བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་བཀའ་འབུམ།

དཀྱིལ་འཁོར་ཐམས་ཅད་ཀྱི་ངོ་བོ་བླ་མ་མཆོད་པའི་ཆོ་ག་གཞན་ཕན་ཕྲིན་ལས་དང་བཅས་པ་ཚོགས་ཆེན་ཤིང་རྟ།

༄༅། །དཀྱིལ་འཁོར་ཐམས་ཅད་ཀྱི་ངོ་བོ་བླ་མ་མཆོད་པའི་ཆོ་ག་གཞན་ཕན་ཕྲིན་ལས་དང་བཅས་པ་ཚོགས་ཆེན་ཤིང་རྟ་ཞེས་བྱ་བ་བཞུགས། །

ཨོཾ་སྭསྟི། མི་འགྱུར་བདེ་ཆེན་གཉུག་མའི་ཡེ་ཤེས་ནི། །བསམ་ཡས་སྒྱུ་འཕྲུལ་དྲྭ་བའི་ཟློས་གར་ཅན། །མ་ལུས་རིགས་ཀྱི་ཁྱབ་བདག་ཧེ་རུ་ཀ །དཔལ་ལྡན་བླ་མའི་ཞབས་པད་སྤྱི་བོས་བསྙེན། །གང་ལ་མ་བསྟེན་ཐར་ལམ་འཐོབ་མིན་ཅིང་། །གུས་པས་མཆོད་ལས་གཏན་བདེའི་དབུགས་འབྱིན་པ། །མགོན་ཁྱོད་མཉེས་བྱེད་མན་ངག་ཟླ་ཟེར་གྱིས། །ཚོགས་ཟུང་ཆུ་གཏེར་སྤེལ་ལ་ཅིས་མི་སྤྲོ། །[དེའང་ངེས་པར་བླ་ན་མེད་པའི་དངོས་གྲུབ་མྱུར་དུ་སྒྲུབ་པར་འདོད་པའི་གང་ཟག་སྐལ་པ་མཆོག་གིས་ཁྱད་པར་དུ་བྱས་པ་རྣམས་ཀྱིས་བརྩོན་པར་བྱ་བའི་ཐབས་ཀྱི་སྙིང་པོར་གྱུར་པ་ནི་ལམ་

འདི་ཁོ་ན་ཡིན་ཏེ། དེའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །] [དང་པོ་ལ་ལྔ་ལས། ཐོག་མར་རྟེན་མཆོད་བཤམ་པ་ནི། དབེན་ཅིང་ཡིད་དུ་འོང་བའི་གནས་ཁང་རྒྱན་གྱིས་བརྒྱན་པར་དཔལ་ལྡན་བླ་མའི་སྐུའི་སྣང་བརྙན་སོགས་རྟེན་ཁྱད་པར་ཅན་བསོད་ནམས་ཀྱི་ཞིང་དུ་བཞུགས་སུ་གསོལ་བའི་སྤྱན་སྔར་སྒྲུབ་པའི་མཎྜལ་མེ་ཏོག་གི་ཚོམ་བུ་བཀོད་པའི་མདུན་དུ་ཕྱི་ནང་གི་མཆོད་པའི་དངོས་པོ་ཇི་ལྟར་འབྱོར་པ་བུངས་བསྐྱེད་དེ་གཙང་ཞིང་བཀོད་པས་ཚར་དུ་དངར་བརབཤམ། གཞན་ཡང་མཆོད་པའི་མཎྜལ། རོལ་མོའི་བྱེ་བྲག ཚོགས་དང་གཏོར་མའི་ཡོ་བྱད་སོགས་ཉེ་བར་མཁོ་བའི་ཆ་རྐྱེན་རྣམས་ལེགས་པར་འདུ་བྱའོ། །] གཉིས་པ་སྔོན་གཏོར་གཏོང་བ་ནི། བདེ་བའི་སྟན་ལ་བསམ་གཏན་གྱི་སྤྱོད་

ལམ་དང་མཐུན་པས་འདུག་སྟེ།] བཛྲ་མ་ཧཱ་ཤྲཱི་ཧེ་རུ་ཀོ྅་ཧཾ། རང་ཉིད་སྐད་ཅིག་གིས་རྡོ་རྗེ་ཧེ་རུ་ཀ་སྐུ་མདོག་སྔོན་པོ་ཁྲོ་བོའི་ཆས་ཅན་རྡོ་རྗེ་དང་དུང་ཁྲག་འཛིན་པའི་སྐུར་གྱུར་པར་[བསམ་ཞིང་། གཏོར་མ་]རཾ་ཡཾ་ཁཾ་[གིས་བསྲེག་གཏོར་བཀྲུས།] སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་བལྟས་ལ། ཨོཾ་ཨཱཿཧཱུྃ་[ས་བྱིན་བརླབ།] བྷཱུ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿ[ས་མགྲོན་སྤྱན་དྲངས།] བྷཱུ་མི་པ་ཏིས་པ་རི་ཝཱ་ར་ཨ་ཀཱ་རོ་[སོགས་གསུམ་གྱིས་གཏོར་མ་བསྔོས་ཏེ།] གང་དག་འདི་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །སྔགས་སྤྱོད་དོན་དུ་ས་ཕྱོགས་འདི། །བདག་ཞུ་ཁྱེད་ཀྱིས་སྩལ་དུ་གསོལ། །བྷཱུ་མི་པ་ཏི་ས་པ་རི་ཝཱ་ར་གཙྪ། [ཞེས་པས་གནང་བ་བྱིན་ནས་རང་གནས་སུ་གཤེགས་པར་བསམ།] [གཏོར་མ་གཉིས་པ།] ཨོཾ་སརྦ་བིགྷྣཱཾ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུ་ཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། [ཞེས་ལན་གསུམ་གྱིས་བསྔོས་ནས།] ཧཱུྃ། རྣལ་འབྱོར་ཆེན་པོའི་དཀྱིལ་འཁོར་འདིར། །

གསང་བའི་དམ་ཅན་སོ་སོ་ནས། །འདུ་བའི་ལྷ་ནི་མ་གཏོགས་པ། །ཐམས་ཅད་ཐུགས་རྗེས་བསྐངས་ཟིན་གྱིས། །ད་ལྟ་ཉིད་དུ་སོ་སོར་དེངས། །ཅི་སྟེ་མི་འགྲོ་འདུག་གྱུར་ན། །རྡོ་རྗེ་ཁྲོ་བོའི་ཚོགས་རྣམས་ཀྱིས། །དེ་མ་ཐག་ཏུ་བཀས་ནས་ནི། །བདུན་བརྒྱུད་རིགས་ཀྱང་བརླག་པར་འགྱུར། །[ཅེས་བཀའ་བསྒོས་ལ།] ཧཱུྃ་ཧཱུྃ་ཧཱུྃ་བི་ཤྭ་བཛྲ་ཀྲོ་ངྷ་ཛྭ་ལ་མཎྜ་ལ་ཕཊ་ཕཊ་ཕཊ། ཧ་ལ་ཧ་ལ་ཧ་ལ་ཧཱུྃ། [ཞེས་དྲག་སྔགས་ཡུངས་ཐུན་སྤོས་རོལ་དང་བཅས་པས་བགེགས་རྣམས་བསྐྲད་དོ། །] [གསུམ་པ་མཚམས་བཅད་པ་ནི།] ཁྲོ་སྤྲིན་མེ་མཚོན་དང་བཅས་པས་བགེགས་ཐམས་ཅད་བསྡིགས་བསྐྲད་བརླག་པར་བྱས། ཚུར་འདུས་པ་ལས་རྡོ་རྗེ་དང་ཁྲོ་བོ་རོལ་པའི་གུར་ཁང་ཡེ་ཤེས་ཀྱི་མེ་འབར་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པའི་སྲུང་བའི་འཁོར་ལོས་ཁྱབ་པར་བསམ་མོ། །[བཞི་པ་རྒྱུད་སྦྱོང་བ་ནི།] བླ་མ་རིག་འཛིན་དཀོན་མཆོག་རྩ་གསུམ་རྒྱ་མཚོའི་སྤྲིན་ཕུང་འཕྲོ་བ་མདུན་གྱི་ནམ་མཁར་བཛྲ་ས་མཱ་ཛཿས་མཁའ་ཁྱབ་ཏུ་སད་པར་[མོས་ལ།] རྡོ་རྗེ་སློབ་དཔོན་སངས་རྒྱས་དཔལ། །དུས་

གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་དཔའ་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བསྒྲངས་པའི་དགེ་བ་རྣམས། །བསྡུས་ནས་བྱང་ཆུབ་མཆོག་ཏུ་བསྔོ། །[ཞེས་ལན་གསུམ་གྱིས་རྒྱུད་སྦྱངས་ནས།] བཛྲ་མུཿ[ས། ཚོགས་ཞིང་རྣམས་རང་ལ་ཐིམ་པར་བསམ།] [ལྔ་པ་མཆོད་རྫས་བྱིན་གྱིས་བརླབ་པ་ནི།] རཾ་ཡཾ་ཁཾ་[གིས་བསང་སྦྱང་།] བདག་གི་ཐུགས་ཀ་ནས་རཾ་ཡཾ་ཁཾ་འཕྲོས་པ་ཡེ་ཤེས་ཀྱི་མེ་རླུང་ཆུར་གྱུར་པས་མཆོད་རྫས་ཀྱི་ཉེས་སྐྱོན་དྲི་མ་ཐམས་ཅད་བསྲེག་གཏོར་བཀྲུས་ཏེ་སྟོང་པར་སྦྱངས། སྟོང་

པའི་ངང་ལས་གནས་ཁང་འོག་མིན་མངོན་པར་དགའ་བའི་གཞལ་མེད་ཁང་ཕུན་སུམ་ཚོགས་པར་རིན་པོ་ཆེ་དང་པདྨ་ལ་སོགས་པའི་སྣོད་བཟང་ཞིང་རྒྱ་ཆེ་བ་རྣམས་སུ་ཧཱུྃ་ཡིག་ལས་བྱུང་བའི་ཕྱི་ནང་གསང་བའི་མཆོད་པའི་ཡོ་བྱད་འདོད་པའི་ཡོན་ཏན་སོ་སོའི་མཚན་ཉིད་ཐམས་ཅད་ཡོངས་སུ་རྫོགས་པ་རྒྱལ་བའི་ཞིང་ཀུན་ཏུ་ཁྱབ་པར་འཆར་བས་ནམ་མཁའ་རབ་འབྱམས་གང་བ་རྣམས་སུ་གྱུར་པར་[བསམ་ཞིང་།] ཨོཾ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ་[ནས།] ཤཔྡའི་[བར་དང་།] ཨོཾ་སརྦ་པཉྩ་ཨ་མྲྀ་ཏ་ཨཱཿཧཱུྃ། ཨོཾ་མ་ཧཱ་རཀྟ་ཨཱཿཧཱུྃ། ཨོཾ་མ་ཧཱ་བ་ལི་ཏཾ་ཨཱཿཧཱུྃ། [ཞེས་པ་རྣམས་ལན་བདུན་རེས་བྱིན་གྱིས་བརླབ་ཅིང་།] བཛྲ་སྥར་ཎ་ཁཾ་[གིས་མཆོད་སྤྲིན་མཁས་ཁྱབ་ཏུ་སྤེལ་ལོ། །] [གཉིས་པ་དངོས་གཞི་ལ་ལྔ་ལས། དང་པོ་ཚོགས་རྟེན་དམ་ཚིག་པ་གསལ་གདབ་པ་ནི།] ཨོཾ་མ་ཧཱ་ཤུ་ནྱཱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། འཁོར་འདས་ཆོས་ཀུན་མི་དམིགས་སྤྲོས་བྲལ་ངང་། །འགགས་མེད་སྙིང་རྗེའི་ཡེ་ཤེས་ཟུང་འཇུག་ལས། །སྐད་ཅིག་རང་ཉིད་གཉུག་མའི་ལྷར་སད་པ། །རྡོ་རྗེ་སེམས་

དཔའ་དཀར་གསལ་ཟླ་བའི་མདོག །ཞི་འཛུམ་ལོངས་སྤྱོད་རྫོགས་སྐུའི་རྒྱན་གྱིས་མཛེས། །ཕྱག་གཡས་རྡོ་རྗེ་གཡོན་པས་དྲིལ་བུ་འཛིན། །ཞབས་གཉིས་པད་ཟླར་རྡོར་སྐྱིལ་འཇའ་འོད་ཀློང་། ཆུ་ལམ་ཉ་ལྡང་ཚུལ་དུ་གསལ་བར་གྱུར། རང་གི་མདུན་གྱི་ནམ་མཁར་གདོད་མ་ནས། །འཁོར་འདས་ཡོངས་དག་ལྷུན་གྲུབ་རྒྱལ་བའི་ཞིང་། །ཡེ་ཤེས་རང་སྣང་གཞལ་མེད་ཁང་ཆེན་དབུས། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་ཀུན་འདུས་ཞལ་གཅིག་ཆོག་ཆོས་ཀྱི་རྗེ། །བཀའ་དྲིན་མཉམ་མེད་རྩ་བའི་བླ་མ་ནི། །རྣམ་པ་རིགས་ཀུན་ཁྱབ་བདག་རྡོ་རྗེ་སེམས། །སྐུ་མདོག་དཀར་གསལ་གངས་ཀྱི་རི་བོ་ལ། །ཉི་གཞོན་སྟོང་གིས་འཁྱུད་པའི་གཟི་བརྗིད་འབར། །སྒེག་ཅིང་འཛུམ་ལ་རབ་ཏུ་རྒྱས་པའི་ཞལ། །མཚན་དཔེས་རབ་མཛེས་ཞལ་གཅིག་ཕྱག་གཉིས་པ། །ཕྱག་གཡས་རྡོ་རྗེ་རྩ་ལྔ་ཐུགས་ཀར་གསོར། །གཡོན་པས་དྲིལ་བུ་དཀུར་བརྟེན་ཡུམ་ལ་འཁྱུད། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །ཡུམ་མཆོག་རྡོ་རྗེ་སྙེམས་

མ་ཟླ་བའི་མདོག །གྲི་གུག་ཐོད་འཛིན་མགུལ་ནས་འཁྱུད་པ་དང་། །མཉམ་པར་སྦྱོར་ཞིང་ཡབ་ཡུམ་གཉིས་ཀ་ཡང་། མཉེན་ལྕུག་འཁྲིལ་ལྡེམ་ཡིད་འཕྲོག་གཞོན་ནུའི་ཚུལ། །གསལ་འཚེར་ལྷུན་སྡུག་གཟི་བྱིན་འབར་བ་སྟེ། །ཞི་ཚུལ་དགུ་ལྡན་དར་དཀར་སྟོད་གཡོགས་དང་། དབང་པོའི་གཞུ་ལྟར་བཀྲ་བའི་སྨད་དཀྲིས་ཅན། །ཅོད་པན་ཟི་ལྡིར་གར་གྱི་ཕུ་དུང་སྟེ། །ལྷ་རྫས་ལས་གྲུབ་དར་གྱི་ཆས་ལྔས་ཀླུབས། །རིན་ཆེན་དབུ་རྒྱན་སྙན་ཆ་མགུལ་པའི་རྒྱན། །ཕྱག་ཞབས་གདུ་བུ་སྐ་རགས་དོ་ཤལ་དང་། །སེ་མོ་དོ་སྟེ་རྒྱན་ཆ་བརྒྱད་ཀྱིས་སྤྲས། །མཐའ་ཡས་འོད་ཟེར་འབར་ཞིང་འཁྲུགས་པའི་དབུས། བདེ་སྟོང་གཉིས་སུ་མེད་པའི་ངོ་བོར་བཞུགས། །ཕུང་པོ་རིགས་ལྔ་ཁམས་རྣམས་དབྱིངས་ཕྱུག་ཡུམ། །ཚོགས་བརྒྱད་དབང་ཡུལ་སེམས་དཔའ་སེམས་མ་དང་། །ཡན་ལག་མཐར་བྱེད་ཡབ་ཡུམ་བརྒྱད་ལ་སོགས། །རབ་འབྱམས་ཞི་ཁྲོའི་དཀྱིལ་འཁོར་འཁོར་ལོའི་སྤྲིན། །གསང་གསུམ་མི་ཟད་རྒྱན་གྱི་

འཁོར་ལོ་རྫོགས། །དེ་མཐར་བརྒྱུད་གསུམ་རིག་འཛིན་བླ་མ་དང་། །ཡི་དམ་ཞི་ཁྲོ་སངས་རྒྱས་བྱང་ཆུབ་སེམས། །མཁའ་འགྲོ་དམ་ཅན་རྒྱ་མཚོའི་སྤྲིན་ཕུང་འཁྲིགས། །གང་འདུལ་མོས་ངོར་ཅིར་ཡང་འཆར་བར་གྱུར། །དེ་ལྟར་གསལ་བའི་སྤྱི་བོར་ཨོཾ་དཀར་པོ། །མགྲིན་པར་ཨཱཿདམར་ཐུགས་ཀར་ཧཱུྃ་སྔོན་པོ། རྒྱལ་ཀུན་རྡོ་རྗེ་གསུམ་གྱི་ངོ་བོར་གསལ། ཐུགས་ཀའི་ཧཱུྃ་ལས་འཕྲོས་པའི་འོད་ཟེར་གྱིས། །ཕྱོགས་བཅུ་དུས་བཞིའི་དེ་བཞིན་གཤེགས་པ་ཀུན། །ཆོས་སྐུ་འགྱུར་མེད་དང་ལས་གཟུགས་སྐུའི་སྤྲིན། །རྩ་གསུམ་ལྷ་ཚོགས་རྣམ་པར་སྤྱན་དྲངས་གྱུར། །[ཅེས་གསལ་བཏབ་བོ། །] [གཉིས་པ་ཡེ་ཤེས་ཀྱི་འཁོར་ལོ་སྤྱན་འདྲེན་པ་ནི། སྤྲོས་བཏུལ་ཞིང་རོལ་མོའི་སྒྲ་དང་གདུང་བའི་དབྱངས་སྙན་པོས་བསྐུལ་ཏེ]། ཨོཾ། ཆོས་ཀྱི་དབྱིངས་ཀྱི་ཕོ་བྲང་ནས། །སྐྱེ་མེད་བླ་མ་གཤེགས་སུ་གསོལ། །ལོངས་སྤྱོད་རྫོགས་སྐུའི་ཕོ་བྲང་ནས། །གསལ་དག་བླ་མ་གཤེགས་སུ་གསོལ། །སྤྲུལ་པ་སྐུ་ཡི་ཕོ་བྲང་ནས། །ཐུགས་རྗེ་ཅན་རྣམས་གཤེགས་སུ་གསོལ། །འཇའ་དང་

འོད་དུ་ཀྱི་ལི་ལི། །སྐུ་དང་ཐིག་ལེར་ཤིགས་སེ་ཤིག །འཁོར་དུ་ཡི་དམ་ལྷ་ཚོགས་དང་། །དཔའ་བོ་མཁའ་འགྲོའི་ཚོགས་ཀྱིས་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱི། །བྱིན་གྱིས་རློབ་ཕྱིར་གཤེགས་སུ་གསོལ། །གནས་མཆོག་འདི་རུ་བྱིན་ཕོབ་ལ། །སྒྲུབ་མཆོག་བདག་ལ་དབང་བཞི་སྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། ཨོཾ་བཛྲ་ས་མཱ་ཛཿ [ཞེས་སྤྱན་དྲངས།] ཛཿཧཱུྃ་བཾ་ཧོཿ[ས། ཡེ་ཤེས་ཀྱི་འཁོར་ལོ་རྣམས་མདུན་གྱི་ཚོགས་ཞིང་དམ་ཚིག་པ་དང་དབྱེར་མེད་དུ་བཞུགས་པར་མོས།] [གསུམ་པ་ཚོགས་བསགས་པ་ལ་ཡན་ལག་བདུན་ལས། དང་པོ་ཕྱག་འཚལ་བ་ནི།] རང་གི་ཐུགས་ཀ་ནས་སྤྲོས་པའི་ལྷ་མོ་རྣམས་དང་སེམས་ཅན་ཐམས་ཅད་བྱ་བྱེད་ཐུན་མོང་པར་གྱུར་ནས་ཕྱག་དང་མཆོད་པའི་ལས་རིམ་ལ་འཇུག་པར་[བསམ་ཞིང་།] གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །སངས་རྒྱས་ཐམས་ཅད་འདུས་པའི་

སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །གང་གིས་འཁོར་བའི་ཉེས་པ་ནི། །དྲན་པ་ཙམ་གྱིས་སེལ་མཛད་ཅིང་། །བླ་མེད་བྱང་ཆུབ་ཐོབ་མཛད་པའི། །བླ་མའི་ཞབས་ཀྱི་པདྨོར་འདུད། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །བླ་མའི་ཞབས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱི། །ལུས་བཏུད་པ་ཡི[ཞེས་ཕྱག་བྱ།] [གཉིས་པ་མཆོད་པ་འབུལ་བ་ལ། ཕྱི་མཆོད་ལས། ཉེར་སྤྱོད་འབུལ་བ་ནི།] ཨོཾ། དཔག་མེད་ནམ་མཁའི་ཁམས་ཉིད་ལས། །མཆོད་ཡོན་བསམ་ཡས་ལྷུན་གྲུབ་པ། །རབ་འབྱམས་ནམ་མཁའི་ཁམས་བཀང་སྟེ། །གུས་པའི་བློ་ཡིས་འབུལ་བར་བགྱི། །ཨོཾ་གུ་རུ་སརྦ་ཏ་ཐཱ་ག་ཏས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། [དེ་བཞིན་དུ་མཆོད་ཡོན་གྱི་གནས་སུ།] ཞབས་བསིལ། མེ་ཏོག བདུག་སྤོས།

མར་མེ། དྲི་ཆབ། ཞལ་ཟས། རོལ་མོ། [རྣམས་དང་།] ཨརྒྷཾ་[གྱི་མལ་དུ།] པཱ་དྱི། པུཥྤེ། དྷུ་པེ། ཨཱ་ལོ་ཀེ། ག་ནྡྷེ། ནཻ་དྱཱ། ཤཔྡ་[རྣམས་བཅུག་པས་མཆོད། རིན་ཆེན་བདུན་འབུལ་བ་ནི།] ཞིང་འདི་འཁོར་ལོ་རིན་ཆེན་གྱིས། །མཁས་པ་དག་གིས་ཡོངས་བཀད་ནས། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རབ་ཅན་གྱིས་འབུལ། །ཨོཾ་ཙཀྲ་རཏྣ་བཛྲ་པཱུ་ཛི་ཏེ་ཨཱཿཧཱུྃ། [དེ་བཞིན་དུ།] ནོར་བུ། བཙུན་མོ། བློན་པོ། གླང་པོ། རྟ་མཆོག དམག་དཔོན་[རྣམས་དང་།] མ་ཎི། སྟཱི། པུ་རུ་ཥ། ཧ་སྟི། ཨ་ཤྭ། ཁཏྒ་[རྣམས་སྦྱར་བས་མཆོད། འདོད་ཡོན་ལྔ་འབུལ་བ་ནི།] ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་བླ་མ་སྲས་བཅས་ལ་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །ཨོཾ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུྃ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་སྙན་ཡིད་འོང་ལྡན། །མོས་བློས༴ བཞེས་ཤིག༴ ཤཔྡ༴

ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་གར་ལ་སོགས་དབང་པོ་ཚིམ་བྱེད་དྲི། །མོས་བློས༴ བཞེས་ཤིག༴ གནྡྷེ༴ ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་པ། །མོས་བློས༴ བཞེས་ཤིག༴ རཱ་ས༴ ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་དབང་པོ་ཚིམ་བྱེད་པ། །མོས་བློས༴ བཞེས་ཤིག༴ སྤ་རྴེ༴ [རྫས་བརྒྱད་འབུལ་པ་ནི།] ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་ཀུན་དངོས་དཔལ་ལྡན་བླ་མ་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །ཨོཾ་ཨཥྚ་མངྒ་ལ་བཛྲ་པཱུ་ཇི་ཏེ་ཨཱཿཧཱུྃ། [རིག་མ་བཅུ་དྲུག་འབུལ་བ་ནི།] ཀུན་ཏུ་དགའ་བ་ཉམས་བཞིའི་རྣམ་འགྱུར་ཅན། །རྡོ་རྗེ་པི་ཝཾ་གླིང་བུ་རྔ་ཐབས་ཟུང་། །ཡིད་འཕྲོག་འཇོ་སྒེག་ལྡན་པའི་ལང་ཚོ་མ། །ནམ་མཁའ་རབ་འབྱམས་གང་བས་འཁོར་ལོར་མཆོད། །ཨོཾ་ཨཱཿབཛྲ་ཝཱི་ནི་ཧཱུྃ། ཨོཾ་ཨཱཿབཛྲ་ཝ་སེ་ཏྲཾ། ཨོཾ་ཨཱཿ

བཛྲ་མྲྀ་དཾ་གེ་ཧྲཱི༔ ཨོཾ་ཨཱཿབཛྲ་མུ་ར་ཛེ་ཨཱཿ མཆོག་ཏུ་དགའ་བ་ཉམས་བཞིའི་རྣམ་འགྱུར་ཅན། །རྡོ་རྗེ་སྒེག་བཞད་གླུ་དང་གར་མཁན་མ། །ཡིད་འཕྲོག༴ ནམ་མཁའ༴ ཨོཾ་ཨཱཿབཛྲ་ལཱ་སྱ་ཧཱུྃ། ཨོཾ་ཨཱཿབཛྲ་ཧཱ་སྱ་ཏྲཱ། ཨོཾ་ཨཱཿབཛྲ་གཱིརྟི་ཧྲཱིཿ ཨོཾ་ཨཱཿ་བཛྲ་ནཱིརྟི་ཨཱཿ ཁྱད་པར་དགའ་བ་ཉམས་བཞིའི་རྣམ་འགྱུར་ཅན། །མེ་ཏོག་བདུག་སྤོས་སྣང་གསལ་དྲི་ཆབ་མ། །ཡིད་འཕྲོག༴ ནམ་མཁའ༴ ཨོཾ་ཨཱཿབཛྲ་པུཥྤེ་ཧཱུྃ། ཨོཾ་ཨཱཿབཛྲ་དྷཱུ་པེ་ཏྲཱཾ། ཨོཾ་ཨཱཿབཛྲ་ཨ་ལོ་ཀེ་ཧྲཱིཿ ཨོཾ་ཨཱཿབཛྲ་གནྡྷེ་ཨཱཿ ལྷན་སྐྱེས་དགའ་བ་ཉམས་བཞིའི་རྣམ་འགྱུར་ཅན། །གཟུགས་རེག་རོ་དང་ཆོས་དབྱིངས་རྡོ་རྗེ་མ། །ཡིད་འཕྲོག༴ ནམ་མཁའ༴ ཨོཾ་ཨཱཿབཛྲ་རཱུ་པ་ཧཱུྃ། ཨོཾ་ཨཱཿབཛྲ་རཱ་ས་ཏྲཱཾ། ཨོཾ་ཨཱཿབཛྲ་སྤརྴེ་ཧྲཱིཿ ཨོཾ་ཨཱཿབཛྲ་ངྷརྨ་ངྷ་ཏུ་ཨཱཿ [ན་བཟའ་འབུལ་བ་ནི།] སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱོང་ཕྱིར་འབུལ། །བཟོད་པ་དམ་

པའི་གོས་ཀྱིས་བརྒྱན་པར་ཤོག །ཨོཾ་བཛྲ་ཝ་སྟྲ་པྲ་ཏཱིཙྪ་སྭཱ་ཧཱ། [རྒྱན་སྣ་ཚོགས་འབུལ་བ་ནི།] རྒྱལ་བ་མཚན་དཔེའི་རང་བཞིན་རྒྱུན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་མཆོག་ཐོབ་པར་ཤོག །ཨོཾ་རཏྣ་ཨ་ལངྐཱ་ར་པྲ་ཏཱིཙྪ་སྭཱ་ཧཱ། [མཎྜལ་འབུལ་བ་ནི། རྒྱས་པར་ཚོམ་བུ་སོ་བདུན་མ་སྤྱི་ལྟར་དང་]ས་གཞི་སྤོས་ཆུས་བྱུགས་ཤིང་མེ་ཏོག་བཀྲམ། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཨི་དཾ་རཏྣ་མཎྜ་ལ་ཨཱཿཧཱུྃ། [ནང་མཆོད་ལས། སྨན་མཆོད་འབུལ་བ་ནི།] རྩ་བརྒྱད་ཡན་ལག་སྟོང་སྦྱར་བའི། །ར་སཱ་ཡ་ན་སྨན་ཆེན་པོ། །འཆི་མེད་གསང་བའི་བདུད་རྩི་འདི། །མཉམ་པའི་དམ་ཚིག་མཆོག་ཏུ་རོལ། །སརྦ་པཉྩ་ཨ་མྲྀ་ཏ་ཁཱ་ཧི། [རཀྟ་འབུལ་བ་ནི།] རྡོ་རྗེ་སྒེག་མོ་འདོད་ཆགས་ཆེ། །རཀྟ་པདྨ་ལས་བྱུང་བ། །ཐིག་ལེ་ཟག་མེད་བདེ་བ་ཆེ། །འདོད་ཆགས་འཁོར་བ་སྟོང་ཕྱིར་

བཞེས། །མ་ཧཱ་རཀྟ་ཁཱ་ཧི། [གཏོར་མ་འབུལ་བ་ནི།] སྣོད་དང་བཅུད་དུ་རབ་ལྡན་པའི། །མི་ཟད་འདོད་ཡོན་ལོངས་སྤྱོད་གཏེར། །དམ་རྫས་མཆོག་གི་གཏོར་མ་འདི། །དགྱེས་པ་ཆེན་པོའི་དཔྱིད་དུ་རོལ། །མ་ཧཱ་བ་ལི་ཏཾ་ཁཱ་ཧི། [གསང་མཆོད་ལས། སྦྱོར་བའི་མཆོད་པ་ནི།] མཚན་ལྡན་བདེ་བའི་རྒྱན་ལྡན་པའི། །མི་མོ་རྣམས་ཀྱི་རེག་བྱའི་མཆོག །བྱིན་གྱིས་རློབས་ཤིག་རྣལ་འབྱོར་ཚོགས། །གསང་མཆོག་བདེ་བའི་གནས་ལ་རོལ། མ་ཧཱ་སུ་ཁ་བོ་དྷི་ཙིཏྟ་ཨ་ལ་ལ་ཧོ། [དེ་ཁོ་ན་ཉིད་ཀྱི་མཆོད་པ་ནི།] གདོད་ནས་རང་རིག་ལྷ་རུ་དག །མཆོད་བྱ་མཆོད་བྱེད་མཆོད་ཡུལ་ཀུན། །མི་དམིགས་སྤྲོས་བྲལ་ཕྱག་རྒྱ་ཆེ། །འདི་ནི་མཆོག་ཏུ་བདེ་ཆེན་ཉིད། [ཅེས་མཆོད་དོ། །རྗེས་འབྲེལ་དུ་བསྟོད་པ་བྱ་བ་ནི། ཆེ་བའི་ཡོན་ཏན་མངོན་པར་དྲན་པའི་སྒོ་ནས། །] ཨེ་མ་ཧོ་ངོ་མཚར་རྨད་ཀྱི་ཆོས། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །འཁོར་འདས་ཡོན་ཏན་དཔལ་དང་ལྡན། །བླ་མ་ཞབས་ལ་ཕྱག་འཚལ་བསྟོད། །

བླ་མའི་སྐུ་ནི་རྡོ་རྗེ་སྐུ། །མཛེས་ཤིང་བལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་ལྡན། །བླ་མའི་སྐུ་ལ་ཕྱལ་འཚལ་བསྟོད། །བླ་མའི་གསུང་ནི་ཚངས་པའི་དབྱངས། །འགག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་སྐྲག་མཛད་པ། །བླ་མའི་གསུང་ལ་ཕྱག་འཚལ་བསྟོད། །བླ་མའི་ཐུགས་ནི་ནམ་མཁའ་འདྲ། །བདེ་གསལ་མི་རྟོག་སྟོང་པའི་ངང་། །རྣམ་ཐར་གསུམ་ལ་ལེགས་གནས་པ། །བླ་མའི་ཐུགས་ལ་ཕྱག་འཚལ་བསྟོད། །སྐུ་ལ་ཚད་མེད་བསྒྲང་དུ་མེད། །ནམ་མཁའ་དང་ནི་མཉམ་གྱུར་ཅིང་། །སྣ་ཚོགས་དབང་ཕྱུག་མི་ཤིགས་པའི། །རྡོ་རྗེའི་སྐུ་ལ་ཕྱག་འཚལ་བསྟོད། །བརྗོད་དུ་མེད་པའི་ངང་ཉིད་ལས། །ཚངས་པ་ལ་སོགས་སྙན་པའི་དབྱངས། །ཕྱོགས་བཅུ་ཀུན་ཏུ་སྒྲོགས་མཛད་པའི། རྣམ་དག་གསུང་ལ་ཕྱག་འཚལ་བསྟོད། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་ལ་སོགས་པའི། །རྟོག་པ་ཀུན་ལས་རྣམ་གྲོལ་བའི། །ཡེ་ཤེས་ཐུགས་ལ་ཕྱག་འཚལ་བསྟོད། །

[ཅེས་བསྟོད། གསུམ་པ་བཤགས་པ་བྱ་བ་ནི། །སྤྲོ་ནརཱུ་ཏྲའི་སྨྲེ་བཤགས་སོགས་ཇི་ལྟར་རིགས་པ་དང་། གང་ལྟར་ཡང་།] དུས་གསུམ་བདེ་གཤེགས་རྒྱལ་བ་འཁོར་དང་བཅས། །[ཞེས་སོགས་སྐུ་གསུང་ཐུགས་ཀྱི་བཤགས་པ་དང་ཡི་གེ་བརྒྱ་པ་མང་དུ་བཟླའོ། །] [བཞི་པ་རྗེས་སུ་ཡི་རང་བ་སོགས་ཡན་ལག་ལྷག་མ་རྣམས་ནི།] རྫོགས་སངས་རྒྱས་དང་བྱང་ཆུབ་སེམས་དཔའ་དང་། །འཕགས་གཉིས་སོ་སོ་སྐྱེ་བོ་མ་ལུས་པའི། །དུས་གསུམ་དགེ་བ་བགྱིས་དང་བགྱིད་སྩལ་དང་། །བགྱིད་པར་འགྱུར་བ་ཀུན་ལ་རྗེས་ཡི་རང་། །གློ་བུར་ཉོན་མོངས་དང་ལྡན་སེམས་ཅན་རྣམས། །ཁམས་དེའི་རང་བཞིན་དག་པ་མཐོང་བྱའི་ཕྱིར། །ཕྱི་ནང་གསང་བ་བླ་ན་མེད་པ་ཡི། །ཆོས་ཀྱི་འཁོར་ལོ་རྨད་བྱུང་བསྐོར་དུ་གསོལ། །སངས་རྒྱས་འཇིག་རྟེན་ཉི་མ་གང་དུ་བྱོན། །འགྲོ་བའི་གཉེན་གྱུར་སྲས་དང་བཅས་པ་ཀུན། །སྲིད་པའི་མུན་ནག་འཐིབ་པོ་བསལ་སླད་དུ། །འགྲོ་བ་ཇི་སྲིད་སྒྲོན་མེ་མཛད་པར་གསོལ། །ཡོན་ཏན་དགེར་འོས་རྒྱལ་བའི་བྱང་

ཆུབ་མཆོག །སྐྱེ་རྒུ་ཀུན་གྱིས་ཐོབ་པར་བྱ་བའི་ཕྱིར། །བསོད་ནམས་ཕུང་པོ་ཡོངས་སུ་བསྔོ་བགྱིས་པས། །འགྲོ་ཀུན་ཐར་པའི་ལམ་དུ་ཕྱིར་པར་ཤོག། [བཞི་པ་གསོལ་བ་གདབ་ཅིང་བསྙེན་པའི་རིམ་པ་ནི།] ཨོཾ། སྐྱེ་འཆི་མེད་པ་གསལ་ལ་དྭངས། །རྡོ་རྗེའི་སྐུ་ལ་གསོལ་བ་འདེབས། །ལུས་ལ་བདེ་བར་བྱིན་གྱིས་རློབས། །སྐུ་ཡི་རྡོ་རྗེར་བདག་བསྒྲུབ་མཛོད། ཨཱཿ འགགས་མེད་གསུང་དབྱངས་ཆོས་ཀྱི་སྒྲ། །ཨཱ་ལི་ཀཱ་ལིར་གསོལ་བ་འདེབས། །ངག་ལ་ནུས་པར་བྱིན་གྱིས་རློབས། །གསུང་གི་རྡོ་རྗེར་བདག་བསྒྲུབ་མཛོད། ཧཱུྃ། ཀ་དག་ཆེན་པོ་ཀུན་བཟང་ཀློང་། །ཅིར་མི་དགོངས་ལ་གསོལ་བ་འདེབས། །ཟད་སར་འཁྱོལ་བར་བྱིན་གྱིས་རློབས། །ཐུགས་ཀྱི་རྡོ་རྗེར་བདག་བསྒྲུབ་མཛོད། །བླ་མ་རྡོ་རྗེ་འཛིན་པ་ནི། །ཁམས་གསུམ་ཀུན་གྱི་གཉེན་གཅིག་པུ། །འགྲོ་བ་སྐྱབས་མེད་རྣམས་ཀྱི་སྐྱབས། །ཐར་པའི་ཐེམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མེ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་

མཚོན་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུང་བ་ལ། །ཐུགས་རྗེའི་ཆར་གྱིས་བསིལ་བར་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །དེང་ནས་བྱང་ཆུབ་སྙིང་པོའི་བར། །སྐྱིད་སྡུག་རེ་ལྟོས་ཁྱེད་མཁྱེན་པས། །མགོན་མེད་བདག་ལ་ཐུགས་རྗེས་གཟིགས། །ནད་གདོན་བགེགས་དང་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །[ཞེས་དང་། གཞན་ཡང་དམིགས་བསལ་རང་གི་རྩ་བའི་བླ་མ་དེ་ཉིད་ཀྱི་གསོལ་འདེབས་རིགས་གང་ཤེས་བྱ་ཞིང་།] མོས་གུས་གདུང་ཤུགས་དྲག་པོས་གསོལ་བ་བཏབ་པས། བླ་མའི་སྐུ་ལས་འོད་ཟེར་བདུད་རྩིའི་རྒྱུན། །དཀར་གསལ་འཕྲོས་པས་རང་ལུས་ཡོངས་སུ་གང་། །ནད་གདོན་སྡིག་སྒྲིབ་ཐམས་ཅད་བྱང་ཞིང་དག། བདེ་ཆེན་ཡེ་ཤེས་ཉམས་རྟོགས་ཆེས་ཆེར་གཡོས། །དེ་ཡི་ངང་ལས་ཁྱད་པར་སྔགས་ཀྱི་སྒྲ། །བུང་བ་ཚང་ཞིག་ལྟར་གྲགས་སྣང་སྲིད་ཀུན། །མེར་མེར་འུར་འུར་རབ་ཏུ་གཡོ་བར་གྱུར། །ཅེས་དམིགས་ལ། ཨོཾ་གུ་རུ་བཛྲ་ས་ཏྭ་སིདྡྷི་ཨཱཿཧཱུྃ།

[ཞེས་བཟླས་པ་བྱ་བ་དང་ལྷན་ཅིག བླ་མ་རྡོ་རྗེ་སེམས་དཔའི་སྐུའི་གསལ་སྣང་། གསུང་སྔགས་སྒྲ། ཐུགས་གཉིས་མེད་ཀྱི་ཡེ་ཤེས་ལ་སེམས་འཛིན། ཐུན་གྱི་གཤམ་དུ་རྡོ་རྗེ་སེམས་དཔའི་ཡི་གེ་བརྒྱ་པའང་ཅི་ནུས་སུ་བཟླ། ཡིད་གཡེང་བ་སྤངས་ཏེ་རྩེ་གཅིག་ཏུ་བཟླས་པ་ལ་འབད་པས་འབུམ་ཕྲག་བཞིས་སྒྲིབ་པ་དག་པ་དང་། བྱིན་རླབས་ཀྱི་མཚན་མ་བཟང་པོ་མཐོང་བར་འགྱུར་རོ། །] [ལྔ་པ་དབང་བླང་བ་ནི། སྐུ་བཞིའི་དབང་ཕྱུག་བླ་མ་རྡོ་རྗེ་འཆང་། །བདག་སོགས་འགྲོ་ལ་ཐུགས་རྗེས་ཉེར་དགོངས་ཏེ། །བུམ་གསང་ཤེས་རབ་ཡེ་ཤེས་དེ་ཁོ་ནའི། །ཡེ་ཤེས་མཆོག་གི་བདག་རྒྱུད་གཏམས་པར་མཛོད། །བླ་མའི་སྐུ་ཡི་གནས་གསུམ་ཡི་གེ་ལས། །དཀར་དམར་མཐིང་གའི་འོད་ཟེར་རིམ་གཅིག་ཆར། །བྱུང་བར་རང་གི་སྤྱི་མགྲིན་སྙིང་གར་ཐིམ། །ལུས་ངག་ཡིད་དང་སྣང་གསུམ་སྒྲིབ་པ་སྦྱངས། །དབང་བཞི་རིམ་པར་ཐོབ་ནས་སྐུ་གསུང་ཐུགས། །ཡེ་ཤེས་རྡོ་རྗེར་བྱིན་གྱིས་བརླབས་པར་གྱུར། [ཅེས་དབང་དོན་གྱི་དགོངས་པ་བསྐྱང་ངོ་། །] [གསུམ་པ་རྗེས་ཀྱི་བྱ་བ་ལ་ལྔ་ལས། དང་པོ་ཚོགས་ཀྱི་མཆོད་པ་ནི། ཐབས་ཤེས་ཀྱི་དམ་རྫས་སུ་འོས་པ་རྣམས་ལེགས་པར་བཤམས་ལ་

བདུད་རྩིས་བྲན་ཅིང་།] ཨོཾ་སརྦ་དྲ་བྱཾ་བི་ཤྭ་དྷ་ནི་ཧཱུྃ་ཕཊ། རང་ཉིད་རྡོ་རྗེ་སེམས་དཔའི་ཐུགས་ཀ་ནས། །རཾ་ཡཾ་ཁཾ་འཕྲོས་མེ་རླུང་ཆུར་གྱུར་པས། །དངོས་འཛིན་ཉེས་སྐྱོན་ཐམས་ཅད་བསྲེག་གཏོར་བཀྲུས། །རླུང་མེ་ཐོད་པའི་སྒྱེད་པུར་ཨ་ཡིག་ལས། །བྱུང་བའི་ཐོད་པ་ཡངས་ཤིང་རྒྱ་ཆེའི་ནང་། །ཤ་ལྔ་བདུད་རྩིར་ས་བོན་བཅུ་ཡིས་མཚན། །རླུང་གཡོས་མེ་སྦར་རྫས་ཁོལ་རླངས་པ་ཡིས། །འཁོར་འདས་བདུད་རྩིའི་དྭངས་མར་ཞུ་བའི་རྒྱུན། །འདྲེས་པས་ཟག་མེད་འདོད་ཡོན་བདུད་རྩིར་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱི༔ [ཞེས་ལན་གསུམ་གྱིས་བྱིན་བརླབས། ཚོགས་ཞིང་སྤྱན་འདྲེན་པ་ནི།] ཨོཾ། བསོད་ནམས་ཡེ་ཤེས་ཚོགས་རྫོགས་ཤིང་། །རང་རིག་མཐའ་དབུས་མེད་པའི་དཀྱིལ། །ཡེ་ཤེས་བཞི་འཕྲོ་འཁོར་ལོའི་ཚུལ། །ཚོགས་མཆོག་དཀྱིལ་འཁོར་གཤེགས་སུ་གསོལ། །ཨོཾ་ཨེ་ཧྱེ་ཧི་མ་ཧཱ་ཀ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟཾ། [ཞེས་སྤྱན་དྲངས་ལ།] ཨོཾ་བཛྲ་ལཱ་སྱ་ཧཱུྃ། ཨོཾ་བཛྲ་མཱ་ལ་ཏྲཱཾ། ཨོཾ་བཛྲ་གཱིརྟི་ཧྲཱིཿ

ཨོཾ་བཛྲ་ནཱིརྟི་ཨཱཿ ཨོཾ་བཛྲ་པུཥྤེ་ཧཱུྃ། ཨོཾ་བཛྲ་དྷཱུ་པེ་ཏྲཱཾ། ཨོཾ་བཛྲ་ཨ་ལོ་ཀེ་ཧྲཱི༔ ཨོ་བཛྲ་གཱནྡྷེ་ཨཱཿ [ཞེས་འདོད་ཡོན་གྱི་ལྷ་མོས་སྤྱིར་མཆོད། བྱེ་བྲག་ཚོགས་ཕུད་ཆ་བཞིར་སྤྲོས་ཏེ། དང་པོ་མཆོད་པ་ནི།] གཟུགས་སྒྲ་དྲི་རོ་རེག་ལྡན་པའི། །འདོད་ཡོན་ཚོགས་ཀྱི་མཆོད་པ་ནི། །གུས་པའི་བློ་ཡིས་འབུལ་ལ་གསན། །དགྱེས་པའི་གར་གྱིས་བཞེས་སུ་གསོལ། །ག་ཎ་ཙཀྲ་པཱུ་ཛ་ཁཱ་ཧི། [བར་པ་བཤགས་པ་ནི།] ཐོག་མེད་དུས་ནས་ད་ལྟའི་བར། །སྒོ་གསུམ་མི་ཤེས་བག་མེད་པས། །ཉམས་ཆག་འགལ་འཁྲུལ་ཅི་མཆིས་པ། །དེ་དག་ཐམས་ཅད་བཤགས་པར་བགྱི། །[ཞེས་དང་ཡི་གེ་བརྒྱ་པ་བཟླ།] ཐ་མ་བསྒྲལ་བསྟབ་ནི། ཆ་གསུམ་པ་དེའི་འདོད་ཡོན་གྱི་ལྷ་མོ་ཧཱུྃ་གིས་རང་ལ་བསྡུས་ནས། ནྲྀ་ཏྲི་བཛྲ་ཨཾ་ཀུ་ཤ་ཇཿ ཛཿཧཱུྃ་བཾ་ཧོཿ[ས་བསྒྲལ་བྱ་དགུག་བསྟིམ་བྱས་ལ།] ཧཱུྃ། ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བ་དང་། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །སརྦ་དུཥྚཱི་མ་ར་ཡ་ཧཱུྃ་ཕཊ། [ཅེས་དྭངས་མ་ཡེས་ཤེས་ཀྱི་འཁོར་ལོར་སྦྱར་བའི་

སྙིགས་མ་བདུད་རྩིའི་རང་བཞིན་དུ་སྦར་ཏེ།] དུག་ལྔས་གཟིར་ཞིང་མནར་བ་དང་། །གདུག་ཅིང་གཏུམ་པའི་སེམས་ཅན་རྣམས། །བདག་མེད་དབྱིངས་སུ་བསྒྲལ་བའི་རྫས། །འདོད་ཡོན་དམ་ཚིག་ཆེན་པོར་འབུལ། །མ་ཧཱ་མཱཾ་ས་རཀྟ་ཀིཾ་ནི་རི་ཏི་ཨ་མྲྀ་ཏ་པཱུ་ཛ་ཁཱ་ཧི། [ཞེས་བསྟབ་པས་དགྱེས་པ་མཆོག་ཏུ་བསྐྱེད་པར་མོས། ཚོགས་ལ་རོལ་བ་ནི། རང་ཉིད་ལྷར་གསལ་བའི་སྐུ་ལ་རྩ་གསུམ་ལྷ་ཚོགས་ཏིལ་གྱི་གོང་བུ་ལྟར་བཞུགས་པར་བསམ་ཞིང་ནང་གི་སྦྱིན་སྲེག་མངོན་དུ་བྱས་ཏེ་ཚིམས་པར་ལོངས་སྤྱད་པའི་མཐར།] ཧེ་རུ་ཀ་དཔལ་གྲོང་ཁྱེར་དུ། །ཚོགས་ཀྱི་འཁོར་ལོ་བསྐོར་བ་ཡིས། །བདག་གཞན་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །[ཅེས་སྨོན་ལམ་གདབ། ལྷག་མ་བསྡུས་པའི་ཁར་སྔར་གྱི་ཕུད་ཆ་བཞི་པའང་བསྲེས་ལ།] ཨོཾ་ཨཱཿཧཱུྃ་ཧ་ཧོ་ཧྲཱིཿ[ས་དམ་ཚིག་གི་ཁ་ཕྲུ་བཏབ་པས།] ལྷག་མའི་གཏོར་མ་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་[བསམ།] ཨེ་ཨཱ་རལླི་ཧྲཱིཾ་ཛཿ [ཞེས་མགྲོན་རྣམས་སྤྱན་དྲངས་ནས།] ཧཱུྃ། མཁའ་འགྲོ་གིང་དང་དབང་ཕྱུག་མ། མ་བདུན་

སྲིང་བཞི་འབར་མ་བརྒྱད། །ཕོ་ཉ་ལ་སོགས་ལྷག་སྡུད་ཚོགས། །དཔལ་གྱི་ཕམ་ཕབ་འདི་གསོལ་ལ། །བཅོལ་པའི་ཕྲིན་ལས་འགྲུབ་པར་མཛོད། །ཨོཾ་ཨུ་ཙྪིཥྚ་བ་ལིཾ་ཏ་ཁཱ་ཧི། [ཞེས་ཕྱིར་རོལ་དུ་འབུལ་ལོ། །] [གཉིས་པ་གཏོར་མ་བསྐྱང་བ་ནི། རྡོ་རྗེའི་སྲུང་མ་སྤྱི་དང་བྱེ་བྲག་པ་རྣམས་ལ་གཏོར་ཆོག་རྒྱས་བསྡུས་ཇི་ལྟར་རིགས་པས་གཏོར་མ་འབུལ་ཞིང་ཕྲིན་ལས་བཅོལ་བར་བྱའོ། །] [གསུམ་པ་དཀྱིལ་འཁོར་བསྡུ་བ་ནི། གཏང་རག་གི་དོན་དུ་སླར་ཡང་མཆོད་ཅིང་བསྟོད་ནས།] མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །[ཞེས་དང་ཡིག་བརྒྱས་ནོངས་པ་བཤགས། མདུན་རྟེན་གྱི་ཡེ་ཤེས་པ་བརྟན་བཞུགས་བྱས་ལ།] བདག་གི་སྒོ་གསུམ་གྱིས་མཚོན་སྣང་སྲིད་ཀུན། །བླ་མའི་སྐུ་གསུང་ཐུགས་ཀྱི་ཀློང་དུ་འདུས། །དེ་ཉིད་ཆོས་སྐུ་སྐྱེ་མེད་དབྱིངས་ཐིམ་པས། །དམིགས་མེད་བསམ་བརྗོད་བྲལ་བའི་ངང་ལ་གནས། །[ཞེས་འོད་གསལ་བདེ་བ་ཆེན་པོའི་ངང་དུ་མཉམ་པར་བཞག དེ་ལས་ལྡང་བ་ན།] སྣང་བ་ཐམས་ཅད་བླ་མའི་སྐུ། །གྲགས་པ་

ཐམས་ཅད་བླ་མའི་གསུང་། །དྲན་རིག་ཐམས་ཅད་བླ་མའི་ཐུགས། །སྣོད་བཅུད་ཡེ་ཤེས་རོལ་པའོ། །[ཞེས་མོས་ལ་རང་ལུས་ལྷར་གསལ་བའི་གནས་གསུམ་འབྲུ་གསུམ་གྱིས་བསྲུང་བར་བསྒོམ།] [བཞི་པ་བསྔོ་སྨོན་བྱ་བ་ནི།] དགེ་བ་འདི་ཡིས་མྱུར་དུ་བདག །དཔལ་ལྡན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡིས་ལ་འགོད་པར་ཤོག །[ཅེས་དང་།] འདིས་མཚོན་དུས་གསུམ་བསགས་པའི་དགེ་བ་རྣམས། །རང་དོན་ཞི་བདེའི་དྲི་མས་མ་གོས་པར། །མཐའ་ཡས་སེམས་ཅན་ཚོགས་རྣམས་མ་ལུས་པ། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །རྒྱལ་བ་ཀུན་དངོས་རྗེ་བཙུན་བླ་མ་ཡིས། །དུས་གསུམ་ཀུན་ཏུ་བརྩེ་བས་རྗེས་བཟུང་སྟེ། །འགྲོ་ཀུན་སྒྲོལ་ཞིང་གསང་ཆེན་རྡོ་རྗེའི་ལམ། །དཀའ་བ་མེད་པར་མྱུར་དུ་བགྲོད་པར་ཤོག །[ཅེས་བསྔོ་སྨོན་གྱིས་རྒྱས་གདབ།] [ལྔ་པ་ཤིས་པ་བརྗོད་པ་ནི། རྟེན་འབྲེལ་སྙིང་པོ་བཟླས་པའི་མེ་ཏོག་གི་ཆར་སིལ་མར་བསྙིལ་ཞིང་།] ཨོཾ། བྱིན་རླབས་མཆོག་སྩོལ་རིགས་བརྒྱའི་བདག །བླ་མ་རྣམས་ཀྱི་བཀྲ་ཤིས་ཤོག །དངོས་གྲུབ་ཆར་

འབེབས་ཞི་དང་ཁྲོ། །ཡི་དམ་ལྷ་ཚོགས་བཀྲ་ཤིས་ཤོག །ཐོགས་མེད་ཕྲིན་ལས་སྒྲུབ་མཛད་པའི། །དཔའ་བོ་མཁའ་འགྲོའི་བཀྲ་ཤིས་ཤོག །གང་ལ་བསམ་པའི་དོན་ཀུན་འགྲུབ། །དགེ་ལེགས་མཆོག་གི་བཀྲ་ཤིས་ཤོག །[ཅེས་སོགས་ཤིས་པ་རྒྱ་ཆེར་བརྗོད་པས་ཕྱོགས་དུས་ཀུན་ཏུ་དགེ་ལེགས་ཀྱི་སྣང་བས་ཡོངས་སུ་ཁྱབ་པར་བྱའོ། །] ༈ [ད་ནི་ཆོ་ག་འདི་དང་འབྲེལ་བར་ཕྲིན་ལས་ཀྱི་ཡིན་ལག་ཉེ་བར་མཁོ་བ་འགའ་ཞིག་བཤད་པར་བྱས་སྟེ། དེ་ལ་བདུན། དབང་ཆོག གནས་ལུང་། སྦྱིན་སྲེག རབ་གནས། མྱོང་གྲོལ། བདུད་རྩི། ཚེ་སྒྲུབ་བོ། །] [སྔ་མ་ལ་གཉིས་ལས། དང་པོར་རང་དོན་བདག་འཇུག་ནི། ལམ་དུས་ཀྱི་དམ་ཚིག་གསོ་ཞིང་ཡེ་ཤེས་སྤེལ་བ་ལ་མེད་དུ་མི་རུང་བ་སྟེ། སྤྱིར་གོང་དུ་སྨོས་པ་ལྟར་ཏིང་ངེ་འཛིན་གྱི་དབང་བླང་བ་ཉིད་དམིགས་པ་གསལ་ཞིང་བརྟན་པ་ཁོ་ནས་དོན་འགྲུབ་པ་ཡིན་པས་རགས་པ་བརྡའི་དབང་རྫས་དང་དབང་ཚིག་ལ་བརྟེན་མི་དགོས་མོད། འོན་ཀྱང་སྤྲོས་པ་དང་འབྲེལ་བའི་སྐབས་ཅུང་ཟད་རྒྱས་པར་གྲུབ་ནའང་ལེགས་པའི་ཡན་ལག་ཏུ་འགྱུར་པས། དེ་ལྟར་ན་སྒྲུབ་དཀྱིལ་གྱི་དབུས་སུ་མཉྫིའི་ཁར་རྣམ་རྒྱལ་བུམ་པ། གསང་ཐོད་བདུད་རྩི། སི་ནྡྷུ་རའི་དཀྱིལ་འཁོར། རྡོ་རྗེ་

སེམས་དཔའི་མེ་ལོང་རྣམས་བཞི་བརྩེགས་ཀྱི་ཚུལ་དུ་བཤམ། གཞན་གཏོར་མཆོད་སོགས་འདྲ་བ་ལས། སྦྱོར་བའི་སྐབས་ལས་བུམ་མམ་དྲིའི་དུང་ཞལ།] རཾ་ཡཾ་ཁཾ་[གིས་བསང་སྦྱང་།] སྟོང་བའི་ངང་ལས་བསང་ཆུའི་སྟེང་དུ། མ་སཱུརྻ་མཎྜ་ལ། ཉི་མ་ལ་གནས་པའི་ཧཱུྃ་ཡིག་དམར་པོ། སྥ་ར་ཎ་ཕཊ། སཾ་ཧ་ར་ཎ་ཧཱུྃ། འཕྲོ་འདུས་ཡོངས་སུ་གྱུར་པ་ལས། ཨོཾ་བཛྲ་མ་ཧཱ་ཀྲོ་ངྷཱི་ཤྭ་རཱི་ཧཱུྃ་ཕཊ། ཁྲོ་མོ་དབྱིངས་ཕྱུག་མ་དམར་མོ་དྲིལ་བུ་དང་བྷན་དམར་འཛིན་པའི་སྐུར་གྱུར་པར་[བསམ་ཞིང་། རྡོ་རྗེ་རྩེ་གཅིག་པའི་ཕྱག་རྒྱས་རེག་ལ།] ཨོཾ་མ་ཧཱ་ཀྲོ་ངྷཱི་ཤྭ་རཱི་སརྦ་དྲ་བྱཾ་ཤོ་ངྷ་ཡ་ཨོཾ་ཨཱཿཧཱུྃ་ཧྲཱིཿཋཱ། [ཞེས་བརྒྱའམ་ཉེར་གཅིག་གིས་བྱིན་གྱིས་བརླབས་པས།] ཁྲོ་མོ་དབྱིངས་ཕྱུག་མའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་[བསམ།] ཨོཾ་མ་ཧཱ་ཀྲོ་ངྷཱི་ཤྭ་རཱི་སརྦ་དྲ་བྱཾ་ཤོ་དྷ་ཡ་ཧཱུྃ་ཕཊ། [ཅེས་བདག་གནས་ཡོ་བྱད་ཐམས་ཅད་ལ་བསངས་གཏོར་བྱ་ཞིང་། ཐོག་མཐའ་ཀུན་ཏུ་བསངས་གཏོར་གྱི་ལས་ཐམས་ཅད་འདིས་བྱའོ། །དངོས་གཞི་ཆོ་གའི་གཞུང་བསྲང་སྟེ་བཟླས་པ་ཡན་ཆད་གྲུབ་ནས།] བུམ་པ་རང་བྱུང་གི་གཞལ་མེད་ཁང་ཆེན་པོར་རིགས་འདུས་བླ་མ་རྡོ་རྗེ་སེམས་

དཔའ་རབ་འབྱམས་རྒྱལ་བའི་སྤྱི་གཟུགས་ཆེན་པོར་བཞུགས་པའི་སྐུ་ལས་བྱང་ཆུབ་སེམས་ཀྱི་བདུད་རྩིའི་རྒྱུན་དཔག་ཏུ་མེད་པ་བབས་པས་བུམ་པ་གང་བར་[མོས་ལ། རྩ་སྔགས་དང་ཡི་གེ་བརྒྱ་པ་ཅི་ནུས་བཟླས་མཐར།] བུམ་པའི་ལྷ་བདེ་སྟོང་ཆེན་པོའི་ངོ་བོར་ཞུ་བ་བུམ་ཆུ་དང་དབྱེར་མེད་དུ་གྱུར་པར་[བསམ། འདིར་སྤྲོ་ཞིང་ནུས་ན་སྔགས་ཀྱི་གསོ་སྦྱོང་གི་གནད་དུ་ཆེ་བ་སྐོང་ཆེན་ལྔ་དག་གྱུར་དང་བཅས་པ་ན་རཀ་དོང་སྦྲུགས་ཀྱི་ཆོ་ག་སོགས་ནས་བཤད་པ་བཞིན་བྱ། བདག་འཇུག་དངོས་ལ། བདག་ཉིད་རང་བཞིན་ཡེ་ཤེས་ཀྱི་འཁོར་ལོར་རྫོགས་པ་བླ་མ་དང་དཀྱིལ་འཁོར་གྱི་བདག་པོ་དབྱེར་མེད་པ་དབང་ལེན་བྱའི་ཡུལ་ལ། རྣམ་འགྱུར་གློ་བུར་གྱི་འཁྲུལ་ངོ་བག་ཆགས་ཀྱི་རྟེན་སློབ་བུའི་ཚུལ་དུ་བྱས་ནས་འཇུག་པ་སྟེ། ཐོག་མར་ཁྲུས་བྱས། མཎྜལ་ཕུལ་ལ།] བླ་མ་གཙོ་བོ་ཁྱོད་ལ་འདུད། །ཐར་ལམ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་ནས། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །[ཞེས་ལན་གསུམ་གྱིས་གསོལ་བ་གདབ།] རྡོ་རྗེ་སློབ་དཔོན་སངས་རྒྱས་དཔལ། [ཞེས་སོགས་རྒྱུན་བཤགས་ཡན་

ལག་བརྒྱད་པས་ཚོགས་བསགས།] བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་ནི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །[ཅེས་སྡོམ་པ་བཟུང་། ཡེ་ཤེས་པ་དབབ་པའི་སླད་དུ། ལུས་གནད་དྲང་པོར་བསྲང་ཞིང་རླུང་ཁ་སྦྱོར་དུ་འཆིང་ལ།] རང་ཉིད་དཔལ་རྡོ་རྗེ་སེམས་དཔའ་ཡུམ་དང་བཅས་པར་གསལ་བའི་སྙིང་གར་རང་འདྲའི་ཡེ་ཤེས་སེམས་དཔའ་རྡོར་སེམས་ཡབ་ཡུམ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་བདེ་བའི་སྒྲ་དང་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མའི་ཚོགས་ཐམས་ཅད་དཔལ་རྡོ་རྗེ་སེམས་དཔའ་ཡབ་ཡུམ་གྱི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་བཞིན་དུ་སྤྱན་དྲངས་ཏེ་སྙིང་ག་ནས་སིབ་སིབ་ཐིམ་པར་[མོས་ལ། ཁྱད་པར་གྱི་སྤོས་དུད་རོལ་མོ་སྣ་

ཚོགས་ཀྱི་སྒྲ་དང་སྦྱར་ཏེ་རྩ་སྔགས་དང་ཡིག་བརྒྱའི་མཐར།] ཨོཾ་བཛྲ་ཛྙཱ་ན་ཨཱ་བེ་ཤ་ཡ་ཨཱ་ཨཱཿ [ཞེས་དྲག་ཏུ་བཟླ་ཞིང་དབབ། ཕེབས་པ་ན།] ཏིཥྛ་བཛྲ[ས་བརྟན་པར་བྱ། དེ་ནས་དངོས་གཞིའི་དོན་དུ་མཎྜལ་སྔོན་དུ་འགྲོ་བས།] བྱང་ཆུབ་རྡོ་རྗེས་སངས་རྒྱས་ལ། །མཆོད་སྦྱིན་ཇི་ལྟར་སྩལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །[ཞེས་ལན་གསུམ་གྱིས་གསོལ་བ་བཏབ། བུམ་དབང་ནི།] སློབ་དཔོན་རྡོ་རྗེ་སེམས་དཔའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་གདན་གསུམ་ཚང་བའི་དབང་གི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿ[ས་སྤྱན་དྲངས།] ཨརྒྷཾ་[ནས།] ཤཔྡའི་[བར་གྱིས་མཆོད།] ནམ་མཁའ་གང་བའི་དབང་གི་ལྷ་ཚོགས་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བར་[མོས་ལ།] ཨོཾ། ཏིལ་གྱི་གོང་བུ་བཞིན་གང་བའི། །རྒྱལ་བའི་བུམ་པ་བཟུང་ནས་ནི། །འདི་ཉིད་དུ་ནི་བླུགས་མཛད་པས། །བག་ཆགས་མ་ལུས་དག་གྱུར་ཅིག །

ཨོཾ་ཀ་ལཱ་ཤ་ཨ་བྷི་ཥིཉྩ་ཧཱུྃ། [ཞེས་བུམ་པ་སྤྱི་བོར་བཞག་ཅིང་བུམ་ཆུ་མྱང་།] དེ་ལྟར་བུམ་པ་བཟང་པོ་ལས་བྱུང་བའི་ཡེ་ཤེས་ལྔའི་རང་བཞིན་ཅན་གྱི་བདུད་རྩིའི་ཆུ་རྒྱུན་གྱིས་དབང་བསྐུར་བས་ལུས་ཀྱི་ནང་ཐམས་ཅད་གང་། ཉོན་མོངས་པ་ལྔ་སྦྱངས། ཕུང་པོ་ལྔ་སངས་རྒྱས་ལྔར་གནས་གྱུར། ཡེ་ཤེས་ལྔ་མངོན་དུ་བྱས། ཆུའི་ལྷག་མ་སྤྱི་བོར་བརྟན་པ་ལས་དབང་རྟགས་སུ་དེ་བཞིན་གཤེགས་པ་རིགས་ལྔས་དབུ་བརྒྱན། དབང་གིས་ལྷ་རྣམས་ཀྱང་རང་ཉིད་ལ་ཐིམ་པར་[བསམ།] དེ་ལྟར་བུམ་པའི་དབང་བསྐུར་བས། ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། སྣོད་བཅུད་ལྷའི་འཁོར་ལོ་གཅིག་ཏུ་རྫོགས་ནས། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་པའོ། །[གསང་དབང་ནི།] བླ་མ་དཔལ་རྡོ་རྗེ་སེམས་དཔའ་ཡབ་ཡུམ་སྙོམས་པར་བཞུགས་པའི་བདེ་བའི་སྒྲ་དང་དགའ་བའི་འོད་ཟེར་གྱིས་སངས་རྒྱས་སྲས་དང་བཅས་པ་སྤྱན་དྲངས། ཡབ་ཀྱི་ཞལ་དུ་ཞུགས། ཐུགས་ཀར་རྗེས་ཆགས་ཀྱི་མེས་ཞུ་བ་རྡོ་རྗེའི་ལམ་ནས་ཡུམ་གྱི་པདྨར་

བབས། བྱང་སེམས་དཀར་དམར་རོ་གཅིག་ཏུ་འདྲེས་པའི་རྒྱུན་ལྷན་ཅིག་སྐྱེས་པའི་རྟེན་དུ་གྱུར་པ་དེ་ཉིད་ལྕེ་ཐོག་ཏུ་བཞག་པར[མོས་ལ།] ཇི་ལྟར་རྒྱལ་བ་བདེ་གཤེགས་ཀྱིས། །རང་གི་སྲས་མཆོག་དབང་བསྐུར་བཞིན། །བྱང་ཆུབ་སེམས་ནི་དག་པའི་ཆུས། །རྟོག་པའི་དྲི་མ་བསལ་བར་བྱ། །ཨོཾ་བྷོ་ངྷི་ཙིཏྟ་མ་ཧཱ་སུ་ཁ་ཧཱུྃ། [ཞེས་བདུད་རྩི་མྱང་།] བྱང་སེམས་བདུད་རྩིའི་རྒྱུན་གྱིས་རྩ་གནས་ཐམས་ཅད་གང་བས་རྩའི་འཆིང་བྱེད་ཀྱི་མདུད་པ་གྲོལ། གཟུང་འཛིན་བརྒྱད་ཅུའི་རྟོག་པ་འགག བདེ་བའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པར་བསམ། དེ་ལྟར་གསང་བའི་དབང་བསྐུར་བས། ངག་གི་དྲི་མ་དག །ལམ་རང་ལུས་བདེ་བ་ཆེན་པོ་བསྒོམ་པ་ལ་དབང་། སྒྲ་སྐད་དང་རླུང་འབྱིན་འཇུག་གསང་སྔགས་སུ་དག་སྟེ། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་པའོ། །[ཤེར་དབང་ནི།] རང་ཉིད་དཔལ་རྡོ་རྗེ་སེམས་དཔའ་སྣང་སྟོང་སྒྱུ་མ་ལྟ་བུའི་སྐུར་གསལ་བ་ལ། སློབ་དཔོན་གྱི་ཡུམ་རྡོ་རྗེ་སྙེམས་མ་ལས་རིགས་མཐུན་གྱི་ཤེས་རབ་མ་གཟུགས་

དང་ལང་ཚོ་མཚན་ཉིད་ཕུན་སུམ་ཚོགས་པ་ཞིག་རྣམ་པར་སྤྲོས་ཏེ་ཐར་པ་བསྟེན་པར་བསྐུལ་བར་[མོས་ལ།] དགའ་བའི་གནས་སྟེར་ལྷ་མོ་འདི། །སྣ་ཚོགས་སྒྱུ་རྩལ་ཡིད་དུ་འོང་། །ལེགས་པར་ཟུངས་ཤིག་བློ་གྲོས་ཅན། །དགའ་བདེའི་མཆོད་པ་རྟག་ཏུ་གྱིས། །པདྨ་བྷཉྫ་མོ་ཀྵ་ཧོ། [ཞེས་མེ་ལོང་སིནྡྷུ་རའི་མཎྜལ་ལས། སྲིན་ལག་གིས་བླངས་པའི་ཐིག་ལེ་སྙིང་གར་བྱུགས།] འདུ་ཤེས་གསུམ་གྱིས་རོལ་པས་རྗེས་ཆགས་བདེ་ཆེན་གྱི་ཡེ་ཤེས་ཆེས་ཆེར་འབར་བས་གཉིས་སྣང་གི་རྟོག་པ་ཐམས་ཅད་དབྱིངས་སུ་ནུབ་ནས་དགའ་བ་བཞིའི་རིམ་པས་ལྷན་སྐྱེས་ཀྱི་བདེ་བ་བརྟན་པར་བསམ་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། [ཞེས་བརྗོད་ཅིང་འཁྱུད་རྒྱ་བྱ།] དེ་ལྟར་ཤེས་རབ་ཡེ་ཤེས་ཀྱི་དབང་བསྐུར་བས། ཡིད་ཀྱི་དྲི་མ་དག ལམ་ཕོ་ཉ་བདེ་བ་ཆེན་པོས་བསྒོམ་པ་ལ་དབང་། བདེ་སྡུག་བྱུང་ཚོར་ཐམ[དབང་བཞི་པ་ནི།] བླ་མ་དཔལ་རྡོ་རྗེ་སེམས་དཔའི་ཞལ་ནས་སྐྱེ་མེད་

རྡོ་རྗེའི་ཚིག་གིས་རང་བྱུང་དོན་གྱི་དགོངས་པ་ངོ་སྤྲད་དེ་དབུགས་ཕྱུང་བར་མོས་ཤིང་། རྡོ་རྗེ་སེམས་དཔའི་མེ་ལོང་བསྟན་ལ། ཧོཿ འདི་ལྟར་ཆོས་རྣམས་ཐམས་ཅད་ཀུན། །ཐོག་མཐའ་དབུས་མེད་གསལ་ཞིང་སྟོང་། །སྨྲ་བསམ་བརྗོད་མེད་ཡེ་ཤེས་ཆེ། །འདི་ནི་སངས་རྒྱས་དགོངས་པའོ། །ཨོཾ་ངྷརྨ་དྷ་ཏུ་ཨ་ཏི་ཧོཿ [ཞེས་རང་བྱུང་ལྷན་ཅིག་སྐྱེས་པའི་ཡེ་ཤེས་རིག་སྟོང་དོན་གྱི་རྡོ་རྗེ་སེམས་དཔའི་རང་མདངས་བསྐྱང་སྟེ་ཅུང་ཟད་མཉམ་པར་བཞག]དེ་ལྟར་དབང་བཞི་པ་བསྐུར་བས། བག་ཆགས་ཀྱི་དྲི་མ་དག ལམ་ཁྲེགས་ཆོད་ཐོད་རྒལ་བསྒོམས་པ་ལ་དབང་། སྣང་བཞི་ཟད་སར་འཁྱོལ་ཏེ། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པའོ། །[རྗེས་ནི།] གཙོ་བོས་ཇི་ལྟར་[སོགས་དང་།] དེང་ནས་བརྩམས་ཏེ་[སོགས་ཀྱིས་དམ་ཚིག་ཁས་བླངས་ཏེ་ལུས་ལོངས་སྤྱོད་དབུལ་ཞིང་། གཏང་རག་གི་མཎྜལ་འབུལ་བར་བྱའོ། །ཡང་གཞན་ལ་དབང་བསྐུར་བ་དང་འབྲེལ་ན་སྤྲོས་པ་འཚམས་པའི་ཕྱིར་རིག་པའི་མེ་ཏོག་དོར་བའི་སྒོ་ནས་དཀྱིལ་འཁོར་དུ་འཇུག་པ་ནི། མེ་ཏོག་འཐོར་བ་དང་བཅས།] ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་

ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མི་ཡ་ཧཱ། [ཞེས་མེ་ཏོག་ཕུལ་བས།] བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་གཉིས་སུ་མེད་པར་[བསམ་ཞིང་།] ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བས། །ཕྱག་རྒྱ་ཆེན་པོར་བདག་སྦྱོར་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་བཛྲ་ས་མ་ཡ་སྟཾ། ཨོཾ་བཛྲ་ས་མ་ཡ་ཧོཿ [ཞེས་དངོས་གྲུབ་བསྐུལ་ཞིང་བསྟིམ་མོ། དེ་ལྟར་བདག་འཇུག་རྒྱས་བསྡུས་གང་གི་སྐབས་སུའང་མཐར་གནང་བ་ཞུ་བ་ནི། ཐལ་མོ་སྦྱར་བས་བཏུད་དེ།] ཨོཾ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གི་སློབ་མ་འཇུག་པར་འཚལ། །[ཞེས་གསོལ་བས་གནང་བ་བྱིན་པར་བསམ་མོ། །] [གཉིས་པ་གཞན་དོན་དབང་བསྐུར་བ་ནི། སློབ་མ་རྣམས་ཁྲུས་བྱ་བགེགས་བསྐྲད་དེ་སྲུང་འཁོར་བསྒོམ། ཆོས་བཤད་ཇི་ལྟར་རིགས་པས་མཚམས་སྦྱར་ཏེ།] དེའང་ཇི་སྐད་དུ་སྔོམ་འབྱུང་ལས། མཆོད་པ་ཐམས་ཅད་ཡོངས་སྤངས་ཏེ། །བླ་

མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་དང་། སྒྱུ་འཕྲུལ་དྲྭ་བའི་རྒྱུད་ལ། བླ་མ་དཀྱིལ་འཁོར་ཐམས་ཅད་ཀྱི། །དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཞེས་སོགས་ཟབ་མོའི་རྒྱུད་སྡེ་རྣམས་ལས་དཔལ་ལྡན་བླ་མ་རྡོ་རྗེ་སློབ་དཔོན་ཁོ་ན་མཆོད་ཅིང་བསྙེན་བཀུར་བ་དང་། དེ་ཉིད་ཀྱང་རིགས་ཀུན་ཁྱབ་བདག་རྡོ་རྗེ་སེམས་དཔའི་ངོ་བོ་ཉིད་དང་ཐ་མི་དད་པར་བསྒོམ་ཞིང་བསྒྲུབ་པ་ལ་བརྟེན་ནས་ལམ་གྱི་འགལ་རྐྱེན་མཐའ་དག་སྦྱངས་ཏེ་བསོད་ནམས་ཀྱི་ཚོགས་རླབས་པོ་ཆེ་མྱུར་དུ་རྫོགས་ཤིང་། ལྷན་ཅིག་སྐྱེས་པའི་ཡེ་ཤེས་དཀའ་བ་མེད་པར་རྟོགས་པར་འགྱུར་བའི་ཚུལ་རྒྱ་ཆེར་གསུངས་པ་བཞིན། མཁས་ཤིང་གྲུབ་པ་བརྙེས་པའི་རྡོ་རྗེའི་རིག་འཛིན་ཆེན་པོ་རྣམས་ཀྱིས་ཇི་ལྟར་བཀྲལ་བའི་རྗེས་སུ་འབྲངས་ཏེ། བླ་མ་མཆོད་པའི་ཆོ་ག་རྒྱུན་གྱི་ཉམས་ལེན་སྙིང་པོའི་བཅུད་དུ་དྲིལ་

བ་ཚོགས་ཆེན་ཤིང་རྟ་དང་རྗེས་ས་འབྲེལ་བར་བྱིན་རླབས་དབང་བསྐུར་གྱི་རིམ་པ་ཟབ་མོ་བསྒྲུབ་པ་ལ་བདག་ཉིད་སློབ་དཔོན་གྱི་བྱ་བ་གྲུབ་ནས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་ཐོག་མར་མཎྜལ་ཕུལ་མཛོད། ཕྱག་སྙིམ་པ་མེ་ཏོག་དང་བཅས་པའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས་མཛོད། བླ་མ་གཙོ་བོ་[སོགས།] བླ་མ་དང་རྡོ་རྗེ་སེམས་དཔའ་རབ་འབྱམས་རྒྱལ་བའི་དཀྱིལ་འཁོར་གྱི་འཁོར་ལོ་དབྱེར་མི་ཕྱེད་པར་བཞུགས་པའི་སྤྱན་སྔར་ཡན་ལག་བརྒྱད་ཀྱི་སྒོ་ནས་རྒྱུད་སྦྱོང་བ་འདིའི་རྗེས་ཟློས། རྡོ་རྗེ་སློབ་དཔོན་[སོགས།] སླར་ཡང་སྲས་བཅས་རྒྱལ་བ་ཡོངས་ཀྱི་བགྲོད་པ་གཅིག་པའི་ལམ་སྡོམ་པ་གསུམ་གྱི་བསླབ་པ་རྣམས་ཚུལ་བཞིན་དུ་བཟུང་ཞིང་བསྲུང་བས་དེ་བཞིན་གཤེགས་པའི་སྤྱོད་ཡུལ་རླབས་པོ་ཆེ་ལ་འཇུག་པར་བགྱིའོ། སྙམ་པས་དམ་བཅའ་འདིའི་རྗེས་ཟློས། བདེ་བར་གཤེགས་པ་[སོགས།] དེ་ནས་དངོས་གཞི་བྱིན་རླབས་ཀྱི་གཞི་བསྒྲུབ་པ་ཡེ་ཤེས་དབབ་པའི་སླད་དུ་

དམིགས་པ་འདི་བཞིན་དུ་མཛོད། ཤཱུ་ནྱ་ཏཱ[ས་བསང་སྦྱང་།] ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་སྦྱངས། སྟོང་པའི་ངང་ལས་ཕྱོགས་འདི་ཉིད་དག་པ་རབ་འབྱམས་འོག་མིན་མངོན་པར་དགའ་བའི་ཞིང་ཁམས་ཆེན་པོར་རྫོགས་པའི་དབུས་སུ་སེང་གེས་མཚོན་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ། ཁྱེད་རང་རྣམས་སྐད་ཅིག་གིས་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་སྐུ་མདོག་དཀར་གསལ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་པ། ཞི་ཚུལ་དགུ་དང་རྒྱན་ཆས་བཅུ་གསུམ་གྱིས་མཛེས་ཤིང་། ཞབས་གཉིས་རྡོ་རྗེ་དང་པདྨའི་སྐྱིལ་མོ་ཀྲུང་གིས་སྣང་སྟོང་འཇའ་ཟེར་ཐིག་ལེའི་ཀློང་ནང་བཞུགས་པའི་ཕུང་ཁམས་སྐྱེ་མཆེད་ཐམས་ཅད་གདོད་ནས་རྣམ་པར་དག་པ་ཞི་ཁྲོ་རབ་འབྱམས་རྒྱལ་ཀུན་འདུས་པའི་སྤྱི་གཟུགས་ཆེན་པོར་ལམ་གྱིས་གསལ་བའི་

གནས་གསུམ་དུ་ཨོཾ་ཨཱཿཧཱུྃ་གིས་མཚན་པ་དང་། ཐུགས་ཀར་རང་འདྲའི་ཡེ་ཤེས་སེམས་དཔའ་རྡོར་སེམས་ཡབ་ཡུམ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་བདེ་བའི་སྒྲ་དང་འོད་ཟེར་གྱིས་སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མའི་ཚོགས་ཐམས་ཅད་དཔལ་རྡོ་རྗེ་སེམས་དཔའ་ཡབ་ཡུམ་གྱི་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་ཁ་ཆར་བུ་ཡུག་འཚུབས་པ་བཞིན་དུ་སྤྱན་དྲངས་ཏེ་སྙིང་གནས་སིབ་སིབ་ཐིམ་པས་རྡོ་རྗེའི་ཡེ་ཤེས་མངོན་དུ་གྱུར་པའི་མོས་པ་མཛོད། [སྔགས་མཐར།] ཨོཾ་བཛྲ་ཛྙཱ་ན་ཨཱ་བེ་ཤ་ཡ་ཨ་ཨཱཿ [ཞེས་དྲག་ཏུ་བརྗོད་པས་དབབ།] དེ་ལྟར་བྱིན་དབབ་པའི་ཡེ་ཤེས་པ་བྱང་ཆུབ་སྙིང་པོའི་བར་དུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ། [ཞེས་རྡོ་རྗེ་མགོ་བོར་རྒྱ་གྲམ་དུ་བཀོད།] དེ་རྣམས་ཀྱིས་འཇུག་པའི་རིམ་པ་གྲུབ་ནས། དངོས་གཞིའི་དབང་བསྐུར་ཞུ་བའི་སླད་དུ་མཎྜལ་ཕུལ། ཁྱད་པར་ཅན་གྱི་དོན་ཞུ་བའི་ཕྱིར་གསོལ་བ་འདེབས་

པ་འདིའི་རྗེས་ཟློས། བྱང་ཆུབ་རྡོ་རྗེ་སོགས། སློབ་དཔོན་རྡོ་རྗེ་སེམས་དཔའི་ཐུགས་ཀ་ནས་[སོགས་ལམ་དབང་དཀྱུས་ལྟར་དབང་བཞི་རྫོགས་པར་བསྐུར་བའི་རྗེས་སུ་ཤིས་བརྗོད་ཇི་ལྟར་རིགས་པ་བྱ།] དེ་རྣམས་ཀྱིས་དབང་བཞི་ཡོངས་སུ་རྫོགས་པ་ལེགས་པར་ཐོབ་པ་ཡིན་པས་དབང་གི་སྲོག་སྤྱི་དང་ཁྱད་པར་ལྷག་པས་བསྡུས་པའི་དམ་ཚིག་དང་སྡོམ་པ་མཐའ་དག་ཚུལ་བཞིན་དུ་འཛིན་ཅིང་བསྲུང་སྙམ་པས་འདིའི་རྗེས་ཟློས། གཙོ་བོས་ཇི་ལྟར་[སོགས་ཀྱིས་དམ་ཚིག་ཁས་ལེན། གཏང་རག་མཎྜལ་དང་ལུས་ལོངས་སྤྱོད་འབུལ་ཞིང་དགེ་བསྔོ་སྤྱི་ལྟར་བྱའོ། །] ༈ [གཉིས་པ་གནས་ལུང་གི་ཆོ་ག་ནི། སྦྱོར་བ་དཀྱིལ་འཁོར་གྱི་ཤར་ཕྱོགས་སུ་པདྨ་འདབ་བརྒྱད་བྲིས་པའི་ཁར་མིང་བྱང་སོགས་རྟེན་བཞག སྦྱོང་ཆས་བྲབ་རྫས་ཟབ་གཏད་སོགས་འོག་ཏུ་དགོས་པ་རྣམས་ཚང་བར་འདུ་བྱ། ཕྲིན་ལས་ཀྱི་གཞུང་བསྲངས་ཏེ་བཟླས་པའི་རྗེས་སུ།] དཀྱིལ་འཁོར་གྱི་ལྷའི་ཞལ་ནས་སྔགས་ཀྱི་སྒྲ་དང་ཐུགས་རྗེའི་འོད་ཟེར་འཕྲོས་པས། ཁམས་གསུམ་ཐམས་ཅད་སྣང་བར་བྱས། ངན་སོང་རྣམས་སྦྱངས། དམིགས་ཡུལ་གཙོ་བོར་གྱུར་པའི་སེམས་ཅན་ཐམས་ཅད་

སངས་རྒྱས་ཀྱི་ཞིང་དུ་བསྒྲལ་བར་[བསམ་ལ། ཡིག་བརྒྱའི་ཤམ་བུར།] ཨུ་སུ་ནྲྀ་ཏྲི་པྲེ་དུཿསརྦ་པཱ་པཾ་ཀླེ་ཤ་ད་ཧ་ན་བྷ་སྨི་ཀུ་རུ་སྭཱཧཱ། [ཞེས་བཏགས་པ་བཟླ་ཞིང་བྱེ་ཡུངས་ལའང་ཕུས་གདབ། གནས་ལུང་དངོས་ལ་བཅུ་གསུམ་ལས།] [དང་པོ་རྟེན་བསྐྱེད་པ་ནི། དམིགས་རྟེན་བསང་སྦྱང་།] སྟོང་པའི་ངང་ལས་པདྨ་དང་ཟླ་བའི་གདན་ལ་མིང་བྱང་ནྲྀ་ལས་ཚེ་འདས་ཀྱི་གཟུགས་ཀྱི་རྣམ་པ་ཇི་ལྟ་བར་གྱུར་བར་[བསམ།] [གཉིས་པ་རྣམ་ཤེས་དགུག་པ་ནི།] ལྕགས་ཀྱུའི་ཕྱག་རྒྱ་དང་ཐུགས་ཀའི་ཧཱུྃ་གི་འོད་ཟེར་གྱིས་རྣམ་ཤེས་བཀུག་པར་[བསམ་ཞིང་།] ན་མོ། རྩ་བརྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ངན་འགྲོ་ཐམས་ཅད་རྣམ་པར་སྦྱོང་བ་བླ་མ་རྡོ་རྗེ་སམེས་དཔའི་ལྷ་ཚོགས་རྣམས་ཀྱི་བདེན་པ་དང་། གསང་སྔགས་རིག་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས་ཚེ་ལས་འདས་པ་[ཆེ་གེ་མོའི་]རྣམ་པར་ཤེས་པ་ཁམས་གསུམ་རིགས་དྲུག་གི་གནས་

གང་ན་གནས་ཀྱང་སྐད་ཅིག་གིས་འདིར་མཆིས་པར་གྱུར་ཅིག །ཨོཾ་བཛྲ་ཨཱ་ཀརྵ་ཡ་ཛཿ [ཞེས་པས་རྣམ་ཤེས་དང་།] སརྦ་པཱ་པཾ་ཨཱ་ན་ཡ་ཧཱུྃ། [ཞེས་པས་སྡིག་པ་བཀུག་ནས།] ཛཿཧཱུྃ་བཾ་ཧོཿས་རྣམ་ཤེས་ཨ་དཀར་པོའི་རྣམ་པས་རྟེན་ལ་ཐིམ་པར་[བསམ།] [གསུམ་པ་བགེགས་སྦྱོང་བ་ནི།] གཏོར་མ་གསུམ་པོ་རྟེན་ལ་གཡས་སུ་བསྐོར་ཞིང་། ཨོཾ་སརྦ་བིགྷྣཱཾ་ན་མཿསརྦ་ཏ་ཐཱ་ག་ཏེ་བྷྱོ་[སོགས་ནས།] གྲྀ་ཧྞེ་དཾ་བ་ལི་ཏེ་སྭཱཧཱ། [ཞེས་ལན་གསུམ་གྱིས་ཞི་བ། ཏིང་ལོ་དང་ཆང་བུ་གཡོན་དུ་བསྐོར་ཞིང་།] སུམྦྷ་ནི་[སོགས་]ཧཱུྃ་[བཞི་པ་གསུམ་གྱིས་ཕྱེད་མ། བདེན་སྟོབས་སྔར་བཞིན་བརྗོད་པའི་མཐར།] ཚེ་ལས་འདས་པ་གསོན་གྱི་དུས་སུ་ཚེ་ལ་བར་དུ་གཅོད་ཅིང་གཤིན་གྱི་དུས་ན་སྡིག་པ་སྦྱོང་བ་ལ་བར་དུ་གཅོད་པའི་གདོན་བགེགས་ཐམས་ཅད་གཏོར་མ་འདིས་ཚིམས་པར་གྱིས་ལ་དཔག་ཚད་དང་རྒྱང་གྲགས་སུ་མ་གནས་པར་སོང་ཞིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བས་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། [ཞེས་བརྗོད་ཅིང་། གུ་གུལ་གྱིས་བདུག་ཡུངས་དཀར་གྱིས་བྲབ། དྲག་སྔགས་རོལ་མོ་ཚམ་རྔམས་དང་བཅས་པས་

གཏོར་མ་རྒྱང་རིང་དུ་དོར་བ་ནི་དྲག་པོས་སྦྱོང་བའོ། །] [བཞི་པ་སྡིག་པ་སྦྱོང་བ་ནི།] ཚེ་ལས་འདས་པའི་སྦྱི་བོར་ལྷའི་ས་བོན་ཨ་དཀར་པོ། མགྲིན་པར་ལྷ་མིན་གྱི་ས་བོན་སུ་སེར་པོ། སྙིང་གར་མིའི་ས་བོན་ནྲྀ་སྔོ་སྐྱ། ལྟེ་བར་དུད་འགྲོའི་ས་བོན་ཏྲི་ལྗང་གུ། གསང་གནས་སུ་ཡི་དྭགས་ཀྱི་ས་བོན་པྲེ་ཐལ་སྐྱ། རྐང་མཐིལ་དུ་དམྱལ་བའི་ས་བོན་དུཿ དུད་ཁའི་རྣམ་པར་གནས་པ། བླ་མ་རྡོ་རྗེ་སེམས་དཔའི་ཐུགས་ཀ་ནས་ཡེས་ཤེས་ཀྱི་འོད་ཟེར་མེ་ལྕེ་ལྟ་བུ་བྱུང་བས་ཚེ་འདས་རིགས་དྲུག་ཏུ་སྐྱེ་བའི་ས་བོན་དང་ལྷན་ཅིག་ཏུ་ཉོན་མོངས་སྡིག་སྒྲིབ་བག་ཆགས་དང་བཅས་པ་ཐམས་ཅད་བསྲེག་ཅིང་སྦྱངས་པར་བསམ་ལ། ཡིག་བརྒྱ་པའི་མཐར།] ཨ་སུ་ནྲྀ་ཏྲི་པྲེ་དུཿསརྦ་པཱ་པཾ་ཀླེ་ཤ་ད་ཧ་ན་བྷ་སྨི་ཀུ་རུ་སྭཱཧཱ། [ཞེས་བཟླ་ཞིང་བྱེ་མ་དང་ཡུངས་དཀར་གྱིས་བྲབ་པས།] སྡིག་སྒྲིབ་ཐམས་ཅད་ཉི་མས་བ་མོ་བཞུ་བ་བཞིན་དག་པར་[བསམ་མོ། །] [ལྔ་པ་ཁྲུས་བྱ་བ་ནི། ཐོག་མར་དཀྱིལ་འཁོར་སོགས་ལྷ་རྟེན་གྱི་གཟུགས་བརྙན་ཤར་བའི་མེ་ལོང་ལ་ཁྲུས་གསོལ་ཞིང་།] ཇི་ལྟར་བལྟམས་པ་[སོགས་དང་།] རྒྱལ་བའི་

སྐུ་གསུང་ཐུགས་མཆོག་ལ། །ཉོན་མོངས་དྲི་མ་མི་མངའ་ཡང་། །ཚེ་འདས་སྒོ་གསུམ་སྒྲིབ་སྦྱོང་ཕྱིར། །གཙང་མའི་ཆབ་ཀྱིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། [ཞེས་དང་།] དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ཨོཾ་ཧཱུྃ་ཏྲཱཾ་ཧྲཱིཿཨཱཿཀཱ་ཡ་བི་ཤྭ་ངྷ་ནེ་སྭཱཧཱ། [ཞེས་སྐུ་ཕྱིས་པའི་ཁྲུས་ཆུ་སླར་ཡང་བུམ་པར་བླུགས་པས་མིང་བྱང་སོགས་རྟེན་ལ་བཀྲུ་ཞིང་།] རྣམ་དག་གཙང་དྭངས་ལྷ་ཡི་ཆུ། །ཡིད་འོང་དྲི་ཞིམ་གཱངྒའི་རྒྱུན། །ཕྱག་རྒྱ་ཡེ་ཤེས་བུམ་པའི་ཆུས། །ཚེ་འདས་སྒྲིབ་པ་དག་གྱུར་ཅིག །[ཅེས་དང་ཡིག་བརྒྱ་བཟླ་ཞིང་བཀྲུ། གཞན་ཡང་།] འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང་། །གཏོང་བ་དྲི་ཡིས་ལེགས་བགོས་ཆུ། །ཁྲུས་ལེགས་མཛད་ཀྱིས་ཁྲུས་བགྱིའོ། །[དེ་བཞིན་དུ་སྦྱིན་པའི་གནས་སུ།] ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ། [ཅེས་དང་། སེར་སྣའི་མལ་དུ།] ཁྲིམས་འཆལ། ཁོང་ཁྲོ། ལེ་ལོ། རྣམ་གཡེང་། ཤེས་

འཆལ་རྣམས་སུ་བསྒྱུར་བ་[གཟུངས་སྔགས་རོལ་མོ་དང་བཅས་པས་ཁྲུས་བྱའོ། །] [དྲུག་པ་དུག་སྦྱོང་བ་ནི། བུམ་ཆུས་རྟེན་ལ་བྱབས་ཤིང་། །] འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བཅོམ་ལྡན་དུག་མི་མདའ། །སངས་རྒྱས་བདེན་པས་དུག་སྦྱོང་ངོ་། །[དེ་བཞིན་དུ་ཆོས་དང་དགེ་འདུན་ལ་ཡང་སྦྱར། འབྱུང་བ་སོ་སོས་བྱབས་ཤིང་།] ས་འདི་དུག་གི་ཕ་ཡིན་ཏེ། །ས་འདི་དུག་གི་མ་ཡང་ཡིན། །སངས་རྒྱས་སྤྱན་མའི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །[དེ་བཞིན་དུ།] ཆུ། མེ། [རླུང་རྣམས།] མ་མ་ཀི། གོས་དཀར་མོ། དམ་ཚིག་སྒྲོལ་མ་[ཞེས་བསྒྱུར་བས་དུག་སྦྱོང་།] [བདུན་པ་སྐྱབས་སུ་འགྲོར་གཞུག་པ་ནི།] ཚེ་འདས་ཉིད་བླ་མ་དཀྱིལ་འཁོར་པ་ལ་ཕྱག་འཚལ་ཞིང་གསོལ་བ་འདེབས་པར་[བསམ་ལ། སྔར་ཚོགས་བསགས་ཀྱི་སྐབས་བཞིན་ཕྱག་རྣམས་བྱས་པའི་མཐར།] ཕྱོགས་བཅུར་བཞུགས་པའི་བླ་མ་དང་། །མཆོག་གསུམ་རྒྱལ་བ་རབ་འབྱམས་ཀྱི། །དཀྱིལ་འཁོར་ལྷ་ཚོགས་ཐམས་ཅད་ལ། །དེ་རིང་སྙིང་ནས་བདག་སྐྱབས་

མཆི། །མགོན་པོ་ཐུགས་རྗེ་ཅན་རྣམས་ཀྱིས། །འཁོར་བའི་སེམས་ཅན་བདག་ལྟ་བུ། །བར་དོའི་གནས་ན་མགོན་མེད་ཅིང་། །འཇིགས་པས་མནར་བ་བདག་ལ་དགོངས། །ཐོག་མེད་དུས་ནས་སྤྱད་པ་ཡི། །ལས་ངན་སྒྲིབ་པས་བཅིངས་པ་བདག །མཐའ་མེད་འཁོར་བའི་སྡུག་བསྔལ་ལས། །བདེ་ཆེན་གནས་སུ་དྲང་དུ་གསོལ། །བར་དོའི་འཇིགས་པ་གཤིན་རྗེའི་འཕྲང་། །ཉམ་ངའི་གནས་སུ་འཁྱམས་པའི་འགྲོ། །ཉོན་མོངས་གདུང་བས་གཟིར་བ་རྣམས། །བྱམས་པའི་ཐུགས་རྗེས་བསྐྱབ་ཏུ་གསོལ། །[ཅེས་སྐྱབས་སུ་འགྲོར་གཞུག་གོ། །] [བརྒྱད་པ་དབང་བསྐུར་བ་ནི། ཁྲུས་དང་མཎྜལ་ནས་བཟུང་རྗེས་གཏང་རག་གི་བར་དབང་ཆོག་བཞིན་བྱའོ། །] [དགུ་པ་ཟས་གཏད་པ་ནི།] ཚེ་འདས་རྡོ་རྗེ་སེམས་དཔའི་སྐུར་བསྐྱེད་པའི་མདུན་དུ་བཟའ་བཏུང་སྣ་ཚོགས་བཤམས་ཏེ། རཾ་ཡཾ་ཁཾ་[གིས་བསང་སྦྱང་།] འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་[བསམ་ཞིང་། ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ལ།] ཕྱོགས་དུས་ཀུན་ན་གཟུགས་སྒྲ་དྲི་རོ་དང་། །རེག་བྱའི་ཁྱད་པར་དབང་པོ་ཆིམ་

བྱེད་རྣམས། །རྡོ་རྗེ་སེམས་དཔའི་གནས་ཐོབ་ཁྱོད་ལ་འབུལ། །ཟག་མེད་དགའ་བདེས་རྟག་ཏུ་ཚིམ་པར་ཤོག །ཨོཾ་བཛྲ་སཏྭ་པཉྩ་ཀ་མ་གུ་ཎ་པྲ་ཏཱིཙྪ་སྭཱ་ཧཱ། [ཞེས་བསྔོ།] [བཅུ་པ་འཁོར་བར་མ་ཆགས་པར་གདམས་པ་ནི།] ཉོན་ཅིག་ཚེ་འདས་རིགས་ཀྱི་བུ། །འཁོར་བ་སྡུག་བསྔལ་ཅན་ཕུང་པོ། །འགྱུར་དང་འདུ་བྱེད་ཉིང་འཁྲུལ་ཅན། །ལས་ལས་སྐྱེ་ཞིང་ལས་ལ་བརྟེན། །དེ་ཕྱིར་དེ་ལ་མ་ཆགས་པར། །བླ་མ་དཀོན་མཆོག་རྣམས་ཀྱི་མཐུ། །དད་པའི་ཡུལ་ན་ཤིན་ཏུ་སྣང་། །མོས་གུས་སྐྱེད་ཅིག་རིགས་ཀྱི་བུ། [བཅུ་གཅིག་པ་ལམ་བསྟན་པ་ནི།] འདི་ནས་ཤར་གྱི་ཕྱོགས་རོལ་ན། །སྲིད་གསུམ་དྲི་མ་རབ་སྤངས་པ། །རང་བཞིན་སྤྲུལ་པའི་ཞིང་ཁམས་ནི། །མངོན་པར་དགའ་བ་ཞེས་བྱ་བར། །བླ་མ་རྡོ་རྗེ་སེམས་དཔའ་ཆེ། །རྒྱལ་དང་དེ་སྲས་འཁོར་བཅས་བཞུགས། །གང་ཞིག་ཡིད་ལ་དྲན་པའི་མོད། །ཁྱོད་ཀྱང་དེ་རུ་ཕྱིན་འགྱུར་བས། །དད་གུས་སྐྱེད་ལ་དེ་མཚན་ཟུངས། །སྟོན་པ་དེ་ཡི་ཞལ་མཐོང་བའི། །མོད་ལ་སྒྲིབ་པ་རྣམས་

པ་གཉིས། །ཡུད་ཀྱིས་སྤངས་ནས་མངོན་སངས་རྒྱས། །ཡིད་གཉིས་སྤོངས་ལ་དེར་གཤེགས་ཤིག །[བཅུ་གཉིས་པ་གནས་སྤར་བ་ནི།] ཚེ་ལས་འདས་པའི་རྣམ་ཤེས་ཧཱུྃ་ཡིག་གི་རྣམ་པས་སྐར་མདའ་འཕང་བ་བཞིན་སྤྱི་བོ་ནས་ཐོན། འོག་མིན་གྱི་ཞིང་དུ་སོང་། རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་ཐིམ་ནས་རྒྱལ་བའི་སྲས་སུ་སངས་རྒྱས་པར་[བསམ་མོ། །] [བཅུ་གསུམ་པ་བྱང་བུ་བསྲེག་པ་ནི།] དཀྱིལ་འཁོར་པའི་ལྷ་ཚོགས་རྣམས་ཀྱི་ཐུགས་ཀ་ནས་ཡེ་ཤེས་ཀྱི་འོད་ཟེར་བྱུང་བས་ཚེས་འདས་ཀྱི་ཕུང་ཁམས་སྐྱེ་མཆེད་འཁོར་བའི་ཆོས་ཐམས་ཅད་དམིགས་མེད་ཀ་དག་གི་དབྱིངས་སུ་སྦྱངས་པར[བསམ་ལ་མེ་སྦར་ཞིང་།] ཧཱུྃ། ཆོས་ཀྱི་དབྱིངས་ཀྱི་ཐབ་ཁུང་དུ། །བདག་འཛིན་ཕུང་པོའི་བུད་ཤིང་ལ། །ཤེས་རབ་ཡེ་ཤེས་མེ་སྦར་ཏེ། །ཚེ་འདས་ཉོན་མོངས་བག་ཆགས་བསྲེག །འདི་ནི་སྐྱེ་འགག་སྨོན་པ་དང་། །གནས་མེད་མཚན་མ་མེད་པའི་མེ། །འདི་ནི་རང་བྱུང་ཡེ་ཤེས་མེ། །བདག་འཛིན་མཚན་མའི་རྟོག་པ་བསྲེག །དོན་ལ་བསྲེག་

བྱ་སྲེག་བྱེད་ཀུན། །བྱ་རྩོལ་མེད་པར་ཡེ་སངས་རྒྱས། །འབད་མེད་ལྷུན་གྲུབ་ཆོས་ཀྱི་སྐུ། །རང་བྱུང་ཡེ་ཤེས་དེར་སྣང་ངོ་། །[ཡིག་བརྒྱའི་མཐར།] ཨགྣེ་ཛྭ་ལ་རཾ། [ཞེས་ཟག་བཅས་ཀྱི་ཕུང་པོ་ཟག་མེད་དུ་སྦྱང་བར་བྱའོ། །དེ་ལྟར་བྱང་བུ་དང་རོ་སྲེག་གིས་མཚོན་ཏེ་སྒྲིབ་སྦྱོང་གི་མཚན་མ་མོའི་པྲ་ལས་ཤེས་པར་བྱ་སྟེ། སྟེང་དུ་དྲང་པོར་འབར་བ་དང་། དུ་བ་ལ་སོགས་ངམ་ནག་ནོག་མེད་པ་དང་། ཟླུམ་ཞིང་སྟེང་དུ་མི་འཕྲོ་བ་དང་། དལ་ཞིང་མདངས་གསལ་བ་དང་། སྒྲ་ལ་སོགས་པ་ཆུང་བར་འབར་བ་དང་། མེ་ལྷ་ཉིད་ཀྱི་རང་གཟུགས་ཇི་ལྟ་བར་མེ་ཡི་གཟུགས་ལས་སྟོན་པ་རྣམས་ནི་དམིགས་ཡུལ་དེ་ངན་སོང་ལས་གྲོལ་ཞིང་ལྷ་ལ་སོགས་པའི་བདེ་འགྲོར་སྐྱེ་བའི་རྟགས་ཡིན་ཅིང་། དགེ་བར་མཐོང་ན་ཚོགས་གཉིས་ཀྱི་དཔུང་བསྐྱེད་པའི་དགེ་བའི་སྟོབས་ཇི་ལྟར་རིགས་པ་བསྒྲུབས་པས་བདེ་འགྲོར་སྐྱེ་འགྱུར་ཉིད་ཀྱང་འགལ་རྐྱེན་ཉུང་བ་དང་། མཐུན་རྐྱེན་མངོན་པར་མཐོ་བའི་རྟེན་དེ་ཡང་གཟུགས་དང་ལང་ཚོ་དང་འབྱོར་པ་ཕུན་སུམ་ཚོགས་པ་གོང་ནས་གོང་དུ་སྤེལ་ཞིང་ངེས་པར་ལེགས་པའི་ལམ་དུ་འཇུག་པ་ལ་སོགས་པར་འགྱུར་རོ། །ཡང་མི་དགེ་བའི་མཚན་མ་ནི། དུ་བ་ཆེ་ཞིང་མེ་སྟག་འཕྲོ་བ་དང་། དལ་བུས་མདོག་མི་གསལ་བར་འབར་བ་དང་། མེ་ཞན་པ་དང་། མེ་ལྕེ་ཆད་པ་

དང་། འོད་མེད་ཅིང་སྔོ་བ་དང་། མདུང་རྩེ་གསུམ་པ་ལྟ་བུ་དང་། ཞིབ་མ་ལྟ་བུ་མིག་ཚགས་ཅན་དང་། བ་ལང་གདོང་གི་དབྱིབས་ལྟ་བུ་དང་། མི་རོ་ལ་སོགས་པའི་དྲི་ང་བ་དང་། དྲག་ཏུ་འཚུབས་ཤིང་འབར་བ་རྣམས་ནི་དམིགས་ཡུལ་དེ་ངན་འགྲོར་སྐྱེ་བའི་རྟགས་ཡིན་པས། ངན་པར་མཐོང་ན་གཉེན་པོ་ཀུན་ཏུ་སྤྱོད་པའི་སྟོབས་ཀྱིས་སྡིག་པ་སྦྱོང་བ་ལ་འབད་པར་བྱ་ཞིང་། དེ་ཡང་མདོ་དང་རྒྱུད་སྡེ་ཟབ་མོ་བཀླག་པ་དང་། བདག་མེད་ཀྱི་དོན་ལ་འཇུག་པ་དང་། ཡིག་བརྒྱ་ལ་སོགས་པའི་གཟུངས་ཁྱད་པར་ཅན་ཆོ་ག་བཞིན་དུ་བཟླ་བ་དང་། སངས་རྒྱས་ཀྱི་སྐུ་གཟུགས་དང་གླེགས་བམ་དང་མཆོད་རྟེན་སོགས་བཞེངས་པ་དང་། དེ་དག་དང་དགེ་འདུན་ལ་མཆོད་པ་དང་། སྦྱིན་གཏོང་དང་སྲོག་བསླུ་བ་ལ་སོགས་དགེ་བའི་དཔུང་རྒྱ་ཆེར་བསྐྱེད་དེ་བསྒྲུབས་པས། ངན་སོང་གི་སྡུག་བསྔལ་ཆེན་པོར་སྐྱེ་བའི་རྒྱུ་རྣམས་སྡུག་བསྔལ་ཆུང་བར་འགྱུར་བ་དང་། ངན་འགྲོར་སྐྱེས་ཀྱང་དེའི་སྡུག་བསྔལ་རིང་པོར་མྱོང་བ་རྣམས་ཡུན་ཐུང་དུའམ། གཏན་ནས་མྱོང་མི་དགོས་པར་འགྱུར་བ་སོགས་གཉེན་པོ་སྟོབས་ཆེ་ཆུང་ལས་སྡིག་པ་འདག་ཚུལ་ཡང་དེའི་རྗེས་སུ་འགྲོ་བས་ན་བསགས་སྦྱོང་གི་ལས་གང་བསྒྲུབ་ཀྱང་ལྷག་པའི་བསམ་པ་དང་སྦྱོར་བ་ཕུན་སུམ་ཚོགས་པས་ནན་ཏན་དུ་བསྒྲུབ་པ་གལ་ཆེའོ། །འཕྲོས་དོན་དུ་སྐབས་འགའ་ཞིག་གི་ཚེ་གསོན་པོའི་སྒྲིབ་སྦྱོང་

ལ་ཡང་གནས་ལུང་གི་ཆོ་ག་འདི་ཉིད་སྦྱར་བར་འདོད་ན། དམིགས་བྱ་གམ་དུ་ཡོད་པ་ལ་ནི་རྟེན་བསྐྱེད་པ་དང་རྣམ་ཤེས་དགུག་པ་དོར་ལ། བགེགས་སྦྱོང་བ་ནས་ལམ་སྦྱོང་བསྟན་གྱི་བར་ཚེ་འདས་ཞེས་པ་རྣམས་སྐལ་ལྡན་དུ་བསྒྱུར་ཞིང་གཞན་ཆོ་གའི་ཆིངས་སྔ་མ་ཁོ་ན་ལྟར་ལས། བྱང་བུ་བསྲེག་པའི་དོད་དུ་དམིགས་བྱའི་སྐྲ་སེན་སོགས་སྡིག་སྒྲིབ་རྣམ་སྨིན་གྱི་ཕུང་པོར་དམིགས་ནས་སྲེག་སྦྱོང་བྱ། དམིགས་ཡུལ་ས་ཕྱོགས་གཞན་དུ་གནས་པ་ཡིན་ན། དམིགས་རྟེན་གྱི་བྱང་བུ་བཤམ་པ་དང་བསྐྱེད་དགུག མཐར་བསྲེག་པ་སོགས་ཀྱང་བཤད་མ་ཐག་པ་ལྟར་བྱའོ། །] ༈ [གསུམ་པ་སྦྱིན་སྲེག་གི་ཆོ་ག་ནི། སྦྱོར་བ་གང་དུ་བྱ་བའི་གནས་དེར་གཞི་བདག་ལ་གཏོར་མ་བྱིན་ནས་བཀའ་བསྒོས། རྡོ་རྗེ་དང་བཅས་པའི་ལག་གཡས་ས་ལ་བཞག་སྟེ་་སྡགས་བརྒྱ་རྩ་བཟླས་པས་བྱིན་གྱིས་བརླབས་ནས་སྟོང་ཉིད་དུ་རྒྱས་བཏབ། ཐབ་སྟེགས་གྲུ་བཞི་པ་བ་བྱུང་དང་དྲི་བཟང་གིས་བྱུགས་པའི་ཁར་བྲིས་ཐབ་ལ་ཚངས་ཟུར་གྱི་ཐིག་བཏབ་པར་མཐོ་གང་ཚད་ཀྱིས་ཟླུམ་པོར་བསྐོར་ལ་པདྨ་འདབ་བརྒྱས་ལྟེ་བར་རྡོ་རྗེས་མཚན་པ། ཕྱི་རིམ་སོར་བཞི་པ་མུ་རན་ལ་མེ་རི་གཡས་བསྐོར་དུ་འབར་བ་དང་། ཁ་ཁྱེར་སོར་བཞི་པ་ལ་རྡོ་རྗེ་ནོར་བུའི་ཕྲེང་བས་བསྐོར་ཞིང་གྲྭ་

བཞིར་ཟླ་ཕྱེད་རྡོ་རྗེས་མཚན་པ་བྲི། ཁ་དོག་ཐམས་ཅད་ཀུན་ནས་དཀར་པོར་བྱས་ཤིང་མེ་ཏོག་དཀར་པོ་གཅལ་དུ་བཀྲམ་པའི་ཁ་ཁྱེར་གྱི་ནང་དུ་ཚེར་མ་དང་སྲོག་ཆགས་མེད་པའི་བུད་ཤིང་ཟླུམ་པོས་ཟླུམ་པོར་བརྩིགས་པའི་ནང་གི་ཤར་ངོས་སུ་མེ་ཚང་བཅས་ལ་སྟེང་ནས་ཀུ་ཤ་རྩེ་མོ་ཤར་དུ་བསྟན་པས་བཀབ། རང་གི་གཡས་ངོས་སུ་མཆོད་རྫས་དང་། གཡོན་དུ་བསྲེག་རྫས་རྣམས་རིམ་པ་ཇི་ལྟ་བར་ཉིས་རིམ། མདུན་དུ་བསང་ཆུ་རྡོར་དྲིལ་དགངས་བླུགས་ནང་མཆོད་རྣམས་བཤམ། སློབ་དཔོན་ཆས་གོས་དཀར་པོ་དང་རིན་པོ་ཆེའི་རྒྱན་གྱིས་བརྒྱན་ནས་གཙང་མའི་སྟན་ལ་ཁ་ཤར་དུ་ཕྱོགས་པས་འཁོད་དེ། ཆོ་ག་དངོས་ལ། [ཐོག་མར་རྡོ་དྲིལ་བསང་སྦྱང་།] སྟོང་པའི་ངང་ལས་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་བྱང་ཆུབ་སེམས་ཀྱི་རང་བཞིན་ནོ། ཨོཾ་མ་ཧཱ་བཛྲ་ཧཱུྃ་[གིས་རྡོ་རྗེ་གསོར་ཞིང་སྙིང་གར་བཟུང་།] ཨོཾ་བཛྲ་གྷཎྜེ་ཨཱཿ[ས་དྲིལ་བུ་གསིལ་ཞིང་དཀུར་བརྟེན།] ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ་[གིས་འཁྱུད་རྒྱ་བྱས་ཏེ་དམ་ཚིག་གསུམ་ལ་བློ་བཞག །མཆོད་རྫས་རྣམས་སྔར་བཞིན་བྱིན་གྱིས་བརླབས། སྲེག་རྫས་

རྣམས་ལ་བདུད་རྩིས་བྲན། རྡོ་རྗེ་རྩེ་གཅིག་པའི་ཕྱག་རྒྱས་རེག་ལ།] ཨོཾ་སྭཱ་ཧཱ[ས་རྫས་རྣམས་བཀྲུ། ཡམ་ཤིང་ལ།] ཨོཾ་ཨཱཿསྭཱཧཱ། [ཞུན་མར་ལ།] ཨོཾ་ཤྲཱི་སྭཱཧཱ། [འབྲུ་རྣམས་ལ།] ཨོཾ་ཛྲིཾ་སྭཱཧཱ། [རྫས་གཞན་རྣམས་ལ།] ཨོཾ་ཀུ་རུ་ཤུ་རུ་སྭཱཧཱ། སྟོང་པའི་ངང་ལས་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་ཡེ་ཤེས་ཀྱི་བདུད་རྩིའི་རང་བཞིན་སྲེག་རྫས་སོ་སོའི་རྣམ་པར་གསལ་བར་[མོས་ལ། འབྲུ་གསུམ་དང་རྫས་སྔགས་རྣམས་གསུམ་གསུམ་བརྗོད་པས་བྱིན་གྱིས་བརླབས།] ཨོཾ་ཨགྣི་ཛྲ་ལ་རཾ། [ཞེས་པས་དུ་བ་མེད་པར་འབར་བའི་མེ་གཡས་སུ་བསྐོར་ནས་ཐབ་ཏུ་བཅུག]ཧཱུྃ་[བརྗོད་ཅིང་རླུང་གཡབ་ཀྱིས་མེ་སྦར།] ཨོཾ་ཨགྣི་སྭཱཧཱ། [ཞེས་བླུགས་གཟར་གྱི་མར་ཁུའི་ཐིག་པས་གསོ།] ཨོཾ་བཛྲ་སཏྭ་ཨཱཿ [ཞེས་བཟླས་པའི་ཀུ་ཤ།] ཨོཾ། ཀུ་ཤ་འདི་ནི་གཙང་ཞིང་དགེ། །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པ་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། སྭཱཧཱ། [ཞེས་པས་ཐབ་

ཀྱི་ཁར་གཡོན་ནས་བརྩམས་ཏེ་གཡས་བསྐོར་དུ་དགྲམ། ཐབ་བསང་སྦྱང་།] སྟོང་པའི་ངང་ལས་ཧཱུྃ་ལས་ཞི་བའི་ཐབ་ཁུང་ཟླུམ་ཞིང་དཀར་བ་མཚན་ཉིད་ཐམས་ཅད་ཚང་བའི་དབུས་སུ་པད་ཟླ་ལ་གནས་པའི་རཾ་ལས་ཞི་བའི་མེ་ལྷ་དཀར་པོ་ཞལ་གཅིག་ཕྱག་བཞི་པ། གཡས་གཉིས་དབྱུག་པ་དང་བགྲང་ཕྲེང་། གཡོན་གཉིས་རིལ་བ་དང་སྐྱབས་སྦྱིན་མཛད་པ། དྲང་སྲོང་གི་ཆ་བྱད་ཅན་འཁོར་ཚོགས་དུ་མས་བསྐོར་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ། ཧཱུྃ་གི་འོད་ཟེར་གྱིས་ཡེ་ཤེས་པ་སྤྱན་དྲངས་པར་[མོས་ལ།] ཨོཾ། ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲོག་བླུགས་ཞལ་ཟས་བཞེས་སླད་དུ། །འབར་བའི་གནས་འདིར་གཤཟེགས་སུ་གསོལ། །ཨོཾ་ཨགྷ་ཡེ་ཨཱ་ཀརྵ་ཡ་ཛཿ [ཞེས་པས་སྤྱན་དྲངས། ཞེས་སྔགས་ཀྱིས་ཕྱིར་འབྲང་གི་བགེགས་བསྐྲད།] ཨོཾཨགྷི་དེ་ཝ་ས་པ་རི་ཝཱ་ར་ཨརྒྷཾ་པྲཱ་ཏཱིཙྪ་སྭཱ་ཧཱ[ས་མཆོད་ཡོན་དང་།] པཱ་དྱཾ་[གིས་ཞབས་བསིལ་ཕུལ།] ཨོཾ་ཨགྣ་ཡེ་ས་མ་ཡ་སྟྭཾ། ཛཿཧཱུྃ་བཾ་ཧོཿ[ས་]དམ་ཚིག་པ་དང་གཉིས་སུ་མེད་བསམ་

དེ་ནས། མེ་ལྷ་ཅུང་ཟད་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་གིས་མཚོན་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་[བསམ་ལ།] ཨོཾ་ཨགྣ་ཡེ་སྭཱ་ཧཱ། [ཞེས་པས་མར་ཁུ་བླུགས་གཟར་བདུན་གྱིས་དགང་གཟར་བཀང་བའི་གཟུར་བུ་ཁ་སྦྱོར་པུས་མོའི་ནང་ལས་ཕྱིར་མི་འདའ་བར་གཡས་སུ་བསྐོར་ཞིང་། ཨོཾ་ཨགྣ་ཡེ་དཱི་བྱ་དཱི་བྱ་བི་ཤུངྔྷེ་མ་ཧཱ་ཤྲཱི་ཧ་བྱ་ཀ་བྱ་བ་ཧྣ་ཡ་ཧཱུྃ་ཕཊ་སྭཱ་ཧཱ། བདག་ཅག་དཔོན་སློབ་སློབ་འཁོར་དང་བཅས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ། [ཞེས་སྤེལ་ཚིག་སྦྲེལ་བས་ཕུལ། དེ་ལྟར་ལན་གསུམ་དུ་དབུལ་ཞིང་མེ་པྲ་བརྟག །] ཨོཾ་ཨགྣ་ཡེ་ས་པ་རི་ཝཱ་ར་ཨརྒྷཾ་[ནས་]ཤཔྡའི་[བར་གྱིས་མཆོད།] ཨོཾ། གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་གསལ་མཛད་པ། །བདག་གཞན་དོན་སྒྲུབ་ས་ལ་བཞུགས། །འཛིན་བྱེད་མེ་ལྷ་ཉིད་ལ་བསྟོད། །[ཅེས་བསྟོད། དེ་ནས་རྫས་རྣམས་རིམ་བཞིན་འབུལ་བ་ལས། ཡམ་ཤིང་།] ཨོཾ་བོ་ངྷི་བྲྀཀྵ་ཡ་སྭཱ་ཧཱ། གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤིནྟཾ་ཀུ་རུ་སྭཱ་ཧཱ།

[མར་ཁུ།] ཨོཾ་ཨགྣ་ཡེ་སྭཱ་ཧཱ། འབྱོར་པ་ཕུན་སུམ་ཚོགས་པ་ལ༴ [ཏིལ།] ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། སྡིག་པ་ཐམས་ཅད༴ [ཞོ་ཟན།] ཨོཾ་སརྦ་ས་མྦ་དེ་སྭཱ་ཧཱ། བདེ་བ་ཕུན་སུམ་ཚོགས་པ་ལ༴ [འབྲས།] ཨོཾ་བཛྲ་པུཥྚཱ་ཡ་སྭཱ་ཧཱ། བསོད་ནམས་ཕུན་སུམ་ཚོགས་པ་ལ༴ [སོ་བ།] ཨོཾ་བཛྲ་བཱི་ཛཱ་ཡེ་སྭཱ་ཧཱ། ནོར་དང་འབྲུ་ཕུན་སུམ་ཚོགས་པ་ལ༴ [ནས།] ཨོཾ་མ་ཧཱ་བེ་གཱ་ཡ་སྭཱ་ཧཱ། ཤུགས་ཕུན་སུམ་ཚོགས་པ་ལ༴ [སྲན་མ།] ཨོཾ་མ་ཧཱ་བ་ལ་ཡ་སྭཱ་ཧཱ། སྟོབས་ཕུན་སུམ་ཚོགས་པ་ལ༴ [གྲོ།] ཨོཾ་བཛྲ་གྷ་སྨ་རྱཻ་སྭཱ་ཧཱ། ནད་མེད་པ་ཕུན་སུམ་ཚོགས་པ་ལ༴ [དཱུརྦ།] ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཚེ་རིང་བ་ཕུན་སུམ་ཚོགས་པ་ལ༴ [ཀུ་ཤ།] ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། སྲང་བ་ཕུན་སུམ་ཚོགས་པ་ལ༴ [ཞེས་འབུལ། གཞན་ཡང་སྲེག་རྫས་ཅི་འབྱོར་བ།] ཨགྣ་ཡེ་དཱི་བྱ་[ཞེས་པའི་སྔགས་ཀྱིས་དབུལ། དེ་ནས་ཡུངས་དཀར་ཐབ་ཏུ་གཏོར་ཏེ།] ཧོཿ དྲང་སྲོང་ཆེན་པོ་འཁོར་དང་བཅས་པས་བསྲེག་རྫས་ལྷའི་ཞལ་དུ་སྟོབ་པ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ཏེ། བདག་གི་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། །

[ཞེས་གསོལ་ལ།] ཨོཾ་བཛྲ་ཛྭ་ལ་རཾ་གྱིས། མེ་ལྷ་འབར་བའི་རྣམ་པར་གྱུར་[པར་བསམ། དེ་དག་ནི་འཇིག་རྟེན་པའི་མེ་ལྷ་མཆོད་པའི་ཚུལ་ལོ། །འདས་པའི་མེ་ལྷ་མཆོད་པ་ནི། སྔར་བཞིན་མེ་བསངས་ཏེ། ཤུ་པྱ་ཏས་སྟོང་པར་སྦྱང་།] ཆོས་རྣམས་མི་དམིགས་སྟོང་པའི་ངང་ཉིད་ལས། །མདུན་དུ་ཞི་བའི་ཐབ་ཁུང་མཚན་ཉིད་ཀུན། །ཡོངས་རྫོགས་འོད་ཟེར་དཀར་པོ་འཕྲོ་བའི་དབུས། །སེང་ཁྲི་པདྨ་ཉི་ཟླའི་གདོན་སྟེང་དུ། །[ཞེས་སོགས་ལྷ་བསྐྱེད་ནས་ཕྱག་མཆོད་བསྟོད་པའི་བར་དཀྱུས་བཞིན་བྱས་ནས། །དགང་བླུགས་འབུལ་བ་ནི།] དཀྱིལ་འཁོར་གྱི་ལྷ་ཅུང་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་ཧཱུྃ་ཡིག་གིས་མཚན་པས་[ཞེས་པ་ནས་ཕྲིན་ལས་གསོལ་བའི་བར་འཇིག་རྟེན་པའི་སྐབས་བཞིན་ལས་རྩ་སྔགས་ཀྱིས་འགངས་ཤིང་ཡི་གེ་བརྒྱ་པས་དབུལ། སྲེག་རྫས་འབུལ་བ་ནི། ཡམ་ཤིང་ནས་བཟུང་ཀུ་ཤའི་བར་སྙིང་པོ་རྫས་སྔགས་སྤེལ་ཚིག་རྣམས་སྦྱར་ཏེ་སྔར་བཞིན་བརྒྱ་རྩ་སོགས་དང་སྲེག་རྫས་གཞན་ཡོད་ན་ཡང་ཕུལ་བའི་མཐར། ཡུངས་དཀར་ལ་ཡིག་བརྒྱ་བཟླས་པ་ཐབ་ཏུ་གཏོར་ལ་དགང་བླུགས་ཀྱི་སྐབས་བཞིན་ཕྲིན་ལས་གསོལ། སླར་ཡང་

གོང་བཞིན་དགང་བླུགས་འབུལ་ཞིང་། གཏང་རག་གི་མཆོད་བསྟོད་དང་ནོངས་པ་བཟོད་པར་གསོལ་ལ།] ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །[ཅེས་སོགས་ནས།] བཛྲ་མུཿ[ས་ཡེ་ཤེས་པ་ཆོས་ཀྱི་དབྱིངས་སུ་གཤེགས། དམ་ཚིག་པ་རང་ལ་བསྡུའོ། །དེ་དག་ནི་འདས་པའི་མེ་ལྷ་མཆོད་པའི་ཚུལ་ལོ། །རྗེས་ཀྱི་བྱ་བ་ནི། བླུགས་གཟར་གྱི་མར་ཁུ་དང་ཛྭ་ལའི་སྔགས་ཀྱིས་མེ་གསོ་ཞིང་།] སླར་ཡང་མེ་ལྷ་ཆ་བྱད་ཡོངས་སུ་རྫོགས་པ་སྐད་ཅིག་གིས་[གསལ་བར་མོས་ལ་སྔར་བཞིན་དགང་བླུགས་དང་སྲེག་རྫས་ལྷག་མ་ཞམས་སྤེལ་ཚིག་མེད་པའི་སྔགས་ཀྱིས་ཕུལ། གཏོར་མ།] ཨོཾ་ཨགྷ་ཡེ་ཨ་ཀཱ་རོ་[སོགས་ཀྱིས་ཕུལ་ནས།] མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །[ཅེས་བསྟོད།] མཆོད་སྦྱིན་གཏོར་མ་འདི་བཞེས་ལ། [ཞེས་སོགས་ཀྱིས་ཕྲིན་ལས་བཅོལ། སྤར་བཞིན་ནོངས་པ་བཤགས་ནས། །] བདག་གི་དོན་དང་གཞན་གྱི་དོན། །བྱིན་ཟ་ཁྱེད་ཀྱིས་བསྒྲུབས་ཀྱི་གཤེགས། །ཇི་བཞིན་དུས་སུ་སླར་སྤྱོན་ལ། །བདག་གི་འདོད་པ་ཐམས་ཅད་སྒྲུབས། །ཨོཾ་

ཨགྣ་ཡེ་གཙྪ། [ཞེས་ཡེ་ཤེས་ཀྱི་མེ་ལྷ་རང་གནས་སུ་གཤེགས། དམ་ཚིག་གི་མེ་ལྷ་རང་ལ་བསྡུ། མེ་རང་ཞིར་གཏོང་བའམ་ལོང་མེད་ན་འོ་མ་དང་དྲི་བཟང་གི་ཆུས་གཞིལ་ལ་ཐལ་སོལ་རྣམས་རྒྱ་མཚོར་འབབས་པའི་ཆུ་ཀླུང་དུ་བསྐྱལ། དགེ་བ་བསྔོ་ཞིང་ཤིས་པ་བརྗོད་པས་མཐའ་བརྒྱན་པར་བྱའོ། །] [ཞར་བྱུང་རོ་སྲེག་གི་ཆོ་གའི་ཁྱད་པར་ནི། བྲིས་ཐབ་ཀྱི་ཁར་ཤིང་བཟང་པོའི་རོ་ཁང་རྒྱར་ཁྲུ་གང་གི་ཚད་དང་དཔངས་སུ་ཇི་ལྟར་རིགས་པ་བརྩིག །སྦར་བྱེད་ཀྱི་མེ་ཚང་མཆོད་སྲེག་གི་རྫས་སོགས་ཚོགས་པར་བྱས་ལ། གནས་ལུང་དངོས་གཞིའི་ལམ་སྦྱོང་བསྟན་ཡང་ཆད་སོང་བ་ན་རོ་ཁང་རྙིང་པ་ལ་གུད་དུ་ཕྱུངས་ཏེ། སྔར་བཞིན་བགེགས་ལ་གཏོར་མ་བྱིན་ནས་དྲག་སྔགས་ཐུན་སྤོས་དང་བཅས་པས་བསྐྲད། སྒྲིབ་སྦྱོང་གི་སྔགས་བཟླས་པའི་བྱེ་ཡུངས་ཀྱིས་བྲབ་ཅིང་བུམ་ཆུས་བཀྲུ། དྲི་བཟང་གིས་བྱུགས། སྟོད་གཡོགས་དང་སྨད་གཡོགས་དཀྲི། གནས་གསུམ་སོགས་སུ་བཏགས་གྲོལ་དང་གདག་ཡིག་གི་རིམ་པ་ཅི་འབྱོར་བཏགས་ལ་སྐད་ཅིག་གིས་རྡོར་སེམས་སུ་བསྐྱེད། ཅུང་ཟད་མཆོད་བསྟོད་དེ་སྟན་སྲབ་མོའི་ཁྱོགས་ལ་བཏེགས་ནས་རོལ་མོ་དང་བཅས་པས་ཐབ་ཀྱི་ནང་དུ་ཅུང་ཟད་རྒུ་བར་བཞག་པའི་མདུན་ངོས་སུ་ཤིང་ཕྲ་བ་

དང་རྒྱབ་རྣམས་ཅུང་ཟད་སྦོམ་པས་གཅེར་བའི་ཕྱིའི་མདུན་གྱི་རྩེ་བར་སྦར་ཁུང་། སྐེད་པར་རྫས་ཁུང་། སྟེང་དུ་དུད་ཁུང་རྣམས་མ་གཏོགས་གཞན་ཐམས་ཅད་མཛེས་ཤིང་བརྟན་པར་བརྩིགས་ནས་དཀར་རྩིས་བྱུགས་ཤིང་གདུགས་དབུབ་པ་སོགས་བྱ། ཆོ་གའི་འགྲོས་སྔར་བཞིན་ལས་མེ་སྦར་བ་ན།] ཆོས་ཀྱི་དབྱིངས་ཀྱི་ཐབ་ཁུང་དུ། །[ཞེས་སོགས་བརྗོད། གང་ཟག་མཆོག་ཡིན་ན་རྟེན་དཀྱིལ་འཁོར་གྱི་གཙོ་བོ་དང་དབྱེར་མེད་དུ་བྱ་ཞིང་། དམན་པ་ལ་ཤ་ཁྲག་བདུད་རྩིའི་རང་བཞིན་གྱི་མཆོད་རྫས་སུ་དམིགས། དགང་བླུགས་ཀྱི་འདོད་གསོལ་སྐབས་སུ། མཆོག་ལ།] ཞི་བར་གཤེགས་པའི་ས་དང་ལམ་གྱི་བར་ཆད་ཐམས་ཅད་ཞི་ནས་ཟག་མེད་ཐུགས་ཀྱི་དགོངས་པ་ཡོངས་སུ་རྫོགས་པའི་ཕྲིན་ལས་མཛད་དུ་གསོལ། [ཞེས་དང་། དམན་པར།] ཚེ་ལས་འདས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ། [ཞེས་བསྒྱུར། རྫས་རྣམས་ཀྱི་སྤེལ་ཚིག་ཀྱང་།] ཞི་བར་གཤེགས་པའི་ས་དང་ལམ་གྱི་བར་ཆད་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ། [ཞེས་དང་།] ཚེ་ལས་འདས་པའི་སྡིག་པ་དང་སྒྲིབ་པ་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ། །

[ཞེས་སྐབས་ཐོབ་སྦྱར་བས་འབུལ། དམིགས་ཡུལ་རྗེས་སུ་དྲན་པས་དེ་ལ་ཕན་པའི་བསམ་པས་སྔགས་བཟླ་ཞིང་སྦྱིན་བསྲེག་བྱས་པས་བདག་དང་ལྷ་དང་མཆོད་རྫས་དང་མེ་ལས་ཡེ་ཤེས་ཀྱི་འོད་ཟེར་དཀར་པོ་འཕྲོས་པ་དམིགས་ཡུལ་ལ་ཐིམ་པས་དེའི་སྡིག་སྒྲིབ་ཉེས་པ་ཐམས་ཅད་སེལ་བར་བསམ། དེ་ལྟར་རོ་བསྲེགས་ཚར་བའི་རྗེས་སུ་སཱཙྪ་གདབ་པའི་ཐབས་ནི། རྡོ་རྗེ་སེམས་དཔའི་ང་རྒྱལ་གྱིས།] བཛྲ་སྃ་ཧ་ར་ཎ་ཧཱུྃ། [ ཞེས་རུས་བུ་རྣམས་བསྡུས་ལ་རིན་པོ་ཆེ་སོགས་ཀྱི་སྣོད་དུ་བཞག དེའི་སྟེང་དུ་མཉྫིའི་ཁར་རིན་པོ་ཆེའི་བུམ་པ་སྨན་དང་དྲི་བཟང་གི་ཆུས་བཀང་བ་དང་། ཉེ་ལོགས་སུ་བ་བྱུང་ལྔ་དང་ག་བུར་གུར་གུམ་སོགས་དྲི་བཟང་གི་ཆུའི་སྣོད་ཀྱང་སོ་སོར་བཤམས་ལ།] རུས་བུའི་སྟེང་དུ་ཟླ་བ་ལ་གནས་པའི་ཨ་དཀར་པོ་འོད་ཟེར་འཕྲོ་བ། དེ་ལས་ཡེ་ཤེས་ཀྱི་བདུད་རྩིའི་རྒྱུན་བབས་པས་ཚེ་འདས་ཀྱི་སྡིག་སྒྲིབ་ཐམས་ཅད་ལྷག་མེད་དུ་སྦྱངས་པར[བསམ་ཞིང་། ཡི་གེ་བརྒྱ་པ་མང་དུ་བཟླས་པས་ཆུ་ལ་སོགས་པའི་རྫས་ཐམས་ཅད་ལ་གདབ་ཅིང་རུས་བུ་རྣམས་དག་པར་བཀྲུ། དེ་ཉིད་ཞིབ་པར་སྦྱངས་ནས་སྔར་གྱི་བུམ་ཆུ་དང་བ་བྱུང་ལྔ་རྣམས་ལྷན་ཅིག་ཏུ་སྦྱར་བ་སླར་ཡང་དྲི་བཟང་དང་ས་བཟང་པོའི་འཇིམ་པ་རྣམས་

བསྲེས་པས་སྙིང་པོ་བཟླ་བཞིན་དུ་བརྫིས་ལ།] འཇིམ་པ་རིན་པོ་ཆེའི་ཕུང་པོར་གྱུར་པར་[བསམ།] རང་གི་ཐུགས་ཀའི་འོད་ཟེར་གྱིས་འོག་མིན་དུ་རྣམ་པར་སྣང་མཛད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་བྱུང་བས་སེམས་ཅན་ཐམས་ཅད་ཀྱི་རྒྱུད་སྦྱངས་འཇིམ་པ་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་རང་བཞིན་དུ་གྱུར་པས་[བསམ་ལ། ལག་གཡོན་པའི་མཐེའུ་ཆུང་མཐེ་བོས་མནན་པ་གྱེན་བསྟན་དང་། གཡས་པའང་དེ་བཞིན་དུ་ཁ་སྦུབས་པའི་བར་དུ་འཇིམ་པ་བཞག་སྟེ།] ཨོཾ་ཛི་ན་ཛིཀྲ་སྭཱ་ཧཱ། [ཞེས་པ་ཉེར་གཅིག་དང་། ཡིག་བརྒྱས་བྱིན་གྱིས་བརླབས།] ཨོཾ་བཛྲ་ཨཱ་ཡུ་ཥེ་སྭཱ་ཧཱ། [ཞེས་རྡོ་རྗེའི་སྲོག་ཐོབ་པར་བསམ་ལ་འཇིམ་པ་བཅད།] ཨོཾ་བཛྲོད་བྷ་ཝཱ་ཡ་སྭཱ་ཧཱ། [ཞེས་ཡེ་ཤེས་རྡོ་རྗེ་འབྱུང་བར་བསམ་ལ་འབི་འབི་བྱ།] ཨོཾ་ཨ་ར་ཛེ་བི་ར་ཛེ་སྭཱ་ཧཱ། [ཞེས་ཡེ་ཤེས་རྡུལ་བྲལ་དུ་བསམ་ལ་སྣུམ་བྱུགས།] ཨོཾ་ངྷརྨ་ཏུ་ག་རྦྷ་སྭཱ་ཧཱ། [ཞེས་ཆོས་ཀྱི་དབྱིངས་ཀྱི་སྙིང་པོ་རྙེད་པར་བསམ་ཞིང་བརྐོས་ཕོར་དུ་བཅུག]ཨོཾ་བཛྲ་མུངྒ་ར་ཨཱ་ཀོ་ཊ་ཡ་ཧཱུྃ་ཕཊ། [ཅེས་སངས་རྒྱས་ཐམས་ཅད་ཀྱི་ཕྱག་རྒྱས་བཏབ་པར་བསམ་ལ་གདབ།] ཨོཾ་སརྦ་བིདྱཱ་སྭཱ་ཧཱ། [ཞེས་ཡེ་ཤེས་ཀྱི་སྙིང་པོ་ཁོང་དུ་ཆུད་

པར་བསམ་ལ་གུར་གུམ་གྱིས་བྲིས་པའི་ཡིག་བརྒྱ་དང་རྟེན་འབྲེལ་སྙིང་པོ་གཟུངས་སུ་གཞུག །] ཨོཾ་ངྷརྨ་ར་ཏི་སྭཱ་ཧཱ། [ཞེས་ཆོས་སྐུ་ལས་གཟུགས་སྐུར་གྲུབ་པར་བསམ་ཞིང་ཕྱིར་འདོན།] ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། [ཞེས་སངས་རྒྱས་ཐམས་ཅད་དེ་ལ་བརྟན་པར་བཞུགས་པར་བསམ་ལ་མེ་ཏོག་འཐོར་ཞིང་རབ་ཏུ་གནས་པར་བྱའོ།] ༈ [བཞི་པ་རབ་གནས་ཀྱི་ཆོ་ག་ནི། སྦྱོར་བ་རྟེན་གྱི་མདུན་དུ་སྒྲུབ་དཀྱིལ་རྣམ་བུམ་དང་བཅས་པ། གཡས་སུ་མངའ་དབུལ་གྱི་མཎྜལ་དང་། །ཞལ་ཟས་དར་གདུགས་སེར་པོས་བརྒྱན་པའི་མཐར་དཀར་མངར་ཤིང་ཏོག་སོགས་ཀྱིས་བསྐོར་བའི་ཙཱ་རུའི་བཟའ་བ། ཉེར་སྤྱོད་སོགས་མཆོད་པའི་བྱེ་བྲག་ཇི་ལྟར་འབྱོར་པ། གཡོན་དུ་བུམ་གདན་པདྨ་འདབ་བརྒྱད་ཀྱི་ཁར་ཁྲུས་བུམ་བཅུད་ལྡན། གཞན་ཡང་གུལ་ཡུངས་སྦྱོང་ཆས་སོགས་ཉེ་བར་མཁོ་བའི་ཡོ་བྱད་ཐམས་ཅད་ལེགས་པར་འདུ་བྱ། བླ་མ་མཆོད་པའི་གཞུང་བསྲང་བསྲངས་ཏེ་བཟླས་པའི་རྗེས་སུ་རྣམ་བུམ་བསྒྲུབ། ཁྲུས་བུམ་བསང་སྦྱང་།] སྟོང་པའི་ངང་ལས་པད་ཟླའི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་བདུད་རྩིའི་བཅུད་ཀྱིས་གང་བའི་དབུས་སུ་སྔགས་ཀྱི་ཕྲེང་བ་འོད་ཟེར་

ཀུན་ཏུ་འཕྲོ་བ་ལས་དྲི་མ་སྦྱོང་བའི་མཐུ་ལྡན་གྱི་བདུད་རྩིའི་རྒྱུན་བབས་པས་བུམ་པ་གང་བར་[བསམ་ཞིང་། ཁྲུས་སྔགས་]ཨ་བྷི་ཥེ་ཀ་[ཅི་འགྲུབ་བཟླ། གུ་གུལ་དང་ཡུངས་དཀར་ཀྱང་ལས་སྔགས་ཀྱིས་བརླབ། རབ་གནས་དངོས་ལ་བཅུ་གསུམ་ལས།] [དང་པོ་བགེགས་སྦྱོང་བ་ནི། སྦྱོང་ཆས་རྣམས་གཡས་གཡོན་དུ་བསྐོར་ཞིང་།] ཨོཾ་སརྦ་བིགྷྣཱན་ན་མཿསརྦ་[སོགས་ལན་གསུམ་གྱིས་ཞི་བ།] སུམྦྷ་ནི་[གསུམ་གྱིས་ཕྱེད་མ།] བཛྲ་མུ་ཧཱ་ཤྲཱི་ཧེ་རུ་ཀོ྅་ཧོཾ། རང་ཉིད་སྐད་ཅིག་གིས་རྡོ་རྗེ་ཧཱུཾ་མཛད་ཁྲོ་བོའི་རྒྱལ་པོ་འཇིགས་སུ་རུང་བའི་སྐུར་[གྱུར་པར་མོས་པའི་ང་རྒྱལ་གྱིས།] ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པར་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ གསང་སྔགས་རིག་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་གྱི་བདེན་པ་དང་། ཆོས་ཉིད་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས་སའི་ཕྱོགས་འདིར་རྡོ་རྗེ་འཛིན་པ་བདག་གིས་སེམས་རྣམ་པ་གཉིས་བསྐྱེད་དེ། གནས་

སྐབས་སུ་འཇིག་རྟེན་གྱི་ཁམས་ལ་ཕན་པ་རྒྱ་ཆེན་པོ་བསྒྲུབ་པ་དང་། མཐར་ཐུག་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་འབྲས་བུ་ཐོབ་པར་བྱ་བའི་ཆེད་དུ་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་རྣམས་ལ་རབ་ཏུ་གནས་པར་བགྱི་བ་ལ་བར་དུ་གཅོད་ཅིང་གླགས་བལྟ་བའི་གང་སུ་ཡང་རུང་བའི་འབྱུང་པོ་གདུག་པ་ཅན་གཡོག་དང་འཁོར་དུ་བཅས་པ་རྣམས་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོ་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། [ཞེས་དང་དྲག་སྔགས་ཡུངས་ཐུན་རོལ་མོའི་ཚམ་རྔམས་བཅས་ཕྱི་རོལ་དུ་བསྐྲད་པ་ནི་དྲག་པོས་སྦྱོང་བའོ། །] [གཉིས་པ་ཁྲུས་བྱ་བ་ནི། ཐོག་མར་དཀྱིལ་འཁོར་སོགས་དང་རྟེན་རིང་བསྲེལ་ཅན་གྱི་གཟུགས་བརྙན་ཤར་བའི་མེ་ལོང་ལ་ཁྲུས་གསོལ་ཞིང་།] ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །[ཞེས་སོགས་ཤློ་ཀ་གཉིས་དང་།] ཇི་ལྟར་བལྟམས་པ་[སོགས་ཀྱི་

མཐར།] ཨོཾ་ས་རྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། [ཁྲུས་རས་ཀྱིས་ཕྱི་ཞིང་།] དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ཨོཾ་ཧཱུྃ་ཏྲཱཾ་ཧྲཱིཿཨཱཿཀཱ་ཡ་བི་ཤོ་ངྷ་ན་ཡེ་སྭཱ་ཧཱ། [ཁྲུས་ཆུ་དེ་ཉིད་སླར་ཡང་བུམ་པར་བླུགས་པས་རྟེན་གསར་པ་རྣམས་དངོས་སམ་གཟུགས་བརྙན་ལ་ཁྲུས་གསོལ་ཞིང་།] འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩོལ་བར་མཛོད། །ཨོཾ་སརྦ་ཏ་ཐཱ་ག་ཏ་[སོགས་དང་། སྤྲོ་ན་ཕར་ཕྱིན་དྲུག་གི་ཁྲུས་ཚིག་ཀྱང་བརྗོད། །] དེ་དག་སྐུ་ལ་[སོགས་ཀྱིས་སྔར་བཞིན་སྐུ་ཕྱི། དྲི་ལྔས་ཐུགས་ཀར་བྱུགས་ཤིང་།] སྟོང་གསུམ་ཀུན་ཏུ་དྲི་ངད་ལྡང་གྱུར་པའི། །དྲི་མཆོག་རྣམས་ཀྱིས་ཐུབ་དབང་རྣམས་ཀྱི་སྐུ། །གསེར་སྦྱངས་བཙོ་མ་བྱི་དོར་བྱས་པ་ལྟར། །འོད་ཆགས་འབར་བ་དེ་དག་བྱུགས་པར་བགྱི། །ཨོཾ་བཛྲ་གྷནྡྷེ་སྭཱ་ཧཱ། [ན་བཟའ་དང་རྒྱན་འབུལ་ལ།] དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་

དག་ཀྱང་དབུལ་བར་བགྱི། །ཨོཾ་བཛྲ་ཝ་སྟྲ་ཡེ་སྭཱ་ཧཱ། [ཞེས་དང་། སྤྲོ་ན་རྗེས་འབྲེལ་དུ་ཤིས་བརྗོད་ཇི་ལྟར་རིགས་པའང་བྱའོ། །] [གསུམ་པ་རྟེན་བསྐྱེད་པ་ནི། རྟེན་ལས་སྔགས་ཀྱིས་བསང་།] སྭ་བྷཱ་ཝ[ས་སྦྱང་།] འཁོར་འདས་ཆོས་ཀུན་སྟོང་པ་ཆེན་པོའི་ངང་། །རབ་ཏུ་གནས་བྱའི་རྟེན་རྣམས་ཡོངས་གྱུར་ལས། །སེང་ཁྲི་པདྨ་ཉི་ཟླའི་གདན་སྟེང་དུ། །རིགས་ཀུན་ཁྱབ་བདག་བཅོམ་ལྡན་རྡོ་རྗེ་སེམས། །[ཞེས་སོགས་ནས།] རྩ་གསུམ་ལྷ་ཚོགས་རྣམ་པར་སྤྱན་དྲངས་གྱུར། །[ཅེས་པའི་བར་གྱིས་གསལ་གདབ།] [བཞི་པ་སྤྱན་དྲང་བ་ནི།] ཨོཾ། ཆོས་ཀྱི་དབྱིངས་ཀྱི་[སོགས་སྔར་བཞིན་མཐར།] བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །པདྨ་ཀ་མ་ལཱ་ཡ་སྟྭཾ། [ཞེས་གདན་ཕུལ་ལ།] པུཥྤེ་[སོགས་ཉེར་སྤྱོད་ལྔས་མཆོད། །] [ལྔ་པ་དགུག་གཞུག་བྱ་བ་ནི།] ཨོཾ་བཛྲ་ཨཾ་ཀུ་ཤ་ཛཿ ཨོཾ་བཛྲ་པཱ་ཤ་ཧཱུྃ། ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཡ་ཧོཿ [ཞེས་པས་དགུག་གཞུག་བཅིང་མཉེས་དགྱེས་པ་བསྐྱེད།] [དྲུག་པ་

རྒྱས་གདབ་པ་ནི།] ཨོཾ་ཨཿཧཱུྃ། དཔལ་ལྡན་སངས་རྒྱས་ཀུན་བདག་ཉིད། །རྡོ་རྗེ་མི་ཕྱེད་གསུམ་འཆང་བ། །དེང་འདིར་སངས་རྒྱས་ཐམས་ཅད་ཀྱི། །སྐུ་གསུང་ཐུགས་སུ་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་ཝཱ་ཙིཏྟ་བཛྲ་སྭ་བྷ་ཝ་ཨཱཏྨ་ཀོ྅་ཧཾ། [ཞེས་རྒྱས་གདབ།] [བདུན་པ་དབང་བསྐུར་བ་ནི།] རང་གི་སྙིང་གའི་ས་བོན་ལས་བྱུང་བའི་འོད་ཟེར་གྱིས་དབང་གི་ལྷ་དེ་བཞིན་གཤེགས་པ་རིགས་ལྔ་སྲས་དང་བཅས་པ་ཐམས་ཅད་བཛྲ་ས་མཱ་ཛཿ[ས་སྤྱན་དྲངས།] ཨརྒྷཾ་[ནས་]ཤཔྡའི་[བར་གྱིས་མཆོད།] ནམ་མཁའ་གང་བའི་དབང་གི་ལྷ་ཚོགས་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བར་གྱུར། ཇི་ལྟར་བལྟམས་པ་[སོགས་ནས།] དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར་བས་སྐུ་གང་དྲི་མ་དག་ཆུའི་ལྷག་མ་སྤྱི་བོར་འཁྱིལ་བ་ལས་མི་བསྐྱོད་པ་བདག་པོར་གྱུར་པའི་རིགས་ལྔས་དབུ་བརྒྱན་པར་གྱུར། ཧཱུྃ་ཨོཾ་ཏྲཱཾ་ཧྲཱིཿཨཱཿ པཉྩ་ཀུ་ལ་མུ་ཀུ་

ཊ་ཨ་བྷི་ཥིཉྩ་མུཾ། ཞེས་དབུ་རྒྱན་གྱིས་དབང་བསྐུར། ཨོཾ་ཏྲུྃ། [ཞེས་གོ་བགོས།] ཨོཾ་བཛྲ་ཏུ་ཥྱ་ཧོ། [ཞེས་རྡོ་རྗེ་ཐལ་མོས་མཉེས་པར་བྱའོ། །] [བརྒྱད་པ་སྤྱན་དབྱེ་བ་ནི། གསེར་ཐུར་རམ་རྡོ་རྗེས་དབྱེ་བའི་ཚུལ་དང་བཅས།] ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་རབ་རིབ་བསལ་བ་ལྟར། །རྒྱལ་བ་རྣམས་ཀྱི་ཡེ་ཤེས་སྤྱན། སེམས་ཅན་དོན་དུ་དབྱེ་བར་བྱ། ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་ངྷ་ནེ་སྭཱ་ཧཱ། [ཞེས་དབྱེ།] [དགུ་པ་རྟེན་བསྒྱུར་བ་ནི། སློབ་དཔོན་གྱིས་རྡོ་རྗེ་དང་བཅས་པའི་ཐལ་མོས་རྟེན་དངོས་སམ་གཟུགས་བརྙན་ལ་རེག་ཅིང་སེ་གོལ་གྱི་སྒྲས་མཚོན་ཏེ།] ཨོཾ་ཨཱཿཧཱུྃ་སྭཱ་ཧཱ། [ལན་གསུམ་བརྗོད་པས།] བསྐྱེད་པའི་ལྷ་ཡོངས་སུ་གྱུར་པ་རྟེན་སོ་སོའི་རྣམ་པར་གྱུར་པར་[བསམ།] [བཅུ་པ་མངའ་དབུལ་བ་ལ། མཆོད་པས་མངའ་དབུལ་བའི་ཕྱིར་མཆོད་པ་བྱིན་རླབས་སྔོན་དུ་འགྲོ་བས་མཆོད་ཕྲེང་གི་རིམ་པ་རྣམས་གཞུང་བཞིན་དུ་རྒྱས་པར་འབུལ། བསྟོད་པས་མངའ་དབུལ་བའི་ཕྱིར་རྡོ་རྗེ་དྲིལ་བུ་འཛིན་པས།] སངས་རྒྱས་ཐམས་ཅད་འདུས་པའི་སྐུ། །[ཞེས་སོགས་དང་།] མགོན་པོ་ཐུགས་རྗེ་ཆེ་ལྡན་པ་[སོགས་ཤློ་ཀ་གསུམ་གྱི་མཐར།] ཕྱག་བྱར་འོས་པ་[སོགས་ཀྱིས་བསྟོད།] ཙཱ་རུའི་

བཟའ་བས་མངའ་དབུལ་བའི་ཕྱིར་ལྷ་བཤོས་ཆབ་ཀྱིས་བྲན་ཅིང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་པ་བཏེགས་ལ། ཞལ་ཟས་རོ་བརྒྱ་ལྡན་ཅིང་ཡིད་འཕྲོག་པ། །ལེགས་སྦྱར་འདི་ནི་རྒྱལ་བ་སྲས་བཅས་ལ། །དད་པས་ཕུལ་བས་འགྲོ་བ་འདི་དག་ཀུན། །འབྱོར་ལྡན་ཏིང་འཛིན་ཟས་ལ་སྤྱོད་པར་ཤོག །[ཅེས་དབུལ། སྔགས་ཀྱིས་མངའ་དབུལ་བའི་ཕྱིར་རྟེན་གཟུངས་ཐག་སེར་པོ་བཏགས་པའི་སྣེ་མོ་སློབ་དཔོན་གྱིས་བཟུང་ལ།] གནས་བྱའི་རྟེན་རྣམས་ཀྱི་ཐུགས་ཀར་ཟླ་བ་ལ་གནས་པའི་སྔགས་ཕྲེང་འཁོར་བའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་རྟེན་སོ་སོའི་རྣམ་པར་བྱོན་ནས་དེ་ལ་བཞུགས་པར་[བསམ་ཞིང་།] སུ་པྲ་ཏིཥྛ་དང་ཡེ་ངྷརྨཱཿ[ཅི་ནུས་བཟླ། མེ་ཏོག་གི་འབྲུ་རེ་རེ་ནས་རྟེན་འབྲེལ་སྙིང་པོའི་ཡིག་འབྲུ་གསེར་འོད་འབར་བའི་རྣམ་པར་གྱུར་པའི་མོས་པས་འཐོར་ཞིང་ཤིས་པ་བརྗོད་དོ། །] [བཅུ་གཅིག་པ་གསོལ་བ་གདབ་པ་ནི། ཡི་གེ་བརྒྱ་པ་ལན་གསུམ་སྔོན་དུ་འགྲོ་བས།] མེ་ཏོག་དམ་པ་[སོགས་ཤློ་ཀ་གཉིས་ཀྱིས་མཆོད།] དེ་དག་བསྔགས་པ་[སོགས་ཀྱིས་བསྟོད། ཐལ་མོ་སྦྱར་བས་བཏུད་དེ།] ཇི་སྲིད་ས་ཆུ་མེ་དང་ནི། །རླུང་གི་བསྐལ་པས་

འཇིག་བར་དུ། །སེམས་ཅན་ཀུན་གྱི་དོན་གྱི་ཕྱིར། །བཅོམ་ལྡན་ཁྱོད་ནི་བཞུགས་པར་མཛོད། འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །[ཞེས་དང་།] ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུའང་སྐུ་གསུང་ཐུགས་ཀྱི་རྟེན་འདི་རྣམས་ལ་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །[ཞེས་ལན་གསུམ་གྱིས་གསོལ་བ་གདབ། བཀྲ་ཤིས་ཀྱིས་མངའ་གསོལ་

བའི་ཕྱིར་རྟེན་འབྲེལ་སྙིང་པོ་སྔོན་དུ་འགྲོ་བས།] ཕུན་སུམ་ཚོགས་པ་ལ་[སོགས་པའི་ཤིས་བརྗོད་རྒྱ་ཆེར་སྤེལ་ལ། མེ་ཏོག་གི་ཆར་དབབ་ཅིང་རོལ་མོའི་སྒྲ་སྙན་པར་སྦྱར་རོ། །] [བཅུ་གཉིས་པ་སྲུང་མ་བསྒོ་བ་ནི། སྤྱིར་ནང་དུ་རྡོ་རྗེའི་ཆོས་སྐྱོང་རྣམས་དང་། ཕྱི་རོལ་དུ་ཕྱོགས་སྐྱོང་འབྱུང་པོ་རྣམས་ལ་གཏོར་མ་འབུལ་བའི་ཆོ་ག་ཇི་ལྟར་རིགས་པ་བྱ་ཞིང་། བྱེ་བྲག་གནས་རྟེན་གང་ལ་གཉེར་གཏད་པར་འདོད་པ་དེ་ཉིད་ཀྱི་གཏོར་མ་ཟུར་དུ་བཤམས་ནས་ཕུལ། དམ་ཚིག་གི་རྡོ་རྗེ་སྤྱི་བོར་རེག་པར་མོས་པས།] ཨོཾ་བཛྲ་ས་མ་ཡ་ཧ་ན་ཧ་ན་ཧཱུྃ་ཕཊ། [ཅེས་དམ་ལ་བཞག] རྡོ་རྗེའི་ཆོས་སྐྱོང་བའི་སྲུང་མ་ཁྱེད་རྣམས་ཀྱིས། རྟེན་འདི་རྣམས་ཀྱི་སྲུང་མ་དང་ཡོན་བདག་གྱིས་ལ་འདི་དག་དངོས་དང་དཀོར་ཆ་ལ་མི་སྲུན་པར་བགྱིད་པ་རྣམས་ཚར་གཅོད་ཅིང་བསྲུང་བ་དང་སྐྱོབ་པའི་མེལ་ཚེ་གཡེལ་བ་མེད་པ་དང་། མཆོད་པ་བསམ་གྱིས་མི་ཁྱབ་པ་རྒྱུན་མི་འཆད་པར་འབྱུང་བའི་ཕྲིན་ལས་མཛོད་ཅིག །ཅེས་གཉེར་གཏད་བས་ཞལ་གྱིས་བཞེས་པར་[བསམ།] [བཅུ་གསུམ་པ་མཐའ་རྒྱས་པར་བྱ་བ་ནི། ཙཱ་རུའི་བཟའ་བ་དང་ཚོགས་ཀྱི་ཞལ་ཟས་ལ་ལོངས་སྤྱད། ཡོན་བདག་བསྐོ་བར་འདོད་ནའང་འདིར་བྱ།

དགེ་བའི་རྩ་བ་རྣམས་བླ་ན་མེད་པའི་བྱང་ཆུབ་ཀྱི་ཆེད་དུ་ཡོངས་སུ་བསྔོ་བས་རྒྱས་གདབ་ཅིང་། ཤིས་བརྗོད་དང་དགའ་སྟོན་གྱི་རིམ་པ་ཇི་ལྟར་ནུས་པ་བཞིན་རྒྱ་ཆེར་སྤེལ་བས་གྲུབ་པ་ཡིན་ནོ།] ༈ ལྔ་པ་མྱོང་གྲོལ་སྒྲུབ་པ་ནི། [སྦྱོར་བ་སེལ་མེད་ཁུངས་བཙུན་གྱི་དམ་རྫས་དང་ཤ་ལྔ་བདུད་རྩི་ལྔའི་གཏའ་ཕབ་ལ་གཞི་བྱས། འབྲས་བུ་གསུམ་དང་བཟང་པོ་དྲུག་སོགས་སྐྱོབ་དང་འཕྲོད་དུ་གྱུར་པའི་སྨན་སྣས་བུངས་བསྐྱེད་ལ་བདུད་རྩི་ཨ་མྲྀ་ཏས་སྦྲུས་ཏེ་རིལ་བུ་སྲན་མ་འཕོས་པ་ཙམ་དུ་དྲིལ། སྐམ་ཐག་ཆོད་པ་ན་རྩི་དཀར་པོ་གསོལ། རིལ་ཆགས་ཐེབས་པར་བྱས་ཏེ་རིན་པོ་ཆེའི་བུམ་པར་བླུགས་པ་སྒྲུབ་དཀྱིལ་གྱི་དབུས་སུ་བཀོད་ལ་གཟུངས་ཐག་བཏགས། དངོས་གཞི་བླ་མ་མཆོད་པའི་གཞུང་བསྲང་ནས་བཟླས་པ་དབང་ལེན་ཡན་གྲུབ་པ་དང་། བུམ་པ་བསང་སྦྱང་།] སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལས། །ཕྱི་ནི་བུམ་པ་ནང་ནི་གཞལ་ཡས་ཁང་། །མཚན་ཉིད་ཡོངས་རྗོགས་སྤྲུལ་པའི་ཕོ་བྲང་དབུས། །སེང་ཁྲི་པདྨ་ཉི་ཟླའི་གདན་སྟེང་དུ། །རིལ་བུའི་རིགས་ཀུན་ཁྱབ་བདག་རྡོ་རྗེ་སེམས། །སྐུ་མདོག་དཀར་གསལ་[སོགས་ནས།] སྤྱན་འདྲེན་དབྱེར་མེད་དུ་བསྟིམ་པའི་[བར་དང་། །

མཆོད་བསྟོད་རྒྱས་བསྡུས་ཇི་ལྟར་རིགས་པ་བྱས་ལ།] བདག་གི་ཐུགས་ཀའི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཡི་ཐུགས་རྒྱུད་བསྐུལ། །སྙོམས་ཞུགས་བདེ་བའི་སྒྲ་དང་འོད་ཟེར་གྱིས། །འཁོར་འདས་དྭངས་བཅུད་ཀུན་བསྡུས་ཞལ་དུ་ཞུགས། །སྐུ་ཡི་དབྱིབས་བརྒྱུད་ཡབ་ཡུམ་སྦྱོར་མཚམས་ནས། །ཡེ་ཤེས་བདུད་རྩི་མུ་ཏིག་དཀར་པོའི་མདོག །ཆར་ལྟར་བབས་ནས་སྒྲུབ་པའི་རྫས་ལ་ཐིམ། །མི་འགྱུར་འཆི་མེད་རྟག་པའི་རྡོ་རྗེ་སེམས། །མཐོང་ཐོས་དྲན་རེག་མྱོང་གྲོལ་རྫས་ཀྱི་ཚུལ། །བདེ་ཆེན་ཐིག་ལེ་གཅིག་ཏུ་འཁྱིལ་བར་གྱུར། །[ཅེས་གསལ་བཏབ་ལ་གཟུངས་ཐག་བཟུང་སྟེ་རྩ་སྔགས་གཙོ་བོར་བཟླ་ཞིང་། མཐར་ཡི་གེ་བརྒྱ་པའང་ཅི་རིགས་བཟླ། ཐུན་མཚམས་སུ་མཆོད་ཅིང་བསྟོད་ནས། དྲག་སྔགས་]བི་ཤྭ་བཛྲ་[བཟླ་ཞིང་ཐུན་བྲབ་པས་བལྟ་ཉན་གྱི་ཉུ་ལེ་ཚར་བཅད་ནས་སྦོས་དང་དོལ་མོས་གཟི་བྱིན་བསྐྱེད་དེ།] ཨོཾ་ཧཱུྃ་ཨ་ལ་ལ་ཧོ༔ བྷ་ག་ཝཱ་ན་ས་མ་ཡ་ཧོ༔ ས་མ་ཡ་སྟྭཾ། ཧཱུྃ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསན་པའི་དུས་ལ་བབ། །

མཐུན་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་སྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཅེས་དང་རྩ་སྔགས་བཟླས་པས་བྱིན་དབབ། ཧཱུྃ་ཧཱུྃ་ཧཱུྃ་[གིས་བྱིན་བསྡུ། བར་སྐབས་སུ་སྐོང་བཤགས་དངཚོགས་ཀྱི་མཆོད་པ་རྒྱ་ཆེར་སྤེལ། དེ་ལྟར་ཐུན་བཞིའམ་དྲུག་ཏུ་བཅད་ལ་བརྩོན་པས་བསྒྲུབས་པས་འོང་དང་། སྒྲ་དང་། དྲི་བཟང་དང་། རྨི་ལྟས་དགེ་བ་སོགས་རྟགས་མཐོང་བའམ། ཞག་གྲགས་བདུན་ཕྲག་སོགས་དུས་ཀྱི་ངེས་པ་རྫོགས་ནས་དངོས་གྲུབ་བླང་བ་ནི། བུམ་པ་སྤྱི་བོར་བཟུང་ཞིང་།] ཧཱུྃ། མཆོག་གི་དམ་ཚིག་བླ་ན་མེད། །དངོས་གྲུབ་ཀུན་གྱི་དབྱིག་ཆེན་པོ། །རྡོ་རྗེ་སེམས་དཔའི་ཡེ་ཤེས་ཀྱིས། །སྐུ་གསུང་ཐུགས་སུ་དབང་བསྐུར་སྩོལ། །[རྩ་སྔགས་མཐར།] ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧོཿ [ཞེས་བརྗོད་ཅིང་གནས་

གསུམ་དུ་གཏུགས།] རིལ་བུ་ལྷར་གསལ་བ་རྡོ་རྗེ་ལྕེའི་ལམ་ནས་བརྒྱུད་དེ་སྙིང་དབུས་མི་ཤིགས་པའི་ཐིག་ལེ་དང་དབྱེར་མེད་པར་ཡེ་ཤེས་སེམས་དཔའི་ཚུལ་གྱིས་བྱང་ཆུབ་བར་དུ་བཞུགས་ཤིང་དབང་བྱིན་དངོས་གྲུབ་སྩོལ་བར་གྱུར་པའི་[མོས་པས་རིལ་བུ་ཁོང་དུ་མིད། གཞན་ལའང་སེར་སྣ་མེད་པའི་སེམས་བསྐྱེད་བཟང་པོས་རྒྱ་ཆེར་སྤེལ་ཏེ་འབྲེལ་ཚད་དོན་དང་ལྡན་པར་བྱའོ། །] ༈ [དྲུག་པ་བདུད་རྩི་སྒྲུབ་པའི་ཐབས་ལ་གཉིས་ལས། དང་པོ་ཁྲོལ་བུ་སྒྲུབ་པ་ནི། དཀྱིལ་འཁོར་གྱི་དབུས་སུ་བྷནྡྷ་མཚན་ལྡན་གྱི་སྣོད་བཟང་པོར། བྱང་སེམས་སེང་གེའི་ཤ། བཟང་དྲུག་རྣམས་དབུས། དྲི་ཆེན། གླང་པོ་ཆེའི་ཤ། ཛཱ་ཏི་སོགས་ཤར། ཤ་ཆེན། རྟ་ཤ། ཀ་ཀོ་ལ་སོགས་ལྷོ། རཀྟ། རྨ་བྱའི་ཤ། ལི་ཤི་སོགས་ནུབ། དྲི་ཆུ། ཁྱུང་ཤ། གུར་གུམ་སོགས་བྱང་དུ་སྟེ། ཤ་དང་བདུད་རྩི་དངོས་སམ་ཕབ་གཏའ་སོ་སོའི་སྐྱོབས་དང་བཅས་པ་དང་། འབྲས་བུ་གསུམ། ཁ་ཆེ། ནཱ་གི། གླ་རྩི། ཙན་དན་དཀར་པོ་སོགས་དྲི་རོ་དང་ཁ་དོག་བཟང་པོ་གཙོ་བོར་གྱུར་པའི་སྨན་སྣ་རྣམས་བཞག་ལ་གཟུངས་ཐག་བཏགས། དངོས་གཞི་ཕྲིན་ལས་ཀྱི་གཞུང་དཀྱུས་ལྟར་བསྲངས་པ་ལས་བདག་བསྐྱེད་ཀྱི།] ཆུ་ལས་ཉ་ལྡང་ཚུལ་དུ་གསལ་བར་གྱུར། །[ཅེས་པའི་

མཚམས་སུ།] མདུན་དུ་རླུང་མེ་ཐང་སྒྱེད་ལ་གནས་པའི། །རང་བྱུང་བདེ་ཆེན་བྷཉྫའི་གཞལ་མེད་ཁང་། ཡངས་ཤིང་རྒྱ་ཆེ་མཚན་ཉིད་ཕུན་ཚོགས་ནང་། །གོ་ཀུ་ད་ཧ་ན་ལས་ཤ་ལྔ་དང་། །བི་མུ་མ་ར་ཤུ་ལས་བདུད་རྩི་ལྔ། །ཧཱུྃ་ཨོཾ་སྭ་ཨཱཾ་ཧཱ་ཡི་ཡི་གེ་དང་། མཱུཾ་ལཱཾ་མཱཾ་པཱཾ་ཏཱཾ་གྱིས་མཚན་པ་ལས། །འོད་འཕྲོས་རླུང་གཡོས་མེ་སྦར་རྫས་རྣམས་ཞུ། །བྱང་ཆུབ་སེམས་ཀྱི་བདུད་རྩིར་འཁྱིལ་བའི་དབུས། །སེང་ཁྲི་པདྨ་ཉི་ཟླའི་གདན་སྟེང་དུ། །བརྟན་གཡོའི་དྭངས་མ་མི་ཤིགས་ཐིག་ལེའི་གཟུགས། །རིགས་ཀུན་ཁྱབ་བདག་དཔལ་ལྡན་བླ་མ་དང་། །དབྱེར་མེད་གསང་ཆེན་རིགས་གཅིག་རྡོ་རྗེ་སེམས། །སྐུ་མདོག་དཀར་གསལ་[སོགས་ནས་བསྟོད་པའི་བར་གཞུང་བཞིན་བྱ། །སྨན་སྲུང་སྤྱན་འདྲེན་པ་ནི། དར་སྣས་གཡབ་ཅིང་སྤོས་དཀར་གྱི་དུད་པ་འཐུལ་ལ།] ཧཱུྃ། རྩི་དང་སྨན་གྱི་བདག་པོ་དང་། །རྟགས་ལྡན་རིག་འཛིན་བྲན་མོ་དག །རོལ་མོའི་ཆ་བྱད་མང་པོས་འབོད། །འདིར་གཤེགས་བཅུད་ལེན་དངོས་གྲུབ་སྩོལ། །[ཞེས་རོལ་མོའི་སྒྲ་དང་བཅས་སྤྱན་དྲངས་པས་སྨན་གྱི་

ཕོ་བྲང་གི་ནམ་མཁར་སྤྲིན་གཏིབས་པ་ལྟར་བཞུགས་པ་ལ་རྟོག་པ་བསལ་བའི་ཕྱིར་བདུད་རྩི་འཐོར་ལ།] ཨོཾ་ཨཱཿཧཱུྃ། ཧཱུྃ། ཚངས་དང་དྲང་སྲོང་གཙང་མ་ཟ། །ལྷ་ཀླུ་བྲམ་ཟེ་གཙང་མ་ཟ། དེ་དག་གྲོལ་བར་ངས་མ་བཤད། །བདུད་རྩི་དག་པ་ཡེ་ཤེས་ལྔ། །རིགས་ལྔ་སྐུ་ལྔ་ལྷུན་གྲུབ་ཡིན། །གཉིས་མེད་རྟོགས་པའི་ཐབས་མཁས་ཀྱིས། །གཙང་རྨེ་མེད་པར་ཀུན་སྤྱོད་ན། །དེ་དག་གྲོལ་བར་ངས་བཤད་དོ། །[ཞེས་བརྗོད་པས་རྟོག་པ་དག་ནས་དངོས་གྲུབ་སྩོལ་བ་ལ་དགྱེས་པར་བསམ། གཟུངས་ཐག་བཟུང་ལ།] བདག་གི་ཐུགས་ནས་རྡོ་རྗེའི་སྔགས་ཀྱི་འོད། །གཟུངས་ཐག་ལ་འཁྲིལ་མདུན་བསྐྱེད་ཐུགས་རྒྱུད་བསྐུལ། །འོད་འཕྲོས་སྲིད་ཞིའི་དྭངས་བཅུད་ཞལ་དུ་བཀྲུག །སྦྱོར་མཚམས་ནས་བབས་དམ་ཚིག་རྫས་ལ་ཐིམ། །[ཞེས་དམིགས་ཏེ་རྩ་སྔགས་ཅུང་ཟད་དང་།] ཨོཾ་སརྦ་པཉྩ་ཨ་མྲྀ་ཏ་ར་ས་ཡཱ་ན་ཏ་ན་ཛ་ཡ་གུ་ཧྱ་སིདྡྷི་ཧཱུྃ་ཧྲཱིཿཋཱ། [ཞེས་བཟླ། བར་སྐབས་སུ་སྐོང་བཤགས་དང་ཚོགས་ཀྱི་འཁོར་ལོས་མཆོད། བལྟ་ཉན་གྱི་ཉུ་ལེ་བསྐྲད་ཅིང་བྱིན་དབབ་པ་སྔར་མྱང་གྲོལ་སྒྲུབ་པའི་སྐབས་སུ་བཤད་པ་བཞིན་བྱ། དེ་ལྟར་ཐུན་བཞིའམ་དྲུག་གི་ངེས་པས་ཞག་

གྲངས་ཅི་རིགས་སུ་བསྒྲུབས་པའི་ཐུན་ཐ་མའི་རྗེས་སུ།] མདུན་གྱི་ལྷ་ཡབ་ཡུམ་བྱང་ཆུབ་སེམས་ཀྱི་བདུད་རྩིར་ཞུ་བ་དམ་ཚིག་གི་རྫས་དང་རོ་གཅིག་ཏུ་གྱུར་པར་[བསམ་མོ། །] [གཉིས་པ་ཕྱེ་མ་སྒྲུབ་པ་ནི།] ཡུམ་དུ་བཏགས་པའི་ལས་ཀྱི་རྡོ་རྗེས་སྨན་སྣོད་བླངས་ཏེ་སློབ་དཔོན་ལ་ཕུལ། ཤར་དུ་རྡོ་རྗེའི་གཏུན་དུ་འཐག་ཅིང་། སྔགས་ཀྱི་མཐར་ཨོཾ་ཨོཾ་ཨོཾ། [ཞེས་བརྗོད་པས་སྦྱང་། ལྷོར་བཙག་ཅིང་། སྔགས་མཐར་]ཨཱཿཨཱཿཨཱཿ [ཞེས་པས་སྤེལ། ནུབ་ཏུ་ཆང་སྣ། ཆུ་སྣ། འོ་མ། རིན་པོ་ཆེའི་ཆུས་སྦོལ་ཞིང་། སྔག་མཐར་]ཧཱུྃ་ཧཱུྃ་ཧཱུྃ་[ཞེས་པས་བསྒྱུར། བྱང་དུ་དམ་རྫས་སྔ་མའི་རྒྱུན་དང་ཕབས་ཀྱིས་བྲན་ཅིང་འདྲེས་པར་དཀྲུགས་ལ། སྔགས་མཐར་]ཧོཿཧོཿཧོཿ [ཞེས་པས་དབྱེར་མེད་དུ་བྱ། དེ་ནས་དྲིལ་བུས་གཞལ་ཞིང་སྣོད་དུ་བླུགས། ཅོད་པན་དང་རྡོ་དྲིལ་གྱིས་བརྒྱན་ཏེ་དཀྱིལ་འཁོར་དབུས་སུ་ལྡིང་ཁྲིའི་ཁར་བཀོད་ལ་གཟུངས་ཐག་བཏགས། འོག་ཏུ་དྲོད་འབེབས་ཀྱི་མར་མེ་སྦར། འབྱོར་ན་འཕན་གདུགས་རྒྱལ་མཚན་ཚར་དུ་དངར་བས་བརྒྱན། སྒྲུབ་ཚུལ་གོང་དུ་སྨོས་པ་ཇི་ལྟ་བ་ལས། བཟླས་པའི་སྐབས་སུ།] བདག་མདུན་ཐུགས་ཀར་ཟླ་སྟེང་ཧཱུྃ་ཡིག་མཐར། །སྔགས་ཀྱི་ཕྲེང་བས་བསྐོར་

ལས་འོད་ཟེར་འཕྲོས། །རླུང་གཡོས་མེ་སྦར་ཐོད་པའི་རྫས་རྣམས་ཞུ། །ཟེར་རླངས་རྡོར་སེམས་ཞི་ཁྲོའི་ལྷ་ཚོགས་ལ། །ཕོག་པས་སྙོམས་ཞུགས་བདེ་བའི་འོད་དང་སྒྲས། །འཁོར་འདས་དྭངས་བཅུད་ཀུན་བསྡུས་ཞལ་དུ་ཞུགས། །སྐུ་ཡི་དབྱིབས་བརྒྱུད་བདེ་རོལ་སྦྱོར་མཚམས་ནས། །ཡེ་ཤེས་བདུད་རྩི་མུ་ཏིག་དཀར་པོའི་མདོག །ཆར་ལྟར་བབས་ནས་སྒྲུབ་པའི་རྫས་ལ་ཐིམ། །མི་འགྱུར་འཆི་མེད་རྟག་པའི་རྡོ་རྗེ་སེམས། །མཐོང་ཐོས་དྲན་རེག་མྱོང་གྲོལ་རྫས་ཀྱི་ཚུལ། །བདེ་ཆེན་ཐིག་ལེ་གཅིག་ཏུ་འཁྱིལ་བར་གྱུར། །[ཅེས་དམིགས་ལ་གཟུངས་ཐག་བཟུང་སྟེ།] ཨོཾ་ཨཱཿཧཱུྃ་བཛྲ་ཨ་མྲྀ་ཏ་ཧཱུྃ་ཧྲཱིཿཋཱ། [ཞེས་ཆིག་སྒྲིལ་དུ་བཟླ། ཐུན་མཚམས་སུ་མཆོད་ཅིང་བསྟོད་ནས།] ཧཱུྃ་ཧཱུྃ་ཧཱུྃ། [ཞེས་བརྗོད་པས།] མདུན་གྱི་རྡོར་སེམས་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོས་འོད་དུ་ཞུ་ནས་དྭངས་མ་མི་ཤིགས་པའི་ཐིག་ལེ་དམ་ཚིག་གི་བདུད་རྩི་དང་དབྱེར་མེད་དུ་འཁྱིལ་བར་གྱུར་པར་[བསམ། སྐབས་ཇི་ལྟར་རིགས་པར་ཚོགས་ཀྱི་མཆོད་པ་དང་། ཉུ་ལེ་བསྐྲད་ཅིང་བྱིན་དབབ་པ་སོགས་སྔར་དང་

