་འཁོར་སྦྱོང་ཕྱིར་ཡི་གེ་

འཕྲོས༔ རཾ༔ རཾ་ལས་མེ་བྱུང་དངོས་འཛིན་བསྲེག༔ ཡཾ༔ ཡཾ་ལས་རླུང་བྱུང་བག་ཆགས་གཏོར༔ ཁཾ༔ ཁཾ་ལས་ཆུ་བྱུང་གཉིས་འཛིན་བཀྲུས༔ བྷྲཱུཾ་རཾ་ཡཾ་ཁཾ་སྭཱཧཱ༔ རྣམ་རྟོག་མཚན་མའི་བག་ཆགས་སྦྱངས༔ དག་པ་རབ་འབྱམས་མཆོད་པའི་སྤྲིན༔ བདེ་སྟོང་ཡེ་ཤེས་བདུད་རྩིའི་དངོས༔ རྣམ་པ་ཚོགས་ཀྱི་རོལ་པར་ཤར༔ ཨོཾ་ཨཱཿཧཱུཾསརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ༔ ཛྙཱ་ན་པཉྩ་ཨ་མྲྀ་ཏ་སྭཱཧཱ༔ མ་ཧཱ་ག་ཎ་ཙ་ཀྲ་ཨོཾ་ཨཱཿཧཱུཾ་སྭཱཧཱ༔ ཧཱུཾ་ཨོ་སྭཱ་ཨཾ་ཧཱ༔ མཱུཾ་ལཱཾ་མཱཾ་པཱཾ་ཏཱཾ༔ རིགས་ལྔ་ཡབ་ཡུམ་སྙོམས་ཞུགས་མཁར༔ བྱང་ཆུབ་སེམས་ཀྱི་སྤྲིན་ཆེན་པོས༔ ལྷ་ཚོགས་མཉེས་པའི་དམ་ཚིག་རྫས༔ ཉམས་ཆག་སྐོང་བའི་རྫས་སུ་གྱུར༔ ཨོཾ་ཨཱཿཧཱུཾ་ཧ་ཧོ་ཧྲཱིཿ [ཞེས་ལན་གསུམ་བརྗོད་པས་འདོད་ཡོན་གྱི་རྣམ་པ་ཅིར་ཡང་འཆར་བར་བསམ་མོ། །][གཉིས་པ་ཚོགས་ཞིང་སྤྱན་དྲང་བ་ནི། རྩ་བ་གསུམ་གྱི་ལྷ་ཚོགས་ནམ་མཁའ་གང་བར་བྱོན་པར་བསམ་ཞིང་།] ཧཱུཾ༔ བླ་མ་རིག་འཛིན་དཔའ་བོ་དཔའ་མོའི་ཚོགས༔ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་༔ གང་ཟག་སྙན་བརྒྱུད་ཤོག་སེར་ཆིག་བརྒྱུད་དང་༔ བཀའ་བབ་དོན་གྱི་བརྒྱུད་པ་ལ་སོགས་ཏེ༔ བརྒྱུད་པ་དགུ་ལྡན་བླ་མ་དམ་པ་རྣམས༔ གནས་འདིར་ཚོགས་ལ་སྤྱན་འདྲེན་གཤེགས་སུ་གསོལ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔

དཔལ་ཆེན་རྡོ་རྗེ་གཞོན་ནུ་ཡབ་ཡུམ་དང་༔ ཀཱི་ལ་རིགས་ལྔ་ཁྲོ་བཅུ་ཁྲ་ཐབས་སྲས༔ སྒོ་སྐྱོང་མ་བཞི་བཀའ་སྡོད་སྲུང་མར་བཅས༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ ཡེ་ཤེས་དབྱིངས་དང་མཁའ་སྤྱོད་གནས་ཡུལ་དང་༔ དུར་ཁྲོད་གནས་དང་སྦས་ཡུལ་ཐམས་ཅད་དུ༔ སྣ་ཚོགས་གར་བསྒྱུར་མ་ངེས་ཚུལ་སྟོན་པའི༔ ཡེ་ཤེས་འཇིག་རྟེན་མཁའ་འགྲོ་རྒྱ་མཚོའི་ཚོགས༔ ཞལ་ཟས་ཚོགས་ལ་སྤྱན་འདྲེན་གཤེགས་སུ་གསོལ༔ གཞལ་ཡས་ཁང་པ་འདི་ལ་བྱིན་ཅིག་ཕོབ༔ དཀྱིལ་འཁོར་གཉན་པོ་འདི་ལ་མདངས་ཤིག་ཕྱུངས༔ ཚོགས་གཏོར་མཆོད་རྫས་འདི་ལ་བཅད་ཅིག་ཕོབ༔ རྣལ་འབྱོར་སྒྲུབ་པ་པོ་ལ་དབང་བྱིན་སྩོལ༔ ཨོཾ་སརྦ་མ་ཧཱ་གུ་རུ་དེ་ཝ་ཌཱ་ཀི་ནཱི༔ བཛྲ་ཀཱི་ལ་ཀཱི་ལ་ཡ་སརྦ་ས་པ་རི་ཝཱ་ར་བཛྲ་ས་མ་ཡ་ཛ༔ ཛཿཧཱུཾ་བཾ་ཧོཿ [ཞེས་སྤྱན་དྲངས།] [གསུམ་པ་མཆོད་པ་ནི། ཚོགས་རྫས་འདོད་ཡོན་གྱི་ལྷ་མོ་གྲངས་མེད་པར་འཕྲོ་བས་ལྷ་ཚོགས་རྣམས་དགྱེས་པ་བསྐྱེད་པར་བསམ་ལ།] ཨོཾ་བཛྲ་ལཱ་སྱ་ཧཱུཾ། ཨོཾ་བཛྲ་མཱ་ལྱ་ཏྲཱཾ། ཨོཾ་བཛྲ་གཱིརྟི་ཧྲཱིཿ ཨོཾ་བཛྲ་ནཱིརྟི་ཧྲཱིཿ ཨོཾ་བཛྲ་ནཱིརྟི་ཨ། ཨོཾ་བཛྲ་དྷུ་པེ་ཧཱུཾ། ཨོཾ་བཛྲ་པུཥྤེ་ཏྲཱཾ། ཨོཾ་བཛྲ་ཨཱ་ལོ་ཀེ་ཧྲཱིཿ ཨོཾ་བཛྲ་གནྡྷེ་ཨ། [ཞེས་འདོད་ཡོན་གྱི་ལྷ་མོ་སྤྱིར་མཆོད་ནས། བྱེ་བྲག་ཚོགས་ཕུད་རིམ་པ་གསུམ་དུ་སྤྲོས་པའི་ཆ་དང་པོ་མཆོད་པའི་ཚུལ་དུ་འབུལ་ཞིང་།] ཧཱུཾ༔ རྩ་བརྒྱུད་བླ་མ་རིག་

འཛིན་རྒྱ་མཚོ་དང་༔ ཡི་དམ་དཀྱིལ་འཁོར་ལྷ་ཚོགས་མ་ལུས་ལ༔ ཞལ་ཟས་ཚོགས་ཀྱི་མཆོད་པ་དམ་པ་འབུལ༔ གཟི་བྱིན་དབང་དང་དངོས་གྲུབ་བསྩལ་དུ་གསོལ༔ གུ་རུ་དྷེ་ཝ་ཌཱ་ཀི་ནཱི་སརྦ་མ་ཧཱ་ག་ཎ་ཙཀྲ་པཱུ་ཛ་ལ་ཁཱ་ཧི༔ [ཞེས་དང་། སྤྲོ་ན་ཐུགས་དམ་བསྐང་བའི་རིམ་པ་གཞན་ཡང་རྒྱ་ཆེར་བྱའོ། །ཆ་བར་པ་ཉམས་ཆག་བཤགས་པའི་ཆེད་དུ་དམིགས་ཏེ་འབུལ་ཞིང་།] ཧཱུཾ༔ བླ་མ་ཡི་དམ་མཁའ་འགྲོའི་དཀྱིལ་འཁོར་དུ༔ ཉེས་བྱས་ཉམས་ཆག་རྟོག་སྒྲིབ་བག་ཆགས་དང་༔ འགལ་འཁྲུལ་ནོང་ས་པ་ཅི་མཆིས་མ་ལུས་པ༔ ཞལ་ཟས་ཚོགས་ཀྱིས་བསྐང་ཞིང་བཤགས་པར་བགྱི༔ ཡེ་ཤེས་ལྷ་ལ་རྣམ་རྟོག་མི་མངའ་ཡང་༔ ཁྱོད་ཀྱི་འཁོར་དུ་གཏོགས་པའི་ལྷ་སྲིན་རྣམས༔ མི་ཡི་སྐྱོན་མཐོང་ཙམ་གྱིས་བར་ཆད་རྩོམ༔ དེ་བས་མི་འཆབ་མི་སྦེད་མཐོལ་ཞིང་བཤགས༔ ཚངས་པ་མཆོག་གི་དངོས་གྲུབ་བསྩལ་དུ་གསོལ༔ ཨོཾ་ག་ཎ་ཙཀྲ་ས་ཏྭ་ས་མ་ཡ་སོགས་[ཡི་གེ་བརྒྱ་པ་བཟླའོ། །ཚོགས་ཐ་མ་གདབ་ལས་དྲིལ་མཐུན་དང་འབྲེལ་བར་སྟོབ་པའི་ལས་རིམ་ལ། བྲུབ་ཁུང་ལིང་གར་བཅས་པ་མདུན་དུ་འགོད་དེ།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་དགྲ་བགེགས་མཱ་ར་ཡ་ཧཱུཾ་ཕཊ༔ [ཅེས་བརྗོད་པས། བདག་ཉིད་དཔལ་ཆེན་པོའི་ཐུགས་ཀ་ནས་སྤྲུལ་པའི་ཁྲོ་ཚོགས་ཕོ་ཉ་གྲངས་མེད་པ་སྟོང་ཁམས་གང་བར་འཕྲོས་པ་དམིགས་བྱ་རང་དབང་མེད་པར་བཀུག་སྟེ་མདུན་གྱི་ལིང་ག་ལ་ཐིམ་པར་བསམ་ཞིང་། བདེན་སྟོབས་

བརྗོད་པ་སྔོན་དུ་འགྲོ་བས།] ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་གནོད་བྱེད་ཛཿཧཱུཾ་བཾ་ཧོ༔ ཤཱི་གྷཾ་ཨཱ་ན་ཡ་ཧཱུཾ་ཕཊ༔ [ཅེས་དགུག་གཞུག་བྱས་ལ།] ཧཱུཾ་ཛཿདམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་མོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱོད་ཀྱི་ཐུགས་དམ་དུས་ལ་བབ༔ མཐུ་རྩལ་ཕྱུངས་པའི་དུས་ལ་བབ༔ དགྲ་བགེགས་དམ་ཉམས་རུ་དྲའི་ཚོགས༔ དགུག་ཅིང་སྒྲོལ་བའི་དུས་ལ་བབ༔ བརྣག་པའི་དགྲ་བགེགས་ཤོར་ཏ་རེ༔ རྡོ་རྗེ་སྲིན་པོའི་སྟོབས་རྩལ་གྱིས༔ ལོག་འདྲེན་དགྲ་བགེགས་འབྱུང་པོའི་ཚོགས༔ རིངས་པར་ཁུག་ལ་མྱུར་དུ་སྒྲོལ༔ དམ་ཚིག་དབང་གིས་ཕྲིན་ལས་མཛོད༔ [ཅེས་ཕོ་ཉ་བསྐུལ། གསལ་བ་གསུམ་ལྡན་གྱི་ངང་ནས་སྲས་མཆོག་གི་ཕུར་བུ་བསྒྲིལ་ཞིང་བཏབ་སྟེ།] ཧཱུཾ༔ ང་ནི་རྡོ་རྗེ་གཞོན་ནུ་ཆེ༔ ང་ནི་བཛྲ་ཀཱི་ལ་ཡ༔ སྤྲུལ་པའི་མཚོན་ཐུན་ལས་ལ་འགྱེད༔ དགྲ་བགེགས་སྲོག་ལ་ཀཱི་ལ་ཡ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེར་གཏམས་བྱས་ནས༔ རྣམ་པར་ཤེས་པ་རྡོ་རྗེར་བསྒོམ༔ འཁྲུལ་སྣང་ལམ་གྱི་རུ་དྲ་དེ༔ ངོ་བོ་སྐྱེ་མེད་ཀློང་དུ་བསྒྲལ༔ སྐུ་གསུམ་

ལྷུན་གྲུབ་ཆེན་པོར་སངས༔ ཨོཾ་ལཾ་ཧཱུཾ་ལཾ་སྟྭམྦྷ་ཡ་ནན༔ མོ་ཧཱ་གྷཱ་ཏ་ཡ་བྷ་ག་ཝཱན་ཧྲཱིཿ ཀྲི་ཤཱི་བི་ཀྲི་བཛྲ་ཀཱ་ར་ཧཱུཾ༔ བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ སརྦ་བིགྷྣཱན་བཛྲ་ཀཱི་ལི་ཀཱི་ལ་ཧཱུཾ་ཕཊ༔ བཛྲ་ཧཱུཾ་ཀཱ་ར་ཧཱུཾ་ཕཊ༔ ཧཱུཾ་ཀཱ་ར་ཧཱུཾ་ཨ་ཕཊ༔ [ཅེས་ཚེ་ཁྲུས་ཀྱི་དགོངས་པས་རྣམ་ཤེས་བདེ་བ་ཆེན་པོའི་འཁོར་ལོར་སྦྱར་ཏེ་བརྟེན་པ་དབྱིངས་སུ་བསྒྲལ། སླར་ཡང་བག་ཆགས་ཀྱི་རྟེན་གཞི་བསྒྲལ་བའི་ཕྱིར་ལས་ཀྱི་ཕུར་བུ་གནས་སོ་སོར་གདབ་ཅིང་།] ཧཱུཾ༔ དྲག་པོ་ཆེན་པོ་དྲག་ཤུལ་ཅན༔ དཔལ་ཆེན་བཛྲ་ཀཱི་ལ་ཡ༔ ཁྱོད་ཀྱི་དམ་ཚིག་དུས་ལ་བབ༔ དགྲ་བགེགས་གདུག་པའི་ལྔ་ཕུང་ལ༔ རྣོ་མྱུར་ཤུགས་དྲག་ཕུར་བུ་ཐོབ༔ ཐལ་བའི་རྡུལ་དུ་བརླག་ནས་ཀྱང་༔ རྣམ་ཤེས་ཆོས་ཀྱི་དབྱིངས་སུ་སྤོར༔ [ཞེས་དང་སྤུ་གྲིའི་དྲག་སྔགས་བཟླ་བཞིན་དུ་ཐུན་རྫས་སྣ་ཚོགས་པས་ཀྱང་བྲབ། མཚོན་ཆའི་ཆར་དབབ་པར་བསམ་ཞིང་རལ་གྲིས་གཏུབ་ལ།] ཧཱུཾ༔ བྲན་དང་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབ༔ དཀྱིལ་འཁོར་ཆེན་པོའི་བར་ཁྱམས་དང་༔ མུ་རན་ཁོར་ཡུག་བཅད་པ་ལ༔ ཞིང་ཆེན་བཀྲམ་པའི་ཁྲི་སྟེང་ན༔ རྔམས་ཤིང་འཇིགས་པ་སྲིན་པོའི་ཚུལ༔ ཟ་བྱེད་ཕོ་ཉ་ལས་ཀྱི་བདག༔ ཤ་ཁྲག་སྲོག་ལ་མངའ་མཛད་ཅིང་༔ དགྲ་དང་བགེགས་ཀྱི་གཉེན་པོ་སྟེ༔ ཤ་ཁྲག་སྲོག་ལ་རྔམས་ཟས་བྱེད༔ ཁྱེད་རྣམས་དཔལ་

གྱི་ཕོ་ཉ་སྟེ༔ རྦད་ཅིང་བསྐུལ་བ་ང་ཡིས་བྱེད༔ ཉམས་པའི་དགྲ་བོ་མྱུར་དུ་སྒྲོལ༔ མངོན་སྤྱོད་དྲག་པོའི་ཕྲིན་ལས་མཆོད༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ༔ མ་མ་པཱ་ཤཾ་ཀུ་རུ༔ མ་ཏཾ་ཉ་ན་ཀ་ར་ཨི་དན་ངྷ་ཏི༔ མ་མ་ཀརྨ་ཤཱི་གྷྲཾ་ཀཱ་ར་ཡེ་ཧཱུཾ་ཕཊ༔ [ཅེས་དུམ་བུར་གཏུབ། ཐོ་གཏུན་མཁའ་གསང་དབྱིངས་རིག་གི་སྦྱོར་བས་གཟུགས་ཕུང་ཟུག་མེད་ཀྱི་དབྱིངས་སུ་བཅོམ་པར་བསམ་ཞིང་ཐོ་གཏུན་དུ་བརྡུང་ལ།] ཧཱུཾ༔ རྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་རྣམས༔ རྡོ་རྗེ་མེ་དབལ་སྙིང་བསྲེགས་ནས༔ ལུས་ངག་རྡུལ་ཕྲན་བཞིན་དུ་རློག༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུང་བྱས་ན༔ ལྷ་ཡང་རུང་སྟེ་བརླག་པར་འགྱུར༔ ཁ་ཏཾ་ཁ་ཏཾ་ཁ་ཏཾ༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ ཧཱུཾ༔ བསྐལ་པའི་མེ་ལྟར་འབར་བའི་ཀློང་དཀྱིལ་ནས༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་དང་༔ སྲས་དང་སྤྲུལ་པ་བཀའ་སྡོད་བཅས་པ་རྣམས༔ གནམ་ས་བར་སྣང་ལྟ་བུར་ཞལ་ཕྱེས་ཤིག༔ དགྲ་བགེགས་ལོག་འདྲེན་བསྒྲལ་བའི་ལྔ་ཕུང་འདི༔ མཉམ་ཉིད་ཧོམ་ཁུང་ཡངས་པའི་ཞལ་དུ་བསྟབ༔ འགགས་མེད་རོལ་པ་ཆེན་པོའི་

མགྲིན་པར་བསྟིམ༔ ཁྱབ་བརྡལ་ཀ་དག་ལྷུན་འབྱམས་ལྟོ་བར་བསྐྱིལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཱན་བཾ་ཧཱུཾ་ཕཊ༔ དགྲ་བགེགས་ལོག་འདྲེན་མཐའ་དམག་དུས་འཁྲུགས་གཡུལ་འགྱེད་མཁན་དང་རྒྱ་འདྲེ་མེ་ཞོན་འབྱུང་པོ་རླུང་ཞོན་རྣམས་ཀྱི་རྣམ་ཤེས་ཚོགས་བརྒྱད་ལ་ཁཱ་ཧི༔ ཁམས་ཆེན་བཅོ་བརྒྱད་ལ་ཁཱ་ཧི༔ ཕུང་པོ་རྣམ་ལྔ་ལ་ཁཱ་ཧི༔ མ་ཧཱ་མཱཾ་ས་རཀྟ་ཀེཾ་ནི་རི་ཏི་བ་སུ་ཏ་ལ་ཁཱ་ཧི༔ ལྷག་མ་རྗེས་ཤུལ་དང་བཅས་པ་ལ་ཁཱ་ཧི༔ ཧབ་ཧབ་ཧུབ་ཧུབ་མྱོག་མྱོག་ཁ་རཾ་ཁཱ་ཁཱཧི༔ [ཞེས་བསྟབ་པས། དཀྱིལ་འཁོར་པ་རྣམས་ཀྱིས་ཧ་ཧ་ཧ་ཞེས་དགྱེས་པའི་བཞད་སྒྲ་དང་བཅས་རོལ། ཧཱུཾ་ཧཱུཾ་ཧཱུཾ་ཞེས་དངོས་གྲུབ་བསྩལ་ཏེ་འོད་གསལ་དུ་ཞུ།] ཕཊ་ཕཊ་ཕཊ་[ཅེས་དེ་ལས་གསལ་སྟོང་ལྷ་སྐུར་སད་པའི་སྣང་ཆེན་ཆ་ཆོས་ཉིད་ཀྱི་བདེན་པའི་ངང་བསྐྱང་ངོ་། །][བཞི་པ་ཚོགས་ལ་རོལ་པ་ནི། ཐ་མལ་གྱི་རྟོག་པའི་འཆིང་བ་དཀྲོལ་ཕྱིར་འཁོར་ལོའི་འདུས་པའི་གཙོ་བོ་ལ་ཕྱག་བཅས་ཐབས་ཤེས་ཀྱི་དམ་རྫས་བསྣོལ་མར་སྟོབ་ཅིང་།] ཚོགས་ཀྱི་མཆོད་པ་རྒྱན་དུ་རོལ། [ཞེས་དྲངས། ལེན་པ་པོས།] ཨ་ལ་ལ་ཧོཿ [ཞེས་བརྗོད་ཅིང་བླང་། འདུས་པ་རྣམས་ལའང་བྲིམས་ཏེ་བཟའ་བའི་དམ་ཚིག་ནང་གི་སྲེག་བླུགས་ཀྱི་སྒོ་ནས་ཚིམས་པར་ལོངས་སྤྱད་པའི་མཐར།] ཧེ་རུ་ཀ་དཔལ་གྲོང་ཁྱེར་དུ། །ཚོགས་ཀྱི་འཁོར་ལོ་བསྐོར་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག [། ཅེས་སྨོན་ལམ་ཡང་གདབ་བོ། །][ལྔ་པ་ལྷག་མའི་ཆོ་ག་ནི། ལྷག་མ་བསྡུས་པའི་སྟེང་དུ་དཀྱིལ་འཁོར་གྱི་ལྷག་

མའི་ཕམ་ཕབ་བཀོད་དེ།] ཧཱུཾ། དང་པོ་ཕུད་ཀྱིས་མི་མཆོད་རྒྱུ། །རྡོ་རྗེ་གཞོན་ནུ་ཕུད་ཀྱི་བདག །བར་དུ་སྤྲིན་ལྟར་མི་གཏིབས་རྒྱུ། །དགེ་བའི་བཤེས་གཉེན་གཉན་གྱི་བཀའ། ཐ་མ་གཅིག་ཏུ་མི་བསྲེ་རྒྱུ། །མ་ཚོགས་དབང་ཕྱུག་ལྷག་མའི་གནས། །ལྷག་མ་ཁ་ཆུས་མི་བྲན་རྒྱུ། །ཁྲོད་དང་ངེད་གཉིས་དམ་ཚིག་གཅིག །ཡེ་ནས་འདུ་འབྲལ་མེད་དོན་དུ། །འདུས་ལ་ལས་རྣམས་ཀུན་བྱོས་ཤིག [། ཅེས་དམ་བདར་ཞིང་སྙན་གསན་དབབ། ཕུད་ལྷག་བསྲེས་ལ་བདུད་རྩིའི་ཁ་ཕྲུ་སྦྲེང་ཞིང་།] ཨོཾ་བཛྲ་ཨ་མྲྀ་ཏ་ཨུ་ཙྪིཥྚ་ཡ་ཧཱུཾ་ཕཊ༔ [ཅེས་དབབ།] ཨ་ལས་བྷཉྫ་འབར་བ་ལྕང་ལོར་བཅས་པའི་ནང་དུ་ལྷག་མའི་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་ཤ་ཆེན་གྱི་ཕུང་པོ་རཀྟའི་རྒྱ་མཚོ་རུས་པའི་གྲམ་ཁྲོད་འདོད་ཡོན་གྱི་དངོས་པོ་ཟད་མི་ཤེས་པས་མགྲོན་རྣམས་དགྱེས་པ་སྐོང་བའི་སྤྲིན་ཆེན་པོར་གྱུར་[པར་བསམ་ལ། སླར་ཡང་སྨན་རཀ་བྲན་ནས།] ཨོཾ་ཨཱཿཧཱུཾ་ཧ་ཧོ་ཧྲཱིཿཞེས་བརླབས། ཨེ་ཨཱ་ར་ལླི་ཧྲཱིཾ་ཧྲཱིཾ་ཛ་ཛཿ[ས་ལྷག་སྡུད་ཀྱི་ཕོ་ཉ་རྣམས་བོས་ལ།] པུཥྤེ་[སོགས་ཀྱིས་ཉེར་སྤྱོད་ཀྱང་སྦྱིན་ཏེ།] ཧཱུཾ་བྷྱོ༔ དཔལ་གྱི་བཀའ་ཉན་ལྷག་སྐྱོང་ཚོགས༔ དུར་ཁྲོད་འགྲིམས་ཤིང་ཚོགས་ཁང་ཉུལ༔ ཞིང་ལྤགས་ཀླུབ་ཅིང་མཁའ་ལ་རྒྱུ༔ ཟས་སུ་ཤ་དང་ཁྲག་ལ་དགྱེས༔ ལས་སུ་བསྟན་དགྲ་སྒྲོལ་བར་བརྩོན༔ ལེགས་ཉེས་གཉིས་

ཀྱི་སྟངས་འཛིན་ཅིང་། དམ་ཚིག་ཅན་ལ་དངོས་གྲུབ་སྟེར༔ ཁྱེད་ཅག་བཀའ་དང་ཐ་ཚིག་ཅན༔ སྔོན་ཚེ་དཔལ་ཆེན་ཁྲག་འཐུང་དང་༔ རིག་འཛིན་རྡོ་རྗེ་ཕྲེང་གིས༔ ཇི་ལྟར་བཀའ་བསྒོས་དམ་ཚིག་བཞིན༔ བཀའ་ཡི་ཕམ་ཕབ་ལྷག་གཏོར་བཞེས༔ བསྟན་པའི་རུ་དྲ་སྒྲོལ་བ་དང་༔ སྒྲུབ་ལ་དངོས་གྲུབ་སྩོལ་བ་དང་༔ ཕྲིན་ལས་རྣམ་བཞི་ལྷུན་གྲུབ་པའི༔ དྲག་པོ་མཐུ་ཡི་དངོས་གྲུབ་སྩོལ༔ ཨོཾ་བཛྲ་ཌཱ་ཀི་ནཱི་རཏྣ་ཌཱ་ཀི་ནཱི་པདྨ་ཌཱ་ཀི་ནཱི་ཀརྨ་ཌཱ་ཀི་ནཱི་སརྦ་ཌཱ་ཀི་ནཱི་སརྦ་དྷརྨ་པཱ་ལ་སརྦ་ཀྵེ་ཏྲ་པཱ་ལ་སརྦ་ལོ་ཀ་པཱ་ལ་སརྦ་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ [ཞེས་རོལ་མོའི་སྒྲ་དང་བཅས་པས་ཕྱི་རོལ་གྱི་ཟ་ལམ་དུ་བསྐྱལ་ལོ། །[གཉིས་པ་བཅོལ་བསྐུལ་བྱ་བ་ནི། ཕོ་ཉ་འདུས་པའི་གཙོ་བོས་ཕུར་བུ་འདྲིལ་ཞིང་བཤུགས་གླུ་དང་རྐང་གི་གླིང་བུ་སོགས་དུར་ཁྲོད་ཀྱི་རོལ་མོའི་རྟ་ལ་བསྐྱོན་ཏེ།] ཧཱུཾ་ཧཱུཾ་ཧཱུཾ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་སྐུ་བཞེངས་ཤིག༔ སྐྱེ་མེད་རྣམ་དག་ཆོས་ཀྱི་དབྱིངས་ཉིད་ལས༔ ཡུམ་མཆོག་འཁོར་ལོ་རྒྱས་འདེབས་སྐུ་བཞེངས་ཤིག༔ ཡེ་ཤེས་མེ་རི་འབར་བའི་ཀློང་དཀྱིལ་ནས༔ ཁྲོ་རྒྱལ་ཀཱི་ལ་རིགས་ལྔ་སྐུ་བཞེངས་ཤིག༔ གནམ་ལྕགས་འཁོར་ལོ་འབར་བའི་རྩིབས་སྟེང་ནས༔ ཡེ་ཤེས་ཁྲོ་བཅུ་ཡབ་ཡུམ་སྐུ་བཞེངས་ཤིག༔

གྲུ་གསུམ་ཟླ་གམ་དམར་པོའི་ཨེ་སྟོང་ནས༔ སྲས་མཆོག་ཁྲ་ཐབས་ཉེར་གཅིག་སྐུ་བཞེངས་ཤིག༔ ཕྲིན་ལས་ལྷུན་གྲུབ་ཕྱོགས་བཞིའི་སྒོ་བཞི་ནས༔ ཡེ་ཤེས་སྒོ་མ་རྣམ་བཞི་སྐུ་བཞེངས་ཤིག༔ བཀའ་དང་དམ་ཚིག་གཉན་པོའི་ཕོ་བྲང་ནས༔ ཕུར་སྲུང་དམ་ཅན་རྒྱ་མཚོ་སྐུ་བཞེངས་ཤིག༔ མ་གཡེལ་མ་གཡེལ་དམ་ཚིག་གཉན་གྱིས་བསྐུལ༔ ཤ་ཁྲག་དམར་གྱི་ཨརྒྷཾ་འདི་བཞེས་ལ༔ ནག་ཕྱོགས་རྗེ་བོ་དམག་འཁྲུགས་གཡུལ་འགྱེད་མཁན༔ སྡོང་ཟླ་བདུད་དམག་འགོང་ནག་དྲག་རྔམས་ཅན༔ མཐའ་འཁོབ་ཀླ་ཀློ་ཆོས་ཁྲིམས་འཇིག་ལ་ཆས༔ སངས་རྒྱས་བསྟན་བཤིག་སྐྱེ་འགྲོའི་བདེ་བཅོམ་པའི༔ གཟུགས་ཅན་དགྲ་དང་གཟུགས་མེད་མི་མིན་ཚོགས༔ ལོང་ཡོད་ལོ་ཟླར་འགྱངས་སུ་མ་ཤོར་བར༔ ནམ་མཁའི་གློག་གཞས་འཕེན་སྡུད་ལས་མྱུར་བར༔ སྲོག་གི་མེ་སོད་སྙིང་གི་ཁྲག་དྲོངས་ཤིག༔ རླུང་གི་རྒྱུ་འགྲུལ་གློ་བའི་མཛོད་ནས་ཆོད༔ དཔུང་ཚོགས་སྔོན་རྒྱུག་རྗེས་འབྲང་སྐྱོབ་གྲོགས་བཅས༔ ལྷ་ཡང་རུང་སྟེ་ཐལ་བའི་རྡུལ་དུ་རློག༔ དམ་ལས་མ་འདའ་བཛྲ་ས་མ་ཡ༔ དམ་ཚིག་དབང་གིས་མཐའ་དམག་དུས་འཁྲུགས་

བཟློག༔ བདག་ཅག་སྐུ་རྗེ་བོད་ཀྱི་རྒྱལ་ཁམས་སུ༔ ལོ་ལེགས་འབྲུ་འཕེལ་སངས་རྒྱས་བསྟན་པ་དར༔ དགེ་ལེགས་ཡར་འཕེལ་འདོད་རྒུ་རབ་རྒྱས་ནས༔ འཁྲུགས་དང་འཐབ་དང་རྩོད་པ་མེད་པར་མཛོད༔ [ཅེས་བསྐུལ་ལོ། །][གསུམ་པ་ཆད་མདོ་གཏོང་བ་ནི། གཏེར་སྲུང་གི་གཏོར་མ་སོགས་རྡོ་རྗེའི་འགྲོས་ཀྱིས་ཕྱིར་བསྣུར་དུ་བཞག་ལ་སྨན་རཀ་བྲན་ཅིང་།] ཧཱུཾ༔ སྔོན་ཚེ་འདས་དུས་བསྐལ་པའི་དང་པོ་ལ༔ འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ༔ བཅོམ་ལྡན་དཔལ་ཆེན་བཛྲ་ཀུམཱ་རས༔ ཆོས་ཀྱི་དབྱིངས་ནས་ཀཱི་ལའི་སྒྲ་བསྒྲགས་ཚེ༔ མ་མོ་མཁའ་འགྲོ་བཀའ་ཡི་ལས་མཁན་དང་༔ ཆོས་སྐྱོང་སྲུང་མ་དམ་ཅན་རྒྱ་མཚོ་ཡིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱིས་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔

དེ་འོག་བར་གྱི་དུས་ཚིག་གཉིས་པ་ལ༔ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ༔ རིག་འཛིན་ཆེན་པོ་པདྨ་ཐོད་ཕྲེང་དང་༔ པཎ་གྲུབ་ཆེན་པོ་བི་མ་མི་ཏྲ་དང་༔ བ་སུ་དྷ་ར་ཤཱཀྱ་དྷེ་མ་སོགས༔ སྒྲུབ་པའི་རྣལ་འབྱོར་རིག་པ་འཛིན་རྣམས་ཀྱིས༔ རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཚེ༔ མ་མོ་མཁའ་འགྲོ་དབང་ཕྱུག་ཉེར་བརྒྱུད་སོགས༔ ཕུར་སྲུང་དམ་ཅན་རྒྱ་མཚོ་ཐམས་ཅད་ཀྱིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་མྱུར་དུ་སྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ དེ་འོག་བར་གྱི་དུས་ཚིགས་གསུམ་པ་ལ༔ མོན་ཁ་ནེའུ་རིང་སེང་གེ་རྫོང་གསུམ་དུ༔ སློབ་དཔོན་ཆེན་པོ་པདྨ་འབྱུང་གནས་དང་༔ ཡེ་ཤེས་མཚོ་རྒྱལ་འབྲོག་བན་ལོ་ཙཱ་དང་༔ རླངས་ཆེན་དཔལ་སེང་རྡོ་

རྗེ་བདུད་འཇོམས་ཀྱིས༔ རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཚེ༔ ཤྭ་ན་ས་བདག་བདག་ཉིད་རེ་མ་ཏཱི༔ བསྭེ་ལྕགས་གིང་སོགས་སྲུང་མ་ཐམས་ཅད་ཀྱིས༔ རང་རང་སྲོག་གི་སྙིང་པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ ད་ལྟ་དུས་ཚིགས་བཞི་པ་སྙིགས་མའི་དུས༔ རང་སྣང་ཀ་དག་ཆོས་དབྱིངས་ཕོ་བྲང་དུ༔ ཚེ་དབང་རིག་འཛིན་རྡོ་རྗེ་གྲོ་ལོད་དང་༔ སྨོན་ལམ་ལས་སད་བདུད་འཇོམས་གླིང་པ་ཡིས༔ ལྷག་པའི་ལྷ་མཆོག་ཕུར་པའི་ཞལ་ཕྱེས་ཚེ༔ སྒྲུབ་པའི་རྣལ་འབྱོར་སྐྱོང་བར་ཞལ་བཞེས་པའི༔ དམ་ཅན་སྲུང་མ་བཀའ་ཡི་མངགས་གཞུག་ཚོགས༔ མཐུ་དང་རྩལ་ལྡན་ཕོ་ཉའི་ཚོགས་རྣམས་ཀྱིས༔ རང་རང་སྲོག་གི་སྙིང་

པོ་མངོན་ཕུལ་ནས༔ སོ་སོའི་གཟུགས་མཆོག་དམ་པ་བསྟན་ནས་ཀྱང་༔ སངས་རྒྱས་བསྟན་པ་གཉན་པོ་བསྲུང་བ་དང་༔ དམ་ཚིག་ཅན་ལ་དངོས་གྲུབ་སྩོལ་བ་དང་༔ སྒྲུབ་པའི་རྣལ་འབྱོར་ཚེ་སྲོག་བསྲིང་བ་དང་༔ དམ་རྫས་དམར་གྱི་གཏོར་མ་ལེན་པ་དང་༔ བཅོལ་བའི་ཕྲིན་ལས་བསྒྲུབ་པར་མ་ཆད་དམ༔ སྔོན་ཚེ་ཞལ་བཞེས་དམ་ལས་མ་འདའ་བར༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་སྒྲུབ་པར་མཛོད༔ བཛྲ་བཛྲ་བཛྲ་ས་མ་ཡ་ཧོ༔ [ཞེས་ཕྱི་རོལ་དུ་འབུལ་ལོ། །][བཞི་པ་ཟོར་འཕང་བ་ནི། དགོས་པ་ཁྱད་པར་ཅན་གྱི་སྐབས་སུ་བབས་ན་ཆད་མདོའི་གཏོར་མ་དེ་ཉིད་མཚོན་ཆའི་ཕུང་པོར་བསྒྱུར་ལ།] ཧཱུཾ༔ ང་ནི་རྡོ་རྗེ་གཞོན་ནུ་ཆེ༔ ང་ནི་འཁོར་འདས་ཡོངས་ཀྱི་བདག༔ ང་ལས་ཆེ་བཙན་སུ་ཡང་མེད༔ ངས་ནི་དྲག་པོའི་གཏོར་ཟོར་འཕེན༔ ཕྱོགས་མཚམས་སྟེང་འོག་གནས་རྒྱུ་བའི༔ སྡེ་བརྒྱད་ལྷ་ཀླུ་གཞི་བདག་རྣམས༔ གཏོར་ཆེན་མཚོན་ཐུན་ཟེར་འཕྲོས་པས༔ ལུས་སེམས་མ་ལུས་བརླག་པར་མཆིས༔ ང་ནི་མ་ཉེས་དགྲ་བགེགས་ཉེས༔ ཟོར་ལམ་ཕྱེས་ལ་སྐུ་བཟུར་ཅིག༔ བརྣག་པའི་དགྲ་བགེགས་མ་

གཏོགས་པ༔ ཉེས་མེད་རྣམས་ལ་ཟོར་མི་འཕེན༔ ཀུན་ཀྱང་གྲོགས་མཛོད་དམག་དཔུང་བསྐྱེད༔ དམག་དཔུང་བསྐྱེད་ལ་རུ་མཚོན་ཕྱོར༔ ཉམས་པའི་དགྲ་བགེགས་སྡིག་ཅན་འདི༔ རྡུལ་ཕྲན་བཞིན་དུ་བརླག་པར་མཛོད༔ ཕུར་པའི་དབལ་ཟོར་ཐོག་ལྟར་འཕེན༔ ཡུངས་དཀར་རྦབ་རྒོད་སེར་ལྟར་བསྒྲིལ༔ ཁྲག་ཐུན་དམར་པོ་ཆར་ལྟར་འབེབས༔ མཚེ་མདའ་དྲག་པོ་རླུང་ལྟར་འཚུབས༔ དུག་ཐུན་དྲག་པོ་མུན་ལྟར་གཏིབས༔ མཚོན་ཆའི་བུ་ཡུག་སྐར་ལྟར་འཁྲུགས༔ མདའ་ཐུན་དྲག་པོ་བུན་ལྟར་འཕྲོ༔ རྡོ་ཐུན་ཆར་པ་རྡུལ་ལྟར་འབེབས༔ དམར་གྱི་གཏོར་མ་རྫ་ལྟར་ཉིལ༔ ཕོ་ཉ་ལས་མཁན་ཟ་གསོད་ཚོགས༔ ཕོ་རྒྱུད་ཟོར་འཕྲིན་ཤ་ར་ར༔ མོ་རྒྱུད་ཐུན་འདེབས་ཉི་ལི་ལི༔ སྡང་བའི་དགྲ་ལ་ཐུན་ཟོར་རྒྱོབས༔ གནོད་པའི་བགེགས་ལ་ཐུན་ཟོར་རྒྱོབས༔ ཟ་བའི་འདྲེ་ལ་ཐུན་ཟོར་རྒྱོབས༔ ཕུང་བའི་སྲི་ལ་ཐུན་ཟེར་རྒྱོབས༔ སྨོན་ལོག་ལྟ་ལོག་སྲོག་ལ་ཕོབ༔ ལུས་ངག་ཡིད་གསུམ་རྡུལ་དུ་རློག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ཨོཾ་བཛྲ་ཙཎྜ་སརྦ་དུཥྚན་ཨེ་ཛཿབྷྱོ་ཧཱུཾ༔ གནོད་བྱེད་ཀ་ལ་རཱུ་པ་སརྦ་ཤ་ཏྲཱུཾ་མཱ་ར་ཡ་རྦད་ཕོབ་ཛཿ[ཞེས་དགྲ་ཕྱོགས་སུ་འཕང་ཞེས་སྤྲུལ་པའི་དམ་ཅན་ཕོ་མོའི་དམག་ཚོགས་ཀྱིས་མཚོན་ཆ་སྣ་ཚོགས་ཆར་ཕབ་པས་

དགྲ་བགེགས་རྣམས་ཁ་ཕུང་རྗེས་མེད་དུ་བརླག་པར་བསམ་མོ། །][ལྔ་པ་བརྟན་མ་བསྐྱང་བ་ནི། བཤལ་ཆུའི་བདུད་རྩི་གཏོར་མ་ལ་སྦྲེང་ཞིང་།] ཨོཾ་ཨཱཿཧཱུཾ་[གིས་བརླབས་ནས།] ཧཱུཾ་བྷྱོ༔ སྔོན་ཚེ་ཨོ་རྒྱན་ཆེན་པོའི་སྤྱན་སྔ་རུ༔ སངས་རྒྱས་བསྟན་པ་གཉན་པོ་བསྲུང་བ་དང་༔ འཇིག་རྟེན་བོད་ཁམས་སྐྱོང་བར་ཁས་བླངས་པའི༔ གནོད་སྦྱིན་དཔལ་གནས་མ་དང་ཡང་དག་ཤེས༔ ཀོང་བཙུན་དེ་མོ་གཡུ་བུན་ཁྱུང་བཙུན་མ༔ དམག་གི་རྒྱལ་མོ་ཟླ་འོད་བྱང་རྒྱལ་མ༔ བསེར་མོ་གསེར་ཐང་མ་དང་ཤིནྟཾ་དཔལ༔ ལ་རོ་སྨན་དང་ཀླུ་མོ་གཟི་འབར་མ༔ ཁྱེད་རྣམས་སྔོན་གྱི་བཀའ་གཉན་དམ་ཚིག་ཅན༔ བལ་ཡུལ་ཁ་ལ་ཤོད་ཀྱི་ས་མཚམས་དང་༔ བོད་ཡུལ་རང་གནས་དབེན་རྩ་སོ་སོ་རུ༔ སློབ་དཔོན་ཆེན་པོ་པདྨ་ཐོད་ཕྲེང་དང་༔ སློབ་མ་མཐུ་ཆེན་རླངས་ཆེན་དཔལ་སེང་གིས༔ དཀྱིལ་འཁོར་མཐའ་རུ་ཞིང་ཆེན་གདན་ལ་བཞག༔ དབང་བསྐུར་དམ་བཏགས་ལྕེ་ལ་བདུད་རྩི་བླུད༔ དབང་རྟགས་ཅོད་པན་སྤྱི་བོའི་གཙུག་ཏུ་བཏགས༔ ལག་ཏུ་རྡོ་རྗེ་ཕུར་པ་གཏད་ནས་ཀྱང་༔ གསང་སྔགས་རྡོ་རྗེ་ཕུར་པའི་སྲུང་མར་བསྐོས༔ མ་འོངས་ཐར་པ་ཐོབ་པར་ལུང་ཡང་བསྟན༔ གཙོ་འཁོར་གཡོག་དང་སྨན་ཕྲན་འབུམ་དང་བཅས༔ དར་སྣའི་ཅོད་པན་དར་དཔྱང་པུ་རུ་རུ༔ རྒྱན་དང་

སིལ་སྙན་མང་པོ་སི་ལི་ལི༔ བསྟན་པའི་དགྲ་བགེགས་བསྒྲལ་བའི་ལས་ལ་བརྩོན༔ ད་རུང་ཁྱེད་རྣམས་འཇིག་རྟེན་མ་འདས་པས༔ ཇི་སྲིད་ཐར་པ་ཆེན་པོ་མ་ཐོབ་པར༔ སྔོན་ཚེ་ཞལ་བཞེས་དམ་ལས་མ་འདའ་བར༔ བཤལ་ཆུ་དམར་གྱི་གཏོར་མ་འདི་ལོངས་ལ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ མ་གཡེལ་མ་འགྱང་མ་མོ་བརྟན་མའི་ཚོགས༔ རྣལ་འབྱོར་བུ་བཞིན་སྐྱོངས་ཤིང་དགྲ་བགེགས་སྒྲོལ༔ བཀའ་དང་དམ་ལས་མ་འདའ་ས་མ་ཡ༔ མ་མ་ཧྲཱིཾ་ཧྲཱིཾ་བཛྲ་ལི་ལ་མ་ཨེ་དཾ་བ་ལིཾ་ཏ་ཁ་ཁ་ཁཱ་ཧི༔ [ཞེས་ཕུལ་བས་དགྱེས་པར་བསམ་མོ། །][དྲུག་པ་བྲོ་བརྡུང་བ་ནི། གཏོར་གཞོང་རི་རབ་ཏུ་གསལ་བའི་འོག་ཏུ་དགྲ་བགེགས་དམ་སྲི་རྣམས་མནན་པར་བསམ་ཞིང་།] ཧཱུཾ༔ སྟོང་གསུམ་སྟོང་གི་གཏོར་གཞོང་གྲུ་གསུམ་དུ༔ དགྲ་བགེགས་དམ་སྲི་འགོང་པོ་ཆུང་སྲི་བྲུབ༔ སྲ་བརྟན་རི་རབ་འབར་བས་སྟེང་ནས་གནོན༔ དེ་སྟེང་རྡོ་རྗེ་གཞོན་ནུའི་ཕོ་བྲང་བཏབ༔ རྡོ་རྗེ་ཁྲོ་ཆེན་ཚོགས་ཀྱིས་བྲོ་བརྡུང་བ༔ སྡང་དགྲ་གདོན་བགེགས་འབྱུང་པོ་ཐམས་ཅད་དང་༔ སྒབ་འདྲེ་ཆུང་སྲི་འགོང་ཚོགས་འདུལ་བའི་བྲོ༔ བར་ཆད་དམ་སྲི་གདོན་ཚོགས་འདུལ་བའི་བྲོ༔ ཐེའུ་རང་སྲིས་རྐུན་གནོད་བྱེད་འདུལ་བའི་བྲོ༔ རྣམ་ཀུན་བར་ཆད་མེད་པར་བརྡུང་བར་བྱ༔ འཁོར་བ་

མ་སྟོང་བར་དུ་མནན་པ་སྟེ༔ མ་ཤོར་ཐེག་པ་རིམ་པ་དགུ་ཡི་རྒྱ༔ ཨོཾ་ལྃ་ཧཱུྃ་ལྃ་ཏྲཱྃ་ལྃ་ཧྲཱིཿལྃ་ཨཱཿལྃ་སྟྭ་མྦྷ་ཡ་ནན་ནན༔ ཡཾ་ནན་ནན༔ དམ་སྲི་ཡ་མ་སྟྭམྦྷ་ཡ་ནན་ནན༔ [ཞེས་མནན་ནོ། །][བདུན་པ་གཏང་རག་འབུལ་བ་ནི། སྔར་བཞིན་སྨན་གཏོར་རཀྟ་ལ་སོགས་པས་མཆོད་ཅིང་བསྟོད་པའང་བྱའོ། །][བརྒྱད་པ་བཟོད་པར་གསོལ་བ་ནི།] ཧོ༔ དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་མ་ལུས་ཤིང་ལུས་པ་མེད་པ་ཐམས་ཅད་བདག་ལ་དགོངས་སུ་གསོལ༔ ཏ་ན་སྒྲོལ་བ་གནས་སུ་མ་སྟོབ་པ་དང་༔ ག་ན་སྦྱོར་བ་བྱིན་གྱིས་མ་རློབ་པ་དང་༔ མཆོད་སྔགས་དང་ཏིང་ངེ་འཛིན་མ་དག་ཅིང་ཉམས་པ་དང་༔ དགེ་བ་བཅུ་དང་དུ་མ་ལོན་པ་དང་༔ མི་དགེ་བ་བཅུ་རྩད་ནས་མ་ཆོད་པ་དང་༔ བཀའ་བཞིན་དུ་གཞུང་མ་བསྲང་བ་དང་༔ དམ་ཚིག་རྩ་བ་དང་ཡན་ལག་ཉམས་ཆག་ཏུ་གྱུར་པ་ཅི་མཆིས་པ་དེ་དག་ཐམས་ཅད་མཐོལ་ལོ་བཤགས་སོ༔ བཟོད་པ་དམ་པ་མཛད་དུ་གསོལ༔ ཚེ་འདིའི་རྐྱེན་དང་ཕྱི་མའི་སྒྲིབ་པར་མི་འགྱུར་བའི་ཚངས་པ་བསྩལ་དུ་གསོལ༔ [ ཞེས་གསོལ་ཞིང་ཡི་གེ་བརྒྱ་པ་མང་དུ་བཟླའོ། །][དགུ་པ་དཀྱིལ་འཁོར་བསྡུ་བ་ནི།] ཧཱུཾ༔ སྣང་སྟོང་རྡོ་རྗེ་ཆོས་སྐུའི་ཞལ༔ སྤྲོས་བཅས་སྤྲོས་མེད་ཆེན་པོར་སངས༔ སྒོམ་འཛིན་དམིགས་བྱ་ཆོས་

ཉིད་དང་༔ རེ་དོགས་ཡུལ་ཞེན་ཀ་དག་ཀློང་༔ ཧཱུཾ་ཧཱུཾ་ཧཱུཾ༔ [ཞེས་བརྗོད་པས།] རང་གི་ཐུགས་ཀའི་འོད་ཀྱིས་ཕོག་པས་སྣང་སྲིད་སྣོད་བཅུད་ཀྱི་དངོས་པོ་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། གཞལ་ཡས་ཁང་འཁོར་གྱི་ལྷ་ཚོགས་རྣམས་ལ་ཐིམ། སྤྲུལ་པའི་འཁོར་དང་རྫས་ཀྱི་དཀྱིལ་འཁོར་ཐམས་ཅད་ཡུམ་གྱི་གསང་བ་བྷ་གའི་དབྱིངས་སུ་ཐིམ། ཡུམ་བདེ་བའི་ངོ་བོར་ཞུ་ནས་ཡབ་ལ་ཐིམ༔ ཡབ་ཀྱི་སྐུའི་ཆ་ཡེ་ཤེས་སེམས་དཔའ་ལ་ཐིམ༔ གསུང་གི་ཆ་སྔགས་ཀྱི་ཕྲེང་བ་ལ་ཐིམ། ཐུགས་ཀྱི་ཆ་རྡོ་རྗེ་ལ་ཐིམ། དེ་གསུམ་ཡང་དྭངས་མའི་ཐུགས་སྲོག་ཧཱུཾ་ལ་ཐིམ། ཧཱུཾ་གྱེན་རྫོགས་ན་དཱའི་བར་དུ་རིམ་གྱིས་ཡལ་ནས་ཆོས་དབྱིངས་ཞི་བ་ཆེན་པོའི་ངང་དུ་འབྱམས་ཀླས་པར་[བསམ་ལ་མཉམ་པར་བཞག་པས་རྟག་མཐའ་བསལ། དེ་ལས་ལྡང་བར་བརྩམ་པ་ན།] ཧཱུཾ༔ ཡེ་གཞི་ཀ་དག་ཆོས་སྐུའི་ཞལ༔ སྐྱེ་འགག་འགྱུར་མེད་གཞོམ་གཞིག་བྲལ༔ ཐིག་ལེ་ཉག་གཅིག་ཡེ་ཤེས་སྐུ༔ མ་བསྐྱེད་མ་བསྒོམ་ཡེ་ཡིན་ལྷ༔ ཕཊ་ཕཊ་ཕཊ༔ ཅེས་པས། སླར་ཡང་སྐད་ཅིག་གིས་རིག་པ་བྱང་ཆུབ་སེམས་ཀྱི་སྤྲིན་ལས་རང་ཉིད་དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི་སྐུར་གྱུར་པའི་སྤྱི་བོར་ཨོཾ། མགྲིན་པར་ཨཱ༔ ཐུགས་ཀར་ཧཱུཾ་གིས་མཚན་པ། རང་གི་མདངས་

ལས་ཤར་བའི་ཁམས་གསུམ་ཡང་ལྷའི་དཀྱིལ་འཁོར་དུ་གྱུར་པར་མོས་ལ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ [ཅེས་ལན་བདུན་གྱིས་སྐུ་དང་། བདུན་གྱིས་གསུང་། བདུན་གྱིས་ཐུགས་གསོ།] ཧཱུཾ༔ འཁོར་འདས་གཞི་རུ་ལྷུན་རྫོགས་པའི༔ རེ་དོགས་རང་ངོར་སངས་པ་ཡི༔ ཁྱབ་བརྡལ་རྡོ་རྗེའི་གོ་ཁྲབ་མཁྲེགས༔ རྒྱུ་གྲོལ་རྐྱེན་སྣང་མ་བཅོས་ཟད༔ ཧཱུཾ་ཧཱུཾ་ཧཱུཾ་བཛྲ་ཀཱ་ཝ་ཙི་ཧཱུཾ༔ [ཞེས་ལུས་ལ་རྡོ་རྗེའི་གོ་ཆས་ཞུ་ལུགས་སུ་གཡོགས་པར་བསམ།] ཧཱུཾ༔ ཕུང་ཁམས་སྐྱེ་མཆེད་ཉོན་མོངས་ལྔ༔ ཡེ་ཤེས་ལྔ་དང་བདེ་གཤེགས་ལྔར༔ ལྷུན་གྲུབ་རྫོགས་པ་མཚོན་ཆའི་གུར༔ གླག་ལྟའི་བར་ཆད་དབྱིངས་སུ་སྒྲོལ༔ ཨོཾ་བཛྲ་ཙཀྲ་ཏིཀྵྞ་ཀརྨ་ཀཱི་ལ་ཡ་ཛྭ་ལ་རཾ་ཧཱུཾ་ཕཊ༔ ཧཱུཾ་ཧཱུཾ་ཧཱུཾ༔ བཛྲ་ཙཀྲ་རཀྵ་ཨ༔ [ཞེས་མཚོན་ཆ་ལྔ་དང་མེ་དཔུང་གི་ཀློང་ན་བཞུགས་པས་བར་ཆད་གང་གིས་ཀྱང་གླག་མི་རྗེད་པར་བསམ་ལ་སྣོད་བཅུད་ལྷའི་འཁོར་ལོར་སྦྱང་བས་ཆད་མཐའ་བསལ་ལོ། །][བཅུ་པ་སྨོན་ལམ་གདབ་པ་ནི། འདུན་པ་རྩེ་གཅིག་པས།] ཧོ་དགོངས་སུ་གསོལ་ལོ༔ ཆོས་ཉིད་ཀྱི་བདེན་པའོ༔ གསང་སྔགས་ཀྱི་བྱིན་གྱིས་བརླབས་པའོ༔ སངས་རྒྱས་ཀྱི་མཐུའོ༔ ཨ་བྷི་ཙཱརྱའི་དུས་ལ་བབས་པའི་བརྣག་པ་དེ་ཁོ་ན་ལའོ༔ དེ་ལྟར་གསང་སྔགས་ཀྱི་སྤྱོད་པ་བླ་ན་མེད་པ་རྨད་དུ་བྱུང་བ་རླབས་པོ་ཆེ་སྤྱད་པའི་མཐུ་བྱིན་གྱིས༔ བདག་དང་

སེམས་ཅན་ཐམས་ཅད་བཅོམ་ལྡན་འདས་དཔལ་ཆེན་པོ་བཛྲ་ཀུ་མཱ་རའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་པའི་སྐལ་བ་དང་ལྡན་གྱུར་ཅིག༔ [ཅེས་དང་། གཞན་ཡང་།] ཧོཿ བླ་མེད་གསང་བ་མཆོག་གི་དཀྱིལ་འཁོར་འདིར། །དུས་གསུམ་བསག་པའི་དགེ་ཚོགས་ཇི་སྙེད་ཀུན། །མི་དམིགས་བདེ་ཆེན་བྱང་ཆུབ་སེམས་ཀྱི་ཀློང་། །སྲིད་པ་རྡོ་རྗེ་ཕུར་བུ་འགྲུབ་ཕྱིར་བསྔོ། །དབང་གི་ཆུ་བོས་བདག་རྒྱུད་རབ་ཏུ་སྨིན། །གཞུང་བཤད་ཆུ་བོས་སྒོམ་བྱ་གཏན་ལ་ཕེབས། །གདམས་པའི་ཆུ་བོས་ཉམས་ལེན་རང་བྱན་ཚུད། །མན་ངག་ཆུ་བོ་གནད་ཀྱི་གཟེར་ཐེབས་ཤོག །ཐབས་ཀྱི་སྤྱོད་པས་ལམ་གྱི་བོགས་ཆེན་འབྱོངས། །ཐལ་འབྱིན་དགོངས་པས་དབང་གི་གདིང་ཚད་བརྙེས། །སྙིང་རྗེས་བསྒྲལ་བའི་དམ་ཚིག་ཚད་དུ་འཁྲོལ༔ ། འབར་བའི་ཕྲིན་ལས་འབྲས་བུའི་མཐར་ཕྱིན་ཤོག །ཐུགས་རྗེའི་ཕུར་བུ་རྒྱུད་དྲུག་ཡུལ་ལ་ཐེབས། །བསྐྱེད་པའི་རིམ་པས་ཐ་མལ་སྣང་ཞེན་སྦྱངས། །གདན་གསུམ་མི་ཤིགས་རྡོ་རྗེ་འཁོར་ལོས་གཏམས། །སྲིད་བཅུད་ཡེ་ཤེས་ཁྲོ་བོར་ཡོངས་གྲུབ་ཤོག །མཚན་མའི་ཕུར་བུ་དགྲ་དང་བགེགས་ལ་ཐེབས། །ཚད་མེད་སྙིང་རྗེའི་ལྕགས་ཀྱུས་ཉེར་དྲངས་པའི། །རྨད་བྱུང་ཚེ་ཁྲུས་བསྒྲལ་འདྲེན་སྦྱོར་

བ་ཡིས། །མ་དག་ཞིང་བཅུའི་གནས་ངན་རྒྱུན་བཅད་ཤོག །བྱང་སེམས་ཕུར་བུ་ཡུམ་གྱི་མཁའ་ལ་ཐེབས། །ཕོ་ཉའི་ལམ་ལས་རྩ་རླུང་ཐིག་ལེའི་འགྲོས། །འཕོ་མེད་དྷུ་ཏིའི་སྦུབས་སུ་རབ་བཅིངས་ཏེ། །བཅུ་དྲུག་དགའ་བའི་ཡེ་ཤེས་མཐར་སོན་ཤོག །རིག་པའི་ཕུར་བུ་ཆོས་དབྱིངས་ལྷུམས་སུ་ཐེབས། །གནས་པ་གཞི་ཡི་རྡོ་རྗེ་ཕུར་བུ་ཉིད། །བགྲོད་པ་ལམ་གྱི་ཕུར་བུས་མཚམས་སྦྱར་ནས། །གྲུབ་པ་འབྲས་བུའི་ཕུར་བུའི་མངོན་རྫོགས་ཤོག །སྣང་བའི་ངོ་བོ་བཛྲ་ཀུ་མཱ་ར། །སྟོང་པའི་རང་བཞིན་དིཔྟ་ཙཀྲའི་དབྱིངས། །ཟུང་འཇུག་ཐུགས་རྗེ་རྟག་ཁྱབ་ཕྲིན་ལས་ཀྱིས། །འགྲོ་ཁམས་ཐིག་ལེ་གཅིག་ཏུ་བཟླུམས་གྱུར་ཅིག །[ཅེས་སྨོན་ལམ་ནན་ཏན་དུ་གདབ་བོ། །][བཅུ་གཅིག་པ་བཀྲ་ཤིས་བརྗོད་པ་ནི། མེ་ཏོག་གི་ཆར་དབབ་ལ།] རྡོ་རྗེའི་དབྱིངས་ནས་སྨིན་གྲོལ་བྱིན་རླབས་སྩོལ། །རིག་འཛིན་རྩ་བརྒྱུད་བླ་མའི་བཀྲ་ཤིས་ཤོག །ཡེ་ཤེས་ཀློང་ནས་དངོས་གྲུབ་ཆར་བཞིན་འབེབས། །ཡི་དམ་དཀྱིལ་འཁོར་ལྷ་ཡི་བཀྲ་ཤིས་ཤོག །དམ་ལྡན་སྐྱོང་ཞིང་ཕྲིན་ལས་ཐོགས་མེད་བསྒྲུབ། །མཁའ་འགྲོ་ཆོས་སྐྱོང་སྲུང་མའི་བཀྲ་ཤིས་ཤོག །གནས་སྐབས་ཞི་རྒྱས་དབང་སོགས་ཕྲིན་ལས་ཀྱིས། །དགོས་འདོད་ལྷུན་གྱིས་འགྲུབ་པའི་

བཀྲ་ཤིས་ཤོག །མཐར་ཐུག་ཡེ་ཤེས་རྡོ་རྗེ་གཞོན་ནུའི་སྐུ། །ཟུང་འཇུག་མཆོག་དངོས་འགྲུབ་པའི་བཀྲ་ཤིས་ཤོག །[ཅེས་དང་། སྤྲོ་ན།] བཀྲ་ཤིས་གང་ཞིག་བདུད་འདུལ་ཕུར་པའི་རིག་པ་འཛིན། །རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ས་ལ་བཞུགས། །པྲ་བྷ་ཧསྟི་པདྨ་ཐོད་ཕྲེང་བརྒྱུད་པར་བཅས། །བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །བཀྲ་ཤིས་གང་ཞིག་ཆོས་དབྱིངས་ནམ་མཁའི་དཀྱིལ་ནས་ཤར། །རྡོ་རྗེ་ཁྲོས་པའི་མཚོན་གྱིས་ཉོན་མོངས་དྲྭ་བ་གཅོད། །དཔལ་ཆེན་རྩ་བའི་དཀྱིལ་འཁོར་མི་གནས་ཡེ་ཤེ་སྐུ། །བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །བཀྲ་ཤིས་གང་ཞིག་སྙིང་རྗེས་སྒྲོལ་བའི་དམ་ཚིག་གིས། བདག་ཏུ་ཞེན་པའི་ཕུང་པོ་རྡོ་རྗེའི་ཕྱག་རྒྱས་གཏམས། ཕྱོགས་བཅུ་ཁྲོ་བོའི་དཀྱིལ་འཁོར་རོལ་པའི་ཆོ་འཕྲུལ་བདག བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །བཀྲ་ཤིས་གང་ཞིག་སྲིད་པ་ཕུར་བུའི་རང་རྟགས་རྒྱ། །འཛིན་ཤེས་གཏོང་མི་ཤེས་ཀྱིས་བརྣག་པའི་ཕྲིན་ལས་མཛད། །མཚན་མ་རྫས་ཀྱི་དཀྱིལ་འཁོར་ཤུགས་སྒྲོལ་སྟོབས་འདུས་པ། །བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །

བཀྲ་ཤིས་གང་ཞིག་རྣམ་འགྱུར་རྫུ་འཕྲུལ་མཐའ་ཡས་ཤིང་། །དམ་ཚིག་རྗེས་གཅོད་དམ་ཉམས་སྲོག་ལ་མངའ་དབང་བསྒྱུར། །བྲན་དང་བཀའ་ཉན་ཕོ་ཉ་དཔལ་ཆེན་བཀའ་བསྒྲུབ་པ། །བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །བཀྲ་ཤིས་གང་ཞིག་སྣང་སྲིད་འཁོར་འདས་མཚན་རྟོག་ཀུན། །ཚུར་བུ་རྣམ་བཞིའི་དགོངས་པས་གྲུབ་མཐའ་ཐལ་བར་འབྱིན། །ཐུན་མོང་མཆོག་གི་དངོས་གྲུབ་བདེ་བླག་འགྲུབ་པ་ཡི། །བདེན་པ་དེས་ཀྱང་བདུད་ལས་རྣམ་རྒྱལ་བཀྲ་ཤིས་ཤོག །[ཅེས་སོགས་ཤིས་པ་བརྗོད་པའི་ཚིག་ཕྲེང་རྒྱ་ཆེར་སྤེལ་བས་ཕྱོགས་དུས་ཀུན་ཏུ་དགེ་ལེགས་ཀྱི་སྣང་བས་ཡོངས་སུ་ཁྱབ་པར་བྱའོ།] ། རྒྱལ་ཀུན་ཕྲིན་ལས་གཅིག་བསྡུས་དཔལ་ཆེན་པོ། །རྡོ་རྗེ་གཞོན་ནུའི་ཀྱིལ་འཁོར་འཁོར་ལོ་ཆེ། །སྒྲུབ་པའི་ལམ་སྲོལ་རྒྱུད་ལུང་མན་ངག་བཅུད། །ཨོ་རྒྱན་མཁན་པོའི་བཞེད་གཞུང་བླ་ན་མེད། །ཟབ་གཏེར་གསང་བ་དགོངས་དོན་གཱངྒའི་ཆབ། །ངན་རྟོག་དུག་ཆུས་བསླད་མིན་བརྒྱུད་ལྡན་གྱི། །དམ་པ་ཞལ་ལུས་བདུད་རྩིས་རབ་སྦྲན་པ། །གྲུབ་གཉིས་འདོད་པ་འཇོ་བའི་གཏེར་དུ་མཚོན། །རྣམ་དག་གཞུང་གི་ངེས་པ་འཁྲུལ་མེད་དུ། བཀྲལ་

བའི་སྒྲུབ་ཕྲིན་ལས་ཀྱི་ཁྲིགས་འདི་ཀོ །དོན་གཉེར་སྐལ་བཟང་ཀུན་དགའི་འཇུག་ངོགས་ཏེ། །ཁྲག་འཐུང་མངོན་པར་རོལ་པའི་དགའ་སྟོན་ཡིན། །བསོད་ནམས་གང་དེས་མ་དག་སྲིད་པའི་ཁམས། །རྡོ་རྗེ་ཕུར་བུའི་འཁོར་ལོར་ཡོངས་སྨིན་ཅིང་། །ཟབ་མོའི་ལམ་བཟང་མཆོག་འདིའི་ཕྲིན་ལས་རྒྱུན། །ཕྱོགས་དུས་ཀུན་ཁྱབ་བཀྲ་ཤིས་དཔལ་འབར་ཤོག །[། དེ་ལྟར་དཔལ་རྡོ་རྗེ་ཕུར་བུ་ཐུགས་ཀྱི་སྒྲུབ་པ་གསང་བའི་རྒྱ་ཅན་བདུད་འཇོམས་གནམ་ལྕགས་སྤུ་གྲིའི་ལས་བྱང་ཁྲག་འཐུང་མངོན་པར་རོལ་པའི་དགའ་སྟོན་ཅེས་བྱ་བ་འདི་ནི། དོན་དུ་གཉེར་བའི་བློ་གྲོས་ཅན་རྣམས་ཀྱིས་བསྐུལ་བ་ལས་རང་གཞན་མང་པོ་ལ་མཆོག་ཏུ་སྨན་པའི་བསམ་པ་ཉེ་བར་བསྐྱེད་ནས། མན་ངག་གི་དགོངས་པ་བཞིན་རྩ་བའི་ལས་གཞུང་དང་གབ་བྱང་དཀྱུས་སུ་བསྡེབས་ཤིང་ཆོ་གའི་ཡན་ལག་སྐབས་སུ་བབས་པ་ཇི་ལྟར་རིགས་པས་ཀྱང་མི་འགལ་བར་བརྒྱན་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེས་རང་ལོ་ཉེར་དགུར་སོན་པ་རབ་བྱུང་བཅུ་དྲུག་པའི་ཆུ་ཕོ་སྤྲེའུའི་ལོ་རྒྱལ་གྱི་ཉ་བའི་ཐབས་ཀྱི་ཆའི་དགའ་བ་དང་པོ་རེས་གཟའ་ལྷའི་བླ་མ་རྒྱུ་སྐར་རྒྱལ་གྱི་དགའ་མ་དང་རྩེ་བའི་འགྲུབ་པའི་སྦྱོར་བ་བཟང་པོ་ལ། ས་སྤྱོད་དཔལ་གྱི་ཞིང་ཁམས་པདྨ་རྣམ་པར་བཀོད་པའི་གྲོང་ཁྱེར་གྱི་ལྟེ་བ་མཁན་ལྗོངས་ཨེ་ཝཾ་བདེ་ཆེན་ཆོས་འཁོར་གླིང་གི་བསྟི་གནས་སུ་ལེགས་པར་གྲུབ་པར་བགྱིས་པ་སྟེ།

འདིས་ཀྱང་རྨད་དུ་བྱུང་བའི་ཟབ་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་། མཐའ་ཡས་པའི་འགྲོ་བ་ཐམས་ཅད་བདུད་བཞིའི་གཡུལ་ལས་རྣམ་པར་རྒྱལ་ཏེ་བཅོམ་ལྡན་འདས་དཔལ་ཆེན་པོ་རྡོ་རྗེ་གཞོན་ནུའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག། །། སརྦ་དཱ་མངྒ་ལ་ཛ་ཡནྟུ། །]༈ ། ཇི་སྙེད་ཕན་བདེ་མ་ལུས་འབྱུང་བའི་གནས། །ཐུབ་པའི་བསྟན་པ་སྤྱི་དང་ཁྱད་པར་དུ། །སྔ་འགྱུར་འོད་གསལ་རྡོ་རྗེ་སྙིང་པོའི་སྲོལ། །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག །༈ པདྨའི་རིང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པའི་འཛིན་གྱུར་ཅིག །༈ བསླབ་གསུམ་འཕགས་པའི་ནོར་གྱིས་ལེགས་ཕྱུག་ཅིང་། །སྤངས་ཀློག་འཁོར་ལོ་གསུམ་གྱིས་དུས་འདའ་བའི། །འདུས་པ་རྒྱ་མཚོས་གནས་འདི་ཡོངས་གང་ནས། །བསྟན་འགྲོའི་ཕན་བདེའི་རྫོགས་ལྡན་གསར་འཆར་ཤོག །༈ ཨེ༵་ཝ༵ཾ་ཟུང་འཇུག་བདེ༵་ཆེ༵ན་མུ་ཁྱུད་ཟླུམ། །མདོ་སྔགས་ཆོས༵་འཁོ༵ར་བཤད་སྒྲུབ་རྩིབས་སྟོང་བཀྲ། །མཚུངས་མེད་རྔ་ཡབ་གླི༵ང་པའི་རིང་ལུགས་འདི། །སྲིད་མཐའི་བར་དུ་མི་ཉམས་འཕེལ་རྒྱས་ཤོག། [ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་བརྒྱུད་པའི་བླ་མ་རྣམས་ལ་གསོལ་བ་འདེབས་པ་བྱིན་རླབས་དགའ་སྟོན།

[དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་བརྒྱུད་པའི་བླ་མ་རྣམས་ལ་གསོལ་བ་འདེབས་པ་བྱིན་རླབས་དགའ་སྟོན་ཅེས་བྱ་བ།] འགྱུར་མེད་དབྱིངས་ཀྱི་མགོན་པོ་ཀུན་ཏུ་བཟང་། །རང་བྱུང་སྒྱུ་འཕྲུལ་རིགས་ལྔ་ཧེ་རུ་ཀ །ལོངས་སྤྱོད་ཡོངས་རྫོགས་རྡོ་རྗེ་སེམས་དཔའ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །གསང་བ་ཀུན་བདག་དཔལ་ལྡན་རྡོ་རྗེ་ཆོས། །རྒྱལ་ཚབ་སྟོན་པ་དགའ་རབ་རྡོ་རྗེའི་ཞབས། །པཎ་གྲུབ་རྒྱ་མཚོའི་གཙུག་རྒྱན་ཤྲཱི་སེང་ཧ། །གསོལ་བ་འདེབས་སོ་བདུད་དཔུང་འཇོམས་པར་ཤོག །གསང་ཆེན་ཏནྟྲའི་མཛོད་འཛིན་རྒྱལ་པོ་ཛཿ མཁའ་འགྲོའི་དབང་ཕྱུག་ལས་ཀྱི་དབང་མོ་ཆེ། །ཕྲིན་ལས་གྲུབ་པ་སློབ་དཔོན་པྲ་བྷ་ཧ། །

གསོལ་བ་འདེབས་སོ་བདུད་དཔུང་འཇོམས་པར་ཤོག །བདེ་གཤེགས་ཀུན་འདུས་པདྨ་ཐོད་ཕྲེང་བསྩལ། །བཀའ་བབས་ཌཱ་ཀི་དབྱིངས་ཕྱུག་མཁར་ཆེན་བཟའ། །འཇམ་དཔལ་དབྱངས་དངོས་ཚངས་པ་ལྷའི་མེ་ཏོག །གསོལ་བ་འདེབས་སོ་བདུད་དཔུང་འཇོམས་པར་ཤོག །མཆོག་གི་ས་བརྙེས་འབྲོག་བན་ལོ་ཙཱ་བ། །ཟབ་གཏེར་མངའ་བདག་ཁྲག་འཐུང་བདུད་འཇོམས་གླིང་། །ལས་ཅན་ཆོས་བདག་རྩ་བརྒྱུད་བླ་མ་ལ། །གསོལ་བ་འདེབས་སོ་བདུད་དཔུང་འཇོམས་པར་ཤོག །ལྷག་པའི་ལྷ་མཆོག་བདུད་འདུལ་ཁྲོ་བོའི་རྒྱལ། །རྡོ་རྗེ་གཞོན་ནུའི་དཀྱིལ་འཁོར་འཁོར་ལོའི་ཚོགས། །མཁའ་འགྲོ་དམ་ཅན་གཏེར་སྲུང་བཅས་རྣམས་ལ། །གསོལ་བ་འདེབས་སུ་བདུད་དཔུང་འཇོམས་པར་ཤོག །སྣང་སྲིད་ཁྲག་འཐུང་འབར་བའི་ཕྱག་རྒྱར་སད། །སྒྲ་གྲགས་འགག་མེད་ཀཱི་ལའི་དབྱངས་སུ་འཕོས། །རིག་པ་ཡེ་ཤེས་ཕུར་བུའི་ངོ་བོ་ཉིད། །མངོན་འགྱུར་ལྷུན་གྲུབ་ཕྲིན་ལས་མཐར་ཕྱིན་ཤོག [ཅེས་བཀའ་གཏེར་རྒྱུད་ལུང་མན་ངག་གི་ཆུ་བོ་གཅིག་ཏུ་དྲིལ་བ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་བཀའ་སྲོལ་གྱི་བརྒྱུད་པའི་བླ་མ་རྣམས་ལ་གསོལ་བ་འདེབས་པ་བྱིན་རླབས་དགའ་སྟོན་ཅེས་བྱ་བ་འདི་ནི། ལྷ་རིགས་ཀྱི་སྔགས་སྨྱོན་འཇིགས་བྲལ་ཡེ་ཤེས་རྡོ་རྙེས་ལྷག་པའི་ལྷ་མཆོག་འདི་ཉིད་ཉེ་བར་བསྙེན་པའི་ཐུན་མཚམས་སུ་སྦྱར་བ་ཛ་ཡནྟུ།། །།]

ཟབ་གསང་མཁའ་འགྲོའི་སྙིང་ཐིག་ལས་དཔལ་ཆེན་རྡོ་རྗེ་གཞོན་ནུའི་བསྐང་བ་དཔག་བསམ་ལྗོན་ཤིང་རྒྱས་པ།

ཟབ་གསང་མཁའ་འགྲོའི་སྙིང་ཐིག་ལས༔ དཔལ་ཆེན་རྡོ་རྗེ་གཞོན་ནུའི་བསྐང་བ་དཔག་བསམ་ལྗོན་ཤིང་རྒྱས་པ་བཞུགས་སོ༔ ཐུགས་སྒྲུབ་གསང་བའི་རྒྱ་ཅན་གྱི་སྐོར༔

ན་མོ་གུ་རུ་ཝེ༔ [ཐངྷཐམྣཐཐ༔ ཕུར་པ་བསྒྲུབ་པའི་རིག་འཛིན་ལ༔ བསྐང་བཤགས་དཔག་བསམ་ལྗོན་ཤིང་གཅེས༔ སྒྲུབ་པའི་དུས་དང་སྨིན་གྲོལ་འཆད༔ དེ་དུས་དངོས་སུ་འབྱོར་ཚོགས་བཤམས༔ སྨན་ཆས་བྱིན་རླབས་བདུད་རྩིས་བྲན༔ རྣམ་རྟོག་འཁོར་བའི་བག་ཆགས་སྦྱངས༔ ཇི་སྲིད་འཁོར་བ་མ་སྟོང་བར༔ སངས་རྒྱས་ཞིང་ཁམས་ཐམས་ཅད་དུ༔ མཆོད་སྤྲིན་རྒྱུན་མི་འཆད་པ་རུ༔ སྤྲོ་བའི་རང་བཞིན་ཅན་དུ་དམིགས༔ ]ཨོཾ་ཨཱཿཧཱུྃ༔ སྣང་སྲིད་སྒྱུ་མར་བཀྲ་བའི་མིག་འཕྲུལ་ཅན༔ ངོ་བོ་སྐྱེ་བ་མེད་པའི་ངང་དུ་འདུས༔ སླར་ཡང་རང་བཞིན་སྒྱུ་མའི་ཆོ་རོལ་དུ༔ སྣ་ཚོགས་བཀྲ་བའི་དགའ་སྟོན་ཚོགས་སུ་ཤར༔ ཨོཾ་ཨཱཿཧཱུྃ༔ སྣང་སྟོང་སྦྱོར་བའི་བདེ་སྟོང་བདུད་རྩིའི་རྒྱུན༔ ཁྱབ་བརྡལ་ཡངས་པའི་དུང་ཆེན་སྣོད་དུ་

བསྐྱིལ༔ འདོད་ཡོན་ལྷ་མོའི་གར་གྱི་རྣམ་འགྱུར་གྱིས༔ ལྷ་ཚོགས་དགྱེས་མཛད་མཆོད་སྤྲིན་རབ་ཏུ་གཏིབས༔ འོད་ཟེར་སྦུ་གུའི་ལྗགས་ཀྱིས་འདྲེན་རོལ་ནས༔ བདེ་སྟོང་ཡེ་ཤེས་རོ་ཡིས་མཉེས་གྱུར་ཅིག༔ ཨོཾ་ཨཱཿཧཱུྃ༔ སྣང་བ་ཐབས་ཀྱི་རང་བཞིན་ཧེ་རུ་ཀ༔ སྟོང་པ་ཤེས་རབ་རང་བཞིན་ཡུམ་གྱི་ཚུལ༔ ཞལ་ཕྱག་མཚན་མ་བྲལ་བའི་ཆོས་སྐུ་ལས༔ མཚན་མའི་རྟོག་པ་རྣམ་སྒྲོལ་གར་བསྒྱུར་བ༔ རྡོ་རྗེ་གཞོན་ནུ་ཡབ་ཡུམ་ཐུགས་དམ་བསྐང་༔ ཕུང་ཁམས་སྐྱེ་མཆེད་གནས་སུ་དག་པ་ལས༔ ཡེ་ཤེས་རྩ་ཆེན་འབར་བའི་སྒྱུ་ཕྲུལ་གྱིསཿ འཁོར་བ་ཡོངས་སུ་སྒྲོལ་ཕྱིར་སྐུར་སྣང་བ༔

སྲས་མཆོག་ཀཱི་ལ་རིགས་ལྔའི་ཐུགས་དམ་བསྐང་༔ སྐྱེ་མེད་དབྱིངས་ལས་འགགས་མེད་རོལ་པའི་རྩལ༔ ཅིར་ཡང་མ་ངེས་སྣ་ཚོགས་བསྒྱུར་བའི་གར༔ ལོག་རྟོག་རཱུ་དྲ་འདུལ་བའི་སྟོབས་མངའ་བ༔ ཡེ་ཤེས་ ན་པོའི་དཔའ་ཟིལ་རབ་ངོམས་ཤིང་༔ ཕྲིན་ལས་རྣམ་བཞིའི་ཐབས་ཀྱིས་གདུག་པ་འདུལ༔ སྲས་འཁོར་བཀའ་སྡོད་ཡོངས་ཀྱི་ཐུགས་དམ་བསྐང་༔ བསྐང་དུ་མེད་དེ་སྐྱེ་མེད་དབྱིངས་སུ་བསྐང་༔ སྦྱོར་དུ་མེད་དེ་ཟུང་འཇུག་ཆེན་པོར་སྦྱོར༔ སྒྲོལ་དུ་མེད་དེ་མཉམ་ཉིད་རོ་གཅིག་ངང་༔ ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་༔ ཧོ༔ མཆོག་གསུམ་སྐུ་གསུམ་རྩ་གསུམ་རྒྱ་མཚོ་དང་༔ རིག་འཛིན་གྲུབ་ཐོབ་རྒྱལ་བ་རྒྱ་མཚོའི་ཚོགས༔ ཐུགས་རྗེ་བརྩེ་བ་ཆེན་པོས་རྗེས་དགོངས་འཚལ༔ ནོངས་པ་འཆགས་སོ་མི་སྒྲིབ་ཚངས་པར་སྩོལ༔ ན་མོ་གུ་རུ་བྷྱ༔ བདེ་གཤེགས་ཡོངས་རྫོགས་དགོངས་སུ་གསོལ༔ བདག་ནི་མ་རིག་དབང་གྱུར་ཏེ༔ རྒྱལ་བའི་བཀའ་དང་བླ་མའི་ལུང་༔ ཇི་བཞིན་མ་སྤྱད་སློབ་དཔོན་སྨད༔ རྡོ་རྗེ་སློབ་དཔོན་མཆེད་ལྕམ་ལ༔ ལྟ་ལོག་ངན་སེམས་ངག་ཏུ་སྨྲས༔ བརྡེག་བཙོགས་གནོད་པ་དངོས་སུ་སྤྱད༔ ལྷ་དང་དཀྱིལ་འཁོར་ཉམས་མ་

གསལ༔ ཛཔ྄་བཟླས་མ་དག་ཟུར་ཆག་ཉམས༔ གསང་བར་འོས་དང་གཉེར་གཏད་སྨྲས༔ གསང་བཅུ་བསྒྲགས་ཤིང་བླ་མ་བསླུས༔ རྩ་བའི་དམ་ཉམས་མཐོལ་ཞིང་བཤགས༔ སྤྱད་པར་བྱ་བའི་དམ་ཚིག་ལྔ༔ ཤེས་བྱ་ལྔ་དང་བསྒྲུབ་བྱ་ལྔ༔ མི་སྤང་ལྔ་དང་དང་ལེན་ལྔ༔ ཡན་ལག་དམ་ཉམས་མཐོལ་ཞིང་བཤགས༔ བསྙེན་སྒྲུབ་ཏིང་འཛིན་དམ་གཡེལ་ཞིང་༔ ཉ་སྟོང་དུས་དྲུག་དུས་མཆོད་ཆག༔ ལེ་ལོ་གསོག་འཇོག་ཚོགས་སྤྱད་བྱས༔ ཕུད་ལྷག་ཉམས་ཤིང་ཁ་ཚར་ཤོར༔ ཚོར་དང་མ་ཚོར་སྐྱོན་དབང་གིས༔ སྒོ་གསུམ་བག་མེད་དམ་ཉམས་བཤགས༔ ཡིད་ཀྱི་དམ་ཉམས་ལྟ་བས་བཤགས༔ དེ་ཡང་ཀུན་གཞི་བྱང་ཆུབ་སེམས༔ ཡིན་པ་མེད་པའི་ལྟ་བ་རྟོགས༔ མིན་པ་མེད་པའི་དགོངས་ཉམས་ལོན༔ ཡིན་མིན་མེད་པའི་སྤྱོད་པ་རྟོགས༔ རེ་དོགས་མེད་པའི་བྱང་ཆུབ་སེམས༔ རྩ་བ་ཡན་ལག་དམ་ཚིག་ཀུན༔ ཆག་ཉམས་མ་བྱུང་མ་སྐྱེས་པ༔ བཤགས་བྱ་བཤགས་བྱེད་གཉིས་མེད་ངང་༔ ཀ་དག་ཀློང་ཆེན་ཡངས་པར་གྲོལ༔ [མ་འོངས་དུས་ཀྱི་གང་ཟག་རྣམས༔ བསྐང་བཤགས་འདི་ལ་རྟག་ཏུ་བརྩོན༔ ཚེ་འདིར་མཆོག་ཐུན་དངོས་གྲུབ་འགྲུབ༔ རྐྱེན་སྒྲིབ་ཉམས་ཆག་འདིས་

གྲོལ་འགྱུར༔ མ་མོ་སྲིད་པའི་རྒྱལ་མོ་དང་༔ གནོད་སྦྱིན་ཤན་དམར་འཁོར་བཅས་ཀྱིས༔ དམ་ཉམས་ལྟ་ལོག་ཅན་ལ་གསང་རྒྱས་ཐོབ༔ ས་མ་ཡ༔ རྒྱ་རྒྱ་རྒྱཿ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ པདྨ་འོད་དུ་ཨ་ཐམ་རྒྱ༔ བརྡ་ཐིམ༔ ཞེས་པའང་སྔགས་པ་བདུད་འཇོམས་རྡོ་རྗེས་གཏེར་ནས་སྤྱན་དྲངས་ཏེ་དག་པར་ཕབ་པའི་ཡེ་གེའི་རིག་བྱེད་ཕུན་ཚོགས་བཀྲ་ཤིས་སོ། །སརྦ་མདྒ་ལཾ།། །།]

དཔལ་རྡོ་རྗེ་ཕུར་བུའི་དཀྱིལ་འཁོར་གྱི་ལྷ་ཚོགས་ཐུགས་དམ་སྐོང་བའི་རིམ་པ་ནམ་མཁའ་མཛོད་ཀྱི་དགའ་སྟོན།

༄༅། །དཔལ་རྡོ་རྗེ་ཕུར་བུའི་དཀྱིལ་འཁོར་གྱི་ལྷ་ཚོགས་ཐུགས་དམ་སྐོང་བའི་རིམ་པ་ནམ་མཁའ་མཛོད་ཀྱི་དགའ་སྟོན་ཅེས་བྱ་བ་བཞུགས་སོ། །

ན་མོ་ཤྲཱི་བཛྲ་ཀུ་མཱ་ར་ཡེ། [བསྐང་རྫས་སུ་འོས་པའི་ཡོ་བྱད་རྣམས་ཚར་དུ་དངར་བར་བཀྲམ་ལ་ནམ་མཁའ་མཛོད་ཀྱི་རིག་པས་ཀུན་ཏུ་བཟང་པོའི་མཆོད་པའི་སྤྲིན་ཕུང་དུ་སྤེལ། རོལ་མོ་སྣ་ཚོགས་དང་སྦྱར་བའི་གདུང་བང་རོའི་དབྱངས་ཀྱིས་འདི་སྐད་དོ།] ཧཱུཾ། ཆོས་དབྱིངས་མི་འགྱུར་མཐིང་ནག་ཨེ་ཀློང་ནས། །སངས་རྒྱས་ཀུན་གྱི་ཕྲིན་ལས་འདུས་པའི་དཔལ། །བདུད་ཀྱི་བདུད་ཆེན་བཅོམ་ལྡན་ཁྲོ་བོའི་རྒྱལ། །རྡོ་རྗེ་གཞོན་ནུའི་ལྷ་ཚོགས་གནས་འདིར་གཤེགས། །སྣ་ཚོགས་དམ་རྫས་ཚིལ་གསུར་སྤོས་ཀྱི་སྤྲིན། །བསུང་ཞིམ་ངད་ལྡན་དྲི་རླུང་ཀུན་ཏུ་གཏིབས། །མཐིང་ནག་དར་སྤུད་མཆོག་གི་ཧ་སྟ་ཆེ། །

ཞིང་ཆེན་ལྤགས་པའི་གཡབ་མོ་ལྷབ་ལྷུབ་འདོར། །གསང་བའི་རྡེའུ་ཆུང་རྐང་གི་གླིང་བུ་སོགས། །སྙན་བརྗིད་ས་གསུམ་འདར་བའི་རོལ་མོའི་སྒྲ། །གདུང་བའི་ང་རོ་དྲག་པོར་དགོད་པའི་དབྱིངས། །མ་བཟད་གད་རྒྱངས་སྒྲོགས་པའི་རྔམས་གླུ་བཅས། །ཁྲག་འཐུང་དབྱིངས་ནས་འགུགས་པའི་སྦྱོར་བ་ཡིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །རབ་འཇིགས་དུར་ཁྲོད་འབར་བའི་ཞིང་ཁམས་མཆོག །རང་བྱུང་ལྷུན་གྲུབ་བཀོད་པ་འབྱམས་ཀླས་པ། །རྡོ་རྗེ་འཛིན་ཀྱང་འཇིགས་པའི་ཕོ་བྲང་དུ། །མི་སྡུག་གཤིན་རྗེའི་འདུན་

ས་ལྟ་བུ་ཡི། །དཔའ་བོ་དགྱེས་པའི་ལོངས་སྤྱོད་བསམ་མི་ཁྱབ། །ཐབས་ཤེས་དབྱེར་མེད་དམ་ཚིག་རྡོ་རྗེའི་རྫས། །འདོད་ཡོན་བདེ་ཆེན་རྣམ་འགྱུར་མཐའ་ཡས་པས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །ཡིད་འོང་མེ་ཏོག་མཛེས་པ་ཚར་དུ་དངར། །དྲི་ཞིམ་བདུག་པའི་སྤྲིན་ཕུང་རབ་ཏུ་འཐུལ། །འོད་འབར་སྣང་གསལ་མར་མེ་ཉི་ལྟར་བཀྲ། །བསིལ་ཞིང་དྲི་ལྡན་ཆབ་རྒྱུན་ལྷུང་ལྷུང་འབབས། །རོ་མཆོག་བརྒྱ་ལྡན་ཞལ་ཟས་ལྷུན་པོར་སྤུངས། །སྙན་འགྱུར་རོལ་མོའི་སྒྲ་དབྱངས་སྟོང་གསུམ་ཁྱབ། །རྣམ་མང་ཕྱི་ཡི་མཆོད་པ་སྣ་ཚོགས་ཀྱིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །གཟུགས་མཛེས་ཡིད་འཕྲོག་གར་གྱི་སྟངས་སྟབས་བསྒྱུར། །སྒྲ་སྙན་པི་ཝཾ་གླིང་བུའི་གདངས་སྐད་འཁྲོལ། །དྲི་མཆོག་བསིལ་བའི་ཆར་ཆེན་སིལ་མར་འབེབས། །རོ་ལྡན་བཟའ་བཏུང་སྣ་ཚོགས་རྒྱ་མཚོར་བསྐྱིལ། །རེག་བྱ་འཇམ་འཁྲིལ་ལྷ་རྫས་གོས་བཟང་འཕུར། །ཟག་མེད་བདེ་དགས་སིམ་པ་མཆོག་བསྐྱེད་པའི། །འདོད་ཡོན་ནང་གི་མཆོད་པ་སྣ་ཚོགས་ཀྱིས། །བདུད་འདུལ་ལྷ་མཆོག་འཁོར་བཅས་ཐུགས་དམ་

བསྐང་། །གདུག་ཅན་ཉམས་པའི་དཔུང་ཚོགས་ཚར་བཅད་པའི། །དབང་པོ་རྣམ་ལྔའི་མེ་ཏོག་འདར་ཞིང་འཁྲིག །ཚིལ་ཆེན་གསུར་དུད་སྤྲིན་ཕུང་ལང་ལོང་གཡོ། །རབ་འབར་ཞུན་ཆེན་མར་མེ་འོད་དུ་གསལ། །མཁྲིས་ཆེན་དྲི་ཆུའི་བྱུག་པ་རྦ་ཀློང་འཁྲུགས། །མཱཾ་ས་རུས་པའི་ཞལ་ཟས་ལྷུན་པོར་སྤུངས། །དུར་ཁྲོད་དྲག་པོའི་མཆོད་སྤྲིན་སྣ་ཚོགས་ཀྱིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །འདོད་རྒུ་ཡིད་བཞིན་འཇོ་བའི་བ་མོ་དང་། །མི་འཛད་གཏེར་གྱི་དབྱིག་ཆེན་བུམ་པ་བཟང་། །མ་རྨོས་འཁྲུངས་པའི་ལོ་ཏོག་དཔག་བསམ་ཤིང་། །ཕུལ་བྱུང་བཀྲ་ཤིས་རྫས་རྟགས་རིན་ཆེན་བདུན། །གླིང་བཞི་རི་རབ་ལྕགས་རི་ཁོར་ཡུག་བཅས། །མཐོ་རིས་འབྱོར་པ་རྒྱ་མཚོས་ཡོངས་གང་བ། །བརྟན་གཡོའི་མངའ་ཐང་ལོངས་སྤྱོད་ཇི་སྙེད་ཀྱིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །དམ་རྫས་རྩ་བ་བརྒྱད་ལ་ཡན་ལག་སྟོང་། །རྒྱུ་གཉིས་རྐྱེན་བཞི་མཉམ་སྦྱར་བཅུད་ཀྱི་མཆོག །ཡེ་ཤེས་འགུགས་པའི་ལྕགས་ཀྱུ་རྣམ་པ་ལྔ། །བདེ་ཆེན་སྟོབས་

རྫོགས་སྒྲོན་མ་ལྔ་དང་སྦྱར། །ཉོན་མོངས་དུག་ལྔ་སེལ་བའི་སྨན་ཆེན་པོ། །སྣང་སྲིད་རྣམ་དག་འཆི་མེད་ར་སཱ་ཡ། །བླ་མེད་དམ་ཚིག་ཆེན་པོའི་མཆོད་པ་འདིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །སྲིད་པ་གསུམ་གྱི་གདུག་ཅན་རཱུ་དྲའི་ཚོགས། །སྙིང་རྗེ་ཁྲོས་པའི་མཚོན་གྱིས་རབ་བསྒྲལ་བའི། །དམར་ཆེན་ཁྲག་གི་ཨརྒྷཾ་རྒྱ་མཚོར་འཁྱིལ། །གཱིརྟའི་མཁའ་ནས་ཆགས་པའི་བདེ་རྒྱུན་འབེབས། །ཆགས་བྲལ་སོ་སོར་རྟོག་པའི་ཡེ་ཤེས་དངོས། །འདོད་ཆགས་འཁོར་བའི་རྩ་བ་སྟོང་བྱེད་པ། །རྨད་བྱུང་གཟི་བརྗིད་ཆེན་པོའི་མཆོད་པ་འདིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། སྐྲ་ཅན་བྷཉྫ་འབར་བའི་སྣོད་ཡངས་པར། །རོ་དྲུག་ནུས་པ་བརྒྱད་དང་ཡོངས་ལྡན་པའི། །དཔལ་གྱི་བཤོས་བུ་ལྷུན་པོའི་གཏོས་ལྟར་སྤུངས། །དགྲ་བོའི་དོན་སྙིང་ནང་ཁྲོལ་ཤ་ཁྲག་རུས། །ཀླད་ཞག་ལྦུ་ཕྲེང་འཁྲིགས་པའི་བཟའ་བཅའི་དངོས། །གང་ལ་གང་བཞེད་དེ་དང་དེར་འཆར་བའི། །ཕུལ་བྱུང་འདོད་ཡོན་ཆེན་པོའི་མཆོད་པ་འདིས། །བདུད་འདུལ་ལྷ་མཆོག་

འཁོར་བཅས་ཐུགས་དམ་བསྐང་། །རིན་ཆེན་གཟི་ལྡན་ལུས་ཀྱི་ཀོང་བུ་རུ། །རིག་པ་སྙིང་པོ་སྲོག་གི་སྡོང་བུ་བཙུགས། །བྱང་སེམས་དྭངས་མ་ཐིག་ལེའི་ཞུན་མར་བསྐྱིལ། །བདེ་གསལ་རྣམ་པར་མི་རྟོག་མར་མེ་སྦར། །ཤེས་རབ་ཡེ་ཤེས་སྣང་བ་འོད་འབར་བས། །ཁམས་གསུམ་འཁོར་བའི་མུན་པ་སེལ་བར་བྱེད། །རང་བྱུང་ངོ་མཚར་ཆེན་པོའི་མཆོད་པ་འདིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །ཤ་ལྔ་བདུད་རྩི་རིགས་ལྔ་ཡེ་ཤེས་ལྔ། །ཡབ་ཡུམ་ཐབས་ཤེས་མཉམ་པར་སྦྱོར་བའི་བཅུད། །ཟག་མེད་བདུད་རྩིའི་རྒྱ་མཚོ་ཆེན་པོར་བསྐྱིལ། །ཡིད་འོང་ཁ་དོག་དྲོ་རོ་ནུས་བཅུད་འབར། །ངོ་མཚར་འདོད་ཡོན་ལྷ་མོའི་སྤྲིན་ཕུང་གིས། །ཆོས་ཀྱི་དབྱིངས་ཀུན་རྒྱས་པར་གང་བ་ཡི། །དམ་ཚིག་ཚོགས་ཀྱི་འཁོར་ལོའི་ལོངས་སྤྱོད་ཀྱིས། །བདུད་འདུལ་ལྷ་མཆོག་འཁོར་བཅས་ཐུགས་དམ་བསྐང་། །མཛེས་སྡུག་ལང་ཚོས་མྱོས་པའི་སྒྱུ་རྩལ་ཅན། །ཡིད་འཕྲོག་འཇོ་སྒེག་ཉམས་ལྡན་ཤེས་རབ་མ། །ནམ་མཁའ་གང་བའི་པདྨོའི་རེག་བྱ་མཆོག །གཉིས་མེད་དགྱེས་པར་རོལ་པའི་བརྟུལ་ཞུགས་ཀྱིས། །ལྷན་སྐྱེས་དགའ་བཞིའི་ཡེ་ཤེས་མཐར་སོན་པས། །གཟུང་འཛིན་རྟོག་ཚོགས་སྐྱེ་

མེད་དབྱིངས་སུ་བསྒྲལ། །བདེ་ཆེན་གསང་བ་མཆོག་གི་མཆོད་པ་ཆེས། །བདུད་འདུལ་ལྷ་མཚོག་འཁོར་བཅས་ཐུགས་དམ་བསྐང་། །ཀུན་ཁྱབ་འདུས་མ་བྱས་པ་རིག་པའི་གཤིས། །གཉུག་མ་དོན་གྱི་ཧེ་རུ་ཀ་དཔལ་མཆོག །གདོད་ནས་འདུ་འབྲལ་མེད་པའི་གནས་ལུགས་ཉིད། །མངོན་སུམ་རང་ཞལ་རྗེན་པར་མཐོང་བ་ལས། །སྣང་སྲིད་ཐལ་འབྱིན་རྡོ་རྗེ་ཕུར་བུའི་ཀློང་། །བློ་འདས་འུབ་ཆུབ་དགོངས་པར་ལ་བཟླ་བ། །སྤང་བླང་བྱ་རྩོལ་བྲལ་བའི་དམ་ཚིག་གིས། །བདུད་འདུལ་ལྷ་ཚོགས་འཁོར་བཅས་ཐུགས་དམ་བསྐང་། །བསྐང་ངོ་གསོལ་ལོ་མཆོད་དོ་ཐུགས་དམ་བསྐང་། །བརྒྱུད་གསུམ་རིག་འཛིན་བླ་མའི་ཐུགས་དམ་བསྐང་། །ཡི་དམ་རྡོ་རྗེ་གཞོན་ནུའི་ཐུགས་དམ་བསྐང་། །སྦྱོར་ཡུམ་འཁོར་ལོ་རྒྱས་འདེབས་ཐུགས་དམ་བསྐང་། །སྒྲོལ་ཡུམ་ཨེ་ཀ་ཛ་ཊཱིའི་ཐུགས་དམ་བསྐང་། །ཁྲོ་རྒྱལ་ཀཱི་ལ་རིགས་ལྔའི་ཐུགས་དམ་བསྐང་། །ཡེ་ཤེས་ཁྲོ་བཅུ་ཡབ་ཡུམ་ཐུགས་དམ་བསྐང་། །ལས་མཁན་ཟ་གསོད་ཕོ་མོའི་ཐུགས་དམ་བསྐང་། །སྲས་མཆོག་ཁྲ་ཐབས་ཉེར་གཅིག་ཐུགས་དམ་བསྐང་། །སྒོ་སྐྱོང་གདོང་མོ་བཞི་ཡི་ཐུགས་དམ་བསྐང་། །མ་སྲིང་མཁའ་འགྲོ་རྒྱ་མཚོའི་ཐུགས་དམ་བསྐང་། །

ཕུར་སྲུང་དམ་ཅན་ལྕམ་དྲལ་ཐུགས་དམ་བསྐང་། །ཆོས་སྐྱོང་གཏེར་སྲུང་གཞི་བདག་ཐུགས་དམ་བསྐང་། །སྣང་སྲིད་དག་པ་རབ་འབྱམས་ཐུགས་དམ་བསྐང་། །སྣོད་བཅུད་རྒྱལ་བའ་དཀྱིལ་འཁོར་ཐུགས་དམ་བསྐང་། །བསྐང་དུ་མེད་དེ་རྫོགས་པ་ཆེན་པོར་བསྐང་། །མཆོད་དུ་མེད་དེ་བདེ་ཆེན་རོལ་པས་མཆོད། །སྦྱོར་དུ་མེད་དེ་ཀ་དག་དབྱིངས་སུ་སྦྱོར། །སྒྲོལ་དུ་མེད་དེ་ལྷུན་གྲུབ་ཐིག་ལེར་བསྒྲལ། །ཡེ་སྦྱོར་ཡེ་སྒྲོལ་ཆེན་པོས་ཐུགས་དམ་བསྐང་། །རྩེ་གཅིག་མོས་ཤིང་སྒྲུབ་པའི་རྣལ་འབྱོར་ལ། །ལྷག་པའི་ལྷ་ཁྱོད་ཐུགས་དམ་མ་གཡེལ་བར། །བརྩེ་བའི་ཞལ་བཟང་དུས་འདིར་བསྟན་ནས་ཀྱང་། །འདོད་པའི་དངོས་གྲུབ་མ་ལུས་བསྩལ་དུ་གསོལ། [། ཅེས་པའང་རང་ལོ་སུམ་ཅུ་རྩ་གསུམ་པའི་ཐོག་ཏུ་སོན་པ་འཛིན་བྱེད་མེ་བྱིའི་ལོ་མགོ་ཉ་བའི་ཡར་ངོ་རྒྱལ་བ་གཉིས་པའི་དུས་དགེ་བར། བལ་ཡུལ་ཡང་ལེ་ཤོད་ཀྱི་བྲག་ཕུག་དཔལ་ཆེན་དགྱེས་པའི་ཕོ་བྲང་དུ་རྡོ་རྗེ་ཕུར་བུའི་རིམ་གཉིས་ཀྱི་རྣལ་འབྱོར་ལ་མཉམ་པར་བཞག་པ་དང་འབྲེལ་ཚོགས་ཀྱི་མཆོད་པ་རྒྱ་ཆེན་པོ་སྤྲོས་པའི་ཚེ། ལྷ་རིགས་ཀྱི་སྔགས་སྨྱོན་ཀུན་ཏུ་རྒྱུ་འཇིགས་བྲལ་ཡེ་ཤེས་རྡོ་རྗེས་སྦྱར་བ་སྟེ། འདིས་ཀྱང་འདོད་པའི་དངོས་གྲུབ་མ་ལུས་བདེ་བླག་ཏུ་འགྲུབ་པའི་རྒྱུར་གྱུར་ཅིག། ཛ་ཡནྟུ།། །།]

བསྐང་ཟློག

ན་མོ་ཤྲཱི་བཛྲ་ཀུ་མཱ་ར་ཡེ། [དཔལ་ཆེན་ཕུར་བུའི་ཚོགས་ཀྱི་མཆོད་པ་དང་འབྲེལ་བར་བསྐང་བ་བྱ་བ་ནི། བདུད་རྩི། རཀྟ། མར་མེ། ཛ་གད། མཱཾ་ས། ཚེ། ཟླ་རྒྱས། བམ་གཙང་མ། གསུར་ཆེན། བཟའ་བཅའ་སྣ་ཚོགས་དང་བཅས་བཤམས་ཤིང་ཐོགས་ཏེ་རོལ་མོ་དབྱངས་དང་བཅས་པས།] ཧཱུཾ༔ སྣང་སྲིད་ཕུར་བུས་གདབ་པའི་ཕྱིར༔ རྡོ་རྗེ་གཞོན་ནུའི་ཐུགས་དམ་བསྐང་༔ ཁམས་གསུམ་འཁོར་བ་རྒྱས་འདེབས་ཕྱིར༔ འཁོར་ལོ་རྒྱས་འདེས་ཐུགས་དམ་བསྐང་༔ མི་དགེ་བཅུ་པོ་ཚར་གཅོད་ཕྱིར༔ ཁྲོ་རྒྱལ་ཡབ་བཅུའི་ཐུགས་དམ་བསྐང་། དགེ་བཅུ་དང་དུ་བླང་བའི་ཕྱིར༔ ཁྲོ་མོ་བཅུ་ཡི་ཐུགས་དམ་བསྐང་༔ ཕྱོགས་བཅུར་སྤྲུལ་པ་འགྱེད་པའི་ཕྱིར༔ ཁྲ་ཐབས་ཉི་ཤུའི་ཐུགས་དམ་བསྐང་། གདུག་པའི་དགྲ་བགེགས་སྒྲོལ་བའི་ཕྱིར༔ སྲས་མཆོག་ཉེར་གཅིག་ཐུགས་དམ་བསྐང་༔ ཞི་རྒྱས་དབང་དྲག་ལས་སྒྲུབ་ཕྱིར༔ ཕྲིན་ལས་བཞིའི་ཐུགས་དམ་བསྐང་༔ སློབ་དཔོན་སྐུ་དགྲ་སྒྲོལ་བའི་ཕྱིར༔ ཤྭ་ན་མཆེད་བཞིའི་ཐུགས་དམ་བསྐང་༔ བསྟན་པའི་སྤྱི་དགྲ་སྒྲོལ་བའི་ཕྱིར༔ རེ་ཏཱི་མཆེད་བཞིའི་ཐུགས་དམ་བསྐང་༔ རྣལ་འབྱོར་སྒོས་དགྲ་སྒྲོལ་བའི་ཕྱིར༔ བསྭེ་མོ་བཞིའི་ཐུགས་དམ་བསྐང་༔ མྱུར་མགྱོགས་དྲག་པོའི་ལས་མཛད་ཕྱིར༔ བསྭེ་ལྕགས་དུང་གསུམ་ཐུགས་དམ་བསྐང་༔ འགུགས་

འདྲེན་འཆིང་སྡོམ་མྱོས་བྱའི་ཕྱིར༔ སྒོ་མ་བཞི་ཡི་ཐུགས་དམ་བསྐང་༔ རུ་དྲ་སྡེ་གསུམ་འདུལ་བའི་ཕྱིར༔ གིང་ཆེན་བཅོ་བརྒྱད་ཐུགས་དམ་བསྐང་༔ ཕྱོགས་བཅུར་དམག་དཔུང་དབབ་པའི་ཕྱིར༔ མ་བདུན་སྲིང་བཞིའི་ཐུགས་དམ་བསྐང་༔ ཕྲིན་ལས་རྒྱ་མཚོ་སྒྲུབ་པའི་ཕྱིར༔ དབང་ཕྱུག་ཉེར་བརྒྱད་ཐུགས་དམ་བསྐང་། [ཞེས་དང་གཞན་ཡང་།] བསྐང་ངོ་བསྐལ་པས་ཐུགས་དམ་བསྐང་༔ དཀྱིལ་འཁོར་ལྷ་ཚོགས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བ་ལིཾ་གཏོར་མས་ཐུགས་དམ་བསྐང་༔ རཀྟ་དམར་གྱིས་ཐུགས་དམ་བསྐང་༔ ཞལ་ཟས་ཚོགས་ཀྱིས་ཐུགས་དམ་བསྐང་༔ དཀྱིལ་འཁོར་ཞལ་གྱིས་ཐུགས་དམ་བསྐང་༔ ཛ་གད་ཕུད་ཀྱིས་ཐུགས་དམ་བསྐང་༔ ཞུན་ཆེན་མར་མེས་ཐུགས་དམ་བསྐང་༔ སྲོག་དབུགས་མདངས་ཀྱིས་ཐུགས་དམང་བསྐང་༔ གསུར་ཆེན་དྲི་ཡིས་ཐུགས་དམ་བསྐང་༔ རོལ་མོ་སྒྲ་ཡིས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ གཡར་དམ་གཉན་པོ་སོར་སྩོལ་ཅིག༔ [དེ་ནས་རྫས་རྣམས་བཞག་སྟེ་སྒོའམ་ཕྱིར་ཟློག་ཏུ་ཐལ་མོ་བརྡབ་ཅིང་།] དེ་ལྟར་བསྐང་བས་བསྐང་གསོས་ནས༔ འདི་ལྟར་བཟློག་པའི་ཕྲིན་ལས་མཛོད༔ རྣལ་འབྱོར་བདག་ཅག་འཁོར་བཅས་ལ༔ ཡས་ཀྱི་བདུད་

གཡོས་ཕྱིར་ལ་ཟློག༔ མས་ཀྱི་སྲི་ལངས་ཕྱིར་ལ་ཟློག༔ ཉེ་བའི་བྱོལ་པོ་ཕྱིར་ལ་ཟློག༔ ཡུལ་པའི་འགྲིམ་ཆགས་ཕྱིར་ལ་ཟློག༔ ཕ་ཚན་རྒྱབ་འདྲེ་ཕྱིར་ལ་ཟློག༔ མ་བུའི་བྱུར་འདྲེ་ཕྱིར་ལ་ཟློག༔ གཤིན་རྗེའི་འཁྲུལ་འཁོར་ཕྱིར་ལ་ཟློག༔ མ་མོའི་ཁྲག་ཟོར་ཕྱིར་ལ་ཟློག༔ བདུད་ཀྱི་ཁྲམ་ཁ་ཕྱིར་ལ་ཟློག༔ བཙན་གྱི་གཟེར་ཁ་ཕྱིར་ལ་ཟློག༔ ས་བདག་དུག་བྱེད་ཕྱིར་ལ་ཟློག༔ རྒྱལ་པོའི་སྨྱོ་འབོག་ཕྱིར་ལ་ཟློག༔ གཟའ་ཡི་ཀིང་ཀང་ཕྱིར་ལ་ཟློག༔ མུ་སྟེག་ངན་སྔགས་ཕྱིར་ལ་ཟློག༔ ཐེ་བྲང་སྲིས་རྐུན་ཕྱིར་ལ་ཟློག༔ ནད་ཁ་རིམས་ཁ་ཕྱིར་ལ་ཟློག༔ སྔགས་པའི་ཕུར་ཁ་ཕྱིར་ལ་ཟློག༔ བོན་གྱི་བོན་ཟོར་ཕྱིར་ལ་ཟློག༔ སུམ་པའི་གླང་ཟོར་ཕྱིར་ལ་ཟློག༔ མེ་ཉག་འབོལ་ལེ་ཕྱིར་ལ་ཟློག༔ ལོ་ཟླ་ཞག་ཀེག་ཕྱིར་ལ་ཟློག༔ མོ་ངན་རྨི་ངན་ཕྱིར་ལ་ཟློག༔ ལྟས་ངན་མཚན་ངན་ཕྱིར་ལ་ཟློག༔ ཕོ་བརྒྱའི་མདའ་བདེ་མཚོན་ཁ་ཟློག༔ མོ་བརྒྱའི་དུག་གཡོས་ཟས་ཁ་བཟློག༔ མི་ནག་སྐྱེ་བོའི་ཡ་ག་ཟློག༔ བྲན་ཁོལ་ངན་པའི་དམོད་མཆུ་ཟློག༔ དགྲ་ལ་བྷྱོ་ལ་བསྒྲལ་དུ་གསོལ༔ བགེགས་ལ་བྷྱོ་ལ་རྡུལ་དུ་རློག༔ [ཅེས་བསྐང་ཟློག་དྲག་ཏུ་བྱ་སྟེ། འདི་ནི་ཚོགས་མཆོད་ཀྱི་ལེ་ལག་ཡིན་ནོ། །] ཤུ་བྷཾ།། །།

རྡོ་རྗེ་ཕུར་པའི་ཚོགས་མཆོད་གྲངས་གསོག་ཉེར་བསྡུས།

[རྡོ་རྗེ་ཕུར་པའི་ཚོགས་མཆོད་གྲངས་གསོག་ཉེར་བསྡུས་ལ། ཚོགས་བྱིན་གྱིས་བརླབ་པ་ནི།] རཾ་ཡཾ་ཁཾ༔ རྣམ་རྟོག་མཚན་མའི་བག་ཆགས་སྦྱངས༔ དག་པར་རབ་འབྱམས་མཆོད་པའི་སྤྲིན༔ བདེ་སྟོང་ཡེ་ཤེས་བདུད་རྩིའི་དངོས༔ རྣམ་པ་ཚོགས་ཀྱི་རོལ་པར་ཤར་༔ ཨོཾ་ཨཱཿཧཱུཾ༔ ཧ་ཧོ་ཧྲཱི༔ [ཚོགས་ཞིང་སྤྱན་འདྲེན་པ་ནི།] ཧཱུཾ༔ བླ་མ་རིག་འཛིན་ཡི་དམ་མཁའ་འགྲོའི་ཚོགས༔ སྲིད་པ་རྡོ་རྗེ་ཕུར་བུ་བསྒྲུབ་པ་དང་༔ དབང་དང་དངོས་གྲུབ་མ་ལུས་བླང་བའི་ཕྱིར༔ ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཛ་ཛ༔ [ཚོགས་ཕུད་འབུལ་བ་ནི།] ཧཱུཾ༔ རྩ་བརྒྱུད་བླ་མ་རིག་འཛིན་རྒྱ་མཚོ་དང་༔ ཡི་དམ་དཀྱིལ་འཁོར་ལྷ་ཚོགས་མ་ལུས་ལ༔ ཞལ་ཟས་ཚོགས་ཀྱི་མཆོད་པ་དམ་པ་འབུལ༔ གཟི་བྱིན་དབང་དང་དངོས་གྲུབ་བསྩལ་དུ་གསོལ༔ མ་ཧཱ་ག་ཎ་ཙཀྲ་པཱུ་ཛ་ཧོཿ [བསྐང་བ་ནི།] ཧཱུཾ༔ དུར་ཁྲོད་གསང་བ་མ་ཆོག་གི་དཀྱིལ་འཁོར་འདིར༔ གསང་བའི་དཀྱིལ་འཁོར་གཞུང་བཞིན་བཤམས་ནས་ཀྱང་༔ སྒྲུབ་རྫས་གཉན་པོ་ཚུལ་བཞིན་བཀྲམ་ལགས་ན༔ བླ་མ་ཡི་དམ་མཁའ་འགྲོ་ཆོས་སྐྱོང་སོགས༔ དཔལ་ཆེན་ལྷ་ཚོགས་ཐུགས་དམ་གཉན་བསྐངས་ཏེ༔ རྣལ་འབྱོར་བདག་གི་གཡར་དམ་སོར་སྩོལ་ཅིག༔ ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ༔ [བར་པ་བཤགས་པ་ནི།] ཧཱུཾ༔ བླ་མ་ཡི་དམ་མཁའ་འགྲོའི་དཀྱིལ་

འཁོར་དུ༔ ཉེས་བྱས་ཉམས་ཆག་རྟོག་སྒྲིབ་བག་ཆགས་དང་༔ འགལ་འཁྲུལ་ནོངས་པ་ཅི་མཆིས་མ་ལུས་པ༔ ཞལ་ཟས་ཚོགས་ཀྱིས་བསྐང་ཞིང་བཤགས་པར་བགྱི༔ བཛྲ་ས་མ་ཡ་ཤུངྔྷེ་ཨ༔ [ཐ་མ་བསྒྲལ་བསྟབ་ནི།] ནྲྀ་ཏྲི་བཛྲ་ཨཾ་ཀུ་ཤ་ཛཿ ཛཿཧཱུཾ་བཾ་ཧོཿཧཱུཾ༔ གཞོམ་བྲལ་ཐོགས་མེད་རྡོ་རྗེ་ཕུར་པ་སྟེ༔ བརྟན་བརྗིད་རི་རབ་ཡིན་ཀྱང་རྡུལ་དུ་བརླག༔ རྡོ་རྗེ་ཕུར་པའི་མཚོན་གྱི་ཆར་ཕབ་ནསཿ དམ་ཉམས་དགྲ་བགེགས་གཟུགས་ཕུང་རྡུལ་དུ་རློག༔ སརྦ་བིགྷྣཱན་ཤ་ཏྲུཾ་མཱ་ར་ཡ་རྦད༔ ཧཱུཾ༔ དཔལ་ཆེན་ཕྲིན་ལས་མངའ་བདག་ཧེ་རུ་ཀ༔ རྡོ་རྗེ་གཞོན་ནུའི་ལྷ་ཚོགས་ཞལ་ཕྱེས་ཤིག༔ དགྲ་བགེགས་བྱད་མ་བསྒྲལ་བའི་ལྔ་ཕུང་འདི༔ ཞལ་དུ་བསྟབ་བོ་བཞེས་ཤིག་ཁ་རཾ་ཁཱ་ཧི༔ བཛྲ་ཡཀྵ་ཀྲོ་ངྷ་བི་ཛ་ཡ་ཁ་ཁ་ཁཱ་ཧི་ཁཱ་ཧི༔ [ལྷག་མ་གཏོང་བ་ནི།] ཨོཾ་ཨཱཿཧཱུཾ༔ བྷྱོ༔ བྲན་དང་བཀའ་ཉན་ལས་བྱེད་ཕོ་ཉའི་ཚོགས༔ ཁྱེད་རྣམས་དམ་ཚིག་ཐུགས་དམ་དུས་ལ་བབ༔ བཀའ་ཡི་ཕམ་ཕབ་ལྷག་གཏོར་འདི་བཞེས་ལ༔ སྔོན་ཆད་ཇི་ལྟར་ཁས་བླངས་དམ་བཅས་པའི༔ མངོན་སྤྱོད་དྲག་པོའི་ཕྲིན་ལས་མྱུར་འགྲུབ་མཛོད༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧི༔ [ཞེས་བསྔོ།] ཧེ་རུ་ཀ་དཔལ་གྲོང་ཁྱེར་དུ། [སོགས་ཀྱིས་སྨོན་ལམ་བྱའོ། །ཞེས་པའང་གཏེར་གཞུང་གོང་འོག་ལས་བཏུས་པ་སྟེ་འཇིགས་བྲལ་ཡེ་ཤེས་རྡོ་རྗེས་སོ། །] ཤུ་བྷཾ།། །།

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཚེ་སྒྲུབ་ཀྱི་ཕྲིན་ལས་འཆི་མེད་འདོད་འཇོའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་ཚེ་སྒྲུབ་ཀྱི་ཕྲིན་ལས་འཆི་མེད་འདོད་འཇོའི་དགའ་སྟོན་ཅེས་བྱ་བ་བཞུགས་སོ། །

ཨོཾ་སྭ་སྟི། གཞོམ་བྲལ་མི་ཤིགས་རྡོ་རྗེ་སེམས་དཔའི་དངོས། བསྒྲེས་རྒུད་ཡོངས་བྲལ་གཞོན་ནུའི་སྐུ་དེ་ལ། །བཏུད་ནས་ཚེ་དབང་བསྒྲུབ་ཅིང་འགུགས་པའི་ལུང་། །འཆི་མེད་འདོད་པ་འཇོ་བའི་དགའ་སྟོན་སྤྲོ། །[འདིལ་བཞི། བསྒྲུབ་བྱའི་ཚེ། སྒྲུབ་པའི་དགོས་ཆེད། སྒྲུབ་བྱེད་ཀྱི་ཐབས། གྲུབ་པའི་འབྲས་བུའོ། །དང་པོ་ནི། རྡོ་རྗེ་གཞོན་ནུ་ཚེའི་ལུང་ལས། ཚེ་ནི་རྣམ་པ་གསུམ་ཡིན་ཏེ༔ འཕོ་ཞིང་གཡོ་བ་ཐིག་ལེའི་ཚེ༔ འགྲོ་དང་འོང་བ་རླུང་གི་ཚེ༔ གཞོམ་དུ་མེད་པ་གཉུག་མའི་ཚེ༔ ཞེས་སོ། །གཉིས་པ་ནི། གློ་བུར་འཕོ་འཇིག་ཞི་བ་དང་༔ མི་འགྱུར་ཡེ་ཤེས་རྒྱས་པའི་ཕྱིར༔ རྡོ་རྗེ་ཚེ་ཡི་མཆོག་བསྒྲུབས་ནས༔ རྣལ་འབྱོར་ཟབ་མོ་མཐར་ཕྱིན་བྱ༔ ཞེས་དང་། གཞན་ལས་ཀྱང་། ལས་རྣམས་ཀུན་གྱི་ཐོག་མར་ནི། །རིག་འཛིན་ཚེ་ཡི་སྒྲུབ་པ་བྱ༔ ཆོས་སྤྱོད་བསླབ་ལྡན་རྣལ་འབྱོར་

པའི༔ ཚེ་རིང་བ་ནི་དགེ་བ་སྟེ༔ འདི་དང་ཕྱི་མའི་དོན་འགྲུབ་ཅིང་༔ དངོས་གྲུབ་ཀུན་ཀྱང་མངོན་དུ་འགྱུར༔ ཞེས་སོ། །གསུམ་པ་ལ་སྦྱོར་དངོས་རྗེས་གསུམ་གྱི། སྦྱོར་བ་ལ། ཚེ་དང་གལ་གྱི་མཐུན་སྡེབ་ལས༔ སྙིང་པོའི་བཅུད་ལྡན་འབྲང་རྒྱས་དང་༔ ཚེ་ཡི་རིལ་བུ་མ་ད་ན༔ ལོངས་སྤྱོད་ཆེན་པོའི་འབྱོར་པར་བཤམ༔ ཞེས་པས། སྒྲུབ་པའི་དལ་གྱི་དབུས་སམ་ཤར་ཕྱོགས་སུ་ཚེ་གལ་མཐུན་སྡེབ་ཀྱི་རྒྱུ་ལས་བསྐྲུན་པའི་ཚེའི་འབྲང་རྒྱས། གཡས་སུ་ཇི་སྐད་དུ། རིན་ཆེན་སྦྲུ་སྨན་དྲི་ལྔ་དང་༔ ཁྱད་པར་སྙིང་པོ་རྣམ་པ་ལྔ༔ དབང་པོ་ལག་པ་འབྲས་བུ་གསུམ༔ ཅོང་ཞི་བྲག་ཞུན་རྩ་བ་ལྔ༔ རྟག་ཏུ་ངུ་དང་དཱུ་རྦར་བཅས༔ འབྲས་དཀར་སཱ་ལུས་འདམ་སྦྱང་ལ༔ རིལ་བུ་སྲན་མ་ཙམ་དུ་དྲིལ༔ སིནྡྷུ་ར་དང་མཚལ་གྱིས་བསྒྱུར༔ ཞེས་པ་ལྟར་འདུ་བྱས་པའི་ཚེ་རིལ། གཡོན་དུ་མངར་གསུམ་བདུད་རྩི་ཨ་མྲྀ་ཏ་དང་སྦྱར་བའི་ཚེ་ཆང་བཅས་ལེགས་པར་བཤམ། ཕྱོགས་གང་བདེར་ཚེ་འགུགས་པའི་རྟེན་འབྲེལ་གྱི་ཡོ་བྱད་མདའ་རྒོད་སྒྲོ་མ་དར་ཚོན་

སྣ་ལྔས་སྤུད་པ་དང་། གཞན་ཡང་ཉེ་བར་མཁོ་བའི་ཆ་རྐྱེན་རྣམས་ཚོགས་པར་བྱས་ལ། དངོས་གཞི་ཕྲིན་ལས་ཀྱི་གཞུང་བསྲངས་ཏེ་བཟླས་པའི་སྐས་སུ་བབས་ལན་ཁྱད་པར་གྱི་དམིགས་བཟླས་ནི།] བདག་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་དཔལ་ཆེན་གཙོ་འཁོར་ཚེའི་བདག་པོའི་ངོ་བོར་བཞུགས་པའི་ཐུགས་རྒྱུད་བསྐུལ་ཏེ་སྔགས་སྒྲ་དིར་དིར་སྒྲོགས་ཤིང་འོད་ཟེར་དམར་པོ་ལྕགས་ཀྱུའི་དབྱིབས་ཅན་འཁོར་འདས་ཁྱབ་པར་འཕྲོས། རང་གི་བླ་ཚེ་འཁྱམས་པ་ཡར་བ་བསྐུས་པ་འཕྲོག་པ་ལ་སོགས་པ་ཐམས་ཅད་དང་། བརྟན་གཡོ་སྣོད་བཅུད་ཀྱི་དྭངས་མ། རྩ་གསུམ་རྒྱལ་བ་སྲས་དང་བཅས་པའི་ཚེའི་བྱིན་རླབས་ཐམས་ཅད་བསྡུས་ཏེ་བདག་དང་སྒྲུབ་རྫས་རྣམས་ལ་སིབ་སིབ་ཐིམ་པས་འཆི་མེད་རྡོ་རྗེའི་ཚེ་ལ་མངའ་བརྙེས་པར་[བསམ་ཞིང་།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཨཱ་ཡུ་ཛྙཱ་ན་སིངྔྷི་ཕ་ལ་ཧཱུཾ་ཨཱཿ [ཞེས་ཆུ་བོའི་རྒྱུན་བཞིན་དུ་བཟླ། ཐུན་མཚམས་སུ་ཚེ་བཅུད་འགུགས་པའི་སླད་དུ་མདའ་དར་གཡབ་ཅིང་།] ཧཱུཾ༔ དབུས་ནས་རང་བྱུང་གྲུབ་པའི་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གར་དགུའི་རོལ་པས་གནས་མཛད་ཅིང་༔ འཁོར་ལོ་རྒྱས་འདེབས་ཡུམ་དང་འཁྲིལ༔ ཡབ་ཡུམ་གཉིས་མེད་སྦྱོར་བའི་སྒྲས༔ དུས་གསུམ་སངས་རྒྱས་རབ་མཆོད་ནས༔ བྱང་ཆུབ་སེམས་ཀྱི་ཐིག་ལེ་ནི༔ མུ་ཏིག་ཁུ་འཕང་

དབབ་ཏུ་གསོལ༔ ཚེ་བུམ་འདི་ལ་བྱིན་གྱིས་རློབས༔ རིག་འཛིན་སྒྲུབ་པོའི་ཚེ་སྤེལ་ཅིག༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ༔ ཨཱ་ཡུརྫྙཱ་ན་ཛཿ ཧཱུཾ༔ སྒྲོལ་ཡུམ་ཨེ་ཀ་ཛ་ཊཱི་མ༔ ཆོས་ཀྱི་དབྱིངས་ཀྱི་མཁའ་འགྲོ་ཡུམ༔ ཁྲག་འཐུང་ལྷ་ཚོགས་མཉེས་བྱེད་མ༔ སངས་རྒྱས་ཀུན་དང་མཉམ་སྦྱོར་བའི༔ བདེ་སྟོང་ཉི་མའི་གཟི་བརྗིད་ཀྱིས༔ མཁའ་འགྲོ་ཐམས་ཅད་དབང་བསྡུས་ནས༔ བྱང་ཆུབ་སེམས་ཀྱི་ཐིག་ལེ་ནི༔ མུ་ཏིག་ཁུ་འཕང་དབབ་ཏུ་གསོལ༔ ཚེ་བུམ་འདི་ལ་བྱིན་གྱིས་རློབས༔ རིག་འཛིན་སྒྲུབ་པོའི་ཚེ་སྤེལ་ཅིག༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ༔ ཨཱ་ཡུརྫྙཱ་ན་ཛ༔ ཧཱུཾ༔ ཆོས་དབྱིངས་ནམ་མཁའི་དཀྱིལ་འཁོར་ནས༔ སྲས་མཆོག་རྡོ་རྗེ་ཕུར་པ་སྟེ༔ སངས་རྒྱས་ཀུན་གྱི་ཐུགས་ཀྱི་སྲས༔ ཁྲོ་བོའི་ཚུལ་སྟོན་གདུག་པ་འདུལ༔ སྟོང་གསུམ་སྟོང་གི་འཇིག་རྟེན་འདིར༔ སྤྲུལ་པ་གྲགས་མེད་ཁྲོ་ཚོགས་ཀྱིས༔ དགྲ་བགེགས་གདུག་པ་དབྱིངས་སུ་སྒྲོལ༔ མཁའ་མཉམ་བདེ་ཆེན་རྒྱས་པར་གྱིས༔ བྱང་སེམས་ཐིག་ལེ་མི་ཤིགས་དབུས༔ མུ་ཏིག་ཁུ་འཕང་དབབ་ཏུ་གསོལ༔ ཚེ་བུམ་འདི་ལ་བྱིན་གྱིས་རློབས༔

རིག་འཛིན་སྒྲུབ་པོའི་ཚེ་སྤེལ་ཅིག༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ཨཱ་ཡུརྫྙཱ་ན་ཛ༔ ཧཱུཾ༔ ཕྱོགས་བཅུ་རང་བྱུང་གྲུབ་པའི་ལྷ༔ ཡེ་ཤེས་ཁྲོ་བོ་ཆེན་པོ་བཅུ༔ ཡུམ་ཆེན་རྡོ་རྗེ་ཁྲོ་མོ་བཅུ༔ སྤྲུལ་པ་ཁྲ་ཐབས་ཚོགས་རྣམས་ཀྱང་༔ མཐིང་ནག་ཞལ་གཅིག་ཕྱག་གཉིས་ཏེ༔ བགེགས་ཆེན་འདུལ་ཞིང་ཁྲོ་ཚུལ་སྟོན༔ གཡས་ན་ལྕགས་ཀྱུ་ཕུར་བུ་བསྣམས༔ གཡོན་ན་བདུད་རྩིའི་བུམ་པ་བསྣམས༔ ཐུགས་ཀའི་ཉི་ཟླ་ཁ་སྦྱོར་ནས༔ ཚེ་འཛིན་ཐུགས་ཀྱི་དཔལ་བེའུ་ལས༔ བྱང་སེམས་ཐིག་ལེའི་ཁུ་འཕང་འབེབས༔ ཁུག་ཅིག་ཁུག་གཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ ཕྱོགས་བཅུའི་གནས་ནས་ཚེ་ཁུག་ཅིག༔ ཚེ་བུམ་འདི་ལ་བྱིན་གྱིས་རློབས༔ རིག་འཛིན་སྒྲུབ་པོའི་ཚེ་སྤེལ་ཅིག༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ༔ ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ༔ ཨཱ་ཡུརྫྙཱ་ན་ཛཿ ཧཱུཾ༔ ཤར་གྱི་ཕྱོགས་ནས་ཚེ་འགུགས་མ༔ དཀར་མོ་ཞི་མཛད་པུ་ཤུད་མགོ༔ ལྕགས་ཀྱུ་ཚེ་བུམ་ལག་ན་བསྣམས༔ ལོག་འདྲེན་འགུགས་མཛད་སྒོ་སྲུང་མ༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔

དྲི་ཟའི་ལག་ནས་ཚེ་ཁུག་ཅིག༔ ཚེ་ཡི་དངོས་གྲུབ་འདིར་སྩོལ་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་བྷིནྡྷ་ཡ་བིང་བིང་ཧཱུཾ་ཕཊ༔ ཨཱ་ཡུརྫྙཱ་ན་ཛཿ ཧཱུྃ༔ ལྷོ་ཡི་ཕྱོགས་ནས་ཚེ་འགུགས་མ༔ སེར་མོ་ཀངྐའི་མགོ་བོ་ཅན༔ ཕྱག་ན་ཞགས་པ་ཚེ་བུམ་བསྣམས༔ ཚེ་དང་ལོངས་སྤྱོད་རྒྱས་མཛད་མ༔ ཁུག་ཅིག་ཁུག་གཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ གྲུལ་བུམ་ལག་ནས་ཚེ་ཁུག་ཅིག༔ ཚེ་ཡི་དངོས་གྲུབ་འདིར་སྩོལ་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་ནམ༔ ས་མནྟ་ཧྲིཾ་ཧྲིཾ་ཧཱུཾ་ཕཊ༔ ཨཱ་ཡུརྫྙཱ་ན་ཛཿ ཧཱུཾ༔ ནུབ་ཀྱི་ཕྱོགས་ནས་ཚེ་འགུགས་མ༔ དམར་སེར་སྲིན་བྱའི་མགོ་བོ་ཅན༔ ལྕགས་སྒྲོག་ཚེ་ཡི་བུམ་པ་བསྣམས༔ ལོག་འདྲེན་དབང་མཛད་སྒོ་སྲུང་མ༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་དྲོངས་ཤིག་ཚེ་དྲོངས་ཤིག༔ ཀླུ་ཡི་ལག་ནས་ཚེ་ཁུག་ཅིག༔ ཚེ་ཡི་དངོས་གྲུབ་འདིར་སྩོལ་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་བྲ་སུ་རུ་ཧཱུཾ་ཕཊ༔ ཨཱ་ཡུརྫྙཱ་ན་ཛཿ ཧཱུཾ༔ བྱང་གི་ཕྱོགས་ནས་ཚེ་འགུགས་མ༔ ལྗང་གུ་ཁྲ་ཡི་མགོ་བོ་ཅན༔ དྲིལ་བུ་ཚེ་བུམ་ལག་ན་བསྣམས༔ ལོག་འདྲེན་སྒྲོལ་མཛད་སྒོ་སྲུང་མ༔ ཁུག་ཅིག་ཁུག་ཅིག་ཚེ་ཁུག་ཅིག༔ དྲོངས་ཤིག་

དྲོངས་ཤིག་ཚེ་དྲོངས་ཤིག༔ གནོད་སྦྱིན་ལག་ནས་ཚེ་ཁུག་ཅིག༔ ཚེ་ཡི་དངོས་གྲུབ་འདིར་སྩོལ་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་མཱ་ར་ཡ་ཧཱུཾ་ཕཊ༔ ཨའ་ཡུརྫྙཱ་ན་ཨ་བེ་ཤ་ཡ་ཛཿ [ཞེས་བསྐུལ་ལ།] བྷྲཱུཾ༔ ཚེ་ཡི་དངོས་གྲུབ་རྒྱུད་གསུམ་པོ༔ རྩ་སྲོག་ཙིཏྟའི་དཀྱིལ་དུ་བསྟིམ༔ ཅིས་ཀྱང་མི་ཆོད་མི་ཤིགས་པའི༔ རྡོ་རྗེ་གཞོན་ནུའི་སྲོག་ཐོབ་ཤོག༔ ཨ་ཡུརྫྙཱ་ན་ཨ་ཨ་ཨ༔ [ཞེས་ཆོས་ཉིད་ཀྱི་ངང་དུ་ཚེ་སྦ། ཚུལ་དེ་ལྟ་བུའི་ངེས་པས་སྒྲུབ་པ་ཐེམ་པ་ན། རྗེས་དངོས་གྲུབ་བླང་བའི་སླད་དུ། མངོན་པར་འདོད་པའི་དོན་ལ་གདུང་བའི་ཤུགས་ཀྱིས་བསྐུལ་ཏེ།] ཧཱུཾ༔ སྲིད་པའི་ཕུར་བུ་བདག་གིས་བསྒྲུབ་པ་དང་༔ ཚེ་དབང་དངོས་གྲུབ་མ་ལུས་བླང་བའི་ཕྱིར༔ ཡེ་ཤེས་ཁྲོ་རྒྱལ་ཆེན་པོ་གཤེགས་སུ་གསོལ༔ ཁྲོ་ཆེན་འབར་བའི་འཁོར་བཅས་གཤེགས་ནས་ཀྱང༔ རྟགས་དང་མཚན་མ་མྱུར་དུ་བསྟན་པ་དང་༔ བཛྲ་ཀཱི་ལིའི་ཚེ་དབང་དངོས་གྲུབ་སྩོལ་༔ [རྩ་སྔགས་མཐར།] ཀཱ་ཡ་ཝཱ་ཀ་ཙིཏྟ་སརྦ་སིངྔྷི་ཕ་ལ་ཧཱུཾ་ཧཱུཾ་བྷྲཱུཾ་ཧྲཱིཿཛཿཛཿཧཱུཾ་བྷྲཱུཾ་གུ་ཎ་བཛྲ་སརྦ་སིངྔྷི་ [ཞེས་དབང་བླངས་ཏེ་ཚེ་རྫས་ལ་ལོངས་སྤྱད་པས་འཆི་མེད་རྡོ་རྗེའི་སྲོག་ལ་མངའ་བརྙེས་པར་བསམ་ཞིང་ཤིས་པ་སྤེལ། གལ་ཏེ་སྣོད་ལྡན་གྱི་སློབ་མ་ལ་ཚེའི་དབང་བསྐུར་ན། སློབ་བུ་དཔལ་ཆེན་ཚེ་ཡི་བདག་པོར་གསལ་བ་ལ་ཚེ་འགུགས་ཤིང་བཅུད་བསྡུས་ནས། གོང་གི་ཚིགས་བཅད་ཀྱིས་ཚེ་འབྲང་གིས་དབང་བསྐུར། སྔགས་བཟླ་བཞིན་ཚེ་རིལ་

ཆང་སྦྱིན་ལ་རྒྱས་གདབ་སྟེ་ཤིས་པ་བརྗོད་པས་དོན་གྲུབ་པ་ཡིན་ནོ། །བཞི་པ་ནི། དེས་ནི་ཚེ་ཡི་བར་ཆད་ཞི༔ དངོས་གྲུབ་འཆི་མེད་གོ་འཕང་འཐོབ༔ ཚེ་གཅིག་གྲུབ་པ་མཐར་ཕྱིན་འགྱུར༔ ཞེས་སོགས་རྡོ་རྗེ་ཧེ་རུ་ཀ་ཆེན་པོའི་དཔལ་གྱི་མགུར་ནས་རྒྱ་ཆེར་བཀའ་བསྩལ་བ་ལྟར་རོ། །རྒྱུད་ཀྱི་ལུང་གང་གྲུབ་པའི་མན་ངག་གིས། །གནད་དུ་དྲིལ་བཞིན་གསལ་བར་བརྗོད་འདིས་ཀྱང་། །འགྲོ་ཀུན་འཆི་བདག་གཡུལ་ལས་རབ་རྒྱལ་ཏེ། །འཆི་མེད་རྡོ་རྗེ་གཞོན་ནུའི་སྲོག་ཐོབ་ཤོག །ཅེས་པའང་ཟབ་གཏེར་རྩ་བའི་གཞུང་གི་དངོས་བསྟན་ལ་སྐབས་སུ་བབས་པའི་ཁ་སྐོང་དུ་འོས་པ་རྣམས་རིགས་མཐུན་གྱི་གཏེར་ཁ་ལས་བླངས་ཏེ་འཇིགས་བྲལ་ཡེ་ཤེས་རྡོ་རྗེས་སྤེལ་བ་ཨཱ་ཡུ་སིངྔྷི་རསྟུ། །] ཤུ་བྷཾ།། །།

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྒྱུན་གྱི་རྣལ་འབྱོར་སྙིང་པོར་དྲིལ་བ།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྒྱུན་གྱི་རྣལ་འབྱོར་སྙིང་པོར་དྲིལ་བ་བཞུགས་སོ། །

ན་མོ་ཤྲཱི་བཛྲ་ཀུ་མཱ་ར་ཡེ། [ཐུགས་དམ་གསང་བའི་མཐར་ཐུག་དཔལ་རྡོ་རྗེ་ཕུར་བུ་རིགས་མཆོག་གཅིག་པའི་ཧེ་རུ་ཀ་རྒྱུན་གྱི་རྣལ་འབྱོར་དུ་བྱ་བར་འདོད་པས། སྦྱོར་བ་ཚོགས་བསགས་ཤིང་རྒྱུད་སྦྱོང་བ་ནི།] ཕྱོགས་བཅུའི་སྐྱབས་ཡུལ་ཐམས་ཅད་དཔལ་ཆེན་ཕུར་བུའི་དཀྱིལ་འཁོར་གྱི་རོལ་པར་བཛྲ་ས་མཱ་ཛཿ [ས་མདུན་མཁར་སད་པར་མོས་ལ།] རྡོ་རྗེ་སློབ་དཔོན་སངས་རྒྱས་དཔལ༔ ། དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་

པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་དཔའ་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བསྒྲངས་པའི་དགེ་བ་རྣམས། བསྡུས་ནས་བྱང་ཆུབ་མཆོག་ཏུ་བསྔོ། །[ཞེས་ཚོགས་བསགས་པའི་མཐར།] ཛཿཧཱུཾ་བཾ་ཧོཿས། ཚོགས་ཞིང་རྣམས་རང་ལ་ཐིམ་པར་བསམ། [དངོས་གཞི་ཏིང་ངེ་འཛིན་གྱི་ཕྱག་རྒྱའི་རྣལ་འབྱོར་ལ་བསླབ་པ་ནི།] ཨོཾ་སྭབྷཱ་ཝ་ཤུངྔྷ༔ སརྦ་དྷརྨཿསྭབྷཱ་ཝ་ཤུངྔྷོཉཧཾ་ [གིས་ཆོས་ཐམས་ཅད་སྟོང་པར་སྦྱང་།] སྟོང་པ་ཉིད་ཀྱི་ངང་ལས་རང་གི་རིག་པའི་

ངོ་བོ་དཔལ་ཆེན་པོའི་རྣམ་པར་ཤར་བའི་ཐུགས་ཁའི་ཧཱུཾ་ལས་ཁྲོ་བོ་བཅུ་སྤྲོས་པའི་ཚོགས་ཀྱིས་བགེགས་རྣམས་ཚར་བཅད། སྲུང་བའི་ལས་མཛད་པའི་ཕྱིར་ཁྲོ་བོ་དང་རྡོ་རྗེ་ཕུར་བུའི་གུར་ཁང་ཡེ་ཤེས་ཀྱི་མེ་དཔུང་འབར་བས་ཕྱོགས་ཀུན་བཅིངས་ཏེ་ཅིས་ཀྱང་མི་ཤིགས་པར་གྱུར། སྲུང་འཁོར་གྱི་ནང་དུ་ཡེ་ཤེས་ནང་དུ་ཡེ་ཤེས་རང་སྣང་ལས་གྲུབ་པའི་གཞལ་མེད་ཁང་ཆེན་པོ་རྒྱན་དང་བཀོད་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པཾ་ལས་པདྨ་ཨ་ལས་ཟླ་བ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་སྔོན་པོ་ཧཱུཾ་གིས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་དཔལ་རྡོ་རྗེ་གཞོན་ནུའི་སྐུ་མདོག་མཐིང་ནག་བསྐལ་པའི་མེ་ལྟར་འབར་བའི་གཟི་བརྗིད་ཅན། དབུ་གསུམ་གྱི་རྩ་ཞལ་མཐིང་ག་གཏུམ་ལ་རྔམས་པ། གཡས་ཞལ་དཀར་པོ་སྒེག་ཅིང་བཞད་པ། གཡོན་ཞལ་དམར་པོ་ཁྲོ་ཞིང་ཆགས་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་སྡང་མིག་ཏུ་འཁྱིལ་བ། རྣམ་པར་འགྱུར་པའི་ཞལ་གདངས་ཤིང་མཆེ་བ་གཙིགས་པ། གློག་ལྟར་

འཁྱུག་པའི་སྔགས་འདྲིལ་ཞིང་རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་རླུང་སྒྲ་འབྱིན་པ། དབུ་སྐྲ་དང་སྨ་ར་སྨིན་དམར་སེར་དུས་ཀྱི་མེ་ལྕེ་ལྟར་བསྐྱོད་པ། སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན། ཕྱག་དྲུག་གི་དང་པོ་གཉིས་གནམ་ལྕགས་ཀྱི་རྡོ་རྗེ་རྩེ་དགུ་པ་དང་མེ་དཔུང་། བར་པ་གཉིས་རྡོ་རྗེ་རྩེ་ལྔ་པ་དང་ཁ་ཊྭཱཾ་ཀ་གདེངས་སྟབས་སུ་འཛིན་པ། ཐ་མ་གཉིས་ཐུགས་ཀར་རི་རབ་ཀྱི་ཕུར་བུ་འདྲིལ་བ། ཞབས་བཞི་གཡས་བསྐུམ་ཞིང་གཡོན་བརྐྱང་པའི་གྱད་ཆེན་པོའི་སྟབས་ཀྱིས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ། ཐོད་པ་སྐམ་པོ་རིན་པོ་ཆེའི་རྩེ་བྲན་ཅན་གྱི་དབུ་རྒྱན་དང་། ཚར་གསུམ་ཐོད་པའི་ཕྲེང་བ་རྒྱུ་རློན་ལ་བརྒྱུས་པའི་དོ་ཤལ་ཅན། ཞིང་ཆེན་དང་གླང་པོ་ཆེའི་ཀོ་བས་སྟོད་གཡོགས་ཤིང་སྟག་གི་ལྤགས་པས་ཤམ་ཐབས་འཕྱང་བ། གདུག་པའི་སྦྲུལ་རིགས་ལྔ་དང་རུས་པའི་ཕྱག་རྒྱ་དྲུག་གིས་བརྒྱན་པ། ཁྲག་ཞག་ཐལ་བས་བྱུགས་ཤིང་རྡོ་རྗེའི་གཤོག་པ་སོགས་དཔལ་གྱི་ཆས་རྣམས་རྫོགས་པ། དེའི་པང་དུ་ཡུམ་འཁོར་ལོ་རྒྱས་འདེབས་མ་སྐུ་མདོག་མཐིང་སྐྱ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ། གཡས་

ཁ་ཊྭཱཾ་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པ་དུང་ཁྲག་ཞལ་དུ་སྟོབ་པ། ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་ཞིང་གཡས་བརྐྱང་པའི་སྟབས་ཀྱིས་སྙོམས་པར་འཇུག་པ། གཟིག་ཤམ་དང་རུས་པའི་རྒྱན་གྱིས་སྤྲས་པ། གཉིས་ཀའམ་སྣང་སྟོང་དབྱེར་མེད་གར་དགུའི་ཉམས་འགྱུར་མཆོག་ཏུ་རྒྱས་པ། བཟོད་པར་དཀའ་བའི་གཟི་བརྗིད་ཉི་མ་འབུམ་གྱི་འོད་ཟེར་ལྟར་འབར་ཞིང་ཡེ་ཤེས་ཀྱི་མེ་དཔུང་ཆེན་པོའི་ཀློང་ན་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་ཡོངས་སུ་རྫོགས་པའི་བདག་ཉིད་ཅན་དུ་བཞུགས་པའོ། །དེའི་སྤྱི་བོར་ཨོཾ་དཀར་པོ། མགྲོན་པར་ཨཱཿདམར་པོ། ཐུགས་ཀར་ཧཱུྃ་མཐིང་ཀ །ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་བསམ་གྱིས་མི་ཁྱབ་པའི་ཚོགས་བཛྲ་ས་མཱ་ཛཿ [ས་སྤྱན་དྲངས།] ཛཿཧཱུཾ་བཾ་ཧོཿས། དམ་ཚིག་པ་དང་ཡེ་ཤེས་པ་གཉིས་སུ་མེད་པར་གྱུར་ཏེ་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་དབྱེར་མེད་དུ་གྱུར་པ་ལ། སླར་ཡང་ཡེ་ཤེས་ལྔའི་རང་བཞིན་གྱི་ས་བོན་བྱུང་བ་སྤྱི་བོར་གནས་པ་ཡོངས་སུ་གྱུར་པས་དབང་བསྐུར། སྐུ་ལྔའི་བདག་ཉིད་ཁྲག་འཐུང་རིགས་ལྔའི་ཅོད་པན་གྱིས་

དབུ་བརྒྱན་པར་ [བསམ་ལ། ལྷ་སྐུའི་གསལ་སྣང་དང་ང་རྒྱལ་སེམས་བཟུང་ཞིང་གཞི་འབྲས་སྦྲེལ་བའི་དག་དྲན་ལ་བསླབ། དེས་སྐྱོ་བའམ་བོགས་འབྱིན་པའི་སླད་དུ་བཟླས་པ་བྱ་བར་འདོད་ན།] བདག་ཉིད་ཀྱི་ཐུགས་ཙིཏྟ་རིན་པོ་ཆེ་ཟུར་བརྒྱད་པའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་རྡོར་སེམས་མཐིང་གསལ་ཞལ་གཅིག་ཕྱག་གཉིས་རྡོར་དྲིལ་འཛིན་ཅིང་ཞབས་བརྐྱང་བསྐུམ་དུ་བཞུགས་པ་རྒྱན་ཆ་ལུགས་ཡོངས་སུ་རྫོགས་པའི་ཐུགས་ཁར་ཉི་མ་ལ་གནས་པའི་ཏིང་ངེ་འཛིན་སེམས་དཔའ་རྡོ་རྗེ་སྔོན་པོ་རྩེ་དགུ་པའི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱུཾ་ཡིག་མཐིང་ག་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་བཻ་ཌཱུརྱ་ཞུན་མའི་མདངས་ཅན་གཡས་བསྐོར་དུ་འཁོད་པར་ [གསལ་གདབ་ཅིང་། འོད་ཟེར་སྤྲོ་བསྡུའི་དམིགས་གནད་དང་སྦྱར་ཏེ།] ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ [ཅེས་རྩ་བའི་སྙིང་པོ་འབྲུ་དགུ་པ་དང་།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ༔ ཛཿཧཱུཾ་ཨཱཿ [ཞེས་བསྙེན་སྒྲུབ་ལས་གསུམ་ཆིག་ཆོད་འབྲུ་བཅུ་བདུན་པ་སྟེ། གང་འདོད་པ་ཉིད་སྒྲར་སྣང་བའི་ཚུལ་དུ་ཡིད་ཀྱིས་བཟླ་བའམ་སྒྲར་གྲགས་པའི་ཚུལ་དུ་ངག་གིས་བཟླ་བ་ཅི་རིགས་སུ་བྱ་ཞིང་། མཐར་ལས་སྦྱོར་ཁྱད་པར་བ་སྤྲོ་ན་མན་ངག་དང་ལྡན་པས་སྤུ་གྲིའི་དྲག་སྔགས་འདུས་པ་ཉིད་ཅུང་ཟད་རེ་གཏུམ་ཆོད་དུ་བཟླའོ། །རྗེས་ཐུན་བསྡུ་བ་ནི། ཧཱུཾ་ཧཱུཾ་ཧཱུཾ་གིས་སྔར་བསྒོམས་པའི་རྟེན་དང་བརྟེན་པར་བཅས་པའི་

སྣང་ཆ་ཐམས་ཅད་འོད་གསལ་སྟོང་པ་ཉིད་ཀྱི་ངང་དུ་བསྡུས་ཏེ་མཉམ་པར་བཞག་པས་རྟག་མཐའ་བསལ།] ཕཊ་ཕཊ་ཕཊ་[ཀྱིས་སླར་ཡང་ཟུང་འཇུག་གི་སྐུར་ལམ་གྱིས་ལྡང་བའི་གནས་གསུམ་འབྲུ་གསུམ་གྱིས་བསྲུང་བར་མོས་ཤིང་།] ཨོཾ་བཛྲ་ཀཱ་ཝ་ཙི་རཀྵ་ཧཱུཾ༔ [ཞེས་པས་རྡོ་རྗེའི་གོ་བགོས་ལ་སྣང་གྲགས་རྟོག་ཚོགས་ལྷ་སྔགས་ཡེ་ཤེས་ཀྱི་རོལ་པར་སྦྱར་བས་ཆད་མཐའ་བསལ་ཏེ།] ཁྲག་འཐུང་རིགས་སུ་སྐྱེས་ནས་ཀྱང་། །མཉམ་མེད་རྡོ་རྗེ་གཞོན་ནུ་སྟོན། །སྙིང་རྗེ་ལྡན་ཞིང་བླ་མར་གུས། །སྐྱེ་ཞིང་སྐྱེ་བར་འགྱུར་བར་ཤོག །ལག་ན་རྡོ་རྗེ་ཕུར་བུ་འཛིན། །ཟབ་མོའི་ཆོས་ནི་ཀློག་པ་དང་། །བཙུན་པོའི་ཤུ་ཀྲ་མཉམ་ཟས་ཅན། །སྐྱེ་ཞིང་སྐྱེ་བར་འགྱུར་བར་ཤོག །[ཅེས་ཕུར་པ་ཞེ་སྡང་ཡོངས་སུ་དག་པའི་རྒྱུད་ལས་བྱུང་བ་དང་། གཞན་ཡང་།] དགེ་བ་འདི་ཡིས་བདག་དང་སེམས་ཅན་ཀུན། །བདུད་ལས་རྣམ་རྒྱལ་བར་ཆད་ཀུན་ཞི་ཞིང་། །རྡོ་རྗེ་གཞོན་ནུ་མྱ་ངན་འདས་པའི་མཆོག །འབྲས་བུ་བྱང་ཆུབ་ངེས་པ་བརྙེས་གྱུར་ཅིག །[ཅེས་དགེ་བའི་རྩ་བ་བྱང་ཆུབ་ཆེན་པོར་བསྔོས་ཏེ་སྨོན་ལམ་ཟབ་མོས་རྒྱས་གདབ།] བྱིན་རླབས་མཆོག་སྩོལ་རྩ་བརྒྱུད་བླ་མ་དང་། །དངོས་གྲུབ་ཆར་འབེབས་ཡི་དམ་ཀཱི་ལ་ཡ། །ཕྲིན་ལས་ཐོགས་མེད་མཁའ་འགྲོ་ཆོས་སྐྱོང་སོགས། །རབ་འབྱམས་དཀྱིལ་འཁོར་འཁོར་ལོའི་བཀྲ་ཤིས་ཤོག །[ཅེས་སོགས་ཤིས་པ་བརྗོད་པས་བདེ་ལེགས་སུ་བྱས་ཏེ་ཐུན་མཚམས་ཀྱི་སྤྱོད་ལམ་

ལ་འཇུག་པར་བྱའོ། །འདི་ལ་བསྐྱེད་ཚིག་རྣམས་གཏེར་གཞུང་ལས་རྒྱུན་ཁྱེར་ཟུར་དུ་མ་བྱུང་ཞིང་རྩ་བའི་ལས་བྱང་ནས་བླངས་ན་འཇེབས་ཆ་ཆེ་མོད། འོན་ཀྱང་ཚིག་སྦྱོར་ཧ་ཅང་རྒྱས་དྲགས་པས་རྒྱུན་གྱི་ཉམས་ལེན་ལ་འཇུག་པ་མི་བདེ་ཞིང་ལས་བྱང་ཉུང་ངུ་ཞིག་ལོགས་སུ་བཀོལ་ན་དེང་དུས་ཀྱི་སྐྱོ་བོ་ཕལ་ཆེར་སླ་ཆོས་ཁོ་ན་འདོམས་པས་རྩ་བའི་ཕྲིན་ལས་ལའང་གནོད་ཀྱི་དོགས་ནས། འདིར་མན་ངག་དོན་ལ་རྟོན་པའི་དབང་དུ་བྱས་ཏེ་སྔ་འགྱུར་ཤིང་རྟ་ཆེན་པོ་རྣམས་ཀྱི་བཞེད་པ་ལྟར་སྤྲོས་མེད་གཙོ་རྐྱང་གི་རྣལ་འབྱོར་ཁོ་ན་འདོན་བསྒོམ་བདེ་བར་ཚིག་ལྷུག་ཏུ་བཀོད་པ་ལ་འགལ་བར་མི་བསམ་ཞིང་། མན་ངག་གི་ཁུངས་ཕྲིན་ལས་རོལ་པའི་རྒྱུད་ལ་བརྟེན་པའི་ཕྱིར་བཀའ་གཏེར་ཕུར་བུ་སྤྱི་ལ་ཁྱབ་པ་ཉིད་དུའང་འགྱུར་བ་ཡིན་ནོ། །ཞེས་པའང་ལྷག་པའི་ལྷ་མཆོག་འདི་ལས་དངོས་གྲུབ་ཀྱི་སྐལ་པ་ཆ་ཐོབ་པ་རྗེ་རིགས་ཀྱི་སྔགས་བན་འཇིགས་བྲལ་ཡེ་ཤེས་རྡོ་རྗེས་བརྒྱུད་འཛིན་རྣམས་ལ་མཆོག་ཏུ་སྨན་པའི་སེམས་ཀྱིས་ཕྲིན་ལས་གྲུབ་པའི་གནས་མཆོག་ཀརྨ་ཚེའི་ཕུག་མོ་ཆེ་དང་འབྲེལ་བ་སེང་གེ་ཡང་རྫོང་གི་ཀེའུ་ཚང་དུ་སྦྱར་བ་ཛ་ཡཏྣུ།། །།[༈ འདི་ལ་བརྟེན་ནས་ཚེ་སྒྲུབ་ཉམས་སུ་ལེན་པར་འདོད་ན། གོང་གི་རྩ་བའི་བཟླས་པ་གྲུབ་ནས།] བདག་གི་ཐུགས་ཀ་ནས་འོད་ཟེར་དམར་པོ་ལྕགས་ཀྱུའི་དབྱིབས་ཅན་འཁོར་འདས་ཁྱབ་པར་འཕྲོས། རང་གི་བླ་ཚེ་འཁྱམས་པ་ཡར་བ་བརྐུས་པ་འཕྲོག་པ་ལ་སོགས་པ་ཐམས་ཅད་དང་།

བརྟན་གཡོ་སྣོད་བཅུད་ཀྱི་དྭངས་མ། རྩ་གསུམ་རྒྱལ་བ་སྲས་དང་བཅས་པའི་ཚེའི་བྱིན་རླབས་ཐམས་ཅད་བསྡུས་ཏེ་བདག་ལ་སིབ་སིབ་ཐིམ་པས་འཆི་མེད་རྡོ་རྗེའི་ཚེ་ལ་མངའ་བརྙེས་པར་[མོས་ལ།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཨཱ་ཡུརྫྙཱ་ན་སིངྔྷི་ཕ་ལ་ཧཱུཾ་ཨཱ༔ [ཞེས་ཅི་ནུས་སུ་བཟླས་མཐར། ཚེ་འགུགས་དམིགས་བསལ་དུ་བསྐུལ་བར་སྤྲོ་ན།] ཧཱུཾ༔ དབུས་ནས་རང་བྱུང་ཚེ་ཡི་ལྷ༔ བཅོམ་ལྡན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ ཁྱོད་ཀྱི་ཐུགས་དམ་གནད་ནས་བསྐུལ༔ འཁོར་འདས་ཚེ་ཡི་བཅུད་རྣམས་བསྡུས༔ རྡོ་རྗེའི་ཚེ་སྲོག་བརྟན་པར་མཛོད༔ ཕྱོགས་བཅུ་རང་བྱུང་ཚེ་ཡི་བདག༔ དཔལ་ཆེན་ཁྲོ་རྒྱལ་ཡབ་ཡུམ་བཅུ༔ སྤྲུལ་པའི་ཕྲ་མེན་ཉི་ཤུའི་ཚོགས༔ ཁྱོད་ཀྱི་ཐུགས་དམ་གནད་ནས་བསྐུལ༔ ཕྱོགས་སྐྱོང་ལག་ནས་ཚེ་ཁུག་ལ༔ རྡོ་རྗེའི་ཚེ་སྲོག་བརྟན་པར་མཛོད༔ སྲས་མཆོག་སྒོ་སྐྱོང་སྲུང་མའི་ཚོགས༔ ཁྱོད་ཀྱི་ཐུགས་དམ་གནད་ནས་བསྐུལ༔ ཚེ་སྲོག་གདོན་གྱི་བརྐུས་པ་ཁུག༔ རྡོ་རྗེའི་ཚེ་མཆོག་བརྟན་པར་མཛད༔ [ཅེས་བསྐུལ་ལས།] བྷྲཱུཾ༔ ཚེ་ཡི་དངོས་གྲུབ་རྒྱུད་གསུམ་པོ༔ རྩ་སྲོག་ཙིཏྟའི་དཀྱིལ་དུ་བསྟིམ༔ ཅིས་ཀྱང་མི་ཆོད་མི་ཤིགས་པའི༔

རྡོ་རྗེ་གཞོན་ནུའི་སྲོག་ཐོབ་ཤོག༔ ཨཱ་ཡུརྫྙཱ་ན་ཨ་ཨ་ཨ༔ [ཞེས་རྒྱས་གདབ་པར་བྱའོ། །ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།][༈ ཕུར་སྲུང་གསོལ་མཆོད་རྒྱུན་ཁྱེར་ནི། མཆོད་གཏོར་རཾ་ཡཾ་ཁཾ་གིས་བསང་སྦྱང་།] ཨོཾ་ཨཱཿཧཱུཾ་[གིས་བྱིན་བརླབ།] རང་གི་སྙིང་གའི་འོད་ཀྱིས་ཕུར་སྲུང་དམ་ཅན་ལྕམ་དྲལ་འཁོར་བཅས་བཛྲ་ས་མཱ་ཛཿ[ས་སྤྱན་དྲངས།] ཨོཾ་བཛྲ་ཨརྒྷཾ་སོགས་ནས། ཤཔྡའི་བར་གྱིས་ཉེར་སྤྱོད་དང་། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། [ཞེས་སྨན་རཀ་སྟོབ།] བཛྲ་ཀཱི་ལི་ཀཱི་ལ་ཡ་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། [ལན་གསུམ་གྱིས་གཏོར་མ་ཕུལ་ལ།] ཧཱུཾ། ཁྲག་འཐུང་བཛྲ་ཀུ་མཱ་རའི། །བཀའ་ཡི་བསྟན་སྐྱོང་གཡར་དམ་ཅན། །ཤྭ་ན་བདག་ཉིད་ས་བདག་མ། །སྐྱེས་བུ་གིང་ཆེན་འཁོར་བཅས་རྣམས། །མཐུན་རྫས་མཆོད་གཏོར་འདི་བཞེས་ལ། །འགལ་རྐྱེན་ཀུན་སེལ་མཐུན་རྐྱེན་སྤེལ། །འདོད་པའི་དོན་ལ་གཉེར་གཏད་པའི། །ལས་ཀྱི་འབྲས་བུ་མཆིས་པར་མཛོད། །[ཅེས་ཕྲིན་ལས་བཅོལ་ཞིང་མགྲོན་མི་དམིགས་པར་བཞག་གོ །ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ། །] སརྦ་དཱ་མངྒ་ལཾ།། །།

དམ་ཅན་སྤྱིའི་གཏོར་མའི་ཆོ་ག་ཉུང་ངུར་བསྡུས་པ།

༄༅། །དམ་ཅན་སྤྱིའི་གཏོར་མའི་ཆོ་ག་ཉུང་ངུར་བསྡུས་པ་ཞེས་བྱ་བ་བཞུགས་སོ། །

ཨོཾ་སིངྔྷི་རསྟུ། བླ་མ་མཆོག་དང་དབྱེར་མེད་ཡི་དམ་ལྷ། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ནས། །དེ་མཉེས་བྱེད་པའི་གཏོར་མའི་ལས་རིམ་དག །དང་པོའི་ལས་ཅན་དོན་དུ་ཉུང་ངུར་བྲི། །[འདིར་དམ་ཅན་སྤྱིའི་གཏོར་མའི་ཕྲིན་ལས་ལ་འཇུག་པར་འདོད་པས་ཡིད་དང་མཐུན་པའི་གནས་སུ་སྐུ་རྟེན་སྤྱན་གཟིགས་སོགས་མཛེས་པར་བསྟར་ཞིང་གཏོར་སྣོད་གསུམ་གྱི་ནང་དུ་བླ་མ་ཡི་དམ་དབྱེར་མེད། ནག་པོ་ཆེན་པོ་ཡེ་ཤེས་དམ་ཅན་སྤྱི། །གཏེར་སྲུང་གཞི་བདག་དང་བཅས་པའི་གཏོར་མ་རྒྱན་ལྡན། སྨན་རཀ་ཉེར་སྤྱོད་དང་བཅས་པ་བཤམས། རང་གི་མདུན་དུ་ནང་མཆོད། རྡོར་དྲིལ། ཐོད་རྔ། མེ་ཏོག་སོགས་མཁོ་བའི་ཡོ་བྱད་རྣམས་འཚོགས་པར་བྱས་ལ། བདག་གི་རྣལ་འབྱོར་བཟླས་པའི་བར་སྔོན་དུ་འགྲོ་བས། མཆོད་གཏོར་རྣམས།] རཾ་ཡཾ་ཁཾ་གིས་བསང་སྦྱང་།

སྟོང་པའི་ངང་ལས་ཡཾ་ལས་རླུང་རཾ་ལས་མེ་ཀེཾ་ལས་མི་མགོའི་སྒྱེད་པུ་གསུམ་ལ་བརྟེན་པའི་ཨ་ཡིག་ལས་བྱུང་བའི་ཐོད་པའི་སྣོད་དུ་བཅུད་ཐམས་ཅད་ཧཱུཾ་ཨོཾ་སྭཱ་ཨཱཾ་ཧཱ། མཱུཾ་ལཱ་མཱཾ་པཱཾ་ཏཱཾ་ལས་བདུད་རྩི་ལྔ་དང་སྒྲོན་མེ་ལྔར་གྱུར་པ་སོ་སོའི་ས་བོན་གྱིས་མཚན་པ་དང་བཅས་པའི་འོག་གི་རླུང་གཡོས། མེ་སྦར། རྫས་ཐམས་ཅད་ཞུ་ཞིང་འདྲེས་པའི་སྟེང་གི་ནམ་མཁའ་ལ་ཨོཾ་ཨཱཿཧཱུཾ་གི་ཡི་གེ་གསུམ་གནས་པ་ལས་འཕྲོས་པའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །ཡི་གེ་གསུམ་ལ་ཐིམ་སྟེ་རིམ་པར་ཞུ་བ་ལས་དམ་ཚིག་གི་རྫས་དང་རོ་

