ཞི་ཁྲོའི་ཀློང་བཤགས་བརྗོད་པ་རང་གྲོལ་གྱི་འབྲུ་ནོན་གྱི་འགྲེལ་བཤད་ཉམས་ཆག་དྲི་མ་དག་བྱེད་ཡེ་ཤེས་བདུད་རྩིའི་ཆུ་རྒྱུན།

སྤྱན་འདྲེན་བཞུགས་གསོལ།

བཞི་བ་གཞུང་གི་ས་བཅད་བསྟན་པ་ནི། འདི་ལ་དྲུག་སྟེ་བརྗོད་མེད་དོན་བཤགས་དང་༔ ཞི་བའི་ཀློང་བཤགས་ཁྲོ་བོའི་ཀློང་བཤགས་དང་༔ ལྟ་བའི་ཀློང་བཤགས་རུ་དྲའི་སྨེ་བཤགས་དང་༔ བདེ་གཤེགས་སྤྱི་བཤགས་རྣམ་པ་དྲུག་གིས་བསྟན༔ ཅེས་པ་སྟེ། གཞུང་འདིར་དེ་ལྟ་བུའི་ས་བཅད་རྣམ་པ་དྲུག་ཏུ་ཕྱེས་པའི་སྒོའི་བསྟན་ལ། དོན་གོ་སླའོ།།

དེ་ཡང་དང་པོ་བརྗོད་མེད་དོན་བཤགས་འདི་ལས་ཕྱག་འཚལ་ཐོན་པ་དེས་ང་རྒྱལ་གྱི་གཉེན་པོ་ཕྱག་འཚལ་བའི་ཡན་ལག་དང་། མཆོད་པས་འདོད་ཆགས་ཀྱི་གཉེན་པོ་མཆོད་པ་འབུལ་བའི་ཡན་ལག་དང་། བསྟོད་པ་ནི་ཕྲག་དོག་གི་གཉེན་པོ་རྗེས་སུ་ཡི་རང་གི་ཡན་ལག་དང་། སྤྱན་འདྲེན་པའི་ཡན་ལག་དང་། བཞུགས་སུ་གསོལ་བའི་ཡན་ལག་དང་། དགོངས་སུ་གསོལ་བ་ནི་ལོག་ལྟའི་གཉེན་པོ་མྱ་ངན་ལས་མི་འདའ་བ་བཞུགས་པར་གསོལ་བ་འདེབས་པའི་ཡན་ལག་རྣམས་དང་། དེ་ནས་དོན་བཤགས་པ་དངོས་ནས་བདེ་གཤེགས་སྤྱི་བཤགས་རྫོགས་པའི་བར་ནི་ཞེ་སྡང་གི་གཉེན་པོ་སྡིག་པ་བཤགས་པའི་ཡན་ལག་དང་། ཀློང་བཤགས་ཀྱི་གོང་འོག་ཀུན་ཏུ་མཆོག་དང་ཐུན་མོང་གི་དངོས་གྲུབ་སྩོལ་བར་བསྐུལ་བའི་ཚིག་ཡོད་པ་དེས་གཏི་མུག་གི་གཉེན་པོ་ཆོས་ཀྱི་འཁོར་ལོ་བསྐོར་བར་བསྐུལ་བའི་ཡན་ལག་དང་། དེ་བཞིན་དུ་སྨོན་པའི་ཚིག་ཐོན་པ་དེས་ཐེ་ཚོམ་གྱི་གཉེན་པོ་བསྔོ་བའི་ལན་ཡག་བསྟན་པར་བྱས་ན་གཞུང་ཧྲིལ་བོ་སྤྱིར་གྱི་ཡན་ལག་བདུན་གྱི་ཁོངས་སུ་བསྡུས་པའམ་བདུན་གྱི་སྟེང་སྤྱན་འདྲེན་དང་བཞུགས་གསོལ་གྱི་ཡན་ལག་སོ་སོར་ཕྱེས་ཏེ་བསྣན་པས་ཡན་ལག་དགུའི་ནང་དུ་བསྡུས་ནས་བསྟན་པར་བྱས་ཀྱང་རུང་ངོ་།།

༈ གཉིས་པ་གཞུང་གི་དོན་ལ་ནི་དྲུག་སྟེ། བརྗོད་མེད་དོན་བཤགས་བསྟན་པ་དང་། ཞི་བའི་ཀློང་བཤགས་བསྟན་པ་དང་། ཁྲོ་བོའི་ཀློང་བཤགས་བསྟན་པ་དང་། རུ་དྲའི་སྨེ་བཤགས་བསྟན་པ་དང་། ལྟ་བའི་ཀློང་བཤགས་བསྟན་པ་དང་། བདེ་གཤེགས་སྤྱི་བཤགས་བསྟན་པ་དང་དྲུག་གོ།

དང་པོ་རྩ་བའི་ས་བཅད་དང་པོ་བརྗོད་མེད་དོན་བཤགས་བསྟན་པ་ལ་ནི། བཤགས་པའི་ཡན་ལག་ཏུ་སྤྱན་འདྲེན་བཞུགས་གསོལ་དང་། ཕྱག་འཚལ་བ་དང་། མཆོད་པ་འབུལ་བ་དང་། བསྟོད་པ་བྱ་བ་དང་། དགོངས་སུ་གསོལ་བ་དང་། བཤགས་པ་དངོས་དང་དྲུག་ལས།

དང་པོ་ནི། ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི༔ ཟླ་རྒྱས་བཞིན་དུ་སྤྲོས་པ་མི་མངའ་ཡང་༔ ཐུགས་རྗེ་ཉི་གསལ་འོད་བཞིན་སྙོམས་མཛད་དེ༔ འདིར་གཤེགས་བདག་ལ་དགོངས་ཤིང་བཞུགས་སུ་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ཏེ། རྒྱུད་རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་ཏེ་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་དང་། རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པ་ལས། ཨོཾ་ཞེས་དང་པོ་ཕྱག་འཚལ་བཀྲ་ཤིས་སྟེར་བྱེད་པ། །ཞེས་དང་། རྒྱུད་ཀྱི་རྒྱལ་པོ་དཔལ་བདེ་མཆོག་ཉུང་ངུ་ལས། ཨོཾ་ནི་ཀུན་ལ་གསལ་བྱེད་དེ། །གྲུབ་སྩོལ་འདོད་པ་ཐམས་ཅད་བྱེད། །དཔའ་བོ་ཉིད་འགྱུར་གྲུབ་པ་ནི། །ཁྱིམ་དུ་དཀྱིལ་འཁོར་མཐོང་བ་ཡིན། །དེ་ནས་དེ་རྟག་བསྒོམ་པར་བྱ། ཞེས་གསུངས་པ་ལྟར། ཨོཾ༷་ཡིག་ནི་སྤྱིར་མཆོག་དང་། འབྱོར་བ་དང་། དཔལ་དང་། གཡང་དང་། སྐལ་བ་བཟང་པོ་དང་། གྲགས་པ་དང་། ཕུན་སུམ་ཚོགས་པ་དང་། དགེ་ཞིང་ལེགས་པ་དང་། བཀྲ་ཤིས་པ་དང་། དམ་བཅའ་བ་དང་། ནོར་བུའི་སྙིང་པོ་འཛིན་པའི་དོན་མཚོན་བྱེད་ཡིན་ཞིང་། བྱེ་བྲག་ཏུ་རིགས་ལྔ་ཡེ་ཤེས་ལྔ་མཚོན་བྱེད་ཡིན་པར་གསུངས་ཏེ། མཁའ་འགྲོ་མ་དྲྭ་བ་སྡོམ་པ་དཔལ་སྐུ་གསུང་ཐུགས་ཀྱི་རྒྱུད་ལས། ཨ་ནི་རྣམ་སྣང་མི་སྐྱོད་པ། །ན་རོ་རིན་ཆེན་འབྱུང་ལྡན་ཏེ། །ཟླ་ཚེས་འོད་དཔག་མེད་པ་ཡིན། །ཐིག་ལེ་དོན་ཡོད་གྲུབ་པའོ། །ཨོཾ་ནི་བདེ་གཤེགས་ལྔ་རང་བཞིན། །ཞེས་དང་། ཡི་གེ་ཨོཾ་ནི་སྔགས་ཀྱི་མཆོག །རྣལ་འབྱོར་པ་ཡིས་བཟླ་བར་བྱ། །སྔ་མ་བཞིན་དུ་ཡེ་ཤེས་ལྔ། །ཞི་བ་ལ་སོགས་དེ་བཞིན་བསྒྲུབ། །ཅེས་དང་། ཀརྨ་གླིང་པའི་བཏགས་གྲོལ་འཁོར་ལོ་ལས། ཨོཾ་ལ་སྐུ་ལྔ་ཡེ་ཤེས་ལྔ༔ ཡུམ་ལྔ་འབྱུང་ལྔ་རིགས་ལྔ་སྟེ༔ ཡེ་ཤེས་ཡི་གེ་ཨོཾ་ལ་རྫོགས༔ ཞེས་གསུངས་པའི་ཕྱིར། གཞན་ཡང་ཨོཾ་ཟླ་ཚེས་དང་རིང་ཆ་ཅན་དེ་ཡེ་ཤེས་ལྔ་དང་སྐུ་གསུང་ཐུགས་ཡོན་ཏན་འཕྲིན་ལས་ལྔ་མཚོན་བྱེད་དུ་བཤད་པའང་ཡོད་དེ། བཏགས་གྲོལ་འཁོར་ལོ་དེར་དྲངས་པའི་ཞི་ཁྲོའི་སྤྱི་རྒྱུད་ལས། ཡི་གེ་ཨོཾ་དུ་སྣང་བ་ནི༔ ཨ་ཉིད་མ་སྐྱེས་ཆོས་ཀྱི་སྐུ༔ ཆོས་ཉིད་བརྡལ་བ་ཆེན་པོའི་ངང་༔ ན་རོ་མཉམ་ཉིད་ཡེ་ཤེས་ཏེ༔ ཐམས་ཅད་ངོ་བོ་མཉམ་ཉིད་སྐུ༔ ཟླ་ཚེས་གསུང་གི་རང་བཞིན་ཏེ༔ སོ་སོར་རྟོགས་པའི་ཡེ་ཤེས་ལ༔ ཐིག་ལེ་ཀུན་ཏུ་མ་སྤྲོས་པས༔ མེ་ལོང་ལྟ་བུའི་ཡེ་ཤེས་ངང་༔ འ་ནི་འདྲེན་པའི་ལྕགས་ཀྱུ་སྟེ༔ འཕྲིན་ལས་རྣམ་བཞི་ལྷུན་གྱིས་མཛད༔ བྱ་བ་ནན་ཏན་ཡེ་ཤེས་ཡིན༔ ཡེ་ཤེས་ལྔ་དང་སྐུ་གསུང་ཐུགས༔ ཡོན་ཏན་འཕྲིན་ལས་ཨོཾ་ལ་རྫོགས༔ ཞེས་གསུངས་པའི་ཕྱིར་རོ།།

དེ་ལྟར་བྱེ་བྲག་ཏུ་ཨོཾ་ཡིག་དེ་སྐུ་ལྔ་ཡེ་ཤེས་ལྔ་དང་། རྒྱལ་བ་རིགས་ལྔ་དང་། འབྱུང་ལྔ་ཡུམ་ལྔ་མཚོན་བྱེད་དུ་གསུངས་པ་མང་ཕྱིར་སྐུ་ལྔ་ཡེ་ཤེས་ལྔ་དང་རྒྱལ་བ་རིགས་ལྔའི་ཤིས་པ་ཕུན་སུམ་ཚོགས་པའི་དཔལ་དང་། གྲགས་པ་དང་། དགེ་ལེགས་ཀྱི་སྣང་བ་རབ་ཏུ་བཞད་པར་གྱུར་ཅིག་ཅེས་པ་དང་། ཡང་། རྣལ་འབྱོར་མ་བཞིའི་ཁ་སྦྱོར་གྱི་རྒྱུད་ལས། དང་པོ་ཨོ་ཡིག་ཡང་དག་ལྡན། །ཨ་ནི་ཡིག་འབྲུ་ཀུན་གྱི་མཆོག །ཐིག་ལེ་ཆེན་པོ་ཡི་གེ་མེད། །ནམ་མཁའ་ནམ་མཁའི་དབུས་གནས་པར། །སྔགས་དང་རྒྱུད་ནི་ཡང་དག་འབྱུང་། །ཞེས་གནས་ལུགས་ཀྱི་དོན་མཚོན་པའི་ཡི་གེ་སྟེ། རྒྱུད་འབྱུང་བའི་ཁུངས་དང་རྒྱུད་ཀྱི་གླེང་གཞི་དང་། གནས་ལུགས་ཀྱི་དོན་ངེས་པ་དང་དེའི་བྱིན་རླབས་དང་དགེ་ལེགས་སྩོལ་བར་བརྗོད་པ་སོགས་གཞུང་གི་སྔོན་དུ་ཤིས་པ་བརྗོད་པའོ།།

དེ་ནས་གཞུང་གི་ཚིག་དོན་ནི། རིག་སྟོང་གཉིས་སུ་མེད་པའི་ཡེ༷་ཤེས༷་ཀྱི་སྐུ༷་འཁོར་འདས་ཀྱིས་བསྡུས་པའི་དངོས་པོ་ཀུན་གྱི་ངོ་བོ་མཆོ༷ག་ཏུ་གྱུར་པའི་ར༷ང་བཞི༷ན་སྐྱེ་འགགས་དང་བྲལ་བའི་དབྱིངས་དང་གཉིས་སུ་མེད་པའི་ཆོས་སྐུའི་དཀྱིལ༷་འཁོ༷ར་ཆེན་པོ་དེ་ནི༷། དཔེར་ན་རྡུལ་བྲལ་སྟོན་གྱི་ནམ་མཁའ་དྭངས་པར་འཆར་བའི་ཟླ༷་བ་ཉ་རབ་ཏུ་རྒྱས༷་པའི་དཀྱིལ་འཁོར་ལ་ནག་ནོག་གི་དྲི་མ་དང་བྲལ་བ་བ༷ཞིན་དུ༷་གཉིས་སྣང་གཉིས་འཛིན་ལ་སོགས་པའི་སྤྲོས༷་པ༷་གང་ཡང་མི༷་མང༷འ་ན་ཡ༷ང་། རྒྱལ་བ་ཀུན་གྱི་ཐུགས༷་བརྩེ་བ་སྙིང་རྗེ༷་ཆེན་པོའི་ཡེ་ཤེས་ནི་དཔེར་ན་མཁའ་ལ་འཆར་བའི་ཉི༷་མའི་དཀྱིལ་འཁོར་རབ་ཏུ་གསལ༷་བའི་འོ༷ད་ཟེར་དེ་རང་ངོས་ནས་རྟོག་པ་མེད་པར་གླིང་བཞིའི་ཁྱོན་ཀུན་ལ་སྙོམས་པར་འཆར་བ་བཞི༷ན་དུ་ཐུགས་ཆོས་ཀྱི་དབྱིངས་ལས་གཡོ་བ་དང་རྟོག་པ་མེད་བཞིན་འགྲོ་བ་ཐམས་ཅད་ལ་སྙོམ༷ས་པར་གཟིགས་པ་མངའ་བའི་སྒོ་ནས་ལོངས་སྐུ་དང་སྤྲུལ་སྐུ་སྟེ་གཟུགས་ཀྱི་སྐུ་རྣམ་པ་གཉིས་ཀྱིས་འགྲོ་བའི་དོན་མཛད་པ་ལགས་པས་ན། དེང་འདིར་ཡང་དེ་ལྟར་སྙོམས་པར་གཟིགས་པར་མཛ༷ད་དེ༷་རྣལ་འབྱོར་བ་བདག་ཅག་གིས་ཉེས་ལྟུང་བཤགས་པའི་ཡུལ་འདིར༷་དཔང་པོར་གཤེགས༷་པ་དང་། ལས་ངན་འདི་སྙིང་རེ་རྗེ། འདིའི་ཉམས་ཆག་གི་ལས་ཀྱི་སྒྲིབ་པ་མཐུག་པོ་འདི་རྣམས་དག་པར་གྱུར་ཅིག་ཅེས་བད༷ག་ལ༷་ཐུགས་བརྩེ་བས་ཉེ་བར་དགོངས༷་ཤིང༷་གནོང་བཤགས་ཞུ་བའི་ཡུལ་གྱི་དཀྱིལ་འཁོར་འདིར་དཔང་པོར་བཞུགས༷་སུ༷་གསོ༷ལ་ཞེས་བཤགས་པའི་ཡུལ་དུ་རྒྱལ་བ་ཞི་ཁྲོའི་དཀྱིལ་འཁོར་སྤྱན་དྲངས་ཤིང་བཤགས་པའི་དཔང་པོར་བཞུགས་པར་གསོལ་བ་བཏབ་པའོ། །བཤགས་པའི་རྒྱུད་ཡིན་ཕྱིར་བཤགས་པའི་དབང་དུ་བྱས་ན་འདི་དང་འོག་གི་དགོངས་གསོལ་རྣམས་ཀྱིས་ནི་གཉེན་པོ་རྟེན་གྱི་སྟོབས་བསྟན་པར་བྱས་པ་ནི་ཤེས་དགོས་སོ།།

ཕྱག་འཚལ་བ།

གཉིས་པ་ཞི་ཁྲོ་སྐུ་གསུམ་གྱི་ལྷ་ལ་ཕྱག་འཚལ་བ་ནི། བརྗོད་མེད་ཤེས་རབ་མི་གཡོ་ཆོས་ཀྱི་སྐུ༔ བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ༔ ཐུགས་རྗེ་ཐབས་མཁས་རྒྱ་ཆེན་རོལ་པའི་སྐུ༔ ཞི་ཁྲོ་སྐུ་གསུམ་གྱི་ལྷ་ལ་ཕྱག་འཚལ་ལོ༔ ཞེས་པ་སྟེ། ཤོ་ལོ་ཀ་གཅིག་གིས་བསྟན་ཏོ། །དེ་ཡང་ཞི་ཁྲོའི་ལས་བྱང་ཆུང་བ་ལས། དཔེ་མེད་བསམ་བརྗོད་བྲལ་བའི་ངང་ཉིད་ལས༔ ཞེས་དང་། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དོན་གྱི་སྙིང་པོ་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་རྣལ་འབྱོར་གྲུབ་པའི་རྒྱུད་ལས། ཅི་ཕྱིར་ཆོས་ཀྱི་དབྱིངས་ཉིད་ནི། །ནམ་མཁའ་ལྟ་བུར་འདུས་མ་བྱས། །བསམ་དུ་མེད་པས་ནམ་མཁའ་འདྲ། །བརྗོད་དུ་མེད་པས་གཟུགས་དང་བྲལ། །ཞེས་དང་། རྡོ་རྗེ་ཕུར་བ་གསང་བའི་རྒྱུད་ལས། ཨེ་མ་ཧོ་ཆོས་ཀུན་སྟོང་པའི་བདག །རང་གི་ངོ་བོ་བརྗོད་དུ་མེད། །བརྗོད་མེད་དེ་ཉིད་སྣ་ཚོགས་པའི། །ཆོས་རྣམས་ཀུན་ལ་ཁྱབ་པར་གནས། །ཞེས་གསུངས་པ་ལྟར། དཔེ་ཡིས་མཚོན་པ་དང་། བློ་ཡིས་བསམ་པ་དང་། ངག་གིས་བརྗོ༷ད་པ་མེ༷ད་པའི་ཤེས༷་ར༷བ་སྟོང་པ་ཉིད་ཆོས་ཉིད་རྣམ་པར་དག་པ་རྒྱུ་དང་རྐྱེན་གང་གིས་ཀྱང་མི༷་གཡོ༷་བའམ་སྐྱེ་འགགས་ཀྱི་དངོས་པོས་གཡོ་བ་མེད་པ་སྐུ་དང་ཡེ་ཤེས་འདུ་འབྲལ་མེད་པའི་ཆོས༷་ཀྱི༷་སྐུ༷་ཀུན་ཏུ་བཟང་པོ་དང་། ཐབས་བ༷དེ་བ་ཆེ༷ན་པོའི་ཡེ་ཤེས་མཐར་ཐུག་པ་ལ་ཉེར་བར་ལོང༷ས་སྤྱོ༷ད་པ་ཡོངས་སུ་རྫོ༷གས་པའི་སྐུ༷། རྣམ་པར་སྣང་མཛད་དང་། རྡོ་རྗེ་སེམས་དཔའ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་བཅས་རྒྱལ་བ་རིགས་ལྔ་དང་། ཁྱད་པར་དུ་རྒྱལ་བ་རིགས༷་ལྔ༷འི་གཙོ༷་བོ་ལོངས་སྐུ་རྡོ་རྗེ་སེམས་དཔའ་དང་། ཐུགས༷་བརྩེ་བ་སྙིང་རྗེ༷་ཆེན་པོའི་སྒོ་ནས་འགྲོ་བ་ཞི་བས་འདུལ་བ་ལ་ཞི་བ་དང་། གདུག་པ་ཅན་ལ་ཁྲོ་བོ་དང་། མ་མོ་དང་ཕྲ་མེན་མ་ལ་སོགས་པ་ཐབ༷ས་ལ་མཁས༷་པའི་མཛད་པ་སྣ་ཚོགས་དང་སྤྲུལ་པ་གཟུགས་ཀྱི་བཀོད་པ་རྒྱ༷་ཆེ༷ན་པོའི་རོ༷ལ་བ་སྣ་ཚོགས་པ༷འི་ཚུལ་གྱིས་འགྲོ་བ་རྣམས་འདུལ་བ་སྤྲུལ་པའི་སྐུ༷་ཐུབ་པ་དྲུག་དང་ཁྲག་འཐུང་རིགས་ལྔ་ལ་སོགས་པའི་ཞི༷་ཁྲོ༷་སྤྲུལ་པ་སྐུའི་དཀྱིལ་འཁོར་བཅས་སྐུ༷་གསུམ༷་གྱི་བདག་ཉིད་དང་ལྡན་པའི་ལྷ༷་ཚོགས་རྣམས་ལ༷་ཉམས་ཆག་བཤགས་པ་པོས་སྒོ་གསུམ་གུས་པའི་མལ་ལྔ་སར་ཕབ་ཀྱི་ཕྱག་དང་ཡང་ན་འགྱོད་པའི་སྨྲེ་སྔགས་ཀྱི་ཕྱག་གྱང་འགྱེལ་བཞིན་དུ་འཚལ་བའི་རྐྱང་ཕྱ༷ག་གང་རུང་གིས་འདུད་པར་འཚ༷ལ་ལོ༷་ཞེས་པའོ།།

མཆོད་པ་འབུལ་བ།

གསུམ་པ་མཆོད་པ་འབུལ་བ་ལ། ཕྱི་ནང་གསང་བ་གསུམ་གྱི་མཆོད་པ་འབུལ་བ་དང་། ཡང་གསང་བླ་ན་མེད་པ་དེ་ཁོ་ན་ཉིད་ཀྱི་མཆོད་པ་འབུལ་བ་དང་གཉིས་ལས། དང་པོ་ནི། དངོས་སུ་འབྱོར་དང་ཡིད་ཀྱི་རྣམ་འཕྲུལ་ཏེ༔ ཀུན་ཏུ་བཟང་པོ་བླ་མེད་མཆོད་སྤྲིན་གྱིས༔ མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ༔ ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཅེས་པ་སྟེ། ཚིགས་སུ་བཅད་པ་གཅིག་གིས་བསྟན་ལ། དེ་ཡང་སྲིད་ཞིའི་ཁམས་ན་ཡིད་འོང་གི་དངོས་པོ་ལ་སོགས་པ་མཆོད་པར་རུང་བའི་མཆོད་པའི་རྫས་ཇི་སྙེད་མཆིས་པ་དེ་རྣམས་དངོས༷་སུ༷་འབྱོར༷་བའམ་བདོག་པ་རྣམས་དངོས་སུ་འབུལ་བ་དང༷་། གལ་ཏེ་དངོས་སུ་མི་འབྱོར་མི་བདོག་པ་དང་། འབུལ་སྟབས་མི་བདེ་བ་རྣམས་དེ་འདྲའི་མཆོད་རྫས་རྣམས་བློ་ཡུལ་དུ་བླངས་ནས་ཞི་ཁྲོའི་དཀྱིལ་འཁོར་དུ་ཡི༷ད་ཀྱི༷ས་རྣམ༷་པར་སྤྲུལ༷་པར་བྱས་ཏེ༷་མཆོད་པར་བྱ་ཞེས་པའོ།།

ཡིད་སྤྲུལ་ནི། སངས་རྒྱས་ཕལ་བོ་ཆེའི་མདོ་ལས། འདོད་པ་ལ་སྤྱོད་པའི་ལྷའི་བུ་སྟོང་ཕྲག་དཔག་ཏུ་མེད་པ་ཁ་དོག་ཤིན་ཏུ་མཛེས་པ་དག་ཀྱང་ནམ་མཁའ་ལ་འཁོད་ཅིང་ཡིད་ཀྱིས་སྤྲུལ་པའི་མཆོད་པས་མཆོད་པ་བྱས་ནས་འདི་སྐད་ཅེས་འཛེར་ཏོ། །ཞེས་དང་། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། ཕྱི་ནང་གསང་བའི་མཆོད་པ་རྒྱ་མཚོའི་ཚོགས། །དངོས་སུ་འབྱོར་དང་ཡིད་ཀྱིས་སྤྲུལ་པ་ཀུན། །ཕྱོགས་བཅུའི་ཞིང་ཁམས་གང་བར་རབ་དམིགས་ལ། །སྐྱོ་མེད་དང་བས་ཉིན་མཚན་བརྩོན་པར་བྱ། །ཞེས་མདོ་སྔགས་གཉིས་ཀར་རྒྱ་ཆེར་གསུངས་ལ། མཆོད་རྫས་དེ་དང་དེ་ཡོད་པར་ཡིད་ཀྱིས་མོས་པས་འབུལ་བ་ལ་ཡིད་ཀྱིས་སྤྲུལ་པའི་མཆོད་པ་ཞེས་བྱ་ཞིང་། འཕགས་པ་ནམ་མཁའ་མཛོད་ཀྱིས་ཞུས་པའི་མདོ་ལས། དེ་ནས་དེ་མ་ཐག་ཏུ་བྱང་ཆུབ་སེམས་དཔའ་ནམ་མཁའ་མཛོད་ཀྱི་བྱིན་གྱི་བརླབས་ཀྱིས་བཟའ་བ་དང་། བཅའ་བ་དང་། མྱང་བ་དང་། བལྡག་པ་སྣ་ཚོགས་ཀྱི་ཆར་རབ་ཏུ་ཕབ་སྟེ། ཞེས་སོགས་གསུངས་པ་ལྟར་འཕགས་པ་ནམ་མཁའ་མཛོད་ཀྱིས་ལོངས་སྤྱོད་དུ་གྲགས་པ་ལྟ་བུ་རིན་པོ་ཆེ་སྣ་ཚོགས་དང་། མེ་ཏོག་དང་། བདུག་སྤོས་དང་། མར་མེ་དང་། དྲི་ཆབ་དང་། རོལ་མོ་དང་། རྟ་དང་གླང་པོ་དང་། ཁྱུ་མཆོག་དང་། ཁང་བཟང་མལ་ཆ་ཁྲི་གདན་ལ་སོགས་པའི་མཆོད་རྫས་མཐའ་ཡས་པ་གང་ལ་གང་འདོད་དུ་ཏིང་ངེ་འཛིན་གྱི་སྟོབས་ཀྱིས་དངོས་སུ་མཐོང་དུ་ཡོད་པར་སྤྲུལ་ནས་འབུལ་བའང་ཡོད་མོད་དེ་ནི་གང་ཟག་ཁྱད་པར་བ་མ་གཏོགས་མི་ནུས་སོ།།

རྒྱུད་རྡོ་རྗེ་རྩེ་མོ་ལས། ཤིན་ཏུ་ངོ་མཚར་མཆོད་པ་ནི། །ཅི་ནུས་པར་ཡང་བསྒྲུབ་པར་བྱ། །ཡང་ན་མྱ་ངན་འདའ་སོགས་དང་། །རྣལ་འབྱོར་དགེ་བ་སོགས་པ་ལ། །ངོ་མཚར་གྱུར་པའི་མཆོད་པ་ཡིས། །མཆོད་པའི་སྤྲིན་དག་དབུལ་བར་བྱ། །གནས་འདི་འམ་ནི་གཞན་དག་ན། །ལྷ་སོགས་བདག་གིར་མ་བྱས་པའི། །མེ་ཏོག་ཆུ་སྐྱེས་ཐང་སྐྱེས་རྣམས། །ཐབས་ཆེན་སངས་རྒྱས་ཐམས་ཅད་དང་། །དེ་ཡི་འོད་ཀྱི་དཀྱིལ་འཁོར་ནས། །ཐུབ་པའི་དབང་པོ་རྣམས་ལ་དབུལ། །རྡོ་རྗེའི་རྣལ་འབྱོར་འདི་ཡིས་ནི། །མེ་ཏོག་མཆོད་པས་རབ་མཆོད་ཅིང་། །ཕྱག་རྒྱ་རྣལ་འབྱོར་བཅས་པ་ཡིས། །ཕྱོགས་རྣམས་ཀུན་དུ་ངེས་པར་སྤྲོ། །ཞེས་པ་ནས། དེ་ནས་རྣལ་འབྱོར་དེ་ཉིད་ཀྱི། །ལུས་དང་ངག་སེམས་བྱུང་བ་ཡི། །མཆོད་པ་དག་ནི་བསྡུས་ནས་སུ། ། སངས་རྒྱས་ཀུན་ལ་དབུལ་བར་བྱ། །ཞེས་གསུངས་པའི་བར་གྱི་མེ་ཏོག་གི་མཆོད་པ་དང་། དེ་བཞིན་དུ་སྤོས་དང་། དྲི་ཆབ་དང་། རིན་པོ་ཆེའི་རྒྱ་མཚོ་རི་རབ་དང་། རྩེ་འཇོ་གླུ་གར་གྱིས་དགའ་བདེ་སྐྱེད་པའི་རིག་མ་དང་། གོས་རྒྱན་དང་། རིན་ཆེན་ཉི་ཟླའི་སྒྲོན་མེ་དང་། སེམས་སྐྱེད་དང་། ཚད་མེད་བཞི་སོགས་བསྒོམ་པ་ཚངས་པའི་རྣལ་འབྱོར་དང་། སྦྱིན་པ་དང་། ཚུལ་ཁྲིམས་དང་། འཇིགས་ཀུན་ལས་སྐྱོབ་བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཡིད་དང་། ངག་དང་། ལུས་ཀྱི་མཆོད་པ་སྟེ་ངོ་མཚར་བའི་མཆོད་པ་བཅོ་བརྒྱད་བཤད་པ་རྣམས་དང་། གཞན་ཡང་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་རྒྱུད་ལས། འཁོར་བ་རྒྱ་མཚོའི་ཡོ་བྱད་རྣམས། །མཆོད་པ་རྒྱ་མཚོའི་རྒྱན་ཡིན་ཏེ། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཐུན་མོང་མཆོད་པ་སྣ་ཚོགས་དང་། །ཀུན་བཟང་མཆོད་པ་ལ་སོགས་པ། །ལྷ་མོ་བརྒྱད་དང་བཅུ་དྲུག་གིས། །མཆོད་པའི་རིམ་པར་བརྩམ་པར་བྱ། །ཞེས་གསུངས་པའི་སྐབས་ཀྱི་ཀུན་ཏུ་བཟང་པོའི་མཆོད་སྤྲིན་ནི། འཇིག་རྟེན་གྱི་ཁམས་རབ་འབྱམས་རྒྱ་མཚོ་མཐའ་ཡས་མུ་མེད་པའི་རྡུལ་ཕྲ་རབ་ཀྱི་གྲངས་དང་མཉམ་པའི་སངས་རྒྱས་དང་བྱང་ཆུབ་སེམས་དཔའ་དེ་སྙེད་ཀྱི་མདུན་དུ་འཇིག་རྟེན་གྱི་ཁམས་རབ་འབྱམས་རྒྱ་མཚོ་མཐའ་ཡས་མུ་མེད་པའི་ས་ཆུ་མེ་རླུང་གི་རྡུལ་ཕྲ་རབ་ཀྱི་གྲངས་ཇི་སྙེད་ཡོད་པའི་རྡུལ་རེ་རེའི་སྟེང་དུ་རང་གི་ལུས་འཇིག་རྟེན་གྱི་ཁམས་རབ་འབྱམས་རྒྱ་མཚོ་མཐའ་ཡས་མུ་མེད་པའི་ས་ཆུ་མེ་རླུང་གི་རྡུལ་ཕྲ་རབ་ཀྱི་གྲངས་ཇི་སྙེད་མཆིས་པའི་གྲངས་སུ་སྤྲུལ་ཞིང་། དེ་སྙེད་ཀྱི་ལུས་རེ་རེ་ལའང་ལག་པ་འཇིག་རྟེན་གྱི་ཁམས་རབ་འབྱམས་རྒྱ་མཚོ་མཐའ་ཡས་མུ་མེད་པའི་ས་ཆུ་མེ་རླུང་གི་རྡུལ་ཕྲ་རབ་ཀྱི་གྲངས་ཇི་སྙེད་ཡོད་པའི་གྲངས་དང་མཉམ་པར་སྤྲུལ་པ་དང་། དེ་འདྲའི་ལག་པ་རེ་རེ་ནའང་ཡིད་དུ་འོང་པའི་མཆོད་རྫས་ཀྱི་དངོས་པོ་འཇིག་རྟེན་གྱི་ཁམས་རབ་འབྱམས་རྒྱ་མཚོ་མཐའ་ཡས་མུ་མེད་པའི་ས་ཆུ་མེ་རླུང་གི་རྡུལ་ཕྲ་རབ་ཀྱི་གྲངས་ཇི་སྙེད་པའི་གྲངས་དང་མཉམ་པར་སྤྲུལ་པས་མཆོད་པ་བྱེད་པ་ལ་ཟེར་བ་ཡིན་ཏེ། འཕགས་པ་སྤྲིན་ཆེན་པོའི་མདོ་ལས། ལུས་རྒྱ་མཚོ་འཇིག་རྟེན་གྱི་ཁམས་རྒྱ་མཚོ་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སངས་རྒྱས་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་དང་། འཇིག་རྟེན་གྱི་ཁམས་རབ་འབྱམས་རྒྱ་མཚོ་ཐམས་ཅད་དང་། ས་དང་། ཆུ་དང་། མེ་དང་། རླུང་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་རྣམས་དང་། གཟུགས་སུ་སྣང་བ་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་རྣམས་ལས་རྡུལ་ཕྲ་རབ་ཀྱི་རྡུལ་རེ་རེ་ལ་ཡང་ལུས་ཀྱི་སྤྲིན་རྒྱ་མཚོ་བགྲང་བའི་རྒྱ་མཚོ་ཐམས་ཅད་ཡང་དག་པར་འདས་པ་གྲངས་མེད། དཔག་ཏུ་མེད། བསམ་གྱིས་མི་ཁྱབ་མཚུངས་པ་མེད། གཞལ་དུ་མེད། བརྗོད་དུ་མེད་པ་ལས་ཡང་དག་པར་འདས་པ་དག་དང་། ལུས་རེ་རེ་ལ་ཡང་ལག་པ་རྒྱ་མཚོའི་སྤྲིན་ཕྱོགས་ཀུན་གྱི་རྒྱུན་དུ་མངོན་པར་ཕྱོགས་པ་དཔག་ཏུ་མེད་གྲངས་མེད་པ་དག་བྱིན་གྱིས་བརླབས་ནས། རྡུལ་ཕྲ་རབ་ཀྱི་རྡུལ་གྱི་ཆ་རེ་རེ་ལས་ཀྱང་མཆོད་པ་ཐམས་ཅད་ཀྱི་སྤྲིན་རྒྱ་མཚོ་ཕྱོགས་ཀུན་གྱི་གཞི་རྒྱས་པར་འགེངས་པ། མ་འདྲེས་པ་རྣམས་ཀྱིས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་མཆོད་པར་བྱའོ་སྙམ་པ་འདི་ལྟ་སྟེ། ཞེས་སོགས་གསུངས་པ་ལྟར་ཡིན་པའི་ཕྱིར་རོ།།