འདྲ། དེ་ལས་འཕྲོས་པའི་དམིགས་རིམ་བྱེ་བྲག་པ་མང་དུ་ཡོད་ཀྱང་སྤྲོས་པ་ཉེར་བསྡུས་སྐབས་སུ་འདི་ཙམ་གྱིས་ཆོག་པར་རྒྱུད་དང་མན་ངག་གི་གཞུང་ལས་གསལ་བས། ཇི་སྐད་བཤད་པ་བཞིན་ཐུན་བཞིའམ་དྲུག་ཏུ་འབད་པས་འོད་དང་། སྒྲ་དང་། དྲི་སོགས་དངོས་གྲུབ་ཀྱི་ཚན་མ་མཐོང་བའམ། ཞག་གསུམ་སོགས་དུས་ཀྱི་ངེས་པ་རྫོགས་ནས་དངོས་གྲུབ་ལེན་པའི་ཚུལ་ནི། ཐོག་མར་དངོས་གྲུབ་བསྐུལ་བའི་དོན་དུ་སྔགས་ཀྱི་མཐར།] ཀཱ་ཡ་ཝཱ་ཀ་ཙིཏྟ་སིདྡྷི་ཕ་ལ་ཧཱུྃ། [ཞེས་བཏགས་པ་མང་དུ་བཟླས་མཐར།] ཨོཾ་བོ་དྷི་ཅིཏྟ་ཀྭ་ཡ་ཝཱཀ་ཙིཏྟ་མ་ཧཱ་ས་མ་ཡ་ཧོཿ [ཞེས་རིག་པའི་མེ་ཏོག་དོར། ཡུམ་གྱིས་སྨན་གྱི་ཕོ་བྲང་བཏེགས་ནས་ཕུལ་བ་སློབ་དཔོན་གྱིས་སྤྱི་གཙུག་ཏུ་བཀོད་དེ། སྔགས་ཀྱི་མཐར།] ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་ཨཱ་ཡུར་སིདྡྷི་ཕ་ལ་ཨ་བྷི་ཥིཉྩ་ཏུ་མཱཾ། [ཞེས་དབང་བླངས་པས།] བདུད་རྩི་བདེ་བ་ཆེན་པོ་རྡོ་རྗེ་སེམས་དཔའ་ཡབ་ཡུམ་རང་ལ་ཐིམ་པར་[བསམ། སློབ་མ་ཡོད་ན།] ཧཱུྃ། མཆོག་གི་དམ་ཚིག་སོགས་ནས། སྐུ་གསུང་ཐུགས་སུ་དབང་བསྐུར་རོ། །[སྔགས་མཐར།] ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ། [ཞེས་གནས་གསུམ་དུ་བསྐུར།] ཨ་

ཧོ་མ་ཧཱ་སུ་ཁ་ཧོཿ [ཞེས་རྟོགས་པ་བརྗོད་ལ།] བཛྲ་པྲ་བེ་ཤ་ཡ་ཕཊ་ཀྱིས་རྒྱ་དགྲོལ། སརྦ་པཉྩ་ཨ་མྲྀ་ཏ་ཨ་བེ་ཤ་ཡ་ཨཱཿ[ཞེས་པས།] བདུད་རྩིའི་དྭངས་མ་དཀར་དམར་མཐིང་པའི་འོད་ཀྱི་རྣམ་པས་རང་ལ་ཐིམ་པར་[བསམ། ནང་མཆོད་དང་སྦྱར་ལ་གཞུང་ལྟར་སྨན་མཆོད་ཕུལ་བའི་རྗེས་སུ། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་གྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉན་པོས་བླང་། །[སྔགས་མཐར།] ཀཱ་ཡ་སིདྡྷི་ཨོཾ། ཝཱ་ཀ་སིདྡྷི་ཨཱ༔ ཙིཏྟ་སིདྡྷི་ཧཱུྃ། [ཞེས་གནས་གསུམ་དུ་ཐིག་ལེ་བྱས་ལ་མྱང་ཞིང་སློབ་མ་ལའང་སྦྱིན། རྗེས་ཀྱི་བྱ་བ་རྣམས་གཞུང་ལྟར་མཐའ་རྒྱས་སུ་བྱའོ། །] ༈ [བདུན་པ་ཚེ་སྒྲུབ་པ་ནི།] སྦྱོར་བ་དཀྱིལ་འཁོར་གྱི་མདུན་དུ་སྙིང་པོ་ལྔའི་རྫས་ལས་གྲུབ་པའི་ཚེ་འབྲང་དང་། གཡས་སུ་ཚེ་རིལ། གཡོན་དུ་ཚེ་ཆང་། རང་གི་མདུན་དུ་ཚེ་འགུགས་པའི་མདའ་དར་སོགས་བཤམ། དངོས་གཞི་ཕྲིན་ལས་ཀྱི་གཞུང་བསྲངས་ལ་བཟླས་པའི་མཇུག་ཏུ། ཚེའི་འབྲང་རྒྱས་ལ་དམིགས་ཏེ། ཤུ་ནྱ་ཏཱ[ས་སྦྱང་།] སྟོང་པའི་ངང་ལས་འཁོར་འདས་སྙིང་པོ་ཀུན། །དྭངས་མ་

འོད་ཕུང་གཅིག་ཏུ་འཁྱིལ་བའི་ཀློང་། །སེང་ཁྲི་པདྨ་ཉི་ཟླའི་གདན་སྟེང་དུ། །རིགས་ཀུན་ཁྱབ་བདག་དཔལ་ལྡན་བླ་མ་དང་། །དབྱེར་མེད་རྡོ་རྗེ་སེམས་དཔའ་ཚེ་དཔག་མེད། །སྐུ་མདོག་དཀར་གསལ་[སོགས་ནས་བསྟོད་པའི་བར་གཞུང་ལྟར་བཏང་ལ།] རྡོར་སེམས་ཚེ་དཔག་མེད་པའི་ཐུགས་ཀ་རུ། །ཉི་ཟླའི་གའུར་མི་འགྱུར་སྲོག་ཡིག་ཧཱུྃ། །ཟླ་བ་ཆུ་ཤེལ་མདངས་ལྟར་འཚེར་བ་ལས། །ལྔ་ལྡན་འོད་ཟེར་ལྷ་མོ་མགྱོགས་མའི་ཚོགས། །གྲངས་མེད་ཉི་ཟེར་རྡུལ་ལྟར་རབ་སྤྲོད་པས། །རང་གི་བླ་ཚེ་ཆད་ཉམས་ཡར་བ་དང་། །འབྱུང་བའི་དྭངས་བཅུད་འཁོར་འདས་དགེ་མཚན་ཀུན། །འཆི་མེད་བདུད་རྩིའི་རྣམ་པར་སྤྱན་དྲངས་ཏེ། །བདག་གི་སྙིང་དབུས་ཉི་ཟླའི་གའུའི་ནང་། །བྷུྃ་སྨུག་ཁོག་པར་ནྲྀ་ཡིག་ཨ་དཀར་མཚན། །དེ་ལ་ཐིམ་པས་རྡོ་རྗེའི་སྲོག་རྩ་གྲུབ། །སྒྲུབ་པའི་དམ་ཚིག་རྫས་ལ་ཡོངས་ཐིམ་པས། །རྡོ་རྗེ་ཚེ་ཡི་བཅུད་ལེན་མཆོག་ཏུ་གྱུར། །[ཅེས་དམིགས་ཏེ་རྩ་སྔགས་མཐར།] བཛྲ་ཨཱ་ཡུ་ཥེ་ཧཱུྃ་ཨཱཿ [ཞེས་བཏགས་པ་རྩ་གཅིག་

ཏུ་བཟླ། ཐུན་མཚམས་སུ་ཚེ་འགུགས་བསྐུལ་བ་ནི། མདའ་དར་གཡབ་ཅིང་།] ཨོཾ། མགོན་པོ་སངས་རྒྱས་ཀུན་གྱི་བདག །རྡོ་རྗེ་སེམས་དཔའ་ཚེ་དཔག་མེད། །བདེ་ཆེན་སྙེམས་མར་མཉམ་སྦྱོར་བ། །སྒྱུ་འཕྲུལ་དྲྭ་བའི་དཀྱིལ་འཁོར་གཙོ། །ཐུགས་དམ་བསྐུལ་ལོ་ཐུགས་རྗེ་སྐྱེད། །ཡེ་ཤེས་ཆེན་པོའི་རོལ་པ་ལས། །ལྷ་མོ་མགྱོགས་མའི་ཕོ་ཉ་སྤྲོས། །བླ་ཚེ་ཆད་ཉམས་ཡར་བ་ཁུག །འབྱུང་བཞིའི་བཅུད་ཀྱི་དྭངས་མ་སྡུས། །ཁམས་གསུམ་སྐྱེ་འགྲོའི་ཚེ་དཔལ་དྲོངས། །དུས་གསུམ་རྒྱལ་བའི་ཡེ་ཤེས་དབྱིག །རྣལ་འབྱོར་ལུས་ངག་ཡིད་ལ་སྟིམས། །ནད་མེད་བདེ་བའི་རྟོགས་པ་སྤོར། །རྒས་མེད་ལང་ཚོའི་གཟི་མདངས་སྐྱེད། །འཆི་མེད་ཚེ་ཡི་རིག་འཛིན་སྩོལ། །རྡོ་རྗེའི་ཚེ་མཆོག་གྲུབ་པར་མཛོད། །[ཅེས་བསྐུལ་བས། ཚེའི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འདུས། ཉི་ཟླའི་གའུ་སྲུབ་མེད་པ་སྔགས་ཀྱི་ཕྲེང་བས་ལུ་གུ་རྒྱུད་དུ་བཅིངས་པས་ཅིས་ཀྱང་མི་ཆོད་མི་ཤིགས་པར་བསམ་ལ།] ཨ། རིག་སྟོང་ཟུང་འཇུག་རྡོ་རྗེ་སེམས། །འོད་གསལ་གཉུག་མའི་ཐིག་ལེ་རུ། །འཆི་

མེད་རྟག་པའི་ཚེ་སྦས་པས། །འཕོ་འགྱུར་མཚན་མ་དབྱིངས་སུ་ཡལ། །ཨ་ཨ་ཨ། [ཞེས་དོན་གྱི་དགོངས་པ་བསྐྱང་། སླར་ཡང་ལུས་ཀྱི་གནས་རྣམས་སུ་རྡོ་རྗེའི་ཕྱག་རྒྱས་གོ་ཁྲབ་ཀྱི་ཚུལ་དུ་གཡོགས་ཤིང་བསྲུངས་པར་བསམ་ལ།] ཨོཾ་བཛྲ་ཀཱ་ཝཱ་ཙི་བཛྲ་རཀྵ་ཧཱུྃ། ཨོཾ་སརྦ་ཏ་ཐཱ་ག་ཏ་བཛྲ་ཨ་དྷི་ཏིཥྛ་བཛྲ་ཡ་སྭཱ་ཧཱ། [ཞེས་བརྟན་པར་བྱ། དེ་ལྟར་བསྒྲུབས་པས་མཚན་མའི་ལྟས་བཟང་པོ་མཐོང་བའམ་གྲངས་དང་དུས་ཀྱི་ངེས་པ་ཐེམ་ནས་ཚེའི་དངོས་གྲུབ་བླང་བ་ནི། མཎྜལ་ཕུལ་ལ།] རྡོ་རྗེ་སེམས་དཔའ་བདེ་བ་ཆེ། །སྒྱུ་འཕྲུལ་གཙོ་བོ་དགོངས་སུ་གསོལ། །རྡོ་རྗེའི་ཚེ་དང་ཡེ་ཤེས་ཀྱི། །དབང་དང་དངོས་གྲུབ་བདག་ལ་སྩོལ། །[ཅེས་ལན་གསུམ་གྱིས་གསོལ་བ་གདབ། ཚེ་འགུགས་བསྐུལ་ཏེ་ཚེ་འབྲང་སྤྱི་བོར་བླངས་ལ།] ཨོཾ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །མི་འགྱུར་རྟག་པའི་དབང་བསྐུར་རོ། །[སྔགས་མཐར།] ཀཱ་ཡ་ཨ་བྷི་ཥིཉྩ་ཨོཾ། [བདུད་རྩི་མགྲིན་པར་བཞག་ཅིང་མྱང་ལ།] ཨཱཿ དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་

ཕྱེད་གསུམ་གྱི་གསུང་། །དེང་འདིར་སངས་རྒྱས་ཐམས་ཅད་ཀྱི། །འགགས་མེད་དབྱངས་ཀྱི་དབང་བསྐུར་རོ། །[སྔགས་མཐར།] ཝཱ་ཀ་ཨ་བྷི་ཥིཉྩ་ཨཱཿ [རིལ་བུ་སྙིང་གར་བཞག་ཅིང་མྱང་ལ།] ཧཱུྃ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་ཐུགས། །དེང་འདིར་སངས་རྒྱས་ཐམས་ཅད་ཀྱི། །འཁྲུལ་མེད་ཡེ་ཤེས་དབང་བསྐུར་རོ། །[སྔགས་མཐར།] ཙིཏྟ་ཨ་བྷི་ཥིཉྩ་ཧཱུྃ། [ཞེས་དབང་བླང་། མཐར་ཚེ་བསྟིམ་ཞིང་རྒྱས་གདབ་སྟེ་ཤིས་པ་བརྗོད། ཕྲིན་ལས་ཀྱི་རྗེས་རིམ་གཞུང་བཞིན་དུ་བྱའོ། །འདིའི་སྒོ་ནས་སློབ་མ་ལ་ཚེ་དབང་བསྐུར་ན། ཁྲུས་བྱ། བགེགས་བསྐྲད་ཅིང་སྲུང་འཁོར་བསྒོམ། སེམས་བསྐྱེད་གསལ་བཏབ་ལ།] དེའང་ཇི་སྐད་དུ། འཁོར་བར་སྲོག་ལས་གཅེས་པ་ནི། །འགའ་ཡང་ཡོད་པར་མ་མཐོང་བས། །དེས་ན་མྱུར་དུ་ཐབས་མང་པོས། །འཆི་བ་བསླུ་བ་ཡང་དག་བརྩམ། །ཞེས་གསུངས་པ་ལྟར། མངོན་མཐོ་དང་ངེས་ལེགས་ཀྱི་ཡོན་ཏན་མ་ལུས་པ་བསྒྲུབ་པའི་གཞི་མ་དལ་འབྱོར་གྱི་ལུས་རྟེན་འདི་ཉིད་ཡུན་དུ་འཚོ་བའི་ཐབས་ལ་འབད་པ་ནི་འཇིག་

རྟེན་འདི་ན་དོན་དུ་གཉེར་བྱའི་གཙོ་བོ་ཡིན་ལ། དེའི་ཚུལ་ཡང་ཇི་སྙེད་ཅིག་མཆིས་པ་ལས། འདིར་ནི་རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་རྒྱས་པ་ལས། བུམ་པ་མཆོག་ནི་བཟང་པོ་ཉིད། །ཚེ་གཞག་གནས་ནི་འདི་ཡིན་ཏེ། །ཡང་དང་ཡང་དུ་འགུག་བྱ་ཞིང་། །མངོན་སུམ་སྨིན་པར་གྱུར་པ་དང་། །དབྱིངས་སུ་ཡང་ནི་སྦ་བར་བྱ། །རྡོ་རྗེའི་གོ་ཆ་སྲུང་བ་ཡིས། །བརྟན་ཅིང་འཁོར་ལོས་དགག་པར་བྱ། །ཞེས་རྡོ་རྗེའི་ཚེ་སྒྲུབ་པའི་རྟེན་དང་། དགུག་པ་དང་། བསྟིམ་པ་དང་། སྦ་བ་དང་། བསྲུང་བའི་ཚུལ་སོགས་རྒྱ་ཆེར་གསུངས་པའི་རྗེས་སུ་འབྲང་སྟེ། རྒྱུད་ལུང་མན་ངག་རྒྱ་མཚོའི་ཟབ་གནད་སྙིང་པོར་དྲིལ་བ་རིགས་འདུས་བླ་མ་རྡོ་རྗེ་སེམས་དཔའ་ཚེ་དཔག་ཏུ་མེད་པའི་ངོ་བོར་བསྒྲུབ་ཅིང་མཆོད་པའི་ཆོ་ག་ཚོགས་ཆེན་ཤིང་རྟ་དང་འབྲེལ་བར་འཆི་མེད་ཚེའི་དབང་བསྐུར་ཟབ་མོ་སྒྲུབ་པ་ལ་[སོགས་ཀྱིས་མཚམས་སྦྱར་ཏེ་མཎྜལ་ཕུལ།] གསོལ་བ་གདབ་པ་འདིའི་རྗེས་ཟློས། རྡོ་རྗེ་སེམས་དཔའ་བདེ་བ་ཆེ། །[ཞེས་སོགས།] བླ་མ་རྡོ་རྗེ་

སེམས་དཔའ་ཚེ་དཔག་ཏུ་མེད་པ་སྐྱབས་ཡུལ་རྒྱ་མཚོའི་སྤྲིན་ཕུང་འཕྲོ་བའི་སྤྱན་སྔར་ཡན་ལག་བརྒྱད་ཀྱི་སྒོ་ནས་རྒྱུད་སྦྱོང་བ་འདིའི་རྗེས་ཟློས། རྡོ་རྗེ་སློབ་དཔོན་[སོགས།] དེ་ནས་དངོས་གཞི་བྱིན་རླབས་ཀྱི་གཞི་བསྒྲུབ་པ་[སོགས་ཡེ་ཤེས་དབབ་བསྟིམ་སྔར་སྨིན་དབང་གི་སྐབས་བཞིན་བྱས་ལ།] དེ་རྣམས་ཀྱིས་འཇུག་པའི་རིམ་པ་གྲུབ་ནས། དངོས་གཞིའི་དབང་བསྐུར་བ་ལ། ཐོག་མར་ཚེ་འགུགས་ཤིང་བཅུད་བསྡུ་བའི་སླད་དུ། སློབ་དཔོན་དང་མདུན་བསྐྱེད་ཀྱི་ཐུགས་ཀར་མི་འགྱུར་བའི་སྲོག་ཧཱུྃ་ཡིག་ཟླ་བ་ཆུ་ཤེལ་གྱི་མདངས་ལྟར་འཚེར་བ་ལས་གཞལ་དུ་མེད་པའི་འོད་ཟེར་གྱི་ཚོགས་དང་ལྷ་མོ་མགྱོགས་མའི་སྤྲུལ་པ་ཉི་ཟེར་གྱི་རྡུལ་ལྟར་སྤྲོས་པས། ཁྱེད་རང་རྣམས་ཀྱི་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་དྭངས་བཅུད། འཁོར་འདས་ཀྱི་དགེ་མཚན་ཐམས་ཅད་འཆི་མེད་བདུད་རྩིའི་རྣམ་པར་སྤྱན་དྲངས། ཁྱེད་རང་རྣམས་ཀྱི་སྤྱི་བོ་ནས་ཞུགས། སྙིང་གར་ཉི་ཟླའི་གའུའི་ནང་དུ་བྷྲཱུྃ་སྨུག་པའི་ཁོག་པར་ནྲྀ་ཡིག་ཨ་དཀར་པོས་མཚན་

པ་ལ་སིབ་སིབ་ཐིམ་པས་རྡོ་རྗེའི་སྲོག་ལ་དབང་ཐོབ། མདུན་གྱི་སྒྲུབ་པའི་དམ་རྫས་ལ་ཐིམ་པས་རྡོ་རྗེ་ཚེའ་བཅུད་ལེན་དུ་གྱུར་པར་མོས་ཤིག །ཨོཾ། མགོན་པོ་སངས་རྒྱས་[སོགས་ཀྱིས་ཚེ་འགུགས་བསྐུལ།] ཚེའི་འབྲང་རྒྱས་འདི་ཉིད་བླ་མ་རྡོ་རྗེ་སེམས་དཔའ་ཚེ་དཔག་ཏུ་མེད་པའི་ངོ་བོར་བཞུགས་པ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་དབང་བསྐུར་བ་ལ་བརྟེན་ནས། ལུས་གནས་འཆིང་བྱེད་ཀྱི་རྩ་མདུད་རང་སར་གྲོལ་ཏེ་འགྱུར་མེད་རྟག་པ་དམ་པའི་སྐུ་མཆོག་མངོན་དུ་བྱས་པར་མོས་ཤིག ཨོཾ། དཔལ་ལྡན་[སོགས་ཀྱིས་ཚེ་འབྲང་གིས་དབང་བསྐུར།] བརྟན་གཡོའི་སྙིང་པོའི་དྭངས་མ་ཟག་མེད་བདུད་རྩིའི་རང་བཞིན་དུ་འཁྱིལ་བ་འདི་ཉིད་མགྲིན་པར་བཞག་ཅིང་མྱང་བ་ལ་བརྟེན་ནས། སྲོག་རྩོལ་གྱི་རྒྱུ་བ་ངྷཱུ་ཏིའི་སྦུབས་སུ་ཚུད་དེ་འགགས་མེད་ཚངས་པའི་དབྱངས་ཀྱི་གསུང་མཆོག་མངོན་དུ་བྱས་པར་མོས་ཤིག ཨཱཿ དཔལ་ལྡན་[སོགས་ཀྱིས་ཚེ་ཆང་མགྲིན་པར་བཞག་ཅིང་སྦྱིན།] སྲིད་ཞིའི་ཁམས་ཀྱི་དྭངས་བཅུད་བདེ་ཆེན་ཐིག་ལེའི་གཟུགས་

སུ་འདྲིལ་བ་འདི་ཉིད་སྙིང་གར་བཞག་ཅིང་མྱང་བ་ལ་བརྟེན་ནས། སྙིང་དབུས་མི་ཤིགས་དྭངས་མའི་སྲོག་དང་རོ་གཅིག་ཏུ་འདྲེས་ཏེ་འཁྲུལ་མེད་ཡེ་ཤེས་རྡོ་རྗེའི་ཐུགས་མཆོག་མངོན་དུ་བྱས་པར་མོས་ཤིག ཧཱུྃ། དཔལ་ལྡན་སོགས་ཀྱིས་ཚེ་རིལ་སྙིང་གར་བཞག་ཅིང་སྦྱིན། དེ་ལྟར་དབང་བསྐུར་བས་ཚེའི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འུབ་ཀྱིས་འདུས་ཤིང་ཕྱི་རོལ་ཉི་ཟླའི་གའུ་སྲུབ་མེད་པ་སྔགས་ཀྱི་ཕྲེང་བས་ལུ་གུ་རྒྱུད་དུ་བཅིངས། ལུས་ཀྱི་གནས་རྣམས་སུ་ཡང་རྡོ་རྗེའི་ཕྱག་རྒྱས་གོ་ཁྲབ་ཀྱི་ཚུལ་དུ་གཡོགས་ཏེ་བསྲུངས་པས་ཅིས་ཀྱང་མི་ཆོད་མི་ཤིགས་པར་མོས་མཛོད། ཨ། རིག་སྟོང་[སོགས་ཀྱིས་མདའ་དར་སྤྱི་བོར་རྒྱ་གྲམ་དུ་བཞག །མཐར་ཤིས་པ་བརྗོད་པ་སོགས་རྗེས་རིམ་རྣམས་སྤྱི་ལྟར་བྱའོ། །དེས་ནི་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་ཤིང་མཐར་ཐུག་འཆི་བ་མེད་པའི་ཡེ་ཤེས་མངོན་དུ་བྱེད་པར་འགྱུར་རོ། །དད་གསུམ་བློ་གྲོས་འདབ་རྒྱ་གྲོལ་བའི་དཔྱིད། །ལེགས་བཤད་སྦྲང་རྩིའི་དོ་ཤལ་སྤྲོས་པ་ན། །ཐུགས་རྗེའི་ཉིན་བྱེད་མགྲོན་ཁུག་པའི་གྲོགས། །སྐལ་བཟང་རྐང་དྲུག་ཚོགས་རྣམས་སྦྲན་པ་

བཞིན། །ལེགས་བྱས་འཛིན་མའི་ལྟོ་བར་ཉེར་བརྟེན་པའི། །བསོད་ནམས་ཡོངས་འདུའི་ལྗོན་པ་མཆོག་འདི་ལས། །ཕན་བདེའི་འབྲས་བཟང་ཡིད་བཞིན་རབ་འཇོ་བས། །མཐའ་ཀླས་སྐྱེ་རྒུའི་གདུང་སེལ་ཉིད་གྱུར་ཅིག །དེ་ལྟར་དཀྱིལ་འཁོར་ཐམས་ཅད་ཀྱི་ངོ་བོ་བླ་མ་མཆོད་པའི་ཚོ་ག་གཞན་ཕན་ཕྲིན་ལས་དང་བཅས་པ་ཚོགས་ཆེན་ཤིང་རྟ་ཞེས་བྱ་བ་འདི་ནི། རིགས་ཀུན་ཁྱབ་བདག་བཀའ་དྲིན་ཅན་གྱི་རྡོ་རྗེའི་སློབ་དཔོན་ཆེན་པོ་རྣམས་ལ་དུས་དྲན་གྱི་མཆོད་སྤྲིན་ཡང་དག་པར་སྤྲོ་བའི་སླད་དུ་དམིགས་ནས། རྡོ་རྗེའི་གསུང་གི་གསང་བ་བྱིན་རླབས་ཅན་ཁོ་ན་གུང་བསྡེབས་ཤིང་ཚོགས་བསགས་རྒྱུན་གྱི་ཉམས་ལེན་འཇུག་པ་བདེ་བའི་དབང་དུ་བྱས་ཏེ། ཐར་ལམ་བླ་མའི་སྐུ་དྲིན་ཁོ་ན་ལ་རེ་བའི་ངེས་ཤེས་བརྟན་པོ་རྙེད་པ་རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་ཉེར་གཅིག་ཏུ་སོན་པ་ཤིང་ཕོ་བྱི་བའི་ལོ་རྒྱལ་གྱི་ཉ་བའི་དུས་ཚེས་དགེ་བ་ལ་མཁན་ལྗོངས་ཨེ་ཝཾ་བདེ་ཆེན་ཆོས་གླིང་གི་དགའ་ཚལ་དུ་སྦྱར་བ་ལས། ཕྱིས་གསང་ཆེན་བསྟན་པའི་སྣང་བྱེད་མཆོག་གི་སྤྲུལ་པའི་སྐུ་འཇིགས་མེད་ཆོས་དབྱིངས་ནོར་བུ་དོན་ཐམས་ཅད་གྲུབ་པའི་སྡེའི་བཞེད་པ་བཞིན་ཆོ་གའི་ཡན་ལག་གི་ཕྲིན་ལས་རྣམས་ཀྱང་གསར་དུ་

བསྣན་ཏེ་ཤིན་ཏུ་གསལ་བར་བགྱིས་པའོ། །འདིས་ཀྱང་འགྲོ་བ་ཐམས་ཅད་དཔལ་ལྡན་བླ་མའི་བྱིན་རླབས་ཀྱི་སྣང་བ་དང་མི་འབྲལ་ཞིང་ཕན་བདེའི་དགེ་མཚན་མཆོག་ཏུ་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལམ། །] ཨོཾ་སྭསྟི། རབ་འབྱམས་དཀྱིལ་འཁོར་འཁོར་ལོའི་སྤྲིན་ཇི་སྙེད། །ཁྱབ་བདག་བླ་མའི་ཡེ་ཤེས་ཉག་གཅིག་སྟེ། །དེ་ཉིད་མངོན་པར་མཆོད་ཅིང་བསྙེན་པ་བས། །ཆེས་འཕགས་ལམ་བཟང་གཞན་དུ་ཡོད་མ་ཡིན། །ཉེས་གདུང་མུན་པའི་གཡུལ་ངོ་མཐར་བྱེད་ཅིང་། །ཚོགས་ཟུང་ཀུནྡའི་ལང་ཚོ་སྤེལ་བ་ལ། །བཀའ་གཏེར་རྒྱུད་ལུང་རྒྱ་མཚོ་བསྲུབས་པའི་བཅུད། །སྔོན་མེད་མན་ངག་ཟླ་གཞོན་དེང་འདིར་ཤར། །ཚུལ་འདི་མོས་ལྡན་ཐར་འདོད་སྐལ་བཟང་གི །མྱུར་བདེའི་འཇུག་ངོགས་གཅིག་ཏུ་ངེས་རྙེད་ནས། །འགྱུར་མེད་རྡོ་རྗེའི་ལྷག་བསམ་ཆུ་འཛིན་ལས། །མི་འཛད་ཆོས་སྦྱིན་གྲུ་ཆར་འདི་ན་ཕབ། །དེ་ལྟའི་བསོད་ནམས་རིན་ཆེན་མྱུ་གུ་ལས། །ཕན་བདེའི་སྙེ་མ་གཡུར་དུ་རབ་ཟ་བ། །ལུས་ཅན་སྐྱེ་རྒུའི་ཉེར་འཚོའི་གཞིར་གྱུར་ནས། །བཀྲ་ཤིས་དཔལ་

གྱིས་ཞིང་ཀུན་མཛེས་བྱེད་ཤོག །ཅེས་ལེགས་བྱས་ཡོངས་སུ་གྲུབ་པའི་འདོད་དོན་གྱི་སྨོན་ཚིག་དགའ་བ་བཞིའི་གྲངས་ལྡན་འདིའང་རྣམ་དཀར་སྒྲུབ་པ་པོའི་བཞེད་པ་བཞིན་འཇིགས་བྲལ་ཡེ་ཤེས་རྡོ་རྗེས་སྙིང་ནས་རྗེས་སུ་ཡི་རང་བའི་སེམས་ཀྱིས་བརྗོད་པ་སིདྡྷི་རསྟུ།། །།

བླ་མཆོད་ཚོགས་ཆེན་ཤིང་རྟའི་བརྒྱུད་འདེབས་བྱིན་རླབས་ཆར་འབེབས།

[བླ་མཆོད་ཚོགས་ཆེན་ཤིང་རྟའི་བརྒྱུད་འདེབས་བྱིན་རླབས་ཆར་འབེབས་ཞེས་བྱ་བ་བཞུགས་སོ། །] ཁྱབ་བདག་སྟོན་པ་ཀུན་བཟང་རྡོ་རྗེ་འཆང་། །ཟུང་འཇུག་ཡེ་ཤེས་རིགས་ལྔ་རིགས་གསུམ་སོགས། །མི་འགྱུར་རྒྱལ་བ་དགོངས་བརྒྱུད་བླ་མ་ལ། །གསོལ་བ་འདེབས་སོ་དབང་བསྐུར་བྱིན་གྱིས་རློབས། །དགའ་རབ་རྡོ་རྗེ་ལས་ཅན་རྒྱལ་པོ་ཛཿ ཤྲཱི་སེང་ཧཱུྃ་མཛད་པདྨ་ཐོད་ཕྲེང་སོགས། །མ་འགགས་རིག་འཛིན་བརྡ་བརྒྱུད་བླ་མ་ལ། །གསོལ་བ་འདེབས་སོ༴ ཆོས་རྒྱལ་ཡབ་སྲས་ཌཱ་ཀི་མཁར་ཆེན་བཟའ། །ལོ་ཆེན་སྣང་མཛད་རྨ་གཉག་འབྲོག་བན་

སོགས། །ཐུགས་རྗེ་གང་ཟག་སྙན་བརྒྱུད་བླ་མ་ལ། །གསོལ་བ་འདེབས་སོ༴ ཡོངས་རྫོགས་བཀའ་གཏེར་རྒྱུད་ལུང་མན་ངག་གི །སྨིན་གྲོལ་གདམས་པའི་ཆུ་བོ་ཀུན་འདུས་མགོན། །རྡོ་རྗེ་སེམས་དངོས་རྩ་བའི་བླ་མ་ལ། །གསོལ་བ་འདེབས་སོ༴ གཅིག་ཆོག་མོས་གུས་ལམ་བཟང་ལ་བརྟེན་ནས། །བླ་མའི་གསང་གསུམ་ཡེ་ཤེས་རྡོ་རྗེའི་སྐུ། །ཚེ་འདིར་འགྲུབ་པའི་སྐལ་བཟང་བདག་ཐོབ་སྟེ། །མཁའ་མཉམ་འགྲོ་བའི་དེད་དཔོན་མངོན་གྱུར་ཤོག །[ཅེས་པའང་མཁྱེན་བརྩེའི་བདག་ཉིད་ཆོས་མཛད་བླ་མ་འགྱུར་མེད་བསྟན་འཛིན་རྡོ་རྗེའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པ་ཛ་ཡནྟུ།། །།]

བཤགས་པ།

དུས་གསུམ་བདེ་གཤེགས་རྒྱལ་བ་འཁོར་དང་བཅས། །རྡོ་རྗེ་དམ་ཅན་མ་ལུས་དགོངས་སུ་གསོལ། །དང་པོར་བྱང་ཆུབ་མཆོག་ཏུ་སེམས་བསྐྱེད་དེ། །སྒྲུབ་པའི་རིག་འཛིན་བྱང་ཆུབ་གོ་འཕང་དུ། །སྐུ་གསུང་ཐུགས་ཀྱི་རྡོ་རྗེ་བསྒྲུབ་པའི་ཕྱིར། །ཡི་དམ་ལྷ་དང་རྡོ་རྗེ་སློབ་དཔོན་དང་། གསང་བའི་དམ་ཚིག་གྲངས་སུ་མནོས་པ་ལས། །དམ་བཅས་བཀའ་ལས་འདའ་བར་མི་བགྱི་སྟེ། །ལས་དང་སྐལ་བས་དམྱལ་བར་སྐྱེ་བར་འགྱུར། །འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལ་སོགས་ཤོར་ནས་ནོངས་བགྱིས་པ། །རྡོ་རྗེ་སློབ་དོཔན་སྟོན་པ་སྒྲོན་མེ་ལ། །སྙིང་ནས་སྨད་ཅིང་དམ་ཚིག་ཉམས་པ་དང་། །དམ་ཚིག་གཅིག་པའི་རྡོ་རྗེ་སྤུན་རྣམས་ལ། །ངན་སེམས་ལོག་པར་ལྟ་བ་ལ་སོགས་པ། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །ཡི་དམ་ལྷ་ཡི་ཕྱག་རྒྱ་མ་གསལ་ཞིང་། །སྔགས་ཀྱི་བསྙེན་པ་གྲངས་ལས་ཆད་པ་དང་། །དུས་དྲུག་ལས་ཀྱི་མཆོད་པ་ཁྱད་པར་དུ། །བསྙེན་སྒྲུབ་སྐོང་བའི་ཆོ་

ག་མ་བགྱིས་ཏེ། །བཀའ་ལྟར་མ་ལྕོགས་གཞུང་བཞིན་རྔོ་མ་ཐོགས། །གསུང་གི་དམ་ཚིག་ཉམས་པ་མཐོལ་ལོ་བཤགས། །རྡོ་རྗེ་སློབ་དཔོན་བྱམས་པའི་བཀའ་དྲིན་གྱིས། །སྙན་ཁུངས་བརྒྱུད་ནས་སེམས་ཀྱི་དཀྱིལ་དུ་བཞག །ཐུགས་ཀྱི་མན་ངག་བྱིན་པས་དམ་ཚིག་འདྲེས། །གསང་མཚམས་འདས་ནས་འཆོལ་བར་སྨྲས་ལ་སོགས། །ཐུགས་ཀྱི་དམ་ཚིག་ཉམས་པ་མཐོལ་ལོ་བཤགས། །ཆོས་རྣམས་མཉམ་པ་ཉིད་དུ་མ་རྟོགས་ཏེ། །ཡན་ལག་དམ་ཚིག་ཉམས་བ་མཐོལ་ལོ་བཤགས། །ལེ་ལོ་སྙོམ་ལས་གཉིད་ཀྱི་དབང་གྱུར་ཏེ། །བསྙེན་སྒྲུབ་དམ་ཚིག་ཉམས་པ་མཐོལ་ལོ་བཤགས། །ལུས་ངག་ཡིད་ཀྱི་བསྲུང་བྱ་འདས་པ་ཡིས། སྐུ་གསུང་ཐུགས་ཀྱི་དམ་ཚིག་ཉམས་པར་བཤགས། །རྗེ་བཙུན་བླ་མ་རྣམས་ཀྱི་སྤྱན་ལམ་དུ། །ཡོ་བྱད་འབྱོར་ཚོགས་ཆུང་པ་མཐོལ་ལོ་བཤགས། །ཡི་དམ་ལྷ་ཚོགས་རྣམས་ཀྱི་སྤྱན་ལམ་དུ། །མངོན་རྟོགས་སྤང་ལེན་བགྱིས་པ་མཐོལ་ལོ་བཤགས། །མཁའ་འགྲོ་སྡེ་བཞི་རྣམས་ཀྱི་སྤྱན་ལམ་དུ། །ཁས་བླང་དམ་བཅའ་

ཉམས་པ་མཐོལ་ལོ་བཤགས། །ཆོས་སྐྱོང་སྲུང་མ་རྣམས་ཀྱི་སྤྱན་ལམ་དུ། །གཏོར་མ་ལོ་ཟླར་འགྱངས་པ་མཐོལ་ལོ་བཤགས། །དུས་གསུམ་ཕ་མ་རྣམས་ཀྱི་སྤྱན་ལམ་དུ། །དྲིན་ལ་ལན་གྱིས་མ་ལོན་མཐོལ་ལོ་བཤགས། །མཆོད་དང་ལྕམ་དྲལ་རྣམས་ཀྱི་སྤྱན་ལམ་དུ། །དམ་ཚིག་བརྩེ་གདུང་ཆུང་བ་མཐོལ་ལོ་བཤགས། །འགྲོ་དྲུག་སེམས་ཅན་རྣམས་ཀྱི་སྤྱན་ལམ་དུ། །སྙིང་རྗེ་ཕན་སེམས་ཆུང་བ་མཐོལ་ལོ་བཤགས། །སོ་སོར་ཐར་པ་རྣམས་ཀྱི་སྡོམ་པ་དང་། །བྱང་ཆུབ་སེམས་དཔའ་རྣམས་ཀྱི་བསླབ་པ་དང་། །རིག་པ་འཛིན་པ་སྔགས་ཀྱི་དམ་ཚིག་སོགས། །ཉམས་པ་ཐམས་ཅད་མཐོལ་བཤགས་མི་འཆབ་བོ། །མི་སྦེད་སླན་ཆད་གཅོད་ཅིང་སྡོམ་པར་བགྱིད། །དུས་གསུམ་བྱས་བསགས་སྡིག་སྒྲིབ་མཐོལ་བཤགས་ན། །ཚངས་པར་མཛད་ནས་སྐུ་གསུང་ཐུགས་ལ་སོགས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །

ན་རཀ་དོང་སྤྲུགས་ཀྱི་ཆོ་ག་ལས་འབྱུང་བའི་སྐོང་གི་ཆོ་ག

[ན་རཀ་དོང་སྤྲུགས་ཀྱི་ཆོ་ག་ལས་འབྱུང་བའི་སྐོང་གི་ཆོ་ག་བྱ་བར་སྤྲོ་ན། སྨན་གཏོར་རཀྟ་མར་མེ་རྣམས་ལྷ་གྲངས་སམ། གཏེར་མ་དཀར་དམར་གཉིས་དང་སྨན་རཀ་མར་མེ་སྣ་རེ་ཙམ་བསྣན་པས་ཀྱང་རུང་ལ། གང་ལྟར་ཡང་སྐོང་བ་བྱ་བ་ལ་བདུན་ལས།] [དང་པོ་རྟོགས་སྐོང་ན། རང་བཞིན་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་རོ་མཉམ་པར་བལྟས་ལ།] ཧཱུྃ། བསྐང་ངོ་ཀལྤས་ཐུགས་དམ་བསྐང་། །དངོས་པོ་སྟོང་ཉིད་ཀློང་དུ་བསྐང་། །སྣང་བ་ཡེ་ཤེས་ཀློང་དུ་བསྐང་། །གསལ་བ་ཤེས་རབ་ཀློང་དུ་བསྐང་། །སྡུག་བསྔལ་ཆོས་ཉིད་ཀློང་དུ་བསྐང་། །སྐྱེ་བ་མེད་པའི་དབྱིངས་སུ་བསྐང་། །འགག་པ་མེད་པའི་མཁའ་ལ་བསྐང་། །སྐྱེ་འགག་གཉིས་མེད་ཀློང་དུ་བསྐང་། [གཉིས་པ་བདུད་རྩིས་སྐོང་བ་ནི།] ཧཱུྃ། བསྐང་ངོ་བདུད་རྩིས་ཐུགས་དམ་བསྐང་། །ཀུན་གཞི་ཀློང་ཡངས་བྷཉྫ་རུ། །བྱང་ཆུབ་སེམས་ཀྱི་བདུད་རྩིས་བཀང་། །འདི་ཡང་རང་བྱུང་བདུད་རྩི་སྟེ། །དམིགས་མེད་ཆོས་སྐུའི་ཐུགས་དམ་བསྐང་། །གདངས་

གསལ་འབར་བའི་བྷཉྫ་རུ། །ཡེ་ཤེས་སྒྲིབ་མེད་བདུད་རྩིས་བཀང་། །འདི་ཡང་རང་བྱུང་བདུད་རྩི་སྟེ། །ལོངས་སྤྱོད་རྫོགས་སྐུུའི་ཐུགས༴ མཆོག་གི་འོད་གསལ་བྷཉྫ་རུ། །ཐིག་ལེ་འབར་བའི་བདུད་རྩིས་བཀང་། །འདི་ཡང་རང་བྱུང་བདུད་རྩི་སྟེ། །རྒྱལ་བ་སྤྲུལ་སྐུའི༴ ཡེ་ཤེས་རྩ་ལྔའི་བྷཉྫ་རུ། །སྐྱེ་མེད་ཨ་དཀར་བདུད་རྩིས་བཀང་། །འདི་ཡང་རང་བྱུང་བདུད་རྩི་སྟེ། །ཞི་བའི་ལྷ་ཚོགས༴ དཔའ་བོ་འབྲུ་ལྔའི་བྷཉྫ་རུ། །ཤེས་རབ་རང་གསལ་བདུད་རྩིས་བཀང་། འདི་ཡང་རང་བྱུང་བདུད་རྩི་སྟེ། །ཁྲོ་བོའི་ལྷ་ཚོགས༴ བདུད་རྩི་སྨན་གྱི་དམ་ཚིག་འདིས། །མཆོད་འོས་རྒྱ་མཚོའི་ཐུགས་དམ་བསྐང་། །ཉམས་ཆག སྐོངས་ཤིང་[གསུམ་པ་གཏོར་མས་སྐོང་བ་ནི།] ཧཱུྃ། བསྐང་ངོ་གཏོར་མས་ཐུགས་དམ་བསྐང་། །བྷཉྫ་འབར་བའི་གཏོར་གཞོང་དུ། །ཤངས་ཀྱི་རླུང་སྒྲོམ་དཔལ་བཤོས་བཙུགས། །འཁོར་ལོ་འབར་བའི་མཐེབ་ཀྱུས་བསྐོར། །

སྒྲོན་མ་མིག་གི་ཛ་གད་སྩལ། །དབང་པོ་ལྔ་ཡི་རཀྟས་བརྒྱན། །འདི་ཡང་རང་བྱུང་གཏོར་མ་སྟེ། །བླ་མ་རིག་འཛིན་མཆོག་གསུམ་དང་། ཞི་ཁྲོ་རབ་འབྱམས་ཐུགས་དམ་བསྐང་། །ཉི་ཟླ་ཁ་སྦྱོར་གཏོར་གཞོང་དུ། །ཙིཏྟ་འབར་བའི་དཔལ་བཤོས་བཙུགས། །པདྨ་འདབ་བརྒྱད་མཐེབ་ཀྱུས་བསྐོར། །རྣམ་ཤེས་ཚོགས་བརྒྱད་ཛ་གད་སྩལ། །རྩ་ཆེན་བཞི་ཡི་རཀྟས་བརྒྱན། །འདི་ཡང་རང་བྱུང་གཏོར༴ བླ་མ་རིག་འཛིན་མཆོག༴ ཞི་ཁྲོ་རབ་འབྱམས་ཐུགས་དམ༴ ཁྱབ་བརྡལ་པགས་པའི་གཏོར་གཞོང་དུ། །རུས་པ་རང་སྣང་དཔལ་བཤོས་བཙུགས། །རང་སྣང་ཤ་ཡི་མཐེབ་ཀྱུས་བསྐོར། །བཀྲག་དང་མདངས་ཀྱི་ཛ་གད་སྩལ། །ཁྲག་དང་ཆུ་སེར་རཀྟས་བརྒྱན། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ ཁོག་པ་སྟོང་པའི་གཏོར་གཞོང་དུ། །མཆིན་པ་རང་སྣང་དཔལ་བཤོས་བཙུགས། །གློ་མཚེར་མཁལ་མའི་མཐེབ་ཀྱུས་བསྐོར། །གུ་ཧྱ་ནང་ཁྲོལ་ཛ་གད་སྩལ། །རང་སྣང་མཁྲིས་པའི་

རཀྟས་བརྒྱན། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ བ་ལིཾ་འདོད་ཡོན་དམ་ཚིག་འདིས། །མཆོད་འོས་རྒྱ་མཚོའི་ཐུགས་དམ་བསྐང་། །ཉམས་ཆག་སྐོངས་ཤིང་རྟོག་སྒྲིབ་དག །དབང་དང་དངོས་གྲུབ་སྩལ་དུ་གསོལ། །མ་ཧཱ་བ་ལིཾ་ཏ་ཁཱ་ཧི། །[བཞི་པ་རཀྟས་སྐོང་བ་ནི།] ཧཱུྃ། བསྐང་ངོ་རཀྟས་ཐུགས་དམ་བསྐང་། །སྤྱི་བོ་བདེ་ཆེན་བྷཉྫ་རུ། །སྡུག་བསྔལ་རྣམ་རྟོག་རཀྟས་བཀང་། །འདི་ཡང་རང་བྱུང་རཀྟ་སྟེ། །བླ་མ་རིག་འཛིན༴ ཞི་ཁྲོ་རབ་འབྱམས༴ མགྲིན་པ་ལོངས་སྤྱོད་བྷཉྫ་རུ། །སྣ་ཚོགས་ཡིད་ཀྱི་རཀྟས་བཀང་། །འདི་ཡང་རང་བྱུང་རཀྟ་སྟེ། །བླ་མ་རིག་འཛིན༴ ཞི་ཁྲོ་རབ་འབྱམས༴ སྙིང་ག་ཆོས་ཀྱི་བྷཉྫ་རུ། །བསམ་པ་བློ་ཡི་རཀྟས་བཀང་། །འདི་ཡང་རང་བྱུང་རཀྟ༴ བླ་མ་རིག་འཛིན༴ ཞི་ཁྲོ་རབ་འབྱམས༴ ལྟེ་བ་སྤྲུལ་པའི་བྷཉྫ་རུ། །ཉོན་མོངས་སྲིད་རྩའི་རཀྟས་བཀང་། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ གསང་བ་བདེ་སྐྱོང་བྷཉྫ་རུ། །བདེ་བ་

ཐིག་ལེའི་རཀྟས་བཀང་། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ རཀྟ་འབར་བའི་དམ་ཚིག་འདིས། །མཆོད་འོས་རྒྱ་མཚོའི་ཐུགས་དམ་བསྐང་། །ཉམས་ཆག་སྐོངས་ཤིང་རྟོག་སྒྲིབ་དག །དབང་དང་དངོས་གྲུབ་སྩལ་དུ་གསོལ། །མ་ཧཱ་རཀྟ་ཁཱ་ཧི། །[ལྔ་པ་སྒྲོན་མེས་སྐང་བ་ནི།] ཧཱུྃ། བསྐང་ངོ་སྒྲོན་མེས་ཐུགས་དམ་བསྐང་། །བརྡལ་ཁྱབ་པགས་པའི་ཀོང་བུ་རུ། །ཁྲག་དང་ཆུ་སེར་མར་ཁུས་གཏམས། །ཤ་དང་རུས་པའི་སྡོང་བུ་ལ། །རང་གསལ་བཀྲག་མདངས་ཞུན་མར་སྦར། །འདི་ཡང་རང་བྱུང་སྒྲོན་མེ་སྟེ། །བླ་མ་རིག་འཛིན༴ ཞི་ཁྲོ་རབ་འབྱམས༴ དུད་ཆེན་འབར་བའི་ཀོང་བུ་རུ། །གོ་རོ་ཙ་ནའི་མར་ཁུས་གཏམས། །གསལ་བྱེད་རྩ་ལྔའི་སྡོང་བུ་ལ། །དབང་པོ་སྒོ་ལྔའི་ཞུན་མར་སྦར། །འདི་ཡང་རང་བྱུང་སྒྲོན༴ བླ་མ་རིག་འཛིན༴ ཞི་ཁྲོ་རབ་འབྱམས༴ ཙིཏྟ་འབར་བའི་ཀོང་བུ་རུ། །སྙིང་ཚིལ་དཀར་དམར་མར་ཁུས་གཏམས། །པདྨ་འདབ་

བརྒྱད་སྡོང་བུ་ལ། །རྣམ་ཤེས་ཚོགས་བརྒྱད་ཞུན་མར་སྦར། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ ཨ་ཝ་དྷཱུ་ཏིའི་ཀོང་བུ་རུ། །རང་གསལ་འོད་ཀྱི་མར་ཁུས་གཏམས། །འཁོར་ལོ་བདུན་བརྩེགས་སྡོང་བུ་ལ། །བྱང་ཆུབ་སེམས་ཀྱི་ཞུན་མར་སྦར། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ མི་ཤིགས་ཐིག་ལེའི་ཀོང་བུ་རུ། །སྐྱེ་མེད་ཡེ་ཤེས་མར་ཁུས་གཏམས། །རྩ་ཕྲན་བཅུ་གཉིས་སྡོང་བུ་ལ། །རིག་པ་རང་བྱུང་ཞུན་མར་སྦར། །འདི་ཡང་རང་བྱུང་༴ བླ་མ་རིགའཛིན༴ ཞི་ཁྲོ་རབ་འབྱམས༴ ཡེ་ཤེས་རྩ་ལྔའི་ཀོང་བུ་རུ། །ཨ་དཀར་རྩ་གཅིག་མར་ཁུས་གཏམས། །ཡེ་ཤེས་འོད་ཟེར་སྡོང་བུ་ལ། །ཤེས་རབ་འབྲུ་ལྔའི་ཞུན་མར་སྦར། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ མཆོག་གི་འོད་གསལ་ཀོང་བུ་རུ། །གདངས་གསལ་འོད་ཀྱི་མར་ཁུས་གཏམས། །ཐིག་ལེ་འབར་བའི་སྡོང་བུ་ལ། །ཡེ་ཤེས་ལྔ་ཡི་ཞུན་མར་སྦར། །འདི་ཡང་

རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ ཀུན་གཞི་ཀློང་ཡངས་ཀོང་བུ་རུ། །ཆོས་ཀྱི་དབྱིངས་ཀྱི་མར་ཁུས་གཏམས། །བྱང་ཆུབ་སེམས་ཀྱི་སྡོང་བུ་ལ། །སྐུ་ལྔ་ལྷུན་གྲུབ་ཞུན་མར་སྦར། །འདི་ཡང་རང་བྱུང་༴ བླ་མ་རིག་འཛིན༴ ཞི་ཁྲོ་རབ་འབྱམས༴ སྒྲོན་མ་འབར་བའི་དམ་ཚིག་འདིས། །མཆོད་འོས་རྒྱ་མཚོའི་ཐུགས་དམ་བསྐང་། །ཉམས་ཆག་སྐོངས་ཤིང་རྟོག་སྒྲིབ་དག །དབང་དང་དངོས་གྲུབ་སྩལ་དུ་གསོལ། །དཱི་པ་པྲ་ཏཱིཙྪ་སྭཱ་ཧཱ། ཨོཾ་ཨེ་ཧོཿཤུདྡྷེ་ཤུདྡྷེ། ཡཾ་ཧོཿཤུདྡྷེ་ཤུདྡྷེ། བཾ་ཧོཿཤུདྡྷེ་ཤུདྡྷེ། ལཾ་ཧོཿཤུདྡྷེ་ཤུདྡྷེ། རཾ་ཧོཿཤུདྡྷེ་ཤུདྡྷེ། ཨ་ཨཱ་སྭཱ་ཧཱ། ཆག་ཉམས་དང་རྟོག་སྒྲིབ་ཐམས་ཅད་ཤཱནྟིཾ་ཀུ་རུ་སྭཱ་ཧཱ། །[ཞེས་ཁྲུས་བདུན་གྱི་རིག་པ་ལན་བདུན་དུ་བྱའོ། །] [དྲུག་པ་ཞི་བ་གནས་དག་གི་སྐོང་བ་ནི།] ཨོཾ། ཡིད་ཀྱི་རྣམ་ཤེས་གནས་དག་པ། །ཀུན་ཏུ་བཟང་པོའི་ཐུགས་དམ་བསྐང་། །ཆོས་ཀྱི་ངོ་བོ་གནས་དག་པ། །ཀུན་ཏུ་བཟང་མོའི་ཐུགས༴ ཕུང་པོ་ལྔ་པོ་གནས་དག་པ། །རྒྱལ་བ་ཡབ་ལྔའི༴ འབྱུང་བ་ལྔ་

པོ་གནས་དག་པ། །རྒྱལ་བ་ཡུམ་ལྔའི༴ རྣམ་ཤེས་ཚོགས་བརྒྱད་གནས་དག་པ། །སེམས་དཔའ་བརྒྱད་ཀྱི༴ རྣམ་ཤེས་ཡུལ་བརྒྱད་གནས་དག་པ། །སེམས་མ་བརྒྱད་ཀྱི༴ ལུས་ཀྱི་ཆོས་བཞི་གནས་དག་པ། །ཁྲོ་བོ་བཞི་ཡི༴ རྟག་ཆད་མུ་བཞི་གནས་ངག་པ། །ཁྲོ་མོ་བཞི་ཡི༴ ཉོན་མོངས་དྲུག་པོ་གནས་དག་པ། །ཐུབ་པ་དྲུག་གི་ཐུགས་དམ་བསྐང་། །[བདུན་པ་ཁྲོ་བོ་གནས་འགྱུར་གྱི་སྐོང་བ་ནི།] ཧཱུྃ། ཀུན་གཞི་ཡིད་ཆོས་གནས་གྱུར་པ། །དཔལ་ཆེན་ཡབ་ཡུམ་ཐུགས་དམ་བསྐང་། །ཉོན་མོངས་དུག་ལྔ་གནས་གྱུར་པ། །ཁྲག་འཐུང་ཡབ་ལྔའི་ཐུགས༴ འབྱུང་བ་ལུས་ལྔ་གནས་གྱུར་པ། །ཁྲག་འཐུང་ཡུམ་ལྔའི༴ རྣམ་བཞིའི་རྟོག་པ་གནས་གྱུར་པ། །ཧེ་རུ་ཀ་བཞིའི༴ སྐྱེ་གནས་བཞི་པོ་གནས་གྱུར་པ། ཀྲོ་དྷཱི་རིགས་བཞིའི༴ རྣམ་འགྱུར་ཚོགས་བརྒྱད་གནས་གྱུར་པ། །ཁྲོ་མོ་བརྒྱད་ཀྱི༴ རྣམ་འགྱུར་ཡུལ་བརྒྱད་གནས་གྱུར་པ། །ཕྲ་མེན་བརྒྱད་ཀྱི༴ རྟག་ཆད་མཐའ་

བཞི་གནས་གྱུར་པ། །སྒོ་མ་བཞི་ཡི༴ སྣ་ཚོགས་རྟོག་པ་གནས་གྱུར་པ། །དབང་མོ་ཉེར་བརྒྱད་ཐུགས༴ མི་ཤིགས་སྐུ་ཡི་ཐུགས་དམ་བསྐང་། །འགགས་མེད་གསུང་གི་ཐུགས༴ འགྱུར་མེད་ཐུགས་ཀྱི༴ ཡོན་ཏན་མི་ཟད༴ ཕྲིན་ལས་རྒྱན་གྱི༴ ཡེ་ཤེས་འཁོར་ལོའི་ཐུགས་དམ་བསྐང་། །ཉམས་ཆག་ཐམས་ཅད་སྐོངས་གྱུར་ཅིག །རྟོག་སྒྲིབ་ཐམས་ཅད་དག་གྱུར་ཅིག །སྐོངས་གྱུར་དབང་དང་དངོས་གྲུབ་སྩོལ། །[ཞེས་པས་ཕྱི་ནང་གསང་བའི་འདོད་པའི་ཡོན་ཏན་ཐམས་ཅད་འཁོར་གསུམ་མི་རྟོག་པ་ཡེ་ཤེས་ཀྱི་དབྱིངས་སུ་རོ་མཉམ་པར་བསྐང་བའོ།། །།]

ཡང་གསང་ཤུགས་ཀྱི་ཐིག་ལེ་ལས་ལོ་རྒྱུས་ལུང་གི་བྱང་བུ།

༁ྃ༔ ཡང་གསང་ཤུགས་ཀྱི་ཐིག་ལེ་ལས༔ ལོ་རྒྱུས་ལུང་གི་བྱང་བུ་བཞུགས་སོ༔

སྣང་བ་མཐའ་ཡས་སྤྲུལ་པའི་སྐུ༔ རྒྱ་གར་མཁས་པ་པད་འབྱུང་བདག༔ རང་བྱུང་པདྨའི་སྙིང་པོ་ལས༔ བརྫུས་ཏེ་ཞིང་འདིར་སྲིད་པ་བཟུང་༔ ཨོ་རྒྱན་རྒྱལ་པོའི་སྲས་སྐལ་དུ༔ ཕྱིན་ནས་རྒྱལ་སྲིད་ཆོས་བཞིན་བསྐྱང་༔ རྒྱ་གར་ཕྱོགས་མཚམས་ཀུན་ཏུ་ཉུལ༔ ཆོས་ཀྱི་སྒྲོ་འདོགས་མ་ལུས་བཅད༔ དུར་ཁྲོད་བརྒྱད་དུ་སྤྱོད་པ་སྤྱད༔ མཆོག་ཐུན་དངོས་གྲུབ་ཐམས་ཅད་ཐོབ༔ མངའ་བདག་རྒྱལ་པོའི་བཞེད་པ་བཞིན༔ སྨོན་ལམ་དབང་གིས་བོད་དུ་འོངས༔ གདུག་པའི་ལྷ་སྲིན་འབྱུང་པོ་བཏུལ༔ གསང་སྔགས་བསྟན་པའི་སྒྲོན་མེ་སྦར༔ ནམ་ཞིག་ལངྐའི་གླིང་བཟུང་ནས༔ འཛམ་གླིང་བོད་ཡུལ་སྐྱེ་འགྲོ་རྣམས༔ སྲིན་

པོའི་འཇིགས་ལས་བསྐྱབ་པར་བྱེད༔ སྐུ་ཚབ་སྤྲུལ་སྐུ་བྱིན་གྱིས་བརླབས༔ གསུང་ཚབ་གདམས་པ་གཏེར་དུ་གཏམས༔ ཐུགས་དགོངས་ལས་ཅན་སྙིང་ལ་འབེབས༔ འགྲོ་དོན་འཁོར་བ་མ་སྟོངས་བར༔ གང་འདུལ་སྤྲུལ་པ་རྒྱུན་མི་འཆད༔ ཀུན་ལ་ཕན་དྲིན་ཆེ་བར་བྱས༔ སྐལ་ལྡན་མོས་པའི་བློ་ཡོད་ན༔ གསོལ་བ་ཐོབ་དང་བྱིན་རླབས་འཇུག༔ ངེས་ཤེས་སྐྱེད་ཅིག་རྗེས་འཇུག་རྣམས༔ ས་མ་ཡ༔ དེ་ཡང་གདོང་དམར་བོད་ཡུལ་མཐའ༔ ཁ་ཁྲ་མོན་གྱི་ས་མཚམས་ནི༔ སྤ་གྲོ་སྟག་ཚང་དཔལ་གྱི་ཕུག༔ སེངྒེ་བསམ་འགྲུབ་ཀེའུ་ཚང་དུ༔ ཁྲོ་བས་ཁྲོ་བ་འདུལ་བའི་ཕྱིར༔ བདག་ཉིད་པདྨ་ཐོད་ཕྲེང་རྩལ༔ རྡོ་རྗེ་

ཁྲོས་པའི་ཏིང་འཛིན་གྱིས༔ དབང་དྲག་འཆོལ་བའི་སྐྲ་ལངས་ཏེ༔ མོན་བོད་གངས་ཅན་མཐའ་དབུས་ཀྱི༔ འདྲེ་བགེགས་རྒྱལ་བསེན་དམ་སྲི་བཏུལ༔ དྲེགས་ལྡན་ལྷ་འདྲེ་གཞི་བདག་ཚོགས༔ དབང་བསྡུས་སྲོག་སྙིང་དངོས་སུ་བླངས༔ གནས་དང་གཏེར་གྱི་གཉེར་ཁ་གཏད༔ དངོས་ཀྱི་གདུལ་བྱས་སྒོ་ཕྱེས་ཏེ༔ བརྒྱུད་ནས་མ་འོངས་ལས་ཅན་དོན༔ སྨིན་གྲོལ་བསྐྱེད་རྫོགས་གདམས་པའི་ཚུལ༔ མང་དུ་བསྟན་ཅིང་སོ་སོར་སྦས༔ དེ་དག་ཀུན་གྱི་སྙིང་པོའི་བཅུད༔ རྩ་གསུམ་ཐུགས་ཀྱི་སྒྲུབ་པའི་སྐོར༔ ཟབ་རྒྱས་ཁ་ཚང་དོན་འདྲིལ་བར༔ འབྲོག་བན་ལོ་ཙཱར་བརྩེ་བས་གདམས༔ རྒྱས་བསྡུས་སྐོར་ཚེ་བཞི་རུ་ཕྱེས༔ རྒྱས་པ་བདེ་གཤེགས་ཡོངས་འདུས་སྐོར༔ སྐུ་ཚབ་ཡིད་བཞིན་དཔལ་འབར་དང་༔ མྱང་གྲོལ་བདེ་ཆེན་རིལ་བུར་བཅས༔ མོན་གྱི་སྟག་ཚང་དཔལ་ཕུག་གི༔ སྒོ་གདོང་སེངྒེ་འདྲ་བའི་མགུལ༔ རྡོ་རྗེའི་ཀེའུ་ཚང་སུལ་དུ་གཏམས༔ འབྲིང་པོ་རིག་འཛིན་ཡོངས་འདུས་སྐོར༔ བོད་ཁམས་བདེ་བའི་མན་ངག་དང་༔ བདག་གི་ཕྱག་མཚན་ཐུགས་རྟེན་བཅས༔ མཆིམས་ཀྱི་གནམ་ལྕགས་འབར་བའི་བྲག༔ མཁར་རྔ་འདྲ་བའི་ལོགས་སུ་སྦས༔ བསྡུས་པ་གསང་བ་ཡོངས་འདུས་སྐོར༔ པདྨ་བཀོད་ཀྱི་ལམ་

ཡིག་དང་༔ སྦས་ཡུལ་བདེ་བའི་མན་ངག་བཅས༔ རྒྱ་ལ་དཔལ་གྱི་རི་བོའི་འགྲམ༔ ཕ་ཝཾ་རྟེན་སྒམ་འདྲ་བར་སྦས༔ ཀུན་གྱི་སྙིང་པོའི་ཞུན་ཐིག་ནི༔ ཡང་གསང་འདུས་པ་རྩ་བའི་སྐོར༔ ཐུགས་ཀྱི་ཐིག་ལེ་དྭངས་མའི་བཅུད༔ ཕྱི་རོལ་གདོས་པོའི་ས་གཏེར་དུ༔ སྤ་ཞིང་འཇོག་པར་བློས་མ་ཐོངས༔ ང་སྤྲུལ་སྒྱུ་མའི་སྐྱེས་བུ་ཡི༔ དགོངས་ཀློང་དབྱིངས་ཀྱི་སྒྲོམ་བུར་སྦས༔ ཡེ་ཤེས་རིག་པའི་གཟུངས་སུ་གཏམས༔ ས་མ་ཡ༔ [འདི་ནས་མར་ལ་དུས་རྟགས་སོགས་མང་ཞིག་སྣང་བ་རྣམས་འབེབས་པའི་སྤྲོས་པ་བསྐྱུང་བར་བྱས་སོ།། །།] ༁ྃ༔ བླ་མ་དྲག་པོའི་སྨིན་ལམ་དབང་གི་མན་ངག་ཟབ་མོ་ཨྠྀི༔ བདག་ཉིད་ནུས་ལྡན་སློབ་དཔོན་ནི༔ ལྷ་དང་སྐལ་བ་མཉམ་པ་ཡིས༔ སྙིང་ནས་དོན་གཉེར་སྣོད་ལྡན་གྱི༔ སློབ་བུར་དབང་བསྐུར་བྱ་འདོད་ན༔ མཚན་མའི་དལ་བཀྲམ་དབང་རྫས་རྣམས༔ གཞུང་བཞིན་ལེགས་པར་ཚོགས་བྱས་ཏེ༔ བསྙེན་སྒྲུབ་བཟླས་པས་བྱིན་བརླབ་ཅིང་༔ ཚོགས་དང་གཏོར་མས་དངོས་གྲུབ་བསྐུལ༔ དེ་ནས་ཟུང་དུ་མ་གྱུར་པའི༔ སློབ་མ་བོས་ལ་ཁྲུས་ནས་དབྱུང་༔ བྱུར་བསལ་སྲུང་བའི་གུར་གྱིས་བཅིང་༔ ཐལ་སྦྱར་རཏྣའི་མ་དྷལ་བཅས༔ བླ་མ་སངས་རྒྱས་ཆེ་བའི་མཆོག༔

ཧེ་རུ་ཀ་དཔལ་བདག་ལ་དགོངས༔ བདེ་ཆེན་གསང་བའི་དཀྱིལ་འཁོར་འདིར༔ ཐུགས་རྗེས་ཟུངས་ལ་དབང་བསྐུར་སྩོལ༔ ཞེས་པས་གསོལ་བཏབ་རྒྱུད་སྦྱང་མཐར༔ དངོས་གཞི་ཡེ་ཤེས་དབབ་པའི་སླད༔ སློབ་བུའི་ལུས་སྣང་སྟོང་པར་སྦྱངས༔ དེ་ལས་དབང་དྲག་སྐུར་གསལ་བའི༔ ཐུགས་ཀར་གཡུང་དྲུང་དམར་པོ་ནི༔ གྲྭ་བཞིར་ཧ་རི་ནི་སས་མཚན༔ ཏིང་འཛིན་སྔགས་དང་རོལ་མོའི་སྒྲས༔ བསྐུལ་བས་གཡུང་དྲུང་ཡིག་འབྲུར་བཅས༔ གཡོན་དུ་མགལ་མེ་ལྟར་འཁོར་བའི༔ འོད་ཀྱིས་རྒྱལ་བ་རབ་འབྱམས་ཀུན༔ ཆར་ཆེན་བབས་ལྟར་སྤྱན་དྲངས་བསྟིམ༔ དེ་ཉིད་བརྟན་ཕྱིར་བུམ་དབང་བསྐུར༔ ཧཱུྃ༔ བུམ་པའི་དཀྱིལ་འཁོར་ཡེ་ཤེས་རྒྱུན༔ རིགས་ཀྱི་བུ་ལ་དབང་བསྐུར་བས༔ སྒོ་གསུམ་སྒྲིབ་པ་ཀུན་དག་ནས༔ ཐོད་ཕྲེང་རྩལ་དང་དབྱེར་མེད་ཤོག༔ [རྩ་སྔགས་དང་༔] ཛྙཱ་ན་པཉྩ་ཨ་བྷི་ཥིཉྩ་ཧཱུྃཿ [ཡེ་ཤེས་སྐུ་ལས་གཉིས་པ་བསྟིམ༔] ཧཱུྃ༔ ཆོས་དབྱིངས་ངང་ལས་རང་ཤར་བ༔ པདྨ་ཁྲག་འཐུང་འཆོལ་བ་ཆེས༔ རིགས་ཀྱི་བུ་ལ་དབང་བསྐུར་བས༔ སྣང་སྟོང་རྡོ་རྗེའི་སྐུ་འགྲུབ་ཤོག༔ ཧཱུྃ་ཧཱུྃ་ཧཱུྃ༔ ཕྱག་མཚན་རྡོ་རྗེ་གཡས་སུ་གཏད༔ ཧཱུྃ༔ ཐེག་དགུ་ཡོངས་རྫོགས་ཡེ་ཤེས་མཚོན༔ གནམ་ལྕགས་རྡོ་རྗེ་རྩེ་

དགུ་འདིས༔ རིགས་ཀྱི་བུ་ལ་དབང་བསྐུར་བས༔ ལོག་འདྲེན་བདུད་དཔུང་ཀུན་འཇོམས་ཤོག༔ ཧཱུྃ་ཧཱུྃ་ཧཱུྃ༔ གནམ་ལྕགས་ཕུར་བུ་གཡོན་དུ་གཏད༔ ཧཱུྃ༔ སྐུ་གསུམ་ལྷུན་གྲུབ་འབར་བའི་མཚོན༔ དྲག་རྩལ་སྟོབས་འདུས་ཀཱི་ལ་ཡས༔ རིགས་ཀྱི་བུ་ལ་དབང་བསྐུར་བས༔ དགྲ་བགེགས་སྙིང་རྩ་ཐལ་འབྱིན་ཤོག༔ ཧཱུྃ་ཧཱུྃ་ཧཱུྃ༔ སྡིག་ཁྱུང་སྡིགས་མཛུབ་རྩེ་མོར་གཏད༔ ཧཱུྃ༔ དཔལ་གྱི་ཕོ་ཉ་མི་བཟད་རྔམས༔ ལྕགས་སྡིག་མེ་ཁྱུང་འབར་བ་ཡིས༔ རིགས་ཀྱི་བུ་ལ་དབང་བསྐུར་བས༔ རྒྱལ་བསེན་ས་བདག་ཀུན་འདུལ་ཤོག༔ ཧཱུྃ་ཧཱུྃ་ཧཱུྃ༔ སྔགས་ཀྱི་ཕྲེང་བ་ལག་ཏུ་གཏད༔ ཧཱུྃ༔ གསང་ཆེན་སྙིང་པོ་སྔགས་ཀྱི་སྒྲ༔ དྲག་ལ་ངར་ལྡན་ཆུ་རྒྱུན་བཞིན༔ རིགས་ཀྱི་བུ་ལ་སྔགས་བསྟིམ་པས༔ གྲགས་སྟོང་གསུང་དབྱངས་ཐོབ་པར་ཤོག༔ ཧཱུྃ་ཧཱུྃ་ཧཱུྃ༔ ཧཱུྃ་དམར་སྙིང་གའི་གནས་སུ་བཞག༔ ཧཱུྃ༔ བདེ་གཤེགས་ཀུན་གྱི་ཡང་སྙིང་ཧཱུྃ༔ བརྗོད་བྱའི་ཚིག་དབང་ཧཱུྃ་འདི་ཡིན༔ རིགས་ཀྱི་བུ་ལ་ཧཱུྃ་བསྟིམ་པས༔ རིག་པ་རྩལ་གྱི་དབང་ཐོབ་ཤོག༔ ཧཱུྃ་ཧཱུྃ་ཧཱུྃ༔ ལྔ་ལྡན་ཧཱུྃ་ཡིག་གནས་ལྔར་བསྐུར༔ སློབ་དཔོན་དབང་དྲག་ཧེ་རུ་ཀའི༔

དཔྲལ་མགྲིན་སྙིང་ལྟེ་གསང་བ་ནས༔ དཀར་དམར་མཐིང་སེར་ལྗང་བའི་ཧཱུྃ༔ ཧཱུྃ་ལས་ཧཱུྃ་འཕྲོས་ཧཱུྃ་སྒྲ་ལྡིར༔ སློབ་བུའི་གནས་ལྔར་སིབ་སིབ་ཐིམ༔ དེ་ལས་རང་གདངས་ཧཱུྃ་ལྔ་ལྡན༔ སྟོང་ཁམས་གང་འཕྲོས་ཧཱུྃ་སྒྲས་ཁྱབཿ སྣོད་བཅུད་ཧཱུྃ་གི་ངོ་བོར་སྦྱངས༔ འུབ་བསྡུས་བདག་ཐིམ་ཧཱུྃ་ལ་འདྲིལ༔ དེ་ཡང་གྱེན་རྫོགས་ནམ་མཁར་ཡལ༔ གནས་ལུགས་ངང་ལ་ཅི་གནས་བཞག༔ བརྒྱུད་འཛིན་སྙིང་དང་འདྲ་བའི་བུར༔ སྐབས་འདིར་དྲེགས་པའི་སྲོག་དབང་བསྐུར༔ དབང་བཞི་ཡོངས་རྫོགས་བྱིན་རླབས་སླད༔ མོས་གུས་གདུང་ཤུགས་དྲག་ཏུ་བསྐྱེད༔ ཐུགས་དམ་བསྐུལ་ཞིང་ཛཔྲ་དབྱངས་བྱ༔ བཟོད་མེད་མོས་གུས་ཉམས་འུར་ཏེ༔ རིག་པ་གཏད་མེད་རྗེན་པར་འཆར༔ དེ་ཚེ་སྐལ་ལྡན་བྱིན་རློབ་ཕྱིར༔ བདག་ཉིད་འབྱོན་པར་ཐེ་ཚོམ་མེད༔ གཏོར་ཆེན་གནས་བཞིར་བསྐུར་ཞིང་གཏད༔ ཧཱུྃ་ཧྲཱི༔ སངས་རྒྱས་ཀུན་དངོས་དྲིན་ཆེན་སྤྲུལ་པའི་སྐུ༔ འགྲོ་བ་འདྲེན་མཛད་མ་ཧཱ་གུ་རུ་རྗེ༔ སྲིན་པོའི་དེད་དཔོན་དབང་དྲག་ཐོད་ཕྲེང་རྩལ༔ ལོག་འདྲེན་ཀུན་འཇོམས་རྡོ་རྗེ་གྲོ་བོ་ལོད༔ ཨོ་རྒྱན་ཡུལ་བྱོན་སྤྲུལ་པ་བསམ་ཡས་འགྱེད༔ རྒྱ་གར་ཡུལ་བྱོན་སྒྲོ་འདོགས་མ་ལུས་བཅད༔ དུར་

ཁྲོད་བརྒྱད་བྱོན་མཆོག་ཐུན་དངོས་གྲུབ་བརྙེས༔ བོད་ཀྱི་ཡུལ་བྱོན་གདུག་པ་མ་ལུས་བཏུལ༔ སྐུ་ཚབ་གཏེར་སྟོན་སྤྲུལ་སྐུ་ལུང་དུ་བསྟན༔ གསུང་ཚབ་དྲི་མེད་ཤོག་སེར་ལོགས་སུ་བཀོད༔ ཐུགས་ཀྱི་དགོངས་པ་ལས་ཅན་སྙིང་ལ་འབེབས༔ དད་མོས་ཅན་ལ་སྤྱི་གཙུག་དངོས་སུ་བྱོན༔ སྔོན་ཚེ་པད་འབྱུང་ཁྱེད་དང་སྨོན་ལམ་གཅིག༔ ད་ལྟ་བདག་ཉིད་སློབ་མའི་སྟངས་བཟུང་སྟེ༔ སྲོག་གི་ཕྱིར་ཡང་མི་བཏང་བསྒྲུབ་ལགས་ན༔ སྨིན་གྲོལ་དབང་དང་གདམས་པ་མ་ལུས་ཀུན༔ སྐལ་ལྡན་བུ་མཆོག་འདི་ལ་སྩལ་དུ་གསོལ༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ འགགས་མེད་གསུང་གི་དངོས་གྲུབ་སྩལ་དུ་གསོལ༔ འཁྲུལ་མེད་ཐུགས་ཀྱི་དངོས་གྲུབ་སྩལ་དུ་གསོལ༔ ཡོན་ཏན་རེ་སྐོང་དངོས་གྲུབ་སྩལ་དུ་གསོལ༔ ཕྲིན་ལས་འགྲོ་འདུལ་དངོས་གྲུབ་སྩལ་དུ་གསོལ༔ ཐུན་མོང་ཡིད་བཞིན་དངོས་གྲུབ་སྩལ་དུ་གསོལ༔ བླ་མེད་མཆོག་གི་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ༔ ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སིདྡྷི་ཕ་ལ་ཧོ༔ གཏོར་མའི་ལྷ་ཉིད་སློབ་མར་བསྟིམ༔ གཏོར་ཟན་བདུད་རྩར་བཞུས་ཏེ་

སྦྱིན༔ བདེན་ཚིག་ཤིས་བརྗོད་མེ་ཏོག་འཐོར༔ འདའ་དཀའ་གསང་བའི་དམ་ཚིག་བསྒྲག༔ བུས་ཀྱང་སྒྲུབ་པའི་གཡར་དམ་བླང་༔ གཏང་རག་དགའ་སྟོན་རྒྱ་ཆེར་བྱ༔ འདི་ལྟར་དབང་བསྐུར་ཐོབ་ཙམ་གྱིས༔ མ་རུངས་རྒྱལ་འགོང་གདུག་རྩུབ་སོགས༔ བར་ཆད་ཐམས་ཅད་ཞི་བ་དང་༔ ཚེ་བསོད་དཔལ་འབྱོར་ཉམས་རྟོགས་འཕེལ༔ བཀྲ་ཤིས་གང་བསམ་ལྷུན་གྱིས་འགྲུབཿ བརྩོན་པས་ཚུལ་བཞིན་ཉམས་བླངས་ན༔ མཆོག་ཐུན་དངོས་གྲུབ་སྟབས་སུ་འབྱུང་༔ དེ་ཕྱིར་ཤིན་ཏུ་གཅེས་པར་ཟུངས༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའིགཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ཕྲིན་ལས་དྲེགས་པ་སྡེ་བརྒྱད་ཀྱི་སྲོག་གཏད་ཟབ་མོ་ཨྠྀི༔] དགོངས་པ་མི་འགྱུར་གཟེར་ཆེན་གྱིས༔ སྣང་སྲིད་སྲོག་ལ་དབང་ཐོབ་པའི༔ སློབ་དཔོན་ནུས་པར་ལྡན་པ་ཡིས༔ ངེས་པར་བརྒྱུད་འཛིན་སྙིང་འདྲའི་བུརཿ དྲེགས་པ་སྡེ་བརྒྱད་གནད་འབེབས་ཀྱི༔ སྲོག་དབང་ཟབ་མོ་བསྐུར་འདོད་ན༔ དྲག་པོའི་མ་ངྷལ་ཉེ་བའི་མདུན༔ མཚན་ངན་ཐོད་པར་རྩིབས་བརྒྱད་ལ༔ སྡེ་བརྒྱད་སྲོག་ཡིག་བྲིས་པ་འགོད༔ སློབ་དཔོན་ཆེ་

མཆོག་དབང་དྲག་གི༔ ཐུགས་སྲོག་ཧཱུྃ་ལས་འབར་བའི་འོད༔ ཛཿཡིག་ལྕགས་ཀྱུའི་རྣམ་པར་འཕྲོས༔ དྲེགས་པ་དབང་མེད་མདུན་དུ་བཀུག༔ སོ་སོའི་སྲོག་ཡིག་ལ་ཐིམ་བསྒོམ༔ ཨ་ཡ་མ་དུ་རུ་ཙ་ཤ་ན་ས་མ་ཡ་ཨ་ཀརྵ་ཡ་ཛ༔ ཛཿཧཱུྃ་བྃ་ཧོཿ ཕུར་པ་ལས་བྱེད་མེ་དབལ་དུ༔ གསལ་བ་ཚམ་རྔམས་དྲག་པོས་གཟིར༔ རྩ་སྔགས་སྡེ་བརྒྱད་སྲོག་ཡིག་མཐར༔ དྲེགས་པའི་གཟིར་སྔགས་ཤམ་བུ་དང་༔ ཏྲིག་ནན་ཨེ་ཧུར་ཐུཾ་ཛཿམཱ་ར་ཡ་རྦད༔ བཛྲ་ཡཀྵ་ཀཱི་ལ་ཡ་ཛཿཧཱུྃ་ཕཊཿ ཉོན་མོངས་དུག་བཅོམ་སྲག་ཡིག་རྣམས༔ སྡེ་བརྒྱད་སོ་སོར་དངོས་སུ་གསལ༔ དམ་རྫས་སྦྱིན་ཅིང་བུ་ལ་གཏད༔ ཧཱུྃ༔ ཆེ་མཆོག་དབང་དྲག་དཀྱིལ་འཁོར་མུ་རན་སྐྱོང་༔ འཇིག་རྟེན་འདས་ཀྱང་འཁོར་བའི་ཆ་འཛིན་པ༔ ལས་བྱེད་ཕོ་ཉ་དྲེགས་པ་སྡེ་བརྒྱད་ཀྱིས༔ སྐལ་ལྡན་འདི་ཡི་ལས་རྣམས་ཀུན་སྒྲུབས་ཤིག༔ དེ་སྐད་བསྒོས་པས་ཁོང་རྣམས་ཀྱིས༔ སློབ་མ་དབང་དྲག་ཧེ་རུ་ཀར༔ གཡས་བསྐོར་རང་རྟགས་སྲོག་སྙིང་ཕུལ༔ གུས་པའི་ཚུལ་གྱིས་འདི་སྐད་དུ༔ མི་བཟད་དཔལ་ཆེན་དབང་

དྲག་ཧེ་རུ་ཀ༔ ཁྱེད་ཀྱི་བཀའ་བཞིན་བདག་གིས་བསྟན་པ་བསྲུང་༔ ཅི་བསྒོའི་ལས་རྣམས་ཐོགས་མེད་འདིར་བསྒྲུབ་ཅིང་༔ དམ་ཚིག་གཉན་ལས་ནམ་ཡང་མི་འདའ་འོ༔ བཛྲ་ས་མ་ཡ་ཨི་དན་ན་ར་ཀན༔ ཅེས་བརྗོད་བྲོ་བོར་བཀའ་སྡོད་བསམ༔ བདུད་རྩི་བླུད་ཅིང་དམ་ཚིག་བསྲེ༔ སྡེ་བརྒྱད་དྲེགས་པ་རང་གནས་བཏང་༔ སྤྱི་དང་ཁྱད་པར་དམ་ཚིག་བསྒྲག༔ དེས་ཀྱང་གཡར་དམ་གཉེར་ཐུབ་བྱ༔ འདི་ནི་ཤིན་ཏུ་གཉན་པའི་ཕྱིར༔ དམ་མེད་རྣམས་ལ་རླུང་ཕྱོགས་ཙམ༔ མི་བསྒྲག་གལ་ཏེ་འཆོལ་གྱུར་ན༔ དྲེགས་པ་སླར་ལ་འཁུ་ཞིང་ལྡོག༔ སློབ་དཔོན་སློབ་མ་གཉིས་ཀ་ཡི༔ སྲོག་ལ་ཧབ་ལེན་བྱེད་པར་ངེས༔ དེ་བས་ཚོད་ཟིན་ཤེས་པ་གཅེས༔ ས་མ་ཡ། [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [མཧཱ་གུ་རུ་ཡང་གསང་གི་སྒྲུབ་པ་སྲོག་གི་ཏི་ཀ་ཨྠྀི༔] ཁྲག་འཐུང་པདྨ་དྲག་པོ་རྩལ༔ འཆོལ་བའི་ཁྲོ་རྒྱལ་བསྒྲུབ་པ་ནི༔ རྣལ་འབྱོར་སྔོན་དུ་འགྲོ་བའི་ཆོས༔ ཇི་ལྟར་རིགས་པས་བློ་སྦྱངས་ནས༔ དངོས་གཞི་བསྐྱེད་རིམ་འདི་ལྟར་བསྒོམ༔

ཧཱུྃ་ཧཱུྃ་ཧཱུྃ༔ མི་འགྱུར་སྟོང་ཆེན་གདོད་མའི་གཤིས༔ སྤྲོས་བྲལ་དེ་བཞིན་ཉིད་དབྱིངས་ལས༔ མ་རྟོགས་ལོག་འདྲེན་སེམས་ཅན་ལ༔ ཀུན་ཁྱབ་བརྩེ་བའི་སྙིང་རྗེ་ཤར༔ གསལ་སྟོང་འགག་མེད་རང་རིག་ནི༔ ཧཱུྃ་དམར་འབར་བས་མཁའ་དབྱིངས་གང་༔ དེ་ལས་ཡེ་ཤེས་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ ཁམས་གསུམ་ཨེ་ཡི་ཕོ་བྲང་དུ༔ པད་ཉི་དྲེགས་པ་རྒྱལ་བསེན་ཁྲིར༔ རྒྱུ་ཡི་ཧཱུྃ་ཡིག་འཕྲོ་འདུ་ལས༔ བདག་ཉིད་པདྨ་ཁྲག་འཐུང་རྩལ༔ འཆོལ་བའི་ཁྲོ་རྒྱལ་ཧེ་རུ་ཀ༔ ཆེ་མཆོག་རྡོ་རྗེ་གྲོ་བོ་ལོད༔ སྨུག་ནག་དུས་མཐའི་མེ་ལྟར་འབར༔ སྤྱན་གསུམ་སྡང་མིག་གློག་སྟོང་འཁྱུག༔ སྨར་སྨིན་བསྐལ་མེའི་ཚྭ་ཚྭ་འཕྲོ༔ ཨམ་གཙིག་བསྡམས་ཤིང་མཆེ་བ་གཙིགས༔ ཁྲོ་གཉེར་ཤངས་ནས་ཧཱུྃ་སྒྲ་ལྡིར༔ དམར་སེར་དབུ་སྐྲ་གྱེན་དུ་འཁྱིལ༔ ཕྱག་གཡས་གནམ་ལྕགས་རྡོ་རྗེ་ནི༔ རྩེ་དགུ་རྭ་གདེངས་མེ་འབར་བ༔ ཧཱུྃ་དགུ་རཾ་དགུས་མཚན་པ་ཅན༔ ནམ་མཁའི་དབྱིངས་སུ་གསོར་ཞིང་འཕྱར༔ སྟེང་གདོན་མ་ལུས་ཐལ་བར་རློག༔ གཡོན་པས་གནམ་ལྕགས་ཕུར་པའི་དཔལ༔ རྣོ་ངར་བགེགས་ཀྱི་

སྙིང་ཁ་གཟིར༔ སྡིགས་མཛུབ་རྩེ་ལས་ལྕགས་སྡིག་ནི༔ མགོ་དགུ་བཅོ་བརྒྱད་རྭ་ལྡན་པ༔ གྲངས་མེད་ཁྲ་ཐབས་འགྱེད་པ་ཡིས༔ དམ་སྲི་རྒྱལ་འགོང་ཧབ་ཧབ་ཟ༔ གསང་ཕོད་ཆོས་གོས་སག་ལྷྭམ་གསོལ༔ སྙན་ཆ་དུང་གི་ཝང་མིག་མཛེས༔ ཁྲག་འཛག་མགོ་ཕྲེང་དོ་ཤལ་སྤྲས༔ ཞབས་ཟུང་གྱད་ཀྱི་འདོར་སྟབས་ཀྱིས༔ སྟག་མོ་གྲུས་མའི་སྟེང་ན་འགྱིང་༔ སྡེར་མོས་རྒྱལ་བསེན་སྙིང་རྩ་འདྲེན༔ སྤྱི་གཙུག་སྤྲུལ་པའི་མཁའ་ལྡིང་ནི༔ དམར་ནག་མེ་ཡི་གཤོག་པ་ཅན༔ ཀླུ་རིགས་སྦྲུལ་གྱི་རྣམ་པས་ཟ༔ ཁྱུང་སྐད་གྲོགས་པས་ས་གསུམ་གཡོ༔ ཡེ་ཤེས་མེ་དཔུང་འཁྲུགས་པའི་ཀློང་༔ གར་དགུའི་ཉམས་ཀྱིས་རྣམ་པར་རོལ༔ གནས་གསུམ་རྡོ་རྗེའི་འབྲུ་གསུམ་མཚན༔ ཐུགས་ཀའི་འོད་དང་ཧཱུྃ་གི་གླུས༔ རྔ་ཡབ་གླིང་ནས་ཐོད་ཕྲེང་རྩལ༔ ཐུགས་རྒྱུད་རང་དབང་མེད་པར་བསྐུལ༔ དྲག་པོ་འཆོལ་བའི་སྐུར་བཞེངས་ཏེ༔ ཆར་ལྟར་བབས་ནས་རང་ཐིམ་བསམ༔ བཟླས་པ་སྔགས་ཀྱི་མན་ངག་ནི༔ ཐུགས་ཀར་ཉི་སྟེང་ཕ་ལམ་གྱི༔ རྡོ་རྗེའི་ལྟེ་བར་ཧཱུྃ་དམར་གསལ༔ ཧཱུྃ་ལས་ཧཱུྃ་དམར་མེ་འབར་བ༔ གྲངས་མེད་སྤྲིན་ཕུང་

རབ་འཁྲུགས་པས༔ རང་ལུས་ཡོངས་གང་སྒོ་གསུམ་གྱི༔ ནད་གདོན་སྡིག་སྒྲིབ་བག་ཆགས་བཅས༔ ལྷག་མེད་གཞོབ་ཏུ་བསྲེགས་ཤིང་སྦྱངས༔ སྣ་བུག་གཡས་ནས་ཕྱིར་ཐོན་པས༔ ལྔ་ལྡན་ཧཱུྃ་གིས་སྟོང་ཁམས་གང་༔ དེ་རྣམས་སྐུར་གྱུར་ཧཱུྃ་སྒྲ་སྒྲོགས༔ གདུག་ཅན་མ་ལུས་བསྔངས་ཤིང་བརྒྱལ༔ སྣང་སྲིད་འཕར་རྡེག་ཤིག་ཤིག་གཡོ༔ ཐ་མལ་དངོས་སྣང་མི་དམིགས་དང་༔ སྣོད་བཅུད་ཁྲག་འཐུང་འཆོལ་བ་ཆེའི༔ སྐུ་གསུང་ཐུགས་ཀྱི་ཕྱག་རྒྱར་རྫོགས༔ ཧཱུྃ་ཧཱུྃ་ཧཱུྃ༔ ཡང་གསང་སྲོག་གི་སྙིང་པོ་མཆོག༔ དཔའ་བོ་འབྲུ་གཅིག་སུམ་སྦྲེལ་དུ༔ རིག་པ་ངར་བསྐྱེད་བཟླས་པ་ཡིས༔ ཟིལ་གནོན་དྲག་པོའི་ནུས་སྟོབས་ཐོབ༔ ཐུགས་ཀའི་ཧཱུྃ་མཐར་སྔགས་ཕྲེང་ནི༔ ལྕགས་སྲེག་མདོག་ཅན་གཡས་བསྐོར་དུ༔ མགལ་མེ་ལྟ་བུར་འཁོར་བ་ལས༔ འོད་ཟེར་མེ་དཔུང་ཚྭ་ཚྭ་འཕྲོས༔ ལོག་འདྲེན་དམ་འགོང་མ་ལུས་བསྲེག༔ སྡེ་བརྒྱད་དྲེགས་པའི་སྲོག་སྙིང་བསྡུས༔ རྩ་གསུམ་རབ་འབྱམས་ཐུགས་རྒྱུད་བསྐུལ༔ བྱིན་རླབས་ནུས་སྟོབས་མ་ལུས་པ༔ བདག་ཐིམ་གཟི་བརྗིད་རབ་

འབར་ཏེ༔ སྣང་སྲིད་ཁམས་ལ་མངའ་མཛད་པའི༔ ཆེ་བཙན་འགྲན་བྲལ་སྐུར་གྱུར་བསམ༔ ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ་ཧཱུྃ༔ སྒྲ་དག་ཏིང་འཛིན་གསལ་བའི་ངང་༔ འབུམ་ཕྲག་བཞི་བཟླས་དངོས་གྲུབ་ཐོབ༔ དམིགས་ཀྱིས་ལས་ལ་སྦྱོར་བ་ནི༔ མན་ངག་ལྡན་པས་གང་འདོད་བརྩམ༔ དྲེགས་པའི་གཟིར་སྔགས་ཤམ་བུར་གདག༔ ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཁམས་གསུམ་བརླག་བྱེད་གནད་ཀྱི་གཟེར༔ ངན་སྔགས་སྤུ་གྲི་རེག་གཅོད་ནི༔ པདྨ་བདག་གི་ཁྱད་ཆོས་ཏེཿ ལས་ཅན་གཅིག་གི་སྙིང་ལ་གབ༔ ས་མ་ཡ༔ ཟབ་མོ་རྫོགས་པའི་རིམ་པ་ནི༔ ཐུགས་ཀའི་ཧཱུཾ་དམར་ཁོ་ན་ལ༔ རླུང་རིག་དྲིལ་ཏེ་མདུང་ཚུགས་གཏད༔ འདས་པ་འགགས་ཤིང་མ་འོངས་པ༔ མ་སྐྱེས་ད་ལྟའི་ཤེས་པ་ནི༔ རིག་སྟོང་རྗེན་པ་ལམ་དུ་ཁྱེར༔ བདུད་བགེགས་དམ་སྲི་རྒྱལ་འགོང་སོགས༔ ཐམས་ཅད་སེམས་ཀྱི་སྣང་ཆ་ཙམ༔ སེམས་ལ་ངོས་བཟུང་མཚན་མ་བྲལ༔ སྟོང་གསལ་དོནགྱི་གྲོ་བོ་ལོད༔ གཞན་ནས་མི་འཚོལ་རང་བྱུང་གི༔ རིག་པ་རྗེན་པ་འདི་ཀ་སྟེ༔ འཁོར་འདས་ཡོངས་ཀྱི་ཁྱབ་

བདག་ཆེ༔ ཡེ་བབས་ཆེན་པོར་ལ་བཟླའོ༔ དེ་ལྟར་གོམས་འདྲིས་བརྟན་ཐོབ་ན༔ མཚན་མའི་ཆོས་ཀུན་ཟིལ་གནོན་ནས༔ ཧེ་རུ་ཀ་དཔལ་མངོན་དུ་འགྱུར༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པ་སྟེ་སྐལ་ལྡན་གཅིག་ལ་ཆིག་བརྒྱུད་དུ་གདམས་པའོ།། །།] ༁ྃ༔ [བླ་མ་དྲག་པོའི་ཕྲིན་ལས་གནད་བྱང་གི་མན་ངག་ཟབ་མོ་ཨྠྀི༔] དབང་ཐོབ་དམ་ཚིག་ལ་གནས་ཤིང་༔ དོན་གཉེར་རྩེ་གཅིག་བརྩོན་ལྡན་པའི༔ སྐལ་བ་ཅན་གྱི་རྗེས་འཇུག་རྣམས༔ ཡང་གསང་ཐུགས་སྒྲུབ་འདི་ལ་དྲིལ༔ དེ་ལ་སྒྲུབ་པའི་ལས་རིམ་ནི༔ དུར་ཁྲོད་ལ་སོགས་དབེན་པའི་གནས༔ གཙང་ལྡན་བཀྲ་ཤིས་དགེ་བའི་སརཿ སྟེགས་བུ་མདའ་གང་གྲུ་བཞི་པ༔ བདུད་རྩི་རྣམ་ལྔས་ཆག་ཆག་གདབ༔ མངྷལ་ཨེ་ཁྲལ་འབར་བའི་སྟེང་༔ སྒྲུབ་རྫས་བྷནྡྷ་དུམ་གཅིག་ནང་༔ ཆེ་མཆོག་དབང་དྲག་སྣང་བརྙན་དང་༔ ལྕགས་སམ་སེང་ལྡེང་ཕུར་པ་ནི༔ མཐོ་གང་རྣོ་དབལ་བརྗོད་ལྡན་པ༔ དར་སྣས་བརྒྱན་པ་རྟེན་དུ་བཟུང་༔ དཔལ་གྱི་བཤོས་སུ་སྨན་རཀ་སོགས༔ མཆོད་པའི་

དམ་རྫས་ཚང་བར་བསགས༔ ཕྱི་ནང་གསང་བའི་མཚམས་བཅད་ལ༔ ཕྲིན་ལས་གཞུང་བསྲང་ཏིང་འཛིན་གསལ༔ བསྙེན་སྒྲུབ་དབང་དང་ལས་སྦྱོར་སོགས༔ ཕྱག་རྒྱ་སྤྲོས་པའི་ཆ་རྐྱེན་དུ༔ གཙོ་དང་འཁོར་གྱི་ཚོམ་བུ་བསྒོམ༔ རང་ཉིད་གཙོ་བོར་གསལ་བ་ཡི༔ ཕྱི་རོལ་འཁོར་ལོའི་རྩིབས་སྟེང་དུ༔ ཕྱོགས་བཞིར་ཧ་རི་ནི་ས་ལས༔ ཡེ་ཤེས་མཁའ་འགྲོ་སྡེ་བཞི་ནི༔ གཅེར་མོ་ལས་མདོག་ཕྱག་རྒྱ་ལྔས༔ རབ་མཛེས་ནུ་མ་བྷ་ག་རྒྱས༔ གྲོ་ཐོད་འཛིན་ཅིང་བརྐྱང་བསྐུམ་གར༔ རྡོ་རྗེའི་ཁ་ཊྭཱཾ་གཡོན་དུ་འཁྲིལ༔ འཇའ་ཟེར་འོད་ལྔའི་ཀློང་ན་འགྱིང་༔ མཚམས་བཞིར་གིང་ཆེན་སྡེ་བཞི་པོ༔ དར་གྱི་རུ་མཚོན་ལྷབས་སེ་ལྷབ༔ རུས་པའི་རྒྱན་ཆ་ཁྲོ་ལོ་ལོ༔ གསེར་གྱི་རྣ་ཆ་གྱི་ལི་ལི༔ སྟག་ཤམ་དྲིལ་གཡེར་སི་ལི་ལི༔ གསང་བའི་རྔ་ཆུང་དི་རི་རི༔ བྲོ་བརྡུང་གར་སྟབས་ཁྱུགས་སེ་ཁྱུག༔ སྒོ་བཞིར་རྒྱལ་ཆེན་སྡེ་བཞི་དང་༔ ཁོར་ཡུག་རིག་འཛིན་ཌཱ་ཀིའི་ཚོགས༔ བཀའ་ཉན་ལྷ་སྲིན་སྡེ་བརྒྱད་སོགས༔ བསམ་གྱིས་མི་ཁྱབ་གསལ་བར་བསྐྱེད༔ ཡེ་ཤེས་དྲངས་བསྟིམ་མཆོད་བསྟོད་འབུལ༔ གཟེར་གསུམ་གནད་

དང་ལྡན་པ་ཡིས༔ བཟླས་པ་ཆུ་བོའི་རྒྱུན་བཞིན་བརྩོན༔ ཐུན་མོང་འཁོར་སྔགས་བཟླ་འདོད་ན༔ གཙོ་འཁོར་ཐུགས་ཀའི་འོད་ཟེར་སྤྲིན༔ སྤྲོ་ཞིང་བསྡུ་བའི་ཆོ་འཕྲུལ་གྱིས༔ ཕྲིན་ལས་སྣ་ཚོགས་སྒྲུབ་པར་བསམ༔ ཧ་རི་ནི་ས་ར་ཙ་ཧྲི༔ ཡ་ཙིཏྟ་ཧྲཱིང་ཧྲཱིང་ཛཿ སརྦ་སིདྡྷི་ཤཱིནྟཾ་པུཥྚིཾ་ཝཱ་ཤཾ་མཱ་ར་ཡ་ཕཊ༔ ཅེས་པའི་ཤམ་བུ་སྦྱར་ཏེ་བཟླ༔ བསྙེན་སྒྲུབ་ངེས་པའི་རྟགས་རྫོགས་ནས༔ སྡེ་བརྒྱད་སྲོག་ཡིག་ཤམ་བུ་ནི༔ ཨ་ཡ་མ་དུ་རུ་ཙ་ཤ་ན་ས་མ་ཡ་ཧཱུྃ་ཕཊ༔ བཟླས་པའི་གྲངས་ཚད་རྟགས་དང་བསྟུན༔ ཁྱད་པར་ཧཱུྃ་གི་ཐུགས་སྒྲུབ་ནི༔ སྙིང་གའི་ཏིང་འཛིན་ཧཱུྃ་དམར་ལས༔ ཧཱུྃ་དམར་གྲངས་མེད་ཐོལ་ཐོལ་འཕྲོས༔ སྟོང་ཁམས་མ་ལུས་ཧཱུྃ་གིས་གང་༔ ཧཱུྃ་ཧཱུྃ་ཧཱུྃ་ཞེས་འབྲུག་ལྟར་སྒྲོག༔ སྣོད་བཅུད་གཟུགས་སྣང་ཡི་གེ་ཧཱུྃ༔ གྲགས་པའི་སྒྲ་ཀུན་ཧཱུྃ་གི་སྒྲ༔ ཀུན་ཀྱང་རིག་སྟོང་ཧཱུྃ་གི་ངང་༔ འཁོར་འདས་གཉིས་མེད་ཀློང་ཡངས་ཆེ༔ མ་བཅོས་ལྷུག་པའི་ངང་ནས་བཟླ༔ ལས་བཞི་གང་དགོས་དེར་མཐུན་པའི༔ མདོག་དང་བྱེད་ལས་སོ་སོར་བསྒོམ༔ ཕྲིན་ལས་རྣམ་བཞི་མྱུར་དུ་འགྲུབ༔ གཞན་ཡང་

ཡིད་ལ་ཅི་འདོད་པ༔ ཡི་གེ་ཧཱུྃ་གི་འཕྲོ་འདུ་བྱ༔ གང་བསམ་འབྲས་བུ་འཕྲལ་དུ་འབྱུང་༔ བསྙེན་སྒྲུབ་ལས་སྦྱོར་ཆིག་ཆོད་དེ༔ བསྐྱེད་རྫོགས་རྣམ་གྲངས་མང་མི་དགོསཿ གསང་བའི་ཡང་གསང་མཐར་ཐུག་པ༔ འབྲུ་གཅིག་ཨ་ཏིའི་ཁྱད་ཆོས་ཡིན༔ ལས་འཕྲོ་ཅན་གྱི་སྙིང་ལ་ཕུར༔ ཐུན་མཚམས་སྤྱི་དང་ཚེས་བཅུའི་དུས༔ ཚོགས་ཀྱི་འཁོར་ལོ་རྒྱ་ཆེར་བསྐོར༔ མཁའ་འགྲོ་བཀའ་སྲུང་གཞི་བདག་རྣམས༔ འདོད་ཡོན་གཏོར་མས་ཚིམས་པར་བརྔན༔ དངོས་གྲུབ་བར་ཆད་ཉེས་བྱས་ཀྱི༔ ཁོན་བཅུག་ཉམས་ཆག་བཤགས་ཤིང་སྦྱང་༔ རྫོགས་རིམ་ཀ་དག་གདོད་མའི་ཀློང་༔ གཡོ་མེད་དགོངས་པའི་བཙན་ས་བཟུང་༔ དུས་ཀུན་བླ་མ་མི་འབྲལ་བར༔ གསོལ་འདེབས་དབང་ལེན་ཐུགས་ཡིད་བསྲེ༔ འདི་ནི་ཉམས་ལེན་ཐམས་ཅད་ཀྱི༔ གེགས་སེལ་བོགས་འདོན་རྒྱལ་པོ་སྟེ༔ འདི་མེད་ནུས་མཐུ་ཙམ་གྱི་ཆེད༔ ལྷ་སྔགས་དྲག་པོ་སྒྲུབ་བྱེད་ན༔ ཕལ་ཆེར་བར་ཆད་དབང་དུ་འགྲོ༔ གཅེར་བུ་གཡུལ་ངོར་འཇུག་དང་མཚུངས༔ དེས་ན་ཤིན་ཏུ་གཅེས་པར་ཟུངས་༔ དེ་ལྟར་སྙིང་ནས་ཡིད་ཆེས་ཀྱིས༔ རྩེ་གཅིག་

བསྒྲུབས་པས་གྲུབ་པའི་རྟགས༔ རབ་འབྲིང་ཐ་མའི་བརྩོན་སྐལ་བཞིན༔ དངོས་ཉམས་རྨི་ལམ་གང་རུང་དུ༔ ཞལ་མཐོང་གསུང་ཐོས་ཕྱག་མཚན་རྙེད༔ ཉམས་རྟོགས་འབར་ཞིང་སྤོབས་པ་སྐྱེ༔ ངྷཱ་ཀིས་ཆོས་རྣམས་ལུང་དུ་སྟོན༔ སྒྲུབ་རྫས་བྱིན་ཆགས་དྲི་བཟང་འཐུལ༔ རིག་འཛིན་མཁའ་འགྲོའི་འདུ་བ་འབྱུང་༔ སྣང་བ་དབང་འདུས་གཞན་སྣང་འགྱུར༔ ཉི་ཟླ་ཞོན་དང་མཁའ་ལ་བགྲོད༔ གོ་གྱོན་མཚོན་ཐོགས་ཕས་རྒོལ་བཅོམ༔ རི་བྲག་བཤིག་ཅིང་རྒྱ་མཚོ་འཐུང་༔ ལུས་ལས་མེ་འབར་རླུང་ནག་འཕྲོ༔ རྫུ་འཕྲུལ་ཡ་མ་ཟུང་དུ་སྟོན༔ དགོངས་པའི་གཏེར་ཁ་རྡོལ་བ་སོགས༔ ངོ་མཚར་ཆོ་འཕྲུལ་ཅི་ཡང་འབྱུང་༔ གང་ལའང་རློམ་སེམས་ཞུམ་པ་སྤངས༔ རེ་དོགས་མེད་པའི་ལྟ་གདིང་བསྐྱེད༔ ཆོས་ཀུན་སྒྱུ་མར་ལམ་དུ་ཁྱེར༔ གོམས་པ་བརྟན་པོ་མཐར་ཕྱིན་ན༔ རང་གཞན་དོན་གཉིས་ལྷུན་གྱིས་འགྲུབ༔ པདྨ་བདག་དང་དབྱེར་མེད་འགྱུར༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །]

[བླ་མ་དྲག་པོའི་ལས་སྦྱོར་མཚོན་མེད་སྲུང་བཟློག་བསད་པའི་མན་ངག་ཨྠྀི༔] བླ་མ་དྲག་པོའི་ཏིང་ངེ་འཛིན༔ བསྙེན་སྒྲུབ་མཐར་ཕྱིན་རྣལ་འབྱོར་པས༔ དྲག་པོའི་ལས་ལ་སྦྱོར་བའི་ཚེ༔ ཡང་གཅེས་གནད་ཀྱི་དམིགས་པ་ནི༔ བདག་ཉིད་དྲག་པོའི་ཐུགས་ཀ་ནས༔ སྔགས་ཀྱི་འོད་ཟེར་སྤུ་གྲི་འཕྲོས༔ འདྲེ་རྒོད་རྒྱལ་འགོང་ཐམས་ཅད་ཀྱི༔ སྲོག་རྩ་རྦད་རྦད་བཅད་པར་བསམ༔ དྲེགས་པའི་གཟིར་སྔགས་ཤམ་བུ་ལ༔ སྤུ་གྲིའི་མཚོན་ཆ་སྦྲེལ་བྱས་ཏེ༔ གནམ་ལྕགས་ཐོག་རྒོད་འཁྲུགས་བཞིན་བཟླ༔ ཨོཾ་བཛྲ་སརྦ་དུཥྚན་ཏ་ཀ་ན་ཧ་ན་ད་ཧ་པ་ཙ་ཧཱུྃ་ཕཊ༔ ཨོཾ་རུ་རུ་བྷ་ཤ་སྲོག་དུང་དུང་༔ བཛྲ་ཡཀྵ་ཧཱུྃ་ཕཊ༔ རཀྵ་ཧཱུྃ་ཕཊ༔ ཨ་ཡ་མ་དུ་རུ་ཙ་ཤ་ན་བཛྲ་ས་མ་ཡ་ཧཱུྃ་ཕཊ༔ གནོད་བྱེད་འདྲེ་རྒོད་རྒྱལ་འགོད་འབྱུང་པོ་ཧཾ་ཤཾ་ཏྲིག་ནན་མཱ་ར་ཡ་ཕཊ༔ ཚད་ནི་རྟགས་དང་བསྟུན་པར་བྱ༔ ཁྱད་པར་རྣོ་ལ་ངར་འདོགས་པ༔ སྲུང་བ་རྡོ་རྗེའི་རྫོང་ཁྲབ་ནི༔ བདག་གི་ཐུགས་ཀའི་ཆ་སྨད་དུ༔ གསེར་གྱི་མཆོད་རྟེན་འོད་འབར་བའི༔ བུམ་ནང་རྡོ་རྗེའི་ལྟེ་བར་ཧཱུྃ༔ དེ་དབུས་བསྲུང་བྱ་གང་ཡིན་རྣམས༔ དཀར་དམར་འོད་ཀྱི་ར་བས་བསྐོར༔ དེ་ལས་

འོད་འཕྲོས་ཞིང་ཀུན་ཁྱབ༔ རྒྱལ་བའི་མཐུ་བྱིན་ཐམས་ཅད་བསྡུས༔ བདག་ཐིམ་རྡོ་རྗེའི་གོ་ཁྲབ་ནི༔ སྲ་བརྟན་བར་མཚམས་ལྕགས་སྡིག་ཁྱུང་༔ གོ་མཚམས་མེད་པར་ཞུ་ལུགས་ལ༔ ཕྱི་རོལ་སྲུང་བའི་འཁོར་ལོ་བཅས༔ ཅིས་ཀྱང་མི་ཆོད་མི་ཤིགས་བསམ༔ རྩ་བའི་སྔགས་ཀྱི་ཤམ་བུ་རུ༔ མ་མ་ཀཱ་ཝཱ་ཅི་རཀྵ་ཀུ་རུ་བྷྲཱུྃ༔ ཞེས་བཟླ་ཀ་དག་ཀློང་དུ་བཞག༔ ཐེ་ཚོམ་མེད་པའི་གདིང་ཐོབ་ན༔ ཕ་རོལ་བྱད་མ་འབུམ་ཕྲག་གིས༔ ཇི་ལྟར་རྦད་ཀྱང་ཉམ་མིང་༔ ཟློག་པ་གནམ་ལྕགས་ཐོག་གཟེར་ནི༔ ཕྱི་རོལ་སྲུང་བའི་འཁོར་ལོ་དང་༔ བདག་གི་སྐུ་ཡི་ཆ་ཀུན་ནས༔ སྤྲུལ་པའི་ཁྲོ་བོ་ཁྲོ་མོ་དང་༔ ལྕགས་སྡིག་ཁྱུང་དམར་དཔག་ཡས་འཕྲོསཿ བྱད་མ་ལྷ་སྲུང་དང་བཅས་པ༔ སྤུར་མ་མེ་ལྕེས་ཚིག་བཞིན་བཅོམ༔ རྡུལ་ཕྲན་ཙམ་ཡང་མེད་པར་བསམ༔ གཟིར་སྔགས་ཤམ་དུ་སྔགས་འདི་གདག༔ ཨ་ཡ་མ་དུ་རུ་ཙ་ཤ་ན་ས་མ་ཡ་བྷྱོ་ཟློག༔ ཨ་ལ་ལ་པྲ་མོ་ཧ་བྷྱོ་ཟློག༔ ཤན་ཏི་ཀ་ཤག་བྱེར་བྱེར་ཟློག༔ བྷ་ཡ་ནན༔ རྒྱལ་འགོང་དམ་སྲིའི་གནོད་པ་ཐམས་ཅད་མ་ཧཱ་ཤ་རི་བྷྱི་བྷྱོ་ཟློག་ཟློག༔ དྲག་ཏུ་བཟླ་ཞིང་

དམོད་པས་གཟིར༔ བདེན་སྟོབས་བརྗོད་ལ་ཐལ་མོ་བརྡབ༔ དགྲ་དཔུང་རྡོ་རྗེ་ཡིན་གྱུར་ཀྱང་༔ སྐད་ཅིག་མིང་མཐར་བརླག་པར་བྱེད༔ བསད་པ་སྡིག་པ་སྙིང་འཛིན་ནི༔ བདག་ཉིད་ཧཱུྃ་ལས་ལྕགས་སྡིག་ཆེ༔ མགོ་དགུ་བཅོ་བརྒྱད་རྭ་ལྡན་པ༔ ཁ་དགུ་གདངས་ཤིང་མིག་དགུ་བགྲད༔ ཤིན་ཏུ་གཏུམ་རྔམས་འཇིགས་རུང་གྱུར༔ བཛྲ་རཱ་ཙའི་ཙིཏྟ་སྲོག་དུང་དུང་༔ རུ་རུ་བྷ་ཤ་བྷ་ཤ་ཧཱུྃ༔ མ་མ་སྲོག་ལ་དུང་དུང་༔ སྙིང་ལ་བྷྱོ༔ མང་དུ་བཟླས་པས་གཟི་བྱིན་བསྐྱེད༔ རང་ཉིད་སྡིག་པའི་ང་རྒྱལ་གྱིས༔ ཐུགས་ཀའི་ཧཱུྃ་ལས་ཛཿདམར་ནག༔ འཕྲོས་པ་ཡོངས་སུ་གྱུར་པ་ལས༔ ཕོ་ཉ་རང་འདྲ་དཔག་མེད་པས༔ འཇིག་རྟེན་ཐམས་ཅད་མེར་གྱིས་གང་༔ རྒྱལ་འགོང་དམ་སྲི་ཐམས་ཅད་ཀུན༔ ཐར་མེད་སྐད་ངན་ཙི་རེར་བསྒོམ༔ ཤ་ལ་སྦྲང་མ་འདུ་བ་ལྟར༔ ལྕགས་སྡིག་ཕོ་ཉར་བཅས་པ་ཡིས༔ དེ་ལ་རུབ་སྟེ་སྙིང་ནང་བཞུགས༔ སྲོག་རྩ་བཅད་ཅིང་སྙིང་ཁྲག་འཇིབས༔ ཕྱི་ནང་ཀུན་ནས་ཟོས་པ་ཡིས༔ ལྷག་མ་ཙམ་ཡང་མེད་པར་བསམ༔ ཨོྃ་བཛྲ་ཡཀྵ་ཏྲིག་ནན༔ ཨེ་ཧུར་ཐུཾ་ཛ༔ གཟིར་ནན༔ རྒྱལ་འགོང་དམ་སྲིའི་ཀཱ་ཝཱ་ཙི་རྦད་རྦད༔ བརྒྱ་སྟོང་

ལ་སོགས་རྟགས་དང་སྦྱར༔ མཐར་ནི་ལས་ལ་བསྐུལ་ཞིང་རྦད༔ དྲེགས་པ་ལྷ་སྲིན་སྡེ་བརྒྱད་དང་༔ འདྲེ་རྒོད་རྒྱལ་འགོང་དམ་སྲི་སོགས་༔ གནོད་བྱེད་ཀུན་ལ་ལྕགས་སྡིག་བྷྱོ༔ བར་གཅོད་ཐལ་བའི་རྡུལ་དུ་རློག༔ ཅེས་བརྗོད་ཏིང་འཛིན་དམིགས་པས་གཟིར༔ འདི་ནི་ཤིན་ཏུ་གཉན་པའི་ཕྱིར༔ ཚད་ལས་བརྒལ་ན་རང་ཉིད་བརླག༔ སྟོང་ཁམས་འཇིག་བྱེད་ངན་སྔགས་ཐོག༔ སྤུ་གྲི་རེག་གཅོད་ངར་མའོ༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ལས་སྦྱོར་མཚན་བཅས་སྲུང་ཟློག་བསད་པའི་མན་ངག་ཨྠྀི༔] དྲག་པོ་བསྙེན་པའི་རྟགས་རྫོགས་ནས༔ མཚན་བཅས་སྲུང་ཟློག་བསད་པའི་ལས༔ རང་གཞན་དོན་དུ་སྔགས་པས་བརྩམ༔ ཐོག་མར་སྲུང་བའི་ཙཀྲ་ནི༔ གྲོ་ག་རས་སམ་ཤོག་གུ་ལ༔ འཁོར་ལོ་མུ་ཁྱུད་རིམ་པས་བསྐོར༔ ལྟེ་བར་རྡོ་རྗེ་ཧཱུྃ་མཚན་མཐར༔ བསྒྲུབ་བྱའི་མིང་དང་སྲུང་སྔགས་སྤེལ༔ མ་མ་ཀཱ་ཝཱ་ཙི་རཀྵ་ཀུ་རུ་བྷྲཱུྃ༔ དེ་རྒྱབ་མུ་ཁྱུད་རྩ་སྔགས་ལ༔ གང་བསྲུང་སྤེལ་ཚིག་ཅི་རིགས་གདག༔

དེ་རྒྱབ་འཁོར་ལོ་རྩིབས་བརྒྱད་ཀྱི༔ ཕྱོགས་བཞིར་ཧ་རི་ནི་ས་དང་༔ མཚམས་བཞིར་ར་ཙ་ཧྲིཿཡ་བྲི༔ རྩིབས་མཆན་ལས་ཀྱི་གཟེར་ཁས་བརྒྱན༔ དམ་སྲི་ཕོ་མོ་ཏྲིག་ནན་རཀྵ༔ དེ་རྒྱབ་དབྱངས་གསལ་རྟེན་སྙིང་དང་༔ རྡོར་ལྕགས་སྡིག་མེ་རིས་བསྐོར༔ བདུད་རྩི་དྲི་སྨན་རིན་པོ་ཆེ༔ གུ་གུལ་གླ་རྩི་ཤུ་དག་ནག༔ སྤྲེའུའི་སྙིང་ཁྲག་རྣམས་ཀྱིས་བྱུག༔ ཡེ་ཤེས་བསྟིམ་གཞུག་རབ་ཏུ་གནས༔ ཀླད་དུ་དབུབས་སམ་མགུལ་དུ་གདགས༔ གང་དུ་ཡོད་པའི་ས་ཕྱོགས་དེར༔ རྒྱལ་བསེན་དམ་སྲི་བྱང་ཕུར་སོགས༔ གནོད་པ་ཀུན་གྱིས་ཉེ་མི་ནུས༔ སྲུང་བ་རྡོ་རྗེའི་གོ་ཆའོ༔ ས་མ་ཡ༔ ཟློག་པ་ལས་ཀྱི་ཙཀྲ་ནི༔ འཁོར་ལོ་མུ་ཁྱུད་སྔར་ལྟར་ལས༔ ལྟེ་བའི་ཧཱུྃ་མཐར་གཟིར་སྔགས་སྤེལ༔ ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ དེ་རྒྱབ་མུ་ཁྱུད་ཟློག་པའི་སྔགས༔ ཧཱུྃ་བཛྲ་ཡཀྵ་ཕཊ༔ གནོད་བྱེད་དམ་སྲི་ཕོ་མོའི་གནོད་པ་ཐམས་ཅད་མཧཱ་ཤམ་རི་བྷྱོ་བྷྱོ་ཟློག་ཟློག༔ མཱ་ར་ཡ་ཕཊ༔ དེ་རྒྱབ་འཁོར་ལོའི་རྩིབས་མཆན་ལ༔ མཧཱ་ཤ་རི་བྷྱོ་བྷྱོ་ཟློག་ཟློག༔ ཅེས་དང་དེ་རྒྱབ་མུ་ཁྱུད་ལ༔ ཨ་ཡ་མ་དུ་རུ་ཙ་ཤ་ན་བཛྲ་ས་

མ་ཡ་ཧཱུྃ་ཕཊ༔ གནོད་བྱེད་རྒྱལ་འགོང་དམ་སྲི་འབྱུང་པོའི་གནོད་པ་ཐམས་ཅད་མཧཱ་ཤ་རི་བྷྱོ་བྷྱོ་ཟློག་ཟློག༔ ཅེས་སོགས་ཟློག་སྔགས་དམོད་མོ་བྲི༔ དེ་མཐར་ལྕགས་སྡིག་བྱ་ཁྱུང་དང་༔ མེ་ཡི་ར་བ་རྣམས་ཀྱིས་བསྐོར༔ དུག་སྣ་ཁྲག་སྣས་ཁྱབ་པར་བྱུག༔ ལྷར་བསྐྱེད་སྔགས་ཀྱི་སྤུ་གྲིས་བརླབ༔ ཕས་རྒོལ་ཕྱོགས་སུ་བསྟན་ལ་བཞག༔ དེས་ནི་དགྲ་གདོན་རྦོད་གཏོང་གི༔ གནོད་པས་མི་ཚུག་ཕྱིར་ལ་བཟློག༔ བཅས་ཆོག་ཟློག་པ་ཟབ་མོ་སྟེ༔ ཡང་གཅེས་གནད་ཀྱི་གདམས་པའོ༔ ས་མ་ཡ༔ ཁྱད་པར་བསད་པའི་སྦྱོར་བ་ནི༔ ཕུང་གསུམ་ས་ལ་བྲུབ་ཁུང་བཅའ༔ རོ་སོལ་དུག་ཁྲག་རྫས་ཀྱིས་བྱུག༔ དགྲ་འདྲེའི་ལིདྒ་མིང་རུས་ཅན༔ མན་ངག་བཞིན་དུ་བཅས་བྱས་ལ༔ དམིགས་བྱ་དངོས་གསལ་དགུག་ཅིང་བསྟིམ༔ ཁ་སྦྱོར་དབྱེ་བའི་ཆོ་ག་བྱ༔ སྙིང་གར་གནམ་ལྕགས་འཁོར་ལོ་ནི༔ རྩིབས་བརྒྱད་རྣོ་དབལ་སྤུ་གྲིའི་རྩེར༔ ལྕགས་སྡིག་ཚྭ་ཚྭ་འཕྲོ་བར་བསམ༔ རང་གི་ཐུགས་ནས་འབར་བའི་འོད༔ མེ་དཔུང་རླུང་ནག་ཚུལ་འཕྲོས་པས༔ འཁོར་ལོ་གཡས་སུ་ཤུགས་དྲག་འཁོར༔ སྲོག་རྩ་བཅད་དེ་སྙིང་ཁྲག་ལྷུད། ལྕགས་སྡིག་ཚོགས་ཀྱིས་ཁྲག་

ལ་འཇིབས༔ དེ་རྣམས་ངར་སྐྱེས་ཤ་རུས་ཀུན༔ ལྷག་མེད་ཧབ་ཧབ་ཟོས་པར་བསམ༔ ཏིང་འཛིན་ངར་བསྐྱེད་དྲག་སྔགས་བཟླ༔ གཟས་པོར་བསྔགས་པའི་ཐུན་གྱིས་བྲབ༔ དངོས་ཉམས་རྨི་ལམ་གང་རུང་དུ༔ རི་བསྙིལ་མཚོ་སྐེམ་ཤིང་གཤག་དང་༔ ལྷ་ཁང་འབག་སེང་ལྡེར་ཚོ་བཅོམ༔ མི་དང་གཅན་གཟན་ཁྱི་སྤྱང་བསད༔ ཁྲག་འཇིབ་རྒྱུ་མ་ཟ་བ་སོགས༔ རྟགས་བྱུང་ཉ་བོ་མིང་རུས་ཕྱུང་༔ མཐའ་སྡུད་དྲག་པོའི་ལས་ལ་སྦྱར༔ ནུས་པ་ཅན་གྱིས་རབ་བརྩམ་ན༔ ཕ་རོལ་ཇི་ལྟར་སྟོབས་བཙན་ཡང་༔ སྐད་ཅིག་སྲོག་མཐར་འབྱིན་པར་བྱེད༔ བསད་པ་ལས་ཀྱི་མཐར་ཐུག་གོ༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ལས་སྦྱོར་མཐར་སྡུད་མནན་སྲེག་འཕང་བའི་མན་ངག་ཨྠྀི༔] དྲག་པོའི་ལས་ཀྱི་མཐའ་སྡུད་ལ༔ རྣམ་པ་གསུམ་དུ་ཤེས་བྱ་སྟེ༔ དང་པོ་སྲུང་བའི་མཐའ་སྡུད་དུ༔ མནན་གཏད་སྦྱོར་བ་འདི་ལ་འཇུག༔ ཕུང་སའི་བྲུབ་ཁུང་གྲུ་གསུམ་པ༔ དམར་ནག་རྩང་གིས་བསྐོར་བའི་ནང་༔ རཱུ་པ་མན་ངག་བཞིན་དུ་བཅའ༔ རང་ཉིད་ལྷ་ཡི་ས་མ་ངྷིས༔ ལྷ་ཚོགས་བསྐུལ་ཞིང་མཁྱེན་པར་གསོལ༔ བདེན་པའི་སྟོབས་

ཀྱིས་དམིགས་བྱ་དགུག༔ ཁུག་རྟགས་མཐོང་ནས་ལྷ་དང་ཕྲལ༔ བྱད་དུ་བཅུག་ཅིང་གནད་ལ་དབབ༔ དེ་ཡི་གནས་ལྔར་གནས་ལྕགས་ཀྱི༔ འཁོར་ལོ་རྩིབས་བཞི་སྲ་ཞིང་བརྟན༔ ཤིན་ཏུ་ལྕི་བ་རེས་མནན་ཏེ༔ འགུལ་བསྐྱོད་ཙམ་ཡང་མི་ནུས་བསམ༔ ཨོཾ་བཛྲ་ཡཀྵ་ཀྲོ་ངྷ་སརྦ་དུཥྚན་ཏྲིག་ནན༔ གནོད་བྱེད་དམ་སྲི་རྒྱལ་འགོང་འབྱུང་པོ་ཧཾ་ཤཾ་ཏྲིག་ནན༔ ཧཱུྃ་ལཾ་ཀཱ་ཝཱ་ཙི་མཱ་ར་ཡ་སྟྭམྷ་ཡ་ནན༔ ཞེས་བཟླ་སེམས་ཅན་བཅིངས་པ་དང་༔ དོང་བཅུག་གཤེད་མར་གཏོད་པ་སོགས་༔ རྟགས་མཐོང་དགྲ་འདྲེ་གང་ཡིན་པ༔ སོ་སོར་བསྔགས་པའི་ཐོད་པར་བཅུག༔ མཆོད་རྟེན་འོག་དང་ལྷ་ཁང་གི༔ ཐེམ་འོག་ལམ་གྱི་བཞི་མདོ་དང་༔ འབྱུང་པོའི་འདུ་སྲང་ལ་སོགས་པ༔ འོས་པའི་ས་རུ་དོང་བྲུས་མནན༔ ཀླུ་བདུད་ལ་གཏད་འཆོར་མེད་བསྒོམ༔ རོ་གཡམ་སྟོང་ཁམས་བྲིས་པས་མནན༔ འབྱུང་བ་གོ་ཟློག་རྒྱས་གདབ་ཅིང་༔ རྡོ་རྗེའི་རྟ་བྲོས་མནན་ཅིང་གཟིར༔ དམིགས་མེད་ལྟ་བའི་གཟེར་ཆེན་གདབ༔ དགྲ་འདྲེ་གང་ལ་བྱ་ཡང་རུང་༔ ནམ་ཡང་ཐར་འཆོར་ལྡང་མེད་དུ༔ སྡོམ་འཛིན་མནན་པའི་ལས་མཐའོ༔ ས་མ་ཡ༔ གཉིས་པ་ཟློག་པའི་མཐའ་སྡུད་དུ༔ འཕང་བ་ཟོར་གྱི་ལས་ལ་

འཇུག༔ དུར་ཁྲོད་རྩུབ་པའི་གནས་དུས་དེར༔ དྲག་པོའི་མཎྜལ་བཅས་པའི་དབུས༔ ལྕགས་སམ་མཆོག་གི་ཁོག་པ་རུ༔ འབྲུ་ནག་ཁྲག་གིས་སྦྲུས་པ་ལས༔ དམར་གྱིས་གཏོར་ཆེན་ཟུར་གསུམ་ནི༔ ལྟོ་བར་སྲིན་པོའི་ཞལ་ཕྱུངས་པ༔ བཤོས་ཕྲན་མཚེ་ཡུངས་མེ་རི་སོགས༔ དྲག་རྒྱན་རྔམས་བརྗིད་ལྡན་པ་བཤམ༔ གདུག་པའི་ས་སྣའི་ཀོང་བུ་རུ༔ དྲག་ཁྲག་མཚེ་ཡུངས་རྦབ་རྡོ་དང་༔ མདའ་སོགས་ཟོར་གྱི་རྫས་སུ་བསྡོག༔ བདག་ཉིད་ལྷ་ཡི་ཏིང་འཛིན་ངང་༔ ཨེ་དཀྱིལ་དུར་ཁྲོད་གཞལ་ཡས་སུ༔ གཏོར་མ་དབང་དྲག་ལྷ་ཚོགས་དང་༔ ཟོར་རྫས་དྲེགས་པའི་དམག་དཔུང་བསྐྱེད༔ ཡེ་ཤེས་དྲངས་བསྟིམ་མཆོད་ཅིང་བསྟོད༔ སྲུང་ཟློག་བསད་པའི་དམིགས་བཟླས་དང་༔ ཁྱད་པར་ཕྱིར་ཟློག་མན་ངག་བྱ༔ ལིངྒ་དགུག་བསྒྲལ་ཞལ་དུ་བསྟབ༔ ཟློག་པའི་ཕྲིན་ལས་ནན་ཏན་བཅོལ༔ མཐའ་མ་བསྐུལ་ཞིང་ཟོར་སྒོ་དབྱེ༔ གསེར་སྐྱེམས་གཏོང་ཞིང་དམག་དཔུང་སྡུད༔ སྡེ་བརྒྱད་གདོང་ཐུག་མ་ཡིན་པར༔ གང་དུ་བྱ་བའི་ཕྱོགས་བསྐྱོད་དེ༔ གཏོར་ཟོར་འཕང་ཞིང་དམོད་པ་བོར༔ ཕ་རོལ་རྗེས་མེད་བརླག་པར་བསམ༔ སྲུང་མཚམས་བཅད་ལ་རྟ་བྲོ་བརྡུང་༔ འདིས་ནི་

ཕས་རྒོལ་བྱད་ཕུར་དང་༔ མཐའ་དམག་མཚོན་འཁྲུགས་དལ་ཡམས་ནད༔ རྣལ་འབྱོར་ཆག་ཆེ་ཉམ་ང་ཀུན༔ སྐད་ཅིག་ཉིད་ལ་བཟློག་པར་བྱེད༔ རྣོ་མྱུར་འཕང་བའི་ལས་མཐའོ༔ ས་མ་ཡ༔ གསུམ་པ་བསད་པའི་མཐའ་སྡུད་དུ༔ སྲེག་པ་ཧོམ་གྱི་སྦྱོར་བ་བྱ༔ ཕུང་གསུམ་ས་ལ་སྟེགས་བུ་བརྩིག༔ ཁྲག་ཆེན་དུག་ཆུས་ཆག་ཆག་གདབ༔ ཨེ་དཀྱིལ་རཾ་ཡིག་བྲིས་པར་ཁར༔ དུག་ཤིང་ཧོམ་ཁུང་གྲུ་གསུམ་བརྩིག༔ ཕྱེ་གསུམ་ཚེ་གསུམ་ཡུངས་དཀར་ནག༔ ཤ་སྣ་ཁྲག་སྣ་གཏོར་ཆུང་དང་༔ དམིགས་བྱའི་རཱུ་པ་མིང་རུས་ཅན༔ གྲངས་ལྡན་བཅས་ལ་རྫས་ཀྱིས་བྱུག༔ རང་ཉིད་ཏིང་འཛིན་ངར་ལྡན་པས༔ གདོལ་བཤན་གདུག་པའི་མེ་སྦར་ཏེ༔ ཧོམ་ཁུང་བསྐལ་མེ་འབར་བའི་ཀློང་༔ དབང་དྲག་ལྷ་ཚོགས་བསྐྱེད་ནས་མཆོད༔ རཱུ་པར་དམིགས་བྱའི་རྣམ་ཤེས་དབབ༔ གདབ་ཁའི་ལས་ཀྱིས་ཚུལ་བཞིན་བསྒྲལ༔ ཤ་ཁྲག་རུས་པར་བཅས་པ་རྣམས༔ གནམ་ས་ཁྱབ་པའི་ཞལ་ཧོམ་དུ༔ ཕུལ་བས་རྔམས་པའི་བཞད་སྒྲ་བཅས༔ ལྷག་མ་མེད་པར་རོལ་པར་བསམ༔ ཨོཾ་བཛྲ་མཧཱ་ཀྲོ་ངྷ་སརྦ་དུཥྚན་རཱ་ཛ་

ར་ཏྲི་ཧཾ་ཤཾ་ཏྲིག་ནན་མཱ་ར་ཡ་ཕཊ༔ གནོད་བྱེད་རྒྱལ་འགོང་དམ་སྲི་འབྱུང་པོ་སོད༔ རཾ་རཾ་ཛྭ་ལ་རཾ༔ ཁཱ་ཧི་ཁཱ་ཧི༔ ཧ་ཧ་ཧི་ཧི་ཧཱུྃ་ཧཱུྃ་ཕཊ༔ ཅེས་བསྟབ་དྲག་པོའི་ཕྲིན་ལས་བཅོལ༔ ཡེ་ཤེས་གཤེགས་ཤིང་སྤྲུལ་པ་བསྡུ༔ ཐལ་སོལ་དུག་ཁྲག་ཆུ་ཡིས་གཞིལ༔ རྒྱ་གྲམ་ལམ་མམ་ཐེམ་འོག་མནན༔ ཤིན་ཏུ་མི་སྲུན་གདུག་ཅན་ཡང་༔ བརྩམས་པ་ཙམ་གྱིས་མཐར་བྱེད་པའི༔ སྲེག་པ་ཧོམ་གྱི་ལས་མཐའོ༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ།། །།] ༁ྃ༔ [བླ་མ་དྲག་པོའི་ལས་སྦྱོར་ཕྱིར་ཟློག་འཕང་བའི་གཟེར་ཁ་ཟབ་མོ་ཨྠྀི༔] བསྙེན་སྒྲུབ་དྲོད་ཐོབ་སྔགས་པ་ནི༔ དྲག་པོའི་ལས་ལ་འཇུག་པའི་ཚེ༔ ཐོག་མར་དཀྱིལ་འཁོར་ལྷ་ཚོགས་རྣམས༔ གདུང་བའི་ང་རོས་ཐུགས་དམ་བསྐུལ༔ ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ པདྨ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔ ཁྲག་འཐུང་ཡོངས་རྫོགས་དྲག་པོའི་ཕྲིན་ལས་མཛོད༔ སངས་རྒྱས་བསྟན་ཤིག་སྐྱེ་འགྲོའི་བདེ་བ་འཇོམས༔ ཁྱད་པར་རྣལ་འབྱོར་

བདག་ཅག་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་འབྱུང་པོའི་ཚོགས༔ ཞི་བའི་ཐབས་ཀྱིས་འདུལ་དུ་མ་འཚལ་བས༔ དྲལ་ཤུལ་འབར་བ་ཆེན་པོའི་ཆོ་འཕྲུལ་གྱིས༔ མངོན་སྤྱོད་དམོད་པའི་ཕྲིན་ལས་དུས་ལ་བབ༔ བདག་སོགས་སྙིགས་མའི་དུས་མཐར་སྐྱེས་པ་རྣམས༔ ལྷ་མཆོག་ཁྱོད་ལས་སྐྱབས་གཞན་མ་མཆིས་པས༔ ཚེ་སྲོག་ཆོས་ལ་བར་དུ་གཅོད་བྱེད་པའི༔ གདུག་པ་ཅན་རྣམས་བསྒྲལ་ཞིང་བསྐྲད་པ་དང་༔ ཕྱིར་ཟློག་སྟོབས་ཀྱི་ཕྲིན་ལས་གྲུབ་པར་མཛོད༔ ཐུགས་དམ་དུས་ལ་བབ་བོ་ས་མ་ཡ༔ ཕྱིར་ཟློག་ཕྲིན་ལས་བཅོལ་བའི་ཕྱིར༔ བསྒྲལ་བའི་ལིང་རོ་གཏོར་མར་བསྟབ༔ དམར་གྱི་གཟར་བུ་འཕྱར་ཞིང་སྦྲོན༔ ཧཱུྃ༔ ཆོས་དབྱིངས་ཞི་ལས་མ་གཡོས་ཀྱང་༔ གདུག་པ་ཅན་རྣམས་འདུལ་བའི་ཕྱིར༔ རྣམ་འགྱུར་འབར་བའི་སྐུར་བཞེངས་པ༔ བདུད་འདུལ་ཆེ་མཆོག་གྲོ་བོ་ལོད༔ གཙོ་འཁོར་སྤྲུལ་པར་བཅས་པ་རྣམས༔ དགྲ་བགེགས་ཤ་ཁྲག་འདི་རོལ་ལ༔ ཁྲོས་འཁྲུགས་རྔམས་པའི་བརྟུལ་ཞུགས་ཀྱིས༔ བཟློག་བསྒྱུར་དྲག་

པོའི་ཕྲིན་ལས་མཛོད༔ རྣལ་འབྱོར་བདག་ཅག་འཁོར་བཅས་ཀྱི༔ སྔོན་ལས་འཕྲལ་རྐྱེན་ངན་པ་དང་༔ གཉིས་སྣང་འཁྲུལ་པ་ལས་བྱུང་བའི༔ མི་མཐུན་བར་ཆད་ཐམས་ཅད་ཟློག༔ འཇིགས་ཆེན་བརྒྱད་དང་བཅུ་དྲུག་ཟློག༔ ནད་རིགས་བཞི་བརྒྱ་རྩ་བཞི་ཟློག༔ གདོན་རིགས་སུམ་བརྒྱ་དྲུག་ཅུ་ཟློག༔ བགེགས་རིགས་སྟོང་ཕྲག་བརྒྱད་ཅུ་ཟློག༔ དུས་མིན་འཆི་རྐྱེན་བཅོ་བརྒྱད་ཟློག༔ གློ་བུར་བདུན་བརྒྱ་ཉི་ཤུ་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ བྱད་ཁ་ཕུར་ཁ་རྦོད་གཏོང་ཟློག༔ སྡེ་བརྒྱད་གདུག་པའི་ཆོ་འཕྲུལ་ཟློག༔ རྒྱལ་བསེན་དམ་སྲིའི་གནད་འཚེ་ཟློག་༔ ཆག་ཆེ་ཉམ་ང་ཐམས་ཅད་ཟློག༔ ལོ་ཟླ་ཞག་དུས་ཀེག་སྲི་ཟློག༔ མི་ཁ་གླེང་གཞི་འཐབ་རྩོད་ཟློག༔ སྣོད་ཀྱི་འཇིག་རྟེན་རྒུད་པ་ཟློག༔ བཅུད་ཀྱི་མི་དགེའི་རྣམ་རྟོག་ཟློག༔ འབྱུང་བཞི་གཡོ་ཞིང་འཁྲུགས་པ་ཟློག༔ སད་སེར་བཙའ་ཐན་མུ་གེ་ཟློག༔ དུས་ཚོད་དམན་ལྷག་ལོག་པ་ཟློག༔ མི་ཕྱུགས་ནད་ཡམས་གོད་ཁ་ཟློག༔ མཐའ་དམག་ཀླ་ཀློའི་རྒྱུ་འགྲུལ་ཟློག༔ བསྟན་སེལ་ཕུང་ཤིག་སྡེ་འཁྲུགས་ཟློག༔

མ་མོ་མཁའ་འགྲོའི་སུན་མ་ཟློག༔ རྩ་རླུང་ཐིག་ལེའི་གཡོ་འཁྲུགས་ཟློག༔ མདོར་ན་འགལ་རྐྱེན་མི་མཐུན་ཕྱོགས༔ བཟློག་གོ་དམར་ཆེན་གཏེར་མས་ཟློག༔ བསྒྱུར་རོ་དགྲ་བགེགས་སྟེང་དུ་སྒྱུར༔ བཟློག་བསྒྱུར་བཅོལ་བའི་ཕྲིན་ལས་མཛོད༔ ཅེས་དང་ཐལ་རྡེབ་དམོད་མོ་བྱ༔ མཐར་ནི་གཏོར་ཆེན་ཟོར་དུ་བསྐུལ༔ ཧཱུྃ༔ ང་ནི་ཆེ་མཆོག་གྲོ་བོ་ལོད༔ ཁམས་གསུམ་ཀུན་གྱི་དབང་ཕྱུག་ཡིནཿ འཇིག་རྟེན་འདས་དང་མ་འདས་པའི༔ དྲེགས་པ་ཕོ་རྒྱུད་མོ་རྒྱུད་ཀུན༔ རང་རང་ཕོ་ཉའི་དམག་བསྡུས་ལ༔ དེ་རིང་དགྲ་བགེགས་སྟེང་དུ་དྲོངས༔ རྦད་དོ་བསྐུལ་ལོ་དྲེགས་པའི་ཚོགས༔ དྲག་རྩལ་མཐུ་དང་དཔུང་བསྐྱེད་ལ༔ དགྲ་བགེགས་སྡིག་ཅན་འཁོར་བཅས་ཀྱི༔ གཟུགས་ཕུང་ཐལ་བའི་རྡུལ་བཞིན་བཤིག༔ རྣམ་ཤེས་ཚངས་པའི་ལམ་ནས་དྲོངས༔ རིག་པ་སྐྱེ་མེད་དབྱིངས་སུ་སྤོར༔ དུས་ལ་བབ་བོ་མཐུ་རྩལ་སྐྱེད༔ མཱ་ར་ཡ་རྦད་བྷྱོ་ཟློག༔ ཅེས་བརྗོད་གཏོར་ཟོར་དགྲ་ཕྱོགས་སུ༔ འཕངས་པས་གང་ལ་བྱ་བའི་ཡུལ༔ རྗེས་ཤུལ་མེད་པར་བརླག་པར་བསམ༔ ཟློག་པའི་གཟེར་ཁ་ཟབ་མོའོ༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་

དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ལས་ཚོགས་འགོང་པོ་ཨར་ལ་གཏད་པའི་མན་ངག་ཨྠྀི༔] མ་འོངས་བསྐལ་པའི་ཐ་མ་ལ༔ འཛམ་གླིང་བོད་ཁམས་མཐའ་དབུས་ཀུན༔ འགོང་པོ་སྤུན་དགུས་དབང་བྱས་ཏེ༔ དུས་འཁྲུག་མཚོན་གྱི་བསྐལ་པ་དར༔ ལྷ་འདྲེ་འཁྲུགས་པས་ནད་ཡམས་རིགས༔ མི་འོང་བྱ་བ་གཅིག་ཀྱང་མེད༔ ས་ཡི་བཅུད་ཉམས་ལོ་ཉེས་ལྡང་༔ ཀུན་ཀྱང་སྙིང་འཕྱོ་ཡིད་མི་དགའ༔ སྐྱེ་འགྲོ་མཆོག་དམན་མ་ལུས་པ༔ མི་འདོད་དུཿཁས་མནར་བ་འབྱུང་༔ དེ་ཚེ་ལྷ་སྔགས་ཏིང་འཛིན་ལ༔ དྲོད་རྙེད་སྔགས་པས་སེམས་བསྐྱེད་ནས༔ འགོང་པོ་ཨར་གཏད་ལས་བརྩམ་ན༔ བསྟན་འགྲོར་ཕན་པ་བླ་མེད་འགྱུར༔ དེ་ལ་དུག་ཤོག་དུག་ཁྲག་གིས༔ ལིངྒ་མི་ཡི་གཟུགས་པོ་ལ༔ སྤྱང་ཀི་བྲ་བ་མི་དང་བྱ༔ བྱི་ལ་རྔ་མོང་ཁྱི་སྤྲེའུ༔ རི་བོང་རྣམས་ཀྱི་མགོ་བོ་ཅན༔ རིམ་བཞིན་འཁྲུགས་[༡]བྱེད་ལོ་ཉེས་གཏོང་༔ [༢]མི་ནད་[༣]ཕྱུགས་ནད་[༤]ཆག་སྒོ་ངན༔ [༥]ལྟས་ངན་[༦]དམ་ཉམས་[༧]དབྱེན་སྦྱོར་བྱེད༔ [༨] བསེ་རག་[༩]བྱེད་བཅས་འགོང་པོ་དགུ༔ སོ་སོའི་མིང་སྤེལ་སྲོག་ཏྲི་ཛ༔ མཐའ་སྐོར་སྔགས་རྒོད་མཚོན་ཆས་བསྡམ༔ མཱ་ར་ཡ་རྦད་ཏྲིག་ནན་ཛཿཛཿ རྒྱལ་འགོང་འབྱུང་པོ་ཐུཾ་ཤད་ལིང་མྱོག་ཛཿཧཱུྃ་བྃ་ཧོཿ ཞེས་དང་

གཟུགས་ཀྱི་ཕྱི་རོལ་དུ༔ འཁྲུགས་བྱེད་ཀྱི་འགོང་པོ་སྤྱང་མགོ་ཅན༔ དུར་དུར༔ མྱོག་མྱོག༔ ཐུཾ་ཐུཾ༔ ཨ་ཀྲག་ཀླག་ཀླག༔ རྦད་རྦད༔ ཡན་ལག་ཛཿཧཱུྃ་བྃ་ཧོཿདང་༔ ཏྲིག་ནན་ཅེས་པའི་གཟེར་གྱིས་གདབ༔ ཡན་ལག་ལྕགས་སུ་བཅུག་པ་སོགས༔ མནན་ལིང་སྤྱི་ལྟར་བྲིས་བྱས་ལ༔ ལྷ་ཁང་ཞིག་དང་སྡེ་འཁྲུགས་ས༔ རི་རུད་ཕུང་ཤུལ་འདྲེ་ཅན་ས༔ ཁྱི་དང་བྱ་སྤྲེལ་བྱི་ལའི་ཁྲག༔ རྣམས་ཀྱིས་བྱུགས་ཤིང་དྲི་མ་སྦྱང་༔ ཕུང་སའི་བྲུབ་ཁུང་ནང་དུ་བཅུག༔ རང་ཉིད་དྲག་པོའི་ང་རྒྱལ་གྱིས༔ ལིངྒ་འགོང་པོ་དངོས་སུ་གསལ༔ སྲོད་དང་ཐོ་རངས་སྐར་ཆེན་དུས༔ དགུག་གཞུག་དྲག་ཏུ་བྱ་ཞིང་བསྟིམ༔ གནད་ལ་དབབ་པའི་དམིགས་པ་བཅས༔ དྲག་སྔགས་སྤུ་གྲིའི་འཁྲུལ་འཁོར་བཟླ༔ དྲེགས་པ་ཐུལ་བའི་རྟགས་བྱུང་ཚེ༔ མཐའ་སྡུད་སྲེག་མནན་ལས་ལ་སྦྱར༔ འདི་ལྟར་ཚུལ་བཞིན་གནད་ལྡན་ན༔ འགོང་པོའི་ཆོ་འཕྲུལ་རྩུབ་འགྱུར་ཞི༔ བོད་ཁམས་བདེ་སྐྱིད་ངེས་པར་འབྱུང་༔ དུས་ལ་བསྔགས་པའི་གདམས་པ་སྟེ༔ ཟབ་པའི་ལས་མཐའ་ཡང་དག་གོ༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ།། །།]

[བླ་མ་དྲག་པོའི་ལས་ཚོགས་རྒྱལ་བསེན་ཤི་ས་བསྟན་པའི་མན་ངག་ཨྠྀི༔] དྲག་པོ་བསྙེན་པའི་རྟགས་མཐོང་ཞིང་༔ བསྐྱེད་རྫོགས་གདིང་ལྡན་སྔགས་འཆང་གིས༔ རྒྱལ་བསེན་ཤི་ས་བསྟན་པ་ཡི༔ ལས་ཀྱི་སྦྱོར་བར་འཇུག་འདོད་ན༔ རོ་རས་སམ་ནི་དུག་ཤོག་ལ༔ འཁོར་ལོའི་རྩིབས་བརྒྱད་སྡིག་པས་མཚན༔ ལྟེ་བར་དྲག་པོའི་སྙིང་པོ་བྲི༔ དེ་ཕྱིར་རྩིབས་བརྒྱད་རྩེ་ནང་བསྟན༔ དེ་ཡང་སྡིག་པས་མཚན་པ་བྱ༔ དེ་རྒྱབ་མུ་ཁྱུད་གཟིར་སྔགས་དང་༔ རཱ་ཙ་ཧབ་ལེ་ཧབ་ལེ་སོད༔ ཅེས་པའི་སྤུ་གྲི་གདགས་པས་བསྐོར༔ དེ་མཐར་མེ་རི་འབར་བ་དང་༔ རྩིབས་མཆན་རྣམས་ལ་གནོད་བྱེད་གཟུགས༔ མིང་སྤེལ་བཅས་པ་འབྲི་བར་བྱ༔ དེ་ནས་དམིགས་བྱ་དགུག་བསྟིམ་ནི༔ རྟགས་མཐོང་བར་དུ་བྱས་ནས་ཀྱང་༔ རང་ཉིད་དྲག་པོར་གསལ་བ་ཡི༔ ཞབས་འོག་འཁོར་ལོ་ལིངྒ་བཏིང་༔ འཁོར་ལོ་གཡས་གཡོན་ཤུགས་དྲག་ཏུ༔ འཁོར་བས་རྩིབས་གཉིས་སྤུ་གྲིའི་བར༔ རྒྱལ་བསེན་དུམ་བུར་གཏུབ་བསམ་ཞིང་། དྲག་སྔགས་སྤུ་གྲིའི་མཚོན་ཆ་བཟླ༔ བནྡྷེ་བཟུང་དང་ཁྱི་དཀར་བསད༔ ལྷ་ཁང་བཅོམ་དང་བུད་མེད་བསད༔ དེ་སོགས་ཐུལ་བའི་རྟགས་མཐོང་ན༔ ཙཀྲ་ཁྱི་དཀར་ཐོད་པར་བཅུག༔ མཐའ་སྡུད་

མནན་པའི་ལས་ལ་སྦྱར༔ འདི་ནི་ཤི་ས་བསྟན་པ་སྟེ༔ ཤིན་ཏུ་གལ་ལ་ཐུག་པ་ལས༔ འཆོལ་བར་སྤྱོད་ན་རང་སྲོག་གཅོད༔ དུས་ངན་བསྐལ་པའི་ཐ་མ་ལ༔ སྔགས་པ་དམ་ལོག་དམ་སྲིར་འཁྲུལ༔ བཙུན་པ་སྡོམ་ཤོར་རྒྱལ་པོར་སྐྱེ༔ བུད་མེད་ཕལ་ཆེར་བསེན་མོར་ལྡང་༔ སྐྱེ་འགྲོའི་སྲོག་ལ་ཧབ་ལེན་བྱེད༔ སྨྱོ་འབོག་བརྒྱལ་ནད་གཟེར་ཐུང་སོགས༔ ཅི་མི་འདོད་པ་སྣ་ཚོགས་ཀྱིས༔ མི་ཕྱུགས་ཕྱགས་མས་འདེད་པ་འབྱུང་༔ དེ་ཚེ་བདག་གི་བརྒྱུད་འཛིན་པའི༔ སྙིང་སྟོབས་ཅན་གྱིས་བརྩམས་བྱས་ན༔ ཕན་པ་ཆེན་པོའི་དཔལ་དུ་འགྱུར༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་མང་དག་པའོ། །] ༁ྃ༔ [བླ་མ་དྲག་པོའི་ལས་ཚོགས་ལྷ་སྲིན་དམ་བསྒྲགས་ཀྱི་མན་ངག་ཨྠྀི༔] མ་འོངས་དུས་ཀྱི་ཐ་མ་ལ༔ མཐའ་ཡི་འབྱུང་པོ་དབུས་སུ་ཤོར༔ དབུས་ཀྱི་དམ་སྲི་གློ་བུར་བསྡོངས༔ འདྲེ་རྒོད་འགོང་པོ་རླུང་ལྟར་འཚུབས༔ བོད་ཀྱི་ལྷ་སྲིན་མ་ལུས་འཁྲུགས༔ དམེ་འཁྲུགས་ཁྲག་གི་ཆར་པ་འབེབས༔ མཐའ་དབུས་ཡུལ་ཁམས་ཕལ་མོ་ཆེར༔ ས་གཡོ་རི་ཉིལ་བྲག་རལ་ཞིང་༔ སྔར་མེད་ཐན་ཆུ་ཤྭ་འུད་བརྡོལ༔

ཞིང་ཁང་གྲོང་སྲང་ཡུལ་ལྗོངས་འཇིག༔ སད་སེར་མུ་གེ་ཐན་ཆེན་འབར༔ མི་ནད་ཕྱུགས་ནད་རླུང་ལྟར་འཚུབས༔ དེ་ཚེ་བོད་ཀྱི་མགུར་ལྷ་སོགས༔ ལྷ་སྲིན་སྡེ་བརྒྱད་ཐམས་ཅད་ལ༔ ཐ་ཚིག་དམ་བསྒྲགས་བཀའ་ནན་བྱ༔ དུས་བཟང་ཚེས་བཅུ་ལ་སོགས་པ༔ ཤིས་པའི་དུས་ཀྱི་སྔ་དྲོའི་ཆར༔ རི་ཆེན་རྩེའམ་ཐང་ཆེན་དཀྱིལ༔ མཁར་གྱི་ཡང་ཐོག་ལ་སོགས་པ༔ གཉན་ཅིང་མཐོ་བའི་ས་ཕྱོགས་སུ༔ རྩ་བ་གསུམ་གྱི་མ་ངྷལ་བཀྲམ༔ རྒྱགས་བརྔན་བསང་དང་གསེར་གཡུའི་སྐྱེམས༔ ལ་རྫས་ཀླུང་རྫས་སྐམ་རློན་ཆས༔ ཡས་སྟགས་སྣ་ཚོགས་ལེགས་པར་བཤམ༔ ཁྲུས་དང་བསང་མཆོད་རྒྱས་པར་བྱ༔ རང་འདོད་མ་ཞུགས་གཞན་ཕན་སེམས༔ ལྟ་སྒོམ་ཏིང་འཇིན་གདིང་མེད་ན༔ ལྷ་འདྲེས་བཀའ་ནན་ལྟ་ཞོག་གིཿ སླར་ཡང་ཚུར་ལ་རྒོལ་བར་བྱེད༔ དེ་ཕྱིར་ང་ཡིས་བྱིན་བརླབས་པའི༔ ནུས་ལྡན་བྱང་སེམས་རྣལ་འབྱོར་པས༔ བདག་ཉིད་ཁྲོ་རྒྱལ་འཆོལ་བ་ཆེ༔ སྟོང་ཁམས་གང་བའི་སྐུར་བལྟས་ལ༔ བྱིན་ཕབ་གཟི་བྱིན་ཆེར་བསྐྱེད་ནས༔ སྣང་སྲིད་ལྷ་འདྲེ་མངོན་སུམ་དགུག༔ སྔོན་གྱི་ཐ་ཚིག་འདི་ལྟར་བསྒྲག༔ ཧཱུྃ༔ ང་ནི་སངས་རྒྱས་ཀུན་གྱི་དངོས༔ འཆོལ་བའི་ཁྲོ་རྒྱལ་ཧེ་རུ་ཀ༔

འཁོར་འདས་ཡོངས་ཀྱི་སྤྱི་དཔལ་ཡིན༔ སྣང་སྲིད་ཁམས་ན་གནས་རྒྱུ་བའི༔ ལྷ་སྲིན་སྡེ་བརྒྱད་འབྱུང་པོའི་ཚོགས༔ ཚུར་ཤོག་ཚུར་ཤོག་དམ་ལ་འདུས༔ ཆོས་ཉིད་བདེན་པའི་གཏམ་ལ་ཉོན༔ ཐ་ཚིག་གཉན་པོ་དྲན་པར་གྱིས༔ གལ་ཏེ་འདུ་བར་མི་བྱེད་ཅིང་༔ བསྒོ་བའི་བཀའ་ལ་མི་ཉན་ན༔ ཁྱེད་རྣམས་སྲོག་སྙིང་ང་ལ་ཡོད༔ གནད་དུ་བོར་ནས་བརླག་ཏ་རེ༔ དེ་བས་འདིར་འདུས་དམ་ལོངས་ཤིག༔ ཨ་ཡ་མ་དུ་རུ་ཙ་ཤ་ན་སརྦ་བྷུ་ཏ་ས་མ་ཡ་ཙིཏྟ་དུང་དུང་ཧྲཱིང་ཧྲཱིང་ཕེཾ་ཕེཾ་ཛཿཛཿས་མ་ཡ་ཛཿཧཱུྃ་བྃ་ཧོཿ དེ་རྣམས་མགོ་བོར་རྡོ་རྗེ་དང་༔ ལྕེ་ལ་བདུད་རྩིའི་དམ་ཆུ་བཞག༔ གསེར་གཡུའི་སྐྱེམས་དང་རྒྱགས་བརྔན་སོགས་༔ མཆོད་གཏོར་ཡས་སྟགས་ཚིམས་པར་བསྔོ༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ སློབ་དཔོན་པདྨ་ཐོད་ཕྲེང་གིས༔ བསམ་ཡས་ཧས་པོ་རི་རྩེ་ནས༔ ལྷ་སྲིན་ཐམས་ཅད་དམ་ལ་བཏགས༔ བསྟན་པ་བསྲུང་བའི་གཉེར་ཁ་གཏད༔ བོད་ཁམས་ཆོས་བཞིན་སྐྱོང་བ་ཡི༔ ཁས་བླངས་དམ་དུ་མ་བཅས་སམ༔ སྔོན་གྱི་ཐ་ཚིག་མ་འདའ་བར༔ གུམ་གུམ་ཆུམ་ཆུམ་ལས་བྱོས་ཤིག༔ མཐའ་དག་ནད་ཡམས་འཁྲུགས་རྩོད་དང་༔ སད་སེར་བཙའ་ཐན་མུ་གེ་ཟློག༔

ལྟས་ངན་ཆོ་འཕྲུལ་ཐམས་ཅད་སོལ༔ སངས་རྒྱས་བསྟན་དང་བསྟན་འཛིན་སྐྱོངས༔ རྒྱལ་ཁམས་བདེ་ལ་འགོད་པ་སོགས༔ སོ་སོའི་མཐུ་དང་འཚམས་པ་ཡི༔ ཇི་ལྟར་ནུས་པའི་ཕྲིན་ལས་མཛོད༔ དཀྱིལ་འཁོར་གཉན་པོ་མ་མཐོང་ཞིང་༔ འདའ་ཀའི་ཐ་ཚིག་མ་ཐོས་པའི༔ གློ་བུར་ལྷགས་པའི་འདྲེ་རྒོད་རྣམས༔ མཆོད་སྦྱིན་ཡས་སྟགས་འདི་ཁྱེར་ལ༔ བདག་གི་བསྒོ་བ་ཉན་པར་གྱིས༔ གལ་ཏེ་མི་ཉན་འདའ་བྱེད་ན༔ བདག་ཉིད་དབང་དྲག་ཐོད་ཕྲེང་རྩལ༔ རབ་ཏུ་ཁྲོས་པའི་བརྟུལ་ཞུགས་གར༔ རྡོ་རྗེ་འབར་བའི་ཚྭ་ཚྭ་ཡིས༔ སྐད་ཅིག་ལུས་ངག་རྡུལ་དུ་རློག༔ རྣམ་ཤེས་མནར་མེད་མེ་ཡིས་བསྲེག༔ བསྐལ་པ་སྟོང་ཡང་ཐར་མི་འགྱུར༔ དེ་བས་ཉེན་ལ་མ་བདོ་བར༔ བསྒོ་བའི་ཕྲིན་ལས་མྱུར་དུ་སྒྲུབས༔ ཨོཾ་བཛྲ་ས་མ་ཡ་རཀྵ་ཧཱུྃ༔ དེ་རྣམས་ཞི་ཞིང་གུས་པ་ཡིས༔ བཀའ་བཞིན་བསྒྲུབ་པར་མནའ་བོར་བསམ༔ རྒྱབ་བརྟེན་བསོད་ནམས་དཔུང་བསྐྱེད་ཕྱིར༔ མཆོད་སྦྱིན་གསུང་བསྒྲགས་སཱཙྪ་གདབ༔ སྲོག་བསླུ་ཉེའུ་འདོན་ལམ་འཕྲང་འཆོས༔ ཚོགས་གཏོར་རྒྱ་ཆེར་འབད་པར་བྱ༔ ལྟ་དགོངས་ལྡན་ཅིང་དམ་ཚིག་གཙང་༔ སྙིང་རྗེ་ཅན་གྱི་སྔགས་པ་ཡིས༔ ཚུལ་འདི་ཇི་བཞིན་བརྩམས་

བྱས་ན༔ བོད་ཁམས་སྤྱི་དང་བྱེ་བྲག་གི༔ སྣོད་བཅུད་ཉེས་རྒུད་ཡོངས་ཞི་ནས༔ ཕན་བདེའི་ལེགས་ཚོགས་འཕེལ་བར་འགྱུར༔ དེ་ཕྱིར་ཤིན་ཏུ་གཅེས་པར་ཟུངས༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ལས་ཚོགས་དུག་ཁྲག་རྫས་རྒོད་ཀྱི་མན་ངག་ཟབ་མོ་ཨྠྀི༔] དྲག་པོ་སྒྲུབ་པའི་ཕྲིན་ལས་ཀྱི༔ སྲུང་ཟློག་ལ་སོགས་ལས་ཀུན་ལ༔ རབ་ཏུ་གཅེས་པའི་ལས་སྦྱོར་ནི༔ དུག་ཁྲག་རྫས་རྒོད་སྒྲུབ་ཐབས་བསྟན། སྦྱོར་བ་དུག་ཁྲག་རྫས་གསུམ་པོ༔ རེ་རེར་གསུམ་ཕྱེས་དགུ་ཡིན་ཏེ༔ བཙན་དུག་ར་དུག་བོང་དུག་གསུམ༔ མི་ཁྲག་རྟ་ཁྲག་ཁྱི་ཁྲག་གསུམ༔ གུ་གུལ་ཤུ་དག་ཁྱི་ལྕེ་གསུམ༔ དེ་དགུ་ལ་ནི་སྐྱོབས་སྦྱར་བ༔ རེ་ལྕགས་ཐང་ཕྲོམ་སྤྱང་ཚེར་ནག༔ མངལ་ཁྲག་ཀ་བར་ཕག་པ༔ ཤ་ཟན་བྱ་དང་གཅན་གཟན་ཁྲག༔ མཛེ་ཅན་དམེ་ཕོ་དམ་ཉམས་[ནག་པོ་]གསུམ༔ མ་གཏོགས་ཁྲག་སྣ་ཚོགས་ཚད་དང་༔ [ནག་པོ་] ཁྱད་པར་གྲི་ཁུག་བུང་ཆེར་[ཡུག་ས་མ་ཡིན་པ།] བསྐྱེད༔ དེ་ལ་སྨན་གྱི་ངར་འདོགས་སུ༔ གླ་རྩི་སྡོང་རོས་རྟ་བོན་དང་༔ ཁྱི་ནག་སྤྱང་ཀི་

ཕག་པའི་བྲུན༔ སྦལ་སྦྲུལ་ལྕོང་མོའི་ཤ་རྣམས་བསྲེ༔ ཁྲིམས་ལྡན་དགེ་སློང་མི་བསྐྱོད་དང་༔ ནུས་ལྡན་སྔགས་པའི་རྣམ་སྣང་བཅས༔ གར་ཆང་སྦྱར་ཏེ་དྲོ་སར་བསྙལ༔ ཁྲག་ནུས་རུལ་པ་ལས་འབྱུང་ཕྱིར༔ ཤིན་ཏུ་རུལ་ཞིང་དུལ་བར་བྱ༔ སྨན་ནུས་སོ་མ་ལས་འབྱུང་ཕྱིར༔ སྐབས་སུ་གསར་པ་སྦྱར་ཞིང་གསོ༔ སྔགས་ནུས་བཟླས་པ་ལས་འབྱུང་ཕྱིར༔ ནངས་བཞིན་སྔགས་མང་བཟླས་ལ་བཏབ༔ དངོས་གཞི་རྫས་ཉིད་ལྷ་རུ་བསྒོམ༔ ཡེ་ཤེས་སྤྱན་དྲང་དབྱེར་མེད་བསྟིམ༔ དུག་རླངས་མེ་དུད་འཚུབས་པར་བསམ༔ རྩ་བསྙེན་གཟིར་སྔགས་ཤམ་བུ་ཅན༔ འབུམ་ཕྲག་བཟླས་ལ་ཧུ་ཡིས་འདེབས༔ སྔགས་ཀྱི་ངར་འདོགས་ཤམ་བུ་ནི༔ ཨོཾ་ན་མོ་བུངྔྷ་ཡ༔ བཛྲ་ཀཱི་ལི་ཀཱི་ལ་ཡ༔ ནཱ་ག་དུ༔ ཙིནྡྷ་ཙིནྡྷ༔ མི་ལི་མི་ལི༔ བྷནྡྷ་བྷནྡྷ༔ ནཱ་གི་ནི་སྭཱཧཱ༔ བཟླས་པས་མེ་ལ་རླུང་བུས་བཞིན༔ སྔགས་ནུས་རབ་ཏུ་འབར་བར་བསམ༔ རྗེས་ནི་ལྕགས་ཀྱི་སྤར་བུའམ༔ གླང་དམར་འོག་ཅན་རྭ་གཡས་པར༔ བླུགས་ཏེ་ཤིན་ཏུ་དམ་པོར་བཅང་༔ རྒྱུན་དུ་མཆན་ཁུང་གཡོན་ན་འཆང་༔ སྲུང་ཟློག་བསད་དང་མནན་གཏད་སོགས༔ དྲག་ལས་

གང་ལ་འཇུག་ཀྱང་རུང་༔ རང་སྲུང་རྫས་ཀྱི་ཐིག་ལེ་ནི༔ བུ་ག་དགུ་ལ་བྱུག་པར་བྱ༔ གཞན་དག་བསྲུང་ན་ལྕགས་སྣོད་དམ༔ སྨྱུག་ཚིགས་སོགས་སུ་བླུགས་ལ་བཏགས༔ སེར་བ་བསྲུང་ན་སྐྱེར་ཕུར་ལ༔ སྔགས་བྲིས་རྫས་ཐུམ་བཏགས་པ་ཉིད༔ སེར་ལམ་ཕྱོགས་སུ་བསྟན་ཏེ་འཛུག༔ ཡུངས་དཀར་ཐལ་ཆེན་བསྲེས་པའི་ཐུན༔ བྲབ་པས་སེར་བ་གདོང་བཟློག་བསྲུང་༔ རྒྱལ་འགོང་སྨྱོ་འདྲེ་སོགས་བསྲུང་ན༔ མགུལ་དུ་བཏགས་པས་གནོད་པ་ཐུབ༔ དུད་པའི་དྲི་ཚོར་གདོན་བགེགས་འབྲོས༔ སྲིའུ་གསོ་ན་གི་ཝང་དང་༔ གུར་གུམ་བསྲེས་ལ་ཐིག་ལེ་བྱ༔ ཞོ་ཉེས་ཆང་ཉེས་བསྲུང་འདོད་ན༔ སྣོད་ཀྱི་ཁ་ལ་བསྐོར་ཞིང་བདུག༔ སྡེ་བརྒྱད་རྒྱུ་ལམ་གཅོད་པ་དང་༔ རྦོད་གཏོང་བཟློག་ན་དེའི་ཕྱོགས་སུ༔ སྔགས་ཀྱིས་མཚན་པའི་ཐོ་བཙུག་ལ༔ རྫས་བྲན་ཚིལ་ཆེན་བསྲེག་པས་བདུག༔ སྡེ་བརྒྱད་རྒྱུ་ལམ་གཅོད་པ་དང་༔ རྦོད་གཏོང་བཟློག་ན་དེའི་ཕྱོགས་སུ༔ སྔགས་ཀྱིས་མཚན་པའི་ཐོ་བཙུག་ལ༔ རྫས་བྲན་ཚིལ་ཆེན་བསྲེག་པས་བདུག༔ ཆར་པ་དབབ་ན་ཆུ་མིག་མདུན༔ སྦལ་སྦྲུལ་ཤ་སྦྱར་བསྲེག་པས་འབེབས༔ སེར་རྒོད་དབབ་ན་ལྷ་འདྲེའི་སར༔ བ་བླ་ཚིལ་ཆེན་རྟ་བོན་དང་༔ ཕག་ཁྲག་

སྦྱར་བསྲེག་གཞོབ་བཏང་འབེབས༔ གག་ལྷོག་གཟེར་རྒོད་མཛེ་ནད་དང་༔ སྐྲང་པ་ཤུ་ཐོར་གཉན་འབྲུམ་སོགས༔ མདོར་ན་ནད་རིགས་ཐམས་ཅད་ལ༔ ཕྱི་ནས་བྱུག་ཅིང་ཁོང་དུ་བཏང་༔ དུད་པས་བདུག་སོགས་འཕྲུལ་ཤེས་བྱ༔ རྫས་སྔགས་ཏིང་འཛིན་ལག་ལེན་བཞི༔ མ་འཆོལ་ཚུལ་བཞིན་ལག་བླངས་ན༔ འཇིག་རྟེན་ཕུང་འཚེང་ནུས་པ་ཡིན༔ གལ་ཏེ་དམ་ཉམས་ལག་ཤོར་ན༔ རྫས་ལས་སྐད་འབྱིན་སྣོད་འགས་འགྱུར༔ ནུས་པ་ཞུད་པས་སླར་ཡང་ནི༔ བསྐྱར་ཞིང་བསྒྲུབ་པ་མཆོག་ཏུ་གཅེས༔ བྱ་སླ་དོན་ཆེ་ཟབ་པའི་གནད༔ དྲག་སྒྲུབ་གསང་བའི་ལས་མཐར་གདམས༔ སྙིགས་མའི་དུས་སུ་ཕན་པ་འབྱུང་༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ། །] ༁ྃ༔ [བླ་མ་དྲག་པོའི་ཁྱད་པར་གྱི་ཕྲིན་ལས་ཟབ་པའི་མན་ངག་ཨྠྀི༔] མ་འོངས་ལྔ་བརྒྱ་ཕྱི་མའི་དུས༔ མཐའ་བཞིའི་དམག་གི་མཚོན་ཁ་ལངས༔ འགོང་པོའི་ཟ་ལམ་བོད་དུ་བསྟན༔ ནད་ཡམས་བཀྲེས་ཕོངས་འཐབ་རྩོད་སོགས༔ མི་འདོད་

སྡུག་བསྔལ་མཚོ་བརྡོལ་འགྱུར༔ དུས་ངན་དེ་དག་སྐྱོབ་པའི་ཕྱིར༔ ཆོས་ནོར་དམ་རྫས་སྦས་ཡུལ་སོགས༔ དཔག་མེད་སྦས་ཤིང་བྱིན་གྱིས་བརླབས༔ བདེན་ཚིག་སྨོན་ལམ་གཏད་རྒྱ་བཞིན༔ དུས་སྐབས་སོ་སོར་བསྔགས་པ་ཡི༔ ང་སྤྲུལ་སྐྱེས་བུ་རིམ་བཞིན་དུ༔ འབྱུང་བས་བཏོན་ཅིང་སྤེལ་ནས་ཀྱང་༔ བོད་ཁམས་སྡུག་བསྔལ་སྐྱོབ་པར་ངེས༔ འོན་ཀྱང་དེ་དུས་བོད་འབངས་རྣམས༔ བསོད་ནམས་སྐལ་ཆུང་དབང་སོང་བས༔ ང་སྤྲུལ་གཏེར་འབྱིན་དེ་དག་ལ༔ ཐེ་ཚོམ་ལོག་པར་ལྟ་བ་མང་༔ རང་གཞན་དམ་ཚིག་གཡེལ་བའི་རྒྱུས༔ གཏེར་སྲུང་ཁྲོས་ཤིང་ལྷ་འདྲེ་འཁྲུགས༔ དམ་སྲི་འབྱུང་པོས་བར་ཆད་རྩོམ༔ མི་རུང་ཆོ་འཕྲུལ་མང་འབྱུང་ཞིང་༔ གཏེར་འབྱིན་སྐྱེས་བུ་རང་ཉིད་ཀྱང་༔ ལྟ་སྒོམ་ཏིང་འཛིན་རྩལ་ཞན་པས༔ ཟབ་གཏེར་གསན་སྒོ་འབྱེད་མི་ནུས༔ དེ་ཚེ་པདྨ་བདག་ཉིད་ལ༔ སྐྱབས་གནས་ཀུན་འདུས་ངེས་ཤེས་ཀྱིས༔ གདུང་ཤུགས་དྲག་པོས་གསོལ་བ་ཐོབ༔ གཏེར་སྲུང་གཞི་བདག་གཉན་པོ་ལ༔ གཏོར་

མ་བསང་དང་གསེར་གཡུའི་སྐྱེམས༔ དཀར་དམར་འབྲུ་སྨན་རིན་ཆེན་རིགས༔ ཤ་ཁྲག་དབུགས་སོགས་རང་རང་གི༔ མཐུན་རྫས་སྤྱན་གཟིགས་ཚོགས་ཀྱིས་བརྔན༔ འགྲོ་དོན་ཟབ་གཏེར་སྦས་ཡུལ་སོགས༔ འབྱེད་པའི་སེམས་བསྐྱེད་བཟང་པོ་ཡིས༔ རང་ཉིད་དབང་དྲག་འཆོལ་བ་ནི༔ སྟོང་ཁམས་རབ་འབྱམས་གང་བའི་སྐུར༔ རིགས་བཞིའི་མཁའ་འགྲོ་ཡང་སྤྲུལ་གྱི༔ དཔའ་བོ་མཁའ་འགྲོ་འབུམ་སྡེ་དང་། ཆོས་སྐྱོང་གཏེར་སྲུང་ལས་བྱེད་ཚོགས༔ སྤྲིན་ཕུང་གཏིབས་བཞིན་བསྐོར་བར་བསམ༔ བྱིན་ཆེན་དབབ་ལ་ང་རྒྱལ་བཟུང་༔ རྩ་བའི་སྔགས་ཀྱི་ཤམ་བུ་རུ༔ ཧ་རི་ནི་ས་ནི་དྷི་སིངྔྷི་ཕ་ལ་སརྦ་ཀརྨ་ཀུ་རུ་ཧོ༔ ཞེས་བཟླ་རིག་པ་གཟེང་བསྟོད་ལ༔ ཧཱུྃ་གླུ་ལེན་ཅིང་སྟངས་སྟབས་བསྒྱུར༔ ཡ་ང་འཁུ་འཁྲིག་དང་བྲལ་བར༔ གཡོ་མེད་དགོངས་པའི་གདིང་བསྐྱེད་པས༔ འབྱུང་པོའི་བར་ཆད་མི་ཚུགས་ཤིང་༔ ལྷ་སྲིན་ཟེར་གྱིས་ཞུད་རྣམས་ཞི༔ གཏེར་བདག་བཀའ་ཉན་ཕྲིན་ལས་སྒྲུབ༔ གཞན་ཡང་སོ་སོའི་ཁ་བྱང་བཞིན༔ མ་འཆོལ་

ལག་ལེན་གནད་ལྡན་པས༔ རང་གཞན་དོན་ཆེན་འགྲུབ་པར་འགྱུར༔ ས་མ་ཡ༔ དུས་མཐར་འགོང་པོས་བློ་བསྒྱུར་ནས༔ འགྲོ་རྣམས་ཆགས་སྡང་སྤྱོད་ངན་གྱིས༔ ཡུལ་གནས་གཞི་བ་དག་ལྷ་སྲིན་འཁྲུགས༔ སྟག་གཟིག་དོམ་དྲེད་འཕར་སྤྱང་སོགས༔ འབྱུང་པོ་གཅན་གཟན་གཟུགས་བརྫུས་ཏེ༔ མི་ཕྱུགས་ཨར་ལ་གཏད་པ་འབྱུང་༔ དེ་ཚེ་གཞི་བདག་སྲུང་མ་ལ༔ བརྔན་ཆ་འབུལ་ཞིང་ཐ་ཚིག་བསྒྲག༔ རང་ཉིད་དྲག་པོར་གསལ་བའི་འཁོར༔ གིང་ཆེན་སྡེ་བཞི་ཡང་སྤྲུལ་འབུམ༔ ཀུན་ཀྱང་བྲོ་བརྡུང་བཤུག་གླུ་དང་༔ དྲིལ་གཡེར་རྔ་སྒྲ་སྟོང་ཁམས་གང་༔ གནོད་བྱེད་ཐམས་ཅད་སྐྲོད་པར་བསམ༔ རྩ་སྔགས་ཤམ་དུ་སྔགས་འདི་གདགས༔ ར་ཙ་ཧྲིཿཡ་སརྦ་དུ་ཏྲི་ཨུ་ཙ་ཏ་ཡ་ཕཊ༔ ཅེས་བཟླ་མུ་ཟི་གླ་རྩ་དང་༔ སྒོག་སྐྱ་གུ་གུལ་ལ་སོགས་པར༔ སྔགས་བཏབ་བདུག་པས་ཐམས་ཅད་བྱེར༔ ཁྱད་པར་ཁ་ཆིངས་ཙཀྲ་ནི༔ གཅན་གཟན་གང་གནོད་དེ་ཡི་གཟུགས༔ ལྕེ་ཕྱུངས་སྟེང་དུ་རྒྱ་གྲམ་མཐར༔ ཧཱུྃ་ཨ་རལླི་གཅན་གཟན་ཆེ་གེ་