གཅིག་ཏུ་གྱུར་[པར་བསམ་ལ། ལག་གཡོན་གདེངས་]ཨོཾ་[གྱིས་སྦྱངས། གཡས་གདེངས་]ཨཱཿ[ས་སྤེལ། སྙིམ་པ་བཀན་ཏེ་ཧཱུཾ་གིས་ཁ་དོག་དྲི་རོ་ཕུན་སུམ་ཚོགས་པར་བྱས། མཁའ་ལྡིང་གི་རྒྱས་ཧོཿ ཞེས་ཟག་མེད་ཀྱི་བདུད་རྩིར་བལྟས་ལ་བྱིན་གྱིས་བརླབས། དེ་ནས་མགྲོན་བསྡུ་བ་ནི།] རང་གི་སྙིང་གའི་ཧཱུཾ་ལས་འོད་ཟེར་ལྕགས་ཀྱུའི་རྣམ་པ་ཅན་གློག་འཁྱུག་པ་ལྟར་འཕྲོས་པས། དཔལ་ཡེ་ཤེས་ཀྱི་མགོན་པོ་སོགས་དམ་ཅན་ལྕམ་དྲལ་བཀའ་སྡོད་འཁོར་དང་བཅས་པ་ཐམས་ཅད་རང་བཞིན་ཆོས་ཀྱི་དབྱིངས་ལས་སྒྱུ་འཕྲུལ་གྱི་རོལ་པ་ཞི་ཁྲོའི་ཉམས་དུ་མར་འཆར་བ་རྣམ་འཕྲུལ་བསམ་གྱིས་མི་ཁྱབ་པའི་བཀོད་པ་ཆེན་པོ་མདུན་གྱི་ནམ་མཁར་བཛྲ་ས་མཱ་ཛཿ[ས་སྤྱན་དྲངས་པར་བསམས་ཤིང་།] ཧཱུཾ། ཆོས་དབྱིངས་མཁའ་ལྟར་དག་པའི་དབྱིངས། །མི་གཡོ་འོག་མིན་ཉམས་དགའི་གནས། །རྡོ་རྗེ་གདན་དང་ན་ལེནྡྲ། །དུར་ཁྲོད་བརྒྱད་དང་ཉེར་བཞིའི་ཡུལ། །ཕྱོགས་བཅུའི་ཞིང་ཁམས་རབ་འབྱམས་ནས། །དཔལ་ལྡན་མགོན་པོ་ལྕམ་དྲལ་ནི། །བཀའ་སྡོད་དམ་ཅན་རྒྱ་མཚོར་བཅས། །བདག་གིས་དད་པས་སྤྱན་འདྲེན་ན། །སྔོན་གྱི་ཞལ་བཞེས་དམ་བཅས་ལྟར། །བསྟན་པ་བསྲུང་ཕྱིར་གཤེགས་སུ་གསོལ། །ཨོཾ་ཤྲཱི་བཛྲ་ངྷརྨ་པཱ་ལ་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས་ལ། ཧཱུཾ། དུས་གསུམ་སངས་རྒྱས་

ཐམས་ཅད་ཀྱི། །བསྟན་པ་བསྲུང་མཛད་དམ་ཚིག་ཅན། །ལྕམ་དྲལ་བཀའ་སྡོད་འཁོར་དང་བཅས། །འདིར་ནི་དགྱེས་པར་བཞུགས་སུ་གསོལ། །ཛཿཧཱུཾ་བཾ་ཧོཿས་མ་ཡ་ཨཱ་ས་ན་ཏིཥྛཱནྟུ། [ཞེས་བཞུགས་སུ་གསོལ། སྲུང་མ་རྣམས་ཀྱི་སྤྱི་བོར་རྡོ་རྗེ་བཞག །བདུད་རྩི་ལྗགས་ལ་བྱིན་པར་མོས་ཏེ།] ཨོཾ་བཛྲ་ས་མ་ཡ་ཧ་ན་ཧཱུཾ་ཕཊ། [ཅེས་དམ་ལ་བཞག] ཧཱུཾ། ཐུན་མོང་ཁྱད་པར་བླ་ན་མེད། །ཕྱི་ནང་གསང་བའི་མཆོད་སྤྲིན་ནི། དངོས་བཤམས་ཡིད་ལས་བྱུང་བ་དག །ནམ་མཁའ་གང་བར་སྤྲོས་ཏེ་མཆོད། །ཨོཾ་ཤྲཱི་བཛྲ་ངྷརྨ་པཱ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། [དེ་བཞིན་དུ་སྦྱར་ཏེ།] པཱ་དྱཾ། པུཥྤེ། ངྷུ་པེ། ཨཱ་ལོ་ཀེ། །གྷནྡྷེ། ནཻ་དྱཱ། ཤཔྡའི་བར་གྱིས་མཆོད། མ་ཧཱ་ཨ་མྲྀ་ཏ་པཱུ་ཛ་ཁཱ་ཧི། མ་ཧཱ་རཀྟ་པཱུ་ཛ་ཁཱ་ཏི། [ཞེས་སྨན་རཀ་སྟོབ། གཏོར་མ་འབུལ་བ་ནི།] ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་[བསམས་ལ་རྡོར་ཐལ་ཁ་གྱེན་དུ་ཕྱེ་ནས།] ཨོཾ་བྷུ་རུ་ཀུ་རུ་ཨི་ཙི་ཀི་བྱི་ཨུ་ཙུཥྨ་ཀྲོ་ངྷ་ཧཱུཾ་ཕཊ། ཨོཾ་མ་ཧཱ་ཀཱ་ཞལ་ཨེ་ཀ་ཛཱ་ཊཱི་གུ་ཎ་ཧྲི་ད་ཧཱུཾ་ཕཊ། ཨོཾ་ཤྲཱི་མ་ཧཱ་ཀཱ་ལ་གཎ་གུཧྱ་རཾ་སིངྔྷི་ཧཱུཾ་ཕཊ། ཨོཾ་རོ་རུ་ཨེ་ཀ་ཛ་ཊཱི་སྙིང་ཁ་རཀྨོ་རུ་ལུ་རུ་ལུ་ཧཱུཾ་ཛཿཛ༔ ཨོཾ་མ་ཧཱ་དེ་ཝ་ཛཿཨུ་མ་དེ་ཝཱི་ཧྲཱིཾ་ཧ་རི་ནི་ས་པཱ་ཤཾ་ཀུ་རུ་ཧོཿ ཨེ་ཧེ་

རྨེ་རུ་ཙེ་གུ་ཎ་ཧྲཱི་ཏྲི་ཧཱུཾ་ཛཿ ཧྲཱིཿཤག་རུ་རག་རཾ་ན་གེ་ཙིཏྟ་ཏྲཾ་མ་མ་ཡོ་ཟ་འགྲམ་ཧ་ཧ་ག་ཤ་ལ་ཛཿཛཿ ཨོཾ་བཻ་ཤྲ་མ་ཎ་ཡ་སྭཱཧཱ། ཨོཾ་སཱ་དྷུ་ས་མ་ཡ་བྷ་ག་ཏྲཾ་ཤེ་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿཛཿཧཱུཾ་བཾ་ཧོཿ ཨོཾ་བཛྲ་མ་ཧཱ་ཀཱ་ལ་སེང་ཧ་མུ་ཁ་སི་ན་ར་མ་ཧཱུཾ་ཕཊ༔ ཨོཾ་མ་མ་ར་ལི་པྲ་མ་ཡ་ཀཱ་ལི་ཡེ་ཛཿཛཿ ཨོཾ་བཛྲ་སརྦ་དུཥྜན་ཨེ་ཛ་བྷྱོ། ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷཱ་ཏ་ཡ་མ་མ་ཤཱི་གྷྲཾ་ཀརྨ་ཀ་ར་ཡ་ཧཱུཾ། ཨོཾ་བཛྲ་ངྷཱ་ཀི་ནི་ཨ་ཡུ་ཥེ་ཤྭ་རི་ཧྲཱིཿ ཨོཾ་བཛྲ་ཁྲ་མོ་ཧ་ཧྲིང་ཧྲིང་སྭཱཧཱ། རཱ་ཛ་སིངྔྷིས་མ་ཡ་ཛཿ ཨོཾ་ནཱ་ག་ཙནྟྲི་ཙེ་ར་ར་ཏྲི་ཀིང་ཀ་ར་ཡཀྴ་ཡཀྴ་ས་མ་ཡ་ཙིཏྟ་ཧྲིཾ་ཧྲིཾ་ཛཿ་ཛཿ[ཞེས་སྙིང་པོ་ཀུན་གྱི་མཐར།] ས་པ་རི་ཝཱ་ར་ཨི་དཾ་བ་ལི་ཏཾ་ཁ་ཁ་ཁཱ་ཧི་ཁཱ་ཧི། [ཞེས་བཏགས་པ་གསུམ་མམ་བདུན་གྱིས་གཏོར་མ་ཕུལ་ལ།] དཔལ་མ་ཧཱ་ཀཱ་ལ་ཁྲག་འཐུང་གི་རྒྱལ་པོ། གཙུག་ལག་ཁང་དང་དཀྱིལ་འཁོར་གྱི་སྲུང་མ། དུག་གསུམ་ནད་ཀྱི་སྨན་པ། རྣལ་འབྱོར་ཡོངས་ཀྱི་དགྲ་ལྷ། བདུད་དཔུང་སྒྲོལ་བའི་དཔའ་བོ། བསྟན་པའི་བཀའ་སྲུང་ཆེན་པོ། ལེགས་ལྡན་རྡོ་རྗེ་སྲིན་པོ་ཚོགས་ཀྱི་བདག་པོ། ནག་པོ་ཆེན་པོ་ཕྱག་བཞི་པ། དཔལ་མགོན་མ་ནིང་ནག་པོ། མ་མོ་སྔགས་ཀྱི་སྲུང་མ། ལྷ་ཆེན་དབང་ཕྱུག་ཆེན་པོ། གནོད་སྦྱིན་ཤན་པ་དམར་ནག །ཁྱབ་འཇུག་དུག་གི་སྤུ་གྲི། རྒྱལ་མཚན་རྣམ་མང་ཐོས་སྲས། དམ་ཅན་རྡོ་རྗེ་

ལེགས་པ། །ཞིང་སྐྱོང་བདུད་མགོན་སེང་གདོང་། དཔལ་ལྡན་དུར་ཁྲོད་ཀྱི་མ་མོ། དྲེགས་པའི་སྡེ་དཔོན་སུམ་ཅུ། ཕུར་སྲུང་དམ་ཅན་ལྕམ་དྲལ། ལྷ་སྨན་ཚེ་རིང་མཆེད་ལྔ། སྨན་བཙུན་རྡོ་རྗེ་གཡུ་སྒྲོན། སྤྲུལ་པའི་རྒྱལ་ཆེན་སྐུ་ལྔ། བཙན་རྒོད་འབར་བ་སྤུན་བདུན་ལ་སོགས་ཏེ་དམ་པ་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱིས་མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐོངས། འཇིག་རྟེན་གྱི་རྒུད་པ་སེལ། སེམས་ཅན་གྱི་ཕན་བདེ་སྤེལ། རྣལ་འབྱོར་པ་རྣམས་ཀྱི་སྡོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་བསྒྲུབས། སྡང་བའི་དགྲ་ཐུལ། གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །[ཅེས་ཕྲིན་ལས་གསོལ། བསྟོད་པ་ནི།] ཧཱུཾ། འཇིགས་བྱེད་ཁྲག་འཐུང་དཔལ་ལྡན་ནག་པོ་ཆེ། །

བདུད་དཔུང་མཐར་བྱེད་དུར་ཁྲོད་སྒྲོལ་བའི་གིང་། །སྒྲུབ་པའི་རེ་སྐོང་ལེགས་ལྡན་ཚོགས་ཀྱི་བདག །རྒྱལ་བའི་བཀའ་སྡོད་མཐུ་ཆེན་ཁྱོད་ལ་བསྟོད། །མི་འགྱུར་རྣམ་དག་ཆོས་དབྱིངས་ངང་འདི་ལས། །ཡེ་ཤེས་ཆེན་པོས་ཐུགས་རྗེའི་སྐུར་སྤྲུལ་པ། མ་རུངས་འདུལ་མཛད་མ་ཧཱ་ཀཱ་ལའི་གཙོ། །དྲག་པོའི་སྟོབས་ལྡན་ཁྱོད་ལ་ཕྱག་འཚལ་བསྟོད། །འཇིག་རྟེན་འདས་པའི་དུས་ནས་སྔོན་བྱུང་བ། །ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས། །སྲིད་རྩའི་བདག་འཛིན་རཱུ་དྲ་སྡེ་གསུམ་འདུལ། །རྩལ་ཆེན་ཕྲིན་ལས་མཛད་ལ་ཕྱག་འཚལ་བསྟོད། །ཀུན་བཟང་ཐུགས་ཀྱི་སྤྲུལ་པ་ཁྲག་འཐུང་ཡུམ། །ཡེ་ཤེས་མ་མོ་རྡོ་རྗེ་རལ་གཅིག་མ། །གསང་སྔགས་བཀའ་ཡི་སྲུང་མ་མཐུ་མོ་ཆེ། །སྡེ་ལྔ་འཁོར་ཚོགས་ཕོ་ཉར་བཅས་ལ་བསྟོད། །ཐུགས་རྗེའི་གཏེར་ཆེན་མགོན་པོ་སྤྱན་རས་གཟིགས། །གང་འདུལ་ཐབས་མཁས་སྤྲུལ་བསྒྱུར་རོལ་པ་ལས། །ཁམས་གསུམ་དབང་མཛད་བདག་པོའི་སྐུར་བཞེངས་པ། དྲང་སྲོང་ལྷ་ཡི་བླ་མ་ཁྱོད་ལ་བསྟོད། །བདེ་ཆེན་དབང་གི་རྒྱལ་པོ་ཧེ་རུ་ཀ། གདུལ་དཀའ་འདུལ་ཕྱིར་འབར་བའི་སྐུར་བཞེངས་པ། །མཐུ་རྩལ་ཐོགས་མེད་ཁམས་གསུམ་སྲོག་གི་བདག །འཇིག་བྱེད་གནོད་སྦྱིན་ཁྱོད་ལ་ཕྱག་

འཚལ་བསྟོད། །ཧེ་རུ་ཀ་དཔལ་ཐུགས་ལས་སྤྲུལ་པའི་སྲས། །འཇིགས་བྱེད་མི་བཟད་སྡེ་བརྒྱད་དྲེགས་པའི་གཙོ། །དྲག་ཤུལ་ཕྲིན་ལས་ཀུན་བསྒྲུབ་རཱ་ཧུ་ལ། །སྲིང་བཞི་སྡེ་བརྒྱད་འཁོར་དང་བཅས་ལ་བསྟོད། །ས་བརྒྱད་དབང་ཕྱུག་སེམས་དཔའ་རིན་ཆེན་མང་། །ནམ་མཁའི་མཛོད་མངའ་དབུལ་བའི་གདུང་བ་འཕྲོག །ཡིད་བཞིན་འདོད་རྒུའི་ཆར་འབེབས་དཔག་བསམ་ཤིང་། །རྣམ་མང་ཐོས་སྲས་ངལ་བསོས་པོ་ལ་བསྟོད། །རྡོ་རྗེ་འཛིན་པའི་བཀའ་ཉན་ཐ་ཚིག་ཅན། །དབང་ཆེན་རྟ་མཆོག་རྒྱལ་པོའི་ཐུགས་ལས་སྤྲུལ། །སྨོན་ལམ་དབང་གི་སངས་རྒྱས་བསྟན་པ་བསྲུང་། །དམ་ཅན་སྐྱེས་བུ་ཁྱོད་ལ་ཕྱག་འཚལ་བསྟོད། །ཆོས་ཉིད་སྐྱེ་མེད་དབྱིངས་ལས་ཁྲོས་པའི་སྐུ། །འབར་བའི་གར་གྱིས་དམ་ཉམས་ཐལ་བར་རློག །འཇིགས་བྱེད་ཆེན་པོ་གསང་སྔགས་སྲུང་མའི་གཙོ། །ཞིང་སྐྱོང་བདུད་མགོན་སེང་གདོང་ཁྱོད་ལ་བསྟོད། །མི་འགྱུར་བདེ་ཆེན་ཆོས་དབྱིངས་ངང་ཉིད་ལས། །མ་རུངས་འདུལ་ཕྱིར་དྲག་མོའི་སྐུར་སྟོན་པ། །སྒྱུ་འཕྲུལ་རྡོ་རྗེའི་གར་མཛད་མ་མོའི་གཙོ། །རྒྱལ་བའི་བསྟན་སྲུང་གཙོ་ལ་ཕྱག་འཚལ་བསྟོད། །བདེ་གཤེགས་བཀའ་ཡི་བསྟན་པ་བསྲུང་བའི་

ཕྱིར། །རང་ཉིད་ཆོས་ཀྱི་དབྱིངས་ལས་མ་གཡོས་ཀྱང་། །གཟུགས་སྐུ་དྲེགས་པའི་ཚུལ་དུ་སྐུར་སྟོན་པ། །མཐུ་ཆེན་སྡེ་དཔོན་སུམ་ཅུའི་ཚོགས་ལ་བསྟོད། །སྔོན་ཚེ་སློབ་དཔོན་པདྨ་ཐོད་ཕྲེང་གི །སྤྱན་སྔར་ཕུར་པའི་སྲུང་མར་ཞལ་བཞེས་པ། །རྣལ་འབྱོར་བུ་བཞིན་སྐྱོང་བའི་དམ་ཚིག་ཅན། །ལྕམ་དྲལ་བཀའ་སྡོད་སྤྲུལ་པར་བཅས་ལ་བསྟོད། །འོད་གསལ་རྡོ་རྗེ་བཙུན་མོ་དབྱིངས་ཀྱི་ཡུམ། །རྣམ་འགྱུར་ཐབས་མཁས་ཞིང་སྐྱོང་སྨན་མོའི་ཚུལ། །བདེ་ཆེན་ཡེ་ཤེས་སྐྱེད་མཛད་ཌཱ་ཀི་མ། །ཚེ་རིང་མཆེད་ལྔ་སྤྲུལ་འཁོར་བཅས་ལ་བསྟོད། །རྡོ་རྗེ་གཡུ་སྒྲོན་ཤིན་ཏུ་མཛེས་པའི་སྐུ། །དཀར་གསལ་གངས་རིའི་ངོས་ལ་ཉི་ཤར་འདྲ། །སྒྲུབ་པ་པོ་ལ་དངོས་གྲུབ་མཆོག་སྩོལ་མཛད། མཆེད་ལྔ་འཁོར་དང་བཅས་ལ་ཕྱག་འཚལ་བསྟོད། །འགྱུར་མེད་དབྱིངས་ལས་འབར་བའི་སྐུར་བཞེངས་པ། །འགྲོ་བའི་དོན་མཛད་ཐུགས་རྗེ་ཉི་མ་འདྲ། །དམ་ཉམས་རྩད་གཅོད་ལེགས་ཉེས་གཉེར་ཁ་འཛིན། །རྒྱལ་ཆེན་སྐུ་ལྔ་འཁོར་དང་བཅས་ལ་བསྟོད། །དཀྱིལ་འཁོར་སློབ་དཔོན་པདྨ་སཾ་བྷ་ཝཱའི། །བཀའ་ཉན་དམ་ཚིག་རྗེས་དགོངས་གཏེར་གྱི་བདག །མཐུ་རྩལ་ཐོགས་མེད་རྣམ་བཞིའི་ཕྲིན་ལས་ཀྱིས། །དམ་ལྡན་རེ་

སྐོང་བཙན་རྒོད་ཁྱོད་ལ་བསྟོད། །[ཅེས་བསྟོད། གཏེར་བདག་སྤྱིའི་གཏོར་འབུལ་ནི།] རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་གཏེར་གྱི་བདག་པོ་འཁོར་བཅས་སྤྱན་དྲངས་པར་[བསམ་ཞིང་།] ཧཱུཾ། སྔོན་ཚེ་པདྨ་འབྱུང་གནས་སྤྱན་སྔ་རུ། །ཟབ་གཏེར་སྲུང་མར་ཞལ་བཞེས་དམ་ཚིག་ཅན། །མཐུ་ཆེན་གཏེར་གྱི་བདག་པོ་ཆེན་པོ་རྣམས། །རང་རང་གཡོག་འཁོར་བཅས་པ་འདིར་གཤེགས་ཤིག །ནི་ངྷི་པ་ཏི་ས་པ་རི་ཝཱ་ར་བཛྲ་ས་མཱ་ཛཿ[ས་སྤྱན་དྲངས།] ནིངྷི་པ་ཏི་ས་པ་རི་ཝཱ་ར་ཨ་རྒྷཾ་[ནས།] ཤཔྡ་པྲ་ཏཱིཙྪ་སྭཱཧཱ། ནི་ངྷི་པ་ཏི་ས་པ་རི་ཝཱ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱི་ཧི། མཧཱ་པཉྩ་ཨ་མྲྀ་ཏ་ཁཱ་ཧི། མཧཱ་རཀྟ་ཁཱ་ཏི། [ཞེས་མཆོད་པ་དང་སྨན་གཏོར་རཀྟ་རྣམས་འབུལ།] ཟབ་གཏེར་སྲུང་མའི་དབང་པོ་འཁོར་དང་བཅས་པ་རྣམས་ཀྱི་མཆོད་པ་དམ་པ་འདི་བཞེས་ལ་སངས་རྒྱས་ཀྱི་བསྟན་པ་སྲུངས་[སོགས་ཀྱིས་ཕྲིན་ལས་བཅོལ།] ཧཱུཾ། དུས་གསུམ་རྒྱལ་བའི་བཀའ་སྡོད་དཔའ་བོ་ཆེ། །རིག་འཛིན་ཀུན་གྱི་ཅི་བགྱིའི་དམ་ཚིག་ཅན། །ཟབ་གཏེར་བསྟན་པ་བསྲུང་བར་དམ་མནོས་པའི། །གཏེར་གྱི་བདག་པོ་འཁོར་དང་བཅས་ལ་བསྟོད། །[ཅེས་བསྟོད། གཞི་བདག་སྤྱི་གཏོར་ནི། གཏོར་མ་ཨ་མྲྀ་ཏས་བསང་།] སྭབྷཱ་ཝས་སྦྱང་། སྟོང་པའི་ངང་ལས་བྷྲཱུཾ་

ལས་རིན་པོ་ཆེའི་སྣོད་ཟབ་ཅིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་[བསམས་ལ། ཨོཾ་ཨཱཿཧཱུཾ་ཧོཿ[ལན་གསུམ་བརྗོད།] བྷཱུ་མི་པ་ཏིས་པ་རི་ཝཱ་ར་བཛྲ་ས་མ་ཛཿ[ས་སྤྱན་དྲངས།] བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱོཏྟ་ཨོཾ་ཨཱཿཧཱུཾ་ཕཊ་སྭཱཧཱ། [ལན་གསུམ་གྱིས་དབུལ།] ཨོཾ་བཛྲ་ཨརྒྷཾ་ནས། ཤཔྡ་པྲ་ཏཱིཙྪ་སྭཱ་ཧཱའི་[བར་དང་།] མ་ཧཱ་པཉྩ་ཨ་མྲྀ་ཏ་ཁཱ་ཧི། [ཞེས་ཕྱི་ནང་གིས་མཆོད།] གཞི་བདག་གཉུག་མར་གནས་པ་རྣམས་ཀྱིས་མཆོད་པ་དམ་པ་འདི་བཞེས་ལ་སངས་རྒྱས་ཀྱི་བསྟན་པ་སྲུང་[སོགས་གོང་བཞིན་དང་།] གཞི་བདག་ཆེན་པོ་ཁྱེད་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱིས་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་

ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་མཛོད། །[ཅེས་བརྗོད། དེ་ནས་འབུལ་གཏོར་ལ་དམིགས་བྱ་དགུག་པ་ནི།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུགས་སྔགས་དང་སྙིང་པོ་དང་ཕྱག་རྒྱ་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་རྡོ་རྗེའི་ཆོས་སྐྱོང་བའི་སྲུང་མ་བཀའ་སྡོད་ཕོ་ཉའི་དམག་ཚོགས་འཁོར་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས་བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བསྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་། སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་

ཁུག་ཅིག །[རྩ་སྔགས་ཤཱ་ས་ནའི་མཐར།] ནྲྀ་ཏྲི་བཛྲ་ཨཾ་ཀུ་ཤ་ཛཿཛཿཧཱུཾ་དཾ་ཧོཿ [ཞེས་བསྟིམ།] ཨོཾ་ཨཱཿཧཱུཾ་ཧོཿ[ས་བརླབ།] ཨོཾ་མ་ཧཱ་ཀཱ་ལ་ཡ། ཤཱ་ས་ན་ཨུ་པ་ཧ་རི་ཎི་ཨེ་ཥ་ཨ་པཉྩི་མ་ཀཱ་ལོ་ཨ་ཡཾ། ཨི་དཾ་རཏྣ་ཏྲ་ཡ་ཡ། ཨ་པ་ཀ་རི་ཎ་ཡ་དེ་པྲ་ཏི་ཛྙཱ་སྨ་ར་སི་ཏ་དཱ་ཨི་དཾ་དུ་ཥྚཱན་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲྀཧྞ་གྲྀཧྞ། བྷནྔྔྷ་བྷནྔྔྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ་དི་ན་མེ་ཀེ་ན་ཧཱུཾ་ཕཊ། ས་བ་རི་ཝཱ་ར་[སོགས་གསུམ་གྱིས་ཕུལ་ལ།] ཧཱུཾ། ཆོས་ཀྱི་དབྱིངས་ནས་འབར་བའི་སྐུར་བཞེངས་པ། །མཐུ་སྟོབས་དབང་ཕྱུག་རྡོ་རྗེ་ནག་པོ་ཆེ། །ལྕམ་དྲལ་བཀའ་སྡོད་དམ་ཅན་རྒྱ་མཚོའི་ཚོགས། །འཁོར་བཅས་ཐུགས་དམ་དབང་གིས་འདིར་ཤེགས་ཤིག །ཕྱི་ནང་གསང་མཆོད་སྨན་རཀ་བ་ལིཾ་ཏ། །དགྲ་བགེགས་ཤ་ཁྲག་ལ་སོགས་མཁོ་རྒུའི་རྫས། །སོ་སོའི་ཐུགས་ལ་ཅི་བཞེད་དེར་འཆར་བའི། །རྨད་བྱུང་དགྱེས་པའི་མཆོད་སྤྲིན་ཆེན་པོ་འདི། །སྔར་མཛད་ལེགས་པའི་ལས་ཀྱི་གཏང་རག་དང་། །སླད་ནས་གཡེལ་བ་མེད་པའི་ཕྲིན་ལས་བཞིའི། །འདོད་པའི་དངོས་གྲུབ་སྩོལ་སླད་འབུལ་ལགས་ན། །དགྱེས་པ་ཆེན་པོས་བཞེས་ཤིང་རོལ་ནས་ཀྱང་། །བསྟན་དང་འགྲོ་བའི་ཕན་བདེ་ཀུན་སྤེལ་ཞིང་། ཁྱད་པར་བདག་ཅག་སློབ་འཁོར་

བཅས་རྣམས། །ནད་མེད་པ་དང་མི་འགྱུར་ཚེ་སྲོག་དཔལ། །གྲགས་དང་འབྱོར་པ་རྒྱ་མཚོས་མཐོ་བ་དང་། །མ་རུངས་བདུད་དགྲའི་རྒོལ་བ་ཀུན་ཞི་ཞིང་། །རྣམ་མང་ཕྲིན་ལས་རྒྱ་མཚོ་ཡིད་བཞིན་སྒྲུབས། །ཕྱོགས་ལས་རྣམ་པར་རྒྱལ་བའི་རུ་མཚོན་ཕྱོར། །བྱང་ཆུབ་བར་དུ་བསྲུང་ཞིང་སྐྱོང་བར་མཛོད། །[ཅེས་གཏོར་མ་སྟོབ་ཅིང་འདོད་དོན་གསོལ། ཡང་ན་འབྲུ་གསུམ་གྱིས་བྱིན་བརླབ་དང་སྔགས་མཆོད་སྔོན་དུ་འགྲོ་བས།] དམ་ཅན་རྒྱ་མཚོའི་ཚོགས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །[སོགས་ཀྱིས་གཏོར་མ་གཙང་སར་ཕུལ་ནའང་རུང་ངོ་། །གཏང་རག་གི་དོན་དུ།] ཨོཾ་ཤྲཱི་བཛྲ་དྷརྨ་པཱ་ལ་ས་པ་རི་ཝཱ་ར་ཨརྒྷཾ་[ནས།] ཤཔྡའི་[བར་དང་།] ཧེ་རུ་ཀ་དཔལ་སྤྱན་སྔ་རུ། །དམ་བཅས་ཇི་བཞིན་ད་ལྟ་འདིར། །བསྟན་པ་བསྲུང་ཞིང་སྐྱོང་མཛད་པའི། །དམ་ཅན་ཀུན་ལ་བསྟོད་པར་བགྱི། །[ཞེས་མཆོད་ཅིང་བསྟོད།] མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །[ཞེས་དང་ཡིག་བརྒྱས་ནོངས་པ་བཤགས།] རྟེན་ཡོད་ན། འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་

ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། །[ཞེས་པས་དམ་ཡེ་གཉིས་ཀ་བསྟིམ། མེད་ན།] ཨོཾ། ཁྱེད་ཀྱི་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ[ས་ཡེ་ཤེས་པ་གཤེགས། དམ་ཚིག་པ་བདག་ལ་བསྟིམ། འཇིག་རྟེན་པ་རྣམས།] གཙྪ་གཙྪ་སྭབྷཱ་ཝ་ནཱཾ་[གྱིས་རང་གནས་སུ་བཏང་།] དགེ་བ་འདི་ཡིས་མྱུར་དུ་བདག །ཧེ་རུ་ཀ་དཔལ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །[ཅེས་དགེ་བ་བསྔོ།] རབ་འབྱམས་དཀྱིལ་འཁོར་རྒྱ་མཚོའི་འཁོར་ལོའི་མགོན། །གསང་གསུམ་འགྱུར་མེད་བདེ་ཆེན་རྡོ་རྗེ་སེམས། །འགྲོ་ལ་ཕན་བདེའི་མཆོག་སྩོལ་དཔག་བསམ་ཤིང་། །རྩ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །ཆོས་སྐུའི་མཁའ་ལ་གྲངས་མེད་གཟུགས་སྐུའི་སྤྲིན། །ཞི་ཁྲོ་ཉམས་བརྒྱའི་རོལ་པར་འཆར་བ་ལས། །དངོས་གྲུབ་འདོད་རྒུའི་ཆར་དུ་བསྙིལ་མཛད་པའི། །ཡི་དམ་ལྷ་ཚོགས་རྣམས་ཀྱི་བཀྲ་ཤིས་ཤོག །ཧེ་རུ་ཀ་དཔལ་སྙིང་རྗེའི་རོལ་གར་ནི། །གཏུམ་ཆེན་བཟོད་པར་དཀའ་བའི་གཟི་བརྗིད་ཀྱིས། །ནག་པོའི་རྩ་ལག་སྡེར་བཅས་མཐར་མཛད་པའི། །དཔལ་

འབར་མ་ཧཱ་ཀཱ་ལའི་བཀྲ་ཤིས་ཤོག །རྒྱལ་བའི་བཀའ་སྡོད་མི་བཟད་དྲག་ཤུལ་ཅན། །བདུད་དཔུང་ཚར་གཅོད་སྒྲུབ་མཆོག་བུ་བཞིན་སྐྱོང་། །ཕྲིན་ལས་རྣམ་བཞིས་བསྟན་པ་བསྲུང་མཛད་པའི། །དམ་ཅན་རྒྱ་མཚོའི་ཚོགས་ཀྱི་བཀྲ་ཤིས་ཤོག །[ཅེས་སོགས་བཀྲ་ཤིས་བརྗོད་པར་བྱའོ། །དམ་ཅན་སྤྱིའི་གཏོར་མའི་ཆོ་ག་ཉུང་ངུར་བསྡུས་པ་འདི་ནི་རྒྱུན་གྱི་ཉམས་ལེན་ལ་འཇུག་པ་བདེ་བའི་ཕྱིར་རིག་འཛིན་འགྱུར་མེད་རྡོ་རྗེས་ལྷ་ལྡན་གྲུ་འཛིན་གྱི་རི་བོར་སྦྱར་བའོ། །སླར་ཡང་རང་ལུགས་ཁ་སྐོང་དུ་འོས་པ་འགའ་ཞིག་བསྡེབས་ཏེ་ཅུང་ཟད་བསྣོན་འཕྲོ་བགྱི་བ་པོ་ནི་ཛྙཱ་ནའོ།། །།]

བླ་མ་ཡི་དམ་སྤྱིའི་གཏོར་འབུལ།

[བླ་མ་ཡི་དམ་སྤྱིའི་གཏོར་འབུལ་ནི།] རང་གི་ཐུགས་ཀའི་ས་བོན་ལས་བྱུང་བའི་འོད་ཟེར་གྱིས་ཕྱོགས་བཅུར་བཞུགས་པའི་བླ་མ་རིག་འཛིན་རྒྱལ་བ་རྒྱ་མཚོའི་དཀྱིལ་འཁོར་གྱི་ལྷ་ཚོགས་ཐམས་ཅད་མཁའ་ཁྱབ་ཀྱི་འཁོར་ལོར་སད་པར་[བསམ་ཞིང་།] ཧཱུཾ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ཨོཾ་ཨེ་ཧྱེ་ཧི་བྷ་ག་བཱ་ན་མ་ཧཱ་ཀཱ་རུ་ཎི་ཀཱ་དྲྀ་ཤྱ་ཧོཿ ས་མ་ཡ་ཧོཿས་མ་ཡ་སྟྭཾ། ཛཿཧཱུཾ་བཾ་ཧོཿ [ཞེས་པས་སྤྱན་དྲངས་ལ། མཆོད་པ་ནི།] ཧཱུཾ། བླ་མེད་མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཨོཾ་ཨཱཿཧཱུཾ་གུ་རུ་མཎྜ་ལ་དེ་བ་ག་ཎ་ས་པ་རི་ཝཱ་རེ་བྷྱཿ བཛྲ་ཨརྒྷཾ་པྲ་ཏཱིཙྪ་སྭཱ་ཧཱ་[ནས་]ཤཔྡའི་[བར་གྱིས་ཕྱི་མཆོད་དང་།] བཛྲ་པཉྩ་ཨ་མྲྀ་ཏ་ཁ་རཾ་ཁཱ་ཧི། མཧཱ་རཀྟ་ཁ་རཾ་ཁཱ་ཧི། [ཞེས་སྨ་རཀ་སྟོབ། རྡོ་རྗེའི་ཐལ་མོ་ཁ་གྱེན་དུ་ཕྱེས་ལ།] ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བར་[བསམ་ཞིང་། གོང་གི་སྔགས་མཐར།] ས་པ་རི་ཝཱ་ར་ཨི་དཾ་བ་ལིཾ་ཏ་གྲྀཧྞནྟུ་མ་མ་སརྦ་སིངྔྷི་མྨེ་པྲ་ཡཙྪ༔ [ཞེས་ལན་གསུམ་གྱིས་གཏོར་མ་ཕུལ།

བསྟོད་པ་ནི།] གང་གི་དྲིན་གྱིས་བདེ་ཆེན་ཉིད། སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །བཅོམ་ལྡན་ཁྲོ་བོའི་རྒྱལ་པོ་ནི། སངས་རྒྱས་ཀུན་གྱི་འཁོར་ལོས་བསྒྱུར། །གདུལ་དཀའ་མ་ལུས་འདུལ་བ་བོ། །ཁྲོ་བོའི་རྒྱལ་ལ་ཕྱག་འཚལ་ལོ། །ཧཱུཾ། མཐིང་ནག་མི་བཟད་སྲིན་པོའི་གཟུགས། །གར་གུའི་ཉམས་ལྡན་རྔམ་ཞིང་ཁྲོ། །གཏུམ་ཆེན་ཉི་མ་འབུམ་གྱི་གཟི། །རྡོ་རྗེའི་སྐུ་ལ་ཕྱག་འཚལ་བསྟོད། །རབ་འཇིགས་ཧ་ཧ་ཧཱུཾ་ཕཊ་ཀྱི། །རྔམ་པའི་ང་རོ་འབྲུག་སྟོང་ལྡིར། །རྡོ་རྗེའི་གད་མོས་ས་གསུམ་གཡོ། །ཁྲོ་རྒྱལ་གསུང་ལ་ཕྱག་འཚལ་བསྟོད། །མི་དམིགས་ཁྱབ་བརྡལ་ཟབ་གསལ་བ། །སྤྲོས་པ་ཀུན་བྲལ་ཡེ་ཤེས་ཆེ། །སྨྲ་བསམ་བརྗོད་མེད་རྡོ་རྗེའི་ཐུགས། །ཁྲོ་རྒྱལ་ཐུགས་ལ་ཕྱག་འཚལ་བསྟོད། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །[ཞེས་བསྟོད་ཅིང་།] མཆོད་སྦྱིན་གཏོར་མ་འདི་བཞེས་ལ། །[ཞེས་སོགས་ཀྱིས་འདོད་དོན་གསོལ་ལོ། །མངྒ་ལཾ། །]

ཕུར་སྲུང་དམ་ཅན་བཅུ་དྲུག་གི་གཏོར་མའི་ཆོ་ག་ཕྲིན་ལས་དགའ་སྟོན།

[ཕུར་སྲུང་དམ་ཅན་བཅུ་དྲུག་གི་གཏོར་མའི་ཆོ་ག་ཕྲིན་ལས་དགའ་སྟོན་ཅེས་བྱ་བ།] ན་མོ་ཤྲཱི་བཛྲ་ཀུ་མཱ་ར་ཡེ། [རྡོ་རྗེ་ཕུར་བུའི་བཀའ་སྲུང་མཐུ་ཆེན་དམ་ཅན་དྲུག་གི་གསོལ་མཆོད་བྱ་བར་འདོད་པས།] སྣོད་གཙང་མར། [དམར་བཤོས་འཁོར་བཅོ་ལྔ་མ་ཐེབ་ཀྱུས་བསྐོར་བ་ཤ་ཁྲག་སོགས་མཐུན་རྫས་སྣ་ཚོགས་པས་བརྒྱན་པ་བཤམས་ལ། བསང་སྦྱངས་བྱིན་གྱིས་བརླབས་ཏེ།] རང་ཉིད་དཔལ་ཆེན་པོའི་ཐུགས་ཀའི་ཧཱུྃ་ཡིག་ལས་བྱུང་བའི་འོད་ཟེར་གྱིས་ཕུར་སྲུང་དམ་ཅན་ལྕམ་དྲལ་འཁོར་བཅས་སོ་སོའི་གནས་ནས་སྤྱན་དྲངས་པར་[བསམ་ཞིང་། གསུར་ཆེན་གྱི་སྤོས་དང་རྐང་གླིང་སྤྱུགས་པས་དྲངས་པའི་རོལ་མོའི་སྒྲ་དང་བཅས་པས།] ཧཱུཾ། ཁྲག་འཐུང་དཔལ་ཆེན་ཀཱི་ལ་ཡའི། །བསྟན་པ་སྲུང་བའི་དམ་ཚིག་ཅན། །མ་མོ་བཅུ་གཉིས་གིང་ཆེན་བཞི། །རང་རང་སྤྲུལ་འཁོར་ཕོ་ཉར་བཅས། སྔོན་གྱི་ཐ་ཚིག་རྗེས་དགོངས་ལ། །མ་ཐོགས་མྱུར་དུ་གནས་འདིར་བྱོན། །ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷཱ་ཏ་ཡ་མ་མ་ཤཱི་གྷྲཾ་ཀརྨ་ཀ་ར་ཡེ་ས་པ་རི་ཝཱ་ར་བཛྲ་ས་མཱ་ཛཿཛཿཧཱུཾ་བཾ་ཧོཿ [ཞེས་སྤྱན་དྲངས།] ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷ་ཏ་ཡ་མ་མ་ཤཱི་གྷྲཾ་ཀརྨ་ཀ་ར་ཡེ་ས་པ་རི་ཝཱ་ར་ཨརྒྷཾ་[ནས།] ཤཔྡའི་[བར་གྱིས་ཉེར་སྤྱོད་དང་།] མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། [ཞེས་སྨན་རཀ་སྟོབ།] ཨོཾ་བཛྲ་ཀཱི་ལི་ཀཱི་ལ་ཡ་མོ་ཧ་གྷཱ་ཏ་ཡ་མ་མ་ཤྲཱི་གྷྲཾ་ཀརྨ་ཀ་ར་

ཡེ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། [ཞེས་ལན་གསུམ་མམ་བདུན་གྱིས་གཏོར་མ་ཕུལ་ལ།] ཕྲིན་ལས་མྱུར་མགྱོགས་ཀྱི་བདག་པོ་ཕུར་སྲུང་ལྕམ་དྲལ་འཁོར་དང་བཅས་པ་རྣམས་ཀྱིས་མཆོད་པ་དམ་པ་འདི་བཞེས་ལ་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། འཇིག་རྟེན་གྱི་རྒུད་པ་སེལ། སེམས་ཅན་གྱི་ཕན་བདེ་སྤེལ། རྣལ་འབྱོེར་པ་རྣམས་ཀྱི་སྡོང་གྲོགས་མཛོད། སྔགས་འཆང་རྣམས་ཀྱི་ཕྲིན་ལས་སྒྲུབས། སྡང་བའི་དགྲ་ཐུལ། གནོད་པའི་བགེགས་ཆོམས། ཁྱད་པར་དམ་ཚིག་འདིར་འདུས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་མྱུར་དུ་འགྲུབ་པའི་ཕྲིན་ལས་མཛོད་ཅིག །[ཅེས་འདོད་དོན་གསོལ། བསྟོད་པ་ནི།] ཧཱུཾ། སྔོན་ཚེ་སློབ་དཔོན་པདྨ་ཐོད་ཕྲེང་གི །སྤྱན་སྔར་ཕུར་པའི་སྲུང་མར་ཞལ་བཞེས་པ། །རྣལ་འབྱོར་བུ་བཞིན་སྐྱོང་བའི་དམ་ཚིག་ཅན། །ལྕམ་དྲལ་བཀའ་སྡོད་སྤྲུལ་པར་བཅས་ལ་བསྟོད། །ཤྭ་ན་མཐིང་ནག་སྤྱང་གདོང་ཐོད་དབྱུག་དང་། །ལྕགས་ཕུར་འདྲིལ་ཞིང་ལྕགས་

སྤྱང་མགོ་དགུ་ཞོན། །སྲི་ཀ་སེར་མོ་འཕར་གདོང་ལྕགས་ཀྱུ་དང་། །གསེར་ཕུར་འདྲིལ་ཞིང་གསེར་འབར་ལྕེ་བརྒྱད་ཞོན། །སྲི་ལ་དམར་མོ་ཝ་གདོང་རྡོ་རྗེ་དང་། །ཟངས་ཕུར་འདྲིལ་ཞིང་ཝ་མོ་རྐང་གསུམ་ཞོན། །ཀུ་ཀུ་ལྗང་མོ་ཁྱི་གདོང་ཞིང་ཆུང་དང་། །གཡུ་ཕུར་འདྲིལ་ཞིང་གཡུ་ཁྱི་རལ་ཅན་ཞོན། །ཤྭ་ན་མཆེད་བཞི་འདིར་སྤྱོན་གཏོར་མ་བཞེས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །རེ་ཏཱི་མཐིང་ནག་མེ་ལོང་ཁ་ཊྭཱཾ་འཛིན། །གཡང་གཞི་གསོལ་ཞིང་དྲེལ་རྟ་རྐང་གསུམ་ཞོན། །རེ་ཛ་སེར་ནག་རྨ་བྱའི་འཇའ་ཐུལ་གསོལ། །གསེར་ཟོར་གཡུ་སྒྲོམ་འཛིན་ཅིང་ཡུ་མོ་ཞོན། །རེ་ཛ་དམར་ནག་རེ་ལྡེའི་ལྭ་བ་གསོལ། །ལྕགས་ཀྱུ་ཐོད་ཁྲག་འཛིན་ཅིང་ཆུ་གླང་ཞོན། །རེ་ཛི་ལྗང་ནག་ཆུ་དར་ལྭ་བ་གསོལ། །ཁྲམ་ཤིང་གྲུ་གུ་འཛིན་ཅིང་རྔ་མོང་ཞོན། །བདག་ཉིད་མ་བཞི་འདིར་སྤྱོན་གཏོར་མ་བཞེས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཡ་བྱིན་མཐིང་ནག་དར་སྔོན་བེར་ཆེན་གསོལ། །ལྕགས་ཀྱུ་གདབ་ཕུར་འཛིན་ཅིང་གཡུ་འབྲུག་ཞོན། །དེ་བྱིན་སེར་མོ་དར་ནག་བེར་ཆེན་

གསོལ། །གསེར་ཞགས་བྱི་ཐུར་འཛིན་ཅིང་ཆུ་སྲིན་ཞོན། །བསྭེ་བྱིན་དམར་ནག་དར་དམར་འཇོལ་བེར་གསོལ། །ལྕགས་སྒྲོག་མཆོག་ཕུར་འཛིན་ཅིང་གློག་ཞགས་ཞོན། །ཕག་བྱིན་ལྗང་ནག་དར་སྔོན་བེར་ཆེན་གསོལ། །དྲིལ་བུ་ཕུར་པ་འཛིན་ཅིང་ཆུ་རྟ་ཞོན། །ས་བདག་མཆེད་བཞི་འདིར་སྤྱན་གཏོར་མ་བཞེས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །དུང་གིང་དཀར་པོ་སྤྱང་དཀར་སློག་པ་གསོལ། །ཤེལ་གྲི་ཤེལ་ཕུར་འཛིན་ཅིང་སེང་གེ་ཞོན། །ལྕགས་གིང་སྔོ་ནག་དར་ནག་བེར་ཆེན་གསོལ། །རལ་གྲི་ལྕགས་ཕུར་འཛིན་ཅིང་ལྕགས་སྤྱང་བཞིན། །བསྭེ་གིང་དམར་ནག་དབང་གི་བསྭེ་ཁྲབ་གསོལ། །ཟངས་གྲི་ཟངས་ཕུར་འཛིན་ཅིང་མེ་རྟ་ཞོན། །ཏ་ཀི་ནག་པོ་མེ་དབལ་ལྕགས་ཁྲབ་གསོལ། །གྲི་གུག་ཐོད་ཁྲག་འཛིན་ཅིང་ལྕེ་སྤྱང་ཞོན། །གིང་ཆེན་སྡེ་བཞི་འདིར་སྤྱོན་གཏོར་མ་བཞེས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །དམ་ཅན་བཅུ་དྲུག་ཕོ་ཉ་ཡང་འཁོར་བཅས། །འདོད་ཡོན་རྒྱ་མཚོའི་ལོངས་སྤྱོད་འདི་གསོལ་ལ། །སྔོན་གྱི་ཐུགས་དམ་ཞལ་བཞེས་མ་གཡེལ་བར། །རྡོ་རྗེ་ཕུར་པའི་བསྟན་དང་བསྟན་འཛིན་སྐྱོང་། །རྣལ་འབྱོར་བདག་ཅག་འཁོར་དང་

བཅས་པ་ཡི། །འགལ་རྐྱེན་ཀུན་སེལ་མཐུན་རྐྱེན་མ་ལུས་སྒྲུབས། །གདུག་ཅན་དགྲ་བགེགས་ཐལ་བའི་རྡུལ་དུ་རློག །ཇི་ལྟར་གསོལ་བའི་ཕྲིན་ལས་མྱུར་འགྲུབ་མཛོད། །[ཅེས་བསྟོད་ཅིང་ཕྲིན་ལས་བཅོལ། མགྲོན་རྣམས་རྟེན་ལ་བསྟིམས་པའམ་རང་གནས་སུ་གཤེགས། མཆོད་གཏོར་གཙང་སར་འབུལ་ལོ། །ཞེས་པའང་རྒྱུན་གྱི་གཏོར་ཆོག་འཇུག་པ་བདེ་བའི་དབང་དུ་བྱས་ཏེ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཛ་ཡནྟུ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་སྒྲུབ་ཆེན་གྱི་ཁོག་དབུབ་གྲུབ་གཉིས་འདོད་འཇོའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་སྒྲུབ་ཆེན་གྱི་ཁོག་དབུབ་གྲུབ་གཉིས་འདོད་འཇོའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་སྒྲུབ་ཆེན་གྱི་ཁོག་དབུབ་གྲུབ་གཉིས་འདོད་འཇོའི་དགའ་སྟོན་ཅེས་བྱ་བ། བླ་མ་དང་གཉིས་སུ་མེད་པའི་བཅོམ་ལྡན་འདས་ཁྲོ་བོའི་རྒྱལ་པོ་ལ་ཕྱག་འཚལ་ལོ། །ཆོས་ཉིད་རང་བཞིན་འགྱུར་བ་མེད་ལས་རྣམ་འགྱུར་ཅིར་ཡང་འཆར་བའི་ཚུལ། །སྙིང་རྗེའི་ཡེ་ཤེས་རྟག་ཏུ་ཞི་ཡང་གདུལ་དཀའི་འགྲོ་ལ་ཁྲོ་བོར་སྣང་། །སངས་རྒྱས་ཀུན་གྱི་ཕྲིན་ལས་ཕྱག་རྒྱ་འབར་བའི་སྒྱུ་འཕྲུལ་ཧེ་རུ་ཀ །བདུད་འདུལ་ལྷག་པའི་ལྷ་མཆོག་དེ་ཡིས་དངོས་གྲུབ་ཆར་དུ་བསྙིལ་བར་མཛོད། །དཔའ་བོ་གང་གི་དཀྱིལ་འཁོར་འཁོར་

ལོ་ཆེ། །ཚོམ་བུ་ཚོགས་སུ་སྒྲུབ་ཅིང་བསྙེན་པ་ལས། །གྲུབ་གཉིས་འདོད་རྒུ་འབད་མེད་ཡིད་བཞིན་དུ། །འཇོ་བའི་མན་ངག་གཏེར་གྱི་དགའ་སྟོན་སྤྲོ། །[དེ་ཡང་དཔལ་ཧེ་རུ་ཀའི་སྐུ་གསུང་ཐུགས་རྡོ་རྗེའི་ཡེ་ཤེས་ཀྱི་དངོས་གྲུབ་སྒྲུབ་ཅིང་བདུད་ཀྱི་གཡུལ་ལས་རབ་ཏུ་རྒྱལ་བར་བྱེད་པའི་སྒྲུབ་པ་ཆེན་པོའི་ལས་ཀྱི་རིམ་པ་ལ་སྤྱི་དོན་རྣམ་པ་གསུམ་སྟེ། གང་ཞིག་སྒྲུབ་པར་བྱ་བའི་གཞི། གང་གིས་སྒྲུབ་པར་བྱེད་པའི་ཐབས། དེ་ཉིད་མངོན་པར་གྲུབ་པའི་འབྲས་བུའོ། །][དང་པོ་ནི། འཁོར་འདས་ཐམས་ཅད་ཀྱི་ཁྱབ་བདག་ཆེན་པོར་གདད་མ་ཉིད་ནས་རང་བྱུང་དུ་བཞུགས་པའི་དཔལ་ཆེན་པོ་འབར་བའི་ཡེ་ཤེས་ཡོན་ཏན་མ་བཙལ་ལྷུན་གྱིས་གྲུབ་ཅིང་གློ་བུར་དྲི་མའི་ཚོགས་ཀྱིས་ལྡན་ལ་མ་གོས་པར་

བཞུགས་པ་ཉིད་དོ། །][གཉིས་པ་ནི། སྤྱིར་ཕྲིན་ལས་ཕུར་པ་རོལ་པའི་ལམ་རིམ་མཐའ་དག་ཐལ་འབྱིན་རྣམ་པ་རྣམ་པ་བཞིའི་སྒོ་ནས་བསྒྲུབ་པ་སྟེ། ཁྱབ་བརྡལ་ཡེ་ཤེས་ཀྱི་ཕུར་པ་ཆོས་ཀྱི་དབྱིངས་སུ་བཏབ་ནས་དོན་དམ་ཡེ་ཤེས་ཆེན་པོའི་ཁྲོ་བོ་བསྒྲུབ། ཚད་མེད་སྙིང་རྗེའི་ཕུར་པ་འགྲོ་དྲུག་སེམས་ཅན་ལ་བཏབ་ནས་ཕུང་ཁམས་རྡོ་རྗེའི་འཁོར་ལོར་བསྒྲུབ། བྱང་ཆུབ་སེམས་ཀྱི་ཕུར་པ་ཡུམ་གྱི་མཁའ་ལ་བཏབ་ནས་སྲས་མཆོག་སྤྲུལ་པའི་དཀྱིལ་འཁོར་བསྒྲུབ། མཚན་མ་རྫས་ཀྱི་ཕུར་པ་བརྣག་པའི་དགྲ་བགེགས་ལ་བཏབ་ནས་སྲིད་པ་རྡོ་རྗེ་ཕུར་བུར་བསྒྲུབ་པ་ཡིན་ལ། བྱེ་བྲག་སྒྲུབ་ལུགས་ལག་ལེན་གྱི་ཆིངས་སུ་སྔ་མ་གཉིས་སྲོག་ཏུ་བཞག་ནས་ཕྱི་མ་གཙོར་བཏོན་གྱི་དབང་དུ་བྱས་ཏེ་སྟོད་སྨད་ཀྱི་ལས་གཉིས་སུ་ཕྱེ་བ་ལས། འདིར་སྟོད་ལས་ལ་བརྟེན་ནས་བྱང་ཆུབ་སྒྲུབ་པའི་ལས་རིམ་ཉིད་འཆད་པར་བྱ་བ་ཡིན་ཅིང་། དེ་ལའང་ཕྱི་སྤྲོས་མེད་ཏིང་ངེ་འཛིན་སེམས་ཀྱི་སྒྲུབ་པ་དང་གསུམ་གྱི། འདིར་ཚོམ་བུ་ཚོགས་སྒྲུབ་ཆེན་མོའི་པྲ་ཁྲིད་ལག་ལེན་དུ་བསྡེབས་པ་ལ་གཉིས་ཏེ། སྒྲུབ་པའི་གཞི་བཟུང་བ་དང་། སྒྲུབ་པ་དངོས་ལ་འཇུག་པའོ།] [དང་པོ་ནི། ཀཱི་ལ་ཡ་མེ་ལྕེ་གསང་བའི་རྒྱུད་ལས། གནས་དང་བདག་ཉིད་འཁོར་རྫས་དུས། །ཕུན་སུམ་ཚོགས་པ་ལྔར་ལྡན་ན། །ལས་རྣམས་གང་འདོད་འགྲུབ་པར་འགྱུར། །ཞེས་གསུངས་པས་གང་དུ་སྒྲུབ་པའི་གནས་བཀྲ་ཤིས་དགེ་མཚན་ཚང་བ། གང་གིས་སྒྲུབ་པའི་སློབ་དཔོན་བདག་ཉིད་ཡོན་ཏན་དང་

ལྡན་པ། གང་དང་ལྷན་ཅིག་སྒྲུབ་པའི་ཚོམ་བུར་འབྲེལ་བའི་འཁོར་དམ་ཚིག་གཙང་བ། གང་ལ་བརྟེན་ནས་སྒྲུབ་པའི་ཡོ་བྱད་ཀྱི་རྫས་ཐམས་ཅད་ཚོགས་པ། གང་གི་ཚེ་སྒྲུབ་པའི་དུས་ཡར་ངོ་གཟའ་སྐར་འཕྲོད་སྦྱོར་བཟང་ཞིང་ཁྱད་པར་མགོ་ཕུར་འཛོམ་པའི་དུས་དགེ་བ་རྣམས་ལ་སྟེ། དེ་ལྟར་ཕུན་སུམ་ཚོགས་པ་ལྔས་ལས་ཀྱི་བཟུང་བར་བྱའོ། །][གཉིས་པ་སྒྲུབ་པའི་རིམ་པ་དངོས་ལ་གསུམ། སྦྱོར་བ་སྔོན་འགྲོའི་ལས་རིམ་གྱིས་ཁོག་དབུབ་པ། དངོས་གཞི་བསྙེན་སྒྲུབ་ཕྲིན་ལས་ཀྱི་བསྲང་བ། རྗེས་མཐའ་རྒྱས་ཀྱི་བྱ་བས་མཇུག་བསྡུ་བའོ། །དང་པོ་ལ་བཞི། སའི་ཆོ་ག །ལྷག་པར་གནས་པ། རྟེན་གྱི་དཀྱིལ་འཁོར་བཅའ་བ། ཕྲིན་ལས་ལ་འཇུག་པའི་ཡན་ལག་གོ །དང་པོ་ལའང་ལྔ། ས་བརྟག་པ། བསླང་བ། སྦྱོང་བ། བཟུང་བ། བསྲུང་བའོ། །དང་པོ་ནི། ལྟོ་འཕྱེ་དང་རྟེན་འབྲེལ་བརྟག་པ་སོགས་ཏེ་སྒྲུབ་གནས་རྙིང་པ་ལ་མི་དགོས་པའི་ཕྱིར་འདིར་མི་སྨོས་ལ། ཤེས་པར་འདོད་ན་གཞུང་གཞན་དུ་བལྟའོ། །གཉིས་པ་ལ་གཉིས་ལས། དང་པོ་སྣང་བ་མི་ལས་བསླང་བ་ནི། རྒྱལ་པོ་ལ་སོགས་པས་ཡུལ་དེ་བདག་ཏུ་བཟུང་བ་ཡོད་ན་དགོས་པ་རིན་དང་བདེན་པའི་གཏམ་གྱིས་བཀྲོལ་ཏེ་གནང་བ་ཞུ་ཞིང་སླད་མར་བར་ཆད་མི་འབྱུང་བར་བྱའོ། །གཉིས་པ་མི་སྣང་བ་ལས་བསླང་བ་ནི། གང་དུ་བྱ་བའི་གཞི་དེར་དྲིའི་མཎྜལ་མེ་ཏོག་གི་ཚོམ་བུ་ཅན་གྱི་མཐར་མཆོད་པ་དང་ས་བདག་སྤྱི་སྒོས་ཀྱི་གཏོར་མ་བཤམ། གཞན་ཡང་འོག་ཏུ་དགོས་པའི་ཡོ་བྱད་རྣམས་ཉེ་བར་བསྡོགས་ཏེ། བདག་གི་རྣལ་འབྱོར་སྔོན་དུ་འགྲོ་བས། ལས་བུམ་མམ་དྲིའི་

དུང་ཞལ་]རཾ་ཡཾ་ཁཾ་གིས་བསང་སྦྱང་། བསང་ཆུའི་སྟེང་དུ་པདྨ་ཉི་མའི་སྟེང་། །བདུད་རྩི་ལྗང་ནག་ཞལ་གསུམ་ཕྱག་དྲུག་པ། །གཡས་ཞལ་སེར་ནག་གཡོན་ཞལ་དུད་ཁ་འབར། །དང་པོའི་ཕྱག་གཉིས་རྡོ་རྗེས་དུང་ཁྲག་དཀྲུག །བར་པའི་ཕྱག་ན་རྒྱ་གྲམ་དབྱུག་ཏོ་བསྣམས། །ཐ་མ་གཉིས་ཀྱིས་གནམ་ལྕགས་ཕུར་བུ་འདྲིལ། །ཞབས་བཞི་འདོར་སྟབས་གནོད་སྦྱིན་ཕོ་མོ་མནོན། །ཡུམ་མཆོག་རླུང་འབྱིན་ལྗང་མོས་གཡོན་ནས་འཁྲིལ། །ཕྱག་གཡས་དྲིལ་འཛིན་གཡོན་པས་ཐོད་ཁྲག་སྟོབ། །དུར་ཁྲོད་ཆས་ལྡན་མེ་དཔུང་ཀློང་དུ་གསལ། །[ཞེས་གསལ་བཏབ་ལ།] ཨོཾ་བཛྲ་ཀྲོ་ངྷ་ཨ་མྲྀ་ཏ་ཀུཎྜ་ལཱི་ཧཱུྃ་ཚིནྡྷ་ཚིནྡྷ་ཧཱུྃ་ཕཊ༔ [ཅེས་ཅི་རིགས་བཟླས་མཐར།] ཁྲོ་བོ་བདུད་རྩི་འཁྱིལ་བའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ། མཆོད་གཏོར་རྣམས་ཨ་མྲྀ་ཏས་བསང་། སྭབྷཱ་ཝས་སྦྱང་། ཐམས་ཅད་སྟོང་ཉིད་ནམ་མཁའི་ངང་༔ བྷཱུཾ་ལས་རིན་ཆེན་སྣོད་ནང་དུ༔ ཨོཾ་ལས་ཕྱི་ནང་མཆོད་པའི་ཚོགས༔ སོ་སོའི་ལྷ་མོའི་རོལ་པར་བཅས༔ རབ་འབྱམས་ནམ་མཁའ་གང་བར་གྱུར༔ ཨོཾ་བཛྲ་པུཥྤེ་དྷཱུ་པེ་ཨཱ་ལོ་ཀེ་གནྔྷེ་ནཻ་དྱ་ཤཔྡ་པཱུ་ཛ་ས་མ་ཡ་ཧཱུྃ༔ [ཞེས་དང་།] གཏོར་གཞོང་རཏྣའི་གཞལ་ཡས་སུ༔ གཏོར་མ་འདོད་ཡོན་ཕུང་པོར་སྤུངས༔ ཨོཾ་ཨཱཿཧཱུཾ༔ [ཞེས་ལན་གསུམ་གྱིས་བྱིན་བརླབ། ལག་གཡས་

རྡོ་རྗེ་དང་བཅས་ས་ལ་རྡེག་པའི་ཚུལ་བྱ་ཞིང་།] ཧ་ཧ་ཧཱུྃ་ཧཱུྃ་ཧེ་ཧེ༔ རྡོ་རྗེའི་གད་མོས་ལྷ་མོའི་རྒྱུད་བསྐུལ་བས་ས་དེ་བརྡོལ་བ་ལས་ལྷ་མོ་བརྟན་མ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ། རིན་པོ་ཆེའི་བུམ་པ་བསྣམས་པ། ཞི་ཞིང་འཛུམ་པའི་ཉམས་ཅན། དར་གྱི་སྟོད་གཡོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ལྟེ་བ་ཡན་ཆད་ས་སྟེང་དུ་འཐོན་པར་བལྟས་ལ། ཨོཾ་པྲི་ཐི་ཝཱི་དེ་ཝི་ས་པ་རི་ཝཱ་རི་ཝཱ་ར་ཨ་རྒྷཾ་པྲ་ཏཱིཙྪ་སྭཱཧཱ། [སོགས་ནས་]ཤཔྡའི་[བར་གྱིས་མཆོད།] ཨོཾ་ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཨཱདྱ་ནུ་ཏྤནྟ་ཏོཏྟེ་ཨོཾ་ཨཱཿཧཱུྃ་ཕཊ་སྭཱཧཱ། [ཞེས་ལན་གསུམ་གྱིས་གཏོར་མ་ཕུལ་ལས་གནོན་གྱི་རྒྱས།] སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དུ། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དབང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་ཀྱང་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་གསོལ་བ་བཏབ་པས་རིག་པ་འཛིན་པ་ཁྱོད་ཅི་དགའ་བར་སྤྱོད་ཅིག་ཅེས་གནང་བ་བྱིན་ནས་ས་དེ་ཉིད་དུ་ཐིམ་པར་བསམ། [དེ་ནས་བྱེ་བྲག་གིས་སའི་བདག་པོ་རྣམས།] བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿས་སྤྱན་དྲངས། སྠཱ་ན་པ་ཏི་ཀྵེ་ཏྲ་པཱ་ལཉྩ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་

མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། [ཞེས་ལན་གསུམ་གྱིས་གཏོར་མ་ཕུལ་ནས།] གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདི། །བདག་ཞུ་ཁྱེད་ཀྱིས་བསྩལ་དུ་གསོལ། །བྷཱུ་མི་པ་ཏིས་པ་རི་ཝཱ་ར་སརྦ་བྷཱུ་ཏ་གཙྪ། གནང་བ་བྱིན་ནས་རང་གནས་སུ་གཤེགས་པར་[བསམ་ལ། ཚོམ་བུ་དང་མཆོད་པ་རྣམས་བསྡུ། ས་གཞི་བརྟན་ཅིང་བཀྲ་ཤིས་པའི་རྟེན་འབྲེལ་དུ་རིན་པོ་ཆེ་དང་འབྲུ་སྨན་སྙིང་པོ་ལྔ་སོགས་ཀྱིས་བཀང་བའི་གཏེར་གྱི་བུམ་པ་ཐོགས་ཏེ།] ཏྲཾ་ལས་རིན་པོ་ཆེའི་མཆོད་སྡོང་དགོས་འདོད་ཐམས་ཅད་འབྱུང་བར་[བསམ་ཞིང་།] ཨོཾ་ཨཱཿཧཱུཾ་[ལན་བདུན་གྱིས་བརླབས་ལ།] ས་ཡི་ལྷ་མོ་འཁོར་དང་བཅས༔ སྔོན་གྱི་རྒྱལ་བ་རྣམས་ཀྱིས་བསྔགས༔ བྱང་ཆུབ་སེམས་ཀྱི་གཏེར་བུམ་འདི༔ དཀྱིལ་འཁོར་བྲི་ཕྱིར་གཏེར་དུ་འབུལ༔ [ཞེས་སྟེགས་བུའི་དབུས་སུ་གཞུག་ཅིང་ཤིས་པ་བརྗོད་དོ། །][གསུམ་པ་ས་སྦྱོང་བ་ནི། སྨན་སྣ་དང་བ་བྱུང་ལྔ་སྦྱར་བའི་དྲིའི་ཆུས་དཀྱིལ་འཁོར་གྱི་གཞིར་དབང་ལྡན་ནས་བརྩམས་ཏེ་བྱུགས་ཤིང་།] ཨོཾ་བྷཱུ་ཁཾཿ ས་གཞི་ནམ་མཁར་[བསམ།] ཧཱུྃ་ལཾ་ཧཱུྃ། རྡོ་རྗེའི་ས་གཞིར་བསྐྱེད། ཨོཾ་མེ་དི་ནཱི་བཛྲི་བྷ་ཝ་བཛྲ་བྷནྡྷ་ཧཱུྃ། རྡོ་རྗེའི་རང་བཞིན་དུ་བཅིངས་ཏེ་བྱིན་གྱིས་བརླབས་པར་གྱུར། ས་ལ་སོགས་པ་སྣ་ཚོགས་པའི་ཆོས་ཐམས་

ཅད་སྟོང་པ་ཉིད་དུ་རོ་གཅིག་པར་[མོས་པར་བྱའོ། །][བཞི་པ་ས་བཟུང་བ་ནི། སློབ་དཔོན་སྟེགས་བུའི་དབུས་སུ་གནས་པས་རྡོ་རྗེའི་འགྲོས་ཀྱིས་དཔྱིད་གསུམ་ལྷོ། དབྱར་གསུམ་ནུབ། སྟོན་གསུམ་བྱང་། དགུན་གསུམ་ཤར་དུ་ཕྱོགས་ཏེ།] ཧ་ཧ་ཧཱུྃ་ཧཱུྃ་ཧྲཱིཿཧྲཱིཿཕེཾ་ཕེཾ། [ཞེས་པའི་གད་མོ་ཆེར་བསྒྲག] རང་ཉིད་དཔལ་ཆེན་པོར་གལ་བའི་མིག་གཉིས་མ་དང་ཊ་ལས་ཉི་མ་དང་ཟླ་བ་མིག་འབྲས་ཧཱུྃ་ལས་བསྐལ་པའི་མེར་འབར་བ་ཁྲོས་པའི་སྡང་མིག་བལྟས་པ་ཙམ་གྱིས་བགེགས་ཐམས་ཅད་ཐལ་བར་བརླག་པར་བསམ་ལ། རྡོ་རྗེའི་ཁྲོ་བོའི་ལྟ་སྟངས་ཀྱིས་ཕྱོགས་ཀུན་ཏུ་བལྟ་ཞིང་། ཀཱི་ལ་ཡ་བརྗོད་པས་[ཆེ་བའི་ང་རྒྱལ་བསྐྱེད་དེ་རྐང་མཐིལ་ཧཱུྃ་ལས་འབར་བའི་རྡོ་རྗེར་བྱསནས། སྒེག་པ་དང་བཅས་པས་རྡོ་རྗེ་གསོར། དྲིལ་བུ་འཁྲོལ་ཞིང་རྡོ་རྗེའི་གོམ་པས་གཡས་སུ་བསྐོར་ནས་དབང་ལྡན་དུ་སོང་སྟེ། ལས་བྱང་བཞིན་བགེགས་ལ་གཏོར་མ་བྱིན་ནས་བཀའ་བསྒོ་ཞིང་དྲག་པོའི་ཚམ་རྔམས་དང་བཅས་པས་བསྐྲད།] ཁྲོ་བོ་དུ་མ་སྤྲོས་པས་བགེགས་བཅོམ། དཀྱིལ་འཁོར་གྱི་གཞི་ཧཱུྃ་ལས་རྡོ་རྗེའི་རང་བཞིན་དུ་གྱུར་པར་[བསམ། གཞན་ཡང་སྤྲོས་པ་ལ་དགའ་བས་ཆས་སུ་ཞུགས་ཏེ་ཁྲོ་བོའི་ཉམས་དང་ལྡན་པས་ཧཱུྃ་གི་སྒྲ་དྲག་པོར་བརྗོད་ཅིང་ཁྲོ་བོ་བཅུའི་རྣམ་འགྱུར་སོགས་འབར་བའི་སྟངས་སྟབས་ཇི་ལྟར་རིགས་པས་ཀྱང་གཅག་ཅིང་གཟུང་བར་བྱའོ། །][ལྔ་པ་ས་བསྲུང་བ་ནི། སློབ་དཔོན་གྱིས་དབང་མཆོག་གི་ཕུར་བུ་བཟུང་ལ།] ཕུར་བུ་སྐད་ཅིག་གིས་

བཛྲ་ཀཱི་ལ་ཡ་སྟོད་ཞལ་གསུམ་ཕྱག་དྲུག་ཕུར་བུ་འདྲིལ་བ། སྨད་ལྕགས་ཕུར་མེའི་ཚྭ་ཚྭ་འཕྲོ་བར་གྱུར་པར་[བསམ་ལ། ཕུར་བུ་བསྒྲིལ་ཞིང་།] ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚན་བཛྲ་ངྷ་རོད་ཨཱ་ཛྙཱ་པ་ཡ་ཏི་སརྦ་བིགྷྣཱན་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཕཊ་ཕཊ༔ [ཅེས་ལན་གསུམ་གྱིས་སྟེགས་བུའི་དབུས་སུ་གདབ་པས།] ཕུར་བུ་ལས་འཕྲོས་པའི་ཁྲོ་ཆུང་དང་མེའི་འོད་ཀྱིས་ས་གཞི་ཁེངས་པར་[བསམ་མོ། དེ་དག་ནི་སའི་ཆོ་གའོ། །སྐབས་འདིར་རྒྱབ་རིམ་གྱི་དཔུང་དུ་སྤྱི་བཤགས་བྱ་སྟེ། སཱཙྪ་གདབ། སྲོག་བསླུ། ཉེའུ་འདོན། བཤགས་སྐོང་། སྦྱིན་སྲེག །མགྲོན་བཞི་ལ་མཆོད་སྦྱིན་ཅི་འབྱོར་དང་། གཟུངས་མདོ་སྒྲོག །ཁྱད་པར་སྒྲུབ་ཁང་གི་ཤར་དུ་ཆོས་ཉིད་ཀྱི་དོན་རྟོགས་ཕྱིར་ཤེར་ཕྱིན། ལྷོར་བདུད་འཇོམས་ཕྱིར་སྟོབས་པོ་ཆེ། ནུབ་ཏུ་རྒྱུ་འབྲས་གོ་ཕྱིར་ལང་གཤེགས། བྱང་དུ་བར་ཆད་ཞི་ཕྱིར་ཏོག་གཟུངས་རྣམས་བཀླག་པ་སོགས་དགེ་བའི་དཔུང་བསྐྱེད་པའི་ཕྱིར་རང་ངམ་གཞན་གྱིས་ཀྱང་ཅི་འགྲུབ་ཏུ་བྱའོ། །][གཉིས་པ་ལྷག་པར་གནས་པའི་རིམ་པ་ནི། ལྷ་དང་བུམ་པ་སློབ་མ་རྣམས་སྟ་གོན་དུ་བསྒྲུབ་པ་སྟེ། སྒྲུབ་ཆེན་དབང་བསྐུར་དང་འབྲེལ་བའི་སློབ་མ་རྗེས་སུ་བཟུང་བ་གཙོ་བོར་བྱེད་པའི་ཚེ་སྨིན་བྱེད་ཀྱི་ཆོ་གའི་སྐབས་བཞིན་ལག་ཏུ་བླང་བར་བྱ་ཞིང་། མོས་སློབ་སྒྲུབ་ཆེན་འདྲ་འབག་སྤྱི་ཙམ་ལ་ནི་དེ་དག་ངེས་པར་དགོས་པ་མ་ཡིན་པས་སྒྲུབ་གཞུང་ཆེན་པོ་གཞན་དག་ལས་ཀྱང་མི་འབྱུང་བ་བཞིན་འདིར་ཡང་མ་སྨོས་སོ། །][གསུམ་

པ་རྟེན་གྱི་དཀྱིལ་འཁོར་བཅའ་བ་ལ་བདུན། མཚམས་བཅད་པ། མ་ཏྲཾ་བསྒྲལ་བ། ཆག་ཆག་གདབ་པ། ཐིག་གདབ་པ། ཐིག་གདབ་པ། ཚོན་དགྱེ་བ། ཕུར་བུ་དགོད་པ། རྒྱན་རྫས་དགྲམ་པའོ། །དང་པོ་ལ་གསུམ་གྱི། ཐོག་མར་ཕྱི་མཚམས་བཅད་པ་ནི། སྒྲུབ་ཁང་གི་ཕྱིའི་ཕྱོགས་བཞིར་ཐོ་བཞི་བརྩིགས་ལ་རྒྱལ་ཆེན་བཞིའི་སྐུ་རྟེན་རབ་གནས་ཅན་གཟུག །དེ་དག་གི་མདུན་དུ་མཆོད་པ་ཆུ་གཉིས་ཉེར་སྤྱོད་ལྔ་དང་གཏོར་མ་རེ་བཤམས་ལ། སྒྲུབ་པ་པོ་རྣམས་དཔལ་ཆེན་པོའི་སྙེམས་པ་དང་བཅས་པས་ཤར་དུ་སོང་སྟེ། མངོན་པར་བཤམས་པའི་མཆོད་གཏོར་རྣམས་བྱིན་གྱིས་བརླབས་ནས།] རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རི་རབ་ཀྱི་ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་དང་བཅས་པ་སྤྱན་དྲངས་པར་བསམ་ལ། ཧཱུྃ། གསང་བདག་སྤྱན་སྔར་དམ་མནོས་ཤིང་། །བསྟན་པ་སྲུང་བར་ཞལ་བཞེས་པ། །རྒྱལ་པོ་ཆེན་པོ་ཡུལ་འཁོར་སྲུང་། །འདིར་གཤེགས་རྟེན་ལ་བརྟན་པར་བཞུགས། །བཛྲ་ས་མཱ་ཛཿ[སྤྱན་དྲངས།] ཛ་ཧཱུཾ་བཾ་ཧོཿས་གཉིས་སུ་མེད་པར་བསྟིམ། ཨོཾ་མ་ཧཱ་རཱ་ཛ་ས་པ་རི་ཝཱ་ར་ཨརྒྷཾ་ནས། ཤཔྡའི་བར་གྱིས་མཆོད། རྩ་སྔགས་མཐར། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། [། ཞེས་ལན་གསུམ་གྱིས་གཏོར་མ་ཕུལ་ལ།] ཧཱུྃ། དྲི་ཟའི་མངའ་བདག་ཡུལ་འཁོར་སྲུང་། །ཞི་བའི་ལས་མཛད་སྐུ་མདོག་དཀར། །ལྷ་ཡི་ཐུགས་དམ་པི་ཝཾ་བསྣམས། །དེ་ལ་བསྟོད་དེ་ཕྱག་ཀྱང་འཚལ། །རྒྱལ་

པོ་ཆེན་པོ་འཁོར་བཅས་ཀྱིས། །སྔོན་གྱི་ཐ་ཚིག་ཇི་བཞིན་དུ། །མཆོད་སྦྱིན་གཏོར་མ་འདི་བཞེས་ལ། །སྒྲུབ་པའི་བར་ཆད་ཀུན་སྲུངས་ཤིག །[ཅེས་བསྟོད་ཅིང་ཕྲིན་ལས་བཅོལ།] ཨོཾ་དྷྲིཥྚ་རཥྚ་ཡ་སྭཱཧཱ། །ཏིཥྛ་བཛྲ། [ཞེས་བརྟན་བཞུགས་བྱ། དེ་བཞིན་དུ་ལྷོ་ལ་སོགས་པའི་ཕྱོགས་གཞན་གསུམ་དུ་རིམ་བཞིན་སོང་སྟེ། ཆོ་ག་གཞན་སྔ་མ་ལྟ་བུ་ལས་ཤར་ཕྱོགས་ཀྱི་མལ་དུ་ལྷོ་ནུབ་བྱང་རྣམས་དང་། ཡུལ་འཁོར་སྲུང་ཞེས་པའི་ཚབ་ཏུ།] འཕགས་སྐྱེས་པོ། མིག་མི་བཟང་། རྣམ་ཐོས་སྲས། [ཞེས་བསྒྱུར་བས་སྤྱན་འདྲེན་མཆོད་གཏོར་འབུལ་བ་རྣམས་ཤེས་པར་བྱས་ལ། བསྟོད་པའི་ཚེ།] ཧཱུྃ། གཤིན་རྗེའི་མངའ་བདག་འཕགས་སྐྱེས་པོ། །མངོན་སྤྱོད་ལས་མཛད་སྐུ་མདོག་སྔོ། །ཚར་གཅོད་བེ་ཅོན་རལ་གྲི་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ཨོཾ་བཻ་རུ་ཌྷ་ཀཱ་ལ་སྭཱཧཱ། ཧཱུྃ། ཀླུ་ཡི་མངའ་བདག་སྤྱན་མི་བཟང་། །དབང་གི་ལས་མཛད་སྐུ་མདོག་དམར། །ཚོགས་རྫོགས་མཆོད་རྟེན་སྦྲུལ་ཞགས་བསྣམས། དེ་ལ་བསྟོད་དེ་ཕྱག་ཀྱང་འཚལ། །ཨོཾ་བཻ་རཱུ་པཱ་ཀྵ་ཡ་སྭཱཧཱ། ཧཱུྃ། གནོད་སྦྱིན་མངའ་བདག་རྣམ་ཐོས་སྲས། །རྒྱས་པའི་ལས་མཛད་ལྗང་སེར་སྐུ། །གཏེར་འཆང་བེ་ཅོན་ནེའུ་ལེ་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ཨོཾ་བཻ་ཤྲ་མ་ཎ་ཡ་སྭཱཧཱ། [ཞེས་དང་། ཕྲིན་ལས་བཅོལ་བ་སོགས་

གོང་བཞིན་བྱ། ཁོར་ཡུག་ཐམས་ཅད་རྒྱལ་ཐབས་བཞིས་རྡོ་རྗེའི་གུར་ཕུབ་པར་བསམ་མོ། །][གཉིས་པ་ནང་མཚམས་བཅད་པ་ལ་གསུམ་གྱི། དང་པོ་དམ་སྲི་མནན་པ་ནི། དུག་ཤོག་ལ་དམ་སྲིའི་གཟུགས་རྟེན་ཚུལ་བཞིན་དུ་བྲིས་པ་སྒྲུབ་ཁང་གི་སྒོ་དྲུང་དོང་གྲུ་གསུམ་པར་བཀོད། སྡོང་གྲོགས་འཆོལ་བའི་ཕྱིར་གསེར་སྐྱེམས་ཀྱི་མཆོད་པ་སྔོན་དུ་འགྲོ་བས།] ཀཱི་ལ་ཡའི་[སྔགས་ཀྱིས་ང་རྒྱལ་བསྐྱེད་དེ།] ཨེ་ཡཾ་ཛྭ་ལ་རཾ། བྲུབ་ཁང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་ཕོ་མོ་རིད་ཅིང་ཉམ་ཐག་པའི་ལུས་ཅན་དུ་[གསལ་ལ། བདེན་སྟོབས་བརྗོད་པའི་སྔོན་དུ་འགྲོ་བས།] སྒྲུབ་པ་ཟབ་མོ་ལ་བར་དུ་གཅོད་པར་བྱེད་པའི་དམ་སྲི་འབྱུང་པོའི་རིགས་སུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག །ཏྲི་ཡཾ་ཛཿཏྲི་བཛྲ་ཨཾ་ཀུ་ཤ་ཛཿཛཿཧཱུྃ་བཾ་ཧོཿ[ཞེས་དགུག་གཞུག་བྱ། ལས་བྱང་བཞིན་བབ་བརྒྱད་སོགས་ཀྱིས་བསྐུལ་ནས། ཨོཾ་ལཾ་སོགས་བརྗོད་ལ་ཕུར་སྐོར་ཚམ་རྔམས་དང་བཅས་ཚེ་ཁྲུས་ཀྱི་དགོངས་པས་རྣམ་པར་ཤེས་པ་རྡོར་སེམས་ཡབ་ཡུམ་གྱི་སྲས་སུ་བསྐྲུན། རྣམ་སྨིན་བག་ཆགས་ཀྱི་ལུགས་རྟེན་དོང་ནང་དུ་སྤྱི་ཚོགས་སུ་མནན་ནས་རོ་གཡམ་ལ་སྣ་ཚོགས་རྡོ་རྗེ་དང་རི་རབ་གླིང་བཞི་བྲིས་པས་བཀབ་སྟེ།] ཧཱུྃ༔ གཅིག་ནི་བརྗོད་མེད་ཉག་གཅིག་རྒྱ༔ གཉིས་པ་ཐབས་དང་ཤེས་རབ་རྒྱ༔ གསུམ་ནི་སྐུ་གསུང་ཐུགས་ཀྱི་རྒྱུ༔ བཞི་ནི་ཕྱག་རྒྱ་བཞི་ཡི་རྒྱ༔ ལྔ་ནི་ཡེ་ཤེས་ལྔ་ཡི་རྒྱ༔

དྲུག་པ་ཕ་རོལ་ཕྱིན་དྲུག་རྒྱ༔ བདུན་པ་མ་མོ་བདུན་གྱི་རྒྱ༔ བརྒྱད་ནི་དུར་ཁྲོད་བརྒྱད་ཀྱི་རྒྱ༔ དགུ་ནི་ཧེ་རུ་ཀློང་དགུའི་རྒྱ༔ བཅུ་ནི་ཁྲོ་རྒྱལ་བཅུ་ཡི་རྒྱ༔ ཁྱོད་ལ་རྒྱ་བཅུ་བརྩེགས་ཏེ་མནན༔ རི་རབ་བརྗིད་པའི་འོག་ཏུ་མནན༔ དཔལ་གྱི་བྲོ་ར་བྱས་ཏེ་མནན༔ བསྐལ་པ་བྱེ་སྙེད་མཐའ་རུ་མནན༔ [ཞེས་རྒྱ་བཅུས་གདབ་ཅིང་ལས་བྱང་བཞིན་བྲོ་བརྡུང་ངོ་། །][གཉིས་པ་སྒོ་སྲུང་བ་ནི། བསེ་བྱང་གཉིས་ཀྱི་མདུན་ངོས་ལ་གཤིན་རྗེ་གཤེད་དང་བདུད་རྩི་འཁྱིལ་བའི་སྐུ་བྲི་ཞིང་རྒྱབ་ཏུ་སོ་སོའི་སྙིང་པོ་འདོད་དོན་གྱི་སྤེལ་ཚིག་ཅན་ཕུར་བུ་རེ་དང་བཅས་པའི་གཤིན་རྗེ་སྒོའི་ཕྱི་ངོས་དང་འཁྱིལ་བ་སྒོའི་ནང་ལོགས་ཀྱི་སྟེང་དུ་བཀོད། མདུན་དུ་མཆོད་པ་ལྔ་གཏོར་མ་དང་བཅས་པ་བཤམས་ཤིང་བྱིན་གྱིས་བརླབས་ཏེ། རྟེན་བསང་སྦྱང་།] སྟོང་པའི་ངང་ལས་པད་ཉི་དྲེགས་པའི་སྟེང་དུ་ཡ་ལས་གཤིན་རྗེ་ནག་པོ་ཐོད་དབྱུག་དང་ཞགས་པ་ཐོགས་པ། ཧཱུྃ་ལས་བདུད་རྩི་འཁྱིལ་བ་ལྗང་ནག་གར་གྲི་དང་རྒྱ་གྲམ་འཛིན་པ། གཉིས་ཀའང་སྲིན་པོ་ཁྲོས་པའི་ཉམས་ཅན་འབར་བའི་ཆས་ཀྱིས་བརྒྱན་ཏེ་མེའི་ཕུང་པོའི་དབུས་ན་གནས་པའོ། དེའི་སྤྱི་བོར་ཨོཾ༔ མགྲིན་པར་ཨཱཿསྙིང་གར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མ་ཛཿས་སྤྱན་དྲངས། ཛཿཧཱུྃ་བཾ་ཧོཿས། གཉིས་སུ་མེད་པར་བསྟིམ། པུཥྤེ་[སོགས་ཉེར་སྤྱོད་ལྔས་མཆོད་ཅིང་སྔགས་གཉིས་ཀྱི་མཐར་གཏོར་སྔགས་བཏགས་པ་གསུམ་

གྱིས་གཏོར་མ་ཕུལ་ལ།] ཧཱུྃ། བཅོམ་ལྡན་ཁྲོ་བོའི་རྒྱལ་པོ་ནི། །སངས་རྒྱས་ཀུན་གྱི་འཁོར་ལོས་བསྒྱུར། །གདུལ་དཀའ་མ་ལུས་འདུལ་བ་པོ། །ཁྲོ་བོའི་རྒྱལ་ལ་ཕྱག་འཚལ་བསྟོད། [། ཅེས་བསྟོད། བརྟན་པར་བྱ་བའི་ཕྱིར།] ཨོཾ་བཛྲ་ཀྲོ་ངྷ་ཏ་མཱནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ [ལན་བདུན་བཟླས་ནས།] ཁྲོ་བོ་གཤིན་རྗེའི་གཤེད་ཀྱིས་བསྒྲུབ་པའི་གནས་འདིར་ཕྱིའི་བར་ཆད་ནང་དུ་མི་གཏོང་བའི་ཕྲིན་ལས་མཛོད་ཅིག [ཅེས་དང་།] ཨོཾ་བཛྲ་ཀྲོ་ངྷ་ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ [བདུན་བཟླས་ནས།] ཁྲོ་བོ་བདུད་རྩི་འཁྱིལ་བས་ནང་གི་དངོས་གྲུབ་ཕྱིར་མི་གཏོང་བའི་ཕྲིན་ལས་མཛོད་ཅིག །[ཅེས་འདོད་དོན་གསོལ་ལོ། །][གསུམ་པ་ཁྲོ་བཅུའི་མཚམས་གཅོད་ནི། སེང་ལྡེང་ལ་སོགས་པའི་ཕུར་བུ་སོར་བཅུ་གཉིས་པ་ཙནྡན་དམར་པོས་བྱུག་པ་བཅུའི་མགུལ་དུ་ཁ་དོག་ལྔའི་སྲས་དབུས་དཀྲིས་ཤིང་རྩེ་མོར་མེ་ཏོག་དང་ཡུངས་དཀར་གྱི་ཐུམ་བུ་བཅིངས་པ་རྣམས་བསང་སྦྱང་།] སྟོང་པའི་ངང་ལས་ཧཱུྃ་ཡོངས་སུ་གྱུར་པ་ལས་ཕུར་བུ་རྣམས་སྟོད་ཁྲོ་བོ་བཅུ་ལ་སྨད་ཕུར་བུའི་དབལ་ཅན་རྩེ་མོར་རབ་ཏུ་འབར་བའི་མེ་ལྟ་བུར་[བསམ་ནས། ཕུར་བུ་རྣམས་བསྒྲིལ་ཞིང་།] ཀཱི་ལ་ཡ་དང་[ཁྲོ་བཅུའི་སྔགས་བརྗོད་པས་བྱིན་གྱིས་བརླབས་ཏེ།] དབང་པོ་ལ་སོགས་པའི་བགེགས་རྣམས་ཀྱི་སྤྱི་བོ་ནས་བསྡིགས་པས་གསང་བའི་བར་ཕུག་སྟེ་གསེར་གྱི་ས་གཞི་ལ་སྦྲགས་ནས་གཡོ་འགུལ་མེད་ཅིང་བདེ་བ་ཆེན་པོར་རོ་

གཅིག་ཏུ་[གྱུར་པར་བསམ་ལ།] ཨོཾ་བཛྲ་ཀྲོ་ངྷ་ཧཱུྃ་ཀཱ་ར་ཧཱུྃ༔ གནོད་བྱེད་འབྱུང་པོ་གརྫ་གརྫ་ཧཱུྃ་ཕཊ༔ [ཅེས་པ་ནས་སྟོབས་པོ་ཆེའི་བར་གྱི་སྔགས་ཚིག་རྣམས་བརྗོད་བཞིན་ཕུར་བུ་རྣམས་དཀྱིལ་འཁོར་ཁང་པའི་ཕྱོགས་མཚམས་བརྒྱད་དང་སྟེང་འོག་གི་ཕུར་བུ་ཤར་ནུབ་ཀྱི་ཤར་ནུབ་ཏུ་གདབ་ཅིང་།] དེ་རྣམས་ཀྱིས་བགེགས་ཐམས་ཅད་བསྲུང་བའི་ལས་མཛད་པར་[བསམ་མོ། གསུམ་པ་གསང་མཚམས་ནི། བར་དུ་གཅད་བྱ་གཅོད་བྱེད་ཐམས་ཅད་གཟུང་འཛིན་སེམས་ཀྱི་རྣམ་པར་རྟོག་པར་ངོར་སྣང་བ་ཙམ་སྟེ། སེམས་ཉིད་ཡེ་ནས་སྟོང་གསལ་ཆོས་ཀྱི་དབྱིངས་སུ་རོ་གཅིག་པའི་ངོ་བོ་ལ་བར་ཆད་ཀྱི་མཚན་མ་ནམ་ཡང་གྲུབ་པ་མེད་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ། །གཉིས་པ་མ་ཏྲཾ་བསྒྲལ་བ་ནི། ཁམ་ས་ལམ་ཏྲཾ་གི་གཟུགས་ཐལ་སྐྱ་མི་སྡུག་པའི་རྣམ་པ་ཅན་ཞིག་བཅོས་པ་དཀྱིལ་འཁོར་གྱི་གཞིར་མགོ་ལྷོ་ནུབ་ཏུ་ཕྱོགས་པར་གན་རྐྱལ་དུ་བཞག་ལ།] རང་ཉིད་དཔལ་ཆེན་པོར་གསལ་བའི་ཐུགས་ཀ་ནས་སྤྲོས་པའི་འོད་ཟེར་ལྕགས་ཀྱུས་བར་གཅོད་པའི་བདུད་བགེགས་ལོག་འདྲེན་བཀུག་པར་[བསམ་ཞིང་། བདེན་སྟོབས་བརྗོད་པ་སྔོན་དུ་འགྲོ་བས།] རྣམ་པ་མ་ཏྲཾ་རཱུ་དྲ་ངོ་བོ་དངོས་གྲུབ་ལ་བར་དུ་གཅོད་པའི་བདུད་དང་ལོག་འདྲེན་ཐམས་ཅད་མ་ཏྲཾ་རཱུ་དྲ་ཨཱ་ཀརྵ་ཡ་ཛཿཏྲི་ཡཾ་ཛཿཛཿཧཱུཾ་བཾ་ཧོ༔ [ཞེས་དགུག་བསྟིམ་བྱ། དེ་ནས་ལས་ཀྱི་གིང་དཀར་ནག་གཡས་ཟངས་གྲི་དང་གཡོན་སྙིང་ཐོགས་པ་གཉིས་ཆས་སུ་བཅུག་པ་ལ་སློབ་དཔོན་གྱི་ཐུགས་ཀ་ནས་སྒྲོལ་བྱེད་ཌཱ་ཀྐི་རཱ་ཛ་དཀར་ནག་གཉིས་སྤྲོས་ཏེ་སོ་སོ་ལ་བསྟིམས་ནས་སྒྲོལ་གིང་དུ་མངའ་གསོལ། དེས་ཀྱང་སྙེམས་བརྟན་ཅིང་དྲག་པོའི་གོམ་སྟབས་དང་བཅས་པས།] ཧཱུྃ། མ་ཏྲཾ་བྱ་བཅའི་སྡིག་ཅན་ཁྱོད། །

དུག་གསུམ་ཉོན་མོངས་དབང་དུ་སོང་། །གསང་བའི་དཀྱིལ་འཁོར་གཉན་པོ་བཤིག །དཀོན་མཆོག་གསུམ་གྱི་སྐུ་དགྲར་གྱུར། །དེ་ཚེ་དཔལ་ཆེན་ཧེ་རུ་ཀས། །བསྒྲལ་ནས་དུར་ཁྲོད་བརྒྱད་དུ་བྱས། །དེ་བཞིན་ཞིང་བཅུའི་རུ་དྲ་ཁྱོད། །བདག་མེད་ཆོས་ཀྱི་དབྱིངས་སུ་བསྒྲལ། །ཨོཾ་བཛྲ་ཀཱི་ལི་ཀཱི་ལ་ཡ་མ་ཏྲཾ་རཱུ་དྲ་པྲ་བྷཉྩ་ཀྲ་ཧཱུྃ་ཕཊ༔ ཙིཏྟ་པྲ་ཝེ་ཤ་ཡ་ཕཊ༔ [ཅེས་མ་ཏྲཾ་བསྒྲལ། སློབ་དཔོན་གྱིས་དེའི་སྙིང་ཕྱུངས་ཏེ་ཞལ་དུ་གསོལ་བར་བསམ་ཞིང་།] ཏི་ཧཱུྃ་ཨེ་སྥ་ར་ཎ་ཕཊ། [ཅེས་རྣམ་ཤེས་སྐྱེ་བ་མེད་པའི་དབྱིངས་སུ་སྦྱར། ཉོན་མོངས་པའི་ཡིད་དཔལ་ཆེན་པོའི་ཞབས་འོག་ཏུ་མནན་ལ་དོན་སྙིང་ནང་རོལ་རྣམས་ཕོ་ཉའི་ཚོགས་ཀྱིས་རོལ་པར་བསམ།] བྷཱུཾ་ཛྙཱ་ན་མཎྜ་ལ་བྷཱུཾ། ཁོག་པ་རང་བྱུང་གི་གཞལ་ཡས་ཁང་དུ་ལྷུན་གྱིས་གྲུབ་པར་[བལྟས་ལ། མགོ་བོ་དཀྱིལ་འཁོར་གྱི་ལྷོ་ནུབ། ལག་གཡོན་ནུབ་བྱང་། རྐང་གཡོན་བྱང་། མཚན་མ་བྱང་ཤར། རྐང་གཡས་ཤར། ལག་གཡས་ཤར་ལྷོ། གློ་བ་ལྷོ། ཁོག་པ་དབུས་རྣམས་སུ་འགོད་དེ། །][གསུམ་པ་ཆག་ཆག་གདབ་པ་ནི། ཀ་པཱ་ལར་ཁྲག་ཆེན་བདུད་རྩི་ལྔ་དྲི་དང་སྦྱར་བ་ཐོགས་ལ།] ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ༔ དམ་རྫས་བདུད་རྩི་ཡེ་ཤེས་ལྔ་ལྡན་པས༔ དེ་བཞིན་གཤེགས་པའི་ཕྲིན་ལས་མཆོག་བསྒྲུབ་ཕྱིར༔ བཀའ་གསང་རྨད་དུ་བྱུང་བའི་ཆག་ཆག་འདེབས༔ ཨོཾ་མཧཱ་པཉྩ་ཨ་མྲྀ་ཏ་མཎྜ་ལ་

ཧཱུྃ༔ [ཞེས་བརྗོད་ཅིང་དཀྱིལ་འཁོར་གྱི་གཞི་དེའི་དབང་ལྡན་ནས་གཡས་བསྐོར་དུ་ཁྱེམ་མེད་པར་ཆག་ཆག་གདབ་བོ། །][བཞི་པ་ཐིག་གདབ་པ་ལ་གཉིས་ཀྱི། དང་པོ་ཡེ་ཐིག་ནི། རྒྱུས་ཆེན་ནམ་ཁ་དོག་ལྔ་པའི་སྲད་བུ་མཚན་ཉིད་དང་ལྡན་པ་བསང་སྦྱང་།] སྟོང་པའི་ངང་ལས་པདྨ་དང་ཉི་མ་གནས་པའི་ཧཱུྃ་ཁ་དོག་ལྔ་ལས་ཁྲག་འཐུང་རིགས་ལྔ་ཡུམ་དང་བཅས་པའི་སྐུར་གྱུར་པའི་ཐུགས་ཀའི་འོད་ཟེར་གྱིས་ཡེ་ཤེས་པ་བཛྲ་ས་མཱ་ཛཿ[ས་སྤྱན་དྲངས།] ཛཿཧཱུྃ་བཾ་ཧོཿ[ས་བསྟིམ། ཉེར་སྤྱོད་ལྔས་མཆོད།] བཅོམ་ལྡན་ཁྲོ་བོའི་རྒྱལ་པོ་ནི། །[སོགས་ཤྭ་ལོ་ཀས་བསྟོད།] དེ་རྣམས་ཞུ་བ་ལས་བྱུང་བའི་ཐིག་སྐུད་དུ་གྱུར་[པར་བསམ་ལ། ལས་ཀྱི་རྡོ་རྗེ་ཡུམ་དུ་གསལ་བའི་ལག་ཏུ་གཏད་དེ།] ཧཱུྃ༔ མཚན་ལྡན་བཀྲ་ཤིས་དགེ་བའི་ཡུམ༔ གཟུགས་མཛེས་ཡིད་འོང་ལྷ་མོའི་ཚུལ༔ མཉེན་ལྕུགས་འཁྲིལ་ནས་དབྱེར་མི་ཕྱེད༔ རྡོ་རྗེ་ལས་ཀྱི་དོན་གྲུབ་མ༔ རྡོ་རྗེ་གསང་བའི་དཀྱིལ་འཁོར་འདིར༔ གསང་བ་རྡོ་རྗེའི་ཐིག་གདབ་མཛོད༔ བྷྲཱུཾ་ཛྙཱ་ན་ཨེ་མཎྜ་ལ་བྷྲཱུཾ༔ [ཞེས་བརྗོད་ཅིང་སློབ་དཔོན་ནུབ་དང་སློབ་མ་ཤར་དུ་གནས་པས་ཚངས་ཐིག་དང་པོ་མཁའ་ལ་གདབ་ཅིང་། དེ་བཞིན་དུ་སློབ་དཔོན་ལྷོ་དང་སློབ་མ་བྱང་དུ་གནས་པས་ཚངས་ཐིག་གཉིས་པ་དང་། ཟུར་ཐིག་རྣམས་ནུབ་ནས་ལྷོ་བྱང་། ལྷོ་ནས་ནུབ་ཤར་གྱི་རྩི་ཐིག་རྣམས་གདབ། ཡུམ་གྱི་མཁའ་ཀློང་དུ་ཡབ་ཀྱི་བྱང་སེམས་མཁའ་མཉམ་

གྱི་ཐིག་ལེར་འདྲེས་ཏེ་རང་བྱུང་གི་གཞལ་ཡས་ཁང་དུ་ལྷུན་གྱིས་གྲུབ་པར་བལྟའོ། །གཉིས་པ་ལས་ཐིག་ནི། ཐིག་ཆལ་གྱིས་སྦགས་པའི་སྐུད་པ་བརྐྱང་སྟེ།] ཧཱུྃ། ནམ་མཁའ་བར་སྣང་ཨེ་ཡི་ངང་། །གསང་བ་ཡེ་ཤེས་ཐིག་བཏབ་པས། །རྡོ་རྗེ་སྲིན་པོའི་ལྷ་ཚོགས་གནས། །ཕོ་བྲང་ཡིད་བཞིན་ལྷུན་གྱིས་གྲུབ། །བྷྲུཾ་བི་ཤྭ་བི་ཤུངྔྷེ་རཏྣ་བྷཉྫ་ན་ཨེ་མ་མཎྜ་ལ་བྷཱུཾ། [ཞེས་བརྗོད་ཅིང་འདུག་གནས་སྤྱོད་ལམ་ཡེ་ཐིག་གི་སྐབས་ལྟ་བུས་འདི་ལྟར་གདབ་སྟེ། ཐོག་མར་ཤར་ནུབ་ཚངས་ཐིག་གདབ། །དབུས་ནས་ཕྱོགས་བཞིར་མཚན་མ་བྱ། །ཤར་ནུབ་ཚངས་ནས་གཉིས་པ་དང་། །ཕྱོགས་བཞིའི་ཚངས་ནས་ཟུར་ཐིག་བཙལ། །དབུས་ནས་ཕྱི་མཐའི་བར་སྲིད་དུ། །ཕྱོགས་བཞིའི་ཚངས་ཐིག་གཡས་གཡོན་དུ། །ཆ་ཆེན་བཅུ་གསུམ་བགོ་བར་བྱ། །བརྒྱད་པའི་སྟེང་ནས་ལོགས་སུ་ཐིག །གྲུ་བཞིར་བཏབ་པ་རྟ་བབ་ཀྱི། །ཕྱི་མཐའི་ཐིག་ཡིན་དེ་ནས་བཟུང་། །ཚངས་པའི་བར་གྱི་རྟགས་རྣམས་གདབ། །བདུན་པ་དབུས་དོར་མཐའ་གཉིས་བསིལ། །རྩིག་པ་འདོད་སྣམ་ཕ་གུ་འབྱུང་། །བརྒྱད་པ་ཕྱེད་གདབ་ཕྱི་མ་ཕྱེད། །དྲྭ་ཕྱེད་ཤར་བུ་མདའ་ཡབ་འབྱུང་། །དགུ་པ་བཞི་ར་བགོ་རྟ་བབ་ས། །དེ་རྗེས་ནང་གི་རྩིག་ཐིག་ནས། །རྟ་བབ་ཕྱི་ཐིག་བར་དུ་ནི། །ལོགས་བཞིའི་ཚངས་ཐིག་གཡས་གཡོན་དུ། །ཆ་ཆེན་གཉིས་གཉིས་གདབ་པར་བྱ། །ནང་མ་ཕྱེད་གདབ་ཕྱི་མ་ཕྱེད། །ཕྱི་མ་ཆ་བཞིར་མཉམ་པར་བགོ །སྒོ་དང་སྒོ་ཁྱུད་སྒོ་འགྲམ་དང་། །རྩིག་མུན་ཀ་བ་ཀ་རྒྱད་འབྱུང་། །རྟ་བབ་ཕྱི་མཐའི་རིམ་པ་ནི། གསེར་སྣམ་ཀ་རྒྱན་མཐའ་དང་མཉམ། །ཤར་བུ་རིན་ཆེན་མདའ་

ཡབ་གསུམ། །ཆ་ཕྲན་རེ་རེ་ནང་དུ་བྲི། །གླང་གུར་མིག་གསུམ་བསྐོར་ཚུལ་ནི། །སྣམ་བུ་གཉིས་པའི་ཕྱི་ཐིག་དང་། །ཚངས་ཐིག་འཛོམ་པ་ནས་བཟུང་སྟེ། །ཆ་ཕྲན་གཉིས་ཀྱི་དབུས་མ་བསྐོར། །མུན་པ་པ་ཏིའི་ཕྱི་ཐིག་དར། །ཚངས་ཐིག་འཛོམ་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཉིས་ཀྱིས་གཡས་གཡོན་བསྐོར། །དེ་ནང་ཆ་ཕྲན་ཕྱེད་རེ་བསྐོར། །དེ་དག་དཀྱིལ་འཁོར་ཕྱི་མའི་ཐིག །བཞི་པ་གཉིས་བགོའི་ཆ་རེ་ལ། །ནང་དཀྱིལ་ཆ་ཆེན་དེའི་བཞི་ཆ། །ཆ་ཕྲན་ཉིད་ཤེས་ནང་མ་ནི། །དབུས་དོར་མཐའ་གཉིས་གདབ་པ་དང་། །ཕྱི་མ་ཕྱེད་གདབ་དེའི་ཕྱི་ཕྱེད། །གོང་བཞིན་གདབ་པས་ནང་དཀྱིལ་གྱི། །རྩིག་པ་འདོད་སྣམ་ཕ་གུ་དང་། །དྲྭ་ཕྱེད་ཤར་བུ་མདའ་ཡབ་ཐིག །དཀྱིལ་འཁོར་ནང་མ་སྒོ་ཁྱུད་དང་། །རྟ་བབ་བྲལ་ཕྱིར་ཟང་ཐལ་དུ། །ཚངས་ནས་གཡས་གཡོན་གྱེན་མཐུར་ནི། །ཆ་ཆེན་ཕྱེད་དང་ཆ་ཕྲན་གདབ། །དེ་ཕྱིར་རྩིག་རྒྱུན་ཆ་ཕྲན་གཅིག །གྱེན་བརྩེགས་ཐད་ཀ་འཁོར་མོར་སྦྲེལ། །ལྟེ་བའི་ལྷ་གནས་བསྐོར་ཚུལ་ནི། །དབུས་ནས་ཆ་ཕྲན་བདུན་དང་གཅིག །བཞི་གཅིག་བཞི་གཅིག་གསུམ་དང་གཅིག །གཉིས་བཅས་རིམ་པར་ཟླུམ་པོར་བསྐོར། །ཟླུམ་སྐོར་དབུས་མའི་ཚད་ཀྱིས་ནི། །དེ་ཡི་ཤར་ངོས་ཚངས་ཟླུམ་འཛོམ། །བཟུང་སྟེ་ལྷོ་ནས་ལྷོ་ནུབ་དང་། །བྱང་ནས་ནུབ་བྱང་བར་གྱི་ནི། །ཟླུམ་ཐིག་ཆ་གསུམ་བགོས་པ་ཡི། །ཆ་གཉིས་ལྷོ་བྱང་ཆ་གཅིག་རེ། །ནུབ་ངོས་བོར་མཚམས་མཚན་བཏབ་སྟེ། །ལོགས་གསུམ་ཐིག་སྦྲེལ་གྲུ་གསུམ་འབྱུང་། །དེ་ནང་རེ་ཁཱ་ལ་རེག་པའི། །འདབ་བརྒྱད་མུ་ཁྱུད་དང་བཅས་བསྐོར། །དེ་རྒྱབ་འཁོར་ལོ་རྩིབས་བཞི་སྟེ། །གྲུ་བཞིར་བཏབ་པའི་ཟུར་བཞི་པོ། །ཟླུམ་བསྐོར་ཚངས་རྩེ་བཞི་པོ་སྦྲེལ། །དེ་ཕྱིར་འཁོར་ལོ་རྩིབས་བཅུ་པོ། །ཚངས་ཐིག་ནས་ནི་ཟུར་ཐིག་བར། །དུམ་བུ་ཕྱེད་གསུམ་གཞལ་

བ་ཡི། ཕྱེད་གཉིས་དོར་བའི་ཆ་གཅིག་པོས། །ལྷོ་བྱང་ཚངས་ནས་ཤར་ནུབ་ཀྱི། །ཚངས་པར་ཟླུམ་སྟེང་མཚན་བཏབ་སྟེ། །བསྣོལ་གདབ་ལྷོ་བྱང་རྩིབས་རེ་དང་། །ཤར་ནུབ་ཚངས་ལས་གཡས་གཡོན་དུ། །རྩིབས་རེ་མཚམས་ཀྱི་རྩིབས་ལས་བཅུ། །དེ་རྒྱབ་ཟླ་གམ་ཉེར་གཅིག་སྟེ། །མདུན་དང་གཡས་གཡོན་ཆ་མཉམ་པར། །གསུམ་བགོ་རེ་རེར་བདུན་བདུན་བཀོད། །མུ་ཁྱུད་རིམ་བཞི་ཐོད་སྐམ་ཕྲེང་། །དེ་ཕྱིར་མེ་ཡི་ཕྲེང་བའོ། །ལྔ་པ་དྲུག་པ་བར་ཁྱམས་ཏེ། །ཕྱི་དཀྱིལ་རྩ་ཐིག་ལ་རེག་པར། །ཟླུམ་པོའི་མཚན་གདབ་ཚད་དེས་ནི། །ཕྱོགས་བཞིའི་ཚང་ཟླུམ་འདོམ་སྟེང་ནས། །གཡས་གཡོན་མཚན་བྱ་རྟགས་བརྒྱད་དང་། །ཚངས་ཐིག་བཞི་བཅས་བཅུ་གཉིས་འོང་། །རང་རང་མཚན་མའི་སྟེང་དེ་ནས། །གཉིས་རེ་དོར་བའི་མཚན་མ་ལ། །། སྦྲེལ་ནས་གྲུ་བཞི་གསུམ་བསྣོལ་མར། །གདབ་པ་འཁོར་རྩི་བས་བཅུ་གཉིས་སོ། །བཅུ་པ་དབུས་དོར་མཐའ་བསིལ་བ། །པདྨ་ཆོས་འཁོར་གདུགས་ཀྱི་ས། །རྒྱ་ཚད་ཆ་ཕྲན་གཉིས་རེ་སྟེ། །པདྨའི་གཡས་གཡོན་ཆ་ཕྲན་ཕྱེད། །དོར་སར་རི་དྭགས་རེ་རེ་བྲི། །སྣ་ཚོགས་རྡོ་རྗེའི་རྭ་བསྐོར་ཚུལ། གསེར་སྣམ་ཕྱི་དང་ཚངས་ནས་གསུམ། །དོར་ཏེ་ཀ་རྒྱན་རྩེ་ནས་དང་། །དེ་ནས་འཕྲེད་གཉིས་ཕྱིར་གཅིག་ནས། །སྔ་མའི་ཚད་དེས་དེ་བཞིན་བསྐོར། །དབུས་རྭ་རྩ་བའི་རྒྱ་ཚད་དུ། །ཆ་ཆེན་གཅིག་ཡིན་མི་མཐོང་ཡང་། །རིམ་ཕྲ་རྩེ་མོ་ཆ་ཕྲན་གཉིས། པད་འཁོར་གདུགས་ཀྱི་འོག་ཏུ་བྲི། །བཅུ་གཉིས་ཟླུམ་བསྐོར་དུར་ཁྲོད་ས། །བཅུ་གཉིས་བཞིར་བགོས་གསུམ་པདྨ། །ཆ་གཅིག་རྡོ་ར་བཅུ་གསུམ་པ། །མེ་ཡི་ར་བ་རྣམས་སུ་འགྱུར། །མཐོང་བརྒྱུད་གནད་ཀྱི་ཤེས་པར་བྱའོ། །དེ་ནས་སྲད་བུ་ཆོ་ག་བཞིན་

མཆོད་ནས་ཡེ་ཤེས་ཀྱི་ཐིག་བཛྲ་མུཿ ས་གཤེགས་སུ་གསོལ། །ལས་ཐིག་ཀྱང་དབེན་པར་བཞག་གོ །ལྔ་པ་ཚོན་དགྱེ་བ་ན་ནི། རྡུལ་ཚོན་ཁ་དོག་ལྔ་ལ་རང་རིགས་ཀྱི་ཡི་གེ་ཧཱུྃ་ཨོཾ་སྭཱ་ཨཱཿཧཱ་རྣམས་བྲིས་པ་དབུས་དང་ཕྱོགས་བཞིར་བཀོད། བསང་སྦྱང་ལྷར་བསྐྱེད་དེ་བསྟོད་པའི་བར་ཐིག་གི་སྐབས་བཞིན་བྱས་ལ།] དེ་རྣམས་ཞུ་བ་ལས་བྱུང་བའི་རིན་པོ་ཆེའི་རྡུལ་ཕྲ་རབ་ཏུ་གྱུར་[པར་བསམ་ཞིང་། ས་བོན་ལྔ་བརྗོད་པས་བྱིན་གྱིས་བརླབས་ནས་ཚོན་ཇི་ལྟར་དགྱེ་བའི་ཚུལ། དབུས་ཀྱི་པདྨ་སྣ་ཚོགས་མདོག །ལྟེ་བ་ཉི་གདན་ཨེ་མཐིང་ནག །ཟླ་གམ་གསུམ་དམར་འཁོར་ལོ་ཡི། །རྩིབས་རྣམས་སྔོ་ཞིང་རྩིབས་མཆན་སེར། །ཟླ་གམ་དམར་ནག་གཞི་མ་སྔོ། །མུ་ཁྱུད་རིམ་བཞི་ཐོད་སྐམ་ཕྲེང་། །མེ་རི་ལྔ་ལྡན་ཁྱམས་ཕྱོགས་མདོག །ལྷ་མཚན་གཙོ་བོ་རྡོ་རྗེ་མཐིང་། །རྩིབས་བཞིར་རྡོ་རྗེ་རིན་ཆེན་དང་། །པདྨ་རྒྱ་གྲམ་ཕྱོགས་ཀྱི་མདོག །ཁྲོ་བཅུ་ཟ་གསོད་སྲས་ཉེར་གཅིག །ནང་སྒོའི་སྒོ་སྐྱོང་བཞི་བཅས་ལ། །ཕྱག་མཚན་ནམ་ཐིག་ལེ་རང་མདོག་བཀོད། །ནང་དཀྱིལ་ཁྲོ་བོའི་དཀྱིལ་འཁོར་ནི། །རྩིག་པ་མགོ་བོ་སྐམ་རྙིང་རློན། །ཚར་གསུམ་སྤེལ་ཞིང་སྒོའི་གཡས་གཡོན། །བརྩེག་ཐབས་སྒོ་སྟེང་ཐད་དུ་བསྒྲིགས། །འདོད་སྣམ་དམར་པོར་ཁྲག་ཆེན་གྱི། །མཆོད་ཡོན་དབང་པོའ་མེ་ཏོག་སོགས། །དྲག་པོའི་ཉེར་སྤྱོད་བརྗིད་ལྡན་བྲི། །ཕ་གུ་གཞི་སེར་ཐོད་ཕྲེང་བརྒྱན། །མུན་པ་ནག་ལ་ཐོད་ཚལ་དང་། །རུས་པའི་དྲྭ་ཕྱེད་རྒྱུ་རློན་ཕྲེང་། །གློ་སྙིང་མགོ་བོའི་འཕྱང་འཕྲུལ་བྱ། །ཤར་བུ་གཞི་སྔོ་ཚིགས་ཆེན་བཞིའི། །རུས་པ་ལས་བྱ་མདའ་ཡབ་དཀར། །སྒལ་ཚིགས་དག་གིས་འཁོར་བར་བྲི། །དེ་སྟེང་ཞིང་དང་གང་ཆེན་སྟག །ལྤགས་པ་རོ་རས་ནག་པོ་ཡི། །བ་

དན་འཕན་དང་རོ་སྐྲ་ཡི། །རྔ་ཡབ་ལ་སོགས་བཀོད་པ་ནི། །འཇིགས་རུང་རྔམས་བརྗིད་ལྡན་པར་བྱ། །བར་ཁྱམས་ཁྲག་མཚོ་འཁོར་རྩིབས་སྔོ། །རྩིབས་སྟེང་མ་མོ་བཅུ་གཉིས་དང་། །ཕྱི་སྒོར་གིང་བཞིའི་ལྷ་མཚན་བཀོད། །ཕོ་བྲང་ཕྱི་མ་ཞི་དཀྱིལ་ནི། །སྒོ་བཞི་ཕྱོགས་མདོག་པ་ཏྲ་རིས། །རྩིག་པ་ནང་ནས་རིམ་པ་བཞིན། །མཐིང་དཀར་སེར་དམར་ལྗང་བའི་མདོག །འདོད་སྣམ་གཞི་མ་དམར་པོ་ལ། །རིག་མ་བཅུ་དྲུག་རང་མིང་གི །མཆོད་རྫས་ཐོགས་ནས་གར་འཁྱུག་བཞིན། །གཉིས་གཉིས་གཡས་བསྐོར་འཁོར་བར་བྱ། །ཕ་གུ་སེར་པོར་རིན་ཆེན་བཀྲ། །དྲྭ་བའི་གཞི་ནག་དྲྭ་བ་དཀར། །ཤར་བུའི་གཞི་སྔོ་ཟར་ཚགས་ནི། །མཆོད་རྟེན་རིས་དབྱིབས་དཀར་པོ་སྟེ། །མདའ་ཡབ་དཀར་པོ་པད་འདབ་རིས། །མུན་པ་པ་ཏི་གླང་གུར་ནག །ཀ་བ་རྡོ་ར་ཕྱོགས་མདོག་ལ། །ཀ་རྒྱན་རྟ་བབ་མཛེས་ཚོན་བྱ། །པདྨ་དམར་ལ་འཁོར་ལོ་དང་། །རི་དྭགས་གསེར་མདོག་གདུགས་དཀར་པོ། །ཕྱི་ཁྱམས་ལྗང་གུར་དབང་མོ་ཡི། །ཐིག་ལེ་སྣ་ཚོགས་བཀོད་པས་བསྐོར། །དུར་ཁྲོད་གཞི་ནས་ཁྱད་ཆོས་ཀྱི། རི་མོ་སྣ་ཚོགས་པདྨ་ནི། །མཛེས་པའི་ཚོན་ཏེ་རྡོ་རྗེའི་ཕྲེང་། །གཞི་ནག་རྡོ་རྗེ་སེར་པོ་ལ། །མེ་རི་སྣ་ལྔ་ཆོས་འཁོར་རོ། །ཞེས་གཟབ་ནས་འབྲི་བ་སྟེ་དེ་དག་ནི་ཉིན་དང་པོའི་བྱ་བའོ། །གལ་ཏེ་རྡུལ་ཚོན་མི་འགྲུབ་པའི་རས་བྲིས་ཀྱི་ཕྱོགས་ལ་ཐིག་ཚོན་གྱི་བྱ་བ་རྣམས་དོར་ནས་ཆག་ཆག་གདབ་པའི་རྗེས་སུ་རས་བྲིས་ཀྱི་དཀྱིལ་འཁོར་བཀྲམ་མོ། །དྲུག་པ་ཕུར་བུ་འགོད་པ་ནི། །ལྕགས་སམ་སེང་ལྡེང་དུག་ཤིང་ཚེར་མ་ཅན་རྣམས་གང་རུང་ལས་བྱས་པའི་གཙོ་ཕུར་སོར་བཅུ་དྲུག །སྲས་མཆོག་དང་ཁྲོ་བོ་སོར་བཅུ་གཉིས། ཟ་གསོ་དང་སྒོ་སྐྱོང་མཐོ་རེ་

ཁྲ་ཐབས་མར་བཅད་སོར་བརྒྱད་པ། ཁྲོ་བོ་སོགས་རང་རང་གི་ཞལ་ཅན་རྒྱ་མདུད་ཉིས་རིམ་ཆངས་བཟུང་ཟུར་བརྒྱད་ཆུ་སྲིན་གྱི་ཁ་ནས་འཐོན་པའི་དབལ་ཟུར་གསུམ་པ། གཙོ་ཕུར་རྣམས་འགྱིང་ཞིང་བརྗིད་ཆགས་པ། ལས་ཕུར་རྣམས་གསོར་བདེ་བ། དམ་ཅན་དང་དབང་ཕྱུག་མ་རྣམས་རྩང་ཕུར་ཁོ་ན་སྟེ། ཀུན་ལ་དར་སྣ་ལྔའི་ཅོད་པན་གྱེན་དུ་འཕུར་ཞིང་རང་རྟགས་ཀྱི་སྙིང་པོས་མཚན་པ་རྫས་དགུས་ངར་བླུད་པ་རྣམས་རུས་སྦལ་གྱི་ཁོག་པའམ་ཐོད་པ་སོགས་སུ་དར་ནག་གིས་བཀབ་སྟེ་བཞག་པ་ཉིད་སླར་ཡང་བྱུག་སོགས་གསུམ་གྱིས་གཟི་བྱིན་བསྐྱེད་པའི་ཕྱིར་གུ་གུལ་གྱིས་བདུག་ལ།] ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་ཨ་ངྷི་ཏིཥྛ་རྨུགས་རྨུགས་ཧ་ལ་ཧ་ལ་དགྲ་བགེགས་འབྱུང་པོའི་ཙིཏྟ་མྱགས་མཱ་ར་ཡ་ཧཱུྃ་ཕཊ། [ཡུངས་དཀར་གྱིས་བྲབ་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་མ་གུ་ཏ་ལ་པྲ་ཏ་ལ་པྲ་ལ་ཤ་ཏ་རཱ་ཙ་ཧཱུྃ་དགྲ་བགེགས་འབྱུང་པོ་མཱ་ར་ཡ་ཧཱུྃ་ཕཊ། [རཀྟས་བྱུག་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་རཀྟ་ཛྭ་ལ་མཎྜལ་རཀྵ་རཀྵ་དགྲ་བགེགས་ཝཱ་ཤཾ་མཱ་ར་ཡ་ཧཱུྃ་ཕཊ། [དེ་ནས་སྲིད་པ་རྫས་ཀྱི་ཕུར་བུ་ཡེ་ཤེས་ཀྱི་ཁྲོ་བོར་སྒྲུབ་པ་ནི།] ཤུ་ནྱ་རས་བསང་སྦྱང་། ཕུར་བུ་རྣམས་སྟོང་ཉིད་ཆོས་ཀྱི་སྐུའི་རང་བཞིན་དུ་གྱུར། སྟོང་པའི་ངང་ལས་ཧཱུྃ་མཐིང་ནག་རེ་རེ་ལས་རྡོ་རྗེ་སྔོན་པོ་ཧཱུྃ་གིས་མཚན་པ་རེ་རེ་གྱུར། [གཙོ་འཁོར་རྣམས་ཀྱི་སྔགས་རྣམས་ཚར་རེ་བརྗོད་པས།] གཙོ་ཕུར་རྡོ་རྗེ་གཞོན་ནུ་ཡབ་ཡུམ་དང་། འཁོར་རྣམས་ཐམས་ཅད་རང་རང་གི་སྐུའི་རྣམ་པ་རྒྱན་ཆ་ལུགས་

ཕྱག་མཚན་དང་བཅས་པ་ལ་སྨད་ཕུར་བུ་འབར་བའི་རྣམ་པ་ཅན་དུ་གསལ་བར་གྱུར་པར་མོས། རང་བཞིན་གྱི་དབྱིངས་ནས་ཡེ་ཤེས་པ་ཆར་བབས་པ་ལྟར་བྱོན་ནས་གཉིས་མེད་དུ་ཐིམ་པར་བསམ་ལ། ཧཱུྃ། ཐབས་ཀྱི་སྤྱོད་པས་འགྲོ་བའི་དོན་ཕྱིར༔ [ཞེས་སོགས་ལས་བྱང་བཞིན་དབང་བསྐུར་བྱིན་གྱིས་བརླབས་ནས། དཀྱིལ་འཁོར་གྱི་ལྷ་གནས་སོ་སོར་ཨེ་ཁྲམ་གྱི་གདན་ལ་རིམ་བཞིན་འགོད་ཅིང་།] ཧཱུྃ། དབུས་ནས་རང་བྱུང་གྲུབ་པའི་ལྷ། །བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་བཅས། །ལྷ་ཆེན་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་དཱིཔྟ་ཙཀྲ་ས་མ་ཡ་ཏིཥྛནྟུ། [ཞེས་གཙོ་ཕུར་དབུས་ནས་ཞལ་ཤར་བསྟན་དང་སྦྱོར་ཡུམ་མདུན་དང་སྒྲོལ་ཡུམ་གཡོན་ཟུར་ནས་ཡབ་ལ་ཕྱོགས་པས་འགོད།] ཧཱུྃ། ཕྱོགས་བཞི་རང་བྱུང་གྲུབ་པའི་ལྷ། །སྲས་མཆོག་ཀཱི་ལི་ཀཱི་ལ་རིགས་ལྔ་པོ། །རུ་དྲ་བསྣོལ་བའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། །ཨོཾ་བུངྔྷ་བཛྲ་རཏྣ་པདྨ་ཀརྨ་ཀཱི་ལ་ཡ་ས་མ་ཡ་ཏིཥྛནྟུ། [ ཞེས་བུངྔྷ་ཀཱི་ལ་ཡ་གཙོ་བོའི་གཡས་ཟུར་དང་གཞན་རྣམས་ཕྱོགས་བཞིའི་རྩིབས་ལ་ཞལ་ནང་བསྟན་དུ་འགོད།] ཧཱུྃ། ཕྱོགས་བཅུ་རང་བྱུང་གྲུབ་པའི་ལྷ། །ཁྲོ་རྒྱལ་ཡབ་ཡུམ་ཟ་གསོད་བཅས། །ཕྱོགས་སྐྱོང་ཕོ་མོའི་གདན་སྟེང་དུ། །

དགྱེས་ཤིང་བརྟན་པར་བཞུགས་སུ་གསོལ། [ཁྲོ་བཅུའི་རྩ་སྔགས་མཐར།] ས་མ་ཡ་ཏིཥྛནྟུ། [ཞེས་ཤར་སྟོད་སྟེང་དང་ནུབ་སྨད་འོག་ཏུ་བྱས་ཏེ་ཕྱོགས་མཚམས་ཀྱི་རྩིབས་བཅུར་ཁྲོ་བོ་རྣམས་ཞལ་ནང་བསྟན་དང་ཡུམ་རྣམས་ཡབ་ལ་ཕྱོགས་ཤིང་ཟ་གསོད་གཉིས་ཀྱིས་གཡས་གཡོན་ནས་བརྟེན་པའི་ཚུལ་གྱིས་འགོད།] ཧཱུྃ། སྐུ་གསུང་ཐུགས་ལས་སྤྲུལ་པ་ཡི། །སྲས་མཆོག་ཉི་ཤུ་རྩ་གཅིག་ཀྱང་། །ཟླ་གམ་ཨེ་ཡི་གདན་སྟེང་དུ། །དགྲ་བགེགས་གཟིར་ཞིང་དགྱེས་པར་བཞུགས། །ཨོཾ་ཀརྨ་ཀྲོ་ངྷ་བཛྲ་ཀཱི་ལི་ཀཱི་ལ་ཡ་ས་མ་ཡ་ཏིཥྛནྟུ། [ཞེས་ཕྱི་རིམ་གྱི་ཟླ་གམ་རྣམས་ལ་ཞལ་ནང་བསྟན་དུ་འགོད།] ཧཱུྃ། གྲུ་ཆད་བཞི་ཡི་ཕོ་བྲང་དུ། །ཕྲིན་ལས་རྣམ་བཞི་ལྷུན་གྲུབ་བཞུགས། །ཙ་ཏུརྐྲྀ་ཏྱ་ས་མ་ཡ་ཏིཥྛནྟུ། [ཞེས་གྲུ་ཆད་བཞི་ལ་འགོད།] ཧཱུྃ། ཚད་མེད་བཞི་ལྡན་སྒོ་བཞི་རུ། །ཡེ་ཤེས་སྒོ་སྐྱོང་བརྟན་པར་བཞུགས། །ཛཿཧཱུྃ་བཾ་ཧོཿས་མ་ཡ་ཏིཥྛནྟུ། །[ཞེས་ནང་སྒོ་བཞི་ལ་ཞལ་ཕྱིར་བསྟན་དུ་འགོད།] ཧཱུྃ། དཀྱིལ་འཁོར་ཆེན་པོའི་བར་ཁྱམས་སུ། །ཤྭ་ན་བདག་ཉིད་ས་བདག་ཚོགས། །བསྭེ་ལྕགས་དུང་གི་གྱད་ཆེན་དང་། །ཕྱི་རིམ་ཁོར་ཡུག་ཆེན་མོ་ལ། །དབང་ཕྱུག་ཉི་ཤུ་རྩ་བརྒྱད་རྣམས། །བསྟན་པ་བསྲུང་ཕྱིར་དགྱེས་པར་བཞུགས། །མོ་ཧ་གྷཱ་ཏ་ཡ་མ་མ་ཤཱི་གྷྲཾ་ཀརྨ་ཀ་ར་ཡེ་ས་མ་ཡ་ཏིཥྛནྟུ། [ཞེས་མ་མོ་བཅུ་གཉིས་ཁྲག་ཁྱམས་ཀྱི་རྩིབས་ལ་ཞལ་ནང་བསྟན་དང་གིང་བཞི་ཕྱི་སྒོ་བཞིར་ཞལ་ཕྱིར་བསྟན།

དབང་ཕྱུག་མ་ཕྱིའི་ཁོར་ཡུག་རྣམས་སུ་ཞལ་ནང་བསྟན་གྱིས་འགོད་དོ། །དེའི་ཞར་ལ་བུམ་པ་སོགས་འགོད་པ་ནི། སྔར་ནས་འདུ་བྱས་པའི་སྒྲུབ་རྫས་རྣམས་སྤོས་ཀྱིས་སྣ་དྲངས་ནས་ནས་དཀྱིལ་འཁོར་ལ་གཡས་སུ་བསྐོར་སྟེ།] ཧཱུྃ། སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ ཕོ་བྲང་གནས་འདིར་བཞུགས་སུ་གསོལ༔ དངོས་གྲུབ་མ་ལུས་བསྩལ་དུ་གསོལ༔ ཨོཾ་བཛྲ་ཀཱི་ལི་ཀཱི་ལ་ཡ་ས་མ་ཡ་ཏིཥྛ་ལྷན༔ [ཞེས་དཀྱིལ་འཁོར་སྟེང་གི་ཁྲིའུའི་རིམ་པ་དང་པོའི་དབུས་སུ་རྣམ་བུམ་སྐུ་རྟེན་དང་བཅས་པ། གཡས་སུ་གསང་ཐོད་མེ་ལོང་སྔགས་བྱང་ཅན་དང་རྒྱུད་ཀྱི་གླེགས་བམ། གཡོན་དུ་སྲོག་འཁོར་བླ་རྡོ་དང་རང་བྱུང་གི་ཤེལ་རྡོ་ཟུར་དྲུག་པ། རྒྱབ་ཏུ་དཔལ་གྱི་གཏོར་ཆེན། མདུན་དུ་ཚེའི་འབྲང་རྒྱས་སོགས་ཇི་ལྟར་འོས་པ་བཞིན་ལེགས་པར་འགོད་དོ། །][བདུན་པ་རྒྱན་རྫས་དགྲམ་པ་ནི། དཀྱིལ་འཁོར་གྱི་སྟེང་དུ་ཞིང་གི་བླ་བྲེ་དང་གདུགས་ཀྱིས་ཕུབ་ཅིང་། ཁོར་ཡུག་རྣམས་སུ་ལྡ་ལྡི། བ་དན། རྒྱལ་མཚན། ཕྱེ་ཕུར། དར་གྱི་ཆུན་འཕྱང་སོགས་དཔལ་གྱི་ཆས་གོས་རྒྱན་ཕྲེང་། རྒྱུ་མ་དང་དོན་སྙིང་གི་འཕྱང་འཕྲུལ། གོ་མཚོན་སོགས་སྤྱན་གཟིགས་སྣ་ཚོགས་པས་ཀུན་ཏུ་བཟང་པོའི་ཞིང་ལྟ་བུར་མཛེས་ཤིང་བརྗིད་ཆགས་པར་བྱས་ནས། བདུད་རྩི་ལྔ་དང་བཅས་པའི་དྲིས་དཀྱིལ་འཁོར་གྱི་མཐའ་རིམ་དུ་བྱུག་ཅིང་། ཟུར་བཞིར་མདའ་དར་ཚོན་སྐུད་ཀྱི་དྲྭ་བས་སྦྲེལ་བ་དང་རལ་གྲི་ལ་སོགས་པའང་ཚུལ་བཞིན་དུ་བཀོད་པའི་དཀྱིལ་འཁོར་གྱི་

ཤར་དུ་ཆུ་གཉིས་ཉེར་སྤྱོད་ལྔ། ལྷོར་འདོད་ཡོན་ལྔ་རིན་པོ་ཆེ་བདུན་བཀྲ་ཤིས་པའི་རྫས་བརྒྱད་སོགས། ནུབ་ཏུ་བཟའ་བཅའ་བཏུང་བ་ལྡག་གཞིབ་མྱང་བའི་དཔལ་གྱི་གཏོར་མ་དར་ཚོན་གྱི་འཕུར་ལྡིང་གཡོ་བ། དེའི་གཡས་སུ་ཆོས་སྐྱོང་ཕོ་རྒྱུད་ཀྱི་གཏོར་མ་དང་བདུད་རྩི་རྩ་བརྒྱད་སྟོང་སྦྱོར་གྱིས་སྦགས་པའི་སྨན་ཕུད། གཡོན་དུ་སྲུང་མ་མོ་རྒྱུད་ཀྱི་གཏོར་མ་དང་སོ་ལྔ་བ་སྦྱར་བའི་རཀྣ། བྱང་དུ་ཁྲག་གི་ཨརྒྷཾ་སོགས་དྲག་པོའི་ཉེར་སྤྱོད། ཤར་ལྷོར་ལས་བཞིའི་འབྲང་རྒྱས་སོགས་དངོས་གྲུབ་ཀྱི་ཡོ་བྱད། ལྷོ་ནུབ་ཏུ་དྲག་པོའི་བྲུབ་ཁུང་ལིང་ག་དང་ཐུན་རྫས། ནུབ་བྱང་དུ་དམ་ཅན་བཅུ་དྲུག་སོགས་བཀའ་སྲུང་གི་གཏོར་མ། བྱང་ཤར་དུ་སྲེག་འཕང་མནན་པ་སོགས་མཐའ་སྡུད་ཀྱི་ཡོ་བྱད། གཞན་ཡང་མཆོད་པར་འོས་པའི་རྫས་ཐམས་ཅད་ཀྱིས་ལེགས་པར་བསྐོར་ཞིང་། རྡོ་རྗེ། དྲིལ་བུ། ཐོད་རྔ། རྔ་བོ་ཆེ། སིལ་ཆོལ་སོགས་རོལ་མོའི་ཁྱད་པར་དང་། གར་འཆམས་ཀྱི་ཆ་བྱད་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ།] ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ༔ ཕུན་སུམ་ཚོགས་པའི་མཆོད་སྤྲིན་རབ་ཏུ་སྤྲས༔ དཔལ་ཆེན་འཁོར་བཅས་ཐུགས་དམ་གཉན་སྐངས་ལ༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ ན་མ་༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ༔ [ཞེས་ནམ་མཁའ་མཛོད་ཀྱི་སྔགས་རྒྱས་མཁའ་ཁྱབ་ཏུ་སྤེལ་བར་བྱའོ། །][བཞི་པ་ཕྲིན་ལས་ལ་འཇུག་པའི་ཡན་ལག་ལ་ལྔ་ལས། དང་པོ་སྒྲུབ་པ་པོ་རྣམས་མངའ་

གསོལ་ཞིང་གནས་སུ་འགོད་པ་ནི། རྡོ་རྗེ་རྒྱལ་ཚབ་པས་སྐབས་སུ་བབ་པའི་གཏོང་ཐུན་ཇི་ལྟར་རིགས་པ་སྔོན་དུ་འགྲོ་བས་དབྱངས་སྙན་པོར་ལེན་ཚུལ་གྱིས།] ཧཱུྃ། རྡོ་རྗེ་རྒྱལ་པོ་ཚོགས་རྗེ་ཚོགས་ཀྱི་བདག༔ ཤེས་རབ་ཡུམ་མཆོག་གཙོ་བོའི་ཐུགས་དམ་བསྐངས༔ སྲས་མཆོག་རྒྱལ་ཐེབ་ཀརྨ་འཆམས་གར་བཅས༔ གིང་དང་ལས་མཁན་སྤྱན་པ་དུས་འཛིན་དང་༔ བརྡ་སྦྱོར་ཕྱག་ཚང་རྡུལ་ཕྱག་སྐྱེས་བུའི་ཚོགས༔ ཀུན་ཀྱང་དཀྱིལ་འཁོར་ཕོ་བྲང་གནས་འདི་རུ༔ ཕྲིན་ལས་མངའ་བརྙེས་བསྐོས་པའི་དོན་སྤྱོད་སྒྲུབ༔ སྐྱེ་བ་སྔོན་ནས་ཚོགས་གཉིས་ལམ་སྦྱངས་པས༔ དུས་འདིར་རླབས་ཆེན་སྤྱོད་པའི་ལམ་སྣ་ཟིན༔ འཁོར་ལོས་སྒྱུར་རྒྱལ་རྣམས་ལ་མངའ་གསོལ་ལོ༔ [ཞེས་མངའ་གསོལ་ཞིང་བདུད་རྩིའི་སྐྱེམས་སོ་སོར་དྲངས་ཏེ་ལས་ཀྱི་གཉེར་གཏད་དོ། །][གཉིས་པ་ཆས་སུ་གཞུག་པ་ནི། སླར་ཡང་སྔོན་བྱུང་གི་ལོ་རྒྱུས་ཇི་ལྟར་འཚམས་པའི་གཏོང་ཐུན་སྔོན་དུ་འགྲོ་བས།] ཧཱུྃ། ཐེག་མཆོག་གླང་པོ་ཆེ་ཡི་ཀོ་རློན་ནི། །གཏི་མུག་འཁོར་བ་རྩད་ནས་བཅད་པ་དང་། །ཆོས་ཀྱི་དབྱིངས་ཀྱི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །མ་ཉམས་བྱང་སེམས་ཞིང་གི་གཡང་གཞི་ནི། །འདོད་ཆགས་འཁོར་བ་རྩད་ནས་བཅད་པ་དང་། །སོ་སོར་རྟོག་པའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་

ཕྱུག་སྐུ་ལ་རྒྱན་དུ་གསོལ། །དཔའ་གཏུམ་ཟ་བྱེད་སྟག་གི་ཤམ་ཐབས་ནི། །ང་རྒྱལ་འཁོར་བ་རྩད་ནས་བཅད་པ་དང་། །མཉམ་པ་ཉིད་ཀྱི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །མཉེན་ལྕུག་འཁྲིལ་ལྡེབ་སྦྲུལ་གྱི་ཆུན་པོ་ནི། །ཞེ་སྡང་འཁོར་བ་རྩད་ནས་བཅད་པ་དང་། །མེ་ལོང་ལྟ་བུའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། །ཐོད་ཕྲེང་ཚར་གསུམ་ཕྲེང་བའི་ག་ཤ་ནི། །ཕྲག་དོག་འཁོར་བ་རྩད་ནས་བཅད་པ་དང་། །བྱ་བ་གྲུབ་པའི་ཡེ་ཤེས་ཐོབ་བྱའི་ཕྱིར། །རྣལ་འབྱོར་དབང་ཕྱུག་སྐུ་ལ་རྒྱན་དུ་གསོལ། ཧཱུཾ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ མཁའ་འགྲོའི་ཚོགས་དང་དམ་ཚིག་གཅིག་པ་དང་༔ སངས་རྒྱས་ས་གསུམ་དག་ལ་འགོད་བྱའི་ཕྱིར༔ སྨིན་མཚམས་ཐལ་ཆེན་ཚོམ་བུའི་མཚན་མས་གདབ༔ [དེ་བཞིན་དུ་འགྲེས་ཏེ།] ལྐོག་མར་ཞག་གི་ཟོ་རིས་མཚན་མས་གདབ༔ [ཞེས་དང་།] འབུར་བཞིར་ཁྲག་གི་ཐིག་ལེའི་མཚན་མས་གདབ༔ ཨོཾ་བཛྲ་ཀཱི་ལི་ཀཱི་ལ་ཡ་མ་ཧཱ་བྷ་སྨ་མ་ཧཱ་ཀིཾ་ནི་རི་ཏི་མཧཱ་རཀྟ་ཧཱུྃ༔ [ཞེས་རྡོ་རྗེ་རྒྱལ་པོ་ནས་བརྩམས་འདུས་པ་ཐམས་ཅད་ལ་རྟགས་གདབ་བོ། །][གསུམ་པ་བསྲེ་བསྣན་བྱ་བ་ནི། སྔར་དམ་མ་འདྲེས་པའི་སློབ་བུ་གསར་པ་ཡོད་ན་དེ་རྣམས་དཀྱིལ་འཁོར་དུ་བཅུག་ནས་དམ་བསྲེ་བ་སྟེ། མཆེད་གསར་བུ་རྣམས་ལོགས་སུ་འཁོད་པ་ལ་ཁྲུས་བྱ། ལས་

བྱང་བཞིན་འབྱུང་གཏོར་བསྔོས་ཏེ་བགེགས་བསྐྲད།] རྡོ་རྗེ་སློབ་དཔོན་སངས་རྒྱས་དཔལ། [ཅེས་སོགས་ཀྱིས་རྒྱུན་བཤགས་བྱས་ཏེ། སློབ་དཔོན་གྱིས་ནང་མཆོད་བྱིན་གྱིས་བརླབས་ནས་སྨན་མཆོད་རྒྱས་པར་ཕུལ་བའི་ལྷག་མ་ལ།] ཨོཾ་བཛྲ་ཡཀྴ་ཀྲོ་ངྷ་ཧ་ན་ཧ་ན་ཧཱུྃ་ཕཊ། [ཅེས་བཟླས་པས་དམ་ཆུར་བྱིན་གྱིས་བརླབས་པའི་བདུད་རྩི་རྡོ་རྗེས་ལྕེ་ལ་ལན་གསུམ་རེ་བཞག་པས།] ཡེ་ཤེས་སེམས་དཔའི་ངོ་བོ་ཧཱུྃ་མཐིང་ནག་རེར་གྱུར་ཏེ་སྙིང་དབུས་སུ་ཐིམ་པར་ [བསམ་དུ་བཅུག་ལ།] འདི་ནི་ཁྱོད་ཀྱི་དམྱལ་བའི་ཆུ༔ དམ་ཚིག་འདས་ན་སྲེག་པར་བྱེད༔ དམ་ཚིག་བསྲུང་ན་དངོས་གྲུབ་ནི༔ རྡོ་རྗེ་བདུད་རྩིའི་ཆུ་འདིས་འགྲུབ༔ [ཅེས་བྱིན། སློབ་བུས།] ས་མ་ཡ་ན་ར་ཀན༔ [ཞེས་བྲོ་བོར་ཞིང་མྱང་། དེ་ནས་འདྲེས་ཟིན་བསྣན་པ་ནི། མཆེད་གསར་རྙིང་ཐམས་ཅད་ཀྱི་གནས་གསུམ་དུ།] ཀཱ་ཡ་སིངྔྷི་ཨོཾ༔ ཝཱ་ཀ་སིངྔྷི་ཨཱཿ ཙིཏྟ་སིངྔྷི་ཧཱུྃ༔ [ཞེས་བདུད་རྩིའི་ཐིག་ལེ་རེ་བྱ་ཞིང་། ལྕེ་ལ་བཞག་སྟེ།] རྣལ་འབྱོར་རྣམས་ཀྱི་དཀའ་ཐུབ་དམ། །རྟོགས་ན་སྐུ་གསུང་ཐུགས་ཡིན་ཏེ། །མ་རྟོགས་ན་ནི་ངན་སོང་གསུམ། །སུ་ཡང་འདའ་བར་མ་བྱེད་ཅིག །[ཅེས་བྱིན་ལ།] ས་མ་ཡ་ན་ར་ཀན༔ [ཞེས་བྲོ་བོར་དུ་བཅུག་ནས། གསར་རྙིང་གྲལ་བསྲེ་བ་ནི།] ཧཱུྃ། རྩ་བ་སྐུ་གསུང་ཐུགས་ཀྱི་དཀྱིལ་འཁོར་དུ། །བསྙེན་སྒྲུབ་རྣམ་བཞི་བསྙེན་ཅིང་བསྒྲུབ་པ་དང་། །ཡི་དམ་ལྷ་མཆོག་ཛཔ྄་བསྙེན་བགྲང་བའི་ཕྱིར། །དམ་ཚིག་རྡོ་རྗེའི་གྲལ་དུ་མཆིས་

པར་གནང་། །དེང་ཕྱིན་ཆད་མཆེད་གསར་རྙིང་ཐམས་ཅད་སྐལ་བ་མཉམ་པ་ཡིན་པས་གྲལ་གཅིག་ལ་འདུག་པས་ཆོག་པ་ཡིན་ནོ། །[ཞེས་བསྐོས་པ་ལྟར་རང་རང་གི་གྲལ་ལ་འཁོད་དོ། །][བཞི་པ་བརྡ་སྦྱར་བ་ནི། ལས་བྱང་བཞིན་བརྡ་སྒོ་དབྱེ་ཞིང་བརྡ་ཕྱག་འཚལ་བ་སྔོན་དུ་འགྲོ་བས། ཡི་དམ་ལྷའི་ང་རྒྱལ་བརྟན་པོས།] ཨོཾ་མ་ཧཱ་བཛྲ་ཧཱུྃ་ [གིས་རྡོ་རྗེ་ཐུགས་ཀར་གསོེར།] ཨོཾ་བཛྲ་གྷཎྜེ་ཧོཿ [ས་དྲིལ་བུ་གསིལ་ཞིང་དཀུར་བརྟེན།] ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭབྷཱ་ཝ་ཨཏྨ་ཀོཉཧཾ། [ཞེས་ཐུགས་ཀར་འཁྱུད་རྒྱ་བྱས་ལ་དམ་ཚིག་གསུམ་དྲན་པའི་ངང་ནས་རོལ་མོའི་སྒྲ་སྣ་ཚོགས་པ་རྒྱ་ཆེར་བསྒྲག་གོ །][ལྔ་པ་སྣོད་བཅུད་བྱིན་དབབ་པ་ནི། སློབ་དཔོན་སོགས་ཀྱིས་དཀྱིལ་འཁོར་ལ་བསྐོར་ཞིང་དར་གྱི་གཡབ་མོ་དང་དྲི་བཟང་པོའི་སྤོས་བཏུལ། རོལ་མོའི་སྒྲ་དང་སྙན་པའི་དབྱངས་ཀྱི་ང་རོ་དང་བཅས་མོས་གུས་དྲག་པོས་ཐུགས་དམ་བསྐུལ་ཏེ་བྱིན་དབབ་པས་བདག་གནས་དཀྱིལ་འཁོར་ཡོ་བྱད་དང་བཅས་པ་ཐམས་ཅད་ཡེ་ཤེས་ཆེན་པོའི་རོལ་པར་བྱིན་གྱིས་བརླབས་པར་བསམ་མོ། །དེ་དག་ནི་ཉིན་གཉིས་པའི་བྱ་བ་སྟེ་སྦྱོར་བའི་ལས་ཀྱི་རིམ་པ་རྣམས་གྲུབ་པ་ཡིན་ནོ། །][སྤྱི་དོན་གཉིས་པ་དངོས་གཞི་བསྙེན་སྒྲུབ་ཕྲིན་ལས་ཀྱི་གཞུང་བསྲང་བ་ལ་བཞི། ཐུན་བཞིའི་རིམ་པས་སྒྲུབ་པའི་གཞུང་བསྲང་། དེའི་བར་ཆད་བརྟག་ཅིང་བསལ་བ། སྒྲུབ་པའི་མཚན་མ་བརྟག་ནས་དངོས་གྲུབ་བླང་བ། ཕྲིན་ལས་ལས་ལ་སྦྱར་བའོ། །དང་པོ་ནི། སློབ་དཔོན་སྒྲུབ་པའི་གྲོགས་དང་བཅས་པ་ཁྲུས་བྱས་དྲིས་བྱུགས་ཤིང་རྒྱན་གོས་བཟང་པོས་བརྒྱན། དང་བའི་ཡིད་ཀྱིས་དཀྱིལ་འཁོར་ལ་ཕྱོགས་པར་འཁོད་དེ་བརྒྱུད་པའི་གསོལ་འདེབས་ནས་བརྩམས་ཕྲིན་ལས་ཀྱི་སྔོན་འགྲོའི་

ཆོས་རྣམས་རྒྱས་པར་བཏང་། དངོས་གཞི་ཏིང་ངེ་འཛིན་གསུམ་གྱིས་རྩ་བའི་དཀྱིལ་འཁོར་སྒོམ་པའི་ཚེ་རྒྱུའི་ཧཱུྃ་དེ་ཉིད་བྲིས་པའི་དཀྱིལ་འཁོར་གྱི་དབུས་སུ་བབས་པ་ལས་བདག་ཉིད་གཙོ་བོར་བསྐྱེད་ཅིང་བདག་མདུན་དབྱེར་མེད་དཀྱིལ་འཁོར་གསུམ་ལྡན་དུ་བསྒོམ་ནས། ཡེ་ཤེས་ཀྱི་འཁོར་ལོ་སྤྱན་དྲངས་བསྟིམས་ཤིང་ཕྱག་མཆོད་བསྟོད་པའི་བར་གཞུང་བཞིན་བྱ། བཟླས་པའི་སྐབས་ཛཔ྄་ལ་བསྐུལ་ཏེ་སྐུ་ཕྱག་རྒྱ། གསུང་ཡིག་འབྲུ། ཐུགས་ཆོས་ཉིད་ལ་དམིགས་པའི་ཛཔ྄་དགོངས་གསུམ་པོ་ལྷ་ཐམས་ཅད་ལ་འགྲེ་བར་བྱས་ལ། ཐུན་རེ་རེ་བཞིན་གཙོ་བོ་ལ་སྟོང་། ཀཱི་ལི་རིགས་ལྔ་དང་ཁྲོ་བོ་བཅུ་ལ་བརྒྱ་རེ། སྲས་མཆོག་སྒོ་སྐྱོང་རྣམས་ལ་ལྔ་བཅུ་རེ་བཟླ། བསྙེན་གྲོགས་ཀྱིས་ཁོར་ཡུག་ཀུན་ཏུ་བཟླས་པ་མ་ཆད་པར་བྱ་ཞིང་། སྐབས་སུ་དབྱངས་ཀྱི་རྟ་ལ་སྦྱར་ཏེ་ཐུན་མོང་དུ་འུར་འདོན་ཡང་བྱ། འདིར་སྟོད་ལས་བསྙེན་སྒྲུབ་ལས་སྦྱོར་ཆིག་ཆོད་བྱེད་པར་འདོད་ན། གོང་གི་ཡེ་ཤེས་ལྷ་བསྙེན་གཙོ་བོར་བཟླ་བ་བསྙེན་པའི་ཚུལ་གྱི་མཐར། ཐུགས་སྲོག་འོད་ཟེར་ལྕགས་ཀྱུས་བསྐུལ་བས་དམ་ཅན་རྣམས་ཤ་རུལ་ལ་སྦྲང་མ་འདུ་བ་ལྟར་ཐིབས་ཀྱིས་བྱོན་ཏེ་ཕྲིན་ལས་སྒྲུབ་པར་བསང་ཞིང་བཞི་སྙིང་གཅིག་དྲིལ་བཟླ་བ་དམ་ཅན་ཉེ་བསྙེན་སྒྲུབ་པའི་ཡན་ལག་དང་། སྔགས་ཀྱི་འོད་ཟེར་མེའི་ཚྭ་ཚྭ་ལྟ་བུས་དགྲ་བགེགས་ཐམས་ཅད་ཐུལ་ཐུལ་བསྲེགས་པར་བསམ་ཞིང་གབ་པའི་སྔགས་དྲུག་གམ་ཆིག་ཆོད་དུ་སྤུ་གྲིའི་དྲག་སྔགས་བཟླ་བ་ངན་སྔགས་ཉེ་བསྙེན་ལས་སྦྱོར་གྱི་ཚུལ་ཏེ། མོས་སློབ་ཀྱི་སྐབས་སུ་གྲངས་ཉེར་གཅིག་ཙམ་རེ་བཟླས་པས་ཆོག་གོ །མཐར་བརྟན་གཡོའི་ཚེ་བཅུད་བསྡུ་བའི་དམིགས་གནད་དང་བཅས།] ཨོཾ་བཛྲ་ཀཱི་ལ་ཀཱི་ལ་ཡ་སརྦ་ཨཱ་ཡུརྫྙཱ་ན་སིངྔྷི་ཕ་ལ་ཧཱུྃ་ཨཱཿ

[ཞེས་ཚེ་ཛཔ྄་ཀྱང་བརྒྱ་ཙམ་བཟླ། ཐུན་མཚམས་སུ་སྟོང་ཚིག་གིས་མཆོད་ཅིང་བསྟོད་ནས་དངོས་གྲུབ་བསྐུལ། ཐུན་གཞན་རྣམས་ལ་ཏིང་ངེ་འཛིན་གསུམ་ནས་བཟླས་པའི་བར་དང་། དགོངས་ཐུན་གྱི་མཐར་དམ་ཅན་གཏེར་སྲུང་རྣམས་ཀྱི་གཏོར་ཆོག་དང་ཚོགས་ཀྱི་མཆོད་པ་སོགས་རྗེས་ཀྱི་བྱ་བ་རྣམས་མཐར་དབྱུང་། དེ་ལྟ་བུའི་འགྲོས་ཀྱིས་སྔ་དྲོ་དགོང་མོ་སྲོད་དང་ཐོ་རངས་བཞི་སྟེ་ཐུན་བཞིའི་རིམ་པས་ཉམས་སུ་བླང་བར་བྱའོ། །][གཉིས་པ་ནི། དམ་སྲིའི་ཉམས་ལོན་གྱི་རྟགས་སུ་དོན་མེད་པར་སེམས་འཁྲུགས་ཤིང་འཐབ་རྩོད་འབྱུང་བ། དཀྱིལ་འཁོར་དང་མར་མེའི་མདངས་ཉམས་པ། ཆགས་སྡང་རང་གར་སྐྱེ་ཞིང་སྐྱོ་འཇིགས་སྙིང་མི་དགའ་བ། ནད་དང་སྡུག་བསྔལ་སློངས་བ། གྱེར་བཟླས་ཀྱིས་སུན་པ་སོགས་ཕྱི་ནང་གི་འགལ་རྐྱེན་མང་ན། སྤྱིར་རེ་དོགས་ཀྱི་བསྙེངས་བཅད་དེ་ལྟ་བས་ཟིལ་གྱིས་གནོན། བྱེ་བྲག་ཉུ་ལེ་བསྐྲད་པའི་ཆོ་ག་བྱ་སྟེ། བྲུབ་ཁུང་དུ་དམ་སྲིའི་ལིང་ག་བཅས་པ་མདུན་དུ་བཀོད་ལ] ཨེ་ཡཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་འབྱུང་པོ་རིད་ཅིང་ཉམ་ཐག་པའི་ལུས་ཅན་དུ་གྱུར་པར་བསམ་ཞིང་། ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིགས་སྔགས་དང་གཟུངས་སྔགས་དང་། སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་

འབྲས་བསླུ་བ་མེད་པའི་བདེན་པ་དང་། ཁྱད་པར་འཁོར་འདས་ཐམས་ཅད་ཀྱི་སྤྱི་དཔལ་ཡི་དམ་རྡོ་རྗེ་གཞོན་ནུ་བདུད་འདུལ་ཁྲོ་བཅུ་ཁྲ་ཐབས་སྒོ་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས་དངོས་གྲུབ་ལ་བར་དུ་གཅོད་ཅིང་ལོག་པར་ལྟ་བའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་བ་ཐམས་ཅད་མཚན་མ་རྫས་ཀྱི་རྟེན་འདི་ལ་ཁུག་ཅིག །ཏྲི་ཡཾ་ཛཿ ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ [ཞེས་དགུག་བསྟིམས་ནན་ཏན་དུ་བྱས་ལ། ཕུར་ཐུན་ཚོམ་བུར་བསྐུལ་བ་ནི།] ཧཱུྃ། ཆོས་ཀྱི་དབྱིངས་ལས་རང་བྱུང་གྲུབ་པའི་ལྷ༔ ཕུར་པ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་ཁྲོ་གཏུམ་སྐུར་སྟོན་པ༔ དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ། ང་ནི་རྡོ་རྗེ་གཞོན་ནུའི་སྐུ༔ སྲས་འཁོར་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉར་བཅས༔ ཕུར་པའི་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་པ་འདྲིལ༔ གཡོན་གྱི་ཕྱག་ན་ལྕགས་ཀྱུས་འགུགས༔ ལྕགས་ཀྱུས་ཟུངས་ལ་ཕུར་བུས་ཐོབ༔ གནོད་བྱེད་དགྲ་བགེགས་རྡུལ་དུ་བརློག༔ ཨོཾ་བཛྲ་མ་ཧཱ་ཀྲོ་ངྷ་པདྨ་ཀྲོ་ངྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་

རཾ་རཾ་ཛྭ་ལ་རཾ་ཧཱུྃ་ཕཊ༔ གནོད་བྱེད་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ༔ [ཅེས་དྲག་སྔགས་ཕུར་བསྐོར་དང་བཅས་སྲས་མཆོག་གི་ཕུར་བུ་ལིང་གའི་གནས་རྣམས་སུ་གདབ་ཅིང་། སྤུ་གྲིའི་སྔགས་བཟླ་བཞིན་དུ་ཐུན་གྱིས་བྲབ། ཁྱད་པར་དཔལ་གྱི་ཕོ་ཉ་ཀུན་ཐུབ་རྒྱལ་མོ་བསྐུལ་བ་ནི།] ཧཱུྃ། ཤར་ཕྱོགས་དཀར་མོ་དུང་གི་གཞལ་ཡས་ནས༔ ཁྲག་མདོག་དམར་མོ་བསེ་ཡི་ལན་ཕྲན་ཅིག༔ སྤྱན་རྩ་དམར་ཟླུམ་ཉི་མའི་ཟེར་ལྟར་འཕྲོ༔ སྨིན་མ་གློག་འཁྱུག་བར་སྣང་གོ་སྐབས་འབྱེད༔ བུ་ཡུག་ཐོག་འབེབས་ཤངས་ནས་རྡོ་རྗེ་འཁྲུགས༔ བཞད་པ་ཧེ་དང་དཔལ་གྱི་པུ་གྲིས་གཏམས༔ རྔམས་པའི་ལྗགས་འདྲིལ་བསྐལ་པའི་མེ་ཆེན་འབར༔ ཨག་ཚོམ་མེ་འབར་རབ་འབྱམས་སྲིད་པ་སྲེག༔ བསྐལ་པའི་འབྲུག་སྒྲ་སྙན་ནས་འབྲུག་སྟོང་སྒྲོགས༔ ལག་པ་དམར་པོ་སྤུ་གྲི་འབུམ་གྱིས་གཏམས༔ སེན་མོ་ལྕགས་ཀྱི་རྩེ་ལ་མེ་ཆེན་འབར༔ བ་སྤུ་གནམ་ལྕགས་ཞུན་མའི་རྡོ་རྗེ་འཁྲུགས༔ སྨིན་མཚམས་ལྕགས་ཀྱི་ཁྲོ་ཆུང་ཆར་འབེབས་ཤིང་༔ ཞབས་ཀྱི་ཕུར་པས་སྲིན་མོ་ལྔ་བརྒྱ་གཟིར༔ རལ་པའི་གསེབ་ནས་ཁྲག་གི་ཆར་པ་འབེབས༔ ཤིན་ཏུ་མི་བཟད་གཏུམ་ཆེན་ཁྲག་འཐུང་མ༔ སྲིན་མོའི་སྙིང་འབྱིན་ཆངས་པར་བཅུག་ནས་གསོལ༔

ཤིན་ཏུ་མི་བཟད་འབར་བའི་སྐུ་གཅིག་མ༔ དཔག་ཚད་ལྔ་བརྒྱར་རྒྱུག་ཅིང་ཀླུ་སྲིན་སྒྲོལ༔ ཁྲོས་པའི་ཞལ་མདོག་ཁྲག་གི་མཆིན་པ་ཁ༔ ན་བཟའ་དམར་པོ་སྲིན་གྱི་གཡང་གཞི་གསོལ༔ ཕྱོགས་བཅུར་ཁ་བལྟས་ཕྱོགས་སྐྱོང་ཞབས་ཀྱིས་གནོན༔ བདུད་ལ་བབས་ན་སྙིང་ཁྲག་དྲོན་མོ་གསོལ༔ སྲིན་ལབབས་ན་སྲོག་རྩ་དམར་པོ་གཅོད༔ དགྲ་ལ་བབས་ན་དུག་གི་ཁ་ཆུ་འདེབས༔ བགེགས་ལ་བབས་ན་རཱུ་པ་རྡུལ་དུ་རློག༔ དཔལ་གྱི་ཕོ་ཉ་དཔལ་གྱི་ཐུགས་ལ་སྤྲུལ༔ དམ་ཉམས་དགྲ་དང་འབྱུང་པོ་བགེགས་རྣམས་ཀྱི༔ ཕུང་པོ་དུམ་བུར་གཏུབས་ལ་དོན་སྙིང་སྲེག༔ དམ་ཉམས་ཉུ་ལེའི་བར་ཆད་རྡུལ་དུ་རློག༔ དམ་ཚིག་དུས་ལ་བབ་པོ་ས་མ་ཡ༔ ཧཱུྃཿགྲུ་བུ་གྲུ་ཨ་པ་ཙེ༔ རཱུ་པ་ཙེ༔ ན་ར་ཙེ༔ ཙ་མེ་ཐུན་ཐུན༔ ན་ཤ་སྟྭཾ་བྷ་ཡ༔ ཡཀྴ་བྱིན༔ ཡཀྴ་བྱིན༔ ཕྱེ་མ་ཕྱེ་མ༔ རྡུལ་ཕྲན་རྡུལ་ཕྲན༔ ཙིཏྟ་རྦད་ནན༔ [ཞེས་ཀུན་ཐུབ་མའི་ཕྱག་མཚན་ཁྱད་པར་གྱི་དབྱུག་པས་བསྡིགས་ཤིང་གཟིར། ཊཱ་ཀཱི་དཀར་པོས་གྲི་ཤར་བྱེད་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་པྲ་མ་རཱ་ཛ་ཏྲིག་ནན༔ པུ་ན་རཀྴ་རྦུད་ལིང་༔ ཏྲིའུ་ཏྲིའུ་མ་ཡ་ན་མོ་ཤོ་ཛ་མཱ་ར་ཡ་རྦད་རྦད༔ [ཊཱ་ཀཱི་ནག་པོས་གྲི་ལག་ལ་མི་ལྤགས་ཀྱི་ལྕགས་འབྲས་བཏགས་པས་བྲབ་ཅིང་།] ཨོཾ་སུམྦྷ་ནི་[སོགས་ཧཱུྃ་བཞི་པའི་སྔགས་

བརྗོད་ཐུན་གྱི་བྲབ་པ་སོགས་ཚམ་རྔམས་དྲག་པོས་བསྐྲད་པ་རྣམས་དུས་དྲུག་ཏུ་བྱས་པའི་རྗེས་སུ། སྒྲུབ་པ་པོ་རྣམས་རྒྱན་དང་ཆས་གོས་བསྟར་ནས་དཀྱིལ་འཁོར་ལ་བསྐོར་ཏེ་རོལ་མོ་སྣ་ཚོགས་པའི་སྒྲ་སྒྲོག་ཅིང་ཚིལ་ཆེན་དང་གུ་གུལ་བསྲེག །དར་ནག་དང་ལྕང་ལོ་མི་ལྤགས་ཀྱིས་གཡབ་ཅིང་དད་པ་མཆོག་ཏུ་བསྐྱེད་ལ་བྱིན་དབབ་པར་བྱའོ། །][གསུམ་པ་ནི། དེ་ལྟར་བརྩོན་པས་བསྒྲུབ་པ་ལ་མཚན་མའི་ལྟས་རབ་འབྲིང་ཐ་མ་གསུམ་གྱི་སྒོ་ནས་འབྱུང་བར་གསུངས་ཏེ། གནད་འཕྱང་ལས། རབ་ཕུར་པ་འགྲུབ་པ༔ འཁྲབ་པ༔ རཀྟ་མི་སྐམ་ཞིང་ཁོལ་བ༔ མར་མེ་གསལ་ཞིང་ཞག་གསུམ་འཛིན་པ་དང་། ཏིང་ངེ་འཛིན་གསལ་བ༔ ཉམས་དགའ་བ༔ དྲི་བཟང་འཐུལ་བ་ལ་སོགས་པ་འབྱུང་ངོ༔ འབྲིང་དུ་རིན་པོ་ཆེའི་གླིང་དུ་ཕྱིན་པ་དང་༔ ཉི་ཟླ་ལུས་ལ་ཤར་བ་དང་༔ ཉི་ཟླ་ལག་གིས་བཟུང་བ་དང་༔ ཉི་ཟླ་ལ་ཞོན་པ་དང་༔ དར་ཕྱར་དུང་འབུད་མེ་འབར༔ ཕུར་པ་ལ་སོགས་ཕྱག་མཚན་རྙེད་པ་འབྱུང་ངོ་༔ ཐ་མ་མེ་ཏོག་སྔོན་པོའི་གླིང་དུ་འདུག་པ་དང་༔ ནམ་མཁའ་ལ་འཕུར་བ༔ ཆུ་ཆེན་བརྒལ་བ༔ མཚོན་རྣོན་ཐོགས་པ༔ ཉམས་དཔའ་གདིང་སྐྱེ་བ་ལ་སོགས་པ་འབྱུང་ངོ་༔ ཞེས་གསུངས་པ་ལྟར་གྲུབ་པའི་མཚན་མ་དགེ་བར་མཐོང་བའམ་དུས་དང་གྲངས་ཀྱི་དམ་བཅས་བརྟན་པོ་ཐེམས་ནས་དངོས་གྲུབ་བླང་བར་བྱ་སྟེ། སླར་ཡང་མཆོད་གཏོར་གསར་པ་བཟང་དུ་བཤམས་ཤིང་དངོས་གྲུབ་ཀྱི་རྫས་སོགས་ཁ་གསོ། ཕྲིན་ལས་ཀྱི་གཞུང་བསྲང་ནས་དངོས་གྲུབ་ལ་བར་དུ་གཅོད་པའི་བགེགས་བསྐྲད་ཅིང་སྲུང་བའི་འཁོར་ལོ་བརྟན་པོར་བསྒོམ། འཁོན་གཅུག་དང་ཉམས་གྲིབ་བཤགས་ལ་བྱིན་དབབ་པ་སྔོན་དུ་འགྲོ་བས། ཡོན་ཏན་དངོས་གྲུབ་བླང་བ་ལ་དམིགས་པའི་ཛཔ྄་དགོངས་ནི།] བདག་ཉིད་དཔལ་ཆེན་པོ་ཡབ་ཡུམ་དུ་གསལ་