དེས་ན་དེ་ལྟར་འཇིག་རྟེན་གྱི་ཁམས་རབ་འབྱམས་རྒྱ་མཚོའི་རྡུལ་ཕྲ་རབ་རེ་རེ་ལ་ལུས་རྡུལ་གྱི་གྲངས་སྙེད་དང་། ལུས་རེ་རེ་ལ་ལག་པ་རྡུལ་སྙེད་དང་། ལག་པ་རེ་རེ་ལ་མཆོད་རྫས་སྣ་ཚོགས་རྡུལ་སྙེད་ཐོགས་པ་སྤྲུལ་ནས་དཀྱིལ་འཁོར་ལ་མཆོད་པ་ཀུ༷ན་ཏུ༷་བཟ༷ང་པོ༷་ཡི་མཆོད་སྦྲིན་ཏེ། མཆོད་པ་ཐམས་ཅད་ཀྱི་མཆོག་གམ་བླ༷་ན་མེ༷ད་པའི་མཆོད་པའི་སྤྲི༷ན་ཆེན་གྱིས༷་མཁ༷འ་དབྱི༷ངས་ཀྱི་ཁྱོན་ཏུ་ཁྱབ་པ་དང་། མི་གཙང་པ་རྡུལ་སོགས་ཀྱིས་སྦགས་པ་མེད་པར་རྣམ༷་པར་ད༷ག་པའམ་འཁོར་གསུམ་དམིགས་མེད་ཀྱི་ལྟ་བས་ཟིན་པའམ། རབ་ན་ཐམས་ཅད་རིག་སྟོང་གཉིས་སུ་མེད་པ་མཉམ་པ་ཆེན་པོའི་རྒྱས་འཐེབས་པའི་རྣམ་པར་དག་པ་དང་ལྡན་པའི་མཆོད་རྫས་ཀྱི་རྒྱ༷་རབ་ཏུ་ཆེ༷ན་པོ་ཅན་དེ་ཉིད་ཕྱོགས་བཅུ་ནམ་མཁའི་ཁམས་ཐམས་ཅད་ཡོང༷ས་སུ་བཀྲམ་པའམ་བཀོ༷ད་དེ༷། ཞི་ཁྲོའི་ལས་བྱང་རྩ་ཕྲེང་ཚོར་བ་རང་གྲོལ་ལས། སྲིད་པར་གཏོགས་པའི་མེ་ཏོག་སྣ་ཚོགས་རིགས༔ ཞེས་སོགས་དང་། བསྐང་བཤགས་ཉམས་ཆགས་རང་གྲོལ་ལས། ཧཱུཾ་སྟོང་གསུམ་འདིའམ་གཞན་དག་ན༔ ལྷ་རྫས་མཆོག་གི་ཡོན་ཆབ་འདི༔ ཞེས་སོགས་དང་། དཔལ་གསང་བ་བདུད་རྩིའི་རྒྱུད་ལས། སྤོས་སོགས་ཕྱི་ཡི་མཆོད་པ་སྟེ། །ཞེས་དང་། མཁའ་འགྲོ་མ་མེ་ལྕེ་འབར་བའི་རྒྱུད་ལས། སྤོས་དང་མེ་ཏོག་མར་མེ་དྲི་ཆབ་ཀྱིས། །དང་པོ་ལ་ནི་མ་ཡི་མཆོད་པ་བྱ། །ཞེས་དང་། དཔལ་འཁོར་ལོ་སྡོམ་པ་རྡོ་རྗེ་རྒྱལ་པོའི་རྒྱུད་ལས། ཕྱི་ཡི་མཆོད་པ་བཤད་པར་བྱ། །མེ་ཏོག་བདུག་པ་མར་མེ་དང་། །དྲི་དང་ལྷ་བཤོས་བཏུང་བ་དང་། །རོལ་མོ་སིལ་སྙན་དབྱངས་ཉིད་དང་། །སྒེག་དང་རྒོད་དང་གར་ཉིད་དང་། །རྟ་དང་གླང་པོ་རིན་ཆེན་སོགས། །ཞེས་དང་། དཔལ་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། དང་པོ་ཕྱི་ཡི་མཆོད་པ་ནི། །མེ་ཏོག་བདུག་སྤོས་མར་མེ་དང་། །དྲི་དང་ལྷ་བཤོས་བཏུང་བ་དང་། །རོལ་མོ་སིལ་སྙན་དབྱངས་ཉིད་དང་། །ཞེས་དང་། འཁོར་ལོ་རིན་ཆེན་གླང་པོ་རྟ། །བཙུན་མོ་དམག་དཔོན་བློན་པོ་རྣམས། །ཕྱི་ཡི་མཆོད་པ་ཐུན་མོང་ངོ་། །ཞེས་གསུངས་པ་ལྟར་གྱི་ཆུ་གཙང་མའི་མཆོད་ཡོན་དང་། ཞབས་བསིལ་དང་། མེ་ཏོག་དང་། བདུག་སྤོས་དང་། མར་མེ་དང་། དྲི་ཆབ་དང་། ཞལ་ཟས་ཏེ་ཆུ་གཉིས་སྔོན་འགྲོ་ཅན་གྱི་ཉེར་སྤྱོད་བདུན་དང་། རོལ་མོའི་བྱེ་བྲག་སྣ་ཚོགས་དང་། འདུལ་བ་ལུང་གཞི་ལས། ཆོས་ཀྱི་རྒྱལ་པོ་ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །ཞེས་པ་ལྟར་གྱི་འཁོར་ལོ་རིན་པོ་ཆེ་དང་། ནོར་བུ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་མཆོག་རིན་པོ་ཆེ་དང་། བཙུན་མོ་རིན་པོ་ཆེ་དང་། དམག་དཔོན་རིན་པོ་ཆེ་དང་། བློན་པོ་རིན་པོ་ཆེ་སྟེ་འཁོར་ལོས་བསྒྱུར་བའི་རྒྱལ་སྲིད་ལ་དབང་བའི་རིན་པོ་ཆེ་སྣ་བདུན་དང་། དྲན་པ་ཉེ་བར་བཞག་པའི་མདོ་ལས། རལ་གྲི་ཉེ་བའི་རིན་པོ་ཆེ་དང་། པགས་པ་ཉེ་བའི་རིན་པོ་ཆེ་དང་། མལ་ཆ་ཉེ་བའི་རིན་པོ་ཆེ་དང་། ཚལ་ཉེ་བའི་རིན་པོ་ཆེ་དང་། ཁྱིམ་ཉེ་བའི་རིན་པོ་ཆེ་དང་། གོས་ཉེ་བའི་རིན་པོ་ཆེ་དང་། ལྷམ་ཉེ་བའི་རིན་པོ་ཆེའོ། །ཞེས་གསུངས་པ་ལྟར་གྱི་ཁང་བཟང་ཉེ་བའི་རིན་པོ་ཆེ་དང་། མལ་ཆ་ཉེ་བའི་རིན་པོ་ཆེ་དང་། མཆིལ་ལྷམ་ཉེ་བའི་རིན་པོ་ཆེ་དང་། གོས་ཉེ་བའི་རིན་པོ་ཆེ་དང་། པགས་པ་ཉེ་བའི་རིན་པོ་ཆེ་དང་། རལ་གྲི་ཉེ་བའི་རིན་པོ་ཆེ་དང་། ཚལ་ཉེ་བའི་རིན་པོ་ཆེ་སྟེ་ཉེ་བའི་རིན་ཆེན་བདུན་དང་། སྤྱན་རས་གཟིགས་ཀྱི་རྩ་རྒྱུད་པདྨ་དྲ་བ་ལས། སེམས་ཅན་ཀུན་དོན་སྤྱོད་པའི་རྫས། །ཐུབ་པའི་བཀྲ་ཤིས་བཞེད་པའི་རྟགས། །གདུགས་ཉ་བུྃ་པ་དཔལ་བེའུ་དུང་། །རྒྱལ་མཚན་འཁོར་ལོ་པད་མ་བསྩལ། །ཞེས་དང་། སློབ་དཔོན་སངས་རྒྱས་གསང་བས་མཛད་པར་གྲགས་པ་ངན་སོང་སྦྱོང་བའི་རྒྱུད་དོན་གྱི་འབྲུ་འགྲེལ་ལས། སྐུ་ཆོས་ཉིད་ལ་རྣལ་འབྱོར་རྟགས་བརྒྱད་དུ་བསྟན་པས་ན། བཀྲ་ཤིས་བརྒྱད་དེ། པདྨ་ཅན་དཔལ་བེའུ། འཇིགས་བྱེད་འཁོར་ལོ། །རྣམ་པར་རྒྱལ་བ་རྒྱལ་མཚན། གདངས་ཅན་གདུགས། འོད་ལྡན་པདྨ། ཡིད་གཞུངས་པ་བུམ་པ། དྲི་མེད་དུང་འཛིན་པ་དང་། ཡིད་བཟངས་གསེར་ཉ་སྟེ། ཞེས་དང་། སློབ་དཔོན་སྡོམ་པ་བཟང་པོས་མཛད་པའི་སྐྱབས་འགྲོ་སེམས་བསྐྱེད་དབང་བཞིའི་གདམས་པ་ལས། བཀྲ་ཤིས་རྫས་བརྒྱད་ཀྱི་བཀྲ་ཤིས་ནི། བཀྲ་ཤིས་ཀུན་གྱི་བཀྲ་ཤིས་པ། །ཆོས་ཀྱི་རྒྱལ་མཚན་ལེགས་པར་འཛུགས། །སངས་རྒྱས་སྐུ་ཡི་བཀྲ་ཤིས་ཤོག །ཆོས་ཀྱི་དུང་སྟེ་སྒྲ་ཆེན་ལྡན། །བུདྡྷ་གསུང་གི་བཀྲ་ཤིས་ཤོག །འོད་བཟང་འབར་བ་དཔལ་གྱི་བེའུ། །བུདྡྷ་ཐུགས་ཀྱི་བཀྲ་ཤིས་ཤོག །ཁྱབ་བདག་ཆེན་པོ་རིན་ ཆེན་གདུགས། །བུདྡྷ་དབུ་ཡི་བཀྲ་ཤིས་ཤོག །སྤྱན་ལྔ་ཆགས་པ་མེད་པ་འཆང་། །བུདྡྷ་སྤྱན་གྱི་བཀྲ་ཤིས་ཤོག །བུམ་པ་བཟང་པོ་ཆེ་བའི་མཆོག །བུདྡྷ་མགུལ་གྱི་བཀྲ་ཤིས་ཤོག །ཉིད་ཀྱི་ཞལ་ནས་ལྗགས་བཟང་བ། །བུདྡྷ་ལྗགས་ཀྱི་བཀྲ་ཤིས་ཤོག །བཀྲ་ཤིས་ཀུན་གྱི་བཀྲ་ཤིས་པ། །གྲགས་པའི་བཀྲ་ཤིས་སྙན་གྲགས་དགེ །སྤྲུལ་པའི་འཁོར་ལོ་སྣ་ཚོགས་འཆང་། །སངས་རྒྱས་ཞབས་ཀྱི་བཀྲ་ཤིས་ཤོག །ཅེས་གསུངས་པར་ལྟར་གྱི་དབུ་ལ་གདུགས་དཀར་དང་། སྤྱན་ལ་གསེར་ཉ་དང་། ལྗགས་ལ་པདྨ་དང་། ཚེམས་ལ་དུང་དཀར་དང་། མགུལ་ལ་བུམ་པ་དང་། ཐུགས་ལ་དཔལ་བེའུ་དང་། སྐུ་ལ་རྒྱལ་མཚན་དང་། ཞབས་ལ་འཁོར་ལོ་སྟེ་བཀྲ་ཤིས་པའི་རྟགས་བརྒྱད་དང་། སྤྱན་རས་གཟིགས་རྩ་རྒྱུད་པདྨ་དྲ་བ་ལས། ནད་སེལ་བདེ་བྱེད་འཚོ་བའི་ཕྱིར། །འདོད་ཡོན་ཕྱོགས་རིས་གྲུབ་པའི་རྫས། །གིའུ་ཝང་དུར་བ་ལི་ཁྲི་ཞོ། །བིལ་བ་སྦྲང་རྩི་ཨ་རུ་ར། །ཀ་ར་བི་རའི་འབྲས་བུ་རྣམས། །ཧྲི་ཞེས་དག་པས་བསྩལ་བར་བྱ། །ཞེས་གསུངས་པ་དང་། སྔགས་འཆང་རཏྣ་ཤཱི་ལས་མཛད་པའི་རྣམ་འཇོམ་ལག་ལེན་ལས། ཡུངས་ཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་འཇོམས་པར་བྱེད་པའོ། །མཐུ་སྟོབས་ཡོན་ཏན་ཕུན་སུམ་ཚོགས་འགྱུར་བར། །བཀྲ་ཤིས་དེས་ཀྱང་ཐམས་ཅད་ཞི་བར་ཤོག །དཱུར་བས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་གྲུབ་ནས། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡི། །བཀྲ་ཤིས་དེས་ཀྱང་ཚེ་ནི་འཕེལ་བར་ཤོག །བིལ་བས་རྒྱུ་རྐྱེན་འབྲས་བུར་གྱུར་པའི་ཆོས། །འཇིག་རྟེན་པ་ལས་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ཀྱང་མཆོག་ཏུ་གྲུབ་གྱུར་ཅིག །གི་ཝང་དུག་གསུམ་འཇོམས་པའི་ནད་ཀྱི་སྨན། །ཆོས་ཀྱི་ཆོས་ཉིད་རབ་ཏུ་རྟོགས་ནས་ནི། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ཀྱང་སྡུག་བསྔལ་བྲལ་གྱུར་ཅིག །ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ལུས་དབང་དུ་བསྡུས་ནས་ཀྱང་། །ཆོས་ཀྱི་རྒྱལ་སྲིད་རབ་བརྟན་གྱུར་པ་སྟེ། །བཀྲ་ཤིས་དེས་ཀྱང་ཁྱོད་སྲིད་བརྟན་གྱུར་ཅིག །ཞོ་ནི་ཀུན་གྱི་སྙིང་པོར་གྱུར་པས་ན། །སྙིང་པོ་རྣམ་དག་ཡེ་ཤེས་རྣམ་རྟོགས་ནས། །ཡོན་ཏན་ཆོས་ཀྱི་དབྱིངས་སུ་གྱུར་པ་ཡི། །བཀྲ་ཤིས་དེས་ཀྱང་དུག་གསུམ་ཞི་བར་ཤོག །མེ་ལོང་ཡེ་ཤེས་ཆེན་པོའི་རྒྱ་མཚོ་ཡིས། །ཡེ་ཤེས་རྒྱ་མཚོ་མཆོག་ཏུ་བདག་གྱུར་ཏེ། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ཀྱང་དེང་ཁྱོད་དགའ་གྱུར་ཅིག །དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡེ་ཤེས་རྒྱ་མཚོ་ཉིད་དུ་བདག་གྱུར་ཏེ། །ཆོས་རྣམས་མ་ལུས་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་ལ་དབང་ཐོབ་ཤོག །ཅེས་གསུངས་པ་ལྟར་གྱི་ཡུང་དཀར་དང་། དུར་བཱ་དང་། བིལ་བ་དང་། གི་ཝང་དང་། ལི་ཁྲི་དང་། ཞོ་དང་། མེ་ལོང་དང་། དུང་དཀར་ཏེ་བཀྲ་ཤིས་པའི་རྫས་བརྒྱད་དང་། རྒྱལ་པོའི་རྣ་ཆ་དང་། བཙུན་མོའི་རྣ་ཆ་དང་། བློན་པོའི་རྣ་ཆ་དང་། གླང་པོ་ཆེའི་མཆེ་བ་དང་། བསེ་རུའི་རྭ་དང་། བྱུ་རུའི་སྡོང་པོ་དང་། ནོར་བུ་མིག་གསུམ་པ་སྟེ་ནོར་བུ་ཆ་བདུན་ལ་སོགས་པ་མདོར་ན། སློབ་དཔོན་གཉིས་མེད་རྡོ་རྗེས་མཛད་པའི་དཔལ་འཁོར་ལོ་སྡོམ་པའི་རབ་གནས་ལས། བྱང་ཆུབ་སེམས་དཔའ་ལ་ཐུན་མོང་དུ་རིན་པོ་ཆེ་སྣ་བདུན་དང་། བཀྲ་ཤིས་རྫས་བརྒྱད་དང་། འཇིག་རྟེན་པའི་བཀྲ་ཤིས་པའི་བིལ་བ་སྟར་ཀ་དང་། ཞོ་དང་། རས་ཡུག་དཀར་པོ་དང་། གདུགས་གསེར་གྱི་ཡུ་བ་ཅན་རྣམས་དབུལ། ཞེས་དང་། སློབ་དཔོན་བརྒྱ་བྱིན་སྡོང་པོས་མཛད་པའི་མཁའ་འགྲོ་སྒྱུ་མ་བདེ་མཆོག་གི་རྒྱུད་དོན་རྣམ་བཤད་ལས། རྡོ་རྗེ་ཚིག་དང་མཆོད་ལ་སོགས། །གླུ་དང་སིལ་སྙན་རྣམ་པར་སྤྲུལ། །མེ་ཏོག་བདུག་པའི་སྦྱོར་བ་དག །མར་མེ་དྲི་ལ་སོགས་ལྡན་པར། །མཆོད་པའི་ལྷ་མོ་དག་དང་བཅས་པའི་མཆོད་པའི་ཚོགས་གཟུགས་ཀྱི་བྱེ་བྲག་རིན་པོ་ཆེ་སྣ་བདུན་དང་། མཆོད་པའི་དངོས་པོ་བརྒྱད་དང་། བཀྲ་ཤིས་ཀྱི་རྫས་བརྒྱད་དང་། བུམ་པ་བཟང་པོ་དང་། དཔག་བསམ་གྱི་ཤིང་དང་། འདོད་འཇོའི་བ་དང་། ཡིད་བཞིན་གྱི་ནོར་བུ་ལ་སོགས་པའི་འདྲ་འབག་གིས་བཅོས་པའི་ལྷ་མོ་དག་ཀྱང་གཞག་པར་བྱའོ། །སྒྲའི་བྱེ་བྲག་གླིང་བུ་དང་། པི་ཝང་དང་། རྫ་རྔ་དང་། རྔ་ཟླུམ་དང་། དུང་དང་། ཟངས་དུང་དང་། མུ་ཏིག་ཧ་ར་དང་། དགུ་པོ་རྒྱུད་མངས་དང་། ཆ་ལང་དང་། ཕེག་རྡོབ་པ་ལ་སོགས་པ་དངོས་སུ་སྒྲ་འབྱིན་པ་དང་། རོལ་མོ་དང་གཟུགས་བརྙན་གྱིས་བཅོས་པ་དག་ཀྱང་གཞག་པར་བྱའོ། །དྲིའི་ཚོགས་ལ་ཨ་ཀ་རུ་དང་དུ་རུ་ཀ་དང་། སྤོས་ལ་སོགས་པའི་རྒྱུ་ལས་བྱུང་བ་དང་། གོརྴི་ཥ་དང་། སྦྲུལ་གྱི་སྙིང་པོ་དང་། བསུང་ལྡན་དང་། ག་པུར་ལ་སོགས་པའི་རྫས་ཁྱད་པར་ཅན་དག་ཀྱང་གཞག་པར་བྱའོ། །སྦྱར་བ་དང་རང་བཞིན་གྱི་རྒྱུ་ལས་བྱུང་བ་རྣམས་ཀྱང་སོ་སོའི་གནས་སུ་དགོད་པར་བྱའོ། །རོའི་ཚོགས་མངར་བ་དང་སྐྱུར་བ་ལ་སོགས་པའི་རོ་དྲུག་དང་སྦྱར་བའི་རྫས་སྟོན་མོའི་གཡོས་ཀྱི་བྱེ་བྲག་སྣ་ཚོགས་པ་དག་ཀྱང་དགོད་པར་བྱའོ། །རེག་བྱའི་བྱེ་བྲག་སྟོད་གཡོགས་དང་། སྨད་གཡོགས་དང་། ཅོད་པན་དང་། རྣ་རྒྱན་དང་། དཔུང་རྒྱན་དང་། དོ་ཤལ་དང་། སེ་མོ་དོ་དང་། ཕྲེང་བ་ལ་སོགས་པའི་རྒྱན་རྣམས་ཀྱང་གདགས་པར་བྱའོ། །ཞེས་སོགས་གསུངས་པ་ལྟ་བུའི་ཕྱི༷་ཡི་མཆོད་པ་སྣ་ཚོགས་པ་རྒྱ་ཆེ་ཞིང་གྲངས་མེད་པ་རྒྱ་མཚོ་ལྟ་བུ་ཡིས་མཆོད་པར་བྱའོ། །ཞེས་པའོ།།

དེ་བཞིན་དུ་ནང་གི་མཆོད་པ་ལ་ནི། ལས་བྱང་ཚོར་བ་རང་གྲོལ་ལས། ཧཱུཾ་བླ་མ་ཀུན་བཟང་ཞི་ཁྲོའི་ཚོགས༔ རྒྱལ་བ་རྒྱ་མཚོའི་ཚོགས་བཅས་ལ༔ ལྷ་རྫས་ནང་མཆོད་འབུལ་བ་ནི༔ ཧཱུཾ་སྣོད་བཅུད་གཟུགས་སྣང་ཐམས་ཅད་ཀུན༔ རྡོ་རྗེ་གཟུགས་མའི་ཚོགས་སྤྲུལ་ནས༔ དངོས་འབྱོར་ཡིད་སྤྲུལ་གཟུགས་མཆོད་འདི༔ ཞེས་སོགས་མཛེས་པའི་གཟུགས་དང་། སྙན་པའི་སྒྲ་དང་། ཞིམ་པའི་དྲི་དང་། མངར་བའི་རོ་དང་། འཇམ་པའི་རེག་བྱ་སྟེ་གཟུགས་སྒྲ་དྲི་རོ་རེག་བྱ་བཅས་འདོད་ཡོན་ལྔ་དང་། དེ་དག་གི་སྟེང་དུ་ཆོས་ཁམས་བསྣན་པ་བཅས་འདོད་ཡོན་དྲུག་གི་མཆོད་པ་གཟུགས་རྡོ་རྗེ་མ་ལ་སོགས་པ་ནང་མཆོད་པའི་ལྷ་མོ་རྣམས་ཀྱིས་མཆོད་པ་ནི་ཀརྨ་གླིང་པའི་ཞི་ཁྲོ་རང་གཞུང་འདིར་བསྟན་པ་ལྟར་གྱི་ནང་གི་མཆོད་པ་དང་། གཞན་ཡང་དུར་ཁྲོད་ཀྱི་རྒྱན་རྨད་དུ་བྱུང་བ་ལས། རང་གི་ལུས་ལས་བྱུང་བ་ཡི། །བདུད་རྩི་ལྔ་དང་བཏུང་བ་དང་། ཤ་ལྔ་ལྷག་པའི་རྫས་རྣམས་ནི། །ཕུང་པོ་ཁམས་དང་སྐྱེ་མཆེད་ཀྱི། །འཁོར་ལོ་རྣམས་ལ་མཆོད་པ་ནང་། །ཞེས་དང་། གཉིས་པ་ནང་གི་གཏོར་མ་ནི། །ཕུང་པོ་ཁམས་དང་སྐྱེ་མཆེད་རྣམས། །ལུས་ནི་ལྷ་ཡི་འཁོར་ལོ་ལ། །རྩ་ནི་ཡེ་ཤེས་མཁའ་འགྲོ་མ། །སྲིན་བུ་ལས་ཀྱི་མཁའ་འགྲོ་མཆོད། །ཅེས་དང་། དཔལ་རྡོ་རྗེ་རྒྱལ་པོའི་རྒྱུད་ལས། དེ་ནས་ནང་གི་མཆོད་པ་ནི། །བྷ་ག་བཙུམས་ལ་ཀུ་ཙ་བཙིར། །བདུད་རྩི་ལྔ་དང་བཏུང་བ་ལྔ། །བྱང་ཆུབ་སེམས་དང་ལྡན་བྱས་ཏེ། །ཕུང་པོ་ཁམས་དང་སྐྱེ་མཆེད་རྣམས། །དེ་ལ་སོགས་པས་མཆོད་པར་བྱ། །ཞེས་དང་། མཁའ་འགྲོ་མ་མེ་ལྕེ་འབར་བའི་རྒྱུད་ལས། ཤ་ལྔ་བདུད་རྩི་ལྔ་དང་བཟའ་བཏུང་གིས། །དེ་ནས་གཉིས་པ་ནང་གི་མཆོད་པ་དབུལ། །ཞེས་དང་། གསང་བ་བདུད་རྩིའི་རྒྱུད་ལས། བདུད་རྩི་ལ་སོགས་ནང་དུའོ། །ཞེས་གསུངས་པ་ལྟར། ཤ་ལྔ་དང་། བདུད་རྩི་ལྔ་དང་། ནང་གི་ཕུང་ཁམས་སྐྱེ་མཆེད་ལ་སོགས་པ་ནང༷་གི་མཆོད་པ་སྣ་ཚོགས་པ་རྒྱ་ཆེ་ཞིང་གྲངས་མེད་པ་རྒྱ་མཚོ་ལྟ་བུ་དག་གིས་མཆོད་པར་བྱའོ།།

དུར་ཁྲོད་ཀྱི་རྒྱན་རྨད་དུ་བྱུང་བ་ལས། གཟུགས་དང་སྒྲ་དང་དྲི་དང་ནི། །རོ་དང་རེག་བྱ་འཇམ་པ་དང་། །ཞེས་དང་། རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས། འདོད་ཡོན་ལྔ་ཡི་རྣམ་པ་ནི། །གཟུགས་སྒྲ་དྲི་རོ་རེག་བྱ་སོགས། །རྣལ་འབྱོར་སེམས་དཔའ་སྤྱད་བྱ་ཞིང༌། །ཞེས་དང་། དཔལ་ཟླ་གསང་ཐིག་ལེའི་རྒྱུད་ལས། གཟུགས་སྒྲ་དྲི་རོ་རེག་གི་རྣམས། །བདུག་པ་མེ་ཏོག་བསུང་ལྡན་པ། །གཟི་བརྗིད་ཆེན་པོ་འོད་དང་ལྡན། །ཅི་རིགས་པར་ནི་གཞག་པར་བྱ། །ཞེས་གསུངས་པའི་འདོད་ཡོན་ལྔ་ཡི་མཆོད་པ་ནི། སྐབས་འགར་ཕྱི་མཆོོད་དང་། སྐབས་འགར་ནང་དུ་བྱས་པ་ཅི་རིགས་ཡོད་པར་མངོན་ཏེ་ཞར་བྱུང་ངོ་།།

གཞན་ཡང་། གསང་བའི་མཆོད་པ་འབུལ་བ་ལ་ནི། ཞི་ཁྲོའི་རང་གཞུང་ལྟར་ན། རྡོ་རྗེའི་ཆོས་སྤྱོད་ལས་མཎྜལ་གྱི་སྐབས་སུ། རང་ལུས་རྩ་ཁམས་དག་པའི་གཞལ་ཡས་སུ། །དབང་པོ་རྣམ་ལྔ་བཀྲག་དང་མདངས་ཀྱིས་བརྒྱན། །ཁམས་དང་སྐྱེ་མཆེད་ཡོངས་སུ་དག་པ་འདི། །ཞེས་དང་། ལས་བྱང་ཚོར་བ་རང་གྲོལ་ལས། རིགས་ལྔ་ཡབ་ཡུམ་གཉིས་ཀྱིས་རྒྱུ་བྱས་ཏེ༔ སྐུ་ལྔ་ཡེ་ཤེས་ལྔ་ཡིས་རྐྱེན་བྱས་ནས༔ ཐབས་ཤེས་རྒྱུ་ལ་མ་འགགས་རྐྱེན་སྦྱར་ནས༔ དམ་པ་རིགས་བརྒྱའི་འབྲུ་བཅུད་བདུད་རྩི་འདི༔ བླ་མ་ཀུན་བཟང་ཞི་ཁྲོའི་ཚོགས་ལ་འབུལ༔ ཞེས་པ་ནས། ཕྱི་སྣོད་འཇིག་རྟེན་གཏོར་གཞོང་དུ༔ ནང་བཅུད་སེམས་ཅན་གཏོར་མར་བཤམས༔ རྩི་བཅུད་འབྲས་བུ་སྨན་གྱིས་བརྒྱན༔ ཞི་ཁྲོ་སྤྲུལ་པའི་སྐུ་ལ་འབུལ༔ ཞེས་དང་། གསང་མཆོག་སྐུ་ཡི་བདེ་ཆེན་རིག་མ་ནི༔ ཞེས་པ་ནས། གསང་མཆོག་བདེ་བའི་མཆོད་པ་བཞེས་སུ་གསོལ༔ ཞེས་པའི་བར་རྣམས་ཀྱིས་གསང་བའི་མཆོད་པ་བསྟན་པ་ཡིན་པས་དེ་ལྟར་མིག་སོགས་དབང་པོ་དྲུག་དང་། ནང་སྐྱེས་བུའི་ལུས་ཀྱིས་བསྡུས་པའི་ཕུང་ཁམས་སྐྱེ་མཆེད་དང་། སྨན་དང་། རཀྟ་དང་། གཏོར་མའི་མཆོད་པ་ལ་སོགས་པ་དང་། རྩ་རླུང་ཐིག་ལེ་སོགས་ཀྱི་ཁམས་རྣམ་པར་དག་པ་དང་། གསང་བ་རིག་མའི་མཆོད་པ་བཅས་ཀརྨ་གླིང་པའི་ཞི་ཁྲོ་རང་གཞུང་འདིར་གསང་བའི་མཆོད་པར་བསྟན་པ་དག་གི་མཆོད་པར་གོ་བར་བྱའོ།།

གཞན་ཡང་། དུར་ཁྲོད་ཀྱི་རྒྱན་རྨད་དུ་བྱུང་བ་ལས། དེ་ནས་གསང་བའི་མཆོད་པ་ནི། །རང་སྣང་ཐབས་ཀྱི་རིག་མ་ཡི། །སྐྲ་བཟུང་བྷ་ག་ཀུ་ཙ་བཙིར། །རྩ་དང་རླུང་དང་ཐིག་ལེ་སོགས། །དགའ་བ་མཆོག་དགའ་དགའ་བྲལ་དང་། །ལྷན་ཅིག་སྐྱེས་པའི་བདེ་བ་མཆོད། །ཅེས་དང་། གསུམ་པ་གསང་བའི་གཏོར་མ་ནི། །འཁོར་ལོ་བཞི་ཡི་ཀ་པཱ་ལར། །རླུང་དང་ཐིག་ལེ་བདུད་རྩི་ལ། །དགའ་བ་གསུམ་གྱིས་བྱིན་བརླབས་ཏེ། །ལྷན་ཅིག་སྐྱེས་པ་མཆོད་པར་བྱ། །ཞེས་དང་། དཔལ་རྡོ་རྗེ་རྒྱལ་པོའི་རྒྱུད་ལས། དེ་ནས་གསང་བའི་མཆོད་པ་ནི། །རྩ་དང་རླུང་དང་ཐིག་ལེ་སྟེ། །དེ་ཉིད་གཉིས་མེད་བདེ་བ་ཡིས། །རྩ་དང་རླུང་སོགས་ཐིག་ལེས་མཆོད། །ཅེས་དང་། མཁའ་འགྲོ་མ་མེ་ལྕེ་འབར་བའི་རྒྱུད་ལས། གསང་བའི་མཆོད་པ་ཁུ་བའི་ཐིག་ལེ་དེས། །དང་པོ་གཙོ་བོ་རྡོ་རྗེ་འཛིན་པ་མཆོད། །གཉིས་པས་ལྷ་མོ་དཔོན་གཡོག་མཆོད་པར་བྱ། །གསུམ་པས་ཁུ་བ་བདག་བཏུང་དངོས་གྲུབ་བླངས། །ཞེས་དང་། གསང་བ་བདུད་རྩིའི་རྒྱུད་ལས། གསང་བར་བདེ་བའི་རོ་ཡིས་མཆོད། །ཅེེས་གསུངས་པ་ལྟར། མཚན་ལྡན་མའི་མཁའ་ལ་བརྟེན་ནས་བྱུང་བའི་དགའ་བཞིའི་ཡེ་ཤེས་བཅུ་དྲུག་གི་བདེ་སྟོང་གི་རོ་ཁྱད་པར་བ་སོགས་གས༷ང་བ༷འི་མ༷ཆོད་པ༷་སྣ་ཚོགས་པ་རྒྱ་ཆེ་ཞིང་གྲངས་མེད་པ་རྒྱ་མཚོ་ལྟ་བུ་བཅས་མཆོད་པ་ཅི་མཆིས་པས་མཆོད་པ་སྟེ། མཆོད་པའི་དངོས་པོ་རྒྱ་ཆེ་བ་རྒྱ༷་མཚོ༷་ལྟ་བུས༷་ཞི་ཁྲོའི་དཀྱིལ་འཁོར་ལ་མཆོ༷ད་པར་བྱའོ་ཞེས་པའོ།།

དེ་ལྟར་ཕྱི་ནང་གསང་བའི་མཆོད་པ་ཕྱེ་བའི་ཚུལ་མང་མོད། འདིར་ཀརྨ་གླིང་པའི་ཞི་ཁྲོ་རང་གཞུང་དུ་ནང་མཆོད་གོང་ལྟར་བགྱིས་འདུག་ལ། ལས་བྱང་ལས། གསང་མཆོག་སྐུ་ཡི་བདེ་ཆེན་རིག་མ་ནི༔ ཞེས་གསང་བ་བདེ་ཆེན་གྱི་མཆོད་པ་དེ་གསང་མཆོད་དུ་བྱས་ཤིང་། སྨན་རཀ་གཏོར་གསུམ་ལོགས་སུ་བཀར་མོད། སྨན་རཀ་གཏོར་གསུམ་གྱི་མཆོད་པ་ནི་དོན་ལ་གསང་མཆོད་དུ་འདུ་བས་འདི་ལྟར་གསང་མཆོད་དུ་བཞག་པ་འཐད་དམ་སྙམ་མོ།།

གཉིས་པ་ཡང་གསང་བླ་ན་མེད་པ་དེ་ཁོ་ན་ཉིད་ཀྱི་མཆོད་པ་ནི། ཀུན་ཏུ་བཟང་མོ་གསང་བའི་བྷ་ག་རུ༔ རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན༔ འདུ་འབྲལ་མེད་པའི་ངང་དུ་རོ་གཅིག་པའི༔ གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག༔ ཅེས་པ་སྟེ། ཤོ་ལོ་ཀ་གཅིག་གིས་བསྟན་ལ། དེ་ཡང་དུར་ཁྲོད་ཀྱི་རྒྱན་རྨད་དུ་བྱུང་བ་ལས། རང་རིག་སྟོང་པར་རྟོགས་པ་ཡི། །འོད་གསལ་དེ་ཉིད་ཆོས་སྐུ་ལ། །ཞེན་པ་རྣམས་དང་བྲལ་བ་ནི། །བླ་ན་མེད་པའི་མཆོད་པའོ། །ཞེས་དང་། དེ་ཉིད་བཞི་པའི་གཏོར་མ་ནི། །ཕྱི་ནང་དངོས་པོའི་གཏོར་མ་ཀུན། །ཆོས་ཀྱི་དབྱིངས་ཀྱི་པད་སྣོད་དུ། །དོན་དམ་སེམས་ཀྱི་གསུམ་སྔགས་ཀྱིས། །བདེ་བ་ཆེན་པོའི་ངང་ལ་མཆོད། །ཞེས་དང་། དཔལ་རྡོ་རྗེ་རྒྱལ་པོའི་རྒྱུད་ལས། དེ་ནས་བླ་མེད་མཆོད་པ་ནི། །རང་རིག་སྟོང་པར་རྟོགས་པ་ཡིས། །འོད་གསལ་དེ་ཉིད་ཆོས་ཀྱི་སྐུ། །དེ་ཉིད་བླ་མེད་མཆོད་པ་མཆོག །ཅེས་དང་། གསང་བ་བདུད་རྩིའི་རྒྱུད་ལས། མཐར་ཐུག་སྟོང་པའི་རོ་ཡིས་མཆོད། །ཅེས་དང་། རྡོ་རྗེ་གྲུབ་པ་དྲྭ་བ་སྡོམ་པའི་རྒྱུད་ཀྱི་རྒྱལ་པོ་ལས། དཔལ་ནི་གཉིས་མེད་ཡེ་ཤེས་ཏེ། །དེ་ཉིད་མཆོད་པའི་འོས་ཡིན་ལ། །གཉིས་མེད་བདེ་བས་མཆོད་པར་བྱ། །ཞེས་གསུངས་པ་ལྟར། ཆོས་ཐམས་ཅད་ཀྱི་ཆོས་ཉིད་སྐྱེ་འགགས་མེད་པ་ཀུ༷ན་ཏུ༷་བཟང༷་མོ༷་གས༷ང་བ༷་བསམ་བརྗོད་ལས་འདས་པའི༷་བྷ༷་ག༷་ཡི་དབྱིངས་དེ་རུ༷་སྣང་བའི་ཆོས་སུ་གྲུབ་པ་ཐམས་ཅད་དང་དག་པ་རྒྱལ༷་བ༷འི་དཀྱི༷ལ་འཁོ༷ར་ར༷བ་འབྱམ༷ས་སུ་སྣང་བ་མ༷་ལུས༷་པ་ཐམས་ཅད་ཀུན༷་ཀྱང་གཟུང་འཛིན་གཉིས་སུ་མེད་པའི་རིག་པའི་ཡེ་ཤེས་ཀྱི་ངོ་བོ་དང་འདུ༷་བ་དང་འབྲ༷ལ་བ་མེ༷ད་པ༷འི་སྒོ་ནས་དབྱིངས་དེའི་ངང༷་དུ༷་དབྱེར་མེད་རོ༷་གཅི༷ག་པ་ཉིད་ཡིན་པས༷་ན། དེ་འདྲའི་ངང་སྐྱོང་བའི་རིག་སྟོང་གཉིས༷་སུ་མེ༷ད་པ་དོན་དམ་བྱང༷་ཆུབ༷་ཀྱི་སེམས༷་དེ་ཉིད་ཀྱི༷ས་བཤགས་ཡུལ་ཞི་ཁྲོའི་ལྷ་ཚོགས་རྣམས་མཆོད་པར་བགྱིད་ཅིང་། མཆོད་པ་དེས་ཐུགས་མཉེས༷་པར་གྱུར༷་ཅི༷ག་ཅེས་གསང་བ་གནས་ལུགས་དེ་ཁོ་ན་ཉིད་དང་དེ་རྟོགས་ཀྱི་ཡེ་ཤེས་ལ་སྦྱར་ན་ཤིན་ཏུ་མཛེས་ཤིང་དེ་ནི་དེ་ཁོ་ན་ཉིད་དམ་བླ་ན་མེད་པའི་མཆོད་པ་ཞེས་བྱའོ།།

གཞན་ཡང་དཔལ་རྡོ་རྗེ་རྒྱལ་པོའི་རྒྱུད་ལས། དེ་ནས་རབ་གསང་མཆོད་པ་ནི། །དང་པོ་དགའ་དང་མཆོག་དགའ་དང་། །དགའ་བྲལ་དེ་བཞིན་ལྷན་སྐྱེས་དགའ། །བདེ་བའི་ཁྱད་པར་དེ་ཉིད་ཀྱིས། །རང་བཞིན་དགའ་སོགས་ཐམས་ཅད་མཆོད། །ཅེས་གསུངས་པ་ལྟར། རང་ཉིད་ཡབ་ཀུན་ཏུ་བཟང་པོར་བསྒོམ། མཚན་ལྡན་གྱི་ལས་རྒྱ་དེ་ཉིད་ཡུམ་ཀུ༷ན་ཏུ༷་བཟ༷ང་མོ༷་རུ་བསྒོམ། སྙོམས་པར་ཞུགས་པའི་སྦྱོར་བས་ཀུནྡ་བྱང་ཆུབ་ཀྱི་སེམས་ཞུ་བ་རྩ་འཁོར་རྣམས་སུ་བརྒྱུད་པའི་བདེ་བས་དགའ་བ་བཞིའི་ཡེ་ཤེས་རིམ་པར་བསྐྱེད་ཅིང་། བྱང་སེམས་ཐབས་ཀྱི་རང་བཞིན་ཡབ་ཀྱི་རྡོ་རྗེའི་རྩེ་ནས་ཤེས་རབ་སྟོང་པའི་རང་བཞིན་ཡུམ་གྱི་གསང༷་བ༷འི་བྷ༷་ག༷་རུ༷་སླེབས་པ་བརྟན་པའི་བདེ་བ་ལས་སྐྱེས་པའི་ཐབས་ཤེས་གཉིས་སུ་མེད་པ་བདེ་སྟོང་ལྷན་ཅིག་སྐྱེས་པའི་ཡེ་ཤེས་དམིགས་པ་མེད་པ་དེའི་ངོ་བོར་རྒྱལ༷་བ༷འི་གཟུགས་བརྙན་ལྷའི་དཀྱིལ༷་འཁོར༷་དང་དོན་དམ་ཡེ་ཤེས་ཀྱི་དཀྱིལ་འཁོར་རབ༷་འབྱམ༷ས་མུ་མཐའ་མེད་པ་ཐམས་ཅད་མ༷་ལུས༷་པ་ཀུ༷ན་ཀྱང་ཚུར་འདུ༷་བ་དང་ཕར་འབྲལ༷་བའི་སྤྲོས་པའི་མཚན་མ་གང་ཡང་མེ༷ད་པ༷འི་ངང༷་དུ༷་རོ༷་གཅི༷ག་པས༷་ན། དེ་འདྲའི་མཆོད་བྱ་མཆོད་བྱེད་དང་བྲལ་བའི་དབྱིངས་དང་ཡེ་ཤེས་རོ་གཅིག་ཏུ་འདྲེས་པའི་གཉིས༷་སུ་མེ༷ད་པ་དོན་དམ་བྱང༷་ཆུབ༷་ཀྱི་སེམས༷་བདེ་བ་ཆེན་པོའི་ཡེ་ཤེས་ཀྱིས༷་ཞི་ཁྲོའི་ལྷ་ཚོགས་རྣམས་ལ་མཆོད་པར་བགྱིད་ཅིང་། མཆོད་པ་དེས་མཉེས༷་པར་གྱུར༷་ཅི༷ག་ཅེས་པ་ནི་དབང་གསུམ་པ་ལས་ཐོབ་པའི་ཡེ་ཤེས་བདེ་ཆེན་གསང་བ་མཆོག་གི་མཆོད་པ་ལ་གོ་བར་བྱས་ཀྱང་རུང་བ་ཤེས་པར་བྱའོ།།