མོའི་མཆུ་ཆིངས་གྲེ་བ་སྡོམ་ཤིག༔ ཅེས་པས་བསྐོར་ཞིང་སྤྱི་གཙུག་ཏུ༔ མཆོད་རྟེན་ནག་པོས་མནན་པ་བྲི༔ མགོ་ནས་དྲིལ་ཏེ་སྐུད་པས་བཅིང་༔ སཱཙྪ་ནག་པོའི་འོག་ཏུ་མནན༔ རང་སྔགས་བཟླ་ཞིང་གཅན་གཟན་གྱི༔ ཁ་བཅིངས་དཔའ་རྩལ་ཉམས་པར་བསྒོམ༔ དེས་ནི་གཅན་གཅན་མ་རུངས་པའི༔ གནོད་པ་ཀུན་ལས་བསྲུང་བར་འགྱུར༔ ས་མ་ཡ༔ སྨོན་ལམ་ལོག་པའི་དམ་སྲི་རྣམས༔ དུས་ཀྱི་མཐའ་ལ་རླུང་ལྟར་འཚུབས༔ སྐྱེ་འགྲོ་ཀུན་གྱི་ཤེས་རྒྱུད་བསྒྱུར༔ ཁྱད་པར་དགེ་བཤེས་བན་བཙུན་དང་༔ མི་ཆེན་རྣམས་ཀྱི་བློ་སྣ་བསྒྱུར༔ ཆོས་ཀྱི་ཁ་འཛིན་ཕྱོགས་ལྷུང་གིས། སྡེ་དང་རིས་སུ་ཕྱེས་ནས་རྩོད༔ གསང་སྔགས་བསྟན་དང་བསྟན་འཛིན་སྡེ༔ ཟོལ་མེད་རྣམས་ལ་ལྷག་པར་སྡང་༔ རྒྱལ་བསྟན་རི་མོའི་མར་མེ་ཡང་༔ ཐབས་ཀྱིས་བསྣུབ་པར་བརྩོན་པ་ཡི༔ འགོང་པོ་ཁ་རྒྱལ་དུས་ཤིག་འབྱུང་༔ དེ་ཚེ་སེམས་བསྐྱེད་ལྡན་པ་ཡིས༔ ང་ཉིད་དྲག་པོའི་རྣལ་འབྱོར་གྱིས༔ ཕུང་སེལ་དམ་སྲི་བྱུར་སྲི་ཀུན༔ གཟིར་མནན་བསྲེག་པའི་ལས་སྦྱོར་བྱ༔

བདག་ཉིད་དབང་དྲག་ཐུགས་ཀ་ནས༔ རབ་འཕྲོས་འབར་བའི་འོད་ཟེར་གྱིས༔ འཁོར་གྱི་ལྷ་ཚོགས་ཐམས་ཅད་བསྐུལ༔ དེ་དག་རྣམས་ལས་རང་འདྲ་བའི༔ ཕོ་ཉ་སྟོང་ཁམས་གང་བར་འཕྲོས༔ མི་དང་མི་མིན་དྲེགས་པ་ཅན༔ ཀུན་གྱི་སེམས་རྒྱུད་དབང་མེད་བསྒྱུར༔ བདག་ལ་དད་ཅིང་རྗེས་སུ་ཞུགས༔ ཕྱིར་མི་ལྡོག་པའི་བརྟན་ཐོབ་བསམ་༔ རྩ་བའི་སྙིང་པོར་ཤམ་བུ་སྤེལ༔ ཧ་རི་ནི་ས་ར་ཙ་ཧྲིཿཡ་མ་ཧཱ་རཱ་ཛ་སརྦ་ཨ་ནྲྀ་ཏྲི་ཙིཏྟ་ཧྲཱིཾ་ཧྲཱིཾ་ཛཿཛཿ ཞེས་བཟླ་ཐུན་མཐར་དེ་རྣམས་ཀུན༔ འོད་དམར་ཚུལ་བསྡུས་རང་ལ་བསྟིམ༔ འཁོར་འདས་སྲོག་ལ་དབང་ཐོབ་བསྒོམ༔ སྟོང་ཉིད་ཟབ་མོའི་ཕྱག་རྒྱས་གདབ༔ དེ་ལྟར་རྒྱུན་དུ་བརྩོན་བྱས་ན༔ མི་དང་མི་མིན་སྐྱེ་འགྲོ་ཀུན༔ ཆོས་བཞིན་དབང་དུ་འདུ་བར་འགྱུར༔ ཡང་ཟབ་སྣང་བ་དབང་སྡུད་ཀྱི༔ ཙཀྲའི་རིམ་པ་འདི་ལྟ་སྟེ༔ དར་རམ་ཤོག་དམར་གང་རུང་ལ༔ འཁོར་ལོ་མུ་ཁྱུད་རིམ་བཞིན་བསྐོར༔ ལྟེ་བར་ཧཱུྃ་གི་ཞབས་ཀྱུའི་ནང་༔ ཨ་ཏྲི་ནྲི་གསུམ་བྲིས་པའི་མཐར༔ རྩ་སྔགས་ཤམ་བུ་ཅི་རིགས་

སྤེལ༔ དེ་རྒྱབ་འཁོར་ལོའི་ཕྱོགས་མཚམས་སུ༔ མཁའ་འགྲོ་གིང་བཞིའི་ས་བོན་དང་༔ རྩིབས་མཆན་རྣམས་ལ་ལས་སྔགས་བརྒྱན༔ ཨོཾ་ཙག་ཤུ་ཙེར་ལྡན་གུཾ༔ དེ་རྒྱབ་འདབ་བཞིར་རྒྱལ་ཆེན་བཞིའི༔ སྔགས་མཐར་རང་རང་སྤེལ་ཚིག་སྦྱར༔ དེ་རྒྱབ་སྣང་བ་དབང་སྡུད་སྔགས༔ ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་ཧ་རི་ནི་ས་ར་ཙ་ཧྲིཿཡ་མཧཱ་རཱ་ཛ་སྲབ་ཨ་ནྲྀ་ཏྲི་ཙིཏྟ་ཧྲཱིང་ཧྲཱིང་ཛཿཛཿ་མ་མ་དུང་དུང་༔ མ་མ་ཁ་ཤི་བཾ༔ སྲོག་རྩ་བྲིང་བྲིང་༔ ཡཾ་ཡཾ༔ མ་མ་པཱ་ཤྃ་ཀུ་རུ་ཛ༔ དེ་རྒྱབ་རླུང་གི་ཞགས་པས་བསྐོར༔ ལྕགས་ཀྱུ་[རྩྭ་ལྕགས་ཀྱུ་][མེ་ཏོག་གླང་སྣ་རྡོ་ཁབ་ལེན་]གསུམ་དང་བྱང་སེམས་གཉིས༔ [དཀར་དམར་] ཕོ་མོའི་འདོད་ཟིལ་ལན་ཚྭས་བྱུག༔ ལྷ་[དུང་]འདྲེ་[ཕ་ཝཾ་ལོང་བུ་]མི་[གཡུ་]གསུམ་བླ་རྡོ་ལ༔ རང་རང་[ལྷ་ལ་ཨ་][འདྲེ་ལ་ཏྲི་][མི་ལ་ནྲྀ་]སྲོག་ཡིག་བྲིས་པ་བཅས༔ ལྷན་ཅིག་རབ་ཏུ་གནས་པ་ཉིད༔ རང་གིས་བཅང་ངམ་གཟུངས་སུ་གཞུག༔ རླུང་ལ་བསྐོར་སོགས་སྐབས་ཐོབ་འཕྲུལ༔ ནན་ཏུར་ལས་ལ་མ་ལྟོས་པར༔ འཇམ་པོའི་སྦྱོར་བས་རྩུབ་པོ་ཡང་༔ སྐད་ཅིག་རང་དབང་བྱེད་པའི་ཐབས༔ ཚུལ་འདི་པདྨའི་ཁྱད་ཆོས་ཏེ༔

བསྟན་འཛིན་རྣམས་ཀྱིས་གཅེས་པར་ཟུངས༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ།། །།] ༁ྃ༔ [བླ་མ་དྲག་པོའི་ཕྲིན་ལས་དབང་གི་སྲེག་བླུགས་ཀྱི་མན་ངག་ཟབ་མོ་ཨྠྀི༔] དབང་དྲག་རྡོ་རྗེ་གྲོ་ལོད་ཀྱི༔ དབང་གི་སྦྱིན་སྲེག་བྱ་འདོད་ན༔ ལས་མཐུན་ཐབ་ཏུ་བུད་ཤིང་བརྩིགས༔ བསྲེག་རྫས་བསགས་ལ་བྱིན་གྱིས་བརླབ༔ སྨད་འཚོང་ལག་གི་མེ་སྦར་ཏེ༔ མེ་ཐབ་བསང་སྦྱང་སྟོང་པའི་ངང་༔ རང་མདུན་དབང་གི་ཐབ་ཁུང་ནི༔ ཚད་དང་མཚན་ཉིད་ཐམས་ཅད་ཀུན༔ ཡོངས་རྫོགས་འོད་དམར་འཁྲུགས་པའི་ཀློང་༔ མེ་ལྷ་ཆེ་མཆོག་གྲོ་བོ་ལོད༔ ཁྲོ་ཆགས་སྒེག་པའི་རྣམ་འགྱུར་ཅན༔ དབང་གི་གཟི་བྱིན་འབར་བར་བསྐྱེད༔ ཡེ་ཤེས་སྤྱན་དྲངས་དབྱེར་མེད་བསྟིམ༔ ལྗགས་ཉིད་རྡོ་རྗེ་རྩེ་གསུམ་པ༔ ཧཱུྃ་མཚན་འབར་བས་བསྲེག་བླུགས་ཀྱི༔ བདུད་རྩིའི་རྒྱུན་དྲངས་གསོལ་བར་བསམ༔ ཏིལ་མར་ལ་སོགས་རྫས་རྣམས་ཀུན༔ རྩ་བའི་སྔགས་ཀྱིས་ཕུལ་ནས་ཀྱང་༔ ལས་སྔགས་ཤམ་སྦྱར་འདོད་དོན་གསོལ༔ ཁྱད་པར་

དམིགས་བྱ་དབང་སྡུད་ན༔ ལིངྒ་མིང་རུས་རྫས་ལྡན་ལ༔ འགུགས་བསྟིམ་བསྡུ་བའི་དམིགས་གནད་བཅས༔ ལས་སྔགས་ཁོ་ནས་གྲངས་ལྡན་དབུལ༔ [རྩ་སྔགས་ཤམ་དུ།] ཆེ་གེ་མོ་པཱ་ཤཾ་ཀུ་རུ་ཧོཿ [མཆན།] མཐར་ནི་དམིགས་བྱ་རང་རིག་དང་༔ དབྱེར་མེད་སྟོང་སྲོག་གཅིག་ཏུ་བསྡུ༔ མེ་ལྷ་རང་དང་གཉིས་མེད་དང་༔ འཁོར་འདས་དབང་ཕྱུག་གྲོ་བོ་ལོད༔ ཡེ་ཡིན་ཆེན་པོར་ལ་བཟླས་པས༔ སེམས་ལྡན་འགྲོ་བ་སྨོས་ཅི་སྟེ༔ སེམས་མེད་བེམ་པོའང་དབང་དུ་འགྱུར༔ མན་ངག་གསང་བའི་མཐར་ཐུག་སྟེ༔ ལས་ཅན་རེ་འགའ་ཙམ་ལས་གཞན་༔ མང་དུ་སྤེལ་ན་རང་ཉིད་ཉམས༔ དེ་བས་གསང་ལ་སྤྱོད་ཤེས་བྱ༔ ས་མ་ཡ་གུཧྱ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ།། །།] ༁ྃ༔ [བླ་མ་དྲག་པོའི་ཕྲིན་ལས་དྲེགས་པ་སྡེ་བརྒྱད་ཀྱི་གསོལ་མཆོད་བསྐུལ་བྱང་ཟབ་མོ་ཨྠྀི༔] མཐུན་རྫས་ཤ་ཁྲག་གཏོར་མ་ནི༔ ཟག་མེད་བདུད་རྩིར་སྦར་བྱས་ཏེ༔ མགྲོན་རྣམས་སྐད་ཅིག་མདུན་དུ་བཀུག༔ རྩ་བའི་སྔགས་དང་གཟིར་སྔགས་ལ༔ ཨ་ཡ་མ་དུ་རུ་ཧ་ཤ་ན་བཛྲ་ས་མ་ཡ་ཛཿཛཿ ཞེས་བོས་ལྷགས་ཏེ་

བཀའ་ནོད་བསམ༔ ཧཱུྃ་ཛཿ ཁྲག་འཐུང་བཀའ་ཡི་ཕོ་ཉ་ཆེ༔ མཐུ་ཆེན་སྡེ་བརྒྱད་དྲེགས་པའི་ཚོགས༔ སྔོན་གྱི་ཁས་བླངས་མ་གཡེལ་བར༔ མ་ཐོགས་མྱུར་དུ་དམ་ལ་འདུ༔ དམ་ཉམས་བསྒྲལ་བའི་ཤ་ཁྲག་རུས༔ དོན་སྣོད་དབང་པོ་རྐང་ཀླད་ཚིལ༔ སྨན་རཀ་གཏོར་མའི་དགའ་སྟོན་ལ༔ རོལ་ཅིག་གསོལ་ལོ་ཁ་རཾ་ཁཱ་ཧི༔ ཤ་ལ་དགའ་བས་ཤ་ལ་ཟོ༔ ཤ་ཟན་རྐན་སྒྲ་ཏོག་ཅིང་རོལ༔ ཁྲག་ལ་དགའ་བས་ཁྲག་ལ་འཐུང་༔ ཁྲག་འཐུང་མིད་པ་ཁྱུར་གྱིས་རོལ༔ རུས་ལ་དགའ་བས་རུས་པ་མུར༔ རུས་མུར་སོ་སྒྲ་ཆེམ་ཆེམ་རོལ༔ བསྟབ་པ་བདག་གིས་མ་ནོར་གྱིས༔ བཞེས་པ་ཁྱེད་རྣམས་མ་ནོར་ཅིག༔ དགྱེས་ཤིང་ཚིམས་པར་རོལ་ནས་ཀྱང་༔ སངས་རྒྱས་བསྟན་པ་ཁྱོད་ཀྱིས་སྲུངས༔ དཀོན་མཆོག་དབུ་འཕང་ཁྱོད་ཀྱིས་བསྟོད༔ རྣལ་འབྱོར་སྐུ་དགྲ་ཁྱོད་ཀྱིས་སྒྲོལ༔ གལ་ཏེ་ཕྲིན་ལས་མི་སྒྲུབ་ན༔ དཔལ་གྱི་ལུང་ལས་འགལ་བའི་ཕྱིར༔ ཁྱེད་རྣམས་ཉམས་ཤིང་བརླག་པར་གྱུར༔ དེ་བས་དམ་ལས་མ་འདའ་བར༔ བཅོལ་བའི་ལས་འདི་མྱུར་དུ་གྱིས༔ དུས་ལ་བབ་བོ་ས་མ་ཡ༔ གཏོར་མ་བསྟབ་ཅིང་ཕྲིན་ལས་

བཅོལ༔ དེ་ཡིས་བཀའ་ཉན་ལས་བྱེད་འགྱུར༔ ཁྱད་པར་སྙིགས་དུས་ལོག་སྤྱོད་མཐུས༔ སྡེ་བརྒྱད་ཁེངས་ལོག་ཆོ་འཕྲུལ་གྱིས༔ གློ་བུར་ཆག་ཆེ་རྐྱེན་ངན་ན༔ གཏོར་མ་བུངས་བསྐྱེད་ནན་ཏན་བརྔན༔ འདི་ལྟར་བཟློག་བསྒྱུར་ཕྲིན་ལས་བསྐུལ༔ ཧཱུྃ༔ དབང་དྲག་བཀའ་ཡི་ཕོ་ཉ་ཆེ༔ སྲིད་པ་གསུམ་ལ་མངའ་དབང་བསྒྱུར༔ ལས་མཁན་དྲེགས་པ་སྡེ་བརྒྱད་ཚོགས༔ དེ་རིང་བཟློག་བསྒྱུར་ལས་ལ་ཆོས༔ ཨ་བྷྱོ༔ སྲོག་བདག་ཚངས་པ་དཀར་པོ་ནི༔ ལྷ་རྣམས་ཀུན་གྱི་རྗེ་བོ་ཡིན༔ སྤྲུལ་པ་རྒྱལ་འགོང་འབྱུང་པོ་འགྱེད༔ ཤ་ཁྲག་གཏོར་མ་འདི་བཞེས་ལ༔ དུས་འཁྲུགས་དམ་སྲིའི་ཆོ་འཕྲུལ་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ཡ་བྷྱོ༔ འཆི་བདག་ནག་པོ་ཁྲམ་ཐོགས་ནི༔ གཤིན་རྗེ་ཡོངས་ཀྱི་དེད་དཔོན་ཡིན༔ སྤྲུལ་པ་བདུད་དང་མོན་དམག་འགྱེད༔ ཤ་ཁྲག་གཏོར་མ་འདི་བཞེས་ལ༔ ནད་མཚོན་གོད་ཡམས་ལོ་ཉེས་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ མ་བྷྱོ༔ འབྱུང་བ་ལྔ་ཡི་རྒྱལ་མོ་ནི༔ སྣང་སྲིད་མ་མོའི་དེད་དཔོན་ཡིན༔ སྤྲུལ་པ་བུད་མེད་འབུམ་སྡེ་འགྱེད༔ ཤ་ཁྲག་གཏོར་མ༴ ནད་

རིམས་བསེན་མོའི་གནོད་གདུག་སོགས༔ མི་མཐུན་ཕྱོགས་ཀུན་དགྲ་ལ༴ དུ་བྷྱོ༔ ནག་པོ་མེ་ཡི་ཁ་རླངས་ཅན༔ ཡ་བདུད་ཀུན་གྱི་དམག་དཔོན་ཡིན༔ སྤྲུལ་པ་ཞགས་ཐོགས་ཟོར་ཐོགས་འགྱེད༔ ཤ་ཁྲག་གཏོར་མ༴ བློ་འགྱུར་བགེགས་ཀྱི་ཆོ་འཕྲུལ་སོགས༔ མི་མཐུན་ཕྱོགས་ཀུན་དགྲ༴ རུ་བྷྱོ༔ ཡམ་ཤུད་དམར་པོ་སྲོག་གི་གཤེད༔ བཙན་རྣམས་ཡོངས་ཀྱི་སྡེ་དཔོན་ཡིན༔ སྤྲུལ་པ་རྟ་ནག་འབུམ་སྡེ་འགྱེད༔ ཤ་ཁྲག་གཏོར་མའི་འདི༴ གློ་བུར་གྲི་ཐབ་གཟེར་ནད་སོགས༔ མི་མཐུན་ཕྱོགས་ཀུན་དགྲ༴ ཙ་བྷྱོ༔ སྲོག་བདག་སྲིད་པ་ལི་འབྱིན་ཧར༔ རྒྱལ་པོ་ཡོངས་ཀྱི་སྡེ་དཔོན་ཡིན༔ སྤྲུལ་པ་འོད་དང་འབག་སེང་འགྱེད༔ ཤ་ཁྲག་གཏོར་མ་འདི༴ བརྒྱལ་ནད་སྨྱོ་འབོག་འཐབ་འཁོན་སོགས༔ མི་མཐུན་ཕྱོགས་ཀུན༴ ཤ་བྷྱོ༔ གང་བ་བཟང་པོ་རལ་པ་ཅན༔ གནོད་སྦྱིན་ཡོངས་ཀྱི་སྡེ་དཔོན་ཡིན༔ སྤྲུལ་པ་གནོད་འབྱིན་འབུམ་སྡེ་འགྱེད༔ ཤ་ཁྲག་གཏོར་མ༴ ཐོག་སེར་ཆོ་འཕྲུལ་གདོང་གཟེར་སོགས༔ མི་མཐུན་ཕྱོགས་ཀུན་དགྲ༴ ན་བྷྱོ༔ ཀླུ་བདུད་མུན་པ་ནག་པོ་ནི༔ ཀླུ་རྣམས་ཡོངས་ཀྱི་དེད་དཔོན་ཡིན༔ སྤྲུལ་པ་ཀླུ་གཉན་དམག་

དཔུང་འགྱེད༔ ཤ་ཁྲག་གཏོར་མ་འདི༴ དྲེགས་གྲུམ་མཛེ་ཤུ་ཕོལ་མིག་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ཧཱུྃ་བྷྱོ༔ སྲིད་པ་གསུམ་ལ་དབང་བྱེད་ཅིང་༔ བར་སྣང་ཁམས་ནས་རྩལ་འབྱིན་པའི༔ དྲེགས་པ་ལྷ་སྲིན་སྡེ་བརྒྱད་ཚོགས༔ སྤྲུལ་པ་ཡང་སྤྲུལ་ཕོ་ཉར་བཅས༔ ཤ་ཁྲག་གཏོར་མ་འདི་བཞེས་ལ༔ ཆག་ཆེ་ཉམ་ང་བྱད་ཕུར་སོགས༔ མི་མཐུན་གནོད་པའི་ཕྱོགས་རྣམས་ཀུན༔ ཟློག་སྒྱུར་དྲག་པོའི་ཕྲིན་ལས་མཛོད༔ དུས་ལ་བབ་བོ་ས་མ་ཡ༔ དམིགས་པས་གཟིར་ཞིང་གནད་ནས་བསྐུལ༔ གཏོར་མ་དགྲ་བོའི་ཕྱོགས་འཕངས་པས༔ གནོད་པ་ཐམས་ཅད་ཞི་ཞིང་ཟློག༔ བརྩམས་པའི་དོན་ཀུན་མྱུར་འགྲུབ་འགྱུར༔ ས་མ་ཡ༔ [འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱི་ཟབ་མོ་དགོངས་པའི་གཏེར་གྱི་ཆོས་སྡེ་ཡང་དག་པའོ།། །།]

བདུད་འཇོམས་ཁྲག་འཐུང་པདྨའི་སྲོག་སྒྲུབ་ཟབ་མོ།

༁ྃ༔ བདུད་འཇོམས་ཁྲག་འཐུང་པདྨའི་སྲོག་སྒྲུབ་ཟབ་མོ་ཨྠྀི༔

[གང་ཞིག་དངོས་གྲུབ་དོན་གཉེར་ལས་ཅན་རྣམས༔ གསང་སྔགས་ཐེག་པའི་ཡང་ཞུན་བཅུད་དྲིལ་བ༔ བདག་ཉིད་བླ་མ་ཡི་དམ་དབྱེར་མེད་དུ༔ སྒྲུབ་པའི་མན་ངག་འདི་ཀོ་སྙིང་ལ་ཕུར༔ ཕྱི་ལྟར་སྒྲུབ་ཕུར་ཚད་ལྡན་རྟེན་དུ་བཟུང་༔ ནང་ལྟར་རང་ལུས་ལྷུན་གྲུབ་ད་ལར་རྫོགས༔ གསང་བ་མ་བཙལ་ཡེ་རྫོགས་རིག་པའི་དལ༔ སྣང་སྲིད་གཞིར་བཞེངས་འཁོར་ལོ་རང་གསལ་གདབ༔ ས་མ་ཡ༔] ན་མོ༔ རང་རིག་སྐྱེ་མེད་དོན་གྱི་ཁྲག་འཐུང་ཆེར༔ མངོན་སུམ་རང་ངོ་ཤེས་པས་སྐྱབས་སུ་བསྙེན༔ མ་རྟོགས་གཉིས་སྣང་འགྲོ་བ་སྒྲོལ་བའི་ཕྱིར༔ སྒོ་གསུམ་རྡོ་རྗེའི་གྲོང་ཁྱེར་ལ་འཇུག་བྱ༔ ཧཱུྃ༔ རིག་སྟོང་ཁྲོ་རྒྱལ་འབར་བའི་

བཀའ་བྱུང་གིས༔ གློ་བུར་འཁྲུལ་སྣང་རྣམ་རྟོག་བགེགས་ཚོགས་རྣམས༔ ཆོས་ཉིད་དག་མཉམ་རོལ་པའི་ཕ་མཐར་དེངས༔ འདས་ན་ཆོས་ཟད་ཀློང་དུ་བརླག་ཏ་རེ༔ ཧཱུྃ༔ འཁོར་འདས་དབྱེར་མེད་བྱང་ཆུབ་སེམས་ཀྱི་ཀློང་༔ མཉམ་ཉིད་བདེ་ཆེན་ཡེ་ཤེས་རྡོ་རྗེའི་གུར༔ སྟོང་ཆེན་ནམ་མཁའི་སྙིང་པོར་དཀྲིག་པ་ལ༔ གཉིས་སྣང་ལོག་འདྲེན་རྒྱུ་བའི་གོ་སྐབས་མེད༔ ངྷརྨ་ངྷ་ཏུ་རཀྵ་ཨ༔ ཧཱུྃ༔ རང་བྱུང་སྣོད་བཅུད་སྣང་བའི་བཀོད་པ་ལ༔ དག་པ་རབ་འབྱམས་ཆེན་པོའི་གཟི་བྱིན་ཕོབ༔ ཡུལ་དྲུག་འདོད་ཡོན་རིན་ཆེན་སེམས་ཀྱི་རྒྱན༔ ཟག་མེད་

ཀུན་བཟང་མཆོད་པའི་སྤྲིན་དུ་ཤར༔ བཛྲ་ཨ་བེ་ཤ་ཡ་ཨ༔ སརྦ་པཱུ་ཛ་བཛྲ་སྥ་ར་ཎ་ཁཾ༔ ཧཱུྃ༔ ཀུན་ཁྱབ་ཀ་དག་ཡེ་གྲོལ་སྟོང་དབྱིངས་ལས༔ འགག་མེད་ལྷུན་གྲུབ་སྒྱུ་འཕྲུལ་སྙིང་རྗེའི་རྩལ༔ ཟུང་འཇུག་རང་བྱུང་རིག་པ་ཧཱུྃ་དམར་པོ༔ མཁའ་ལ་སྐར་ཆེན་ལྷགས་བཞིན་གཟི་འོད་འབར༔ དེ་ལས་འོད་འཕྲོས་སྣོད་བཅུད་ཞེན་རྟོག་སྦྱངསཿ གནས་ཡུལ་དུར་ཁྲོད་རོལ་པའི་ཕོ་བྲང་ཆེ༔ འཇིགས་རུང་དྲག་པོའི་མཚན་ཉིད་རབ་རྫོགས་དབུས༔ པད་ཉིའི་གདན་ལ་རྒྱུ་ཡི་འཕྲོ་འདུ་ལས༔ རང་ཉིད་བདུད་འཇོམས་རྡོ་རྗེ་གྲོ་ལོད་རྩལ༔ སྐུ་མདོག་སྨུག་ནག་གར་དགུའི་ཉམས་འགྱུར་ཅན༔ གཏུམ་དྲག་མི་བཟད་སྡང་མིག་གློག་ལྟར་འཁྱུག༔ སྨར་སྨིན་བསྐལ་མེའི་ཚྭ་ཚྭ་འོད་དུ་འཕྲོ༔ ཁྲོ་གཉེར་ཤངས་ནས་སྲིད་པའི་འཐོར་རླུང་འབྱིན༔ ཨམ་གཙིགས་ཧཱུྃ་ཕེཾ་ང་རོ་འབྲུག་སྟོང་ལྡིར༔ དབུ་སྐྲ་དམར་སེར་གཡས་འཁྱིལ་དུང་ལུང་འཁྲོལ༔ ཕྱག་གཡས་གནམ་ལྕགས་རྡོ་རྗེ་ནམ་མཁར་འཕྱར༔ གཡོན་པས་ཕུར་བུ་བགེགས་ཀྱི་སྙིང་ལ་གཟིར༔ སྡིགས་མཛུབ་རྩེ་ནས་ལྕགས་སྡིག་ཁྲ་ཐབས་འགྱེད༔ གསང་གོས་ཕོད་ཀ་ཆོས་གོས་

སག་ལྷྭམ་གསོལ༔ ཁྲག་འཛག་མགོ་ཕྲེང་དོ་ཤལ་སེ་རལ་འཕྱང་༔ སྒྲོལ་ཡུམ་ཟ་བྱེད་སྟག་མོ་གྲུས་མ་ནི༔ སྡེར་མོས་རྒྱལ་བསེན་སྙིང་རྩ་འདྲེན་པའི་སྟེང་༔ གྱད་ཀྱི་འདོར་སྟབས་འགྱིང་ལོག་འཆམས་སྟངས་བཅས༔ བསྐལ་མེ་འུར་འུར་འབར་བའི་ཀློང་ན་རོལ༔ སྤྱི་བོར་མེ་ཁྱུང་སྤུ་གྲིའི་སྒྲོ་གཤོག་ཅན༔ རྔམས་བརྗིད་འཕུར་ལྡིང་ཁྱུང་གི་ཚྭ་ཚྭ་འཕྲོ༔ རིགས་ཀྱི་བདག་པོ་སྣང་མཐའ་ཚེ་དཔག་མེད༔ གསང་ཡེ་ཡུམ་སྦྱོར་འཇའ་ཟེར་ཀློང་དུ་བརྗིད༔ འཁོར་དུ་རིགས་ཀྱི་ཡུམ་བཞི་གིང་སྒོ་སྐྱོང་། དཔའ་བོ་མཁའ་འགྲོ་ཆོས་སྐྱོང་སྤྲིན་ལྟར་གཏིབས༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ གནས་གསུམ་འོད་ཀྱིས་རང་བཞིན་གནས་མཆོག་ནས༔ ཡེ་ཤེས་སེམས་དཔའ་དཔག་མེད་སྤྱན་དྲངས་བསྟིམ༔ ཧཱུྃ༔ རང་སྣང་དག་པ་འོག་མིན་དཔལ་གྱི་རི༔ ལོག་རྟོག་སྲིན་པོ་འདུལ་བའི་རྒྱལ་ཁབ་ནས༔ མཧཱ་གུ་རུ་བདུད་འཇོམས་གྲོ་བོ་ལོད༔ རིག་འཛིན་མཁའ་འགྲོ་རྒྱ་མཚོའི་ཚོགས་དང་བཅས༔ བཞེངས་ཤིག་སྒྲུབ་པའི་གནས་འདིར་གཤེགས་

ནས་ཀྱང་༔ བར་ཆད་ཀུན་སོལ་མཆོག་ཐུན་དངོས་གྲུབ་སྩོལ༔ ཨེ་ཨཱ་རལླི་ཧྲཱིཾ་ཧྲཱིཾ་ཕེཾ་ཕེཾ་ཛ་ཛ༔ ཧཱུྃ༔ ཕུང་ཁམས་སྣོད་བཅུད་དམ་ཚིག་ཕྱག་རྒྱ་དང་༔ ཡོངས་གྲུབ་ཡེ་ཤེས་རྡོ་རྗེ་དབྱེར་མེད་རོལ༔ གང་འདུལ་ཐབས་མཁས་རོལ་པའི་སྒྱུ་འཕྲུལ་ཆེར༔ ངོ་མཚར་བརྡ་དང་གར་གྱིས་མཚོན་ཕྱག་འཚལ་༔ བཛྲ་ས་མ་ཡ་ཏིཥྛ་ལྷན༔ ན་མོ་ཧོ༔ ཧཱུྃ༔ ཀུན་འབྱུང་སེམས་ཉིད་ནམ་མཁའི་ཆོ་འཕྲུལ་ལས༔ ཡོངས་ཤར་ཕྱི་ནང་གསང་མཆོད་འདོད་ཡོན་སྤྲིན༔ དུར་ཁྲོད་དྲག་པོའི་དམ་རྫས་རྒྱ་ཆེན་པོ༔ ཁྲག་འཐུང་དགྱེས་པའི་དམ་ཚིག་མཆོག་ཏུ་རོལ༔ ཨོཾ་བཛྲ་ཨརྒྷཾ༔ པཱདྱཾ་[སོགས།] ཤཔྡ་རཱུ་པ་[ནས།] སྤརྴེ་མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིཾ་ཏ་ཏ་ན་ག་ན་ངྷརྨ་ངྷཱ་ཏུ་པཱུ་ཛ་ཧོ༔ ཧཱུྃ༔ འབར་བའི་སྐུ་ནི་གཏུམ་དྲག་ཉམས་བརྒྱས་སྒེག༔ རྡོ་རྗེའི་གད་རྒྱངས་ང་རོས་ས་གསུམ་གཡོ༔ ཟུང་འཇུག་ཐུགས་མཆོག་ཡེ་ཤེས་ཐིག་ལེར་འཁྱིལ༔ བདུད་འཇོམས་ལྷག་པའི་ལྷ་ལ་ཕྱག་འཚལ་བསྟོད༔ ཐུགས་ཀར་ཉི་སྟེང་ཕ་ལམ་རྡོ་རྗེའི་ལྟེར༔ སྲོག་གི་སྙིང་པོ་ཧཱུྃ་ཡིག་ལྕགས་སྲེག་མདོག༔ ཧཱུྃ་ལས་ཧཱུྃ་འཕྲོས་སྟོང་ཁམས་ཧཱུྃ་

གིས་གང་༔ སྣང་བའི་དངོས་ཀུན་གསལ་བརྟན་ཧཱུྃ་དུ་གྱུར༔ གྲགས་པའི་སྒྲ་སྐད་ཧཱུྃ་གི་རང་སྒྲར་ལྡིར་༔ དྲན་རིག་ཟང་ཐལ་གཉུག་མའི་ཧེ་རུ་ཀ༔ སྲིད་ཞིའི་ཁྱབ་བདག་ཆེན་པོར་དབང་རྫོགས་བསམ༔ ཧཱུྃ་གི་བཟླས་པ་ཆུ་བོའི་རྒྱུན་བཞིན་བརྩོན༔ སླར་ཡང་ཧཱུྃ་མཐར་སྔགས་ཕྲེང་རང་སྒྲར་བཅས༔ མགལ་མེའི་འཁོར་ལོ་བཞིན་དུ་གཡས་སུ་འཁོར༔ འོད་འཕྲོས་རྒྱལ་མཆོད་འགྲོ་བའི་སྒྲིབ་པ་བསལ༔ སྡེ་བརྒྱད་དབང་བསྡུས་ལོག་འདྲེན་ཚར་ཐག་བཅད༔ འཁོར་འདས་དྭངས་བཅུད་སླར་འདུས་ཧཱུྃ་ལ་ཐིམ༔ རྒྱལ་ཀུན་མཐུ་སྟོབས་ནུས་པ་ཡོངས་རྫོགས་བསམ༔ ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིངྔྷི་ཧཱུྃ་ཧཱུྃ༔ བསྙེན་པ་ཐེམ་ནས་གཟིར་སྔགས་ཤམ་བུ་གདགས༔ ཨོཾ་བཛྲ་སརྦ་དུཥྜན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ བཟླས་པའི་གྲངས་ཚད་མཚན་མ་དག་དང་བསྟུན༔ རྟགས་མཐོང་ཞི་སོགས་གང་འདོད་ལས་ལ་སྦྱར༔ ཁྱད་པར་ཕྲིན་ལས་མན་ངག་ཞལ་ལས་ཤེས༔ ཐུན་མཚམས་སྤྱི་དང་དུས་བཟང་ཚེས་བཅུའི་སྐབས༔ བསོད་ནམས་སྤེལ་ཕྱིར་ཚོགས་ཀྱི་མཆོད་པ་བྱ༔ རཾ་ཡཾ་ཁཾ༔ ཡེ་ཤེས་རིག་རྩལ་མེ་རླུང་ཆུ་བྱུང་བས༔ ཚོགས་ཀྱི་དངོས་

འཛིན་ཉེས་སྐྱོན་བསྲེག་གཏོར་བཀྲུས༔ བྷནྡྷའི་སྣོད་དུ་ཚོགས་རྫས་ལོངས་སྤྱོད་གཏེར༔ འབྲུ་གསུམ་འོད་ཀྱིས་ཟག་མེད་བདུད་རྩིར་སྤེལ༔ ཨོཾ་ཨཱཿཧཱུྃ༔ ཧཱུྃ༔ དབང་དྲག་རོལ་པའི་དུར་ཁྲོད་ཆེན་པོ་ནས༔ ཆེ་བའི་ཆེ་མཆོག་བདུད་འཇོམས་གྲོ་བོ་ལོད༔ རྩ་གསུམ་དཔའ་བོ་མཁའ་འགྲོའི་འཁོར་དང་བཅས༔ གནས་འདིར་ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛ༔ ཧོཿ ཤ་ལྔ་བདུད་རྩི་རིགས་ལྔ་ཡེ་ཤེས་ལྔ༔ ཟག་མེད་འདོད་ཡོན་དམ་ཚིག་རྫས་མཆོག་འདི༔ བླ་མ་ཡི་དམ་མཁའ་འགྲོའི་ཚོགས་ལ་འབུལ༔ དགྱེས་པར་བཞེས་ནས་དབང་དང་དངོས་གྲུབ་སྩོལ༔ མཧཱ་གྷ་ཎ་ཙཀྲ་པཱུ་ཛ་ཧོཿ ཧོཿ ཚེ་རབས་བསགས་པའི་སྡིག་སྒྲིབ་ཉེས་ལྟུང་དང་༔ ཁྱད་པར་རིག་འཛིན་སྔགས་ཀྱི་དམ་ཚིག་ལས༔ འགལ་འཁྲུལ་ཉམས་ཆག་ནོངས་པ་ཅི་མཆིས་པས༔ འདོད་ཡོན་ཚོགས་ཀྱི་མཆོད་པས་བསྐང་ཞིང་བཤགས༔ བཛྲ་མ་ཡ་ཤུངྔྷེ་ཨ༔ ཧཱུྃ༔ གཉིས་སྣང་ཀུན་ཏུ་རྟོག་པའི་དགྲ་དང་བགེགས༔ བདག་མེད་ཤེས་རབ་རིག་པའི་མཚོན་གྱིས་བསྒྲལ༔ དྭངས་མ་མི་ཤིགས་བདེ་

ཆེན་ལྷུམས་སུ་སྦྱོར༔ སྙིགས་མ་ཁྲག་འཐུང་དགྱེས་པའི་སྟོན་མོར་བསྟབ༔ ནྲྀ་ཏྲི་ཤ་ཏྲཱུྃ་མཱ་ར་ཡ་རྦད་ཁ་རཾ་ཁཱ་ཧི༔ ཕེཾ༔ དཀྱིལ་འཁོར་ཆེན་པོའི་མུ་རན་ལ་གནས་ཤིང་༔ དམ་ཚིག་ཇི་བཞིན་ཕྲིན་ལས་སྒྲུབ་མཛད་པའི༔ དཔལ་གྱི་ཕོ་ཉ་ལྷག་སྐྱོང་སྲུང་མ་རྣམས༔ ལྷག་གཏོར་འདི་བཞེས་བཅོལ་བའི་ཕྲིན་ལས་མཛོད༔ ཨུ་ཙྪིཥྚ་བ་ལིཾ་ཏ་ཁཱ་ཧིཿ ཧཱུྃ༔ སྔོན་ཚེ་བར་དང་བསྐལ་པ་ཐ་མའི་དུས༔ བརྒྱུད་གསུམ་རིག་འཛིན་སྤྱན་སྔར་དམ་མནོས་པའི༔ བཀའ་ཡི་སྲུང་མ་དམ་ཅན་གཏེར་སྲུང་རྣམས༔ གཏོར་མ་འདི་ལོངས་ལས་བཞིའི་ཕྲིན་ལས་མཛོད༔ ཁྱད་པར་པདྨའི་བཀའ་ཉན་དམ་ཚིག་ཅན༔ བརྟན་མ་བཅུ་གཉིས་སྨན་ཕྲན་འབུམ་དང་བཅས༔ འདིར་སྤྱོན་བཤལ་ཚུལ་གཏོར་མ་འདི་བཞེས་ལ༔ མཆོག་གསང་བསྟན་པ་རྒྱས་པའི་སྡོང་གྲོགས་མཛོད༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧི༔ ཧཱུྃ༔ ཁམས་གསུམ་ཐར་མེད་ཨེ་ཡི་ཁང་སྒྲོམ་དུ༔ མ་རིག་ལོག་འདྲེན་དམ་སྲི་འབྱུང་པོ་བྲུབ༔ དབང་ཆེན་ཁྲོ་ཚོགས་འབར་བའི་བྲོ་ཡིས་གཟིར༔ ནམ་ཡང་ལྡང་མེད་

མཐར་མནན་ཆོ་ག་རྫོགས༔ ཨོཾ་ཨཱཿཧཱུྃ་ལཾ་སྟྭམྔྷ་ཡ་ནན༔ ཧཱུྃ༔ ཧེ་རུ་ཀ་དཔལ་རྩ་བ་གསུམ་གྱི་བདག༔ རྩེ་གཅིག་སྒྲུབ་པའི་རྣལ་འབྱོར་བདག་ལ་དགོངས༔ རང་བྱུང་སྐུ་གསུང་ཐུགས་ཀྱི་དཀྱིལ་འཁོར་ནས༔ བྱིན་རླབས་དབང་དང་དངོས་གྲུབ་འདིར་རྩོལ་ཅིག༔ ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧོ༔ བསྐྱེད་པའི་སྣང་ཆ་མི་དམིགས་ཆོས་ཀྱི་དབྱིངས༔ སྨྲ་བསམ་བརྗོད་པ་བྲལ་བའི་ངང་དུ་བཞག༔ སྟོང་པའི་རང་རྩལ་འགག་མེད་ལྷའི་དཀྱིལ་འཁོར༔ སྣང་གྲགས་རྡོ་རྗེ་གསུམ་གྱི་ཕྱག་རྒྱས་སད༔ བདག་གིས་བླ་མ་དྲག་པོའི་དཀྱིལ་འཁོར་དུ༔ བསྙེན་སྒྲུབ་ཕྲིན་ལས་དགེ་ཚོགས་སྤེལ་བའི་མཐུས༔ འགྲོ་ཀུན་བདུད་བཞིའི་གཡུལ་ལས་རྣམ་རྒྱལ་ཏེ༔ བདུད་འཇོམས་དཔའ་བོའི་གོ་འཕང་མྱུར་འཐོབ་ཤོག༔ ཡེ་ཤེས་དབྱིངས་ལས་རྡོ་རྗེའི་སྐུར་བཞེངས་པ༔ བླ་མ་རྩ་གསུམ་འདུས་པའི་ལྷ་ཚོགས་ཀྱིས༔ དེང་འདིར་མི་མཐུན་རྒུད་པ་ཀུན་ཞི་ནས༔ རྟག་ཏུ་དཔལ་གནས་བཀྲ་ཤིས་བདེ་ལེགས་སྩོལ༔ འདིས་ནི་རྒྱལ་འགོང་འབྱུང་པོས་ཉེ་མི་ནུས༔ འབར་བ་གསུམ་དང་འདུ་བའི་དངོས་གྲུབ་འབྱུང་༔ བརྩོན་པས་ཚུལ་བཞིན་ཉམས་སུ་སུས་བླངས་པ༔ ཐོད་ཕྲེང་རྩལ་དང་སྐལ་པ་མཉམ་པར་ངེས༔ ས་མ་ཡ༔ མན་ངག་སྙིང་པོ་རྫོགས་པའི་རིམ་པ་ནི༔ རླུང་རོ་བསལ་ཤིང་ཤེས་པ་རྣལ་དུ་ཕབ༔ གཟུང་འཛིན་

རྟོག་པས་མ་བསླད་གཉུག་མའི་གཤིས༔ ད་ལྟའི་ཤེས་པ་གསལ་རིག་རྗེན་པ་འདི༔ ཀུན་བཟང་པདྨ་འབྱུང་གནས་དགོངས་པ་སྟེ༔ ཡེ་གནས་དོན་གྱི་བདུད་འཇོམས་དྲག་པོ་རྩལ༔ གཞན་དུ་མི་འཚོལ་རང་རིག་འདི་ཀའོ༔ ངོ་ཤེས་ཐག་བཅད་གདིང་བཅའ་རང་བབས་སུ༔ མཉམ་པར་བཞག་ལ་ཚོགས་དྲུག་ལྷུག་པར་བོར༔ གང་ཤར་རང་གྲོལ་སྒྱུ་མར་ལ་བཟླས་པས༔ ཆོས་ཟད་གདོད་མའི་ས་ལ་བྱང་ཆུབ་འགྱུར༔ ས་མ་ཡ༔ སྨིན་བྱེད་སྙིང་པོ་གཏོར་མའི་དབང་བསྐུར་ནི༔ དཔལ་གཏོར་ལྷ་དང་དབྱེར་མེད་ནུས་ལྡན་བསྒྲུབ༔ སློབ་བུའི་བྱུར་བསལ་རྒྱུད་སྦྱང་བྱིན་དབབ་སྟེ༔ ནུས་པ་བརྟན་ཕྱིར་གཏོར་མ་གནས་བཞིར་བཞག༔ ཧཱུྃ༔ འཁོར་འདས་སྤྱི་དཔལ་བདུད་འཇོམས་གྲོ་བོ་ལོད༔ རྩ་གསུམ་རབ་འབྱམས་སྐུ་གསུང་ཐུགས་ཡོན་ཏན༔ ཕྲིན་ལས་འདུས་པའི་ངོ་བོ་ལྷུན་གྱིས་གྲུབ༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ སྒོ་གསུམ་སྡིག་སྒྲིབ་བག་ཆགས་ཀུན་སྦྱངས་ཏེ༔ སྐུ་བཞིའི་ཡེ་ཤེས་ཡོངས་རྫོགས་དབང་ཆེན་ཐོབ༔ བླ་མ་དྲག་པོ་རྩལ་དང་དབྱེར་མེད་ཤོག༔ ཀཱ་ཡ་ཝཱ་ཀ་ཙིཏྟ་སརྦ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ གཏོར་མའི་ལྷ་ཉིད་འོད་ཞུ་སློབ་མར་བསྟིམ༔ གཏོར་ཟན་བདུད་རྩི་དངོས་གྲུབ་ཚུལ་དུ་སྦྱིན༔ དམ་ཚིག་གཉེར་གཏད་བུས་ཀྱང་དམ་བཅའ་བླང་༔ དེས་ནི་ཕྱི་ནང་བར་ཆད་གེགས་གདོན་ཞི༔ རྒྱུད་སྨིན་ནུས་བསྐྱེད་ལམ་ལ་སློབ་པར་དབང་༔ རྩེ་གཅིག་ཡི་

དམ་འཆའ་བའི་སྐལ་ལྡན་ན༔ རིག་པ་འཛིན་པའི་དངོས་གྲུབ་མཆོག་ཐོབ་འགྱུར༔ ས་མ་ཡ༔ སྙིགས་མའི་དུས་སུ་ཆོས་དང་གང་ཟག་འགལཿ མི་རུང་སྣ་དགུ་སྤྱོད་པའི་སྐབས་ཤར་ཚེ༔ དམ་སྲི་འགོང་པོའི་ཚ་ངར་རླུང་ལྟར་འཚུབས༔ ཡི་དམ་གཞན་གྱི་ནུས་པ་རྒྱང་རེ་རིང་༔ དེ་དུས་བདག་ཉིད་ཕྲིན་ལས་ལྷག་པར་མྱུར༔ འོན་ཀྱང་ང་ལ་མོས་པའི་མི་རེ་དཀོན༔ གསོལ་བ་ཐོབ་དང་པདྨས་བསླུ་རེ་ཀན༔ དད་པ་ཅན་ལ་པད་འབྱུང་འདུ་འབྲལ་མེད༔ ཐེ་ཚོམ་མེད་ན་དངོས་གྲུབ་ངས་པར་འབྱུང་༔ ཐུགས་ལ་འདོག་གོ་ལས་ཅན་སྙིང་གི་བུ༔ དུས་ལ་མ་བབ་ཙིཏྟར་གུ་ཧྱ་རྒྱ༔ ནམ་ཞིག་རྒྱལ་བསྟན་དགོང་ཁའི་དམར་ཐག་འདྲ༔ ལས་འབྲས་ཁྱད་གསོད་ལུགས་གཉིས་བཅའ་ཁྲིམས་ཞིག༔ ཆོས་མིན་ཆོས་རྫུས་ཆོས་མཐུན་ཉིན་སྐར་ཙམ༔ འབྱུང་བཞི་གཡོ་འཁྲུགས་སྔར་མེད་ཐན་རྟགས་མང་༔ མི་རྣམས་བློ་འགྱུར་བློ་རྩེ་འགོང་པོར་གཏོད༔ བོད་ཁམས་རུ་བཞི་མཐའ་མིས་བྲན་དུ་བཀོལ༔ ཕྱི་ཟིང་ནང་ཟིང་སྐད་ཅིག་བག་མི་ཕེབས༔ ཁྠཾ༔ སྐྱེ་འགྲོ་ཕལ་ཆེར་དུཿཁའི་འདམ་དུ་ཚུད༔ ལས་ཀྱི་ལ་ཡོག་འཁོར་བས་བཟློག་ཐབས་དཀའ༔ འོན་ཀྱང་དེ་དུས་ང་སྤྲུལ་ལས་ཅན་བུས༔ སྙིང་སྟོབས་ཕྱུང་ལ་ང་ཡི་ལུང་བཞིན་བསྒྲུབ༔ ཕྱི་ནང་རིམ་གྲོའི་རྟེན་འབྲེལ་མ་འཆོལ་ན༔ དུས་ཀྱི་བསྐལ་ངན་དྲུག་ཅུའི་བར་དུ་བསྲིང་༔ ལུང་བཞིན་མ་འགྲུབ་ལས་ཕྲན་ཐོར་བུ་ཙམ༔ བསྒྲུབ་པར་ནུས་ཀྱང་ཡུལ་ཕྱོགས་ཁོལ་བུར་བདེ༔ ཆེ་རྒུའི་སྙིང་ལ་སྡུག་འདྲེ་དངོས་ཞུགས་

པས༔ མཐུན་རྐྱེན་བས་ཀྱང་འགལ་རྐྱེན་སྒྲུབ་པ་མང་༔ མི་དང་མི་མིན་དམ་སྲིའི་ཆོ་འཕྲུལ་གྱིས༔ ང་སྤྲུལ་སྐྱེས་བུར་ལོག་ལྟའི་འབར་ཤ་ལྡིར༔ ཆེ་སྟེ་ཚེ་སྲོག་ཆུང་སྟེ་ཕྱིན་ལས་ལ༔ གློ་བུར་ཧུར་ཐུམ་ཅི་མི་འདོད་པ་གཏོང་༔ གང་ཡང་དགའ་སྡུག་རེ་དོགས་འཁུ་འཁྲིགས་སྤོངས༔ གཞན་ཕན་སེམས་བསྐྱེད་གོ་ཆ་བརྟན་པོ་བགོས༔ ཁྱད་པར་བདག་ཉིད་པདྨ་ཁྲག་འཐུང་གི༔ ཏིང་འཛིན་ཟབ་མོ་སྲོག་གི་གཏའ་རུ་ཟུངས༔ འབྲུ་གཅིག་སྙིང་པོ་ཁོངས་པའི་དབུགས་བཞིན་སྒྲོངས༔ མཁའ་འགྲོ་ཆོས་སྐྱོང་གྲོགས་ཀྱི་མཆོག་ཏུ་བརྟེན༔ གནས་གཅིག་མ་སྡོད་རྒྱལ་ཁམས་ཕྱོགས་མེད་འགྲིམ༔ བག་ཡངས་ངང་ནས་བློ་བདེ་རྒྱུན་དུ་སྐྱོངས༔ དེས་ནི་ཕྱི་ནང་འགལ་རྐྱེན་ངང་གིས་ཞི༔ ཚེ་ཡི་འཕྲང་སྒྲོལ་དོན་གཉིས་ལྷུན་གྱིས་འགྲུབ༔ སྐབས་སུ་ད་ལྟའི་ངང་ཚུལ་འལ་འོལ་དྲན༔ དེ་ཚེ་གདུང་ཤུགས་བསྐྱེད་ལ་གསོལ་བ་ཐོབ༔ དངོས་ཉམས་རྨི་ལམ་དག་ཏུ་བྱིན་རློབ་ངེས༔ པདྨའི་སྲོག་སྒྲུབ་ཡང་ཟབ་སྙིང་པོ་འདི༔ སྙིགས་དུས་རྒྱལ་འགོང་གཉེན་པོ་གཅིག་ཆོག་སྟེ༔ ཤིན་ཏུ་ཟབ་ཕྱིར་རང་ཉམས་གསང་བས་ལོངས༔ བཅུ་ཕྲག་ལྔ་ཡི་ཚེ་འཕྲང་མ་བརྒལ་བར༔ རླུང་ཕྱོགས་ཙམ་ཡང་མཆུ་སྒོར་དབྱུང་མི་བྱ༔ དེ་ནས་རིམ་བཞིན་སྣོད་ལྡན་བྱུང་ན་བྱིན༔ སྐལ་ལྡན་འགའ་ཡི་དངོས་གྲུབ་ཉེ་རྒྱུར་

འགྱུར༔ ས་མ་ཡཿ གུ་ཧྱ༔ ཁོ་བོ་འཇིགས་བྲལ་ཡེ་ཤེས་རྡོ་རྗེས་རང་ལོ་བཅུ་གསུམ་པར་བདུད་འདུལ་གཏེར་བྱོན་གྲོ་ལོད་ཀྱི་བསྙེན་སྒྲུབ་ཕྲན་བུ་བགྱིས་པའི་སྐབས་ཤིག་ཚུལ་འདིའི་བསྐྱེད་བཟླས་ཀྱི་རིམ་པ་བློ་ངོར་བརྡོལ་ཐབས་སུ་ཤར་ཞིང་། ཕྱིས་རང་ལོ་ཉེར་བཞི་པར་བདུད་འཇོམས་གྲོ་ལོད་ཀྱི་བསྙེན་སྒྲུབ་སྐབས་ཤིན་ཏུ་གསལ་བར་བྱུང་བ་བཅས༔ གཞན་ལ་བསྟན་ན་རང་སྲོག་འཆད་པའི་ཐ་ཚིག་ལ་འཇིགས་ཏེ་གཏེར་ཁ་གོང་མ་གཉིས་ཀྱི་ཚུལ་དུ་གསང་བས་ཉམས་སུ་བླངས་པ་ལས། སྙིགས་དུས་ཀྱི་བར་ཆད་རླུང་དམར་ལྟ་བུའི་ཁྲོད་ན་ཚེ་སྲོག་གི་མར་མེ་འདི་ཙམ་གནས་པར་གྱུར་པའང་གདམས་པ་འདི་ཁོ་ནའི་མཐུར་ངེས་པ་རྙེད་ལ། ད་ཆ་རང་ལོ་ལྔ་བཅུའི་ཚེ་འཕྲང་ཀྱང་བརྒལ་ཞིང་སྔགས་ཀྱི་སྐྱེས་མཆོག་འགྱུར་མེད་ཡོན་ཏན་རྒྱ་མཚོ་ནས་བདུད་འཇོམས་རྡོ་རྗེའི་གསང་སྒྲུབ་ཟབ་པ་ཞིག་ཅིས་ཀྱང་འབེབས་དགོས་པའི་བསྐུལ་མ་ནན་ཆགས་སུ་བྱུང་བ་ལ་བརྟེན་ནས་རྒྱ་བཀྲོལ་བའོ།། ༈ །།འདིའི་ཞལ་གདམས་གབ་སྦས་ཀྱི་ནང་ཚན་རིགས་བདག་ལ་བརྟེན་ནས་ཚེ་སྒྲུབ་པའི་མན་ངག་ནི་འདི་ལྟར། རང་གཉན་འདི་གཞན་ཕུན་ཚོགས་ཀུན་གྱི་གཞི༔ འཚོ་བའི་ཚེ་ཉིད་བསྒྲུབ་བྱའི་གཙོ་བོ་སྟེ༔ དེ་ལ་ཐུན་མོང་ཉམས་དགའི་དབེན་གནས་སུ༔ ཕྱི་ནང་མཚམས་བཅད་ཚོགས་བསགས་ད་ལ་བཀྲམ༔ ཚེ་ལྷ་ཡོངས་རྫོགས་དཀྱིལ་འཁོར་གཞུང་བསྲང་ཏེ༔ བསྙེན་སྒྲུབ་བཟླས་པས་རྒྱུད་བསྐུལ་ཚེ་བཅུད་བསྡུ༔ རྟགས་མཐོང་དངོས་གྲུབ་བླང་ལ་

དགའ་སྟོན་བྱ༔ ཐུན་མིན་ཐོ་རངས་རླུང་རིག་དྭངས་པའི་དུས༔ རང་ལུས་ཚེ་ལྷ་ཡབ་ཡུམ་རིགས་བདག་བཅས༔ གསལ་གདབ་བརྟན་གཡོའི་ཚེ་བཅུད་བསྡུ་ཞིང་བསྟིམ༔ རྡོ་རྗེའི་བཟླས་པ་དང་ནི་ཧྲཱིཿབཟླས་བྱ༔ ཞུ་བདེས་དྲངས་པའི་འཆི་མེད་ལང་ཚོ་སྤེལ༔ ཁྱད་པར་ཡང་གསང་ཚེ་སྒྲུབ་རྒྱལ་པོ་ནི༔ ལུས་བསྲང་རླུང་དུག་ཕྱུངས་ལ་སྒོ་གསུམ་ཀློད༔ རང་ལུས་རྟོང་གསལ་ནམ་མཁའི་རྡོ་རྗེར་བསྒོམ༔ འཁོར་འདས་དྭངས་བཅུད་ནམ་མཁའི་རང་བཞིན་དུ༔ ནར་གྱིས་དྲངས་ཏེ་རྡུབ་ཅིང་ཡང་ཡང་བཟའ༔ ནམ་མཁར་འཛིན་པའང་དམིགས་སུ་མ་མཆིས་པ༔ ཡེ་ནས་སྐྱེ་འཆི་བྲལ་བ་གཉུག་མའི་གཤིས༔ བདེ་སྟོང་ཡེ་ཤེས་ཆེན་པོར་ལ་བཟླས་པས༔ རྩེ་གཅིག་གོམས་པ་བརྟན་པོའི་གདིང་ཐོབ་ན༔ འཇའ་ཚོན་ལུས་ལ་རྡོ་རྗེའི་སྲོག་གྲུབ་སྟེ༔ འཆི་བདག་བདུད་ཀྱིས་ནམ་ཡང་མཐོང་མི་འགྱུར༔ གང་ཡང་རྒྱབ་ཆོས་འཆི་ངེས་སྲོག་བསླུ་ཞིང་༔ ལམ་འཕྲང་འཆོས་དང་སྦྱིན་སོགས་ཚོགས་གསོག་འབད༔ རྫས་སྨན་བདུད་རྩིའི་བཅུད་ལེན་དང་སྦྱར་ན༔ རྟེན་འབྱུང་བསླུ་མེད་འབྲས་བུ་མྱུར་འབྱིན་ངེས༔ ས་མ་ཡ༔

གསོལ་འདེབས།

རབ་འབྱམས་རྒྱལ་ཀུན་རིགས་བདག་སྣང་མཐའ་ཡས། །འགྲོ་འདུལ་ཐུགས་རྗེའི་གཏེར་ཆེན་གར་གྱི་དབང་། །དཀྱིལ་འཁོར་རྒྱ་མཚོའི་ཁྱབ་བདག་ཐོད་ཕྲེང་རྩལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །བླ་མེད་གསང་བའི་མཛོད་འཛིན་མཁར་ཆེན་བཟའ། །མི་ཤིགས་ཀློང་ལྔའི་བརྡ་འགྲོལ་འགྲོ་འདུལ་གླིང་། །ཟབ་གསང་བཀའ་བབས་རྩ་བརྒྱུད་བླ་མ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སངས་རྒྱས་ཀུན་གྱི་ཡེ་ཤེས་སྒྱུ་དྲྭའི་གར། །གདུལ་དཀའི་གཤེད་དུ་ཡོངས་སྣང་ཧེ་རུ་ཀ །གཏུམ་ཆེན་འཆོལ་བའི་ཁྲོ་རྒྱལ་ལྷ་ཚོགས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དུག་གསུམ་རང་གཟུགས་རྒྱལ་བསེན་བདུད་སྡེའི་དཔུང་། །དབང་དྲག་མཐུ་སྟོབས་ནུས་པས་ཚར་བཅད་དེ། །རང་རིག་པདྨ་ཁྲག་འཐུང་དབང་པོའི་སྐུ། །མངོན་གྱུར་ཕྱོགས་ལས་རྣམ་རྒྱལ་དཔལ་ཐོབ་ཤོག །[ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ལས་བྱང་དངོས་གྲུབ་འདོད་འཇོ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ལས་བྱང་དངོས་གྲུབ་འདོད་འཇོ་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [སྙིགས་དུས་ཀྱི་དམ་འགོང་གདུག་པ་ཅན་འདུལ་བའི་གཉེན་པོ་མཐུ་སྟོབས་ནུས་རྩལ་འགྲན་ཟླ་དང་བྲལ་བ་ཁྲོ་རྒྱལ་རྡོ་རྗེ་གྲོ་ལོད་ཀྱི་སྒྲུབ་ཐབས་མཐའ་ཡས་པའི་སྙིང་པོར་གྱུར་པ་འདིའི་ཕྲིན་ལས་ལ་འཇུག་པར་འདོད་པས། སྦྱོར་བ་མཚན་མའི་དམ་ཚིག་གི་རྟེན་དང་ཕྱི་ནང་གི་མཆོད་པ་སོགས་དགོས་པའི་ཡོ་བྱད་རྣམས་མཐོང་རྒྱུད་བཞིན་ཚོགས་པར་བྱས་ནས། ཆོ་ག་དངོས་ལ། ཐོག་མར་སྐྱབས་སུ་འགྲོ་བ་ནི།] ཕྱོགས་བཅུའི་སྐྱབས་ཡུལ་ཐམས་ཅད་ཁྲག་འཐུང་པདྨ་དྲག་པོའི་དཀྱིལ་འཁོར་གྱི་འཁོར་ལོའི་རྣམ་པར་བཛྲས་མཱ་ཛ༔ [ས་མདུན་མཁར་སད་པར་མོས་ལ།] ན་མོ༔ བརྒྱུད་པའི་རྩ་བ་བླ་མ་རྗེ༔ དངོས་གྲུབ་སྩོལ་བའི་ཡི་

དམ་ལྷ༔ བར་ཆད་ཀུན་སེལ་མཁའ་འགྲོ་མ༔ རྩ་བ་གསུམ་ལ་སྐྱབས་སུ་མཆི༔ [ལན་གསུམ། སེམས་བསྐྱེད་པ་ནི།] སེམས་བསྐྱེད་འགྲོ་བ་ཀུན་དོན་དུ༔ དབང་དྲག་པདྨ་བསྒྲུབས་ནས་ཀྱང་༔ ལོག་འདྲེན་དགྲ་བགེགས་བསྒྲལ་ནས་ནི༔ གཞན་དོན་སྐྱོང་བར་སེམས་བསྐྱེད་དོ༔ [ལན་གསུམ། ཚོགས་བསགས་པ་ནི།] ཧོ༔ དབང་དྲག་འབར་བའི་ལྷ་ཚོགས་གཤེགས། །དྲེགས་པ་བསྣོལ་བའི་གདན་ལ་བཞུགས། །སྲིན་པོའི་གར་གྱིས་ཕྱག་འཚལ་ལོ། །དུག་གསུམ་བསྒྲལ་བའི་མཆོད་པ་འབུལ། །ཉམས་ཆག་འགལ་འཁྲུལ་མཐོལ་ལོ་བཤགས། །ལོག་འདྲེན་སྒྲོལ་ལ་རྗེས་

ཡི་རང་། །དྲག་པོའི་ཆོས་འཁོར་བསྐོར་བར་བསྐུལ། །ཕྲིན་ལས་འགྲུབ་པར་གསོལ་བ་འདེབས། །དགེ་བ་སེམས་ཅན་ཡོངས་ལ་བསྔོ། །མངོན་སྤྱོད་ཕྲིན་ལས་མཐར་ཕྱིན་ཤོག །[ཅེས་ཚོགས་བསགས་མཐར།] ཛཿཧཱུྃ་བཾ་ཧོཿ[ས། སྐྱབས་ཡུལ་རྣམས་རང་ལ་ཐིམ་པར་བསམ། བགེགས་བསྐྲད་པ་ནི།] རང་ཉིད་སྐད་ཅིག་གིས་བདུད་འདུལ་རྡོ་རྗེ་གྲོ་བོ་ལོད་གཟི་བརྗིད་བསྐལ་པའི་མེ་ལྟར་འབར་བའི་སྐུར་གྱུར་པས་[བསམ་ཞིང་། བགེགས་གཏོར] རྃ་ཡྃ་ཁྃ་[གིས་བསང་སྦྱང་།] ཨོཾ་ཨཱཿཧཱུྃ་ཧོཿ[ས་བྱིན་བརླབ།] སརྦ་བྷུ་ཏ་ཨ་ཀརྵ་ཡ་ཛཿ[]ས་མགྲོན་བཀུག །] སརྦ་བིགྷྣཱན་བ་ལིཾ་ཏ་ཁཱ་ཧི། [ཞེས་ལན་གསུམ་གྱིས་བསྔོས་ལ། བཀའ་བསྒོ་བ་ནི།] ཧཱུྃ༔ ཉོན་ཅིག་ལོག་འདྲེན་འབྱུང་པོའི་ཚོགས༔ གསང་སྤྱོད་བལྟ་བར་མི་དབང་ཞིང་༔ བྱང་ཆུབ་སྒྲུབ་ལ་བར་གཅོད་རྣམས༔ འདིར་འདུས་གཏོར་མས་ཚིམ་བྱོས་ལ༔ རང་རང་གནས་སུ་འགྲོ་བར་གྱིས༔ གལ་ཏེ་བཀའ་ལས་འདའ་བྱེད་ན༔ སྤྲུལ་པའི་ཁྲོ་ཚོགས་འབར་བ་ཡིས༔ རྡུལ་དུ་བརླག་པར་གདོན་མི་ཟ༔ དེ་བས་ད་ལྟ་ཕྱིར་དེངས་ཤིག༔ [ཅེས་དྲག་སྔགས་ཚམ་རྔམས་དང་བཅས་པས་བསྐྲད། མཚམས་བཅད་པ་ནི།] ཧཱུྃ༔

ང་ནི་དབང་དྲག་འཆོལ་བའི་སྐུ༔ སྐུ་གསུང་ཐུགས་ལས་འོད་ཟེར་འཕྲོས༔ སྟེང་འོག་རྡོ་རྗེའི་གུར་དུ་གྱུར༔ ཡེ་ཤེས་འབར་བའི་མེ་དཔུང་གིས༔ ཕྱོགས་མཚམས་མ་ལུས་རབ་གཏམས་ཤིང་༔ ཁྲོ་བོ་ཁྲོ་མོས་གནམ་ས་གང་༔ སྣོད་བཅུད་ལྷ་ཡི་གཞལ་ཡས་ལས༔ སུ་ཡང་འདའ་བར་མ་བྱེད་ཅིག༔ ཧཱུྃ་ཧཱུྃ་བཛྲ་ཀྲོ་ངྷ་ཏཱིཀྵྞ་བཛྲ་རཀྵ་རཀྵ་ཧཱུྃ་ཕཊ༔ [བྱིན་དབབ་པ་ནི།] སྤོས་དང་རོལ་མོས་གཟི་བྱིན་བསྐྱེད་ལ། ཧཱུྃ༔ ལྷོ་ནུབ་རྔ་ཡབ་དཔལ་གྱི་རི༔ པདྨ་འོད་ཀྱི་ཕོ་བྲང་དུ༔ སྐྱེ་འཆི་མེད་པའི་སྐུར་བསྟེན་ཏེ༔ འགྲོ་བ་འདུལ་བའི་དངོས་གྲུབ་བརྙེས༔ བདེ་གཤེགས་ཡོངས་འདུས་གྲོ་བོ་ལོད༔ འཁོར་དུ་དཔའ་བོ་མཁའ་འགྲོས་བསྐོར༔ རིན་ཆེན་རྒྱན་ཆ་སི་ལི་ལི༔ དར་གྱི་ཅོད་པན་པུ་རུ་རུ༔ གསེར་གྱི་ཅོད་པན་ལྡེམས་སེ་ལྡེམ༔ རུས་པའི་རྒྱན་ཆ་ཁྲོ་ལོ་ལོ༔ རོལ་མོ་མང་པོ་དེ་རི་རི༔ རྐང་གླིང་ཐོད་རྔ་ཁྲོ་ལོ་ལོ༔ གནས་མཆོག་འདི་རུ་གཤེགས་སུ་གསོལ༔ དཀྱིལ་འཁོར་འདི་ལ་བྱིན་ཆེན་ཕོབ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་

དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་མཧཱ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔ ཨཱ་བེ་ཤ་ཡ་ཧྲཱིཾ་ཧྲཱིཾ་ཛཿ [མཆོད་རྫས་བྱིན་བརླབ་པ་ནི།] ཨོཾ་སྭབྷཱ་ཝ་བི་ཤངྔྷ་ངྷརྨཿངྷཱ་ཏུ་བི་ཤུངྔྷོ྅ཧཾ༔ [གིས་བསང་སྦྱང་།] སྟོང་པ་ཡི་ནི་ངང་ཉིད་ལས༔ ཨཱཿ ལས་བྱུང་བའི་ཐོད་སྣོད་དུ༔ ཧཱུྃ་ལས་ཕྱི་ནང་མཆོད་པའི་སྤྲིན༔ ངོ་བོ་ཡེ་ཤེས་བདུད་རྩི་ལ༔ རྣམ་པ་སྨན་རཀ་གཏོར་མཆོད་རྫས༔ སོ་སོའི་རྣམ་པ་མཁའ་དབྱིངས་སྤེལ༔ ཨོཾ་བཛྲ་པུཥྤེ༔ ངྷུ་པེ༔ ཨཱ་ལོ་ཀེ༔ གྷནྡྷེ༔ ནཻདྱ༔ ཤཔྡ་ཨཱཿཧཱུྃ༔ ཨོཾ་ཨཱཿཧཱུྃ་མཧཱ་སརྦ་པཉྩ་ཨ་མྲྀ་ཏ་མཧཱ་རཀྟ་མ་ཧཱ་བ་ལིཾ་ཏ་ཏེ་ཛ་བ་ལིཾ་ཏ་བ་ལ་ཏེ་གུ་ཧྱ་ས་མ་ཡ་ཧཱུྃ་ཧྲཱིཿཋཱ༔ [ལན་གསུམ། དངོས་གཞི་ལྷ་བསྐྱེད་པ་ནི།] ཧཱུྃ་ཧཱུྃ་ཧཱུྃ༔ མི་འགྱུར་སྟོང་ཆེན་གདོད་མའི་གཤིས༔ སྤྲོས་བྲལ་དེ་བཞིན་ཉིད་དབྱིངས་ལས༔ མ་རྟོགས་ལོག་འདྲེན་སེམས་ཅན་ལ༔ ཀུན་ཁྱབ་བརྩེ་བའི་སྙིང་རྗེ་ཤར༔ གསལ་སྟོང་འགག་མེད་རང་རིག་ནི༔ ཧཱུྃ་དམར་འབར་བས་མཁའ་དབྱིངས་གང་༔ དེ་ལས་ཡེ་ཤེས་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ འགགས་མེད་སྒྱུ་མའི་ཆོ་འཕྲུལ་ནི༔ ཨེ་ཡྃ་རྃ་ར་སུྃ་ཀེཾ་བྷྲཱུྃ༔ ནམ་མཁའ་

རླུང་མེ་རཀྟའི་མཚོ༔ ཤ་ཆེན་ས་གཞི་ཞག་གི་མཚོ༔ ཀེཾ་རུས་རི་རབ་ཐོད་པའི་མཁར༔ རྡོ་རྗེ་མི་འགྱུར་གཟེར་གྱིས་བསྡམས༔ བདུད་རྩི་ཀླད་ཆེན་ཞལ་བ་བྱས༔ ལྷ་ཀླུ་རྒྱུ་སྐར་ཀ་བ་དང་༔ ཀ་གདན་གདུང་བཞི་ཕྱམ་དྲལ་ཕུབ༔ ཞིང་ཆེན་གཡང་གཞིའི་བླ་བྲེ་དང་༔ ཙིཏྟའི་ཕོ་ཏོ་དམར་ཆེན་ཏོག༔ རྒྱུ་རློན་ཐོད་ཚལ་དྲྭ་བས་བརྒྱན༔ དེ་དབུས་གནམ་ལྕགས་འཁོར་ལོ་ནི༔ རྩིབས་བརྒྱད་རྣོ་དབལ་ལྡན་པའི་དབུས༔ པད་ཉི་དྲེགས་པ་རྒྱལ་བསེན་ཁྲིར༔ རྒྱུ་ཡི་ཧཱུྃ་ཡིག་འཕྲོ་འདུ་ལས༔ བདག་ཉིད་པདྨ་ཁྲག་འཐུང་རྩལ༔ འཆོལ་བའི་ཁྲོ་རྒྱལ་ཧེ་རུ་ཀ༔ ཆེ་མཆོག་རྡོ་རྗེ་གྲོ་བོ་ལོད༔ སྨུག་ནག་དུས་མཐའི་མེ་ལྟར་འབར༔ སྤྱན་གསུམ་སྡང་མིག་གློག་སྟོང་འཁྱུག༔ སྨར་སྨིན་བསྐལ་མེའི་ཚྭ་ཚྭ་འཕྲོ༔ ཨམ་གཙིགས་བསྡམས་ཤིང་མཆེ་བ་གཙིགས༔ ཁྲོ་གཉེར་ཤངས་ནས་ཧཱུྃ་སྒྲ་ལྡིརཿ དམར་སེར་དབུ་སྐྲ་གྱེན་དུ་འཁྱིལ༔ ཕྱག་གཡས་གནམ་ལྕགས་རྡོ་རྗེ་ནི༔ རྩེ་དགུ་རྭ་གདེང་མེ་འབར་བ༔ ཧཱུྃ་དགུ་རཾྃ་དགུས་མཚན་པ་ཅན༔ ནམ་མཁའི་དབྱིངས་སུ་གསོར་ཞིང་འཕྱར༔ སྟེང་གདོན་མ་ལུས་ཐལ་བར་རློག༔ གཡོན་པས་

གནམ་ལྕགས་ཕུར་པའི་དབལ༔ རྣོ་ངར་བགེགས་ཀྱི་སྙིང་ལ་གཟིར༔ སྡིགས་མཛུབ་རྩེ་ལས་ལྕགས་སྡིག་ནི༔ མགོ་དགུ་བཅོ་བརྒྱད་རྭ་ལྡན་པ༔ གྲངས་མེད་ཁྲ་ཐབས་འགྱེད་པ་ཡིས༔ དམ་སྲི་རྒྱལ་འགོང་ཧབ་ཧབ་ཟ༔ གསང་ཕོད་ཆོས་གོས་སག་ལྷྭམ་གསོལ༔ སྙན་ཆ་དུང་གི་ཝང་མིག་མཛེས༔ ཁྲག་འཛག་མགོ་ཕྲེང་དོ་ཤལ་སྤྲས༔ ཞབས་ཟུང་གྱད་ཀྱི་འདོར་སྟབས་ཀྱིས༔ སྟག་མོ་གྲུས་མའི་སྟེང་ན་འགྱིང་༔ སྡེར་མོས་རྒྱལ་བསེན་སྙིང་རྩ་འདྲེན༔ སྤྱི་གཙུག་སྤྲུལ་པའི་མཁའ་ལྡིང་ནི༔ དམར་ནག་མེ་ཡི་གཤོག་པ་ཅན༔ ཀླུ་རིགས་སྦྲུལ་གྱི་རྣམ་པས་ཟ༔ ཁྱུང་སྐར་སྒྲོགས་པས་ས་གསུམ་གཡོ༔ ཡེ་ཤེས་མེ་དཔུང་འཁྲུགས་པའི་ཀློང་༔ གར་དགུའི་ཉམས་ཀྱིས་རྣམ་པར་རོལ༔ ཕྱི་རིམ་འཁོར་ལོའི་རྩིབས་སྟེང་དུ༔ ཕྱོགས་བཞིར་ཧ་རི་ནི་ས་ལས༔ ཡེ་ཤེས་མཁའ་འགྲོ་སྡེ་བཞི་ནི༔ གཅེར་བུ་ལས་མདོག་ཕྱག་རྒྱ་ལྔས༔ རབ་མཛེས་ནུ་མ་བྷ་ག་རྒྱས༔ གྲི་ཐོད་འཛིན་ཅིང་བརྐྱང་བསྐུམ་གར༔ རྡོ་རྗེའི་ཁ་ཊྭཱཾ་གཡོན་དུ་འཁྲིལ༔ འཇའ་ཟེར་འོད་ལྔའི་ཀློང་ན་འགྱིང་༔ མཚམས་བཞིར་གིང་ཆེན་སྡེ་བཞི་པོ༔ དར་གྱི་རུ་མཚོན་ལྷབས་སེ་ལྷབ༔ རུས་པའི་རྒྱན་ཆ་ཁྲོ་ལོ་ལོ༔

གསེར་གྱི་རྣ་ཆ་གྱི་ལི་ལི༔ སྟག་ཤམ་དྲིལ་གཡེར་སི་ལིཾ་ལིཾ༔ གསང་བའི་རྔ་ཆུང་དི་རི་རི༔ བྲོ་བརྡུང་གར་སྟབས་ཁྱུགས་སེ་ཁྱུག༔ སྒོ་བཞིར་རྒྱལ་ཆེན་སྡེ་བཞི་དང་༔ ཁོར་ཡུག་རིག་འཛིན་ཌཱ་ཀིའི་ཚོགས༔ བཀའ་ཉན་ལྷ་སྲིན་སྡེ་བརྒྱད་སོགས༔ བསམ་གྱིས་མི་ཁྱབ་སྤྲིན་ཕུང་གཏིབས༔ གནས་གསུམ་རྡོ་རྗེའི་འབྲུ་གསུམ་མཚན༔ ཐུགས་ཀའི་འོད་དང་ཧཱུྃ་གི་གླུས༔ རྔ་ཡབ་གླིང་ནས་ཐོད་ཕྲེང་རྩལ༔ ཐུགས་རྒྱུད་རང་དབང་མེད་པར་བསྐུལ༔ དྲག་པོ་འཆོལ་བའི་སྐུར་བཞེངས་ཏེ༔ ཆར་ལྟར་བབས་ནས་སྤྱན་དྲངས་གྱུར༔ [སྤྱན་འདྲེན་པ་ནི། གདུང་བའི་ང་རོས་བསྐུལ་ཏེ།] ཧཱུྃ༔ རཀྵ་སྲིན་པོ་ཁྲོས་པའི་ཕོ་བྲང་ནས༔ སྟོང་གསུམ་དྲེགས་པ་འདུལ་མཛད་ཐོད་ཕྲེང་རྩལ༔ པདྨ་ཁྲག་འཐུང་འཆོལ་བའི་སྐུར་སྣང་བ༔ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས༔ འདོད་ཆགས་རཀྟའི་རྒྱ་མཚོའི་ཀློང་ནས་བཞེངས༔ ཞེ་སྡང་ཀེང་རུས་བཀྲམ་པའི་ཁྲོད་ནས་བཞེངས༔ གཏི་མུག་ཤ་ཆེན་སྤུངས་པའི་དབུས་ནས་བཞེངས༔ ང་རྒྱལ་མེ་ཕུང་འབར་བའི་དབྱིངས་ནས་བཞེངས༔ ཕྲག་དོག་རླུང་ནག་འཚུབས་པའི་ནང་ནས་བཞེངས༔

དགྲ་བགེགས་འབྱུང་པོ་འདུལ་ཕྱིར་གཤེགས་སུ་གསོལ༔ ལྷ་སྲིན་སྡེ་བརྒྱད་འདུལ་ཕྱིར༴ དམ་སྲི་ཕོ་མོ་འདུལ་ཕྱིར༴ རང་རྩལ་མཁའ་འགྲོ་གིང་ཆེན་སྒོ་སྐྱོང་དང་༔ དམ་ཅན་སྲུང་མའི་ཚོགས་བཅས་གཤེགས་སུ་གསོལ༔ བཛྲ་གུ་རུ་ཤྲཱི་ཧེ་རུ་ཀ་པདྨ་ཀྲོ་ངྷ་ས་པ་རི་ཝཱ་ར་བཛྲ་ས་མ་ཡ་ཛཿཛཿ [བཞུགས་སུ་གསོལ་བ་ནི།] ཧཱུྃ༔ བསྐལ་པའི་མེ་ལྟར་འབར་བའི་ཀློང་དཀྱིལ་ན༔ ཏི་ར་ཞིང་ཆེན་བསྣོལ་བའི་གདན་སྟེང་དུ༔ མ་ཧཱ་གུ་རུ་དབང་དྲག་ཐོད་ཕྲེང་རྩལ༔ འཁོར་བཅས་དགྱེས་ཤིང་བརྟན་པར་བཞུགས་སུ་གསོལ༔ ས་མ་ཡ་ཏིཥྛ་ལྷན༔ [ཕྱག་འཚལ་བ་ནི།] ཧཱུྃ༔ དབང་དྲག་པདྨ་ཐོད་ཕྲེང་དྲག་པོའི་སྐུ༔ དྲེགས་པ་ལྷ་སྲིན་སྡེ་བརྒྱད་འདུལ་མཛད་ཅིང་༔ འགྲོ་བ་མ་ལུས་འདྲེན་པའི་དཔལ་གྱུར་པ༔ འཁོར་དང་བཅས་ལ་གུས་པས་ཕྱག་འཚལ་ལོ༔ ཨ་ཏི་པུ་ཧོ༔ པྲ་ཏི་ཙྪ་ཧོ༔ [མཆོད་པ་འབུལ་བ་ནི།] ཧཱུྃ༔ ཆེ་མཆོག་རྡོ་རྗེ་སྲིན་པོའི་ལྷ་ཚོགས་ལ༔ ཕྱི་ནང་གསང་བའི་མཆོད་པ་སྣ་ཚོགས་པ༔ དངོས་སུ་བཤམས་དང་ཡིད་ལས་སྤྲུལ་པ་ཡི༔ རབ་འབྱམས་མཁའ་དབྱིངས་གང་བའི་སྒྱུ་འཕྲུལ་གྱི༔ ཀུན་ཏུ་བཟང་པོའི་མཆོད་པ་རྒྱ་མཚོས་མཆོད༔ རང་བྱུང་དབང་དང་དངོས་གྲུབ་སྩལ་དུ་གསོལ༔

བཛྲ་པུཥྤེ་ངྷུ་པེ་ཨཱ་ལོ་ཀ་གནྷེ་ནཻ་དྱ་ཤཔྡ་པྲ་ཏཱིཙྪ་སྭཱ་ཧཱ༔ མཧཱ་པཉྩ་རཀྟ་བ་ལིཾ་ཏ་ག་ན་གུཧྱ་ས་མ་ཡ་པཱུ་ཛ་པྲ་ཏཱིཙྪ་ཧོ༔ [ཞེས་པ་ཙམ་མམ། དེ་ལས་ཅུང་ཟད་རྒྱས་པར་སྤྲོ་ན་ཕྱི་མཆོད་ནི།] ཧཱུྃ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སིལ་སྙན་འདོད་ཡོན་ལྔ༔ ཡིད་འོང་མཆོད་པ་མ་ལུས་པ༔ ཁྲོ་རྒྱལ་འཁོར་དང་བཅས་ལ་འབུལ༔ བྱིན་རླབས་དབང་དང་དངོས་གྲུབ་སྩོལ༔ རང་བྱུང་བདུད་རྩིའི་ཡོན་ཆབ་དང་༔ དབང་པོ་མེ་ཏོག་ཚིལ་ཆེན་སྤོས༔ ཞུན་ཆེན་མར་མེ་རཀྟའི་དྲི༔ ཤ་ཆེན་བཤོས་དང་ཐོད་རྔའི་སྒྲ༔ ཁྲོ་རྒྱལ་འཁོར་དང་བཅས་ལ༴ བྱིན་རླབས་དབང་དང་དངོས༴ ཨོཾ་བཛྲ་པུཥྤེ་ངྷུ་པེ་ཨཱ་ལོ་ཀེ་གནྡྷེ་ནཻ་དྱ་ཤཔྡ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ [ནང་མཆོད་ནི།] ཧཱུྃ༔ གདོད་ནས་རྣམ་དག་བདུད་རྩི་སྨན༔ རྩ་བརྒྱད་སྟོང་སྦྱར་ཨ་མྲྀ་ཏ༔ དགུ་ལྔ་སེལ་བའི་ཡེ་ཤེས་སྨན༔ ཁྲོ་རྒྱལ་འཁོར་དང་བཅས་ལ་འབུལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཧཱུྃ༔ སྣང་བ་སྣོད་ཀྱི་གཏོར་གཞོང་དུ༔ སྲིད་པ་བཅས་ཀྱི་གཏོར་མ་བཤམས༔ སྣང་སྲིད་ཡོངས་རྫོགས་བ་ལིཾ་ཏ༔ ཁྲོ་རྒྱལ་འཁོར་དང་བཅས་ལ་འབུལ༔ མཧཱ་བ་ལིང་ཏ་ཁ་རཾ་ཁཱ་ཧི༔

ཧཱུྃ༔ ཉོན་མོངས་རྒྱུད་དྲུག་འཁོར་བ་བསྒྲལ༔ གཉིས་མེད་མཁའ་དབྱིངས་བདེ་བ་ཆེ༔ སྦྱོར་སྒྲོལ་མཧཱ་རཀྟའི་རྒྱུན༔ ཁྲོ་རྒྱལ་འཁོར་དང་བཅས་ལ་འབུལ༔ མཧཱ་རཀྟ་ཁ་རཾ་ཁཱ་ཧི༔ [གསང་མཆོད་ནི།] ཧཱུྃ༔ ཕྱི་ནང་དངོས་འབྱོར་ཡིད་ཀྱིས་སྤྲུལ༔ ཕྱག་རྒྱ་གར་དང་སྦྱོར་སྒྲོལ་མཆོད༔ གསང་བ་བླ་མེད་མཐུན་པའི་རྫས༔ ཁྲོ་རྒྱལ་འཁོར་དང་བཅས་ལ་འབུལ༔ ཨོཾ་ཨཱཿསརྦ་མུ་དྲ་མ་མ་ཀི་རི་ཁ་རཾ་ཁཱ་ཧི༔ དགྲ་བགེགས་མ་ལུས་བསྒྲལ་བ་ཡི༔ ཤ་ཁྲག་རུས་པ་ནང་ཁྲོལ་མཁྲིས༔ འདོད་ཆགས་ཞེ་སྡང་གཏི་མུག་དང་༔ ང་རྒྱལ་ཕྲག་དོག་མཆོད་པར་འབུལ༔ སྐུ་གསུང་ཐུགས་དང་ཡོན་ཏན་དང་༔ ཕྲིན་ལས་དངོས་གྲུབ་སྩལ་དུ་གསོལ༔ སརྦ་ཤཱ་ཏྲཱུཾ་མཱ་ར་ཡ༔ མཱ་ས་རཀྟ་ཙིཏྟ་ཀིཾ་ནི་རི་ཏི་ཁཱ་ཧི༔ [ཞེས་མཆོད། བསྟོད་པ་ནི།] ཧཱུྃ༔ ཆོས་ཀྱི་དབྱིངས་ལས་ལོག་འདྲེན་གདུལ་བྱའི་ངོར༔ སྙིང་རྗེ་ཁྲོས་པ་མི་བཟད་ཁྲོ་བོའི་རྒྱལ༔ འཇིགས་རུང་བཟོད་དཀའི་གཟི་བརྗིད་དཔག་ཡས་འབར༔ རྡོ་རྗེ་གྲོ་ལོད་སྐུ་ལ་བདག་བསྟོད་དོ༔ ཕྱག་གཡས་རྡོ་རྗེ་འབར་བ་གདེངས་པ་ཡིས༔ ལོག་འདྲེན་སྡེ་བརྒྱད་བར་གཅོད་དབྱིངས་སུ་སེལ༔ གཡོན་པས་ཕུར་བུ་བགེགས་ཀྱི་སྙིང་ལ་གཟིར༔ ལྕགས་སྡིག་རྒྱལ་བསེན་འཇོམས་ལ་བདག་

བསྟོད་དོ༔ བརྗིད་པའི་སྐུ་ལ་དཔའ་བའི་ཆས་ཀྱིས་བརྒྱན༔ བསྐལ་པའི་མེ་འབར་རྡོ་རྗེའི་ཚྭ་ཚྭ་འཕྲོ༔ ཨམ་གཙིགས་ཧཱུྃ་ཕེཾ་ང་རོ་འབྲུག་སྟོང་ལྡིར༔ དམ་སྟག་དྲེགས་བྱེད་ཟ་ལ་བདག་བསྟོད་དོ༔ སྤྲུལ་པའི་བྱ་ཁྱུང་ཀླུ་དང་ས་བདག་འདུལ༔ རིགས་ཀྱི་ཡུམ་བཞི་བདེ་ཆེན་འདུ་འབྲལ་མེད༔ གིང་ཆེན་སྒོ་སྐྱོར་ཕྲིན་ལས་ཐོགས་མེད་སྒྲུབ༔ རྡོ་རྗེ་སྲིན་པོའི་ལྷ་ཚོགས་རྣམས་ལ་བསྟོད༔ [ཛཔྲ་བཟླ་བ་ནི།] ཐུགས་ཀར་ཉི་སྟེང་ཕ་ལམ་གྱི༔ རྡོ་རྗེའི་ལྟེ་བར་ཧཱུྃ་དམར་གསལ༔ ཧཱུྃ་ལས་ཧཱུྃ་དམར་མེ་འབར་བ༔ གྲངས་མེད་སྤྲིན་ཕུང་རབ་འཁྲུགས་པས༔ རང་ལུས་ཡོངས་གང་སྒོ་གསུམ་གྱི༔ ནད་གདོན་སྡིག་སྒྲིབ་བག་ཆགས་བཅས༔ ལྷག་མེད་གཞོབ་ཏུ་བསྲེགས་ཤིང་སྦྱངས༔ སྣ་བུག་གཡས་ནས་ཕྱིར་ཐོན་པས༔ ལྔ་ལྡན་ཧཱུྃ་གིས་སྟོང་ཁམས་གར༔ དེ་རྣམས་སྐུར་གྱུར་ཧཱུྃ་སྒྲ་སྒྲོགས༔ གདུག་ཅན་མ་ལུས་བསྔངས་ཤིང་བརྒྱལ༔ སྣང་སྲིད་འཕར་རྡེག་ཤིགས་ཤིག་གཡོ༔ སླར་ཡང་ཚུར་འདུས་ཧཱུྃ་དུ་གྱུར༔ སྣ་བུག་གཡོན་ནས་ནང་དུ་ཞུགས༔ ཐུགས་ཀའི་ཧཱུྃ་དང་དབྱེར་མེད་འདྲེས༔ ཐ་མལ་དངོས་སྣང་མི་དམིགས་ངང་༔ སྣོད་བཅུད་ཁྲག་འཐུང་འཆོལ་ཆེའི༔ སྐུ་གསུང་ཐུགས་ཀྱི་ཕྱག་

རྒྱར་རྫོགས༔ ཧཱུྃ་ཧཱུྃ་ཧཱུྃ༔ [ཞེས་ཡང་གསང་དཔའ་བོ་འབྲུ་གཅིག་སུམ་སྦྲེལ་དུ་བཟླ་བ་ནི་བསྙེན་པའི་རིམ་པའོ། །] ཐུགས་ཀའི་ཧཱུྃ་མཐར་སྔགས་ཕྲེང་ནི༔ ལྕགས་སྲེགས་མདོག་ཅན་གཡས་བསྐོར་དུ༔ མགལ་མེ་ལྟ་བུར་འཁོར་བ་ལས༔ འོད་ཟེར་མེ་ཕུང་ཚྭ་ཚྭ་འཕྲོས༔ ལོག་འདྲེན་དམ་འགོང་མ་ལུས་བསྲེགས༔ སྡེ་བརྒྱད་དྲེགས་པའི་སྲོག་སྙིང་བསྡུས༔ རྩ་གསུམ་རབ་འབྱམས་ཐུགས་རྒྱུད་བསྐུལ༔ བྱིན་རླབས་ནུས་སྟོབས་མ་ལུས་པ༔ བདག་ཐིམ་གཟི་བརྗིད་རབ་འབར་ཏེ༔ སྣང་སྲིད་ཁམས་ལ་མངའ་མཛད་པའི༔ ཆེ་བཙན་འགྲན་བྲལ་སྐུ་རུ་གྱུར༔ ཨོཾ་ཨཱཿཧཱུྃ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིདྡྷི་ཧཱུྃ་ཧཱུྃ༔ [ཞེས་རྩ་བའི་སྔགས་ཕྲེང་སྲོག་གི་སྙིང་པོ་ཉིད་བཟླ་བ་སྒྲུབ་པའི་ཁྱད་པར་རོ། །] བདག་ཉིད་དྲག་པོའི་ཐུགས་ཀ་ནས༔ སྔགས་ཀྱི་འོད་ཟེར་སྤུ་གྲི་འཕྲོས༔ འདྲེ་རྒོད་རྒྱལ་འགོང་ཐམས་ཅད་ཀྱི༔ སྲོག་རྩ་རྦད་རྦད་བཅད་པར་གྱུར༔ [རྩ་སྔགས་ཤམ་དུ།] ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ [ཅེས་དྲེགས་པའི་གཟིར་སྔགས་དང་། སྐབས་སུ།] ཨོཾ་རུ་རུ་བྷ་ཤ་སྲོག་དུང་དུང་༔ བཛྲ་ཡཀྵ་ཧཱུྃ་ཕཊ༔ རཀྵ་ཧཱུྃ་ཕཊ༔ ཨ་ཡ་མ་དུ་རུ་ཙ་ཤ་ན་བཛྲ་ས་མ་ཡ་ཧཱུྃ་ཕཊ༔ གནོད་བྱེད་འདྲེ་རྒོད་རྒྱལ་འགོང་འབྱུང་པོ་ཧཾ་ཤཾ་ཏྲིག་ནན་མཱ་ར་ཡ་ཕཊ༔

[ཅེས་སྤུ་གྲིའི་མཚོན་ཆ་སྦྲེལ་ཏེ་བཟླ་བ་ནི་ལས་སྦྱོར་གྱི་ཡན་ལག་སྟེ། གཞན་ཡང་དགོས་པ་ཁྱད་པར་ཅན་གྱི་ཚེ་སྲུང་ཟློག་བསད་པའི་འཁྲུལ་འཁོར་ཀྱང་སྦྱར་རོ། །རྗེས་ཚོགས་ཀྱི་མཆོད་པ་ནི། དམ་རྫས་རྣམས་བདུད་རྩིས་བསང་གཏོར་བྱས་ལ།] རྃ་ཡྃ་ཁྃ་གིས་ཚོགས་རྫས་ཀྱི༔ དངོས་འཛིན་འབགས་བཙོག་སེར་སྣ་སྦྱངས༔ ཨོཾ་ཨཱཿཧཱུྃ་གིས་འདོད་ཡོན་གྱི༔ ཕུང་པོ་ཟག་མེད་བདུད་རྩིར་སྤེལ༔ ཨོཾ་ཨཱཿཧཱུྃ་ཧོཿ [ཚོགས་མགྲོན་སྤྱན་དྲང་བ་ནི།] ཧཱུྃ༔ རང་བཞིན་ལྷུན་གྲུབ་གནས་མཆོག་དང་༔ ལང་ཀ་དཔལ་གྱི་ཕོ་བྲང་ནས༔ བདེ་གཤེགས་གཅིག་བསྡུས་ཐོད་ཕྲེང་རྩལ༔ མཁའ་འགྲོའི་ཚོགས་དང་བཅས་ཉིད་དུ༔ འདིར་གཤེགས་ཚོགས་ཀྱི་མཆོད་པ་བཞེས༔ དཀྱིལ་འཁོར་འདི་ལ་བྱོན་ཅིག་ཕོབ༔ སྒྲུབ་རྫས་ཚོགས་ལ་བཅུད་ཅིག་ཕོབ༔ སྒྲུབ་མཆོག་རྣམས་ལ་དངོས་གྲུབ་སྩོལ༔ ཧཱུྃ༔ གྲུབ་པའི་གནས་མཆོག་ཉམས་རེ་དགའ༔ དུར་ཁྲོད་གཞལ་ཡས་བྱིན་རེ་ཆེ༔ རྣལ་འབྱོར་ཕོ་མོ་དམ་ཚིག་གཙང་༔ འདོད་ཡོན་ཚོགས་མཆོད་དང་རེ་སྤྲོ༔ སྤྲོ་དགའ་གནས་ཀྱི་མཆོད་པ་འབུལ༔ [ཚོགས་ཕུད་རིམ་གསུམ་དུ་སྤྲོས་པའི་དང་པོ་མཆོད་པ་ནི།] ཧཱུྃ༔ བདེ་གཤེགས་འདུས་པའི་དཀྱིལ་འཁོར་དུ༔ ཆེ་མཆོག་

དབང་དྲག་ལྷ་ཚོགས་ལ༔ ཞལ་ཟས་ཚོགས་ཀྱི་མཆོད་པ་འབུལ༔ མཆོག་དང་ཐུན་མོང་དངོས་གྲུབ་སྩོལ༔ ག་ཎ་ཙཀྲ་པཱུ་ཛ་ཁཱ་ཧི༔ [བར་པ་བཤགས་པ་ནི།] ཧཱུྃ༔ སྔོན་བྱུང་དུས་ནས་ད་ལྟའི་བར༔ ལུས་ངག་ཡིད་ཀྱི་སྒོ་ནས་ནི༔ རྩ་བ་ཡན་ལག་ནོངས་པ་ཀུན༔ ཚོགས་ཀྱིས་བཤགས་སོ་དག་གྱུར་ཅིག༔ ག་ཎ་ཙཀྲ་བཛྲ་ས་མ་ཡ་ཧོ༔ [ཐ་མ་བསྒྲལ་བསྟབ་ནི། བྲུབ་ཁུང་དུ་དམིགས་བྱའི་རཱུ་པ་བཅས་ལ་བདེན་སྟོབས་བརྗོད་པ་སྔོན་དུ་བགྲོ་བས།] ནྲྀ་ཡཾ་ཛཿ ཏྲི་ཡཾ་ཛཿ ཨ་ཀརྵ་ཡ་ཛཿ ཛཿཧཱུྃ་བྃ་ཧོཿ [ཞེས་དགུག་གཞུག་བཅིངས་ཏེ། ཕུར་བུ་གདབ་ཅིང་།] ཧཱུྃ༔ ང་ནི་རྡོ་རྗེ་གྲོ་བོ་ལོད༔ གཏུམ་རྔམས་ཁྲོ་བོ་ཁྲོ་མོའི་ཚོགས༔ ཡཀྵ་མེ་དབལ་སྐར་ལྟར་འཁྲུགས༔ གནོད་བྱེད་དགྲ་བགེགས་འབྱུང་པོ་ཡི༔ གཟུགས་ཕུང་རྡུལ་ཕྲན་བཞིན་དུ་བཤིག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ནྲྀ་ཏྲི་ཤ་ཏཱུཾ་མཱ་ར་ཡ་རྦད༔ [ཅེས་བསྒྲལ་ལ།] སྙིགས་མའི་ཤ་ཁྲག་རུས་པ་རྣམས༔ དུག་གསུམ་ངོ་བོ་བདུད་རྩིའི་མཆོག༔ དྭངས་མ་ཡེ་ཤེས་ལྔ་རུ་བསྒྱུར༔ བཞེས་ཤིག་རོལ་ཅིག་དགྱེས་པར་མཛོད༔ མཱཾ་ས་རཀྟ་ཀིཾ་ནི་རི་ཏིཾ་ཁཱ་ཧི༔ [ཞེས་བསྟབ། དེ་ནས་ཚོགས་ཀྱི་རྫས་ནང་གི་སྲེག་བླུག་ཏུ་ཚིམས་པར་ལོངས་སྤྱད་ལ། ལྷག་གཏོར་བསྔོ་བ་ནི།] ལྷག་མ་ལ་ཁ་ཕྲུ་བཏབ་ནས། ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿ[ས་བྱིན་བརླབ།] ཨེ་ཨཱ་

རལླི་ཧྲཱིཾ་ཧྲཱིཾ་ཛཿ[ས་མགྲོན་སྤྱན་དྲངས་ཏེ།] ཧཱུྃ༔ མཁའ་འགྲོ་གིང་དང་དབང་ཕྱུག་མ༔ འབར་མ་ལ་སོགས་ཕོ་ཉའི་ཚོགས༔ ལྷག་མའི་ལོངས་སྤྱོད་འདི་གསོལ་ལ༔ སྔོན་ཚེ་དཔལ་ཆེན་སྤྱན་སྔ་རུ༔ ཁས་བླངས་ཐ་ཚིག་ཇི་བཞིན་དུ༔ ཕྲིན་ལས་ཐོགས་མེད་སྒྲུབ་པར་མཛོད༔ མ་མ་ཧྲཱིཾ་ཧྲཱིཾ་བ་ལིཾ་ཏ་ཁཱ་ཧི༔ [ཞེས་བསྔོ། །ཐུགས་དམ་བསྐུལ་བ་ནི།] ཧཱུྃ༔ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས༔ བདུད་འདུལ་མཧཱ་གུ་རུ་གྲོ་བོ་ལོད༔ སྤྲུལ་པ་ཡང་སྤྲུལ་འཁོར་དང་བཅས་པ་རྣམས༔ སྙིགས་མ་ལྔ་བདོའི་སེམས་ཅན་གདུལ་དཀའ་བ༔ ཞི་བས་མི་འདུལ་དེ་ཕྱིར་ཐུགས་རྗེ་ཆེས༔ སྙིང་རྗེ་དྲག་པོར་ཁྲོས་པས་ཚར་ཆོད་ཅིག༔ སྙིགས་དུས་ལོག་པར་འདྲེན་པའི་གདོན་བགེགས་རིགས༔ མཐའ་བཞིའི་འདྲེ་རྒོད་རྒྱལ་འགོང་དམ་སྲིའི་ཚོགས༔ ཉོན་མོངས་ལ་སོགས་ཐར་པའི་གེགས་བྱེད་ཅིང་༔ བདེ་ཆེན་བྱང་ཆུབ་སྒྲུབ་ཏུ་མི་འཚལ་བ༔ ཡེ་ཤེས་ཁྲོ་རྒྱལ་རྣམས་ཀྱིས་ཚར་ཆོད་ལ༔ གཉུག་མའི་ཡེ་ཤེས་སྒྲིབ་བྲལ་གསལ་བར་མཛོད༔ [ཆད་མདོ་བསྒྲག་པ་ནི། གཏོར་མ་འབྲུ་གསུམ་གྱིས་བརླབ་ལ།] ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཨོ་རྒྱན་པདྨ་འབྱུང་གནས་ཀྱིས༔ བསམ་ཡས་ཧས་པོའི་རི་རྩེ་ནས༔ ཆོས་ཉིད་བདེན་པའི་བཀར་བཏགས་པའི༔ རུ་བཞིའི་

ལྷ་སྲིན་སྡེ་བརྒྱད་རྣམས༔ ལྔ་བརྒྱ་དུས་ཀྱི་ཐ་མ་ལ༔ ཆོས་འཁོར་བསྲུང་བར་མ་ཆད་དམ༔ བརྒྱུད་འཛིན་སྐྱོང་བར་མ་ཆད་དམ༔ མཐའ་དམག་བསྲུང་བར་མ་ཆད་དམ༔ དལ་ཡམས་གཅོད་པར་མ་ཆད་དམ༔ གཏོར་མ་ལེན་པར་མ་ཆད་དམ༔ སྔོན་ཚེ་ཇི་ལྟར་དམ་བཅས་བཞིན༔ ཕྱི་ཚིག་གཉན་པོ་བདག་གིས་བསྐུལ༔ ཨོ་རྒྱན་རྗེས་འཇུག་དཔོན་སློབ་དང་༔ བསྟན་པ་སྐྱོང་བའི་ཡོན་བདག་རྣམས༔ མཐོ་བ་དགུང་ལ་རེག་པ་དང་༔ དམའ་བ་བུ་བཞིན་སྐྱོང་བར་མཛོད༔ གངས་ཅན་གཙུག་ལག་ཆོས་འཁོར་སྲུངས༔ ཇི་ལྟར་བཅོལ་བཞིན་ཕྲིན་ལས་མཛོད༔ [སྐབས་འགའ་ཞིག་ཏུ་ཆད་མདོའི་གཏོར་མ་ཟོར་དུ་བསྐུལ་ན།] ཧཱུྃ༔ ང་ནི་ཆེ་མཆོག་གྲོ་བོ་ལོད༔ ཁམས་གསུམ་ཀུན་གྱི་དབང་ཕྱུག་ཡིན༔ འཇིག་རྟེན་འདས་དང་མ་འདས་པའི༔ དྲེགས་པ་ཕོ་རྒྱུད་མོ་རྒྱུད་ཀུན༔ རང་རང་ཕོ་ཉའི་དམག་སྡུས་ལ༔ དེ་རིང་དགྲ་བགེགས་སྟེང་དུ་དྲོངས༔ རྦད་དོ་བསྐུལ་ལོ་དྲེགས་པའི་ཚོགས༔ དྲག་རྩལ་མཐུ་དང་དཔུང་བསྐྱེད་ལ༔ དགྲ་བགེགས་སྡིག་ཅན་འཁོར་བཅས་ཀྱི༔ གཟུགས་ཕུང་ཐལ་བའི་རྡུལ་བཞིན་བཤིག༔ རྣམ་ཤེས་ཚངས་པའི་ལམ་ནས་དྲོངས༔ རིག་པ་སྐྱེ་མེད་དབྱིངས་སུ་སྤོར༔ དུས་ལ་བབ་བོ་མཐུ་རྩལ་སྐྱེད༔ མཱ་ར་ཡ་རྦད་བྷྱོ་ཟློག༔ [བརྟན་མ་བསྐྱེད་པ་ནི། བཤལ་ཆུའི་བདུད་རྩིས་བྲན་ཏེ།]

ཧཱུྃ༔ སློབ་དཔོན་པདྨ་ཐོད་ཕྲེང་གི༔ བཀའ་ཉན་མ་མོ་བརྟན་མའི་ཚོགས༔ འདིར་གཤེགས་གཏོར་མའི་བཤལ་ཆུ་བཞེས༔ དལ་ཁ་ཆོད་ལ་མཚོན་རྩེ་ཐུལ༔ ལོ་ཕྱུགས་ལེགས་ཤིང་སྲིད་རྣམས་འཕེལ༔ བོད་ཁམས་བདེ་བའི་ཕྲིན་ལས་མཛོད༔ [བྲོ་བརྡུང་བ་ནི།] ཧཱུྃ༔ རྣམ་ཐར་གསུམ་གྱི་ཨེ་ཁང་དུ༔ མཚན་མར་འཛིན་པའི་དམ་སྲི་བྲུབ༔ བརྡལ་ཁྱབ་རྫོགས་པ་ཆེན་པོར་མནན༔ འཁོར་འདས་མཉམ་ཉིད་མ་གྱུར་པར༔ ནམ་ཡང་ལྡང་བའི་སྐབས་མེད་དོ༔ སྟྭམྦྷ་ཡ་ནན༔ [དངོས་གྲུབ་བླང་བ་ནི།] ཧཱུྃ༔ བདེ་གཤགེས་ཀུན་འདུས་རྡོ་རྗེ་གྲོ་ལོད་རྩལ༔ ཆོས་དབྱིངས་ངང་ལས་ཁྲོ་བོའི་སྐུར་སྟོན་པ༔ གློག་ལྟར་མྱུར་བའི་ཐུགས་རྗེས་བརྩེར་དགོངས་ལ༔ དེང་འདིར་སྒྲུབ་མཆོག་བདག་ལ་སྐུ་གསུང་ཐུགས༔ ཡོན་ཏན་ཕྲིན་ལས་རྫོགས་པའི་དབང་མཆོག་སྐུར༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ [རྩ་སྔགས་མཐར།] ཀཱ་ཡ་ཝཱ་ཀ་ཙིཏྟ་སརྦ་སིངྔྩི་ཕ་ལ་ཧོ༔ [བཟོད་པར་གསོལ་བ་ནི།] མ་འབྱོར་པ་དང་ཉམས་པ་དང་༔ ཆོ་ག་ལྷག་ཆད་གྱུར་པ་དང་༔ ལྷ་བསྒོམ་ཏིང་འཛིན་བུལ་བ་རྣམས༔ ཡེ་ཤེས་དཀྱིལ་འཁོར་ལྷ་ལ་བཤགས༔ ཚངས་པ་མཆོག་གི་དངོས་གྲུབ་སྩོལ༔ [ཞེས་དང་

ཡི་གེ་བརྒྱ་པ་བཟླ། དཀྱིལ་འཁོར་བསྡུ་བ་ནི། མདུན་དཀྱིལ་དང་འབྲེལ་ན་དེའི་ཡེ་ཤེས་པ་རྣམས་བརྟན་བཞུགས་སམ་གཤེགས་སུ་གསོལ། ཏིང་འཛིན་གྱི་དཀྱིལ་འཁོར།] སྣང་བའི་དཀྱིལ་འཁོར་བརྟེན་པར་བཅས་པ་ཀུན༔ རྒྱུ་ཡི་སྙིང་པོ་ཧཱུཾ་ཆེན་འབར་བར་བསྡུ༔ ཧཱུྃ་ཡང་སྟོང་ཉིད་གཟོད་མའི་ཀློང་དུ་ཐིམ༔ སྐྱེ་མེད་ངང་ལས་འགགས་མེད་ཆོ་འཕྲུལ་ནི༔ ཆུ་ལས་ཆུ་བུར་ཇི་བཞིན་མ་ཧཱ་གུ་རུ༔ རྡོ་རྗེ་གྲོ་ལོད་རྩལ་གྱི་ངོ་བོར་ལྡང་༔ [སྨོན་ལམ་གདབ་པ་ནི།] ཧོ༔ མཐའ་ཡས་ཐེག་པ་མཆོག་གི་ལམ་མཆོག་ཏུ༔ བདག་གིས་དབང་དྲག་འབར་བའི་སྐུ་གསུང་ཐུགས༔ ཡེ་ཤེས་རྡོ་རྗེའི་ངོ་བོར་བསྒྲུབས་པ་དེས༔ འགྲོ་ཀུན་ཐར་པ་མཆོག་གི་ལམ་འཁོད་ཤོག༔ [བཀྲ་ཤིས་བརྗོད་པ་ནི།] ཧཱུྃ༔ བདེ་གཤེགས་གཅིག་བསྡུས་རྡོ་རྗེ་གྲོ་བོ་ལོད༔ ལོག་འདྲེན་འཇོམས་མཛད་དབང་དྲག་ཧེ་རུ་ཀ༔ བར་ཆད་ཀུན་སེལ་མཐུན་རྐྱེན་མ་ལུས་འགྲུབ༔ མཆོག་ཐུན་དངོས་གྲུབ་མྱུར་སྩོལ་བཀྲ་ཤིས་ཤོག༔ [ཅེས་མེ་ཏོག་གི་ཆར་དབབ་པས་དགེ་ལེགས་སུ་བྱའོ། །དེ་ལྟར་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ལས་བྱང་དངོས་གྲུབ་འདོད་འཇོ་ཞེས་བྱ་བ་འདི་ནི། རྩ་བའི་ཆོས་ཀྱི་བདག་པོར་གྲུབ་པ་དཔལ་མིའི་དབང་པོ་ཚེ་དབང་རིག་འཛིན་རྣམ་པར་རྒྱལ་བའི་སྡེའི་བཞེད་པ་སྐོང་བའི་སླད་དུ། རིགས་མཐུན་གྱི་ངག་

འདོན་ཁ་སྐོང་དང་བཅས་ཐུགས་དམ་རྒྱུན་གྱི་ཉམས་བཞེས་འཇུག་པ་བདེ་བའི་དབང་དུ་བྱས་ཏེ། ལྷག་པའི་ལྷ་མཆོག་འདི་ཉིད་ཀྱི་རིགས་སྔགས་འཆར་བ་འཇིགས་བྲལ་ཡེ་ཤེས་རྡོ་རྗེས་ཤིང་སྤྲེལ་དབྱུག་པ་ཉ་པའི་ཤེས་རབ་ཀྱི་ཆའི་དུས་ཚེས་བཟང་པོ་ལ་ཡབ་གཞིས་བསམ་འགྲུབ་ཕོ་བྲང་ཡང་རྩེ་པདྨ་འཁྱིལ་བའི་གཞལ་མེད་ཁང་དུ་སྦྱར་བ་ཛཡནྟུ།། །། སརྦ་དཱ་མངྒ་ལཾ།། །།]

ཡང་གསང་བདུད་འདུལ་གྲོ་ཟོ་ལོད་ཀྱི་རྒྱུན་ཁྱེར་སྙིང་པོར་དྲིལ་པ།

[ཡང་གསང་བདུད་འདུལ་གྲོ་ཟོ་ལོད་ཀྱི་རྒྱུན་ཁྱེར་སྙིང་པོར་དྲིལ་པ་བཞུགས།] ཨོཾ་སྭསྟི། [ཡང་གསང་བདུད་འདུལ་གྲོ་ལོད་ཀྱི་རྣལ་འབྱོར་རྒྱུན་གྱི་ཉམས་ལེན་དུ་བྱ་བར་འདོད་པས། སྦྱོར་བ་ནི། ཕྱོགས་བཅུའི་སྐྱབས་ཡུལ་ཐམས་ཅད་ཁྲག་འཐུང་པདྨ་དྲག་པོའི་དཀྱིལ་འཁོར་གྱི་འཁོར་ལོའི་རྣམ་པར་བཛྲ་ས་མཱ་ཛཿས་སད་པ་ལ།] ན་མོ༔ བརྒྱུད་པའི་རྩ་བ་བླ་མ་རྗེ༔ དངོས་གྲུབ་སྩོལ་བའི་ཡི་དམ་ལྷ༔ བར་ཆད་ཀུན་སེལ་མཁའ་འགྲོ་མ༔ རྩ་བ་གསུམ་ལ་སྐྱབས་སུ་མཆི༔ [ལན་གསུམ་གྱིས་སྐྱབས་སུ་འགྲོ།] སེམས་བསྐྱེད་འགྲོ་བ་ཀུན་དོན་དུ༔ དབང་དྲག་པདྨ་བསྒྲུབ་ནས་ཀྱང་༔ ལོག་འདྲེན་དགྲ་བགེགས་བསྒྲལ་ནས་ནི༔ གཞན་དོན་སྐྱོང་བར་སེམས་བསྐྱེད་དོ༔ [ལན་གསུམ་གྱིས་སེམས་བསྐྱེད།] ཧོ༔ དབང་དྲག་འབར་བའི་ལྷ་ཚོགས་གཤེགས། །དྲེགས་པ་བསྣོལ་བའི་གདན་ལ་བཞུགས། །སྲིན་པོའི་གར་གྱིས་ཕྱག་འཚལ་ལོ། །དུག་གསུམ་བསྒྲལ་བའི་མཆོད་པ་འབུལ། །ཉམས་ཆག་འགལ་འཁྲུལ་མཐོལ་ལོ་བཤགས། །ལོག་འདྲེན་སྒྲོལ་ལ་རྗེས་ཡི་རང་། །དྲག་པོའི་ཆོས་འཁོར་བསྐོར་བར་བསྐུལ། །ཕྲིན་ལས་འགྲུབ་པར་གསོལ་བ་འདེབས། །དགེ་བ་སེམས་ཅན་ཡོངས་ལ་བསྔོ། །མངོན་སྤྱོད་ཕྲིན་ལས་མཐར་ཕྱིན་ཤོག །[ཅེས་ཚོགས་བསགས་མཐར།] ཛཿཧཱུྃ་བྃ་ཧོཿ[ས། སྐྱབས་

ཡུལ་རྣམས་རང་ལ་ཐིམ་པར་བསམ། དངོས་གཞི་ནི།] ཧཱུྃ་ཧཱུྃ་ཧཱུྃ༔ མི་འགྱུར་སྟོང་ཆེན་གདོད་མའི་གཤིས༔ སྤྲོས་བྲལ་དེ་བཞིན་ཉིད་དབྱིངས་ལས༔ མ་རྟོགས་ལོག་འདྲེན་སེམས་ཅན་ལ༔ ཀུན་ཁྱབ་བརྩེ་བའི་སྙིང་རྗེ་ཤར༔ གསལ་སྟོང་འགག་མེད་རང་རིག་ནི༔ ཧཱུྃ་དམར་འབར་བས་མཁའ་དབྱིངས་གང་༔ དེ་ལས་ཡེ་ཤེས་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ ཁམས་གསུམ་ཨེ་ཡི་ཕོ་བྲང་དུ༔ པད་ཉི་དྲེགས་པ་རྒྱལ་བསེན་ཁྲིར༔ རྒྱུ་ཡི་ཧཱུྃ་ཡིག་འཕྲོ་འདུ་ལས༔ བདག་ཉིད་པདྨ་ཁྲག་འཐུང་རྩལ༔ འཆོལ་བའི་ཁྲོ་རྒྱལ་ཧེ་རུ་ཀ༔ ཆེ་མཆོག་རྡོ་རྗེ་གྲོ་བོ་ལོདཿ སྨུག་ནག་དུས་མཐའི་མེ་ལྟར་འབར༔ སྤྱན་གསུམ་སྡང་མིག་གློག་སྟོང་འཁྱུག༔ སྨར་སྨིན་བསྐལ་མེའི་ཚྭ་ཚྭ་འཕྲོ༔ ཨམ་གཙིགས་བསྡམས་ཤིང་མཆེ་བ་གཙིགས༔ ཁྲོ་གཉེར་ཤངས་ནས་ཧཱུྃ་སྒྲ་ལྡིར༔ དམར་སེར་དབུ་སྐྲ་གྱེན་དུ་འཁྱིལ༔ ཕྱག་གཡས་གནམ་ལྕགས་རྡོ་རྗེ་ནི༔ རྩེ་དགུ་རྭ་གདེངས་མེ་འབར་བ༔ ཧཱུྃ་དགུ་རཾ་དགུས་མཚན་པ་ཅན༔ ནམ་མཁའི་དབྱིངས་སུ་གསོར་ཞིང་འཕྱར། སྟེང་གདོན་མ་ལུས་ཐལ་བར་རློག༔ གཡོན་པས་གནམ་ལྕགས་ཕུར་པའི་དབལ༔ རྣོ་ངར་བགེགས་ཀྱི་སྙིང་ལ་གཟིར༔ སྡིགས་མཛུབ་རྩེ་ལས་ལྕགས་སྡིག་ནི༔ མགོ་དགུ་བཅོ་བརྒྱད་རྭ་ལྡན་པ༔ གྲངས་

མེད་ཁྲ་ཐབས་འགྱེད་པ་ཡིས༔ དམ་སྲི་རྒྱལ་འགོང་ཧབ་ཧབ་ཟ༔ གསང་ཕོད་ཆོས་གོས་སག་ལྷྭམ་གསོལ༔ སྙན་ཆ་དུང་གི་ཝང་མིག་མཛེས༔ ཁྲག་འཛག་མགོ་ཕྲེང་དོ་ཤལ་སྤྲས༔ ཞབས་ཟུང་གྱད་ཀྱི་འདོར་སྟབས་ཀྱིས༔ སྟག་མོ་གྲུས་མའི་སྟེང་ནས་འགྱིང་༔ སྡེར་མོས་རྒྱལ་བསེན་སྙིང་རྩ་འདྲེན༔ སྤྱི་གཙུག་སྤྲུལ་པའི་མཁའ་ལྡིང་ནི༔ དམར་ནག་མེ་ཡི་གཤོག་པ་ཅན༔ ཀླུ་རིགས་སྦྲུལ་གྱི་རྣམ་པས་ཟ༔ ཁྱུང་སྐད་སྒྲོགས་པས་ས་གསུམ་གཡོ༔ ཡེ་ཤེས་མེ་དཔུང་འཁྲུགས་པའི་ཀློང་༔ གར་དགུའི་ཉམས་ཀྱིས་རྣམ་པར་རོལ༔ གནས་གསུམ་རྡོ་རྗེའི་འབྲུ་གསུམ་མཚན༔ ཐུགས་ཀའི་འོད་དང་ཧཱུྃ་གིས་གླུས༔ རྔ་ཡབ་གླིང་ནས་ཐོད་ཕྲེང་རྩལ༔ ཐུགས་རྒྱུད་རང་དབང་མེད་པར་བསྐུལ༔ དྲག་པོ་འཆོལ་བའི་སྐུར་བཞེངས་ཏེ༔ ཆར་ལྟར་བབས་ནས་རང་ལ་ཐིམ༔ ཐུགས་ཀར་ཉི་སྟེང་ཕ་ལམ་གྱི༔ རྡོ་རྗེའི་ལྟེ་བར་ཧཱུྃ་དམར་གསལ༔ ཧཱུྃ་ལས་ཧཱུཾ་དམར་མེ་འབར་བ༔ གྲངས་མེད་སྤྲིན་ཕུང་རབ་འཁྲུགས་པས༔ རང་ལུས་ཡོངས་གང་སྒོ་གསུམ་གྱི༔ ནད་གདོན་སྡིག་སྒྲིབ་བག་ཆགས་བཅས༔ ལྷག་མེད་གཞོབ་ཏུ་བསྲེགས་ཤིང་སྦྱངས༔ སྣ་བུག་གཡས་ནས་ཕྱིར་ཐོན་པས༔ ལྔ་ལྡན་ཧཱུྃ་གིས་སྟོང་ཁམས་གང་༔ དེ་

རྣམས་སྐུར་གྱུར་ཧཱུྃ་སྒྲ་སྒྲོགས༔ གདུག་ཅན་མ་ལུས་བསྔངས་ཤིང་བརྒྱལ༔ སྣང་སྲིད་འཕར་རྡེག་ཤིག་ཤིག་གཡོ༔ སླར་ཡང་ཚུར་འདུས་ཧཱུྃ་དུ་གྱུར༔ སྣ་བུག་གཡོན་ནས་ནང་དུ་ཞུགས༔ ཐུགས་ཀའི་ཧཱུྃ་དང་དབྱེར་མེད་འདྲེས༔ ཐ་མལ་དངོས་སྣང་མི་དམིགས་ངང་༔ སྣོད་བཅུད་ཁྲག་འཐུང་འཆོལ་བ་ཆེའི༔ སྐུ་གསུང་ཐུགས་ཀྱི་ཕྱག་རྒྱར་རྫོགས༔ ཧཱུྃ་ཧཱུྃ་ཧཱུྃ༔ [ཞེས་དཔའ་བོ་འབྲུ་གཅིག་སུམ་སྦྲེལ་དུ་བཟླ་བ་ནི་བསྙེན་པའོ། །] ཐུགས་ཀའི་ཧཱུྃ་མཐར་སྔགས་ཕྲེང་ནི༔ ལྕགས་སྲེགས་མདོག་ཅན་གཡས་བསྐོར་དུ༔ མགལ་མེ་ལྟ་བུར་འཁོར་བ་ལས༔ འོད་ཟེར་མེ་ཕུང་ཚྭ་ཚྭ་འཕྲོས༔ ལོག་འདྲེན་དམ་འགོང་མ་ལུས་བསྲེགས༔ སྡེ་བརྒྱད་དྲེགས་པའི་སྲོག་སྙིང་བསྡུས༔ རྩ་གསུམ་རབ་འབྱམས་ཐུགས་རྒྱུད་བསྐུལ༔ བྱིན་རླབས་ནུས་སྟོབས་མ་ལུས་པ༔ བདག་ཐིམ་གཟི་བརྗིད་རབ་འབར་ཏེ༔ སྣང་སྲིད་ཁམས་ལ་མངའ་མཛད་པའི༔ ཆེ་བཙན་འགྲན་བྲལ་སྐུ་རུ་གྱུར༔ ཨོྃ་ཨཱཿཧཱུྃ་བཛྲ་གུ་རུ་གྲོ་བོ་ལོད་ལོ་ཀ་སརྦ་སིངྔྷི་ཧཱུྃ་ཧཱུྃ༔ [ཞེས་རྩ་བའི་སྙིང་པོ་ཉིད་གཙོ་བོར་བཟླ་བ་སྒྲུབ་པའི་ཁྱད་པར་རོ། །] བདག་ཉིད་དྲག་པོའི་ཐུགས་ཀ་ནས༔ སྔགས་ཀྱི་འོད་ཟེར་སྤུ་གྲི་འཕྲོས༔ འདྲེ་རྒོད་རྒྱལ་འགོང་ཐམས་ཅད་ཀྱི༔ སྲོག་རྩ་རྦད་རྦད་བཅད་པར་གྱུར༔ [རྩ་སྔགས་ཤམ་དུ།] ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་

པ་ཙ་ཧཱུྃ་ཕཊ༔ [ཅེས་གཟིར་སྔགས་བཏགས་ཏེ་སྒྲུབ་པའི་བཅུ་ཆ་ཙམ་བཟླ་བ་ལས་སྦྱར་རོ། །རྗེས་ནི། ཐུན་གྱི་མཐར།] སྣང་བའི་དཀྱིལ་འཁོར་བརྟེན་པར་བཅས་པ་ཀུན༔ རྒྱུ་ཡི་སྙིང་པོ་ཧཱུྃ་ཆེན་འབར་བར་བསྡུ༔ ཧཱུྃ་ཡང་སྟོང་ཉིད་གཟོད་མའི་ཀློང་དུ་ཐིམ༔ སྐྱེ་མེད་ངང་ལས་འགགས་མེད་ཆོ་འཕྲུལ་ནི༔ ཆུ་ལས་ཆུ་བུར་ཇི་བཞིན་མཧཱ་གུ་རུ༔ རྡོ་རྗེ་གྲོ་ལོད་རྩལ་གྱི་ངོ་བོར་ལྡང་༔ [ཞེས་བསྡུ་ལྡང་བྱ།] ཧོ༔ མཐའ་ཡས་ཐེག་པ་མཆོག་གི་ལམ་མཆོག་ཏུ༔ བདག་གིས་དབང་དྲག་འབར་བའི་སྐུ་གསུང་ཐུགས༔ ཡེ་ཤེས་རྡོ་རྗེའི་ངོ་བོར་བསྒྲུབ་པ་དེས༔ འགྲོ་ཀུན་ཐར་པ་མཆོག་གི་ལམ་འཁོད་ཤོག༔ [ཅེས་བསྔོ་སྨོན་དང་།] ཧཱུྃ༔ བདེ་གཤེགས་གཅིག་བསྡུས་རྡོ་རྗེ་གྲོ་བོ་ལོད༔ ལོག་འདྲེན་འཇོམས་མཛད་དབང་དྲག་ཧེ་རུ་ཀ༔ བར་ཆད་ཀུན་སེལ་མཐུན་རྐྱེན་མ་ལུས་འགྲུབ༔ མཆོག་ཐུན་དངོས་གྲུབ་མྱུར་སྩོལ་བཀྲ་ཤིས་ཤོག༔ [ཅེས་ཤིས་པ་བརྗོད་པས་མཚམས་སྦྱར་ཏེ་སྤྱོད་ལམ་ལ་འཇུག་གོ །ཞེས་པའང་མཆོག་སྤྲུལ་འཇིགས་མེད་ཀུན་ཁྱབ་རྡོ་རྗེའི་གསུང་གི་ངོར་འཇིགས་བྲལ་ཡེ་ཤེས་རྡོ་རྗེ་སྦྱར་བ་ཛ་ཡནྟུ།། །།]

གྲོ་ལོད་སྐོང་བ།

[སྐོང་བ་བྱ་བར་སྤྲོ་ན་བསྐང་རྫས་སུ་འོས་པའི་ཡོ་བྱད་ཅི་འབྱོར་བ་བཤམ་ཞིང་རྒྱ་ཆེར་སྤེལ་ལ།] ཧཱུྃ། བདེ་ཆེན་འགྱུར་མེད་ཀུན་བཟང་དབྱིངས། །འོག་མིན་རྔ་ཡབ་དཔལ་གྱི་རི། །པདྨ་འོད་ཀྱི་གཞལ་ཡས་ནས། །རིག་འཛིན་པདྨ་ཐོད་ཕྲེང་རྩལ། །ཁྲག་འཐུང་ཁྲོ་བོར་རྣམ་རོལ་པ། །རྩ་བརྒྱུད་བླ་མ་ཡི་དམ་ལྷ། །དཔའ་བོ་མཁའ་འགྲོ་རྒྱ་མཚོར་བཅས། །གནས་འདིར་སྤྱན་འདྲེན་གཤེགས་སུ་གསོལ། །ཀུན་བཟང་འབྱོར་པ་རྒྱ་མཚོའི་དཔྱིད། །ངོ་མཚར་ནམ་མཁའི་མཛོད་ཀྱི་སྤྲིན། །ཕྱི་ནང་གསང་བ་བླ་མེད་པའི། །མཆོད་པ་ཀུན་གྱིས་ཐུགས་དམ་བསྐང་། །མེ་ཏོག་སྤོས་དང་སྣང་གསལ་དང་། དྲི་མཆོག་བཤོས་གཙང་རོལ་མོའི་སྒྲ། །རྒྱལ་སྲིད་བདུན་དང་འདོད་ཡོན་ལྔ། །བཀྲ་ཤིས་རྟགས་རྫས་བརྒྱད་ཀྱིས་བསྐང་། །དབང་པོའི་མེ་ཏོག་གསུར་ཆེན་སྤོས། །ཞུན་མར་ཁྲག་མཁྲིས་བྱུག་པའི་མཚོ། །ཤ་ཚིལ་རུས་བཅུད་ཞལ་ཟས་དང་། །ཐོད་རྔ་རོལ་མོས་ཐུགས་དམ་བསྐང་། །འཆི་མེད་བདུད་རྩི་མ་ད་ན། །དགྲ་བགེགས་སྙིང་ཁྲག་འཁྲུགས་པའི་མཚོ། །དམ་རྫས་བརྗིད་ལྡན་གཏོར་མ་དང་། །མཉམ་སྦྱོར་བདེ་བས་ཐུགས་དམ་བསྐང་། །རྔམས་བརྗིད་དུར་ཁྲོད་ཐོད་པའི་མཁར། །ཞིང་ལྤགས་བླ་རེ་རྒྱུ་རློན་གྱི། །དྲྭ་ཕྱེད་དོན་སྙིང་འཕྱང་འཕྲུལ་སོགས། །དྲག་པོའི་དཀྱིལ་འཁོར་

ཆེན་པོས་བསྐང་། །ཐོད་སྐམ་དབུ་རྒྱན་ཞིང་གླང་གོས། །མགོ་ཕྲེང་སྦྲུལ་ཆུན་སྟག་ཤམ་དང་། །ཁྲག་ཞག་ཐལ་ཆེན་རུས་རྒྱན་སོགས། །དཔལ་གྱི་ཆས་གོས་དུ་མས་བསྐང་སྔགས་བྱང་གླེགས་བམ་བགྲང་ཕྲེང་དང་། །རྔ་དང་རྔ་ཆེན་འཁར་རྔ་དུང་། །ཅང་ཏེའུ་དྲིལ་བུ་རྐང་གླིང་དང་། །བཤུགས་པའི་བརྡ་ཡིས་ཐུགས་དམ་བསྐང་། །རྡོ་རྗེ་རིན་ཆེན་པདྨ་དང་། །རལ་གྲི་འཁོར་ལོ་ཁ་ཊྭཱྃ་ཀ །གྲི་གུག་མདུང་ཐུང་བྷཉྫ་སོགས། །ཕྱག་མཚན་མང་པོས་ཐུགས་དམ་བསྐང་། །སྲ་བརྟན་གོ་དང་རྣོ་ངར་མཚོན། །མཁའ་ལྡིང་བྱ་དང་གཡག་ལུག་ཁྱུ། །གཅན་གཟན་གཏུམ་བརྗིད་དཔའ་བོའི་ཚོགས། །འབུམ་ཕྲག་མང་པོས་ཐུགས་དམ་བསྐང་། །མཛེས་པའི་རྒྱན་ཆ་དར་ཟབ་དང་། །རིན་ཆེན་སྨན་སྤོས་འབྲུ་བཅུད་ཚོགས། །མཐུན་པའི་དཀོར་ནོར་དམ་ཚིག་རྫས། །དཔག་ཡས་ནམ་མཁའ་གང་བས་བསྐང་། །ཀ་དག་ཆོས་སྐུར་བྱང་ཆུབ་གདངས། །འགགས་མེད་དཀྱིལ་འཁོར་ལྷར་ཤར་བའི། །ཡེ་ཤེས་སྒྱུ་མ་ཆེན་པོ་ཡིས། །འཁོར་འདས་རོ་མཉམ་དབྱིངས་སུ་བསྐང་། །མེད་བཞིན་ཤར་བའི་གཟུང་འཛིན་དགྲ། །རྟོགས་གྲོལ་སྲུང་ཟློག་བསད་པ་དང་། །མནན་སྲེག་འཕང་བའི་ལས་སྦྱོར་གྱིས། །སྲིད་རྩ་དབྱིངས་སུ་གཅོད་ཕྱིར་བསྐང་། །གཞི་དབྱིངས་འགྱུར་མེད་ཐོད་ཕྲེང་རྩལ། །

བསྐྱེད་རྫོགས་ལམ་གྱི་རྣལ་འབྱོར་གྱིས། །མངོན་པར་བྱང་ཆུབ་འབྲས་བུའི་སྐུ། །ཀློང་དུ་གྱུར་པའི་དགོངས་པ་ཡིས། །རྩ་བརྒྱུད་བླ་མ་མཆོག་གསུམ་དང་། །ཡི་དམ་རྒྱལ་བའི་དཀྱིལ་འཁོར་ལྷ། །ཁྱད་པར་ཁྲག་འཐུང་གྲོ་ལོད་རྩལ། །འཁོར་དང་བཅས་པའི་ཐུགས་དམ་བསྐང་། །བདེ་གཤེགས་ཀུན་འདུས་འཁོར་ལོའི་མགོན། །པདྨ་ཐོད་ཕྲེང་ཐུགས་དམ་བསྐང་། །ཁྲག་འཐུང་རྒྱལ་པོ་དཀྱིལ་འཁོར་གཙོ། །བདུད་འདུལ་འབར་བའི་ཐུགས་དམ་བསྐང་། །བདེ་ཆེན་ཤེས་རབ་སྒྲོལ་བའི་ཡུམ། །ཟ་བྱེད་སྟག་མོའི་ཐུགས་དམ་བསྐང་། །གཏུམ་དྲག་རྔམས་བརྗིད་ཀླུ་གདོན་འདུལ། །མཁའ་ལྡིང་རྒྱལ་པོའི་ཐུགས༴ ཐོགས་མེད་དྲག་རྩལ་ཕྲིན་ལས་བདག །ལྕགས་སྡིག་ནག་པོའི༴ ཡེ་ཤེས་བཞི་དངོས་དངོས་གྲུབ་བདག །མཁའ་འགྲོ་སྡེ་བཞིའི༴ ཚད་མེད་བཞི་དངོས་ལས་བཞི་མཛད། །དཔའ་བོ་གིང་བཞིའི་ཐུགས་དམ་བསྐང་། །བར་ཆད་ཀུན་སྲུང་མཐུ་སྟོབས་བདག །རྒྱལ་ཆེན་སྡེ་བཞིའི་ཐུགས་དམ་བསྐང་། །རྣལ་འབྱོར་སྒྲུབ་མཆོག་བུ་བཞིན་སྐྱོང་། །དམ་ཅན་གཏེར་སྲུང་ཐུགས་དམ་བསྐང་། །དེ་ལྟར་སྐོང་བའི་དམ་ཚིག་གིས། །ཐུགས་དམ་གཉན་པོ་བསྐངས་གྱུར་ནས། །རྣལ་

འབྱོར་དམ་ཚིག་ཉམས་ཆག་བཤགས། །ཉེས་པའི་སྒྲིབ་ཚོགས་དག་གྱུར་ཅིག །རྐྱེན་ངན་ཕྱི་ནང་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །[ཞེས་པའང་བྱིན་རླབས་ཀྱི་བབ་ཆེ་བའི་ཕྱིར་རིག་འཛིན་གཏེར་བདག་གླིང་པའི་རྡོ་རྗེའི་གསུང་སོར་བཞག་ལ་ཚིག་ཕྲད་འགའ་ཞིག་བསྒྱུར་བ་སྟེ། འཇིགས་བྲལ་ཡེ་ཤེས་རྡོ་རྗེས་སོ།། །། སརྦ་དཱ་མངྒ་ལཾ།། །།]

དྲེགས་པ་སྡེ་བརྒྱད་ཀྱི་གསོལ་མཆོད།

[དྲེགས་པ་སྡེ་བརྒྱད་ཀྱི་གསོལ་མཆོད་ནི། བཤོས་བུ་མཐུན་རྫས་ཀྱིས་གཏམས་པ་བྱིན་གྱིས་བརླབས་ནས།] རང་ཉིད་དབང་དྲག་འབར་བའི་ཐུགས་ཀའི་འོད་ཟེར་གྱིས་བསྐུལ་བས་དྲེགས་པ་སྡེ་བརྒྱད་འཁོར་དང་བཅས་པ་སོ་སོའི་གནས་ནས་སྤྱན་དྲངས་པར་[བསམ་ཞིང་།] ཧཱུྃ་ཧཱུྃ་ཧཱུྃ༔ ཨ་ཡ་མ་དུ་རུ་ཙ་ཤ་ན་བཛྲ་ས་མ་ཡ་ཛཿཛཿ ཞེས་བོས་ལ། ཨོཾ་བཛྲ་ཨརྒྷཾ་པཱདྱཾ་[སོགས་ནས།] ཤཔྡའི་[བར་གྱིས་ཉེར་སྤྱོད་དང་།] མཧཱ་པཉྩ་ཨ་མྲྀ་ཏ་ཁཱ་ཧི། མཧཱ་རཀྟ་ཁཱ་ཧི་[ཞེས་སྨན་རཀ་སྟོབ།] ཨ་ཡ་མ་དུ་རུ་ཙ་ཤ་ན་ས་པ་རི་ཝཱ་ར་ཨེ་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། [ལན་གསུམ་མམ་བདུན་གྱིས་གཏོར་མ་ཕུལ་ལ།] ཧཱུྃ་ཛ༔ ཁྲག་འཐུང་བཀའ་ཡི་ཕོ་ཉ་ཆེ༔ མཐུ་ཆེན་སྡེ་བརྒྱད་དྲེགས་པའི་ཚོགས༔ སྔོན་གྱི་ཁས་བླངས་མ་གཡེལ་བར༔ མ་ཐོགས་མྱུར་དུ་དམ་ལ་འདུ༔ དམ་ཉམས་བསྒྲལ་བའི་ཤ་ཁྲག་རུས༔ དོན་སྣོད་དབང་པོ་རྐང་ཀླད་ཚིལ༔ སྨན་རཀ་གཏོར་མའི་དགའ་སྟོན་ལ༔ རོལ་ཅིག་གསོལ་ལོ་ཁ་རཾ་ཁཱ་ཧི༔ ཤ་ལ་དགའ་བས་ཤ་ལ་ཟོ༔ ཤ་ཟན་རྐན་སྒྲ་ཏོག་ཅིང་རོལ༔ ཁྲག་ལ་དགའ་བས་ཁྲག་ལ་འཐུང་༔ ཁྲག་འཐུང་མིད་པ་ཁྱུར་གྱིས་རོལ༔ རུས་ལ་དགའ་བས་རུས་པ་མུར༔ རུས་མུར་

སོ་སྒྲ་ཆེམ་ཆེམ་རོལ༔ བསྟབ་པ་བདག་གིས་མ་ནོར་གྱིས༔ བཞེས་པ་ཁྱེད་རྣམས་མ་ནོར་ཅིག༔ དགྱེས་ཤིང་ཚིམས་པར་རོལ་ནས་ཀྱང་༔ སངས་རྒྱས་བསྟན་པ་ཁྱོད་ཀྱིས་སྲུངས༔ དཀོན་མཆོག་དབུ་འཕང་ཁྱོད་ཀྱིས་བསྟོད༔ རྣལ་འབྱོར་སྐུ་དགྲ་ཁྱོད་ཀྱིས་སྒྲོལ༔ གལ་ཏེ་ཕྲིན་ལས་མི་བསྒྲུབ་ན༔ དཔལ་གྱི་ལུང་ལས་འགལ་བའི་ཕྱིར༔ ཁྱེད་རྣམས་ཉམས་ཤིང་བརླག་པར་འགྱུར༔ དེ་བས་དམ་ལས་མ་འདའ་བར༔ བཅོལ་བའི་ལས་འདི་མྱུར་དུ་གྱིས༔ དུས་ལ་བབ་བོ་ས་མ་ཡ༔ ཞེས་གསོལ་ཞིང་ཕྲིན་ལས་བསྐུལ། མགྲོན་རང་གནས་སུ་གཤེགས་ལ་མཆོད་གཏོར་གཙང་སར་འབུལ་ལོ། ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྒྲུབ་པ་ཆེན་པོའི་ལས་རིམ་དངོས་གྲུབ་གཏེར་མཛོད།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྒྲུབ་པ་ཆེན་པོའི་ལས་རིམ་དངོས་གྲུབ་གཏེར་མཛོད་ཅེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་དྷ་ལོ་ཀོཏྟ་རཱ་ཡེ། [ཡང་གསང་བདུད་འདུལ་དབང་དྲག་རྡོ་རྗེ་གྲོ་ལོད་རྩལ་གྱི་སྒྲུབ་པ་ཆེན་པོའི་ལས་ཀྱི་རིམ་པ་ལ་སྤྱི་དོན་རྣམ་པ་གཉིས་ཏེ། སྒྲུབ་པའི་གཞི་བཟུང་བ་དང་། སྒྲུབ་པ་དངོས་ལ་འཇུག་པའོ། །] [དང་པོ་ནི། སྟོན་པ། འཁོར། གནས། ཡོ་བྱད། སྒྲུབ་ཆོས་ཏེ་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ་སྤྱི་བཞིན་ཤེས་པར་བྱའོ། །] [གཉིས་པ་སྒྲུབ་པའི་ལས་རིམ་དངོས་ལ་གསུམ། སྔོན་འགྲོ། དངོས་གཞི། རྗེས་ཀྱི་བྱ་བའོ། །] [དང་པོ་ལ་ལྔ། སའི་ཆོ་ག །མཚམས་གཅོད་པ། དཀྱིལ་འཁོར་འབྲི་བ། རྒྱན་འགོད་པ། ཕྲིན་ལས་ལ་འཇུག་པའི་ཡན་ལག་གོ །] [དང་པོ་ལ། ས་བསླང་བ་ནི། གང་དུ་དཀྱིལ་འཁོར་བྱ་བའི་གཞིར་དྲིའི་མཎྜལ་མེ་ཏོག་གི་ཚོམ་བུ་ཅན་གྱི་མཐར་མཆོད་པ་དང་

ས་བདག་སྤྱི་སྒོས་ཀྱི་གཏོར་མ་བཤམ་ལ། བདག་གི་རྣལ་འབྱོར་སྔོན་དུ་འགྲོ་བས། མཆོད་པ་རྣམས་རྟ་སྔགས་ཀྱིས་བསང་།] སྭ་བྷཱ་ཝ་[ས་སྦྱངས། །] ཐམས་ཅད་སྟོང་ཉིད་ནམ་མཁའི་ངང་༔ བྷྲཱུྃ་ལས་རིན་ཆེན་སྣོད་ནང་དུ༔ ཨོཾ་ལས་ཕྱི་ནང་མཆོད་པའི་ཚོགས༔ སོ་སོའི་ལྷ་མོའི་རོལ་པར་བཅས༔ རབ་འབྱམས་ནམ་མཁའ་གང་བར་གྱུར༔ ཨོཾ་བཛྲ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻདྱ་ཤཔྡ་པཱུ་ཛ་ས་མ་ཡ་ཧཱུྃ་ཞེས་དང་༔ གཏོར་གཞོང་རཏྣའི་གཞལ་ཡས་སུ༔ གཏོར་མ་འདོད་ཡོན་ཕུང་པོར་སྤུངས༔ ཨོཾ་ཨཱཿཧཱུྃ༔ [ལན་གསུམ་གྱིས་བརླབ།] ཚོམ་བུ། བཾ་ལས་སའི་ལྷ་མོ་སྐུ་མདོག་གསེར་

བཙོ་མ་ལྟ་བུ་ཞལ་གཅིག་ཕྱག་གཉིས་པ། རིན་པོ་ཆེའི་བུམ་པ་བསྣམས་པ། ཞི་ཞིང་འཛུམ་པའི་ཉམས་ཅན། དར་གྱི་སྟོད་གཡོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ལྟེ་བ་ཡན་ཆད་ས་སྟེང་དུ་འཐོན་པར་གྱུར། རང་གི་སྙིང་གའི་འོད་ཟེར་གྱིས་ས་འོག་ནས་ཡེ་ཤེས་ཀྱི་ལྷ་མོ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿ གཉིས་སུ་མེད་པར་གྱུར། ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ༔ ཞེས་དབང་བསྐུར་རིན་ཆེན་འབྱུང་ལྡན་གྱིས་དབུ་བརྒྱན་པར་གྱུར། ཨོཾ་པྲི་ཐི་ཝཱི་དེ་ཝཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ་[ནས།] ཤཔྡའི་[བར་གྱིས་མཆོད།] ཨ་ཀཱ་རོའི་[སྔགས་ཀྱིས་གཏོར་མ་ཕུལ་ལ་ས་གནོན་གྱི་རྒྱས།] སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དུ། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་ཀྱང་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་གསོལ་བ་བཏབ་པས་རིག་པ་འཛིན་པ་ཁྱོད་ཅི་དགའ་བར་སྤྱོད་ཅིག་ཅེས་གནང་བ་བྱིན་ནས་ས་དེ་ཉིད་དུ་ཐིམ་པར་གྱུར།

[དེ་ནས་བྱེ་བྲག་གི་སའི་བདག་པོ།] བྷཱ་མི་པ་ཏི་ས་པ་རི་ཝཱ་ར་བཛྲ་ས་མཱ་ཛཿ[ས་སྤྱན་དྲངས།] སྠ་ན་པ་ཏི་[སོགས་གསུམ་གྱིས་གཏོར་མ་ཕུལ།] གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །དཀྱིལ་འཁོར་དོན་དུ་ས་ཕྱོགས་འདི། །བདག་ཞུ་ཁྱེད་ཀྱིས་སྩལ་དུ་གསོལ། །བྷཱུ་མི་པ་ཏི་ས་པ་རི་ཝཱ་ར་སརྦ་བྷཱུ་ཏ་གཙྪ། [གནང་བ་བྱིན་ནས་རང་གནས་སུ་གཤེགས་པར་བསམས་ལ། ཚོམ་བུ་དང་མཆོད་པ་རྣམས་བསྡུ། ས་སྦྱོང་བ་ནི།] ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ [ཅེས་བརྗོད་ལ་དཀྱིལ་འཁོར་གྱི་གཞིར་དྲི་དང་བ་བྱུང་གི་ཆུ་རྡོ་རྗེ་ཁུ་ཚུར་གྱིས་བྱང་ཤར་ནས་གཡས་བསྐོར་དུ་བྱུག་ཅིང་།] སྭ་བྷཱ་ཝའི་[སྔགས་ལན་བདུན་བརྗོད་པས།] ས་ལ་སོགས་པ་སྣ་ཚོགས་པའི་ཆོས་ཐམས་ཅད་སྟོང་པ་ཉིད་དུ་རོ་གཅིག་པར་[མོས། ས་བཟུང་བ་ནི།] རང་ཉིད་སྐད་ཅིག་གིས་བདུད་འདུལ་དབང་དྲག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་པའི་མེ་ལྟར་འབར་བའི་སྐུར་གྱུར་པར་[བསམ་ལ། ལས་བྱང་བཞིན་བགེགས་གཏོར་བསྔོས་ཏེ་བཀའ་བསྒོ་དྲག་སྔགས་ཡུངས་ཐུན་ཚམ་རྔམས་དང་བཅས་པས་བསྐྲད།

ས་སྲུང་བ་ནི། སེང་ལྡིང་གི་ཕུར་པ་སོར་བརྒྱད་པ་དར་དམར་གྱི་ཅོད་པན་ཅན་བཟུང་ནས།] རང་གི་ཐུགས་ཀ་ནས་ཧྲཱིཿ་ཡིག་མར་མེ་ལྟར་འབར་བ་འཕྲོས། ཕུར་བུ་ལ་ཐིམ་པས་དེ་ཉིད་དཔལ་རྟ་མགྲིན་སྐུ་མདོག་དམར་པོ་དབྱུག་ཏོ་དང་ཐོད་ཁྲག་འཛིན་པ་སྐུ་སྨད་ཕུར་བུའི་དབལ་ཅན་དུ་གྱུར་པར་[བསམ་ཞིང་།] ཨོཾ་ཧྲཱིཿཔདྨནྟ་ཀྲྀཏ་མཧཱ་ཀྲོ་ངྷ྄་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ [ཅེས་ལན་བདུན་བཟླས་ནས་ས་གཞིར་བཏབ་པས།] དེ་ལས་འོད་ཟེར་འཕྲོས་ས་གཞི་ལ་ཁྱབ་པས་སྣང་སྲིད་ཐམས་ཅད་བདག་གི་དབང་དུ་འདུས་པར་[བསམ་མོ། །] [གཉིས་པ་མཚམས་བཅད་པ་ལ། ཕྱི་མཚམས་བཅད་པ་ནི། སྒྲུབ་ཁང་གི་ཕྱི་རོལ་ཕྱོགས་བཞིར་ཐོ་ལ་རྒྱལ་ཆེན་བཞིའི་སྐུ་རྟེན་རབ་གནས་བཙུགས་པའི་མདུན་དུ་ཆུ་གཉིས་ཉེར་སྤྱོད་ལྔ་དང་དཀར་གཏོར་རེ་བཤམ། ཐོག་མར་ཤར་དུ་ཕྱིན་ལ་མཆོད་གཏོར་བྱིན་བརླབ། ཐོ་བསང་སྦྱང་།] སྟོང་པའི་ངང་ལས་རྒྱལ་པོ་ཆེན་པོ་ཡུལ་འཁོར་སྲུང་སྐུ་མདོག་དཀར་པོ་མཛེས་ཤིང་བརྗིད་པའི་ཆས་ཅན་པི་ཝཾ་འཛིན་པའི་སྐུར་གྱུར། རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་ཤར་ཕྱོགས་ནས་རྒྱལ་པོ་ཆེན་པོ་ཡུལ་འཁོར་སྲུང་འཁོར་བཅས་བཛྲ་ས་མཱ་ཛཿ[ས་སྤྱན་དྲངས།] ཛཿཧཱུྃ་བྃ་ཧོཿ[ས་བསྟིམ།] ཨོཾ་དྷྲིཥྚ་རཱཥྚ་ཡ་སྭཱཧཱ༔ [ལན་བདུན།] ཨོཾ་བཛྲ་ཨརྒྷཾ་[སོགས་

ཀྱིས་ཉེར་སྤྱོད་དང་། སྔགས་སྔ་མའི་མཐར།] བ་ལིཾ་ཏ་ན་ན་ཁ་དནྟུ་གྲྀ་ཧྞ་ཧཱུྃ་ཁ་ཁ་ཁཱ་ཧི་ཁཱ་ཧི༔ [ཞེས་ལན་གསུམ་གྱིས་གཏོར་མ་ཕུལ་ལ།] དྲི་ཟ་དག་གི་བདག་པོ་ཆེ༔ རྒྱལ་པོ་ཆེན་པོ་ཡུལ་འཁོར་སྲུང་༔ བཙུན་མོ་སྲས་དང་བློན་པོར་བཅས༔ དེ་ལ་བསྟོད་དེ་ཕྱག་ཀྱང་འཚལ༔ མཆོད་སྦྱིན་གཏོར་མ་འདི་བཞེས་ལ༔ ཤར་ཕྱོགས་བགེགས་ཀྱི་མཚམས་ཆོད་ཅིག༔ [ཅེས་ཕྲིན་ལས་བཅོལ། རང་སྔགས་དང་།] ཏིཥྛ་བཛྲ་[ཞེས་མེ་ཏོག་འཐོར་ལ་བརྟན་བཞུགས་བྱ། དེ་བཞིན་དུ་ཕྱོགས་གཞན་གསུམ་པོ་ཡང་རིགས་འགྲེ་བས། ལྷོར།] རྒྱལ་པོ་ཆེན་པོ་འཕགས་སྐྱེས་པོ་སྐུ་མདོག་སྔོན་པོ་མཛེས་ཤིང་བརྗིད་པའི་ཆས་ཅན་རལ་གྲི་འཛིན་པ། རི་རབ་ཀྱི་ལྷོ་ཕྱོགས་ནས་[དྲང་བསྟིམ།] ཨོཾ་བི་རཱུ་ཌྷ་ཀ་ཡ་སྭཱ་ཧཱ༔ གྲུལ་བུམ་དག་གི་བདག༴ རྒྱལ་པོ་ཆེན་པོ་འཕགས་སྐྱེས་པོ༔ བཙུན་མོ༴ དེ་ལ༴ མཆོད་སྦྱིན༴ ལྷོ་ཕྱོགས་བགེགས་ཀྱི༴ [ནུབ་ཏུ།] རྒྱལ་པོ་ཆེན་པོ་མིག་མི་བཟང་སྐུ་མདོག་དམར་པོ་མཛེས་ཤིང་བརྗིད་པའི་ཆས་ཅན་སྦྲུལ་ཞགས་དང་མཆོད་རྟེན་འཛིན་པ། རི་རབ་ཀྱི་ནུབ་ཕྱོགས་ནས་[དྲང་བསྟིམ།] ཨོཾ་བི་རཱུ་པཱཀྵ་ཡ་སྭཱཧཱ༔ ཀླུ་དབང་དག་གི༴ རྒྱལ་པོ་ཆེན་པོ་མིག་མི་བཟང་༔ བཙུན་མོ༴

དེ་ལ༴ མཆོད་སྦྱིན༴ ནུབ་ཕྱོགས་བགེགས་ཀྱི༴ [བྱང་དུ།] རྒྱལ་པོ་ཆེན་པོ་རྣམ་ཐོས་སྲས་སྐུ་མདོག་སེར་པོ་མཛེས་ཤིང་བརྗིད་པའི་ཆས་ཅན་བེ་ཅོན་དང་ནེའུ་འཛིན་པ། རི་རབ་ཀྱི་བྱང་ཕྱོགས་ནས་[དྲང་བསྟིམ།] ཨོཾ་བཻ་ཤྲ་མ་ཎཱ་ཡ་སྭཱ་ཧཱ༔ གནོད་སྦྱིན་དག་གི༴ རྒྱལ་པོ་ཆེན་པོ་ངལ་གསོས་པོ༔ བཙུན་མོ༴ དེ་ལ༴ མཆོད་སྦྱིན༴ བྱང་ཕྱོགས་བགེགས་ཀྱི་མཚམས་ཆོད་ཅིག༔ [ཅེས་བསྒྱུར། ནང་མཚམས་བཅད་པ་ལ། དམ་སྲི་མནན་པ་ནི། སྒྲུབ་ཁང་གི་སྒོ་དྲུང་དུ་དོང་གྲུ་གསུམ་བྲུས་པར་དམ་སྲིའི་ལིངྒ་ཚུལ་བཞིན་བྲིས་པ་བཀོད་ལ། གསེར་སྐྱེམས་ཀྱི་མཆོད་པ་སྔོན་དུ་འགྲོ་བས། རང་ཉིད་བདུད་འདུལ་དབང་དྲག་རྡོ་རྗེ་གྲོ་ལོད་རྩལ་གཟི་བརྗིད་དུས་མཐའི་མེ་ལྟར་འབར་བའི་སྐུར་གྱུར་པའི་ང་རྒྱལ་བསྐྱེད་དེ།] ཨེ་ཡཾ་ཛྭ་ལ་རཾ༔ བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དམ་སྲི་འབྱུང་པོ་རིད་ཅིང་ཉམ་ཐག་པའི་ལུས་ཅན་དུ་གསལ་ལ། [ལྕགས་ཀྱུའི་ཕྱག་རྒྱ་དང་བཅས།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ༴ ཆོས་ཀྱི་བཀའ༴ དགེ་འདུན་གྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་

དང་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་བདུད་འདུལ་ཆེ་མཆོག་ཁྲག་འཐུང་རྡོ་རྗེ་གྲོ་ལོད་རྩལ་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས་དངོས་གྲུབ་ལ་བར་དུ་གཅོད་ཅིང་ལོག་པར་འདྲེན་པའི་འབྱུང་པོ་བདུད་ཀྱི་རིགས་སུ་གྱུར་པ་ཐམས་ཅད་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག ཏྲི་ཡཾ་ཛ༔ ཏྲི་བཛྲ་ཨངྐུ་ཤ་ཛཿཛཿཧཱུྃ་བཾ་ཧོ༔ [ཞེས་ལན་གསུམ་གྱི་དགུག་བསྟིམ་བྱས་ལ། དྲག་སྔགས་དང་བཅས་ཕུར་པ་གདབ། ཐུན་རྫས་ཀྱིས་བྲབ་ཅིང་།] ཧཱུྃཿ དམ་སྲི་བྱ་བའི་ལས་ངན་སྡིག་ཏོ་ཅན༔ དམ་ཉམས་གསང་སྔགས་བསྟན་པའི་རུ་དྲ་ཁྱོད༔ བླ་མ་ལ་བསྡོས་དཀོན་མཆོག་དབུ་འཕང་སྨད༔ བསྟན་ལ་གནོད་ཅིང་མཆེད་ལྕམ་ཡོངས་ལ་འཚེ༔ བཀའ་འདས་ཁྱོད་ཉིད་ནམ་ཡང་མི་བཏང་བས༔ འབར་བའི་མཚོན་ཆ་ལྔ་ཡིས་དུམ་བུར་གཏུབ༔ ལས་ཀྱི་གཤིན་རྗེ་ནག་པོའི་ཁ་རུ་བསྟབ༔ གླིང་བཞི་རི་རབ་ཆེན་པོའི་འོག་ཏུ་མནན༔ སྐྱེ་བ་ཇི་སྲིད་བསྐལ་པ་མ་སྟོངས་པར༔ མནན་

པ་ཡིན་གྱི་ནམ་ཡང་མ་ལྔངས་ཤིག༔ ཡ་མ་དམ་སྲི་མཱ་ར་ཡ་ནན་ནན༔ ཞེས་མནན་ཅིང་རོ་གཡམ་ལ་སྣ་ཚོགས་རྡོ་རྗེ་དང་རི་རབ་གླིང་བཞི་བྲིས་པས་བཀབ་སྟེ་ལས་བྱང་བཞིན་བྲོ་བརྡུང་བྱ། སྒོ་བསྲུང་བ་ནི། སྒོའི་ཡ་ཐེམ་གྱི་ཕྱི་ངོས་སུ་གཤིན་རྗེ་དང་ནང་དུ་བདུད་རྩི་འཁྱིལ་བའི་རྟེན་བཀོད། མཆོད་གཏོར་བཤམ་པ་བྱིན་བརླབ། རྟེན་[བསང་སྦྱང་།] སྟོང་པའི་ངང་ལས་པད་ཉི་དྲེགས་པའི་སྟེང་དུ་ཡ་ལས་གཤིན་རྗེ་ནག་པོ་ཐོད་དབྱུག་དང་ཞགས་པ་ཐོགས་པ། ཧཱུྃ་ལས་བདུད་རྩི་འཁྱིལ་པ་ལྗང་ནག་རལ་གྲི་དང་རྒྱ་གྲམ་འཛིན་པ། གཉིས་ཀའང་སྲིན་པོ་ཁྲོས་པའི་ཉམས་ཅན་འབར་བའི་ཆས་ཀྱིས་བརྒྱན་ཏེ་མེའི་ཕུང་པོའི་དབུས་ན་གནས་པའོ། །དེའི་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ། ཧཱུྃ་ལས་འོད་ཟེར་འཕྲོས་པས་རང་འདྲའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོ༔ གཉིས་སུ་མེད་པར་གྱུར། [ཉེར་སྤྱོད་ལྔས་མཆོད་ཅིང་། རྩ་སྔགས་གཉིས་ཀྱི་མཐར།] ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི་[བཏགས་པ་གསུམ་གྱིས་གཏོར་མ་ཕུལ།] ཧཱུྃ༔ བཅོམ་ལྡན་ཁྲོ་བོའི་རྒྱལ་པོ་ནི༔ སངས་རྒྱས་ཀུན་གྱི་འཁོར་ལོས་བསྒྱུར༔ གདུལ་དཀའ་མ་ལུས་འདུལ་བ་པོ༔ ཁྲོ་བོའི་རྒྱལ་ལ་ཕྱག་འཚལ་བསྟོད། [བརྟན་པར་བྱ་བའི་ཕྱིར།] ཨོཾ་བཛྲ་ཀྲོ་ངྷ་ཡ་

མཱནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ [ལན་བདུན་བཟླས་ནས།] ཁྲོ་བོ་གཤིན་རྗེའི་གཤེད་ཀྱིས་སྒྲུབ་པའི་གནས་འདིར་ཕྱིའི་བར་ཆད་ནང་དུ་མི་གཏོང་བའི་ཕྲིན་ལས་མཛོད་ཅིག །[ཅེས་དང་།] ཨོཾ་བཛྲ་ཀྲོ་ངྷ་ཨ་མྲྀ་ཏ་ཀུཎྜ་ལི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ [བདུན་བཟླས་ནས།] ཁྲོ་བོ་བདུད་རྩི་འཁྱིལ་བས་ནང་གི་དངོས་གྲུབ་ཕྱིར་མི་གཏོང་བའི་ཕྲིན་ལས་མཛོད་ཅིག །[ཅེས་འདོད་དོན་གསོལ། ནང་མཚམས་བཅད་པ་ནི། སེང་ལྡེང་གི་ཕུར་བུ་བཅུ་ཙནྡན་དམར་པོས་བྱུགས་ཤིང་མེ་ཏོག་གི་ཕྲེང་བ་བཅིང་པ་བསང་སྦྱང་།] སྟོང་པའི་ངང་ལས་ཧཱུྃ་ཡིག་བཅུ་ཡོངས་སུ་གྱུར་པ་ལས་ཕུར་བུ་རྣམས་ཁྲོ་བོ་བཅུ་སྟོད་ཁྲོ་བོའི་གཟུགས་ལ་སྨད་ཕུར་བུའི་རྣམ་པ་ཅན་རྩེ་མོ་རབ་ཏུ་འབར་བའི་མེ་ལྟ་བུར་བསམ་ནས་ཕུར་བུ་བསྒྲིལ་ཞིང་ཧཱུྃ་བཅུ་བཟླས་པས་བྱིན་གྱིས་བརླབས་ལ། རང་གི་ཐུགས་ཀ་ནས་ཁྲོ་བོ་ཌཱ་ཀི་རཱ་ཛ་སྤྲོས་ཏེ་ཕྱོགས་སྐྱོང་བཅུ་བཀུག་ནས་སྟེང་འོག་ཕྱོགས་མཚམས་སོ་སོར་ཨེ་བཅུ་བཀོད་པ་ལ་གཟིར་བར་[བསམ་ཞིང་། སློབ་དཔོན་གྱིས་ལག་གཡས་ཐོ་བ་དང་གཡོན་པས་ཕུར་བུ་རྣམས་རིམ་པར་ཐོགས་ལ།] ཨོཾ་བཛྲ་ཀཱི་ལི་ཀཱི་ལ་ཡ་མཧཱ་ཀྲོ་ངྷ་ཧཱུྃ་ཀ་ར་ཧཱུྃ༔ གནོད་བྱེད་འབྱུང་པོ་གརྫ་གརྫ་

ཧཱུྃ་ཕཊ༔ [དེ་བཞིན་དུ་གོང་འོག་གི་སྔགས་ཚིག་འགྲེས་སྦྱར་ཏེ།] བི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཧྱ་གྲཱི་ཝ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཏྲཻ་ལོ་ཀྱ་བི་ཛ་ཡ་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཨ་པ་རཱ་ཛི་ཏ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨཱ་རྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ནི་ལ་དཎྜ་ཧཱུྃ༔ ད་ཧ་ད་ཧ་ཧཱུྃ་ཕཊ༔ མཧཱ་བ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ [ཅེས་འབར་བའི་སྟངས་སྟབས་དང་བཅས་སྟེང་གི་ཕུར་བུ་ཤར་གྱི་ཤར་དང་། ཕྱོགས་བཞི་ཤར་ནས་གཡས་བསྐོར། མཚམས་བཞི་བྱང་ཤར་ནས་གཡོན་བསྐོར། འོག་གི་ཕུར་བུ་ནུབ་ཀྱི་ནུབ་ཏུ་གདབ་པས།] བགེགས་རྣམས་ཀྱི་སྙིང་ཕུག་ནས་གཡོ་འགུལ་མེད་ཅིང་འོད་གསལ་བར་གྱུར་པར་[བསམ་ཞིང་།] ཕུར་བུ་ལས་བྱུང་བའི་འོད་ཟེར་སྲུང་བའི་འཁོར་ལོར་འཁྲིགས་པས་ཕྱོགས་མཚམས་ཐམས་ཅད་ཁྱབ་པར་[མོས་ལ་ལས་བྱང་བཞིན་སྲུང་འཁོར་གསལ་གདབ། གསང་མཚམས་བཅད་པ་ནི། ཁམ་ས་ལ་མ་ཏྲཾ་གི་གཟུགས་བྱས་པ་དཀྱིལ་འཁོར་གྱི་གཞིར་མགོ་ལྷོ་ནུབ་ཏུ་ཕྱོགས་པར་བཞག་ལ།] དཀྱིལ་འཁོར་གྱིས་མི་དམིགས་པ་ལས་མ་ཏྲཾ་རུ་ཏྲ་མཱ་ར་ཡ་ཛཿ[ཞེས་པས།] བདུད་པོ་མ་ཏྲཾ་རུ་ཏྲ་མགོ་གསུམ་ལག་པ་དྲུག་

ཁ་དོག་ཐལ་སྐྱ་ཆེ་ལ་མི་སྡུག་པ་འདར་ཞིང་དངངས་པའི་རྣམ་པ་ཅན་དུ་གྱུར་པར་བསམ་ཞིང་། [དྲག་སྔགས་སོ་ལྔ་པ་བརྗོད་ལ་ཕུར་བསྐོར་ཚམ་རྔམས་དང་བཅས་ཏེ།] ཧཱུྃ༔ མ་ཏྲཾ་བྱ་བའི་སྡིག་ཅན་ཁྱོད༔ དུག་གསུམ་ཉོན་མོངས་དབང་དུ་སོང་༔ གསང་བའི་དཀྱིལ་འཁོར་གཉན་པོ་བཤིག༔ དཀོན་མཆོག་གསུམ་གྱི་སྐུ་དགྲར་གྱུར༔ དེ་ཚེ་དཔལ་ཆེན་ཧེ་རུ་ཀས༔ བསྒྲལ་ནས་དུར་ཁྲོད་བརྒྱད་དུ་བྱས༔ དེ་བཞིན་ཞིང་བཅུའི་རུ་ཏྲ་ཁྲོད༔ བདག་མེད་ཆོས་ཀྱི་དབྱིངས་སུ་བསྒྲལ༔ ཨོཾ་ཏྲི་ཤུ་ཛྙཱ་ན་སྭ་བྷཱ་ཝ་ཨཏྨ་ཀོ྅ཧཾ། །[ཞེས་ཕུར་བུ་བཏབ་ཅིང་རལ་གྲིས་ལྷུ་ཕྲལ་ལ། སྟེགས་བུའི་ལྷོ་ནུབ་ཏུ་མགོ །ནུབ་ཏུ་སྙིང་། ནུབ་བྱང་དུ་ལག་གཡོན། བྱང་དུ་རྐང་གཡོན། བྱང་ཤར་དུ་གསང་གནས། ཤར་དུ་རྐང་གཡས། ཤར་ལྷོར་ལག་གཡས། ལྷོར་གློ་བ་རྣམས་ཕྱོགས་མཚམས་མ་འཆོལ་བར་བཀོད་ནས།] མ་ཏྲཾ་རུ་ཏྲ་ཨེ་རཱ་ཙ་མ་ངྷ་ལ་བྷྲཱུྃ༔ རང་གི་ཐུགས་ཀ་ནས་བྷྲཱུྃ་འཕྲོས་ཁོག་པ་ལ་ཐིམ་པས་ཁོག་པ་དུར་ཁྲོད་རོལ་པའི་གཞལ་ཡས་ཁང་དུར་ཁྲོད་བརྒྱད་ར་བ་མེ་དང་བཅས་པས་བསྐོར་བར་གྱུར་པར་[བསམ་མོ། །དེ་དག་ནི་ནུབ་དང་པོའི་བྱ་བའོ། །སྐབས་འདིར་ཕྱི་བཤགས་སཱཙྪ་གདབ་པ། ཆུ་གཏོར་གཏོང་བ། མདོ་སྡེ་ཀློག་པ། གླུད་གཏོར་གསེར་སྐྱེམས་ལ་སོགས་པ་དགེ་བའི་དཔུང་བསྐྱེད་

ཅིང་བར་གཅོད་ཞི་བའི་ཐབས་ཀྱི་རིམ་པ་ཇི་ལྟར་འགྲུབ་པར་བྱའོ། །] [གསུམ་པ་དཀྱིལ་འཁོར་འབྲི་བ་ལ། ཆག་ཆག་གདབ་པ་ནི། ཀ་པཱ་ལར་བདུད་རྩི་ལྔ་དྲི་དང་སྦྱར་བ་ཐོགས་ལ།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ དམ་རྫས་བདུད་རྩི་ཡེ་ཤེས་ལྔ་ལྡན་པས༔ དེ་བཞིན་གཤེགས་པའི་ཕྲིན་ལས་མཆོག་སྒྲུབ་ཕྱིར༔ བཀའ་གསང་རྨད་དུ་བྱུང་བའི་ཆག་ཆག་འདེབས༔ ཨོཾ་མཧཱ་པཉྩ་ཨ་མྲི་ཏ་མཎྜལ་ཧཱུྃ༔ [ཞེས་བརྗོད་ཅིང་དཀྱིལ་འཁོར་གྱི་གཞི་དེར་ཁྱེམ་མེད་པར་ཆག་ཆག་གདབ་བོ། །ཐིག་གདབ་པ་ལ། ཡེ་ཐིག་ནི། རྒྱུས་ཆེན་ནམ་ཁ་དོག་ལྔ་པའི་སྲད་བུ་ཉིད་བསང་སྦྱང་།] སྟོང་པའི་ངང་ལས་པདྨ་དང་ཉི་མ་ལ་གནས་པའི་ཧཱུྃ་ཁ་དོག་ལྔ་ལས་ཁྲག་འཐུང་རིགས་ལྔ་ཡུམ་དང་བཅས་པའི་སྐུར་གྱུར་པའི་ཐུགས་ཀའི་འོད་ཟེར་གྱིས་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿ [ཉེར་སྤྱོད་ལྔས་མཆོད།] བཅོམ་ལྡན་ཁྲོ་བོའི་རྒྱལ་པོ་ནི། །[སོགས་ཤླཽ་ཀས་བསྟོད།] དེ་རྣམས་ཞུ་བ་ལས་བྱུང་བའི་ཐིག་སྐུད་དུ་གྱུར་པ་ཀརྨ་བཛྲ་ཡུམ་དུ་གསལ་བའི་ལག་ཏུ་གཏད་དེ། ཧཱུྃ༔ མཚན་ལྡན་བཀྲ་ཤིས་སྦྱོར་བའི་ཡུམ༔ དྲག་པོ་སྒྲོལ་བའི་ཡུམ་ཆེན་ནི༔ གདོལ་པ་ནག་པོ་གཉེར་འབྲེང་མ༔ རྡོ་རྗེ་དྲག་པོའ་ལས་རྣམས་འགྲུབཿ གསང་བ་རྡོ་རྗེའི་ཐིག་འདེབས་ཀྱིས༔ ལས་རྣམས་

མ་ལུས་ཀུན་བྱོས་ཤིག༔ བྷྲཱུྃ་ཛྙཱ་ན་ཨེ་མཎྜལ་བྷྲཱུྃ༔ [ཞེས་བརྗོད་ཅིང་སློབ་དཔོན་ནུབ། སློབ་མ་ཤར་དུ་གནས་པས་ཚངས་ཐིག་དང་པོ་མཁའ་ལ་གདབ་ཅིང་། དེ་བཞིན་དུ་སློབ་དཔོན་ལྷོ་དང་སློབ་མ་བྱང་དུ་གནས་པས་ཚངས་ཐིག་གཉིས་པ་དང་། ཟུར་ཐིག་རྣམས་ནུབ་ནས་ལྷོ་བྱང་། ལྷོ་ནས་ནུབ་དང་ཤར་གྱི་རྩ་ཐིག་རྣམས་གདབ་ཅིང་། ཡུམ་གྱི་མཁའ་ཀློང་དུ་ཡབ་ཀྱི་བྱང་སེམས་མཁའ་མཉམ་གྱི་ཐིག་ལེར་འདྲེས་ཏེ་རང་བྱུང་གཞལ་ཡས་ཁང་དུ་ལྷུན་གྱིས་གྲུབ་པར་བལྟའོ། །ལས་ཐིག་ནི། ཐིག་ཆལ་གྱིས་སྦགས་པའི་སྐུད་པ་བརྒྱང་སྟེ།] ཧཱུྃ༔ ནམ་མཁའ་བར་སྣང་ཨེ་ཡི་ངང་༔ གསང་བ་ཡེ་ཤེས་ཐིག་བཏབ་པས༔ དབང་དྲག་སྲིན་པོའི་ལྷ་ཚོགས་གནས༔ ཕོ་བྲང་ཡིད་བཞིན་ལྷུན་གྱིས་གྲུབ༔ བྷྲཱུྃ་བི་ཤྭ་བི་ཤུངྔྷ་རཏྣ་བྷཉྫ་ན་ཨེ་མ་མཎྜལ་བྷྲཱུྃ༔ [ཅེས་བརྗོད་ཅིང་འདུག་གནས་སྤྱོད་ལམ་ཡེ་ཐིག་གི་སྐབས་ལྟ་བུས་འདི་ལྟར་གདབ་སྟེ། དང་པོ་ཤར་ནུབ་ཚངས་ཐིག་གདབ། །དེ་ཡི་དབུས་སུ་མཚན་མ་བྱ། །དེ་ནི་དཀྱིལ་འཁོར་དབུས་ཡིན་ནོ། །དབུས་ནས་ཤར་ནུབ་ཚད་མཉམ་པའི། །མཚན་མ་བྱས་པ་བརྐྱངས་པ་ཡིས། །ལྷོ་བྱང་གཉིས་སུ་བྱ་རྗེས་བྱ། །དེ་སྟེང་ཚངས་ཐིག་གཉིས་པ་གདབ། །དེ་བཞིན་ལྷོ་བྱང་ཚངས་ཐིག་ལའང་། །ཤར་ནུབ་ལྟ་བུའི་མཚན་མ་བྱ། །དེ་ཡི་བར་བརྐྱངས་སྲད་བུ་ནི། །ཕྱོགས་བཞི་མཚན་མའི་སྟེང་བཟུང་ནས། །ཟུར་བཞིར་བྱ་རྗེས་