བའི་ཡབ་ཀྱི་གསང་གནས་ཟླ་བར་རྡོ་རྗེ་རྩེ་ལྔ་བུ་གར་ཨོཾ་གྱིས་མཚན་པ། ཡུམ་གྱི་མཁའ་པདྨ་འདབ་བརྒྱད་ལ་ཨེར་ཨོཾ་གྱིས་མཚན་པ། སྙོམས་པར་ཞུགས་པས་ཡུམ་གྱི་དུང་ཁང་ཁྲག་འཐུང་རིགས་ལྔ་གནས་པ་རྣམས་བསྐུལ་སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་ལྟ་བུ་དང་ཡུམ་ལྔའི་དྭངས་མ་མཚལ་ལྟ་བུ་ངྷུ་ཏིར་བྱུང་། མཁར་དཀར་དམར་འདྲེས་ནས་དངོས་གྲུབ་ཀུན་གྱི་སྙིང་པོར་འཁྱིལ་བ་ཡི་གེ་གསུམ་དུ་གྱུར་པ་བདག་གི་རྡོ་རྗེའི་བུ་གར་རྡུབས་ནས་དྭངས་མའི་སྲོག་ལ་ཐིམ་པས་བདེ་སྟོང་འཛིན་མེད་རང་བྱུང་གི་ཡེ་ཤེས་འབར་བར་[བསམ་ལ། དཀྱིལ་འཁོར་གསུམ་གྱི་ཛཔ྄་མཐར། ཨོཾ་ཨཱཿཧཱུྃ་སརྦ་སིངྔྷི་ཛཿཧཱུཾ་ཨཱཿ ཞེས་བཏགས་པ་ཅི་ནུས་བཟླས་ནས་གདུང་དབྱངས་དྲག་པོས།] ཧཱུཾ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ གཉིས་མེད་དག་པའི་མཁའ་དབྱིངས་ནས༔ ཡེ་ཤེས་ཁྲོ་བོ་གཤེགས་སུ་གསོལ༔ ས་མ་ཡ་ཛཿཧཱུྃ་བཾ་ཧོཿ [ཞེས་བསྐུལ་ལ་ཀ་པཱ་ལ་མཚན་ལྡན་དུ་ཁྲག་ཆང་ཨ་མྲྀ་ཏ་དང་མངར་གསུམ་སྦྱར་བ་བདུད་རྩིར་སྦ་རབ་ཐོགས་ཏེ།] ཧཱུྃ༔ འཆི་མེད་བདུད་རྩི་སྨན་གྱི་བཅུད༔ ཉོན་མོངས་གདུང་བ་སེལ་བའི་མཆོག༔ ཛ་གད་རཀྣཏའི་མཆོད་པ་འདི༔ དཀྱིལ་འཁོར་ལྷ་ཚོགས་རྣམས་ལ་འབུལ༔ [ཞེས་ཁྲག་ཆང་མཐེབ་སྲིན་གྱིས་འཐོར་ཞིང་སོ་སོའི་མཚན་སྔགས་མཐར།] མ་ཧཱ་

པཉྩ་ཨ་མྲྀ་ཏ་ཁཱ་ཧིཿ མ་ཧཱ་རཀྟ་ཁཱ་ཧི༔ [ཞེས་བཏགས་པས་མཆོད། དངོས་གྲུབ་བསྡུ་བའི་ཛཔ྄་དབྱངས་དང་བཅས་པས་དཀྱིལ་འཁོར་ལ་བསྐོར་ཞིང་ཤར་དུ་འཁོད་པས།] ཧཱུྃ༔ ལྷག་པའི་ཡེ་ཤེས་རྡོ་རྗེ་ཕུར་པའི་ལྷ༔ རང་བཞིན་དབྱིངས་ནས་རྩོལ་རྟོག་མི་མངའ་ཡང་༔ སྔོན་གྱི་ཐུགས་དམ་རང་བཞིན་བྱིན་རླབས་ནི༔ རིན་ཆེན་ནོར་བུ་དགོས་འདོད་ཀུན་འབྱུང་ལྟར༔ དུས་ལས་མི་འདའ་ཐུགས་རྗེའི་དབང་གི་ལྷ༔ སྐྱབས་ལས་མི་གཡེལ་གཡར་དམ་གཅིག་པའི་ངང༔ མི་ཟད་རིན་ཆེན་རྒྱན་གྱི་འཁོར་ལོ་ནས༔ མཆོག་དང་ཐུན་མོང་དངོས་གྲུབ་མ་ལུས་པ༔ སྐལ་ལྡན་རྣམས་ལ་དུས་འདིར་སྩལ་དུ་གསོལ༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ བརྒྱུད་འཛིན་སྲིད་ཀྱི་དངོས་གྲུབ་བསྩལ་དུ་གསོལ༔ ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ༔ [ཅེས་དང་།] ཧཱུྃ༔ དགོངས་ཤིག་རྡོ་རྗེ་ཕུར་པའི་ལྷ༔ རིག་འཛིན་མཁའ་འགྲོ་དམ་ཅན་ཚོགས༔ དབང་གྱུར་ཐམས་ཅད་དགོངས་སུ་གསོལ༔ དང་པོ་བསྙེན་ཅིང་བར་དུ་བསྒྲུབས༔ བསྐྱེད་རྫོགས་གཉིས་ཀྱི་ལས་གཞུང་བསྲངས༔

སྨིན་གྲོལ་གཉིས་ཀྱིས་རྒྱུད་ཀྱང་སྦྱངས༔ ཞག་དུས་གྲངས་དང་རྟགས་ཀྱང་ཐེམས༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ འདོད་རྒུའི་དངོས་གྲུབ་རིན་ཆེན་གཏེར༔ ད་ནི་འབྱུང་བའི་དུས་ལ་བབ༔ རྡོ་རྗེ་ཕུར་པའི་ལྷ་ཚོགས་རྣམས༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བའི༔ སངས་རྒྱས་ཕྲིན་ལས་རྫོགས་མཛད་ནས༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་དང་དངོས་གྲུབ་བདག་ལ་སྩོལ༔ ལྷ་དང་སྐལ་བ་མཉམ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སརྦ་སིངྔྷི་ཕ་ལ་ཧོ༔ [ཞེས་བརྗོད་ལ་སྒྲུབ་རྟེན་གནས་གསུམ་དུ་གཏུག་ཅིང་དམ་རྫས་རྣམས་ལ་ལོངས་སྤྱད་ནས།] ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་གྱུར་པར་[བསམ། འདིར་རྒྱས་པ་དང་ཞི་བའི་སྦྱིན་སྲེག་ཆོ་ག་བཞིན་དུ་བྱ་ཞིང་ཚོགས་ཀྱི་མཆོད་པ་རྒྱ་ཆེར་ཕུལ་ལོ། །][བཞི་པ་ནི། སྲེག་འཕང་མནན་པའི་ཆོ་ག་གསུམ་གྱིས་ངན་སྔགས་དྲག་པོའི་ཕྲིན་ལས་ཀྱི་མཇུག་བསྡུ་བ་སྟེ། རྒྱས་པ་སོ་སོའི་གཞུང་དུ་བལྟ་བར་བྱ་ཞིང་། བསྡུས་པར་གཏོར་ཟོར་རྣམས་ཕྱིར་བཏེགས་ལ་ལས་བྱང་གི་ཟོར་ལས་ཀྱི་དགྲ་ཕྱོགས་སུ་འོང་། ཚེར་མ་ཅན་གྱི་ཧོམ་གྲུ་གསུམ་བར་མེ་ཉིད་རྡོ་རྗེ་སྲིན་པོའི་ལྷ་ཚོགས་སུ་གསལ་

བའི་ཞལ་དུ་སྲེག་ལིང་ཞུན་མར་དང་བཅས་པ་སྤུ་གྲིའི་སྔགས་མཐར་སྲེག་སྔགས་བཏགས་པས་བསྲེག །མནན་རྫས་རྣམས་སྒོའི་ཕྱི་རོལ་དུ་དོང་གྲུ་གསུམ་བྲུས་པར་མནན་ལ་རོ་གཡམ་རྒྱ་གྲམ་བྲིས་པས་བཀབ་སྟེ་དམིགས་བྱ་གཤིན་རྗེའི་བཙོན་ཁང་དུ་ཚུད་པའི་སྟེང་དུ་རི་རབ་ཀྱིས་མནན་པར་བསམ་ལ་བྲོ་བརྡུང་གཞུང་བཞིན་དུ་བྱ། གཞན་ཡང་ཞི་བ་ལ་སོགས་པའི་ཕྲིན་ལས་རབ་འབྱམས་གང་གིས་སེམས་ཅན་གང་འདུལ་བ་དེ་དང་དེའི་མོས་བློ་དང་འཚམས་པའི་སྤྱོད་པ་ལ་འཇུག་པར་བྱའོ། །དེ་དག་གིས་དངོས་གཞིའི་ལས་ཀྱང་རིམ་པ་རྣམས་གྲུབ་པ་ཡིན་ནོ། །][སྤྱི་དོན་གསུམ་པ་རྗེས་མཐའ་རྒྱས་ཀྱི་བྱ་བས་མཇུག་བསྡུ་བ་ལ་བདུན། གཏོར་མ་བཏང་བ། དཀྱིལ་འཁོར་བསྡུ། མཚམས་འགྲོལ་བ། རྡུལ་ཚོན་གཤེགས་པ། སྨོན་ལམ་གདབ་པ། ཤིས་པར་བྱ་བ། དགའ་སྟོན་དང་གནས་སྲུང་བའོ། །དང་པོ་ནི། འཇིག་རྟེན་ལས་འདས་པའི་གཏོར་མ་རྣམས་དངོས་གྲུབ་ཀྱི་དོན་དུ་བཞག །དམ་ཅན་ལ་སོགས་པའི་འཕྲལ་གཏོར་རྣམས་རོལ་མོའི་སྒྲ་དང་བཅས་པས་ཡང་ཐོག་ཏུ་ཁྱེར་ལ་ཐ་ཚིག་བསྒྲག་ཅིང་བརྟན་མ་བསྐྱང་སྟེ་ཛ་གད་ཕུད་སྐྱེམས་དང་བཅས་པས་ཀྱང་མཆོད་དོ། །][གཉིས་པ་དཀྱིལ་འཁོར་བསྡུ་བ་ནི། གཏང་རག་གི་དོན་དུ་དཀྱིལ་འཁོར་གྱི་འཁོར་ལོ་ལ་ཕྱག་སྔོན་དུ་འགྲོ་བས་ཕྱི་ནང་གི་མཆོད་པ་འབུལ་ཞིང་བསྟོད་པ་བྱས་ལ་ནོངས་པ་བཟོད་པར་གསོལ། དེ་ནས་མངོན་པར་འདོད་པའི་དོན་གྲུབ་པར་གསོལ་བ་གདབ་པ་ནི།] ཨོཾ། ཁྱེད་ཀྱིས་སེམས་ཅན་དོན་དུ་ཀུན་མཛད། །[ཅེས་སོགས་དང་།] བཛྲ་མུཿ[ས། རང་བཞིན་ཡེ་ཤེས་ཀྱི་འཁོར་ལོ་ཆོས་ཀྱི་དབྱིངས་སུ་གཤེགས། རྣམ་པ་དམ་ཚིག་གི་དཀྱིལ་འཁོར་ལས་བྱང་བཞིན་ཉེར་བསྡུ་བྱས་ཏེ་རྒྱུན་གྱི་ཏིང་ངེ་འཛིན་ལ་འཇུག་གོ །][གསུམ་པ་

མཚམས་དགྲོལ་བ་ནི། ཕྱི་རོལ་གྱི་ཤར་ལ་སོགས་པར་སྔར་བཞིན་སོང་སྟེ་རྒྱལ་མཚན་བཞི་དང་སྒོ་ཕྱི་ནང་གི་ཁྲོ་བོ་གཉིས་རྣམས་ལ་མཆོད་ཅིང་བསྟོད་ནས་ཡེ་ཤེས་པ་སྐུ་གཟུགས་ཀྱི་བྱང་བུ་རྣམས་ལ་བསྟིམས་ཏེ་ལྷ་གནས་ཀྱི་མེ་ཏོག་འཐོར། ནང་དུ་ཞུགས་ལ་ཧཱུྃ་མཛད་ཀྱི་རྒྱ་དང་ལྡན་པས་སུམྦྷ་ནི་བརྗོད་ཅིང་ཕུར་བུ་རྣམས་དང་པོར་གདབ་རིམ་ལས་ལྡོག་ཕྱོགས་སུ་ཕྱུགས་ཏེ།] ཨོཾ་རུ་རུ་སྥུ་རུ་ཛྭ་ལ་ཏིཥྛ་སིངྔྷི་ལོ་ཙ་ནི་སརྦ་ཨརྠ་སཱ་ངྷ་ནི་སྭཱ་ཧཱ། [ཞེས་བཟླས་པའི་འོ་མས་ཕུར་རྩེ་བཀྲུ་ཞིང་ཁུང་བུར་ཡང་འཐོར། ལྷ་རྣམས་ཀྱང་གཤེགས་ལ་ཁུང་བུ་དགང་ངོ་།] བཞི་པ་རྡུལ་ཚོན་བསྡུ་ཞིང་གཤེགས་པ་ནི། ཆོས་ཐམས་ཅད་སྐྱེ་བ་མེད་པའི་དོན་ཡིད་ལ་བྱས་ཏེ་ཨ་ཀཱ་རོ་[བརྗོད་བཞིན་པས་གཡས་པའི་རྡོ་རྗེས་ཤར་གྱི་ཚངས་ཐིག་གི་ལམ་ནས་གཙོ་བོའི་གནས་ཀྱི་བར་དབྱི་ཞིང་ལྷག་མ་རྣམས་རྗེས་མི་མངོན་པར་འཕྱག་ལ། དོན་དུ་གཉེར་བ་རྣམས་ལ་ཅུང་ཟད་བྱིན་ནས་གཞན་རྣམས་བུམ་པར་བླུགས་ཏེ་བཀུར་སྟི་ཆེན་པོས་མཆོད། ཐིག་ཤུལ་དྲི་བཟང་གི་ཆུས་དབྱི། དུས་དེ་ཉིད་དུའམ་གཞན་གྱི་ཚེ་ནའང་རུང་སྟེ་རྡུལ་ཚོན་ཉིད་སློབ་དཔོན་སློབ་མར་བཅས་པས་བཀྲ་ཤིས་པའི་གླུ་དང་རོལ་མོ་རྣམ་པར་བཀྲ་བའི་ལྟད་མོ་སྣ་ཚོགས་དང་བཅས་པས་རྒྱུན་མི་ཆད་པའི་ཆུ་ཀླུང་ཆེན་པོའི་འགྲམ་དུ་ཁྱེར་ནས། དེའི་དྲིའི་མཎྜལ་དཀར་པོ་འདབ་མ་བརྒྱད་པའི་དབུས་དང་འདབ་མ་མེ་ཏོག་གི་ཚོམ་བུ་བཀོད། མཐར་ཉེར་སྤྱོད་དཀར་སྐྱེམས་ལྷ་བཤོས་དང་བཅས་པ་དང་། དེའི་མདུན་རྒྱབ་གང་འོས་ཀྱི་སྟེགས་བུ་མཐོ་བ་ལ་རྡུལ་ཚོན་གྱི་བུམ་པ་བཞུགས་སུ་གསོལ། མཆོད་པ་རྣམས་བྱིན་གྱིས་བརླབས་ནས། རྟེན་བསང་སྦྱང་།] སྟོང་པའི་ངང་ལས་བྃ་ལས་བྱུང་བའི་རྒྱ་མཚོ་རིན་པོ་ཆེ་དང་མེ་ཏོག་གིས་གང་བའི་དབུས་སུ་པདྨ་དཀར་

པོ་འདབ་མ་བརྒྱད་པའི་ལྟེ་བར་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་རྒྱན་ཐམས་ཅད་ཀྱིས་བརྒྱན་པ་རང་སྣང་གི་ཡུམ་དང་བཅས་པའོ། །སྙིང་ག་ནས་འོད་ཟེར་འཕྲོས་པས་ཀླུ་ཆེན་བརྒྱད་འཁོར་དང་བཅས་པ་བཛྲ་ས་མཱ་ཛཿ[ས་སྤྱན་དྲངས།] འདབ་མ་བརྒྱད་ལ་འཁོད་པ་ནི། སྟོད་ལྷའི་ལུས་ཅན་ཐལ་མོ་སྦྱར་བ། སྦྲུལ་མགོའི་གདེངས་ཀ་དང་ལྡན་པའི་སྨད་སྦྲུལ་མཇུག་ཏུ་འཁྱིལ་ཞིང་དར་དང་རིན་པོ་ཆེའི་རྒྱུན་གྱིས་བརྒྱན་པའི་འཁོར་དང་བཅས་[པར་བལྟས་ལ།] ཨོཾ་བཛྲ་སཏྭ་ཨཥྚ་མ་ཧཱ་ནཱ་ག་ཨ་ངྷི་པ་ཏ་ཡེ་ས་པ་རི་ཝཱ་ར་པུཥྤེ་[སོགས་ཀྱིས་མཆོད།] གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པའི་ཚོགས་རྣམས་རབ་འཇོམས་ཤིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་བསྟོད། །[ཅེས་བསྟོད།] ཨོཾ་རྣམས་ཀྱིས་བྱིན་གྱིས་བརླབས་པའི་རྡུལ་ཚོན་རིན་པོ་ཆེའི་རང་བཞིན་འདི་རྣམས་བདག་གིར་མཛད་ནས་མཆོད་པ་དང་། འཇིག་རྟེན་གྱི་ཁམས་སྤྱི་དང་ཁྱད་པར་ས་ཕྱོགས་འདི་དག་ཏུ་བདེ་ལེགས་

ཀྱི་དཔལ་ཕུན་སུམ་ཚོགས་པ་འཕེལ་ཞིང་མཛད་དུ་གསོལ། [ཞེས་རྡུལ་ཚོན་གཏད་དེ་ཆུ་ལ་བསྐུར་བ་དེ་རྣམས་ཀྱིས་བཀུར་སྟི་ཆེན་པོས་ས་འོག་གི་གཞིར་སྤྱན་དྲངས་པར་བསམ་ལ།] ཨོཾ་མ་ཧཱ་ནཱ་ག་ཨ་ངྷི་པ་ཏ་ཡེ་ས་པ་རི་ཝཱ་ར་གཙྪ། [ཞེས་པས་ཀླུ་རྣམས་རང་གནས་སུ་གཤེགས།] ཛཿཧཱུྃ་བཾ་ཧོཿས། རྡོ་རྗེ་སེམས་དཔའ་རང་ལ་[བསྟིམ། མཆོད་གཏོར་དང་མཎྜལ་གྱི་ཚོམ་བུ་རྣམས་ཆུར་གཤེགས་ཤིང་རེ་ཁཱ་ཡང་བཀྲུ། གང་དུ་རྡུལ་ཚོན་བླུགས་པའི་བུམ་པ་དེ་ཆུས་བཀང་ནས་སྔར་བཞིན་ཁྱེར་ཏེ་ཞི་བའི་ཕྱིར་དཀྱིལ་འཁོར་གྱི་ཁང་པ་ལ་སོགས་པར་བསང་གཏོར་བྱའོ། །][ལྔ་པ་སྨོན་ལམ་གདབ་པ་ནི། སློབ་དཔོན་འདུས་པར་བཅས་པ་རྣམས་ཀྱི་ལག་བསྣོལ་བས་སྲིན་ལག་སྦྲེལ་ཏེ་གཡོན་པས་མར་མེ་ཐོགས། རྒྱལ་ཚབ་པས་གཏོང་ཐུན་གྱིས་དྲངས་པའི་དྲངས་སྙན་པོས།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ རྡོ་རྗེ་སློབ་དཔོན་གཉན་གྱིས་དབུ་བཟུང་ནས༔ རྒྱལ་བའི་གདུང་འཚོབ་མཆེད་དང་ལྕམ་དྲལ་རྣམས༔ ནམ་ཞིག་བྱང་ཆུབ་ལམ་དུ་ཞུགས་པའི་ཚེ༔ དམྱལ་བའི་ཟངས་ཁར་ནམ་ཡང་མི་སྐྱེ་ཞིང་། གཅན་གཟན་གདུག་པའི་སྒྲ་སྐད་མི་ཐོས་ཤིང་༔ བག་ཆགས་ངན་པའི་ནད་རོ་མི་ལྡང་བརཿ རིགས་དྲུག་འཁོར་བའི་སྡུག་བསྔལ་འབྱུང་མི་འགྱུར༔ མཚོན་རྣོན་གདུག་པའི་དཔལ་གྱིས་མི་ཕོག་ཤོག༔ དགེ་བའི་བཤེས་གཉེན་བཀའ་དྲིན་ཆེ་བ་དང་༔ དམ་ཚིག་གཅིག་པའི་རྡོ་རྗེའི་མཆེད་གྲོགས་རྣམས༔

ཐབས་དང་ཤེས་རབ་འབྲེལ་བའི་གཟུངས་མ་གསུམ༔ ཚེ་རབས་འདི་ནས་སྐྱེ་བ་ཐམས་ཅད་དུ༔ མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔ ས་བཅུའི་ཁྱད་པར་རིམ་གྱིས་བགྲོད་པར་ཤོག༔ ནམ་ཞིག་ཚེ་འཕོས་འཆི་བའི་དུས་འབྱུང་ཚེ༔ གཏི་མུག་མུན་པའི་གླིང་དུ་འཁྱམས་གྱུར་ཅིང་༔ འཁོར་བའི་གཡང་ས་ཆེན་པོར་ལྟུང་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ སེམས་ཅན་ལས་ཀྱིས་མནར་བའི་སྡུག་བསྔལ་གྱིས༔ དམྱལ་བའི་ཟངས་ཁང་ནང་དུ་ལྟུང་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ང་རྒྱལ་ཁྲོ་གཏུམ་ཁེངས་པའི་སྡུག་བསྔལ་གྱིས༔ གཅན་གཟན་གདུག་པའི་སྒྲ་སྐད་ཐོས་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ འདོད་ཆགས་འཛིན་པ་ལས་ཀྱི་སྡུག་བསྔལ་གྱིས༔ གཅོང་རོང་ཟབ་མོའི་ནང་དུ་སྐྱེ་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་

མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ཕྲག་དོག་ཟུག་རྔུ་ལས་ཀྱི་སྡུག་བསྔལ་གྱིས༔ མི་བཟད་མཚོན་ཆའི་དབལ་གྱིས་ཕོག་སྲིད་ན༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ནམ་ཞིག་ས་དང་ལམ་གྱི་ཡོན་ཏན་རྫོགས༔ སྟོབས་བཅུའི་ཡོན་ཏན་ཉེ་བར་གྱུར་པའི་ཚེ༔ ཐུགས་རྗེ་གསལ་བའི་མར་མེ་དེར་སྣང་ནས༔ སྣང་བའི་གོ་འབྱེད་མདངས་དང་ལྡན་པ་འདིས༔ རིག་འཛིན་སྒྲུབ་པོ་རྣམས་ཀྱི་ལམ་སྟོན་ཤོག༔ ས་བཅུའི་ཁྱད་པར་རིམ་གྱིས་བགྲོད་པའི་ཚེ༔ ཉོན་མོངས་བག་ཆགས་མ་ལུས་བྱང་གྱུར་ནས༔ ཕ་རོལ་ཕྱིན་དྲུག་འགྲོ་དོན་དཔག་མེད་ཅིང་༔ ས་བཅུའི་རྒྱུན་མཐར་ཅིག་ཅར་རྫོགས་གྱུར་ཅིག༔ ས་བཅུའི་ཁྱད་པར་རྩེ་མོར་ཕྱིན་པའི་ཚེ། བྱང་ཆུབ་སེམས་དཔའ་རྣམས་ཀྱིས་མདུན་བསུས་ཤིག༔ བྱང་ཆུབ་སེམས་མ་རྣམས་ཀྱིས་མཐའ་སྐྱོངས་ཤིག༔ ཁྲོ་བོ་ཁྲོ་མོ་རྣམས་ཀྱིས་རྒྱབ་བརྟེན་ཅིག༔ འགྱུར་མེད་རྡོ་རྗེའི་ས་ལ་ཕྱིན་པར་ཤོག༔ ཀུན་ཏུ་འོད་ཀྱི་ས་ལ་ཕྱིན་པའི་ཚེ༔ ཡི་དམ་ལྷ་ཚོགས་རྣམས་ཀྱིས་མདུན་བསུས་ཤིག༔ བཀྲ་ཤིས་ལྷ་མོ་བརྒྱད་ཀྱིས་མཐའ་སྐྱོངས་ཤིག༔ ཡེ་ཤེས་ཁྲོ་བོ་

རྣམས་ཀྱིས་རྒྱབ་རྟེན་ཅིག༔ རྡོ་རྗེ་ལྟ་བུའི་ཏིང་ངེ་འཛིན་ཐོབ་པར་ཤོག༔ རྡོ་རྗེ་འཛིན་པའི་ས་ལ་ཕྱིན་པའི་ཚེ༔ སྔོན་ས་འབྲེལ་བའི་ལྷ་ཡིས་མདུན་བསུས་ཤིག༔ མཁའ་སྤྱོད་རིག་འཛིན་རྣམས་ཀྱིས་མཐའ་སྐྱོངས་ཤིག༔ སྒྲུབ་པའི་དཀྱིལ་འཁོར་རྣམས་ཀྱིས་རྒྱབ་རྟེན་ཅིག༔ ཡང་དག་རྡོ་རྗེའི་ལམ་མཆོག་ཐོབ་པར་ཤོག༔ འཁོར་ལོ་ཚོགས་ཆེན་ས་ལ་ཕྱིན་པའི་ཚེ༔ འདས་པའི་སངས་རྒྱས་རྣམས་ཀྱིས་མདུན་བསུས་ཤིག༔ ད་ལྟ་བཞུགས་པ་རྣམས་ཀྱིས་མཐའ་སྐྱོངས་ཤིག༔ སླད་ནས་འབྱོན་པ་རྣམས་ཀྱིས་རྒྱབ་སྐྱོར་ཅིག༔ ཡང་དག་རྡོ་རྗེའི་ས་ལ་ཕྱིན་པར་ཤོག༔ ཡེ་ཤེས་བླ་མའི་ས་ལ་ཕྱིན་པའི་ཚེ༔ ཀརྨ་ཧེ་རུ་ཁ་ཡིས་མདུན་བསུས་ཤིག༔ རང་བྱུང་ཁྲོ་རྒྱལ་རྣམས་ཀྱིས་མཐའ་སྐྱོངས་ཤིག༔ དཀྱིལ་འཁོར་ལྷ་ཚོགས་རྣམས་ཀྱིས་རྒྱབ་བརྟེན་ཅིག༔ སྐུ་གསུམ་ཡེ་ཤེས་ལྔ་ལྡན་ཐོབ་པར་ཤོག༔ རང་སྣང་དག་པའི་དཀྱིལ་འཁོར་དེར་གྲུབ་ཚེ༔ ཉིད་ལས་མི་གཞན་དག་པའི་འཁོར་རྣམས་ལ༔ མི་དམིགས་དགོངས་རྒྱུད་དག་པའི་དཀྱིལ་འཁོར་གྱིས་༔ ཏིང་འཛིན་ཆོས་ཀྱི་འཁོར་ལོ་བསྐོར་བར་ཤོག༔ སྤྲོས་མེད་དག་པའི་དཀྱིལ་འཁོར་དེ་ཉིད་ནས༔ གཟུགས་སྐུ་གཉིས་ཀྱི་འགྲོ་བའི་དཔལ་ཤར་ཚེ༔ གང་འདུལ་འགྲོ་བའི་དོན་རྣམས་ཡོངས་རྫོགས་ཏེ༔

ཁམས་གསུམ་འཁོར་བ་དོང་ནས་སྤྲུགས་པར་ཤོག༔ [ཅེས་འདུས་པ་ཀུན་གྱིས་རྗེས་ཟློས་དང་བཅས་སྨོན་ལམ་ནན་ཏན་དུ་གདབ་ཅིང་དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོའོ། །][དྲུག་པ་ཤིས་པ་བརྗོད་པ་ནི། ལས་བྱང་ནས་འབྱུང་བས་མཚོན་ཤིས་པ་བརྗོད་པའི་ཚིག་ཕྲེང་རྒྱ་ཆེར་སྤེལ་ཞིང་བཀྲ་ཤིས་ཀྱི་མེ་ཏོག་ཆར་དུ་བསྙིལ་བར་བྱའོ། །][བདུན་པ་དགའ་སྟོན་དང་གནས་སྲུང་བ་ན། སླར་ཡང་ཞག་ལྔའམ་གསུམ་ལ་སོགས་པར་བཟའ་བཅའ་མྱང་བ་ལྡག་པ་དང་ཆང་ལ་སོགས་པའི་ལོངས་སྤྱོད་ཆེན་པོ་དང་ལྡན་པས་སྐྱེ་བོ་དམ་པའི་འདུས་པ་དང་དགའ་སྟོན་རྒྱ་ཆེན་པོར་བྱ་ཞིང་། བཀྲ་ཤིས་ཀྱི་ཆོ་གས་ཕྱོགས་ཐམས་ཅད་དུ་བདེ་ལེགས་ཀྱི་སྣང་བ་ཆེན་པོས་ཡོངས་སུ་ཁྱབ་པར་བྱའོ། །ཞར་བྱུང་འཕྲོས་དོན་དུ་མོས་སློབ་ཀྱི་སྒྲུབ་ཆེན་འདྲ་འབག་ཙམ་ཡང་མི་ལྕོགས་པས་སྒྲུབ་མཆོད་སྤྱི་འགྲེ་ལྟར་བྱེད་པར་འདོད་ན། ནུབ་དང་པོ་ས་ཆོག་གིས་བཟུང་ཡན་ཆད་སྔར་བཞིན་ལས། ས་བསྲུང་གི་ཚེ་ནང་མཚམས་ནས་འབྱུང་བ་ལྟར་ཕྱོགས་སྐྱོང་ཕུར་གདབ་རྣམས་བྱས་ལ་ཆག་ཆག་གདབ་ཅིང་ཐིག་དང་ཚོན་གྱི་དཀྱིལ་འཁོར་བྲི། ནུབ་གཉིས་པ་ལ་ཕུར་བ་བྱིན་གྱིས་བརླབས་ནས་ཕུར་ཁྲོམ་སྒྲུབ་རྫས་མཆོད་གཏོར་དཀྱིལ་འཁོར་གྱི་རྒྱན་སོགས་སྡེབས་འགོད་བྱས་ཏེ་སྔགས་རྒྱས་སྤེལ་བའི་བར་ཙམ་བྱའོ། །དེ་ནས་སྒྲུབ་མཆོད་དངོས་གཞི་ཞག་གྲངས་ཇི་ཙམ་བྱེད་ཀྱི་བར་ཉིན་རེ་བཞིན་ལས་བྱང་གི་གཞུང་སྲོང་ལུགས་འདྲ་བ་ལས། ཐུན་བཞིའི་ངེས་པ་མི་དགོས་ཤིང་། འགྲུབ་ན་བདག་འཇུག་རེ་ལན། ནུབ་ཐ་མར་དངོས་གྲུབ་ལེན་པ་དང་། ལྕོགས་ན་སྦྱིན་སྲེག་བྱ། དཀྱིལ་འཁོར་བསྡུ་བ་དང་། ཕུར་བུ་ཕྱུང་ལ་རྡུལ་ཚོན་དབྱི་ཞིང་ཆུ་བོར་དོར་བ་རྣམས་ལྷག་པོར་བསྒྲུབ་པ་སྟེ། འདོར་ལེན་

གྱི་དམིགས་ཕྱེད་པར་བྱ་བ་ཡིན་ནོ། །][སྤྱིའི་དོན་གསུམ་པ་དེ་ལྟར་བསྒྲུབ་པའི་འབྲས་བུ་ནི། སྤྱི་ཆོས་ཕུང་བརྒྱད་ཁྲིའི་ཡང་སྙིང་གསང་སྔགས་རྡོ་རྗེ་ཐེག་པའི་ལྷའི་མཚན་ཐོས་པ་ཙམ་གྱི་ཕན་ཡོན་དང་བསོད་ནམས་བསམ་གྱིས་མི་ཁྱབ་ན་དཀྱིལ་འཁོར་དུ་ཞུགས་ཤིང་བསྙེན་སྒྲུབ་ཚུལ་བཞིན་ཉམས་སུ་ལེན་པ་ལྟ་ཅི་སྨོས་ཏེ། གུ་རུའི་གསུང་ལས། སྒྲུབ་ཆེན་འདི་ཡི་མཚན་ཙམ་སུས་འཛིན་པ༔ ཨོ་རྒྱན་ང་དང་སྙིང་ཁྲག་གཅིག་ཏུ་འདྲེས༔ ཡིད་གཉིས་ཐེ་ཚོམ་མེའགྲུབ་པར་མ་གྱུར་ན༔ ཨོ་རྒྱན་ང་ཡིས་ཕྱི་རབས་འགྲོ་བ་བསླུས༔ ཞེས་དང་། ཁྱད་པར་ཕུར་པ་མཁན་པོ། བཀྲ་ཤིས། དཔལ་ཆེ། ཚེ་རིང་། ནོར་ཕྱུག །འཁོར་རྒྱས། སྲིད་འཕེལ། མཐུ་ཆེ། མཐའ་བཙན་པ་སྟེ་ཡོན་ཏན་བརྒྱད་དང་ལྡན་པར་གསུངས་པ་སོགས་ཕུར་པ་རོལ་པའི་བསྐྱེད་རྫོགས་ཀྱི་རྣལ་འབྱོར་ལ་བརྩོན་པའི་ཕན་ཡོན་བསམ་གྱིས་མི་ཁྱབ་ཅིང་། སྒྲུབ་ཆེན་འདི་ལྟ་བུ་ནི་འཁོར་ཚོམ་བུ་དང་བཅས་པ་བཙན་ཐབས་སུ་འཚང་རྒྱ་བའི་ཐབས་མཁས་རྨད་དུ་བྱུང་བའི་གསེང་ལམ་ཡིན་པས་མཐོང་ཐོས་དྲན་རེག་ཙམ་གྱིས་འབྲེལ་བ་ཐམས་ཅད་ཀྱང་སྐལ་བ་དང་འཚམས་པར་རིག་འཛིན་རྣམ་པ་བཞིའི་ས་ལ་དབུགས་ཆེན་འབྱིན་པར་འགྱུར་ལ། རྩེ་གཅིག་ཏུ་མོས་ཤིང་བརྩོན་པ་རྣམས་ནས་སྐབས་གང་ལ་བརྩམས་པའི་ཕྲིན་ལས་རབ་འབྱམས་བདེ་བླག་ཏུ་འགྲུབ་པ་དང་། མཆོག་གི་དངོས་གྲུབ་ཡི་དམ་ལྷ་དང་སྐལ་བ་མཉམ་ཞིང་བོར་དོར་ལྷར་སྣང་གི་ཕྱག་རྒྱ་འགྲུབ་སྟེ་ལོངས་སྤྱོད་རྫོགས་པའི་སྐུ་དཔལ་ཆེན་པོ་རྡོ་རྗེ་གཞོན་ནུའི་གོ་འཕང་ལ་སྦྱོར་བར་འགྱུར་བ་ནི་ནམ་ཡང་མི་བསླུ་བའི་ཚད་མ་ཉིད་དུ་ངེས་པའོ། །]ཧེ་རུ་ཀ་དཔལ་མཆོག་གི་རྒྱལ་ཐབས་ཆེར། །བདེ་བར་དཀྲི་བའི་མྱུར་ལམ་སྙིང་པོའི་ཕུལ། །སྒྲུབ་ཆེན་ཆོ་གའི་ཁྲིགས་རིམ་འཇུག་བདེའི་སྐྱེས། །

གྲུབ་གཉིས་འདོད་འཇོའི་དགའ་སྟོན་བླ་ན་མེད། །འདི་ལས་རིག་འཛིན་ཚོམ་བུ་འབྲེལ་བར་བཅས། །དཀའ་བ་མེད་པར་མཆོག་ཐུན་དངོས་གྲུབ་ལ། །ཅི་དགར་ལོངས་སུ་སྤྱོད་པའི་སྐལ་བཟང་གིས། །ས་གསུམ་བཀྲ་ཤིས་སྣང་བས་ཁྱབ་བྱེད་ཤོག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྟོད་ལས་སྒྲུབ་ཆེན་གྱི་ཁོག་དབུབ་གྲུབ་གཉིས་འདོད་འཇོའི་དགའ་སྟོན་ཅེས་བྱ་བ་འདི་ནི། རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས། མཁས་ཤིང་གྲུབ་པ་བརྙེས་པའི་རྡོ་རྗེ་སློབ་དཔོན་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲང་སྟེ། རྡོ་རྗེ་གཞོན་ནུའི་རྣལ་འབྱོར་པ་འཇིགས་བྲལ་ཡེ་ཤེས་རྡོ་རྗེས་རང་ལོ་ཉེར་དགུར་སོན་པ་ཆུ་ཕོ་སྤྲེའུའི་ལོ་རྒྱལ་གྱི་ཟླ་བའི་ཐབས་ཀྱི་ཆའི་རྒྱལ་བ་དང་པོ་ལ་ཨེ་ཝཾ་བདེ་ཆེན་ཆོས་འཁོར་གླིང་གི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་འགྲོ་བ་ཐམས་ཅད་བདུད་བཞིའི་གཡུལ་ལས་རྣམ་པར་རྒྱལ་ཏེ་བཅོམ་ལྡན་འདས་རྡོ་རྗེ་གཞོན་ནུའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག། །། སརྦ་དཱ་མངྒ་ལཾ། །

སྒྲུབ་ཆེན་ཛཔ྄་བསྙེན་སྐབས་སུ་གཙོ་འཁོར་སོ་སོར་ཛཔ྄་བསྐུལ་དམིགས་བསལ་དུ་སྦྱོར་བ།

[སྒྲུབ་ཆེན་ཛཔ྄་བསྙེན་སྐབས་སུ་གཙོ་འཁོར་སོ་སོར་ཛཔ྄་བསྐུལ་དམིགས་བསལ་དུ་སྦྱོར་བར་སྤྲོ་ན།] ཧཱུྃ༔ ཆོས་དབྱིངས་འཁོར་ལོའི་གཞལ་ཡས་སུ༔ ལྷ་ཆེན་ཉི་ཟླ་པདྨའི་སྟེང་༔ དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ སྐུ་ལ་དུར་ཁྲོད་ཆས་རྣམས་རྫོགས༔ གསུང་གི་སྒྲ་སྒྲོགས་ཀཱི་ལ་ཡ༔ ཐུགས་ནི་སྒྲོལ་མཛད་སྲོག་དང་བཅས༔ མ་གསལ་བར་དུ་བསྐྱེད་ཅིང་བསྒོམ༔ མ་གྲུབ་བར་དུ་མི་བཏང་ངོ་༔ ཧཱུྃ༔ རང་བྱུང་ཕྱོགས་བཞིའི་རྩིབས་སྟེང་དུ༔ བདུད་བཞི་ཉི་ཟླ་པདྨའི་སྟེང་༔ ཡེ་ཤེས་ལྔ་ཡི་རང་མདངས་ལས༔ ཁྲོ་རྒྱལ་ཀཱི་ལ་རིགས་མཆོག་ལྔ༔ [སྐུ་ལ་སོགས།] ཧཱུྃ༔ སྟེང་ཕྱོགས་འཁོར་ལོའི་རྩིབས་སྟེང་དུ༔ ཚངས་པ་ཉི་ཟླ་པདྨའི་སྟེང་༔ ཁྲོ་བོ་ཧཱུྃ་ཀཱར་སྒྲ་འབྱིན་ཡུམ༔ སྤྲུལ་པ་ཕག་དང་རྨིག་བུའི་མགོ༔ [སྐུ་ལ་སོགས།] ཧཱུྃ༔ ཤར་ཕྱོགས་འཁོར་ལོའི་རྩིབས་སྟེང་དུ༔ དྲི་ཟ་ཉི་ཟླ་པདྨའི་སྟེང་༔ རྣམ་པར་རྒྱལ་བ་སྙེམས་མ་ཡུམ༔ སྤྲུལ་པ་སྟག་དང་བྱ་རྒོད་མགོ༔ [སྐུ་ལ་སོགས།] ཧཱུྃ༔ ཤར་ལྷོ་འཁོར་ལོའི་རྩིབས་སྟེང་དུ༔ མེ་ལྷ་ཉི་ཟླ་པདྨའི་སྟེང་༔ དབྱུག་པ་སྔོན་པོ་སྡེར་མོ་ཡུམ༔ སྤྲུལ་པ་གཡག་དང་བྱ་རོག་མགོ༔ [སྐུ་

ལ་སོགས།] ཧཱུྃ༔ ལྷ་ཕྱོགས་འཁོར་ལོའི་རྩིབས་སྟེང་དུ༔ གཤིན་རྗེ་ཉི་ཟླ་པདྨའི་སྟེང་༔ གཤིན་རྗེ་གཤེད་པོ་དུར་བདག་ཡུམ༔ སྤྲུལ་པ་ཤ་བ་འུག་པའི་མགོ༔ [སྐུ་ལ་སོགས་] ཧཱུྃ༔ ལྷོ་ནུབ་འཁོར་ལོའི་རྩིབས་སྟེང་དུ༔ སྲིན་པོ་ཉི་ཟླ་པདྨའི་སྟེང་༔ ཁྲོ་བོ་མི་གཡོ་གཏུན་ཁུང་ཡུམ༔ སྤྲུལ་པ་གཟིག་དང་ཁྭ་ཏའི་མགོ༔ [སྐུ་ལ་སོགས།] ཧཱུྃ༔ ནུབ་ཕྱོགས་འཁོར་ལོའི་རྩིབས་སྟེང་དུ༔ ཀླུ་དབང་ཉི་ཟླ་པདྨའི་སྟེང་༔ རྟ་མགྲིན་དབང་ཆེན་གཏུམ་མོ་ཡུམ༔ སྤྲུལ་པ་བྱི་ལ་པུ་ཤུད་མགོ༔ [སྐུ་ལ་སོགས༔ ] ཧཱུྃ༔ ནུབ་བྱང་འཁོར་ལོ་རྩིབས་སྟེང་དུ༔ རླུང་ལྷ་ཉི་ཟླ་པདྨའི་སྟེང་༔ འདོད་པའི་རྒྱལ་པོ་མདའ་སྙེམས་ཡུམ༔ སྤྲུལ་པ་སྤྱང་ཀི་ཁྲ་ཡི་མགོ༔ [སྐུ་ལ་སོགས།] ཧཱུྃ༔ བྱང་ཕྱོགས་འཁོར་ལོའི་རྩིབས་སྟེང་དུ༔ གནོད་སྦྱིན་ཉི་ཟླ་པདྨའི་སྟེང༔ བདུད་རྩི་འཁྱིལ་བ་རླུང་འབྱིན་ཡུམ༔ སྤྲུལ་པ་སེང་གེ་ཕ་ཝཾ་མགོ༔ [སྐུ་ལ་སོགས།] ཧཱུྃ༔ བྱང་ཤར་འཁོར་ལོའི་རྩིབས་སྟེང་དུ༔ དབང་ལྡན་ཉི་ཟླ་པདྨའི་སྟེང་༔ ཁམས་གསུམ་རྣམ་རྒྱལ་གསོད་བྱེད་ཡུམ༔ སྤྲུལ་པ་དོམ་དང་སྲེ་མོང་མགོ༔ [སྐུ་ལ་སོགས།] ཧཱུྃ༔ འོག་ཕྱོགས་འཁོར་ལོའི་རྩིབས་སྟེང་དུ༔ ས་བདག་ཉི་ཟླ་པདྨའི་སྟེང་༔ ཁྲོ་བོ་སྟོབས་ཆེན་སྐྱོད་བྱེད་

ཡུམ༔ སྤྲུལ་པ་དྲེད་དང་བྱི་བའི་མགོ༔ [སྐུ་ལ་སོགས།] ཧཱུྃ༔ ཟླ་གམ་དམར་ནག་ཨེ་ཡི་ཀློང་༔ དགྲ་བགེགས་ཉི་ཟླ་པདྨའི་སྟེང་༔ སྐུ་གསུང་ཐུགས་ལས་སྤྲུལ་པ་ཡི༔ སྲས་མཆོག་ཁྲ་ཐབས་ཉེར་གཅིག་རྣམས༔ [སྐུ་ལ་སོགས།] ཧཱུྃ༔ འབར་བའི་ཕོ་བྲང་སྒོ་བཞི་རུ༔ ཞིང་ཆེན་བཀྲམ་པའི་གདན་སྟེང་ན༔ པུ་ཤུད་ཀཾ་ཀ་སྲིན་བྱ་དང་༔ ཁྲ་གདོང་འཇིགས་པའི་སྒོ་མ་བཞི༔ སྐུ་ལ་དུར་ཁྲོད་ཆས་རྣམས་རྫོགས༔ གསུང་གི་སྒྲ་སྒྲོགས་ཀཱི་ལ་ཡ༔ ཐུགས་ནི་སྒྲོལ་མཛད་སྲོག་དང་བཅས༔ མ་གསལ་བར་དུ་བསྐྱེད་ཅིང་བསྒོམ༔ མ་གྲུབ་བར་དུ་མི་བཏང་ངོ་༔ [ཞེས་སོ་སོར་སྦྱར་ལ་བཟླས་པ་བྱས་པའི་མཐར།] ཧཱུྃ། དཔལ་ཆེན་ཕུར་བུའི་ལྷ་ཚོགས་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆགས་བཤགས། །ཐུགས་རྗེས་བརྩེར་དགོངས་དངོས་གྲུབ་སྩོལ། [ཅེས་སྟོང་ཚིག་གི་མཆོད་པའང་རེ་རེ་བཞིན་དུ་བྱའོ།། །།]

༈ ལྷ་ཡི་ལྷ་མཆོག་རྡོ་རྗེ་གཞོན་ནུ་ཆེ༔ དུས་རྣམས་རྟག་ཏུ་ཁྲོ་རྒྱལ་ཁྱེད་བསྒྲུབས་ཏེ༔ སྲོག་གི་ཕྱིར་ཡང་ཡི་དམ་མི་སྤོང་ན༔ ཡེ་ཤེས་ཐུགས་རྗེའི་སྤྱན་གྱིས་གཟིགས་སུ་གསོལ༔ ཁྲོ་རྒྱལ་འཁོར་བཅས་ཁྱེད་ཀྱི་གཟི་བརྗིད་ཀྱིས༔ བར་གཅོད་དགྲ་བགེགས་ཚོགས་རྣམས་བསལ་ནས་ཀྱང་༔ བྱམས་པའི་ཞལ་བཟང་མངོན་སུམ་སྟོན་པ་དང་༔ སྒྲུབ་པའི་འབྲས་བུ་དུས་འདིར་བསྩལ་དུ་གསོལ༔ ༈ བསྐལ་པ་དཔག་ཏུ་མེད་པའི་སྔོན་རོལ་ནས། །ལྷ་མཆོག་ཁྱེད་དང་སྨོན་ལམ་ལྷན་ཅིག་བཏབ། །ད་ལྟ་ཞལ་མཐོང་ཡི་དམ་ལྷར་གསོལ་ན། །སྙིང་པོ་བྱང་ཆུབ་མཆོག་ལ་མི་གནས་ཚེ། །ཚེ་རབས་འཁོར་བ་གར་སྐྱེ་གར་གནས་ཀྱང་། །རྗེས་སུ་ཟུང་ཞིག་བཛྲ་ཀཱི་ལ་ཡ། །དངོས་གྲུབ་སྩོལ་ཅིག་བཛྲ་ཀཱི་ལ་ཡ། བར་གཅོད་སོལ་ཅིག་བཛྲ་ཀཱི་ལ་ཡ། །དགྲ་བགེགས་སྒྲོལ་ཅིག་བཛྲ་ཀཱི་ལ་ཡ། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ།། །།

ཕུར་པ་བདུད་འཇོམས་གནམ་ལྕགས་སྤུ་གྲིའི་གཙོ་འཁོར་སོ་སོའི་སྒོས་ཛཔ྄་སྔགས་བྱང་།

[ཕུར་པ་བདུད་འཇོམས་གནམ་ལྕགས་སྤུ་གྲིའི་གཙོ་འཁོར་སོ་སོའི་སྒོས་ཛཔ྄་སྔགས་བྱང་ལས། གཙོ་བོ་ནི།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ ཛཿཧཱུྃ་ཨཱཿ [ཀཱི་ལ་རིགས་ལྔ་ནི།] ཨོཾ་བུངྔྷ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་རཏྣ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་པདྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་ཀརྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཁྲོ་བཅུ་ནི། ཨོཾ་བཛྲ་ཀྲོ་ངྷ་ཧཱུྃ་ཀཱ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་བི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཨོཾ་བཛྲ་ཀྲོངྷ་ནི་ལ་དཎྜ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་ཡ་མཱནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་ཨཱ་རྱ་ཨ་ཙ་ལ་ཧཱུྃ༔ བྷནྔྷ་བྷནྔྷ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་ཧྱ་གྲཱི་ཝ་ཧཱུྃ༔ ཧུ་ལུ་ཧུ་ལུ་ཧཱུཾ་ཕཊ༔ ཨོཾ་བཛྲ་ཀྲོ་ངྷོ་ཨ་པ་རཱ་ཛི་ཏ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྔྷ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་ཏྲཻ་ལོ་ཀྱ་བི་ཛ་ཡ་ཧཱུྃ༔ བྷིནྔྷ་བྷིནྔྷ་ཧཱུྃ་ཕཊ༔ ཨོཾ་བཛྲ་ཀྲོ་ངྷ་མ་ཧཱ་བ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ [སྲས་མཆོག་ཉེར་གཅིག་ཐུན་མོང་དུ།] ཨོཾ་ཀརྨ་ཀྲོ་ངྷ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ [སྒོ་མ་བཞི་ནི།] ཨོཾ་བཛྲ་ཀཱི་ལི་ཀཱི་ལ་ཡ་བྷིནྔྷ་ཡ་བིང་བིང་ཧཱུྃ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་ན་མཿ ས་མནྟ་ཧྲིཾ་ཧྲིཾ་ཧཱུྃ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་པྲ་སུ་རུ་ཧཱུྃ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་མཱ་ར་ཡ་ཧཱུྃ་ཕཊ༔ [བཞི་སྙིང་གཅིག་དྲིལ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔

ཨ་ཛི་ཏེ་ཨ་པ་རཱ་ཛི་ཏེ༔ མཱ་ར་སེ་ན་པྲ་མརྔྷ་ན་ཡེ་སརྦ་བིགྷྣཱན་བཾ་ཧཱུྃ་ཕཊ༔ [སྤུ་གྲིའི་དྲག་སྔགས་འདུས་པ་ནི།] ཨོཾ་བཛྲ་ཀཱི་ལི་ཀཱི་ལ་ཡ་མ་ར་ཡཀྨོ་ཡཀྨོ༔ ཀཱ་ལ་རུ་པ་སྙིང་རྩ་ལ་ཡཾ་ཡཾ༔ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་ཕྲིལ༔ སྲོག་རྩ་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ ཐུཾ་རི་ལི་ལིཿ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱུག་མྱག༔ སོད་སོད༔ ངྷ་ཏི་མ་མ་ཀརྨ༔ ཤཱིགྷྲཾ་ཀ་ར་ཡེ༔ མ་ར་སེ་ན༔ པྲ་མརྔྷ་ན་ཡེ་ཧཱུྃ་ཕཊ༔ ཚེ་ཛཔ྄་ནི། ཨོཾ་བཛྲ་ཀཱི་ལི་ཀཱི་ལ་ཡ་སརྦ་ཨཱ་ཡུརྫྙཱ་ན་སིངྔྷི་ཕ་ལ་ཧཱུྃ་ཨཱ༔ [ཞེས་སོ། །] [༈ སྨད་ལས་ངན་སྔགས་སྐབས་ཀྱི་གབ་པའི་སྔགས་དྲུག་ལས། ལྷ་དང་དབྲལ་བ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཧ་ས་ཡ་ར་ཧ་ས་ར་ཧྲཱི་དཎྜ་ཧཱུྃ་ཕཊ༔ [གཟུགས་ལ་དབབ་པ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཨཱ་བེ་ཤ་ཡ་ཨ་བེ་ཤ་ཡ་ཨ་བེ་ཤ་ཡ་ཧཱུྃ་ཕཊ༔ བྱད་དུ་གཞུག་པ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཛཿཧཱུྃ་བཾ་ཧོཿ ཤཱི་གྷྲཱཾ་ཨཱ་ན་ཡ་ཧཱུྃ་ཕཊ༔ སྨྱོ་རུ་གཞུག་པ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཛྭ་ལ་པ་ཡ་ཛྭ་ལ་ཧཱུྃ་ཕཊ༔ རྡུལ་དུ་བརླག་པ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མ་ད་ཧ་ཡ་ད་ཧ་ཡ་ཧཱུྃ་ཕཊ༔ [ཞལ་དུ་སྟོབ་པ་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་བྷིནྔྷ་ཡ་བྷིནྔྷ་ཡ་ཧཱུྃ་ཕཊ༔ ཅེས་སོ།། །།

ཟབ་གསང་མཁའ་འགྲོའི་སྙིང་ཐིག་ལས་དཔལ་ཆེན་རྡོ་རྗེ་གཞོན་ནུའི་བྱིན་འབེབས་བྱིན་རླབས་ཆར་འབེབས།

ཐྃ། །༔ ཟབ་གསང་མཁའ་འགྲོའི་སྙིང་ཐིག་ལས༔ དཔལ་ཆེན་རྡོ་རྗེ་གཞོན་ནུའི་བྱིན་འབེབས་བྱིན་རླབས་ཆར་འབེབས་ཞེས་བྱ་བ་བཞུགས་སོ༔

[ན་མོ་གུ་རུ་མུ་ཁྱོ་པདྨ་ཀ་ར་ཡེ༔ ཐྠ ངྷཾ། བྠངྷཟླནཱཤྟ༔ ཕུར་པ་བསྒྲུབ་པའི་སྐྱེས་བུ་ཡིས༔ གནས་དང་སྒྲུབ་མཆོག་བྱིན་བརླབ་ཕྱིར༔ དང་པོ་བྱིན་ཆེན་དབབ་པ་ལ༔ སྤོས་བསྲེག་རོལ་མོ་སྣ་ཚོགས་བསྒྲག༔ གདུང་བའི་དབྱངས་ཀྱིས་འདི་སྐད་དོ༔ ] ཧཱུྃ་ཧཱུྃ་ཧཱུྃ༔ དབུས་ཕྱོགས་སྟུག་པོ་བཀོད་པའི་ཞིང་༔ ཆོས་དབྱིངས་ཡེ་ཤེས་གཞལ་ཡས་ནས༔ སྐུ་མཆོག་བུངྔྷ་རིགས་ཀྱི་ལྷ༔ རྡོ་རྗེ་ཕུར་པའི་སྐུར་བཞེངས་ལ༔ སྣང་སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་བྱིན་ཕོབ་ཅིག༔ ཤར་ཕྱོགས་མངོན་པར་དགའ་བའི་ཞིང་༔ མེ་ལོང་ཡེ་ཤེས་གཞལ་ཡས་ནས༔ ཐུགས་མཆོག་རྡོ་རྗེ་རིགས་ཀྱི་ལྷ༔ རྡོ་རྗེ་ཕུར་པའི་སྐུར་བཞེངས་ལ༔ སྣང་

སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་བྱིན་ཕོབ་ཅིག༔ ལྷོ་ཕྱོགས་དཔལ་དང་ལྡན་པའི་ཞིང་༔ མཉམ་ཉིད་ཡེ་ཤེས་གཞལ་ཡས་ནས༔ ཡོན་ཏན་རིན་ཆེན་རིགས་ཀྱི་ལྷ༔ རྡོ་རྗེ་ཕུར་པའི་སྐུར་བཞེངས་ལ༔ སྣང་སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་བྱིན་ཕོབ་ཅིག༔ ནུབ་ཕྱོགས་བདེ་བ་ཅན་གྱི་ཞིང་༔ སོར་རྟོག་ཡེ་ཤེས་གཞལ་ཡས་ནས༔ གསུང་མཆོག་པདྨ་རིགས་ཀྱི་ལྷ༔ རྡོ་རྗེ་ཕུར་པའི་སྐུར་བཞེངས་ལ༔ སྣང་སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་བྱིན་ཕོབ་ཅིག༔ བྱང་ཕྱོགས་ལས་རབ་རྫོགས་པར་ཞིང་༔ བྱ་གྲུབ་ཡེ་ཤེས་གཞལ་ཡས་ནས༔

ཕྲིན་ལས་ཀརྨ་རིགས་ཀྱི་ལྷ༔ རྡོ་རྗེ་ཕུར་པའི་སྐུར་བཞེངས་ལ༔ སྣང་སྲིད་དག་པ་རབ་འབྱམས་ཀྱི༔ རོལ་པ་ཆེན་པོར་བྱིན་ཕོབ་ཅིག༔ ཧཱུྃ༔ ཀ་དག་བརྡལ་ཁྱབ་གཞལ་ཡས་ནས༔ གདོད་མའི་མགོན་པོ་ཀུན་ཏུ་བཟང་༔ ཆོས་ཀྱི་དབྱིངས་ནས་སྐུ་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ ཟག་མེད་བདེ་ཆེན་གཞལ་ཡས་ནས༔ འགྲོ་བའི་མགོན་པོ་འོད་དཔག་མེད༔ ཆོས་ཀྱི་དབྱིངས་ལས་སྐུ་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ འགྲོ་འདུལ་སྤྲུལ་པའི་ཞིང་ཁམས་ནས༔ ཐུགས་རྗེའི་བདག་ཉིད་སྤྱན་རས་གཟིགས༔ ཐུགས་རྗེའི་དབང་གིས་སྐུ་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ པདྨ་འོད་ཀྱི་གཞལ་ཡས་ནས༔ རྗེ་བཙུན་པདྨ་ཐོད་ཕྲེང་རྩལ༔ ཡེ་ཤེས་དབྱིངས་ལས་སྐུ་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ འཇམ་དཔལ་སྐུ་ཡི་དཀྱིལ་འཁོར་ནས༔ མཉྫུ་མི་དྲ་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ པདྨ་གསུང་གི་དཀྱིལ་འཁོར་ནས༔ ཀླུ་སྒྲུབ་སྙིང་པོ་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ ཡང་དག་ཐུགས་ཀྱི་དཀྱིལ་འཁོར་ནས༔ ཧཱུྃ་ཆེན་ཀཱ་ར་ཡབ་ཡུམ་ཡང་༔ ཡེ་

ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ ཆེ་མཆོག་ཡོན་ཏན་དཀྱིལ་འཁོར་ནས༔ མཁའ་འགྲོ་ལས་ཀྱི་དབང་མོ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ ཕུར་པ་ཕྲིན་ལས་དཀྱིལ་འཁོར་ནས༔ པྲ་བྷ་ཧསྟི་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ མ་མོ་རྦོད་གཏོང་དཀྱིལ་འཁོར་ནས༔ ངྷ་ན་སཾ་ཀྲྀ་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ རིག་འཛིན་སློབ་དཔོན་དཀྱིལ་འཁོར་ནས༔ རིག་འཛིན་རྡོ་རྗེ་ཐོད་པ་རྩལ༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ འཇིག་རྟེན་མཆོད་བསྟོད་དཀྱིལ་འཁོར་ནས༔ རམ་བུ་གཧྱ་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ དམོད་པ་དྲག་སྔགས་དཀྱིལ་འཁོར་ནས༔ ཤིནྟཾ་གརྦྷ་ཡབ་ཡུམ་ཡང་༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ རང་སྣང་དོན་གྱི་འོག་མིན་ནས༔ ཕུར་བུ་གྲུབ་པའི་རིག་འཛིན་རྣམས༔ ཡེ་ཤེས་སྒྱུ་མའི་སྐུར་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ སྤྱི་གཙུག་

བདེ་ཆེན་འཁོར་ལོ་ནས༔ རིག་འཛིན་རྩ་བརྒྱུད་བླ་མ་རྣམས༔ ཆོས་ཀྱི་དབྱིངས་ནས་སྐུ་བཞེངས་ལ༔ སྲིད་པའི་ཕུར་བུར་བྱིན་ཕོབ་ཅིག༔ བཀའ་དང་དམ་ཚིག་གཞལ་ཡས་ནས༔ བཀའ་སྲུང་དམ་ཅན་རྒྱ་མཚོའི་ཚོགས༔ དབྱིངས་ནས་སྐུ་བཞེངས་འདིར་གཤེགས་ལ༔ སྲིད་པའི་ཕུར་བུར་བྱིན་ཕོབ་ཅིག༔ རྣམ་དག་འོག་མིན་ཞིང་ཁམས་སུ༔ གནས་འདི་བྱིན་གྱིས་བརླབ་ཏུ་གསོལ༔ ལྷུན་གྲུབ་བདེ་ཆེན་གཞལ་ཡས་སུ༔ གནས་ཁང་བྱིན་གྱིས་བརླབ་ཏུ་གསོལ༔ རིག་འཛིན་དཔའ་བོ་མཁའ་འགྲོ་རུ༔ སྒྲུབ་མཆོག་བྱིན་གྱིས་བརླབ་ཏུ་གསོལ༔ བཀོད་པ་རབ་རྫོགས་དཀྱིལ་འཁོར་དུ༔ དཀྱིལ་འཁོར་བྱིན་གྱིས་བརླབ་ཏུ་གསོལ༔ མྱོང་གྲོལ་ཡེ་ཤེས་བདུད་རྩི་རུ༔ དམ་རྫས་བྱིན་གྱིས་བརླབ་ཏུ་གསོལ༔ རིག་འཛིན་དཔའ་བོ་མཁའ་འགྲོའི་ཚོགས༔ ནམ་མཁའི་མཐོང་ནས་སྐུ་བཞེངས་ལ༔ འཇའ་དང་འོད་ཕུང་ཐིབས་སེ་ཐིབ༔ རལ་པའི་ཐོར་ཚུགས་ལྡེམས་སེ་ལྡེམ༔ ལྕང་ལོའི་ཟར་བུ་ཏ་ལ་ལ༔ རིན་ཆེན་རྒྱན་ཆ་ཁྲོ་ལོ་ལོ༔ དྲིལ་གཡེར་སྒྲ་སྙན་སི་ལི་ལི༔ བྱིན་རླབས་ན་བུན་ཐིབས་སེ་ཐིབ༔ དངོས་གྲུབ་སྦྲང་ཆར་ཉི་ལི་ལི༔ གནས་འདིར་དབང་བསྐུར་བྱིན་ཆེན་ཕོབ༔ ཨོཾ་ཨཱཿཧཱུྃ་གུ་རུ་ངྷེ་ཝ་ཌཱ་ཀི་ནཱི་བཛྲ་

ཀཱི་ལི་ཀཱི་ལ་ཡ་སརྦ་དྷརྨ་པཱ་ལ་ཀྵེ་ཊ་པཱ་ལ་བཛྲ་ས་མ་ཡ་ཛ་ཛཿ ཨ་བེ་ཤ་ཡ་ཨ་ཨཱ༔ [ཞེས་ཡིད་ཀྱིས་དད་པ་མོས་གུས་དྲག་པོ་བསྐྱེད༔ ལྷ་རྣམས་རིམ་གྱིས་ཡིད་ལ་དྲན་བཞིན་རྒྱ་མཚོ་ལ་ཆར་བབས་པ་ལྟར་གནས་ཡུལ་སྒྲུབ་རྫས་རྣམས་ལ་ཐིམ་པར་བསྒོམ་སྟེ༔ གནས་ཞིང་ཁམས་དང་༔ སྒྲུབ་ཁང་གཞལ་ཡས་ཁང་དང་༔ དཀྱིལ་འཁོར་ལྷའི་རྟེན་དང་བརྟེན་པ༔ སྒྲུབ་རྫས་འཆི་མེད་ཡེ་ཤེས་ཀྱི་བདུད་རྩི༔ སྒྲུབ་པ་པོ་རྣམས་ཡེ་ཤེས་ལྷའི་རོལ་པ་རུ་བྱིན་གྱིས་བརླབས་ཤིང་གོ་འཕོས་པར་བསམ་པ་གནད་ཀྱི་དམ་པའོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ ཨྠྀི༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེའི་བྲག་ནས་བཏོན་ཏེ་མི་ལོ་སུམ་ཅུ་རྩ་གསུམ་བར་དུ་བཀག་རྒྱ་བྱས་མཐར་རིགས་སྲས་མཁྱེན་བརྩེའི་མྱུ་གུས་ནན་དུ་བསྐུལ་ངོར་གཏན་ལ་ཕབ་པའོ། །སརྦ་མངྒ་ལཾ༎ ། །]

ཕུར་བུའི་སྒྲུབ་ཆེན་སྐབས་ཀྱི་ཉེར་མཁོ་གཏོང་ཐུན་མདོར་བསྡུས།

༄༅། །ཕུར་བུའི་སྒྲུབ་ཆེན་སྐབས་ཀྱི་ཉེར་མཁོ་གཏོང་ཐུན་མདོར་བསྡུས་བཞུགས་སོ། །

ཨོཾ་སྭསྟི། [སྒྲུབ་པ་པོ་རྣམས་མངའ་གསོལ་ཞིང་གནས་སུ་འགོད་པའི་སྐབས་སུ་བབས་པ་ན་འདི་སྐད་ཅེས་བྱ་སྟེ།] དེང་བཀྲ་ཤིས་པའི་དགེ་མཚན་རབ་ཏུ་འཆར་བའི་དུས་འདིར། དཔལ་ཆེན་རྡོ་རྗེ་ཕུར་བུའི་དཀྱིལ་འཁོར་གྱི་འཁོར་ལོ་ཚོམ་བུ་ཚོགས་སུ་བསྒྲུབ་པར་བགྱི་བ་སྟེ། དེའང་མཛད་པ་ཆོ་འཕྲུལ་ལྷའི་ལུང་ལས་ལྷ་ཞེས་བྱ་བ་བྱང་ཆུབ་སེམས། །དེ་ནི་རྒྱུད་དུ་རབ་ཏུ་བརྗོད། །ཐ་སྙད་ཙམ་དུ་ཕྱེ་བ་ན། །གཞི་ལམ་འབྲས་བུ་གསུམ་དུ་བརྗོད། །ཅེས་སྦྱང་གཞི་འགྲོ་བ་ཐམས་ཅད་རང་བཞིན་གྱིས་ལྷའི་དཀྱིལ་འཁོར་བྱང་ཆུབ་སེམས་ཀྱི་བདག་ཉིད་དུ་གནས་ཀྱང་། སྦྱང་བྱ་གཉིས་འཛིན་ཆགས་སྡང་གི་རྣམ་པས་བྲལ་བྱའི་ཚུལ་དུ་བསྒྲིབས་པ་ཉིད།

སྦྱོང་བྱེད་དཀྱིལ་འཁོར་འཁོར་ལོའི་རྣམ་པ་ལམ་དུ་བྱས་པས། སྦྱང་འབྲས་གདོད་ནས་བཞུགས་པའི་ཟུང་འཇུག་གི་ཕྱག་རྒྱ་མངོན་དུ་བྱེད་པའི་ཐབས་ཁྱད་པར་ཅན་དང་དགོས་པ་རྗེས་སུ་འབྲེལ་བས་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ་ལ། ས་བརྟག་བསླང་སྦྱོང་ཞིང་ཕྱི་ནང་གསང་བའི་མཚམས་གཅོད། དཀྱིལ་འཁོར་བྲི་ཞིང་རྒྱན་འགོད་པ་སོགས་སྔོན་དུ་སོང་ནས། ད་ལམ་སྒྲུབ་པ་པོ་རྣམས་གནས་སུ་འགོད་པའི་སྐབས་སུ་བབས་པ་སྟེ། དེ་ཡང་གནས་ཕུན་སུམ་ཚོགས་པ་སྦས་ཡུལ་ཆེན་པོ་བཅུ་དྲུག་གི་ཡ་གྱལ་པདྨ་རྣམ་པར་བཀོད་པའི་གྲོང་ཁྱེར་རྡོ་རྗེ་ཕག་མོ་ཀླུ་འདུལ་མའི་སྐུའི་བཀོད་པ་ལས་གསང་བ་

བདེ་སྐྱོང་གི་འཁོར་ལོ་འཆི་མེད་ཡང་གསང་ཌཱ་ཀིའི་འདུ་བ་དགྱེས་པར་རོལ་པའི་གླིང་དང་ཉེ་བའི་ཆ། བདེ་བ་ཆེན་པོ་པདྨ་སཾ་བྷ་ཝ་ཡབ་ཡུམ་གྱིས་བརླབས་ཤིང་ངོ་མཚར་ཟབ་མོའི་གཏེར་གྱིས་ཕྱུར་བུར་གཏམས་པའི་ལྗོངས། མདོ་སྔགས་བཤད་སྒྲུབཀྱི་ཆུ་འོག་ཨེ་ཝཾ་བདེ་ཆེན་ཆོས་འཁོར་གླིང་དགེ་ལེགས་ཀྱི་དཔལ་ཡོན་ཕུན་སུམ་ཚོགས་པའི་དགའ་ཚལ་ག་ལ་བར། དུས་ཕུན་སུམ་ཚོགས་པ་རབ་ཚེས་དཔལ་གདོང་གི་གནམ་ལོ་གསར་དུ་ཤར་བ་དཔྱིད་ཟླ་ར་བའི་ཡར་ངོ་། བདག་ཅག་གི་སྟོན་པས་ཆོ་འཕྲུལ་བསམ་གྱིས་མི་ཁྱབ་པའི་མཛད་པ་ཆེན་པོས་མུ་སྟེགས་ཀྱི་དཔུང་ཚོགས་ཚར་བཅད་ཅིང་། སློབ་དཔོན་སངས་རྒྱས་གཉིས་པ་མདངས་ལྡན་ཀོ་ཤའི་མཚོ་གླིང་ནས་ལྷ་ཅིག་ཨིནྡྲ་བྷཱུ་ཏིས་སྲས་ཀྱི་སྐལ་པར་སྤྱན་དྲངས་ནས་ཨོ་རྒྱན་གྱི་རྒྱལ་པོར་མངའ་གསོལ་ཏེ་གུ་རུ་པདྨ་རྒྱལ་པོ་ཞེས་མཚན་གྱི་དྲིལ་ཆེན་ས་གསུམ་སྐྱེ་རྒུའི་རྣ་བའི་བཅུད་ལེན་དུ་བསྒྲགས་པར་མཛད་པའི་དུས་ཀྱི་ཆར། སྟོན་པ་ཕུན་སུམ་ཚོགས་པ་རྡོ་རྗེ་སློབ་དཔོན་ལྟ་བ་གཉིས་སུ་མེད་པའི་གདེང་དང་ལྡན། སྒོམ་པ་བསྐྱེད་རྫོགས་ལས་སུ་རུང་། སྤྱོད་པ་ས་མ་ཡ་འབུམ་སྡེ་རྣམ་པར་དག །དབང་དང་མན་ངག་གི་བཀའ་བབ། ཡོ་ག་གསུམ་གྱི་དོན་ཐུགས་སུ་ཆུད། །གསང་བའི་གཉེར་

ཐུབ་ཅིང་རྒྱུད་ཀྱི་དངོས་པོ་བཅུ་ལ་མཁས་པ། སྒྲུབ་པའི་ལས་རིམ་ལ་མ་རྨོངས་ཤིང་མན་ངག་ཉམས་མྱོང་དང་ལྡན་པ། ངང་རྒྱུད་རིང་ཞིང་ཕན་སེམས་ཆེ་བ། ཚོགས་ཀྱི་དཀྱིལ་འཁོར་ཆེན་པོའི་མགོན་དང་དཔུང་གཉེན་དུ་བཞུགས་པ་འདི་ལྟར་དང་། འཁོར་ཕུན་སུམ་ཚོགས་པ་བདེ་ཆེན་རྒྱུད་ལ་སྐྱེད་པའི་འཁོར་གཟུངས་མ་ལུས་ངག་ཡིད་གསུམ་གྱི་མཚན་ཉིད་དང་ལྡན་པ། རིགས་ལྔའི་དངོས་གྲུབ་སྒྲུབ་པའི་འཁོར་རྡོ་རྗེ་རིན་ཆེན་པདྨ་ལས་ཀྱི་རིགས་ཀྱི་གཙོ་བོ་བཞི་ཡུམ་དང་བཅས་པ། དོན་གཉིས་ཕྲིན་ལས་སྒྲུབ་པའི་འཁོར་རྒྱལ་ཐེབ་ཀྱི་སྟོན་པ་བཞི། བར་ཆད་དགྲ་བགེགས་སྒྲོལ་བའི་འཁོར་རྡོ་རྗེ་སྤྱན་པ་དང་རྡོ་རྗེ་མཚམས་པ་གིང་དང་བཅས་པ། མཆོད་པའི་ཞལ་ཟས་སྦྱོར་བའི་འཁོར་རྡོ་རྗེ་དྲོད་འཛིན་བྱན་ཕོ་བྱན་མོ་དང་བཅས་པ། དད་འདུས་དང་བརྩོན་འགྲུས་ཆེ་བ། ལྷག་པར་རྒྱལ་ཐེབ་རྣམས་ཀྱང་དབང་དང་དམ་ཚིག་ལྡན་ཞིང་ཐོས་བསམ་གྱིས་རྒྱུད་དག །དེ་ཁོ་ན་ཉིད་ལ་བློ་སྦྱངས་པ་ཤ་སྟག་ལགས་པ་དང་། ཡོ་བྱད་ཕུན་སུམ་ཚོགས་པ་འཚོ་བ་ཟས།

ནད་ཟློག་སྨན། དགྲ་ཟློག་མཚོན་སོགས་ཕྱིའི་ཡོ་བྱད། རྟེན་རྫས། སྒྲུབ་རྫས། རྒྱན་རྫས། མཆོད་རྫས། དབང་གི་རྫས་ཏེ་ནང་གི་ཡོ་བྱད། ཏ་ན་གྷ་ན། ཤེས་རབ་སྙིང་རྗེ་སྟེ་གསང་བའི་ཡོ་བྱད་དུ་བཤད་པ་སྤྱི་དང་། ཁྱད་པར་ཕྲིན་ལས་ཀྱི་ལུང་ལས་གསུངས་པའི་ཕོ་བྲང་ཨེ་ཁྲམ་འབར་བའི་དཀྱིལ་འཁོར་སོགས་ཐུན་མོང་མ་ཡིན་པའི་རྟེན་སྒྲུབ་མཆོད་པའི་དམ་རྫས་གཙང་ལ་མ་ཚང་བ་མེད་པར་འདུ་བྱས། དཀྱིལ་འཁོར་གྱི་རི་མོ་བཀྲ་ཡ་ལེ། སྣང་གསལ་མར་མེ་འོད་ལྷག་གེ །བདུག་སྤོས་ཀྱི་དྲི་ངད་ཐུད་ལེ། རྡོ་རྗེ་མཆེད་ལྕམ་སྤྲེ་དགའ་དང་བྱིན་རླབས་ཐིབས་སེ་འདུ་བའི་སྐབས་འདིར། བརྒྱུད་པ་དགུའི་བཀའ་བབ་འཛིན་ཅིང་ཡོན་ཏན་བརྒྱད་དང་ལྡན་པའི་སྟོན་པ་རྡོ་རྗེ་སློབ་དཔོན་ཉིད་འདས་པ་རྒྱ་མཚོའི་མགོན་དུ་རྡོ་རྗེའི་ཁྲི་ཆེན་པོ་ལ་བཞུགས་ཏེ་གཡོ་མེད་ཀྱི་དགོངས་པས་བྱིན་གྱིས་རློབས་པར་ཞུ། དེ་དང་དགོངས་པ་མཉམ་ཞིང་དཀྱིལ་འཁོར་གྱི་ལས་རབ་འབྱམས་སྒྲུབ་པར་ནུས་པའི་རྡོ་རྗེའི་རྒྱལ་ཚབ་ཆེན་པོ་བཞི་ཕྱོགས་བཞི། ཡབ་ཀྱི་དགོངས་པ་དང་བསྟུན་ཞིང་སྦྱོར་བའི་སྒྱུ་རྩལ་ཤེས་པའི་གཟུངས་མ་ཀུན་ཏུ་བཟང་མོ་རྣམས་ཡབ་ཀྱི་གཡོན་ཟུང་། ཆོས་འཆད་པ་རྡོ་རྗེ་རྒྱལ་ཐེབ། དངོས་གྲུབ་ཀྱི་རྫས་སྟེར་བའི་རིན་ཆེན་རྒྱལ་ཐེབ། དབང་བསྐུར་

བའི་བྱ་བ་བྱེད་པ་དབང་གི་རྒྱལ་ཐེབ། ཕྲིན་ལས་ཀྱི་གཞུང་བསྲང་བ་ལས་ཀྱི་རྒྱལ་ཐེབ་རྣམས་ཀྱང་ཕྱོགས་བཞི། ཕྱི་ནང་བར་ཆད་སྲུང་བའི་བརྟུལ་ཞུགས་ཅན་རྡོ་རྗེ་མཚམས་པ་ནུབ་བྱང་། སྒྲོལ་བའི་ལས་དང་བརྡ་ལ་མཁས་པ་རྡོ་རྗེའི་ཀིང་ཀར་རྣམས་ལྷོ་ནུབ། གཡོ་སྒྱུ་མེད་པར་མི་མ་ཡིན་མཐོང་ཞིང་ཉུ་ལེའི་བར་ཆད་ཟློག་ནུས་པའི་མིག་རྣོན་རྡོ་རྗེ་སྤྱན་པ་དང་། དུས་སྦྱོར་དབྱུ་གུ་སོགས་ལ་མཁས་ཤིང་ཕྲིན་ལས་ཀྱི་སྐབས་ཕྱེད་པ་རྡོ་རྗེ་དྲོད་འཛིན་པ་གཉིས་བྱང་ཤར། བག་ལྡན་གཙང་སྦྲ་ཆེ་ཞིང་རྣམ་སྨིན་ལ་འཛེམ་པའི་རྡོ་རྗེ་བྱན་ཕོ་བྱན་མོ་དང་། ང་རྒྱལ་མེད་ཅིང་བཀའ་བཞིན་སྲི་ཞུ་ལ་བརྩོན་པའི་རྡོ་རྗེ་རྡུལ་ཕྱག་པ་རྣམས་ཤར་ལྷོ། མཆེད་ལྕམ་རིན་པོ་ཆེ་ལྟ་བུའི་གང་ཟག་རྣམས་གྲལ་གྱི་བར་དུ་བཞུགས་ཏེ། ཐམས་ཅད་ཀྱང་ཆོས་སྤྱོད་ལ་བརྩོན་འགྲུས་ཆུང་བ་ལུས་ཀྱི་སྐྱོན་དང་། སྨྲ་བ་མང་ཞིང་བཟླས་པ་ལ་མི་བརྩོན་པ་ངག་གི་སྐྱོན་དང་། ཞེ་སྡང་ཆེ་ཞིང་བྱམས་པ་ཆུང་བ་ཡིད་ཀྱི་སྐྱོན་དང་། བརྗེད་ངེས་ཆེ་ཞིང་བག་ཟོན་ཆུང་བ་དམ་ཚིག་གི་སྐྱོན་དང་། ཆང་ལ་དགའ་ཞིང་གཉིད་ཆེ་བ་ཏིང་ངེ་འཛིན་གྱི་སྐྱོན་དང་། གཡེང་བ་ལ་དགའ་ཞིང་བསྒོམ་སྒྲུབ་ལ་སྐྱོ་བ་དད་པའི་སྐྱོན་ཏེ་སྐྱོན་དྲུག་པོ་རྣམ་པ་ཐམས་ཅད་དུ་སྤང་ཞིང་། རྟོགས་པ་ཆེ་བས་

ཆོས་ཉིད་དང་མི་ཕྱེད་པ། དད་གུས་ཆེ་བས་བླ་མ་དང་མི་ཕྱེད་པ། དམ་ཚིག་ཆེ་བས་ཡི་དམ་དང་མི་ཕྱེད་པ། བརྩེ་གདུང་ཆེ་བས་མཆེད་ལྕམ་དང་མི་ཕྱེད་པ། བརྟུལ་ཞུགས་ཆེ་བས་དམ་རྫས་དང་མ་ཕྱེད་པ། སྦྱོར་སྒྲོལ་ལ་བརྩོན་པས་གཟུངས་མ་དང་མི་ཕྱེད་པ། སྙིང་རྗེ་ཆེ་བས་སེམས་ཅན་དང་མི་ཕྱེད་པ། ཏིང་ངེ་འཛིན་གསལ་བས་དངོས་གྲུབ་དང་མི་ཕྱེད་པ། སྐྱོན་དང་བྲལ་བས་འབྲས་བུ་སངས་རྒྱས་དང་མི་ཕྱེད་པ་སྟེ་ཡོན་ཏན་དགུ་པོ་ལ་རྣམ་པ་ཀུན་ཏུ་བརྩོན་ཞིང་། གཞན་ཡང་རྩ་རྒྱུད་ལས། སྙིགས་མའི་དུས་ཀྱི་སྟོན་པ་དང་། །ད་ལྟའི་སངས་རྒྱས་འདི་དག་ལ། །ཐ་དད་དུ་ནི་ཅུང་མིན་བརྟག །རྡོ་རྗེ་གསང་བའི་གྲོགས་དག་ཀྱང་། །དེ་དང་རྗེས་སུ་མཐུན་པར་བལྟ། །སྒོ་གསུམ་གུས་པས་བརྩོན་བྱ་ཞིང་། །ཞེས་གསུངས་པའི་དོན་ལ་བསླབ་ཅིང་རང་རང་གིས་གཉེར་དུ་འོས་པའི་ལྟ་དགོངས་ཕྲིན་ལས་ལ་གཡེལ་བ་མེད་པར་བཀའ་གསང་གཉན་པོའི་གཞུང་དང་མཐུན་པར་ཁུར་དུ་བཞེས་ཏེ་འདོད་པའི་དངོས་གྲུབ་བདེ་བླག་ཏུ་བསྒྲུབ་པར་བགྱིའོ་སྙམ་པའི་ཐུགས་འདུན་དང་ལྡན་པའི་ངང་ནས་འདིའི་རྗེས་ཟློས་གནང་བར་ཞུ། །༈ [དཔལ་གྱི་རྟགས་གདབ་པའི་སྐབས་སུ།] འདིར་འདུས་པའི་སྒྲུབ་པ་པོ་རྣམས་དོན་གྱི་དག་པ་

སྦྱར་བས་ལྷ་དང་གཉིས་སུ་མེད་པར་རྟོགས་པ་དང་། རྟགས་ཀྱི་ཕྱག་རྒྱ་བཅིངས་པས་མཁའ་འགྲོ་དམ་ཅན་ཕོ་མོ་རྣམས་ཀྱིས་སྒྲུབ་པ་པོར་ཤེས་པ་དང་། བར་ཆད་བདུད་ཀྱིས་མི་ཚུགས་ཤིང་ཐབས་ཀྱི་ཐེག་པའི་རིགས་སུ་ངེས་པའི་འབྲས་བུ་མྱུར་དུ་འགྲུབ་པ་སོགས་དགོས་པ་དུ་མ་དང་ལྡན་པའི་ཕྱིར། སྔོན་དཔལ་ཆེན་པོས་རཱུ་དྲ་སྡེ་གསུམ་བཏུལ་ཞིང་དེའི་ཆས་རྣམས་དཔའ་བའི་རྟགས་སུ་བཞེས་པ་ལྟར་ད་ལམ་སྒྲུབ་པ་པོ་རྣམས་ལ་དཔལ་གྱི་ཆས་གོས་ཀྱིས་མངའ་གསོལ་བས་དུག་ལྔ་རྩད་ནས་གཅོད། སྟོབས་བཅུ་དང་མི་འཇིགས་པ་ལྡན། མ་མོ་མཁའ་འགྲོ་ཐམས་ཅད་ལ་དབང་བསྒྱུར། གདུག་པ་ཅན་ཟིལ་གྱིས་མནན། ཡི་གེ་འཁོར་ལོ་ཚོགས་ཆེན་གྱི་ས་ལ་མངའ་མཛད་པ་དཔལ་ཆེ་ཁྲག་འཐུང་ལྷའི་ཚོམ་བུའི་དགོངས་པ་ལས་གཡེལ་བ་མེད་པའི་ངང་ནས་འདིའི་རྗེས་ཟློས་གནང་བར་ཞུ། །༈ [མར་མེ་སྨོན་ལམ་གྱི་སྐབས་སུ།] དེ་ལྟར་ཕུན་སུམ་ཚོགས་པ་ལྔས་གཞི་བཟུང་། བསྙེན་སྒྲུབ་ཡན་ལག་བཞིས་གཞུང་བསྲངས། ལག་ལེན་རྩིས་འགོ་ཚང་བས་ཁྲིགས་ལ་ཕབ་སྟེ་ཚོམ་བུ་ཚོགས་སྒྲུབ་ཆེན་མོ་བར་ཆད་མེད་པར་མཐར་ཕྱིན་ནས། རྗེས་མཐའ་རྒྱས་ཀྱི་བྱེ་བྲག་རྟེན་འབྲེལ་ཁྱད་འཕགས་སྣང་གསལ་མར་མེའི་སྨོན་ལམ་ཟབ་

མོ་གདབ་པའི་སྐབས་སུ་བབས་པ་སྟེ། དེའང་སངས་རྒྱས་ཐམས་ཅད་ཀྱི་དགོངས་པ་འདུས་པའི་མདོ་ཆེན་པོ་ལ། སྒྲོན་མེའི་སྣང་བ་མི་ཤེས་པ། །མཐོང་བྱ་ཀུན་ལ་མུན་པས་བསྒྲིབ། །ནམ་ཡང་སྣང་བར་མི་འགྱུར་ཏེ། །ལོང་བའི་གྲོང་ཁྱེར་ཆེན་པོར་འགྲོ། །སྒྲོན་མེ་འབར་བ་གང་བསྲེལ་བ། །ཀུན་ལ་མུན་པ་སངས་གསལ་བའི། །མ་ནོར་མ་བཅོས་དེ་བཞིན་ཉིད། །སྒྲོན་མ་དམིགས་བུས་མཐོང་བར་འགྱུར། །ཞེས་གསུངས་པ་ལྟར་མི་ཤེས་པའི་མུན་པ་སེལ་ཞིང་གནས་ལུགས་ཀྱི་སྣང་བ་མཚོན་པར་བྱེད་པ་ནི་སྒྲོན་མེའི་མིང་དུ་གྲགས་ཏེ། གསང་བའི་བདག་པོས། རིན་ཆེན་འབར་བའི་སྒྲོན་མ་བསྲེལ་བར་བྱའོ། །ཞེས་བརྡའི་སྒོ་ནས་བསྟན་པ་བཞིན། བྱང་ཆུབ་ཀྱི་སེམས་དངོས་པོའི་གཟུགས་དང་བྲལ་བ་ཁྱད་ཆོས་དྲུག་ལྡན་ཡེ་ཤེས་ཀྱི་འོད་ཕུང་དུ་འབར་ཞིང་གཞོན་ནུ་བུམ་སྐུའི་ཚུལ་དུ་བཞུགས་པ་ནི་མཚོན་བྱ་དོན་གྱི་མར་མེ། གཞི་ལས་གཞི་སྣང་དུ་གཡོས་ཏེ་ལྷུན་གྲུབ་རང་སྣང་གི་སྒོ་ནས་ཤར་ལུགས་ཆེན་པོ་བརྒྱད་ཀྱིས་འཁོར་འདས་ཀྱི་སྣང་བ་སྣ་ཚོགས་སུ་སྣང་བ་ནི་མཚོན་པ་བརྡའི་མར་མེ། རྒྱུ་སྐུ་དང་ཡེ་ཤེས། རྐྱེན་འོད་དང་ཁ་དོག །བྱེད་ལས་སྒྲོན་མ་བཞིར་སྨིན་ཏེ་འཁོར་ལོ་བཞིའི་དབུས་སུ་སྙིང་པོའི་འོད་གསལ་ཐིག་ལེ་ཆེན་པོ་རྟོག་པ་མེད་པའི་སྐུ་འཆར་བ་ནི་མཚོན་བྱེད་རྟགས་ཀྱི་མར་མེ་སྟེ།

དེ་དག་རྟེན་ཅིང་འབྲེལ་འབྱུང་གི་དབང་ལས་སྣང་གསལ་མར་མེ་འདིས་མཚོན་བྱེད་བྱས་ནས། ཡེ་ཤེས་ཆེན་པོའི་སྣང་བས་ཉོན་མོངས་པའི་མུན་ཁང་བཅོམ། རྒྱུ་དྲུག་འཁོར་བའི་སྒོ་རྩད་ནས་བཅད། རྡོ་རྗེ་ཁྲོ་རྒྱལ་རྣམས་ཀྱི་ཞལ་མཐོང་། རང་བྱུང་སྣང་བ་བཞིས་ཤུལ་མཚོན། རིག་སྟོང་ཁྱབ་བརྡལ་ཆེན་པོས་རྒྱབ་སྐྱོར། རང་གྲོལ་ཅོག་བཞག་སྤྱོད་པས་མཐའ་བརྟེན་ཏེ། བགྲོད་པར་བྱ་བའི་ས་དང་ལམ་གྱི་རིམ་པ་མཐའ་དག་བགྲོད་དུ་མེད་པ་ཚུལ་གྱིས་སྲིད་གསུམ་ཡོངས་དག་དྭངས་སྲོག་ཐིག་ལེ་ཆེན་པོའི་ཀློང་དུ་བགྲོད་ནས། ཆོས་ཐམས་ཅད་གདོད་ནས་སྐྱེ་འགག་འཕོ་འགྱུར་དང་བྲལ་བ་གཞི་རྫོགས་ལྷུན་གྲུབ་ཆེན་པོར་གདིང་ཆེན་ཐོབ། དབུགས་ཆེན་ཕྱིན། རྩལ་ཆེན་རྫོགས་པའི་ཐུགས་འདུན་རྩེ་གཅིག་པའི་ངང་ནས་སྨོན་ལམ་གྱི་རྗེས་ཟློས་གནང་བར་ཞུ། [ཞེས་སོ་སོར་མཚམས་སྦྱར་ཏེ་གཞུང་ཚིག་གི་དབྱངས་བོར་ལེན་ལ་འཇུག་གོ །འདི་ནི་རབ་ཚེས་དཔལ་གདོང་གི་ལོར་ཕུན་སུམ་དགའ་ཚལ་གྱི་བསྟི་གནས་སུ་སྒྲུབ་ཆེན་བཙུག་སྐབས་ཉེ་བར་མཁོ་བའི་ཡན་ལག་ཏུ་བྲིས་པ་སྟེ། གཞན་དུ་གནས་དང་དུས་ཀྱི་ཁྱད་པར་སྐབས་ཐོབ་བཞིན་ཁ་བསྒྱུར་ཏེ་འབྲེལ་བསྡེབས་ཤེས་པར་བྱའོ། །ཞེས་པའང་ལྷ་རིགས་ཀྱི་སྔགས་བན་འཇིགས་བྲལ་ཡེ་ཤེས་རྡོ་རྗེས་སོ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་མཆོག་གི་ཕྲིན་ལས་དམ་རྫས་བདུད་རྩིའི་སྒྲུབ་ཐབས་དངོས་གྲུབ་རྒྱ་མཚོའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་མཆོག་གི་ཕྲིན་ལས་དམ་རྫས་བདུད་རྩིའི་སྒྲུབ་ཐབས་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་མཆོག་གི་ཕྲིན་ལས་དམ་རྫས་བདུད་རྩིའི་སྒྲུབ་ཐབས་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ། །བླ་མ་དང་ཧེ་རུ་ཀ་གཉིས་སུ་མེད་པའི་ཞབས་ལ་ཕྱག་འཚལ་ལོ། །མ་དག་གཙང་དང་དམེ་བར་ཡོངས་ཞེན་ཉོན་མོངས་དུག་ལྔའི་ལྕགས་ཁམས་བདུད། །རྟོག་བྲལ་ཟུང་འཇུག་བདེ་བ་ཆེ་དངོས་ཡེ་ཤེས་མཆོག་གི་གསེར་འགྱུར་རྩིས། །རྡོ་རྗེ་མི་ཤིགས་ཀུན་ཏུ་བཟང་པོ་རྟག་པ་དམ་པར་རྒྱས་འདེབས་མགོན། །ཁྱབ་བདག་བླ་མ་ཧེ་རུ་ཀ་ཀྱེ་གྲུབ་གཉིས་བྱིན་ཆེན་དེང་ཕོབ་ཅིག །གསང་ཆེན་ལམ་གྱི་ཆེ་བ་མཆོག་ཐུན་གྱི། །དངོས་གྲུབ་རྒྱ་མཚོ་བདེ་བླག་སྦྱིན་པའི་ཕུལ། །དམ་རྫས་ར་སཱ་ཡ་ན་སྒྲུབ་པའི་ཚུལ། །

ངོ་མཚར་བདུད་རྩིའི་དགའ་སྟོན་འདི་ན་སྤྲོ། །[དེ་ཡང་དཔལ་ཆེན་ཕྲིན་ལས་འདས་པའི་དཀྱིལ་འཁོར་གྱི་འཁོར་ལོ་ལ་བརྟེན་ནས་རྡོ་རྗེ་ཐེག་པའི་དམ་ཚིག་གི་རྫས་ར་སཱ་ཡ་ནའི་སྒྲུབ་པ་ཟབ་མོ་ཇི་ལྟར་ཉམས་སུ་ལེན་པའི་ཚུལ་འཇུག་བདེ་སྙིང་པོར་དྲིལ་ནས་འཆད་པ་ལ་སྤྱི་དོན་རྣམ་པ་བདུན་སྟེ། བདུད་རྩིའི་ངོ་བོ་བཞག་པ། ངེས་ཚིག་བཤད་པ། བསྟེན་པར་གསུང་ཚུལ། རྣམ་གྲངས་ཀྱི་དབྱེ་བ། དམ་རྫས་བསགས་ཚུལ། སྒྲུབ་པ་ཉམས་སུ་བླང་བ། དེའི་ཕན་ཡོན་བསྟན་པའོ། །][དང་པོ་ནི། འདི་ལྟར་འཁོར་འདས་ཐམས་ཅད་ཆོས་ཀྱི་དབྱིངས་བཟང་ངན་ཕྱོགས་ལྷུང་བྲལ་བའི་ཀློང་དུ་རོ་གཅིག་ཅིང་གདོད་མ་ཉིད་ནས་རང་བཞིན་གྱིས་རྣམ་པར་དག་པ་ནི་བདུད་རྩིའི་ངོ་བོ་སྟེ། བམ་བརྒྱད་ལས། སྲིད་གསུམ་ཡེ་ནས་བདུད་རྩི་ལྔ། །མ་བཅོས་ལྷུན་གྲུབ་རྗོགས་སངས་རྒྱས། །དུས་གསུམ་སྲིད་གསུམ་སྐུ་གསུང་ཐུགས། །ཡེ་ནས་བདུད་རྩི་ཡིན་པའི་ཕྱིར། །ངེས་པའི་ཀློང་ནས་བཀའ་བསྩལ་ཏོ། །ཞེས་

པས། སྲིད་པ་གསུམ་གྱིས་བསྡུས་པའི་ཉོན་མོངས་པ་ལྔ་དང་། འདོད་པའི་ཡོན་ཏན་ལྔ་དང་། འབྱུང་བ་ལྔ་དང་། ཕུང་པོ་ལྔར་སྣང་བ་ཐམས་ཅད་ཀྱང་རིགས་ལྔ་ཡབ་ཡུམ་གྱི་རང་བཞིན་ཅན་དུ་མངོན་པར་བྱང་ཆུབ་པའི་ཕྱིར། སངས་རྒྱས་ཀུན་དང་མཉམ་སྦྱོར་བའི། །རང་བྱུང་གདོད་ནས་རྣམ་པར་དག །ཅེས་གསུངས་སོ། །][གཉིས་པ་ནི། ཨ་མྲྀ་ཏའི་སྒྲ་ལས་འཆི་བ་མེད་པ་ཞེས་བདུད་རྩིར་འཇུག་པ་སྟེ་འཆི་བའི་འཇིགས་པ་སེལ་བའི་གསོས་སུ་གྱུར་པའི་ཕྱིར། རྣམ་རྟོག་གི་བདུད་ལ་རིག་པ་ཡེ་ཤེས་ཀྱི་རྩིས་འདེབས་པས་ན་བདུད་རྩི་སྟེ། ལུང་རབ་གསལ་ལས། གཙང་དམེར་འཛིན་བདུད་དམ་རྫས་རྩིས། །ཡེ་ཤེས་ངང་དུ་རོ་གཅིག་པ། །ཞེས་དང་། འཁོར་འདས་ཀྱི་ཆོས་ཐམས་ཅད་ཡེ་ཤེས་ཆེན་པོར་རྒྱས་འདེབས་པའི་སྨན་ཡིན་པའི་ཕྱིར་ཆོས་སྨན་ཞེས་ཀྱང་བྱ་སྟེ། མན་ངག་ལས། འཁོར་འདས་ཆོས་ཀུན་ཡེ་ཤེས་སྨན༔ བརྡ་བརྟགས་ཆོས་སྨན་དེ་སྤྱད་ན༔ ཉོན་མོངས་དུག་རྣམས་སྨན་དུ་འགྱུར༔ ཞེས་སོ། །]༡གསུམ་པ་ནི། ངེས་ཚིག་དེ་ལྡན་གྱི་བདུད་རྩི་དེ་ཉིད་ཡེ་ནས་བླང་དོར་མེད་པའི་ཆོས་ཉིད་ཀྱི་རོལ་པ་ཡིན་པས་དང་། རིགས་ལྔའི་རང་བཞིན་ཡིན་པས་དང་། དངོས་གྲུབ་སྒྲུབ་པའི་རྫས་ཡིན་པས་དང་། མཁའ་འགྲོ་རྣམས་འདུ་ཞིང་བརྟུལ་ཞུགས་སྤྱོད་པའི་གྲོགས་སུ་འགྱུར་པས་ན་དང་དུ་བླང་བར་བྱ་བ་ཡིན་ཏེ། རྒྱུད་ལས། ར་སཱ་ཡ་ན་སྨན་ཆེན་པོ། །ཟོས་པས་མཆོག་ཐུན་དངོས་གྲུབ་ཐོབ། །ཅེས་སོགས་གསུངས་སོ། །][བཞི་པ་ནི། བདུད་རྩིའི་རྒྱུད་ལས། གཙོ་བོ་དམ་རྫས་བདུད་རྩི་ལྔ། །རྩ་བ་བརྒྱད་ལ་ཡན་ལག་སྟོང་། །དམ་རྫས་རྩི་བཅུད་སྨན་དུ་སྦྱར། །ཞེས་གསུངས་པས། སྨན་རྩ་བ་བརྒྱད་ལ་ཡན་ལག་སྟོང་དུ་ཚང་བར་སྦྱོར་བ་སྟེ། འདི་དག་གི་དབྱེ་བསྡུ་རྣམ་གྲངས་ཇི་སྙེད་པ་ཞིག་འབྱུང་བ་གཞན་དུ་བཤད་པ་ལས་ཤེས་སོ། །][ལྔ་པ་དམ་རྫས་ཀྱི་

རྒྱུ་བསགས་པ་ནི། རྫས་ཀྱི་གཙོ་བོ་བདུད་རྩི་ལྔ་དང་ཤ་ལྔ་སྟེ། དེ་དག་དངོས་ནི་དེང་དུས་ཚད་ལྡན་ལག་ཏུ་ཐེབ་པར་དཀའ་ཞིང་རྟོག་པའི་དབང་གིས་གསག་ཏུའང་མི་བཏུབ་པས་གཏེར་བྱོན་རིགས་དང་རིག་འཛིན་གོང་མ་རྣམས་ཀྱིས་བསྒྲུབས་པའི་ཆོས་སྨན་ལ་ཚང་བས་ན་སེལ་མེད་ཁུངས་ལྡན་གྱི་ཕབ་རྒྱུན་ཉིད་གཞིར་བཞག །སྨན་སྦྱོར་ལག་ཏུ་བླང་བྱ་རྩ་བ་བརྒྱད་ཕྱོགས་མཐུན། ཙནྡན་སྨུག་པོ། མཱུ་ལ་པ་ཏྲ། [ མ་ནུ།] ལི་ཤི། གནྔྷ་བྷ་དྲ། [རྒྱ་ཤུག ལོ་མ།] གུར་གུམ། ཛཱ་ཏི། ག་བུར། ཤིང་ཚྭ་རྣམས་ལ་བྱ་ཞིང་། ཡན་ལག་གི་སྨན་སྤྱིར་སྣང་ཞིང་སྲིད་པའི་རྩི་བཅུད་ཐམས་ཅད་སྨན་དུ་སྦྱོར་བར་གསུངས་པས་རྒྱ་བལ་མོན་བོད་སོགས་ནས་བྱུང་བའི་སྨན་སྣ་ཇི་ཙམ་ཚོགས་པ་དང་། བཞུ་བ་དང་མི་བཞུ་བའི་ཁམས་ཀྱི་རིན་པོ་ཆེའི་རིགས་སུ་གྱུར་པ། མི་དང་འདབ་ཆགས་སྡེར་ཆགས་རི་དྭགས་གཡུང་དྭགས་ཆུ་གནས་ས་འཛུལ་རྣམས་ཀྱི་ཤ་ཁྲག་སྙིང་སྣ་དབང་པོ། ལྔ་ཚན་ལྔ། དཀར་མངར་འབྲུ་སྣ་སོགས་སྦྱོར་དུ་མི་རུང་བ་འགའ་ཡང་མེད་པས་གང་འཛོམ་བསགས། འོན་ཀྱང་གནས་སྐབས་སུ་དུག་རིགས་གཙོས་ནུས་པ་དྲི་རོ་ཁ་དོག་ཤ་མེ་ཏོག་གི་སྤྱང་ཀི་རྣམས་སྤང་བྱར་བཤད་པས་མི་སྦྱོར། སྨན་གང་ཡང་རྒྱུ་དང་ཁུངས་དག་ལ་བམ་རུལ་འཁྱགས་པ་སོགས་སྐྱོན་གྱིས་མ་གོས་ཤིང་ཧ་ཅང་རྙིང་ཆེས་པ་སོགས་མ་ཡིན་པར་གཙང་ལ་ཁ་དོག་དྲི་རོ་མ་ཉམས་པ་ཁོ་ན་སྦྱར། རིན་པོ་ཆེ་དང་དབང་རིལ་གྱིས་མཚོན་གཡའ་སེལ་དུག་འདོན་ངར་འདོགས་དགོས་པའི་རིགས་རྣམས་གསོ་རིག་གི་གཞུང་ལས་བཤད་པ་ལྟར་བྱ། ཤ་སྣ་སོགས་དངོས་སུ་མ་འཛོམ་པའམ་རྟོག་པས་མ་ཆུན་ཀྱང་བཏང་སྙོམས་སུ་བཞག་མི་རུང་བས་ཟན་ལ་མི་དང་དུད་འགྲོ་རྣམས་ཀྱི་གཟུགས་མང་དུ་འཆོས་ཏེ་ནྲྀ་ལྗང་གུ་ལས་མི་དང་སུ་སེར་པོ་ལས་དུད་འགྲོའི་

རིགས་བརྒྱ་སྟོང་མང་པོ་གསལ་བཏབ་པའི་མཐར་སོ་སོའི་ཚེ་ཟད་པས་ལས་ཀྱིས་ཤི་བའི་ཕུང་པོ་ཤ་ཁྲག་ཏུ་དམིགས་ལ་དམ་རྫས་ཀྱི་རྒྱུར་སྦྱོར་བར་གསུངས། སྨན་གྱི་སྦྱར་ཚད་གཞུང་དང་ཕྱག་ལེན་རྣམས་ལས་འདྲ་མིན་མང་ཡང་ཕྱག་ལེན་དངོས་གཙང་བའི་ལུགས་གཅིག་ལ་མཚོན་ན། གཞི་ཨ་རུ་ར་ཁོ་ན་ལ་བྱེད་དགོས་པས་གང་མང་དང་དེའང་རུས་པ་དང་ཕྲལ་བ་བྱུང་ན་ལེགས། བ་རུ་བ། ཀྱུ་རུ་ར། གུར་གུམ་རྣམས་དེའི་བཞི་ཆ་རེ། ཙནྡན་དཀར་དམར། ཨ་ཀ་རུ་ནག་པོ་རྣམས་བསྡོམས་པ་བཞི་ཆ་གཅིག །ནཱ་གི་དུལ་མ། གི་ཝཾ། ཅུ་གང་། ལི་ཤི། ཛཱ་ཏི། སུཀྨེལ། ཀ་ཀོ་ལ་རྣམས་བསྡོམས་པ་བཞི་ཆ་གཅིག །བཟང་སྨན་གཞན་ཐམས་ཅད་བསྡོམས་པ་བཞི་ཆ་གཅིག །སྔོ་སྨན་རིགས་དང་ཤ་སྣ་སོགས་ནང་སྨན་ཕྱོགས་བསྡོམས་བརྒྱད་ཆ་གཅིག །དབང་ལག་བཞི་ཆ་གཅིག ལི་ག་དུར། སྦྲང་བུར་ཀ་ར་རྣམས་བཞི་ཆ་ཙམ་སྦྱོར་བ་ཡིན་ལ། བཟང་སྨན་དཀོན་ན་བུང་བསྐྱེད་རུ་རྟ་དང་ལི་ག་དུར་རྟ་མོན་པ་སོགས་ཅུང་མང་བ་བཏང་དུ་བཏུབ། སྤང་སྤོས་ཀྱིས་མཚོན་པའི་སྔོ་སྨན་རིགས་རྣམས་མང་ན་མི་ལེགས། །སྤྱིར་སྨན་སྦྱོར་ལེགས་པའི་ཚད་ནི་མི་དོག་བཟང་ལ་རྟག་ཏུ་མི་བཏུབ་པ། དྲི་བཟང་ལ་ངོས་བཟུང་དཀའ་བ། རོ་ཞིམ་ལ་སྨྲར་མེད་པ། ཟོས་ན་ཁ་ཟས་གཞན་གྱིས་སྨན་ངད་མི་འཕྲོས་པ་འབྱུང་ཞེས་གསུངས། དེ་ལྟར་སྦྱར་ཚད་ངེས་པའི་སྒོ་ནས་བསགས་ལ་གཞུང་གི་དངོས་བསྟན་དུ་ཐོག་མར་སྨན་རྣམས་ཁྲོལ་བུར་བསྒྲུབ་ཅིང་གཏོད་བཏགས་བཙག་སོགས་བྱ་བ་ཡིན་ཀྱང་། སྨན་བུང་མང་ཞིང་སྒྲུབ་ཞག་གྲངས་བཅད་ཀྱི་སྐབས་འདིར་འཇུག་པ་མི་བདེ་བས་ཡོངས་གྲགས་དཀྱུས་ཀྱི་ཕྱག་ལེན་སྟབས་བདེའི་དབང་དུ་སྨན་ཕྱེ་སྔ་ཚགས་སུ་ཚུད་པར་བྱས་ན་ལེགས་པས། གཤལ་གསལ་ཁྲོལ་

སྒྲུབ་རྟེན་རིགས་དབྱེ་མཚོན་ཙམ་སོ་སོར་བཞག །བྱིངས་རྣམས་ཕྱོགས་གཅིག་ཏུ་ཞིབ་མོར་བཏུལ་ནས་དར་ཚགས་ལ་དྲངས། ཞིབ་པ་ལྟར་སྣང་ཡང་རླན་གྱིས་སྦོལ་སྐབས་རྩིང་སྐྱོན་འབྱུང་བས་དར་ཚགས་ཀྱང་ཞིབ་པར་བྱས་ལ་སྨན་ཕྱེ་རྣམས་དར་གོས་བཟང་པོའི་སྒྱེའུར་བླུག་གོ །][དྲུག་པ་སྒྲུབ་པས་ཉམས་སུ་བླང་བ་ལ་གསུམ། སྦྱོར་བ། དངོས་གཞི། རྗེས་ཀྱི་རིམ་པའོ། །དང་པོ་ལའང་དྲུག །བསྙེན་པ་གསོ་བ། སྒྲུབ་པའི་གཞི་བཟུང་བ། སྤྱི་བཤགས་བྱ་བ། སའི་ཆོ་ག །རྟེན་གྱི་དཀྱིལ་འཁོར་འདུ་བྱ་བ། དེར་དམ་རྫས་འགོད་པའོ། །དང་པོ་ནི། གཞིའི་བསྙེན་པ་སྔོན་དུ་སོང་བས་ལས་རིམ་འདིའི་ཆེད་དུ་ལྷག་པའི་ལྷའི་བཟླས་པ་ཞག་བདུན་གྱིས་མཐའ་བརྟེན་པས་ཁ་གསོ་བྱའོ། །གཉིས་པ་ནི། སྟོན་འཁོར་གནས་དུས་ཡོ་བྱད་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ་སྟེ། གཞན་སྤྱི་དང་འདྲ་བ་ལས་འདིར་བསྟན་ཁྱད་པར་གྱི་ཡོ་བྱད་རྣམས་ཚང་ཞིང་། བདུད་རྩི་སྒྲུབ་པའི་དུས་སྟོན་དཔྱིད་བསིལ་དྲོད་སྙོམས་པའི་ཡར་གྱི་ངོའི་ཚེས་བརྒྱད་ལ་ཤིས་པར་གསུངས་སོ། །གསུམ་པ་ནི། མཐུན་རྐྱེན་གྱི་དཔུང་བསྐྱེད་པའི་ཕྱིར་སྤྱི་བཤགས་བྱ་བ་སྟེ་སྒྲུབ་ཁོག་ཏུ་སྨོས་པ་བཞིན་ཅི་འགྲུབ་བྱའོ། །]བཞི་པ་ནི། ས་བརྟག་པ། སློང་བ། སྦྱོང་བ། བཟུང་བ། བསྲུང་བ་རྣམས་དང་། ལྷག་པར་གནས་པའི་རིམ་པ་སོགས་སོ། ལྔ་པ་ནི། ཕྱི་ནང་གསང་བའི་མཚམས་བཅད་པ། མ་ཏྲཾ་བསྒྲལ་ཞིང་ཆག་ཆག་གདབ་པ། ཐིག་ཚོན་གྱིས་རྟེན་དཀྱིལ་འཁོར་བཞེངས་པ་རྣམས་རྩ་བའི་སྒྲུབ་གཞུང་བཞིན་ལ། ཁྱད་པར་ཁྲོལ་སྒྲུབ་ཀྱི་དཀྱིལ་འཁོར་མཎྜལ་ལ་འབྲུ་དཀར་བདུད་རྩི་ལྔས་སྦགས་པས་ཚོམ་བུ་བཀོད་པ་བཀྲམ་མོ། །དྲུག་པ་ནི། ཀ་པཱ་ལ་མཚན་ལྡན་ལྔ་ཚོམས་སུ་ཤོང་

བའི་རིན་པོ་ཆེའི་སྣོད་ཀྱི་དབུས་དང་ཕྱོགས་མཚམས་སུ་སྨན་ཕྱེ་རྣམས་དང་ཁྲོལ་སྒྲུབ་རྟེན་བཅས་རིགས་སོ་སོར་ཕྱེ་ནས་འགོད་དེ། མན་ངག་ལས། མཚན་ཉིད་ལྡན་པའི་ཀ་པཱ་ལར༔ དབུས་སུ་གཙོ་བོར་བྱུང་བ་ནི༔ ན་རའི་[མིའི་ཤ།] ཤ་དང་མཱུ་ཏྲ་[དྲི་ཆུ།] སྟེ༔ བརྡ་དང་རིགས་སུ་གྱུར་པའི་སྨན༔ རུ་རྟ་གླ་རྩི་སྤོས་དཀར་དང་༔ པྲི་ཡཾ་ཏིཀྟ་པི་ལིང་སོགས༔ ཁ་དང་ཚྭ་བའི་རོ་རྣམས་བསགས༔ ཤར་དུག་[བ་ལང་ཤ།] པི་བིཥྛ་དང་༔ ར་མོ་ཤག་དང་རྩ་བ་དྲུག༔ [རྩ་བ་ལྔ་དང་གྲོ་མ།] བྲག་ཞུན་ཛཱ་ཏི་ཨ་རུ་ར༔ ཤིང་མངར་སྦྲང་རྩི་ཀ་ར་སོགས༔ མངར་བའི་རིགས་རྣམས་ཚོགས་པར་བྱ༔ ལྷོ་རུ་ཧ་ལ་[རྟ་ཤ།] ཤུ་ཀྲ་དང་༔ [ཁུ་བ།] དབང་ལག་ག་བུར་ཐལ་དཀར་རྡོར༔ སུཀྨེལ་ཅུ་གང་སྐྱུ་རུ་ར༔ སྟར་བུ་བསེ་ཡབ་ལ་སོགས་པ༔ བ་ལང་ཤ། དྲི་ཆེན། སྐྱུར་བའི་རོ་དང་ལྡན་པ་བསགས༔ ནུབ་ཏུ་ཤྭ་[ཁྱི་ཤ།] ན་རཀྟ་[ཁྲག]དང་༔ ག་དུར་སིནྔྷུ་ཙན་དན་དམར༔ ལི་ཤི་རྒྱ་མ་ཚྭ་ཅོག་ལ་སོག་ས༔ ལན་ཚྭའི་རོ་རྣམས་ཚོགས་པར་བྱ༔ བྱང་དུ་ཏསྟི་[གླང་ཆེན་ཤ།] གོ་རོ་ཙ༔ [ཀླད་པ།] ག་བུར་ཅོང་ཞི་ཙན་དན་དཀར༔ ཞོ་ཤའི་རིགས་དང་རྟག་ཏུ་ངུ༔ ཀཎྜ་ཀཱ་རི་སླེ་ཏྲེས་སོགས༔ སྐ་བ་གཙོར་གྱུར་ཐམས་ཅད་བསགས༔ ཅེས་པ་ལྟར་ཐོད་པ་ལྔ་སོ་སོའི་རྫས་ཀྱི་བཀང་བ་ལས་ལྷག་པར་དབུས་ཀྱི་ཐོད་པའི་རྫས་ཉིད་ཆེས་མཐོ་བར་བྱས་ལ། སོ་སོའི་དབུས་སུ་གཙོ་བོ་བདུད་རྩི་ལྔ་དང་ཤ་ལྔ་རིགས་བསྡེབས་པ་སྙིང་པོར་བྱ་ཞིང་། ཐོད་པ་དབུས་མའི་ཁར་བླ་མ་གོང་མ་རྣམས་ཀྱི་གདུང་རིང་བསྲེལ་བདུད་རྩིའི་ཕབ་གཏའ་སེལ་མེད་རྣམས་ཆང་དང་སྦྱར་བ་གསེར་ལ་སོགས་པའི་སྣོད་དུ་བཞག་ལ་རིགས་དང་མཐུན་པའི་དར་གྱིས་བྷཉྫ་རྣམས་ཁ་དག་པ། མཚམས་བཞིར་ཐོད་པ་སོགས་སུ་རིམ་པ་བཞིན་ཤར་ལྷོར་འོ་མ། ལྷོ་ནུབ་ཏུ་རིན་པོ་ཆེ། ནུབ་བྱང་དུ་ཆང་། བྱང་ཤར་དུ་ཆུ་རྣམས་བཞག །གཞི་སྟེགས་སྟེང་གི་སྒྲུབ་དཀྱིལ་ཁར་ལྷ་ཕུར་རྣམས་དགྲམ་ཞིང་། ལྡིང་ཁྲི་རིམ་པ་བར་མའི་དབུས་སུ་ཁྲོལ་བུའི་དཀྱིལ་འཁོར་མཎྜལ་བཀྲམ་པའི་ཁར་མཉྗིའི་སྟེང་དུ་སྨན་གྱི་

བཅས་གཤོམ་དེ་ཉིད་སྦྱོང་ཁྲུས་སྔོན་དུ་འགྲོ་བས།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ དམ་རྫས་རྩ་བ་བརྒྱད་དང་ཡན་ལག་སྟོང་། འབྲས་བུ་སྐུ་གསུང་ཐུགས་སུ་རབ་སྦྱར་ནས༔ དུག་ལྔ་མ་སྤངས་སྐུ་གསུམ་ལྷུན་གྱིས་གྲུབ༔ དབྱིངས་ནས་སྤྱན་དྲངས་སངས་རྒྱས་སྐུར་བསྐྱེད་དེ༔ ཕྱོགས་བཅུ་དུས་གསུམ་འཕགས་པ་མཆོད་པ་དང་༔ རྣལ་འབྱོར་དབང་ཕྱུག་ཐུགས་དམ་བསྐང་བའི་ཕྱིར༔ གསང་བ་མཆོག་གི་དབུས་སུ་བཞུགས་སུ་གསོལ༔ ཨོཾ་སརྦ་པཉྩ་ཨ་མྲྀ་ཏ་ས་མ་ཡ་ཏིཥྛ་ལྷན༔ [ཞེས་རོལ་མོ་དང་བཅས་པས་བཀོད། སྟེང་ནས་དར་སྣ་ཚོགས་ཀྱིས་བཀབ་ཅིང་ཚོན་སྐུད་ལྔས་རྒྱ་གྲམ་དུ་བཏབ་པའི་སྣེ་མོར་རྡོ་རྗེ་བཏགས་ཐོད་པ་དབུས་མའི་ཁར་བཞག །སྣེ་མོ་གཅིག་ཤོས་ལས་སྟེང་དུ་དམུ་ཐག་དང་ཕྱོགས་བཞིར་གཟུངས་ཐག་ཏུ་དྲང་། སྨན་ཁང་ལ་ནང་ནས་རིམ་བཞིན་མཐིང་དམར་དཀར་བའི་དར་ཡོལ་སུམ་རིམ་བྲེ། སྟེང་དུ་ཚངས་པའི་ཕོ་བྲང་དུ་གྲགས་པ་རྒྱ་གདུགས་ལྟ་བུའི་དབུས་སུ་ཚངས་པ་བརྒྱ་བྱིན་གྱི་སྐུ་དང་རྔ་ཡབ་དཀར་པོ་ཀུ་ཤའི་ཆུན་པོ་རྣམས་བཏགས། ཤམ་བུའི་ནང་ངོས་སུ་རྒྱུ་སྐར་ཉེར་བརྒྱད་ཀྱི་ཙཀླི་རྒྱབ་ཏུ་སོ་སོའི་སྔགས་བྱང་བྲིས་པ་དར་གྱི་འཕུར་ལྕེ་དང་ལྡན་པ་རྣམས་བྱང་ཤར་བྲ་ཉེ་ནས་བརྩམས་ཏེ་གཡས་སྐོར་དུ་ཕྱོགས་མ་འཆོལ་བར་བཀོད། དེའི་རྒྱབ་ངོས་ཕྱོགས་མཚམས་སུ་མེ་ལོང་བཅུ་ལ་མཚལ་གྱིས་ཁྲོ་བོ་བཅུའི་སྔགས་བྲིས་པ་དང་། བར་མཚམས་རྣམས་སུ་དར་དཔྱང་དྲིལ་གཡེར་སོགས་ཀྱིས་མཛེས་པར་བརྒྱན། ཚངས་པ་བརྒྱ་བྱིན་གྱི་སྐུ་དང་ཕོ་བྲང་གི་བར་དམུ་ཐག་གིས་སྦྲེལ། ཁྲོལ་བུའི་ཕྱོགས་མཚམས་སུ་ཐོད་པ་

བདུད་རྩི་ཅན་སོགས་དང་། སྒྲོམ་ཁྲིའི་རིམ་པ་དང་པོར་བུམ་པ་སོགས་འགོད། གཞན་ཡང་དཀྱིལ་འཁོར་གྱི་མཐའ་སྐོར་དུ་ཕུར་བུ་རལ་གྲི་བ་དན་རྒྱལ་མཚན་ཕྱི་ནང་གསང་བའི་མཆོད་པ་གཏོར་ཚོགས་སྤྱན་གཟིགས་སོགས་མཛེས་ཤིང་བཀྲ་བའི་རྒྱན་གྱི་ཁྱད་པར་ཇི་སྙེད་པ་རྣམས་ལེགས་པར་བཤམས་ཤིང་། ཕྲིན་ལས་ལ་འཇུག་པའི་ཡན་ལག་སོགས་སྒྲུབ་གཞུང་བཞིན་བྱའོ། །][གཉིས་པ་དངོས་གཞི་ལ་གསུམ། སྒྲུབ་པའི་དཀྱིལ་འཁོར་གཞུང་བསྲང་བ། སྨན་ཁྲོལ་བུར་སྦྱོང་བ། ཕྱེ་མ་བསྒྲུབ་པའོ། །དང་པོ་ནི། སྐྱབས་སེམས་སོགས་སྦྱོར་བའི་ཆོས་རྣམས་སྔོན་དུ་འགྲོ་བས། དངོས་གཞི་བདག་སྒྲུབ་པ་པོ། མདུན་རྟེན་བྲིས་པའི་དཀྱིལ་འཁོར། སྒྲུབ་རྫས་བདུད་རྩི་གསུམ་ཀ་རང་བཞིན་དབྱེར་མེད་གཅིག་ཏུ་སྒོམ་པའི་དོན་ཤེས་པས་ཕྲིན་ལས་ཀྱི་གཞུང་བསྲང་སྟེ། རྗེས་ཚོགས་མཆོད་སོགས་མཇུག་གི་ལས་རིམ་རྣམས་དང་། དེ་དག་གི་སྐབས་ཅི་རིགས་པར་བར་གཅོད་ཉུ་ལེ་འདུལ་ཞིང་བྱིན་དབབ་པ་སོགས་སྒྲུབ་ཆེན་གྱི་ཁོག་དབུབ་དང་མཐོང་བརྒྱུད་ཕྱག་ལེན་ལས་རྟོགས་པར་བྱ་བ་ཡིན་ནོ། །][གཉིས་པ་ཁྲོལ་བུར་སྦྱོར་བ་ལ་གཉིས། དངོས་དང་། མཇུག་དོན་ནོ། །དང་པོ་ནི། དེ་ལྟར་རྩ་བའི་དཀྱིལ་འཁོར་སྒྲུབ་མཆོད་ཛཔ྄་ཀྱི་མཐར་ཐུག་པའི་བདག་མདུན་སྒྲུབ་རྫས་གསུམ་དབྱེར་མེད་དུ་བྱས་ནས། སླར་དམིགས་ཕྱེད་པའི་ཕྱིར་སྨན་གྱི་དཀྱིལ་འཁོར་ཛཔ྄་ཁང་དབྱེ་བ་ལྟར་མདུན་དུ་ཕྱེས་ནས་སྒྲུབ་པ་སྟེ། དེ་ལ་བཅུ་ལས། དང་པོ་སྨན་དམ་ཚིག་པར་བསྐྱེད་པ་ནི། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭབྷཱ་ཝ་ཨཏྨ་ཀོཉ་ཧཾ་གིས་བསང་སྦྱང་། སྟོང་པའི་ངང་ལས་སྐད་ཅིག་གིས༔ སྣོད་ནི་པདྨ་བྷཉྫ་ཆེ༔ རྡོ་རྗེ་བཙུན་མོའི་བྷ་ག་དང་༔ དབྱེར་མེད་གསང་

བ་མཆོག་ཞི་ཞིང་། རང་བྱུང་མཚན་ཉིད་ཡོངས་ཚོགས་དབུས༔ བཅུད་རྣམས་རིགས་ལྔ་ཡེ་ཤེས་ལྔ༔ བདུད་རྩིའི་རྒྱ་མཚོ་ཆེན་པོར་འཁྱིལ༔ མཁའ་ཁྱབ་འོད་ཟེར་འཕྲོ་བའི་ཀློང་༔ སྣ་ཚོགས་པདྨ་ཉི་མའི་སྟེང་༔ ཧཱུཾ་ལས་རྡོ་རྗེ་ཧཱུཾ་གིས་མཚན༔ སྤྲོ་བསྡུའི་འོད་ཀྱི་གོང་བུ་ལས༔ སྤྱི་དཔལ་རིགས་གཅིག་ཧེ་རུ་ཀ༔ བདུད་རྩི་འཁྱིལ་བ་སྐུ་མདོག་ལྗང་༔ བཙོ་མ་གསེར་གྱི་མདངས་འོད་འཚེར༔ ཞལ་གཅིག་ཕྱག་གཉིས་ཁྲོ་ཆགས་ཚུལ༔ མི་བཟད་གར་དགུའི་གཟི་འོད་འབར༔ ཕྱག་གཡས་སྣ་ཛོགས་རྡོ་རྗེ་དང་༔ གཡོན་པས་བདུད་རྩིའི་བྷནྔྷ་འཛིན༔ དུར་ཁྲོད་འཇིགས་པའི་ཆས་ཀྱིས་བརྒྱན༔ རང་འོད་རྡོ་རྗེ་བདུད་རྩི་མ༔ ཁྲོ་ཆགས་ཉམས་ལྡན་པདྨ་དང་༔ བདུད་རྩིའི་ཐོད་པ་བསྣམས་པས་འཁྱུད༔ ཞབས་ཟུང་གྱད་ཀྱི་འདོར་སྟབས་ཀྱིས༔ བགེགས་ཀྱི་རྒྱལ་པོ་ཕོ་མོ་གནོན༔ ཡེ་ཤེས་མེ་དཔུང་འབར་བའི་ཀློང་༔ ཁ་སྦྱོར་བདེ་བས་དགྱེས་པར་བཞུགས༔ རྡོ་རྗེ་གསུམ་དང་མི་ཕྱེད་པའི༔ བདེ་བ་ཆེན་པོའི་འོད་ཟེར་གྱིས༔ ཡེ་ཤེས་འཁོར་ལོ་སྤྱན་དྲངས་གྱུར༔ [ཞེས་གསལ་བཏབ། གཉིས་པ་ཡེ་ཤེས་པ་སྤྱན་དྲང་བ་ནི།] ཧཱུྃ༔ བདེ་གཤེགས་རྣམས་ནི་ཐམས་ཅད་ཀྱི༔ ཡེ་ཤེས་རྡོ་རྗེ་བདུད་རྩི་འཁྱིལ༔ སྒྲུབ་གཉིས་དྲི་མ་སྦྱོང་མཛད་ལྷ༔ འདིར་ནི་ཡང་དག་ཉེ་བར་མཛོད༔ ཨོཾ་

བཛྲ་ཨམྲྀ་ཏ་ཀུཎྜ་ལཱི་ཨེཧྱེ་ཧི༔ བཛྲ་ས་མཱ་ཛ༔ [ཞེས་སྤྱན་དྲངས། གསུམ་པ་བཞུགས་སུ་གསོལ་བ་ནི།] ཧཱུྃ༔ དམ་ཚིག་རྫས་དང་དབྱེར་མེད་པའི༔ ཕྱག་རྒྱ་སྒྱུ་མའི་གྲོང་ཁྱེར་དུ༔ ཡེ་ཤེས་ཆེན་པོ་ཁྲག་འཐུང་ལྷ༔ དབྱེར་མེད་དགྱེས་པ་མཆོག་ཏུ་རོལ༔ ཛཿཧཱུྃ་བཾ་ཧོཿ ས་མ་ཡ་ཏིཥྛནྟུ༔ [ཞེས་གཉིས་མེད་དུ་བསྟིམས།] བཞི་པ་དབང་བསྐུར་བ་ནི།] སླར་ཡང་རོལ་པའི་འོད་ཟེར་གྱིས༔ དབང་ལྷ་ནམ་མཁའ་གང་བར་སད༔ བྱང་ཆུབ་སེམས་ཀྱི་དབང་བསྐུར་བས༔ རིགས་ལྔའི་ཕྱག་རྒྱས་དབུར་བརྒྱན་གྱུར༔ ཧཱུྃ་ཨོཾ་ཏྲཱཾ་ཧྲཱིཿཨཱཿ ཨ་བྷིཥིཉྩ་ཧཱུྃ༔ ས་མ་ཡ་སྟྭཾ༔ [ལྔ་པ་ཕྱག་བྱ་བ་ནི།] ཧོཿ འཇིགས་བྱེད་ཆེན་པོ་མཆེ་བ་གཙིགས༔ བདུད་དཔུང་འཇོམས་པའི་ཆས་ཀྱིས་བརྒྱན༔ དམ་ཚིག་ཤ་ཆེན་ཁྲག་ལ་གསོལ༔ ཧེ་རུ་ཀ་ལ་ཕྱག་འཚལ་ལོ༔ ཤྲཱི་ཧེ་རུ་ཀ་ན་མཱ་མི༔ [དྲུག་པ་མཆོད་པ་ནི།] ཧཱུྃ༔ ནམ་མཁའ་ལས་བྱུང་ལྷ་མོ་ནི༔ དྲག་ཤུལ་འཇིགས་པ་ཆེན་མོའི་ཚོགས༔ དུར་ཁྲོད་རྫས་མཆོག་དང་སྦྱར་ཏེ༔ ཁྲག་འཐུང་དགྱེས་པའི་གར་གྱིས་མཆོད༔ ཨོཾ་ཤྲཱི་ཧེ་རུ་ཀ་མ་ཧཱ་ཤྨ་ཤ་ནཱ་པུཥྤེ་སོགས། ཤཔྡ་པཱུ་ཛ་ཧོ༔ མ་ཧཱ་ཨ་མྲྀ་ཏ་རཀྟ་བ་ལིཾ་ཏ་ཁ་ཁ་ཁཱི་ཧི་ཁཱ་ཧི༔ མ་ཧཱ་སུ་ཁ་ཛྙཱ་ན་དྷ་ཏུ་ཧོ༔ བདུན་པ་བསྟོད་པ་ནི། ཧཱུྃ༔ གང་ཞིག་དྲན་པ་ཙམ་གྱིས་ཀྱང་༔ འཇིག་རྟེན་གསུམ་པོ་གཡོ་བར་མཛད༔ དག་པའི་བདུད་རྩིའི་མཆོག་ཆེན་སྩོལ༔ དོན་ཀུན་སྒྲུབ་ལ་ཕྱག་

འཚལ་བསྟོད༔ [བརྒྱད་པ་སྨན་སྲུང་སྤྱན་འདྲེན་པ་ནི། སློབ་དཔོན་གྱིས་ཁ་དོག་སྣ་ཚོགས་པའི་དར་གྱིས་གཡབ། སྤོས་དཀར་བསྲེག་ཅིང་རོལ་མོར་བཅས་པས།] ཧཱུྃ༔ ཚངས་དང་དྲང་སྲོང་ཀླུ་རྣམས་དང་༔ རྩི་ཤིང་སྨན་གྱི་ལྷ་མོ་དང་༔ ར་སཱ་ཡ་ནའི་སྲུང་མའི་ཚོགས༔ སྔོན་ཚེ་འདས་དུས་དང་པོ་ལ༔ ཀུན་བཟང་ལྷ་ཡི་སྤྱན་སྔ་རུ༔ ཁས་བླངས་དམ་བཅས་དབང་མནོས་ཏེ༔ སྡོམ་ལ་གནས་པའི་རིག་འཛིན་རྣམས༔ དུས་གསུམ་བདེ་གཤེགས་མཆོད་པ་དང་༔ སྨན་གྱི་རིག་འཛིན་བསྒྲུབ་པའི་ཕྱིར༔ འཁོར་དང་བཅས་ཏེ་སྤྱན་འདྲེན་ན༔ འདིར་གཤེགས་དམ་ཚིག་ཚུལ་བཞིན་དགོངས༔ ར་སཱ་ཡ་ནའི་དངོས་གྲུབ་སྩོལ༔ [ཅེས་བསྐུལ་བས།] སྔོན་བྱོན་སྨན་གྱི་དམ་ཚིག་གི་དངོས་གྲུབ་ཐོབ་ཅིང་སྒྲུབ་པ་པོའི་སྡོང་གྲོགས་མཛད་པར་དམ་མནོས་པའི་སྨན་གྱི་རིག་འཛིན་ལྷ་དང་དྲང་སྲོང་སྲུང་མ་རྒྱ་མཚོའི་ཚོགས་དང་བཅས་པ་ཐམས་ཅད་བྱོན་ནས་སྨན་གྱི་ཕོ་བྲང་སྟེང་གི་ནམ་མཁར་སྤྲིན་ཕུར་གཏིབས་པ་བཞིན་བཞུགས་པར་[བསམ། དགུ་པ་རྟོག་པ་བསལ་བ་ནི། བྱིན་གྱིས་བརླབས་པའི་བདུད་རྩི་འཐོར་ཞིང་།] ཧཱུྃ༔ ར་སྭ་ཡ་ནའི་རིག་འཛིན་རྣམས༔ ཚངས་དང་དྲང་སྲོང་གཙང་མ་ཟ༔ དེ་དག་གྲོལ་བར་ངས་མ་བཤད༔ ཁྱི་དང་ཕག་པ་མི་གཙང་ཟ༔ དེ་དག་གྲོལ་བར་ངས་མ་བཤད༔ ཀླུ་དང་བྲམ་ཟེ་གཙང་མ་ཟ༔ དེ་དག་གྲོལ་བར་ངས་མ་བཤད༔ བྱོལ་སོང་རྩྭ་མཆོག་ཟ་བ་ཡང་༔

ཇི་སྲིད་འཚོ་ཡི་བར་དུ་ཟ༔ དེ་དག་གྲོལ་བར་ངས་མ་བཤད༔ ཡང་དག་དོན་གྱི་ལུང་འདི་ཉོན༔ རྣལ་འབྱོར་ཐབས་ལྡན་རྣམས་ཀྱིས་ནི༔ ཆོས་སྐུ་གཅིག་ལས་ཐ་དད་པའི༔ རིགས་ལྔའི་རང་བཞིན་འདིར་བསྟན་ཏེ༔ དེ་ལྟར་རྟོགས་ན་གྲོལ་ཞེས་བཤད༔ རང་བཞིན་ཡང་དག་པའི་རྫས༔ མཉམ་པའི་དབྱིངས་སུ་རབ་བརྟགས་ན༔ གཉིས་མེད་དོན་གྱིས་ཟིན་པ་ཡིན༔ ཇི་ལྟར་དམིགས་པ་བཞིན་དུ་འགྲུབ༔ གཙང་དང་མི་གཙང་རྟོགས་པ་ཅན༔ དངོས་དང་མི་དངོས་གཉིས་མེད་པས༔ མཁས་པ་གཙང་དམེ་གཉིས་མི་བྱེད༔ ཡེ་ཤེས་སྐུ་ལྔར་བསྟན་པའི་ཕྱིར༔ གཙོ་རུ་དང་དུ་བླང་བར་བྱ༔ གཙང་དམེ་མེད་པར་ཀུན་གྱིས་སྤྱོད༔ དེ་དག་གྲོལ་བར་ངས་བཤད་ཀྱིས༔ ར་སཱ་ཡ་ནའི་རིགས་འཛིན་ཚོགས༔ བཏང་སྙོམས་མེད་པའི་ཕྲིན་ལས་མཛོད༔ ཐེ་ཚོམ་མེད་ན་ངེས་པར་འགྲུབ༔ དཀྱིལ་འཁོར་འདི་ལ་བྱིན་ཅིག་ཕོབ༔ སྒྲུབ་རྫས་འདི་ལ་བྱིན་གྱིས་རློབས༔ སྒྲུབ་པ་པོ་ལ་དབང་ཞིག་སྐུར༔ ཞེས་བརྗོད་པས། སྨན་གྱི་དྲང་སྲོང་རིག་འཛིན་ཐམས་ཅད་གཙང་དམེའི་གཉིས་འཛིན་དག་ནས་འདོད་པའི་དངོས་གྲུབ་སྩོལ་བ་ལ་དགྱེས་བཞིན་དུ་བཞུགས་པར་[བསམ། བཅུ་པ་ཛཔ྄་བཟླ་བ་ནི། གཟུངས་ཐག་བླངས་ལ།] རང་གི་ཐུགས་ནས་འོད་འཕྲོས་པས༔ མདུན་གྱི་ཁྲོ་རྒྱལ་ཐུགས་རྒྱུད་བསྐུལ༔ འབར་བའི་འོད་དང་ཧཱུྃ་གིས་སྒྲས༔

རྫས་ཀྱི་མ་དག་སྐྱོན་ལ་སོགས༔ བརྟན་གཡོའི་དུག་ཀུན་གཞིལ་ཞིང་སྦྱངས༔ དག་པ་རིགས་ལྔ་ཡེ་ཤེས་ལྔས༔ ཉོན་མོངས་ཕུང་པོ་ནད་གདོན་གྱི༔ རྟོག་པ་སྦྱོར་བའི་བདུད་རྩིར་གྱུར༔ ཨོཾ་བཛྲ་ཙཎྜ་ཨ་མྲྀ་ཏ་ཀུཎྜ་ལཱི་ཤུངྔྷེ་ཤུངྔྷེ་བི་ཤུངྔྷེ་སྭཱཧཱ༔ [ཞེས་བརྒྱ་རྩ་ཙམ་བཟླས་མཐར།] སླར་ཡང་ཡབ་ཡུམ་སྙོམས་ཞུགས་པའི༔ བདེ་བའི་སྒྲ་དང་འོད་ཟེར་གྱིས༔ སྲིད་ཞིའི་ཁམས་ཀུན་དབང་མེད་གཡོས༔ དྭངས་བཅུད་བདེ་ཆེན་བདུད་རྩིར་བཀུག༔ དམ་ཚིག་རྫས་དང་རོ་གཅིག་འདྲེས༔ སྨན་གྱི་ལྷ་དང་དྲང་སྲོང་བསྐུལ༔ དེ་རྣམས་ཕོ་ཉ་མཁའ་ཁྱབ་ཀྱིས༔ འཁོར་འདས་བདུད་རྩི་ཆར་བཞིན་ཕབ༔ སྒྲུབ་པའི་རྫས་ལ་སིབ་སིབ་ཐིམ༔ བདེ་ཆེན་ཡེ་ཤེས་བདུད་རྩི་དང་༔ དབྱེར་མེད་ཁ་དོག་དྲི་དང་རོ༔ ནུས་བཅུད་ཕུན་སུམ་ཚོགས་པ་ཡི༔ ར་སཱ་ཡ་ནའི་མཆོག་ཏུ་གྱུར༔ ཨོཾ་བཛྲ་ཙཎྜ་ཨ་མྲྀ་ཏ་ཀུཎྜ་ལཱི་ཧཱུྃ་ཧྲཱིཿཋཱཿ [ཞེས་དམིགས་པའི་གནད་དང་བཅས་པས་སྟོང་དུ་གྲངས་ཚང་བར་བཟླས་པའི་མཚམས་སུ་སྟོང་ཚིག་གི་མཆོད་པའང་བྱ། བྱིངས་རྨུགས་ལེ་ལོ་སོགས་ཀྱི་དབང་དུ་མ་སོང་བར་ཏིང་ངེ་འཛིན་གྱི་ངར་དང་ལྡན་པས་ཐུན་བཞིའམ་དྲུག་གི་ངེས་པས་བཟླ་ཞིང་། བསྙེན་གྲོགས་ཀྱིས་ཁོར་ཡུག་ཀུན་ཏུ་གསུང་མི་ཆག་པར་བཟླ། ཐུན་མཇུག་ཏུ།] མདུན་བསྐྱེད་བདེ་ཆེན་དགྱེས་པའི་སྤྲིན༔ མི་འགྱུར་འོད་ཀྱི་ཐིག་ལེའི་ཚུལ༔ སྨན་གྱི་རྫས་ལ་ཐིམ་པ་ཡིས༔ དངོས་གྲུབ་འབྱུང་བའི་

དབྱིག་ཏུ་གྱུར༔ ཨོཾ་བཛྲ་ཛྙཱ་ན་མ་ཧཱ་སུ་ཁ་ཨ་མྲྀ་ཏ་ཧཱུྃ་ཧཱུྃཿ [ཞེས་བསྡུ། ཐུན་རྗེས་མར་མཚམས་ཀྱི་ཆང་དང་འོ་མ་རིན་པོ་ཆེ་ཆུ་རྣམས་ཀྱང་དེ་དང་དེའི་རང་བཞིན་གྱི་བདུད་རྩིའི་ངོ་བོར་ཞུ་བར་བསམ་ཞིང་འོག་གི་གྲོལ་བའི་སྐབས་སུ་སྔགས་རྣམས་བརྒྱ་རྩ་རེ་བཟླས་པས་རོའི་མཆོག་ཏུ་བྱིན་གྱིས་བརླབ། ཚོགས་མཆོད་སོགས་རྗེས་ཀྱི་བྱ་བ་སྔར་བཤད་པ་བཞིན་ལ། ཚུལ་དེ་ལྟ་བུའི་ངེས་པས་སྤྱིར་ཁྲོལ་བུ་ལ་ཞག་གསུམ་དུ་བྱའོ། །][གཉིས་པ་ཁྲོལ་བུའི་མཇུག་དོན་ལ་གསུམ། བདུད་རྩི་མཆོད་པ། བསྟོད་པ། དངོས་གྲུབ་བསྡུ་བའོ། །དང་པོ་སྨན་ཆེ་བའི་ཡོན་ཏན་བརྗོད་དེ་འབུལ་བ་ནི།] ཧཱུྃ་ཧྲཱིཿ རང་བྱུང་གདོད་ནས་རྣམ་པར་དག༔ [ཅེས་སོགས་རྩ་བ་གསུམ་གྱི་ལྷ་ཚོགས་རྣམས་ཀྱི་མཚན་དོན་སྦྱར་བས་མཆོད་དོ། །གཉིས་པ་བསྟོད་པ་ནི།] ཨེ་མ་ཧོཿ གདོད་ནས་རྣམ་པར་དག༔ དོན་གྱི་བདུད་རྩི་བླ་ན་མེད༔ རྟགས་སུ་ཡེ་ཤེས་རིགས་ལྔར་ཤར༔ རྡོ་རྗེའི་ཆོས་ལ་ཕྱག་འཚལ་ལོ༔ [ཞེས་བསྟོད། གསུམ་པ་དངོས་གྲུབ་བསྡུ་བ་ནི། ཕྱག་རྒྱའམ་དེར་བཏགས་པའི་ལས་ཀྱི་རྡོ་རྗེས་ཁྲོལ་བུའི་སྨན་གཞོང་དར་གྱིས་ལྕིབས་ལ་བླངས་ཏེ།] ཨེ་མ་ཧོཿ ངོ་མཚར་རྨད་དུ་བྱུང་བའི་ཆོས༔ ནམ་མཁའ་དང་ནི་མཉམ་པའི་གནས༔ རྣམ་པར་མི་རྟོག་རྟོག་ལས་འདས༔ ཀུན་རྫོབ་ཙམ་དུ་བསྟན་པ་མཚར༔ [ཞེས་བརྗོད་དེ་སློབ་དཔོན་གྱི་ཕྱག་ཏུ་ཕུལ། དེས་ཀྱང་།] ཨ་ཧོ་སུ་ཁ་ངྷརྨ་ཀཱ་ཡ་ནི་ཨ་མྲྀ་ཏ་སིངྔྷི་ཧྲཱིཿ

[ཞེས་དངོས་གྲུབ་ཀྱི་སྙིང་པོ་འོད་ཀྱི་གོང་བུའི་རྣམ་པ་ཐུགས་ཀྱི་ཐིག་ལེར་བསྡུའོ། །འདི་ཉིད་ཁྲོལ་བུའི་མཇུག་དོན་དང་སྨན་འཐག་པའི་སྔོན་འགྲོ་ཐུན་མོང་བ་ཡིན་ཀྱང་སྦྱར་བའི་དུས་ནི་ཁྲོལ་

བུའི་ཞག་གསུམ་རྫོགས་པའི་ཉིན་ཕྱི་མའི་ཐོར་ཐུན་གྱི་རྗེས་སུ་བྱ་བ་ཡིན་ནོ། །སྐབས་འདིར་སྒྲོམ་ཁྲིའི་སྟེང་གི་མཎྜལ་གྱི་ཚོམ་བུའང་བསྡུ་ཞིང་། ཁྲོལ་བུའི་སྣོད་དེ་ཉིད་རེ་ཞིག་དཀྱིལ་འཁོར་མདུན་གྱི་སྟེགས་བུ་གང་ཡང་རུང་བའི་ཁར་འགོད་པར་བྱའོ། །][གསུམ་པ་བདུད་རྩི་ཕྱེ་མར་སྒྲུབ་པ་ལ་གཉིས། བཏགས་བཙག་སོགས་ཀྱི་དགོངས་པ་དང་། ཕྱེ་མ་དངོས་ཀྱི་དགོངས་རྒྱུད་དོ། དང་པོ་ལ་ལྔ། འཐག་པ། བཙག་པ། སྦྱར་བ། སྦོལ་ཞིང་གཞལ་བ། འགོད་པའོ། སྔ་མ་ལའང་གཉིས་ཀྱི། དང་པོ་སྦྱོར་བ་ནི། སྨན་ཁྲོལ་བུའི་དངོས་གྲུབ་བླངས་པའི་དེ་མ་ཐག་པར་སློབ་དཔོན་ཡབ་ཡུམ་འཁོར་དང་བཅས་པ་དུར་ཁྲོད་ཀྱི་ཆས་ཀྱིས་བརྒྱན། དཔལ་ཆེན་པོ་གཙོ་འཁོར་གྱི་ང་རྒྱལ་བཟུང་ནས་རྡོ་རྗེའི་གོམ་སྟབས་ཀྱིས་དཀྱིལ་འཁོར་ལ་གཡས་སུ་བསྐོར་ཞིང་ཀཱི་ལ་ཡའི་ཛཔ྄་བྱ། །མཆོག་གི་ཧ་སྟ་གཡབ་ཅིང་སྦྱར་བའི་སྤོས་བསྲེག །རྐང་གི་གླིང་བུ་དང་ཀུ་ཤའི་གླུ་བླང་བ་སོགས་དྲག་པོའི་རོལ་གར་མང་པོ་དང་བཅས་པས་རྒྱལ་བ་རྣམས་ཐུགས་དམ་བསྐུལ། མཁའ་འགྲོ་དམ་ཅན་དབང་དུ་བསྡུས་ནས་ལས་ལ་བཙུད། དགྲ་བགེགས་རྣམས་གཟིར་ཞིང་ཚར་གཅོད་པའི་བརྟུལ་ཞུགས་བསྐྱེད་ཅིང་ཉམས་བསྐྱང་། སྒྲུབ་དཀྱིལ་གྱི་ཤར་ཕྱོགས་སུ་ཞིང་ཆེ་ཆུང་གི་གཡང་གཞི་དངོས་སམ་རི་མོ་བྲིས་པ་བརྩེགས་མར་བཏིང་། དེ་ལ་གུ་གུལ་གྱིས་བྱུགས་ཤིང་རཀྟའི་ཐིག་ལེ་ཧཱུཾ་ཡིག་གིས་མཚན་པ་བཀོད། དེའི་སྟེང་དུ་གཏན་གཏུན་ཐབ་ཤེས་ཀྱི་བརྡ་མཚོན་པར་བཞག་གོ །གཉིས་པ་འཐག་པ་དངོས་ལ་གསུམ་གྱི། དང་པོ་སྦྱོར་བའི་ལས་ཀྱིས་འདོད་ཆགས་བཏག་པ་ནི། གོང་དུ་བཀོད་པའི་སྨན་གཞོང་གི་ཤར་དུ་སློབ་དཔོན་དཀྱིལ་འཁོར་ལ་ཕྱོགས་པས་འཁོད། དེའི་མདུན་དུ་ཡུམ་མམ་དེར་བཏགས་པའི་སློབ་མ་སློབ་དཔོན་ལ་ཕྱོགས་

ཏེ་འདུག་པའི་ཡབ་ཡུམ་གྱི་ཞབས་གཉིས་སྨན་གཞོང་གི་འགྲམ་གཉིས་སུ་ཕན་ཚུན་བསྣོལ་ཏེ་བརྐྱང་། སློབ་དཔོན་གྱིས་ཕྱག་གཉིས་སོ་སོར་མོ་བསྣོལ། མཛུབ་མོ་སྒྲེང་། མཐེ་བོང་བཀུག་པ་བྱིན་དབབ་པའི་རྒྱས་གཏུན་བུ་བཟུང་། ཡུམ་གྱི་ལག་གཉིས་མཁའ་དབྱིངས་ཀྱི་རྒྱས་གཏུན་ཁུང་བཟུང་ལ། སློབ་དཔོན་དང་གཟུངས་མ་གཙོ་བོ་ཡབ་ཡུམ་གྱི་ང་རྒྱལ་དང་ལྡན་པས། གཏན་པ་ཡུམ་གྱི་མཁའ་དབྱིངས་སུ་གཏུན་བུ་ཡབ་ཀྱི་རྡོ་རྗེ་མཉམ་པར་སྦྱོར་བའི་སྦྱོར་མཚམས་ནས་སྨན་རྣམས་དཀར་དམར་བྱང་ཆུབ་སེམས་ཀྱི་རང་བཞིན་ཅན་གྱི་བདུད་རྩི་ཆི་ལི་ལི་བྱུང་བར་བསམ་ཞིང་འཐག་གོ །གཉིས་པ་སྒྲོལ་བའི་ལས་ཀྱིས་ཞེ་སྡང་བཏག་པ་ནི། གཏུན་ཁུང་ཁྲོ་མོ་འབར་བའི་ཨེ་དབྱིངས་སུ་གཏུན་བུ་ཁྲོ་བོ་འབར་བའི་རྡོ་རྗེའི་ཐོ་བས་སྨན་གྱི་མི་མཐུན་པའི་དགྲ་བགེགས་རྡུལ་ཕྲན་བཞིན་དུ་བཅོམ་པར་བསམ་ཞིང་འཐག་གོ །གསུམ་པ་སྦྱོར་སྒྲོལ་གཉིས་སུ་མེད་པས་གཏི་མུག་བཏག་པ་ནི། གཏུན་ཁུང་ཆོས་ཀྱི་དབྱིངས་སུ་གཏུན་བུ་རིག་པའི་ཡེ་ཤེས་སྦྱར་བས་སྨན་རྣམ་རྟོག་གི་མཚན་མ་ཐམས་ཅད་མཉམ་ཉིད་སྤྲོས་པ་དང་བྲལ་བའི་ཀློང་དུ་བསྒྲལ་བར་བསམ་ཞིང་འཐག་གོ །དེ་དག་གི་ཚེ་སྔགས་ནི། ཨོཾ་སརྦ་པཉྩ་ཨ་མྲྀ་ཏ་ཧ་ན་ཧཱུྃ་ཕཊ༔ ཅེས་བཟླའོ། གཉིས་པ་བཙག་པ་ནི། དཀྱིལ་འཁོར་གྱི་ལྷོར་སློབ་དཔོན་དཀྱིལ་འཁོར་ལ་ཕྱོགས་པའི་མདུན་དུ་གཟུངས་མ་འཁོད་པའི་བར་དུ་དར་གྱི་ཁྱོགས་བཅག་པའི་སྣེ་གཉིས་ཡབ་ཡུམ་གྱི་སྐེད་དུ་མདུད་པ་དབུས་ལྡིང་སྟབས་སུ་དཔྱངས་ལ། ཡུམ་གྱིས་དར་ཚགས་བཟུང་། ཡབ་ཀྱིས་སྨན་ཕྱེ་བླུགས་ཤིང་ཆོས་ཉིད་བྱང་ཆུབ་སེམས་ཀྱི་ངང་དུ་རྣམ་རྟོག་གི་མཚན་མ་རྡུལ་ཙམ་ཡང་མི་གནས་པར་བསམ་ལ།] ཨོཾ་སརྦ་པཉྩ་ཨ་མྲྀ་ཏ་ཧོ་ས་

ཡ་ཧཱུྃ་ཧྲཱིཿཋཱ༔ [ཞེས་བཟླ་ཞིང་འཚག་གོ །གསུམ་པ་བསྲེ་ཞིང་སྦྱར་བ་ནི། དཀྱིལ་འཁོར་གྱི་ནུབ་ཏུ་སློབ་དཔོན་ཡབ་ཡུམ་གྱི་བར་དུ་སྨན་སྣོད་མཁར་གཞོང་སོགས་ལྕགས་གཡའི་དྲི་མ་མེད་པ་བཞག །གུར་གུམ་སོགས་དྲི་བཟང་དང་དམ་རྩིའི་དབང་ལག་ཟུར་དུ་ཕྱེ། སྨན་གཞན་རྣམས་རླན་མེད་པའི་དུས་ཉིད་ནས་འདྲེས་པར་བསྲེ་ཞིང་འབྲུམ་མེད་པར་བྱས་ལ། སློབ་དཔོན་གྱིས་སྔར་བྱིན་གྱིས་བརླབས་པའི་ཆང་གི་ཁ་ཕྲུ་སྦྲེང་ཞིང་།] ཨོཾ་སརྦ་པཉྩ་ཨ་མྲྀ་ཏ་ཛ་གད་པྲ་ཝ་ཡ་སྭཱཧཱ༔ [དེ་བཞིན་དུ་འོ་མ་སྦྲེང་ཞིང་།] ཨོཾ་སརྦ་པཉྩ་ཨ་མྲྀ་ཏ་སཾ་ཤོ་ངྷ་ཡ་ཧཱུྃ་ཕཊ༔ [རིན་པོ་ཆེ་སྦྲེང་ཞིང་།] ཨོཾ་སརྦ་པཉྩ་ཨ་མྲྀ་ཏ་རཏྣ་ཙིཏྟ་ཧཱུྃ་ཧྲཱིཿཋཱ༔ [ཆུ་སྦྲེང་ཞིང་།] ཨོཾ་སརྦ་པཉྩ་ཨ་མྲྀ་ཏ་བི་ཤུངྔྷེ་ཧཱུྃ་ཕཊ༔ [ཅེས་བཟླ་བཞིན་འདྲེས་པར་འཕུར་ཞིང་། སྔར་གྱི་དམ་རྫས་ཕབ་རྒྱུན་རྣམས་ཆང་གི་ཉིང་ཁུ་བཟང་པོ་དང་སྦྱར་བའི་ཁ་ཕྲུས་འདེབས་ལ་ནན་གྱིས་སྦོལ་ཞིང་བསྲེས། བསྐ་སླའི་ཚད་སྙིམ་པར་བཅངས་ནས་ཆག་གང་དུ་བསྐྱུར་བས་བམ་པོ་འཇིག་ཅིང་ཕྱེ་མར་མི་འདལ་བ་ཙམ་དུ་བྱ། དེ་ནས་སྔར་ཟུར་དུ་ཕྱེ་བའི་དྲི་བཟང་གི་ཕྱེ་མས་མདངས་བསྒྱུར་ཞིང་། དབང་ལག་གི་ཕྱེ་མའང་བཏབ་སྟེ་འདྲེས་པར་སྦོལ་ལ།] ཨོཾ་བཛྲ་ཨ་མྲྀ་མུ་ས་ལ་མུ་ས་ལ་ཧཱུྃ་ཕཊ༔ [ཅེས་བཟླ་ཞིང་དབྱིངས་དང་ཡེ་ཤེས་གཉིས་མེད་དུ་འདྲེས་པར་བསམ་མོ། བཞི་པ་སྦོལ་ཞིང་གཞལ་བ་ནི། དཀྱིལ་འཁོར་གྱི་བྱང་དུ་ནམ་དུས་དང་བསྟུན་པའི་དྲོད་བརྟག་ལ་ཕབ་རྩི་ཞིམ་པོ་ནོན་ཙམ་བླུགས་ནས་མཆོག་གི་ལག་པ་གཡོན་པའམ་རྐང་ངམ་རྡོ་རྗེས་དཀྲུགས་པས་འཁོར་འདས་ཀྱི་ཆོས་ཐམས་ཅད་བདེ་ཆེན་ཆོས་ཀྱི་དབྱིངས་སུ་རོ་གཅིག་ཏུ་འདྲེས་པར་བསམ་ལ།] ཨོཾ་སརྦ་པཉྩ་ཨ་མྲྀ་ཏ་པྲ་བརྔྷ་ཡ་ཧཱུྃ་ཧྲཱིཿཋཱ༔ [ཞེས་བཟླ་ཞིང་

འཕེལ་བ་བརྟག་ཕྱིར་གཞལ་ཏེ་གྲངས་ངེས་པར་བྱས་ནས་དར་གོས་དམར་པོའི་ཁུག་མར་བླུགས། དེ་ཉིད་བྷཉྫ་ཁ་སྦྱོར་གྱི་ནང་དུ་གཞུག་པར་གསུངས་པས་ཕོ་མོའི་ཐོད་པ་མཚན་ལྡན་གྱི་ནང་དུ་རཀྟ་དང་ཨ་མྲི་ཏས་འཁོར་ལོ་རྩིབས་བཞི་མུ་ཁྱུད་དང་བཅས་བྲིས་པའི་ཕོ་ཐོད་ལ་རིགས་ལྔ་ཡབ་ལྔའི་ས་བོན་མོ་ཐོད་ལ་རིགས་ལྔ་ཡབ་ལྔའི་ས་བོན་དང་མོ་ཐོད་ལ་ཡུམ་ལྔའི་ས་བོན་འབྲི། གཉིས་ཀའི་མུ་ཁྱུད་ལ། ཨོཾ་བརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཤྲཱི་མ་ཧཱ་སུ་ཁ་ཧཱུྃ་ཧྲཱིཿཋཱ༔ ཞེས་བྲིས་པའི་མོི་ཐོད་ཀྱི་ནང་དུ་སྨན་གྱི་སྒྱེའུ་བཅུག །ཕོ་ཐོད་ཀྱིས་སྟེང་ནས་དགབ། དར་གྱིས་དྲིལ། ཚོན་སྐུད་སྣ་ལྔས་རྒྱ་གྲམ་དུ་བཅིངས་པའི་སྟེང་གི་མདུད་ཁར་མི་འགྱུར་བའི་ཕྱིར་རྡོ་རྗེ་རྒྱ་གྲམ་གྱི་རྒྱས་གདབ་ཅིང་།] ཧཱུྃ༔ བདུད་རྩི་གསང་བའི་ཕོ་བྲང་གི༔ དངོས་གྲུབ་བར་ཆད་སྲུང་བ་དང་༔ ཡེ་ཤེས་རྟག་ཏུ་འཕེལ་བའི་ཕྱིར༔ མི་ཕྱེད་རྡོ་རྗེའི་རྒྱས་གདབ་བོ༔ བཛྲ་རཀྵ་ཧཱུྃ་ཧཱུྃ་ཧཱུྃ༔ [ཞེས་རྒྱས་གདབ་བོ། །][ལྔ་པ་དཀྱིལ་འཁོར་གྱི་དབུས་སུ་འགོད་པ་ནི། སྨན་ལ་དྲིའི་རྒྱལ་པོ་ལྔ་དང་། [ ཛཱ་ཏི་ག་བུར་ཙན་དན་གླ་རྩི་དུ་རུ་ཀ།] གུ་གུལ་ཚལ་ཆེན་གྱི་དུད་པས་བདུག་ཅིང་དྲག་སྔགས་ཡུངས་ཐུན་ཚམ་རྔམས་དང་དང་བཅས་པས་བགེགས་བསྐྲད། བཤུག་གླུ་འབོད་ཅིང་ཛཔ྄་དབྱངས་རྡོ་རྗེའི་འགྲོས་གར་དང་བཅས་པས་དཀྱིལ་འཁོར་ལ་བསྐོར་ནས་ཤར་དུ་འཁོད་དེ།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ [ཞེས་སོགས་ཀྱིས་སྔར་བཞིན་གཙོ་བོར་མངའ་གསོལ་ཏེ། དཀྱིལ་འཁོར་དབུས་ཀྱི་བར་ལྡིང་ལ་མཉྫིའི་ཁར་རིན་པོ་ཆེའི་གཞོང་པ་བལ་བུའི་ཕུར་མའམ་འབྲུ་རླན་ཅན་གྱིས་བཀང་བའི་ནང་དུ་རུས་སྦལ་གྱི་ཁོག་པར་ཧྲཱིཿཡིག་བྲིས་པའི་ཁར་བཞུགས་སུ་གསོལ། དར་ཟབ་སྣ་ཚོགས་ཀྱི་ན་

བཟའ་གསོལ། གཡས་གཡོན་དུ་རྡོ་དྲིལ་དང་སྟེང་དུ་དབུ་རྒྱན་བཅིང་། གཟུངས་རྡོར་བཞག་པའི་སྲས་བུ་ལྔ་ཕྱིར་དྲང་ཞིང་སྟེང་དུ་དམུ་ཐག་སྦྲེལ། ཞི་བའི་སྦྱིན་སྲེག་བྱས་པའི་མེའི་ཕུད་ཀྱིས་འོག་ཏུ་དྲོད་འབེབས་ཞུན་ཆེན་གྱི་མར་མེ་གཏམ་མོ། །ཁྲོལ་བུའི་མཇུག་དོན་ནས་བཟུང་འདིའི་བར་ཉིན་གཅིག་གི་ཐོར་ཐུན་ནས་སྲོད་ཐུན་གྱི་མཐར་ཐུན་པའི་བར་བྱ་བའི་ཆོ་གའོ། །][གཉིས་པ་ཕྱེ་མ་སྒྲུབ་པའི་དགོངས་པ་ལ་བདུན། འཇུ་འདུལ་གྱི་དགོངས་པ། གནད་ལ་དབབ་པ། བདུད་རྩིར་བསྐྱིལ་བ། བཅུད་ལ་དབབ་པ། དབང་དུ་བྱ་བ། དངོས་གྲུབ་བླང་བ། རྒྱ་བཀྲོལ་བའོ། །དང་པོ་ལའང་དྲུག །དཀྱིལ་འཁོར་བསྐྱེད་པ། སྨན་སྲུང་སྤྱན་དྲང་བ། རྟོག་པ་བསལ་བ། ཛཔ྄་བཟླ་བ། རྟགས་ཚད་བསྟན་པ། སྤོགས་ཆོག་བྱ་བའོ། །དང་པོ་ནི། བདག་མདུན་སྒྲུབ་རྫས་གསུམ་དབྱེར་མེད་པའི་དཀྱིལ་འཁོར་སྒྲུབ་མཆོད་ཛཔ྄་ཀྱི་མཐར་ཐུག་པའི་བར་སྔར་བཞིན་བྱས་ནས།] བྷྲཱུྃ་བི་ཤྭ་བི་ཤུངྔྷེ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ་ཛཿ [ཞེས་པས། གོང་དུ་བདག་མདུན་དབྱེར་མེད་དུ་བསྒྲུབས་པའི་དཀྱིལ་འཁོར་དེ་ལས་བདག་ཉིད་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་གཉིས་པའི་རྣམ་པར་ཕྱེ་བ་མདུན་བསྐྱེད་དང་མེ་རི་འདབ་འབྱར་གྱི་ཚུལ་དུ་འཁོད་པར་བསམ་ལ།] ཧཱུྃ༔ སྙིང་པོ་རང་བྱུང་བདུད་རྩིའི་དཀྱིལ་འཁོར་ནི༔ གཏུམ་མོའི་མེ་འབར་ཡེ་ཤེས་འོད་རླུང་འཁྲུགས༔ བདེ་སྟོང་བྷཉྫ་རབ་ཏུ་རྒྱ་ཆེ་བར༔ ཤ་ལྔའི་རི་བོ་བདུད་རྩི་ལྔའི་རྒྱ་མཚོ༔ རྒྱ་ཁྱོན་དབྱིངས་མཉམ་ཞུ་ཞིང་ཁོལ་བའི་ཀློང་༔ རྡོ་རྗེ་གཞོན་ནུ་རིགས་