འོ་ན་གོང་དུ། གསང་མཆོག་སྐུ་ཡི་བདེ་ཆེན་རིག་མ་ནི༔ སོགས་ཀྱི་སྐབས་ནས་བསྟན་པའི་རིག་མས་བསྐྱེད་པའི་ཡེ་ཤེས་དེ་གསང་མཆོད་དུ་བྱས་པ་དང་། འདིར་ཡང་ཀུན་ཏུ་བཟང་མོའི་མཁའ་ལ་བསྟེན་པའི་ཡེ་ཤེས་དེ་ཁོ་ན་ཉིད་མཆོད་དུ་བཞག་པ་ལ་ཁྱད་པར་ཅི་ཡང་མ་མཆིས་སོ་ཞེ་ན། འདིར་ནི་ཀུན་ཏུ་བཟང་མོའི་གསང་བའི་བྷ་ག་སྟེ། ཆོས་ཉིད་སྤྲོས་པ་མེད་པའི་དབྱིངས་སུ་དེ་རྟོགས་པའི་གཉིས་མེད་ཀྱི་ཡེ་ཤེས་རོ་གཅིག་ཏུ་འདྲེས་པ་སྟེ་ཡུལ་དང་ཡུལ་ཅན་གཉིས་སུ་མེད་པར་ཆུ་ལ་ཆུ་བཞག་ལྟར་སོང་བའི་དབྱིངས་ཡེ་ཟུང་འཇུག་གི་ཡེ་ཤེས་དེར་གཙོ་བོར་གོ་དགོས་ལ། གཞན་རིག་མའི་མཁའ་གསང་གིས་བསྐྱེད་པའི་བདེ་བའི་ཡེ་ཤེས་ཀྱི་ཆ་དེ་བདེ་ཆེན་གསང་བའི་མཆོད་པ་དང་། བདེ་བ་སྟོང་པར་རྟོགས་པའི་ཡེ་ཤེས་ཀྱི་ཆ་དེ་བདེ་ཆེན་དེ་ཁོ་ན་ཉིད་ཀྱི་མཆོད་པར་བྱས་ཀྱང་རུང་ངམ་སྙམ་ཏེ། རྡོ་རྗེ་ཕྲེང་བ་ལས། ལྷ་མོ་ཕྱག་རྒྱ་ཆེན་པོ་འདི། །དཔག་མེད་བདེ་བ་རབ་སྟེར་བ། །བུ་ཡིས་ཀུན་ནས་བླངས་ནས་ནི། །བླ་ན་མེད་པའི་མཆོད་པ་གྱིས། །ཞེས་གསང་མཆོད་ལ་བླ་ན་མེད་པའི་མཆོད་པར་བཤད་ནས་དེ་དབང་ཡོན་ཏུ་འབུལ་དགོས་པར་གསུངས་པ་དང་། ཡང་དེ་ཉིད་ལས། དེ་ནས་ཤེས་རབ་ཡེ་ཤེས་དེའི། །སྒྲུབ་པོ་མཆོག་ཏུ་འདོད་པའི་དོན། །ལྷ་མོའི་ཡེ་ཤེས་དེ་ཉིད་མཆོག །དངོས་གྲུབ་དོན་དུ་ང་ཡིས་སྦྱིན། །ཞེས་བསྒྲུབ་བྱའི་སློབ་མ་ལ་ལྷ་མོ་ལ་བརྟེན་པའི་དེ་ཁོ་ན་ཉིད་ཀྱི་ཡེ་ཤེས་སྦྱིན་པར་གསུངས་པ་ལྟར་ཡིན་པའི་ཕྱིར་རོ།།

དེ་ཡང་ཞི་ཁྲོའི་ལས་བྱང་དུ་དེ་ཁོ་ཉིད་ཀྱི་མཆོད་པ་ལོགས་སུ་མ་ཕྱེས་པར་གསང་མཆོད་དུ་འདུ་བའི་དབང་དུ་བཏང་བ་དང་། ཀློང་བཤགས་འདིར་ཐ་དད་དུ་ཕྱེས་པའི་ཁྱད་པར་ཡིན་པར་འགྲེལ་ནས་འདི་ལྟར་གོ་བ་བླངས་ན་རུང་བར་ནི་ངེས་པས་འགལ་བར་མི་སེམས་ཏེ། རྒྱུད་དུ་མར་ཕྱག་རྒྱའི་མཆོད་པའམ་གསང་མཆོད་དང་། དེ་ཁོ་ན་ཉིད་ཀྱི་མཆོད་པ་དང་། བདེ་བ་ཆེན་པོའི་མཆོད་པ་དང་། བླ་ན་མེད་པའི་མཆོད་པ་རྣམས་ནི་དོན་གཅིག་ཏུ་བྱས་པའང་ཡོད་པའི་ཕྱིར་ཏེ། །བདེ་མཆོག་ཉུང་ངུའི་རྒྱུད་ཀྱི་ལེའུ་སོ་དྲུག་པ་དེ་ཁོ་ན་ཉིད་ཀྱི་མཆོད་པའི་ལེའུ་ལས། དེ་ནས་ཕྱག་རྒྱའི་མཆོད་ཆེན་དང་། །སྔགས་ཀྱི་དགོད་པ་རབ་ཏུ་གྲགས། །མྱུར་དུ་དངོས་གྲུབ་བྱེད་པར་ནི། །ཕྱག་རྒྱའི་མཆོད་འདི་ཐེ་ཚོམ་མེད། །མཚན་མ་གཉིས་ལ་སྔགས་སྦྱར་ཏེ། །མཁའ་འགྲོ་དཔའ་བོ་གཉིས་མེད་པ། །སྙིང་པོ་རྣམས་ཀྱི་དེ་བཞིན་དུ། །སྔགས་པས་མཁའ་འགྲོ་མ་ལ་སྦྱར། །བློ་ལྡན་མཁའ་འགྲོ་མ་བསྲུབ་བྱ། །དག་པའི་ལུས་ནི་རང་འདོད་པ། །དཔའ་བོ་མཆོད་པ་རྣམས་བྱས་ནས། །ལས་ནི་འབད་པ་ཉིད་ཀྱིས་བྱ། །ཞེས་དང་། གཏུམ་པོ་ཁྲོ་བོ་ཆེན་པོའི་རྒྱུད་དཔའ་བོ་གཅིག་པ་ལས། གུས་པ་དང་བཅས་སེམས་ཀྱིས་ནི། །དེ་བཞིན་སྐྱེས་བུས་བུད་མེད་མཆོད། །དེ་ཉིད་མཆོད་པའི་ཆོ་ག་ནི། །རྒྱལ་བས་ཕན་ཚུན་བྱ་བར་གསུངས། །ཞེས་དང་། གསང་བ་འདུས་པའི་རྒྱུད་ལས། གཟུགས་དང་སྒྲ་དང་རོ་ལྡན་པ། །ཤེས་རབ་ཅན་གྱིས་ཟླ་དྲུག་བསྒོམ། །གསང་བའི་དེ་ཉིད་མཆོད་ཆེན་ནི། །ལེགས་མཆོད་ནས་ཀྱང་བསྒོམ་པར་བྱ། །ཞེས་དང་། བཞིན་བཟང་ཡིད་དུ་འོང་བ་ཡི། །ན་ཆུང་སྐལ་བའི་མཆོག་ལྡན་པ། །བྱིན་གྱིས་བརླབས་ཀྱི་གནས་བསམ་སྟེ། །དེ་ཉིད་མཆོད་པ་རབ་ཏུ་བརྟག །ཅེས་གསུངས་པའི་ཕྱིར། ཐ་དད་དུ་ཕྱེ་བའི་སྐབས་སུ་དེ་ཁོ་ན་ཉིད་མཆོད་ནི་སྤྱིར་གྱི་ཆོས་ཉིད་དང་། དེ་རྟོགས་པའི་ཡེ་ཤེས་ལ་བྱ་བ་ཡིན་པར་ཤེས་པར་བྱའོ།།

དེ་ཁོ་ན་ཉིད་ཀྱི་མཆོད་པ་གསང་མཆོད་ལས་ལོགས་སུ་ཕྱེ་བའི་ཁུངས་ཡོད་དེ། དུར་ཁྲོད་ཀྱི་རྒྱན་རྨད་དུ་བྱུང་བ་ལས། དེ་ནས་རྡོ་རྗེ་སྙིང་པོ་ལ་སོགས་པའི་དཔའ་བོ་དང་དཔའ་མོ་རྣམས་ཀྱིས་ཕྱིའི་མཆོད་པ་དང་། ནང་དང་། གསང་བ་དང་། དེ་ཁོ་ན་ཉིད་ཀྱི་མཆོད་པས་མཆོད་ནས་འདི་སྐད་ཅེས་གསོལ་ཏོ། །ཞེས་དང་། ཕག་མོ་མངོན་འབྱུང་གི་རྒྱུད་ལས། དེ་ནས་དུར་ཁྲོད་བདག་མོ་དེས། སྟོན་པ་མཚན་ཉིད་བཞི་དང་ལྡན་པ་དེ་ལ་ཕྱིའི་མཆོད་པའི་ཚོགས་དཔག་ཏུ་མེད་པ་དང་། ནང་གི་མཆོད་པའི་ཚོགས་དཔག་ཏུ་མེད་པ་དང་། གསང་བའི་མཆོད་པའི་ཚོགས་དཔག་ཏུ་མེད་པ་དང་། དེ་ཁོ་ན་ཉིད་ཀྱི་མཆོད་པ་ཕུལ་ནས་འདི་སྐད་ཞུས་སོ། །ཞེས་གསུངས་པའི་ཕྱིར་རོ།།

བསྟོད་པ་བྱ་བ།

བཞི་བ་གཉིས་མེད་བྱང་ཆུབ་སེམས་ཀྱི་སྒོ་ནས་བསྟོད་པ་བྱ་བ་ནི། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ༔ ཆོས་ཀུན་རྣམ་དག་ཡེ་ནས་འོད་གསལ་བའི༔ རྣལ་འབྱོར་དབྱིངས་ཉིད་སྨྲ་བསམ་ལས་འདས་པ༔ མཉམ་ཉིད་བྱང་ཆུབ་སེམས་ལ་རྟག་ཏུ་འདུད༔ ཅེས་པ་སྟེ། ཤོ་ལོ་ཀ་གཅིག་གིས་བསྟན་ལ། འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་བརྒྱ་སྟོང་པ་ལས། འདི་ལྟར་སེམས་དེ་སེམས་མ་ཡིན་ཏེ། སེམས་ཀྱི་རང་བཞིན་འོད་གསལ་བའི་ཕྱིར་རོ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སེམས་ཀྱི་རང་བཞིན་མ་བྱས་རང་བྱུང་བས། །ཏིང་ངེ་འཛིན་ཞེས་དམིགས་པ་ཀུན་དང་བྲལ། །འདི་ལྟར་ངེས་པའི་བྱང་ཆུབ་སེམས་དེ་ལ། །བགྲོད་པའི་གནས་དང་ལྟ་བའི་གཟུགས་མེད་པས། །མཚན་མ་ཀུན་མཁྱེན་སྐྱོན་ཡོན་ཡོང་ཡེ་མེད། །ཐེག་ཆེན་གཉིས་རྫོགས་ཐེ་ཚོམ་ཀུན་བཅད་ཅིང་། །བླ་མེད་དོན་རྫོགས་ཆེན་པོར་ལ་བཟླས་པའོ། །ཞེས་དང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། ནམ་མཁའི་ཁམས་ལྟར་ཆགས་མེད་པས། །མ་ཆགས་ཐོག་མཐའ་མེད་པར་ནི། །སྐྱེ་འཆི་མེད་པའི་ལུས་སྟོན་ཅིང་། །ངག་དང་སེམས་ཀྱང་དེ་ལྟར་གསུངས། །ཞེས་གསུངས་པ་ལྟར། སེམས་ཅན་ཐམས་ཅད་ཀྱི་སེམས༷་ཀྱི༷་ར༷ང་བཞི༷ན་སྐྱེ་འགགས་མེད་པའི་ཆོས༷་ཀྱི་དབྱི༷ངས་ཐོགས་རེག་དང་བྲལ་བའི་ནམ༷་མཁ༷འ་ལྟ་བུ་སྤྲོས་པའི་དངོས་པོར་གྲུབ་པ་རྡུལ་ཙམ་མེད་པའི་མཉམ་པ་ཉིད་ཀྱི་དབྱིངས་རབ་ཏུ་ཆེ༷་བའི་བདག་ཉིད་ཅན་ཡིན་པ་བཞིན་དུ་འཁོར་འདས་ཀྱི་ཆོ༷ས་ཀུ༷ན་གྱི་རང་བཞིན་ཡང་སྤྲོས་པའི་དྲི་མས་རྣམ༷་པར་ད༷ག་པའི་རང་བཞིན་ཅན་དུ་གནས་ཤིང་། དེ་དང་ངོ་བོ་དབྱེར་མེད་པར་ཡེ༷་གདོད་མ་ནས༷་ཉི་མ་ལ་ཟེར་བཞིན་དུ་རང་ཆས་སུ་གནས་པའི་འོ༷ད་གས༷ལ་བ༷འི་རིག་པའི་ཡེ་ཤེས་ཤིན་ཏུ་རྣལ༷་འབྱོ༷ར་ཆེན་པོ་དང་། དེའི་རྟོགས་བྱའི་དབྱིང༷ས་དང་བཅས་པ་གང་ཡིན་པ་དེ་ཉི༷ད་ནི་ཚིག་ཏུ་སྨྲ༷་བ་དང་བློ་ཡིས་བས༷མ་པའི་ཡུལ་ལ༷ས་འདས༷་པ༷་ཡི་རང་བཞིན་ཅན། དབྱིངས་དང་ཡེ་ཤེས་གཉིས་སུ་མེད་པ་དོན་དམ་མཉམ༷་པ་ཉིད༷་བྱང༷་ཆུབ༷་ཀྱི་སེམས༷་ཞེས་བྱ་ལ། དེ་ལ༷་ཉམས་ཆག་བཤགས་པ་པོས་རང་ངོ་ཤེས་པའི་སྒོ་ནས་རྒྱུད་ལ་རྟ༷ག་ཏུ༷་ཉམས་སུ་བླང་བས་འདུ༷ད་པར་བྱའོ་ཞེས་པ་ནི་དོན་དམ་པའི་ལྟ་བ་མཇལ་བའི་ཕྱག་གམ་དེ་འདྲའི་ལྟ་བ་མཇལ་བར་སྨོན་པའི་ཕྱག་གོ །ཡང་ན་དེ་ལྟ་བུའི་གནས་ལུགས་རྣལ་མའི་དོན་ལ་ཡིད་རབ་ཏུ་དད་པའི་ཀུན་རྫོབ་ཀྱི་ཕྱག་འཚལ་བར་བྱས་ཀྱང་རུང་ངོ་།།

རགས་པའི་དབང་དུ་བྱས་ན་བསྟོད་པ་འདི་དང་། གོང་གི་ཕྱག་འཚལ་བ་དང་། མཆོད་པ་འབུལ་བ་རྣམས་ཀྱིས་ནི་གཉེན་པོ་ཀུན་སྤྱོད་ཀྱི་སྟོབས་བསྟན་པར་བྱས་ཀྱང་རུང་ལ། འོག་གི་བཤགས་པ་དངོས་ནས་ས་བཅད་གཞན་པ་དག་གིས་ནི་གཉེན་པོ་སུན་འབྱིན་པའི་སྟོབས་དང་། སོར་ཆུད་པའི་སྟོབས་བསྟན་པར་བགྱིས་ཏེ་ཀློང་བཤགས་ཡོངས་རྫོགས་སྟོབས་བཞིའི་ནང་དུ་བསྡུས་ནས་འགྲེལ་ཡང་འགྲེལ་ལེགས་པོ་ཆགས་པ་ཡིན་ནོ།།

དགོངས་སུ་གསོལ་བ།

ལྔ་བ་ཞི་ཁྲོའི་ལྷ་ཚོགས་རྣམས་དགོངས་སུ་གསོལ་བ་ནི། ཀུན་བཟང་རྫོགས་ཆེན་ཡེ་ནས་བརྡལ་བ་ལ༔ ཕྱི་ནང་གསང་བ་བཀོད་པའི་དཀྱིལ་འཁོར་འདིར༔ སྣང་སྲིད་རྣམ་དག་ལྷ་དང་ལྷ་མོའི་དབྱིངས༔ འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས༔ གསང་ཆེན་རབ་དགྱེས་གཟུང་ཆེན་བདག་ཉིད་མའི༔ མཁའ་དབྱིངས་ཀློང་དབྱིངས་པདྨོར་འཁྱིལ་བ་འདིར༔ གཉིས་མེད་ཐིག་ལེ་ཆེན་པོར་འོད་གསལ་ཞིང་༔ མ་བཅོས་སྤྲོས་མེད་བྱང་ཆུབ་སྙིང་པོའི་སྐུ༔ ཅིར་ཡང་སྣང་བ་བདེ་ཆེན་གཡུང་དྲུང་ལྷ༔ འདུ་འབྲལ་མེད་པ་གསང་བའི་དཀྱིལ་འཁོར་འདིར༔ བདག་ཉིད་ཆེན་པོ་རིགས་ལྔ་ཡབ་ཡུམ་དང་༔ བྱང་སེམས་ལྕམ་དྲལ་འགྲོ་འདུལ་ཐུབ་པ་དྲུག༔ སྤྲུལ་པའི་སྒོ་བ་ཡབ་ཡུམ་བརྒྱད་ལ་སོགས༔ དབྱིངས་མེད་དབྱིངས་ཉིད་སྤྲུལ་པ་མང་པོའི་ཚོགས༔ རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག༔ རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ༔ གནས་དང་ཡུལ་གྱི་ཕྱག་རྒྱ་སྒོ་མ་བཞི༔ ཡེ་ཤེས་སྤྲུལ་པའི་ལྷ་ཚོགས་མང་པོོ་དག༔ མ་ལྟར བྱམས་ཤིང་སྲིང་ལྟར་གདུང་ལ་སོགས༔ ལེགས་ཉེས་སྟངས་འཛིན་དམ་ཚིག་རྗེས་གཅོད་པའི༔ ཕྱི་ནང་མཁའ་འགྲོ་རྣལ་འབྱོར་ཉེར་བརྒྱད་ཚོགས༔ དཔང་གྱུར་རྡོ་རྗེ་དམ་ཅན་དགོངས་སུ་གསོལ༔ ཞེས་པའི་ཤོ་ལོ་ཀ་ལྔ་དང་རྐང་པ་གཉིས་ཀྱིས་བསྟན། ཆོས་ཐམས་ཅད་ཀྱི་གནས་ལུགས་རང་བྱུང་གི་ངོ་བོ་རིག་པ་ཀུ༵ན་ཏུ་བཟང༷་པོ་ཞེས་གྲགས་པ་འཁོར་འདས་ཀྱི་རང་བཞིན་ཡོངས་སུ་རྫོ༷གས་པའི་ཆོས་ཉིད་དོན་དམ་པ་ཆེ༷ན་པོ་གཉུག་མ་གཞིའི་གནས་ལུགས་དང་དེའི་སྣང་ཆ་འགགས་པ་མེད་པའི་ཡེ་ཤེས་དེ་ཉིད་ནི་ཡེ༷་གདོད་མ་ནས༷་ཆོས་ཀུན་གྱི་རང་བཞིན་དུ་བདལ༷་བ༷་སྟེ་ཁྱབ་པ་ལ༷། དེའི་རྩལ་ལས་ཤར་བའི་ཕྱི༷་སྣང་བ་གཟུགས་ཀྱི་ལྷ་ཞི་བ་བཞི་བཅུ་རྩ་གཉིས་དང་། འབར་བ་ཁྲག་འཐུང་དྲུག་ཅུའི་དཀྱིལ་འཁོར་གྱི་བཀོད་པ་རྟེན་དང་བརྟེན་པའི་རང་བཞིན་དང་། ནང༷་སེམས་ཉིད་རང་བྱུང་འོད་གསལ་འདུས་མ་བྱས་པའི་དཀྱིལ་འཁོར་དང་། གསང༷་བ༷་ཆོས་ཀུན་ཡེ་ནས་ཀ་དག་བསམ་བརྗོད་སྤྲོས་པ་དང་བྲལ་བར་གནས་པའི བ༷ཀོད་པ༷འི་དཀྱི༷ལ་འཁོར༷་ཆེན་པོ་འདིར༷་ཕྱི་སྣང༷་བ་སྣོད་ཀྱི་འཇིག་རྟེན་དང་། ནང་སྲི༷ད་པ་བཅུད་ཀྱི་སེམས་ཅན་ཐམས་ཅད་གདོད་ནས་རྣམ༷་པར་ད༷ག་པ་སྣང་བ་ལྷ༷་དང༷་། སྟོང་པ་ལྷ༷་མོ༷འི་དབྱི༷ངས་ཉིད་དུ་གནས་པ་དང་། དེ་ཡང་ས་ཆུ་ལ་སོགས་པའི་འབྱུང་བ་ལྔ་ལས་བསྐྱེད་པའི་སྣང་བ་སྣོད་ཀྱི་འཇིག་རྟེན་གྱི་རང་བཞིན་ས་དང་། ཆུ་དང་། མེ་དང་། རླུང་དང་། ནམ་མཁའ་སྟེ་འབྱུང༷་བ་ལྔ་རྣམ་པར་དག་པ་ཡུམ་ལྔ་དང༷་། གཟུགས་སྒྲ་ལ་སོགས་པའི་འབྱུང་འགྱུར་ལས་བསྐྱེད་པའི་གཟུགས་སྒྲ་སོགས་སྤྱི་དང་། བྱེ་བྲག་སྲིད་པ་བཅུད་ཀྱི་སེམས་ཅན་གྱི་ལུས་ཀྱི་རང་བཞིན་འབྱུང༷་བ་ལས་འགྱུར༷་བ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལྔ་རྣམ་པར་དག་པ་ཡབ་ལྔ་སྟེ། རྡོ་རྗེ་དཔལ་མཆོག་དང་པོའི་བརྟག་པ་དང་པོ་ལས། དྲི་མེད་ལྷུན་གྲུབ་ཡེ་ཤེས་རང་བྱུང་བ། །འོད་གསལ་ཆོས་དབྱིངས་སྙིང་པོ་བླ་ན་མེད། །ཆོས་ཉིད་ཆོས་ཅན་དབྱེར་མེད་བདེ་བ་ཆེ། །མཉམ་ཉིད་གནས་པ་ཚུལ་འདི་བསྟན་པའོ། །ཞེས་གསུངས་པ་ལྟར། མདོར་ན་སྣང་བ་སྣོད་དང་སྲིད་པ་བཅུད་ཀྱི་སེམས་ཅན་གྱི་རང་བཞིན་ཡེ་ནས་རིགས་ལྔའི་ལྷ་ཡབ༷་ཡུམ༷་ཉིད་དུ་ལྷུ༷ན་གྱིས་གྲུབ་ཅིང་དེའི་རང་བཞིན་དུ་རྫོག༷ས་པ་ཡིན་པར་བསྟན་པ་ཡིན་ནོ།།

དེ་ལྟར་སྣོད་བཅུད་ལྷ་དང་ལྷ་མོའི་རང་བཞིན་དུ་གནས་པ་དེ་རྣམ༷ས་ཀྱང་ཞི་ཁྲོའི་ལྷ་ཡབ་རྣམས་ལ་གས༷ང་ཆེན༷་ལྷན་ཅིག་སྐྱེས་པ་བདེ་བ་ཆེན་པོའི་ཡེ་ཤེས་སྟེར་བ་ལ་ར༷བ་ཏུ་དགྱེས༷་ཤིང་། དེ་ལྟ་བུའི་ཡེ་ཤེས་དེ་རྣལ་འབྱོར་བའི་རྒྱུད་ལ་སྦྱོར་བར་བྱེད་པའི་གཟུང༷་མ་ཆེན༷་མོའི་བད༷ག་ཉིད༷་མ༷་ཀུན་ཏུ་བཟང་མོ་དེའི༷་རང་བཞིན་ཆོས་ཉིད་སྤྲོས་པ་མེད་པའི་མཁ༷འ་དབྱིང༷ས་ཀྱི་ཀློང༷་རབ་ཏུ་ཡ༷ངས་པའི་པ༷དྨོར༷་འཁྱིལ༷་བ༷་སྟེ། དེའི་ངང་དུ་གནས་པའི་ཚུལ་འདིར༷་ནི་སྣང་སྟོང་དང་ཡབ་ཡུམ་སོགས་སྤྲོས་པའི་གཉིས་སུ་གྲུབ་པ་མེད་པར་ཡབ་ཡུམ་གཉིས་སུ་མེད་པ་དང་། རིག་སྟོང་གཉིས་སུ་མེད་པ་དང་། སྣང་སྟོང་གཉིས་སུ་མེད་པ་དང་། བདེ་སྟོང་གཉིས་སུ་མེད་པ་དང་། སྣོད་བཅུད་གཉིས་སུ་མེད་པ་དང་། གཟུང་འཛིན་གཉིས་སུ་མེད་པའི་གཉིས༷་མེད༷་སྤྲོས་བྲལ་རང་བྱུང་གཉུག་མ་མི་ཤིགས་ཐིག༷་ལེ༷་ཆེན༷་པོར༷་ཡེ་ནས་འོད༷་གས༷ལ་བའི་རང་བཞིན་དུ་གནས་པ་ཡིན་ཞིང༷་། དེ་འདྲའི་རྩོལ་བས་མ༷་བཅོས༷་ཤིང་སྤྲོས༷་པའི་མཚན་མ་མེད༷་པའི་གཉིས་སུ་མེད་པའི་རིག་པ་བྱང༷་ཆུབ༷་ཀྱི་སྙིང༷་པོ༷་དོན་དམ་པའི་སྐུ༷་དེ་ནི་ཅིའི་ངོ་བོར་ཡང་མ་གྲུབ་ཅིང་ཞི་བ་དང་ཁྲོ་བོ་ལ་སོགས་པ་རྒྱལ་བའི་དཀྱིལ་འཁོར་རབ་འབྱམས་པ་ཅིར༷་ཡང༷་སྣང༷་བ༷་སྟེ། དེ་ལ་ཟག་མེད་འོད་གསལ་བ༷དེ་བ་ཆེན༷་པོ་མི་འགྱུར་གཡུང༷་དྲུང༷་དོན་དམ་པའི་ལྷ༷་ཞེས་བྱའོ།།

དེ་ལྟར་སྣང་སྟོང་འ༷དུ་འབྲལ༷་མེད༷་པ༷་ཆོས་རྣམས་ཀྱི་རང་བཞིན་གས༷ང་བ༷འི་དཀྱིལ༷་འཁོར༷་ཆེན་པོ་འདིར༷་ནི་བདེ་བར་གཤེགས་པའི་བད༷ག་ཉིད༷་ཆེན༷་པོ༷་རྒྱལ་བ་རིགས༷་ལྔ༷་ཡི་བདག་ཉིད་ཡབ༷་ལྔ་དང་། རིགས་ཀྱི་ཡུམ༷་ལྔ་དང༷་། བྱང༷་ཆུབ་སེམ༷ས་མ་བརྒྱད་ནི་ལྕམ༷་མོ་སྟེ་སྲིང་མོའི་ཚོགས་དང་། བྱང་ཆུབ་སེམས་དཔའ་བརྒྱད་ནི་མིང་པོའམ་དྲལ༷་པོའི་ཚོགས་དང་། ལྷ་དང་། ལྷ་མིན་དང་། མི་དང་། དུད་འགྲོ་དང་། ཡི་དྭགས་དང་། དམྱལ་བ་སྟེ་འ༷གྲོ་བ་རིགས་དྲུག་པོ་འདུལ༷་བར་བྱེད་པའི་སྤྲུལ་སྐུ་ཐུབ༷་པ༷་དྲུག༷་དང་། ཀུན་རྫོབ་ཏུ་དཀྱིལ་འཁོར་ལ་བགེགས་སྲུང་པའི་ཕྱིར་དང་། དོན་དམ་པར་རྟག་ཆད་མུ་བཞི་དང་བྱམས་པ་སྙིང་རྗེ་དགའ་བ་བཏང་སྙོམས་ཏེ་ཚད་མེད་རྣམ་བཞིའི་ངོ་བོ་རྣམ་པར་དག་པའི་དབྱིངས་ཡེ་ཟུང་འཇུག་གི་ཡེ་ཤེས་བཞིའི་མཚོན་བྱེད་གཙོ་བོ་ལས་སྤྲུལ༷་པ༷འི་སྒོ༷་བ༷་བཞི་དང་སྒོ་མ་བཞི་སྟེ་ཡབ༷་ཡུམ༷་བརྒྱ༷ད་དང་། སོགས་ཁོངས་ནས་ཐོན་པ་རྣམ་སྨིན་རིག་འཛིན་དང་། སར་གནས་རིག་འཛིན་དང་། ཚེ་དབང་རིག་འཛིན་དང་། ཕྱག་ཆེན་རིག་འཛིན་དང་། ལྷུན་གྲུབ་རིག་འཛིན་ཏེ་རིག་འཛིན་ལྔ་ལ༷་སོག༷ས་པའི་བླ་མ་རིག་འཛིན་གྱི་ལྷ་ཚོགས་ཏེ། མདོར་ན་ཆོས་ཀྱི་དབྱིང༷ས་སྤྲོས་པ་མེད༷་པའི་དབྱིང༷ས་ཀྱི་རྩལ་ཉིད༷་ལས་ཤར་བའམ་སྤྲུལ་པའི་ཡེ་ཤེས་ཀྱི་ལྷ་མཐའ་ཡས་པའི་སྤྲུལ༷་པ༷་མ༷ང་པོ༷འི་ཚོག༷ས་དང་། མཁའ་འགྲོ་རྒྱ་མཚོ་ལས། ལྷན་སྐྱེས་ཞིང་སྐྱེས་ལྷ་མོ་དང་། །སྔགས་སྐྱེས་འཇིག་རྟེན་མགོན་པོ་དང་། །སྦྱོར་སྐྱེས་གནས་སྐྱེས་དེ་བཞིན་དུ། །དམ་ཚིག་ལྷ་རྫས་རྣལ་འབྱོར་མ། །པད་ཅན་མ་ནི་དུས་ཀུན་ཏུ། །ཕྱག་རྒྱ་ཆེན་པོ་རབ་བསྔགས་པའོ། །ཞེས་གསུངས་པ་ལྟར། བདེ་བ་ཆེན་པོའི་ཡེ་ཤེས་ཁྱད་པར་བ་བསྐྱེད་པར་བྱེད་པའི་རྡོ༷་རྗེ༷་གསང་བའི་གཟུང་མ་ཞིང་སྔགས་ལྷན་སྐྱེས་ཀྱི་མཁའ་འགྲོ་མའི་ཚོགས་ལྷ༷་མོ༷་དང་། ཀླུ་མོ་དང་། གནོད་སྦྱིན་མོ་དང་། མི་མོ་ཡེ་ཤེས་ཀྱི་ས་ཐོབ་པ་རྣམས་ཀྱི་བདག་པོ་དང་། ཁྱད་པར་དུ་དཀྱིལ་འཁོར་གཅིག་ནས་གྲངས་མེད་པའི་ཡེ་ཤེས་ཀྱི་མཁའ་འགྲོ་མ་ཀུན་གྱི་ཚོག༷ས་ཀྱི་གཙོ་བོའམ་རྗེ༷་བོ་དང་། ཁྲོ་བོའི་དཀྱིལ་འཁོར་ཀུན་གྱི་རིགས་ཀྱི་ལྷའི་ཚོག༷ས་ཐམས་ཅད་ཀྱི༷་བད༷ག་པོ་དཔལ་ཁྲོ་བོའི་རྒྱལ་པོ་ཆེ་མཆོག་ཧེ་རུ་ཀ་ཡབ་ཡུམ་དང་། རྡོ་རྗེ་སེམས་དཔའ་ཁྲོ་བོའི་རྒྱལ་པོའི་སྐུར་གནས་གྱུར་པ་བཛྲ་ཧེ་རུ་ཀ་ལ་སོགས་པ་སྟེ་རྡོ་རྗེ་དང་། རིན་ཆེན་དང་། པདྨ་དང་། ཀརྨ་དང་། དེ་བཞིན་གཤེགས་པའི་རིག༷ས་ལྔ༷་ཡིས་བསྡུས་པའི་རྟོག་ཚོགས་ཀྱི་གདོན་འཇོམ་པར་བྱེད་པའི་དྲག་པོའི་ཡེ་ཤེས་ཀྱི་དཔ༷ལ་ཆེན༷་པོ་དང་ལྡན་པའི་ཁྲོ༷་བོའི་རྒྱལ༷་པོ་ཧེ་རུ་ཀ་ཡ༷བ་ལྔ་དང་། བཛྲ་རཏྣ་པདྨ་ཀརྨ་བྷུདྡྷ་ཀྲོ་ཏི་མ་སྟེ་རིགས་ཀྱི་ཁྲོ་མོ་ཀྲོ་ཏི་ཡུམ་ལྔ་སྟེ་ཁྲག་འཐུང་ཡབ་ཡུམ༷་བ༷ཅུ་དང་། རྣམ་པར་ཤེས་པ་ཚོགས་བརྒྱད་རྣམ་པར་དག་པ་གནས་གྱུར་པའམ་དུར་ཁྲོད་ཀྱི་གནས༷་བརྒྱད་ན་བཞུགས་པའི་གནས་ཀྱི་ཕྱག་རྒྱ་མོ་མ་མོ་ཀཽ་རཱི་མ་ལ་སོགས་པ་བརྒྱད་དང༷་། རྣམ་ཤེས་བརྒྱད་ཀྱི་ཡུལ་བརྒྱད་དག་པའམ་ཡུལ་དང་ཉེ་བའི་ཡུལ༷་གྱི༷་གནས་ན་བཞུགས་པའི་ཕྱ༷ག་རྒྱ༷་མོ་ཕྲན་མེན་སིང་ཧ་མ་ལ་སོགས་པ་བརྒྱད་དང་། ཤར་ལྷོ་ནུབ་བྱང་གི་སྒོ་བཞི་སྐྱོང་བའི་ཕྱག་རྒྱ་མོ་སྒོ༷་མ༷་ཆེན་མོ་བ༷ཞི་དང་། གསོད་བྱེད་ཀྱི་ཁྲོ་བོ་ཕ་བཅུ་དང་། ཟ་བྱེད་ཀྱི་ཁྲོ་མོ་མ་བཅུ་དང་། རིགས་དྲུག་འདྲེན་པའི་སྤོར་བྱེད་ཆེན་མོ་བརྒྱད་བཅས་དབྱིངས་དང་ཡེ༷་ཤེས༷་གཉིས་སུ་མེད་པའི་ངང་ལས་སྤྲུལ༷་པ༷འི་ཡེ་ཤེས་པའི་ལྷ༷་ཡི་ཚོག༷ས་རབ་ཏུ་མང༷་པོ༷་ད༷ག་དང་། སྒྲུབ་པ་པོ་ལ་མ༷་ལྟར༷་དུ་ཕན་པ་དང་བདེ་བ་སྟེར་འདོད་ཀྱི་ཐུགས་བྱམས༷་པ་ཆེན་པོས་གཟིགས་ཤིང༷་། སྲིང༷་མོ་ལྟར༷་དུ་ཡིད་གདུང༷་བའི་ཐུགས་དུང་བ་དང་ལྡན་པ་ལ༷་སོ༷གས་པ་སྟེ། སོགས་ཁོངས་ནས་ཐོན་པ་ཕ་དང་མཛའ་བཤེས་བཞིན་དུ་ཉེ་བར་སྙིང་བརྩེ་བ་དང་ལྡན་པའི་སྒོ་ནས་དུས་རྟག་པར་ལེགས་པ་བདེ་བར་གནས་སམ་ཉེས་པ་མི་བདེ་བར་གནས་པ་དང་། བྱ་བ་ལེགས་པ་རྣམ་པར་དཀར་བ་སྒྲུབ་འདུག་གམ་མི་རུང་བ་ཉེས་པའི་བྱ་བ་ལ་གཡེང་འདུག་སྙམ་དུ་ལེག༷ས་ཉེས༷་ཀྱི་སྟང༷ས་སམ་མཚམས་འཛིན༷་ཅིང་། སྒྲུབ་པ་པོའི་དམ༷་ཚིག༷་དག་གམ་མི་དག་གི་རྗེས༷་གཅོད༷་པར་བྱེད་པ༷འི་ཕྱི༷་ལས་ལས་གྲུབ་པའི་འཇིག་རྟེན་དྲེགས་པའི་ཚུལ་བཟུང་བ་འབྱུང་པོའི་མ་མོ་དང་། ནང༷་འཇིག་རྟེན་ལས་འདས་པའི་ཡེ་ཤེས་ཀྱི་མཁ༷འ་འ༷གྲོ་མ་གནས་ཡུལ་ཉེར་བཞི་སོགས་ན་གནས་པ་དབང་ཕྱུག་སོགས་ཀྱི་ཆུང་མ་དབང༷་ཕྱུག༷་མ་ཉེར་བརྒྱད་འདུལ་བྱེད་ཀྱི་གཉེན་པོར་བཞེངས་པའི་ཞིང་སྐྱེས་ཀྱི་མཁའ་འགྲོ་མ་སྔགས་ཀྱི་རྣལ་འབྱོར་ལ་གནས་པའི་གཡག་གདོང་མ་ལ་སོགས་པའི་མ་མོ་ཉེར༷་བརྒྱ༷ད་དང་། མ་བདུན་སྲིང་བཞི་དང་། དུར་ཁྲོད་ཀྱི་གནས་ཉུལ་བའི་གནས་ཉུལ་མ་ཆེན་མོ་རྣམས་ལ་སོགས་པའི་འཇིག་རྟེན་འདས་དང་མ་འདས་པའི་མཁའ་འགྲོ་མའི་ཚོ༷གས་སྒྲུབ་པ་ལེགས་ཉེས་དང་དགེ་སྡུག་དྲང་བདེན་གྱི་ཤན་འབྱེད་པ་པོ་དང་། ཉེས་ལྟུང་བཤགས་པའི་དཔ༷ང་པོར་གྱུར༷་པའི་གསང་སྔགས་རྡོ༷་རྗེ༷་ཐེག་པའི་དམ༷་ཚིག་གཉན་པོ་ལ་གནས་པ་ཅ༷ན་གྱི་མཁའ་འགྲོ་དང་ཡེ་ཤེས་ཀྱི་ཆོས་སྐྱོང་སྲུང་མའི་ཚོགས་དང་བཅས་དཀྱིལ་འཁོར་ཡོངས་རྫོགས་ཀྱི་ལྷ་ཚོགས་མ་ལུས་པ་རྣམས་དང་། དཀྱིལ་འཁོར་གྱི་གཙོ་བོ་བླ་མ་རྡོ་རྗེ་སློབ་དཔོན་འཁོར་མཆེད་ལྕམ་དང་བཅས་པ་རྣམས་གསོན་ཅིག་ཀྱེ། དམ་ཚིག་ཉམས་ཆག་ཆེ་ཞིང་། རྟོག་སྒྲིབ་དང་བག་ཆགས་ངན་པས་རྒྱུད་བསྡམས་པ་བདག་གིས་ཉེས་ལྟུང་སྡིག་སྒྲིབ་ཐམས་ཅད་གནོང་བས་བཤགས་ན་མྱུར་དུ་དག་པར་ཐུགས་བརྩེ་བས་ཉེ་བར་དགོང༷ས་སུ༷་གསོལ༷་ལ་དཔང་པོར་བཞུགས་ཤིག། ཅེས་ཞི་ཁྲོའི་ལྷ་ཚོགས་རྣམས་ཉེས་ལྟུང་བཤགས་པའི་དཔང་པོར་བཞུགས་པར་གསོལ་བ་དང་ཉེས་ལྟུང་བཤགས་པ་ལ་ཐུགས་གཏད་པར་གསོལ་བ་བཏབ་པའོ།།