མཚན་མ་བྱ། །དེ་སྟེང་ཟུར་ཐིག་གཉིས་པོ་གདབ། །ངོས་རེར་ཇི་ལྟར་འཚམས་པ་ཡི། །འོག་ཐིག་བཞི་བཏབ་མདའ་ཡབ་ཐིག །མདའ་ཐིག་ནས་ནི་ལྟེ་བའི་བར། །ཟུར་ཐིག་བཞི་པོ་ཆ་གསུམ་བགོ། །སུམ་ཆ་ཕྱི་མའི་སྟེང་བཟུང་ནས། །ལོགས་ཐིག་བཞི་བཏབ་རྩ་བའི་ཐིག །མདའ་ཐིག་དང་ནི་རྩ་ཐིག་བར། །ཕྱེད་བགོས་ཆ་ཆེན་གཉིས་འབྱུང་ངོ་། །ནང་མ་དབུས་དོར་མཐའ་གཉིས་གདབ། །རྩིག་པ་འདོད་སྣམ་ཕ་གུ་འབྱུང་། །ཆ་ཆེན་ཕྱི་མ་ཕྱེད་བགོས་ལ། །ཕྱི་མ་དེ་ཡང་ཕྱེད་དུ་བཅད། །དྲྭ་ཕྱེད་ཤར་དུ་མདའ་ཡབ་འབྱུང་། །དེ་རྗེས་ནང་གི་རྩ་ཐིག་ནས། །རྟ་བབ་ཕྱི་ཐིག་བར་དུ་ནི། །ཚངས་པའི་ཐིག་གི་གཡས་གཡོན་དུ། །ཆ་ཆེན་གཉིས་གཉིས་གདབ་པར་བྱ། །ནང་མ་ཕྱེད་གདབ་ཕྱི་མ་ཕྱེད། །ཕྱི་མ་ཆ་བཞིར་བགོ་བར་བྱ། །སྒོ་ཁྱུད་སྒོ་འགྲམ་སྒོ་ལོགས་དང་། །རྩིག་མུན་ཀ་བ་ཀ་རྒྱན་འབྱུང་། །མདའ་ཐིག་ཕྱི་རུ་ཆ་ཆེན་གཉིས། །ནང་མ་ཆ་བཞིར་བགོ་བར་བྱ། །རྟ་བབ་སྣམ་བུ་བཞི་ཡིན་ནོ། །ཕྱི་མ་དབུས་དོར་མཐའ་གཉིས་གདབ། །པད་འཁོར་གདུགས་ཀྱི་གནས་སུ་གྱུར། །རྟ་བབ་ཕྱི་མཐའི་རིམ་པ་ཡང། དང་པོ་ཀ་རྒྱན་མཐའ་དང་མཉམ། །དེ་རྗེས་གསུམ་པོ་རེ་རེ་ཐུད། །མིག་གསུམ་སྐོར་ཚུལ་རྟ་བབ་ཀྱི། །སྣམ་བུ་གཉིས་པའི་ཕྱི་ཐིག་དང་། །ཚངས་ཐིག་འཛོམས་ནས་བཟུང་སྟེ། །ཆ་ཕྲན་གཉིས་ཀྱིས་དབུས་མ་བསྐོར། །སྣམ་བུ་དང་པོའི་ཕྱི་ཐིག་དང་། །ཚངས་ཐིག་འཛོམ་པའི་གཡས་གཡོན་དུ། །ཆ་ཕྲན་གཉིས་རེ་ཕྱིན་པ་ནས། །ཆ་ཕྲན་གཉིས་རེ་གཡས་གཡོན་བསྐོར། །སྣ་ཚོགས་རྡོ་རྗེའི་ར་བསྐོར་ཚུལ། །ཚངས་ཕྱིར་གསུམ་ཕྱིན་མདའ་ཕྱིར་གཅིག །ཕྱིན་ཏེ་ཀ་རྒྱན་རྩེ་ནས་བསྐོར། །དེ་ནས་ཕྲེང་གཉིས་ཕྱི་རུ་

གཅིག །ཕྱིན་ཏེ་སྔ་མའི་ཚད་དེས་བསྐོར། །མདའ་ཐིག་རྩེ་ནས་ཕྱི་རོལ་དུ། །ཆ་ཆེན་ཕྱེད་དང་གཅིག་དང་ཕྱེད། །གཅིག་བསྐོར་པདྨ་དུར་ཁྲོད་དང་། །རྡོ་ར་མེ་རི་རྣམས་སུ་འགྱུར། །ལྟེ་བའི་ལྷ་གནས་བསྐོར་ཚུལ་ནི། །རྩ་ཐིག་ནང་ནས་ལྟེ་བའི་བར། །ཚད་མཉམ་ཟླུམ་ཐིག་གཉིས་བསྐོར་བའི། །རེ་རེའི་ནང་དུ་ཆ་ཆུང་བསྐོར། །ལྟེ་བ་མུ་ཁྱུད་རྩི་བས་བརྒྱད་དང་། །རྩིབས་རྟེན་མུ་ཁྱུད་རྣམས་སུ་འགྱུར། །ལྟེ་བའི་མུ་ཁྱུད་ནང་ཐིག་དང་། །ཤར་གྱི་ཚངས་ཐིག་ཕྲད་པ་ནས། །ལྟེ་བར་ཚད་པའི་སྲད་བུ་ཡིས། །གཡས་དང་གཡོན་དུ་མཚན་མ་བྱ། །དེ་ཉིད་ནུབ་ཀྱི་ཚངས་ཐིག་དང་། །སྦྲེལ་བའི་ལྟེ་བ་ཆོས་འབྱུང་འོང་། །མཐོང་བརྒྱུད་གནས་ཀྱིས་ཤེས་པར་བྱའོ། །ཞེས་པ་ལྟར་མ་འཁྲུལ་བར་གདབ། ཚོན་དབྱེ་བ་ནི། རྡུལ་ཚོན་ཁ་དོག་ལྔ་དམར་པོ་ཧྲཱིཿས་མཚན་པ་གཙོ་བོར་བྱས་པའི་སོ་སོར་རིགས་ཀྱི་ཡི་གེ་བྲིས་པ་དབུས་དང་ཕྱོགས་བཞིར་བཀོད། བསང་སྦྱང་ལྷར་བསྐྱེད་དེ་བསྟོད་པའི་བར་ཐིག་གི་སྐབས་བཞིན་བྱས་ལ། དེ་རྣམས་ཞུ་བ་ལས་བྱུང་བའི་རིན་པོ་ཆེའི་རྡུལ་ཕྲ་རབ་ཏུ་བསམ་ནས་ས་བོན་ལྔ་བརྗོད་པར་བྱིན་གྱིས་བརླབ། ཚོན་ཇི་ལྟར་དབྱེ་བའི་ཚུལ་ལ། ལྟེ་བའི་ཆོས་འབྱུང་དམར་པོ་ལ། །མུ་རན་སྔོན་པོ་ཟླ་གམ་དམར། །མུ་ཁྱུད་ཐོད་ཕྲེང་འཁོར་ལོ་སྔོ། །གོང་རས་ཕྱོགས་མདོག་མུ་ཁྱུད་མཐིང་། །གྲུ་ཆད་སྒོ་ཁྱམས་ཕྱོགས་ཀྱི་མདོག །རྩིག་པ་ནང་ནས་རིམ་པ་བཞིན། །དམར་དཀར་མཐིང་སེང་ལྗང་གུའོ། །འདོད་སྣམ་དམར་ལ་ཕ་གུ་སེར། །དྲྭ་བའི་གཞི་ནག་དྲྭ་བ་དཀར། །ཤར་བུའི་གཞི་སྔོ་

ཤར་བུ་དཀར། །མདའ་ཡབ་དཀར་པོ་པད་འདབ་རིས། །མུན་པ་པ་ཏི་གླང་རྒྱབ་ནག །ཀ་བ་ཕྱོགས་མདོག་རྒྱན་མཛེས་ཚོན། །རྟ་བབ་སྣམ་བུ་བཞི་པོ་ལ། །ནང་ནས་དམར་སྔོ་ལྗང་སེར་རམ། །ཡང་ནས་སེར་མཐིང་དམར་ལྗང་བྱ། །པདྨ་དམར་ལ་འཁོར་ལོ་དང་། །རི་དྭགས་གསེར་མདོག་གདུགས་དཀར་པོ། །འོག་གཞིའི་སྣ་ཚོགས་རྡོ་རྗེ་ནི། །ཕྱོགས་མདོག་ཕྱི་ཁྱམས་ལྗང་གུ་སྟེ། །པདྨ་སྣ་ཚོགས་དུར་ཁྲོད་ཀྱི། །གཞི་མ་ནག་ལ་རྒྱན་མཛེས་ཚོན། །རྡོ་ར་གཞི་ནག་རྡོར་ཕྲེང་སེར། །མེ་རི་སྣ་ཚོགས་ཆོས་འཁོར་རོ། །ལྷ་གནས་རྣམས་སུ་མཚན་མ་ནི། །སྐུ་གཟུགས་ཡིག་འབྲུ་ཕྱག་མཚན་ནམ། །མ་གྲུབ་གཙོ་འཁོར་རང་རང་གི །སྐུ་མདོག་དང་མཚུངས་ཚོན་སྤུང་བྱ། །ཚོན་རྩི་མི་འཐུག་མི་སྲབ་ཅིང་། །མ་འདྲེས་ཆད་དང་ཡོ་བ་སོགས། །ཉེས་པའི་སྐྱོན་ཀུན་རབ་སྤངས་ཏེ། །སྒྲིན་པོའི་བློ་ཡིས་ལེགས་པར་བྲི། །ཞེས་པ་ལྟར་མཛེས་ཤིང་ཡིད་དུ་འོང་བར་བཀྱེ། གལ་ཏེ་རྡུལ་ཚོན་གྱི་དཀྱིལ་འཁོར་མི་འགྲུབ་པའི་ཕྱོགས་ལ་གོང་གི་ཆག་ཆག་གྲུབ་པ་དང་སྤྲོ་ན་ཡེ་ཐིག་ཙམ་བཏབ་ནས་རས་བྲིས་ཀྱི་དཀྱིལ་འཁོར་མཚན་ཉིད་དང་ལྡན་པ་བཀྲམ་མོ། །] [བཞི་པ་རྒྱན་འགོད་པ་ནི། ཙནྡན་དམར་པོའམ་སེང་ལྡེང་ལ་སོགས་པའི་སྒྲུབ་ཕུར་མཚན་ཉིད་དང་ལྡན་པ་དར་སྣའི་ཅོད་པན་བྱུག་སོགས་གསུམ་གྱིས་གཟི་བྱིན་བསྐྱེད་ཕྱིར་གུ་གུལ་གྱི་བདུག་ལ།] ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་ཨ་ངྷི་ཏིཥྛ་རྨུགས་རྨུགས་ཧ་ལ་ཧ་ལ་དགྲ་བགེགས་འབྱུང་པོའི་ཙིཏྟ་མྱགས་མཱ་ར་ཡ་ཧཱུྃ་ཕཊ༔ [ཡུངས་ཀར་གྱིས་བྲབ་

ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་མ་གུ་ཏ་ལ་མ་གུ་ཏ་ལ་པྲ་ཏ་ལ་པྲ་ཏ་ལ་ཤ་ཏ་ར་ཙ་ཧཱུྃ་དགྲ་བགེགས་འབྱུང་པོ་མཱ་ར་ཡ་ཧཱུྃ་ཕཊ། [རཀྟས་བྱུག་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་རཀྟ་ཛྭ་ལ་མཎྜལ་རཀྵ་རཀྵ་དགྲ་བགེགས་ཝཱ་ཤཾ་མཱ་ར་ཡ་ཧཱུྃ་ཕཊ༔ [དེ་ནས་སྲིད་པ་རྫས་ཀྱི་ཕུར་བུ་ཡེ་ཤེས་ཀྱི་ཁྲོ་བོར་སྒྲུབ་པ་ནི། ཕུར་བུའི་རང་བཞིན་སྟོད་ཉིད་ཆོས་ཀྱི་སྐུའི་རོལ་པ་ལས་རྣམ་པ་བདུད་འདུལ་དབང་དྲག་འབར་བ་ཐུགས་རྗེ་གཟུགས་ཀྱི་སྐུར་གསལ་བས་ཁམས་གསུམ་སྒྲོལ་བའི་མཐུ་དབང་རྫོགས་པར་བསམ་ལ། དཀྱིལ་འཁོར་དབུས་ཀྱི་ཨེ་ཁྲམ་ལ་འགོད་ཅིང་།] ཧཱུྃ༔ སངས་རྒྱས་ཀུན་གྱི་ཡེ་ཤེས་སྐུ༔ ཆེ་མཆོག་བདུད་འདུལ་གྲོ་ལོད་རྩལ༔ བདེ་ཆེན་འབར་བ་ཨེ་ཡི་དབྱིངས༔ དུར་ཁྲོད་གསང་བའི་ཕོ་བྲང་དུ༔ རུ་ཏྲ་བསྣོལ་བའི་གདན་སྟེངས་སུ༔ དགྱེས་ཤིང་བརྟན་པར་བཞུགས་སུ་གསོལ༔ ཨོྃ་མཧཱ་གུ་རུ་ཤྲཱི་ཧེ་རུ་ཀ་ས་མ་ཡ་ཏིཥྛ་ལྷན༔ [ཞེས་དང་། རྣམ་རྒྱལ་བུམ་པ། དམ་ཚིག་གི་བྲིས་སྐུ། གསང་ཐོད་བདུད་རྩི། གནམ་ལྕགས་རྡོ་རྗེ་དགུ་པ། སྒྲུབ་པའི་གཏོར་ཆེན། ཚེའི་འབྲང་རྒྱས་སོགས་རིམ་པར་འགོད་ལ།] ཧཱུྃ༔ གསང་གསུམ་བདག་ཉིད་སྔགས་ཀྱི་བརྡ༔ དབང་དྲག་ཁྲག་འཐུང་འཁོར་བཅས་རྟེན༔ ཆོས་ཀྱི་དབྱིངས་ནས་བཞེངས་ལ་འདིར༔ དངོས་གྲུབ་སྩོལ་ཕྱིར་བཞུགས་སུ་གསོལ༔

[དཀྱིལ་འཁོར་གྱི་རྒྱན་རྫས་རྣམས་བཀྲམ་ཞིང་།] ཧཱུྃ༔ ཤེས་རབ་རལ་གྲིས་ཉོན་མོངས་དྲྭ་བ་གཅོད༔ ཡེ་ཤེས་མདའ་ཡིས་མ་རིག་དུག་གསུམ་འབིགས༔ ཕྲིན་ལས་ཕུར་པས་བར་ཆད་བདུད་དཔུང་འདུལ༔ དཀྱིལ་འཁོར་ཆེན་པོའི་རྒྱན་ཏུ་བཞུགས་སུ་གསོལ༔ ས་མ་ཡ་ཏིཥྛ་ལྷན༔ ཧཱུྃ༔ བྱམས་པའི་གདུགས་མཆོག་འཁོར་བའི་ཚ་གདུང་སྐྱོབ༔ ཆོས་ཀྱི་རྒྱལ་མཚན་བར་ཆད་བདུད་ལས་རྒྱལ༔ ཤེས་རབ་འཕན་དར་བྱང་ཆུབ་ཆོས་རྣམས་རྫོགས༔ རྒྱལ་བའི་དཀྱིལ་འཁོར་མཛེས་པའི་རྒྱན་དུ་འབུལ༔ བཛྲ་སྥ་ར་ཎ་ཕཊ༔ ཨརྒྷཾ་མེ་ཏོག་བདུག་སྤོས་མར་མེ་དང་༔ དྲི་ཆབ་ཞལ་ཟས་རོལ་མོ་ལ་སོགས་པ༔ དངོས་འབྱོར་ཡིད་སྤྲུལ་ཀུན་བཟང་མཆོད་པ་རྣམས༔ དཀྱིལ་འཁོར་ལྷ་ཚོགས་མཆོད་ཕྱིར་འབུལ་བར་བགྱི༔ སརྦ་པཱུ་ཛ་ས་མ་ཡ་ཧཱུྃ༔ [དཔལ་གྱི་གཏོར་མ་སྨན་རཀ་སོགས་ཕྱི་ནང་གསང་བའི་མཆོད་པའི་རྫས་ཐམས་ཅད་ཀྱིས་བསྐོར་ཞིང་།] ཧཱུྃ༔ དུར་ཁྲོད་གསང་བ་མཆོག་གི་དཀྱིལ་འཁོར་དུ༔ ཕུན་སུམ་ཚོགས་པའི་མཆོད་སྤྲིན་རབ་ཏུ་སྤྲོས༔ དབང་དྲག་འཁོར་བཅས་ཐུགས་དམ་གཉན་བསྐང་ལ༔ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ༔ ན་མ༔ སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ༔ [ཞེས་ནམ་མཁའ་མཛོད་ཀྱི་སྔགས་རྒྱས་མཁའ་ཁྱབ་ཏུ་སྤེལ་ལོ། །]

[ལྔ་པ་ཕྲིན་ལས་ལ་འཇུག་པའི་ཡན་ལག་ལ། མངའ་གསོལ་ཞིང་གནས་སུ་འགོད་པ་ནི། རྒྱལ་ཚབ་པས་དབྱངས་སྙན་པོར་ལེན་ཚུལ་གྱིས།] ཧཱུྃ༔ སངས་རྒྱས་གདུང་འཚོབ་རྡོ་རྗེ་རྒྱལ་པོ་ཉིད༔ སྐུ་གསུང་ཐུགས་དང་ཡོན་ཏན་ཕྲིན་ལས་རྫོགས༔ དུག་ལྔ་རྩད་གཅོད་དངོས་གྲུབ་ཀུན་འབྱུང་གནས༔ སྟོན་པའི་སྒྲོན་མེར་མངའ་གསོལ་དགྱེས་པར་བཞུགས༔ [ཞེས་དང་། རྒྱལ་ཚབ་ལ།] ཧཱུྃ༔ བླ་མའི་གདུང་འཚོབ་སྐུ་གསུང་ཐུགས་ཀྱི་སྲས༔ དམ་ཆོས་ཆར་འབེབས་ཚེ་དང་དངོས་གྲུབ་སྤེལ༔ དབང་བསྐུར་ཕྲིན་ལས་རྣམ་བཞི་མཐར་ཕྱིན་པ༔ རྒྱལ་ཚབ་སྟོན་པར་མངའ་གསོལ་དགྱེས་པར་བཞུགས༔ [ཡུམ་ལ།] གཉིས་མེད་བདེ་སྐྱིད་མཚན་ཉིད་རབ་ཏུ་བཟང་༔ ཀུན་བཟང་ཡུམ་དུ་མངའ་གསོལ་དགྱེས་པར་བཞུགས༔ [རྡོ་རྗེ་ལས་པར།] ཕྲིན་ལས་གཞུང་བསྲང་བསྙེན་སྒྲུབ་མཐར་ཕྱིན་མཛད༔ རྡོ་རྗེ་ཀརྨཱ་མངའ་གསོལ་དགྱེས་པར་བཞུགས༔ [གིང་ལ།] བར་གཅོད་བགེགས་བསྒྲལ་གཟུགས་ཕུང་ལྷ་བ་སྟོབ༔ རྡོ་རྗེ་གིང་མཆོག་མངའ་གསོལ་དགྱེས་པར་བཞུགས༔ [མཚམས་པར།] ཕྱི་ནང་མཚམས་གཅོད་བར་ཆད་ཐམས་ཅད་སྲུང་༔ རྡོ་རྗེ་མཚམས་བར་མངའ་གསོལ་དགྱེས་པར་བཞུགས༔ [སྤྱན་པར།] དངོས་གྲུབ་བགེགས་

གཉིས་དུས་དང་དྲོད་ཚད་མཁྱེན༔ རྡོ་རྗེ་སྤྱན་པར་མངའ་གསོལ་དགྱེས་པར་བཞུགས༔ [དུས་མཚམས་པར།] ཕྲིན་ལས་སྐབས་སྦྱར་དུས་འཛིན་ནམ་ཚོད་མཁས༔ རྡོ་རྗེ་དུས་མཚམས་མངའ་གསོལ་དགྱེས་པར་བཞུགས༔ [ཕྱག་ཚང་།] ཕུད་གཙང་གཡོས་མཁས་ཕྱི་ནང་བྱ་བྱེད་མཁས༔ རྡོ་རྗེ་ཕྱག་ཚང་མངའ་གསོལ་དགྱེས་པར་བཞུགས༔ [བྱན་པོར།] གཡོ་མཁན་ཆད་ལྷག་མེད་ཅིང་གཙང་སྦྲ་ལྡན༔ རྡོ་རྗེ་བྱོན་མོར་མངའ་གསོལ་དགྱེས་པར་བཞུགས༔ [མཆེད་ལྕམ་གཞན་རྣམས་ལ།] གསལ་དག་ཛཔྲ་མཁས་དད་ལྡན་བརྩོན་པར་བཞུགས༔ གསེར་ཕྲེང་མཆེད་ལྕམ་མངའ་གསོལ་དགྱེས་པར་བཞུགས༔ [རྡུལ་ཕྱག །] ཀུན་གྱི་བཀའ་སྒྲུབ་ཕྱི་ཡི་ཉུ་ལེ་སྐྲོད༔ རྡུལ་ཕྱག་སྐྱེས་བུ་མངའ་གསོལ་དགྱེས་པར་བཞུགས༔ [ཞེས་སོ་སོར་མངའ་གསོལ། རྟགས་གདབ་པ་ནི། དཔལ་གྱི་ཆས་རྣམས་ཐོགས་ལ་གོང་བཞིན་དབྱངས་བོར་ལེན་གྱིས།] ཧཱུྃ༔ དོན་དམ་སྤྲོས་མེད་རྒྱུ་མའི་ཁོང་གསེང་ཅན༔ ཡེ་ཤེས་ལྔ་ལྡན་ཐོད་པའི་དབུ་རྒྱན་གསོལ༔ ཐེག་མཆོག་དོན་སྟོན་གླང་ཆེན་ཀོ་རློན་གསོལ༔ འཁོར་བ་མི་སྤང་མི་ལྤགས་གཡང་གཞི་གསོལ༔ ཞེ་སྡང་ཉིད་འཇོམས་སྦྲུལ་ནག་ཆུན་པོ་གསོལ༔ ཕྲིན་ལས་རྣམ་བཞི་ལྷུན་གྲུབ་སྟག་ཤམ་

གསོལ༔ འཁོར་བའི་བཅུད་ལེན་ཞག་གི་ཟོ་རིས་གསོལ༔ ཆགས་པ་དབང་སྡུད་རཀྟའི་ཐིག་ལེ་གསོལ༔ སྐྱེ་འཆི་རྩད་གཅོད་ཐལ་ཆེན་ཚོམ་བུ་གསོལ༔ སྐུ་གསུམ་ལྷུན་གྲུབ་ཐོད་ཕྲེང་ཚར་གསུམ་གསོལ༔ ཅིས་ཀྱང་མི་ཤིགས་རྡོ་རྗེའི་གོ་ཁྲབ་གསོལ༔ མ་རིག་ནགས་སྲེག་ཡེ་ཤེས་མེ་དཔུང་གསོལ༔ ཞིང་བཅུ་ཡོངས་སྒྲོལ་དཔལ་གྱི་ཆས་བཅུ་འདི༔ དབང་ཕྱུག་ཆེན་པོའི་སྐུ་ལ་རྒྱན་ཏུ་བཞེས༔ [ཞེས་རྗེས་ཟློས་དང་བཅས་ཚིག་དང་བསྟུན་ནས་ཐམས་ཅད་ཀྱི་གནས་སོ་སོར་བགོ་བའི་ཚུལ་བྱ། བརྡ་སྦྱར་བ་ནི།] ཧཱུྃ༔ སྣང་སྲིད་འཁོར་འདས་གདོད་མ་ནས༔ རྣམ་དག་ལྷུན་གྲུབ་རྒྱལ་བའི་ཞིང་༔ མ་རྟོགས་གཉིས་འཛིན་སྒྲིབ་གཡོགས་སྒོ༔ རང་རིག་བརྡ་ཡིས་དབྱེ་བར་བྱ༔ བྷྲཱུྃ་པྲ་ཝེ་ཤ་ཡ་ཕཊ༔ [ཅེས་བརྡ་སྒོ་དབྱེ།] ཧཱུྃ༔ ཁམས་གསུམ་ཡེ་ནས་རང་བྱུང་བའི༔ བདེ་གཤེགས་རྒྱལ་བའི་དཀྱིལ་འཁོར་ཉིད༔ བརྡ་དང་གར་གྱིས་མཚོན་ནས་ཀྱང་༔ གཉིས་སུ་མེད་པར་ཕྱག་བགྱིའོ༔ ཨ་ལ་ལ༔ ཨ་ཏི་པུ་ཧོ༔ པྲ་ཏཱིཙྪ་ཧོ༔ [ཞེས་བརྡ་ཕྱག་འཚལ་ལ། ལྷའི་ང་རྒྱལ་དང་ལྡན་པས།] ཨོཾ་མ་ཧཱ་བཛྲ་ཧཱུྃ༔ [ཞེས་རྡོ་རྗེ་སྙིང་གར་གསོར།] ཨོཾ་བཛྲ་གྷཎྜེ་ཧཱུྃ༔ [ཞེས་དྲིལ་བུ་གསིལ་ཞིང་དཀུར་བརྟེན།] ཨོཾ་སརྦ་ཏ་ཐཱ་ག་ཏ་མཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ་྅ཧཾ༔

[ཞེས་ཐུགས་ཀར་འཁྱུད་རྒྱ་བྱས་ལ་རོལ་མོའི་རིགས་ཀྱི་སྒྲ་ཆེར་བསྒྲག །བྱིན་དབབ་ནི།] རང་ཉིད་ལྷར་གསལ་བའི་ཐུགས་ཀ་ནས་འོད་ཟེར་འཕྲོས་པས་བླ་མ་རིག་འཛིན་རྩ་བ་གསུམ་གྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། ཐམས་ཅད་སྤྲིན་གཏིབས་པ་ལྟར་བྱོན་ནས་བྱིན་རླབས་དབང་བསྐུར་དངོས་གྲུབ་སྩོལ་ཞིང་ཕྲིན་ལས་བསྒྲུབ་པར་[མོས་ལ། སྤོས་དང་རོལ་མོ་དབྱངས་དང་བཅས་ཏེ་ལས་བྱང་བཞིན་བྱིན་དབབ་པར་བྱའོ། །དེ་དག་ཉིན་གཉིས་པའི་བྱ་བ་ཏེ་སྦྱོར་བའི་ཆོས་རྣམས་ཐུབ། གལ་ཏེ་རས་བྲིས་ཀྱི་ཕྱོགས་ལྟ་བུ་མགྱོགས་ཁྱད་སྐབས་སྔོན་འགྲོའི་ཉི་མ་གཉིས་པོ་གཅིག་ཏུ་སྦྲེལ་ནའང་རུང་ངོ་། །] [སྤྱི་དོན་གཉིས་པ་དངོས་གཞི་སྒྲུབ་པའི་རིམ་པ་ལ་གསུམ། ཕྲིན་ལས་ཀྱི་གཞུང་བསྲང་བ། སྒྲུབ་པའི་བར་ཆད་བསལ་བ། གྲུབ་ནས་དངོས་གྲུབ་བླང་བའོ། །] [དང་པོ་ནི། སློབ་དཔོན་སྒྲུབ་པའི་གྲོགས་དང་བཅས་པ་དཀྱིལ་འཁོར་ལ་ཕྱོགས་པར་འཁོད་དེ། ཉིན་གསུམ་པ་ནས་ཕྲིན་ལས་ཀྱི་བྱང་བུ་སྦྱོར་དངོས་རྗེས་གསུམ་གྱིས་བསྡུས་པ་ཉིད་ཉིན་མཚན་ཐུན་དྲུག་གི་རིམ་པས་ཉམས་སུ་ལེན་པར་བྱ་བ་ལས། ཐུན་དང་པོ་ལ་བླ་མ་བརྒྱུད་པའི་གསོལ་འདེབས་སྔོན་དུ་འགྲོ་བས། སྐྱབས་སེམས་ཚོགས་བསགས་སྔོན་གཏོར་ནས་བརྩམས་སྔོན་འགྲོའི་ལས་རིམ་རྣམས་རྒྱས་པར་བཏང་། དངོས་གཞི་ཏིང་ངེ་འཛིན་གསུམ་གྱིས་ཁོག་ཕུབ་སྟེ་མདུན་གྱི་སྒྲུབ་དཀྱིལ་དམིགས་རྟེན་གྱིས་མཚན་གཞི་ལྟ་བུར་བཟུང་ནས་རྟེན་དང་བརྟེན་པའི་དཀྱིལ་འཁོར་བདག་མདུན་དབྱེར་མེད་དུ་བསྒོམ་སྟེ་ཡེ་ཤེས་པ་སྤྱན་འདྲེན་ནས་བསྟོད་པའི་བར་གྲུབ་པ་དང་། ཛཔྲ་བསྐུལ་ནི།] ཧཱུྃ༔ བཞེངས་ཤིག་ཆོས་ཀྱི་

དབྱིངས་ནས་བཞེངས༔ བསྐུལ་ལོ་འགྲོ་བའི་དོན་དུ་བསྐུལ༔ ཐུགས་རྗེའི་ཕྲིན་ལས་དུས་ལ་བབ༔ དབང་དྲག་དཀྱིལ་འཁོར་ལྷ་ཚོགས་རྣམས༔ ཡུན་རིང་དུས་ནས་བསྙེན་པའི་ལྷ༔ སྐུ་ནི་མི་བཟད་འཇིགས་ཚུལ་ལྡན༔ གསུང་དབྱངས་བཟླས་པས་རྒྱུད་བསྐུལ་ནས༔ ཐུགས་ཀྱི་བརྩེ་བས་བདག་ལ་དགོངས༔ སྐུ་གསུང་ཐུགས་དང་ཡོན་ཏན་དང་༔ ཕྲིན་ལས་འདུས་པའི་དངོས་གྲུབ་རྣམས༔ ད་ལྟ་ཉིད་དུ་སྩལ་དུ་གསོལ༔ [ཞེས་པ་སྐུལ་ལ་གཞུང་བཞིན་བསྙེན་པའི་ཧཱུཾ་བཟླས་ཅུང་ཟད་ཀྱིས་འགོ་དྲངས་ཏེ། སྒྲུབ་པའི་དམིགས་གནད་དང་བཅས་གྲོ་བོ་ལོད་ཀྱི་བཟླས་པ་ལ་གཙོ་བོར་བྱ་ཞིང་། མཐར་འཁོར་སྔགས་དང་ལས་སྦྱོར་ཡང་ཉུང་ཙམ་རེ་སྦྱར། ཐུན་མཚམས་སུ་སྟོང་ཚིག་གི་མཆོད་པ་ནི།] ཧཱུྃ། དབང་དྲག་འབར་བའི་ལྷ་ཚོགས་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་ཕྲིན་ལས་བསྟོད། །བག་མེད་འགན་འཁྲུལ་ཉམས་ཆག་བཤགས། །ཐུགས་རྗེས་བརྩེར་དགོངས་དངོས་གྲུབ་སྩོལ། [ཞེས་བསྐུལ། ཐུན་གཉིས་པ་ལ་མཆོད་པ་བྱིན་བརླབ་ནས་བཟླས་པའི་མཐར་ཐུག་གི་བར་དང་། ཐུན་གསུམ་པ་ཡང་དེ་དང་འདྲ་བ་ལས་བཟླས་པའི་རྗེས་སུ་ཚོགས་ཀྱི་མཆོད་པ་དང་དམ་ཅན་གཏེར་སྲུང་གི་གཏོར་སྐྱོང་སོགས་རྗེས་ཀྱི་ལས་རིམ་རྣམས་རྒྱས་པར་བྱ། མཚན་ཐུན་གསུམ་པོའང་ཉིན་ཐུན་དང་ཕྱོགས་འདྲ་བས་གཞུང་སྲོང་བ་སྟེ། བསྙེན་གྲོགས་ཀྱིས་ཁོར་ཡུག་ཏུ་གསུང་མི་འཆད་

པའི་བཟླས་པ་ལ་བརྩོན་པར་བྱའོ། །] [གཉིས་པ་བར་ཆད་བསལ་བ་ནི། ཐུན་མཚམས་སུ་དམ་སྲི་ཉུལ་ལེའི་ལིངྒ་བཅས་པ་མདུན་དུ་བཀོད་ལ།] ཨེ་ཡཾ་ཛྭ་ལ་རཾ༔ བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་དངོས་གྲུབ་ལ་བར་དུ་གཅོད་ཅིང་ལོག་པར་ལྟ་བའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་པ་ཐམས་ཅད་རིད་ཅིང་ཉམ་ཐག་པའི་ལུས་ཅན་དུ་གྱུར་པར་[བསམ་ཞིང་།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་[སོགས་བདེན་སྟོབས་བརྗོད་པ་སྔོན་དུ་འགྲོ་བས།] བདེན་པ་ཆེན་པོའི་མཐུ་ལ་བརྟེན་ནས་དངོས་གྲུབ་ལ་བར་དུ་གཅོད་ཅིང་ལོག་པར་འདྲེན་པའི་འབྱུང་པོ་ཉམས་ལེན་བདུད་ཀྱི་རིགས་སུ་གྱུར་པ་ཐམས་ཅད་མཚན་མ་རྫས་ཀྱི་རྟེན་ལ་མཆིས་པར་གྱུར་ཅིག །ཏྲི་ཡཾ་ཛ༔ ཏྲི་བཛྲ་ཨངྐུ་ཤ་ཛ༔ ཛཿཧཱུྃ་བྃ་ཧོཿ [ཞེས་ལན་གསུམ་གྱིས་འགུག་གཞུག་བྱས་ལ། ཕུར་ཐུན་ཚོམ་བུ་བསྐུལ་བ་ནི།] ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་བོ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་ཁྲོ་གཏུམ་སྐུར་སྟོན་པ༔ དབང་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ༔ ང་ནི་པདྨ་དབང་གི་སྐུ༔ སྲས་འཁོར་སྤྲུལ་པ་བྱེ་བ་འབུམ༔ བཀའ་སྡོད་རབ་འཇིགས་ཕོ་ཉར་བཅས༔ དབང་དྲག་ལྷ་ཚོགས་དུས་ལ་བབ༔ གཡས་ཀྱི་ཕྱག་ན་ཕུར་བུ་འདྲིལ༔ གཡོན་གྱི་ཕྱག་ན་ལྕགས་ཀྱུས་འགུགས༔ ལྕགས་ཀྱུས་ཟུངས་ལ་ཕུར་

བུས་ཐོབ༔ གནོད་བྱེད་དགྲ་བགེགས་རྡུལ་དུ་རློག༔ ཨོཾ་བཛྲ་མཧཱ་ཀྲོ་ངྷ་པདྨ་ཀྲོ་ངྷི་ཤྭ་རི་བཛྲ་ཀཱི་ལི་ཀཱི་ལ་ཡ་མཧཱ་ཡཀྵ་ཀ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ༔ གནོད་བྱེད་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཧཱུྃ་ཕཊ༔ [ཅེས་དྲག་སྔགས་ཕུར་བསྐོར་དང་བཅས་པས་གདབ་ཅིང་ཐུན་གྱིས་བྲབ། ཁྱད་པར་དཔལ་གྱི་ཕོ་ཉ་ཀུན་ཐུབ་རྒྱལ་མོ་བསྐུལ་བ་ནི།] ཧཱུྃ༔ ཤར་ཕྱོགས་དཀར་མོ་དུང་གི་གཞལ་ཡས་ནས༔ ཁྲག་མདོག་དམར་མོ་བསེ་ཡི་ལན་ཕྲན་ཅན༔ སྤྱན་རྩ་དམར་ཟླུམ་ཉི་མའི་ཟེར་ལྟར་འཕྲོ༔ སྨིན་མ་གློག་འཁྱུག་བར་སྣང་གོ་སྐབས་འབྱེད༔ བུ་ཡུག་ཐོག་འབེབས་ཤངས་ནས་རྡོ་རྗེ་འཁྲུག༔ བཞད་པ་ཧེ་དང་དཔལ་གྱི་སྤུ་གྲིས་གཏམས༔ རྔམས་པའི་ལྗགས་འདྲིལ་བསྐལ་པའི་མེ་ཆེན་འབར༔ ཨག་ཚོམ་མེ་འབར་རབ་འབྱམས་སྲིད་པ་སྲེག༔ བསྐལ་པའི་འབྲུག་སྒྲ་སྙན་ནས་འབྲུག་སྟོང་སྒྲོགས༔ ལག་པ་དམར་པོ་སྤུ་གྲི་འབུམ་གྱིས་གཏམ༔ སེན་མོ་ལྕགས་ཀྱུའི་རྩེ་ལ་མེ་ཆེན་འབར༔ བ་སྤུ་གནམ་ལྕགས་ཞུན་མའི་རྡོ་རྗེ་འཁྲུགས༔ སྨིན་མཚམས་ལྕགས་ཀྱི་ཁྲོ་ཆུང་ཆར་འབེབས་ཤིང་༔ ཞབས་ཀྱི་ཕུར་པས་སྲིན་མོ་ལྔ་བརྒྱ་གཟིར༔ རལ་པའི་གསེབ་ནས་ཁྲག་གི་ཆར་པ་འབེབས༔ ཤིན་ཏུ་མི་བཟད་

གཏུམ་ཆེན་ཁྲག་འཐུང་མ༔ སྲིན་མོའི་སྙིང་འབྱིན་ཆང་པར་བཅུག་ནས་གསོལ༔ ཤིན་ཏུ་མི་བཟད་འབར་བའི་སྐུ་གཅིག་མ༔ དཔག་ཚད་ལྔ་བརྒྱར་རྒྱུག་ཅིང་ཀླུ་སྲིན་སྒྲོལ༔ ཁྲོས་པའི་ཞལ་མདོག་ཁྲག་གི་མཆན་པ་ཁ༔ ན་བཟའ་དམར་པོ་སྲིན་གྱི་གཡང་གཞི་གསོལ༔ ཕྱོགས་བཅུར་ཁ་བལྟས་ཕྱོགས་སྐྱོང་ཞབས་ཀྱིས་མནན༔ བདུད་ལ་བབ་ན་སྙིང་ཁྲག་དྲོན་མོ་གསོལ༔ སྲིན་ལ་བབ་ན་སྲོག་རྩ་དམར་པོ་གཅོད༔ དགྲ་ལ་བབ་ན་དུག་གི་ཁ་ཆུ་འདེབས༔ བགེགས་ལ་བབ་ན་རཱུ་བ་རྡུལ་དུ་རློག༔ དཔལ་གྱི་ཕོ་ཉ་དཔལ་གྱི་ཐུགས་ལས་སྤྲུལ༔ དམ་ཉམས་དགྲ་དང་འབྱུང་པོ་བགེགས་ལ་སོགས༔ ཕུང་པོ་དུམ་བུར་གཏུབ་ལ་དོན་སྙིང་སྲེགས༔ དམ་ཉམས་ཉུལ་ལེའི་བར་ཅད་རྡུལ་དུ་རློག༔ དམ་ཚིག་དུས་ལ་བབ་བོ་ས་མ་ཡ༔ ཧཱུྃ༔ གྲུ་བུ་གྲུ་ཨ་པ་ཙེ༔ རུ་པ་ཙེ༔ ན་ར་ཙེ༔ ཙ་མེད་ཐུན་ཐུན༔ ན་ཤ་སྟྭཾ་བྷ་ཡ༔ ཡཀྵ་བྱིན༔ ཡཀྵ་བྱིན༔ ཕྱེ་མ་ཕྱེ་མ༔ རྡུལ་ཕྲན་རྡུལ་ཕྲན༔ ཙིཏྟ་རྦད་ནན༔ ཨོཾ་སུཾ་བྷ་ནི་[སོགས་དང་།] ཨོཾ་བཛྲ་ཀཱི་ལི་ཀཱི་ལ་ཡ་པྲ་མ་རཱ་ཛ་ཏྲིག་ནན༔ ངྷ་ན་རཀྵ་རྦུད་ལིང་༔ ཏྲིའུ་ཏྲིའུ་མ་མ་ན་ཡ་ཤོ་ན་ཛ༔ མཱ་ར་ཡ་རྦད་རྦད༔ ཅེས་དྲག་སྔགས་སྤོས་རོལ་དང་ཁྱད་པར་གྱི་དབྱུག་པས་བསྡིགས་ཤིང་ཐུན་གྱིས་བྲབ་ནས་རྒྱང་རིང་དུ་བསྐྲད། དེ་མ་ཐག་སྤོས་དང་

རོལ་མོ་སོགས་ཀྱིས་གཟི་བྱིན་བསྐྱེད་དེ་བྱིན་དབབ་ཅིང་ཛབ྄་དབྱངས་གྱེར་རོ། །གསུམ་པ་དངོས་གྲུབ་གླང་བ་ནི། སྒྲུབ་ཞག་ཐེམ་ནས་དཀྱིལ་འཁོར་གྱི་མདུན་དུ་ཚེ་གལ་མཐུན་བསྡེབས་ཀྱི་རྒྱུ་ལས། འབྲང་རྒྱས་ནོར་བུ་འབར་བའི་དབྱིབས་ཅན་བཟའ་བཅའ་བཏུང་བའི་རིགས་གྱུར་མ་ཚང་བ་མེད་པས་བསྐོར་བ་དང་། བྷནྡྷ་མཚན་ལྡན་མངར་གསུམ་ཨ་མྲྀ་ཏ་དར་སྦྱར་བའི་ཆང་བཟར་པོས་བཀང་བ་བཅས་བཤམ། ཐུན་ཐ་མའི་ཕྲིན་ལས་ཀྱི་གཞུང་བསྲང་སྟེ་བཟླས་པ་གྲུབ་པ་ན་དངོས་ཐུབ་ལྟ་ཉན་གྱི་བགེགས་བསྐྲད་བསྲུར་འཁོར་བསྒོམ། འཁོན་གཅུག་སྦྱངས་ཤིང་བྱིན་དབབ་པའི་མཐར། མཆོད་ཅིང་དངོས་གྲུབ་བསྡུ་བ་ནི། ཆང་དང་རཀྟ་སྦྱར་བ་ཐོགས་ལ། ཧཱུྃ་ཧཱུྃ་ཧཱུྃ༔ ཞེས་ལན་གཅིག་འཕྱར་བས། གཉིས་བསྡུས་ཀྱི་ཆོས་ཐམས་ཅད་བྱང་ཆུབ་ཀྱི་སེམས་ཆོས་སྐུ་བདེ་བ་ཆེན་པོར་གྱུར། ཡང་། ཧཱུྃ་ཧཱུྃ་ཧཱུྃ༔ ཞེས་ལན་གཉིས་འཕྱར་བས། སྣར་སྲིད་བདེ་བ་ཆེན་པོའི་ཡེ་ཤེས་སུ་གྱུར། ཡང་། ཧཱུྃ་ཧཱུྃ་ཧཱུྃ༔ ཞེས་ལན་གསུམ་འཕྱར་བས། བདེ་གཤེགས་རྣམས་ཆོས་སྐུ་སྐྱེ་བ་མེད་པའི་ངང་ལས་གཟུགས་སྐུ་ཁྲོ་རྒྱལ་འཕར་བའི་དཀྱིལ་འཁོར་དུ་བཞེངས་པར་བསམ་ལ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ༔ ཞེས་ལན་གསུམ་གྱིས་རཀྟ་དེ་བདུད་རྩིར་བྱིན་གྱིས་བརླབས་ནས། ཧཱུྃ༔ ཁྲག་འཐུང་རྒྱལ་པོ་རྡོ་རྗེ་གྲོ་ལོད་རྩལ༔ མཁའ་འཕྲོ་གིང་དང་བ་ཀའ་སྡོད་འཁོར་བཅས་རྣམས༔ དང་པོ་མཆོད་འོས་སྐྱབས་ཀྱི་ཡེ་ཤེས་ལྷ༔ བར་

དུ་སྒོམ་བསྒྲུབ་བདག་གི་ཡི་དམ་ལྷ༔ ད་ལྟ་བདག་དང་གཉིས་མེད་ཆོས་ཀྱི་སྐུ༔ གཉིས་མེད་བདེ་ཆེན་རོལ་བའི་མཁའ་དབྱིངས་སུ༔ རཀྟ་དམར་གྱི་ཨརྒྷཾ་མཆོད་པར་འབུལ༔ མཆོད་པ་བཞེས་ལ་དངོས་གྲུབ་སྩལ་དུ་གསོལ༔ ས་མ་ཡ་ཧོཿ ས་མ་ཡ་སྟྭཾ༔ སྙིང་པོའི་མཐར། མ་ཧཱ་རཀྟ་ཁཱ་ཧི༔ ཞེས་ལན་གསུམ་ཕུལ་བས་མཉེས་ཏེ་དངོས་གྲུབ་བདག་ལ་སྩལ་བར་བསམ་ཞིང་། ཁྱད་པར། ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་དམར་པོ་ཕྱོགས་བཅུར་འཕྲོས། འགྲོ་བའི་རྒྱུད་སྦྱངས། བདེ་བར་གཤེགས་པ་རྣམས་ལ་ཕོག་པས་དགྱེས་པ་བསྐྱེད། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དངོས་གྲུབ་ཚུར་འདུས། བདག་ལ་ཐིམ་པས་ནུས་པ་བསྟན་པར་བྱས། རྫས་རྣམས་ལ་ཐིམ་པས་འཆི་མེད་ཀྱི་བདུད་རྩི་དངོས་གྲུབ་ཀུན་གྱི་སྙིང་པོར་འཁྱིལ་བར་བསམ་ཞིང་། རྩ་སྔགས་ཤམ་དུ། ཀཱ་ཡ་ཝཱ་ཀ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཞེས་བཏགས་པ་བརྒྱ་སྟོང་སོགས་ཅི་འགྲུབ་བཟླ། དཀྱིལ་འཁོར་ལྷ་ཚོགས་རྣམས་ཀྱི་གནས་གསུམ་ནས་དངོས་གྲུབ་ཐམས་ཅད་འབྲུ་གསུམ་གྱི་ཚུལ་དུ་བར་མ་ཆད་པར་བྱུང་བ་རང་གི་གནས་གསུམ་དུ་ཐིམ་པར་མོས་ཏེ། སྒྲུབ་རྟེན་དངོས་གྲུབ་ཀྱི་རྫས་ཞམས་ཐོགས་ལ། ཧཱུྃ༔ ལྷ་དང་རིག་འཛིན་མཁའ་འགྲོ་དགོངས༔ འདིར་འདུས་རིག་འཛིན་བདག་ཅག་རྣམས༔ སྨིན་གྲོལ་གཉིས་ཀྱིས་ཀྱིས་རྒྱུད་སྦྱངས་

ཤིང་༔ བསྐྱེད་རྫོགས་གཉིས་ཀྱི་ལས་གཞུང་བསྲངས༔ བསྙེན་སྒྲུབ་རྣམ་བཞི་མཐའ་རུ་ཕྱིན༔ ལས་དང་ཐུགས་རྗེ་མཐུན་པ་ཡིས༔ ཞི་རྒྱས་དབང་དྲག་ཡིད་བཞིན་གཏེར༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཧཱུྃ༔ བདེ་གཤེགས་ཀུན་འདུས་རྡོ་རྗེ་གྲོ་ལོད་རྩལ༔ [ཅེས་སོགས་ལས་བྱང་ལྟར་བརྗོད་ལ་སྒྲུབ་རྟེན་གནས་གསུམ་དུ་གཏུགས་ཤིང་དངོས་གྲུབ་ཀྱི་རྫས་རྣམས་ལ་རོལ། བདག་ཉིད་ལྷ་དང་དངོས་གྲུབ་དབྱེར་མེད་བདེ་བ་ཆེན་པོའི་ཡེ་ཤེས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་གྱུར་པར་བལྟའོ། །དེ་རྣམས་ཀྱི་དངོས་གཞི་སྒྲུབ་པ་ཆེན་པོའི་ལས་རིམ་ལེགས་པར་གྲུབ་བོ། །] [སྤྱི་དོན་གསུམ་པ་རྗེས་ཀྱི་ལས་རིམ་ལ་ལྔ། ལས་ལ་སྦྱར་བ། ཚོགས་གཏོར་བཏང་བ། དཀྱིལ་འཁོར་བསྡུ་ཞིང་མཚམས་དཀྲོལ་བ། སྨོན་ལམ་བྱ་བ། དགའ་སྟོན་ཤིས་པ་སྤེལ་བའོ། །] [དང་པོ་ནི། རྗེས་འབྲེལ་དྲག་པོའི་ལས་ལ་སྦྱར་བར་འདོད་ན་སྲུང་ཟློག་བསད་པ་གསུམ་གྱི་གཞི་བཟུང་ནས་མནན་འཕང་བསྲེག་གསུམ་གྱི་ཚོགས་ལས་མཇུག་བསྡུ་བ་སྟེ་སོ་སོའི་གཞུང་བཞིན་ལག་ཏུ་བླང་བར་བྱ་ཞིང་། མཆོག་སྒྲུབ་རྐྱང་པ་ལ་ནི་ངེས་པར་དགོས་པའང་མ་ཡིན་པས་དུས་སྐབས་དང་བསྟུན་པར་བྱའོ། །] [གཉིས་པ་ཚོགས་གཏོར་བཏང་བ་ནི། ཚོགས་མཆོད་རྒྱས་པར་བྱ་ཞིང་དམ་ཅན་ལ་སོགས་པའི་གཏོར་མ་བསྐྱང་བ་སོགས་གཞུང་བཞིན་དུ་བྱ། གསུམ་པ་དཀྱིལ་འཁོར་བསྡུ་ཞིང་མཚམས་དཀྲོལ་བ་ནི། གཏང་རག་གི་མཆོད་བསྟོད་བྱ་ཞིང་ནོངས་པ་བཟོད་པར་གསོལ་ནས།] ཨོཾ་

ཁྱེད་ཀྱིས་སེམས་ཅན་དོན་ཀུན་མཛད། [ཅེས་སོགས་དང་།] ཛྙཱ་ན་མཎྜལ་བཛྲ་མུཿ[ས། རྡུལ་ཚོན་གྱི་ཡེ་ཤེས་པ་ཆོས་ཀྱི་དབྱིངས་སུ་གཤེགས། སྤྲུལ་པའི་དམ་ཚིག་པ་རང་གི་སྙིང་གར་ཐིམ་པར་མོས་ལ། བདག་བསྐྱེད་ཉེར་བསྡུ་བྱས་ཏེ།] ཧཱུྃ༔ ངར་འཛིན་རྣམ་དག་སྒྱུ་ལུས་འཇའ་འདྲ་འདི༔ བླ་མེད་སྐུ་གསུང་ཐུགས་སུ་རྒྱས་བཏབ་ནས༔ བདེན་པ་དབྱེར་མེད་ལྟ་སྤྱོད་ཟུང་འབྲེལ་ཏེ༔ རྒྱུན་དུ་འགྲོ་བ་འདྲེན་པའི་སྤྱོད་ལམ་བྱའོ༔ ཨོཾ་ཨཱཿཧཱུྃ༔ བཛྲ་ཧྲཱིཿཨཱ༔ མི་འགྱུར་མི་ཤིགས་རྡོ་རྗེའི་གུར༔ སྟོང་པའི་ཆོ་ག་བླ་ན་མེད༔ ཆོས་སྐུ་སྐྱེ་མེད་རྡོ་རྗེ་ཡིས༔ མཚན་མའི་སྤྱོད་ཡུལ་ཀུན་བཅོམ་ནས༔ ཆོས་ཀྱི་དབྱིངས་སུ་རྒྱས་བཏབ་པས༔ སངས་རྒྱས་ཀྱིས་ཀྱང་མི་གཟིགས་ན༔ གནོད་བྱེད་བགེགས་ཀྱིས་ག་ལ་མཐོང་༔ ཧཱུྃ་ཧཱུྃ་ཧཱུྃ༔ བཛྲ་རཀྵ་རཀྵ་ཧཱུྃ༔ ཨོཾ་བཛྲ་ཀཱ་ཡ་ཝཱ་ཀ་ཙིཏྟ་ཧཱུྃ༔ [ཞེས་རྒྱས་གདབ་བོ། །མཚམས་འགྲོལ་བའི་ཕྱིར་ཕྱི་རོལ་དུ་སོང་ནས་རྒྱལ་ཐོ་བཞི་ལ་མཆོད་གཏོར་བཤམས་པ་བྱིན་བརླབས་བསྐྱེད་བསྟིམ་མཆོད་གཏོར་འབུམ་པ་རྣམས་ཐོ་སྡོམ་ལྟར་ལས། བསྟོད་པའི་རྐང་པ་ཐ་མ་ཤར་ཕྱོགས་བགེགས་ཀྱི་སོགས་ཀྱི་ཚབ་ཏུ།] བཅོལ་བའི་ཕྲིན་ལས་སྒྲུབ་པར་མཛོད༔ [ཅེས་བསྒྱུར་བའི་མཐར།] བཛྲ་མུཿ[ས་གཤེགས་སུ་གསོལ། སྒོ་བྱང་ལ་མཆོད་གཏོར་བཤམ་རློབ་བསྐྱེད་བསྟིམ་མཆོད་བསྟོད་རྣམས་སྔ་མ་ལྟར་ལ།] བཛྲ་མུཿ[ས་གཤེགས་སུ་གསོལ། ནང་དུ་ལོག་ནས་ཧཱུྃ་མཛད་ཀྱི་ཕྱག་རྒྱ་དང་ལྡན་པས།] སུམྦྷ་ནི་[བརྗོད་ཅིང་

ཕུར་བུ་རྣམས་དང་པོར་གདབ་རིམ་ལས་ལྡོག་ཕྱོགས་སུ་ཕྱུངས་ཏེ།] ཨོཾ་རུ་རུ་སྥུ་རུ་ཛྭ་ལ་ཏིཥྛ་སིངྔྷི་ལོ་ཙ་ནི་སརྦ་ཨཏྠ་སཱ་ངྷ་ནི་སྭཱཧཱ༔ [ཞེས་བཟླས་པས་འོ་མས་ཕུར་རྩེ་བཀྲུ་ཞིང་ཁུང་བུར་ཡང་འཐོར་ལ་ལྷ་རྣམས་གཤེགས། ཆོས་ཐམས་ཅད་སྐྱེ་བ་མེད་པའི་དོན་ཡིད་ལ་བྱས་ཏེ་དྲིལ་བུ་གསིལ་ཞིང་།] ཨ་ཀཱ་རོའི་[སྔགས་བརྗོད་པས་གཡས་པའི་རྡོ་རྗེས་རྡུལ་ཚོན་གྱི་ཤར་གྱི་ཚངས་ཐིག་གི་ལམ་ནས་གཙོ་བོའི་གནས་ཀྱི་བར་དབྱི་ཞིང་། ལྷག་མ་རྣམས་ཀྱང་རྗེས་མི་མངོན་པར་ཕྱགས་ལ་དོན་དུ་གཉེར་བ་རྣམས་ལ་ཅུང་ཟད་སྦྱིན་ནས་གཞན་རྣམས་བུམ་པར་བླུགས་ཏེ་བཀུར་སྟཻ་ཆེན་པོས་མཆོད། ཐིག་ཤུལ་དྲི་བཟང་གི་ཆུས་དབྱི། དུས་དེ་ཉིད་དུའམ་གཞན་གྱི་ཚེ་ནའང་རུང་སྟེ་རྡུལ་ཚོན་ཉིད་སློབ་དཔོན་སློབ་མར་བཅས་པས་བཀྲ་ཤིས་པའི་རྣམ་རོལ་སྣ་ཚོགས་དང་བཅས་རྒྱུན་མི་འཆད་པའི་ཆུ་ཀླུང་ཆེན་པོའི་འགྲམ་དུ་ཁྱེར་ནས། དེར་དྲིའི་མཎྜལ་དཀར་པོ་འདབ་མ་བརྒྱད་པའི་དབུས་དང་ཕྱོགས་མཚམས་བརྒྱད་ལ་མེ་ཏོག་གི་ཚོམ་བུ་བཀོད། མཐར་ཉེར་སྤྱོད་དཀར་སྐྱེམས་ལྷ་བཤོས་དང་བཅས་པ་བཤམ་ལ་བྱིན་གྱིས་བརླབས་ནས། རྟེན་བསང་སྦྱང་།] སྟོང་པའི་ངང་ལས་བཾ་ལས་བྱུང་བའི་རྒྱ་མཚོ་རིན་པོ་ཆེ་དང་མེ་ཏོག་གིས་གང་བའི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ་རྒྱན་ཐམས་ཅད་ཀྱིས་བརྒྱན་པ་རང་སྣང་

གི་ཡུམ་དང་བཅས་པའོ། །སྙིང་ག་ནས་འོད་ཟེར་འཕྲོས་པས་ཀླུ་ཆེན་བརྒྱད་འཁོར་དང་བཅས་པ་བཛྲ་ས་མཱ་ཛཿ[ས་སྤྱན་དྲངས། འདབ་མ་བརྒྱད་ལ་འཁོད་པ་ནི། སྟོད་ལྷའི་ལུས་ཅན་ཐལ་མོ་སྦྱར་བ། སྦྲུལ་མགོའི་གདེངས་ཀ་དང་ལྡན་པའི་སྨད་སྦྲུལ་མཇུག་ཏུ་འཁྱིལ་ཞིང་དར་དང་རིན་པོ་ཆེའི་རྒྱན་གྱིས་བརྒྱན་པ་འཁོར་དང་བཅས་པར་བལྟས་ལ།] ཨོཾ་བཛྲ་སཏྭ་ཨཥྚ་མ་ཧཱ་ནཱ་ག་ཨ་ངྷི་པ་ཏ་ཡེ་ས་པ་རི་ཝཱ་ར་ཨརྒྷཾ་[སོགས་ཀྱིས་མཆོད།] ཨོཾ་བྷཀྵ་བྷཀྵ་ཨཱ་གཙྪ་ཨཱ་གཙྪ་མ་ཧཱ་ནཱ་ག་ཨ་ངྷི་པ་ཏ་ཡ་སརྦ་བྷུརྦྷུ་ཝཿཕྲུཾ་ཕུ་སྭཱཧཱ། [ཞེས་ལན་གསུམ་གྱིས་འོ་ཐུག་གི་གཏོར་མ་ཕུལ།] གདེངས་ཀ་ནོར་བུ་འབར་བའི་འོད་ཟེར་གྱིས། །ས་འོག་མུན་པའི་ཚོགས་རྣམས་རབ་འཇོམས་ཤིང་། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་བསྟོད། །[ཅེས་བསྟོད།] ཀླུའི་རྒྱལ་པོ་འཁོར་དང་བཅས་པ་རྣམས་ཀྱིས་དེང་དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པའི་རྡུལ་ཚོན་རིན་པོ་ཆེའི་རང་བཞིན་འདི་རྣམས་བདག་གིར་མཛད་ནས་མཆོད་པ་དང་། འཇིག་རྟེན་གྱི་ཁམས་སྤྱི་དང་ཁྱད་པར་ས་ཕྱོགས་འདི་དག་ཏུ་བདེ་ལེགས་ཀྱི་དཔལ་ཕུན་སུམ་ཚོགས་པ་འཕེལ་ཞིང་རྒྱས་པར་མཛད་དུ་གསོལ། [ཞེས་རྡུལ་ཚོན་གཏད་དེ་ཆུར་

སྦྱངས་པ་དེ་རྣམས་ཀྱིས་བཀུར་སྟི་ཆེན་པོས་ས་འོག་གི་གཞིར་སྤྱན་དྲངས་པར་བསམ་ཞིང་།] ཨོཾ་མ་ཧཱ་ནཱ་ག་ཨ་ངྷི་པ་ཏ་ཡེ་ས་པ་རི་ཝཱ་ར་གཙྪ༔ [ཞེས་པས་ཀླུ་རྣམས་རང་གནས་སུ་གཤེགས།] ཛཿཧཱུྃ་བཾ་ཧོཿས། རྡོ་རྗེ་སེམས་དཔའ་རང་ལ་ཐིམ་པར་མོས། མཆོད་གཏོར་མཎྜལ་གྱི་ཚོམ་བུ་རྣམས་ཆུར་གཤེགས་ཤིང་རེ་ཁཱ་ཡང་བཀྲུ། [གར་དུ་རྡུལ་ཚོན་བླུགས་པའི་བུམ་པ་དེ་ཆུས་བཀང་ནས་སྔར་བཞིན་ཁྱེར་ཏེ།] ཨོཾ་རུ་རུ་སྥུ་རུ་[སོགས་སྤྱན་མའི་སྔགས་བཟླ་བཞིན་དུ་ཞི་བའི་ཕྱིར་དཀྱིལ་འཁོར་གྱི་ཁང་པ་སོགས་ལ་འཐོར་བར་བྱའོ། །] [བཞི་པ་སྨོན་ལམ་བྱ་བ་ནི། མཆེད་ལྕམ་ཐམས་ཅད་ལག་སྦྲེལ་བས་མར་མེ་ཐོགས། རྒྱལ་ཐེབས་པས་དབྱངས་བོར་ལེན་ཚུལ་གྱིས།] ཧཱུྃ༔ བླ་མེད་གསང་བ་མཆོག་གི་དཀྱིལ་འཁོར་འདིར༔ རྡོ་རྗེ་སློབ་དཔོན་གཉན་གྱིས་དབུ་མཛད་ནས༔ དམ་ཚིག་ལྡན་པའི་མཆེད་དང་ལྕམ་དྲལ་རྣམས༔ དེང་ནས་བྱང་ཆུབ་སྙིང་པོ་མ་ཐོབ་བར༔ འཁོར་བའི་གཡང་ས་ཆེན་པོར་མི་ལྷུང་ཞིང་༔ མ་རིག་མུན་པའི་ནང་དུ་མི་འཁྱམས་ཤོག༔ གཅོང་རོང་དོག་མོའི་གནས་སུ་མི་སྐྱེ་དང་༔ དམྱལ་བའི་ཟངས་ཁར་གནས་སུ་མི་ལྷུང་ཞིང་། གཅན་གཟན་གདུག་པའི་སྒྲ་སྐད་མི་གྲགས་ཤིང་༔ མཚོན་ཆ་གདུག་པའི་དབལ་གྱིས་མི་ཕོས་ཤོག༔ རྡོ་རྗེ་སློབ་དཔོན་བཀའ་དྲིན་ཆེ་བ་དང་༔ མཚན་

ལྡན་གཟུངས་མ་རྡོ་རྗེ་མཆེད་ལྕམ་རྣམས༔ མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔ ས་བཅུ་རིམ་གྱིས་ཁྱད་པར་བགྲོད་པར་ཤོག༔ ནམ་ཞིག་ཚེ་འཕོས་འཆི་བའི་དུས་བྱུང་ཚེ༔ མ་རིག་དབང་གིས་འཁོར་བར་ལྷུང་སྲིད་ན༔ སྣང་གསལ་མར་མེས་མ་རིག་སྡུག་བསྔལ་སོལ༔ ཉོན་མོངས་དབང་གིས་རིགས་དྲུག་གནས་འཁྱམས་ན༔ སྣང་གསལ་མར་མེས་མ་རིག་སྡུག་བསྔལ་སོལ༔ ཉོན་མོངས་དབང་གིས་རིགས་དྲུག་གནས་འཁྱམས་ན༔ སྣང་གསལ་མར་མེས་འགྲོ་དྲུག་སྡུག་བསྔལ་སོལ༔ རྒྱུ་མཆོག་འདི་ཡིས་ས་བཅུ་ཡོངས་བགྲོད་དེ༔ ཤེས་བྱའི་སྒྲིབ་བྱང་ཕྱིར་མི་ལྡོག་པར་ཤོག༔ སྣང་གསལ་གོ་འབྱེད་ཞུན་མར་མདངས་ལྡན་འདི༔ བདེ་གཤེགས་ཡོངས་ལ་ཕུལ་བའི་མཐུ་བྱིན་གྱིས༔ ས་བཅུ་འདས་ཏེ་ས་རྣམས་ཡོངས་ནོན་ཤོག༔ ཀུན་ཏུ་འོད་དང་མ་ཆགས་པདྨ་ཅནཿ འཁོར་ལོ་ཚོགས་ཆེན་པདྨ་བཀོད་པའི་ས༔ དེ་ཝ་ཀོ་ཤ་ཀུན་བཟང་དབྱེར་མེད་ས༔ རྡོ་རྗེ་སེམས་མིང་ལྕང་ལོ་ཅན་གྱི་ས༔ བླ་མའི་ས་དང་སྲིད་གསུམ་གཞིར་རྫོགས་ས༔ རྩོལ་བྲལ་ལྷུན་པོའི་ས་ལ་ཐིག་ལེ་ཡི༔ ས་ལམ་འགྲོས་རྣམས་མ་ལུས་ལྷུན་གྲུབ་ནས༔ གཟུགས་སྐུ་གཉིས་ཀྱིས་འགྲོ་དོན་ཡོངས་རྫོགས་ཤོག [ཅེས་དང་གཞན་

ཡང་གཞུང་ནས་འབྱུང་བས་མཚོན་སྨོན་ལམ་རྒྱ་ཆེར་གདབ།] [ལྔ་པ་དགའ་སྟོན་ཤིས་པ་སྤེལ་བ་ནི། རྟེན་འབྲེལ་སྙིང་པོ་བཟླས་པའི་མེ་ཏོག་གི་ཆར་དབབ་ལ་ཞལ་ནས་གསུངས་པའི་ཐོག་དྲངས། ལས་བྱང་ནས་འབྱུང་བས་མཚོན་ཤིས་པ་རྒྱ་ཆེར་བརྗོད་ཅིང་རོལ་མོ་སྣ་ཚོགས་ཀྱི་སྒྲ་སྙན་ལ་ཡུན་རིང་བར་བསྒྲག །གནས་སྲུང་བ་དང་དགའ་སྟོན་གྱི་རིམ་པ་རྒྱ་ཆེར་སྤེལ་བས་ཕན་བདེའི་སྣང་བ་ཟད་མི་ཤེས་ཁྱབ་ཅིང་རྟག་པར་འགྱུར་རོ། །ཞར་བྱུང་འཕྲོས་དོན་དུ་སྒྲུབ་ཆེན་འདྲ་འབག་ཇི་བཞིན་མི་ལྕོགས་པས་སྒྲུབ་མཆོད་སྤྱི་འགྲེ་ལྟར་བྱེད་པར་འདོད་ན། ནུབ་དང་པོའི་ས་ཆོག་ནས་བཟུང་བ་ཡན་ཆད་སྔར་བཞིན་ལས། །ས་བསྲུང་གི་ཚེ་ནང་མཚམས་ནས་འབྱུང་བ་ལྟར་ཁྲོ་བཅུའི་ཕུར་གདབ་བྱས་ལ་ཆག་ཆག་གདབ་ཅིང་ཐིག་ཚོན་གྱི་དཀྱིལ་འཁོར་བྲི། ནུབ་གཉིས་པ་ལ་རྒྱན་འགོད་དཀྱུས་བཞིན་དུ་བྱས་ཏེ་སྔགས་རྒྱས་སྤེལ་བའི་བར་ཙམ་བྱ། དེ་ནས་སྒྲུབ་མཆོད་དངོས་གཞི་ཞག་གྲངས་ཇི་ཙམ་བྱེད་ཀྱི་བར་ཉིན་རེ་བཞིན་ཆོ་གའི་གཞུང་སྲོང་ལུགས་འདྲ་བ་ལས་ཐུན་བཞིའི་ངེས་པ་མི་དགོས། ནུབ་ཐ་མར་དངོས་གྲུབ་བླང་ལ་ལྕོགས་ན་སྦྱིན་སྲེག་བྱ། དཀྱིལ་འཁོར་བསྡུ་བ་དང་། ཕུར་བུ་ཕྱུང་ལ་རྡུལ་ཚོན་དབྱི་ཞིང་ཆུ་བོར་དོར་བ་རྣམས་ལྷག་པོར་བསྒྲུབ་པ་སྟེ། འདོར་ལེན་གྱི་དམིགས་ཕྱེད་པར་བྱའོ། །དེ་ལྟ་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྒྲུབ་པ་ཆེན་པོའི་ལས་རིམ་དངོས་གྲུབ་གཏེར་མཛོད་ཅེས་བྱ་བ་འདི་ནི། མདོ་ཁམས་རི་བོ་ཆེའི་སྔགས་སྟོན་པདྨ་ལྷུན་གྲུབ་རྡོ་རྗེ་དང་རིགས་བྱེད་པ་ཡོན་ཏན་ཆོས་འཕེལ་སོགས་ཀྱིས་ནན་ཏན་དུ་བསྐུལ་བ་ལ་བརྟེན་ནས། སྔ་འགྱུར་

སྒྲུབ་ཆེན་སྤྱིའི་ཁོག་དབུབ་དང་བསྟུན་ཅིང་ལག་ལེན་འཇུག་པ་བདེ་བར་བྱས་ཏེ། ལམ་འདིའི་གསང་བ་འཛིན་པ་འཇིགས་བྲལ་ཡེ་ཤེས་རྡོ་རྗེས་ས་ཁམས་ཁྱུ་མཆོག་གི་ལོ་འབྲས་བུ་བཅུད་དུ་སྨིན་པའི་དུས་ཀྱི་ཟླ་བའི་དཀར་ཕྱོགས་ཀྱི་དགའ་བ་དང་པོར་བུ་ཆུ་རིག་པ་འཛིན་པའི་དགའ་ཚལ་དུ་སྦྱར་བ་ལས། ཐོག་མའི་ཡི་གེ་པ་ནི་སྐྱུ་རུའི་སྔགས་འཆང་པདྨ་དབང་ཆེན་གྱིས་བགྱིས་པའོ། །འདིས་ཀྱང་དངོས་གྲུབ་ཆེན་པོ་མྱུར་དུ་འགྲུབ་པའི་རྒྱུར་གྱུར་ཅིག། །སརྦ་མངྒ་ལཾ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྦྱིན་སྲེག་གི་ཆོ་ག་ཕྲིན་ལས་རྣམ་རོལ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྦྱིན་སྲེག་གི་ཆོ་ག་ཕྲིན་ལས་རྣམ་རོལ་ཅེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [ལས་དང་དངོས་གྲུབ་སྒྲུབ་པའི་འབྲས་བུ་མྱུར་དུ་འབྱིན་པར་བྱེད་པ་བསྲེག་བླུགས་ཀྱི་ཆོ་གའི་རིམ་པ་ལ་འཇུག་པར་འདོད་པས། སྦྱོར་བ་གང་དུ་བྱ་བའི་གནས་དེར་གཞི་བདག་ལ་གཏོར་མ་བྱིན་ནས་བཀའ་བསྒོས། རྡོ་རྗེ་དང་བཅས་པའི་ལག་གཡས་ས་ལ་བཞག་སྟེ་རྩ་སྔགས་བརྒྱ་རྩ་བཟླས་པས་སྦྱོང་ཞིང་བཟུང་ནས་སྟོང་ཉིད་དུ་རྒྱས་བཏབ། དངོས་གཞི་ཞི་རྒྱས་དབང་གསུམ་གྱི་ཐོག་མར་ཞི་བའི་ཚུལ་ལ། དུས་ར་བ་བཞིའི་ཡར་ངོའི་ཚེས་གཅིག་ལ་སོགས་པའི་སྔ་དྲོའི་ཆར་བཀྲ་ཤིས་པའི་ས་ལས་ཐབ་སྟེགས་གྲུ་བཞི་པ་བ་བྱུང་དང་དྲི་བཟང་གིས་བྱུག་པའི་ཁར་བྲིས་ཐབ་ལ་ཚངས་ཟུར་གྱི་ཐིག་བཏབ་པར་མཐོ་གང་ཚད་ཀྱིས་ཟླུམ་པོར་བསྐོར་ལ་པདྨ་འདབ་བརྒྱད་ལྟེ་བར་རྡོ་རྗེ་མཚན་པ། ཕྱི་རིམ་སོར་བཞི་པའི་མུ་རན་ལ་མེ་རི་གཡས་བསྐོར་དུ་

འབར་བ་དང་། ཁ་ཁྱེར་སོར་བཞི་པ་ལ་རྡོ་རྗེ་ནོར་བུའི་ཕྲེང་བས་བསྐོར་ཞིང་གྲྭ་བཞིར་ཟླ་ཕྱེད་རྡོ་རྗེས་མཚན་པ་བྲི། ཁ་དོག་ཐམས་ཅད་ཀུན་ནས་དཀར་པོར་བྱས་ཤིང་མེ་ཏོག་དཀར་པོ་གཅལ་དུ་བཀྲམ་པའི་ཁ་ཁྱེར་གྱི་ནང་དུ་ཚེར་མ་དང་སྲོག་ཆགས་མེད་པའི་བུད་ཤིང་ངམ་བ་ལང་གི་ལྕི་བས་ཟླུམ་པོར་བརྩིགས་པའི་ནང་གི་ཤར་ངོས་སུ་མེ་ཚང་བཅས་ལ་སྟེང་ནས་ཀུ་ཤ་རྩེ་མོ་ཤར་དུ་བསྟན་པས་བཀབ། རང་གི་གཡས་ངོས་སུ་མཆོད་རྫས་འོ་མ་འབྲས་ཆན་དངུལ་ཕྱེ་མེ་ཏོག་དཀར་པོ་མར་དཀར་རྣམས་བསྲེས་པའི་གཏོར་མ་དཀར་ཟླུམ་སྨན་རཀ་ཉེར་སྤྱོད་དང་བཅས་པ་འདས་མ་འདས་ཉིས་རིམ་དང་། གཡོན་ངོས་སུ་བསྲེག་རྫས་བལ་དཀར་སོགས་འོ་མ་ཅན་གྱི་ཤིང་གི་རྩེ་མོའི་ཆ་ལས་བྱུང་བའི་ཡམ་ཤིང་སོར་བཞི་པ་དྲིས་བྱུགས་ཤིང་སྣེ་གཉིས་མར་དང་སྦྲང་རྩིས་ཉུག་པ།

མངར་གསུམ་དང་སྦྱར་བའི་མར་ཁུ། ཏིལ་དཀར་པོ། དཀར་མངར་འབྲུ་ཕྱེ་འོ་མར་སྦྱར་བའི་ཟས་མཆོག །འབྲས་མ་གྲུགས་པ། ནས་དང་སོ་བ་གྲ་མ་མེད་པ། གྲོ། སྲན་མ། དུརྦ། ཀུ་ཤ། ཡུངས་དཀར། ཤིང་ཏོག་རྣམས་དང་། དར་དཀར་གྱི་གོས་ཟུང་། རྡོ་ཐལ་མེད་པའི་སོ་རྩི་རྣམས་ཁ་དོག་དཀར་ཞིང་དབྱིབས་ཟླུམ་པོའི་སྣོད་འབའ་ཞིག་པར་འདས་མ་འདས་ཉིས་རིམ་དུ་བཤམ། སློབ་དཔོན་དང་ཐབ་ཀྱི་བར་དུ་མེ་ཡོལ་གངས་རི་བཾ་གྱིས་མཚན་པ་བྲིས་པའི་ནང་གི་ཆར། ནང་མཆོད། ལས་བུམ། རྡོ་དྲིལ་བར་དུ་དགང་བླུགས་ཁ་སྦྱར་བ་བཅས་བཞག །གཞན་ཡང་རླུང་གཡབ་སོགས་ཉེ་བར་མཁོ་བའི་ཡོ་བྱད་རྣམས་ལེགས་པར་འདུ་བྱས་ལ། སློབ་དཔོན་རྒྱན་ཆས་དཀར་པོ་བགོས་ཏེ་ཞི་ཞིང་དེས་པའི་སེམས་ཀྱིས་ཀུ་ཤ་སོགས་གཙང་མའི་སྟན་ལ་སེམས་དཔའི་སྐྱིལ་མོ་ཀྲུང་གིས་ཤར་དུ་ཕྱོགས་པར་འཁོད་དེ་བདག་གི་རྣལ་འབྱོར་ལ་གནས་པས། ཆོ་ག་དངོས་ལ། ཐོག་མར་རྡོ་དྲིལ་བསང་སྦྱང་།] སྟོང་པའི་ངང་ལས་རྡོ་རྗེ་ཐབས་ཀྱི་རང་བཞིན་ཡེ་ཤེས་ལྔའི་ངོ་བོ། དྲིལ་བུ་ཤེས་རབ་ཀྱི་རང་བཞིན་སྟོང་ཉིད་ཆོས་ཀྱི་སྒྲ་དབྱངས་སྒྲོགས་པ། གཉིས་ཀའང་དོན་དམ་བྱང་ཆུབ་སེམས་ཀྱི་རང་བཞིན་ནོ། །ཨོཾ་མ་ཧཱ་བཛྲ་ཧཱུྃ་[གིས་རྡོ་རྗེ་གསོར་ཞིང་སྙིང་ཁར་བཟུང་།] ཨོཾ་བཛྲ་གྷཎྜེ་ཨཱཿ [ས་དྲིལ་བུ་གསིལ་ཞིང་དཀུར་བརྟེན།] ཨོཾ་སརྦ་ཏ་ཐཱ་ག་ཏ་མཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ་྅ཧཾ༔ [གིས་འཁྱུད་རྒྱ་བྱས་ཏེ་དམ་ཚིག་གསུམ་ལ་བློ་

བཞག །མཆོད་རྫས་རྣམས་ལས་བྱང་བཞིན་བྱིན་གྱིས་བརླབས། སྲེག་རྫས་རྣམས་ལ་བདུད་རྩིས་བྲན། རྡོ་རྗེ་རྩེ་གཅིག་པའི་ཕྱག་རྒྱས་རེག་ལ།] ཨོཾ་སྭཱཧཱ་[ས་རྫས་རྣམས་བཀྲུ། ཡམ་ཤིང་ལ།] ཨོཾ་ཨཱཿསྭཱཧཱ། [ཞུན་མར་ལ།] ཨོཾ་ཤྲཱི་སྭཱཧཱ། [འབྲུ་རྣམས་ལ།] ཨོཾ་ཛྲིཾ་སྭཱཧཱ། [རྫས་གཞན་རྣམས་ལ།] ཨོཾ་ཀུ་རུ་ཀུ་རུ་སྭཱཧཱ། སྟོང་པའི་ངང་ལས་རྫས་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་ཡེ་ཤེས་ཀྱི་བདུད་རྩིའི་རང་བཞིན་སྲེག་རྫས་སོ་སོའི་རྣམ་པར་གསལ་བར་མོས་ལ། འབྲུ་གསུམ་དང་རྫས་སྔགས་རྣམས་གསུམ་གསུམ་བརྗོད་པས་བྱིན་གྱིས་བརླབས། བཀྲ་ཤིས་པའི་གནས་ལས་བྱུང་བའི་མེ་དུ་བ་མེད་པར་འབར་བ་གཡས་སུ་བསྐོར་ཏེ། ཨོཾ་ཨགྣེ་ཛྭ་ལ་རཾ་གྱིས་ཐབ་ཏུ་བཅུག །ཧཱུྃ་བརྗོད་ཅིང་རླུང་གཡབ་ཀྱིས་མེ་སྦར། ཨོཾ་ཨགྣེ་སྭཱཧཱ། [ཞེས་བླུགས་གཟར་གྱི་མར་ཁུའི་ཐིག་པས་གསོ། །ལས་སྔགས་བཟླས་པའི་ཀུ་ཤ།] ཨོཾ་ཀུ་ཤ་འདི་ནི་གཙང་ཞིང་དགེ །ཚངས་པ་ལྷ་རྣམས་དག་བྱེད་ཡིན། །དཀོན་མཆོག་གསུམ་པོ་མཉེས་བྱེད་པ། །ས་ལས་སྐྱེས་པ་འདབ་མའི་སྙིང་། །བདག་གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །སྭཱཧཱ། [ཞེས་ནས་ཐབ་ཀྱི་ཁར་གཡོན་ནས་བརྩམས་ཏེ་གཡས་བསྐོར་དུ་དགྲམ། ཐབ་བསང་སྦྱང་།] སྟོང་པའི་ངང་ལས་ཧཱུྃ་ལས་ཞི་བའི་ཐབ་ཁུང་

དཀར་པོ་དབྱིབས་ཟླུམ་པོ་མུ་རན་ཁ་ཁྱེར་དང་བཅས་པའི་དབུས་སུ་སྣ་ཚོགས་པདྨའི་ལྟེ་བར་རྡོ་རྗེ་རྩེ་ལྔ་པ་དང་ཁ་ཁྱེར་ལ་རྡོ་རྗེ་ནོར་བུ་དཀར་པོའི་ཕྲེང་བས་བསྐོར་ཞིང་གྲྭ་བཞིར་ཟླ་ཕྱེད་རྡོ་རྗེས་མཚན་པ། དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཞི་བའི་མེ་དཀར་གསལ་དུ་འབར་བའི་དབུས་སུ་པད་ཟླ་ལ་གནས་པའི་རཾ་ལས་ཞི་བའི་མེ་ལྷ་སྐུ་མདོག་དཀར་པོ་ཞི་ཞིང་འཛུམ་པའི་ཉམས་ཅན། ཕྱག་གཡས་གཉིས་དབྱུག་པ་དང་བགྲང་ཕྲེང་། གཡོན་གཉིས་རིལ་བ་དང་སྐྱབས་སྦྱིན་མཛད་པ། དབུ་སྐྲ་རལ་པའི་ཐོར་ཚུགས་ཅན། རིན་པོ་ཆེའི་རྒྱན་དང་ཚངས་སྐུད་སོགས་དྲང་སྲོང་གི་ཆ་བྱད་ཅན། ར་སྐྱེས་དཀར་པོའི་གདན་ལ་ཕྱེད་སྐྱིལ་གྱིས་བཞུགས་པ། དྲང་སྲོང་གི་འཁོར་ཚོགས་དུ་མས་བསྐོར་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ། ཧཱུཾྃ་གི་འོད་ཟེར་གྱིས་ཤར་ལྷོ་ནས་ཡེ་ཤེས་ཀྱི་མེ་ལྷ་འཁོར་དང་བཅས་པ་སྤྱན་དྲངས་པར་[མོས་ལ། ལག་གཡས་མི་འཇིགས་པའི་རྒྱ་དང་བཅས་པས་མཐེ་བོང་གཡབ་ཅིང་།] ཨོཾ༔ དད་པ་དང་ནི་དམ་ཚིག་གིས༔ ཚུར་བྱོན་ཚུར་བྱོན་ལྷ་ཆེན་པོ༔ ཨགྣེ་རཱ་ཛ་འཁོར་དང་བཅས༔ སྲེག་བླུགས་ཞལ་ཟས་བཞེས་སླད་དུ༔ འབར་བའི་

གནས་འདིར་གཤེགས་སུ་གསོལ༔ ཨོཾ་ཨགྣ་ཡེ་ཨེ་ཧྱེ་ཧི་ས་མཱ་ཛཿ [ཞེས་སྤྱན་དྲངས། ལས་སྔགས་ཀྱིས་ཕྱིར་འབྲང་གི་བགེགས་བསྐྲད།] ཨོཾ་ཨགྣེ་དེ་ཝཱ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་[ས་མཆོད་ཡོན་དང་།] པཱདྱཾ་[གིས་ཞབས་བསིལ་ཕུལ།] ཨོཾ་ཨརྒྷ་ཡེ་ས་མ་ཡ་སྟྭཾ། ཛཿཧཱུྃ་བཾ་ཧོཿ[ས་དམ་ཚིག་པ་དང་གཉིས་སུ་མེད་པར་བསམ།] ཧཱུྃ༔ ཚངས་པ་འཇིག་རྟེན་མགོན་གྱི་སྲས༔ མཐུ་སྟོབས་བྱིན་རླབས་བསམ་མི་ཁྱབ༔ ཇི་ལྟར་འདོད་པའི་དོན་སྒྲུབ་པ༔ གཟི་བརྗིད་རྒྱལ་པོར་ཕྱག་འཚལ་ལོ༔ ཨ་ཏི་པུ་ཧོཿ པྲ་ཏཱིཙྪ་ཧོ༔ [ཞེས་ཕྱག་བྱ།] ཧཱུྃ༔ སྟོང་གསུམ་ཞིང་ཀུན་ཡོངས་གང་བའི༔ རྨད་བྱུང་འདོད་ཡོན་མཆོད་པའི་ཚོགས༔ ཟ་བྱེད་མེ་ལྷའི་ཚོགས་ལ་འབུལ༔ ཞི་བའི་ཕྲིན་ལས་འགྲུབ་པར་མཛོད༔ ཨོཾ་ཨགྣ་ཡེ་ས་པ་རི་ཝཱ་ར་ཨརྒྷཾ་[ནས།] ཤཔྡའི[བར་གྱིས་མཆོད། དེ་ནས་བསྲེག་རྫས་རྣམས་ལས་ཐོག་མར་དགང་བླུགས་འབུལ་བ་ལ།] མེ་ལྷ་ཞལ་འཛུམ་པ་དང་བཅས་པོར་འབར་བས་མཚན་པས་སྲེག་བླུགས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་[བསམ་ལ། ལག་གཉིས་དེ་བཞིན་གཤེགས་པའི་ཁུ་ཚུར་གྱིས་དགང་བླུགས་བཟུང་ནས།] ཨོཾ་ཨགྣེ་ཡེ་སྭཱཧཱ། [ཞེས་པས་མར་ཁུ་བླུགས་གཟར་

བདུན་གྱིས་དགང་གཟར་བཀང་བའི་གཟར་བུ་ཁ་སྦྱོར་པུས་མོའི་ནང་ལས་ཕྱིར་མི་འདའ་བར་གཡས་སུ་བསྐོར་ཞིང་།] ཨོཾ་ཨགྣ་ཡེ་དཱི་བྱ་དཱི་བྱ་བི་ཤུངྔྷེ་མཧཱ་ཤྲཱི་ཏ་བྱ་ཀ་བྱ་བ་ཧྣ་ཡ་ཧཱུྃ་ཕཊ་སྭཱཧཱ། བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ། [ཞེས་སྤེལ་ཚིག་སྦྲེལ་བས་ཕུལ། ཚུལ་དེ་ལྟ་བུས་ལན་གསུམ་དུ་འབུལ་ཞིང་མེ་པྲ་བརྟག །རྫས་རྣམས་རིམ་བཞིན་འབུལ་བ་ལས། ཡམ་ཤིང་།] ཨོཾ་བོ་ངྷི་བྲྀཀྵ་ཡ་སྭཱཧཱ༔ གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱིནྟིཾ་ཀུ་རུ་སྭཱཧཱ༔ [མར་ཁུ།] ཨོཾ་ཨགྣ་ཡེ་སྭཱ་ཧཱ༔ འབྱོར་པ་ཕུན་སུམ་ཚོགས་པ་ལ༴ [ཏིལ།] ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱཧཱ༔ སྡིག་སྒྲིབ་ཞི་བ་ལ༴ [ཞོ་ཟན་ནམ་ཟས་མཆོག །] ཨོཾ་སརྦ་སམྦ་དེ་སྭཱཧཱ༔ བདེ་བ་ཕུན་སུམ་ཚོགས་པ་ལ་བར་དུ༴ [འབྲས།] ཨོཾ་བཛར་པུཥྚ་ཡ་སྭཱཧཱ༔ བསོད་ནམས་ཕུན་སུམ་ཚོགས་པ་ལ༴ [ནས།] ཨོཾ་མཧཱ་བེ་ག་ཡ་སྭཱཧཱ༔ ཤུགས་ཕུན་སུམ་ཚོགས་པ་ལ་༴ [སོ་བ།] ཨོཾ་བཛྲ་བཱི་ཛཱ་ཡ་སྭཱཧཱ༔ ནོར་དང་འབྲུ་ཕུན་སུམ་ཚོགས་ལ་ལ༴ [གྲོ།] ཨོཾ་བཛྲ་གྷསྨཱ་རི་སྭཱཧཱ༔ ནད་མེད་པ་ཕུན་སུམ་ཚོགས་པ་ལ་༴ [སྲན་མ།] ཨོཾ་མ་ཧཱ་བ་ལ་ཡ་སྭཱཧཱ༔ སྟོབས་ཕུན་སུམ་ཚོགས་པ་ལ་༴ [དཱུརྦ།]

ཨོཾ་བཛྲ་ཨཱ་ཡུཥེ་སྭཱཧཱ༔ ཚེ་རིང་བ་ཕུན་སུམ་ཚོགས་པ་ལ་༴ [ཀུ་ཤ།] ཨོཾ་ཨ་པྲ་ཏི་ཧ་ཏ་བཛྲ་ཡ་སྭཱཧཱ༔ མི་མཐུན་པའི་ཕྱོགས་ཐམས་ཅད་སྲུང་བ་ལ་༴ [ཡུངས་དཀར།] ཨོཾ་བཛྲ་སིངྔྷ་ཡེ་སྭཱཧཱ༔ གདོན་བགེགས་འཇོམས་པ་ལ༴ [ཤིང་ཏོག]ཨོཾ་ག་གྷ་ནི་ག་གྷ་ནི་བཾ་ལོ་ཀ་ཏི་སྭཱཧཱ༔ རིགས་བརྒྱུད་ཕུན་སུམ་ཚོགས་པ་ལ་༴ [དེ་ལྟར་ལན་བདུན་སོགས་ཇི་ལྟར་རིགས་པ་ཕུལ་བའི་མཐར། བསྟོད་པ་ནི།] ཧཱུྃ༔ གཟི་བརྗིད་འབར་བ་མེ་ཡི་ལྷ༔ འདོད་པ་ཐམས་ཅད་སྒྲུབ་མཛད་པ༔ བདག་གཞན་དོན་གཉིས་མྱུར་འགྲུབ་སྩོལ༔ འཇིགས་བྱེད་མེ་ལྷ་ཉིད་ལ་བསྟོད༔ [ཅེས་བསྟོད། ཡུངས་དཀར་ཐབ་ཏུ་གཏོར་ཏེ།] ན་མོཿ རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལྷ་ཀླུ་གནོད་སྦྱིན་དྲི་ཟ་ལ་སོགས་པའི་གདོན་རྣམས་ལས་ཐར་བ་དང་གློ་བུར་ཡེ་འདྲོགས་དུས་མ་ཡིན་པར་འཆི་བ་ལ་སོགས་པའི་བར་ཆད་མི་འབྱུང་བར་མཛད་དུ་གསོལ། མི་ཁ་སྨྲ་མཆུ་དགྲ་རྐུན་བྱད་སྟེམས་སྦྱོར་བ་རྩུབ་མོ་དང་ཉེ་བར་འཚེ་བ་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་ཟློག་པར་

མཛད་དུ་གསོལ། ལས་དང་ཉོན་མོངས་བག་ཆགས་ཤེས་བྱའི་དྲི་མ་ལ་སོགས་པ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་ཞི་བར་མཛད་དུ་གསོལ། ཤཱནྟིཾ་ཀུ་རུ་སྭཱཧཱ༔ [ཞེས་འདོད་དོན་གསོལ།] ཨོཾ་ཨཱཿཧཱུྃ་མུཿ[ས། ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་པར་བསམ་མོ། །དེ་དག་ནི་འཇིག་རྟེན་པའི་མེ་ལྷ་མཆོད་པའི་ཆོ་གའོ། །དེ་ནས་འདས་པའི་མེ་ལྷ་མཆོད་པའི་རིམ་པ་ནི། བུད་ཤིང་ཅུང་ཟད་ཁ་གསོས་ལ་བསང་སྦྱང་།] ཧཱུྃ༔ དམ་ཚིག་མེ་ལྷའི་ལྟོ་བའི་དབྱིངས༔ ནམ་མཁའ་རླུང་མེ་རཀྵའི་མཚོ༔ [ཞེས་སོགས་ནས།] རྒྱུ་ཡི་ཧཱུྃ་ཡིག་འཕྲོ་འདུ་ལས༔ འཆོལ་བའི་ཁྲོ་རྒྱལ་ཧེ་རུ་ཀ༔ [ཞེས་སོགས་ལས་བྱང་བཞིན་ལྷ་ཚོགས་དམ་ཚིག་པ་བསྐྱེད་ཅིང་ཡེ་ཤེས་པ་སྤྱན་དྲངས་པའི་བར་དུ་སོང་ནས།] ཨོཾ་ཤྲཱི་མཧཱ་ཀྲོ་ངྷ་རཱ་ཛ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱཧཱ། [དེ་བཞིན་དུ།] པཱདྱཾ་[སྦྱར་བ་བཅས་ཀྱིས་དྲག་པོའི་ཆུ་གཉིས་ཕུལ་ལ། བཞུགས་གསོལ་ཕྱག་འཚལ་མཆོད་པ་རྣམས་གཞུང་བཞིན་སོང་མཐར། སྲེག་རྫས་ཀྱི་ཐོག་མར་དགང་བླུགས་འབུལ་བ་ནི།] དཀྱིལ་འཁོར་གྱི་ལྷ་རྣམས་ཞལ་འཛུམ་པ་དང་བཅས་པས་ཅུང་ཟད་གདངས་པའི་ལྗགས་རྡོ་རྗེ་དཀར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་ཧཱུྃ་ཡིག་འོད་ཟེར་གྱི་ཕུང་པོར་འབར་བས་མཚན་པ་[ཞེས་སོགས་འདོན་པ་སྤོས་ལ། རྩ་སྔགས་ཀྱིས་དགང་ཞིང་འཁོར་སྔགས་ཤམ་བུ་སྤེལ་ཚིག་དང་བཅས་པས་ཕུལ། སྲེག་རྫས་

ཡམ་ཤིང་ནས་བཟུང་ཤིང་ཏོག་གི་བར་སྙིང་པོ་ལ་རྫས་སྔགས་སྤེལ་ཚིག་རྣམས་སྦྱར་ཏེ་སྔར་བཞིན་བརྒྱ་རྩ་སོགས་དང་། སྲེག་རྫས་གཞན་ཡོད་ན་ཡང་ཕུལ་བའི་མཐར། ལས་བྱང་བཞིན་བསྟོད་དེ།] ན་མོ༔ དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདག་ཉིད། ཁྲག་འཐུང་ཆེ་མཆོག་དབང་དྲག་རྡོ་རྗེ་གྲོ་ལོད་རྩལ་སྤྲུལ་འཁོར་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ལ་ཕྲིན་ལས་སུ་གསོལ་བ་ནི། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལྷ་ཀླུ་སོགས་གོང་བཞིན་འདོད་པའི་དོན་ལ་གསོལ་བ་བཏབ་པས། ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་ཟླ་བ་ཆུ་ཤེལ་གྱི་བུམ་པ་བདུད་རྩི་དཀར་པོས་གང་བ་འཛིན་པས་ཟླ་བ་ལ་གནས་པའི་བསྒྲུབ་བྱའི་སྟེང་ཕྱོགས་ནས་ཁྲུས་བྱས་པས་སྡིག་སྒྲིབ་ནད་གདོན་ལ་སོགས་པའི་ཉེས་པ་ཐམས་ཅད་དག་ཅིང་ཞི་བར་[བསམ། སླར་ཡང་དགང་བླུགས་སྔར་བཞིན་དུ་ཕུལ་མཐར།] ཨོཾ་བཛྲ་ཝ་སྟྲ་ཡ་སྭཱཧཱ༔ [ཞེས་གོས་ཟུང་དང་།] ཨོཾ་བཛྲ་ཏམྦུ་ལཱ་ཡ་སྭཱཧཱ༔ [ཞེས་སོ་རྩི་དབུལ། ཆུ་གཉིས་ཉེར་སྤྱོད་སྔགས་ཙམ་གྱིས་མཆོད་ཅིང་ཤླཽ་ཀ་གཅིག་གིས་བསྟོད།] མ་རྙེད་ཡོངས་སུ་མ་ཚང་དང་། །[སོགས་ནས་ཡི་གེ་བརྒྱ་པ་བཟླས་པས་ནོངས་པ་

བཤགས།] ཨོཾ། ཁྱེད་ཀྱིས་སེམས་ཅན་དོན་ཀུན་མཛད། [ཅེས་སོགས་ནས།] བཛྲ་མུཿ ཡེ་ཤེས་པ་ཆོས་ཀྱི་དབྱིངས་སུ་གཤེགས། དམ་ཚིག་པ་རང་ལ་བསྡུ། དེ་དག་ནི་འདས་པའི་མེ་ལྷ་མཆོད་པའི་ཚུལ་ལོ། །རྗེས་ཀྱི་བྱ་བ་ནི། [བླུགས་གཟར་གྱི་མར་ཁུས་མེ་གསོ་ཞིང་།] བཛྲ་ས་མཱ་ཛཿ[ས་མེ་ལྷ་ཡེ་ཤེས་པ་སྤྱན་དྲངས།] ཛཿཧཱུྃ་བཾ་ཧོཿ[ས། དམ་ཚིག་པ་དང་དབྱེར་མེད་དུ་གྱུར་པ་ལ། སྔར་བཞིན་དགང་བླུགས་དང་ཡམ་ཤིང་ལ་སོགས་པའི་བསྲེག་རྫས་ལྷག་མ་རྣམས་སྤེལ་ཚིག་མེད་པའི་སྔགས་ཀྱིས་འབུལ། གོས་ཟུང་དང་སོ་རྩིའང་གོང་གི་སྔགས་ཀྱིས་ཕུལ་མཐར།] པུཥྤེ་[སོགས་ཉེར་སྤྱོད་ལྔས་མཆོད་ཅིང་།] མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །[ཅེས་བསྟོད།] ཨ་ཀཱ་རོས་[སྔར་བསྔོས་པའི་གཏོར་མ་ཐབ་ཏུ་འབུལ་ཞིང་།] མཆོད་སྦྱིན་གཏོར་མ་འདི་བཞེས་ལ། [ཞེས་སོགས་ཀྱིས་ཕྲིན་ལས་བཅོལ། གོང་བཞིན་ནོངས་པ་བཤགས་ནས།] བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབ་ཀྱི་གཤེགས། །ཇི་བཞིན་དུས་སུ་སླར་བྱོན་ལ། །བདག་གི་འདོད་པ་ཐམས་ཅད་སྒྲུབས། །[ཞེས་སྙན་མནན་ཏེ།] ཨོཾ་ཨགྣ་ཡེ་གཙྪཿ [ཞེས་པས་ཡེ་ཤེས་ཀྱི་མེ་ལྷ་རང་གནས་སུ་གཤེགས། དམ་ཚིག་གི་མེ་ལྷ་རང་ལ་བསྡུ། མེ་རང་ཞིར་གཏོང་བའམ་ལོང་མེད་ན་འོ་མ་དྲི་བཟང་གི་ཆུས་གཞིལ་ལ་ཐལ་སོལ་

རྣམས་རྒྱ་མཚོར་འབབ་པའི་ཆུ་བོ་ཆེན་པོར་བསྐྱལ། དགེ་བ་བསྔོ་ཞིང་ཤིས་པ་བརྗོད་པས་མཐའ་བརྒྱན་པར་བྱའོ། །] ༈ [ད་ནི་ཆོ་ག་དེས་ཁོག་ཕུབ་སྟེ་རྒྱས་པའི་སྦྱིན་སྲེག་གི་ཁྱད་པར་ནི། དུས་ར་བ་བཞིའི་ཡར་ངོའི་ཚེས་བརྒྱད་དམ་བཅོ་ལྔ་ལ་སོགས་པའི་ཉི་དྲོས་ཀྱི་ཆར་རྒྱལ་པོའི་བང་མཛོད་ཀྱི་འོག་དང་ཞིང་བཟང་པོ་སོགས་དཔལ་ཅན་གྱི་ས་ལས་བསྐྲུན་པའི་ཐབ་སྟེགས་བ་བྱུང་བདུད་རྩི་དང་སྦྱར་བའི་དྲིའི་ཆུས་ཆག་ཆག་བཏབ་པར་ཚངས་ཟུར་གྱི་ཐིག་བཏབ་པའི་དབུས་ནས་ལོགས་ངོས་སུ་ཁྲུ་རེ་གཞལ་བའི་སར་གྲུ་བཞི་པར་བཅད་པའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་སོར་དྲུག་པའི་རིན་པོ་ཆེས་མཚན་པ། ཕྱི་རིམ་སོར་བརྒྱད་པའི་མུ་རན་ལ་མེ་རི་གཡས་བསྐོར་དུ་འབར་བ་དང་། ཁ་ཁྱེར་སོར་བརྒྱད་པ་ལ་རིན་པོ་ཆེའི་ཕྲེང་བས་བསྐོར་ཞིང་ཟུར་བཞི་ལའང་རིན་པོ་ཆེ་འབར་བ་རེ་བཅས་བྲི། ཁ་དོག་ཐམས་ཅད་ཀུན་ནས་སེར་པོར་བྱས་ཤིང་མེ་ཏོག་སེར་པོ་གཅལ་དུ་བཀྲམ་པའི་ཁ་ཁྱེར་གྱི་ནང་དུ་ཚེར་མ་མེད་པའི་འབྲས་བུ་ཅན་གྱི་བུད་ཤིང་ཁྲུ་གང་བས་གྲུ་བཞིར་བརྩིག །གཏོར་མའི་རྒྱུ་གསེར་ཕྱེ་མེ་ཏོག་སེར་པོ་གྲོ་དང་རྒུན་འབྲུའི་ཕྱེ་ལྡོང་རོས་ཞོ་རྣམས་མར་དང་བསྲེས་པས་གྲུ་བཞི་པད་འདབ་ཅན། ཡམ་ཤིང་འབྲས་བུ་ཆགས་པའི་ཤིང་གི་བར་གྱི་ཆ་ལས་བྱུང་བ་ཁྲུ་གང་བ་དྲི་དང་མངར་གསུམ་མར་ཁུས་སྤགས་པ། བསྲེག་རྫས་ཞི་བ་དང་མཚུངས་པ་ལས་བི་ལྦ་སོགས་ཤིང་ཏོག་འབྲུ་སྨན་རིན་པོ་ཆེ་དང་དར་གོས་སེར་པོའི་རིགས། སྣོད་དང་རྫས་ཐམས་ཅད་དབྱིབས་གྲུ་བཞི་ཁ་དོག་སེར་པོ་འབའ་ཞིག་པ་བྱ། སློབ་དཔོན་རྒྱན་ཆས་སེར་པོ་བགོས་ལ་དགའ་བའི་སེམས་དང་བཟང་པོའི་

སྟབས་ཀྱིས་སྟན་སེར་པོ་ལ་ཁ་བྱང་དུ་ཕྱོགས་པས་འཁོད་ནས་ལས་རིམ་ལ་འཇུག །མེ་རྒྱལ་རིགས་ཀྱི་ཁྱིམ་དང་གཙུབས་ཤིང་ལས་བྱུང་བས་སྤར། ཕྲིན་ལས་ཞི་བའི་སྐབས་ཁོ་ན་ལྟར་ལས། ཐབ་བསྐྱེད་སྐབས།] སྟོང་པའི་ངང་ལས་ཧཱུྃ་ལས་རྒྱས་པའི་ཐབ་ཁུང་སེར་པོ་དབྱིབས་གྲུ་བཞི་མུ་རན་ཁ་ཁྱེར་དང་བཅས་པའི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་རིན་པོ་ཆེ་སེར་པོ་དང་ཁ་ཁྱེར་དང་ཟུར་བཞིར་རིན་པོ་ཆེས་མཚན་པ། དྭངས་ཤིང་སྒྲིབ་པ་མེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་རྫོགས་པའི་ནང་དུ་རྒྱས་པའི་མེ་སེར་གསལ་དུ་འབར་བའི་དབུས་སུ་པད་ཉི་ལ་གནས་པའི་རཾ་ལས་རྒྱས་པའི་མེ་ལྷ་སྐུ་མདོག་སེར་པོ་གནོད་སྦྱིན་སྒེག་པའི་ཉམས་ཅན། ཕྱག་གཡས་གཉིས་དབྱུག་པ་དང་བགྲང་ཕྲེང་། གཡོན་གཉིས་རིན་པོ་ཆེ་དང་མཆོག་སྦྱིན་མཛད་པ། དབུ་སྐྲ་རལ་པའི་ཐོར་ཚུགས་ཅན་རིན་པོ་ཆེའི་རྒྱན་དང་ཚངས་སྐུད་སོགས་དྲང་སྲོང་གི་ཆ་བྱད་ཅན། ར་སྐྱེས་སེར་པོའི་གདན་ལ་ཕྱེད་སྐྱིལ་གྱིས་བཞུགས་པ། དྲང་སྲོང་གི་འཁོར་ཚོགས་སོགས་སྔར་ལྟར་དང་། ཞི་བའི་མལ་དུ་རྒྱས་པ་[ཞེས་བསྒྱུར།] དགང་བླུགས་སྐབས་ལག་གཉིས་ཁུ་ཚུར་བྱས་པའི་མཐེབ་མཛུབ་གཉིས་རྩེ་སྤྲད་པ་རིན་པོ་ཆེའི་ཁུ་ཚུར་གྱིས་དགང་བླུགས་བཟུང་། [སྤེལ་ཚིག་སྐབས།] ཚེ་དང་བསོད་ནམས་ཡེ་ཤེས་ཡོན་ཏན་ཐམས་ཅད་འཕེལ་

ཞིང་རྒྱས་པའི་ཕྲིན་ལས་མཛད་དུ་གསོལ། །[ཞེས་དང་།] གཟི་བརྗིད་ཕུན་སུམ་ཚོགས་པ་ཐམས་ཅད་པུཥྚིཾ་ཀུ་རུ་ཨོཾ༔ [ཞེས་པས་འགྲེས་སྦྱར། འདོད་གསོལ་སྐབས།] ན་མོ༔ རིག་པའི་རྒྱལ་པོ་[སོགས་གོང་ལྟར་ལ།] བདག་ཅག་དཔོན་སློབ་ཡོན་མཆོད་འཁོར་དང་བཅས་པའི་ཚེ་དང་བསོད་ནམས་དཔལ་དང་འབྱོར་པ་སྙན་གྲགས་དབང་ཐང་གཟི་བརྗིད་ལང་ཚོ་ཟས་ནོར་ལོངས་སྤྱོད་བུ་སློབ་འཁོར་འབངས་མངའ་རིས་ཆུས་སྲིད་ལ་སོགས་པ་དར་ཞིང་རྒྱས་པར་མཛད་དུ་གསོལ། མཁྱེན་པ་དང་བརྩེ་བ་མཐུ་སྟོབས་ནུས་རྩལ་ཉམས་དང་རྟོགས་པ་ས་ལམ་གྱི་ཡོན་ཏན་དཀར་པོའི་བསམ་སྦྱོར་ཐམས་ཅད་གོང་ནས་གོང་དུ་འཕེལ་བར་མཛད་དུ་གསོལ། མདོར་ན་འཇིག་རྟེན་དང་འཇིག་རྟེན་ལས་འདས་པའི་དགེ་ལེགས་ཀྱི་ཡོན་ཏན་ཇི་སྙེད་པ་ཐམས་ཅད་དབྱར་གྱི་ཆུ་གཏེར་དང་ཡར་ངོའི་ཟླ་བ་བཞིན་དུ་འཕེལ་ཞིང་རྒྱས་པར་མཛད་དུ་གསོལ། པུཥྚིཾ་ཀུ་རུ་ཨོཾ༔ [ཞེས་སྦྱར། འདས་པའི་དགང་བླུགས་སྐབས།] དཀྱིལ་འཁོར་གྱི་ལྷ་རྣམས་ཞལ་འཛུམ་པ་དང་བཅས་པས་ཅུང་ཟད་གདངས་པའི་ལྗགས་རིན་པོ་ཆེ་སེར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་བྷྲཱུྃ་ཡིག་འོད་ཟེར་གྱི་ཕུང་པོར་འབར་བས་མཚན་པ་[ཞེས་འདོན་པ་སྤོ། རྫས་རྣམས་རྫོགས་ནས་

ལས་ལ་སྦྱོར་བའི་ཚེ།] ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་གསེར་གྱི་བུམ་པ་བདུད་རྩི་དང་རིན་པོ་ཆེས་གང་བ་འཛིན་པས་ཟླ་བ་སེར་པོ་ལ་གནས་པའི་བསྒྲུབ་བྱའི་སྟེང་ཕྱོགས་ནས་བདུད་རྩི་དང་རིན་པོ་ཆེའི་ཆར་ཕབ་པས་དེའི་ལུས་དང་ཁྱིམ་གང་ཚེ་དང་བསོད་ནམས་ཡེ་ཤེས་ཡོན་ཏན་ཐམས་ཅད་འཕེལ་ཞིང་རྒྱས་པར་བསམ། [རྗེས་མེ་རང་ཞིར་བཏང་སྟེ་ཐལ་སོལ་བང་མཛོད་དུ་སྦའོ། །] ༈ ཡང་དབང་གི་སྦྱིན་སྲེག་གི་ཁྱད་པར་ནི། དུས་འབྲིང་པོ་བཞིའི་དམར་ཕྱོགས་ཀྱི་ཚེས་བཅུ་ལ་སོགས་པའི་དགོང་མོའི་ཆར་སྨད་འཚོང་མས་ཉལ་པོ་བྱས་པའི་མལ་འོག་གམ་མགྲོན་ཁང་གིས་ལ་ས་བསྐྲུན་པའི་ཐབ་སྟེགས་མྱོས་བྱེད་དང་བདུད་རྩི་བྱུགས་ཤིང་སིནྡྷུ་ར་བརྡལ་བར་དབུས་སུ་ཟླ་གམ་ཁྲུ་གང་བ་ལ་པདྨ་འདབ་བརྒྱད་ལྕགས་ཀྱུས་མཚན་པ། ཕྱི་རིམ་སོར་བརྒྱད་པའི་མུ་རན་ལ་མེ་རི་གཡོན་བསྐོར་དུ་འབར་བ་དང་། ཁ་ཁྱེར་སོར་བརྒྱད་པ་ལ་མེ་ཏོག་དམར་པོ་ལྕགས་ཀྱུ་སྤེལ་མའི་ཕྲེང་བས་བསྐོར་ཞིང་ཟུར་གཉིས་ལའང་ལྕགས་ཀྱུ་རེ་བཅས་བྲི། ཁ་དོག་ཐམས་ཅད་ཀུན་ནས་དམར་པོ་བྱས་ཤིང་མེ་ཏོག་དམར་པོ་གཅལ་དུ་བཀྲམ་པའི་ཁ་ཁྱེར་གྱི་ནང་དུ་ཡམ་ཤིང་གི་རྒྱུ་དང་མཚུངས་པའི་ཤིང་སྲིན་ལག་གི་སྦོམ་ཕྲ་ཅན་མྱོས་བྱེད་ཀྱིས་བྲན་པས་ཟླ་གམ་དུ་བརྩིག །གཏོར་མའི་རྒྱུ་ཟངས་ཕྱེ་པད་རག་བུ་རམ་འབྲས་དམར་རམ་བུའི་ཕྱེ་རྣམས་མར་ལ་བསྲེས་པས་དབྱིབས་ཟླ་གམ་པད་འདབ་ལྔ་པ། ཡམ་ཤིང་ཙན་དན་དམར་པོ་སོགས་དམར་

ལ་རོ་སྐྱུར་བའི་ཤིང་གི་སྡོང་པོའི་ཆ་ལས་བྱུང་བ་སོར་ལྔའམ་གསུམ་པ་བུ་རམ་མར་ཁུས་རྩེ་མོ་དང་མཚལ་དང་སིན་དྷུ་རས་རྩ་བ་བྱུགས་པ། མར་ཁུའང་འཛོམ་ན་ཏིལ་མར་གྱི་ཁུ་བ་དང་། བསྲེག་རྫས་ཞི་བ་དང་མཚུངས་པ་ལས་རྒུན་འབྲུམ་སོགས་ཤིང་ཏོག་འབྲུ་སྨན་རིན་པོ་ཆེ་དར་གོས་དམར་པོའི་རིགས། ཁྱད་པར་གྱི་ཕྲིན་ལས་བསྒྲུབ་ན་དེའི་རྫས་ཚུལ་བཞིན་དུ་སྦྱར་བའི་རིལ་བུ་བདུད་རྩི་ལྔས་སྦགས་པ། སྣོད་དང་རྫས་ཐམས་ཅད་དབྱིབས་ཟླ་གམ་ཁ་དོག་དམར་པོ་འབའ་ཞིག་པ་བྱ། སློབ་དཔོན་རྒྱན་ཆས་དམར་པོ་བགོས་ཏེ་ཆགས་པའི་བསམ་པས་སྟན་དམར་པོ་ལ་པདྨའི་སྐྱིལ་ཀྲུང་གིས་ཁ་ནུབ་ཏུ་ཕྱོགས་པས་འཁོད་ནས་ལས་རིམ་ལ་འཇུག །མེ་རོལ་མོ་མཁན་ནམ་སྨད་འཚོང་མའི་ལག་ནས་བྱུང་བས་སྤར། ཕྲིན་ལས་ཞི་བའི་སྐབས་དང་འདྲ་བ་ལས། [ཐབ་བསྐྱེད་སྐབས།] སྟོང་པའི་ངང་ལས་ཧཱུྃ་ལས་དབང་གི་ཐབ་ཁུང་དམར་པོ་ཟླ་གམ་གྱི་དབྱིབས་ཅན་མུ་རན་ཁ་ཁྱེར་དང་བཅས་པའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ལྕགས་ཀྱུ་དང་ཁ་ཁྱེར་དང་ཟུར་རྣམས་སུ་མེ་ཏོག་དམར་པོ་དང་ལྕགས་ཀྱུས་མཚན་པ། དྭངས་ཤིང་སྒྲིབ་པམེད་པའི་འོད་ཟེར་ཀུན་ཏུ་འཕྲོ་བ། རྒྱ་དཔངས་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་དབང་གི་མེ་དམར་གསལ་དུ་འབར་བའི་དབུས་སུ་པད་ཉི་ལ་གནས་པའི་རཾ་ལས་དབང་གི་མེ་ལྷ་སྐུ་མདོག་དམར་པོ་ཞི་འཛུམ་ཆགས་པའི་ཉམས་ཅན། ཕྱག་གཡས་

གཉིས་དབྱུག་པ་དང་བགྲང་ཕྲེང་། གཡོན་གཉིས་ལྕགས་ཀྱུ་དང་དབང་སྡུད་ཀྱི་ཕྱག་རྒྱ་མཛད་པ། དབུ་སྐྲ་རལ་པའི་ཐོར་ཚུགས་ཅན་རིན་པོ་ཆེའི་རྒྱན་དང་ཚངས་སྐུད་སོགས་དྲང་སྲོང་གི་ཆ་བྱད་ཅན། ར་སྐྱེས་དམར་པོའི་གདན་ལ་ཕྱེད་སྐྱིལ་གྱིས་བཞུགས་པ། [དྲང་སྲོང་གི་འཁོར་ཚོགས་སོགས་སྔར་བཞིན་དང་།] ཞི་བའི་མལ་དུ་དབང་གི་[ཞེས་བསྒྱུར། དགང་བླུགས་སྐབས་ལག་གཉིས་ཁུ་ཚུར་སྲིན་མཛུབ་རྩེ་སྤྲད་པ་པདྨའི་ཕྱག་རྒྱས་དགང་བླུགས་བཟུང་། སྤེལ་ཚིག་སྐབས།] ཁམས་གསུམ་སྲིད་གསུམ་རླུང་སེམས་སྣང་བ་ཐམས་ཅད་དབང་དུ་འདུ་བའི་ཕྲིན་ལས་མཛད་དུ་གསོལ། [ཞེས་དང་།] གཟི་བརྗིད་ཕུན་སུམ་ཚོགས་པ་ཐམས་ཅད་ཝཱ་ཤཾ་ཀུ་རུ་ཧོཿ [ཞེས་པས་འགྲེས་སྦྱར། འདོད་གསོལ་སྐབས།] ན་མོཿ རིག་པའི་རྒྱལ་པོ་[སོགས་གོང་ལྟར་ལ།] བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱིས་འཇིག་རྟེན་ཁམས་ཀྱི་ལྷ་འདྲེ་མི་གསུམ་རྒྱལ་བློན་བཙུན་མོ་འགྲོ་བ་ཕོ་མོ་ཟས་ནོར་ལོངས་སྤྱོད་ཁྱད་པར་དུ་བདུད་རིས་ནག་པོའི་ཕྱོགས་སུ་གྱུར་པའི་དྲེགས་ལྡན་མི་དང་མི་མ་ཡིན་མཐུ་བོ་ཆེ་མཐའ་དག་རང་དབང་མེད་པར་མོས་པ་རྣམ་པ་བཞིས་དབང་དུ་འདུ་བར་མཛད་དུ་གསོལ། རྩ་བརྒྱུད་བླ་མའི་བྱིན་རླབས་ཡི་དམ་ལྷའི་དངོས་གྲུབ་མཁའ་འགྲོ་སྲུང་མའི་མཐུ་རྩལ་

ལས་དང་དངོས་གྲུབ་རླུང་སེམས་སྣང་བ་ཐམས་ཅད་རང་དབང་དུ་གྱུར་པར་མཛད་དུ་གསོལ། མདོར་ན་འཁོར་འདས་ལམ་གསུམ་མཆོག་ཐུན་མོང་གི་དངོས་གྲུབ་ཡིད་ལ་འདོད་པ་གང་མཆིས་པ་ཐམས་ཅད་ཐོགས་པ་མེད་པར་དབང་དུ་འདུ་བར་མཛད་དུ་གསོལ། ཝཱ་ཤཾ་ཀུ་རུ་ཧོཿ [ཞེས་སྦྱར། འདས་པའི་དགང་བླུགས་སྐབས།] དཀྱིལ་འཁོར་གྱི་ལྷ་རྣམས་ཞལ་འཛུམ་ཞིང་ཆགས་པ་དང་བཅས་ཅུང་ཟད་གདངས་པའི་ལྗགས་པདྨ་དམར་པོའི་རྣམ་པ་ཅན་དང་གཟར་བུ་གཉིས་ཀྱི་ཁ་ལ་ཧྲཱིཿཡིག་འོད་ཟེར་གྱི་ཕུང་པོར་འབར་བས་མཚན་པ་[ཞེས་འདོན་པ་སྤོ། ཁྱད་པར་གྱི་རྫས་འབུལ་ན་དེའི་སྔགས་དང་དམིགས་གནད་ནི་མན་ངག་ལས་ཤེས་པར་བྱ་ཞིང་། རྫས་རྣམས་རྫོགས་ནས་ལས་འཆོལ་བའི་ཚེ།] ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་པདྨ་རཱ་གའི་བུམ་པ་བདུད་རྩི་དམར་པོས་གང་བ་འཛིན་པས་ཟླ་བ་དམར་པོ་ལ་གནས་པའི་བསྒྲུབ་བྱའི་སྟེང་ཕྱོགས་ནས་དབང་བསྐུར་བས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་མོས་པ་རྣམ་བཞིས་དབང་དུ་སྡུད་པའི་ནུས་མཐུ་ལ་མངའ་བརྙེས་པར་[བསམ། རྗེས་མེ་རང་ཞིར་བཏང་བའམ་ཆང་གིས་གཞིལ་ནས་ཐལ་སོལ་རི་རྩེ་ནས་རླུང་ལ་བསྐུར་

བའམ་ཆུ་བོ་ཆེན་པོར་བསྐྱལ་ལོ། །] ༈ [ཡང་སྐབས་འགའ་ཞིག་ཏུ་དཀྱིལ་འཁོར་སྒྲུབ་མཆོད་དང་འབྲེལ་བ་ཡིན་ན།] བདག་ཉིད་གཙོ་བོའི་ཐུགས་ཀ་ནས་ལས་ཀྱི་ཧེ་རུ་ཀའི་རྣམ་པར་ཐོན་ནས་སྦྱིན་སྲེག་གི་ལས་རིམ་ལ་འཇུག་པར་[མོས་ཤིང་། འདས་པའི་མེ་ལྷ་བསྐྱེད་པའི་སྐབས།] པད་ཉི་དྲེགས་པ་རྒྱལ་བསེན་རྣམས༔ བསྣོལ་ཞིང་བརྩེགས་པའི་ཁྲི་རུ་གྱུར། [ཅེས་རྟེན་གྱི་བཀོད་པ་བསྒོམ་ནས་སྤྱན་འདྲེན་གྱི་ཚིག་བརྗོད་པ་དང་བསྟུན་སྒྲུབ་དཀྱིལ་ལས་མཎྜལ་མེ་ཏོག་གིས་མཚོན་པར་སྤྱན་དྲངས་ཏེ་སྙིང་པོ་འཁོར་སྔགས་བཅས་བཟླ་བཞིན་མེ་ཏོག་ཐབ་ཏུ་དོར་བའི་མཐར།] ཧཱུྃ༔ ཕོ་བྲང་དབུས་ཀྱི་གདན་སྟེང་དུ༔ འཆོལ་བའི་ཁྲོ་རྒྱལ་ཧེ་རུ་ཀ༔ [ཞེས་སོགས་ལྷ་བསྐྱེད་ཡོངས་རྫོགས་ནས།] བཀའ་ཉན་ལྷ་སྲིན་སྡེ་བརྒྱད་སོགས༔ སྤྲིན་ཕུང་གཏིབས་བཞིན་གསལ་བར་གྱུར། [ཅེས་བསྒྱུར། དེ་ནས་ཆུ་གཉིས་འབུལ་བ་དང་བཞུགས་གསོལ་ཕྱག་འཚལ་སོགས་སྦྱིན་སྲེག་ཡོངས་རྫོགས་དཀྱུས་བཞིན་བྱ། རྗེས་བསྡུ་བའི་སྐབས།] དཀྱིལ་འཁོར་པའི་ལྷ་ཚོགས་རྣམས་སྒྲུབ་པའི་དཀྱིལ་འཁོར་ལ་གཤེགས་པར་[བསམ་ཞིང་ཚོམ་བུ་སྒྲུབ་དཀྱིལ་དུ་སླར་སྤྱན་དྲངས།] གཞལ་ཡས་ཁང་གདན་དང་བཅས་པ་རང་ལ་ཐིམ་པར་[བསམ་པ་རྣམས་ཁྱད་པར་ཏེ། སྐབས་ཐོབ་བཞིན་འདོར་ལེན་

གྱི་དམིགས་ཕྱེད་ཤེས་པར་བྱའོ། །ཞེས་པའང་ཉེ་བར་མཁོ་ཞིང་འཇུག་པ་བདེ་བའི་ཕྱིར་གསང་བ་སྤྱིའི་ཚོ་གའི་འགྲོས་དང་བསྟུན་ཏེ། ལྷ་རིགས་ཀྱི་སྔགས་བན་འཇིགས་བྲལ་ཡེ་ཤེས་རྡོ་རྗེས་ས་ཁམས་ཁྱུ་མཆོག་གི་ལོ་སྨིན་དྲུག་ཟླ་བའི་ཡར་ངོའི་ཚེས་བཅོ་ལྔ་ལ་བྱང་ཀོང་བྲག་གསུམ་མཚོ་ཆུ་དར་མ་འཇའ་འོད་འཁྲུགས་པའི་ལྟེ་བ་མཚོ་རྫོང་དབང་དྲག་འབར་བའི་ཕོ་བྲང་དུ་སྦྱར་བའི་ཡི་གེ་པ་ནི་སྐྱུ་རུའི་སྔགས་འཆང་པདྨ་དབང་ཆེན་གྱིས་བགྱིས་པའོ། །སརྦ་སིངྔྷི་རསྟུ།། །།]

བླ་མ་དབང་དྲག་འཆོལ་བའི་ཕྲིན་ལས་དབང་གི་སྲེག་བླུགས་ཁམས་གསུམ་མྱུར་འགུགས།

༄༅། །བླ་མ་དབང་དྲག་འཆོལ་བའི་ཕྲིན་ལས་དབང་གི་སྲེག་བླུགས་ཁམས་གསུམ་མྱུར་འགུགས་ཞེས་བྱ་བ་བཞུགས་སོ། །

ན་མོ་མ་ཧཱ་ཀྲོ་ངྷ་གུ་རུ་ལོ་ཀོཏྟ་རཱ་ཡ། [བླ་མ་དབང་དྲག་འཆོལ་བའི་ཕྲིན་ལས་དབང་གི་སྲེག་བླུགས་བྱ་བར་འདོད་ན། ཟླ་བ་མར་གྱི་ངོའི་ཉི་མ་ཕྱི་དྲོའི་དུས་སུ། ཆུ་བོ་འདུས་པའི་མདོའམ་སྨད་འཚོང་མ་ཉལ་པོ་བྱས་པའི་གནས་སུ། དེའི་མལ་འོག་གི་ས་སོགས་ལས་ཐབ་སྟེགས་བརྩིགས་པར་ཟླ་གམ་སུམ་རིམ་པདྨ་དང་ལྕགས་ཀྱུས་མཚན་པའི་ཁ་ཁྱེར་ལ་ཙནྡན་དམར་པོ་སོགས་ལས་མཐུན་གྱི་ཤིང་ལས་ཐབ་ཁུང་ཟླ་གམ་དུ་བརྩིགས་ལ་མེ་ཚང་བཅའ། མཆོད་གཏོར་ཉེར་སྦྱོད་སོགས་སྤྱི་ལྟར་ལས། ཁྱད་པར་དམར་ལ་དྲི་ཞིམ་པའི་ཡམ་ཤིང་། འབྲི་མོག་གིས་བསྒྱུར་བའི་མར་ཁུ། ནས་གྲོ་འབྲས་སྲན་མ་སོགས་འབྲུ་སྣ། ཤ་མར་བུ་རམ་སོགས་ཟས་སྣ། དར་ཟབ་སྣམ་རས་སོགས་གོས་སྣ། བཞུ་བ་དང་མི་བཞུ་བའི་རིན་པོ་ཆེའི་རིགས་གང་འབྱོར། ཁྱད་པར་གྱི་བསྲེག་རྫས་

ཙནྡན་གྱི་བྱང་བུ་ལ་རྒྱ་སྐྱེགས་ཀྱིས་བྲིས་པའི་བསྒྲུབ་བྱའི་ལིངྒ་མིང་རུས་ཅན་ཟག་རྫས་ཀྱིས་བྱུགས་པ། གླང་སྣ་དང་ཁུག་ཆོས་སོགས་མེ་ཏོག་དམར་པོའི་རིགས་གང་འཛོམ་བཅས་བསགས། དགང་གཟར་བླུག་ལ་སོགས་པ་དགོས་པའི་ཆ་བྱད་རྣམས་ཚོགས་པར་བྱས་ལ། ཆགས་ཤིང་གདུང་བའི་བསམ་པ་དང་ལྡན་པས་ཁ་ནུབ་ཏུ་ཕྱོགས་པར་པདྨའི་སྐྱིལ་ཀྲུང་གིས་འདུག་སྟེ། བདག་གི་རྣལ་འབྱོར་བཟླས་པའི་བར་དང་། ཁྱད་པར་གྱི་ཕྲིན་ལས་ཟབ་པའི་མན་ངག་བཞིན་དབང་སྡུད་ཀྱི་བཟླས་པ་བྱ་ཞིང་། དམིགས་བསལ་གྱི་བསྒྲུབ་བྱ་ཡོད་ན་ཐུགས་ཀའི་འོད་ཟེར་ལྕགས་ཀྱུ་དང་ཞགས་པས་དྲངས་པའི་དམིགས་གནད་ཀྱིས་བསྒྲུབ་བྱ་ལིངྒ་ལ་ཡང་ཡང་བསྟིམ། དེ་ནས་བསྲེག་རྫས་རྣམས།] རྃ་ཡྃ་ཁྃ་[གིས་བསང་སྦྱང་།] སྟོང་པའི་ངང་ལས་རིན་ཆེན་སྣོད་ཡངས་པར། །འབྲུ་གསུམ་ཞུ་ལས་

མཆོད་རྫས་བསྲེག་རྫས་ཚོགས། །ངོ་བོ་ཟག་མེད་བདུད་རྩིའི་རང་བཞིན་ཅན། །དཔག་ཡས་ནམ་མཁའི་ཁམས་ཀུན་གང་བར་གྱུར། །ཨོཾ་ཨཱཿཧཱུཾ། [ཞེས་ལན་གསུམ་གྱིས་བརླབ། རང་འདོད་པའི་ལག་ནས་བྱུང་བའི་མེ།] ཨོཾ་ཨགྣེ་ཛྭ་ལ་རཾ་[གྱིས་སྦར་ལ་མར་ཁུས་ཀྱང་གསོ།] ཐབ་ཧྱ་གྲཱི་ཝ[ས་བསང་།] སྭ་བྷཱ་ཝ[ས་སྦྱང་།] མི་དམིགས་སྟོང་པའི་ངང་ལས་རང་ཉིད་ཀྱི། །མདུན་དུ་དབང་གི་ཐབ་ཁུང་མཚན་ཉིད་ཀུན། ཡོངས་རྫོགས་འོད་ཟེར་དམར་པོ་འཕྲོ་བའི་དབུས། །པད་ཉིའི་གདན་ལ་ཆེ་མཆོག་གྲོ་ལོད་རྩལ། །སྐུ་མདོག་སྨུག་ནག་གར་དགུའི་ཉམས་འགྱུར་ཅན། །[སོགས་མངོན་རྟོགས་ནས་བསྟོད་པའི་བར་དུ་བཏང་རྗེས།] རྫས་རྣམས་བསྲེགས་པའི་བདུད་རྩི་དྭངས་མའི་འོད། །ཞལ་དུ་དྲངས་པས་མཉེས་ཤིང་ཚིམ་གྱུར་ནས། །གཙོ་བོའི་ཐུགས་ལས་འབར་བའི་འོད་ཟེར་འཕྲོས། །འཁོར་གྱི་ལྷ་ཚོགས་རྣམས་བསྐུལ་དེ་དག་ལས། །རང་འདྲའི་ཕོ་ཉ་སྟོང་ཁམས་གང་སྤྲོས་པས། །འཇིག་རྟེན་ཁམས་ཀྱི་མི་དང་མི་མ་ཡིན། །དྲེགས་ལྡན་ཀུན་གྱི་སེམས་རྒྱུད་དབང་མེད་བསྒྱུར། །བདག་ལ་དད་ཅིང་གུས་པས་རྗེས་སུ་ཞུགས། །ཕྱིར་མི་ལྡོག་པར་དབང་དུ་འདུས་པར་གྱུར། །[ཅེས་གསལ་བཏབ་ལ། རྩ་སྔགས་མཐར།] ཧ་རི་ནི་ས་ར་ཙ་ཧྲིཿཡ་མ་ཧཱ་རཱ་ཛ་སརྦ་ཨ་ནྲྀ་ཏྲི་ཙིཏྟ་ཧྲཱིཾ་ཧྲཱིཾ་ཛཿཛཿ [ཞེས་བཟླ་བཞིན་དུ་རྫས་རྣམས་རིམ་པར་ཐབ་ཏུ་ཕུལ་ཞིང་། བར་མཚམས་སུ།] བདག་གི་མཆོད་རྫས་དམ་པ་འདི་བཞེས་ལ། །

ཆེ་བཙན་འགྲོ་ཀུན་དབང་དུ་འདུས་པར་མཛོད། །[ཅེས་འདོད་དོན་ཡང་གསོལ། འདི་ཉིད་སྤྱིར་གཟུགས་ཅན་གཟུགས་མེད་གང་ལའང་དམིགས་པའི་ལས་སྦྱོར་ཏེ། ཡང་ཁྱད་པར་གྱི་དམིགས་བྱ་གཅིག་ལ་མཚོན་ན། གོང་གི །] རང་འདྲའི་ཕོ་ཉ་སྟོང་ཁམས་གང་སྤྲོས་པས། །དམིགས་བྱ་དེ་ཉིད་མེ་ལྷའི་མདུན་དུ་བཀུག །ཤིན་ཏུ་གུས་པས་ཐལ་སྦྱར་གནས་པ་ལ། །འབར་བའི་འོད་ཟེར་བསྒྲུབ་བྱའི་སྤྱི་བོ་ནས། །སྙིང་གར་ཞུགས་པས་སེམས་རྒྱུད་དབང་མེད་བསྐུལ། །ཡིད་ཆགས་མྱོས་པས་བརྒྱལ་ཐབས་གནས་པར་གྱུར། །སླར་ཡང་རྫས་ཕུལ་མེ་ཉིད་ཆེར་འབར་ཞིང་། །ཁྱད་པར་ལྷ་ཡི་ཐུགས་ཀའི་འོད་དམར་པོས། །རེག་པས་བསྒྲུབ་བྱ་ཆགས་པའི་མེས་གདུངས་ཏེ། །རང་དབང་མེད་པར་བདག་ལ་ཆགས་པར་གྱུར། །[ཞེས་བསམ་ཞིང་། རྫས་རྣམས་འབུལ་བ་དང་བཅས་སྔགས་གོང་བཞིན་ལ།] ནྲྀ་[ཆེ་གེ་མོ་]པཱ་ཤཾ་ཀུ་རུ་ཧོཿ [ཞེས་ཕུལ་བ་ལ་གྲངས་འཛིན་ཅིང་། འདོད་གསོལ་ཀྱང་]དམིགས་བྱ་[ཆེ་གེ་མོ་]དབང་དུ་འདུས་པར་མཛོད་[ཅེས་སྦྱར། མཐར་གྲངས་ལོངས་པ་ན་གྱི་དང་ཁྱད་པར་གང་གི་སྐབས་སུའང་འདྲ་སྟེ།] དམིགས་བྱ་འོད་དམར་གྱི་རྣམས་པར་མེར་གྱི་ཞུ། ཐུགས་སྲོག་ས་བོན་ཧཱུྃ་གི་ཞབས་ཀྱུར་ཐིམ། །བདག་གཞན་གཉིས་མེད་ཀློང་ཡངས་རྫོགས་པ་ཆེ། །འཁོར་འདས་སྲོག་ལ་དབང་བསྒྱུར་དབང་ཐོབ་གྱུར། །[ཞེས་བསྡུ། རྗེས་མེ་ལྷའི་དཀྱིལ་འཁོར་ལ་མཆོད་ཅིང་བསྟོད་ནས་

ནོངས་པ་བཟོད་པར་གསོལ། མེ་ལྷའི་ཡེ་ཤེས་པ་གཤེགས་སུ་གསོལ་བའམ་རྟེན་ལ་བསྟིམ། དམ་ཚིག་པ་རང་ལ་བསྡུ། བསྔོ་སྨོན་དང་ཤིས་པ་བརྗོད་པས་མཐའ་བརྒྱན། ཐལ་བ་རིའི་རྩེ་ནས་རླུང་ལ་འཕྱར་བའམ་ཡང་ན་ཆུ་བོ་ཆེན་པོའི་གཞུང་ལ་སྦྱང་ངོ་། །འདིའི་བསྲེག་རྫས་རྣམས་སོ་སོར་འབུལ་བར་མི་ནུས་ན། ཡམ་ཤིང་མར་ཁུ་ལིངྒ་གསུམ་མ་གཏོགས་པའི་རྫས་བྱིང་རྣམས་ཕྱེ་མའམ་རིལ་བུ་གང་བདེར་བྱས་ལ་ཕུལ་བས་ཀྱང་རུང་ངོ་། །ཞེས་པའང་སྔགས་སྟོན་ཚེ་དབང་དཔལ་འབྱོར་གྱི་ནན་ཏན་ཆེན་པོས་བསྐུལ་བའི་གཡར་ངོ་མི་ལྡོག་ཕྱིར་དུ་འཇིགས་བྲལ་ཡེ་ཤེས་རྡོ་རྗེས་སྦྱར་བའི་ཡི་གེ་པ་ནི་སྔགས་བན་ཀུན་བཟང་དབང་འདུས་སོ། །ཛཡནྟུ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྨད་ལས་རྡོ་རྗེའི་ཐོག་ཆར།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྨད་ལས་རྡོ་རྗེའི་ཐོག་ཆར་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། །[བདུད་འདུལ་དབང་དྲག་རྡོ་རྗེ་གྲོ་བོ་ལོད་ཀྱི་ཕྲིན་ལས་དམར་ཆེན་གཏོར་མའི་ལས་རིམ་ལ་འཇུག་པར་འདོད་པས་དྲག་པོའི་ལས་དང་མཐུན་པའི་གནས་སུ་དཀྱིལ་འཁོར་གྱི་གཞིར་དུག་ཁྲག་གིས་ཆག་ཆག་བཏབ་པ་ལ་ཆོས་འབྱུང་དམར་ནག་ལྕགས་འཁོར་རྩིབས་བརྒྱད་རྡོ་ར་མེ་རིས་མཚན་པ་ཅན་ཚུལ་བཞིན་འབྲི་བའམ། མ་འབྱོར་ན་ཞིང་ལྤགས་ལ་ཁྲག་གིས་སྦགས་པའི་འབྲུ་ཚོམ་ལྷ་གྲངས་བཀོད་པའི་དབུས་སུ་མཉྫིའི་ཁར་ལྕགས་སྣོད་དུ་འབྲུ་ནག་གི་ངར་ཕྱེ་དུག་ཁྲག་གིས་སྦྲུས་པའི་དཔལ་གཏོར་གྲུ་གསུམ་རྣོ་དབལ་ཅན་སྲིན་པོའི་ཞལ་ཕྱུངས་པ་འཁོར་བརྒྱད་དང་བཞིས་བསྐོར་བ་མཚེ་ཡུངས་རྩང་དམར་ཁྲམ་བྱང་སོགས་དྲག་རྒྱན་རྔམས་བརྗིད་དང་ལྡན་པའི་རྩེར་སྐུ་རྟེན་བྱ་ཁྱུང་སྲུང་ཟློག་ཙཀྲ་དར་དམར་པོའི་གུར་ཕུབ་པ་འགོད། །སྤྲོ་ན་མཐའི་རྡོ་རའི་

ཁར་དུག་ཟོར། ཁྲག་ཟོར། མཚེ་ཟོར། ཡུངས་ཟོར། རྡོ་ཟོར། མདའ་ཟོར། གཏོར་ཟོར་རྣམས་ལག་ལེན་བཞིན་བཤམ། ཁྲག་གི་ཨརྒྷཾ་སོགས་དྲག་པོའི་མཆོད་པས་གཡས་སུ་བསྐོར། ཇི་ལྟར་བདེ་བའི་སྟེགས་མཐོ་བར་བླ་མ་ཡི་དམ་ཆོས་སྐྱོང་གི་གཏོར་མ་ཕྲེང་ཚར་སྨན་རཀ་ཉེར་སྤྱོད་བཅས་པ་དང་། མདུན་ངོས་སུ་བྲུབ་ཁུང་ལིངྒ་ཐུན་རྫས་སོགས་ཉེ་བར་མཁོ་བའི་ཡོ་བྱད་རྣམས་མཐོང་བརྒྱུད་བཞིན་ཚོགས་པར་བྱས་ལ། ལས་བྱང་ལྟར་བདག་མདུན་གྱི་དཀྱིལ་འཁོར་མེ་རི་འདབ་འབྱོར་གྱི་ཚུལ་དུ་གསལ་བཏབ་ལ་བསྙེན་སྒྲུབ་ཀྱི་བཟླས་པ་ཅི་ནུས་མཐར། སྲུང་བ་ནི།] བདག་གི་ཐུགས་ཀའི་ཆ་སྨད་དུ༔ གསེར་གྱི་མཆོད་རྟེན་འོད་འབར་བའི༔ བུམ་ནང་རྡོ་རྗེའི་ལྟེ་བར་ཧཱུྃ༔ དེ་དབུས་བསྲུང་བྱ་གང་ཡིན་རྣམས༔ དཀར་

དམར་འོད་ཀྱི་ར་བས་བསྐོར༔ དེ་ལས་འོད་འཕྲོས་ཞིང་ཀུན་ཁྱབ༔ རྒྱལ་བའི་མཐུ་བྱིན་ཐམས་ཅད་བསྡུས༔ བདག་ཐིམ་རྡོ་རྗེའི་གོ་ཁྲབ་ནི༔ སྲ་བརྟན་བར་མཚམས་ལྕགས་སྡིག་ཁྱུང་༔ གོ་མཚམས་མེད་པར་ཞུ་ལུགས་ལ༔ ཕྱི་རོལ་སྲུང་བའི་འཁོར་ལོ་བཅས༔ ཅིས་ཀྱང་མི་ཆོད་མི་ཤིགས་གྱུར༔ [རྩ་སྔགས་ཤམ་དུ།] མ་མ་ཀཱ་ཝཱ་ཙི་རཀྵ་ཀུ་རུ་བྷྲཱུྃ༔ [ཞེས་བཟླ། བསད་པ་ནི།] ལིངྒ་དམིགས་བྱ་དངོས་གསལ་བའི༔ སྙིང་གར་གནམ་ལྕགས་འཁོར་ལོ་ནི༔ རྩིབས་བརྒྱད་རྣོ་དབལ་སྤུ་གྲིའི་རྩེར༔ ལྕགས་སྡིག་ཚྭ་ཚྭ་འཕྲོ་བར་གྱུར༔ རང་གི་ཐུགས་ནས་འབར་བའི་འོད༔ མེ་དཔུང་རླུང་ནག་ཚུལ་འཕྲོས་པས༔ འཁོར་ལོ་གཡས་སུ་ཤུགས་དྲག་འཁོར༔ སྲོག་རྩ་བཅད་དེ་སྙིང་ཁྲག་ལྷུད༔ ལྕགས་སྡིག་ཚོགས་ཀྱིས་ཁྲག་ལ་འཇིབས༔ དེ་རྣམས་ངར་སྐྱེས་ཤ་རུས་ཀུན༔ ལྷག་མེད་ཧབ་ཧབ་ཟོས་པར་གྱུར༔ [ཅེས་རྩ་སྡགས་ཤམ་བུར་གཟིར་སྔགས་དང་སྤུ་གྲིའི་མཚོན་ཆ་སྦྲེལ་ཏེ་བཟླ་ཞིང་ཐུན་རྫས་ལ་ངར་འདོག །དེ་ནས་ཚོགས་ཀྱི་མཆོད་པ་བར་པ་བཤགས་པའི་བར་དུ་བཏང་ནས། སྨད་ལས་དངོས་ལ། ཐོག་མར་དཔུང་བསྡུ་བའི་ཕྱིར་ཐུགས་དམ་བསྐུལ་བ་ནི།] ཧཱུཾ༔ ཆོས་ཀྱི་དབྱིངས་ནས་རང་བྱུང་གྲུབ་པའི་

ལྷ༔ པདྨ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔ ཁྲག་འཐུང་ཡོངས་རྫོགས་དྲག་པོའི་ཕྲིན་ལས་མཛོད། སངས་རྒྱས་བསྟན་བཤིག་སྐྱེ་འགྲོའི་བདེ་བ་འཇོམས༔ ཁྱད་པར་རྣལ་འབྱོར་བདག་ཅག་འཁོར་བཅས་ལ༔ གནོད་ཅིང་འཚེ་བའི་དགྲ་བགེགས་འབྱུང་པོའི་ཚོགས༔ ཞི་བའི་ཐབས་ཀྱིས་འདུལ་དུ་མ་འཚལ་བས༔ དྲག་ཤུལ་འབར་བ་ཆེན་པོའི་ཆོ་འཕྲུལ་གྱིས༔ མངོན་སྤྱོད་དམོད་པའི་ཕྲིན་ལས་དུས་ལ་བབ༔ བདག་སོགས་སྙིགས་མའི་དུས་མཐར་སྐྱེས་པ་རྣམས༔ ལྷ་མཆོག་ཁྱོད་ལས་སྐྱབས་གཞན་མ་མཆིས་པས༔ ཚེ་སྲོག་ཆོས་ལ་བར་དུ་གཅོད་བྱེད་པའི༔ གདུག་པ་ཅན་རྣམས་བསྒྲལ་ཞིང་བསྐྲད་པ་དང་༔ ཕྱིར་ཟློག་སྟོབས་ཀྱི་ཕྲིན་ལས་གྲུབ་པར་མཛོད༔ ཐུགས་དམ་དུས་ལ་བབ་བོ་ས་མ་ཡ༔ [གསེར་སྐྱེམས་འབུལ་བ་ནི། འདོད་ཡོན་ཟག་པ་མེད་པའི་ལོངས་སྤྱོད་ཀྱི་གཏེར་དུ་གྱུར་པར་བསམ་ཞིང་།] ཨོཾ་ཨཱ༔ ཧཱུྃ་[གིས་བརླབ་ནས།] ཧཱུྃ། རིག་འཛིན་རྩ་བརྒྱུད་བླ་མ་དམ་པ་དང་། །བདེ་གཤེགས་ཞི་ཁྲོ་རབ་འབྱམས་དཀྱིལ་

འཁོར་ལྷ། །ཁྱད་པར་དབང་དྲག་པདྨའི་ལྷ་ཚོགས་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད། །མ་མགོན་ལྕམ་དྲལ་དམ་ཅན་རྒྱ་མཚོའི་ཚོགས། །དྲེགས་པ་སྡེ་བརྒྱད་གཏེར་སྲུང་དམ་ཚིག་ཅན། །བཀའ་ཉན་བྲན་གཡོག་མངགས་གཞུག་བཅས་རྣམས་ཀྱིས། །གསེར་སྐྱེམས༴ སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་སོགས་ཡུལ་གཞིས་གནས་ཀྱི་བདག །ལོ་ཟླ་ཞག་དུས་ཚེས་ལ་དབང་བའི་ལྷས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །[གཟུ་དཔང་གསོལ་བ་ནི།] ཧཱུྃ༔ ཕྱོགས་བཅུ་ནམ་མཁའི་དཀྱིལ་འཁོར་ནས༔ བླ་མ་རིག་འཛིན་ཡི་དམ་ལྷ༔ ཁྲག་འཐུང་དབང་དྲག་འཁོར་དང་བཅས༔ ཐུགས་རྗེས་བདག་ལ་དགོངས་སུ་གསོལ༔ བདག་ནི་རིག་འཛིན་སྒྲུབ་པ་པོ༔ དམ་ཚིག་འཛིན་ལ་དགྲ་བྱུང་ན༔ མ་ཉེས་མ་ཡོ་སྲུང་མ་མཁྱེན༔ གཟུ་དང་དཔང་དུ་དཀོན་མཆོག་བཞུགས༔ ཞལ་ལྕེ་སྣང་སྲིད་ལྷ་འདྲེས་མཛོད༔ དམ་ཉམས་དགྲ་བོ་སྡིག་ཅན་འདིས༔ དང་པོར་སངས་རྒྱས་བསྟན་པ་བཤིག༔ བར་དུ་དཀོན་མཆོག་དབུ་འཕང་སྨད༔ མཐའ་མར་སྔགས་འཆང་སྙིང་པོ་ཕྲལ༔ ད་ལྟ་རྣལ་འབྱོར་བདག་ལ་བསྡོས༔ དགེ་བ་བཅུ་ནི་ཁྱད་དུ་

བསད༔ མི་དགེ་བཅུ་ནི་དང་དུ་བླངས༔ མཚམས་མེད་ལྔ་ཡི་འབྲས་བུ་སྨིན༔ འདི་ནི་བསྒྲལ་བའི་ཞིང་ཡིན་པས༔ དབང་དྲག་འབར་བའི་ལྷ་ཚོགས་རྣམས༔ ཆོས་ཉིད་ཞི་ལས་མ་གཡོས་ཀྱང་༔ རྔམས་བརྗིད་ཁྲོས་པའི་སྐུར་བཞེངས་ལ༔ དགྲ་བགེགས་བསྒྲལ་བའི་དུས་ལ་བབ༔ མ་གཡེལ་མ་གཡེལ་ཐུགས་དམ་ཅན༔ དགྲ་བགེགས་སྒྲོལ་བའི་ཕྲིན་ལས་མཛོད༔ [དམིགས་བྱ་བསྐྱེད་པ་ནི། བྲུབ་ཁུང་།] སྭ་བྷཱ་ཝ[ས་སྦྱངས།] སྟོང་པའི་ངང་ལས་མདུན་དུ་ཨེ་ལས་ལྕགས་སྲེགས་ཀྱི་ཁང་སྒྲོམ་གྲུ་གསུམ་བང་རིམ་དགུ་པ། ཁ་ཁྱེར་ཅོག་ཅིང་གཏིང་ཟབ་པ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། ལོགས་ལ་ཞེ་སྡང་གི་མེ་དཔུང་འབར་བ། སྟེང་ན་གཏི་མུག་གི་མུན་པ་འཐིབ་པ། ཟུར་ན་ང་རྒྱལ་གྱི་བྲག་རི་ཉིལ་བ། ཕྱི་ནང་ཀུན་ཏུ་ཕྲག་དོག་གི་རླུང་དམར་འཚུབས་ཤིང་ནད་དུག་མཚོན་ཆའི་ཆར་འབེབས་པ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་བཟད་པར་འཁྲུགས་པ། ལས་བྱེད་གཤིན་རྗེའི་དམག་ཚོགས་སེངྒེ་ལྟར་རྔམས་པ། སྟག་ལྟར་འཕྲོ་བ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོགས་པས་གང་བ། སྲིད་

པ་ལས་ཀྱི་བཙོན་ཁང་དྲག་པོ་དེའི་ནང་དུ་ནྲི་ཏྲི་དུད་ཁ་ཡོངས་སུ་གྱུར་པ་ལས་དགྲ་བགེགས་དེ་ཉིད་ལུས་གཅེར་བུ་རིད་པ། མདོག་ནག་ཅིང་དྲན་པ་ཉམས་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་རྣག་ཁྲག་འཛག་པ། ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་གནོད་བྱེད་ཐམས་ཅད་འདུས་པའི་ངོ་བོར་གྱུར་པར་[བསམ་པ། རྣམ་ཤེས་དགུག་པ་ནི།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་བདུད་འདུལ་ཆེ་མཆོག་ཁྲག་འཐུང་རྡོ་རྗེ་གྲོ་ལོད་རྩལ་གྱི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ། ཕྱི་

དགྲ་ཡིད་ལ་སེམས་པ། ད་དགྲ་ཐད་དུ་འཛུགས་པའི་གཟུགས་ཅན་སྡང་བའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་གྱིས་དམིགས་པའི་རྟེན་འདི་ལ་ཁུག་ཅིག །[སྒྲུབ་སྔགས་གཟིར་སྔགས་དང་བཅས་པའི་ཤམ་བུར།] སརྦ་བིགྷྣཾན་ཤ་ཏྲུཾ་ཨ་ཀརྵ་ཡ་ཛཿ ནྲྀ་ཡཾ་ཛཿ ཏྲི་ཡཾ་ཛཿ ཛཿཧཱུྃ་བཾ་ཧོཿ [ལན་གསུམ། ཕོ་ཉ་འགྱེད་པ་ནི།] ཛཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ འགུགས་བྱེད་ཆེན་མོ་ལྩགས་ཀྱུ་དཀར་མོའི་ཚོགས༔ རིངས་པར་རྒྱུག་ལ་དམ་ཉམས་དགྲ་བགེགས་རྣམས༔ ཁུག་ཅིག་བཛྲ་ཨངྐུ་ཤ་ཡ་ཛ༔ ཧཱུྃ༔ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ འཆིངས་བྱེད་ཆེན་མོ་ཞགས་པ་སེར་མོའི་ཚོགས༔ རིངས་པར་རྒྱུག་ལ་དམ་ཉམས་དགྲ་བགེགས་རྣམས༔ མགུལ་ནས་ཆིངས་ཤིག་བཛྲ་པཱ་ཤ་ཧཱུྃ༔ བྃ༔ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ སྡོམ་བྱེད་ཆེན་མོ་ལྕགས་སྒྲོགས་དམར་མོའི་ཚོགས༔ རིངས་པར་རྒྱུག་ལ་དམ་ཉམས་དགྲ་བགེགས་རྣམས༔

ཡན་ལག་སྡོམས་ཤིག་བཛྲ་སྥོ་ཊ་བྃ༔ ཧོཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ མྱོས་བྱེད་ཆེན་མོ་དྲིལ་བུ་ལྗང་མོའི་ཚོགས༔ རིངས་པར་རྒྱུག་ལ་དམ་ཉམས་དགྲ་བགེགས་རྣམས༔ མྱོས་སུ་ཆུག་ཅིག་བཛྲ་གཎྜེ་ཧོ༔ ཕཊ༔ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ དབྱེ་བྱེད་ཁ་ཁ་ཨུ་ལུ་མུ་ཁ་མ༔ རིངས་པར་རྒྱུག་ལ་དམ་ཉམས་དགྲ་བགེགས་འདི༔ ཕྱེས་ཤིག་བཛྲ་པྲ་བེ་ཤ་ཡ་ཕཊ༔ ཛཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ འབེབས་བྱེད་ཆེན་མོ་རྡོ་རྗེ་འབེབས་པ་མོ༔ རིངས་པར་རྒྱུག་ལ་དམ་ཉམས་དགྲ་བགེགས་རྣམས༔ གཟུགས་ཕུང་རྟེན་ལ་ཕོབ་ཅིག་ཨཱ་བར་ཤ༔ པདྨ་མཧཱ་ཀྲོ་ངྷ་བཛྲ་ཨངྐུ་ཤ་ཛ༔ བཛྲ་པཱ་ཤ་ཧཱུྃ༔ བཛྲ་སྥོ་ཊ་བྃ༔ བཛྲ་གཎྜེ་ཧོ༔ དེ་ཝ་ཤག་ཕྱེས༔ ནྲྀ་ཏྲི་གརྦྷ་ཨཱ་བེ་ཤ་ཡ་ཧཱུྃ་ཕཊ༔ [གནད་ལ་དབབ་པ་ནི། ཐུན་རྫས་སྣ་ཚོགས་ཀྱི་བྲབ་ཅིང་།] ཧཱུྃ༔ ཁྲག་འཐུང་ཁྲོས་པ་དྲག་པོའི་མཚོན༔ གཏུམ་དྲག་ཕོ་ཉ་འབར་བའི་ཐུན༔ རྣོ་མྱུར་ཤུགས་དྲག་རྡོ་རྗེའི་མེ༔ མི་བཟད་མཚོན་ཆའི་འཁྲུལ་འཁོར་ནི༔ གནམ་ས་འཁྲུགས་པའི་ཐོག་སེར་བཞིན༔ དགྲ་བགེགས་གཟུགས་ཕུང་རྟེན་ལ་

ཡ༔ རྡུལ་ཕྲན་བཞིན་དུ་བརླག་པར་མཛོད༔ དུས་ལ་བབ་བོ་ས་མ་ཡ༔ ཨོྃ་བཛྲ་ཡཀྵ་ཏྲིག་ནན་ཨེ་ཧུར་ཐུཾ་ཛཿ གཟིར་ནན་ཀཱ་ཝཱ་ཙི་རྦད་རྦད༔ གདབ་པའི་གཟེར་ཁ་ནི། ཕུར་བུ་བསྒྲིལ་ཞིང་བཏབ་ལ། ཧཱུྃ༔ ང་ནི་དབང་དྲག་འཆོལ་བའི་སྐུ༔ འཁོར་འདས་ཡོངས་ཀྱི་སྤྱི་དཔལ་ཆེ༔ དམ་སྲི་འབྱུངཔོ་ཀུན་གྱི་གཤེད༔ ཁམས་གསུམ་གདུག་པ་འདུལ་བའི་དགྲ༔ མ་ལུས་ཀུན་གྱི་བདུད་ཆེན་པོ༔ སྲིད་པ་གསུམ་ཡང་ཟས་སུ་ཟ༔ རྡོ་རྗེའི་ངར་སྐད་འབྲུག་ལྟར་ལྡིར༔ ཕོ་ཉ་ལས་བྱེད་གློག་ལྟར་འཁྱུག༔ ཁྲོ་ཆུང་མཚོན་ཆ་སེར་ལྟར་འབེབས༔ གཏུམ་རྔམས་གཟི་བརྗིད་མེ་ལྟར་འབར༔ ལག་གཉིས་ཁྲག་འཐུང་ཡབ་ཡུམ་བཅུ༔ སྦྱོར་བའི་བྱང་སེམས་ཧཱུྃ་གི་སྤྲིན༔ པདྨ་ཀཱི་ལ་འབར་བའི་དཔལ༔ ལས་བྱུང་འོད་ཀྱིས་རྣམ་སྨིན་སྦྱངས༔ བདེ་བ་ཆེན་པོའི་ངང་དུ་བརྒྱལ༔ ཚེ་བསོད་དྭངས་མ་ནྲྀ་ལྗང་ཀུ༔ བདག་ཐིམ་འཆི་མེད་ནུས་སྟོབས་འབར༔ རྣམ་ཤེས་སོར་རྟོག་ཡེ་ཤེས་དབྱིངས༔ ཆགས་པ་ཆེན་པོའི་ཀློང་དུ་ཨ༔ དུག་གསུམ་ལས་ཉོན་བག་ཆགས་གཟུགས༔ རྡུལ་ཕྲན་བཞིན་དུ་བསྒྲལ་བར་བྱ༔ པདྨ་ཀྲོ་ངྷ་ཀཱི་ལ་ཡ་སརྦ་བིགྷྣཱན་མཱ་ར་ཡ་ཙིཏྟ་ཐུཾ་རིལ་རྦད་སོད༔

[སྒྲོལ་གྲིས་རྟེན་གཞོ་བསྒྲལ་བ་ནི།] ཧཱུྃ༔ ཆེ་མཆོག་པདྨ་ཐོད་ཕྲེང་རྩལ༔ གཏུམ་དྲག་རྔམས་པའི་རང་བཞིན་ལས༔ ཡཀྵ་མེ་དབལ་སྐར་ལྟར་འཁྲུག༔ ལས་བྱེད་ཕོ་ཉར་བཅས་པ་རྣམས༔ དྲག་པོའི་ཕྲིན་ལས་དུས་ལ་བབ༔ ཞིང་བཅུའི་དགྲ་དང་བགེགས་རྣམས་ཀྱི༔ གཟུགས་ཕུང་རྡུལ་ཕྲན་བཞིན་དུ་ཤིག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ནྲྀ་ཏྲི་ཤ་ཏྲཱུ་མཱ་ར་ཡ་རྦད༔ [ཐོ་བས་བརྡུང་བ་ནི།] ཧཱུྃ༔ རྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་རྣམས༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུང་བྱས་པས༔ ལྷ་ཡང་རུང་སྟེ་བརླག་བྱེད་ན༔ དགྲ་དང་བགེགས་ལ་སྨོས་ཅི་དགོས༔ ཨོཾ་པདྨ་ཨཱ་ཀོ་ཊ་ཡ་ཁ་ཐཾ་ཁ་ཐཾ༔ [ཞལ་དུ་སྟོབ་པ་ནི། བསྒྲལ་བའི་ཤ་ཁྲག་བདུད་རྩིའི་སྦར་བ་ཧོམ་གཟར་གྱིས་སྟོབ་ཅིང་།] ཧཱུྃ༔ པདྨ་དྲག་པོའི་ལྷ་ཚོགས་ཞལ་ཕྱེས་ཤིག༔ དགྲ་བགེགས་འབྱུང་པོ་བསྒྲལ་བའི་ཤ་ཁྲག་རུས༔ བདེ་ཆེན་རྡོ་རྗེའི་ལོངས་སྤྱོད་ཆེན་པོར་བཞེས༔ དུག་གསུམ་རྩད་ནས་གཅོད་པའི་ཕྲིན་ལས་མཛོད༔ སརྦ་ཤ་ཏྲུཾ་བིགྷྣཱན་མཧཱ་མཱཾ་ས་རཀྟ་ཀིཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ [ཞེས་བསྟབས། འདིར་ཚོགས་ལ་རོལ་ཞིང་ལྷག་མའི་ཆོ་ག་བྱ། དེ་ནས་ཟློག་པའི་དཔུང་བསྐྱེད་ཕྱིར་སླར་ཡང་གོང་བཞིན་

ཐུགས་དམ་བསྐུལ་བ་སྔོན་དུ་འགྲོ་བས། བཟློག་པའི་ཕྲིན་ལས་བཅོལ་བ་ནི།] ཧཱུྃ༔ ཆོས་དབྱིངས་ཞི་ལས་མ་གཡོས་ཀྱང་༔ གདུག་པ་ཅན་རྣམས་འདུལ་བའི་ཕྱིར༔ རྣམ་འགྱུར་འབར་བའི་སྐུར་བཞེངས་པ༔ བདུད་འདུལ་ཆེ་མཆོག་གྲོ་བོ་ལོད༔ གཙོ་འཁོར་སྤྲུལ་པར་བཅས་པ་རྣམས༔ དགྲ་བགེགས་ཤ་ཁྲག་འདི་རོལ་ལ༔ ཁྲོས་འཁྲུགས་རྔམས་པའི་བརྟུལ་ཞུགས་ཀྱིས༔ ཟློག་སྒྱུར་དྲག་པོའི་ཕྲིན་ལས་མཛོད༔ རྣལ་འབྱོར་བདག་ཅག་འཁོར་བཅས་ཀྱི༔ སྔོན་ལས་འཕྲལ་རྐྱེན་ངན་པ་དང་༔ གཉིས་སྣང་འཁྲུལ་པ་ལས་བྱུང་བའི༔ མི་མཐུན་བར་ཆད་ཐམས་ཅད་ཟློག༔ འཇིགས་ཆེན་བརྒྱད་དང་བཅུ་དྲུག་ཟློག༔ ནད་རིགས་བཞི་བརྒྱ་རྩ་བཞི་ཟློག༔ གདོན་རིགས་སུམ་བརྒྱ་དྲུག་ཅུ་ཟློག༔ བགེགས་རིགས་སྟོང་ཕྲག་བརྒྱད་ཅུ་ཟློག༔ དུས་མིན་འཆི་རྐྱེན་བཅོ་བརྒྱད་ཟློག༔ གློ་བུར་བདུན་བརྒྱ་ཉི་ཤུ་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ བྱད་ཁ་ཕུར་ཁ་རྦོད་གཏོང་ཟློག༔ སྡེ་བརྒྱད་གདུག་པའི་ཆོ་འཕྲུལ་ཟློག༔ རྒྱལ་བསེན་དམ་སྲིའི་གནོད་འཚེ་ཟློག༔ ཆག་ཆེ་ཉམ་ང་ཐམས་ཅད་ཟློག༔ ལོ་ཟླ་ཞག་

དུས་ཀག་སྲི་ཟློག༔ མི་ཁ་གླེང་གཞི་འཐབ་རྩོད་ཟློག༔ སྣོད་ཀྱི་འཇིག་རྟེན་རྒུད་པ་ཟློག༔ བཅུད་ཀྱི་མི་དགེའི་རྣམ་རྟོག་ཟློག༔ འབྱུང་བཞི་གཡོ་ཞིང་འཁྲུགས་པ་ཟློག༔ སད་སེར་བཙའ་ཐན་མུ་གེ་ཟློག༔ དུས་ཚོད་དམན་ལྷག་ལོག་པ་ཟློག༔ མི་ཕྱུགས་ནད་ཡམས་གོད་ཁ་ཟློག༔ མཐའ་དམག་ཀླ་ཀློའི་རྒྱུ་འགྲུལ་ཟློག༔ བསྟན་སེལ་ཕུང་ཤིག་སྡེ་འཁྲུགས་ཟློག༔ མ་མོ་མཁའ་འགྲོའི་སུན་མ་ཟློག༔ རྩ་རླུང་ཐིག་ལེའི་གཡོ་འཁྲུགས་ཟློག༔ མདོར་ན་འགལ་རྐྱེན་མི་མཐུན་ཕྱོགས༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་དགྲ་བགེགས་སྟེང་དུ་སྒྱུར༔ ཟློག་སྒྱུར་བཅོལ་བའི་ཕྲིན་ལས་མཛོད༔ [ཅེས་ཟློག་པ་བྱ། ཁྱུང་ལ་བརྟེན་ནས་ལྟས་ངན་དམིགས་ཀྱིས་བཟློག་པར་འདོད་ན།] ཧཱུྃ་བྷྱོ༔ བདུད་འདུལ་དབང་དྲག་ལྷ་ཚོགས་ཀྱི༔ དཀྱིལ་འཁོར་ཀླད་ན་ལྡེང་བ་ནི༔ བྱ་ཁྱུང་རྒྱལ་པོ་ག་རུ་ཌ༔ དཔལ་ཆེན་ཡོངས་ཀྱི་སྟོབས་རྩལ་རྫོགས༔ དེ་རིང་ཟློག་སྒྱུར་ལས་ལ་བཞེངས༔ རྭ་ཡིས་རྭ་ཅན་ལྟས་ངན་ཟློག༔ མཆུ་ཡིས་མཆུ་ཅན་ལྟས་ངན་ཟློག༔ སྡེར་མོས་སྡེར་ཅན་ལྟས་ངན་ཟློག༔ གཤོག་པས་གཤོག་ཅན་ལྟས་ངན་ཟློག༔ མཆེ་བས་མཆེ་ཅན་ལྟས་ངན་ཟློག༔ གནམ་གྱི་བྱ་དཀར་མཆེ་བ་ཅན༔ བྱ་ལ་མཆེ་བ་

མི་སྲིད་དེ༔ ལྟས་ངན་ཀུན་གྱི་ཕ་རུ་བྱུང་༔ ས་ཡི་བྱི་ནག་གཤོག་པ་ཅན༔ བྱི་བར་གཤོག་པ་མི་སྲིད་དེ༔ ལྟས་ངན་ཀུན་གྱི་མ་རུ་བྱུང་༔ དེ་གཉིས་སྲིད་དུ་སྦྲུམ་པ་ལས༔ ལྟས་ངན་བརྒྱད་ཅུ་རྩ་གཅིག་བྱུང་༔ དེ་ལས་ནད་གདོན་བགེགས་རིགས་དང་༔ ཆག་ཆེ་ཉམ་ང་ཐམས་ཅད་བྱུང་༔ དེ་དག་ཐམས་ཅད་བཟློག་པའི་ཕྱིར༔ མཁའ་ལྡིང་རྒྱལ་པོ་དབྱིངས་ནས་བཞེངས༔ ཤ་ཁྲག་གཏོར་མ་འདི་བཞེས་ལ༔ ཆག་ཆེ་ཉམ་ང་བྱད་ཕུར་དང་༔ མི་མཐུན་ལྟས་ངན་ཆོ་འཕྲུལ་ཀུན༔ བཟློག་གོ་བསྒྱུར་རོ་དགྲ་ལ་བྷྱོ༔ བཅོལ་བའི་ཕྲིན་ལས་འགྲུབ་པར་མཛོད༔ [ཅེས་དང་། ཤིན་ཏུ་དོ་གལ་ཆེ་ན་སྡེ་བརྒྱད་ཀྱི་ཟློག་པའི་འཕྱོང་ནི།] ཧཱུྃ༔ དབང་དྲག་བཀའ་ཡི་ཕོ་ཉ་ཆེ༔ སྲིད་པ་གསུམ་ལ་མངའ་དབང་སྒྱུར༔ ལས་མཁན་དྲེགས་པ་སྡེ་བརྒྱད་ཚོགས༔ དེ་རིང་ཟློག་སྒྱུར་ལས་ལ་ཆོས༔ ཨ་བྷྱོ༔ སྲོག་བདག་ཚངས་པ་དཀར་པོ་ནི༔ ལྷ་རྣམས་ཀུན་གྱི་རྗེ་བོ་ཡིན༔ སྤྲུལ་པ་རྒྱལ་འགོང་འབྱུང་པོ་འགྱེད༔ ཤ་ཁྲག་གཏོར་མ་འདི་བཞེས་ལ༔ དུས་འཁྲུགས་དམ་སྲིའི་ཆོ་འཕྲུལ་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ཡ་བྷྱོ༔ འཆི་བདག་ནག་པོ་ཁྲམ་ཐོགས་ནི༔ གཤིན་རྗེ་

ཡོངས་ཀྱི་དེད་དཔོན་ཡིན༔ སྤྲུལ་པ་བདུད་དང་མོན་དམག་འགྱེད༔ ཤ་ཁྲག་གཏོར་མ་འདི་བཞེས་ལ༔ ནད་མཚོན་གོད་ཡམས་ལོ་ཉེས་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ མ་བྷྱོ༔ འབྱུང་བ་ལྔ་ཡི་རྒྱལ་མོ་ནི༔ སྣང་སྲིད་མ་མོའི་དེད་དཔོན་ཡིན༔ སྤྲུལ་པ་བུད་མེད་འབུམ་སྡེ་འགྱེད༔ ཤ་ཁྲག་གཏོར་མ་འདི་བཞེས་ལ༔ ནད་རིམས་བསེན་མོའི་གནོད་གདུག་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ དུ་བྷྱོ༔ ནག་པོ་མེ་ཡི་ཁ་རླངས་ཅན༔ ཡ་བདུད་ཀུན་གྱི་དམག་དཔོན་ཡིན༔ སྤྲུལ་པ་ཞགས་ཐོགས་ཟོར་ཐོགས་འགྱེད༔ ཤ་ཁྲག་གཏོར་མ་འདི་བཞེས་ལ༔ བློ་འགྱུར་བགེགས་ཀྱི་ཆོ་འཕྲུལ་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ རུ་བྷྱོ༔ ཡམ་ཤུད་དམར་པོ་སྲོག་གི་གཤེད༔ བཙན་རྣམས་ཡོངས་ཀྱི་སྡེ་དཔོན་ཡིན༔ སྤྲུལ་པ་རྟ་ནག་འབུམ་སྡེ་འགྱེད༔ ཤ་ཁྲག་གཏོར་མ་འདི་བཞེས་ལ༔ གློ་བུར་གྲི་ཐབས་གཟེར་ནད་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ཙ་བྷྱོ༔ སྲོག་བདག་སྲིད་པ་ལི་བྱིན་ཧར༔ རྒྱལ་པོ་ཡོངས་ཀྱི་སྡེ་དཔོན་ཡིན༔ སྤྲུལ་པ་འོད་དང་འབག་སེང་འགྱེད༔ ཤ་ཁྲག་གཏོར་མ་འདི་བཞེས་ལ༔ བརྒྱལ་ནད་སྨྱོ་འབོག་འཐབ་འཁོན་སོགས༔ མི་

མཐུན་ཕྱོགས་ཀུན་དགྲ་ལ་ཟློག༔ ཤ་བྷྱོ༔ གང་བ་བཟང་པོ་རལ་པ་ཅན༔ གནོད་སྦྱིན་ཡོངས་ཀྱི་སྡེ་དཔོན་ཡིན༔ སྤྲུལ་པ་གནོད་སྦྱིན་འབུམ་སྡེ་འགྱེད༔ ཤ་ཁྲག་གཏོར་མ་འདི་བཞེས་ལ༔ ཐོག་སེར་ཆོ་འཕྲུལ་གདོང་གཟེར་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ན་བྷྱོ༔ ཀླུ་བདུད་མུན་པ་ནག་པོ་ནི༔ ཀླུ་རྣམས་ཡོངས་ཀྱི་སྡེ་དཔོན་ཡིན༔ སྤྲུལ་པ་ཀླུ་གཉན་དམག་དཔུང་འགྱེད༔ ཤ་ཁྲག་གཏོར་མ་འདི་བཞེས་ལ༔ དྲེགས་གྲུམ་མཛེ་ཤུ་ཕོལ་མིག་སོགས༔ མི་མཐུན་ཕྱོགས་ཀུན་དགྲ་ལ་ཟློག༔ ཧཱུྃ་བྷྱོ༔ སྲིད་པ་གསུམ་ལ་དབང་བྱེད་ཅིང་༔ བར་སྣང་ཁམས་ནས་རྩལ་འབྱིན་པའི༔ དྲེགས་པ་ལྷ་སྲིན་སྡེ་བརྒྱད་ཚོགས༔ སྤྲུལ་པ་ཡང་སྤྲུལ་ཕོ་ཉར་བཅས༔ ཤ་ཁྲག་གཏོར་མ་འདི་བཞེས་ལ༔ ཆག་ཆེ་ཉམ་ང་བྱད་ཕུར་སོགས༔ མི་མཐུན་གནོད་པའི་ཕྱོགས་རྣམས་ཀུན༔ བཟློག་བསྒྱུར་དྲག་པོའི་ཕྲིན་ལས་མཛོད༔ དུས་ལ་བབ་བོ་ས་མ་ཡ༔ [མཐར་དམོད་ཚིག་ཐལ་རྡེབ་ནི། ཟློག་པ་གནམ་ལྕགས་ཐོག་གཟེར་གྱི་དམིགས་བཟླས་སྦྱོར་བ་སྟེ།] ཕྱི་རོལ་སྲུང་བའི་འཁོར་ལོ་དང་༔ བདག་གི་སྐུ་ཡི་ཆ་ཀུན་ནས༔ སྤྲུལ་པའི་ཁྲོ་བོ་

ཁྲོ་མོ་དང་༔ ལྕགས་སྡིག་ཁྱུང་དམར་དཔག་ཡས་འཕྲོས༔ བྱད་མ་ལྷ་སྲུང་དང་བཅས་པ༔ སྦུར་མ་མེ་ལྕེས་ཚིག་བཞིན་བཅོམ༔ རྡུལ་ཕྲན་ཙམ་ཡང་མེད་པར་གྱུར༔ [ཅེས་རྩ་སྔགས་དང་གཟིར་སྔགས་སྦྲེལ་བའི་ཤམ་དུ།] ཨ་ཡ་མ་དུ་རུ་ཙ་ཤ་ན་མ་ཡ་བྷྱོ་ཟློག༔ ཨ་ལ་ལ་པྲ་མོ་ཧ་བྷྱོ་ཟློག༔ ཤན་ཏི་ཀ་ཤག་བྱེར་བྱེར་ཟློག༔ བྷ་ཡ་ནན༔ རྒྱལ་འགོང་དམ་སྲིའི་གནོད་བ་ཐམས་ཅད་མཧཱ་ཤཱ་རི་བྷྱོ་བྷྱོ་ཟློག་ཟློག༔ [ཅེས་ཟློག་སྔགས་བུང་བསྐྱེད་ནས་བཟླས་མཐར་བདེན་སྟོབས་བརྗོད་པ་གོང་བཞིན་ལས།] རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་དགྲ་འདྲེ་ཆག་ཆེ་ཉམ་ང་བྱད་ཕུར་རྦོད་གཏོང་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་གནོད་བྱེད་དགྲ་བགེགས་བྱད་མའི་སྟེང་དུ་མཱ་ར་ཡ་བྷྱོ་ཟློག༔ [ཅེས་ཐལ་རྡེབ་བྱ། ཐུན་གཏོར་གཏོང་བ་ནི། དམར་གཏོར་ལ་དམིགས་བྱ་འགུགས་བསྟིམ་བྱས་ཏེ།] རྃ་ཡྃ་ཁྃ་[གིས་སྦྱང་།] སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་ཕུང་པོ། ཀླད་ཞིག་ལྦུ་ཕྲེང་འཁྲིགས་པ། དམ་ཚིག་ཏུ་འོས་པའི་འདོད་ཡོན་གྱི་རྣམ་པ་མ་ཚང་བ་མེད་པ། ངོ་བོ་ཟག་པ་མེད་པའི་ཡེ་ཤེས་ཀྱི་བདུད་རྩིའི་

རང་བཞིན་ཅན་བསམ་གྱིས་མི་ཁྱབ་པས་ནམ་མཁའི་ཁམས་གང་བར་[བསམ་ལ།] ཨོཾ་ཨཱཿཧཱུྃ་[གིས་བྱིན་བརླབས།] ལྷ་ཚོགས་རྣམས་ཀྱིས་གཏོར་མ་བདུད་རྩིའི་ངོ་བོ་རྣམ་པ་ཤ་ཁྲག་གི་རང་བཞིན་ཆལ་ཆོལ་དུ་གསོལ་བར་[བསམ་ཞིང་།] ཨོཾ་ཨཱཿཧཱུྃབཛྲ་གུ་རུ་གྲོ་བོ་ལོད་ས་པ་རི་ཝཱ་ར་སརྦ་བིགྷྣཱན་ཤ་ཏྲུཾ་མཧཱ་མཱཾ་ས་རཀྟ་ཀེཾ་ནི་རི་ཏི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། [ཞེས་ལན་གསུམ་མམ་བདུན་གྱིས་ཕུལ་མཐར་གཏོར་མའི་ལྷག་མ་དུག་མཚོན་རྡོ་རྗེའི་ཆར་དུ་མོས་ལ་ལས་བྱང་བཞིན་ཟོར་ཚིག་ཟློག་སྔགས་དང་བཅས་པས་དགྲ་ཕྱོགས་སུ་འཕང་ངོ་། །དེ་ནས་ཉིན་ཐ་མ་འཕང་བའི་ལས་ལ་འཇུག་པའི་ཚེ། ཟློག་གཞུང་གྲུབ་པ་དང་གཏོར་མའི་ལྷ་ཚོགས་ལ་མཆོད་བསྟོད་བཟོད་གསོལ་བྱས་ཏེ།] ཡེ་ཤེས་པ་མདུན་གྱི་ནམ་མཁར་གཤེགས། དམ་ཚིག་པ་བདག་ལ་ཐིམ་པར་[བསམ།] སླར་ཡང་གཏོར་ཆེན་ཟོར་རྫས་དང་བཅས་པ་སྐད་ཅིག་གིས་ཁྲག་འཐུང་རྡོ་རྗེ་གྲོ་ལོད་དྲེགས་པ་ལྷ་སྲིན་སྡེ་བརྒྱད་ཀྱི་དམག་ཚོགས་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ་ནད་མཚོན་དུག་གི་ཆར་འབེབས་པས་དགྲ་བོ་སྒྲོལ་བའི་ལས་ལ་རྔམས་པར་[བསམ་ཞིང་། རྩ་སྔགས་ལ་ཟོར་སྔགས་བཏགས་པ་མང་དུ་བཟླ། ཐུན་གཏོར་གོང་བཞིན་དམག་ལྟོའི་ཚུལ་དུ་ཕུལ་ལ།] ཧཱུྃ། བདུད་འདུལ་དབང་དྲག་ཆེན་པོ་འཁོར་བཅས་ལ། །དགྲ་བགེགས་ཤ་ཁྲག་རུས་པ་ནང་ཁྲོལ་ཚོགས། །