རྣམས་ཀུན་གྱི་བདག༔ བདུད་རྩི་བདེ་ཆེན་དགྱེས་པའི་སྐུ་རུ་བཞེངས༔ སྐུ་མདོག་ལྗང་ནག་འོད་ཟེར་བྱེ་བ་འཕྲོ༔ བདེ་བའི་ཉམས་རྒྱས་ཤེས་རབ་ཡུམ་དང་སྦྱོར༔ ཐུགས་ཀར་སྲོག་གི་སྙིང་པོ་ཧཱུྃ་ཡིག་ལ༔ གསང་སྔགས་འབྲུ་དགུ་གཡས་སུ་བསྐོར་བས་མཚན༔ ཁྲག་འཐུང་ཕྲིན་ལས་འདུས་པའི་ལྷ་ཚོགས་ཀུན༔ རྗེས་ཆགས་གཟི་བྱིན་རབ་ཏུ་འབར་བར་གྱུར༔ [ཞེས་མདུན་བསྐྱེད་ཀྱི་དཀྱིལ་འཁོར་དེ་ཉིད་འཆི་མེད་བདུད་རྩིའི་ལྷ་ཚོགས་ཀྱི་རྣམ་པར་ཞལ་བསྒྱུར་རོ། །][གཉིས་པ་སྨན་སྲུང་སྤྱན་དྲང་བ་དང་། གསུམ་པ་རྟོག་པ་བསལ་བ་ནི་སྔར་ཁྲོལ་སྒྲུབ་ཀྱི་སྐབས་བཞིན་འདིར་བླངས་ཏེ་བྱའོ། །བཞི་པ་ཛཔ྄་བཟླ་བ་ནི། ལས་ཀྱི་རྡོ་རྗེས་གཟུང་ཐག་གི་སྣེ་མོ་ལྔ་རྡོ་རྗེ་རྒྱལ་པོ་དང་རྒྱལ་ཐེབས་བཞིའི་ཕྱག་ཏུ་ཕུལ་བ་དེ་རྣམས་ཀྱི་ལག་གཡོན་པའི་མཐེ་བོང་དང་སྲིན་ལག་སྦྱར་བ་རྟ་མགྲིན་ཡབ་ཡུམ་དུ་བསྒོམ་ཞིང་གུང་མཛུབ་དང་མཐེའུ་ཆུང་བསྒྲེང་བའི་བར་དུ་བཟུང་ལ།] ཤེས་རབ་སྒྲོག་གིས་སྦྲེལ་བའི་གཟུངས་ཐག་ལ། །རིག་པ་སྲོག་གིས་འབྲེལ་བའི་ལུ་གུ་རྒྱུད། །སྐུ་གསུང་ཐུགས་ཀྱི་དངོས་གྲུབ་མ་ཐོབ་པར། །སྐྱེ་བ་ཇི་སྲིད་བར་དུ་མི་བཏང་ངོ་། །[ཞེས་གཟུངས་ཐག་རྡོ་རྗེ་ལུ་གུ་རྒྱུད་ཁོང་སེང་བྲེང་ཆགས་སུ་ཡོད་པར་བསྒོམ་ཞིང་།] བདག་སྲོག་རྡོ་རྗེའི་སྔགས་ཀྱི་འོད་ཟེར་སྤྲིན༔ མདུན་བསྐྱེད་ལྷ་ཚོགས་ལ་ཕོག་ཐུགས་རྒྱུད་བསྐུལ༔ ཤིན་ཏུ་ཆགས་པ་ཆེན་པོའི་དམ་ཚིག་གིས༔ སྙོམས་ཞུགས་བདེ་བའི་གཟི་བྱིན་ཆེས་ཆེར་འབར༔ ཐབས་དང་ཤེས་རབ་རོལ་པའི་འོད་

ཟེར་གྱིས༔ འཁོར་དང་མྱ་ངན་འདས་པའི་བདུད་རྩིའི་བཅུད༔ ཁབ་ལེན་རྡོ་ཡིས་ལྕགས་ཕྱེ་ཇི་བཞིན་དུ༔ རང་དབང་མེད་པར་བདུད་རྩིའི་སྤྲིན་ཆེན་པོ༔ ལྔ་ལྡན་འོད་ཟེར་འབར་བའི་རྣམ་པར་བསྡུས༔ ཡབ་ཀྱི་ཞལ་ཞུགས་ཡུམ་གྱི་མཁའ་ལ་འཁྱིལ༔ དྭངས་མ་བདེ་ཆེན་ཡེ་ཤེས་སྲོག་ཏུ་རྫོགས༔ [ཞེས་པའི་དོན་ནན་ཏན་དུ་བསྒོམ་ལ།] ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ [ཞེས་དགུ་པའི་ཛཔ྄་ཏུ་གྲགས་པ་འདི་ཉིད་ཁོ་ན་ཆིག་དྲིལ་དུ་བཟླ་ཞིང་། བསྙེན་གྲོགས་ཀྱིས་གསུང་མི་ཆག་པར་ཁོར་ཡུག་ཏུ་བཟླ། སྔགས་སྟོང་ཕྲག་རེའི་མཚམས་སུ་མཆོད་པ་དང་། ཐུན་བསྡུ་བའི་ཚེ།] ལྷ་ཚོགས་དགྱེས་པའི་འོད་ཞུ་བཅུད་ལ་ཐིམ། །འཆི་མེད་བདུད་རྩིའི་རྒྱ་མཚོར་འཁྱིལ་བར་གྱུར། །[ཞེས་བསྡུ། དུས་དྲུག་ཏུ་ཉུ་ལེ་བསྐྲད་ཅིང་བྱིན་དབབ་པ་དང་། ཐུན་རྗེས་མའི་མཐར་ཚོགས་ཀྱི་མཆོད་པ་སོགས་སྔར་བཞིན་ནོ། །][ལྔ་པ་རྟགས་ཚད་བསྟན་པ་ནི།] ཇི་སྐད་དུ་བམ་བརྒྱད་ལས། རྟགས་དང་མཚན་མ་བདུན་གྱིས་འབྱུང་། །འོད་དང་དྲི་དང་དུ་བ་སྒྲ། །ལྷ་མོའི་གཟུགས་ཀྱང་སྟོན་པར་བྱེད། །མང་དུ་འཕེལ་ན་འགྲུབ་རྟགས་ཡིན། །དེ་ལ་ཡ་མཚན་བསྐྱེད་མི་བྱ། །ཞེས་གསུངས་པས། ལེ་ལོ་དང་ཐེ་ཚོམ་མེད་པའི་ཡིད་ཀྱིས་འབད་པས་བསྒྲུབས་ན་ངོ་མཚར་བའི་རྟགས་རྣམས་མཐོང་བར་འགྱུར་སྟེ། དེ་ཡང་ཐུགས་ཏིང་ངེ་འཛིན་གསལ་བ་ལས་འོད། ཡོན་ཏན་ཕྲིན་ལས་ཏེ་སྨན་ཆ་སྙོམས་པ་ལས་དུ་བ་དང་དྲི། གསུང་སྔགས་དག་པ་ལས་སྒྲ། སྐུ་ཕྱག་རྒྱ་གསལ་བ་ལས་ལྷ་མོའི་སྐུ་སྟོན་པ། མང་དུ་འཕེལ་བ་ནི་སྤྱིར་འགྲུབ་པའི་རྟགས་སོ། །དེ་དག་གང་

ལའང་དགོད་བྲོད་ཀྱི་སྙེམས་འཕྲིགས་མེད་པ་གལ་ཆེ་ཞིང་། སྤྱིར་རྟགས་དེ་རྣམས་འབྱུང་བའི་ཚད་གཞུང་གི་སྨོས་ཚོད་ཞག་བདུན་ན་མཐོང་བར་བཤད་ཅིང་། དེ་ལས་མྱུར་བས་འབྱུང་བའང་ཡོད་མོད། །དེང་སང་ལག་ལེན་ལ་སྨན་རླན་ཅན་དུ་གྱུར་པས་རུལ་བ་སོགས་ཀྱི་ཉེས་པ་འགོག་ཕྱིར་ཞག་གསུམ་དུ་ཤས་ཆེའོ། །][དྲུག་པ་སྤོགས་ཆོག་བྱ་བ་ནི། སྒྲུབ་པའི་ཞག་གྲངས་ཐེམས་ནས་ཀྱང་རྟགས་མ་བྱུང་ན་སྤོགས་པའི་ཆོ་ག་བྱ་བར་གསུངས་པས། དམ་ཚིག་ཉམས་ཆགས་རྣམས་སྐོང་བཤགས་ཀྱིས་སྦྱང་། མཚམས་དམ་དུ་བཅད། མཆེད་དང་སྒྲུབ་རྫས་ངན་པ་ཕྱིར་བསལ། མཆོད་རྫས་སོགས་ཡོ་བྱད་རྣམས་གཙང་ཞིང་དག་པར་གསང་། ཐེ་ཚོམ་མེད་པའི་ཡིད་རྩེ་གཅིག་པས་བསྒྲུབ་པར་བྱ་སྟེ། བམ་བརྒྱད་ལས། ཡོན་ཏན་ཅན་གྱིས་བརྩོན་འགྲུས་བསྐྱེད། །ཐེ་ཚོམ་མེད་ན་ངེས་པར་འགྲུབ། །ཅེས་པའི་ཚུལ་གྱིས་བསྒྲུབས་པས། རབ་ཀྱིས་ཐང་གཅིག་དང་ཞག་གཅིག །འབྲིང་གིས་ཞག་གསུམ་མམ་བདུན། ཐ་མས་ཉེར་གཅིག་གིས་སྔར་བཤད་པའི་རྟགས་མཚན་ཚུལ་བཞིན་དུ་མཐོང་བར་འགྱུར་རོ། །][གཉིས་པ་ལྷ་གནད་ལ་དབབ་པ་ནི། གོང་ལྟར་ཚུལ་བཞིན་བསྒྲུབས་པས་རྟགས་མ་མཐོང་བའམ་མཐོང་ན་ཡང་ཐ་ཚིག་བསྐུལ་བ་སྟེ།] ཧཱུྃ༔ ང་ནི་ཁྱབ་བདག་ཧེ་རུ་ཀ༔ རང་བཞིན་དཀྱིལ་འཁོར་ཆེན་པོར་རྫོགས༔ དམ་ཚིག་གཉན་ལ་རབ་དགོངས་ནས༔ ཡེ་ཤེས་དཀྱིལ་འཁོར་དབྱིངས་ནས་བཞེངས༔ བདུད་རྩི་སྤྲུལ་པའི་དཀྱིལ་འཁོར་ལ༔ བྱིན་རླབས་རྟགས་དང་མཚན་མ་སྟོན༔ གལ་ཏེ་ཐུགས་དམ་གཡེལ་སྲིད་ན༔ སྔོན་གྱི་དམ་བཅའ་གང་དུ་གཉན༔ དེ་བས་ཐུགས་རྗེ་ཐབས་མཁས་བདག༔ ཡལ་ཡོལ་དབྲི་བསྐོལ་མ་

མཛད་པར༔ མཐུ་རྩལ་དབྱུང་བའི་དུས་ལ་བབ༔ འཕྲུལ་གྱི་དངོས་གྲུབ་དེང་འདིར་སྩོལ༔ ཨོཾ་ཨཱཿཧཱུྃ་མ་ཧཱ་སུ་ཁ་བཛྲ་ཨ་མྲྀ་ཧཱུྃ་ཧྲཱིཿཋཱ༔ ཨེ་ཨཱ་རལླི་ཧྲཱིཾ་ཧྲཱིཾ་ཕེཾ་ཕེཾ༔ [ཞེས་སྟོང་དུ་ཚང་བར་བཟླས་མཐར། སྨན་གྱི་རིག་འཛིན་བསྐུལ་བའི་སླད་དུ་སྤོས་དང་རོལ་མོར་བཅས་པས།] ཧཱུྃ༔ བདག་ཅག་སྐལ་ལྡན་སྒྲུབ་པ་པོས༔ ལོངས་སྤྱོད་དུར་ཁྲོད་རྫས་ལ་བརྟེན༔ སྡོང་བུ་དུར་ཁྲོད་རས་ལས་གཏམས༔ ཚིལ་ཆེན་མར་ཁུ་རྒྱ་མཚོར་བསྐྱིལ༔ དཀྱིལ་འཁོར་ལྷ་ཚོགས་ཐུགས་དམ་བསྐང་༔ དམ་ཅན་མ་གཡེལ་དམ་ལ་འདུས༔ སྨན་གྱི་སྲུང་མ་དམ་ཚིག་ཅན༔ བདུད་རྩི་སྨན་གྱི་དྲིས་མཚོན་ཏེ༔ ལེ་བརྒན་དར་གྱིས་གཡབ་འདོར་ན༔ ལས་ལམ་མ་གཡེལ་ད་ཚུར་བྱོན༔ ཐམས་ཅད་ཆོས་ཀྱི་དབྱིངས་སུ་གཅིག༔ གཙང་དང་དམེ་བའི་རྟོག་པ་ཀུན༔ བདེ་བ་ཆེན་པོར་རྣམ་དག་པའི༔ གཟི་བྱིན་སྐྱེད་ལ་འོད་ཟེར་སྤྲོས༔ བདུད་རྩི་སྨན་གྱི་ནུས་པ་སྡུས༔ རྟགས་དང་མཚན་མ་མངོན་དུ་སྟོན༔ སྒྲུབ་པ་པོ་ཡི་ཕྲིན་ལས་མཛོད༔ ཨོཾ་སྲབ་ཨ་མྲྀ་ཏ་བཱིདྱ་ངྷ་ར་ཧྲཱིཾ་ཧྲཱིཾ་ཕེཾ་ཕེཾ་སིངྔྷི་སིངྔྷི་ཀུ་ར་ཧཱུཾ༔ [ཞེས་བསྐུལ་ལོ། །][གསུམ་པ་བདུད་རྩི་བསྐྱིལ་ཞིང་བཟུང་བ་ནི། སྔར་བཤད་པའི་རྟགས་མཚན་རྣམས་ལེགས་པར་མཐོང་ནས་བྱ་བ་སྟེ།] བྷཉྫ་གཞལ་ཡས་ཁང་ནང་བདུད་རྩི་ཡི། །རྒྱ་མཚོ་བསྐྱིལ་སྟེང་དཀྱིལ་འཁོར་ལྷ་ཚོགས་རྣམས། །བདེ་ཆེན་དགྱེས་པར་རོལ་པའི་སྦྱོར་མཚམས་མཁར། །དཀར་དམར་

བྱང་སེམས་ཡེ་ཤེས་བདུད་རྩིའི་བཅུད། །དངུལ་ཆུ་བཞིན་དུ་གསལ་འཚེར་འཛག་ལ་ཁད། །འཕོ་ཞིང་གཡོ་བ་ཙམ་དུ་འཁྱིལ་བར་གྱུར། །ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀུཎྜ་ལཱི་ཧཱུྃ་ཧྲཱིཿཋཱ༔ [ཞེས་ཁྲི་ལ་སོགས་པར་བཟླའོ། །][བཞི་པ་བདུད་རྩི་བཅུད་ལ་དབབ་པ་ནི། ཐོག་མར་དུར་ཁྲོད་ཀྱི་མ་མོ་བརྒྱད་བསྐུལ་བའི་སླད་དུ། ཚིལ་ཆེན་བསྲེག །ཧསྟས་གཡབ། རྐང་གི་གླིང་བུ་དང་བཤུགས་པ་སོགས་རོལ་མོའི་སྒྲ་དང་སྦྱར་ཏེ།] ཧཱུྃ༔ སྔོན་ཚེ་དཔལ་ཆེན་ཧེ་རུ་ཀས༔ དྲེགས་པའི་སྡེ་དཔོན་བཏུལ་བའི་ཚེ༔ སྦྱོར་བའི་ཐབས་ལ་མཁས་པ་ཡིས༔ མ་མོ་བརྒྱད་པོ་དབང་དུ་མཛད༔ བཀའ་བཞིན་འཚལ་བར་དམ་བཅས་ལྟར༔ བདག་ནི་དཔལ་ཆེན་གདུང་འཛིན་ཕྱིར༔ ཐུགས་དམ་ཞལ་བཞེས་རྗེས་དགོངས་ལ༔ གདོད་ནས་གྲུབ་པའི་དུར་ཁྲོད་ནས༔ འབར་དང་ཆགས་པའི་བརྟུལ་ཞུགས་ཀྱི༔ རྣམ་འགྱུར་མི་བཟད་བྱིན་གཡོ་བས༔ གནས་འདིར་མྱུར་དུ་གཤེགས་ནས་ཀྱང་༔ བདུད་རྩི་གསང་བའི་ཐུགས་དམ་བསྐུལ༔ བདེ་ཆེན་དགྱེས་པར་ཕེབས་པ་དང་༔ བྱིན་རླབས་གཟི་བརྗིད་ནུས་སྟོབས་སྐྱེད༔ དངོས་གྲུབ་མྱུར་དུ་འགྲུབ་པར་མཛོད༔ ན་མ་ངྷཱ་ཀི་ནཱི་ཨེ་ཨཱ་རལླི་ཧྲཱིཾ་ཧྲཱིཾ་ཕེཾ་ཕེཾ༔ [ཞེས་བསྐུལ་ལ།] གནས་ཀྱི་མ་ཚོགས་ཆགས་པའི་སྒྱུ་རྩལ་གྱིས། །ཁྲག་འཐུང་དགྱེས་པ་སྐྱེད་པའི་དམ་ཚིག་གིས། །དཀྱིལ་འཁོར་ལྷ་ཚོགས་མཁའ་ལས་བྱང་ཆུབ་སེམས། །དཀར་དམར་

བདུད་རྩི་སྨན་གྱི་རྒྱ་མཚོར་ཕབ། །སྨན་གྱི་སྲུང་མ་རིག་འཛིན་རྣམས་ཀྱིས་ཀྱང་། འཁོར་འདས་རྩི་བཅུད་མཚོ་ལ་སྦྲང་ཆར་བཞིན། །ཕབ་པས་དངོས་གྲུབ་གསོས་བཏབ་དམ་ཚིག་རྫས། །ཁ་དོག་དྲི་རོ་ནུས་ལྡན་རྒྱ་མཚོར་གྱུར། །ཨོཾ་སརྦ་ནཉྩ་ཨ་མྲྀ་ཏ་པྲ་བེ་ཤ་ཡ་ཕཊ་ཨཱ་བེ་ཤ་ཡ་ཧཱུྃ་ཧྲཱིཿཋཱ༔ [ཞེས་སྟོང་དུ་བཟླ་ཞིང་དབབ་པ་ནི་ཕྱག་རྒྱས་སྨན་ལ་གཏུག་གོ །][ལྔ་པ་བདུད་རྩི་དབང་དུ་བྱ་བ་ནི། ཐོག་མར་རིགས་ལྔའི་ཁྲག་འཐུང་རྣམས་བསྐུལ་བའི་དོན་དུ།] ཧཱུྃ༔ ང་ནི་དཔལ་ཆེན་ཧེ་རུ་ཀ༔ སྐུ་གསུང་ཐུགས་ཡོན་ཕྲིན་ལས་ལ༔ བདུད་རྩི་རང་བཞིན་དཀྱིལ་འཁོར་རྫོགས༔ རིགས་ཀྱི་འཁོར་ལོས་རབ་བསྒྱུར་བས༔ བདེ་གཤེགས་རྡོ་རྗེ་རིན་པོ་ཆེ༔ པདྨ་ལས་ཀྱི་ཁྲག་འཐུང་ཚོགས༔ སྔོན་ཚེ་ཞལ་བཞེས་དམ་བཅས་ལྟར༔ དབང་དང་དངོས་གྲུབ་སྩོལ་བའི་ཕྱིར༔ ལས་ལ་མ་གཡེལ་ད་ཚུར་བྱོན༔ དམ་ཚིག་ཚུལ་བཞིན་མ་གཤེགས་ཤིང་༔ དངོས་གྲུབ་དབང་དུ་བསྡུ་བ་དང་༔ སྐལ་པ་བཞིན་དུ་མ་བསྩལ་ན༔ རྡོ་རྗེའི་ཚིག་དང་འགལ་ཏ་རེ༔ དེ་བས་དམ་ཚིག་རྗེས་དགོངས་ལ༔ ལས་ཀྱི་འབྲས་བུ་མཆིས་པར་མཛོད༔ པཉྩ་ཛྙཱ་ན་ཤྲཱི་ཧེ་རུ་ཀ་སརྦ་ས་མ་ཡ་ཧཱུྃ་ཧཱུྃ༔ [ཞེས་བསྐུལ་ལ།] ཁྲག་འཐུང་རིགས་ལྔའི་སྤྲིན་གྱིས་འཁོར་འདས་བཅུད། །འོད་

དམར་རྣམ་པར་སླར་བསྐུས་ཐུགས་ཀར་ཐིམ། །གཙོ་བོ་ཡབ་ཡུམ་བདེ་རོལ་བྱང་སེམས་རྒྱུད། །འཆི་མེད་བདུད་རྩིའི་སྨན་དང་རབ་འདྲེས་ནས། །གཟུངས་ཐག་རྡོ་རྗེའི་ལམ་བརྒྱུད་མཐེབ་སྲིན་གྱི། །རྟ་མགྲིན་ཡབ་ཡུམ་ལ་ཐིམ་མཉམ་སྦྱོར་བའི། །བྱང་ཆུབ་སེམས་དང་གཅིག་འདྲེས་འོད་ཟེར་རྣམས༔ ། བདག་ལ་རབ་ཐིམ་གཉིས་སུ་མེད་པར་གྱུར། །ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧ་ཡ་གྲཱི་ཝ་ཧུ་ལུ་ཧུ་ལུ་བྷནྔྷ་བྷནྔྷ་ཧཱུྃ་ཧྲཱིཿཋཱ༔ [ཞེས་སྟོང་ལ་སོགས་པ་བཟླ་ཞིང་བདུད་རྩིའི་དངོས་གྲུབ་གཞན་གྱིས་འཕྲོས་པར་བདག་གིས་ཐོབ་པར་བསམ་མོ། །][དྲུག་པ་དངོས་གྲུབ་བླང་བ་ལ་གསུམ། ཐུགས་དམ་བསྐུལ་བ། སྙན་གསན་དབབ་པ། དངོས་གྲུབ་བླང་དངོས་སོ། །དང་པོ་ནི། སྒྲུབ་པའི་ཞལ་གྲངས་རྫོགས་པའི་ནང་པར་སྔ་མའི་ཆར་ཚེ་གལ་སྨན་གཏོར་རཀྟ་ཉེར་སྤྱོད་ཚོགས་ཀྱི་ཡོ་བྱད་སོགས་མཆོད་པའི་རྣམ་པ་ཇི་ཙམ་འབྱོར་པ་གསར་དུ་བཤམ། ཕྲིན་ལས་ཀྱི་གཞུང་སྲོང་བཟླས་པའི་བར་རྫོགས་པར་བྱས་ནས། སླར་ཡང་སྨན་ཕུད་ལ་སོགས་པས་མཆོད་མཐར་དད་པའི་གདུང་ཤུགས་ཀྱིས་ཐུགས་དམ་བསྐུལ་ཏེ།] དཀྱིལ་འཁོར་ལྷ་ཚོགས་སྐུ་གསུང་ཐུགས་ཡོན་ཏན། །ཕྲིན་ལས་འདུས་པའི་དངོས་གྲུབ་ཀུན་གྱི་དབྱིག །འཆི་མེད་བདུད་རྩིའི་འོད་ཀྱི་རྣམ་པར་ནི། །བདག་ལ་ཐིམ་ནས་གཉིས་སུ་མེད་པར་གྱུར། །[ཞེས་བསྒོམ་ཞིང་།] ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་མཉྫུ་ཤྲཱི་བྱ་བ་ལོ་ཀི་ཏེ་ཧཱུྃ་ཧྲཱིཿཋཱ༔ [ཞེས་སྟོང་དུ་ཚང་བར་བཟླའོ། །][གཉིས་པ་སྙན་གསན་དབབ་པ་ནི།] ཧཱུྃ༔ ཆོས་སྐུ་སྤྲོས་བྲལ་དབྱིངས་ལས་མ་གཡོས་

བཞིན༔ ལོངས་སྐུའི་དཀྱིལ་འཁོར་ཁྲག་འཐུང་འཁོར་ལོར་ཤར༔ སྤྲུལ་པ་ཐབས་མཁས་སྦྱོར་བའི་རོལ་པ་ཡིས༔ སྣང་སྲིད་བདུད་རྩིར་དག་པའི་ལྷ་ཚོགས་རྣམས༔ དང་པོར་བསྙེན་ཅིང་བར་དུ་རྩེ་གཅིག་བསྒྲུབས༔ ད་ལྟ་སྒྲུབ་པ་ཆེན་པོའི་ཕྲིན་ལས་ཀྱིས༔ གྲུབ་པའི་དངོས་གྲུབ་གསོལ་བའི་དུས་ལ་གསན༔ དགོངས་པ་ཡལ་ཡོལ་བཏང་སྙོམས་མ་མཛད་བར༔ ཐུགས་རྗེའི་རྩལ་སྐྱེད་ཁྱད་པར་རྟགས་མཚན་སྟོན༔ བྱིན་ཆེན་བྱིན་ཕོབ་དབང་ཆེན་དབང་མཆོག་སྐུར༔ ལས་དང་ཡེ་ཤེས་བདུད་རྩིའི་དངོས་གྲུབ་རྣམས༔ ད་ལྟ་ཉིད་དུ་བདག་ལ་བསྩལ་དུ་གསོལ༔ ཤྲཱི་ཧེ་རུ་ཀ་མ་ཧཱ་སུ་ཁ་ཨ་མྲྀ་སརྦ་སིངྔྷི་ཨཱ་བེཤ་ཡ་ཧཱུྃ་ཧཱུྃ༔ [ཞེས་བརྗོད་ཅིང་དཀྱིལ་འཁོར་ལ་བསྐོར་རོ། །][གསུམ་པ་དངོས་གྲུབ་བླང་བ་དངོས་ནི། སློབ་དཔོན་ཤར་དུ་འཁོད་པས་གུ་ཧྱ་ལག་གི་ཕྱག་རྒྱ་དངོས་གྲུབ་ལེན་པར་བྱ་སྟེ། ལག་གཡོན་མཐེབ་སྲིན་རྩེ་སྤྲད་ལྷག་མ་གསུམ་བརྐྱངས་པས་བདུད་རྩིའི་སྟེང་ནས་མནན་ཅིང་།] ཤྲཱི་ཧེ་རུ་ཀ་ཨ་ཧོསུ་ཁ་དྷརྨ་ཀཱ་ཡ་ནི་ཨ་མྲྀ་ཏ་སིདྡྷི་ཧཱུྃ་ཧྲཱིཿཋཱ༔ [ཞེས་བརྒྱ་རྩ་བརྒྱད་ལ་བཟླས་ལ།] ཧཱུྃ༔ རང་བྱུང་བདུད་རྩིའི་ཕོ་བྲང་ཆེན་པོ་ན། དགྱེས་པར་བཞུགས་པའི་དཔལ་ཆེན་དཀྱིལ་འཁོར་པ༔ རྟག་རྒྱན་རང་བཞིན་ཡེ་ཤེས་ཚད་མེད་ཀྱང་༔ གདུལ་བྱའི་ཡུལ་ལ་འཇུག་ཕྱིར་སླར་ཡང་གསོལ༔ བདུད་རྩི་སྒྲུབ་པའི་

ཞག་གྲངས་ད་ནང་ཐེམ༔ བདུད་རྩི་སྒྲུབ་པའི་དམ་ཚིག་ད་ལྟ་རྫོགས༔ རྡོ་རྗེའི་ནམ་ལངས་དངོས་གྲུབ་ཉི་ཟླ་ཤར༔ ཐུགས་དམ་དུས་ལ་བབ་བོ་ཐུགས་རྗེ་སྐྱེད༔ རྡོ་རྗེའི་སྐུ་མངའ་འགྲན་དུ་མེད་པ་ཡི༔ གཟི་བརྗིད་ཚེ་ཡི་དངོས་གྲུབ་བསྩལ་དུ་གསོལ༔ རྡོ་རྗེའི་གསུང་ལ་སྔགས་ཀྱི་ཆར་ཆེན་འབེབས༔ བྱིན་རླབས་ལུང་གི་དངོས་གྲུབ་བསྩལ་དུ་གསོལ༔ འོད་གསལ་ཐུགས་ཀྱི་དགོངས་པ་མཁའ་ལྟར་ཁྱབ༔ མཁྱེན་བརྩེ་ནུས་པའི་དངོས་གྲུབ་བསྩལ་དུ་གསོལ༔ འགྲོ་འདུལ་ཡོན་ཏན་ཡིད་བཞིན་རིན་ཆེན་སྤྲིན༔ ཁམས་གསུམ་དབུས་འབྱིན་དངོས་གྲུབ་བསྩལ་དུ་གསོལ༔ ཚེ་དང་སྐོང་དང་བགེགས་ཞི་དབང་བསྒྱུར་སོགས༔ ཅི་འདོད་འགྲུབ་པའི་དངོས་གྲུབ་བསྩལ་དུ་གསོལ༔ ཧེ་རུ་ཀ་དང་སྤྱོད་ཡུལ་དབྱེར་མེད་པའི༔ དངོས་གྲུབ་དམ་པ་དེང་འདིར་བདག་ལ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སིངྔྷི་ཕ་ལ་ཧཱུྃ༔ [ཞེས་དངོས་གྲུབ་སྤྱིར་གསོལ། སྙིམ་པ་མེ་ཏོག་དང་བཅས་པས་དཀྱིལ་འཁོར་ལ་འདུད་ཅིང་།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ རིག་པ་བྱང་ཆུབ་སེམས་ཀྱི་མེ་

ཏོག་འདི༔ ཐབས་དང་ཤེས་རབ་དབྱིངས་སུ་བདག་འབུལ་གྱིས༔ སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ༔ ཨོཾ་དི་དྷི་ཙིཏྟ་ཀཱ་ཡ་ཝཱ་ཀ་ཙིཏྟ་ས་མ་ཡ་སྟྭཾ༔ [ཞེས་མེ་ཏོག་དོར། སྨན་གྱི་ཕོ་བྲང་སློབ་དཔོན་རིག་མར་བཅས་པས་ཁྲག་འཐུང་གར་གྱི་ཕྱག་རྒྱས་དཀྱིལ་འཁོར་ནས་སྤྱན་དྲངས་པ་གཙུག་ཏུ་བཀོད་ལ།] སློབ་དཔོན་བདག་ཉིད་རང་བཞིན་གྱི་དཀྱིལ་འཁོར་དུ་གསལ་བ་ལ་བདུད་རྩི་རྩ་བའི་དཀྱིལ་འཁོར་ལ་ཐིམ་ནས་གཉིས་མེད་དུ་གྱུར་པར་ [བསམ་ཞིང་] ཧཱུྃ༔ བདུད་རྩིའི་སྐུ་གསུང་ཐུགས་ཡོན་ཕྲིན་ལས་དང་༔ རང་བཞིན་དཀྱིལ་འཁོར་མི་ཟད་རྒྱན་འཁོར་ལྔ༔ དབྱེར་མེད་གདོད་ནས་མཉམ་པ་ཆེན་པོའི་ངང་༔ ཁྱབ་བདག་ཐིག་ལེ་གཅིག་ཏུ་དབང་བསྐུར་རྫོགས༔ ཨོཾ་ཨཱཿཧཱུྃ་མ་ཧཱ་སུ་ཁ་ཨ་མྲྀ་ཏ་མཎྜལ་ཛཿཧཱུྃ་བཾ་ཧོཿ [ཞེས་སློབ་དཔོན་གྱིས་དབང་བླངས་ལ།] ཡེ་ཤེས་འོད་ཟེར་རང་ལ་ཐིམ༔ ལྷ་ཚོགས་བདུད་རྩིར་འཁྱིལ་བ་ལས༔ སྲིད་པ་གསུམ་པོ་ཐམས་ཅད་ཀུན༔ བདུད་རྩིའི་དྲི་རོ་ནུས་པས་ཁྱབ༔ ཁམས་གསུམ་སེམས་ཅན་ཐམས་ཅད་ཀུནཿ བདེ་བ་ཆེན་པོ་བདུད་རྩིའི་བདག༔ དཔལ་ཆེན་ཁྲག་འཐུང་སྐུ་རུ་གྱུར༔ [ཞེས་མོས། དེ་ནས་སློབ་མ་རྣམས་ཀྱིས་རུ་ལུ་གར་གྱི་བྲོས་བསྐོར་ཏེ་རྡོ་རྗེ་སློབ་དཔོན་ལ་སྔར་བཞིན་མེ་ཏོག་འབུལ་ཞིང་གསོལ་བ་གདབ། །སློབ་དཔོན་གྱིས་སྨན་གྱི་ཕོ་བྲང་ཐོགས་ལ།] ཧཱུྃ༔ དཔལ་ཆེན་ཕྲིན་ལས་འདུས་པའི་དཀྱིལ་འཁོར་དུ༔ སྣང་སྲིད་འཁོར་འདས་ཐམས་

ཅད་བསྡུས་པའི་བཅུད༔ རྩ་བརྒྱད་ཡན་ལག་སྟོང་སྦྱར་སྨན་གྱི་དབང་༔ སྐལ་ལྡན་ལུས་ངག་ཡིད་ཀྱིས་ཐོབ་པར་ཤོག༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ༔ [ཞེས་དབང་བསྐུར་ཞིང་།] ཁ་དོག་མཐོང་བས་ལུས་སྒྲིབ་དག༔ ཚེ་དང་བསོད་ནམས་ལང་ཚོ་རྒྱས༔ དྲི་ལ་བསྣོམས་པས་ངག་སྒྲིབ་དག༔ ནུས་པ་འབར་ཞིང་དབང་དུ་འདུ༔ རོ་ལ་ཞལ་མྱང་བས་ཡིད་སྒྲིབ་དག༔ བདེ་ཆེན་ཡེ་ཤེས་རྩོལ་མེད་འཆར༔ དཔལ་ཆེན་ཧེ་རུ་ཀ་དང་མཉམ༔ མཆོག་ཐུན་ཕྲིན་ལས་ཐམས་ཅད་འགྲུབ༔ [ཅེས་ཕན་ཡོན་བསྟན་ནས་ཇི་ལྟར་རིགས་པའི་སྟེགས་ལ་བཞུགས་སུ་གསོལ་ལོ། །][བདུན་པ་རྒྱ་འགྲོལ་བ་ལ་གསུམ། གཏད་ཅིང་རྒྱ་འགྲོལ་བ། མཆོད་ཅིང་བགོ་བ། བཅང་ཞིང་བསྟེན་པའོ། །དང་པོ་ནི། བདུད་རྩི་བསྡུ་བ་པོ་འཇམ་དཔལ་རྣོན་པོ་ཡིན་པའི་ཕྱིར་དེའི་ཐུགས་རྒྱུད་བསྐུལ་བའི་དོན་དུ།] ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀུཎྜ་ལཱི་མ་ཧཱ་གུ་ཧྱ་མཉྫུ་ཤྲཱི་སིདྡྷི་ས་མ་ཡ་ཧཱུྃ་ཧྲཱིཿཋཱཿ [ཞེས་བརྒྱ་རྩ་བརྒྱད་བཟླས་པས་དཀྱིལ་འཁོར་པ་རྣམས་ཀྱིས་འཇམ་དཔལ་རྣོན་པོ་ལ་གཏད་ནས་གནང་བ་བྱིན་པར་བསམ་ཞིང་། ལས་ཀྱི་རྡོ་རྗེ་ཡུམ་དུ་བཏགས་པས་སྨན་སློབ་དཔོན་ལ་འབུལ་ཏེ།] ཨེ་མ་ཧོཿ ངོ་མཚར་རྨད་དུ་བྱུང་བའི་ཆོས། །ནམ་མཁའ་དང་ནི་མཉམ་པའི་གནས། །རྣམ་པར་མི་རྟོག་རྟོག་ལས་འདས༔ ཀུན་རྫོབ་ཙམ་དུ་བསྟན་པ་མཚར། །[ཞེས་ཕུལ། སློབ་དཔོན་གྱིས།] ཨོཾ་སརྦ་པཉྩ་མ་ཧཱ་སུ་ཁ་ཧོ༔ [ཞེས་བླངས་ལ།] ཨོཾ་བི་ཤུདྡྷེ་ཀརྨ་པྲ་བེ་ཤ་ཡ་ཕཊ༔ [ཅེས་སྨན་ཐོད་

ལ་དཀྲིས་པའི་སྲད་བུ་བཀྲོལ།] ཨ་མྲྀ་ཏ་ཀཱ་ཡ་ཝཱ་ཙིཏྟ་སིདྡྷི་ཧཱུྃ༔ [ཞེས་ཁ་ཕྱེས་ལ། སྨན་གྱི་བདུད་རྩིའི་དྭངས་མ་དཀར་དམར་སྔོ་བའི་འོད་ཀྱི་རྣམ་པས་རང་གི་གནས་གསུམ་དུ་ཐིམ་པར་བསམ། དེ་ནས་སྨན་དྲིལ་བུ་ལ་གཞལ་ཏེ་ཇི་ཙམ་འཕེལ་བ་རྟགས་ནས་སྟེགས་བུ་ལ་བཀོད་དོ། [འདིར་མདངས་འགུགས་པའི་སྲོལ་ཡང་ཡོད།] ། [གཉིས་པ་མཆོད་ཅིང་བགོ་བ་ནི། ཐོད་པ་བཟང་པོ་མྱོས་བྱེད་ཀྱིས་བཀང་བ་ལ་བདུད་རྩིའི་ཕུར་མ་ཅུང་ཟད་བླུགས་ལ་བྱིན་གྱིས་བརླབ་སྟེ།] ཕྱོགས་བཅུ་དུས་བཞིའི་རྒྱལ་བ་སྲས་དང་བཅས་པ་ཐམས་ཅད་དཀྱིལ་འཁོར་འཁོར་ལོའི་ལྷ་ཚོགས་ཀྱི་རྣམ་པར་མདུན་གྱི་ནམ་མཁར་སད་པར་[མོས་ལ།] ཧཱུྃ་ཧྲཱི༔ རང་བྱུང་གདོད་ནས་རྣམ་པར་དག༔ [ཅེས་སོགས་ཀྱིས་རྒྱས་པར་མཆོད་ནས།] རང་གི་ལྕེ་ཉི་མ་ལ་གནས་པའི་རྡོ་རྗེའི་ལྟེ་བ་ཧཱུྃ་གིས་མཚན་པར་[བསམ་ཞིང་། གཡོན་པ་མཐེབ་སྲིན་གྱིས་བདུད་རྩིའི་ཐེག་ལེ་གནས་གསུམ་དུ་བཀོད་ཅིང་ལྕེ་ཐོག་ཏུ་བཞག་ལ།] ཨོཾ་ཨཱཿཧཱུྃ༔ བླ་མ་རིག་འཛིན་སྙོམས་ཞུགས་ཟག་བྲལ་རྒྱུན༔ [ཞེས་སོགས་ཀྱི་མྱང་ཞིང་། ཉེ་སྙིང་ལས། རྣ་བ་སྙིང་ག་ལྕེ་སྟེང་དང་། །ཡན་ལག་ཀུན་ལ་ཐིག་ལེ་བྱའོ། །ཞེས་གསུངས་པ་བཞིན་ཐིག་ལེའང་བྱ། ལུས་ཀྱི་རྩ་ཁམས་ཐམས་ཅད་བདུད་རྩི་བྱང་ཆུབ་སེམས་ཀྱིས་ཡོངས་སུ་གང་བའི་བདེ་སྟོང་གི་ངང་ལ་མཉམ་པར་བཞག་གོ །དེ་ནས་སྨན་རྣམས་ཆ་གསུམ་དུ་བགོས་པའི་དང་པོ་དཀྱིལ་འཁོར་གྱི་ལྷ་རྣམས་ལ་བསྔོ། བར་པ་སློབ་དཔོན་གྱིས་བཟུང་། ཐ་མ་སྒྲུབ་པ་པོ་སྤྱི་ལ་སྤེལ། དང་པོ་ཆ་ལས་གཞན་དོན་དུ་གཉེར་བ་ལ་ཡང་ཇི་ལྟར་

རིགས་པ་སྦྱིན་པར་བྱའོ། །][གསུམ་པ་བཅང་ཞིང་བསྟེན་པ་ནི། དེ་ལྟ་བུའི་བདུད་རྩི་དེ་ཉིད་རིན་པོ་ཆེའི་གའུའམ་པགས་ཤུན་སོགས་ཇི་ལྟར་རིགས་པའི་སྣོད་དུ་བླུགས་ལ་སྤྱི་བོའམ་མགུལ་དུ་བཅང་ཞིང་རྒྱུན་དུ་བསྟེན་པར་བྱ་སྟེ། རྒྱུད་ལས། བདུད་རྩི་སྤྱི་བོར་བཅངས་པ་ཡིས། །དུས་གསུམ་བདེ་གཤེགས་བསྙེན་བཀུར་འགྱུར། །མགུལ་ལམ་དཔུང་པར་བཏགས་པས་ཀྱང་། །ཕྱོགས་བཅུའི་རྒྱལ་བས་སྲས་སུ་དགོངས། །རིག་འཛིན་མཁའ་འགྲོ་ངང་གིས་འདུ། །རྩ་ཁམས་རླུང་ལ་བྱིན་ཆེན་འབེབ། །རྡོ་རྗེའི་སྲུང་བ་ཆེན་པོར་འགྱུར། །བྱད་ཕུར་རྦོད་གཏོང་གདོན་དང་བགེགས། །གང་གིས་མི་ཚུགས་ཐུབ་པ་མེད། །ཅེས་དང་། སློབ་དཔོན་ཆེན་པོས། གསང་བའི་དམ་ཚིག་ཆེན་པོ་ནི། །ཡེ་ཤེས་སྒྲུབ་རྫས་བདུད་རྩི་ལྔ། །དམར་ཆེན་ག་བུར་ཙན་དན་སྦྱར། །རྡོ་རྗེ་ཆུ་ཡིས་ཀུན་ཏུ་བསྲེ། །དུས་གསུམ་རྒྱལ་བ་ཀུན་དང་མཚུངས། །འདི་དང་འདོད་པའི་ཡོན་ཏན་ལྔ། །རྒྱུན་དུ་ཡང་དང་ཡང་དུ་བསྟེན། །འདི་ནི་དམ་ཚིག་བླ་ན་མེད། །ཅེས་གསུངས་པས། རབ་ཐུན་བཞིའི་ཐོག་མཐར་ཆག་མེད་དུ་བསྟེན། འབྲིང་ཐུན་མགོར་རེ་རེ་དང་། ཐ་མས་ཐུན་དང་པོའི་འགོ་དང་། དེ་ཡང་མ་འགྲུབ་ན་ཟླ་བ་དྲུག་ལ་རེ་རེ་དང་། གལ་ཏེ་དེ་ཡང་མ་འགྲུབ་ན་ལོ་རེའི་དཔྱིད་ཟླ་འབྲིང་པོའི་ཚེས་གཅིག་གམ་བཅོ་ལྔ་ལ་ལན་རེ་མ་ཆག་པར་བསྟེན། དེའི་ཚེ་རང་ཉིད་ལྷར་གསལ་བས་བདུད་རྩི་ཡེ་ཤེས་ལྔའི་རང་བཞིན་དུ་མོས་ལ་གཡོན་པའི་མཐེབ་སྲིན་རྡོ་རྗེ་དང་པདྨ་སྦྱར་བ་ལས་ཡེ་ཤེས་ཀྱི་བདུད་རྩི་བྱུང་བ་ལྕེ་རྡོ་རྗེ་ཧཱུྃ་གིས་མཚན་པ་ལ་ཐིམ་པས་རྩ་ཁམས་ཐམས་ཅད་ཁྱབ་སྟེ་ལུས་དཀྱིལ་གྱི་ལྷ་ཚོགས་རྣམས་ཚིམ་པར་བསམ་ལ་ཟ་བར་བྱའོ། །][དོན་གསུམ་པ་རྗེས་ཀྱི་བྱ་བ་ལ་བདུན། སྤྱིན་སྲེག་བྱ་བ།

གཏོར་མ་བཏང་བ། དཀྱིལ་འཁོར་བསྡུ་བ། མཚམས་འགྲོལ་བ། རྡུལ་ཚོན་གཤེགས་པ། སྨོན་ལམ་གདབ་པ། དགའ་སྟོན་ཤིས་བརྗོད་པའོ། །][དང་པོ་ནི། དཀྱིལ་འཁོར་གྱི་མདུན་དུ་རྒྱས་པའམ་མཆོག་གི་སྦྱིན་སྲེག་ཚུལ་བཞིན་དུ་བྱ་སྟེ། གཏོར་མ་བདུད་རྩིའི་ཆ་ཤས་ཀྱང་བསྲེག་རྫས་སུ་འབུལ་ཏེ་འདོད་དོན་གསོལ་ལོ། །][གཉིས་པ་ནི། འཇིག་རྟེན་ལས་འདས་པའི་གཏོར་མ་རྣམས་ཆ་གསུམ་དུ་བགོས་པའི་དང་པོ་སྔར་གྱི་བསྲེག་རྫས་སུ་ཕུལ། གཉིས་པ་དངོས་གྲུབ་ཀྱི་དོན་དུ་བཞག །གསུམ་པ་མི་འཛད་པའི་གཏེར་དུ་སྦ་བར་བྱའོ། །][གསུམ་པ་ནི། དཀྱིལ་འཁོར་པར་གཏང་རག་གི་མཆོད་པ་རྒྱ་ཆེན་པོ་འབུལ་ཞིང་བསྟོད་པ་བྱ། ནོངས་པ་བཟོད་པར་གསོལ་ནས་ཡེ་ཤེས་པ་གཤེགས། དམ་ཚིག་པ་བསྡུས་ཏེ་རྒྱུན་གྱི་ཏིང་ངེ་འཛིན་ལ་འཇུག་གོ །][བཞི་པ་ནི། ཕྱི་ནང་གསང་བའི་མཚམས་འགྲོལ་བ་སྟེ་སྒྲུབ་གཞུང་བཞིན་ནོ། །][ལྔ་པ་ནི། རྡུལ་ཚོན་རྣམས་ཨ་ཀཱ་རོས་བསྡུས་ལ་རྒྱ་མཚོར་འབབ་པའི་ཆུར་གཤེགས་སུ་གསོལ་བ་སོགས་སོ། །][དྲུག་པ་ནི། མར་མེའི་སྨོན་ལམ་དང་གཞན་ཡང་སྨོན་ལམ་གྱི་རིམ་པ་ཇི་ལྟར་ནུས་པ་གདབ་བོ། །][བདུན་པ་ནི། དགའ་སྟོན་དང་བཀྲ་ཤིས་བྱ་བ་སྟེ་ཆོ་གའི་མཐའ་རྒྱས་པར་བྱ་བའི་ཕྱིར་ཕུན་སུམ་ཚོགས་པའི་དགེ་ལེགས་ཀྱི་སྣང་བ་ཆེན་པོའ་ཡོངས་སུ་ཁྱབ་པར་བྱའོ། །འཕྲོས་དོན་དུ་སྐབས་འགའ་ཞིག་གི་ཚེ་སྤྲོས་པས་བསྡུ་བའི་སྨན་ཁོ་ན་རྐྱང་སྒྲུབ་བྱེད་པར་འདོད་ན། །སྒྲུབ་པའི་གཞི་བཟུང་ཕྱི་བཤགས། ས་ཆོག །ཕྱི་ནང་གསང་བའི་མཚམས་གཅོད། མ་ཏྲཾ་བསྒྲལ་། ཆག་ཆག་འདེབས་པ་སོགས་སྤྱིའི་ཁོག་དབུབ་རགས་པ་ཙམ་བྱས་རྗེས། སྒྲུབ་པ་དངོས་གཞི་དཀྱིལ་འཁོར་ལ་མ་ལྟོས་པར་སྨན་གྱི་དཀྱིལ་འཁོར་ཁོ་ན་ཁོལ་བུར་ཕྱུངས་ཏེ་

སྒྲུབ་ཚུལ་མཐའ་རྒྱས་ཀྱི་བར་ཁར་སྔར་བསྟན་པ་ལས་སྐབས་སུ་བབས་པའི་ཚོམས་བསྡུས་ཏེ་ཤེས་པར་བྱ་བ་ཡིན་ལ། དེ་ལྟ་ནའང་ཕྱི་བཤགས་སོགས་ལ་ཞག་གཅིག །ཁྲོལ་བུ་ཞག་གསུམ། བཏགས་བཙག་ཉིན་གཅིག །ཕྱེ་མར་ཞག་གསུམ། བསྐྱིལ་དབབ་སོགས་ཉིན་གཅིག །དངོས་གྲུབ་ལེན་ཅིང་རྗེས་ཆོག་དང་བཅས་པས་སྦྱིན་ཞག་དགུར་ངེས་པ་ཡིན་ཅེས་སློབ་དཔོན་ཆེན་པོའི་གསུངས་ལས་འབྱུང་ངོ་། །][སྤྱི་དོན་བདུན་པ་ཕན་ཡོན་བསྟན་པ་ནི། རྩ་རྒྱུད་ལས། སྐད་ཅིག་ཐུག་ཕྲད་བསྟེན་པ་ཡིས། །ཚེ་རིང་ནད་མེད་བདེ་བར་དང་། །ལང་ཚོ་ཁ་དོག་སྟོབས་དང་གཟི། །འཕེལ་ཞིང་དབང་པོའི་རིག་པ་གསལ། །མཁའ་ལ་འགྲོ་ཞིང་ཕ་རོལ་གྱི། །ནུས་སྟོབས་ནུས་པས་མི་ཚུགས་ཤིང་། །ཀུན་གྱིས་བཀུར་སྟིའི་འོས་སུ་འགྱུར། ཞེས་དང་། བམ་བརྒྱད་ལས། བཞི་རྒྱ་རྩ་བཞིའི་ནད་རྣམས་སེལ། །མདོག་ནི་བཅུ་དྲུག་གཞོན་ནུ་འདྲ། །སྟོབས་ཀྱང་གླང་པོ་ཆེ་དང་འདྲ། །མངོན་ཤེས་ལྔ་དང་ལྡན་པར་འགྱུར། །ཞེས་སོགས་གནས་སྐབས་ཀྱི་ཡོན་ཏན་དུ་མ་དང་། མཐར་ཐུག་གི་ཕན་ཡོན་ཇི་ལྟར་འཐོབ་པའི་ཚུལ། རྒྱུད་ལས། འདི་གྲུབ་རྒྱལ་སྲས་དམ་པར་འགྱུར། །ཡོན་ཏན་མཆོག་འབྲས་ཡོངས་སུ་རྫོགས། །ཞེས་གསུངས་པའི་དོན་ཨོ་རྒྱན་ཆེན་པོའི་རྡོ་རྗེའི་གསུང་གིས་རྒྱས་པར་བཀྲལ་བ། བདེ་གཤེགས་མ་ལུས་མཆོད་པའི་རྫས། །བླ་མ་ཡི་དམ་སྡུད་པའི་རྩི། །མཁའ་འགྲོ་ཀུན་ཀྱི་སྙིང་ཁྲག་ཡིན། །ཟོས་པས་ཡོན་ཏན་བརྗོད་མི་ལངས། །སངས་རྒྱས་སྐུ་ལྔའི་ཡོན་ཏན་ཐོབ། །ཕྱི་ལྟར་ལུས་ཀྱི་ནད་གདོན་འཇོམས། །ནང་དུ་ཉོན་མོངས་དུག་ལྔ་འདག །དམ་ཚིག་ཉམས་ཆགས་ཐམས་ཅད་སྐོང་། །གསང་བ་རང་བྱུང་ཡེ་ཤེས་རྟོགས། །

ཉན་ཐོས་རང་སངས་རྒྱས་རྣམས་ཀྱིས། །ཟོས་པས་ས་བཅུ་ནོན་ནས་ཀྱང་། །ཐེག་ཆེན་བྱང་སེམས་ཆེན་པོར་འགྱུར། །བླ་མ་མཆོད་ན་བྱིན་རླབས་འཇུག །ཡི་དམ་མཆོད་ན་དངོས་གྲུབ་སྟེར། བདེ་གཤེགས་མཆོད་ན་ཐུགས་རྗེ་འབྱུང་། །མཁའ་འགྲོ་མཆོད་པས་ལུང་ཡང་སྟོན། །རྣལ་འབྱོར་པའམ་སུས་ཟོས་ཀྱང་། །ཕྱི་ཡི་ནད་གདོན་སྡིག་སྒྲིབ་བྱང་། །ནང་གི་བསྐྱེད་རིམ་ཏིང་འཛིན་གསལ། །གསང་བ་རང་རིག་ཆོས་སྐུར་རྟོགས། །ཉམས་དང་ལྷག་ཆད་དམ་ལུས་སྐོང་། །འཆང་བས་དུས་མིན་འཆི་བ་བཟློག །གདུག་པའི་དུག་ཀྱང་གཞིལ་བར་ནུས། །བྱུག་པས་ནད་གདོན་མ་ལུས་སེལ། །བསྲེག་ན་གདོན་བགེགས་ཐམས་ཅད་སྐྲོད། །འདི་ཉིད་སྒྲུབ་པའི་གནས་དེ་ཡང་། །དུར་ཁྲོད་བསིལ་བའི་ཚལ་དང་མཚུངས། །དཔའ་བོ་མཁའ་འགྲོ་ཐམས་ཅད་འདུ། །ས་ཕྱོགས་བྱིན་དང་ལྡན་པར་འགྱུར། །ཆར་ཆུ་འབེབས་ཤིང་ལོ་ཕྱུགས་ལེགས། །གར་སྒྲུབ་པ་ཡི་གནས་དེ་རུ། །སུ་བསྡད་མི་རྣམས་ཏིང་འཛིན་འཆར། །ནམ་ཞིག་ཚེ་ཡི་དུས་བྱས་ཚེ། །ཕོ་མོ་བཟང་ངན་མེད་པ་རུ། །རིག་པ་འཛིན་པའི་ས་ལ་གནས། །དེ་ཕྱིར་མཆོག་གི་དམ་རྫས་སོ། །ཞེས་གསུངས་པས། མདོར་ན་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྒྱ་མཚོ་ལ་དབང་འབྱོར་བས་དོན་གཉིས་འབྲས་བུ་ཕུན་སུམ་ཚོགས་པ་བདེ་བླག་ཏུ་འགྲུབ་པར་གདོན་མི་ཟ་བ་ཡིན་ནོ། །] གསང་སྔགས་ཐབས་ཀྱིས་ཆེ་བའི་ཁྱད་ཆོས་ལས། །འབྲེལ་ཚད་གྲོལ་བ་མཆོག་ལ་སྦྱོར་བྱེད་པ། །དམ་རྫས་སྒྲུབ་པའི་མན་ངག་བདུད་རྩིའི་རྒྱུན། །སྐལ་བཟང་ཀུན་

དགའི་དཔྱིད་དུ་ཁོ་བོས་སྤྲོས། །ཉོན་མོངས་བདུད་ཁམས་ཡེ་ཤེས་རྩིར་བསྒྱུར་ནས། །བརྟན་གཡོའི་སྲོག་ལ་བདེ་ཆེན་ཕྱག་རྒྱས་ཐེབས། །འཆི་མེད་འོད་གསལ་དྭངས་མའི་ཧེ་རུ་ཀར། །ལྷུན་རྫོགས་བཀྲ་ཤིས་སྣང་བས་ཀུན་ཁྱབ་ཤོག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་མཆོག་གི་ཕྲིན་ལས་དམ་རྫས་བདུད་རྩིའི་སྒྲུབ་ཐབས་དངོས་གྲུབ་རྒྱ་མཚོའི་དགའ་སྟོན་ཅེས་བྱ་བ་འདི་ནི། རང་གཞན་རྣམས་འཆི་མེད་བདེ་ཆེན་ཡེ་ཤེས་རྡོ་རྗེ་གཞོན་ནུའི་སྲོག་སྒྲུབ་པའི་ཆ་རྐྱེན་དུ་ཡང་དག་པར་དམིགས་ནས། བདེ་བ་ཆེན་པོ་པདྨ་སམྦྷ་ཝའི་མན་ངག་གི་གཞུང་ཉིད་མཁས་ཤིང་གྲུབ་པ་བརྙེས་པའི་རྡོ་རྗེ་སློབ་དཔོན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲངས་ཏེ། རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེས་རང་ལོ་སུམ་ཅུ་རྩ་བཞིར་སོན་པ་རབ་བྱུང་བཅུ་དྲུག་པའི་མེ་ཁམས་ཁྱུ་མཆོག་གི་ལོ་རྩི་བཅུད་འབྲས་སུ་སྨིན་པ་སྟོན་ཟླ་འབྲིང་པོའི་ཡར་ངོའི་རྒྱལ་བ་གཉིས་པ་ལྷ་དང་དྲང་སྲོང་དཔའ་བོ་ཌཱ་ཀིའི་འདུ་བ་ཀུན་ཏུ་དགའ་མགུར་རོལ་པའི་ཚེ། རང་བྱུང་པདྨས་བྱིན་གྱིས་བརླབས་པའི་སྒྲུབ་གནས་ཀྱི་རྒྱལ་པོ་སྟག་ཚང་སེང་གེ་བསམ་འགྲུབ་ཀྱི་ཀེའུ་ཚང་དཔལ་ཆེན་དགྱེས་པའི་ཕོ་བྲང་དུ་ཁྲག་འཐུང་ཕྲིན་ལས་འདུས་པའི་དཀྱིལ་འཁོར་གྱི་འཁོར་ལོ་ལ་བརྟེན་ནས་སྣང་སྲིད་བདུད་རྩིར་བསྐྱིལ་བའི་སྐབས་སུ་ལེགས་པར་སྦྱར་བ་སྟེ། འདིས་ཀྱང་གྲོལ་བ་རྣམ་པ་བཞིའི་ཕྲིན་ལས་འདོད་རྒུར་འཇོ་བས་འགྲོ་བ་ཐམས་ཅད་ཀྱིས་འཆི་མེད་གཉུག་མའི་ཧེ་རུ་ཀ་མངོན་དུ་འགྲུབ་པའི་རྒྱུར་གྱུར་ཅིག།] སརྦ་དཱ་མངྒ་ལཾ།། །།

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་བདག་འཇུག་གི་དག་འདོན་སྙིང་པོར་དྲིལ་བ།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་བདག་འཇུག་གི་དག་འདོན་སྙིང་པོར་དྲིལ་བ་བཞུགས་སོ། །

ན་མོ་ཤྲཱི་བཛྲ་ཀུ་མཱ་ར་ཡེ། [དེ་ཡང་རིམ་གཉིས་ཀྱི་རྣལ་འབྱོར་ཟབ་མོ་ཉམས་སུ་ལེན་པའི་ཆ་རྐྱེན་ལམ་དུས་ཀྱི་དམ་ཚིག་གསོ་ཞིང་ཡེ་ཤེས་སྤེལ་བ་ལ་མེད་དུ་མི་རུང་བ་ལྷག་པའི་ལྷའི་དཀྱིལ་འཁོར་དུ་བདག་འཇུག་མདོར་བསྡུས་ཏེ་བླང་བའི་ཚུལ་ནི། སྦྱོར་བ་མཚན་མའི་དཀྱིལ་འཁོར་བཞེངས་ཏེ་བདག་མདུན་བུམ་གསུམ་ཐ་མི་དད་ཀྱི་ཚུལ་དུ་ལས་གཞུང་གི་བཟླས་པའི་བར་བསྒྲུབས་རྗེས། བུམ་པའི་དཀྱིལ་འཁོར་ལེགས་སུ་ཕྱེ་སྟེ།] བདག་གི་ཐུགས་ལས་སྔགས་ཀྱི་འོད་ཟེར་ནི། །བར་མ་ཆད་པ་གཟུངས་ཐག་བརྒྱུད་དེ་སོང་། །བུམ་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། །སྔགས་ཕྲེང་སྦྱོར་མཚམས་སྐུ་ཡི་ཆ་རྣམས་ལས། །བྱང་སེམས་ངོ་བོ་ཡེ་ཤེས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་

གྱུར། །[ཅེས་མོས་ལ་བཟླས་པ་གང་འགྲུབ་མཐར།] ཨོཾ་ཨཱཿཧཱུཾ་[གིས་མཆོད་ཡོན་ཕུལ་བས།] བུམ་པའི་ལྷ་རྣམས་ཆགས་པ་ཆེན་པོས་བྱང་ཆུབ་ཀྱི་སེམས་སུ་ཞུ་བ་བུམ་པའི་ཆུ་དང་གཉིས་མེད་དུ་གྱུར་པར་[བསམ། རྗེས་འབྲེལ་དུ་སྔར་མ་བསྒྲུབ་ན་ལས་སྔགས་ཀྱི་བསང་ཆུ་སྒྲུབ་ཅིང་། ཚོགས་གཏོར་རྣམས་ཀྱང་ཇི་ལྟར་རིགས་པ་བྱས་ལ། དངོས་གཞི་བླ་མ་དང་དཀྱིལ་འཁོར་གྱི་གཙོ་བོ་ཐ་དད་པ་དབང་ལེན་པའི་ཡུལ་དང་། དབང་གི་བྱ་བ་རྣམས་གཙོ་བོ་ལས་ཕྱེ་བའི་ལས་ཀྱི་ཧེ་རུ་ཀས་མཛད་ཅིང་། བདག་ཉིད་རྣམ་འགྱུར་གློ་བུར་བའི་རང་བཞིན་དབང་ཞུ་བ་པོར་བྱས་ནས་འཇུག་སྟེ། དེ་ལ་གཉིས། དཀྱིལ་འཁོར་དུ་འཇུག་པ་དང་། ཞུགས་ནས་དབང་བླང་བའོ། །སྔ་མ་ལ་གཉིས་ཀྱི། དང་པོ་ཕྱི་འཇུག་ནི།] ཇི་ལྟར་བལྟམས་[པ་སོགས་ཀྱིས་ལས་བུམ་གྱི་ཆུས་ཁྲུས་བྱ།] སུམྦྷ་[ནིའི་སྔགས་ཀྱིས་བགེགས་བསྐྲད།] ས་གཞི་སྤོས་ཆུས་

[སོགས་ཀྱིས་མཎྜ་ལ་ཕུལ་ལ།] ཨོཾ་ཙཀྵུ་བྷནྡྷ་ཝ་ར་མ་ཎ་ཡེ་སྭཱཧཱ[ས་མིག་དར་འཆིང་།] ཨཱ་ཁཾ་ཝཱི་ར་ཧཱུྃ་[གིས་མེ་ཏོག་བཟུང་ནས། ཐལ་མོ་སྦྱར་བས་བཏུད་དེ།] བླ་མ་སངས་རྒྱས་ཀུན་དང་མཉམ། །སློབ་དཔོན་ལ་ནི་སྐྱབས་སུ་མཆི། །རྡོ་རྗེ་གཞོན་ནུ་འཁོར་དང་བཅས། །ལྷ་རྣམས་ལ་ཡང་ཕྱག་འཚལ་ལོ། །མི་གནས་བདེ་ཆེན་གྲོང་མཆོག་ཏུ། །སློབ་དཔོན་ཁྱོད་ཀྱིས་བདག་གཞུག་གསོལ། །[ཅེས་ལན་གསུམ་གྱིས་གསོལ་བ་བཏབ།] རྡོ་རྗེ་སློབ་དཔོན་སངས་རྒྱས་དཔལ། །[ཅེས་སོགས་རྒྱུན་བཤགས་ཡན་ལག་བརྒྱད་པས་ཚོགས་བསགས་ཤིང་རྒྱུད་སྦྱང་།] རྡོ་རྗེ་གཞོན་ནུའི་དཀྱིལ་འཁོར་འདིར༔ སོ་སོར་ཐར་པའི་སྡོམ་པ་དང་༔ བྱང་ཆུབ་སེམས་དཔའི་བསླབ་བྱ་དང་༔ རིག་འཛིན་སྔགས་ཀྱི་དམ་ཚིག་རྣམས༔ དེང་ནས་བདག་གིས་བརྟན་པོར་བཟུང་༔ [ཞེས་སྡོམ་པ་བཟུང་།] སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པའི་གཟུགས་སུ་གནས་པར་[བསམ་ཞིང་།] ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི༔ [ལན་གསུམ། སྙིང་གར་རྡོ་རྗེས་རེག་ལ།] བོ་དྷི་ཙིཏྟ་ས་མ་ཡ་སྟྭཾ༔ [ཞེས་གསང་སྔགས་ནང་གི་སེམས་བསྐྱེད།] ཛཿཧཱུྃ་བཾ་ཧོ༔ བྷཱུྃ་པྲ་བེ་ཤ་ཡ་ཕཊ༔ [ཅེས་དཀྱིལ་འཁོར་གྱི་སྒོ་ཕྱེས་པའི་ནང་དུ་ཞུགས་པར་མོས་པས།] ཨོཾ་ན་མ་སྟེ་ཧཱུྃ༔ ཨོཾ་ན་མ་མཱི་ཧཱུྃ༔ ཨོཾ་ན་མོ་ན་མ་ཧཱུྃ༔ [ཞེས་ཕྱག་བྱ། གཉིས་པ་ནང་འཇུག་ལ། སྦྱོར་བ་དམ་ལ་བཞག་པ་ནི། རྡོ་རྗེ་མགོར་བཞག་སྟེ།]

སྐལ་ལྡན་རྡོ་རྗེ་ལེགས་པར་ཉོན༔ དེང་ཁྱོད་བདེ་གཤེགས་ཐམས་ཅད་ཀྱི༔ རིགས་ནི་ཁྱོད་ལ་ཡང་དག་བཞུགས༔ རྡོ་རྗེ་སློབ་དཔོན་བདག་གིས་ནི༔ བཅོམ་ལྡན་རྡོ་རྗེ་གཞོན་ནུ་ཡི༔ ཡེ་ཤེས་ཁྱོད་ལ་བསྐྱེད་པར་བྱ༔ ཡེ་ཤེས་ཁྲོ་བོའི་དཀྱིལ་འཁོར་གྱི༔ དངོས་གྲུབ་ཆེན་པོ་ཐོབ་བྱེད་ན༔ ཕྲིན་ལས་གཞན་ལྟ་སྨོས་ཅི་དགོས༔ ཁྱོད་ཀྱིས་དཀྱིལ་འཁོར་མ་མཐོང་བའི༔ དྲུང་དུ་ཚུལ་འདི་མ་སྨྲ་ཞིག༔ [རྡོ་རྗེ་སྙིང་གར་བཞག་སྟེ།] དེ་རིང་རྡོ་རྗེ་གཞོན་ནུ་ཆེ༔ ཁྱོད་ཀྱི་སྙིང་ལ་ཡང་དག་ཞུགས༔ གལ་ཏེ་ཚུལ་འདི་སྨྲས་ན་ནི༔ དེ་མ་ཐག་ཏུ་དྲལ་ཏེ་གཤེགས༔ [དམ་ཆུ་མྱང་ལ།] འདི་ནི་ཁྱོད་ཀྱི་དམྱལ་བའི་ཆུ༔ དམ་ཚིག་འདས་ན་སྲེག་པར་བྱེད༔ དམ་ཚིག་བསྲུང་ན་དངོས་གྲུབ་ནི༔ རྡོ་རྗེ་བདུད་རྩིའི་ཆུ་འདིས་འགྲུབ༔ བཛྲ་ས་མ་པཉྩ་ཨ་མྲྀ་ཏ་ཨུད་ཀ་ན་རཀ་ཋ་ཋ༔ [སླར་ཡང་རྡོ་རྗེ་སྤྱི་བོར་བཞག་སྟེ།] དེང་ནས་བརྩམས་ཏེ་བུ་ཁྱོད་ཀྱི༔ རྡོ་རྗེ་གཞོན་ནུ་ང་ཡིན་གྱི༔ ང་ཡིས་ཇི་ལྟར་བསྒོས་པ་རྣམས༔ བརྩོན་པས་ཁྱོད་ཀྱི་བྱ་དགོས་སོ༔ ཁྱོད་ཀྱིས་ང་ལ་སྨད་མི་བྱ༔ གང་ཡང་ང་ལ་མ་གུས་མིན༔ གལ་ཏེ་གུས་པར་མ་བྱས་ན༔ སེམས་ཅན་དམྱལ་བ་ཆེན་པོར་ལྟུང་༔ [ཞེས་དམ་ལ་བཞག །དངོས་གཞི་ཡེ་ཤེས་པ་དབབ་པའི་སླད་དུ།] ཨེ་མ་ཁྲོ་རྒྱལ་འབར་བའི་གཙོ༔ ཁྱོད་ཀྱི་རྡོ་རྗེའི་ཡེ་ཤེས་

དེ༔ བདག་གི་སྙིང་གི་དབུས་ཉིད་ན༔ ཉེ་བར་དབབ་པར་མཛད་དུ་གསོལ༔ [ཞེས་གསོལ་བ་བཏབ། ལུས་གནད་དྲང་པོར་བསྲང་ཞིང་རླུང་ཁ་སྦྱོར་དུ་འཆིངས་ལ།] རང་ཉིད་དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི་སྐུར་གསལ་བའི་སྙིང་གའི་ས་བོན་མར་མེ་ལྟར་འབར་ཞིང་གསལ་བའི་འོད་ཀྱིས་བསྐུལ་བས། བླ་མ་དཀྱིལ་འཁོར་པའི་ལྷ་ཚོགས་རྣམས་ཀྱི་ཐུགས་ཀ་ནས་སྐུ་དང་ཡིག་འབྲུ་ཕྱག་མཚན་གྱི་རྣམ་པ་གྲངས་མེད་པ་འོད་ཟེར་གྱི་ཕུང་པོར་འབར་ཞིང་འཕྲོ་བ་ཁ་ཆར་དང་བུ་ཡུག་འཚུབས་པ་བཞིན་དུ་བྱུང་བ་བ་སྤུའི་ཁུང་བུ་ནས་ཞུགས་ལུས་ཀྱི་ནད་ཀུན་དང་ཁྱད་པར་སྙིང་གའི་ཏིང་འཛིན་སེམས་དཔའ་ལ་སིབ་སིབ་ཐིམ་པས་བདེ་བའི་ཡེ་ཤེས་བཟོད་མེད་དུ་འབར་བར་[བསམ་ཞིང་། ཁྱད་པར་གྱི་སྤོས་དང་རོལ་མོའི་སྦྱོར་བ་ལྷན་གཅིག་པས།] ཨོཾ་བཛྲ་ཀཱི་ལི་ཀཱི་ལ་ཡ༔ ཨཱ་བེ་ཤ་ཡ་ཨ་ཨཱ༔ པྲ་བེ་ཤ་ཡ༔ པྲ་བེ་ཤ་ཡ༔ ས་མ་ཡ་ཕེཾ་ཕེཾཿ ས་མ་ཡ་ཛཿཧཱུྃ་བཾ་ཧོཿ [ཞེས་དྲག་ཏུ་བརྗོད་པས་ཡེ་ཤེས་པ་དབབ་ལ།] ཏིཥྛ་བཛྲས་[བརྟན་པར་བྱ།] ཧཱུྃ༔ རྡོ་རྗེ་གཞོན་ནུའི་དཀྱིལ་འཁོར་དུ༔ རིག་པའི་མེ་ཏོག་འདི་ཕུལ་བས༔ སྔོན་ནས་ལས་འཕྲོ་གང་ཡོད་ལྷས༔ རྗེས་འཛིན་བྱིན་གྱིས་བརླབ་པར་ཤོག༔ པུཥྤེ་པྲ་ཏཱིཙྪ་ཧོཿ [ཞེས་མེ་ཏོག་དོར།] ཧཱུྃ༔ ཅོད་པན་འདི་ནི་དཔའ་བའི་རྟགས༔ ཡི་དམ་ལྷ་དང་སྐལ་པ་མཉམ༔ འཁོར་ལོའི་སྒྱུར་རྒྱལ་ཇི་བཞིན་དུ༔ ཆོས་ཀྱི་རྒྱལ་སྲིད་དབང་བསྐུར་རོ༔

ཨོཾ་པཉྩ་ཨ་ལངྐ་ར་ཨ་བྷི་ཥིཉྩ་ཧཱུྃ༔ [ཞེས་སླར་ཡང་མེ་ཏོག་སྤྱི་བོར་བཀོད།] ཧེ་རུ་ཀ་དཔལ་དེང་ཁྱོད་ཀྱི༔ མིག་འབྱེད་པར་ནི་བརྩོན་པར་མཛད༔ ཕྱེ་བས་ཐམས་ཅད་མཐོང་འགྱུར་ཏེ༔ རྡོ་རྗེའི་མིག་ནི་བླ་ན་མེད༔ ཛྙཱ་ན་ཙཀྵུ་ཁྲ་བེ་ཤ་ཡ་ཕཊ༔ [ཅེས་མིག་དར་བསལ།] ད་ནི་དད་པའི་ཤུགས་ཀྱིས་སུ༔ དཀྱིལ་འཁོར་འདི་དེ་ཉིད་ལ་ལྟོས༔ ཁྱོད་ནི་སངས་རྒྱས་རིགས་སུ་སྐྱེས༔ སྔགས་དང་ཕྱག་རྒྱས་བྱིན་གྱིས་བརླབས༔ དངོས་གྲུབ་ཀུན་ཀྱང་ཕུན་སུམ་ཚོགས༔ དམ་ཚིག་མཆོག་ཏུ་ཁྱོད་འགྱུར་རོ༔ [ཞེས་མཐོང་བ་བསྟན་པས།] དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་མངོན་སུམ་བཞིན་དུ་མཐོང་བར་[བསམ།] [གཉིས་པ་དབང་བླང་བ་དངོས་ལ་ཐུན་མོང་དང་། ཁྱད་པར་གཉིས་ཀྱི། དང་པོ་ནི། མཎྜལ་ཕུལ་ལ།] ཨེ་མ༔ བླ་མ་ཀུན་བཟང་ཆེ་བའི་མཆོག༔ རྡོ་རྗེ་འཛིན་རྒྱལ་དཀྱིལ་འཁོར་འདིར༔ བདག་ཅག་སྐལ་ལྡན་བུ་མཆོག་ལ༔ དབང་མཆོག་དམ་པ་བསྐུར་དུ་གསོལ༔ [ཞེས་ལན་གསུམ་གྱིས་གསོལ་བ་བཏབ།] རང་ཉིད་དཀྱིལ་འཁོར་ཆེན་པོའི་ཤར་སྒོའི་ཁྱམས་ལ་སེང་གེས་བཏེགས་པའི་རིན་པོ་ཆེའི་ཁྲི་པད་ཟླའི་གདན་ལ་གཙོ་བོའི་གཟུགས་ཀྱི་རྣམ་པས་འཁོད་པར་གྱུར། སློབ་དཔོན་དཔལ་ཆེན་པོའི་ཐུགས་ཀ་ནས་འོད་ཟེར་འཕྲོས། འོག་མིན་གྱི་ཞིང་ནས་དབང་ལྷ་དེ་

བཞིན་གཤེགས་པ་རྒྱལ་བ་སྲས་དང་བཅས་པ་ཐམས་ཅད་གདན་གསུམ་ཚང་བའི་དབང་གི་ལྷ་ཚོགས་ཀྱི་རྣམ་པར་བཛྲ་ས་མཱ་ཛཿ[ས་སྤྱན་དྲངས་ལ།] ཨོཾ་བཛྲ་པུཥྤེ་[སོགས་ནས།] ཤཔྡའི་[བར་གྱིས་མཆོད།] དེ་བཞིན་གཤེགས་པ་ཐམས་ཅད་ཀྱིས་བདག་ལ་མོངན་པར་དབང་བསྐུལ་དུ་གསོལ། ཞེས་གསོལ་བ་བཏབ་པས་གདན་གསུམ་ཚང་བའི་དབང་ལྷ་རྡོ་རྗེ་རྒྱལ་པོ་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། སེམས་དཔའ་སེམས་མ་རྣམས་ཀྱིས་མེ་ཏོག་འཐོར་ཞིང་ཤིས་པ་བརྗོད། ཀིངྐ་ར་རྣམས་ཀྱིས་བགེགས་བསྐྲད། བུམ་འཛིན་རིག་པའི་ལྷ་མོ་རྣམས་ཀྱིས་བཛྲ་ཧེ་རུ་ཀའི་ངོ་བོར་གྱུར་པའི་རིན་པོ་ཆེའི་བུམ་པ་ཟག་མེད་ཡེས་ཤེས་ཀྱི་བདུད་རྩིས་བཀང་བས་སྤྱི་བོ་ནས་མངོན་པར་དབང་བསྐུར་བར་མོས་ལ། ཧཱུྃ༔ བུམ་པ་ཆོས་དབྱིངས་དག་པའི་ནང༔ ཡེ་ཤེས་རྒྱ་མཚོ་འཁྱིལ་བ་ཡི༔ བཛྲ་ཀཱི་ལའི་དབང་མཆོག་འདི༔ སྐལ་ལྡན་ཁྱོད་ལ་བསྐུར་བར་བྱ༔ ཨོཾ་བཛྲ་ཀཱི་ལི་ཀཱི་ལ་ཡ་ཨ་བྷི་ཥེ་ཀ་ཏ་ཤྲཱི་ཧཱུྃ༔ [ཞེས་བུམ་པ་སྤྱི་བོར་བཞག་ཅིང་བུམ་ཆུ་གཏིགས།] དེས་བཛྲ་ཧེ་རུ་ཀའི་སྒོ་ནས་ཆུའི་དབང་ཐོབ། ཞེ་སྡང་གི་དྲི་མ་སྦྱངས། རྣམ་ཤེས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། བཛྲ་ཀཱི་ལ་ཡའི་གོ་འཕང་ནུས་པ་རྒྱུད་ལ་བཞག །རྡོ་རྗེའི་རིགས་ཀྱི་དངོས་གྲུབ་ཐོབ་པའི་སྐལ་པ་

ཅན་དུ་བྱས་སོ། །རཏྣ་ཧེ་རུ་ཀའི་ངོ་བོར་གྱུར་པའི་རིན་པོ་ཆེའི་དབུ་རྒྱན་དར་དཔྱངས་དང་ལྡན་པས་མངོན་པར་དབང་བསྐུར་ཞིང་སྤྱི་བོར་བཅིངས་པར་[བསམ་ལ།] དེ་བཞིན་གཤེགས་པ་ཀུན་གྱི་རྒྱན༔ སངས་རྒྱས་རྣམས་ཀྱིས་རབ་བསྔགས་པའི༔ རིན་པོ་ཆེ་ཡི་དབུ་རྒྱན་དང་༔ དར་དཔྱངས་ཅོད་པན་དབང་སྦྱིན་ནོ༔ ཨོཾ་རཏྣ་ཀཱི་ལི་ཀཱི་ལ་ཡ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ༔ [ཞེས་དབུ་རྒྱན་མགོ་བོར་ཅིང་།] དེས་རཏྣ་ཧེ་རུ་ཀའི་སྒོ་ནས་ཅོད་པན་གྱི་དབང་ཐོབ། ང་རྒྱལ་གྱི་དྲི་མ་སྦྱངས། ཚོར་བའི་ཕུང་པོ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རཏྣ་ཀཱི་ལ་ཡའི་གོ་འཕང་ནུས་པ་རྒྱུད་ལ་བཞག །རིན་ཆེན་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་སོ། །[པདྨ་ཧེ་རུ་ཀའི་ངོ་བོར་གྱུར་པའི་རྡོ་རྗེ་དགུ་པས་མངོན་པར་དབང་བསྐུར་ཞིང་ལག་གཡས་སུ་གཏད་པར་མོས་ལ།] ཉེས་པའི་སྐྱོན་བྲལ་དྲི་མ་མེད༔ སྐྱེ་འགག་མེད་པའི་དངོས་གྲུབ་སྟེ༔ རྡོ་རྗེ་གཞོན་ནུའི་ཕྱག་རྒྱ་འདིས༔ སྐལ་ལྡན་ཁྱོད་ལ་དབང་བསྐུར་རོ༔ ཨོཾ་པདྨ་ཀཱི་ལི་ཀཱི་ལ་ཡ་མ་ཧཱ་བཛྲ་ཨ་བྷི་ཥིཉྩ་ཧཱུྃ༔ [ཞེས་རྡོ་རྗེ་གསོར་ཞིང་སྙིང་གར་བཟུང་།] དེས་པདྨ་ཧེ་རུ་ཀའི་སྒོ་ནས་རྡོ་རྗེའི་དབང་ཐོབ། འདོད་ཆགས་ཀྱི་དྲི་མ་སྦྱངས། འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས། པདྨ་ཀཱི་ལ་ཡའི་གོ་འཕང་

ནུས་པ་རྒྱུད་ལ་བཞག །པདྨ་རིགས་ཀྱི་དངོས་གྲུབ་ཐོབ་པའི་སྐལ་པ་ཅན་དུ་བྱས་སོ། །ཀརྨ་ཧེ་རུ་ཀའི་ངོ་བོར་གྱུར་པའི་དྲིལ་བུས་མངོན་པར་དབང་བསྐུར་ཞིང་ལག་གཡོན་དུ་གཏད་པར་[མོས་ལ།] དོན་དམ་ཆོས་ཉིད་སྟོང་པའི་སྒྲས༔ གསུང་དབྱངས་དྲུག་ཅུ་མཚོན་པའི་བརྡ༔ དྲིལ་བུའི་དབང་མཆོག་དམ་པ་འདི༔ སྐལ་ལྡན་ཁྱོད་ལ་བསྐུར་བར་བྱ༔ ཨོཾ་ཀརྨ་ཀཱི་ལི་ཀཱི་ལ་ཡ་མ་ཧཱ་གཎྜེ་ཨ་བྷེ་ཥིཉྩ་ཧཱུྃ༔ [ཞེས་དྲིལ་བུ་གསིལ་ཞིང་དཀུར་བརྟེན།] དེས་ཀརྨ་ཧེ་རུ་ཀའི་སྒོ་ནས་དྲིལ་བུའི་དབང་ཐོབ། ཕྲག་དོག་གི་དྲི་མ་སྦྱངས། འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་མངོན་དུ་བྱས། ཀརྨ་ཀཱི་ལ་ཡའི་གོ་འཕང་ནུས་པ་རྒྱུད་ལ་བཞག །ལས་ཀྱི་རིགས་ཀྱི་དངོས་གྲུབ་ཐོད་པའི་སྐལ་པ་ཅན་དུ་བྱས་སོ། །དབང་ལྷ་དེ་བཞིན་གཤེགས་པ་རིགས་ཀྱི་ཡུམ་དང་བཅས་པ་ཐམས་ཅད་ཀྱིས་མགྲིན་གཅིག་དབྱངས་གཅིག་ཏུ་བུདྡྷ་ཧེ་རུ་ཀའི་ངོ་བོར་གྱུར་པའི་རྡོ་རྗེའི་མིང་གིས་མངོན་པར་དབང་བསྐུར་བར་[མོས་ལ།] ཉོན་མོངས་ཡེ་ཤེས་གནས་གྱུར་པ༔ མིང་བཏགས་བདུད་ལས་རྣམ་པར་རྒྱལ༔ མིང་གི་དབང་བསྐུར་དམ་པའི་འདི༔ སྐལ་ལྡན་ཁྱོད་ལ་སྦྱིན་པར་བྱ༔ ཨོཾ་བུདྡྷ་ཀཱི་ལི་ཀཱི་ལ་ཡ་ཀྱེ་ཤྲཱི་ཧེ་རུ་ཀ་ཕྲིན་ལས་འདུས་པ་ལས་རབ་བདེ་བ་རྩལ་ཨ་བྷི་ཥེཉྩ་ཨོཾ༔ [ཞེས་རྡོར་དྲིལ་ལྷན་ཅིག་ཏུ་བཟུང་ནས་སྤྱི་བོར་དཀྲོལ།] དེས་བདྡྷ་ཧེ་རུ་ཀའི་སྒོ་ནས་མིང་གི་དབང་ཐོབ། གཏི་མུག་གི་དྲི་མ་སྦྱངས། གཟུགས་ཀྱི་ཕུང་པོ་གནས་གྱུར། ཆོས་ཀྱི་

དབྱིངས་ཀྱི་ཡེ་ཤེས་མངོན་དུ་བྱས། བུདྡྷ་ཀཱི་ལ་ཡའི་གོ་འཕང་ནུས་པ་རྒྱུད་ལ་བཞག །སངས་རྒྱས་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་སོ། །སླར་ཡང་རྣམ་རྒྱལ་བུམ་པའི་བདུད་རྩིས་རྒྱལ་ཐབས་སྤྱི་བླུགས་ས་མངོན་པར་དབང་བསྐུར་བར་[མོས་ལ།] ཧཱུྃ༔ བུམ་པ་ལྷུན་གྲུབ་གཞལ་ཡས་ཁང་༔ རྡོ་རྗེ་ཕུར་པའི་དཀྱིལ་འཁོར་རྫོགས༔ སྐལ་ལྡན་ཁྱོད་ལ་དབང་བསྐུར་བས༔ བུམ་དབང་ཡོངས་སུ་རྫོགས་ཐོབ་ཤོག༔ [རྩ་སྔགས།] ཀཱ་ཡ་ཨ་བྷི་ཥིཉྩ་ཨོཾ༔ [ཞེས་བུམ་ཆུ་མྱང་།] བདུད་རྩིའི་ཆུ་རྒྱུན་གྱིས་ལུས་ཀྱི་ནང་ཐམས་ཅད་གང་། བདེ་བ་ཆེན་པོའི་ཡེ་ཤེས་ཉམས་སུ་མྱོང་། ཆུའི་ལྷག་མ་སྤྱི་བོར་འཁྱིལ་བ་ལས་རིགས་ཐམས་ཅད་འདུས་པའི་སྤྱི་གཟུགས་རྒྱལ་བ་ཀུན་ཏུ་བཟང་པོས་དབུ་བརྒྱན། སྤྱན་དྲངས་པའི་དབང་ལྷ་རྣམས་ཀྱང་རང་ལ་དབྱེར་མེད་དུ་ཐིམ་པར་མོས་ལ། ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ། [ཞེས་མེ་ཏོག་འཐོར།] དེ་ལྟ་ན་ཕྱི་ཀུན་རྫོབ་མཚན་མ་རྫས་ཀྱི་དཀྱིལ་འཁོར་དུ་བུམ་པའི་དབང་ཐོབ། ཕུང་ཁམས་སྣོད་བཅུད་ཐ་མལ་དུ་ཞེན་པའི་རྟོག་ཚོགས་སྦྱངས་ཏེ་ལུས་ཀྱི་སྒྲིབ་པ་དག །ལམ་དུས་སུ་བསྐྱེད་པའི་རིམ་པ་བསྒོམ་པ་ལ་དབང་། སྣོད་བཅུད་ཁྲག་འཐུང་རོལ་པའི་དཀྱིལ་འཁོར་གཅིག་ཏུ་རྫོགས་ནས། འབྲས་བུ་སྐུ་རྡོ་རྗེ་མཆོག་གི་སྤྲུལ་སྐུ་འགྲུབ་པའི་སྐལ་

པ་ཅན་དུ་བྱས་པའོ། །[ཞེས་རྟོགས་པ་བསྐྱེད་དོ། །][གཉིས་པ་ཁྱད་པར་གྱི་དབང་ལ་གསུམ་གྱི། དང་པོ་གསང་དབང་ནི། མཎྜལ་ཕུལ་ལ།] ཀྱེ་ཧོ་བླ་མ་ཁྱོད་དགོངས་ཤིག༔ འཁོར་བའི་གཅོང་རོང་ཟབ་མོ་ལས༔ ཟུང་འཇུག་ཀློང་དུ་སྒྲོལ་མཛད་པ༔ གསང་བའི་དབང་མཆོག་བདག་ལ་སྩོལ༔ [ཞེས་གསོལ་བ་བཏབ།] སློབ་དཔོན་དཔལ་ཆེན་རྡོ་རྗེ་གཞོན་ནུ་རང་འོད་ཀྱི་ཡུམ་འཁོར་ལོ་རྒྱས་འདེབས་མ་དང་མཉམ་པར་སྦྱོར་བའི་དགའ་བའི་སྒྲ་དང་བདེ་བའི་འོད་ཟེར་གྱི་འཕྲོ་འདུས་ཕྱོགས་བཅུའི་རྒྱལ་བ་ཐམས་ཅད་སྤྱན་དྲངས་པ་ཡབ་ཀྱི་ཞལ་དུ་ཞུགས། །ཐུགས་ཀར་ཆགས་པ་ཆེན་པོའི་མེས་ཞུ་བ་སྐུའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨར་བབས། བྱང་སེམས་དཀར་དམར་རོ་གཅིག་ཏུ་འདྲེས་པའི་རྒྱུན་མུ་ཏིག་གི་མདངས་ཅན་དེ་ཉིད་ལྕེ་ཐོག་ཏུ་བསྩལ་བར་མོས་ལ། ཧཱུྃ༔ ཇི་ལྟར་སྔོན་གྱི་བདེ་གཤེགས་ཀྱིས༔ རྒྱལ་སྲས་ཚོགས་ལ་དབང་བསྐུར་བཞིན༔ གཉིས་མེད་མཉམ་སྦྱོར་བྱང་སེམས་རོས༔ བུ་མཆོག་ཁྱོད་ལ་དབང་བསྐུར་རོ༔ བོ་དྷི་ཙིཏྟ་ཨ་བྷི་ཥིཉྩ་ཧཱུྃ༔ ཨ་ཧོ་མ་ཧཱ་ས་ཁུ་ཧོཿ [ཞེས་བདུད་རྩི་མྱང་།] བྱང་སེམས་ཡི་གེའི་སྤྲིན་ཨ་ལི་ཀ་ལིའི་རྣམ་པར་འཆར་བས་རྩ་གནས་ཐམས་ཅད་གང་སྟེ་རྩའི་འཆིང་བྱེད་ཀྱི་མདུད་པ་གྲོལ། གཟུང་འཛིན་བརྒྱད་ཅུའི་རྟོག་པ་འགགས། ཐིག་རླུང་སེམས་གསུམ་ཡེ་ཤེས་ཆེན་པོའི་ངོ་བོར་བྱིན་གྱིས་བརླབས་ནས་བདེ་བའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་གྱུར། སློབ་དཔོན་དཀྱིལ་འཁོར་གྱི་གཙོ་བོ་སྤྲུལ་པའི་སྐུ་ཤཱཀྱ་སེང་

གེའི་རྣམ་པར་བཞེངས་ནས་བྱང་ཆུབ་མཆོག་ཏུ་ལུང་བསྟན་པར་མོས་ལ། འདིར་ནི་ཁྱོད་ལ་ངས་ལུང་བསྟན༔ རྡོ་རྗེ་གཞོན་ནུ་ཞེས་བྱ་བའི༔ སྲིད་པ་ཀུན་ལས་རྣམ་གྲོལ་བ༔ དེ་བཞིན་གཤེགས་པ་ཉིད་ཡིན་ནོ༔ ཨོཾ་སརྦ་ཏ་ཐཱ་ག་ཏ་བྷུརྦྷུ་ས་སྭ༔ [ཞེས་ལུང་བསྟན།] དེ་ལྟ་ན་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བ་འི་དབང་ཐོབ། རླུང་ཐ་མལ་དུ་འཛིན་པའི་བག་ཆགས་སྦྱངས་ཏེ་ངག་གི་སྒྲིབ་པ་དག །ལམ་དུས་སུ་བདག་བྱིན་རླབས་རྫོགས་རིམ་ཙཎྜ་ལཱིའི་རྣལ་འབྱོར་བསྒོམ་པ་ལ་དབང་། སྒྲ་སྐད་དང་རླུང་འབྱིན་འཇུག་གསང་སྔགས་སུ་དག་སྟེ། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་ཐོབ་པའི་སྐལ་བ་ཅན་དུ་བྱས་པའོ། །[གཉིས་པ་ཤེར་དབང་ནི། མཎྜལ་ཕུལ་ལ།] བཅོམ་ལྡན་ཞི་བ་ཆེན་པོ་ཀྱེ༔ རྡོ་རྗེ་གཞོན་ནུ་བདག་ལ་དགོངས༔ རྡོ་རྗེ་པདྨ་སྦྱོར་བྱུང་བའི༔ བདེ་ཆེན་ལམ་འདི་བདག་ལ་སྩོལ༔ [ཅེས་གསོལ་བ་བཏབ།] རང་ཉིད་དཔལ་ཆེན་པོ་སྣང་སྟོང་རྒྱུ་མ་ལྟ་བུའི་སྐུར་གསལ་བ་ལ། སློབ་དཔོན་གྱི་ཡུམ་འཁོར་ལོ་རྒྱས་འདེབས་ལས་རིགས་མཐུན་གྱི་ཤེས་རབ་མ་གཟུགས་དང་ལང་ཚོ་མཚན་ཉིད་ཕུན་སུམ་ཚོགས་པ་ཞིག་རྣམ་པར་སྤྲོས་ཏེ་ཐར་པ་བརྟེན་པར་བསྐུལ་བར་མོས་ལ། ལྷ་མོ་དགའ་སྦྱིན་གནས་སྦྱིན་མ༔ སྣ་ཚོགས་སྒྱུ་རྩལ་ཡིད་དུ་འོང་༔ ཁྱེད་ལ་རྟག་ཏུ་པདྨར་རོལ༔ བདེ་ཆེན་

མཆོག་གི་དངོས་གྲུབ་ཐོབ༔ པྲཛྙཱ་ཛྙ་ན་ཨ་བྷི་ཥིཉྩ་ཧཱུྃ༔ [ཞེས་རིག་ཙཀ་གམ་དྲིལ་བུ་བླང་། རིག་མ་དེས་ཀྱང་།] བདུད་རྩིའི་མཆོད་པ་བྱེད་པ་དང་༔ བུད་མེད་རྣམས་ལ་གུས་པ་དང་༔ བྷ་ག་ལ་ནི་འོ་བགྱིད་པར༔ སྤྲོ་བར་གྱུར་ཏམ་བུ་ཡི་སྨྲོས༔ [ཞེས་བརྟུལ་ཞུགས་དྲིས་པ་ལ།] དྲི་ཆེན་དྲི་ཆུ་ལ་སོགས་འཚལ༔ བུད་མེད་རྣམས་ལ་རྟག་གུས་བགྱིད༔ བྷ་ག་ལ་ཡང་འོ་བྱེད་པར༔ བདག་ནི་སྤྲོ་བས་ཁྱོད་མཆོད་དོ༔ [ཞེས་ལན་བཏབ།] ཨེ་མ་ང་ཡི་པདྨ་འདི༔ བདེ་བ་ཐམས་ཅད་འབྱུང་བའི་གནས༔ གལ་ཏེ་ཆོ་ག་བཞིན་བསྟེན་ན༔ སངས་རྒྱས་མཉེས་པ་ལ་སོགས་པའི༔ བྱ་བ་པདྨ་ཇི་བཞིན་ནོ༔ སྐྱེ་བོ་མ་རིག་རང་གར་སྤྱོད༔ ཐེ་ཚོམ་ཅན་རྣམས་འདི་སྤོང་བ༔ དེ་ལ་མཆོག་གི་དངོས་གྲུབ་མེད༔ [ཅེས་བདེ་བ་སྒྲུབ་པར་གདམས་པ་ནི།] ཤེས་རབ་མ་དང་འདུ་ཤེས་གསུམ་གྱིས་རོལ་པས་རྗེས་ཆགས་པ་བདེ་ཆེན་གྱི་ཡེ་ཤེས་ཆེས་ཆེར་འབར་བས་གཉིས་སྣང་གི་རྟོག་པ་ཐམས་ཅད་དབྱིངས་སུ་ནུབ་ནས་བྱང་སེམས་ཐིག་ལེའི་དྭངས་མ་དབབ་བཟློག་གི་སྦྱོར་བས་བདེ་སྟོང་དགའ་བ་བཞིའི་ཡེ་ཤེས་ཀྱི་རོལ་མོ་རྒྱུད་ལ་བརྟན་པར་བསམ་ཞིང་། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭབྷཱ་ཝ་ཨཏྨ་ཀོཉཧཾཿ [ཞེས་འཁྱུད་རྒྱ་བྱ།] འདོད་ཆགས་བྲལ་བ་ལྟ་བུའི་སྡིག༔ ཁམས་གསུམ་གནས་ན་སྡིག་མེད་དེ༔ དེ་བས་འདོད་ལ་ཆགས་བྲལ་བ༔ ཁྱོད་ཀྱིས་ནམ་ཡང་མ་བྱེད་ཅིག༔

[ཅེས་བརྟུལ་ཞུགས་བསྒྲག །]དེ་ལྟ་ན་གསང་བ་ཆོས་ཐམས་ཅད་འབྱུང་བའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། གཟུང་འཛིན་གཉིས་སྣང་གི་རྟོག་ཚོགས་སྦྱངས་ཏེ་ཡིད་ཀྱི་སྒྲིབ་པ་དག །ལམ་དུས་སུ་ཕོ་ཉ་བདེ་བ་ཆེན་པོ་རྡོ་རྗེ་སེམས་དཔའི་གསེང་ལམ་བསྒོམ་པ་ལ་དབང། བདེ་སྡུག་བྱུང་ཚོར་ཐམས་ཅད་ལྷན་སྐྱེས་ཡེ་ཤེས་སུ་དག་ནས། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་པ་ཅན་དུ་བྱས་པའོ། །[གསུམ་པ་ཚིག་དབང་ནི། མཎྜལ་ཕུལ་ལ།] བདག་ཉིད་ཆེ་ཁྱོད་བཀའ་དྲིན་གྱིས༔ གཙོ་བོའི་དབང་བསྐུར་རྣམ་གསུམ་ཐོབ༔ དེ་རིང་རིན་ཆེན་བཞི་པ་ཡང་༔ བཀའ་དྲིན་གྱིས་ནི་བསྐྱང་དུ་གསོལ༔ [ཞེས་གསོལ་བ་བཏབ།] བླ་མ་དཔལ་ཆེན་པོའི་ཞལ་ནས་སྐྱེ་མེད་རྡོ་རྗེའི་ཚིག་གིས་རང་བྱུང་དོན་གྱི་དགོངས་པ་ངོ་སྤྲད་དེ་དབུགས་དབྱུང་བར་མོས་ལ། ཧཱུྃ༔ འདི་ལྟར་ཆོས་རྣམས་ཐམས་ཅད་ཀུན༔ ཐོག་མཐའ་དབུས་མེད་གསལ་ཞིང་སྟོང་༔ སྨྲ་བསམ་བརྗོད་མེད་ཡེ་ཤེས་ཆེ༔ འདི་ནི་སངས་རྒྱས་དགོངས་པའོ༔ ཛྙཱ་ན་བཛྲ་དྷརྨ་ཀཱ་ཡ་ཨ་བྷི་ཥིཉྩ་ཨ༔ [ཞེས་རང་བྱུང་གི་ཡེ་ཤེས་དེ་ཁོ་ན་ཉིད་ཀྱི་ངང་ལ་མཉམ་པར་བཞག །]བདུད་འདུལ་དཀྱིལ་འཁོར་ཆེན་པོ་རུ༔ དབང་མཆོག་བསྐུར་བས་སྡིག་ལས་གྲོལ༔ འབྲས་བུ་གྲུབ་པའི་དགེ་བ་ནི༔ ཐོབ་པས་བདག་ནི་འབྲས་དང་བཅས༔ [ཞེས་གཟེངས་

བསྟོད།] དེ་ལྟ་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རིག་པའི་རྩལ་དབང་ཐོབ། སྒོ་གསུམ་ཐ་དད་དུ་འཛིན་པའི་ཤེས་བྱའི་སྒྲུབ་པ་ཆེས་ཕྲ་བ་སྦྱངས། ལམ་དུས་སུ་ཀ་དག་ལྷུན་གྲུབ་ཟུང་འཇུག་རྫོགས་རིམ་མཐར་ཐུག་པའི་རྣལ་འབྱོར་བསྒོམ་པ་ལ་དབང་། སྣང་བཞི་ཟད་སར་འཁྱོལ་ཏེ། འབྲས་བུ་ངོ་བོ་ཉིད་སྐུ་ཀུན་བཟང་དཔལ་ཆེན་ཧེ་རུ་ཀའི་གོ་འཕང་མངོན་དུ་བྱེད་པའི་སྐལ་པ་ཁྱད་པར་ཅན་དུ་བྱས་པའོ། །[ཞེས་རྟོགས་པ་བསྐྱེད་དོ། རྗེས་ནི།] གཙོ་བོའི་ཇི་ལྟར་སོགས་དང་། དེང་ནས་བརྩམས་ཏེ་[སོགས་ཀྱིས་དམ་ཚིག་ཁས་བླངས་ཏེ་ལུས་ལོངས་སྤྱོད་དབུལ་ཞིང་། གཏང་རག་གི་མཎྜལ་སྔར་ལྟར་ཕུལ། ཆོ་གའི་རྗེས་ཀྱི་བྱ་བ་རྣམས་ལས་བྱང་བཞིན་མཐར་དབྱུང་བར་བྱའོ། །ཞེས་པའང་རྩ་བའི་དབང་གི་གཞུང་ལས་འཇུག་པ་བདེ་བའི་ངག་འདོན་ཁོལ་དུ་ཕྱུང་སྟེ་འཇིགས་བྲལ་ཡེ་ཤེས་རྡོ་རྗེས་སྦྱར་བ་ཛ་ཡནྟུ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྦྱིན་སྲེག་གི་ཆོ་ག་ཕྲིན་ལས་ལྷུན་གྱིས་གྲུབ་པའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྦྱིན་སྲེག་གི་ཆོ་ག་ཕྲིན་ལས་ལྷུན་གྱིས་གྲུབ་པའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའ་སྦྱིན་སྲེག་གི་ཆོ་ག་ཕྲིན་ལས་ལྷུན་གྱིས་གྲུབ་པའི་དགའ་སྟོན་ཅེས་བྱ་བ། བླ་མ་དཔལ་ཆེན་ཧེ་རུ་ཀའི་ཞབས་ལ་ཕྱག་འཚལ་ལོ། །སྤྲོས་ཀུན་ཡོངས་བྲལ་རྡོ་རྗེའི་སྙིང་པོ་རྟག་ཏུ་ཞི་བའི་རང་བཞིན་ལས། །དམིགས་པ་མེད་པའི་ཡེ་ཤེས་མེ་ལྕེ་འོད་གསལ་སྣང་བ་འབུམ་བརྡལ་བས། །མ་དག་འཇིག་རྟེན་གསུམ་གྱི་ཚང་ཚིང་ཕྲ་རབ་རྡུལ་བཞིན་བསྲེག་མཛད་པ། །ཧེ་རུ་ཀ་དཔལ་དཔའ་བོ་དེ་ཡིས་སྙིང་གི་མུན་པ་བཅིལ་བར་མཛོད། །མཆོག་ཏུ་འབར་བའི་ཞལ་གྱི་ཐབ་ཁུང་ཆེ། །སྲེག་བླུགས་མཆོད་པས་མངོན་པར་མཉེས་བྱས་ལས། །རྣམ་མང་ཕྲིན་ལས་རབ་འབྱམས་འདོད་པ་རྒུ། །ཐོགས་མེད་ལྷུན་གྱིས་གྲུབ་པའི་དགའ་སྟོན་

སྤྲོ། །[དེ་ཡང་མངོན་པར་འདོད་པའི་ལས་དང་དངོས་གྲུབ་སྒྲུབ་པའི་འབྲས་བུ་བདེ་བླག་ཏུ་འབྱིན་པར་བྱེད་པ་སྲེག་བླུགས་ཀྱི་ཆོ་གའི་རིམ་པ་ལ་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། གང་དུ་བྱ་བའི་ས་དེ་སྔར་མ་སྦྱངས་པ་ཡིན་ན་སའི་ཆོ་ག་རྒྱས་པར་བྱ་བའམ། བསྡུ་ན་ཞིང་སྐྱོང་གཞི་བདག་སྤྱི་ལ་གཏོང་མ་དང་གསེར་སྐྱེམས་བྱིན་གྱིས་བརླབས་པ་བསྔོས་ཏེ་གནང་བ་ཞུ། དཔལ་ཆེན་པོའི་སྙེམས་པས་ལག་གཡས་རྡོ་རྗེ་དང་བཅས་པས་ལ་བཞག་སྟེ་]ཀཱི་ལ་ཡ་[བརྒྱ་རྩ་དང་།] ཨོཾ་ཨཱཿཧཱུྃ་ཧ་ན་ཧ་ན་ཀྲོ་དྷ་ཧཱུྃ་ཕཊ༔ [ཅེས་ལན་བདུན་ཙམ་བརྗོད་པ་ཀུན་རྫོབ་ཀྱི་སྦྱོང་བ་དང་། སྭབྷཱ་ཝས་ཆོས་ཐམས་ཅད་སྟོང་པ་ཉིད་དུ་མོས་པ་དོན་དམ་གྱི་སྦྱོང་བ་སྟེ་ལས་བཞི་ཀའི་ཐུན་མོང་གི་སྦྱོར་བའོ། །][གཉིས་པ་དངོས་གཞི་ལ་གསུམ། ཕན་གདགས་པ། ཚར་གཅོད་པ། ཀུན་འདུས་མཆོག་གི་སྦྱིན་སྲེག་གོ །སྔ་མ་ལ་ཞི་རྒྱས་དབང་གསུམ་གྱི། དང་པོ་ཞི་བའི་སྦྱིན་སྲེག་ནི། དུས་ར་བ་བཞིའི་ཡར་ངོའི་ཚེས་གཅིག་ལ་སོགས་པའི་སྔ་དྲོའི་ཆར་བཀྲ་ཤིས་པའི་ས་ལས་སྟེག་བུ་གྲུ་བཞི་ཁོད་སྙོམས་པར་བྱས་པའི་

སྟེང་དུ་མེ་ཐབ་བྱ་སྟེ། དེའང་རྒྱུན་གྱི་ལག་ལེན་དུ་བརྩིགས་ཐབ་དང་བརྐོས་ཐབ་མི་འགྲུབ་པའི་དབང་དུ་བྱས་ནས། སྟེག་བུར་བ་བྱུང་བདུད་རྩི་དང་སྦྱར་བའི་དྲིའི་ཆུས་ཆག་ཆག་བཏབ་སྟེ་ཚངས་ཟུར་གྱི་ཐིག་བཏབ་པའི་དབུས་ནས་མཐོ་གང་གིས་ཟླུམ་པོར་བསྐོར་བའི་ཕྱི་རོལ་སོར་བཞི་པའི་ཚད་ཀྱི་མཆུ་དང་ཁ་ཁྱེར་བསྐོར་ལ། དབུས་སུ་རྡུལ་ཚོན་གྱིས་པདྨ་འདབ་མ་བརྒྱད་པའི་ལྟེ་བར་རྡོ་རྗེ་དཀར་པོ་རཾ་ཡིག་གིས་མཚན་པ། པདྨའི་ཕྱི་སྐོར་གྱི་ཟླུམ་སྐོར་བར་མར་མེའི་དཀར་པོ་གཡས་བསྐོར་དུ་འབར་བ་དང་། ཕྱི་མར་རྡོ་རྗེ་ནོར་བུ་དཀར་པོའི་ཕྲེང་བ་དང་གྲྭ་བཞིར་ཟླ་ཕྱེད་རྡོ་རྗེས་མཚན་པ་བྲི། དེར་སྲོག་ཆགས་མེད་པའི་བ་ལང་གི་ལྕི་བའམ་ཡམ་ཤིང་གི་རྒྱུ་དང་མཚུངས་པའི་བུད་ཤིང་ཟླུམ་པོས་ཁྲུ་གང་ཙམ་དུ་ཟླུམ་པོར་བརྩིགས་པའི་ནང་གི་ཤར་ངོས་སུ་མེ་ཚང་བཅས་ལ་སྟེང་ནས་ཀུ་ཤ་རྩེ་མོ་ཤར་དུ་བསྟན་པས་བཀབ། རང་གི་གཡས་ངོས་སུ་མཆོད་སྟེགས་དང་གཡོན་དུ་རྫས་སྟེགས་གཉིས་ཀ་དར་རས་དཀར་པོའི་ཁེབས་དང་ལྡན་པའི་མཆོད་སྟེགས་སུ་འོ་མ་འབྲས་ཆན་དངུལ་ཕྱེ་མེ་ཏོག་དཀར་པོ་རྣམས་དང་བསྲེས་པའི་མར་དཀར་གྱི་འདས་གཏོར་ཟླུམ་པོ་དང་། མདུན་དུ་འཇིག་རྟེན་པའི་གཏོར་མ་དཀར་ཟླུམ། གཡས་གཡོན་དུ་སྨན་ཕུད་དང་རཀྟ ། མདུན་དུ་ཡེ་ཤེས་པར་ཞི་དྲག་གི་ཉེར་སྤྱོད་གཉིས་དང་འཇིག་རྟེན་པར་གཅིག་བཅས་ཕྲེང་ཚར་དུ་འགོད། རྫས་སྟེགས་སུ་བལ་དཀར་སོགས་འོ་མ་ཅན་གྱི་ཤིང་གི་རྩེ་མོའི་ཆ་ལས་བྱུང་བའི་ཡམ་ཤིང་སོར་བཞི་པ་དྲིས་བྱུགས་ཤིང་སྣེ་གཉིས་མར་དང་སྦྲང་རྩིས་ཉུག་པ། མངར་གསུམ་དང་སྦྱར་བའི་མར་ཁུ། ཏིལ་དཀར་པོ། དཀར་མངར་འབྲུ་ཕྱེ་འོ་མར་སྦྱར་བའི་ཟས་མཆོག །འབྲས་མ་གྲུགས་པ། ནས་དང་སོ་བ་གྲ་མ་མེད་པ། གྲོ ། སྲན་མ། དཱུརྦ། ཀུ་ཤ། ཡུངས་དཀར། ཤིང་ཏོག་རྣམས་དང་། དར་དཀར་གྱི་གོས་ཟུང་། རྡོ་ཐལ་མེད་པའི་སོ་རྩི་རྣམས་མདོག་དཀར་ཞིང་དབྱིབས་ཟླུམ་པོའི་སྣོད་འབའ་ཞིག་པར་འདས་མ་འདས་ཉིས་རིམ་དུ་བཤམ། སློབ་དཔོན་དང་

ཐབ་ཀྱི་བར་དུ་མེ་ཡོལ་གངས་རི་བཾ་གྱིས་མཚན་པ་བྲིས་པའི་ནང་གི་ཆར། ནང་མཆོད། ལས་བུམ། རྡོ་དྲིལ་བར་དུ་དགང་བླུགས་ཁ་སྦྱར་བ་བཅས་བཞག །གཞན་ཡང་མེ་དར་དང་རླུང་གཡབ་སོགས་ཉེ་བར་མཁོ་བའི་ཡོ་བྱད་རྣམས་ལེགས་པར་འདུ་བྱས་ལ། སློབ་དཔོན་རྒྱན་ཆས་དཀར་པོ་བགོས་ཏེ་ཞི་ཞིང་དེས་པའི་སེམས་ཀྱིས་ཀུ་ཤ་སོགས་གཙང་མའི་སྟན་ལ་སེམས་དཔའི་སྐྱིལ་མོ་ཀྲུང་གིས་ཤར་དུ་ཕྱོགས་པར་འཁོད་དེ་བདག་གི་རྣལ་འབྱོར་ལ་གནས་པས་ལས་རིམ་ལ་འཇུག །སྒྲུབ་མཆོད་དང་འགྲེལ་བའི་ཚེ་རྩ་སྔགས་ལ་ཕཊ་ཛཿབཏགས་པ་བརྗོད་པས།] རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་སྦྱིན་སྲེག་གི་ལས་རིམ་ལ་འཇུག་པར་[མོས་ལ། ཚུལ་བཞིན་བསྒྲུབས་པའི་ལས་བུམ་གྱི་ཆུ་དང་ཨ་མྲྀ་ཏས་རྡོ་དྲིལ་བསང་།] སྭབྷཱ་ཝས་སྦྱང་། སྟོང་པའི་ངང་ལས་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོག་པ། གཉིས་ཀའའང་དོན་དམ་བྱང་ཆུབ་སེམས་ཀྱི་རང་བཞིན་ནོ། ཨོཾ་མ་ཧཱ་བཛྲ་ཧཱུྃ༔ [ཞེས་རྡོ་རྗེ་གསོར་ཞིང་གར་བཟུང་།] ཨོཾ་བཛྲ་གཎྜེ་ཨཱཿ [ཞེས་དྲིལ་བུ་གསིལ་ཞིང་དཀུར་བརྟེན།] ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭབྷཱ་ཝ་ཨཏྣམ་ཀོཉཧཾ༔ [ཞེས་པད་སྐོར་སྔོན་དུ་འགྲོ་བས་འཁྱུད་རྒྱ་བྱས་ཏེ་དམ་ཚིག་གསུམ་ལ་བློ་ལ་བཞག །དགང་བླུགས་སྔར་བཞིན་བསང་སྦྱང་།] སྟོང་པའི་ངང་ལས་པད་ཟླའི་སྟེང་དུ་རིན་པོ་ཆེ་ལས་གྲུབ་པའི་དགང་གཟར་བླུགས་མཚན་ཉིད་ཐམས་ཅད་དང་ལྡན་པ། རང་གི་སྙིང་ག་ནས་འོད་ཟེར་འཕྲོས་ཡེ་

ཤེས་ལྷའི་ཐུགས་རྒྱུད་བསྐུལ། ཐབས་དང་ཤེས་རབ་ཀྱི་རང་བཞིན་ཡེ་ཤེས་སེམས་དཔའ་འོད་ཟེར་གྱི་ཚུལ་དུ་བཀུག དགང་བླུག་ལ་ཐིམ་པས་དངོས་གྲུབ་འབྱུང་བའི་དམ་ཚིག་གི་ཡོ་བྱད་དུ་གྱུར་[པར་བསམ། ཕྱི་ནང་གི་མཆོད་རྫས་རྣམས་བསང་སྦྱངས་ཏེ་བྱིན་གྱིས་བརླབས་པ་ལས་བྱང་ལྟར་བྱ། བསྲེག་རྫས་རྣམས་བསང་སྦྱང་།] སྟོང་པའི་ངང་ལས་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་བདུད་རྩིའི་བཅུད་ཅན་མཚན་ཉིད་ཐམས་ཅད་ཡོངས་སུ་རྫོགས་པ། ཞི་བའི་ལས་སྒྲུབ་པ་ལ་ཐོགས་པམེད་པའི་ནུས་པ་དང་ལྡན་པར་[བསམ་ཞིང་། རྡོལ་དྲིལ་དང་བཅས་དགང་བླུགས་འཛིན་པས་བསྲེག་རྫས་རྣམས་ལ་གཡས་བསྐོར་དུ་རེག་ལ།] ཨོཾ་སྭཱཧཱ༔ [ཡམ་ཤིང་ལ།] ཨོཾ་ཨཱཿསྭཱཧཱ༔ [ཞུན་མར་ལ།] ཨོཾ་ཤྲཱི་སྭཱཧཱ༔ [འབྲུ་རྣམས་ལ།] ཨོཾ་ཛིཾ་སྭཱཧཱ༔ [རྫས་གཞན་རྣམས་ལ།] ཨོཾ་ཀུ་རུ་ཀུ་རུ་སྭཱཧཱ༔ ཨོཾ་ཨཱཿཧཱུྃ༔ [ཞེས་སྔགས་རྣམས་ལན་གསུམ་གསུམ་དུ་བརྗོད་པས་བརླབ་བོ། དེ་ནས་བགེགས་གཏོར་མ་བྱིན་ཏེ་བཀའ་བསྒོ་ཞིང་མཚམས་བཅད། བཀྲ་ཤིས་པའི་གནས་ལས་བྱུང་བའི་མེ་དུ་བ་མེད་པ་གཡས་སུ་བསྐོར་ཏེ།] ཨོཾ་ཛྭ་ལ་ཛྭ་ལ་ཧཱུྃ༔ [ཞེས་ཐབ་ཀྱི་ཤར་ལྷོ་ནས་བཅུག] ཧཱུྃ་ཧཱུྃ་ཧཱུྃ༔ [ཞེས་རླུང་གཡབ་ཀྱིས་མེ་སྦར་ཞིང་།] ཧཱུྃ༔ [ལན་བདུན་བཟླས་པའི་བླུགས་གཟར་གྱི་མར་ཁུའི་ཐིགས་པས་ཀྱང་གསོ། ཀུ་ཤ་སྔོ་ལྗང་དྲི་མ་མེད་པ་ལས་བུམ་གྱི་ཆུས་བྲན་ཏེ།] ཨོཾ་ཨ་མྲྀ་ཏ་ཀུཎྜ་ལཱི་སརྦ་བིགྷྣཱན་ནཱ་ཤ་ཡ་ཧཱུྃ་ཕཊ༔ [ཅེས་བསང་ལ།] ཨོཾ། ཀུ་ཤ་འདི་ནི་གཙང་ཞིང་དགེ །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་ནི་མཉེས་བྱེད་པ། །ས་ལས་སྐྱེས་པ་འདབ་མའི་

སྙིང་། །བདག་གིས་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །སྭཱཧཱ། [ཞེས་ཀུ་ཤ་ཐབ་ཀྱི་གཡས་བསྐོར་དུ་དགྲམ་ཞིང་སླར་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་མི་རིང་བས་གཡོག་གོ །དེ་ནས་ཐབས་བསང་སྦྱང་།] སྟོང་པའི་ངང་ལས་ཧཱུྃ་ལས་ཞི་བའི་ཐབ་ཁུང་དཀར་པོ་དབྱིབས་ཟླུམ་པོ་མུ་རན་ཁ་ཁྱེར་དང་བཅས་པའི་དབུས་སུ་སྣ་ཚོགས་པདྨའི་ལྟེ་བར་རྡོ་རྗེ་ལྔ་པ་དང་ཁ་ཁྱེར་ལ་རྡོ་རྗེ་ནོར་བུ་དཀར་པོའི་ཕྲེང་བས་བསྐོར་ཞིང་གྲྭ་བཞིར་ཟླ་ཕྱེད་རྡོ་རྗེས་མཚན་པ། དྭངས་ཤིང་སྒྲུབ་པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཞི་བའི་མེ་དཀར་གསལ་དུ་འབར་བའི་དལས་ཞི་བའི་མེ་ལྷ་སྐུ་མདོག་དཀར་པོ་ཞི་ཞིང་འཇུམ་པའི་ཉམས་ཅན། ཕྱག་གཡས་ན་ཞི་མཛད་མེའི་འཁོར་ལོ་དཀར་གསལ་དང་། གཡོན་ན་ཞི་བའི་དུལ་ཕུར་དཀར་པོ་འདྲིལ་བ། དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། ཚངས་སྐུད་སུམ་བསྒྲིལ་སེ་རལ་ཁར་ཐོགས་པ། གསུས་ཁྱིམ་ཆེ་ལ་བྲང་རུས་བཀྲ་བ། ཨག་ཚོམ་རིང་ཞིང་ལོ་བརྒྱད་པའི་ན་ཚོད་ཅན། ར་སྐྱེས་དཀར་པོའི་གདན་ལ་ཕྱེད་སྐྱིལ་གྱིས་བཞུགས་པ། རིགས་ཀྱི་བདག་པོ་རྣམ་པར་སྣང་མཛད་ཀྱི་དབུ་བརྒྱན་ཅིང་དྲང་སྲོང་གི་ཚོགས་ཀྱི་ཡོངས་སུ་བསྐོར་བར་གྱུར།

དེའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། བདག་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཤར་ལྷོ་ནས་མེ་ལྷ་འཁོར་དང་བཅས་པ་བཛྲ་ས་མཱ་ཛཿ [ས་སྤྱན་དྲངས་པར་བསམ་ལ། ལག་གཡས་མི་འཇིགས་པའི་རྒྱ་དང་བཅས་པས་མཐེ་བོང་གཡབ་ཅིང་།] ཧཱུྃ༔ དད་པ་དང་ནི་དམ་ཚིག་གིས༔ ཚུར་བྱོན་ཚུར་བྱོན་ལྷ་ཆེན་པོ༔ ཨགྷེ་རཱ་ཛ་འཁོར་དང་བཅས༔ སྲེག་བླུགས་ཞལ་ཟས་བཞེས་སླད་དུ༔ འབར་བའི་གནས་འདིར་གཤེགས་སུ་གསོལ༔ དགྱེས་པའི་གདན་ལ་བཞུགས་སོ་འཚལ༔ ཨོཾ་པཱ་བ་ཀ་ཨགྷ་ཡེ་ཨཱ་གཙྪ་ཡཿམ་མ་ཤཱིནྟཾ་ཀུ་རུ་སྭཱ་ཧཱ༔ [ཞེས་མདུན་གྱི་ནམ་མཁར་བྱོན་པར་བསམ། ལས་བུམ་གྱི་ཆུ་གཏོར་ཞིང་ལས་སྔགས་ཀྱིས་ཕྱི་འབྲང་གིས་བགེགས་བསྐྲད།] ཛཿཧཱུྃ་བཾ་ཧོཿ ས་མ་ཡ་ཏིཥྛ་ལྷན༔ [ཞེས་དམ་ཡེ་དབྱེར་མེད་དུ་བསྟིམ།] ཧཱུྃ༔ ཚངས་པ་འཇིག་རྟེན་མགོན་གྱི་སྲས༔ མཐུ་སྟོབས་བྱིན་རླབས་བསམ་མི་ཁྱབ༔ ཇི་ལྟར་འདོད་པའི་དོན་སྒྲུབ་པ༔ གཟི་བརྗིད་རྒྱལ་པོར་ཕྱག་འཚལ་ལོ༔ ཨ་ཏི་པུ་ཧོཿ པྲ་ཏཱིཙྪ་ཧོཿ [ཞེས་ཕྱག་བྱ།] ཧོཿ ལྷ་རྫས་བཟང་པོའི་ཡོན་ཆབ་དང་༔ ཞབས་བསིལ་མེ་ཏོག་སྤོས་མར་མེ༔ དྲི་ཆབ་ཞལ་ཟས་རོལ་མོ་སོགས༔ ཕྱི་མཆོད་རྣམ་པ་སྣ་ཚོགས་འདི༔ མེ་ལྷའི་རྒྱལ་པོ་ཁྱོད་ལ་འབུལ༔ ཞི་བའི་ཕྲིན་ལས་འགྲུབ་པར་མཛོད༔ ཨོཾ་ཨགྣ་ཡེ་ཨརྒྷཾ་[སོགས།] ཤཔྡ་པྲ་ཏཱིཙྪ་པཱུ་ཛ་ཧོཿ ཧཱུྃ༔ འཇིགས་བྱེད་མེ་ལྷའི་

རྒྱལ་པོ་ལ༔ གཟུགས་སྒྲ་དྲི་རོ་རེག་བྱ་སོགས༔ ནང་གི་མཆོད་པ་སྣ་ཚོགས་འབུལ༔ ཞི་བའི་ཕྲིན་ལས་འགྲུབ་པར་མཛོད༔ ཨོཾ་ཨགྣ་ཡེ་རཱུ་པ་སོགས། སྤརྴེ་པྲ་ཏཱིཙྪ་པཱུ་ཛ་ཧོཿ ཧཱུྃ༔ འཇིགས་བྱེད་མེ་ལྷའི་རྒྱལ་པོ་ལ༔ བདུད་རྩི་སྨན་དང་བ་ལིཾ་ཏ༔ རཀྟ་དམར་གྱི་མཆོད་པ་འབུལ༔ ཞི་བའི་ཕྲིན་ལས་འགྲུབ་པར་མཛོད༔ མ་ཧཱ་སརྦ་པཉྩ་ཨ་མྲྀ་ཏ་བ་ལིཾ་ཏ་རཀྟ་ཁཱ་ཧི༔ ཧཱུྃ༔ འཇིགས་བྱེད་མེ་ལྷའི་རྒྱལ་པོ་ཁྱོད༔ འགྲོ་བ་སེམས་ཅན་དོན་སླད་དུ༔ གནས་འདིར་སྲེག་བླུགས་མཆོད་པ་བཞེས༔ ཞི་བའི་ཕྲིན་ལས་མྱུར་འགྲུབ་མཛོད༔ [ཞེས་ཕྱི་ནང་གི་མཆོད་པས་མཆོད། དེ་ནས་བསྲེག་རྫས་ཀྱི་ཐོག་མར་དགང་བླུགས་འབུལ་བ་ནི།] མེ་ལྷ་ཞལ་འཛུམ་པ་དང་བཅས་པ་ཅུང་ཟད་གདངས་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་འོད་ཟེར་གྱི་ཕུང་པོ་འབར་བས་མཚན་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་ [བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་གྱིས་དགང་བླུགས་བཟུང་ནས།] ཨོཾ་བི་མ་ལ་ཨགྣ་ཡེ་སྭཱ་ཧཱ༔ [ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་བའི་གཟར་བུ་ཁ་སྦྱར་པུས་མོའི་ནང་ལས་ཕྱིར་མི་འདའ་བར་གཡས་སུ་བསྐོར་ཞིང་།] ཨོཾ་ཨགྣ་ཡེ་དཱི་བྱ་དཱི་བྱ་བི་ཤུངྔྷེ་མ་ཧཱ་ཤྲཱི་ཧ་བྱ་ཀ་བྱ་བྷ་ཧ་ན་ཡ་སྭཱཧཱ༔ [ཞེས་པའི་མཐར།] བདག་ཅག་དཔོན་སློབ་འཁོར་དང་བཅས་པས་ཐོག་དྲངས་མཐའ་ཡས་པའི་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་འགལ་རྐྱེན་མི་མཐུན་པའི་

ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ། [ཞེས་སྤེལ་ཚིག་སྦྲེལ་བས་ཕུལ། ཚུལ་དེ་ལྟ་བུས་ལན་གསུམ་དུ་འབུལ་ཞིང་མེ་པྲ་བརྟག་པས་དགེ་བར་མཐོང་ན་གཟེངས་བསྟོད། བགེགས་དང་བཅས་པ་ཉིད་ན་ལས་སྔགས་ཀྱིས་མེ་ལ་བསང་གཏོར་དང་སྲུང་བ་བྱ་ཞིང་།] བགེགས་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཞེས་སྦྱར་བས་སྲེག་བླུགས་བདུན་ལ་སོགས་པ་འབུལ་ལོ། །དེ་ནས་རྫས་རྣམས་ལས་ཁུ་བའི་རང་བཞིན་ཅན་རྣམས་ཞལ་དང་། ཡམ་ཤིང་དཱུརྦ་ཀུ་ཤ་སོགས་འོད་ཀྱི་དཀྱིལ་འཁོར་དང་། ཞོ་ཟོན་དང་ཏིལ་སོགས་ཕྱག་གིས་མཚོན་པར་ཕུལ་བར་མོས་ཏེ། ལག་གིས་བཟུང་དུ་བཏུབ་པ་རྣམས་གཡས་པའི་མཐེབ་སྲིན་སྦྱར་བའི་མཆོག་སྦྱིན་གྱི་ཚུལ་དང་། དེ་ལས་གཞན་པ་རྣམས་བླུག་གཟེར་གྱིས་འབུལ་ཞིང་། འབུལ་སྔགས་དང་གོ་རིམ་ནི། ཡམ་ཤིང་།] ཨོཾ་བོདྷི་བྲྀཀྵ་ཡ་སྭཱཧཱ༔ གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་སྭཱཧཱ༔ [མར་ཁུ།] ཨོཾ་ཨགྣ་ཡེ་སྭཱཧཱ༔ འབྱོར་པ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཏིལ།] ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱཧཱ༔ བསོད་ནམས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཞོ་ཟན་ནམ་ཟས་མཆོག །]ཨོཾ་སརྦ་སམྦ་དེ་སྭཱཧཱ༔ བདེ་བ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [འབྲས།] ཨོཾ་བཛྲ་པུཥྚ་ཡ་སྭཱཧཱ༔ བསོད་ནམས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟ་ཀུ་རུ་སྭཱཧཱ༔ [ནས།] ཨོཾ་མ་ཧཱ་བེ་གཱ་ཡ་སྭཱཧཱ༔ ཤུགས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [སོ་བ།] ཨོཾ་བཛྲ་བཱི་ཛཱ་ཡ་སྭཱཧཱ༔ ནོར་དང་

འབྲུ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་སུ་སྭཱཧཱ༔ [གྲོ།] ཨོཾ་བཛྲ་གྷསྨཱ་རི་སྭཱཧཱ༔ ནད་མེད་པ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [སྲན་མ།] ཨོཾ་མ་ཧཱ་བ་ལཱ་ཡ་སྭཱཧཱ༔ སྟོབས་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [དཱུརྦ།] ཨོཾ་བཛྲ་ཨཱ་ཡུ་ཥེ་སྭཱཧཱ༔ ཚེ་རིང་བ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཀུ་ཤ།] ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱཧཱ༔ མི་མཐུན་པའི་ཕྱོགས་ཐམས་ཅད་སྲུང་བ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཡུངས་ཀར།] ཨོཾ་བཛྲ་སིདྡྷ་ཡེ་སྭཱཧཱ༔ གདོན་བགེགས་འཇོམས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [ཤིང་ཏོག] ཨོཾ་ག་གྷ་ནི་ག་གྷ་ནི་བཻ་ལོ་ཀ་ཏི་སྭཱཧཱ༔ རིགས་རྒྱུད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟཾ་ཀུ་རུ་སྭཱཧཱ༔ [དེ་ལྟར་ལན་བདུན་སོགས་ཇི་ལྟར་རིགས་པ་ཕུལ་བའི་མཐར། བསྟོད་པ་ནི།] ཧཱུྃ༔ གཟི་བརྗིད་འབར་བ་མེ་ཡི་ལྷ༔ འདོད་པ་ཐམས་ཅད་སྒྲུབ་མཛད་པ༔ བདག་གཞན་དོན་གཉིས་མྱུར་འགྲུབ་སྩོལ༔ འཇིགས་བྱེད་མེ་ལྷ་ཉིད་ལ་བསྟོད༔ མེ་ལྷའི་རྒྱལ་པོ་དགའ་བའི་མཆོག༔ ཚངས་དབང་འཇིག་རྟེན་སྐྱོང་བྱེད་སྲས༔ བགེགས་ཚོགས་མ་ལུས་བསྲེག་མཛད་པའི༔ གཟི་བརྗིད་རྒྱལ་པོ་ཉིད་ལ་འདུད༔ ཉོན་མོངས་སྲེག་པའི་ཡེ་ཤེས་འོད༔ མངོན་ཤེས་

རྫུ་འཕྲུལ་སྟོབས་དང་ལྡན༔ ཉེས་པའི་སྐྱོན་རྣམས་སེལ་མཛད་པ༔ དྲང་སྲོང་ཆེན་པོ་ཉིད་ལ་བདུད༔ བདེན་པའི་ཚིག་ནི་མི་བསླུ་བས༔ འཇིག་རྟེན་སྐྱོབ་པ་རྣམས་ཀྱི་རྒྱལ༔ ཚངས་པར་གྱུར་པའི་ངག་དང་ལྡན༔ དྲང་སྲོང་ཆེན་པོ་ཉིད་ལ་འདུད༔ དམ་བཅའ་བཞིན་དུ་མེ་ཡི་ལས༔ ནུས་པར་བྱིན་གྱིས་བརླབ་ཏུ་གསོལ༔ [ཞེས་བསྟོད།] ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལྷ་ཀླུ་གནོད་སྦྱིན་དྲི་ཟ་ལ་སོགས་པའི་གདོན་རྣམས་ལས་ཐར་བ་དང་གློ་བུར་ཡེ་འདྲོགས་དུས་མ་ཡིན་པར་འཆི་བ་ལ་སོགས་པའི་བར་ཆད་མི་འབྱུང་བར་མཛད་དུ་གསོལ། མི་ཁ་སྨྲ་མཆུ་དགྲ་རྐུན་བྱད་སྟེམས་སྦྱོར་བ་རྩུབ་མོ་དང་ཉེ་བར་འཚེ་བ་ལས་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་ཟློག་པར་མཛད་དུ་གསོལ། ལས་དང་ཉོན་མོངས་བག་ཆགས་ཤེས་བྱའི་དྲི་མ་ལ་སོགས་པ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་ཞི་བར་མཛད་དུ་གསོལ། ཤིནྟཾ་ཀུ་རུ་སྭཱཧཱ༔ [ཞེས་འདོད་དོན་གསོལ།] ཨོཾ་ཨཱཿཧཱུྃ་མུཿས། ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་པར་ [བསམ་མོ། དེ་དག་ནི་འཇིག་རྟེན་པའི་མེ་ལྷ་མཆོད་པའི་ཆོ་གའོ། །དེ་ནས་འདས་པའི་མེ་ལྷ་མཆོད་པའི་རིམ་པ་ནི། བུད་ཤིང་ཅུང་ཟད་ཁ་གསོས་བསང་སྦྱང་།] ཧཱུྃ༔

དམ་ཚིག་མེ་ལྷའི་ལྟོ་བ་འབྱམས་ཀླས་དབྱིངས༔ རང་བྱུང་ཡེ་ཤེས་ལྔ་ལྡན་དཀྱིལ་འཁོར་ནི༔ [ཞེས་པ་ནས།] པྃ་པདྨ་མཎྜ་ལ༔ [ཞེས་པའི་བར་གྱིས་རྟེན་གཞལ་ཡས་ཁང་གདན་དང་བཅས་པ་བསྐྱེད། སྐབས་འདིར་སྦྱིན་སྲེག་རྐྱང་པའི་ཚེ་བརྟན་པ་ལྷ་བསྐྱེད་ནས་སྤྱན་འདྲེན་བྱེད་པ་ཡིན་ཅིང་། སྒྲུབ་མཆོད་དང་འབྲེལ་བའི་སྐབས་སུ།] ཧཱུྃ༔ ཆོས་དབྱིངས་བརྡལ་བ་ཆེན་པོའི་ཀློང་དཀྱིལ་ནས༔ [ཞེས་སོགས་སྤྱན་འདྲེན་གྱི་ཚིག་བརྗོད་པ་དང་བསྟུན་ལས་རྡོར་གྱིས་སྔགས་བཟླ་བཞིན་སྒྲུབ་དཀྱིལ་ལས་མཎྜལ་མེ་ཏོག་གིས་མཚོན་པར་སྤྱན་དྲངས་པ་སློབ་དཔོན་ལ་གཡས་སུ་བསྐོར་ཏེ་གཡོན་ཕྱོགས་ནས་ཕུལ་བ་ལས་མེ་ཏོག་ཐབ་ཏུ་དོར་བ་དང་ལྷན་ཅིག་གཙོ་བོ་འཁོར་སོ་སོའི་བསྐྱེད་སྔགས་བརྗོད་པའི་མཐར།] ཧཱུྃ༔ རང་བྱུང་ཕོ་བྲང་ཨེ་ཡི་གཞལ་ཡས་དབུས༔ པདྨ་ཉི་ཟླ་འབར་བའི་གདན་སྟེངས་སུ༔ བདུད་བཞི་རྒྱལ་བསེན་དྲེགས་པ་བསྣོལ་བའི་སྟེང་༔ རྒྱལ་ཀུན་ཕྲིན་ལས་ཡོངས་འདུས་ཆེ་བའི་མཆོག༔ [ཅེས་སོགས་ལས་བྱང་བཞིན་གཙོ་འཁོར་ཡོངས་རྫོགས་གསལ་གདབ། གང་ལྟར་ཡང་བཞུགས་སུ་གསོལ་བ་ནས་བཟུང་སྦྱོར་སྒྲོལ་གྱི་མཆོད་པའི་བར་སོང་ནས། སྲེག་རྫས་ཀྱི་ཐོག་མར་དགང་བླུགས་འབུལ་བ་ལ།] དཀྱིལ་འཁོར་གྱི་ལྷ་རྣམས་ཞལ་འཛུམ་པ་དང་བཅས་པས་ཅུང་ཟད་གདངས་པའི་ལྗགས་རྡོ་རྗེ་དཀར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་ཧཱུྃ་ཡིག་འོད་ཟེར་གྱི་ཕུར་པོར་འབར་བས་མཚན་པ་ [ཞེས་སོགས་འདོན་པ་སྤོས་ལ། གཙོ་སྔགས་ཀྱིས་དགང་ཞིང་བཞི་སྙིང་གཅིག་དྲིལ་སྤེལ་ཚིག་དང་བཅས་པས་ཕུལ། དེ་ནས་ཡམ་ཤིང་ལ་སོགས་པའི་བསྲེག་རྫས་གཞན་ཐམས་ཅད་གཙོ་སྔགས།] ས་པ་རི་ཝཱ་ར་ [བཏགས་པ་ཁོ་ནའམ།

སྤྲོ་ན་གཙོ་བོ། ཀཱི་ལ་རིགས་ལྔ། ཁྲོ་བཅུ། སྲས་མཆོག སྒོ་སྲུང་རྣམས་སོ་སོའི་སྔགས་དང་། དམ་ཅན་སྤྱི་ལ་བཞི་སྙིང་གཅིག་དྲིལ་བཅས། ཐོག་མར་དེ་དག་ལན་རེའི་མཐར་རྫས་སྔགས་ཁོ་ནས་བཅུ་ལ་སོགས་པ་ཇི་ལྟར་རིགས་པར་ཕུལ་མཐར་སྤེལ་ཚིག་གོང་ལྟར་སྦྱར། ཚུལ་དེ་ལྟ་བུས་གཙོ་འཁོར་གྱི་འགྲོས་དང་སྦྱར་ཏེ་འབུལ། མཐར་ཚོགས་ཕུད་ཀྱི་ཆ་ཤས་ཕུལ་ལ།] ཨོཾ་ཨཱཿཧཱུྃ༔ དཔེ་མེད་བསམ་བརྗོད་བྲལ་བའི་དཀྱིལ་འཁོར་ལ༔ སྣོད་བཅུད་ཚོགས་ཀྱི་འཁོར་ལོར་བསྒྱུར་ཏེ་འབུལ༔ འགྲོ་རྣམས་ཚོགས་རྫོགས་སྒྲིབ་པ་ཀུན་དག་ནས༔ རང་སྣང་མི་ཟད་རྒྱན་འཁོར་ལོངས་སྤྱོད་ཤོག༔ མ་ཧཱ་ག་ཎ་ཙཀྲ་པཱུ་ཛ་ལ་ཁཱ་ཧི༔ [ཞེས་འབུལ། དེ་ནས་ལས་བྱང་བཞིན་བསྟོད་དེ།] ཧོཿ བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་ཁྱེད་རྣམས་ཀྱིས་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལྷ་ཀླུ་ [སོགས་གོང་བཞིན་འདོད་པའི་དོན་ལ་གསོལ་བ་བཏབ་བས།] ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་ཟླ་བ་ཆུ་ཤེལ་གྱི་བུམ་པ་བདུད་རྩི་དཀར་པོས་གང་བ་འཛིན་པས་ཟླ་བ་ལ་གནས་པའི་བསྒྲུབ་བྱའི་སྟེང་ཕྱོགས་ནས་ཁྲུས་བྱས་པས་སྡིག་སྒྲིབ་ནད་གདོན་ལ་སོགས་པའི་ཉེས་པ་ཐམས་ཅད་དག་ཅིང་ཞི་བར་ [བསམ་མོ། སླར་ཡང་དགང་བླུགས་སྔར་བཞིན་དུ་ཕུལ་མཐར།] ཨོཾ་བཛྲ་ཝསྟྲ་ཡ་སྭཱཧཱ༔ [ཞེས་གོས་ཟུང་དང་།] ཨོཾ་བཛྲ་ཏམྦུ་ལཱ་ཡ་སྭཱཧཱ༔ [ཞེས་སོ་རྩི་དབུལ། ཆུ་གཉིས་ཉེར་སྤྱོད་སྔགས་ཙམ་གྱིས་མཆོད་ཅིང་ཤླཽ་ལོ་ཀ་གཅིག་གིས་བསྟོད།] མ་རྙེད་ཡོངས་སུ་མ་ཚང་དང་།

[སོགས་དང་ཡི་གེ་བརྒྱ་པ་བཟླས་པས་ནོངས་པ་བཤགས།] ཨོཾ། ཁྱེད་ཀྱིས་སེམས་ཅན་དོན་ཀུན་མཛད། [ཅེས་སོགས་ནས།] བཛྲ་མུ༔ [ཞེས་སོགས་ཀྱི་སྒྲས་ཡེ་ཤེས་པ་ཆོས་ཀྱི་དབྱིངས་སུ་གཤེགས། དམ་ཚིག་པ་རང་ལ་བསྡུ། སྒྲུབ་མཆོད་དང་སྦྲེལ་ཚེ།] དཀྱིལ་འཁོར་པའི་ལྷ་ཚོགས་རྣམས་སྒྲུབ་པའི་དཀྱིལ་འཁོར་ལ་གཤེགས་པར་[བསམ་ཞིང་མཎྜལ་མེ་ཏོག་གིས་མཚོན་པར་སྒྲུབ་དཀྱིལ་ག་ལ་བར་སྤྱན་དྲངས།] གཞལ་ཡས་ཁང་གདན་དང་བཅས་པ་རང་ལ་ཐིམ་པར་[བསམ་། དེ་དག་གི་འདས་པའི་མེ་ལྷ་མཆོད་པའི་ཆོ་གའོ། །][གསུམ་པ་རྗེས་ཀྱི་བྱ་བ་ནི། སླར་ཡང་བླུགས་གཟར་གྱི་མར་ཁུས་མེ་གསོ་ཞིང་།] བཛྲ་ས་མཱ་ཛཱཿ[ས་མེ་ལྷ་ཡེ་ཤེས་པ་སྤྱན་དྲངས།] ཛཿཧཱུྃ་བཾ་ཧོཿས་དམ་ཚིག་པ་དང་དབྱེར་མེད་དུ་གྱུར་པ་ལ། [སྔར་བཞིན་དགང་བླུགས་དང་ཡམ་ཤིང་ལ་སོགས་པའི་བསྲེག་རྫས་ལྷག་མ་རྣམས་སྤེལ་ཚིག་མེདཔའི་སྔགས་ཀྱིས་འབུལ། གོས་ཟུང་དང་སོ་རྩིའང་གོང་གི་སྔགས་ཀྱིས་ཕུལ་མཐར།] པུཥྤེ་[སོགས་ཉེར་སྤྱོད་ལྔས་མཆོད།] ཧཱུྃ༔ ཕྲིན་ལས་སྒྲུབ་མཛད་ཆེ་བའི་མཆོག༔ མེ་ལྷའི་རྒྱལ་པོ་གདོན་གྱི་བདག༔ ཤར་ལྷོ་མེ་ལྷའི་ཚོགས་བཅས་ལ༔ མཆོད་ཅིང་བསྟོད་དེ་ཕྱག་ཀྱང་འཚལ༔ [ཅེས་བསྟོད།] ཨ་ཀཱ་[རོས་སྔར་བསྔོས་པའི་གཏོར་མ་ཐབ་ཏུ་འབུལ་ཞིང་།] མཆོད་སྦྱིན་གཏོར་མ་འདི་བཞེས་ལ། [ཞེས་སོགས་ཀྱིས་ཕྲིན་ལས་བཅོལ། སྔར་བཞིན་ནོངས་པ་བཤགས་ནས།] བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱི་གཤེགས། །ཇི་བཞིན་དུས་སུ་སླར་བྱོན་ལ། །བདག་

གི་འདོད་པ་ཐམས་ཅད་བ་སྒྲུབས། །[ཞེས་སྙན་མནན་ཏེ།] ཨོཾ་ཨགྣ་ཡེ་གཙྪ༔ [ཞེས་པའི་ཡེ་ཤེས་ཀྱི་མེ་ལྷ་རང་གནས་སུ་གཤེགས། དམ་ཚིག་གི་མེ་ལྷརང་ལ་བསྡུ། མེ་རང་ཞིར་གཏོང་བའམ་ལོང་མེད་ན་འོ་མ་དང་དྲི་བཟང་གི་ཆུས་གཞིལ་གབ་ཐལ་སོལ་རྣམས་རྒྱ་མཚོར་འབབ་པའི་ཆུ་བོ་ཆེན་པོར་བསྐྱལ། ལས་མཇུག་བྲོ་ཡིས་བསྡུ་བའི་སླད་དུ། །ཞི་བའི་ཕུར་བུ་འདྲིལ། མཆེད་རྣམས་ལག་གཡས་སྟེང་དང་གཡོན་འོག་ཏུ་བྱསཔའི་མཛུབ་མོ་རྣམས་ལུ་གུ་རྒྱུད་དུ་སྦྲེལ་ནས་བྲོ་ར་ཟླུམ་པོར་བསྐོར་བའམ་དེར་མོས་ལ།] ཧཱུྃ༔ དངུལ་ལམ་དཀར་པོའི་ཤིང་རྣམས་ལ༔ མགོ་བོ་རྒྱ་མདུད་རྩེ་ཟླུམ་པོ༔ ངོས་ལ་ཞི་བའི་ལྷ་བསྒོམས་ཏེ༔ བཏབ་པས་འཇིགས་བརྒྱད་ཞི་བར་འགྱུར༔ བྃ་གྱི་ཚོགས་ཀྱི་དཀྱིལ་འཁོར་དུ༔ ཨོཾ་ལས་དེ་བཞིན་འཁོར་དང་བཅས༔ རྨུགས་པར་གྱུར་པའི་སེམས་ཅན་རྣམས༔ ཞི་བར་གྱུར་ལ་དབྱིངས་སུ་རོལ༔ [ཧཱུཾ་བཞི་པའི་སྔགས་དང་།] ཞི་མཛད་ལྷ་ལ་ཕྱག་འཚལ་ལོ༔ སྟེང་གི་ལྷ་ཡང་ཞི་གྱུར་ཅིག༔ འོག་གི་ཀླུ་ཡང་ཞི་གྱུར་ཅིག༔ སྡང་བའི་དགྲ་ཡང་ཞི་འགྱུར་ཅིག༔ གནོད་པའི་བགེགས་ཀྱང་ཞི་གྱུར་ཅིག༔ ནད་དང་སྡུག་བསྔལ་ཞི་གྱུར་ཅིག༔ ཨོཾ་བཛྲ་ཀཱི་ལི་ཀཱི་ལ་ཡ་ཤཱནྟི་ཀུ་རུ་ཡེ་སྭཱཧཱ༔ [ཞེས་བྲོ་བརྡུང་། དགེ་བ་བསྔོ་ཞིིང་ཤིས་པ་བརྗོད་པས་མཐའ་བརྒྱན་པར་བྱའོ།། །།][༈ གཉིས་པ་རྒྱས་པའི་སྤྱན་སྲེག་ནི། དུས་ར་བ་བཞིའི་ཡར་ངོའི་ཚེས་བརྒྱད་དམ་བཅོ་བརྒྱད་དམ་བཅོ་ལྔ་ལ་སོགས་པའི་ཉི་དྲོས་ཀྱི་ཆར། རྒྱལ་པོའི་བང་མཛོད་ཀྱི་འོག་དང་ཞིང་བཟང་པོ་སོགས་དཔལ་ཅན་གྱི་ས་ལས་བསྐྲུན་

པའི་ཐབས་སྟེགས་བ་བྱུང་བདུད་རྩི་དང་སྦྱར་བ་དྲིའི་ཆུས་ཆག་ཆག་བཏབ་པར་ཚངས་ཟུར་གྱི་ཐིག་བཏབ་པའི་དབུས་ནས་ལོགས་ངོས་ས་ཁྲུ་རེ་གཞལ་བའི་སར་གྲུ་བཞི་པར་བཅད་པའི་ཕྱི་རོལ་དུ་སོར་བརྒྱད་པའི་མཆུ་དང་ཁ་ཁྱེར་གྱིས་བསྐོར། ཐབ་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་སོར་དྲུག་པའི་རིན་པོ་ཆེས་མཚན་པ། མཆུའམ་མུ་རན་ལ་མེ་རི་སེར་པོ་གཡས་བསྐོར་དུ་འབར་བ་དང་། ཁ་ཁྱེར་ལ་རིན་པོ་ཆེའི་ཕྲེང་བས་བསྐོར་ཞིང་ཟུར་བཞི་ལའང་རིན་པོ་ཆེ་འབར་བ་རེ་བཅས་བྲི། དེར་ཚེར་མ་མེད་པའི་འབྲས་བུ་ཅན་གྱི་ཤིང་འོ་མར་བཅས་པའི་གུར་གུམ་གྱི་ཆབ་ཀྱིས་བྲན་པས་ཁྲུ་གང་ཙམ་དུ་གྲུ་བཞིར་བརྩིག །གཏོར་མའི་རྒྱུ་གསེར་ཕྱེ་མེ་ཏོག་སེར་པོ་གྲོ་དང་རྒུན་འབྲུའི་ཕྱེ་ལྡོང་རོས་ཞོ་རྣམས་མར་དང་བསྲེས་པས་དབྱིབས་གྲུ་བཞི་པད་འདབ་ཅན། ཡམ་ཤིང་འབྲས་བུ་ཆགས་པའི་ཤིང་གི་བར་གྱི་ཆ་ལས་བྱུང་བ་ཁྲུ་གང་བ་དྲི་དང་མངར་གསུམ་མར་ཁུས་སྦགས་པ། བསྲེག་རྫས་ཞི་བ་དང་མཚུངས་པ་ལས་བི་ལྦ་སོགས་ཤིང་ཏོག་འབྲུ་སྨན་རིན་པོ་ཆེ་དང་དར་གོས་སེར་པོའི་རིགས། སྣོད་དང་རྫས་ཐམས་ཅད་དབྱིབས་གྲུ་བཞི་ཁ་དོག་གསེར་པོ་འབའ་ཞིག་པ་བྱ། སློབ་དཔོན་རྒྱན་ཆས་སེར་པོ་བགོས་པ་དགའ་བའི་སེམས་དང་བཟང་པོའི་སྟབས་ཀྱིས་སྟན་སེར་པོ་ལ་ཁ་བྱང་དུ་ཕྱོགས་པས་འཁོད་ནས་ལས་རིམ་ལ་འཇུག །མེ་རྒྱལ་རིགས་ཀྱི་ཁྱིམ་དང་གཙུབས་ཤིང་ལས་བྱུང་བས་སྦར། ཕྲིན་ལས་ཞི་བའི་སྐབས་ཁོ་ན་ལྟར་ལས། ཐབ་བསྐྱེད་སྐབས།] སྟོང་པའི་ངང་ལས་ཧཱུྃ་ལས་རྒྱས་པའི་ཐབ་ཁུང་སེར་པོ་དབྱིབས་གྲུ་བཞི་མུ་རན་ཁ་ཁྱེར་དང་བཅས་པའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་རིན་པོ་ཆེ་སེར་པོ་དང་ཁ་ཁྱེར་དང་ཟུར་བཞིར་རིན་པོ་ཆེས་མཚན་པ་དྭངས་ཤིང་སྒྲིབ་

པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་རྒྱས་པའི་མེ་སེར་གསལ་དུ་འབར་བའི་དབུས་སུ་པྃ་ལས་པདྨའི་སྡོང་པོ་དང་མ་ལས་ཉི་མའི་དཀྱིལ་འཁོར་གྱི་སྟེང་དུ། རཾ་ལས་རྒྱས་པའི་མེ་ལྷ་སྐུ་མདོག་སེར་པོ་གནོད་སྦྱིན་སྒེག་པའི་ཉམས་ཅན། ཕྱག་གཡས་ན་རྒྱས་མཛད་མེའི་འཁོར་ལོ་སེར་གསལ་དང་། གཡོན་ན་རྒྱས་པའི་གསེར་ཕུར་སེར་པོ་འདྲིལ་བ། དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། ཚངས་སྐུད་སུམ་བསྒྲིལ་སེ་རལ་ཁར་ཐོགས་པ། ཤ་རྒྱས་ལ་གསུས་ཁྱིམ་ཆེ་བ། ཨག་ཚོམ་རིང་ཞིང་ལོ་བརྒྱད་པའི་ན་ཚོད་ཅན། ར་སྐྱེས་སེར་པོའི་གདན་ལ་ཕྱེད་སྐྱིལ་གྱིས་བཞུགས་པ། རིགས་ཀྱི་བདག་པོ་རིན་ཆེན་འབྱུང་ལྡན་གྱིས་དབུ་ལ་བརྒྱན་ཅིང་[སོགས་སྔར་ལྟར་དང་། མ་མ་ཤནྟིཾ་ཀུ་རུའི་མལ་དུ།] མ་མ་པུཥྚིཾ་ཀུ་རུ་ཨོཾ། [ཞེས་དང་། ཞི་བའི་མལ་དུ་རྒྱས་པ་ཞེས་བསྒྱུར། དགང་བླུགས་སྐབས་ལག་གཉིས་ཁུ་ཚུར་བྱས་པའི་མཐེབ་མཛུབ་གཉིས་རྩེ་སྤྲད་པ་རིན་པོ་ཆེའི་ཁུ་ཚུར་གྱིས་དགང་བླུགས་བཟུང་། སྤེལ་ཚིག་སྐབས།] ཚེ་དང་བསོད་ནམས་ཡེ་ཤེས་ཡོན་ཏན་ཐམས་ཅད་འཕེལ་ཞིང་རྒྱས་པའི་ཕྲིན་ལས་མཛད་དུ་གསོལ། [ཞེས་དང་།] གཟི་བརྗིད་ཕུན་སུམ་ཚོགས་པ་ཐམས་ཅད་པུཥྚིཾ་ཀུ་རུ་ཨོཾ༔ [ཞེས་པས་འགྲེས་སྦྱར། འདོད་གསོལ་སྐབས།] ན་མོ།

རིག་པའི་རྒྱལ་པོ་ [སོགས་གོང་ལྟར་ལ།] བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཚེ་དང་བསོད་ནམས་དཔལ་དང་འབྱོར་པ་སྙན་གྲགས་དབང་ཐང་གཟི་བརྗིད་ལང་ཚོ་ཟས་ནོར་ལོངས་སྤྱོད་བུ་སློབ་འཁོར་འབངས་མངའ་རིས་ཆུས་སྲིད་ལ་སོགས་པ་དར་ཞིང་རྒྱས་པར་མཛད་དུ་གསོལ། མཁྱེན་པ་དང་བརྩེ་བ་མཐུ་སྟོབས་ནུས་རྩལ་ཉམས་དང་རྟོགས་པ་ས་ལམ་གྱི་ཡོན་ཏན་དཀར་པའི་བསམ་སྦྱོར་ཐམས་ཅད་གོང་ནས་གོང་དུ་འཕེལ་བར་མཛད་དུ་གསོལ། མདོར་ན་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཀྱི་ཡོན་ཏན་ཇི་སྙེད་པ་ཐམས་ཅད་དབྱར་གྱི་ཆུ་གཏེར་དང་ཡར་ངོའི་ཟླ་བ་བཞིན་དུ་འཕེལ་ཞིང་རྒྱས་པའི་མཛད་དུ་གསོལ། པུཥྚིཾ་ཀུ་རུ་ཨོཾ༔ [ཞེས་སྦྱར། འདས་པའི་དགང་བླུགས་སྐབས།] དཀྱིལ་འཁོར་གྱི་ལྷ་རྣམས་ཞལ་འཛུམ་པ་དང་བཅས་པས་ཅུང་ཟད་གདངས་པའི་ལྗགས་རིན་པོ་ཆེ་སེར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་བྷཱུཾ་ཡིག་འོད་ཟེར་གྱི་ཕུང་པོར་འབར་བས་མཚན་པ་ [ཞེས་འདོན་པ་སྤོ། རྫས་རྣམས་རྫོགས་ནས་ལས་འཆོལ་བའི་ཚེ།] ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་གསེར་གྱི་བུམ་པ་བདུད་རྩི་དང་རིན་པོ་ཆེས་གང་བ་འཛིན་པས་ཟླ་བ་སེར་པོ་ལ་གནས་པའི་བསྒྲུབ་བྱའི་སྟེང་ཕྱོགས་ནས་བདུད་

རྩི་དང་རིན་པོ་ཆེའི་ཆར་ཕབ་པའི་ལུས་དང་ཁྱིམ་གང་སྟེ་ཚེ་དང་བསོད་ནམས་ཡེ་ཤེས་ཡོན་ཏན་ཐམས་ཅད་འཕེལ་ཞིང་རྒྱས་པར་ [བསམ། བྲོ་བརྡུང་བའི་སྐབས་རྒྱས་པའི་ཕུར་བུ་འདྲིལ། གོང་མོ་སྦྲེལ་བའི་བྲོར་གྲུ་བཞིའམ་དེར་མོས་ལ།] ཧའུྃ༔ གསེར་རམ་སེར་པོའི་ཤིང་རྣམས་ལ༔ མགོ་བོ་རྒྱ་མདུད་རྩེ་ཟུར་བཞི༔ ངོས་ལ་རྒྱས་པའི་ལྷ་བཀོད་དེ༔ བཏབ་པའི་ཚེ་དབང་བསོད་ནམས་རྒྱས༔ མཱ་ཡི་ཚོགས་ཀྱི་དཀྱིལ་འཁོར་དུ༔ སྭཱ་ལས་རིན་ཆེ་འཁོར་དང་བཅས༔ ང་རྒྱལ་དྲེགས་པའི་སེམས་ཅན་རྣམས༔ རྒྱས་པར་གྱུར་ལ་དབྱིངས་སུ་རོལ༔ [ཧཱུྃ་བཞི་པའི་སྔགས་དང་།] རྒྱས་མཛད་ལྷ་ལ་ཕྱག་འཛལ་ལོ༔ ཚེ་དང་བསོད་ནམས་རྒྱས་གྱུར་ཅིག༔ བཀྲག་དང་གཟི་བརྗིད་རྒྱས་གྱུར་ཅིག༔ གདུལ་བྱ་ཕྲིན་ལས་རྒྱས་གྱུར་ཅིག༔ སྭཱ་རཏྣ་ཀཱི་ལི་ཀཱི་ལ་ཡ་པུཥྚིཾ་ཀུ་རུ་ཡེ་སྭཱཧཱ༔ [ཞེས་བརྡུང་། རྗེས་མེ་རང་ཞིར་བཏང་སྟེ་ཐལ་སོལ་བང་མཛོད་དུ་སྦ། གལ་ཏེ་རབ་གནས་དང་འབྲེལ་བར་འོ་ཐུག་སྒྲུབ་ན་དེའི་ལག་ལེན་ནི་སྤྱི་ལྟར་ཤེས་པར་བྱའོ།། །།༈ གསུམ་པ་དབང་གིས་གི་སྦྱིན་སྲེག་ནི། དུས་འབྲིང་པོ་བཞིའི་དམར་ཕྱོགས་ཀྱི་ཚེས་བཅུ་ལ་སགས་པའི་དགོང་མོའི་ཆར། སྨད་འཚོང་མས་ཉལ་པོ་བྱས་པའི་མལ་འོག་གམ་མགྲོན་ཁང་གི་ས་ལས་བསྐྲུན་པའི་ཐབ་སྟེགས་མྱོས་བྱེད་དང་བདུད་རྩིས་བྱུགས་ཤིང་སིནྡྷུ་ར་བརྡལ་བར་དབུས་སུ་ཟླ་གམ་རྒྱར་མཐོ་དོ་སྲིད་དུ་ཁྲུ་གང་པ་ལ་པདྨ་འདབ་བརྒྱད་ལྕགས་ཀྱུས་མཚན་པ། དེ་རྒྱབ་སོར་བརྒྱད་པའི་མཆུ་དང་ཁ་ཁྱེར་ལ་མེ་རི་དམར་པོ་གཡོན་

བསྐོར་དུ་འབར་བ་དང་མེ་ཏོག་དམར་པོ་ལྕགས་ཀྱུ་སྤེལ་མའི་ཕྲེང་བས་བསྐོར་ཞིང་ཟུར་གཉིས་ལའང་ལྕགས་ཀྱུ་རེ་བཅས་བྲི། དེར་ཡམ་ཤིང་གི་རྒྱུ་དང་མཚུངས་པའི་ཤིང་སྲིན་ལག་གི་སྦོམ་ཕྲ་ཅན་མྱོས་བྱེད་ཀྱིས་བྲན་པས་ཟླ་གམ་དུ་བརྩིག །གཏོར་མའི་རྒྱུ་ཟངས་ཕྱེ་པད་རག་བུ་རམ་འབྲས་དམར་རམ་བུའི་ཕྱེ་རྣམས་མར་ལ་བསྲེས་པས་དབྱིངས་ཟླ་གམ་པད་འདབ་ལྔ་པ། ཡམ་ཤིང་ཙན་དན་དམར་པོ་སོགས་དམར་ལ་རོ་སྐྱུར་བའི་ཤིང་གི་སྡོང་པོའི་ཆ་ལས་བྱུང་བ་སོར་ལྔའམ་གསུམ་པ་བུ་རམ་མར་ཁུས་རྩེ་མོ་དང་མཚལ་དང་སིནྡུྷུ་རས་རྩ་བ་བྱུགས་པ། མར་ཁུའང་འཛོམ་ན་ཏིལ་མར་གྱི་ཁུ་བ་དང་། བསྲེག་རྫས་ཞི་བ་དང་མཚུངས་པ་ལས་རྒུན་འབྲུམ་སོགས་ཤིང་ཏོག་འབྲུ་སྨན་རིན་པོ་ཆེ་དར་གོས་དམར་པོའི་རིགས། ཁྱད་པར་གྱི་ཕྲིན་ལས་བསྒྲུབ་ན་དེའི་རྫས་ཚུལ་བཞིན་དུ་སྦྱར་བའི་རིལ་བུ་བདུད་རྩི་ལྔས་སྦགས་པ། སྣོད་དང་རྫས་ཐམས་ཅད་དབྱིབས་ཟླ་གམ་ཁ་དོག་དམར་པོ་འབའ་ཞིག་པ་བྱ། སློབ་དཔོན་རྒྱན་ཆས་དམར་པོ་བགོས་ཏེ་ཆགས་པའི་བསམ་པས་སྟན་དམར་པོ་ལ་པདྨའི་སྐྱིལ་ཀྲུང་གིས་ཁ་ནུབ་ཏུ་ཕྱོགས་པས་འཁོད་ནས་ལས་རིམ་ལ་འཇུག །མེ་རོལ་མོ་མཁན་ནམ་སྨད་འཚོང་མའི་ལག་ནས་བྱུང་བས་སྦར། ཕྲིན་ལས་ཞི་བའི་སྐབས་དང་འདྲ་བ་ལས། ཐབས་བསྐྱེད་སྐབས།] སྟོང་པའི་ངང་ལས་ཧཱུྃ་ལས་དབང་གི་ཐབ་ཁུང་དམར་པོ་ཟླ་གམ་གྱི་དབྱིབས་ཅན་མུ་རན་ཁ་ཁྱེར་དང་བཅས་པའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ལྕགས་ཀྱུ་དང་ཁ་ཁྱེར་དང་ཟུར་རྣམས་སུ་མེ་ཏོག་དམར་པོ་དང་ལྕགས་ཀྱུས་མཚན་པ། དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་

མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་དབང་གི་མེ་དམར་གསལ་དུ་འབར་བའི་དབུས་སུ་པྃ་ལས་པདྨའི་སྡོང་པོ་དང་མ་ལས་ཉི་མའི་དཀྱིལ་འཁོར་གྱི་སྟེང་དུ། རྃ་ལས་དབང་གིས་མེ་ལྷ་སྐུ་མདོག་དམར་པོ་ཞི་འཛུམ་ཆགས་པའི་ཉམས་ཅན། ཕྱག་གཡས་ན་དབང་མཛད་མེའི་འཁོར་ལོ་དམར་གསལ་དང། གཡོན་དབང་གི་ཟངས་ཕུར་དམར་པོ་འདྲིལ་བ། དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་རྒྱན་སྣ་ཚོགས་ཀྱིས་སྦྲས་པ། ཚངས་སྐུད་སུམ་བསྒྲིལ་སེ་རལ་ཁར་ཐོགས་པ། ཤ་རྒྱས་ལ་གསུས་ཁྱིམ་ཆེ་བ། ཨག་ཚོམ་རིང་ཞིང་ལོ་བརྒྱད་པའི་ན་ཚོད་ཅན། ར་སྐྱེས་དམར་པོའི་གདན་ལ་ཕྱེད་སྐྱིལ་གྱིས་བཞུགས་པ། རིགས་ཀྱི་བདག་པོ་སྣང་བ་མཐའ་ཡས་ཀྱི་དབུ་བརྒྱན་ཅིང་[སོགས་སྔར་ལྟར་དང་།] མ་མ་ཝཱ་ཤཾ་ཀ་རུ་ཧོཿ [ཞེས་དང་། ཞི་བའི་མལ་དུ་དབང་གི་ཞེས་བསྒྱུར། དགང་བླུགས་སྐབས་ལག་གཉིས་ཁུ་ཚུར་སྲིན་མཛུབ་རྩེ་སྤྲད་པ་པདྨའི་ཕྱག་རྒྱས་དགང་བླུགས་བཟུང་། སྤེལ་ཚིག་སྐབས།] ཁམས་གསུམ་སྲིད་གསུམ་རླུང་སེམས་སྣང་བ་ཐམས་ཅད་དབང་དུ་འདུ་བའི་ཕྲིན་ལས་མཛད་དུ་གསོལ། །[ཞེས་དང་།] གཟི་བརྗིད་ཕུན་སུམ་ཚོགས་པ་ཐམས་ཅད་ཝཱ་ཤཾ་ཀུ་རུ་ཧོཿ [ཞེས་པས་འགྲེས་སྦྱར། འདོད་གསོལ་སྐབས།] ན་མོ་རིག་པའི་རྒྱལ་པོ་[སོགས་གོང་ལྟར་ལ།] བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱིས་འཇིག་རྟེན་ཁམས་

ཀྱི་ལྷ་འདྲེ་མི་གསུམ་རྒྱལ་བློན་བཙུན་མོ་འགྲོ་བ་ཕོ་མོ་ཟས་ནོར་ལོངས་སྤྱོད་ཁྱད་པར་དུ་བདུད་རིས་ནག་པོའི་ཕྱོགས་སུ་གྱུར་པའི་དྲེག་ལྡན་མི་དང་མི་མ་ཡིན་མཐུ་བ་ཆེ་མཐའ་དག་རང་དབང་མེད་པར་མོས་པ་རྣམ་བཞིས་དབང་དུ་འདུ་བར་མཛད་དུ་གསོལ། རྩ་བརྒྱད་བླ་མའི་བྱིན་རླབས་ཡི་དམ་ལྷའི་དངོས་གྲུབ་མཁའ་འགྲོ་སྲུང་མའི་མཐུ་རྩལ་ལས་དང་དངོས་གྲུབ་རླུང་སེམས་སྣང་བ་ཐམས་ཅད་རང་དབང་དུ་གྱུར་པར་མཛད་དུ་གསོལ། མདོར་ན་འཁོར་འདས་ལམ་གསུམ་མཆོག་ཐུན་མོང་གི་དངོས་གྲུབ་ཡིད་ལ་འདོད་པ་གང་མཆིས་པ་ཐམས་ཅད་ཐོགས་པ་མེད་པར་དབང་དུ་འདུ་བར་མཛད་དུ་གསོལ། ཝཱ་ཤཾ་ཀུ་རུ་ཧོཿ [ཞེས་སྦྱར། འདས་པའི་དགང་བླུགས་སྐབས།] དཀྱིལ་འཁོར་གྱི་ལྷ་རྣམས་ཞལ་འཛུམ་ཞིང་ཆགས་པ་དང་བཅས་ཅུང་ཟད་གདངས་པའི་ལྗགས་པདྨ་དམར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་ཧྲཱིཿཡིག་འོད་ཟེར་གྱི་ཕུང་པོར་འབར་བས་མཚན་པ་[ཞེས་འདོན་པ་སྤོ། ཁྱད་པར་གྱི་རྫས་འབུལ་ན་དེའི་སྔགས་དང་དམིགས་གནད་ནི་མན་ངག་ལས་ཤེས་པར་བྱ་ཞིང་། རྫས་རྣམས་རྫོགས་ནས་ལས་འཆོལ་བའི་ཚེ།] ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་པདྨ་རཱ་གའི་བུམ་པ་བདུད་རྩི་དམར་པོས་གང་བ་འཛིན་པས་ཟླ་བ་དམར་པོ་ལ་གནས་པའི་བསྒྲུབ་བྱའི་སྟེང་ཕྱོགས་ནས་དབང་བསྐུར་བས་འཇིག་རྟེན་དང་