ཉང་རལ་ཉི་མ་འོད་ཟེར་གྱི་གཏེར་མ་བརྗོད་མེད་དོན་བཤགས་འདིའི་འགྲེལ་བ་དོན་གསལ་སྒྲོན་མེ་ལས། ཚོགས་ནི་རིག་འཛིན་དང་༔ ཡི་དམ་གྱི་དང་༔ རྡོ་རྗེ་སློབ་དཔོན་དང་༔ མཆེད་ལྕམ་དང་༔ གྲོགས་པོ་རྣམས་སོ༔ ཞེས། ཕྱི་ནང་མཁའ་འགྲོ་དབང་ཕྱུག་ཉེར་བརྒྱད་ཚོགས༔ ཞེས་པའི་སྐབས་ཀྱི་ཚོགས་དེ་དབང་ཕྱུག་ཉེར་བརྒྱད་ལ་སོགས་མཁའ་འགྲོའི་ཚོགས་ཞེས་སྦྱར་རྒྱུ་མིན་པར་རིག་འཛིན་གྱི་ཚོགས་སོགས་དེ་དག་ལ་གོ་བ་ཡིན་པ་དང་། ཡང་དཔང་གྱུར་རྡོ་རྗེ་དམ་ཅན་ཞེས་པ་ཞི་ཁྲོའི་ལྷ་ཚོགས་དང་། མ་མོ་མཁའ་འགྲོ་དང་། ཡི་དམ་གྱི་ཚོགས་དང་། རྡོ་རྗེ་སློབ་དཔོན་དང་བཅས་པར་དགོངས་གསོལ་ཡིན་པར་འགྲེལ་འདུག་ལ། ཀཿཐོག་པ་ཡེ་ཤེས་རྒྱལ་མཚན་གྱི་བརྗོད་མེད་དོན་བཤགས་ཀྱི་འགྲེལ་བ་ལས་ནི། ཚོགས་ཞེས་པ་རིག་འཛིན་སློབ་དཔོན་གྱི་ཚོགས་དང་། རྡོ་རྗེ་ཞེས་པ་ཡེ་ཤེས་ཀྱི་ལྷ་ཚོགས་དང་། དམ་ཅན་ཞེས་པ་མ་མོ་མཁའ་འགྲོ་ལ་གོ་དགོས་པར་འགྲེལ་འདུག་གོ།

གཞན་ཡང་ཀ༔ཐོག་པ་ཡེ་ཤེས་རྒྱལ་མཚན་གྱི་བརྗོད་མེད་དོན་བཤགས་ཀྱི་འགྲེལ་བ་ལས་ནི་དཔལ་དབྱངས་ཀྱིས། བརྗོད་མེད་དོན་བཤགས་ཀྱི་ས་བཅད་ལ་དགོངས་གསོལ་དང་། ཕྱག་འཚལ་དང་། མཆོད་པ་དང་། སྡིག་བཤགས་དངོས་དང་བཅས་ས་བཅད་བཞི་འདིར་ཁོ་བོས་འགྲེལ་བ་ལྟར་བྱས་ཤིང་། སྡིག་བཤགས་དངོས་ལ་དོན་དམ་གྱི་བཤགས་པ་དང་། ཀུན་རྫོབ་ཀྱི་བཤགས་པ་གཉིས་ཕྱེས་ཤིང་། དོན་དམ་ལ་མ་ཧཱ་དང་། ཨ་ནུ་དང་། ཨ་ཏིའི་ལྟ་བ་གསལ་བར་བསྟན་པ་གསུམ་བྱས་ཡོད་པར་གསུངས་པ་དང་། ཡང་ཟུར་བཟང་པོ་དཔལ་ཟེར་བས། བཤགས་པའི་རྒྱུ་དང་། གཉེན་པོའི་སྟོབས་དང་། ཇི་ལྟར་བཤགས་པའི་ཐབས་གསུམ་ཕྱེས་ཡོད་པར་གསུངས་ཤིང་། ཡེ་ཤེས་རྒྱལ་མཚན་པ་ཁོང་རང་གིས་ལུས་ཀྱི་སྒོ་ནས་བཤགས་པ་དང་། ཡིད་ཀྱི་སྒོ་ནས་བཤགས་པ་དང་། ངག་གི་སྒོ་ནས་བཤགས་པ་གསུམ་ཕྱེས་ཏེ། དང་པོ་ལུས་ལ་སྤྱན་འདྲེན་བཞུགས་གསོལ་དང་། སྐུ་གསུམ་ལ་ཕྱག་འཚལ་བ་དང་། ཕྱི་ནང་གསང་བའི་མཆོད་པ་དང་གསུམ་དུ་ཕྱེས་ཏེ་དེ་ཡན་གྱིས་བསྟན་པར་བགྱིས་པ་དང་། སེམས་སམ་ཡིད་ཀྱི་སྒོ་ནས་བཤགས་པ་ལ་ནི་སེམས་བསྐྱེད་པ་དང་། ལྟ་བ་གསལ་བ་དང་། དགོངས་སུ་གསོལ་བ་གསུམ་ཕྱེས་ནས། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ༔ ཞེས་པ་ནས། རྟག་ཏུ་འདུད༔ བར་གྱིས་སེམས་བསྐྱེད་པ་བསྟན་པ་དང་། ལྟ་བ་གསལ་བ་ལ་གསུམ་ཕྱེས་ཏེ། ཀུན་བཟང་རྫོགས་ཆེན་ཡེ་ནས་བརྡལ་བ་ལ༔ ཞེས་པ་ནས། ལྷུན་རྫོགས་རྣམས༔ ཞེས་པའི་ཤོ་ལོ་ཀ་གཅིག་པོས་མ་ཧཱ་ཡོ་གའི་ལྟ་བ་གསལ་བ་བསྟན་པ་དང་། གསང་ཆེན་རབ་དགྱེས་གཟུང་ཆེན་བདག་ཉིད་མའི༔ མཁའ་དབྱིངས་ཀློང་དབྱིངས་ཀློང་ཡངས་པདྨོར་འཁྱིལ་བ་འདིར༔ ཞེས་པའི་རྐང་པ་གཉིས་ཀྱིས་ཨ་ནུའི་ལྟ་བ་གསལ་བ་བསྟན་པ་དང་། གཉིས་མེད་ཐིག་ལེ་ཆེན་པོར་འོད་གསལ་ཞིང་༔ མ་བཅོས་སྤྲོས་མེད་བྱང་ཆུབ་སྙིང་པོའི་སྐུ༔ ཅིར་ཡང་སྣང་བ་བདེ་ཆེན་གཡུང་དྲུང་ལྷ༔ ཞེས་པའི་རྐང་བ་གསུམ་གྱིས་ཨ་ཏིའི་ལྟ་བ་གསལ་བ་བསྟན་པར་ཡིན་པར་གསུངས། དེ་ནས་དགོངས་གསོལ་ལ། ཞི་བའི་ལྷ་ཚོགས་དགོངས་སུ་གསོལ་བ་དང་། ཁྲོ་བོའི་ལྷ་ཚོགས་དགོངས་སུ་གསོལ་བ་དང་། མཁའ་འགྲོ་རིག་འཛིན་ལྷ་ཚོགས་དགོངས་སུ་གསོལ་བ་གསུམ་དུ་ཕྱེས་ནས། འདུ་འབྲལ་མེད་པ་གསང་བའི་དཀྱིལ་འཁོར་འདིར༔ ཞེས་པ་ནས། དབྱིངས་མེད་དབྱིངས་ཉིད་སྤྲུལ་པ་མང་པོའི་ཚོགས༔ ཞེས་པའི་བར་གྱི་རྐང་པ་ལྔ་ཡིས་དང་པོ་དང་། རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག༔ ཞེས་པ་ནས། མ་ལྟར་བྱམས་ཤིང་སྲིང་ལྟར་གདུང་ལ་སོགས༔ ཞེས་པའི་བར་གྱི་རྐང་པ་ལྔ་ཡིས་གཉིས་པ་དང་། ལེགས་ཉེས་སྟངས་འཛིན་དམ་ཚིག་རྗེས་གཅོད་པའི༔ སོགས་རྐང་པ་གསུམ་གྱིས་གསུམ་པ་བསྟན་པ་ཡིན་པར་གསུངས་པ་དང་། གསུམ་པ་ངག་གི་སྒོ་ནས་བཤགས་པ་ལ་ནི་ས་བཅད་དྲུག་བགྱིས་ཏེ། འོག་གི་བཤགས་པ་དངོས་ཀྱི། ཧཱུཾ་ཐུགས་རྗེའི་གདུང་འཚོབ་རྡོ་རྗེ་རྣལ་འབྱོར་བདག༔ ཅེས་པ་ནས། དོན་ལ་གོལ་ཞིང་ལྡོག་སེམས་མ་མཆིས་ཀྱང༔ ཞེས་པའི་བར་གྱིས་དང་པོ་རྣལ་འབྱོར་བས་དམ་ཚིག་ཇི་ལྟར་དམ་པ་མནོས་པ་བསྟན་པ་དང་། གཟོད་བྱ་ལོང་ཡོད་སྙམ་པའི་ལེ་ལོ་ཡིས༔ ཞེས་པ་ནས་རྐང་པ་གཉིས་ཀྱིས་གཉིས་པ་ལེ་ལོ་སྙོམས་ལས་ཀྱི་དབང་དུ་བཏང་བ་དང་། དེ་ནས། ཤེས་བཞིན་མི་ལྡན་བག་མེད་དབང་གྱུར་ཏེ༔ ཞེས་པ་ནས། ཤོ་ལོ་ཀ་གཅིག་གིས་གསུམ་པ་ཚུལ་བཞིན་མ་སྲུང་བའི་སྐྱོན་དང་། རྣལ་འབྱོར་གང་ཞིག་དམ་ཚིག་ཉམས་པ་དང་༔ ཞེས་པ་ནས། ཉམས་སྒྲིབ་སྐྱོན་གྱིས་གོས་པར་གྱུར་ཏོ་འཚལ༔ ཞེས་པའི་བར་གྱིས་བཞི་བ་གཞན་གྱི་ཉམས་སྒྲིབ་རང་ལ་གནོད་པ་དང་། ཚེ་འདིའི་རྐྱེན་དང་ཡུན་གྱི་སྒྲིབ་གྱུར་རྣམས༔ ཞེས་པ་ནས། གཉིས་མེད་དོན་གྱི་ཚངས་པ་བསྩལ་དུ་གསོལ༔ ཞེས་པའི་བར་གྱིས་ལྔ་བ་ཉམས་སྒྲིབ་བཤགས་ཤིང་ཐུགས་རྗེས་བཟུང་བར་ཞུ་བ་དང་། དོན་དམ་སྤྲོས་མེད་བརྗོད་ལས་འདས་པ་ལ༔ ཞེས་པ་ནས། ཚངས་པ་བསྩལ་དུ་གསོལ༔ ཞེས་པའི་བར་གྱིས་དྲུག་པ་ཀུན་རྗོབ་ཀྱི་འགལ་འཁྲུལ་དོན་དམ་དུ་བཤགས་པར་བསྟན་པ་སྟེ་ས་བཅད་རྣམ་པ་དྲུག་གིས་བསྟན་པར་བྱས་འདུག་ཅིང་། ཡོ་ག་གསུམ་གྱི་ལྟ་བ་བསྟན་པར་བཤད་པའི་འཕྲོའི་བཤགས་པའི་རྒྱུད་ཀྱི་རྩ་ཚིག་རྣམས་ཀྱི་ཚིག་དོན་ཞི་ཁྲོའི་ཀློང་བཤགས་འདི་ཇི་བཞིན་མིན་པར་ཅུང་མི་མཐུན་པས་ཁོ་བོ་ནི་ཀ༔ཐོག་པ་ཡེ་ཤེས་རྒྱལ་མཚན་གྱི་འགྲེལ་བའི་རྗེས་སུ་མ་འབྲང་བར་ས་བཅད་འདི་ལྟར་རང་གིས་ལོགས་སུ་བགྱིས་པ་ལགས་སོ།།

རིག་འཛིན་འཇིགས་མེད་གླིང་པས། ཀུན་བཟང་རྫོགས་ཆེན་ཡེ་ནས་བརྡལ་བ་ལ༔ སོགས་རྐང་པ་གཉིས་ཀྱིས་དབང་བཞིའི་རིམ་པའི་ཕྱི་ནང་གསང་བའི་དཀྱིལ་འཁོར་གྱི་བཀོད་པ་སྤྱིའི་མཚམས་སྦྱོར་ལྟ་བུ་དང་། སྣང་སྲིད་རྣམ་དག་ལྷ་དང་ལྷ་མོའི་དབྱིངས༔ སོགས་རྐང་པ་གཉིས་ཀྱིས་ཕྱི་ཡི་དཀྱིལ་འཁོར་དང་། གསང་ཆེན་རབ་དགྱེས་གཟུགས་ཅན་བདག་ཉིད་མའི༔ སོགས་རྐང་པ་གསུམ་གྱིས་ནང་གི་དཀྱིལ་འཁོར་དང་། མ་བཅོས་སྤྲོས་མེད་བྱང་ཆུབ་སྙིང་པོའི་སྐུ༔ སོགས་རྐང་པ་གཉིས་ཀྱིས་གསང་བའི་དཀྱིལ་འཁོར་བསྟན་པ་དང་། དེ་ནས་དཀྱིལ་འཁོར་གསུམ་གྱི་བདག་ཉིད་ཞི་ཁྲོའི་དཀྱིལ་འཁོར་བསྟན་པ་དང་། རྡོ་རྗེ་ལྷ་མོ་ཞེས་པ་རྡོ་རྗེའི་རིག་མ་བཅུ་དྲུག་དང་། ཚོགས་རྗེ་ཚོགས་ཀྱི་བདག་ཅེས་པ་རིགས་ལྔ་དང་ལྡན་པའི་སྤྱི་དཔལ་ཆེན་པོ་དང་ཞེས། རིགས་ལྔ་དཔལ་ཆེན་ཞེས་པ་དེ་ཁྲོ་རྒྱལ་ཡབ་ཡུམ་བཅུའི་ངོར་མ་སྦྱར་བར་ཡར་ཚོགས་རྗེ་ཚོགས་ཀྱི་བདག་གི་ངོར་སྦྱར་བ་དང་། གནས་དང་ཡུལ་གྱི་ཕྱག་རྒྱ་སྒོ་མ་བཞི༔ ཞེས་པ་ཡང་གནས་སུམ་ཅུ་རྩ་གཉིས་དང་། ཡུལ་ཉེར་བཞིའི་དཔའ་བོ་རྣམས་ཀྱི་ཡུམ་རྣལ་འབྱོར་མ་རེ་རེ་ཡོད་པ་ལ་སྦྱར་འདུག་པ་ལ་སོགས་པ་མི་འདྲ་བ་མཆིས་མོད་གཞུང་དོན་གང་ཡིན་བློ་ལྡན་གཟུར་གནས་དག་གིས་དཔྱད་པར་རིགས་སོ། །ཞར་བྱུང་ཐལ་ལོ།།

བཤགས་པ་དངོས།

དྲུག་པ་བརྗོད་མེད་དོན་བཤགས་ཀྱི་བཤགས་པ་དངོས་ལ། སོ་བྱང་སྔགས་གསུམ་གྱི་བཤགས་པ་སྤྱི་བསྟན་པ་དང་། སྔགས་ཀྱི་རྩ་བ་དང་ཡན་ལག་གི་དམ་ཚིག་གི་བཤགས་པ་བྱེ་བྲག་ཏུ་བསྟན་པ་དང་། དོན་དམ་བརྗོད་མེད་ཀྱི་བཤགས་པ་དམིགས་སུ་བཀར་ནས་བསྟན་པ་དང་གསུམ་ལས། དང་པོ་ནི། ཧཱུཾ་ཐུགས་རྗེའི་གདུང་འཚོབ་རྡོ་རྗེ་རྣལ་འབྱོར་བདག༔ འགྲོ་བའི་དོོན་དུ་བྱང་ཆུབ་སེམས་བསྐྱེད་དེ༔ བླ་མེད་གོ་འཕངས་ཐོབ་པར་བྱ་བའི་ཕྱིར༔ བསྟན་པ་རྒྱ་མཚོ་སོོ་སོའི་འདུལ་ཁྲིམས་དང་༔ སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག༔ འདའ་ཀ་རྡོ་རྗེ་དམ་ཚིག་གཏན་གྱི་གཉེར༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། དེ་ལྟར་བཤགས་པའི་ཡན་ལག་དང་སྔོན་དུ་འགྲོ་དགོས་པ་རྣམས་ལེགས་པར་བསྟན་ནས་ད་ནི་བཤགས་པ་དངོས་ཀྱི་ཚུལ་ལ་ཞུགས་པ་ཡིན་ཞིང་། དེ་ཡང་རྒྱུད་རྡོ་རྗེ་རྩེ་མོ་ལས། ཡི་གེ་ཧཱུཾ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །སྲིད་པའི་ཞགས་པ་གཅོད་བྱེད་ཅིང་། །གདུག་པ་སྔངས་ཤིང་གསོད་བྱེད་པའི། །ཧཱུཾ་ནི་མཆོག་ཏུ་དྲན་པར་བྱ། །ཞེས་དང་། ཡི་གེ་ཧཱུྃ་ནི་བསྡིགས་ལ་སྦྱར། །གསད་པ་ལ་ཡང་ཡི་གེ་ཧཱུྃ། །ཞེས་དང་། སངས་རྒྱས་ཀུན་གྱི་ཡི་གེ་ཧཱུྃ། །གང་ཕྱིར་སངས་རྒྱས་རིགས་བྱུང་བ། །རྡོ་རྗེ་ཅན་དག་ཀུན་གྱི་ཧཱུྃ། ། དྲག་པོ་གཅོད་ཀུན་རབ་ཏུ་བསྒོམ། །ཞེས་གསུངས་པ་ལྟར། ཧཱུཾ༷་ནི་རྒྱལ་བ་ཀུན་གྱི་ཐུགས་རྣམ་པར་མི་རྟོག་པ་རྡོ་རྗེ་གཞོམ་དུ་མེད་པ་མི་མཐུན་པ་གཞོམ་པར་བྱེད་པ་སྟེ། ཉེས་ལྟུང་གི་ཚོགས་དང་། སྒྲིབ་གཉིས་དང་། བདུད་བཞི་གདུག་པ་དང་། རྣམ་པར་རྟོག་པའི་བགེགས་དང་། ཁྱད་པར་དུ་ཉེས་ལྟུང་མི་བཟད་པ་དེ་དག་བསྐྱེད་པའི་རྒྱུ་ཉོན་མོངས་པ་སོགས་འཇོམ་བྱེད་ཀྱི་གཉེན་པོའི་ཡེ་ཤེས་མཚོན་བྱེད་དོ།།

རྣམ་པར་མི་རྟོག་ཅིང་ཟག་པ་མེད་པའི་མཁྱེན་པ་མཐའ་ཡས་པའི་ཡེ་ཤེས་དང་འགྲོ་བ་ཀུན་ལ་སྙོམས་པར་གཟིགས་པའི་ཐུག༷ས་བརྩེ་བ་ཆེན་པོ་སྙིང་རྗེ༷འི་བདག་ཉིད་ཅན་གྱི་རྒྱལ་བ་རྣམས་ཀྱི་ཡོན་ཏན་གྱི་གདུང༷་འཚོབ༷་པའི་ཐབས་དམ་པ་རྡོ༷་རྗེ༷་ཐེག་པའི་ལམ་ཟབ་མོ་ཉམས་སུ་ལེན་པའི་དོན་རྣལ༷་མ་ལ་དབང་འབྱོར༷་བར་མོས་ཤིང་བརྩོན་པ་བད༷ག་གིས་ནི་མཐའ་ཡས་པའི་འ༷གྲོ་བ་རྣམས་རིགས་དྲུག་གི་སྡུག་བསྔལ་གྱི་རྒྱ་མཚོ་ལས་བསྒྲལ་བ༷འི་ཆེད་དུའམ་དོན༷་དུ༷་དེ་ལྟར་འགྲོ་བ་རྣམས་བྱང་ཆུབ་ཆེན་པོའི་ས་ལ་འགོད་པར་བྱའོ་སྙམ་པའི་ཀུན་རྫོབ་བྱང༷་ཆུབ༷་ཀྱི་སེམ༷ས་རིན་པོ་ཆེ་བསྐྱེད༷་དེ༷། དེ་ལྟར་འགྲོ་བ་རྣམས་བླ༷་ན་མེད༷་པ་ཡང་དག་པར་རྫོགས་པ་སངས་རྒྱས་ཀྱི་གོ༷་འཕ༷ང་ཐོབ༷་པ༷ར་བྱ༷་བ༷འི་ཕྱིར༷་དུ་རྒྱལ་སྲས་ཀྱི་སྤྱོད་པ་ལ་འཇུག་སྟེ་དང་པོ་རང་ཉིད་སངས་རྒྱས་ཀྱི་བསྟན་པའི་སྒོར་ཞུགས་ཏེ་ཕྱི་སོ་སོར་ཐར་བ་དང་། ནང་བྱང་ཆུབ་ཀྱི་སེམས་དང་། གསང་བ་སྔགས་ཀྱི་རིག་པ་འཛིན་པའི་བསླབ་པའི་རྣམ་གྲངས་ལ་བསླབ་པར་བྱ་དགོས་ཤིང་། ཉམས་ན་བཤགས་པ་བྱ་དགོས་པས། དང་པོ་ཕྱི་སོ་སོར་ཐར་བའི་བསླབ་པའི་རྣམ་གྲངས་ལ་ནི་དགག་སྒྲུབ་ཀྱི་རྣམ་གཞག་དུ་མ་ཡོད་པ་ལས་དགག་པའི་བསླབ་བྱར་བཅས་པ་སོ་ཐར་རིགས་བདུན་ལས་དགེ་བསྙེན་ལ་ནི། འདུལ་བ་ལུང་གཞི་ལས། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་གོ །མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། སྦྱར་བའི་ཆང་དང་། འབྲུའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། ཞེས་གསུངས་པ་ལྟར། སྲོག་གཅོད་པ་དང་། མ་བྱིན་པ་ལེན་པ་དང་། མི་ཚངས་པ་འདོད་པའི་ལོག་པར་གཡེམ་པ་དང་། རྫུན་དུ་སྨྲ་བ་དང་། ཆང་འཐུང་བ་སྤོང་བའི་དགེ་བསྙེན་གྱི་ཁྲིམས་ལྔ་དགག་པ་ལ་བསླབ་པར་བྱ་ཞིང་ཉམས་ན་བཤགས་པར་བྱའོ།།

གཞན་ཡང་དུས་ཁྲིམས་ཡན་ལག་བརྒྱད་པའི་བསྙེན་གནས་ནི། གཏུམ་པོ་དཔའ་གཅིག་གི་རྒྱུད་ལས། བདག་གིས་སེམས་ཅན་བསད་མི་བྱ། །ཕ་རོལ་ནོར་ནི་འཕྲོག་མི་བྱ། །བདག་ནི་ཚངས་པ་མཚུངས་པར་སྤྱད། །རྫུན་གྱི་ཚིག་ཀྱང་སྤང་བར་བགྱི། །མྱོས་བྱེད་ཆང་གི་བཏུང་བ་ནི། །བདག་གིས་གང་དུའང་བཏུང་མི་བྱ། །གར་དང་གླུ་དང་རྒྱན་རྣམས་དང་། །རྒོད་བག་རྣམས་ནི་སྤང་བར་བྱ། །ཁྲི་སྟན་མཐོ་དང་ཁྲི་སྟན་ཆེ། །དུས་མིན་ཁ་ཟས་སྤང་བར་བྱ། །དེ་ལྟར་གསོ་སྦྱོང་ཡན་ལག་བརྒྱད། །དགྲ་བཅོམ་རྗེས་སུ་བདག་གིས་བསླབ། །ཅེས་གསུངས་པར་ལྟར་གྱི་བསྙེན་གནས་ཀྱི་སྡོམ་ཁྲིམས་ཡན་ལག་བརྒྱད་པ་དགག་པ་ལ་བསླབ་པར་བྱ་ཞིང་ཉམས་ན་བཤགས་པར་བྱའོ།།

གཞན་ཡང་རབ་བྱུང་དགེ་ཚུལ་ཕ་མའི་བསླབ་བྱ་ནི། འདུལ་བ་ལུང་གཞི་ལས། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །ཞེས་པས་ནས་གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་གསུངས་པ་ལྟར། མི་གསོད་པ་དང་། མ་བྱིན་པ་ལེན་པ་དང་། མི་ཚངས་པ་སྤྱོད་པ་དང་། མི་ཆོས་བླ་བའི་རྫུན་སྨྲ་བ་བཞིའི་ཕྱོགས་གཏོགས་དང་བཅས་པ་སྤོང་བ་དང་། ཆང་དང་། གླུ་གར་རོལ་མོ་དང་། ཕྲེང་བ་སྤོས་ཉུག་རྒྱན་ཁ་དོག་འཆང་བ་དང་། མལ་སྟན་ཆེ་མཐོ་དང་། ཕྱི་དྲོའི་ཁ་ཟས་དང་། གསེར་དངུལ་ལ་ལེན་པ་སྤོང་བ་སྟེ་དགེ་ཚུལ་ཕ་མའི་བསླབ་པ་རགས་པ་བཅུ་དང་རྒྱས་པ་བླང་འདས་སོ་དྲུག་དགག་པ་ལ་བསླབ་པར་བྱ་ཞིང་ཉམས་ན་བཤགས་པར་བྱའོ།།

དེ་བཞིན་དུ་དགེ་སློབ་མའི་བསླབ་བྱ་ལ། དགེ་སློང་མའི་འདུལ་བ་རྣམ་འབྱེད་ལས། གཅིག་པུ་ལམ་དུ་འཇུག་མི་བྱ། །ཆུ་བོའི་ཕ་རོལ་བརྒལ་མི་བྱ། །སྐྱེས་པ་ནི་ལ་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་བ་མི་བྱ་ཞིང་། །ཁ་ན་མ་ཐོ་བཅབ་མི་བྱ། །འདི་དག་ནི་ཆོས་དྲུག་ཅེས་བྱའོ། །རྗེས་སུ་མཐུན་པའི་ཆོས་དྲུག་གང་ཞེ་ན། གསེར་ལ་གཟུང་བར་མི་བྱ་སྟེ། །སྤུ་ཡི་ལས་ནི་མི་བྱའོ། །ས་ཡང་རྐོ་བར་མི་བྱ་སྟེ། །རྩྭ་སྔོན་དག་ཀྱང་བཅད་མི་བྱ། །བྱིན་ལེན་མ་བྱས་མི་བཟའ་སྟེ། །བཞག་པ་བཟའ་བར་མི་བྱའོ། །ཆོས་དྲུག་པོ་འདི་དག་ནི་རྗེས་སུ་མཐུན་པའི་ཆོས་དྲུག་ཅེས་བྱ་སྟེ། ཞེས་གསུངས་པ་ལྟར་གྱི་དགེ་སློབ་མའི་བསླབ་པའི་ཆོས་ དྲུག་དང་། རྗེས་སུ་མཐུན་པའི་ཆོས་དྲུག་དགག་པ་ལ་བསླབ་པར་བྱ་ཞིང་ཉམས་ན་བཤགས་པར་བྱའོ།།

གཞན་ཡང་དགེ་སློང་མའི་བསླབ་བྱ་ལ། དགེ་སློང་མའི་སོ་སོར་ཐར་བའི་མདོ་ལས། མི་ཚངས་སྤྱོད་དང་རྐུ་བ་དང་། །མི་གསོད་རྫུན་དུ་སྨྲ་བ་དང་། །ས་གའི་བུ་དང་སྤོས་འཚོང་ཁྱེའུ། །མཛའ་མོ་དང་ནི་གྲེ་སྐྱེས་པའོ། །ཞེས་གསུངས་པ་ལྟར་མི་ཚངས་སྤྱོད་པ་དང་། མ་བྱིན་པའི་ནོར་རྐུ་བ་དང་། མི་གསོད་པ་དང་། མི་ཆོས་བླ་མའི་རྫུན་དུ་སྨྲ་བ་དང་། ཆགས་པས་སྐྱེས་པའི་ལུས་ལ་འཁྱུད་པ་དང་། ཆགས་པས་སྐྱེས་པའི་བདུན་དུ་འཕྱར་གཡེང་ལ་སོགས་པས་ལུས་བཀན་པ་དང་། དགེ་སློང་མ་གཞན་ལ་ཕམ་པ་བྱུང་བ་ཤེས་བཞིན་དུ་བཅབས་པ་དང་། དགེ་འདུན་པས་གནས་ནས་དབྱུངས་པའི་དགེ་སློང་ལ་དགེ་སློང་མས་ཕྱག་མི་བྱ་བར་བཅས་པ་ལ་སོགས་པ་ཤེས་བཞིན་དུ་དེ་ལ་བཟོད་གསོལ་འབུལ་དུ་མི་འཇུག་པ་བཅས་དགེ་སློང་མའི་ཕམ་པ་བརྒྱད་དང་།

དེ་བཞིན་དུ་དེ་ཉིད་ལས། སྨྱན་བྱེད་པ་དང་གཞི་མེད་དང་། །གསུམ་པ་བག་ཙམ་ཆ་ལས་ལེན། །བཞི་བ་ཅི་ཡང་རུང་བར་བྱ། །ལྔ་བ་ཆགས་པ་མེད་པ་སྟེ། །མཚན་མོ་ཉིན་མོ་ལམ་འགྲོ་དང་། །ཆུ་ཀླུང་ཕ་རོལ་ཡིད་མཐུན་ནོ། །ཞེས་དང་། ཤི་བའི་ནོར་རྫས་ལེན་པ་དང་། །དགེ་སློང་མ་ལ་བཟོད་བྱེད་དང་། །སྤོང་དང་འཐབ་ཀྲོལ་བྱེད་པ་དང་། སྟེན་དང་སྟེན་དུ་འཇུག་པ་དང་། །དགེ་འདུན་དབྱེན་དང་དེ་རྗེས་ཕྱོགས། །སུན་འབྱིན་བཀའ་བློ་མི་བདེ་བའོ། །ཞེས་དང་། འཕགས་མ་དག་བདག་གིས་དགེ་འདུན་ལྷག་མའི་ཆོས་ཉི་ཤུ་པོ་དག་བཏོན་ཟིན་ཏོ། །ཞེས་གསུངས་པ་ལྟར་གྱི་དགེ་སློང་མའི་ལྷག་མ་ཉི་ཤུ་དང་།

དེ་ཉིད་ལས། འཆང་བ་བྲལ་བ་འཇོག་པ་དང་། །འཁྲུ་བ་དང་ནི་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་དང་། གསེར་དངུལ་མངོན་ཚན་ཉོ་ཚོང་དང་། །ཚོལ་དང་འཐག་པ་སྐྱེད་པ་དང་། བྱིན་འཕྲོགས་བསྔོས་དང་གསོག་འཇོག་དང་། །འཆང་དང་བྱིན་གྱིས་མི་རློབ་པའོ། །ཞེས་དང་། འབྱིན་དང་མི་འབྱིན་སློང་བ་དང་། །གོས་དང་གོས་རྒྱུ་མལ་ཆ་དང་། །དབྱར་ཁང་རྒྱུ་དང་སྐྱེ་བོ་དང་། །དགེ་འདུན་བཅིངས་བཀྲོལ་ལྕི་ཡང་ངོ་། །ཞེས་དང་། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །འཁྲུ་དང་འཆང་དང་རྟ་དང་དགོན། །རས་ཆེན་མ་གཏོགས་ལྷག་མ་ཡིན། །འཕགས་མ་དག་བདག་གིས་སྤང་བའི་ལྟུང་བྱེད་ཀྱི་ཆོས་སུམ་ཅུ་རྩ་གསུམ་པོ་དག་བཏོན་ཟིན་ཏོ། །ཞེས་གསུངས་པ་ལྟར་གྱི་དགེ་སློང་མའི་སྤང་ལྟུང་སོ་གསུམ་དང་།

ཡང་དེ་ཉིད་ལས། རྫུན་དང་ས་བོན་འདུག་གནས་དང་། །སྲོག་ཆགས་བདེ་དང་དུད་འགྲོ་དང་། །རྐུ་བ་དང་ནི་ཟས་བཅས་པ། །དེ་དག་ཐུན་མོང་ཡིན་པར་འདོད། །ཞེས་དང་། དགེ་སློང་ཐུན་མོང་བདུན་ཅུ་གཉིས་ཞེས་གསུངས་པ་ལྟར་གྱི་དགེ་སློང་དང་ཐུན་མོང་གི་ལྟུང་བྱེད་འབའ་ཞིག་པ་བདུན་ཅུ་རྩ་གཉིས་དང་། མ་ལོན་འདྲིད་དང་ནད་གཡོག་དང་། །ཉན་དང་ཁྲི་གཅིག་པུ་ཤེལ་ཙི། །མཆིལ་ལྷམ་སྒོག་སྐྱ་ཆོས་དང་ནི། །འདུན་དང་མི་འགྲོ་ཐ་མ་ཡིན། །ཞེས་དང་། ཐུན་མོང་མིན་པ་བརྒྱ་རྩ་བརྒྱད་ཅེས་གསུངས་པ་ལྟར་གྱི་དགེ་སློང་མ་རང་གི་ཐུན་མོང་མ་ཡིན་པའི་ལྟུང་བྱེད་བརྒྱ་རྩ་བརྒྱད་དེ། དོན་ལ་དགེ་སློང་མའི་ལྟུང་བྱེད་འབའ་ཞིག་པ་བརྒྱ་དང་བརྒྱད་ཅུ་དང་།

ཡང་དེ་ཉིད་ལས། འོ་མ་ཞོ་དང་མར་དང་ནི། །ཞུན་མར་འབྲུ་མར་སྦྲང་རྩི་དང་། །དབུ་བ་ཉ་ཤ་ཤ་དང་ནི། །ཤ་སྐམ་བསླབ་སྡོམ་བྱིན་པའོ། །འཕགས་མ་དག་སོ་སོར་བཤགས་པར་བྱ་བའི་ཆོས་བཅུ་གཅིག་པོ་འདི་དག་ནི་ཞེས་གསུངས་པ་ལྟར་གྱི་དགེ་སློང་མའི་སོ་སོར་བཤགས་པ་བཅུ་གཅིག་དང་།

ཡང་དེ་ཉིད་ལས། ཤམ་ཐབས་ལ་ནི་རྣམ་བརྒྱད་དང་། །སྟོད་གཡོགས་ལ་ནི་རྣམ་གསུམ་དང་། །ཤིན་ཏུ་བསྡམས་ལ་སོགས་པ་དྲུག །མགོ་གཡོགས་ལ་སོགས་རྣམ་པ་ལྔ། །མཆོང་ལ་སོགས་པ་རྣམ་པ་ལྔ། །འདུས་ལ་སོགས་པ་རྣམ་པ་ལྔ། །འདུག་པར་བྱ་བ་བརྒྱད་དག་དང་། །བྱིན་ལེན་བྱ་བ་བརྒྱད་རྣམས་སོ། །ཞེས་དང་། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ། །ལག་པ་ལྡག་ལ་སོགས་པ་ལྔ། །ཞེས་དང་། འཕྱ་ལ་སོགས་པ་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །འགྲེང་བར་བྱེད་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །དོ་ཀེར་ཅན་ལ་སོགས་པ་ལྔ། །གླང་ཆེན་ལ་སོགས་བཞོན་པ་ལྔ། །ལག་ན་འཁར་བ་ཐོགས་སོགས་དྲུག །ན་བ་རྣམ་པ་གསུམ་རྣམས་སོ། །ཞེས་བསླབ་པར་བྱ་བའི་ཆོས་མང་པོ་སྟེ་ཉེས་བྱས་བརྒྱ་དང་བཅུ་གཉིས་ཏེ། དེ་དག་སྡོམ་པའི་དགེ་སློང་མའི་འདུལ་ཁྲིམས་སུམ་བརྒྱ་དྲུག་ཅུ་རྩ་བཞི་དགག་པ་ལ་བསླབ་པར་བྱ་ཞིང་ཉམས་ན་བཤགས་པར་བྱའོ།།