ལྷུན་པོར་སྤུངས་པའི་འདོད་དགུའི་བ་ལིང་ཏ། །ཕྱི་ནང་ཉེར་སྤྱོད་སྨན་རཀ་བདུད་རྩིའི་ཚོགས། །འབུལ་ལོ་དགྱེས་པར་རོལ་ལ་བདག་ཅག་གི །ནད་གདོན་ཀུན་ཞི་ཚེ་དཔལ་ལོངས་སྤྱོད་སྤེལ། །ཁམས་གསུམ་དབང་སྡུས་དགྲ་བགེགས་བདུད་སྡེའི་དཔུང་། །ཐམས་ཅད་མིང་གི་ལྷག་མར་ཚར་ཆོད་ཅིག །ཕས་རྒོལ་བསམ་ངན་སྦྱོར་རྩུབ་བྱས་སྟེམས་དཔུང་། །ཐམས་ཅད་རང་གཤེད་ཕོབ་ལ་ནུས་མཐུ་ཤིག །མདོར་ན་བདག་གི་རེ་འབྲས་གང་ཡིན་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །[ཅེས་ཕྲིན་ལས་བཅོལ། སྒོ་དབྱེ་བ་ནི། ཕུད་སྐྱེམས་འཐོར་ཞིང་།] ཧཱུྃ༔ ཕྱོགས་བཞི་མཚམས་བརྒྱད་སྟེང་འོག་ན༔ གནས་པའི་སྣང་སྲིད་ལྷ་འདྲེའི་ཚོགས༔ གསེར་སྐྱེམས་མཆོད་པ་འདི་བཞེས་ལ༔ རིག་འཛིན་བདག་གི་བཀའ་ལ་ཉོན༔ དམར་ཆེན་དྲག་པོའི་གཏོར་ཟོར་འདི༔ ལྷ་སྲིན་ཚོགས་ལ་འཕེན་སྙམ་སྟེ༔ དཀར་པོའི་ཕྱོགས་ལ་མི་འཕེན་ནོ༔ ཁྱེད་རྣམས་རང་རང་གནས་ལ་གཤེགས༔ ཧཱུྃ༔ རྣལ་འབྱོར་ཟོར་འཕེན་གང་དུ་འཕེན༔ སྡང་དགྲ་གདོན་བགེགས་ཕྱོགས་སུ་འཕེན༔ ཕྱོགས་དེར་གནས་པའི་གཞི་བདག་རྣམས༔ སྐུ་བཟུང་དབུ་སྨད་ཞབས་སྡུས་ལ༔ དོ་ནུབ་ཟོར་གྱི་ཟོར་ལམ་ཕྱེས༔ འཁོར་བཅས་དྲག་པོའི་དམག་སྣ་དྲོངས༔ སྡང་དགྲ་གནོད་བགེགས་ཕྱོགས་སུ་ཁྱེར༔

དཔའ་བའི་འཁྲུལ་འཁོར་དེར་ཤོམས་ཤིག༔ [ཅེས་ཟོར་ལམ་བསལ་ལ་ལས་བྱང་བཞིན་བསྐུལ་དང་ཆད་མདོ་བསྒྲག །དེ་ནས་ཕྱར་དར་སོགས་ཀྱིས་སྣ་དྲངས་ཏེ་གཏོར་ཟོར་སོགས་ཁྱེར་ལ་གང་དུ་འཕང་བའི་སར་སོང་ནས། གསེར་སྐྱེམས་ཀྱི་མཆོད་པ་སྔོན་དུ་འགྲོ་བས།] ཧཱུྃ༔ ང་ནི་བདུད་འདུལ་ཧེ་རུ་ཀ༔ ཁྲག་འཐུང་ཀུན་གྱི་རྒྱལ་པོ་ཡིན༔ བཀའ་འཁོར་ལས་བྱེད་སྟོང་གསུམ་གང༔ ཐམས་ཅད་དྲག་པོའི་ལས་ལ་ཆོས༔ སྒྲོལ་བྱེད་དྲག་པོ་ཟོར་གྱི་རྫས༔ སྡང་དགྲ་གནོད་བགེགས་ཕྱོགས་སུ་འཕེན༔ གཏོར་ཟོར་ཐོག་ལྟར་ཤ་ར་ར༔ དཔལ་ཆེན་དྲག་པོའི་གཏོར་ཟོར་འདི༔ སྡང་བ་དགྲ་ཡི་སྙིང་ལ་ཡ༔ བདུན་རྒྱུད་ཆོད་ཅིག་མཱ་ར་ཡ༔ གནོད་པ་བགེགས་ཀྱི་སྙིང་ལ་ཡ༔ མེད་པར་ཆོམས་ཤིག་མཱ་ར་ཡ༔ ཡུལ་མཁར་ཁྱིམ་ལ་གཏོར་ཟོར་ཡ༔ རྡུལ་དུ་རློག་ཅིག་མཱ་ར་ཡ༔ བདག་འཛིན་བདུད་ལ་གཏོར་ཟོར་ཡ༔ གཉིས་མེད་སྒྲོལ་ཅིག་མཱ་ར་ཡ༔ [ཞེས་དཔུང་བསྐྱེད། འཕང་བ་དངོས་ནི།] ཧཱུྃ༔ ང་ནི་ཆེ་མཆོག་གྲོ་བོ་ལོད༔ ཁམས་གསུམ་ཀུན་གྱི་དབང་ཕྱུག་ཡིན༔ འཇིག་རྟེན་འདས་དང་མ་འདས་པའི༔ དྲེགས་པ་ཕོ་རྒྱུད་མོ་རྒྱུད་ཀུན༔ རང་རང་ཕོ་ཉའི་དམག་སྡུས་ལ༔ དེ་རིང་དགྲ་བགེགས་སྟེང་དུ་དྲངས༔ རྦད་དོ་བསྐུལ་ལོ་དྲེགས་པའི་ཚོགས༔ དྲག་རྩལ་

མཐུ་དང་དཔུང་བསྐྱེད་ལ༔ དགྲ་བགེགས་སྡིག་ཅན་འཁོར་བཅས་ཀྱི༔ གཟུགས་ཕུང་ཐལ་བའི་རྡུལ་བཞིན་བཤིག༔ རྣམ་ཤེས་ཚངས་པའི་ལམ་ནས་དྲོངས༔ རིག་པ་སྐྱེ་མེད་དབྱིངས་སུ་སྤོར༔ དུས་ལ་བབ་བོ་མཐུ་རྩལ་བསྐྱེད༔ མཱ་ར་ཡ་རྦད་བྷྱོ་ཟློག༔ [ཅེས་རོལ་མོའི་སྒྲ་དྲག་པོ་དང་བཅས་ཟོར་རྣམས་རིམ་པར་འཕངས་པའི་རྗེས་སུ་གཏོར་ཆེན་རྔམ་སྟབས་སུ་རྦུད་པས་དགྲ་བོའི་རྣམ་ཤེས་མར་བསད་པ་ལྟར་སོང་། གནས་ལུས་ལོངས་སྤྱོད་ཐམས་ཅད་རྗེས་མེད་དུ་བརླག་པར་བསམ་ཞིང་ཐལ་མོ་དང་དུལ་མོ་རྡེབ། མཐར་ཟོར་རྗེས་གཅོད་པའི་ཕྱིར་སྲུང་འཁོར་བསྒོམ་ལ་སློབ་དཔོན་གྱིས་རྟིང་མནན་སྟེ་ལྡོག །སྒྲུབ་ཁང་གི་སྒོ་དྲུང་དུ་བཤལ་ཆུའི་བདུད་རྩིས་བརྟན་མ་བསྐྱང་། གཏོར་གཞོང་ཁ་སྦུབས་པའི་འོག་ཏུ་དགྲ་བགེགས་དམ་སྲི་མནན་པར་བསམ་ལ་བྲོ་བརྡུང་། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་ལེན། གཏང་རག་གི་མཆོད་བསྟོད་བཟོད་གསོལ་བྱས་ལ་ནམ་མཁར་བཞུགས་པའི་ཡེ་ཤེས་པ་གཤེགས་སུ་གསོལ་པའམ་རྟེན་ལ་བསྟིམ། བདག་བསྐྱེད་ཉེར་བསྡུ་དང་ཐུན་མཚམས་ཀྱི་ལྷར་ལྡང་ཏེ་རྡུལ་ཚོན་ཡོད་ན། ཨ་ཀཱ་རོས་དབྱི་ཞིང་སྨོན་ལམ་དང་ཤིས་པ་བརྗོད་པས་མཐའ་བརྒྱན་བར་བྱའོ། །དེ་ལྟར་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་སྨད་ལས་རྡོ་རྗེའི་ཐོག་ཆར་ཞེས་བྱ་བ་འདི་ནི། ལུང་ཟིན་ཤུད་བུ་དཔལ་སེང་གི་རྣམ་འཕྲུལ་དུ་བསྔགས་པ་ཨོ་རྒྱན་ཆེ་མཆོག་འདུས་པ་རྩལ་གྱི་བཞེད་སྐོང་དུ། རིགས་མཐུན་གྱི་ངག་འདོན་ཁ་སྐོང་དང་བཅས་དཀྱུས་ཀྱི་ལག་ལེན་འཇུག་པ་བདེ་བའི་

དབང་དུ་བྱས་ཏེ། ལམ་འདིའི་གསང་བ་འཛིན་པ་འཇིགས་བྲལ་ཡེ་ཤེས་རྡོ་རྗེས་ས་ཁམས་ཁྱུ་མཆོག་གི་ལོ་བདུད་སྡེ་ཕུང་བའི་ཉི་མ་ལ་ཀོང་ཡུལ་བདུད་རི་རྔམས་ཆེན་སྒྲ་སྒྲོགས་ཀྱི་མགུལ་བོད་ཀྱི་དུར་ཁྲོད་པདྨ་བརྩེགས་པའི་གནས་སུ་སྦྱར་བ་ཛ་ཡནྟུ།། །།] ༈[གོང་གི་ཟོར་ལས་ཀྱི་སྤྲོས་པ་རྒྱས་པར་འདོད་ན་ཟོར་རྣམས་རིམ་པར་ཐོགས་ལ། བྷྱོ། ཁྲག་འཐུང་དབང་དྲག་འབར་བ་ཡི། །ཕོ་ཉར་མངགས་པ་ཟོར་གྱི་བདག །དགྲ་བགེགས་སྒྲོལ་ཕྱིར་ལས་ལ་ཡ། །དམར་ཆེན་དྲག་པོ་གཏོར་མའི་ཟོར། །གློག་ལྟར་འཁྱུག་ཅིང་ཐོག་ལྟར་འབེབས། །དགྲ་བགེགས་ལུས་སེམས་འབེན་ལ་ཡཱ། [ཞེས་དྲག་སྔགས་བརྗོད་བཞིན་པར་བརྡེག །དེ་བཞིན་གཏོར་ཟོར་གྱི་ཚབ་ཏུ།] རྦ་ཀློང་འཁྲུགས་པ་ཁྲག་གི་ཟོར། །རི་བོ་སྙིལ་བ་རྡོ་ཡི་ཟོར། །རྣོ་མྱུར་ཤུགས་དྲག་མདའ་ཡི་ཟོར། མཚོན་རྩེ་གཟིངས་པ་ཡུངས་ཀར་ཟོར། །མུན་པ་འཁྲིགས་པ་དུག་གི་ཟོར། [ཞེས་བསྒྱུར་ལ་སོ་སོའི་མཐར་དྲག་སྔགས་བརྗོད་བཞིན་པས་འཕང་། དེ་ནས་ཟོར་ཆེན་འཕང་བ་དངོས་ལ་འཇུག་པར་བྱའོ།། །།]

ལས་སྦྱོར་གྱི་སྐབས་འགའ་ཞིག་ཏུ་དྲེགས་པ་སྡེ་བརྒྱད་ཀྱི་བསྐུལ་བའི་འཕྱོང་དམིགས་བསལ་དུ་གདག་པ།

[ལས་སྦྱོར་གྱི་སྐབས་འགའ་ཞིག་ཏུ་དྲེགས་པ་སྡེ་བརྒྱད་ཀྱི་བསྐུལ་བའི་འཕྱོང་དམིགས་བསལ་དུ་གདག་པར་སྤྲོ་ན། །དམར་གཏོར་ཤ་ཁྲག་གིས་བརྒྱན་པ་ལ་སྨན་རཀ་སྦྲན་ཅིང་།] ཧཱུྃ༔ སྲིད་པ་གསུམ་ལ་དབང་བསྒྱུར་ཞིང་༔ འཇིག་རྟེན་ཁམས་ལ་མངའ་མཛད་པ༔ རྣམ་འགྱུར་ཁྲོ་གཏུམ་དྲག་ཤུལ་ཅན༔ དྲེགས་པ་སྡེ་བརྒྱད་ད་ཚུར་བྱོན༔ ཨཿ སྲིད་པ་ལྷ་ཡི་གཙོ་བོ་ནི༔ སྐུ་མདོག་དཀར་པོ་འཛུམ་ཞིང་བརྗིད༔ ཕྱག་ན་རལ་གྲི་མདུང་དར་བསྣམས༔ ཆིབས་སུ་ལྷ་གཡག་དཀར་པོ་ཆིབས༔ ལྷ་དམག་འབུམ་གྱི་འཁོར་གྱིས་བསྐོར༔ རྒྱལ་འགོང་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ་འདི་བཞེས་ལ༔ དགྲ་ལ་སྙིང་གཟིར་བརྒྱལ་ནད་ཐོང་༔ ཡ༔ སྲིད་པ་གཤིན་རྗེའི་གཙོ་བོ་ནི༔ སྐུ་མདོག་ནག་པོ་ཁྲོ་ཞིང་གཏུམ༔ ཕྱག་ན་བེ་ཅོན་ཁྲམ་ཤིང་ཐོགས༔ ཆིབས་སུ་མ་ཧེ་རུ་རིང་ཆིབས༔ གཤིན་རྗེའི་དམག་ཚོགས་འབུམ་གྱིས་བསྐོར༔ ཡི་དྭགས་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ་འདི་བཞེས་ལ༔ སྡང་བའི་དགྲ་བོ་ཁྲམ་ལ་ཐོབ༔ མ༔ སྲིད་པ་མ་མོའི་གཙོ་བོ་ནི༔ སྐུ་མདོག་དཀར་སྨུག་བརྗིད་པའི་ཞལ༔ ཕྱག་ན་མདའ་དར་མེ་ལོང་བསྣམས༔ ཆིབས་སུ་གཡུ་འབྲུག་སྔོན་པོ་ཆིབས༔

མ་མོའི་དམག་ཚོགས་འབུམ་གྱིས་བསྐོར༔ བསེན་མོ་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ་འདི་བཞེས་ལ༔ སྡང་བའི་དགྲ་ལ་ཡམས་ནད་ཐོང་༔ དུ༔ སྲིད་པ་བདུད་ཀྱི་གཙོ་བོ་ནི༔ སྐུ་མདོག་མཐིང་ནག་རབ་ཏུ་འཇིགས༔ ཕྱག་ན་དར་ནག་ཁྲམ་ཤིང་ཐོགས༔ ཆིབས་སུ་རྟ་ནག་རྟིང་དཀར་ཆིབས༔ བདུད་ཀྱི་དམག་ཚོགས་འབུམ་གྱིས་བསྐོར༔ བགེགས་རིགས་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ༴ སྡང་བའི་དགྲ་བོ་འཐོམ་སུ་ཆུག༔ རུ༔ སྲིད་པ་བཙན་གྱི་གཙོ་བོ་ནི༔ སྐུ་མདོག་དམར་ནག་མེ་ལྟར་འབར༔ ཕྱག་ན་ལྕགས་ཀྱི་མདའ་གཞུ་འགེངས༔ ཆིབས་སུ་བཙན་རྟ་རླུང་གཤོག་ཆིབས༔ བཙན་གྱི་དམག་ཚོགས་འབུམ་གྱིས་བསྐོར༔ ས་བདག་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ༴ དགྲ་ལ་ཁྲག་སྐྱུག་གཟེར་ནད་ཐོང་༴ ཙ༔ སྲིད་པ་རྒྱལ་པོའི་གཙོ་བོ་ནི༔ སྐུ་མདོགདཀར་བརྗིད་ཁྲོ་ཞིང་འཛུམ༔ ཕྱག་ན་གསེག་ཤང་པར་བུ་བསྣམས༔ ཆིབས་སུ་སེངྒེ་དཀར་མོ་ཆིབས༔ རྒྱལ་པོའི་དམག་ཚོགས་འབུམ་གྱིས་བསྐོར༔ གིང་འགོང་བྱ་བ་སྤྲུལ་པར་འགྱེད༔ ཤ་ཁྲག་གཏོར་མ༴ སྡང་བའི་དགྲ་ལ་སྨྱོ་འབོག་ཐོང་༔

ཤ༔ སྲིད་པ་གནོད་སྦྱིན་གཙོ་བོ་ནི༔ སྐུ་མདོག་སྔོན་པོ་འོད་དུ་འཁྲུགས༔ ཕྱག་ན་རལ་གྲི་ནོར་བུ་འཛིན༔ ཆིབས་སུ་སྟག་ཆེན་རྔམས་པ་ཆིབས༔ གནོད་སྦྱིན་དམག་ཚོགས་འབུམ་གྱིས་བསྐོར༔ གཟའ་སྐར་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ༴ སྡང་བའི་དགྲ་བོ་མྱུར་དུ་སྒྲོལ༔ ན༔ སྲིད་པ་ཀླུ་ཡི་གཙོ་བོ་ནི༔ སྐུ་མདོག་དུད་ཁ་འཇིགས་པའི་གཟུགས༔ ཕྱག་ན་སྦྲུལ་ཞགས་ནད་རྐྱལ་ཐོགས༔ ཆིབས་སུ་གདུག་པའི་ཆུ་སྲིན་ཆིབས༔ ཀླུ་བདུད་དམག་ཚོགས་འབུམ་གྱིས་བསྐོར༔ ཀླུ་གཉན་བྱེ་བ་སྤྲུལ་པར་འགྱེད༔ ཤ་ཁྲག་གཏོར་མ༴ དགྲ་ལ་མཛེ་ཤུ་ཕོལ་འབྲས་ཐོང་༔ ཧཱུྃ༔ སྲིད་པ་གསུམ་ལ་དབང་བྱེད་ཅིང་༔ བར་སྣང་ཁམས་ནས་རྩལ་འབྱིན་པའི༔ དྲེགས་པ་ལྷ་སྲིན་སྡེ་བརྒྱད་ཀྱིས༔ དམ་ཉམས་དགྲ་བོའི་ཤ་དང་ཁྲག༔ སྨན་རཀ་གཏོར་མ་འདོད་ཡོན་སྐྱེམས༔ མཐུན་པའི་དམ་རྫས་འདི་བཞེས་ལ༔ བཅོལ་བའི་ཕྲིན་ལས་སྒྲུབ་པར་མཛོད༔ [ཅེས་བསྐུལ་ལོ། །ཞེས་པའང་དག་འདོན་ཁ་སྐོང་དུ་བསྡེབས་པ་སྟེ་འཇིགས་བྲལ་ཡེ་ཤེས་རྡོ་རྗེས་སོ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་སྲེག་པ་ཧོམ་གྱི་ལས་རིམ་བསྐལ་མེའི་འཕྲུལ་འཁོར།

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་སྲེག་པ་ཧོམ་གྱི་ལས་རིམ་བསྐལ་མེའི་འཕྲུལ་འཁོར་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། །[མངོན་སྤྱོད་དྲག་པོའི་མན་ངག་བསད་པའི་མཐའ་སྡུག་སྲེག་པ་ཧོམ་ཅི་ལས་རིམ་ལ་འཇུག་པར་འདོད་པས་དུར་ཁྲོད་སོགས་དྲག་པོའི་ལས་ལ་བསྔགས་པའི་ས་གཞི་གནག་ལ་རྩུབ་པ། དུས་ཐ་ཆུང་བཞིའི་དམར་ཕྱོགས་ཉེར་དགུ་དང་གནམ་སྟོང་ལ་སོགས་པའི་སྲོད་དང་ནམ་ཕྱེད་ཀྱི་ཆར། གདུག་པའི་ས་སྣ་གསུམ་གྱི་སྟེགས་བུ་རྒྱར་མདའ་གང་དཔངས་སུ་ཇི་ལྟར་འཚམས་པའི་ཐལ་ཚོན་གྱིས་ཐབ་ཁུང་གྲུ་གསུམ་ཁ་ཁྱེར་གསུམ་རིམ་གྱི་རྣམ་པའི་ཕྱི་མར་མེ་རི་འབར་བ་དང་ལྟེ་བར་རཾ་གྱིས་མཚན་པ་བྲི། དེར་དུག་ཤིང་ཚེར་མ་ཅན་གྱི་བུད་ཤིང་དུག་ཁྲག་གིས་སྦགས་པས་ཧོམ་གྲུ་གསུམ་འཚམས་པར་བརྩིགས་པའི་ནང་དུ་མེ་ཚང་བཅའ་ཞིང་ཐབ་ཀྱི་ཟུར་གསུམ་དུ་རྩང་གསུམ་མཆེ་བའི་ཚུལ་དུ་བསླང་། སློབ་དཔོན་གྱི་གཡས་

ངོས་སུ་མེ་སྲོག་འཛིན་པའི་རྫས་བུད་ཤིང་གི་རྒྱུ་ལས་ཡམ་ཤིང་ཟུར་གསུམ་སོར་བཅུ་གཉིས་པ་མར་ནག་དང་ཚིལ་ཞུན་གྱིས་སྦགས་པ། རྩ་བའི་རྫས་དུག་ཤོག་ལ་དགྲ་བགེགས་ཀྱི་རཱུ་པ་མིང་རུས་བླ་དྭགས་གནས་ཡིག་དང་བཅས་པ་གྲངས་ལྡན། དྲག་པོའི་རྫས་ཤ་སྣ་བག་ཕྱེ་དང་བསྲེས་པའི་རིལ་བུ་མིང་རུས་ཅན། གནད་དབབ་ཀྱི་རྫས་སྦལ་སྦྲུལ་ཉ་ཁྱི་ལ་སོགས་པའི་ཤ་དུག་སྣ་དང་བསྲེས་པའི་རིལ་བུ། གསོད་པའི་རྫས་ལྕགས་ཟངས་རྦབ་རྡོའི་ཕྱེ་མ་དང་ཚེ་གསུམ། མྱོས་པའི་རྫས་མར་ནག་རྨེ་མནོལ་གྱི་ཁྲག་དང་སྦྱར་བ། ཚ་བའི་རྫས་ཏིལ་དང་ཡུངས་དཀར་ཚ་བ་གསུམ་སྟེ། དེ་ལྟར་རྫས་བདུན་པོ་རྣམས་ལྕགས་སམ་བསེ་ཕོར་ཐོད་པ་ལ་སོགས་པའི་སྣོད་དུ་གྲལ་རིམ་གྱིས་འགོད། རྩ་བའི་རྫས་ཤོག་ལིང་ཅིས་ཀྱང་མ་འབྱོར་ན་རཱུ་བ་འབྲུ་ནག་གི་ཟན་ལ་བཟོས་པས་ཀྱང་རུང་།

གཡོན་ངོས་སུ་ལྕགས་ཕྱེ་དུག་སྣ་རྡོ་ཕྱེར་ཁྱིའི་ཁྲག་ཤ་ཆེན་སྲན་ཆེན་རྣམས་མར་ནག་ལ་བསྲེས་པའི་གཏོར་མ་གྲུ་གསུམ་ཐེབ་ཀྱུ་གསུམ་ལྡན་དང་། མེ་ལྷའི་གཏོར་མ་ཟུར་གསུམ། གཡས་གཡོན་དུ་སྨན་ཕུད་དང་རཀྟ། མདུན་དུ་ཁྲག་གི་མཆོད་ཡོན་སོགས་དྲག་མཆོད་ཕྲེང་ཚར་ཆ་གཉིས་བཅས་འདས་མ་འདས་ཉིས་རིམ་དུ་བཤམ། སྣོད་དང་རྫས་ཐམས་ཅད་དབྱིབས་གྲུ་གསུམ་ཁ་དོག་ནག་པོ་འབའ་ཞིག་པ་བྱ། སློབ་དཔོན་དང་ཐབ་ཀྱི་བར་དུ་མེ་ཡོལ་གངས་རི་བཾ་གྱིས་མཚན་པ་བྲིས་པའི་ནང་གི་ཆར༔ ནང་མཆོད། ལས་བུམ། རྡོ་དྲིལ་བར་དུ་དགང་བླུགས་ཁ་སྦྱར་བ། འབྲུ་ནག་གི་མེ་ཏོག་བཅས་འགོད། གཞན་ཡང་གདབ་པའི་ཆས། ཚིལ་ཞུན་དང་མར་ནག་བསྲེས་པའི་མར་ཁུ། ཐུན་རྫས། རླུང་གཡབ། གོས་ཟུང་། སོ་རྩེ་སོགས་ཉེ་བར་མཁོ་བའི་ཡོ་བྱས་རྣམས་ཚང་བར་འདུ་བྱས་ལ། སློབ་དཔོན་བདག་གི་རྣལ་འབྱོར་ལ་གནས་པས་རྒྱུ་དུས་ཀྱི་ཀུན་སློང་སྙིང་རྗེ་བྱང་སེམས་ཀྱིས་དྲངས་པའི་ཞིང་བཅུ་སྒྲོལ་བའི་ཞེ་སྡང་གི་དཔའ་ངར་དང་ལྡན་པས་དྲག་པོའི་ཆས་གོས་ཀྱིས་བརྒྱན་ཏེ་མགར་བའི་འདུག་སྟངས་ཀྱིས་ཁ་ལྷོར་ཕྱོགས་པས་འཁོད་ལ། མཆོད་རྫས་རྣམས་བསང་ཆུ་དང་རྟ་སྔགས་ཀྱིས་[བསང་།] སྭ་བྷཱ་ཝ་[ས་སྦྱང་།] སྟོང་པའི་ངང་ལས་གནས་ཁང་འོག་མིན་གསང་ཆེན་རོལ་པའི་གཞལ་མེད་ཁང་ཕུན་སུམ་ཚོགས་པར་བྷཉྫ་འབར་བའི་སྣོད་ཡངས་ཤིང་རྒྱ་ཆེ་བ་རྣམས་སུ་དགྲ་བགེགས་བསྒྲལ་བ་ལས་བྱུང་བའི་

ཁྲག་གི་མཆོད་ཡོན། ཆུ་སེར་གྱི་ཞལ་བསིལ། དབང་པོའི་མེ་ཏོག །ཚིལ་ཆེན་གྱི་དུད་སྤྲིན། ཞུན་ཆེན་གྱི་སྒྲོན་མེ། མཁྲིས་པའི་དྲི་ཆབ། མཱཾ་སའི་ཞལ་ཟས། ཐོད་རྔའི་རོལ་མོ་སོགས་རང་བྱུང་དུར་ཁྲོད་ཀྱི་དམ་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ཁྲག་འཐུང་ཁྲོ་བོའི་དཀྱིལ་འཁོར་གྱི་འཁོར་ལོའི་ཞིང་ཐམས་ཅད་དུ་ཁྱབ་པར་འཆར་བས་ནམ་མཁའི་མཐའ་ཀླས་པར་གང་བར་[བསམ་ལ།] ཨོཾ་བཛྲ་ཨརྒྷཾ་ཨཱཿཧཱུྃ༔ [སོགས་ནས།] ཤཔྡ་པཉྩ་ཀཱ་མ་གུ་ཎ་ཨཱཿཧཱུྃ༔ [ཞེས་དང་།] ཨོཾ་ཨཱཿཧཱུྃ་མཧཱ་སརྦ་པཉྩ་ཨ་མྲྀ་ཏ་མཧཱ་རཀྟ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡ་ཧཱུྃ་ཧྲཱིཿཋཱ༔ [ལན་གསུམ། བསྲེག་རྫས་རྣམས་བསང་སྦྱང་།] སྟོང་པའི་ངང་ལས་ཨ་ལས་བྱུང་བའི་དམར་གྱི་དུང་ཆེན་སྟོང་གསུམ་དང་མཉམ་པའི་ནང་དུ་ནྲྀ་དང་ཏྲི་ལས་དགྲ་བགེགས་ཀྱི་ཤ་ཁྲག་ཕུང་ཁམས་སྐྱེ་མཆེད་ལས་བྱུང་བའི་བསྲེག་རྫས་རྣམས་ངོ་བོ་ཟག་མེད་ཡེ་ཤེས་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་ཡོངས་སུ་རྫོགས་པས་ནམ་མཁའི་ཁམས་གང་བར་[བསམ་ཞིང་། རྩ་སྔགས་དང་།] ནྲྀ་ཏྲི་ཨ་མུ་ཀཱ་མཱ་ར་ཡ་ཛ་ཛཿ [ཞེས་ལན་གསུམ་གྱིས་བརླབ་བོ། །དེ་ནས་

གདོལ་བཤན་རྨེ་ཡུག་ལ་སོགས་པའི་ལག་ནས་བྱུང་བའི་མེ་ཐོགས་ལ།] ཨོཾ་ཨགྣ་ཡེ་ཧ་བྱ་ཀ་བྱ་ཛཿ ཆེ་གེ་མོ་མཱ་ར་ཡ་ཛྭ་ལ་རཾ། [ཞེས་རླུང་གཡབ་དང་བཅས་ཏེ་སྤར།] ཨོཾ་ཨགྣ་ཡེ་ཆེ་གེ་མོ་ཛྭ་ལ་རཾ། [ཞེས་བླུགས་གཟར་གྱི་མར་ནག་ཁུ་བས་མེ་གསོ། ཐོག་མར་འཇིག་རྟེན་པའི་མེ་ལྷ་མཆོད་པའི་དོན་དུ། མེ་ཐབ་བསང་སྦྱང་།] སྟོང་པའི་ངང་ལས་ཧཱུྃ་ཡིག་ལས་བྱུང་བའི་དྲག་པོའི་ཐབ་ཁུང་མཐིང་ནག་གྲུ་གསུམ་བང་རིམ་གསུམ་ལྡན་ཆོས་ཀྱི་དབྱིངས་དང་མཉམ་པའི་ནང་དུ། ར་སྐྱེས་ཁམ་ནག་ཞིང་གི་ཐོད་པའི་སྒ་དང་མིའི་པགས་པས་གཡོགས་ཤིང་། སྦྲུལ་ནག་གི་གོང་སྨེད་བྱས་པའི་སྟེང་དུ་རཾ་ཡིག་ཡོངས་སུ་གྱུར་པ་ལས། ཟ་བྱེད་མེ་ལྷ་མཐིང་ནག་ཁྲོ་གཏུམ་འཇིགས་སུ་རུང་བ། ཞལ་གཅིག་ཕྱག་བཞིའི་དང་པོས་ཧོམ་གཟར་དང་མེ་ཕུང་། འོག་མ་གཉིས་ཀྱིས་བགྲང་ཕྲེང་དང་དབྱུག་གུ་བསྣམས་པ། དུར་ཁྲོད་ཀྱི་ཆས་ཀྱིས་བརྒྱན་ཅིང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཤར་ལྷོའི་མཚམས་ནས་ཡེ་ཤེས་ཀྱི་མེ་ལྷ་འཁོར་དང་བཅས་པ་སྤྱན་དྲངས་པར་[བསམ་ཞིང་། སྐྱབས་སྦྱིན་རྒྱས་མཐེ་བོང་རྣ་བའི་དྲུང་དུ་གཡབ་ལ།] ཨོཾ༔ དད་པ་དང་ནི་དམ་ཚིག་གིས༔ ཚུར་བྱོན་ཚུར་བྱོན་འབྱུང་པོ་ཆེ༔

དགྲ་བགེགས་གདུག་པ་ཚར་གཅོད་ཕྱིར༔ དྲང་སྲོང་ཆེན་པོ་ད་ཚུར་གཤེགས༔ ཆིབས་སུ་ར་སྐྱེས་ཁམ་པ་ཆིབས༔ ཕྱག་ན་མེ་ཡི་འཁོར་ལོ་བསྣམས༔ ཕྲིན་ལས་སྒྲུབ་ཕྱིར་གཤེགས་སུ་གསོལ༔ ཨོཾ་ཨགྣ་ཡེ་ཨེ་ཧྱེ་ཧི་ས་མཱ་ཛ༔ [ཞེས་སྤྱན་དྲངས། ཁྲག་གི་མཆོད་ཡོན་དང་ཆུ་སེར་གྱི་ཞབས་བསིལ་སྦྲེང་ལ།] ཨོཾ་ཨ་གྣེ་དེ་བ་བཛྲ་ཨརྒྷཾ་པྲ་ཏཱིཙྪ་སྭཱཧཱ༔ [དེ་བཞིན་དུ།] བཛྲ་པཱདྱཾ་[སྦྱར་བས་ཕུལ། བཞུགས་སུ་གསོལ་བ་ནི།] འབར་བའི་རྒྱལ་པོ་ཆེན་པོ་ཁྱོད༔ འདོད་པའི་བསམ་པ་བསྒྲུབ་བྱའི་ཕྱིརཿ བདག་གི་གནས་མཆོག་དམ་པ་འདིར༔ འབར་བའི་གདན་ལ་བཞུགས་སུ་གསོལ༔ ཛཿཧཱུྃ་བྃ་ཧོཿས་མ་ཡ་ཏིཥྛ་ལྷན༔ [ཕྱག་འཚལ་བ་ནི།] ཧཱུྃ༔ ཚངས་པ་འཇིག་རྟེན་མགོན་གྱི་སྲས༔ བདུད་དང་དགྲ་བགེགས་བརླག་མཛད་ཅིང་༔ ཇི་ལྟར་འདོད་པའི་དོན་སྒྲུབ་པ༔ གཟི་བརྗིད་རྒྱལ་པོར་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏཱིཙྪ་ཧོཿ [མཆོད་པ་ནི།] ཧཱུྃ༔ སྟོང་གསུམ་ཞིང་ཀུན་ཡོངས་གང་བའི༔ རྨད་བྱུང་འདོད་པའི་ཉེར་སྤྱོད་ལྔ༔ ཤ་ཁྲག་དབང་པོའི་ཚིལ་རུས་དང་༔ གཉིས་མེད་མཉམ་སྦྱོར་ཨ་མྲྀ་ཏ༔ བ་ལིང་གཏོར་མ་རཀྟ་སོགས༔ ཟ་བྱེད་མེ་ལྷའི་ཚོགས་ལ་འབུལ༔

དགྲ་བགེགས་སྒྲོལ་ཕྱིར་བཞེས་སུ་གསོལ༔ ཨོཾ་ཨགྣེ་ཀྲོ་ངྷ་ས་པ་རི་ཝཱ་ར་བཛྲ་པུཥྤེ་པྲ་ཏཱིཙྪ་སྭཱཧཱ། [དེ་བཞིན་དུ་]ཤཔྡའི་[བར་དང་།] པཉྩ་ཀཱ་མ་གུ་ཎ། སརྦ་པཉྩ་ཨ་མྲྀ་ཏ། མཧཱ་རཀྟ། མཧཱ་བ་ལིཾ་ཏ། [སོ་སོ་ལ་གོང་གི་སྔགས་དང་། མཇུག་ཏུ་]པཱུ་ཛ་ཁཱ་ཧི་[སྦྱར་བ་འབུལ། དེ་ནས་རྫས་རྣམས་ལས་ཐོག་མར་དགང་བླུགས་འབུལ་བ་ལ།] མེ་ལྷ་ཁྲོས་པའི་ཞལ་རབ་ཏུ་གདངས་པའི་ལྗགས་རྡོ་རྗེ་རྩེ་མོ་གཅིག་བར་རཾ་དང་དགང་བླུགས་ཀྱི་རྩེར་ཧཱུྃ་ཡིག་མཐིང་ནག་འོད་ཟེར་གྱི་ཕུང་པོ་འབར་བས་མཚན་པས་སྲེག་རྫས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་[བསམ་ཞིང་། ལག་གཉིས་ཁྲོ་བོའི་ཁུ་ཚུར་གྱིས་དགང་བླུགས་བཟུང་ནས།] ཨོཾ་ཨགྷ་ཡེ་སྭཱཧཱ༔ [ཞེས་གཡོན་པའི་བླུགས་གཟར་བདུན་གྱིས་གཡས་པའི་དགང་གཟར་བཀང་བའི་དགང་བླུགས་ཁ་སྦྱར་པུད་མོའི་ཕྱི་ལས་ནང་དུ་མི་འདའ་བར་གཡོན་དུ་བསྐོར་ཞིང་།] ཨོཾ་ཨགྣ་ཡེ་དཱི་བྱ་དཱི་བྱ་བི་ཤུངྔྷེ་མཧཱ་ཤྲཱི་ཧ་བྱ་ཀ་བྱ་ཝ་ཧ་ནེ་ཡ་བདག་ཅག་དཔོན་སློབ་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འགལ་རྐྱེན་མི་མཐུན་པའི་ཕྱོགས་སྤྱི་དང་ཁྱད་པར་བསམ་པ་ངན་པ་ཡིད་ལ་འཆང་ཞིང་སྦྱོར་བ་རྩུབ་མོ་ལག་ཏུ་ལེན་པའི་ཆེ་གེ་མོ་ཐམས་ཅད་ཚར་གཅོད་པའི་ཕྲིན་ལས་མཛད་དུ་གསོལ། །སརྦ་ཤ་ཏྲུཾ་མཱ་ར་ཡ་ཕཊ༔ [ཅེས་ལན་གསུམ་དུ་འབུལ། ཡམ་ཤིང་ལ།] ཨོཾ་རཱུ་དྲ་བྲྀཀྵཱ་ཡ་སྭཱཧཱ༔ [ཞེས་

དང་། མར་ཁུ་ལ།] ཨོཾ་ཨགྣ་ཡེ་སྭཱཧཱཿ [ཞེས་སོ་སོར་སྤེལ་ཚིག་གོང་ལྟར་ལས།] ཐམས་ཅད་མཱ་ར་ཡ་རྦད། [ཅེས་བསྒྱུར་ཏེ་འབུལ། རྫས་གཞན་རྣམས་ལ།] ཧཱུྃ༔ དམར་ནག་མེ་ཡི་ཀློང་དཀྱིལ་ནས། །ཟ་བྱེད་མེ་ལྷ་འཁོར་བཅས་ལ། །དགྲ་བགེགས་ཕུང་ཁམས་བླ་ཚེ་སྲོག །འདོད་རྒུ་འཆར་བའི་མཆོད་པ་འབུལ། །དྲག་པོའི་གནད་འབེབས་གསོད་པའི་དུག །མྱོས་བྱེད་ཚ་བའི་རྫས་རྒོད་འདིས། །དམིགས་བྱ་དགྲ་བགེགས་བརླག་པར་མཛོད། །ཨོཾ་ཨགྣེ་ཀྲོ་ངྷ་ཡེ་དགྲ་བགེགས་ཤ་ཏྲུཾ་མཱ་ར་ཡ་ཛྭ་ལ་རཾ་ཧཱུྃ་ཕཊ༔ [ཅེས་རྩ་བའི་རྫས་ནས་ཚེ་རྫས་ཀྱི་བར་ལན་བདུན་སོགས་ཇི་ལྟར་རིགས་པ་ཕུལ་བའི་མཐར། བསྟོད་པ་ནི།] ཧཱུྃ༔ མེ་ལྷའི་རྒྱལ་པོ་དྲང་སྲོང་མཆོག༔ བདུད་བཞི་འཇོམས་མཛད་ཕྱག་བཞི་པ༔ ལས་ཀུན་སྒྲུབ་མཛད་འོད་པོ་ཆེ༔ སྔོན་ཚེ་དུས་ན་ལྷ་ཡི་མཆེད༔ ད་ལྟ་རྣལ་འབྱོར་སྒྲུབ་པའི་མཆེད༔ གདུག་པ་ཀུན་སྒྲོལ་ཁྱོད་ལ་བསྟོད༔ [ཅེས་བསྟོད།] ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས། སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ལ་གནོད་ཅིང་འཚེ་བར་བྱེད་པའི་གཟུགས་ཅན་གྱི་

དགྲ། གཟུགས་མེད་ཀྱི་བགེགས། ལོག་འདྲེན་འབྱུང་པོ། དམ་སྲི་སྒབ་འདྲེ། རྒྱལ་འདྲེ་འགོང་པོ། མཐའ་བཞིའི་དམག་དཔུང་། བྱད་མ་ལྷ་སྲུང་དང་བཅས་པ་ཐམས་ཅད་ཚར་གཅོད་པར་མཛད་དུ་གསོལ། ཁྱད་པར་རྣལ་འབྱོར་པ་བདག་ཅག་འཁོར་དང་བཅས་པ་ལ་གནོད་ཅིང་བར་དུ་གཅོད་པར་བྱེད་པ་བསྒྲལ་བའི་ཞིང་དུ་གྱུར་པའི་དགྲ་བགེགས་ཆེ་གེ་མོ་གཟུགས་ལིངྒ་ལ་བྲིས་ཤིང་མིང་བྱང་དམར་གྱི་དཀྱུས་སུ་བཀོད་པ་འདི་ཉིད་ལོ་དང་ཟླ་བར་མ་བཞག་ཞག་དང་ཟ་མར་མ་འགྱངས་པར་མྱུར་བ་ཉིད་དུ་སོད་ལ་མིང་ཙམ་བརྡ་ཙམ་ཡང་མ་ལུས་པར་ཐལ་བའི་རྡུལ་དུ་བརླག་པའི་ཕྲིན་ལས་མཛོད་ཅིག །སརྦ་ཤ་ཏྲུཾ་མཱ་ར་ཡ་ཕཊ༔ [ཅེས་འདོད་དོན་གསོལ།] ཨོཾ་ཨགྣ་ཡེ་ཛྭ་ལ་ཛྭ་ལ་གཙྪ་མུཿ[ས། ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་ནས་དཔང་པོ་མཛད་པར་བསམ་མོ། །དེ་ནས་འདས་པའི་མེ་ལྷ་མཆོད་པ་ནི། བུད་ཤིང་ཁ་གསོས་ལ་བསང་སྦྱང་།] དམ་ཚིག་མེ་ལྷའི་ལྟོ་བའི་དབྱིངས༔ ནམ་མཁའ་རླུང་མེ་རཀྟའི་མཚོ༔ [ཞེས་སོགས་ནས།] རྒྱུ་ཡི་ཧཱུྃ་ཡིག་འཕྲོ་འདུ་ལས༔ འཆོལ་བའི་ཁྲོ་རྒྱལ་ཧེ་རུ་ཀ༔ [ཞེས་སོགས་ལས་བྱང་བཞིན་ལྷ་ཚོགས་དམ་ཚིག་པ་བསྐྱེད་ཅིང་ཡེ་ཤེས་པ་སྤྱན་དྲངས་པའི་བར་དུ་སོང་ནས།] ཨོཾ་ཤྲཱི་མཧཱ་ཀྲོ་ངྷ་རཱ་ཛ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་

སྭཱཧཱ། [དེ་བཞིན་དུ།] པཱདྱཾ་[སྦྱར་བ་བཅས་ཀྱིས་དྲག་པོའི་ཆུ་གཉིས་ཕུལ་ལ། བཞུགས་གསོལ་ཕྱག་འཚལ་མཆོད་པ་གཞུང་བཞིན་སོང་མཐར། སྲེག་རྫས་ཀྱི་ཐོག་མར་དགང་བླུགས་འབུལ་བ་ནི།] ལྷ་ཚོགས་ཐམས་ཅད་སྐུ་མདོག་ཆར་སྤྲིན་ལྟར་གནག་ཅིང་བཟོད་པར་དཀའ་བའི་གཟི་བརྗིད་ཅན་དྲག་པོའི་བསྲེག་བྱ་ཟ་བའི་ལས་ལ་རྔམས་པའི་ལྗགས་རྡོ་རྗེ་[ཞེས་པ་ནས་གཡོན་དུ་བསྐོར་བའི་བར་གཞན་སྔར་བཞིན་ལས། ཁྱད་པར་རྩ་སྔགས་ཀྱིས་དགང་ཞིང་།] ཨགྣ་ཡེ་དཱི་བྱ་[སོགས་ཀྱི་སྤེལ་ཚིག་བཅས་འབུལ། དེ་ནས་དྲག་བསྐུལ་གསེར་སྐྱེམས་ནས་བརྩམ་གཏུན་བརྡུང་གི་བར་སྨད་ལས་བཞིན་བསྒྲལ་ལས་རྫོགས་པར་བཏང་ལ་ལིངྒ་རྣམས་དུམ་བུར་གཏུབ། སླར་ཡང་ཐུགས་དམ་བསྐུལ་བ་སྔོན་དུ་འགྲོ་བས།] ཛཿ སྲིད་པའི་བཙོན་ཁང་དྲག་པོའི་ཨེ༔ བསྐལ་པའི་མེ་དཔུང་འབར་བའི་ཀློང་༔ གདུག་པའི་ཡམ་ཤིང་མར་ནག་ཚིལ༔ དམིགས་པའི་གཟུགས་རྟེན་དྲག་པོའི་རྫས༔ གནད་འབེབས་མྱོས་བྱེད་གསོད་པའི་མཚོན༔ ཚ་བའི་ནད་སྐྱེད་རྫས་རྒོད་རྣམས༔ བསྲེགས་པས་དགྲ་བགེགས་གདུག་པའི་ཚོགས་༔ ལུས་ངག་རྡུལ་དུ་བསྲེག་ནས་ཀྱང་༔ རྗེས་ཤུལ་ལྷག་མ་མེད་པར་མཛོད༔ [ཅེས་དང་། སྙིང་པོའི་ཤམ་དུ།] སརྦ་ཤ་ཏྲུཾ་བིགྷྣཱན་རཱུ་པ་ཙིཏྟ་ཨགྣེ་ཛྭ་ལ་རཾ་ཁཱ་ཧི་ཁཱ་ཧི༔ [ཞེས་བཏགས་

པས་མེ་སྲོག་འཛིན་པ་ནས་ཚ་བའི་རྫས་ཀྱི་བར་བརྒྱ་རྩ་སོགས་འབུལ་ཞིང་། རྫས་རེ་རེའི་མཇུག་ཏུ་དགང་བླུགས་སྐབས་ལྟར་སྤེལ་ཚིག་སྦྱར། དེ་ལྟར་རྫས་རྣམས་རྫོགས་ནས་དམིགས་བསལ་བགེགས་མི་བསྲུན་པ་སོགས་ལ་ལྕགས་སླང་དུ་མར་ནག་བསྐོལ་བའི་མེ་ལྕེ་སླེབ་པའི་སར་དམིགས་བྱའི་ལིངྒ་བཀྲམ་ལ་དྲག་བསྐུལ་གསེར་སྐྱེམས་འགུགས་འདྲེན་རྣམས་བྱས་ནས་བཞེས་སྒྲ་དྲག་པོ་དང་བཅས་ཛ་གད་རྫས་ལྡན་གྱིས་མེ་སྦར་ཏེ་ཧོམ་མཆོད་བྱ་བ་ཡིན་ནོ། །དེ་ནས་ལས་བྱང་བཞིན་བསྟོད་དེ།] ན་མོ། དུས་གསུམ་སངས་རྒྱས་ཐམས་ཅད་ཀྱི་སྐུ་གསུམ་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདག་ཉིད། ཁྲག་འཐུང་ཁྲོ་བོ་ཐམས་ཅད་ཀྱི་སྤྱི་དཔལ། བདུད་དང་བདུད་ཀྱི་ཕྱོགས་ཐམས་ཅད་སྒྲོལ་བའི་དཔའ་བོ། ཆེ་མཆོག་དབང་དྲག་རྡོ་རྗེ་གྲོ་ལོད་རྩལ་སྤྲུལ་འཁོར་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ལ་ཕྲིན་ལས་སུ་གསོལ་བ་ནི། སངས་རྒྱས་ཀྱི་བསྟན་པ་དང་[སོགས་གོང་བཞིན་འདོད་དོན་གསོལ། སླར་ཡང་དགང་བླུགས་སྔར་ལྟར་ཕུལ་མཐར།] ཨོཾ་བཛྲ་ཏམྦུ་ལ་ཡ་སྭཱཧཱ། [ཞེས་སོ་རྩི་དང་།] ཨོཾ་བཛྲ་ཝ་སྟྲ་ཡེ་སྭཱཧཱ། [ཞེས་གོས་ཟུང་ཕུལ། སྔགས་ཙམ་གྱིས་མཆོད་ཅིང་ཤློོ་ཀ་གཅིག་གིས་བསྟོད།] མ་རྙེད་ཡོངས་སུ་མ་ཚང་[དང་། །སོགས་དང་ཡི་གེ་བརྒྱ་པས་ནོངས་པ་བཤགས།] ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །[ཅེས་སོགས་དང་།] བཛྲ་མུཿས་ཡེ་

ཤེས་པ་དབྱིངས་སུ་གཤེགས། དམ་ཚིག་པ་རང་ལ་བསྡུ། དེ་ནས་མེ་ལྷའི་གཏང་རག་གི་དོན་དུ་བུད་ཤིང་བསྣན་ལ་བསང་ཆུས་བྲན་ཏེ། སླར་ཡང་འཇིག་རྟེན་པའི་མེ་ལྷ་དཔང་པོར་བཞུགས་པ་བཛྲ་ས་མཱ་ཛཿ[ས། དམ་ཚིག་པ་དང་དབྱེར་མེད་དུ་གྱུར་པར་བསམ་ལ། སྔར་བཞིན་དགང་བླུགས་དང་བསྲེག་རྫས་ལྷག་མ་རྣམས་སྤེལ་ཚིག་མེད་པའི་སྔགས་ཀྱིས་འབུལ་ཞིང་། སོ་རྩི་དང་གོས་ཟུང་ཀྱང་ཕུལ་མཐར་ཉེར་སྤྱོད་ཀྱིས་མཆོད།] མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །[ཅེས་བསྟོད།] ཨོཾ་ཨགྣ་ཡེ་ས་པ་རི་ཝཱ་ར་མཧཱ་བ་ལིཾ་ཏ་པཱུ་ཛ་ཁཱ་ཧི། [ཞེས་ལན་གསུམ་གྱིས་གཏོར་མ་ཕུལ་ལ་སྔར་བཞིན་འདོད་དོན་གསོལ། ནོངས་པ་བཤགས་ནས།] བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱི་གཤེགས། །ཇི་བཞིན་དུས་སུ་སླར་བྱོན་ལ། །བདག་གི་འདོད་པ་ཐམས་ཅད་སྒྲུབས། །[ཞེས་སྙན་མནན་ཏེ།] བཛྲ་མུཿ[ས།] ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་བར་[བསམ་ལ། མེ་ལོངས་སྐབས་ཡོད་ཀྱང་མི་བཞག་བར་དུག་ཁྲག་གི་ཆུས་བསད་པའི་ཐལ་བ་ཟློག་པའི་ཐལ་རྡེབ་དང་འབྲེལ་བར་དགྲ་ཕྱོགས་སུ་རླུང་ལ་བསྐུར་བའམ། སྣོད་ངན་དུ་བླུགས་ལ་མཆོད་རྟེན་ནམ་ལམ་རྒྱ་གྲམ་དུ་མནན། ལས་གསོར་མི་རུང་བའི་གཟིར་མནན་བྲོ་ཡིས་རྒྱས་གདབ། དགེ་བ་བསྔོ་ཞིང་ཤིས་པ་བརྗོད་

པས་མཐའ་བརྒྱན་པར་བྱའོ། །ཞེས་པའང་གཏེར་ཆེན་མཐུ་སྟོབས་གླིང་པའི་རྣམ་འཕྲུལ་ཨོ་རྒྱན་ཆེ་མཆོག་འདུས་པ་རྩལ་གྱི་བཞེད་སྐོང་དུ། རྩ་བའི་གཞུང་དོན་མན་ངག་གིས་ཕྱེས་ཏེ་དུས་མཐའི་རྡོ་རྗེ་འཛིན་པ་འཇིགས་བྲལ་ཡེ་ཤེས་རྡོ་རྗེ་ཁམས་ཁྱུ་མཆོག་གི་ལོ་དབྱར་ཉི་ལྡོག་པ་དགྲ་བོ་འཆི་བའི་སྦྱོར་བ་དང་ལྡན་པའི་དུས་ཀྱི་ཉིན་ཀོང་ཡུལ་བདུད་རི་རྔམས་ཆེན་སྒྲ་སྒྲོགས་ཀྱི་མགུལ་དུ་སྦྱར་བའི་ཡི་གེ་པ་ནི་སྐྱུ་རུའི་སྔགས་འཆང་པདྨ་དབང་ཆེན་གྱིས་བགྱིས་པའོ། །སརྦ་མངྒ་ལཾ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་མཐའ་སྡུད་མནན་པའི་ལས་རིམ་རྡོ་རྗེའི་ལྷུན་པོ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་མཐའ་སྡུད་མནན་པའི་ལས་རིམ་རྡོ་རྗེའི་ལྷུན་པོ་ཞེས་བྱ་བ་བཞུགས་སོ།། །།

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [མངོན་སྤྱོད་དྲག་པོའི་མན་ངག་སྲུང་བའི་མཐར་སྡུད་དགྲ་བགེགས་མནན་པའི་ལས་རིམ་ལ་འཇུག་པར་འདོད་པས། སྦྱོར་བ་ལྕགས་ཁམས་ཀྱི་ལོ་ཟླ་ཉི་ཁྱིམ་ཕུང་གསུམ་བདུད་ཀྱི་ཉི་མ་སོགས་ཤིན་ཏུ་རྩུབ་པའི་དུས་གནད་ངེས་པ་ཅན་གྱི་སྐབས་སུ་བབས་པ་ན། དྲག་པོའི་གནས་སུ་འོས་པར་དམ་ཚིག་གི་བྲིས་སྐུ་བཀྲམ་པའི་མདུན་དུ་བླ་མ་ཡི་དམ་ཆོས་སྐྱོང་དང་བཅས་པའི་གཏོར་མ་དང་ཕྱི་ནང་གི་མཆོད་པ་རྣམས་ལེགས་པར་བཤམས་པའི་ཉེ་འདབས་སུ། །གདུག་པའི་ས་སྣ་རྣམས་ལས་སྟེགས་བུ་མདའ་གང་གྲུ་བཞི་པ་རོ་སོལ་གྱིས་ནག་པོར་བྱས་པའི་དབུས་སུ་བྲུབ་ཁུང་ཁ་ཁྱེར་གསུམ་ལྡན་གྱི་ནང་དུག་ཁྲག་དང་ཕྱིར་རོ་སོལ་གྱིས་དམར་ནག་ཏུ་བྱུགས་ཤིང་མཐའ་རྩང་དམར་སྲིན་མོ་འགྲོས་སུ་བཙུགས་པས་བསྐོར་བའི་ནང་དུ་གཤོག་ལ་དགྲ་འདྲེ་གང་ལ་བྱ་བའི་ལིངྒ་མན་ངག་ལྟར་

བྲིས་ཏེ་དྲི་བྲལ་དུ་བྱས་པ་བཅུག་པའི་ཁ་རོ་གཡམ་གྱིས་བཅད། དེ་སྟེང་མཉྫིའི་ཁར་གོང་གནོན་གྱི་གཏོར་ཆེན་འཁོར་གྱི་བཤོས་བུས་གཏམས་པ་དྲག་རྒྱན་རྔམས་བརྗིད་ཅན་འཕང་བའི་སྐབས་ལྟར་འདུ་བྱས་པ་བཀོད། དྲག་ཤིང་གི་ཨེ་ཁྲོམ་ལ་བརྟེན་པའི་ཕུང་རེའམ་སྣམ་རས་ཀྱི་གུར་ཕུབ་ལ་ཉི་ཟེར་མར་མེའི་མདངས་མི་ཕོག་ཅིང་བདུད་རྩིའི་ཟེགས་མ་མི་འཐོར་བར་བྱས་ལ་མཐའ་དྲག་པོའི་མཆོད་པས་བསྐོར། གཞན་ཡང་དབྱེ་རྫས་ཐུན་རྫས་མནན་ཐོད་ཕུང་རེ་བྱད་ཐག་རོ་གཡམ་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ། དངོས་གཞི་ཕྲིན་ལས་ཀྱི་གཞུང་བསྲངས་ཏེ་བདག་དང་མདུན་གྱི་གཏོར་ཆེན་གཉིས་ཀ་གྱེར་ཚིག་གིས་མཉམ་དུ་བསྒྲུབ་ནས་བཟླས་པའི་སྐབས་སྲུང་བའི་དམིགས་བཟླས་ལ་གཙོ་བོར་བྱ། དེ་ནས་སྨད་ལས་བཞིན་བསྐུལ་བ།

གསེར་སྐྱེམས་གཟུ་དཔང་། བྲུབ་ཁུང་དམིགས་བྱ་བསྐྱེད་པ་རྣམས་སྔོན་དུ་འགྲོ་བས། བདག་མདུན་གྱི་ཐུགས་ཀ་ནས་སྤྲུལ་བའི་ལས་བྱེད་ཀྱི་ཁྲོ་བོ་ཡཀྵ་མེ་དབལ་བསམ་གྱིས་མི་ཁྱབ་པ་སྐར་ལྟར་འཁྲུགས་པ་སྟོང་ཁམས་ཁྱབ་པར་འཕྲོས། དམིགས་བྱ་དགྲ་འདྲེ་འབྱུང་པོ་འཁོར་བཅས་ལྕགས་ཀྱུས་སྙིང་ནས་བཟུང་། ཞགས་པས་སྐེ་ནས་བཅིངས། ལྕགས་སྒྲོགས་གིས་ཡན་ལག་བསྡམ། དྲིལ་བུས་མྱོས་པར་བྱས་ཏེ་རང་དབང་མེད་པར་ལས་ཀྱི་རླུང་དམར་གྱི་རྟ་ལ་བསྐྱོན་ཏེ་བྲུབ་ཁུང་གི་ལིངྒ་ལ་ཐིམ་པར་བསམ་ཞིང་བདེན་སྟོབས་འགུགས་གཞུག་ཅི་མང་མཐར་བླ་འགུགས་ཀྱི་སྔགས་ནི། རྩ་སྔགས་གཟིར་སྔགས་ཅན་གྱི་ཤམ་དུ། དགྲ་བོ་སོགས་དགྲ་འདྲེ་གང་ཡིན་གྱི་མིང་སྤེལ་ལ། བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོག་མྱོག༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོག་ལིང་ཤག་ལིང་ཐུམ་ཙ་མུནྟྲི་ཛཿཧཱུྃ་བྃ་ཧོཿ [ཞེས་སྟོང་ངམ་བརྒྱ་རྩ་ལས་མི་ཉུང་བས་བཀུག་ལ་འགུགས་འཆིང་སྡོམ་མྱོས་ཀྱི་ལས་བྱ། ཐུན་མཚམས་སུ་སྨད་ལས་བཞིན་ཐུན་གཏོར་འབུལ། དེ་ལྟར་ཐོག་མར་འགུགས་པའི་ལས་ཉིད་ཁུག་རྟགས་མ་བྱུང་གི་བར་དུའམ་ཞག་གྲངས་ཇི་ཙམ་བྱེད་པ་ཆ་གཉིས་སུ་བགོས་པའི་ཆ་གཅིག་ལ་འབད་དོ། །དེ་ནས་བར་དུ་གཟིར་བའི་ལས་ལ། བདག་ཉིད་ཡི་དམ་དུ་གསལ་བའི་ཤངས་བུག་དང་བ་སྤུའི་བུ་ག་ཐམས་ཅད་ནས་ལས་བྱེད་ཀྱི་ཁྲོ་བོ་ནམ་མཁའ་གང་བར་སྤྲོས། ཁོའི་ལྷ་སྲུང་ཐམས་ཅད་བྱ་སྤུ་རླུང་

གིས་ཁྱེར་བ་ལྟར་བསྐྲད་པར་བསམ་ལ་རྫས་ངན་གྱིས་བདུག་ཅིང་སྨད་ལས་བཞིན་ལྷ་དབྱེ་དང་གཟུགས་ལ་དབབ་པའི་ལས་བསྐུལ་མཐར། རང་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་དམིགས་བྱ་རྣམས་ལ་ཕོག་པས། བ་མོ་ལ་ཉི་ཟེར་ཕོག་པའམ་མེ་ཏོག་སད་ཀྱིས་ཁྱེར་བ་ལྟར་བཀྲག་མདངས་ཉམས། བདག་མདུན་དང་བྲུབ་ཁུང་ཁའི་རྩང་རྣམས་ཤན་པ་ཕོ་མོའི་ངོ་བོར་གསལ་བའི་ཞལ་ནས་སྔགས་སྒྲ་དི་རི་རི་བཟླས་པས། དྲག་སྔགས་ཀྱི་འོད་ཟེར་མེ་ལྕེ་རྣོ་ངར་དང་ལྡན་པ་མཚོན་ཆའི་རྣམ་པར་འཕྲོས་ཏེ་ལུས་ཀྱི་ཡན་ལག་ནང་ཁྲོལ་རྣམས་བཅད་གཏུབ་བྱས་ཏེ་ལོ་ཏོག་སེར་བས་བཅོམ་པ་ལྟར་གྱུར། ཡང་དུག་གིས་འཚུབ་ཅིང་ནད་ཀྱིས་གཟིར་ནས་དབང་པོ་ཉམས་ཤིང་རྣམ་ཤེས་མར་མེ་འཆི་ཁའི་འོད་ལྟར་ནག་སྐེམ་སྐེམ་པ་དེ་ཡང་ཐུམ་སེ་བསད་པར་བསམ་ཞིང་། རྩ་སྔགས་གཟིར་སྔགས་ཅན་གྱི་ཤམ་དུ།] ཨོཾ་བཛྲ་ཡཀྵ་ཏྲིག་ནན༔ ཨེ་ཧུར་ཐུམ་ཛཿགཟིར་ནན༔ ཆེ་གེ་མོའི་ཀཱ་ཝ་ཙི་རྦད་རྦད༔ [ཅེས་དྲག་ཏུ་བཟླ་ཞིང་ཐུན་རྫས་ལ་ཁ་རླངས་མ་ཤོར་བར་ལག་ངར་བརྒྱུད་ནས་ཕུས་འདེབས། ཐུན་རྫས་རྣམས་དྲེགས་པ་ལྷ་སྲིན་སྡེ་བརྒྱད་འདུས་པའི་དམག་ཚོགས་ནད་མཚོན་དུག་གི་ཐོག་སེར་དྲག་པོ་དམིགས་བྱའི་སྙིང་ཁར་གཟིར་ཞིང་བསྡིགས་པས་གཟུགས་བྱེ་མའི་མཁར་ཆུས་བཤིགས་པ་ལྟར་རྡུལ་དུ་བཅོམ་ནས་མཐར་རྣམ་ཤེས་ཀྱི་ངོ་བོ་ནྲིའམ་ཏྲི་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམས་

ཀྱིས་བསད་པར་བསམ་ལ།] ཧཱུྃ༔ ཁྲག་འཐུང་ཁྲོས་པ་དྲག་པོའི་མཚོན༔ [ཞེས་སོགས་ཀྱིས་ལིངྒ་ལ་ཐུན་བརྡེག །ཐུན་མཚམས་སུ་གོང་བཞིན་ཐུན་གཏོར་ཕུལ་ཞིང་ཕྲིན་ལས་བཅོལ། དེ་ལྟར་བསད་རྟགས་མངོན་དུ་མ་གྱུར་གྱི་བར་རམ་འགུགས་པའི་ཕྱེད་ཆ་ཧམ་དུ་འབད་དོ། །དེ་ནས་ཐ་མ་མནན་པའི་ལས་ལ། མདུན་གྱི་ལིངྒ་དམིགས་བྱ་དངོས་སུ་གསལ་བའི་གནས་ལྔར་གནམ་ལྕགས་ཀྱི་འཁོར་ལོ་རྩིབས་བཞི་པ་ལྟེ་བར་སྣ་ཚོགས་རྡོ་རྗེས་མཚན་པ་ལྕི་ཞིང་འཐས་པ་རེ་རེ་དང་། ཡན་ལག་དང་ཚིགས་བཞི་རྣམས་སུ་རྡོ་རྗེ་རྒྱ་གྲམ་རེས་གཟིར་བས་ཉམ་ཐག་གཡོ་འགུལ་མི་ཤེས་པར་བསམ་ལ། རྩ་སྔགས་གཟིར་ཤམ་ཅན་མཐར།] ཨོཾ་བཛྲ་རཀྵ་ཀྲོ་ངྷ་སརྦ་དུཥྚན་ཏྲིག་ནན༔ གནོད་བྱེད་[ཆེ་གེ་མོའི་]ཧཾ་ཤཾ་ཏྲིག་ནན༔ ཧཱུྃ་ལཾ་ཀཱ་ཝཱ་ཙི་མཱ་ར་ཡ་སྟྭམྦྷ་ཡ་ནན༔ [ཞེས་དྲག་ཏུ་བཟླ། མཐར་ཐུན་རྡེག་པ་སོགས་གོང་བཞིན་དང་། ཐུན་གཏོར་གྱི་ཚེ།] རང་གཤེད་ཕོབ་ལ་མཐུ་དང་ནུས་པ་བཤིག༔ [ཅེས་པའི་མཇུག་ཏུ།] ལུས་ངག་ཡིད་གསུམ་མཐུ་རྩལ་ནུས་པ་རྣམས༔ ནམ་ཡང་ལྡང་མེད་མནན་པའི་ཕྲིན་ལས་མཛོད༔ [ཅེས་བསྒྱུར་ལ་འབུལ། དེ་ལྟར་མནན་རྟགས་མཐོང་གི་བར་རམ་བསད་པའི་ཕྱེད་ཆ་ཙམ་དུ་འབད། མནན་པ་དངོས་ལ། དགྲ་བགེགས་དེ་རྣམས་དབང་པོ་ཉམས་ཤིང་དབུགས་དང་བྲལ་ནས་འགུལ་ཙམ་ཡང་མི་ནུས་པར་བྱད་ཐག་སྣ་ལྔས་གྲུ་གུ་ལྟར་བསྡམས། སྙིང་ནང་དུ་འཁོར་ལོ་རྩིབས་དགུ་གནམ་ལྕགས་ལས་གྲུབ་པ་རྣོ་ངར་དང་ལྡན་པ་གཡོན་བསྐོར་དུ་དྲག་ཏུ་འཁོར་བས་

སྙིང་སོགས་ནང་ཁྲོལ་རྣམས་བཅད། ཁོ་ལ་ཟུག་ཟེར་དང་ན་ཚ་སྡུག་བསྔལ་མི་སྐྱེ་བར་བདེ་བའི་ངང་དུ་བརྒྱལ་བར་བསམ་ཞིང་། དྲག་སྔག་བཟླ་བཞིན་པར་ལིང་ག་བྲུབ་ཁུང་ནས་ཕྱུངས་ཏེ་ལྟེབས་ལུགས་གསུམ་པོ་གང་རུང་བས་བལྟབ་ལ་ཤི་ཡུག་གི་སྐྲ་དང་ཚོན་སྐུད་ཀྱིས་བཅིང་། མནན་ཐོད་སོ་སོའི་རང་གཤེད་ཀྱི་གནད་དང་ལྡན་པར་གཞུག་ཅིང་ཐུན་རྫས་ཀྱིས་སེང་མེད་བཀང་སྟེ་ལ་ཆས་བཀག །ཕུང་རེའམ་ཡུག་སའི་ཤ་གོས་ཀྱིས་དྲིལ་ལ་བྱད་ཐག་གིས་བཅིངས་པ་རྩང་རྒྱ་གྲམ་དུ་གཟེར། བདག་མདུན་རྣམས་དང་རང་བཞིན་གྱི་དབྱིངས་ན་བཞུགས་པའི་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་སྐུ་དང་ཕྱག་མཚན་སོགས་ལས་འོད་ཟེར་དམར་ནག་མེ་རླུང་འཚུབས་ཤིང་སྲ་མཁྲེགས་མཚོན་ཆའི་རང་བཞིན་ཐོད་པ་ལ་བསྟིམས་པས། ཐོད་པ་ཤིན་ཏུ་སྲ་ཞིང་བརྟན་པ་དགྲ་བགེགས་བསྐལ་པའི་བར་དུ་མི་ལྡང་བའི་བཙོན་ཁང་སྲུབས་སེང་མེད་པར་བསམ་ཞིང་། དྲིལ་ཆས་ཀྱང་བསྐལ་པའི་མུན་པ་དང་། རྩང་རྣམས་གཤིན་རྗེའི་ལས་བྱེད་ཤན་པ་ཕོ་མོས་བསྐོར་ནས་ལྡང་མེད་དུ་ཐུབ་པར་སྲུང་བར་ནན་ཏན་དུ་གསལ་གདབ་ལ། རིགས་སྔགས་ཀྱི་བཅིང་། རྒྱ་དང་མནན་སྔགས་རྟེན་འབྲེལ་ནག་པོའི་མན་ངག་བཞིན་རབ་ཏུ་གནས། དེ་ནས་ཟློག་གཞུང་ལྟར་སྒོ་དབྱེ། བསྐུལ་དང་ཆད་མདོ་བསྒྲག་ནས། མནན་རྫས་དང་གོང་གནོན་གྱི་གཏོར་མ་སོགས་ཁྱེར་ཏེ་གང་དུ་མནན་པའི་ས་མིག་ཏུ་མནན་དོང་ཚུལ་བཞིན་བྲུབ་པའི་སར་སླེབས་པ་དང་གསེར་སྐྱེམས་ཕུལ་ཞིང་གཟུ་དཔང་བྱས་ལ། བདག་ཉིད་དབང་དྲག་འཆོལ་བའི་ཕྱག་གཡོན་གྱི་ཕུར་པ་ས་ལ་བཏབ་པས་ས་གཞིགས་ཏེ་རྒྱ་མཚོ་སྔོ་མེར་

གྱིས་གསལ་བར་གྱུར་པར་མོས་ཤིང་།] ཧཱུྃ༔ རིམ་པ་དགུ་ཡི་ས་འོག་ན༔ སྒོ་མེད་ལས་ཀྱི་བཙོན་ཁང་ནས༔ སྡོམ་འཛིན་ཀླུ་བདུད་མགོ་དགུ་པ༔ གཉན་རྒོད་མང་པོའི་འཁོར་དང་བཅས༔ འདིར་གཤེགས་དྲག་པོའི་ཕྲིན་ལས་མཛོད༔ [ཅེས་རྒྱ་མཚོ་འཁྲུགས་པའི་ཀློང་ནས་ཀླུ་བདུད་མགོ་དགུ་པ་རྩ་བ་ཆུ་སྲིན་གྱི་ཞལ་མུན་པའི་མགོ་ཅན་མི་སྡུག་པའི་གཟུགས་ཁ་གདངས་པ་དུག་གི་རླངས་པ་འཐུལ་ཞིང་ལག་གཉིས་ལེན་པའི་ཕྱག་རྒྱ་ཅན་གཉན་རྒོད་མང་པོས་བསྐོར་བ་མངོན་སུམ་དུ་ལྷགས་པར་བསམ་ཞིང་། ཤ་དུམ་རཀྟས་བྲན་པའི་དམར་གཏོར་དགྲ་བོའི་ཤ་ཁྲག་ཏུ་དམིགས་ལ།] ཧཱུྃ༔ ཀླུ་བདུད་ནག་པོ་འཁོར་བཅས་ལ༔ དགྲ་བོའི་ཤ་ཁྲག་གཏོར་མ་འདི༔ འབུལ་གྱིས་དགྱེས་པར་རོལ་ནས་ཀྱང་༔ དམ་ཉམས་ལས་ངན་འཁོར་བཅས་རྣམས༔ སྡོམ་འཛིན་མནན་པའི་ཕྲིན་ལས་མཛོད༔ [ཅེས་གཏོར་མ་ཕུལ། སླར་ཡང་འགུགས་འདྲེན་བླ་འགུགས་ལྷ་དབྱེ་རྣམས་ཡིད་ཆེས་པར་བྱས་ནས་མནན་ཆས་ཐོགས་ལ།] ཧཱུྃ༔ རི་རབ་ཆེན་པོའི་རྨང་འོག་ནས༔ རྒྱ་མཚོ་ཆེན་པོ་འཁྲུགས་པའི་ཀློང་༔ ཀླུ་བདུད་ནག་པོ་འཇིགས་པའི་གཟུགས། །ཀླུ་གཉན་ས་བདག་མང་པོས་བསྐོར༔ དམ་ཉམས་ལས་ཀྱི་དགྲ་བོ་རྣམས༔ མནན་པ་ལས་ཀྱི་དུས་ལ་བབ༔ སེམས་ཅན་ལས་ངན་སྡིག་ཅན་འདིས༔ བྱང་ཆུབ་མཆོག་སེམས་མ་སྐྱེས་པར༔

ཆུ་སྲིན་གདུག་པའི་གྲེ་བར་རྫོང་༔ ཐར་མེད་ལས་ཀྱི་ལྟོ་བར་ཆུག༔ མ་ཤོར་མ་བཏང་ཤོར་ར་རེ༔ ལྡང་མེད་མནན་པའི་ཕྲིན་ལས་མཛོད༔ [ཅེས་དོང་ནང་དུ་བསྐྱུར་ཏེ་ལྡོག་མེད་ཀྱི་དམོད་པ་བརྗོད་ཅིང་ཐལ་མོ་བརྡབ།] དམིགས་བྱ་ཁོང་ཆུད་ཀླུ་བདུད་ཞལ་བསྡམས་ཏེ། །རི་རབ་རྨང་འོག་རྒྱ་མཚོའི་ནང་དུ་སོང་། [རོ་གཡམ་ལ་སྣ་ཚོགས་རྡོ་རྗེ་དང་སྟོང་ཁམས་བྲིས་པས་ཁ་བཀབ། འབྱུང་བ་གོ་ལྡོག་གི་དམིགས་པ་དང་བཅས་ཏེ་སོ་སོས་རིམ་པར་རྒྱས་འདེབས་ཅིང་།] ནམ་མཁའ་རླུང་མེ་ཆུ་ས་རི་རབ་འོག༔ མནན་པ་ཡིན་ནོ་ལྡང་བར་མ་བྱེད་ཅིག༔ ཨེ་ཡཾ་རཾ་བཾ་སུཾ་ནྲྀ་ཏྲི་སྟྭཾ་བྷ་ཡ་ནན༔ [ཞེས་ས་རྡོས་མི་མངོན་པར་བཀབ་ལ་ལས་བྱང་བཞིན་བྲོ་བརྡུང་། དབང་དྲག་ཧེ་རུ་ཀའི་མཐུ་སྟོབས་དང་ནུས་པར་རྒྱས་བཏབ་ཅིང་། བདེན་པའི་ཚིག་གིས་གཟིར། དྲག་རྩལ་སྟོབས་ཀྱིས་མནན་པར་ཐར་པའི་གོ་སྐབས་མེད་པར་བྱས། དེའི་སྟེང་དུ་སྟོབས་པོ་ཆེ་དུད་ཁ་རི་རབ་རྒྱ་གྲམ་འཛིན་པ་འཁོར་དཔག་ཏུ་མེད་པ་དང་བཅས་པས་ཕོ་བྲང་བཏབ་སྟེ་མནན་པར་བསམ། དེ་ནས་སྨད་ལས་བཞིན་གཏོར་ཆེན་ཟོར་དུ་བསྐུལ་ཏེ་དགྲ་ཕྱོགས་སམ་ཐེབས་ཕྱོགས་སུ་འཕང་། བཤལ་ཆུས་བརྟན་མ་བསྐྱང་། གཏོར་སྣོད་ཁ་སྦུབས་ལ་བྲོ་བརྡུང་། ཕྱིར་བསྙེགས་བཅད་དེ་བསྲུང་བའི་འཁོར་ལོ་བརྟན་པོར་བསྒོམ། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་བླང་བ་སོགས་རྗེས་ཀྱིས་བྱ་བ་རྣམས་གཞུང་

བཞིན་དུ་བྱའོ། །ཞེས་པའང་གཏེར་ཆེན་མཐུ་སྟོབས་གླིང་པའི་རྣམ་འཕྲུལ་ཨོ་རྒྱན་ཆེ་མཆོག་འདུས་པ་རྩལ་གྱི་བཞེད་སྐོང་དུ། རྩ་བའི་གཞུང་གིས་དངོས་བསྟན་རིགས་མཐུན་གྱི་ངག་འདོན་ཁ་སྐོང་དུ་བསྡེབས་ནས་ལག་ལེན་འཇུག་པ་བདེ་བའི་དབང་དུ་བྱས་ཏེ། འཇིགས་བྲལ་ཡེ་ཤེས་རྡོ་རྗེས་བུ་ཆུང་བདེ་ཆེན་སྟེང་གི་དགོན་པར་སྦྱར་བའི་ཡི་གེ་པ་སྐྱུ་རུའི་སྔགས་འཆང་པདྨ་དབང་ཆེན་གྱིས་བགྱིས་པའོ། །སརྦ་མངྒ་ལཾ།། །།]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་མནན་པའི་མན་ངག་ལས་འཕྲོས་པའི་ལག་ལེན་ཟིན་བྲིས།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་མནན་པའི་མན་ངག་ལས་འཕྲོས་པའི་ལག་ལེན་ཟིན་བྲིས་བཞུགས་སོ། །

ཤྲཱི་བི་ཛ་ཡནྟུ། [བསྐྱེད་རྫོགས་ལས་སུ་རུང་བའི་སྔགས་པས་དགྲ་བགེགས་མནན་གཏད་ཀྱི་ལས་སྦྱོར་ཟབ་མོ་ཚུལ་བཞིན་ལག་ཏུ་ལེན་པའི་སྐབས་སུ་བབས་པ་ན། ཐོག་མར་ལིངྒ་སོགས་ཀྱི་བཅས་ཤོམ་ནི། དེའང་དགྲ་ལ་ལིངྒ་བྲིས་འབུར་དང་བགེགས་ལ་ཐོད་པ་སོ་སོ་མནན་པ་གཙོ་བོར་བཤད་ཀྱང་ད་ལྟ་གཉིས་ཀ་ལ་ཤོག་ལིང་ཐོད་པར་བཅུག་སྟེ་མནན་པ་ཁོ་ན་བྱེད་པ་ལྟར་ན། ཐོག་མར་ལིངྒ་བྲི་བའི་གཞི་རོ་རས་སམ་དུག་ཤོག །བྲི་རྫས་དུག་ཁྲག་བསྲེས་པའི་སྣག་ཚ། བྲིས་སྨྱུག་བྱ་ཤ་ཟན་གྱི་སྒྲོ་རྐང་ངམ་སྐྱེར་པ་སོགས་དྲག་ཤིང་ལས་བཅོས་པ་དང་། འབྲི་མཁན་གྱི་ལག་པ་སེན་མོའི་སྦུབས་དང་བཅས་པ་ལེགས་པར་བཀྲུས་ཤིང་བསྐམ་ནས་ཕྱེའམ་བསང་ཐལ་གྱིས་འཕུར། ཁ་རས་དང་པང་ཁེབས་བཅས་ཁ་རླངས་མཆིལ་མ་མ་ཤོར་

ཞིང་ལུས་ཀྱི་གྲིབ་མའང་མ་ཕོག་པར་བྱས་ལ། འབྲི་བྱ་གཟུགས་ཅན་དགྲ་མནན་གཙོ་བོར་བྱེད་ན། ལིངྒ་མི་གཟུགས་ཕོ་མོ་གང་འོས་ཀྱི་རྟགས་ཅན་རིད་ཅིང་མྱ་ངན་གྱིས་གདུང་བའི་ཚུལ། མིག་ཤི་མིག་ཁ་གདངས་ཤིང་ཡན་ལག་བཞི་ལྕགས་སྒྲོག་གིས་བསྡམས་པའི་སྙིང་ཁར་ཛཿཁ་སྤྲོད་བར་དུ་ནྲྀ་བྲི། དེའི་སྟེང་དུ་ཨེ། གཡོན་དུ་ཧུར། འོག་ཏུ་ཐུཾ། གཡས་སུ་ཛཿཞེས་པའི་འབྲུ་བཞིས་ཕྱོགས་བཞི་བསྐོར། དེ་རྒྱབ་ལིངྒའི་མགྲིན་ཕྱོགས་ནས་ཡིག་མགོ་ཕྱིར་ལ་བསྟན་ཏེ། ཉི་མ་ཕྱོགས་བཞི་མཚམས་བརྒྱད་ནས་གནོད་ཅིང་འཚེ་བའི་དགྲ་བོ་བསམ་ངན་སྦྱོར་རྩུབ་འཆང་བ་རྣམས་དང་། ཁྱད་པར་དགྲ་བོ་ཆེ་གེ་མོའི་ཚེ་བླ་སྲོག་གསུམ་མཐུ་སྟོབས་ནུས་པ་ཐམས་ཅད་ཁུག་ཛཿཛཿ ཛཿཧཱུྃ་བཾ་ཧོཿ ཞེས་པ་ཙམ་མམ། སྤྲོ་ན་

བླ་འགུགས་ཀྱི་སྔགས་ཀྱང་བྲི། དཔྲལ་བར་རུས་ཤེས་ན་དེ་ཀའི་མཐར་ཁུག་ཛཿ མ་ཤེས་ན་ཐམས་ཅད་རུས་ཆེན་སྡེ་ལྔར་འདུ་བས། ཇིའུ་ཀུང་ཀེག་ཤངས་ཁུག་ཛཿ མགོ་བོར་དགྲ་མགོ་ཐོག་ཏུ་བབས་པ་ཐམས་ཅད་སྟྭམྦྷ་ཡ་ནན། མིག་གཉིས་ལོང་། རྣ་བ་གཉིས་ལ་འོན། སྣ་ལ་ཐིབས། ཁ་ནང་བདུད་པོ་ང་ལོང་། མགྲིན་པར་བརྗེད། དཔུང་པ་གཡས་གཡོན་ལ་ཛཿཧཱུྃ། པུས་མོ་གཡས་གཡོན་ལ་བྃ་ཧོ༔ ཉྭ་ལྡིར་བཞིར་མཱ་ར་ཡ་རྦད་ཅེས་འབྲུ་བཞིའི་འོག་ཏུ་ཞ་རེ། བརླ་གཡས་སུ་དགྲ་བོའི་བླ་མི་ཤ་བ་དགོ་བ་ར་ལུག་བྱ་བོང་བུར་བརྫུ་བ་ཁུག་ཛཿ ཞེས་ཕྲེང་དུ་བྲི། གཡོན་དུ་ཚ་ཞེས་པའི་མཐར་པུས་མོའི་ཕྱོགས་ནས་བརྩམས་ཏེ། ཏྲཾ་ཏྲི་ཤཾ་ཏྲི་ཛཿཁཾ་ཤ་བྷ་ཛཿཏྲཾ་ཐུཾ་ཛཿ ཞེས་སྔགས་མགོ་ཕྱིར་བསྟན་དུ་བསྐོར། གསང་བར་ཕཊ། ཅེས་སམ། གརྦྷ་ནྲྀ་ཛཿ རྐང་མཐིལ་གཉིས་སུ་ཡཾ་རེ་རེ་བྲི། ལིངྒའི་ཕྱི་རོལ་དུ་མགོ་བོ་ནས་བཟུང་སྔགས་མགོ་ཕྱིར་བསྟན་དུ་གཞུང་གི་མནན་སྔགས་མིང་སྤེལ་ཅན་མཐར།] མ་རིག་པ་ནན། འདུ་བྱེད་ནན། །རྣམ་ཤེས་ནན། མིང་གཟུགས་ནན། སྐྱེ་མཆེད་དྲུག་ནན། རེག་པ་ནན། ཚོར་བ་ནན། སྲེད་པ་ནན། ལེན་པ་ནན། སྲིད་པ་ནན། སྐྱེ་བ་ནན། རྒ་ཤི་ནན། ཨོཾ་སརྦ་ཛི་ན་ཧཱུྃ་ཛ༔ ཏྲི་ཛ་ཏྲིག་ནན། ནྲྀ་ཏྲི་ཛ་ཏྲི་ལཾ་ནན། ཤན་ཏྲི་ནན། དགྲ་བོ་གུཾ་གུཾ་སྟྭམྦྷ་ཡ་ནན། སརྦ་ལོག་ཏྲི་པ་ལཱ་ནན། སྔ་དགྲ་ལག་ཏུ་བསྡར་བ་ཐམས་ཅད་ཆིངས་བྲུབ་ནན། ད་དགྲ་ཐད་དུ་ལངས་པ་ཐམས་ཅད༴ ཕྱི་དགྲ་ཞེ་ལ་འཆང་

བ་ཐམས་ཅད་ཆིངས་བྲུབ་ནན། སྤྱི་དགྲ་རླུང་ལྟར་འཚུབས་པ་ཐམས་ཅད༴ སྒོས་དགྲ་རྦབ་ལྟར་རྒྱུག་པ་ཐམས་ཅད༴ ཟུར་དགྲ་ཁྱི་ལྟར་ཟུག་པ་ཐམས་ཅད༴ རྐྱེན་དགྲ་ཐོག་ལྟར་བབས་པ་ཐམས་ཅད༴ ཤར་ཤིང་ཁམས་པའི་དགྲ་བོ་ཐམས་ཅད་ཆིངས་བྲུབ་ནན། ལྷོ་མེ་ཁམས་པའི་དགྲ་བོ་ཐམས་ཅད༴ ནུབ་ལྕགས་ཁམས་པའི་དགྲ་བོ་ཐམས་ཅད༴ བྱང་ཆུ་ཁམས་པའི་དགྲ་བོ་ཐམས་ཅད༴ མཚམས་བཞི་ས་ཁམས་པའི་དགྲ་བོ་ཐམས་ཅད༴ སརྦ་ཏྲིག་ནན་རྦད་ནན། བྷིནྔྷ་ཙིཏྟ་རྦད་ནན། ལིཾ་ནན་ནན། [ཞེས་བྲི། དེ་རྒྱབ་ཛཿཁྲམ་ཉེར་གཅིག་གིས་བསྐོར། ཡང་འདྲེ་བགེགས་ལ་དམིགས་པའི་སྲི་མནན་གཙོ་བོར་བྱེད་ན། ལིངྒ་བཤད་མ་ཐག་པ་ལྟར་ལ་མི་འདྲ་བའི་ཁྱད་པར། དམ་སྲི་བྱ་མགོ། །དུར་སྲི་ཝ་མགོ ཕུང་སྲི་རྔ་མོའི་མགོ །དགྲ་སྲི་གཡག་མགོ། །ཕོ་སྲི་སྤྱང་མགོ མོ་སྲི་ཁྱི་མགོ །ཆུང་སྲི་སྲེ་མོང་། གོད་སྲི་ཕག་མགོ་སོགས་སྐབས་ཐོབ་བསྒྱུར། གནས་ཡིག་སྤྱི་ལྟར་ལ་སྙིང་གར་ནྲྀའི་ཚབ་ཏུ་ཏྲི་བྲི། འགུགས་བྱང་ཉི་མ་ཕྱོགས་བཞི་སོགས་ཀྱི་མལ་དུ།] ཨོཾ་སརྦ་ཛ་ཏྲི་ནི་ཧཱུྃ་ཛཿ ན་ཏྲི་སུ་ཏྲི་ནི་ཧཱུྃ་ཛཿ ཤནྟྲི་ནི་ཧཱུྃ་ཛཿ ཀ་ཏྲི་ནི་དནྟྲི་ནི་ཀུཾ་ཀུཾ་ཛཿཛཿཧཱུྃ། སྲི་ངན་གདུག་པ་ཅན་གྱི་བླ་སྲོག་རྣམ་ཤེས་ཁུག་ཛཿཛཿ ཛཿཧཱུྃ་བཾ་ཧོཿ [ཞེས་དང་སྤྲོ་ན་བླ་འགུགས་ཀྱང་བྲི། དབྲལ་བར་ཨེ་ཏྲིག་ནན། བརླ་གཡས་གཡོན་དུ།

དམ་སྲི་གདུག་པ་ཅན་གྱི་བླ་སྲོག་ཤཀྟི་ཐུན་ཛ༔ ཞེས་ཡིན་མགོ་པུས་མོ་ནས་བརྩམས་ཏེ་བྲི་བ་རྣམས་ཁྱད་པར་དང་། ལིངྒའི་ཕྱི་རོལ་ཏུ།] ལོ་སྲི་ལོ་བཅུ་གཉིས་ལ་འཁོར་བ་ཐམས་ཅད་མཱ་ར་ཡ་ཆིངས་བྲུབ་ནན། ཟླ་སྲི་བཅུ་གཉིས་ཟླ་བར་བབས་པ་ཐམས་ཅད༴ ཞག་སྲི་སུམ་ཅུའི་ཞག་ཏུ་འགྱུ་བ་ཐམས་ཅད༴ དུས་སྲི་དྲུག་ཅུའི་སྲང་དུ་སྡིག་པ་ཐམས་ཅད༴ དམ་སྲི་སྣང་སྲིད་འབྱུང་བ་དཀྲུག་པ་ཐམས་ཅད༴ འགོང་སྲི་བསྟན་སེལ་ཕུགས་སུ་བཞུགས་པ་ཐམས་ཅད༴ ཀེག་སྲི་སྤར་སྨེ་དུར་དུ་ཚུད་པ་ཐམས་ཅད༴ བྱེད་སྲི་སྡེ་བརྒྱད་ཟ་ཁ་ཟུག་པ་ཐམས་ཅད༴ ཡོད་སྲི་སྟོང་སྡེའི་མི་ཁ་ཟུག་པ་ཐམས་ཅད༴ མེད་སྲི་ལྟོག་འགོང་སྲིས་ལ་རྐུ་བ་ཐམས་ཅད༴ བགེགས་སྲི་ཅི་བྱེད་བར་དུ་གཅོད་པ་ཐམས་ཅད༴ གནོད་སྲི་འཚེ་བའི་བདུད་རིགས་ཐམས་ཅད༴ དམིགས་བསལ་སྲི་གང་ཡིན་གྱི་མིང་དཔེ་ན་དགྲ་དུར་ཕུང་གསུམ་ལ། དགྲ་སྲི་ཕྱོགས་བཞི་མཚམས་ནས་ལྡངས་པ་ཐམས་ཅད༴ དུར་སྲི་གཤིན་དུར་འོག་ནས་དོན་པ་ཐམས་ཅད༴ ཕུང་སྲི་སྒོ་བཞི་ཟུར་ནས་ལྡངས་པ་ཐམས་ཅད༴ མདོར་ན་བར་དུ་གཅོད་པའི་སྲི་ངན་ཐམས་ཅད༴ མཱ་ར་ཡ་རྦད་ཐུཾ། རྡ་ར་ཡ་རྡ་ར་ཡ་ནན། མཱ་ར་ཡ་མཱ་ར་ཡ་ནན། ཡ་མ་དམ་སྲི་ཀཱ་ཡ་ཝཱ་ཀ་ཙིཏྟ་སྟྭམྦྷ་ཡ་ནན། [ཅེས་དང་ཛ་ཁྲམ་སྔར་བཞིན་བཀོད། དེ་ལྟར་བྲིས་ཟིན་ནས་ཆུ་ཟན་

གཙང་མས་ཤོག་གུའི་ཕྱི་ནང་ཐམས་ཅད་དྲིལ་ཕྱིས་བྱ། སྣོད་གཙང་ཆུས་བཀང་བར་ལིངྒ་ལན་གཅིག་བཤན་ནས་རླུང་ལ་ཕྱར་ཏེ་སྐམ་ནས། ལིང་ཁྲུས་བྱ་བའི་ཐོག་མར་རང་གྲིབ་སྦྱོང་བ་ནི།] རང་ཉིད་ཐ་མལ་གནས་པ་ཡི༔ སྤྱི་མགྲིན་སྙིང་གའི་གནས་གསུམ་དུ༔ རྡོ་རྗེ་སེམས་དཔའ་དཀར་དམར་མཐིང་༔ གསལ་བའི་སྐུ་ལས་བདུད་རྩིའི་རྒྱུན༔ བབས་པས་སྒོ་གསུམ་སྒྲིབ་དག་གྱུར༔ [ཅེས་མོས་ལ་ཡིག་བརྒྱ་བཟླ།] སླར་ཡང་གནས་གསུམ་རྡོར་སེམས་ཀྱི༔ སྐུ་ལས་འོད་ཟེར་ཡར་འཕྲོས་པས༔ རབ་འབྱམས་ཞིང་གི་རྒྱལ་བ་མཆོད༔ ཐུགས་རྗེའི་བྱིན་རླབས་ཚུར་འདུས་པ༔ བདག་གི་གནས་གསུམ་ཐིམ་པ་ཡིས༔ ཉམས་ཆག་ཉེས་ལྟུང་དྲི་མ་སྦྱངས༔ ཕ་རོལ་བྱད་མའི་བསམ་ངན་གྱིས༔ གནོད་བྱས་ཉེས་ཚོགས་ཐམས་ཅད་སྦྱངས༔ ཡིག་བརྒྱའི་ཤམ་བུར། ཨེ་ཧོ༔ ཤུངྔྷེ་ཤུངྔྷེ༔ ཡཾ་ཧོཿཤུངྔྷེ་ཤུངྔྷེ༔ བཾ་ཧོཿཤུངྔྷེ་ཤུངྔྷེ༔ རཾ་ཧོཿཤུངྔྷེ་ཤུངྔྷེ༔ ལཾ་ཧོཿཤུངྔྷེ་ཤུངྔྷེ༔ ཨ་ཧ་རཾ༔ ཨི་ནེ་རཾ༔ བི་ན་ཤུངྔྷེ་སྭཱཧཱ༔ ཨ་ཨ་ཨ་སྭཱཧཱ༔ [ཞེས་པ་བདུན་ནམ་ཉེར་གཅིག་བཟླས༔ སྨན་སྤོས་ཆུར་བཏབ་བཏུང་ཞིང་བྱུག༔ ཉེས་ཚོགས་ཐམས་ཅད་དག་པར་བསམ༔ དེ་ནས་ལིངྒའི་དྲི་མ་སྦྱོང་བ་ནི། བྱེ་མ་གཤེར་ལྡན་གྱིས་ལིངྒའི་ཕྱི་ནང་ལེགས་པར་འཕུར་ཞིང་། སྲིད་པ་བྱེ་མའམ་ཞིང་ས་གཙང་མས་བསྐོར་ལ།] ལཾ་ཧོཿཤུངྔྷེ་ཤུངྔྷེ་

ཡེ་སྭཱཧཱ༔ [ཆུ་མིག་ལྐུག་པའམ་ཕུག་རྡུགས་ཀྱིས་ཆུས་འཐོར་ཞིང་།] བཾ་ཧོཿཤུངྔྷེ་ཤུངྔྷེ་ཡེ་སྭཱཧཱ༔ [བྲ་རྐང་ངམ་ཤིང་ཚེ་ཟད་ཀྱི་མེས་བསྐོར་ཞིང་།] རཾ་ཧོཿཤུངྔྷེ་ཤུངྔྷེ་ཡེ་སྭཱཧཱ༔ [ཕོ་རོག་དང་འུག་སྒྲོས་རླུང་གཡབ་ཅིང་།] ཡཾ་ཧོཿཤུངྔྷེ་ཤུངྔྷེ་ཡེ་སྭཱཧཱ༔ [ཞེས་ལན་གསུམ་གསུམ་དང་། གོང་གི་རང་སྒྲིབ་སྦྱོང་བའི་སྔགས་བརྒྱ་རྩ་གཅིག་བཟླས་རྗེས།] ཨེ་ཧོཿཤུངྔྷེ་ཤུངྔྷེ་ཡེ་སྭཱཧཱ༔ [སོགས་ཉེར་གཅིག་རེའི་མཇུག་ཏུ་ལིངྒ་བར་སྣང་གཡབ་ཅིང་།] རྣལ་འབྱོར་པ་བདག་ཅག་འཁོར་དང་བཅས་པ་ཐམས་ཅད་ཀྱི་ལུས་ཀྱི་དྲི་མས་མ་གོས། ངག་གི་དྲི་མས་མ་གོས། ཡིད་ཀྱི་དྲི་མས་མ་གོས། ལུས་ངག་ཡིད་གསུམ་གྱི་དྲི་མས་མ་གོས་སོ། །ཨེ་ཧོཿ[སོགས་དང་དབུགས་ཐེངས་གཅིག་ལ་ཨ་ཉེར་གཅིག་བརྗོད་པས་ཐམས་ཅད་སྟོང་པར་བལྟའོ། །དེ་ནས་གྲི་མཛེའི་ཁྲག་དང་། དུག་སྣ་ཚོགས་ཚད། དགྲ་བོ་དམིགས་བསལ་ལ་དེ་ཉིད་ཀྱི་དྲི་མ་དྲུག་སོགས་ཟག་རྫས། བགེགས་དང་སྲི་ལ་འདྲེ་ཚུགས་ཀྱི་ས་དང་རྟེན་གནས་ས་རྡོ་ཆུ་ཤིང་གར་ཡིན་རྣམས་ལྕགས་སྣོད་དུ་རླངས་པ་ཐོན་ཙམ་མེ་ལ་བསྲོས་ནས་བྱུག །དགྲ་ལིང་མཚོན་ལྟེབ་བམ་རོ་ལྟེབ་ཏུ་གྲགས་པ་ཐོག་མར་ཟུར་བཞི་ནང་དུ་བཅུག །དེ་ནས་མཐའ་ནས་རིམ་པར་བསྡུས་ལ་སྙིང་གའི་ས་བོན་མཐོང་བ་དང་། འདྲེ་བགེགས་ལ་སྙིང་གའི་ས་བོན་བཅག་པའི་འདྲེ་ལྟེབ་བྱས་ལ། ཤི་སྐྲ་བདུད་དང་སྐུད་པ་སྔོ་དམར་གནོད་སྦྱིན་གྱི་ཞགས་པའམ་ཡང་ན་སྐུད་པ་སྣ་ལྔ་སྡེ་བརྒྱད་ཀྱི་བྱད་ཐག་གིས་

བཅིང་པའི་སྣེ་ནྲྀ་མིག་ནས་དྲངས་པའམ་སྐེ་ལ་བཏགས་ཏེ་ཕུར་པ་ལ་འདོག །མདུན་དཀྱིལ་གྱི་འོག་ཕྱོགས་སུ་རི་རུད་ས། ཕུང་ཤུལ་ས། རྒྱ་གྲོག་དམར་ནག་འཐབ་པའི་ས་སྟེ་གདུག་པའི་ས་སྣ་གསུམ་གྱི་སྟེགས་བུ་ཁྲུ་གང་ངམ་མདའ་གང་པ་གྲུ་བཞི་པའི་དབུས་སུ་གྲུ་གསུམ་ཁ་ཁྱེར་གསུམ་ལྡན་ནང་དུག་ཁྲག་དང་ཕྱི་རོ་སོལ་གྱིས་བྱུག་པའི་ནང་དུ་ལིངྒ་བཅུག་ལ་རོ་གཡམ་མམ་རས་ནག་གིས་བཀབ་སྟེ་བཞག་པའི་བྲུབ་ཁུང་གི་གཡས་གཡོན་དུ་བྱ་རོག་དང་འུག་པའི་སྒྲོ་བཙུག །སྲི་མནན་ལ་གལ་ཆེ་བ་ཐོད་པ་ཡིན་པས་སྲི་ཚུད་བཅུ་གསུམ་སོགས་ལ་ཐོད་པ་སོ་སོར་བཤད་ཀྱང་། ཉེར་མཁོ་དམ་སྲི་མི་ཁྱི་ར་ཕག་རབས་ཆད་ཐོད་པ། དུར་སྲི་ཝ་ཐོད། ཕུང་སྲི་རྔ་མོང་མཛོ་རྟོལ་དྲེའུའི་ཐོད་པ། དགྲ་སྲི་རྟ་གཡག་ཐོད་པ། ཕོ་སྲི་གཡག་རོག་ཐོད་པ། མོ་སྲི་ཁྱི་མོ་ནག་མོའི་ཐོད་པ། ཆུང་སྲི་དྲིའུ་ལུ་གུ་ཁྱི་གུ་སྐད་མ་ཐོན་པར་ཤི་བ་དང་སྲེ་མོང་ཐོད་པ། གོད་སྲི་འཕར་སྦྱང་ངམ་གོད་མགོ་རྣམས་སུ་བཤད་ཅིང་། དགྲ་མནན་སྤྱི་ལ་གླང་རུ་སྤྱང་ཀི་ཤ་ཁྱི་ཁོ་རང་གི་ཕ་མྱེས་ཐོད་པ་རྣམས་བསྔགས། ཡང་ན་གཡག་རྭ་མེ་ཆུས་མ་ཕོག་པ་སྐྱེས་པ་ལ་གཡས་དང་བུད་མེད་ལ་གཡོན་པ། འདྲེ་བགེགས་སྤྱི་ལ་ཝ་ཐོད་དང་ཕག་ཐོད་ཉིད་བསྔགས། དེ་ལྟར་ཐོད་པའི་རིགས་ལ་གོང་དུ་ལིངྒའི་སྙིང་གར་བཀོད་པའི་སྔགས།] ཨོཾ་སརྦ་ཛ་ཏྲི་[སོགས་ཐོད་པའི་དཔྲལ་བ་ནས་ཕྱིར་ལ་མདུང་ཚུགས་སུ་བྲི། དཔྲལ་བར་རྒན་པའི་

རྒན་སྲི་ནན། གཞོན་པའི་གཞོན་སྲི་ནན། འགྲམ་པ་གཡས་ལ་ཕོའི་ཕོ་སྲི་ནན། གཡོན་ལ་མོའི་མོ་སྲི་ནན། ཅེས་དུག་ཁྲག་གིས་བྲིས་ལ་སྐུད་པ་སྔོ་དམར་གྱིས་བཅིངས་ནས་སྒྲུབ་པའི་ཚེ་བྲུབ་ཁུང་དུ་ལིངྒ་དང་མཉམ་དུ་བཞག་དགོས་ཀྱང་མ་ཤོང་ན་བྲུབ་ཁུང་འགྲམ་དུ་འཇོག །སྲི་མནནན་ལ་སྲི་ཐོད་གང་ཡིན་ལིངྒ་བཅས་མནན་ཟིན་པའི་སྟེང་དུ་ཐོད་གནོན་ཅེས་ར་ཁྱི་ཕག་གསུམ་གྱི་ཐོད་པ་རེ་མེད་ཐབས་མེད་པས་དེའང་ཉེ་འགྲམ་དུ་བཀོད། ཧོམ་ཁུང་མཐའ་མར་སྐྱེར་རྩང་དམར་ནག་ཉེར་གཅིག་སྲིན་མོ་འགྲོས་སུ་བཙུག །དེ་སྟེང་ཁྲིའུར་ཟློག་གཏོར་འཕང་བའི་སྐབས་བཞིན་འདུ་བྱས་པ་འགོད་ཅིང་མཐར་དྲག་པོའི་ཉེར་སྤྱོད་ཀྱིས་བསྐོར། ཤིང་གི་ཨེ་ཁྲམ་ལ་བརྟེན་པའི་ཕུང་རེའམ་རས་ནག་གི་གུར་ཕུབ་ལ་ཉི་ཟླའི་གསལ་ཆ་མི་མཐོང་ཞིང་མཆོད་པའི་ཟེགས་མ་མི་འཐོར་བར་བྱ། ཉེ་ལོགས་སུ་ལྕགས་སྣོད་དུ་ལྷ་དབྱེའི་བདུག་རྫས་གུལ་ནག །ཚིལ་ཆེན། དྲི་ཆེན། རྟ་བོན། རྭ་གཞོབ། དམེ་ཡུག་མཛེ་ཕོའི་ལྷྭམ་འབོག །ཡུག་སའི་དོར་རྟ། མུ་ཟི་ནག་པོ་བཅས་རྟ་དྲེལ་གྱི་སྦང་དང་སྦྱར་བ། ཐོད་ངན་དུ་ཐུན་རྫས་ཡུངས་དཀར་ནག །ཏིལ་ནག །ཀེ་ཚེ། ཤང་ཚེ། བྲག་ཚེ། ལྕགས་ཕྱེ། ཟངས་ཕྱེ། མི་བསད་རྦབ་རྡོའི་ཕྱེ་མ་བཅས་ལ། བཙན་དུག་ར་དུག་སྤྱང་དུག་རྡ་རྡུ་ར་རྣམས་ཡུག་སའི་མངལ་ཁྲག་དང་བམ་གྱི་སྙིང་ཁྲག་སོགས་ཁྲག་སྣ་དང་སྦྱར་བས་ངར་བཏགས་པ། གཡོབ་བྱེད་རྔ་མ་ནག་པོ། མནན་ཆས་

བསྟུམ་བྱེད་ཕུང་རེ། ཡུགས་སའི་ཤ་གོས་རབས་ཆད་རེ་བ་སོགས། ཐོད་པའི་གསེང་འགེང་བྱེད་གཡེར་མ་ཚྭ་སྒོག་རམ་པ་བུལ་ཏོག་བ་ཚྭ་སོགས་མི་ཁའི་རྫས། སྡོམ་བྱེད་རོ་སྐྲའམ་ཁྱི་སྤུའི་སྐུད་པ་དང་ཚོན་སྐུད་སྣ་ལྔ། གནོན་བྱེད་རོ་གཡམ་འོག་རྒྱ་གྲམ་དང་སྟེང་རི་གླིང་བྲིས་པ་བཅས་བསྡོག །གུང་དུ་རྩ་བའི་མཆོད་གཏོར་སྤྱི་བྱེ་བྲག་གི་སྲུང་མའི་གཏོར་འབུལ། སྨན་རཀ་ཉེར་སྤྱོད་དང་བཅས་པ། ཉིན་རེ་བཞིན་དགོས་པའི་སྔོན་རྗེས་ཀྱི་གཏོར་མ་དང་ཚོགས་ཀྱི་ཡོ་བྱད། ཐུན་རེ་བཞིན་འབུལ་རྒྱུའི་གསེར་སྐྱེམས་དང་། དམར་གཏོར་རྒྱན་མེད་ཤ་དུམ་མཐེབ་ཀྱུ་ཅན། གཞན་ཡང་གཡབ་དར་དང་རོལ་མོའི་ཁྱད་པར་སོགས་ཆོ་གར་འོས་ཤིང་མཁོ་བའི་ཆ་རྐྱེན་ཐམས་ཅད་མ་ཚང་བ་མེད་པར་འདུ་བྱའོ། །དེ་ནས་ཆོ་ག་དངོས་ལ་ཐུན་བཞིའི་ངེས་པས་གཞུང་སྲོང་བ་ལས། ཐུན་དང་པོར་ལས་བྱང་གི་བརྒྱུད་འདེབས་ནས་བརྩམས་བཟླས་པའི་བར་གྱེར་ཚིག་གཅིག་གིས་བདག་མདུན་མཉམ་དུ་བསྒྲུབ་ལ། བཟླས་པའི་སྐབས་བསྙེན་སྒྲུབ་ཀྱི་བཟླས་པ་ཅི་ནུས་དང་སྲུང་བའི་དམིགས་བཟླས་ནན་ཏན་དུ་བྱ། དེ་ནས་མནན་གཞུང་དང་སྨད་ལས་ལྟོ་སྦྱར་བས་ཐུགས་དམ་བསྐུལ་བ་ནས་བྲུབ་ཁུང་བསྐྱེད་པའི་བར་དཀྱུས་བཞིན་ལ། འགུགས་པའི་ཚེ་དགྲ་མནན་སྐབས། ད་དགྲ་ཐད་དུ་འཛུག་པའི་གཟུགས་ཅན་སྡང་བའི་དགྲ་བོ་དམིགས་བསལ་ལ་ཆེ་གེ་མོའི་མིང་འདི་ཞེས་བྱ་བ་

དང་། སྤྱིར་བཏང་དུ། དགྲ་སྣ་ཇག་སྣ་རྐུན་སྣ་སྟོན་པའི་དགྲ་བོ་ཡིད་ལ་བརྣག་པ་ཞེས་དང་། སྲི་མནན་སྐབས། ད་དགྲ་ཐད་དུ་འཛུག་པའི་གནོད་བྱེད་དགྲ་སྲི་དུར་སྲི་ཕུང་སྲི་དམ་སྲི་སོགས་དང་། དགྲ་བགེགས་ཐུན་མོང་དུ། གཟུགས་ཅན་སྡང་བའི་དགྲ་དང་གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཞེས་གང་འདོད་བསྒྱུར་མཐར། རྒྱབ་བརྟེན་ལྷ་སྲུང་དང་བཅས་པ་རྣམས། མགོན་བྱེད་ཀྱི་ལྷ། ཚེ་དང་དབང་ཐང་། བསོད་ནམས་དང་དུས་ཀྱི་དབང་དུ་མ་བཏང་བར་སྲིད་པ་གསུམ་གྱི་ཁོངས་གར་གནས་གར་བྲོས་ཀྱང་སོགས་དཀྱུས་བཞིན་དང་། སྔགས་ཀྱང་ཁ་བསྒྱུར་འདྲ་བས་བདེན་བརྗོད་ལན་གསུམ་སོགས་བྱ། འདིར་གལ་ཆེན་ནན་བསྒྲུབ་ཀྱི་ཚེ་བླ་འགུགས་ཕོ་ཉ་འགྱེད་པ་སྦྱར་ན་ལེགས་པས། དགྲ་མནན་ལ།] ཧཱུྃ་བྷྱོ༔ ད་ནི་བསྒྲལ་བའི་ཐུགས་དམ་དུས་ལ་བབ༔ དོ་ནུབ་ནམ་གྱི་སྲོད་དང་གུང་ལ་བབ༔ ད་ལྟ་ནམ་གྱི་གུང་ལ་བབ་དུས་འདིར༔ སེམས་མེད་འབྱུང་བ་ཆུ་ཡང་གཉིད་ལོག་དུས༔ དགྲ་བོ་སྡིག་ཅན་ལས་ངན་གཉིད་ལོག་གི༔ བླ་ཚེ་འཁྱམས་པོ་ད་ལྟ་ཁྲིད་ལ་ཤོག༔ བྷྱོ༔ ད་ལྟ་ནམ་གྱི་སྲོད་ལ་བབ་དུས་འདིར༔ ཚེ་རྐུན་ལས་ལ་འགྱོད་པའི་དུས་ཡིན་པས༔ དམ་ཉམས་དགྲ་བོའི་བླ་ཚེ་འཁྱམས་པའི་དུས༔ དམ་ཉམས་དགྲ་བོའི་བླ་

འཁྱམས་ཁྲིད་ལ་ཤོག༔ བྷྱོ༔ དོ་ནུབ་ནམ་གྱི་ཐོ་རངས་བབ་དུས་འདིར༔ དགྲ་བོའི་བླ་ཚེ་འཕྱོ་ཞིང་འཕྲོ་བའི་དུས༔ ལས་ངན་བླ་འཁྱམས་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ནམ་ལངས་ཉི་མ་ཤར་བའི་དུས༔ མི་ཕྱུགས་ཐམས་ཅད་ལས་ལ་གྲམ་པའི་དུས༔ དགྲ་བོའི་བླ་ཚེ་སྒོ་རུ་ཐོན་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ཉི་མ་གུང་ལ་བབ་དུས་འདིར༔ དགྲ་རྐུན་རྣམ་ཤེས་བྱིང་ཞིང་མྱོས་པའི་དུས༔ དགྲ་བོའི་བླ་ཚེ་འཐོམ་ཞིང་འཁྱམས་པའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ ད་ལྟ་ཉི་མ་གྲིབ་སོ་ཕོག་པའི་དུས༔ སྙིང་མི་དགའ་ཞིང་ཤེས་པ་འཕྱོ་བའི་དུས༔ དགྲ་བོའི་བླ་ཚེ་རྣམ་ཤེས་འཕྱོ་བའི་དུས༔ བླ་འཁྱམས་ལས་ངན་མྱུར་དུ་ཁྲིད་ལ་ཤོག༔ བྷྱོ༔ བླ་འཁྱམས་ལས་ངན་འཁྱམས་པའི་དུས་དྲུག་ལ༔ བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུག༔ མགོན་མེད་བྱིའུ་ཕྲུག་བྱ་ཁྲས་ཟིན་པ་ལྟར༔ རང་དབང་མེད་པར་མྱུར་དུ་ཁྲིད་ལ་ཤོག༔ དགྲ་བོའི་བླ་འཁྱམས་མི་རུ་བརྫུ་བ་ནཿ ཕོ་ཉ་གནོད་བྱེད་སྲིན་པོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་ཤ་བར་བརྫུ་བ་ན༔ ཕོ་ཉ་གསེར་གྱི་སྟག་མོར་

སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་རྒོ་བར་བརྗུ་བན༔ ཕོ་ཉ་ལྕགས་དོམ་ནག་པོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་ལུག་ཏུ་བརྫུ་བ་ནི༔ ཕོ་ཉ་ལྕགས་ཀྱི་སྤྱང་མོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ དགྲ་བོའི་བླ་འཁྱམས་སར་རུ་བརྫུ་བ་ན༔ ཕོ་ཉ་བྱེ་རུའི་ཁྱི་མོར་སྐུར་སྤྲུལ་ལ༔ རང་དབང་མེད་པར་མྱུད་ར༴ དགྲ་བོའི་བླ་འཁྱམས་བྱ་རུ་བརྫུ་བ་ན༔ ཕོ་ཉ་བྱ་རྒྱལ་ཁྱུང་དུ་སྐུར་སྤྲུལ་ལ༔ རང་དབང་མེད་པར་མྱུར་དུ༴ དགྲ་བོའི་བླ་འཁྱམས་གླ་བར་བརྫུ་བ་ན༔ ཕོ་ཉ་གསེར་གྱི་འཕརབར་སྐུར་སྤྲུལ་ལ༔ རང་དབང་མེད་པར་མྱུར་དུ༴ དགྲ་བོའི་བླ་འཁྱམས་བོང་བུར་བརྫུ་བ་ན༔ ཕོ་ཉ་ཟངས་ཀྱི་དྲེད་མོར་སྐུར་སྤྲུལ་ལ༔ རང་དབང་མེད་པར་མྱུར་དུ་ཁུག་ལ་ཤོག༔ བྷྱོ༔ དམ་ཉམས་དགྲ་བོའི་བླ་རྟགས་བརྒྱད་པོ་ལ༔ ཕོ་ཉ་བརྒྱད་ཀྱིས་གཉེན་པོ་སྐུར་སྤྲུལ་ལ༔ བྲུབ་ཁུང་འཁོར་བའི་བཙོན་དོང་འདི་ནང་དུ༔ དམ་ཉམས་ལིང་གའི་སྟེང་ན་བླ་སྲོག་ཁུག༔ བླ་སྲོག་གསུམ་ལ་སྲིད་པའི་ཕུར་པ་ཐོབ༔ ཕུར་མཚོན་དཔལ་གྱིས་ལུས་སེམས་ཕྱེས་ལ་ཤོག༔ དགྲ་བོའི་བླ་སྲོག་སྟེང་དུ་

མཱ་ར་ཡ༔ སྲོག་རྩ་དམར་པོ་རྦད་ཀྱིས་ཆོད་ལ་ཤོག༔ བླ་འཁྱམས་ལས་ངན་སྟེང་དུ་མཱ་ར་ཡ༔ ར་དང་ལུག་དང་བོང་བུ་རྣམ་པ་གསུམ༔ བླ་རྟགས་ཡིན་པས་མྱུར་དུ་ཁྱེར་ལ་ཤོག༔ སོ་དང་སེན་མོ་པགས་པ་རྣམ་པ་གསུམ༔ ཕྱི་རྟགས་ཡིན་པས་ད་ལྟ་ཁྱེར་ལ་ཤོག༔ རྣ་བ་ལྕེ་དང་མིག་དང་གསུམ་པོ་ནི༔ དབང་པོ་ཡིན་པས་མྱུར་དུ་ཁྱེར་ལ་ཤོག༔ གློ་བ་སྙིང་དང་མཆིན་པ་གསུམ་པོ་ནི༔ དོན་སྙིང་ཡིན་པས་མྱུར་དུ་ཁྱེར་ལ་ཤོག༔ མཉེ་མ་རྒྱུ་མ་མཁལ་མ་གསུམ་པོ་ནི། ནང་རོལ་ཡིན་པས་ད་ལྟ་ཁྱེར་ལ་ཤོག༔ ཤ་ཁྲག་བརྒྱན་པའི་གཏོར་མ་འདི་བཞེས་ལ༔ བཅོལ་བའི་ཕྲིན་ལས་མྱུར་དུ་འགྲུབ་པར་མཛོད༔ [ཅེས་དང་། སྲི་མནན་ལ།] ཧཱུྃ༔ ནམ་མཁའི་དབྱིངས་སུ་སྲི་བྲོས་ན༔ ཁྱུང་གི་མགོ་ཅན་ཁྱོད་སོང་ལ༔ ནམ་མཁའི་དཀྱིལ་ནས་སྲི་ཁུག་ཅིག༔ རྣ་ཤེས་གཟུགས་དང་རྟེན་ལ་ཕོབ༔ གངས་དཀར་རྩེ་ལ་སྲི་བྲོས་ན༔ སེང་གེའི་མགོ་ཅན་ཁྱོད་སོང་ལ༔ གངས་དཀར་རྩེ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ གཡའ་སྤང་མཚམས་སུ་སྲི་བྲོས་ན༔ གཡག་གི་མགོ་ཅན་ཁྱོད་སོང་ལ༔ གཡའ་སྤང་

མཚམས་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ གོང་སུམ་དག་ཏུ་སྲི་བྲོས་ན༔ སྤྱང་ཤིའི་མགོ་ཅན་ཁྱོད་སོང་ལ༔ གོང་སུམ་དག་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ བྲག་ཐང་མཚམས་སུ༴ འུག་པའི་མགོ་ཅན༴ བྲག་ཐང་མཚམས་ནས༴ རྣམ་ཤེས་གཟུགས་དང་༴ ནགས་ཚལ་དག་ཏུ༴ དོམ་གྱི་མགོ་ཅན༴ ནགས་ཚལ་གསེབ་ནས༴ རྣམ་ཤེས་གཟུགས་དང་༴ རྒྱ་མཚོའི་གཏིང་དུ༴ སྲམ་གྱི་མགོ་ཅན༴ རྒྱ་མཚོའི་གཏིང་ནས༴ རྣམ་ཤེས་ཆོས་ཀྱི༴ ཆུ་བོའི་གཞུང་དུ་སྲི་བྲོས་ན༔ ཆུ་བྱའི་མགོ་ཅན་ཁྱོད་སོང་ལ༔ ཆུ་བོའི་གཞུང་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ས་ཡི་སྟེང་དུ༴ དྲེད་ཀྱི་མགོ་ཅན་ཁྱོད༴ ས་ཡི་སྟེང་ནས༴ རྣམ་ཤེས་གཟུགས་དང་༴ རྒྱ་གྲམ་ལམ་དུ༴ ཕག་གི་མགོ་ཅན༴ རྒྱ་གྲམ་ལམ་ནས༴ རྣམ་ཤེས་གཟུགས་དང་༴ རི་སུལ་དག་ཏུ༴ གོ་བོའི་མགོ་ཅན༴ རི་སུལ་དག་ནས༴ རྣམ་ཤེས་གཟུགས་དང་༴ ཐེམ་པའི་འོག་ཏུ༴ ཁྱི་ཡི་མགོ་ཅན༴ ཐེམ་པའི་འོག་ནས༴ རྣམ་ཤེས་གཟུགས་དང་༴ རྩིག་པའི་གསེབ་ཏུ༴ བྱི་བའི་མགོ་

ཅན་ཁྱོད་སོང་ལ༔ རྩིག་པའི་གསེབ་ནས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ ཕྱོགས་མཚམས་ཀུན་ཏུ་སྲི་བྲོས་ན༔ སྤྲུལ་པའི་ཕོ་ཉ་མང་པོ་དང་༔ ཡང་སྤྲུལ་ཕོ་ཉས་སྲི་ཁུག་ཅིག༔ རྣམ་ཤེས་གཟུགས་དང་རྟེན་ལ་ཕོབ༔ [ཅེས་བསྐུལ་ལ། གང་གི་ཚེ་ནའང་དམིགས་གནད་དང་འགུགས་སྔགས་གཞུང་གསལ་ལྟར་ལ་མིང་ཁ་བསྒྱུར་དང་བཅས་འགུགས་སྔགས་སྟོང་རྩ་ལས་མི་ཉུང་བ་བཟླ། མཐར་འགུགས་འཆིང་སྡོམ་མྱོས་ཀྱི་ལས་བསྐུལ་རྗེས་ཐུན་གཏོར་ཕུལ་བ་གཏོར་ཆེན་དུ་བསྟབ་ལ།] ནམ་མཁའ་མེད་པར་གྱུར་ན་ཡང་༔ སྔགས་ཀྱི་དངོས་གྲུབ་མེད་མི་འགྱུར༔ ལྷ་དང་དྲང་སྲོང་གིས་བཤད་པའི༔ རིག་སྔགས་བསླུ་བར་མི་འགྱུར་ན༔ འདོད་ཆགས་བྲལ་བས་བྱས་པ་ཡི༔ གསང་སྔགས་སྦྱོར་བས་བསླུས་པ་ནི༔ མ་བྱུང་འབྱུང་བར་མི་འགྱུར་རོ༔ སྔགས་དང་རྟེན་འབྲེལ་མི་བསླུ་ཞིང་༔ ཏིང་འཛིན་ནུས་པ་བསམ་མི་ཁྱབ༔ དཀོན་མཆོག་གསུམ་དང་རྩ་གསུམ་གྱི༔ བདེན་པ་ཆེན་པོའི་མཐུ་སྟོབས་ཀྱིས༔ མངོན་སྤྱོད་དམོད་པའི་ལས་འདི་ཉིད༔ ཐོགས་མེད་མྱུར་དུ་འགྲུབ་གྱུར་ཅིག ཛ་ཡ་ཛ་ཡ་སུ་ཛ་ཡ༔ [ཅེས་བདེན་སྟོབས་བརྗོད་པས་ཐུན་དང་པོ་གྲུབ། དེ་ནས་

ཐུན་ཕྱི་མ་རྣམས་ལ་མཆོད་པ་ཁ་གསོ་ཞིང་ལས་བྱང་མདོར་བསྡུས་ཏེ་མཆོད་བརླབ་ནས་བཟླས་པའི་བར་དང་། བསྐུལ་བ་ནས་ཐུན་གཏོར་བར་གོང་བཞིན་བཏང་། དགོང་ཐུན་ནམ་སྲོད་ཐུན་གྱི་བཟླས་པའི་རྗེས་སུ་ཆོས་སྐྱོང་གཏོར་འབུལ་དང་། ཚོགས་བྱིན་བརླབ་ནས་ལྷག་མའི་བར་དུ་བཏང་རྗེས་བསྐུལ་བ་ནས་ཐུན་གཏོར་བར་གྲུབ་ནས་ལས་བྱང་གི་གཏོར་སྐྱོང་ཐོ་བརྡུང་སོགས་ཤིས་བརྗོད་བར་མཐར་དབྱུང་། དེའི་འགྲོས་ཀྱིས་རྟགས་ཐོན་བྱེད་ན་དངོས་ཉམས་རྨི་ལམ་དུ་ཁུག་རྟགས་མ་བྱུང་བར་འགུགས་པ་ཁོ་ན་དགོས་ཤིང་མ་ཁུག་པར་བསད་ལས་བྱས་ན་བླ་ཡར་བས་ནམ་ཡང་མི་ཐེབས་པར་བཤད། དེའང་འགུགས་པའི་དུས་གནད་ཐོ་རངས་སྐར་ཆེན་ཤར་བ་སྟག་ཆེན་ཁ་གདངས་པའི་དུས། ཞོག་པ་ཤར་ནས་གྲིབ་སོ་བྱུང་བ་གིང་ཟིན་ལ་འཇུག་པའི་དུས། དགོང་མོ་ནུབ་ནས་གྲིབ་སོ་བྱུང་བ་སྲིན་པོ་ལྟོ་ལ་རུབ་པའི་དུས། སྲོད་གདོང་ནག་ལ་བདུད་དམག་ལ་ཆས་པའི་དུས་ཏེ་དུས་དེ་བཞི་ལ་དགུག་གཞུག་དྲག་པོ་ནན་ཏན་དུ་བྱ་ཞིང་། དེང་སང་ཞག་གི་གྲངས་བཅད་བདུན་གཅིག་ལྟ་བུར་མཚོན་ན་ཞག་གསུམ་ལ་འགུགས་པ་འདི་ཁོ་ན་བྱ་སྟེ་དང་པོ་འགུགས་པའི་ལས་སོ། །དེ་ལྟར་འགུགས་ལས་ཐེམས་ནས་བར་དུ་གཟིར་བའི་ལས་ལ། ཐུན་དང་པོར་འགུགས་པ་འགུགས་འཆིང་སྡོམ་མྱོས་ཡན་གྲུབ་པ་དང་། ལྷ་དབྱེའི་རྫས་ངན་རྣམས་རང་དང་ལྷ་རྟེན་ལ་དུད་པ་དྲི་ཙམ་མི་འཕོག་པར་རྫའམ་དོང་གི་འཕྲུལ་འཁོར་དུ་བདུག་པ་ཡིན་ཅིང་། ཐུན་མོང་སྤྱིར་

བཏང་ཙམ་ལ་གུ་གུལ་ཤ་ཆེན་ཡུངས་དཀར་གྱི་དུད་པས་བདུག །བྱ་འུག་གི་དང་རུས་གཡབ་ལ་གཞུང་གསལ་དམིགས་པ་དང་བཅས་དབྱེ་བའི་ལས་བསྐུལ་མཐར། སྔགས་ཤམ་དུ།] ཨ་ནྲྀ་ཏྲི་ཏྲཀ་རཀྵ་མཱ་ར་ཡ་ཕྱེས་ཕྱེས༔ མ་མ་ཏྲག་རཀྵ་མཱ་ར་ཡ་ཕྱེས་ཕྱེས༔ ནྲྀ་ཏྲི་དེ་ཝ་ཨུ་ཙ་ཏ་ཡ་ཕཊ༔ [ཅེས་བརྒྱ་རྩ་སོགས་བཟླས་མཐར་གཟུགས་ལ་དབབ། དེ་ནས་བསད་དམིགས་གཞུང་བཞིན་གྱིས་གཟིར་སྔགས་སྟོང་ཕྲག་ལས་མི་ཉུང་བ་བཟླས་མཐར་ཐུན་བསྐོར་ནས་ལིངྒ་ལ་ཐུན་བརྡེག་ཅིང་ཐུན་གཏོར་ཕུལ་ལ་བདེན་སྟོབས་བརྗོད། ཚུལ་དེའི་འགྲོས་ཀྱིས་བསད་རྟགས་མ་བྱུང་གི་བར་རམ་ཞག་བདུན་གྱི་ཚེ་འདི་ལ་ཞག་གཉིས་བྱའོ། །དེ་ལྟར་གཟིར་ལས་ཐེམས་ནས་མཐར་མནན་པའི་ལས་སྒྲུབ་ལ། སྔར་བཞིན་ལྷ་དབྱེ་གཟུགས་དབབ་བར་དུ་སོང་ནས་གཞུང་གསལ་དམིགས་གནད་བཅས་མནན་སྔགས་དྲག་ཏུ་བཟླ། འདི་སྐབས་མཆིལ་མ་ཁོང་དུ་སོང་ན་ངག་མནན་དུ་འགྱུར་བས་སྣོད་ཅིག་ཏུ་བསགས་ལ་ཕོ། བཟླས་པ་ཟིན་ནས་སྔོན་དུ་བསྒྲུབས་པའི་རྣམ་འཇོམས་བུམ་ཆུའམ་ཆུ་གཙང་གིས་ཁ་བཤལ། མཐར་ཐུན་སྒྲུབ་དང་བཅས་ཏེ་ཐུན་བརྡེག་རྗེས་བྲུབ་ཁུང་སྟེང་རྔ་མ་ནག་པོས་གཡོབ་བཞིན་དམོད་བྱང་གོང་གི་ལིངྒ་བྲི་ཐབས་སུ་བཤད་པ་ལྟར་བརྗོད། ཐུན་གཏོར་འབུལ་བའི་ཚིག་གཤམ། ཐམས་ཅད་རང་གཤེད་ཕོབ་ལ་མཐུ་ནུས་ཤིགས། །[ཅེས་པའི་

མཐར།] ལུས་ངག་ཡིད་གསུམ་མཐུ་རྩལ་ནུས་པ་རྣམས། །ནམ་ཡང་ལྡང་མེད་མནན་པའི་ཕྲིན་ལས་མཛོད། །[ཅེས་བསྒྱུར་བ་ཁྱད་པར་དང་། དེའི་འགྲོས་ཀྱིས་རྟགས་བྱུང་གི་བར་རམ་ཞག་བདུན་གྱི་ཚེ་ན་ཉིན་གཉིས་ལ་འབད་དོ། །དེ་ལྟར་རྟགས་སམ་ཞག་གྲངས་རྫོགས་པའི་ཐུན་ཐ་མ་དགོང་མོ་ལ་བབས་པ་དང་། ལས་བྱང་བཟླས་པ། སྲུང་མའི་གཏོར་འབུལ། ཚོགས་ཀྱི་ལྷག་མ་ཡན་རྒྱས་པར་བཏང་། བསྐུལ་བ་ནས་བརྩམས་ཐུན་གཏོར་ཡན་དཀྱུས་ལྟར་སོང་ནས། ལིངྒ་ཧོམ་ཁུང་ནས་སྐམ་པས་བླངས་ཏེ་དགྲ་འདྲེ་ཕོ་ལ་དཔུང་པ་གཡས་དང་། མོ་ལ་གཡོན་སྔོན་ལ་བཅག་སྟེ་མགོ་ནས་མར། མཇུག་ནས་ཡར་དྲིལ། བྱད་ཐག་གིས་བཅིངས་ལ་མནན་ཐོད་གང་ཡིན་དེར་བཅུག །དེ་སྟེང་ཐུན་རྫས། མི་ཁའི་རྫས། ཚ་བུལ་ཏོ་བ་ཚྭ་སོགས་བླུགས་ལ་བཀང་། ཕུང་རེ་ཡུགས་སའི་ཤ་གོས་རབས་ཆད་རེ་བ་སོགས་ཀྱིས་བསྒྲིལ། རོ་སྐྲའམ་ཁྱིའི་སྤུའི་སྐུད་པ། ཚོན་སྐུད་སྣ་ལྔས་རྒྱ་ཆིངས་བྱས་པའི་ཁ་ལ་ཁྲོ་ཞལ་ལམ་སྣ་ཚོགས་རྡོ་རྗེའི་ཐེའུས་རྒྱས་བཏབ། སེ་སྐྱེར་འོམ་བུ་གསུམ་གྱི་རྩང་དམར་རྒྱ་གྲམ་དུ་གཟེར། དེ་དག་གི་སྐབས་སུའང་ཁ་རླངས་དྲི་མཐེབ་རྗེས་སོགས་མ་ཤོར་བ་གལ་ཆེ། མནན་ཆས་བྱེད་པའི་སྐབས་སུ་གཞུང་གསལ་དམིགས་གནད་དང་བཅས་མནན་སྔགས་ཅི་འགྲུབ་བཟླ་ཞིང་བྱ་བ་ཟིན་ནས་ཐོད་དབང་བསྐུར་བ་རྟེན་འབྲེལ་ནག་པོའི་མན་ངག་ནི།] ཧཱུྃ་ཨེ་ཛ་བྷྲཱུྃ། ཐུགས་རྗེའི་འོད་

རྩལ་སྲིད་གསུམ་གང་བའི་ཚོགས། །གཅིག་ཏུ་དྲིལ་བའི་སྟོབས་ཤུགས་ནུས་པའི་དཔལ། །བགེགས་སྲིན་མཐར་བྱེད་གཤིན་ཡུལ་ཨེ་གསང་ཀློང་། །ཏིང་འཛིན་རྡོ་རྗེ་ཐོད་པའི་བརྡ་རུ་སྣང་། །དབྱིངས་རྩལ་འགགས་མེད་བདུད་འདུལ་ཁྲོ་བོའི་སྤྲིན། །དྲག་སྔགས་ལུ་གུ་རྒྱུད་ཀྱི་ཐིག་ལེ་ཡིས། །ནམ་ཡང་གཞོམ་མེད་རྡོ་རྗེའི་ངོ་བོ་རུ། །སྲིད་པ་སྤུ་གྲིའི་འཁོར་ལོས་རྒྱས་ཐོབ་ཅིག །ཨོཾ་ལཾ་ཨཱཿལཾ་ཧཱུྃ་ལཾ་སྟྭམྦྷ་ཡ་ནན། ཧཱ་སྭཱ་ཡེ་ཎ་མ་ཤྲ་ཧཱ་མ་དཱི་བཱ་ཝཾ་ཨེ་ངྷ་རོ་ནི་ཡོ་ཙ་ཥཱཉ་ཏེ་དཏ་བ་ཧྱ་ཏོ་ག་ཐཱ་ཏ་ཥཱཉ་ཏེ་ཏུན་ཧེ་ཝཱ་བྷ་པྲ་ཏུ་ཧེ་མཱ་རྡར་ཡེ་ཨོཾ། [ཞེས་ཉེར་གཅིག་གིས་རབ་གནས་བྱ། དེ་ནས་མནན་པའི་ས་ནི་དགྲ་འདྲེ་རང་གཤེད་དབབ་པའི་ས་མཾག་དམིགས་སུ་བསལ་བའམ། དཀྱུས་སུ་དགྲ་འདྲེ་སྤྱི་ལ་ལྷ་ཁང་ངམ་མཆོད་རྟེན་གྱི་འོག་དང་ལམ་རྒྱ་གྲམ། བྱེ་བྲག་དམ་སྲི་ལྷ་ཁང་ཐེམ་འོག་གམ་མཆོད་རྟེན་རྨངས། ཕུང་སྲི་གྲོང་དབུས་སམ་སྲང་མདོ། དགྲ་སྲི་གོང་གསུམ་ལྟོང་དང་ལུང་གསུམ་མདོ། དུར་སྲི་དུར་ཁྲོད་དབུས། ཕོ་སྲི་ལ་བཙས་འོག །མོ་སྲི་བྲག་ནག་རྨས། ཆུང་སྲི་མའི་མལ་འོག །གོད་སྲི་རྭ་བའི་དབུས་སུ་མནན་པར་བཤད་པ་ལྟར། དཔྱིད་གསུམ་ནུབ། དབྱར་གསུམ་ལྷོ། སྟོན་གསུམ་ཤར། དགུན་གསུམ་བྱང་དུ་བལྟས་ལ་དོང་གྲུ་གསུམ་བརྐོ་དེའང་

ཁྲུ་གང་ཡན་ཆད་ས་རོ་ཡིན་པས་དོར། དེ་ནས་སོར་ཉི་ཤུའི་སར་མནན་པ་བྱ་སྟེ། ཐོག་མར་ཟློག་གཞུང་ལྟར་གཏོར་ཆེན་གྱི་ཡེ་ཤེས་པ་ནམ་མཁར་བཏེགས་ལ་གཏོར་ཟོར་བསྒྲུབ། སྒོ་དབྱེ་ཞིང་བསྐུལ་དང་ཆད་མདོ་བསྒྲག་ནས། དཀར་གཏོར་གྱིས་སྣ་དྲངས་ཏེ། མནན་ཆས་རྣམས་དང་། གོང་གནོན་གྱི་གཏོར་ཆེན་སོགས་ཁྱེར་ལ་སློབ་དཔོན་གྲོགས་བཅས་ལྟ་དགོངས་ངར་དང་ལྡན་པས་དེ་དག་གི་ཕྱི་བཞིན་དུ་སོང་ནས་མནན་དོང་གི་སར་སླེབས་པ་དང་། གཏོར་ཆེན་རེ་ཞིག་ཁྲིའུར་འགོད། གསེར་སྐྱེམས་ཕུལ་ཞིང་གཟུ་དཔང་གསོལ་མཐར། སློབ་དཔོན་གྱིས་ལས་ཕུར་དོང་ཁང་གཟིར་ཚུལ་དང་བཅས་དམིགས་གནད་གཞུང་གསལ་ལྟར་ཀླུ་བདུད་སྤྱན་དྲངས་པར་དམར་གཏོར་ཕུལ། ཧོམ་བསྐྱེད་འགུགས་གཞུག་འགུགས་འཆིང་སྡོམ་མྱོས་ལྷ་དབྱེ་གཟུགས་ལ་དབབ་པ་བཅས་ནན་ཏན་དུ་བྱས་རྗེས།] ཧཱུྃ༔ རི་རབ་ཆེན་པོའི་རྨང་འོག་[སོགས་ཀྱིས་མནན་ཆས་དོང་ནང་དུ་བསྐྱུར།] དམོད་བྱང་སྔར་བཞིན་བརྗོད་ཅིང་ཐལ་མོ་བརྡབ། དམིགས་བྱ་ཁོང་ཆུད་སོགས་ཀྱིས་རོ་གཡམ་རྒྱ་གྲམ་རི་གླིང་བྲིས་པས་ཁ་བཀབ། [ནམ་མཁའ་རླུང་མེ་སོགས་ཀྱིས་མནན་པའི་སྟེང་དུ་སློབ་དཔོན་གྱིས་མཁའ་དབྱིངས་རྒྱས་བཀབ་ལ།] ཨེ་ནྲྀ་ཏྲི་མཱ་ར་ཡ་སྟྭཾ་བྷ་ཡ་ནན༔ [གཡབ་དར་གྱིས་རླུང་གཡབ་ཅིང་།] ཡཾ་ནྲྀ་ཏྲི་མཱ་ར་ཡ་སྟྭཾ་བྷ་ཡ་ནན༔ [མེ་བླུགས་ཤིང་།] རཾ་ནྲྀ་ཏྲི་མཱ་ར་ཡ་སྟྭཾ་བྷ་ཡ་ནན༔ [ཆུ་བླུགས་ཅིང་།] བཾ་ནྲྀ་ཏྲི་

མ་ར་ཡ་སྟྭཾ་བྷ་ཡ་ནན༔ [སས་གཡོག་ཅིང་།] སུཾ་ནྲྀ་ཏྲི་མཱ་ར་ཡ་སྟྭཾ་བྷ་ཡ་ནན༔ [སོགས་རེ་རེ་བཞིན་རྫས་སྔགས་ལན་དགུ་རེས་རྒྱས་བཏབ་ལ་གཞུང་གསལ་དམིགས་གནད་ཀྱི་གདིང་བསྐྱེད།] སུམྦྷ་ནི[ས་བྲོ་ར་གྲུ་གསུམ་དུ་བསྐོར་ཏེ་ལས་བྱང་བཞིན་བྲོ་བརྡུང་། དེ་ནས་སྨད་ལས་ལྟར།] ཧཱུཾ༔ ང་ནི་བདུད་འདུལ་ཧེ་རུ་ཀ༔ [སོགས་དང་།] ཧཱུྃ༔ ང་ནི་ཆེ་མཆོག་གྲོ་བོ་ལོད༔ [ཅེས་སོགས་ཀྱིས་གཏོར་ཟོར་དགྲ་ཕྱོགས་སམ་ཐེབས་ཕྱོགས་སུ་འཕང་། བཤལ་ཆུས་བརྟན་མ་བསྐྱང་། གཏོར་གཞོང་སྔར་གྱི་མནན་པའི་སྟེང་དུ་ཁ་སྦུབས་ལ་འགུགས་འདྲེན་དང་བཅས་སླར་ཡང་བྲོ་བརྡུང་བྱས་མཐར་གཏོར་གཞོང་བཟེད་པར་མེ་ཏོག་འཐོར་ཞིང་ཤིས་བརྗོད་ཤླཽ་ཀ་གཅིག་ཙམ་བྱ། ཅུང་ཟད་ཕྱིར་དཔག་སྟེ་ལས་བྱང་བཞིན་སྲུང་འཁོར་བསྒོམ། སྤྲུལ་པའི་བྱ་ཁྱུང་འཇིགས་སུ་རུང་བ་ཞིག་གིས་ཞལ་ཕྱིར་གཟིགས་ཏེ་རྗེས་བཅད་པར་བསམ་ཞིང་སློབ་དཔོན་གྱི་རྟིང་མནན་ཏེ་ལྡོག །ནང་དུ་ལོག་ནས་མཚོ་སྐྱེས་ཐུགས་ཐིག་བཞིན།] ཨོཾ་ཨཱཿཧཱུྃ་བཛྲ་གུ་ཏུ་པདྨ་སིངྔྷི་ཛྙཱ་ན་ཨ་ཡུ་ཥེ་ཧཱུྃ་བྷྲཱུྃ་ནྲྀ་ཛཿ [ཞེས་ཚེ་ཛཔྲ་བརྒྱ་རྩ་ཙམ་བཟླས་ལ།] ཧྲཱི༔ པདྨ་དྲྭ་བ་ཚེ་ཡི་ཞིང་༔ [སོགས་ཀྱིས་ཚེ་འགུགས་བསྐུལ་ཞིང་རྒྱས་གདབ་མཐར།] ཧཱུྃ༔ བདེ་གཤེགས་ཀུན་འདུས་རྡོ་རྗེ་གྲོ་ལོད་རྩལ༔ [ཞེས་སོགས་ཀྱིས་དངོས་གྲུབ་བླང་། གཏང་རག་གི་མཆོད་བསྟོད་བཟོད་གསོལ་བྱས་ལ་

སྔར་གཏོར་ཆེན་གྱི་ཡེ་ཤེས་པ་ནམ་མཁར་བཏེགས་པ་རྟེན་ལ་བརྟན་བཞུགས་སམ་གཤེགས་གསོལ་བྱ། བདག་བསྐྱེད་བསྡུ་ལྡང་བསྔོ་སྨོན་ཤིས་བརྗོད་བཅས་དཀྱུས་བཞིན་བཏང་བས་ལེགས་པར་གྲུབ་བོ། །གཞན་དུ་འགོང་པོ་སྤུན་དགུ་ཨར་གཏད་དང་། རྒྱལ་བསེན་ཤི་ས་བསྟན་པའི་ལས་སྦྱོར་ལག་ཏུ་ལེན་པར་འདོད་ནའང་ལིངྒའི་བཅས་དང་སྔགས་ཀྱི་གཟེར་ཁ་སོགས་སོ་སོའི་གཞུང་གསལ་ལྟར་ལ། སྤྱིའི་ཆོ་གའི་ཆིངས་འདི་ཁོ་ནས་ཁོག་ཕུབ་པས་དོན་འགྲུབ་པར་འགྱུར་ཞིང་། འདི་ལ་དགྲ་མནན་གལ་ཆེན་གྱི་སྐབས་སུ་ལྷ་ལྔ་རང་གཤེད་དུ་དབབ་ཅིང་ལོག་འབྱམས་ཀྱི་སྐྱོན་བསལ་བ་སོགས་ཟབ་པའི་གནད་ཐུན་མོང་མ་ཡིན་པ་རྣམས་ནི་རྡོ་རྗེ་སློབ་དཔོན་གྱི་ཐུགས་ལ་གབ་པའི་མན་ངག་ཞལ་གྱི་བདུད་རྩི་བརྟེན་པ་ལས་ཤེས་དགོས་པ་ཡིན་ནོ། །ཞེས་པའང་འཇིགས་བྲལ་ཡེ་ཤེས་རྡོ་རྗེས་རང་ལོ་ང་གསུམ་པ་གདོང་ངན་མེ་སྤྲེ་ལོ་སྣྲོན་གྱི་ཟླ་བར་དབུས་རི་ནག་པོ་མཐུར་རྒྱུག་གི་ཟད་མཚམས་ཆུ་བོ་ལོ་ཧི་ཏ་དང་ཉང་ཁའི་གཙང་པོ་སྣེ་འཛོམ་པའི་འདུས་མདོ་རྩེ་ལ་སྒང་གི་རི་རྒྱུད་གླང་པོའི་སྣ་ཞགས་འདྲ་བའི་རྩེར། གནས་ཆུང་ཆོས་སྐྱོང་ཆེན་པོའི་བཀའ་ལུང་གི་དོན་བཞིན་བོད་ཁམས་བསྟན་སྲིད་སྤྱིའི་རིམ་གྲོལ་ཚུ་ལ་འདིའི་སྒོ་ནས་དམ་འགོང་གཟིར་མནན་དང་འབྲེལ་བར་བདུད་འདུལ་མཆོད་རྟེན་ཟབ་མོ་བསྐྲུན་པའི་སྐབས། ལམ་འདིའི་རྣལ་འབྱོར་པ་འགྱུར་མེད་རྡོ་རྗེས་དོན་གཉེར་གྱི་

བསྐུལ་མ་དང་ཡི་གེའི་གྲོགས་དན་ལ་བརྟེན་ནས་ཟིན་བྲིས་སུ་བཏབ་པ་ཛ་ཡནྟུ།། །།

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་འགོང་པོ་ཨར་ལ་གཏད་པའི་ལས་ཁྲིགས་འཆོར་མེད་དུས་ཀྱི་ཞགས་པ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་འགོང་པོ་ཨར་ལ་གཏད་པའི་ལས་ཁྲིགས་འཆོར་མེད་དུས་ཀྱི་ཞགས་པ་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [ཡི་དམ་གྱི་བསྙེན་སྒྲུབ་ལས་སུ་རུང་ཞིང་ལྟ་སྒོམ་གདིང་དང་ལྡན་པའི་སྔགས་པ་བསྟན་འགྲོའི་དོན་ལ་ལྷག་བསམ་སེམས་བསྐྱེད་ལྡན་པས་འགོང་པོ་ཨར་ལ་གཏད་པའི་ལས་སྦྱོར་རྩོམ་པ་སྐབས་སུ་བབས་པ་ན། ཕུང་ས་སྣ་ཚོགས་ལས་གྲུབ་པའི་མཎྜལ་སྟེགས་བུ་གྲུ་བཞི་པའི་དབུས་སུ་བྲུབ་ཁུང་རྒྱར་ཁྲུ་གང་པའམ་མཐོ་གང་བ། རྒྱའི་ཕྱེད་ཚད་ཀྱི་དཔངས་ལ་བང་རིམ་གསུམ་པ། ཕྱི་རོ་སོལ་གྱིས་ནག་པོ་དང་། ནང་གྲི་ཁྲག་སོགས་ཁྲག་སྣས་དམར་པོར་བྱུགས། ཁ་ཁྱེར་ལ་དྲག་པོའི་རྩང་ཕུར་སྟོད་སྨད་གྲི་ཁྲག་དང་བཙག་གིས་དམར་པོར་བྱུགས་ཤིང་། རྐེད་པ་རོ་སོལ་གྱིས་ནག་པོར་བྱུགས་པ་ཉེར་གཅིག་སྲིན་མོ་འགྲོས་སུ་བཙུགས་པའམ། བསྡུ་ན་བྲུབ་ཁུང་

རྐྱང་པ་ཙམ་གྱིས་ཀྱང་ཆོག །གང་ལྟར་ཡང་དེར་དུག་ཤོག་ལ་དུག་ཁྲག་གིས་ལིངྒ་མི་གཟུགས་དགུ་སྤྱི་ལྟར་བྲིས་པ་ལ། མགོ་བོ་རིམ་པར་སྤྱང་ཀི །བྲ་བ། མི། བྱ། བྱི་ལ། རྔ་མོང་། ཁྱི། སྤྲེའུ། རི་བོང་རྣམས་ཀྱི་གདོང་པ་ཅན་དང་། སྙིང་གར་ཛ་ཁ་སྤྲོད་ཀྱི་བར་དུ་ཏྲི། མཐའ་བསྐོར་དུ། མཱ་ར་ཡ་རྦད༔ ཏྲིག་ནན་ཛཿཛཿ འཁྲུགས་བྱེད་ཀྱི་འགོང་པོ་སྤྱང་མགོ་ཅན་ཐུཾ་ཤད་ལིང་མྱོག་ཛཿཧཱུྃ་བྃ་ཧོ༔ གཟུགས་ཀྱི་ཕྱི་རོལ་དུ། འཁྲུགས་བྱེད་ཀྱི་འགོང་པོ་སྤྱང་མགོ་ཅན་དུར་དུར༔ མྱོག་མྱོག༔ ཐུཾ་ཐུཾ༔ ཨ་ཀྲག་ཀླག་ཀླག༔ རྦད་རྦད༔ ཅེས་བྲི། དེ་བཞིན་དུ་རིམ་པར། ལོ་ཉེས་གཏོང་བའི་འགོང་པོ་བྲ་པའི་མགོ་ཅན། མི་ནད་གཏོང་བའི་འགོང་པོ་མིའི་མགོ་ཅན། ཕྱུགས་ནད་གཏོང་བའི་འགོང་པོ་བྱའི་མགོ་ཅན། ཆག་སྒོ་ངན་པ་

གཏོང་བའི་འགོང་པོ་བྱི་བའི་མགོ་ཅན། ལྟས་ངན་གཏོང་བའི་འགོང་པོ་རྔ་མོང་མགོ་ཅན། དམ་ཉམས་གཏོང་བའི་འགོང་པོ་ཁྱིའི་མགོ་ཅན། དབྱེན་སྦྱོར་གཏོང་བའི་འགོང་པོ་སྤྲེའུའི་མགོ་ཅན། བསེ་རག་གཏོང་བའི་འགོང་པོ་རི་བོང་མགོ་ཅན། ཞེས་པ་རྣམས་སུ་བསྒྱུར་བ་དང་། ཡན་ལག་བཞིར་ཛཿཧཱུྃ་བྃ་ཧོ༔ སྤྱི་བོར་ཏྲིག་ནན་སོགས་གནས་ཡིག་རྣམས་ལིངྒ་སྤྱི་ལྟར་བྲི། ལྷ་ཁང་ཞིག་རལ་སྡེ་འཁྲུགས་རི་རུད་ཕུང་ཤུལ་འདྲེ་ཅན་གྱི་ས་དང་། ཁྱི་བྱ་སྤྲེ་བྱི་ལའི་ཁྲག་རྣམས་ཀྱིས་བྱུགས། རང་གི་དྲི་མ་སྦྱངས་ལ་བྱད་ཐག་སྔོ་དམར་གྱིས་བསྡམས་ནས་བྲུབ་ཁུང་དུ་བཅུག །ཉེ་ལོགས་ཅི་བདེ་བར་བདག་བསྐྱེད་ཀྱི་མཆོད་པ། སྲུང་མའི་གཏོར་མ་སོགས་དང་། ཐུན་གཏོར་ཟུར་གསུམ་མཚེ་ཡུངས་རྩང་དང་ཁྲག་གིས་བརྒྱན་པ། ཐོད་ངན་དུ་བླུགས་པའི་ཐུན་རྫས་སོགས་འདིར་དགོས་པའི་ཡོ་བྱད་ཐམས་ཅད་ཚོགས་པར་བྱས་ལ། བདག་གི་རྣལ་འབྱོར་གྱི་གཞུང་བསྲངས་ཏེ་བསྙེན་སྒྲུབ་ལས་སྦྱོར་གྱི་བཟླས་པ་སྔོན་དུ་འགྲོ་བས། ཐོག་མར་ཐུགས་དམ་བསྐུལ་བ་ནི།] ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ པདྨ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔ ཁྲག་འཐུང་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ༔ བཞེངས་ཤིག་རྔ་ཡབ་ལངྒའི་གླིང་ནས་བཞེངས༔ དགོངས་ཤིག

སྙིགས་མའི་སེམས་ཅན་དོན་ལ་དགོངས༔ གཤེགས་ཤིག་བོད་ཀྱི་རྗེ་འབངས་དོན་ལ་གཤེགས༔ དུས་གསུམ་བདེ་གཤེགས་ཡི་དམ་ལྷ་ཡི་ཚོགས༔ པདྨ་དྲག་པོ་རིག་འཛིན་མཁའ་འགྲོ་དང་༔ ཆོས་སྐྱོང་སྲུང་མ་དམ་ཅན་གཞི་བདག་རྣམས༔ མཐུ་རྩལ་དཔུང་བསྐྱེད་བདག་གི་བསམ་པ་སྒྲུབས༔ སངས་རྒྱས་བསྟན་པ་སྙིགས་མའི་མཐའ་ལ་ཐུག༔ བདུད་ཀྱི་སྤྲུལ་པས་འཛམ་གླིང་ཁྱབ་པར་འདུལ༔ བོད་ཡུལ་འདི་ན་སྡུག་བསྔལ་ཁྲག་མཚོ་བརྡོལ༔ ཁྲི་སྲོང་ལྡེའུ་བཙན་གདུང་བརྒྱུད་དམངས་སུ་འབེབས༔ དབེན་གནས་དགོན་པོ་རྣམས་སུ་ཇག་ཆོམས་བྱེད༔ དམག་དཔུང་འཇིགས་པས་སེམས་ཅན་གྱོད་ལ་འབེབས༔ བདུད་དང་འགོང་པོས་སྡེ་དཔོན་ཁ་ལོ་བསྒྱུར༔ དམ་ཆོས་ཚུལ་བཞིན་བྱེད་དུ་བར་ཆོད་བྱས༔ དམ་ཚིག་ཚུལ་བཞིན་བསྲུང་དུ་མ་སྟེར་རོ༔ དམ་ཅན་བཀའ་སྲུང་མཆོད་དུ་མ་སྟེར་རོ༔ ཆོས་རྒྱལ་མངའ་ཐང་རྒྱས་སུ་འབངས་མགོ་རྒོད༔ བོད་ཁམས་སེམས་ཅན་བདེ་རུ་དམག་འཁྲུགས་དར༔ ཧཱུྃ༔ བདེ་བར་གཤེགས་པའི་དགོངས་པ་སྤྲིན་ལྟར་གཏིབས༔ ཁྲོ་

བོ་འཇིགས་པའི་གད་མོ་འབྲུག་ལྟར་སྒྲོག༔ འགྲོ་ལ་བརྩེ་བའི་ཐུགས་རྗེ་གློག་ལྟར་འཁྱུག༔ བྱིན་རླབས་མཐུ་རྩལ་དྲག་པོ་ཐོག་ལྟར་ཕོབ༔ བདུད་དང་འགོང་པོ་དམ་སྲི་ཤ་ཟ་དང་༔ ཕུང་བྱེད་གདོན་གྱི་རིགས་རྣམས་ཐལ་བར་རློག༔ དུག་ལྔ་འཆོལ་ཉོག་རང་རྒྱུད་འཁྲུགས་པའི་མི༔ བདུད་ཀྱི་སྡེ་དཔོན་རྒྱལ་ཕྲན་ཆམ་ལ་ཕོབ༔ ལས་ངན་རྔམ་སེམས་མེ་ལྟར་འབར་བ་ཡི༔ དམག་དཔོན་དམག་མིའི་རང་གཤེད་རང་ལ་ཕོབ༔ སངས་རྒྱས་བསྟན་པ་བཤིག་པའི་གདོན་བགེགས་དང་༔ ཆོས་རྒྱལ་དམངས་སུ་འབེབས་པའི་དགྲ་བོ་དང་༔ བོད་ཁམས་ཕུང་བར་བྱེད་པའི་འགོང་པོ་དང་༔ རྣལ་འབྱོར་བདག་ལ་སྡང་བའི་དགྲ་བགེགས་ཀུན༔ ཡིད་ཀྱི་བསམ་སྦྱོར་ངན་པ་སྨྱོ་རུ་ཆུག༔ ངག་གི་སྨྲ་བ་ལྐུགས་ཤིང་བརྒྱལ་དུ་ཆུགས༔ གདོས་བཅས་ལུས་ཀྱི་ཕུང་པོ་མྱུར་དུ་སྒྲོལ༔ ཐུགས་དམ་དུས་ལ་བབ་བོ་ས་མ་ཡ༔ [དེ་ནས་སྨད་ལས་བཞིན་གསེར་སྐྱེམས་གཏོང་ཞིང་གཟུ་དཔང་གསོལ།] བྲུབ་ཁུང་བསྐྱེད་པ་གཞུང་ལྟར་ལ། སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་བསྟན་འགྲོའི་ལེགས་ཚོགས་འཕྲོག་པར་བྱེད་པའི་གདོན་བགེགས་ཐམས་ཅད་འདུས་པའི་ངོ་བོ་ར་ཙ་ཏྲི་ལས་

ཕུང་བྱེད་འགོང་པོ་སྤུན་དགུ་མིའི་གཟུགས་ལ་སྤྱང་ཀི་བྲ་བ་མི་དང་བྱ་དང་བྱི་ལ་རྔ་མོང་ཁྱི་སྤྲེལ་རི་བོང་རྣམས་ཀྱི་གདོང་པ་ཅན། ལུས་གཅེར་བུ་རིད་པ་[སོགས་དང་། བདེན་སྟོབས་ཀྱི་ཚེ།] བདེན་པ་ཆེན་པོའི་མཐུ་ལ་བརྟེན་ནས། སྤྱིར་སངས་རྒྱས་བསྟན་པའི་སྤྱི་བགེགས། དཔལ་ལྡན་བླ་མའི་སྐུ་བགེགས། སེམས་ཅན་ཡོངས་ལ་འཚེ་བར་བྱེད་ཅིང་། ཁྱད་པར་རྣལ་འབྱོར་པ་བདག་ཅན་དཔོན་སློབ་ཡོན་མཆོད་འཁོར་དང་བཅས་པ་ལ་གནོད་འཚེ་བསམ་ངན་སྦྱོར་རྩུབ་འཆང་བའི་རྒྱལ་འགོང་དམ་སྲི་བོད་ཁམས་ཕུང་བྱེད་ཀྱི་འགོང་པོ་སྤུན་དགུ་རྒྱ་འདྲེའི་ཚོགས་དང་བཅས་པའི་ཚེ་སྲོག་ཡིད་གསུམ། གནམ་ས་བར་སྣང་། ཉི་ཟླའི་གོ་བར། ཆོས་བོན་སྲུང་མའི་སྐྱབས་འོག་གང་ན་གནས་ཀྱང་སྐད་ཅིག་ཡུད་ཙམ་ལ་དམིགས་པའི་རྟེན་འདི་ལ་ཁུག་ཅིག །[སྒྲུབ་སྔགས་གཟིར་སྔགས་དང་བཅས་པའི་ཤམ་བུར།] སརྦ་ར་ཙ་ཏྲི་ཨ་ཀརྵ་ཡ་ཛཿཏྲི་ཡཾ་ཛཿ ཛཿཧཱུྃ་བྃ་ཧོཿ [ཞེས་བསྒྱུར་བ་ལན་གསུམ་བདུན་ཉེར་གཅིག་སོགས་དང་།] ཕུང་བྱེད་འགོང་པོ་སྤུན་དགུའི་བླ་ཤ་རེ་མ་ཏི་[སོགས་བླ་འགུགས་ཀྱི་སྔགས་བརྒྱ་རྩ་སོགས་ཀྱིས་བཀུག་མཐར་འགུགས་འཆིང་སྡོམ་མྱོས་ཀྱི་ལས་བསྐུལ། ཐུན་གཏོར་ལ་གོང་བཞིན་

དམིགས་བྱ་དགུག་བསྟིམ་བྱས་ཏེ་བདུད་རྩིར་སྦར་བ་སྔགས་ཀྱིས་སྟོབ་ཅིང་།] ཧཱུྃ། བདུད་འདུལ་དབང་དྲག་ཆེན་པོ་འཁོར་བཅས་ལ། །དགྲ་བགེགས་ཤ་ཁྲག་རུས་པ་ནང་ཁྲོལ་ཚོགས། །ལྷུན་པོར་སྤུངས་པའི་འདོད་དགུའི་བ་ལིང་ཏ། །ཕྱི་ནང་ཉེར་སྤྱོད་སྨན་རཀ་བདུད་རྩིའི་ཚོགས། །འབུལ་ལོ་དགྱེས་པར་རོལ་ལ་བདག་ཅག་གི །ནད་གདོན་ཀུན་ཞི་ཚེ་དཔལ་ལོངས་སྤྱོད་སྤེལ། །ཁམས་གསུམ་དབང་སྡུས་དགྲ་བགེགས་བདུད་སྡེའི་དཔུང་། །ཐམས་ཅད་མིང་གི་ལྷག་མར་ཚར་ཆོད་ཅིག །རྒྱལ་ཁམས་ཕུང་བྱེད་འགོང་པོ་སྤུན་དགུའི་སྡེ། །བདུད་ཀྱི་དཔུང་ཚོགས་མ་ལུས་ཆམ་ལ་ཕོབ། །མདོར་ན་བདག་གི་རེ་འབྲས་གང་ཡིན་པ། །འབད་མེད་ལྷུན་གྱིས་གྲུབ་པའི་ཕྲིན་ལས་མཛོད། །[ཅེས་འབུལ། ཚུལ་དེ་ལྟ་བུའི་རིམ་པས་ཁུག་རྟགས་མ་བྱུང་གི་བར་དུ་བརྩོན་པར་བྱ་སྟེ། ཇི་སྐད་དུ། འགོང་པོ་ཤར་གྱི་ཕྱོགས་ནས་འབྱུང་༔ ཤར་ནས་འགུགས་འདྲེན་ཡང་ཡང་བྱ༔ ཕྱག་རྒྱ་བཞི་སྤྲོས་ཏིང་འཛིན་སྤར༔ དམིགས་པའི་རྟེན་ལ་ཡང་ཡང་བསྟིམ༔ ཞེས་དང་། སྲོད་དང་ཐོ་རངས་སྐར་ཆེན་དུས༔ དགུག་གཞུག་དྲག་ཏུ་བྱ་ཞིང་བསྟིམ༔ ཞེས་སོ། །དེ་ནས་ཨར་གཏད་གཟིར་བའི་ལས་དངོས་ལ། གོང་གི་འགུགས་འཆིང་སྡོམ་མྱོས་ཀྱི་ལས་བསྐུལ་མ་ཐག་

པ་དེར།] ལིངྒ་འགོང་པོ་དངོས་སུ་གསལ༔ སྙིང་གར་གནམ་ལྕགས་འཁོར་ལོ་ནི༔ རྩིབས་བརྒྱད་རྣོ་དབལ་སྤུ་གྲིའི་རྩེར༔ ལྕགས་སྡིག་ཚྭ་ཚྭ་འཕྲོ་བར་གྱུར༔ རང་གི་ཐུགས་ནས་འབར་བའི་འོད༔ མེ་དཔུང་རླུང་ནག་རབ་འཕྲོས་པས༔ འཁོར་ལོ་གཡས་སུ་ཤུགས་དྲག་འཁོར༔ སྲོག་རྩ་བཅད་དེ་སྙིང་ཁྲག་ལྷུང་༔ ལྕགས་སྡིག་ཚོགས་ཀྱིས་ཁྲག་ལ་འཇིབས༔ དེ་རྣམས་ངར་སྐྱེས་ཤ་རུས་ཀུན༔ ལྷག་མེད་ཧབ་ཧབ་ཟོས་པར་གྱུར༔ [ཅེས་དམིགས་ལ་རྩ་སྔགས་གཟིར་ཤམ་ཅན་མཐར།] ཕུང་བྱེད་འགོང་པོ་སྤུན་དགུ་མཱ་ར་ཡ་རྦད༔ ཏྲིག་ནན་ཛཿཛཿདུར་དུར༔ མྱོག་མྱོག༔ ཐུཾ་ཐུཾ༔ ཨ་ཀྲག་ཀླག་ཀླག༔ རྦད་རྦད༔ [ཅེས་རིག་པ་ངར་དང་ལྡན་པས་ཐུན་རེ་ལ་དགུ་བརྒྱ་རེ་ལས་མི་ཉུང་བ་བཟླ་ཞིང་ཐུན་རྫས་ལ་ངར་བཏགས་ནས།] ཧཱུྃ༔ ཁྲག་འཐུང་ཁྲོས་པ་དྲག་པོའི་མཚོན༔ [ཞེས་སོགས་ཀྱིས་ཐུན་དབབ། ཚུལ་དེ་ལྟ་བུས་འགོང་པོ་ཐུལ་བའི་རྟགས་མ་བྱུང་གི་བར་དུ་བརྩོན་པར་བྱ་སྟེ། ཇི་སྐད་དུ། བནྡྷེ་བཟུང་དང་ཁྱི་དཀར་བསད༔ ལྷ་ཁང་བཅོམ་དང་བུད་མེད་བསད༔ དེ་སོགས་ཐུལ་བའི་རྟགས་མཐོང་ན༔ ཞེས་སོ། །དེ་ནས་རྗེས་མཐའ་བསྡུ་བ་ལ། གོང་གི་ཐུན་དབབ་མ་ཐག་པ་དེར་ལིངྒ་ལ་ཕུར་བུས་གཟིར་ཞིང་ལས་བྱང་གི་ཚོགས་ཐ་མའི་སྐབས་ལྟར།] ཧཱུྃ༔ ང་ནི་རྡོ་རྗེ་གྲོ་བོ་ལོད༔ [སོགས་ཀྱིས་ཚེ་ཁྲུས་ཀྱི་དགོངས་

པས་རྣམ་ཤེས་དབྱིངས་སུ་བསྒྲལ། རྣམ་སྨིན་བག་ཆགས་ཀྱི་ཕུང་པོ་རྡུལ་ཕྲན་དུ་བཏང་བར་བསམ་ལ། སྤྲེའུ་ཁྱི་དཀར་སྤྱང་ཀི་ཡི༔ ཐོད་པར་འགོང་པོའི་ལིངྒ་གཞུག༔ ཅེས་པས། ཐོད་པ་དེ་གསུམ་གང་འབྱོར་གྱི་ནང་དུ་ཤོག་ལིང་མནན་ཆས་སྤྱི་ལྟར་བྱས་ཏེ། ལུང་པ་གསུམ་གྱི་འཛོམས་སུ་མནན༔ ཞེས་པ་ལྟ་བུའི་ས་མིག་ཏུ་མནན་པའི་སྐབས་བཞིན་ལས་ཀྱི་མཐའ་བསྡུ་བའམ། སྐབས་འགའ་ཞིག་ཏུ་སྲེག་པས་མཐའ་བསྡུ་བར་འདོད་ནའང་རུང་བས་དེའི་ཚུལ་རྒྱས་པར་དྲག་སྲེག་གི་སྐབས་བཞིན་དང་། ཤིན་ཏུ་བསྡུ་ན། ཚེར་མ་ཅན་གྱི་ཤིང་ལ་ཐབ་གྲུ་གསུམ་དུ་བརྩིག །སྨན་རཀ་གཏོར་མ་ཉེར་སྤྱོད། ཡུངས་ཀར་ལ་དུག་ཁྲག་བཏབ་པ་མར་ཁུས་སྦགས་པ་སོགས་བཤམ། གདོལ་བཤན་ནམ་ཡུགས་སའི་མེས་ཧོམ་སྦར།] སྟོང་པའི་ངང་ལས་དྲག་པོའི་ཐབ་ཁུང་གྲུ་གསུམ་པ་ཡེ་ཤེས་ཀྱི་མེ་རབ་ཏུ་འབར་བ་ཡངས་ཤིང་རྒྱ་ཆེ་བའི་ནང་དུ། བདུད་འདུལ་ཆེ་མཆོག་རྡོ་རྗེ་གྲོ་ལོད་རྩལ་གྱི་ལྷ་ཚོགས་དྭངས་པའི་མཚོ་ལ་གཟའ་སྐར་ཤར་བ་བཞིན་དུ་གསལ་བ་ཁྲོས་པའི་ཞལ་གནམ་ས་ཙམ་དུ་གདངས་ཏེ་བསྲེག་བྱ་ཟ་བའི་ལས་ལ་རྔམས་པར་གྱུར། [ཅེས་གསལ་བཏབ་ནས་སྔགས་ཙམ་གྱིས་མཆོད་ཅིང་ཤླཽ་ཀས་བསྟོད། ཧཱུྃ༔ ཡེ་ཤེས་བསྐལ་མེ་འབར་བའི་ཧོམ་ཁུང་དུ༔ ཟིལ་གནོན་ཁྲོ་རྒྱལརྡོ་རྗེ་གྲོ་ལོད་རྩལ༔ ཁྲག་འཐུང་སྤྲུལ་པའི་ཕོ་ཉར་བཅས་པ་ལ༔ དམ་སྲི་འགོང་པོ་གནོད་བྱེད་གདོན་བགེགས་ཀྱི༔

དུག་གསུམ་ཤ་ཁྲག་རུས་པའི་མཆོད་པ་འབུལ༔ དོན་སྙིང་ནང་ཁྲོལ་དབང་པོའི༴ ཕུང་ཁམས་སྐྱེ་མཆེད་བཀྲག་མདངས༴ བླ་ཚེ་སྲོག་དབུགས་དབང་ཐང་༴ ཡུལ་མཔར་ལོངས་སྤྱོད་འཁོར་བཅས༴ བཞེས་རིག་རོལ་ཅིག་ལྷག་མེད་ཁ་རཾ་ཁཱ་ཧི༔ ཨོཾ་བཛྲ་གུ་རུ་གྲོ་བོ་ལོད་སརྦ་དུཥྚཾ་ཧཾ་ཤཾ་ཏྲི་ཛྭ་ལ་རཾ༔ འགོང་པོ་སྤུན་དགུ་འཁོར་དང་བཅས་པ་མཱ་ར་ཡ་ཁ་རཾ་ཁཱ་ཧི༔ [ཞེས་བརྒྱ་རྩ་སོགས་ཕུལ་ཞིང་ཤོག་ལིང་ཧོམ་དུ་བསྲེགས་པས་ལྷག་མེད་དུ་སོང་བར་མོས།] མཐར་མེ་ལྷ་འབར་བའི་རྣམ་པར་གྱུར་པར་[བསམ་ལ། ལས་གསོར་མི་རུང་བ་བྲོ་བརྡུང་གིས་མཐའ་བསྡུ། ལས་ཀྱི་རྗེས་མི་མངོན་པར་བྱའོ། །དེ་ལྟར་ཡང་ཇི་སྐད་དུ། དུས་མཐར་འགོང་པོས་བོད་ཁམས་འདུལ༔ དེ་ཚེ་འགོང་པོ་ཨར་གཏད་འདི༔ བྱང་སེམས་ལྡན་པས་ཡང་ཡང་བྱ༔ བསྟན་པ་ཡུན་དུ་རྒྱས་པར་འགྱུར༔ ཞེས་དང་། འདི་ལྟར་ཚུལ་བཞིན་གནད་ལྡན་ན༔ འགོང་པོའི་ཆོ་འཕྲུལ་རྩུབ་འགྱུར་ཞི༔ བོད་ཁམས་བདེ་སྐྱིད་ངེས་པར་འབྱུང་༔ དུས་ལ་བསྔགས་པའི་གདམས་པ་སྟེ༔ ཟབ་པའི་ལས་མཐའ་ཡང་དག་གོ༔ ཞེས་གསུངས་པ་ལྟར་རོ། །ཞེས་པའང་བསྟན་འགྲོ་སྤྱིའི་རིམ་གྲོ་ལ་འདི་ལྟར་རྩོམ་པ་སྐབས་སུ་བབས་པ་ན་ཉེ་བར་མཁོ་བས་མཚམས་སྦྱར་ཏེ། འཇིགས་བྲལ་ཡེ་ཤེས་རྡོ་རྗེས་ཟིལ་གནོན་གྱི་ལོ་དྲག་པོའི་ལས་ལ་བསྔགས་པའི་

ཉིན་མོའི་ཐུན་གཅིག་ལ་འཕྲལ་དུ་སྦྱར་བའི་ཡི་གེ་པ་ནི་མོན་གྱི་སྔགས་སྟོན་ཆོས་གྲགས་རྒྱ་མཚོས་བགྱིས་པའོ། །། ཛ་ཡནྟུ།། །།]

གྲོ་ལོད་ཀྱི་ལས་མཐའ་འགོང་པོ་ཨར་གཏད་ཀྱི་ཆོ་གའི་ཟིན་བྲིས།

གྲོ་ལོད་ཀྱི་ལས་མཐའ་འགོང་པོ་ཨར་གཏད་ཀྱི་ཆོ་གའི་ཟིན་བྲིས་ལ། གང་དུ་བྱ་བའི་གནས་ཁང་གི་ཕུག་ལོགས་སུ་དམ་ཚིག་གི་བྲིས་སྐུ་བཀྲམ་པའི་སྤྱན་སྔར་སྟེགས་བུ་རིམ་པ་གཉིས་པའི་སྟར་དང་པོར་རྩ་བའི་དཔལ་གཏོར་རྒྱན་སྤྲོས་ཅན་གྱི་གཡས་ནས་གཡས་སུ་དམ་ཅན་སྤྱིའི་གཏོར་སྤུངས། ཆད་མདོ། སྨན་ཐོད། གཡོན་ནས་གཡོན་དུ་དྲེགས་པ་སྡེ་བརྒྱད་ཀྱི་གཏོར་སྤུངས། བརྟན་མ། རཀྟ་བཅས་དང་། སྟར་གཉིས་པ་ལ་ཞི་དྲག་གི་ཆུ་གཉིས་ཉེར་སྤྱོད་ལྔ་མཇུག་སྤྲོད་དུ་བཤམ། དེའི་མདུན་དུ་ལས་དཀྱིལ་སྟེགས་དམའ་བར་ཕུང་ས་སྣ་ཚོགས་ལས་བསྐྲུན་པའི་བྲུབ་ཁུང་དང་ལིངྒའི་བཅས་རྣམས་གཞུང་གསལ་ལྟར་ལ། མནན་པའི་ཟིན་བྲིས་ལྟར་ལིང་ཁྲུས་ལེགས་པར་བྱས་ནས་རྫས་རྣམས་བྱུགས། ལིངྒ་རེ་རེ་བཞིན་མཐའ་ནས་གྲུ་གསུམ་དུ་བལྟབ་པའི་ཟུར་རྣམས་བྱད་ཐག་སྔོ་དམར་གྱིས་བཅིང་ལ་བརྩེགས་ཏེ་བྲུབ་ཁུང་དུ་བཅུག །སྟེང་ནས་དར་རས་ནག་པོའི་ཁེབས་ཀྱིས་གཡོགས། ཉེ་ལོགས་སུ་ཐུན་གཏོར་མཛུབ་གང་བ་དྲག་རྒྱན་ཅན་དང་། ཐོད་ངན་དུ་ཐུན་རྫས་ཡུངས་དཀར་ནག །ལྕགས་ཕྱེ། ཟངས་ཕྱེ། རྡོ་ཕྱེ། ཀེ་ཚེ། ཤངས་ཚེ། བྲག་ཚེ་རྣམས་བཙན་དུག་

བསད་ཁྲག་གིས་སྦགས་པ། གཞན་ཡང་གསེར་སྐྱེམས། སྲུང་མའི་གཏོར་འབུལ། ཚོགས་ཀྱི་ཡོ་བྱད། རོལ་མོའི་བྱེ་བྲག་སོགས་འདིར་དགོས་པའི་ཆ་རྐྱེན་ཐམས་ཅད་ཚོགས་པར་འདུ་བྱས་ནས། ཆོ་ག་དངོས་ཀྱི་ཐུན་དང་པོ་ལ། ཚིག་བདུན་དང་བརྒྱད་འདེབས་ཀྱིས་ཐོག་དྲངས། ལས་བྱང་གི་དབུ་ནས་བསྟོད་པའི་བར་དཀྱུས་བཞིན་དང་། བཟླས་པའི་སྐབས་སུ་བསྙེན་སྒྲུབ་ལས་གསུམ་གྱི་གྲངས་ཚད་སོ་སོའི་སྐབས་ཐོབ་བཞིན་གྱི་མཐར་བསྲུང་བའི་དམིགས་བཟླས་ཀྱང་སྦྱར་ནས་བསྙེན་བསྟོད་བྱ། དེ་ནས་ཨར་གཏད་གཞུང་གི་བསྐུལ་བ། སྨད་ལས་ལྟར་གསེར་སྐྱེམས། གཟུ་དཔང་། ཧོམ་བསྐྱེད་དང་འགུགས་པ་ཁ་བསྒྱུར་ཅན་གཞུང་ལྟར་ལན་ཉེར་གཅིག་ལས་མི་ཉུང་བ་དང་། རྩ་སྔགས་གཟིར་ཤམ་ཅན་མཐར། ཕུང་བྱེད་འགོང་པོ་སྤུན་དགུའི་བླ་ཤ་རེ་མ་ཏི་འགྲིམ་འགྲིམ་སོགས་མནན་པའི་སྐབས་བཞིན་བླ་འགུགས་ཀྱི་སྔགས་སུམ་བརྒྱ་ལས་མི་ཉུང་བ་བཟླས་མཐར། ཧཱུྃ་ཛཿ དཔལ་གྱི་བཀའ་སྡོད་གཏུམ་རྔམས་འཇིགས་པའི་གཟུགས༔ ཞེས་སོགས་སྨད་ལས་སྐབས་བཞིན་འགུགས་འཆིང་སྡོམ་མྱོས་བཞིའི་ལས་བསྐུལ། ཐུན་གཏོར་ལ་རཀྟས་བྲན་ནས་སྔར་