འཇིག་རྟེན་ལས་འདས་ཐམས་ཅད་མོས་པ་རྣམ་བཞིས་དབང་དུ་སྡུད་པའི་ནུས་མཐུ་ལ་མངའ་བརྙེས་པར་[བསམ། བྲོ་བརྡུང་བའི་སྐབས་དབང་གི་ཕུར་བུ་འདྲིལ། སྲིན་ལག་སྦྲེལ་བའི་བྲོ་ར་ཟླ་གམ་མམ་དེར་མོས་ལ།] ཧཱུྃ༔ ཟངས་སམ་དམར་པོའི་ཤིང་རྣམས་ལ༔ མགོ་བོ་རྒྱ་མདུད་རྩེ་ཟླ་གམ༔ ངོས་ལ་དབང་གི་ལྷ་བཀོད་དེ༔ བཏབ་པས་སྣང་སྲིད་དབང་དུ་སྡུད༔ ཡཱ་ཡི་ཚོགས་ཀྱི་དཀྱིལ་འཁོར་དུ༔ ཨཱཿལས་པདྨ་འཁོར་ང་བཅས༔ ཆགས་པར་གྱུར་པའི་སེམས་ཅན་རྣམས༔ དབང་དུ་མ་གྱུར་གང་ཡང་མེད༔ [ཧཱུྃ་བཞི་པའི་སྔགས་དང་།] དབང་མཛད་ལྷ་ལ་ཕྱག་འཚལ་ལོ༔ ལྷ་འདྲེ་མི་གསུམ་དབང་སྡུས་ཤིག༔ ཁམས་གསུམ་སྲིད་གསུམ་དབང་སྡུས་ཤིག༔ མོས་པ་རྣམ་བཞིས་དབང་སྡུས་ཤིག༔ ཨཱཿཔདྨ་ཀཱི་ལི་ཀཱི་ལ་ཡ་ཝཱ་ཤཾ་ཀུ་རུ་ཡེ་སྭཱཧཱ༔ [ཞེས་བརྡུང་། རྗེས་མེ་རང་ཞིར་བཏང་བའང་ཆང་གིས་གཞིལ་ནས་ཐལ་སོལ་རི་རྩེ་ནས་རླུང་ལ་བསྐུར་བའམ་ཆུ་བོ་ཆེན་པོར་བསྐྱལ་ལོ། །][གཉིས་པ་ཚར་གཅོད་པ་དྲག་པོའི་སྦྱིན་སྲེག་ནི། སྲེག་པ་ཧོམ་གྱི་ལས་དང་འབྲེལ་བར་དགྲ་བགེགས་མཐར་བྱེད་ཀྱི་ཆོ་ག་སྒྲུབ་པ་སྟེ། ལག་ལེན་འཇུག་པ་བདེ་བའི་ཕྱིར་དེའི་ཆོ་གའི་ཁྲིགས་རིམ་ནི་ལོགས་སུ་བསྙད་པར་སྤྲོའོ།། །།][༈ གསུམ་པ་ཀུན་འདུས་མཆོག་གི་སྦྱིན་སྲེག་ནི། དུས་ཟླ་བ་གང་ཡང་རུང་བའི་ཉ་སྟོང་བརྒྱད་ལ་སོགས་པའི་ཉིན་མཚན་ཇི་ལྟར་རིགས་པར། ཆོ་གའི་སྦྱོར་དངོས་རྗེས་གསུམ་གྱི་བྱ་བ་མཐའ་དག་རྒྱས་པའི་སྦྱིན་སྲེག་ཇི་ལྟ་བ་བཞིན་ལས། ཁྱད་པར་གྱི་བསྲེག་རྫས་རྩ་བརྒྱད་ཡན་ལག་སྟོང་སྦྱར་ཨ་མྲྀ་

ཏ་དང་ཛ་གད་སྦྱར་བའི་རིལ་བུ་གྲངས་མང་བསག །ཐབ་བསྐྱེད་སྐབས།] སྟོང་པའི་ངང་ལས་ཧཱུྃ་ལས་མཆོག་གི་ཐབ་ཁུང་སྣ་ཚོགས་མདོག་ཅན་དབྱིབས་གྲུ་བཞི་མུ་རན་ཁ་ཁྱེར་དང་བཅས་པའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་ནོར་བུ་རིན་པོ་ཆེ་དང་ཁ་ཁྱེར་དང་ཟུར་བཞིར་རིན་པོ་ཆེས་མཚན་པ། དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་མཆོག་གི་མེ་ཁ་དོག་ལྔ་ལྡན་དུ་འབར་བའི་དབུས་སུ་པྃ་ལས་པདྨའི་སྡོང་པོ་དང་མ་ལས་ཉི་མའི་དཀྱིལ་འཁོར་གྱི་སྟེང་དུ། རཾ་ལས་མཆོག་གི་མེ་ལྷ་སྣ་ཚོགས་མདོག་འཆང་གནོད་སྦྱིན་སྒེག་པའི་ཉམས་ཅན། ཕྱག་གཡས་ན་སྲེག་མཛད་མའི་འཁོར་ལོ་མཐིང་གསལ་དང་། གཡོན་ན་གནམ་ལྕགས་ཀྱི་ཕུར་བུ་འདྲིལ་བ། དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། ཚངས་སྐུ་སུམ་བསྒྲིལ་སེ་རལ་ཁར་ཐོགས་པ། ཤ་རྒྱས་ལ་གསུས་ཁྱིམ་ཆེ་བ། ཨག་ཚོམ་རིང་ཞིང་ལོ་བརྒྱད་པའི་ན་ཚོད་ཅན། ར་སྐྱེས་མཐིང་གའི་གདན་ལ་ཕྱེད་སྐྱིལ་གྱིས་བཞུགས་པ། རིགས་ཀྱི་བདག་པོ་རྡོ་རྗེ་སེམས་དཔས་དབུ་བརྒྱན་ཅིང་[སོགས་སྔར་ལྟར་དང་། རྒྱས་པའི་མལ་དུ་མཆོག་གི་ཞེས་བསྒྱུར། སྤེལ་ཚིག་སྐབས།] ཚེ་བསོད་དཔལ་འབྱོར་ཡེ་ཤེས་ཡོན་ཏན་ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་

པའི་ཕྲིན་ལས་མཛད་དུ་གསོལ། །ཞེས་དང་། གཟི་བརྗིད་ཕུན་སུམ་ཚོགས་པ་དང་བདེ་ཆེན་ཕྱག་རྒྱ་ཆེན་པོ་མཆོག་གི་དངོས་གྲུབ་པུཥྚིཾ་ཀུ་རུ་ཨོཾ༔ [ཞེས་པས་འགྲེས་སྦྱར། འདོད་གསོལ་རྒྱས་པ་ལྟར་ལས།] དཀར་པོའི་བསམ་སྦྱོར་ཐམས་ཅད་གོང་ནས་གོང་དུ་འཕེལ་བར་མཛད་དུ་གསོལ། ཁྱད་པར་བདེ་སྟོང་ཟུང་འཇུག་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོགས་པ་མེད་པར་མྱུར་དུ་འགྲུབ་པར་མཛད་དུ་གསོལ། མ་ཧཱ་སུ་ཁ་ས་མ་ཡ་སིདྡྷི་ཧོ༔ [ཞེས་སྦྱར། འདས་པའི་སྐབས་ཁྱད་པར་གྱི་རྫས་སྙིང་པོ་འབྲུ་བཅུ་བདུན་པ་ཁོ་ནས་འབུལ་ཞིང་འདོད་དོན་དགང་བླུགས་སྐབས་བཞིན་གསོལ། མཐར་ལས་འཆོལ་བའི་ཚེ།] ལྷ་རྣམས་ཀྱི་ཐུགས་ཀ་ནས་མཆོག་གི་འོད་ཟེར་མཐིང་ལ་དམར་བའི་མདངས་ཅན་ཟག་མེད་བདེ་བ་ཆེན་པོའི་རང་བཞིན་མཁའ་ཁྱབ་ཏུ་སྤྲོས་པས་སྐུ་གསུང་ཐུགས་ཡེ་ཤེས་རྡོ་རྗེ་ཕྱག་རྒྱ་ཆེན་པོ་ཆེ་བའི་མཆོག་གི་དངོས་གྲུབ་སྟན་ཐོག་འདི་ཉིད་དུ་ཐོབ་པའི་ཕྲིན་ལས་གྲུབ་པར་[བསམ། རྗེས་ཀྱི་རིམ་པ་རྣམས་རྒྱས་པ་བཞིན་མཐར་དབྱུང་བས་ལེགས་པར་གྲུབ་བོ། །དེ་དག་ནི་རྫས་ལ་བརྟེན་པ་ཕྱིའི་སྦྱིན་སྲེག་གོ། །གཞན་དུ་རྣལ་འབྱོར་པས་ཟས་བཟའ་བའི་ཚེ་ཁ་ཟས་འབྲུ་གསུམ་གྱིས་བདུད་རྩིར་བརླབས་པ་ལག་པའི་དགང་བླུགས་ཀྱིས་ཁའི་ཐབ་ཁུང་དུ་ཕུལ་བ་གཏུམ་མོ་སྦར་བའི་མེས་སྦྱངས་པའི་དྭངས་མས་ལུས་དཀྱིལ་ཁྲོ་བཅུ་ལ་སོགས་པའི་ལྷ་རྣམས་མཉེས་ཤིང་ཚིམ་པར་བྱེད་པ་ནང་གི་སྦྱིན་སྲེག །ཡུམ་གྱི་མཁའི་ཐབ་ཁུང་དུ་རྗེས་ཆགས་ཀྱི་མེས་ཧཾ་ཡིག་བདེ་བ་ཆེན་པོར་ཞུ་བའི་བསྲེག་རྫས་རོ་རྐྱང་གི་དགང་བླུགས་ཀྱིས་

ཕུལ་བས་ཕུང་ཁམསཀྱི་ལྷ་རྣམས་ལྷན་སྐྱེས་བདེ་བའི་རང་བཞིན་དུ་ཚིམས་པར་བྱེད་པ་གསང་བའི་སྦྱིན་སྲེག །སྐྱེ་མེད་རང་བྱུང་ཆོས་ཀྱི་དབྱིངས་ཀྱི་ཐབ་ཁུང་དུ་བདེ་ཆེན་བྱང་ཆུབ་སེམས་ཀྱི་མེ་ལ་ཐབས་ཤེས་ཟུང་དུ་འཇུག་པའི་དགང་བླུགས་ཀྱིས་གཉིས་སྣང་མཚན་མའི་བསྲེག་རྫས་ཐམས་ཅད་ཕུལ་བས་ཆོས་རྣམས་བདེ་ཆེན་མི་ཤིགས་རྡོ་རྗེ་གསུམ་གྱི་བདག་ཉིད་ཆེན་པོར་ལྷུན་གྱིས་གྲུབ་པའི་དབྱིངས་སུ་ལ་བཟླ་བ་ཡང་གསང་དེ་ཁོ་ན་ཉིད་ཀྱི་སྦྱིན་སྲེག་སྟེ། ཚུལ་དེ་ལྟ་བུའི་རིམ་པ་བཞིན་ཉམས་སུ་བསྟར་བས་ཐུན་མོང་དང་ཐུན་མོང་མ་ཡིན་པའི་དངོས་གྲུབ་ཐམས་ཅད་དཀའ་བ་མེད་པར་བདེ་བླག་ཏུ་འགྲུབ་པར་གདོན་མི་ཟ་བ་ཡིན་ནོ། །] རབ་འབྱམས་སྔགས་ཀྱི་ཕྲིན་ལས་མ་ལུས་པ། །འབར་བའི་མེ་ཡི་ལས་ལ་བརྟེན་ནས་ཀྱང་། །ཐོགས་མེད་ལྷུན་གྱིས་གྲུབ་པའི་དགའ་སྟོན་གང་། །སྐལ་བཟང་འདོད་པ་འཇོ་བའི་དཔྱིད་དུ་སྤྲོས། །བདེ་ཆེན་དགྱེས་པའི་ཞལ་གྱི་ཐབ་ཁུང་ཆེ། །མཆོད་སྦྱིན་སྲེག་བླུགས་བདུད་རྩིས་མཉེས་བགྱིས་ལས། །རྣམ་མང་ལས་དང་དངོས་གྲུབ་རྒྱ་མཚོའི་དཔལ། །དབང་འབྱོར་སྐྱེ་རྒུའི་གདུང་སེལ་ཉིད་གྱུར་ཅིག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྦྱིན་སྲེག་གི་ཆོ་ག་ཕྲིན་ལས་ལྷུན་གྱིས་གྲུབ་པའི་དགའ་སྟོན་ཅེས་བྱ་བ་འདི་ནི། རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེད་ནས་རྩ་བའི་གཞུང་དོན་མན་ངག་གིས་ཕྱེས་ཤིང་ལག་ལེན་འཇུག་པ་བདེ་བའི་དབང་དུ་བྱས་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་པའི་ཐོག་ཏུ་སོན་པ་དཔལ་གདོང་གི་ལོ་དབོ་ཉ་བའི་ཡར་ངོའི་བཟང་པོ་གསུམ་པར་མཁན་ལྗོངས་ཕུན་ཚོགས་དགའ་ཚལ་གྱི་བསྟི་གནས་སུ་གྲུབ་པར་བ་གྱིས་པ་སྟེ། འདིས་ཀྱང་ལས་དང་དངོས་གྲུབ་ཐམས་ཅད་ཐོགས་མེད་ཡིད་བཞིན་དུ་འགྲུབ་པའི་རྒྱུར་གྱུར་ཅིག། །། སརྦ་དཱ་མངྒ་ལཾ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྲེག་པ་ཧོམ་གྱི་ལས་རིམ་གདུག་ཅན་མཐར་བྱེད་བསྐལ་པའི་མེ་ཆེན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྲེག་པ་ཧོམ་གྱི་ལས་རིམ་གདུག་ཅན་མཐར་བྱེད་བསྐལ་པའི་མེ་ཆེན་ཞེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྲེག་པ་ཧོམ་གྱི་ལས་རིམ་གདུག་ཅན་མཐར་བྱེད་བསྐལ་པའི་མེ་ཆེན་ཞེས་བྱ་བ། བླ་མ་ཁྲག་འཐུང་ཁྲོ་བོའི་རྒྱལ་པོ་ཕྱག་འཚལ་ལོ། །ཤིན་ཏུ་ཞི་བ་སྙིང་རྗེའི་ཡེ་ཤེས་ཞེ་སྡང་རྡོ་རྗེར་ཁྲོས་པའི་གར། །མི་བཟད་ཕྲིན་ལས་གཏུམ་ཆེན་དུས་མཐའི་མེ་ལྕེ་འབུམ་དུ་རབ་འབར་བས། །མ་རུང་བདུད་དགྲའི་རྩྭ་སྦུར་ཕུང་པོ་སྐད་ཅིག་ཉིད་ལ་ཆེས་ཟ་བ། །ཁྲག་འཐུང་ཧེ་རུ་ཀ་དཔལ་དཔའ་བོས་ཕས་རྒོལ་དཔུང་ཚོགས་ཚར་གཅོད་མཛོད། །ཉམས་པ་བདུན་ལྡན་གདུག་ཅན་དགྲ་དང་བགེགས། །སྐད་ཅིག་ཙམ་གྱིས་མིང་མཐར་བྱེད་པའི་སྟོབས། །སྲེག་པ་ཧོམ་གྱི་གཟེར་ཁའི་ལས་རིམ་ནི། །འཁྲུལ་མེད་བསྐལ་པའི་མེ་ཆེན་འདི་ན་སྦར། །[དེའང་མངོན་སྤྱོད་དྲག་པོའི་སྦྱོར་བ་བསད་པའི་མཐའ་སྡུད་དགྲ་བགེགས་ཚར་གཅོད་སྲེག་པ་ཧོམ་གྱི་གཟེར་ཁ་ཟབ་མོ་ལག་ཏུ་ལེན་པ་ལ་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། སྒྲུབ་དཀྱིལ་དང་འབྲེལ་ན་དེའི་ལྷོ་ཕྱོགས་དང་གཞན་དུ་དུར་ཁྲོད་སོགས་དྲག་པོའི་ལས་ལ་བསྔགས་པའི་ས་གཞི་གནག་ལ་རྩུབ་པར། དུས་ཐ་ཆུང་བཞིའི་དམར་ཕྱོགས་ཉེར་དགུ་དང་གནམ་སྟོང་ལ་སོགས་པའི་སྲོད་དང་ནམ་ཕྱེད་ཀྱི་ཆར། གདུག་པའི་ས་སྣ་གསུམ་གྱི་སྟེག་བུ་རྒྱར་མདའ་གང་དཔངས་སུ་ཇི་ལྟར་འཚམས་པའི་ཁར་ཐལ་ཚོན་གྱིས་མ་ཏྲཾ་གཟུགས་ཀྱི་ལྟོ་བར་ཐབ་ཁུང་མཚོན་བྱེད་གྲུ་གསུམ་ཁ་ཁྱེར་གསུམ་རིམ་གྱི་རྣམ་པ། རྒྱར་སོར་མོ་ཉི་ཤུ་པའི་དབུས་སུ་འཁོར་ལོ་མཐིང་ནག་རྩིབས་བཅུ་པའི་ལྟེ་བར་ཆོས་བྱུང་མཐིང་ནག་རཾ་ཡིག་གིས་མཚན་

བསྐལ་པའི་མེ་ཆེན་འདི་ན་སྦར། །དེའང་མངོན་སྤྱོད་དྲག་པོའི་སྦྱོར་བ་བསད་པའི་མཐའ་སྡུད་དགྲ་བགེགས་ཚར་གཅོད་སྲེག་པ་ཧོམ་གྱི་གཟེར་ཁ་ཟབ་མོ་ལག་ཏུ་ལེན་བ་ལགསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། སྒྲུབ་དཀྱིལ་དང་འབྲེལ་ན་དེའི་ལྷོ་ཕྱོགས་དང་གཞན་དུ་དུར་ཁྲོད་སོགས་དྲག་པོའི་ལས་ལ་བསྔགས་པའི་ས་གཞི་གནག་ལ་རྩུབ་པར། དུས་ཐ་ཆུངབཞིའི་དམར་ཕྱོགས་ཉེར་དགུ་དང་གནམ་སྟོང་ལ་སོགས་པའི་སྲོད་དང་ནམ་ཕྱེད་ཀྱི་ཆར། གདུག་པའི་ས་སྣ་གསུམ་གྱི་སྟེགས་བུ་རྒྱར་མངའ་གང་དཔངས་སུ་ཇི་ལྟར་འཚམས་པའི་ཁར་ཐལ་ཚོན་གྱིས་མ་ཏྲཾ་གཟུགས་ཀྱི་ལྟོ་བར་ཐབ་ཁུང་མཚོན་བྱེད་གྲུ་གསུམ་ཁ་ཁྱེར་གསུམ་རིམ་གྱི་རྣམ་པ། རྒྱར་སོར་མོ་ཉི་ཤུ་པའི་དབུས་སུ་འཁོར་ལོ་མཐིང་ནག་རྩིབས་བཅུ་པའི་ལྟེ་བར་ཆོས་འབྱུང་མཐིང་ནག་རཾ་ཡིག་གིས་མཚན་

པ་བྲི། དེར་དུག་ཤིང་ཚེར་མ་ཅན་གྱི་བུད་ཤིང་དུག་ཁྲག་གིས་སྦགས་པས་ཧོམ་གྲུ་གསུམ་འཚམས་པར་བརྩིགས་པའི་ནང་དུ་མེ་ཚང་བཅའ་ཞིང་ཐབ་ཀྱི་ཟུར་གསུམ་དུ་ཟིང་གསུམ་མཆེ་བའི་ཚུལ་དུ་བསླང་། སློབ་དཔོན་གྱི་གཡས་ངོས་སུ་མེ་སྲེག་འཛིན་པའི་རྫས་བུད་ཤིང་གི་རྒྱུ་ལས་ཡམ་ཤིང་ཟུར་གསུམ་བཅུ་གཉིས་པ་མར་ནག་དང་ཚིལ་ཞུན་གྱིས་སྦགས་པ། རྩ་བའི་རྫས་དུག་ཤོག་ལ་དགྲ་བགེགས་ཀྱི་རཱུ་པ་མིང་རུས་བླ་དྭགས་གནས་ཚིག་དང་བཅས་པ་གྲངས་ལྡན། དྲག་པོའི་རྫས་ཤ་སྣ་བག་ཕྱེ་དང་བསྲེག་པའི་རིལ་བུ་མིང་རུས་ཅན། གནད་དབབ་ཀྱི་རྫས་སྦལ་སྦྲུལ་ཉ་ཁྱི་ལ་སོགས་པའི་ཤ་དུག་སྣ་དང་བསྲེས་པའི་རིལ་བུ། གསོད་པའི་རྫས་ལྕགས་ཟངས་རྡོའི་ཕྱེ་མ། མྱོས་པའི་རྫས་མར་ནག་རྨེ་མནོལ་གྱི་ཁྲག་དང་སྦྱར་བ། ཚ་བའི་རྫས་ཏིལ་དང་ཡུངས་དཀར་ཚ་བ་གསུམ་སྟེ། དེ་ལྟར་རྫས་བདུན་པོ་རྣམས་ལྕགས་སམ་བསེ་ཕོན་ཐོད་པ་ལ་སོགས་པའི་སྣོད་ད་གྲལ་རིམ་གྱིས་བཀོད། རྩ་བའི་རྫས་ཤོག་ལིང་ཅིས་ཀྱང་མ་འབྱོར་ན་རཱུ་པ་འབྲུ་ནག་གི་ཟན་ལ་བཟོས་པས་ཀྱང་རུང་། གཡོན་ངོས་སུ་ལྕགས་ཕྱེ་དུག་སྣ་རྡོ་ཕྱེར་ཁྱིའི་ཁྲག་ཤ་ཆེན་སྲན་ཆེན་རྣམས་མར་ནག་ལ་བསྲེས་པའི་གཏོར་མ་གྲུ་གསུམ་མཐེབ་ཀྱུ་གསུམ་ལྡན་དང་། མེ་ལྷའི་གཏོར་མ་ཟུར་གསུམ། གཡས་གཡོན་དུ་སྨན་ཕུད་དང་རཀྟ། མདུན་དུ་ཁྲག་གི་མཆོད་ཡོན་སོགས་དྲག་མཆོད་ཕྲེང་ཚར་ཆ་གཉིས་བཅས་བཤམས། སྣོད་དང་རྫས་ཐམས་ཅད་དབྱིབས་གྲུ་གསུམ་ཁ་དོག་ནག་པོ་འབའ་ཞིག་པ་བྱ། སློབ་དཔོན་དང་ཐབ་ཀྱི་བར་དུ་མེ་ཡོལ་གངས་རི་བཾ་གྱིས་མཚན་པ་བྲིས་པའི་ནང་གི་ཆར། ནང་མཆོད། ལས་བུམ། རྡོ་དྲིལ་བར་དུ་དགང་བླུགས་ཁ་སྦྱར་བ། འབྲུ་ནག་གི་མེ་ཏོག་

བཅས་བཀོད། གཞན་ཡང་གདབ་ཁའི་ཆས། ཚིལ་ཞུན་དང་མར་ནག་བསྲེས་པའི་མར་ཁུ། ཐུན་རྫས། རླུང་གཡབ། གོས་ཟུང་། སོ་རྩི་སོགས་ཉེ་བར་མཁོ་བའི་ཡོ་བྱད་རྣམས་ཚང་བར་འདུ་བྱའོ། །][གཉིས་པ་ནི། སློབ་དཔོན་བདག་གི་རྣལ་འབྱོར་ལ་གནས་པས་རྒྱུ་དུས་ཀྱི་ཀུན་སློང་སྙིང་རྗེ་བྱང་སེམས་ཀྱིས་དྲངས་པའི་ཞིང་བཅུ་སྒྲོལ་བའི་ཞེ་སྡང་གི་དཔའ་ངར་དང་ལྡན་པས་ཞྭ་ཕོད་ནག་པོ་གྱོན། རུས་པའི་རྒྱན་དང་ཐོད་པ་རཀྴའི་ཕྲེང་བས་སེ་རལ་ཁར་འཕྱང་། དུར་ཁྲོད་ཀྱི་རས་ལ་ཞིང་ཆེན་བྲིས་པའི་སྟན་བཀྲམ་པར་ཙོག་བུའམ་མགར་བའི་འདུག་སྟངས་ཀྱི་ཁ་ལྷོར་ཕྱོགས་པས་འཁོད་དེ་ལས་རིམ་ལ་འཇུག །སྒྲུབ་མཆོད་དང་འབྲེལ་ན་རྩ་སྔགས་ལ་ཕཊ་ཛཿབཏགས་པ་བརྗོད་པས།] རང་ཉིད་དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པས་ཐོན་ནས་སྦྱིན་སྲེག་གི་ལས་རིམ་ལ་འཇུག་པར་[མོས་ལ། རྡོ་དྲིལ་དང་དགང་བླུགས་བྱིན་གྱིས་བརླབ་པའམ་དྲག་སྲེག་ཁྱད་པར་བའི་སྐབས་འདིར་དེ་དག་མ་བྱས་ཀྱང་རུང་། མཆོད་རྫས་རྣམས་བསང་ཆ་དང་ཨ་མྲྀ་ཏས་བསང་།] སྭབྷཱ་ཝས་སྦྱང་། སྟོང་པའི་ངང་ལས་གནས་ཁང་འོག་མིན་གསང་ཆེན་རོལ་པའི་གཞལ་མེད་ཕུན་སུམ་ཚོགས་པར་བྷཉྫ་འབར་བའི་སྣོད་ཡངས་ཤིང་རྒྱ་ཆེ་བ་རྣམས་སུ་དགྲ་བགེགས་བསྒྲལ་བ་ལས་བྱུང་བའི་ཁྲག་གི་མཆོད་ཡོན། །དུག་ཆུའི་ཞབས་བསིལ། དབང་པོའི་མེ་ཏོག །ཚིལ་ཆེན་གྱི་དུད་སྤྲིན། ཞུན་ཆེན་གྱི་སྒྲོན་མེ། མཁྲིས་པའི་དྲི་ཆབ། མཱཾ་སའི་ཞལ་ཟས་ཐོད་

རྔའི་རོལ་མོ་སོགས་རང་བྱུང་དུར་ཁྲོད་ཀྱི་དམ་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ཁྲག་འཐུང་ཁྲོ་བོའི་དཀྱིལ་འཁོར་གྱི་འཁོར་ལོའི་ཞིང་ཐམས་ཅད་དུ་ཁྱབ་པར་འཆར་བས་ནམ་མཁའི་མཐའ་ཀླས་པར་གང་བར་བསམ་ལ། ཨོཾ་བཛྲ་ཨརྒྷཾ་ཨཱཿཧཱུྃ། [སོགས་ནས།] ཤཔྡ་པཉྩ་ཀཱ་མ་གུ་ཎ་ཨཱཿཧཱུྃ། [ཞེས་དང་། སྨན་རཀ་གཏོར་མ་རྣམས་ལས་བྱང་བཞིན་བྱིན་གྱིས་བརླབ། བསྲེག་རྫས་རྣམས་བསང་སྦྱང་།] སྟོང་པའི་ངང་ལས་ཨ་ལས་བྱུང་བའི་དམར་གྱི་དུང་ཆེན་སྟོང་གསུམ་དང་མཉམ་པའི་ནང་དུ་ནྲྀ་དང་ཏྲི་ལས་དགྲ་བགེགས་ཀྱི་ཤ་ཁྲག་ཕུང་ཁམས་སྐྱེ་མཆེད་ལས་བྱུང་བའི་བསྲེག་རྫས་རྣམས་ངོ་བོ་ཟག་མེད་ཡེ་ཤེས་བདུད་རྩི་ལ་རྣམ་པ་སོ་སོའི་མཚན་ཉིད་ཡོངས་སུ་རྫོགས་པས་ནམ་མཁའི་ཁམས་གང་བར་[བསམ་ཞིང་། རྩ་སྔགས་དང་།] ནྲྀ་ཏྲི་ཨ་མུ་ཀཱ་མཱ་ཡ་ཛ་ཛ༔ [ཞེས་ལན་གསུམ་གྱིས་བརླབ་བོ། དེ་ནས་གདོལ་བ་ཤན་རྨེ་ཡུག་ལ་སོགས་པའི་ལག་ནས་བྱུང་བའི་མེ་ཐོགས་ལ།] ཨོཾ་ཨགྣ་ཡེ་ཧ་བྱ་ཀ་ཛ༔ དགྲ་བགེགས་དམ་སྲི་འབྱུང་པོ་མཱ་ར་ཡ་ཛྭ་ལ་རཾ། [ཞེས་རླུང་གཡབ་དང་བཅས་ཏེ་སྤར།] ཨོཾ་ཨགྣ་ཡེ་དགྲ་བགེགས་དམ་སྲི་འབྱུང་པོ་ཛྭ་ལ་རཾ། [ཞེས་བླུགས་གཟར་གྱིས་མར་ནག་ཁ་བས་མེ་གསོ། མེ་ཐབས་བསང་སྦྱང་།] སྟོང་པའི་ངང་ལས་ཧཱུཾ་ཡིག་ལས་བྱུང་བའི་དྲག་པོའི་ཐབ་ཁུང་མཐིང་ནག་གྲུ་གསུམ་བང་རིམ་གསུམ་ལྡན་ཆོས་ཀྱི་དབྱིངས་དང་མཉམ་པའི་ནང་དུ་དྲག་པོའི་མེ་དམར་

ནག་ཏུ་འབར་བའི་དབུས་སུ་ར་སྐྱེས་ཁམ་ནག་ཞིང་གི་ཐོད་པའི་སྒ་དང་ལྤགས་པས་གཡོགས་ཤིང་སྦྲུལ་ནག་གི་གོང་སྨེད་བྱས་པའི་སྟེང་དུ། རཾ་ལས་ཟ་བྱེད་དྲག་པོའི་མེ་ལྷ་མཐིང་ནག་ཁྲོ་གཏུམ་འཇིགས་སུ་རུང་བ། ཞལ་གཅིག་ཕྱག་བཞིའི་དང་པོས་ཧོམ་གཟར་དང་མེ་དཔུང་། འོག་མ་གཉིས་ཀྱིས་བགྲང་ཕྲེང་དང་དྲག་པོའི་ལྕགས་ཕུར་དྲིལ་བ། དབུ་སྐྲ་ཁམ་ནག་གྱེན་དུ་བརྫེས་ཤིང་དུར་ཁྲོད་ཀྱི་ཆས་ཀྱིས་བརྒྱན་པ། སྒེག་ཅིང་དཔའ་བའི་ཉམས་ཅན་ཕྱེད་སྐྱིལ་གྱིས་བཞུགས་པ། རིགས་ཀྱི་བདག་པོ་དོན་ཡོད་གྲུབ་པས་དབུ་བརྒྱན་ཅིང་དྲང་སྲོང་གི་ཚོགས་ཀྱིས་ཡོངས་སུ་བསྐོར་བར་གྱུར། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པར་ཤར་ལྷོ་ནས་ཡེ་ཤེས་ཀྱི་མེ་ལྷ་འཁོར་དང་བཅས་པ་བཛྲ་ས་མཱ་ཛཿ [ས་སྤྱན་དྲངས་པར་བསམ་ཞིང་། ལག་གཡས་སྐྱབས་སྦྱིན་རྒྱས་མཐེ་བོང་རྣ་བའི་དྲུང་དུ་གཡབ་ལ།] ཧཱུྃ༔ དད་པ་དང་ནི་དམ་ཚིག་གིས༔ ཚུར་གཤེགས་ཚུར་གཤེགས་ལྷ་ཆེན་པོ༔ ཨགྣེ་རཱ་ཛ་འཁོར་དང་བཅས༔ སྲེག་བླུགས་ཞལ་ཟས་བཞེས་སླད་དུ༔ འབར་བའི་གནས་འདིར་གཤེགས་སུ་གསོལ༔ དགྱེས་པའི་གདན་ལ་བཞུགས་སོ་འཚལ༔ ཨོཾ་པཱ་བ་ཀ་ཨགྣ་ཡེ་ཨ་གཙྪ་ཡཿ མ་མ་མཱ་ར་ཡ་ཕཊ༔ [ཅེས་སྤྱན་དྲངས་ཏེ།] ཛཿཧཱུྃ་བཾ་ཧོཿ ས་མ་ཡ་ཏིཥྛ་ལྷན༔

[ཞེས་དམ་ཡེ་དབྱེར་མེད་དུ་བསྟིམ།] ཧཱུཾ། ཚངས་པ་འཇིག་རྟེན་མགོན་གྱི་སྲས། བདུད་དང་དགྲ་བགེགས་བརླག་མཛད་ཅིང། །ཇི་ལྟར་འདོད་པའི་དོན་སྒྲུབ་པ། །གཟི་བརྗིད་རྒྱལ་པོར་ཕྱག་འཚལ་ལོ། །ཨ་ཏི་པུ་ཧོཿ པྲ་ཏཱིཙྪ་ཧོཿ [ཞེས་ཕྱག་བྱ]། ཧཱུྃ༔ སྟོང་གསུམ་ཞིང་ཀུན་ཡོངས་གང་བའི༔ རྨད་བྱུང་འདོད་ཡོན་ཉེར་སྤྱོད་ལྔ༔ ཤ་ཁྲག་དབང་པོ་ཚིལ་རུས་དང་༔ གཉིས་མེད་མཉམ་སྦྱོར་ཨ་མྲྀ་ཏ༔ བ་ལིཾ་གཏོར་མ་རཀྟ་སོགས། ཟ་བྱེད་མེ་ལྷའི་ཚོགས་ལ་འབུལ༔ དགྲ་བགེགས་སྒྲོལ་ཕྱིར་བཞེས་སུ་གསོལ༔ ཨོ་ཨགྣེ་ཀྲོ་དྷ་ས་པ་རི་ཝཱ་ར་བཛྲ་ཨརྒྣཾ་པྲ་ཏཱིཙྪ་སྭཱཧཱ༔ [དེ་བཞིན་དུ་སྦྱར་ཏེ་ཤཔྡའི་བར་གྱིས་ཉེར་སྤྱོད་དང་།] པཉྩ་ཀ་མ་གུ་ཎཿསརྦ་པཉྩ་ཨ་མྲྀ་ཏ༔ མ་ཧཱ་རཀྟ༔ མ་ཧཱ་བ་ལིཾ་ཏ་ [སོ་སོར་གོང་གི་སྔགས་དང་མཇུག་ཏུ་]པཱུ་ཛ་ཁཱ་ཧིཿ ཞེས་སྦྱར་བས་འདོད་ཡོན་སྨན་རཀ་གཏོར་མ་རྣམས་ཕུལ། དེ་ནས་རྫས་རྣམས་ལས་ཐོག་མར་དགང་བླུགས་འབུལ་བ་ལ། མེ་ལྷ་ཁྲོས་པའི་ཞལ་རབ་ཏུ་གདངས་པའི་ལྗགས་རྡོ་རྗེ་རྩེ་མོ་གཅིག་པར་རཾ་དང་དགང་བླུགས་ཀྱི་རྩེར་ཧཱུྃ་ཡིག་མཐིང་ནག་འོད་ཟེར་གྱི་ཕུང་པོར་འབར་བས་མཚན་པས་སྲེག་རྫས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་[བསམ་ཞིང་། ཞལ་གཉིས་ཁྲོ་བོའི་ཁུ་ཚུར་གྱིས་དགང་བླུགས་བཟུང་ནས།] ཨོཾ་ཨགྣ་ཡེ་སྭཱཧཱ༔ [ཞེས་གཡོན་པའི་བླུགས་གཟར་བདུན་གྱིས་གཡས་པའི་དགང་གཟར་བཀང་བའི་དགང་བླུགས་ཁ་སྦྱར་པུས་མོའི་ཕྱི་ལས་ནང་དུ་མི་འདའ་བར་གཡོན་དུ་བསྐོར་

ཞིང་།] ཨོཾ་ཨགྣ་ཡེ་དཱི་བྱ་དཱི་བྱ་བི་ཤུདྡྷེ་མ་ཧཱ་ཤྲཱི་ཧ་བྱ་ཀ་བྱ་ཝ་ཧ་ན་ཡ་བདག་ཅག་དཔོན་སློབ་རྒྱུ་སྦྱོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འགལ་རྐྱེན་མི་མཐུན་པའི་ཕྱོགས་སྤྱི་དང་ཁྱད་པར་བསམ་པ་ངན་པ་ཡིད་ལ་འཆང་ཞིང་སྦྱོར་བ་རྩུབ་མོ་ལག་ཏུ་ལེན་པའི་དགྲ་བགེགས་ཆེ་གེ་མོ་བྱད་མ་རྦོད་གཏོང་དང་བཅས་པ་ཐམས་ཅད་ཚར་གཅོད་པའི་ཕྲིན་ལས་མཛད་དུ་གསོལ། སརྦ་ཤ་ཏྲུཾ་མཱ་ར་ཡ་ཕཊ༔ [ཞེས་ལན་གསུམ་དུ་འབུལ ཡམ་ཤིང་ལ།] ཨོཾ་རཱུ་དྲ་བྲྀཀྵཱ་ཡ་སྭཱཧཱ༔ [ཞེས་དང་། མར་ཁུ་ལ།] ཨོཾ་ཨགྣ་ཡེ་སྭཱཧཱ༔ [ཞེས་སོ་སོར་སྤེལ་ཚིག་གོང་ལྟར་ལས] རྦོད་གཏོང་དང་བཅས་པ་ཐམས་ཅད་མཱ་ར་ཡ་རྦད། [ཅེས་བསྒྱུར་ཏུ་འཐུལ། རྫས་གཞན་རྣམས་ལ།] ཧཱུྃ། དམར་ནག་མེ་ཡི་ཀློང་དཀྱིལ་ནས། །ཟ་བྱེད་མེ་ལྷ་འཁོར་བཅས་ལ། །དགྲ་བགེགས་ཕུང་ཁམས་བླ་ཚེ་སྲོག །འདོད་རྒུར་འཆར་བའི་མཆོད་པ་འབུལ། །དྲག་པོའི་གནད་འབེབས་གསོད་པའི་དུག །མྱོས་བྱེད་ཚ་བའི་རྫས་རྒོད་འདིས། །དམིགས་བྱ་དགྲ་བགེགས་བརླག་པར་མཛོད། །ཨོཾ་ཨགྣེ་ཀྲོ་དྷ་ཡེ་དགྲ་བགེགས་ཤ་ཏྲུཾ་མཱ་ར་ཡ་ཛྭ་ལ་རཾ་ཧཱུྃ་ཕཊ༔ [ཅེས་རྩ་བའི་རྫས་ནས་ཚ་རྫས་ཀྱི་བར་ལན་བདུན་སོགས་ཇི་ལྟར་རིགས་པ་ཕུལ་བའི་མཐར། བསྟོད་པ་ནི།] ཧཱུྃ༔ མེ་ལྷའི་རྒྱལ་པོ་དྲང་སྲོང་མཆོག༔ བདུད་བཞི་འཇོམས་མཛད་ཕྱག་བཞི་

པ༔ ལས་ཀུན་སྒྲུབ་མཛད་འོད་པོ་ཆེ༔ སྔོན་ཚེ་དུས་ན་ལྷ་ཡི་མཆེད༔ ད་ལྟ་རྣལ་འབྱོར་སྒྲུབ་པའི་མཆེད༔ གདུག་པ་ཀུན་སྒྲོལ་ཁྱོད་ལ་བསྟོད༔ [ཅེས་བསྟོད།] ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས། བདག་ཅག་དཔོན་སློབ་འཁོར་དང་བཅས་པར་གནོད་ཅིང་འཚེ་བར་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས། ལོག་འདྲེན་འབྱུང་པོ། དམ་སྲི་སྒབ་འདྲེ། རྒྱ་འདྲེ་འགོང་པོ། མཐའ་བཞིའི་དམག་དཔུང། བྱད་མ་ལྷ་སྲུང་དང་བཅས་པ་ཐམས་ཅད་སྐད་ཅིག་ཡུད་ཙམ་བསྒྲལ་ཞིང་ཚར་གཅོད་པར་མཛད་དུ་གསོལ། སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ལ་འཚེ་ཞིང་། བདག་ཅག་བྱང་ཆུབ་བསྒྲུབ་པ་ལ་བར་དུ་གཅོད་པར་བྱེད་པའི་མ་རུང་གདུག་པ་ཅན་ཐམས་ཅད་སྐད་ཅིག་ཡུད་ཙམ་ཉིད་དུ་མངོན་སྤྱོད་དྲག་པོའི་ཕྲིན་ལས་ཀྱིས་ཐལ་བའི་རྡུལ་ཕྲན་བཞིན་དུ་བརླག་པར་མཛད་དུ་གསོལ། སརྦ་ཤ་ཏྲཱུཾ་མཱ་ར་ཡ་ཕཊ༔ [ཅེས་འདོད་དོན་གསོལ།] ཨོཾ་ཨགྣ་ཡེ་ཛྭ་ལ་ཛྭ་ལ་གཙྪ་མུཿས། ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་ནས་དཔང་པོ་མཛད་པར་ [བསམ་མོ། །དེ་ནས་འདས་པའི་མེ་ལྷ་མཆོད་པ་ནི། བུད་ཤིང་ཁ་གསོས་ལ་བསང་སྦྱང་།] ཧཱུཾ༔ དམ་ཚིག་མེ་ལྷའི་ལྟོ་བ་འབྱམས་ཀླས་

དབྱིངས། །རང་བྱུང་ཡེ་ཤེས་ལྔ་ལྡན་དཀྱིལ་འཁོར་ནི༔ [ཞེས་པ་ནས།] པཾ་པདྨ་མཎྜལ༔ [ཞེས་པའི་བར་གྱིས་རྟེན་གཞལ་ཡས་ཁང་གདན་དང་བཅས་པ་བསྐྱེད། སྐབས་འདིར་སྲེག་རྐྱང་གི་ཚེ་བརྟེན་པ་ལྷ་བསྐྱེད་ནས་སྤྱན་འདྲེན་བྱེད་པ་ཡིན་ཅིང་། སྒྲུབ་མཆོད་དང་འབྲེལ་བའི་སྐབས་སུ།] ཧཱུྃ༔ ཆོས་དབྱིངས་བརྡལ་བ་ཆེན་པོའི་ཀློང་དཀྱིལ་ནས༔ [ཞེས་སོགས་ཀྱིས་ཚོམ་བུ་སྒྲུབ་དཀྱིལ་ལས་སྤྱན་དྲངས་ཏེ་སོ་སོའི་སྔགས་ཀྱིས་ཐབ་ཏུ་དོར་མཐར།] ཧཱུྃ༔ རང་བྱུང་ཕོ་བྲང་ཨེ་ཡི་གཞལ་ཡས་དབུས༔ པདྨ་ཉི་ཟླ་འབར་ཕྲིན་ལས་ཡོངས་འདུས་ཆེ་བའི་མཆོག༔ [ཅེས་སོགས་ལས་བྱང་བཞིན་གཙོ་འཁོར་ཡོངས་རྫོགས་གསལ་གདབ། གང་ལྟར་བཞུགས་སུ་གསོལ་ཞིང་ཕྱག་བྱས་པའི་མཐར་ཁྲག་གི་ཨརྒྷཾ་སོགས་དྲག་པོའི་ཉེར་སྤྱོད་ནས་སྦྱོར་སྒྲོལ་གྱི་མཆོད་པའི་བར་སོང་ནས། སྲེག་རྫས་ཀྱི་ཐོག་མར་དགང་བླུགས་འབུལ་བ་ནི།] ལྷ་ཚོགས་རྣམ་ཁྲོས་པའི་ཞལ་རབ་ཏུ་གདངས་པའི་ལྗགས་རྡོ་རྗེ་ [ཞེས་པ་ནས་གཡོན་དུ་བསྐོར་བའི་བར་སྤེལ་ཚིག་བཅས་འབུལ། དེ་ནས་དྲག་བསྐུལ་སྔོན་དུ་འགྲོ་བས་བྲུབ་ཁུང་བསྐྱེད་པ་ནས་རྡུལ་དུ་བརླག་པའི་བར་གྱི་བསྒྲལ་ལས་རྒྱས་པ་སྨད་ལས་དང་བསྡུས་པ་ཚོགས་ཐ་མའི་དྲིལ་ཐུན་ལྟར་ཇི་ལྟར་རིགས་པས་ལིངྒ་རྣམས་དུམ་བུར་གཏུབ་ལ།] ཧཱུཾ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་

དུས་ལ་བབཿ ཕྱག་བརྙན་ཆེན་མོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱོད་ཀྱི་དམ་ཚིག་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ རྡོ་རྗེ་མེ་དབལ་སྙིང་བསྲེག་ནས༔ ལུས་ངག་རྡུལ་ཕྲན་བཞིན་དུ་རློག༔ [ཅེས་བསྐུལ།] ཛཿ སྲིད་པའི་བཙོན་ཁང་དྲག་པོའི་ཨེ། །བསྐལ་པའི་མེ་དཔུང་འབར་བའི་ཀློང་། །གདུག་པའི་ཡམ་ཤིང་མར་ནག་ཚིལ། །དམིགས་པའི་གཟུགས་རྟེན་དྲག་པོའི་རྫས། །གནད་འབེབས་མྱོས་བྱེད་གསོད་པའི་མཚོན། །ཚ་བའི་ནད་སྐྱེད་རྫས་རྒོད་རྣམས། །བསྲེག་པས་དགྲ་བགེགས་གདུག་པའི་ཚོགས། །ལུས་ངག་རྡུལ་དུ་བསྲེག་ནས་ཀྱང་། །རྗེས་ཤུལ་ལྷག་མ་མེད་པར་མཛོད། །[ཅེས་སྤྱིར་ཕུལ་ནས། བྱེ་བྲག་སོ་སོར་འབུལ་ཞིང་ཕྲིན་ལས་བཅོལ་བ་ནི། ཐོག་མར་གཙོ་བོ་ཡབ་ཡུམ་ལ།] ཧཱུྃ༔ མཐིང་ནག་གྲུ་གསུམ་འབར་བའི་ཀློང་དཀྱིལ་ནས༔ དཔལ་ཆེན་ཁྲོ་རྒྱལ་བཛྲ་ཀཱི་ལ་ཡ༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ བརྣག་པའི་དགྲ་བགེགས་སྲོག་དབུགས་དབང་བསོད་ནམས༔ ཚོགས་ཡུམ་ཁམས་དང་སྐྱེ་མཆེད་ཤ་ཁྲག་རུས༔ ཟག་མེད་བདུད་རྩིའི་རྒྱ་མཚོར་བསྒྱུར་ཏེ་བསྟབ༔ བཞེས་ནས་དུག་

གསུམ་དགྲ་བགེགས་རྡུལ་དུ་རློག༔ དྲག་པོ་མཐུ་ཡི་དངོས་གྲུབ་བདག་ལ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ སརྦ་ཤ་ཏྲུཾ་བིགྷྣཱན་རཱུ་པ་ཙིཏྟ་ཨགྣེ་ཛྭ་ལ་རཾ་ཁཱ་ཧི་ཁཱ་ཧིཿ [ཞེས་པའི་སྔགས་ཀྱིས་མེ་སྲོག་འཛིན་པ་ནས་ཚ་བའི་རྫས་ཀྱི་བར་བརྒྱ་རྩ་ལ་སོགས་པ་ཇི་ལྟར་རིགས་པ་ཕུལ་བའི་མཐར།] བདག་ཅག་དཔོན་སློབ་རྒྱུ་སྦྱོར་འཁོར་དང་བཅས་པ་རྣམས་ལ་གནོད་ཅིང་ [སོགས་དགང་བླུགས་ཀྱི་སྐབས་བཞིན་སྤེལ་ཚིག་སྦྱར། དེ་བཞིན་དུ་འགྲེས་སྦྱར་ཏེ།] ཧཱུྃ༔ གནམ་ལྕགས་འཁོར་ལོ་འབར་བའི་རྩིབས་སྟེང་ནས༔ སྲས་མཆོག་ཁྲོ་རྒྱལ་ཀཱི་ལ་རིགས་ལྔ་ཡི༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ [ཞེས་སོགས་འདོན་པ་སྤོས་ནས། རིགས་ལྔ་སོ་སོའི་སྔགས་ལ་]སརྦ་ཤ་ཏྲུཾ་ [སོགས་འབུལ་སྔགས་སྦྱར་བས་གྲངས་ཉེར་གཅིག་སོགས་ཕུལ་མཐར་སྤེལ་ཚིག་སྦྱར།] ཧཱུྃ༔ སྟེང་འོག་ཕྱོགས་མཚམས་འཁོར་ལོའི་རྩིབས་སྟེང་ནས༔ ཡེ་ཤེས་ཁྲོ་བཅུ་ཡབ་ཡུམ་ཟ་གསོད་བཅས༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ [ཞེས་སོགས་དང་། ཧཱུྃ་ཀཱ་ར་ནས་སྟོབས་པོ་ཆེའི་བར་གྱི་སོ་སོའི་སྔགས་ལ་འབུལ་སྔགས་སྤེལ་ཚིག་བཅས་ཕུལ།] ཧཱུྃ༔ རང་བྱུང་ཟླ་གམ་ཨེ་ཡི་ཀློང་དཀྱིལ་ནས༔ སྤྲུལ་པའི་སྲས་མཆོག་ཁྲོ་བོ་ཉེར་གཅིག་གི༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ [ཞེས་སོགས་དང་། རང་སྔགས་ལ་འབུལ་སྔགས་དང་སྤེལ་ཚིག] ཧཱུྃ༔ ཚད་མེད་

བཞི་ལྡན་ཡེ་ཤེས་སྒོ་བཞི་ནསཿ ཕྲིན་ལས་བཞི་སྒྲུབ་སྒོ་སྐྱོང་རྣམ་བཞི་ཡི༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ [ཞེས་སོགས་དང་། སོ་སོའི་སྔགས་ལ་འབུལ་སྔགས་སྤེལ་ཚིག་བཅས་གྲངས་བདུན་སོགས་འབུལ།] ཧཱུྃ༔ དཀྱིལ་འཁོར་ཆེན་པོའི་མུ་རན་ཁོར་ཡུག་ཏུ༔ ཕུར་སྲུང་དམ་ཅན་རྒྱ་མཚོ་འཁོར་བཅས་ཀྱི༔ རབ་འཇིགས་རྔམས་བརྗིད་ཞལ་གྱི་ཧོམ་ཁུང་དུ༔ [ཞེས་སོགས་དང་།] ཀ་ཏཾ་ཀ་ཡ་ [སོགས་ལ་འབུལ་སྔགས་སྦྱར་བས་གྲངས་ལྔའམ་གསུམ་སོགས་ཕུལ་མཐར་སྤེལ་ཚིག་སྦྱར། དེ་ལྟར་རྫས་རྣམས་རྫོགས་ནས་དམིགས་བསལ་བགེགས་མི་བསྲུན་པ་སོགས་ལ་ལྕགས་སླང་དུ་མར་ནག་བསྐོལ་བའི་མེ་ལྩེས་སླེབ་པའི་སར་དམིགས་བྱའི་ལིངྒ་བཀྲམ་ལ་དྲག་བསྐུལ་གསེར་སྐྱེམས་འགུགས་དྲེན་རྣམས་བྱས་ནས་བཞེས་སྒྲ་དྲག་པོ་དང་བཅས་ཛ་གད་རྫས་ལྡན་གྱིས་མེ་སྦར་ཏེ་ཧོམ་མཆོད་བྱ་བ་ཡིན་ནོ། །དེ་ནས་ལས་བྱང་བཞིན་བསྟོད་དེ།] ཧོཿ དུས་གསུམ་རྒྱལ་བ་ཐམས་ཅད་ཀྱི་ཐུགས་རྗེ་མཐུ་སྟོབས་མ་ལུས་པ་གཅིག་ཏུ་བསྡུས་པའི་བདག་ཉིད་འཁོར་འདས་ཐམས་ཅད་ཀྱི་སྤྱི་དཔལ་བཅོམ་ལྡན་འདས་རྡོ་རྗེ་གཞོན་ནུ་བདུད་འདུལ་སྲས་མཆོག་ཁྲོ་བཅུ་ཟ་གསོད་ཁྲ་ཐབས་སྒོ་སྐྱོང་ཕུར་སྲུང་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ལ་ཕྲིན་ལས་སུ་གསོལ་བ་ནི། རྣལ་འབྱོར་པ་བདག་ཅག དཔོན་སློབ་རྒྱུ་སྦྱོར་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ངན་པ་ཐམས་ཅད་ཞི་བར་མཛོད་ཅིག །ཞི་བ་དང་རྒྱས་པ་དང་འགུགས་པ་དང་དྲག་པོའི་ལས་ཐམས་ཅད་ལ་མཐུ་དང་ལྡན་པར་མཛོད་ཅིག །ཕས་ཀྱི་རྦོད་

གཏོང་བྱད་སྟེམས་མནན་གཏད་བསྲེག་འཕང་བྱས་པ་ཐམས་ཅད་བྱད་མ་ཁོ་རང་གི་གཤེད་དུ་ཕོབ་ཅིག །ལྷ་འདྲེའི་ཟ་ཁ་གཏད་པ། གནོད་པའི་དབལ་ཟུག་པ། བྱད་ཀྱིས་ཁྲམ་ལ་བཏབ་པ་ཐམས་ཅད་དགྲ་ལ་སྒྱུར་ཅིག །ཁྱད་པར་བསྒྲལ་བའི་ཞིང་དུ་གྱུར་པའི་དགྲ་བགེགས་ཆེ་གེ་མོ་གཟུགས་ལིངྒ་ལ་བྲིས་ཤིང་མིང་བྱང་དམར་གྱི་དཀྱུས་སུ་བཀོད་པ་འདི་ཉིད་ལོ་དང་ཟླ་བར་མ་བཞག་ཞག་དང་ཟ་མར་མ་འགྱངས་པར་མྱུང་བ་ཉིད་དུ་སོད་ལ་མིང་ཙམ་བརྡ་ཙམ་ཡང་མ་ལུས་པར་ཐལ་བའི་རྡུལ་དུ་བརླག་པའི་ཕྲིན་ལས་མཛོད་ཅིག །[ཅེས་འདོད་དོན་གསོལ། སླར་ཡང་དགང་བླུགས་སྔར་བཞིན་དུ་ཕུལ་མཐར།] ཨོཾ་བཛྲ་ཏམྦུ་ལ་ཡ་སྭཱཧཱ། [ཞེས་སོ་རྩི་དང་།] ཨོཾ་བཛྲ་ཝསྟྲ་ཡ་སྭཱཧཱ། [ཞེས་གོས་ཟུང་ཕུལ། ཆུ་གཉིས་ཉེར་སྤྱོད་སྔགས་ཙམ་གྱིས་མཆོད་ཅིང་ཤློོ་ཀ་གཅིག་གིས་བསྟོད།] མ་རྙེད་ཡོངས་སུ་མ་ཚང་དང་། [སོགས་དང་ཡི་གེ་བརྒྱ་པས་ནོངས་པ་བཤགས།] ཨོཾ་ཁྱེད་ཀྱིས་སེམས་ཅན་ཀུན་མཛད། [ཅེས་སོགས་དང་།] བཛྲ་མུཿ [ས་ཡེ་ཤེས་པ་སྒྲུབ་རྟེན་ནམ་དབྱིངས་སུ་གཤེགས། སྒྲུབ་དཀྱིལ་སྐབས་ཚོམ་བུ་སླར་སྤྱན་དྲངས། དམ་ཚིག་པ་རང་ལ་བསྡུའོ། །གསུམ་པ་ནི། བུད་ཀིང་བསྣན་ལ་བསང་ནུས་བྲན་ཏེ།] སླར་ཡང་འཇིག་རྟེན་པའི་མེ་ལྷ་དཔང་པོར་བཞུགས་པ་བཛྲ་ས་མཱ་ཛཿས། དམ་ཚིག་པ་དང་དབྱེར་མེད་དུ་འགྱུར་ [པར་བསམ་ལ། སྔར་བཞིན་དགང་བླུགས་དང་བསྲེག་རྫས་ལྷག་མ་རྣམས་སྤེལ་

ཚིག་མེད་པའི་སྔགས་ཀྱིས་འབུལ་ཞིང་། སོ་རྩི་དང་གོས་ཟུང་ཡང་ཕུལ་མཐར་ཉེར་སྤྱོད་ཀྱིས་མཆོད།] ཧཱུྃ༔ ཕྲིན་ལས་སྒྲུབ་མཛད་ཆེ་བའི་མཆོག༔ མེ་ལྷའི་རྒྱལ་པོ་གདོན་གྱི་བདག༔ ཤར་ལྷོ་མེ་ལྷའི་ཚོགས་བཅས་ལ༔ མཆོད་ཅིང་བསྟོད་དེ་ཕྱག་ཀྱང་འཚལ༔ [ཅེས་བསྟོད།] ཨོཾ་ཨགྣ་ཡེ་ས་པ་རི་ཝཱ་ར་མ་ཧཱ་བ་ལིཾ་ཏ་པཱུ་ཛ་ཁཱ་ཧི། [ཞེས་ལན་གསུམ་གྱིས་གཏོར་མ་ཕུལ་ལ་སྔར་བཞིན་འདོད་དོན་གསོལ། ནོངས་པ་བཤགས་ནས།] བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱི་གཤེགས། །ཇི་བཞིན་དུས་སུ་སླར་བྱོན་ལ། །བདག་གི་འདོད་པ་ཐམས་ཅད་སྒྲུབས། །[ཞེས་སྙན་མནན་ཏེ།] བཛྲ་མུཿས། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་ [བསམ་ལ། མེ་ལོངས་སྐབས་ཡོད་ཀྱང་མི་བཞག་པར་དུག་ཁྲག་གི་ཆུས་བསད་པའི་ཐལ་བ་ཟློག་པའི་ཐལ་རྡེབ་དང་འབྲེལ་བར་དགྲ་ཕྱོགས་སུ་རླུང་ལ་བསྐུར་བའམ། སྣོད་ངན་དུ་བླུགས་ལ་མཆོད་རྟེན་ནམ་ལམ་རྒྱ་གྲམ་དུ་མནན། ལས་གསོར་མི་རུང་བའི་གཟིར་མནན་བྲོ་ཡིས་མཇུག་བསྡུབའི་སླད་དུ། དྲག་པོའི་ཕུར་བུ་འདྲིལ། མཐེའུ་ཆུང་འབྲེལ་བའི་བྲོ་གྲུ་གསུམ་དུ་བསྐོར་བའམ་དེར་མོས་ལ།] ཧཱུྃ༔ ལྕགས་སམ་དྲག་པོའི་ཤིང་རྣམས་ལ༔ མགོ་བོ་རྒྱ་མདུད་རྩེ་ཟུར་གསུམ༔ ངོས་ལ་དྲག་པོའི་ལྷ་བཀོད་དེ༔ བཏབ་པས་དགྲ་བགེགས་བརླག་པར་འགྱུར༔ ཨེ་ཡི་ཚོགས་ཀྱི་དཀྱིལ་འཁོར་དུ༔ ཧཱ་ལས་རྡོ་རྗེ་འཁོར་དང་བཅས༔

ཕྲག་དོག་གྱུར་པའི་སེམས་ཅན་རྣམས༔ བརླག་པར་གྱུར་ལ་དབྱིངས་སུ་རོལ༔ [ཧཱུྃ་བཞི་པའི་སྔགས་དང་།] བརླག་མཛད་ལྷ་ལ་ཕྱག་འཚལ་ལོ༔ སྡང་བའི་དགྲ་ཡང་རྡུལ་དུ་རློག༔ གནོད་པའི་བགེགས་ཀྱང་རྡུལ་དུ་རློག༔ བར་གཅོད་དམ་སྲི་རྡུལ་དུ་རློག༔ འབྱུང་པོའི་ཚོགས་རྣམས་རྡུལ་དུ་རློག༔ ཧཱ་ཀརྨ་ཀཱི་ལི་ཀཱི་ལ་ཡ་མཱ་ཡ་ཕཊ༔ [ཅེས་བྲོ་བརྡུང་། དགེ་བ་བསྔོ་ཞིང་ཤིས་པ་བརྗོད་པས་མཐའ་བརྒྱན་པར་བྱའོ། །]མི་སྲུན་གདུག་ཅན་ཉམས་པའི་རྩྭམ་སྦུར་སྡེ། །སྐད་ཅིག་ཡུད་ཀྱིས་ཟ་ལ་ཆེས་རྔམས་པ། །དྲག་སྔགས་བསྐལ་པའི་མེ་ཆེན་སྤོར་བའི་ཐབས། །འཁྲུལ་མེད་གནད་ཀྱི་གཟེར་ཁ་འདི་ཀོ་རྨད། །མི་འགྱུར་སྟོང་ཉིད་ཡེ་ཤེས་ཁྲོས་པའི་གར། །རྡོ་རྗེ་མེ་དབལ་འབར་བ་ཆེན་པོ་ཡིས། །མ་དག་གཉིས་སྣང་བདུད་དགྲའི་སྙིང་བསྲེགས་ནས། །བདེ་ཆེན་སྣང་བ་འོད་དུ་གསལ་གྱུར་ཅིག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྲེག་པ་ཧོམ་གྱི་ལས་རིམ་གདུག་ཅན་མཐར་བྱེད་བསྐལ་པའི་མེ་ཆེན་ཞེས་བྱ་བ་འདི་ནི། རང་གཞན་མང་པོ་ལ་སྨན་པའི་བསམ་པ་ཉེར་བསྐྱེད་ནས་རྩ་བའི་གཞུང་དོན་མན་ངག་གིས་ཕྱེས་ཤིང་ལག་ལེན་འཇུག་པ་བདེ་བའི་དབང་དུ་བྱས་ཏེ། ལྷ་རིགས་ཀྱི་སྔགས་ནག་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་པའི་ཐོག་ཏུ་སོན་པ་དཔལ་གདོང་གི་ལོ་དབོ་ཉ་བའི་མར་ངོའི་རྫོགས་པ་གསུམ་པར་མཁན་ལྗོངས་ཕུན་ཚོགས་དགའ་འཚལ་གྱི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་བདུད་དགྲ་དམ་སྲིའི་ཚོགས་རྣམས་རྨིགས་མེད་གཞོབ་ཏུ་བསྲེག་པའི་རྒྱུར་གྱུར་ཅིག །ཛཡནྟུ། །]

མེ་ཐུན་བརྡེག་སྐབས་སུ། དཔལ་ཆེན་སྐུ་ལས་མེ་དཔུང་རྣམ་ལྔ་འབར༔ མེ་ལྕེ་ཁྲོ་ཆུང་ཡང་སྤྲུལ་མཚོན་ཆ་ཡི༔ ཚྭ་ཚྭ་འཕྲོས་པས་ནད་གདོན་སྡིག་སྒྲིབ་སྲེག༔ བར་ཆད་གདོན་བགེགས་བརླག་ཅིང་བཅོམ་པར་གྱུར༔ [དྲག་སྔགས་སྤུ་གྲིའི་མཐར།] གནོད་བྱེད་དམ་སྲི་ཕོ་མོའི་སྲོག་ལ་རཾ་རཾ་ཙིཏྟ་རཾ་རཾ་ཐུལ་ཐུལ་ཛྙཱན་ཨ་ན་ལ་ཙཀྲ་ཧཱུྃ་ཧཱུྃ་ཕཊ་ཕཊ༔ [ཆེ་གེ་མོ་]ཐམས་ཅད་མཱ་ར་ཡ་ཛྭ་ལ་རཾ་རཾ་ཨུཙྪ་ཏ་ཡ་ཕཊ༔ སརྦ་ཨནྟ་ར་ཤཱིནྟཾ་ཀུ་རུ་ཧཱུྃ་ཕཊ་རཾ་སྭཱཧཱ༔ ཞེས་བཟླ་བཞིན་དུ་བརྡེག་གོ། །། སརྦ་མངྒ་ལཾ།། །།

ཕུར་པ་བདུད་འཇོམས་གནམ་ལྕགས་སྤུ་གྲིའི་མངོན་སྤྱོད་དྲག་པོའི་ཕྲིན་ལས་ཀྱི་ཆ་ལག་མཁྱེན་དགོངས་དམོད་བཅོལ་དྲང་སྲོང་ཁྲོས་པའི་ང་རོ།

༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་མངོན་སྤྱོད་དྲག་པོའི་ཕྲིན་ལས་ཀྱི་ཆ་ལག་མཁྱེན་དགོངས་དམོད་བཅོལ་དྲང་སྲོང་ཁྲོས་པའི་ང་རོ་ཞེས་བྱ་བ་བཞུགས་སོ། །

ན་མོ། རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུངས་ཀྱི་བརྒྱུད་པ་ལ་སོགས་ཏེ་བཀའ་གཏེར་བརྒྱུད་པ་དགུ་ལྡན་གྱི་དཔལ་ལྡན་བླ་མ་དམ་པ། ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་དམ་ཅན་ཆོས་སྐྱོང་སྲུང་མའི་ཚོགས་སྤྱི་དང་། ཁྱད་པར་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་གཅིག་ཏུ་བསྡུས་པའི་བདག་ཉིད་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུ། ཡུམ་མཆོག་འཁོར་ལོ་རྒྱས་འདེབས་མ། སྒྲོལ་ཡུམ་ཨེ་ཀ་ཛ་ཊཱི། ཁྲོ་རྒྱལ་ཀཱི་ལ་

རིགས་ལ༎ བདུད་འདུལ་ཁྲོ་བཅུ་ཡབ་ཡུམ། ལས་མཁན་ཟ་གསོད་ཉི་ཤུ། སྲས་མཆོག་ཁྲ་ཐབས་ཉེར་གཅིག །སྒོ་སྐྱོང་གདོང་མོ་མཆེད་བཞི་བཅས་དཀྱིལ་འཁོར་འཁོར་ལོའི་ལྷ་ཚོགས་རྣམས་དང་། བཀའ་སྡོད་མ་མོ་བཅུ་གཉིས། སྲོགབདག་གིང་ཆེན་སྡེ་བཞི། མ་མོ་དབང་ཕྱུག་ཉེར་བརྒྱད། མ་སྲིང་ལངྐ་འབར་མ། དགེ་བསྙེན་ཉི་ཤ་རྩ་གཅིག །བོད་སྐྱོང་བརྟན་མ་བཅུ་གཉིས་ལ་སོགས་པ་དང་། ཕྱིའི་ལྷ་མ་སྲིན་སྡེ་བརྒྱད། ནང་གི་ལྷ་མ་སྲིན་སྡེ་བརྒྱད། གསང་བའི་ལྷ་མ་སྲིན་སྡེ་བརྒྱད། སྦས་པའི་ལྷ་མ་སྲིན་སྡེ་བརྒྱད། བསྟན་པ་སྲུང་བའི་ལྷ་མ་སྲིན་སྡེ་བརྒྱད། དྲག་པོ་སྔགས་ཀྱི་

ལྷ་མ་སྲིན་སྡེ་བརྒྱད། བཏགས་ཤིང་ཆགས་པའི་ལྷ་མ་སྲིན་སྡེ་བརྒྱད། ལས་བྱེད་མྱུར་མགྱོགས་ཀྱི་ལྷ་མ་སྲིན་སྡེ་བརྒྱད། བྱེ་བྲག་དེ་རིང་གི་ཚེས་གྲངས་དུས་ཚོད་ལ་རྒྱུ་བའི་རཱ་ཧུ་ལ། རྣལ་འབྱོར་མ། གཤིན་རྗེ་དུས་མཚན། ཟིན་ཕུང་ཧལ་ཁྱི། པི་ལིང་སོགས་ས་བདག་དྲག་རྩལ་ཅན་རྣམས་ཏེ། མདོར་ན་ཡེ་ཤེས་དང་ལས་ལས་གྲུབ་པའི་དྲེགས་པ་ཕོ་རྒྱུད་མོ་རྒྱུད་རྫུ་འཕྲུལ་མྱུར་མགྱོགས་ཀྱི་མཐུ་དང་རྩལ་མངའ་བ་ཐམས་ཅད་ཐོགས་མེད་པ་མེད་པའི་མངོན་ཤེས་ཀྱིས་དགོངས་ལ་གཟུ་དང་དཔང་པོ་མཛོད་ཅིག །ཁྱེད་རྣམས་བོས་པའི་ཚེ་ན་སྙན་མ་སྲ། གཡབ་པའི་ཚེ་ན་སྤྱན་མ་བརྟུལ། བརྟེན་པའི་ཚེ་ན་རྒྱང་མ་རིང་། སྒྲུབ་པའི་ཚེ་ན་གོང་མ་གཡེལ། བསྐུལ་བའི་ཚེ་ན་བང་མ་བུལ། རྦད་པའི་ཚེ་ན་མཐུ་མ་ཆུང་། མངགས་པའི་ལས་ལ་རྩལ་མ་ཞན་པར། ལེགས་ཉེས་ཀྱི་སྟངས་ཟུང་ལ་བདེན་རྫུན་གྱི་ཤན་ཕྱེས་ཤིག །སྤྱིར་སངས་རྒྱས་ཀྱི་བསྟན་པ་བཤིག་ཅིང་དཀོན་མཆོག་གསུམ་ལ་གནོད་པའི་ལས་རྩོམ་པ། སྐྱེ་འགྲོ་སེམས་ཅན་ཡོངས་ཀྱི་བདེ་སྐྱིད་འཕྲོག་པ། མི་དགེ་བ་བཅུ་དང་མཚམས་མེད་པ་ལྔ་སོགས་སྡིག་པའི་ལས་ལ་རྟག་ཏུ་སྤྱོད་པའི་ཞིང་བཅུ་ཚང་བ་

བསྟན་པ་སྤྱིའི་དགྲ་བགེགས་རྣམས་དང་། ཁྱད་པར་རིག་པ་འཛིན་པ་བདག་ཅག་དཔོན་སློབ་མི་ནོར་སྡེ་སྲིད་དང་བཅས་པར་དངོས་སམ་བརྒྱུད་ནས་གནོད་ཅིང་འཚེ་བ། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུག་པ། རྒྱབ་ན་ཁྲ་ལྟར་འཇབ་པ། ལྐོག་ནས་འབུ་ལྟར་གཡེང་བ། གདོང་ནས་ཁྱི་ལྟར་ཟུག་པ། མདུན་ནས་ལོག་པར་ལྟ་བ། གཡས་ནས་བསམ་པ་ངན་པ། གཡོན་ནས་སྦྱོར་བ་རྩུབ་པ། མགོ་ནས་རི་ལྟར་མཐོ་གནོན་བྱེད་པ། འོག་ནས་རླུང་ལྟར་བསྐྱོད་པ། བར་ནས་ཆུ་ལྟར་འཁྲུག་པ། ཟ་ལམ་དུ་དུག་གཡོ་བ། འགྲོ་ལམ་དུ་རྩང་འཛུག་པ། སྟོབས་འབྱོར་དང་མངའ་རིས་འཕྲོག་པ། འཐབ་ཅིང་རྩོད་པར་འདོད་པ། འཁྲུག་ཅིང་འཛིང་བར་འདོད་པ། འགྲས་ཤིང་འཁོན་པར་འདོད་པ། ལུས་ལ་ན་ཚ་གཏོང་བ། སེམས་ལ་སྡུག་བསྔལ་གཏོང་བ། སྲོག་ལ་བར་ཆད་གཏོང་བ། བསམ་པ་མི་འགྲུབ་པར་བྱེད་པ། མདོར་ན་གཟུགས་ཅན་སྡང་བར་བྱེད་པའི་དགྲ། གཟུགས་མེད་གནོད་པར་བྱེད་པའི་བགེགས་འདི་རྣམས་ཀྱིས། སྤྱིར་སངས་རྒྱས་ཀྱི་བསྟན་པ་ལ་གནོད་པ་བྱས་སོ། །དཀོན་མཆོག་གི་དབུ་འཕང་སྨད་

དོ། །ཁྱད་པར་བླ་མའི་སྐུ་ལ་བསྡོས་སོ། །དགེ་འདུན་གྱི་སྡེ་བཅོམ་མོ། །སྐྱེ་འགྲོ་ཡོངས་ཀྱི་བདེ་སྐྱིད་ལ་འཚེའོ། །རིག་སྔགས་འཆང་བ་རྣམས་ལ་བསྙད་བཙུག་གོ །སྲུང་མ་ཁྱེད་རྣམས་དང་ཞེ་འགྲས་སོ། །ལྷ་སྲིན་སྡེ་བརྒྱད་རྣམས་ཀྱི་ཟ་སྒོ་བཀག་གོ། ལྷ་ཆོས་ཀྱི་དམ་ཚིག་ཉམས་སོ། །མི་ཆོས་ཀྱི་མནའ་ཐོ་ཟོས་སོ། །བློ་གཏད་པའི་སྙིང་བརྐུས་སོ། །གྲོས་དྲིས་པས་མཚང་བྲུས་སོ། །ཕན་བཏགས་པས་དགྲར་བལྟས་སོ། །བཟང་ལན་ངན་གྱིས་འཇལ་ལོ། །རིག་སྔགས་འཆང་བ་བདག་ཅག་རྣམས་ཀྱིས་དང་པོར་བསམ་པས་མ་ཉེས་སོ། །བར་དུ་དག་གིས་མ་ཉེས་སོ། །ཐ་མ་སྦྱོར་བས་མ་ཉེས་སོ། །ངས་མཁའ་ལྟར་དྭངས་ཀྱང་ཁོས་སྤྲིན་ལྟར་གཏིབ་བོ། །ངས་གངས་ལྟར་དཀར་ཀྱང་ཁོས་རྫ་ལྟར་གནག་གོ །ངས་བྱེའུ་ལྟར་བྲོས་ཀྱང་ཁོས་ཁྲ་ལྟར་དེད་དོ། །ངས་ཉ་ལྟར་གབ་ཀྱང་ཁོས་སྲམ་ལྟར་མཆོང་ངོ་། །ངས་ཝ་ལྟར་ཞུམ་ཡང་ཁོས་སེང་ལྟར་འགྱིང་ངོ། །མི་ང་ལ་ལྷ་མེད་ཟེར་ནས་བདོས་སོ། །ལྷ་ཁྱེད་ལ་མཐུ་མེད་ཟེར་ནས་བརྙས་སོ། །དེ་ལྟ་བུའི་དགྲ་བགེགས་གཟུགས་ལིངྒ་ལ་བྲིས་ཤིང་མིང་བྱང་དམར་གྱི་དཀྱུས་སུ་བཀོད་པ་འདི་ཉིད། ལོ་འདྲ་བ། རུས་འདྲ་བ། མིང་

འདྲ་བ་རྣམས་དང་མ་ནོར་བར་ངོས་ཟུང་ལ། མཐོ་སྲིད་པའི་རྩེ་མོ། །དམའ་ན་རཀ་དམྱལ་ཁམས། གླིང་བཞི་གླིང་ཕྲན། ཉི་ཟླའི་གོ་བར། བན་བོན་སྲུང་མའི་སྐྱབས་འོག་སོགས་གང་དུ་གནས་ཤིང་བྲོས་ཀྱང་། ལས་བྱེད་ཀྱི་ཕོ་ཉ་ལྕགས་ཀྱུ་ཅན་གྱིས་སྙིང་ནས་ཟུངས་ཤིག །ཞགས་པ་ཅན་གྱིས་རྐེ་ནས་ཆིངས་ཤིག །ལྕགས་སྒྲོགས་ཅན་གྱིས་དབང་པོ་སྡོམས་ཤིག །དྲིལ་བུ་ཅན་གྱིས་མྱོས་སུ་ཆུག་ཅིག །འཇིགས་པའི་མུན་ནག་གིས་མདུན་ནས་བསུས་ཤིག །མཚོན་ཆ་ཅན་གྱིས་ཕྱི་ནས་བདོས་ཤིག །ལས་ཀྱི་རླུང་དམར་གྱི་རྟ་ལ་བསྐྱོན་ནས་སྐད་ཅིག་ཡུད་ཅིག་ཐེངས་ཅིག་ལ་བྲུབ་ཁུང་ཁམས་གསུམ་འཁོར་བའི་བཙོན་ཁང་ཆེན་པོར་དམིགས་རྟེན་གཟུགས་ཀྱི་ལིངྒ་འདི་ལ་འགུགས་པའི་ཕྲིན་ལས་མཛོད་ཅིག །[ཅེས་མཁྱེན་པར་གསོལ་ལོ།] ༈ ཧོ། དམ་ཉམས་པའི་དགྲ་བོ་མི་ནོར་སྲིད་སྡེ་དང་བཅས་པ་འདི་རྣམས་ཀྱི་ལུས་ངག་ཡིད་གསུམ་བླ་ཚེ་སྲོག་དབུགས་དང་བཅས་པ་རྣམས་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་དྲེགས་པ་དྲག་རྩལ་མྱུར་མགྱོགས་ཀྱི་

མཐུ་དང་ལྡན་པ། ཤ་ལ་དགའ་ཞིང་ཁྲག་ལ་རྔམས་པ། གསོད་གཅོད་ཀྱི་ལས་ལ་བརྩོན་པ་ཁྱེད་རྣམས་ལ་དུག་གསུམ་ཤ་ཁྲག་རུས་པའི་ཚོགས་རྣམས་འདོད་ཡོན་བདུད་རྩིའི་དམ་ཚིག་ཏུ་སྤེལ་ནས་བསྟབ་པ་ཡིན་པས། དགྲ་བོ་འདི་རྣམས་ཕོ་ལྷ་དང་ཕྱེས་ཤིག །ཕོ་འདྲེ་དང་སྤྲོད་ཅིག །མོ་ལྷ་དང་ཕྱེས་ཤིག །མོ་འདྲེ་དང་སྤྲོད་ཅིག །ཞང་ལྷ་དང་ཕྱེས་ཤིག །ཞང་འདྲེ་དང་སྤྲོད་ཅིག །ཡུལ་ལྷ་དང་ཕྱེས་ཤིག །ཡུལ་འདྲེ་དང་སྤྲོད་ཅིག །དགྲ་ལྷ་དང་ཕྱེས་ཤིག །དགྲ་འདྲེ་དང་སྤྲོད་ཅིག །གནམ་གྱི་འཇུ་ཐག་སྟེང་ནས་ཆོད་ཅིག །ས་ཡི་རྟེན་ཕུར་དྲུང་ནས་ཕྱུངས་ཤིག །བླ་མེ་སྟག་ཡར་བ་བཞིན་དུ་ཐོང་ཞིག །སྲོག་མར་མེ་རླུང་གིས་བསད་པ་བཞིན་དུ་ཐོང་ཞིག །དབུགས་པགས་པ་མེད་པའི་སྦུད་མཆུའི་རླུང་བཞིན་དུ་ཐོང་ཞིག །གཟུགས་བྱེ་མའི་ཁང་བུ་ཆུས་བཤིག་པ་བཞིན་དུ་ཐོང་ཞིག །ངག་པི་ཝཾ་གི་རྒྱུན་ཐག་ཆད་པ་བཞིན་དུ་ཐོང་ཞིག །སེམས་དྷ་དྷུ་རའི་ཁུ་བ་བཏུང་བས་མྱོས་པ་བཞིན་དུ་ཐོང་ཞིག །ཡན་ལག་ཤིང་སྐམ་གྱི་མགལ་བ་རེངས་པ་བཞིན་དུ་ཐོང་ཞིག །དབང་པོ་ལྔ་ཆུ་ལ་སྣག་ཚ་བླུགས་པས་མོག་པ་བཞིན་དུ་ཐོང་ཞིག །སྟེང་གི་མི་རབས་ཤིང་སྡོང་རྩ་བ་བཏོན་པ་བཞིན་དུ་ཐོང་ཞིག །

ཕ་ཚན་ཕོ་རྒྱུད་ཀྱི་རིགས་རྣམས་ཤིང་ཏཱ་ལའི་མགོ་བོ་བཅད་པ་བཞིན་དུ་ཐོང་ཞིག །མཚན་ཞང་རྒྱུད་ཀྱི་རིགས་རྣམས་རྒྱུས་པ་ཐབ་ལ་བཏབ་པ་བཞིན་དུ་ཐོང་ཞིག །མནའ་མ་དང་ཚ་རིགས་ལྕུག་ཕྲན་ཟོར་བས་བཅད་པ་བཞིན་དུ་ཐོང་ཞིག །བུ་དང་བུ་མོ་སྒོ་ང་བྲག་ལ་བརྒྱབ་པ་བཞིན་དུ་ཐོང་ཞིག །བུ་སྲིང་དང་མག་པ་མེ་ལ་ཆུ་བླུགས་པ་བཞིན་དུ་ཐོང་ཞིག །བར་གྱི་གཡོག་རབས་སེར་བས་ལོ་ཏོག་བཅོམ་པ་བཞིན་དུ་ཐོང་ཞིག །འོག་གི་རྟ་ནོར་ཕྱུགས་རབས་རྩྭ་ཕུང་མེ་ལ་བརྒྱབ་པ་བཞིན་དུ་ཐོང་ཞིག །ཡུལ་དང་མཁར་གཞིས་ཕ་བོང་ལ་ཐོག་བརྒྱབ་པ་བཞིན་དུ་ཐོང་ཞིག །བསོད་ནམས་དང་ལོངས་སྤྱོད་མེ་ཏོག་སད་ཀྱིས་ཁྱེར་བ་བཞིན་དུ་ཐོང་ཞིག །ཟས་སྐལ་དང་དབང་ཐང་དགུན་གྱི་ཆུ་བྲན་སྐམ་པ་བཞིན་དུ་ཐོང་ཞིག ཁ་རྗེ་དང་རླུང་རྟ་འདབ་ཆགས་གཤོག་པ་ཆག་པ་བཞིན་དུ་ཐོང་ཞིག །སྟོབས་དང་ནུས་པ་གཟི་བརྗིད་ཁང་རུལ་རྡིབ་པ་བཞིན་དུ་ཐོང་ཞིག །མཐུན་རྐྱེན་ལེགས་ཚོགས་ནམ་ལང་གི་སྐར་མ་བཞིན་དུ་ཐོང་ཞིག །མི་འདོད་པའི་ཉེས་ཚོགས་ཉི་རྒལ་གྱི་གྲིབ་སོ་བཞིན་དུ་ཐོང་ཞིག །།ནད་གདོན་དང་ཆག་ཆེན་ཁ་ཆར་བུ་ཡུག་འཚུབས་པ་བཞིན་དུ་ཐོང་ཞིག །སྟོད་ཀྱི་ཚ་

བའི་ནད་རིགས་ནགས་མེ་རླུང་གིས་སྤར་བ་བཞིན་དུ་ཐོང་ཞིག །སྨད་ཀྱི་གྲང་བའི་ནད་རིགས་ཤྭ་འོད་དང་ཆུ་རྒོད་བརྡོལ་བ་བཞིན་དུ་ཐོང་ཞིག །རླུང་མཁྲིས་བད་ཀན་ལྡན་འདུས་ཀྱི་ནད་རྒྱ་མཚོའི་རྦ་རླབས་འཁྲུགས་པ་བཞིན་དུ་ཐོང་ཞིག །འགོ་བའི་རིམས་ནད་དབྱར་གྱི་ཆར་སྤྲིན་འཐིབས་པ་བཞིན་དུ་ཐོང་ཞིག །ཕན་བྱེད་ཀྱི་སྨན་རྣམས་གནོད་བྱེད་ཀྱི་དུག་ཟོས་པ་བཞིན་དུ་ཐོང་ཞིག །གྲི་མདུང་མཚོན་ཁར་སྦྲང་བུ་མེ་ལ་ལྕེབས་པ་བཞིན་དུ་ཐོང་ཞིག །ཁང་པ་རོ་ཡིས་འགེངས་པ་གཤིན་རྗེའི་ལྕོགས་བརྡུང་ཐོང་ཞིག །རིམས་ནད་ཁྲག་ཏུ་འཛག་པ་མ་མོའི་ལྕོགས་བརྡུང་ཐོང་ཞིག །ཕ་ཚན་གྲི་ཁར་འཆི་བ་བདུད་ཀྱི་ལྕོགས་བརྡུང་ཐོང་ཞིག །ཁ་མིག་ལྟག་པར་སྒྱེལ་བ་གཟའ་ཡི་ལྕོགས་བརྡུང་ཐོང་ཞིག །གདུག་གཟེར་སྦོས་གྲིར་འཆི་བ་བཙན་གྱི་ལྕོགས་བརྡུང་ཐོང་ཞིག །སྨྱོ་འབོག་རང་སྣང་འཁྲུལ་པ་རྒྱལ་པོའི་ལྕོགས་བརྡུང་ཐོང་ཞིག །གྲོང་ཁྱེར་ཁང་པ་གཏིབས་པ་འགོངས་པོའི་ལྕོགས་བརྡུང་ཐོང་ཞིག །མཛེ་ནད་བོལ་མིག་ཡོང་བ་ཀླུའི་ལྕོགས་བརྡུང་ཐོང་ཞིག །དམུ་ཆུ་རྡེ་ནད་འོང་བ་ས་བདག་གི་ལྕོགས་བརྡུང་ཐོང་ཞིག །གག་ལྷོག་སྐྲངས་འབུར་ཡོང་བ་གཉན་གྱི་ལྕོགས་བརྡུང་ཐོང་ཞིག །

གཞང་འབྲུམ་འོན་ལོང་བ་དགྲ་ལྷའི་ལྕོགས་བརྡུང་ཐོང་ཞིག །ཅིར་སྣར་འདྲེ་རུ་མཐོང་བ་མོན་པའི་ལྕོགས་བརྡུང་ཐོང་ཞིག །དཔོན་གཡོག་བཟའ་ཚང་དཀྲུག་པ་རླུང་ལྷའི་ལྕོགས་བརྡུང་ཐོང་ཞིག །ཐོག་དང་སེར་བ་འབེབས་པ་སྡེ་བརྒྱད་ཀྱི་ལྕོགས་བརྡུང་ཐོང་ཞིག །གཞན་ཡང་བརྩིག་པའི་མཁར་ཡོད་ན་རྡོ་རྗེའི་ཐོག་གིས་ཆོམ་ཞིག །སྲུང་བའི་གོ་ཡོད་ན་ཕོ་ཉའི་ལག་གིས་བསྡུས་ཤིང་། །རྡེག་པའི་མཚོན་ཡོད་ན་རང་གཤེད་རང་ལ་ཕོབ་ཅིག །སྐྱོབས་པའི་སྲུང་མ་ཡོད་ན་གནོད་པའི་བདུད་ཕོབ་ཅིག །མཛའ་བའི་གཉེན་བཤེས་ཡོད་ན་སྡང་བའི་དགྲར་བསྒྱུར་ཅིག །བཟླས་པའི་སྔགས་ཡོད་ན་སྡིག་ཅན་རང་ལ་སྡིགས་ཤིག །བསགས་པའི་ནོར་རྫས་ཡོད་ན་བརླག་པའི་གཞིར་བསྒྱུར་ཅིག །རང་སྲོག་རང་གིས་ཆོད་ཅིག །རང་མཚོན་རང་ལ་རྒྱོབ་ཅིག །རང་གཤེད་རང་ལ་ཕོབ་ཅིག །རང་ནུས་རང་ལ་སྨིན་ཅིག །མདོར་ན་ནམ་མཁའ་སྟོང་པ་ལ་ཚད་མ་འཛུག །འཇིག་རྟེན་ཕྱི་མ་ལ་དུས་མ་འདེབས། རང་བཞིན་སྐྱེ་འཆི་ལ་ཁུང་མ་འབྱིན། ལས་ཀྱི་དབང་བཙན་ཞེས་བསྙད་མ་འདོགས། ཁ་རྗེ་བསོད་ནམས་རིམ་གྲོ་དབང་ཐང་བསྐྱབ་པའི་ལྷ་སྲུང་གང་གིའང་

དབང་དུ་མ་གཏོང་། ལོ་དང་ཟླ་བ་ཞག་དང་ཟ་མར་མ་འགྱང་བར། མཐུ་སྟོབས་རྫུ་འཕྲུལ་གྱི་མངའ་བདག་ཁྱེད་རྣམས་ཀྱིས་གནམ་ས་ཙམ་གྱི་ཞལ་ཕྱེས། གངས་རི་ཙམ་གྱི་མཆེ་བ་གཙིགས། གློག་དམར་ལྟ་བུའི་ལྗགས་རྐྱོང་ལ། དགྲ་བགེགས་འདི་རྣམས་ཀྱི་ཤ་ཟོ། ཁྲག་འཐུང་། དབུགས་ལོངས། ལིང་ཐོབ། རྣམ་ཤེས་རྡུལ་བྲལ་དྭངས་མའི་ཐིག་ལེ་ཡེ་ཤེས་རྡོ་རྗེ་སེམས་དཔའི་སྐུ་གསུང་ཐུགས་སུ་སྦྱོར་ལ། གཟུགས་ཕུང་འཁྲུལ་རྟོག་བག་ཆགས་འཁོར་བའི་རྟེན་གཞི་དང་བཅས་པ་ཐམས་ཅད་མིང་ཙམ་བརྡ་ཙམ་མ་ལུས་པར་རྗེས་མེད་ཐལ་བའི་རྡུལ་ཕྲན་སྐད་ཅིག་ཡུད་ཙམ་ལ་བརླག་པའི་ཕྲིན་ལས་མཛོད་ཅིག །[ཅེས་དམོད་བཅོལ་ནན་ཏན་དུ་བྱའོ། །ཞེས་པའང་ཉེ་བར་མཁོ་བའི་ཡན་ལག་ཏུ། དུས་ངན་གྱི་སྔགས་ནག་གདུག་པ་ཅན་འཇིགས་བྲལ་ཡེ་ཤེས་རྡོ་རྗེས་སྔོན་གྱི་རིག་སྔགས་གྲུབ་པའི་དཔའ་བོ་རྣམས་ཀྱི་གསུང་རྒྱུན་ལ་གཞི་བྱས་ཏེ་འཇུག་པ་བདེ་བའི་མཚམས་སྦྱོར་དུ་སྤེལ་བ་ཛ་ཡནྟུ།། །།]

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྨད་ལས་དགྲ་བགེགས་སྒྲོལ་བའི་ལས་རིམ་ཁྲག་འཐུང་ཁྲོས་པའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྨད་ལས་དགྲ་བགེགས་སྒྲོལ་བའི་ལས་རིམ་ཁྲག་འཐུང་ཁྲོས་པའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྨད་ལས་དགྲ་བགེགས་སྒྲོལ་བའི་ལས་རིམ་ཁྲག་འཐུང་ཁྲོས་པའི་དགའ་སྟོན་ཅེས་བྱ་བ། ཁྱབ་བདག་བླ་མ་བདུད་འདུལ་ཧེ་རུ་ཀ་དང་གཉིས་སུ་མེད་པའི་ཞབས་ལ་ཕྱག་འཚལ་ལོ། །ཞི་བ་ཆེན་པོ་སྙིང་རྗེའི་ཡེ་ཤེས་དངོས་པོ་མེད་ལས་དངོས་པོའི་སྤྲིན། །གདུལ་དཀའི་འགྲོ་ངོར་མི་བཟད་རབ་ཁྲོས་དྲག་ཤུལ་གོམ་པས་ས་གསུམ་གཡོ། །སངས་རྒྱས་ཀུན་གྱི་ཕྲིན་ལས་སྟོབས་དཔལ་འབར་བའི་ཕྱག་རྒྱ་ལྷག་པའི་ལྷ། །ཧེ་རུ་ཀ་དཔལ་དཔའ་བོ་དེ་ཡིད་བདུད་སྡེའི་ཀླད་པ་འགེམས་པར་མཛོད། །མ་རུང་ཕས་རྒོལ་

བདུད་སྡེའི་བྲག་རི་འབུམ། །སྐད་ཅིག་ཙམ་ལ་ཐལ་བར་བསྙིལ་བྱེད་པའི། །མངོན་སྤྱོད་ལས་རིམ་གནམ་ལྕགས་འཁྲུལ་འཁོར་ནི། །བདུད་འདུལ་ཁྲག་འཐུང་ཁྲོས་པའི་དགའ་སྟོན་སྤྲོ། །[དེའང་བླ་ན་མེད་པའི་བྱང་ཆུབ་མངོན་དུ་བྱེད་པ་ལ་གནས་སྐབས་དང་མཐར་ཐུག་གི་འགལ་རྐྱེན་བར་ཆད་ཀྱི་གཡུལ་ཐམས་ཅད་ལས་རྣམ་པར་རྒྱལ་བའི་ཕྲིན་ལས་ཀྱི་སྦྱོར་བ་ཐམས་ཅད་ཀྱི་རྩ་བ་སྨད་ལས་ལ་བརྟེན་ནས་དགྲ་བགེགས་སྒྲོལ་བའི་ཐབས་མངོན་སྤྱོད་དྲག་པོའི་ལས་ཀྱི་རིམ་པ་ལ་སྤྱི་དོན་རྣམ་པ་གསུམ་སྟེ། དམིགས་པར་བྱ་བའི་ཡུལ། སྒྲུབ་པར་བྱེད་པའི་ཐབས། དེ་ཉིད་གྲུབ་པའི་འབྲས་བུའོ། །][དང་པོ་གང་ལ་དམིགས་པར་བྱ་བའི་ཡུལ་ནི། ཞིང་བཅུ་ཚང་ཞིང་ཉམས་པ་བདུན་དང་ལྡན་པའི་ཡུལ་ལ་སྙིང་རྗེ་ཆེན་པོའི་བློས་ཡོངས་སུ་བཟུང་ནས་དམིགས་པར་བྱ་བའོ། །] [

གཉིས་པ་གང་གིས་སྒྲུབ་པར་བྱེད་པའི་ཐབས་ནི། ལྟ་བའི་གདེང་དང་ལྡན་ཅིང་བསྙེན་སྒྲུབ་ལས་གསུམ་ལ་དྲོད་ཚད་བརྙེས་པའི་སྔགས་པས། དཔའ་བརྟུལ་ཆེ་བ་དྲག་པོའི་འཁོར་དང་ལྷན་ཅིག །གནག་ཅིང་རྩུབ་ལ་གཉན་པ་མངོན་སྤྱོད་དང་རྗེས་སུ་མཐུན་པའི་གནས་སུ། །སྒྲུབ་རྫས་སྤྱི་དང་ཁྱད་པར་སྨད་ལས་ལ་དགོས་པའི་ཡོ་བྱད་ཐམས་ཅད་ཚང་བར་བསགས་ཏེ། མར་ངོའི་གཟའ་སྐར་ཚེས་གྲངས་སོགས་དྲག་ཅིང་རྩུབ་པའི་དུས་སམ་གློ་བུར་གྱི་ཚེ་ནའང་རུང་སྟེ་ནམ་སྐབས་སུ་བབས་པ་ན་ལས་ལ་སྦྱོར་བ་ཡིན་ནོ། །དེའི་ཚུལ་ལ་གསུམ། སྦྱོར་བ་ཡོ་བྱད་ཀྱི་ཤོམ། ཆོ་གའི་རིམ་པ་དངོས། རྗེས་ཀྱི་བྱའོ། །][དང་པོ་སྦྱོར་བ་ཡོ་བྱད་ཀྱི་ཤོམ་ནི། གང་དུ་བྱ་བའི་གནས་དེར་དཔལ་ཆེན་པོ་དམ་ཅན་དང་བཅས་པའི་སྐུའི་རྟེན་དགྲམ། ཡོལ་བ་བླ་བྲེ་རྒྱལ་མཚན་འཕན་གདུགས་ལྡ་ལྡི་གོ་མཚོན་སོགས་སྤྱན་གྱི་གཟིགས་མོ་ངོ་མཚར་བའི་རྒྱན་གྱི་ཁྱད་པར་ཇི་སྙེད་པ་མཛེས་ཤིང་བརྗིད་ཆགས་པར་བསྟར། སྟེགས་བུ་མཐོ་བ་ལ་བླ་མ་ཡི་དམ་ནས་གཞི་བདག་གཏོར་མའི་བར་མཆོད་པ་དང་བཅས་པ་སྤྱི་ལྟར་བཤམ། ལས་དཀྱིལ་གྱི་གཞི་དེར་དུག་ཁྲག་གིས་ཆག་ཆག་གདབ་པར་ཐིག་ཆེན་བརྒྱད་སྤྱི་ལྟར་བཏབ་རྗེས་ཁྲུ་གང་ལས་མི་ཆུང་བ་ཟླུམ་པོར་བསྐོར་ལ་སྐོར་ཐིག་དང་ཤར་གྱི་ཚངས་ཐིག་འཕྲད་མཚམས་ནས་བཟུང་སྟེ་ནུབ་བྱང་གི་ཟུར་ཐིག་དང་བྱང་གི་རྩ་ཐིག་བར་གྱི་ཟླུམ་ཐིག་ཆ་གསུམ་དུ་བསྒོས་པའི་ཆ་གཉིས་བྱང་དང་ཆ་གཅིག་ནུབ་ཏུ་བོར་བའི་འཕྲད་མཚམས་ནས་ཆོས་འབྱུང་གི་གཡོན་གྱི་ལོགས་ཐིག་བཏབ། དེ་བཞིན་དུ་ལྷོ་དང་ལྷོ་ནུབ་ཀྱི་བར་ལ་ལ་གཡས་དང་། དེ་གཉིས་རྩེ་སྦྲེལ་བས་རྒྱབ་ཀྱི་ལོགས་ཐིག་འབྱུང་ངོ་། །ཟུར་གསུམ་དུ་སོར་གཉིས་རེ་བསྣན་པའི་རྩེ་རྣམས་སྦྲེལ་ཏེ་མུ་རན་དང་། དེའི་ཕྱིར་མེའི་ར་བ་གྲུ་གསུམ་ཆེ་ཆུང་ཇི་ལྟར་འོས་པ། ཆོས་འབྱུང་གི་ནང་གི་གྲྭ་གསུམ་ནས་ཟླུམ་ཐིག་ལྔ་བསྐོར་བ་ལ། མུ་ཁྱུད། རྩིབས་བཅུ། རྩིབས་བཞི་

ཐོད་པ། ལྟེ་བ་དང་། དབུས་སུ་ཆོས་འབྱུང་གི་གྲྭ་མདུན་བསྟན་མུ་རན་དང་བཅས་པའི་ཐིག་བཏབ། རྒྱས་པ་ལ་དགའ་ན་ཆོས་འབྱུང་གི་ཕྱི་རོལ་རྡོར་མེ་རིས་ཀྱང་བསྐོར། རྡུལ་ཚོན་དགྱེ་བ་ནི། ཆོས་འབྱུང་གི་ནང་ནག་པོ། མུ་རན་སྔོན་པོ། ཟླ་གམ་ཁྲག་མཚོ། མུ་ཁྱུད་ཐོད་སྐམ། རྩིབས་བཞི་རྩིབས་བཅུ་སེར་པོ། རྩིབས་མཆན་ཁྲག་མཚོ། མུ་ཁྱུད་ཕྱི་མ་དམར་སེར། ཆོས་འབྱུང་དང་མུ་རན་སྔར་བཞིན། མེ་རི་དམར་སེར་འབར་བ། རྡོ་ར་སོགས་ཡོད་ན་སྤྱི་མཐུན། ཆོས་འབྱུང་ལྟེ་བར་ཉི་གདན་ལ་ཁྲོ་བོའི་རྡོ་རྗེ་རྭ་གདེངས་པ། ལྷ་གནས་གཞན་དུ་ས་བོན་ནམ་མེ་ཏོག་ནག་པོའི་ཚོམ་བུ་བཀོད། དཀྱིལ་འཁོར་གྱི་དབུས་སུ་མཉྗིའི་ཁར་ལྕགས་སྣོད་དུ་འབྲུ་ནག་གི་རྗེན་ཕྱེ་ཁྲག་གིས་སྦྲུས་པའི་གཙོ་བོའི་དམར་གཏོར་ཐོག་གཟུགས་རྣོ་དབལ་ཅན་ལ་འཁོར་དམར་གྱི་བཤོས་ཕྲན་ལྔས་བསྐོར་བའི་རྩེ་མོར་སྐུ་རྟེན་བྱ་ཁྱུང་བ་དན་ནག་པོ་མེ་ལོང་བཙུག་པ། ཁྲག་ཀོང་། མཚེ་ཡུངས། རྩང་དམར། ཁྲམ་བྱང་། རྒྱུ་རློན་གྱི་ལྡ་ལྡི་སོགས་དྲག་རྒྱན་རྔམས་བརྗིད་དང་ལྡན་པ་འགོད། དེ་མཐར་ཁྲོ་བོ་བཅུའི་དམར་གཏོར་རང་རང་གི་འཁོར་ཅན་གཙོ་བོ་དང་དབྱིབས་མཚུངས་པ་སོ་སོའི་སྐུ་ཙཀ་བ་དན་གྱིས་སྤུད་པ་རྩིབས་སོ་སོར་འགོད། དེའི་ཕྱི་རོལ་གྱི་ཕྱོགས་བཞིར་སྒོ་སྐྱོང་བཞིའི་གཏོར་མ་དང་། ཆོས་འབྱུང་ཕྱི་མའི་ཟུར་མདུན་མར་ཤྭ་ནམ་བཞི། གཡས་ཟུར་དུ་བདག་ཉིད་མ་བཞི། རྒྱབ་ཏུ་ས་བདག་མ་བཞི། གཡོན་ཟུར་དུ་སྐྱེས་བུ་གིང་བཞི་རྣམས་ཀྱི་བཤོས་བུ་སོ་སོའི་མཐུན་རྫས་ཀྱིས་གཏམས་ཤིང་མདའ་དར་སོགས་རྒྱན་གྱིས་བརྒྱན་པ། ཕྱི་རོལ་དབང་མོ་ཉེར་བརྒྱད་ཀྱི་ཀོང་ཟོར་གྲུ་གསུམ་

དུག་ཁྲག་གིས་བྱུགས་ཤིང་མཚེ་ཡུངས་བཙུག་པ་ལོགས་རེར་བདུན་བདུན་བཀོད། །སྤྲོས་པ་བསྡུ་ན་ཁྲོ་བོ་བཅུ་སོགས་འཁོར་རྣམས་དམར་གྱི་བཤོས་ཕྲན་ལྷ་གྲངས་དང་མཉམ་པ་གཙོ་གཏོར་གྱི་འཁོར་དུ་གོ་རིམ་བཞིན་བཀོད་པས་ཀྱང་རུང་། གང་ལྟར་མཐར་ཁྲག་ཆེན་དང་སྦྱར་བའི་མཆོད་ཡོན། དུག་དང་ཆུ་སེར་སྦྱར་བའི་ཞབས་བསིལ། དབང་པོ་ལྔའི་མེ་ཏོག །ཚིལ་ཆེན་བྱུགས་པའི་སྤོས་རེངས། ཞུན་མར་རམ་མར་ནག་གི་སྒྲོན་མེ། ཆང་ལ་མཁྲིས་ཆེན་སྦྱར་བའི་དྲི་ཆབ། ཤ་རུས་ཀྱི་གཏམས་པའི་བཤོས་བུ་ཟུར་གསུམ་དམར་ནག་སོགས་དྲག་པོའི་མཆོད་པས་གཡས་སུ་བསྐོར། སྒྲུབ་དཀྱིལ་དེའི་ལྷོ་ནུབ་སྲིན་པོའི་ཕྱོགས་སུ་དངོས་སམ་དྲིས་པའི་བྲུབ་ཁུང་མཐའ་མ་རྩང་ཕུར་གྱིས་བསྐོར་བའི་ནང་དུ། དུར་ཁྲོད་ཀྱི་འཇག་མ། གྲོག་མཁར་གྱི་ས། དགྲ་བོའི་ཁང་ས་དང་དྲི་མ་རྣམས་སྦྱར་བའི་ལིངྒ་དབང་པོ་དོད་པ་ཞིག་བྱས་ལ་དེའི་སྙིང་གར་རོ་རས་ལ་དགྲ་སྲོག་སྤུ་གྲིའི་འཁོར་ལོ་བྲིས་བསླན་ཅིང་ཡན་ལག་བྱད་ཐག་སྔོ་དམར་གྱིས་བཅིངས་པའི་སྣེ་མོ་ཐུན་ཕུར་ལ་བཏགས། དེའི་ཉེ་ལོགས་སུ་བྱ་རོག་དང་འུག་པའི་དང་རུ། གུ་གུལ་སོགས་དབྱེ་རྫས། འབེབས་པའི་ཡུངས་དཀར། ཚོན་སྐུད་དང་ཤི་ཡུག་གི་སྐྲའི་བྱད་ཐག །མྱོས་བྱེད་ཀྱི་དུག་ཁྲག །གཙོ་འཁོར་ཡོངས་རྫོགས་ཀྱི་ཕུར་བུ། གྲི་ལྕགས་ཀྱི་རལ་གྲི། ཐོ་བ། ཧོམ་གཟར་དང་བཅས་པ་བཤམས། སྒྲུབ་དཀྱིལ་གྱི་མེ་མཚམས་སུ་ཟོར་གདན་གཡང་གཞིར་རོ་སོལ་གྱིས་ཆོས་འབྱུང་རྒྱར་སོར་ཉི་ཤུ་དཔངས་སོར་གསུམ་པ་འཁོར་ལོ་རྩིབས་བརྒྱད་དང་བཅས་པ་བྲིས་པའི་ལྟེ་བར་མཉྗིའི་ཁར་སྲས་མཆོག་གི་གཏོར་

ཟོར་རཀྟས་བྱུགས་ཤིང་ཡུངས་དཀར་གྱི་གོང་བུ་བཙུག་པ། ལྷོ་ནས་བརྩམས་ཏེ་ཕྱོགས་བཞིའི་རྩིབས་ལ་སྐྱེར་མདའ་ཕུར་གཟུགས་ཚོན་དོ་པ་ཅན་རིམ་བཞིན་འུག་པ། ཁྲ། སྲིན་བྱ། བྱ་རོག་རྣམས་ཀྱི་སྒྲོས་བསྒྲོན་པ་དུག་ཁྲག་གུ་གུལ་ཚིལ་ཆེན་གྱིས་སོ་སོར་བྱུགས་པ་བཞག་ལ་གཤིན་རྗེ་ལ་སོགས་པ་ཕྱོགས་ཀྱི་ཁྲོ་བོ་བཞིར་བསྐྱེད་ཅིང་། ཕྱོགས་གང་བདེར་མི་རྩིབས་ཀྱི་གཞུ་ཞིང་རྒྱུས་ཀྱིས་དྲངས་པའང་བཀོད། ཤར་ལྷོར་རབས་ཆད་ནག་པོའི་ཐོད་པའམ་གཡག་རྒོད་ཀྱི་རྭ་གཡས་པར་མི་ཁྱི་རའི་ཁྲག་དང་དམེ་ཁྲག་སོགས་སྦྱར་བའི་ཁ་རོ་རས་ཀྱིས་བཀབ་པ། ལྷོ་ནུབ་ཏུ་དུར་ཁྲོད་ཀྱི་རྡོ་ལ་དུག་ཁྲག་གིས་བྷྱོ་ཟློག་རྦད་བྲིས་པའི་རྡོ་ཐུན་ཚོན་སྐུད་ཀྱི་སྒུལ་མོ་ཞིང་ལྤགས་ཀྱི་མཐིལ་ཡུག་སྐྲའི་འཇག་ཅན་དང་བཅས་པ། ནུབ་བྱང་དུ་ཕུང་ཤུལ་དུར་ཁྲོད་གཡུལ་བཀྱེ་བ་འདྲེ་ཅན་སོགས་ཕུང་ས་སྣ་ཚོགས་རྔ་མོང་ཁྱི་ཕག་སྤྱང་ཀིའི་བྲུན་དང་དུག་ཁྲག་གིས་སྦྲུས་པའི་ཀོང་བུ་གྲུ་གསུམ་གདེངས་ཀ་ཅན་ཁ་དཔངས་མཉམ་པར་སོར་བཞི་པ་ནང་དུག་ཁྲག་གིས་དམར་པོ་དང་ཕྱི་རོ་སོལ་གྱིས་ནག་པོར་བྱུགས་པ་གསུམ་གྱི་ནང་དུ་ཡུངས་དཀར་གང་བཟང་། བྲག་ནག་ལ་སྐྱེས་པའི་མཚེ། གྲི་ལྕགས་ཀྱི་རལ་གྲི་རྣམས་བཙུག་པ། བྱང་ཤར་དུ་ཐོད་ནག་གླིང་དྲུག་པའམ་ཀོང་བུར་བོང་ང་སྤྱང་ཚེར་རེ་ལྕགས་སྦྱར་དུག་ཐར་ནུ་དྷ་དྷུ་ར་སོགས་དུག་སྣ་མྱོས་བྱེད་དང་སྦྱར་བའི་དུག་ཐུན། མཐའ་སྐོར་དུ་ཟོར་ཀོང་སོ་སོར་ཟངས་ཕྱེ། ལྕགས་ཕྱེ། རྡོ་ཕྱེ། ཉུང་ནག །ཀེ་ཚེ། ཤངས་ཚེ། བྲ་བོ་རྣམས་བླུགས་པ་ལག་ལེན་བཞིན་བཤམ། གཞན་ཡང་ཕྱི་ནང་གི་མཆོད་པ།

ཚོགས་ཀྱི་ལོངས་སྤྱོད། རོལ་མོའི་བྱེ་བྲག་སོགས་ཉེ་བར་མཁོ་བའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱའོ། །][གཉིས་པ་ཆོ་ག་དངོས་ཀྱི་རིམ་པ་ལ་གཉིས། ཏིང་ངེ་འཛིན་གྱི་རྫོང་བཅའ་བ་དང་། དྲག་པོའི་ལས་ཀྱིས་གཡུལ་འགྱེད་པའོ། །དང་པོ་ཏིང་ངེ་འཛིན་རྫོང་བཅའ་བ་ནི། སྐྱབས་སེམས་ཚོགས་བསགས་ནས་བཟུང་སྔོན་འགྲོའི་ལས་རིམ་རྣམས་རྫོགས་པའི་རྗེས་སུ་ཕུར་བུ་བྱིན་གྱིས་རློབ་པ་ལ། ཕུར་བུ་རྣམས་གུ་གུལ་གྱིས་བདུག་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་ཨ་ངྷི་ཏིཥྛ་རྨུགས་ཧ་ལ་ཧ་ལ་དགྲ་བགེགས་འབྱུང་པོའི་ཙིཏྟ་མྱགས་མཱ་ར་ཡ་ཧཱུཾ་ཕཊ༔ [ཡུངས་དཀར་གྱིས་བྲབ་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་མ་གུ་ཏ་ལ་པྲ་ཏ་ལ་པྲ་ཏ་ལ་ཤ་ཏ་རཱ་ཧ་ཧཱཾ་དགྲ་བགེགས་འབྱུང་པོ་མཱ་ར་ཡ་ཧཱུཾ་ཕཊ༔ [རཀྟས་བྱུག་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་རཀྟ་ཛྭ་ལ་མཎྜལ་རཀྵ་རཀྵ་དགྲ་བགེགས་ཝཱ་ཤཾ་མཱ་ར་ཡ་ཧཱུཾ་ཕཊ༔ [ཅེས་བྱུགས་སོགས་གསུམ་གྱིས་གཟི་བྱིན་བསྐྱེད་ལ། ཤུ་ནྱ་ཏས་བསང་སྦྱང་།] སྟོང་པའི་ངང་ལས་ཨེ་ལས་ཕུར་གདན་གྲུ་གསུམ་མཐིང་ནག་འབར་བའི་དབུས་སུ་པད་ཉི་དགྲ་བགེགས་ཀྱི་གདན་ལ་རང་གི་ཐུགས་ཀ་ནས་ཧཱུཾ་སྤྲོས། ཧཱུཾ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ། ཕུར་བུ་དཔལ་ཆེན་རྡོ་རྗེ་གཞོན་ནུ་ཡུམ་དང་བཅས་པའི་སྐུར་གྱུར། [སྙིང་པོ་ལན་བདུན་བཟླས།]

དེ་ཞུ་བ་ལས་བྱུང་བའི་ཕུར་བུར་གྱུར་པའི་མདུད་འོག་མ་ལ་སྒོ་སྐྱོང་། དབལ་ཟུར་ལ་སྲས་མཆོག །ལོགས་གསུམ་ལ་དམ་ཅན་སྲུང་མ་དང་བཅས་པའི་ཕོ་བྲང་དུ་གྱུར་པར་[བསམ་མོ། །དེ་ནས་དངོས་གཞི་ལ། རྒྱུ་ཏིང་ངེ་འཛིན་གསུམ་ལས་འབྲས་བུ་དཀྱིལ་འཁོར་གསུམ་དུ་བསྐྱེད་པའི་ཚུལ་དཀྱུས་བཞིན་ལ་དམིགས་པའི་ཁྱད་པར་དཔེར་ན་བཞིན་གཅིག་ལ་མེ་ལོང་གཉིས་སུ་གཟུགས་བརྙན་སོ་སོར་འཆར་བ་བཞིན་བདག་མདུན་གཅིག་ཅར་དུ་གསལ་བཏབ། སྒོ་མ་བཞིའི་བསྐྱེད་ཚིག་མཇུག་གི་]ཀརྨ་ཀ་ར་ཡེ་ཧཱུཾ་ཕཊ༔ [ཅེས་པའི་མཚམས་སུ་དམ་ཅན་གྱི་དམར་བྱང་གབ་དོན་སྦྱོར་བ་ནི།] ཧཱུཾ༔ རང་བྱུང་ལྷུན་གྲུབ་གསང་ཆེན་དཀྱིལ་འཁོར་གྱི༔ བར་ཁྱམས་གནམ་ལྕགས་འཁོར་ལོའི་རྩིབས་སྟེང་དུ༔ བཀའ་སྡོད་མཐུ་ཆེན་མ་མོ་བཅུ་གཉིས་ནི༔ ཤར་དུ་ཆེ་ཞེ་ཤྭ་ན་སྤྱང་གདོང་ནག༔ ཆིབས་སུ་ལྕགས་ཀྱི་སྤྱང་མོ་མགོ་དགུ་ཞོན༔ ཕྱག་གཡས་ཐོད་དབྱུག་གཡོན་པས་ལྕགས་ཕུར་འདྲིལ༔ ལྷོ་རུ་སྲི་ཀ་འཕར་གདོང་ཆེན་མོ་སེར༔ ཆིབས་སུ་གསེར་གྱི་འཕར་བ་ལྕེ་བརྒྱད་ཞོན༔ ཕྱག་གཡས་ལྕགས་ཀྱུ་གཡོན་པས་གསེར་ཕུར་འདྲིལ༔ ནུབ་

ཏུ་སྲི་ལ་ཝ་གདོང་ཆེན་མོ་དམར༔ ཆིབས་སུ་ཟངས་ཀྱི་ཝ་མོ་རྐང་གསུམ་ཞོན༔ ཕྱག་གཡས་རྡོ་རྗེ་གཡོན་པས་ཟངས་ཕུར་འདྲིལ༔ བྱང་དུ་ཀུ་ཀུ་མུ་ཁ་སྐུ་མདོག་ལྗང་༔ གཡུ་ཡི་ཁྱི་མོ་རལ་པ་ཅན་ལ་ཞོན༔ ཞིང་ཆུང་མགོ་ནས་འཇོམས་ཤིང་གཡུ་ཕུར་འདྲིལ༔ ཀུན་ཀྱང་གཅེར་བུ་རལ་པའི་ཅོད་པན་ཅན༔ རལ་པ་རང་མདོག་ཕུར་པ་དག་གིས་བརྒྱན༔ རང་འདྲའི་ལས་བྱེད་བུད་མེད་འབུམ་སྡེ་འགྱེད༔ ཤར་སྟོད་ཆེ་ཞེ་དཔལ་ལྡན་རེ་མ་ཏཱི༔ མཐིང་ནག་གཡས་གཉིས་མེ་ལོང་སྦྲུལ་ཞགས་ཐོགས༔ གཡོན་གཉིས་ཁ་ཊྭཾ་གནམ་ལྕགས་ཕུར་པ་འདྲིལ༔ གཡང་གཞི་གསོལ་ཞིང་རལ་པས་སྟོང་གསུམ་ཁེབས༔ ཆིབས་སུ་མྱུར་མགྱོགས་དྲེལ་རྟ་རྐང་གསུམ་ཆིབས༔ ལྷོ་སྟོད་དཔལ་ལྡན་ལྷ་མོ་རེ་མ་ཛུ༔ སྐུ་མདོག་སེར་ནག་སྨན་ཤ་ཡུ་མོ་ཆིབས༔ ཕྱག་གཉིས་གསེར་ཟོར་གཡུ་ཡི་སྒྲོམ་བུ་བསྣམས༔ གོས་སུ་རབ་མཛེས་རྨ་བྱའི་ཐུལ་པ་གསོལ༔ ནུབ་སྟོད་མ་བདུད་ཀུན་གཙོ་རེ་མ་ཛུ༔ སྐུ་མདོག་དམར་ནག་ཆུ་གླང་ནག་པོ་ཆིབས༔ ཕྱག་གཡས་ལྕགས་ཀྱུ་གཡོན་པས་ཐོད་ཁྲག་བསྣམས༔ གོས་སུ་རེ་ལྡེ་ནག་པོའི་ཝྭ་བ་གསོལ༔ བྱང་སྟོད་སྒྲོལ་བྱེད་དཔལ་འབར་རེ་མ་

ཛི༔ སྐུ་མདོག་ལྗང་ནག་རྔ་མོང་གྭ་པ་ཆིབས༔ ཕྱག་གཉིས་ཁྲམ་ཤིང་ཚོན་གྱི་གྲུ་གུ་བསྣམས༔ གོས་སུ་རབ་མཛེས་ཆུ་དར་ལྭ་བ་གསོལ༔ ཀུན་ཀྱང་རབ་ཁྲོས་བསྟན་དགྲའི་སྲོག་ལ་རྔམས༔ སྤྲུལ་པའི་རེ་ཏཱི་སྟོང་རྩ་ལས་ལ་འགྱེད༔ སྲིད་པའི་ལེགས་ཉེས་ཀུན་གྱི་དབང་མོར་བསྐྱེད༔ ཤར་སྨད་ཆེ་ཞེ་ས་བདག་ཆེན་མོ་ནི༔ རྡོ་རྗེ་ཡ་བྱིན་མཐིང་ནག་གཡུ་འབྲུག་ཆིབས༔ ཕྱག་གཡས་ལྕགས་ཀྱུ་གཡོན་པས་གདབ་ཕུར་བསྣམས༔ གོས་སུ་མཐིང་ནག་དར་གྱི་བེར་ཆེན་གསོལ༔ ལྷོ་སྨད་རྡོ་རྗེ་དེ་བྱིན་ཆེན་མོ་ནི༔ སྐུ་མདོག་སེར་མོ་ཆུ་སྲིན་ཁམ་པ་ཆིབས༔ ཕྱག་གཉིས་གསེར་ཞགས་གཟུག་མོ་བྱི་ཐུར་བསྣམས༔ གོས་སུ་དར་ནག་བེར་ཆེན་བརྗིད་པར་གསོལ༔ ནུབ་སྨད་རྡོ་རྗེ་བསྭེ་བྱིན་ཆེན་མོ་ནི༔ སྐུ་མདོག་དམར་ནག་གློག་དམར་འཇིགས་ལ་ཆིབས༔ ཕྱག་གཉིས་ལྕགས་སྒྲོག་མི་ལག་མཆོག་ཕུར་བསྣམས༔ གོས་སུ་ལེ་བརྒན་འཇོལ་བེར་ལྷུབ་ཆེན་གསོལ༔ བྱང་སྨད་རྡོ་རྗེ་ཕག་བྱིན་ཆེན་མོ་ནི༔ སྐུ་མདོག་ལྗང་ནག་ཆུ་རྟ་སྔོན་པོ་ཆིབས༔ ཕྱག་གཉིས་དྲིལ་བུ་སེང་ལྡེང་ཕུར་པ་འདྲིལ༔ གོས་སུ་སྔོ་ནག་དར་གྱི་བེར་ཆེན་གསོལ༔

ཀུན་ཀྱང་སྣང་སྲིད་ཀུན་ལ་མངའ་དབང་བསྒྱུར༔ སྤྲུལ་པའི་བསྭེ་མོ་ཉིས་བརྒྱ་ལྔ་བཅུ་འགྱེད༔ སྒྲུབ་ལ་བརྩེ་ཞིང་དམ་ཚིག་ལས་རྗེས་གཅོད༔ ཞིང་བཅུའི་སྲོག་གི་གཤེད་མར་ལྷུན་གྱིས་གྲུབ༔ ཤར་སྒོར་སྒྲོལ་གིང་དུང་གི་སྐྱེས་བུ་ནི༔ ཕྱག་གཉིས་ཤེལ་གྲི་ཤེལ་གྱི་ཕུར་བུ་འདྲིལ༔ སྤྱང་དཀར་སློག་པ་གསོལ་ཞིང་སེང་གེ་ཆིབས༔ རང་འདྲའི་ལས་མཁན་དཔག་མེད་ཁྲ་ཐབས་འགྱེད༔ ལྷོ་སྒོར་ལྕགས་ཀྱི་སྐྱེས་བུ་སྔོ་ནག་འཇིགས༔ ཕྱག་གཡས་རལ་གྲི་གཡོན་པས་ལྕགས་ཕུར་འདྲིལ༔ དར་ནག་བེར་གསོལ་ལྕགས་སྤྱང་སྔོན་པོ་ཆིབས༔ རང་འདྲའི་ལས་མཁན་ཁྲི་འབུམ་ལས་ལ་འགྱེད༔ ནུབ་སྒོར་བསྭེ་ཡི་སྐྱེས་བུ་དམར་ནག་རྔམས༔ ཕྱག་གཡས་ཟངས་གྲི་གཡོན་པས་ཟངས་ཕུར་འདྲིལ༔ དབང་གི་བསྭེ་ཁྲབ་གསོལ་ཞིང་མེ་རྟ་ཆིབས༔ དབང་སྡུད་ལས་ཀྱི་ཕོ་ཉ་འབུམ་གྱིས་བསྐོར༔ བྱང་སྒོར་ཏ་ཀི་ནག་པོ་མེ་དབལ་འཇིགས༔ སྐུ་མདོག་སྔོ་ནག་གྲི་གུག་ཐོད་ཁྲག་བསྣམས༔ ལྕགས་ཁྲབ་གསོལ་ཞིང་ལྕེ་སྤྱང་སྔོན་པོ་ཆིབས༔ འཁོར་དུ་ལས་མཁན་བདུད་ནག་འབུམ་གྱིས་བསྐོར༔ ཀུན་ཀྱང་སྒྲུབ་པ་པོ་ལ་གདུང་ཞིང་བརྩེ༔ དགྲ་བགེགས་གནོད་བྱེད་སྒྲོལ་

བའི་ལས་ལ་བརྩོན༔ དཀྱིལ་འཁོར་ཆེན་པོའི་ཕྱི་ཁྱམས་ཁོར་ཡུག་ཏུ༔ དབང་ཕྱག་ཆེན་མོ་ཉི་ཤུ་རྩ་བརྒྱད་དང་༔ མ་སྲིང་ལངྐ་དུར་ཁྲོད་མཁའ་འགྲོ་སོགས༔ བཀའ་སྡོད་དམ་ཅན་རྒྱ་མཚོ་སྤྲིན་ལྟར་གཏིབས༔ ཨོཾ་སརྦ་མ་ཧཱ་གུ་རུ་དེ་ཝ་ཌཱ་ཀི་ནཱི༔ བཛྲ་ཀཱི་ལི་ཀཱི་ལ་ཡ༔ སརྦ་དྷརྨ་པཱ་ལ༔ སརྦ་ཀྵེ་ཏྲ་པཱ་ལ༔ སརྦ་ལོ་ཀ་པཱ་ལ༔ བཛྲ་ས་མ་ཏི་སྟྭཾ༔ [ཞེས་སྦྱར། དབང་བསྐུར་བྱིན་བརླབ་ནས་བསྟོད་པའི་བར་དཀྱུས་བཞིན་ལས། བཟླས་པའི་ཚེ་སྐུ་གསུང་ཐུགས་ལ་དམིགས་པའི་ཛཔ྄་དགོངས་སོགས་ཡེ་ཤེས་ཀྱི་ལྷ་ཉེ་བར་བསྙེན་པ་གཞུང་བཞིན་དང། སྲུང་འཁོར་གྱི་དམིགས་པ་ནི།] སྲུང་འཁོར་གྱི་མེ་རིའི་ནང་དུ་མཚོན་ཆ་ལྔའི་གུར་ཁང་། དེའི་ནང་དུ་མཚམས་གཅོད་ཀྱི་ཁྲོ་བོ་འབར་བའི་གུར་ཁང་། དེའི་ནང་དུ་ཐབས་ཤེས་དབྱངས་གསལ་ཉི་ཟླའི་གུར་ཁང་རྣམས་ཀྱིས་རིམ་པར་དཀྲིགས་ཏེ་བར་ཆད་གང་གིས་ཀྱང་མི་ཕྱེད་པའི་དབུས་སུ་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་གསལ་བའི་གཙོ་བོའི་ཡེ་ཤེས་སེམས་དཔའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཧཱུཾ་མཐིང་ནག་གི་ཐིག་ལེར་བླ་མ་སློབ་དཔོན་ཁོག་པར་རང་གཞན་བསྲུང་བྱ་མཐའ་དག་ཚུད་པར་[བསམ་ཞིང་སྒོ་གསུམ་སྲུང་བའི་དམིགས་གནད་དང་

བཅས་འབྲུ་དགུའི་ཤམ་དུ།] མ་མ་ཀཱ་ཝཱ་ཙི་རཀྵ་ཀུ་རུ་བྷཱུྃ༔ [ཞེས་བཏགས་པ་ཅི་ནུས་སུ་བཟླ། དམ་ཅན་ཉེ་བར་བསྙེན་པ་ནི།] རང་ཉིད་དཔལ་ཆེན་པོའི་ཐུགས་ཀ་ནས་འབར་བའི་འོད་ཟེར་བསམ་གྱིས་མི་ཁྱབ་པ་འཕྲོས་པ་འཁོར་གྱི་དམ་ཅན་རྣམས་ལ་ཕོག །སྔོན་གྱི་ཐ་ཚིག་གནད་ནས་བསྐུལ་ཏེ་དྲག་པོའི་ལས་ལ་རྔམས་ཤིང་རིངས་པའི་ཚུལ་དུ་འདུག་པ་ལ། སླར་ཡང་སྔགས་ཀྱི་འོད་ཟེར་རྩུབ་ཅིང་གདུང་བས་རང་དབང་མེད་པར་དྲག་ཏུ་བསྐུལ་ཏེ་ཤ་ཁྱི་ཚོམ་ནས་བཀྱེ་བའམ་བྱ་གཅན་ཤ་ལ་རུབ་པ་ལྟར་ལས་བྱེད་པར་ [བསམ་ལ་བཞི་སྙིང་གཅིག་དྲིལ་གྱི་སྔགས་ཉིད་དྲག་ཏུ་བཟླ་ཞིང་། ཁྱད་པར་ངན་སྔགས་ཉེ་བར་བསྙེན་པ་ཕྲིན་ལས་ལ་དམིགས་པ་དྲག་པོའི་བཟླས་པ་བྱེ་བྲག་ཏུ་བྱ་བ་ནི།] རང་ཉིད་དཔལ་ཆེན་པོ་འཁོར་བཅས་སུ་ལྷག་པར་གསལ་བས། ཨོཾ་བཛྲ་ཀཱི་ལ་ཀཱི་ལ་ཡ་སརྦ་བིགྷྣཱན་བཾ་དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ༔ [ཅེས་བརྗོད་པས།] ཐུགས་ཀའི་ས་བོན་ལས་སྔགས་ཀྱི་འོད་ཟེར་ལྗང་ནག་བ་ཐག་གཟེངས་པ་ལྟ་བུ་ཕྱོགས་བཅུར་འཕྲོས་པའི་རྩེ་ལས་སྲས་མཆོག་ལྟ་བུའི་ཁྲོ་བོའི་སྤྲུལ་པ་བསམ་གྱིས་མི་ཁྱབ་པ་སྤྲོས། སྟོང་གསུམ་ཐམས་ཅད་གང་། དངོས་སྣང་སྐུ། སྒྲ་གྲགས་གསུང་། རྟོག་ཚོགས་ཐུགས་སྒྲོལ་བྱེད་དུ་གསལ་བས་

དཀྱིལ་འཁོར་གསུམ་སོགས་བདེ་བར་གཤེགས་པ་ཐམས་ཅད་ཀྱི་ཐུགས་དམ་བསྐངས། སྲུང་མ་དམ་ཅན་ཐམས་ཅད་ཀྱི་སྲོག་གཅུད་ལ་ཕབ་ནས་སྒྲོལ་བའི་ལས་ལ་བཙུད། རྣལ་འབྱོར་པ་ཐམས་ཅད་ཀྱི་གཡར་དམ་སོར་བསྩལ། སེམས་ཅན་ཐམས་ཅད་ཀྱི་དོན་བྱས། བླ་ན་མེད་པའི་གནས་སུ་བསྒྲལ། གཟས་པོའི་གནས་སུ་འཕྲོས་པས་གང་ལ་བྱ་བ་དེ་དག་བཀུག་ནས་ལིངྒ་ལ་བསྟིམས་པས་དངོས་སུ་གྱུར་ནས་འཁུ་མི་ནུས་པར་འབྲུབ་ཁུང་དུ་གསལ། འོད་ཟེར་སླར་འདུས་ནས་བདག་དང་ཕུར་བུ་རྣམས་ལ་ཐིམ་པས་གཟི་བརྗིད་དང་མཐུ་སྟོབས་དཔག་མེད་དུ་གྱུར། འཕྲོས་པའི་ཁྲོ་བོ་ཕུར་བུའི་གཟུགས་ཅན་རྣམས་བསྒྲལ་བྱའི་ཞིང་རྣམས་ལ་བཏབ་པའི་སྤྱི་གཙུག་ནས་རྐང་མཐིལ་དུ་ཕྱུང་ལུས་བསྒྲལ། ལྕེ་སྟེང་ནས་ལྐོག་མར་ཕྱུང་ངག་བསྒྲལ། སྙིང་གར་ཐོག་ལྟ་བུར་ལྷུང་བས་སྲོག་རྩ་ཐལ་བར་བྱས་སེམས་ཀྱི་བག་ཆགས་བསྒྲལ། མདོར་ན་ཕུར་བུའི་ཆར་རྒྱུན་མ་ཆད་པར་ལྷུང་བས་དགྲ་བགེགས་ཀྱི་སྒོ་གསུམ་ལོངས་སྤྱོད་དང་བཅས་པ་ཐམས་ཅད་ཕྱེ་མར་བརླག་པར་ [བསམ་ཞིང་། སྤྲོ་ན་གཙོ་འཁོར་སོ་སོའི་སྔགས་ལ་

ཕྲིན་ལས་ཀྱི་སྤེལ་སྔགས་གོང་བཞིན་སྦྱར་ཏེ་བཟླ་བའམ། ཆིག་ཆོད་དུ་སྤུ་གྲིའི་དྲག་སྔགས་འདུས་པ་ཉིད་དྲག་ཏུ་བཟླའོ། །དེ་ནས་ཆོས་སྐྱོང་སྤྱི་སྒོས་ཀྱི་གཏོར་མའི་ཆོ་ག་དང་། ཚོགས་ཀྱི་མཆོད་པ་བྱིན་གྱིས་བརླབ་པ་ནས་བར་པ་བཤགས་པའི་མཐར་ཐུག་པར་བཏང་ངོ་། །][གཉིས་པ་དྲག་པོའི་ལས་ཀྱིས་གཡུལ་འགྱེད་པ་ལ། སྔོན་དུ་བྱ་བ་བཞི། བར་དུ་བྱ་བ་ལྔ། རྗེས་སུ་བྱ་བ་དྲུག་གི །སྔ་མར་ཐུགས་དམ་བསྐུལ་བ། གསེར་སྐྱེམས་འབུལ་བ། མཁྱེན་དཔང་གསོལ་བ། བདེན་པ་བརྡར་བ་དང་བཞི་ལས། དང་པོ་ཐུགས་དམ་བསྐུལ་བ་ནི།] བླ་མ་རིག་འཛིན་དཀྱིལ་འཁོར་གསུམ་གྱི་ལྷ་ཚོགས་དམ་ཅན་སྲུང་མ་དང་བཅས་པ་ཐམས་ཅད་སྔོན་གྱི་ཐུགས་དམ་ལས་བཞེངས་ཏེ་རྔམས་པའི་ཧཱུཾ་སྒྲ་དིར་གྱིས་མངོན་སྤྱོད་དྲག་པོའི་ལས་ལ་ཆས་པར་ [བསམ་ཞིང་། ཐོག་མར་རིག་འཛིན་བསྐུལ་བ་ནི།] ཧཱུཾ༔ བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔ རིག་འཛིན་རྣམས་ཀྱི་དུས་ལ་བབ༔ ཕུར་བུ་སྒྲུབ་པའི་གྲོགས་མཛོད་ཅིག༔ སློབ་དཔོན་པདྨ་འབྱུང་གནས་ཀྱིས༔ རྒྱ་གར་ཙན་དན་ནགས་ཚལ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ པཎ་ཆེན་བི་མ་མི་ཏྲ་ཡིས༔ གངྒཱ་ལྷ་ཡི་ཆུ་བོ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་

བུ་སྒྲུབ་པའི་གྲོགས་མཛོད་ཅིག༔ བལ་པོ་ཤཱི་ལ་མཉྗུ་ཡིས༔ མནྡྷ་ལ་ཡི་མཁར་སྒོང་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ མཁར་ཆེན་ཡེ་ཤེས་མཚོ་རྒྱལ་གྱིས༔ དགུང་གི་ཕོ་རོག་ནག་པོ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ མིང་པོ་དཔལ་གྱི་དབང་ཕྱུག་གིས༔ རྩིབས་ཀྱི་སྤྱང་ཀི་སྔོན་པོ་ལ༔ གནམ་ལྕགས་འབར་བའི་བྲག་ལོགས་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ ཁྲག་འཐུང་བདུད་འཇོམས་དཔའ་བོ་ཡིས༔ གནམ་ལྕགས་འབར་བའི་བྲག་ལོགས་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ གཞན་ཡང་རིག་འཛིན་བརྒྱུད་པའི་ཚོགས༔ ཕྲིན་ལས་དྲག་རྩལ་ཅན་རྣམས་ཀྱིས༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི་གྲོགས་མཛོད་ཅིག༔ མ་གཡེལ་མ་གཡེལ་རིག་འཛིན་རྣམས༔ སྔོན་གྱི་ཐུགས་དམ་རྗེས་དགོངས་ལ༔ མཐུ་རྩལ་ནུས་པའི་དཔུང་བསྐྱེད་ཅིང་༔ བྱིན་གྱིས་བརླབ་ཕྱིར་གཤེགས་སུ་གསོལ༔ [དཀྱིལ་འཁོར་རྩ་བའི་ལྷ་རྣམས་བསྐུལ་བ་ནི།] ཧཱུཾ༔ དུར་ཁྲོད་མེ་རི་འབར་བའ་གནས་མཆོག་ནས༔ གྲུ་གསུམ་མཐིང་ནག་འབར་བའི་ཀློང་དཀྱིལ་ན༔ བདུད་དང་རཱུ་དྲ་བརྫིས་པའི་གདན་སྟེང་དུ༔ ཁྱབ་བདག་སྤྱི་དཔལ་རྡོ་རྗེ་

སྲིན་པོའི་སྐུ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་ཆེ༔ བཞེངས་ཤིག་བསྐུལ་ལོ་ཐུགས་དམ་གནད་ནས་བསྐུལ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ ཐབས་མཁས་ཐུགས་རྗེའི་དབང་གིས་སྐུ་བཞེངས་ཤིག༔ མི་སྲུན་དགྲ་བགེགས་འདུལ་བའི་དུས་ལ་བབ༔ ཤར་ཕྱོགས་ཞི་བ་ལྷུན་གྲུབ་དཀྱིལ་འཁོར་ནས༔ དཔལ་ཆེན་ཁྲོ་རྒྱལ་བཛྲ་ཀཱི་ལ་ཡ༔ བཞེངས་ཤིག་བསྐུལ་ལོ་ཐུགས་དམ་གནད་ནས་བསྐུལ༔ མེ་ལོང་ཡེ་ཤེས་ཀློང་ནས་སྐུ་བཞེངས་ཤིག༔ ལྷོ་ཕྱོགས་རྒྱས་པ་ལྷུན་གྲུབ་གཞལ་ཡས་ནས༔ དཔལ་ཆེན་ཁྲོ་རྒྱལ་རཏྣ་ཀཱི་ལ་ཡ༔ བཞེངས་ཤིག་བསྐུལ་ལོ་ཐུགས་དམ་གནད་ནས་བསྐུལ༔ མཉམ་ཉིད་ཡེ་ཤེས་ཀློང་ནས་སྐུ་བཞེངས་ཤིག༔ ནུབ་ཕྱོགས་དབང་གི་དཀྱིལ་འཁོར་ཆེན་པོ་ནས༔ དཔལ་ཆེན་ཁྲོ་རྒྱལ་པདྨ་ཀཱི་ལ་ཡ༔ བཞེངས་ཤིག་བསྐུལ་ལོ་ཐུགས་དམ་གནད་ནས་བསྐུལ༔ སོར་རྟོག་ཡེ་ཤེས་ཀློང་ནས་སྐུ་བཞེངས་ཤིག༔ བྱང་ཕྱོགས་དྲག་པོའི་དཀྱིལ་འཁོར་ཆེན་པོ་ནས༔ དཔལ་ཆེན་ཁྲོ་རྒྱལ་ཀརྨ་ཀཱི་ལ་ཡ༔ བཞེངས་ཤིག་བསྐུལ་ལོ་ཐུགས་དམ་གནད་ནས་བསྐུལ༔ བྱ་གྲུབ་ཡེ་ཤེས་ཀློང་ནས་སྐུ་བཞེངས་ཤིག༔ ཛཿ དམ་ཚིག་ཐུགས་དམ་ཆེན་པོའི་དུས་ལ་བབ༔ ཡེ་ཤེས་དབྱིངས་ལས་སྤྲུལ་པའི་སྐུར་བཞེངས་པ༔ དཔལ་ཆེན་རྡོ་རྗེ་གཞོན་ནུ་སྤྲུལ་འཁོར་བཅས༔ མ་གཡེལ་མ་གཡེལ་དམ་ཚིག་གཉན་ལ་འདུས༔ མངོན་སྤྱོད་

དྲག་པོའི་ལས་ཀྱིས་དགྲ་བགེགས་སྒྲོལ༔ ཧཱུཾ༔ སྟེང་ཕྱོགས་འཁོར་ལོ་འབར་བའི་རྩིབས་སྟེང་ནས༔ ཧཱུཾ་ཆེན་ཀཱ་ར་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ཤར་ཕྱོགས་འཁོར་ལོ་འབར་བའི་རྩིབས་སྟེང་ནས༔ རྣམ་པར་རྒྱལ་བ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ལྷོ་ཕྱོགས་འཁོར་ལོ་འབར་བའི་རྩིབས་སྟེང་ནས༔ གཤིན་རྗེ་གཤེད་པོ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ནུབ་ཕྱོགས་འཁོར་ལོ་འབར་བའི་རྩིབས་སྟེང་ནས༔ རྟ་མགྲིན་རྒྱལ་པོ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་

གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ བྱང་ཕྱོགས་ཁོར་ལོ་འབར་བའི་རྩིབས་སྟེང་ནས༔ བདུད་རྩི་འཁྱིལ་བ་ཡབ་ཡུམ་སྲས་ཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ཤར་ལྷོ་འཁོར་ལོ་འབར་བའི་རྩིབས་སྟེང་ནས༔ དབྱུག་པོ་སྔོན་པོ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ལྷོ་ནུབ་འཁོར་ལོ་འབར་བའི་རྩིབས་སྟེང་ནས༔ མི་གཡོ་མགོན་པོ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ནུབ་བྱང་འཁོར་ལོ་འབར་

བའི་རྩིབས་སྟེང་ནས༔ འདོད་པའི་རྒྱལ་པོ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྲོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ བྱང་ཤར་འཁོར་ལོ་འབར་བའི་རྩིབས་སྟེང་ནས༔ ཁམས་གསུམ་རྣམ་རྒྱལ་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ འོག་ཕྱོགས་འཁོར་ལོ་འབར་བའི་རྩིབས་སྟེང་ནས༔ ཁྲོ་རྒྱལ་སྟོབས་ཆེན་ཡབ་ཡུམ་སྲས་འཁོར་བཅས༔ བསྐུལ་ལོ་ཐུགས་དམ་གཉེན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ཧཱུཾ༔ འཁོར་བ་ཡོངས་སྒྲོལ་དྲག་པོའི་དཀྱིལ་འཁོར་ནས༔ སྲས་མཆོག་ཁྲ་ཐབས་ཉེར་གཅིག་འཁོར་དང་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་

སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ལས་བཞི་ལྷུན་གྱིས་གྲུབ་པའི་དཀྱིལ་འཁོར་ནས༔ ཡེ་ཤེས་སྒོ་མ་རྣམ་བཞི་འཁོར་དང་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ དམ་ཚིག་སྲོག་ཏུ་ཐེབས་པའི་རྫུ་འཕྲུལ་ཅན། ཕུར་སྲུང་དམ་ཅན་རྒྱ་མཚོ་བཀའ་འཁོར་བཅས༔ བསྐུལ་ལོ་ཐུགས་དམ་གཉན་པོ་གནད་ནས་བསྐུལ༔ བཞེངས་ཤིག་མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་གདོན་བགེགས་ཚོགས་འགུགས་བསྒྲལ་ཕྲིན་ལས་མཛོད༔ ཧོཿ གསོན་ཅིག་དགོངས་ཤིག་རྡོ་རྗེ་ཕུར་པའི་ལྷ༔ བཞེངས་ཤིག་སྒྲུབ་པའི་བུ་ལ་ད་དགོངས་འཚལ༔ མ་རིག་འཁྲུལ་པའི་རཱུ་དྲ་སྟོབས་བཙན་པས༔ ཡེ་ཤེས་གསལ་བའི་སྒྲོན་མེ་སྦུབས་སུ་བསྣུབ༔ ཉོན་མོངས་དུག་ལྔའི་བག་ཆགས་སྟོབས་བཙན་པས༔ དོན་དམ་ཆོས་ཉིད་ཉི་མ་སྤྲིན་གྱིས་བསྒྲིབས༔ བདག་སྣང་གཉིས་འཛིན་འགོང་པོ་སྟོབས་བཙན་པས༔ ཀུན་རྫོབ་བསླུ་མེད་ཟླ་འོད་མུན་དུ་

བསྣུབ༔ ཡུལ་ངན་རྐྱེན་དབང་བདུད་པོ་སྟོབས་བཙན་པས༔ ཆོས་ཕུང་བརྒྱད་ཁྲིའི་སྐར་ཚོགས་ལྐོག་ཏུ་བསྣུབ༔ བཞེངས་ཤིག་བཞེངས་ཤིག་བརྡ་ཁྱབ་ཆོས་དབྱིངས་ལས༔ སྐུར་བཞེངས་འཁོར་བའི་འཁྲུལ་འཁོར་བཤིག་ཏུ་གསལ༔ འཁོར་འདས་གཉིས་མེད་ཀ་དག་ངང་དུ་སྒྲོལ༔ དམ་ཚིག་ཐུགས་དམ་ཆེན་པོའི་དུས་ལ་བབ༔ ཛཿ དགོངས་ཤིག་བདེ་གཤེགས་རྒྱལ་བ་ཡོངས་འདུས་དཔལ༔ ཁྱོད་ཀྱི་སྤྲུལ་པ་ཆེན་པོའི་དུས་ལ་བབ༔ དམ་ཉམས་དགྲ་བགེགས་སངས་རྒྱས་བསྟན་བཤིག་འདི༔ མངོན་སྤྱོད་དྲག་པོས་བསྒྲལ་བའི་དུས་ལ་བབ༔ བདག་ནི་རྩེ་གཅིག་བརྩོན་འགྲུས་ཤུགས་བསྐྱེད་ཅིང་༔ སྲིད་པའི་ཕ་རོལ་བརྒལ་བའི་གྲུ་གཟིངས་བརྩམས༔ འཁོར་བའི་རྒྱ་མཚོ་སྐེམ་བྱེད་དམ་ཆོས་བསྒྲུབ༔ འགྲོ་བའི་དོན་དུ་བྱང་ཆུབ་སྒྲུབ་པ་ལ༔ ཆོས་ཁྲིམས་བཤིག་པའི་བསྟན་དགྲ་དམ་ཉམས་ཀྱིས༔ མ་ཉེས་ཁ་ཡོག་རྐྱེན་ངན་བསླུ་བ་བཏང་། བག་མེད་འཁྲུལ་པའི་ཡུལ་དུ་འཆོར་ཏ་རེ༔ མ་གཡེལ་མ་གཡེལ་ཡེ་ཤེས་སྤྱན་ལྡན་རྣམས༔ མུ་སྟེགས་ལོག་ལྟས་ནང་བསྟན་སྤྱི་ལ་རྒོལ༔ དམ་ལོག་སློབ་བུས་རྡོ་རྗེ་རྒྱལ་པོར་རྒོལ༔ བདུད་སྤྲུལ་སྡིག་

རྗེས་སྐྱེ་འགྲོའི་བདེ་བ་བཅོམ༔ དམ་ཉམས་ཞིང་བཅུས་ཆོས་ཁྲིམས་འཇིག་ལ་ཆས༔ བདག་རྒྱུད་བསྲེག་བྱེད་དགྲ་གདོན་བགེགས་ཚོགས་ལངས༔ བརྣག་པའི་དགྲ་བགེགས་མྱུར་དུ་མི་སྒྲོལ་ན༔ སྟོབས་བཅུ་མངའ་བའི་ནུས་པ་མེད་དམ་ཅི༔ ད་ལྟ་བསྐུལ་བའི་ལས་ལ་མི་དགོངས་ན༔ ཆོས་ཉིད་མི་འགྱུར་བདེན་པ་མེད་དམ་ཅི༔ མངོན་སྤྱོད་དྲག་པོའི་ཕྲིན་ལས་མི་མཛད་ན༔ ཡེ་ཤེས་ལྷ་ལ་ནུས་པ་མེད་དམ་ཅི༔ བདེན་གཉིས་བསྟན་པ་འདི་ལ་མི་དགོངས་ན༔ མཆོག་གསུམ་བདེན་པ་མེད་དམ་རྫུན་དུ་འགྱུར༔ མ་གཡེལ་མ་འགྱང་ཐུགས་དམ་གནད་ནས་བསྐུལ༔ བཞེངས་ཤིག་དགོངས་ཤིག་རྡོ་རྗེ་ཕུར་པའི་ལྷ༔ དུས་ལ་བབ་བོ་དམ་ཚིག་གཉན་ལ་འདུས༔ དམ་ཚིག་ཐུགས་དམ་ཆེན་པོའི་དུས་ལ་བབ༔ སྤྲུལ་པ་ཆེན་པོ་འགྱེད་པའི་དུས་ལ་བབ༔ ཕྱག་བརྙན་ཆེན་པོའི་ཐུགས་དམ་དུས་ལ་བབ༔ མཐུ་རྩལ་ཆེན་པོ་ཕྱུང་བའི་དུས་ལ་བབ༔ སྲས་འཁོར་བཀའ་སྡོད་དཔག་མེད་དུས་ལ་བབ༔ ཕོ་ཉ་ལས་མཁན་ཟ་གསོད་དུས་ལ་བབ༔ དོ་ནུབ་བསྐུལ་བའི་ལས་ལ་རྒྱང་མ་རིང་༔ དོ་ནུབ་བརྣག་པའི་ལས་ལ་མཐུ་མ་ཆུང་༔ དོ་ནུབ་གསོད་བྱེད་ཤན་པ་རྩལ་མ་ཞན༔ དོ་ནུབ་མངགས་པའི་ཕོ་ཉ་

བང་མ་བུལ༔ དོ་ནུབ་དགྲ་གདོན་བགེགས་ཚོགས་མ་ལུས་པ༔ སྟོང་གསུམ་འཇིག་རྟེན་གང་དང་གར་གནས་ཀྱང་༔ རང་དབང་མེད་པར་རཱུ་པ་འདི་ལ་ཁུག༔ འགུགས་འཆིང་སྡོམ་མྱོས་ཕྲིན་ལས་རྣམ་བཞི་མཛོད༔ དབང་པོ་བསྣུབ་ལ་དོན་སྙིང་རྣམ་ལྔ་དྲོངས༔ ཕྲིན་ལས་དུས་ལ་བབ་བོ་ཡེ་ཤེས་ལྷ༔ སྤྲུལ་པས་མངོན་སྤྱོད་ལས་མཛོད་མཐུ་རྩལ་ཅན༔ རྣམ་ཤེས་དབྱིངས་སུ་སྤོར་ཅིག་ཐུགས་རྗེ་ཅན༔ འཁོར་བའི་རྒྱུན་ཐག་ཆོད་ཅིག་བདེ་གཤེགས་རྣམས༔ གཟུགས་ཕུང་རྡུལ་དུ་རློག་ཅིག་སྲུང་མའི་ཚོགས་༔ བཞེངས་ཤིག་དམ་ཚིག་གཉན་གྱིས་ཐུགས་དམ་བསྐུལ༔ དགོངས་ཤིག་དམ་ཚིག་གཉན་ལས་མ་འདའ་བར༔ མཛོད་ཅིག་དམ་ཚིག་དབང་གིས་དགྲ་བགེགས་སྒྲོལ༔ བཅོལ་ལོ་བརྣག་པའི་ལས་ལ་ཕྲིན་ལས་མཛོད༔ [ཅེས་དང་། དམ་ཅན་རྣམས་སྒོས་སུ་བསྐུལ་བ་ནི།] ཛཿབྷྱོ༔ དཔལ་ཆེན་རྡོ་རྗེ་གཞོན་ནུ་ཡི༔ བཀའ་ཡི་སྲུང་མར་དམ་བཅས་ཤིང་། དཀྱིལ་འཁོར་བར་ཁྱམས་སྐྱོང་མཛད་པའི༔ མཐུ་རྩལ་ཅན་རྣམས་གནས་འདིར་བྱོན༔ བྷྱོ༔ ཤྭ་ན་མུ་ཁའི་དུས་ལ་བབ༔ ཤར་ཕྱོགས་འཁོར་ལོའི་རྩིབས་སྟེང་ན༔ ནམ་གྱི་སྲོད་ཀྱི་ཕོ་ཉ་མོ༔

ལྕགས་ཀྱི་སྤྱང་མོ་མགོ་དགུ་མ༔ ཀེའུ་རི་ཤ་ཡི་དབུ་གསུམ་གྱིས༔ ལྷ་བྲན་བརྒྱ་ལ་ལོངས་སྤྱོད་བྱེད༔ ནཱ་ག་དུན་ཏིང་དབུ་གསུམ་གྱིས༔ ཀླུ་བྲན་བརྒྱ་ལ་ལོངས་སྤྱོད་ཅིང་༔ རཀྵ་ཧ་ལིང་དབུ་གསུམ་གྱིས༔ སྲིན་བརྒྱའི་ཤ་ལ་ལོངས་སྤྱོད་བྱེད༔ དེ་ལ་ལྕགས་ཀྱི་མི་མོ་ཞོན༔ གཅེར་བུ་རལ་པའི་ཅོད་པན་ཅན༔ ཁྲམ་བམ་ཐོད་དབྱུག་གཡས་ན་ཕྱར༔ ཐུགས་ཀྱི་ཕུར་པ་གཡོན་ནས་འདེབས༔ སྤྱང་སྐད་འདོན་ཅིང་དགྲ་བགེགས་སྒྲོལ༔ ཞེ་སྡང་འཇོམས་པའི་ཤྭ་ན་མ༔ མ་གཡེལ་མ་འཕང་ལས་མཛོད་ཅིག༔ བྷྱོཿ ལྷོ་ཕྱོགས་འཁོར་ལོའི་རྩིབས་སྟེང་ན༔ གསེར་གྱི་འཕར་བ་ལྕེ་བརྒྱད་མ༔ དུར་ཁྲོད་བརྒྱད་ཀྱི་གནས་སྲུང་ཞིང་༔ རྣམ་ཐར་བརྒྱད་ཀྱི་སྒོ་འབྱེད་ནས༔ རྣམ་ཤེས་ཚོགས་བརྒྱད་གནས་སུ་སྒྲོལ༔ བསམ་པ་ཙམ་གྱིས་གནས་སུ་ཕྱིན༔ སྲྀ་ཀ་ཆེན་མོ་དེ་ལ་ཞོན༔ གཅེར་བུ་རལ་པའི་ཅོད་པན་ཅན༔ འགུགས་པའི་རྡོ་རྗེ་ལྕགས་ཀྱུ་གཡས༔ ཡེ་ཤེས་ཐུགས་ཀྱི་ཕུར་པ་གཡོན༔ མི་སྡུག་ངག་གི་གསུང་སྒྲ་ཅན༔ ཐུགས་ནི་སྒྲོལ་བྱེད་སྲོག་དང་བཅས༔ སྐད་ཅིག་ཡུད་ལ་དབྱིངས་ནས་བཞེངས༔ དགྲ་བགེགས་

ཁུག་ལ་ད་སྒྲོལ་ཅིག༔ བྷྱོ༔ ནུབ་ཕྱོགས་འཁོར་ལོའི་རྩིབས་སྟེང་ན༔ ཟངས་ཀྱི་ཝ་མོ་རྐང་གསུམ་མ༔ ཝ་མོའི་རྒྱུག་ཚུལ་ཞུངས་སེ་ཞུང༔ ཝ་སྐད་སྒྲ་འབྱིན་ཙེ་རེ་རེ༔ སྐུ་ནི་མེ་རི་མཆེད་པ་འདྲ༔ མཇུག་མ་ལྕགས་ཀྱི་སོག་ལེ་འདྲ༔ སྡེར་མོ་ལྕགས་ཀྱུ་བྱེ་བས་གཏམས༔ ཝ་སྐད་འདོན་ཅིང་དུར་ཁྲོད་ཉུལ༔ དེ་ལ་ཟངས་ཀྱི་མི་མོ་ཞོན༔ དམར་ནག་གཅེར་བུ་ཅོད་པན་ཅན༔ གཡས་པའི་ཕྱག་ན་རྡོ་རྗེ་བསྣམས༔ རི་རབ་ཀུན་ཀྱང་རྩེ་ནས་བསྙིལ༔ གཡོན་པས་ཕུར་པ་འདྲིལ་ཞིང་འདེབས༔ བཀའ་ལས་འདའ་བའི་སྙིང་ལ་གཟིར༔ རཀྴ་དུན་གྱི་ཕོ་ཉ་མོ༔ རྦད་པའི་ལས་ལ་མ་གཡེལ་ཅིག༔ བྷྱོ༔ བྱང་ཕྱོགས་འཁོར་ལོའི་རྩིབས་སྟེང་ན༔ ལྕགས་ཀྱི་ཁྱི་མོ་རལ་པ་ཅན༔ རལ་པ་མདའ་ཙམ་ཤ་ར་ར༔ ཡ་མགལ་གནམ་ལ་མ་མགལ་ས༔ ཚེམས་ནི་གངས་རི་ལྗགས་ནི་གློག༔ མིག་ནས་མེ་བར་སྣ་རླུང་འཚུབས༔ ཁ་ནས་ཁྲག་གི་སྐྱིན་ཐང་འབེབས༔ ཕྲིན་ལས་ཐོགས་མེད་དྲག་རྩལ་ཅན༔ ཁྲོ་ཆུའི་གཞུང་ལ་ལྕགས་ཀྱུའི་སྡེར༔ དེ་ལ་གཡུ་ཡི་མི་མོ་ཞོན༔ གཅེར་བུ་ལྗང་ནག་ཅོད་པན་ཅན༔

གཡས་པས་ཞིང་ཆུང་མགོ་ནས་འཇོམས༔ གཡོན་པས་ཐུགས་ཀྱི་ཕུར་པ་འདྲིལ༔ སྔགས་པས་དྲག་ཏུ་བསྐུལ་བའི་ཚེ༔ ཁམས་གསུམ་ཀུན་གྱི་ཤ་ཁྲག་གིས་༔ མ་ངོམས་དེ་ནི་མ་འགྲངས་ན༔ སྲིད་པ་གསུམ་གྱི་ཤ་ཁྲག་ལ༔ ཉིན་མཚན་མེད་པར་རྦ་ལ་རྐྱལ༔ ཁྱོད་ནི་དཔལ་གྱི་ཕོ་ཉ་སྟེ༔ གང་ལ་དམིགས་པ་ཤོར་ར་རེ༔ བརྣག་པའི་ལས་ལ་མཐུ་མ་ཆུང་༔ བཅོལ་བའི་འཕྲིན་ལས་གྲུབ་པར་མཛོད༔ བྷྱོ༔ བདག་ཉིད་ཆེན་མོ་ཁྱོད་ཀྱི་ཐུགས་དམ་དུས་ལ་བབ༔ ཤར་སྟོད་འཁོར་ལོ་འབར་བ་ཆེན་པོའི་རྩིབས་སྟེང་ན༔ ནམ་གྱི་གུང་གི་ཕོ་ཉ་ལས་བྱེད་ཆེན་མོ་སྟེ༔ ཆེ་ཞེ་སྲིད་པའི་རྒྱལ་མོ་དཔལ་ལྡན་རེ་མ་ཏཱི༔ སྐུ་མདོག་ནག་མོར་བཞུགས་ཤིང་མཐའ་གཉིས་སྤྲོས་དང་བྲལ༔ དྲེལ་རྟ་རྐང་གསུམ་བཅིབས་ནས་སྟོང་གསུམ་ཁྱབ་པར་ཉུལ༔ མེ་ལོང་སྦྲུལ་ཞགས་ཐོགས་ནས་དམ་ཉམས་འཆིངས་ཤིང་སྡོམ༔ ཁ་ཊྭཱཾ་ཕུར་པ་ཐོགས་ནས་དམ་ཉམས་གཟིར་ཞིང་སྒྲོལ༔ སྟོང་གསུམ་ཁྲམ་ལ་འདེབས་ཤིང་སྲིད་གསུམ་ཤྭོ་ལ་འདྲེན༔ ཚོན་གྱི་གྲུ་གུ་བརྐྱངས་ཤིང་ནད་ཀྱི་རྐྱལ་པ་འབུད༔ མི་ནད་ཕྱུགས་ནད་གཏོང་ཞིང་སྟོང་གསུམ་རྩིས་

ལ་འདེབས༔ སྲིད་པ་དུས་བཞིའི་མ་མོས་སྐུ་ལ་མཛེས་པར་བརྒྱན༔ དབྱིངས་ནས་བྷ་ག་སྦྱོར་བྱེད་ཐབས་ཀྱི་ཕོ་ཉ་འགྱེད༔ སྟོང་གསུམ་རྐན་སྒྲ་རྡེབ་ཅིང་སངས་རྒྱས་དམ་ལ་སྡུད་བྱེད་མ༔ ཕུར་འདེབས་ཆེན་མོ་ཁྱོད་ནི་སྔགས་པས་ལས་ལ་སྐུལ༔ རྣལ་འབྱོར་བདག་གི་བཅོལ་བའི་ཕྲིན་ལས་གྲུབ་པར་མཛོད༔ བྷྱོཿ ལྷོ་སྟོད་འཁོར་ལོའི་རྩིབས་སྟེང་ན༔ ནམ་གུང་ལས་ཀྱི་ཕོ་ཉ་མོ༔ ཆེ་ཞེ་དཔལ་ལྡན་རེ་མ་ཛ༔ སེར་ནག་རྨ་བྱའི་ཐུལ་པ་གསོལ༔ ཆིབས་སུ་སྨན་ཤ་ཡུ་ཆུང་ཆིབས༔ གཡས་པས་གསེར་གྱི་ཟོར་བ་བསྣམས༔ གཡོན་པས་གཡུ་ཡི་ཀོང་བུ་ཐོགས༔ ལོ་ཏོག་བཅུད་ལེན་དུག་ནད་སེལ༔ སེར་ནག་རལ་པ་སྤྲིན་ལྟར་གཏིབས༔ ཕུར་འདེབས་ཆེན་མོ་གཤེགས་སུ་གསོལ༔ བཅོལ་བའི་ཕྲིན་ལས་གྲུབ་པར་མཛོད༔ བྷྱོཿ ནུབ་སྟོད་འཁོར་ལོའི་རྩིབས་སྟེང་ན༔ ནམ་གུང་དགྲ་བོའི་བླ་འགུགས་མ༔ ཆེ་ཞེ་དཔལ་ལྡན་རེ་མ་ཛུ༔ དམར་ནག་སྐུ་ལ་རེ་ནག་གསོལ༔ ཆིབས་སུ་ཆུ་གླང་སྔོན་པོ་ཆིབས༔ གཡས་པས་རྡོ་རྗེ་ལྕགས་ཀྱུ་བསྣམས༔ གཡོན་པས་བྷནྡྷ་ཐོད་ཁྲག་ཐོགས༔ ལས་ཀྱི་མ་ཚོགས་དབང་དུ་སྡུས༔ ཕུར་འདེབས་

ཆེན་མོ་གཤེགས་སུ་གསོལ༔ བརྣག་པའི་ལས་ལ་མཐུ་མ་ཆུང་༔ བཅོལ་བའི་ཕྲིན་ལས་གྲུབ་པར་མཛོད༔ བྷྱོ༔ བྱང་སྟོད་འཁོར་ལོའི་རྩིབས་སྟེང་ན༔ ནམ་གུང་དགྲ་བོའི་སྙིང་འབྱིན་མ༔ ཆེ་ཞེ་དཔལ་ལྡན་རེ་མ་ཛི༔ ལྗང་ནག་སྐུ་ལ་དར་ནག་གསོལ༔ ཆིབས་སུ་རྔ་མོང་གྭ་པ་ཆིབས༔ སྐྱེ་འགྲོའི་ཀེག་རྩིས་ཁྲམ་ཤིང་གཡས༔ ཡེ་ཤེ་ཚོན་གྱི་གྲུ་གུ་གཡོན༔ ལྗང་ནག་རལ་པའི་ཆུན་འཕྱང་ཅན༔ བརྣག་པའི་ལས་ལ་མཐུ་མ་གཡེལ༔ ཕུར་འདེབས་ཆེན་མོ་གཤེགས་སུ་གསོལ༔ བཅོལ་བའི་ཕྲིན་ལས་གྲུབ་པར་མཛོད༔ བྷྱོ༔ ས་བདག་ཆེན་མོའི་དུས་ལ་བབ༔ ཤར་སྨད་འཁོར་ལོའི་རྩིབས་སྟེང་ན༔ ནམ་གྱི་ཐོ་རངས་ཕོ་ཉ་མོ༔ རྡོ་རྗེ་ཡ་བྱིན་ཆེན་མོ་ནི༔ ཞལ་གཅིག་ཕྱག་གཉིས་སྐུ་མདོག་མཐིང་༔ ཆིབས་སུ་འབྲུག་མོ་ཆེ་ལ་ཆིབས༔ གནས་འདྲེན་རྡོ་རྗེ་ལྕགས་ཀྱུ་གཡས༔ མགྱོགས་བྱེད་ལས་ཀྱི་ཕུར་པ་གཡོན༔ མཐིང་ནག་རལ་པ་སྤྲིན་ལྟར་གཏིབས༔ རལ་པ་རེ་ལ་ཕུར་པ་རེ༔ ལྕགས་རྡོར་འབར་བའི་ཐོད་གདེངས་ན༔ མཐིང་ནག་ཅོད་པན་པུ་རུ་རུ༔ ཁྱེད་ཀྱང་ཕུར་པའི་ལས་མཁན་ཏེ༔ བསྐུལ་བའི་ལས་ལ་རྩལ་མ་ཞན༔