དེ་བཞིན་དུ་གཞན་ཡང་དགེ་སློང་གི་བསླབ་བྱ་ལ། སོ་སོར་ཐར་བའི་མདོ་ལས། མི་ཚངས་སྤྱོད་དང་རྐུ་བ་དང་། །མི་ལ་གསོད་པར་མི་བྱ་བ། །རྫུན་དུ་སྨྲ་དང་བཅས་པ་ཡི། །ཆོས་བཞི་འདིར་ནི་གསུངས་པ་ཡིན། ཞེས་གསུངས་པ་ལྟར། རྨའི་སྒོ་གསུམ་གང་རུང་དུ་མི་ཚངས་པ་སྤྱོད་པ་དང་། རིན་ཐང་ཚང་བའི་དངོས་པོ་བཙན་འཇབ་ཀྱིས་རྐུ་བའི་མ་བྱིན་པ་ལེན་པ་དང་། མིའམ་མིར་ཆགས་པ་གསོད་པ་དང་། མི་ཆོས་བླ་མའི་རྫུན་སྨྲ་བ་སྟེ་དགེ་སློང་གི་སྡོམ་པའི་ཕམ་པ་བཞི་དང་།

དེ་ཉིད་ལས། ཁུ་བ་འཛིན་པ་འཁྲིག་ཚིག་བསྙེན་བཀུར་སྨྱན། །ཁང་པ་ཁང་ཆེན་དང་ནི་གཞི་མེད་པ། །བག་ཙམ་དགེ་འདུན་དབྱེན་དང་དེ་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་གསུངས་པ་ལྟར་གྱི་ལྷག་མ་བཅུ་གསུམ་དང་།

ཡང་དེ་ཉིད་ལས། འཆང་བ་འབྲལ་བ་འཇོག་པ་དང་། །འཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་དང་། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །འཁྲུ་བ་དང་ནི་གསེར་དངུལ་དང་། །མངོན་ཚན་ཅན་དང་ཉོ་ཚོང་ངོ་། །ཞེས་དང་། ལྷུང་བཟེད་གཉིས་དང་ཐ་ག་གཉིས། །བྱིན་འཕྲོགས་སྟོན་ཟླ་ཐ་ཆུང་དང་། །དགོན་པ་བ་དང་རས་ཆེན་དང་། །བསྔོས་པ་དང་ནི་གསོག་འཇོག་གོ །ཞེས་གསུངས་པ་ལྟར་གྱི་སྤང་བའི་ལྟུང་བ་སུམ་ཅུ་དང་།

ཡང་དེ་ཉིད་ལས། རྫུན་སྐྱོན་དགེ་སློང་ཕྲ་མ་དང་། །སྐྱོ་སྔོགས་བྱེད་དང་སྟོན་པ་དང་། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཅེས་དང་། ས་བོན་འཕྱ་དང་བསྒོ་བ་དང་། །ཁྲི་དང་གདིང་དང་སྐྲོད་པ་དང་། །ཕྱིས་གནོན་འབྱུང་བ་འདེབས་པ་དང་། །རིམ་པ་གཉིས་སུ་རྩིག་པའོ། །ཞེས་དང་། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཞེས་དང་། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབས་པ་དང་། །དུས་དང་དུས་མིན་གསོགས་འཇོག་དང་། །ཁ་ནས་མིད་དང་བསོད་པ་ཉིད། །ཅེས་དང་། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་བཤམ་དཀྲུག་འགྲོ་བ་དང་། །རྡེག་དང་གཟས་དང་གནས་ངན་ལེན། །ཞེས་དང་། བདེ་དང་མེ་དང་འདུན་པ་དང་། །བསྙེན་པར་མ་རྫོགས་ཆོས་དང་སྨྲ། །དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཞེས་དང་། དུད་འགྲོ་འགྱོད་པ་སོར་མོ་དང་། །རྩེ་དང་ལྷན་གཅིག་སྔངས་བྱེད་དང་། །སྤེད་དང་གདེང་མེད་གཞི་མེད་དང་། །སྐྱེས་པ་མེད་པར་ལམ་འགྲོའོ། །ཞེས་དང་། རྐུ་དང་ཉི་ཤུ་མ་ལོན་དང་། །རྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མི་གུས་ཆང་འཐུང་དུས་མིན་པའོ། །ཞེས་དང་། ཟས་བཅས་སྐྱ་རེངས་ད་གདོད་དང་། །ཁབ་རལ་དང་ནི་ཁྲི་རྐང་དང་། །བདལ་དང་གདིང་དང་གཡན་པ་དང་། །རས་ཆེན་བདེ་གཤེགས་ཆོས་གོས་སོ། །ཞེས་གསུངས་པ་ལྟར་གྱི་ལྟུང་བྱེད་འབའ་ཞིག་པ་དགུ་བཅུ་དང་།

ཡང་སོ་སོར་ཐར་བའི་མདོ་ལས། གྲོང་དང་ཁྱིམ་གཞན་ཉིད་དང་ནི། །བསླབ་པ་རྣམས་དང་དགོན་པ་ནི། །སངས་རྒྱས་ཕན་པ་གསུངས་པ་ཡིས། །སོ་སོར་བཤགས་པར་བྱ་བར་གསུངས། །ཞེས་གསུངས་པའི་སོ་སོར་བཤགས་པ་བཞི་དང་།

ཡང་དེ་ཉིད་ལས། ཤམ་ཐབས་ལ་ནི་རྣམ་བདུན་དང་། །སྟོད་གཡོགས་ལ་འང་རྣམ་གསུམ་དང་། །ཤིན་ཏུ་བསྡམས་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །མཆོང་ལ་སོགས་པ་རྣམ་ལྔ་དང་། །ལུས་ལ་སོགས་པ་རྣམ་པ་ལྔ། །འདུག་པར་བྱ་བ་དགུ་དག་དང་། །བྱིན་ལེན་བྱ་བ་བརྒྱད་རྣམས་སོ། །ཞེས་དང་། ཟས་ལ་ལེགས་པར་བྱ་བ་དྲུག །ཙུག་ཙུག་ལ་སོགས་རྣམ་པ་ལྔ། །འབྲུ་ནས་ཐ་དད་བྱེད་པ་ལྔ། །ལག་པ་ལྡག་ལ་སོགས་པ་ལྔ། །ཞེས་དང་། འཕྱ་ལ་སོགས་པ་རྣམ་པ་བཞི། །ལྷུང་བཟེད་ལ་ཡང་རྣམ་པ་བཅུ། །འགྲེང་བར་བྱེད་ལ་སོགས་པ་ལྔ། །མགོ་གཡོགས་ལ་སོགས་རྣམ་པ་ལྔ། །དོ་ཀེར་ཅན་ལ་སོགས་པ་ལྔ། །གླང་ཆེན་ལ་སོགས་བཞོན་པ་ལྔ། །ལག་ན་འཁར་བ་ཐོགས་སོགས་དྲུག །ན་བ་རྣམ་པ་བཞི་རྣམས་སོ། །ཞེས་གསུངས་པ་ལྟར་གྱི་ཉེས་བྱས་སམ་བསླབ་པར་བྱ་བའི་ཆོས་མང་པོ་བརྒྱ་དང་བཅུ་གཉིས་ཏེ་དགེ་སློང་གི་ཁྲིམས་ཉིས་བརྒྱ་ལྔ་བཅུ་རྩ་གསུམ་སྟེ་སོ་སོར་ཐར་བའི་སྡོམ་པའི་ཆོས་ཤིན་ཏུ་མང་པོ་དེ་དག་དགག་པ་ལ་བསླབ་པར་བྱ་ཞིང་གལ་ཏེ་དེ་དག་གི་བླང་དོར་ལས་འདས་ན་བཤགས་པར་བྱའོ།།

གཞན་ཡང་དེ་བཞིན་དུ་ཐེག་པ་ཆེན་པོའི་སྡེ་སྣོད་ལས་བསྟན་པའི་བྱང་ཆུབ་སེམས་དཔའི་བསླབ་པར་བྱ་བ་ལ་ཡང་ནི། འཕགས་པ་ནམ་མཁའི་སྙིང་པོའི་མདོ་ལས། རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་ལྟུང་བའི་རྩ་བ་ནི་ལྔ་སྟེ། ཞེས་པ་ནས་འདི་ནི་ལྟུང་བའི་རྩ་བ་ལྔ་བ་སྟེ། ཞེས་གསུངས་པ་ལྟར། མཆོད་པའི་རྟེན་དཀོན་མཆོག་གསུམ་གྱི་དཀོར་འཕྲོག་པ་རྩ་བའི་ལྟུང་བ་དང་པོ་དང་། ཐེག་པ་གསུམ་གྱི་ངེས་པར་འབྱུང་བ་དམ་པའི་ཆོས་སྤོང་བ་རྩ་བའི་ལྟུང་བ་གཉིས་པ་དང་། གོས་ངུར་སྨྲིག་བགོས་པའི་ཚུལ་ཁྲིམས་དང་ལྡན་པའི་དགེ་སློང་དང་ཚུལ་ཁྲིམས་དང་མི་ལྡན་པ་དགེ་སློང་གི་གཟུགས་བརྙན་ཙམ་འཛིན་པ་གང་རུང་གི་གོས་ངུར་སྨྲིག་འཕྲོག་པ་དང་། ལུས་ལ་རྡེག་པ་དང་། བཙོན་དུ་བཅུག་པ་དང་། གསོད་པ་གང་རུང་བྱེད་པ་རྩ་བའི་ལྟུང་བ་གསུམ་པ་དང་། ཕ་མ་དང་དགྲ་བཅོམ་པ་གསོད་པ་དང་དགེ་འདུན་དབྱེན་དང་དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་པ་ལྔ་གང་རུང་གི་ལས་བྱེད་པ་རྩ་བའི་ལྟུང་བ་བཞི་བ་དང་། ཚེ་ཕྱི་མ་དང་ལས་འབྲས་མེད་པར་འཛིན་ཅིང་མི་དགེ་བ་བཅུ་རང་གིས་འཛིན་པ་དང་གཞན་སེམས་ཅན་ལ་འཛིན་དུ་འཇུག་པ་ལ་སོགས་པས་ལོག་ལྟ་བྱེད་པ་རྩ་བའི་ལྟུང་བ་ལྔ་བ་སྟེ་རྒྱལ་པོ་ལ་འབྱུང་ཉེ་བའི་བྱང་སེམས་ཀྱི་རྩ་བའི་ལྟུང་བ་ལྔ་དང་། ཡང་དེ་ཉིད་ལས། བྱམས་པ་བློན་པོའི་ལྟུང་བའི་རྩ་བ་ཡང་ལྔ་སྟེ། ཞེས་པ་ནས་ལྟུང་བའི་རྩ་བ་ལྔ་བ་སྟེ། ཞེས་གསུངས་པ་ལྟར། དཀོན་མཆོག་གི་དཀོར་འཕྲོག་པ་རྩ་བའི་ལྟུང་བ་དང་པོ་དང་། གྲོང་དང་། ལྗོངས་དང་། གྲོང་ཁྱེར་འཇོམ་པར་བྱེད་པ་རྩ་བའི་ལྟུང་བ་གཉིས་པ་དང་། ཆོས་སྤོང་བ་རྩ་བའི་ལྟུང་བ་གསུམ་པ་དང་། ཚུལ་ཁྲིམས་ལྡན་མི་ལྡན་གང་རུང་གི་དགེ་སློང་གི་ངུར་སྨྲིག་འཕྲོག་པ་སོགས་བགྱི་བ་རྩ་བའི་ལྟུང་བ་བཞི་བ་དང་། མཚམས་མེད་པ་ལྔ་བྱེད་པ་རྩ་བའི་ལྟུང་བ་ལྔ་བ་བཅས་བློན་པོ་ལ་འབྱུང་ཉེ་བ་ལྔ་དང་། ཡང་ནམ་སྙིང་གི་མདོ་ལས། ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་ལས་དང་པོ་པ་དག་གི་རྩ་བའི་ལྟུང་བ་ནི་བརྒྱད་དེ། ཞེས་པ་ནས་བྱང་ཆུབ་སེམས་དཔའ་ལས་དང་པོ་བ་རྣམས་ཀྱི་ལྟུང་བའི་རྩ་བ་བརྒྱད་པ་སྟེ། ཞེས་གསུངས་པ་ལྟར། ཐེག་པ་ཆེན་པོ་ལ་བློ་སྦྱོང་མ་བྱས་པའི་གང་ཟག་ལ་སྟོང་པ་ཉིད་ལ་སོགས་པ་ཐེག་པ་ཆེན་པོའི་ལམ་ཟབ་པ་དང་རྒྱ་ཆེན་པོ་རྣམས་བསྟན་ནས་དེ་དག་གི་བློར་མ་ཤོང་བར་ཉན་ཐོས་ཀྱི་ཐེག་པ་ལ་སྨོན་པར་བྱས་པར་བྱེད་པ་རྩ་བའི་ལྟུང་བ་དང་པོ་དང་། བྱང་སེམས་ལས་དང་པོ་བ་རྣམས་ལ་ཁྱོད་ཕར་ཕྱིན་དྲུག་ལ་སོགས་པ་ཐེག་པ་ཆེན་པོ་ལ་སློབ་པར་མི་ནུས་པས་དེ་བས་ཉན་རང་གི་ཐེག་པ་ལ་སློབ་ཅིག་ཅེས་ཐེག་པ་ཆེན་པོ་ལ་ཞུགས་ཏེ་རྫོགས་པའི་བྱང་ཆུབ་སྒྲུབ་པ་ལས་བཟློག་པ་རྩ་བའི་ལྟུང་བ་གཉིས་པ་དང་། བྱང་སེམས་ལས་དང་པོ་བ་ལ་སོ་སོར་ཐར་བའི་འདུལ་བ་དང་། ཚུལ་ཁྲིམས་དང་། ལེགས་སྤྱད་དག་གིས་ཅི་བྱ་དེ་དག་ལ་རྣམ་པར་སྨིན་པ་ཐར་བ་མེད་པས་ཐེག་པ་ཆེན་པོ་ལ་སློབ་ཅིག་ཅེས་སོ་སོར་ཐར་བ་སྤོང་དུ་འཇུག་པ་རྩ་བའི་ལྟུང་བ་གསུམ་པ་དང་། བྱང་སེམས་ལས་དང་པོ་བ་ལ་ཉན་ཐོས་ཀྱི་ཐེག་པ་སྤོངས་ཤིག། དེའི་སྡེ་སྣོད་མ་ཀློག་མ་སྟོན་ཅིག། དེས་ཐར་བའི་འབྲས་བུ་ཆེན་པོ་མི་ཐོབ་ལ་ཉོན་མོངས་པ་སྤོང་མི་ནུས་པས་ཐེག་པ་ཆེན་པོ་ལ་སློབ་ཅིག། དེ་གཞན་ལ་སྟོན་ཅིག་ཅེས་བཤད་པ་ལ་ཕ་རོལ་བོས་དེ་ལྟར་ཉན་དབང་གིས་ཉན་རང་གི་ལམ་སྤངས་པས་ཉན་ཐོས་རྣམས་ཐེག་པ་ཆེན་པོ་ལ་སྦྱོར་བར་བྱེད་པ་རྩ་བའི་ལྟུང་བ་བཞི་བ་དང་། རྙེད་པ་དང་བཀུར་སྟིའི་ཆེད་དུ་ཐེག་པ་ཆེན་པོའི་ཆོས་དག་འཛིན་ཅིང་། ཀློག་པ་དང་། གཞན་ལ་བསྟན་ཅིང་བདག་ཁོ་ན་ནི་ཐེག་པ་ཆེན་པོ་བ་ཡིན་གྱི་གཞན་ནི་མ་ཡིན་ནོ་ཞེས་བདག་བསྟོད་དང་གཞན་ལ་ཕྲག་དོག་གིས་སྨོད་པ་ནི་རྩ་བའི་ལྟུང་བ་ལྔ་བ་དང་། བྱང་སེམས་ལས་དང་པོ་བས་ཐེག་པ་ཆེན་པོའི་མདོ་སྡེ་གཟུངས་ནས་མ་རྟོགས་བཞིན་དུ་བདག་ནི་ཐེག་པ་ཆེན་པོའི་ལམ་ཟབ་པ་དང་རྒྱ་ཆེ་བ་རྣམས་གཟུངས་ནས་ཡེ་ཤེས་མཐོང་ཞིང་ཟབ་མོའི་བཟོད་པ་ཐོབ་སྟེ་སྙིང་རྗེས་ཁྱོད་ཅག་ལ་སྟོན་པ་ཡིན་ཞེས་རྙེད་བཀུར་གྱི་ཆེད་དུ་ལོག་པར་སྨྲ་བ་ནི་རྩ་བའི་ལྟུང་བ་དྲུག་པ་དང་། བྱང་སེམས་ལས་དང་པོས་རྒྱལ་རིགས་དང་བློན་པོའི་ཕྱག་དར་བ་དང་། དཔའ་བོ་དང་སྨན་པའི་ཕྱག་དར་བ་སོགས་ནོར་གྱིས་ཕྱུག་པས་དྲེགས་པ་དག་ལ་བརྟེན་ནས་དགེ་སློང་དག་རྒྱལ་རིགས་དང་དབྱེ་ཞིང་ནོར་འཕྲོག་པ་ལ་སོགས་པ་ཆད་པས་གཅོད་པར་བྱེད་པ་རྩ་བའི་ལྟུང་བ་བདུན་པ་དང་། དགེ་སྦྱོང་ཁྲིམས་མི་གཙང་བ་ཁ་ནས་ཐེག་པ་ཆེན་པོ་སྟོན་ནུས་ཞིང་སྤོང་བ་ལ་སྡང་བ་དག་འབྱུང་ཞིང་། དེ་དག་གིས་དགེ་སློང་སྤོང་པ་བ་དག་ལ་གཙེ་ཞིང་། ཞི་ལྷག་གི་དོན་བསྒོམ་པ་གཏོང་བར་བྱེད་པ་དང་། དེ་དག་གི་དབང་གིས་བྱང་སེམས་ལས་དང་པོ་བ་དག་གིས་དགེ་སྦྱོང་སྤོང་བ་ལ་བརྩོན་པ་དག་གི་ཕན་པ་དང་དཀོར་ནོར་ལོངས་སྤྱོད་རྣམས་དགེ་སྦྱོང་ཁ་ཏོན་ལ་བརྩོན་པ་རྣམས་ལ་སྦྱིན་པར་བྱེད་པ་རྩ་བའི་ལྟུང་བ་བརྒྱད་པ་སྟེ་འབངས་ཕལ་བ་ལ་འབྱུང་ཉེ་བ་བརྒྱད་བཅས་སྡོམ་པའི་བྱང་སེམས་ཀྱི་རྩ་བའི་ལྟུང་བ་བཅོ་བརྒྱད་དང་། གསང་ཆེན་ཐབས་ལ་མཁས་པའི་མདོ་ལས་བཤད་པའི་སྨོན་སེམས་འདོར་བའི་རྩ་ལྟུང་དང་། དཀོན་བརྩེགས་ལས་བཤད་པའི་འཇུག་སེམས་འདོར་བའི་རྩ་ལྟུང་གཉིས་བསྣན་པའི་བྱང་སེམས་ཀྱི་རྩ་ལྟུང་ཉི་ཤུ་དང་། བསླབ་བཏུས་ལས། བྱང་ཆུབ་སེམས་ནི་ཡོངས་འདོར་དང་། །ཆགས་དང་སེར་སྣ་མི་ཟད་པས། །སློང་ལ་སྦྱིན་པར་མི་བྱེད་དང་། །བསྒྲིམས་ཏེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་པར། །ཁྲོས་པས་སེམས་ཅན་རྡེག་པ་དང་། །ཉོན་མོངས་པ་དང་གནས་མཐུན་པས། །ཆོས་ལྟར་བཅོས་པ་སྟོན་པའོ། །ཞེས་བྱང་ཆུབ་ཀྱི་སེམས་འདོར་བ་དང་། ཆགས་དང་སེར་སྣས་སློང་མོ་པ་ལ་སྦྱིན་པ་སྦྱིན་པར་མི་བྱེད་པ་དང་། སེམས་ཅན་ལ་མི་བཟོད་པར་ཁྲོས་པས་རྡེག་པ་དང་། ཉོན་མོངས་པ་དང་གནས་མཐུན་པའི་དམ་ཆོས་ལྟར་བཅོས་པའི་ཆོས་སྟོན་པ་སྟེ་རྩ་བའི་ལྟུང་བ་བཞི་དང་། དཀོན་མཆོག་བརྩེགས་པ་འོད་སྲུང་གིས་ཞུས་པའི་ལེའུ་ལས། འོད་སྲུང་བྱང་ཆུབ་སེམས་དཔའ་ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། འདི་ལྟ་སྟེ། སློབ་དཔོན་དང་། བླ་མ་དང་། སྦྱིན་གནས་སླུ་བ་དང་། གཞན་འགྱོད་པ་མེད་པ་དག་ལ་འགྱོད་པ་ཉེ་བར་སྒྲུབ་པ་དང་། ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་རྣམས་ལ་བསྔགས་པ་མ་ཡིན་པ་དང་། མི་སྙན་པ་དང་། བརྗོད་པ་མ་ཡིན་པའི་ཚིགས་སུ་བཅད་པ་འབྱིན་པ་དང་། སྒྱུ་དང་གཡོས་གཞན་ལ་ཉེ་བར་སྤྱོད་ཀྱི་ལྷག་པའི་བསམ་པས་མ་ཡིན་པ་སྟེ། འོད་སྲུང་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། སྦྱིན་གནས་བླ་མས་བསྒོམ་བཞིན་མི་བྱེད་དང་། །གཞན་དག་ལ་ཡང་ཐེ་ཚོམ་ཉེར་སྒྲུབ་དང་། །སེམས་ཅན་གང་དག་བྱང་ཆུབ་རབ་ཞུགས་པ། །དེ་ལ་བསྔགས་མིན་མི་སྙན་སྨྲ་བ་དང་། །སྒྱུ་དང་གཡོ་དང་རྒྱན་ལ་འདོར་བྱེད་པས། །གཞན་ལ་བསྟེན་གྱི་བསམ་པས་མ་ཡིན་པ། །ཆོས་བཞི་འདི་དག་ཀུན་ཏུ་བསྟེན་བྱས་ནས། །སངས་རྒྱས་བྱང་ཆུབ་སེམས་མཆོག་ཉམས་པར་འགྱུར། །ཞེས་གསུངས་པ་ལྟར། མཆོད་འོས་ཀྱི་བླ་མ་སློབ་དཔོན་སླུ་བ་དང་། གཞན་འགྱོད་པའི་གནས་མ་ཡིན་པ་ལ་འགྱོད་པ་སྐྱེད་པ་དང་། ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་ལ་ཡིད་སྡང་བས་སྐུར་འདེབས་སྐྱོན་ངན་བརྗོད་པ་དང་། སེམས་ཅན་ལ་གཡོ་སྒྱུའི་སྤྱོད་པ་སྣ་ཚོགས་སྟོན་པ་སྟེ་ནག་པོའི་ཆོས་བཞི་དང་། སྡོམ་པ་ཉི་ཤུ་བ་ལས། ཉོན་མོངས་དྲག་ལས་བྱུང་བ་ཡི། །སྡོམ་པར་ཞིག་པར་གང་གྱུར་པ། །དེ་ཡི་ཉེས་པ་བཞི་བོ་ནི། །ཕམ་པ་འདྲ་བར་དགོངས་པ་ཡིན། །རྙེད་དང་བཀུར་བསྟིར་ཆགས་པ་དང་། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོས་པས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་གསུངས་པ་ལྟར། རྙེད་པ་དང་བཀུར་སྟིར་ཆགས་ནས་བདག་བསྟོད་གཞན་ལ་སྨོད་པ་དང་། སེམས་ཅན་སྡུག་བསྔལ་ཞིང་དབུལ་བ་མགོན་མེད་པར་གྱུར་པ་ལ་སེར་སྣས་ཆོས་དང་ནོར་གང་ཡང་མི་སྟེར་བ་དང་། གཞན་གྱིས་ཉེས་པ་ཤད་སྦྱངས་ཀྱིས་ཚུར་ལ་བཤགས་ཀྱང་མི་ཉན་པར་ཁྲོས་པས་གཞན་ལ་འཚོག་པའམ་རྡེག་པ་དང་། ཐེག་པ་ཆེན་པོའི་ཆོས་མི་ལེགས་ཞེས་སྤོང་བར་བྱེད་ཅིང་གཞན་གྱི་གཡམ་ལ་རྒྱུག་སྟེ་དམ་ཆོས་འདྲར་སྣང་བའི་ཆོས་མིན་གཞན་ལ་སྟོན་པ་སྟེ། རྒྱལ་བས་ཐེག་ཆེན་གྱི་མདོ་སྡེ་དུ་མར་གསུངས་པའི་འཇུག་པ་བྱང་ཆུབ་ཀྱི་སེམས་གཏོང་བྱེད་ཀྱི་རྩ་བའི་ལྟུང་བ་བཞི་དང་། དེ་སོ་སོར་ཕྱེ་ན་བདག་བསྟོད་དང་གཞན་སྨོད་གཉིས་དང་། ཆོས་མི་སྟེར་བ་དང་ནོར་མི་སྟེར་བ་གཉིས་དང་། ཤད་སྦྱངས་ལ་མི་ཉན་པ་དང་གཞན་ལ་འཚོག་པ་གཉིས་དང་། ཐེག་པ་ཆེན་པོའི་ཆོས་སྤོང་བ་དང་ཆོས་འདྲར་སྣང་བ་སྟོན་པ་གཉིས་ཏེ་རྩ་བ་བརྒྱད་དུ་གྱུར་པ་རྣམས་དང་། གཞན་ཡང་བསླབ་པར་བྱ་བའི་བྱང་སེམས་ཀྱི་ཚུལ་ཁྲིམས་གསུམ་གྱི་ཕྱོགས་སུ་གཏོགས་པ་ཅི་མཆིས་པ་བཅས་རྒྱུ་མཚན་ཉིད་ཐེག་པ་ཆེ་ཆུང་གི་བསྟ༷ན་པ༷་རྒྱ༷་མ༷ཚོ་ལྟ་བུ་སོ༷་སོ༷འི་ལུགས་ཀྱི་དགག་སྒྲུབ་ཀྱི་འདུལ༷་ཁྲིམ༷ས་རྣམས་ད༷ང་འགལ་བ་བཤགས་པར་བྱ་ཞིང་བླང་དོར་ཚུལ་བཞིན་དུ་བྱའོ།། གཞན་ཡང་གསང་བ་སྔགས་ཀྱི་གཞུང་རྒྱུད་སྡེ་བཞི་སོ་སོ་ནས་བསླབ་པའི་གནས་དུ་བསྟན་པའི་སྐུ༷་དང་། གསུང༷་དང་། ཐུག༷ས་ཀྱི་དམ་ཚིག་དང༷་། ཁྱད་པར་དུ་ཟུང་འཇུག་རབ་ཏུ་མི་གནས་པའི་ཆོས་སྐུ་བདེ་སྟོང་མཉ༷མ་པ་ཉིད་ལ་མངོན་པར་སྦྱོར༷་བར་བྱེད་པའི་སྡོམ་པ་སྟེ་སྡོམ༷་པའི༷་མཆོ༷ག་ཏུ་གྱུར་པ་དེ་དང་། ཉམས་ན་འབྲས་བུ་ལྕི་བ་མི་བཟད་པ་འབྱིན་པར་བྱེད་པའི་འད༷འ་ཀ༷་སྟེ་འདའ་བར་དཀའ་བའི་གསང་སྔགས་རྡོ༷་རྗེ༷་ཐེག་པའི་དམ༷་ཚིག༷་དེ་ཉིད་བླ་མ་དང་དཀྱིལ་འཁོར་གྱི་གཙོ་བོས་སྒྲུབ་པ་པོའི་རྒྱུད་ལ་དུས་གཏ༷ན་གྱི༷་ཡུན་དུ་སྲུང་དགོས་པར་གཉེར༷་གཏད་པ་གང་ཡིན་པ་དེ་དག་བསྲུང་བར་ཁས་བླངས་པ་ལས་ཉམས་པ་རྣམས་ངག་གིས་མི་འཆབ་པར་མཐོལ་ཞིང་སེམས་ཀྱི་གནོང་འགྱོད་དྲག་པོས་སླད་མར་མི་བྱེད་པར་སྡོམ་འདོད་དང་བཅས་པས་བཤགས་པར་བྱ་ཞེས་པའོ།།

གཉིས་པ་སྔགས་ཀྱི་རྩ་བ་དང་ཡན་ལག་གི་དམ་ཚིག་གི་བཤགས་པ་བྱེ་བྲག་ཏུ་བསྟན་པ་ནི། སྤྱི་དང་ཁྱད་པར་ལྷག་པའི་དམ་ཚིག་རྣམས༔ སྔ་ཕྱི་མནོས་ཤིང་གཉེར་དུ་སྨྲས་སོ་འཚལ༔ ཡུན་དུ་མི་གཏོང་འདའ་བར་མ་བགྱིད་ཅིང་༔ དོན་ལ་གོལ་ཞིང་ལྡོག་སེམས་མ་མཆིས་ཀྱང་༔ གཟོད་བྱ་ལོང་ཡོད་སྙམ་པའི་ལེ་ལོ་ཡིས༔ ཀློང་དུ་མ་གྱུར་རྩལ་ཤུགས་ཆུང་བ་དང་༔ ཤེས་བཞིན་མི་ལྡན་བག་མེད་དབང་གྱུར་ཏེ༔ སྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས༔ རྩ་བ་སྐུ་གསུང་ཐུགས་ཀྱི་དམ་ཚིག་ལ༔ ཚོར་དང་མ་ཚོར་མ་རིག་དབང་གིས་ནི༔ སྟོན་པའི་བཀའ་དང་དམ་ལས་འགལ་གྱུར་ཏེ༔ རྣལ་འབྱོར་གང་ཞིག་དམ་ཚིག་ཉམས་པ་དང་༔ སྐད་ཅིག་ཙམ་ཡང་འཕྲད་སྨྲ་མི་བྱ་ཞིང་༔ ལུང་བ་གཅིག་གི་ཆུ་ལ་མི་འཐུང་ཞེས༔ བཀའ་ལས་བྱུང་བ་དེ་ལྟར་མ་ལྕོགས་ཏེ༔ གསང་སྒོ་འཆོལ་བས་དབྱེ་བསལ་དཀའ་བ་དང་༔ མངོན་ཤེས་ཆུང་བས་སྐྱོན་ཅན་མ་རྟོགས་ཏེ༔ ཉམས་དང་ཚོགས་འདྲེས་ཉམས་པ་བསྐང་ལ་སོགས༔ ཉམས་དང་སྣོད་མིན་རྣམས་ལ་ཆོས་བཤད་དང་༔ ཉམས་ལ་མི་འཛེམས་ཉམས་པའི་སྐྱོན་ལ་སོགས༔ ཉམས་དང་འགྲོགས་ཤིང་ཉམས་པ་དེ་དག་གི༔ ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། ཚེ་འདིའི་རྐྱེན་དང་ཕྱི་མའི་སྒྲིབ་གྱུར་རྣམས༔ རང་གནོང་འགྱོད་པའི་སེམས་ཀྱིས་མཐོལ་བཤགས་ན༔ འཕགས་པའི་བཀའ་ཆད་བདག་ལ་མི་གཏོང་ཞིང་༔ བྱམས་པའི་ཐུགས་རྗེས་བདག་ལ་དགོངས་ནས་ཀྱང་༔ གཉིས་མེད་དབྱིངས་སུ་མི་འགྱུར་བདག་བཀོད་དེ༔ མི་དམིགས་བཏང་སྙོམས་ངང་དུ་བཞུགས་ནས་ཀྱང་༔ གཉིས་མེད་དོན་གྱི་ཚངས་པ་བསྩལ་དུ་གསོལ༔ ཞེས་པའི་ཤོ་ལོ་ཀ་བདུན་དང་རྐང་པ་གཅིག་གིས་བསྟན་ཏོ།།

དེ་ཡང་རྡོ་རྗེ་གུར་གྱི་རྒྱུད་ལས། སློབ་དཔོན་སྨད་པར་མི་བྱ་སྟེ། །བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པ་མི་བྱ་ཞིང་། །སེམས་ཅན་རྣམས་ལ་གདུག་བྱམས་དང་། །བྱང་ཆུབ་སེམས་ནི་སྤང་མི་བྱ། །བདག་གཞན་ཆོས་ལ་སྨད་མི་བྱ། །སྐལ་མེད་དེ་ཉིད་གཏམ་མི་བྱ། །སྐལ་ལྡན་སེམས་ཅན་སྨད་མི་བྱ། །བདག་གི་ལུས་ལའང་སྨད་མི་བྱ། །ཆོས་ལ་ཡིད་གཉིས་མི་བྱ་ཞིང་། །གདུག་ལ་བྱམས་པ་ཉིད་མི་བྱ། །ཆོས་ཉིད་ཚད་ནི་བཟུང་མི་བྱ། །དམ་ཚིག་རྟག་ཏུ་སྐྱང་བ་དང་། །གཞན་གྱི་ཆོས་ལ་སྨད་མི་བྱ། །བུད་མེད་ཉིད་ལའང་སྨད་མི་བྱ། །རྩ་བའི་ལྟུང་བ་རབ་ཏུ་སྤང་། །ཞེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། ཐུན་མོང་མ་ཡིན་ཕས་ཕམ་པ། །བཅུ་བཞིར་གྲགས་པ་གང་འདི་ནི། །སྔགས་པས་དོན་ཀུན་འགྲུབ་བྱེད་པས། །སྤང་ཞིང་འདོར་བར་མི་བྱའོ། །སློབ་དཔོན་སྙིང་ནས་སྨོད་པ་དང་། །བདེ་གཤེགས་བཀའ་ལས་འདའ་བྱེད་དང་། །ཞེ་སྡང་གིས་ནི་མཆེད་སུན་འབྱིན། །བྱམས་སེམས་མེད་པར་སེམས་ཅན་སྤངས། །བྱང་ཆུབ་སེམས་ཆེན་འདོར་བ་དང་། །བདག་གཞན་གྲུབ་པའི་མཐའ་སྨོད་བྱེད། །སྣོད་མི་རུང་ལ་གསང་བ་བསྟན། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་སོམ་ཉི་བྱེད། །གསུམ་ལྡན་ཁྲོ་ལ་བྱམས་ལྡན་ཏེ། །སྟོང་པ་ཐལ་བྱུང་ལ་རྟོག་པ། །དད་ལྡན་སེམས་ནི་སུན་འབྱིན་བྱེད། །དམ་ཚིག་དང་ལྡན་རྩེ་མི་བྱེད། །ཤེས་ལྡན་བུད་མེད་སྨོད་པར་བྱེད། །སྔགས་པས་དེ་དག་ཡོངས་སྤངས་ནས། །ངེས་པར་དངོས་གྲུབ་ཐོབ་པར་བྱེད། །ཅེས་དང་། གཤིན་རྗེ་གཤེད་ནག་པོའི་རྒྱུད་ལས། སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་འདའ་མི་བྱ། །དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་གཞན་ཆོས་ལ་སྨད་མི་བྱ། །སེམས་ཅན་ལ་ནི་བྱམས་པ་དག །ནམ་ཡང་གཏང་བར་མི་བྱའོ། །ཡོངས་སུ་མ་སྨིན་སེམས་ཅན་ལ། །གསང་བ་དག་ནི་བསྟན་མི་བྱ། །བདག་སོགས་ཕུང་པོ་བརྙས་མི་བྱ། །གྲོང་པའི་ཆོས་ནི་སུན་མི་གདོན། །གདུག་ལ་བྱམས་པ་རྟག་ཏུ་སྤང་། །ཆོས་ལ་ཚད་གཞལ་བར་མི་བྱ། །སེམས་ཅན་དད་པ་ཅན་མི་བསླུ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པ་ཉེས་པ་དེ་བཞིན་ནོ། །ཞེས་གསུངས་པ་ལྟར། བླ་མ་རྡོ་རྗེ་སློབ་དཔོན་ལ་སྨོད་པ་དང་། བདེ་བར་གཤེགས་པའི་བཀའ་ལས་འདས་པ་དང་། རྡོ་རྗེའི་སྤུན་མཆེད་ལ་ཁྲོས་པས་སྨོད་པ་དང་། སེམས་ཅན་རྣམས་ལ་གདུག་པའི་སེམས་སྐྱེད་དེ་བྱམས་པ་སྤོང་བ་དང་། བྱང་ཆུབ་ཀྱི་སེམས་འདོར་བ་དང་། བདག་ནང་པ་དང་གཞན་ཕྱི་རོལ་བ་སྟེ་རང་གཞན་གྱི་གྲུབ་མཐའི་ཆོས་ལ་སྨད་པ་དང་། རྒྱུད་ཡོངས་སུ་མ་སྨིན་པའི་གསང་སྔགས་ཀྱི་སྣོད་ཀྱི་སྐལ་བ་མེད་པ་རྣམས་ལ་དེ་བཞིན་ཉིད་སོགས་གསང་བ་ཟབ་མོའི་གཏམ་སྒྲོག་པ་དང་། སེམས་ཅན་རྣམས་དང་བདག་ཉིད་ཀྱི་ལུས་ནི་ཕུང་ལྔ་རྒྱལ་བ་རིགས་ལྔ་དང་འབྱུང་ལྔ་ཡུམ་ལྔའི་རང་བཞིན་ལ་སོགས་པ་ཡིན་པས་དེ་ལ་སྨོད་མི་རུང་ནའང་སྨད་པ་དང་། ཆོས་རྣམས་ཀྱི་རང་བཞིན་ཆོས་ཉིད་དག་མཉམ་ཆེན་པོའི་དོན་ལ་དེ་ལྟར་གནས་མིན་ཡིད་གཉིས་ཟ་བ་དང་། བསྒྲལ་བའི་ཞིང་བཅུ་གང་ཡང་རུང་བ་ཚང་བའི་དགྲ་བགེགས་གདུག་པ་ཅན་མི་བསྒྲལ་བར་དེ་ལ་བྱམས་པར་བྱེད་པ་དང་། མིང་དང་མཚན་མ་བྲལ་བའི་ཆོས་ཉིད་ཀྱི་ཚད་ནི་སྤྲོས་པས་བཟུང་དུ་མེད་ནའང་འདིའོ་དེའོ་ཞེས་རྟོག་པས་མིང་མཚན་ཅན་དུ་ཚད་གཞལ་བ་དང་། སེམས་ཅན་དད་པ་དང་ལྡན་པ་ལ་སེམས་སུན་མི་འབྱིན་པའི་དམ་ཚིག་གིས་སེམས་རྟག་ཏུ་སྐྱོང་དགོས་པ་ལ་མ་སྐྱོང་བ་དང་། གསང་སྔགས་ཀྱི་ལྟ་སྒོམ་ལམ་འབྲས་ལས་གཞན་གྱི་ཆོས་དམ་ཚིག་གི་རྫས་སོགས་ལ་སྨད་དེ་ཇི་བཞིན་མི་བསྟེན་པ་དང་། གསང་སྔགས་ཕོ་ཉའི་ལམ་གྱི་ཉེར་རྒྱུ་ཁྱད་པར་བ་ཤེས་རབ་སྟོང་པ་ཉིད་མཚོན་པའི་རང་བཞིན་བུད་མེད་ཀྱི་རིགས་ཉིད་ལ་སྨད་པ་སྟེ། གསང་སྔགས་སྤྱིའི་རྩ་བའི་ལྟུང་བ་བཅུ་བཞི་པོ་མི་ཉམས་པར་བསྲུང་ཞིང་ཉམས་པ་བཤགས་པར་བྱའོ།།