བཞིན་དམིགས་བྱ་འགུགས་བསྟིམ་དང་བསྒྲལ་སྤར་གྱི་དམིགས་པ་མན་ངག་བཞིན་བྱས་མཐར། རྃ་ཡྃ་ཁྃ། སྟོང་པའི་ངང་ལས་གཏོར་སྣོད་དམར་གྱི་དུང་ཆེན་སོགས་བྱིན་བརླབ་སྔགས་བསྔོས་སྨད་ལས་ལྟར་ལ། ཧཱུྃ༔ བདུད་འདུལ་དབང་དྲག་ཆེན་པོ་སོགས་ཀྱིས་ཐུན་གཏོར་ཕྱི་རོལ་དུ་ཕུལ་བས་ཐུན་དང་པོ་གྲུབ། ཐུན་གཉིས་པ་དང་གསུམ་པའང་ལས་བྱང་གི་མཆོད་བརླབ་ནས་བརྩམ་ཐུན་གཏོར་བར་གོང་དང་འདྲ། ཐུན་བཞི་པ་ལ། བཟླས་པའི་རྗེས་སུ་སྲུང་མའི་གཏོར་ཆོག་དང་ཚོགས་བྱིན་རླབས་ནས་བསྒྲལ་བསྟབ་ཀྱི་བར་གྲུབ་པ་དང་། བསྐུལ་ནས་ཐུན་གཏོར་གྱི་བར་སྔར་བཞིན་དང་། དེ་ནས་ཚོགས་ལྷག་དང་དམ་ཅན་གཏོར་སྐྱོང་སོགས་ཆོ་གའི་རྗེས་ཀྱི་ལས་རིམ་རྣམས་མཐར་དབྱུང་། ཚུལ་དེ་ལྟ་བུའི་སྒོ་ནས་ཁུག་པའི་རྟགས་མཐོང་གི་བར་རམ་ཞག་གྲངས་ཇི་ཙམ་བསྒྲུབ་པའི་སུམ་ཆ་གཅིག་ལ་འབད་དོ། །དེ་ནས་ཨར་གཏད་དངོས་ལ། ཆོ་གའི་ཆིངས་སྔ་མ་ལྟར་ལ་འགུགས་པའི་ལས་ཤར་ཙམ་གྱི་རྗེས་སུ། ལིངྒ་འགོང་པོ་དངོས་སུ་གསལ༔ ཞེས་སོགས་ཀྱིས་རྩ་སྔགས་གཟིར་སྔགས་ཨར་གཏད་སྔགས་གསུམ་སྦྲེལ་བ་དགུ་བརྒྱ་ལས་མི་ཉུང་བ་བཟླ་ཞིང་ཐུན་རྫས་

ལ་ཁ་རླངས་མ་ཤོར་པར་ལག་ངར་བརྒྱུད་ནས་ཧུས་གདབ་ལ། ཧཱུྃ༔ ཁྲག་འཐུང་ཁྲོས་པ་སོགས་ཀྱིས་ཐུན་དབབ། མཐར་གོང་བཞིན་ཐུན་གཏོར་གཏོང་བ་བཅས་ཐུན་ཐམས་ཅད་ལ་འདྲ་ཞིང་། ཆོ་གའི་འགྲོས་སྔ་མ་ལྟ་བུས་འགོང་པོ་ཐུལ་བའི་རྟགས་མཐོང་གི་བར་རམ་ཞག་གྲངས་ཇི་ཙམ་བྱ་བའི་སུམ་ཆ་གཉིས་ལ་འབད་དོ། །གྲོལ་ཉིན་གྱི་ཐུན་རྗེས་མ་ལ། ཐུན་དབབ་ཕུར་གདབ་བཅས་གྲུབ་ནས། མནན་པས་མཐའ་བསྡུ་བར་འདོད་ན་ལིངྒ་རྣམས་དྲིལ་ཏེ་གཞུག་པ་སོགས་མནན་ཆས་སྤྱི་ལྟར་བྱས་ལ་མནན་པའི་ཆོ་ག་ཁྲིགས་ལྟར་ལག་ཏུ་ལེན། བསྲེག་པས་མཐའ་བསྡུ་བར་འདོད་ལིངྒ་རྣམས་ཁ་ཕྱེས་ལ་ཐད་ཀར་བརྒྱང་། ཐབ་དང་བསྲེག་རྗས་ཆོ་རྣམས་དྲག་སྲེག་དཀྱུས་ལྟར་ལག་ཏུ་བླང་བར་བྱ་བ་ཡིན་ལ། སྐབས་འགའ་ཞིག་ཏུ་སྤྲོད་པ་བསྡུ་བའི་སྲེག་ཆོག་ཙམ་གྱིས་མཐའ་བསྡུ་བར་འདོད་ནའང་དཀྱུས་སུ་བསྟན་པ་ཉིད་ཀྱིས་དོན་འགྲུབ་པ་སྟེ་ལོངས་སྐབས་དང་བསྟན་པས་ཆོག་གོ །ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །།

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་དང་འབྲེལ་བར་རྒྱལ་འགོང་གིཟ་ཁ་སྤོ་ཐབས།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཕྲིན་ལས་དང་འབྲེལ་བར་རྒྱལ་འགོང་གིཟ་ཁ་སྤོ་ཐབས་བཞུགས་སོ། །

ན་མོ་མ་ཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [བླ་མ་དབང་དྲག་འཆོལ་བའི་ཕྲིན་ལས་ལ་བརྟེན་ནས་རྒྱལ་འགོང་གི་ཟ་ཁ་སྤོ་བར་འདོད་ན། སྲོད་དང་ཐོ་རངས་གང་རུང་དུས་གནད་དང་བསྟུན་ཏེ། མདོས་སྣོད་ཚུར་ལེན་མི་དགོས་པའི་གཞི་ལ་བག་ཟན་གྱིས་རྒྱལ་འགོང་གི་གཟུགས་ཁྲུ་གང་ལས་མི་ཆུང་བ་འགྲེང་སྟབས་ཅན་ལུས་ལ་གཟན་ཤམ་སོགས་བཙུན་ཆས་དང་མགོ་ལ་བསྭེ་ཐེབ་གྱོན་པ། ལག་གཉིས་མདུན་དུ་བཟེད་དེ་ལེན་པའི་ཚུལ་ཅན། འཁོར་དུ་སྔགས་གཟུགས། བཙུན་གཟུགས། སྐྱེས་པ། བུད་མེད། བྱིས་པ། སྤྲེའུ། བྱ་དེ་ཕོ། ཐེའུ་རང་སོགས་ལྟོག་འགོང་མང་པོས་བསྐོར་བ་ཞིག་བཟོས་ལ། དེའི་མདུན་དང་མཐའ་སྐོར་དུ་རྩམ་རྐྱལ་སྤྲུགས་པའི་ཕྱེ། ཇ་རོ། མར་ལྐོག །རུས་པ། སྦང་མ། ཚྭ་ཁུག་དྲེག་པ། ཞོ་དྲེག །གཞན་ཡང་བཟའ་བཏུང་གི་ལྷག་མ། གྱོན་གོས་སྙིང་པོའི་དྲས་དུམ། རྫ་སྣོད་ཕོར་སྡེར་ཆག་དུམ་རས་མ། ཆངས་བུ། ཏིང་ལོ། མཆོད་ཆ་རལ་རོལ་སོགས་དཀོར་ཆ་སྣ་ཚོགས་པ་བཤམ། བདག་ཉིད་ཡི་དམ་གྱི་ང་རྒྱལ་དང་བཅས། མདུན་གྱི་གཟུགས་ལ་དམིགས་ཏེ།] ན་མོ། དཀོན་མཆོག་གསུམ་གྱི་བདེན་པ་དང་། །རྩ་བ་གསུམ་གྱི་བྱིན་རླབས་དང་། །ཆོས་སྐྱོང་སྲུང་མའི་མཐུ་སྟོབས་ཀྱིས། །གནོད་བྱེད་རྒྱལ་འགོང་དམ་སྲི་རྣམས། །མདུན་གྱི་གཟུགས་ལ་ཐིམ་

པར་གྱུར། །ཨ་ཀརྵ་ཡ་ཛཿཞེས་ལན་གསུམ་སོགས་ཀྱིས་བཀུག་ནས་དངོས་སུ་[གྱུར་པར་བསམ། ཡས་སྟག་ལ་ཆུ་གཙང་བྲན་ཅིང་།] རྃ་ཡྃ་ཁྃ། སྟོང་པའི་ངང་ལས་རིན་ཆེན་སྣོད་ཡངས་པར། །ཁྃ་ཡིག་ལས་བྱུང་གླུད་གཏོར་རྒྱ་ཆེ་བ། །འདོད་པའི་ཡོན་ཏན་ལྔ་དང་རབ་ལྡན་ཏེ། །སོ་སོར་མོས་པའི་ར་མཆོག་ཆར་འབེབས་གྱུར། །[ཞེས་བྱིན་བརླབས།] བདེ་གཤེགས་རིན་ཆེན་མང་དང་གཟུགས་མཛེས་དང་། །འབྱམས་ཀླས་འཇིགས་ཀུན་བྲལ་ལ་ཕྱག་འཚལ་ལོ། །ཨོྃ་ཨ་ཀཱ་རོ་མུ་ཁཾ་སརྦ་ངྷརྨཱ་ཎཱཾ་ཨཱདྱ་ནུཏྤནྣ་ཏྭོཏྟ་ཨོཾ་ཨཱཿཧཱུྃ་ཕཊ་སྭཱ་ཧཱ། [ཞེས་བརྒྱ་རྩ་སོགས་ཀྱིས་བསྔོས་ལ།] ཧཱུྃ༔ རྒྱལ་པོ་འཁོར་དང་བཅས་པ་རྣམས༔ འདི་རུ་བཞུགས་པ་ཡུན་རིང་བས༔ ཟས་ནོར་དཀོར་ཆ་ཐམས་ཅད་སྟོངས༔ རྒྱལ་པོ་ཆགས་པའི་རྟེན་དང་བྲལ༔ ཕ་ཀི་ཕྱུག་པོ་ཆེ་གེ་མོ༔ བང་མཛོད་ནོར་གྱིས་མི་ཤོང་འདུག༔ ཚད་མང་ཟས་སྐོམ་མི་ཤོང་འདུག༔ གོ་ཁ་མི་ཡིས་གང་ནས་འདུག༔ རྟ་ར་རྟ་ཡིས་གང་ནས་འདུག༔ མཛོ་ར་མཛོ་ཡིས་གང་ནས་འདུག༔ ལྷས་ར་འབྲི་ཡིས་གང་ནས་འདུག༔ ར་ཚང་ར་ཡིས་གང་ནས་འདུག༔ ལུག་ཚང་ལུག་གིས་གང་ནས་འདུག༔

སྒོ་ཁྱི་གསེར་མགོ་རྔ་བརྒྱན་འདུག༔ སྤྲེའུ་ནོར་བུས་བརྒྱན་པ་འདུག༔ ལྷ་ཆ་རོལ་མོ་དཔག་མེད་འདུག༔ རྒྱལ་པོ་ཆེན་པོ་ཕེབས་ཡོང་ཟེར༔ གསེར་ཁྲི་གཡུ་ཁྲི་བཤམས་ཤིང་འདུག༔ ལོངས་སྤྱོད་སྣ་དགུ་སྦྱར་ཞིང་འདུག༔ རོལ་མོ་སྣ་ཚོགས་སྦིར་ཞིང་འདུག༔ རྒྱལ་པོ་བྱོན་པའི་ས་རེ་བཟང་༔ རྒྱལ་པོ་བྱོན་ལམ་ཉམས་རེ་དགའ༔ རྒྱལ་པོ་བཞུགས་ཡུལ་དང་རེ་སྤྲོ༔ རྒྱལ་པོ་ཆེན་པོ་དེ་རུ་གཤེགས༔ འདི་ན་དཀོར་ཆ་སྟོངས་པའི་ལྷག༔ སྣམ་རས་སྣ་ཚོགས་ཁྱེད་ལ་རྫོངས༔ ཕོར་སྡེར་གས་ཆག་ཁྱེད་ལ་རྫོངས༔ མཆོད་ཆ་རལ་རོལ་ཁྱེད་ལ་རྫོངས༔ རྩམ་ཟད་རྐྱལ་པ་བརྡབ་ཕྱེ་རྫོངས༔ ཞོ་ཟད་ཟོམ་དྲེག་སྔོ་ནག་རྫོངས༔ ཚྭ་ཟད་ཚྭ་ཁུག་བརྡབ་ནས་རྫོངས༔ ཆང་ཟད་སྦང་མ་འབུས་ཁྱེར་རྫོངས༔ ཤ་ཟད་རུས་པ་ཁྲལ་ཁྲོལ་རྫོངས༔ ཇ་ཟད་ཇ་རོ་ཉལ་ཉིལ་རྫོངས༔ མར་ཟད་མར་ལྐོག་རལ་རྡོལ་རྫོངས༔ ལྷག་རོལ་གང་ཡོད་ཁྱོད་ལ་རྫོངས༔ འདི་རུ་ཆགས་པའི་རྟེན་མེད་པས༔ རྒྱལ་པོ་འཁོར་དང་བཅས་པ་རྣམས༔ ཕྱུགས་པོ་ཆེ་གེའི་ནང་དུ་གཤེགས༔ དེ་རུ་རྒྱལ་པོ་རྟེན་ཆོས་ཤིག༔ ད་ནི་མྱུར་དུ་མ་གཤེགས་ན༔ ཁྱིམ་འདིར་

དབང་དྲག་འབར་བ་ཡིས༔ ཕོ་བྲང་བཅས་ནས་ཕྱི་ནང་ཀུན༔ གནམ་ལྕགས་སྡིག་པ་འབར་བས་གང༔ ཁྱོད་ཀྱི་ཤ་ཁྲག་མ་ལུས་པ༔ ཧབ་ཧབ་བཟོས་སུ་རོལ་པར་འགྱུར༔ དེ་བས་ད་ལྟ་ཉིད་དུ་གཤེགས༔ ཞེས་བརྗོད་མཐར། གདོན་གཟུགས་དཀོར་ཆ་དང་བཅས་པ་ཕྱི་མིག་མི་བལྟ་བར་ཁྱེར་ལ། དམིགས་བསལ་རང་ལ་སྡང་དགྲའི་རིགས་ཡོད་ན་དེའི་ཁང་པའི་ཕྱོགས་སུ་ཁ་ཕར་བསྟན་ཏེ་བསྐྱལ། དེ་མིན་ལམ་གྱི་བཞི་མདོ་དང་ཆུ་བོའི་གཞུང་སོགས་གང་འོས་སུ་བསྐྱལ་ལ་ཕྱི་མིག་མི་བལྟ་བར་ནང་དུ་ལོག །བཀའ་བསྒོ་དྲག་སྔགས་དང་བཅས་གནས་ཁང་གི་ནང་ཀུན་གུ་གུལ་སོགས་རྫས་རྒོད་ཀྱི་དུད་པ་འཚུབས་འཁྱིལ་དུ་བཏང་། ཐུན་གྱིས་བྲབ་སྟེ་ཕྱིར་བསྐྲད་ལ་སྲུང་འཁོར་བརྟན་པོ་བསྒོམ། སྲུང་བའི་འཁོར་བྱང་ཡོད་ན་སྒོ་གང་དུ་སྦྱར། དེ་ལྟར་དོར་བའི་གཟུགས་འགྲོས་དཀོར་ཆ་རྣམས་ཕ་རོལ་པོའི་སྒོ་ཁྱིས་ཟོས་ན་བཟང་། མ་ཟོས་ན་བསྐྱར། རང་གི་སྒོ་ཁྱིར་བཟའ་རུ་མི་འཇུག །འདིས་ནི་རྒྱལ་འགོང་གིས་ཟ་ཁ་ཟུག་པ་བཟློག་པར་འགྱུར། ལན་གསུམ་བསྐྱར་བས་མ་བཟློག་ན། གནད་དུ་དབབ་པ་དང་། ཨར་ལ་གཏད་པ་དང་། ཤི་ས་བསྟན་པས་འདུལ་བར་བྱ་སྟེ། དེའི་ཚུལ་ནི་ཐུན་མིན་མན་ངག་ལས་ཤེས་པར་བྱའོ། །ཞེས་པའང་གཏེར་བྱོན་བླ་མ་དབང་དྲག་འབར་བའི་མན་ངག་

ལས་ཚོགས་ལ་བརྟེན་ནས་འཇིགས་བྲལ་ཡེ་ཤེས་རྡོ་རྗེས་འཇུག་བདེའི་ལག་ལེན་ཁྲིགས་སུ་བསྡེབས་པ་ཛ་ཡནྟུ།། །།

བཀའ་བསྒོ་བྱེད་ཚུལ་ལོག་འདྲེན་ཀླད་འགེམ་རྡོ་རྗེའི་ཐོག་ཆར།

[བཀའ་བསྒོ་བྱེད་ཚུལ་ལོག་འདྲེན་ཀླད་འགེམ་རྡོ་རྗེའི་ཐོག་ཆར་ཞེས་བྱ་བ་བཞུགས་སོ། །] ན་མོ་མ་ཧཱ་གུ་རུ་བཛྲ་ཀྲོ་ངྷ་ལོ་ཀོཏྟཱ་ར་ཡེ། [གང་དག་གདོན་གྱིས་ཉེན་པ་སོགས་ལ་བཀའ་བསྒོ་བྱིན་རླབས་བྱེད་པར་འདོད་ན། །] བདག་ཉིད་སྐད་ཅིག་གིས་བདུད་འདུལ་དབང་དྲག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་ཚུལ་ཅན་གཟི་བརྗིད་དུས་མཐའི་མེ་ལྟར་འབར་བས་གདུག་པ་ཅན་རྣམས་ཟིལ་གྱིས་གནོན་པའི་སྐུར་གྱུར་པར་[བསམ་ལ།] ཧཱུྃ་ཧཱུྃ་ཧཱུྃ༔ ང་ནི་ཡེ་ནས་ཁྲོ་བོའི་རྒྱལ༔ ཆོས་ཉིད་ངང་གིས་ཁྲོས་པས་ན༔ རྣམ་རྟོག་རྒྱུ་བའི་གནས་མེད་པས༔ མཚན་འཛིན་ཆོས་སྐུའི་ཀློང་དུ་དེངས༔ ཧཱུྃ་ཧཱུྃ་ཧཱུྃ༔ ང་ནི་ཡེ་ཤེས་རོལ་པའི་སྐུ༔ ཐུགས་རྗེ་

ཤུགས་ཀྱིས་ཁྲོས་པས་ན༔ ལོག་རྟོག་རྒྱུ་བའི་གནས་མེད་པས༔ གཉིས་འཛིན་ལོངས་སྐུའི་དབྱིངས་སུ་དེངས༔ ཧཱུྃ་ཧཱུྃ་ཧཱུྃ༔ ང་ནི་དབང་དྲག་འཆོལ་བའི་སྐུ༔ གདུལ་དཀའི་གཤེད་དུ་ཁྲོས་པས་ན༔ དམ་འགོང་རྒྱུ་བའི་གནས་མེད་པས༔ བགེགས་ཚོགས་སྤྲུལ་སྐུའི་ངང་དུ་དེངས༔ ཧཱུྃ་ཧཱུྃ་ཧཱུྃ༔ ཁྲག་འཐུང་ཆེན་པོའི་བཀའ་བྱུང་གིས༔ གནོད་བྱེད་ལོག་འདྲེན་འབྱུང་པོ་རྣམས༔ འབར་བའི་གནས་འདིར་མ་སྡོད་ཅིག༔ ཁྱོད་ལ་བསྡིགས་པར་འགྱུར་ཏ་རེ༔ ན་མོ་རྫོགས་པའི་སངས་རྒྱས་བཅོམ་ལྡན་འདས་རྐང་གཉིས་རྣམས་ཀྱི་མཆོག་ཏུ་གྱུར་པའི་བདེན་པ་དང་། དམ་པའི་ཆོས་ཞི་བ་འདོད་ཆགས་དང་བྲལ་བའི་བདེན་པ་དང་། འཕགས་པའི་དགེ་འདུན་ཚོགས་རྣམས་ཀྱི་མཆོག་ཏུ་གྱུར་པའི་བདེན་པ་དང་། ཆོས་ཉིད་རང་བཞིན་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པའི་སྟོབས་གང་གིས་བསྲུང་བྱ་ཆེ་གེ་མོ་འདི་ལ་དང་པོ་ནད་ཀྱི་སྣ་འདྲེན་པ། བར་དུ་ནད་ཀྱི་གཞི་བཅའ་བ། ཐ་མ་ནད་ལ་མི་ཕན་པར་བྱེད་པའི་སྟེང་གདོན་གཟའ་དང་རྒྱུ་སྐར། འོག་གདོན་ཀླུ་དང་ས་དག །བར་གདོན་

བཙན་དང་རྒྱལ་པོ། འཕྲལ་གདོན་ཟ་འདྲེ་ཤི་གཤེད་ལ་སོགས་བགེགས་རིགས་སྟོང་ཕྲག་བརྒྱད་ཅུ་དང་། གདོན་རིགས་ཉི་ཁྲི་ཆིག་སྟོང་དུ་གཏོགས་པའི་བགེགས་གདོན་གྱི་རིགས་སུ་གྱུར་པ་ཐམས་ཅད་འདིར་མ་གནས་པར་གཞན་དུ་འགྲོ་བར་གྱིས་ཤིག །གང་དག་མི་འགྲོ་བ་རྣམས་བདག་ཉིད་དབང་དྲག་འབར་བའི་བྱང་ཆུབ་ཀྱི་སེམས་ཁྲོ་བོ་འཆོལ་བའི་སྤྲིན་དུ་སྤྲོས་པས་སྐད་ཅིག་ཉིད་ལ་རྡུལ་དུ་བརླག་པར་འགྱུར་ཏ་རེ། [ཞེས་བསྔགས་གུལ་གྱིས་བདུག་ཅིང་ཡུངས་དཀར་གྱིས་བྲབ་བཞིན། རྩ་སྔགས་མཐར།] ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཨོཾ་སུམྦྷ་ནི་[སོགས་]ཧཱུྃ་[བཞིའི་སྔགས་དང་། སྟོང་པ་ཉིད་ཀྱི་ངང་ནས་ཧཱུྃ་གང་མང་བརྗོད།] མཐར་བགེགས་ཚོགས་ལོག་པར་འདྲེན་པ་ཐམས་ཅད་ཕྱིར་བསྐྲད་ཁྲོ་བོའི་སྤྲིན་འོད་ཟེར་མུ་མེད་པ་དང་བཅས་ཚུར་འདུས་བསྲུང་བྱའི་ལུས་ལ་ཐིམ་པས་བསྲུང་བྱ་ཉིད་སྐད་ཅིག་གིས་ཆེ་མཆོག་དབང་དྲག་འབར་བའི་སྐུར་ལམ་གྱིས་གྱུར་པའི་གནས་གསུམ་དུ་འབྲུ་གསུམ་དང་། ཕྱི་རོལ་ཕྱག་རྒྱའི་གོ་ཆ་ཡེ་ཤེས་ཀྱི་མེ་འབར་བས་ཡོངས་སུ་བཅིངས་པས་ཅིས་ཀྱང་མི་ཆོད་མི་ཤིགས་པའི་བདག་ཉིད་དུ་གྱུར་པར་[བསམས་ལ།

རྡོ་རྗེའམ་ཕུར་པ་སོགས་ཕྱག་མཚན་ནམ་སྔགས་ཀྱི་ཕྲེང་བ་བསྲུང་བྱའི་སྤྱི་བོར་བཞག་ཅིང་།] ཨོཾ་ཨཱཿཧཱུྃ། རྒྱལ་བ་དགོངས་པའི་བརྒྱུད་པ། རིག་འཛིན་བརྡ་ཡི་བརྒྱུད་པ། གང་ཟག་སྙན་ཁུང་གི་བརྒྱུད་པ། བཀའ་བབས་ལུང་བསྟན་གྱི་བརྒྱུད་པ། སྨོན་ལམ་དབང་བསྐུར་གྱི་བརྒྱུད་པ། མཁའ་འགྲོ་གཏད་རྒྱའི་བརྒྱུད་པ། རྟོགས་པ་དོན་གྱི་བརྒྱུད་པའི་དཔལ་ལྡན་བླ་མ་དམ་པ་རྣམས་དང་། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདག་ཉིད་བདུད་འདུལ་ཆེ་མཆོག་རྡོ་རྗེ་གྲོ་བོ་ལོད་ཀྱི་ལྷ་ཚོགས་མཁའ་འགྲོ་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་ཐུགས་བརྩེ་བ་ཆེན་པོས་ཉེ་བར་དགོངས་ཏེ་བསྲུང་བྱ་ཆེ་གེ་མོ་འདིའི་ལུས་ལ་སྐུའི་སྒོ་ནས་བྱིན་གྱིས་བརླབ་པར་བཛད་དུ་གསོལ། ངག་ལ་གསུང་གི་སྒོ་ནས་བྱིན་གྱིས་བརླབ་པར་མཛད་དུ་གསོལ། ཡིད་ལ་ཐུགས་ཀྱི་སྒོ་ནས་བྱིན་གྱིས་བརླབ་པར་མཛད་དུ་གསོལ། འདུག་ས་འདི་རུ་བྱིན་གྱིས་བརླབ་པར་མཛད་དུ་གསོལ། མྱུར་བ་ཉིད་དུ་བྱིན་གྱིས་བརླབ་པར་མཛད་དུ་གསོལ། སྐད་ཅིག་ཉིད་ལ་བྱིན་གྱིས་བརླབ་པར་མཛད་དུ་གསོལ། ཨོཾ་ཨཱཿཧཱུྃ༔ གུ་རུ་ངྷེ་ཝ་ཌཱ་ཀི་ནཱི་ཀཱ་ཡ་

ཝཱ་ཀ་ཙིཏྟ་སིངྔྷི་ཕ་ལ་ཧཱུྃ་ཨཱ༔ [ཞེས་དང་།] སླར་ཡང་རྩ་བརྒྱུད་ཀྱི་བླ་མ་ཐམས་ཅད་སྟེང་གི་ནམ་མཁར་བྱོན་ནས་བཀྲ་ཤིས་པའི་མེ་ཏོག་གི་ཆར་འབེབས་བཞིན་བསྲུང་བྱ་ལ་ཐིམ་པར་མོས་ཤིང་། [རྟེན་འབྲེལ་སྙིང་པོ་བཟླས་པའི་མེ་ཏོག་འཐོར་ལ།] མི་འགྱུར་ལྷུན་པོ་[སོགས།] ཚངས་དང་ལྷ་དབང་[སོགས།] བགེགས་རིགས་སྟོང་ཕྲག་[སོགས།] ལོ་བརྒྱ་འཚོ་ཞིང་[སོགས་ཤིས་བརྗོད་ཇི་ལྟར་རིགས་པ་སྤེལ་བས་གྲུབ་བོ། །ཞེས་པའང་སྔགས་བན་པདྨ་ཀློང་གྲོལ་གྱིས་དོན་དུ་གཉེར་བའི་ངོར་འཇིགས་བྲལ་ཡེ་ཤེས་རྡོ་རྗེས་བྲིས་པ་མ་རུང་གདོན་ཚོགས་གཅིག་ཅར་དུ་འཇོམས་པའི་རྒྱུར་གྱུར་ཅིག། ཛ་ཡནྟུ། །]

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་དབང་ཆོག་སྨིན་གྲོལ་འདོད་འཇོ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་དབང་ཆོག་སྨིན་གྲོལ་འདོད་འཇོ་ཞེས་བྱ་བ་བཞུགས་སོ།། །།

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། [སློབ་དཔོན་མཚན་ཉིད་དང་ལྡན་པས་དབང་དྲག་གསང་བའི་དཀྱིལ་འཁོར་དུ་སྐལ་ལྡན་གྱི་སློབ་མ་གཞུག་ཅིང་སྨིན་པར་འདོད་པས། བཀྲ་ཤིས་བྱིན་ཆགས་པའི་གནས་སུ་ཡར་མར་གྱི་ཚེས་བཅུ་སོགས་དགེ་བའི་དུས་ལ་བབས་པའི་ཚེ། གཙང་མའི་སྟེགས་བུར་གཞུང་མཐུན་གྱི་དཀྱིལ་འཁོར་རས་བྲིས་དགྲམ་པའམ། མཎྜལ་དྲི་བཟང་གིས་བྱུག་པར་མེ་ཏོག་དམར་པོའི་ཚོམ་བུ་གཙོ་འཁོར་ཕྱེད་པར་བཀོད་པའི་ཁར་མཉྫིའི་སྟེང་དུ་རྣམ་བུམ་སོ་ལྔའི་བཅུད་ལྡན་མགུལ་ཆིངས་ཁ་རྒྱན་གྱིས་སྤྲས་པ་འགོད། མདུན་དུ་གཙོ་བོའི་སྐུ་ཙཀ། གཡས་སུ་ཕྱག་མཚན་རྡོ་རྗེ། ཕུར་བུ། ལྕགས་སྡིག་ཁྱུང་དམར། གཡོན་དུ་ཐོད་པའམ་རཀྴའི་ཕྲེང་བ། ཧཱུྃ་དམར། ཧཱུྃ་ཡིག་ལྔ་ལྡན། རྒྱབ་ཏུ་གཏོར་ཆེན་སྐུ་ཙཀ་

དར་གདུགས་ཀྱི་སྤྲད་པ་དང་ཐོད་ཆང་། སྡེ་བརྒྱད་སྲོག་གཏད་བྱ་ན་ཐོད་པ་མཚན་ངན་ནང་དུ་སྡེ་བརྒྱད་སྲོག་ཡིག་བྲིས་པ། མདུན་རྒྱབ་གང་བདེར་མཆོད་གཏོར་སྨན་རཀ །བཀའ་སྲུང་གི་གཏོར་མ་མཐའ་སྐོར་དུ་ཆུ་གཉིས་ཉེར་སྤྱོད་ལྔ་བཅས་བཤམ། གཞན་ཡང་ཚོགས་ཀྱི་ཡོ་བྱད་སོགས་ཉེ་བར་མཁོ་བའི་ཆ་རྐྱེན་རྣམས་ཚང་བར་འདུ་བྱས་ལ། ཕྲིན་ལས་ཀྱི་གཞུང་བསྲང་སྟེ་བདག་མདུན་དབྱེར་མེད་སྣང་སྲིད་དག་པ་རབ་འབྱམས་ཆེན་པོའི་ངང་ནས་བསྙེན་སྒྲུབ་ཀྱི་བཟླས་པ་བྱ་ཞིང་། སྲུང་མའི་གཏོར་འབུལ་དང་ཚོགས་ཀྱི་མཆོད་པ་ཞལ་བསྟབ་ཀྱི་བར་དུ་བཏང་ལ་ལས་བུམ་རྟ་སྔགས་ཀྱིས་བརླབ། རིག་པའི་མེ་ཏོག་དོར་བའམ་གདོད་ནས་མཉམ་རྫོགས་ཆེན་པོའི་དཀྱིལ་འཁོར་དུ་དོན་གྱི་དགོངས་པ་ལ་བཟླ་བས་འཇུག་པ་སྔོན་དུ་འགྲོ་བས། དབང་བསྐུར་དངོས་ལ། སྣོད་དང་ལྡན་ཅིང་ཉམས་ལེན་ལ་བརྩོན་ངེས་

པའི་སློབ་མ་ཧ་ཅང་མང་པོ་མ་ཡིན་པ་ཁྲུས་ནས་དབྱུང་། བགེགས་གཏོར་བཏང་ཞིང་བཀའ་བསྒོ་དྲག་སྔགས་ཡུངས་ཐུན་གྱི་སྦྱོར་བས་བསྐྲད་དེ་སྲུང་འཁོར་བསྒོམ། སེམས་བསྐྱེད་གསལ་བཏབ་ལ་ཆོས་བཤད་ཇི་ལྟར་རིགས་པས་ཐོག་དྲངས་ཏེ། དེའང་ཇི་སྐད་དུ་རྩ་གཞུང་ལས། སྣང་བ་མཐའ་ཡས་སྤྲུལ་པའི་སྐུ༔ རྒྱ་གར་མཁས་པ་པད་འབྱུང་བདག༔ རང་བྱུང་པདྨའི་སྙིང་པོ་ལས༔ བརྫུས་ཏེ་ཞིང་འདིར་སྲིད་པ་བཟུང་༔ ཨོ་རྒྱན་རྒྱལ་པོའི་སྲས་སྐལ་དུ༔ ཕྱིན་ནས་རྒྱལ་སྲིད་ཆོས་བཞིན་བསྐྱང་༔ རྒྱ་གར་ཕྱོགས་མཚམས་ཀུན་ཏུ་ཉུལ༔ ཆོས་ཀྱི་སྒྲོ་འདོགས་མ་ལུས་བཅད༔ དུར་ཁྲོད་བརྒྱད་དུ་སྤྱོད་པ་སྤྱད༔ མཆོག་ཐུན་དངོས་གྲུབ་ཐམས་ཅད་ཐོབ༔ མངའ་བདག་རྒྱལ་པོའི་བཞེད་པ་བཞིན༔ སྨོན་ལམ་དབང་གིས་བོད་དུ་འོངས༔ གདུག་པའི་ལྷ་སྲིན་འབྱུང་པོ་བཏུལ༔ གསང་སྔགས་བསྟན་པའི་སྒྲོན་མེ་སྦར༔ ནམ་ཞིག་ལངྐའི་གླིང་བཟུང་ནས༔ འཛམ་གླིང་བོད་ཡུལ་སྐྱེ་འགྲོ་རྣམས༔ སྲིན་པོའི་འཇིགས་ལས་བསྐྱབ་པར་བྱེད༔ སྐུ་ཚབ་སྤྲུལ་སྐུ་བྱིན་གྱིས་བརླབ༔ གསུང་ཚབ་གདམས་པ་གཏེར་དུ་གཏམས༔ ཐུགས་དགོངས་ལས་ཅན་སྙིང་ལ་འབེབས༔ འགྲོ་

དོན་འཁོར་བ་མ་སྟོངས་བར༔ གང་འདུལ་སྤྲུལ་པ་རྒྱུན་མི་འཆད༔ ཀུན་ལ་ཕན་དྲིན་ཆེ་བར་བྱས༔ སྐལ་ལྡན་མོས་པའི་བློ་ཡོད་ན༔ གསོལ་བ་ཐོབ་དང་བྱིན་རླབས་འཇུག༔ ངེས་ཤེས་སྐྱེད་ཅིག་རྗེས་འཇུག་རྣམས༔ ཞེས་གསུངས་པ་ལྟར། དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་གཅིག་ཏུ་བསྡུས་པ། དཀྱིལ་འཁོར་ཀུན་གྱི་དབང་ཕྱུག་གུ་རུ་རིན་པོ་ཆེ་རྡོ་རྗེ་ཐོད་པའི་ཕྲེང་བ་རྩལ་འཆང་གང་ཉིད་བོད་ཡུལ་གདོང་དམར་མུན་པའི་གླིང་དུ་བསྟན་པའི་སྒྲོན་མེ་སྦར་བར་མཛད་པའི་སྐབས་སུ། མ་རུང་གདུལ་བར་དཀའ་བའི་མི་དང་མི་མ་ཡིན་ལྷ་སྲིན་གདུག་པ་ཅན་མཐའ་དག་འདུལ་བའི་སླད་དུ་གསང་བ་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོས་གཉེན་པོ་སྟོབས་ཀྱི་ཕྱག་རྒྱ་འབར་བའི་ཁྲོ་རྒྱལ་འཇིག་རྟེན་གསུམ་ན་ཆེ་བའི་མཆོག་གི་སྐུར་བཞེངས་པ་རྡོ་རྗེ་གྲོ་བོ་ལོད་ཅེས་མཚན་ཙམ་གྱིས་ཀྱང་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པར་མཛད་པའི་ཡེ་ཤེས་ཁྲོ་བོ་ཆེན་པོ་འདིའི་སྒྲུབ་ཐབས་

རྒྱས་བསྡུས་མཐའ་ཡས་པ་མཆིས་པལས། སྐབས་སུ་བབས་པའི་འདི་ནི་ཇི་སྐད་དུ། དེ་ཡང་གདོང་དམར་བོད་ཡུལ་མཐའ༔ ཁ་ཁྲ་མོན་གྱི་ས་མཚམས་ནི༔ སྤ་གྲོ་སྟག་ཚང་དཔལ་གྱི་ཕུག༔ སེང་གེ་བསམ་འགྲུབ་ཀེའུ་ཚང་དུ༔ ཁྲོ་བས་ཁྲོ་བོ་འདུལ་བའི་ཕྱིར༔ བདག་ཉིད་པདྨ་ཐོད་ཕྲེང་རྩལ༔ རྡོ་རྗེ་ཁྲོས་པའི་ཏིང་འཛིན་གྱིས༔ དབང་དྲག་འཆོལ་བའི་སྐུར་ལངས་ཏེ༔ མོན་བོད་གངས་ཅན་མཐའ་དབུས་ཀྱི༔ འདྲེ་བགེགས་རྒྱལ་བསེན་དམ་སྲི་བཏུལ༔ དྲེགས་ལྡན་ལྷ་འདྲེ་གཞི་བདག་ཚོགས༔ དབང་བསྡུས་སྲོག་སྙིང་དངོས་སུ་བླངས༔ གནས་དང་གཏེར་གྱི་གཉེར་ཁ་གཏད༔ དངོས་ཀྱི་གདུལ་བྱས་གོ་ཕྱེས་ཏེ༔ བརྒྱུད་ནས་མ་འོངས་ལས་ཅན་དོན༔ སྨིན་གྲོལ་བསྐྱེད་རྫོགས་གདམས་པའི་ཚུལ༔ མང་དུ་བསྟན་ཅིང་སོ་སོར་སྦས༔ དེ་དག་ཀུན་གྱི་སྙིང་པོའི་བཅུད༔ རྩ་གསུམ་ཐུགས་ཀྱི་སྒྲུབ་པའི་སྐོར༔ ཟབ་རྒྱས་ཁ་ཚང་དོན་འདྲིལ་བར༔ འབྲོག་བན་ལོ་ཙཱར་བརྩེ་བས་གདམས༔ རྒྱས་བསྡུས་སྐོར་ཚོ་བཞི་རུ་ཕྱེས༔ རྒྱས་པ་བདེ་གཤེགས་ཡངས་འདུས་སྐོར༔ སྐུ་ཚབ་ཡིད་བཞིན་དཔལ་འབར་དང་༔ མྱང་གྲོལ་བདེ་ཆེན་རིལ་བུར་བཅས༔ མོན་གྱི་སྟག་ཚང་དཔལ་ཕུག་གི༔ སྒོ་གདོང་སེངྒེ་འདྲ་

བའི་མགུལ༔ རྡོ་རྗེའི་ཀེའུ་ཚང་སུལ་དུ་གཏམས༔ འབྲིང་པོ་རིག་འཛིན་ཡོངས་འདུས་སྐོར༔ བོད་ཁམས་བདེ་བའི་མན་ངག་དང་༔ བདག་གི་ཕྱག་མཚན་ཐུགས་རྟེན་བཅས༔ མཆིམས་ཀྱི་གནམ་ལྕགས་འབར་བའི་བྲག༔ མཁར་རྔ་འདྲ་བའི་ལོགས་སུ་སྦས༔ བསྡུས་པ་གསང་བ་ཡོངས་འདུས་སྐོར༔ པདྨ་བཀོད་ཀྱི་མ་ཡིག་དང་༔ སྦས་ཡུལ་བདེ་བའི་མན་ངག་བཅས༔ རྒྱ་ལ་དཔལ་གྱི་རི་བོའི་འགྲམ༔ ཕ་ཝཾ་རྟེན་སྒམ་འདྲ་བར་སྦས༔ ཀུན་གྱི་སྙིང་པོའི་ཞུན་ཐིག་ནི༔ ཡང་གསང་འདུས་པ་རྩ་བའི་སྐོར༔ ཐུགས་ཀྱི་ཐིག་ལེ་དྭངས་མའི་བཅུད༔ ཕྱི་རོལ་གདོས་པོའི་ས་གཏེར་དུ༔ སྦ་ཞིང་འཇོག་པར་བློས་མ་ཐོངས༔ ང་སྤྲུལ་སྒྱུ་མའི་སྐྱེས་བུ་ཡི༔ དགོངས་ཀློང་དབྱིངས་ཀྱི་སྒྲོབ་བུར་སྦས༔ ཡེ་ཤེས་རིག་པའི་གཟུངས་སུ་གཏམས༔ ཞེས་གདམས་པར་མཛད་པའི་སྒྲུབ་སྐོར་སྔ་མ་རྣམས་རང་གཞན་ཡུལ་དུས་གནས་སྐབས་ཀྱི་རྟེན་ཅིང་འབྲེལ་བར་འབྱུང་བའི་ཉེར་ལེན་གྱིས་དངོས་སུ་འདོན་པའི་རྩོལ་བ་མ་བྱས་ཀྱང་། ཡང་གསང་འདུས་པ་སྙིང་པོའི་ཞུན་ཐིག་འདི་ཉིད་ཟབ་མོ་དགོངས་པའི་གཏེར་དུ་བརྡོལ་བ་ཡུན་རིང་

པོར་གསང་བའི་དམ་ཚིག་མཐར་ཕྱིན་པར་བྱས་ཏེ་དུས་ལ་བབས་པའི་མཚན་མ་མངོན་དུ་མཐོང་བ་ན་རིམ་པར་གསང་བའི་རྒྱ་བཀྲོལ་ནས་སྐལ་ལྡན་བརྒྱུད་པ་གསུམ་གྱི་བར་དུ་ཆིག་བརྒྱུད་དུ་གདམས་པ་འདི་ཉིད་ཀྱི་སྒོ་ནས་དབང་བསྐུར་བ་ལ་[སོགས་ཀྱིས་མཚམས་སྦྱར་ཏེ་མཎྜལ་འབུལ་དུ་གཞུག །] བླ་མ་དཀྱིལ་འཁོར་གྱི་འཁོར་ལོ་ཐ་མི་དད་པའི་སྤྱན་སྔར་སྒོ་གསུམ་གུས་པ་ཆེན་པོས་གསོལ་བ་འདེབས་པའི་འདིའི་རྗེས་ཟློས། བླ་མ་སངས་རྒྱས་ཆེ་བའི་མཆོགཿ ཧེ་རུ་ཀ་དཔལ་བདག་ལ་དགོངས༔ བདེ་ཆེན་གསང་བའི་དཀྱིལ་འཁོར་འདིར༔ ཐུགས་རྗེས་ཟུངས་ལ་དབང་བསྐུར་སྩོལ༔ [ལན་གསུམ།] བླ་མ་ཉིད་རྩ་གསུམ་ཀུན་འདུས་དབང་དྲག་རྡོ་རྗེ་གྲོ་ལོད་རྩལ་དངོས་སུ་སྣང་བ་ལ་བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་མཆིའོ་སྙམ་པས་འདིའི་རྗེས་ཟློས། ན་མོ༔ བརྒྱུད་པའི་རྩ་བ་བླ་མ་རྗེ༔ [སོགས་ལན་གསུམ།] མཁའ་ཁྱབ་ཀྱི་འགྲོ་བ་མ་ལུས་པའི་དོན་དུ་བླ་མ་དབང་དྲག་འབར་བའི་ལྷ་ཚོགས་བསྒྲུབ་ནས་གང་ལ་གང་འདུལ་གྱི་ཕྲིན་ལས་དྲག་པོས་མ་བསྒྲལ་བ་ཐམས་ཅད་ཡང་དག་པའི་མཐའ་ལ་བསྒྲལ་བར་བྱ་སྙམ་དུ་སེམས་བསྐྱེད་པ་

འདིའི་རྗེས་ཟློས། སེམས་བསྐྱེད་འགྲོ་བ་ཀུན་དོན་དུ༔ [སོགས་ལན་གསུམ།] བསགས་སྦྱོང་སྤེལ་གསུམ་གྱི་སྙིང་པོར་གྱུར་པ་ཡན་ལག་བཅུ་པའི་སྒོམ་དོན་རེ་རེ་བཞིན་གསལ་ཐོབ་ལ་འདིའི་རྗེས་ཟློས། ཧོཿ དབང་དྲག་འབར་བའི་ལྷ་ཚོགས་གཤེགས༔ [སོགས་ལན་གསུམ།] དབང་གི་ཡེ་ཤེས་སྣོད་བཅུད་དཀྱིལ་འཁོར་གྱི་རྟེན་འབྲེལ་ཚོགས་པ་ལས་ཐོབ་ཀྱང་དེ་ཉིད་འཛིན་པ་ནི་དམ་ཚིག་དང་སྡོམ་པ་ལ་རག་ལས་པ་ཡིན་པས་དམ་ཚིག་བདུད་རྩིའི་མནའ་ཆུ་འདི་ཉིད་ལྕེ་ལ་བཞག་པ་སྙིང་གི་དཀྱིལ་དུ་ཐིམ་སྟེ་དེ་བཞིན་གཤེགས་པ་ཐམས་ཅད་དང་མཉམ་པར་སྦྱོར་བའི་སྐུ་གསུང་ཐུགས་ཀྱི་དམ་ཚིག་ཐོབ་པར་མོས་ཤིག། འདི་ནི་དམ་ཚིག་བདུད་རྩིའི་ཆུ༔ དེ་རིང་ཁྱོད་ཀྱི་སྙིང་ལ་བསྟིམས༔ སངས་རྒྱས་ཀུན་དང་མཉམ་སྦྱོར་བའི༔ འདའ་དཀའ་རྡོ་རྗེའི་དམ་ཚིག་ཟུངས༔ ཉམས་ན་བསྲེགས་པར་འགྱུར་ཏ་རེ༔ བཛྲ་ས་མ་ཡ་ཨ་མྲྀ་ཏ་ཧཱུྃ༔ [ཞེས་དམ་ཆུ་སྦྱིན།] དེ་ནས་དབང་གི་གཞི་རྟེན་ཡེ་ཤེས་པ་དབབ་པ་ལ་ཁྱེད་རང་རྣམས་ལུས་གནད་བསྲང་། ངག་རླུང་འཆིང་། སེམས་གཞན་དུ་མ་ཡེངས་པར་དམིགས་པ་འདི་རྣམས་

རྩེ་གཅིག་ཏུ་སྒོམས་ཤིག །སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག །རྣམ་སྨིན་གདོས་བཅས་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པར་སྦྱངས། སྟོང་པའི་ངང་ལས་ཆུ་ལས་ཆུ་བུར་བརྡོལ་བ་བཞིན་དུ་ལྷའི་སྐུར་གྱུར་པ་ནི། ཁྱོད་རང་པདྨ་ཁྲག་འཐུང་རྩལ༔ འཆོལ་བའི་ཁྲོ་རྒྱལ་ཧེ་རུ་ཀཿ [སོགས་ནས།] གར་དགུའི་ཉམས་ཀྱིས་རྣམ་པར་རོལ༔ དེ་ལྟར་གསལ་བའི་ཐུགས་ཀར་གཡུང་དྲུང་དམར་པོའི་གྲྭ་བཞིར་ཧ་རི་ནི་སའི་ཡིག་འབྲུ་རྣམས་གསལ་ཞིང་འབར་བ། འོག་རླུང་གིས་བསྐུལ་བས་སྙིང་གའི་གཡུང་དྲུང་ཡིག་འབྲུ་དང་བཅས་པ་གཡོན་བསྐོར་དུ་མགལ་མེ་ལྟར་འཁོར་བ་ལས་བདེ་བའི་རང་བཞིན་ཅན་གྱི་འོད་ཟེར་ཉི་མ་བྱེ་བའི་གཟི་མདངས་ལྟ་བུ་འཕྲོས། བླ་མ་སྐུ་གསུམ་གྱི་ཞིང་ཁམས་རྣམས་སུ་བཞུགས་པའི་རྩ་གསུམ་རྒྱལ་བ་རབ་འབྱམས་དང་། ཁྱད་པར་ལྷོ་ནུབ་པདྨ་འོད་ཀྱི་ཕོ་བྲང་ནས་གུ་རུ་པདྨ་ཐོད་ཕྲེང་རྩལ་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་ལ་ཕོག་པས་ཐུགས་རྒྱུད་རང་དབང་མེད་པར་བསྐུལ། ཐམས་ཅད་ཀྱང་ཁྲོ་རྒྱལ་ཀུན་གྱི་རྗེ་བཙན་དཔལ་ཆེན་རྡོ་རྗེ་གྲོ་ལོད་ཀྱི་སྐུར་བཞེངས་ཏེ་ནམ་

མཁའ་བར་སྣང་ས་གཞིའི་ཁྱོན་ཁེངས་པར་སྐད་ཅིག་ལ་བྱོན་ཏེ་ཁྱེད་རང་རྣམས་ལ་ཐིམ་པས་ཡེ་ཤེས་ཆེན་པོའི་བྱིན་རླབས་རྒྱུད་ལ་ཞུགས་པའི་མོས་པ་རྩེ་གཅིག་ཏུ་མཛོད། [ཅེས་འབེབས་རྫས་བདུག་ཅིང་རོལ་མོ་དབྱངས་དང་བཅས་པས་ལས་བྱང་གི་བྱིན་འབེབས་མཐར་རྩ་སྔགས་དང་ཧཱུྃ་སུམ་སྦྲེལ་མང་དུ་བརྗོད་པ་བྱིན་དབབ།] ཡེ་ཤེས་པའི་རྒྱུན་དེ་ཉིད་བྱང་ཆུབ་མ་ཐོབ་ཀྱི་བར་དུ་བརྟན་པར་བྱས་པའི་མོས་པ་མཛོད། ཏིཥྛ་བཛྲ། [ཞེས་རྡོ་རྗེ་རྒྱ་གྲམ་མགོར་བཞག །] དེ་ལྟར་ཁྱེད་རང་རྣམས་དམ་ཚིག་ཡེ་ཤེས་དབྱེར་མེད་གདོད་ནས་གྲུབ་པའི་ཁྲོ་བོའི་རྒྱལ་པོ་ཆེན་པོའི་ཕྱག་རྒྱར་བཞེངས་པ་དེ་ཉིད། སླར་ཡང་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཡོངས་སུ་རྫོགས་པར་བྱིན་གྱིས་བརླབ་ཅིང་རབ་ཏུ་བརྟན་པར་བྱ་བའི་སླད་དུ་དངོས་གཞིའི་དབང་རྣམས་རིམ་པར་བསྐུལ་བ་ལ། བུམ་པ་འདི་ཉིད་བདུད་འདུལ་དབང་དྲག་འབར་བའི་བརྡ་དོན་རྟགས་ཀྱི་དཀྱིལ་འཁོར་ཡོངས་སུ་རྫོགས་པས་དབང་བསྐུར་བའི་ཚེ་བདུད་རྩིའི་ཆུ་རྒྱུན་གྱིས་ཁྱེད་རང་གི་སྒོ་གསུམ་གྱི་སྒྲུབ་པ་བག་ཆགས་དང་བཅས་པ་བཀྲུས། དབང་བཞིའི་ཡེ་ཤེས་རྒྱུད་ལ་སྨིན། པདྨ་དྲག་པོ་ཐོད་ཕྲེང་རྩལ་དང་དབྱེར་མེད་དུ་གྱུར་པར་མོས་ཤིག།

[བུམ་པ་མགོར་བཞག་ཅིང་བུམ་ཆུ་སྦྱིན་ལ།] ཧཱུྃ༔ བུམ་པའི་དཀྱིལ་འཁོར་ཡེ་ཤེས་རྒྱུན༔ རིགས་ཀྱི་བུ་ལ་དབང་བསྐུར་བས༔ སྒོ་གསུམ་སྒྲིབ་པ་ཀུན་དག་ནས༔ ཐོད་ཕྲེང་རྩལ་དང་དབྱེར་མེད་ཤོག༔ [རྩ་སྔགས་དང་།] ཛྙཱ་ན་པཉྩ་ཨ་བྷི་ཥིཉྩ་ཧཱུྃ༔ [ཞེས་དང་ཧཱུྃ་གསུམ་སྦྲེལ་བརྗོད།] བདེ་གཤེགས་ཡོངས་འདུས་བདུད་འདུལ་རྡོ་རྗེ་གྲོ་ལོད་རྩལ་གྱི་སྐུ་ལས་ཡེ་ཤེས་ཀྱི་སྐུ་གཉིས་པ་བྱིན་རླབས་འོད་ཟེར་གྱི་ཕུང་པོ་འབར་བཞིན་དུ་འཕྲོས། ཁྱེད་རང་རྣམས་ཀྱི་ལུས་ལ་ཐིམ་པས་གདོས་བཅས་སུ་འཛིན་པའི་དྲི་མ་དག །སྣང་སྟོང་ཡེ་ཤེས་ལྷའི་སྐུར་གྱུར་པར་མོས་ཤིག །[གཙོ་བོའི་སྐུ་ཙཀ་གནས་གསུམ་དུ་བཞག་ལ།] ཧཱུྃ༔ ཆོས་དབྱིངས་ངངལས་རང་ཤར་བ༔ པདྨ་ཁྲག་འཐུང་འཆོལ་བ་ཆེས༔ རིགས་ཀྱི་བུ་ལ་དབང་བསྐུར་བས༔ སྣང་སྟོང་རྡོ་རྗེའི་སྐུ་འགྲུབ་ཤོག༔ ཧཱུྃ་ཧཱུྃ་ཧཱུྃ༔ [ཧཱུྃ་དབྱངས་བྱ།] ཡེ་ཤེས་ཀྱི་རང་བཞིན་འབར་བའི་ཕྱག་མཚན་སོགས་གཏད་ཅིང་མངའ་གསོལ་བས་དུག་གསུམ་དང་གདོན་བགེགས་མ་ལུས་པ་ཚར་བཅད་ཅིང་ཕྱི་ནང་གསང་བའི་བར་ཆད་མི་མཐུན་པའི་ཕྱོགས་ལས་རྣམ་པར་རྒྱལ་བའི་དབང་ཆེན་བརྙེས་པར་མོས་ཤིག །[རྡོ་རྗེ་ལག་གཡས་སུ་གཏད་ལ།] ཧཱུྃ༔ ཐེག་དགུ་ཡོངས་རྫོགས་ཡེ་ཤེས་

མཚོན༔ གནམ་ལྕགས་རྡོ་རྗེ་རྩེ་དགུ་འདིས༔ རིགས་ཀྱི་བུ་ལ་དབང་བསྐུར་བས༔ ལོག་འདྲེན་བདུད་དཔུང་ཀུན་འཇོམས་ཤོག༔ ཧཱུྃ་ཧཱུྃ་ཧཱུྃ༔ [ཕུར་པ་ལག་གཡོན་དུ་གཏད་ལ།] ཧཱུྃ༔ སྐུ་གསུམ་ལྷུན་གྲུབ་འབར་བའི་མཚོ༔ དྲག་རྩལ་སྟོབས་འདུས་ཀཱི་ལ་ཡས༔ རིགས་ཀྱི་བུ་ལ་དབང་བསྐུར་བས༔ དགྲ་བགེགས་སྙིང་རྩ་ཐལ་འབྱིན་ཤོག༔ ཧཱུྃ་ཧཱུྃ་ཧཱུྃ༔ [ལྕགས་སྡིག་དང་མེ་ཁྱུང་ལག་གཡོན་གྱི་སྡིགས་མཛུབ་རྩེར་གཏད་ལ།] ཧཱུྃ༔ དཔལ་གྱི་ཕོ་ཉ་མི་བཟང་རྔམས༔ ལྕགས་སྡིག་མེ་ཁྱུང་འབར་བ་ཡིས༔ རིགས་ཀྱི་བུ་ལ་དབང་བསྐུར་བས༔ རྒྱལ་བསེན་ས་བདག་ཀུན་འདུལ་ཤོག༔ ཧཱུྃ་ཧཱུྃ་ཧཱུྃ༔ [ཞེས་ཧཱུྃ་དབྱངས་བྱ།] དེ་དག་རྣམས་ཀྱིས་སྐུའི་དབང་བསྐུར་བ་ཐོབ། ལུས་ཀྱི་ནད་གདོན་སྡིག་སྒྲིབ་དག །སྣང་སྟོང་ལྷ་སྐུ་བསྒོམ་པ་ལ་དབང་། ཁྲོ་རྒྱལ་རྡོ་རྗེ་གྲོ་ལོད་རྩལ་གྱི་སྐུ་མི་ཟད་པ་རྒྱན་གྱི་འཁོར་ལོ་མངོན་དུ་འགྲུབ་པའི་སྐལ་པ་ཅན་དུ་བྱས་པ་ཡིན་ནོ། །དེ་ནས་གསུང་བཟླས་པའི་ལུང་དབང་གི་སླད་དུ། སློབ་དཔོན་དང་དཀྱིལ་འཁོར་གྱི་གཙོ་བོ་དབྱེར་མེད་པའི་ཐུགས་ཀར་ཉི་མའི་གདན་ལ་ཕ་ལམ་གྱི་རྡོ་རྗེ་རྩེ་ལྔ་པའི་ལྟེ་བར་ཧཱུྃ་དམར་ནག་གི་མཐར་སྔགས་ཕྲེང་

ལྕགས་སྲེག་མདོག་ཅན་གཡས་སུ་འཁོར་བ། སློབ་དཔོན་ལ་མོས་གུས་དྲག་ཏུ་བྱས་པའི་རྐྱེན་གྱིས་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་འཕྲོས། ཞལ་ནས་ཐོན་ཏེ་ཁྱེད་རང་རྣམས་ལྷར་གསལ་བའི་ཞལ་དུ་ཞུགས། ཐུགས་ཀར་ཉི་སྟེང་རྡོ་རྗེའི་ལྟེ་བར་ཧཱུྃ་དམར་ནག་གི་མཐར་འཁོད། བཟླས་པའི་རྐྱེན་གྱིས་སྔགས་ཕྲེང་གཡས་སུ་འཁོར་བ་ལས་འོད་ཟེར་མེ་དཔུང་ཁ་དོག་ལྔ་ལྡན་དཔག་ཏུ་མེད་པ་འཕྲོས་ནས་ལུས་ཐམས་ཅད་གང་། སྡིག་སྒྲིབ་འགལ་རྐྱེན་བར་ཆད་ཐམས་ཅད་བསྲེགས་ཤིང་སྦྱངས། འོད་ཟེར་ཕྱིར་འཕྲོས་པས་སྣོད་ཀྱི་འཇིག་རྟེན་གཞལ་ཡས་ཁང་། བཅུད་ཀྱི་སེམས་ཅན་པདྨ་ཧེ་རུ་ཀ །སྒྲ་སྐད་ཐམས་ཅད་དྲག་པོ་སྔགས་ཀྱི་རང་སྒྲ་འུར་དིར་གྱིས་སྒྲོག་པར་མོས་ལ་སྔགས་འདིའི་རྗེས་ཟློས་ལན་གསུམ་མཛོད། [ཕྲེང་བ་སྦྲེལ་ལ་སྙིང་པོའི་རྗེས་ཟློས་ལན་གསུམ་མཐར་སྔགས་ཕྲེང་མགྲིན་པར་བཞག་ཅིང་ལག་ཏུ་གཏད་ལ།] ཧཱུྃ༔ གསང་ཆེན་སྙིང་པོ་སྔགས་ཀྱི་སྒྲ༔ དྲག་ལ་ངར་ལྡན་ཆུ་རྒྱུན་བཞིནཿ རིགས་ཀྱི་བུ་ལ་སྔགས་བསྟིམ་པས༔ གྲགས་སྟོང་གསུང་དབྱངས་ཐོབ་པར་ཤོག༔ ཧཱུྃ་ཧཱུྃ་ཧཱུྃ༔ [ཞེས་ཧཱུྃ་དབྱངས་བྱ།] དེས་གསུང་གི་དབང་བསྐུར་བ་ཐོབ། ངག་གི་

ནད་གདོན་སྡིག་སྒྲིབ་དག །གྲགས་སྟོང་རྡོ་རྗེའི་བཟླས་པ་ལ་དབང་། ཁྲོ་རྒྱལ་རྡོ་རྗེ་གྲོ་ལོད་རྩལ་གྱི་གསུང་མི་ཟད་པ་རྒྱན་གྱི་འཁོར་ལོ་མངོན་དུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་ཐུགས་རིག་པ་རྩལ་གྱི་དབང་གི་སླད་དུ། སློབ་དཔོན་དབང་དྲག་རྡོ་རྗེ་གྲོ་ལོད་རྩལ་ལ་གུས་འདུད་དྲག་པོ་བྱས་པས་སློབ་དཔོན་གྱི་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཧཱུྃ་ཡིག་དམར་པོ་ཡེ་ཤེས་ལྔའི་འོད་ཟེར་འབར་བ་རྒྱངས་ཀྱིས་འཕྲོས། ཁྱེད་རང་རྣམས་ཀྱི་སྙིང་གའི་ཧཱུྃ་ལ་ཐིམ་པས་བླ་མ་དྲག་པོའི་ཐུགས་དང་ཁྱེད་རང་གི་ཡིད་དབྱེར་མེད་དུ་གྱུར་པར་མོས་ལ་རང་རིག་གསལ་སྟོང་མ་བཅོས་པའི་ངང་དུ་མཉམ་པར་ཞོག་ཅིག །[ཧཱུྃ་དམར་སྙིང་གར་བཞག་ལ།] ཧཱུྃ༔ བདེ་གཤེགས་ཀུན་གྱི་ཡང་སྙིང་ཧཱུྃ༔ བརྗོད་བྱའི་ཚིག་དབང་ཧཱུྃ་འདི་ཡིན༔ རིགས་ཀྱི་བུ་ལ་ཧཱུྃ་བསྟིམ་པས༔ རིག་པ་རྩལ་གྱི་དབང་ཐོབ་ཤོག༔ ཧཱུྃ་ཧཱུྃ་ཧཱུྃ༔ [ཞེས་ཧཱུྃ་དབྱངས་བྱ།] དེས་ཐུགས་ཀྱི་དབང་བསྐུར་བ་ཐོབ། ཡིད་ཀྱི་ནད་གདོན་སྡིག་སྒྲིབ་དག །རིག་སྟོང་འོད་གསལ་བསྒོམ་པ་ལ་དབང་། ཁྲོ་རྒྱལ་རྡོ་རྗེ་གྲོ་ལོད་རྩལ་གྱི་ཐུགས་མི་ཟད་པ་རྒྱན་གྱི་འཁོར་ལོ་མངོན་དུ་

འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་ཡོན་ཏན་ཕྲིན་ལས་ཡོངས་རྫོགས་ཡང་གསང་རྡོ་རྗེའི་འབྲུ་གཅིག་གཞོམ་མེད་ཧཱུྃ་གི་སྤྲོ་བསྡུའི་དབང་བསྐུར་བའི་སླད་དུ། སློབ་དཔོན་གྱི་གནས་ལྔ་ནས་ཧཱུྃ་ཡིག་དཀར་དམར་མཐིང་སེར་ལྗང་བའི་འབྲུ་ལྔ་འོད་ཟེར་གྱི་ཕུང་པོ་འབར་བཞིན་པ་འཕྲོས། ཁྱེད་རང་རྣམས་ཀྱི་གནས་ལྔར་ཐིམ་པས་ཕྱི་ནང་འཁྲུལ་པའི་རྟོག་ཚོགས་དུག་ལྔ་ཕུང་པོ་ལྔའི་ཆོས་རྣམས་ཡེ་ཤེས་ལྔ་དང་སྐུ་ལྔའི་རང་བཞིན་དུ་གྲོལ། སྣོད་བཅུད་སྣང་སྲིད་ཧཱུྃ་གི་རང་བཞིན་དུ་གྱུར་ནས་རྡོ་རྗེའི་རང་སྒྲས་འཁོར་འདས་མ་ལུས་པ་ཁྱབ། རང་སྣང་དབང་དུ་འདུས་གཞན་སྣང་ཟིལ་གྱིས་གནོན། ཡོན་ཏན་ལྷུན་གྱིས་གྲུབ། ཕྲིན་ལས་ཀུན་ལ་ཁྱབ་པར་མོས་ཤོག །[ཧཱུྃ་ལྔའི་ཙཀླི་གནས་ལྔར་བཞ་ཅིང་།] སློབ་དཔོན་དབང་དྲག་ཧེ་རུ་ཀའི༔ དཔྲལ་མགྲིན་སྙིང་ལྟེ་གསང་བ་ནས༔ དཀར་དམར་མཐིང་སེར་ལྗང་བའི་ཧཱུྃ༔ ཧཱུྃ་ལས་ཧཱུྃ་འཕྲོས་ཧཱུཾ་སྒྲ་ལྡིར༔ སློབ་བུའི་གནས་ལྔར་སིབ་སིབ་ཐིམ༔ [ཞེས་དང་ཧཱུྃ་ལྔ་སྦྲེལ་བའི་དབྱངས་བྱ།] དེ་ལས་རང་གདངས་ཧཱུྃ་ལྔ་ལྡན༔ སྟོང་ཁམས་གང་འཕྲོས་ཧཱུྃ་སྒྲས་ཁྱབ༔ སྣོད་བཅུད་ཧཱུྃ་གི་ངོ་བོར་སྦྱངསཿ འུབ་བསྡུས་བདག་ཐིམ་ཧཱུྃ་ལ་འདྲིལ་༔ ཧཱུྃ་

དབྱངས་གོང་བཞིན། དེ་ཡང་གྱེན་རྫོགས་ནམ་མཁར་ཡལ༔ གནས་ལུགས་ངང་ལ་ཅི་གནས་བཞག༔ [ཅེས་ཉམས་ཀྱི་རང་ངོ་བསྐྱང་དུ་གཟུག །] དེས་ཡོན་ཏན་ཕྲིན་ལས་ཡོངས་རྫོགས་ཀྱི་དབང་བསྐུར་བ་ཐོབ། སྒོ་གསུམ་འཕོ་བའི་སྒྲིབ་པ་བག་ཆགས་དང་བཅས་པ་དག །བདེ་སྟོང་གི་ཡེ་ཤེས་བསྒོམ་ཞིང་འགྲ་འདུལ་ཕྲིན་ལས་ཀྱི་འཁོར་ལོ་ཕྱོགས་མེད་དུ་བསྐོར་བ་ལ་དབང་། ཁྲོ་རྒྱལ་རྡོ་རྗེ་གྲོ་ལོད་རྩལ་གྱི་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་མངོན་དུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །[ཞེས་རྟོགས་པ་སྐྱེད། སྐབས་འདིར་བརྒྱུད་འཛིན་གྱི་སློབ་མ་ཁྱད་པར་བ་རེ་རེ་ཙམ་ལ་དྲེག་ས་པའི་སྲོག་དབང་བསྐུར་ན། ཐོད་ངན་དུ་སྡེ་བརྒྱད་ཀྱི་གཟུགས་བྱས་པ་སློབ་དཔོན་གྱི་མདུན་དུ་བཀོད་ལ།] དེ་ལྟར་དབང་བསྐུར་བས་ཁྱེད་རང་རྣམས་ཀྱི་ལུས་ངག་ཡིད་གསུམ་ལྷའི་སྐུ་གསུང་ཐུགས་དང་དབྱེར་མེད་དུ་བྱིན་གྱིས་བརླབས་ཏེ་ཆེ་བཙན་འགྲན་ཟླ་དང་བྲལ་བའི་བདག་ཉིད་དུ་གྱུར་པ་དེ་ཉིད་ལ་དྲེགས་པའི་སྲོག་དབང་བསྐུར་བར་བྱ་སྟེ། དགོངས་པ་མི་འགྱུར་གཟེར་ཆེན་གྱིས༔ སྣང་སྲིད་སྲོག་ལ་དབང་ཐོབ་པའི༔ སློབ་དཔོན་ནུས་པར་ལྡན་པ་ཡིས༔ ངེས་པར་བརྒྱུད་འཛིན་སྙིང་འདྲའི་

བུར༔ དྲེགས་པ་སྡེ་བརྒྱད་གནད་འབེབས་ཀྱི༔ སྲོག་དབང་ཟབ་མོ་བསྐུར་འདོད་ན༔ ཞེས་གསུངས་པ་ཉིད་སྒྲུབ་པ་སྐབས་སུ་བབས་པ་ཡིན་པས་དམིགས་པ་འདི་བཞིན་དུ་མཛོད། སློབ་དཔོན་ཉིད་བདུད་འདུལ་ཆེ་མཆོག་རྡོ་རྗེ་གྲོ་ལོད་རྩལ་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་བདག་ཉིད་དུ་བཞུགས་པའི་ཐུགས་ཀའི་ཧཱུྃ་དམར་བསྐལ་མེ་ལྟར་འབར་བ་ལས་ཛཿཡིག་རྡོ་རྗེ་ལྕགས་ཀྱུ་ཉི་ཟེར་གྱི་རྡུལ་ལྟ་བུ་ཕྱོགས་བཅུར་འཕྲོས། འཇིག་རྟེན་ཁམས་ཀྱི་ཆེ་བཙན་དྲེགས་པ་ཅན་སྡེ་བརྒྱད་ཐམས་ཅད་རང་དབང་མེད་པར་བཀུག་སྟེ་མདུན་གྱི་རྟེན་ལ་ཐིམ་པར་གྱུར། [བདེན་སྟོབས་བརྗོད་པ་སྔོན་དུ་འགྲོ་བས།] བདེན་པ་ཆེན་པོའི་མཐུ་ལ་བརྟེན་ནད་ལྷ་སྲིན་སྡེ་བརྒྱད་དྲེགས་པ་ཅན་ཐམས་ཅད་སོ་སོའི་རྟེན་འདི་རྣམས་ལ་མཆིས་པར་གྱུར་ཅིག །[རྩ་སྔགས་མཐར།] ཨ་ཡ་མ་དུ་རུ་ཙ་ཤ་ན་ས་མ་ཡ་ཨ་ཀརྵ་ཡ་ཛ༔ [ཞེས་བདེན་སྟོབས་ལན་གསུམ་བརྗོད་པས་བཀུགས།] ཛཿཧཱུྃ་བྃ་ཧོཿ[ས་གཉིས་མེད་དུ་བསྟིམ། ཕུར་བུ་ཐོགས་ལ། སློབ་དཔོན་གྱི་ཕྱག་གི་ཕུར་བུ་སྲས་མཆོག་ཡཀྵ་མེ་དབལ་དུ་གསལ་བ་དེ་ཉིད་དྲེགས་པའི་སྙིང་གར་གཟིར་ཞིང་བཏབ་པས་ཕུར་རྩེ་ལས་ཡེ་ཤེས་ཀྱི་མེ་སྦར་བས་དེ་རྣམས་ཀྱི་རྒྱུད་ཀྱི་ཉོན་མོངས་

པ་དུག་ལྔའི་རྟོག་པ་ཐམས་ཅད་བསྲེགས་ཤིང་བཅོམ་སྟེ་ཚར་བཅད་པའི་མོས་པ་མཛོད། [རྩ་སྔགས་གཟིར་ཤམ་ཅན་མཐར།] ཨ་ཡ་མ་དུ་རུ་ཙ་ཤ་ན་ཏྲིག་ནན་ཨེ་ཧུར་ཐུཾ་ཛ༔ མཱ་ར་ཡ་རྦད༔ བཛྲ་ཡཀྵ་ཀཱི་ལ་ཡ་ཛཿཧཱུྃ་ཕཊ༔ [ཅེས་བཟླ་ཞིང་ཕུར་བུས་གཟིར།] དེ་ལྟར་བསྒྲལ་བའི་དྭངས་མ་ཨ་ཡ་མ་དུ་རུ་ཙ་ཤ་ན་ཞེས་པའི་སྲོག་གི་སྙིང་པོ་སོ་སོ་ལས་སྡེ་བརྒྱད་རང་རང་གི་གཟུགས་སུ་གྱུར་པ་ལ་སློབ་དཔོན་གྱིས་དམ་རྫས་བདུད་རྩི་བྱིན་ཞིང་བཀའ་བསྒོས་ཏེ་ཁྱེད་རང་རྣམས་ཀྱི་སྲུང་མར་གཏད་པའི་མོས་པ་མཛོད། ས་མ་ཡ་ཨ་མྲྀ་ཏ་ཧཱུྃ༔ [ཞེས་བདུད་རྩི་འཐོར་ཚུལ་བྱས་ལ།] ཧཱུྃ༔ ཆེ་མཆོག་དབང་དྲག་དཀྱིལ་འཁོར་མུ་རན་སྐྱོང་། འཇིག་རྟེན་འདས་ཀྱང་འཁོར་བའི་ཆ་འཛིན་པ༔ ལས་བྱེད་ཕོ་ཉ་དྲེགས་པ་སྡེ་བརྒྱད་ཀྱིས༔ སྐལ་ལྡན་འདི་ཡི་ལས་རྣམས་ཀུན་སྒྲུབས་ཤིག༔ [ཅེས་སྡེ་བརྒྱད་ཀྱི་གཟུགས་ལག་ཏུ་གཏད།] ཅེས་བསྒོས་ཤིང་བྲན་ཏུ་གཏད་ལ་བརྟེན་ནས་སྡེ་བརྒྱད་དེ་རྣམས་སོ་སོ་ནས་ཁྱེད་རང་ལ་ལུས་གུས་པས་གཡས་བསྐོར་གྱིས་འདུད་ཅིང་། ངག་གུས་པའི་སྒོ་ནས། མི་བཟད་དཔལ་ཆེན་དབང་དྲག་ཧེ་རུ་ཀ༔ ཁྱེད་ཀྱི་བཀའ་བཞིན་བདག་གིས་བསྟན་པ་

བསྲུང་༔ ཅི་བསྒོའི་ལས་རྣམས་ཐོགས་མེད་འདིར་བསྒྲུབ་ཅིང་། དམ་ཚིག་གཉན་ལས་ནམ་ཡང་མི་འདའ་འོ༔ ཞེས་བརྗོད་ཅིང་གནས་པ་ཁྱེད་རང་བདུད་འདུལ་དྲག་པོའི་ཞབས་འོག་ཏུ་དྲངས་པས། ཡིད་གུས་པ་ཆེན་པོས་ཅི་བསྒོ་བའི་བཀའ་སྒྲུབ་པར་དམ་བཅས་ཏེ། བཛྲ་ས་མ་ཡ་ཨི་དན་ན་ར་ཀན་༔ ཅེས་ཐ་ཚིག་གི་བྲོ་བོར་བར་མོས་ཤིག །[ཅེས་སྲོག་རྟེན་སློབ་མའི་རྐང་འོག་ནས་དྲང་བའི་ཚུལ་བྱ་ཞིང་། སློབ་དཔོན་གྱིས་ནང་མཆོད་བདུད་རྩི་སྡེ་བརྒྱད་ཀྱི་རྟེན་ལ་འཐོར་ཞིང་སློབ་མ་ལའང་སྦྱིན་ཏེ་དམ་བསྲེ།] དེ་ལྟར་དམ་ཚིག་བསྲེས་པས་ཁྱེད་རང་རྣམས་ལ་དགྱེས་པ་ཆེན་པོས་ངོ་མཐོན་དུ་བཞུགས་པར་མོས་ཤིག །[དཔོན་སློབ་ལྷན་ཅིག་པས་སྡེ་བརྒྱད་ཀྱི་གཏོར་འབུལ་བྱ་ཞིང་གཏོར་མ་གཙང་སར་ཕུལ།] སྡེ་བརྒྱད་རྣམས་རང་གནས་སུ་གཤེགས། རང་རིག་དང་དབང་དུ་བསྐུར་བྱའི་དྲེག་ས་པ་རྣམས་གཉིས་མེད་ཀ་དག་སྤྲོས་པ་བྲལ་བའི་ངང་སྐྱོང་ལ་མཉམ་པར་ཞོག་ཅིག །[ཅེས་དགོངས་པ་བསྐྱང་།] དེ་ལྟར་ན་ཇི་སྐད་དུ། འདི་ནི་ཤིན་ཏུ་གཉན་པའི་ཕྱིར༔ དམ་མེད་རྣམས་ལ་རླུང་ཕྱོགས་ཙམ༔ མི་བསྒྲག་གལ་ཏེ་འཆོལ་གྱུར་ན༔ དྲེགས་པ་སླར་ལ་འཁུ་ཞིང་ལྡོག༔ སློབ་དཔོན་སློབ་མ་གཉིས་ཀ་ཡི༔ སྲོག་ལ་ཧབ་ལེན་

བྱེད་པར་ངེས༔ དེ་བས་ཚོད་ཟིན་ཤེས་པ་གཅེས༔ ཞེས་དྲེགས་པའི་སྲོག་དབང་ཟབ་ཅིང་ཤིན་ཏུ་གཉན་པ་གཅིག་བརྒྱུད་ལས་འཆོལ་བར་སྤྱད་དུ་མེད་པར་བཀའ་ནན་དུ་བསྡམས་པ་ཉིད་ལེགས་པར་གྲུབ་པ་ཡིན་པས་སྡེ་བརྒྱད་དྲེགས་པའི་དམ་ཚིག་ཕྱི་ནང་གསང་བ་རྣམས་ཚུལ་བཞིན་དུ་བསྲུང་བ་དང་། ཉི་ཚེའི་ལས་ལ་མི་བཀོལ་ཞིང་རྟག་ཏུ་གསོལ་མཆོད་མི་གཅོག་པ་སོགས་གཞུང་ལས་ཇི་སྐད་དུ་གསུངས་པ་རྣམས་སྤང་བླང་ལེགས་པར་བྱ་དགོས་སོ། །[ཞེས་གདམས།] དེ་ནས་དབང་བཞི་ཡོངས་རྫོགས་བྱིན་རླབས་གཏོར་མའི་དབང་བསྐུར་བ་ལ། རྩ་བར། དབང་བཞི་ཡོངས་རྫོགས་བྱིན་རླབས་སླད༔ མོས་གུས་གདུང་ཤུགས་དྲག་ཏུ་བསྐྱེད༔ ཐུགས་དམ་བསྐུལ་ཞིང་ཛཔྲ་དབྱངས་བྱ༔ བཟོད་མེད་མོས་གུས་ཉམས་འུར་ཏེ༔ རིག་པ་གཏད་མེད་རྗེན་པར་འཆརཿ དེ་ཚེ་སྐལ་ལྡན་བྱིན་རློབ་ཕྱིར༔ བདག་ཉིད་འབྱོན་པར་ཐེ་ཚོམ་མེད༔ [ཅེས་གསུངས་པ་ལྟར།] ཐོག་མར་བྱིན་དབབ་པའི་སླད་དུ། གཏོར་སྣོད་དུར་ཁྲོད་རབ་འཇིགས་འབར་བའི་ཞིང་ཁམས་ཆེན་པོར་ཡོངས་སུ་གྲུབ་པའི་ནང་ན་གཏོར་མ་འདི་ཉིད་བདུད་འདུལ་ཆེ་མཆོག་རྡོ་རྗེ་གྲོ་ལོད་རྩལ་གྱི་དཀྱིལ་

འཁོར་འཁོར་ལོའི་ལྷ་ཚོགས་ཀྱི་རྣམ་པར་དངོས་སུ་བཞུགས་པ་ལ། ངེད་ནས་ཐུགས་དམ་བསྐུལ་པའི་ཚིག་བརྗོད་པའི་ཚེ་ཁྱེར་རང་རྣམས་ཀྱིས་ཀྱང་མོས་གུས་གདུང་ཤུགས་བཟོད་མེད་དུ་བསྐྱེད་ལ་གསོལ་བ་དྲག་དུ་ཐོབ་ཅིག །[སྦྱར་སྦོས་བཏུལ་ཞིང་ཐོད་རྔ་རོལ་མོའི་སྒྲ་དང་བཅས་ཏེ།] ཧཱུྃ་ཧཱུྃ་ཧཱུྃ༔ བཞེངས་ཤིག་པདྨ་ཐོད་ཕྲེང་རྩལ༔ བདག་ཅག་མོས་པའི་བུ་རྣམས་ལ༔ བྱིན་རླབས་འབེབས་ཕྱིར་གནས་འདིར་བྱོན༔ འགྲོ་བ་ཡོངས་ཀྱི་སྐྱབས་མགོན་རྗེ༔ ཁྱད་པར་ཐུགས་རྗེས་བོད་ལ་དགོངས༔ ལས་ངན་རྣམ་སྨིན་མནར་བ་ཡི༔ བདག་ཅག་རྗེས་འཇུག་བུ་སློབ་རྣམས༔ ཐུགས་ཀྱིས་འདོར་རམ་གུ་རུ་རྗེ༔ ཐུགས་རྗེས་ཡལ་ཡོལ་བཏང་སྙོམས་ནཿ ཡེ་སངས་རྒྱས་པའི་དགོས་པ་ཅི༔ བདག་ཅག་གདུང་བའི་མཆི་མ་འཁྲུགས༔ གསོལ་འདེབས་སྙིང་ནས་འོ་དོད་འབོད༔ ཕ་མཆོག་ཁྱོད་ཀྱི་ཡོན་ཏན་དྲན༔ བུ་ལ་གཟིགས་ཤིག་ཐུགས་རྗེ་ཅན༔ བྱིན་གྱིས་རློབས་ཤིག་སྤྲུལ་པའི་སྐུ༔ ལུས་ལ་སྐུ་ཡི་བྱིན་ཕོབ་ཅིག༔ བདེ་བ་སྤོར་ཅིག་ངྷཱ་ཀིའི་ཚོགས༔ ངག་ལ་གསུང་གི་བྱིན་ཕོབ་ཅིག༔ ནུས་པ་སྐྱེད་ཅིག་ཡི་དམ་ལྷ༔ སེམས་ལ་ཐུགས་ཀྱི་བྱིན་ཕོབ་ཅིག༔ རྟོགས་པ་སྤོར་ཅིག་གུ་རུ་རྗེ༔ འདིར་ཚོགས་

མོས་པའི་བུ་རྣམས་ལ༔ ཡོན་ཏན་ཕྲིན་ལས་བྱིན་ཕོབ་ཅིག༔ ལུས་ངག་ཡིད་གསུམ་སྒྲིབ་པ་སྦྱོངས༔ རྩ་གསུམ་དམ་ཚིག་ཉམས་པ་སྐོངས༔ སྐུ་གསུང་ཐུགས་ཀྱི་བྱིན་གྱིས་རློབས༔ དུག་ལྔའི་རྣམ་རྟོག་ཞི་བར་མཛོད༔ ཡེ་ཤེས་ལྔ་ཡི་དབང་མཆོག་སྐུར༔ ལྷ་སྲིན་སྡེ་བརྒྱད་དམ་ལ་ཐོགས༔ མི་མཐུན་རྐྱེན་སོལ་མཐུན་པ་སྒྲུབས༔ མཆོག་དང་ཐུན་མོང་བྱིན་ཕོབ་ཅིག༔ [ཅེས་མོས་གུས་རིག་རྩལ་གསལ་ངར་དང་ལྡན་པས་སྙིང་པོའི་ཛཔྲ་དབྱངས་དང་ཧཱུྃ་གླུ་བྱ་ཞིང་ཉམས་སྦར།] དེ་ལྟར་གསོལ་བ་བཏབ་པས་ལྷ་ཚོགས་རྣམས་ཀྱི་ཐུགས་རྒྱུད་རང་དབང་མེད་པར་བསྐུལ་ཏེ་སྐུ་དགྱེས་པའི་གར་སྟབས་ཤིགས་ཤིག །གསུང་སྔགས་ཀྱི་སྒྲ་གདངས་འུར་འུར། ཐུགས་ཟབ་གསལ་གཉིས་མེད་ཀྱི་ཡེ་ཤེས་ལྷམ་མེར་འབར་བས་ཁྱེད་རང་རྣམས་ཀྱི་སྤྱི་བོར་བྱོན། ལུས་ངག་ཡིད་གསུམ་གྱི་འགལ་རྐྱེན་བར་ཆད་ཐམས་ཅད་བསལ། སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་ཆར་ལྟར་ཕབ་ཅིང་རྒྱུད་ལ་ཞུགས་པར་གྱུར་སྙམ་པའི་མོས་པ་མཛོད། [གཏོར་ཆེན་གནས་གསུམ་དུ་བཞག་ཅིང་།] ཧཱུྃ་ཧྲཱི༔ སངས་རྒྱས་ཀུན་དངོས་དྲིན་ཆེན་སྤྲུལ་པའི་སྐུ༔ འགྲོ་བ་

འདྲེན་མཛད་མཧཱ་གུ་རུ་རྗེ༔ སྲིན་པོའི་དེད་དཔོན་དབང་དྲག་ཐོད་ཕྲེང་རྩལ༔ ལོག་འདྲེན་ཀུན་འཇོམས་རྡོ་རྗེ་གྲོ་བོ་ལོད༔ ཨོ་རྒྱན་ཡུལ་བྱོན་སྤྲུལ་པ་བསམ་ཡས་འགྱེད༔ རྒྱ་གར་ཡུལ་བྱོན་སྒྲོ་འདོགས་མ་ལུས་བཅད༔ དུར་ཁྲོད་བརྒྱད་བྱོན་མཆོག་ཐུན་དངོས་གྲུབ་བརྙེད༔ བོད་ཀྱི་ཡུལ་བྱོན་གདུག་པ་མ་ལུས་བཏུལ༔ སྐུ་ཚབ་གཏེར་སྟོན་སྤྲུལ་སྐུ་ལུང་དུ་བསྟན༔ གསུང་ཚབ་དྲི་མེད་ཤོག་སེར་ལོགས་སུ་བཀོད༔ ཐུགས་ཀྱི་དགོངས་པ་ལས་ཅན་སྙིང་ལ་འབེབས༔ དད་མོས་ཅན་ལ་སྤྱི་གཙུག་དངོས་སུ་བྱོན༔ སྔོན་ཚེ་པད་འབྱུང་ཁྱེད་དང་སྨོན་ལམ་གཅིག༔ ད་ལྟ་བདག་ཉིད་སློབ་མའི་སྟངས་བཟུང་སྟེ༔ སྲོག་གི་ཕྱིར་ཡང་མི་བཏང་བསྒྲུབ་ལགས་ན༔ སྨིན་གྲོལ་དབང་དང་གདམས་པ་མ་ལུས་ཀུནཿ སྐལ་ལྡན་བུ་མཆོག་འདི་ལ་སྩལ་དུ་གསོལ༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ འགགས་མེད་གསུང་གི་དངོས་གྲུབ་སྩལ་དུ་གསོལ༔ འཁྲུལ་མེད་ཐུགས་ཀྱི་དངོས་གྲུབ་སྩལ་དུ་གསོལ༔ ཡོན་ཏན་རེ་སྐོང་དངོས་གྲུབ་སྩལ་དུ་གསོལ༔ ཕྲིན་ལས་འགྲོ་འདུལ་དངོས་གྲུབ་སྩལ་དུ་གསོལ༔ བླ་མེད་མཆོག་གི་དངོས་གྲུབ་སྩལ་དུ་གསོལ༔

ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སིངྔྷི་ཕ་ལ་ཧོ༔ [ཞེས་བསྐུར་ལ།] མཐར་གཏོར་མའི་ལྷ་ཚོགས་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་གསང་བ་གསུམ་དང་གཉིས་སུ་མེད་པར་བྱིན་གྱིས་བརླབ། གཏོར་ཟན་ཟག་མེད་ཀྱི་བདུད་རྩིར་འཁྱིལ་བ་འདི་ཉིད་མྱང་བས་ལས་དང་དངོས་གྲུབ་ཐམས་ཅད་སྟན་ཐོག་དེ་ཉིད་དུ་ཐོབ་པའི་མོས་པ་མཛོད། [ཅེས་གཏོར་ཟན་དུམ་བུ་བདུད་རྩི་དང་སྦྱར་བ་སྦྱིན། མཚམས་སྦྱོར་སྤྱི་མཐུན་བཅས་ཤིས་པ་བརྗོད་ཅིང་མེ་ཏོག་གི་ཆར་དབབ།] དེ་ལྟར་ན་རིམ་པ་དེ་རྣམས་ཀྱི་སྒོ་ནས་ཡང་གསང་འདུས་པ་རྩ་བའི་ཐུགས་ཐིག་བདུད་འདུལ་རྡོ་རྗེ་གྲོ་ལོད་རྩལ་གྱི་དབང་བསྐུར་ཟབ་མོ་ལེགས་པར་གྲུབ་པ་སྟེ། འདི་ལྟར་དབང་བསྐུར་ཐོབ་ཙམ་གྱིས༔ མ་རུངས་རྒྱལ་འགོང་གདུག་རྩུབ་སོགས༔ བར་ཆད་ཐམས་ཅད་ཞི་བ་དང་༔ ཚེ་བསོད་དཔལ་འབྱོར་ཉམས་རྟོགས་འཕེལ༔ བཀྲ་ཤིས་གང་བསམ་ལྷུན་གྱིས་འགྲུབ༔ བརྩོན་པས་ཚུལ་བཞིན་ཉམས་བླངས་ན༔ མཆོག་ཐུན་དངོས་གྲུབ་སྟབས་སུ་འབྱུང་༔ དེ་ཕྱིར་ཤིན་ཏུ་གཅེས་པར་བཟུང་༔ ཞེས་བསྔགས་པར་མཛད་པ་དོན་ལ་གནས་པ་ལགས་པས་སྤྲོ་བ་དང་བཅས་

ཏེ་འདི་ཉིད་ལྷག་པའི་ལྷར་འཛིན་པ་དང་། དབང་དུས་སུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པ་རྣམས་སྲོག་གི་ཕྱིར་ཡང་མི་གཏོང་བར་ནན་ཏན་དུ་བསྲུང་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་[དམ་ཚིག་ཁས་ལེན། གཏང་རག་མཎྜལ་དགེ་བསྔོ་སོགས་སྤྱི་ལྟར་དང་། ཆོ་གའི་རྗེས་ཀྱི་བྱ་བ་རྣམས་ཀྱང་གཞུང་བཞིན་དུ་བྱའོ། །ཡང་གསང་བའི་བསྐྱེད་རྫོགས་ཀྱི་མན་ངག་ཉམས་སུ་ལེན་པར་མི་ནུས་ཀྱང་དམ་ཚིག་གི་སེལ་མེད་ཅིང་མོས་གུས་དང་ལྡན་པའི་སྐྱེ་འགྲོ་ཐུན་མོང་བ་དག་ལ་རྐྱེན་སེལ་གྱི་བྱིན་རླབས་དང་། བསྙེན་པའི་འབྲེལ་འཇོག་ཙམ་གྱི་བྱིན་རླབས་སྒོ་འབྱེད་གཏོར་དབང་རྐྱང་པའི་ལུགས་སུ་བསྐུར་བར་འདོད་ན། སྦྱོར་བ་མཚན་མའི་དབང་རྫས་གཏོར་མ་ཁོ་ན་ལས་གཞན་མི་དགོས་ཤིང་། དངོས་གཞིའི་དབང་བཤད་སྐབས།] འདི་ཉིད་ཀྱི་སྒོ་ནས་བྱིན་རླབས་གཏོར་མའི་དབང་བསྐུར་ཟབ་མོ་བསྒྲུབ་པ་ལ་[སོགས་མཎྜལ་གསོལ་གདབ་ནས་ཡེ་ཤེས་དབབ་པའི་མཇུག་གི །] བརྟན་པར་བྱ་བའི་སླད་དུ་དངོས་གཞི་གཏོར་མའི་དབང་བསྐུར་བ་ལ། གཏོར་སྣོད་དུར་ཁྲོད་རབ་འཇིགས་འབར་བའི་ཞིང་ཁམས་ཆེན་པོར་ཡོངས་སུ་གྲུབ་པའི་ནང་ན་གཏོར་མ་འདི་ཉིད་བདུད་འདུལ་ཆེ་མཆོག་རྡོ་རྗེ་གྲོ་ལོད་རྩལ་གྱི་དཀྱིལ་འཁོར་འཁོར་ལོའི་ལྷ་ཚོགས་ཀྱི་རྣམ་པར་དངོས་སུ་བཞུགས་པ་ལ། མོས་གུས་གདུང་

ཤུགས་དྲག་པོས་གསོལ་བ་བཏབ་པས་ལྷ་ཚོགས་རྣམས་ཀྱི་ཐུགས་རྒྱུད་རང་དབང་མེད་པར་བསྐུལ་ཏེ་སྐུ་དགྱེས་པའི་གར་སྟབས་ཤིགས་ཤིག །[ཅེས་སོགས་ནས་གོང་གི་དཀྱུས་བཞིན་བསྐུར་བས་ལེགས་པར་འགྲུབ་པ་ཡིན་ནོ། །ཞེས་པའང་གཏེར་ཆེན་མཐུ་སྟོབས་གླིང་པའི་རྣམ་འཕྲུལ་ཨོ་རྒྱན་ཆེ་མཆོག་འདུས་པ་རྩལ་གྱི་བཞེད་སྐོང་དུ། འཇུག་བདེའི་མཚམས་སྦྱོར་ངག་འདོན་ཆུ་འབབས་ཀྱི་ཚུལ་དུ་འཇིགས་བྲལ་ཡེ་ཤེས་རྡོ་རྗེས་བུ་ཆུ་རིག་པ་འཛིན་པའི་དགའ་ཚལ་དུ་སྦྱར་བའི་ཡི་གེ་པ་ནི་སྐྱུ་རུའི་སྔགས་འཆང་པདྨ་དབང་ཆེན་གྱིས་བགྱིས་པའོ། །ཛ་ཡནྟུ། སརྦ་མངྒ་ལཾ། །

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་རྫོགས་རིམ་ཀ་དག་གི་ཁྲིད་ཡིག་ཡེ་ཤེས་སྣང་བ།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་རྫོགས་རིམ་ཀ་དག་གི་ཁྲིད་ཡིག་ཡེ་ཤེས་སྣང་བ་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲོ་ཀྲོ་ངྷ་ལོ་ཀོཏྟ་རཱ་ཡེ། ཡང་གསང་བདུད་འདུལ་དབང་དྲག་རྡོ་རྗེ་གྲོ་ལོད་རྩལ་གྱི་སྒྲུབ་པ་སྲོག་གི་ཏི་ཀའི་ཟབ་མོ་རྫོགས་རིམ་ཀ་དག་གི་ཁྲིད་ལ་གཉིས་ཏེ། སྦྱོར་བ་ཞི་གནས་ཀྱི་གཞི་བཅའ་བ་དང་། དངོས་གཞི་ལྷག་མཐོང་གི་ཡེ་ཤེས་བསྐྱེད་པའོ། །དང་པོ་ནི། རྩ་བར། ཟབ་མོ་རྫོགས་པའི་རིམ་པ་ནི༔ ཐུགས་ཀའི་ཧཱུྃ་དམར་ཁོ་ན་ལ༔ རླུང་རིག་དྲིལ་ཏེ་མདུང་ཚུགས་གཏད༔ ཅེས་པས། སྐྱེ་བོའི་འདུ་འཛི་དང་སྒྲའི་གླག་ཅོར་ལ་སོགས་པ་མེད་པའི་གནས་དབེན་པར་སྟན་བདེ་བ་ལ། ལུགས་གནད་རྣམ་སྣང་གི་ཆོས་བདུན་དྲང་པོར་བསྲང་ཞིང་ཆ་ཆ་ནས་ཧྲིལ་གྱིས་སྒྲིམ། ངག་

གནད་རླུང་རང་སོར་བཞག །སེམས་ཀྱི་གནད་སྔོན་བསུ་རྗེས་དཔྱོད་སོགས་སེམས་ལ་ལས་གང་ཡང་མི་འཆོལ་བར་དུས་གསུམ་གྱི་སྤྲོས་པ་བཅད་དེ་བཟོ་མེད་ཡེངས་མེད་དུ་འཇོག །དེ་ལ་གནས་ན་དེས་ཆོག །གལ་ཏེ་མི་གནས་ན་སྙིང་གར་ཧཱུྃ་དམར་ཚོན་གང་བ་སོགས་ཆེ་ཆུང་ཇི་ལྟར་རིགས་པ་ཞིག་བསྒོམས་ལ། གསལ་ཡེ་རེ་བྱུང་བ་དང་ཧ་ཅང་ཚིར་ཟིན་མི་བྱེད་པར་སྣང་བ་ལམ་མེ་བ་དེ་ཀ་ལ་ཅེ་རེ་བལྟས་ལ་རང་བབས་སུ་ཀློད་དེ་འཇོག །དེ་ལའང་གནས་དཀའ་ན་ཡིག་འབྲུའམ་ཤིང་བུ་རྡེའུ་ལྟ་བུ་དངོས་པོ་ཕྲ་རགས་གང་རུང་ཞིག་མདུན་དུ་དངོས་སུ་བཞག་སྟེ། དེ་ལ་མིག་འབྲས་མི་འགུལ་ཞིང་རྫི་མ་མི་

གཡོ་བར་ལྟ་སྟངས་གཏད་ནས་སེམས་ཀྱི་ལེགས་ཉེས་སྤུ་རིས་སོགས་གང་ཡང་ཡིད་ལ་མི་བྱེད་ཅིང་ཅི་ཡང་མི་སེམས་མི་བསྒོམ་པར་ཁྲེས་སེ་བོར་ལ་འཇོག །དེའི་ངང་ལས་རྣམ་རྟོག་གི་འཆར་སྒོ་ཅི་བྱུང་ཡང་རྗེས་མཐུད་མི་བྱ་བར་རྟེན་ལ་བསླན་ཏེ་རྟོག་མེད་སིང་ངེ་མ་ཡེངས་པར་བཟུང་། གལ་ཏེ་བྱིང་ན་ལྟ་སྟངས་བསྟོད། ལུས་གྲིམ་ཆ་འཚོལ། ཤེས་པ་ལ་ངར་བཏགས། རིག་པ་ལ་ཧུར་བཏོན་ཏེ་རྩེ་གཅིག་ཏུ་བལྟ། འཕྲོ་ཞིང་རྒོད་ན་ལྟ་སྟངས་དམད། ལུས་གནད་ལྷོད་ཆ་འཆོལ། ཞེ་གཏིང་ནས་ཀློད་ལ་རང་བབས་སུ་འཇོག །དེ་བཞིན་དུ་སྒྲ་ལྷང་ངེ་བ་དང་། དྲི་ཆི་ལེ་བ་སོགས་དང་། དབུགས་རང་བབས་ཀྱི་འབྱུང་འཇུག་གནས་གསུམ་ལ་ཤེས་པ་གཏད་ཙམ་མ་གཏོགས་ཅི་ཡང་མི་བསམ་པར་ཀློད་དེ་འཇོག་པའམ་ཡང་ན་རྟེན་མེད་དུ་ཧད་དེ་འཇོག་པ་སོགས་གང་རུང་གཅིག་གི་སྟེང་དུ་བཞག་པས་ཆོག་ཅིང་། དེ་ལྟར་བསྒོམས་པས་ཐོག་མར་རྣམ་རྟོག་གི་འཆར་སྒོ་མང་དུ་འགྲོ་བ་སྙམ་བྱེད་ཀྱང་སྐྱོན་ཡོན་དུ་མ་བལྟས་པར་རྒྱུན་བསྲིངས་ལ་བསྒོམས་པས་ཆ་ཆ་ནས་ཞི་སྟེ་ལུས་སེམས་ལ་བདེ་བ་སྐྱེ་ཞིང་སེམས་རྟོག་མེད་དུ་གནས་པ་ལས་ལྡང་མི་ནུས་ཤིང་གཡོ་མི་འདོད་པ་འདྲ་བར་ཆམ་

གྱིས་འགྲོ་བས་རྩེ་གཅིག་ཏུ་གནས་པ་ནི་ཞི་གནས་གོམས་པའི་རྟགས་སོ། །གཉིས་པ་དངོས་གཞི་ལྷག་མཐོང་གི་ཡེ་ཤེས་བསྐྱེད་པ་ལ་བཞི། ལྟ་བས་ཐག་གཅོད་པ། སྒོམ་པས་ཉམས་སུ་བླང་བ། སྤྱོད་པ་རྒྱུན་སྐྱོང་བ། འབྲས་བུ་མངོན་དུ་བྱེད་པའོ། །དང་པོ་ལའང་གསུམ། ཕྱི་གཟུང་ཡུལ་གཏན་ལ་འབེབས་པ། ནང་འཛིན་སེམས་གཏན་ལ་འབེབས་པ། གནས་ལུགས་ཀྱི་ལྟ་བ་ངོས་འཛིན་པའོ། དང་པོ་ནི། བདུད་བགེགས་དམ་སྲི་རྒྱལ་འགོང་སོགས༔ ཐམས་ཅད་སེམས་ཀྱི་སྣང་ཆ་ཙམ༔ ཞེས་པས། བར་ཆད་བདུད་བགེགས་སུ་བཏགས་པས་མཚོན་རང་གཞན་སྣོད་བཅུད་དུ་སྣང་བའི་དངོས་པོ་ཐམས་ཅད་བདེན་བདེན་འདྲ་བར་འདུག་ཀྱང་། རང་གི་སམས་ཀྱི་འཁྲུལ་སྣང་ལས་དོན་ལ་ཅུང་ཟད་ཀྱང་གྲུབ་པ་མེད་དེ། སྣང་ནི་སྣང་། བདེན་ནི་མི་བདེན། འདི་དག་སྒྱུ་མའི་འཁྲུལ་འཁོར་རྨི་ལམ་གྱི་སྣང་བ་ལྟར་མེད་བཞིན་དུ་སྣང་བ་སང་སིང་འལ་འོལ་ཙམ་དུ་བལྟ་ཞིང་། དེ་ཡང་བཏགས་པ་ཙམ་ལས་རང་བཞིན་ཡོད་མེད་སྤྲོས་པའི་ཡུལ་ལས་འདས་པས་དོན་ལ་སྒྱུ་མར་འཛིན་པ་ཙམ་ཡང་མི་དམིགས་པས་འདི་ལྟར་སྣང་བ་ཐམས་ཅད་རང་སྣང་རིས་མེད་སྒྱུ་མ་ལྟ་

བུའི་ཡེ་ཤེས་སུ་ཐག་གཅོད་དོ། །གཉིས་པ་ནི། སེམས་ལ་ངོས་བཟུང་མཚན་མ་བྲལ༔ ཞེས་པས། ལུས་གནད་ཆོས་བདུན་བཅའ། ངག་གནད་རླུང་རང་བབས་སུ་བཞག །སེམས་གནད་མ་སྒྲིམ་མ་ཀློད། གང་ཡང་འདི་ལ་མི་བྱེད་པར་རིག་པ་མ་བཅོས་སོ་མར་ཙན་གྱིས་བཞག་ལ། ཁ་ནང་ལོག་གི་ཤེས་པས་སེམས་ཁོ་རང་གི་རང་ངོ་ལ་ཅེ་རེ་བལྟ། དེ་ལྟར་བལྟས་པས་བལྟ་བྱ་དང་ལྟ་བྱེད། མྱང་བྱ་དང་མྱོང་བྱེད། ཡུལ་དང་ཡུལ་ཅན་སོགས་གཟུང་འཛིན་ཐམས་ཅད་དང་བྲལ་བའི་ཡུལ་མེད་རང་གསལ་སྤྲོས་པའི་མཐའ་དང་བྲལ་བ་ཞིག་འཆར་བས། དེ་ཀའི་སྟེང་དུ་མ་བཅོས་མ་བསླད་མ་བསྒྱུར་བར་སོ་ཁད་དེ་མཉམ་པར་བཞག །དེ་ནི་དབང་རབ་ཀྱི་སྒོམ་ཚུལ་རིག་པ་སྤྱི་བླུགས་སུ་འཇོག་པ་སྟེ། གང་ཟག་ཕལ་ཆེ་བ་ཞིག་རྣམ་རྟོག་གིས་དཀྲུགས་ནས་དེ་ལ་ངོ་འཕྲོད་པ་དཀའ་བས། རིག་པ་རྐྱང་འདེད་ལ་བརྟེན་ནས་སེམས་བཙལ་བར་བྱ་སྟེ། དེའང་རྣམ་རྟོག་གྱ་གྱུ་ཐལ་ཐོལ་དུ་འཕྲོ་ན། དེ་ཀ་དང་པོ་གང་ནས་སྐྱེས། ད་ལྟ་གང་ན་གནས། ཐ་མར་གང་དུ་འགག་རྐྱང་འདེད་ཀྱིས་བལྟ། དེར་མ་ཟད་ཡར་སངས་རྒྱས་མཁན་དང་། མར་འཁོར་བར་འཁྱམས་མཁན་སོགས་བདེ་སྡུག་གི་བྱེད་པ་པོ་གང་ཡིན། དེ་སེམས་ཡིན་པར་འདུག་སྙམ་ན། སེམས་དེ་ལ་ཐོག་མ་དང་།

ཐ་མ་དང་། བར་མ་གསུམ་ཨེ་འདུག །སེམས་ཁོ་རང་དངོས་པོའམ། དངོས་མེད་གང་། དངོས་ཡོད་ཡིན་ན་དབྱིབས་ཁ་དོག་སོགས་ཅི་འདྲ། །དངོས་མེད་དོ་སྙམ་ན། ཅང་མེད་ཅིག་འདུག་གམ་ཅི་འདྲ་ཞེས་ཡང་ཡང་དྲི་ཞིང་བྱ་མ་ཤོར་བར་བྱས་ལ་བལྟ། དངོས་པོ་འདི་འདྲ་ཞིག་འདུག་ཅེས་བདེན་འཛིན་ཨ་འཐས་དང་། ཅང་མེད་སྟོང་བར་འདུག་ཅེས་ཚོད་དཔག་དང་། མ་རྙེས་པས་ཡེ་ནས་མེད་པ་ཞིག་གམ་ཡོད་རང་ནི་ཡོད་ལས་ཆེ་སྟེ་མ་རྙེད་པ་ཅེ་ཡིན། སྙམ་དུ་བློ་ཐག་མ་ཆོད་ན་ད་དུང་འཚོལ་དུ་བཅུག་སྟེ་དྲི་བར་བྱ། བལྟ་བྱ་དང་ལྟ་བྱེད། མཐོང་བྱ་དང་མཐོང་བྱེད་སོགས་གང་ཡང་མ་མཐོང་། བཙལ་ཞིང་དཔྱད་པས་ཅི་ཡང་མ་རྙེད་པ་ནམ་མཁའི་དབྱིངས་ལ་བལྟས་པ་ཅི་ཡང་མ་མཐོང་བ་དང་འདྲ་བར། སྣང་རིག་འདི་ཀ་ངོ་བོ་ངོས་བཟུང་དང་བྲལ་བ། རྗེན་ནེ་བ། སྨྲ་མི་ཤེས། བསམ་མི་ཤེས། མཐོང་མི་ཤེས་པར་སྟོང་གསལ་ཡུལ་མེད་ཀྱི་རིག་པ་གཅར་བུ་ལྷིངས་པ་ཞིག་འཆར་ན་ཁྲིད་ཆུད་པ་ཡིན་ནོ། །གསུམ་པ་ནི། སྟོང་གསལ་དོན་གྱི་གྲོ་བོ་ལོད༔ གཞན་ནས་མི་འཚོལ་རང་བྱུང་གི༔ རིག་པ་རྗེན་པ་འདི་ཀ་སྟེ༔ འཁོར་འདས་ཡོངས་ཀྱི་ཁྱབ་བདག་ཆེ༔ ཡེ་བབས་

ཆེན་པོར་ལ་བཟླའོ༔ ཞེས་པས། དེ་ལྟར་གཟུང་འཛིན་སྤྲོས་པའི་མཚན་མ་ཐམས་ཅད་དང་བྲལ་བ་ཡེ་གདོད་མ་ནས་རང་བཞིན་གྱིས་སྟོང་པའི་གཤིས་སམ་རང་བབས་ངོ་བོ་ཀ་དག་སྨྲ་བསམ་བརྗོད་པ་ལས་འདས་ཤིང་། གསལ་མདངས་འགགས་པ་མེད་པའི་ཡེ་ཤེས་ཀྱི་རང་རྩལ་འཁོར་འདས་ཀུན་གྱི་ཁྱབ་བདག་ཆེན་པོར་ལྷུན་གྱིས་གྲུབ་པ། དེའང་གདོད་ནས་དབྱེར་མེད་ཟུང་འཇུག་འདུས་མ་བྱས་པའི་རང་བབས་ཀྱི་ཡིན་ལུགས་ཡེ་སངས་རྗེན་པ་རང་བྱུང་གི་ཡེ་ཤེས་རང་གནས་ཆོས་ཟད་ཀྱི་དགོངས་པ་ངོས་ཟིན་པ་ནི་བློ་འདས་རྫོགས་པ་ཆེན་པོའི་ལྟ་བ་སྟེ། དེ་ཉིད་ཇི་བཞིན་ངོ་འཕྲོད་པའི་སྒོ་ནས་མངོན་དུ་རྟོགས་པར་བྱའོ། །གཉིས་པ་སྒོམ་པས་ཉམས་སུ་བླང་བ་ནི། འདས་པ་འགགས་ཤིང་མ་འོངས་པ༔ མ་སྐྱེས་ད་ལྟའི་ཤེས་པ་ནི༔ རིག་སྟོང་རྗེན་པ་ལམ་དུ་ཁྱེར༔ ཞེས་པས། སྟོང་གསལ་རང་བྱུང་གི་རིག་པ་བློ་འདས་ཆེན་པོ་འདི་ལས་ཆོས་སྐུ་གཞན་དུ་མེད་པར་ངོ་རང་ཐོག་ཏུ་འཕྲོད་ནས། དྲན་བསམ་སྔ་མ་འགགས་ཕྱི་མ་མ་སྐྱེས་ཤིང་། ད་ལྟའི་ཤེས་པ་སྐད་ཅིག་མ་ལ་བཟོ་བཅོས་མ་བྱས་པས་དུས་གསུམ་གྱི་རྣམ་པར་རྟོག་པས་མ་བསླད་པ་བཞི་ཆ་གསུམ་བྲལ་ཐ་མལ་གྱི་ཤེས་པ་སོ་མ་དེ་ཉིད་

རང་བབས་རྣལ་མར་བཞག་པ་ལས་གཞན་པའི་བསྒོམ་བྱ་རྡུལ་ཙམ་མེད་པར་ཐག་གཅིག་ཐོག་ཏུ་བཅད། གང་ཤར་ཅིར་སྣང་ཐམས་ཅད་ཆོས་སྐུའི་ཡོ་ལང་རིག་སྟོང་བློ་བྲལ་རྗེན་པར་རྟོགས་པའི་གདོང་གྲིལ་ཐོག་ཏུ་བཅས་ཏེ། མཐའ་བྲལ་ནམ་མཁའ་ལྟ་བུའི་ངང་ལ་ཤེས་པ་ཁ་ཡན་དུ་ལྷོད་ཀྱིས་ཀློད་ནས་བཞག་གོ །དེའི་ཚེ་ཚོགས་དྲུག་གི་ཡུལ་སྣང་ཡང་འཛིན་པ་མེད་པ་རང་གསལ་རྗེན་ལྷག་གེ་བ། ནང་སེམས་ལ་རྟོག་དཔྱོད་ཀྱི་སྤྲོ་བསྡུ་མེད་པར་རང་སངས་སུ་རྗེན་ནེ་བ། བར་རང་སར་གནས་ཀྱང་གཉེན་པོས་མ་བཅིང་པར་བར་མེད་དུ་ཧ་རེ་བ་སྟེ་ཡུལ་བཟང་ངན་གྱིས་མ་བསྒྱུར། འཛིན་པས་མ་བསླད། སྤང་གཉེན་གྱི་བློ་མ་ཞུགས་པར་ས་ལེ་སང་ངེ་བ་རིག་པའི་ཆ་དེ་ཅར་ཕོག་ཏུ་ངོས་བཟུང་ལ་ཟང་ཐལ་རྗེན་པར་སྐྱོང་བ་ནི་རྫོགས་པ་ཆེན་པོའི་ཁྱད་ཆོས་སོ། །གསུམ་པ་སྤྱོད་པས་རྒྱུན་བསྐྱང་བ་ནི། དེ་ལྟར་གོམས་འདྲིས་བརྟན་ཐོབ་ན༔ ཞེས་པས། མཉམ་བཞག་ཏུ་རིག་སྟོང་རྗེན་པའི་ཡེ་ཤེས་ལ་ཞེན་འཛིན་གྱིས་མ་བསླད་པར་རང་གསལ་རྒྱ་ཡན་དུ་ཀློད་ཅིང་། རྗེས་ཐོབ་ཏུ་གང་སྣང་ཐམས་ཅད་སྒྱུ་མའི་འཁྲུལ་འཁོར་རམ་རྨི་ལམ་གྱི་སྣང་བ་ལྟར་གསལ་སྟོང་འཛིན་མེད་དུ་ཐག་བཅད་

དེ་ལམ་དུ་ཁྱེར་བས་མཉམ་རྗེས་དབྱེར་མེད་དུ་འདྲེས་ཏེ་གང་ཤར་རང་གྲོལ་མངོན་དུ་གྱུར་ནས་རྣམ་རྟོག་སྒོམ་གྱི་གྲོགས་སུ་འཆར་བར་འགྱུར་ཞིང་། གལ་ཏེ་རྣམ་རྟོག་གིས་གནོད་ན་འགྱུ་དྲན་གྱི་རྟོག་པ་གང་ཤར་དེ་ཀ་ལ་ཅེར་གྱི་བལྟས་པས་རྦ་རླབས་ཆུར་ཐིམ་པ་ལྟར་དྲན་རྟོག་རྗེས་མེད་དུ་ཡལ་ཏེ། རྣམ་རྟོག་གཞི་མེད་རྩ་བྲལ་དུ་ཐག་ཆོད་པ་སྐྱེ་བས་ཉམས་ལེན་སྐྱོང་བདེ་མོར་འགྲོ་བ་ཡིན་ལ། མདོར་ན་སྤྱོད་ལམ་ཀུན་ཏུ་ཐ་མལ་གྱི་བློ་འཁྲུལ་འབྱམས་སུ་མ་ཤོར་བར་ཡེངས་མེད་འཛིན་མེད་ཀྱི་རྣལ་འབྱོར་ཆུ་བོའི་རྒྱུན་ལྟ་བུ་ལ་བསླབ་སྟེ་གོམས་འདྲིས་མཐར་དབྱུང་བར་བྱའོ། །བཞི་པ་འབྲས་བུ་མངོན་དུ་འགྱུར་ཚུལ་ནི། མཚན་མའི་ཆོས་ཀུན་ཟིལ་གནོན་ནས༔ ཧེ་རུ་ཀ་དཔལ་མངོན་དུ་འགྱུར༔ ཞེས་པས། རང་རིག་གདོད་ནས་འཁྲུལ་མ་མྱོང་བའི་སངས་རྒྱས་སུ་ལྷུན་གྱིས་གྲུབ་པ་ཉིད་མེད་སྣང་གློ་བུར་འཁྲུལ་རྟོག་མཛན་འཛིན་གྱི་ཞེན་པས་བསྒྲིབས་ཏེ་གཞན་ནས་རྩོལ་སྒྲུབ་ཏུ་ལྟ་བས་བཅིངས་པ་ལ། བླ་མའི་བཀའ་དྲིན་གྱིས་རང་གནས་ཆོས་སྐུའི་རང་ཞལ་ངོ་འཕྲོད་དེ་ཡེ་གྲོལ་གྱི་རྟོགས་པ་རང་བབས་སུ་བསྐྱངས་པས། གསར་ཐོབ་ཀྱིས་འཆོས་པ་མེད་པར་གདོད་མའི་གཤིས་ལུགས་ཇི་བཞིན་

པ་མངོན་དུ་གྱུར་པ་ལ་འབྲས་བུའི་ཐ་སྙད་དུ་བྱས་པ་སྟེ། འཁོར་འདས་ཀུན་གྱི་ཁྱབ་བདག་ཁྲག་འཐུང་ཧེ་རུ་ཀའི་གོ་འཕང་ལ་རང་དབང་བསྒྱུར་ནས་རྩོལ་བ་མེད་པའི་ཕྲིན་ལས་རབ་འབྱམས་ལྷུན་གྱིས་གྲུབ་པར་འགྱུར་བ་ཡིན་ནོ། །ཞེས་མྱོས་སྟོན་ཚེ་དབང་དཔལ་འབྱོར་སོགས་ལམ་འདིར་མོས་པའི་དོན་གཉེར་ཅན་དུ་མས་བསྐུལ་བ་ལས། འཇིགས་བྲལ་ཡེ་ཤེས་རྡོ་རྗེས་སྨར་ཁྲིད་མཛུབ་ཚུགས་ཀྱི་ཚུལ་དུ་གོ་བདེ་ཁྱེར་བདེ་གཙོ་བོར་བྱས་ཏེ་མདོར་བསྡུས་སུ་སྦྱར་བ་ཛ་ཡནྟུ།། །།

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་བསྙེན་ཡིག་དངོས་གྲུབ་བུམ་བཟང་།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་བསྙེན་ཡིག་དངོས་གྲུབ་བུམ་བཟང་ཞེས་བྱ་བ་བཞུགས་སོ། །

ན་མོ་མཧཱ་གུ་རུ་བཛྲ་ཀྲོ་ངྷ་ལོ་ཀོཏྟ་རཱ་ཡེ། ཁྲག་འཐུང་དབང་དྲག་འཆོལ་བའི་ཁྲོ་རྒྱལ་ཆེན་པོ་བསྙེན་པའི་ལས་རིམ་ལ་འཇུག་པར་འདོད་པས། དབེན་ཅིང་ཤེས་པའི་སྒྲུབ་ཁང་གི་ཕུག་ལོགས་སོགས་གང་དུ་བྱ་བའི་གཞིར་མཎྜལ་བདུད་རྩི་ལྔས་ཆག་ཆག་བཏབ་པ་ལ་ཚུལ་བཞིན་བྲིས་པའི་རས་བྲིས་ཀྱི་དཀྱིལ་འཁོར་བཀྲམ་པའམ། འབྲུ་ནག་ཛ་གད་ཀྱིས་གཤེར་བས་ཚོམ་བུ་ལྷ་གྲངས་བཀོད་པའི་ཁར་འཕྲུལ་སྟེགས་ལ་བརྟེན་པའི་སྒྲུབ་ཐོད་དུམ་བུ་གཅིག་པ་འབྲུ་སྨན་བཀང་བར་ལྕགས་སམ་ཙནྡན་ནམ་སེང་ལྡེང་གི་སྒྲུབ་ཕུར་ཚད་ལྡན་གྱིས་དར་སྣའི་ཅོད་པན་ཅན་བརྟན་པར་གཟུག་ཅིང་དེ་དང་ལྷན་དུ་དམ་ཞིཚིག་གི་སྣང་བརྙན་

ཀྱང་འགོད། དེའི་མདུན་རྒྱབ་གང་བདེར་གཏོར་མ་སྨན་རཀ་ཞི་དྲག་གི་ཆུ་གཉིས་ཉེར་སྤྱོད་ལྔ་རྣམས་དང་། གཞན་ཡང་ཆོས་སྐྱོང་དང་གཏེར་སྲུང་གཞི་བདག་གི་གཏོར་མ། ཚོགས་ཀྱི་ཡོ་བྱད་སོགས་ཉེ་བར་མཁོ་བའི་རིགས་རྣམས་ཕུན་སུམ་ཚོགས་པར་འདུ་བྱས་ལ། ཡར་ངོའི་ཚེས་བཅུ་ལྟ་བུའི་དུས་ཚེས་བཟང་པོའི་དགོང་ཐུན་གྱི་ཆར་སྐྱབས་སེམས་སྔོན་དུ་འགྲོ་བས་གཞི་བགེགས་ལ་གཏོར་མ་བཏང་ཞིང་བགེགས་བསྐྲད་དེ་སྒོ་དྲུང་དུ་ཐོ་བརྩིགས་པར་རྒྱལ་ཆེར་སྡེ་བཞི་བསྐྱེད་བསྟིམ་རབ་གནས་བྱས་ལ་མཚམས་དམ་པར་བཅད་ནས་སྲུང་བའི་འཁོར་ལོ་བརྟན་པོར་བསྒོམ། བྱིན་འབེབས་དང་མཆོད་པ་བྱིན་བརླབ་མཐར། དངོས་གཞི་

བདག་མདུན་སོགས་ཀྱི་ཐ་སྙད་ལས་འདས་པ་ཨ་ཏིའི་རྣལ་འབྱོར་གྱི་གསང་བ་ཁོང་དུ་ཆུད་པའི་སྒོ་ནས་སྣང་སྲིད་གཞིར་བཞེངས་ཀྱི་དཀྱིལ་འཁོར་སྐད་ཅིག་དྲན་རྫོགས་ཆེན་པོར་གསལ་གདབ། བཟླས་པའི་སྐབས་སྤྱིར་མཚན་མའི་བསྙེན་པ་ནི་རྟགས་ཀྱི་རིམ་པ་ཁོ་ན་དང་སྦྱར་བ་ལས་གྲངས་མི་གཙོ་ལ། གྲངས་ཀྱི་བསྙེན་པ་ནི་འབུམ་ཕྲག་བཞི་དང་། དེའི་བཞི་འགྱུར་སོགས་སྔགས་ཀྱི་ནུས་པ་ཐོབ་ཀྱི་བར་དང་། དུས་ཀྱི་བསྙེན་པ་ནི་ཟླ་བ་དྲུག་གམ་གསུམ་མམ་གཅིག་གིས་མཐའ་བརྟེན་པ་སྟེ། སྤྱིར་བཏང་བསྙེན་འབྲེལ་ཟླ་བ་གཅིག་ལ་མཚོན་ན། བདུན་དང་པོར་སྔགས་ཀྱི་དམིགས་པ་དང་པོ་དང་སྦྱར་ཏེ་ཧཱུྃ་སུམ་སྦྲེལ་ཁོ་ན་གཙོ་བོར་བཟླ། བདུན་གཉིས་པ་ལ་ཧཱུྃ་བཟླས་ཀྱིས་འགོ་ཅུང་ཟད་དྲངས་པས་དམིགས་གནད་གཉིས་པ་དང་སྦྱར་ཏེ་བསྙེན་སྒྲུབ་ཆིག་དྲིལ་གྱི་སྔགས་གྲོ་བོ་ལོད་ཁོ་ན་བཟླ། བདུན་གསུམ་པ་ལ་བསྙེན་སྒྲུབ་ཅུང་ཟད་ཀྱིས་འགོ་དྲངས་པས། ཕྲིན་ལས་གནད་བྱང་དུ་གསལ་བའི་དམིགས་པ་དང་བཅས་འཁོར་སྔགས་དང་སྡེ་བརྒྱད་སྲོག་སྔགས་ཤམ་བུར་སྦྱར་ཏེ་བཟླ་ཞིང་། ཐུན་གྱི་ཕྱེད་མཚན་མེད་ལས་སྦྱོར་མན་ངག་ལྟར་སྤྱིར་ལས་ལ་སྦྱོར་བའི་དམིགས་གནད་དང་སྦྱར་ཏེ་རྩ་སྔགས་ཀྱི་

ཤམ་བུར་དྲེགས་པའི་གཟིར་སྔགས་དང་སྤུ་གྲིའི་མཚོན་ཆའི་དྲག་སྔགས་སྦྲེལ་ཏེ་བཟླ། བདུན་བཞི་པར་ཁྱད་པར་སྲུང་ཟློག་བསད་པའི་ལས་ལ་སྦྱོར་བ་སྟེ། ཐོར་ཐུན་ལ་བསྙེན་སྒྲུབ་ལས་སྦྱོར་ཤམ་བུ་དང་བཅས་པ། སྔ་ཐུན་ལ་ཤམ་བུ་ཡན་ཁྱུག་ཙམ་གྱི་རྗེས་སུ་སྲུང་བ་རྡོ་རྗེའི་རྫོང་ཁྲ་བ་ཀྱི་དམིགས་བཟླས། དགོང་ཐུན་ལ་དེ་བཞིན་དུ་ཟློག་པ་གནམ་ལྕགས་ཐོག་གཟེར་གྱི་དམིགས་བཟླས་མཐར་བདེན་སྟོབས་ཐལ་རྡེབ་དང་བཅས་པ། སྲོད་ཐུན་ལ་བསད་པ་སྡིག་པ་སྙིང་འཛིན་གྱི་དམིགས་བཟླས་བསྐུལ་བཅས་བྱ། གང་གི་ཚེ་ནའང་ཐུན་ཐམས་ཅད་ཀྱི་མཇུག་ཏུ་ཨ་ལི་ཀི་ལི་ཡིག་བརྒྱ་སྦྲེལ་བ་ལན་གསུམ་གྱིས་ཉམས་པ་བསྐང་ཞིང་རྟེན་འབྲེལ་སྙིང་པོས་ནུས་པ་བརྟན་པར་བྱས་ལ། སྲུང་འཁོར་མི་བསྡུ་བར་སྦྲ་ཕུབ་པ་ལྟར་བཞག་ནས་རྟེན་དང་བརྟེན་པའི་སྣང་ཆ་ཐམས་ཅད་འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་། དགེ་བ་བསྔོ་ཞིང་ཤིས་པ་བརྗོད་པས་མཚམས་སྦྱར་ཏེ་ཐུན་མཚམས་ལ་འཇུག །སྲོད་ཐུན་ཀྱང་དེ་དང་འདྲ་བ་ལས་ཐུན་མཐར་དམ་ཅན་གཏོར་སྐྱོང་དང་། ཚོགས་མཆོད་འབུལ་ཞིང་ལྷག་མ་གཏར་འཛིན། རྗེས་

བསྡུ་སོགས་སྔར་བཞིན་གྱིས་མཚན་མའི་རྣལ་འབྱོར་ལ་འཇུག །ཐོ་རངས་ལྡང་བའི་རྣལ་འབྱོར་གྱིས་ལངས་ཏེ་སྔོན་འགྲོའི་ཆོས་རྣམས་ནས་བཟུང་ཐུན་གྱི་གཏོང་ལུགས་སྔ་མ་ལྟར་བྱ་ཞིང་། རྒྱུན་གྱི་ཐུན་འགོ་ཐོར་ཐུན་ཡིན་པས་སྔོན་འགྲོ་རྣམས་རྒྱས་པ་དང་། སྲོད་ཐུན་འདི་ཐུན་མཇུག་ཡིན་པས་ཚོགས་མཆོད་སོགས་རྗེས་ཆོག་རྣམས་སྦྲེལ་བ་ཡིན་ལ། དེ་ལྟར་ཐུན་བཞིའི་ཁྲིགས་རིམ་གྱིས་ཉམས་སུ་བླངས་ནས་ནངས་བར་གྲོལ་རྒྱུའི་དེ་རིང་གི་ཉིན་གཅིག་ལ་བསྙེན་སྒྲུབ་ལས་སྔགས་ཁྱུག་ཙམ་རེའི་རྗེས་སུ་མདུན་གྱི་སྒྲུབ་ཕུར་སྐུ་རྟེན་གཏོར་མ་བཅས་རང་དང་ཞལ་སྤྲོད་ཚུལ་གྱི་ལྷར་བསྒོམ་ལ་དངོས་གྲུབ་བསྡུ་བའི་དམིགས་པ་དང་བཅས་གྲོ་བོ་ལོད་ཀྱི་སྔགས་ཤམ་དུ། སརྦ་སིངྔྷི་ཕ་ལ་ཧཱུྃ། ཞེས་བཏགས་པ་ལ་བཟླས་པའི་དངོས་གཞི་བྱ། སང་སྔ་ཐུན་ལ་ཚོགས་གཏོར་གསར་པ་རྒྱ་ཆེར་བཤམ། ཕྲིན་ལས་ཀྱི་གཞུང་བསྲང་སྟེ་དངོས་གྲུབ་བསྡུ་བའི་བཟླས་པ་ཅི་ནུས་དང་། གཏོར་སྐྱོང་ཚོགས་མཆོད་ཀྱི་བར་བྱས་རྗེས་མདུན་རྟེན་ལྷར་གསལ་བ་ལ་མཆོད་ཅིང་བསྟོད། ཡིག་བརྒྱ་མང་དུ་བཟླས་པས་འཁོན་གཅུག་བཤགས་ནས། ཧཱུྃ༔ བདེ་གཤེགས་ཀུན་འདུས་རྡོ་རྗེ་གྲོ་ལོད་རྩལ༔ ཞེས་སོགས་ཀྱིས་བསྐུལ་ལ་དངོས་གྲུབ་བླངས་ཏེ་སྒྲུབ་ཕུར་དང་གཏོར་མ་སོགས་

གནས་གསུམ་དུ་འཇོག་ཅིང་། ལྷ་འོད་དུ་ཞུ་བའི་དམ་རྫས་ལ་ལོངས་སྤྱད། མཇུག་ཆོག་ཤིས་བརྗོད་ཀྱི་བར་མཐར་དབྱུང་། ཁ་སྐོང་དུ་ཞི་བའི་སྦྱིན་སྲེག་འགྲུབ་ན་མཆོག་དང་། དེ་མིན་སྔགས་ཀྱིས་ཁ་བསྐང་བས་ཀྱང་འཐུས། དེ་ནས་ཐོ་འགྲོལ་ཞིང་གནས་སྲུང་བ་སོགས་ཀྱིས་གྲུབ་བོ། །དེ་ལྟར་འདིར་སྨོས་པ་ནི་ཁྱད་པར་གྱི་སྒོས་ཆོས་བྱེ་བྲག་པ་རྣམས་མདོ་ཙམ་བྲིས་པ་སྟེ། གཞན་དུ་བསྙེན་པའི་སྐབས་ཀྱི་གོ་བ་ར་བྱ་བའི་གནད་རྣམས་སྤྱི་ལྟར་ཤེས་པར་བྱའོ། །ཞེས་པའང་རྩ་བའི་ཆོས་ཀྱི་བདག་པོར་གྲུབ་པ་དཔལ་མིའི་དབང་པོ་ཚེ་དབང་རིག་འཛིན་རྣམ་པར་རྒྱལ་བའི་སྡེའི་ཐུགས་དམ་ཉམས་བཞེས་ཀྱི་གསལ་འདེབས་སུ། འཇིགས་བྲལ་ཡེ་ཤེས་རྡོ་རྗེས་བསམ་འགྲུབ་ཕོ་བྲང་གི་གནྡྷོ་ལར་ཟིན་བྲིས་སུ་བཏབ་པ་ཛ་ཡནྟུ།། །།

བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་བསྙེན་ཡིག་ལས་འཕྲོས་པའི་མན་ངག་ཞལ་ཤེས་བཀའ་རྒྱ་ཅན།

༄༅། །བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་བསྙེན་ཡིག་ལས་འཕྲོས་པའི་མན་ངག་ཞལ་ཤེས་བཀའ་རྒྱ་ཅན་བཞུགས་སོ། །

ཨོཾ་སྭ་སྟི། བླ་མ་དྲག་པོ་བསྙེན་པོའི་སྐབས་ཀྱི་དམིགས་གནད་ཐུན་མོང་མ་ཡིན་པ་ཞལ་ལས་ཤེས་དགོས་པ་འགའ་ཞིག་ཟིན་ཐོར་འགོད་པ་ལ། བསྙེན་སྒྲུབ་ཀྱི་དམིགས་པ་གཞུང་གསལ་གོ་སླ་ཞིང་། འཁོར་སྔགས་སྐབས་སུ། རང་ཉིད་གཙོ་བོའི་ཐུགས་ཀའི་འོད་ཟེར་གྱིས་འཁོར་རྣམས་བསྐུལ། དེ་རྣམས་ཀྱིས་ཐུགས་ཀའི་འོད་ཟེར་དང་སྤྲུལ་པ་ཡང་སྤྲུལ་ཉི་ཟེར་གྱི་རྡུལ་ལྟར་འཕྲོས་པས་སྣང་སྲིད་ཐམས་ཅད་གང་། འཁོར་འདས་ཀྱི་བཅུད་དང་དགེ་མཚན་ཐམས་ཅད་བསྡུས་ཏེ་རང་ལ་ཐིམ། ཅི་འདོད་པའི་ཕྲིན་ལས་རྣམ་བཞི་ཐོགས་མེད་དུ་སྒྲུབ་པར་བསམ་ཞིང་རྩ་སྔགས་ལ་འཁོར་སྔགས་ཤམ་བུ་སྦྱར་ཏེ་བཟླ།

སྡེ་བརྒྱད་སྲོག་སྔགས་སྐབས་སུ། རང་གི་ཐུགས་ཀ་ནས་འོད་ཟེར་ལྕགས་ཀྱུའི་དབྱིབས་ཅན་རྣོ་ཞིང་མྱུར་བ་འཕྲོས་པས་སྡེ་བརྒྱད་རྣམས་སོ་སོའི་གནས་ནས་རང་དབང་མེད་པར་བཀུག་སྟེ་མདུན་དུ་འཁོད། བདག་ཉིད་དྲག་པོའི་གཟི་བྱིན་མ་བཟོད་པར་སྔངས་སྐྲག་འདར་ཕྲི་ལི་ལི་འདུད་ཅིང་ཅི་བསྒོ་བའི་བཀའ་ལ་ཉན་པར་བསམ་ཞིང་རྩ་སྔགས་ལ་སྡེ་བརྒྱད་སྲོག་སྔགས་སྦྲེལ་ནས་བཟླ། མཐར་དེ་རྣམས་སོ་སོའི་སྲོག་སྙིང་ཚངས་པ་ཨ། གཤིན་རྗེ་ཡ། མ་མོ་མ། བདུད་དུ། བཙན་རུ། རྒྱལ་པོ་ཙ། གནོད་སྦྱིན་ཤ། ཀླུ་ན་རྣམས་སུ་གྱུར་པ་ཚུར་དྲངས་ཏེ་ཐུགས་སྲོག་ཧཱུྃ་གི་ཞབས་ཀྱུར་ཐིམ་པར་མོས། ལས་སྦྱོར་སྤུ་

གྲིའི་སྐབས་སུ། རང་གི་ཐུགས་ཀ་ནས་སྔགས་ཀྱི་འོད་ཟེར་གང་ལ་རེག་པ་ཙམ་གྱིས་ཐོགས་མེད་དུ་གཅོད་པར་བྱེད་པ་སྤུ་གྲི་འབར་བའི་རང་བཞིན་ཅན་བསྐལ་པ་དུས་ཀྱི་མེ་ལྕེའི་ཚྭ་ཚྭ་འཕྲོ་བ་དཔག་ཏུ་མེད་པ་འཕྲོས་པས། འདྲེ་རྒོད་རྒྱལ་འགོང་འབྱུང་པོ་སོགས་གང་ལ་དམིགས་པ་རྣམས་ཀྱི་སྲོག་རྩ་དུམ་བུར་བཅད་ཅིང་གཞོབ་ཐུལ་གྱིས་བསྲེགས་ཏེ་ལྷག་མ་ཙམ་ཡང་མ་ལུས་པར་བསམ་ཞིང་རྩ་སྔགས་ལ་གཟིར་སྔགས་དང་མཚོན་ཆའི་དྲག་སྔགས་སྦྲེལ་ཏེ་དྲག་ཏུ་བཟླ། སྲུང་བའི་སྐབས་སུ། རང་ཉིད་དབང་དྲག་ཏུ་གསལ་བའི་ལྟོ་བར་གསེར་གྱི་བྱང་ཆུབ་ཆེན་པོའི་མཆོད་རྟེན་རྩེ་མོ་དབུ་གཙུག་ལ་ཐུག་པ་ཙམ་པའི་སྙིང་གའི་ཐད་ཀྱི་བུམ་པའི་ནང་དུ་ཕ་ལམ་ལས་གྲུབ་རྡོ་རྗེ་རྩེ་དགུའི་ལྟེ་བར་ཧཱུྃ་ཡིག་དམར་པོའི་ཀླད་ཀོར་ནང་དུ་བླ་མ་སློབ་དཔོན། ཧའི་ཁོག་པར་རང་དྲག་པོར་གསལ་བ་ཡིན་ཀྱང་སྲུང་བའི་སྐབས་འདིར་ཐ་མལ་གྱི་མིང་གཞི་རང་གི་ད་ལྟའི་གཟུགས་ཇི་ལྟར་བར་གནས་པ། དེའི་གཡས་གཡོན་མདུན་རྒྱབ་རྣམས་སུ་ཕོ་ཉེ་མོ་ཉེ་མཆེད་གྲོགས་ཡོན་བདག་སོགས་དང་། འ་དང་ཞབས་ཀྱུའི་ནང་ཁུག་ཏུ་བྲན་གཡོག་ནོར་ཕྱུགས་སོགས་བསྲུང་བྱ་གང་ཡོད་ཚུད་པ། ཧཱུྃ་གི་ཕྱི་རོལ་དུ་ཤེས་རབ་ཀྱི་རང་བཞིན་འོད་དམར་པོའི་

གུར་དང་། དེའི་ཕྱི་མར་ཐབས་ཀྱི་རང་བཞིན་འོད་དཀར་པོའི་གུར་ཏེ་གུར་ཁང་ཉིས་སྦྲག་གིས་བསྟུམ་པས་སྣང་སྲིད་ཀྱི་ལྷ་འདྲེ་སུས་ཀྱང་མི་མཐོང་བ། ཧཱུྃ་ལས་འོད་ཟེར་ཞིང་ཀུན་ཏུ་ཁྱབ་པར་འཕྲོས་པས་རྒྱལ་བ་རབ་འབྱམས་མཆོད། བྱིན་རླབས་ནུས་པ་འོད་ཟེར་གྱི་རྣམ་པར་ཚུར་འདུས་ཏེ་རང་དང་བསྲུང་བྱ་རྣམས་ལ་ཐིམ་པས། ལུས་ལ་རྡོ་རྗེའི་གོ་ཁྲབ་རྡོ་རྗེ་རྒྱ་གྲམ་སྣེ་སྦྲེལ་བ་འབའ་ཞིག་གི་བར་སྟོང་རྣམས་ལྕགས་སྡིག་དང་མེ་ཁྱུང་གི་གོ་འཚམས་མེད་པར་གཏམས་པས་ཞུ་ལུགས་སུ་བགོས་ཤིང་། གཞལ་ཡས་ཁང་གི་ཕྱི་རོལ་དུ་ནང་ནས་རིམ་པ་བཞིན་གནམ་ལྕགས་ཀྱི་འཁོར་ལོ། རྡོ་རྗེ། བེ་ཅོན། ཐོད་དབྱུག །རལ་གྲི་བཅས་ཀྱི་གུར་ཁང་གི་ཕྱི་ནས་ཡེ་ཤེས་ཀྱི་མེ་དཔུང་མཐའ་མེད་དུ་འབར་བས་དཀྲིགས་ཏེ་ཅིས་ཀྱང་མི་ཤིགས་པར་བསམ། རང་ཉིད་བསྲུང་ན་མ་མ་དང་། ཡོན་བདག་བསྲུང་ན་ད་ན་བ་ཏི་ཞེས་བསྒྱུར་བའི་སྲུང་སྔགས་ཤམ་བུར་སྦྱར་ཏེ་བཟླ། ཟློག་པའི་སྐབས་སུ། རང་ཉིད་དྲག་པོའི་སྐུའི་ཆ་ལས་ཁྲོ་ཆུང་དང་། ཕྱག་གཡས་པའི་རྡོ་རྗེ་ལས་མེ་ཁྱུང་། གཡོན་པའི་ཕུང་རྩེ་ནས་ལྕགས་སྡིག་རྣམས་དཔག་ཏུ་མེད་པ་འཕྲོས། འཁོར་རྣམས་ཀྱང་

། ཞལ་ཕྱིར་གཟིགས་ཤིང་སྐུ་ལས་རང་འདྲའི་སྤྲུལ་པ་མཚོན་ཆ་ཐོགས་པ་དང་། ཕྱི་རོལ་གྱི་སྲུང་འཁོར་ལས་ཀྱང་སྤྲུལ་པ་དེ་བཞིན་བསམ་གྱིས་མི་ཁྱབ་པ་སྤྲོས་པས་དགྲ་བགེགས་བྱད་མ་གནོད་བྱེད་ཐམས་ཅད་བསད་གཏུབ་ཟོས་ཏེ་རྡུལ་ཕྲན་ཙམ་ཡང་མ་ལུས་པར་བསམ་ལ་རྩ་སྔགས་གཟིར་ཤམ་ཟློག་སྔགས་སྦྲེལ་ཏེ་བཟླས་མཐར། བདེན་སྟོབས་བརྗོད་པ་སྤྱི་ལྟར་ལས། རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་དགྲ་འདྲེ་ཆག་ཆེ་ཉམ་ང་བྱད་ཕུར་རྦོད་གཏོང་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་གནོད་བྱད་དགྲ་བགེགས་བྱད་མའི་སྟེང་དུ་མཱ་ར་ཡ་བྷྱོ་ཟློག །ཅེས་ཐལ་རྡེབ་བྱ་ཞིང་། སྤྲོ་ན། བཀའ་ལྟར་མི་བྱེད་ཅིང་དམ་ལ་མི་གནས་པ་ཐམས་ཅད་འདིར་མ་གནས་པར་གཞན་དུ་དེངས་ཤིག །སྲིད་པ་སྤྱི་ནས་བཤིག་ཅིག །སྲིད་གསུམ་དམང་ནས་སྒྱེལ་ཅིག །འཁོར་བའི་གཏིང་ནས་ཕྱུངས་ཤིག །བསྐལ་པའི་མེས་སྲེགས་ཤིག །དམ་ཚིག་དམོད་པས་སྡིགས་ཤིག །བཀའ་ཡི་ཆད་པ་ཆོད་ཅིག །གནམ་ལྕགས་རལ་གྲིས་སྤྱི་བོའི་གཙུག་ནས་ཁོས་ཤིག །སུམྦྷ་

ནིས་ནོན་ཅིག །སྲིད་གསུམ་གར་སྐྱེས་གར་གནས་ཀྱང་སྡིག་ཅན་འདིའི་སྟེང་དུ་གནམ་ལྕགས་རྡོ་རྗེའི་ཆར་ཆེན་པོ་ཕོབ་ཅིག །གནོད་བྱེད་ཤ་ཏྲཱུྃ་མཱ་ར་ཡ་རྦད། སྦྱོར་བ་ངན་པ་ཐམས་ཅད་འདིས་ཐུལ་ཅིག །ཅེས་དམོད་པའང་བརྗོད། བསད་པའི་སྐབས་སུ། རང་ཉིད་དབང་དྲག་འཁོར་གཞལ་ཡས་ཁང་དང་བཅས་པའི་སྣང་ཆ་དེ་ཉིད་སྐད་ཅིག་གིས་གནས་འགྱུར་ཏེ་ལྕགས་སྡིག་མགོ་དགུ་ཁ་དགུ་རྭ་བཅོ་བརྒྱད་པ་ཤིན་ཏུ་འཇིགས་པ་སྟོང་གསུམ་ཁེངས་པ་གཅིག་ཏུ་བསྒོམས་ནས། བཛྲ་རཱ་ཙའི་བཟླས་པ་ཅི་འགྲུབ་མཐར། སྡིག་པའི་ཐུགས་སྲོག་ཧཱུྃ་དམར་ནག་ལས་ཛཿཡིག་དཔག་ཏུ་མེད་པ་སྤྲོས་པ་རྣམས་སྡིག་པར་གྱུར་ཏེ་སྡིག་པ་རང་འདྲ་བ་དཔག་ཏུ་མེད་པས་འཇིག་རྟེན་ཐམས་ཅད་མེར་གྱིས་ཁེངས་ཏེ་གནོད་བྱེད་རྒྱལ་བསེན་ཐམས་ཅད་ཤ་ལ་སྦྲང་མ་རུབ་པ་ལྟར་ཕྱི་ནང་ཐམས་ཅད་ནས་ཟོས་པས་ལྷག་མ་རྡུལ་ཕྲན་ཙམ་མེད་པར་བསམ་ལ། འདི་དྲག་པོ་སྡིག་པར་གནས་འགྱུར་བ་ཡིན་པས་དྲག་སྒྲུབ་ཀྱི་སྔགས་མི་དགོས་པས། བཛྲ་ཡཀྵ་ཏྲིག་ནན་གྱི་སྔགས་སྐབས་སྦྱར་བཟླས་རྗེས་སྡིག་པའི་བསྐུལ་བྱས་ནས་གསལ་

ཆ་དེ་ཉིད་མེ་ལོང་ལ་ཧས་བཏབ་པ་བཞིན་ཡལ་བའི་ངང་ལ་དར་ཅིག་བཞག །སླར་ཆུ་ལས་ཆུ་བུར་བརྡོལ་བ་ལྟར་ཕོ་བྲང་རྟེན་དང་བརྟེན་པར་བཅས་པའི་སྣང་ཆར་ལམ་གྱིས་སད་པར་བལྟ། སྡིག་པ་སྙིང་འཛིན་གྱི་དམིགས་པ་འདི་ཤིན་ཏུ་རྩུབ་པས་འདྲེ་སྲིན་ཚ་ངར་ཆེ་བ་དང་དམིགས་བསལ་མ་གཏོགས་རྒྱུན་ལྡན་དཀྱུས་སུ་བྱ་མི་རུང་ཞིང་། ལས་གང་ལའང་དམིགས་མེད་ཀྱི་ལྟ་བའི་རྩིས་ཟིན་པ་ནི་ཅི་ནས་གལ་ཆེ་བ་ཡིན་ནོ། །ཞེས་པའང་འཇིགས་བྲལ་ཡེ་ཤེས་རྡོ་རྗེས་བརྒྱུད་འཛིན་ངེས་པའི་སྐལ་ལྡན་རྣམས་ཀྱི་དོན་དུ་སྤེལ་བ་སྟེ་གང་བྱུང་གིས་འཆོལ་བར་སྤྱོད་ན་དྲེགས་པ་སྡེ་བརྒྱད་ཀྱི་བཀའ་ཆད་འབེབས་པར་གདོན་མི་ཟ་བས་བག་ཡོད་པར་བྱའོ།། །།

སྒོ་སྲུང་རྒྱལ་འགོང་གནད་འབེབས་ཟབ་མོ།

༁ྃ༔ སྒོ་སྲུང་རྒྱལ་འགོང་གནད་འབེབས་ཟབ་མོ་བཞུགས༔ མ་འོངས་རྒྱ་འདྲེ་འགོང་པོས་སྐྱེ་འགྲོ་ཡོངས་ལ་འཚེ༔ དེ་ཉིད་འགྲིམ་ལམ་བཅད་པ་ཡི༔ རྒྱལ་འགོང་གནད་འབེབས་སྒོ་སྲུང་ཟབ་མོ་བསྟན༔ འདི་མཐོང་རྒྱལ་འགོང་མ་ལུས་ཀུན༔ དོན་སྙིང་གས་ནས་རྒྱང་གྲགས་བྲོས༔ ལྕགས་སྡིག་མགོ་དགུ་ཁ་སྤྲོས་བར༔ དམ་ཉམས་རཱུ་པ་མགོ་ལ་བསྭེ་ཐེབ་ལག་གཉིས་རྒྱབ་ཏུ་བཀྱིག༔ རྐང་གཉིས་ལྕགས་སྒྲོག་བསྡམ་པ་དེ༔ མགོ་བོ་སྡིག་པའི་ཁ་རུ་འཛིན༔ རྐང་གཉིས་དེ་བཞིན་སྡིག་པའི་ཁ་རུ་འཛིན༔ གནས་བཞིར་ཛཿཧཱུྃ་བཾ་ཧོ་དང་༔ དེ་ནས་ཕྲག་ནས་འཕྲེད་དེད་དུ༔ ནོར་འཁྲུལ་མེད་པར་འདི་ཉིད་བཀོད༔ སུ་ཏྲི་མཱ་ར་ཡ་རྦད་ནན་ནན༔ ས་དུ་སྟྭམྦྷ་ཡ་གཏུབ་གཏུབ་ཏྲི་ཏོ་བ་རི་ཤག་ཕྱེས་ཕྱེས༔ དུ་མེ་ཙ་ཏི་ལ་ཙཀྲ་ཙཀྲ་ཧ་ན་ཧ་ན་ཧཱུྃ་ཕཊ༔ སྲོག་ཏི་ཏྲི་མཱ་ར་ཡ་ཤག་ཕྱེ་ཕྱེ༔ ཐུམ་རིལ་རིལ་ཧཱུྃ་ཕཊ༔ ཁྱིམ་སྒོ་ལམ་སྲང་འདི་ལ་རྒྱལ་འགོང་དམ་སྲིའི་རིགས་སུ་གྱུར་པ་ཐམས་ཅད་ཀྱི་གནོད་པས་མི་ཚུགས་པར་སྲུངས་ཤིག་རཀྵ་རཀྵ༔ དེ་ནས་སྡིག་པའི་མཇུག་རཱུ་པའི་མགོ་བོའི་ཐད་ནས་ཡིག་མགོ་ཕྱིར་ལ༔ དྲག་པོའི་སྔགས་རྒོད་འདི་རྣམས་བཀོད༔ ཨོཾ་ཧྲཱིཿ

པདྨནྟ་ཀྲྀ་ཏ་བཛྲ་ཀྲོདྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཧཱུྃ་ཕཊ་ཕཊ༔ ཨོཾ་བཛྲ་གུ་རུ་གྲོ་བོ་ལོཏ་ལོ་ཀ་ཀྲོ་དྷ་ཧཱུྃ་ཧཱུྃ་ཕཊ་ཕཊ༔ ཨོཾ་བཛྲ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷཱ་ཀི་ནཱི་ཨརྩིག་ནི་རྩིག་ན་མོ་བྷ་ག་ཝ་ཧཱུྃ་ཧཱུྃ་ཕཊ་ཕཊ༔ བཛྲ་ཧཱུྃ༔ ཡཀྴ་ཧཱུྃ༔ རཀྵ་ཧཱུྃ༔ ཨ་ཡ་མ་ད་རུ་ཙ་ཤ་ན་གནོད་བྱེད་རྒྱལ་འགོང་དམ་སྲི་ཐམས་ཅད་ཀྱི་བླ་ཚེ་སྲོག་སྙིང་ལ་མཱ་ར་ཡ་ཧཱུྃ་ཕཊ༔ ཁྱིམ་སྒོ་ལམ་སྲང་འདི་ཉིད་ལ་རྒྱལ་འགོང་དམ་སྲིའི་རིགས་སུ་གྱུར་པ་རྣམས་ཀྱི་གནོད་པ་དང་འགྲིམ་ལམ་ཐམས་ཅད་ཀྱིས་མི་ཚུགས་པར་སྲུངས་ཤིག༔ སྒྲིབ་ཅིག་རཀྵ་རཀྵ༔ སྲུངས་ཤིག་སྐྱོབས་ཤིག༔ རཀྵ་རཀྵ༔ འདི་ཉིད་མ་བལྟེབ་མ་དྲིལ་སྒོའི་ཡ་ཐེམ་དུ་བཏགས༔ རྒྱ་འདྲེ་འགོང་པོ་དམ་སྲིའི་རིགས་སུ་གྱུར་པ་རྣམས་ཀྱིས་གནོད་པ་སྐྱེལ་མི་ནུས་ཤིང་༔ འགྲིམ་ལམ་ཆོད་པར་འགྱུར་རོ༔ སྔོན་སློབ་དཔོན་དང་སློབ་མ་གཉིས་མ་འཆམས་པས༔ སློབ་མ་དམ་ལོག་ནས་སློབ་དཔོན་བསད་པས༔ སློབ་དཔོན་ལྕགས་ཀྱི་སྡིག་པ་ནག་པོ་མགོ་དགུ་རྭ་བཅོ་བརྒྱད་ཡོད་པ་ཞིག་ཏུ་སྐྱེས༔ སློབ་མ་དེ་དམ་ཉམས་ནས་རྒྱལ་འགོང་དུ་སྐྱེས༔ དེ་ནས་ལྕགས་ཀྱི་སྡིག་པ་ནག་པོ་དེས༔ རྒྱལ་འགོང་དེའི་སྙིང་ཁྲག་འཇིབ་

ཅིང་བཅས་ནས་ཟོས༔ དེའི་ཕྱིར་ན་ལྕགས་ཀྱི་སྡིག་པ་རྒྱལ་འགོང་གི་གཤེད་དུ་བབ་པ་ཡིན་ནོ༔ ལར་འདི་ཉིད་ཕོ་འདྲེ་དང་གསོན་འདྲེའི་རིགས་སུ་གྱུར་པ་ཐམས་ཅད་ལ་བསྔགས་པ་ཡིན་ནོ༔ དེའི་ཕྱིར་མང་དུ་སྤེལ་ན་རང་ལ་འཁུ་བར་འགྱུར་རོ༔ དེ་བས་མང་དུ་མ་སྤེལ་ས་མ་ཡ༔ རྒྱ་རྒྱ་རྒྱ༔ ཞེས་བདུད་འདུལ་གཏེར་ཁ་ལས་ཁོལ་ཕྱུངས་ཁ་སྐོང་དུ་བསྡེབས་པའོ།། །།

ཡང་གསང་འདུས་པ་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཆོས་སྡེ།

༄༅། །ཡང་གསང་འདུས་པ་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཆོས་སྡེ་བཞུགས། །

ཨོཾ་སྭསྟི། ཡང་གསང་བདུད་འདུལ་དབང་དྲག་རྡོ་རྗེ་གྲོ་ལོད་ཀྱི་ཆོས་སྡེ་འདིར། གཞུང་རྩ་བའི་སྐོར་དང་། ཡན་ལག་ཁ་སྐོང་གི་སྐོར་གཉིས་ཀྱི། དང་པོ་ལ། ལོ་རྒྱུས་ལུང་གི་བྱང་བུ། སྨིན་ལམ་དབང་གི་མན་ངག །དྲེགས་པ་སྡེ་བརྒྱད་ཀྱི་སྲོག་གཏད། ཡང་གསང་གི་སྒྲུབ་པ་སྲོག་གི་ཏི་ཀ །ཕྲིན་ལས་གནད་ཀྱི་བྱང་བུ། མཚན་མེད་སྲུང་ཟློག་བསད་པ། མཚན་བཅས་སྲུང་ཟློག་བསད་པ། མཐའ་སྡུད་མནན་སྲེག་འཕང་བ། ཕྱིར་ཟློག་འཕང་བའི་གཟེར་ཁ། འགོང་པོ་ཨར་ལ་གཏད་པ། རྒྱལ་བསེན་ཤི་ས་བསྟན་པ། ལྷ་སྲིན་དམ་བསྒྲགས། དུག་ཁྲག་རྫས་རྒོད། ཁྱད་པར་གྱི་ཕྲིན་ལས། དབང་གི་སྲེག་བླུགས་ཀྱི་མན་ངག །སྡེ་བརྒྱད་ཀྱི་གསོལ་མཆོད་བསྐུལ་བྱང་བཅས་རིང་སྦྲེལ་ལ་ལྡེབ་༢༩ བདུད་འཇོམས་ཁྲག་འཐུང་པདྨའི་སྲོག་སྒྲུབ་ལྡེབ་༨ བཅས། གཉིས་པ་ཡན་ལག་ཁ་སྐོང་གི་སྐོར་ལ། བརྒྱུད་འདེབས་ལྡེབ་༡ལས་བྱང་དངོས་གྲུབ་འདོད་འཇོ་ལྡེབ་༡༡ རྒྱུན་ཁྱེར་སྙིང་པོ་དྲིལ་བ་ལྡེབ་༣ སྐོང་བ་ལྡེབ་༢ སྡེ་བརྒྱད་གསོལ་མཆོད་༡ སྒྲུབ་ཁོག་དངོས་གྲུབ་གཏེར་མཛོད་ལྡེབ་༡༩ སྦྱིན་སྲེག་ཕྲིན་

ལས་རྣམ་རོལ་ལྡེབ་༡༡ དབང་གི་སྲེག་བླུགས་ཁམས་གསུམ་མྱུར་འགུགས་ལྡེབ་༣ སྨད་ལས་རྡོ་རྗེའི་ཐོག་ཆར་ལྡེབ་༡༢ སྡེ་བརྒྱད་ཀྱི་བསྐུལ་བའི་འཕྱོང་ལྡེབ་༢ དྲག་སྲེག་བསྐལ་མེའི་འཕྲུལ་འཁོར་ལྡེབ་༧ མནན་པ་རྡོ་རྗེའི་ལྷུན་པོ་ལྡེབ་༥ དེའི་ལག་ལེན་ཟིན་བྲིས་ལྡེབ་༡༣ འགོང་པོ་ཨར་གཏད་འཆོར་མེད་དུས་ཀྱི་ཞགས་པ་ལྡེབ་༦ དེའི་ཟིན་བྲིས་ལྡེབ་༢ རྒྱལ་འགོང་ཟ་ཁ་སྤོ་ཐབས་ལྡེབ་༣ བཀའ་བསྒོ་རྡོ་རྗེའི་ཐོག་ཆར་ལྡེབ་༣ དབང་ཆོག་སྨིན་གྲོལ་འདོད་འཇོ་ལྡེབ་༡༤ ཀ་དག་གི་ཁྲིད་ཡིག་ཡེ་ཤེས་སྣང་བ་ལྡེབ་༦ བསྙེན་ཡིག་དངོས་གྲུབ་བུམ་བཟང་ལྡེབ་༤ བསྙེན་ཡིག་ཞལ་ཤེས་བཀའ་རྒྱ་ཅན་ལྡེབ་༤ སྒོ་སྲུང་རྒྱལ་འགོང་གནད་འདེབས་ཟབ་མོ་ལྡེབ་༢ གཏོར་དཔེ་ལྡེབ་༢ དཀར་ཆག་ལྡེབ་༢ བཅས་བསྡོམས་ལྡེབ་གྲངས་༡༧༢བཞུགས།། །།

ཕུར་པ་སྤུ་གྲི་རེག་ཕུང་གི་རྩ་བ།

༁ྃ༔ ཕུར་པ་སྤུ་གྲི་རེག་ཕུང་གི་རྩ་བ་བཞུགས་སོ༔

བླ་མ་རྡོ་རྗེ་གཞོན་ནུ་ལ་ཕྱག་འཚལ་ལོ༔ རྒྱུད་ལུང་མན་ངག་ཐམས་ཅད་ཀྱི་གསང་བ་གཅིག་ཏུ་དྲིལ་ཞིང་བིདྱཏྟོ་མ་ལ་འབུམ་སྡེའི་སྙིང་པོའི་ཡང་ཞུན་བཅུད་དུ་བསྡུས་པ་རྡོ་རྗེ་ཕུར་པ་སྤུ་གྲི་རེག་ཕུང་གི་གདམས་པ་འདི་ལ་གསུམ་སྟེ༔ སྨིན་བྱེད་དབང་༔ གྲོལ་བྱེད་ཁྲིད༔ ཕྲིན་ལས་ཁ་ཚར་རོ༔ དང་པོ་ནི༔ དབང་མ་ཐོབ་པ་ལ་དངོས་གྲུབ་ལྟ་ཅི་ཉན་པ་ཙམ་གྱིའང་སྐལ་བ་མེད་པས་ཐོག་མར་དབང་ལ་འཇུག་པར་བྱའོ༔ དེའང་དཔོན་སློབ་ཀྱི་རྟེན་འབྲེལ་ཕུན་སུམ་ཚོགས་པ་ན་དབེན་པའི་གནས་བཙལ་ལ་སའི་ཆོ་ག་བྱ་ཞིང་དཀྱིལ་འཁོར་བྲི༔ དབང་རྫས་བུམ་པ་

བདུད་རྩི་ལྔས་བཀང་བ༔ སྒྲུབ་པའི་ཕུར་བུ༔ གསང་ཐོད༔ རིག་མ༔ ཤེལ་རྡོ༔ ཕྱི་ནང་གསང་བའི་ཆོད་པ་རྣམས་བཤམ༔ དབང་སྒྲུབ་བསྙེན་པ་ཚུལ་བཞིན་དུ་བྱས་ལ་སྒྲུབ་པ་རྟགས་ཐོན་ནས༔ སློབ་མའི་བྱུར་དང་བགེགས་ཕྲལ་ནས་མཎྜལ་ཕུལ་ལ༔ ཧོཿ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་ཕྱིར༔ རྡོ་རྗེ་གཞོན་ནུའི་དབང་མཆོག་སྩོལ༔ ཞེས་གསོལ་བ་བཏབ༔ སྐྱབས་སེམས་ཚོགས་བསགས་ཀྱིས་རྒྱུད་སྦྱངས་ལ་དམ་ཚིག་བཟུང་༔ དེ་ནས་སློབ་མ་རྡོ་རྗེ་གཞོན་ནུར་གསལ་ཞིང་སློབ་

དཔོན་ལ་མོས་གུས་བྱས་པའི་རྐྱེན་གྱིས་དཀྱིལ་འཁོར་གྱི་ལྷ་ཚོགས་རྣམས་ལས་ཡེ་ཤེས་པ་སྐུ་དང་ས་བོན་ཕྱག་མཚན་གྱི་རྣམ་པར་བྱོན་ནས་སློབ་མའི་ལུས་ཀྱི་ནང་གང་སྙིང་གའི་ཧཱུྃ་ལ་ཐིམ་པས་བདེ་སྟོང་གི་ཡེ་ཤེས་རྩོལ་མེད་དུ་ཤར་བའི་དོན་ལ་མཉམ་པར་འཇོག་ཏུ་བཅུག༔ རོལ་མོའི་སྒྲ་དང་སྙིང་པོའི་མཐར༔ ཛྙཱ་ན་ཨཱ་བེ་ཤ་ཡ་ཨ༔ ར་ར་ར་ར་ཙ་ལ་ཡ་ཙ་ལ་ཡ་ཧཱུྃ་ཨ་ཧཾ་ཛྷེཾ༔ ཞེས་བཟླས་ཤིང་བྱིན་ཕེབས་པའི་རྟགས་བྱུང་བ་ན་ཏིཥྛ་བཛྲས་བརྟན་པར་བྱ༔ བུམ་པ་སྤྱི་བོར་བཀོད་ཅིང་༔ ཧཱུྃ༔ སྟོང་གསལ་ཆོས་དབྱིངས་བུམ་པ་རུ༔ བདེ་ཆེན་ཕུར་པའི་ལྷ་ཚོགས་གནས༔ སྐལ་ལྡན་ཁྱོད་ལ་དབང་བསྐུར་བས༔ རྡོ་རྗེ་གཞོན་ནུའི་སྐུ་ཐོབ་ཤོག༔ སྔགས་མཐར༔ ཀ་ལཱ་ཤ་ཨ་བྷི་ཥིཉྩ་ཨོཾ༔ ཞེས་བསྐུར་བས་ཆུས་ལུས་གང་ལྷག་མ་སྤྱི་བོར་ལུད་པ་ལས་ཁྲག་འཐུང་རིགས་ལྔས་དབུ་བརྒྱན་པར་བསམ༔ སྒྲུབ་ཕུར་དཀྱིལ་འཁོར་གསུམ་གྱི་རང་བཞིན་སློབ་མར་དབྱེར་མེད་དུ་བསྟིམས་ལ༔ ཧཱུྃ༔ སྣང་སྲིད་ཕུར་བུའི་དཀྱིལ་འཁོར་དུ༔ སྐུ་གསུང་ཐུགས་ཀྱི་ཕྱག་རྒྱ་རྫོགས༔ རྩ་བའི་དཔལ་ཆེན་བསྒོམ་པ་དང་༔ ཕྱོགས་བཅུའི་ཁྲོ་བོ་སྤྲུལ་པར་འགྱེད༔ རྗས་ཀྱི་

སྲས་མཆོག་ལས་མ་མངགས༔ བསྙེན་སྒྲུབ་ཕྲིན་ལས་དབང་ཐོབ་ཤོག༔ ཅེས་ཛཔྲ་དབྱངས་དང་བཅས་ཕུར་པ་གནས་གསུམ་དུ་བཞག་ཅིང་ཕུར་བསྐོར་བྱ༔ གསང་རྫས་བདུད་རྩི་སྦྱིན་ལ༔ ཧཱུྃ༔ བླ་མ་ཧེ་རུ་ཀ་ཡབ་ཡུམ༔ དགའ་བཞི་རོལ་པའི་བྱང་ཆུབ་སེམས༔ བུ་ཡི་ལྕེ་ལ་བཞག་པ་ཡིས༔ བདེ་ཆེན་གསང་བའི་དབང་ཐོབ་ཤོག༔ སྔགས་མཐར༔ གུ་ཧྱ་ཨ་བྷི་ཥིཉྩ་ཨཱ༔ ཞེས་བྱང་སེམས་བདུད་རྩིས་རྩ་གནས་ཐམས་ཅད་གང་ནས་དྭངས་མ་གསལ་ཞིང་བདེ་དྲོད་རྒཡས་པར་བསམ༔ རིག་མ་གཏད་ལ༔ ཧཱུྃ༔ ཤེས་རབ་ཡུམ་གྱི་པདྨ་ལ༔ ཆགས་མེད་བདེ་སྟོང་ཐིག་ལེར་འཁྱིལ༔ འགྱུར་མེད་ལྷན་སྐྱེད་དགའ་བ་མྱོང་༔ ཤེས་རབ་ཡེ་ཤེས་དབང་ཐོབ་ཤོག༔ སྔགས་མཐར༔ མ་ཧཱ་མུ་དྲ་ཨ་བྷི་ཥིཉྩ་ཧཱུྃ༔ ཞེས་བདེ་སྟོང་གི་ཡེ་ཤེས་ཉམས་སུ་མྱོང་བར་བསམ༔ ཤེལ་རྡོ་བསྟན་ལ༔ ཧཱུྃ༔ ཕྱི་དང་ནང་མེད་ཟང་ཐལ་གསལ༔ ཡེ་ནས་རྣམ་དག་རིག་པའི་གཤིས༔ རང་གྲོལ་འཛིན་མེད་ལྷུག་པ་འདི༔ རྡོ་རྗེ་གཞོན་ནུའི་དགོངས་པ་ཡིན༔ སྔགས་མཐར༔ དྷརྨ་དྷཱ་ཏུ་ཨ་བྷི་ཥིཉྩ་ཧཱུྃ༔ ཞེས་རིག་པའི་རྩལ་དབང་བསྐུར་ལ་ཉམས་བསྐྱང་དུ་གཞུག༔

དེ་དག་གིས་དབང་བཞི་ཐོབ༔ སྒྲིབ་བཞི་དག༔ ལམ་བཞི་བསྒོམ་པ་ལ་དབང་༔ འབྲས་བུ་སྐུ་བཞི་འགྲུབ་པའི་སྐལ་པ་ཅན་དུ་བྱས་པ་ཡིན་ཅེས་ངོ་སྤྲད༔ སློབ་མས་དམ་ཚིག་ཁས་བླངས་ལ་གཏང་རག་འབུལ༔ ཚོགས་ཀྱི་འཁོར་ལོ་བྱ་ཞིང་གཏོར་མ་སྐྱོང་༔ དཀྱིལ་འཁོར་བསྡུ་ཞིང་སྨོན་ལམ་དང་བཀྲ་ཤིས་བྱའོ༔ འདི་ནི་རྩ་བ་ཐུགས་ཀྱི་དབང་བཞི་ཤིན་ཏུ་ཟབ་ཅིང་གཉན་པ་ཡིན་པས་གང་ཐོད་ཐོད་ལ་མི་བསྐུར་ཞིང་སྐལ་ལྡན་རྣམས་ལའང་དམ་ཚིག་གི་གསང་རྒྱས་འདེབས་པ་གལ་ཆེའོ༔ ས་མ་ཡ༔ རྒྱ་རྒྱ་རྒྱ༔ གཉིས་པ་གྲོལ་བྱེད་ཁྲིད་ལ་ཐལ་འབྱིན་གྱི་དགོངས་པ་རྣམ་པ་བཞི་སྟེ༔ རིག་པ༔ བྱང་སེམས༔ ཐུགས་རྗེ༔ རྫས་སོ༔ དང་པོ་རིག་པའི་ཕུར་བུ་ལ༔ འདེབས་པ་པོ་ནི༔ བློ་ཤིན་ཏུ་ཡངས་ལ་རྒྱ་ཆེ་བ་ནམ་མཁའ་ལྟ་བུའི་གང་ཟག་གིས་སོ༔ འདེབས་བྱེད་ཀྱི་ཕུར་པ་ནི༔ རང་བྱུང་རིག་པའི་ཡེ་ཤེས་སྤྲོས་པའི་མཐའ་ཐམས་ཅད་དང་བྲལ་བའོ༔ འདེབས་པའི་ཡུལ་ནི༔ ཆོས་ཀྱི་དབྱིངས་རང་བཞིན་ཀུན་ཁྱབ་བརྡལ་བ་ཆེན་པོའི་ཀློང་དུའོ༔ འདེབས་པའི་ཐབས་ནི༔ ཐ་མལ་གྱི་ཤེས་པ་སོར་བཞག་དགག་སྒྲུབ་རེ་དོགས་སྤང་བླང་གི་རྩིས་གདབ་དང་བྲལ་

བར་དབྱིངས་དང་ཡེ་ཤེས་གཉིས་མེད་ཆུ་དང་འོ་མ་འདྲེས་པའི་ཚུལ་གྱིས་ཏེ༔ དེའང་རང་བྱུང་གི་རིག་པ་བློ་འདས་ཆེན་པོའི་འདི་ཉིད་ཀ་དག་རྡོ་རྗེ་གཞོན་ནུའི་དགོངས་པར་ངོ་རང་ཐོག་ཏུ་སྤྲད༔ རང་བབས་གཉུག་མའི་གཤིས་ལུགས་བཞི་ཆ་སུམ་བྲལ་གྱི་ངང་ལས་ནམ་ཡང་མི་གཡོ་བར་གནས་པས་ཐག་གཅིག་ཐོག་ཏུ་བཅད༔ དྲན་རྟོག་ཅི་འཕྲོ་རང་ཤར་རང་གྲོལ་འཛིན་རྩོལ་སྤང་བླང་གཉེན་པོ་མེད་པར་གདིང་གྲོལ་ཐོག་ཏུ་འཆོས་པའོ༔ ཐེབས་པའི་རྟགས་ནི༔ ཐ་མལ་གྱི་མཚན་རྟོག་མཐའ་དག་ཆོས་ཉིད་ཀྱི་ཀློང་དུ་གྲོལ་ཏེ་བྱར་མེད་དུ་རྟོགས་པའི་གདིང་ཐོབ་པའོ༔ མ་ཐེབས་པའི་སྐྱོན་ནི༔ རང་ལས་རང་འཁྲུལ་ཏེ་ལམ་གྱི་ཐབས་གང་བསྟེན་ཀྱང་མཐའ་གཅིག་ཏུ་ཞེན་འཛིན་གྱིས་བཅིངས་ནས་སངས་རྒྱས་ཐོབ་པའི་དུས་མེད་པའོ༔ ཐེབས་པའི་ཡོན་ཏན་ནི༔ རྣམ་པར་རྟོག་པ་རང་ག་མས་འཁོར་བར་འཁྱམས་པའི་སྐྱོན་ལས་གྲོལ་ཏེ་དབྱིངས་རིག་ཟུང་འཇུག་ཡེ་ཤེས་བླ་མའི་ས་ཐོབ་པར་བྱེད་པའོ༔ གཉིས་པ་བྱང་སེམས་ཀྱི་ཕུར་བུ་ལ༔ འདེབས་པ་པོ་ནི༔ བློ་ཆགས་པ་དང་བཅས་པ་བྱ་ཀ་ལནྡ་ལྟ་བུའི་གང་ཟག་གིས་སོ༔ འདེབས་བྱེད་ཀྱི་ཕུར་པ་ནི༔ དགའ་བ་བཅུ་དྲུག་གི་ཐིག་ལེས་གཏམས་ཤིང་བྱིན་གྱིས་བརླབས་པའི་རྡོ་རྗེའོ་

འདེབས་པའི་ཡུལ་ནི༔ རང་བྱུང་གི་ཆོས་འབྱུང་ཡུམ་མཚན་ཉིད་དང་ལྡན་པ་གསང་རྩ་པདྨ་ཅན་ལ་སོགས་པ་ཡོད་པའོ༔ འདེབས་པའི་ཐབས་ནི༔ གཉིས་ཀ་རྩ་རླུང་གིས་རྒྱུད་སྦྱངས་ལ་འདུ་ཤེས་གསུམ་གྱི་སྒོ་ནས་མཉམ་པར་སྦྱོར་བས་ཐིག་ལེ་ཕབ༔ ལུགས་འབྱུང་གི་དགའ་བ་བཞི་རིམ་པར་བསྐྱེད་ཅིང་བདེ་བ་བསྐྱང་༔ དེ་ལས་ལྡོག་ཅིང་ཁྱབ་པར་བཀྲམ་ནས་ལུགས་ལྡོག་གི་དགའ་བཞིའི་མཐར་ཐུག་པར་སྐྱེལ་བ་ཐིག་ལེ་འཕོ་མེད་ཆུ་སྲིན་གྱི་གྲེ་བར་རིན་པོ་ཆེ་ཚུད་པའི་ཚུལ་གྱིས་སོ༔ ཐེབས་པའི་རྟགས་ནི༔ གཉིས་སྣང་གི་རྟོག་ཚོགས་ཐམས་ཅད་ལྷན་སྐྱེས་བདེ་བ་ཆེན་པོའི་ཡེ་ཤེས་སུ་ཤར་བའི་གདིང་ཐོབ་པའོ༔ མ་ཐེབས་པའི་སྐྱོན་ནི༔ དཔེའི་ཡེ་ཤེས་ངོ་མ་འཕྲོད་པས་དོན་གྱི་ཡེ་ཤེས་ངོ་མི་འཕྲོད་ཅིང་དེས་འཁོར་བར་ལྟུང་བའོ༔ ཐེབས་པའི་ཡོན་ཏན་ནི༔ ཆགས་པར་རང་རྒྱུད་པས་མངལ་གྱི་སྲིན་བུར་སྐྱེ་བའི་སྐྱོན་ལས་གྲོལ་ཏེ་བདེ་ཆེན་ཁ་སྦྱོར་ལོངས་སྤྱོད་རྫོགས་པའི་སྐུ་ཐོབ་པར་བྱེད་པའོ༔ གསུམ་པ་ཐུགས་རྗེའི་ཕུར་བུ་ལ༔ འདེབས་པ་པོ་ནི༔ བློ་བརྟན་ཅིང་མི་འགྱུར་བ་རི་བོ་ལྟ་བུའི་གང་ཟག་གིས་སོ༔ འདེབས་བྱེད་ཀྱི་ཕུར་པ་ནི༔ ཐུགས་རྗེའི་རྩལ་སྣང་ལྷ་སྐུ་ཕྱག་རྒྱ་ཆེན་པོའི་ཆོ་འཕྲུལ་དུ་

སྤྲུལ་པའོ༔ འདེབས་པའི་ཡུལ་ནི༔ ཁམས་གསུམ་སྣོད་བཅུད་ཐ་མལ་དུ་བཟུང་བའི་ཞེན་འཛིན་གྱི་རྟོག་པ་རང་ག་མའོ༔ འདེབས་པའི་ཐབས་ནི༔ ཏིང་ངེ་འཛིན་གསུམ་གྱི་སྒོ་ནས་སྣོད་བཅུད་དཀྱིལ་འཁོར་གསུམ་དུ་བསྒོམ་ཞིང་སྣང་གྲགས་རྟོག་གསུམ་ལྷ་སྔགས་ཆོས་ཉིད་ཀྱི་རོལ་པ་སྣང་ལ་རང་བཞིན་མེད་པ་མེ་ལོང་ལ་གཟུགས་བརྙན་ཤར་བའི་ཚུལ་གྱིས་སོ༔ ཐེབས་པའི་རྟགས་ནི༔ མ་དག་པའི་སྣང་བ་ནུབ་ཅིང་དག་པའི་སྣང་བ་འབྱམས་ཀླས་ཏེ་འཁྲུལ་སྣང་ལྷར་ཤར་བའི་གདིང་ཐོབ་པའོ༔ མ་ཐེབས་པའི་སྐྱོན་ནི༔ ཐུགས་རྗེའི་དཔྱང་ཐག་ཆད་པས་སེམས་ཅན་འཁོར་བའི་གཡང་སར་འཁྱལ་ཞིང་རང་ཉིད་ཐར་པའི་ལམ་ཐག་རིང་བའོ༔ ཐེབས་པའི་ཡོན་ཏན་ནི༔ རྟོགས་པས་བདག་བསྒྲལ་ནས་ལྷར་སྣང་རང་རྒྱུད་པས་རུ་དྲར་གོལ་བའི་ཉེས་སྐྱོན་ལས་བྲལ་ཏེ་ཐུགས་རྗེ་སྤྲུལ་པའི་སྐུ་ཐོབ་པར་བྱེད་པའོ༔ བཞི་པ་རྫས་ཀྱི་ཕུར་བུ་ལ༔ འདེབས་པ་པོ་ནི༔ རྒྱུད་བཟང་ལ་རབ་ཏུ་གཏུམ་པ་ཙནྡན་ལྟ་བུའི་གང་ཟག་གིས་སོ༔ འདེབས་བྱེད་ཀྱི་ཕུར་བུ་ནི༔ དངུལ༔ གསེར༔ ཟངས༔ ལྕགས་རྣམས་སམ་དེ་དང་མཐུན་པའི་ཤིང་གི་ཕུར་པ་