ཕུར་པའི་ལས་མཁན་གཤེགས་སུ་གསོལ༔ བྷྱོ༔ ལྷོ་སྨད་འཁོར་ལོའི་རྩིབས་སྟེང་ན༔ ཐོ་རངས་སྒྲོལ་བའི་ཕོ་ཉ་མོ༔ རྡོ་རྗེ་དེ་བྱིན་ཆེན་མོ་ནི༔ ཞལ་གཅིག་ཕྱག་གཉིས་སྐུ་མདོག་སེར༔ ཆིབས་སུ་ཆུ་སྲིན་སྦིར་ལ་ཆིབས༔ རྒྱུ་དྲུག་འཆིངས་སྡོམ་ཞགས་པ་གཡས༔ རྒྱས་བྱེད་གཟུག་མོ་བྱི་ཐུར་གཡོན༔ སེར་ནག་རལ་པས་ས་གཞི་ཁེངས༔ རལ་པ་རེ་ལ་ཕུར་པ་རེ༔ གསེར་རྡོར་འབར་བའི་ཐོད་གདེངས་ན༔ སེར་ནག་ཅོད་པན་པུ་རུ་རུ༔ ཁྱེད་ཀྱང་ཕུར་པའི་ལས་མཁན་ཏེ༔ སྲོག་ལ་བསྔགས་ཚེ་དུས་མ་གཡེལ༔ ཕུར་འདེབས་ཆེན་མོས་ལས་མཛོད་ཅིག༔ བྷྱོ༔ ནུབ་སྨད་འཁོར་ལོའི་རྩིབས་སྟེང་ན༔ ཐོ་རངས་ལས་ཀྱི་དབང་སྡུད་མ༔ རྡོ་རྗེ་བསྭེ་བྱིན་ཆེན་མོ་ནི༔ ཞལ་གཅིག་ཕྱག་གཉིས་སྐུ་མདོག་དམར༔ ཆིབས་སུ་གློག་དམར་འཇིགས་ལ་ཆིབས༔ མི་དགེ་འཆིངས་སྡོམ་ལྕགས་སྒྲོག་གཡས༔ དབང་གི་མི་ལག་མཆོག་ཕུར་གཡོན༔ དམར་ནག་རལ་པས་བར་སྣང་ཁེངསཿ རལ་པ་རེ་ལ་ཕུར་པ་རེ༔ ཟངས་རྡོར་འབར་བའི་ཐོད་གདེངས་ན༔ དར་དམར་ཅོད་པན་པུ་རུ་རུ༔ ཕུར་པའི་ལས་མཁན་གཤེགས་སུ་གསོལ༔ སྙིང་ཁྲག་འཐུང་

ལ་ཧབ་མ་ཆུང་༔ བརྣག་པའི་ཕྲིན་ལས་མ་གཡེལ་ཅིག༔ བྷྱོ༔ བྱང་སྨད་འཁོར་ལོའི་རྩིབས་སྟེང་ན༔ ཐོ་རངས་ལས་ཀྱི་ཕོ་ཉ་མོ༔ རྡོ་རྗེ་ཕག་བྱིན་ཆེན་མོ་ནི༔ ཞལ་གཅིག་ཕྱག་གཉིས་སྐུ་མདོག་ལྗང་༔ ཆིབས་སུ་ཆུ་རྟ་སྔོན་པོ་ཆིབས༔ རྣམ་ཤེས་འབེབས་པའི་དྲིལ་བུ་གཡས༔ དྲག་པོའི་སེང་ལྡེང་ཕུར་པ་གཡོན༔ ལྗང་ནག་རལ་པས་འཇིག་རྟེན་ཁེངས༔ རལ་པ་རེ་ལ་ཕུར་པ་རེ༔ གཡུ་རྡོར་འབར་བའི་ཐོད་གདེངས་ན༔ ལྗང་ནག་ཅོད་པན་པུ་རུ་རུ༔ ཁྱེད་ཀྱང་ཕུར་པའི་ལས་མཁན་ཏེ༔ སྲོག་དབུགས་སྡུད་ལ་རྔམས་མ་ཆུང་༔ བཅོལ་བའི་ཕྲིན་ལས་སྒྲུབ་པར་མཛོད༔ ཛཿ ཤར་ཕྱོགས་སྒོ་ནང་དགྲ་བགེགས་སྟེང་༔ དུང་གི་སྐྱེས་བུ་མི་བཟད་པ༔ སྐུ་མདོག་དཀར་འཚེར་འབར་བ་ལ༔ གཡས་ན་ཤེལ་གྲི་ཟངས་ཡག་བསྣམས༔ གཡོན་པས་ཤེལ་གྱི་ཕུར་པ་འདྲིལ༔ དགྲ་བགེགས་སྙིང་ལ་གཟིར་ཞིང་འདེབས༔ ཆིབས་སུ་སེང་གེ་དཀར་མོ་ཆིབས༔ སྐུ་ལ་སྤྱང་དཀར་སློག་པ་གསོལ༔ འཁོར་དུ་གིང་ཆེན་ཚོགས་ཀྱིས་བསྐོར༔ དཀར་པོ་འབུམ་གྱི་དམག་དཔོན་མཛད༔ ཁྱེད་ཀྱང་ཕུར་པའི་ལས་མཁན་ཏེ༔ བསྒྲལ་བའི་ཕྲིན་ལས་གྲུབ་པར་མཛོད༔

ཛཿ ལྷོ་ཕྱོགས་སྒོ་ནང་དགྲ་བགེགས་སྟེང་༔ ལྕགས་ཀྱི་སྐྱེས་བུ་མི་སྡུག་པ༔ སྐུ་མདོག་སྔོ་ནག་འབར་བ་ལ༔ གཡས་པས་ལྕགས་ཀྱི་རལ་གྲི་ཕྱར༔ གཡོན་པས་ལྕགས་ཀྱི་ཕུར་པ་འདྲིལ༔ དགྲ་བགེགས་སྙིང་ལ་གཟིར་ཞིང་འདེབས༔ ཆིབས་སུ་ལྕགས་སྤྱང་སྔོན་པོ་ཆིབས༔ སྐུ་ལ་དར་ནག་བེར་ཆེན་གསོལ༔ འཁོར་དུ་བདུད་པོའི་ཚོགས་ཀྱིས་བསྐོར༔ ནག་པོ་འབུམ་གྱི་དམག་དཔོན་མཛད༔ ཁྱེད་ཀྱང་ཕུར་པའི་སྲུང་མ་སྟེ༔ བརྣག་པའི་ལས་ལ་མཐུ་མ་ཆུང་༔ ཛཿ་ནུབ་ཕྱོགས་སྒོ་ནང་དགྲ་བགེགས་སྟེང་༔ བསྭེ་ཡི་སྐྱེས་བུ་རབ་འཇིགས་པ༔ སྐུ་མདོག་དམར་ནག་འབར་བ་ལ༔ གཡས་ན་ཟངས་གྲི་མེ་ཆེན་འབར༔ གཡོན་པས་ཟངས་ཀྱི་ཕུར་པ་འདྲིལ༔ དགྲ་བགེགས་སྙིང་ལ་གཟིར་ཞིང་འདེས༔ ཆིབས་སུ་བསྭེ་རྟ་དམར་པོ་ཆིབས༔ སྐུ་ལ་དབང་གི་བསྭེ་ཁྲབ་གསོལ༔ འཁོར་དུ་བདུད་བཙན་ཚོགས་ཀྱིས་བསྐོར༔ དམར་པོ་འབུམ་གྱི་དམག་དཔོན་མཛད༔ ཁྱེད་ཀྱང་ཕུར་པའི་སྲུང་མ་སྟེ༔ བརྣག་པའི་ལས་ལ་མཐུ་མ་ཆུང་༔ ཛཿ བྱང་ཕྱོགས་སྒོ་ནང་དགྲ་བགེགས་སྟེང་༔ ཏཱ་ཀི་ནག་པོ་མེ་དབལ་འཇིགས༔ སྐུ་མདོག་ལྗང་

ནག་འཇིགས་པ་ལ༔ གཡས་པས་གྲི་གུག་དགྲ་སོག་གཅོད༔ གཡོན་པས་བྷནྡྷ་སྙིང་ཁྲག་འཐུང་༔ ཆིབས་སུ་ལྕེ་སྤྱང་སྔོན་པོ་ཆིབས༔ སྲ་བརྟན་ལྕགས་ཀྱི་གོ་ཁྲབ་གསོལ༔ ཤན་པ་ཕོ་མོའི་ཚོགས་ཀྱིས་བསྐོར༔ ལས་བྱེད་འབུམ་གྱི་དམག་དཔོན་མཛད༔ ཁྱེད་ཀྱང་ཕུར་པའི་ལས་མཁན་ཏེ༔ བཅོལ་བའི་ཕྲིན་ལས་གྲུབ་པར་མཛོད༔ [ཅེས་དྲག་ཏུ་བསྐུལ་ལོ། །གཉིས་པ་གསེར་སྐྱེམས་འབུལ་བ་ནི། ཛ་གད་གསེར་དང་སྦྱར་བའི་སྨན་ཕུད་]ཨོཾ་ཨཱཿཧཱུཾ་གིས། འདོད་ཡོན་ཟག་པ་མེད་པའི་ལོངས་སྤྱོད་ཀྱི་གཏེར་དུ་[བྱིན་གྱིས་བརླབས་ནས་ཕྱོགས་བཅུར་འཐོར་ཞིང་།] ཧཱུཾ། རིག་འཛིན་རྩ་བརྒྱུད་བླ་མ་དམ་པ་དང་། །བདེ་གཤེགས་ཞི་ཁྲོ་རབ་འབྱམས་དཀྱིལ་འཁོར་ལྷ། །ཁྱད་པར་རྡོ་རྗེ་ཕུར་པའི་ལྷ་ཚོགས་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །མ་མགོན་ལྕམ་དྲལ་དམ་ཅན་རྒྱ་མཚོའི་ཚོགས། །དྲེགས་པའི་སྡེ་དཔོན་ཕུར་སྲུང་དམ་ཚིག་ཅན། །བཀའ་ཉན་བྲན་གཡོག་མངགས་གཞུག་བཅས་རྣམས་ཀྱིས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །སྔགས་འཆང་བདག་གིེི་རིགས་ཀྱི་སྲུང་མ་དང་། །ས་ཕྱོགས་འདི་སོགས་ཡུལ་གཞིས་གནས་ཀྱི་བདག །ལོ་ཟླ་ཞག་དུས་

ཚེས་ལ་དབང་བའི་ལྷས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །[ཅེས་མཆོད་དོ། །][གསུམ་པ་མཁྱེན་དཔང་གསོལ་བ་ནི།] ཧཱུཾ༔ རྩ་བརྒྱུད་བླ་མ་གཟུ་དང་དཔང་དུ་དགོངས༔ ཡི་དམ་ལྷ་ཚོགས་གཟུ་དང་དཔང་དུ་དགོངས༔ མ་རྒྱུད་མཁའ་འགྲོ་གཟུ་དང་དཔང་དུ་དགོངས༔ བསྟན་སྲུང་རྒྱ་མཚོ་གཟུ་དང་དཔང་དུ་དགོངས༔ དམ་ཉམས་ལས་ངན་བསྟན་བཤིག་ལས་དམར་འདིས༔ དང་པོ་སངས་རྒྱས་བསྟན་པ་གཉན་པོ་བཤིག༔ བར་དུ་དཀོན་མཆོག་གསུམ་གྱི་དབུ་འཕང་སྨད༔ ཐ་མ་སྐྱེ་འགྲོའི་བདེ་བ་ཡན་བསྟུད་ནས༔ ད་ལྟ་རྣལ་འབྱོར་བདག་ལ་གནོད་པ་བརྩམ༔ བསྒྲལ་བའི་ཞིང་བཅུ་ཚང་བའི་དགྲ་བགེགས་འདི༔ མངོན་སྤྱོད་དྲག་པོས་སྒྲོལ་བའི་ཕྲིན་ལས་མཛོད༔ ཟོལ་མེད་རྩེ་གཅིག་སྒྲུབ་པའི་རྣལ་འབྱོར་ངས༔ མ་བཟོད་སྙིང་ནས་གདུང་བའི་ང་རོ་ཡིས༔ ལྷ་དང་སྲུང་མ་རྒྱ་མཚོ་དཔང་དུ་བསྐུལ༔ བསྟན་སྲུང་རྒྱ་མཚོ་མེད་དམ་ར་མདའ་ལོག༔ ཉེས་མེད་སྒྲུབ་ལ་གཞོལ་བའི་རྣལ་འབྱོར་ངས༔ དད་དམ་དབང་གིས་དཔུང་གཉེན་ལྷ་ལ་འབོད༔ ཕུར་སྲུང་རྒྱ་མཚོ་མེད་དམ་ར་མདའ་ལོག༔ རྩེ་གཅིག་སྒོམ་སྒྲུབ་ལྷུར་ལེན་རྣལ་འབྱོར་ངས༔ སྐྱབས་མཆོག་རྩ་གསུམ་

རྒྱ་མཚོ་འབོད་བསྐུལ་གྱི༔ མཐུ་རྩལ་དྲག་པོ་མེད་དམ་དགྲ་ལ་རྦད༔ མ་གཡེལ་མ་འགྱང་དམ་ཚིག་གཉན་ལ་འདུས༔ ཡིད་ལ་བརྣག་པའི་དགྲ་བགེགས་སྡིག་ཅན་འདི༔ ཁམས་གསུམ་གང་དུ་གནས་སམ་བྲོས་གབ་ཀྱང་༔ ཡེ་ཤེས་སྤྱན་ལ་གསལ་འགྲིབ་མི་མངའ་བས༔ མ་ཤོར་མྱུར་དུ་ཁུག་ལ་བསྒྲལ་མཛོད་ཅིག༔ དོ་ནུབ་བསྐུལ་ལོ་ལྷ་ཚོགས་ཐུགས་མ་གཡེལ༔ དོ་ནུབ་འབོད་དོ་ལྷ་ཚོགས་སྙན་མ་སྲ༔ དོ་ནུབ་གཡབ་བོ་ལྷ་ཚོགས་སྤྱན་མ་རྟུལ༔ དོ་ནུབ་རྦད་དོ་ལྷ་ཚོགས་མཐུ་མ་ཆུང་༔ ཛཿ འཛིན་བྱེད་དཔའ་བོ་ལག་མ་སྡུམ༔ གསོད་བྱེད་ཤན་པ་རྩལ་མ་ཞན༔ མངགས་པའི་ཕོ་ཉ་བང་མ་བུལ༔ རྒྱུག་བྱེད་མྱུར་མགྱོགས་རྩལ་མ་ཙན༔ ཟ་བྱེད་རྔམས་པ་ཁ་མ་ཆུང་༔ ལས་བྱེད་དྲེགས་པ་མཐུ་མ་ཆུང་༔ མཁྱེན་ལྡན་ལྷ་རྣམས་དཔང་དུ་རོལ༔ དམ་ཚིག་གཉན་པོའི་དུས་ལ་བབ༔ མ་གཡེལ་མ་འགྱང་ལས་ལ་ཡཱ༔ བཅོལ་བའི་ཕྲིན་ལས་གྲུབ་པར་མཛོད༔ [ཅེས་གསོལ་བས་རང་ལ་གནང་བ་བསྩལ་ཞིང་དགྲ་བགེགས་ལ་ཐུགས་ཆེར་འཁྲུགས་པས་དྲག་པོའི་ལས་ལ་མངོན་དུ་ཕྱོགས་པས་བཞུགས་པར་བསམ་མོ། །][བཞི་པ་བདེན་པ་བརྡར་བ་ནི།] ཨོཾ་བཛྲ་ས་མཱ་ཛཿཧཱུཾ་ཛཿཆོས་ཉིད་ཀྱི་བདེན་པའོ༔

གསང་སྔགས་ཀྱི་བྱིན་གྱིས་བརླབས་པའོ༔ སངས་རྒྱས་ཀྱི་མཐུའོ༔ ཨ་བྷི་ཙརྻའི་དུས་ལ་བབ་པའི་བརྣག་པ་འདི་ཁོ་ནའོ༔ [ཞེས་བརྗོད་དོ། །][གཉིས་པ་བར་དུ་བྱ་བའི་ལས་ལ། དམིགས་བྱ་བསྐྱེད་འགུགས། སྒྲོལ་ཆོག་དངོས། ཐུགས་དམ་བསྐུལ་བ། ཟློག་ལས་བཅོལ་བ། ཐུན་གཏོར་གཏོང་བ་དང་ལྔ་ལས། དང་པོ་དམིགས་བྱ་བསྐྱེད་ཅིང་དགུག་གཞུག་བྱ་བ་ནི། བྲུབ་ཁུང་སྭབྷཱ་ཝས་སྦྱང་།] སྟོང་པའི་ངང་ལས་མདུན་དུ་ཨེ་ལས་ལྕགས་སྲེགས་ཀྱི་ཁང་སྒྲོམ་གྲུ་གསུམ་བང་རིམ་དགུ་པ། ཁ་ཁྱེར་དོག་ཅིང་གཏིང་ཟབ་པ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། ལོགས་ལ་ཞེ་སྡང་གི་མེ་དཔུང་འབར་བ། སྟེང་ན་གཏི་མུག་གི་མུན་པ་འཐིབས་པ། ཟུར་ན་ང་རྒྱལ་གྱི་བྲག་རི་ཉིལ་བ། ཕྱི་ནང་ཀུན་ཏུ་ཕྲག་དོག་གི་རླུང་དམར་འཚུབས་ཤིང་ནད་དུག་མཚོན་ཆའི་ཆར་འབེབས་པ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་བཟད་པར་འཁྲུགས་པ། ལས་བྱེད་གཤིན་རྗེའི་དམག་ཚོགས་སེང་གེ་ལྟར་རྔམས་པ། སྟག་ལྟར་འཕྱོ་བ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོགས་པས་གང་བ། སྲིད་པ་ལས་ཀྱི་བཙོན་ཁང་དྲག་པོ་

དེའི་ནང་དུ་ནྲྀའམ་ཏྲི་དུད་ཁ་ཡོངས་སུ་གྱུར་པ་ལས་དགྲའམ་བགེགས་དེ་ཉིད་ལུས་གཅེར་བུ་རིད་པ། མདོག་ནག་ཅིང་དྲན་པ་ཉམས་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་རྣག་ཁྲག་འཛག་པ། ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་གནོད་བྱེད་ཐམས་ཅད་འདུས་པའི་ངོ་བོར་གྱུར་[པར་བསམ་ལ།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་ངོ་བོ་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་འཁོར་འདས་ཐམས་ཅད་ཀྱི་སྤྱི་དཔལ་ཡི་དམ་རྡོ་རྗེ་གཞོན་ནུ་བདུད་འདུལ་ཁྲོ་བཅུ་ཁྲ་ཐབས་སྒོ་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་

ལ་སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུག་པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་གྱིས་དམིགས་པའི་རྟེན་འདི་ལ་ཁུག་ཅིག །ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་གནོད་བྱེད་ཛཿཧཱུཾ་བཾ་ཧོཿ ཤཱི་གྷྲཾ་ཨཱ་ན་ཡ་ཧཱུཾ་ཕཊ༔ [ཅེས་ལན་གསུམ་མམ་བདུན་གྱིས་བཀུག་ནས། ཕོ་ཉ་བཏང་བ་ནི།] ཛཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ འགུགས་བྱེད་ཆེན་མོ་ལྕགས་ཀྱུ་དཀར་མོའི་ཚོགས༔ རིང་པར་རྒྱུག་ལ་དམ་ཉམས་དགྲ་བགེགས་རྣམས༔ ཁུག་ཅིག་བཛྲ་ཨངྐུ་ཤ་ཡ་ཛཿཧཱུཾ༔ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ འཆིང་བྱེད་ཆེན་མོ་ཞགས་པ་སེར་མོའི་ཚོགས༔ རིང་པར་རྒྱུག་ལ་དམ་ཉམས་དགྲ་བགེགས་རྣམས༔ མགུལ་ནས་ཆིངས་ཤིག་བཛྲ་པཱ་ཤ་ཧཱུཾ༔ བྃ༔ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ སྡོམ་བྱེད་ཆེན་མོ་ལྕགས་སྒྲོག་དམར་མོའི་ཚོགས༔ རིང་པོར་རྒྱུག་ལ་དམ་ཉམས་དགྲ་

བགེགས་རྣམས༔ ཡན་ལག་སྡོམས་ཤིག་བཛྲ་སྥོ་ཊ་བཾ༔ ཧོཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ མྱོས་བྱེད་ཆེན་མོ་དྲིལ་བུ་ལྗང་མོའི་ཚོགས༔ རིང་པར་རྒྱུག་ལ་དམ་ཉམས་དགྲ་བགེགས་རྣམས༔ མྱོས་སུ་ཆུ་གཅིག་བཛྲ་གཎྜེ་ཧོཿ [ཞེས་འགུགས་འཆིང་སྡོམ་མྱོས་ཀྱི་ལས་བསྐུལ་ལོ། །][གཉིས་པ་སྒྲོལ་ཆོག་དངོས་ལ། རིག་པ་མཆོག་གི་རྒྱུད་ལས། ལྷ་དཔྲལ་གཟུགས་ལ་དབབ་པ་དང་། །བྱད་དུ་གཞུག་དང་སྨྱོ་རུ་གཞུག །རྡུལ་དུ་བརླག་དང་ཞལ་དུ་བསྟབ། །དེ་ལའང་ཕོ་ཉ་འཕྱོང་སྔགས་རྫས། །ཏིང་འཛིན་དམོད་པས་ལས་རྫོགས་བྱ། ཞེས་འབྱུང་བས། དང་པོ་ལྷ་དང་ཕྲལ་བ་ལའང་དྲུག་གི །ཕོ་ཉ་ནི།] ཧཱུཾ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་མོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ མཐུ་རྩལ་ཕྱུང་བའི་དུས་ལ་བབ༔ [ཅེས་བབ་བརྒྱད་ཀྱིས་བསྐུལ་རྗེས་སུ། འཕྱོང་ནི།] ཡིད་ལ་བརྣག་པའི་དགྲ་བགེགས་འདི༔ སྐྱོབ་བྱེད་ལྷ་དང་བྲལ་བར་གྱིས༔ [ཞེས་སྦྱར། སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཧ་ས་ཡ་ར་ཧ་ས་ཡ་ར་ཧྲཱི་དཎྜ་ཧཱུཾ་ཕཊ༔ ཨ་ནྲྀ་ཏྲི་ཏྲཀ་རཀྴ་མཱ་ར་ཡ་ཕྱེས་

ཕྱེས༔ མ་མ་ཏྲག་རཀྴ་མཱ་ར་ཡ་ཕྱེས་ཕྱེས༔ [རྫས་ནི། གུ་གུལ་སོགས་དབྱེ་རྫས་ཀྱིས་བདུག་ཅིང་བྱ་རོག་དང་འུག་པའི་དང་རུས་ཕྱིར་འབྱེད་པའི་ཚུལ་བྱ། ཏིང་ངེ་འཛིན་ནི།] དཀྱིལ་འཁོར་གསུམ་གྱི་ལྷ་ཚོགས་རྣམས་དང་རྡོ་རྗེ་ལེགས་པ་འགོང་པོ་འཁོར་བཅས་ཀྱིས་བསྒྲུབ་བྱ་སྲུང་སྐྱོབ་བྱེད་པའི་ལྷ་དང་ཕྲལ་ནས་བྱ་སྤུ་རླུང་གིས་གཏོར་བ་ལྟར་དབྱེ་བར་[བསམ། དམོད་པ་ནི།] དགྲ་བགེགས་སྐྱོབ་བྱེད་ཀྱི་ལྷ་དང་ཕྱེས་ཤིག༔ དགྲ་དང་སྐྱོབ་པའི་ལྷ་གཉིས་བྲལ་བར་གྱུར་ཅིག༔ [ཅེས་བརྫོད་པའོ། །][གཉིས་པ་གཟུགས་ལ་དབབ་པ་ལ་དྲུག་གི། །ཕོ་ཉ་ནི་གོང་བཞིན་བབ་བརྒྱད་ཀྱིས་བསྐུལ་ནས། འཕྱོང་ནི།] ཡིད་ལ་བརྣག་པའི་དགྲ་བགེགས་འདི༔ མྱུར་དུ་ལིངྒ་འདི་ལ་ཕོབ༔ [སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཨཱ་བེ་ཤ་ཡ་ཨཱ་བེ་ཤ་ཏ་ཧཱུཾ་ཕཊ༔ [རྫས་ནི། ཡུངས་དཀར་གྱིས་བྲབ་ཅིང་ཐལ་མོ་གཉིས་སྦུབས་ལ་འབེབས་ཚུལ་བྱ། ཏིང་ངེ་འཛིན་ནི།] དཀྱིལ་འཁོར་གསུམ་གྱི་ལྷ་ཚོགས་རྣམས་ལས་སྤྲུལ་པ་ཡང་སྤྲུལ་ལྕགས་ཀྱུ་ཐོགས་པ་མང་པོ་དང་ཀླུ་ཆེན་འཇོག་པོ་འཁོར་བཅས་ཀྱིས་དགྲ་བོའི་རྣམ་ཤེས་བཀུག་ནས་ལིངྒ་ལ་གཉིས་སུ་མེད་པར་བསྟིམས་པར་[བསམ། དམོད་པ་ནི།] དགྲ་བགེགས་གཟུགས་ལིངྒ་འདི་ལ་ཕོབ་ཅིག༔ དགྲ་བགེགས་ཀྱི་རྣམ་པར་ཤེས་པ་

བླ་དང་བཅས་པ་ལིངྒ་འདི་ལ་ཁུག་ནས་ཐིམ་པར་གྱུར་ཅིག༔ [ཅེས་བརྗོད་དོ། །][གསུམ་པ་བྱད་དུ་གཞུག་པ་ལ་དྲུག་གི །ཕོ་ཉ་ནི་བབ་བརྒྱད་ཀྱི་བསྐུལ་དང་། འཕྱོང་ནི།] ཡིད་ལ་བརྣག་པའི་དགྲ་བགེགས་འདི༔ ཁྲོལ་མེད་ལས་ཀྱི་བྱད་དུ་ཆིངས༔ [སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཛཿཧཱུཾ་བཾ་ཧོཿ ཤཱི་གྷྲཾ་ཨཱ་ན་ཡ་ཧཱུཾ་ཕཊ༔ [རྫས་ནི། ཚོན་སྐུད་སྣ་ལྔའི་སྐུད་པ་དང་ཤི་ཡུག་གི་སྐྲ་སྐུད་ཀྱིས་ཕྱིར་བཟློག་ཏུ་དཀྲི་ཞིང་ཡན་ལག་རྣམས་བཅིང་བའི་ཚུལ་བྱ། ཏིང་ངེ་འཛིན་ནི།] དཀྱིལ་འཁོར་གསུམ་གྱི་ལྷ་ཚོགས་ཡང་སྤྲུལ་དང་བཅས་པ་རྣམས་དང་སྲོག་བདག་སྒྲོལ་གིང་འཁོར་བཅས་ལྕགས་ཀྱུ་ཞགས་པ་ལྕགས་སྒྲོག་ཐོགས་པ་རྣམས་ཀྱིས་དགྲ་བོ་རི་དྭགས་རྒྱར་ཚུད་པ་ལྟར་བཅིངས་པར་[བསམ། དམོད་པ་ནི།] དགྲ་བགེགས་ཀྱི་དབང་པོ་ཡན་ལག་སྡོམས་ཤིག༔ དགྲ་བགེགས་འདི་གྲུ་གུ་ཐུལ་དུ་ཆིངས་ཤིག་སྡོམས་ཤིག༔ [ཅེས་བརྗོད་དོ། །][བཞི་པ་སྨྱོ་རུ་གཞུག་པ་ལ་དྲུག་གི །ཕོ་ཉ་ནི་བབ་བརྒྱད་ཀྱི་བསྐུལ་དང་། འཕྱོང་ནི] ཡིད་ལ་བརྣག་པའི་དགྲ་བགེགས་འདི༔ སྨྱོ་ཞིང་བརྒྱལ་ནས་རེངས་སུ་ཆུག༔ [སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ཆེ་གེ་མོ་ཛྭ་ལ་པ་ཡ་ཛྭ་ལ་པ་ཡ་ཧཱུཾ་ཕཊ༔ [རྫས་ནི། དུག་སྣ་ཚོགས་དང་རྡ་རྡུ་རའི་ཁུ་བ་ཁྲག་དང་སྦྱར་བས་བྲབ། ཏིང་ངེ་འཛིན་ནི།] དཀྱིལ་འཁོར་གསུམ་

གྱི་ལྷ་ཚོགས་ཡང་སྤྲུལ་དང་བཅས་པ་རྣམས་དང་གནམ་ཐེ་འཁོར་བཅས་ཀྱིས་སྨྱོ་དུག་གི་ཆར་ཕབས་པས་དམིགས་བྱ་སེམས་མྱོས་ལུས་སྐྲངས་དྲན་མེད་དུ་གྱུར་ནས་མུ་ཅོར་དུ་སྨྲ་བར་[བསམ། དམོད་པ་ནི།] དགྲ་བགེགས་སྨྱོ་རུ་ཆུག་འབོགས་སུ་ཆུག༔ དྲན་པ་ཉམས་པར་གྱུར་ཅིག༔ [ཅེས་བརྗོད་དོ། །][ལྔ་པ་རྡུལ་དུ་བརླག་པ་ཁོངས་སུ་གྲི་ཆིག་ཤུར་གྱི་གདབ་ལས་སྟོན་པས། དེ་ལ་ཐུགས་དམ་བསྐུལ་བ། ཕུར་བུ་བྱིན་གྱི་སྲོས་རློབ་པ། གདབ་པའི་གཟེར་ཁ་དངོས་དང་གསུམ་གྱི། དང་པོ་ཐུགས་དམ་བསྐུལ་བ་ནི།] དྲག་པོའི་ལས་ལ་ཆེད་དུ་བསྐུལ་བས་དཀྱིལ་འཁོར་གྱི་ལྷ་ཚོགས་ཐམས་ཅད་དམིགས་བྱ་སྒྲོལ་བའི་ལས་ལ་ཁྲོས་འཁྲུགས་རྔམས་ཤིང་དགྱེས་པའི་ཚུལ་གྱིས་བཞེངས་པར་[མོས་ལ།] ཧཱུཾ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཕྱག་བརྙན་ཆེན་མོའི་དུས་ལ་བབ༔ ཤྭ་ན་མུ་ཁའི་དུས་ལ་བབ༔ བདག་ཉིད་ཆེན་མོའི་དུས་ལ་བབ༔ ས་བདག་ཆེན་མོའི་དུས་ལ་བབ༔ སྐྱེས་གིང་ཆེན་པོའི་དུས་ལ་བབ༔ བཀའ་སྡོད་སྲུང་མའི་དུས་ལ་བབ༔ ཁྱེད་ཀྱི་ཐུགས་དམ་དུས་ལ་བབ༔ མཐུ་རྩལ་ཕྱུང་བའི་དུས་ལ་བབ༔ བསྐུལ་ནི་དམ་ཚིག་གཉན་གྱིས་བསྐུལ༔ མ་འདའ་

བཀའ་དང་ཐ་ཚིག་དགོངས༔ དམ་ཚིག་དབང་གིས་ཕྲིན་ལས་མཛོད༔ ཛཿ ཁྱབ་བདག་རྡོ་རྗེ་གཞོན་ནུ་ཆེ༔ ཐབས་ཤེས་སྦྱོར་བའི་བརྟུལ་ཞུགས་ཀྱིས༔ སྲས་དང་སྤྲུལ་པ་ལས་ལ་ཁྱེས༔ དགྲ་བགེགས་ཁུག་ལ་སྒྲོ་མཛོད་ཅིག༔ ཛཿ དམ་ཚིག་ཆེན་པོའི་དུས་ལ་བབ༔ སྲས་མཆོག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ ཧཱུཾ༔ ཕྱོགས་ཀྱི་ཁོར་ལོའི་རྩིབས་སྟེང་ནས༔ སྲས་མཆོག་ཀཱི་ལ་རིགས་བཞི་ཡིས༔ སྒྱུ་འཕྲུལ་གར་གྱི་བརྟུལ་ཞུགས་སྐྱེད༔ ཕྱོགས་བཞིའི་དགྲ་བགེགས་ཁུག་ལ་སྒྲོལ༔ [སྤྲོ་ན་གོང་གི་བབ་བཞི་པོ་རེ་རེ་བཞིན་སྦྱར་ཞིང་། མི་སྤྲོ་ན།] ཛཿ སྟེང་ཕྱོགས་ཁྲོ་རྒྱལ་ཧཱུཾ་ཀཱ་ར༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ སྟེང་གི་དགྲ་བགེགས་ཁུལ་ལ་སྒྲོལ༔ ཛ༔ ཤར་ཕྱོགས་ཁྲོ་བོ་རྣམ་པར་རྒྱལ༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ ཤར་གྱི་དགྲ་བགེགས་ཁུག་ལ་སྒྲོལ༔ ཛཿ ལྷོ་ཕྱོགས་ཁྲོ་བོ་གཤིན་རྗེ་གཤེད༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ ལྷོ་ཡི་དགྲ་བགེགས་

ཁུག་ལ་སྒྲོལ༔ ཛཿ ནུབ་ཕྱོགས་ཁྲོ་བོ་རྟ་མགྲིན་རྒྱལ༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ ནུབ་ཀྱི་དགྲ་བགེགས་ཁུག་ལ་སྒྲོལ༔ ཛཿ བྱང་ཕྱོགས་ཁྲོ་བོ་བདུད་རྩི་འཁྱིལ༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ བྱང་གི་དགྲ་བགེགས་ཁུག་ལ་སྒྲོལ༔ ཛཿ ཤར་ལྷོ་ཁྲོ་བོ་དབྱུག་སྔོན་ཅན༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ ཤར་ལྷོའི་དགྲ་བགེགས་ཁུག་ལ་སྒྲོལ༔ ཛཿ ལྷོ་ནུབ་ཁྲོ་བོ་མི་གཡོ་མགོན༔ ཐབས་ཤེས་སྦྱར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ ལྷོ་ནུབ་དགྲ་བགེགས་ཁུག་ལ་སྒྲོལ༔ ཛཿ ནུབ་བྱང་ཁྲོ་བོ་འདོད་པའི་རྒྱལ༔ ཐབས་ཤེས་སྦྱོར་བའི་བརྟུལ་ཞུགས་རོལཿ སྤྲུལ་པ་ཟ་གསོད་ལས་ལ་ཁྱེས༔ ནུབ་བྱང་དགྲ་བགེགས་ཁུག་ལ་སྒྲོལ༔ ཛཿ བྱང་ཤར་ཁྲོ་བོ་ཁམས་གསུམ་རྒྱལ༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ བྱང་ཤར་དགྲ་བགེགས་ཁུག་ལ་སྒྲོལ༔ ཛཿ འོག་ཕྱོགས་ཁྲོ་བོ་

སྟོབས་པོ་ཆེ༔ ཐབས་ཤེས་སྦྱོར་བའི་བརྟུལ་ཞུགས་རོལ༔ སྤྲུལ་པ་ཟ་གསོད་ལས་ལ་ཁྱེས༔ འོག་གི་དགྲ་བགེགས་ཁུག་ལ་སྒྲོལ༔ ཛཿ སྲས་མཆོག་ཁྲོ་བོ་ཁྲ་ཐབས་ཚོགས༔ སྒྱུ་འཕྲུལ་སྤྲུལ་པ་སྣ་ཛོགས་ཀྱིས༔ མངོན་སྤྱོད་དྲག་པོའི་ཕྲིན་ལས་མཛོད༔ དགྲ་བགེགས་མ་ཤོར་ཁུག་ལ་སྒྲོལ༔ ཛཿ བཀའ་སྡོད་ཕུར་སྲུང་ལས་མཁན་ཚོགས༔ དམ་ཚིག་ཅན་གྱི་དུས་ལ་བབ༔ མཐུ་རྩལ་ཕྱུང་བའི་དུས་ལ་བབ༔ བརྣག་པའི་དགྲ་བགེགས་ཤོར་ར་རེ༔ མྱུར་ཁུག་སྒྲོལ་བའི་ཕྲིན་ལས་མཛོད༔ [ཅེས་བསྐུལ་ལོ། །][གཉིས་པ་ཕུར་བུ་བྱིན་གྱིས་རློབ་པ་ནི། སླར་ཡང་རྣོ་ལ་ངར་འདོགས་པའི་ཚུལ་དུ་བྱ་བ་སྟེ། ཐལ་མོ་སྦྱར་བའི་བར་དུ་ཕུར་པ་བཟུང་ལ།] བདག་ཉིད་དཔལ་ཆེན་པོའི་ཕྱག་གཡས་ཀྱི་སོར་མོ་ལྔ་ལ་ཟླ་བའི་དཀྱིལ་འཁོར་ལ་ཧཱུཾ་ཨོཾ་སྭཱ་ཨཾ་ཧཱ་ལས་ཁྲག་འཐུང་ཡབ་ལྔར་གྱུར༔ གཡོན་གྱི་སོར་མོ་ལྔ་ལ་ཉི་མའི་དཀྱིལ་འཁོར་ལ་མཱུྃ་ལཱྃ་མཱྃ་པཱྃ་ཏཱྃ་ལས་ཁྲོ་མོ་ཡུམ་ལྔར་གྱུར༔ ཨོཾ་བཛྲ་ཀྲོ་དྷ་ཀྲོ་དྷི་ས་མ་ཡ་སྟྭཾ༔ ཛཿཧཱུཾ་བཾ་ཧོཿ རིགས་ལྔ་ཡབ་ཡུམ་སྙོམས་པར་ཞུགས་པའི་བདེ་ཆེན་བྱང་ཆུབ་སེམས་ཀྱི་ངོ་བོ་ཧཱུཾ་མཐིང་ནག་འབར་བར་གྱུར༔ དེ་ལས་འོད་ཟེར་དྲག་ཅིང་

ཚ་ལ་རྩུབ་པ་དཔག་ཏུ་མེད་པ་འཕྲོས་པས་དགྲ་བགེགས་གདུག་པ་ཅན་ཚར་བཅད༔ བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ༔ དེ་དག་གི་མཐུ་སྟོབས་ནུས་པ་ཐམས་ཅད་བསྡུས་ནས་ཧཱུཾ་ལ་ཐིམ༔ ཧཱུཾ་ཡོངས་སུ་གྱུར་པ་ལས་སྲས་མཆོག་ཀརྨ་ཀཱི་ལ་ཡ་སྐུ་སྟོད་ཞལ་གསུམ་ཕྱག་དྲུག་རྡོ་རྗེའི་གཤོག་པ་ཅན༔ ཞལ་གཡས་དཀར་བ༔ གཡོན་དམར་བ༔ དབུས་ལྗང་ནག་ཏུ་འབར་བ༔ ཞལ་གདངས་ལྗགས་འདྲིལ་མཆེ་བ་གཙིགས་པ༔ སྤྱན་དགུ་སྡང་མིག་ཏུ་བསྒྲད་པ༔ སྨ་ར་དང་སྨིན་མར་བསྐལ་པའི་མེ་ཞགས་འཕྲོ་བ༔ དབུ་སྐྲ་དམར་སེར་སྲིད་པའི་རྩེ་མོར་བརྫིས་པ༔ ཕྱག་གཡས་དང་པོ་ན་རྡོ་རྗེ་རྩེ་དགུ༔ བར་པ་ན་རྒྱ་གྲམ༔ གཡོན་གྱི་དང་པོ་ན་མེ་དཔུང་༔ བར་པ་ན་ཁ་ཊྭཱྃ༔ ཐ་མ་གཉིས་ན་གནམ་ལྕགས་ཀྱི་ཕུར་བུ་འདྲིལ་ཞིང་འདེབས་པ༔ དུར་ཁྲོད་ཀྱི་ཆས་ཀྱིས་བརྒྱན་པ༔ སྐུ་སྨད་གནམ་ལྕགས་ཀྱི་ཕུར་པ་མགར་གྱི་སོལ་མལ་ནས་དྲངས་པ་ལྟ་བུ་སྐེད་པ་ཆུ་སྲིན་གྱི་ཁ་ནས་སྦྲུལ་གྱི་ཆུན་པོ་སྐྱུག་པ་ཞིག་ཏུ་གྱུར༔ དེའི་རྒྱ་མདུད་གོང་མ་ལ་བླ་མ་རིག་འཛིན་ཞི་བ་དབྱིངས་ཀྱི་དཀྱིལ་

འཁོར་ཡོངས་རྫོགས་པ༔ ཆངས་བཟུང་ལ་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་ཡོངས་སུ་རྫོགས་པ༔ རྒྱ་མདུད་འོག་མ་ལ་དཔལ་གྱི་བཀའ་སྡོད་ཕུར་སྲུང་རྒྱ་མཚོའི་ཚོགས་རྣམས་ཡོངས་སུ་རྫོགས་པ༔ རྩེ་མོ་ཟུར་གསུམ་མཚོན་ཐུན་སྣ་ཚོགས་ཀྱི་ཚྭ་ཚྭ་རླུང་ལྟར་འཚུབས་པ༔ བསྒྲིལ་བ་ཙམ་གྱིས་སྲིད་གསུམ་འདར་བར་བྱེད་པ༔ འཕྱར་བ་ཙམ་གྱིས་ཁམས་གསུམ་དངངས་པར་བྱེད་པ༔ བཏབ་པ་ཙམ་གྱིས་སྟོང་གསུམ་བརླག་ནུས་པ་གཅིག་ཏུ་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཨ་བྷི་ཥིཉྩ་ཨོཾ༔ ཕུར་པའི་སྤྱི་བོར་ཨོཾ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས༔ ཕྱོགས་བཅུའི་བདེ་བར་གཤེགས་པ་ཐམས་ཅད་ལ་སྐུ་མཉེས་པའི་མཆོད་པ་ཕུལ༔ འོད་ཟེར་ཚུར་འདུས་བདེ་བར་གཤེགས་པ་ཐམས་ཅད་ཀྱི་སྐུའི་བྱིན་རླབས་ཕུར་པ་ལ་ཐིམ་པས་སྐུ་འགྱིང་བ་ཙམ་གྱིས་ཁམས་གསུམ་སྒྲོལ་ནུས་པའི་དབང་ཐོབ་པར་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཝཱ་ཀ་ཨ་བྷི་ཥིཉྩ་ཨཱཿ ཕུར་པའི་མགྲིན་པའི་ཨཱཿལས་འོད་ཟེར་དམར་པོ་དཔག་ཏུ་མེད་པ་འཕྲོས༔ ཕྱོགས་བཅུའི་བདེ་བར་གཤེགས་པ་ཐམས་ཅད་ལ་གསུང་མཉེས་པའི་མཆོད་

པ་ཕུལ༔ འོད་ཟེར་ཚུར་འདུས་བདེ་བར་གཤེགས་པ་ཐམས་ཅད་ཀྱི་གསུང་གི་བྱིན་རླབས་ཕུར་པ་ལ་ཐིམ་པས་གསུང་བསྒྲགས་པ་ཙམ་གྱིས་སྟོང་གསུམ་སྒྲོལ་ནུས་པའི་དབང་ཐོབ་པར་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཙིཏྟ་ཨ་བྷི་ཥིཉྩ་ཧཱུཾ༔ ཕུར་པའི་ཐུགས་ཀའི་ཧཱུྃ་ལས་འོད་ཟེར་སྔོན་པོ་དཔག་ཏུ་མེད་པ་འཕྲོས༔ ཕྱོགས་བཅུའི་བདེ་བར་གཤེགས་པ་ཐམས་ཅད་ལ་ཐུགས་མཉེས་པའི་མཆོད་པ་ཕུལ༔ འོད་ཟེར་ཚུར་འདུས་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་བྱིན་རླབས་ཕུར་པ་ལ་ཐིམ་པས་ཐུགས་གཡོས་པ་ཙམ་གྱིས་སྲིད་གསུམ་སྒྲོལ་ནུས་པའི་དབང་ཐོབ་པར་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུཾ་ཕཊ༔ [ཅེས་རྩ་སྔགས་ཉེར་གཅིག་ཙམ་བཟླ་ས་ལ།] ཧཱུཾ༔ གཏུམ་ཆེན་འབར་བས་གཏི་མུག་འཇོམས༔ ཞེ་སྡང་སྲིན་པོས་ཞེ་སྡང་འདུལ༔ ང་རྒྱལ་ཆེན་པོས་ངར་འཛིན་གཅོད༔ འདོད་པ་ཆེན་པོས་འདོད་ཆགས་གསོད༔ ཕྲག་དོག་ལས་ཀྱིས་ཕྲག་དོག་འཇོམས༔ གཞི་རུ་གནས་ཤིང་ལམ་ཞེན་འདུལ༔ དུག་ལྔའི་དུག་ལྔ་རང་འཇོམས་ཤིང་༔ ཀ་དག་གཞི་རུ་ཀུན་གཞི་སྡུད༔ ཁྱབ་བདག་རྡོ་རྗེ་རྡོ་རྗེའི་བདག༔ མི་སྲུན་རྡོ་རྗེ་

སྲིན་པོར་བསྟོད༔ ཧཱུཾ༔ དཔལ་ཆེན་རྡོ་རྗེ་ཕུར་པའི་ལྷ༔ སྐུ་སྟོད་ཁྲོ་བོ་ཆེན་པོ་སྟེ༔ ཞལ་གསུམ་ཕྱག་ཀྱང་དྲུག་པ་ལ༔ དབུ་ལ་རིགས་ལྔའི་དབུ་རྒྱན་རྫོགས༔ ལྟེ་བ་མན་ཆད་སྐུ་ཡི་ཆ༔ ཆུ་སྲིན་གདུག་པའི་ཁ་ནང་ནས༔ ཨུཏྤལ་སྔོན་པོའི་འདབ་འདྲ་བ༔ འབར་བའི་ཕྲེང་བ་འཁྲིགས་པའི་དབུས༔ གནམ་ལྕགས་ཕུར་བུ་ཟུར་གསུམ་པ༔ དྲག་པོར་གྱུར་པའི་ཕུར་པ་སྟེ༔ བཏབ་ན་ལྷ་ཡང་བརླག་འགྱུར་ན༔ གནོད་བྱེད་བགེགས་ལ་སྨོས་ཅི་དགོས༔ འཁོར་བ་དོང་ནས་སྤྲུགས་ཤིག་བཛྲ་ཀཱི་ལ་ཡ༔ ཕོ་རྒྱུད་རྩད་ནས་ཆོད་ཅིག་བཛྲ་ཀཱི་ལ་ཡ༔ མོ་རྒྱུད་མངལ་ནས་སྐོམ་ཅིག་བཛྲ་ཀཱི་ལ་ཡ༔ ཁམས་གསུམ་དབང་དུ་སྡུས་ཤིག་བཛྲ་ཀཱི་ལ་ཡ༔ རྣལ་འབྱོར་འཁོར་བཅས་སྲུངས་ཤིག་བཛྲ་ཀཱི་ལ་ཡ༔ དུག་ལྔའིབག་ཆགས་སྦྱོངས་ཤིག་བཛྲ་ཀཱི་ལ་ཡ༔ ཚེ་སྲོག་དྭངས་མ་སྡུས་ཤིག་བཛྲ་ཀཱི་ལ་ཡ༔ རྣམ་ཤེས་དབྱིངས་སུ་སྤོར་ཅིག་བཛྲ་ཀཱི་ལ་ཡ༔ ལྔ་ཕུང་རྡུལ་དུ་རློག་ཅིག་བཛྲ་ཀཱི་ལ་ཡ༔ རིགས་དྲུག་སྐྱེ་སྒོ་ཆོད་ཅིག་བཛྲ་ཀཱི་ལ་ཡ༔ ཨོཾ་ཤྲཱི་བཛྲ་ཀུ་མཱ་ར་ས་མ་ཏི་ས་མ་ཡ༔ ཨ་བྷི་ཙརྻའི་དུས་ལ་བབ་བོ༔ [ཞེས་བསྐུལ་བས།] ཕུར་པ་དེ་ཡེ་ཤེས་ཀྱི་ལྷ་ལ་གཏད་དེ་དྲིལ་བས་ཕྱོགས་བཅུའི་བདེ་བར་གཤེགས་པ་ཐམས་ཅད་

འོད་དུ་ཞུ་ནས་ཕུར་པ་ལ་ཐིམ་པས་གཟི་བརྗིད་དང་ལྡན་པར་གྱུར༔ ཕུར་པ་ཕྱོགས་མཚམས་བཅུར་གཏད་དེ་དྲིལ་བས་གནོད་བྱེད་རྣམས་འོད་དུ་ཞུ་ནས་ཕུར་པ་ལ་ཐིམ་པས་ཕུར་པ་རྫུ་འཕྲུལ་དང་ལྡན་པར་གྱུར་[པར་བསམ་མོ། །][གསུམ་པ་གདབ་པའི་གཟེར་ཁ་དངོས་ལ། བརྟེན་པ་དབྱིངས་སུ་སྒྲོལ་བ་དང་། བག་ཆགས་ཀྱི་རྟེན་གཞི་བཅོམ་པ་གཉིས་ཀྱི། དང་པོ་བརྟེན་པ་དབྱིངས་སུ་བསྒྲལ་བ་ནི།] ཧཱུཾ༔ ཆོས་དབྱིངས་སྐྱེ་བ་མེད་པའི་ངང་ཉིད་ལས༔ སྐྱེ་བའི་ཆོ་འཕྲུལ་འབར་བའི་སྐུར་སྟོན་པ༔ གཞོམ་བྲལ་ཐོགས་མེད་རྡོ་རྗེ་ཕུར་པ་ཆེ༔ དབྱིངས་ལས་སྐུར་བཞེངས་ལོག་རྟོག་དབྱིངས་སུ་སྒྲོལ༔ ཧཱུཾ༔ ང་ནི་རྡོ་རྗེ་གཞོན་ནུ་ཆེ༔ ང་ནི་བཛྲ་ཀཱི་ལ་ཡ༔ སྤྲུལ་པའི་མཚོན་ཐུན་ལས་ལ་འགྱེད༔ དགྲ་བགེགས་སྲོག་ལ་ཀཱི་ལ་ཡ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེར་གཏམས་བྱས་ནས༔ རྣམ་པར་ཤེས་པ་རྡོ་རྗེར་སྒོམ༔ འཁྲུལ་སྣང་ལམ་གྱི་རཱུ་དྲ་དེ༔ ངོ་བོ་སྐྱེ་མེད་ཀློང་དུ་སྒྲོལ༔ སྐུ་གསུམ་ལྷུན་གྲུབ་ཆེན་པོར་སངས༔ ཨོཾ་ལཾ་ཧཱུཾ་ལཾ་སྟྭམྦྷ་ཡ་ནན༔ མོ་ཧཱ་གྷ་ཏ་ཡ་བྷ་ག་ཝཱ་ན་ཧྲཱིཿཀྲི་ཤཱི་བི་ཀྲི་བཛྲ་ཧཱུཾ་ཀཱ་ར་ཧཱུཾ༔ བཛྲ་ཀཱི་ལི་ཀཱི་ལ་ཡ་ཛཿཧཱུཾ་བཾ་ཧོཿ སརྦ་བིགྷྣཱན་བཛྲ་ཀཱི་ལི་

ཀཱི་ལ་ཡ་ཧཱུཾ་ཕཊ༔ བཛྲ་ཧཱུཾ་ཀཱ་ར་ཧཱུཾ་ཕཊ༔ ཧཱུཾ་ཀཱ་ར་ཧཱུཾ་ཨ་ཕཊ༔ [ཅེས་བཟླ་བཞིན་དུ་ཕུར་བུ་བསྒྲིལ་ཞིང་གདབ་སྟེ། དེའང་བདག་དཔལ་ཆེན་པོ། ཕུར་བུ་སྲས་མཆོག །ལིངྒ་གནོད་བྱེད་ཀུན་འདུས་སུ་གསལ་བས། སངས་རྒྱས་ཐམས་ཅད་ཀྱི་ཐུགས་ཀ་ནས་ཨ་དཀར་པོ་དཔག་ཏུ་མེད་པ་བྱུང་། རང་གི་སྙིང་གར་ཨ་གཅིག་ཏུ་གྱུར་པའི་འོད་ཟེར་གྱིས་སྐུ་གསུང་ཐུགས་འོད་གསལ་བར་བྱས། ལིངྒལ་ཕོག །སྒོ་གསུམ་གྱི་སྡིག་སྒྲིབ་སྦྱངས། སྙིང་གར་ཚེ་རྟེན་ཨ་འོད་ཀྱི་ཐིག་ལེའི་དབུས་སུ་ཀུན་གཞི་ནྲྀ་དུད་ཁའི་གཟུགས་སུ་གནས་པ་ལ་ཕུར་རྩེ་ཧཱུཾ་ལྡན་བཏབ་པས་ནྲྀ་ཐིག་ལེ་ཨ་བཅས་ཧཱུཾ་ལ་བསྡུས། ཕུར་རྩེ་ཨ་དཀར་ཡེ་རེ་བ་དེ་རང་ལ་བསྟན་པས་བདག་གི་རྡོ་རྗེའི་ཚེ་སྲོག་དང་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར། ཀཱི་ལ་ཡ་བརྗོད་ཅིང་ཕུར་བུའི་དབལ་ནས་བཟུང་སྟེ་ཀླད་ལ་བསྐོར་བས་ཁམས་གསུམ་ཕུར་བུས་གང་། ཐུགས་ཀའི་ཧཱུཾ་ལས་འོད་འཕྲོས། ཁམས་གསུམ་ཕུར་བུས་གདབ་ལ་ཕོག །སྐུ་གསུང་ཐུགས་ཀྱི་བྱིན་རླབས་འོད་ཟེར་གྱི་རྣམ་པས་སླར་འདུས་བདག་ལ་ཐིམ། ཛཿཧཱུཾ་བཾ་ཧོཿས་ཕུར་བུའི་ཡེ་ཤེས་ཀྱི་འོད་ཟེར་གྱིས་གཟས་པོའི་ཁམས་བཅོ་བརྒྱད་ཀྱིས་མཚོན་པའི་ལས་དང་ཉོན་མོངས་པའི་དྲི་མ་ཐམས་ཅད་དག་ནས་སེམས་ཉིད་རྡུལ་བྲལ་དྭངས་མའི་ཐིག་ལེ་ཨའེ་རྣམ་པར་གྱུར། ཧཱུཾ་ཧཱུཾ་ཧཱུཾ་བདག་གི་ཐུགས་ཀའི་ཡེ་ཤེས་སེམས་དཔའི་ཐུགས་སྲོག་འོད་ཟེར་བ་ཐག་གཟེང་བ་ལྟར་སྤྲོས་པའི་རྟ་ལ་བསྐྱོན། ཕཊ་ཕཊ་ཕཊ། འོག་མིན་དུ་རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་སྤར། ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ རྣམ་ཤེས་ཨར་གྱུར་པ་རྡོ་རྗེ་སེམས་དཔའི་ཐུགས་ཀར་ཐིམ་པས་དབྱེར་མེད་དུ་

བྱང་ཆུབ། སླར་དབུ་མའི་ལམ་བརྒྱུད་གསང་བ་ནས་ཡུམ་གྱི་མཁར་བབས། གཞན་དོན་དུ་གཟུགས་ཀྱི་སྐུ་རྡོ་རྗེ་སེམས་དཔའི་སྲས་ཀྱི་ཐུ་བོར་སྣང་ནས་འགྲོ་བའི་དོན་བྱེད་པར་མོས་པ་ནི་ཐུགས་རྗེའི་འོད་ཀྱི་ཕུར་བུ་ཞེས་བྱ་སྟེ་ལས་ཉོན་རྣམ་སྨིན་གྱི་སྐྱེ་སྒོ་བཅད་ནས་སྐྱེ་མེད་ཀྱི་དབྱིངས་སུ་སྦྱོར་བའོ། །][གཉིས་པ་བག་ཆགས་ཀྱི་རྟེན་གཞི་བཅོས་པ་ནི། འདི་མན་ཆད་ཀྱི་ཕུར་བུ་རྣམས་མི་ལྡོག་པའི་ཕྲིན་ལས་མཐར་འབྱིན་པའི་དོན་དུ་གཙོ་བོའི་གྲོགས་སུ་འདེབས་པ་སྟེ། སྒོ་མ་བཞིའི་ཕུར་བུ་བླངས་ལ།] ཧཱུཾ༔ ཕྱག་བརྙན་ཆེན་མོའི་དུས་ལ་བབ༔ པུ་ཤུད་སྲིན་བྱ་ཁྲ་ཡི་མགོ༔ ཀང་ཀ་ལ་སོགས་སྒོ་མ་བཞི༔ འཛིན་འཆིང་སྡོམ་སྡིག་ཐལ་བར་རློག༔ ཁྱེད་ཀྱི་ཐུགས་དམ་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་མཛོད༔ ཨོཾ་བཛྲ་ཀཱི་ལི་ཀཱི་ལ་ཡ་བྷིནྡྷ་ཡ་བིང་བིང་ཧཱུཾ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡན་མ༔ ས་མནྟ་ཧྲཱིཾ་ཧྲཱིཾ་ཧཱུཾ་ཕཊ༔ ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་ས་རུ་པྲ་སུ་རུ་ཧཱུཾ་ཕཊཿ ཨོཾ་བཛྲ་ཀཱི་ལི་ཀཱི་ལ་ཡ་མཱ་ཏ་ཡ་ཧཱུཾ་ཕཊ༔ [ཅེས་ལྕགས་ཀྱུ་མ་སོགས་རིམ་པ་བཞིན་གློ་སྙིང་དབུས། མཆིན་པ་ཁྲག །མཁལ་མ་ཤ །ཀླད་པ་བྱང་སེམས་ཏེ་ལུས་ཀྱི་མཚོ་བཞི་ལ་གདབ། དེ་ནས་ཡུམ་བརྒྱད་ཀྱི་སྲིད་པ་ཆགས་རིམ་ནས་གདབ་སྟེ།] ཧཱུཾ་ཛཿ དམ་ཚིག་ཆེན་པོའི་དུས་ལ་བབ༔ [ཅེས་སོགས་བབ་བརྒྱད་དང་།] བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔

རིག་འཛིན་བདག་ཅག་རྣམས་ལ་ནི༔ གནོད་ཅིང་གདུག་པའི་དགྲ་དང་བགེགས༔ བདུད་དང་བར་དུ་གཅོད་པའི་ཚོགས༔ དངོས་གྲུབ་འཕྲོག་ཅིང་འཚེ་བ་རྣམས༔ ཁྲོ་བོ་ཆེན་པོའི་བྱིན་རླབས་ཀྱིས༔ ཡུད་ཙམ་གྱིས་ནི་འདིར་ཁུག་ལ༔ མངོན་སྤྱོད་ཚུལ་བཞིན་བསྒྲལ་བ་དང་༔ ལུས་ངག་རྡུལ་དུ་བཤིག་ནས་ཀྱང༔ སྡུག་བསྔལ་ཉམས་སུ་མྱོང་བར་མཛོད༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ཟུངས་ཤིག་རྒྱོབ་ཅིག་རྣམ་པར་ཅིངས༔ གཏོགས་ཤིག་གྲོགས་དང་བྲལ་བར་གྱིས༔ རིང་པར་ཁུག་ལ་སྨྱོར་ཆུག་ཅིག༔ ཕོབ་ཅིག་རྣམ་པར་གཟིར་བར་གྱིས༔ ང་ཡི་དབང་དུ་གྱུར་ནས་ཀྱང་༔ བསྒོ་བའི་བཀའ་རྣམས་ཉན་པར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་སྥ་ར་བཱིདྱ་དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ༔ [ཅེས་སྙེམས་མའི་ཕུར་བུ་སྲིད་པ་ཆགས་པའི་རྟེན་ལྟེ་བར་གདབ། སྔགས་ཐོག་མཐའ་དེས་འགྲེས་པར།] ཙྪིནྡྷ་ཙྪིནྡྷས་ [སྡེར་མོ་རྣམ་ཤེས་རྟེན་སྙིང་གར་གདབ།] བྷིནྡྷ་བྷིནྡྷས་ [དུར་ཁྲོད་མ་དང་གཏུམ་མོ་རྒ་ཤིའི་རྟེན་དཔུང་པ་གཡས་གཡོན་དུ་གདབ} གྲྀཧྞ་གྲྀཧྞས་གཏུན་ཁུང་མ་དང་མདའ་སྙེམས་ཕུང་པོ་ཆགས་ཐོགས་རྟེན་དཔྱི་མིག་གཡས་གཡོན་དུ་གདབ། ཧ་ན་ཧ་ནས་རླུང་འབྱིན་མ་ཉིང་མཚམས་སྦྱོར་བའི་རྟེན་གསང་གནས་སུ་གདབ།

བྷནྡྷ་བྷནྡྷ་ [གསོད་མ་ཕུང་པོ་བླང་དོར་གྱི་རྟེན་དཔྲལ་བར་གདབ། གསོད་བྱེད་རྣམས་ཀྱང་རང་རང་གི་གཡོན་དུ་གདབ་བོ། །དེ་ནས་ཁྲོ་བོ་བཅུའི་ཕུར་བུ་རིག་པའི་གནས་རིམ་ནས་གདབ་སྟེ། བབ་བརྒྱད་ཀྱི་བསྐུལ་ནས།] སྡུག་བསྔལ་ཉམས་སུ་མྱོང་བར་མཛོད༔ [བར་གོང་བཞིན་ལ།] ཧཱུཾ༔ རྡོ་རྗེ་གསང་བའི་བཀའ་ལས་ནི། སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་བཅུས༔ ཀླད་པ་ཚལ་པ་བརྒྱ་རུ་ཁོས༔ ཉོན་ཅིག་བགེགས་དང་ལོག་འདྲེན་ཚོགས༔ ང་ཡི་བཀའ་ལས་འདའ་མ་བྱེད༔ ཨོཾ་བཛྲ་ཀཱི་ལི་ཀཱི་ལ་ཡ་ཧ་ན་ཧ་ན་བཛྲ་དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ༔ [ཅེས་རྣམ་རྒྱལ་ཚེའི་རྟེན་དཔྲལ་བར་གདབ། དེ་བཞིན་དུ།] ད་ཧ་ད་ཧ་བཛྲས་ [དབྱུག་སྔོན་ང་རྒྱལ་རྟེན་དཔུང་པ་གཡོན་གདབ།] པ་ཙ་པ་ཙ་བཛྲས་ [གཤིན་རྗེ་གཤེད་གཏི་མུག་རྟེན་ལྟེ་བར་གདབ།] མ་ཐ་མ་ཐ་བཛྲས་[མི་གཡོ་བ་ཕྲག་དོག་རྟེན་དཔྱི་གཡོན་དུ་གདབ།] ཛྭ་ལ་ཛྭ་ལ་བཛྲས་[རྟ་མགྲིན་འདོད་ཆགས་རྟེན་མགྲིན་པར་གདབ།] སུ་རུ་སུ་རུ་བཛྲས་[འདོད་རྒྱལ་སེར་སྣའི་རྟེན་དཔྱི་གཡས་སུ་གདབ།] མུ་རུ་མུ་རུ་བཛྲས་ [ཧཱུཾ་ཀཱ་ར་སྒོ་ལྔའི་རྟེན་སྤྱི་བོར་གདབ།] ཀ་ཏཾ་ཀ་ཡེས་[སྟོབས་པོ་ཆེ་སྐྱེ་བའི་རྟེན་གསང་བར་གདབ།] ཛ་ཡེ་བི་ཛ་ཡེས་ [སུམ་རྒྱལ་ཞེ་སྡང་རྟེན་དཔུང་པ་གཡས་སུ་གདབ།] ཨ་ཛི་ཏེ་ཨ་པ་རཱ་ཛི་ཏེ་མ་ར་སེ་ན་པྲ་མརྔྷ་ན་ཡེས་[བདུད་རྩི་ལུས་ཀྱི་རྟེན་སྙིང་གར་གདབ། ཟ་བྱེད་རྣམས་རང་རང་གི་གཡས་སུ་གདབ་བོ། །དེ་ནས་ཡུམ་

ལྷག་མ་གཉིས་ཀྱི་དགེ་སྡིག་ཆ་སྙོམས་ནས་གདབ་སྟེ། བབ་བརྒྱད་ཀྱི་བསྐུལ་སོགས་གོང་ལྟར་ལ།] གདུག་ཅིང་སྡང་སེམས་ལྡན་པ་རྣམས༔ ལྷའམ་འོན་ཏེ་བདུད་ཀྱང་རུང་༔ ང་ལ་བར་ཆད་བྱེད་པའི་བགེགས༔ མཐུ་དང་རྫུ་འཕྲུལ་མེད་པར་བྱོས༔ ཨོྃ་བཛྲ་ཀཱི་ལི་ཀཱི་ལ་ཡ་སརྦ་ཨཱ་ན་ཡ་དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊཿ [ཅེས་སྒྲ་འབྱིན་མ་མཐོ་རིས་ཀྱི་སྒོ་དགག་ཕྱིར་སྤྱི་བོར་གདབ། དེ་བཞིན་དུ།] ཏ་ཐཱ་ཡ་ཏ་ཐཱ་ཡས་ [སྐྱོད་བྱེད་མ་ངན་འགྲོའི་སྒོ་གཅོད་ཕྱིར་རྐང་མཐིལ་དུ་གདབ། གསོད་བྱེད་གཉིས་ཀྱང་རང་རང་གི་གཡོན་དུ་གདབ་བོ། །དེ་ནས་སྲས་མཆོག་གི་ཕུར་བུ་སོགས་ཀྱིས་ཐལ་བྱུང་དུ་གདབ་སྟེ།] ཧཱུཾ་ཛ༔ དམ་ཚིག་ཆེན་པོའི་དུས་ལ་བབ༔ ཁྲོ་བོ་ཆེན་པོའི་དུས་ལ་བབ༔ སྲས་མཆོག་ཆེན་པོའི་དུས་ལ་བབ༔ ཁྱེད་ཀྱི་ཕྲིན་ལས་དུས་ལ་བབ༔ ཧཱུཾ༔ ང་ནི་བཛྲ་ཀཱི་ལ་ཡ༔ རྡོ་རྗེ་ཕུར་པ་ལས་ལ་འགྱེད༔ དགྲ་བགེགས་སྙིང་ལ་ཀཱི་ལ་ཡ༔ འཁྲུལ་འཁོར་གཡོ་འཁྲུགས་རྒྱུ་རྐྱེན་སོད༔ ཨོཾ་བུདྡྷ་ཀཱི་ལི་ཀཱི་ལ་ཡ་དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ༔ [ཅེས་གཏི་མུག་གི་རྟེན་དཔྲལ་བར་གདབ། དེ་བཞིན་དུ།] བཛྲ་ཀཱི་ལ་ཡས་[ཞེ་སྡང་གི་རྟེན་སྙིང་གར་གདབ།] རཏྣ་ཀཱི་ལ་ཡས་[ང་རྒྱལ་གྱི་རྟེན་ལྟེ་བར་གདབ།] པདྨ་ཀཱི་ལ་ཡས་ [འདོད་ཆགས་ཀྱི་རྟེན་མགྲིན་པར་གདབ།] ཀརྨ་ཀཱི་ལ་ཡས་ [ཕྲག་དོག་གི་རྟེན་གསང་བར་གདབ་

སྤུ་གྲིའི་དྲག་སྔགས་ཀྱིས་སྲས་མཆོག་ཉེར་གཅིག་གི་ཕུར་བུ་རྣམས་གནས་ངེས་མེད་དུ་གདབ། བཞི་སྙིང་གཅིག་དྲིལ་སྔགས་ཤམ་སྦྱར་བས་དམ་ཅན་བཅུ་གཉིས་ལྷུ་བཅུ་གཉིས་དང་གིང་བཞི་ཉིང་ལག་བཞི་ལ་གདབ།] བྷྱོ་ [ཤམ་ཅན་གྱིས་དབང་ཕྱུག་ཉེར་བརྒྱད་བདུན་ཚན་བཞིར་བསྒོས་ཏེ་མཐིལ་བཞི་རྣམས་སུ་གདབ།] དགྲ་བགེགས་ཀྱི་སྙིང་ནང་དུ་ངོ་བོ་སྔགས་ལ་རྣམ་པ་སྤུ་གྲིའི་འཁོར་ལོ་རྩིབས་དགུ་པ་འཁོར་བས་ལྔ་ཕུང་རྡུལ་དུ་བརླག་པར་[བསམ་ཞིང་སྤུ་གྲིའི་སྔགས་ཀྱིས་ཐུན་རྫས་སྣ་ཚོགས་པས་བྲབ།] སྤྲུལ་པའི་ཁྲོ་ཚོགས་བྲན་དང་བཅས་པ་རྣམས་ཀྱིས་མཚོན་ཆའི་ཆར་ཕབ་པས་དགྲ་བགེགས་ཀྱི་ཤ་རུས་དུམ་བུར་གཏུབ་པར་[བསམ་ལ།] ཧཱུཾ༔ བྲན་དང་བཀའ་ཉན་ཕོ་ཉའི་ཚོགས༔ ཁྱེད་ཀྱི་དམ་ཚིག་དུས་ལ་བབ༔ དཀྱིལ་འཁོར་ཆེན་པོའི་བར་ཁྱམས་དང༔ མུ་རན་ཁོར་ཡུག་བཅས་པ་ལ༔ ཞིང་ཆེན་བཀྲམ་པའི་ཁྲི་སྟེང་ན༔ རྔམས་ཤིང་འཇིགས་པ་སྲིན་པོའི་ཚུལ༔ ཟ་བྱེད་ཕོ་ཉ་ལས་ཀྱི་བདག༔ ཤ་ཁྲག་སྲོག་ལ་མངའ་མཛད་ཅིང་༔ དགྲ་དང་བགེགས་ཀྱི་གཉེན་པོ་སྟེ༔ ཤ་ཁྲག་སྲོག་ལ་རྔམས་ཟས་བྱེད༔ ཁྱེད་རྣམས་དཔལ་གྱི་ཕོ་ཉ་སྟེ༔ རྦད་ཅིང་བསྐུལ་བ་ང་ཡིས་བྱེད༔ ཉམས་པའི་དགྲ་བོ་མྱུར་དུ་སྒྲོལ༔ མངོན་སྤྱོད་དྲག་པོའི་ཕྲིན་ལས་མཛོད༔ ཨོཾ་བཛྲ་

ཀཱི་ལི་ཀཱི་ལ་ཡ་ཧཱུཾ་ཕཊ༔ མ་མ་པཱ་ཤཾ་ཀུ་རུ༔ མ་ཏཾ་ཉ་ན་ཀ་ར་ཨི་དན་དྷ་ཏི༔ མ་མ་ཀརྨ་ཤཱི་གྷྲཾ་ཀཱ་ར་ཡེ་ཧཱུཾ་ཕཊཿ དགྲ་བགེགས་གནོད་བྱེད་མཱ་ར་ཡ་ཧཱུཾ་ཕཊ༔ [ཅེས་སྒྲོལ་གྲིས་མགོ་བོ་ནས་བརྩམས་ཡན་ལག་ལྔ་གཡོན་སྐོར་དུ་བཅད། མཐར་ཁོག་པ་ཁ་ཕྱེས་ལ་ཅི་བདེར་གཏུབ་བོ། དེ་ནས་རྡུལ་དུ་བརླག་པ་དངོས་ལ་དྲུག་གི །ཕོ་ཉ་ནི་བབ་བརྒྱད་ཀྱི་བསྐུལ་དང་། འཕྱོང་ནི།] ཡིད་ལ་བརྣག་པའི་དགྲ་བགེགས་འདིའི༔ ལུས་ངག་རྡུལ་ཕྲན་བཞིན་དུ་རློག༔ [སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ [ཆེ་གེ་མོ་]ད་ཧ་ཡ་ད་ཧ་ཡ་ཧཱུཾ་ཕཊ༔ [རྫས་ནི། རྡོ་རྗེའི་ཐོ་བ་དང་གཏུན་ཁུང་གྲུ་གསུམ་བར་དུ་བརྡུང་། ཏིང་ངེ་འཛིན་ནི།] དཀྱིལ་འཁོར་གསུམ་གྱི་ལྷ་ཚོགས་ཡང་སྤྲུལ་དང་བཅས་པ་དང་ལྷ་བདུད་རྣམ་རོལ་འཁོར་དང་བཅས་པས་རྡོ་རྗེ་རི་རབ་ཀྱི་ཐོ་བ་ཐོགས་ནས་དམིགས་བྱ་རྡུལ་དུ་བརླག་པར་[བསམ། དམོད་པ་ནི།] དགྲ་བགེགས་ཐལ་བའི་རྡུལ་དུ་རློག་ཅིག༔ [ཅེས་བརྗོད། སླར་ཡང་མཐའ་རྟེན་ཐུན་མིན་མཁའ་གསང་སྦྱོར་བའི་གཏུན་བརྡུང་ནི།] བདག་ཉིད་དཔལ་ཆེན་ཁྲོས་པའི་རྡོ་རྗེ་ཐོ་ལུམ་གྱི་རྣམ་པ་ཅན་དང་སྒྲོལ་ཡུམ་ཁྲོས་པའི་པདྨ་གྲུ་གསུམ་མཐིང་ནག་གི་ནང་དུ་དགྲ་བགེགས་ཐམས་ཅད་ཆུད་པ་ལ། སྦྱོར་བའི་སྒྲ་དྲག་སྔགས་དང་བཅས་ཏེ་གཅར་ཞིང་འཐག་པས་ཕྱེ་མར་བྱས། བྱང་སེམས་མེ་ལྕེ་ལྟ་བུས་

དགྲ་བགེགས་ཀྱི་ཉོན་མོངས་པ་ཐམས་ཅད་བསྲེགས། དབྱིངས་དང་ཡེ་ཤེས་དབྱེར་མེད་བདེ་བ་ཆེན་པོར་བཅོམ་པར་ [བསམ་ཞིང་།] ཧཱུཾ༔ རྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་རྣམས༔ རྡོ་རྗེ་མེ་དབལ་སྙིང་བསྲེགས་ནས༔ ལུས་ངག་རྡུལ་ཕྲན་བཞིན་དུ་རློག༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུངས་བྱས་ན༔ ལྷ་ཡང་རུང་སྟེ་བརླགཔར་གྱུར༔ ཁ་ཏཾ་ཁ་ཏཾ་ཁ་ཏཾ༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ [ཅེས་བརྡུང་ངོ་། །][དྲུག་པ་ཞལ་དུ་སྟོབ་པ་ལའང་དྲུག་གི །ཕོ་ཉ་ནི་བབ་བརྒྱད་ཀྱི་བསྐུལ་དང་། འཕྱོང་ནི།] བཛྲ་ཡ་ཀྴ་ཀྲོ་དྷ་ཁ་ཁ་ཁཱ་ཧི་ཁཱ་ཧི༔ [སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ་ [ཆེ་གེ་མོ་བྷིནྡྷ་ཡ་བྷིནྡྷ་ཡ་]ཧཱུཾ་ཕཊ༔ [རྫས་ནི། ཧོམ་གཟར་དུ་སྙིགས་མའི་ཤ་ཁྲག་སྟོབ་ཅིང་། ཏིང་ངེ་འཛིན་ནི།] དཀྱིལ་འཁོར་གསུམ་གྱི་ལྷ་ཚོགས་རྣམས་ཀྱི་ཞལ་དུ་རེ་མ་ཏཱིས་གྲོགས་བྱས་ཤིང་བསྟབས་པས་དགྱེས་པའི་རྐན་སྒྲ་དང་བཅས་པས་རོལ་པར་ [བསམ། དམོད་པ་ནི།] དགྲ་བགེགས་ཀྱི་ཤ་ཁྲག་ལྷག་མ་མེད་པར་རོལ་ཅིག༔ [ཅེས་བརྗོད། དེ་ནས་སླར་ཡང་ལིང་རོ་རྣམས་བདུད་རྩིར་སྤར་བ་དཔལ་གྱི་གཏོར་མར་སྟོབ་ཅིང་།] ཧཱུཾ༔ ཕྱེས་ཤིག་ཁྲོ་རྒྱལ་ཞལ་ཕྱེས་ཤིག༔ གནམ་ས་ཙམ་གྱི་ཞལ་གདོངས་ཤིག༔ གློག་དམར་ལྟ་བུའི་ལྗགས་རྐྱོངས་ཤིག༔ གངས་རི་ལྟ་བུའི་

མཚེ་གཙིགས་ཤིག༔ ཉི་ཟླ་ལྟ་བུའི་སྤྱན་གྱིས་གཟིགས༔ དགྲ་བགེགས་ལོག་འདྲེན་བསྒྲལ་བའི་ལྔ་ཕུང་འདི༔ མཉམ་ཉིད་ཧོམ་ཁུང་འབར་བའི་ཞལ་དུ་བསྟབ༔ འགགས་མེད་རོལ་པ་ཆེན་པོའི་མགྲིན་པར་བྲུབ༔ ཆོས་ཉིད་ཀ་དག་ལྷུན་འབྱམས་ལྟོ་བར་བསྐྱིལ༔ འགྲོ་འདུལ་རྒྱལ་པོ་སངས་རྒྱས་ཐོབ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ས་པ་རི་ཝཱ་ར་མ་ཧཱ་མཱཾ་ས་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་གོ་རོ་ཙ་ན་ལ་ཁཱ་ཧི༔ མ་ཧཱ་བ་སུ་ཏ་ལ་ཁཱ་ཧི༔ མ་ཧཱ་ཀིཾ་ནི་རི་ཏི་ལ་ཁཱ་ཧི༔ ཁ་ཐཾ་ཁ་ཐཾ་ཁ་ཐཾ༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ བཛྲ་ཡཀྴ་ཀྲོ་དྷ་ཀྲོ་དྷི་ཁཱ་ཧི་ཁཱ་ཧི་ཁཱ་ཧི༔ ཧ་ཧ་ཧ༔ ཧཱུཾ་ཧཱུཾ་ཧཱུཾ༔ ཕཊ་ཕཊ་ཕཊ༔ [ཅེས་དང་། ལས་ཀྱི་མཐའ་སྡུད་དཔལ་ལྷ་མོའི་ཞལ་དུ་སྟོབ་པའི་དོན་དུ་ལིང་གའི་སྣོད་ཁྲག་ཆང་གིས་བཤལ་བ་དམ་ཅན་གྱི་གཏོར་མར་སྦྲོན་ཅིང་།] ཧཱུཾ༔ བདག་ཉིད་ཆེན་མོའི་དུས་ལ་བབ༔ མཐུ་རྩལ་ཕྱུང་བའི་དུས་ལ་བབ༔ ང་ཡི་དབང་དུ་གྱུར་ནས་ཀྱང་༔ བསྒོ་བའི་བཀའ་རྣམས་ཉན་པར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ༔ དགྲ་བགེགས་ལོག་འདྲེན་མཐའ་དམག་དུས་འཁྲུགས་གཡུལ་འགྱེད་མཁན་དང་རྒྱ་འདྲེ་མེ་ཞོན་འབྱུང་པོ་རླུང་ཞོན་རྣམས་ཀྱི་རྣམ་ཤེས་ཚོགས་བརྒྱད་ལ་ཁཱ་ཧི༔ ཁམས་ཆེན་བཅོ་བརྒྱད་ལ་ཁཱ་ཧི༔

ཕུང་པོ་རྣམ་ལྔ་ལ་ཁཱ་ཧི༔ སྐྱེ་མཆེད་བཅུ་གཉིས་ལ་ཁཱ་ཧི༔ ལྷག་མ་རྗེས་ཤུལ་དང་བཅས་པ་ལ་ཁཱ་ཧི༔ ཧབ་ཧབ་ཧུབ་ཧུབ་མྱོག་མྱོག་ཁ་རཾ་ཁཱ་ཧི༔ [ཞེས་བསྟབས་པས་དཀྱིལ་འཁོར་པ་རྣམས་དགྱེས་བཞིན་རོལ་ཏེ་ཧ་ཧ་ཧ་ཞེས་བཞད། ཧཱུཾ་ཧཱུཾ་ཧཱུཾ་ཞེས་དངོས་གྲུབ་བསྩལ་ནས་འོད་གསལ་དུ་ཞུ། ཕཊ་ཕཊ་ཕཊ་ཅེས་དེ་ལས་གསལ་སྟོང་ལྷ་སྐུར་ཤར་བས་དབྱིངས་དང་ཡེ་ཤེས་དབྱེར་མེད་སྤྲོས་བྲལ་མཁའ་ལྟར་དག་པའི་རང་བཞིན་བསྒྲལ་བྱ་སྒྲོལ་བྱེད་བསྒྲལ་བའི་ཕྲིན་ལས་གང་ཡང་མ་གྲུབ་པ་ནི་རང་བྱུང་གི་ཡེ་ཤེས་ཞེས་བྱ་བ་ཆོས་ཉིད་ཀྱི་བདེན་པ་སྟེ་བརྣག་པ་དེ་ཁོ་ན་ཉིད་དོ། །སྐབས་འདིར་ཚོགས་ལ་རོལ་ཞིང་ལྷག་མ་གཏོང་བ་ལས་བྱང་བཞིན་བྱའོ། །][གསུམ་པ་ཟློག་པའི་དཔུང་བསྐྱེད་པའི་ཕྱིར་སླར་ཡང་བསྐུལ་བ་ནི།] ཧཱུཾ༔ ཡེ་ཤེས་བླ་མེད་གསང་ཆེན་དཀྱིལ་འཁོར་ནི༔ ཕྲིན་ལས་མངོན་སྤྱོད་རོལ་པའི་སྒྱུ་འཕྲུལ་ལས༔ རབ་འཇིགས་དྲག་པོའི་དཀྱིལ་འཁོར་ལྷུན་གྱིས་གྲུབ༔ སྣང་བས་གར་ཁྱབ་མེ་རི་འབར་བའི་ཞིང་༔ སྲིད་པ་ཐམས་ཅད་རྡོ་རྗེ་ཕུར་པའི་དལ༔ སྒྲ་རུ་གྲགས་པ་དྲག་སྔགས་རང་སྒྲ་ལྡིར༔ ལས་མཁན་ཕོ་ཉ་བཀའ་སྡོད་སྤྲིན་ལྟར་གཏིབས༔ མཚོན་ཐུན་དྲག་པོ་ཐོག་སེར་ལྟ་བུར་འབེབསཿ བསྐལ་པའི་མེ་རླུང་འཚུབས་མ་རབ་ཏུ་གཡོ༔ དགྲ་དཔུང་མ་ལུས་ཐལ་བའི་རྡུལ་བཞིན་རློག༔ བགེགས་དཔུང་རྗེས་ཤུལ་མེད་པར་གཞོམ་

པར་བྱེད༔ ཧཱུཾ༔ དྲག་པོ་ལས་ཀྱི་བཤན་ཁང་ཡངས་པའི་ནང༔ ཞིང་བཅུའི་དགྲ་བགེགས་བསྒྲལ་བའི་ཕུང་པོ་བརྡལ༔ གཏི་མུག་ཤ་ཡི་རི་བོ་སྤུངས་སེ་སྤུང་༔ འདོད་ཆགས་ཁྲག་གི་རྒྱ་མཚོ་མེ་རེ་རེ༔ ཞེ་སྡང་རུས་པའི་གྲམ་ཁྲོད་ཉི་ལི་ལི༔ དྲག་པོ་མངོན་སྤྱོད་ལས་ཀྱི་དཔའ་སྐྱེམས་ལགས༔ ཧཱུཾ། བསྐལ་པའི་མེ་ལྟར་འབར་བའི་ཀློང་དཀྱིལ་ནས༔ ། བདུད་འདུལ་ཁྲོ་བོ་ཆེན་པོའི་སྐུར་སྟོན་པ། །བརྗོད་མེད་སྤྲོས་བྲལ་ཆོས་ཀྱི་དབྱིངས་ཉིད་ལས། །དཔལ་ཆེན་རྡོ་རྗེ་གཞོན་ནུ་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །མི་གནས་ཡེ་ཤེས་ཐུགས་ཀྱི་དཀྱིལ་འཁོར་ནས། །སྦྱོར་ཡུམ་འཁོར་ལོ་རྒྱས་འདེབས་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །བདེ་ཆེན་ཀུན་བཟང་ཡུམ་གྱི་མཁའ་ཀློང་ནས། །སྒྲོལ་ཡུམ་ཨེ་ཀ་ཛ་ཊཱི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །འགགས་མེད་ཡེ་ཤེས་རོལ་པའི་སྒྱུ་འཕྲུལ་ལས། །

ཁྲོ་རྒྱལ་ཀཱི་ལ་རིགས་ལྔ་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཡབ་ཡུམ་གཉིས་སུ་མེད་པའི་དཀྱིལ་འཁོར་ནས། །བདུད་འདུལ་ཁྲོ་བཅུ་ཡབ་ཡུམ་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཅི་བགྱིའི་ལས་ལ་འདུ་བའི་དཀྱིལ་འཁོར་ནས། །ཟ་གསོད་མགོ་བརྙན་ཚོགས་རྣམས་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཕྲིན་ལས་སྐར་ལྟར་འཁྲུགས་པའི་དཀྱིལ་འཁོར་ནས། །སྲས་མཆོག་ཁྲ་ཐབས་ཉེར་གཅིག་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཚད་མེད་བཞི་ལྡན་དཀྱིལ་འཁོར་སྒོ་བཞི་ནས། །ཡེ་ཤེས་སྒོ་སྐྱོང་རྣམ་བཞི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །མ་ལྟར་བྱམས་ཤིང་སྲིངལྟར་གདུང་སེམས་ཅན། །བསྟན་སྐྱོང་

ཤྭ་ན་མཆེད་བཞི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །སྤྲུལ་པ་མང་པོ་འབྱུང་བའི་དཀྱིལ་འཁོར་ནས། །བདག་ཉིད་ཆེན་མོ་མཆེད་བཞི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །མཚོ་བཞི་ཕོ་བྲང་གཏམས་པའི་དཀྱིལ་འཁོར་ནས། །དམ་ཅན་ས་བདག་མཆེད་བཞི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །ཙིཏྟ་སྒོང་ལྟར་འདྲིལ་བའི་དཀྱིལ་འཁོར་ནས། །གིང་ཆེན་སྐྱེས་བུ་མཆེད་བཞི་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །རཀྟ་མཚོ་ལྟར་བསྐྱིལ་བའི་དཀྱིལ་འཁོར་ནས། །དབང་ཕྱུག་ཉེར་བརྒྱད་ཚོགས་རྣམས་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །གངྒཱའི་རྡུལ་ལྟར་སྤུངས་པའི་དཀྱིལ་འཁོར་ནས། །མ་བདུན་སྲིང་བཞི་ལ་སོགས་ལྷག་

མའི་གནས། །ལངྐ་དུར་ཁྲོད་མཁའ་འགྲོ་སུམ་ཅུ་གཉིས། །འབུམ་ཕྲག་ཡངས་པའི་ཚོགས་རྣམས་སྐུ་བཞེངས་ཤིག །དུག་གསུམ་ཤ་ཁྲག་མཆོད་པ་འདི་བཞེས་ལ། །མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད། །[ཅེས་བསྐུལ་ཞིང་ཚིག་མཚམས་སོ་སོར་ལིང་རོ་སྦྱར་བའི་ཁྲག་སྐྱེམས་གཏོར་མ་རྣམས་ལ་དམིགས་ཕྱེད་པར་བསྟབ་བོ། །][བཞི་པ་ཟློག་ལས་འཆོལ་བ་ལ། རྩ་བ། ཡན་ལག །ཟབ་པའི་མདེའུ་ཁ་སྦྱར་བ་དང་གསུམ་གྱི། དང་པོ་རྩ་བའི་དཀྱིལ་འཁོར་བ་ལ་ཟློག་པའི་ཕྲིན་ལས་བཅོལ་བ་ནི།] ཧཱུཾ༔ གཞོམ་བྲལ་དོན་གྱི་འོག་མིན་ཆེན་པོའི་ཞིང་༔ གྲུ་གསུམ་མཐིང་ནག་འབར་བའི་དཀྱིལ་འཁོར་དུ༔ སྐྱེ་འགགས་འགྱུར་མེད་གདོད་མའི་ཡེ་གདངས་ལས༔ རང་བྱུང་ལྷུན་གྲུབ་རྡོ་རྗེ་གཞོན་ནུར་ཤར༔ མཐིང་ནག་ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་ཞལ་རབ་དཀར་གྱེན་ལ་གཟིགས་པ་ཡིས༔ ལྷ་ཡི་གདོན་ཚོགས་སྡང་བའི་དགྲ་ལ་ཟློག༔ གཡོན་ཞལ་དམར་ནག་ཐུར་དུ་གཟིགས་པ་ཡིས༔ ས་བདག་ཀླུ་གཉན་གདོན་ཚོགས་དགྲ་ལ་ཟློག༔ དབུས་ཞལ་མཐིང་ནག་ཕྱོགས་བཅུར་གཟིགས་པ་ཡིས༔ ཕྱོགས་སྐྱོང་སྡེ་བརྒྱད་གདོན་ཚོགས་དགྲ་ལ་ཟློག༔ དབུ་སྐྲ་དམར་སེར་སྲིད་རྩེར་འབར་བ་ཡིས༔ སྣང་སྲིད་

གཡོ་འཁྲུགས་སྡང་བའི་དགྲ་ལ་ཟློག༔ ཕྱག་གཡས་རྡོ་རྗེ་རྩེ་དགུ་བསྣམས་པ་ཡིས༔ ཆོས་ཀྱི་བདེན་པ་སྡང་བའི་དགྲ་ལ་ཟློག༔ བར་པས་རྡོ་རྗེ་རྩེ་ལྔ་བསྣམས་པ་ཡིས༔ ཉོན་མོངས་དུག་ལྔ་སྡང་བའི་དགྲ་ལ་ཟློག༔ གཡོན་གྱི་དང་པོས་མེ་དཔུང་བསྣམས་པ་ཡིས༔ སྒྲིབ་གཉིས་བག་ཆགས་སྡང་བའི་དགྲ་ལ་ཟློག༔ བར་པས་ཁ་ཊྭཱཾ་རྩེ་གསུམ་བསྣམས་པ་ཡིས༔ དུག་གསུམ་གཡོ་འཁྲུགས་སྡང་བའི་དགྲ་ལ་ཟློག༔ ཐ་གཉིས་རི་རབ་ཕུར་བུ་འདྲིལ་བ་ཡིས༔ ཁམས་གསུམ་འཁྲུལ་འཁོར་སྡང་བའི་དགྲ་ལ་ཟློག༔ ཞབས་བཞི་གྱད་ཀྱི་འདོར་སྟབས་བསྒྲད་པ་ཡིས༔ བདུད་དང་རཱུ་དྲ་སྡང་བའི་དགྲ་ལ་ཟློག༔ རྡོ་རྗེའི་གཤོག་པས་བར་སྣང་ཁེངས་པ་ཡིས༔ གཟའ་དང་རྒྱུ་སྐར་དམག་དཔུང་དགྲ་ལ་ཟློག༔ དུར་ཁྲོད་ཆས་བརྒྱད་སྐུ་ལ་རྫོགས་པ་ཡིས༔ དཔའ་བོ་མཁའ་འགྲོའི་བཀའ་ཆད་དགྲ་ལ་ཟློག༔ སྦྱོར་བའི་ཡུམ་ཆེན་འཁོར་ལོ་རྒྱས་འདེབས་མས༔ འཁོར་འདས་ཡོངས་ཀྱི་རྒོལ་ངན་དགྲ་ལ་ཟློག༔ སྒྲོལ་བའི་ཡུམ་ཆེན་ཨེ་ཀ་ཛ་ཊཱི་མས༔ སྲིད་པ་མ་མོའི་འཁྲུགས་རྒོལ་དགྲ་ལ་ཟློག༔ ཧཱུཾ༔ དབུས་ཕྱོགས་དཔལ་ཆེན་བུདྡྷ་ཀཱི་ལ་ཡ༔ བཞེངས་ཤིག་ཐུགས་དམ་

གཉན་པོའི་དུས་ལ་བབ༔ དམ་ཉམས་དགྲ་བགེགས་གཟུགས་ཀྱི་ཕུང་པོ་རོལ༔ དབུས་ཀྱི་དགྲ་བགེགས་ཟློག་ཅིག་དགྲ་ལ་བསྒྱུར༔ ཤར་ཕྱོགས་དཔལ་ཆེན་བཛྲ་ཀཱི་ལ་ཡ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་རྣམ་ཤེས་ཕུང་པོ་རོལ༔ ཤར་གྱི་དགྲ་བགེགས་ཟློག་ཅིག་དགྲ་ལ་བསྒྱུར༔ ལྷོ་ཕྱོགས་དཔལ་ཆེན་རཏྣ་ཀཱི་ལ་ཡ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཚོར་བའི་ཕུང་པོ་རོལ༔ ལྷོ་ཡི་དགྲ་བགེགས་ཟློག་ཅིག་དགྲ་ལ་བསྒྱུར༔ ནུབ་ཕྱོགས་དཔལ་ཆེན་པདྨ་ཀཱི་ལ་ཡ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་འདུ་ཤེས་ཕུང་པོ་རོལ༔ ནུབ་ཀྱི་དགྲ་བགེགས་ཟློག་ཅིག་དགྲ་ལ་བསྒྱུར༔ བྱང་ཕྱོགས་དཔལ་ཆེན་ཀརྨ་ཀཱི་ལ་ཡ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་འདུ་བྱེད་ཕུང་པོ་རོལ༔ བྱང་གི་དགྲ་བགེགས་ཟློག་ཅིག་དགྲ་ལ་བསྒྱུར༔ ཧཱུཾ༔ སྟེང་ཕྱོགས་ཁྲོ་བོའི་རྒྱལ་པོ་ཧཱུཾ་ཀ་ར༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་

བགེགས་ཤ་ཁྲག་འདི་རོལ་ལ༔ ལྷ་ཡི་གདོན་ཚོགས་སྡང་བའི་དགྲ་ལ་ཟློག༔ ཤར་ཕྱོགས་ཁྲོ་བོ་ཆེན་པོ་རྣམ་པར་རྒྱལ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ དྲི་ཟའི་གདོན་ཚོགས་སྡང་བའི་དགྲ་ལ་ཟློག༔ ཤར་ལྷོ་ཁྲོ་བོ་ཆེན་པོ་དབྱུག་སྔོན་ཅན༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ མེ་ལྷའི་གདོན་ཚོགས་སྡང་བའི་དགྲ་ལ་ཟློག༔ ལྷོ་ཕྱོགས་ཁྲོ་བོ་ཆེན་པོ་གཤིན་རྗེ་གཤེད༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ གཤིན་རྗེའི་གདོན་ཚོགས་སྡང་བའི་དགྲ་ལ་ཟློག༔ ལྷོ་ནུབ་ཁྲོ་བོ་ཆེན་པོ་མི་གཡོ་མགོན༔ བཞེངས་ཤིག་ཐུགས་དམ་གཉེན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ སྲིན་པོའི་གདོན་ཚོགས་སྡངབའི་དགྲ་ལ་ཟློག༔ ནུབ་ཕྱོགས་ཁྲོ་བོ་ཆེན་པོ་རྟ་མགྲིན་རྒྱལ༔ བཞེངས་ཤིག་ཐུགས་དམ་གཉེན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ ཆུ་ལྷའི་གདོན་

ཚོགས་སྡང་བའི་དགྲ་ལ་ཟློག༔ ནུབ་བྱང་ཁྲོ་བོ་ཆེན་པོ་འདོད་པའི་རྒྱལ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ རླུང་ལྷའི་གདོན་ཚོགས་སྡང་བའི་དགྲ་ལ་ཟློག༔ བྱང་ཕྱོགས་ཁྲོ་བོ་ཆེན་པོ་བདུད་རྩི་འཁྱིལ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ གནོད་སྦྱིན་གདོན་ཚོགས་སྡང་བའི་དགྲ་ལ་ཟློག༔ བྱང་ཤར་ཁྲོ་བོ་ཁམས་གསུམ་རྣམ་པར་རྒྱལ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ དབང་ལྡན་གདོན་ཚོགས་སྡང་བའི་དགྲ་ལ་ཟློག༔ འོག་ཕྱོགས་ཁྲོ་བོ་ཆེན་པོ་སྟོབས་པོ་ཆེ༔ བཞེངས་ཤིག་ཐུགས་དམ་གཉན་པོའི་དུས་ལ་བབ༔ དམ་ཉམས་དགྲ་བགེགས་ཤ་ཁྲག་འདི་རོལ་ལ༔ ས་བདག་ཀླུ་གཉན་གདོན་ཚོགས་དགྲ་ལ་ཟློག༔ ཧཱུཾ༔ རྡོ་རྗེ་སྒྲ་འབྱིན་དགྲ་བགེགས་ཀླད་ཁྲག་རོལ༔ སྟེང་གི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་སྙེམས་མས་དགྲ་བགེགས་ཀླད་ཁྲག་རོལ༔ ཤར་གྱི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔

རྡོ་རྗེ་སྡེར་མོས་དགྲ་བགེགས་ཀླད་ཁྲག་རོལ༔ ཤར་ལྷོ་མཚམས་ཀྱི་དགྲ་བགེགས་བསྒྲལ་ཞིང་ཟློག༔ དུར་ཁྲོད་བདག་མོས་དགྲ་བགེགས་ཀླད་ཁྲག་རོལ༔ ལྷོ་ཡི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་གཏུན་ཁུང་དགྲ་བགེགས་ཀླད་ཁྲག་རོལ༔ ལྷོ་ནུབ་མཚམས་ཀྱི་དགྲ་བགེགས་བསྒལ་ཞིང་ཟློག༔ རྡོ་རྗེ་གཏུམ་མོས་དགྲ་བགེགས་ཀླད་ཁྲག་རོལ༔ ནུབ་ཀྱི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་མདའ་སྙེམས་དགྲ་བགེགས་ཀླད་ཁྲག་རོལ༔ ནུབ་བྱང་མཚམས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་རླུང་འབྱིན་དགྲ་བགེགས་ཀླད་ཁྲག་རོལ༔ བྱང་གི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་གསོད་བྱེད་དགྲ་བགེགས་ཀླད་ཁྲག་རོལ༔ བྱང་ཤར་མཚམས་ཀྱི་དགྲ་བགེགས་བསྒྲལ་ཞིང་ཟློག༔ རྡོ་རྗེ་བསྐུལ་བྱེད་དགྲ་བགེགས་ཀླད་ཁྲག་རོལ༔ འོག་གི་ཕྱོགས་ཀྱི་དགྲ་བགེགས་བསྒྲལ་ཞིང་ཟློག༔ ཛཿསྟེང་གི་ཟ་བྱེད་ཆེན་པོའི་དུས་ལ་བབ༔ རྡོ་རྗེ་ཕག་གདོང་ཀླད་ཁྲག་ཐིགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ སྟེང་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ ཤར་

གྱི་ཟ་བྱེད་ཆེན་པོའི་དུས་ལ་བབ༔ སྟག་གདོང་དཀར་པོས་མི་རོ་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ཤར་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ ཤར་ལྷོའི་ཟ་བྱེད་ཆེན་པོའི་དུས་ལ་བབ༔ གཡག་གདོང་སྔོན་པོས་རྒྱུ་མ་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ཤར་ལྷོའི་དགྲ་བགེགས་བསྒྲལ་ཏེ་ཟ་ཞིང་ཟློག༔ ལྷོ་ཡི་ཟ་བྱེད་ཆེན་པོའི་དུས་ལ་བབ༔ ཤ་གདོང་སེར་ནག་ཞིང་ཆེན་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ལྷོ་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ ལྷོ་ནུབ་ཟ་བྱེད་ཆེན་པོའི་དུས་ལ་བབ༔ གཟིག་གདོང་དམར་སྐྱ་ཙིཏྟ་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ལྷོ་ནུབ་དགྲ་བགེགས་བསྒྲལ་ཏེ་ཟ་ཞིང་ཟློག༔ ནུབ་ཕྱོགས་ཟ་བྱེད་ཆེན་པོའི་དུས་ལ་བབ༔ དམར་ནག་བྱི་ལའི་གདོང་ཅན་ཀླད་ཁྲག་ཐོགས༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ནུབ་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ ནུབ་བྱང་ཟ་བྱེད་ཆེན་པོའི་དུས་ལ་བབ༔ སྤྱང་

གདོང་དམར་སེར་ཤ་ཆེན་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ ནུབ་བྱང་དགྲ་བགེགས་བསྒྲལ་ཏེ་ཟ་ཞིང་ཟློག༔ བྱང་ཕྱོགས་ཟ་བྱེད་ཆེན་པོའི་དུས་ལ་བབ༔ སེང་གདོང་ལྗང་ནག་མི་རོ་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ བྱང་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ བྱང་ཤར་ཟ་བྱེད་ཆེན་པོའི་དུས་ལ་བབ༔ སྲེ་གདོང་སེར་ནག་གློ་སྙིང་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ བྱང་ཤར་དགྲ་བགེགས་བསྒྲལ་ཏེ་ཟ་ཞིང་ཟློག༔ འོག་གི་ཟ་བྱེད་ཆེན་པོའི་དུས་ལ་བབ༔ དྲེད་གདོང་ནག་པོ་ཡན་ལག་ཐོགས་ནས་རྒྱུག༔ མ་ངེས་ལས་ཀྱི་མཚོན་ཐུན་འཕྲུལ་འཁོར་གྱིས༔ འོག་ཕྱོགས་དགྲ་བགེགས་བསྒྲལ་ཏེ་ཟ་ཞིང་ཟློག༔ བྷྱོ༔ གསོད་བྱེད་སྨིག་བུའི་མགོ་ཅན་མཁའ་ལ་སྤྱོད༔ སྟེང་གི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་བྱ་རྒོད་མགོ་ཅན་བརྟུལ་ཞུགས་ལྡན༔ ཤར་གྱི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་བྱ་རོག་མགོ་ཅན་རིག་པའི་རྒྱལ༔ ཤར་ལྷོའི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་འུག་པའི་མགོ་

ཅན་ཤེས་རབ་ཅན༔ ལྷོ་ཡི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་ཁྭ་ཏའི་མགོ་ཅན་སྒྲིབ་ཤིང་ཅན༔ ལྷོ་ནུབ་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་པུ་ཤུད་མགོ་ཅན་མིག་རྩི་ཅན༔ ནུབ་ཀྱི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་ཁྲ་ཡི་མགོ་ཅན་མྱུར་མགྱོགས་ལྡན༔ ནུབ་བྱང་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་ཕ་ཝཾ་མགོ་ཅན་ཐབས་ལ་མཁས༔ བྱང་གི་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་སྲེ་མོང་མགོ་ཅན་རྩལ་ཤུགས་ལྡན༔ བྱང་ཤར་དགྲ་བགེགས་གནོད་བྱེད་གསོད་ཅིང་ཟློག༔ གསོད་བྱེད་བྱི་བའི་མགོ་ཅན་ལས་ལ་དབང༔ འོག་གི་དགྲ་བགེགས་གནོད་བྱེད་གསོད་ཅིང་ཟློག༔ བྷྱོ༔ ཡེ་ཤེས་ཁྲོ་བོ་ཡབ་ཡུམ་ཕྲིན་ལས་གར༔ ཟ་གསོད་ལས་ཀྱི་ཕྲ་མེན་ཁྱེད་རྣམས་ཀྱིས༔ དགྲ་བགེགས་གདུག་པའི་ཤ་ཁྲག་སྲོག་དབུགས་རོལ༔ ཕྲིན་ལས་དྲག་པོས་བཟློག་བསྒྱུར་ལས་མཛོད་ཅིག༔ ཧཱུཾ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཡི༔ གསང་གསུམ་སྒྱུ་འཕྲུལ་གར་གྱི་རྣམ་རོལ་ལས༔ གཡས་སུ་སྐུ་ཡི་ཁྲ་ཐབས་ཆེན་པོ་

བདུན༔ ཕྲིན་ལས་དུས་ལ་བབ་བོ་དབྱིངས་ནས་བཞེངས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ཕོ་གདོན་རྒྱལ་འགོང་མ་ལུས་དགྲ་ལ་ཟློག༔ གཡོན་དུ་གསུང་གི་ཁྲ་ཐབས་ཆེན་པོ་བདུན༔ ཕྲིན་ལས་དུས་ལ་བབ་བོ་དབྱིངས་ན་བཞེངས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ མོ་གདོན་བསེན་མོ་མ་ལུས་དགྲ་ལ་ཟློག༔ མདུན་དུ་ཐུགས་ཀྱི་ཁྲ་ཐབས་ཆེན་པོ་བདུན༔ ཕྲིན་ལས་དུས་ལ་བབ་བོ་དབྱིངས་ནས་བཞེངས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ཀླུ་གདོན་ས་བདག་མ་ལུས་དགྲ་ལ་ཟློག༔ ཛཿ ཞི་མཛད་ཤར་གྱི་སྒོ་མ་ལྕགས་ཀྱུ་མ༔ འགུགས་འདྲེན་ལས་ཀྱི་ཕོ་ཉ་ཆེན་མོ་བཞེངས༔ ཞེ་སྡང་དགྲ་བགེགས་ཤ་ཁྲག་སྲོག་དབུགས་རོལ༔ ཕྲིན་ལས་ཤར་སྒོའི་མཐའ་དམག་དམ་སྲི་ཟློག༔ ཧཱུཾ༔ རྒྱས་མཛད་ལྷོ་ཡི་སྒོ་མ་ཞགས་པ་མ༔ འཛིན་འཆིང་ལས་ཀྱི་ཕོ་ཉ་ཆེན་མོ་བཞེངས༔ ང་རྒྱལ་དགྲ་བགེགས་ཤ་ཁྲག་སྲོག་དབུགས་རོལ༔ ཕྲིན་ལས་ལྷོ་སྒོའི་མཐའ་དམག་དམ་སྲི་ཟློག༔ བཾ༔ དབང་སྡུད་ནུབ་ཀྱི་སྒོ་མ་ལྕགས་སྒྲོག་མ༔ སྡོམ་བྱེད་ལས་ཀྱི་ཕོ་ཉ་ཆེན་མོ་བཞེངས༔ འདོད་ཆགས་དགྲ་བགེགས་ཤ་

ཁྲག་སྲོག་དབུགས་རོལ༔ ཕྲིན་ལས་ནུབ་སྒོའི་མཐའ་དམག་དམ་སྲི་ཟློག༔ ཧོཿ མངོན་སྤྲོད་ལས་མཛད་བྱང་སྒོ་དྲིལ་བུ་མ༔ འབེབས་ཤིང་གསོད་གཅོད་ཕོ་ཉ་ཆེན་མོ་བཞེངས༔ ཕྲག་དོག་དགྲ་བགེགས་ཤ་ཁྲག་སྲོག་དབུགས་རོལ༔ ཕྲིན་ལས་བྱང་སྒོའི་མཐའ་དམག་དམ་སྲི་ཟློག༔ བྷྱོ༔ བར་ཁྱམས་གནམ་ལྕགས་འཁོར་ལོའི་རྩིབས་དབུས་ན༔ གཏུམ་མོ་ཤྭ་ན་མཆེད་བཞི་མཐུ་རྩལ་ཅན༔ དོ་ནུབ་ཁྱོད་ལ་བཟློག་པའི་ལས་བཅོལ་གྱི༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རྣམ་བཞིའི་མཐུ་དང་རྩལ་ཤུགས་ཕྱུང་༔ སྡང་དགྲ་ལྟ་ལོག་ནག་ཕྱོགས་བདུད་དཔུང་ཟློག༔ བར་ཁྱམས་གནམ་ལྕགས་འཁོར་ལོའི་རྩིབས་སྟོད་ན༔ བདག་ཉིད་ཆེན་མོ་མཆེད་བཞི་མཐུ་རྩལ་ཅན༔ དོ་ནུབ་ཁྱོད་ལ་བཟློག་པའི་ལས་བཅོལ་གྱི༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རྣམ་བཞིའི་མཐུ་དང་རྩལ་ཤུགས་ཕྱུང་༔ སྡང་དགྲ་ལྟ་ལོག་ནག་ཕྱོགས་བདུད་དཔུང་ཟློག༔ བར་ཁྱམས་གནམ་ལྕགས་འཁོར་ལོའི་རྩིབས་སྨད་ན༔ ས་བདག་ཆེན་མོ་མཆེད་བཞི་མཐུ་རྩལ་ཅན༔ དོ་ནུབ་ཁྱོད་ལ་བཟློག་པའི་ལས་བཅོལ་གྱི༔ དགྲ་

བགེགས་ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རྣམ་བཞིའི་མཐུ་དང་རྩལ་ཤུགས་ཕྱུང་༔ སྡང་དགྲ་ལྟ་ལོག་ནག་ཕྱོགས་བདུད་དཔུང་ཟློག༔ ཕོ་བྲང་ཆེན་པོའི་ཕྱི་ཡི་སྒོ་བཞི་ན༔ སྒྲོལ་གིང་སྐྱེས་བུ་མཆེད་བཞི་མཐུ་རྩལ་ཅན༔ དོ་ནུབ་ཁྱོད་ལ་བཟློག་པའི་ལས་བཅོལ་གྱི༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རྣམ་བཞིའི་མཐུ་དང་རྩལ་ཤུགས་ཕྱུང་༔ སྒོ་བཞིའི་ལྟ་ལོག་ནག་ཕྱོགས་བདུད་དཔུང་ཟློག༔ བྷྱོ༔ དཀྱིལ་འཁོར་ཆེན་པོའི་མུ་རན་ཁོར་ཡུག་ཡུ༔ དབང་ཕྱུག་ཉེར་བརྒྱད་མ་སྲིང་ལངྐའི་ཚོགས༔ དུར་ཁྲོད་མཁའ་འགྲོ་མཐུ་དང་རྫུ་འཕྲུལ་ཅན༔ དོ་ནུབ་ཁྱོད་ལ་བཟློག་པའི་ལས་བཅོལ་གྱི༔ དགྲ་བགེས་ཤ་ཁྲག་གཏོར་མ་འདི་བཞེས་ལ༔ ཕྲིན་ལས་རྣམ་བཞིའི་མཐུ་དང་རྩལ་ཤུགས་ཕྱུང་༔ སྡང་དགྲ་ལྟ་ལོག་ནག་ཕྱོགས་བདུད་དཔུང་ཟློག༔ བྷྱོ༔ དཀོན་མཆོག་རིན་ཆེན་གསུམ་གྱི་བདེན་པ་དང་༔ ཆོས་ཉིད་རྣམ་དག་རྟེན་འབྲེལ་བསླུ་མེད་ཀྱི༔ བདེན་པའི་སྟོབས་དང་དཀྱིལ་འཁོར་ལྷ་ཚོགས་མཐུས༔ སྔོན་ལས་འཕྲལ་རྐྱེན་ངན་པ་དགྲ་ལ་ཟློག༔ བཞི་བརྒྱ་རྩ་བཞིའི་ནད་རྣམས་དགྲ་ལ་ཟློག༔ སྟོང་ཕྲག་བརྒྱད་ཅུའི་བགེགས་

རྣམས་དགྲ་ལ་ཟློག༔ མཐུ་གཏད་ཧོམ་ཟོར་རྦོད་གཏོང་དགྲ་ལ་ཟློག༔ མུ་སྟེགས་ཀླ་ཀློའི་རིག་སྔགས་དགྲ་ལ་ཟློག༔ འཇིགས་ཆེན་བརྒྱད་དང་བཅུ་དྲུག་དགྲ་ལ་ཟློག༔ ཆོས་སྲིད་ནོར་གྱི་བར་ཆད་དགྲ་ལ་ཟློག༔ ཀེག་བདུད་གཤེད་གསུམ་བབས་པ་དགྲ་ལ་ཟློག༔ སྲི་དང་གྲི་ཁ་མཚོན་དབལ་དགྲ་ལ་ཟློག༔ ཐན་ལྟས་མཚན་མ་ངན་པ་དགྲ་ལ་ཟློག༔ མོ་རྩིས་རྨི་ལྟས་ངན་པ་དགྲ་ལ་ཟློག༔ ལྷ་དང་སྲུང་མའི་བཀའ་ཆད་དགྲ་ལ་ཟློག༔ སྡེ་བརྒྱད་ཡོངས་ཀྱི་རྒོལ་ངན་དགྲ་ལ་ཟློག༔ ཟ་འདྲེ་ཕུང་སྲི་ཐམས་ཅད་དགྲ་ལ་ཟློག༔ དགྲ་ཇག་ཆོམ་རྐུན་རྒོལ་ངན་དགྲ་ལ་ཟློག༔ དུས་ངན་ཡོ་ལང་འཁྲུག་རྩོད་དགྲ་ལ་ཟློག༔ ནད་མཚོན་མུ་གེའི་བསྐལ་ངན་དགྲ་ལ་ཟློག༔ ས་དང་ལམ་གྱི་བར་ཆད་དགྲ་ལ་ཟློག༔ མི་མཐུན་ཕྱོགས་རྣམས་མ་ལུས་དགྲ་ལ་ཟློག༔ [ཅེས་དང་། གཞན་ཡང་།] ཧཱུཾ༔ མ་ཧཱ་དེ་ཝ་ལྷ་ཡི་གདོན༔ སྒེག་པའི་སྟོབས་ཀྱིས་བཟློག་ཏུ་གསོལ༔ འཆི་བདག་ནག་པོ་གཤིན་རྗེའི་གདོན༔ དཔའ་བའི་སྟོབས་ཀྱིས་བཟློག་ཏུ་གསོལ༔ ཁྲམ་ཐོགས་ནད་བདག་མ་མོའི་གདོན༔ མི་སྡུག་སྟོབས་ཀྱིས་བཟློག་ཏུ་གསོལ༔ ནག་པོ་བཀྲག་མེད་བདུད་ཀྱི་གདོན༔

རྒོད་པའི་སྟོབས་ཀྱིས་བཟློག་ཏུ་གསོལ༔ གང་བ་བཟང་པོ་གནོད་སྦྱིན་གདོན༔ གཤེ་བའི་སྟོབས་ཀྱིས་བཟློག་ཏུ་གསོལ༔ ཁྱབ་འཇུག་སྒྲ་གཅན་གཟའ་ཡི་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ ལི་བྱིན་ཧ་ར་འགོང་པོའི་གདོན༔ སྙིང་རྗེའི་སྟོབས་ཀྱིས་བཟློག་ཏུ་གསོལ༔ ཡམ་ཤུད་དམར་པོ་བཙན་གྱི་གདོན༔ རྔམས་པའི་སྟོབས་ཀྱིས་བཟློག་ཏུ་གསོལ༔ དགའ་བོ་འཇོག་པོ་ཀླུ་ཡི་གདོན། ཞི་བའི་སྟོབས་ཀྱིས་བཟློག་ཏུ་གསོལ༔ ནད་མུག་དུག་མཚོན་ལུས་ཀྱི་གདོན༔ སྐུ་ཡི་སྟོབས་ཀྱིས་བཟློག་ཏུ་གོལ༔ མི་ཁ་དམོད་ཚིག་ངག་གི་གདོན༔ གསུང་གི་སྟོབས་ཀྱིས་བཟློག་ཏུ་གསོལ༔ ཉོན་མོངས་གཟུང་འཛིན་སེམས་ཀྱི་གདོན༔ ཐུགས་ཀྱི་སྟོབས་ཀྱིས་བཟློག་ཏུ་གསོལ༔ མི་མཐུན་ལྟས་ངན་ཆོ་འཕྲུལ་ཀུན༔ མཐུ་སྟོབས་རྩལ་གྱིས་བཟློག་ཏུ་གསོལ༔ བྷྱོ༔ གཞན་ཡང་བཟློག་ཅིང་བསྒྱུར་བ་ནི༔ རྣལ་འབྱོར་བདག་ཅག་འཁོར་བཅས་ལ༔ གནོད་ཅིང་བར་དུ་གཅོད་པ་ཡི༔ ལྟས་ངན་བརྒྱད་ཅུ་རྩ་གཅིག་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ དུས་མིན་འཆི་དང་འཇིགས་བརྒྱད་ཟློག༔ གློ་བུར་བདུན་བརྒྱ་ཉི་ཤུ་ཟློག༔ བགེགས་

རིགས་སྟོང་ཕྲག་བརྒྱད་ཅུ་ཟློག༔ གདོན་རིགས་ཉི་ཁྲི་ཆིག་སྟོང་ཟློག༔ ཀེག་ཆེན་སུམ་བརྒྱ་དྲུག་ཅུ་ཟློག༔ ལྷ་ཆེན་དྲག་པོའི་གདུག་རྩུབ་ཟློག༔ ལྷ་མ་ཡིན་གྱི་རྒྱུ་ཐབས་ཟློག༔ མགོན་པོས་པར་བུ་བསྐོར་བ་ཟློག༔ གཤིན་རྗེའི་འཕྲུལ་འཁོར་བཅས་པ་ཟློག༔ དྲང་སྲོང་བྲམ་ཟེའི་དམོད་པ་ཟློག༔ གཟའ་ཡི་ཀིང་ཀང་འཕེན་པ་ཟློག༔ བཙན་ནད་གཟེར་ཁ་གཏོང་བ་ཟློག༔ ས་བདག་ཀླུ་ཡི་མཛེ་ནད་ཟློག༔ བནྡྷེས་འབུམ་སྐོར་བྱེད་པ་ཟློག༔ སྔགས་པས་སྔགས་ཟོར་འཕེན་པ་ཟློག༔ བོན་གྱིས་ཛོ་དམར་འཕེན་པ་ཟློག༔ མུ་སྟེགས་ངན་སྔགས་བྱེད་པ་ཟློག༔ བྱད་ཕུར་རྦོད་གཏོང་ཟུག་པ་ཟློག༔ མནན་གཏད་བསྲེགས་འཕང་བྱས་པ་ཟློག༔ མོ་རྩིས་རྨི་ལྟས་མཚན་ངན་ཟློག༔ སྔ་ཞགས་མདའ་ལྟར་འཕེན་པ་ཟློག༔ ཕྱི་ཞགས་གྲུ་གུར་འཐུལ་བ་ཟློག༔ མི་མཐུན་གནོད་པའི་ཕྱོགས་ཀུན་ཟློག༔ ཧཱུཾ༔ སྔོན་ཚེ་རྒྱལ་བ་ཤཱཀ་ཐུབ་ཀྱིས༔ བསམ་གཏན་བདུད་རྩི་བརྟེན་པའི་ཚེ༔ གཡོན་ཅན་བདུད་ཀྱི་བར་ཆད་བྱུང་༔ དེ་ཚེ་ཁྱོད་སྦྲན་བདུད་ཚོགས་བཏུལ༔ ཟབ་ཞི་སྤྲོས་བྲལ་མངོན་དུ་བརྙེས༔ དེ་འོག་རྒྱ་གར་ཆོས་ཀྱི་གླིང་༔ མུ་སྟེགས་ནག་པོས་དབང་བྱས་ཚེ༔

སློབ་དཔོན་པྲ་བྷ་ཧསྟི་ཡིས༔ ཁྱོད་སྦྲན་མུ་སྟེགས་ཕམ་པར་བྱས༔ སངས་རྒྱས་བསྟན་པའི་རྒྱལ་རྔ་བརྡུངས༔ དེ་འོག་བལ་ཡུལ་ཡང་ལེ་ཤོད༔ སློབ་དཔོན་པདྨ་ཐོད་ཕྲེང་གིས༔ ཡང་དག་ཕྱག་རྒྱ་ཆེ་བསྒྲུབ་ཚེ༔ བར་དུ་གཅོད་པ་སྣ་ཚོགས་བྱུང་༔ ཁྱོད་བསྒྲུབས་མཆོག་གི་དངོས་གྲུབ་བརྙེས༔ དེ་འོག་བོད་ཡུལ་མུན་པའི་གླིང་༔ བཙད་པོ་ཁྲི་སྲོང་ལྡེའུ་བཙན་གྱིས༔ ཆོས་འཁོར་ཆེན་པོ་བཞེངས་པའི་ཚེ༔ ལྷ་འདྲེ་གདུག་པས་བར་དུ་བཅད༔ སྔགས་འཆང་པདྨ་འབྱུང་གནས་ཀྱིས༔ ཁྱོད་བསྐུལ་མངའ་བདག་བཞེད་པ་འགྲུབ༔ ད་ལྟ་རིག་འཛིན་བདག་ཅག་རྣམས༔ བདེ་ཆེན་བྱང་ཆུབ་བསྒྲུབ་པ་ལ༔ གཉིས་འཛིན་ལོག་འདྲེན་དགྲ་བགེགས་དང་༔ ཆགས་སྒོ་རྐྱེན་ངན་བར་ཅད་ཚོགས༔ ཕ་རོལ་བྱད་ཕུར་རྦོད་གཏོང་སོགས༔ མི་མཐུན་གནོད་པའི་ཕྱོགས་ཐམས་ཅད༔ བཟློག་བསྒྱུར་ཞི་བའི་ལས་བཅོལ་ན༔ སྔོན་གྱི་ཐུགས་དམ་མ་གཡེལ་བར༔ ཁྲག་འཐུང་འབར་བའི་ལྷ་ཚོགས་ཀྱིས༔ ཐུགས་རྗེ་མཐུ་དཔུང་ཆེར་བསྐྱེད་ལ༔ བར་དུ་གཅོད་པ་མ་ལུས་པ༔ བཟློག་ཅིང་བསྒྱུར་བའི་ཕྲིན་ལས་མཛོད༔ [ཅེས་བཟློག་པའི་ཕྲིན་ལས་བསྐུལ་ལོ། །][གཉིས་པ་ཡན་ལག་གི་ལས་ལ། རྩང་ཟློག་དང་། ཁྱུང་ཟློག་གཉིས་

ཀྱི། དང་པོ་རྩང་ཟློག་ནི།] ཧཱུཾ༔ དྲག་པོ་གནམ་ལྕགས་འཁོར་ལོའི་སྟེང་༔ ཤ་ཁྲག་དམར་ཆེན་གཏོར་མ་བཤམས༔ མཐའ་མར་རྩང་གི་ར་བས་བསྐོར༔ དྲག་པོ་སྔགས་ཀྱི་ནུས་སྟོབས་ཀྱིས༔ མཚོན་ཐུན་སྣ་ཚོགས་ཚྭ་ཚྭ་འཕྲོ༔ དགྲ་བགེགས་ཐམས་ཅད་བརླག་པར་བྱེད༔ ཧཱུཾ་བྷྱོ༔ སྔོན་གྱི་བསྐལ་པའི་དང་པོ་ལ༔ རྩུབ་འགྱུར་ཚལ་གྱི་དུར་ཁྲོད་དུ༔ གདུག་པའི་སྐྱེར་ཚེར་ཕུང་གཅིག་སྐྱེས༔ རྩ་བ་ཀླུ་ཡི་ཡུལ་དུ་ཟུག༔ ཡལ་ག་འདོད་ཁམས་གནས་ན་གྱེས༔ འབྲས་བུ་གཟུགས་ཀྱི་ཁམས་སུ་སྨིན༔ རྩེ་མོ་གཟུགས་མེད་ཁམས་སུ་སླེབས༔ བཅོམ་ལྡན་སྤྱི་དཔལ་ཆེན་པོ་ཡི༔ སྤྲུལ་པ་ལས་ཀྱི་ཕོ་ཉ་ལྔས༔ གཅོད་བྱེད་འཕྲུལ་གྱི་ཟོར་བས་བརྔས༔ མགོ་མཇུག་གྲུ་གསུམ་ཚུལ་དུ་བཟོས༔ སྐེད་པ་རྒྱ་མདུད་གྲུ་བཞི་བྱས༔ བདག་ལྟའི་རཱུ་དྲ་བསྒྲལ་བའི་ཕྱིར༔ བདག་མེད་ཆེན་པོའི་རྒྱ་ཡིས་བཏབ༔ སྐུ་གསུམ་རྒྱལ་བས་དབང་ཡང་བསྐུར༔ ཡེ་ཤེས་ལྔ་ཡིས་ངར་བླུད་དེ༔ ཞིང་བཅུ་བསྒྲལ་བའི་མཚོན་དུ་བསྔགས༔ རྩང་གི་རྒྱུ་བྱུང་དེ་ནས་བྱུང་༔ དེ་བཞིན་རྩང་ལ་བྱིན་ཆེན་ཕོབ༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་

གྱི་རྩེ་ལ་ལྕགས་ཀྱི་ཕོ་རོག་ལྡིང་༔ མར་གྱི་རྩེ་ལ་དུག་སྦྲུལ་ནག་པོ་འཁྱིལ༔ སྐེད་པ་རྒྱ་མདུད་གཡག་ནག་ངུར་ཞིང་འགྱིང་༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་མཁའ་འགྲོས་གར་སྟབས་བྱེད༔ མར་གྱི་རྩེ་ལ་ཐན་གྱི་ཕོ་ཉ་འགྱེད༔ སྐེད་པ་རྒྱ་མདུད་བསྐལ་པའི་རླུང་དམར་འཚུབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་ལྕགས་འབྲུག་དཀར་པོ་རྒྱུ༔ མར་གྱི་རྩེ་ལ་རོ་ཡི་གྲམ་པ་བརྡལ༔ སྐེད་པ་རྒྱ་མདུད་ཐོག་སེར་བུ་ཡུག་འཚུབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སེང་གེས་རལ་པ་བསིག༔ མར་གྱི་རྩེ་ལ་ལྕགས་ཀྱི་སྦལ་པ་འཕྱོ༔ སྐེད་པ་རྒྱ་མདུད་དུང་གི་བྱི་བ་མཁུན༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གསེར་གྱི་སྦྲང་ཆུང་རྩེ༔ མར་གྱི་རྩེ་ལ་ལྕགས་སྡིག་ནག་པོ་འགྱེད༔ སྐེད་པ་རྒྱ་མདུད་བསྐལ་པའི་མེ་དཔུང་འབར༔ དགྲ་བགེགས་གདུག་

པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་དཔའ་བོས་མཚོན་ཆ་གདེངས༔ མར་གྱི་རྩེ་ལ་མཚོན་ཆའི་ཚྭ་ཚྭ་འཕྲོ༔ སྐེད་པ་རྒྱ་མདུད་ཐུན་གྱི་ཆར་པ་འབེབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སྡེ་བརྒྱ་དམག་དཔུང་འཁྲུགས༔ མར་གྱི་རྩེ་ལ་ས་བདག་ཀྭི་བསྭོ་སྒྲོགས༔ སྐེད་པ་རྒྱ་མདུད་གློག་ཞགས་འཁྱུག་ཅིང་འཁྱིལ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གསེར་གྱི་འུག་པ་རྒོད༔ མར་གྱི་རྩེ་ལ་གཟིག་མོའི་སོ་སྒྲ་འདོན༔ སྐེད་པ་རྒྱ་མདུད་ཐན་གྱི་སྤྲུལ་པ་འགྱེད༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་མཚན་རྒྱུའི་བྱ་མ་ལྡིང་༔ མར་གྱི་རྩེ་ལ་ཟངས་ཀྱི་འཕར་བ་མཁུན༔ སྐེད་པ་རྒྱ་མདུད་བཙན་གྱི་ཕོ་ཉ་འགྱེད༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་པུ་ཤུད་ཁྲ་མོ་ལྡིང་༔ མར་གྱི་རྩེ་ལ་དོམ་དང་

དྲེད་མོ་འཐབ༔ སྐེད་པ་རྒྱ་མདུད་ནད་ཀྱི་ན་བུན་འཁྲུགས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་མེ་ཁྱུང་དམར་པོ་ལྡིང་༔ མར་གྱི་རྩེ་ལ་སྟག་གཡག་འཛིང་འཐབ་བྱེད༔ སྐེད་པ་རྒྱ་མདུད་ཕུར་པའི་ཚྭ་ཚྭ་འཕྲོ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་མོར་བྱ་རྒོད་རོ་ལ་ལྡིང་༔ མར་གྱི་རྩེ་ལ་ཆུ་སྲིན་གདུག་པ་རྔམས༔ སྐེད་པ་རྒྱ་མདུད་ཡུངས་ཐུན་སེར་ལྟར་འབེབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩཕེ་མོ་གཉིས་དང་ལྡན༔ ཡར་གྱི་རྩེ་ལ་ཁྭ་ཏ་ནག་པོ་ལྡིང་༔ མར་གྱི་རྩེ་ལ་འདྲེ་སྲིན་གདུག་པ་རྒྱུ༔ སྐེད་པ་རྒྱ་མདུད་ཁྲག་གི་ཆར་པ་འབེབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སྲིན་བྱའི་འཇོལ་སྟབས་བྱེད༔ མར་གྱི་རྩེ་ལ་སྡོམ་ནག་ཚང་ཁ་འཁྲུགས༔ སྐེད་པ་རྒྱ་མདུད་དུག་གི་རླངས་པ་འཕྱོ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་

དང་ལྡན༔ ཡར་གྱི་རྩེ་ལ་རྨ་བྱའི་གཤོག་གུར་ཕུབ༔ མར་གྱི་རྩེ་ལ་བདུད་ཀྱི་བཤའ་ཁང་བྱེད༔ སྐེད་པ་རྒྱ་མདུད་མདའ་ཐུན་བུ་ཡུག་འཚུབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་ལྕགས་ཀྱི་བྱ་ཁྱུང་ལྡིང་༔ མར་གྱི་རྩེ་ལ་དུར་ཁྲོད་ལྕེ་སྤྱང་འདུ༔ སྐེད་པ་རྒྱ་མདུད་གནམ་ལྕགས་གྲི་ཐུན་འབེབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གླག་མོས་གཤོག་འཛིང་བྱེད༔ མར་གྱི་རྩེ་ལ་ཟངས་ཀྱི་གླ་བ་འཕྱོ༔ སྐེད་པ་རྒྱ་མདུད་ལྕགས་ཀྱི་སེར་བ་འབེབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གཡུ་ཡི་ནེ་ཙོ་ལྡིང་༔ མར་གྱི་རྩེ་ལ་གཟའ་དང་སྐར་མདའ་འཁྲུགས༔ སྐེད་པ་རྒྱ་མདུད་རྡོ་རྗེའི་ཚྭ་ཚྭ་འཕྲོ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་དངུལ་གྱི་ཕུག་རོན་མཁུན༔ མར་གྱི་རྩེ་ལ་རྔ་མོང་མགོ་དགུ་འགྱིང་༔ སྐེད་པ་རྒྱ་མདུད་ཕོ་ཉ་

མཚོན་ཐོགས་འགྱེད༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་དུར་བྱ་ཀངྐ་ལྡིང་༔ མར་གྱི་རྩེ་ལ་ལྕགས་ཀྱི་ཏེ་ལོ་འགྱེད༔ སྐེད་པ་རྒྱ་མདུད་རྡོ་ཕྱེའི་ཆར་པ་བསྙིལ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་དུང་བྱ་གོང་མོ་ལྡིང་༔ མར་གྱི་རྩེ་ལ་སྤྲེའུས་གར་སྟབས་བསྒྱུར༔ སྐེད་པ་རྒྱ་མདུད་ན་བུན་སྔོ་དམར་འཁྲིགས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གོ་བོས་གཤོག་འཛིང་བྱེད༔ མར་གྱི་རྩེ་ལ་ཐེའུ་རང་བླ་རྐུན་འགྱེད༔ སྐེད་པ་རྒྱ་མདུད་མཚོན་ཆའི་འཁོར་ལོ་འཁོར༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་བྱ་རོག་འུག་པ་འཐབ༔ མར་གྱི་རྩེ་ལ་རོ་ལངས་གད་མོ་སྒྲོགས༔ སྐེད་པ་རྒྱ་མདུད་མ་མོའི་ཚང་ཁ་འཁྲུགས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་འབྲུག་དང་སེང་གེ་འཐབ༔

མར་གྱི་རྩེ་ལ་དམག་གི་བསྭོ་སྒྲ་སྒྲོགས༔ སྐེད་པ་རྒྱ་མདུད་གྲིབ་ཀྱི་ཡོ་ལང་འགྱེད༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སྟག་དང་སྤྲེའུ་འཐབ༔ མར་གྱི་རྩེ་ལ་སྲིན་མོ་རོ་ཁུར་འགྱེད༔ སྐེད་པ་རྒྱ་མདུད་གནམ་ལྕགས་ཕུར་པ་འཕྲོ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་གནོད་སྦྱིན་ཕོ་མོ་འགྱེད༔ མར་གྱི་རྩེ་ལ་ཤ་བ་རུ་འཛིང་བྱེད༔ སྐེད་པ་རྒྱ་མདུད་སྤུ་གྲི་འབར་བ་འཕྲོ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སྲོག་བདག་རྒྱལ་པོ་འཕྲོ༔ མར་གྱི་རྩེ་ལ་ཀེང་རུས་ཆོ་སྒྲ་འདོན༔ སྐེད་པ་རྒྱ་མདུད་མ་བདུད་རོ་ལ་ཉུལ༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྷྱོ༔ གདུག་པའི་རྩང་ཕུར་རྩེ་མོ་གཉིས་དང་ལྡན༔ ཡར་གྱི་རྩེ་ལ་སྲིན་པོ་མཚོན་ཐོགས་འགྱེད༔ མར་གྱི་རྩེ་ལ་གཤིན་རྗེའི་བཤའ་ཁང་བྱེད༔ སྐེད་པ་རྒྱ་མདུད་སྲོག་གཅོད་ཡོ་ལང་འཚུབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔

བྷྱོ༔ དྲག་པོ་གདུག་པའི་རྩང་ཕུར་བརྒྱ་རྩ་བརྒྱད༔ དུག་ཁྲག་དུད་སོལ་ནག་པོའི་རྫས་ཀྱིས་བྱུགས༔ མི་སྲུན་རཱུ་དྲ་ནག་པོའི་རྒྱུ་མས་སྦྲེལ༔ རྩེ་མོར་སྣ་ཚོགས་སྙིང་དང་ཤ་ཡིས་བརྒྱན༔ རྩ་བར་ཤ་ཟན་སྲོག་ཆགས་ཁྲག་མཚོ་འཁྱིལ༔ རྩང་ལ་བྷྱོ་ཡིག་ཉི་ཤུ་རྩ་བརྒྱད་བྲིས༔ མ་ཏྲཾ་ལུས་ལ་སྲིན་མོའི་འགྲོས་སུ་བཙུག༔ དབང་ཕྱུག་ཉི་ཤུ་རྩ་བརྒྱད་ངོ་བོ་ལ༔ ཕོ་ཉ་ཟ་གསོད་སྣ་ཚོགས་ལས་ལ་འགྱེད༔ ནད་མཚོན་དུག་དང་རིམས་ཀྱི་ཡོ་ལང་འཚུབས༔ དགྲ་བགེགས་གདུག་པའི་སྙིང་ལ་ད་ཐོབ་ཅིག༔ བྱད་མ་གདུག་པའི་སྙིང་ལ་ད་ཐོབ་ཅིག༔ ཟ་བའི་འདྲེ་ཡི་སྙིང་ལ་ད་ཐོབ་ཅིག༔ ཕུང་གཤེད་སྲི་བདུད་སྙིང་ལ་ད་ཐོབ་ཅིག༔ བཞི་བརྒྱ་རྩ་བཞིའི་ནད་རྣམས་རྩང་གིས་ཟློག༔ སྟོང་ཕྲག་བརྒྱད་ཅུའི་བགེགས་དཔུང་རྩང་གིས་ཟློག༔ བྱད་ཁ་ཕུར་ཁ་ཟོར་ཁ་རྩང་གིས་ཟློག༔ མོ་རྩིས་རྨི་ངན་ལྟས་ངན་རྩང་གིས་ཟློག༔ དུས་ཀྱི་ཡོ་ལང་ངན་པ་རྩང་གིས་ཟློག༔ སྟེང་ནས་ཐོག་སེར་འབེབས་པ་རྩང་གིས་ཟློག༔ བར་ནས་སྡེ་བརྒྱད་གཡོས་པ་རྩང་གིས་ཟློག༔ འོག་ནས་ཀླུ་གཉན་ནད་རྣམས་རྩང་གིས་ཟློག༔ སྣང་སྲིད་ལྷ་འདྲེའི་རྒོལ་ངན་རྩང་གིས་ཟློག༔ མདོར་ན་སྔོན་ལས་འཕྲལ་རྐྱེན་ངན་པ་

ལས༔ བྱུང་བའི་མི་མཐུན་མི་འདོད་ཕྱོགས་རྣམས་ཀུན༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་ཟློག༔ དྲག་པོ་རྩང་གི་འཁྲུལ་འཁོར་འདི་ཡིས་ཟློག༔ [རྩ་སྔགས་དང་།] མཱ་ར་ཡ་བྷྱོ་བྷྱོ་ཟློག་ཟློག༔ ས་མ་ཡ་བྷྱོ་བྷྱོ་ཟློག་ཟློག༔ ཨེས་བྷྱོ་བྷྱོ་ཟློག་ཟློག༔ རྦད་བྷྱོ་རྦད་ཟློག་རྦད་ནན་ཕཊ༔ [གཉིས་པ་ཁྱུང་བཟློག་ནི།] བདག་མདུན་དཔལ་ཆེན་པོ་དང་སྤྲུལ་པའི་ཁྲོ་བོ་རྣམས་ཀྱི་དབུ་གཙུག་གི་ཡེ་ཤེས་ཀྱི་ག་རུ་ཌ་ལས་རང་འདྲའི་ཁྱུང་ཆེན་དཔག་ཏུ་མེད་པ་སྟོང་གསུམ་གང་བར་འཕྲོས། དགྲ་འདྲེ་ཆག་ཆེ་ཉམ་ང་བྱད་ཕུར་རྦད་གཏོང་ལྟས་ངན་གཏད་སེལ་བྱད་མ་ལྷ་དང་བཅས་པ་ཐམས་ཅད་སྡེར་མོས་བྲད། གཤོག་པས་གཡབ། རྭས་བརྡུང་། མཆུས་ཟོས་ཏེ་རྡུལ་ཕྲན་བཞིན་བརླག་པར་[བསམ་ཞིང་།] ཁྲོ་ག་རུ་ཌ་ཧཱུཾ་ཕཊ༔ གནོད་བྱེད་སརྦ་ཤ་ཏྲུཾ་མཱ་ར་ཡ་རྦད༔ མཱ་ར་ཡ་སོད༔ མཱ་ར་ཡ་བྷྱོ༔ མཱ་ར་ཡ་ཟློག༔ [ཅེས་ཅི་ནུས་སུ་བཟླས་ལ།] ཧཱུཾ་བྷྱོ༔ དྲག་པོ་དམར་ཆེན་གཏོར་མའི་སྟེང་༔ ཁྲོ་རྒྱལ་ཁམས་གསུམ་རོལ་པ་ཆེ༔ སྐུ་ལ་རྡོ་རྗེའི་གོ་ཁྲབ་གསོལ༔ ཚེམས་ཕྲེང་གངས་རི་དཀར་པོ་འདྲ༔ ཁྲོ་གཉེར་རྒྱ་མཚོའི་གཉེར་མ་འདྲ༔ སྤྱན་གསུམ་ཉི་མ་ཤར་བ་འདྲ༔ དབུ་

སྐྲ་དུས་མཐའི་མེ་ལྟར་འབར༔ རྭ་ནི་ལྕགས་སྲེག་ཐུར་མ་འདྲ༔ སྨར་སྨིན་གློག་གི་ཕྲེང་བ་འདྲ༔ ང་རོ་འབྲུག་སྟོང་ལྡིར་བ་འདྲ༔ སྐུ་ནི་རི་རབ་ལྷུན་པོ་འདྲ༔ ཚྭ་ཚྭ་ཐོག་རྒོད་འབར་བ་འདྲ༔ ཕོ་ཉ་མེ་སྟག་འཕྲོ་བ་འདྲ༔ ལས་མཁན་སེར་ཆེན་འབེབས་པ་འདྲ༔ མཚོན་ཐུན་རླུང་ཆེན་གཡོ་བ་འདྲ༔ མེ་དཔུང་ན་བུན་འཐིབས་པ་འདྲ༔ དེ་འདྲའི་ཁྲོ་རྒྱལ་ཆེན་པོ་ཉིད༔ ཆོས་ཀྱི་དབྱིངས་ནས་སྐུ་བཞེངས་ཤིག༔ སྐུ་གསུང་ཐུགས་ལས་སྤྲུལ་པའི་ཁྱུང་༔ ནམ་མཁར་སྐར་ཚོགས་བཀྲ་བ་འདྲ༔ བར་སྣང་སྤྲིན་དཔུང་གཏིབས་པ་འདྲ༔ ས་གཞིར་སྐྱིན་ཐང་འབེབས་པ་འདྲ༔ བཞེངས་ཤིག་མི་མངོན་དབྱིངས་ནས་བཞེངས༔ བསྐུལ་ལོ་ཐུགས་དམ་གནད་ནས་བསྐུལ༔ བཞེས་ཤིག་དགྲ་བགེགས་ཤ་ཁྲག་བཞེས༔ མཛོད་ཅིག་མངོན་སྤྱོད་ཕྲིན་ལས་མཛོད༔ ཁྲོཾ་བྷྱོ་ཛཿ ཁྱུང་གི་རལ་པ་སྤྲུགས་པ་ཡིས༔ དྲེད་མོང་རལ་འཛིངས་ལྟས་ངན་ཟློག༔ གཡས་གཤོག་དང་པོ་བརྡབས་པ་ཡིས༔ འབྲུག་སེང་འཐབ་པའི་ལྟས་ངན་ཟློག༔ གཡས་གཤོག་གཉིས་པ་བརྡབས་པ་ཡིས༔ སྟག་སེང་འཛིངས་པའི་ལྟས་ངན་ཟློག༔ གཡས་གཤོག་གསུམ་པ་བརྡབས་པ་ཡིས༔ བུད་མེད་རལ་འཛིངས་

ལྟས་ངན་ཟློག༔ གཡས་གཤོག་བཞི་པ་བརྡབས་པ་ཡིས༔ དབྱིག་གི་ནོར་བུའི་ལྟས་ངན་ཟློག༔ གཡས་གཤོག་ལྔ་པ་བརྡབས་པ་ཡིས༔ ལྕི་བ་ཟས་ཀྱི་ལྟས་ངན་ཟློག༔ གཡོན་གཤོག་དང་པོ་བརྡབས་པ་ཡིས༔ མེ་ཏོག་བཅུད་ཉམས་ལྟས་ངན་ཟློག༔ གཡོན་གཤོག་གཉིས་པ་བརྡབས་པ་ཡིས༔ ལྕི་བས་བསྐྱོད་པའི་ལྟས་ངན་ཟློག༔ གཡོན་གཤོག་གསུམ་པ་བརྡབས་པ་ཡིས༔ གཏེར་གྱི་བཅུད་ཉམས་ལྟས་ངན་ཟློག༔ གཡོན་གཤོག་བཞི་པ་བརྡབས་པ་ཡིས༔ སེང་གེ་ངུ་འབོད་ལྟས་ངན་ཟློག༔ གཡོན་གཤོག་ལྔ་པ་བརྡབས་པ་ཡིས༔ རྣོ་དབལ་མཚོན་གྱི་ལྟས་ངན་ཟློག༔ རྨ་བྱ་གཡེང་བའི་ལྟས་ངན་ཟློག༔ གཡུ་སྒོང་སྔོན་པོ་ཡར་བ་ཟློག༔ ལྕགས་ཀྱི་སེར་བ་འབེབས་པ་ཟློག༔ ཤེལ་སྒོང་ནང་དུ་དུག་གཡོས་ཟློག༔ ཟངས་སྒོང་དམར་པོ་འདྲིལ་བ་ཟློག༔ ཉི་མ་སྤྲིན་གྱིས་འཁྲུགས་པ་ཟློག༔ འཚུབས་མ་མང་པོའི་སྙིང་བཏགས་ཟློག༔ སེང་གེ་གངས་ནས་ལྷུང་བ་ཟློག༔ ཤེལ་གྱི་སྒོ་ང་ཡར་བ་ཟློག༔ སྤྲིན་ཆེན་ཡར་བའི་ལྟས་ངན་ཟློག༔ བོང་བུའི་བཅུང་ཆེན་ཟག་པ་ཟློག༔ དབང་མོ་ཉི་ཤུ་རྩ་བརྒྱད་ཀྱི༔ ལྟས་ངན་བཅུ་གསུམ་སླར་ལ་ཟློག༔

ཁྱུང་གི་མཇུག་སྒྲོ་འབར་བ་ཡིས༔ སྤུ་སྡུག་ཉམས་པའི་ལྟས་ངན་ཟློག༔ རྒྱལ་མོ་བཞི་དང་བློན་མོ་བཞི༔ སྤྲུལ་པ་འོད་ཕྲེང་ལྟས་ངན་ཟློག༔ ཁྲོཾ་བྷྱོ་ཛཿ བཅོམ་ལྡན་བྱ་ཁྱུང་རྒྱལ་པོ་ཡི༔ མཐུ་སྟོབས་ནུས་རྩལ་ཤུགས་ཕྱུང་ལ༔ ཐན་ལྟས་བཟློག་པའི་ལས་མཛོད་ཅིག༔ རྭ་ཡིས་རྭ་ཅན་ལྟས་ངན་ཟློག༔ ནོར་བུས་རྫས་ཀྱི་ལྟས་ངན་ཟློག༔ རལ་པས་རལ་ཅན་ལྟས་ངན་ཟློག༔ མཆུ་ཡིས་མཆུ་ཅན་ལྟས་ངན་ཟློག༔ གཤོག་པས་གཤོག་ཅན་ལྟས་ངན་ཟློག༔ སྡེར་མོས་སྡེར་ཅན་ལྟས་ངན་ཟློག༔ སྤུ་ཡིས་སྤུ་ཅན་ལྟས་ངན་ཟློག༔ དབང་པོས་ཡུལ་དྲུག་ལྟས་ངན་ཟློག༔ སྡང་བར་བྱེད་པའི་དགྲ་ལ་ཟློག༔ དགྲ་དཔུང་བདུན་བརྒྱུད་རྩད་ནས་ཆོད༔ གནོད་པར་བྱེད་པའི་བགེགས་ལ་ཟློག༔ བགེགས་དཔུང་ཐལ་བའི་རྡུལ་བཞིན་རློག༔ ཟ་བར་བྱེད་པའི་འདྲེ་ལ་ཟློག༔ བདག་མེད་སྟོང་པའི་དབྱིངས་སུ་སོད༔ ཕུང་བར་བྱེད་པའི་སྲི་ལ་ཟློག༔ ཡུལ་མེད་ཟང་ཐལ་ཆེན་པོར་ཆོམ༔ དུས་ལ་བབ་བོ་ས་མ་ཡ༔ གནོད་བྱེད་སརྦ་ཤ་ཏྲུཾ་མཱ་ར་ཡ་བྷྱོ་བྷྱོ་ཟློག་ཟློག༔ [ཅེས་དང་། འདི་ལ་བརྟེན་ནས་ལྟས་ངན་དམིགས་ཀྱིས་ཟློག་པའི་རིམ་པ་གཞན་ཡང་སྤྲོ་ན་སྦྱར་བས་ཆོག་གོ།] [གསུམ་པ་ཟབ་པའི་མདེའུ་ཁ་སྦྱོར་བ་ནི།] ལྷ་ཚོགས་རྣམས་ཀྱི་ཞལ་ནས་དྲག་པོ་སྔགས་ཀྱི་སྒྲ་དབྱངས་འབྲུག་ལྟར་སྒྲོག་ཅིང་འཁོར་གྱི་ཁྲ་བོ་ཁྲ་ཐབས་སྒོ་སྐྱོང་དམ་ཅན་དང་བཅས་པ་རྣམས་ཞལ་ཕྱིར་

གཟིགས་ཏེ་གནོད་པ་ཕྱིར་བཟློག་པའི་ཕྲིན་ལས་མཛད། སྤྲུལ་པའི་ཕོ་ཉ་ནམ་མཁའ་གང་བར་སྤྲོས་པ་རྣམས་དང་ཕྱི་རོལ་གྱི་མཚོན་ཆ་འཁོར་ལོ་དང་བཅས་པ་དྲག་ཏུ་འཁོར་བས་དགྲ་བགེགས་རྣམས་ཀྱི་ལུས་ངག་ཡིད་གསུམ་ཕྱེ་མར་བརླག་སྟེ་མིང་གཞི་ཙམ་ཡང་མ་ལུས་པར་[བསམ་ཞིང་། དྲག་སྔགས་འདུས་པའི་ཤམ་དུ།] གནོད་བྱེད་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་མཱ་ར་ཡ་རྦད་བྷྱོ་ཟློག༔ [ཅེས་བཏགས་པ་མང་དུ་བཟླས་ལ། བདེན་སྟོབས་བརྗོད་པའི་མཐར།] རྣལ་འབྱོར་པ་བདག་ཅག་འཁོར་དང་བཅས་པའི་ཆག་ཆེ་བ༔ ཉམ་ང་བ༔ རྨི་ལམ་ངན་པ༔ མཚན་མ་ངན་པ༔ ལྟས་ངན་པ༔ ཕ་རོལ་གྱི་དམག་ཚོགས༔ རྦད་འདྲེ༔ རྦོད་གཏོང་༔ བྱད་ཁ༔ ཟོར་ཁ༔ ཕུར་ཁ༔ གཏད་ཁ༔ ཁྱད་པར་དུ་བཟློག་པ་བྱས་པའི་མཐུ་དང་ནུས་པ་ཐམས་ཅད་བྱད་མ་ཁོ་རང་གི་གཤེད་དུ་ཕོབ་ཅིག༔ རང་གཤེད་རང་ལ་ཕོབ་ཅིག༔ རང་སྲོག་རང་གིས་ཆོད་ཅིག༔ རང་ཤ་རང་གིས་ཟོ་ཞིག༔ རང་ཁྲག་རང་གིས་འཐུང་ཞིག༔ ཁོ་རང་གི་ལྷ་སྲུང་ཐམས་ཅད་ཁོ་རང་གི་གཤེད་དུ་ཕོབ་ཅིག༔ བདག་གི་ལྷ་སྲུང་ཐམས་ཅད་ཀྱང་ཁོའི་གཤེད་དུ་ཕོབ་ཅིག༔ མཱ་ར་ཡ་ཟློག་བྷྱོ་བྷྱོ༔ [ཞེས་ཐལ་བརྡེབ་བྱ། དྲག་པོའི་སྔགས་རྒོད་དམོད་མོ་གཞན་སྦྱར་བར་སྤྲོ་ནའང་འདིར་བྱའོ། །][ལྔ་པ་ཐུན་གཏོར་གཏོང་བ་ནི།

དམར་གྱི་གཏོར་མར་དམིགས་བྱ་བཀུག་གནས་གཉིས་མེད་དུ་བསྟིམས།] རཾ་ཡཾ་ཁཾ་[གིས་བསང་སྦྱང་།] སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་ཕུང་པོ། ཀླད་ཞགས་ལྦུ་ཕྲེང་འཁྲིགས་པ། དམ་ཚིག་ཏུ་འོས་པའི་འདོད་ཡོན་གྱི་རྣམ་པ་མ་ཚང་བ་མེད་པ། ངོ་བོ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རང་བཞིན་ཅན་བསམ་གྱིས་མི་ཁྱབ་པས་ནམ་མཁའི་ཁམས་གང་བར་[བསམ་ལ] ཨོཾ་ཨཱཿཧཱུཾ་[གིས་བྱིན་བརླབས།] ལྷ་ཚོགས་རྣམས་ཀྱིས་གཏོར་མ་བདུད་རྩིའི་ངོ་བོ་རྣམ་པ་ཤ་ཁྲག་གི་རང་བཞིན་ཆལ་ཆོལ་དུ་གསོལ་བར་[བསམ་ཞིང་།] ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ༔ ས་པ་རི་ཝཱ་ར་སརྦ་བིགྷྣཱན་ཤ་ཏྲུཾ་མ་ཧཱ་མཱཾ་ས་རཀྟ་ཀིཾ་ནི་རི་ཏི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ [ཞེས་ལན་གསུམ་མམ་བདུན་གྱིས་ཕུལ་བས་དགྱེས་ཤིང་ལྷག་མེད་དུ་བཞེས་པར་བསམ། མཐར་གཏོར་མ་ཁྲོ་བོའི་དམག་ཚོགས་དགྲ་བགེགས་སྒྲོལ་བའི་ལས་ལ་རྔམས་པ་དུག་མཚོན་རྡོ་རྗེའི་ཆར་དུ་མོས་ནས་ལས་བྱང་བཞིན་ཟོར་དུ་བསྐུལ་ཏེ་དམོད་ཚིག་ཐལ་རྡེབ་དང་བཅས་གནོད་པའི་ཕྱོགས་སུ་འཕངས་པས་དམིགས་བྱ་གནས་ལུས་ལོངས་སྤྱོད་དང་བཅས་པ་རྗེས་མེད་དུ་བརླག་པར་བསམ་མོ། །དེ་ནས་རྒྱུན་གྱི་རྗེས་ཆོག་རྣམས་ཕྲིན་ལས་ཀྱི་དཀྱུས་བཞིན་བྱའོ། །][གསུམ་པ་རྗེས་སུ་བྱ་བའི་ལས་ལ། ཟོར་བསྒྲུབ་པ། ཟོར་ལམ་བསལ་བ། དཔུང་བསྐྱེད་པ།

ཟོར་བསྐུལ་བ། ཟོར་འཕང་བ། ཟོར་རྗེས་གཅོད་པ་དང་དྲུག་གི །དང་པོ་ཟོར་བསྒྲུབ་པ་ནི། སྒྲུབ་ཞག་རྫོགས་པའི་ཉིན་རྗེས་མར་ཟློག་པའི་ཕྲིན་ལས་བཅོལ་བའི་མཐར་གཏོར་མའི་ལྷ་ཚོགས་རྣམས་ལ་མཆོད་ཅིང་བསྟོད་ནས་ནོངས་པ་བཟོད་པ་གསོལ། རྩ་སྔགས་ཤམ་དུ།] ས་མ་ཡ་མ་ཏི་ཀྲ་མ་ཏི། ཨོཾ་བཛྲླ་ཏྟིཥྛ། [ཞེས་པས།] སྤྲུལ་གཞི་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཞུགས། སྤྲུལ་པ་དམ་ཚིག་གི་འཁོར་ལོ་འོད་དུ་ཞུ་བ་ལས་གཏོར་ཆེན་ཟོར་རྫས་དང་བཅས་པ་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་ཁྲོ་བཅུ་ཁྲ་ཐབས་ཕྱག་བརྙན་སྒོ་མ་བཀའ་སྲུང་སྡེ་བརྒྱད་དྲེགས་པའི་དཔུང་ཚོགས་བསམ་གྱིས་མི་ཁྱབ་པ་དང་བཅས་པ་ཐམས་ཅད་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ་ནད་མཚོན་དུག་གི་ཆར་འབེབས་པས་དགྲ་བགེགས་སྒྲོལ་བའི་ལས་ལ་རྔམས་པར་གྱུར་པར་[བསམ་ལ། གཙོ་འཁོར་རྣམས་ཀྱི་སྔགས་སྤེལ་ཚིག་ཅན་ནམ་སྤུ་གྲིའི་དྲག་སྔགས་འདུས་པ་མང་དུ་བཟླས་ལ་ཟོར་རྫས་ནུས་ལྡན་དུ་བསྒྲུབ། དམར་གཏོར་ཁྲག་སྐྱེམས་བཅས་པར་དམིགས་བྱ་འགུགས་འདྲེན་དང་ཞལ་སྟོབས་ཀྱི་དམིགས་པ་དྲག་པོ་དང་བཅས་གཏོར་ཆེན་དུ་ཕུལ་ལ།] ཧཱུཾ། རྩ་བརྒྱུད་བླ་མ་དཀོན་མཆོག་གསུམ། །ཡི་དམ་ཞི་ཁྲོ་རབ་འབྱམས་དང ། །ཁྱད་པར་ཕུར་བུའི་ལྷ་ཚོགས་རྣམས། །དགྲ་བགེགས་བསྒྲལ་བའི་ཤ་ཁྲག་རུས། །འདོད་ཡོན་མཆོད་པ་འདི་བཞེས་ལ། །ཟོར་ཆེན་རྫས་ཀྱི་དཔུང་

སྐྱེད་ཅིག །དགྲ་བགེགས་སྒྲོལ་བའི་ཕྲིན་ལས་མཛོད། །དཔལ་ལྡན་མགོན་པོ་ལྕམ་དྲལ་དང། །ཤྭ་ན་བདག་ཉིད་ས་བདག་སོགས། །དཔལ་ཆེན་བཀའ་ཡི་སྲུང་མ་རྣམས། །དགྲ་བགེགས་བསྒྲལ་བའི་ཤ་ཁྲག་རུས། །འདོད་ཡོན་མཆོད་པ་འདི་བཞེས་ལ། །ཟོར་ཆེན་རྫས་ཀྱི་དཔུང་སྐྱེད་ཅིག །དགྲ་བགེགས་སྒྲོལ་བའི་ཕྲིན་ལས་མཛོད། །སྣང་སྲིད་ལྷ་སྲིན་སྡེ་བརྒྱད་དང་། །ཕོ་རྒྱུད་མོ་རྒྱུད་དྲེགས་པའི་ཚོགས། །བསྟན་ལ་མངོན་པར་དགའ་བ་རྣམས། །དགྲ་བགེགས་བསྒྲལ་བའི་ཤ་ཁྲག་རུས། །འདོད་ཡོན་མཆོད་པ་འདི་བཞེས་ལ། །ཟོར་ཆེན་རྫས་ཀྱི་དཔུང་སྐྱེད་ཅིག །དགྲ་བགེགས་སྒྲོལ་བའི་ཕྲིན་ལས་མཛོད། །[ཅེས་འདོད་དོན་གསོལ་བས་ནམ་མཁར་བཞུགས་པའི་ལྷ་ཚོགས་རྣམས་ཀྱིས་ཟོར་ཆེན་དཔུང་བསྐྱེད་པའི་ཕྲིན་ལས་མཛད། སྤྲུལ་པ་ཟོར་རྫས་ཕོ་ཉར་བཅས་པ་དཔའ་བོ་གཡུལ་དུ་ཞུགས་པ་ལྟར་ཟ་ཟ་རྔམ་རྔམ་དུ་བསྐྱེད་པར་བསམ་མོ། །][གཉིས་པ་ཟོར་ལམ་བསལ་བ་ནི། །སློབ་དཔོན་དྲག་པོའི་ཆས་སུ་ཞུགས་ཏེ་དཀྱིལ་འཁོར་ལ་བསྐོར། ཕྱི་རོལ་དུ་ཕུད་སྐྱེམས་འཐོར་ཞིང་བདེན་པའི་ཡུས་ཀྱིས།] ཧཱུཾ། བདག་ནི་མ་ཉེས་མ་ཡོའོ། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྣང་སྲིད་ལྷ་འདྲེས་ཆོད། །རྣལ་འབྱོར་དབང་ཕྱུག་ཟོར་འཕེན་ནོ། །དགྲ་བགེགས་མ་གཏོགས་སྐུ་བཟུར་ཅིག །ཕྱོགས་བཞི་མཚམས་བརྒྱ་སྟེང་འོག་ན། །

སྣང་སྲིད་ལྷ་འདྲེ་བཞུགས་པ་རྣམས། །མཐོ་བ་རྣམས་ཀྱི་ཞབས་སྡུས་ཤིག །དམའ་བ་རྣམས་ཀྱི་དབུ་ཆུམས་ཤིག །བར་ན་བཞུགས་པ་སྐུ་བཟུར་ཅིག །དབུ་ཞབས་ཀུན་ལ་ཕོག་པར་སྲིད། །སོ་སོའི་ཕོ་བྲང་སྒོ་སྡོམས་ཤིག །ལྷ་སྲིན་སྡེ་བརྒྱད་ཐམས་ཅད་ཀྱང་། །གསེར་སྐྱེམས་དམ་པ་འདི་གསོལ་ལ། །དཔལ་གྱི་གཏོར་ཟོར་ལམ་ཕྱེས་ཤིག །དོ་ནུབ་དྲག་པོའི་ཟོར་ཆེན་འདི། །སྡང་དགྲ་གནོད་བགེགས་རྣམས་ལ་འཕེན། །ཟ་འདྲེ་ཕུང་སྲི་རྣམས་ལ་འཕེན། །ཕར་འཕེན་ཚུར་ལ་མ་ལྡོག་ཅིག །རྣལ་འབྱོར་བསམ་པ་འགྲུབ་པར་མཛོད། །[ཅེས་ཟོར་ལམ་བསལ། ལས་བྱང་བཞིན་བསྐུལ་དང་ཆད་མདོ་བསྒྲག་གོ །][གསུམ་པ་ཟོར་གྱི་དཔུང་བསྐྱེད་པ་ནི། འཕྱར་དར་དང་རུ་འདྲེན་གྱི་རྣམ་པ་དུ་མས་སྣ་དྲངས་ཏེ་སྐྱེས་བུ་གིང་ཆས་སུ་ཞུགས་པ་སོགས་ཀྱིས་དཀར་གཏོར་དང་གསེར་སྐྱེམས། ཟོར་གྱི་རྫས་རྣམས་ནས་གཙོ་བོའི་གཏོར་ཆེན་གྱི་བར་རིམ་བཞིན་ཁྱེར། རྣལ་འབྱོར་པ་ལྟ་བའི་གདིང་སྒོམ་པའི་གསལ་སྣང་དང་མ་བྲལ་བས་རིག་པ་ཧུར་ཕྱུངས་ཏེ་དྲག་སྔགས་བཟླ་ཞིང་རོལ་མོ་དང་བཅས་པས་དེ་དག་གི་ཕྱི་བཞིན་གཟའ་དང་སྡེ་བརྒྱད་ཀྱི་རྒྱུ་ཕྱོགས་དང་བསྟུན་གང་དུ་འཕེན་པའི་སར་ཕྱིན་ལ། གསེར་སྐྱེམས་ཀྱི་མཆོད་པ་སྔོན་དུ་འགྲོ་བས།] ཧཱུཾ༔ སངས་རྒྱས་ཀྱིས་ནི་བདུད་ཕམ་མཛད། །ཆོས་མ་ཡིན་ནི་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་གྱུར་ཏེ། །

རྡོ་རྗེ་གཞོན་ནུའི་ལྷ་ཚོགས་ཀྱིས། །དགྲ་བགེགས་རྣམས་ནི་ཕམ་པར་མཛད། །རིག་སྔགས་བདེན་པའི་མཐུ་འདི་ནི། །ཐོགས་པ་མེད་པར་འགྲུབ་པར་མཛོད། །[ཅེས་བདེན་སྟོབས་ཀྱིས་དཔུང་བསྐྱེད།] [བཞི་པ་ཟོར་བསྐུལ་བནི། བདེན་སྟོབས་བཅས་འགུགས་གཞུག་གིས་དགྲ་བགེགས་བཀུག་སྟེ་དམིགས་པའི་འབེན་བཅས་ལ།] ཧཱུཾ༔ ང་ནི་རྡོ་རྗེ་གཞོན་ནུ་ཆེ༔ ང་ནི་འཁོར་འདས་ཡོངས་ཀྱི་བདག༔ ང་ལས་ཆེ་བཙན་སུ་ཡང་མེད༔ ངས་ནི་དྲག་པོའི་གཏོར་ཟོར་འཕེན༔ ཕྱོགས་མཚམས་སྟེང་འོག་གནས་རྒྱུ་བའི༔ སྡེ་བརྒྱད་ལྷ་ཀླུ་གཞི་བདག་རྣམས༔ གཏོར་ཆེན་མཚོན་ཐུན་ཟེར་འཕྲོས་པས༔ ལུས་སེམས་མ་ལུས་བརླག་པར་མཆིས༔ ང་ནི་མ་ཉེས་དགྲ་བགེགས་ཉེས༔ ཟོར་ལམ་ཕྱེས་ལ་སྐུ་བཟུར་ཅིག༔ བརྣག་པའི་དགྲ་བགེགས་མ་གཏོགས་པ༔ ཉེས་མེད་རྣམས་ལ་ཟོར་མི་འཕེན༔ ཀུན་ཀྱང་གྲོགས་མཛོད་དམག་དཔུང་བསྐྱེད༔ དམག་དཔུང་བསྐྱེད་ལ་རུ་མཚོན་ཕྱོར༔ ཉམས་པའི་དགྲ་བགེགས་སྡིག་ཅན་འདི༔ རྡུལ་ཕྲན་བཞིན་དུ་བརླག་པར་མཛོད༔ [ཅེས་རིག་པ་ངར་དང་ལྡན་པས་བརྗོད།] [ལྔ་པ་ཟོར་འོང་བ་ནི། ཟོར་རྣམས་རིམ་པར་ཐོགས་ལ།] ཧཱུཾ་བྷྱོ༔ དཔལ་ཆེན་རྡོ་རྗེ་གཞོན་ནུ་སྲས་འཁོར་བཅས༔ མ་གཡེལ་མ་གཡེལ་ཆོས་ཀྱི་དབྱིངས་ལས་བཞེངས༔ མངོན་སྤྱོད་དྲག་

པོའི་ཕྲིན་ལས་དུས་ལ་བབ༔ དགྲ་བགེགས་ཉོན་མོངས་འདུས་པའི་ཕུང་པོ་ལ༔ ཐོགས་མེད་གནམ་ལྕགས་རྡོ་རྗེའི་ཐུན་ཆར་ཕོབ༔ ཕུར་ཟོར་དྲག་པོ་ཐོག་ལྟར་ཤ་ར་ར༔ དགྲ་གདོན་བགེགས་ཀྱི་སྒོ་གསུམ་རྡུལ་དུ་རློག༔ རྣམ་པར་ཤེས་པ་ཆོས་ཀྱི་དབྱིངས་སུ་སྤོར༔ [སྤུ་གྲིའི་ཤམ་དུ།] དགྲ་གདོན་བགེགས་ཚོགས་རྣམས་ཀྱི་ལུས་ངག་ཡིད་གསུམ་ལ་ཕོབ་ཛཿ རྦད༔ [ཅེས་བརྗོད་བཞིན་པར་བརྡེག །དེ་བཞིན་དུ་ཐོག་མཐའ་འདྲ་བ་ལས་ཁྱད་པར་ཕུར་ཟོར་གྱི་ཚབ་ཏུ།] ཡུངས་ཟོར་དྲག་པོ་སེར་ལྟར་ཧྲི་ལི་ལི༔ ཁྲག་ཟོར་དམར་པོ་མཚོ་ལྟར་ཆི་ལི་ལི༔ མཚེ་ཟོར་དྲག་པོ་མདའ་ལྟར་ཏ་ལ་ལ༔ དུག་ཟོར་དྲག་པོ་ཆུ་ལྟར་ཕྱུ་རུ་རུ༔ མཚོན་ཆ་སྣ་ཚོགས་རླུང་ལྟར་འཚུབས་སེ་འཚུབ༔ མདའ་ཟོར་དྲག་པོ་ཚྭ་ཚྭ་སྐར་ལྟར་འཁྲིགས༔ རྡོ་ཟོར་དྲག་པོ་ཆར་ལྟར་འབེབས་ཤིང་འཚུབས༔ དཔལ་གྱི་གཏོར་ཟོར་གློག་ལྟར་འཁྱུགས་ཤིང་འདེབས༔ [ཞེས་བསྒྱུར་བ་དང་།] ཧཱུཾ༔ ང་ནི་དཔལ་ཆེན་རྡོ་རྗེ་གཞོན་ནུ་ཆེ༔ ཛཿ ཕུར་སྲུང་དམ་ཅན་རྒྱ་མཚོ་ལས་ལ་བསྐུལ༔ དགྲ་བགེགས་སྡིག་ཅན་ལོག་འདྲེན་རཱུ་པ་ལ༔ ཟངས་ཕྱེའི་དབལ་དུག་མཚོན་ཆའི་ཆར་ཚན་ཕོབ༔ མིང་ཙམ་མེད་པར་ཐལ་བའི་རྡུལ་དུ་རློག༔ [ཅེས་པའི་མཐར་གོང་བཞིན་དྲག་