གཞན་ཡང་། རྡོ་རྗེ་སྙིང་པོ་རྒྱན་གྱི་རྒྱུད་ལས། སྦོོམ་པོ་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །དམ་ཚིག་མི་ལྡན་རིག་མར་བསྟེན། །ཚོགས་ཀྱི་འཁོར་ལོར་རྩོད་པར་བྱེད། །གསང་བའི་ཆོས་ནི་སྟོན་པ་དང་། །དད་ལྡན་རྣམས་ལ་གཞན་དུ་སྟོན། །ཉན་ཐོས་ནང་དུ་ཡུན་རིང་གནས། །སྣོད་མི་རུང་ལ་གསང་བ་བསྟན། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དེ་ཡི་སྡོམ་པ་ཟད། །ཅེས་གསུངས་པ་ལྟར། སྔགས་ཀྱི་དམ་ཚིག་མི་ལྡན་བཞིན་དུ་རིག་མ་ལེན་པ་དང་། དེ་བཞིན་དུ་སྔགས་ཀྱི་དམ་ཚིག་མི་ལྡན་བཞིན་དུ་རིག་མའི་མཁའི་བདུད་རྩི་བསྟེན་པ་དང་། རྡོ་རྗེའི་མཆེད་ལྕམ་གྱིས་ཚོགས་འཁོར་ལ་རོལ་བའི་དུས་སུ་རྩོད་པ་བྱེད་པ་དང་། གསང་བ་ཟབ་མོའི་ཆོས་གཞན་ལ་སྟོན་པ་དང་། དད་པ་ལྡན་པའི་གསང་སྔགས་ཀྱི་སྣོད་རུང་ལ་ཆོས་དེ་མི་སྟོན་པར་ཆོས་གཞན་པ་སྟོན་པ་དང་། ཉན་ཐོས་ཀྱི་ནང་དུ་ཞག་བདུན་ལས་ལྷག་པར་སྡོད་པ་དང་། སྔགས་ཀྱི་དམ་ཚིག་མི་ལྡན་བཞིན་དུ་སྔགས་ཀྱི་རྣལ་འབྱོར་བར་རློམ་པ་དང་། སྔགས་ཀྱི་སྣོད་དུ་མི་རུང་བ་ལ་གསང་སྔགས་ཀྱི་ཆོས་སྟོན་པ་དང་བརྒྱད་དེ་གསང་སྔགས་ཀྱི་སྦོམ་པོའི་ལྟུང་བ་རྣམ་པ་བརྒྱད་མི་ཉམས་པར་བསྲུང་ཞིང་ཉམས་པ་བཤགས་པར་བྱའོ།།

གཞན་ཡང་། དུས་འཁོར་བསྡུས་རྒྱུད་ལས། འཚེ་དང་མི་བདེན་གཞན་གྱི་བུད་མེད་སྤང་བྱ་གཞན་གྱི་ནོར་དང་ཆང་གི་བཏུང་བ་དེ་བཞིན་ཉིད། །ཅེས་དང་། ཆོ་ལོ་ཁ་ན་མ་ཐོ་བཅས་པའི་ཟས་དང་ཚིག་ངན་ཀློག་དང་འབྱུང་པོ་ལྷ་མིན་དབང་པོའི་ཆོས། །བ་ལང་བྱིས་པ་བུད་མེད་སྐྱེས་པ་རྣམས་དང་ལྷ་མིའི་བླ་མ་གསོད་པ་ལྔ་ནི་མི་བྱའོ། །གྲོགས་པོ་རྗེ་བོ་རྣམས་དང་ལྷ་དང་མི་ཡི་བླ་མ་དགེ་འདུན་ཡིད་བརྟན་རྣམས་ལ་འཁུ་བ་དང་། །དབང་པོ་རྣམས་ནི་ཆགས་པ་དག་དང་དེ་ལྟར་སྲིད་པའི་བདག་པོ་དག་གི་བརྟུལ་ཞུགས་ཉི་ཤུ་ལྔ། །ཞེས་གསུངས་པ་ལྟར། འཚེ་བས་གཞན་སྲོག་གཅོད་པ་དང་། མི་བདེན་པ་རྫུན་སྨྲ་བ་དང་། གཞན་གྱི་བུད་མེད་འཕྲོག་པ་སོགས་ལོག་པར་གཡེམ་པ་དང་། གཞན་གྱི་ནོར་རྐུ་བ་དང་། ཆང་འཐུང་བ་སྟེ་སྡིག་པ་ལྔ་དང་། ཤོ་དང་མིག་མང་སོགས་ཆོ་ལོ་འགྱེད་པ་དང་། ཁ་ན་མ་ཐོ་བ་སྡིག་པའི་ཁ་ཟས་བསྟེན་པ་དང་། ཚོང་དང་དམག་འཁྲུག་གི་གཏམ་ངག་འཁྱལ་སོགས་ཚིག་ངན་ཀློག་པ་དང་། མཚུན་ལྷ་མཆོད་ཅིང་ཕྱུགས་ཀྱི་མཆོད་སྦྱིན་བྱེད་པའི་འབྱུང་བོའི་ཆོས་སློབ་པ་དང་། རང་གིས་བསད་པའི་ཤ་མ་གཏོགས་མི་ཟ་ཞིང་གོས་དཀར་པོ་འབའ་ཞིག་དང་བྱ་གག་གི་བཏུང་བ་བསྟེན་པའིི་ལྷ་མིན་དབང་པོའི་ཆོས་སློབ་པ་སྟེ་ཉེ་བའི་སྡིག་པ་ལྔ་དང་། མཐོ་རིས་ཐོབ་པའི་ཆེད་དུ་བ་ལང་གསོད་པ་དང་། མ་མོ་མཆོད་ཕྱིར་དུ་བྱིས་པ་གསོད་པ་དང་། བུད་མེད་ཀྱི་མཆོད་སྦྱིན་ལ་བུད་མེད་གསོད་པ་དང་། སྐྱེས་པའི་མཆོད་སྦྱིན་ལ་སྐྱེས་པ་གསོད་པ་དང་། སངས་རྒྱས་ཀྱི་སྐུ་དང་། གླེགས་བམ་དང་། མཆོད་རྟེན་བཤིགས་པ་སྟེ་ལྷ་མིའི་བླ་མ་གསོད་པའི་བརྟུལ་ཞུགས་ལ་གནས་པ་སྟེ་གསོད་པ་ལྔ་དང་། ཆོས་འཇིག་རྟེན་གྱི་ལུགས་གཉིས་ཀྱི་ཡིད་མཛའ་བའི་གྲོགས་པོ་དང་། ལུགས་གཉིས་ཀྱིས་བཀུར་འོས་པའི་རྗེ་བོ་རྒན་རབས་དང་། ལྷ་མིའི་བླ་མ་སངས་རྒྱས་དང་། དགེ་སློང་གི་དགེ་འདུན་པ་དང་། ཡིད་རྟོན་པར་འོས་པའི་རང་གི་མཁན་སློབ་བླ་མ་རྣམས་ལ་ཁོང་ཁྲོས་གཙེས་པ་སྟེ་འཁུ་བ་ལྔ་དང་། མིག་རྣ་བ་སྣ་ལྕེ་ལུས་ཀྱི་དབང་པོ་ལྔ་གཟུགས་སྒྲ་དྲི་རོ་རེག་བྱ་སྟེ་འདོད་པ་ལྔ་ལ་ཆགས་པ་ལྔ་སྤོང་བ་སྟེ་བླ་མེད་ཀྱི་བརྟུལ་ཞུགས་ཉི་ཤུ་རྩ་ལྔ་མི་ཉམས་པར་བསྲུང་ཞིང་ཉམས་པ་བཤགས་པར་བྱའོ།།

དེ་བཞིན་དུ་ཡེ་ཤེས་རྔམ་པ་གློག་གི་འཁོར་ལོའི་རྒྱུད་ལས། ཡན་ལག་དམ་ཚིག་མི་སྤང་དང་། །མི་འདོར་སྤྱོད་དང་ཤེས་པ་དང་། །སྒྲུབ་པ་ཡིན་ཏེ་རྣམ་ལྔ་པོ། །ཞེས་གསུངས་པ་ལྟར། མི་སྤང་ལྔ་དང་། བླང་བྱ་ལྔ་དང་། སྤྱད་བྱ་ལྔ་དང་། ཤེས་བྱ་ལྔ་དང་། སྒྲུབ་བྱ་ལྔ་སྟེ་ཡན་ལག་གི་དམ་ཚིག་ཉེར་ལྔ་སྟེ། དེ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་སྟེ་ཉོན་མོངས་དུག་ལྔ་མི་སྤོང་བར་རྒྱལ་བ་རིགས་ལྔའི་ཡེ་ཤེས་ཀྱི་ངོ་བོར་ཤེས་ཤིང་དག་པའི་ལམ་ཁྱེར་ནི་མི་སྤོང་བ་ལྔ་ཡིན་ཏེ། དེ་ཉིད་ལས། མི་སྤང་དམ་ཚིག་ཞེས་བྱ་བ། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ལྔ་རྣམས་ནི། །རིགས་ལྔའི་སངས་རྒྱས་ངོ་བོ་སྟེ། །ཡེ་ཤེས་ལྔ་ཡི་རང་བཞིན་པས། །སྤངས་ན་རྣལ་འབྱོར་དོན་དང་འགལ། །ཞེས་གསུངས་པའི་ཕྱིར་རོ།།

དེ་བཞིན་དུ་བླང་བྱ་ལྔ་ནི། ཤ་ལྔ་བདུད་རྩི་ལྔ་དང་དུ་བླང་བའམ། དྲི་ཆེན་དང་། དྲི་ཆུ་དང་། རཀྟ་དང་། མང་ས་དང་། བྱང་སེམས་ལྔ་བཟའ་བྱར་དང་དུ་བླང་བ་ལ་བྱ་སྟེ། དེ་ཉིད་ལས། དྲི་ཆེན་དྲི་ཆུ་ རཀྟ་དང་། །མང་ས་དང་ནི་ཟིལ་བ་ལྔ། འབྲས་བུ་ལྔ་ཡིས་བསྡུས་པ་རྣམས། །རྣལ་འབྱོར་པས་ནི་རྟག་ཏུ་བཟའ། །འདི་ཡང་དམ་ཚིག་རྨད་པོ་ཆེ། །ཞེས་གསུངས་པའི་ཕྱིར་རོ།།

སྤྱད་བྱ་ལྔ་ནི། མི་ཚངས་པ་སྤྱོད་པ་དང་། སྲོག་གཅོད་པ་དང་། མ་བྱིན་པ་ལེན་པ་དང་། རྫུན་སྨྲ་བ་དང་། ཚིག་རྩུབ་པོ་སྨྲ་བ་ལྔ་སྔགས་ཀྱི་ལྟ་བས་ཟིན་པས་སྤྱད་པ་ལ་བྱ་སྟེ། ཡང་ཡེ་ཤེས་རྔམ་གློག་ལས། སྤྱད་པར་བྱ་བའི་དམ་ཚིག་ནི། །སྦྱོར་དང་སྒྲོལ་དང་མ་བྱིན་ལེན། །རྫུན་དང་ངག་རྩུབ་སྨྲ་དང་ལྔ། །དོན་དམ་སྐྱེས་བུས་ཤེས་པར་བྱ། །ཞེས་གསུངས་པའི་ཕྱིར་རོ།།

ཤེས་བྱ་ལྔ་ནི། ཕུང་པོ་ལྔ་རྒྱལ་བ་རིགས་ལྔའི་རང་བཞིན་དུ་ལྟ་བའམ། ཕུང་པོ་ལྔ་དང་། འབྱུང་བ་ལྔ་དང་། དབང་པོ་ལྔ་དང་། ཡུལ་ལྔ་དང་། ཁ་དོག་ལྔ་རིགས་ལྔ་ཡེ་ཤེས་ལྔའི་རང་བཞིན་དུ་ཤེས་པ་ལྔ་ཡིན་ཏེ། དེ་ཉིད་ལས། ཕུང་པོ་ལྔ་དང་འབྱུང་བ་ལྔ། །དབང་པོ་ཡུལ་ལྔ་ཁ་དོག་ལྔ། །རིགས་ལྔ་ཡེ་ཤེས་ལྔ་ཉིད་དུ། །དོན་ལྡན་སྐྱེས་བུས་ཤེས་པར་བྱ། །ཞེས་གསུངས་པའི་ཕྱིར་རོ།།

སྒྲུབ་བྱ་ལྔ་ནི། ཕུང་ལྔ་སངས་རྒྱས་རིགས་ལྔའི་ངོ་བོར་བསྒྲུབ་པར་བྱ་བ་ལྔ་ཡིན་ཏེ། ཡང་དེ་ཉིད་ལས། ལུང་དང་ལྡན་པའི་རྣལ་འབྱོར་པས། །གྲུབ་པར་བྱ་བའི་དོན་ཆེན་ཡང་། །སངས་རྒྱས་ལྔ་ལས་གཞན་མི་བསྒྲུབ། །གྲུབ་པར་བྱ་བའི་དམ་ཚིག་སྟེ། །ཞེས་གསུངས་པའི་ཕྱིར་རོ། །དེ་འདྲའི་ཡན་ལག་གི་དམ་ཚིག་ཉེར་ལྔ་ལས་ཉམས་པ་བཤགས་པར་བྱ་བའོ།།

དཔལ་ཡེ་ཤེས་ཕྲེང་བའི་རྒྱུད་ལས། སངས་རྒྱས་རིགས་དང་རྡོ་རྗེའི་རིགས། །རིན་ཆེན་རིགས་དང་པདྨའི་རིགས། །ལས་ཀྱི་རིགས་དང་སྤྱོད་པ་ལྔ། །ཀུན་ཏུ་བཟང་པོའི་སྤྱོད་པ་ཡིན། །སྡོོམ་པ་གསུམ་ལ་གནས་པ་དང་། །དཀོན་མཆོག་གསུམ་ནི་འཛིན་པ་དག །སངས་རྒྱས་ཀྱི་ནི་མཆོག་གི་སྤྱོད། །རྡོ་རྗེ་དྲིལ་བུ་ཕྱག་རྒྱ་འཛིན། །བླ་མ་འཛིན་པ་རྡོ་རྗེའི་སྤྱོད། །དམ་ཚིག་ཡིད་འོང་དུས་བཞི་རུ། །སྦྱིན་པ་རྣམ་བཞི་རིན་ཆེན་སྤྱོད། །ཐེག་པ་གསུམ་དང་དམ་ཆོས་འཛིན། །པདྨ་གར་གྱི་སྤྱོད་པ་ཡིན། །དམ་ཚིག་ཐམས་ཅད་ལྡན་པ་དང་། །མ་གྲོལ་ལ་སོགས་དགྲོལ་བ་ནི། །རྟ་ཡི་རྒྱལ་པོའི་སྤྱོད་པ་ཡིན། །ཞེས་དང་། རྡོ་རྗེ་མཁའ་འགྲོའི་རྒྱུད་ལས། སངས་རྒྱས་རྣལ་འབྱོར་སྐྱེད་སྡོམ་པ། སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་མཆོག་ཏུ་བཟུང་། །བསླབ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་བསྡུ་བ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་སོ་སོར་བརྟན་པོར་བཟུང་། །རྡོ་རྗེའི་རིགས་མཐོ་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་གཟུང་བགྱི་ཞིང་། །སློབ་དཔོན་དག་ཀྱང་བདག་གིས་བཟུང་། །རིན་ཆེན་རིགས་ཆེན་རྣལ་འབྱོར་གྱི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ནི་དུས་དྲུག་ཏུ། །སྦྱིན་པ་རྣམ་བཞི་བསྩལ་བར་བགྱི། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་ཆོས་ཡང་དག་གཟུང་བར་བགྱི། །ལས་ཀྱི་རིགས་མཆོག་ཆེན་པོོ་ལ། །མཆོད་པ་ཅི་ནུས་བགྱི་བ་དང་། །སྡོམ་པ་ཐམས་ཅད་ལྡན་པར་བགྱི། །བླ་ན་མེད་པའི་བྱང་ཆུབ་སེམས། །དམ་པ་དེ་ནི་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །སྡོམ་པ་མ་ལུས་བཟུང་བར་བགྱི། །ཞེས་གསུངས་པ་ལྟར་གྱི་དེ་བཞིན་གཤེགས་པ་སངས་རྒྱས་རིགས་ཀྱི་དམ་ཚིག་ལ་དཀོན་མཆོག་གསུམ་དང་། ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་བྱང་སེམས་ཀྱི་ཚུལ་ཁྲིམས་གསུམ་མི་གཏོང་བར་བརྟན་པོར་འཛིན་པ་དང་། རྡོ་རྗེའི་རིགས་ཀྱི་དམ་ཚིག་ལ་རྡོ་རྗེ་དྲིལ་བུ་རྟག་ཏུ་འཆང་ཞིང་སློབ་དཔོན་མི་གཏོང་བ་དང་། རིན་ཆེན་རིགས་ཀྱི་དམ་ཚིག་ལ་ཉིན་རེ་བཞིན་དུ་དུས་དྲུག་ཏུ་ཟིང་ཟིང་མི་འཇིགས་ཆོས་དང་བྱམས་པའི་སྦྱིན་པ་རྣམ་བཞི་རྟག་ཏུ་སྦྱིན་པ་དང་། པདྨའི་རིགས་ཀྱི་དམ་ཚིག་ལ་ཕྱི་ནང་གསང་བའི་ཐེག་པ་གསུམ་པོའི་དམ་ཆོས་མི་གཏོང་བར་འཛིན་པ་དང་། ལས་ཀྱི་རིགས་ཀྱི་དམ་ཚིག་ལ་མཆོད་པ་འབུལ་བ་ལ་ཅི་ནུས་སུ་འབད་ཅིང་སྡོམ་པ་ཐམས་ཅད་དང་བྱང་ཆུབ་ཀྱི་སེམས་མི་འདོར་བར་རྟག་ཏུ་བསྐྱེད་པ་སྟེ། རིགས་ལྔའི་དམ་ཚིག་རྣམས་སྲུང་ཞིང་ཉམས་ན་བཤགས་པར་བྱའོ།།

གཞན་ཡང་། དེ་བཞིན་དུ་གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཉིད་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆུ། །དག་པའི་སྣོད་བཅུད་མི་དོར་རོ། །ཡན་ལག་བཅུ་ཡི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །བསྲུང་ཞིང་བསྒྲུབ་པའི་དམ་ཚིག་ལྔ། །རྩ་བ་ཡིན་ཏེ་རིགས་མེད་འགྱུར། །མི་སྤང་མི་དོར་ལྔ་གཉིས་ནི། །ཡན་ལག་དམ་ཚིག་འདའ་དཀའོ། །ཞེས་གསུངས་པ་ལྟར་གྱི་རྩ་བ་ལྔ་དང་། ཡན་ལག་གི་དམ་ཚིག་བཅུ་རུ་གྲགས་པ་ལ་སོགས་པ་གསང་སྔགས་སྤྱི༷་ཡི་དམ་ཚིག་ས་མ་ཡ་འབུམ་སྡེེ་རྣམས་དང༷་ཉམས་པ་བཤགས་ལ་མ་ཉམས་པར་བསྲུང་བར་བྱའོ།།

དེ་བཞིན་དུ་ཡེ་ཤེས་རྔམ་གློག་ལས། གསང་སྔགས་རྒྱ་མཚོ་ཆེན་པོ་ཡི། །དམ་ཚིག་བསམ་ཡས་ཇི་སྙེད་པ། །རྩ་བ་ཡན་ལག་གཉིས་སུ་འདུ། །རྩ་བའི་དམ་ཚིག་གསུམ་ཡིན་ཏེ། །སྐུ་གསུང་ཐུགས་སུ་རྒྱལ་བས་གསུངས། །ཞེས་གསུངས་པ་ལྟར། རྩ་བ་སྐུ་གསུང་ཐུགས་ཀྱི་དམ་ཚིག་ནི། དང་པོ་སྐུ་ལ་ནི། དམ་ཚིག་རིན་པོ་ཆེ་རྣམ་པར་སྤུངས་པའི་རྒྱུད་ལས། སྐུ་ཡི་ཕྱི་ཡི་དམ་ཚིག་ལ། །རྣམ་པ་གསུམ་དུ་བརྟག་ཕྱེ་སྟེ། །མ་བྱིན་བླངས་པས་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །ཞེས་དང་། མི་ཚངས་སྤྱད་པ་ནང་ཡིན་ཏེ། །ཞེས་དང་། སྲོག་གཅོད་པ་ནི་གསང་བ་སྟེ། །ཞེས་གསུངས་པ་ལྟར། སྐུ་ཡི་ཕྱིའི་ཕྱིའི་དམ་ཚིག་མ་བྱིན་པ་ལེན་པ་སྤོང་བ་དང་། སྐུའི་ཕྱིའི་ནང་གི་དམ་ཚིག་འདོད་པས་ལོག་པར་མི་ཚངས་པ་སྤྱོད་པ་སྤོང་བ་དང་། སྐུའི་ཕྱིའི་གསང་བའི་དམ་ཚིག་སྲོག་གཅོད་པ་སྤོང་བ་སྟེ་སྐུའི་ཕྱིའི་དམ་ཚིག་གསུམ་མོ།།

དེ་བཞིན་དུ་གསེར་གྱི་ཁང་བུ་བརྩེགས་པའི་རྒྱུད་ལས། ནང་གི་ཕྱི་ནི་སྤུན་དང་ཡང་། །གང་གི་ཕ་དང་མ་ཉིད་དང་། །རང་གི་ལུས་ལ་མི་སྨད་དོ། །ནང་གི་ནང་ཉིད་སྤྱིར་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །སྨད་ཅིང་ཐོ་འཚམས་རྒྱན་སྨད་ན། །སངས་རྒྱས་ཀུན་གྱི་བརྒྱ་ཕྲག་བསླུས། །ནང་གི་གསང་བ་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨན་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱི་བཏབ་ན་ཡང་། །ཞེས་གསུངས་པ་ལྟར། སྐུའི་ནང་གི་ཕྱིའི་དམ་ཚིག་སྤུན་དང་ཕ་མ་དང་རང་ལུས་ལ་སྨོད་པ་སྤོང་བ་དང་། སྐུའི་ནང་གི་ནང་གི་དམ་ཚིག་མདོ་སོགས་ཀྱི་ཐེག་པ་ཆེ་ཆུང་གི་ཆོས་ལ་འཇུག་འདོད་པ་དང་། ཞུགས་པ་དང་། ཞུགས་ཟིན་པ་གསུམ་པོའི་གཟུགས་བརྙན་ཙམ་འཛིན་པ་ཡན་ཆད་ཀྱི་རྒྱན་ཆ་དང་བཅས་པར་སྨོད་པ་སྤོང་བ་དང་། སྐུ་ཡི་ནང་གི་གསང་བའི་དམ་ཚིག་རང་ལུས་རྒྱལ་བའི་དཀྱིལ་འཁོར་ལ་དུག་དང་ཟས་ངན་པ་དང་མཚོན་ལ་སོགས་པས་གཙེས་ཏེ་སྨོད་པ་སྤོང་བ་སྟེ་སྐུའི་ནང་གི་དམ་ཚིག་གསུམ་མོ།།

ཡང་གསེར་གྱི་ཁང་བུ་བརྩེགས་པའི་རྒྱུད་ལས། སྐུ་ཡི་གསང་བའི་ཕྱི་ལ་ཡང་། །རྡོ་རྗེའི་སྤུན་ནམ་སྲིང་མོ་ཡི། །ལུས་ཀྱི་རྒྱན་ལ་དཔྱས་པ་དང་། །ཐོ་འཚམས་ལག་གིས་རྡེག་པའི་ཚུལ། །གལ་ཏེ་གཞན་གྱིས་བྱེད་བཅུག་ན། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲིས་པའི་མཆེད། །ཀུ་རེ་རྩེ་མོའི་ཚུལ་ཙམ་དུའང་། །བརྡེགས་སམ་བརྡེག་པར་བརྩམས་པའམ། །རྨི་ལམ་ན་ཡང་ཡུམ་ལ་བརྩེས། །ཞེས་དང་། གསང་བའི་གསང་བ་བླ་མ་ཡི། །སྐུ་ཡི་གྲིབ་མ་མི་འགོང་ལ། །བླ་མའི་སྤྱན་ལམ་དག་ཏུ་ཡང་། །མཚོན་ཆ་གཟུང་བར་མི་བྱའོ། །རྐང་ལག་བརྐྱང་དང་ཉལ་མི་བྱ། །དཀྱིལ་དྲུང་འདུག་དང་རྒྱབ་མི་གཏད། །ལྷམ་དང་སྟན་དང་བཞོན་པ་དང་། །གདུགས་སོགས་སྒེག་པའི་རྒྱན་རྣམས་སྤང་། །བླ་མའི་གཟིམ་ཁང་དག་ལ་ཡང་། །ལག་པས་མཚོན་དང་རྡོ་དག་གིས། །བརྩམ་པར་བྱ་བ་མ་ཡིན་ནོ། །ཞེས་གསུངས་པ་ལྟར། སྐུའི་གསང་བའི་ཕྱིའི་དམ་ཚིག་རྡོ་རྗེའི་སྤུན་དང་དེའི་རྒྱན་ཡན་ཆད་འཕྱ་ཞིང་ཁྲོས་པས་རྡེག་པ་སྤོང་བ་དང་། སྐུའི་གསང་བའི་ནང་གི་དམ་ཚིག་ ཤིན་ཏུ་འདྲིས་པའི་ནང་གི་མཆེད་པོ་དང་རྡོ་རྗེའི་ཡུམ་ལ་ཀུ་རེའི་ཚུལ་དུ་རྡེག་པ་དང་རྡེག་པར་བརྩམ་པ་དང་ཐ་ན་རྨི་ལམ་ནའང་ཡུམ་ལ་བརྩེས་པ་སྤོང་བ་དང་། སྐུའི་གསང་བའི་གསང་བའི་དམ་ཚིག་བླ་མའི་གྲིབ་མ་ལ་འགོང་བ་དང་། མདུན་དུ་མཚོན་ཆ་ཐོགས་པ་དང་། ཉལ་ཞིང་རྐང་ལག་རྐྱོང་བ་ལ་སོགས་པ་ཐ་ན་བླ་མའི་གཟིམ་ཁང་སོགས་རྒྱན་དང་ཡོ་བྱད་ཡན་ཆད་བཤིག་གཏོར་སོགས་ཀྱིས་བླ་མ་ལ་མ་གུས་པའི་སྦྱོད་ལམ་སྣ་ཚོགས་བགྱིས་པ་སྤོང་བ་སྟེ་སྐུའི་གསང་བའི་གསང་བའི་དམ་ཚིག་གསུམ་སྟེ་སྐུ་ལ་ཕྱི་ནང་གསང་བ་དགུ་པོ་མ་ཉམས་པར་བསྲུང་བར་བྱ་ཞིང་ཉམས་ན་བཤགས་པར་བྱའོ།།

གཞན་ཡང་། དེ་བཞིན་དུ་གསུང་ལ་ཡང་། འཁོར་ལོ་བརྩེགས་པའི་རྒྱུད་ལས། སྔགས་ཀྱི་མོས་པ་སྤྱོད་པ་ཡིས། །འགྲོ་བ་ཕལ་པ་དག་ལ་ཡང་། །རྫུན་པའི་ཚིག་ནི་རང་འདོད་ཀྱིས། །སྨྲ་ལ་རྟག་ཏུ་དགའ་བ་ལ། །སྔགས་བཟླས་ནུས་པ་མི་འབྱུང་ཞིང་། །གཞན་ལ་སྨྲས་པའང་བཙུན་པ་མིན། །ཞེས་སོགས་གསུངས་པ་ལྟར། གསུང་གི་ཕྱིའི་ཕྱིའི་དམ་ཚིག་རྫུན་སྤོང་བ་དང་། ཡང་དེ་ཉིད་ལས། སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེ་འཇུག་ཕྲ་མ་སྨྲ། །ཞེས་གསུངས་པ་ལྟར། གསུང་གི་ཕྱིའི་ནང་གི་དམ་ཚིག་ཕྲ་མ་སྤོང་བ་དང་། ཡང་དེ་ཉིད་ལས། རྟག་ཏུ་ཞེ་གཅོད་ཚིག་སྨྲ་བ། །ཞེས་གསུང་གི་ཕྱིའི་གསང་བའི་དམ་ཚིག་གཞན་གྱི་ཞེ་གཅོད་པའི་ཚིག་རྩུབ་སྤོང་བ་སྟེ་གསུང་གི་ཕྱིའི་དམ་ཚིག་གསུམ་མོ།།

དམ་ཚིག་རྣམ་པར་བཀོད་པའི་རྒྱུད་ལས། སྔགས་པ་སྡོམ་ལ་གནས་པ་ཡིས། །ཆོས་སྨྲ་རྣམས་དང་ཆོས་སྒྲུབ་དང་། །ཆོས་ནི་སྒོམ་པའི་གང་ཟག་ལ། །སྨྲེ་ཞིང་སྐུར་བ་བཏབ་པ་དང་། །གཤེ་ཞིང་སྨད་པའི་ཚིག་སྨྲ་ན། །ཞེས་གསུངས་པ་ལྟར། གསུང་གི་ནང་གི་ཕྱིའི་དམ་ཚིག་ཆོས་སྨྲ་པ་རྣམས་ལ་གཤེ་ཞིང་སྐུར་འདེབས་དང་སྨད་པ་སྤོང་བ་དང་། གསུང་གི་ནང་གི་ནང་གི་དམ་ཚིག་ཆོས་སྒྲུབ་པའི་གང་ཟག་རྣམས་ལ་གཤེ་ཞིང་སྐུར་འདེབས་དང་སྨད་པ་སྤོང་བ་དང་། གསུང་གི་ནང་གི་གསང་བའི་དམ་ཚིག་ཆོས་སྒོམ་པའི་གང་ཟག་རྣམས་ལ་གཤེ་ཞིང་སྐུར་འདེབས་དང་སྨད་པ་སྤོང་བ་སྟེ་གསུང་གི་ནང་གི་དམ་ཚིག་གསུམ་མོ།།

དེ་བཞིན་དུ་ཕྱག་རྒྱ་གཉིས་སྦྱོར་གྱི་རྒྱུད་ལས། རྡོ་རྗེ་མཆེད་དང་ལྕམ་དྲལ་ལ། །ཚིག་གིས་སྨྲས་དང་ངག་བཅག་ན། །ཞེས་དང་། བླ་མའི་བུ་དང་ཆུང་མ་དང་། །གང་དག་ཉེ་གནས་དག་ཀྱང་རུང་། །བཀའ་ལས་འདས་ཤིང་དམ་འདས་ན། །སྔ་མ་ལས་ནི་ཉིས་འགྱུར་རོ། །ཡང་ན་བླ་མའི་བྱེ་བྲག་གིས། །རྩ་བ་དང་ནི་ཡན་ལག་གིས། །ངག་འདས་ངག་ཏུ་སྨྲས་པ་དང་། །སྒྲོ་སྐུར་འདོད་ཚིག་སྨྲ་བྱས་ན། །སྔ་མ་ལས་ནི་སྟོང་ཕྲག་འགྱུར། །ཞེས་ གསུངས་པ་ལྟར། གསུང་གི་གསང་བའི་ཕྱིའི་དམ་ཚིག་རྡོ་རྗེའི་མཆེད་ལྕམ་ལ་སྨོད་ཅིང་དེའི་བཀའ་བཅག་པ་དང་། གསུང་གི་གསང་བའི་ནང་གི་དམ་ཚིག་བླ་མའི་ཕྱག་རྒྱ་མོ་དང་ཉེ་འཁོར་ལ་སྨོད་ཅིང་དེ་དག་གི་བཀའ་བཅག་པ་དང་། གསུང་གི་གསང་བའི་གསང་བའི་དམ་ཚིག་བླ་མ་ཉིད་ལ་སྨོད་ཅིང་དེའི་བཀའ་བཅག་པ་སྟེ་གསུང་གི་ཕྱི་ནང་གསང་བ་དགུ་པོ་མི་ཉམས་པར་བླང་དོར་ཚུལ་བཞིན་དུ་བྱེད་པ་དང་། གལ་ཏེ་ཉམས་ན་བཤགས་པར་བྱའོ།།

ཡང་སྙིང་པོའི་དོན་རྣམ་པར་ལེན་པའི་རྒྱུད་ལས། གང་དག་སྔགས་པ་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །གནོད་པར་བྱ་བའི་སེམས་འཆང་ན། །ཞེས་དང་། གནམ་ལྕགས་མེ་འབར་བའི་རྒྱུད་ལས། གལ་ཏེ་སེམས་ཅན་ཕལ་བ་ལ། །ཡུལ་གྱུར་གནོད་པའི་སེམས་སྐྱེས་ན། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་བཅད་པས། །འདི་ནི་སྡིག་པའི་ཆ་དང་མཉམ། །གལ་ཏེ་བསྟན་པའི་རྟགས་འཛིན་པའི། །གཟུགས་ཅན་རྣམས་ལ་ལོག་འགྱུར་རོ། །སྔགས་ལ་ཞུགས་པས་ཕྲག་འགྱུར་རོ། །རྡོ་རྗེའི་སྤུན་སྲིང་བདུན་ཕྲག་གོོ །བརྒྱུད་པའི་བླ་མ་བརྒྱ་ཕྲག་གོ །རྩ་བའི་བླ་མ་དེ་ཡི་བརྒྱ། །ཞེས་དང་། བཀོད་པ་ཆེན་པོ་ལས། རང་དང་གཞན་གྱི་གབ་པ་ཡི། །ཆོས་ལ་སྨོད་པ་ལོག་པའི་ལམ། །རྩ་བའི་དམ་ཚིག་ལས་འདས་ནས། །ས་སྤྱོད་མེ་ཡི་སྡུག་བསྔལ་ལ། །ཡུན་རིང་བར་དུ་གནས་པའོ། །རང་གི་གྲུབ་མཐའ་ལོག་ལྟ་སྐྱེས། །ཞེས་གསུངས་པ་ལྟར། ཐུགས་ཀྱི་ཕྱིའི་ཕྱིའི་དམ་ཚིག་སེམས་ཅན་ལ་གནོད་སེམས་སྤོང་བ་དང་། ཐུགས་ཀྱི་ཕྱིའི་ནང་གི་དམ་ཚིག་བླ་མ་མཆེད་ལྕམ་ལ་གནོད་སེམས་སྤོང་བ་དང་། ཐུགས་ཀྱི་ཕྱིའི་གསང་བའི་དམ་ཚིག་རང་གཞན་གྱི་གྲུབ་མཐའ་ལ་ལོག་ལྟ་སྐྱེས་པ་སྤོང་བ་སྟེ་གསུམ་མོ།།

དེ་བཞིན་དུ་ཤེལ་གྱི་ཁང་བུ་བརྩེགས་པའི་རྒྱུད་ལས། ལྟ་བ་སྒོམ་དང་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །འདི་ཡི་སེམས་ལ་སྨིན་པར་ངེས། །ཞེས་གསུངས་པ་ལྟར། སྤྱོད་པ་ལ་ལོག་ལྟ་སྤོང་བ་ཐུགས་ཀྱི་ནང་གི་ཕྱིའི་དམ་ཚིག་དང་། སྒོམ་པ་ལ་ལོག་ལྟ་སྤོང་བ་ཐུགས་ཀྱི་ནང་གི་ནང་གི་དམ་ཚིག་དང་། ལྟ་བ་ལ་ལོག་ལྟ་སྤོང་བ་ཐུགས་ཀྱི་ནང་གི་གསང་བའི་དམ་ཚིག་སྟེ་ཐུགས་ཀྱི་དམ་ཚིག་སུམ་མོ།།

ཡང་པདྨ་ཀློང་གི་རྒྱུད་ལས། སུ་ཡི་ཡིད་ཀྱི་ལས་འཁྱལ་ཏེ། །ཡིད་ལ་བྱ་བའི་ཆོས་རྣམས་ལ། །ཡིད་ལ་མ་བྱས་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །ཞེས་དང་། ལྷན་ཅིག་སྐྱེས་པ་ཉེ་བར་ལེན་པའིི་རྒྱུད་ལས། དངོས་གྲུབ་མཆོག་ནི་འདོད་པ་ཡིས། །ཡི་དམ་སྤང་བར་མི་བྱ་ཞིང་། །བླ་མ་སྤང་ན་དངོས་གྲུབ་བརླག །ཅེས་གསུངས་པ་ལྟར། ཐུགས་ཀྱི་གསང་བའི་ཕྱིའི་དམ་ཚིག་ལྟ་སྒོམ་སྤྱོད་པ་གསུམ་ཀ་ཉམས་སུ་མ་བླང་ཞིང་ཡིད་ལ་མ་བྱས་པར་སྤོང་བ་དང་། ཐུགས་ཀྱི་གསང་བའི་ནང་གི་དམ་ཚིག་ཡི་དམ་གྱི་ལྷ་སྤོང་བར་མི་བྱ་བ་དང་། ཐུགས་ཀྱི་གསང་བའི་གསང་བའི་དམ་ཚིག་བླ་མ་རྡོ་རྗེ་སློབ་དཔོན་དང་མཆེད་ལྕམ་སྤོང་བར་མི་བྱ་བ་སྟེ་ཐུགས་ཀྱི་ཕྱི་ནང་གསང་བ་གསུམ་གྱི་དམ་ཚིག་དགུ་སྟེ། ཁྱད༷་པར༷་བ་སྐུ་གསུང་ཐུགས་ཀྱི་དམ་ཚིག་ཉི་ཤུ་རྩ་བདུན་པོ་རྣམས་མི་ཉམས་པར་བསྲུང་ཞིང་ཉམས་པ་བཤགས་པར་བྱའོ།།