མགོ་བོ་རྒྱ་མདུད་སྐེད་པ་ཆང་བཟུང་ལྟེ་བ་རྒྱ་མདུད་དང་ཆུ་སྲིན༔ རྩེ་མོའི་དབལ་ཟླུམ་པོ༔ གྲུ་བཞི༔ ཟླ་གམ༔ ཟུར་གསུམ་པ༔ བཀྲ་བ༔ བརྗིད་པ༔ མཛེས་པ༔ རྣོ་བ༔ བདུད་རྩི༔ བརྒྱད་ལྡན༔ མྱོས་བྱེད༔ དུག་གིས་ངར་བཏབ་པའོ༔ འདེབས་པའི་ཡུལ་ནི༔ འཇིགས་པ་བརྒྱད་༔ འབྱོར་པ་དྲུག༔ དགོས་པ་གསུམ༔ ཉམས་པ་བདུན་རྣམས་ལའོ༔ འདེབས་པའི་ཐབས་ནི༔ རྣལ་འབྱོར་པ་ལྟ་བའི་རྫོང་དུ་ཞུགས༔ སྒོམ་པའི་འཕྲང་ལས་གྲོལ༔ སྙིང་རྗེའི་སྲོག་དང་ལྡན་པས༔ བདག་ལྷ༔ རྫས་སྲས་མཆོག་རིགས་བཞི༔ གང་ལ་འདེབས་པའི་ཡུལ་དེ་མངོན་སུམ་བཞིན་དུ་བསྒོམས་པའི་ཐབས་ཀྱིས་ཐོགས་པ་མེད་པར་འབྱིན་པ་ནོར་བུ་མིག་ཡངས་ལ་རྟ་རྔ་བརྒྱུས་པའི་ཚུལ་གྱིས་སོ༔ ཐེབས་པའི་རྟགས་ནི༔ ཞི་རྒྱས་དབང་དྲག་གི་ཕྲིན་ལས་ལ་རང་དབང་འབྱོར་པའི་གདིང་ཐོབ་པའོ༔ མ་ཐེབས་པའི་སྐྱོན་ནི༔ འགལ་རྐྱེན་མི་བཟློག་ཅིང་མཐུན་རྐྱེན་མི་འཛོམ༔ མི་སྲུན་པ་རྣམས་མི་ཐུལ་ཞིང་༔ སངས་རྒྱས་ཀྱི་བསྟན་པ་མི་འཕེལ་བའོ༔ ཐེབས་པའི་ཡོན་ཏན་ནི༔ རང་གཞན་གང་ལའང་འཇིགས་པ་བརྒྱད་ཀྱིས་མི་ཚུགས༔ འབྱོར་

པ་དྲུག་དང་ལྡན༔ དགོས་པ་གསུམ་དབང་དུ་འདུ༔ ཉམས་པ་བདུན་ཚར་གཅོད་ཅིང་༔ རང་གཞན་གྱི་དོན་འགྲུབ༔ བསྟན་དང་བསྟན་འཛིན་དབུ་འཕང་དམའ་བའི་སྐྱོན་ལས་གྲོལ་ཏེ་སངས་རྒྱས་ཀྱི་བསྟན་པ་འཕེལ་བར་བྱེད་པའོ༔ ཕུར་པ་མཁན་པོ་ཐལ་འབྱིན་གྱི་དགོངས་པ་འདི་བཞི་དང་ལྡན་པ་ནི་ཤིན་ཏུ་གལ་ཆེ་བ་ཡིན་ནོ༔ ས་མ་ཡ༔ རྒྱ་རྒྱ་རྒྱ༔ གསུམ་པ་ཕྲིན་ལས་ཁ་ཚར་གྱི་རིམ་པ་ནི༔ སྒྲུབ་རྟེན་ཕུར་པ་མཚན་ཉིད་དང་ལྡན་པ་བྱུག་སོགས་གསུམ་གྱིས་གཟི་བྱིན་བསྐྱེད་ལ་དལ་གྱི་དབུས་སུ་ཨེ་ཁྲམ་ལ་བརྟན་པར་འགོད༔ གཏོར་མ་སྨན་རཀ་སོགས་ཕྱི་ནང་གི་མཆོད་རྫས་འབྱོར་ཚོགས་བཤམས་ལ་བྱིན་གྱིས་བརླབ༔ ཚོགས་བསགས་ཀྱིས་རྒྱུད་སྦྱོང་ཞིང་༔ བགེགས་བསྐྲད་པ་དང་སྲུང་བའི་འཁོར་ལོ་སྒོམ་པ་རྣམས་སྔོན་དུ་འགྲོ་བས༔ དངོས་གཞི་བསྐྱེད་རིམ་ནི༔ ཧཱུྃ༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆེན་སྔོན་པོ་འབར་བ་ཡིས༔ ནམ་མཁའི་དཀྱིལ་ནས་ཐིག་པ་ཤར༔ འབར་བ་ཆེན་པོ་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ རང་བྱུང་ལྷུན་གྲུབ་གཞལ་ཡས་དབུས༔ སྣ་ཚོགས་པདྨ་ཟླ་ཉི་དང་༔ ལྷ་ཆེན་ཕོ་མོ་བསྣོལ་

བའི་སྟེང་༔ རིག་པ་ཧཱུྃ་གི་འཕྲོ་འདུ་ལས༔ བདག་ཉིད་མ་བཅོས་རྫོགས་པའི་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་དབུ་གསུམ་ཕྱག་དྲུག་པ༔ གཡས་དཀར་གཡོན་དམར་བཞད་གཤེ་རྔམས༔ ཕྱག་དྲུག་གཡས་ཀྱི་དང་པོ་གཉིས༔ རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་མེ་དཔུང་ཁ་ཊྭཱཾ་གདེངས༔ ཐ་གཉིས་རི་རབ་ཕུར་བུ་འདྲིལ༔ ཞབས་བཞི་གྱད་ཀྱི་འདོར་སྟབས་ཅན༔ མ་ཧཱ་རུ་དྲའི་སྤྱི་ནས་བརྫིས༔ ཁྲོ་གཏུམ་མི་བཟད་གར་དགུར་ལྡན༔ ཧཱུྃ་ཧཱུྃ་རྡོ་རྗེའི་གསུང་གདངས་ཅན༔ ཐབས་དང་ཤེས་རབ་གཤོག་པ་གདེངས༔ དཔལ་དང་དུར་ཁྲོད་ཆས་ཀྱིས་བརྒྱན༔ ཉི་ཁྲི་ཆིག་སྟོང་གྱེན་དུ་འཁྱིལ༔ བྱེ་བ་ཐེར་འབུམ་རྡོ་རྗེས་གཏམས༔ ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་དམར་སྟོབ༔ ཕྱག་རྒྱ་ལྔ་ཡི་རྒྱན་འཆང་ཞིང་༔ གཡས་བརྐྱང་གཡོན་བསྐུམ་ཡབ་དང་སྦྱོར༔ རྡོ་རྗེ་པདྨ་མཉམ་པར་རོལ༔ སྤྱི་བོར་རིགས་ཀྱི་ཁྱུང་ཆེན་ལྡིང་༔ ཡེ་ཤེས་མེ་དཔུང་འབར་བའི་ཀློང་༔ སྲས་མཆོག་ཉེར་གཅིག་སྤྲུལ་པར་བཅས༔ རང་རིག་རང་གསལ་ངང་དུ་བསྐྱེད༔ ཐུགས་ཀར་ཡེ་ཤེས་སེམས་དཔའ་ནི༔ བཛྲ་སཏྭ་དཀར་གསལ་འཚེར༔ རྡོ་རྗེ་དྲིལ་འཛིན་ལོངས་

སྐུའི་ཆས༔ ཞབས་ཟུང་ཕྱེད་སྐྱིལ་པད་ཟླར་བཞུགས༔ དེ་ཡི་ཙིཏྟའི་གུར་ཁང་དབུས༔ ཉི་སྟེང་རྡོ་རྗེ་རྩེ་ལྔའི་ལྟེར༔ སྲོག་གི་སྙིང་པོ་ཧཱུྃ་མཐིང་མཐར༔ འབར་བའི་སྔགས་ཀྱི་ཕྲེང་བས་བསྐོར༔ ཕྱི་རིམ་འཁོར་ལོའི་རྩིབས་སྟེང་དུ༔ ཁྲོ་བཅུ་རང་རང་ཡུམ་དང་བཅས༔ ཟ་གསོད་ཕོ་ཉའི་སྤྲིན་ཕུང་འཕྲོ༔ སྒོ་བཞིར་ཕྲིན་ལས་སྒོ་མ་བཞི༔ མུ་རན་དམ་ཅན་སྲུང་མའི་ཚོགས༔ ཡེ་ཤེས་རོལ་རྩལ་བསམ་མི་ཁྱབ༔ ཀུན་གྱི་གནས་གསུམ་འབྲུ་གསུམ་མཚན༔ སྐུ་གསུང་ཐུགས་ཀྱི་ཕྱག་རྒྱས་གདབ༔ སྣོད་བཅུད་རྒྱུད་བཅས་རྣམ་དག་པ༔ ཡེ་ཤེས་ལྔ་རུ་རང་དབང་བསྐུར༔ ཨོཾ་ཨཱཿཧཱུྃ༔ ཧཱུྃ་ཨོཾ་ཏྲཱཾ་ཧྲཱིཿཨཱ༔ ཨ་བྷིཥིཉྩ་ཧཱུྃ༔ ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཁྲོ་ཆེན་འཁོར་བཅས་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ བཛྲ་ས་མཱ་ཛཿ ཛཿཧཱུྃ་བཾ་ཧོཿ སརྦ་ས་མ་ཡ་ཏིཥྛ་ལྷན༔ ཨ་ཏི་པུ་ཧོཿ པྲ་ཏཱི་ཙ་ཧོཿ ཧཱུྃ༔ བླ་མེད་འདོད་ཡོན་མཆོད་པ་ནི༔ བྱང་ཆུབ་སེམས་ཀྱི་སྤྲིན་ཆེན་འཕྲོ༔ ཡུལ་དང་དབང་པོ་

གཉིས་མེད་པར༔ བདེ་ཆེན་ལོངས་སྤྱོད་མཆོག་ཏུ་རོལ༔ མ་ཧཱ་སརྦ་པཱུ་ཛ་ཧོཿ ཧཱུྃ༔ ཆོས་སྐུ་ཞི་བའི་ངང་ཉིད་ལས༔ ལོངས་སྤྱོད་རྫོགས་སྐུ་དཔལ་ཆེན་པོ༔ སྤྲུལ་སྐུ་དཀྱིལ་འཁོར་གསུམ་དུ་ཤར༔ རྡོ་རྗེ་ཕུར་པའི་ལྷ་ལ་བསྟོད༔ ཐུགས་ཀའི་སྔགས་ལས་འོད་འཕྲོས་པས༔ རྒྱལ་མཆོད་བྱིན་རླབས་ཐམས་ཅད་བསྡུས༔ འགྲོ་བའི་སྒྲིབ་སྦྱངས་ལྷ་རུ་གྱུར༔ སྣང་སྲིད་ཕུར་བུའི་ཕྱག་རྒྱར་སད༔ དམ་ཅན་སྲུང་མ་ལས་ལ་བཙུད༔ སྡེ་བརྒྱད་གདུག་པ་ཚར་ཐག་བཅད༔ བར་ཆད་བགེགས་དཔུང་ཐལ་བར་བརླག༔ སྣང་སྲིད་གཞིར་བཞེངས་དཔལ་ཆེན་པོའི༔ སྐུ་གསུང་ཐུགས་སུ་ལྷན་གྲུབ་བསམ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བཾ་ཧཱུྃ་ཕཊ༔ ཅེས་མི་ཚིག་གིས་བར་མ་ཆོད་པར་རྩེ་གཅིག་ཏུ་བཟླ༔ རྟགས་ཐོན་ནས་སྤུ་གྲིའི་དྲག་སྔགས་གདགས་ཤིང་ལས་ལ་སྦྱར༔ ཐུན་མཚམས་སུ་ཚོགས་དང་གཏོར་མས་ཐུགས་དམ་བསྐངས་ཏེ་འཁོན་གཅུག་སྦྱངས༔ རྒྱུན་གྱི་དངོས་གྲུབ་ནར་མར་བསྐུལ་ཞིང་༔ སྒྲུབ་པ་ཐེམས་ནས་དུས་ཀྱི་དངོས་གྲུབ་སྦྱོར་སྒྲོལ་ལ་བརྟེན་ནས་ལྷག་པར་ཡང་བསྐུལ་ཞིང་བླང་༔ རྟག་ཆད་ཀྱི་མཐའ་བསལ༔ དགེ་བ་བསྔོ་ཞིང་སྨོན་ལམ་

གདབ༔ བཀྲ་ཤིས་ཀྱི་སྣང་བབས་ཁྱབ་པར་བྱའོ༔ དེ་ནས་མཚན་མ་རྫས་ཀྱི་ཕུར་བུ་གདབ་པའི་སྔོན་དུ་ལྷ་རྣམས་ཐུགས་དམ་བསྐུལ་བར་བྱ་སྟེ༔ ཧཱུྃ༔ མཐིང་ནག་གྲུ་གསུམ་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ སྲས་མཆོག་ཉི་ཤུ་གཅིག་དང་༔ ཁྲོ་བོ་བཅུ་དང་ཁྲོ་མོ་བཅུ༔ ཐབས་ཤེས་སྤྲུལ་པའི་ཟ་གསོད་ཚོགས༔ ཕྲ་མེན་སྒོ་མ་ཆེན་མོ་བཞི༔ ཕུར་པ་ཕྲིན་ལས་ལྷ་ཚོགས་རྣམས༔ མི་མངོན་དབྱིངས་ནས་སྐུར་བཞེངས་ལ༔ ཐུགས་དམ་ཐུགས་རྗེས་དགྲ་བགེགས་སྒྲོལ༔ ཧཱུྃ༔ བྱང་ཆུབ་མཆོག་ཏུ་སེམས་བསྐྱེད་ནས༔ བླ་མེད་ལམ་དུ་ཞུགས་པ་ལ༔ བར་ཆད་འཚེ་བ་དགྲ་ཡིས་བྱས༔ ཉེས་མེད་རྣལ་འབྱོར་གྲོགས་གཡེལ་ན༔ སྔོན་གྱི་ཐུགས་དམ་ཉམས་པར་འགྱུར༔ དྲག་པོའི་ཕྲིན་ལས་དུས་ལ་བབ༔ ཅེས་བསྐུལ་ཞིང་མ་ཉེས་པའི་དཔང་བཅོལ༔ དགྲ་བགེགས་ཀྱི་མིང་གཟུགས་ལ་བདེན་སྟོབས་བརྗོད་ཅིང་འགུག་གཞུག་དྲག་ཏུ་བྱས་ལ་བཀུག༔ རྫས་ངན་གྱི་ཆར་དང་དམོད་སྔགས་ཏིང་ངེ་འཛིན་གྱིས་སྐྱོབ་བྱེད་ཀྱི་ལྷ་དང་དབྱེ༔ རྣམ་ཤེས་རྟེན་དང་གཉིས་མེད་དུ་བསྟིམ༔ བྱད་ཀྱི་ཐག་པས་བཅིང་༔ སྨྱོ་ཁྲག་

གི་ཆར་ཕབ་ནས་དྲན་མེད་དུ་བཏང་༔ སྲས་མཆོག་གི་ཕུར་པ་གདབ་ཅིང་ཚེ་ཁྲུས་ཀྱི་དགོངས་པས་བརྟེན་པ་དབྱིངས་སུ་བསྒྲལ༔ ཕྱིར་མི་ལྡོགཔའི་སླད་དུ་ལས་ཕུར་གྱིས་གནས་སོ་སོར་གདབ༔ གཟུགས་ཕུང་དུམ་བུར་གཏུབ་ཅིང་ཐོ་བས་རྡུལ་དུ་བརླག༔ ཤ་ཁྲག་བདུད་རྩིར་སྤར་བ་ལྷ་ཚོགས་རྣམས་ཀྱི་ཞལ་དུ་བསྟབས་ལ་བཅོལ་བསྐུལ་དྲག་ཏུ་བྱ༔ གཞན་ཡང་རྡོ་རྗེའི་གུར་དུ་སྲུང་བའི་གོ་གྱོན༔ དུག་གཏོར་གྱི་ཟོར་བཅས་ལ་བཟློག་པའི་གཡུལ་འགྱེད༔ ལས་གསོར་མེད་གཟིར་མནན་གྱིས་ནམ་ཡང་ལྡང་མེད་དུ་རྒྱས་འདེབས་པ་སོགས་ཇི་ལྟར་འཚམས་པའི་དྲག་ཤུལ་གྱི་སྦྱོར་བ་ལ་བརྟེན་ནས་མངོན་སྤྱོད་ཀྱི་ལས་མཐར་དབྱུང་བར་བྱའོ༔ དེ་ལས་གཞན་ཡང་ཕུར་པ་མཁན་པོས་ཁྱད་པར་གྱི་ཕྲིན་ལས་རྡོ་རྗེའི་ཚེ་དང་༔ འཛད་མེད་ནོར་དང་༔ དངོས་གྲུབ་ཆེན་པོ་བདུད་རྩིའི་སྒྲུབ་པ་སོགས་རང་རང་གི་ཅི་འདོད་པའི་ལས་རྣམས་ཀྱང་གསང་བའི་མན་ངག་གི་དོན་གཞན་ལས་འབྱུང་བ་བཞིན་སྤྱད་པས་འགྲུབ་པར་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ སློབ་དཔོན་རྣམ་པ་གསུམ་གྱི་དགོངས་ཉམས་གཅིག་ཏུ་དྲིལ་ཞིང་གུ་རུ་པདྨའི་ཐུགས་ཀྱི་བརྣག་པ་ཕྲིན་ལས་ཕུར་པའི་ཆོས་སྐོར་རྣམས་རྗེ་འབངས་འདུས་པའི་ཚོགས་ལ་ཇི་ལྟར་བསྩལ་

བ་བཞིན་རང་རང་གིས་ཉམས་སུ་བླངས་ཤིང་༔ གདམས་སྐོར་ཕལ་ཆེར་མ་འོངས་པའི་དོན་དུ་འགའ་ཙམ་སྙན་བརྒྱུད་དུ་སྤེལ༔ ཕལ་ཆེར་ས་གཏེར་དུ་གཏམས༔ འགའ་ཞིག་དགོངས་བརྒྱུད་དུ་རྒྱས་བཏབ་པ་ལས༔ ཤིན་ཏུ་ཟབ་པའི་མཐར་ཐུག་ཚིག་གི་སྤྲོས་པ་ཉུང་ལ་དོན་གྱི་གལ་གནད་ཚང་བ༔ བྱིན་རླབས་རྣོ་ནུས་ཀྱི་ཚན་ཁག་གཞན་ལས་ཁྱད་པར་དུ་གྱུར་པ་འདི་ཉིད༔ སློབ་དཔོན་ཆེན་པོ་ལྷོ་ནུབ་སྲིན་པོའི་ཁ་གནོན་ད་བཞུད་པའི་སྐྱེལ་ཐུང་ལ་ཆས་པའི་ཚེ༔ ཁོ་མོ་མཁར་ཆེན་བཟའ་ལ་སྐྱེལ་ལན་མནོག་ཆོས་གཅིག་བརྒྱུད་དུ་བསྩལ་བའི་གསང་བ་ཟབ་མོ་སྟེ༔ གཞན་ལ་སྤེལ་ཞིང་སྦ་བར་བློས་མ་ཐོངས་ནས་ང་དང་གཉིས་སུ་མེད་པའི་སྐལ་ལྡན་དགོངས་བརྒྱུད་དག་པ་གཅིག་གི་སྙིང་ལ་བཀའ་རྒྱས་བཏབ་བོ༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ [ཁོ་བོ་འཇིགས་བྲལ་ཡེ་ཤེས་རྡོ་རྗེ་རང་ལོ་སུམ་ཅུ་རྩ་བཞིར་སོན་པ་རབ་བྱུང་བཅུ་དྲུག་པའི་མེ་གླང་ཁྲུམ་སྟོད་ཀྱིས་ཉ་བར་མོན་སྤ་མགྲོ་སྟག་ཚང་སེང་ཕུག་ཏུ་ཕུར་པ་གནམ་ལྕགས་སྤུ་གྲིའི་སྒོ་ནས་བདུད་རྩི་སྨན་གྱི་སྒྲུབ་པ་བགྱིས་པའི་སྐབས་ཤིག་རྨི་ལམ་དུ་མཚོ་རྒྱལ་ཡིན་སྐད་བུ་མོ་རྒྱན་བཟང་མ་ཞིག་གིས་གནམ་ལྕགས་ཀྱི་ཕུར་པ་མཐོ་གང་ཙམ་པ་ཤིན་ཏུ་སྒྲོས་གཙང་ཞིག་གཏད་ནས། འདི་གུ་རུ་རིན་པོ་ཆེ་གནས་འདིར་རྡོ་རྗེ་གྲོ་ལོད་ཀྱི་སྐུར་བཞེངས་

དུས་སྡེ་བརྒྱད་དམ་ལ་འདོགས་ཤིང་རྒྱལ་བསེན་ཚར་གཅོད་བྱེད་ཀྱི་ཕྱག་མཚན་ངོ་མ་དེ་རེད། ཕྱིས་གུང་ཐང་ལ་ཁར་ཕེབས་སྐྱེལ་གྱི་དུས་སུ་ཁོ་མོར་གནང་བ་ཡིན། ད་ལན་ཁྱེད་ལ་སྦྱིན་པ་ཡིན་གྱིས་སྙིང་ནོར་དུ་ཆོངས་ཞེས་རུམ་དུ་བཅུག་བྱུང་བར། དགའ་ཆེས་པས་ཕྱག་ནས་བཙན་ཐབས་སུ་འཕྲོག་སྟེ། ཐོག་མར་དབང་ཞིག་ལེན་དགོས་སྙམ་སྤྱི་བོ་དང་མགྲིན་པར་གཏུགས། སྙིང་གར་རེག་མ་ཐག་ཕྱག་མཚན་ཕུར་པ་དང་རང་ལུས་དབྱེར་མེད་དུ་འདྲེས་ནས་ཁོག་སྟོད་ད་ལྟའི་ལུས་འདི་རང་ལ་ཁོག་སྨད་ལྕགས་ཕུར་མེའི་ཚྭ་ཚྭ་འཕྲོ་བར་གྱུར་ཏེ་ངག་ནས་ཀཱི་ལ་ཡ་སྒྲོགས་པས་ས་ཀུན་གཡོ་བ་སྙམ་བྱེད། དེར་བུ་མོ་དེས་འོ་དབང་དང་བྱིན་རླབས་དངོས་གནས་དེ་རེད། རྒྱུད་ལུང་མན་ངག་གཅིག་དྲིལ་གྱི་གཏེར་མཛོད་དེ་ཡིན། འདི་ཡལ་བར་མ་དོར་ན་དགོས་པ་ཆེན་པོ་ཡོད། སྔོན་དུས་གུ་རུ་རིན་པོ་ཆེའི་དྲུང་ནས་དབང་དང་གདམས་ངག་བཀའ་རྫོགས་ལུང་རྫོགས་སུ་ཞུས་པ་ཨེ་དྲན་ཟེར་ཞིང་ལག་ནས་འཇུས་ཏེ་འཐེན་བྱུང་བས་གཉིད་སད། དེ་འཕྲལ་སྔར་གྱི་བག་ཆགས་མང་པོ་འལ་འོལ་དྲན་ཅིང་། ཁྱད་པར་ཕུར་པའི་ཆོས་བསྐོར་བཀྲ་ལམ་གྱིས་ཡིད་ངོར་གསལ་བ་བྱུང་སྟེ། རིག་པའི་ཀློང་ནས་གང་བརྡོལ་བརྡ་ཐད་ཀར་བསྒྱུར་ན་གཏེར་སྟོན་གོང་མ་གཉིད་ཀྱི་ཆོས་སྐོར་ལས་ཀྱང་རྒྱས་ཤིང་མན་ངག་ཕྲིན་ལས་ལས་ཚོགས་གྱི་རིམ་པ་སྔར་མ་གྲགས་པའང་ཇི་སྙེད་ཅིག་སྣང་མོད་ཀྱི། འོན་ཀྱང་དེང་དུས་འདི་རིགས་གསར་དུ་འབེབས་པ་ངལ་བ་དོན་མེད་དུ་མཐོང་ནས་

བཏང་སྙོམས་སུ་བཞག །ཕྱིས་རང་ལོ་ཞེ་ལྔ་པ་ས་བྱི་ཆོ་འཕྲུལ་ཟླ་བའི་ཚེས་བཅུར་ཕྱི་ནང་གི་རྐྱེན་དུ་མས་བསྐུལ་ཏེ་རང་སྐལ་ཡལ་བར་མི་དོར་བའི་ས་ཁོངས་འཛིན་ཕྱིར་སྙིང་པོའི་ཞུན་ཐིག་རྩ་ཐོ་ཙམ་གཏན་ལ་ཕབ་པ་སྟེ། ཆོས་བདག་མཁའ་འགྲོ་དམ་ཅན་རྒྱ་མཚོའི་ཚོགས་ཀྱིས་གཉེར་ཁ་ཐུབ་པར་མཛོད་ཅིག། ཨྠྀི།། །།

ཉམས་སྣང་།

[ཕུར་པ་སྤུ་གྲི་རེག་ཕུང་གི་རྩ་གཞུང་ཕབ་ཟིན་པའི་རྗེས་ཐོག་ཏུ་འཁྲུལ་སྣང་ལ་གཡུའི་ཁྱི་མོ་ཡིད་དུ་འོང་བ་ཞིག་མདུན་དུ་བྱུང་ནས་དགའ་བའི་ཉམས་ཀྱིས་འདི་སྐད་དོ། །དམ་ཅན་ཐམས་ཅད་འདུ་བའི་གནས། དམ་མེད་ཤིན་ཏུ་དབེན་པའི་ཚལ། དམ་ཚིག་ཅན་གྱི་ཚོགས་ཁང་དུ། དམ་པའི་བརྡ་ཚིག་འདི་ལྟར་རོ། སྔོན་གྱི་ལས་སྨོན་དུས་སུ་སྨིན་པ་ལས། མ་འོངས་འགྲོ་བ་ཀུན་ལ་ཕན་པའི་སྨན༔ གཅིག་དྲིལ་མཆོག་གི་གསང་བའི་མཛོད་འདི་ཉིད། སློབ་དཔོན་རྣམ་གསུམ་དགོངས་པའི་མཐིལ་ཡང་ཡིན༔ བསྐྱེད་དང་རྫོགས་དང་རྫོགས་པ་ཆེན་པོ་རུ། ཐེག་པ་རིམ་པ་དགུ་ཡི་མདོ་ཆིངས་ཀྱིས། བཅིངས་པ་ཚིག་ཉུང་དོན་རྒྱས་ཡི་གེའི་རིས། ཀུན་གསལ་ངོས་ནས་འཇའ་ཚོན་ལྟ་བུར་ཤར། ཀུན་བཟང་བརྒྱུད་པ་གསུམ་གྱི་སྙིང་བཅུད་འདི། དུས་བབས་མནོག་པའི་ཆོས་སུ་ཤེས་ནས་ཀྱང་། ཛྙཱ་ན་བཛྲ་ཀརྨ་མ་ཎི་དང་། པུཎྱེ་པདྨ་ཨཽ་ཌིའི་མིང་ལ་གདམས། རོང་ཆེན་བཞི་དང་ཤོད་ཆེན་བཞི་ལ་སྤེལ། བསྟན་པའི་མེ་རོ་ཅུང་ཟད་སོས་པར་འགྱུར། ཁྱད་པར་སྙིང་པོའི་དོན་ལ་དགའ་བ་ཡི། རང་བྱུང་མཚན་བཟང་ཁྱེའུ་སྤྲེལ་ལོ་པ། དེ་ཉིད་ཀུན་བཟང་ཆོས་སྐུའི་ཀློང་དུ་ཐིམ། ནམ་མཁའ་ལས་བྱུང་རང་བྱུང་ཆེན་པོའོ། སྟག་མོ་དགྲ་ལ་རྔམས་འདྲའི་ཁྱི་མོ་ང་། སྔོན་ཚེ་ཡང་ལེ་ཤོད་ཀྱི་བྲག་ཕུག་ཏུ། གུ་རུ་ཆེན་པོའི་བཀའ་རྟགས་རྡོ་རྗེ་བཟུང༔ ལས་འཕྲོ་ཅན་གྱི་

མཆོག་ལ་འཕྲིན་དུ་སྒྲོགས། མ་བསླུས་མི་བསླུ་བསླུ་བར་མི་འགྱུར་རོ། ས་མ་ཡ། །ཞེས་ཟེར་ཏེ་མི་སྣང་བར་གྱུར་ཏོ། །]

རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་བདུད་སྡེའི་གཡུལ་འཇོམས།

༄༅། །རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་བདུད་སྡེའི་གཡུལ་འཇོམས་ཞེས་བྱ་བ་ཞུགས་སོ། །

ཨོཾ་སྭསྟི་ཤྲཱི་བི་ཛ་ཡནྟུ། །[སྲིད་པ་ཐལ་འབྱིན་ཕུར་བུའི་དབྱིངས། །བླ་མ་ཧེ་རུ་ཀར་བཏུད་ནས། །སྤུ་གྲི་རེག་ཕུང་འབར་བ་ཡི། །ཕྲིན་ལས་བདུད་སྡེའི་གཡུལ་འཇོམས་བྱ། །དེ་ཡང་རྒྱུད་སྨིན་ཅིང་དམ་ཚིག་ལ་གནས་པའི་སྐལ་ལྡན་དངོས་གྲུབ་མཆོག་གི་འབྲས་བུ་བདེ་བླག་ཏུ་དོན་དུ་གཉེར་བ་རྣམས་ཀྱིས་ཕྲིན་ལས་འདུས་པའི་སྙིང་པོའི་ཞུན་ཐིག་འདི་ལ་རྣལ་འབྱོར་དུ་བྱའོ། །དེའི་ཚུལ་ལ་སྦྱོར་དངོས་རྗེས་གསུམ་གྱི།] [དང་པོ་སྦྱོར་བའི་ཆོས་ལ། དམ་ཚིག་གི་སྒྲུབ་རྟེན་ཕྱི་ནང་གི་མཆོད་པ་སོགས་ཉེ་བར་མཁོ་ཞིང་འོས་པའི་ཡོ་བྱད་ཐམས་ཅད་གཞུང་བཞིན་ཚོགས་པར་བྱས་ནས། ཐོག་མར་རྒྱུད་སྦྱོང་བ་ནི།] ཕྱོགས་བཅུའི་སྐྱབས་ཡུལ་ཐམས་ཅད་དཔལ་ཆེན་ཕུར་པའི་དཀྱིལ་འཁོར་གྱི་འཁོར་ལོའི་རྣམ་པར་རོལ་

པ་བཛྲ་ས་མཱ་ཛཿ[ས་མཁའ་ཁྱབ་ཏུ་སད་པའི་སྤྱན་སྔར། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དེ། །བདེ་གཤེགས་

བྱང་ཆུབ་སེམས་དཔའ་ལ། དག་པ་གསུམ་གྱི་ལུས་འབུལ་ལོ། །ཚེ་རབས་བསྒྲངས་པའི་དགེ་བ་རྣམས། །བསྡུས་ནས་བྱང་ཆུབ་མཆོག་ཏུ་བསྔོ། །[ཞེས་ཚོགས་བསགས་མཐར།] ཛཿཧཱུྃ་བཾ་ཧོ༔ [ས། ཚོགས་ཞིང་རྣམས་རང་ལ་ཐིམ་པར་མོས། མཚམས་བཅད་པ་ནི།] རང་ཉིད་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་ཡུམ་དང་བཅས་པ་རབ་ཏུ་འབར་བའི་གར་གྱི་སྤྲིན་མི་བཟད་པར་འཕྲོ་བའི་སྐུར་གྱུར་པར་[བསམ་ཞིང་།] ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ང་ཡི་བཀའ་ལས་འདའ་མ་བྱེད༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་ཡིས༔ ཀླད་པ་ཚལ་པ་བརྒྱ་རུ་ཁོས༔ དེ་བས་ད་ལྟ་ཕྱིར་དེངས་ཤིག༔ ཧཱུྃ་ཧཱུྃ་ཧཱུྃ་སརྦ་བིགྷྣཱན་ཨུཙྪིཥྚ་ཡ་ཕཊ༔ ཧཱུྃ༔ སྟེང་ཡང་ཕུར་བུའི་བླ་བྲེ་ལ༔ ཕུར་བུའི་ཐོག་ཆེན་ཆར་ལྟར་འབེབས༔ འོག་ཀྱང་ཕུར་བུའི་ས་གཞི་ལ༔ ཕུར་བུའི་འདུ་འཕྲོ་མེ་ལྟར་འབར༔ ཕྱོགས་མཚམས་ཕུར་བུས་གཏམས་པ་ལ༔ ཕུར་བུའི་ཚྭ་ཚྭ་སྐར་ལྟར་འཁྲུགས༔ ཕུར་བུའི་མཚམས་ལས་མ་འདའ་ཞིག༔ སརྦ་ཏིཀྵྞ་བཛྲ་ཛྭ་ལ་མ་ཧཱ་ཀྲོ་ངྷ་

རཀྵ་རཀྵ་ཧཱུྃ་ཧཱུྃ་ཧཱུྃ༔ [བཤགས་པ་བྱ་བ་ནི།] ཧཱུྃ༔ སྣང་སྲིད་སྐུ་གསུང་ཐུགས་ཀྱི་ངང་༔ ཡེ་ནས་སྒྲིབ་གཡོགས་བྲལ་བ་ལ༔ མ་རིག་ཐ་མལ་ཞེན་པས་བཅིངས༔ རང་རིག་རང་གསལ་ངང་དུ་བཤགས༔ ས་མ་ཡ་ཤུངྔྷེ་ཨ༔ [བྱིན་དབབ་པ་ནི། སྤོས་དང་རོལ་མོས་གཟི་བྱིན་བསྐྱེད་ལ། ཧཱུྃ༔ རྡོ་རྗེ་གཞོན་ནུའི་རིག་འཛིན་རྣམས༔ སྲིད་པ་རྡོ་རྗེར་སྒྲུབ་མཛོད་ཅིག༔ སྲིད་པ་རྡོ་རྗེ་ཕུར་བུའི་ལྷ༔ ཡེ་ཤེས་ཁྲོ་བོ་གྲུབ་པར་མཛོད༔ བྱིན་ཆེན་རྣམས་ཀྱིས་བྱིན་ཕོབ་ཅིག༔ དབང་ཆེན་རྣམས་ཀྱིས་དབང་སྐུར་ཅིགཿ མཐུ་ཆེན་རྣམས་ཀྱིས་མཐུ་སྩོལ་ཅིག༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ སརྦ་ས་མ་ཡ་ཛྙཱ་ན་ཨཱ་བེ་ཤ་ཡ་ཧཱུྃ་ཧཱུྃ་ཧཱུྃ༔ [མཆོད་རྫས་བྱིན་གྱིས་བརླབ་པ་ནི།] རཾ་ཡཾ་ཁཾ༔ སྟོང་པའི་ངང་ལས་སྐད་ཅིག་གིས༔ གནས་ཡུལ་དུར་ཁྲོད་རོལ་པའི་ཞིང་༔ ཕྱི་ནང་གསང་བ་བླ་མེད་པའི༔ མཆོད་པའི་སྤྲིན་ཕུང་མཁའ་ཁྱབ་གྱུར༔ ཨོཾ་བཛྲ་ཨརྒྷཾ་[སོགས།] ཤཔྡ་པཉྩ་ཀཱ་མ་གུ་ཎ་སརྦ་པཱུ་ཛ་ཨཱཿཧཱུྃ༔ བོ་ངྷི་ཙིཏྟ་ག་ཎ་གུ་ཧྱ་པཱུ་ཛ་ཨཱཿཧཱུྃ༔ ཨོཾ་ཨཱཿཧཱུྃ་མ་ཧཱ་པཉྩ་ཨ་མྲྀ་ཏ་རཀྟ་

བ་ལིཾ་ཏ་ཧཱུྃ་ཧྲཱིཿཥྲཱཿ [ཞེས་སྔགས་ལན་བདུན་གྱིས་བྱིན་བརླབ་བོ། །] [གཉིས་པ་དངོས་གཞིའི་ཆོས་ལ། ཐོག་མར་དམ་ཚིག་པ་གསལ་གདབ་པ་ནི།] ཧཱུྃ༔ རྡོ་རྗེ་ཁྲོས་པས་ཞེ་སྡང་གཅོད་༔ མཚོན་ཆེན་སྔོན་པོ་འབར་བ་ཡིས༔ ནམ་མཁའི་དཀྱིལ་ནས་ཐིག་པ་ཤར༔ འབར་བ་ཆེན་པོའི་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ ཡེ་ཤེས་རོལ་པའི་ཆོ་འཕྲུལ་ནི༔ འབྱུང་བ་རིམ་བརྩེགས་རི་རབ་སྟེང་༔ ཐར་པ་ཆེན་པོའི་གཞལ་མེད་ཁང་༔ དུར་ཁྲོད་དྲག་པོའི་བཀོད་པ་རྫོགས༔ དེ་དབུས་ཙ་ཀྲ་འབར་བའི་ལྟེར༔ སྣ་ཚོགས་པདྨ་ཟླ་ཉི་དང་༔ ལྷ་ཆེན་ཕོ་མོ་བསྣོལ་བའི་སྟེང་༔ རིག་པ་ཧཱུྃ་གི་འཕྲོ་འདུ་ལས༔ བདག་ཉིད་མ་བཅོས་རྫོགས་པའི་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་དབུ་གསུམ་ཕྱག་དྲུག་པ༔ གཡས་དཀར་གཡོན་དམར་བཞད་གཤེ་རྔམས༔ ཕྱག་དྲུག་གཡས་ཀྱི་དང་པོ་གཉིས༔ རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་མེ་དཔུང་ཁཊྭཱཾ་གདེངས༔ ཐ་གཉིས་རི་རབ་ཕུར་བུ་འདྲིལཿ ཞབས་བཞི་གྱད་ཀྱི་འདོར་སྟབས་ཅན༔ མ་ཧཱ་རུ་དྲའི་སྤྱི་ནས་བརྫིས༔ ཁྲོ་གཏུམ་མི་བཟད་

གར་དགུར་ལྡན༔ ཧཱུྃ་ཧཱུྃ་རྡོ་རྗེའི་གསུང་གདངས་ཅན༔ ཐབས་དང་ཤེས་རབ་གཤོག་པ་གདེངས༔ དཔལ་དང་དུར་ཁྲོད་ཆས་ཀྱིས་བརྒྱན༔ ཉི་ཁྲི་ཆིག་སྟོང་གྱེན་དུ་འཁྱིལ༔ བྱེ་བ་ཐེར་འབུམ་རྡོ་རྗེས་གཏམས༔ ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་དམར་སྟོབ༔ ཕྱག་རྒྱ་ལྔ་ཡི་རྒྱན་འཆང་ཞིང་༔ གཡས་བརྐྱང་གཡོན་བསྐུམ་ཡབ་དང་སྦྱོར༔ རྡོ་རྗེ་པདྨ་མཉམ་པར་རོལ༔ སྤྱི་བོར་རིགས་ཀྱི་ཁྱུང་ཆེན་ལྡིང་༔ ཡེ་ཤེས་མེ་དཔུང་འབར་བའི་ཀློང་༔ སྲས་མཆོག་ཉེར་གཅིག་སྤྲུལ་པར་བཅས༔ རང་རིག་རང་རྩལ་ངང་དུ་བསྐྱེད༔ ཡབ་ཡུམ་སྙོམས་ཞུགས་བྱང་སེམས་སྤྲིན༔ འོད་ཀྱི་གོང་བུ་མཁའ་ནས་སྤྲོས༔ ཕྱི་རིམ་འཁོར་ལོའི་རྩིབས་སྟེང་དུ༔ ཧཱུྃ་མཛད་རྣམ་རྒྱལ་དབྱུག་སྔོན་ཅན༔ གཤིན་རྗེ་མི་གཡོ་རྟ་མགྲིན་རྒྱལ༔ འདོད་རྒྱལ་བདུད་རྩི་ཁམས་གསུམ་རྒྱལ༔ སྟོབས་པོ་ཆེ་རྣམས་སྐུལ་མདོག་མཐིང་༔ གནམ་ལྕགས་ཕུར་བུ་འདྲིལ་ཞིང་འདེབས༔ རང་རང་ཡུམ་དང་གཉིས་མེད་འཁྲིལ༔ ཟ་གསོད་ཕོ་ཉའི་སྤྲིན་ཕུང་འཕྲོ༔ སྒོ་བཞིར་

ཕྲིན་ལས་སྒོ་མ་བཞི༔ མུ་རན་དམ་ཅན་སྲུང་མའི་ཚོགས༔ ཡེ་ཤེས་རོལ་རྩལ་བསམ་མི་ཁྱབ༔ ཀུན་གྱི་གནས་གསུམ་འབྲུ་གསུམ་མཚན༔ སྐུ་གསུང་ཐུགས་ཀྱི་ཕྱག་རྒྱས་གདབ༔ སྣོད་བཅུད་རྒྱུད་བཅས་རྣམ་པ་དག༔ ཡེ་ཤེས་ལྔ་རུ་རང་དབང་བསྐུར༔ ཨོཾ་ཨཱཿཧཱུྃ༔ ཧཱུྃ་ཨོཾ་ཏྲཱཾ་ཧྲཱིཿཨཱ༔ ཨ་བྷི་ཥིཉྩ་ཧཱུྃ༔ [ཡེ་ཤེས་པ་སྤྱན་འདྲེན་པ་ནི།] ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཁྲོ་ཆེན་འཁོར་བཅས་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་བཛྲ་ས་མཱ་ཛཿ ཛཿཧཱུྃ་བཾ་ཧོཿ [དམ་ཡེ་གཉིས་མེད་དུ་བཞུགས་སུ་གསོལ་བ་ནི།] ཧཱུྃ༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྗོགས་མཛད་ཕྱིར༔ རབ་ཏུ་དགྱེས་ཤིང་བརྟན་པར་བཞུགས༔ ས་མ་ཡ་ཏིཥྛ་ལྷན༔ [ཕྱག་བྱ་བ་ནི།] ཧཱུྃ༔ སྲིད་གསུམ་གདུག་པ་འདུལ་བ་དང་༔ ང་རྒྱལ་ཆེན་པོ་བརྟན་པའི་ཕྱིར༔ རྡོ་རྗེ་སྲིན་པོའི་ལྷ་ཚོགས་ལ༔ རྩེ་གཅིག་

ཡིད་ཀྱིས་ཕྱག་འཚལ་ལོ༔ ཨ་ཏི་པུ་ཧོཿ པྲ་ཏཱིཙྪ་ཧོཿ [མཆོད་པ་འབུལ་བ་ལ། ཐུན་མོང་ཉེར་སྤྱོད་ནི།] ཧཱུྃ༔ བླ་མེད་འདོད་ཡོན་མཆོད་པ་ནི༔ བྱང་ཆུབ་སེམས་ཀྱི་སྤྲིན་ཆེན་འཕྲོ༔ ཡུལ་དང་དབང་པོ་གཉིས་མེད་པར༔ བདེ་ཆེན་ལོངས་སྤྱོད་མཆོག་ཏུ་རོལ༔ ཨོཾ་ཤྲཱི་བཛྲ་ཀུ་མཱ་ར་ས་པ་རི་ཝཱ་ར་ཨརྒྷཾ་པཱ་དྱཾ་[སོགས།] ཤཔྡ་པཉྩ་ཀཱ་མ་གུ་ཎ་པྲ་ཏཱིཙྪ་སྭཱཧཱ༔ [ཁྱད་པར་སྨན་མཆོད་ནི།] ཧཱུྃ༔ རང་བྱུང་གདོད་ནས་རྣམ་པར་དག༔ རྩ་བརྒྱད་སྟོང་ལ་སྦྱར་བའི་སྨན༔ ར་ས་ཡཱ་ནའི་དམ་ཚིག་མཆོག༔ དཔའ་བོའི་རོ་དང་མཉམ་སྦྱར་ནས༔ དཀྱིལ་ཁོར་ལྷ་ཚོགས་རྣམ་ལ་འབུལ༔ བླ་མེད་འཕྲུལ་གྱི་དངོས་གྲུབ་སྩོལ༔ མ་ཧཱ་པཉྩ་ཨ་མྲྀ་ཏ་ཁཱ་ཧི༔ [གཏོར་མའི་མཆོད་པ་ནི།] ཧཱུྃ༔ དམ་རྫས་རྨད་བྱུང་གཏོར་ཆེན་པོ༔ ཆོས་ཉིད་སྐྱེ་མེད་ཀློང་ནས་སྤྲུལ༔ འདོད་ཡོན་རྣམས་ལྔས་རབ་ཏུ་སྤྲས༔ དཔལ་ཆེན་འཁོར་བཅས་ཐུགས་དམ་བསྐང་༔ སརྦ་བ་ལིཾ་ཏ་ཁའ་ཧི༔ [རཀྟའི་མཆོད་པ་ནི།] ཧཱུྃ༔ ཉོན་མོངས་རྩ་བ་འཁོར་བའི་ཁྲག༔ ཁམས་གསུམ་འཁོར་བ་སྟོང་བྱའི་ཕྱིར༔ དུང་ཆེན་སྣོད་དུ་དམར་ཆེན་བསྐྱིལ༔ དཀྱིལ་འཁོར་ལྷ་ཚོགས་ཞལ་དུ་འབུལ༔ མ་ཧཱ་རཀྟ་ཁཱ་ཧི༔ [དུག་

གསུམ་གྱི་མཆོད་པ་ནི།] ཧཱུྃ༔ གཏི་མུག་ཤ་ཆེན་སྤུངས་སེ་སྤུང་༔ འདོད་ཆགས་ཁྲག་མཚོ་མེ་རེ་རེ༔ ཞེ་སྡང་རུས་གྲམ་ཉི་ལི་ལི༔ དཔལ་ཆེན་འཁོར་དང་བཅས་ལ་འབུལ༔ མ་ཧཱ་མཱཾ་ས་རྟ་ཀྟ་ཀིཾ་ནི་རི་ཏི་ཁ་རཾ་ཁཱ་ཧི༔ [སྦྱོར་སྒྲོལ་གྱི་མཆོད་པ་ནི།] ཧཱུྃ་ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུངས་བྱས་ནས༔ ལྷ་ཡང་རུང་སྟེ་བསྒྲལ་བར་བྱ༔ ཁ་ཏཾ་ཁ་ཏཾ་ཁ་ཏཾ༔ ཧཱུྃ་ཧཱུྃ་ཧཱུྃ༔ ཕགས་ཕགས་ཕགས་བཛྲ་ཡཀྴ་ཀྲོ་ངྷ་ཁ་ཁ་ཁ་རཾ་ཁཱ་ཧི་ཧ་ཧ་ཧཱུྃ་ཧཱུྃ་ཕཊ་ཕཊ༔ [བསྟོད་པ་བྱ་བ་ནི།] ཧཱུྃ༔ ཆོས་སྐུ་ཞི་བའི་ངང་ཉིད་ལས༔ ལོངས་སྤྱོད་རྫོགས་སྐུ་དཔལ་ཆེན་པོ༔ སྤྲུལ་སྐུ་དཀྱིལ་འཁོར་གསུམ་དུ་ཤར༔ རྡོ་རྗེ་ཕུར་པའི་ལྷ་ལ་བསྟོད༔ མཐིང་ནག་མི་བཟད་སྲིན་པོའི་གཟུགས༔ གར་དགུའི་ཉམས་ལྡན་རྔམས་ཤིང་ཁྲོ༔ གཏུམ་ཆེན་ཉི་མ་འབུམ་གྱི་གཟི༔ རྡོ་རྗེའི་སྐུ་ལ་ཕྱག་འཚལ་བསྟོད༔ རབ་འཇིགས་ཧ་ཧ་ཧཱུྃ་ཕཊ་ཀྱི༔ རྔམས་པའི་ང་རོ་འབྲུག་སྟོང་ལྡིར༔ རྡོ་རྗེའི་གད་མོས་ས་གསུམ་གཡོ༔ ཁྲག་འཐུང་གསུང་ལ་ཕྱག་འཚལ་བསྟོད༔ མི་དམིགས་ཁྱབ་བརྡལ་ཟབ་གསལ་བ༔ སྤྲོས་པ་ཀུན་བྲལ་རྡོ་རྗེའི་དབྱིངས༔ སྨྲ་བསམ་བརྗོད་མེད་ཡེ་ཤེས་ཆེ༔ ཁྲོ་

རྒྱལ་ཐུགས་ལ་ཕྱག་འཚལ་བསྟོད༔ རང་རྩལ་རོལ་པའི་ཆ་འཕྲུལ་ནི༔ སྐུ་གསུང་ཐུགས་ཀྱི་འཕྲོ་འདུ་ལས༔ ཡེ་ཤེས་སྤྲུལ་པ་བསམ་མི་ཁྱབ༔ དཀྱིལ་འཁོར་ལྷ་ཚོགས་རྣམས་ལ་བསྟོད༔ [དེ་ནས་བཟླས་པ་བྱ་བ་ལ། ཛཔྲ་བསྐུལ་ནི།] ཨོཾ༔ སྔོན་གྱི་ཐུགས་དམ་ཆེན་པོ་ནི༔ བདུད་དང་རུ་དྲ་བསྒྲལ་བ་དང་༔ གདུལ་བྱ་ཡོངས་སུ་སྨིན་པའི་ཕྱིར༔ ཐབས་ཀྱི་ཕྲིན་ལས་དེང་བསྐུལ་ན༔ འབར་བ་སྐུ་ཡི་གཟི་བྱིན་སྐྱེད༔ རྡོ་རྗེའི་སྔགས་ཀྱི་སྒྲ་གདངས་སྒྲོགས༔ ཡེ་ཤེས་ཆེན་པོའི་སྲོག་ལྡན་པས༔ དངོས་གྲུབ་རྣམ་གཉིས་མྱུར་དུ་སྩོལ༔ [བཟླས་དམིགས་ནི།] བདག་ཉིད་རྡོ་རྗེ་གཞོན་ནུ་ཆེའི༔ ཐུགས་ཀར་ཡེ་ཤེས་སེམས་དཔའ་ནི༔ བཛྲ་སཏྭ་དཀར་གསལ་འཚེར༔ རྡོ་རྗེ་དྲིལ་འཛིན་ལོངས་སྐུའི་ཆས༔ ཞབས་ཟུང་ཕྱེད་སྐྱིལ་པད་ཟླར་བཞུགས༔ དེ་ཡི་ཙིཏྟའི་གུར་ཁང་དབུས༔ ཉི་སྟེང་རྡོ་རྗེ་རྩེ་ལྔའི་ལྟེར༔ སྲོག་གི་སྙིང་པོ་ཧཱུྃ་མཐིང་མཐར༔ འབར་བའི་སྔགས་ཀྱི་ཕྲེང་བས་བསྐོར༔ བཟླས་པས་འོད་ཟེར་མཁའ་ཁྱབ་འཕྲོས༔ རྒྱལ་མཆོད་བྱིན་རླབས་ཐམས་ཅད་བསྡུས༔ འགྲོ་བའི་སྒྲིབ་སྦྱངས་ལྷ་རུ་གྱུར༔ སྣང་

སྲིད་ཕུར་བུའི་ཕྱག་རྒྱར་སད༔ དམ་ཅན་སྲུང་མ་ལས་ལ་བསྐུལ༔ སྡེ་བརྒྱད་གདུག་པ་ཚར་ཐག་བཅད༔ བར་ཆད་བགེགས་དཔུང་ཐལ་བར་བརླག༔ སྣང་སྲིད་གཞིར་བཞེངས་དཔལ་ཆེན་པོའི༔ སྐུ་གསུང་ཐུགས་སུ་ལྷུན་གྲུབ་གྱུར༔ [ཅེས་པའི་དམིགས་གནད་རྩེ་གཅིག་པས།] ཨོཾ་བཛྲ་ཀཱི་ལི་ཀཱི་ལ་ཡ་སརྦ་མིགྷྣཱན་བཾ་ཧཱུྃ་ཕཊ༔ [ཅེས་བཟླ་བ་ནི་རྩ་བའི་སྙིང་པོའོ། །] ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔ ཨ་ཛི་ཏི་ཨ་པ་རཱ་ཛི་ཏི༔ མཱ་ར་སེ་ན་པྲ་མརྔྷ་ན་ཡེ་ཧཱུྃ་ཕཊ༔ [ཅེས་བཞི་སྙིང་གཅིག་ཏུ་དྲིལ་བ་དང་།] མ་ར་ཀྨོ་ཡཀྨོ༔ ཀ་ལ་རཱུ་པ་སྙིང་རྩ་ལ་ཡཾ་ཡཾ༔ སྲོག་ལ་ཡཾ་ཡཾ༔ སྙིང་ལ་ཕྲིལ་ཕྲིལ༔ སྲོག་ལ་ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག༔ སོད་སོད༔ ངྷ་ཏི་མ་མ་ཀརྨ༔ ཤཱི་གྷྲཾ་ཀ་ར་ཡེ༔ མཱ་ར་སེ་ན་པྲ་མརྔྷ་ན་ཡེ་ཧཱུཾ་ཕཊ༔ [ཅེས་སྤུ་གྲིའི་དྲག་སྔགས་འདུས་པ་སྟེ། བསྙེན་པའི་འགྲོས་དང་སྦྱར་ཏེ་ཇི་ཙམ་འོས་པ་བཟླ་ཞིང་། ཐུན་མཚམས་སུ།] དཔལ་ཆེན་ཕུར་བུའི་ལྷ་ཚོགས་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་

ཐུགས་ཡོན་ཕྲིན་ལས་བསྟོད། །བག་མེད་འགལ་འཁྲུལ་ཉམས་ཆགས་བཤགས། ཐུགས་རྗེས་བརྩེར་དགོངས་དངོས་གྲུབ་སྩོལ། །[ཅེས་སྟོང་ཚིགས་ཀྱི་མཆོད་བསྟོད་བྱའོ། །] [གསུམ་པ་རྗེས་ཀྱི་ལས་རིམ་ལ། ཚོགས་ཀྱི་མཆོད་པ་ནི། ཚོགས་རྫས་བདུད་རྩིས་བྲན་ཅིང་།] ཨོཾ་སརྦ་དྲ་བྱཾ་བི་ཤྭ་ངྷ་ནི་ཧཱུྃ་ཕཊ༔ ཧཱུྃ༔ རང་བྱུང་རིག་པའི་ཡེ་ཤེས་ནི༔ རཾ་ཡཾ་ཁཾ་གིས་དངོས་འཛིན་སྦྱངས༔ བྷྲཱུྃ་ལས་དབྱིངས་ཀྱི་ཀ་པཱ་ལར༔ ཧཱུྃ་ཨོཾ་ཏྲཱཾ་ཧྲཱིཿཨཱཿརྣམས་ཀྱིས༔ བདེ་གཤེགས་རིགས་ལྔའི་དམ་ཚིག་རྫས༔ ཁ་དོག་དྲི་རོ་ནུས་པར་ལྡན༔ ཨོཾ་ག་ཎ་ཙཀྲ་ཀཱ་མ་གུ་ཎ་ཧཱུྃ་ཧྲཱིཿཋཱ༔ [ཞེས་བྱིན་བརླབས། ཚོགས་ཞིང་སྤྱན་དྲང་བ་ནི།] ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་འཁོར་དང་བཅས༔ འདོད་ཡོན་ཚོགས་ཀྱི་འདུ་བར་སྤྱོན༔ ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོ༔ [ཚོགས་ཕུད་འབུལ་བ་ནི།] ཧཱུྃ༔ ཡེ་ཤེས་ལྔ་ཡི་ཆོ་འཕྲུལ་ལས༔ འདོད་ཡོན་མཆོད་སྤྲིན་བསམ་མི་ཁྱབ༔ བསོད་ནམས་ཡེ་ཤེས་ཚོགས་རྫོགས་ཕྱིར༔ དཀྱིལ་འཁོར་ལྷ་ཚོགས་རྣམས་ལ་འབུལ༔ ག་ཎ་ཙཀྲ་པཱུ་

ཛ་ཧོཿ [བར་པ་བཤགས་པ་ནི།] ཧཱུྃ༔ ཐོག་མེད་དུས་ནས་ད་ལྟའི་བར༔ མ་རིག་ལུས་དང་ངག་སེམས་ཀྱིས༔ བག་མེད་སྤྱོད་པས་དམ་འགལ་བ༔ ཚོགས་ཀྱི་འཁོར་ལོས་བསྐང་ཞིང་བཤགས༔ ས་མ་ཡ་ཤུངྔྷེ་ཨ༔ [ཐ་མ་བསྒྲལ་བསྟབ་ནི། སྤྲོ་ན་བདེན་སྟོབས་བརྗོད་པ་སྔོན་དུ་འགྲོ་བས།] ནྲྀ་ཏྲི་བཛྲ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ ཧཱུྃ༔ མ་རིག་གཉིས་འཛིན་དགྲ་དང་བགེགས༔ རྣམ་ཐར་གསུམ་གྱི་ཨེ་དབྱིངས་སུ༔ ཡེ་ཤེས་ཕུར་པའི་མཚོན་གྱིས་བསྒྲལ༔ ལྷ་ཚོགས་རྣམས་ཀྱི་ཞལ་དུ་བསྟབ༔ མ་ཏྲཾ་རུ་དྲ་མཱ་ར་ཡ་མཱཾ་ས་རཀྟ་ཀིཾ་ནི་རི་ཏི་ཁ་རཾ་ཁཱ་ཧི༔ [དེ་ནས་བརྡ་དང་བརྡའི་འབུལ་ལེན་དང་བཅས་ཚོགས་ལ་རོལ། ལྷག་མ་གཏོང་བ་ནི། དམ་ཚིག་གི་ཁ་ཕྲུ་བཏབ་ཅིང་།] ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿ ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་[བསམ།] ཨེ་ཨ་རལླི་ཧྲིཾ་ཧྲིཾ་ཛཿ[ས་མགྲོན་བོས་ལ།] ཧཱུྃ༔ བྲན་དང་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབ༔ ལྷག་མའི་གཏོར་མ་འདི་བཞེས་ལ༔ སྔོན་ཆད་ཇི་ལྟར་དམ་བཅའ་བཞིན༔ མངོན་སྤྱོད་ཕྲིན་ལས་འགྲུབ་པར་མཛོད༔ ཨུཙྪིཥྚ་བ་

ལིཾ་ཏ་ཁཱ་ཧི༔ [ཆད་མདོ་གཏོང་བ་ནི།] ཧཱུྃ༔ སྔོན་ཚེ་དུར་ཁྲོད་ཆེན་པོ་རུ༔ དཔལ་ཆེན་རྡོ་རྗེ་གཞོན་ནུ་དང་༔ བར་དུ་ཡང་ལེ་ཤོད་ཀྱི་གནས༔ གྲུབ་པའི་སློབ་དཔོན་རྣམ་གསུམ་དང་༔ ཐ་མ་བྲག་དམར་དབེན་གནས་སུ༔ པདྨ་ཐོད་ཕྲེང་མཚོ་རྒྱལ་གྱི༔ སྤྱན་སྔར་ཁས་བླང་དམ་བཅས་པའི༔ དམ་ཅན་བཀའ་ཡི་སྲུང་མ་རྣམས༔ དཔལ་གྱི་གཏོར་མ་འདི་བཞེས་ལ༔ སྔོན་གྱི་ཐ་ཚིག་ཇི་བཞིན་དུ༔ ཕྲིན་ལས་རྣམ་བཞི་འགྲུབ་པར་མཛོད༔ [བརྟན་མ་བསྐྱང་བ་ནི།] ཨོཾ་ཨཱཿཧཱུྃ༔ བྷྱོ༔ ཁྱད་པར་པདྨ་ཐོད་ཕྲེང་གི༔ སྤྱན་སྔར་དབང་བསྐུར་དམ་མནོས་པའི༔ བདུད་མོ་བཞི་དང་གནོད་སྦྱིན་བཞི༔ སྨན་མོ་བཞི་སོགས་བརྟན་མའི་ཚོགས༔ འདིར་གཤེགས་བཤལ་ཆུའི་བདུད་རྩི་བཞེས༔ ཕུར་བུ་སྒྲུབ་པའི་རྣལ་འབྱོར་གྱི༔ བསམ་རྒུ་འགྲུབ་པའི་སྡོང་གྲོགས་སྤེལ༔ གངས་ཅན་མཐའ་དབུས་བདེ་བ་དང་༔ བཤད་སྒྲུབ་བསྟན་པ་རྒྱས་པར་མཛོད༔ མ་མ་ཧྲིཾ་ཧྲིཾ་བ་ལིཾ་ཏ་ཁཱ་ཧི༔ [བྲོ་མནན་བྱ་བ་ནི།] ཨེ་ནྲྀ་ཏྲི་སརྦ་ཤ་ཏྲཱུཾ་བིགྷྣཱན་ཛཿཧཱུྃ་བཾ་ཧོ༔ ཧཱུྃ༔ སྲིད་པ་ཕུར་བུའི་དཀྱིལ་

འཁོར་འདིར༔ སྐུ་གསུང་ཐུགས་གྱི་བྲོ་བརྡུང་བས༔ དུག་གསུམ་དགྲ་བགེགས་བརླག་པར་མཛད༔ ཐམས་ཅད་ཆོས་ཀྱི་དབྱིངས་སུ་ཐིམ༔ ཨོཾ་ལཾ་ཧཱུཾ་ལཾ་སྟྭཾ་བྷ་ཡ་ནན༔ [དངོས་གྲུབ་བསྐུལ་བ་ནི།] ཧཱུྃ༔ དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་ཀྱི༔ བདེ་ཆེན་གསང་བའི་མཁའ་ཀློང་ནས༔ མཆོག་དང་ཐུན་མོང་དངོས་གྲུབ་སྩོལ༔ [རྩ་སྔགས་མཐར།] ཀཱ་ཡ་ཝཱ་ཀ་ཙིཏྟ་སརྦ་སིངྔྷི་ཧཱུྃ༔ [གཏང་རག་གི་མཆོད་བསྟོད་བྱ་ཞིང་ཧེ་རུ་ཀའི་ཡིག་བརྒྱ་བཟླས་པས་ནོངས་པ་བཟོད་པར་གསོལ། རྟག་ཆད་ཀྱི་མཐར་བསལ་བ་ནི།] སྣང་སྲིད་ཕུར་བུའི་དཀྱིལ་འཁོར་རྣམས༔ ཐུགས་ཀྱི་ཐིག་ལེ་ཆེན་པོར་ཐིམ༔ ཧཱུྃ་ཧཱུྃ་ཧཱུྃ༔ དཔལ་ཆེན་པོ་ཡི་དབྱིངས་ཉིད་ལས༔ སྐུ་གསུང་ཐུགས་ཀྱི་དཀྱིལ་འཁོར་གསལ༔ ཕཊ་ཕཊ་ཕཊ༔ བཛྲ་ཀཱ་ཝཱ་ཙི་རཀྵ་ཧཾ༔ [བསྔོ་སྨོན་ནི།] མི་གནས་ཡེ་ཤེས་དཀྱིལ་འཁོར་དུ༔ སྐུ་གསུང་ཐུགས་སུ་ལྷུན་གྲུབ་ནས༔ རྡོ་རྗེ་གཞོན་ནུའི་གོ་འཕང་ཐོབ༔ འགྲོ་བ་ཀུན་གྱི་དཔལ་དུ་ཤོག༔ [བཀྲ་ཤིས་ནི། མེ་ཏོག་ཆར་དབབ་ལ།] ཧཱུྃ༔ རིག་འཛིན་རྩལ་འཆང་བྱིན་རླབས་རྒྱ་

མཚོའི་བདག༔ སྲིད་པའི་ཕུར་བུ་དངོས་གྲུབ་ཀུན་གྱི་གཏེར༔ མ་མོ་མཁའ་འགྲོ་མྱུར་མགྱོགས་ཕྲིན་ལས་ཅན༔ ཕུར་པའི་དཀྱིལ་འཁོར་ལྷ་ཡི་བཀྲ་ཤིས་ཟོག༔ [ཅེས་དང་། གཞན་ཡང་ཤིས་བརྗོད་ཇི་ལྟར་རིགས་པ་སྤེལ་བས་བདེ་ལེགས་སུ་བྱའོ། །] ༈ ང་ནི་ཕྲིན་ལས་འདི་དང་འབྲེལ་བར་དམར་ཆེན་གཏོར་ཟློག་གི་ལས་སྦྱོར་བརྩམ་པར་འདོད་པས། ལས་དཀྱིལ་གྱི་གཞིར་དུག་ཁྲག་གིས་ཆག་ཆག་བཏབ་པར་ཆོས་འབྱུང་མེ་རི་འཁོར་ལོ་མུ་ཁྱུད་ལྟེ་བ་དང་བཅས་པ་རྡུལ་ཚོན་གྱིས་ཚུལ་བཞིན་བྲི་བའམ་ཆུ་ཚོན་གྱིས་བྲིས་པ་དགྲམ། དེའང་མ་འཛོམ་ན་ཞིང་ལྤགས་ཁྲག་གིས་སྦག་པར་འབྲུ་ནག་གི་ཚོམ་བུ་བཀོད་པས་ཀྱང་རུང་། དེའི་དབུས་སུ་མཉྫིའི་ཁར་ལྕགས་སྣོད་དུ་འབྲུ་ནག་གི་རྗེན་ཕྱེ་ཁྲག་གིས་སྦྲུས་པའི་དམར་གཏོར་ཐོག་གཟུགས་རྣོ་དབལ་ཅན་ལ་འཁོར་གྱི་བཤོས་ཕྲན་ལྷ་གྲངས་དང་མཉམ་པས་བསྐོར་བའི་རྩེ་མོར་སྐུ་རྟེན་བྱ་ཁྱུང་དར་ནག་གི་འཕུར་ལྡིང་གཡོ་ཞིང་། ཁྲག་ཀོང་། མཚེ་ཡུངས། རྩང་དམར། ཁྲམ་བྱང་། རྒྱུ་རློན་གྱི་ལྡ་ལྡི་སོགས་དྲག་རྒྱན་རྔམས་བརྗིད་དང་ལྡན་པ་འགོད། མཐར་ཁྲག་གི་ཨཏྒྷཾ་སོགས་དྲག་པོའི་ཉེར་སྤྱོད་ཀྱིས་བསྐོར། ཕུར་བུ། ལིང་ག །དབྱེ་འབེབས་བྱད་སྨྱོའི་རྫས། ཐུན་སྣ། སྒྲོལ་གྲི། ཐོ་བ། ཧོམ་གཟར་སོགས་ཉེ་བར་མཁོ་བའི་ཡོ་བྱད་ཐམས་ཅད་ཚོགས་པར་བྱས་ལ། སྦྱོར་

བའི་ཚེ་ཕུར་བུ་གུ་གུལ་གྱིས་བདུད་ཅིང་། ཨོཾ་བཛྲ་ཀཱི་ལི་ཀཱི་ལ་ཡ་སུ་རུ་སུ་རུ་ཨ་ངྷི་ཏིཥྛ་རྨུགས་རྨུགས་ཧ་ལ་ཧ་ལ་དགྲ་བགེགས་འབྱུང་པོའི་ཙིཏྟ་མྱགས་མཱ་ར་ཡ་ཧཱུྃ་ཕཊ༔ [ཡུངས་ཀར་གྱིས་བྲབ་ཅིང་།] ཨོཾ་བཛྲ་ཀཱི་ཡི་ཀཱི་ལ་ཡ་མ་གུ་ཏ་ལ་པྲ་ཏ་ལ་ཤ་ཏ་རཱ་ཙ་ཧཱུྃ་དགྲ་བགེགས་འབྱུང་པོ་མཱ་ར་ཡ་ཧཱུྃ་ཕཊ༔ [རཀྟས་བྱུག་ཅིང་།] ཨོཾ་བཛྲ་ཀཱི་ལི་ཀཱི་ལ་ཡ་རཀྟ་ཛྭ་ལ་མཎྜལ་རཀྵ་རཀྵ་དགྲ་བགེགས་ཝཱ་ཤཾ་མཱ་ར་ཡ་ཧཱུྃ་ཕཊ༔ [ཅེས་བྱུག་སོགས་གསུམ་གྱིས་གཟི་བྱིན་བསྐྱེད་ལ།] ཤཱུ་ནྱ་ཏས་[སྦྱངས།] སྟོང་པའི་ངང་ལས་ཨེ་ལས་ཕུར་གདན་གྲུ་གསུམ་མཐིང་ནག་འབར་བའི་དབུས་སུ་པད་ཉི་དགྲ་བགེགས་ཀྱི་གདན་ལ་རང་གི་ཐུགས་ཀ་ནས་ཧཱུྃ་སྤྲོས། ཧཱུྃ་སྥ་ར་ཎ་ཕཊ། སཾ་ཧ་ར་ཎ་ཧཱུྃ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ། ཕུར་བུ་དཔལ་ཆེན་རྡོ་རྗེ་གཞོན་ནུ་ཡུམ་དང་བཅས་པའི་སྐུར་གྱུར། [སྙིང་པོ་ལན་བདུན་བཟླས།] དེ་ཞུ་བ་ལས་བྱུང་བའི་ཕུར་བུར་གྱུར་པའི་རྩེ་མོར་དཔལ་ཆེན་པོ། རྒྱ་མདུད་གོང་མ་ལ་ཁྲོ་བཅུ། ཆངས་བཟུང་ལ་ཟ་གསོད། རྒྱ་མདུད་འོག་མ་ལ་སྒོ་སྐྱོང་། དཔལ་ཟུར་ལ་སྲས་མཆོག །ལོགས་གསུམ་ལ་དམ་ཅན་སྲུང་མ་དང་བཅས་པའི་ཕོ་བྲང་

དུ་གྱུར་པར་[བསམ། དངོས་གཞི་བདག་མདུན་གཅིག་ཅར་དུ་གསལ་བཏབ་ལ་བསྙེན་པ་ཅི་འགྲུབ་མཐར། སྲུང་བ་ནི།] བདག་ཉིད་ཁྲག་འཐུང་དཔལ་ཆེན་པའི༔ ཐུགས་སྲོག་རྡོ་རྗེའི་ལྟེ་བར་ཧཱུྃ༔ ཁོག་པར་རང་གཞན་བསྲུང་བྱ་ཚུད༔ དཀར་དམར་འོད་ཀྱི་ར་བས་བསྐོར༔ དེ་ལས་འོད་འཕྲོས་ཞིང་ཀུན་ཁྱབ༔ རྒྱལ་བའི་མཐུ་བྱིན་ཐམས་ཅད་བསྡུས༔ བདག་ཐིམ་རྡོ་རྗེའི་གོ་ཁྲབ་ནི༔ སྲ་བརྟན་སྲུབ་མེད་ཞུ་ལུགས་ལ༔ ཕྱི་རོལ་སྲུང་བའི་འཁོར་ལོ་བཅས༔ ཅིས་ཀྱང་མི་ཆོད་མི་ཤིགས་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ༔ མ་མ་ཀཱ་ཝཱ་ཙི་རཀྵ་ཀུ་རུ་བྷྲཱུྃ༔ [ཞེས་བཟླ། ཟློག་པ་ནི།] ཕྱི་རོལ་སྲུང་བའི་འཁོར་ལོ་དང་༔ བདག་གི་སྐུ་ཡི་ཆ་ཀུན་ནས༔ སྤྲུལ་པའི་ཁྲོ་ཚོགས་དཔག་ཡས་འཕྲོས༔ བྱད་མ་ལྷ་སྲུང་དང་བཅས་པ༔ སྦུར་མ་མེ་ལྕེས་ཚིག་བཞིན་བཅོམ༔ རྡུལ་ཕྲན་ཙམ་ཡང་མེད་པར་གྱུར༔ [རྩ་སྔགས་ཤམ་དུ།] གནོད་བྱེད་དགྲ་བགེགས་བྱད་མ་ལྷ་སྲུང་དང་བཅས་པ་ཐམས་ཅད་མཱ་ར་ཡ་རྦད་བྷྱོ་ཟློག༔ [ཅེས་བཟླ། བསད་པ་ནི།] བདག་མདུན་ལྷ་ཚོགས་ཐུགས་ཀ་ནས༔ སྔགས་ཀྱི་འོད་ཟེར་

སྤུ་གྲི་ནི༔ གནམ་ལྕགས་ཐོག་རྒོད་འཁྲུགས་ལྟར་འཕྲོས༔ ཕ་རོལ་དགྲ་བགེགས་ཐམས་ཅད་ཀྱི༔ སྲོག་རྩ་རྦད་རྦད་བཅད་པར་གྱུར༔ [ཅེས་སྤུ་གྲིའི་དྲག་སྔགས་བཟླ་ཞིང་ཐུན་རྫས་ལ་ངར་འདོགས། དེ་ནས་ཚོགས་ཀྱི་མཆོད་པ་བར་པ་བཤགས་པའི་བར་དུ་བཏང་ནས། སྨད་ལས་དངོས་ལ། ཐོག་མར་ཐུགས་དམ་བསྐུལ་བ་ལས། རིག་འཛིན་བསྐུལ་བ་ནི།] ཧཱུྃ༔ བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔ རིག་འཛིན་རྣམས་ཀྱི་དུས་ལ་བབ༔ ཕུར་བུ་སྒྲུབ་པའི་གྲོགས་མཛོད་ཅིག༔ སློབ་དཔོན་པདྨ་འབྱུང་གནས་ཀྱིས༔ རྒྱ་གར་ཙནྡན་ནགས་ཚལ་ལ༔ ཇི་ལྟར་རྟགས་བསྟན་བསྙེལ་ལམ་ཅི༔ ཕུར་བུ་སྒྲུབ་པའི༴ པཎ་ཆེན་བི་མ་མི་ཏྲ་ཡིས༔ གངྒཱ་ལྷ་ཡི་ཆུ་བོ་ལ༔ ཇི་ལྟར༴ ཕུར་བུ༴ བལ་པོ་ཤཱི་ལ་མཉྫུ་ཡིས༔ མནྔྷ་ལ་ཡི་མཁར་སྒོང་ལ༔ ཇི་ལྟར༴ ཕུར་བུ༴ མཁར་ཆེན་ཡེ་ཤེས་མཚོ་རྒྱལ་གྱིས༔ དགུང་གི་ཕོ་རོག་ནག་པོ་ལ༔ ཇི་ལྟར༴ ཕུར་བུ༴ གཞན་ཡང་སྔོན་གྱི་རིག་འཛིན་རྣམས༔ ཇི་ལྟར་བསྒྲུབས་བཞིན་དེང་བསྐུལ་གྱིས༔ མ་གཡེལ་ཐུགས་དམ་རྗེས་

དགོངས་ལཿ མཐུ་རྩལ་ནུས་པའི་དཔུང་སྐྱེད་ཅིག༔ [རྩ་བའི་ལྷ་རྣམས་བསྐུལ་བ་ནི།] ཧཱུྃ༔ མཐིང་ནག་གྲུ་གསུམ་དཀྱིལ་འཁོར་ནས༔ དཔལ་ཆེན་རྡོ་རྗེ་གཞོན་ནུ་དང་༔ ཡུམ་ཆེན་འཁོར་ལོ་རྒྱས་འདེབས་མ༔ སྲས་མཆོག་ཉི་ཤུ་རྩ་གཅིག་དང་༔ ཁྲོ་བོ་བཅུ་དང་ཁྲོ་མོ་བཅུ༔ ཐབས་ཤེས་སྤྲུལ་པའི་ཟ་གསོད་ཚོགས༔ ཕྲ་མེན་སྒོ་མ་ཆེན་མོ་བཞི༔ ཕུར་པ་ཕྲིན་ལས་ལྷ་ཚོགས་རྣམས༔ མི་མངོན་དབྱིངས་ནས་སྐུར་བཞེངས་ཤིག༔ བྱང་ཆུབ་མཆོག་ཏུ་སེམས་བསྐྱེད་ནས༔ བླ་མེད་ལམ་དུ་ཞུགས་པ་ལ༔ བར་ཆད་འཚེ་བ་དགྲ་ཡིས་བྱས༔ ཉེས་མེད་རྣལ་འབྱོར་གྲོགས་གཡེལ་ན༔ སྔོན་ཀྱི་ཐུགས་དམ་ཉམས་པར་འགྱུར༔ དྲག་པོའི་ཕྲིན་ལས་དུས་ལ་བབ༔ མ་གཡེལ་མ་གཡེལ་ཡི་དམ་ལྷ༔ དྲག་ཤུལ་ཆེན་པོས་གཟི་བྱིན་སྐྱེད༔ འབར་བ་མཆོག་གི་ཆོ་འཕྲུལ་གྱིས༔ ནག་ཕྱོགས་དགྲ་བགེགས་རྩད་ནས་ཆོད༔ ཕས་རྒོལ་རྦོད་གཏོང་དམོད་པའི་མཚོན༔ ཟློག་གཟིར་དྲག་པོའི་ཕྲིན་ལས་མཛོད༔ [དམ་ཅན་རྣམས་བསྐུལ་བ་ནི།] ཧཱུྃ༔ སྔོན་ཚེ་སྒྲུབ་པའི་གནས་

མཆོག་ཏུ༔ ཤྭ་ན་བདག་ཉིད་ས་བདག་མ༔ སྐྱེས་བུ་གིང་དང་ཕོ་ཉའི་ཚོགས༔ ཁྱེད་ཅག་ཕུར་པའི་ལས་མཁན་ཏེ༔ བསྐུལ་བའི་ལས་ལ་རྩལ་མ་ཞན༔ དམར་གྱི་གཏོར་མ་འདི་བཞེས་ལ༔ ཐུགས་དམ་གཉན་པོའི་དུས་ལ་བབ༔ གང་ལ་བྱ་བ་ཁྱོད་ཀྱིས་ཤེས༔ ཡིད་ལ་བརྣག་པའི་དགྲ་བོ་རྣམས༔ རིངས་པར་ཁུག་ལ་མྱུར་དུ་སྒྲོལ༔ མངོན་སྤྱོད་ཕྲིན་ལས་གྲུབ་པར་མཛོད༔ [གསེར་སྐྱེམས་འབུལ་བནི། འདོད་ཡོན་ཟག་པ་མེད་པའི་ལོངས་སྤྱོད་ཀྱི་གཏེར་དུ་གྱུར་པར་བསམ་ཞིང་།] ཨོཾ་ཨཱཿཧཱུྃ་[གིས་བརླབས་ནས།] ཧཱུྃ། རིག་འཛིན་རྩ་བརྒྱུད་བླ་མ་དམ་པ་དང་། །བདེ་གཤེགས་ཞི་ཁྲོ་རབ་འབྱམས་དཀྱིལ་འཁོར་ལྷ། །ཁྱད་པར་རྡོ་རྗེ་ཕུར་པའི་ལྷ་ཚོགས་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །མ་མགོན་ལྕམ་དྲལ་དམ་ཅན་རྒྱ་མཚོའི་ཚོགས། །དྲེགས་པའི་སྡེ་དཔོན་ཕུར་སྲུང་དམ་ཚིག་ཅན། །བཀའ་ཉན་བྲན་གཡོག་མངགས་གཞུག་བཅས་རྣམས་ཀྱིས། །གསེར་སྐྱེམས༴ སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་སོགས་ཡུལ་གཞིས་གནས་ཀྱི་བདག །ལོ་ཟླ་ཞག་དུས་

ཚེས་ལ་དབང་བའི་ལྷས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །[གཟུ་དཔང་གསོལ་བ་ནི།] ཧཱུྃ། ཕྱོགས་བཅུ་ནམ་མཁའི་དཀྱིལ་འཁོར་ནས། བླ་མ་རིག་འཛིན་ཡི་དམ་ལྷ། །རྡོ་རྗེ་གཞོན་ནུ་འཁོར་དང་བཅས། །ཐུགས་རྗེས་བདག་ལ་དགོངས་སུ་གསོལ། །བདག་ནི་རིག་འཛིན་སྒྲུབ་པ་པོ། །དམ་ཚིག་འཛིན་ལ་དགྲ་བྱུང་ན། །མ་ཉེས་མ་ལེན་སྲུང་མ་མཁྱེན། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྣང་སྲིད་ལྷ་འདྲེས་མཛོད། །དམ་ཉམས་དགྲ་བོ་སྡིག་ཅན་འདིས། དང་པོ་སངས་རྒྱས་བསྟན་པ་བཤིག །བར་དུ་དཀོན་མཆོག་དབུ་འཕང་སྨད། །མཐའ་མར་སྔགས་འཆང་སྙིང་པོ་དྲལ། །ད་ལྟ་རྣལ་འབྱོར་བདག་ལ་བསྡོས། །དགེ་བ་བཅུ་ནི་ཁྱད་དུ་བསད། །མི་དགེ་བཅུ་ནི་དང་དུ་བླངས། །མཚམས་མེད་ལྔ་ཡི་འབྲས་བུ་སྨིན། །འདི་ནི་བསྒྲལ་བའི་ཞིང་ཡིན་པས། །རྡོ་རྗེ་གཞོན་ནུའི་ལྷ་ཚོགས་རྣམས། །ཆོས་དབྱིངས་ཞི་ལས་མ་གཡོས་ཀྱང་། །རྔམས་བརྗིད་ཁྲོས་པའི་སྐུར་བཞེངས་ལ། །དགྲ་བགེགས་བསྒྲལ་བའི་དུས་ལ་བབ། །མ་གཡེལ་མ་གཡེལ་ཐུགས་དམ་ཅན། །དགྲ་བགེགས་སྒྲོལ་བའི་

ཕྲིན་ལས་མཛོད། །[དམིགས་བྱ་བསྐྱེད་པ་ནི།] བྲུབ་ཁུང་སྭ་བྷཱ་ཝ་[ས་སྦྱངས།] སྟོང་པའི་ངང་ལས་མདུན་དུ་ཨེ་ལས་ལྕགས་སྲེགས་ཀྱི་ཁང་སྒྲོམ་གྲུ་གསུམ་བང་རིམ་དགུ་པ། ཁ་ཁྱེར་དོག་ཅིང་གཏིང་ཟབ་པ། འོག་ན་འདོད་ཆགས་ཀྱི་ཁྲག་མཚོ་ཁོལ་བ། ལོགས་ལ་ཞེ་སྡང་གི་མེ་དཔུང་འབར་བ། སྟེང་ན་གཏི་མུག་གི་མུན་པ་འཐིབ་པ། ཟུར་ནང་རྒྱལ་གྱི་བྲག་རི་ཉིལ་བ། ཕྱི་ནང་ཀུན་ཏུ་ཕྲག་དོག་གི་རླུང་དམར་འཚུབས་ཤིང་ནད་དུག་མཚོན་ཆའི་འཆར་འབེབས་པ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་མི་བཟད་པར་འཁྲུགས་པ། ལས་བྱེད་གཤིན་རྗེའི་དམག་ཚོགས་སེངྒེ་ལྟར་རྔམས་པ། སྟག་ལྟར་འཕྱོ་བ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། རྒྱོབ་རྒྱོབ་དང་སོད་སོད་ཀྱི་སྒྲ་འབྲུག་ལྟར་སྒྲོགས་པས་གང་བ། སྲིད་པ་ལས་ཀྱི་བཙོན་ཁང་དྲག་པོ་དེའི་ནང་དུ་ནྲྀ་ཏྲི་དུད་ཁ་ཡོངས་སུ་གྱུར་པ་ལས་དགྲ་བགེགས་དེ་ཉིད་ལུས་གཅེར་བུ་རིད་པ། མདོག་ནག་ཅིང་དྲན་པ་ཉམས་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་རྣག་ཁྲག་འཛག་པ། ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་གནོད་བྱེད་ཐམས་ཅད་འདུས་པའི་ངོ་བོར་གྱུར་པར་

[བསམ་ལ། རྣམ་ཤེས་དགུག་པ་ནི།] ན་མོ། རིག་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་འཁོར་འདས་ཐམས་ཅད་ཀྱི་སྤྱི་དཔལ་ཡི་དམ་རྡོ་རྗེ་གཞོན་ནུ་བདུད་འདུལ་ཁྲོ་བཅུ་ཁྲོ་ཐབས་སྒོ་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། ཁྱད་པར་རིག་པ་འཛིན་པ་བདག་ཅག་ཡོན་མཆོད་འཁོར་དང་བཅས་པ་རྣམས་ལ་སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུག་པའི་གཟུགས་ཅན་སྡང་པའི་དགྲ་དང་། གཟུགས་མེད་གནོད་བྱེད་བགེགས་ཀྱི་ཚོགས་དང་བཅས་པ་ཐམས་ཅད་སྲིད་པ་གསུམ་

གྱི་ཁོངས་གར་གནས་གར་བྲོས་ཀྱང་སྐད་ཅིག་ཡུད་ཙམ་གྱིས་དམིགས་པའི་རྟེན་འདི་ལ་ཁུག་ཅིག །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་ཤ་ཏྲུཾ་ཨཱ་ཀརྵ་ཡ་ཛཿནྲྀ་ཡཾ་ཛཿཏྲི་ཡཾ་ཛཿ ཛཿཧཱུྃ་བཾ་ཧོ༔ [ཞེས་ལན་གསུམ་སོགས་ཀྱིས་བཀུག་ནས། ཕོ་ཉ་འགྱེད་པ་ནི།] ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་པོའི་དུས༴ ཕྱག་བརྙན་ཆེན་མོའི༴ ཤྭ་ན་མུ་ཁའི༴ བདག་ཉིད་ཆེན་མོའི༴ ས་བདག་ཆེན་མོའི༴ ཁྱོད་ཀྱི་ཕྲིན་ལས༴ མཐུ་རྩལ་དབྱུང་བའི༴ ཧཱུྃ༔ དུས་གསུམ་རྒྱལ་བའི་གདུང་འཚོབ་པའི༔ རིག་འཛིན་བདག་ཅག་རྣམས་ལ་ནི༔ གནོད་ཅིང་གདུག་པའི་དགྲ་དང་བགེགས༔ བདུད་དང་བར་དུ་གཅོད་པའི་ཚོགས༔ དངོས་གྲུབ་འཕྲོག་ཅིང་འཚེ་བ་རྣམས༔ ཁྲོ་བོ་ཆེན་པོའི་བྱིན་རླབས་ཀྱིས༔ ཡུད་ཙམ་གྱིས་ནི་འདིར་ཁུག་ལ༔ མངོན་སྤྱོད་ཚུལ་བཞིན་བསྒྲལ་བ་དང་༔ སྡུག་བསྔལ་ཉམས་སུ་མྱོང་བར་མཛོད༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ཛཿཧཱུྃ་བཾ་ཧོ་ཤཱི་གྷྲཾ་ཨཱ་ན་ཡ་ཧཱུྃ་ཕཊ༔ [ལྷ་དང་ཕྲལ་བ་ནི། གུ་གུལ་སོགས་ཀྱིས་བདུག །བྱ་འུག་གི་སྒྲོས་ཕྱིར་འབྱེད་ཚུལ་དང་བཅས།]

ཧཱུྃ༔ དམ་ཚིག་ཆེན་པོའི་དུས་ལ་བབ༔ ཁྱེད་ཀྱི་དམ་ཚིག་དུས༴ མཐུ་རྩལ་དབྱུང་བའི༴ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ གཏོགས་ཤིག་གྲོགས་དང་བྲལ་བར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ཧ་ས་ཡ་ར་ཧ་མ་ཡ་ར་ཧྲཱིཿདཎྜ་ཧཱུྃ་ཕཊ༔ [གཟུགས་ལ་དབབ་པ་ནི། ཡུངས་ཀར་གྱིས་བྲབ་ཅིང་།] ཧཱུྃ༔ སྤྲུལ་པ་ཆེན་པོའི་དུས་ལ་བབ༔ མཐུ་རྩལ་དབྱུང་བའི༴ དངོས་གྲུབ༴ གདུག་ཅིང་༴ ཕོབ་ཅིག་རྣམ་པར་གཟིར་བར་བྱོས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ཨཱ་བེ་ཤ་ཡ་ཨཱ་བེ་ཤ་ཡ་ཧཱུྃ་ཕཊ༔ [བྱད་དུ་གཞུག་པ་ནི། བྱད་ཐག་གིས་འཆིང་ཚུལ་བྱ་ཞིང་།] ཧཱུྃ༔ ཕྱག་བརྙན་ཆེན་མོའི་དུས་ལ་བབ༔ མཐུ་རྩལ༴ དངོས་གྲུབ༴ གདུག་ཅིང་༴ ཟུང་ཞིག་རྒྱོབ་ཅིག་རྣམ་པར་ཆིངས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ཤཱི་གྷྲཾ་ཨཱ་ན་ཡ་ཧཱུྃ་ཕཊ༔ [སྨྱོར་གཞུག་པ་ནི། དུག་ཁྲག་གིས་བྲབ་ཅིང་།] ཧཱུྃ༔ ཤྭ་ན་མུ་ཁའི་དུས་ལ་བབ༔ མཐུ་རྩལ༴ དངོས་གྲུབ༴ གདུག་ཅིང་༴ རིངས་པར་ཁུག་ལ་སྨྲར་ཆུག་ཅིག༔ ཨོཾ་བཛྲ་

ཀཱི་ལི་ཀཱི་ལ་ཡ་དགྲ་བགེགས་ཛྭ་ལ་པ་ཡ་ཛྭ་ལ་པ་ཡ་ཧཱུཾ་ཕཊ༔ [གདབ་པའི་གཟེར་ཁ་ནི། སྲས་མཆོག་གི་ཕུར་པ་ཐོགས་ལ།] ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ སངས་རྒྱས་ཀུན་གྱི་ཕྲིན་ལས་རྫོགས༔ ལག་གཉིས་རིགས་ལྔ་ཡབ་ཡུམ་སྦྱོར༔ མཐིང་ནག་ཧཱུྃ་ལས་སྐྱེས་པ་ཡི༔ སྲས་མཆོག་ཡཀྴ་ཀྲོ་ངྷ་ནི༔ སྐུ་སྟོད་ཁྲོ་བོ་འཇིགས་པ་ལ༔ སྐུ་སྨད་གནམ་ལྕགས་ཕུར་པའི་དབལ༔ རྣོ་ངར་འབར་བ་རྡོ་རྗེའི་མཚོན༔ འཕྱར་བ་ཙམ་གྱིས་སྲིད་གསུམ་འདར༔ བསྒྲིལ་བ་ཙམ་གྱིས་ཁམས་གསུམ་བརླག༔ ཀླད་ལ་བསྐོར་བས་བདག་འཁོར་སྲུང་༔ སྐེད་ལ་བསྐོར་བས་ཕྱིར་མི་ལྡོག༔ གཡས་སུ་བསྒྲིལ་བས་ཕོ་རྒྱུད་འདུལ༔ གཡོན་དུ་བསྒྲིལ་བས་མོ་རྒྱུད་འདུལ༔ བཏབ་པས་ལྷ་ཡང་བརླག་འགྱུར་ན༔ དགྲ་དང་བགེགས་ལ་སྨོས་ཅི་དགོས༔ གཟིར་ཅིག་དགྲ་བོའི་སྲོག་རྩ་ལ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཕུང་པོ་རྡོ་རྗེར་གཏམས་བྱས་ནས༔ རྣམ་པར་ཤེས་པ་རྡོ་རྗེར་སྒོམ༔ ཨོཾ་ལཾ་ཧཱུྃ་ལཾ་སྟྭམྦྷ་ཡ་ནན༔ མོ་ཧཱ་གྷཱ་ཏ་ཡ་བྷ་ག་ཝཱ་ན་ཧྲཱིཿཀྲི་ཤཱི་བི་ཀྲི་བཛྲ་ཧཱུྃ་ཀཱ་ར་

ཧཱུྃ༔ བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོ༔ སརྦ་བིགྷྣཱན་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ བཛྲ་ཧཱུྃ་ཀཱ་ར་ཧཱུྃ་ཕཊ༔ ཧཱུྃ་ཀཱ་ར་ཧཱུྃ་ཨཱཿཕཊ༔ [ཅེས་ཚེ་ཁྲུས་ཀྱི་དགོངས་པས་བརྟེན་པ་དབྱིངས་སུ་བསྒྲལ། སླར་ཡང་བག་ཆགས་ཀྱི་རྟེན་གཞི་བཅོམ་པའི་ཕྱིར་ལས་ཕུར་བླངས་ལ།] ཧཱུྃ༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་ཡིས༔ ཀླད་པ་ཚལ་པ་བརྒྱ་རུ་ཁོས༔ གདུག་ཅིང་སྡང་སེམས་ལྡན་པ་ཡི༔ ལྷའམ་འོན་ཏེ་བདུད་ཀྱང་རུང་༔ ང་ལ་བར་ཆད་བྱེད་པའི་བགེགས༔ མཐུ་དང་རྫུ་འཕྲུལ་མེད་པར་བྱོས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུྃ་ཕཊ༔ [ཅེས་གནས་སོ་སོར་གདབ་ཅིང་སྤུ་གྲིའི་དྲག་སྔགས་བཟླ་བཞིན་ཐུན་རྫས་སྣ་ཚོགས་པས་བྲབ། སྒྲོལ་གྱི་ཐོགས་ལ།] ཧཱུྃ༔ བྲན་དང་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབ༔ སྔོན་ཆད་ཁས་བླངས་དམ་བཅས་བཞིན༔ མངོན་སྤྱོད་ཕྲིན་ལས་གྲུབ་པར་མཛོད༔ ཧཱུྃ་མ་མ་པཱ་ཤཾ་ཀུ་རུ༔ མ་ཏཾ་ཉ་ན་ཀ་ར་ཨི་དན་དྷ་ཏི༔ མ་མ་ཀརྨ་ཤཱི་གྷྲཾ་ཀཱ་ར་ཡེ་ཧཱུྃ་ཕཊ༔ [ཅེས་གཏུབ། རྡུལ་དུ་བརླག་པ་ནི། ཐོ་

བས་བརྡུང་ཚུལ་བྱ་ཞིང་།] ཧཱུྃ༔ ས་བདག་ཆེན་མོའི་དུས་ལ་བབ༔ མཐུ་རྩལ༴ དངོས་གྲུབ༴ གདུག་ཅིང་༴ ལུས་ངག་རྡུལ་ཕྲན་བཞིན་དུ་རློག༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་ད་ཧ་ཡ་ད་ཧ་ཡ་ཧཱུྃ་ཕཊ༔ [ཞལ་དུ་སྟོབ་པ་ནི། བསྒྲལ་བའི་ཤ་ཁྲག་བདུད་རྩིར་སྦར་བ་ཧོམ་གཟར་གྱིས་སྟོབ་ལ།] ཧཱུྃ༔ དཔལ་ཆེན་ལྷ་ཚོགས་འཁོར་དང་བཅས༔ གནམ་ས་ཙམ་གྱི་ཞལ་གདངས་ཤིང་༔ གངས་རི་ཙམ་གྱི་མཆེ་བ་གཙིགས༔ གློག་དམར་འགྱུ་འདྲའི་ལྗགས་རྐྱོངས་ལ༔ བསྒྲལ་བའི་ལྔ་ཕུང་མཆོད་པར་རོལ༔ མངོན་སྤྱོད་ཕྲིན་ལས་མཐར་ཕྱིན་མཛོད༔ བཛྲ་ཡཀྴ་ཀྲོ་ངྷ་ཁ་ཁ་ཁཱ་ཧི་ཁཱ་ཧི༔ ཧ་ཧ་ཧ༔ ཧཱུྃ་ཧཱུྃ་ཧཱུྃ༔ ཕཊ་ཕཊ་ཕཊ༔ [ཧོམ་གཟར་ཁྲག་ཆང་གིས་བཤལ་བ་དམ་ཅན་གྱི་གཏོར་མར་སྦྲན་ཅིང་།] ཧཱུྃ༔ བདག་ཉིད་ཆེན་མོའི་དུས་ལ་བབ༔ མཐུ་རྩལ༴ དངོས་གྲུབ༴ གདུག་ཅིང་༴ ང་ཡི་དབང་དུ་གྱུར་ནས་ཀྱང་༔ བསྒོ་བའི་བཀའ་ལ་ཉན་པར་གྱིས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་བྷིནྔྷ་ཡི་བྷིནྔྷ་ཡ་ཧཱུྃ་ཕཊ༔ [ཅེས་བསྟབས། འདིར་ཚོགས་ལ་རོལ་ཞིང་ལྷག་མའི་ཆོ་ག་བྱ། དེ་ནས་ཟློག་པའི་དཔུང་བསྐྱེད་ཕྱིར་སླར་ཡང་ཐུགས་དམ་བསྐུལ་བ་ནི། ལིང་

རོ་ཁྲག་སྐྱེམས་དང་སྦྱར་བ་གཏོར་ཆེན་དུ་སྟོབ་ཅིང་།] ཧཱུྃ༔ མཐིང་ནག་གྲུ་གསུམ་འབར་བའི་དཀྱིལ་འཁོར་ནས༔ དཔལ་ཆེན་ཧེ་རུ་ཀ་དཔལ་ཁྲོ་བོའི་རྒྱལ༔ རྣམ་ཐར་སྒོ་གསུམ་དབྱིངས་ལས་བཞེངས་པའི་ཡུམ༔ དབྱིངས་རིག་ཟུང་འཇུག་ཐུགས་ལས་སྤྲུལ་པའི་སྲས༔ ཕྱོགས་བཅུའི་གདོན་འདུལ་ཁྲོ་བཅུ་ཡབ་ཡུམ་དང་༔ ཐབས་ཤེས་སྐུ་ལས་སྤྲུལ་པ་ཕོ་ཉའི་ཚོགས༔ སྒོ་སྐྱོང་སྲུང་མ་དབང་ཕྱུག་དྲེགས་པའི་སྡེ༔ རྡོ་རྗེ་གཞོན་ནུའི་དཀྱིལ་འཁོར་ལྷ་ཚོགས་རྣམས༔ རྣལ་འབྱོར་བདག་གིས་གདུང་བས་གསོལ་འདེབས་ནི༔ ཨེ་ཁྲམ་འབར་བའི་དབྱིངས་ནས་སྐུར་བཞེངས་ཤིག༔ དུག་གསུམ་ཤ་ཁྲག་རུས་པའི་མཆོད་པ་བཞེས༔ མངོན་སྤྱོད་དམོད་པ་ཆེན་པོའི་རྩལ་བསྐྱེད་ལ༔ ཕྱིར་ཟློག་ལས་ཀྱི་ཕྲིན་ལས་གྲུབ་པར་མཛོད༔ ཐུགས་དམ་དུས་ལ་བབ་བོ་ས་མ་ཡ༔ [བཟློག་པའི་ཕྲིན་ལས་བཅོལ་བ་ནི།] ཧཱུྃ་བྷྱོ༔ ཤིན་ཏུ་རྣམ་དག་ཡེ་ཤེས་ངང་༔ སྙིང་རྗེའི་སྐུར་ཤར་ཧེ་རུ་ཀ༔ ཁྲག་འཐུང་རྡོ་རྗེ་གཞོན་ནུ་ཚེ༔ ཤེས་རབ་ཡུམ་དང་མཉམ་པར་སྦྱོར༔ གཙོ་འཁོར་སྤྲུལ་པ་ཡང་སྤྲུལ་བཅས༔

ཐོགས་མེད་ཕྲིན་ལས་རྩལ་ཕྱུང་ལ༔ འདི་ལྟར་བཟློག་བསྒྱུར་ལས་མཛོད་ཅིག༔ རྣལ་འབྱོར་བདག་ཅག་འཁོར་བཅས་ལ༔ གནོད་ཅིང་བར་དུ་གཅོད་པ་ཡི༔ ནད་རིགས་བཞི་བརྒྱ་རྩ་བཞི་ཟློག༔ གདོན་རིགས་ཉི་ཁྲི་ཆིག་སྟོང་ཟློག༔ བགེགས་རིགས་སྟོང་ཕྲག་བརྒྱད་ཅུ་ཟློག༔ བྱིས་པའི་གདོན་ཆེན་བཅོ་ལྔ་ཟློག༔ ཀེག་ཆེན་སུམ་བརྒྱ་དྲུག་ཅུ༴ ལྟས་ངན་བརྒྱད་ཅུ་རྩ་གཅིག་༴ ཡེ་འདྲོག་སུམ་བརྒྱ་དྲུག་ཅུ༴ དུས་མིན་འཆི་རྐྱེན་བཅོ་བརྒྱད་༴ རྨི་ལྟས་རྟེན་འབྲེལ་ངན་པ༴ སྡེ་བརྒྱད་ཟ་ཁ་ཟུག་པ༴ མཐུ་གཏད་ཧོམ་ཟོར་རྦོད་གཏོང་༴ མུ་སྟེགས་ཀླ་ཀློའི་རིག་སྔགས༴ རྒྱལ་འགོང་དམ་སྲིའི་ཆོ་འཕྲུལ༴ བྱུར་འདྲེ་བསེན་མོའི་གནོད་འཚེ༴ ཐེའུ་རང་བླ་རྐུན་འཇབ་པ༴ ཕུང་སྲི་གྲི་ཁ་མཚོན་དབལ༴ ཟ་འདྲེ་སྲིས་རྐུན་སྒབ་འདྲེ༴ མི་ཁ་སྨྲ་མཆུ་འཁོན་འཐབ༴ ལོ་ཉེས་ཕྱུགས་ཉེས་གོད་ཡམས༴ དུས་ངན་ཡོ་ལང་འཁྲུགས་རྩོད༴ ཕྱི་རྐྱེན་འབྱུང་བཞིའི་གཡོ་འཁྲུགས༴ ནང་རྐྱེན་རྩ་རླུང་འདུ་འཁྲུགས༴ ཀུན་བཏགས་སེམས་ཀྱི་བག་ཆགས༴ མི་མཐུན་ཆག་ཆེ་

ཉམ་ང་༴ འགལ་རྐྱེན་བར་ཆད་ཐམས་ཅད༴ བཟློག་གོ་དཔལ་ཆེན་མཐུ་ཡིས་ཟློག༔ བསྒྱུར་རོ་དམར་ཆེན་གཏོར་མས་སྒྱུར༔ ཟོར་རོ་དགྲ་དང་བགེགས་ལ་ཟོར༔ ཟློག་སྒྱུར་ཕྲིན་ལས་གྲུབ་པར་མཛོད༔ [ཅེས་ཟློག་པ་བྱ། མཐར་དམོད་ཚིགས་ཐལ་རྡེབ་ནི།] དཔལ་ཆེན་ལྷ་ཚོགས་འཁོར་དང་བཅས༔ ཁྲོས་འཁྲུགས་རྔམས་པའི་གཟི་བྱིན་བསྐྱེད༔ ཕྱི་རོལ་ཞལ་གཟིགས་སྔགས་ཀྱི་སྒྲ༔ འབྲུག་སྟོང་ལྟ་བུར་སྒྲོགས་པ་ཡི༔ སྐུ་དང་ཞལ་ལས་དམོད་པའི་མཚོན༔ ནད་མཚོན་དུག་རླབས་ཕོ་ཉའི་ཚོགས༔ སྐར་ལྟར་འཁྲུགས་ཤིང་སེར་ལྟར་བབས༔ ནག་ཕྱོགས་འབྱུང་པོ་སྡེ་བཅས་དང་༔ ཕས་རྒོལ་རིག་སྔགས་དམོད་པའི་དབལ༔ མི་མཐུན་འབྲས་བུ་ཐན་ལྟས་ངན༔ ཐམས་ཅད་རང་དབང་མེད་པར་བཟློག༔ དགྲ་དང་བགེགས་ཀྱི་སྟེང་དུ་བབས༔ རྩྭ་སྦུར་མེ་ལྕེས་བསྲེགས་པ་བཞིན༔ རྗེས་ཤུལ་མེད་པར་བརླག་པར་གྱུར༔ [དྲག་སྔགས་འདུས་པའི་ཤམ་དུ།] གནོད་བྱེད་དགྲ་བགེགས་བྱད་མའི་སྙིང་རྩ་ལ་མཱ་ར་ཡ་རྦད་ཟློག༔ [ཅེས་བཏགས་པ་

མང་དུ་བཟླས་མཐར་བདེན་སྟོབས་བརྗོད་པ་གོང་བཞིན་ལས།] རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་དགྲ་འདྲེ་ཆག་ཆེ་ཉམ་ང་བྱད་ཕུར་རྦོད་གཏོང་ནད་གདོན་བར་ཆད་མི་མཐུན་པའི་ཕྱོགས་ཐམས་ཅད་གནོད་བྱེད་དགྲ་བགེགས་བྱད་མའི་སྟེང་དུ་མཱ་ར་ཡ་བྷྱོ་ཟློག༔ [ཅེས་ཐལ་རྡེབ་བྱ། ཐུན་གཏོར་གཏོང་བ་ནི། དམར་གཏོར་ལ་དམིགས་བྱ་འགུགས་བསྟིམ་བྱ་ཏེ།] རཾ་ཡཾ་ཁཾ་[གིས་སྦྱང་།] སྟོང་པའི་ངང་ལས་གཏོར་སྣོད་དམར་གྱི་དུང་ཆེན་ཡངས་ཤིང་རྒྱ་ཆེ་བའི་ནང་དུ་གཏོར་རྫས་དགྲ་བགེགས་བསྒྲལ་བ་ལས་བྱུང་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་ཕུང་པོ། ཀླད་ཞག་ལྦུ་ཕྲེང་འཁྲིགས་པ། དམ་ཚིག་ཏུ་འོས་པའི་འདོད་ཡོན་གྱི་རྣམ་པ་ཚང་བ་མེད་པ། ངོ་བོ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རང་བཞིན་ཅན་བསམ་གྱིས་མི་ཁྱབ་པས་ནམ་མཁའི་ཁམས་གང་བར་[བསམ་ལ།] ཨོཾ་ཨཱཿཧཱུྃ་[གིས་བྱིན་བརླབས།] ལྷ་ཚོགས་རྣམས་ཀྱིས་གཏོར་མ་བདུད་རྩིའི་ངོ་བོ་རྣམ་པ་ཤ་ཁྲག་གི་རང་བཞིན་ཆལ་ཆོལ་དུ་གསོལ་བར་[བསམ་ཞིང་།] ཨོཾ་བཛྲ་ཀཱི་

ལི་ཀཱི་ལ་ཡ་ཧཱུྃ་ཕཊ༔ ས་པ་རི་ཝཱ་ར་སརྦ་བིགྷྣཱན་ཤ་ཏྲུཾ་མ་ཧཱ་མཱཾ་ས་རཀྟ་ཀིཾ་ནི་རི་ཏི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ [ཞེས་ལན་གསུམ་མམ་བདུན་གྱིས་ཕུལ་མཐར་གཏོར་མའི་ལྷག་མ་དུག་མཚོན་རྡོ་རྗེའི་ཆར་དུ་མོས་ལ།] ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ འཁོར་འདས་ཀུན་གྱི་སྤྱི་དཔལ་ཡིན༔ ང་ལས་ཆེ་བཙན་སུ་ཡང་མེད༔ ཕྱོགས་མཚམས་སྟེང་འོག་གནས་རྒྱུ་བའི༔ སྡེ་བརྒྱད་ལྷ་ཀླུ་གཞི་བདག་རྣམས༔ གཏོར་ཆེན་མཚོན་ཐུན་ཟེར་འཕྲོག་པས༔ ལུས་སེམས་དེ་ནི་བརླག་པར་མཆིས༔ ཟོར་ལམ་ཕྱེས་ལ་སྐུ་བཟུར་ཅིག༔ བརྣག་པའི་དགྲ་བགེགས་མ་གཏོགས་པ༔ ཉེས་མད་རྣམས་ལ་ཟོར་མི་འཕེན༔ ཀུན་ཀྱང་གྲོགས་མཛོད་དམག་དཔུང་སྐྱེད༔ དམག་དཔུང་བསྐྱེད་ལ་རུ་མཚོན་ཕྱོར༔ ཉམས་པའི་དགྲ་བགེགས་སྡིག་ཅན་འདིའི༔ གཟུགས་ཕུང་ཐལ་བའི་རྡུལ་དུ་རློག༔ རྣམ་ཤེས་སྐྱེ་མེད་དབྱིངས་སུ་སྤོར༔ དུས་ལ་བབ་པོ་མཐུ་རྩལ་སྐྱེད༔ མཱ་ར་ཡ་རྦད་བྷྱོ་ཟློག༔ [ཅེས་གནོད་པའི་ཕྱོགས་སུ་འཕེན་ནོ། །དེ་ནས་ཉིན་ཐ་མས་འཕང་བའི་ལས་ལ་འཇུག་པའི་ཚེ། ཟློག་གཞུང་གྲུབ་པ་དང་གཏོར་མའི་ལྷ་ཚོགས་ལ་མཆོད་

བསྟོད་བཟོད་གསོལ་བྱས་ཏེ། ཡེ་ཤེས་པ་མདུན་གྱི་ནམ་མཁར་གཤེགས། དམ་ཚིག་པ་བདག་ཉིད་ལ་ཐིམ་པར་[བསམ།] སླར་ཡང་གཏོར་ཆེན་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་དྲེགས་པ་ལྷ་སྲིན་སྡེ་བརྒྱད་ཀྱི་དམག་ཚོགས་ཁྲོ་གཏུམ་འཇིགས་པའི་གཟུགས་ཅན་སྲིད་གསུམ་གང་བ་ནད་མཚོན་དུག་གི་ཆར་འབེབས་པས་དགྲ་བོ་སྒྲོལ་བའི་ལས་ལ་རྔམས་པར་[བསམ་ཞིང་། སྤུ་གྲིའི་དྲག་སྔགས་ཤམ་བུ་ཅན་བཟླ། ཐུན་གཏོར་གོང་བཞིན་དམག་ལྟོའི་ཚུལ་དུ་ཕུལ་ལ།] ཧཱུྃ། ཁྲག་འཐུང་དཔལ་ཆེན་འཇིགས་བྱེད་ཀཱི་ལ་ཡ། །བདུད་འདུལ་ཁྲོ་རྒྱལ་འཁོར་དང་བཅས་རྣམས་ལ། །དུག་གསུམ་དགྲ་བགེགས་བསྒྲལ་བའི་ཤ་ཁྲག་རུས། །འདོད་ཡོན་ལྔ་ལྡན་སྨན་རཀ་བ་ལིཾ་ཏ། །འབུལ་ལོ་བཞེས་ལ་བདག་ཅག་འཁོར་བཅས་ཀྱིས། །ཇི་ལྟར་གསོལ་བའི་ལས་རྣམས་འགྲུབ་པ་དང་། །གཏོར་ཟོར་དྲག་པོའི་རྫས་ཀྱི་དཔུང་སྐྱེད་ཅིག །དགྲ་བགེགས་དམ་སྲི་བྱད་མ་བདུད་སྡེའི་དཔུང་། །ཤུགས་སྒྲོལ་སྟོབས་ཀྱིས་རྗེས་ཤུལ་མེད་པར་མཛོད། །ཆག་ཆེ་ཉམ་ང་ཕས་རྒོལ་མི་མཐུན་ཕྱོགས། །བཟློག་བསྒྱུར་བཅོལ་བའི་ཕྲིན་ལས་མྱུར་དུ་སྒྲུབས། །

ཐུགས་དམ་དུས་ལ་བབ་བོ་ས་མ་ཡ། །[ཞེས་ཕྲིན་ལས་བཅོལ། སྒོ་དབྱེ་བ་ནི། ཕུད་སྐྱེམས་འཐོར་ཞིང་།] རྩ་གསུམ་ཆོས་སྐྱོང་དམ་ཅན་དང་༔ སྒོ་བཞི་སྲུང་བའི་ཕྲ་མེན་རྣམས༔ གཙང་སྦྱར་གསེར་སྐྱེམས་འདི་བཞེས་ལ༔ ཟོར་སྒོ་དགྲ་བགེགས་སྟེང་དུ་ཕྱེས༔ མ་ཉེས་དཔང་དུ་དཀོན་མཆོག་བཞུགས༔ དགྲ་བགེགས་མ་གཏོགས་སྐུ་བཟུར་ཅིག༔ ཁྲག་འཐུང་ཁྲོ་བོའི་དམག་དཔུང་སྐྱེད༔ དྲག་པོའི་ཕྲིན་ལས་འགྲུབ་པར་མཛོད༔ [ཅེས་ཟོར་ལམ་བསལ།] ཧཱུྃ༔ མཐིང་ནག་གྲུ་གསུམ་འབར་བའི་དཀྱིལ་འཁོར་ནས༔ [ཞེས་སོགས་ཀྱི་བསྐུལ་དང་ཆད་མདོ་བསྒྲག །དེ་ནས་ཕྱར་དར་སོགས་ཀྱིས་སྣ་དྲངས་ཏེ་གཏོར་ཟོར་ཁྱེར་ལ་གང་དུ་འཕང་བའི་སར་སོང་ནས། གསེར་སྐྱེམས་ཀྱི་མཆོད་པ་སྔོན་དུ་འགྲོ་བས།] ཧཱུྃ། སངས་རྒྱས་ཀྱིས་ནི་བདུད་ཕམ་མཛད། །ཆོས་མ་ཡིན་ནི་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་གྱུར་ཏེ། །རྡོ་རྗེ་གཞོན་ནུའི་ལྷ་ཚོགས་ཀྱིས། །དགྲ་བགེགས་རྣམས་ནི་ཕམ་པར་མཛད། །རིག་སྔགས་བདེན་པའི་མཐུ་འདི་ནི། །ཐོགས་པ་མེད་པར་འགྲུབ་པར་མཛོད། །[ཅེས་བདེན་སྟོབས་ཀྱིས་དཔུང་བསྐྱེད། །གཏོར་ཟོར་ཐོགས་ལ།] ཧཱུྃ༔ ང་ནི་རྡོ་རྗེ་གཞོན་ནུ་ཆེ༔ [ཞེས་

སོགས་ཀྱི་ཟོར་བསྐུལ་དང་སྤྲོ་ན་ཟློག་བྱང་ཡང་གྱེར། དྲག་སྔགས་དམོད་མོར་བཅས་པས་གཏོར་ཆེན་ཟོར་སྟབས་སུ་འཕངས་པས་དགྲ་བོའི་རྣམ་ཤེས་མར་མེ་བསད་པ་ལྟར་སོང་། གནས་ལུས་ལོངས་སྤྱོད་ཐམས་ཅད་རྗེས་མེད་དུ་བརླག་པར་བསམ་ཞིང་ཐལ་མོ་དང་དུལ་མོ་བརྡེབ། མཐར་ཟོར་རྗེས་གཅོད་པའི་ཕྱིར་སྲུང་འཁོར་སྒོམ་ལ་སློབ་དཔོན་གྱིས་རྟིང་མནན་ཏེ་ལྡོག །སྒྲུབ་ཁང་གི་སྒོ་དྲུང་དུ་བཤལ་ཆུའི་བདུད་རྩིས་བརྟན་མ་བསྐྱངས། གཏོར་གཞོང་ཁ་སྦུབས་པའི་འོག་ཏུ་དགྲ་བགེགས་དམ་སྲི་མནན་པར་བསམ་ལ་བྲོ་བརྡུང་། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་ལེན། གཏང་རག་གི་མཆོད་བསྟོད་བཟོད་གསོལ་བྱས་ལ་ནམ་མཁར་བཞུགས་པའི་ཡེ་ཤེས་པ་གཤེགས་སུ་གསོལ་བའམ་རྟེན་ལ་བསྟིམ། བདག་བསྐྱེད་ཉེར་བསྡུ་དང་ཐུན་མཚམས་ཀྱི་ལྷར་ལྡང་སྟེ་རྡུལ་མཚོན་ཡོད་ན་ཨ་ཀཱ་རོས་དབྱི་ཞིང་སྨོན་ལམ་དང་ཤིས་པ་བརྗོད་པས་མཐའ་བརྒྱན་པར་བྱའོ། །ཡང་སྐབས་འགའ་ཞིག་ཏུ་ཟོར་ལས་ཀྱི་སྤྲོས་པ་རྒྱས་པར་འདོད་ན། སྦྱོར་བའི་ཚེ་གཏོར་ཟོར། ཁྲག་ཟོར། རྡོ་ཟོར། མདའ་ཟོར། ཡུངས་ཟོར། དུག་ཟོར་རྣམས་ལག་ལེན་བཞིན་བཤམ། འཕང་བའི་སྐབས་བདེན་སྟོབས་ཀྱི་དཔུང་བསྐྱེད་པའི་རྗེས་སུ་ཟོར་རྣམས་རིམ་པར་ཐོགས་ལ།] བྷྱོ། དཔལ་ཆེན་རྡོ་རྗེ་གཞོན་ནུ་ཡི། །ཕོ་ཉར་མངགས་པ་ཟོར་གྱི་བདག །དགྲ་བགེགས་སྒྲོལ་ཕྱིར་ལས་ལ་ཡཱ། །དམར་ཆེན་དྲག་པོ་གཏོར་མའི་ཟོར། །གློག་ལྟར་འཁྱུག་ཅིང་ཐོག་ལྟར་འབེབས། །དགྲ་བགེགས་ལུས་སེམས་འབེན་ཡ་ཡཱ། །[ཞེས་དྲག་སྔགས་བརྗོད་བཞིན་པར་བརྡེག །དེ་བཞིན་གཏོར་ཟོར་གྱི་ཚབ་ཏུ།] རྦ་ཀློང་འཁྲུགས་

པ་ཁྲག་གི་ཟོར། །རི་བོ་སྙིལ་བ་རྡོ་ཡི་ཟོར། །རྣོ་མྱུར་ཤུགས་དྲག་མདའ་ཡི༴ མཚོན་རྩེ་གཟིངས་པ་ཡུངས་ཀར༴ མུན་པ་འཁྲིགས་པ་དུག་གི་ཟོར། །[ཞེས་བསྒྱུར་ལ་ཐམས་ཅད་ཀྱི་མཐར་དྲག་སྔགས་བརྗོད་བཞིན་པས་འཕང་། དེ་ནས་ཟོར་ཆེན་འཕང་བ་དངོས་ལ་འཇུག་པར་བྱའོ། །འདི་དང་འབྲེལ་བར་མནན་སྲེག་གི་ལས་རིམ་གཞན་རྩོམ་པར་འདོད་ནའང་སྤྲོས་པས་ཆོག་སྟེ་ལོགས་སུ་བལྟ་བར་བྱའོ། །ཕྲིན་ལས་ཏནྟྲ་བྱེ་བའི་བཅུད། །སྤུ་གྲི་འདུས་པའི་ཡང་ཞུན་ནི། །རེག་ཕུང་གནམ་ལྕགས་འབར་བའི་མཚོན། །བདུད་འདུལ་དཔའ་མོས་བདག་ལ་བྱིན། །དྲག་ཤུལ་རིག་སྔགས་རྡོ་རྗེའི་ཐོག །འབེབས་མཁས་རྣལ་འབྱོར་དབྱར་རྔའི་དཔུང་། །བདུད་སྡེའི་གཡུལ་ལས་རྣམ་རྒྱལ་གྱི། །དགའ་སྟོན་ཉིད་དུ་སྤྲོས་པ་ཡིན། །ཅེས་པའང་རང་གཞན་འགའ་ཞིག་ལ་ཉེ་བར་མཁོ་ཞིང་ཕན་པའི་ཕྱིར་རྩ་བའི་གཞུང་གི་བཅུད་བསྡུས་ཤིང་མན་ངག་གི་འབྲེལ་བསྡེབས་ནས་ངག་འདོན་འཇུག་པ་བདེ་བར་བྱས་ཏེ། རྗེ་རིགས་ཀྱི་སྔགས་ནག་འཇིགས་བྲལ་ཡེ་ཤེས་རྡོ་རྗེས་རང་ལོ་ཞེ་ལྔ་པར་སོན་པ་ཀུན་འཛིན་གྱི་ལོ་ཆོ་འཕྲུལ་ཟླ་བའི་ཤེར་ཕྱོགས་ཀྱི་རྒྱལ་བ་གསུམ་པར་དབུ་རུ་ལྷ་ལྡན་གྱི་གྲོང་ཁྱེར་ཆེན་པོའི་ཤར་ཕྱོགས་བོད་ཀྱི་དུར་ཁྲོད་བསིལ་བའི་ཚལ་དུ་སྦྱར་བ་ལས་ཡི་གེ་པ་ནི་མང་དུ་ཐོས་པའི་བཤེས་གཉེན་རིག་སྔགས་འཆང་བ་དོན་དམ་ཆོས་མཆོག་གིས་བགྱིས་པའོ། །འདིས་ཀྱང་གསང་ཆེན་བསྟན་པའི་འགལ་བྱེད་ཆམ་ལ་ཕབ་སྟེ་ཕྱོགས་ལས་རྣམ་པར་རྒྱལ་བའི་རུ་མཚོན་དགུང་དུ་བསྙེགས་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །།

ཕུར་པ་སྤུ་གྲི་རེག་ཕུང་གི་བརྒྱུད་འདེབས།

ཁྱབ་བདག་དང་པོའི་སངས་རྒྱས་ཀུན་ཏུ་བཟང་། །ཟུང་འཇུག་སྒྱུ་འཕྲུལ་ཡེ་ཤེས་རྡོ་རྗེ་སེམས། །འབར་བའི་སྐུར་སྣང་བཛྲ་ཀུ་མཱ་ར། །གསོལ་བ་འདེབས་སོ་ཕྲིན་ལས་མཐར་ཕྱིན་ཤོག །གསང་བའི་མཛོད་འཛིན་བདེ་བའི་འཁོར་ལོ་ཆེ། །ཕྲིན་ལས་ཡོངས་གྲུབ་འོད་ཟེར་གླང་པོའི་ཞབས། །ཧེ་རུ་ཀ་དཔལ་རྡོ་རྗེ་ཐོད་ཕྲེང་རྩལ། གསོལ་བ་འདེབས་སོ༴ བཀའ་བབས་ཐུགས་ཀྱི་གཟུངས་མ་མཁར་ཆེན་བཟའ། །ཟབ་གསང་རྒྱ་འགྲོལ་གཏེར་འབྱིན་སྤྲུལ་པའི་སྐུ། །སྐལ་ལྡན་ཆོས་བདག་རྩ་བརྒྱུད་བླ་མ་ལ། །གསོལ་བ་འདེབས་སོ༴ སྣང་གྲགས་རིག་པ་དཀྱིལ་འཁོར་གསུམ་དུ་དག །ཐལ་འབྱིན་རྣམ་བཞིའི་གྲུབ་མཐའ་ཚད་འཁྱོལ། །རྩོལ་མེད་ཕྲིན་ལས་ཆགས་ཐོགས་མི་མངའ་བས། །བདུད་ལས་རྣམ་རྒྱལ་གོང་འཕང་མཆོག་ཐོབ་ཤོག །[ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ། །དགེའོ།། །།]

ཕུར་པ་སྤུ་གྲི་རེག་ཕུང་གི་རྒྱུན་ཁྱེར།

ཕུར་པ་སྤུ་གྲི་རེག་ཕུང་གི་རྒྱུན་ཁྱེར་ནི། རྒྱུན་བཤགས་ཡན་ལག་བརྒྱད་པ་སྔོན་དུ་འགྲོ་བས། ཧཱུྃ༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆེན་སྔོན་པོ་འབར་བ་ཡིས༔ ནམ་མཁའི་དཀྱིལ་ནས་ཐིག་པ་ཤར༔ འབར་བ་ཆེན་པོའི་འོད་ཟེར་གྱིས༔ སྣོད་བཅུད་དངོས་འཛིན་དབྱིངས་སུ་སྦྱངས༔ ཡེ་ཤེས་རོལ་པའི་ཆོ་འཕྲུལ་གྱི༔ འབྱུང་བ་རིམ་བརྩེགས་རི་རབ་སྟེང་༔ ཐར་པ་ཆེན་པོའི་གཞལ་མེད་ཁང་༔ དུར་ཁྲོད་དྲག་པོའི་བཀོད་པ་རྫོགས༔ དེ་དབུས་ཙཀྲ་འབར་བའི་སྟེང་༔ སྣ་ཚོགས་པདྨ་ཟླ་ཉི་དང་༔ ལྷ་ཆེན་ཕོ་མོ་བསྣོལ་བའི་སྟེང་༔ རིག་པ་ཧཱུྃ་གི་འཕྲོ་འདུ་ལས༔ བདག་ཉིད་མ་བཅོས་རྫོགས་པའི་ལྷ༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་དབུ་གསུམ་ཕྱག་དྲུག་པ༔ གཡས་དཀར་གཡོན་དམར་བཞད་གཤེ་རྔམས༔ ཕྱག་དྲུག་གཡས་ཀྱི་དང་པོ་གཉིས༔ རྡོ་རྗེ་རྩེ་དགུ་རྩེ་ལྔ་དང་༔ གཡོན་གཉིས་མེ་དཔུང་ཁ་ཊྭཱཾ་གདེངས༔ ཐ་གཉིས་རི་རབ་ཕུར་པ་འདྲིལ༔ ཞབས་བཞི་གྱད་ཀྱི་འདོར་སྟབས་ཅན༔ མ་ཧཱ་རུ་དྲའི་སྤྱི་ནས་བརྫིས༔ ཁྲོ་གཏུམ་མི་བཟད་གར་དགུར་ལྡན༔ ཧཱུཾ་ཧཱུཾ་རྡོ་རྗེའི་གསུང་གདངས་ཅན༔ ཐབས་དང་ཤེས་རབ་གཤོག་པ་གདེངས༔ དཔལ་དང་དུར་ཁྲོད་ཆས་ཀྱིས་བརྒྱན༔ ཉི་ཁྲི་

ཆིག་སྟོང་གྱེན་དུ་འཁྱིལ༔ བྱེ་བ་ཐེར་འབུམ་རྡོ་རྗེས་གཏམས༔ ཡུམ་མཆོག་འཁོར་ལོ་རྒྱས་འདེབས་མ༔ མཐིང་སྐྱ་ཨུཏྤལ་དུང་དམར་སྟོབ༔ ཕྱག་རྒྱ་ལྔ་ཡི་རྒྱན་འཆང་ཞིང་༔ གཡས་བརྐྱང་གཡོན་བསྐུམ་ཡབ་དང་སྦྱོར༔ རྡོ་རྗེ་པདྨ་མཉམ་པར་རོལ༔ སྤྱི་བོར་རིགས་ཀྱི་ཁྱུང་ཆེན་ལྡིང་༔ ཡེ་ཤེས་མེ་དཔུང་འབར་བའི་ཀློང་༔ དམ་ཡེ་གཉིས་མེད་ངོ་བོར་གསལ༔ ཐུགས་ཀར་ཡེ་ཤེས་སེམས་དཔའ་ནི༔ བཛྲ་སཏྭ་དཀར་གསལ་འཚེར༔ རྡོ་རྗེ་དྲིལ་འཛིན་ལོངས་སྐུའི་ཆས༔ ཞབས་ཟུང་ཕྱེད་སྐྱིལ་པད་ཟླར་བཞུགས༔ དེ་ཡི་ཙིཏྟའི་གུར་ཁང་དབུས༔ ཉི་སྟེང་རྡོ་རྗེ་རྩེ་ལྔའི་ལྟེར༔ སྲོག་གི་སྙིང་པོ་ཧཱུཾ་མཐིང་མཐར༔ འབར་བའི་སྔགས་ཀྱི་ཕྲེང་བས་བསྐོར༔ བཟླས་པས་འོད་ཟེར་མཁའ་ཁྱབ་འཕྲོས༔ རྒྱལ་མཆོད་བྱིན་རླབས་ཐམས་ཅད་བསྡུས༔ འགྲོ་བའི་སྒྲིབ་སྦྱངས་ལྷ་རུ་གྱུར༔ སྣང་སྲིད་ཕུར་བུའི་ཕྱག་རྒྱར་སད༔ དམ་ཅན་སྲུང་མ་ལས་ལ་བསྐུལ༔ སྡེ་བརྒྱད་གདུག་པ་ཚར་ཐག་བཅད༔ བར་ཆད་བགེགས་དཔུང་ཐལ་བར་བརླག༔ སྣང་སྲིད་གཞིར་བཞེངས་དཔལ་ཆེན་པོའི༔ སྐུ་གསུང་ཐུགས་སུ་ལྷུན་གྲུབ་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ [ཅེས་བཟླས་པ་བྱ། ཐུན་གྱི་མཐར།] སྣང་སྲིད་

ཕུར་བུའི་དཀྱིལ་འཁོར་རྣམས༔ ཐུགས་ཀྱི་ཐིག་ལེ་ཆེན་པོར་ཐིམ༔ ཧཱུྃ་ཧཱུྃ་ཧཱུྃ༔ དཔལ་ཆེན་པོ་ཡི་དབྱིངས་ཉིད་ལས༔ སྐུ་གསུང་ཐུགས་ཀྱི་དཀྱིལ་འཁོར་གསལ༔ ཕཊ་ཕཊ་ཕཊ༔ བཛྲ་ཀཱ་ཝཱ་ཙི་རཀྵ་ཧཾ༔ [ཞེས་བསྡུ་ལྡང་བྱས་ལ།] མི་གནས་ཡེ་ཤེས་དཀྱིལ་འཁོར་དུ༔ སྐུ་གསུང་ཐུགས་སུ་ལྷུན་གྲུབ་ནས༔ རྡོ་རྗེ་གཞོན་ནུའི་གོ་འཕང་ཐོབ༔ འགྲོ་བ་ཀུན་གྱི་དཔལ་དུ་ཤོག༔ [ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ །ཞེས་པའང་འདི་ཉིད་ཉམས་སུ་ལེན་མཁན་འགའ་ལ་ཕན་པའི་ཕྱིར་འཇིགས་བྲལ་ཡེ་ཤེས་རྡོ་རྗེས་སོ།། ༎]

ཕུར་པ་སྤུ་གྲི་རེག་ཕུང་གི་ཕྲིན་ལས་དང་འབྲེལ་བར་ཚེ་སྒྲུབ།

[ཕུར་པ་སྤུ་གྲི་རེག་ཕུང་གི་ཕྲིན་ལས་དང་འབྲེལ་བར་ཚེ་སྒྲུབ་བྱེད་པར་འདོད་ན།] དཀྱིལ་འཁོར་དུ་ཚེ་རྟེན་བཅས་པའམ་རྒྱུན་གྱི་ཉམས་ལེན་ལ་དམིགས་པས་ཁྱབ་པར་བྱས་ཏེ། རྩ་བའི་བཟླས་པའི་རྗེས་སུ།] བདག་ཉིད་དཔལ་ཆེན་ཐུགས་ཀ་རུ༔ ཉི་ཟླའི་གའུ་ཁ་སྦྱོར་སྦུབས༔ ཧཱུྃ་མཐར་ཚེའི་རིག་པས་བསྐོར༔ བཟླས་ཤིང་ཐུགས་དམ་རྒྱུད་བསྐུལ་བས༔ ཡེ་ཤེས་རོལ་པའི་འོད་ཟེར་ནི༔ ཁྲོ་བཅུ་སྲས་མཆོག་སྒོ་སྐྱོང་སོགས༔ ཕོ་ཉ་རྣམས་ཀྱི་ཐུགས་ཀར་ཕོག༔ དེ་རྣམས་སྤྲུལ་པ་ཡང་སྤྲུལ་བཅས༔ གྲངས་མེད་འཇིག་རྟེན་ཀུན་ཏུ་ཁྱབ༔ རང་གི་བླ་ཚེ་ཆད་ཡར་དང་༔ སྲིད་ཞིའི་དྭངས་བཅུད་ཐམས་ཅད་ཀུན༔ བདུད་རྩིའི་རྣམ་པར་སྤྱན་དྲངས་ནས༔ བདག་གི་སྒོ་གསུམ་ཐིག་ལེར་ཐིམ༔ འཆི་མེད་རིག་འཛིན་འགྲུབ་པར་གྱུར༔ [ཅེས་དམིགས་ལ་རྩ་སྔགས་ཤམ་དུ།] བཛྲ་ཨཱ་ཡུ་ཥེ་སྭཱ་ཧཱ༔ [ཞེས་བཟླ༔ ཚེ་འགུགས་ནི།] ཧཱུྃ༔ དབྱིངས་ནས་རང་བྱུང་གྲུབ་པའི་ལྷ༔ དཔལ་ཆེན་ཚེ་བདག་ཧེ་རུ་ཀ༔ སྔོན་ཚེ་གོང་ནས་འབྲེལ་བའི་ལྷ༔ དེང་འདིར་བསྙེན་ཅིང་སྒྲུབ་ལགས་ན༔ ཐུགས་དམ་ཆེན་པོ་རྗེས་དགོངས་ནས༔ དངོས་གྲུབ་སྩོལ་བའི་དུས་ལ་བབ༔

བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔ རིག་འཛིན་རྣལ་འབྱོར་བདག་ཅག་གི༔ བླ་ཚེ་ཆད་ཉམས་ཡར་བ་དང་༔ སྲིད་ཞིའི་དགེ་མཚན་དྭངས་བཅུད་ཀུན༔ ཐོགས་པ་མེད་པར་གནས་འདིར་སྡུས༔ མི་ཤིགས་ཐུགས་ཀྱི་ཐིག་ལེར་སྟིམས༔ སྐྱེ་འཆི་མེད་པ་རྡོ་རྗེའི་ཚེ༔ བསྒྲེས་རྒུད་བྲལ་བ་གཞོན་ནུའི་ལུས༔ འཕོ་འགྱུར་མི་དམིགས་དྭངས་མའི་སྲོག༔ རྟག་པ་དམ་པའི་མཆོག་སྩོལ་ཅིག༔ [ཅེས་བསྐུལ་ལ།] བྷྲཱུྃ༔ འཁོར་འདས་དྭངས་བཅུད་སྲོག་ཏུ་འདྲིལ༔ མི་ཤིགས་ཐིག་ལེ་ཧཱུྃ་ལ་ཐིམ༔ དེ་ཡང་བརྗོད་བྲལ་ཀ་དག་ཀློང་༔ འཆི་མེད་གཉུག་མར་རྒྱས་གདབ་བོ༔ བཛྲ་ཛྙཱ་ན་རཀྵ་ཨ༔ [ཞེས་རྒྱས་གདབ་པར་བྱའོ། །འདི་འང་ཛྙཱ་ནས་སོ།། །།]

དཔལ་ཆེན་ཕུར་བུའི་ཚོགས་ཀྱི་མཆོད་པ་དང་འབྲེལ་བར་བསྐང་བ།

དཔལ་ཆེན་ཕུར་བུའི་ཚོགས་ཀྱི་མཆོད་པ་དང་འབྲེལ་བར་བསྐང་བ་བྱ་བ་ནི། བདུད་རྩི། རཀྟ། མར་མེ། ཛ་གད། མཱཾ་ས། ཚེ། ཟླ་རྒྱས། བམ་གཙང་མ། གསུར་ཆེན། བཟའ་བཅའ་སྣ་ཚོགས་དང་བཅས་པ་བཤམས་ཤིང་ཐོགས་ཏེ་རོལ་མོ་དབྱངས་དང་བཅས་པས། ཧཱུྃ༔ སྣང་སྲིད་ཕུར་བུས་གདབ་པའི་ཕྱིར༔ རྡོ་རྗེ་གཞོན་ནུའི་ཐུགས་དམ་བསྐང་༔ ཁམས་གསུམ་འཁོར་བ་རྒྱས་འདེབས་ཕྱིར༔ འཁོར་ལོ་རྒྱས་འདེབས་ཐུགས་དམ་བསྐང་༔ མི་དགེ་བཅུ་པོ་ཚར་གཅོད་ཕྱིར༔ ཁྲོ་རྒྱལ་ཡབ་བཅུའི་ཐུགས་དམ་བསྐང་༔ དགེ་བཅུ་དང་དུ་བླང་བའི་ཕྱིར༔ ཁྲོ་མོ་བཅུ་ཡི་ཐུགས་དམ་བསྐང་༔ ཕྱོགས་བཅུར་སྤྲུལ་པ་འགྱེད་པའི་ཕྱིར༔ ཁྲ་ཐབས་ཉི་ཤུའི་ཐུགས་དམ་བསྐང་༔ གདུག་པའི་དགྲ་བགེགས་སྒྲོལ་བའི་ཕྱིར༔ སྲས་མཆོག་ཉེར་གཅིག་ཐུགས་དམ་བསྐང་༔ ཞི་རྒྱས་དབང་དྲག་ལས་སྒྲུབ་ཕྱིར༔ ཕྲིན་ལས་བཞི་ཡི་ཐུགས་དམ་བསྐང་༔ སློབ་དཔོན་སྐུ་དགྲ་སྒྲོལ་བའི་ཕྱིར༔ ཤྭ་ན་མཆེད་བཞིའི་ཐུགས་དམ་བསྐང་༔ བསྟན་པའི་སྤྲི་དགྲ་སྒྲོལ་བའི་ཕྱིར༔ རེ་ཏཱི་མཆེད་བཞིའི་ཐུགས་དམ་བསྐང་༔ རྣལ་འབྱོར་སྒོས་དགྲ་སྒྲོལ་བའི་ཕྱིར༔ བསྭེ་མོ་བཞི་ཡི་

ཐུགས་དམ་བསྐང་༔ མྱུར་མགྱོགས་དྲག་པོའི་ལས་མཛད་ཕྱིར༔ བསྭེ་ལྕགས་དུང་གསུམ་ཐུགས་དམ་བསྐང་༔ འགུགས་འདྲེན་འཆིང་སྡོམ་མྱོས་བྱའི་ཕྱིར༔ སྒོ་མ་བཞི་ཡི་ཐུགས་དམ་བསྐང་༔ རུ་དྲ་སྡེ་གསུམ་འདུལ་བའི་ཕྱིར༔ གིང་ཆེན་བཅོ་བརྒྱད་ཐུགས་དམ་བསྐང་༔ ཕྱོགས་བཅུར་དམག་དཔུང་དབབ་པའི་ཕྱིར༔ མ་བདུན་སྲིང་བཞིའི་ཐུགས་དམ་བསྐང་༔ ཕྲིན་ལས་རྒྱ་མཚོ་སྒྲུབ་པའི་ཕྱིར༔ དབང་ཕྱུག་ཉེར་བརྒྱད་ཐུགས་དམ་བསྐང་༔ [ཞེས་དང་གཞན་ཡང་།] བསྐང་ངོ་བསྐལ་པས་ཐུགས་དམ་བསྐང་༔ དཀྱིལ་འཁོར་ལྷ་ཚོགས་ཐུགས་དམ་བསྐང་༔ བདུད་རྩི་སྨན་གྱིས་ཐུགས་དམ་བསྐང་༔ བི་ལིཾ་གཏོར་མས༴ རཀྟ་དམར་གྱིས༴ ཞལ་ཟས་ཚོགས་ཀྱིས༴ དཀྱིལ་འཁོར་ཞལ་གྱིས༴ ཛ་གད་ཕུད་ཀྱིས༴ ཞུན་ཆེན་མར་མེས༴ སྲོག་དབུགས་མདངས་ཀྱིས༴ གསུར་ཆེན་དྲི་ཡིས་ཐུགས་དམ་བསྐང་༔ རོལ་མོ་སྒྲ་ཡིས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ གཡར་དམ་གཉན་པོ་སོར་སྩོལ་ཅིག༔ [ཅེས་བསྐང་བ་བྱའོ༎ ༎]

ཕུར་སྲུང་གསོལ་མཆོད་རྒྱུན་ཁྱེར།

[ཕུར་སྲུང་གསོལ་མཆོད་རྒྱུན་ཁྱེར་ནི། མཆོད་གཏོར]རཾ་ཡཾ་ཁཾ་[གིས་བསང་སྦྱང་།] ཨོཾ་ཨཱཿཧཱུྃ་[གིས་བྱིན་བརླབ།] རང་གི་སྙིང་གའི་འོད་ཀྱིས་ཕུར་སྲུང་དམ་ཅན་ལྕམ་དྲལ་འཁོར་བཅས་བཛྲ་ས་མཱ་ཛཿ[ས་སྤྱན་དྲངས།] ཨོཾ་བཛྲ་ཨརྒྷཾ་[སོགས་ནས་]ཤཔྡའི་[བར་གྱིས་ཉེར་སྤྱོད་དང་།] མཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་ཁཱ་ཧི། [ཞེས་སྨན་རཀ་སྟོབ།] ཨོཾ་བཛྲ་ཀཱི་ལི་ཀཱི་ལི་ཡ་མོ་ཧ་གྷཱ་ཏ་ཡ་མ་མ་ཤཱི་གྷྲཾ་ཀརྨ་ཀ་ར་ཡེ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། [ལན་གསུམ་གྱིས་གཏོར་མ་ཕུལ།] ཧཱུྃ། ཁྲག་འཐུང་བཛྲ་ཀུ་མཱ་རའི། །བཀའ་ཡི་བསྟན་སྐྱོང་གཡར་དམ་ཅན། །ཤྭ་ན་བདག་ཉིད་ས་བདག་མ། །སྐྱེས་བུ་གིང་ཆེན་འཁོར་བཅས་རྣམས། མཐུན་རྫས་མཆོད་གཏོར་འདི་བཞེས་ལ། །འགལ་རྐྱེན་ཀུན་སོལ་མཐུན་རྐྱེན་སྤེལ། །འདོད་པའི་དོན་ལ་གཉེར་གཏད་པའི། ལས་ཀྱི་འབྲས་བུ་མཆིས་པར་མཛོད། །[ཅེས་ཕྲིན་ལས་བཅོལ་ཞིང་མགྲོན་མི་དམིགས་པར་བཞག་གོ །ཞེས་པའང་འཇིགས་བྲལ་ཡེ་ཤེས་རྡོ་རྗེས་སོ། །སརྦ་མངྒ་ལཾ༎ ༎]

རྡོ་རྗེ་ཕུར་པ་སྤུ་གྲི་རེག་ཕུང་གི་བསྙེན་ཡིག་དངོས་གྲུབ་འདོད་འཇོ།

༄༅། །རྡོ་རྗེ་ཕུར་པ་སྤུ་གྲི་རེག་ཕུང་གི་བསྙེན་ཡིག་དངོས་གྲུབ་འདོད་འཇོ་ཞེས་བྱ་བ་བཞུགས་སོ།། །།

ཨོཾ་སྭསྟི། འཁོར་འདས་སྤྱི་དཔལ་རིགས་ཀྱི་བདག །བླ་མ་ཁྲག་འཐུང་ཧེ་རུ་ཀར། །བཏུད་ནས་གང་དེ་བསྙེན་པའི་ཚུལ། །ཉུང་ངུའི་ངག་གིས་འཇུག་བདེར་འདོམས། །དེ་ཡང་རྡོ་རྗེ་ཕུར་པ་སྤུ་གྲི་རེག་ཕུང་གི་བསྙེན་སྒྲུབ་ཉམས་སུ་ལེན་པའི་ཚུལ་ལ་གསུམ་སྟེ། སྦྱོར་བ། དངོས་གཞི། རྗེས་སོ། །དང་པོ་ནི། དབེན་ཅིང་ཉམས་དགའ་ཡིད་དང་མཐུན་པའི་གནས་སུ་བཀྲ་ཤིས་ཤིང་རང་དབང་དུ་གྱུར་པའི་སྒྲུབ་ཁང་ཕྱག་བདར་གྱིས་གཙང་བར་བྱས། ཕུག་ལོགས་སུ་དམ་ཚིག་གི་བྲིས་སྐུ་མཚན་ཉིད་དང་ལྡན་པ་བཀྲམ་པའི་མདུན་རྟེན་ཁ་སྤྲོད་དུ་སྡོད་མལ་སྟན་ནང་

ཚངས་ཅན་གྱི་འོག་ཏུ་འབྲས་སམ་ནས་དཀར་མོས་གཡུང་དྲུང་གཡས་སྐོར་དུ་བྲི། མཚམས་གཡོག་སྨན་པ་འཚོ་ཆས་སོགས་ཉེར་མཁོའི་ཡོ་བྱད་མཚམས་ཁོངས་སུ་ཆུག་དགོངས་པ་ཐམས་ཅད་སྤྱི་དང་མཐུན་པར་འདུ་བྱས་ལ། དུས་ཚོད་དགེ་ཞིང་ཤིས་པ་ནས་དབུ་བཟུང་སྟེ་བསྙེན་པ་དངོས་གཞི་མ་ཚུགས་པའི་ཞག་བདུན་ཕྲག་ཙམ་གྱི་གོང་ནས་ཕྱི་མཚམས་བཅད་དེ། དགོངས་ཐུན་དེར་རང་ཉིད་དཔལ་ཆེན་པོའི་ང་རྒྱལ་གྱིས་ཞིང་སྐྱོང་གཞི་བདག་ལ་དཀར་གཏོར་བྱིན་གྱིས་བརླབས་པ་བསྔོས་ཏེ་ཕྲིན་ལས་བཅོལ། བགེགས་ལ་གཏོར་མ་བྱིན་ནས་བཀའ་བསྒོ་དྲག་སྔགས་ཡུངས་ཐུན་གུ་གུལ་གྱིས་བདུག་པ་དང་

བཅས་པས་བསྐྲད་ལ་སྲུང་བའི་འཁོར་ལོ་བརྟན་པོར་བསྒོམ། དེ་ནུབ་བམ་སང་ཐོ་རངས་ནས་བཟུང་བློ་ལྡོག་རྣམ་པ་བཞིས་རྒྱུད་བསྐུལ་ཏེ། སྐྱབས་སེམས། ཡིག་བརྒྱ། མཎྜལ། བླ་མའི་རྣལ་འབྱོར་རྣམས་ཐུན་དུ་བཅད་ནས་ཅི་ནུས་སུ་འབད་ཅིང་། གཞན་ཡང་སྣ་སེལ་དུ། སཱཙྪ། ཆུ་གཏོར། གསུང་སྒྲོག །སྲོག་བསླུ། བཤགས་སྦྱོང་། ཚོགས་སྐོང་སོགས་ཅི་འགྲུབ་ཏུ་བྱ། དེ་ནས་ཡར་མར་གྱི་ཚེས་བཅུ་སོགས་ཚེས་གྲངས་དགེ་ཞིང་མགོ་ཕུར་འཛོམ་པ་ལྟ་བུའི་གཟའ་སྐར་འཕྲོད་སྦྱོར་བཟང་བ་དང་བསྟུན་བསྙེན་པ་དངོས་ལ་འཇུག་རྒྱུའི་དགོངས་ཐུན་དེར་བརྒྱུད་འདེབས་ཚོགས་བསགས་སྔོན་དུ་འགྲོ་བས་གཞི་བགེགས་ཀྱི་གཏོར་མ་སྔར་བཞིན་བཏང་ནས་བགེགས་བསྐྲད་ནན་ཏན་དུ་བྱས་ཏེ་ནང་མཚམས་བཅད། སྒོ་དྲུང་དུ་ཐོ་བརྩིགས་པ་ལ་རྒྱལ་ཆེན་བཞིའི་སྐུ་དང་སྔགས་བྱང་བཙུག །མདུན་དུ་མཆོད་གཏོར་བཤམས་པ་རཾ་ཡཾ་ཁཾ་གིས་བསང་སྦྱང་། ཨོཾ་ཨཱཿཧཱུྃ་ལན་གསུམ་གྱིས་བྱིན་བརླབ། རང་གི་ཐུགས་ཀ་ནས་འོད་ཟེར་འཕྲོས་པས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་སྤྱན་དྲངས་པར་བསམ་ལ། ཧཱུྃ། གསང་བདག་སྦྱན་སྔར་དམ་མནོས་ཤིང་། །བསྟན་པ་སྲུང་བར་ཞལ་བཞེས་པ། །རྒྱལ་པོ་ཆེན་པོ་སྡེ་བཞི་པོ། །འདིར་གཤེགས་རྟེན་ལ་

བརྟན་པར་བཞུགས། །བཛྲས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿས་གཉིས་སུ་མེད་པར་བསྟིམ། ཨོཾ་མཧཱ་རཱ་ཛ་ས་པ་རི་ཝཱར་ཨརྒྷཾ་ནས། ཤཔྡ་པྲ་ཏཱིཙྪ་སྭཱ་ཧཱའི་བར་གྱིས་མཆོད། ཨོཾ་ངྷྲིཥྚ་རཥྚ་ཡ་སྭཱཧཱ། ཨོཾ་བཻ་རུ་ཌྷ་ཁ་ཡ་སྭཱཧཱ། ཨོཾ་བཻ་རུ་ཀྵ་ཡ་སྭཱ་ཧཱ། ཨོཾ་བཻ་ཤྲ་མ་ཎ་ཡེ་སྭཱ་ཧཱ། ཞེས་སྔགས་སོ་སོའི་མཐར། ཨེ་དཾ་ལ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་ལན་གསུམ་གྱིས་གཏོར་མ་ཕུལ་ལ། ཧཱུྃ། ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་བསྟོད། རྒྱལ་པོ་ཆེན་པོ་འཁོར་བཅས་ཀྱིས། སྔོན་གྱི་ཐ་ཚིག་ཇི་བཞིན་དུ། །མཆོད་སྦྱིན་གཏོར་མ་འདི་བཞེས་ལ། །སྒྲུབ་པའི་བར་ཆད་ཀུན་སྲུངས་ཤོག །ཅེས་བསྟོད་ཅིང་ཕྲིན་ལས་བཅོལ། ཏིཥྛ་བཛྲ། ཞེས་བརྟན་བཞུགས་བྱས་པས་སྒྲུབ་ཁང་གི་ཕྱོགས་སོ་སོ་ནས་རྒྱལ་ཆེན་སྡེ་བཞི་རང་རང་གི་རྒྱལ་ཐབས་ཀྱི་དཔུང་དང་བཅས་པས་བསྲུང་བར་བསམ། དེ་ནས་སྲུང་འཁོར་གྱི་དམིགས་པ་རང་གི་ཐུགས་ཀ་ནས་འོད་ཟེར་རྡོ་རྗེ་ཕུར་བུའི་རང་བཞིན་ཅན་སྤྲོས་པ་ལས་སྟེང་འོག་ཕྱོགས་མཚམས་ཐམས་ཅད་རྡོ་རྗེ་ཕུར་བུའི་ས་གཞི་ར་བ་དྲྭ་བ་གུར་བླ་བྲེ་ཕྱི་རོལ་ཏུ་ཡེ་ཤེས་ཀྱི་མེ་དཔུང་མཐའ་མེད་དུ་འབར་བ་དང་བཅས་

པས་བཅིངས་ཏེ་བར་ཆད་གང་གིས་ཀྱང་གླག་མི་རྙེད་པར་བསམ། དོན་དམ་པར་བར་དུ་བཅད་བྱ་གཅོད་བྱེད་ཐབས་ཅད་གཟུང་འཛིན་སེམས་ཀྱི་འཁྲུལ་ངོར་སྣང་བ་ཙམ་སྟེ། སེམས་ཉིད་ཡེ་ནས་སྟོང་གསལ་བདེ་བ་ཆེན་པོའི་ངོ་བོ་ལ་བར་ཆད་ཀྱི་མཚན་མ་ནམ་ཡང་མ་གྲུབ་པས་ན་སྲིད་ཞི་མཉམ་ཉིད་དུ་རིག་པ་ནི་མི་ཤིགས་རྡོ་རྗེའི་མཚམས་གཅོད་བླ་ན་མེད་པའོ། །སྲུང་འཁོར་འདི་དག་མཚམས་གྲོལ་རྒྱུའི་ཐུན་ཐ་མའི་མཐུར་མ་གཏོགས་མི་བསྡུ་ཞིང་། ཐུན་མགོ་ཐམས་ཅད་དུའང་བར་ཆད་མི་འཇུག་པའི་ཕྱིར་གསལ་འདེབས་བསྐྱར་མ་རེ་བྱ། འདི་ནས་བཟུང་མཚམས་ནང་དུ་དགོས་ངེས་སྔར་དམིགས་འོག་ཏུ་གང་ཆུག་ལས་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་མི་བྱ་བ་སོགས་འོག་ཏུ་སྨོས་པ་ལྟར་མཚམས་ཀྱི་སྤང་བླང་ཐམས་ཅད་ཚུལ་བཞིན་དུ་བྱ། སྐྱིད་སྡུག་ལེགས་ཉེས་གང་ལ་ཡང་རེ་དོགས་ཀྱི་རྩིས་གདབ་སྤངས་ཏེ་ད་རེས་བཟླས་པ་འདི་མ་གྲོལ་གྱི་བར་ལ་རྐྱེན་གང་གི་ཡང་དབང་དུ་མི་གཏོང་། ད་ལྟ་ལྷག་པའི་ལྷ་འདི་ལྟ་བུ་སྒྲུབ་ཏུ་ཡོད་པ་ཤིན་ཏུ་སྐལ་པ་བཟང་བས་ཅི་ནས་འབད་རྩོལ་དྲག་པོ་བྱ་སྙམ་དུ་ཞེ་དམ་འཆའ། དེ་ལྟར་ངེས་པའི་སྒོ་ནས་ཐོག་མར་བཅས་བཤམ་བྱ་བ་ནི། བྲིས་སྐུའི་མདུན་གྱི་སྟེགས་བུའམ་གཏོར་ཁང་ནང་དུ་མཎྜལ་བདུད་རྩི་ལྔས་ཆག་ཆག་

བཏབ་པ་ལ་ཚུལ་བཞིན་བྲིས་པའི་རས་བྲིས་ཀྱི་དཀྱིལ་འཁོར་བཀྲམ་པའམ། མ་འཛོམ་ན་འབྲུ་ནག་ཛ་གད་ཀྱིས་གཤེར་བས་ཚོམ་བུ་ལྷ་གྲངས་དང་མཉམ་པ་བཀོད་པའི་ཁར་འཕྲུལ་སྟེགས་ལ་ཐོད་པ་གླིང་བཞི་པར་ཆུ་ཚོན་གྱིས་འཁོར་ལོ་སེར་པོ་རྩིབས་བརྒྱད་པ་བྲིས་པའི་ནང་འབྲུ་ནག་གིས་བཀང་བ་ལ་བསྙེན་ཕུར་དར་མཐིང་གི་གཅོད་པན་དང་ཡུངས་དཀར་གྱི་ཐུམ་བུ་བཏགས་པ་བྱུག་སོགས་གསུམ་གྱིས་གཟི་བྱིན་བསྐྱེད་དེ་བཙུགས་པ་ཉིད་བརྟན་པར་འགོད། དེའི་མདུན་རྒྱབ་གང་བདེར་རྩ་བའི་མཆོད་གཏོར་དཔལ་བཤོས། གཡས་སུ་དམ་ཅན་སྤྱི་གཏོར། གཡོན་དུ་ཕུར་སྲུང་གི་གཏོར་སྤུངས། དེའི་གཡས་གཡོན་དུ་སྨན་རཀ །མཐར་ཞི་དྲག་གི་ཉེར་སྤྱོད་ཕྲེང་ཚར་རམ་བསྐོར་བཤམ། རྒྱབ་ངོས་སུ་ཚེ་འབྲང་བུམ་གཟུགས་དང་། གཡས་གཡོན་དུ་ཚེ་རྫས་མངར་གསུམ་སྦྱར་བའི་ཚེ་རིལ་ཆང་། ཚེ་མདའ་དར་སྣ་མེ་ལོང་གཡུ་བྱང་བཏགས་པ་བཅས་བཤམ། རང་གི་མདུན་དུ་ནང་མཆོད། རྡོ་དྲིལ། ཌཱ་མ་རུ། མེ་ཏོག་གི་སྣོད་རྣམས་བཞག །གཞན་ཡང་གཏེར་སྲུང་གི་གཏོར་མ་དང་ཆད་བརྟན། ཚོགས་ཀྱི་ཡོ་བྱད་སོགས་ཉེ་བར་མཁོ་བའི་རིགས་རྣམས་མ་ཚང་བ་མེད་པར་འདུ་བྱའོ། །གཉིས་པ་དངོས་གཞི་ལ། བསྙེན་སྒྲུབ་ལས་

གསུམ་གྱི། དང་པོ་བསྙེན་པ་ནི། དེ་ནས་བཤགས་པ་བྱིན་འབེབས་མཆོད་རྫས་བྱིན་རླབས་རྣམས་དཀྱུས་ལྟར་བྱས་རྗེས་སྨད་ལས་ཀྱི་དབུར་འབྱུང་བ་བཞིན་ཕུར་བུར་བྱུག་བདུག་བྲབ་གསུམ་སོགས་བྱིན་རླབས་བྱས་ལ་བརྟན་པར་གཟུག །མངོན་རྟོགས་ཏིང་ངེ་འཛིན་རྣམ་པ་གསུམ་གྱིས་རང་དང་མདུན་གྱི་དཀྱིལ་འཁོར་སྒྲུབ་རྟེན་ཕུར་བུ་དང་བཅས་པ་དམ་ཚིག་གི་འཁོར་ལོར་དབྱེར་མེད་དུ་བསྒོམ་ལ་ཡེ་ཤེས་པ་དྲངས་བསྟིམ་ཕྱག་མཆོད་བསྟོད་པའི་བར་དུ་བཏང་། དམིགས་པའི་གཙོ་བོ་ལྷའི་སྣང་ཞེན་ལ་བསླབ་སྟེ། རྣམ་པ་སྤྱི་བྱེ་བྲག །ང་རྒྱལ། དག་དྲན་རྣམས་རེ་རེ་ནས་སེམས་འཛིན་ཅིང་། ཁྱད་པར་ལྷའི་གསལ་སྣང་དང་ང་རྒྱལ་སྦྲེལ་བ་ལ་སྒྱུ་མ་ལྟ་བུའི་རྩིས་བཏབ་སྟེ་རྩེ་གཅིག་ཏུ་མཉམ་པར་བཞག །དེས་སྐྱོ་བའམ་བཟླས་པ་ལ་འཇུག་པ་ན། ཐོག་མར་ཕྲེང་བ་ལག་མཐིལ་གཡོན་དུ་བསྐྱིལ་བ་སྭཱ་བྷཱ་ཝས་སྦྱངས། སྟོང་པའི་ངང་ལས་ཕྲེང་བའི་མདོ་འཛིན་གཙོ་བོ་རྡོ་རྗེ་གཞོན་ནུ་ཡབ་ཡུམ་ལ། ཕྲེང་རྡོག་རྣམས་འཁོར་གྱི་ཁྲོ་བོ་སྲས་མཆོག་སྒོ་སྐྱོང་དམ་ཅན་རྒྱ་མཚོའི་ཚུལ་གྱིས་ཡོངས་སུ་བསྐོར་བ་ལས་འོད་འཕྲོས། རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཏེ་དབྱེར་མེད་དུ་ཐིམ་པར་མོས་ལ། སྙིང་པོ་དང་། ཨོཾ་རུ་ཙི་ར་མ་ཎི་པྲ་བརྔྷ་ཡེ་

སྭཱཧཱ། ཞེས་ཉེར་གཅིག་ཙམ་བཟླས་མཐར། ལྷ་རྣམས་འོད་དུ་ཞུ་བ་ཕྲེང་བའི་རྣམ་པར་གྱུར་པར་བསམ་ཞིང་རྟེན་སྙིང་བཟླས་པའི་མེ་ཏོག་འཐོར། དེ་ནས་ཛཔྲ་བསྐུལ་སྔོན་དུ་འགྲོ་བས་བཟླས་དམིགས་གཞུང་བཞིན་གསལ་འདེབས་པ་ལས། ཙིཏྟའི་རྩ་སྦུབས་ཀྱི་སྒོར་རྟ་མགྲིན་དམར་པོ་ཡུངས་འབྲུ་ཙམ་པདྨ་བྷཉྫ་འཛིན་པ་ཡུམ་དང་བཅས་པས་བསྲུང་བར་བསྒོམ་པ་མན་ངག་དང་། ཁྱད་པར་གྱི་དམིགས་པ་ཐུགས་ཀའི་སྔགས་ཕྲེང་བར་མ་ཆད་པ་འོད་ཟེར་ལྕགས་སྒྲོག་སྦྲེལ་བ་ལྟ་བུ་ཤད་ཀྱིས་བྱུང་བ་ཡེ་ཤེས་སེམས་དཔའི་ཞལ་བརྒྱུད་རང་གི་ཞལ་ནས་ཐོན། ཡུམ་གྱི་ཞལ་ནས་སྐུའི་དབྱིབས་བརྒྱུད་གསང་བའི་པདྨོ་ནས་རྡོ་རྗེའི་སྦུབས་བརྒྱུད་ཡེ་ཤེས་སེམས་དཔའི་གསང་བ་ནས་སྙིང་གའི་དྭངས་སྲོག་ལ་ཐིམ་པས་བདེ་སྟོང་གི་ཡེ་ཤེས་མཆོག་ཏུ་འབར་བར་བསམ་པ་མགལ་མེ་ཀླད་བསྐོར་གྱི་འཕྲོ་འདུ་ཉིད་རྩ་བར་བཟུང་ནས་བཟླས་པའི་སྐྱོན་ཐམས་ཅད་སྤངས་ལ་འབྲུ་བཅུ་བཞི་པ་ཁོ་ན་ཆུ་བོའི་རྒྱུན་བཞིན་དུ་བཟླ། ཐུན་མཐར་ཨ་ལི་ཀ་ལི་ཡིག་བརྒྱ་སྦྲེལ་བ་ལན་གསུམ་གྱིས་སྔགས་ཀྱི་ལྷག་ཆད་ཁ་བསྐང་ཞིང་རྟེན་འབྲེལ་སྙིང་པོས་ནུས་པ་བརྟན་པར་བྱས་པར་བྱས་ལ་སྟོད་ཚིག་ཕུལ། སྲུང་འཁོར་མི་བསྡུ་བར་སྦྲ་ཕུབ་པ་ལྟར་བཞག་ནས་རྟེན་དང་བརྟེན་པའི་སྣང་ཆ་

ཐམས་ཅད་འོད་གསལ་དུ་བསྡུ་ཞིང་ཟུང་འཇུག་གི་སྐུར་ལྡང་། དགེ་བ་བསྔོ་ཞིང་ཤིས་པ་བརྗོད་པས་མཚམས་སྦྱར་ཏེ་ཐུན་མཚམས་ལ་འཇུག །དེ་ནས་སྲོད་ཐུན་ལ་སྲུང་འཁོར་ནས་བརྩམ་ཕྲེང་བ་བྱིན་རླབས་མི་དགོས་པ་ཙམ་ལས་སྔར་དང་འདྲ་ཞིང་། ཐུན་མཐར་དམ་ཅན་སྤྱི་དང་ཕུར་སྲུང་གི་གཏོར་སྐྱོང་བྱ། ཚོགས་མཆོད་ལྕོགས་ན་ཉིན་རེ་བཞིན་མ་ཆག་པར་བྱ་དགོས་ཀྱང་མི་འགྲུབ་ན་བསྙེན་པ་ཚུགས་པའི་ཉིན་དང་པོ་དང་། གྲོལ་བའི་ཉིན་ཕྱི་མ། ཡར་མར་གྱི་ཚེས་བཅུ་ཉ་སྟོང་བརྒྱད་གསུམ་རྣམས་ལ་ངེས་པར་ཆག་ཏུ་མི་རུང་བས་འདིར་ཚོགས་མཆོད་ཕུལ་ལ་ལྷག་མ་གཏར་བཟུང་། ཆབ་བརྟན་རྒྱུན་དུ་མ་འགྲུབ་ཀྱང་རུང་བས་གཏང་རག་བཟོད་གསོལ་སོགས་མཐའ་དབྱུང་། མཐར་ཉལ་བ་ན་མཚན་མེད་འོད་གསལ་གྱི་ངང་ལ་འཇོག་པའམ། སྙིང་གའི་ཧཱུྃ་ཡིག་ལ་སེམས་རྩེ་གཅིག་པས་ཉལ་བ་གང་བདེའི་རྣལ་འབྱོར་གྱིས་ཉལ། ཕྱིར་ནངས་ཐོ་རངས་ལ་བབས་པ་ན་ནམ་མཁའི་དཔའ་བོ་དང་དཔའ་མོ་རྣམས་ཀྱིས་སྔགས་སྒྲ་དང་ཌཱ་དྲིལ་གྱི་སྒྲས་གཉིད་སད་པར་བསམ་ལ་སྐད་ཅིག་གིས་ཐུན་མཚམས་ཀྱི་ལྷར་ལངས་ཏེ། ཐུན་མོང་གི་སྔོན་འགྲོས་རྒྱུད་སྦྱོང་ཞིང་། བརྒྱུད་འདེབས་ཚོགས་བསགས་བཀའ་བསྒོ་སྲུང་འཁོར་ནས་ཐུན་མཚམས་ཀྱི་བར་ཕུར་བུ་བྱིན་རླབས་མི་དགོས་པ་ཙམ་

ལས་གཞན་སྔར་བཞིན་གྱིས་སྔ་དྲོ་ཐུན་གཉིས་ཏེ་ཐུན་བཞིའམ། ཡང་ན་ཐོ་རེངས་ནས་ཉིན་གུང་ཡན་ལ་ཐུན་གཅིག་དང་། དེ་ནས་སྲོད་ཐུན་གྱི་བར་ལ་ཐུན་གཅིག་སྟེ་ཐུན་གཉིས་སུ་བྱས་ན་ཡང་མི་འགལ་ཞིང་། འོན་ཀྱང་འདི་ལ་ངག་འདོན་སོགས་ཀྱི་སྤྲོས་པ་ཉུང་བས་ཐུན་བཞི་མར་བྱས་པ་ཉིད་བློ་འཇུར་བ་ལ་ཕན་པའི་ཕྱིར་དེ་ལྟར་བྱས་པ་ཉིད་ལེགས། གང་ལྟར་ཡང་རིམ་པ་དེ་ལྟ་བུས་གྲངས་ནི་བདུན་འབུམ་ཉི་ཁྲི་ནས་འབུམ་ཕྲག་བཅོ་ལྔའི་བར་དང་། དུས་ནི་ཟླ་བ་གཅིག་ནས་དྲུག་གི་བར་དང་། མཚན་མ་ནི་ཇི་སྐད་དུ། སྤུ་གྲིའི་རྩ་གཞུང་ལས། སེམས་རྩེ་གཅིག་ཏུ་ཏིང་ངེ་འཛིན་ལ་གནས་ཤིང་གསལ་བ་དང་༔ བླ་མ་ལ་མོས་གུས༔ ཡི་དམ་ལ་དག་སྣང་༔ སྒྲུབ་པ་ལ་སྤྲོ་ཞིང་བློ་དཔའ་བ་དང་གདིང་ཡོད་པ༔ རྨི་ལམ་དུ་མཆོད་རྟེན་དང་རི་མགོའི་རྩེར་འདུག་པ༔ རྔ་བརྡུང་༔ དར་འཕྱར༔ དུང་འབུད༔ ཉི་ཟླའི་སྟེང་དུ་འདུག་པ༔ ལྷའི་ཞལ་མཇལ༔ སྒྲུབ་ཕུར་རྣམས་ལས་འོད་འཕྲོ་འཕར་ལྡིང་བཞད་པ༔ ལྷ་མོའི་གཟུགས་སྟོན་པ༔ དབང་བསྐུར་ཆོས་བཤད་ཁྲི་ཆེན་པ་ལ་འདུག་པ༔ གྲུ་ཆེན་ལ་འཇུག་པ༔ གྲ་པ་མཉན་པ༔ སྡེ་དཔོན༔ ཁྲོམ་གྱི་ཁ་ལོ་བསྒྱུར་བ་འབྱུང་ངོ༔ ཞེས་གསུངས་པ་ལྟར་དངོས་ཉམས་རྨི་ལམ་གང་

རུང་དུ་རྟགས་མཐོང་གི་བར་རོ། །གཉིས་པ་སྒྲུབ་པ་ནི། དེ་ལྟར་བསྙེན་པ་རྫོགས་ནས་སྒྲུབ་པ་ལ་འཇུག་པ་ན། མཆོད་གཏོར་རྙིང་པ་ཁ་གསོ་ཞིང་གསར་པའང་ཅི་འབྱོར་པ་བཤམ། དངོས་གཞི་སྔར་བཞིན་བདག་མདུན་དབྱེར་མེད་དུ་བསྒོམ་ནས། བཟླས་པའི་ཐོག་མར་སྙིང་པོ་ལ་ཕཊ་ཛཿབཏགས་པ་བརྗོད་པས་བདག་ཉིད་ལས་མདུན་རྟེན་ལོགས་སུ་ཕྱེས་ཏེ་མདུན་གྱི་ནམ་མཁར་མེ་རི་འདབ་སྦྱོར་གྱི་ཚུལ་དུ་བཞུགས་པར་མོས། བཟླས་དམིགས་སྤྱིར་བཏང་གཞུང་གསལ་ལྟར་ལ། ཁྱད་པར་བདག་ཉིད་ཀྱི་ཐུགས་ཀའི་སེམས་དཔའ་སུམ་བརྩེགས་ལས་འོད་ཟེར་དཔག་ཏུ་མེད་པ་འཕྲོས། ཕྱོགས་བཅུའི་བདེ་གཤེགས་ཐམས་ཅད་དང་། མདུན་བསྐྱེད་གཙོ་བོ་ཁྲོ་ཚོགས་སྲས་མཆོག་སྒོ་མ་དམ་ཅན་ཐམས་ཅད་ཀྱི་ཐུགས་ཀར་ཐིམ། དགྱེས་པ་བསྐྱེད་ཅིང་ཐུགས་དམ་བསྐུལ། སྐུ་གསུང་ཐུགས་ཀྱི་དངོས་གྲུབ་ཐམས་ཅད་སྔགས་ཕྲེང་དམར་པོའི་རྣམ་པར་ལྷ་སོ་སོའི་ལྟེ་བ་ནས་བྱུང་། བདག་གི་ལྟེ་བར་ཞུགས། ཐུགས་ཀའི་ས་བོན་ལ་ཐིམ། སླར་ཐུགས་ཀ་ནས་སྔར་བཞིན་སྤྲོས་པ་མགལ་མེ་ལྟར་འཁོར་བར་དམིགས་པ་དང་། ཡང་བདག་གི་ཞལ་གསུམ་ཀ་ནས་ཀཱི་ལ་ཡ་བཟླས་པས་དབུ་རྒྱན་གྱི་ཁྲག་འཐུང་རིགས་ལྔ། བ་སྤུ་བུ་གའི་ཁྲོ་

ཆུང་རྣམས་དང་། འཁོར་གྱི་ཁྲོ་བོ་ཟ་གསོད་སྲས་མཆོག་སྒོ་སྐྱོང་དམ་ཅན་བཀའ་སྡོད་ཐམས་ཅད་ཀྱིས་དུས་གཅིག་ཏུ་སྔགས་བཟླ་ཞིང་། དེ་བཞིན་དུ་མདུན་གྱི་ནམ་མཁར་རྩ་བ་གསུམ་གྱི་ལྷ་ཚོགས་མཁའ་དབྱིངས་གང་བར་བཞུགས་པ་རྣམས་དང་། ཁམས་གསུམ་སེམས་ཅན་ཐམས་ཅད་ཡི་དམ་གྱི་སྐུར་གྱུར་པས་སྔགས་སྒྲ་རི་རི་སྒྲོགས་པར་བསམ། དེར་མ་ཟད་འབྱུང་བའི་སྒྲ་སྐད་ཐམས་ཅད་ཀྱང་ཀཱི་ལ་ཡའི་རང་སྒྲར་གྲགས་པར་བསམ་པ་བུང་བ་ཚང་ཞིག་གི་དགོངས་པ་གཙོ་བོར་བཟུང་སྟེ། སྙིང་པོ་ལ་འཕྱོང་ཛཿཧཱུྃ་ཨཱཿབཏགས་པ་འབྲུ་བཅུ་བདུན་པའི་བཟླས་པར་ཆིག་དྲིལ་དུ་བརྩོན། ཐུན་མཐར་ཛཔྲ་ཁང་རང་ལ་བསྡུ་བ་ཙམ་ལས་གཞན་རྣམས་བསྙེན་པ་དང་འདྲ་ཞིང་ཚོགས་གཏོར་རྒྱས་པར་བྱ། རིམ་པ་དེ་ལྟ་བུས་གྲངས་དང་དུས་ཚད་བཤད་མ་ཐག་པ་ལྟར་ལ། རྟགས་མཚན་ནི་ཇི་སྐད་དུ། དེ་ལྟར་འོད་ཟེར་སྤྲོ་བསྡུ་མ་ཡེངས་པར་ཞག་སུམ་ཅུ་ཕྲག་གསུམ་མམ་མཚན་རྟགས་མ་བྱུང་གི་བར་འབད་པས༔ རྟགས་དང་ཡོན་ཏན་བསམ་གྱིས་མི་ཁྱབ་པ་འབྱུང་སྟེ༔ རབ་རྣམ་སྨིན་གྱི་ལུས་འདི་ལྟར་འགྱུར་བའམ༔ འབྲིང་དུ་ཞལ་མཐོང་ལུང་སྟོན་གསུང་དང་ཆོས་སྟོན་པ༔ ངག་བདེན་པ་འགྲུབ་པ་རྣམས་འབྱུང་༔ ཐ་མ་ཡང་རྨི་ལམ་

དུ་ཞལ་མཇལ༔ དགྲ་བགེགས་ཚར་བཅད་ཕྲིན་ལས་ཐོགས་མེད་དུ་འགྲུབ་པར་འགྱུར་རོ༔ དེ་ཚེ་སྒྲུབ་ཕུར་རྣམས་སྤྱི་བོ་མགྲིན་པ་སྙིང་ག་གསུམ་དུ་གཏུགས་ཏེ༔ སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་ཐོབ་པར་བསམ༔ ཐོབ་ཀྱང་ངེས་པར་ཐོབ་པ་ཡིན་ནོ༔ ཞེས་གསུངས་པ་ལྟར་རོ། །གསུམ་པ་ལས་སྦྱོར་ནི། དེ་ལྟར་སྒྲུབ་པ་ཐེམས་ནས་འདིར་ཆོ་གའི་གཞུང་དང་དམིགས་གནད་ཀྱི་གཞི་སྔར་དང་འདྲ་བ་ལས་བསྙེན་སྒྲུབ་ཀྱི་བཟླས་པ་ཁྱུག་ཙམ་རེ་སོང་རྗེས། ལས་སྦྱོར་དངོས་ཐུན་རེ་ལ་ཆ་གཉིས་རེ་བགོས་ཏེ། དང་པོ་དམ་ཅན་བསྙེན་ནི། བདག་མདུན་གྱི་ཐུགས་ཀའི་སྔགས་ཕྲེང་གི་མཐའ་མར་དམ་ཅན་འདུས་པའི་སྔགས་ཀྱིས་བསྐོར་བར་བསམ། བཟླས་པ་བྱས་པས་སྔགས་ལས་འོད་ཟེར་དམར་པོ་ཛཿཡིག་གི་རྣམ་པ་ཕྱོགས་བཅུར་འཕྲོས། དམ་ཅན་རྣམས་རང་རང་གི་གནས་ནས་ལྕགས་ཀྱུའི་རྡུལ་གྱིས་རང་དབང་མེད་པར་བཀུགས་ཤིང་ཤ་རུལ་ལ་སྦྲང་མ་འདུ་བ་ལྟར་ཐིབས་ཀྱིས་འདུས་ཏེ་བདག་གི་བཀའ་ཉན་ཅིང་ལས་བྱེད་པའི་ཚུལ་དུ་འདུག་པར་བསྒོམ་ལ་བཞི་སྙིང་གཅིག་དྲིལ་བཟླ་ཞིང་། ཐུན་མཐར་དེ་དག་ལས་རྔམ་ཤིང་རིངས་པའི་ཚུལ་དུ་འདུག་པ་ལ་སླར་ཡང་སྔགས་ཀྱི་འོད་ཟེར་རྩུབ་ཅིང་གདུང་བས་རང་དབང་

མེད་པར་དྲག་ཏུ་བསྐུལ་ཏེ་ཤ་ཁྱི་ཚོམ་ནས་བཀྱེ་བའམ་བྱ་གཅན་ཤལ་རུབ་པ་ལྟར་དམིགས་བྱ་དགྲ་བགེགས་སྒྲོལ་བའི་ལས་བྱེད་པར་བསམ། གཉིས་པ་ངན་སྔགས་ཉེ་བསྙེན་ནི། དཀྱིལ་འཁོར་གསུམ་གྱི་ལྷ་ཚོགས་རྣམས་ལས་སྤྲུལ་པ་ཁྲོ་ཆུང་མཚོན་ཐུན་གྱི་ཚོགས་དྲག་ཅིང་རྩུབ་པ་དཔག་ཏུ་མེད་པ་སེར་ཐུན་དང་ཐོག་རྒོད་བབས་པ་ལྟར་འཕྲོས་ཤིང་སྔགས་སྒྲ་འབྲུག་སྟོང་དུས་གཅིག་ལྡིར་བ་ལྟར་སྒྲོགས་པ་དང་། སྔགས་ཀྱི་འོད་ཟེར་མེའི་ཚྭ་ཚྭ་ལྟར་འཕྲོས་པས་ལོག་པར་འདྲེན་པའི་བདུད་བགེགས་འབྱུང་པོ་ཐམས་ཅད་ཐུལ་ཐུལ་བསྲེག་ཏེ་ཐལ་བའི་རྡུལ་ཕྲན་བཞིན་བརླག་པར་བསམ་པ་མགར་གྱི་ཚྭ་ཚྭ་སྤྲོ་བ་ལྟ་བུའི་དམིགས་གནད་དང་སྦྱར་ཏེ། རྩ་སྔགས་འབྲུ་བརྒྱད་པ་ལ་སྤུ་གྲིའི་དྲག་སྔགས་འདུས་པ་བཏགས་ནས་བཟླ། གྲངས་ཚད་བསྙེན་པའི་བཅུ་ཆ་ཙམ་སྟེ། དུས་ནི་བདུན་ཕྲག་སོགས་སྒྲུབ་པའི་འགྲོས་དང་སྦྱར་ཏེ་ཇི་ལྟར་འོས་པ་དང་། རྟགས་ནི་སྔ་མ་ལ། རང་སྲུང་མའི་སྐུ་དངོས་སུ་སྟོན། འབྲིང་དངོས་གྲུབ་ཀྱི་རྟགས་སྟེར། ཐ་མ་དགྲ་བོའི་གློ་སྙིང་ཕྱུང་བའམ་བླ་འཁྲིད་ཅིང་བསད་པ་སོགས་དང་། ཕྱི་མའི་རྟགས་སུ། རབ་དགྲ་བོའི་གློ་སྙིང་ཕྱུང་བ། འབྲིང་དགྲ་བོ་དངོས་སུ་འཁྲིད་པ། ཐ་མ་