སྔགས་སྦྱར་བ་དང་། དེ་བཞིན་དུ་ཟངས་ཕྱེའི་ཚབ་ཏུ།] ལྕགས་ཕྱེ། རྡོ་ཕྱེ། ཉུང་ནག །ཀེ་ཚེ། ཤངས་ཚེ། འབྲུ་ནག་[རྣམས་སུ་བསྒྱུར་ལ་འཕང་། འདིར་སྤྲོ་ན་ཟློག་བྱང་ཇི་ལྟར་རིག་པའང་གྱེར། དེ་ནས་གཏོར་ཟོར་རྣམས་བཏེགས་ལ།] ཧཱུཾ༔ དཔལ་ཆེན་རྡོ་རྗེ་གཞོན་ནུ་ཆེ༔ ཕོ་ཉ་ལས་མཁན་ཟ་གསོད་ཚོགས༔ ཕོ་རྒྱུད་ཟོར་འཕེན་ཤ་ར་ར༔ མོ་རྒྱུད་ཐུན་འདེབས་ཉི་ལི་ལི༔ སྡང་བའི་དགྲ་ལ་གཏོར་ཟོར་རྒྱོབ༔ གནོད་པའི་བགེགས་ལ་གཏོར་ཟོར་རྒྱོབ༔ ཟ་བའི་འདྲེ་ལ་གཏོར་ཟོར་རྒྱོབ༔ ཕུང་བའི་སྲི་ལ་གཏོར་ཟོར་རྒྱོབ༔ སྨོན་ལོག་ལྟ་ལོག་སྲོག་ལ་ཕོབ༔ ལུས་ངག་ཡིད་གསུམ་རྡུལ་དུ་རློག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ཨོཾ་བཛྲ་ཙནྡྲ་སརྦ་དུཥྚན་ཨེ་ཛཿབྷྱོ་ཧཱུཾ༔ གནོད་བྱེད་ཀ་ལ་རཱུ་པ་སརྦ་ཤ་ཏྲུཾ་མཱ་ར་ཡ་རྦད་ཕོབ་ཛ༔ [ཞེས་སོགས་དྲག་སྔགས་ཟློག་ཤམ་ཅན་དྲག་པོར་བཟླ་བཞིན་པས་དབང་མོ་ཉེར་བརྒྱད་ཀྱི་ཀོང་ཟོར་དང་དམ་ཅན་གྱི་གཏོར་མ་ནས་བཟུང་གཙོ་གཏོར་གྱི་བར་བརྡེག་ཅིང་། དགྲ་བོའི་གཟུགས་ཕུང་བཤིག །རྣམ་ཤེས་མར་མེ་བསད་པ་ལྟར་ཡལ། གནས་གཞིས་ལོངས་སྤྱོད་དང་བཅས་པ་རྗེས་མེད་དུ་བརླག་པར་བསམ་ལ་དྲག་སྔགས་དམོད་མོར་བཅས་པ་ཐལ་མོ་དང་དུལ་མོ་བརྡབ་བོ། །][དྲུག་པ་ཟོར་རྗེས་གཅོད་པ་ནི། ཡེ་ཤེས་ཀྱི་བྱ་ཁྱུང་འཇིགས་སུ་རུང་བ་ཞིག་གིས་མཚམས་བཅད་པར་བསམ་ལ།] ཧཱུཾ་ཁྲོཾ་བཛྲ་ག་རུ་ཌ་བྷྱོ་ཟློག༔ [ཅེས་བཟླ་ཞིང་རྡོ་རྗེ་སློབ་དཔོན་གྱིས་རྟིང་མནན་ཏེ་ལོག །ཕྱིར་སྙོགས་གཅོད་ཕྱིར་བལྟས་

ཏེ་སྲས་ཕུར་བསྒྲིལ་ཞིང་གདེངས་ལ་དྲག་སྔགས་གནམ་ལྕགས་ཐོག་གི་སྤུ་གྲི་བདུན་ནམ་ཉེར་གཅིག་ཙམ་བཟླ། རྡོ་རྗེའི་གུར་དུ་རང་གཞན་བསྲུང་བྱ་ཐམས་ཅད་ཚུད་པར་བསམ་ལ་སྲུང་བའི་འཁོར་ལོ་བརྟན་པོར་བསྒོམ། དེ་ནས་སྒྲུབ་ཁང་གི་སྒོ་དྲུང་དུ་བཤལ་ཆུའི་བདུད་རྩིས་བརྟན་མ་བསྐྱང་། གཏོར་གཞོང་ཁ་སྦུབས་ལ་བྲོ་ར་བསྐོར་ཏེ་ཨེ་གྲུ་གསུམ་པར་དགྲ་བགེགས་དམ་སྲི་ཐམས་ཅད་བཀུག་ནས་མནན་པར་བསམ་ཞིང་བྲོ་བརྡུང་བྱའོ། །][གསུམ་པ་རྗེས་ཀྱི་བྱ་བ་ནི། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་ལེན། མཆོད་པ་ཁ་གསོས་ལ་བྱིན་གྱིས་བརླབས་ཏེ་ཕུལ་ནས་བསྟོད་པ་བྱ། ནོངས་པ་བཟོད་པར་གསོལ། ནམ་མཁར་བཞུགས་པའི་ཡེ་ཤེས་པ་གཤེགས་སུ་གསོལ་བའམ་བྲིས་སྐུ་སོགས་ལ་བརྟན་བཞུགས་བྱ། བདག་བསྐྱེད་ཀྱི་རྣལ་འབྱོར་འོད་གསལ་དུ་བསྡུ་ཞིང་ལྷར་ལྡངས་ཏེ་གོ་བགོ། ལས་དཀྱིལ་གྱི་རྡུལ་ཚོན་ཨ་ཀཱ་རོས་བསྡུས་ལ་ཐིག་ཤུལ་དབྱི། དགེ་བ་བསྔོ་ཞིང་སྨོན་ལམ་ནན་ཏན་དུ་གདབ། ཤིས་པ་རྒྱ་ཆེར་བརྗོད་དེ་མེ་ཏོག་གི་ཆར་དབབ་པས་བདེ་ལེགས་སུ་བྱའོ། །][ཞར་བྱུང་འཕྲོས་དོན་དུ་སྐབས་འགའ་ཞིག་གི་ཚེ་སྤྲོས་པ་བསྡུ་བའི་གཏོར་ཟློག་ཙམ་བྱེད་པར་འདོད་ན། ལས་དཀྱིལ་གྱི་གཞིར་ཐིག་ཚོན་གྱི་བྱ་བ་རྣམས་དོར་ནས་རས་བྲིས་ཀྱི་འདིང་དཀྱིལ་ཡོད་ན་བཀྲམ། མེད་ན་ཞིང་ངམ་གཅན་གཟན་གྱི་ལྤགས་པ་ལ་འབྲུ་ནག་དུག་ཁྲག་གིས་གཤེར་བའི་ཚོམ་བུ་ལྷ་གྲངས་དང་མཉམ་པ་བཀོད་པའི་ཁར་ཟོར་གཏོར་གཙོ་འཁོར་ཕྱོགས་བསྡུས་སུ་བཀོད། ཟོར་ཆས་གཞན་རྣམས་ཀྱི་བཅས་མི་དགོས་ཤིང་། ལིངྒ་ཡང་འཕྲལ་གྱི་རྐྱེན་སེལ་ཙམ་ལ་ཟན་ལིང་གིས་འཐུས། ཕུར་ཁྲོམ་ཡོངས་རྫོགས་ལས་ཉི་ཚེ་བ་ལ་འབྱོར་དཀའ་བས་སྲས་མཆོག་གི་ཕུར་བུ་གཅིག །ཁྲོ་བཅུ་ཡབ་ཡུམ་

ཐུན་མོང་དུ་རེ་རེ། སྲས་ཕུར་ཐུན་མོང་དུ་གཅིག །སྒོ་མ་དམ་ཅན་དབང་ཕྱུག་ཐུན་མོང་དུ་གཅིག་སྟེ་ཕུར་བུ་ལྔ་འདུ་བྱ། གཞན་བཅས་གཤོམ་དང་ཆོ་གའི་འགྲོས་གཞུང་བཞིན་ལས། འཕང་བའི་སྐབས་ཟོར་བསྐུལ་གྱི་རྗེས་སུ་གཏོར་ཟོར་དངོས་ལ་འཇུག་པ་སོགས་ལག་ལེན་དབྱེ་བསྡུའི་གནད་ཤེས་པའི་སྒོ་ནས་འདོར་ལེན་གྱི་དམིགས་ཕྱེད་པར་བྱ་བ་ཡིན་ནོ། །][གསུམ་པ་གྲུབ་པའི་འབྲས་བུ་ནི། དེ་ལྟར་རྡོ་རྗེ་ཐེག་པའི་ལམ་གྱི་ཐབས་མཆོག་ཏུ་གྱུར་པ་སྒྲོལ་བའི་དགོངས་སྤྱོད་ལམ་དུ་ལོངས་པས་ལམ་གྱི་མངོན་རྟགས་བདེ་ཆེན་གྱི་ཡེ་ཤེས་གོང་དུ་འཕེལ་ཞིང་ལམ་ལ་བར་དུ་གཅོད་པའི་བདུད་ཚོགས་ཞི་ནས་ལས་དང་དངོས་གྲུབ་ཐོགས་མེད་དུ་འགྲུབ། ལམ་གྱུར་གྱི་འབྲས་བུ་རིག་འཛིན་རྣམ་པ་བཞིའི་གོ་འཕང་མཐར་ཕྱིན་ནས་འཁོར་འདས་སོགས་ཀྱི་ཁྱབ་བདག་དཔལ་ཆེན་བཛྲ་ཀུ་མཱ་རའི་གསང་གསུམ་ཡེ་ཤེས་རྡོ་རྗེ་མངོན་དུ་བྱེད་པར་འགྱུར་རོ། །]དྲག་པོའི་རིག་སྔགས་ཕལ་གྱི་གཟི་བྱིན་ཀྱང་། །ཆེས་ཆེར་བཟོད་པར་དཀའ་ན་རྒྱལ་ཀུན་གྱི། །ཕྲིན་ལས་སྟོབས་འདུས་དྲག་སྔགས་རྡོ་རྗེའི་མཚོན། །ཟློག་མེད་ཐོག་གི་དབལ་དེར་སུ་ཞིག་འཁུ། །འཁྲུལ་བྲལ་མན་ངག་གནད་ཀྱི་ངར་ལྡན་པའི། །མངོན་སྤྱོད་ལས་རིམ་སྤུ་གྲིའི་མཚོན་ཆེན་གང་། །བདུད་འདུལ་རིག་པ་འཛིན་པའི་ཕྱག་མཚན་སྟེ། །དཔལ་ཆེན་ཁྲག་འཐུང་ཁྲོས་པའི་དགའ་སྟོན་ཡིན། །འདིས་ཀྱང་སྙིང་པོའི་བསྟན་དང་བསྟན་འཛིན་སྡེ། །ཕས་རྒོལ་ཡིད་སྲུབས་དཔུང་ལས་རྣམ་པར་རྒྱལ། །སྙིང་རྗེས་བསྒྲལ་བའི་དམ་ཚིག་

མཐར་ཕྱིན་ནས། །འབར་བའི་གར་གྱིས་ས་གསུམ་གཡོ་བྱེད་ཤོག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་སྨད་ལས་དགྲ་བགེགས་སྒྲོལ་བའི་ལས་རིམ་ཁྲག་འཐུང་ཁྲོས་པའི་དགའ་སྟོན་ཅེས་བྱ་བ་འདི་ནི། རིང་མོ་ཉིད་ནས་དོན་དུ་གཉེར་བ་ཅན་དུ་མའི་གསུང་གིས་བསྐུལ་བ་དང་། ཉེ་ཆར་ཟབ་གཏེར་གྱི་ལུང་དོན་བཞིན་བོད་ཁམས་བསྟན་སྲིད་སྤྱིའི་རིམ་གྲོར་དམིགས་ཏེ་ཨེ་ཝཾ་བདེ་ཆེན་ཆོས་འཁོར་གླིང་དུ་བསྙེན་སྒྲུབ་ལས་ཀྱི་སྦྱོར་བ་ཟབ་མོ་འཛུག་པའི་སྐབས་སུ་བབ་པ་ན་ཉེ་བར་མཁོ་བས་མཚམས་སྦྱར་ནས། བདུད་འདུལ་ཕུར་བུའི་རིག་སྔགས་འཆང་བ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་པའི་ཐོག་ཏུ་སོན་པ་དཔལ་གདོང་གི་ལོ་མགོ་ཉ་པའི་ཤེས་རབ་ཀྱི་ཆའི་རྒྱལ་བ་དང་པོ་ལ་མཁན་ལྗོངས་ཕུན་ཚོགས་དགའ་ཚལ་གྱི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་བསྟན་འགྲོར་འཚེ་བྱེད་ཕས་རྒོལ་བདུད་དགྲའི་དཔུང་རྣམས་མིང་གི་ལྷག་མར་བྱས་ཏེ་ཕྱོགས་ལས་རྣམ་པར་རྒྱལ་བའི་དགེ་ལེགས་ཀྱི་རུ་མཚོན་དགུང་དུ་བསྙེགས་པའི་རྒྱུར་གྱུར་ཅིག།] ཛ་ཡནྟུ།། །།

སྨད་ལས་ཟློག་སྒྱུར་ཟབ་པའི་མདེའུ་ཁའི་སྐབས་སུ་དྲག་པོའི་སྔགས་རྒོད་དམོད་མོ་གཞན་སྦྱར་བ།

[སྨད་ལས་ཟློག་སྒྱུར་ཟབ་པའི་མདེའུ་ཁའི་སྐབས་སུ་དྲག་པོའི་སྔགས་རྒོད་དམོད་མོ་གཞན་སྦྱར་བར་སྤྲོ་ན་ཞེས་པ་འདི་ལྟ་སྟེ།] ཐུགས་ནས་ལོཀྟྲི་པཱ་ལ་ནི༔ སྔོ་ནག་རབ་ཁྲོས་འཇིགས་པའི་གཟུགས༔ གྲངས་མེད་སྲིད་གསུམ་ཁྱབ་མར་འཕྲོས༔ ཕྱག་གཉིས་གནམ་ལྕགས་ངར་མའི་དབལ༔ ཆ་ལང་བཞིན་དུ་བརྡབ་པའི་བར༔ དགྲ་བགེགས་ལོག་པར་འདྲེན་པའི་རིགས༔ སྡེ་དང་དཔུང་དང་བརྒྱུད་བཅས་པ༔ སྒོང་ལྐོག་བཙིར་བ་བཞིན་དུ་འཐར༔ ལུས་ངག་ཐལ་བའི་རྡུལ་བཞིན་བརླག༔ རྣམ་ཤེས་ཀ་དག་དབྱིངས་སུ་ཐིམ༔ མིང་གི་ལྷག་མ་མེད་པར་གྱུར༔ [ཅེས་བསྒོམ་ལ།] ཨོཾ་ལོཀྟྲི་པཱ་ལ་ནན༔ ས་ག་པཱ་ཤ་ནན༔ ནཱ་ག་དུ་དུ་ནན༔ མ་མཾ་མ་མཾ༔ ཙིར་ཙར་ཙིར་ཙར༔ བཾ་རུ་ལུ་བཾ་རུ་ལུ༔ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར་ནན༔ ཙི་དུ་སོད་ཙི་དུ་སོད༔ ཤིག་ལྷུར་གཏུབས༔ ཧ་ལ་པ་ཏི་ནན༔ འཁོར་བ་ཐུལ༔ གནོད་བྱེད་འབྱུང་པོའི་ཀཱ་ཝཱ་ཙི་བརླག་བརླག༔ གནོད་བྱེད་ཤ་ཏྲུཾ་མཱ་ར་ཡ་རྦད༔ [ཅེས་གང་འགྲུབ་བཟླས་མཐར།] བཀའ་ལྟར་མི་བྱེད་ཅིང་དམ་ལ་མི་གནས་པ་ཐམས་ཅད་འདིར་མ་གནས་པར་གཞན་དུ་དེངས་ཤིག །སྲིད་པ་སྤྱི་ནས་བཤིག་ཅིག །སྲིད་གསུམ་རྨང་ནས་སྒྱེལ་ཅིག །འཁོར་བའི་གཏིང་ནས་ཕྱུངས་ཤིག །བསྐལ་པའི་མེས་སྲེགས་ཤིག །དམ་ཚིག་

དམོད་པས་སྡིགས་ཤིག །བཀའི་ཆད་པ་ཆོད་ཅིག །གནམ་ལྕགས་རལ་གྲིས་སྤྱི་བོའི་གཙུག་ནས་ཁོས་ཤིག །སུམྦྷ་ནིས་ནོན་ཅིག །སྲིད་གསུམ་གར་སྐྱེས་གར་གནས་ཀྱང་སྡིག་ཅན་འདིའི་སྟེང་དུ་གནམ་ལྕགས་རྡོ་རྗེའི་ཆར་ཆེན་པོ་ཕོབ་ཅིག །གནོད་བྱེད་ཤ་ཏྲུཾ་མཱ་ར་ཡ་རྦད། སྦྱོར་བ་ངན་པ་ཐམས་ཅད་འདིས་ཐུལ་ཅིག །[ཅེས་དམོད་པ་དང་བཅས་ཐལ་རྡེབ་བྱ།] ནམ་མཁའ་མེད་པར་གྱུར་ན་ཡང་༔ སྔགས་ཀྱི་དངོས་གྲུབ་མེད་མི་འགྱུར༔ ལྷ་དང་དྲང་སྲོང་གིས་བཤད་པའི༔ རིག་སྔགས་བསླུ་བར་མི་འགྱུར་ན༔ འདོད་ཆགས་བྲལ་བས་བྱས་པ་ཡི༔ གསང་སྔགས་སྦྱོར་བས་བསླུས་པ་ནི༔ མ་བྱུང་འབྱུང་བར་མི་འགྱུར་རོ༔ སྔགས་དང་རྟེན་འབྲེལ་མི་བསླུ་ཞིང་༔ ཏིང་འཛིན་ནུས་པ་བསམ་མི་ཁྱབ༔ དཀོན་མཆོག་གསུམ་དང་རྩ་གསུམ་གྱི༔ བདེན་པ་ཆེན་པོའི་མཐུ་སྟོབས་ཀྱིས༔ མི་མཐུན་གནོད་པའི་ཕྱོགས་ཀུན་ལས༔ དེང་ནས་རྟག་ཏུ་རྒྱལ་གྱུར་ཅིག༔ ཛ་ཡ་ཛ་ཡ་སུ་ཛ་ཡ༔ [ཞེས་བདེན་པའི་སྟོབས་བརྗོད་ཅིང་མི་དམིགས་པའི་ངང་ལ་བཞག་གོ།] ཛ་ཡནྟུ།། །།

དཔལ་རྡོ་རྗེ་ཕུར་བུའི་བདུད་འཇོམས་གནམ་ལྕགས་སྤུ་གྲིའི་དྲག་པོའི་ལས་ཀྱི་མཐའ་སྡུད་དགྲ་བགེགས་མནན་པའི་ལས་རིམ་རབ་བརྗིད་རྡོ་རྗེའི་ལྷུན་པོ།

༄༅། །དཔལ་རྡོ་རྗེ་ཕུར་བུའི་བདུད་འཇོམས་གནམ་ལྕགས་སྤུ་གྲིའི་དྲག་པོའི་ལས་ཀྱི་མཐའ་སྡུད་དགྲ་བགེགས་མནན་པའི་ལས་རིམ་རབ་བརྗིད་རྡོ་རྗེའི་ལྷུན་པོ་ཞེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་དྲག་པོའི་ལས་ཀྱི་མཐའ་སྡུད་དགྲ་བགེགས་མནན་པའི་ལས་རིམ་རབ་བརྗིད་རྡོ་རྗེའི་ལྷུན་པོ་ཞེས་བྱ་བ། བླ་མ་དང་གཉིས་སུ་མེད་པའི་དཔལ་ཧེ་རུ་ཀ་ལ་ཕྱག་འཚལ་ལོ། །རབ་བརྗིད་གར་དགུའི་རྣམ་པར་རོལ་པ་ཁྲག་འཐུང་དཔའ་བོ་ཁྲོས་པའི་ཞབས། །འབར་བའི་གོམ་སྟབས་ཆེས་ཆེར་བསྒྱུར་བ་ཉམས་པའི་སྤྱི་བོར་རྟག་འབབས་པས། །མི་སྲུན་བརླང་པོར་སྤྱོད་པའི་ལུས་སེམས་མཁའ་ཀློང་ཡངས་པར་རྒྱས་འདེབས་པ། །དཔལ་ཆེན་ཧེ་རུ་ཀ་དཔལ་དཔའ་བོས་ཕྲིན་ལས་ནུས་པ་མཐར་འབྱིན་མཛོད། །མ་རུང་ཞིང་བཅུར་གྱུར་པའི་བདུད་དགྲའི་སྟོབས། །ནམ་ཡང་ལྡང་མེད་གཏད་ཁྲོམ་མནན་པའི་

གཟེར། །འཁྲུལ་མེད་ཆོ་གའི་ངག་ཁྲིགས་གནད་ཀྱི་ཕུལ། །རབ་བརྟན་རྡོ་རྗེའི་ལྷུན་པོ་བརྩེགས་ལ་སྤྲོ། །[དེའང་མངོན་སྤྱོད་དྲག་པོའི་མན་ངག་སྲུང་བའི་མཐའ་སྡུད་དགྲ་བགེགས་མནན་པའི་ལས་ཀྱི་རིམ་པ་ལ་གསུམ་སྟེ། སྦྱོར་བ་བཅས་ཀྱི་གཤོམ་བཀོད། །དངོས་གཞི་སྒྲུབ་པའི་ལས་ཁྲིགས། རྗེས་མནན་པའི་རིམ་པའོ། །དང་པོ་ནི། དུས་སྤྱི་ཙམ་དུ་ལྕགས་ཁམས་ཀྱི་ལོ་ཟླ་ཉི་ཁྱིམ་ཕུང་གསུམ་བདུད་ཀྱི་ཉི་མ་སོགས་དང་། བྱེ་བྲག་དགྲ་སྲི་ལྟ་བུར་དམིགས་བྱའི་ལོ་ཟླ་ཞག་དུས་ཀྱི་བཞི་གཤེད་བདུན་ཟུར་སོགས་གྱིམ་ཤང་ནས་འབྱུང་བ་ལྟར་ལེགས་པར་བརྩིས་པའི་དུས་སམ། ཁྱད་པར་རྣལ་འབྱོར་པ་རང་ཉིད་ཁྲོ་ཞིང་ཚོགས་པ་ངར་དང་ལྡན་པའི་དུས་མངོན་སྤྱོད་ཀྱི་ལས་གནམ་ལྕགས་ཀྱི་ཐོག་ལྟར་མྱུར་བར་གསུངས་པས་དེ་ལྟ་བུའི་དུས་ངེས་པ་ཅན་ལ། དྲག་པོའི་གནས་སུ་འོས་པར་དམ་ཚིག་གི་བྲིས་སྐུ་བཀྲམ་པའི་མདུན་དུ་བླ་མ་ཡི་དམ་ཆོས་སྐྱོང་དང་བཅས་པའི་གཏོར་མ་དང་ཕྱི་

ནང་གི་མཆོད་པ་རྣམས་ལེགས་པར་བཤམས་པའི་ཉེ་འདབས་སུ། གདུག་པའི་ས་སྣ་རྣམས་ལས་སྟེགས་བུ་མདའ་གང་གྲུ་བཞི་པ་རོ་སོལ་གྱིས་ནག་པོར་བྱས་པའི་དབུས་སུ་བྲུབ་ཁུང་ཁ་ཁྱེར་སུམ་ལྡན་གྱིས་དུག་ཁྲག་དང་ཕྱི་རོ་སོལ་གྱིས་དམར་ནག་ཏུ་བྱུགས་ཤིང་མཐའ་རྩང་དམར་སྲིན་མོ་འགྲོས་སུ་བཙུགས་པས་བསྐོར་བའི་ནང་དུ་དུག་ཤོག་ལ་དགྲ་འདྲེ་གང་ལ་བྱ་བའི་ལིངྒ་མན་ངག་ལྟར་བྲིས་ཏེ་དྲི་བྲལ་དུ་བྱས་པ་བཅུག་པའི་ཁ་རོ་གཡམ་གྱིས་བཅད། དེ་སྟེང་དྲག་ཤིང་གི་ཁྲི་འུར་གོང་གནོན་གྱི་གཏོར་ཆེན་འཁོར་གྱི་བཤོས་བུས་གཏམས་པས་དྲག་རྒྱན་རྔམས་བརྗིད་ཅན་འཕང་བའི་སྐབས་ལྟར་འདུ་བྱས་པ་འགོད། ཤིང་གི་ཨེ་ཁྲོམ་ལ་བརྟེན་པའི་ཕུང་རེའམ་སྣམ་རས་ཀྱི་གུར་ཕུབ་ལ་ཉི་ཟེར་དང་མར་མེའི་མདངས་མི་ཕོག་ཅིང་བདུད་རྩིའི་ཟེགས་མ་མི་འཐོར་བར་བྱས་ལ་མཐའ་དྲག་པོའི་མཆོད་པས་བསྐོར། གཞན་ཡང་དབྱེ་རྫས་ཐུན་རྫས་མནན་ཐོད་ཕུང་རེ་བྱད་ཐག་རོ་གཡམ་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱའོ། །][གཉིས་པ་དངོས་གཞི་ལ་གསུམ། དང་པོ་འགུགས་པའི་ལས། བར་དུ་བསད་པའི་ལས། ཐ་མ་མནན་པའི་ལས་སོ། །དང་པོ་ནི། ཕྲིན་ལས་ཀྱི་གཞུང་བསྲངས་ཏེ་བཟླས་པའི་སྐབས་སྲུང་བའི་དམིགས་བཟླས་དང་ཕྲིན་ལས་ལ་དམིགས་པའི་སྤུ་གྲིའི་སྔགས་དྲག་ཏུ་བཟླ། དེ་ནས་སྨད་ལས་དཀྱུས་བཞིན་རིག་འཛིན་བསྐུལ་བ་ནས་བཟུང་དམ་ཅན་གྱི་བསྐུལ་བའི་བར་དང་། གསེར་སྐྱེམས། གཟུ་དཔང་། བདེན་བརྡར། བྲུབ་ཁུང་དམིགས་བྱ་བསྐྱེད་པ་རྣམས་སྔོན་དུ་འགྲོ་བས། བདེན་སྟོབས་ཀྱིས་འགུགས་གཞུག་ཅི་མང་མཐར། ཕོ་ཉ་འགྱེད་པ་ནི། བབ་བརྒྱད་དང་།] ཧཱུཾ༔ ནམ་མཁའི་དབྱིངས་སུ་སྲི་བྲོས་ན༔ ཁྱུང་གི་མགོ་ཅན་ཁྱོད་སོང་ལ༔ ནམ་མཁའི་དཀྱིལ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ གངས་

དཀར་རྩེ་ལ་སྲི་བྲོས་ན༔ སེང་གེའི་མགོ་ཅན་ཁྱོད་སོང་ལ༔ གངས་དཀར་རྩེ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ གཡའ་སྤང་མཚམས་སུ་སྲི་བྲོས་ན༔ གཡག་གི་མགོ་ཅན་ཁྱོད་སོང་ལ༔ གཡའ་སྤང་མཚམས་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ གོང་སུམ་དག་ཏུ་སྲི་བྲོས་ན༔ སྤྱང་ཀིའི་མགོ་ཅན་ཁྱོད་སོང་ལ༔ གོང་སུམ་དག་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ བྲག་ཐང་མཚམས་སུ་སྲི་བྲོས་ན༔ འུག་པའི་མགོ་ཅན་ཁྱོད་སོང་ལ༔ བྲག་ཐང་མཚམས་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ནགས་ཚལ་དག་ཏུ་སྲི་བྲོས་ན༔ དོམ་གྱི་མགོ་ཅན་ཁྱོད་སོང་ལ༔ ནགས་ཚལ་གསེབ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ རྒྱ་མཚོའི་གཏིང་དུ་སྲི་བྲོས་ན༔ སྲམ་གྱི་མགོ་ཅན་ཁྱོད་སོང་ལ༔ རྒྱ་མཚོའི་གཏིང་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ཆུ་བོའི་གཞུང་དུ་སྲི་བྲོས་ན༔ ཆུ་བྱའི་མགོ་ཅན་ཁྱོད་སོང་ལ༔ ཆུ་བོའི་གཞུང་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ས་ཡི་སྟེང་དུ་སྲི་བྲོས་ན༔ དྲེད་ཀྱི་མགོ་ཅན་ཁྱོད་སོང་ལ༔ ས་ཡི་སྟེང་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ རྒྱ་གྲམ་ལམ་དུ་སྲི་བྲོས་ན༔ ཕག་གི་མགོ་ཅན་ཁྱོད་སོང་

ལ༔ རྒྱ་གྲམ་ལམ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ རི་སུལ་དག་ཏུ་སྲི་བྲོས་ན༔ གོ་བོའི་མགོ་ཅན་ཁྱོད་སོང་ལ༔ རི་སུལ་དག་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབཿ ཐེམ་པའི་འོག་ཏུ་སྲི་བྲོས་ན༔ ཁྱི་ཡི་མགོ་ཅན་ཁྱོད་སོང་ལ༔ ཐེམ་པའི་འོག་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ རྩིག་པའི་གསེབ་ཏུ་སྲི་བྲོས་ན༔ བྱི་བའི་མགོ་ཅན་ཁྱོད་སོང་ལ༔ རྩིག་པའི་གསེབ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ཕྱོགས་མཚམས་ཀུན་ཏུ་སྲི་བྲོས་ན༔ སྤྲུལ་པའི་ཕོ་ཉ་མང་པོ་དང་༔ ཡང་སྤྲུལ་ཕོ་ཉས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ [ཅེས་དང་། དམིགས་བསལ་དགྲ་མནན་སྐབས་བབ་བརྒྱད་རྗེས་སུ།] ཧཱུྃ་བྷྱོ༔ ད་ནི་བསྒྲལ་བའི་ཐུགས་དམ་དུས་ལ་བབ༔ དོ་ནུབ་ནམ་གྱི་སྲོད་དང་གུང་ལ་བབ༔ ད་ལྟ་ནམ་གྱི་གུང་ལ་བབ་དུས་འདིར༔ སེམས་མེད་འབྱུང་བ་ཆུ་ཡང་གཉིད་ལོག་དུས༔ དགྲ་བོ་སྡིག་ཅན་ལས་ངན་གཉིད་ལོག་གི༔ བླ་ཚེ་འཁྱམས་པོ་ད་ལྟ་ཁྲིད་ལ་ཤོག༔ བྷྱོ༔ ད་ལྟ་ནམ་གྱི་སྲོད་ལ་བབ་དུས་འདིར༔ ཚེ་རྐུན་ལས་ལ་འགྱེད་པའི་དུས་ཡིན་པས༔ དམ་ཉམས་དགྲ་བོའི་བླ་ཚེ་འཁྱམས་པའི་དུས༔ དམ་ཉམས་དགྲ་བོའི་བླ་འཁྱམས་ཁྲིད་ལ་ཤོག༔ བྷྱོ༔ དོ་ནུབ་ནམ་གྱི་ཐོ་རངས་བབ་དུས་འདིར༔ དགྲ་བོའི་བླ་

ཚེ་འཕྱོ་ཞིང་འཕྲོ་བའི་དུས༔ ལས་ངན་བླ་འཁྱམས་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ནམ་ལངས་ཉི་མ་ཤར་བའི་དུས༔ མི་ཕྱུགས་ཐམས་ཅད་ལས་ལ་གྲམ་པའི་དུས༔ དགྲ་བོའི་བླ་ཚེ་སྒོ་རུ་ཐོན་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ཉི་མ་གུང་ལ་བབ་དུས་འདིར༔ དགྲ་རྐུན་རྣམ་ཤེས་བྱིང་ཞིང་མྱོས་པའི་དུས༔ དགྲ་བོའི་བླ་ཚེ་འཐོམ་ཞིང་འཁྱམས་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ཉི་མ་གྲིབ་སོ་ཕོག་པའི་དུས༔ སྙིང་མི་དགའ་ཞིང་ཤེས་པ་འཕྱོ་བའི་དས༔ དགྲ་བོའི་བླ་ཚེ་རྣམ་ཤེས་འཕྱོ་བའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ བླ་འཁྱམས་ལས་ངན་འཁྱམས་པའི་དུས་དྲུག་ལ༔ བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུག༔ མགོན་མེད་བྱིའུ་ཕྲུག་བྱ་ཁྲས་ཟིན་པ་ལྟར༔ རང་དབང་མེད་པར་མྱུར་དུ་ཁྲིད་ལ་ཤོག༔ དགྲ་བོའི་བླ་འཁྱམས་མི་རུ་བརྫུ་བ་ན༔ ཕོ་ཉ་གནོད་བྱེད་སྲིན་པོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་ཤ་བར་བརྫུ་བ་ན༔ ཕོ་ཉ་གསེར་གྱི་སྟག་མོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་རྒོ་བར་བརྫུ་བ་ན༔ ཕོ་ཉ་ལྕགས་དོམ་ནག་པོར་སྐུར་སྤྲུལ་ལ༔ རང་དབང་མེད་

པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་ལུག་ཏུ་བརྫུ་བ་ན༔ ཕོ་ཉ་ལྕགས་ཀྱི་སྤྱང་མོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་ར་རུ་བརྫུ་བ་ན༔ ཕོ་ཉ་བྱེ་རུའི་ཁྱི་མོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་བྱ་རུ་བརྫུ་བ་ན༔ ཕོ་ཉ་བྱ་རྒྱལ་ཁྱུང་དུ་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་གླ་བར་བརྫུ་བ་ན༔ ཕོ་ཉ་གསེར་གྱི་འཕར་བར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་བོང་བུར་བརྫུ་བ་ན༔ ཕོ་ཉ་ཟངས་ཀྱི་དྲེད་མོར་སྐུར་སྤྲུལ་ལ༔ རང་དབང་མེད་པར་མྱུུར་དུ་ཁུག་ལ་ཤོག༔ བྷྱོ༔ དམ་ཉམས་དགྲ་བོའི་བླ་རྟགས་བརྒྱད་པོ་ལ༔ ཕོ་ཉ་བརྒྱད་ཀྱིས་གཉེན་པོ་སྐུར་སྤྲུལ་ལ༔ བྲུབ་ཁུང་འཁོར་བའི་བཙོན་དོང་འདི་ནང་དུ༔ དམ་ཉམས་ལིང་གའི་སྟེང་ན་བླ་སྲོག་ཁུག༔ བླ་སྲོག་གསུམ་ལ་སྲིད་པའི་ཕུར་པ་ཐོབ༔ ཕུར་མཚོན་དབལ་གྱིས་ལུས་སེམས་ཕྱེས་ལ་ཤོག༔ དགྲ་བོའི་བླ་སྲོག་སྟེང་དུ་མཱ་ར་ཡ༔ སྲོག་རྩ་དམར་པོ་རྦད་ཀྱིས་ཆོད་ལ་ཤོག༔ བླ་འཁྱམས་ལས་ངན་སྟེང་དུ་མཱ་ར་ཡ༔ ར་དང་ལུག་དང་བོང་བུ་རྣམ་པ་གསུམ༔ བླ་རྟགས་ཡིན་པས་མྱུར་དུ་ཁྱེར་ལ་ཤོག༔ སོ་དང་སེན་མོ་པགས་པ་རྣམ་པ་གསུམ༔ ཕྱི་རྟགས་ཡིན་པས་ད་ལྟ་ཁྱེར་ལ་ཤོག༔ རྣ་བ་

ལྕེ་དང་མིག་དང་གསུམ་པོ་ནི༔ དབང་པོ་ཡིན་པས་མྱུར་དུ་ཁྱེར་ལ་ཤོག༔ གློ་བ་སྙིང་དང་མཆིན་པ་གསུམ་པོ་ནི༔ དོན་སྙིང་ཡིན་པས་མྱུར་དུ་ཁྱེར་ལ་ཤོག༔ མཉེ་མ་རྒྱུ་མ་མཁལ་མ་གསུམ་པོ་ནི༔ ནང་རོལ་ཡིན་པས་ད་ལྟ་ཁྱེར་ལ་ཤོག༔ ཤ་ཁྲག་བརྒྱན་པའི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་འགྲུབ་པར་མཛོད༔ [ཅེས་བསྐུལ། གང་གི་ཚེ་ནའང་།] ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ་ཀཱ་ལ་རཱུ་པ་དམ་སྲིའམ་དགྲ་བོ་ཛཿ་ཛཿ སྙིང་རྩ་ལ་ཡཾ་ཡཾ༔ དམ་སྲི་ཛཿཛཿ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་ཕྲིལ་དམ་སྲི་ཛཿཛཿ སྲོག་རྩ་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛཿ དམ་སྲི་ཛཿཛཿ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག་དམ་སྲི་ཛཿཛཿ སོད་སོད་ངྷ་ཏི་མ་མ་ཀརྨ་ཤཱི་གྷྲཾ་ཀ་ར་ཡེ༔ མཱ་ར་སེ་ན་པྲ་མརྔྷ་ན་ཡེ་ཧཱུྃ༔ དམ་སྲི་ཛཿཛཿ [ཞེས་གང་མང་དང་།] ཨོཾ་བཛྲ་ཀཱི་ལི་ཀཱི་ལ་ཡ་སྲི་ངན་ཛཿཧཱུྃ་བཾ་ཧོ༔ སྲི་ངན་ནམ། དགྲ་བོའི་བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོག་མྱོག༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོག་ལིང་ཤག་ཙ་མུནྟྲིཛཿཧཱུྃ་བཾ་ཧོཿ [ཞེས་བཟླ། དེ་ཡང་འགུགས་པའི་དུས་གནད་ཐོ་རངས་སྐར་ཆེན་ཤར་བ་སྟག་ཆེན་ཁ་གདང་བའི་དུས། ཞོགས་པ་ཤར་

ནས་གྲིབ་སོ་བྱུང་བ་གང་ཟིན་ལ་འཇུག་པའི་དུས། དགོང་མོ་ནུབ་ནས་གྲིབ་སོ་བྱུང་བ་སྲིན་པོ་ལྟོ་ལ་རུབ་པའི་དུས། སྲོད་གདོང་ནག་ལ་བདུད་དམག་ལ་ཆས་པའི་དུས་ཏེ་དུས་དེ་བཞི་ལ་དགུགས་གཞུག་དྲག་པོ་ནན་ཏན་དུ་བྱ། དམིགས་པ་ནི། དཀྱིལ་འཁོར་གསུམ་གྱི་ལྷ་ཚོགས་ཀྱི་སྐུ་ལས་སྤྲུལ་པའི་ཁྲོ་བོ་ཁྲོ་མོ་ཕོ་ཉ་དཔག་ཏུ་མེད་པ་འཕྲོས། ཕོ་སྲི་གཡག་དཀར་པོའི་རྣམ་པར། མོ་སྲི་ཁྱི་ནག་མོའི་ཚུལ་སོགས་གོང་གསལ་ལྟར་ལ། རི་བོའི་རྩེ་རྒྱ་མཚོའི་འགྲམ་འཇིག་ཏེན་ཁམས་གར་གནས་ཀྱང་སྲི་ངན་རྣམས་བྱིའུ་ཅུང་ཁྲས་དེད་པ་ལྟར་བཀུག་ནས་གཟུགས་ལ་བསྟིམ། ཡང་དཀྱིལ་འཁོར་གསུམ་ལས་ཁྲོ་བོ་འདོད་རྒྱལ་ལྕགས་ཀྱུ་དང་། སྒོ་མ་བཞི་རང་རང་གི་མཚོན་ཆའི་འཛིན་པ་དཔག་མེད་སྤྲོས་ཏེ། སྲི་ཆུང་བཅུ་གསུམ་གཙོ་བོར་གྱུར་པའི་གདོན་བགེགས་གནོད་བྱེད་སྲིད་རྩེ་ནས་མནར་མེད་ཀྱི་བར་གང་དུ་གནས་པ་ནས། ལྕགས་ཀྱུས་སྙིང་ནས་ཕུག །ཞགས་པས་རྐེད་ནས་བཅིངས། ལྕགས་སྒྲོག་གི་དྲྭ་བར་བཅུག །དྲིལ་བུས་མྱོས་པར་བྱས། མཚོན་ཆ་སྣ་ཚོགས་ཀྱི་ཆར་ཕབས། ལས་ཀྱི་རླུང་གི་འཁོར་ལོ་ལ་བསྐྱོན། རང་དབང་མེད་པར་མྱུར་སྟབས་སུ་བཀུག་སྟེ་གཟུགས་ལ་དབང་མེད་དུ་ཐིམ་པར་གྱུར་ནས། བྱད་ཐག་གིས་གྲུ་གུ་ལྟར་བཅིངས། ལུས་ངག་ཡིད་གསུམ་ཉམ་ཐག་པ་རྡོ་རྗེ་རྒྱ་གྲམ་ཤིན་ཏུ་ལྕི་བས་མནན་ཏེ། བདག་མདུན་གྱི་གཟི་བརྗིད་མཐུས་འགུལ་ཙམ་མི་ནུས་པར་བསམ། དམིགས་བསལ་དགྲ་བོ་ལ། རང་ཉིད་ལྷར་གསལ་བའི་སྣ་བུག་གཡས་ནས་དབུགས་ཕྱིར་རྒྱུ་བ་དང་མཉམ་དུ་ཁྲོ་ཆུང་ཚོན་གང་བ་ཡུངས་ཀར་ཙམ་མཐིང་ནག་ཞལ་གཅིག་ཕྱག་གཉིས་པ་གཡས་སྤུ་གྲི་དང་གཡོན་ལྕགས་ཀྱུའི་རྩེ་ལ་ཛཿདམར་པོ་ཡོད་པ་འཛིན་པ་སྤྲོས། དམིགས་བྱའི་སྣ་བུག་གཡོན་ནས་རླུང་ནང་དུ་རྔུབས་པ་དང་ལྷན་དུ་ཞུགས་ནས་ཁོའི་སྙིང་དཀར་ནག་མཚམས་སུ་སྤུ་གྲིས་བཅད། སྙིང་གའི་ས་བོན་ལྕགས་ཀྱུའི་ཛཿདམར་པོ་དེས་འུབ་ཀྱིས་བླངས་ནས་སྣ་

བུག་གཡས་ནས་རླུང་རྒྱུ་བ་དང་མཉམ་དུ་ཐོན་ནས་ས་བོན་ལིང་གར་ཐིམ། ཁོའི་ལུས་སོལ་སྡོང་འགྱེལ་བ་ལྟར་སོང་བར་བསམ་ཞིང་། འགུགས་སྡགས་བརྒྱ་རྩ་ལས་མི་ཉུང་བས་བཀུག་ལ་འགུགས་འཆིང་སྡོམ་མྱོས་ཀྱི་ལས་བྱ། ཐུན་མཚམས་སུ་སྨད་ལས་བཞིན་ཐུན་གཏོར་ལ་དམིགས་བྱ་འགུགས་བསྟིམ་བདུད་རྩིར་སྦར་བསྔགས་ཀྱིས་ཕུལ་ཏེ།] ཧཱུྃ༔ དུས་གསུམ་རྒྱལ་བའི་ཕྲིན་ལས་འབྱུང་བའི་དཔལ༔ མ་རུངས་འདུལ་མཛད་ཀརྨ་ཧེ་རུ་ཀ༔ འགྲོ་བ་སྙིགས་མའི་སྡུག་བསྔལ་སྐྱོབ་པའི་ལྷ༔ དྲག་པོའི་ཕྲིན་ལས་མཛད་ལ་མཆོད་པ་འབུལ༔ ཁྲོ་བཅུ་ཡབ་ཡུམ་ཁྲ་ཕྱག་སྒོ་མ་བཞི༔ ཕུར་སྲུང་ཟ་གསོད་དབང་ཕྱུག་ཉེར་བརྒྱད་སོགས༔ སྤྲུལ་པ་ཡང་སྤྲུལ་འཁོར་དང་བཅས་པ་རྣམས༔ བ་ལིཾ་ཤ་ཁྲག་གཏོར་མ་འདི་བཞེས་ལ༔ དམིགས་པའི་དགྲ་བགེགས་གཟུགས་ལིང་མིང་བཅས་འདི༔ བླ་ཁུག་དབུགས་འཕྲོག་མགོ་འཁོར་ཁྲག་ཏུ་སྐྱུགས༔ བརྒྱལ་ཞིང་ལུས་སེམས་ཕྲོལ་ལ་སྲོག་རྩ་ཆོད༔ ཚེ་ཡི་འདུ་བྱེད་བསྐུམས་ལ་མྱུར་དུ་སོད༔ ཤ་ཁྲག་གཟུགས་ཕུང་འབྱུང་བ་ཞལ་དུ་ཐོབ༔ བསད་རྟགས་དོན་སྙིང་དམར་པོ་ཁྱེར་ལ་ཤོག༔ བྱད་མ་ལྷ་སྲུང་རང་གཤེད་རང་ལ་ཕོབ༔ ལུས་ངག་ཡིད་གསུམ་མཐུ་རྩལ་ནུས་པ་རྣམས༔ ནམ་ཡང་ལྡང་མེད་མནན་པའི་ཕྲིན་ལས་མཛོད༔ [ཅེས་འབུལ། དེ་ལྟ་བུའི་ཚུལ་གྱིས་ཐུན་དྲུག་གམ་བཞིར་བཅད་དེ་ཁུག་རྟགས་མ་བྱུང་བར་རམ་ཞག་གྲངས་ཇི་ཙམ་བྱེད་པ་ཆ་གཉིས་སུ་

བགོས་པའི་ཆ་གཅིག་ལ་འབད་དོ། །][གཉིས་པ་བར་དུ་བསད་པའི་ལས་ནི། དེ་ལྟར་བཀུག་ནས་སྨད་ལས་བཞིན་ལྷ་དབྱེ་བྱས་ལ།] རང་ཉིད་དཔལ་ཆེན་པོར་གསལ་བའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་དམིགས་བྱ་རྣམས་ལ་ཕོག་པས། བ་མོ་ལ་ཉི་ཟེར་ཕོག་པའམ་མེ་ཏོག་སད་ཀྱིས་ཁྱེར་བ་ལྟར་བཀྲག་མདངས་ཉམས། བདག་མདུན་དང་བྲུབ་ཁུང་ཁའི་རྩང་རྣམས་ཤན་པ་ཕོ་མོའི་ངོ་བོར་གསལ་བའི་ཞལ་ནས་སྔགས་སྒྲ་དི་རི་རི་བཟླས་པས། དྲག་སྔགས་ཀྱི་འོད་ཟེར་མེ་ལྕེ་རྣོ་ངར་དང་ལྡན་པ་མཚོན་ཆའི་རྣམ་པར་འཕྲོས་ཏེ་ལུས་ཀྱི་ཡན་ལག་ནང་ཁྲོལ་རྣམས་བཅད་གཏུབ་བྱས་ཏེ་ལོ་ཏོག་སེར་བས་བཅོམ་པ་ལྟར་གྱུར། ཡང་དུག་གིས་འཚུབ་ཅིང་ནད་ཀྱིས་གཟིར་ནས་དབང་པོ་ཉམས་ཤིང་རྣམ་ཤེས་མར་མེ་འཆི་ཁའི་འོད་ལྟར་ནག་སྐེམ་སྐེམ་པ་དེ་ཡང་ཐུམས་སེ་བསད་པར་[བསམ། ཟབ་གནད་དམིགས་པ་ནི། རྡོ་རྗེ་གཞོན་ནུའི་སྐུ་སྨད་ཁྲོ་ཕུར་ལྕགས་ཁྲེག་གི་རང་བཞིན་ཅན་དུ་གྱུར་པ་དེ་ཉིད་དམིགས་བྱའི་སྤྱི་གཙུག་ཏུ་བརྒྱབ། རྐང་མཐིལ་ནས་ཕྱུང་། ལྕེ་སྟེང་ནས་ཨོག་མར་ཕྱུང་། སྙིང་ཁར་ཐོག་རྒྱབ་པ་ལྟར་སོང་བས་སྲོག་རྩ་ཐལ་བར་བཏང་། མདོར་ན་དགྲ་བོའི་སྒོ་གསུམ་བྱ་སྒྲོ་མེ་ལ་བསྲེག་པའམ་གཞོབ་རོ་ལྡོག་པས་བརྫིས་པ་ལྟར་ཐལ་བ་བུན་བུན་སོང་ནས་ཕུར་པའི་ཆར་རྒྱུན་མི་ཆད་པས་རྗེས་མེད་རྩ་བརླག་ཏུ་སོང་བར་བསམ་ལ།] ཨོཾ་བཛྲ་ཀཱི་ལི་ཀཱི་ལ་ཡཱཾ༔ མ་རཀྨོ་ཡཀྨོ་ཀཱ་ལ་རུ་པ་དམ་སྲི་མཱ་ར་ཡ་སོད༔ སྙིང་རྩ་ལ་ཡཾ་ཡ༔ དམ་སྲི་མཱ་ར་ཡ་སོད༔ སྲོག་རྩ་ལ་ཡཾ་ཡཾ༔

སྙིང་རྩ་ལ་ཕྲིལ་ཕྲིལ༔ དམ་སྲི་མཱ་ར་ཡ་སོད༔ སྲོག་རྩ་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ དམ་སྲི་མཱ་ར་ཡ་སོད༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག་དམ་སྲི་མཱ་ར་ཡ༔ སོད་སོད་དྷ་དྷི་མ་མ་ཀརྨ་ཤཱི་གྷྲཾ་ཀཱ་ར་ཡེ༔ མཱ་ར་སེ་ན་པྲ་མརྔྷ་ན་ཡེ་ཧཱུྃ༔ དམ་སྲི་མཱ་ར་ཡ་སོད་ཕཊ༔ [ཅེས་དྲག་ཏུ་བཟླ་ཞིང་ཐུན་རྫས་ལ་ཁ་རླངས་མ་ཤོར་བར་ལག་ངར་བརྒྱུད་ནས་ཕུས་འདེབས།] ཐུན་རྫས་རྣམས་དྲེགས་པ་ལྷ་སྲིན་སྡེ་བརྒྱད་འདུས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོ་དམིགས་བྱའི་སྙིང་ཁར་གཟིར་ཞིང་བསྡིག་པས་གཟུགས་བྱེ་མའི་མཁར་ཆུས་བཤིགས་པ་ལྟར་རྡུལ་དུ་བཅོམ་ནས་མཐར་རྣམ་ཤེས་ཀྱི་ངོ་བོ་ནྲྀའམ་ཏྲི་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམས་ཀྱིས་བསད་པར་[བསམ་ལ། ཐུན་གྱིས་ལིང་ག་ལ་བརྡེག་ཅིང་།] ཧཱུྃ། དཔལ་ཆེན་རྡོ་རྗེ་གཞོན་ནུ་དང་། །ཡུམ་མཆོག་འཁོར་ལོ་རྒྱས་འདེབས་མ། །ཁྲོ་བཅུ་ཁྲ་ཐབས་སྒོ་སྐྱོང་ཚོགས། །སྲས་དང་སྲུང་མ་དམ་ཅན་རྣམས། །སྐུ་ནི་འཇིགས་གཟུགས་སྟོང་ཁམས་ཁྱབ། །གསུང་ནི་དྲག་སྔགས་འབྲུག་སྟོང་ལྡིར། །ཐུགས་ནི་ཆོས་དབྱིངས་སྐྱེ་བ་མེད། །གཏུམ་ཆེན་དུས་མཐའི་མེ་ལྟར་འབར། །སྤྲུལ་པའི་ཕོ་ཉ་རྡུལ་ལྟར་

འཚུབས། །ཡེ་ཤེས་མཚོན་ཆ་སྐར་ལྟར་འཁྲུགས། །དམ་སྲི་ལས་ངན་སྡིག་ཅན་ལ། །དུག་ཁྲག་ནད་རླངས་མཚོན་ཆ་དང་། །ཐུན་རྫས་རྡོ་རྗེའི་མེ་ཆར་ཕོབ། །དམ་སྲིའི་ལུས་ངག་ཡིད་ལ་གཟིར། །དམིགས་པའི་དགྲ་བགེགས་རྡུལ་དུ་རློག །བཅོལ་བའི་ཕྲིན་ལས་གྲུབ་པར་མཛོད། །[ཅེས་ཐུན་དབབ། ཐུན་མཚམས་སུ་གོང་བཞིན་ཐུན་གཏོར་ཕུལ་ཞིང་ཕྲིན་ལས་བཅོལ། དེ་ལྟར་བསད་རྟགས་མངོན་དུ་མ་གྱུར་གྱི་བར་རམ་འགུགས་པའི་ཕྱེད་ཆ་ཙམ་དུ་འབོད་དོ། །][གསུམ་པ་ཐ་མ་མནན་པའི་ལས་ནི། དེ་ལྟར་བསྒྲུབས་པས་བསད་རྟགས་ཐོན་པ་ན། བྲུབ་ཁུང་གནམ་ལྕགས་ཀྱི་ཁང་སྒྲོམ་སྲུབས་མེད་པ་རྡོ་རྗེ་ཕ་ལམ་ལས་གྲུབ་པའི་གཤིན་རྗེའི་བཙོན་ཁང་། གསེར་གྱི་ས་གཞིའི་འོག་ཏུ་སླེབས་པ་ཙམ་གྱི་གཏིང་རིང་བ། ལྕགས་སྲེག་གི་ས་གཞི་ཕྱི་ནང་ཐམས་ཅད་ནད་ངན་དུག་གི་རླངས་པ་འཁྲིགས་ཤིང་མཚོན་ཆའི་ཆར་འབེབས། རྩང་རྣམས་ཀྱང་ལས་བྱེད་ཀྱི་ཁྲོ་བོ་དཔག་ཏུ་མེད་པ་མཚོན་ཆ་ཐོགས་པས་བསྐོར་བའི་ཕྱི་རོལ་དུ་ས་ཆུ་མེ་རླུང་མི་བཟད་པའི་གུར་ཁང་རིམ་པ་མང་པོ་བསྐལ་པའི་རླུང་ཡང་མི་ཐར་བའི་གཏིང་དུ་དགྲ་བགེགས་དམ་སྲི་དབང་མེད་དུ་ཚུད་དེ་སྒོ་གསུམ་མྱོས་ཤིང་བརྒྱལ་ནས་འགུལ་བསྐྱོད་བྲལ་བའི་སྟེང་དུ་སྟོབས་བཅུའི་རྩལ་མངའ་དཔལ་ཆེན་རྡོ་རྗེ་གཞོན་ནུའི་ལྷ་ཚོགས་ཡང་སྤྲུལ་དང་བཅས་པས་གཟིར་ཞིང་མནན་ཏེ་བསྐལ་པའི་བར་དུའང་མི་ཐར་བར་བསམ་ཡང་ཟབ་དམིགས་པ་ནི།] དགྲ་བགེགས་འབྱུང་པོའི་སྤྱི་མགྲིན་དང་། །སྙིང་ག་ལྟེ་བ་གསང་གནས་ལྔར། གནམ་ལྕགས་ཙཀྲ་རྩིབས་བརྒྱད་པ། །སྣ་ཚོགས་རྡོ་རྗེས་མཚན་པ་རེ། །རྩིབས་བཞིར་རྒྱ་གྲམ་

ལྕི་ཞིང་འཐས། །མནན་པས་ལུས་ངག་ཡིད་གསུམ་ཚོགས། །འགུལ་བསྐྱོད་སྨྲ་བསམ་མེད་པ་རུ། །ཉམ་ཐག་དུཿཁའི་རང་བཞིན་གྱུར། །[ཅེས་བསྒོམས་ལ།] ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ་ཀཱ་ལ་རུ་པ་དམ་སྲི་སྟྭཾ་བྷ་ཡ་ནན༔ སྙིང་རྩ་ལ་ཡཾ་ཡཾ་དམ་སྲི་སྟྭཾ་བྷ་ཡ་ནན༔ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་ཕྲིལ་དམ་སྲི་སྟྭཾ་བྷ་ཡ་ནན༔ སྲོག་རྩ་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛཿདམ་སྲི་སྟྭཾ་བྷ་ཡ་ནན༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག་དམ་སྲི་སྟྭཾ་བྷ་ཡ་ནན༔ སོད་སོད་ངྷ་ཏི་མ་མ་ཀརྨ་བཱི་གྷྲཾ་ཀ་ར་ཡེ༔ མཱ་ར་སེ་ན་པྲ་མརྔྷ་ན་ཡེ་ཧཱུྃ་དམ་སྲི་སྟྭཾ་བྷ་ཡ་ནན༔ [ཞེས་དྲག་ཏུ་བཟླ། མཐར་ཐུན་རྡེག་པ་སོགས་གོང་གི་འགྲོས་ཀྱིས་མནན་རྟགས་མཐོང་བའི་བར་རམ་བསད་པའི་ཕྱེད་ཆ་ཙམ་དུ་འབད་དོ། །][གསུམ་པ་རྗེས་མནན་པའི་ལས་རིམ་དངོས་ནི། དེ་ལྟར་མནན་རྟགས་རྫོགས་ནས་མནན་པའི་དུས་ལ་བབ་པ་ན།] དགྲ་བགེགས་དམ་སྲི་དེ་རྣམས་དབང་པོ་ཉམས་ཤིང་དབུགས་དང་བྲལ་ནས་འགུལ་ཙམ་ཡང་མི་ནུས་ཤིང་བྱད་ཐག་སྣ་ལྔས་གྲུ་གུ་ལྟར་བསྡམས། སྙིང་ནང་དུ་འཁོར་ལོ་རྩིབས་དགུ་གནམ་ལྕགས་ལས་གྲུབ་པ་རྣོ་ངར་དང་ལྡན་པ་ཨོཾ་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ་ཅེས་པས་མཚན་པ་གཡོན་བསྐོར་དུ་དྲག་ཏུ་

འཁོར་བས་སྙིང་སོགས་ནང་ཁྲོལ་རྣམས་བཅད། ཁོ་ལ་ཟུག་གཟེར་དང་ན་ཚ་སྡུག་བསྔལ་མི་སྐྱེ་བར་བདེ་བའི་ངང་དུ་བརྒྱལ་བར་[བསམ་ཞིང་། དྲག་སྔགས་བཟླ་བཞིན་པར་ལིང་ག་བྲུབ་ཁུངས་པས་ཕྱུངས་ཏེ་ལྟེབས་ལུགས་གསུམ་པོ་གང་ཡང་རུང་བས་ལྟེབས་ལ་ཤི་ཡུག་གི་སྐྲ་དང་ཚོན་སྐུད་ཀྱིས་བཅིང་། མནན་ཐོད་སོ་སོའི་རིང་གཤེད་ཀྱི་གནད་དང་ལྡན་པར་གཞུག་ཅིང་ཐུན་རྫས་ཀྱིས་སེང་མེད་པར་བཀང་སྟེ་ལ་ཆས་བཀག །ཕུང་རེའམ་ཡུག་སའི་ཤ་གོས་ཀྱིས་དྲིལ་ལ་བྱད་ཐག་གིས་བཅིངས་པར་རྩང་རྒྱ་གྲམ་དུ་གཟེར།] དཀྱིལ་འཁོར་གསུམ་གྱི་ལྷ་རྣམས་དང་རང་བཞིན་གྱི་དབྱིངས་ན་བཞུགས་པའི་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་སྐུ་དང་ཕྱག་མཚན་སོགས་ལས་འོད་ཟེར་དམར་ནག་མེ་རླུང་འཚུབས་ཤིང་སྲ་མཁྲེགས་མཚོན་ཆའི་རང་བཞིན་ཐོད་པ་ལ་བསྟིམས་པས། ཐོད་པ་ཤིན་ཏུ་སྲ་ཞིང་བརྟན་པ་དགྲ་བགེགས་བསྐལ་པའི་བར་དུ་མི་ལྡང་བའི་བཙོན་ཁང་སྲུབས་སེང་མེད་པར་[བསམ་ཤིང་།] དྲིལ་ཆས་ཀྱང་བསྐལ་པའི་མུན་པ་དང་། རྩང་རྣམས་གཤིན་རྗེའི་ལས་བྱེད་ཤན་པ་ཕོ་མོས་བསྐོར་ནས་ལྡང་མེད་དུ་ཐུབ་པར་སྲུང་བར་[ནན་ཏན་དུ་གསལ་གདབ་ལ། རིགས་སྔགས་ཀྱི་བཅིངས་རྒྱ་དང་མནན་སྔགས་རྟེན་འབྲེལ་ནག་པོའི་མན་ངག་བཞིན་རབ་ཏུ་གནས། དེ་ནས་ཟློག་གཞུང་བཞིན་སྒོ་དབྱེ། བསྐུལ་དང་ཆད་མདོ་བསྒྲག་ནས། མནན་རྫས་དང་གོང་གནོན་གྱི་གཏོར་མ་སོགས་ཁྱེར་ཏེ་གང་དུ་མནན་པའི་ས་མིག་ཏུ་མནན་དོང་ཚུལ་བཞིན་བྲུས་པའི་སར་སླེབ་པ་དང་། གསེར་སྐྱེམས་ཕུལ་ཏེ།]

རང་ཉིད་དཔལ་ཆེན་སྐུ་རུ་གསལ་བ་ཡིས༔ ཕྱག་གི་གནམ་ལྕགས་ཕུར་བུ་ས་ལ་བཏབ༔ ས་གཞི་གས་ཏེ་རྒྱ་མཚོ་སྔོ་མེར་གསལ༔ དེ་དབུས་གནམ་ལྕགས་ཁང་པ་སྒོ་མེད་ནང་༔ འཆི་བདག་གཤིན་རྗེ་ནག་པོ་འཇིགས་རུང་བ༔ ལག་གཡས་དབྱུག་ཏོ་གཡོན་ན་ཞགས་པ་ཐོགས༔ མི་སྡུག་དྲི་འཐུལ་མ་ཧེ་ནག་པོ་ཞོན༔ གཤིན་རྫེའི་འཁོར་ཛོགས་རྔམས་པའི་ཚུལ་གྱིས་བསྐོར༔ མངོན་སུམ་ལྟ་བུར་གསལ་བ་ཉིད་དུ་གྱུར༔ ས་མ་ཡ་ཛཿ[ས་སྤྱན་དྲངས།] ས་མ་ཡ་ཧཱུྃ་གིས་[དམ་ལ་བཞག །དམར་གྱི་གཏོར་མར་དམིགས་བྱ་དགུག་བསྟིམས་བདུད་རྩིར་སྦར་ལ།] ཀྲིཥྞ་ཛ་མཱ་རི་དགྲ་བགེགས་ཀྱི་མཱཾ་ས་ཙིཏྟ་རཀྟ་གོ་རོ་ཙ་ན་ཀིཾ་ནི་རི་ཏི་གྷྲྀཧྞ་ཁཱ་ཧི། [ལན་གསུམ།] ཧཱུྃ༔ འཆི་བདག་ནག་པོ་འཁོར་བཅས་ལ༔ དགྲ་བོའི་ཤ་ཁྲག་གཏོར་མ་འདི༔ འབུལ་གྱི་དགྱེས་པར་རོལ་ནས་ཀྱང་༔ དམ་ཉམས་དགྲ་བོ་འཁོར་དང་བཅས༔ བསྡམས་འཛིན་མནན་པའི་ཕྲིན་ལས་མཛོད༔ [ཅེས་གཏོར་མ་ཕུལ། དེ་ནས་སླར་ཡང་འགུགས་འདྲེན་བླ་འགུགས་ནན་ཏན་དང་ལྷ་དབྱེ་བྱས་ཏེ་མནན་ཆས་ཐོགས་ལ།] ཧཱུྃ༔ ཕུང་སྲི་བྱ་བའི་ལས་ངན་འདིས༔ རྡོ་རྗེ་སློབ་དཔོན་སྐུ་ལ་བསྡོས༔ རྡོ་རྗེ་མཆེད་ལ་བར་ཆད་བྱས༔ རྣལ་འབྱོར་བདག་ལ་རྟག་ཏུ་འཚེ༔ དམ་སྲི་སྡིག་ཅན་ལས་ངན་འདིས༔ རྒྱལ་ཁམས་ཡོངས་ལ་གནོད་པ་བྱས༔ སྦྱོར་སྒྲོལ་མང་པོའི་སྒོ་ཡང་བཀག༔ བཀའ་ལས་འདའ་བྱེད་

སྡིག་ཆེན་འདི༔ ནམ་ཡང་བཏང་བར་མ་བྱེད་ཅིག༔ འཛིགས་རུང་གཤིན་རྗེའི་ཁ་ནང་ཆུག༔ མི་འགྱུར་ཡངས་པའི་མགྲིན་པར་དྲོངས༔ ཐར་མེད་ལས་ཀྱི་ལྟོ་བར་ཆུག༔ གཏད་དོ་འཆི་བདག་ཁྱོད་ལ་གཏད༔ འཆི་བདག་ནག་པོ་དམ་ཚིག་ཅན༔ གལ་ཏེ་བྱང་ཆུབ་སེམས་ལྡན་བར༔ སྲི་ངན་གཏད་ཀྱི་སླར་མ་བཏང་༔ [ཞེས་དང་། དམིགས་བསལ་དགྲ་མནན་ལ།] ཧཱུྃ༔ དམ་ཉམས་དགྲ་བོ་ལས་ངན་འདི༔ མནན་ནོ་རི་རབ་འོག་ཏུ་མནན༔ ལས་ཀྱིས་མནར་བའི་སྡིག་ཅན་འདི༔ གཏད་དོ་གཤིན་རྗེའི་ལག་ཏུ་གཏད༔ འཁོར་བར་འཁྱམས་པའི་ལས་ངན་འདི༔ སྦའོ་རྒྱ་མཚོའི་གཏིང་དུ་སྦ༔ དང་པོ་བདེ་བར་གཤེགས་པའི་བཀའ༔ དེ་ནས་འབྱུང་བ་ལྔ་ཡི་གཏེར༔ དེ་ནས་དབང་པོ་ལྔ་ཡི་བཅུད༔ དང་པོ་ཞེ་སྡང་ཕ་ཡི་རྒྱུད༔ བར་དུ་འདོད་ཆགས་མ་ཡི་མངལ༔ ཐ་མར་ཉོན་མོངས་ལུས་བླངས་ཏེ༔ གཏན་དུ་སྡུག་བསྔལ་མྱོང་བ་ལས༔ དེ་བས་བསད་ཅིང་མནན་པར་བྱ༔ མནན་གཟིར་དྲག་པོ་མི་བྱ་རྒྱུ༔ ཁྱོད་ཀྱིས་ལས་ངན་སྣ་ཚོགས་སྤྱོད༔ འདི་འོག་བསྐལ་པ་བརྒྱད་ཁྲི་བཞི་སྟོང་ན༔ གཤིན་རྗེའི་རྒྱལ་པོས་ཆོས་འཆད་ཟེར༔ ཁྱོད་ཀྱི་ཆོས་སྐལ་དེར་ཉོན་ཅིག༔ འཁོར་དང་བུད་མེད་ཉེ་དྲུང་ཟས་ནོར་བཅས༔ གཏད་དོ་འཆི་བདག་གཤིན་རྗེའི་ལག་ཏུ་གཏད༔ དེ་ཡི་ལག་ནས་འཆོར་མི་སྲིད༔

མནན་ནོ་རི་རབ་འོག་ཏུ་མནན༔ དེ་ཡི་འོག་ནས་ལྡང་མི་སྲིད༔ ནམ་ཞིག་བྱང་ཆུབ་སེམས་སྐྱེས་ནས༔ ལོངས་ལ་རྒྱལ་བའི་བཀའ་ལ་ཉོན༔ དེ་ཡི་བར་དུ་མནན་པར་བྱའོ༔ ནམ་ཡང་བཏང་བར་མི་བྱའོ༔ [ཞེས་པས་དོང་ནང་དུ་བསྐྱུར། མནན་སྔགས་དང་ལྡོག་མེད་ཀྱི་དམོད་པ་བརྗོད་ཅིང་ཐལ་མོ་བརྡབ།] དམིགས་བྱ་ཁོང་ཚུད་གཤིན་རྗེའི་ཞལ་བསྡམས་ཏེ༔ མནན་པའི་ལས་སྦྱར་དམ་ཉམས་དགྲ་བོ་རྣམས༔ བསྐལ་པ་མ་སྟོངས་བར་དུ་མི་ཐར་བར༔ མུན་ནག་རུམ་གྱི་ནང་ནས་རྒྱ་མཚོའི་གཏིང་༔ རིམ་བདུན་ས་འོག་གཤིན་རྗེའི་གྲོང་ཁྱེར་སོང་༔ བྷོ་ངྷི་ཨ་ཡཾ། [ཞེས་མི་ཁའི་རྫས་སོགས་བླུགས་ཏེ་རི་རབ་དང་རྒྱ་གྲམ་བྲིས་པའི་དུར་རྡོས་བཀབ་ལ།] མཁའ་དབྱིངས་རླུང་མེ་ཆུ་སའི་དཀྱིལ་འཁོར་སྟེང་༔ སུཾ་ལས་རིན་ཆེན་རི་རབ་སྲ་ཞིང་བརྟན༔ རབ་འབར་སྣ་ཚོགས་རྡོ་རྗེ་དང་བཅས་པས༔ རྟག་ཏུ་ཐར་མེད་གཟིར་མནན་རྒྱས་གདབ་བོ༔ ཨེ་སྟྭཾ་བྷ་ཡ་ནན༔ [དེ་བཞིན་དུ།] ཡཾ༔ རཾ༔ བཾ༔ ལཾ་རྣམས་སྦྱར་བས་འབྱུང་བ་སོ་སོའི་རྒྱས་གདབ། ཧཱུྃ༔ གཅིག་ནི་བརྗོད་མེད་ཉག་གཅིག་རྒྱ༔ གཉིས་པ་ཐབས་དང་ཤེས་རབ་རྒྱ༔ གསུམ་ནི་སྐུ་གསུང་ཐུགས་ཀྱི་རྒྱ༔ བཞི་ནི་ཕྱག་རྒྱ་བཞི་ཡི་རྒྱ༔ ལྔ་ནི་ཡེ་ཤེས་ལྔ་ཡི་རྒྱ༔ དྲུག་པ་ཕ་རོལ་ཕྱིན་དྲུག་རྒྱ༔ བདུན་པ་མ་མོ་བདུན་གྱི་རྒྱ༔ བརྒྱད་

ནི་དུར་ཁྲོད་བརྒྱད་ཀྱི་རྒྱ༔ དགུ་ནི་ཧེ་རུ་ཀློང་དགུའི་རྒྱ༔ བཅུ་ནི་ཁྲོ་རྒྱལ་བཅུ་ཡི་རྒྱ༔ ཁྱོད་ལ་རྒྱ་བཅུ་བརྩེགས་ཏེ་མནན༔ རི་རབ་བརྗིད་པའི་འོག་ཏུ་མནན༔ དཔལ་གྱི་བྲོ་གར་བྱས་ཏེ་མནན༔ བསྐལ་པ་ཇི་སྙེད་མཐའ་རུ་མནན༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྟྭཾ་བྷ་ཡ་ནན༔ [ཞེས་དང་།] མ་ར་ཀྨོ་ཡཀྨོ་[སོགས་མནན་སྔགས་དང་སྤེལ་བ་བརྗོད་ལ། རྣལ་འབྱོར་པ་རྣམས་མཐེའུ་ཆུང་སྦྲེལ་ཏེ་ལས་བྱང་བཞིན་བྲོ་བརྡུང་། དཔལ་ཆེན་ཧེ་རུ་ཀའི་མཐུ་སྟོབས་དང་ནུས་པས་རྒྱས་བཏབ་ཅིང་། བདེན་པའི་ཚིག་གིས་གཟིར། དྲག་རྩལ་སྟོབས་ཀྱིས་མནན་པས་ཐར་པའི་གོ་སྐབས་མེད་པར་བྱས། དེའི་སྟེང་དུ་ཀརྨ་ཧེ་རུ་ཀ་ལྗང་ནག་རྒྱ་གྲམ་དང་དྲིལ་བུ་འཛིན་པ་སངས་རྒྱས་དོན་ཡོད་གྲུབ་པའི་དབུ་རྒྱན་ཅན་འཁོར་དཔག་ཏུ་མེད་པ་དང་བཅས་པས་ཕོ་བྲང་བཏབ་སྟེ་མནན་པར་བསམ་མོ། དེ་ནས་ལས་བྱང་བཞིན་གཏོར་ཆེན་ཟོར་དུ་བསྐུལ་ཏེ་དགྲ་ཕྱོགས་སམ་ཐེབས་ཕྱོགས་སུ་འཕང་། བཤལ་ཆུས་བརྟན་མ་བསྐྱང་། གཏོར་སྣོད་ཁ་སྦུབས་ལ་བྲོ་བརྡུང་། ཕྱིར་བསྙེགས་བཅད་དེ་བསྲུང་བའི་འཁོར་ལོ་བརྟན་པོར་བསྒོམ། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་བླང་བ་སོགས་རྗེས་ཀྱིས་བྱ་བ་རྣམས་གཞུང་བཞིན་དུ་བྱའོ། །]ཕས་རྒོལ་གདུག་ཅན་དཔུང་གི་གཡུལ་ངོ་ལས། །སྲུང་བའི་མན་ངག་མཐའ་སྡུད་ཟབ་མོའི་གཟེར། །མནན་གཏད་ལས་སྦྱོར་གནད་ཀྱི་མན་ངག་ནི། །རབ་བརྟེན་རྡོ་རྗེའི་རི་དབང་ལྷུན་མཐོ་བརྗིད། །འདིས་ཀྱང་བསྟན་འགྲོར་འཚེ་

བའི་ཡིད་སྲུབས་དཔུང་། །ནམ་ཡང་ལྡང་མེད་རིམ་དགུའི་འོག་བཅིངས་ཏེ། །ཕྱོགས་ལས་རྣམ་པར་རྒྱལ་བའི་རུ་མཚོན་ཆེ། །སྲིད་པའི་མཐར་ཡང་མི་ནུབ་རྟག་བསྒྲེངས་ཤོག །[དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་དྲག་པོའི་ལས་ཀྱི་མཐའ་སྡུད་དགྲ་བགེགས་ནན་པའི་ལས་རིམ་རབ་བརྗིད་རྡོ་རྗེའི་ལྷུན་པོ་ཞེས་བྱ་བ་འདི་ནི། རྩ་བའི་གཞུང་དོན་མན་ངག་གིས་བཀྲལ་བའི་དབང་དུ་བྱས་ཏེ། །རྗེ་རིགས་ཀྱི་སྔགས་སྨྱོན་འཇིགས་བྲལ་ཡེ་ཤེས་རྡོ་རྗེས་རང་ལོ་སོ་གཅིག་ཏུ་སོན་པ་ཤིང་ཕོ་ཁྱིའི་ལོ་ནག་པ་ཉ་བའི་ཤེས་རབ་ཀྱི་ཕྱོགས་ལ་ཕུན་ཚོགས་དགའ་ཚལ་གྱི་བསྟི་གནས་སུ་གྲུབ་པར་བགྱིས་པ་སྟེ། འདིས་ཀྱང་བསྟན་འགྲོར་འཚེ་བྱེད་བར་ཆད་བདུད་དགྲའི་དཔུང་རྣམས་ལྡང་མེད་བསྐལ་པར་གནོན་པའི་རྒྱུར་གྱུར་ཅིག།] ། །སརྦ་མངྒ་ལཾ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྩ་བའི་དབང་བསྐུར་གྱི་ཆོ་ག་སྨིན་གྲོལ་འདོད་འཇོའི་དགའ་སྟོན།

༄༅། །དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྩ་བའི་དབང་བསྐུར་གྱི་ཆོ་ག་སྨིན་གྲོལ་འདོད་འཇོའི་དགའ་སྟོན་ཅེས་བྱ་བ་བཞུགས་སོ། །

དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྩ་བའི་དབང་བསྐུར་གྱི་ཆོ་ག་སྨིན་གྲོལ་འདོད་འཇོའི་དགའ་སྟོན་ཅེས་བྱ་བ། བླ་མ་དང་གཉིས་སུ་མེད་པའི་དཔལ་ཆེན་པོ་བྱིན་རླབས་ཀྱི་གཏེརམཛོད་ལ་ཕྱག་འཚལ་ལོ། །མི་གནས་ཡེ་ཤེས་རྡོ་རྗེ་སྙིང་པོ་མཆོག་ཏུ་ཞི་བའི་དབྱིངས་རུམ་ལས། །རྣམ་འགྱུར་མི་འགག་ཁྲོ་བོའི་ཟློས་གར་གང་འདུལ་མཁའ་ཁྱབ་སྤྲིན་བཀོད་དེ། །རྒྱལ་ཐབས་སྤྱི་བླུགས་བདུད་རྩིའི་གྲུ་ཆར་སྲིད་གསུམ་སྲོག་ཏུ་འབེབས་མཛད་པ། །བླ་མ་ཧེ་རུ་ཀ་དཔལ་དཔའ་བོས་སྨིན་གྲོལ་གནས་ལ་དབུགས་འབྱིན་མཛོད། བདུད་འདུལ་ཕྲིན་ལས་རོལ་པའི་དཀྱིལ་འཁོར་དུ། །སྐལ་བཟང་སྣོད་ལྡན་རྗེས་སུ་འཛིན་པའི་ཚུལ། །དབང་བསྐུར་

ཆོ་གའི་ངག་ཁྲིགས་བདུད་རྩིའི་སྐྱེས། །སྨིན་གྲོལ་འདོད་པ་འཇོ་བའི་དགའ་སྟོན་སྤྲོ། །[དེའང་རྡོ་རྗེ་ཕུར་བུ་གསང་བ་མཆོག་གི་དཀྱིལ་འཁོར་ཆེན་པོར་སྐལ་ལྡན་གྱི་སློབ་མ་གཞུག་ཅིང་སྨིན་པར་བྱེད་པའི་ཚུལ་ལ་གསུམ་སྟེ། སྔོན་འགྲོའི་རིམ་པས་དབང་གི་གཞི་བཟུང་བ། དངོས་གཞིའི་ལས་ཀྱིས་དབང་བསྐུར་གཞུང་བསྲང་བ། རྗེས་ཀྱི་བྱ་བས་དབང་ཐོབ་མཐའ་རྒྱས་སུ་བྱ་བའོ། །དང་པོ་ལ་གཉིས། སའི་ཆོ་ག་དང་། ལྷག་པར་གནས་པའོ། །][དང་པོ་ནི། སྒྲུབ་གནས་གསར་པ་ཡིན་ན་སའི་ཆོ་ག་སྒྲུབ་ཁོག་བཞིན་རྒྱས་པར་བྱ་བ་ཡིན་ཅིང་། སྒྲུབ་གནས་རྙིང་པའི་ཕྱོགས་སུའང་བདག་གི་རྣལ་འབྱོར་དང་ལྡན་པས་ཞིང་སྐྱོང་གཞི་བདག་རྣམས་ལ་གཏོར་མ་བསྔོས་ཏེ་གནང་བ་ཞུ་བ་ཙམ་ས་ཁུང་དུ་མཛད་པ་དག་སྐབས་སུ་ཇི་ལྟར་བབ་པ་བཞིན་བྱའོ། །][གཉིས་པ་ལྷག་པར་གནས་པར་གནས་པ་ལ་གསུམ། ལྷ། བུམ་པ། སློབ་མ་སྟ་གོན་ནོ། །དང་པོ་ནི། སྟེགས་བུའི་དབུས་སུ་

མཎྜལ་དྲི་བཟང་གིས་བྱུགས་པ་ལ་མེ་ཏོག་གི་ཚོམ་བུ་ལྷ་གྲངས་དང་མཉམ་པ་གཙོ་འཁོར་ཕྱེད་པར་འགོད། མཐའ་སྐོར་དུ་ཉེར་སྤྱོད་དང་སྨན་རཀ་གཏོར་མ་བཤམ། ལས་བྱང་གི་བཀའ་བསྒོ་ནས་བཟུང་བསྟོད་པའི་བར་དུ་བཏང་ལ་བཟླས་པ་ཅི་འགྲུབ་མཐར་མཆོད་ཅིང་བསྟོད་དོ། །][གཉིས་པ་བུམ་པ་སྟ་གོན་ནི། རིན་པོ་ཆེའི་བུམ་པ་གཉིས་གུ་གུལ་གྱིས་བདུག་ཅིང་དྲག་སྔགས་དང་བཅས་ཡུངས་དཀར་གྱིས་བྲབ་ལ་བགེགས་བསྐྲད། བཀྲ་ཤིས་པའི་ཕྱིར་སྤོས་ཀྱིས་བདུག་ལ་རྒྱུན་འབབས་ཀྱི་ཆུ་གཙང་དྲི་བཟང་སོ་ལྔའི་བཅུད་ཀྱིས་སུམ་གཉིས་བཀང་བར་མགུལ་ཆིངས་ཁ་རྒྱན་གཟུངས་རྡོར་གྱིས་སྤྲས་པ་རྣམ་བུམ་དཀྱིལ་འཁོར་གྱི་དབུས་དང་། ལས་བུམ་བྱང་དུ་འགོད། དྲིའི་དུང་ཞལ་ཀྱང་འདུ་བྱས་ལ། བུམ་པ་ཨ་མྲྀ་ཏས་བསང་།] སྭབྷ་ཝས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་རྣམ་རྒྱལ་བུམ་པ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་པད་ཉི་དྲེགས་པ་རཱུ་དྲའི་གདན་ལ་དཔལ་ཆེན་རྡོ་རྗེ་གཞོན་ནུ་ཡབ་ཡུམ་རང་རྩལ་སྤྲུལ་པའི་འཁོར་ཚོགས་དང་བཅས་པ་སོ་སོར་མ་འདྲེས་མེ་ལོང་ནང་གི་གཟུགས་བརྙན་ལྟར་རྣམ་པར་བཀྲ་བ་སྐད་ཅིག་གིས་གསལ་བར་གྱུར། ཐམས་ཅད་ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་སྤྱན་དྲངས་པར་བསམ་ཞིང་། ཧཱུྃ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་

རོལ་ཅིང་གཤེགས་སུ་གསོལ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་ས་པ་རི་ཝཱ་ར་བཛས་མཱ་ཛ༔ ཛཿཧཱུྃ་བཾ་ཧོཿས་དམ་ཡེ་དབྱེར་མེད་དུ་བསྟིམ། ཧཱུྃ༔ འབར་བའི་དཀྱིལ་འཁོར་རྡོ་རྗེ་ཕུར་པའི་ལྷ༔ [ཞེས་སོགས་ཀྱིས་མཆོད་ཅིང་།] ཧཱུྃ༔ སྲིད་གསུམ་གདུག་པ་མ་ལུས་བསྒྲལ་བ་དང་༔ [ཞེས་སོགས་ཤླཽ་ཀས་བསྟོད། གཟུངས་ཐག་བླངས་ཏེ།] བདག་གི་ཐུགས་ལས་སྔགས་ཀྱི་འོད་ཟེར་ནི། །བར་མ་ཆད་པར་གཟུངས་ཐག་བརྒྱུད་དེ་སོང་། །བུམ་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། །སྔགས་ཕྲེང་སྦྱོར་མཚམས་སྐུ་ཡི་ཆ་རྣམས་ལས། །བྱང་སེམས་ངོ་བོ་ཡེ་ཤེས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་གྱུར། །[ཅེས་མོས་ལ་ཀཱི་ལ་ཡ་གང་འགྲུབ་བཟླས་མཐར། དུང་ཆོས་ཀྱི་མཆོད་ཡོན་]ཨོཾ་ཨཱཿཧཱུྃ་གིས་[ཕུལ་བས།] བུམ་པའི་ལྷ་རྣམས་ཆགས་པ་ཆེན་པོས་བྱང་ཆུབ་སེམས་སུ་ཞུ་བ་བུམ་པའི་ཆུ་དང་གཉིས་མེད་དུ་གྱུར་པར་བསམ། ལས་བུམ་ནང་དུ་པདྨ་ཉི་མའི་སྟེང་། །བདུད་རྩི་ལྗང་ནག་ཞལ་གསུམ་ཕྱག་དྲུག་པ། །གཡས་ཞལ་སེར་ནག་གཡོན་ཞལ་དུད་ཁ་འབར། །དང་པོའི་ཕྱག་གཉིས་རྡོ་རྗེས་དུང་ཁྲག་དཀྲུགས། བར་པའི་ཕྱག་ན་རྒྱ་གྲམ་དབྱུག་ཏོ་བསྣམས། །ཐ་མ་གཉིས་ཀྱིས་གནམ་ལྕགས་ཕུར་བུ་འདྲིལ། །ཞབས་བཞི་འདོར་སྟབས་གནོད་སྦྱིན་ཕོ་མོ་གནོན། །ཡུམ་མཆོག་རླུང་འབྱིན་ལྗང་མོས་གཡོན་ནས་

འཁྲིལ། །ཕྱག་གཡས་དྲིལ་འཛིན་གཡོན་པས་ཐོད་ཁྲག་སྟོབ། །དུར་ཁྲོད་ཆས་ལྡན་མེ་དཔུང་ཀློང་དུ་གསལ། །[ཞེས་གསལ་བཏབ་ལ།] ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཚིནྡྷ་ཧཱུྃ་ཕཊ༔ [ཅེས་བརྒྱའམ་ཉེར་གཅིག་ཙམ་བཟླས་མཐར།] ཁྲོ་བོ་བདུད་རྩི་འཁྱིལ་བའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་[བསམ་མོ། །][གསུམ་པ་སློབ་མ་སྟ་གོན་ལ་བཅུ་ལས། དང་པོ་ཀུན་སློང་བཅོས་པ་ནི། དཀྱིལ་འཁོར་ལ་ཡོལ་བ་བཏང་། མཆོད་པའི་མཎྜ་ལ་དང་ཉེར་སྤྱོད། སྲུང་སྐུད་ཁ་དོག་ལྔ་བསྒྲིལ། སོ་ཤིང་དང་འགྲིམ་དཀྱིལ། དྲིའི་ཁྱོར་ཆུ། ཀུ་ཤའི་ཕོན་པོ་བཅས་ཉེ་ལོགས་སུ་བསྡོག །ཟུང་དུ་མ་གྱུར་པའི་སློབ་མ་རྣམས་སྒོ་དྲུང་དུ་འཁོད་པ་ལ།] ཇི་ལྟར་བལྟམས་པ་[སོགས་བརྗོད་ཅིང་ལས་བུམ་གྱི་ཆུས་ཁྲུས་བྱ། །ཕྱག་བཅས་གྲལ་དུ་འཁོད་པ་དར་མེ་ཏོག་བཀྲམ་བསྡུ་བྱས་ལ།] འོ། ནམ་མཁའ་དང་མཉམ་པའི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་འདི་ལས་བསྒྲལ་ནས་ཐར་པ་བླ་ན་མེད་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པར་བྱ། དེའི་ཆེད་དུ་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་དུ་འཇུག་པའི་སྔོན་འགྲོ་སྟ་གོན་གྱི་ཆོས་ཟབ་མོ་ཞུ་བར་བགྱིའོ་སྙམ་པའི་མོས་བསམ་རྣམ་པར་དག་པ་དང་ལྡན་པས་གསན་འཚལ། དེ་ལ་རང་གཞན་ཐམས་ཅད་ཀྱིས་རྙེད་པར་དཀའ་ཞིང་རྙེད་པ་དོན་ཆེན་པོ་དང་ལྡན་པའི་དལ་འབྱོར་གྱི་མི་ལུས་རིན་པོ་ཆེ་ཆོས་བཅོ་བརྒྱད་དང་ལྡན་པ་འདི་ཉིད་ད་རེས་རྒྱ་མཚོའི་གླིང་གི་

ཡིད་བཞིན་གྱི་ནོར་བུ་ལྟར་ལན་ཅིག་ཐོབ་པའི་དུས་འདིར་ཤེས་ལྡན་གྱི་གང་ཟག་རྣམས་མྱུར་དུ་སྙིང་པོ་ལེན་པའི་ཐབས་ལ་འབད་པར་རིགས་པ་ཡིན་ཏེ། སློབ་དཔོན་ཆེན་པོས་རྒྱལ་སྲས་ལྷ་རྗེར་གདམས་པའི་བསླབ་བྱ་ཐ་ཚིག་གསེར་ཕྲེང་ལས། སྤྱིར་ན་བདེ་འགྲོར་སྐྱེ་བ་ཆེས་ཉུང་ལ༔ དེ་བས་མི་ལུས་རིན་ཆེན་མཆོག་ཏུ་དཀོན༔ མི་ལུས་ཐོབ་ཀྱང་ཆོས་ཐོབ་སྲིད་པ་ཙམ༔ དལ་འབྱོར་སྟོང་ལོག་མ་གཏོང་གསུང་གི་སྲས༔ ཞེས་གསུངས་པ་ལྟར་རྒྱུ་དང་ངོ་བོ་གྲངས་དང་དཔེ་སོགས་རྒྱུ་མཚན་དང་གཏན་ཚིགས་དུ་མའི་སྒོ་ནས་རྙེད་པར་དཀའ་ཞིང་། རྙེད་པ་དེའང་། བརྒྱ་ལ་སྲིད་པའི་དལ་འབྱོར་ཐོབ་ན་ཡང་༔ ནམ་འཆི་ཆ་མེད་གློག་གི་རོལ་རྩེད་བཞིན༔ ངེས་མེད་ཞག་དང་ཟ་མས་ཚེ་འཛད་ན༔ ཆོས་ལ་ཕྱི་བཤོལ་མི་ཉན་གསུང་གི་སྲས༔ ཞེས་གསུངས་པ་ལྟར་འདུས་བྱས་ཐམས་ཅད་གཡོ་ཞིང་འཇིག་པའི་ཆོས་ཁོ་ན་ཉིད་ཡིན་པའི་ཕྱིར་ཡུན་དུ་གནས་པའི་མཐུ་སྐད་ཅིག་ཀྱང་མེད་པས་འཆི་བར་ངེས་ལ། ཤི་བའི་འོག་ཏུ་ཡང་རང་ལས་གཅེས་ཤིང་སྙིང་དུ་སྡུག་པའི་མཛའ་བཤེས་གཉེན་འཁོར་གནས་གྲོགས་ལོངས་སྤྱོད་སུ་དང་ཡང་འགྲོགས་པའི་དབང་མེད་པར་རང་ཉིད་གཅིག་པུ་མར་གསེབ་ནས་སྤུ་ཉག་བཏོན་པ་ལྟར་འགྲོ་ཞིང་། དགེ་སྡིག་དཀར་ནག་གི་ལས་

ཁོ་ན་ཆུད་མི་ཟ་བར་ལྷན་ཅིག་ཏུ་འགྲོགས་པའི་རྣམ་པར་སྨིན་པ་བདེ་སྡུག་རྒྱུ་འབྲས་ཀྱི་ངང་ཚུལ་མི་བསླུ་བར་ཉམས་སུ་མྱོང་སྟེ་སྲིད་རྩེ་ནས་མནར་མེད་ཀྱི་བར་འགལ་མེའི་འཕྲུལ་འཁོར་ལྟར་འཁོར་བར་འགྱུར་ལ། དེ་ཉིད་སྡུག་བསྔལ་གསུམ་གྱི་རང་བཞིན་ཉམ་ཐག་འཐོན་པར་དཀའ་བ་སོགས་ཉེས་དམིགས་དང་སྐྱོན་གྱི་འབྱུང་གནས་ཡིན་པས་ན་ཐར་པ་དམ་པའི་གོ་འཕང་ཁོ་ན་དོན་དུ་གཉེར་དགོས་པ་ཡིན། དེ་ལའང་གང་ཟག་དམན་པ་ཁ་ཅིག་ཚེ་འདིའི་ནད་གདོན་ཞི་ཞིང་ཚེ་དཔལ་སྙན་གྲགས་སྟོབས་འབྱོར་ཙམ་ཞིག་རེ་བའི་བློས་འཇུག་པ་དང་། འགའ་ཞིག་ངན་སོང་གསུམ་གྱི་སྡུག་བསྔལ་ལ་ཞེ་འཚེར་བས་དེ་ལས་ལྷ་མིའི་རྟེན་བཟང་ཐོབ་པའི་འདོད་པས་དོན་དུ་གཉེར་བ་ཡོད་མོད་ཀྱི། དེ་གཉིས་ཀ་ཡང་དག་པའི་བློ་ཅན་མ་ཡིན་པའི་ཚུལ། འཁོར་བ་སྤེལ་བའི་མངའ་ཐང་མཐོ་གྱུར་ཀྱང་༔ རང་གཞན་གཉིས་ཕུང་གཏན་གྱི་སྡུག་ལ་སྦྱོར༔ དུག་འདྲེས་འབྲས་ཆན་ལོངས་སུ་སྤྱོད་དང་མཚུངས༔ སྲིད་འབྱོར་ཞེན་པ་སྤོངས་ཤིག་གསུང་གི་སྲས༔ ཞེས་གསུངས་པ་ལྟར་ཡིན་ལ། འོ་ན་ཇི་ལྟ་བུ་ཞིག་བྱ་སྙམ་ན། ཁམས་གསུམ་གྱི་འཁོར་བ་ནི་མཐོ་དམན་གང་དུ་སྐྱེས་ཀྱང་རྣམ་མང་སྡུག་བསྔལ་ཁོ་ནའི་རང་བཞིན་དུ་ཤེས་པས་གནས་སྐབས་ལྟར་སྣང་གི་བདེ་བ་སྒྲུབ་པའི་རྒྱུ་འབྲས་ཀྱི་ཆོས་དང་། སྲིད་པའི་བདེ་འབྱོར་གང་ལའང་མ་ཆགས་པས་སྙིང་པོ་

མེད་པ་སྦུན་པ་ལྟར་ངེས་པ་ཞིག་དང་། དེར་མ་ཟད། ཆོས་ཀྱི་རྩ་བ་བྱང་ཆུབ་སེམས་གསུམ་ཡིན༔ དེ་ཉིད་སྐྱེད་ཐབས་བྱམས་དང་སྙིང་རྗེ་སྟེ༔ འཇིག་རྟེན་འདི་ན་སྡུག་པ་ཕ་མ་ཡིན༔ ཀུན་ལ་ཕ་མར་ཤེས་མཛོད་གསུང་གི་སྲས༔ སེམས་ཅན་ཡོངས་ཀྱིས་བདག་གི་ཕ་མ་བྱས༔ ལན་རེ་མ་ཡིན་ཀུན་ཏུ་བྱམས་པས་བསྐྱངས༔ དྲིན་ཅན་མར་གྱུར་འགྲོ་འདི་སྡུག་བསྔལ་ན༔ འགྲོ་དོན་ཐུགས་རྗེ་ཆེར་སྐྱེད་གསུང་གི་སྲས༔ ཞེས་གསུངས་པ་བཞིན་ཐེག་པ་འོག་མ་ལྟར་རང་ཉིད་གཅིག་པུ་ཐར་འདོད་ཀྱི་བློས་རང་དོན་ཞི་བདེ་ཕྱོགས་གཅིག་ཏུ་ཞེན་པ་མ་ཡིན་པར་སེམས་ཅན་ཐམས་ཅད་ཕ་མར་ཤེས་པའི་སྙིང་རྗེ་ཚད་མེད་པས་ཀུན་ནས་བསླངས་ཏེ་དེ་དག་ཐམས་ཅད་བྱང་ཆུབ་སྙིང་པོར་སྦྱོར་འདོད་ཀྱི་བསམ་པ་ཐུན་མོང་མ་ཡིན་པས་གསང་སྔགས་ཟབ་མོའི་ཆོས་དོན་དུ་གཉེར་བར་བྱ་དགོས་ལ། དེ་ལྟར་བགྱིས་ན་གནས་སྐབས་ཀྱི་བདེ་འབྱོར་མི་འདོད་ཀྱང་ཞར་ལ་འབྱུང་བ་ནི། ཇི་སྐད་དུ། དཔེར་ན་སྐྱེས་བུ་ལ་ལས་འབྲས་བུའི་ཕྱིར། །སཱ་ལུ་བསྐྱེད་ཀྱི་སོག་མའི་ཕྱིར་མིན་ཡང་། །སཱ་ལུ་རྙེད་ནས་གྲིམ་པ་མེད་པར་ནི། །སོག་མའི་ཕུང་པོ་ཞར་ལ་འབྱུང་བ་ཡིན། །དེ་བཞིན་བྱང་ཆུབ་འབྲས་བུ་འདོད་པའི་ཕྱིར། །བསོད་ནམས་སྒྲུབ་ཀྱི་ལོངས་སྤྱོད་ཕྱིར་མིན་ཡང་། །སོག་མའི་ཕུང་པོ་དག་དང་མཚུངས་པར་ཡང་། །མ་སྒྲིམས་བཞིན་དུ་མི་ཡི་ལོངས་

སྤྱོད་འགྲུབ། །ཅེས་འཇིག་རྟེན་ན་སོ་ནམ་དོན་དུ་གཉེར་བ་དག་འབྲས་བུའི་ཞོར་ལ་སོག་ཕུབ་འབྱུང་བ་ཆོས་ཉིད་ཡིན་པ་ལྟར་བྱང་ཆུབ་དོན་དུ་གཉེར་ན་གནས་སྐབས་ཀྱི་ཕུན་ཚོགས་ཤུགས་ལ་འགྲུབ་ཚུལ་དཔེ་དང་བཅས་ཏེ་གསུངས་པ་ལྟར་ལགས་ན། དེ་བས་ཐར་པ་བླ་ན་མེད་པའི་བྱང་ཆུབ་ཀྱི་འབྲས་བུ་དོན་དུ་གཉེར་བ་ཡང་དག་པའི་བསམ་པ་ཆེན་པོ་དང་ལྡན་པའི་སྒོ་ནས་སྔོན་འགྲོ་སྟ་གོན་གྱི་ཆོས་ཟབ་མོ་རྣམས་རིམ་པར་ཞུ་བའི་ཡོན་དུ་མཎྜལ་འབུལ་བར་ཞུ། [ཞེས་མཎྜལ་འབུལ་དུ་གཞུག །][གཉིས་པ་གསོལ་བ་འདེབས་ཤིང་གནང་བ་སྦྱིན་པ་ནི།] དེ་ནས་ཕྱག་སྙིམས་པ་མེ་ཏོག་དང་བཅས་པའི་ཐལ་མོ་སྦྱོར་ལ་བླ་མ་དཀྱིལ་འཁོར་གྱི་གཙོ་བོ་གཉིས་སུ་མེད་པར་འདུ་ཤེས་པས་མཆོག་ཏུ་གུས་པ་ཆེན་པོ་ཉེ་བར་བཞག་སྟེ་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ༔ དུས་གསུམ་སངས་རྒྱས་འདུས་པའི་དཔལ༔ བླ་མ་རྡོ་རྗེ་འཛིན་ཁྱོད་ཀྱིས༔ རྡོ་རྗེ་ཕུར་པའི་དཀྱིལ་འཁོར་དུ༔ བདག་ཅག་དབང་གིས་སྨིན་པར་མཛོད་༔ [ལན་གསུམ།] དེ་ལྟར་གསོལ་བ་བཏབ་པས་རྒྱུད་སྣོད་རུང་དུ་དགོངས་ཏེ་སྤྲོ་བ་བསྐྱེད་པའི་སྒོ་ནས་གནང་བ་སྦྱིན་པ་འདི་ལ་གསན་པས་ཁྱབ་པར་གདའ། ཀྱེ་ཧོ་སྐལ་ལྡན་རིགས་ཀྱི་བུ༔ མི་ལུས་ཐོབ་པ་གྲངས་མང་ཡང་༔ དོན་ལྡན་ཨུ་དུམ་ཝ་ར་ཙམ༔ དེ་རིང་ཁྱོད་ཀྱིས་རྙེད་ཆེན་ཐོབ༔ དགའ་དང་གུས་པའི་སེམས་ཀྱིས་ཉོན༔ སྨིན་གྲོལ་དབང་མཆོག་བསྐུར་བར་བགྱི༔

[གསུམ་པ་སྐྱབས་སུ་འགྲོ་ཞིང་སེམས་བསྐྱེད་པ་ནི།] དེ་ནས་ཆོས་ཐམས་ཅད་ཀྱི་འཇུག་སྒོའམ་རྨང་གཞིར་གྱུར་པ་སྐྱབས་སུ་འགྲོ་བའི་སླད་དུ། མདུན་གྱི་དཀྱིལ་འཁོར་དཔལ་ཆེན་རྡོ་རྗེ་གཞོན་ནུ་རྟེན་དང་བརྟེན་པར་བཅས་པ་ལ་བརྒྱུད་པ་དྲུག་ལྡན་གྱི་བླ་མ་རིག་འཛིན་རྒྱལ་བ་ཞི་ཁྲོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་ཏེ་མངོན་སུམ་བཞིན་དུ་བཞུགས་པའི་སྤྱན་སྔར་བདག་སོགས་སེམས་ཅན་ཐམས་ཅད་དེང་ནས་བྱང་ཆུབ་མ་ཐོབ་ཀྱི་བར་དུ་རྩེ་གཅིག་གུས་པ་ཆེན་པོས་སྐྱབས་སུ་འགྲོ་བའི་འདུན་པས་འདིའི་རྗེས་ཟློས་མཛོད། ན་མོ༔ བླ་མ་རིག་འཛིན་[སོགས་སྐྱབས་འགྲོ་ལན་གསུམ།] ཐེག་པ་ཆེན་པོའི་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པ་ལ། ཕ་མར་གྱུར་པའི་མཁའ་ཁྱབ་ཀྱི་འགྲོ་བ་མཐའ་དག་སྐུ་གསུམ་གྱི་བདག་ཉིད་དཔལ་ཆེན་རྡོ་རྗེ་གཞོན་ནུའི་གོ་འཕང་ལ་འགོད་པར་བྱ། དེའི་ཆེད་དུ་གསང་བའི་དཀྱིལ་འཁོར་ཆེན་པོར་སྨིན་བྱེད་ཟབ་མོའི་སྒོར་ཞུགས་ཏེ་ལམ་རིམ་པ་གཉིས་ཀྱི་ཕྱིར་རྣལ་འབྱོར་ལ་ཚུལ་བཞིན་དུ་བརྩོན་པར་བགྱིའོ་སྙམ་པས་འདིའི་རྗེས་ཟློས་མཛོད། ན་མོ༔ རྒྱུད་དྲུག་འཁོར་བར་སོགས་[སེམས་བསྐྱེད་ལན་གསུམ།] [བཞི་པ་ཚོགས་བསགས་ཤིང་སྡོམ་པ་བཟུང་བ་ནི།] རྒྱུད་རྣམ་པར་དག་པར་བྱ་བའི་སླད་དུ་སླར་ཡང་ཚོགས་ཀྱི་ཞིང་དེ་རྣམས་ཀྱི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་

ཕྱག་འཚལ་ཞིང་སྐྱབས་སུ་འགྲོ་བ་དང་། བླ་ན་ཡོད་པ་དང་མེད་པའི་མཆོད་སྤྲིན་རྒྱ་མཚོས་མངོན་པར་མཆོད་པ་དང་། ཟབ་ལམ་གྱི་དངོས་གྲུབ་ཐོབ་པ་ལ་གེགས་བྱེད་ཀྱི་སྒྲིབ་ཚོགས་མཐའ་དག་བཤགས་པ་དང་། རང་གཞན་སྐྱེ་འཕགས་ཀུན་གྱི་དགེ་བ་རྨ་མེད་པ་ལ་རྗེས་སུ་ཡི་རང་བ་དང་། སྟོང་ཉིད་སྙིང་རྗེའི་སྙིང་པོ་ཅན་དོན་དམ་བྱང་ཆུབ་ཀྱི་སེམས་ཚུལ་བཞིན་དུ་བསྐྱེད་པ་དང་། རྒྱལ་བ་སྲས་དང་བཅས་པ་རྣམས་ལ་ལུས་ངག་ཡིད་གསུམ་ལྟོས་པ་མེད་པར་བྲན་དུ་འབུལ་བ་དང་། ཐོག་མེད་ནས་བསགས་པའི་དགེ་ཚོགས་ཇི་སྙེད་པ་ཐམས་ཅད་གཅིག་ཏུ་བསྡོམས་ནས་འགྲོ་ཀུན་བྱང་ཆུབ་སྙིང་པོ་ཐོབ་པའི་རྒྱུར་བསྔོ་བར་བགྱིའོ་སྙམ་པས་རྒྱུན་བཤགས་འདི་ཉིད་ཀྱི་རྗེས་ཟློས་མཛོད། རྡོ་རྗེ་སློབ་དཔོན་སངས་རྒྱས་དཔལ། །[སོགས་ལན་གསུམ།] དེ་ལྟར་ཚོགས་བསགས་པ་སྔོན་དུ་འགྲོ་བས་དབང་བསྐུར་བ་དེ་ཡང་རྟེན་དཀྱིལ་འཁོར་ལ་བརྟེན་ནས་ཐོབ་ནའང་དབང་འཛིན་པ་དམ་ཚིག་དང་སྡོམ་པ་ལ་རག་ལས་པས་ན། ཕྱི་སྒོ་གསུམ་གྱི་ཉེས་སྤྱོད་སྡོམ་པ་སོ་སོར་ཐར་པའི་ཚུལ་ཁྲིམས། ནང་གཞན་ལ་ཕན་པ་སྒྲུབ་པ་བྱང་ཆུབ་སེམས་དཔའི་བསླབ་བྱ། གསང་བ་རང་རྒྱུད་ཐབས་ཤེས་དབྱེར་མེད་ཟག་མེད་བདེ་བ་ཆེན་པོའི་རང་བཞིན་དུ་སྡོམ་པ་རིག་འཛིན་སྔགས་ཀྱི་དམ་ཚིག་མཐའ་དག་ཚུལ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས་མཛོད། རྡོ་རྗེ་གཞོན་

ནུའི་དཀྱིལ་འཁོར་འདིར༔ སོ་སོར་ཐར་པའི་སྡོམ་པ་དང་༔ བྱང་ཆུབ་སེམས་དཔའི་བསླབ་བྱ་དང་༔ རིག་འཛིན་སྔགས་ཀྱི་དམ་ཚིག་རྣམས༔ དེང་ནས་བདག་གིས་བརྟན་པོར་བཟུང་༔ [ལན་གསུམ། ལྔ་པ་གནས་གསུམ་བྱིན་གྱིས་བརླབ་པ་ནི།] སློབ་དཔོན་རྡོ་རྗེ་གཞོན་ནུར་གསལ་བའི་ཐུགས་ཀ་ནས་ཡེ་ཤེས་ཀྱི་མེ་འོད་སྤྲོས་པས་ཁྱེད་རང་རྣམས་ཀྱི་ཕུང་ཁམས་སྒྲིབ་གཉིས་བག་ཆགས་དང་བཅས་པ་ཐམས་ཅད་བསྲེགས། རིགས་ཧཱུྃ་ལས་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་ཕུར་བུ་འཛིན་པའི་སྐུར་གྱུར་པར་མོས་ཤིག །[སློབ་དཔོན་གྱིས་གཡས་པའི་སྲིན་ལག་གིས་དང་པོར་གནས་གསུམ་གྱི་ཐུགས་ཕྱག་མཚན་གསལ་གདབ་ཕྱིར་དཔྲལ་བ་ནས་བཟུང་ཡས་ནས་མར་དྲིའི་ཐིག་ལེ་བྱ་ཞིང་།] ཨོཾ་ཨཱཿཧཱུྃ༔ [དེའི་དབུས་སུ་གསུང་ཡིག་འབྲུ་གསལ་གདབ་སླད་མས་ནས་ཡར་རེག་ཅིང་།] ཧཱུྃ་ཨཱ་ཨོཾ༔ [དེ་ལས་སྐུ་རྡོ་རྗེ་གསུམ་གྱི་ལྷ་ཡོངས་རྫོགས་གསལ་འདེབས་ཕྱིར་ཡས་ནས་མར་རེག་ལ།] ཨོཾ་ཨཱཿཧཱུྃ་[ཞེས་བརྗོད་ཅིང་། དེ་ཉིད་ཚིག་གིས་གསལ་གདབ་པ་ནི།] སྤྱི་བོར་ཟླ་བའི་གདན་ལ་ཨོཾ་ལས་སྐུ་རྡོ་རྗེ་དཀར་པོ་འཁོར་ལོ་དང་དྲིལ་བུ་འཛིན་པའི་ཐུགས་ཀར་ཨོཾ་དཀར་པོ། མགྲིན་པར་པདྨའི་གདན་ལ་ཨཱཿལས་གསུང་རྡོ་རྗེ་དམར་པོ་པདྨ་དང་དྲིལ་བུ་འཛིན་པའི་ཐུགས་ཀར་ཨཱཿདམར་པོ། ཐུགས་ཀར་ཉི་མའི་གདན་ལ་ཧཱུྃ་ལས་ཐུགས་རྡོ་རྗེ་སྔོན་པོ་རྡོ་རྗེ་དང་དྲིལ་བུ་འཛིན་པའི་ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པར་གྱུར་པའི་

ང་རྒྱལ་དང་བཅས་སྔགས་འདིའི་རྗེས་ཟློས་མཛོད། ཨོཾ་ན་མཿས་རྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་སྭབྷཱ་ཝ་ཨཱདྨ་ཀོ྅ཧཾ། [ཞེས་ང་རྒྱལ་བརྟན་པར་བྱ།] དེ་ལྟར་ཁྱེད་རང་རྣམས་ཀྱི་སྒོ་གསུམ་ལྷའི་བདག་ཉིད་ཡེ་ནས་ཡིན་པ་ལ་ཡིན་པར་གསལ་བཏབ་པ་དེ་མཆོད་པའི་ཡུལ་དུ་བཟུང་བ་ཡིན་པས་སློབ་དཔོན་གྱིས་མཆོད་པ་བགྱིས་པའི་མོས་པ་མཛོད། ཨོཾ་བཛྲ་པུ་ཥྤེ་ཨཱཿཧཱུྃ་སོགས་ནས། ཤཔྡའི་བར་[གྱིས་ཉེར་སྤྱོད་འབུལ་ཚུལ་བྱའོ། །][དྲུག་པ་སྲུང་སྐུད་གདག་པ་ནི།] སྲུང་སྐུད་ཨ་མྲ་ཏས་བསང་། སྭབྷཱ་ཝས་སྦྱང་། སྟོང་པའི་ངང་ལས་དམ་ཚིག་པའི་སྲུང་སྐུད་ཁ་དོག་ལྔ་ལྡན་སློབ་མའི་ལུས་ཚད་དང་མཉམ་ཞིང་རྡོ་རྗེའི་མདུད་པ་དང་ལྡན་པ་ལ། སྟ་གོན་གྱི་ལྷའི་ཐུགས་ཀ་ནས་ཡེ་ཤེས་པའི་སྲད་བུ་བསམ་གྱིས་མི་ཁྱབ་པ་བྱུང་སྟེ་དམ་ཚིག་པའི་སྲུང་སྐུད་ལ་ཐིམ་པས། ཁྲོ་བོ་བདུད་རྩི་འཁྱིལ་བའི་རང་བཞིན་སློབ་མའི་སྒོ་གསུམ་གྱི་བར་ཆད་སྲུང་བའི་ནུས་པ་དང་ལྡན་པར་གྱུར། [སྲུང་སྐུད་ཐལ་མོའི་བར་དུ་མཉེ་ཞིང་།] ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ༔ [ཞེས་ལན་ཉེར་གཅིག་ཙམ་བཟླས་ལ་བསྔགས་རྗེས། བྱང་ཆུབ་སེམས་འཕོ་བའི་གེགས་བསྲུང་བ་གཙོ་ཆེ་ཕྱིར་སྐྱེས་པའི་དཔུང་པ་གཡོན་དང་། བུད་མེད་ཀྱི་དཔུང་པ་གཡས་སུ་ཉིས་བསྐོར་གྱི་བཅིངས་ལ།] ཧཱུྃ༔ ཡེ་ཤེས་ལྔ་ལྡན་སྲད་བུ་འདི༔ འགྱུར་མེད་རྡོ་རྗེ་གསུམ་དང་ལྡན༔ ཁྱོད་ཀྱི་དཔུང་པར་བཅིངས་པ་ཡིས༔ བར་ཆད་གཡུལ་ལས་རྒྱལ་བར་ཤོག༔ [རྩ་སྔགས་དང་འཁྱིལ་བའི་སྔགས་

མཐར་]བཛྲ་རཀྵ་ཧཱུྃ་ཕཊ༔ [ཅེས་བཅིངས་ལ་མདུད་རྒྱར་དྲིའི་ཐིག་ལེ་དང་རྡོ་རྗེས་རྒྱས་གདབ།] དེའང་སྲུང་སྐུད་འཁོར་གཉིས་སུ་བཅིངས་པས་ཉིན་མཚན་གྱི་བར་ཆད་སྲུང་། འདོམས་གང་བས་གཙོ་བོར་ལུས་ཀྱི་གེགས་སྲུང་བ་མཚོན། སུམ་ལྟེབས་སུ་བགྱིས་པས་སྦྱང་གཞི་ལུས་ངག་ཡིད་གསུམ་དང་། ཁ་དོག་ལྔ་ལྡན་རྡོ་རྗེའི་མདུད་པ་གསུམ་བཏབ་པས་ཕུང་ཁམས་ཡེ་ཤེས་ལྔར་དག་པ་དང་སྒོ་གསུམ་རྡོ་རྗེ་གསུམ་དུ་བྱིན་གྱིས་རློབ་པ་མཚོན། དེས་གཙོ་བོར་ལུས་སྒྲིབ་དག་པ་དང་། གནས་སྐབས་དོ་ནུབ་རྨི་ལམ་བརྟག་པའི་བར་ཆད་སྲུང་། མཐར་ཐུག་སྐུ་གསུམ་རྡོ་རྗེ་འཛིན་པའི་གོ་འཕང་ཐོབ་ནས་བདུད་བཞིའི་དཔུང་ལས་རྣམ་པར་རྒྱལ་བའི་རྟེན་འབྲེལ་མངོན་དུ་བགྱིས་པ་ཡིན་ནོ། །[བདུན་པ་སོ་ཤིང་འདོར་བ་ནི། སོ་ཤིང་བསང་སྦྱང་] སྟོང་པའི་ངང་ལས་སོ་ཤིང་མཚན་ཉིད་དང་ལྡན་པ་ཁྲོ་བོ་རྟ་མགྲིན་གྱི་རང་བཞིན་སློབ་མའི་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་གྱུར། ཨོཾ་བཛྲ་ཀྲོ་དྷ་ཧྱ་གྲཱི་ཝ་ཧཱུྃ༔ [ཞེས་བཟླས་པས་བརླབས་པ་གཏད་ལ།] དེའང་སློབ་དཔོན་གྱིས་སོ་ཤིང་སྦྱིན་པའི་དུས་ཐལ་སྦྱར་བར་དུ་བླང་། རྗེས་ཟློས་ཀྱི་ཚེ་མཁའ་དབྱིངས་ཀྱི་ཕྱག་རྒྱ་ཞེས་མཐེ་བོང་ལྟོ་སྦྱར་བའི་བར་དུ་སོ་ཤིང་གི་རྩ་བ་བཟུང་ནས་སོས་འཆའ་བའི་ཚུལ་དང་། སོར་མོ་རྣམས་ཐད་ཀར་བརྐྱངས་པའི་གུང་མོའི་བར་སོ་ཤིང་གི་རྩེ་མོ་མེ་ཏོག་དང་ལྡན་པ་བཟུང་ལ། སོ་ཤིང་

ལས་བྱུང་བའི་འོད་ཟེར་གྱིས་ཁོང་པའི་ནང་གི་ནད་གདོན་སྡིག་སྒྲིབ་ཐམས་ཅད་སྨན་པ་མཁས་པས་སྐྱུགས་སྨན་བཏང་བ་བཞིན་ནག་འདུར་གྱིས་ཕྱིར་འཐོན་ཏེ་དབང་ཆེན་གསེར་གྱི་ས་གཞིར་ཐིམ་སོང་སྙམ་པ་དང་། རྩེ་མོའི་མེ་ཏོག་འདོར་ཡུལ་གྱི་མཎྜལ་གཏད་དེ་དངོས་གྲུབ་ཀྱི་མཚན་མ་གསལ་པོར་སྟོན་ཅིག་སྙམ་པས་འདིའི་རྗེས་ཟློས་དང་བཅས་འདོར་བར་མཛོད། ཧཱུྃ༔ ཡེ་ཤེས་རྡོ་རྗེ་མཆོག་གི་ནི༔ རྟགས་དང་མཚན་མ་བརྟག་པའི་ཕྱིར༔ བསྒྲུབ་པའི་སོ་ཤིང་འདི་དོར་བས༔ ལས་དང་ཐུགས་རྗེ་མཐུན་པ་ཡི༔ རྟགས་དང་མཚན་མ་བསྟན་པ་དང་༔ དངོས་གྲུབ་བཟང་པོ་བསྩལ་དུ་གསོལ༔ ཨོཾ་བཛྲ་ཧ་ས་ཧཱཿ [ཞེས་རབ་ཁྲུ་གང་གྲུ་བཞི་པ་བ་བྱུང་དང་དྲིས་བྱུགས་ཤིང་པདྨ་འདབ་བརྒྱད་ཀྱིས་མཚན་པའི་ཁར་འདོར་དུ་གཞུག།] དེ་ལྟར་སོ་ཤིང་དོར་བས་གནས་སྐབས་ངག་གི་སྒྲིབ་པ་དག་པ་དང་། རྩེ་མོ་དབུས་སུ་ཕོག་ནས་རང་ལ་བསྟན་ན་གཙོ་བོའི་རིག་འཛིན། ཕྱོགས་མཚམས་དང་སྟེང་འོག་ཏུ་བལྟ་ན་འཁོར་གྱི་ལྷ་དང་དེའི་རིགས་ཀྱི་དངོས་གྲུབ་ཐོབ་པར་འགྱུར་པ་ནི་མཆོག་དང་། ཕྱོགས་བཞིར་བལྟ་ན་རིམ་པ་བཞིན་ཕྲིན་ལས་བཞི་དང་སྟེང་འོག་མཁའ་སྤྱོད་དང་ས་སྤྱོད། །མཚམས་བཞིར་བུམ་པ་དང་དཔག་བསམ་ཤིང་དང་བ་དང་ལོ་ཏོག་ལ་སོགས་འཇིག་རྟེན་པའི་དངོས་གྲུབ་ཀྱི་ལྟས་ཡིན་ལ། གོང་གི་འབྲས་བུ་དེ་དག་ཀྱང་སོ་

ཤིང་ལན་གཅིག་དོར་བས་ཕོག་ན་ཚེ་འདི། གཉིས་ཀྱིས་བར་དོ། གསུམ་གྱིས་འཇིག་རྟེན་ཕྱི་མར་ཐོབ་འགྱུར་དུ་ངེས་ཤིང་། དེར་ཡང་མ་ཆུད་པར་ཕྱི་རོལ་ཏུ་ལྷུང་ན་རེ་ཞིག་དངོས་གྲུབ་ཀྱི་སྐལ་པ་ཆད་པར་བཤད་པས་ཚོགས་བསགས་དང་ཉམས་ཆག་སྐོང་བ་ལ་འབད་པར་རིགས་སོ། །[བརྒྱད་པ་ཁྱོར་ཆུ་བླུད་པ་ནི། དུང་ཞལ་གྱི་དྲིའི་ཆུ་བསང་སྦྱང་།] སྟོང་པའི་ངང་ལས་དུང་ཆུ་ཁྲོ་ཆེནགཞན་གྱིས་མི་ཐུབ་པའི་རང་བཞིན་སློབ་མའི་ཡིད་ཀྱི་སྒྲིབ་པ་སྦྱོང་ནུས་པའི་རང་བཞིན་དུ་གྱུར། ཨོཾ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ༔ [ཞེས་བཟླས་པས་བརླབས་པ་སློབ་མའི་ཁྱོར་བ་གཡས་པར་བླུགས་ལ་ཧུབ་གསུམ་བཏུང་རྗེས་ལྷག་མ་རྒྱབ་ཏུ་དོར་གཞུག །]དེ་ལྟར་ཧུབ་གསུམ་བཏུང་བ་ནི་སྒོ་གསུམ་གྱི་དྲི་མ་སྦྱོང་བ་དང་། ལྷག་མ་རྒྱབ་ཏུ་དོར་བ་མི་དགེ་བ་ལ་རྒྱབ་ཀྱིས་ཕྱོགས་པའི་དོན། དེ་ཡང་ཁྱོར་ཆུས་གནས་སྐབས་སུ་རྨི་ལམ་གསལ་བ་དང་སྒོ་གསུམ་སྤྱི་དང་ཁྱད་པར་ཡིད་ཀྱི་སྒྲིབ་པ་སྦྱོང་། མཐར་ཐུག་སྒྲིབ་གསུམ་བག་ཆགས་དང་བཅས་པ་བྱང་ཞིང་དག་ནས་སྐུ་གསུམ་གྱི་འབྲས་བུ་མངོན་དུ་བྱེད་པའི་རྟེན་འབྲེལ་ལོ། །[དགུ་པ་ཀུ་ཤ་སྦྱིན་པ་ནི། ཀུ་ཤའི་ཕོན་པོ་ཆེ་ཆུང་སློབ་མའི་གྲངས་མཉམ་བསང་སྦྱང་།] སྟོང་པའི་ངང་ལས་དྷྲཱི༔ དང་ཧཱུྃ་ལས་སྐྱེས་པའི་ཀུ་ཤ་སྔོ་ལྗང་རྨ་བྱའི་མགྲིན་མདོག་ལྟར་འཇམ་ལ་རེག་ན་བདེ་བ། སློབ་མ་རྣམས་ཀྱི་རྨི་

ལམ་མི་འཁྲུགས་ཤིང་གསལ་བའི་ནུས་པ་དང་ལྡན་པར་གྱུར། དྷིཿཧཱུྃ༔ [བདུན་ཙམ་བཟླས་པས་བརླབས་ལ།] ཀྱེ༔ སྔོན་གྱི་སྟོན་པ་ཤཱཀྱ་ཐུབ༔ རྩྭ་མཆོག་ལ་ནི་སྟན་བྱས་ཏེ༔ བྱང་ཆུབ་མངོན་དུ་མཛད་པ་ལྟར༔ ཁྱོད་ཀྱི་རྟེན་འབྲེལ་བཟང་པོར་འགྱུར༔ [ཞེས་ཀུ་ཤ་ཕོན་ཆུང་བ་སྔས་ཀྱི་དོན་དུ་སློབ་དཔོན་གྱི་གཡས་དང་ཆེ་བ་སྟན་གྱི་དོན་དུ་གཡོན་པར་བསྣམས་ཏེ་ཕྱག་རྒྱ་བསྣོལ་མར་གཏད། སློབ་མས་ཐལ་མོ་རང་སར་བཀན་ཏེ་མ་འཆོལ་བར་ལེན།] དོ་ནུབ་བླ་མའམ་དཀྱིལ་འཁོར་ལ་མགོ་ཕྱོགས་པས་ཀུ་ཤའི་སྔས་སྟན་ལ་སེང་གེའི་ཉལ་སྟབས་དང་བཅས་དགེ་བའི་སེམས་ཀྱིས་ཉོལ་ལ། དེ་ལས་ཐོ་རངས་ན་རྨི་ལམ་གྱི་མཚན་མ་བཟང་ངན་དག་མཐོང་བར་འགྱུར་བས་ན་ངེས་པར་ཁོ་བོ་ལ་སྨྲོས་ཤིག །དེ་ལྟར་ཀུ་ཤ་ནི་དག་བྱེད་ཀྱི་རྩྭ་གཙང་ཞིང་དགེ་བ་ཡིན་པས་གནས་སྐབས་སུ་རྨི་ལམ་མི་འཁྲུགས་ཤིང་བར་ཆད་ཐམས་ཅད་སྲུང་། མཐར་ཐུག་རྡོ་རྗེའི་གདན་བྱང་ཆུབ་ཆེན་པོའི་ཤིང་དྲུང་དུ་སྐུ་ཤའི་གདིང་བར་རྫོགས་པའི་བྱང་ཆུབ་ཀྱི་འབྲས་བུ་མངོན་དུ་བྱེད་པའི་རྟེན་འབྲེལ་ཁྱད་པར་ཅན་བསྒྲིགས་པ་ཡིན་ནོ། །[བཅུ་པ་ཆོས་བཤད་པ་ནི།] དེ་ནས་ཕྱིར་མི་ལྡོག་པའི་སླད་དུ་ཟབ་མོའི་ཆོས་བཤད་པའི་སྒོ་ནས་སྤྲོ་བ་བསྐྱེད་པ་འདི་ལ་གསན་པས་ཁྱབ་པར་གདའ། ཨེ་མ་སྐལ་ལྡན་རིགས་ཀྱི་བུ༔ ཕུར་པའི་དཀྱིལ་འཁོར་འཇུག་པ་ནི༔ ཨུ་དུམ་ཝ་རའི་མེ་ཏོག་བཞིན༔ བརྒྱ་ལམ་ན་ནི་རེས་འགའ་ཙམ༔ འབྱུང་འགྱུར་ཡང་ན་མི་འབྱུང་

ངོ་༔ བསྐལ་པ་བྱེ་བ་བསམ་ཡས་སུ༔ སྔོན་དུ་སྡིག་པ་བྱས་པ་གང་༔ དཀྱིལ་འཁོར་བཟང་པོ་མཐོང་མ་ཐག༔ དེ་རྣམས་འཛད་པར་འགྱུར་ཡིན་ན༔ ཚུལ་འདིར་ཞུགས་ན་སྨོས་ཅི་དགོས༔ གང་གི་སྤྱོད་པ་མཆོག་འདི་ལ༔ བློ་གྲོས་མི་གཡོ་རབ་གནས་ན༔ གོ་འཕང་བླ་ན་མེད་པར་འགྱུར༔ དེ་ཕྱིར་ཁྱེད་རྣམས་སྐལ་བཟང་ཅན༔ རྡོ་རྗེ་གཞོན་ནུའི་རིགས་མཆོག་སྟེ༔ མ་ནོར་ཚུལ་བཞིན་འཇུག་པར་གྱིས༔ ཀྱེ་རིགས་ཀྱི་བུ་རྣམས་འཇིག་རྟེན་ན་ཨུ་དུམ་ཝ་རའི་མེ་ཏོག་བརྒྱ་ལམ་ན་འབྱུང་སྲིད་ཀྱི་དེ་བས་སངས་རྒྱས་འཇིག་རྟེན་དུ་འབྱོན་པ་དཀོན། བྱོན་ཀྱང་ཆོས་གསུངས་པ་དང་ཁྱད་པར་ཐེག་ཆེན་གསུངས་པ་དཀོན། དེ་ལས་ཀྱང་གསང་སྔགས་རྡོ་རྗེ་ཐེག་པ་གསུངས་པ་ནི་ཤིན་ཏུ་དཀོན་པས། རྙེད་པར་དཀའ་བ་རྙེད་ན་དོན་ཆེ་བ་དཀྱིལ་འཁོར་ཆེན་པོ་ལན་གཅིག་མཐོང་བས་ཀྱང་བསྐལ་པ་བྱེ་བར་བསགས་པའི་སྡིག་པ་འདགས་པར་གསུངས་ན། དཀྱིལ་འཁོར་དུ་ཞུགས་ནས་དབང་བསྐུར་བ་ཚུལ་བཞིན་ཐོབ་པར་གྱུར་ན་སྨོས་ཀྱང་ཅི་དགོས་ཏེ། ཐབས་མང་དཀའ་བ་མེད་པའི་ཚུལ་གྱིས་རིང་པོར་མི་ཐོགས་པར་བླ་ན་མེད་པ་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པ་མྱུར་ལམ་རྡོ་རྗེ་ཐེག་པའི་རིགས་སུ་སྐྱེས་པ་ནི་ཁྱེད་རྣམས་ཀྱིས་རྙེད་པ་ལེགས་པར་རྙེད་པ་ཡིན་པས་སྤྲོ་བ་ཆེན་པོ་བསྐྱེད་ལ་ཡང་དག་པའི་བློ་གྲོས་དང་།

བསམ་པ་དེ་ལས་ནམ་ཡང་མི་འགྱུར་བར་གྱིས་ཤིག །[ཅེས་གདམས།] དེས་སྔོན་འགྲོ་སྟ་གོན་གྱི་ཆོས་རྣམས་གྲུབ། དངོས་གཞི་དབང་བསྐུར་བའི་ཆོ་ག་སང་ཉིན་འབྱུང་བ་ལགས་པས་དགེ་བའི་རྩ་བ་གཞན་དོན་དུ་བསྔོ་བར་ཞུ། བསོད་ནམས་འདི་ཡིས་[སོགས་ཀྱིས་དགེ་བ་བསྔོས་ཏེ་སློབ་མ་རྣམས་རང་གནས་སུ་བཏང་། སློབ་དཔོན་གྱིས་སྟ་གོན་གྱི་ལྷ་ལ་མཆོད་བསྟོད་སྔོན་དུ་འགྲོ་བས། གནང་བ་ཞུ་བའི་ཕྱིར་སྦོས་དང་བཅས་ཏེ།] རྡོ་རྗེ་གཞོན་ནུ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སེམས་ཅན་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་འཛིན་པ་བདག་གིས་ནི། །ནང་པར་དཀྱིལ་འཁོར་འབྲི་བར་འཚལ། །རྗེས་སུ་བརྩེབས་ཉེར་དགོངས་ཏེ། །ཀུན་གྱིས་བྱིན་གྱིས་བརླབ་ཏུ་གསོལ། །[ཞེས་ལན་གསུམ་གསོལ་བས་གནང་བ་ཐོབ་པར་མོས་ལ། འདེགས་པའི་རྒྱ་དང་བཅས།] བཛ་ཨུཏྟི་ཥྛ། [ཞེས་པས།] སྟ་གོན་གྱི་ལྷ་ནམ་མཁར་བཏེགས་པ་བར་སྣང་འོད་ཀྱི་དྲྭ་གུར་དུ་བཞུགས་པར་མོས། [ཚོམ་བུ་དང་མཆོད་པ་བསྡུ། ཕྱིར་ནངས་སློབ་མ་རྣམས་ཀྱིས་རྨི་ལམ་དགེ་བའི་མཚན་མ་མཐོང་ན་ཞེན་པ་མེད་པའི་སྒོ་ནས་གཟེངས་བསྟོད། ཅི་ཡང་མ་མཐོང་ན་འབྲིང་། ངན་ན་ཞི་བའམ་དྲག་པོའི་སྲེག་བླུགས་སོགས་ཟློག་པའི་ཐབས་བྱ་ཞིང་། དེ་ཙམ་མི་ནུས་ན་སྒྱུ་མ་ལྟ་བུར་ཤེས་པས་བདེན་མེད་ཀྱི་རྒྱས་བཏབ་པས་བཟློག་པར་བྱའོ། །གཉིས་པ་དངོས་གཞིའི་རིམ་པ་ལ་གསུམ། དབང་རྟེན་གཟུགས་བརྙན་གྱི་དཀྱིལ་འཁོར་འདུ་བྱ་བ། དབང་དོན་ཏིང་ངེ་འཛིན་གྱི་དཀྱིལ་འཁོར་སྒྲུབ་ཅིང་མཆོད་པ། དབང་བསྐུར་དངོས་གཞིའི་ཆོ་ག་རྒྱས་པར་དབྱེ་བའོ། །དང་པོ་ནི། སྟེགས་བུར་བདུད་རྩི་ལྔས་ཆག་ཆག་བཏབ་པ་ལ་རས་བྲིས་ཀྱི་དཀྱིལ་འཁོར་

མཚན་ཉིད་དང་ལྡན་པ་ལེགས་པར་བཀྲམ་པའམ། མ་འབྱོར་ན་སྔར་གྱི་མཎྜལ་མེ་ཏོག་གི་ཚོམ་བུ་ཅན་བཀོད་པའི་སྟེང་དུ་ཨེ་ཁྲོམ་ལ་གཙོ་འཁོར་ཡོངས་རྫོགས་ཀྱི་ལྷ་ཕུར་རྣམས་བྱུག་སོགས་གསུམ་གྱིས་གཟི་བྱིན་བསྐྱེད་ཅིང་བྱིན་གྱིས་བརླབས་པ་བརྟན་པོར་བཀོད། ཕུར་ཁྲོམ་མེད་ནའང་གཙོ་ཕུར་ཉིད་ངེས་པར་འགོད་ཅིང་གཞན་རྣམས་ཀྱི་སྐུ་ཙཀ་ཚང་བར་འགོད། དེ་སྟེང་མཉཛུའི་ཁར་སྔར་ལྷག་གནས་བྱས་པའི་རྣམ་བུམ། མདུན་དུ་རྡོ་དྲིལ་ལྷག་ཅིག་ཏུ་བསྡམས་པ་དང་། གསང་མཚན་ཤོག་དྲིལ། ཧཱུྃ་ཡིག །གནམ་ལྕགས་རྡོ་རྗེ། སྲོག་འཁོར། མེ་ལོང་། ཚེ་འབྲང་། ཚེ་རིལ། ཚེ་ཆང་། མདའ་དར། གཡས་སུ་དབུ་རྒྱན་དར་དཔྱང་། དུར་ཁྲོད་དཔལ་ཆས། རྡོ་རྗེ་རྩེ་དགུ། རྩེ་ལྔ། མེ་དཔུང་། ཁ་ཊྭཱྃ། སྲས་ཕུར། རྒྱབ་ཏུ་རྡོ་རྗེ། ཨཱཿཡིག །སྔགས་བྱང་། རཀྴའི་ཕྲེང་བ། གསང་ཐོར་ཀ་པཱ་ལ་བྱང་སེམས་བདུད་རྩི་ཨ་མྲྀ་ཏས་བཀང་བའི་ཁ་དར་དམར་བཞི་ལྟེབས་ཀྱིས་བཀབ་པ། རིག་མའི་གཟུགས་བརྙན། དཔལ་གྱི་གཏོར་མ་སྐུ་ཙཀ་དར་གདུགས་ཀྱིས་སྤྲས་པ། གཡོན་དུ་དྲིལ་བུ། རྒྱུད་ཀྱི་གླེགས་བམ། ཆོས་དུང་། རྒྱལ་མཚན། འཕན་གདུགས། མན་ཤེལ། འོད་ལྔའི་ཐིག་ལེ། ཤར་ལྷོར་ལས་བཞིའི་འབྲང་རྒྱས་སོགས་ཕྱྭ་གཡང་དངོས་གྲུབ་ཀྱི་རྫས་དང་། རྫས་རྟགས་སྣ་བདུན་གྱི་ཙཀླི། ལྷོ་ནུབ་ཏུ་བྲུབ་ཁུང་ལིངྒ། ཐུན་རྫས། ལས་ཕུར། བསྒྲལ་ཆས་སོགས། ནུབ་བྱང་དུ་དུག་ཤིང་གི་མེ་ཧོམ། དགང་བླུགས། སྲེག་རྫས། བྱང་ཤར་དུ་ཟློག་པའི་གཏོར་ཟོར་རྩང་དམར་མཚེ་ཡུངས་ཀྱིས་བརྒྱན་པ་དང་། མནན་རྫས་རི་རབ་རྣམས་འགོད། མཐར་ས་སྨན་རཀ་གཏོར་མ་སོགས་ཀྱི་ནང་གི་མཆོད་པས་བསྐོར་ཞིང་རྒྱན་གྱི་བྱེ་བྲག་ཇི་ལྟར་འོས་པའང་མཛེས་ཤིང་བརྗིད་ཆགས་པར་བཀྲམ། ཉེ་ལོགས་སུ་ཨ་མྲྀ་ཏ་སྦྱར་བའི་དམ་ཆུ། མིག་དར། མེ་ཏོག །ཕྱག་ཤིང་།

འབེབས་རྫས་སྦྱར་སྤོས་སོགས་དང་། སྦྲོས་པ་ལ་མོས་ན་བསྒྲལ་དབང་སྐབས་སུ་མ་ཁོ་བའི་དྲག་པོའི་ཞྭ་ཕོད་སོགས་གར་འཆམས་ཀྱི་ཡོ་བྱད་ཀྱང་ཉེ་བར་བསྡོག །གཞན་ཡང་ཚོགས་དང་གཏོར་མའི་ཡོ་བྱད་རོལ་མོའི་བྱེ་བྲག་སོགས་ཉེ་བར་མཁོ་བའི་ཆ་རྐྱེན་རྣམས་མཚང་བ་མེད་པར་ལེགས་པར་འདུ་བྱའོ། །གཉིས་པ་ཏིང་ངེ་འཛིན་གྱི་དཀྱིལ་འཁོར་སྒྲུབ་མཆོད་བདག་ཉིད་འཇུག་པ་དང་བཅས་པ་ནི། བརྒྱུད་འདེབས་ནས་བརྩམས་སྔོན་འགྲོ་རྣམས་ལས་བྱང་གི་དཀྱུས་བཞིན་དང་། དངོས་གཞིའི་སྐབས་སྒྲུབ་གཞི་བདག་དང་མདུན་དུ་བཀོད་པའི་དཀྱིལ་འཁོར་སྒྲུབྲོ་གརཛས་དང་བཅས་པ་ཐམས་ཅད་དེ་བཞིན་ཉིད་ཀྱི་ཏིང་འཛིན་སྟོང་ཉིད་ཀྱི་རང་བཞིན་ཀུན་སྣང་སྙིང་རྗེ་ཆེན་པོའི་དང་ལས་དཀྱིལ་འཁོར་རྣམ་གསུམ་རྟེན་དང་བརྟེན་པར་བཅས་པ་བདག་མདུན་ཐ་མི་དད་པའི་ཚུལ་དུ་གྱེར་ཚིག་གཅིག་གིས་བསྒོམས་ནས། སྤྱན་འདྲེན་སྐབས་སྟ་གོན་གྱི་ལྷ་རྣམས་མདུན་དཀྱིལ་ལ་བསྟིམས་ཏེ་ཕྱག་མཆོད་བསྟོད་པའི་ལས་རིམ་རྣམས་ཀྱི་མཐར་འོད་ཟེར་སྤྲོ་བསྡུས་རྗ་པྲ་བཟླས་ཅི་མང་དང་། སྤྲོ་ན་སྟ་གོན་གྱི་སྐབས་བཞིན་བུམ་བཟླས་ཀྱང་བྱ།] ཐོད་པ་གཞལ་ཡས་ཁང་དུ་ལྷ་རྣམས་རང་རང་གི་ཤེས་རབ་མ་དང་སྙོམས་པར་ཞུགས་པའི་བྱང་སེམས་ཡེ་ཤེས་ཀྱི་བདུད་རྩིས་གང་བར་[བསམ་ཞིང་།] ས་རྦ་པཉྩའི་[སྔགས་ཀྱིས་བྱིན་བརླབ། ཚེ་བཅུད་བསྡུ་བསྟིམ་གྱི་དམིགས་པ་དང་བཅས་ཚེ་ཛཔ྄་བཟླ་ཞིང་ཚེ་འགུགས་བསྐུལ། ཆོས་སྐྱོང་སོས་སྤྱི་དང་བྱེ་བྲག་ཕུར་སྲུང་གཏོར་འབུལ། ཚོགས་ཀྱི་མཆོད་པ་རྣམས་བྱས་ལ། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་དབང་ལེན་པའི་ཡུལ་དང་། དབང་གི་བྱ་བ་རྣམས་གཙོ་བོ་ལས་ཕྱེ་བའི་ལས་ཀྱི་ཧེ་རུ་ཀས་མཛད་ཅིང་། བདག་ཉིད་རྣམ་འགྱུར་གློ་བུར་བའི་རང་བཞིན་དབང་ཞུ་བ་པོར་བྱས་ཏེ་རྒྱས་པར་འཆད་འགྱུར་བཞིན་

དབང་རྣམས་རྫོགས་པར་བླང་བའམ། བསྡུན།] ཨོཾ་བཛྲ་ཀྲོ་དྷ་ས་མ་ཡ་ཧཱུྃ། [ཞེས་རིག་པའི་མེ་ཏོག་དོར་ནས།] བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་རང་བཞིན་དབྱེར་མེད་དུ་རྟོགས་པར་བྱས་ཏེ། ཨོ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ཨོཾ་བཛྲ་ཀྲོ་དྷ་སམ་ཡ་སྟྭཾ། ཨོཾ་བཛྲ་ཀྲོ་དྷ་ས་མ་ཡ་ཕཊ། ཨོཾ་བཛྲ་ཀྲོ་དྷ་སམ་ཡ་ཧོ། [ཞེས་པ་ཙམ་གྱིས་བདག་ཉིད་ཞུགས་ནས། སློབ་མ་འཇུག་པར་གསོལ་བ་གདབ་པ་ནི། རྡོར་དྲིལ་འཛིན་པས།] དེ་བཞིན་གཤེགས་པ་ཀུན་གྱི་གནས། །རྡོ་རྗེ་གཞོན་ནུའི་གྲོང་ཁྱེར་མཆོག །གསང་བའི་དཀྱིལ་འཁོར་ཆེན་པོ་འདིར། །བདག་གིས་སློབ་མ་གཞུག་པར་བགྱི། །[ཞེས་གསོལ་བས་གནང་བ་བྱིན་པར་བསམ། སློབ་མ་རྣམས་ཀྱིས་སྡར་མཚན་མའི་དཀྱིལ་འཁོར་མ་མཐོང་བ་མཚོན་བྱེད་དཀྱིལ་འཁོར་ཡོལ་བས་བསྒྲིབ་སྟེ་བཞག་གོ །གསུམ་པ་དབང་བསྐུར་བའི་ཆོ་ག་དངོས་ལ་གཉིས་ཏེ། དཀྱིལ་འཁོར་དུ་འཇུག་པའི་རིམ་པ་དང་། ཞུགས་ནས་མངོན་པར་དབང་བསྐུར་བའོ། །དང་པོ་ལའང་གཉིས། ཕྱི་མཚན་མའི་དཀྱིལ་འཁོར་དུ་འཇུག་པ་དང་། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའོ། །སྔ་མ་ལ་བདུན་ལས། དང་པོ་ཁྲུས་བྱ་ཞིང་བགེགས་བསལ་བ་ནི། སྟ་གོན་གྱིས་སྣོད་རུང་དུ་བྱས་པའི་སློབ་མ་རྣམས་སྒོའི་ཕྱི་རོལ་དུ་ཁྲུས་བྱ། ཕྱག་བཅས་གྲལལ་དུ་འཁོད་པ་དང་ལས་གཞུང་བཞིན་བགེགས་གཏོར་བསྔོས་ལ་བཀའ་བསྒོམ་ཏེ་དྲག་སྔགས་ཡུངས་ཐུན་ཚམ་རྔམས་དྲག་པོས་བསྐྲད་ནས་སྲུང་བའི་འཁོར་ལོ་བརྟན་པོར་བསྒོམ། གཉིས་པ་ལོ་རྒྱུས་ཀྱིས་མཚམས་

སྦྱར་ཏེ་མཎྜལ་འབུལ་ཞིང་ཆས་སུ་འཇུག་པ་ནི། མེ་ཏོག་བཀྲམ་བསྡུ་བྱས་ལ།] འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་བདུད་བཞིའི་གཡུལ་ལས་རྣམ་པར་རྒྱལ་བར་བྱས་ཏེ་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་གོ་ འཕང་ཚེ་འདི་ཉིད་ལ་མངོན་དུ་བསྒྲུབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་དབང་གི་རིམ་པ་ནོད་ནས་ཟབ་མོའི་བསྐྱེད་རྫོགས་ཀྱི་རྣལ་འབྱོར་ལ་ཚུལ་བཞིན་དུ་སློབ་པར་བགྱིའོ་སྙམ་པའི་བྱང་ཆུབླ་ན་མེད་པ ཆོག་ཏུ་སེམས་བསྐྱེད་པ་དང་། རང་གི་སྒོ་གསུམ་སྡོམ་ཞིང་རྣམ་པར་མི་གཡེང་བ་ལ་རྩེ་གཅིག་པའི་ཡིད་བཞག་སྟེ་ཆོས་ཉན་པའི་ཀུན་ཏུ་སྤྱོད་པ་ཚུལ་བཞིན་དང་ལྡན་པས་ལེགས་པར་གསན་འཚལ། དེ་ལ་གང་ཞིག་གསན་པར་བྱ་བའི་ཆོས་ནི་འོ་སྐོལ་གྱི་སྟོན་པ་ཐབས་ལ་མཁས་ཤིང་ཚད་མེད་པའི་ཐུགས་རྗེ་ཆེན་པོའི་བདག་ཉིད་ཅན་དེས། གདུལ་བྱ་སོ་སོའི་མོས་བསམ་ཁམས་དབང་སྐལ་པའི་བྱེ་བྲག་དང་རྗེས་སུ་མཐུན་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་བསྟན་པར་མཛད་པ་དེ་ཐམས་ཅད་སྤང་གཉེན་ནམ་ལྟ་སྤྱོད་ཙམ་གྱི་སྒོ་ནས་མདོར་བསྡུན་ཐེག་པ་རིམ་པ་གསུམ་དུ་འདུ་བ་གསང་སྔགས་སྔ་འགྱུར་བའི་རང་བཞེད་ཐུན་མོང་མ་ཡིན་པ་སྟེ། སྤྱི་མདོ་དགོངས་པ་འདུས་པ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་

རིག །དབང་སྒྱུར་ཐབས་ཀྱི་ཐེག་པའོ། །ཞེས་གསུངས་པའི་ཀུན་འབྱུང་འདྲེན་པའི་ཐེག་པ་ལ། ཉན་ཐོས། རང་རྒྱལ། བྱང་སེམས་གསུམ། དཀའ་ཐུབ་རིག་བྱེད་ཀྱི་ཐེག་པ་ལ། ཀྲི་ཡ། ཨུ་པ། ཡོ་ག་གསུམ། དབང་སྒྱུར་ཐབས་ཀྱི་ཐེག་པ་ལ། མ་ཧཱ། ཨ་ནུ། ཨ་ཏི་གསུམ་དུ་དབྱེ་ཞིང་། དེའང་བསྡུ་ན། ཀུན་བྱེད་རྒྱལ་པོ་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། འབྲས་བུ་རྡོ་རྗེའི་ཐེག་པའོ། །ཞེས་གཉིས་སུ་འདུ་ཞིང་། དེ་ལ་འདིར་རྒྱུ་མཚན་ཉིད་ཀྱི་ཐེག་པ་ལས། ལམ་བདེ་བ་དང་། དུས་མྱུར་བ་དང་། ཐབས་ལ་མཁས་པ་སྟེ་ཁྱད་པར་གསུམ་གྱིས་འཕགས་པའི་འབྲས་བུ་རྡོ་རྗེ་ཐེག་པའམ་མ་རིག་པ་འཛིན་པའི་སྡེ་སྣོད་ཡིན། དེ་ལ་གངས་ཅན་གྱི་ལྗོངས་འདིར་འགྱུར་སྔ་ཕྱིའི་དབང་གིས་གསར་སྔགས་གསར་རྙིང་གཉིས་ཞེས་རབ་ཏུ་གྲགས་པ་ལས། འདིར་སྤྱན་འདྲེན་པ་པོ་ཡོན་བདག །ཆོས་བསྒྱུར་བའི་གནས། སྒྱུར་བྱེད་ལོ་ཙཱ་བ། བསྒྱུར་མཁན་པ་ཎཌཏ། ཞུ་རྟེན་གྱི་མེ་ཏོག །བསྒྱུར་བྱའི་ཆོས་ཏེ། ཁྱད་པར་དྲུག་གིས་འཕགས་པ་གསང་སྔགས་རྙིང་མའི་བཀའ་སྲོལ་ཡིན། དེ་ལའང་རིང་བརྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་སྟེ། བརྒྱུད་པའི་བཀའ་སྲོལ་གསུམ་དུ་གནས་པ་ལས། འདིར་བཀའ་མ་ལས་ཀྱང་། བཀའ་བབ་ལུང་བསྟན། སྨོན་ལམ་དབང་བསྐུར།

མཁའ་འགྲོ་གཏད་རྒྱ་སྟེ། ཁྱད་པར་གྱི་བརྒྱུད་པ་གསུམ་དང་ལྡན་ཅིང་། གཙོ་བོར་བརྒྱུད་ཐག་ཉེ་བས་བྱིན་རླབས་ཀྱི་ཚན་ཁ་ཆེ་ཞིང་། གཏེར་ཡིག་གི་དཔེ་དཔང་མངའ་བས་ཁུངས་བཙུན་པ་དང་། གང་ལ་གང་འདུལ་གྱི་དུས་དང་འཚམས་པར་མངོན་དུ་སྣང་བས་ཟབ་ལམ་ནུབ་པ་མེད་པའི་ཕྱིར་ཁྱད་པར་དུ་འཕགས་པ་གཏེར་གྱི་ཕྱོགས་སུ་གཏོགས་པ་ཡིན། དེ་ལའང་གཏེར་གནས་ཀྱི་དབྱེ་བས་ཕྱོགས་བཞི་དབུས་ལྔའི་གཏེར་ཁ། གཏེར་ཆོས་ཀྱི་དབྱེ་བས་གཏེར་ཆེན་དང་གཏེར་ཕྲན། འདོན་དུས་ཀྱི་དབྱེ་བས་གཏེར་རྙིང་དང་གཏེར་གསར་སོགས་སུ་མཆིས་པ་ལས། ཤར་གཏེར་འདྲིལ་བ་སྡོང་པོ་ལྟ་བུའི་སྐོར་དུ་གཏོགས་ཤིང་། གང་ཟག གཅིག་འཚང་རྒྱ་བའི་ལམ་ཚང་ལ་མ་ནོར་བར་སྟོན་པས་གཏེར་ཆེན་གྱི་ཡ་གྱལ། བརྒྱུད་པ་མང་པོས་བར་མ་ཆད་པའི་གཏེར་གསར་བྱིན་རླབས་ཀྱི་གཟི་བྱིན་དང་ལྡན་པ། ཡོ་ག་གསུམ་གྱི་ནང་ཚདབ་དུ་རྣལ་འབྱོར་ཆེན་པོ་ལ་སྒྲུབ་སྡེ་ཆེན་པོ་བརྒྱད་དུ་གྲགས་པའི་ནང་ཚན་ཕྲིན་ལས་ཕུར་པ་རོལ་པའི་ཏནཏྲ་བྱེ་བ་ཕྲག་བརྒྱའི་བཅུད་ཕྱུང་ཞིང་ལུང་དང་མན་ངག་ལྟོ་སྤྱར་བའི་གདམས་ཟབ་ཉམས་ལེན་གནད་ཀྱི་སྙིང་པོར་དྲིལ་བ་སྟེ། དེའང་ངེས་པའི་དོན་དུ་བཅོམ་ལྡན་འདས་དབལ་རྡོ་རྗེ་སེམས་དཔའ་ཉིད་གདུལ་བྱ་ཞིབས་མི་འདུལ་བ་རྣམས་ཀྱི་གཉེན་པོར་དཔལ་ཆེན་ཀརྨ་ཧེ་རུ་ཀའི་སྐུར་བཞེངས་ཏེ། འོག་མིན་གསང་ཆེན་རོལ་པའི་དུར་ཁྲོད་ལ་སོགས་པར། འཇིགས་

བྱེད་ཁྲོ་བོ་བཅུ་སོགས་ཡེ་ཤེས་རང་སྣང་གི་འཁོར་རྣམས་ལ་རྒྱུད་སྡེ་རྒྱ་མཚོ་ལྟ་བུ་གསུངས་ཤིང་། ཉིད་ལས་མི་གཞན་པ་གསང་བའི་བདག་པོ་དང་མཁའ་འགྲོ་མ་རྣམས་ཀྱིས་བསྡུས་ཏེ་གཉེར་བ་ལས། དུས་ལ་བབས་པའི་ཚེ་ཨོ་རྒྱན་དང་། ཕགས་ཡུལ། འགྲོ་ལྡིང་། སྲིན་ཡུལ། གངས་ཅན་ལྗོངལས་སོགས་མིའི་ཡུལ་རྣམས་སུ་ཆ་ཤས་ཙམ་སྣང་བའི་དོན་ཉམས་སུ་བླངས་པས་བདུད་བཞི་ལས་རྣམ་པར་རྒྱལ་ཏེ་ཕྱག་རྒྱ་ཆེན་པོ་མཆོག་གི་རིག་འཛིན་བརྙེས་པ་མཁའ་འགྲོ་མ་བདེ་བའི་འཁོར་ལོ་དང་། སློབ་དཔོན་པྲ་བྷ་ཧ་སྟི་ལ་སོགས་པ་བསམ་གྱིས་མི་ཁྱབ་པ་བྱུང་། ཁྱད་པར་སངས་རྒྱས་གཉིས་པ་པདྨ་ཐོད་ཕྲེང་། པཎ་ཆེན་བི་མ་ལ་མི་ཏྲ། བལ་པོ་ཤཱ་ལ་མ་ཉཛུ་སྟེ་སློབ་དཔོན་རྣམ་པ་གསུམ་གྱིས་ཆོས་འདི་ལས་གྲུབ་པ་བརྙེས་པའི་ཚུལ་བལུས་སྟོདན་ཏེ་དགོངས་ཉམས་གཅིག་ཏུ་དྲིལ་བའི་བསྟན་བཅོས་འབུམ་ནག་ཅེས་བྱ་བའང་མཛད། སློབ་དཔོན་སངས་རྒྱས་གཉིས་པ་བོད་ཡུལ་མུན་པའི་གླིང་དུ་དམ་པ་ཆོས་ཀྱི་སྒྲོན་མེ་སྤོར་བ་ལ་ཕེབས་པའི་ཚེ། རྗེ་ཆོས་རྒྱལ་ཆེན་པོ། གྲོགས་མཁར་ཆེན་བཟའ། འབངས་ནམ་མཁའི་སྙིང་པོ། རླངས་ཆེན་དཔལ་གྱི་སེང་གེ །སྣ་ནམ་རྡོ་རྗེ་བདུད་འཇོམས། འབྲོག་བན་ཁྱེའུ་ཆུང་ལོ་ཙཱ་སོགས་སྐལ་བ་དང་ལྡན་པ་རྣམས་ཀྱིས་གསོལ་བ་བཏབ་པའི་ངོར། རིག་པ་མཆོག་གི་རྒྱུད་ལ་བརྟེན་ནས་རྡོ་རྗེ་ཕུར་པའི་སྒྲུབ་ཐབས་དང་མན་ངག་དཔག་

ཏུ་མེད་པ་གནང་བས། དེ་དག་གི་བརྒྱུད་པའི་ཆུ་བོ་རེ་རེ་ལས་ཀྱང་བརྒྱུད་སྲོལ་དུ་མར་ཕྱེས་ཏེ། ནང་དུག་ལྔ། ཕྱི་དགྲ་བགེགས་ལ་ཕུར་པ་ཐེབས་པས་མཆོག་དང་ཐུན་མོང་གི་དངོས་གྲུབ་གཅིག་ཆར་དུ་བརྙེས་པའི་རིག་འཛིན་རྩལ་འཆང་ས་ཆེན་པོའི་རྡུལ་ཙམ་བྱུང་། མན་ངག་ཕལ་ཆེར་མ་འོང་ཕྱི་མའི་དུས་ཀྱི་གདུལ་བྱ་མགོན་མེད་པ་རྣམས་ལ་བརྩེ་བས་དགོངས་ཏེ་བོད་ཡུལ་མཐའ་དབུས་ཀུན་ཏུ་ཟབ་མོའི་གཏེར་དུ་གཏམས་པར་མཛད་པ་ལས་འཕྲོ་སད་པའི་སྐལ་ལྡན་རྣམས་ཀྱིས་རིམ་བཞིན་བཏོན་ཅིང་སྤེལ་བའི་སྒོ་ནས། ད་ལྟའི་བར་དུའང་ལྷ་འདི་ལ་བརྟེན་ནས་ཡི་དམ་གྱི་ཞལ་གཟིགས་པ། ཆོས་ཉིད་ཀྱི་བདེན་པ་མཐོང་བ། ཕྲིན་ལས་རབ་འབྱམས་ལ་མངའ་འབྱོར་བའི་སྐྱེས་བུ་ཇི་སྙེད་ཅིག་བྱོན་པས་གངས་ལྗོངས་སངས་རྒྱས་བསྟན་པའི་སྲོག་རྩ་བཟུང་ཞིང་སྐྱེ་རྒུ་ཡོངས་ལ་ཕན་བདེའི་སྣང་བ་མཁའ་ཁྱབ་ཏུ་བརྡལ་བར་མཛད་པ་ལས། སྐབས་སུ་བབས་པའི་གསང་བ་ཟབ་མོ་འདི་ཉིད་ཀྱི་དབང་དུ་བྱས་ན། དཔལ་ཧེ་རུ་ཀ་དང་ཐ་མི་དད་ཅིང་དུས་གསུམ་སངས་རྒྱས་ཐམས་ཅད་ཀྱི་ཕྲིན་ལས་ནུས་སྟོབས་གཅིག་ཏུ་བསྡུས་པ་རིག་འཛིན་ཆེན་པོ་པདྨ་ཐོད་ཕྲེང་རྩལ་ཉིད་གངས་ཅན་བོད་ཀྱི་ཡུལ་མཐའ་མོན་ཁ་ནེ་རིང་སེང་གེའི་རྫོང་དུ་བཞུགས་པའི་སྐབས། མཁའ་འགྲོ་ཡེ་ཤེས་མཚོ་རྒྱལ་དང་། འབྲོག་བན་ཁྱེའུ་ཆུང་ལོ་ཙཱ་གཉིས་ཀྱི་གཙོས་སྐལ་ལྡན་འདུས་པ་ཐུན་མོང་མ་ཡིན་པ་

རྣམས་ཀྱིས་གསོལ་བ་བཏབ་པའི་ངོར་དཔལ་ཆེན་རྡོ་རྗེ་སྲིན་པོའི་དཀྱིལ་འཁོར་རྣམ་མཁའ་གང་བར་སྤྲུལ་ཏེ་དབང་བསྐུར་རྒྱུད་བཤད་མན་ངག་རྣམས་གནང་སྟེ། ཇི་སྐད་དུ། སྤྱིར་ནི་ལྔ་བདོ་དུས་ཀྱི་ཐ་མའི་ཚེ༔ ཕྲིན་ལས་ལས་ཀྱི་གདུལ་བྱ་དུས་བབས་པས༔ དཔལ་ཆེན་རྡོ་རྗེ་གཞོན་ནུ་མ་གཏོགས་པ༔ ལྷ་གཞན་བསྒྲུབ་ཀྱང་ལམ་དུ་འགྲོ་དཀའ་ཞིང་༔ གྲུབ་འབྲས་མངོན་དུ་འགྱུར་བ་ཤིན་ཏུ་དཀོན༔ བདག་འདྲ་རིག་འཛིན་པདྨ་ཐོད་ཕྲེང་ངས༔ གངས་ཅན་བོད་ཀྱིས་གནས་ཐམས་ཅད་དུ༔ ཕུར་རྒྱུད་འདྲ་མིན་བརྒྱ་ཙམ་གཏེར་དུ་སྦས༔ སྙིང་པོའི་ཡང་ཞུན་བཅུད་དུ་དྲིལ་བ་ཡི༔ གདམས་པའི་མཆོག་གྱུར་འདི་ལས་ཡོད་རེ་ཀན༔ ཉམས་སུ་ལེན་པའི་ལས་ཅན་སྐལ་ལྡན་རྣམས༔ འབྲེལ་བ་ཙམ་གྱིས་རིག་འཛིན་གྲལ་དུ་འཁོད༔ འདི་ཉིད་སྒྲུབ་རྒྱུན་འཛིན་པའི་ཡུལ་དེ་རུ༔ བདེ་ལེགས་ཀུན་འབྱུང་ཕྱོགས་ལས་རྣམ་རྒྱལ་འབྱུང་༔ ཞེས་དང་། ད་ལྟ་བོད་ལ་བདེ་སྐྱིད་ཉི་མ་ཤར༔ མ་འོང་བསྐལ་པའི་མར་གཤམ་སྙིགས་མའི་དུས༔ མ་རུང་བདུད་ཀྱི་དཔུང་སྟོབས་བརླག་པ་དང་༔ བསྟན་འགྲོ་གསོ་དང་ཆོས་སྒྲུབ་གོ་ཆ་དང་༔ ནད་མུག་མཚོ ན་གྱི་བསྐལ་ངན་གཞོམ་པའི་ཕྱིར༔ ཐུགས་སྒྲུབ་ཡང་སྙིང་གསང་བའི་རྒྱ་ཅན་ནི༔ བདུད་འཇོམས་གནམ་ལྕགས་རྡོ་རྗེའི་སྤུ་གྲི་འདི༔ ཡི་གེར་

ཐོབ་ལ་ཟབ་མོའི་གཏེར་དུ་སྦོས༔ འདི་འབྱིན་དུས་ནི་སུམ་ཅུ་ཁ་རལ་ཚེ༔ གནམ་ལ་དམག་དཔོན་མཚོན་གྱི་མཇུག་ཅན་འཆར༔ བོད་དུ་དམ་ལོག་བདུད་ནག་ཕོ་མོ་བདུན༔ ཕྱི་ནང་བར་གསུམ་འཁྲུགས་རྩོད་འཐབ་ར་བཅའ༔ དུས་འཁྲུགས་མཚོན་གྱི་ཁྲག་ཆར་དམར་པོ་འབེབས༔ ནད་རིམས་གོད་ཕུང་ལོ་ཉེས་སྣ་ཚོགས་འབྱུང་༔ དེ་དུས་གཏེར་འདིའི་གདུལ་བྱ་དུས་ལ་བབས༔ འདི་ཉིད་དབང་སྐལ་བབས་པའི་གཏེར་སྟོན་ནི༔ འབྲོག་བན་ལོ་ཙཱའི་ཡང་སྲིད་སྦས་ཚུལ་ཅན༔ ང་ཡི་ཕྲིན་ལས་སྤྲུལ་པ་བདུད་འཇོམས་གླིང་༔ བདུད་བགེགས་རྒྱལ་བསེན་ཀུན་གྱི་ཁ་གནོན་ཡིན༔ སྐྱེས་མཆོག་དམ་པ་དེ་ལ་དབང་པའོ༔ ས་མོ་ལུག་ལོར་ཟབ་གཏེར་སྒོ་འབྱེད་དེ ཤིང་མོ་གླང་ལོར་ཡི་གེར་ཕབ་ཙམ་ནས༔ བདུད་ཀྱི་སྡེ་དཔོན་བཅུ་གཉིས་རིམ་བཞིན་འཇོམས༔ ཞེས་མ་འོངས་བོད་ཁམས་ཐམས་ཅད་མཐའི་དམག་གིས་ ཇོམས་པའི་ཚེ་དེ་འདུལ་བྱེད་ཀྱི་གཉེན་པོ་ཐུན་མོང་མ་ཡིན་པར་འགྱུར་བའི་ཐ་ཚིག་དང་བཅས་འབྲོག་བན་ཁྱེའུ་ཆུང་ལོ་ཙཱ་ལ་སྨོན་ལམ་ཟབ་མོའི་གཏད་རྒྱ་ཡོངས་སུ་རྫོགས་པར་མཛད། མཁའ་འགྲོ་ཡེ་ཤེས་མཚོ་རྒྱལ་གྱིས་དྷ་ཀི་གསང་བའི་བརྡ་ཡིག་ཏུ་བཀོད་ནས་རང་བྱུང་རྡོ་སྒྲོམ་སྨུག་པོར་སྩལ་བ་ལྕགས་ཟངས་གསེར་གྱི་ཞུན་མས་བྱིལ་པོར་གཡོགས་ཏེ་ཁྱད་པར་འཕགས་པའི་དམ་རྫས་དང་བཅས། བོད་ཆེན་པོའི་ལྗོངས་ཀྱི་བྱེ་བྲག་རྗེ་བཙུན་