གཞན་ཡང་། རྣལ་འབྱོར་གྲུབ་པའི་ལུང་ཀུན་འདུས་རིག་པའི་མདོ་ལས། མི་བཤིག་པ་ནི་སེང་གེ་སྟེ། །གཅན་གཟན་རྒྱལ་པོ་ཡིན་པས་སོ། །ཞེས་སྒྲུབ་པའི་རྡོ་རྗེ་སློབ་དཔོན་གྱི་སྐུ་ལ་མི་བསྡོ་ཞིང་བཀའ་མི་གཅོག་པ་དང་། ཡང་དེ་ཉིད་ལས། ཟ་མ་ཏོག་ནི་རྒྱལ་པོའི་མཛོད། །དུག་སྤྱོ་བ་ནི་དེར་མི་རིགས། །ཞེས་བླ་མའི་རིག་མ་ལ་འཁྲིག་པ་མི་སྤྱོད་པ་དང་། རིན་ཆེན་མྱུ་གུའི་ལྕུག་ཕྲན་དག །བྲེགས་ཏེ་འབྱུང་རྒྱུན་བཅད་མ་ཡིན། །ཞེས་དད་པ་ཅན་གྱི་ཚོགས་མི་གཅོག་པ་དང་། གངས་ཀྱི་ཞུན་ཆུ་ཕལ་བ་ཡང་། །མཁས་པས་བཏུང་བར་མི་བྱའོ། །ཞེས་དཀོན་མཆོག་དང་མཁས་པའི་དཀོར་དང་ཆང་གི་བཏུང་བ་མི་བསྟེན་པ་དང་། པདྨའི་ཟེ་འབྲུ་ཁ་མི་དབྱེ། །ཟླ་ཟེར་མ་ཡིན་དབྱེ་མི་བྱ། །ཞེས་རྡོ་རྗེ་སྤུན་མཆེད་ཀྱི་ཡུམ་ལ་མི་སྤྱོད་པ་དང་། མ་བརྟགས་བུག་རྡོལ་ཅན་སྣོད་དུ། །བདུད་རྩི་སྨན་བླུགས་ཟག་པར་འགྱུར། །ཞེས་མཚན་ཉིད་མི་ལྡན་པའི་རིག་མ་མི་བསྟེན་པར་རིག་མ་མཚན་ལྡན་བསྟེན་པ་དང་། དོན་མེད་བཅོས་མའི་ཚུལ་རྟགས་ཅན། །བསྲེལ་ཞིང་སྤྱད་པར་བྱ་བ་མིན། །ཞེས་མཚན་ཉིད་དང་མི་ལྡན་པའི་དམ་རྫས་མི་བསྟེན་པ་དང་། ཤེལ་དཀར་རིན་ཆེན་སྒོང་ང་དག །འདམ་ཁུང་རྫབ་ཏུ་བསྣུབ་མི་བྱ། །ཞེས་མཁས་པའི་ཡོན་ཏན་ལ་མི་སྨོད་པ་དང་། སེངྒེ་དཀར་མོའི་འོ་མ་དག །གསེར་སྣོད་མ་ཡིན་བླུགས་མི་བྱ། །ཞེས་སྣོད་མིན་ལ་གསང་སྔགས་ཀྱི་ཆོས་མི་བཤད་པ་དང་། ཡིད་བཞིན་ནོར་བུ་རིན་པོ་ཆེ། །བསྲེག་པར་བྱ་བ་ཡོད་མ་ཡིན། །ཞེས་མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤོང་བ་དང་། ཁྱུང་ཆེན་གཤོག་པ་མཁར་བརྐྱང་བ། །དེ་དག་གཅག་པར་བྱ་བ་མིན། །ཞེས་བདེ་སྟོང་གི་རྟོགས་པ་ཁྱད་པར་བ་དང་དེའི་རྒྱུ་དང་རྟགས་ཡབ་ཡུམ་མི་འབྲལ་བ་དང་། གནམ་ལྕགས་མེ་ཡི་ངུར་མོ་དག །བརྡབ་པར་བྱ་བ་མ་ཡིན་ནོ། །ཞེས་རྡོ་རྗེའི་མཆེད་ལྕམ་ལ་ཀྱལ་ཀ་ཙམ་གྱིས་ཀྱང་ནང་འཐབ་མི་བྱ་བ་དང་། སྟག་སེང་རོལ་པས་ལས་བྱས་པའི། །ལས་ཀྱི་རྗེས་ལ་བཟླས་མི་བྱ། །ཞེས་གཞན་གྱིས་སྤྱད་ཟིན་པའི་དམ་ཚིག་གི་རྫས་སོགས་ཀྱི་ལྷག་མ་ལ་མི་སྤྱོད་པ་དང་། རྡོ་རྗེ་བྲག་ཆེན་གཏམས་པའི་གཞི། །གཞིག་པར་བྱ་བ་ག་ལ་ཡིན། །ཞེས་བླ་མའི་གདན་ས་ལ་མི་རློམ་པ་དང་། རྡོ་རྗེ་ར་བའི་རེ་ཁ་དག །བསྡམ་བྱ་དྲལ་བར་བྱ་བ་མིན། །ཞེས་གསང་སྔགས་ཀྱི་སྒྲུབ་པ་ལ་གནས་པའི་གང་ཟག་རང་དང་གཞན་གྱི་མཚམས་མི་བཤིག་པ་དང་། བུད་ཤིང་སྲེག་པའི་སྒྲོན་མ་དེ། །འཐོར་རླུང་དྲག་པོས་བསྐྱོད་མི་བྱ། །ཞེས་ ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏོང་བ་དང་། རྡོ་རྗེ་ཚིག་གི་ཆུ་རྒྱུན་དག །འོལ་ཀར་གཅོད་པར་བྱ་བ་མིན། །ཞེས་བཟླས་པ་དང་ཆོ་གའི་ཚིག་ལ་མི་ཚིག་ངག་འཁྱལ་གྱིས་བར་མི་གཅོད་པ་དང་། རྒྱལ་པོ་བཀའ་རྟགས་ཕྱག་རྒྱ་དག །ནམ་ཞར་དབྱི་བར་མི་བྱའོ། །ཞེས་དབང་རྟགས་ཀྱི་ཕྱག་རྒྱ་ལས་མི་འདའ་ཞིང་དབང་གི་མིང་བརྡ་དག་མི་བརྗེད་པར་བྱ་བ་དང་། རྡོ་རྗེ་ཕ་ལམ་གཏམས་པའི་མཁར། །རྨང་ནས་བཟློག་པར་མི་བྱའོ། །ཞེས་རྣལ་འབྱོར་བའི་དཀྱིལ་འཁོར་མི་དཀྲུག་པ་དང་། གཙུག་གི་ནོར་བུ་འབར་བ་དེ། །རྒྱལ་མཚན་རྩེ་ལས་དཔོག་མི་བྱ། །ཞེས་སློབ་དཔོན་རྟག་ཏུ་གཙུག་ཏུ་བཀུར་བ་ལས་ཉམས་པར་མི་བྱ་བ་སྟེ་ལྡེམ་པོར་བརྗོད་པའི་ལྷག་པའི་དམ་ཚིག་ཉི་ཤུ་གསུངས་པ་རྣམས་དང་། གཞན་ཡང་། རྫོགས་པ་ཆེན་པོ་ཀུན་བྱེད་རྒྱལ་པོའི་རྒྱུད་ལས། ཕྱལ་བ་དང་ནི་མེད་པ་གཅིག་པུ་དང་། །ལྷུན་གྱིས་གྲུབ་པར་བསྲུང་བ་ཀུན་ལས་འདས། །ཀུན་བྱེད་རྒྱལ་པོའི་དམ་ཚིག་རྣམ་གྲངས་ཏེ། །ཞེས་མེད་པ་དང་། ཕྱལ་བ་དང་། གཅིག་པུ་དང་། ལྷུན་གྲུབ་སྟེ་རྫོགས་ཆེན་གྱི་སྲུང་དུ་མེད་པའི་ལྷ༷ག་པ༷འི་དམ༷་ཚིག༷་རྣམས་མི་ཉམས་པར་བསྲུང་ཞིང་ཉམས་པ་བཤགས་པར་བྱའོ།།

དེ་ལྟར་བསྲུང་བ་དང་ཉམས་ན་བཤགས་པར་བྱ་དགོས་པར་གསུངས་པའི་མཐའ་ཡས་པའི་དམ་ཚིག་ཇི་སྐད་བཀའ་བསྩལ་བ་རྣམ༷ས་དུས་སྔ༷་ཕྱི༷་ཀུན་ཏུ་གསང་བ་ཟབ་མོའི་དཀྱིལ་འཁོར་དུ་ཞུགས་ཤིང་དབང་སྐུར་ཐོབ་པའི་སྒོ་ནས་བསྲུང་བར་ཁས་བླངས་ཀྱིས་མནོས༷་ཤིང༷་། བླ་མ་རྡོ་རྗེ་སློབ་དཔོན་གྱིས་དམ་ཚིག་གི་རིམ་པ་རྣམས་ངེས་པར་དུ་བསྲུང་དགོས་པར་གཉེར༷་དུ༷་གཏད་ཅིང་། དམ་ཚིག་གི་རིམ་པ་འདི་དང་འདིའོ་ཞེས་གསལ་བར་ཞལ་ནས་སྨྲས༷་སོ༷་ཅོག་ཏུ་འཚ༷ལ་བའམ་མཆིས་པ་རྣམས་རང་ངོས་ནས་ཀྱང་སེམས་ལ་དུས་ཡུན༷་རིང་པོ་ཉིད་དུ༷་མི༷་གཏོང༷་བར་སྲུང་བ་དང་། སྲུང་བའི་བྱ་བ་ལས་འད༷འ་བ༷ར་མི༷་བགྱིད༷་ཅིང༷་། དོན༷་དམ་སྤྲོས་པ་མེད་པ་དམ་ཚིག་སྲུང་མཚམས་ལས་འདས་པའི་ཡིན་ལུགས་གཤིས་ཀྱི་ལྟ་བ་ལ༷་གནས་པར་བྱ་བ་ལས། དོན་དེ་ལས་གོལ༷་ཞིང༷་འཕྱུག་པ་དང་དམ་ཚིག་བསྲུང་བར་བྱ་བ་ལས་ལྡོ༷ག་པར་བྱའོ་སྙམ་པའི་སེམ༷ས་མ༷་མཆིས༷་ཀྱང༷་། བསྲུང་འདོད་དང་ཉམས་སུ་ལེན་འདོད་པ་ཅན་ཡིན་ནའང་། དུས་ད་གཟོད༷་དེ་ཕྱིས་སུའམ་རྗེས་ནས་ཉམས་སུ་ལེན་ཅིང་དམ་ཚིག་བསྲུང་བར་བྱ༷་བ་ལ་ནན་ཏན་དུ་འབད་དང་ཁོམ་ལོང༷་ཡོད༷་དོ་སྙམ༷་པ༷འི་ཕྱི་བཤོལ་གྱི་ལེ༷་ལོ༷་ངན་པ་ཡི༷་དབང་དུ་སོང་བ་དང་། དེ་ཡི་དབང་གིས་ནི་བརྗོད་མེད་རང་བྱུང་དོན་དམ་པ་དམ་ཚིག་སྲུང་མཚམས་འདས་པའི་ལྟ་བའི་རྟོགས་པ་ཀློང༷་དུ༷་མ༷་གྱུར༷་བའམ་དེ་འདྲའི་ལྟ་བའི་རྩལ༷་གྱི་ཤུག༷ས་ཆུང༷་བ༷་དང༷་། སྒོ་གསུམ་ལ་བརྟག་པའི་ཤེས༷་བཞིན༷་མི༷་ལྡ༷ན་ཞིང་ཉེས་སྤྱོད་ལ་གཟོབ་པ་ལྷུར་ལེན་པའི་བག་ཡོད་མེད་པར་སྒོ་གསུམ་བ༷ག་མེད༷་པའི་དབ༷ང་དུ་གྱུར༷་ཏེ༷། གནས་ལུགས་ཟབ་མོ་བསྒོམ༷་པ་ལ༷་འབད་པས་མི༷་བརྩོན༷་ཞིང་། ལྷག་པའི་ལྷ་རྒྱལ་བ་ཞི་ཁྲོའི་བསྙེན༷་སྒྲུབ༷་ལ་བརྩོན་པ་མེད་པར་དེ་ལས་གཡེལ༷་བ་དང་། ལྟ་བ་དང་དམ་ཚིག་བསྲུང་བའི་དྲན་པ་དང་། བརྩོན་འགྲུས་མི་ལྡན་པ་ལ༷་སོགས༷་པའི་དབང་གིས། རྩ༷་བ༷་སྐུ༷་དང་། གསུང༷་དང་། ཐུག༷ས་ཀྱི༷་དམ༷་ཚིག༷་སྟེ། རྩ་བའི་དམ་ཚིག་གསུམ་ཡིན་ཏེ། །སྐུ་གསུང་ཐུགས་སུ་རྒྱལ་བས་གསུངས། །ཞེས་གོང་དུ་ལུང་དྲངས་ཤིང་དམ་ཚིག་རྒྱས་པར་བཤད་ཟིན་པ་རྣམས་ལ༷་དེ་ལྟར་དམ་ཚིག་ཡིན་པར་ཤེེས་ཤིང་བསྲུང་དགོས་པ་དང་། མ་བསྲུང་ན་དམ་ལས་འདས་ཤིང་ཉེས་པ་ལྕི་བ་རྣམ་སྨིན་ཡིད་དུ་མི་འོང་བ་འབྱིན་བྱེད་ཡིན་པར་ཚོར༷་བ་སྟེ་ཤེས་ནའང་ཤེས་བཞིན་དུ་ཉེས་པ་བྱས་པ་དང༷་། བླང་དོར་ལ་བློ་རྨོངས་པའི་དབང་གིས་དེ་ལྟར་ཉེས་པ་ཡིན་པར་མ༷་ཚོར༷་བ་སྟེ་མ་ཤེས་པར་ཉེས་པར་སྤྱད་པ་དང་། ཉེས་པར་ཤེས་ནའང་བདག་འཛིན་མ༷་རིག༷་པ་སྟོབས་ཆེ་བའི་དབ༷ང་གིས༷་དེས་བསྐྱེད་པའི་ཉོན་མོངས་པ་འདོད་ཆགས་ཞེ་སྡང་ལ་སོགས་པའི་དབང་དུ་སོང་ནས་ནི༷་དམ་ཚིག་ཇི་བཞིན་བསྲུང་མ་ནུས་པར། རྣལ་འབྱོོར་གྲུབ་པའི་ལུང་ཀུན་འདུས་རིག་པའམ་སྤྱི་མདོ་དགོངས་འདུས་ལས། ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་བཟླས་ཉམས་ཞར་ཉམས་ལྔ། །རྟག་པར་རྒྱུན་གྱི་ཁོར་མོར་འབྱུང་། །ཞེས་གསུངས་པ་ལྟར། ཡུལ་གཉན་པོ་བླ་མ་ལྟ་བུ་ལ་ཀུན་སློང་ཀུན་དཀྲིས་དྲག་པོས་ལན་གྲངས་མང་དུ་སྤྱད་ནས་འདས་རལ་དུ་གྱུར་པའི་ཉམས་པ་ཆེན་པོ་དང་། རྩ་བའི་ཉམས་པ་དང་། ཡན་ལག་གི་ཉམས་པ་དང་། གྲོགས་ངན་ཉམས་པ་དང་འགྲོགས་དབང་གིས་བྱུང་བའི་ཟླས་ཉམས་དང་། གཞན་ཕ་རོལ་བོའི་ངོ་དགར་བལྟས་ཤིང་ཤོར་ཏེ་བྱས་པའི་ཞར་ཉམས་བཅས་ཉམས་པའི་ཉེས་པ་ལྕི་བ་མཐའ་ཡས་པ་ཕོག་པ་དང་། རྒྱུད་བསྟན་ཅིང་དམ་ཚིག་སྟོན༷་པ༷་པོའི་བླ་མ་རྡོ་རྗེ་སློབ་དཔོན་ནམ་རྒྱུད་ཀྱི་སྟོན་པ་རྡོ་རྗེ་འཆང་གི་བཀའ་ལས་དཀྱིལ་འཁོར་གཅིག་ཏུ་དམ་ཚིག་བསྲེས་ཤིང་སྤྱོད་ལམ་གཅིག་པ་ལ་སོགས་པ་བྱ་མི་རུང་བར་བཀ༷འ་བསྩལ་བ་དང༷་དམ༷་དུ་བཞག་པ་ལས༷་རང་ཉིད་འག༷ལ་བར་གྱུར༷་ཏེ༷། ཁྲོ་བོ་རྡོ་རྗེའི་རིགས་ཀུན་འདུས་པའི་མདོ་ལས། དད་ལོག་དམ་ཉམས་དོན་ལས་གོལ། །བྱང་ཆུབ་ཐག་པ་གཏིང་ནས་ཆད། །སེམས་ཀྱི་མྱུ་གུའི་རྩ་འཚིགས་པ། །ངན་འགྲོའི་འདམ་དུ་ཁ་སྦུབ་ཡིན། །སྣོད་མེད་ཁ་སྦུབ་དེ་དག་ལ། །གསང་བ་སྨྲ་བར་བྱ་བ་མིན། །སྨྲས་ན་དེ་ཉིད་ཁ་སྦུབ་འགྱུར། །ཞེས་གསུངས་པ་ལྟར། རྣལ༷་འབྱོར༷་བར་ཁས་འཆེ་བ་གཞན་གང༷་ཞིག༷་རྡོ་རྗེ་ཐེག་པའི་རྩ་བ་དང་ཡན་ལག་གང་རུང་གི་ད༷མ་ཚིག༷་ཉམ༷ས་ཤིང་ཕྱིར་བཅོས་མེད་པའིི་དམ་ཉམས་པའི་གང་ཟག་དེ་དང་ངོ་འཕྲད་པ༷་ད༷ང་། དམ་ཚིག་བསྲེས་ཤིང་རྒྱུད་འཆད་པ་དང་། དབང་ཞུ་སྐུར་དང་། སྤྱོད་ལམ་དང་ཟས་གཅིག་པ་སོགས་པ་བགྱིས་ཏེ། དཔལ་ཡེ་ཤེས་ཐིག་ལེ་ལས། དེ་དང་ལྷན་ཅིག་གནས་མི་བྱ། །དེ་ལ་གཏམ་ཡང་མི་བྱ་སྟེ། །ཐབས་དང་མི་ལྡན་འཇིགས་པ་ཡིས། །མགོ་ལ་ནོར་བུས་བརྒྱན་ཀྱང་ནི། །སྦྲུལ་ནག་བཞིན་དུ་དོར་བར་བྱ། །ཞེས་དང་། དཔལ་རྡོ་རྗེ་ཕྲེང་བ་ལས། དོན་དམ་པ་ནི་མི་ཤེས་པ། །མེད་པར་ལྟ་དང་ཚུལ་ཁྲིམས་འཆལ། །གཏམ་དང་ཚིག་གི་ཀྱལ་པ་དང་། །འདྲི་བ་ལ་སོགས་མི་བྱ་ཞིང་། །སེ་གོལ་ཏོགས་པ་ཙམ་དུ་ཡང་། །དེ་དང་ལྷན་ཅིག་གནས་མི་བྱ། །ཞེས་གསུངས་པ་ལྟར། དམ་ཉམས་དང་སྐ༷ད་ཅིག༷་ཙམ༷་ཡ༷ང་འཕྲ༷ད་པར་མི་བྱ་བ་དང་། གནས་གཅིག་ཏུ་ལྷན་ཅིག་ཏུ་གནས་པར་མི་བྱ་བ་དང་། ཆོས་དང་དམ་ཚིག་མི་བསྲེ་བ་དང་། དགའ་གྲོགས་དང་གཉེན་མཛའ་མི་བྱེད་པ་དང་། གཏམ་སྨྲ༷་བར་མི༷་བྱ༷་ཞིང༷་། ལམ་བར་དུ་སྐད་ཅིག་ཙམ་ལ་ལྷན་གཅིག་འགྲོགས་པ་དང་སྡོད་པར་མི་བྱ་བ་དང་། དཔལ་དམ་ཚིག་ཆེན་པོའི་རྒྱུད་ལས། གལ་ཏེ་ཉམས་པ་མ་གསོས་ན། །ཉམས་པ་དེ་དང་རྣལ་འབྱོར་གཞན། །གནས་གཅིག་དང་ནི་ཆུ་གཅིག་གམ། །ཡུལ་དང་ལམ་གྱི་གནས་གཅིག་གམ། །སྐད་ཅིག་ཙམ་ཡང་འདུག་མིི་བྱ། །འདུག་ན་ཉེས་པ་བསམ་མི་ཁྱབ། །ཅེས་གསུངས་པ་ལྟར་ཐ་ན་ལུང༷་བ༷་གཅིག༷་གི༷་ཆུ༷་ལ༷འང་མི༷་འཐུང༷་བར་བྱ་དགོས་ཞེས༷་རྒྱལ་བའི་བཀ༷འ་ལ༷ས་བྱུང༷་བ༷་དེ༷་ལྟར༷་དུ་ཉམས་སུ་ལེན་པར་མ༷་ལྕོག༷ས་ཏེ༷། ཡེ་ཤེས་རྔམ་ཀློག་ལས། སྤྱིར་གསང་བཞི་དང་བར་གསང་བཞི། །གསང་བར་འོས་དང་གཉེར་གཏད་པའི། །གསང་སྔགས་གསང་བའི་དོན་རྣམས་ཀུན། །བུམ་པའི་ནང་གི་མར་མེ་བཞིན། །སྣོད་མ་ཡིན་པའི་གང་ཟག་ལ། །དུས་དང་གནས་སྐབས་ཀུན་ཏུ་གསང་། །སྣོད་དང་ལྡན་པ་རྣམས་ལ་ཡང་། །དབང་མ་ཐོབ་པར་བཤད་པ་མིན། །ཞེས་དང་། རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། བཤད་པའི་དབང་རྣམས་རབ་ཏུ་མ་བསྟན་ན། །རྡོ་རྗེའི་ལྕེ་ལ་བདུད་རྩི་འཛག་གྱུར་ཀྱང་། །གཞན་ལ་ཟེར་ཐིགས་འགའ་ཡང་སྤྲོ་མི་བྱ། །གསང་འོས་གཉེར་གཏད་སྔགས་དང་མཚན་རྣམས་གསང་། །ཞེས་གསུངས་པ་ལྟར། སྔགས་ཀྱི་ལྟ་བ་ཟབ་མོ་དང་། སྤྱོད་པ་བརླིང་པོ་དང་། ཡི་དམ་གྱི་ལྷའི་མཚན་སྔགས་དང་། ས་ལམ་དང་དངོས་གྲུབ་གྲུབ་པའི་རྟགས་དང་མཚན་མ་རྣམས་དབང་མ་ཐོབ་ཅིང་རྒྱུད་མ་སྨིན་པའི་སྣོད་མིན་དང་། གསར་ཞུགས་དང་། མ་འདྲིས་པ་སོགས་ལ་གསང་དགོས་པའི་སྤྱིར་གསང་བཞི་དང་། གསང་སྔགས་ཀྱི་སྒྲུབ་པ་མཛད་པའི་གནས་དང་། དུས་དང་། གྲོགས་དང་། རྫས་བཞི་གཞན་ལ་གསང་དགོས་པའི་བར་གསང་བཞི་དང་། གསང་སྔགས་ཀྱི་སྤྱོད་པ་སྣ་ཚོགས་དང་། དཀྱིལ་འཁོར་སྒྲུབ་པ་དང་། ཚོགས་ཀྱི་འཁོར་ལོ་བསྐོར་བ་དང་། དམ་ཚིག་གི་རྫས་དང་། ཡོ་བྱད་རྣམས་གསང་དགོས་པ་ནི་གསང་བར་འོས་པ་དང་། བླ་མ་དང་མཆེད་ལྕམ་གྱིས་འདི་དག་ནི་གསང་བར་གྱིས་གསང་བར་བཀའ་བརྒྱས་གཉེར་གཏད་པ་གང་ཡིན་པའི་གསང་བར་གཉེར་གཏད་པ་བཅས་གསང་བ་བཅུ་ལ་སོགས་པ་གས༷ང་བ་ཀུན་གྱིས་སྒོ༷་འཆོ༷ལ་བ༷འི་དབང་གིས་དམ་ཉམས་དང་དམ་ལྡན་གྱི་དབྱེ༷་བ་སོ་སོར་བས༷ལ་དཀ༷འ་བ༷ར་གྱུར་པ་དང༷་། རང་ལ་ཕ་རོལ་བོའི་རྒྱུད་ཚོད་ཤེས་པའི་མངོ༷ན་ཤེ༷ས་ཆུང༷་བ༷་སྟེ་མེད་པའི་དབང་གིས༷་སྔགས་ཀྱི་དམ་ཚིག་ཉམས་པའི་སྐྱོན༷་ཅ༷ན་དེ་གང་ཡིན་མ༷་རྟོག༷ས་ཏེ༷། དམ་ཉམ༷ས་པའི་གང་ཟག་དང༷་དཀྱིལ་འཁོར་གཅིག་ཏུ་དབང་ནོད་པ་ལ་སོགས་པས་ཚོག༷ས་འདྲེས༷་པ་དང་། དམ་ཉམ༷ས་པ༷་ལ་ཟས་གོས་སྟེར་བ་ལ་སོགས་པས་སྤྱོད་ལམ་གཅིག་པས་དེའི་རེ་བ་བསྐང༷་བར་བྱས་པ་ལ༷་སོ༷གས་པའི་སྒོ་ནས་དམ་ཉམ༷ས་ད༷ང་། དམ་ཉམས་མིན་ཡང་གསང་སྔགས་ཀྱི་སྣོ༷ད་དུ་མི་རུང་ཞིང་དེའི་སྣོད་མི༷ན་པའི་གང་ཟག་རྣམས༷་ལ༷་དབང་བསྐུར་བ་དང་། མན་ངག་གནང་བའི་ཆོས༷་བཤ༷ད་པ་ད༷ང་། དུས་རྟག་ཏུ་དམ་ཉམ༷ས་ལ༷་མི༷་འཛེ༷མས་པའི་དབང་གིས། ཇི་སྐད་དུ་ཁྲོ་བོ་རྡོ་རྗེའི་རིགས་ཀུན་འདུས་པ་ལས། ཅི་ཕྱིར་འོ་མ་ཉུང་ངུ་ཞིག །རུལ་བས་འོ་མ་ཀུན་རུལ་བཞིན། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་འགྱུར། །ཞེས་གསུངས་པ་ལྟར། རང་རྒྱུད་ཕ་རོལ་བོའི་ཤུགས་ཀྱི་ཉམ༷ས་པ༷འི་སྐྱོན༷་ལ༷་སོག༷ས་པའི་ཉེས་སྒྲིབ་ཀྱིས་བསྒྲིབས་པར་འགྱུར་ལ། དེས་ན་དམ་ཉམ༷ས་དང༷་འགྲོག༷ས་ཤིང༷་དམ་བསྲེས་དབང་གིས་རང་ལའང་དམ་ཉམ༷ས་པ༷་དེ༷་ད༷ག་གི༷་ཉམ༷ས་པའི་སྒྲིབ་པ་ངན་པའི་གྲི༷བ་སྐྱོན༷་གྱིས༷་གོས༷་པ༷ར་གྱུར༷་ཏོ༷་འཚ༷ལ་ལམ་ཡོད་དོ་ཅོག་པོ་ནི། སྤྱིར་དམ་ལས་ཉམས་པ་ཙམ་མིན་པར་ཇི་སྐད་དུ། དཔལ་བ་གསང་བ་གཅོད་པའི་རྒྱུད་ལས། རྩ་བ་ཡན་ལག་དམ་ཚིག་ཉམས། །བླ་མ་ལ་སྨོད་རྣམ་སྨིན་གྱིས། །མནར་མེད་སེམས་ཅན་དམྱལ་བར་སྐྱེ། །རྟེན་ཅིང་འབྲེལ་བ་ཟབ་མོ་ཡི། །རྩ་ཡི་འཁོར་ལོའི་དོན་མ་རྟོགས། །ལྕགས་ཀྱི་སོར་ནི་བཅུ་དྲུག་པ། །འཛེག་པ་རུ་ནི་ང་ཡིས་བཤད། །ཅེས་དང་། དམ་ཚིག་ཆེན་པོའི་རྒྱུད་ལས། དུས་གསུམ་དམ་ཚིག་མ་བསྲུང་ན། །འཇིག་རྟེན་པ་དང་འབུམ་འགྱུར་བའི། །རྣམ་སྨིན་ཆེ་བར་ང་ཡིས་གསུངས། །དམ་ཚིག་ཉམས་པའི་མཚན་མ་ནི། །ལུས་ཀྱི་ཉེས་པ་སྣ་ཚོགས་འབྱུང་། །ངག་གིས་ཉེས་པ་སྣ་ཚོགས་སྨྲ། །ཁ་དོག་དབྱིབས་རྣམས་འགྱུར་པ་དང་། །ལག་གི་རྫས་རྣམས་མི་ཐུབ་ཅིང་། །འབྲས་དང་ཤུ་བ་ལ་སོགས་འབྱུང་། །ཞེས་དང་། གསང་བ་མངོན་བསྟན་གྱི་རྒྱུད་ལས། སྔགས་པ་དམ་ཚིག་ཉམས་གྱུར་ཏེ། །ནད་གདོན་འབྱུང་པོ་མ་ལུས་པས། །ཉེ་བར་གཙེས་ཏེ་འཆི་བར་འགྱུར། །དེ་ནས་མནར་མེད་སྡུག་བསྔལ་ནི། །གྲངས་མེད་འདས་ཀྱང་ཐར་མི་འགྱུར། །ཞེས་དང་། ཡེ་ཤེས་རྔམ་གློག་ལས། རྩ་བ་ཉམས་པའི་སྐྱོན་ཆེན་ཡང་། །བསྐལ་བ་གྲངས་མེད་བགྲངས་པར་ཡང་། །དམྱལ་བའི་གནས་སུ་ལྟུང་བར་འགྱུར། །རྡོ་རྗེ་སློབ་དཔོན་སྐུ་དམད་ན། །དུས་གསུམ་སངས་རྒྱས་བརྙས་པ་ཡིན། །བྱང་ཆུབ་སེམས་ལ་སྐུར་བས་ན། །དེ་ཡི་སྡིག་པ་བརྗོད་མི་ལང་། །ཞེས་སོགས་གསུངས་པ་ལྟར་གྱི་ཉེས་དམིགས་ཆེན་པོ་འབྱུང་བ་ཡིན་ཞིང་། ཉེས་པ་དེ་དག་ནི་ཚེ༷་འདི༷འི་ནད་གདོན་བར་ཆད་ཀྱི་རྐྱེན༷་ངན་པ་དང༷་། ཚེ་ཕྱི༷་མ༷འི་ཐར་བ་དང་ཐམས་ཅད་མཁྱེན་པའི་ལམ་དང་གོ་འཕང་གི་སྒྲིབ༷་པར་གྱུར༷་ཅིང་ངན་སོང་གསུམ་དང་རྡོ་རྗེའི་དམྱལ་བའི་སྡུག་བསྔལ་མྱོང་དགོས་པའི་རྒྱུར་གྱུར་པ་ཡིན་པས། དེ་རྣམ༷ས་དེ་རིང་བདག་གིས་ར༷ང་ཉིད་ཀྱིས་ཉེས་པའི་ཚོགས་འདི་དག་བགྱིས་པ་ལ་ངོ་གནོང༷་བ་སྟེ། རང་ཉིད་ངོ་ཚ་ཞིང་། འགྱོ༷ད་པ༷་དྲག་པོའི༷་སེམ༷ས་ཀྱིས༷་ཉེས་པའི་ཚོགས་འདི་དག་མི་གསང་། མི་སྦེད། མི་འཆབ་པར་ཁ་ནས་མཐོལ༷་ཞིང་། སྙིང་ནས་ཕྱིན་ཆད་མི་བགྱིད་པར་སྡོམ་པས་བཤ༷གས་པར་བགྱིད་དོ།།

ཀློང་བཤགས་ཀྱི་དཔེ་ལ་ལར། ཉམས་ལ་མི་འཛེམ་ཉམས་པའི་སྐྱོན་ལ་སོགས༔ ཉམས་དང་འགྲོགས་ཤིང་ཉམས་པ་དེ་དག་གི༔ ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ༔ ཞེས་པ་དང་། དཔེར་ལ་ལར། ཉམས་ལ་མི་འཛེམ་ཉམས་པ་དེ་དག་གི༔ ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ༔ ཞེས་ཅུང་མི་འདྲ་བ་ཡོད་པ་དང་། དཔེ་ལ་ལར། ལུང་བ་གཅིག་གི་ཆུ་ལ་མི་འཐུང་ཞེས༔ ཞེས་པ་དེ་མེད་པའང་ཡོད་དོ། །ཞར་བྱུང་ངོ་།།

དེ་ལྟར་ཉེས་པ་རྣམས་བཤགས་ན༷་ནི་ཕྱོགས་བཅུ་དུས་བཞིའི་འཕ༷གས་པ༷འི་མཆོག་རྒྱལ་བ་སྲས་བཅས་སྤྱི་དང་། བྱེ་བྲག་ཏུ་ཞི་ཁྲོ་དམ་པ་རིགས་བརྒྱའི་ལྷ་ཚོགས་དང་། བླ་མ་རྡོ་རྗེ་སློབ་དཔོན་དང་བཅས་པའི་བཀ༷འ་ཡི་ཆ༷ད་པ་དྲག་པོ་བད༷ག་ལ༷་མི༷་གཏོ༷ང་ཞི༷ང་། བརྩེ་བ་དང་བྱམ༷ས་པ༷འི་ཐུག༷ས་རྗེས༷་ལས་ངན་བད༷ག་ལ༷་ཉེ་བར་དགོང༷ས་ན༷ས་སླར་ཡང་རྗེས་སུ་བཟུང་བར་མཛད་ནས་ཀྱ༷ང་ཟབ་གསལ་གཉི༷ས་སུ་མེ༷ད་པའམ་གཟུང་འཛིན་གཉིས་སུ་མེད་པའི་ཆོས་ཀྱི་དབྱིང༷ས་སུ༷་གནས་ལུགས་ཇི་བཞིན་རྟོགས་པའི་མི༷་འགྱུར༷་དྲི་མ་མེད་པའི་ཡེ་ཤེས་འོད་གསལ་བའི་ངོ་བོར་བད༷ག་ལེགས་པར་བཀོ༷ད་དེ༷་ཟུང་འཇུག་གི་སྐུ་ཐོབ་པར་མཛད་དུ་གསོལ། ཞི་ཁྲོའི་ལྷ་ཚོགས་བླ་མ་རྡོ་རྗེ་སློབ་དཔོན་དང་བཅས་པ་རྣམས་རྣམ་རྟོག་རླུང་གིས་མི་བསྐྱོད་པའི་ཐུགས་ཟག་མེད་འོད་གསལ་བ་དེ་ཉིད་མི༷་དམི༷གས་བཏ༷ང་སྙོམ༷ས་ཆེན་པོའི་ང༷ང་དུ༷་ཡེ་ནས་བཞུགས་པ་ལ་དེ་དེ་བཞིན་དུ་བཞུག༷ས་པར་མཛད་ན༷ས་ཀྱ༷ང་དམ་ཚིག་ཉེས་ལྟུང་ལེགས་པར་བཤགས་པའི་གང་ཟག་བདག་ལ་དབྱིངས་ཡེ་གཉི༷ས་སུ་མེ༷ད་པའི་ཟུང་འཇུག་དོན༷་གྱི༷་ཚང༷ས་པ༷་ཆེན་པོའི་འབྲས་བུའི་གོ་འཕང་བསྩ༷ལ་ཏུ༷་གསོ༷ལ་ལོ་ཞེས་སྤྱི་ཁྱད་ལྷག་པའི་སྔགས་ཀྱི་དམ་ཚིག་ཉམས་པ་ཅི་མཆིས་པ་བཤགས་པའོ།།

དེ་ཡང་དམ་ཚིག་དང་སྡོམ་པའི་ཁྱད་པར་ནི། བྱ་རྒྱུ་མི་བྱེད་པ་འགོག་པ་དམ་ཚིག་དང་། མི་བྱ་རྒྱུ་བྱེད་པ་འགོག་པ་སྡོམ་པར་གསུངས་པས། དེས་ན་དག་པའི་སྣང་བ་དང་མི་འབྲལ་བ་དང་། ཤ་ལྔ་བདུད་རྩི་ལྔ་བསྟེན་པ་ལ་སོགས་པ་བྱེད་དགོས་པའམ་ཉམས་སུ་ལེན་དགོས་པ་རྣམས་མི་བྱེད་ཅིང་ཉམས་སུ་མི་ལེན་པ་དེ་འགོག་པར་བྱེད་པ་དམ་ཚིག་དང་། རྩ་བ་དང་ཡན་ལག་གི་ལྟུང་བ་ལ་སོགས་པ་མི་བྱའམ་བྱ་རྒྱུ་མ་ཡིན་པ་རྣམས་འགོག་པར་མི་བྱེད་པ་དེ་ཉིད་སྡོམ་པའམ་འགོག་པ་ནི་སྡོམ་པ་ཡིན་པའི་ཕྱིར། དེ་གཉིས་ལྡོག་ཆས་ཕྱེ་བ་ལས་འགལ་བ་ནི་མིན་པར་སྔགས་སྡོམ་ཡིན་ན་དམ་ཚིག་ཡིན་པས་ཁྱབ་པ་དང་། སྔགས་སྡོམ་ཡིན་ན་སྡོམ་པ་ཡིན་པས་ཀྱང་ཁྱབ་ཕྱིར་སྔགས་སྡོམ་གྱི་ངོ་བོ་དམ་ཚིག་དང་སྡོམ་པ་གཉིས་ཀ་ཡིན་པ་སྨོས་མ་དགོས། འོན་ཀྱང་དམ་ཚིག་ཡིན་ན་སྡོམ་པ་ཡིན་པས་མ་ཁྱབ་པ་ནི་བྱ་སྤྱོད་ཀྱི་དམ་ཚིག་དག་སྡོམ་པ་མ་ཡིན་པར་གསུངས་པ་ལྟར་རོ།།