དགྲ་བོའི་བླ་བསད་པ་རྣམས་དངོས་ཉམས་གང་རུང་དང་། རྨི་ལམ་དུའང་རྒྱ་མཚོའི་འཐུང་བ། རི་རབ་འཕེན་པ། ཉི་ཟླ་སྦར་བས་འཛིན་པ་སོགས་འབྱུང་གི་བར་རོ། །འོན་ཀྱང་གོང་གི་བསྙེན་སྒྲུབ་ཀྱི་གྲངས་ཚད་ཚུལ་བཞིན་མ་ལོངས་ན་འདི་གཉིས་སྤྱིར་བཏང་ཙམ་ལས་གཉན་ཆ་ཆེ་བས་ཧ་ཅང་མང་མི་རུང་ངོ་། །རྩ་བའི་གསུམ་པ་རྗེས་ལ། བཀྲ་ཤིས་མཐར་རྒྱས་ཚེའི་སྒྲུབ་པ་དང་། སྒྲུབ་པ་ཆེན་པོའི་ཡན་ལག་དངོས་གྲུབ་ལེན་པ་གཉིས་ཀྱི། དང་པོ་ནི། བསྙེན་སྒྲུབ་ལས་གསུམ་གྲུབ་པའི་ཐོར་ཐུན་ནི་སྔ་དྲོ་ནས་དབུ་བཙུག །ཐུན་དང་ཆོ་གའི་ཁྲིགས་རིམ་སྔར་བཞིན་ལས་བསྙེན་སྒྲུབ་ལས་གསུམ་གྱི་བཟླས་པ་ཁྱུགས་ཙམ་སོང་རྗེས། ཟུར་བྱང་ལྟར། བདག་མདུན་དཔལ་ཆེན་ཐུགས་ཀ་རུ༔ ཞེས་སོགས་ཀྱིས་དམིགས་པ་གསལ་བཏབ་ལ་རྩ་སྔགས་བཅུ་བཞི་པར་ཚེ་ཤམ་སྦྱར་བ་གཙོ་བོར་བཟླ། ཐུན་མཐར་མདའ་དར་གཡབ་ལ་ཚེ་འགུགས་བསྐུལ་ཞིང་རྒྱས་གདབ་བྱ། འདི་ཉིད་སྤྱིར་ཇི་ཙམ་མང་ན་ལེགས་ཤིང་། གྲངས་གཙོར་བྱེད་ན་འབུམ་ཕྲག་ལས་མི་ཉུང་བ་དང་། ཞག་གཙོ་བོར་བྱེད་ན་ཞག་བདུན་ལས་མི་ཉུང་བར་བྱའོ། །གཉིས་པ་དངོས་གྲུབ་ལེན་པ་ནི། དེ་ལྟར་བསྙེན་སྒྲུབ་ལས་སྦྱོར་མཐའ་རྒྱས་ཐེམས་

ནས་མཆོད་གཏོར་རྣམས་ཁ་གསོ། བྷནྡྷ་མཚན་ལྡན་དུ་ཆང་བཟང་པོ་ལ་ཨམྲྀ་ཏ་མངར་གསུམ་བཏབ་པ་ཨོཾ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་པ་དང་། རིན་པོ་ཆེའི་སྣོད་དུ་དཀར་མངར་སྤོད་དང་ཆོས་སྨན་སོགས་བསྲེས་པའི་རྒྱུ་ལས་འབྲང་རྒྱས་ནོར་བུ་འབར་བའི་དབྱིབས་ཅན་གྱི་མཐའ་སྐོར་དུ་ཚེ་རིལ་གྱིས་གཏམས་པ་དཀྱིལ་འཁོར་མདུན་དུ་བཤམ། གཞན་ཡང་ཚོགས་རྫས་བཟའ་བཅའ་བཏུང་བའི་རིགས་གང་འབྱོར་གྱིས་བསྐོར། ནུབ་ཐ་མའི་ཐོར་ཐུན་གྱི་ལས་བྱང་གི་མཚམས་གཅོད་སྐབས་སྒྲུབ་རྫས་ལ་བགེགས་སྐྲོད་པའི་དམིགས་པ་ནན་ཏན་དུ་བྱེད། ལྷ་བསྐྱེད་སྐབས་རང་དང་མདུན་གྱི་སྒྲུབ་ཕུར་བཅས་ངོ་བོ་རིག་པའི་མདངས་རྩལ་གཅིག་ལ་རྣམ་པ་བཞིན་དང་མེ་ལོང་ལྟར་ཐ་དད་ཞལ་སྤྲོད་ཀྱི་ཚུལ་དུ་བསྒོམ། བཟླས་པ་ཅུང་ཟད་མཐར་ཚོགས་བསྒྲལ་བསྟབ་ཀྱི་བར་ལས་གཞུང་སྔར་གྱི་དཀྱུས་བཞིན་བསྲང་རྗེས། ཡི་གེ་བརྒྱ་པ་བརྒྱ་རྩ་བཟླས་པས་འཁོན་གཅུག་སྦྱངས་ནས། དངོས་གྲུབ་བླང་བའི་ཛཔྲ་དགོངས་ནི། བདག་དཔལ་ཆེན་པོ་ཡབ་ཡུམ་དུ་གསལ་བའི་ཡབ་ཀྱི་གསང་གནས་ཟླ་བ་ལ་རྡོ་རྗེ་རྩེ་ལྔ་པ། སྡུད་བྱེད་ཀྱི་སྙིང་པོ་བུ་གར་ཨོཾ་དཀར་པོས་མཚན་པ། ཡུམ་གྱི་མཁའ་པདྨ་འདབ་བརྒྱད་ཀྱི་ལྟེ་བར་ཨེ་གྲུ་གསུམ་གྱི་དབུས་

སུ་འབེབས་བྱེད་ཀྱི་སྙིང་པོ་ཨེ་དམར་པོས་མཚན་པར་གྱུར། མཁའ་གསང་སྦྱར་ཏེ་སྙོམས་པར་ཞུགས་པས་ཡུམ་གྱི་དུང་ཁང་ན་ཁྲག་འཐུང་རིགས་ལྔ་ཡབ་ཡུམ་ཚོན་གང་བཞུགས་པ་རྣམས་བསྐུལ། སྙོམས་པར་ཞུགས་པས་ཡབ་ལྔའི་བྱང་སེམས་མུ་ཏིག་དཀར་པོ། ཡུམ་ལྔའི་དྭངས་མ་མཚལ་ལྟ་བུ་རྩ་དབུ་མ་ནས་བྱུང་། ཡུམ་གྱི་མཁར་བབས་དཀར་དམར་འདྲེན་ནས་དངོས་གྲུབ་ཀྱི་རང་བཞིན་དུ་འཁྱིལ་བ་དེ་ཨོཾ་ཨཱཿཧཱུྃ་གསུམ་དུ་གྱུར་པ་བདག་ཉིད་རྡོ་རྗེའི་ནང་དུ་རྔུབས་ཏེ་ཐུགས་སྲོག་ཧཱུྃ་ལ་ཐིམ། ཐུན་མོང་གི་ཚེ་བསོད་དཔལ་གྲགས་རྒྱས། སྣང་བ་དབང་དུ་འདུས། གཟི་བརྗིད་འོད་དུ་འབར། ལོ་བཅུ་དྲུག་གི་ན་ཚོད་དུ་གྱུར། མཆོག་གི་དངོས་གྲུབ་བདེ་སྟོང་འཛིན་མེད་རང་བྱུང་གི་ཡེ་ཤེས་འབར་བར་བསམ་ཞིང་། སྙིང་པོ་ལ། ཨོཾ་ཨཱཿཧཱུྃ་སརྦ་སིངྔྷི་ཨཱཿ ཞེས་བཏགས་པ་བརྒྱ་སྟོང་སོགས་དྲག་ཏུ་བཟླ། མཐར་ཕྲེང་བ་ལག་གཡས་སུ་ཐོགས། གཡོན་པའི་མཛུབ་མོ་དང་མཐེའུ་ཆུང་བསྒྲེང་། གུང་སྲིན་མཐེ་བོང་སྦྱར་བ་རྟ་མགོའི་ཕྱག་རྒྱ་བྱས་ཏེ། ཐུགས་སྲོག་འོད་ཟེར་གྱིས་བསྐུལ་བས་ཕྱོགས་བཅུའི་རྒྱལ་བ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་དངོས་གྲུབ་ཐམས་ཅད་དང་། ཁྱད་པར་དུ་དཀྱིལ་འཁོར་ལྷ་ཚོགས་རྣམས་ཀྱི་

བྱིན་རླབས་མཆོག་དང་ཐུན་མོང་ཡིད་ལ་ཅི་འདོད་པ་ཐམས་ཅད་དངོས་གྲུབ་ཀྱི་རྫས་ལ་དྲག་ཏུ་ཐིམ་པས་རྫས་རྣམས་འདོད་རྒུ་འབྱུང་བའི་རྒྱ་མཚོ་ཆེན་པོར་གྱུར་པར་བསམ་ལ། ཨོཾ་བཛྲ་ཀཱི་ལི་ཀཱི་ལ་ཡ༔ ཛཿཧཱུྃ་བཾ་ཧོཿ ཀཱ་ཡ་སིངྔྷི་ཨོཾ༔ ཝཱ་ཀ་སིངྔྷི་ཨཱ༔ ཙིཏྟ་སིངྔྷི་ཧཱུྃ༔ སརྦ་སིངྔྷི་ཧྲཱི༔ ཞེས་བཟླས་པས་རྫས་རྣམས་ལ་རབ་འོད་འབར། འབྲིང་ཁོལ། ཐ་མ་རླངས་སམ་དྲི་བྱུང་བའམ། གལ་ཏེ་དེ་ཙམ་མ་བྱུང་ནའང་ཐོར་ཐུན་གྱི་མཐའི་སྐྱ་རེངས་ཤར་བ་དང་བསྟུན་དངོས་གྲུབ་ཀྱི་རྫས་རྣམས་ཐོགས་ལ། ཧཱུྃ༔ དགོངས་ཤིག་རྡོ་རྗེ་ཕུར་པའི་ལྷ༔ རིག་འཛིན་མཁའ་འགྲོ་དམ་ཅན་ཚོགས༔ དཔང་གྱུར་ཐམས་ཅད་དགོངས་སུ་གསོལ༔ དང་པོ་བསྙེན་ཅིང་བར་དུ་བསྒྲུབ༔ བསྐྱེད་རྫོགས་གཉིས་ཀྱི་ལས་གཞུང་བསྲང་༔ སྨིན་གྲོལ་གཉིས་ཀྱིས་རྒྱུད་ཀྱང་སྦྱངས། ཞག་དུས་གྲངས་དང་རྟགས་ཀྱང་ཐེམས༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ འདོད་རྒུའི་དངོས་གྲུབ་རིན་ཆེན་གཏེར༔ ད་ནི་འབྱུང་བའི་དུས་ལ་བབ༔ རྡོ་རྗེ་ཕུར་པའི་ལྷ་ཚོགས་རྣམས༔ ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བའི༔ སངས་རྒྱས་ཕྲིན་ལས་རྫོགས་མཛད་ནས༔ སྐུ་གསུང་ཐུགས་ཡོན་ཕྲིན་ལས་ཀྱི༔

དབང་དང་དངོས་གྲུབ་བདག་ལ་སྩོལ༔ ལྷ་དང་སྐལ་བ་མཉམ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སརྦ་སིངྔྷི་ཕ་ལ་ཧོ༔ ཞེས་བརྗོད་ལ་སྒྲུབ་ཕུར་གནས་གསུམ་དུ་གཏུག་ཅིང་རྡོ་རྗེ་གསུམ་དུ་ལྷུན་གྱིས་གྲུབ་པར་གསོལ་བ་གདབ། ཚེ་འབྲང་གི་དབང་བླང་ཞིང་། ལྷ་དང་དངོས་གྲུབ་འོད་དུ་ཞུ་བ་བདག་གི་ཐུགས་སྲོག་ལ་ཐིམ་པས་དབྱེར་མེད་དུ་གྱུར་པར་བསམ། ཚེ་རིལ་ཆང་དང་འབྲང་རྒྱས་སོགས་དམ་རྫས་རྣམས་ལ་ལོངས་སྤྱོད་ཅིང་ནང་མི་དམ་གཙང་ལའང་སྦྱིན། དེ་ནས་ནམ་ལངས་པ་དང་ཁ་སྐོང་ཞི་བའི་སྲེག་བླུགས་བྱ་བ་ལ། ཆོ་ག་རྒྱས་པའི་ཚུལ་ནི་གཞན་ལས་ཤེས་ཤིང་། འདིར་འཇུག་བདེའི་མེ་མཆོད་སྤྲོས་པ་བསྡུ་བར་འདོད་ན། མདུན་དུ་ཞི་བའི་ཐབ་སྟེགས་ཟླུམ་པོར་རྡུལ་ཚོན་དཀར་པོས་བྲིས་དཀྱིལ་སྤྱི་ལྟར་འབྲི་བའམ། མི་འགྲུབ་ན་མེ་ཏོག་དཀར་པོས་ཚོམ་བུ་གཅིག་བཀོད། དེར་སྲོག་ཆགས་མེད་པའི་བ་ལང་གི་ལྕི་བའམ་བལ་དཀར་སོགས་ཞི་བའི་བུད་ཤིང་ཟླུམ་པོས་ཟླུམ་པོར་བརྩིགས་ལ་མེ་ཚང་བཅའ། འོ་མ་ཅན་གྱི་ཡམ་ཤིང་སོར་བཞི་པ། མར་ཁུ། ཏིལ་དཀར་ནག །ཡུངས་དཀར། མེ་ཏོག་དང་འབྲུ་སྣ་དཀར་པོའི་རིགས་རྣམས་འདུ་བྱས་ལ། རཾ་ཡཾ་ཁཾ་གིས་བསང་སྦྱང་། རྗེས་རྣམས་འབྲུ་གསུམ་ཞུ་བ་ལས་བྱུང་བའི་ཟག་མེད་ཀྱི་བདུད་རྩིར་གྱུར་པར་བསམ་ལ། ཨོཾ་ཨཱཿཧཱུྃ་ལན་བདུན་གྱིས་བྱིན་བརླབ། མེ་ཐབ་ཨམྲྀ་ཏས་བསང་། སྭབྷཱ་ཝས་སྦྱང་། སྟོང་པའི་ངང་ལས་

མདུན་དུ་ཧཱུྃ་ལས་ཞི་བའི་ཐབ་ཁུང་ཟླུམ་པོ་དཀར་པོ་མཚན་ཉིད་ཐམས་ཅད་ཡོངས་སུ་རྫོགས་པར་གསལ་གདབ། ཨགྣ་ཛྭ་ལ་རཾ་གྱིས་མེ་དུ་བ་མེད་པར་འབར་བ་ཐབ་ཏུ་བཞག་ནས། མེའི་དབུས་སུ་དཔལ་ཆེན་རྡོ་རྗེ་གཞོན་ནུ་རང་རྩལ་སྤྲུལ་པའི་འཁོར་ཚོགས་དང་བཅས་པ་སྐད་ཅིག་གིས་སད་པར་མོས། གཙོ་འཁོར་ཐམས་ཅད་ཀྱི་བ་སྤུའི་ཁུང་བུ་ནས་འོད་ཟེར་དཀར་པོ་ཟླ་བའི་བདུད་རྩི་ལྟ་བུ་མཁའ་ཁྱབ་ཏུ་སྤྲོ་བ་དང་བསྡུ་བའི་སྒོ་ནས་ཞི་བའི་ལས་རབ་འབྱམས་བསྒྲུབ་པར་བསམ་ལ། རྩ་སྔགས་འབྲུ་བཅུ་བཞི་པའི་ཤམ་དུ། ཛྭ་ལ་རཾ་སརྦ་ཀརྨ་ཀུ་རུ་ཧོཿཞེས་བཏགས་པ་ཁོ་ནས་བརྒྱ་སྟོང་སོགས་འབུལ་ཞིང་། མཚམས་སུ། རྣལ་འབྱོར་པ་བདག་གི་ནད་གདོན་སྡིག་སྒྲིབ་སྔགས་ཀྱི་ལྷག་ཆད་ལ་སོགས་པ་མི་མཐུན་ཉེས་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་སྤེལ། མཐར་རླུང་ནང་དུ་འཇུག་པ་དང་ལྷན་ཅིག་མེ་ལྷ་རང་གི་སྙིང་གར་བསྡུ། ཚུལ་དེ་ལྟ་བུས་བསྙེན་པའི་བཅུ་ཆའི་གྲངས་ལོངས་སུ་བསགས་དགོས་པས་ཉིན་གྲངས་ཇི་ཙམ་འགོར་བ་དེ་སྲིད་ཆོ་གའི་གཞུང་སྔར་ལྟར་བསྲང་ནས་གྲངས་རྫོགས་ངེས་པར་བྱ། དེ་ལྟར་བསྙེན་སྒྲུབ་ལས་སྦྱོར་ཁ་སྐོང་བཅས་གྲུབ་ནས་མཚམས་གྲོལ་བའི་ཉིན་ཡར་ངོའི་གཟའ་ཚེས་འཕྲོད་སྦྱོར་ལེགས་པ་དང་བསྟུན་དགའ་སྟོན་ཚོགས་མཆོད་ཅི་སྦྱོར་པ་བཤམས་ལ་

ཚོགས་སྐོང་རྒྱས་པར་བཏང་། ལྷག་ཆོག་སྐབས་སྔར་བཙོན་འཛིན་བྱས་པའི་ལྷག་མ་རྣམས་དང་ལྷན་ཅིག་སྒྲུབ་ཁང་ལྷོ་ནུབ་གོམ་པ་བདུན་ཅུའི་སར་སྐྱོལ། སྒྲུབ་ཁང་གི་ཐལ་རྡུལ་རྣམས་ཀྱང་ཕྱིར་དོར། ཆད་མདོའི་གཏོར་མ་གསར་པའང་བཤམས་ཏེ་ཆོས་སྐྱོང་གཞི་བདག་གི་གཏོར་མ་དང་སྔར་གྱི་གཏའ་གཏོར་བཅས་སྒྲུབ་ཁང་གི་ཡང་ཐོག་ཏུ་འབུལ་ཞིང་བཤལ་ཆུས་བརྟན་མ་བསྐྱང་། གཏོར་གཞོང་ཁ་སྦུབས་པ་རི་རབ་ཏུ་གསལ་བའི་འོག་ཏུ་བར་ཆད་དམ་སྲི་སྒྲབ་འདྲེ་འབྱུང་པོ་ཐམས་ཅད་མནན་པར་བསམ་ལ་བྲོ་བརྡུང་། མཆོད་པ་ཁ་གསོས་ཏེ་གཏང་རག་གི་མཆོད་བསྟོད་དང་ནོངས་བཤགས་བྱས་རྗེས། རས་བྲིས་ཀྱི་དཀྱིལ་འཁོར་རམ་བྲིས་སྐུ་དང་སྒྲུབ་ཕུར་ལ་དམིགས་ཏེ། འདིར་ནི་གཟུགས་དང་སོགས་སུ་པྲ་ཏིཥྛས་མེ་ཏོག་འཐོར་ཞིང་ཡེ་ཤེས་པ་བརྟན་བཞུགས་བྱ། དམ་ཚིག་གི་དཀྱིལ་འཁོར་འོད་གསལ་དུ་བསྡུ་ཞིང་སླར་ཡང་གཉུག་མའི་སྐུར་ལྡངས་པའི་གནས་གསུམ་འབྲུ་གསུམ་གྱིས་བསྲུང་བར་མོས། དགེ་བའི་རྩ་བ་བྱང་ཆུབ་ཆེན་པོར་བསྔོས་ཏེ་སྨོན་ལམ་ནན་ཏན་དུ་གདབ། ཤིས་བརྗོད་སྤྱི་དང་བྱེ་བྲག་རྒྱས་པར་སྤེལ་ལ་མེ་ཏོག་གི་ཆར་དབབ། དེ་ནས་སྒོ་དྲུང་དུ་མཆོད་གཏོར་བཤམས་ལ་སྔར་བཞིན་བྱིན་བརླབ་ཅིང་སྔགས་ཀྱིས་ཕུལ་ནས། ཧཱུྃ༔ རྒྱལ་པོ་

ཆེན་པོ་སྡེ་བཞི་པོ༔ རྡོ་རྗེ་འཛིན་པའི་བཀའ་བཞིན་དུ༔ སྒྲུབ་པའི་བར་ཆད་བསྲུང་མཛད་པའི༔ གཏང་རག་མཆོད་གཏོར་འདི་བཞེས་ལ༔ རང་གནས་གཤེགས་ཏེ་བྱང་ཆུབ་བར༔ དངོས་གྲུབ་མཆོག་སྩོལ་བར་ཆད་སོལ༔ བཛྲ་མུ༔ ཞེས་གཤེགས་གསོལ་བྱས་ལ་སྒོ་བྱང་བསྡུ། དེ་ནས་བགས་ཀྱིས་མཚམས་གསེང་སྟེ་ཞག་ཤས་གཞན་དུ་མི་འགྲོ་བར་སྒྲུབ་ཁང་དེར་སྡོད། བྲིས་སྐུ་སྒྲུབ་ཕུར་ཀ་པཱ་ལ་རྣམས་མི་འབྲལ་བར་དམ་ཚིག་གི་རྟེན་དུ་འཆང་། རྒྱུན་བཟླས་ཀྱི་དམ་བཅའ་བཟུང་ནས་དེའི་དབུ་འཛུག །ཐོག་མར་དམ་ཚིག་གཙང་བའི་མི་དང་གདོང་འཕྲད་ཅིང་། མིག་ཉི་ཟླ་ལ་བལྟ་བ་དང་། གོམ་པ་གྱེན་དུ་འདོར་བ་སོགས་མཚམས་གྲོལ་བའི་རྟེན་འབྲེལ་གྱི་སྒོ་བཟང་དུ་བསྒྲིགས་པར་བྱའོ། །དེ་ལྟར་བསྙེན་གྲུབ་ཉམས་སུ་ལེན་ཚུལ་སྒོས་ཀྱི་ལག་ལེན་མདོ་ཙམ་བཤད་ཟིན་ནས། ཞར་ལ་སྤྱིའི་གོ་དོན་གལ་ཆེ་བ་འགའ་ཞིག་འཕྲོས་སུ་སྨོས་ན། སྤྱི་རྡོ་རྗེ་ཐེག་པའི་ལམ་གྱི་དངོས་གྲུབ་ནི་བླ་མའི་བྱིན་རླབས་ལ་རག་ལས་ཤིང་དེ་ཡང་མོས་གུས་ཀྱི་རྟེན་འབྲེལ་ལ་རག་ལས་པའི་ཕྱིར་བླ་མ་ཉིད་སྒྲུབ་བྱའི་ལྷ་དང་དབྱེར་མེད་དུ་བལྟ་བ་ནི་རྩ་བ་དང་། དམ་ཚིག་མི་ལྡན་ན་གསང་སྔགས་མི་འགྲུབ་པས་རྩ་བ་དང་ཡན་ལག་གི་

ཉེས་ལྟུང་ཕྲ་མོས་ཀྱང་མ་གོས་པར་བྱ་ཞིང་ཐུན་མཚམས་སུ་བཤགས་སྦྱང་ལ་འབད། མཚམས་ཡུན་རིང་ཐུང་དང་ཐུན་བཞིའམ་གཉིས་སོགས་ཀྱི་བཅད་ཁྲིགས་དམ་བཅའ་དང་པོར་གང་བྱས་པ་དེ་ཉིད་མཐར་ཐོན་ངེས་པར་བྱ། འཚོ་ཆས་སོགས་ཚགས་སུ་མ་ཚུད་པས་ཅིས་ཀྱང་གཏོང་ལེན་མི་བྱ་ཀ་མེད་ཡོད་པ་དང་། སྒྲུབ་གཡོག་ཁྲོལ་ཅན་ལྷ་རྗེ་སོགས་སྒྲུབ་པའི་གྲོགས་སུ་འགྲོ་ངས་པ་རྣམས་ཐོག་མ་ནས་དམིགས་འོག་ཏུ་འཇུག་ཅིང་། ལར་ནས་དམ་བཅའི་སྐབས་འདིར་དངོས་སུ་མི་དྲན་པའི་གལ་ཆེ་བ་གློ་བུར་དུ་བྱུང་ན་དམིགས་འོག་ཏུ་ཆུག་པར་བྱེད་པ་སོགས་ཧ་ཅང་སྡོམ་དྲག་པ་མ་ཡིན་པ་དང་། རྗེས་ནས་དམིགས་ཁོངས་སུ་ཆུད་ཡོད་སྙམ་པའི་བག་ཡངས་མི་བྱ་བར་སྒྲུབ་གཡོག་ཁྲོལ་ཅན་དང་ཕྱི་ནང་འགྲུལ་བས་མཚོན་བསྲུང་ཅི་ཐུབ་བྱས་པས་མཚམས་མི་རལ་ཞིང་གཡེང་བས་མི་ཁྱེར་བ་ཡིན། ཕྱི་རོལ་པས་རང་ཉིད་མཐོང་ན་གསང་སྒོ་རྡོལ་བ་དང་། རང་གིས་ཕྱི་རོལ་དུ་བལྟ་བས་གཡེང་ཤོར་ན་གསང་སྒོ་ཤོར་བ་ཞེས་བྱ་སྟེ། དོན་ལ་དམ་ཚིག་ལས་འགལ་བས་སྒྲུབ་པའི་འབྲས་བུ་མི་འབྱིན་པས་ན་སྒྲུབ་པ་པོའི་ལུས་ངག་ཕྱི་རོལ་པས་མཐོང་ཚོར་མི་བྱ། མངོན་མཚན་ཅན་གྱི་སྒྲུབ་པ་ལ་དངོས་གྲུབ་གཡེལ་ཞིང་

བར་ཆད་འཇུག་པས་བསྙེན་པ་མ་ཐོན་གྱི་བར་ཡི་དམ་གང་ཡིན་གཞན་གྱིས་མི་ཤེས་པ་བྱེད། ཐོག་མར་ཕྱི་ནང་གི་མཚམས་བཅད་པ་ནས་བཟུང་སྒྲུབ་པ་མ་གྲོལ་གྱི་བར་དུ་ཆོས་འཆད་ཉན་དང་གཞན་ལ་བསྲུང་བ་བྱིན་རླབས་རིམ་གྲོ་རྟེན་འབྲེལ་སོགས་མི་བྱ། ཚོགས་གཏེར་མཆོད་ལྷག་སོགས་བྱིན་གྱིས་བརླབས་པའི་རྫས་ཕྱིར་མི་གཏོང་། རང་གི་ཟས་གོས་སྣོད་དཔྱད་སྤྱོད་འཕྲོ་གཞན་སྤྱོད་དུ་མི་འཇུག །གཞན་གྱི་དེ་དག་རང་གིས་མི་སྤྱད། ལྷག་པར་དམ་ཚིག་ཉམས་པའི་ཕྲིན་ཡིག་ཀ་ཅ་ཟས་གོས་སོགས་རླུང་ཕྱོགས་ཙམ་ཡང་འཕྲད་དུ་མི་འཇུག །རྟགས་མཚན་དང་ཉམས་རྟོགས་ཅི་བྱུང་ཡང་གཞན་ལ་མི་བཤད། བྱིན་གྱིས་མ་བརླབ་པའི་ཆུས་ལུས་གོས་སྐྲ་དང་གདོང་མི་བཀྲུ། སྐྲ་སེན་མི་འདྲེག །མལ་ས་མི་སྤོ། སྟན་མི་སྤྲུགས། སྒྲུབ་ཁང་གི་གད་རོ་ཕྱིར་མི་དོར། ལྟར་སྣང་ཉི་ཚེ་གཞན་དོན་གྱི་རྣམ་པའི་གཡེང་བ་དང་། རང་ཉིད་ཞི་བདེ་དོན་གཉེར་གྱི་བློ་འཁྲིས་མ་ཞུགས་པས་སྟན་གྱི་དྲོད་མ་ཡལ་བར་བྱས་ཏེ་བསྒྲུབ། རྒྱུན་གྱི་ཁ་ཏོན་དགེ་སྦྱོར་རིགས་ཀྱང་སྒྲུབ་པ་ཆག་པའི་རྒྱུ་ཡིན་པས་མང་དུ་བྱ་བ་རྣམས་སྤངས་ཏེ། འབྲས་བུ་སངས་རྒྱས་སྒྲུབ་པ་ལ་ཟབ་ལམ་འདི་

ལས་གཞན་དུ་མེད་པའི་ཡིད་ཆེས་ཀྱིས་ཆོག་ཤེས་པར་བྱེད། རྒྱུན་དུ་ཆབ་ལྡན་གྱི་ཁྲུས་བུམ་དུ་སྨེ་བརྩེགས་སམ་བདུད་རྩི་འཁྱིལ་བ་བསྐྱེད་བཟླས་བྱས་པས་ཁྲུས་བྱ་ཞིང་། མི་བྱེད་ཀ་མེད་ཀྱི་ཡོ་བྱད་ལེན་པ་དང་སྒྲུབ་གཡོག་འགྲུལ་དགོས་ན་ཁྲུས་ཆུས་བསང་གཏོར་དང་གུ་གུལ་གྱིས་བདུག་པ་སོགས་བྱ། མི་དང་ཡོ་བྱད་གསར་པའི་གདོང་དུ་ཤེས་པ་བྱིང་འཐིབ་ཚིག་པ་གཉིད་ཡེར་བ་སོགས་བྱུང་ན་འགྲུལ་སྣ་ཡིན་པས་སྲུང་འཁོར་བསྒོམ། རྫས་དེ་བྱུང་ཚར་བའི་རྗེས་སུ་བྱུང་ན་གྲིབ་ལྷོངས་ཡིན་པས་ཡིག་བརྒྱ་བཟླ། འགྲུབ་ཏུ་རུང་ན་རྫས་དེ་དག་འཕྲལ་དུ་ལོངས་མ་སྤྱོད། མཚམས་རལ་པ་ལྟ་བུའི་རྐྱེན་གྱིས་བགེགས་འཚུབས་ཀྱི་རྟགས་བྱུང་ན་བགེགས་སྐྲོད་ནན་ཏན་དང་རྒྱལ་ཐོ་གསོ་ཞིང་སྲུང་འཁོར་བསྒོམ། ཀ་ཅ་ཆེ་ཕྲ་ཕྲིན་ཡིག་ཙམ་གྱི་བཏང་ལེན་ཀྱང་མི་བྱ་བར་གཅིག་པུར་རྣམ་གཡེང་སྤངས་ནས་བསྒྲུབ་ནུས་ན་རྟགས་མཚན་མྱུར་ཞིང་སྒྲུབ་པའི་འབྲས་བུ་འབྱིན་པ་ཡིན་ལ། བསྙེན་སྒྲུབ་ཀྱི་དམ་ཚིག་རལ་ཞིང་ཁ་ཡེངས་མིག་ཡེངས་ཀྱི་བཟླས་པ་ལོ་ཟླར་འབད་ཀྱང་གྲུབ་པའི་རྟགས་དང་འབྲས་བུ་མི་འབྱུང་བས་འབད་པ་དོན་མེད་དུ་འགྲོ་བ་ཡིན། སྐབས་རེར་ཚིག་པ་ཟ་བ་དང་སྙིང་མི་དགའ་བ་སོགས་བྱུང་ན་བླ་མའི་མོས་གུས་དང་ངོ་བོ་ལ་བལྟས་ནས་རང་ཐོག་ཏུ་བཞག །

ཤེས་པ་འཕྱོ་ཞིང་ཡེད་པ་སོགས་རླུང་རྟགས་བྱུང་ན་རུས་ཐང་སོགས་དང་། བྱིང་འཐིབ་ཉོབ་ན་ཇ་དཀར་བཏུང་བ་སོགས་ཁམས་དང་བསྟུན་པའི་ཟས་སྤྱོད་དང་སྨན་བསྟེན་པ་སོགས་སྤྱོད་ལམ་གཟབ་པར་བྱ། བཟླས་ཕྲེང་སྤྱི་ལ་བྷོ་ངྷི་ཙེ་ཉིད་འགྱུར་སྟོབས་དང་བསྔགས་པ་ཆེ་བར་བཤད་ཅིང་། འདིར་དྲག་པོའི་ཕྲིན་ལས་ཀྱི་དབང་གིས་རུ་རཀྵ་དང་ཐོད་པའི་ཕྲེང་བ་མཆོག་ཏུ་ཤིས། གང་ཡང་གཞན་གྱིས་ལོངས་མ་སྤྱད་པ་ཉིད་གཞོན་ནུ་མས་བཀལ་བའི་སྲད་བུ་རིགས་ལྔ་སྐུ་གསུམ་སོགས་མཚོན་པའི་ལྔ་བསྒྲིལ་སུམ་བསྒྲིལ་ཇི་ལྟར་འཚམས་པ་ལ་བརྒྱུས་ཤིང་སྐུ་གཉིས་མཚོན་པའི་མདོ་འཛིན་ཉིས་བརྩེགས་སུ་ཡོད་པར་བྱས་ལ་བྱིན་གྱིས་བརླབས་ཏེ་འགོམ་ཡུག་དང་ཕལ་གྱིས་མཐོང་རེག་མེད་པར་བཅང་། སྔགས་ཀྱི་སྒྲ་ཆེ་ཆུང་མྱུར་བུལ་ལྷག་ཆད་ཡིག་འབྲུ་སྒྲ་ཟུར་ཉམས་པ། གློ་ལུ་བ་དང་གླལ་བ་སྤྲིད་པ་སོགས་ཀྱིས་བར་ཆོད་པ་མ་ཡིན་པའི་ངག་བཟླས་སྐྱོན་བྲལ་བྱེད་ཅིང་། སྔགས་ཕྲེང་སྐོར་རེའི་མཚམས་སུ་བཟླས་དམིགས་གསལ་སྐྱོར་དང་སྟོང་རྗེས་ལ་བརྒྱ་སོགས་བཅུ་ཆའི་ཁ་སྐོང་ཡང་ཞོར་ལ་འགྲོ་བ་ཐོན་ན་རྗེས་སུ་སྦྱིན་སྲེག་མ་གྲུབ་ཀྱང་སྐྱོན་མེད་པ་དང་། སྒྲུབ་པ་ཞག་གྲངས་སུ་བཅད་པ་སོགས་ལ་སྟབས་བདེ་བ་ཡིན། ཐུན་

གྱི་སྒང་ལ་འགྲོ་འདུག་འགུལ་བསྐྱོད་གཞན་ལ་ངག་དང་ཕྲིན་ཡིག་གཏོང་བ། ལྷ་སྔགས་མི་གཅིག་པ་འདོན་བསྒོམ་སོགས་བཟླས་དམིགས་ཀྱི་བར་ཆད་དུ་འགྲོ་བའི་རྣམ་གཡེང་ཐམས་ཅད་སྤངས། ཐུན་མཚམས་རྣམས་སུ་ཡང་ལྷའི་གསལ་སྣང་མ་བྲལ་བས་བཟླས་པ་གང་འགྲུབ་བྱེད་ཅིང་གྲངས་སུ་མི་རྩི། ཁམས་གསེང་ལ་འགྲོ་བ་སོགས་སྟན་ལས་འཕགས་དུས་ཕྲེང་བ་ལ་རྡོ་རྗེའི་མདུད་པ་བྱས་པ་ཁྲོ་ཞལ་དུ་དམིགས་ནས་གདན་ཁར་བཞག་པས་སྟན་བསྲུང་། བཟའ་བཏུང་གང་ཡང་འབྲུ་གསུམ་གྱིས་བྱིན་བརླབ་ལ་ཚོགས་འཁོར་གྱི་ཚུལ་དུ་ལོངས་སྤྱད། སྔགས་ནུས་འཇོམས་པའི་ཟས་ཀྱི་སྤང་བྱ་དུག་རིགས་འདྲེས་པའི་བཟའ་བཏུང་། ཉམས་གྲིབ་དང་འདྲེ་ཅན་གྱི་ཁ་ཟས། སྒོག་བཙོང་། ལ་ཕུག །ལྒ་གཡེར། དམར་ཚྭ། ཟྭ་ཚོད། ལྕེའི་དབང་པོ་སོགས་ཀྱིས་ནུས་པ་འགྱང་བར་བཤད། བྱ་བ་གང་ལ་འཇུག་ཀྱང་དྲན་པའི་རྩིས་ཟིན་པས་ཐ་མལ་གྱི་བློ་ལང་དུ་མ་ཤོར་བ་ཞིག་ཅིས་ཀྱང་དགོས། དེའང་ལྷའི་སྣང་ཆགས་ལ་མ་ཐེབས་ན་བསྐྱེད་རིམ་གྱིས་གོ་མི་ཆོད། ང་རྒྱལ་མེད་ན་ཐ་མལ་གྱི་སྣང་ཞེན་མི་ལྡོག །དག་དྲན་མེད་ན་ལྷ་ཞི་བ་བསྒོམ་ཀྱང་རྒྱལ་འགོང་དང་། དྲག་པོ་བསྒོམ་ན་རཱུ་དྲར་གོལ་བར་འགྱུར་བས་ན་གསལ་བརྟན་དག་གསུམ་གྱི་གནད་ལ་འབད།

གཞན་ཡང་བདུད་ཀྱིས་ལྷར་བརྫུས་ནས་བར་གཅོད་འབྱུང་བའང་སྲིད་པས་རྟགས་དང་ཆོ་འཕྲུལ་འཚུབས་ལྷོང་སོགས་བཟང་ངན་གྱི་མཚན་མ་ཇི་ལྟར་བྱུང་ཡང་དགག་སྒྲུབ་རེ་དོགས་ཀྱི་བློས་མ་བཅིངས་པར་གདོད་མའི་གནས་ལུགས་དབྱིངས་དང་ཡི་ཤེས་གཉིས་སུ་མེད་པའི་ཀློང་ཆེན་པོར་ལ་བཟླ། ལར་བསྐྱེད་རིམ་ཙམ་དུ་མ་ཟད་འཁོར་འདས་ཀྱི་སྣང་ཆ་ཐམས་ཅད་རྟོག་པས་བཏགས་པ་ཁོ་ན་ཡིན། དེའང་ཉི་མ་དང་འོད་ཆུ་དང་རླན་བཞིན་རིག་པའི་རང་རྩལ་ལས་གཞན་དུ་གྲུབ་པ་རྡུལ་ཙམ་མེད། རང་རིག་ཐིག་ལེ་ཉག་གཅིག་གི་ཀློང་དུ་ཆོས་ཐམས་ཅད་ཡེ་རྫོགས་ཆེན་པོར་གྲུབ་པ་ལ་སླར་བཅོས་མས་རྒྱས་འདེབས་མི་དགོས། རིག་པའི་ངོ་བོ་སྐྱེ་འགག་གནས་གསུམ་གྱི་མཐའ་དང་བྲལ་བས་ཅིར་ཡང་མ་ཡིན་ལ་ཅིར་ཡང་འཆར་བ། ཤར་བ་ཙམ་ནས་དངོས་པོ་མཚན་མར་མ་གྲུབ་ཀྱང་ཀུན་རྫོབ་ཏུ་སྣང་ལ་དོན་བྱེད་ནུས་པ་བསམ་བསྐྱེད་ལྷུན་རྫོགས་ཀྱི་དཀྱིལ་འཁོར། ཟང་ཐལ་གྱི་ཡེ་ཤེས་རང་གནས་ལ་ནམ་ཡང་འཕོ་འགྱུར་མེད་པས་འཛིན་མེད་ཅོག་བཞག་གི་ཆོས་སྐུ། འདི་ལྟར་སྣང་བའི་ཆོས་ཐམས་ཅད་བསྐྱེད་རྫོགས་ཟུང་འཇུག་འབའ་ཞིག་ལས་མི་འདའ་བ་གཤིས་ལུགས་ཀྱི་སྣང་སྟོང་ཟུང་འཇུག་ལ་རིག་ཐོག་ཏུ་མྱོང་བ་ཐོན་ནས་གནད་གཅིག་ཤེས་པས་འཁོར་འདས་ཀུན་གྱི་སྟོང་སྲོག་ཐོབ་པ་

ཉིད་བསྐྱེད་རྫོགས་གང་གི་ཡང་སྙིང་པོ་སྟེ། སློབ་དཔོན་ཆེན་པོས། འགྲོ་འདུག་ཉལ་དང་སྤྱོད་ལམ་ཐམས་ཅད་ཀུན། །དེ་ལྟར་ལྟ་བའི་བྱ་ར་མ་ཡེངས་ན། །ང་ཉིད་པདྨ་འབྱུང་གནས་ཐུགས་ཀྱི་སྲས། །མཆོག་དང་ཐུན་མོང་དངོས་གྲུབ་མྱུར་དུ་ཐོབ། །ཕྱི་ནང་ཟས་ནོར་མི་དང་ལྷ་འདྲེ་འདུ། །བླ་མེད་བྱང་ཆུབ་གོ་འཕང་མྱུར་དུ་ཐོབ། །ལྟ་བས་མ་ཟིན་བསྒྲུབ་ཀྱང་དོན་མེད་པས། །ལྟ་བ་བྱ་ར་གཅེས་སོ་རིགས་ཀྱི་བུ། །ཞེས་དང་། བརྒྱ་བཤད་སྟོང་དུ་ལབ་ཀྱང་གོ་བ་གཅིག །གཅིག་ཤེས་ཀུན་གྲོལ་རང་རིག་རང་མདངས་སྐྱོང་། །ཞེས་གསུངས་པ་ལྟར། ལྟ་བའི་སྤྱི་རྒྱ་རླབས་ཀྱིས་གཅོད་པའི་སྒོ་ནས་བསྐྱེད་རྫོགས་ཟུང་དུ་འཇུག་པའི་ཉམས་ལེན་གྱི་རིམ་པ་ལ་གནད་དུ་བསྣུན་པས། འབྲས་བུ་ཕྱི་དུས་སུ་མི་ལྟོས་པར་ཚེ་འདི་ཉིད་ལ་དངོས་གྲུབ་རྣམ་པ་གཉིས་མངོན་དུ་བྱེད་པར་འགྱུར་ཏེ། བཤད་རྒྱུད་ལས། རྡོ་རྗེ་ཁྲག་འཐུང་ང་ཉིད་ཀྱི། །ཡི་གེ་ཧཱུྃཙམ་བཟླས་པ་ལའང་། །བར་ཆད་ཀུན་གྱིས་མི་ཚུགས་ཤིང་། །མཚན་མ་འགྲུབ་པར་ཐེ་ཚོམ་མེད། །རྩེ་གཅིག་འདི་ལ་བརྩོན་ལྡན་པས། །འཁོར་བར་མི་ལྡོག་མངོན་འཚང་རྒྱ། །ཞེས་དང་། མཚོ་རྒྱལ་གྱིས། འདི་ལྟར་བསྙེན་སྒྲུབ་ལས་སྦྱོར་གསུམ་སྒྲུབ་ཚད་ཐེམས་ནས་ནི༔ ཚེ་འདིར་ཕྲིན་ལས་རྣམ་པ་བཞི་གང་ལ་བརྩམ་པ་འགྲུབ་པ་

དང་༔ མཆོག་གི་དངོས་གྲུབ་ཡི་དམ་ལྷ་དང་སྐལ་བ་མཉམ་སྟེ༔ བར་དོ་གསུམ་ལ་ལྷའི་སྣང་བ་ཐོབ་སྟེ༔ ལོངས་སྤྱོད་རྫོགས་པའི་སྐུ་རྡོ་རྗེ་གཞོན་ནུའི་གོ་འཕང་འཐོབ་པར་ཐེ་ཚོམ་མེད་དོ་བདག་འདྲ་མཁར་ཆེན་བཟས་མི་བསླུ་བའི་དོན་གྱི་ཐ་ཚིག་གོ༔ ཞེས་གསུངས་པ་ལྟར་རོ། །བདུད་འདུལ་སྤུ་གྲིའི་མན་ངག་གི །བཅུད་ཕུར་རེག་ཕུང་འབར་བ་ཡི། །བསྙེན་ཚུལ་མདོ་ཙམ་བརྗོད་འདི་ལས། །སྐལ་བཟང་དངོས་གྲུབ་མངོན་བྱེད་ཤོག །ཅེས་པའང་མདོ་ཁམས་རྫོགས་ཆེན་དགོན་གྱི་བསྟན་འཛིན་དམ་པ་ཕུར་ཚ་སྤྲུལ་སྐུ་རིན་པོ་ཆེ་དང་། བཤེས་གཉེན་རིག་སྔགས་འཆང་བ་དོན་དམ་ཆོས་མཆོག་སོགས་ལམ་འདིའི་བཀའ་བབས་ཀྱི་སྐྱེས་བུ་དུ་མས་སྔ་ཕྱིར་ཡང་ནས་ཡང་དུ་བསྐུལ་བར་མཛད་པ་ཡིད་ལ་སིམ་པའི་ཐོག །ཉེར་ཆར་མི་འཕྲོག་པའི་དད་གུས་ཀྱི་ནོར་ལྡན་དྭགས་པོ་གཤམ་མཁར་བ་འཇིགས་མེད་བློ་གྲོས་ཀྱི་གསུང་གིས་ནན་ཆགས་སུ་བསྐུལ་བས་མཚམས་སྦྱར་ཏེ། རྒྱལ་ཁམས་པ་འཇིགས་བྲལ་ཡེ་ཤེས་རྡོ་རྗེས་ཀུན་འཛིན་གྱི་ལོ་སྨིན་ཟླའི་ཡར་ངོའི་རྒྱལ་བ་དང་པོ་ལ་མཆིམས་ཀྱི་ཀོང་ཡུལ་ལྗོན་པ་བུ་ཆུ་བདེ་ཆེན་སྟེང་གི་རིག་པ་འཛིན་པའི་དགའ་ཚལ་དུ་སྦྱར་བའོ། །འདིས་ཀྱང་སྐལ་ལྡན་རྣམས་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག །སརྦ་དཱ་མངྒ་ལཾ།། །།

རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་མཐའ་སྡུད་མནན་པའི་ལས་རིམ་འབར་བའི་ཐོག་བརྩེགས།

༄༅། །རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་མཐའ་སྡུད་མནན་པའི་ལས་རིམ་འབར་བའི་ཐོག་བརྩེགས་ཞེས་བྱ་བ་བཞུགས་སོ། །

ན་མོ་ཤྲཱི་བཛྲ་ཀུ་མཱ་ར་ཡ། [ལྷ་མཆོག་རྡོ་རྗེ་གཞོན་ནུའི་རྣལ་འབྱོར་པས་མངོན་སྤྱོད་དྲག་པོའི་མན་ངག་སྲུང་བའི་མཐའ་སྡུད་དགྲ་བགེགས་མནན་པའི་ལས་རིམ་ལ་འཇུག་པ་སྐབས་སུ་བབས་པ་ན། སྦྱོར་བ་ལྕགས་ཁམས་ཀྱི་ལོ་ཟླ་ཉི་ཁྱིམ་ཕུང་གསུམ་བདུད་ཀྱི་ཉི་མ་སོགས་ཤིན་ཏུ་རྩུབ་པའི་དུས་གནད་ངེས་པ་ཅན་གྱི་སྐབས་སུ་བབས་པ་ན། དྲག་པོའི་གནས་སུ་འོས་པར་དམ་ཚིག་གི་བྲིས་སྐུ་བཀྲམ་པའི་མདུན་དུ་བླ་མ་ཡི་དམ་ཆོས་སྐྱོང་དང་བཅས་པའི་གཏོར་མ་དང་ཕྱི་ནང་གི་མཆོད་པ་རྣམས་ལེགས་པར་བཤམསཔའི་ཉེ་འདབས་སུ། གདུག་པའི་ས་སྣ་རྣམས་ལས་སྟེགས་བུ་མདའ་གང་གྲུ་བཞི་པ་རོ་སོལ་གྱིས་ནག་པོར་བྱས་པའི་དབུས་སུ་བྲུབ་ཁུང་ཁ་ཁྱེར་གསུམ་ལྡན་གྱི་ནང་དུག་ཁྲག་དང་ཕྱིར་རོ་སོལ་གྱིས་དམར་ནག་ཏུ་བྱུགས་ཤིང་མཐའ་རྩང་

དམར་སྲིན་མོ་འགྲོས་སུ་བཙུགས་པས་བསྐོར་བའི་ནང་དུ་དུག་ཤོག་ལ་དྲག་འདྲེ་གང་ལ་བྱ་བའི་ལིངྒ་མན་ངག་ལྟར་བྲིས་ཏེ་དྲི་བྲལ་དུ་བྱས་པ་བཅུག་པའི་ཁ་རོ་གཡམ་གྱིས་བཅད། དེ་སྟེང་མཉྫིའི་ཁར་གོང་གནོན་གྱི་གཏོར་ཆེན་འཁོར་གྱི་བཤོས་བུས་གཏམས་པ་དྲག་རྒྱན་རྔམས་བརྗིས་ཅན་འཕང་བའི་སྐབས་ལྟར་འདུ་བྱས་པ་འགོད། དྲག་ཤིང་གི་ཨེ་ཁྲོམ་ལ་བརྟེན་པའི་ཕུང་རེའམ་སྣམ་རས་ཀྱི་གུར་ཕུབ་ལ་ཉི་ཟེར་དང་མར་མེའི་མདངས་མི་ཕོག་ཅིང་བདུད་རྩིའི་ཟེག་མ་མི་འཐོར་བར་བྱས་ལ་མཐའ་དྲག་པོའི་མཆོད་པས་བསྐོར། གཞན་ཡང་དབྱེ་རྫས་ཐུན་རྫས་མནན་ཐོད་ཕུང་རེ་བྱད་ཐག་རོ་གཡམ་སོགས་འདིར་དགོས་པའི་ཡོ་བྱད་ཐམས་ཅད་ཚང་བ་མེད་པར་འདུ་བྱས་ལ། དངོས་གཞི་ཕྲིན་ལས་ཀྱི་གཞུང་བསྲངས་ཏེ་བདག་དང་མདུན་གྱི་གཏོར་

ཆེན་གཉིས་ཀ་གྱེར་ཚིག་གཅིག་གིས་མཉམ་དུ་བསྒྲུབ་ནས་བཟླས་པའི་སྐབས་སྲུང་བའི་དམིགས་བཟླས་ལ་གཙོ་བོར་བྱས། དེ་ནས་སྨད་ལས་བཞིན་བསྐུལ་བ། གསེར་སྐྱེམས་གཟུ་དཔང་། བྲུབ་ཁུང་དམིགས་བྱ་བསྐྱེད་པ་རྣམས་སྔོན་དུ་འགྲོ་བས། བདག་མདུན་གྱི་ཐུགས་ཀ་ནས་སྤྲུལ་པའི་ལས་བྱེད་བསམ་གྱིས་མི་ཁྱབ་པ་སྐར་ལྟར་འཁྲུགས་པ་སྟོང་ཁམས་ཁྱབ་པར་འཕྲོས། དམིགས་བྱ་དགྲ་འདྲེ་འབྱུང་པོ་འཁོར་བཅས་ལྕགས་ཀྱུས་སྙིང་ནས་བཟུང་། ཞགས་པས་རྐེ་ནས་བཅིངས། ལྕགས་སྒྲོག་གིས་ཡན་ལག་བསྡམ། དྲིལ་བུ་མྱོས་པར་བྱས་ཏེ་རང་དབང་མེད་པར་ལས་ཀྱི་རླུང་དམར་གྱི་རྟ་ལ་བསྐྱོན་ཏེ་བྲུབ་ཁུང་གི་ལིངྒ་ལ་ཐིམ་པར་བསམ་ཞིང་བདེན་སྟོབས་འགུགས་གཞུག་ཅི་མང་མཐར་བླ་འགུགས་ཀྱི་སྔགས་ནི།] ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ་ཀཱ་ལ་རཱུ་པ་དམ་སྲིའམ། དགྲ་བོ་ཛཿཛཿ སྙིང་རྩ་ལ་ཡཾ་ཡཾ༔ དམ་སྲི་ཛཿཛཿ སྲོག་རྩ་ལ་ཡཾ་ཡཾ༔ སྙིང་རྩ་ཕྲིལ་ཕྲིལ་དམ་སྲི་ཛཿཛཿ སྲོག་རྩ་ལ་ཆུཾ་ཆུཾཿ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ དམ་སྲི་ཛཿཛཿ ཐུམ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ ་གུལ་གུལ༔ མྱག་མྱག་དམ་སྲི་ཛཿཛ༔ སོད་སོད་ངྷ་ཏི་མ་མ་ཀརྨ་ཤཱི་གྷྲཾ་ཀ་ར་ཡེ༔ མཱ་ར་སེ་ན་པྲ་མརྔྷན་ཡེ་ཧཱུྃཿ དམ་སྲི་ཛཿཛཿ

[ཞེས་གང་མང་དང་།] ཨོཾ་བཛྲ་ཀཱི་ལི་ཀཱི་ལ་ཡ་སྲི་ངན་ཛཿཧཱུྃ་བཾ་ཧོ༔ སྲི་ངན་ནམ། དགྲ་བོའི་བླ་ཤ་རེ་མ་ཏི་འགྲིམ་འགྲིམ༔ ཤ་མ་རུ་ཏི་ཐུལ་ཐུལ༔ མྱོག་མྱོག༔ ཡེད་ཡེད༔ ཤ་མ་རུ་ཏི་ཁུག་ཁུག༔ ལིང་མྱོག་ལིང་ཤག་ཙ་མུནྟྲི་ཛ༔ ཧཱུྃ་བཾ་ཧོ༔ [ཞེས་སྟོང་ངམ་བརྒྱ་རྩ་ལས་མི་ཉུང་བས་བཀུག་འགུགས་འཆིང་སྡོམ་མྱོས་ཀྱི་ལས་བྱ། ཐུན་མཚམས་སུ་སྨད་ལས་བཞིན་ཐུན་གཏོར་ལ་དམིགས་བྱ་འགུགས་བསྟིམ་བདུད་རྩིར་སྦར་བ་སྔགས་ཀྱིས་ཕུལ་ཏེ།] ཧཱུྃ༔ དུས་གསམ་རྒྱལ་བའི་ཕྲིན་ལས་འབྱུང་བའི་དཔལ༔ མ་རུངས་འདུལ་མཛད་ཀརྨ་ཧེ་རུ་ཀ༔ འགྲོ་བ་སྙིགས་མའི་སྡུག་བསྔལ་སྐྱོབ་པའི་ལྷ༔ དྲག་པོའི་ཕྲིན་ལས་མཛད་ལ་མཆོད་པ་འབུལ༔ ཁྲོ་བཅུ་ཡབ་ཡུམ་ཁྲ་ཕྱག་སྒོ་མ་བཞི༔ ཕུར་སྲུང་ཟ་གསོད་དབང་ཕྱུག་ཉེར་བསྒྱད་སོགས༔ སྤྲུལ་པ་ཡང་སྤྲུལ་འཁོར་དང་བཅས་པ་རྣམས༔ བ་ལིང་ཤ་ཁྲག་གཏོར་མ་འདི་བཞེས་ལ༔ དམིགས་པའི་དགྲ་བགེགས་གཟུགས་ལིང་མིང་བཅས་འདིའི༔ བླ་ཁུག་དབུགས་འཕྲོག་མགོ་འཁོར་ཁྲག་ཏུ་སྐྱུགས༔ བརྒྱལ་ཞིང་ལུས་སེམས་ཕྲོལ་ལ་སྲོག་རྩ་ཆོད༔ ཚེ་ཡི་འདུ་བྱེད་བསྐུམས་ལ་མྱུར་དུ་སོད༔

ཤ་ཁྲག་གཟུགས་ཕུང་འབྱུང་བ་ཞལ་དུ་ཐོབ༔ བསད་རྟགས་དོན་སྙིང་དམར་པོ་ཁྱེར་ལ་ཤོག༔ བྱད་མ་ལྷ་སྲུང་རང་གཤེད་རང་ལ་ཕོབ༔ ལུས་ངག་ཡིད་གསུམ་མཐུ་རྩལ་ནུས་པ་རྣམས༔ ནམ་ཡང་ལྡང་མེད་མནན་པའི་ཕྲིན་ལས་མཛོད༔ [ཅེས་འབུལ། དེ་ལྟ་བུའི་ཚུལ་གྱིས་ཐུན་དྲུག་གམ་བཞིར་བཅད་དེ་ཁུག་རྟག་མ་བྱུང་བར་རམ་ཞག་གྲངས་ཇི་ཙམ་བྱེད་པ་ཆ་གཉིས་སུ་བགོས་པའི་ཆ་གཅིག་ལ་འབད་དོ། །དེ་ནས་བར་དུག་ཟིར་བའི་ལས་ལ། བདག་ཉིད་ཡི་དམ་དུ་གསལ་བའི་ཤངས་བུག་དང་བ་སྤུའི་བུ་ག་ཐམས་ཅད་ནས་ལས་བྱེད་ཀྱི་ཁྲོ་བོ་ནམ་མཁའ་གང་བར་སྤྲོས། ཁོའི་ལྷ་སྲུང་ཐམས་ཅད་བྱ་སྤུ་རླུང་གིས་ཁྱེར་བ་ལྟར་བསྐྲད་པར་བསམ་ལ་རྗས་ངན་གྱིསབདུག་ཅིང་སྨད་ལས་བཞིན་ལྷ་དབྱེ་དང་གཟུགས་ལ་དབབ་པའི་ལས་བསྐུལ་མཐར། རང་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་དམིགས་བྱ་རྣམས་ལ་ཕོག་པས། བ་མོ་ལ་ཉི་ཟེར་ཕོག་པའམ་མེ་ཏོག་སད་ཀྱིས་ཁྱེར་བ་ལྟར་བཀྲག་མདངས་ཉམས། བདག་མདུན་དང་བྲུབ་ཁུང་ཁའི་རྩང་རྣམས་ཤན་པ་ཕོ་མོའི་ངོ་བོར་གསལ་བའི་ཞལ་ནས་སྔགས་སྒྲ་དེ་རི་རི་བཟླས་པས། དྲག་སྔགས་ཀྱི་འོད་ཟེར་མེ་ལྕེ་རྣོ་ངར་དང་ལྡན་པ་མཚོན་ཆའི་རྣམ་པར་འཕྲོས་ཏེ་ལུས་ཀྱི་ཡན་ལག་ནང་ཁྲོལ་རྣམས་བཅད་གཏུབ་བྱས་ཏེ་ལོ་ཏོག་སེར་བས་བཅོམ་པ་ལྟར་གྱུར། རྡོ་རྗེ་གཞོན་ནུའི་སྐུ་སྨད་ཁྲོ་ཕུར་ལྕགས་སྲེག་གི་རང་བཞིན་ཅན་དུ་གྱུར་པ་དེ་ཉིད་དམིགས་བྱའི་སྤྱི་གཙུག་ཏུ་བརྒྱབ། རྐང་མཐིལ་

ནས་ཕྱུང་། ལྕེ་སྟེང་ནས་ཨོག་མར་ཕྱུང་། སྙིང་གར་ཐོག་རྒྱབ་པ་ལྟར་སོང་བས་སྲོག་རྩ་ཐལ་བར་བཏང་། མདོར་ན་དགྲ་བོའི་སྒོ་གསུམ་བྱ་སྒྲོ་མེ་ལ་བསྲེག་པའམ་གཞོབ་རོ་ལྡོག་པས་བརྗིས་པ་ལྟར་ཐལ་བ་བུན་བུན་སོང་ནས་ཕུར་པའི་ཆར་རྒྱུན་མི་ཆད་པས་རྗེས་མེད་རྩ་བརླག་ཏུ་སོང་བར་བསམ་ལ།] ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ་ཀཱ་ལ་རཱུ་པ་དམ་སྲི་མཱ་ར་ཡ་སོད༔ སྙིང་རྩ་ལ་ཡཾ་ཡཾ༔ དམ་སྲི་མཱ་ར་ཡ་སོད༔ སྲོག་རྩ་ལ་ཡཾ་ཡཾ། སྙིང་རྩ་ལ་ཕྲིལ་ཕྲིལ༔ དམ་སྲི་མཱ་ར་ཡ་སོད༔ སྲོག་རྩ་ལ་ཆུཾ་ཆུཾ༔ ཅིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ དམ་སྲི་མཱ་ར་ཡ་སོད༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག་དམ་སྲི་མཱ་ར་ཡ༔ སོད་སོད་ངྷ་ཏི་མ་མ་ཀརྨ་ཤཱི་གྷྲཾ་ཀཱ་ར་ཡེ༔ མཱ་ར་སེ་ན་པྲ་མ་ངྷ་ན་ཡེ་ཧཱུྃ༔ དམ་སྲི་མཱ་ར་ཡ་སོད་ཕཊ༔ [ཅེས་དྲག་ཏུ་བཟླ་ཞིང་ཐུན་རྫས་ལ་ཁ་རླངས་མ་ཤོར་བར་ལག་ངར་བརྒྱུད་ནས་ཕུས་འདེབས། ཐུན་རྫས་རྣམས་དྲེགས་པ་ལྷ་སྲིན་སྡེ་བརྒྱད་འདུས་པའི་དམག་ཚོགས་ནད་མཆོན་དུག་གི་ཐོག་སེར་དྲག་པོ་དམིགས་བྱའི་སྙིང་གར་གཟིར་ཞིང་བསྡིག་པས་གཟུགས་བྱེ་མའི་མཁར་ཆུས་བཤིག་པ་ལྟར་རྡུལ་དུ་

བཅོམ་ནས་མཐར་རྣམ་ཤེས་ཀྱི་ངོ་བོ་ནྲིའམ་ཏྲི་དུད་ཁ་མར་མེ་འཆི་ཁའི་འོད་ལྟ་བུ་དེ་ཡང་ནག་སྐེམས་ཀྱིས་བསད་པར་བསམ་ལ།] ཧཱུྃ༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྱོ་བོ་ཆེན་པོ་ཡིས༔ ཀླད་པ་ཚལ་པ་བརྒྱ་རུ་ཁོས༔ གདུག་ཅིང་སྡང་སེམས་ལྡན་པ་ཡི༔ ལྷའམ་འོན་ཏེ་བདུད་ཀྱང་རུང་༔ ང་ལ་བར་ཆད་བྱེད་པའི་བགེགས༔ མཐུ་དང་རྫ་འཕྲུལ་མེད་པར་བྱོས༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་མཱ་ར་ཡ་ཧཱུྃ་ཕཊ༔ [ཅེས་ལིངྒ་ལ་ཐུན་བརྡེག། ཐུན་མཚམས་སུ་གོང་བཞིན་ཐུན་གཏོར་ཕུལ་ཞིང་ཕྲིན་ལས་བཅོལ། དེ་ལྟར་བསད་རྟགས་མངོན་དུ་མ་གྱུར་གྱི་བར་རམ་འགུགས་པའི་ཕྱེད་ཆ་ཙམ་དུ་འབད་དོ། །དེ་ནས་ཐ་མ་མནན་པའི་ལས་ལ། མདུན་གྱི་ལིངྒ་དམིགས་བྱ་དངོས་སུ་གསལ་བའི་གནས་ལྔར་གནམ་ལྕགས་ཀྱི་འཁོར་ལོ་རྩིབས་བཞི་པ་ལྟེ་བར་སྣ་ཚོགས་རྡོ་རྗེ་མཚན་པ་ལྕི་ཞིང་འཐས་པ་རེ་རེ་དང་། ཡན་ལག་དང་ཚིག་བཞི་རྣམས་སུ་རྡོ་རྗེ་རྒྱ་གྲམ་རེས་གཟིར་བས་ཉམ་ཐག་གཡོ་འགུལ་མི་ཤེས་པར་བསམ་ལ། ཨོཾ་བཛྲ་ཀཱི་ལི་ཀཱི་ལ་ཡ༔ མ་རཀྨོ་ཡཀྨོ་ཀཱ་ལ་རུ་པ་དམ་སྲི་སྟྭཾ་བྷ་ཡ་ནན༔ སྙིང་རྩ་ལ་ཡཾ་ཡཾ་དམ་སྲི་སྟྭཾ་བྷ་ཡ་ནན༔ སྲོག་རྩ་ལ་ཡཾ་ཡཾ༔ སྙིང་རྩ་ལ་ཕྲིལ་ཕྲིལ་དམ་སྲི་སྟྭཾ་བྷ་ཡ་ནན༔ སྲོག་རྩ་ལ་

ཆུཾ་ཆུཾ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཛ༔ དམ་སྲི་སྟྭ་བྷ་ཡ་ནན༔ ཐུཾ་རི་ལི་ལི༔ སྙིང་ཙེག་ཙེག༔ འུར་འུར༔ ཤིག་ཤིག༔ གུལ་གུལ༔ མྱག་མྱག་དམ་སྲི་སྟྭཾ་བྷ་ཡ་ནན༔ སོད་སོད་ངྷ་ཏི་མ་མ་ཀརྨ་ཤཱི་གྷྲཾ་ཀ་ར་ཡེ༔ མཱ་ར་སེན་པྲ་མ་ངྷ་ན་ཡེ་ཧཱུྃ་དམ་སྲི་སྟྭཾ་བྷ་ཡ་ནན༔ [ཞེས་དྲག་ཏུ་བཟླ། མཐར་ཐུན་རྡེག་པ་སོགས་གོང་གི་འགྲོས་ཀྱིས་མནན་རྟགས་མཐོང་བའི་བར་རམ་བསད་པའི་ཕྱེད་ཆ་ཙམ་དུ་འབད་དོ། །རྗེས་མནན་པའི་ལས་རིམ་དངོས་ལ། དགྲ་བགེགས་དམ་སྲི་]དེ་རྣམས་དབང་པོ་ཉམས་ཤིང་དབུགས་དང་བྲལ་ནས་འགུལ་ཙམ་ཡང་མི་ནུས་ཤིང་བྱད་ཐག་སྣ་ལྔས་གྲུ་གུ་ལྟར་བསྡམས། སྙིང་ནང་དུ་འཁོར་ལོ་རྩིབས་དགུ་གནམ་ལྕགས་ལས་གྲུབ་པ་རྣོ་ངར་དང་ལྡན་པ་ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ་ཅེས་པས་མཚན་པ་གཡས་སྐོར་དུ་དྲག་ཏུ་འཁོར་བས་སྙིང་སོགས་ནང་ཁྲོལ་རྣམས་བཅད། ཁོ་ལ་ཟུག་གཟེར་དང་ན་ཚ་སྡུག་བསྔལ་མི་སྐྱེ་བར་བདེ་བའི་ངང་དུ་བརྒྱལ་བར་བསམ་ཞིང་། དྲག་སྔགས་བཟླ་བཞིན་པར་ལིང་ག་བྲུབ་ཁུང་ནས་ཕྱུངས་ཏེ་ལྟེབས་ལུགས་གསུམ་ལ་གང་ཡང་རུང་བས་ལྟེབས་ལ་ཤི་ཡུག་གི་སྐྲ་དང་ཚོན་སྐུད་ཀྱིས་བཅིང་། མནན་ཐོད་སོ་སོའི་རང་གཤེད་ཀྱི་གནད་དང་ལྡན་པར་གཞུག་ཅིང་ཐུན་རྫས་ཀྱིས་སེང་མེད་པར་

བཀང་སྟེ་ལ་ཆས་བཀག །ཕུང་རེའམ་ཡུག་སའི་ཤ་གོས་ཀྱིས་དྲིལ་ལ་བྱད་ཐག་གིས་བཅིངས་པར་རྩང་རྒྱ་གྲམ་དུ་གཟེར། [དཀྱིལ་འཁོར་གསུམ་གྱི་ལྷ་རྣམས་དང་རང་བཞིན་གྱི་དབྱིངས་ན་བཞུགས་པའི་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་སྐུ་དང་ཕྱག་མཚན་སོགས་ལས་འོད་ཟེར་དམར་ནག་མེ་རླུང་འཚུབས་ཤིང་སྲ་མཁྲེགས་མཚོན་ཆའི་རང་བཞིན་ཐོད་པ་ལ་བསྟིམས་པས། ཐོད་པ་ཤིན་ཏུ་སྲ་ཞིང་བརྟན་པ་དགྲ་བགེགས་བསྐལ་པའི་བར་དུ་མི་ལྡང་བའི་བཙོན་ཁང་སྲུབས་སེང་མེད་པར་བསམ་ཞིང་། དྲིལ་ཆས་ཀྱང་བསྐལ་པའི་མུན་པ་དང་། རྩང་རྣམས་གཤིན་རྗེའི་ལས་བྱེད་ཤན་པ་ཕོ་མོས་བསྐོར་ནས་ལྡང་མེད་དུ་ཐུབ་པར་སྲུང་བར་ནན་ཏན་དུ་གསལ་གདབ་ལ། རིག་སྔགས་ཀྱི་བཅིངས་རྒྱ་དང་མནན་སྔགས་རྟེན་འབྲེལ་ནག་པོའི་མན་ངག་བཞིན་རབ་ཏུ་གནས། དེ་ནས་ཟློག་གཞུང་བཞིན་སྒོ་དབྱེ། བསྐུལ་དང་ཆད་མདོ་བསྒྲག་ནས། མནན་རྫས་དང་གོང་གནོན་གྱི་གཏོར་མ་སོགས་ཁྱེར་ཏེ་གང་དུ་མནན་པའི་ས་མིག་ཏུ་མནན་དོང་ཚུལ་བཞིན་བྲུས་པའི་སར་སླེབས་པ་དང་། གསེར་སྐྱེམས་ཕུལ་ཏེ།] རང་ཉིད་དཔལ་ཆེན་སྐུ་རུ་གསལ་བ་ཡིས༔ ཕྱག་གི་གནམ་ལྕགས་ཕུར་བུ་ས་ལ་བཏབ༔ ས་གཞི་གས་ཏེ་རྒྱ་མཚོ་སྔོ་མེར་གསལ༔ དེ་དབུས་གནམ་ལྕགས་ཁང་པ་སྒོ་མེད་ནང་༔ འཆི་

བདག་གཤིན་རྗེ་ནག་པོ་འཇིགས་རུང་བ༔ ལག་གཡས་དབྱུག་ཏོ་གཡོན་ན་ཞགས་པ་ཐོགས༔ མི་སྡུག་དྲི་འཐུལ་མ་ཧེ་ནག་པོ་ཞོན༔ གཤིན་རྗེའི་འཁོར་ཚོགས་རྔམས་པའི་ཚུལ་གྱིས་བསྐོར༔ མངོན་གསུམ་ལྟ་བུར་གསལ་བ་ཉིད་དུ་གྱུར༔ ས་མ་ཡ་ཛཿ[ས་སྤྱན་དྲངས།] ས་མ་ཡ་ཧཱུྃ་གིས་[དམ་ལ་བཞག །དམར་གྱི་གཏོར་མ་དམིགས་བྱ་དགུག་བསྟིམས་བདུད་རྩིར་སྤར་ལ།] ཀྲྀཥྞ་ཛ་མཱ་རི་དགྲ་བགེགས་ཀྱི་མཱཾ་ས་ཙིཏྟ་རཀྟ་གོ་རོ་ཙ་ན་ཀེཾ་ནི་རི་ཏི་གྲྀཧྞ་ཁཱཧི༔ [ལན་གསུམ།] ཧཱུྃ༔ འཆི་བདག་ནག་པོ་འཁོར་བཅས་ལ༔ དགྲ་བོའི་ཤ་ཁྲག་གཏོར་མ་འདི༔ འབུལ་གྱི་དགྱེས་པར་རོལ་ནས་ཀྱང་༔ དམ་ཉམས་དགྲ་བོ་འཁོར་དང་བཅས༔ བསྡམས་འཛིན་མནན་པའི་ཕྲིན་ལས་མཛོད༔ [ཅེས་གཏོར་མ་ཕུལ། དེ་ནས་སླར་ཡང་འགུགས་འདྲེན་བླ་འགུགས་ནན་ཏན་དང་ལྷ་དབྱེ་བྱས་ཏེ་མནན་ཆས་ཐོགས་ལ།] ཧཱུྃ༔ ཕུང་སྲི་བྱ་བའི་ལས་ངན་འདིས༔ རྡོ་རྗེ་སློབ་དཔོན་སྐུ་ལ་བསྡོས༔ རྡོ་རྗེ་མཆེད་ལ་བར་ཆད་བྱས༔ རྣལ་འབྱོར་བདག་ལ་རྟག་ཏུ་འཚེ༔ དམ་སྲི་སྡིག་ཆེན་ལས་ངན་འདིས༔ རྒྱལ་ཁམས་ཡོངས་ལ་གནོད་པ་བྱས༔ སྦྱོར་སྒྲོལ་མང་པོའི་སྒོ་ཡང་བཀག༔

བཀའ་ལས་འདའ་བྱེད་སྡིག་ཆེན་འདི༔ ནམ་ཡང་བཏང་བར་མ་བྱེད་ཅིག༔ འཇིགས་རུང་གཤིན་རྗེའི་ཁ་ནང་ཆུག༔ མི་འགྱུར་ཡངས་པའི་མགྲིན་པར་དྲོངས༔ ཐར་མེད་ལས་ཀྱི་ལྟོ་བར་ཆུག༔ གཏད་དོ་འཆི་བདག་ཁྱོད་ལ་གཏད༔ འཆི་བདག་ནག་པོ་དམ་ཚིག་ཅན༔ གལ་ཏེ་བྱང་ཆུབ་སེམས་ལྡན་བར༔ སྲི་ངན་གཏད་ཀྱི་སླར་མ་བཏང་༔ [ཞེས་དང་། དམིགས་བསལ་དགྲ་མནན་ལ།] ཧཱུྃ༔ དམ་ཉམས་དགྲ་བོ་ལས་ངན་འདི༔ མནན་ནོ་རི་རབ་འོག་ཏུ་མནན༔ ལས་ཀྱིས་མནར་བའི་སྡིག་ཅན་འདི༔ གཏད་དོ་གཤིན་རྗེའི་ལག་ཏུ་གཏད༔ འཁོར་བར་འཁྱམས་པའི་ལས་ངན་འདི༔ སྦའོ་རྒྱ་མཚོའི་གཏིང་དུ་སྦ༔ དང་པོ་བདེ་བར་གཤེགས་པའི་བཀའ༔ དེ་ནས་འབྱུང་བ་ལྔ་ཡི་གཏེར༔ དེ་ནས་དབང་པོ་ལྔ་ཡི་བཅུད༔ དང་པོ་ཞེ་སྡང་ཕ་ཡི་རྒྱུད༔ བར་དུ་འདོད་ཆགས་མ་ཡི་མངལ༔ ཐ་མར་ཉོན་མོངས་ལུས་བླངས་ཏེ༔ གཏན་ཏུ་སྡུག་བསྔལ་མྱོང་བ་ལས༔ དེ་བས་བསད་ཅིང་མནན་པར་བྱ༔ མནན་གཟིར་དྲག་པོ་མི་བྱ་རྒྱུ༔ ཁྱོད་ཀྱིས་ལས་ངན་སྣ་ཚོགས་སྤྱོད། འདི་འོག་བསྐལ་པ་བརྒྱད་ཁྲི་བཞི་

སྟོང་ན༔ གཤིན་རྗེའི་རྒྱལ་པོས་ཆོས་འཆད་ཟེར༔ ཁྱོད་ཀྱི་ཆོས་སྐལ་དེར་ཉོན་ཅིག༔ འཁོར་དང་བུད་མེད་ཉེ་དྲུང་ཟས་ནོར་བཅས༔ གཏད་དོ་འཆི་བདག་གཤིན་རྗེའི་ལག་ཏུ་གཏད༔ དེ་ཡི་ལག་ནས་འཆོར་མི་སྲིད༔ མནན་ནོ་རི་རབ་འོག་ཏུ་མནན༔ དེ་ཡི་འོག་ནས་ལྡང་མི་སྲིད༔ ནམ་ཞིག་བྱང་ཆུབ་སེམས་བསྐྱེད་ནས༔ ལོངས་ལ་རྒྱལ་བའི་བཀའ་ལ་ཉོན༔ དེ་ཡི་བར་དུ་མནན་པར་བྱའོ༔ ནམ་ཡང་བཏང་བར་མི་བྱའོ༔ [ཞེས་པས་དོང་ནང་དུ་བསྐྱུར། མནན་སྔགས་དང་ལྡོག་མེད་ཀྱི་དམོད་པ་བརྗོད་ཅིང་ཐལ་མོ་བརྡབ།] དམིགས་བྱ་ཁོང་ཆུད་གཤིན་རྗེའི་ཞལ་བསྡམས་ཏེ༔ མནན་པའི་ལས་སྦྱར་དམ་ཉམས་དགྲ་བོ་རྣམས༔ བསྐལ་པ་མ་སྟོངས་བར་དུ་མི་ཐར་བར༔ མུན་ནག་རུམ་གྱི་ནང་ནས་རྒྱ་མཚོའི་གཏིང་༔ རིམ་བདུན་ས་འོག་གཤིན་རྗེའི་གྲོང་ཁྱེར་སོང་༔ བྷོ་ངྷི་ཨ་ཡཾ། [ཞེས་མི་ཁའི་རྫས་སོགས་བླུགས་ཏེ་རི་རབ་དང་རྒྱ་གྲམ་བྲིས་པའི་དུར་རྡོས་བཀབ་ལ།] མཁའ་དབྱིངས་རླུང་མེ་ཆུ་སའི་དཀྱིལ་འཁོར་སྟེང་༔ སུཾ་ལས་རིན་ཆེན་རི་རབ་སྲ་ཞིང་བརྟན༔ རབ་འབར་སྣ་ཚོགས་རྡོ་རྗེ་དང་བཅས་པས༔ རྟག་ཏུ་ཐར་མེད་གཟིར་

མནན་རྒྱས་གདབ་བོ༔ ཨེ་སྟྭཾ་བྷ་ཡ་ནན༔ [དེ་བཞིན་དུ།] ཡཾཿ རཾཿ བཾཿ ལཾ་[རྣམས་སྦྱར་བས་འབྱུང་བ་སོ་སོའི་རྒྱས་གདབ།] ཧཱུྃ༔ གཅིག་ནི་བརྗོད་མེད་ཉག་གཅིག་རྒྱ༔ གཉིས་པ་ཐབས་དང་ཤེས་རབ་རྒྱ༔ གསུམ་ནི་སྐུ་གསུང་ཐུགས་ཀྱི་རྒྱ༔ བཞི་ནི་ཕྱག་རྒྱ་བཞི་ཡི་རྒྱ༔ ལྔ་ནི་ཡེ་ཤེས་ལྔ་ཡི་རྒྱ༔ དྲུག་པ་ཕ་རོལ་ཕྱིན་དྲུག་རྒྱ༔ བདུན་པ་མ་མོ་བདུན་གྱི་རྒྱ༔ བརྒྱད་ནི་དུར་ཁྲོད་བརྒྱད་ཀྱི་རྒྱ༔ དགུ་ནི་ཧེ་རུ་ཀློང་དགུའི་རྒྱ༔ བཅུ་ནི་ཁྲོ་རྒྱལ་བཅུ་ཡི་རྒྱ༔ ཁྱོད་ལ་རྒྱ་བཅུ་བརྩེགས་ཏེ་མནན༔ རི་རབ་བརྗིད་པའི་འོག་ཏུ་མནན༔ དཔལ་གྱི་བྲོ་གར་བྱས་ཏེ་མནན༔ བསྐལ་པ་ཇི་སྙེད་མཐའ་རུ་མནན༔ ཨོཾ་ལཾ༔ ཨཱ་ལཾ༔ ཧཱུྃ་ལཾ༔ སྟྭཾ་བྷ་ཡ་ནན༔ [ཞེས་དང་།] མ་རཀྨོ་ཡཀྨོ་[སོགས་མནན་སྔགས་དང་སྤེལ་བ་བརྗོད་ལ། རྣལ་འབྱོར་པ་རྣམས་མཐེའུ་ཆུང་སྦྲེལ་ཏེ་ལས་བྱང་བཞིན་བྲོ་བརྡུང་། དཔལ་ཆེན་ཧེ་རུ་ཀའི་མཐུ་སྟོབས་དང་ནུས་པས་རྒྱས་བཏབ་ཅིང་། བདེན་པའི་ཚིག་གི་གཟིར། དྲག་རྩལ་སྟོབས་ཀྱིས་མནན་པས་ཐར་བའི་གོ་སྐབས་མེད་པར་བྱ། དེའི་སྟེང་དུ་ཀརྨ་ཧེ་རུ་ཀ་ལྗང་ནག་རྒྱ་གྲམ་དང་དྲིལ་བུ་འཛིན་པ་སངས་རྒྱས་དོན་ཡོད་གྲུབ་པའི་དབུ་རྒྱན་ཅན་འཁོར་དཔག་ཏུ་མེད་པ་དང་བཅས་པས་ཕོ་བྲང་བཏབ་སྟེ་མནན་པར་བསམ་མོ། །

དེ་ནས་ལས་བྱང་བཞིན་གཏོར་ཆེན་ཟོར་དུ་བསྐུལ་ཏེ་དགྲ་ཕྱོགས་སམ་ཐེབས་ཕྱོགས་སུ་འཕང་། བཤལ་ཆུས་བརྟན་མ་བསྐྱང་། གཏོར་སྣོད་ཁ་སྦུབས་ལ་བྲོ་བརྡུང་། ཕྱིར་བསྙེགས་བཅད་དེ་བསྲུང་བའི་འཁོར་ལོ་བརྟན་པོར་བསྒོམ། ནང་དུ་ལོག་ནས་ཚེ་འགུགས་བསྐུལ་ཞིང་དངོས་གྲུབ་བླང་བ་སོགས་རྗེས་ཀྱིས་བྱ་བ་རྣམས་གཞུང་བཞིན་དུ་བྱའོ། །ཞེས་པའང་མཐུ་ཆེན་ལང་ལབ་གཉིས་པ་བྱང་ཆུབ་རྡོ་རྗེ་དང་། སྡོམ་བརྩོན་པདྨ་བློ་གྲོས་བཟང་པོ། །སྔགས་བན་ཆོས་གྲགས་རྒྱ་མཚོ་རྣམས་ནས་མངོན་སྤྱོད་ཀྱི་ཆ་རྐྱེན་ལ་བསྔགས་པའི་རྟེན་དང་བཅས་ཏེ་བསྐུལ་བའི་ངོར། འཇིགས་བྲལ་ཡེ་ཤེས་རྡོ་རྗེས་དྲག་པོའི་ལས་ཀྱི་མཐའ་སྡུད་མན་ངག་ལག་ཁྲིགས་སུ་བསྡེབས་ཏེ་སྦྱར་བ་ལས་ཡི་གེ་པ་ནི་བསྐུལ་བ་པོ་ཕྱི་མ་ཉིད་ཀྱིས་བགྱིས་པའོ། །འདིས་ཀྱང་བསྟན་དགྲའི་དཔུང་ཚོགས་མཐར་བྱེད་པའི་རྒྱུར་གྱུར་ཅིག། །། ཛ་ཡནྟུ།། །།]

རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་སྲེག་པ་ཧོམ་གྱི་ལས་རིམ་དུས་མེའི་དབལ་ཟེར།

༄༅། །རྡོ་རྗེ་ཕུར་པ་སྤུ་གྲི་རེག་ཕུང་གི་ཕྲིན་ལས་སྲེག་པ་ཧོམ་གྱི་ལས་རིམ་དུས་མེའི་དབལ་ཟེར་ཅེས་བྱ་བ་བཞུགས་སོ། །

ན་མོ་ཤྲཱི་བཛྲ་ཀུ་མཱ་ར་ཡ། [ལྷ་མཆོག་རྡོ་རྗེ་གཞོན་ནུའི་རྣལ་འབྱོར་པས་དྲག་པོ་མངོན་སྤྱོད་བསད་པའི་མཐར་སྡུད་སྲེག་པ་ཧོམ་གྱི་ལས་རིམ་ལ་འཇུག་པ་སྐབས་སུ་བབས་པ་ན། །དུར་ཁྲོད་སོགས་དྲག་པོའི་ལས་ལ་བསྔགས་པའི་ས་གཞི་གནག་ལ་རྩུབ་པར། དུས་ཐ་ཆུང་བཞིའི་དམར་ཕྱོགས་ཉེར་དགུ་དང་གནམ་སྟོང་ལ་སོགས་པའི་སྲོད་དང་ནམ་ཕྱེད་ཀྱི་ཆར། གདུག་པའི་ས་སྣ་གསུམ་གྱི་སྟེགས་བུ་རྒྱར་མདའ་གང་དཔངས་སུ་ཇི་ལྟར་འཚམས་པའི་ཁར་ཐལ་ཚོན་གྱིས་ཐབ་ཁུང་གྲུ་གསུམ་ཁ་ཁྱེར་གསུམ་རིམ་གྱི་རྣམ་པའི་ཕྱི་མར་མེ་རི་འབར་བ་དང་རཾ་གྱིས་མཚན་པ་བྲི། དེར་དུག་ཤིང་ཚེར་མ་ཅན་གྱི་བུད་ཤིང་དུག་ཁྲག་གིས་སྦགས་པས་ཧོམ་གྲུ་གསུམ་འཚམས་པར་བརྩིགས་པའི་ནང་དུ་མེ་ཚང་བཅའ་ཞིང་ཐབ་ཀྱི་ཟུར་གསུམ་དུ་རྩང་གསུམ་མཆེ་བའི་ཚུལ་དུ་བསླང་། སློབ་

དཔོན་གྱི་གཡས་ངོས་སུ་མེ་སྲོག་འཛིན་པའི་རྫས་བུད་ཤིང་གི་རྒྱུ་ལས་ཡམ་ཤིང་ཟུར་གསུམ་སོར་བཅུ་གཉིས་པར་མར་ནག་དང་ཚིལ་ཞུན་གྱིས་སྦགས་པ། རྩ་བའི་རྫས་དུག་ཤོག་ལ་དགྲ་བགེགས་ཀྱི་རཱུ་པ་མིང་རུས་བླ་དྭགས་གནས་ཡིག་དང་བཅས་པ་གྲངས་ལྡན། དྲག་པོའི་རྫས་ཤ་སྣ་བག་ཕྱེད་དང་བསྲེས་པའི་རིལ་བུ་མིང་རུས་ཅན། གནད་དབབ་ཀྱི་རྫས་སྦལ་སྦྲུལ་ཉ་ཁྱི་ལ་སོགས་པའི་ཤ་དུག་སྣ་དང་བསྲེས་པའི་རིལ་བུ། གསོད་པའི་རྫས་ལྕགས་ཟངས་རྦབ་རྡོའི་ཕྱེ་མ་དང་ཚེ་གསུམ། མྱོས་པའི་རྫས་མར་ནག་རྨེ་མནོལ་གྱི་ཁྲག་དང་སྦྱར་བ། ཚ་བའི་རྫས་ཏིལ་དང་ཡུངས་དཀར་ཚ་བ་གསུམ་སྟེ། དེ་ལྟར་རྫས་བདུན་པོ་རྣམས་ལྕགས་སམ་བསེ་ཕོར་ཐོད་པ་ལ་སོགས་པའི་སྣོད་དུ་གྲལ་རིམ་གྱིས་འགོད། རྩ་བའི་རྫས་ཤོག་ལིང་ཅིས་

ཀྱང་མ་འབྱོར་ན་རཱུ་པ་འབྲུ་ནག་གི་ཟན་ལ་བཟོས་པས་ཀྱང་རུང་། གཡོན་ངོས་སུ་ལྕགས་ཕྱེ་དུག་སྣ་རྡོ་ཕྱེ་ར་ཁྱིའི་ཁྲག་ཤ་ཆེན་སྲན་ཆེན་རྣམས་མར་ནག་ལ་བསྲེས་པའི་གཏོར་མ་གྲུ་གསུམ་ཐེབ་ཀྱུ་གསུམ་ལྡན་དང་། མེ་ལྷའི་གཏོར་མ་ཟུར་གསུམ་གཡས་གཡོན་དུ་སྨན་ཕུད་དང་རཀྟ། མདུན་དུ་ཁྲག་གི་མཆོད་ཡོན་སོགས་དྲག་མཆོད་ཕྲེང་ཚར་ཆ་གཉིས་བཅས་འདས་མ་འདས་ཉིས་རིམ་དུ་བཤམ། སྣོད་དང་རྫས་ཐམས་ཅད་དབྱིབས་གྲུ་གསུམ་ཁ་དོག་ནག་པོ་འབའ་ཞིག་པ་བྱ། སློབ་དཔོན་དང་ཐབ་ཀྱི་བར་དུ་མེ་ཡོལ་གངས་རི་བཾ་གྱིས་བྲིས་པའི་ནང་གི་ཆར། ནང་མཆོད། ལས་བུམ། རྡོ་དྲིལ་བར་དུ་དགང་བླུགས་ཁ་སྦྱར་བ། འབྲུ་ནག་གི་མེ་ཏོག་བཅས་འགོད། གཞན་ཡང་གདབ་ཁའི་ཆས། ཚིལ་ཞུན་དང་མར་ནག་བསྲེས་པའི་མར་ཁུ། ཐུན་རྫས། རླུང་གཡབ། གོས་ཟུང་། སོ་རྩི་སོགས་ཉེ་བར་མཁོ་བའི་ཡོ་བྱད་རྣམས་ཚང་བར་འདུ་བྱས་ལ། སློབ་དཔོན་བདག་གི་རྣལ་འབྱོར་གནས་པས་རྒྱུ་དུས་ཀྱི་ཀུན་སློང་སྙིང་རྗེ་བྱང་སེམས་ཀྱིས་དྲངས་པའི་ཞིང་བཅུ་སྒྲོལ་བའི་ཞེ་སྡང་གི་དཔའ་ངར་དང་ལྡན་པས་དྲག་པོའི་ཆས་གོས་ཀྱིས་བརྒྱན་ཏེ་མགར་བའི་འདུག་སྟངས་ཀྱིས་ཁ་ལྷོར་ཕྱོགས་པས་འཁོད་ལ། མཆོད་རྫས་རྣམས་བསང་ཆུ་དང་ལས་སྔགས་ཀྱིས་བསང་།] སྭ་བྷཱ་ཝ[ས་སྦྱང་།] སྟོང་པའི་ངང་ལས་གནས་ཁང་འོག་མིན་གསང་ཆེན་རོལ་པའི་གཞལ་མེད་ཁང་ཕུན་སུམ་ཚོགས་པར་བྷཉྫ་འབར་བའི་སྣོད་ཡངས་ཤིང་རྒྱ་

ཆེ་བ་རྣམས་སུ་དགྲ་བགེགས་བསྒྲལ་བ་ལས་བྱུང་བའི་ཁྲག་གི་མཆོད་ཡོན། ཆུ་སེར་གྱི་ཞབས་བསིལ། དབང་པོའི་མེ་ཏོག །ཚིལ་ཆེན་གྱི་དུད་སྤྲིན། ཞུན་ཆེན་གྱི་སྒྲོན་མེ། མཁྲིས་པའི་དྲི་ཆབ། མཱཾ་སའི་ཞལ་ཟས། ཐོད་རྔའི་རོལ་མོ་སོགས་རང་བྱུང་དུར་ཁྲོད་ཀྱི་དམ་རྫས་འདོད་ཡོན་གྱི་རྣམ་པ་མ་ཚང་བ་མེད་པ་ཁྲག་འཐུང་ཁྲོ་བོའི་དཀྱིལ་འཁོར་གྱི་འཁོར་ལོའི་ཞིང་ཐམས་ཅད་དུ་ཁྱབ་པར་འཆར་བས་ནམ་མཁའི་མཐའ་ཀླས་པར་གང་བར་[བསམ།] ཨོཾ་བཛྲ་ཨརྒྷཾ་ཨཱཿཧཱུྃ༔ [སོགས་ནས།] ཤཔྡ་པཉྩ་ཀཱ་མ་གུ་ཎ་ཨཱཿཧཱུྃ༔ [ཞེས་དང་།] ཨོཾ་ཨཱཿཧཱུྃ་མཧཱ་སརྦ་པཉྩ་ཨ་མྲྀ་ཏ་མཧཱ་རཀྟ་མཧཱ་བ་ལིཾཏ་ཏེ་ཛྭ་བ་ལིཾཏ་བ་ལ་བ་ཏེ་གུཧྱ་ས་མ་ཡ་ཧཱུྃ་ཧྲཱི་ཋཱ༔ [ལན་གསུམ། བསྲེག་རྫས་རྣམས་བསང་སྦྱང་།] སྟོང་པའི་ངང་ལས་ཨ་ལས་བྱུང་བའི་དམར་གྱི་དུང་ཆེན་སྟོང་གསུམ་དང་མཉམ་པའི་ནང་དུ་ནྲྀ་དང་ཏྲི་ལས་དགྲ་བགེགས་ཀྱི་ཤ་ཁྲག་ཕུང་ཁམས་སྐྱེ་མཆེད་ལས་བྱུང་བའི་བསྲེག་རྫས་རྣམས་ངོ་བོ་ཟག་མེད་ཡེ་ཤེས་ཀྱི་བདུད་རྩི་ལ་རྣམ་པ་སོ་སོའི་མཚན་ཉིད་ཡོངས་སུ་རྫོགས་པས་ནམ་མཁའི་ཁམས་གང་བར་[བསམ་ཞིང་། རྩ་སྔགས་དང་།] ནྲྀ་ཏྲི་ཨ་མུ་ཀཱ་

མཱ་ར་ཡ་ཛ་ཛཿ [ཞེས་ལན་གསུམ་གྱིས་བརླབ་བོ། །དེ་ནས་གདོལ་བཤན་རྨེ་ཡུག་ལ་སོགས་པའི་ལག་ནས་བྱུང་བའི་མེ་ཐོགས་ལ།] ཨོཾ་ཨགྣ་ཡེ་ཧ་བྱ་ཀ་བྱ་ཛཿ ཆེ་གེ་མོ་མཱ་ར་ཡ་ཛྭ་ལ་རཾ། ཞེས་རླུང་གཡབ་དང་བཅས་ཏེ་མེ་སྦར། ཨོཾ་ཨགྣ་ཡེ་ཆེ་གེ་མོ་ཛྭ་ལ་རཾ། ཞེས་བླུགས་གཟར་གྱི་མར་ནག་ཁུ་བས་མེ་གསོ། ཐོག་མར་འཇིག་རྟེན་པའི་མེ་ལྷ་མཆོད་པའི་དོན་དུ། མེ་ཐབ་[བསང་སྦྱང་།] སྟོང་པའི་ངང་ལས་ཧཱུྃ་ཡིག་ལས་བྱུང་བའི་དྲག་པོའི་ཐབ་ཁུང་མཐིང་ནག་གྲུ་གསུམ་བང་རིམ་གསུམ་ལྡན་ཆོས་ཀྱི་དབྱིངས་དང་མཉམ་པའི་ནང་དུ། ར་སྐྱེས་ཁམ་ནག་ཞིང་གི་ཐོད་པའི་སྒ་དང་མིའི་ལྤགས་པས་གཡོགས་ཤིང་། སྦྲུལ་ནག་གི་གོང་སྨེད་བྱས་པའི་སྟེང་དུ་རཾ་ཡིག་ཡོངས་སུ་གྱུར་པ་ལས། ཟ་བྱེད་མེ་ལྷ་མཐིང་ནག་ཁྲོ་གཏུམ་འཇིགས་སུ་རུང་བ། ཞལ་གཅིག་ཕྱག་བཞིའི་དང་པོས་ཧོམ་གཟར་དང་མེ་ཕུང་། འོག་མ་གཉིས་ཀྱིས་བགྲང་ཕྲེང་དང་དབྱུག་གུ་བསྣམས་པ། དུར་ཁྲོད་ཀྱི་ཆས་ཀྱིས་བརྒྱན་ཅིང་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཤར་ལྷོའི་མཚམས་ནས་ཡེ་ཤེས་ཀྱི་མེ་ལྷ་འཁོར་དང་བཅས་པ་སྤྱན་དྲངས་

པར་[བསམ་ཞིང་། སྐྱབས་སྦྱིན་རྒྱས་མཐེ་བོང་རྣ་བའི་དྲུང་དུ་གཡབ་ལ།] ཨོཾ༔ དད་པ་དང་ནི་དམ་ཚིག་གིས༔ ཚུར་བྱོན་ཚུར་བྱོན་འབྱུང་པོ་ཆེ༔ དགྲ་བགེགས་གདུག་པ་ཚར་གཅོད་ཕྱིར༔ དྲང་སྲོང་ཆེན་པོ་ད་ཚུར་གཤེགས༔ ཆིབས་སུ་ར་སྐྱེས་ཁམ་པ་ཆིབས༔ ཕྱག་ན་མེ་ཡི་འཁོར་ལོ་བསྣམས༔ ཕྲིན་ལས་སྒྲུབ་ཕྱིར་གཤེགས་སུ་གསོལ༔ ཨོཾ་ཨགྣ་ཡེ་ཨེ་ཧྱེ་ཧི་ས་མཱ་ཛ༔ [ཞེས་སྤྱན་དྲངས། ཁྲག་གི་མཆོད་ཡོན་དང་ཆུ་སེར་གྱི་ཞབས་བསིལ་སྒྲེང་ལ།] ཨོཾ་ཨགྣ་ཡེ་དེ་བ་བཛྲ་ཨརྒྷཾ་པྲ་ཏཱིཙྪ་སྭཱཧཱ། [དེ་བཞིན་དུ།] བཛྲ་པཱདྱཾ་[སྦྱར་བས་ཕུལ། བཞུགས་སུ་གསོལ་བ་ནི།] འབར་བའི་རྒྱལ་པོ་ཆེན་པོ་ཁྱོད༔ འདོད་པའི་བསམ་པ་བསྒྲུབ་བྱའི་ཕྱིར༔ བདག་གི་གནས་མཆོག་དམ་པ་འདིར༔ འབར་བའི་གདན་ལ་བཞུགས་སུ་གསོལ༔ ཛཿཧཱུྃ་བཾ་ཧོཿ ས་མ་ཡ་ཏིཥྛ་ལྷན༔ [ཕྱག་འཚལ་བ་ནི།] ཧཱུྃ༔ ཚངས་པའི་འཇིག་རྟེན་མགོན་གྱི་སྲས༔ བདུད་དང་དགྲ་བགེགས་བརླག་མཛད་ཅིང་༔ ཇི་ལྟར་འདོད་པའི་དོན་སྒྲུབ་པ༔ གཟི་བརྗིད་རྒྱལ་པོར་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏཱིཙྪ་ཧོཿ [མཆོད་པ་ནི།] ཧཱུྃ༔ སྟོང་གསུམ་

ཞིང་ཀུན་ཡོངས་གང་བའི༔ རྨད་བྱུང་འདོད་པའི་ཉེར་སྤྱོད་ལྔ༔ ཤ་ཁྲག་དབང་པོ་ཚིལ་རུས་དང་༔ གཉིས་མེད་མཉམ་སྤྱོད་ཨམྲྀ་ཏ༔ བ་ལིང་གཏོར་མ་རཀྟ་སོགས༔ ཟ་བྱེད་མེ་ལྷའི་ཚོགས་ལ་འབུལ༔ དགྲ་བགེགས་སྒྲོལ་ཕྱིར་བཞེས་སུ་གསོལ༔ ཨོཾ་ཨགྣ་ཡེ་ཀྲོ་ངྷ་ས་པ་རི་ཝཱ་ར་བཛྲ་པུཥྤེ་པྲ་ཏཱིཙྪ་སྭཱཧཱ༔ [དེ་བཞིན་དུ་]ཤཔྡའི་[བར་དང་།] པཉྩ་ཀཱ་མ་གུ་ཎ། སརྦ་པཉྩ་ཨ་མྲྀ་ཏ། མཧཱ་རཀྟ། མཧཱ་བ་ལིང་ཏ། [སོ་སོ་ལ་གོང་གི་སྔགས་དང་།] མཇུག་ཏུ་པཱུ་ཛ་ཁཱ་ཧི་[སྦྱར་བ་འབུལ། དེ་ནས་རྫས་རྣམས་ལས་ཐོག་མར་དགང་བླུགས་འབུལ་བ་ལ།] མེ་ལྷ་ཁྲོས་པའི་ཞལ་རབ་ཏུ་གདངས་པའི་ལྗགས་རྡོ་རྗེ་རྩེ་མོ་གཅིག་པར་རཾ་དང་དགང་བླུགས་ཀྱི་རྩེར་ཧཱུྃ་ཡིག་མཐིང་ནག་འོད་ཟེར་གྱི་ཕུང་པོར་འབར་བས་མཚན་པས་སྲེག་རྫས་ཀྱི་བདུད་རྩིའི་རྒྱུན་དྲངས་ཏེ་གསོལ་བར་[བསམ་ཞིང་། ལག་གཉིས་ཁྲོ་བོའི་ཁུ་ཚུར་གྱིས་དགང་བླུགས་བཟུང་ནས།] ཨོཾ་ཨགྣ་ཡེ་སྭཱཧཱ༔ [ཞེས་གཡོན་པའི་བླུགས་གཟར་བདུན་གྱིས་གཡས་པའི་དགང་གཟར་བཀང་བའི་དགང་བླུགས་ཁ་སྦྱར་པུས་མོའི་ཕྱི་ལས་ནང་དུ་མི་འདའ་བར་གཡོན་དུ་བསྐོར་ཞིང་།] ཨོཾ་ཨགྣ་ཡེ་དཱི་བྱ་དཱི་བྱ་བི་ཤུངྔྷེ་མཧཱ་ཤྲཱི་ཧ་བྱ་ཀ་བྱ་ཝ་ཧ་ན་ཡ་བདག་ཅག་དཔོན་སློབ་འཁོར་དང་བཅས་པ་

རྣམས་ལ་གནོད་ཅིང་འཚེ་བར་བྱེད་པའི་འགལ་རྐྱེན་མི་མཐུན་པའི་ཕྱོགས་སྤྱི་དང་ཁྱད་པར་བསམ་པ་ངན་པ་ཡིད་ལ་འཆང་ཞིང་སྦྱོར་བ་རྩུབ་མོ་ལག་ཏུ་ལེན་པའི་ཆེ་གེ་མོ་ཐམས་ཅད་ཚར་གཅོད་པའི་ཕྲིན་ལས་མཛད་དུ་གསོལ། སརྦ་ཤ་ཏྲུཾ་མཱ་ར་ཡ་ཕཊ༔ [ཅེས་ལན་གསུམ་དུ་འབུལ། ཡམ་ཤིང་ལ།] ཨོཾ་རཱུ་དྲ་བྲྀཀྵ་ཡ་སྭཱཧཱ༔ [ཞེས་དང་། མར་ཁུ་ལ།] ཨོཾ་ཨགྣ་ཡེ་སྭཱཧཱ༔ [ཞེས་སོ་སོར་སྤེལ་ཚིག་གོང་ལྟར་ལས།] ཐམས་ཅད་མཱ་ར་ཡ་རྦད། [ཅེས་བསྒྱུར་ཏེ་འབུལ། རྫས་གཞན་རྣམས།] ཧཱུྃ༔ དམར་ནག་མེ་ཡི་ཀློང་དཀྱིལ་ནས༔ ཟ་བྱེད་མེ་ལྷ་འཁོར་བཅས་ལ༔ དགྲ་བགེགས་ཕུང་ཁམས་བླ་ཚེ་སྲོག༔ འདོད་རྒུར་འཆར་བའི་མཆོད་པ་འབུལ༔ དྲག་པོའི་གནད་འབེབས་གསོད་པའི་དུག༔ མྱོས་བྱེད་ཚ་བའི་རྫས་རྒོད་འདིས༔ དམིགས་བྱ་དགྲ་བགེགས་བརླག་པར་མཛོད༔ ཨོཾ་ཨགྣ་ཡེ་ཀྲོ་ངྷ་ཡེ་དགྲ་བགེགས་ཤ་ཏྲཱུྃ་མཱ་ར་ཡ་ཛྭ་ལ་རཾ་ཧཱུྃ་ཕཊ༔ [ཅེས་རྩ་བའི་རྫས་ནས་ཚ་རྫས་ཀྱི་བར་ལན་བདུན་སོགས་ཇི་ལྟར་རིགས་པ་ཕུལ་བའི་མཐར། བསྟོད་པ་ནི།] ཧཱུྃ༔ མེ་ལྷའི་རྒྱལ་པོ་དྲང་སྲོང་མཆོག༔ བདུད་བཞི་འཇོམས་མཛད་ཕྱག་བཞི་པ༔ ལས་ཀུན་སྒྲུབ་མཛད་འོད་པོ་

ཆེ༔ སྔོན་ཚེ་དུས་ན་ལྷ་ཡི་མཆེད༔ ད་ལྟ་རྣལ་འབྱོར་སྒྲུབ་པའི་མཆེད༔ གདུག་པ་ཀུན་སྒྲོལ་ཁྱོད་ལ་བསྟོད༔ [ཅེས་བསྟོད།] ན་མོ་རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་བསྲེག་རྫས་ལྷའི་ཞལ་དུ་འབུལ་བ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ལ་གནོད་ཅིང་འཚེ་བར་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས། ལོག་འདྲེན་འབྱུང་པོ། དམ་སྲི་སྒབ་འདྲེ། རྒྱ་འདྲེ་འགོང་པོ། མཐའ་བཞིའི་དམག་དཔུང་། བྱད་མ་ལྷ་སྲུང་དང་བཅས་པ་ཐམས་ཅད་ཚར་གཅོད་པར་མཛད་དུ་གསོལ། ཁྱད་པར་རྣལ་འབྱོར་པ་བདག་ཅག་འཁོར་དང་བཅས་པ་ལ་གནོད་ཅིང་བར་དུ་གཅོད་པར་བྱེད་པ་བསྒྲལ་བའི་ཞིང་དུ་གྱུར་པའི་དགྲ་བགེགས་ཆེ་གེ་མོ་གཟུགས་ལིངྒ་ལ་བྲིས་ཤིང་མིང་བྱང་དམར་གྱི་དཀྱུས་སུ་བཀོད་པ་འདི་ཉིད་ལོ་དང་ཟླ་བར་མ་བཞག་ཞག་དང་ཟ་མར་མ་འགྱངས་པར་མྱུར་བ་ཉིད་དུ་སོད་ལ་མིང་ཙམ་བརྡ་ཙམ་ཡང་མ་ལུས་པར་ཐལ་བའི་རྡུལ་དུ་བརླག་པའི་ཕྲིན་ལས་མཛོད་ཅིག༔ སརྦ་ཤ་ཏྲཱུཾ་མཱ་ར་ཡ་ཕཊ༔ [ཅེས་འདོད་དོན་གསོལ།] ཨོཾ་ཨགྣ་ཡེ་

ཛྭ་ལ་ཛྭ་ལ་གཙྪ་མུཿ[ས། ཡེ་ཤེས་ཀྱི་མེ་ལྷ་ཐབ་ཀྱི་ཤར་ལྷོར་གཤེགས་ནས་དཔང་པོ་མཛད་པར་བསམ་མོ། །དེ་ནས་འདས་པའི་མེ་ལྷ་མཆོད་པ་ནི། བུད་ཤིང་ཁ་གསོས་ལ་བསང་སྦྱང་།] དམ་ཚིག་མེ་ལྷའི་ལྟོ་བའི་དབྱིངས༔ འབྱུང་བ་རིམ་བརྩེགས་རི་རབ་སྟེང་༔ [ཞེས་སོགས་ནས།] ལྷ་ཆེན་ཕོ་མོ་བསྣོལ་བའི་སྟེང་༔ འབར་བ་ཧཱུྃ་གི་འཕྲོ་འདུ་ལས༔ དཔལ་ཆེན་རྡོ་རྗེ་གཞོན་ནུ་ནི༔ མཐིང་ནག་དབུ་གསུམ་ཕྱག་དྲུག་པ༔ [ཞེས་སོགས་ལས་བྱང་བཞིན་ལྷ་ཚོགས་དམ་ཚིག་པ་བསྐྱེད་ཅིང་ཡེ་ཤེས་པ་སྤྱན་དྲངས་པའི་བར་དུ་སོང་ནས།] ཨོཾ་ཤྲཱི་མཧཱ་ཀྲོ་ངྷ་རཱ་ཛ་ས་པ་རི་ཝཱ་ར་བཛྲ་ཨརྒྷཾ་པྲ་ཏཱིཙྪ་སྭཱཧཱ། [དེ་བཞིན་དུ།] པཱདྱཾ་[སྦྱར་བ་བཅས་ཀྱིས་དྲག་པོའི་ཆུ་གཉིས་ཕུལ་ལ། བཞུགས་གསོལ་ཕྱག་འཚལ་མཆོད་པ་གཞུང་བཞིན་སོང་མཐར། སྲེག་རྫས་ཀྱི་ཐོག་མར་དགང་བླུགས་འབུལ་བ་ནི།] ལྷ་ཚོགས་ཐམས་ཅད་སྐུ་མདོག་ཆར་སྤྲིན་ལྟར་གནག་ཅིང་བཟོད་པར་དཀའ་བའི་གཟི་བརྗིད་ཅན་དྲག་པོའི་བསྲེག་བྱ་ཟ་བའི་ལས་ལ་རྔམས་པའི་ལྗགས་རྡོ་རྗེ་[ཞེས་པ་ནས་གཡོན་དུ་བསྐོར་བའི་བར་གཞན་སྔར་བཞིན་ལས། ཁྱད་པར་རྩ་སྔགས་ཀྱིས་དགང་ཞིང་]ཨགྣ་ཡེ་དཱི་བྱ་[སོགས་ཀྱི་སྤེལ་ཚིག་བཅས་འབུལ། དེ་ནས་དྲག་བསྐུལ་གསེར་སྐྱེམས་ནས་

བརྩམ་གཏུན་བརྡུང་གི་བར་སྨད་ལས་བཞིན་བསྒྲལ་ལས་རྫོགས་པར་བཏང་ལ་ལིངྒ་རྣམས་དུམ་བུར་གཏུབ། སླར་ཡང་ཐུགས་དམ་བསྐུལ་བ་སྔོན་དུ་འགྲོ་བས།] ཛཿ སྲིད་པའི་བཙོན་ཁང་དྲག་པོའི་ཨེ༔ བསྐལ་པའི་མེ་དཔུང་འབར་བའི་ཀློང་༔ གདུག་པའི་ཡམ་ཤིང་མར་ནག་ཚིལ༔ དམིགས་པའི་གཟུགས་རྟེན་དྲག་པོའི་རྫས༔ གནད་འབེབས་མྱོས་བྱེད་གསོད་པའི་མཚོན༔ ཚ་བའི་ནད་སྐྱེད་རྫས་རྒོད་རྣམས༔ བསྲེགས་པས་དགྲ་བགེགས་གདུག་པའི་ཚོགས༔ ལུས་ངག་རྡུལ་དུ་བསྲེགས་ནས་ཀྱང་༔ རྗེས་ཤུལ་ལྷག་མ་མེད་པར་མཛོད༔ [ཅེས་དང་། སྙིང་བོའི་ཤམ་དུ།] སརྦ་ཤ་ཏྲཱུཾ་བིགྷྣཱན་རཱུ་པ་ཙིཏྟ་ཨགྣེ་ཛྭ་ལ་རཾ་ཁཱ་ཧི་ཁཱཧི༔ [ཞེས་བཏགས་པས་མེ་སྲོག་འཛིན་པ་ནས་ཚ་བའི་རྫས་ཀྱི་བར་བརྒྱ་རྩ་སོགས་འབུལ་ཞིང་། །རྫས་རེ་རེའི་མཇུག་ཏུ་དགང་བླུགས་སྐབས་ལྟར་སྤེལ་ཚིག་སྦྱར། དེ་ལྟར་རྫས་རྣམས་རྫོགས་ནས་དམིགས་བསལ་བགེགས་མི་བསྲུན་པ་སོགས་ལ་ལྕགས་སླང་དུ་མར་ནག་བསྐོལ་བའི་མེ་ལྕེ་སླེབ་བའི་སར་དམིགས་བྱའི་ལིངྒ་བཀྲམ་ལ་དྲག་བསྐུལ་གསེར་སྐྱེམས་འགུགས་འདྲེན་རྣམས་བྱས་ནས་བཞེས་སྒྲ་དྲག་པོ་དང་བཅས་ཛ་གད་རྫས་ལྡན་གྱིས་མེ་སྦར་ཏོ་ཧོམ་མཆོད་བྱ་བ་ཡིན་ནོ། །དེ་ནས་ལས་བྱང་བཞིན་བསྟོད་དེ།] ན་མོ། དུས་གསུམ་སངས་རྒྱས་ཐམས་ཅད་ཀྱི་སྐུ་

གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་བདག་ཉིད། ཁྲག་འཐུང་ཁྲོ་བོ་ཐམས་ཅད་ཀྱི་སྤྱི་དཔལ། བདུད་དང་བདུད་ཀྱི་ཕྱོགས་ཐམས་ཅད་སྒྲོལ་བའི་དཔའ་བོ། དཔལ་ཆེན་རྡོ་རྗེ་གཞོན་ནུ་སྤྲུལ་འཁོར་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་ཁྱེད་རྣམས་ལ་ཕྲིན་ལས་སུ་གསོལ་བ་ནི། སངས་རྒྱས་ཀྱི་བསྟན་པ་དང་[སོགས་གོང་བཞིན་འདོད་དོན་གསོལ། སླར་ཡང་དགང་བླུགས་སྔར་ལྟར་ཕུལ་མཐར།] ཨོཾ་བཛྲ་ཏམྦུ་ལ་ཡ་སྭཱཧཱ། [ཞེས་སོ་རྩི་དང་།] ཨོཾ་བཛྲ་ཝསྟྲ་ཡེ་སྭཱཧཱ། [ཞེས་གོས་ཟུང་ཕུལ། སྔགས་ཙམ་གྱིས་མཆོད་ཅིང་ཤླཽ་ཀ་གཅིག་གིས་བསྟོད།] མ་རྙེད་ཡོངས་སུ་མ་ཚང་[དང་། །སོགས་དང་ཡི་གེ་བརྒྱ་པས་ནོངས་བ་བཤགས།] ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །[ཅེས་སོགས་དང་།] བཛྲ་མུཿ[ས་ཡེ་ཤེས་པ་དབྱིངས་སུ་གཤེགས། དམ་ཚིག་པ་རང་ལ་བསྡུ། དེ་ནས་མེ་ལྷའི་གཏང་རག་གི་དོན་དུ་བུད་ཤིང་བསྣན་ལ་བསང་ཆུས་བྲན་ཏེ།] སླར་ཡང་འཇིག་རྟེན་པའི་མེ་ལྷ་དཔང་པོར་བཞུགས་པ་བཛྲ་ས་མཱ་ཛཿས། དམ་ཚིག་པ་དང་དབྱེར་མེད་དུ་གྱར་པར་[བསམ་ལ། སྔར་བཞིན་དགང་བླུགས་དང་བསྲེག་རྫས་ལྷག་མ་རྣམས་སྤེལ་ཚིག་མེད་པའི་སྔགས་ཀྱིས་འབུལ་ཞིང་

སོ་རྩི་དང་གོས་ཟུང་ཀྱང་ཕུལ་མཐར་ཉེར་སྤྱོད་ཀྱིས་མཆོད།] མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །[ཞེས་བསྟོད།] ཨོཾ་ཨགྣ་ཡེས་པ་རི་ཝཱ་ར་མཧཱ་བ་ལིཾ་ཏ་པཱུ་ཛ་ཁཱ་ཧི། [ཞེས་ལན་གསུམ་གྱིས་གཏོར་མ་ཕུལ་ལ་སྔར་བཞིན་འདོད་དོན་གསོལ། ནོངས་པ་བཤགས་ནས།] བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱི་གཤེགས། །ཇི་བཞིན་དུས་སུ་སླར་བྱོན་ལ། །བདག་གི་འདོད་པ་ཐམས་ཅད་སྒྲུབས། [ཞེས་སྙན་མནན་ཏེ།] བཛྲ་མུཿ[ས།] ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་[བསམ་ལ། མེ་ལོངས་སྐབས་ཡོད་ཀྱང་མི་བཞག་པར་དུག་ཁྲག་གི་ཆུས་བསད་པའི་ཐལ་བ་ཟློག་པའི་ཐལ་རྡེབ་དང་འབྲེལ་བར་དགྲ་ཕྱོགས་སུ་རླུང་ལ་བསྐུར་བའམ། སྣོད་ངན་དུ་བླུགས་ལ་མཆོད་རྟེན་ནམ་ལམ་རྒྱ་གྲམ་དུ་མནན། ལས་གསོར་མི་རུང་བའི་གཟིར་མནན་བྲོ་ཡིས་རྒྱས་གདབ། དགེ་བ་བསྔོ་ཞིང་ཤིས་པ་བརྗོད་པས་མཐའ་བརྒྱན་པར་བྱའོ། །ཞེས་པའང་མཐུ་ཆེན་ལང་ལབ་གཉིས་པ་བྱང་ཆུབ་རྡོ་རྗེ་དང་། སྡོམ་བརྩོན་པདྨ་བློ་གྲོས་བཟང་པོ། སྔགས་

བན་ཆོས་གྲགས་རྒྱ་མཚོ་རྣམས་ནས་མངོན་སྤྱོད་ཀྱི་ཆ་རྐྱེན་ལ་བསྔགས་པའི་རྟེན་དང་བཅས་ཏེ་བསྐུལ་བའི་ངོར། འཇིགས་བྲལ་ཡེ་ཤེས་རྡོ་རྗེས་དྲག་པོའི་ལས་ཀྱི་མཐའ་སྡུད་མན་ངག་ལག་ཁྲིགས་སུ་བསྡེབས་ཏེ་སྦྱར་བ་ལས། ཡི་གེ་པ་ནི་བསྐུལ་བ་པོ་ཕྱི་མ་ཉིད་ཀྱིས་བགྱིས་པའོ། །འདིས་ཀྱང་བསྟན་དགྲའི་དཔུང་ཚོགས་མཐར་བྱེད་པའི་རྒྱུར་གྱུར་ཅིག།། །། ཛཡནྟུ།། །།]

རྡོ་རྗེ་ཕུར་པ་སྤུ་གྲི་རེག་ཕུང་གི་དབང་ཆོག་ཕྲིན་ལས་བཅུད་ཐིག

༄༅། །རྡོ་རྗེ་ཕུར་པ་སྤུ་གྲི་རེག་ཕུང་གི་དབང་ཆོག་ཕྲིན་ལས་བཅུད་ཐིག་ཅེས་བྱ་བ་བཞུགས་སོ། །

ཨོཾ་སྭསྟི། རིགས་ཁམས་རྡོ་རྗེ་གཞོན་ནུའི་སྐུར། །སྨིན་མཛད་བླ་མར་གུས་བཏུད་ནས། །ཕྲིན་ལས་འདུས་པའི་བཅུད་ཐིག་གི། །དབང་བསྐུར་མཚམས་སྦྱོར་འཇུག་བདེར་སྤེལ། །[དེ་ཡང་རྡོ་རྗེ་ཕུར་པ་སྤུ་གྲི་རེག་ཕུང་གི་དཀྱིལ་འཁོར་དུ་སྐལ་ལྡན་སློབ་མ་གཞུག་ཅིང་སྨིན་པར་བྱེད་པའི་ཚུལ་ལ། སྦྱོར་བ་རས་བྲིས་ཀྱི་དཀྱིལ་འཁོར་རམ་མཎྜལ་ལ་ཚོམ་བུ་ལྷ་གྲངས་བཀོད་པའི་ཁར་འཕྲུལ་སྟེགས་ཨེ་ཁྲམ་ལ་བརྟེན་པའི་གཙོ་ཕུར་བྱུག་སོགས་གསུམ་གྱིས་གཟི་བྱིན་བསྐྱེད་པ་བརྟན་པར་བཙུགས་པའི་སྟེང་གི་མཉྫིར་རྣམ་བུམ་སོ་ལྔའི་བཅུད་ལྡན་ཁ་རྒྱན་མགུལ་ཆིངས་དང་ལྡན་པ་འགོད། དེའི་གཡས་སུ་གསང་ཐོད་ཨ་མྲྀ་མངར་གསུངཆང་དང་སྦྱར་བས་བཀང་བ། གཡོན་དུ་རིག་མའི་ཙཀླི་དང་ཤེལ་རྡོ། མདུན་དུ་ཚེའི་འབྲང་རྒྱས་དང་དངོས་གྲུབ་ཀྱི་རྫས། རྒྱབ་ཏུ་དཔལ་གཏོར་སྐུ་ཙཀ་དར་གདུགས་ཀྱིས་སྤྲས་པ། མདུན་རྒྱབ་གང་བདེར་སྨན་རཀ་གཏོར་མ་ཕྱི་ནང་གི་ཉེར་སྤྱོད་བཅས་བཀོད་མཛེས་སུ་བསྟར། གཞན་ཡང་ཚོགས་གཏོར་མཎྜལ་འབེབས་རྫས་སོགས་འདིར་དགོས་པའི་ཡོ་བྱད་རྣམས་ཚང་བར་འདུ་བྱས་ལ། ཕྲིན་ལས་ཀྱི་གཞུང་བསྲངས་ཏེ་

བདག་མདུན་དབྱེར་མེད་དུ་བསྒྲུབས་ནས་བཟླས་པ་ཇི་ཙམ་ནུས་པའི་མཐར།] བུམ་པ་རང་བྱུང་གི་གཞལ་ཡས་ཁང་དུ་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བར་[མོས་ནས།] རང་སྲོག་སྔགས་ཀྱི་འོད་ཟེར་གཟུངས་ཐོག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་རྒྱུད་བསྐུལ། །དེ་དག་སྐུ་ལས་བྱང་སེམས་བདུད་རྩིའི་རྒྱུན། བབས་པས་བུམ་ཆུར་དབྱེར་མེད་རོ་གཅིག་གྱུར། །[ཅེས་གཟུངས་ཐག་འཇུས་ཏེ་གཙོ་སྔགས་ཅི་འགྲུབ་བཟླས་མཐར་འབྲུ་གསུམ་གྱིས་མཆོད་ཡོན་ཕུལ་ལ།] ལྷ་རྣམས་ཆགས་པ་ཆེན་པོས་རྡོ་རྗེ་བདུད་རྩིའི་ངོ་བོར་ཞུ་སྟེ་བུམ་པའི་ཆུ་དང་རོ་གཅིག་ཏུ་གྱུར་པར་[མོས།] ལས་བུམ་གྱི་ནང་དུ་ཉི་མ་ལ་གནས་པའི་ཧཱུྃ་ཡིག་འཕྲོ་འདུས་ཡོངས་སུ་འགྱུར་པ་ལས་ཁྲོ་བོ་བདུད་རྩི་འཁྱིལ་བ་མཐིང་ནག་ཕུར་བུ་དང་ལྕགས་ཀྱུ་འཛིན་པའི་སྐུར་གསལ་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ༔ [ཅེས་ཅི་རིགས་བཟླས་པས།] ཁྲོ་བོ་བདུད་རྩི་འཁྱིལ་པའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་[བསམ། སྲུང་མའི་མཆོད་གཏོར་དང་། ཚོགས་མཆོད་བསྒྲལ་བསྟབ་ཡན་

བྱས་ལ་རིག་པའི་མེ་ཏོག་དོར་སྟེ་གནང་བ་ནོད། དབང་དངོས་ལ། སློབ་བུ་རྣམས་སྒོའི་ཕྱི་རོལ་དུ།] ཇི་ལྟར་བལྟམས་པ་[སོགས་ཀྱིས་ཁྲུས་ནས་དབྱུང་། གྲལ་དུ་འཁོད་པ་ལ། བགེགས་གཏོར་]ཨ་མྲྀ་ཏ[ས་བསང་།] སྭ་བྷཱ་ཝ[ས་སྦྱང་།] སྟོང་པའི་ངང་ལས་བྷྲཱུཾ་ལས་རིན་པོ་ཆའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་[གིས་བརླབ།] ཨོཾ་སརྦ་བྷཱུ་ཏ་ཨ་ཀརྵ་ཡ་ཛཿ[ས་མགྲོན་དགུག །] ཨོཾ་སརྦ་བིགྷྣཱ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་[སོགས་ཀྱིས་བསྔོས་ལ།] ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་རྣམས་ཀྱི་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུ་བཅོམ་ལྡན་འདས་རྡོ་རྗེ་གཞོན་ནུ་ཁྲོ་བཅུ་ཁྲ་ཕྱག་སྒོ་མ་བཀའ་སྡོད་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོས་བྱིན་གྱི་རླབས་ཀྱིས་དེང་འདིར་རྡོ་རྗེ་སློབ་མ་རྣམས་དཀྱིལ་འཁོར་དུ་འཇུག་ཅིང་དབང་བསྐུར་ཟབ་མོ་སྒྲུབ་པ་ལ་བར་དུ་གཅོད་པའི་བགེགས་ཚོགས་

ཐམས་ཅད་གཏོར་མ་འདིས་ཚིམས་པར་གྱིས་ལ་དཔག་ཚད་དང་རྒྱང་གྲགས་སུ་མ་གནས་པར་ཕྱིར་དེངས་ཤིག །གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་ཁྱོད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། སུམྦྷ་ནི༴ [སོགས་དྲག་སྔགས་ཡུངས་ཐུན་རོལ་མོ་དང་བཅས་པས་བསྐྲད།] ཨོཾ་བཛྲ་རཀྵ་རཀྵ་ཧཱུྃ་[ཞེས་བརྗོད་པས།] སྟེང་འོག་ཕྱོགས་མཚམས་ཐམས་ཅད་རྡོ་རྗེ་སྲུང་བའི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་འབར་བ་དང་བཅས་པས་མཚམས་བཅད་དེ་ཅིས་ཀྱང་མི་ཤིགས་པར་གྱུར་པར་[མོས། མེ་ཏོག་བཀྲམ་བསྡུ་བྱས་ལ།] འོ། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བདུད་བཞིའི་གཡུལ་ལས་རྣམ་པར་རྒྱལ་བ་དཔལ་ཆེན་ཧེ་རུ་ཀའི་གོ་འཕང་ལ་ཅི་ནས་ཀྱང་འགོད་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་སྨིན་བྱེད་དབང་བསྐུར་གྱི་རིམ་པ་ཟབ་མོ་གསན་ལ་དོན་རིམ་པ་གཉིས་ཀྱི་རྣལ་འབྱོར་ཚུལ་བཞིན་ཉམས་སུ་ལེན་པར་བགྱིའོ་སྙམ་པའི་ཀུན་སློང་རྣམ་པར་དག་པ་གསལ་བཏབ་ནས་གསན་འཚལ། དེ་ལ་འདིར་སྐབས་སུ་བབས་པའི་གསན་བྱ་གདམས་ཟབ་

ཁྱད་པར་ཅན་འདི་ཉིད་སློབ་དཔོན་གང་གིས་མཛད་ཅིང་གང་ལས་བརྒྱུད་ན། འོག་མིན་གྱི་གནས་སུ་བཅོམ་ལྡན་འདས་དཔལ་རྡོ་རྗེ་གཞོན་ནུས་འཁོར་རིགས་བཞིའི་སངས་རྒྱས་རྣམས་ལ་ཆོས་ཉིད་ཀྱི་རང་སྒྲས་བསྟན་པ་ལས། མཁའ་འགྲོ་མ་བདེ་བའི་འཁོར་ལོ་དང་། སློབ་དཔོན་པྲ་བྷ་ཧ་སྟི་ལས་བརྒྱུད་དེ། རིག་འཛིན་ཚེ། རྣམ་བཞིའི་ལས། ས་འོག་གཏེར། ཕྱག་རྒྱ་ཆེན་པོ་མཆོག་གི་དངོས་གྲུབ་རྣམ་པ་བཞི་ལ་མངའ་བརྙེས་པའི་ཨོ་རྒྱན་གྱི་སློབ་དཔོན་པདྨ་ཐོད་ཕྲེང་རྩལ་ལ་བཀའ་བབས། དེ་ཉིད་ཀྱིས་སྔོན་དུས་ལས་ཅན་རྗེ་འབངས་རྣམས་དང་འབྱུང་འགྱུར་གདུལ་བྱ་མཐའ་ཡས་པ་རྣམས་ཀྱི་ཁམས་དབང་སྐལ་པའི་ཁྱད་པར་དང་མཐུན་པར། །གསང་སྔགས་ཀྱི་ཆོས་སྒོ་ནམ་མཁའི་མཐས་ཀྱང་གཞལ་བར་དཀའ་བ་ཞིག་དབྱེ་བར་མཛད་པ་ལས། དམ་པའི་ཆོས་སྒྲུབ་པ་པོ་སྤྱིའི་བར་ཆད་བསལ་བ་དང་། ཐུན་མོང་གཙོ་བོར་བསྒྲུབས་པས་མཆོག་ཞར་ལ་འགྲུབ་ཅིང་ཁྱད་པར་སྙིགས་དུས་ཀྱི་དམ་སྲི་མ་རུངས་པ་མཐུ་བོ་ཆེ་རྣམས་ཀྱི་གཉེན་པོར་ཆེད་དུ་བསྔགས་པ་ཕྲིན་ལས་ཕུར་པ་རོལ་པའི་གདམས་པ་ཁྱད་པར་ཅན་རྒྱས་འབྲིང་བསྡུས་པ་

བསམ་གྱིས་མི་ཁྱབ་པ་བསྟན་ཅིང་། ཆ་ཤས་ཙམ་བཀའ་མ་སྙན་བརྒྱུད་དུ་བཞག །ཕལ་ཆེར་མ་འོངས་པའི་དོན་ལ་དགོངས་ནས་ཟབ་མོའི་གཏེར་དུ་གཏམས་པར་མཛད་པ་ལས། བིདྱཏྟོ་མ་ལ་འབུམ་སྡེའི་ཡང་སྙིང་དྲག་སྔགས་སྤུ་གྲིར་འབྲེལ་བ། རྣོ་ལ་ཚན་ཆེ་བ། སློབ་དཔོན་རྣམ་པ་གསུམ་གྱི་དགོངས་ཉམས་གཅིག་ཏུ་དྲིལ་ནས་ཁ་ཚང་དོན་འདྲིལ་དུ་གདམས་པ་ཟབ་དོན་ཐུགས་ཀྱི་ཉིང་ཁུ་སྤུ་གྲི་རེག་ཕུང་གི་ཆོས་སྐོར་འདི་ཉིད་གཞན་གང་ལའང་མ་སྤེལ་བར། ལྷོ་ནུབ་སྲིན་ཡུལ་དུ་ཕེབས་པའི་གཤེགས་སྐྱེལ་ལ་མཚོ་རྒྱལ་དཔོན་སློབ་གསུམ་བྱོན་པའི་སྐབས་སུ་ཕུར་པའི་བཀའ་བབས། ཚེ་རབས་ཀྱི་ལས་ཅན། གཏན་གྱི་གཟུངས་མར་དགོངས་ནས་སྐྱེལ་ལེན་གྱི་ཚུལ་དུ་མཁར་ཆེན་བཟའ་ཁོ་ན་ལ་མནོག་ཆོས་གཅིག་བརྒྱུད་དུ་གནང་། དེས་ཀྱང་ཆེས་ཆེར་སྙིགས་མའི་མཐར་ཐུགས་པའི་དུས་ཀྱི་གདུལ་བྱ་དགོངས་ཏེ་སུ་ལའང་མ་སྤེལ་བར་ལས་ཅན་ལམ་ལ་དབང་བའི་སྐྱེས་བུ་གཅིག་གི་སྙིང་ལ་བཀའ་རྒྱས་བཏབ་སྟེ་མི་སྣང་བར་སྦས་པ་ལས། དེང་དུས་གུ་རུ་ཡབ་ཡུམ་གྱི་ཐུགས་རྗེ་འགོགས་པ་མེད་པའི་མཐུ་ལས་རིག་པ་

འཛིན་པ་འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པ་རྩལ་གྱིས་རྨི་ལམ་དག་པའི་སྣང་ངོར་མཁའ་འགྲོ་མཚོ་རྒྱལ་མས་རྗེས་སུ་བཟུང་བའི་གསལ་སྣང་ལ་བརྟེན་ནས་ཟབ་མོ་དགོངས་པའི་གཏེར་ཁ་ཤུགས་འབྱུང་དུ་བརྡོལ་ཏེ་གཏན་ལ་ཕབ་པའི་ཟབ་ཆོས་ཏེ། བཀའ་གཏེར་རྡོ་རྗེ་ཕུར་པའི་ལམ་སྲོལ་རིང་བརྒྱུད་ཀྱི་ཆུ་བོ་འདུས་པ། ཉེ་བརྒྱུད་ཀྱི་དྲོད་ཚད་ལྡན་པ། བཀའ་བབས་ཀྱི་བྱིན་རླབས་ཆེ་བ། ཕྲིན་ལས་ཀྱི་ཚན་ཁ་འབར་བ། རྟེན་འབྲེལ་གྱི་སརྒྷ་མ་ལོག་པ་འདི་ཉིད་ཀྱི་དཀྱིལ་འཁོར་དུ་རྩ་བའི་དབང་བསྐུར་ཟབ་མོ་བསྒྲུབ་པར་བྱ་བ་ལ། །བདག་ཉིད་སློབ་དཔོན་གྱིས་བྱ་བའི་འོས་སུ་གྱུར་པ་རྣམས་གྲུབ་ཟིན་པས། ཁྱེད་རང་སློབ་མ་རྣམས་ཀྱི་ངོ་སྐལ་དུ་གྱུར་པ་སྨིན་བྱེད་དབང་གི་རིམ་པ་རྣམས་ཞུ་བའི་ཡོན་དུ་མཎྜལ་འབུལ་བར་ཞུ། [ཞེས་མཚམས་སྦྱར་ལ་མཎྜལ་འབུལ་དུ་གཞུག །] དེ་ནས་ཐལ་མོ་མེ་ཏོག་དང་བཅས་ཏེ་བླ་མ་དཀྱིལ་འཁོར་གྱི་གཙོ་བོ་གཉིས་སུ་མེད་པར་འདུ་ཤེས་པའི་གུས་པ་ཉེ་བར་བཞག་ནས་གསོལ་བ་འདེབས་པ་འདིའི་རྗེས་ཟློས་མཛོད། །ཐབས་ཀྱི་སྤྱོད་པས་འགྲོ་དོན་དུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྫོགས་མཛད་ཕྱིར༔ རྡོ་རྗེ་གཞོན་ནུའི་དབང་མཆོག་སྩོལ༔ [ལན་

གསུམ་ཞུས་པའི་ལན་དུ་སློབ་དཔན་གྱིས།] ལེགས་འོངས་སྐལ་ལྡན་རིགས་ཅན་རྣམས༔ བླ་མེད་གསང་བའི་དཀྱིལ་འཁོར་འདིར༔ འཇུག་ཅིང་དམ་ལ་གནས་འགྱུར་པའི༔ དབང་དང་སྐལ་པར་ལྡན་ལགས་སམ༔ ཞེས་དྲིས་པའི་ལན་ཏུ་འདིའི་རྗེས་ཟློས། བདག་ཅག་སྐལ་ལྡན་སྒྲུབ་པ་པོ༔ ལྷ་དང་བླ་མ་དབྱེར་མི་ཕྱེད༔ བླ་མེད་རྡོ་རྗེ་ཕུར་པ་ཡི༔ དབང་གི་དཀྱིལ་འཁོར་འཇུག་པར་སྤྲོ༔ [ཞེས་ཞུ།] དེ་ནས་རྒྱུད་ངག་ཅིང་སྣོད་དུ་རུང་བར་བྱ་བའི་སླད་དུ་དཀྱིལ་འཁོར་རྣམ་པ་གསུམ་གྱི་ལྷ་ཚོགས་ལ་ཕྱོགས་དུས་ཀྱི་རྩ་གསུམ་དཀོན་མཆོག མ་ལུས་པ་སྤྲིན་གྱི་ཕུང་པོ་གཏིབས་པ་བཞིན་བཞུགས་པ་ལ། མཁའ་ཁྱབ་ཀྱི་འགྲོ་བ་མ་ལུས་པ་དང་ལྷན་ཅིག་ཕྱག་འཚལ་ཞིང་སྐྱབས་སུ་འགྲོ་བ་སོགས་ཡན་ལག་བརྒྱད་ཀྱི་སྒོ་ནས་ཚོགས་བསགས་པ་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ། །[སོགས་ལན་གསུམ།] གསང་སྔགས་ཀྱི་གཞི་དབང་ལ་བརྟེན་ཀྱང་དབང་གི་སྲོག་དམ་ཚིག་ལ་རག་ལས་པས་ན་ཕྱི་སྒོ་གསུམ་གྱི་ཉེས་སྤྱོད་སྡོམ་པ་སོ་ཐར་གྱི་ཚུལ་ཁྲིམས། ནང་གཞན་ལ་ཕན་པ་སྒྲུབ་པ་བྱང་ཆུབ་སེམས་དཔའི་བསླབ་བྱ། གསང་བ་རང་རྒྱུད་ཐབས་ཤེས་དབྱེར་མེད་ཟག་མེད་བདེ་

བ་ཆེན་པོའི་རང་བཞིན་གཅིག་ཏུ་སྡོམ་པ་རིག་འཛིན་སྔགས་ཀྱི་དམ་ཚིག་མཐའ་དག་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་བཟླས་མཛོད། རྡོ་རྗེ་གཞོན་ནུའི་དཀྱིལ་འཁོར་འདིར༔ སོ་སོར་ཐར་པའི་སྡོམ་པ་དང་༔ བྱང་ཆུབ་སེམས་དཔའི་བསླབ་བྱ་དང་༔ རིག་འཛིན་སྔགས་ཀྱི་དམ་ཚིག་རྣམས༔ དེང་ནས་བདག་གིས་བརྟན་པོར་བཟུང་༔ [ལན་གསུམ། དམ་ཚིག་གི་མནའ་ཆུ་ལྕེ་ལ་བཞག་ཅིང་རྡོ་རྗེ་གནས་གསུམ་དུ་གཏུགས་ཏེ།] ཧཱུྃ༔ དམ་ཚིག་འདི་ནི་བླ་ན་མེད༔ སྐུ་གསུང་ཐུགས་དང་མཉམ་སྦྱོར་ཕྱིར༔ ང་ནི་ཁྱོད་ཀྱི་ཧེ་རུ་ཀ༔ ང་ཡིས་བསྒོ་བའི་བཀའ་ཅི་བཞིན༔ ཁྱོད་ཀྱིས་འདའ་བར་མི་རུང་ངོ་༔ ཨོཾ་ཨཱཿཧཱུྃ་ས་མ་ཡ་ཛ༔ བླ་མ་དཔལ་ཆེན་པོས་ཇི་ལྟར་བསྒོས་པའི་དམ་ལས་མི་འདའ་བར་རྡོ་རྗེའི་ཐ་ཚིག་ལ་རབ་ཏུ་གནས་པར་བགྱིའོ་སྙམ་པས་བྲོ་བོར་བ་འདིའི་རྗེས་ཟློས་འཚལ། ཨི་དན་ན་ར་ཀན༔ དེ་ནས་དབང་གི་གཞི་འགོད་པ་ཡེ་ཤེས་པ་དབབ་པའི་སླད་དུ་སྒོ་གསུམ་གྱི་གནད་ལེགས་པར་གཅུན་ཏེ་གཞན་དུ་མ་ཡེངས་པར་དམིགས་པ་འདི་བཞིན་དུ་མཛོད་ཅིག །[ལས་བུམ་གྱི་ཆུ་དང་།] ཨ་མྲྀ་ཏ[ས་བསང་།] སྭ་བྷཱ་ཝ་[ས་སྦྱང་།] ཆོས་ཐམས་ཅད་འོད་གསལ་སྟོང་པ་ཉིད་ཀྱི་ངང་ལས་

འོ་སྐོལ་གནས་པའི་ས་ཕྱོགས་འདི་ཉིད་ཐ་མལ་གདོས་བཅས་སུ་མ་ཡིན་པ་འོག་མིན་གསང་ཆེན་རོལ་པའི་དུར་ཁྲོད་ཡེ་ཤེས་རང་སྣང་གི་གཞལ་ཡས་ཁང་རྒྱ་ཁྱོན་བཀོད་པ་ཚད་མེད་པར་གྱུར་པའི་དབུས་སུ་ཁྱེད་རང་རྣམས་གང་དུ་གནས་པའི་གོ་སར་སྣ་ཚོགས་པདྨ་ཟླ་ཉི་ལྷ་ཆེན་ཕོ་མོ་བསྣོལ་བའི་གདན་ལ་སེམས་ཉིད་ཧཱུཾ་མཐིང་ནག་ལས་འོད་ཟེར་འཕྲོས། དོན་གཉིས་བྱས་ནས་ཚུར་འདུས་པ་ཡོངས་སུ་གྱུར་པ་ལས་ཁྱེད་རང་རྣམས་སྐད་ཅིག་གིས་དཔལ་ཆེན་རྡོ་རྗེ་གཞོན་ནུ་སྐུ་མདོག་མཐིང་ནག་ཞལ་གསུམ་ཕྱག་དྲུག །ཞལ་གཡས་དཀར་གཡོན་དམར་དབུས་མཐིང་ནག་སྤྱན་དགུ་དམར་ཟླུམ་ཕྱོགས་བཅུར་གཟིགས་ཤིང་དབུ་སྐྲ་ཁམ་ནག་གྱེན་དུ་འབར་བ་ལ་རིགས་ལྔའི་རྩེ་བྲན་ཅན་གྱི་ཐོད་སྐམ་ལྔས་བརྒྱན་པ། ཕྱག་གཡས་གཉིས་རྡོ་རྗེ་རྩེ་དགུ་དང་རྩེ་ལྔ། གཡོན་གཉིས་མེ་དཔུང་དང་ཁ་ཊྭཱཾ་བསྣམས་ཤིང་། མཐའ་གཉིས་རི་རབ་ཀྱི་ཕུར་བུ་འདྲིལ་བ། རྡོ་རྗེ་རིན་པོ་ཆེའི་གཤོག་པ་སོགས་དཔལ་དང་དུར་ཁྲོད་ཆས་ཀྱིས་བརྒྱན་ཅིང་ཡེ་ཤེས་ཀྱི་མེ་དཔུང་འབར་བའི་དབུས་ན་ཞབས་བཞི་བརྐྱང་བསྐུམ་འདོར་ཐབས་སུ་བཞུགས་པའི་པང་དུ་ཡུམ་འཁོར་ལོ་རྒྱས་འདེབས་མ་མཐིང་སྐྱ་

ཨུཏྤལ་དང་ཐོད་ཁྲག་འཛིན་ཅིང་ཁྲོ་མོའི་ཆས་ཀྱིས་བརྒྱན་པས་འཁྱུད་པ། གཉིས་ཀའང་སྣང་སྟོང་དབྱེར་མེད་གར་དགུའི་ཉམས་ལྡན་གཏུམ་རྔམ་གཟི་བརྗིད་ཀྱི་དཔལ་དུ་འབར་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་གསུམ་ཀྱིས་མཚན་པ་དང་། ཡབ་ཀྱི་ཐུགས་ཙིཏྟ་རིན་པོ་ཆེའི་སྦུབས་སུ་པད་ཟླའི་གདན་ལ་ཡེ་ཤེས་སེམས་དཔའ་ཚོན་གང་བ་རྡོ་དྲིལ་འཛིན་པའི་ཐུགས་ཀར་རྡོ་རྗེ་མཐིང་ག་ནས་འབྲུ་ཙམ་གྱི་ལྟེ་བར་ཉི་མ་ལ་ཧཱུྃ་མཐིང་ནག་གི་མཐར་ཀཱི་ལ་ཡ་འབྲུ་བཅུ་བཞིས་བསྐོར་བ་རྣམས་དང་། །བླ་མ་དཀྱིལ་འཁོར་གྱི་འཁོར་ལོའི་ཐུགས་ཀ་ནས་ཀྱང་འོད་ཟེར་དཔག་ཏུ་མེད་པ་འཕྲོས་པས་ཕྱོགས་དུས་རྩ་གསུམ་རྒྱལ་བ་རབ་འབྱམས་ཀྱི་ཐུགས་རྒྱུད་བསྐུལ། ཐམས་ཅད་ཀྱང་དཔལ་ཆེན་རྡོ་རྗེ་ཕུར་པའི་སྐུ་གསུང་ཐུགས་ཀྱི་ཕྱག་རྒྱའི་རྣམ་པར་ནམ་མཁའ་གང་བར་བྱོན་ཏེ་ཁྱེད་རང་རྣམས་ལྷར་གསལ་བའི་སྐུ་ལུས་ཀྱི་ཆ་ཐམས་ཅད་དང་ཁྱད་པར་སྙིང་གའི་ཏིང་འཛིན་སེམས་དཔའ་ལ་སིབ་སིབ་ཐིམ་པས་ཡེ་ཤེས་ཆེན་པོས་རྒྱུད་བྱིན་གྱིས་བརླབས་པའི་མོས་པ་བརྟན་པོ་མཛོད་ཅིག །[ཅེས་བརྡ་སྦྱར་ལ་སྤོས་རོལ་དབྱངས་དང་བཅས། ལས་བྱང་གི་

བྱིན་འབེབས་མཐར་རྩ་སྔགས་གཤམ་དུ།] ཛྙཱ་ན་ཨཱ་བེ་ཤ་ཡ་ཨ༔ ར་ར་ར་ར་ཙ་ལ་ཡ་ཙ་ལ་ཡ་ཧཱུྃ་ཨ་ཧཾ་ཛྷེཾ༔ [ཞེས་དྲག་ཏུ་བཟླས་ལ་དབབ།] དེ་ལྟར་དབབ་པའི་ཡེ་ཤེས་པ་དེ་ཉིད་བརྟན་པར་བྱས་པའི་མོས་པ་མཛོད། [མེ་ཏོག་དང་བཅས་པའི་རྡོ་རྗེ་སྤྱི་བོར་རྒྱ་གྲམ་དུ་བཞག་ལ།] ཏིཥྛ་བཛྲ། [ཞེས་བརྟན་པར་བྱ།] དེ་དག་གིས་འཇུག་པའི་ཆོས་རྣམས་གྲུབ་ནས་དངོས་གཞི་དབང་བསྐུར་ཞུ་བའི་ཡོན་དུ་མཎྜལ་འབུལ་འཚལ། གསོལ་བ་འདེབས་པ་འདིའི་རྗེས་ཟློས། ཀྱེ༔ རྡོ་རྗེ་འཛིན་པ་དཀྱིལ་འཁོར་བདག༔ ཕུར་པ་བླ་ན་མེད་པ་ཡི༔ དཀྱིལ་འཁོར་ཆེན་པོར་བདག་འཇུག་ཅིང་༔ དབང་བཞི་རྫོགས་པར་བསྐུར་དུ་གསོལ༔ [ལན་གསུམ།] དེ་ནས་དངོས་གཞིའི་དབང་གི་ཐོག་མར་བུམ་པའི་དབང་བསྐུར་བ་ལ། གདན་གསུམ་ཚང་བའི་དབང་ལྷ་ནམ་མཁའ་གང་བར་སད་པ་རྣམས་དང་རྡོ་རྗེ་ཕུར་པའི་ལྷ་ཚོགས་ཐམས་ཅད་ཁྱེད་རང་རྣམས་ཀྱི་སྤྱི་བོའི་སྟེང་གི་ནམ་མཁར་ཀཱི་ལ་ཡའི་སྔགས་སྒྲ་དི་རི་བྱོན། རིག་འཛིན་མཁའ་འགྲོའི་ཚོགས་ཐམས་ཅད་ཀྱིས་བཀྲ་ཤིས་པའི་ཚིགས་སུ་བཅད་པ་བརྗོད་བཞིན་རིན་པོ་ཆེའི་བུམ་པ་ཟག་མེད་བདུད་རྩིའི་ཆུ་རྒྱུན་གྱིས་བཀང་བས་རྒྱལ་ཐབས་སྤྱི་བླུགས་སུ་མངོན་པར་

དབང་བསྐུར་བའི་མོས་པ་མཛོད། [རྣམ་བུམ་ཐོགས་ལ།] ཧཱུྃ༔ སྟོང་གསལ་ཆོས་དབྱིངས་བུམ་པ་རུ༔ བདེ་ཆེན་ཕུར་པའི་ལྷ་ཚོགས་གནས༔ སྐལ་ལྡན་ཁྱོད་ལ་དབང་བསྐུར་བས༔ རྡོ་རྗེ་གཞོན་ནུའི་སྐུ་ཐོབ་ཤོག༔ [སྔགས་མཐར།] ཀ་ལཱ་ཤ་ཨ་བྷི་ཥིཉྩ་ཨོཾ༔ [ཞེས་སྤྱི་བོར་བཞག་ཅིང་བུམ་ཆུ་སྦྱིན། དེ་ལྟར་དབང་བསྐུར་བས་བདུད་རྩིའི་ཆུ་རྒྱུན་གྱིས་རྐང་མཐིལ་ཡན་ཆད་མེར་གྱིས་གང་། ཆུའི་ལྷག་མ་ཡར་ལུད་པ་ལས་ཁྲག་འཐུང་རིགས་ལྔས་དབུ་བརྒྱན། དབང་ལྷ་རྣམས་ཀྱང་ཁྱེད་རང་རྣམས་ལ་ཐིམ་པར་མོས་ཤིག །གཙོ་ཕུར་འདི་ཉིད་དཔལ་ཆེན་རྡོ་རྗེ་གཞོན་ནུ་དངོས་སུ་གསལ་བའི་སྐུ་ལས་འོད་ཟེར་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་གནས་གསུམ་དུ་ཐིམ་པས། ཉོན་ཤེས་ཀྱི་སྒྲིབ་པ་དག་ཅིང་དཔལ་ཆེན་པོའི་སྐུ་གསུང་ཐུགས་ཡོངས་རྫོགས་ཀྱི་དབང་ཐོབ་པར་མོས་ཤིག །[སྒྲུབ་ཕུར་ཐོགས་ལ།] ཧཱུྃ༔ སྣང་སྲིད་ཕུར་བུའི་དཀྱིལ་འཁོར་དུ༔ སྐུ་གསུམ་ཐུགས་ཀྱི་ཕྱག་རྒྱ་རྫོགས༔ རྩ་བའི་དཔལ་ཆེན་བསྒོམ་པ་དང་༔ ཕྱོགས་བཅུའི་ཁྲོ་བོ་སྤྲུལ་པ་འགྱེད༔ རྫས་ཀྱི་སྲས་མཆོག་ལས་ལ་མངགས༔ བསྙེན་སྒྲུབ་ཕྲིན་ལས་དབང་ཐོབ་ཤོག༔ [རྩ་སྔགས་མཐར།] ཨ་བྷི་ཥིཉྩ་ཨོཾ་ཨཱཿཧཱུྃ༔ [ཞེས་གནས་

གསུམ་དུ་གཏུག །སློབ་དཔོན་མདུན་གྱི་ལས་ཕུར་གཏད་དེ།] ཧཱུྃ༔ བདག་དང་ལག་པའི་མཆོག་རྣམས་ཀྱིས༔ རབ་ཏུ་དྲིལ་ཏེ་གསོར་བྱས་ན༔ དུག་གསུམ་རྩ་བ་རྩད་བཅད་ཕྱིར༔ འདྲིལ་ཞིང་འདེབས་པའི་དབང་བསྐུར་རོ༔ ཨོཾ་བཛྲ་ཀཱི་ལི་ཀཱི་ལ་ཡ་ཨ་བྷི་ཥིཉྩ་ཨཱ༔ ཕུར་པ་འདི་ཉིད་སྲུང་བའི་དོན་དུ་ཀླད་ལ་ལན་གསུམ། ཟློག་པའི་དོན་དུ་རྐེད་པར་ལན་གསུམ་བསྐོར་ཞིང་། བསད་པའི་ཕྱིར་དུ་ལན་གསུམ་དྲིལ་ཏེ་དགྲ་དང་བགེགས་ལ་འདེབས་པའི་མོས་པས་ཛཔྲ་དབྱངས་ལྷན་གཅིག་ཏུ་གསུང་བར་ཞུ། ཞེས་དཔོན་སློབ་ལྷན་ཅིག་ཏུ་ཛཔྲ་དབྱངས་བྱ་ཞིང་ཕུར་སྐོར་བྱེད་དུ་གཞུག །དེ་ལྟར་ན་ཕྱི་ཀུན་རྫོབ་མཚན་མ་རྫས་ཀྱི་དཀྱིལ་འཁོར་དུ་བླ་མ་སྤྲུལ་པའི་སྐུ་ལས་བུམ་པའི་དབང་ཐོབ། ཕུང་ཁམས་སྣོད་བཅུད་ཐ་མལ་དུ་ཞེན་པའི་རྟོག་ཚོགས་སྦྱངས་ཏེ་ལུས་ཀྱི་སྒྲིབ་པ་དག །ལམ་དུས་སུ་བསྐྱེད་པའི་རིམ་པ་བསྒོམ་པ་ལ་དབང་། སྣོད་བཅུད་ཁྲག་འཐུང་རོལ་པའི་དཀྱིལ་འཁོར་གཅིག་ཏུ་རྫོགས་ནས། འབྲས་བུ་སྐུ་རྡོ་རྗེ་མཆོག་གི་སྤྲུལ་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །[ཞེས་རྟོགས་པ་བསྐྱེད།] དེ་ནས་གསང་བའི་དབང་གི་སླད་དུ། བླ་མ་དཔལ་ཆེན་པོ་ཡབ་ཡུམ་རྗེས་ཆགས་བདེ་ཆེན་

གྱི་མཉམ་སྦྱོར་མཛད་པའི་བདེ་བ་ཆེན་པོའི་སྒྲས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་པ་ཡབ་ཀྱི་ཞལ་དུ་ཞུགས། ཐུགས་ཀར་ཆགས་པ་ཆེན་པོའི་མེས་ཞུ་བ་སྐུའི་དབྱིབས་བརྒྱུད་རྡོ་རྗེའི་ལམ་ལས་ཡུམ་གྱི་པདྨར་བབས། བྱང་སེམས་དཀར་དམར་རོ་གཅིག་ཏུ་འདྲེས་པའི་རྒྱུན་མུ་ཏིག་གི་མདངས་ཆགས་པ་ཐོད་པའི་བདུད་རྩི་དང་དབྱེར་མེད་དུ་གྱུར་པ་ཁྱེད་རང་རྣམས་ཀྱི་ལྕེ་ཐོག་ཏུ་བཞག་སྟེ་དབང་བསྐུར་བར་མོས་ཤིག །[བྷནྔྷ་ཐོགས་ལ།] ཧཱུྃ༔ བླ་མ་ཧེ་རུ་ཀ་ཡབ་ཡུམ༔ དགའ་བཞི་རོལ་པའི་བྱང་ཆུབ་སེམས༔ བུ་ཡི་ལྕེ་ལ་བཞག་པ་ཡིས༔ བདེ་ཆེན་གསང་བའི་དབང་ཐོབ་ཤོག༔ [སྔགས་མཐར།] གུཧྱ་ཨ་བྷིཥིཉྩ་ཨཱཿ [ཞེས་སྦྱིན་ཅིང་།] རྣམ་པར་རྟོག་པ་མེད་པའི་བློས་སྔགས་འདིའི་རྗེས་ཟློས་དང་བཅས་ཏེ་མྱང་མཛོད། ཨ་ཧོཿམཧཱ་སུ་ཁ༔ བྱང་སེམས་བདུད་རྩིའི་རྒྱུན་གྱི་རྩ་གནས་ཐམས་ཅད་གང་བས་རྩའི་འཆིང་བྱེད་ཀྱི་མདུད་པ་གྲོལ། གཟུང་འཛིན་བརྒྱད་ཅུའི་རྟོག་པ་འགགས། །ཐིག་རླུང་སེམས་གསུམ་ཡེ་ཤེས་ཆེན་པོའི་ངོ་བོར་བྱིན་གྱིས་བརླབས་ནས་བདེ་དྲོད་ཀྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའི་མོས་པ་མཛོད། དེ་ལྟར་ན་ཀུན་རྫོབ་བྱང་

ཆུབ་སེམས་ཀྱི་དཀྱིལ་འཁོར་དུ་བླ་མ་ལོངས་སྤྱོད་རྫོགས་པའི་སྐུ་ལས་གསང་བའི་དབང་ཐོབ། རླུང་ཐ་མལ་དུ་འཛིན་པའི་བག་ཆགས་སྦྱངས་ཏེ་ངག་གི་སྒྲིབ་པ་དག །ལམ་དུས་སུ་བདག་བྱིན་རླབས་རྫོགས་རིམ་ཙཎྜ་ལཱིའི་རྣལ་འབྱོར་བསྒོམ་པ་ལ་དབང་། སྒྲ་སྐད་དང་རླུང་འབྱིན་འཇུག་གསང་སྔགས་སུ་དག་སྟེ། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །[ཞེས་རྟོགས་པ་བསྐྱེད། དེ་ནས་དབང་གསུམ་པའི་སླད་དུ།] ཁྱེད་རང་རྣམས་དཔལ་ཆེན་པོ་སྣང་སྟོང་སྒྱུ་མ་ལྟ་བུའི་སྐུར་གསལ་བ་ལ། སློབ་དཔོན་གྱིས་ཡུམ་འཁོར་ལོ་རྒྱས་འདེབས་མ་ལས་རིགས་མཐུན་གྱི་ལས་རྒྱ་གཟུགས་དང་ལང་ཚོ་མཚན་ཉིད་ཕུན་སུམ་ཚོགས་པ་ཞིག་རྣམ་པར་འཕྲུལ་པའི་ལག་གཡོན་ནས་བཟུང་སྟེ། རྒྱལ་བ་ཐམས་ཅད་དཔང་པོར་གསོལ་ནས་ཁྱེད་རྣམས་ཀྱི་ལག་གཡས་སུ་གཏད་པར་མོས་ཤིག །[རིག་མའི་གཟུགས་བརྙན་ཐོགས་ལ།] ཧཱུྃ༔ ཤེས་རབ་ཡུམ་གྱི་པདྨ་ལ༔ ཆགས་མེད་བདེ་སྟོང་ཐིག་ལེར་འཁྱིལ༔ འགྱུར་མེད་ལྷན་སྐྱེས་དགའ་བ་མྱོང་༔ ཤེས་རབ་ཡེ་

ཤེས་དབང་ཐོབ་ཤོག༔ [སྔགས་མཐར།] མཧཱ་མུ་དྲ་ཨ་བྷི་ཥིཉྩ་ཧཱུྃ༔ [ཞེས་ལག་ཏུ་གཏད།] དེ་ལྟར་གཏད་པའི་རིག་མ་དེ་དང་འདུ་ཤེས་གསུམ་ལྡན་གྱི་རོལ་པས་རྗེས་ཆགས་བདེ་ཆེན་གྱི་ཡེ་ཤེས་ཆེས་ཆེར་འབར་བས་གཉིས་སྣང་གི་རྟོག་པ་ཐམས་ཅད་དབྱིངས་སུ་ནུབ་སྟེ་བྱང་སེམས་བདུད་རྩིའི་དྭངས་མ་དབབ་ལྡོག་གི་སྦྱོར་བས་བདེ་སྟོང་དགའ་བཞིའི་ཡེ་ཤེས་མཐར་ཐུག་པ་སྐྱེས་པར་མོས་ཤིག །དེ་ལྟར་གསང་བ་ཆོས་ཐམས་ཅད་འབྱུང་བའི་དཀྱིལ་འཁོར་དུ་བླ་མ་ཆོས་ཀྱི་སྐུ་ལས་ཤེས་རབ་ཡེ་ཤེས་ཀྱི་དབང་ཐོབ། གཟུང་འཛིན་གཉིས་སྣང་གི་རྟོག་ཚོགས་སྦྱངས་ནས་ཡིད་ཀྱི་སྒྲིབ་པ་དག །ལམ་དུས་སུ་ཕོ་ཉ་བདེ་བ་ཆེན་པོ་རྡོ་རྗེ་སེམས་དཔའི་གསེང་ལམ་བསྒོམ་པ་ལ་དབང་། བདེ་སྡུག་བྱུང་ཚོར་ཐམས་ཅད་ལྷན་སྐྱེས་ཡེ་ཤེས་སུ་དག་སྟེ། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །[ཞེས་རྟོགས་པ་བསྐྱེད།] དེ་ནས་དབང་རྣམས་ཀུན་གྱི་མཐར་ཐུག་བཞི་པ་ཚིག་དབང་རིན་པོ་ཆེ་བརྡ་དང་བྱིན་རླབས་ཀྱི་སྟོབས་ཀྱིས་ངོ་སྤྲོད་པ་ལ། སྒོ་གསུམ་མ་བཅོས་རང་བབས་སུ་ལྷོད་ཀྱིས་ཀློད་ནས་

ལྟ་སྟངས་གཡོ་བ་མེད་པས་མན་ཤེལ་འདི་ཉིད་ལ་མིག་དབང་གཏོད་པར་ཞུ། [མན་ཤེལ་དྲི་མེད་བསྟན་ལ།] ཧཱུྃ༔ ཕྱི་དང་ནང་མེད་ཟང་ཐལ་གསལ༔ ཡེ་ནས་རྣམ་དག་རིག་པའི་གཤིས༔ རང་གྲོལ་འཛིན་མེད་ལྷག་པ་འདི༔ རྡོ་རྗེ་གཞོན་ནུའི་དགོངས་པ་ཡིན༔ [སྔགས་མཐར།] ངྷརྨ་ངྷཱ་ཏུ་ཨ་བྷི་ཥིཉྩ་ཧཱུྃ༔ དེ་ཡང་མན་ཤེལ་འདིའི་དཔེས་མཚོན་ནས་རང་སེམས་སྟོང་གསལ་རིག་པའི་སྙིང་པོ་ཅན་འདི་ནི་ཤེལ་གོང་དྭངས་པ་ལ་རྐྱེན་དང་འཕྲད་པས་འཇའ་འོད་ཚོན་རིས་སྣ་ཚོགས་སུ་འཆར་བ་བཞིན། རིག་པའི་ངོ་བོ་ཀ་དག་སྤྲོས་པ་དང་བྲལ་བ། རང་བཞིན་འགགས་མེད་དུ་ལྷུན་གྱིས་གྲུབ་པ། ཐུགས་རྗེའི་རྩལ་ཅིར་ཡང་འཆར་བ། དེ་གསུམ་དབྱེར་མེད་མཉམ་ཉིད་བློ་འདས་ཆེན་པོ་འདི་ཉིད་དཔལ་ཆེན་ཧེ་རུ་ཀའི་དགོངས་པར་ངོ་ཤེས་པར་གྱིས་ལ། རང་བབས་གཉུག་མའི་གཤིས་ལུགས་འོད་གསལ་རྣམ་པར་མི་རྟོག་པ་ནམ་མཁའ་དྭངས་པའི་དབྱིངས་ལྟ་བུའི་ངང་དུ་མཉམ་པར་ཞོག་མཛོད། །[ཅེས་དར་གཅིག་མཉམ་པར་བཞག །] དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་བླ་མ་ངོ་བོ་ཉིད་ཀྱི་སྐུ་ལས་རིག་པའི་རྩལ་

དབང་ཐོབ། སྒོ་གསུམ་ཐ་དད་འཛིན་པའི་ཤེས་བྱའི་སྒྲིབ་པ་ཆེས་ཕྲ་བ་སྦྱངས། ལམ་དུས་སུ་ཁྲེགས་ཆོད་ཐོད་རྒལ་ཟུང་འཇུག་རྫོགས་རིམ་མཐར་ཐུག་པའི་རྣལ་འབྱོར་ཆེན་པོ་བསྒོམ་པ་ལ་དབང་། སྣང་བཞི་ཟད་སར་འཁྱོལ་ཏེ། འབྲས་བུ་ངོ་བོ་ཉིད་སྐུ་གདོད་མའི་མགོན་པོ་ཀུན་བཟང་ཧེ་རུ་ཀའི་གོ་འཕང་མངོན་དུ་བྱེད་པའི་སྐལ་བ་ཁྱད་པར་ཅན་དུ་བྱས་པ་ཡིན་ནོ། །[ཞེས་རྟོགས་པ་བསྐྱེད།] དེ་རྣམས་ཀྱིས་དངོས་གཞིའི་དབང་བསྐུར་བ་གྲུབ་ནས་རྗེས་འབྲེལ་བྱིན་རླབས་ཡོངས་རྫོགས་གཏོར་མའི་དབང་བསྐུར་བ་ལ། དཔལ་གྱི་གཏོར་ཆེན་འདི་ཉིད་བཅོམ་ལྡན་འདས་རྡོ་རྗེ་གཞོན་ནུ་ཡབ་ཡུམ་ཁྲོ་བཅུ་ཁྲ་ཐབས་སྒོ་སྲུང་དམ་ཅན་དང་བཅས་པའི་སྟེང་གི་ཆ་ལ་རིག་འཛིན་བརྒྱུད་པའི་བླ་མ། བར་གྱི་ཆ་ལ་ཡི་དམ་དཀྱིལ་འཁོར་ལྷ་ཚོགས། འོག་རོལ་དུ་མཁའ་འགྲོ་དམ་ཅན་སྲུང་མ་དང་བཅས་པས་བསྐོར་ཏེ་བཞུགས་པ་ཁྱེད་རང་རྣམས་ཀྱི་སྤྱི་བོར་བྱོན། སྐུ་གསུང་ཐུགས་ལས་བྱིན་རླབས་དངོས་གྲུབ་ཐམས་ཅད་བདུད་རྩི་འོད་ཟེར་ཐིག་ལེའི་རྣམ་པར་བྱོན་ཏེ། ཁྱེད་རང་རྣམས་ཀྱི་སྤྱི་བོ་ནས་ཞུགས། གནས་གསུམ་དུ་ཐིམ་པས་ལུས་ངག་ཡིད་གསུམ་གྱི་འགལ་རྐྱེན་

ནད་གདོན་བར་ཆད་སྡིག་སྒྲིབ་ཐམས་ཅད་སྦྱངས། གསང་བ་གསུམ་གྱི་དབང་དང་བྱིན་རླབས་དངོས་གྲུབ་ཐམས་ཅད་རྩལ་རྫོགས་སུ་ཐོབ་བྱུང་སྙམ་དུ་མོས་མཛོད། [གཏོར་ཆེན་ཐོགས་ལ།] ཧཱུྃ༔ རྡོ་རྗེ་གཞོན་ནུའི་རིག་འཛིན་རྣམས༔ སྲིད་པ་རྡོ་རྗེར་གྲུབ་མཛོད་ཅིགཿ སྲིད་པ་རྡོ་རྗེ་ཕུར་བའི་ལྷ༔ ཡེ་ཤེས་ཁྲོ་བོ་འགྲུབ་པར་མཛོད༔ གཏོར་ཆེན་ལྷ་དང་གཉིས་སུ་མེད༔ དམ་རྫས་ཆེན་པོའི་དངོས་གྲུབ་འདིས༔ སྐལ་ལྡན་ཁྱོད་ལ་དབང་བསྐུར་བས༔ དབང་བཞི་ཡོངས་རྫོགས་ཐོབ་པར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ༔ མཧཱ་བ་ལིཾཏ་ཛྙཱ་ན་ཨ་བྷི་ཥིཉྩ་ཨཱ༔ [ཞེས་གཏོར་མ་གནས་གསུམ་དུ་བཞག །] ཛཿཧཱུྃ་བྃ་ཧོཿ མཐར་གཏོར་མའི་ལྷ་ཚོགས་འོད་དུ་ཞུ་ནས་ཁྱེད་རང་རྣམས་ལ་ཐིམ། གཏོར་ཟན་ཟག་མེད་ཀྱི་བདུད་རྩིར་ཞུ་བ་མགྲིན་པར་མྱང་བས་ལས་དང་དངོས་གྲུབ་མ་ལུས་པ་ལ་དབང་འབྱོར་བར་མོས་ཤིག །[ཅེས་གཏོར་མའི་རས་མ་བདུད་རྩི་དང་སྦྱར་ཏེ་སྦྱིན།] བྷྲཱུཾ་ལས་བུམ་པ་གཞལ་ཡས་ཁང་རྡོ་རྗེའི་གུར་ཅན་གྱི་ནང་དུ་བླ་མ་དཔལ་ཆེན་པོའི་སྐུ་ལས་འོད་ཟེར་འཕྲོས་པས་འཁོར་འདས་ཀྱི་ཚེ་བཅུད་བདུད་རྩིའི་རྣམ་པར་བསྡུས་ནས་བསྐྱིལ་བ་དང་། དཀྱིལ་འཁོར་

གྱི་ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་ཐམས་ཅད་འོད་ཟེར་གྱི་རྣམ་པར་མཚོ་ལ་སྦྲང་ཆར་བབས་པ་ལྟར་དངོས་གྲུབ་ཀྱི་ཞལ་ཟས་ཟླ་གམ་ལ་ཐིམ་པས་དངོས་གྲུབ་ཀྱི་རྫས་ཁྱད་པར་ཅན་དུ་གྱུར་པས་དབང་བསྐུར་བས་བདེ་བར་གཤེགས་པའི་སྐུ་ཚེ་དང་ལང་ཚོ་ལ་མངའ་བརྙེས་ཤིང་མཆོག་ཐུན་ཕུན་སུམ་ཚོགས་པའི་དངོས་གྲུབ་ཀྱི་དབང་དམ་པ་ཐོབ་པར་མོས་ཤིག །[ཚེ་འབྲང་དངོས་གྲུབ་ཀྱི་རྫས་བཅས་སྤྱི་བོར་བཞག་ལ།] ཧཱུྃ༔ སྲིད་པའི་ཕུར་བུ་སྒྲུབ་པ་དང་༔ དབང་དང་དངོས་གྲུབ་བླང་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣན་བྃ་ཧཱུྃ་ཕཊ༔ བཛྲ་ཨཱ་ཡུཥེ་སིངྔྷི་ཧཱུྃ༔ ཀཱ་ཡ་བཛྲ་སིངྔྷི་ཧཱུྃ༔ ཝཱ་ཀ་བཛྲ་སིངྔྷི་ཧཱུྃ༔ ཙིཏྟ་བཛྲ་སིངྔྷི་ཧཱུྃ༔ གུ་ཎ་བཛྲ་སིངྔྷི་ཧཱུྃ༔ ཀརྨ་བཛྲ་སིངྔྷི་ཧཱུྃ༔ ཤཱནྟི་སིངྔྷི་ཧཱུྃ༔ པུཥྚིཾ་སིངྔྷི་ཧཱུྃ༔ ཝཱ་ཤཾ་སིངྔྷི་ཧཱུྃ༔ ཀརྨ་སིངྔྷི་ཧཱུྃ༔ ཨ་བྷི་ཥིཉྩ་ཧཱུྃ་ཨཱཿ [ཞེས་བསྐུར་ཞིང་དངོས་གྲུབ་ཀྱི་རྫས་རོལ་དུ་གཞུག །] དེ་ལྟར་དབང་རྣམས་ཡོངས་སུ་རྫོགས་པ་ཐོབ་པ་ལ། ནམ་མཁའི་གང་བའི་སངས་རྒྱས་དཀྱིལ་འཁོར་གྱི་ལྷ་དང་བཅས་པས་ཤིས་པ་བརྗོད་པའི་

དབྱངས་སྙན་སྒྲོགས་བཞིན་མེ་ཏོག་གི་ཆར་སིལ་མར་བསྙིལ་བས་དབང་དོན་གྱི་ཡེ་ཤེས་བརྟན་པར་བྱས་པའི་མོས་པ་མཛོད། [ཅེས་མཚམས་སྦྱར་ལ་ཤིས་བརྗོད་རྒྱས་པར་སྤེལ།] དེ་རྣམས་ཀྱིས་སྨིན་བྱེད་དབང་གི་རིམ་པ་ཟབ་མོ་ཕུལ་གྲུབ་ནས། སྨིན་ཟིན་གྲོལ་བར་བྱེད་པ་ཁྲིད་ཀྱི་རིམ་པ་ནི་གཏེར་གཞུང་རྡོ་རྗེའི་ཚིག་འདི་ལ་ལེགས་པར་གསན་པས་ཁྱབ་སྟེ། གཉིས་པ་གྲོལ་བྱེད་ཁྲིད་ལ་ཐལ་འབྱིན་གྱི་དགོངས་པ་སོགས་ནས། ཤིན་ཏུ་གལ་ཆེ་བ་ཡིན་ནོ༔ [ཞེས་པའི་བར་གསལ་དག་སྙན་པས་བརྡ་དོན་འཕྲོད་ངེས་པར་བཀླག །] ཞེས་ཇི་ལྟར་གསུངས་པ་བཞིན་ཐལ་འབྱིན་གྱི་དགོངས་པ་རྣམ་པ་བཞི་ལ་རང་བྱན་ཚུད་པའི་སྒོ་ནས་ཕུར་བུ་རྣམ་བཞི་ཡུལ་སོ་སོར་གདབ་པའི་ལས་ལ་བརྩོན་པར་མཛོད་ཅིག །དེ་ལྟ་ན་དབྱིངས་ཕྱུག་ཡེ་ཤེས་མཁའ་འགྲོ་མཚོ་རྒྱལ་གྱི་ཐུགས་དམ་གསང་བའི་ལྷ་མཆོག་རྡོ་རྗེ་གཞོན་ནུའི་རྒྱུད་དང་མན་ངག་སྒྲུབ་ཐབས་ཐམས་ཅད་ལས་ཡང་ཟབ་སྙིང་པོའི་སྙིང་པོར་བསྔགས་པ་རྡོ་རྗེ་ཕུར་པ་སྤུ་གྲི་རེག་ཕུང་གི་སྨིན་གྲོལ་ཚང་ཕྲུགས་སུ་ཕུལ་གྲུབ་པ་ལགས་པས། དབང་གི་སྲོག་དམ་ཚིག་ཁོ་ནས་འཛིན་དགོས་པས་ན་རྡོ་རྗེ་ཐེག་པའི་དམ་ཚིག་རྩ་བ་ཡན་ལག་གིས་བསྡུས་པ་རྣམས་ཚུལ་བཞིན་དུ་བསྲུང་

བར་དམ་བཅའ་བ་འདིའི་རྗེས་ཟློས། གཙོ་བོས་ཇི་ལྟར་[སོགས་དང་།] དེ་ལྟར་ལེགས་པར་ཐོབ་པའི་གཏང་རག་གི་དོན་དུ་མཎྜལ་ཕུལ་མཛོད༔ [ཅེས་མཎྜལ་འབུལ་དུ་གཞུག །] སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་སྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ནས་འབུལ་ན་ཆ་ཤས་ནས་ལོངས་སྤྱོད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་[སོགས་ལན་གསུམ།] དེ་ལྟར་གསན་པ་ལས་བྱུང་བའི་དགེ་ཚོགས་རྣམས་སེམས་ཅན་ཐམས་ཅད་ཀྱི་དོན་དུ་བསྔོ་བའི་རྒྱས་འདེབས་ལྷན་ཅིག་ཏུ་གནང་བ་དང་། ཟབ་ཆོས་འདི་ཉིད་ཀྱི་སྒོ་ནས་རང་གཞན་གྱི་དོན་རྒྱ་ཆེན་པོ་བསྒྲུབ་པར་ཞུ། བསོད་ནམས་འདི་ཡིས་[སོགས་ཀྱིས་དགེ་བ་བསྔོས་ཏེ་སློབ་མ་རྣམས་རང་གནས་སུ་བཏང་། སློབ་དཔོན་གྱིས་ཚོགས་ལ་རོལ་པ་སོགས་ཆོ་གའི་རྗེས་ཀྱི་བྱ་བ་རྣམས་ལས་བྱང་བཞིན་མཐའ་རྒྱས་སུ་བྱའོ། །བདུད་དཔུང་འཇོམས་ལ་ཆེས་དཔའ་བ། །སྤུ་གྲི་རེག་ཕུང་ངར་མ་ཡི། །བྱིན་རླབས་བཅུད་ཀྱིས་སྐལ་ལྡན་སྲོག །རྡོ་རྗེ་གཞོན་ནུར་རྒྱས་ཐེབས་ཤོག །ཅེས་ཕུར་པ་སྤུ་གྲི་རེག་ཕུང་གི་དབང་བསྐུར་མཚམས་སྦྱོར་གྱིས་བརྒྱན་པ་འདིའང་། བཀའ་བབས་ཀྱི་སྐྱེས་མཆོག་རིག་པ་འཛིན་པ་སངས་རྒྱས་རྡོ་རྗེའི་བཞེད་པ་སྐོང་བའི་སླད་དུ། སྙོམས་ལས་པ་འཇིགས་བྲལ་

ཡེ་ཤེས་རྡོ་རྗེས་སྐབས་སུ་བབས་པའི་ཁ་སྐོང་ཅུང་ཟད་དང་བཅས་བཀླག་ཆོག་ཏུ་སྤེལ་བའི་ཡི་གེ་པ་ནི་རིག་བྱེད་པ་ནོར་བུ་དབང་རྒྱལ་གྱིས་སོ། །འདིས་ཀྱང་སྐལ་བ་ཅན་གྱི་གདུལ་བྱ་མཐའ་དག་གྲུབ་གཉིས་ཀྱི་དགའ་སྟོན་འདོད་རྒུར་སྤྱོད་པའི་རྒྱུར་གྱུར་ཅིག། །། སརྦ་དཱ་མངྒ་ལཾ། །]