འཕགས་མའི་གནས་མཆོག་གསེར་ས་གསུམད་རྔ་རོལ་སྟག་རྩེའི་རི་བོའི་གཡས་ལོགས་དགེ་བསྙེན་གཡུ་ཕྲེང་ཅན་གྱི་མགུལ་ཤྭ་བྲག་རྡོ་རྗེའི་བྲག་ཏུ་རྒྱས་བཏབ་ནས་སྦ་ས་ཤིང་གཏེར་སྲུང་དམ་ཅན་རྒྱ་མཚོར་གཉེར་དུ་བཅོལ་བར་མཛད་པ་ཉིད། འབྱུང་འགྱུར་འདུལ་བའི་དུས་ལ་བབས་པན་འདོན་པའི་སྐྱེས་མཆོག་ནི། གཏེར་སྟོན་ཡོངས་ཀྱི་སྤྱི་མྱེས་འགྲོ་འདུལ་སངས་རྒྱས་བླ་མའི་གཏེར་ལུང་ལས། ལྔ་བརྒྱའི་ཐ་མར་ཁམས་ཀྱི་གསེར་ལུང་དུ༔ བདུད་འཇོམས་རྡོ་རྗེས་ཟབ་གཏེར་སྒོ་ཡང་འབྱེད༔ ཅེས་དང་། བདུད་འདུལ་རོལ་པ་རྩལ་གྱི་ལུང་བྱང་ལས། མ་འོངས་བསྐལ་པ་རྩུབ་འགྱུར་ཡང་མཐའི་དུས༔ པད་འབྱུང་ང་ཉིད་བདུད་འཇོམས་རྡོ་རྗེར་སྤྲུལ༔ ལུས་ལ་ལྟེ་སྨེ་སྙིང་གར་གྲུ་གསུམ་ཤར༔ རྣ་ལྟག་གཡས་སུ་སེང་རལ་སྨེ་བས་བརྒྱན༔ ཟབ་གཏེར་རྣམ་གསུམ་སྒོ་འབྱེད་འབྲེལ་ཚད་ཀུན༔ ལྷོ་ནུབ་པདྨ་འོད་དུ་ལམ་སྣ་འདྲེན༔ ཞེས་སོགས་གཏེར་ཁ་གསར་རྙིང་མང་པོ་ནས་ལུང་བསྟན་བསྔགས་པའི་གླིང་བུ་མགྲིན་གཅིག་ཏུ་བསྒྱུར་བ་གཏེར་འབྱིན་གྲུབ་པའི་འཁོར་ལོས་བསྒྱུར་བ་ཆེན་པོ་ཁྲག་འཐུང་བདུད་འཇོམས་རྡོ་རྗེ་གྲོ་ལོད་རྩལ་གྱིས་དགུང་གྲངས་ཉེར་ལྔ་བཞེས་པས་མོ་ལུག་གི་ལོ་མགོ་ཟླ་བའི་དམར་ཕྱོགས་ཀྱི་ཚེས་བཅུའི་ཉིན་ངོ་མཚར་བའི་ཆོ་འཕྲུལ་བསམ་གྱིས་མི་ཁྱབ་པ་དང་བཅས་སྤྱན་དྲངས་ཏེ་བགྲང་བྱ་དྲུག་གི་བར་དུ་ཤིན་ཏུ་གསང་བའི་དམ་

ཚིག་གི་རྒྱས་བཏག་རིམ་པར་ཆོས་བདག་མ་མོ་མཁའ་འགོ་མ་རྣམས་ཀྱིས་རྗེས་སུ་བསྐུལ་བ་བཞིན་ཤོག་སེར་ཌ་ཀིའི་ཡི་གེ་ལས་མདོ་རྒྱས་འཚམས་པར་བརྡ་བསྒྱུར་ཏེ་གཏན་ལ་ཕབ་པའི་ཚེ་ནག་ཕྱོགས་ཐུལ་བའི་ལྟས་བཟང་ཁྱད་པར་ཅན་སྐལ་ལྡན་རྣམས་ཀྱི་མཐུན་སྣང་དུ་གྲུབ་ཅིང་། བསྙེན་སྒལཚུབ་ཕྲིན་ལས་རྒྱ་མཚོས་གངས་ལྗོངས་དུས་ཀྱི་རྒུད་པ་སྤྱི་དང་ཁྱད་པར་གསང་ཆེན་བསྟན་པའི་འགལ་བྱེད་ཚར་བཅད་ཅིང་བསྟན་འགྲོའི་ ཕན་བདེའི་ལང་ཚོ་གསར་དུ་སྤེལ་བར་མཛད་པའི་ཟབ་ཆོས་མཁའ་འགྲོའི་ཁ་རླངས་མ་ཡལ་བ་མཐུ་སྟོབས་བྱིན་རླབས་ཀྱི་གཟི་བྱིན་འགྲན་ཟླ་དང་བྲལ་བ་འདི་ཉིད་ཀྱི་དཀྱིལ་འཁོར་དུ་རྩ་བའི་དབང་བསྐུར་ཟབ་མོ་བསྒྲུབ་པ་ལ། སློབ་དཔོན་གྱི་བྱ་བ་དང་སློབ་མའི་བྱ་བ་གཉིས་ལས། བདག་ཉིད་སློབ་དཔོན་གྱིས་བགྱི་བར་འོས་པ་རྣམས་རིག་འཛིན་བརྒྱུད་པའི་ཕྱག་བཞེས་ལས་ཇི་ལྟར་འབྱུང་བ་བཞིན་ཆད་ལྷག་མེ་དཔར་སྔོན་དུ་སོང་གྲུབ། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ལ་དཀྱིལ་འཁོར་དུ་འཇུག་པའི་རིམ་པ་དང་ཞུགས་ནས་མངོན་པར་དབང་བསྐུར་བ་གཉིས་སུ་ཡོད་པ་ལས་ཐོག་མར་འཇུག་པའི་ཆོས་རྣམས་ཞུ་བའི་ཡོན་དུ་དམིགས་ཏེ་མཎྜལ་འབུལ་བར་འཚལ། [ཞེས་ལོ་རྒྱུས་ཀྱིས་མཚམས་སྦྱར་ཏེ་མཎྜལ་འབུལ་དུ་གཞུག །]དེ་ལྟར་མཎྜལ་ཕུལ་ནས་ཁྱེད་རང་རྣམས་སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་མིག་ལྡོངས་ཏེ་ཡང་གསར་བླ་

ན་མེད་པ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་མ་མཇལ་བའམ། མཇལ་ནའང་དཀྱིལ་འཁོར་སོ་མ་འདི་ཉིད་མ་མཇལ་བ་མཚོན་བྱེད་དུ་ཁ་ཚར་ཉམས་པའི་དར་ཡུག་དམར་པོ་རེས་གདོང་གཡོགས་བཅིང་བའི་མོས་པ་མཛོད། ཨོཾ་ཙཀྵུ་བྷནྡྷ་ཝཱ་ར་མ་ཎ་ཡེ་སྭཱཧཱ༔ [ཞེས་མིག་དར་བཅིང་།] དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་རུང་བས་ཨུ་དུམ་ཝ་ར་ལ་སོགས་པའི་མཆོག་གི་མེ་ཏོག་སྣ་ལྔའི་ཆུན་པོ་གསར་པ་རེ་ཕྱག་རྟེན་དུ་གཏད་པའི་མོས་པ་མཛོད། ཨཱ་ཁཾ་བི་ར་ཧཱུྃ༔ [ཞེས་མེ་ཏོག་གཏད། གསུམ་པ་གསོལ་བ་གདབ་ཅིང་གནང་བ་སྦྱིན་པ་ནི།] བླ་མ་དང་དཀྱིལ་འཁོར་གྱི་གཙོ་བོ་དཔལ་ཆེན་རྡོ་རྗེ་གཞོན་ནུ་དབྱེར་མི་ཕྱེད་པལ་དད་མོས་དྲག་པོས་སྙིམ་པ་མེ་ཏོག་དང་བཅས་པའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས་མཛོད། ཧཱུྃ༔ གསང་བའི་དཀྱིལ་འཁོར་བླ་ན་མེད༔ དངོས་གྲུབ་ཆེན་པོ་འབྱུང་བའི་གནས༔ རྡོ་རྗེ་གསང་བའི་དཀྱིལ་འཁོར་འདིར༔ ཧེ་རུ་ཀ་དཔལ་ལས་ཀྱི་བདག༔ ཁྱེད་ཀྱིས་བདག་ཉིད་སྨིན་པར་མཛོད༔ སྲིད་པའི་རྡོ་རྗེ་བདག་ལ་སྩོལ༔ [ཅེས་ལན་གསུམ།] དེ་ལྟར་གསོལ་བ་བཏབ་པ་ལ་སློབ་དཔོན་གྱིས་རིགས་དང་སྐལ་པ་དྲི་བའི་སྒོ་ནས་ལན་སྦྱི ན་པ་ཡིན་ཏེ། ལེགས་འོངས་སྐལ་ལྡན་རིགས་ཅན་རྣམས། བླ་མེད་གསང་བའི་དཀྱིལ་འཁོར་འདིར༔ འཇུག་ཅིང་དམ་ལ་གནས་གྱུར་པའི༔ དབང་དང་སྐལ་

པར་ལྡན་ལགས་སམ༔ ཞེས་དྲིས་པའི་ལན་དུ་སླར་ཡང་ནན་ཏན་ཆེན་པོས་གསོ་ལ་བ་འདེབས་པ་འདིའི་རྗེས་ཟློས་མཛོད༔ བདག་ཅག་སྐལ་ལྡན་སྒྲུབ་པ་པོ༔ ལྷ་དང་བླ་མ་དབྱེགར་མི་ཕྱེད༔ བླ་མེད་རྡོ་རྗེ་ཕུར་པ་ཡི༔ དབང་གི་དཀྱིལ་འཁོར་འཇུག་པར་སྤྲོ༔ མི་གནས་བདེ་ཆེན་གྲོང་མཆོག་ཏུ༔ སློབ་དཔོན་ཁྱེད་ཀྱིས་བདག་གཞུག་གསོལ༔ [ཞེས་ལན་གསུམ་ཞུས་པའི་ལན་དུ།] དེང་འདིར་གསང་ཆེན་དཀྱིལ་འཁོར་དུ༔ ཁྱེད་རྣམས་འཇུག་པར་སྤྲོ་བ་ནི༔ གསང་བའི་དམ་ཚིག་ཚུལ་མཐའ་དག༔ མི་འབྲལ་རྩེ་གཅིག་བློ་ཡིས་ཟུངས༔ [ཞེས་གདམས། བཞི་པ་རྒྱུད་སྦྱོར་བའི་ཕྱིར་སྐྱབས་སེམས་ཚོགས་བསགས་དང་། ལྔ་པ་སྡོམ་པ་བཟུང་བ་རྣམས་སྟ་གོན་ཀྱི་སྐབས་བཞིན་བྱ། དྲུག་པ་གསང་སྔགས་ནང་གི་སེམས་བསྐྱེད་པ་ནི།] དེ་ནས་གསང་སྔགས་ནང་གི་སེམས་བསྐྱེད་པའི་སླད་དུ། ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པ་ནས་འབྲས་ཙམ་གྱི་ལྟེ་བར་དྭངས་མ་ལྔ་ལྡན་གྱི་ཐིག་ལེར་ཧཱ་སྔོན་པོ་སྤུས་བྲིས་པ་ལྟ་བུ་ཞིག་གི་གཟུགས་སུ་གནས་པར་མོས་ལ་ཐམས་ཅད་རྣམ་འབྱོར་དུ་སེམས་བསྐྱེད་པ་འདིའི་རྗེས་ཟློས་མཛོད། ཨོ་སརྦ་ཡོ་ག་ཙི་ཏ་ཨུཔཱ་ད་ཡཱ་མི༔ [ལན་གསུམ།] སེམས་བསྐྱེད་པ་དེ་ཉིད་བརྟན་པར་བྱས་པའི་མོས་པ་མཛོད། རྡོ་རྗེ་མེ་ཏོག་དང་བཅས་པ་སྙིང་གར་བཞག་སྟེ། བོ་དྷི་ཙི་ཏ་ས་མ་ཡ་སྟ༔ [ཞེས་

བརྟན་པར་བྱ། བདུན་པ་སྒོ་བཞི་ནས་འཇུག་ཅིང་ཕྱག་བྱ་བ་ནི།] སློབ་དཔོན་དང་དཀྱིལ་འཁོར་གྱི་གཙོ་བོ་ཐ་མི་དད་པའི་ཐུགས་ཀ་ནས་ཚད་མེད་པ་བཞིའི་ཡེ་ཤེས་ཀྱི་རང་གཟུགས་སུ་ཕྱེ་བའི་ལས་ཀྱི་རྡོ་རྗེས་ཕྱག་གིས་ཁྲིད་དེ་དཀྱིལ་འཁོར་གྱི་ནང་དུ་དྲངས་པའི་མོས་པ་མཛོད། [སློབ་དཔོན་གྱི་ཕྱག་གི་རྡོ་རྗེ་ལ་འཇུར་བཅུག་ནས།] ཛཿཧཱུྃ་བཾ་ཧོཿ ཡེ་ཤེས་རང་གསལ་གྱི་སྒོ་བཞི་ཤག་གིས་ཕྱེ་བར་གྱུར། བྷུ་པྲ་བེ་ཤ་ཡ་ཕཊ༔ [ཅེས་ཡོལ་བ་བསལ།] ཁྱེད་རང་རྣམས་དཀྱིལ་འཁོར་པ་ལ་དད་པའི་ཡིད་ཀྱིས་བསྐོར་བ་ལན་གསུམ་བྱས་ཏེ་ཤར་ཁྱམས་སུ་གནས་པས་ལྷ་ཚོགས་ཐམས་ཅད་ལ་ཕྱག་འཚལ་བའི་མོས་པ་དང་བཅས་ཐལ་མོ་སྤྱི་མགྲིན་སྙིང་གར་བཏུད་ནས་འདིའི་རྗེས་ཟློས་མཛོད། ཨོཾ་ན་མ་སྟེ་ཧཱུྃ༔ ཨོཾ་ནམ་མཱ་ཧཱུྃ༔ ཨོཾ་ན་མོ་ན་མཿཧཱུྃ༔ [ཞེས་ལན་གསུམ་བྱའོ། །གཉིས་པ་ནང་འཇུག་ལ་ལྔ་ལས། དང་པོ་དམ་ལ་བཞག་པ་ནི།] དེ་དག་གིས་ཕྱི་མཚན་མའི་དཀྱིལ་འཁོར་དུ་འཇུག་པའི་རི་མ་པ་རྣམས་སོང་། དེ་ནས་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་ཐོག་མར་སྦྱོར་བ་དམ་ལ་བཞག་པ་ལ། དེ་ཡང་གསང་སྔགས་ཀྱི་གཞི་དབང་ལ་བརྟེན་ཀྱང་དབང་གི་སྲོག་དམ་ཚིག་ལ་རག་ལས་པས་ན་རྩ་བ་དང་ཡན་ལག་གིས་བསྡུས་པའི་དམ་ཚིག་གི་གནས་ལ་ཚུལ་བཞིན་དུ་སློབ་ཅིང་བཟུང་བས་ནི་མཆོག་དང་ཐུན་མོང་གི་དངོས་གྲུབ་ཐམས་

ཅད་དཀའ་བ་མེད་པར་འགྲུབ་པར་འགྱུར་བ་ཡིན་ཅེས་ཕན་ཡོན་གཙོ་བོར་བཤད་པའི་སྒོ་ནས་དམ་ལ་བཞག་བ་ནི། [རྡོ་རྗེ་མགོར་བཞག་ལ།] སྐལ་ལྡན་རྡོ་རྗེ་ལེགས་པར་ཉོན༔ དེང་ཁྱོད་བདེ་གཤེགས་ཐམས་ཅད་ཀྱི༔ རིགས་ནི་ཁྱོད་ལ་ཡང་དག་བཞུགས༔ རྡོ་རྗེ་སློབ་དཔོན་བདག་གིས་ནི༔ བཅོམ་ལྡན་རྡོ་རྗེ་གཞོན་ནུ་ཡི༔ ཡེ་ཤེས་ཁྱོད་ལ་བསྐྱེད་པར་བྱ༔ ཡེ་ཤེས་ཁྲོ་བོའི་དཀྱིལ་འཁོར་གྱི༔ དངོས་གྲུབ་ཆེན་པོ་ཐོབ་བྱེད་ན༔ ཕྲིན་ལས་གཞན་ལྟ་སྨོས་ཅི་དགོས༔ ཁྱོད་ཀྱི་དཀྱིལ་འཁོར་མ་མཐོང་བའི༔ དྲུང་དུ་ཚུལ་འདིམ་སྨྲ་ཞིག༔ [ཅེས་དང་།] སྣོད་མ་ཡིན་པ་ལ་གསང་བ་བསྒྲགས་པ་སོགས་དམ་ཚིག་ལས་འགལ་ན་མི་བཟད་པའི་སྡུག་བསྔལ་ཆེན་པོ་ཉམས་སུ་མྱོང་བར་འགྱུར་བ་ཡིན་ཅེས་ཉེས་དམིགས་གཙོ་བོར་བཤད་པའི་སྒོ་ནས་དམ་ལ་བཞག་པ་ནི། [རྡོ་རྗེ་སྙིང་གར་བཞག་ལ།] དེ་རིང་རྡོ་རྗེ་གཞོན་ནུ་ཆེ༔ ཁྱོད་ཀྱི་སྙིང་ལ་ཡང་དག་ཞུགས༔ གལ་ཏེ་ཚུལ་འདི་སྨྲས་ན་ནི༔ དེམ་ཐག་ཏུ་དྲལ་ཏེ་གཤེགས༔ [ཞེས་དང་།] དམ་ཚིག་བདུད་རྩིའི་ཆུ་ནན་འདི་ཉིད་ལྕེ་ལ་བཞག་ཀྱང་སྙིང་ནང་དུ་ཐིམ་སྟེ་ཧཱ་མཐིང་ནག་གི་རྣམ་པར་གནས་པ་ལས། དམ་ཚིག་བསྲུངས་ན་ཡེ་ཤེས་སེམས་དཔའ་རྡོ་རྗེ་སེམས་དཔའི་ངོ་བོར་གྱུར་ནས་བྱིན་གྱིས་རློབ་ཅིང་མཆོག་ཐུན་གྱི་དངོས་གྲུབ་འབད་མེད་དུ་ཐོབ་པར་འགྱུར་བ་དང་། དམ་ལས་འགལ་ན་ཁྲོ་བོ་རྡོ་རྗེ་གནོད་སྦྱིན་ལྕགས་སྡིག་མགོ་དགུ་པའི་རྣམ་

པས་སྲོག་གཅོད་ཀྱི་གཤེད་མར་གྱུར་ནས་ཚེ་འདིར་མཐོང་ཆོས་ཀྱི་འབྲས་བུ་མི་བཟད་པ་དང་བཅས་ཕྱི་མར་མནར་མེད་པའི་དམྱལ་མེས་རབ་ཏུ་བསྲེག་པར་འགྱུར་བས་ན། ལེགས་ཉེས་ཀྱི་ཤན་འབྱེད་ཁྲིམས་དབང་ལྟ་བུ་སྟེ་ཕན་ཡོན་དང་ཉེས་དམིགས་གཉིས་ཀ་བསྟན་པའི་སྒོ་ནས་དམ་ལ་བཞག་པ་ནི། [དམ་ཆུ་བདུད་རྩི་སྦྱིན་ལ།] འདི་ནི་དམ་ཚིག་རྡོ་རྗེའི་ཆུ༔ ཁྱོད་ཀྱི་ལྕེ་ལ་བཞག་པ་ཡིས༔ དམ་ཚིག་གཉན་པོའི་སྲོག་ཐོབ་ཟིན༔ བསྲུང་ན་ཚེ་འདིར་སངས་རྒྱས་ཐོབ༔ ཉམས་ན་རྡོ་རྗེའི་དམྱལ་བར་ལྟུང༔ དེ་ཕྱིར་དམ་ཚིག་གཉན་པོ་སྲུངས༔ བཛ་མ་ཡ་པཉཙ་མྲ་ཏ་ཨུད་ཀ་ན་རཀ་ཋཋ༔ [ཞེས་དང་།] རྡོ་རྗེ་སློབ་དཔོན་ནི་དཀྱིལ་འཁོར་ཀུན་གྱི་ཁྱབ་བདག་ཆེན་པོར་ངེས་པའི་ཕྱིར་དེ་ཉིད་ཀྱི་སྐུ་གསུང་ཐུགས་ཀྱི་དམ་ལས་འགལ་བར་གྱུར་ན་མ་ལུས་པའི་དཀྱིལ་འཁོར་ཐམས་ཅད་དུས་གཅིག་ལ་སྤང་བར་འགྱུར་ཞིང་མི་བཟད་པའི་ཉམས་པ་ཆེན་པོར་འགྱུར་བ་ཡིན་ཅེས་སློབ་དཔོན་བཀའ་གཉན་པར་བསྟན་པའི་སྒོ་ནས་དམ་ལ་བཞག་པ་ནི། རྡོ་རྗེ་གདེངས་ཤིང་སྤྱི་བོར་བཞག་ལ། དེང་ནས་བརྩམས་ཏེ་བུ་ཁྱོད་ཀྱི༔ རྡོ་རྗེ་གཞོན་ནུ་ང་ཡིན་གྱི༔ ང་ཡིས་ཇི་ལྟར་བསྒོས་པ་རྣམས༔ བརྩོན་པས་ཁྱོད་ཀྱིས་བྱེད་དགོས་སོ༔ ཁྱོད་ཀྱིས་ང་ལ་ས་གསུམད་མི་བྱ༔ གང་ཡང་ངལ་མ་གུ་ས་མིན༔ གལ་ཏེ་གུས་པར་མ་བྱས་ན༔ སེམས་

ཅན་དམྱལ་བ་ཆེན་པོར་ལྟུང་༔ [ཞེས་བསྒྲགས།] དེང་ཕྱིན་ཆད་བླ་མ་དཔལ་ཆེན་པོས་ཇི་ལྟར་བསྒོས་བའི་དམ་ལས་ནམ་ཡང་མི་འདའ་བར་རྡོ་རྗེའི་ཐ་ཚིགས་རབ་ཏུ་གནས་པར་བགྱིའོ་སྙམ་པས་བྲོ་བོར་བ་འདིའི་རྗེས་ཟློས་མཛོད། བཛ་ས་མ་ཡ་ན་ར་ཀན༔ [ཞེས་བྲོ་བསྐྱལ་ལོ། །གཉིས་པ་ཡེ་ཤེས་རབས་པ་ནི།] དེ་ནས་ནང་འཇུག་གི་དངོས་གཞི་ཡེ་ཤེས་པ་དབབ་པར་གསོལ་བ་འདེབས་པ་འདིའི་རྗེས་ཟློས་མཛོད། ཨེ་མ་ཁྲོ་རྒྱལ་འབར་བའི་གཙོ༔ ཁྱོད་ཀྱི་རྡོ་རྗེའི་ཡེ་ཤེས་དེ༔ བདག་གི་སྙིང་གི་དབུས་ཉིད་ན༔ ཉེ་བར་དབབ་པར་མཛད་དུ་གསོལ༔ [ལན་གསུམ།] ད་ནི་དབང་གི་གཞིའམ་རྩ་བར་གྱུར་པ་ཡེ་ཤེས་པ་དབབ་པ་ཡིན་པས་ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་སྲོང་། ངག་གནད་སྲོག་རྩོལ་ཁ་སྦྱོར་དུ་ཆིངས། སེམས་ཀྱི་གནད་གཞན་དུམ་ཡེངས་པར་དམིགས་པ་འདི་རྩེ་གཅིག་ཏུ་སྒོམས་ཤིག །ཤུ་ནྱ་ཏས་བསང་སྦྱང་། ཁྱེད་རང་རྣམས་ཀྱི་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་གཟུང་འཛིན་གྱི་སྣང་བ་ཐམས་ཅད་མི་དམིགས་ཏེ་འོད་གསལ་སྟོང་པ་ཉིད་ཀྱི་ངང་ལས། སྣོད་རྣམ་པར་དག་པ་སའི་ཕྱོགས་འདི་དག་འོག་མིན་གསང་ཆེན་རོལ་པ འི་དུར་ཁྲོད་ཡེ་ཤེས་རང་སྣང་གི་གཞལ་མེད་ཁང་དབྱིབས་དང་རྒྱ་ཁྱོན་བཀོད་པ་ཚད་མེད་པས་མངོན་པར་འཕགས་པའི་དབུས་སུ་སྣ་ཚོགས་པདྨ་ཉི་ཟླའི་དཀྱིལ་འཁོར་གྱི་སྟེང་དུ། བཅུད་རྣམ་པར་དག་པ་ཁྱེད་རང་རྣམས་ཀྱི་སེམས་ཉིད་རྣམ་པར་མི་རྟོག་པའི་ངོ་བོ་ཡི་གེ་ཧཱ་མཐིང་ནག་ལས་རྡོ་རྗེ་སྔོན་པོ་རྩེ་དགུ་པ་སྟེ་བར་ཧཱ་

གིས་མཚན་པར་གྱུར། དེ་ལས་འོད་ཟེར་འཕྲོས་འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཡོངས་སུ་གྱུར་པ་ལས། ཁྱེར་རང་རྣམས་སྐད་ཅིག་གིས་དཔལ་རྡོ་རྗེ་གཞོན་ནུ་སྐུ་མདོག་མཐིང་ནག་བསྐལ་པའི་མེ་ལྟར་འབར་བའི་གཟི་བརྗིད་ཅན། དབུ་གསུམ་གྱི་རྩ་ ལ་མཐིང་ག་གཏུམ་ལ་རྔམས་པ། གཡས་ཞལ་དཀར་པོ་སྒེག་ཅིང་བཞད་པ། གཡོན་ཞལ་དམར་པོ་ཁྲོ་ཞིང་ཆགས་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་སྡང་མིག་ཏུ་འཁྱིལ་བ། རྣམ་པར་འགྱུར་པའི་ཞལ་གདངས་ཤིང་མཆེ་བ་གཙིགས་པ། གློག་ལྟར་འཁྱུགས་པའི་ལྗགས་འདྲིལ་ཞིང་རྡོ་རྗེའི་གད་མོས་ས་གསུམ་གཡོ་བ། ཁྲོ་གཉེར་བསྡུས་པའི་ཤངས་ནས་མི་བཟད་པའི་རླུང་སྒྲ་འབྱིན་པ། དབུ་སྐྲ་དང་ས་གསུམར་སྨིན་དམར་སེར་དུས་ཀྱི་མེ་ལྕེ་ལྟར་བསྐྱོད་པ། སྐུ་ཆེ་ཞིང་ཡན་ལག་རགས་པ་ལང་ཚོ་རྒྱས་པའི་འགྱུར་བག་ཅན། ཕྱག་དྲུག་གི་དང་པོ་གཉིས་གནམ་ལྕགས་ཀྱི་རྡོ་རྗེ་རྩེ་དགུ་པ་དང་མེ་དཔུང་། བར་པ་གཉིས་རྡོ་རྗེ་རྩེ་ལྔ་པ་དང་ཁ་ཊ་ཀ་གདེངས་སྟབས་སུ་འཛིན་པ། ཐམ་གཉིས་ཐུགས་ཀར་རི་རབ་ཀྱི་ཕུར་བུ་འདྲིལ་བ། ཞབས་བཞིག་ཡས་བསྐུམ་ཞིང་གཡོན་བརྐྱང་པའི་གྱད་ཆེན་པོའི་སྟབས་ཀྱིས་དྲེགས་པ་ཕོ་མོའི་མགོ་བོ་དང་ནུ་མ་ནས་བརྫིས་པ། ཐོད་པ་སྐམ་པོ་རིན་པོ་ཆེའི་རྩེ་

བྲན་ཅན་གྱི་དབུ་རྒྱན་དང་། ཚར་གསུམ་ཐོད་པའི་ཕྲེང་བ་རྒྱུ་རློན་ལ་བརྒྱུས་པའི་དོ་ཤལ་ཅན། ཞིང་ཆེན་དང་གླང་པོ་ཆེའི་ཀོ་བས་སྟོད་གཡོགས་ཤིང་སྟག་གི་ལྦགས་པས་ཤམ་ཐབས་འཕྱང་བ། གདུག་པའི་སྦྲུལ་རིགས་ལྔ་དང་རུས་པའི་ཕྱག་རྒྱ་དྲུག་གིས་བརྒྱན་པ། ཁྲལ་ཞག་ཐལ་བས་བྱུགས་ཤིང་རྡོ་རྗེའི་གཤོག་པ་སོགས་དཔལ་གྱི་ཆས་རྣམས་རྫོགས་པ། དེའི་པང་དུ་ཡུམ་འཁོར་ལོ་རྒྱས་འདེབས་མ་སྐུལ་མདོག་མཐིང་སྐྱ་གཅེར་བུ་སྐྲ་གྲོལ་ཞིང་ལང་ཚོས་སྒེག་པ། གཡས་ཁ་ཊ་འཛིན་པས་ཡབ་ཀྱི་མགུལ་ནས་འཁྱུད་ཅིང་གཡོན་པས་དུང་ཁྲག་ཞལ་དུ་སྟོབ་པ། ཞབས་གཡོན་བསྐུམ་པས་ཡབ་ཀྱི་སྐེད་ལ་འཁྲིལ་ཞིང་གཡས་བརྐྱང་པའི་སྟབས་ཀྱིས་སྙོམས་པར་འཇུག་པ། གཟིག་ཤམ་དང་རུས་པའི་རྒྱན་གྱིས་སྤྲས་པ། གཉིས་ཀའང་སྣད་སྟོང་དབྱེར་མེད་གར་དགུའི་ཉམས་འགྱུར་མཆོག་ཏུ་རྒྱས་པ། བཟོད་པར་དཀའ་བའི་གཟི་བརྗིད་ཉི་མ་འབུམ་གྱི་འོད་ཟེར་ལྟར་འབར་ཞིང་ཡེ་ཤེས་ཀྱི་མེ་དཔུང་ཆེན་པོའི་ཀློང་ན་དེ་བཞིན་གཤེགས་པ་ཐམས་ཅད་ཀྱི་ཆེ་བའི་ཡོན་ཏན་ཡོངས་རྫོགས་པའི་བདག་ཉིད་ཅན་དུ་གསལ་བའི་སྦྱི་བོར་ཨོ་དཀར་པོ། མགྲིན་པར་ཨཱཿདམར་པོ། ཐུགས་ཀའི་སྟོད་དུ་ཧཱ་སྔོ ་པོ་རྣམས་ཀྱིས་མཚན་པ་དང་། ཡབ་ཀྱི་ཐུགས་ཙི་ཏ་ཏ་རིན་པོ་ཆེ་ཟུར་བརྒྱད་པའི་དབུས་སུ་པདྨ་དང་ཟླ་བའི་གདན་ལ་ཡེ་ཤེས་སེམས་

དཔལ་རྡོར་སེམས་མཐིང་གསལ་ཞལ་གཅིག་ཕྱག་གཉིས་རྡོར་དྲིལ་འཛིན་ཅིང་ཞབས་བརྐྱང་བསྐུམ་དུ་བཞུགས་པ་རྒྱན་ཆ་ལུགས་ཡོངས་སུ་རྫོགས་པའི་ཐུགས་ཀར་ཉི་མ་ལ་གནས་པའི་ཏིང་འཛིན་སེམས་དཔའ་རྡོ་རྗེ་སྔོན་པོ་རྩེ་དགུ་པའི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་སྲོག་གི་སྙིང་པོ་ཧཱ་ཡིག་མཐིང་ག་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་བེདཱུརྱ་ཞུན་མའི་མདངས་ཅན་གཡས་བསྐོར་དུ་འཁོད་པར་གསལ་ཐོབ། རྒྱུད་རྣམ་པར་དག་པ་ཡེ་ཤེས་ལྷའི་གཟི་བྱིན་དབབ་པའི་སླད་དུ་སློབ་དཔོན་ལ་དཔལ་ཆེན་རྡོ་རྗེ་གཞོན་ནུ་དངོས་ཡིན་སྙམ་པའི་གུས་འདུས་དྲག་པོས་གསོལ་བ་བཏབ་པ་ལ་བརྟེན་ནས། སློབ་དཔོན་གྱི་ཐུགས་ཀ་ནས་འོད་ཟེར་གྱི་སྣང་བ་ཆོས་ཀྱི་དབྱིངས་ཀུན་ཏུ་ཁྱབ་པར་འཕྲོས་པས། འོག་མིན་སྐུ་གསུམ་གྱི་ཞིང་ཁམས་རབ་འབྱམས་ནས་བླ་མ་རིག་འཛིན་ཡིད་མ་ཞིག་ཁྲོ་དཔའ་བོ་མཁའ་འགྲོ་རྣལ་འབྱོར་མ་དམ་ཅན་སྲུང་མའི་ཚོགས་དང་བཅས་པ་ཐམས་ཅད་དཔལ་ཆེན་རྡོ་རྗེ་གཞོན་ནུའི་ལྷ་ཚོགས་ཀྱི་སྐུར་བཞེངས་ཏེ་སྐུ་གསུང་ཐུགས་ཀྱི་དབང་བྱིན་དངོས་གྲུབ་ཐམས་ཅད་ཕྱག་རྒྱ་ཡིག་འབྲུ་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་ལྟར་བྱོན་ནས་ཁྱེད་རང་རྣམས་ལྷར་གསལ་བའི་སྐུ་ ལུས་ཀྱི་ཆ་ཐམས་ཅད་དང་ཁྱད་པར་སྙིང་གའི་ཏིང་འཛིན་སེམས་དཔའ་ལ་སིབ་སིབ་ཐིམ་པས་རྒྱུད་ཡེ་ཤེས་ཆེན་པོར་བྱིན་གྱིས་བརླབས་པའི་མོས་འདུན་དྲག་པོ་

བསྐྱིད་ཅིག །[ཅེས་བརྡ་སྤྲད་ལ། གཞོན་ནུ་མའི་འདོམ་རས་རྡུལ་གྱིས་སྦགས་པ་དང་། བདུད་རྩི་ལྔ། བྱིལ་ནག་པོའི་བྲུན། རའི་རྐང་ལག་གི་ཉྭ་བཞིའི་ཤ །གུ་གུལ་ནག་པོ་རྣམས་དྲི་བཟང་པོའི་སྤོས་དང་སྦྱར་བ་ཡི་དྭགས་ཀྱི་མེ་ལ་བསྲེགས་པའི་དུད་པས་འདུག །རོལ་མོའི་སྒྲ་དང་བཅས་ལས་གཞུང་གི་བྱིན་འབེབས་དང་།] ཨོཾ་བཛྲ་ཀཱ་ལི་ཀཱ་ལ་ཡ༔ ཨཱ་བེ་ཤ་ཡ་ཨ་ཨཱ༔ པྲ་བེ་ཤ་ཡ༔ ས་མ་ཡ་ཕེ་ཕེ༔ ས་མ་ཡ་ཛཿཧཱུྃ་བཾ་ཧོཿ [ཞེས་དྲག་ཏུ་བརྗོད་ལ་བྱིནན་དབབ། བྱིན་ཕེབས་པ་ན།] དེ་ལྟར་དབབ་པའི་ཡེ་ཤེས་པའི་བྱིན་རླབས་ཀྱི་རྒྱུན་དེ་ཉིད་ཇི་སྲིད་བྱང་ཆུབ་མ་ཐོབ་ཀྱི་བར་དུ་སྒོ་གསུམ་ལ་བརྟན་པར་བྱས་པར་མོས་ཤིག །[མེ་ཏོག་དང་བཅས་པའི་རྡོ་རྗེ་སྦྱི་བོར་རྒྱ་གྲམ་དུ་བཞག་སྟེ།] ཏི་ཥ་བཛ༔ [ཞེས་བརྟན་པར་བྱ། གསུམ་པ་མེ་ཏོག་དོར་བ་ནི། ཚོམ་བུའི་དཀྱིལ་འཁོར་འདུ་བྱས་ལ།] དེ་ནས་རིགས་བརྟན་པར་བྱ་བའི་སླད་དུ། ཁྱེད་རང་རྣམས་ལ་སྔར་བྱིན་པའི་མེ་ཏོག་དེ་ཉིད་རང་རང་གི་ཚེ་རབས་སྔོན་ནས་བསྙེན་ཅིང་སྒྲུབ་པའི་ལས་འཕྲོ ་གང་ལ་ཡོད་པའི་ལྷ་དེ་ལ་ཕོག་པར་ཤོག་ཅིག་སྙམ་པས་ཚིག་འདིའི་རྗེས་ཤལཨས་དང་བཅས་དཀྱིལ་འཁོར་དུ་འདོར་བར་མཛོད། ཧོཿ དཀོན་མཆོག་གསུམ་གྱི་བདེན་པ་དང་༔ གསང་སྔགས་ཟབ་མོའི་བྱིན་རླབས་ཀྱིས༔ རྟེན་འབྲེལ་རྫས་ཀྱི་མེ་ཏོག་འདི༔ སྔོན་ནས་ལས་འཕྲོ་གང་ཡོད་པའི༔ ལྷག་པའི་ལྷ་ལ་ཕོག་པར་ཤོག༔ བཛ་པུཥ་པྲཏི་ཙཧོཿ [ཞེས་དངོས་སུ་དཀྱིལ་འཁོར་ལ་འདོར་རྒྱུ་ཡིན་ཀྱང་འཇུག་པ་བདེ་བའཇའ་ཚོན་ཕྱག་ལེན་དུ་མཎྜལ་ཚོམ་བུ་ཅན་ནམ་རིགས་ལྔའི་ཕྱག་མཚན་བཀྲམ་པ་དཀྱིལ་འཁོར་དང་རོག་ཅིག་ཏུ་མོས་

ནས་དེར་དོར་བ་ཡིན་ཅིང་། དབུས་སུ་བབས་ན་རྡོ་རྗེ་གཞོན་ནུ་སྩལ། ཤར་དུ་རྡོ་རྗེ་ཐུགས་མཆོག་རྩལ། ལྷོར་རིན་ཆེན་ཡོན་ཏན་རྩལ། ནུབ་ཏུ་པདྨ་བདེ་བ་རྩལ། བྱང་དུ་ཕྲིན་ལས་གྲུབ་བརྩལ། ཤར་ལྷོར་རྡོ་རྗེ་གསང་བདག་རྩལ། ལྷོ་ནུབ་ཏུ་རྡོ་རྗེ་དྲག་པོ་རྩལ། ནུབ་བྱང་དུ་རྡོ་རྗེ་མེ་ཏོག་རྩལ། བྱང་ཤར་དུ་རྡོ་རྗེ་སྟོབས་མཆོག་རྩལ་རྣམས་དང་། བུད་མེད་རིགས་ལ། འཁོར་ལོའི་དབང་ཕྱུག་མ། རྡོ་རྗེ་བདུད་འདུལ་མ་སོགས་རིགས་འགྲེ་བས་གདགས་པའམ། སྦྱི་ཙམ་དུ།] དེ་ལྟར་ཁྱེད་རང་རྣམས་ཀྱི་མེ་ཏོག་དབུས་དང་ཕྱོགས་མཚམས་གང་དུ་ཕོག་ཀྱང་འདྲ་སྟེ། ཐམས་ཅད་དཀྱིལ་འཁོར་ཀུན་གྱི་ཁྱབ་བདག་དཔལ་ཆེན་གཙོ་བོའི་ཐུགས་ཀ་ཁོ་ནར་བབས་པ་ཡིན་ཏེ། འཁོར་གྱི་ཚོམ་བུར་སྣང་བ་ཐམས་ཅད་ཀྱང་གཙོ་བོའི་ཡེ་ཤེས་ཀྱི་རང་མདངས་གང་འདུལ་གྱི་རོལ་པར་འཆར་པ་ཡིན་པའི་ཕྱིར། ཁྱེད་ཅག་རྣམས་ཀྱི་ལྷག་པའི་ལྷ་སྐལ་དུ་ཡི་དམ་དཔལ་ཆེན་རྡོ་རྗེ་གཞོན་ནུ་ཉིད་ཟུངས་ལ་ཚུལ་བཞིན་བསྙེན་ཅིང་སྒྲུབ་པར་གྱིས་ཤིག །[ཅེས་བརྗོད།] ལྷ་དང་མི་འབྲལ་ཞིང་རང་རྒྱུད་བྱིན་གྱིས་བརླབས་པའི་བརྡར་མེ་ཏོག་དེ་ཉིད་སླར་ཡང་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངལས་པའི་མོས་པ་མཛོད། ཧཱུྃ༔ ཅོད་པན་འདི་ནི་དཔའ་བའི་རྟགས༔ ཡི་དམ་ལྷ་དང་སྐལ་པ་མཉམ༔ འཁོར་ལོས་སྒྱུར་རྒྱལ་ཇི་བཞིན་དུ༔ ཆོས་ཀྱི་རྒྱལ་སྲིད་དབང་བསྐུར་རོ༔ ཨོ་པཉ་ཨ་ལང་ར་ཨ་བྷ་ཥཉ་ཧཱཧཱུྃ༔ [ཞེས་མེ་ཏོག་སྤྱི་བོར་བཞག །བཞི་པ་མིག་དབྱེ་བ་ནི།] སློབ་དཔོན་གྱི་ཐུགས་

ཀ་ནས་ཡེ་ཤེས་ཀྱི་འོད་ཟེར་གསེར་གྱི་ཐུར་མ་ལྟ་བུ་འཕྲོས་པས་ཁྱོད་རང་རྣམས་ཀྱི་མ་རིག་པའི་སྒྲིབ་གཡོགས་གཉིས་འཛིན་བདེན་རྟོག་གི་ལིང་ཏོག་དེ་ཉིད་མིག་དར་དང་ལྷན་ཅིག་ཏུ་ བསལ་བས་དྲི་མེད་ཡེ་ཤེས་ཀྱི་སྤྱན་ཐོབ་པའི་མོས་པ་མཛོད། [གསེར་ཐུར་ཐོགས་ལ།] ཧོཿ བདེ་གཤེགས་སྙིང་པོ་སངས་རྒྱས་ཀྱི༔ ཞལ་རས་བསྒྲིབས་པའི་བག་ཆགས་སྒྲིབ༔ མ་རིག་ལིང་ཏོག་དྲིམ་བསལ༔ རང་སྣང་ཡེ་ཤེས་དཀྱིལ་འཁོར་གྱི༔ རང་ཞལ་མཇལ་ཏེ་འཚང་རྒྱ་ཤོག༔ ཛ་ན་ཙ་ཀ་པྲ་བེ་ཤ་ཡ་ཕཊ༔ [ཅེས་གདོང་གཡོགས་བསལ། ལྔ་པ་མཐོང་བ་བསྟན་པ་ནི། རྡོ་རྗེའམ་ཕྱག་ཤིང་གིས་མཚོན་ཏེ།] དེ་ལྟར་ཡེ་ཤེས་ཀྱི་མིག་གསར་དུ་ཐོབ་པ་དེ་ལ་མཐོང་བ་བསྟན་པར་བྱ་བ་ཡིན་ཏེ། ད་ནི་དདབ་པའི་ཤུགས་ཀྱིས་སུ༔ དཀྱིལ་འཁོར་འདི་དེ་ཉིད་ལ་ལྟོས༔ ཁྱོད་ནི་སངས་རྒྱས་རིགས་སུ་སྐྱེས༔ སྔགས་དང་ཕྱག་རྒྱས་བྱིན་གྱིས་བརླབས༔ དངོས་གྲུབ་ཀུན་ཀྱང་ཕུན་སུམ་ཚོགས༔ དམ་ཚིག་མཆོག་ཏུ་ཁྱོད་འགྱུར་གྱི༔ རྡོ་རྗེ་པདྨ་ཆེ་གྲོལ་ལས༔ གསང་སྔགས་རྣམས་ལ་བསྒྲུབ་པར་གྱིས༔ [ཞེས་བལྟ་བར་བསྐུལ་ནས།] མདུན་གྱི་དཀྱིལ་འཁོར་སྲུང་བའི་གུར་ཁང་དུར་ཁྲོད་བརྒྱད་དང་བཅས་པ་གཟུང་འཛིན་འཁྲུལ་རྟོག་གི་བདུད་བཅོམ་ཞིང་ཚོགས་བརྒྱད་དག་པའི་དབུས་སུ། དུར་ཁྲོད་འབར་བའི་གཞལ་ལས་ཁང་རྒྱན་དང་མཚན་ཉིད་ཡོངས་སུ་

རྫོགས་པ་བྱང་ཆུབ་ཕྱོགས་ཀྱི་ཆོས་རྣམ་པར་དག་པའི་ནང་དུ། ང་བདག་ཉོན་མོངས་དག་པརཱ་དྲ་དང་མཆགས་ཐབས་ཤེས་པདྨ་ཉི་ཟླའི་གདན་ལ། དཀྱིལ་འཁོར་གཙོ་བོ་རྡོ་རྗེ་གཞོན་ནུ་ཡབ་ཡུམ་སངས་རྒྱས་ཐམས་ཅད་འདུས་པའི་བདག་ཉིད་ཡིད་ཆོས་རྣམ་པར་དག་པའི་རང་བཞིན་ཅན། དུག་ལྔ་རྣམ་པར་དག་པ་ཡེ་ཤེས་ལྔའི་ངོ་བོ་ཀཱ་ལ་རིགས་ལྔ། ས་བཅུའི་དབང་ཕྱུག་ཞིང་བཅུ་སྒྲོལ་བའི་ཕྱིར་ཁྲོ་བོ་བཅུར་བསྟན་པ་ལ་མི་དགེ་བ་བཅུ་གནས་སུ་དག་ནས་ཕར་ཕྱིན་བཅུའི་དོན་མཐར་ཕྱིན་པའི་ཡུམ་ཁྲོ་མོ་བཅུས་རྣམ་པར་འཁྱུད་པ། ཉོན་མོངས་ཉི་ཤུ་རྣམ་པར་དག་པའི་ཁྲ་ཐབས་ཉི་ཤུ་གཡས་གཡོན་དུ་འགྱེད་པ། སྐུ་གསུང་ཐུགས་ཀྱི་ཕྲིན་ལས་གང་འདུལ་དུ་རོལ་པའི་སྲས་མཆོག་ཉེར་གཅིག །ཚད་མེད་པ་བཞིའི་ཕྲིན་ལས་བཞི་སྒྲུབ་པའི་སྒོ་སྐྱོང་བཞི། ཕུང་ཁམས་རྟོག་ཚོགས་རྣམ་པར་དག་པ་དམ་ཅན་ཕུར་སྲུང་ཕོ་ཉའི་རང་བཞིན་སྟེ། མདོར་ན་སློབ་དཔོན་ལུས་དཀྱིལ་བདག་ཉིད་རྩ་བའི་དཀྱིལ་འཁོར། དེའི་འཁོར་དུ་ཕྱོགས་བཅུ་ཁྲོ་བོའི་དཀྱིལ་འཁོར། མདུན་གྱི་དཀྱིལ་འཁོར་མཚན་མ་རྫས་ཀྱི་དཀྱིལ་འཁོར་ཏེ། ཡེ་ཤེས་ཀྱི་རང་སྣང་གཅིག་ལས་ཐ་དད་པའི་ཚུལ་གྱིས་ཆུ་ཟླའི་གཟུགས་བརྙན་བཞིན་ཤར་བ་དེ་ཉིད་མངོན་སུམ་དུ་མཇལ་བས་མཚོན་བྱེད་དཔེའི་དཀྱིལ་འཁོར་དེས་མཚོན་བྱ་རང་བྱུང་ཡེ་ཤེས་

ཀྱི་དཀྱིལ་འཁོར་མཐོང་བའི་རྒྱུར་བྱས་ཏེ་ཕྱི་ནང་གི་འཛིན་རྟོག་ཐམས་ཅད་ལྷ་དང་ཡེ་ཤེས་ཀྱི་རོལ་པར་ཤར་བའི་མོས་པ་མཛོད་ཅིག །[ཅེས་དཀྱིལ་འཁོར་དོན་བསྡུས་སུ་ངོ་སྤྲད།] དེ་རྣམས་ཀྱིས་ལྷ་དང་སྐལ་བ་མཉམ་པར་བྱ་བའི་ཕྱིར་དཀྱིལ་འཁོར་དུ་འཇུག་པའི་ཆོས་རྣམས་གྲུབ་པ་ལགས། །[གཉིས་པ་ཞུགས་པའི་དཀྱིལ་འཁོར་དུ་དབང་བསྐུར་ལ་གསུམ། སྟོད་ལས་མཆོག་སྒྲུབ་ཀྱི་དབང་། སྨད་ལས་དགྲ་བགེགས་སྒྲོལ་དབང་། མཐའ་རྟེན་ཚེའི་དབང་བསྐུར་བའོ། །དང་པོ་ལྔ་ལས། ཐོག་མར་བུམ་དབང་རྗེས་འབྲེལ་དང་བཅས་པ་ནི།] ཞུགས་ནས་མངོན་པར་དབང་བསྐུར་བ་ལ་ཐོག་མར་བུམ་པའི་དབང་སྐུར་རྗེས་འབྲེལ་དང་བཅས་པ་ཞུ་བའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཨེ་མ་བླ་མ་ཀུན་བཟང་ཆེ་བའི་མཆོག༔ རྡོ་རྗེ་འཛིན་རྒྱལ་དཀྱིལ་འཁོར་འདིར༔ བདག་ཅག་སྐལ་ལྡན་བུ་མཆོག་ལ༔ དབང་མཆོག་དམ་པ་བསྐུར་དུ་གསོལ༔ [ལན་གསུམ།] ཁྱེད་རང་རྣམས་དཀྱིལ་འཁོར་ཆེན་པོའི་ཤར་སྒོའི་ཁྱམས་སུ་སེང་གེས་བཏེགས་པའི་རིན་པོ་ཆེའི་ཁྲི་པད་ཟླའི་གདན་ལ་གཙོ་བོའི་གཟུགས་ཀྱིས་འཁོད་པར་གྱུར་པའི་མོས་པ་མཛོད། སློབ་དཔོན་དཔལ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས། འོག་མིན་གྱི་ཞིང་ནས་དབང་ལྷ་དེ་བཞིན་གཤེགས་པ་ཕྱོགས་བཅུ་དུས་བཞིའི་རྒྱལ་བསྲས་དང་བཅས་པ་ཐམས་ཅད་གདན་གསུམ་ཚང་བའི་དབང་གི་ལྷ་ཚོགས་ཀྱི་རྣམ་པར་

བཛས་མཱ་ཛཿས་སྦྱན་དྲངས་ལ། ཨོཾ་བཛྲ་པུ་ཥ་སོགས་ནས། ཤཔདའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་རྡོ་རྗེའི་སློབ་མ་འདི་རྣམས་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་སྒྲུབ་པའི་དཀྱིལ་འཁོར་པ་རྣམས་དང་མདུན་གྱི་ནམ་མཁར་སྤྱན་དྲངས་པའི་གདན་གསུམ་ཚང་བའི་དབང་ལྷ་རྡོ་རྗེ་རྒྱལ་པོ་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། སེམས་དཔའ་སེམས་མ་རྣམས་ཀྱིས་མེ་ཏོག་འཐོར་ཞིང་ཤིས་པ་བརྗོད། ཀིངར་རྣམས་ཀྱིས་བགེགས་བསྐྲད། བུམ་འཛིན་རིག་པའི་ལྷ་མོ་རྣམས་ཀྱིས་བཛ་ཧེ་རུ་ཀའི་ངོ་བོར་གྱུར་པའི་རིན་པོ་ཆེའི་བུམ་པ་ཟག་མེད་ཡེ་ཤེས་ཀྱི་བདུད་རྩིས་བཀང་བས་མངོན་པར་དབང་བསྐུར་བའི་མོས་པ་མཛོད། [རྣམ་བུ་མ་སྤྱི་བོར་བཞག་ལ།] ཧཱུྃ༔ བུམ་པ་ཆོས་དབྱིངས་དག་པའི་ནང་༔ ཡེ་ཤེས་རྒྱ་མཚོ་འཁྱིལ་བ་ཡི༔ བཛ་ཀཱ་ལའི་དབང་མཆོག་འདི༔ སྐལ་ལྡན་ཁྱོད་ལ་བསྐུར་བར་བྱ༔ ཨོཾ་བཛྲ་ཀཱ་ལི་ཀཱ་ལ་ཡ་ཨ་བྷ་ཥ་ཀ་ཏ་ཤྲཱི་ཧཱུྃ༔ [ཞེས་བུམ་ཆུ་སྤྱི་བོར་གཏིགས།] དེས་བཛ་ཧེ་རུ་ཀའི་སྒོ་ནས་ཆུའི་དབང་ཐོབ། ཞེས་སྡང་གི་དྲིམ་སྦྱངས། རྣམ་ཤེས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། བཛ་ཀཱ་ལ་ཡའི་གོ་འཕང་ནུས་པ་རྒྱུད་ལ་བཞག །རྡོ་རྗེའི་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པ་ཡིན་

ནོ། །རཏན་ཧེ་རུ་ཀའི་ངོ་བོར་གྱུར་པའི་རིན་པོ་ཆེའི་དབུ་རྒྱན་དར་དཔྱངས་དང་ལྡན་པས་མངོན་པར་དབང་བསྐུར་ཞིང་སྤྱི་བོར་བཅིངས་པའི་མོས་པ་མཛོད། [ཅོད་པན་དབུ་རྒྱན་ཐོགས་ལ།] དེ་བཞིན་གཤེགས་པ་ཀུན་གྱི་རྒྱན༔ སངས་རྒྱས་ཀུན་གྱིས་རབ་བསྔགས་པའི་༔ རིན་པོ་ཆེ་ཡིད་དབུ་རྒྱན་དང༔ དར་དཔྱངས་ཅོད་པན་དབང་སྦྱིན་ནོ༔ ཨོ་རཏན་ཀཱ་ལི་ཀཱ་ལ་ཡར་ཏན་མུ་ཀུ་ཊ་ཨ་བྷ་ཥ་ཉ་ཧ༔ [ཞེས་མགོ་བོར་བཞག] དེས་རཏན་ཧེ་རུ་ཀའི་སྒོ་ནས་ཅོད་པན་གྱི་དབང་ཐོབ། ང་རྒྱལ་གྱི་དྲི་མ་སྦྱངས། ཚོར་བའི་ཕུང་པོ་གནས་གྱུར། མཉམ་པ་ཉིད་ཀྱི་ཡེ་ཤེས་མངོན་དུ་བྱས། རཏན་ཀཱ་ལ་ཡའི་གོ་འཕང་ནུས་པ་རྒྱུད་ལ་བཞག །རིན་ཆེན་རིགས་ཀྱི་དངོས་གྲུབ་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །པདྨ་ཧེ་རུ་ཀའི་ངོ་བོར་གྱུར་པའི་རྡོ་ རྗེ་རྩེ་དགུ་པས་མངོན་པར་དབང་བསྐུར་ཞིང་ལག་གཡས་སུ་གཏད་པའི་མོས་པ་མཛོད། རྡོ་རྗེ་ཐོགས་ལ། ཉེས་པའི་སྐྱོན་བྲལ་དྲིམ་མེད༔ སྐྱེ་འགག་མེད་པའི་དངོས་གྲུབ་སྟེ༔ རྡོ་རྗེ་གཞོན་ནུའི་ཕྱག་རྒྱ་འདིས༔ སྐལ་ལྡན་ཁྱོད་ལ་དབང་བསྐུར་རོ༔ ཨོ་པདྨ་ཀཱལ་ཡ་མ་ཧཱ་བཛ་ཨ་བྷ་ཥ་ཉ་ཧཱུྃ༔ [ཞེས་སྤྱི་བོར་བཞག་ཅིང་ལག་གཡས་སུ་གཏད་དེ་སྙིད་གར་གསོར་དུ་གཞུག །] དེས་པདྨ་ཧེ་རུ་ཀའི་སྒོ་ནས་རྡོ་རྗེའི་དབང་ཐོབ། འདོད་ཆགས་ཀྱི་དྲི་མ་སྦྱངས། འདུ་ཤེས་ཀྱི་ཕུང་པོ་གནས་གྱུར། སོ་སོར་རྟོག་པའི་ཡེ་ཤེས་མངོན་དུ་བྱས། པདྨ་ཀཱ་ལ་ཡའི་གོ་འཕང་ནུས་པ་རྒྱུད་ལ་

བཞག །པདྨ་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །ཀརྨ་ཧེ་རུ་ཀའི་ངོ་བོར་གྱུར་པའི་ དྲིལ་བུས་མངོན་པར་དབང་བསྐུར་ཞིང་ལག་གཡོན་དུ་གཏད་པའི་མོས་པ་མཛོད། [དྲིལ་བུ་ཐོགས་ལ།] དོན་དམ་ཆོས་ཉིད་སྟོང་པའི་སྒྲས༔ གསུང་དབྱངས་དྲུག་ཅུ་མཚོན་པའི་བརྡ༔ དྲིལ་བུའི་དབང་མཆོག་དམ་པ་འདི༔ སྐལ་ལྡན་ཁྱོད་ལ་བསྐུར་བར་བྱ༔ ཨོ་ཀརྨ་ཀཱ་ལི་ཀཱ་ལ་ཡ་མ་ཧཱ་གཎ་ཨ་བྷ་ཥ་ཉ་ཧཱུྃ༔ [ཞེས་སྤྱི་བོར་བཞག་ཅིང་ལག་གཡོན་དུ་གཏད་པ་གསིལ་པ་ཞིང་དཀུར་བརྟེན་དུ་གཞུག །]དེས་ཀརྨ་ཧེ་རུ་ཀའི་སྒོ་ནས་དྲིལ་བུའི་དབང་ཐོབ། ཕྲག་དོག་གི་དྲི་མ་སྦྱངས། འདུ་བྱེད་ཀྱི་ཕུང་པོ་གནས་གྱུར། བྱ་བ་གྲུབ་པའི་ཡེ་ཤེས་མངོན་དུ་བྱས། ཀརྨ་ཀཱ་ལ་ཡའི་གོ་འཕང་ནུས་པ་རྒྱུད་ལ་བཞག །ལས་ཀྱི་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །སླར་ཡང་ནམ་མཁར་བཞུགས་པའི་དབང་ལྷ་དེ་བཞིན་གཤེགས་པ་རིགས་ཀྱི་ཡུམ་དང་བཅས་པ་ཐམས་ཅད་ཀྱིས་མགྲིན་གཅིག་དབྱངས་གཅིག་ཏུ་བུདྷ་ཧེ་རུ་ཀའི་ངོ་བོར་གྱུར་པའི་རྡོ་རྗེའི་མིང་གིས་དབང་གིས་དབང་བསྐུར་བའི་མོས་པ་མཛོད། [རྡོར་དྲིལ་བསྣོལ་མ་སྤྱི་བོར་འཁྲོལ་ཞིང་།] ཉོན་མོངས་ཡེ་ཤེས་གནས་གྱུར་པ༔ མིང་བཏགས་བདུད་ལས་རྣམ་བར་རྒྱལ༔ མིང་གི་དབང་བསྐུར་དམ་པ་འདི༔ སྐལ་ལྡན་ཁྱོད་ལ་སྦྱིན་པར་བྱ༔ ཨོ་བུདྷ་ཀཱ་ལི་ཀཱ་ལ་ཡ་

ཀྱེ་ཤྲཱི་ཧེ་རུ་ཀ་ཕྲིན་ལས་འདུས་པ་ལས་རབ་བདེ་བ་རྩལ་ཨ་བྷ་ཥ་ཉ་ཨོ༔ [ཞེས་སོགས་རིགས་ཀྱི་མིང་གདགས།] དེས་བུདྷ་ཧེ་རུ་ཀའི་སྒོ་ནས་མིང་གི་དབང་ཐོབ། གཏི་མུག་གི་དྲི་མ་སྦྱངས། གཟུགས་ཀྱི་ཕུང་པོ་གནས་གྱུར། ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས། བུདྷ་ཀཱ་ལ་ཡའི་གོ་འཕང་ནུས་པ་རྒྱུད་ལ་བཞག །སངས་རྒྱས་རིགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །དེ་རྣམས་བརྟན་པར་བྱ་བའི་སླད་དུ་སླར་ཡང་རྣམ་རྒྱལ་བུམ་པའི་བདུད་རྩིས་རྒྱལ་ཐབས་སྤྱི་བླུགས་སུ་མངོན་པར་དབང་བསྐུར་བའི་མོས་པ་མཛོད། [རྣམ་བུམ་ཐོགས་ལ།] ཧཱུྃ༔ བུམ་པ་ལྷུན་གྲུབ་གཞལ་ཡས་ཁང༔ རྡོ་རྗེ་ཕུར་པའི་དཀྱིལ་འཁོར་རྫོགས༔ སྐལ་ལྡན་ཁྱོད་ལ་དབང་བསྐུར་བས༔ ལུས་ཀྱི་སྒྲིབ་པ་ཀུན་དག་ནས༔ རྣམ་སྨིན་རིག་འཛིན་ཉེར་འགྲུབ་ཅིང་༔ བུམ་དབང་ཡོངས་སུ་རྫོགས་ཐོབ་ཤོག༔ རྩ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ [ཞེས་སྤྱི་བོར་བཞག་ཅིང་བུམ་ཆུ་སྦྱིན།] དེ་ལྟར་བུམ་པའི་དབང་བསྐུར་བས་བདུད་རྩིའི་ཆུ་རྒྱུན་གྱིས་ལུས་ཀྱི་ནང་ཐམས་ཅད་གང་། བདེ་བ་ཆེན་པོའི་ཡེ་ཤེས་ཉམས་སུ་མྱོང་། ཆུའི་ལྷག་མ་སྦྱི་བོར་འཁྱིལ་བ་ལས་རིགས་ཐམས་ཅད་འདུས་པའི་སྦྱི་གཟུགས་རྒྱལ་བ་ཀུན་ཏུ་བཟའ་པོས་དབུ་བརྒྱན་པར་གྱུར་ཅིང་། སྤྱན་དྲངས་པའི་དབང་ལྷ་རྣམས་ཁྱེད་རང་རྣམས་ལ་དབྱེར་མེད་དུ་ཐིམ་

པས་ཡེ་ཤེས་ཀྱི་བྱིན་རླབས་བརྟན་པར་བྱས་པའི་མོས་པ་མཛོད། ཨོ་སུ་པྲ་ཏི་ཤ་བཛ་ཡེ་སྭཧཱ། [ཞེས་མེ་ཏོག་འཐོར།] ཁྱེད་རང་རྣམས་ཡི་དམ་གྱི་ལྷ་དང་དབྱེར་མེད་པ་མཁའ་མཉམ་འགྲོ་བའི་དེད་དཔོན་ཆེན་པོར་འགྱུར་བའི་རྟེན་འབྲེལ་གྱིས་བོན་རྒྱུད་ལ་བཞག་པ་དེ་ལ་མངའ་དབུལ་གྱི་ཚུལ་དུ་སློབ་དཔོན་གྱིས་མཆོད་པ་བགྱིས་པའི་མོས་པ་མཛོད། ཨོཾ་བཛྲ་པུཥ་སོགས་ཀྱིས་མཆོད་དོ། [རྗེས་འབྲེལ་དུ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྗེས་སུ་གནང་བ་ནི།] དེ་ནས་སྐུའི་རྗེས་སུ་གནང་བའི་སླད་དུ། མདུན་བསྐྱེད་དཀྱིལ་འཁོར་པའི་སྣ་ཚོགས་རྣམས་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་རང་འདྲ་བའི་སྐུ་སྒྱུ་འཕྲུལ་གར་དགུའི་ཉམས་ཀྱིས་རོལ་པ་ཉི་མ་འབུམ་གྱི་གཟི་མདངས་ལྟར་འབར་བཞིན་བྱོན་པ་ཁྱེད་རང་རྣམས་ཀྱི་སྤྱི་བོར་ཐིམ་པས་ཕུང་ཁམས་རྒྱལ་བའི་དཀྱིལ་འཁོར་ཆེན་པོར་གཟོད་ནས་ལྷུན་གྱིས་གྲུབ་བཞིན་པ་ལ་སླར་ཡང་ཆན་ལ་ཕབས་ཀྱིས་ཐེབས་པ་ལྟར་སྐུ་མི་ཟད་པ་རྒྱན་གྱི་འཁོར་ལོའི་བྱིན་རླབས་ནུས་པ་བརྟན་པར་བྱས་པའི་མོས་པ་མཛོད། [ལྷ་ཕུར་རམ་སྐུ་ཙཀ་རྣམས་རིམ་པར་སྦྱི་བོར་བཞག་ལ།] ཧཱུྃ༔ དུས་གསུམ་སངས་རྒྱས་འདུས་པའི་སྐུ༔ སྤྱི་དཔལ་རྡོ་རྗེ་གཞོ་ན་ནུ་ཆེ༔ སྣང་སྟོང་ཐབས་ཤེས་དབྱེར་མེད་སྐུས༔ སལ་ལྡན་ཁྱོད་ལ་དབང་བསྐུར་རོ༔ མི་ཤིགས་རྡོ་རྗེའི་གདིང་ཐོབ་ཀྱི༔ བསྐྱེད་རིམ་ལྷ་དབང་ཐོབ་པར་

ཤོག༔ [རྩ་སྔགས་དང་།] ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ འཁོར་འདས་རྩོགས་པའི་དབྱིངས་ཆེན་མོ༔ སྒྲོལ་ཡུམ་ཨེ་ཀ་ཛ་ཊའི་སྐུས༔ སྐལ་ལྡན་བུ་ལ་དབང་བསྐུར་རོ༔ འཁོར་བ་ཡོངས་སྒྲོལ་དབང་ཐོབ་ཤོག༔ [རྩ་སྔགས།] ཀཱ་ཡ་ཨ་བྷ་ཥ་ཉ་ཨོ༔ ཧཱུྃ༔ སངས་རྒྱས་ཀུན་བས་སྔར་སངས་རྒྱས༔ ཀ་དག་གདོད་མའི་མཨན་པོ་ཡིས༔ སྐལ་ལྡན་བུ་ལ་དབང་བསྐུར་རོ༔ གཉིས་སུ་མེད་པའི་དབང་ཐོབ་ཤོག༔ [རྩ་སྔགས།] ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ དཔལ་ཆེན་སྐུ་ཡི་གསང་རྫོགས་དཔལ༔ ཁྲག་འཐུང་བུདྷ་ཀཱ་ལ་ཡས༔ སྐལ་ལྡན་བུལ་དབང་བསྐུར་རོ༔ སྐུལ་དབང་བསྒྱུར་དབང་ཐོབ་ཤོག༔ ཨོ་བུདྷ་ཀཱ་ལི་ཀཱ་ལ་ཡ། ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ དཔལ་ཆེན་ཐུགས་ཀྱི་གསང་རྫོགས་དཔལ༔ ཁྲག་འཐུང་བཛ་ཀཱ་ལ་ཡས༔ སྐལ་ལྡན་བུ་ལ་དབང་བསྐུར་རོ༔ ཐུགས་ལ་དབང་བསྒྱུར་དབང་ཐོབ་ཤོག༔ ཨོཾ་བཛྲ་ཀཱ་ལི ཀཱ་ཡ་ཨ ཧཱུྃ༔ དཔལ་ཆེན་ཡོན་ཏན་གསང་རྫོགས་དཔལ༔ ཁྲག་འཐུང་རཏན་ཀཱ་ལ་ཡས༔ སྐལ་ལྡན་བུ་ལ་དབང་བསྐུར་རོ༔ ཡོན་ཏན་དབང་བསྒྱུར་དབང་ཐོབ་ཤོག༔ ཨོ་རཏན་ཀཱ་ལི ཀཱ་ཡ་ཨ ཧཱུྃ༔ དཔལ་ཆེན་གསུང་གི་གསང་རྫོགས་དཔལ༔ ཁྲག་འཐུང་པདྨ་ཀཱ་ལ་ཡས༔ སྐལ་ལྡན་བུ་ལ་དབང་བསྐུར་རོ༔ གསུངས་ལ་དབང་བསྒྱུར་དབང་ཐོབ་ཤོག༔ ཨོ་

པདྨ་ཀཱ་ལི ཀཱ་ཡ ཧཱུྃ༔ དཔལ་ཆེན་ཕྲིན་ལས་གསང་རྫོགས་དཔལ༔ ཁྲག་འཐུང་ཀརྨ་ཀཱ་ལ་ཡས༔ སྐལ་ལྡན་བུལ་དབང་བསྐུར་རོ༔ ཕྲིན་ལས་དབང་བསྒྱུར་དབང་ཐོབ་ཤོག༔ ཨོ་ཀརྨ་ཀཱ་ལི ཀཱ་ཡ ཧཱུྃ༔ དཔལ་གྱི་མངོན་སྤྱོད་རོལ་པའི་རྩལ༔ ཡེ་ཤེས་སྤྲུལ་པའི་ཁྱུང་ཆེན་གྱིས༔ སྐལ་ལྡན་བུ་ལ་དབང་བསྐུར་རོ༔ འཁོར་བ་དོང་སྤྲུགས་དབང་ཐོབ་ཤོག༔ ཁྲོ་ག་རུ་ཌ་ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ ལྷ་གདོན་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་ཧཱ་ཆེན་ཀཱ་ར་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཧཱ་ཀཱ་ར་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ དྲི་ཟ་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་རྣམ་པར་རྒྱལ་བ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་བི་ཛ་ཡ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ མེ་ལྷ་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་དབྱུག་པ་སྔོན་པོ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ནཱ་ལ་དཎ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ གཤིན་རྗེ་ཟིལ་

གནོན་དྲག་པོའི་སྐུར་སྟོན་པ༔ ཁྲོ་རྒྱལ་གཤིན་རྗེ་གཤེད་པོ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཡ་མན་ཀ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ སྲིན་པོ་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་མི་གཡོ་མགོན་པོ་ཡབ་ཡུམ་གྱི་ས༔ སལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ ཆུ་བདག་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་རྟ་མགྲིན་རྒྱལ་པོ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཧ་གྲི་ཝ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ རླུང་ལྷ་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་འདོད་པའི་རྒྱལ་པོ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ གནོད་སྤྱིན་ཟིལ་གནོན་དྲག་པོའི་སྐུར་སྟོན་པ༔ ཁྲོ་རྒྱལ་བདུད་རྩི་འཁྱིལ་བ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཨ་མྲ་ཏ་ཀུཎ་ལཱ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ དབང་ལྡན་ཟིལ་གནོན་དྲག་པོའི་

སྐུར་སྟོན་པ༔ ཁྲོ་རྒྱལ་ཁམས་གསུམ་རྣམ་རྒྱལ་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་ཏྲ་ལོ་ཀྱ་བི་ཛ་ཡ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཆེ་མཆོག་རྡོ་རྗེ་གཞོན་ནུ་ཆེ༔ ས་བདག་ཟིལ་གནོན་དྲག་པོའི་སྐུར་སྟོན་པ༔ ཁྲོ་བོའི་རྒྱལ་པོ་སྟོབས་ཆེན་ཡབ་ཡུམ་གྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ༔ ཀཱ་ཡ ཧཱུྃ༔ དཔལ་ཆེན་ཁྲོ་བོ་བཅུ་ཡི་རྣམ་རོལ་གར༔ མི་སྲུན་གདུག་པ་འདུལ་བའི་དཔལ་དུ་ཤར༔ མངོན་སྦྱོད་ལས་མཛད་ཟ་བྱེད་ཆེན་པོ་བཅུས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཧཱ་ཧཱ་ཧཱ་ཧཱ་ཧཱ་ཧཱ་བསྐུར་རོ༔ བྷྱ་བྷྱ་བྷྱ་བྷྱ་བྷྱ་བྷྱ་བྷྱ་བྷྱ་བྷྱ་བྷྱ༔ རྡོ་རྗེ་ཁྲོ་མོ་བཅུ་ཡི་ཕྲིན་ལས་གར༔ མྱུར་མགྱོགས་སྟོབས་རྩལ་དྲག་པའི་མངོན་སྤྱོད་གྲུབ༔ གཉིས་མེད་སྙོམས་འཇུག་རོལ་པའི་ཆོ་འཕྲུལ་གར༔ ཕོ་གདོན་ཟིལ་གནོན་སྐུ་ཡི་སྲས་མཆོག་བདུན༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོ་ཀརྨ་ཀྲོ་དྷ་བཛ་ཀཱ་ལ་ཀཱ་ལ་ཡ་ཧཱ་ཕཊ༔ ཀཱ་ཡ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་ཆེ༔ གསུང་གསང་སྒྱུ་འཕྲུལ་རོལ་པའི་གར་དབང་

པོ༔ མོ་གདོན་ཟིལ་གནོན་གསུང་གི་སྲས་མཆོག་བདུན༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོ་ཀརྨ ཀཱ་ཡ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་ཆེ༔ ཐུགས་གསང་མཉམ་ཉིད་རོལ་པའི་སྒྱུ་འཁྲུལ་གར༔ ཀླུ་གདོན་ཟིལ་གནོན་ཐུགས་ཀྱི་སྲས་མཆོག་བདུན༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོ་ཀརྨ ཀཱ་ཡ ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི༔ ཚད་མེད་རྣམ་བཞི་ཕྲིན་ལས་དཔལ་དུ་ཤར༔ འགུགས་འཆིང་སྡོམ་མྱོས་ལས་བྱེད་སྒོ་མ་བཞིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཛཿཧཱུྃ་བཾ་ཧོཿ ཀཱ་ཡ [ཞེས་བསྐུར་རོ།] དེ་ནས་གསུང་གི་རྗེས་སུ་གནང་བའི་སླད་དུ། སློབ་དཔོན་དཔལ་ཆེན་པོའི་ཐུགས་ཀའི་ཡེ་ཤེས་སེམས་དཔའི་ཐུགས་ཀ་ནས་སྔགས་ཀྱི་ཕྲེང་བ་མཐིང་ཞུན་གྱི་མདངས་ཅན་འོད་ཟེར་ཉི་མ་འབར་བའི་རྣམ་པ་ཅན་བྱུང་། ཞལ་ནས་ཐོན། ཁྱེད་རང་རྣམས་ལྷར་གསལ་བའི་ཞལ་ནས་ཐུགས་ཀའི་ཡེ་ཤེས་སེམས་དཔའི་ཞལ་དུ་ཞུགས། ཐུགས་སྲོག་ཧཱ་ཡིག་གི་མཐར་འཁོད་པ་ལས་འོད་ཟེར་སྤྲོ་བསྡུས་དོན་གཉིས་བསྒྲུབས་ཏེ་དག་སྔགས་ཀྱི་རོལ་པ་གསུང་མི་ཟད་པ་རྒྱན་གྱི་འཁོར་ལོའི་རང་བཞིན་དུ་རྒྱས་བཏབ་པར་མོས་པས་སྔགས་འདི་རྣམས་ཀྱི་རྗེས་ཟློས་མཛོད། [ཅེས་ཕྲེང་བ་སྦྲེལ་ལ་བསྙེན་སྒྲུབ་ཚར་གསུམ་རེ་དང་། སྤུ་གྲི་ཚར་གཅིག་རྗེས་ཟློས་བྱར་གཞུག །]སྔགས་

ཀྱི་བྱང་བུ་མགྲིན་པར་བཞག་ཅིང་བསྙེན་པའི་ཕྲེང་བ་ལག་ཏུ་གཏད་པས་དེ་ཉིད་བརྟན་པར་བྱས་པའི་མོས་པ་མཛོད། ཨཱཿཡིག་དམར་པོ་མགྲིན་པར་བཞག་ལ། ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱིས༔ གསུང་གིས་བོན་ཨཱཿདམར་འོད་དང་བཅས༔ སྐལ་ལྡན་ཁྱོད་ཀྱི་མགྲིན་པར་དབང་བསྐུར་བས༔ ངག་གི་སྒྲིབ་དག་གསུང་གི་དབང་ཐོབ་ཤོག༔ [རྩ་སྔགས་དང་།] ཝཱ་ཀ་ཨ་བྷ་ཥ་ཉཙ་ཨཱཿ [སྔགས་བྱང་མགྲིན་པར་བཞག་ལ།] ཧཱུྃ༔ དཔལ་ཆེན་རྡོ་རྗེ་གཞོན་ནུ་ཡབ་ཡུམ་གྱི༔ གསུང་གི་སྙིང་པོ་སྔགས་ཀྱི་རང་སྒྲ་ཡིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ བཟླས་པ་སྔགས་སྦྱོར་སྔགས་ཀྱི་དབང་ཐོ་བ་སྟེ༔ མཆོག་དང་ཐུན་མོང་དངོས་གྲུབ་ཉེར་འགྲུབ་ཤོག༔ [རྩ་སྔགས།] ཝཱ་ཀ [ཞེས་བསྐུར།] དེ་ནས་ཐུགས་ཀྱི་རྗེས་སུ་གནང་བའི་སླད་དུ། དཀྱིལ་འཁོར་ལྷ་ཚོགས་རྣམས་ཀྱི་ཐུགས་ནས་ཐུགས་བདེ་སྟོང་གཉིས་སུ་མེད་པའི་ཡེ་ཤེས་ཆེན་པོའི་རང་རྩལ་འགྲོ་འདུལ་ཕྲིན་ལས་ཀྱི་ཕྱག་རྒྱ་ཡིག་འབྲུའི་རྣམ་པར་འཕྲོས་པ་ཁྱེད་རང་རྣམས་ཀྱི་སྙིང་གར་ཐིམ་པས་རང་བྱུང་འོད་གསལ་

ཆེན་པོའི་དགོངས་པ་ཀློང་དུ་གྱུར་ཏེ་ཐུགས་མི་ཟད་པ་རྒྱན་གྱི་འཁོར་ལོ་མངོན་དུ་བྱས་པའི་མོས་པ་མཛོད། [ཧཱ་ཡིག་སྔོན་པོ་སྙིང་གར་བཞག་ལ།] ཧཱུྃ༔ རྒྱལ་བ་ཀུན་གྱི་ཐུགས་གསང་ཡི་གེ་ཧཱུྃ༔ མཐིང་ནག་འོད་ཀྱི་ཐིག་ལེ་དང་བཅས་པ༔ སློབ་མའི་སྙིང་གར་ཐིམ་པས་ཡིད་སྒྲིབ་དག༔ ཐུགས་ཀྱི་དབང་ཐོབ་ཆོས་སྐུར་སྨིན་གྲོལ་ཤོག༔ [རྩ་སྔགས།] ཙི་ཏ་ཏ་ཨ་བྷ་ཥ་ཉཙ་ཧཱུྃ༔ [གནམ་ལྕགས་རྡོ་རྗེ་རྩེ་དགུ་པ་སྙིང་གར་བཞག་ལ།] ཧཱུྃ༔ དཔལ་ཆེན་ཐུགས་ཀྱི་གསང་བ་ཡོངས་སུ་རྫོགས༔ མི་ཤིགས་གནམ་ལྕགས་རྡོ་རྗེ་རྩེ་དགུ་འདིས༔ སྐལ་ལྡན་སྐྱེས་བུཡ་ཁྱོད་ལ་དབངབ་བསྐུར་རོ༔ རྡོ་རྗེ་ཐེག་པའི་དབང་མཆོག་ཡོངས་རྫོགས་ཤོག༔ [རྩ་སྔགས།] ཙི་ཊ [སྲོག་འཁོར་གཏད་ལ།] ཧཱུྃ༔ དཔལ་ཆེན་རྡོ་རྗེ་གཞོན་ནུའི་ཐུགས་ཀྱི་མཛོད༔ སྒྱུ་འཕྲུལ་རོལ་པ་ཡོངབས་རྫོགས་སྲོག་འཁོར་འདི༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡིས༔ དཀྱིལ་འཁོར་ཡོངས་ཀྱི་ཁྱབ་བདག་མཆོག་ཐོབ་ཤོག༔ [རྩ་སྔགས།] ཙི་ཏཏ [མེ་ལོང་གཏད་ལ།] ཧཱུྃ༔ ཀ་དག་ཆོས་སྐུ་སྤྲོད་པའི་མཐའ་དད་བྲལ༔ ཉག་གཅིག་ཐིག་ལེ་སྐྱོན་དང་དྲི་མ་མེད༔ ཅི་ཡང་འཆར་དུ་རུང་བའི་ཨ་དརས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཆོས་སྐུ་སྐྱེ་བ་མེད་པའི་དོན་རྟོགས་ཤོག༔ རྩ་སྔགས༔ ཙི་ཏ་ཏ [ཞེས་བསྐུར།] དེ་ནས་ཡོན་ཏན་གྱི་

རྗེས་སུ་གནང་བའི་སླད་དུ། དཔལ་ཆེན་ཁྲོ་རྒྱལ་འབར་བའི་རྒྱན་ཆས་དང་རྟགས་ཀྱི་ཕྱག་མཚན་རྣམས་ཀྱིས་དབང་བསྐུར་བས། མ་མོ་མཁའ་འགྲོ་དམ་ཅན་ཐམས་ཅད་ཀྱིས་རྗེ་དང་གཙོ་བོར་མཐོང་ཞིང་བཀུར་བ་དང་། འཇིག་རྟེན་ཁམས་ཀྱི་དྲེགས་པ་ཅན་མ་ལུས་པ་ཟིལ་གནོན་དབང་དུ་སྡུད་པའི་མཐུ་དབང་ཐོབ་སྟེ་ཆེ་བའི་ཡོན་ཏན་ཡོངས་སུ་རྫོགས་པའི་མོས་པ་མཛོད༔ དུར་ཁྲོད་ཆས་བརྒྱད་གཏད་ལ། ཧཱུྃ༔ བྱུགས་པའི་རྫས་དང་མནབ་པའི་གོས༔ སྤྲས་པའི་རྒྱན་བཅས་དུར་ཁྲོད་ཆས༔ སྐལ་ལྡན་བུ་ལ་དབང་བསྐུར་རོ༔ ཧེ་རུ་ཀ་ཡི་དཔལ་ཐོབ་ཤོག༔ [རྩ་སྔགས།] གུ་ཎ་ཨ་བྷ་ཥ་ཉཙ་སྭ༔ [རྡོ་རྗེ་རྩེ་དགུ་དང་རྩེ་ལྔ་ལག་གཡས་སུ་གཏད་ལ།] ཧཱུྃ༔ རྡོ་རྗེ་རྩེ་དགུས་ལོག་རྟོགས་རུ་དྲ་འཇོམས་༔ རྡོ་རྗེ་རྩེ་ལྔས་དུག་ལྔ་ཕུང་ལྔ་སྒྲོལ༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡིས༔ འཁོར་བ་དོང་ནས་སྤྲུགས་པའི་དབང་ཐོབ་ཤོག༔ [རྩ་སྔགས།] གུ་ཎ [མེ་དཔུང་དང་ཁ་ཊ་ལག་གཡོན་དུ་གཏད་ལ།] ཧཱུྃ༔ མེ་དཔུང་འབར་བསམ་མ་རིག་བག་ཆགས་བསྲེག༔ ཁ་ཊ་རྩེ་གསུམ་ཉོན་མོངས་དུག་གསུམ་སྒྲོལ༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡིས༔ བདག་རྟོག་རུ་དྲ་སྒྲོལ་བའི་དབང་ཐོབ་ཤོག༔ [རྩ་སྔགས།] གུ་ཎ [ཕུར་པ་ལག་གཉིས་སུ་གཏད་ལ།] ཧཱུྃ༔ སྐུ་གསུམ་ལྷུན་

གྲུབ་རི་རབ་ཕུར་པ་འདིས༔ ཁམས་གསུམ་འཁོར་བ་སྐུ་གསུམ་ཀློང་དུསྒྲོལ༔ སྐལ་ལྡན་བུ་མཆོག་ཁྱོད་ལ་གཏད་པ་ཡིས༔ དོན་གཉིས་ལྷུན་གྲུབ་མཐུ་ཡི་དབང་ཐོབ་བ་ཤོག༔ [རྩ་སྔགས།] གུ་ཎ [ཞེས་བསྐུར།] དེ་ནས་ཕྲིན་ལས་ཀྱི་རྗེས་སུ་གནང་བའི་སླད་དུ། ཐོག་མར་ཕུར་སྲུང་དམ་ཅན་རྒྱ་མཚོའི་ཚོགས་རྣམས་བྲན་དང་འབངས་སུ་གཏད་པར་བྱ་བ་ཡིན་ཏེ། [དམ་ཅན་གྱི་རྩང་ཕུར་རམ་སྐུ་ཙཀ་རྣམས་ལ་དམིགས་ཏེ་བདེན་སྟོབས་སྔོན་དུ་འགྲོ་བས།] ཕུར་སྲུང་དམ་ཅན་བཅུ་དྲུག་དབང་ཕྱུག་ཉེར་བརྒྱད་སྤྲུལ་པ་འཁོར་དང་བཅས་པ་ཐམས་ཅད་རང་རང་གི་རྟེན་འདི་རྣམས་ལ་ཐིམ་པར་གྱུར་ཅིག །ཛ་ཿཧཱུྃ་བཾ་ཧོཿ [ཞེས་བཀུག་ཅིང་གུ་གུལ་དང་ཤ་ཆེན་བདུག །ཡུངས་དཀར་ལ་བཞི་སྙིང་གཅིག་དྲིལ་བཟླས་པ་མཐོར་བས་གཟི་བྱིན་བསྐྱེད་ལ།] ཧཱུྃ༔ བྲན་དང་བཀའ་ཉན་ཁས་བླངས་ཕོ་ཉའི་ཚོགས༔ སྔོན་ཚེ་དཔལ་ཆེན་རྡོ་རྗེ་གཞོན་ནུ་ཡི༔ སྤྱན་སྔར་ཇི་ལྟར་ཁས་བླངས་དམ་བཅས་ལྟར༔ དམ་ཚིག་གཉན་པོ་དེ་ལས་མ་འདའ་བར༔ རིག་འཛིན་བདག་གིས་གཞུང་བཞིན་བསྒྲུབས་ལགས་ཀྱི༔ དམ་ཅན་སྲུང་མ་མ་གཡེལ་དམ་ལ་འདུས༔ མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད༔ [ཅེས་བསྐུལ།] ཁྱེད་རང་རྣམས་སྐད་ཅིག་གིས་དཔའ་བོ་གོ་བརྗེས་པའི་ཚུལ་དུ་ཁྲོ་བོའི་རྒྱལ་པོ་སྟོབས་པོ་ཆེ་དུད་ཁ་ཡུམ་སྐུལ་བྱེད་མ་དང་མཉམ་པར་སྦྱོར་ཞིང་རྒྱན་ཆ་ལུགས་

ཡོངས་སུ་རྫོགས་པ་དྲེགས་ཚོགས་ཟིལ་གྱིས་གནོན་པའི་བདག་ཉིད་ཆེན་པོར་གྱུར་པས། ཕུར་སྲུང་དམ་ཅན་རྒྱ་མཚོའི་ཚོགས་རྣམས་བྲན་དང་འབངས་སུ་གཏད་པས་ཇི་ལྟར་བཅོལ་བའི་ཕྲིན་ལས་ཐམས་ཅད་ཐོགས་མེད་དུ་སྒྲུབ་པར་ཞལ་གྱིས་བཞེས་པའི་མོས་པ་མཛོད། [རྩང་ཕུར་རམ་སྐུ་ཙཀ་རྣམས་རིམ་བཞིན་གཏད་ལ།] ཧཱུྃ༔ དབྱིངས་ཀྱི་རྗེ་མོའི་ཐུགས་ཀྱི་རྣམ་རོལ་གར༔ ཞིང་བཅུའི་སྲོག་གི་གཤེད་མར་ལྷུངན་གྱིས་གྲུབ༔ རབ་འཇིགས་གཏུམ་མོ་ཤྭ་ན་མཆེད་སྡེ་བཞིས༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ མ་མོ་དམ་ཅན་སྲོག་ལ་དབང་ཐོབ་ནས༔ མངོན་སྦྱོད་ལས་ཀྱིས་གདུག་པ་འདུལ་བར་ཤོག༔ ཨོཾ་བཛྲ་ཀཱ་ལི་ཀཱ་ལ་ཡ༔ ཤྭ་ན་སྲི་ཀ་སྲི་ལ་ཀུ་ཀུ་མུ་ཁ་བཛ་ས་མ་ཡ་ཙིཏ་ཏ་བྷ་ཥ་ཉཙ་ཧཱུྃ༔ ཧཱུྃ༔ དབྱིངས་ཀྱི་རྗེ་མོའི་སྐུ་ཡི་རྣམ་རོལ་གར༔ བསྟན་དགྲའི་སྲོག་གི་གཤེད་མར་ལྷུངན་གྱིས་གྲུབ༔ སྲིད་པའི་དབང་མོ་རེ་ཏཱ་མཆེད་སྡེ་བཞིས༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ སྲིད་པ་མ་མོའི་སྐུ་ལ་དབངབ་ཐོབ་ནས༔ ཞིང་བཅུའི་དགྲ་དཔུང་བརླག་པའི་མཐུ་ཐོབ་ཤོག༔ [རྩ་སྔགས།] པྲ་མོ་སྲོག་ཏིག་སྙིང་ཏེག་པྲ་མོ་ཧ་བཛ་སམ་ཡ་ཀཱ་ཡ་ཨ་བྷ་ཤིཉཙ་ཧཱུྃ༔ ཧཱུྃ༔ དབྱིངས་ཀྱི་རྗེ་མོའི་གསུང་གི་རྣམ་རོལ་གར༔ ལོག་འདྲེན་སྲོག་

གི་གཤེད་མར་ལྷུན་གྱིས་གྲུབ༔ མཐུ་རྩལ་ཐོགས་མེད་ས་བདག་ཆེན་མོ་བཞིས༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ བཀའ་སྡོད་མ་མོའི་གསུང་ལ་དབང་ཐོབ་ནས༔ མངོན་སྤྱོད་དྲག་པོ་མཐུ་ཡི་དཔལ་ཐོབ་ཤོག༔ [རྩ་སྔགས།] མ་མ་བཛ་ཀྲོ་དྷ་བཛ་མ་ཡ་ཝཱ་ཀ་ཨ་བྷ་ཥ་ཉཙ་ཧཱུྃ༔ ཧཱུྃ༔ དཔལ་ཆེན་རྡོ་རྗེ་གཞོན་ནུའི་ཕྲིན་ལས་གར༔ མངོན་སྤྱོད་ལས་ཀྱིས་དགྲ་བགེགས་ཐལ་བར་རློག༔ མི་བཟད་རབ་འཇིགས་སྐྱེས་བུ་གིང་ཆེན་བཞིས༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ དྲག་པོ་མཐུ་ཡི་དངོས་གྲུབ་མཆོག་ཐོབ་སྟེ༔ བརྣག་པ་ཙམ་གྱིས་ལོག་འདྲེན་སྒྲོལ་ནུས་ཤོག༔ [རྩ་སྔགས།] རཀཤ་ཡ་ཀཤ་ཡ་མཱ་ར་ཛ་དུ་ཀ་ལ་ཀིང་ཀ་ར་བཛ་ཀྲོ་དྷ་བཛས་མ་ཡ་ཀརྨ་ཨ་བྷ་ཥ་ཉཙ་ཧཱུྃ༔ ཧཱུྃ༔ སྦྱོར་བའི་ཡུམ་ཆེན་འཁོར་ལོ ་རྒྱས་འདེབས་མ༔ མི་སྲུན་ལོག་འདྲེན་གདུག་པ་ཚར་གཅོད་ཕྱིར༔ རྡོ་རྗེ་སྲིན་མོའི་རྣམ་འགྱུར་རོལ་པའི་གར༔ བཀའ་སྡོད་ལས་ཀྱི་དབང་ཕྱུག་ཉི་ཤུ་བརྒྱད༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ མམ་མོ་རབ་འབྱམས་དབང་སྡུད་དབང་ཐོབ་ཤོག༔ [རྩ་སྔགས།] མ་ཏྲི་བྷྱ་ཛཿ ཧྲིང་ཀརྨ་ཨ་བྷ་ཥ་ཉཙ་ཧཱུྃ༔ [ཞེས་བསྐུར།] དེ་ནས་རྡོ་རྗེ་རྒྱལ་པོ་རབ་འབྱམས་བཀའི་དབང་གི་སླད་དུ། ཁྱེད་རང་རྣམས་སེང་གེ་ལ་སོགས་

པའི་ཁྲི་ལ་དཔལ་ཆེན་པོ་དངོས་སུ་གསལ་བར་གྱུར་པའི་སྤྱི་བོར་གདུགས་དཀར་པོ་གསེར་གྱི་ཡུ་བ་ཅན་དབུབ། གཡས་གཡོན་དུ་རྒྱལ་མཚན་དང་བ་དན་བསྒྲེངས། དབུ་ལ་སྤྲོག་ཞུ་བཀོན། ཕྱག་ཏུ་དུང་དང་སྒྲུབ་ཡིག་གཏད། མཐའ་སྐོར་དུ ་ས་གསུམན་རཀ་གཏོར་མ་སོགས་མཆོད་པའི་བྱེ་བྲག་དུ་མ་དང་བཅས་ཏེ་མངའ་གསོལ་བས་སྲིད་ཞི་དབང་དུ་སྒྱུར་བའི་འཁོར་འདས་ཀུན་གྱི་སྤྱི་དཔལ་ཆེན་པོར་མངའ་དབང་རྫོགས་པའི་མོས་པ་མཛོད༔ [ཡོ་བྱད་རྣམས་གོང་གསལ་བཞིན་གཏད་ལ།] ཧཱུྃ༔ དུས་གསུམ་རྒྱལ་བ་རིག་འཛིན་དམ་པའི་སྲས༔ བསྐྱོད་རྫོགས་བརྟན་ཐོབ་ཕྲིན་ལས་རྣམ་པ་བཞི༔ མཐར་ཕྱིན་ཆོས་རྣམས་ཀུན་ལ་དབང་བསྒྱུར་ཞིང་༔ བསྙེན་སྒྲུབ་ལས་སྦྱོར་མ་ལུས་མཐར་སོན་ཏེ༔ བདག་གཞན་མ་ལུས་སྨིན་ཅིང་གྲོལ་བ་དང་༔ ཕྲིན་ལས་རྣམ་བཞི་ལྷུན་གྲུབ་བཀའ་གཏད་དབང་༔ དེང་འདིར་སྐལ་ལྡན་རིགས་ཀྱི་བུ་ཁྱོད་ལ༔ རབ་འབྱམས་བཀའ་ཡི་དབང་རྫོགས་འདི་བསྐུར་བས༔ ཕྲིན་ལས་ནུས་མཐུ་ཐོགས་མེད་དབང་ཐོབ་ཤོག༔ ཨོཾ་བཛྲ་ཀཱ་ལི་ཀཱ་ལ་ཡ་ཛཿཧཱུྃ་བཾ་ཧོཿ ཀཱ་ཡ་ཝཱ་ཀ་ཙི་ཏ་ཏ་ས་རྦ་ཏ་ཐཱ་ག་ཏ་ཨ་བྷ་ཥ་ཉ་མ༔ ཞེས་དང་རྟེན་འབྲེལ་སྙིང་པོ་བཟླས་པའི་མེ་ཏོག་འཐོར་རོ། །དེ་ལྟར་ན་ཕྱི་ཀུན་རྫོབ་མཚན་མའི་དཀྱིལ་

འཁོར་དུ་བུམ་འི་དབང་ཐོབ། ཕུང་ཁམས་སྣོད་བཅུལད་ཐ་མལ་དུ་ཞེན་པའི་རྟོག་ཚོགས་སྦྱངས་ཏེ་ལུས་ཀྱི་སྒྲིབ་པ་དག །ལམ་དུས་སུ་བསྐྱེད་པའི་རིམ་པ་བསྒོམ་པ་ལ་དབང་། སྣོད་བཅུད་ཁྲག་འཐུང་རོལ་པའི་དཀྱིལ་འཁོར་གཅིག་ཏུ་རྫོགས་ནས། འབྲས་བུ་སྐུ་རྡོ་རྗེ་མཆོག་གི་སྤྲུལ་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །[གཉིས་པ་གསང་བའི་དབང་བསྐུར་བ་ནི།] དེ་ནས་གསང་བའི་དབང་བསྐུར་ བ་མོ་ཞུ་བའི་དོན་དུ་མཎལ་ཕུལ། གཟུགས་དང་ལང་ཚོས་བརྒྱན་པའི་རིག་མ་མཚན་ཉིད་དང་ལྡན་པ་ཕྱག་རྒྱའི་དོན་དུ་ཕྲུལ་བར་མོས་ལ་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཧོ་བླ་མ་ཁྱེད་དགོངས་ཤིག༔ འཁོར་བའི་གཅོང་རོང་ཟབ་མོ་ལས༔ ཟུང་འཇུག་ཀློང་དུ་སྒྲོལ་མཛད་པ༔ གསང་བའི་དབང་མཆོག་བདག་ལ་སྩོལ༔ [ལན་གསུམ།] སློབ་དཔོན་དཔལ་ཆེན་རྡོ་རྗེ་གཞོན་ནུ་དང་གཟུངས་མ་ཡུམ་ཆེན་འཁོར་ལོ་རྒྱས་འདེབས་མ་རྗེས་ཆགས་བདེ་ཆེན་གྱི་མཉམ་སྦྱོར་མཛད་པའི་ཡབ་ཀྱི་གསང་གནས་ཧཱ་ལས་རྡོ་རྗེ་སྔོན་པོ་རྩེ་ལྔ་པ་བུ་ག་ཧཱ་གིས་མཚན་པ། ཡུམ་གྱི་མཁའ་གསང་ཨ་ལས་པདྨའི་ཟེའུ་འབྲུ་ཨས་མཚན་པར་གྱུར། ཛཿཧཱུྃ་བཾ་ཧོཿ ཡབ་ཡུམ་མཉམ་པར་སྦྱོར་བའི་དགའ་བའི་སྒྲ་དང་བདེ་བའི་

འོད་ཟེད་དམར་པོའི་འཕྲོ་འདུས་ཕྱོགས་བཅུའི་རྒྱལ་བ་ཐམས་ཅད་སྤྱན་དྲངས་པ་ཡབ་ཀྱི་ཞལ་དུ་ཞུགས། ཐུགས་ཀར་ཆགས་པ་ཆེན་པོའི་མེས་ཞུ་བ་སྐུའི་དབྱིབས་བརྒྱུད་རྡོ་རྗེའི་ལམ་ལས་ཡུམ་གྱི་པདྨར་བབས། བྱང་སེམས་དཀར་དམར་རོ་གཅིག་ཏུ་འདྲེས་པའི་རྒྱུན་མུ་ཏིག་གི་མདངས་ཆགས་པ་ཐོད་པའི་བདུད་རྩི་དང་དབྱེར་མེད་དུ་གྱུར་པ་དེ་ཉིད་ཁྱེད་རང་རྣམས་ཀྱི་ལྗགས་ཐོག་ཏུ་སྩལ་བའི་མོས་པ་མཛོད། [གསང་ཐོད་ཐོགས་ལ།] ཧཱུྃ༔ ཡེ་ཤེས་གསང་ཆེན་ཡངས་པའི་བྷ་དྷ་རུ༔ གསུང་གསང་འདུས་པའི་བཅུ་ཆེན་ཨ་མྲ་ཏ༔ སྐལ་ལྡན་ཁྱོད་ཀྱི་ངག་ཏུ་བླུད་པ་ཡིས༔ གསང་བའི་དབང་ཐོབ་ལོངས་སྐུར་སྨིན་གྲོལ་ཤོག༔ [རྩ་སྔགས།] བྷོ་དྷི་ཙི་ཏ་ཝཱ་ཀ་ཨ་བྷ་ཥ་ཉཙ་ཨཱཿ [ཞེས་མགྲིན་པར་བཞག་ལ་བདུད་རྩི་སྦྱིན།] རྣམ་གྲུ་པར་རྟོག་པ་མེད་པའི་སེམས་ཀྱིས་སསྔགས་འདིའི་རྗེས་ཟློས་དང་བཅས་མྱང་བར་མཛོད། ཨ་ཧོ་མ་ཧཱ་སུ་ཁ་ཧོཿ [ཞེས་མྱང་དུ་གཞུག །] དེ་ལྟར་བྱང་སེམས་ཡི་གེའི་སྦྲིན་ཨཱ་ལི་ཀཱ་ལིའི་རྣམ་པར་འཆར་བས་རྩ་གནས་ཐམས་ཅད་གང་བས་རྩའི་འཆིང་བྱེད་ཀྱི་མདུད་པ་གྲོལ། གཟུང་འཛིན་བརྒྱད་ཅུའི་རྟོག་པ་འགགས། ཐིག་རླུང་སེམས་གསུམ་ཡེ་ཤེས་ཆེན་པོའི་ངོ་བོར་བྱིན་གྱིས་བརླབས་ནས་བདེ་བའི་ཡེ་ཤེས་ཁྱད་པར་ཅན་རྒྱུད་

ལ་སྐྱེས་པར་མོས་ཤིག །སློབ་དཔོན་དཀྱིལ་འཁོར་གྱི་གཙོ་བོ་སྤྲུལ་པའི་སྐུ་ཤཱཀྱ་སེང་གེའི་རྣམ་པར་བཞེངས་ནས་ཁྱེད་རང་རྣམས་བྱང་ཆུབ་མཆོག་ཏུ་ལུང་བསྟན་པར་མོས་མཛོད། [ཅེས་སློབ་དཔོན་གྱི་ལག་གཡོན་པས་ཆོས་གོས་ཀྱི་གྲྭ་གཉིས་སེང་གེའི་རྣ་བ་ལྟར་བྱས་པ་སྙིང་གར་བཟུང་། གཡས་རྡོ་དྲིལ་ལྷན་ཅིག་ཏུ་བཟུང་བ་སློབ་མའི་སྨིན་ཐང་དུ་དཀྲོལ་ཞིང་།] འདིར་ནི་ཁྱོད་ལ་ངས་ལུང་བསྟན༔ རྡོ་རྗེ་གཞོན་ནུ་ཞེས་བྱ་བའི༔ སྲིད་པ་ཀུན་ལས་རྣམ་གྲོལ་བ༔ དེ་བཞིན་གཤེགས་པ་ཉིད་ཡིན་ནོ༔ ཨོ་སརྦ་ཏ་ཐཱ་ག་ཏ་བྷུ་བྷུ་བ་སྭ༔ འདི་ལྟར་ངས་ལུང་བསྟན་པ་ལྟར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་དཀྱིལ་འཁོར་གྱི་ལྷ་ཚོགས་ཐམས་ཅད་ཀྱིས་མགྲིན་གཅིག་ཏུ་ལུང་སྟོན་པར་མཛད་པ་ནི་སྔགས་འདི་དང་ཕྱག་རྒྱ་འདིའི་མཐུ་ཡིན་ནོ། །[ཞེས་ལུང་བསྟན།] དེ་ལྟར་ན་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་ཐོབ། རླུང་ཐ་མལ་དུ་འཛིན་པའི་བག་ཆགས་སྦྱངས་ཏེ་དག་གི་སྒྲིབ་པ་དག །ལམ་དུས་སུ་བདག་བྱིན་རླབས་རྫོགས་རིམ་ཙཎཌ་ལཱལི་རྣལ་འབྱོར་བསྒོམ་པ་ལ་དབང་། སྒྲ་སྐད་དང་རླུང་འབྱིན་འཇུག་གསང་སྔགས་སུ་དག་སྟེ། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །[གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ནི།]

དེ་ནས་ཤེས་རབ་ཡེ་ཤེས་ཀྱི་དབང་བསྐུར་ཞུ་བའི་དོན་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་ཞེ་བ་ཆེན་པོ་ཀྱེ༔ རྡོ་རྗེ་གཞོན་ནུ་བདག་ལ་དགོངས༔ རྡོ་རྗེ་པདྨ་སྦྱོར་བྱུང་བའི༔ བདེར་ཆཕན་ལམ་འདི་བདག་ལ་སྩོལ༔ [ལན་གསུམ།] ཁྱེད་རང་རྣམས་དཔལ་ཆེན་པོ་སྣང་སྟོང་སྒྱུ་མ་ལྟ་བུའི་སྐུར་གསལ་བ་ལ། སློབ་དཔོན་གྱིས་ཡུམ་འཁོར་ལོ་རྒྱས་འདེབས་མ་ལས་རིགས་མཐུན་གྱི་ལས་རྒྱ་གཟུགས་དང་ལང་ཚོ་མཚན་ཉིད་ཕུན་སུམ་ཚོགས་པ་ཞིག་རྣམ་པར་འཕྲུལ་པའི་ལག་གཡོན་པ་ནས་བཟུང་སྟེ་རྒྱལ་བ་ཐམས་ཅད་དཔང་པོར་གསོལ་ནས་ཁྱེད་རྣམས་ཀྱི་ལག་གཡས་སུ་གཏད་པའི་མོས་པ་མཛོད། [རིག་མའི་གཟུགས་བརྙན་གཏད་ལ།] ཧཱུྃ༔ སྟོང་པའི་བདག་ཉིད་ཤེས་རབ་དབྱིངས་ཀྱི་ཡུམ༔ བདེ་ཆེན་ཡེ་ཤེས་བསྐྱེད་པའི་མཛའ་ན་མོ༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡིས༔ བདེ་སྟོང་སྙོམས་འཇུག་ཆེན་པོར་ལོངས་སྤྱོད་ཅིང༔ དགའ་བ་བཞི་ཡི་ཡེ་ཤེས་ཉམས་སུ་མྱོང་༔ ཡིད་སྒྲིབ་དག་ནས་ཆོས་སྐུའི་ས་བོན་ཐེབས༔ ཤེས་རབ་ཡེ་ཤེས་དབང་མཆོག་ཡོངས་རྫོགས་ཤོག །[རྩ་སྔགས།] ཨོ་མ་ཧཱ་བྷོ་དྷི་ཛ་ན་མུ་དྲ་ཚི་དྷ་ཨ་བྷ་ཥ་ཉ་ཧཱུྃ༔ དེས་ཀྱང་ བ་མོའི་བརྟུལ་ཞུགས་ལ་སྤྱོད་པའི་

ནུས་པ་ཡོད་མེད་བརྟག་པའི་དོན་དུ་དྲི་བ་འདི་ལྟར་སྨྲས་པར་མོས་ཤིག །བདུད་རྩིའི་མཆོད་པ་བྱེད་པ་དང་༔ བུད་མེད་རྣམས་ལ་གུས་པ་དང་༔ བྷ་ག་ལ་ནིའོ་བགྱིད་པར༔ སྤྲོ་བར་གྱུར་རམ་བུ་ཡིས་སྨོས༔ དེ་ལྟར་དྲིས་པ་ལ་ནུས་ཤིང་སྤྲོ་བའི་ལན་བཏབ་པར་མོས་ལ་འདིའི་རྗེས་ཟློས་མཛོད། དྲི་ཆེན་དྲི་ཆུ་ལ་སོགས་འཚལ༔ བུད་མེད་རྣམས་ལ་རྟག་གུས་བགྱིད༔ བྷ་ག་ལ་ཡང་འོ་བྱེད་པར༔ བདག་ནི་སྤྲོ་བས་ཁྱོད་མཆོད་དོ༔ ཞེས་ལན་བཏབ་པས་རིག་མ་དེ་ཉིད་དགྱེས་ཏེ་ལུས་གོས་དང་བྲལ་བར་བྱས་པ་ལ་གུར་གུམ་ལ་སོགས་པའི་དྲི་ཞིམ་པོའི་ཆུས་བྱུགས། རྩ་མཛེས་པའི་ཆུ་སྐྱེས་ཀྱི་མདངས་ངོམས་ཏེ་པདྨའི་ཆེ་བ་བརྗོད་པར་མོས་མཛོད། ཨེ་མ་ད་ཡི་པདྨ་འདི༔ བདེ་བ་ཐམས་ཅད་འབྱུང་བའི་གནས༔ གལ་ཏེ་ཆོ་ག་བཞིན་བརྟེན་ན༔ སངས་རྒྱས་མཉེས་པ་ལ་སོགས་པའི༔ བྱ་བ་པདྨར་ཇི་བཞིན་ནོ༔ སྐྱེ་བོ་མ་རིག་རང་གར་སྤྱོད༔ ཐེ་ཚོམ་ཅན་རྣམས་འདི་སྤོང་བ༔ དེ་ལ་མཆོག་གི་དངོས་གྲུབ་མེད༔ ཅེས་གསུངས་ཏེ་པང་དུ་བྱོན་པར་མོས་ཤིག །དེ་ནས་ཁྱེད་རང་རྣམས་དཔལ་ཆེན་རྡོ་རྗེ་གཞོན་ནུ་དང་། རིག་མ་ཡུམ་འཁོར་ལོ་རྒྱས་འདེབས་མར་གསལ་བ་ལྷའི་འདུ་ཤེས། ཡབ་ཀྱི་གསང་

གནས་ཧཱ་ལས་རྡོ་རྗེ་ཧཱ་གིས་མཚན་པའི་ནོར་བུར་ཨོ་དང་རྩེ་མོར་ཕཊ་ཀྱིས་མཚན་པ། ཡུམ་གྱི་མཁའ་ཨ་ལས་པདྨ་ཨས་མཚན་པར་མོས་པ་སྡགས་ཀྱི་འདུ་ཤེས། ཐབས་འདི་ལ་བརྟེན་ནས་རང་གནས་ཀྱི་ཡེ་ཤེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་ལྡན་གྱི་སྒོ་ནས་ཡབ་ཡུམ་འཁྱུད་པ་དང་ཙུ་མ་བ་ན་དང་གསང་གནས་སྦྱར་ཞིང་རོལ་པས་རྗེས་ཆགས་བདེ་ཆེན་གྱི་ཡེ་ཤེས་ཆེས་ཆེར་འབར་བས་གཉིས་སྣང་གི་རྟོག་པ་ཐམས་ཅད་དབྱིངས་སུ་ནུབ་ནས་ཐིག་ལེ་དྭངས་མ་རྣམས་ཞུ་སྟེ། སྤྱི་བོ་ནས་མགྲིན་པར་བྱོན་པས་དགའ་བ། སྙིང་གར་མཆོག་དགའ། ལྟེ་བར་དགའ་བྲལ། མཁའ་གསང་གི་རྩེར་དཀར་དམར་གྱི་འདུ་འཕྲོག་ཞལ་མཇལ་བས་ལྷན་སྐྱེས་ཀྱི་དགའ་བ་ཉམས་སུ་མྱོང་། སླར་ཡང་རླུང་འཕོ་བ་མེད་པའི་སྟོབས་ཀྱིས་ཧཱ་ཞེས་ཡུམ་གྱི་དམར་ཆ་དང་ལྷན་ཅིག་གྱེན་དུ་དྲངས་པས་མས་བརྟན་གྱི་དགའ་བ་བཞི་ཉམས་སུ་མྱང་བར་བྱས་ཏེ་མཆོག་བྱེད་དཔེའི་ཡེ་ཤེས་བདེ་སྟོང་ལྷན་ཅིག་སྐྱེས་པའི་རང་ངོ་བརྗོད་བྲལ་གྱི་ངང་མདངས་དེ་ཉིད་ཅུང་ཟད་བསྐྱང་བར་ཞུ། [ཞེས་དར་གཅིག་བཞག །]དེ་ལྟར་ཟབ་མོའི་དབང་ཐོབ་པ་ལ་མཐའ་རྟེན་དུ་དབུགས་དབྱུང་བ་ནི།

འདོད་ཆགས་བྲལ་བ་ལྟ་བུའི་སྡིག༔ ཁམས་གསུམ་གནས་ན་སྡིག་མེད་དེ༔ དེ་བས་འདོད་ལ་ཆགས་བྲལ་བ༔ ཁྱོད་ཀྱི་ས་ནམ་ཡང་མ་བྱེད་ཅིག༔ [ཅེས་བསྒྲག།] དེ་ལྟར་ན་གསང་བ་ཆོས་ཐམས་ཅད་འབྱུང་བའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། གཟུང་འཛིན་གཉིས་སྣང་གི་རྟོག་ཚོགས་སྦྱངས་ཏེ་ཡིད་ཀྱི་སྒྲིབ་པ་དག །ལམ་དུས་སུ་ཕོ་ཉ་བདེ་བ་ཆེན་པོ་རྡོ་རྗེ་སེམས་དཔའི་གསེང་ལམ་བསྒོ་པ་ལ་དབང་། བདེ་སྡུག་བྱུང་ཚོར་ཐམས་ཅད་ལྷན་སྐྱེས་ཡེ་ཤེས་སུ་དག་ནས། འབྲས་བུ་ཐུགས་རྡོ་རྗེ་དག་པ་གཉིས་ལྡན་ཆོས་ཀྱི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། [བཞི་པ་ཚིག་དབང་རིན་པོ་ཆེ་བསྐུར་བ་ནི།] དེ་ནས་དབང་རྣམས་ཀུན་གྱི་མཐར་ཐུག་ཚིག་དབང་རིན་པོ་ཆེ་ཞུ་བའི་དོན་དུ་མཎྜལ་ཕུལ། གསོ་ལ་བ་འདེབས་པ་འདིའི་རྗེས་ཟློས་མཛོད། བདག་ཉིད་ཆེ་ཁྱོད་བཀའ་དྲིན་གྱིས༔ གཙོ་བོའི་དབང་བསྐུར་རྣམ་གསུམ་ཐོབ༔ དེ་རིང་རིན་ཆེན་བཞི་པ་ཡང་༔ བཀའ་དྲིན་གྱིས་ནི་བསྐྱང་དུ་གསོལ༔ [ལན་གསུམ།] ཁྱེད་རང་རྣམས་སྒོ་གསུམ ་མ་བཅོས་རང་བབས་སུ་ལྷོད་ཀྱིས་ཀློད་ལ་ལྟ་སྟངས་གཡོ་བ་མེད་པའི་དང་ནས་རིག་པ་སྐྱེས་འགག་གནས་གསུམ་དང་བྲལ་བའི་གཤིས་ལུགས་སྨྲ་བསམ་བརྗོད་བྲལ་གྱི་དང་

དུ་མཉམ་པར་ཞོག་ཅིག །[མན་ཤེལ་སྙིང་གར་གཏད་ལ།] ཧཱུྃ༔ ཆོས་དབྱིངས་བརདལ་ཁྱབ་ཆེན་པོའི་ཀློང་ཡངས་སུ༔ ལྷུན་གྲུབ་འགག་མེད་ལོངས་སྐུའི་ཚོམ་བུ་གསལ༔ མ་བཅོས་རང་བྱུང་རང་གསལ་འཇའ་ཤེལ་འདིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ སྒྲིབ་གཉིས་བག་ཆགས་དྲི་མ་ཀུན་བྲལ་ནས༔ ཀ་དག་སྐྱེ་མེད་ཚིག་གི་དབང་ཐོབ་ཤོག༔ [རྩ་སྔགས།] སརྦ་ཨ་བྷ་ཥ་ཉ་ཙ་ཨ༔ [འོད་ལྔའི་ཐིག་ལེ་གཏད་ལ།] ཧཱུྃ༔ དབྱིངས་རིག་ཟུང་འཇུག་བདེ་བ་ཆེན་པོའི་ཀློང་༔ སྐུ་དང་ཡེ་ཤེས་ལྷུན་གྲུབ་ཐིག་ལེ་ཤར༔ སྐལ་ལྡན་བུ་མཆོག་ཁྱོད་ལ་དབང་བསྐུར་རོ༔ སྣང་བཞི་མཐར་ཕྱིན་འཇའ་ལུས་སྐུ་ཐོབ་ཤོག༔ རྩ་སྔགས། སརྦ་ཀཱ་ཡ་ཛཉའ་ན་ཨ་བྷ་ཥ་ཉཙ་ཨཿ ཨ་ཨ་ཨ་ཕཊ༔ དེའང་རང་སེམས་སྟོང་གསལ་རིག་པའི་སྙིང་པོ་ཅན་འདི་ནི་ཤེལ་གོང་དྭངས་པ་ལ་གཟུགས་བརྙན་གྱི་ཚོན་རིས་སྣ་ཚོགས་སུ་འཆར་ཡང་ཤར་བ་ཉིད་དམིགས་སུ་མེད་ཅིང་དངོས་པོར་མ་གྲུབ་པ་བཞིན་དུ། སེམས་ཀྱི་གཤིས་ལུགས་ཡེ་ནས་དངོས་མཚན་ཅན་དུ་གྲུབ་པ་མེད་པས་སྟོང་སང་ངེ་བ། སྟོང་པའི་རང་མདངས་འགགས་མེད་དུ་སྣང་བས་གསལ་ལྷང་ངེ་བ། སྟོང་གསལ་གཉིས་མེད་ཀྱི་རང་རྩལ་སྣ་ཚོགས་པར་ཤར་ཡང་དོན་ལ་སྤྲོས་པའི་མཚན་

མས་དབེན་པ་འདི་ཉིད་སེམས་ཀྱི་གནས་ལུགས་དྲི་མ་མེད་པ་སྟེ། རིག་པའི་ངོ་བོ་ཀ་དག་ཁྱབ་བརྡལ་ཕྱོགས་མཐའ་ཐམས་ཅད་དང་བྲལ་བ་དེ་ཀ་ཆོས་སྐུ་གདོང་མའི་མགོན་པོ་ཀུན་ཏུ་བཟང་པོ་ཞེས་བྱ་བ་ཡིན་ནོ། །གདངས་མ་འགག་རང་བཞིན་སྐུ་དང་ཡེ་ཤེས་ཀྱི་རོལ་པར་ལྷུན་གྱིས་གྲུབ་པ་ནི་ལོངས་སྐུ་རིགས་ལྔ་གངས་ཆེན་མཚོའི་བཀོད་པའོ། །ཐུགས་རྗེའི་རྩལ་ཀུན་ཁྱབ་ཅིར་ཡང་འཆར་བ་ནི་སྤྲུལ་པའི་སྐུའོ། །དེ་གསུམ་ཡང་ཐ་དད་དུ་མ་ཡིན་པར་ད་ལྟའི་ཐ་མལ་གྱི་ཤེས་པ་གསལ་རིག་རྗེན་ནེ་བ་སྤྲོས་པ་ཐམས་ཅད་དང་བྲལ་བ་འདི་ཉིད་སྐུ་གསུམ་དབྱེར་མེད་དཔལ་ཆེན་ཧེ་རུ་ཀའི་དགོངས་པར་ངོ་ཤེས་པས་རང་སྣང་སྐུ་དང་ཡེ་ཤེས་འདུ་འབྲལ་མེད་པའི་དབྱིངས་སུ་མཉམ་པར་ཞོག་མཛོད། དེའི་མཐའ་རྟེན་དུ་གཟེངས་བསྟོད་པར་བྱ་བ་ཡིན་ཏེ། འདུད་འདུལ་དཀྱིལ་འཁོར་ཆེན་པོ་རུ༔ དབང་མཆོག་བསྐུར་བས་སྡིག་ལས་གྲོལ༔ འབྲས་བུ་གྲུབ་པའི་དགེ་བ་ནི༔ ཐོབ་པས་ཁྱོད་ནི་འབྲས་དང་བཅས༔ དེ་ལྟར་ན་དོན་དམལ་བྱང་ཆུབ་སེམས་ཀྱི་དཀྱིལ་འཁོར་དུ་རིག་པའི་རྩལ་དབང་ཐོབ། སྒོ་གསུམ་ཐ་དད་དུ་འཛིན་པའི་ཤེས་བྱའི་སྒྲིབ་པ་ཆེས་ཕྲ་བ་སྦྱོངས། ལམ་དུས་སུ་ཁྲེགས་ཆོད་ཐོད་རྒལ་ཟུང་འཇུག་རྫོགས་རིམ་

མཐར་ཐུག་པའི་རྣལ་འབྱོར་ཆེན་པོ་བསྒོམ་པ་ལ་དབང་། སྣང་བཞི་ཟད་སར་འཁྱོལ་ཏེ། འབྲས་བུ་ངོ་བོ་ཉིད་སྐུ་ཀུན་བཟང་ཧེ་རུ་ཀའི་གོ་འཕང་མངོན་དུ་བྱེད་པའི་སྐལ་བ་ཁྱད་པར་ཅན་དུ་བྱས་པ་ཡིན་ནོ། །[ལྔ་པ་བྱིན་རླབས་ཡོངས་རྫོགས་གཏོར་མའི་དབང་བསྐུར་བ་ནི།] དེ་ནས་བྱིན་རླབས་ཡོངས་རྫོགས་གཏོར་མའི་དབང་གི་སླད་དུ། དཔལ་གྱི་གཏོར་ཆེན་འདི་ཉིད་བཅོམ་ལྡན་འདས་རྡོ་རྗེ་གཞོན་ནུའི་ལྷ་ཚོགས་དངོས་སུ་གསལ་བའི་སྟེང་གི་ཆ་ལ་རིག་འཛིན་བརྒྱུད་པའི་བླ་མ། བར་གྱི་ཆ་ལ་ཡི་དམ་རྒྱུད་སྡེའི་ལྷ་ཚོགས། འོག་གི་ཆ་ལ་མཁའ་འགྲོ་དམ་ཅན་སྲུང་མའི་ཚོགས་དང་བཅས་པ་དྭངས་པའི་མཚོ་ལ་གཟའ་སྐར་ཤར་བ་བཞིན་བཀྲ་ལམ་མེར་དགྱེས་འཛུམ་བྱིན་གྱིས་རློབ་པའི་དགོངས་པ་དང་ལྡན་པས་བཞུགས་པ་ལ། མོས་འདུན་དྲག་པོས་གསོལ་བ་བཏབ་པའི་རྐྱེན་གྱིས་ཁྱེད་རང་རྣམས་ཀྱི་སྤྱི་བོར་བྱོན། གསང་བ་གསུམ་གྱི་བྱིན་རླབས་ཐམས་ཅད་འོད་ཟེར་བདུད་རྩིའི་རྣམ་པར་ཆར་རྒྱུན་བཞིན་བབས་པས་ལུས་དག་ཡིད་གསུམ་གྱི་འགལ་རྐྱེན་ནད་གདོན་བར་ཆད་སྡིག་སྒྲིབ་ཐམས་ཅད་ལྷག་མེད་དུ་སྦྱངས། སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་དབང་བྱིན་དངོས་

གྲུབ་མ་ལུས་པ་ཆིག་རྫོགས་སུ་ཐོབ་པའི་མོས་པ་མཇོད། [གཏོར་ཆེན་གནས་གསུམ་དུ་བཞག་ལ།] ཧཱུཾ༔ གཞི་དབྱིངས་ཁྱབ་བརྡལ་ཡངས་པའི་སྣོད་མཆོག་ཏུ༔ ལྷུན་གྲུབ་བཀོད་པ་རྫོགས་ལྡན་གཏོར་ཆེན་པོ༔ ཐབས་ཤེས་སྒྱུ་འཕྲུལ་དྲྭ་བའི་འཁོར་ལོར་རྫོགས༔ དབང་དང་བྱིན་རླབས་དངོས་གྲུབ་ཆར་རྒྱུན་འབེབས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ རིགས་དང་དཀྱིལ་འཁོར་ཀུན་ལ་དབང་ཐོབ་ཤོག༔ [རྩ་སྔགས།] ཀཱ་ཡ་ཝཱ་ཀ་ཙི་ཏ་སརྦ་བ་ལིང་ཏ་ཨ་བྷ་ཥ་ཉཙ་ཨོཾ་ཨཱཿཧཱུྃ་སྭའ་ཧཱུྃ༔ [ཞེས་དང་། སླར་ཡང་སྦྱི་བོར་བཞག་སྟེ།] ཁྱབ་བདག་ཀུན་ཏུ་བཟང་པོ། དཔལ་ཆེན་ཁྲག་འཐུང་རིགས་ལྔ། རིག་འཛིན་རྡོ་རྗེ་ཆོས་རབ། མཁའ་འགྲོ་བདེ་བའི་འཁོར་ལོ། སློབ་དཔོན་པྲ་བྷ་ཧ་སྟི། ཨོ་རྒྱན་པདྨ་ཐོང་ཕྲེང་། མཁར་ཆེན་ཡེ་ཤེས་མཚོ་རྒྱལ། འབྲོག་བན་ཁྱེའུ་ཆུང་ལོ་ཙཱ། ཁྲག་འཐུང་བདུད་འཇོམས་དཔའ་བོ། འགྱུར་མེད་དེས་དོན་དབང་པོ་ལ་སོགས་ཏེ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་དང་། སངས་རྒྱས་ཐམས་ཅད་ཀྱི་ཕྲི ན་ལས་མི་ཟད་པ་རྒྱན་གྱི་འཁོར་ལོའི་མཐུ་སྟོབས་གཅིག་ཏུ་འདུས་པ་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་མཁའ་འགྲོ་བཀའ་སྡོད་དམ་ཅན་རྒྱ་མཚོའི་

ཚོགས་དང་བཅས་པས་རྡོ་རྗེའི་སློབ་མ་འདི་རྣམས་ཀྱི་རྒྱུད་ལ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་སྒོ་ནས་བྱིན་གྱིས་བརླབ་ཏུ་གསོལ། ནད་གདོན་སྡིག་སྒལཚིབ་བགེགས་དང་བར་དུ་གཅོད་པ་ཐམས་ཅད་ཉེ་བར་ཞི་བ་དང་། ཚེ་དང་བསོད་ནམས་དཔལ་དང་འབྱོར་པ་ཐམས་ཅད་འཕེལ་ཞིང་རྒྱས་པ་དང་། ཁམས་གསུམ་སྐྱེ་འགྲོ་རླུང་སེམས་སྣང་བ་ཐམས་ཅད་དབང་དུ་འདུ་བ་དང་། གཉིས་སྣང་ལོག་འདྲེན་དགྲ་བགེགས་འབྱུང་པོ་ཐམས་ཅད་ཚར་གཅོད་པ་དང་། བྱང་ཆུབ་ཀྱི་སེམས་རྣམ་པ་གཉིས་རྒྱུད་ལ་སྐྱེས་ནས་མྱུར་དུ་ཕྱག་རྒྱ་ཆུ་བཅུདཕན་པོ་མཆོག་གི་དངོས་གྲུབ་དཔལ་ཆེན་རྡོ་རྗེ་གཞོན་ནུའི་གོ་འཕང་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། [ཞེས་བཀའ་བསྒོ་བྱས་མཐར།] ཛཿཧཱུྃ་བཾ་ཧོཿ [ཞེས་བརྗོད་པས།] གཏོར་མའི་ལྷ་ཚོགས་འོད་དུ་ཞུ་སྟེ་ཁྱེད་རང་རྣམས་ལ་སིབ་ཀྱིས་ཐིམ་པས་དཔལ་ཆེན་པོའི་གསང་བ་གསུམ་དང་གཉིས་སུ་མེད་པའི་ངོ་བོར་ལྷུན་གྱིས་གྲུབ་པའི་མོས་པ་མཛོད་ཅིག །[ཅེས་གཏོར་མའི་རས་མ་བདུད་རྩི་དང་བསྲེས་པ་དངོས་གྲུབ་ཏུ་སྦྱིན་ནོ། །གཉིས་པ་ས་གསུམད་ལས་དགྲ་བགེགས་སྒྲོལ་བའི་དབང་ནི།] དེ་རྣམས་ཀྱིས་བྱང་ཆུབ་སྒྲུབ་པའི་ཕུར་བུའི་དགོངས་པ་གསུམ་དང་འབྲེལ་བ་སྟོད་ལས་ཀྱི་དབང་བསྐུར་

བ་གྲུབ་ནས། ད་ནི་མཚན་མ་རྫས་ཀྱི་ཕུར་བུས་དགྲ་བགེགས་བསྒྲལ་བ་ས་གསུམད་ལས་མངོན་སྤྱོད་དམོད་པའི་རྗེས་གནད་ཟབ་མོ་ཞུ་བའི་དོན་དུ་མཎྜལ་ཕུལ། [ཞེས་མཚོན་ཆའི་མཎྜལ་འབུལ་དུ་གཞུག །]གསོལ་བ་འདེབས་པ་འདིའི་རྗེས་ཟློས་མཛོད། ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་ཕྱིར༔ ལས་སྦྱོར་དབང་བསྐུར་སྩལ་དུ་གསོལ༔ [ལན་གསུམ་ཞུས་པའི་ལན་དུ།] ཧཱུྃ༔ གང་གིས་འདུལ་བར་མི་འགྱུར་བའི༔ གདུག་པ་ཅན་རྣམས་བསྒྲལ་བ་དང་༔ སངས་རྒྱས་བསྟན་པ་བསྲུང་དོན་དུ༔ མངོན་སྦྱོད་དབང་འདི་སྦྱིན་པར་བྱ༔ [ཞེས་གནང་བ་སྦྱིན།] དེའང་མངོན་སྤྱོད་དྲག་པོ་སྒྲོལ་བའི་རྗེས་སུ་གནང་བ་སྒྲུབ་པ་ལ། ཕྲིན་ལས་རྩཨམ་པ་པོ་ལྟ་བ་ཆོས་ཉིད་ཀྱི་རྫོང་ལ་ཞུགས་ཤིང་། སྒོམ་པ་བསྐྱེད་རྫོགས་ཀྱི་འཕྲང་ལ་འགྲིམ་སྟེ། སྤྱོད་པ་སྙིང་རྗེའི་སྲོག་དང་ལྡན་པས། བརྩམ་པའི་ཡུལ་ཉམས་པ་བདུན་ལྡན་གྱི་དགྲ་བ་གེགས་རྣམས་ལ། ཇི་ལྟར་རྩོམ་པའི་ཕྲིན་ལས་ཀྱི་རིམ་པ་རྣམས་འོག་ནས་འབྱུང་བའི་ཚིག་རིས་དང་མཐུན་པར་དོན་གྱི་དགོངས་པ་གསལ་འདེབས་པར་མཛོད། [ཅེས་བརྡ་སྦྱར་ལ། སྨད་ལས་བཞིན་གསེར་སྐྱེམས་ཀྱི་མཆོད་པ་སྔོན་དུ་འགྲོ་བས། བྲུབ་ཁུང་

བསྐྱེད་ཅིང་འགུག་གཞུག་བྱ་བ་ནས་བཟུང་སྨྱོ་རུ་གཞུག་པའི་བར་དཀྱུས་བཞིན་སོང་ནས།] དེ་ནས་ཚེ་ཁྲུས་ཀྱི་དགོངས་པས་བསྒྲལ་དབང་གི་དངོས་གཞིའི་ལས་མཐར་དབྱུང་བའི་སླད་དུ་དམིགས་པ་འདི་བཞིན་དུ་ངེས་མཛོད། དེའང་དང་པོར་མི་ལྡོག་པའི་ཕྱིར་རང་ཉིད་དཔལ་ཆེན་རྡོ་རྗེ་གཞོན་ནུ་དངོས་སུ་གསལ་བ་དང་། མི་རྡུགས་པའི་ཕྱིར་ཕྱག་མཚན་ཕུར་པ་སྲས་མཆོག་དངོས་སུ་གསལ་བ་དང་། མི་འབྱམས་པའི་ཕྱིར་ལིངག་དགྲ་བོ་དངོས་སུ་གསལ་བ་ནི་གསལ་བ་གསུམ་ལྡན་གྱི་ཏིང་ངེ་འཛིན་ཡིན་ལ། བདག་ཉིད་རྩ་བའི་དཀྱིལ་འཁོར། མཚན་མ་རྫས་ཀྱི་དཀྱིལ་འཁོར། ཕྱོགས་བཅུ་ཁྲོ་བོའི་དཀྱིལ་འཁོར་གསུམ་པོའི་ལྷ་ཚོགས་ཐམས་ཅད་ཀྱི་གནས་གསུམ་དུ་ཨ་དཀར་པོ་རེ་རེ་གསལ་བ་ལས་འོད་ཟེར་འཕྲོས་ཕྱོགས་བཅུའི་སངས་རྒྱས་ཐམས་ཅད་ཨ་དཀར་པོ་བྱ་དཀར་གདངས་ལ་བསྒྲིགས་པ་ལྟ་བུའི་རནམ་པར་བྱོན་ནས་དཀྱིལ་འཁོར་གསུམ་ལ་ཐིམ་པས་བདག་གི་ལུས་ངག་ཡིད་གསུམ་གྱི་སྒྲིབ་པ་སྦྱངས་ཏེ་བདེ་སྟོང་གི་ངང་དུ་རོ་གཅིག་པར་བསམ་པ་ནི་བདག་རྣལ་འབྱོར་པའི་ཁྲུས་ལུང་། ཡང་དཀྱིལ་འཁོར་གསུམ་པོའི་གནས་གསུམ་གྱི་ཨ་དཀར་ལས་འཕྲོས་པའི་འོད་ཀྱིས་འཕགས་པ་

མཆོད་བྱིན་རླབས་བསྡུས་ཁམས་གསུམ་སེམས་ཅན་ཐམས་ཅད་ཀྱི་སྡི ་སྒྲིབ་སྦྱངས་ཡི་དམ་ལྷའི་གོ་འཕང་ལ་བཀོད་པར་བསམ་པ་ནི་ཁམས་གསུམ་སེམས་ཅན་གྱི་ཁྲུས་ལུང་། ཡང་འོད་ཟེར་ཚུར་འདུས་དགྲ་བགེགས་ཀྱི་གནས་གསུམ་དུ་ཐིམ་པས་ཁོའི་ལས་དན་གྱི་སྡིག་སྒྲིབ་སྦྱངས་བསྒྲལ་བའི་སྐལ་ལྡན་དུ་གྱུར་པར་མོས་པ་ནི་གཟས་པོ་དགྲ་བགེགས་ཀྱི་ཁྲུས་ལུང་སྟེ་ཁཚུས་ལུང་རྣམས་པ་གསུམ་ཡིན་ཅིང་། དེའི་དང་པོ་ནི་འདྲ་བ་དཔེའི་སྒོ་ནས་ཨ་དཀར་བྱ་དཀར་གྱི་དགོངས་པ་དང་། གཉིས་པ་བདག་ཕུར་ལི་ངག་གསུམ་དགོངས་པ་གཅིག་གིས་འབྲེལ། དམ་ཚིག་གཅིག་གིས་འབྲེལ། ཆོས་ཉིད་གཅིག་གིས་འབྲེལ་སླད་ཐུགས་རྗེ་འབྲེལ་ཐག་གི་དགོངས་པ་དང་། སྤྱིར་སེམས་ཅན་ཐམས་ཅད་སྒོས་བསྒྲལ་བྱའི་ཞིང་དེ་ཉིད་མྱུར་དུ་མ་བསྒྲལ་ན་ལས་ངན་ཚབས་པོ་ཆེ་བསགས་ཏེ་འཁོར་བར་འཁྱམས་དགོས་པར་མཐོང་ནས་ཚད་མེད་སྙིང་རྗེས་མི་གཏོང་བ་གདུང་སེམས་ལུ་གུ་རྒྱུད་ཀྱི་དགོངས་པ་སྟེ། དགོངས་པ་རྣམ་གསུམ་གྱི་དོན་ཚང་། དེ་ནས་ལིང་ག་དགྲ་བགེགས་དངོས་སུ་གསལ་བའི་སྙིང་དཀར་ནག་མཚམས་སུ་སྲོག་གི་ངོ་བོ་ཚེ་རྟེན་སྡོམ་གྱི་བལ་རྒྱ་འདྲ་བ་དེའི་ནང་དུ་ཁྲག་

སྦལ་བྱེའུ་ལན་པའི་མགོ་བོ་ཙམ་གྱི་དབུས་སུ་ཀུན་གཞིའི་རྣམ་ཤེས་ཀྱི་ངོ་བོར་གྱུར་པའི་ཡི་གེ་ཨ་དཀར་པོའི་ཁོད་པར་ཐིག་ལེ་འོད་ཀྱི་རང་བཞིན་ཅན་གྱི་ལྟེ་བར་ཡི་གེ་ནྲ་དུད་ཁ་མར་མེ་འཆི་ཁའི་དོད་ལྟ་བུ་སྔོ་སྐམ་སྐམ་པ་ཞིག་ཡོད་པ་དེ་ལ་དམིགས་ཏེ་ཕུར་རྩེ་བསྒྲིལ་ཞིང་བཏབ་པས་ཕུར་རྩེའི་འོད་ཟེར་མེའི་ཚྭ་ཚྭ་ལྟ་བུ་དང་རྩེ་མོའི་རྣོ་དབལ་གྱིས་ཚེ་སྲོག་བལ་རྒྱ་འདྲ་བ་དེ་དབྲལ་རྣམ་ཤེས་མར་མེ་ལ་ཕུས་བཏབ་པ་ལྟར་ནག་ཐུམ་གྱིས་སོང་། ནྲ་ཐིག་ལེ་ཨ་དང་བཅས་པ་ཏོག་གིས་བླངས་ནས་ཕུར་རྩེལ་ཡེར་རེ་ཡོད་པ་རང་གི་སྙིང་གར་ཐིམ་པས་རྡོ་རྗེའི་ཚེ་སྲོག་གི་སྟོབས་བསྐྱེད། ཨོཾ་བཛྲ་ཀཱ་ལི་ཀཱ་ལ་ཡ་ཧཱ་ཕཊ། [ལན་གསུམ།] ཅེས་བརྗོད་ཅིང་ཕུར་པའི་དབལ་ནས་བཟུང་སྟེ་ཀླད་ལ་ལན་གསུམ་བསྐོར་བས་དེ་ལས་རང་འདྲའི་ཕུར་བུ་དཔག་མེད་འཕྲོས་པས་སྣང་སྲིད་ཐམས་ཅད་ཕུར་བུས་གང་ཞིང་གཟི་བརྗིད་འབར། བདག་གི་ཐུགས་ཀ་ནས་འོད་ཟེར་གྱི་སྣེ་ལ་མཆོད་པའི་ལྷ་མོ་འདོད་ཡོན་ཐོགས་པ་དཔག་མེད་འཕྲོས། སྣང་སྲིད་ཕུར་བུའི་ལྷ་ཚོགས་མཆོད་པས་མཉེས་ཤིང་ཚིམས། སྐུ་གསུང་ཐུགས་ཀྱི་དབང་དང་དངོས་གྲུབ་ཐམས་ཅད་འོད་ཟེར་དཀར་དམར་མཐིང་

གསུམ་གྱི་རྣམ་པར་བྱུང་བ་རང་ལ་ཐིམ། ཕུར་རྩེ་གྱེན་དུ་བསྟན་པ་དང་ལྷན་ཅིག་ཧཱ་ཧཱ་ཧཱ་ཞེས་བརྗོད་པའི་རྐྱེན་གྱིས་བདག་གི་ཐུགས་ཀ་ནས་འོད་ཟེར་བ་ཐག་ལྟ་བུའི་སྣེ་ལ་དགྲ་བགེགས་ཀྱི་རྣམ་ཤེས་ཨ་དཀར་པོ་ཙན་གྱིས་བླངས་ནས་སྐར་མདའ་འཕངས་པ་ལྟར་སོང་། ཕཊ་ཕཊ་ཕཊ་ཅེས་འོག་མིན་དུ་རྡོར་སེམས་ཡབ་ཡུམ་གྱི་སྦྱོར་མཚམས་སུ་འཕངས་པས་རྒྱལ་བའི་སྲས་སུ་སྐྱེས་པར་བསམ་པ་ཁྱད་པར་ཅན་གྱི་ཚེ་ལུང་དང་གསོ་བའི་ལུང་སྟེ། དེ་ལྟ་བུའི་དམིགས་པའི་གནད་དང་ལྡན་པས་གདབ་པའི་ལས་རིམ་ལ་འཇུག་པར་འཚལ། [སྲས་ཕུར་གཏད་ལ།] ཧཱུྃ༔ གཟུང་འཛིན་རཱ་དྲ་ཕོ་མོའ་ཕུང་ཁམས་གཟུགས༔ འཇིགས་བྱེད་ལས་ཀྱི་མཚོན་ཐུན་དར་ལྡན་པ༔ སྐལ་ལྡན་སྐྱེས་བུ་ཁྱོད་ལ་གཏད་པ་ཡིས༔ ཁམས་གསུམ་འཁོར་བ་ཡོངས་སྒྲོལ་དབང་ཐོབ་ཤོག༔ [རྩ་སྔགས།] རཱ་དྲ་ཨ་མུ་ཀ་མཱ་ར་ཡ་རྦད་ཨ་བྷ་ཥ་ཉཙ་ཧཱུྃ༔ [ཞེས་གཏད།] ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ [ཞེས་སོགས་ཀྱིས་ཕུར་པ་ཐོག་མར་སློབ་དཔོན་གྱིས་འདྲིལ་ཞིང་རྗེས་ལ་སློབ་མའི་ལག་ཏུ་གཏད་དེ་ལིངག་གདབ་ཏུ་གཞུག །དེ་ནས་གདབ་ཕུར་ཐོགས་ལ།] ཧཱུྃ༔ དྲག་པོ་ཆེན་པོ་དྲག་ཤུལ་ཅན༔ [ཞེས་སོགས་ཀྱིས་ཕུར་བུ་གནས་སོ་སོར་གདབ་ཅིང་སྤུ་གྲིའི་དྲག་སྔགས་བཟླ་བཞིན་དུ་ཐུན་རྫས་ཀྱིས་བྲབ། སྨད་ལས་བཞིན་དུམ་བུར་བཏུབ་

ཅིང་རྡུལ་དུ་བརླག་པ་དང་ཞལ་དུ་སྟོབ་པ་བཅས་གཏད་ལ་ལིང་རོའི་ཕུད་དཔལ་གྱི་གཏོར་མར་སྦྲོན་ཅིད་ཆ་ཤས་སྲེག་ཧོམ་དུ་འབུལ་རྒྱུར་འཇོག །བ ་པ་སློབ་མ་ལྷར་གསལ་བ་ལ་བཀྱེ། ལྷག་མ་ཚོགས་ལྷག་ཏུ་བླུག་གོ །]དེ་ལྟར་བསྒྲལ་ལས་དངོས་གཞིའི་རིམ་པ་སོང་ནས་མཐའ་སྡུད་ལས་ཀྱི་སྦྱོར་བ་ལས། བསད་པའི་མཐའ་སྡུད་སྲེག་པ་ཧོམ་གྱི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད། [མེ་ཧོམ་སྦར་བ་བསང་སྦྱང་།] སྟོང་པའི་ངང་ལས་དྲག་པོའི་ཐབ་ཁུང་གྲུ་གསུམ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་དུ་དཔལ་ཆེན་རྡོ་རྗེ་གཞོན་ནུ་སྤྲུལ་འཁོར་དང་བཅས་པ་ཤིན་ཏུ་རྔམས་པའི་ཆ་ལུགས་ཞལ་གནམ་ས་ཙམ་དུ་གདངས་ནས་བཞུགས་པ་ལ། དགྲ་པ་གེགས་བསྒྲལ་བའི་ཤ་ཁྲག་བདུད་རྩིའི་རྒྱ་མཚོར་སྦར་བ་ཞལ་དུ་བསྟབས་པས་དགྱེས་པའི་བཞད་སྒྲ་དང་བཅས་ལྷག་མེད་དུ་རོལ་བའི་མོས་པ་མཛོད། [དགང་གཟར་བླུགས་མར་ནག་ལིང་རོ་སོགས་སྲེག་རྫས་རྣམས་གཏད་ལ།] ཧཱུྃ༔ ལས་ཀྱི་དགང་གཟར་མེ་ཧོམ་བཅས༔ སྐལ་ལྡན་ཁྱོད་ལ་གཏད་པ་ཡིས༔ དྲག་པོའི་ཞལ་གྱི་ཧོམ་ཁུང་དུ༔ དགྲ་བགེགས་བསྟབ་བསྲེག་དབང་ཐོབ་ཤོག༔ [རྩ་སྔགས།] སརྦ་ཤ་ཏྲ་མཱ་ར་ཡ་ཨ་གེན་ཛ་ལ་ར་ཨ་བྷ་ཥ་ཉཙ་ཧཱུྃ༔ [ཞེས་དང་སྤུ་གྲིའི་སྔགས་ཤམ་དུ།] དགྲ་བགེགས་དམ་སྲི་ཛ་ལ་ར་ཁཱ་ཧི༔ [ཞེས་བཏགས་པས་འབུལ་དུ་གཞུག་མཐར།] མ་

ལྷ་ཆོས་ཀྱི་དབྱིངས་སུ་གཤེགས་པར་མོས་ཤིག །དེ་ནས་ཟློག་པའི་མཐའ་སྡུད་འཕང་བ་ཟོར་གྱི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད། ཏོར་མ་འདི་ཉིད་དཔལ་ཆེན་རྡོ་རྗེ་གཞོན་ནུ་སྤྲུལ་འཁོར་ཕོ་ཉ་སྡེ་བརྒྱང་དྲེགས་པའི་དམག་ཚོགས་དགྲ་བགེགས་སྒྲོལ་བའི་ལས་ལ་རྔམས་པར་གསལ་བ་ཁྱེད་རང་རྣམས་ཀྱི་ལག་ཏུ་གཏད་པ་ཙམ་གྱིས་ཕས་རྒོལ་གནོད་བྱེད་ཐམས་ཅད་སྐད་ཅིག་ཉིད་ལ་རྡུལ་ཕྲན་བཞིན་དུ་བརླག་པར་ནུས་པའི་མཐུ་དབང་ཐོབ་པར་མོས་མཛོད། [གཏོར་ཟོར་གཏད་ལ།] ཧཱུྃ༔ དྲག་པོ་ལས་ཀྱི་གཏོར་ཟོར་འདི་གཏད་པས༔ མངོན་སྤྱོད་ཟོར་འཕེན་ལས་ལ་བརྩོན་པ་ཡི༔ ཞིང་བཅུའི་བདུད་སྡེ་མ་ལུས་བརླག་བྱེད་པའི༔ ཐོགས་མེད་དྲག་པོ་མཐུ་ཡི་དབང་ཐོབ་ཤོག༔ [རྩ་སྔགས།] ནྲ་ཏྲི་ཀ་ལ་རཱ་པ་མཱ་ར་ཡ་རྦད་བྷྱ་ཀརྨ་ཨ་བྷ་ཥ་ཉཙ་ཧཱུྃ༔ [ཞེས་གཏད་དེ་གསེར་སྐྱེམས་འབུལ་ཞིང་ཟོར་སྒོ་དབྱེ། གཏོར་མའི་ལྷ་ཚོགས་སློབ་མར་བསྟིམས་ནས་གཏོར་མ་ནད་མཚོན་དུག་གི་ཕུང་པོར་བསྒྱུར་ཏེ་ལས་བྱང་བཞིན་ཟོར་བསྐུལ་དྲག་སྔགས་དམོད་མོ་དང་བཅས་དཔོན་སློབ་ལྷན་ཅིག་པས་གནོད་པའི་ ཕྱོགས་སུ་འཕེན་ནོ། །]དེ་ནས་སྲུང་བའི་མཐའ་སྡུད་གཏད་ཁྲོམ་མནན་པའི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད། དཔལ་གྱི་རི་རབ་འབར་བ་འདི་ཉིད་ཁྱེད་རང་རྣམས་ཀྱི་ལག་ཏུ་གཏད་པས་དགྲ་འདྲེ་དམ་སྲི་འབྱུང་པོའི་

ཚོགས་ཀྱི་ལུས་ངག་ཡིད་གསུམ་གྱི་མཐུ་རྩལ་ནུས་པ་ཐམས་ཅད་ནགམ་ཡང་ལྡང་མེད་གནོན་པའི་ཕྲིན་ལ་མངའ་བརྙེས་པའི་མོས་པ་མཛོད། [རི་རབ་གཏད་ལ།] ཧཱུྃ༔ མི་ཤིགས་དུག་ལྔའི་ལས་ལས་གྲུབ་པ་ཡི༔ ཐར་མེད་བདུད་ཀྱི་བཙོན་ཁང་ནག་པོ་རུ༔ དགྲ་བགེགས་མ་ལུས་བཀུག་ཅིང་བྲུབ་ནས་སུ༔ ལྡང་མེད་བསྐལ་པར་གནོན་པའི་དབང་ཐོབ་ཤོག༔ [རྩ་སྔགས།] སརྦ་ཤ་ཧྲུ་མཱ་ར་ཡ་ནན་ཨ་བྷ་ཉཙ་ཧཱུྃ༔ [ཞེས་གཏད། གོང་གི་ཐལ་བསྒོ་ཐེམས་འོག་ཏུ་དོང་གྲུ་གསུམ་བྲུས་པར་མནན་ལ་གཏོར་གཞོང་སྦུབས་པའི་སྟེང་དུ་རྡོ་རྗེས་རྒྱས་བཏབ་ལྟེ་ལས་བྱང་བཞིན་རྟ་བྲོ་བརྡུང་ངོ་།] དེ་རྣམས་ཀྱིས་མངོན་སྤྱོད་དྲག་པོའི་རྗེས་གནང་གྲུབ་པ་ཡིན་པས། དེང་ནས་བརྩམས་ཏེ་སྣང་སྲིད་ཐལ་འབྱིན་གྱི་དགོངས་པས་ཕུར་བུ་རྣམ་བཞི་ཡུལ་སོ་སོར་གདབ་པའི་ལས་ལ་བརྩོན་པར་གྱིས་ཤིག །[གསུམ་པ་མཐའ་རྟེན་ཚེཕའི་དབང་བསྐུར་བ་ནི།] དེ་ནས་མཐའ་རྟེན་འཆི་མེད་ཚེའི་དབང་བསྐུར་ཟབ་མོ་ཞུ་བའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཧོཿ རྡོ་རྗེ་སློབ་དཔོན་དགོངས་སུ་གསོལ༔ དུས་གསུམ་རྒྱལ་བའི་གདུང་གསོབ་པའི༔ རིག་འཛིན་བདག་ཅག་རྣམས་ལ་ནི༔ ཚེ་དབང་དངོས་གྲུབ་བསྩལ་དུ་གསོལ༔ [ལན་གསུམ།] སློབ་དཔོན་དཔལ་ཆེན་ཚེའི་བདག་པོའི་ངོ་བོར་བཞུགས་པའི་ཐུགགས་ཀ་ནས་

འོད་ཟེར་དམར་པོ་ལྕགས་ཀྱུའི་དབྱིབས་ཅན་འཁོར་འདདས་ཁྱབ་པར་འཕྲོས། ཁྱེད་རང་རྣམས་ཀྱི་བླ་ཚེ་འཁྱམས་པ་ཡར་བ་བརྐུས་པ་འཕྲོག་པ་ལ་སོགས་པ་ཐམས་ཅད་དང་། བརྟན་གཡོ་སྣོད་བཅུད་ཀྱི་དྭངས་མ། རྩ་གསུམ་རྒྱལ་བ་སྲས་དང་བཅས་པའི་ཚེའི་བྱིན་རླབས་ཐམས་ཅད་འོད་ཟེར་ཁ་དོག་སྣ་ཚོགས་པའི་རྣམ་པར་བསྡུས་ཏེ་ཁྱེད་རང་རྣམས་དང་མདུན་གྱི་ཚེ་རྫས་ལ་སིབ་ཀྱིས་ཐིམ་པས་འཆི་མེད་རྡོ་རྗེའི་བཅུད་ལེན་ད་གྱུར་པའི་མོས་པ་མཛོད། [མདའ་དར་གཡབ་ཅིང་།] ཧཱུྃ༔ དབུས་ནས་རང་བྱུང་གྲུབ་པའི་ལྷ༔ [ཞེས་སོགས་ཀྱིས་ཚེཕ་འགུགས་བསྐུལ།] ཚེ་ཡི་འབྲང་རྒྱས་འདི་ཉིད་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་དུ་གསལ་བ་སྦྱི་བོར་བཞག་སྟེ་དབང་བསྐུར་བའི་ཚེཕ་སྐུ་གསུང་ཐུགས་ལས་འཆི་མེད་བདུད་རྩི་འོད་ཟེར་གྱི་རྒྱུན་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྤྱི་བོ་ནས་ཞུགས་ལུས་ཀྱི་ནང་ཐམས་ཅད་གང་བས་གསང་གསུམ་མི་ཤིགས་རྡོ་རྗེའི་ཚེ་དབང་དམ་པ་ཐོབ་པའི་མོས་པ་མཛོད། [ཚེ་འབྲང་སྤྱི་བོར་བཞག་ལ།] ཧཱུྃ༔ སྲིད་པའི་ཕུར་བུ་བདག་གིས་བསྒྲུབ་པ་དང་༔ ཚེ་དབང་དངོས་གྲུབ་མ་ལུས་བླང་བའི་ཕྱིར༔ ཡེ་ཤེས་ཁྲོ་རྒྱལ་ཆེན་པོ་གཤེགས་སུ་གསོལ༔ ཁྲོ་ཆེན་འབར་བ་འཁོར་བཅས་གཤེགས་ནས་ཀྱང་༔ རྟགས་དང་མཚན་མ་མྱུར་དུ་

བསྟན་པ་དང་༔ བཙ་ཀཱ་ལའི་ཚེ་དབང་དངོས་གྲུབ་སྩོལ༔ [རྩ་སྔགས།] ཀཱ་ཡ་ཝཱ་ཀ་ཙི་ཏཏ་སརྦ་སི་དྷི་ཕ་ལ་ཧཱ་ཧཱ་ཧཱ་ཧྲ༔ ཛ་ཛ༔ ཧཱ་བིབིབ་གུ་ཎ་བཛསརྦ་སི་དྷ་ཧྲིཿ [ཞེས་དབང་བསྐུར་ཞིང་། ཚེ་རིལ་དང་ཚེ་ཆང་སྦྱིན།] བཀྲ་ཤིས་ལོངས་སྤྱོད་ཞལ་ཟ ས་ཚོགས་ཀྱི་ཡོ་བྱད་སྣ་ཚོགས་བྱིན་པས་དཔལ་འབྱོརག་སྙན་གྲགས་དབང་ཐང་ཕྱྭ་གཡང་རིགས་བརྒྱུད་སོགས་བདེ་ཆེན་ཡེ་ཤེས་ཀྱི་ལོངས་སྤྱོད་ནམ་མཁའ་མཛོད་ཀྱི་དཔལ་ཆེན་པོ་ལ་མངའ་བརྙེས་པའི་མོས་པ་མཛོད། [དངོས་གྲུབ་ཀྱི་རྫས་གཏད་ལ།] ཧཱུྃ༔ གཞོང་པ་རྣམ་དག་ཉི་ཟླའི་སྣོདད་ནང་དུ༔ ཞལ་ཟས་སྣ་ཚོགས་བདུད་རྩིའི་རྒྱ་མཚོར་འཁྱིལ༔ སྐལ་ལྡན་རིགས་ཀྱི་བུ་ཡིས་ལོངས་སྤྱད་པས༔ བདེ་ཆེན་ཡེ་ཤེས་མཆོག་དང་ལྡན་པར་ཤོག༔ [ཅེས་རོལ་དུ་གཞུག །] བརྟན་གཡོའི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འུབ་ཀྱིས་འདྲིལ། ལུས་ལ་རྡོ་རྗེའི་གོ་ཆ་ཞུ་ལུགས་སུ་བགོས་ཏེ་དཔལ་ཆེན་པོ་དང་དབྱེརབ་མེད་པའི་གཞོམ་བྲལ་རྡོ་རྗེའི་སྲོག་དང་འགྲིབ་མེད་གཞོན་ནུའི་ལང་ཚོ་ཡོངས་སུ་རྫོགས་པའི་མོས་པ་མཛོད། [མགོ་བོར་མདའ་དདར་རྒྱ་གྲམ་དུ་བཀོད་ལ།] བྷ༔ ཚེ་ཡི་དངོས་གྲུབ་རྒྱུད་གསུམ་པོ༔ རྩ་སྲོག་ཙི་ཊའི་དཀྱིལ་དུ་བསྟིམ༔ ཅིས་ཀྱང་མི་ཆོད་མི་ཤིགས་པའི༔ རྡོ་རྗེ་གཞོན་ནུའི་སྲོག་ཐོབ་ཤོག༔ ཨ་ཡུ་རྫ་ན་ཨ་ཨ་ཨ༔ [ཞེས་

རྒྱས་གདབ།] དེ་ནས་བཀྲ་ཤིས་པའི་རྫས་རྟགས་དང་རྒྱལ་སྲིད་རིན་པོ་ཆེ་སྣ་བདུན་རྣམས་རིམ་པར་ཕྱག་ཏུ་གཏད་ཅིང་མངའ་གསོལ་བལ་འཇིག་རྟེན་དང་འཇིག་རྟེན་ལས་འདས་པའི་བདེ་ལེགས་ཀྱི་དཔལ་ཡོན་ཇི་སྙེད་པ་ལ་མངའ་བརྙེས་པའི་མོས་པ་མཛོད། [རྫས་བརྒྱད་གཏད་ལ།] ཧཱུྃ༔ རྒྱལ་བའི་བྱིན་གྱིས་བརླབས་པའི་བཀྲ་ཤིས་རྫས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ མི་མཐུན་ཕྱོགས་རྣམས་ཀུན་ལས་རྣམ་རྒྱལ་ཞིང་༔ བཀྲ་ཤིས་ཡོན་ཏན་ཕུན་སུམ་ཚོགས་པར་ཤོག༔ མངག་ལ་ཨ་བྷ་ཥ་ཉཙ་ཧཱུྃ༔ [རྟགས་བརྒྱད་གཏད་ལ།] ཧཱུྃ༔ སྔོན་ཚེ་བཅོམ་ལྡན་རྒྱལ་པའི་དབང་པོ་ཡི༔ མཚན་དཔེ་ལས་བྱུང་བཀྲ་ཤིས་རྟགས་བརྒྱད་ཀྱིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ མཚན་དཔེ་ཡོན་ཏན་རྫོགས་པའི་སྐུ་ཐོབ་ཤོག༔ སརྨ་མངག་ལ་པུནྱ་ཨ་བྷ་ཥ་ཉཙ་ཧཱུྃ༔ [སྣ་བདུན་གཏད་ལ།] ཧཱུྃ༔ འཁོར་ལོའི་བསྒྱུར་རྒྱལ་བསོད་ནམས་ལས་གྲུབ་པའི༔ རྒྱལ་སྲིད་ལོངས་སྤྱོད་རིན་ཆེན་སྣ་བདུན་འདིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཁམས་གསུམ་ཆོས་ཀྱི་རྒྱལ་པོའི་སྲིད་ཐོབ་ཤོག༔ སྭ་སྟི་དྷརྨ་རཱ་ཛ་ཨ་བྷ་ཥ་ཉཙ་ཨ༔ མ་ཎ་ར་ཏན་སི་དྷི་ཧཱུྃ༔ [ཞེས་གཏད།] ནམ་མཁའ་གང་བའི་ལྷ་ཚོགས་རྣམས་ཀྱིས་ཤིས་པ་བརྗོད་པའི་གླུ་དབྱངས་

སྒྲོག་ཅིང་མེ་ཏོག་སྣ་ཚོགས་ཀྱི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་བྱིན་རླབས་ནུས་མཐུ་ཐམས་ཅད་རབ་ཏུ་བརྟན་ཅིང་མི་ཉམས་གོང་འཕེལ་དུ་བྱས་པའི་མེས་པ་མཛོད། [ཅེས་རྟེན་འབྲེལ་སྙིང་པོ་བཟླས་པའི་མེ་ཏོག་འཐོར་ཞིང་ལས་བྱང་ནས་འབྱུང་བས་མཚོན་ཤིས་བརྗོད་རྒྱ་ཆེར་སྤེལ་ལོ། །རྩ་བའི་གསུམ་པ་རྗེས་ཀྱི་ལས་རིམ་ལ་གཉིས། ད བང་གི་རྗེས་རིམ་དང་། ཆོ་གའི་རྗེས་རིམ་མོ། །དང་པོ་ནི།] དེ་ལྟ་ན་དེ་དག་རྣམས་ཀྱི་སྒོ་ནས་རྡོ་རྗེ་ཕུར་བུ་བདུན་འཇོམས་གནམ་ལྕགས་སྤུ་གྲིའི་དཀྱིལ་འཁོར་དུ་རྩ་བའི་དབང་ཆེན་ཡོངས་སུ་རྫོགས་པ་རིག་འཛིན་བརྒྱུད་པའི་ཕྱག་བཞེས་བཞིན་ལེགས་པར་གྲུབ་པ་སྟེ། ཟབ་མོའི་དཀྱིལ་འཁོར་འདི་ལྟ་བུར་དབང་ཐོབ་ཅིང་ལམ་བསྒོམ་ན་བརྩོན་འགྲུས་དང་སྐལ་པ་རབ་ཚེ་འདིར་གྲོལ། འབྲིང་འཆི་ཚེ་མཁའ་སྤྱོད་དུ་འགྲོ། ཐ་མ་སྐྱེ་བ་བརྒྱུད་ནས་དཔལ་ཆེན་པོའི་གོ་འཕང་འཐོབ་ཅིང་། ཡང་ཐ་དད་ཅིང་ཐེ་ཚོམ་མེད་པ་ཁོ་ནས་ཀྱང་དཔལ་ཆེན་པོས་རྗེས་སུ་འཛིན་པར་འགྱུར་ཏེ། བཤད་རྒྱུད་ལས། རྩེ་གཅིག་འདི་ལ་བརྩོན་ལྡན་པས། །འཁོར་བར་མི་ལྡོག་མངོན་འཚར་རྒྱ། །གང་གིས་དབང་དང་མན་ངག་ཐོབ། །སྐད་ཅིག་ཙམ་གྱིས་མོས་གྱུར་ན། །འཆི་བ་ཞེས་ནི་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་འགྱུར། །གང་ཞིག་འདི་ལ་མོས་པ་

ཙམ། །དབང་དང་དམ་ཚིག་འཛིན་གྱུར་ན། །སྐྱེ་བདུན་ཉིད་ནས་འཚང་རྒྱ་འགྱུར། །སྐྱེ་བ་གཞན་གྱིས་བར་མི་ཆོད། །འདི་ལ་ཐེ་ཚོམ་ལེ་ལོ་སྤང་། །ཞེས་གསུངས་པ་ལྟར་ལགས་པས་དང་མོས་སྤྲོ་བ་རྒྱ་ཆེན་པོ་བསྐྱེད་པ་དང་། དབང་གི་སྲོག་རྡོ་རྗེ་ཐེག་པའི་དམ་ཚིག་ས་མ་ཡ་འབུམ་སྡེ་སྤྱི་དང་ཁྱད་པར་གྱིས་བསྡུས་པ་མཐའ་དག་གཞུང་ནས་ཇི་སྐད་བཤད་པ་ལྟར་ཚུལ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས་མཛོད། གཙོ་བོའི་ཇི་ལྟར་[སོགས་ལན་གསུམ།] དབང་བསྐུར་རྫོགས་པར་ཐོབ་པའི་གཏང་རག་ཏུ་མཎྜལ་ཕུལ། སླར་ཡང་ལུས་ ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་ཐམས་ཅདད་ཀུན་ཏུ་བཟང་པོའི་མཆོད་སྤྲིན་ཆེན་པོར་སྤྲོས་ཏེ་འབུལ་ན་ཆ་ཤས་རེ་རེ་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་[སོགས་ལན་གསུམ།] དེ་ལྟར་དབང་བསྐུར་ཟབ་མོ་ཐོབ་པ་ལས་བྱུང་བའི་དགེ་བའི་རྩ་བ་རྣམས་བླ་ན་མེད་པའི་བྱང་ཆུབ་ཆེན་པོར་ཡོངས་སུ་བསྔོ་བའི་རྒྱས་འདེབས་ལྷན་ཅིག་ཏུ་མཛད་པ་དང་། ཟབ་ཆོས་འདི་ཉིད་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་སྒྲུབ་པར་ཞུ། བསོད་ནམས་འདི་ཡིས་[སོགས་ཀྱིས་དགེ་བ་བསྔོས་ཏེ་སློབ་མ་རྣམས་རང་གནས་སུ་བཏང་ངོ་། །གཉིས་པ་ཆོ་གའི་རྗེས་རིམ་ནི། སློབ་དཔོན་གྱིས་ཚོགས་ལ་རོལ་ཞིང་ལྷག་མ་བཏང་།

ཆོས་སྐྱོང་གི་གཏོར་སྐྱོབང་དང་ཆད་བརྟན་རྟ་བྲོ། གཏང་རག་གི་མཆོད་བསྟོད་ནོངས་བཤགས། བརྟན་བཞུགས་བསྡུ་ལྡང་། བསྔོ་སྨོན་ཤིས་བརྗོད་བཅས་ལས་བྱང་བཞིནན་མཐའ་རྒྱས་སུ་བྱའོ། །]མཁའ་འགྲོའིཧ་སྙིང་ཁྲག་རིག་མཆོག་བྱེ་བའི་བཅུད། །གནམ་ལྕགས་སྤུ་གྲིའི་སྨིན་ལམ་བདུད་རྩིའི་རྒྱུན། །རྣམ་གྲོལ་མཆོག་དངོས་འདོད་པ་རབ་འཇོ་བའི། །ནམ་མཁའ་མཛོདད་ཀྱི་དགའ་སྟོན་དེང་འདིར་སྤྲོས། །བསོད་ནམས་དེས་ཀྱང་སྣང་སྲིད་ཐལ་འབྱིན་དུ། །ཕུར་བུ་རྣམ་བཞིས་ཐོགས་མེད་འདེབས་པ་ལ། །ཁྲག་འཐུང་རྡོ་རྗེ་སྲིན་པོའི་སྟོབས་བཅུའི་དཔལ། །ཡོངས་རྫོགས་བདུད་ལས་རྣམ་པར་རྒྱལ་གྱུར་ཅིག །དེ་ལྟར་དཔལ་རྡོ་རྗེ་ཕུར་བུ་བདུད་འཇོམས་གནམ་ལྕགས་སྤུ་གྲིའི་རྩ་བའི་དབང་བསྐུར་གྱི་ཆོ་ག་སྨིན་གྲོལ་འདོད་འཇོའི་དགའ་སྟོན་ཅེས་བྱ་བ་འདི་ནི། རང་གཞན་མང་པོ་ལ་སྨན་པའི་བསམ་པ་ཉེ་བར་བསྐྱེདད་ནས་དབང་ཆོག་རྩ་བའི་གཞུང་ལ་ཁ་སྐོང་དུ་འོས་པ་རྣམས་གཏེར་ལ་རིགས་མཐུན་ལས་བླངས་ཤིང་ཕྱག་ལེན་འཇུག་པ་བདེ་བའི་མཚམས་སྦྱོར་གགསལ་བྱེད་ཀྱིས་རྣམ་པར་བརྒྱན་ཏེ། རིག་པ་འཛིན་པའི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་སུམ་ཅུ་རྩ་གཅིག་ཏུ་སོན་པ་ཤིཧང་པོ་ཁྱིའི་ལོ་ས་ག་ཉ་བའི་ཡར་ངོའི་དགའ་བ་གསུམ་པ་ལ་མཁན་ལྗོངས་ཕུན་ཚོགས་དགའ་ཚལ་གྱི་བསྟི་གནས་སུ་གྲུབ་བར་བགྱིས་སྟེ། འདིས་ཀྱང་ཟབ་མོའི་ལམ་གྱི་རིང་ལགས་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག །སརྦ་མངྒ་ལཾ།། །།