དེ་བཞིན་དུ་སྡིག་པ་དང་ལྟུང་བ་ངོ་བོ་གཅིག་མིན་པར་ཁྱིམ་པའི་རྒྱུད་ཀྱི་སྲོག་གཅོད་པ་ལ་སོགས་པའི་ལས་དེ་སྡིག་པ་ཡིན་ཡང་ལྟུང་བ་མ་ཡིན་ལ། ལྟུང་བ་ནི་སྡོམ་པ་རྒྱུད་ལ་མ་བླངས་པའི་ཁྱིམ་པ་ལྟ་བུའི་རྒྱུད་ལ་མེད་པར་རབ་བྱུང་དང་སྔགས་པ་ལྟ་བུ་སྡོམ་པ་རྒྱུད་ལ་བླངས་པའི་གང་ཟག་གི་རྒྱུད་ཀྱི་རང་བཞིན་དང་བཅས་པ་ལས་འདས་པའི་ཉེས་པ་ལ་བྱེད་པས་སྤྱིར་སྡིག་ལྟུང་ངོ་བོ་མི་གཅིག་ཀྱང་། སྡོམ་ལྡན་གྱི་རྒྱུད་ཀྱི་སྡིག་ལྟུང་ངོ་བོ་གཅིག་པའང་ཡོད་པ་དང་། བཤགས་པས་སྡིག་པ་འདག་ཀྱང་ལྟུང་བ་མི་འདག་པ་ཡང་ཡོད་པས། ལྟུང་བ་ནི་སོ་བྱང་སྔགས་གསུམ་རང་རང་གི་གཞུང་ནས་བཤད་པའི་ཕྱིར་བཅོས་ཀྱིས་ཐབས་ཀྱིས་སོར་ཆུད་པའམ་འདག་པ་ཡིན་པར་གསུངས་སོ།།

སྔགས་སྡོམ་སླར་སོར་ཆུད་པ་ནི་བདག་འཇུག་སོགས་ལྟུང་བ་ལས་སོར་ཆུད་པའི་ཆོ་ག་དག་ཡིན་པ་ཤེས་པར་བྱའོ། །དེས་ན་བཤགས་པས་སྡིག་པ་འདག་ཅིང་ལྟུང་བའི་རྣམ་སྨིན་སྐྱེད་པའི་ལས་འདག་པར་བྱེད་མོད། ལྟུང་བ་དག་ནས་ཕྱིར་སྡོམ་ལྡན་དུ་སྔར་གྱི་གོ་སར་སླར་སོར་ཆུད་པ་མེད་པ་ལ་གོ་བ་ཆགས་པའི་ཞིབ་ཆ་ཡོད་པར་བྱའོ།།

གསུམ་པ་དོན་དམ་བརྗོད་མེད་ཀྱི་བཤགས་པ་དམིགས་སུ་བཀར་ཏེ་བསྟན་པ་ནི། དོན་དམ་སྤྲོས་མེད་བརྗོད་ལས་འདས་པ་ལ༔ རྣམ་རྟོག་གང་ཡང་དམིགས་པར་མི་འགྱུར་ཏེ༔ ཀུན་རྫོབ་སྒྱུ་མ་ཙམ་གྱི་དབང་གིས་ནི༔ ཐུགས་དང་འགལ་བར་གྱུར་པ་མཐོལ་ལོ་གཤགས༔ ནོངས་པ་མཆིས་ན་རང་གནོང་བཟོད་པར་གསོལ༔ འཁོར་བ་ཐོག་མ་མེད་པའི་དུས་མཐའ་ནས༔ ལས་ཀྱི་དབང་གིས་བདག་ཅག་འཁོར་བར་འཁྱམས༔ ཉོན་མོངས་ལོག་པར་ལྟ་བའི་དུག་འཐུང་སྟེ༔ སྡུག་བསྔལ་ནད་ཀྱིས་ཤིན་ཏུ་གདུང་པ་ལ༔ བདེ་གཤེགས་ཐུགས་རྗེ་སྨན་པའི་རྒྱལ་པོ་ཡིས༔ དམ་ཆོས་བདུད་རྩི་ཐར་བའི་སྨན་བསྩལ་ནས༔ ཉོན་མོངས་འཁྲུལ་བའི་ནད་རྣམས་ཞི་མཛད་ཅིང་། བླ་མེད་བྱང་ཆུབ་ཀྱི་སྙིང་པོར་འཚོ་མཛད་པ༔ བྱམས་མགོན་ཐུགས་རྗེ་ཅན་ལ་སྐྱབས་སུ་མཆི༔ ཐུགས་དང་འགལ་བར་གྱུར་པ་མཐོལ་ལོ་བཤགས་༔ ལྟ་བ་འཕང་དམས་ཆོས་ཉིད་དོན་མ་རྟོགས༔ སྒོམ་པ་ཡུན་ཐུང་ཡི་དམ་ལྷ་མ་གསལ༔ བཟླས་བརྗོད་གྲངས་ཉུང་གྲྭ་ཆག་ཟུར་ཉམས་པས༔ རྒྱལ་བ་རྒྱ་མཚོའི་ཐུགས་དང་ཅི་འགལ་བ༔ རྒྱལ་བ་ཞི་ཁྲོའི་སྤྱན་སྔར་མཐོལ་ལོ་བཤགས༔ ཐུགས་རྗེ་མངའ་བ་ཁྱེད་ལ་བཟོད་པར་གསོལ༔ ཡེ་ཤེས་ལྷ་ཚོགས་སྤྱན་སྔར་མཐོལ་ལོ་གཤགས༔ འབད་རྩོལ་ཆུང་བས་སློབ་དཔོན་ཐུགས་མ་མཉེས༔ གདུང་སེམས་ཆུང་བས་མཆེད་ལྕམ་ཐུགས་མ་ཟིན༔ འཕྱར་ལ་གཡེམ་པས་གདམས་ངག་གཞན་ལ་ཤོར༔ རྩ་བ་སྐུ་གསུང་ཐུགས་ཀྱི་དམ་ཚིག་ལ༔ ཚོར་དང་མ་ཚོར་མ་རིག་དབང་གིས་ནི༔ ལྷག་ཆད་འགལ་འཁྲུལ་གྱུར་པ་ཅི་མཆིས་པ༔ རྒྱལ་བ་ཞི་ཁྲོའི་སྤྱན་སྔར་མཐོལ་ལོ་བཤགས༔ ཐུགས་རྗེ་མངའ་བ་ཁྱེད་ལ་བཟོད་པར་གསོལ༔ རྒྱལ་བ་རྒྱ་མཚོའི་ཚོགས་ལ་མཐོལ་ལོ་བཤགས༔ མཐོལ་ཞིང་བཤགས་སོ་བྱང་ཞིང་དག་གྱུར་ཅིག༔ གཉིས་མེད་དོན་གྱི་ཚངས་པ་བསྩལ་ཏུ་གསོལ༔ ས་མ་ཡ༔ ཞེས་པའི་ཤོ་ལོ་ཀ་བརྒྱད་དང་རྐང་པ་གཅིག་གིས་བསྟན་ལ། དེ་ཡང་གནས་ལུགས་དོ༷ན་དམ༷་སྤྲོས༷་པ་མེ༷ད་པ་བསམ་བརྗོ༷ད་ཀྱི་ཡུལ་ལ༷ས་འདས༷་པ༷་དེ་ཡི་ངོ་བོ་ལ༷་བློ་རྣམ༷་པར་རྟོག༷་པས་བཞག་པའི་སྤྲོས་པའི་ཆོས་ག༷ང་ཡ༷ང་དམིག༷ས་པ༷ར་མི༷་འགྱུར༷་པའི་ཕྱིར་ན་དམ་ཚིག་ཉམས་བྱ་ཉམས་བྱེད་དང་བཤགས་བྱ་བཤགས་བྱེད་དང་བྲལ་བ་ཡིན་ཏེ༷། གནས་ལུགས་དོན་དམ་པ་དེའི་ངོ་བོར་བདེན་པར་ཅི་ཡང་མ་གྲུབ་པའི་ཕྱིར། འོན་ཀྱང་ཀུན༷་རྫོབ༷་ཏུ་སྒྱུ༷་མ༷་ཙ༷མ་གྱི༷་ངོར་བྱ་བྱེད་ཐམས་ཅད་འཐད་པའི་ཕྱིར་ན་དེའི་དབ༷ང་གིས༷་བློ་འཁྲུལ་བར་གྱུར་ནས་ནི༷་རྒྱལ་བ་ཞི་ཁྲོའི་ལྷ་ཚོགས་སོགས་ཕྱོགས་བཅུའི་སངས་རྒྱས་བྱང་སེམས་ཉན་རང་བླ་མ་རྡོ་རྗེ་སློབ་དཔོན་དང་བཅས་པའི་ཐུགས༷་དང༷་འག༷ལ་བ༷ར་གྱུར༷་པའི་དམ་ཚིག་ཉམས་ཆགས་ཉེས་ལྟུང་གི་ཚོགས་བསགས་པ་ཅི་མཆིས་པ༷་ཐམས་ཅད་འགྱོད་པས་མི་སྦེད་པར་མཐོ༷ལ་ལོ༷་གཤ༷གས་སོ། །དེ་ལྟར་གནས་ལུགས་ཀྱི་དོན་དེ་ལས་གཞན་དུ་འཛིན་པ་དང་། དམ་ཚིག་མ་སྲུང་བར་ཡལ་བར་དོར་བ་སོགས་ནོང༷ས་པ༷་སྟེ་ནོར་བའི་བློ་དང་། དེའི་དབང་གིས་བྱུང་བའི་ཉེས་པ་ཅི་མཆི༷ས་ན༷འང་ར༷ང་ཉིད་ངོ་ཚ་བའམ་ངོ་གནོ༷ང་ཞིང་འགྱོད་པས་བཤགས་པ་ལགས་ན་བཤགས་ཡུལ་རྣམས་ཀྱི་ཐུགས་ཀྱིས་བདག་ལ་བཤགས་པ་དང་ལེན་གྱིས་བཟོ༷ད་པ༷ར་མཛོད་ཅིག་ཅེས་གསོ༷ལ་བ་འདེབས་སོ། །ཞེས་པའོ།།

ནོངས་པ་ཞེས་པ་ནི་ནོར་འཁྲུལ་དང་ངོ་ཚ་བ་གཉིས་ལ་འཇུག་པ་ཡོད་པས་འདིར་ནོར་བ་ལ་གོ་བར་བྱ་དགོས་ལ། འོག་ནས་བྱུང་བ་རྣམས་ལའང་དེ་ལྟར་སྐབས་ཐོབ་ཀྱི་གོ་བ་ལེན་པར་བྱའོ།།

ཟག་བཅས་ཉེ་བར་ལེན་པའི་ཕུང་པོ་ལྔའི་རང་བཞིན་འཁོ༷ར་བ༷་འདི་ཉིད་ཀྱི་ཐོ༷ག་མ༷་མེ༷ད་པ༷འི་དུས༷་ཀྱི་ཡ་མཐ༷འ་ནས༷་ད་བར་དུ་དཀར་པོ་དགེ་བ་ཟག་བཅས་ཀྱི་ལས་དང་ནག་པོ་མི་དགེ་བ་སྡིག་པའི་ལས༷་ཀྱི༷་དབ༷ང་གིས༷་བད༷ག་ཅ༷ག་རིགས་དྲུག་གི་འགྲོ་བ་རྣམས་འཁོ༷ར་བ༷འི་གནས་རིས་དྲུག་པོ་དེར་འཁྱམ༷ས་ནས། ཉོ༷ན་མོང༷ས་པ་འདོད་ཆགས་ཞེ་སྡང་ང་རྒྱལ་ཕྲག་དོག་དང་། རྒྱུ་འབྲས་དང་ཚེ་སྔ་ཕྱི་མེད་པར་ལྟ་བའི་ལོ༷ག་པ༷ར་ལྟ༷་བ༷འི་དུག༷་དྲག་པོ་ཐར་བའི་སྲོག་འཕྲོག་པར་བྱེད་པ་དེ་ཉིད་རྒྱུད་ལ་འཐུང༷་སྟེ༷། དེའི་དབང་གིས་མི་དགེ་བ་བཅུ་ལ་སོགས་པའི་སྡིག་ལྟུང་གི་ཚོགས་རབ་ཏུ་མང་པོ་བསགས་ཤིང་། དེའི་འབྲས་བུ་སྡུག༷་བསྔ༷ལ་གསུམ་སོགས་བཟོད་པར་དཀའ་བའི་ཟུག་རྔུའི་ན༷ད་ཀྱིས༷་ཚེ་རབས་ནས་ཚེ་རབས་སུ་ཤི༷ན་ཏུ༷་གདུང༷་པ༷་ཡིན་ལ༷། དེ་ཕྱིར་རྒྱུ་བདེ་བ་བྱང་ཆུབ་ཀྱི་ལམ་ནས་འབྲས་བུ་བདེ༷་བ་རྫོགས་པའི་སངས་རྒྱས་ཀྱི་སར་གཤེག༷ས་པའི་ཐུག༷ས་བརྩེ་བ་སྙིང་རྗེ༷་ཆེན་པོ་དང་ལྡན་པའི་སྡུག་བསྔལ་གྱི་ནད་གསོ་བའི་སྨ༷ན་པ༷འི་རྒྱ༷ལ་པོ༷་སངས་རྒྱས་བཅོམ་ལྡན་དེ་ཡིས༷་གདུལ་བྱ་བདག་ཅག་ཀུན་ལ་ལུང་དང་རྟོགས་པའི་དམ༷་པའི་ཆོས༷་ཀྱི་བདུད༷་རྩི༷་ཐ༷ར་བ༷་མྱ་ངན་ལས་འདས་པའི་སྲོག་གསོ་བྱེད་ཀྱི་སྨ༷ན་བསྩལ༷་ན༷ས་བདག་ཅག་གི་ཉོ༷ན་མོང༷ས་པ་དང་དེའི་རྒྱུ་འཁྲུལ༷་བ༷་མ་རིག་པའི༷་ནད༷་རྣམ༷ས་མ་ལུས་པར་ཞི༷་བར་མཛ༷ད་ཅིང༷་། བླ༷་ན་མེ༷ད་པ་ཡང་དག་པར་རྫོགས་པའི་བྱ༷ང་ཆུབ༷་ཀྱི་སྙིང༷་པོར༷་འབྲས་ཆོས་ཀྱི་ཡོན་ཏན་རྒྱ་མཚོས་འཚོ༷་བར་མཛ༷ད་པ༷་པོ་དེ་ནི་བྱམ༷ས་པ་དང་སྙིང་རྗེ་ཚད་མེད་པའི་བདག་ཉིད་ཅན། མཐའ་ཡས་པའི་གདུལ་བྱ་རྣམས་ཀྱི་མགོ༷ན་པོ་སངས་རྒྱས་བཅོམ་ལྡན་འདས་དང་དེའི་རྣམ་པར་འཕྲུལ་བ་རྒྱལ་བ་ཞི་ཁྲོའི་ལྷ་ཚོགས་ཐུག༷ས་བརྩེ་བ་སྙིང་རྗེ༷་ཆེན་པོ་དང་ལྡན་པ་ཅ༷ན་ཁྱེད་ཅག་ཡིན་ལ། བདག་ཅག་འཁོར་བ་ལས་ཉེ་བར་ཐར་བའི་དོན་དུ་ཁྱེད་ཅག་ལ༷་སྒོ་གསུམ་གུས་པས་སྐྱབ༷ས་སུ༷་ཉེ་བར་མཆི༷འོ། །ཁྱེད་ཅག་གི་ཐུག༷ས་དང༷་འག༷ལ་བ༷ར་གྱུར༷་པ༷་ཡི་ལས་དམ་ཚིག་ཉམས་ཆག་ཐམས་ཅད་མཐོ༷ལ་ལོ༷་བཤ༷གས་སོ།།

གོང་སྨོས་རྩ་བ་དང་ཡན་ལག་གི་དམ་ཚིག་ཏུ་གསུངས་པ་ལས་གཞན་ཞི་ཁྲོའི་ལྷ་ཚོགས་སོགས་བསྒོམ་པ་ལ་ལྡན་དགོས་པ་གསལ་དག་བརྟན་པའི་ལྷ་གཙོ་འཁོར་གསལ་བར་བསྒོམ་པའི་མཚན་བཅས་བསྐྱེད་རིམ་གྱི་ལྟ་བ་དང་། རྩ་ཐིག་རླུང་གསུམ་སྒོམ་པ་མཚན་བཅས་རྫོགས་རིམ་དང་། ཆོས་ཐམས་ཅད་གནས་ལུགས་ཀ་དག་སྐྱེ་བ་མེད་པ་དབྱིངས་དང་ཡེ་ཤེས་གཉིས་སུ་མེད་པའི་ངོ་བོར་ལྷུན་རྫོགས་སུ་དག་པའི་མཚན་མ་མེད་པའི་རྫོགས་རིམ་རྣམས་ཀྱི་ལྟ་བའི་རྩལ་མ་རྫོགས་པའི་དབང་གིས་ཇི་སྐད་ཧེ་རུ་སྙིང་རྗེ་རོལ་བའི་རྒྱུད་ལས། མ་རིག་ལོག་པའི་དབང་དུ་གྱུར་པས་ན། །ཡང་དག་དོན་མ་རྟོགས་པ་མཐོལ་ཞིང་བཤགས། །ཞེས་གསུངས་པ་ལྟར། ལྟ༷་བ༷་འཕ༷ང་དམ༷འ་བས་སྣང་གྲགས་འགྱུ་བའི་ཆོས་ཐམས་ཅད་ཀྱི་གཤིས་ལུགས་ཆོས༷་ཉིད༷་དོན་དམ་པའི་དོན༷་དེ་ཇི་བཞིན་མ༷་རྟོག༷ས་པ་དང་། སྒོམ༷་པ༷་ཆུ་བོའི་རྒྱུན་བཞིན་དུ་གནས་མ་ནུས་པར་བྱིང་རྒོད་ཀྱི་དབང་དུ་ཤོར་བས་བསྒོམ་པའི་དུས་ཡུན༷་ཐུང༷་བ་དང་། དེའི་དབང་གིས་དང་སྒོམ་པའི་དུས་སུ་ལྷ་རྒྱལ་བ་ཞི་ཁྲོའི་དཀྱིལ་འཁོར་རྟེན་དང་བརྟེན་པའི་ཡི༷་ད༷མ་གྱི་ལྷ༷་ཡི་ཚོགས་ཇི་ལྟ་བ་བཞིན་དུ་མ༷་གས༷ལ་བ་དང་། སློབ་དཔོན་བྷ་བྱས་མཛད་པའི་ལག་ན་རྡོ་རྗེ་གོས་སྔོན་པོ་ཅན་གྱི་སྦྱོར་ཀ་ཆེན་པོའི་ཆོ་ག་ལས། བཟླས་བརྗོད་འཕྲོས་འདུས་བསྙེན་པ་བྱ། །དུས་གྲངས་མཚན་མ་ཐིམ་པ་དང་། །སྒྲུབ་པ་གང་འདོད་བརྩམ་པར་བྱའོ། །ཞེས་དང་། ཀླུའི་བྱང་ཆུབ་ཀྱིས་མཛད་པའི་ལག་ན་རྡོ་རྗེ་གོས་སྔོན་པོ་ཅན་གྱི་རྒྱུད་ཀྱི་རྣམ་བཤད་ལས། དང་པོ་བསྙེན་པ་བསྐྱལ་ཏེ། དུས་གྲངས་མཚན་མའི་བསྙེན་པའོ། །ཞེས་དང་། སྒེག་པའི་རྡོ་རྗེས་། བརྟུལ་ཞུགས་སྤྱོད་པའི་སྔོན་རོལ་དུ་ནི་དུས་ངེས་པ་དང་། གྲངས་ངེས་པ་དང་། མཚན་མ་ཐོབ་པ་ཞེས་བྱ་བའི་བསྙེན་པ་རྣམ་པ་གསུམ་གང་ཡང་རུང་བ་ལ་སྦྱར་དགོས་སོ་ཞེས་ཤེས་པར་བྱའོ། །ཞེས་གསུངས་པ་ལྟར།

དུས་གྲངས་རྟགས་ཀྱི་བསྙེན་པའི་ཚད་དུ་མ་འཁྱོལ་ཞིང་ཡིད་བཟླ༷ས་དང་ངག་བརྗོ༷ད་ཀྱི་བཟླས་པའི་གྲང༷ས་ཀ་ཉུང༷་དྲགས་པ་དང་། བཟླས་པའི་སྒྲ་མ་ཐོན་པར་སྒྲའི་གྲྭ༷་ཆ༷ག་པ་དང་། སྔགས་མ་དག་པར་ཟུར༷་ཉམ༷ས་པ༷འི་དབང་གིས༷་ལྷ་འགྲུབ་པའི་ནུས་པ་ཏིང་ངེ་འཛིན་དང་སྔགས་ཀྱི་སྒོ་ནས་མ་ཐོན་པས་བདུད་བཞིའི་གཡུལ་ལས་རྒྱལ་བའི་ཕྱོགས་བཅུའི་རྒྱལ༷་བ༷་རྒྱ༷་མཚོ༷་ལྟ་བུ་སྤྱི་དང་། ལྷག་པར་དུ་གནས་སྐབས་གང་བསྒོམ་པ་རྒྱལ་བ་ཞི་ཁྲོའི༷་ལྷ་ཚོགས་རྣམས་ཀྱི་ཐུག༷ས་ད༷ང་ཅི༷་ཞིག་འག༷ལ་བ༷་ཡི་ལས་བགྱིས་ཡོད་པ་དེ་དག་དུས་ད་ལྟ་ཉིད་དུ་རྒྱལ༷་བ༷་ཞི༷་ཁྲོ༷་དམ་པ་རིགས་བརྒྱའི༷་ལྷ་ཚོགས་རྣམས་ཀྱི་སྤྱ༷ན་སྔ༷ར་མི་གསང་མི་སྦེད་པར་འགྱོད་པས་མཐོ༷ལ་ལོ༷་བཤ༷གས་སོ།།

ཐུག༷ས་བརྩེ་བ་སྙིང་རྗེ༷་ཆེན་པོ་དང་ལྡན་པའམ་མང༷འ་བ༷་ཁྱེད༷་ཅག་ལ༷་གནོང་པས་བཟོ༷ད་པར༷་གསོལ༷་ལོ། །དེ་ལྟར་མ་རིག་མ་རྟོགས་པའི་དབང་གིས་བྱུང་བའི་ཉེས་ལྟུང་ཅི་བྱུང་བཤགས་པ་དེའང་དག་པ་ཡེ༷་ཤེས༷་པའི་ལྷ༷་ཚོ༷གས་རྣམས་ཀྱི་སྤྱ༷ན་སྔ༷ར་མི་འཆབ་པར་མཐོ༷ལ་ལོ༷་བཤ༷གས་སོ། །ཞེས་པ་སྟེ། དག་པ་ཡེ་ཤེས་པའི་ཚོགས་ནི་བཤགས་ཡུལ་ཡིན་གྱི་འཇིག་རྟེན་པའི་དྲེགས་པ་རང་རྒྱུད་པར་གྱུར་པའི་མི་མངོན་པ་ལྷ་ཀླུའི་ཚོགས་ཅི་མཆིས་པ་རྣམས་ནི་བཤགས་ཡུལ་མ་ཡིན་པར་བསྟན་པའོ།།

འདིར་རྒྱལ་བ་ཞི་ཁྲོའི་ལྷ་ཚོགས་རྣམས་ཀྱི་ཐུགས་དང་འགལ་བ་ཞེས་དང་། དེ་དག་ལ་བཟོད་པར་གསོལ་ཞེས་ཡེ་ཤེས་པའི་ལྷ་རྣམས་ཕོག་ཐུག་ཆེན་པོར་སོང་ཡོད་པ་སྐད་དུ་བསྟན་པ་ནི། ཉེས་ལྟུང་དེ་དག་རྒྱུད་ལ་མཆིས་ན་ཡེ་ཤེས་པའི་དཀྱིལ་འཁོར་འགྲུབ་པའི་གེགས་དང་སྒྲིབ་པར་གྱུར་ཅིང་། ལམ་ཟབ་མོ་བསྐྱེད་རྫོགས་ཀྱི་དོན་བསྒྲུབ་པའི་འགལ་རྐྱེན་ཡིན་པ་དང་། ཉེས་ལྟུང་གིས་རྒྱུད་བསྡམས་པ་དང་སྟོང་པ་ཉིད་དང་ལམ་ཟབ་མོའི་དོན་རྟོགས་པ་མངའ་བ་གཉིས་འགལ་བའི་དབང་གིས་དེ་སྐད་དུ་བརྗོད་པ་དང་། གཞན་ཡང་རྒྱལ་བ་ཞི་ཁྲོའི་ལྷ་ཚོགས་རྣམས་བཤགས་པ་བྱ་བའི་ཡུལ་དང་དཔང་པོ་ཡིན་པའི་དབང་གིས་དེ་ལྟར་བརྗོད་པ་ལས་རྒྱལ་བ་ཞི་ཁྲོའི་ལྷ་ཚོགས་རྣམས་ཐུགས་ཁྲོས་ནས་བཤགས་པ་པོ་ལ་སྡང་སེམས་དང་འཁོན་དུ་སོང་བས་འཇིག་རྟེན་པ་རྣམས་ལྟར་ངོ་ལོན་གྱི་བཤགས་པ་ལྟ་བུར་གོ་ན་ནི་གཞུང་དོན་གཏན་ནས་མ་ཡིན་ནོ།།

གསང་བ་སྙིང་པོ་ལས། མ་རྟོགས་ལེ་ལོ་སྙོམས་ལས་བྱས། །དོན་མ་གྲུབ་པར་ངན་སོང་འགྲོ། །ཞེས་གསུངས་པ་ལྟར། ལེ་ལོ་དང་བཏང་སྙོམས་ཀྱི་དབང་དུ་ཤོར་ནས་ལམ་ཟབ་མོ་ཉམས་སུ་ལེན་པ་ལ་བརྩོན་འགྲུས་ཀྱི་འབ༷ད་པ་དང་རྩོལ༷་བ་ཆུང༷་བ༷ས་བླ་མ་རྡོ་རྗེ་སློབ༷་དཔོ༷ན་གྱི་ཐུགས་ལ་བརྣགས་པའི་ཐོས་བསམ་དང་། ཁྱད་པར་དུ་སྒྲུབ་པ་ལ་ནན་ཏན་མ་ནུས་པས་དེའི་ཐུག༷ས་མ༷་མཉེས༷་པ་སྟེ་ཐུགས་མཉེས་པའི་བྱ་བ་བསྒྲུབ་མ་ནུས་པ་དང་། རྡོ་རྗེའི་མཆེད་གྲོགས་རྣམས་ལ་དགའ་བ་དང་དུང་པའི་གདུང༷་སེམ༷ས་ཆུང༷་བ༷འི་དབང་གིས་ཉམས་ལེན་སྒྲུབ་པའི་མཆོད་པ་དང་། ཟང་ཟིང་གི་འབུལ་བ་དང་། བཀུར་བསྟིས་ཞབས་ཏོག་ལེགས་པོོ་མ་གྲུབ་པས༷་གསང་སྔགས་རྡོ་རྗེ་ཐེག་པའི་དབང་དང་གདམས་པ་ཟབ་མོ་མཉམ་དུ་མནོས་པའི་ཕོ་རྡོ་རྗེའི་མཆེ༷ད་པོ་དང་། མོ་རྡོ་རྗེའི་ལྕ༷མ་མོ་རྣམས་ཀྱི་ཐུག༷ས་དགྱེས་པར་བྱེད་པའི་ལས་མེད་པའི་དབང་གིས་ཐུགས་མ༷་ཟིན༷་པ་དང་། ཇི་སྐད་དུ་དཔལ་གསང་བ་གཅོད་པའི་རྒྱུད་ལས། མན་ངག་གཞན་དུ་སྤེལ་ཞིང་འཕྱར་ལ་དགའ། །འདོད་ཆགས་སྤྱོད་ཕྱིར་སྦས་པའི་རིམ་པ་ནོད། །ཅེས་དང་། ཡེ་ཤེས་རྔམ་གློག་ལས། དད་དང་མི་ལྡན་བརྩོན་འགྲུས་ཆུང་། །བློ་ཞན་ངེས་མེད་འཕྱར་ལ་གཡེང་། །བླ་མ་སྤུན་ལ་སྲི་ཞུ་ཆུང་། །དེ་ནི་དབང་གི་སྣོད་མ་ཡིན། །ཞེས་དང་། ཀུན་འདུས་རིག་པའི་མདོ་ལས། ཕྱི་ནང་ཅན་དང་གནོད་བྱེད་དང་། །འདོད་མྱོས་བྱིང་རྨུགས་བརྐམ་པ་དང་། །དད་མེད་རྩ་ཉམས་འཕྱར་གཡེང་ཅན། །མཁས་པས་བསྒྲིམས་ཏེ་སྤང་བར་བྱའོ། །ཞེས་གསུངས་པ་ལྟར། རྙེད་བདེ་གྲགས་བསྟོད་སོགས་འདོད་ཡོན་ལྔ་སྤྱི་དང་ཁྱད་པར་དུ་བུད་མེད་ལ་འདོད་པས་སེམས་འཕྱར༷་བའམ་འཕྱར་གཡེང་ལ༷་ཤོར་ནས་གཡེམ༷་པ༷་ལ་དགའ་བའི་དབང་གིས༷་སྣོད་ཀྱི་ཁྱད་པར་ལ་མ་བརྟགས་པར་ཕྱུག་པོ་དང་། རིགས་མཐོ་བ་དང་། གཟུགས་མཛེས་པའི་བུད་མེད་དག་ལ་གསང་སྔགས་ཀྱི་དབང་དང་མན་ངག་ཟབ་མོ་བྱིན་པའམ། རང་ཉིད་ལ་གསང་སྔགས་ཀྱི་ལམ་ཟབ་མོ་ཉམས་སུ་ལེན་པའི་བློ་ནུས་མེད་པ་དང་། ཕ་རོལ་པོ་ལ་སྣོད་ཀྱི་ཁྱད་པར་མི་ལྡན་ནའང་བུད་མེད་ལ་འཕྱར་ཞིང་གཡེམ་ལ་དགའ་བའི་དབང་གིས་འོལ་ཚོད་ཀྱིས་སྔགས་རྒྱུད་ལས་བཤད་པའི་ཕོ་ཉའི་ལམ་སོགས་གསང་བ་ཟབ་མོ་རྣམས་ལག་ཏུ་བླངས་པའི་སྒོ་ནས་གསང་སྔགས་ཀྱི་གདམ༷ས་ང༷ག་སྣོད་མིན་གཞ༷ན་གྱི་ལག་ལ༷་ཤོར༷་བ་དང་། རྩ༷་བ༷་སྐུ༷་གསུང༷་ཐུག༷ས་ཀྱི༷་ད༷མ་ཚི༷ག་དང་། ཡན་ལག་གི་དམ་ཚིག་ས་མ་ཡ་འབུམ་སྡེའི་ཚོགས་ལ༷་ལྟུང་བར་ཤེས་ཤིང་བྱུང་བ་ཚོར༷་བ་ད༷ང་། རྨོངས་པའི་དབང་གིས་མ་ཤེས་པའམ་མ༷་ཚོར༷་བ་དང་། བདག་འཛིན་མ༷་རི༷ག་པ་དང་དེའི་འབྲས་བུ་ཉོན་མོངས་པའི་དབ༷ང་གིས༷་དབང་མེད་དུ་ཉེས་པ་བསགས་པ་རྣམས་དང་ནི༷། གཞན་ཡང་ཞི་ཁྲོའི་དཀྱིལ་འཁོར་སྒྲུབ་པ་ལ་ཆོ་གའི་ཚིག་འདོན་པ་དང་དོན་སྒོམ་པ་དང་། སྔགས་བཟླ་བ་དང་། དམ་རྫས་དང་མཆོད་རྫས་རྣམས་ལ་ལྷ༷ག་པ་དང་། མ་ཚང་བར་ཆ༷ད་པ་དང་། གཞུང་དོན་དང་འག༷ལ་བ་དང་། ལག་ལེན་དང་ཉམས་ལེན་ལ་འཁྲུལ༷་བར་གྱུར༷་པ༷་ཅི༷་མཆི༷ས་པ༷་ཐམས་ཅད་རྒྱལ༷་བ༷་ཞི༷་ཁྲོ༷་དམ་པ་རིགས་བརྒྱའི༷་ལྷ་ཚོགས་རྣམས་ཀྱི་སྤྱ༷ན་སྔ༷ར་གནོང་ཞིང་འགྱོད་པས་མཐོ༷ལ་ལོ༷་བཤ༷གས་སོ། །ཐུག༷ས་བརྩེ་བ་སྙིང་རྗེ༷་ཆེན་པོ་མང༷འ་བ༷་ཁྱེད༷་ཅག་ལ༷་གནོང་པས་བཟོ༷ད་པ༷ར་གསོ༷ལ་ལོ། །ཕྱོགས་བཅུའི་ཞིང་རབ་འབྱམས་ན་བཞུགས་པའི་རྒྱལ༷་བ༷་རྒྱ༷་མཚོ༷འི་ཚོག༷ས་ཀྱི་སྤྱན་སྔ་ལ༷་མཐོལ༷་ཞིང༷་བཤ༷གས་སོ། །དེ་ལྟར་མི་གསང་བར་མཐོ༷ལ་ཞིང༷་ཕྱིན་ཆད་མི་བགྱིད་པར་སྡོམ་པས་བཤག༷ས་པ་བྱས་སོ༷། །ད་ནི་ཉེས་ལྟུང་དེ་དག་བྱང༷་ཞིང༷་ད༷ག་པར་གྱུར༷་ཅི༷ག། ལྟུང་པ་དག་པའི་དབང་གིས་རྟོགས་པ་ཟབ་མོ་རང་རྒྱུད་ལ་མྱུར་དུ་སྐྱེས་ཏེ་དབྱིངས་དང་ཡེ་ཤེས་གཉིས༷་སུ་མེ༷ད་པའི་གནས་ལུགས་དོ༷ན་གྱི༷་ཚང༷ས་པ༷་ཆེན་པོའི་གོ་འཕང་བདག་ལ་བསྩ༷ལ་ཏུ༷་གསོ༷ལ་ལོ་ཞེས་ཉེས་ལྟུང་བཤགས་ཤིང་འདོད་དོན་མྱུར་དུ་འགྲུབ་པར་བྱིན་གྱིས་བརླབ་པར་གསོལ་བ་བཏབ་པའོ། །ས༷་མ༷་ཡ༷་ནི་དམ་ཚིག་སྟེ། དམ་ཚིག་ལས་མི་འདའ་བའི་རྒྱ་སྨྲས་པའོ།། །།

ཆོས་ཉིད་ཞི་བའི་ཀློང་བཤགས་བསྟན་པ།

༈ རྩ་བའི་ས་བཅད་གཉིས་པ་ཞི་བའི་ཀློང་བཤགས་ལ་ནི། ཆོས་ཉིད་ཞི་བའི་ཀློང་བཤགས་དང་། ཞི་བའི་ལྷའི་གནོང་བཤགས་དང་། ཞི་བའི་ལྷ་ལ་འགྱོད་བཤགས་དང་གསུམ་ལས།

དང་པོ་ལ་ནི། ཀུན་བཟང་ཡབ་ཡུམ་གྱི་ཀློང་བཤགས་དང་། རྒྱལ་བ་རིགས་ལྔ་དང་། རིགས་ཀྱི་ཡུམ་ལྔ་དང་། སེམས་དཔའ་བརྒྱད་དང་། སེམས་མ་བརྒྱད་དང་། ཐུབ་པ་དྲུག་དང་། སྒོ་བ་བཞི་དང་། སྒོ་མ་བཞི་ཡི་ཀློང་བཤགས་བཅས་བརྒྱད་ལས། དང་པོ་ནི། ཨོཾ་ཀུན་བཟང་ཡབ་ཡུམ་གསན་ཅིང་དགོངས་སུ་གསོལ༔ ཡིད་དང་ཆོས་ནི་ཡེ་ནས་མངོན་སངས་རྒྱས༔ ཀུན་བཟང་ཡབ་ཡུམ་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ ཀུན་བཟང་ཡབ་ཡུམ་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། དེ་ཡང་མདོ་སྡེ་ལས་བརྒྱ་བ་ལས། ཨོཾ་ཞེས་བྱ་བ་དང་། བྷོ་ཞེས་བྱ་བ་དང་། ཞེས་ཨོཾ་ཞེས་བྱ་བ་ནི་རིག་པའི་གནས་བཅོ་བརྒྱད་ཀྱི་ཡ་གྱལ་ཞིག་ཡིན་པར་གསུངས་པ་དང་། དེ་བཞིན་དུ་འདུལ་བ་ཕྲན་ཚེགས་ལས། ཨོཾ་ཞེས་བྱ་བ་དང་། བྷོ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། ཞེས་སོགས་གསུངས་པས། ཨོཾ༷་དེ་རྒྱ་གར་གྱི་གནའ་བོའི་ལས་ཐམས་ཅད་ཀྱི་ཐོག་མར་བཀྲ་ཤིས་པ་སྦྱིན་པའི་ཚུལ་གྱི་ཤིས་ཚིག་ཅིག་ཡིན་འདུག་ལ། འདིར་ནི་རྒྱུད་སྟོན་པ་པོས་ལུགས་སྲོལ་དེ་དང་བསྟུན་པའམ་སྲོལ་དེ་ཉིད་འདིར་བླངས་ནས་ནང་དོན་ལ་ནང་ཆོས་ཟབ་མོའི་དོན་ཅན་དུ་མཛད་དེ་ཐོག་མའི་ཤིས་པ་བརྗོད་པའི་གཏམ་དུ་བགྱིས་པ་སྟེ། སྐུ་ལྔ་ཡེ་ཤེས་ལྔ་འདུ་འབྲལ་མེད་པའི་དབྱིངས་རྣམ་པར་དག་པ་ཆོས་ཉིད་ཀུན་ཏུ་བཟང་པོའི་དོན་མཚོན་པ་དེས་ཤིས་པར་གྱུར་ཅིག་ཅེས་པའོ།།

ལས་བྱང་ཚོར་བ་རང་གྲོལ་ལས། ཀུན་ཏུ་བཟང་མོ་གསང་བའི་བྷ་ག་རུ༔ ཀུན་ཏུ་བཟང་པོ་ཟག་པ་མེད་པས་བདེ༔ རོལ་པ་ཡེ་ཤེས་རྒྱལ་བ་ཞི་ཁྲོའི་ཚོགས༔ ཡབ་ཡུམ་སྲས་དང་བཅས་ལ་ཕྱག་འཚལ་ལོ༔ ཞེས་གསུངས་པ་ལྟར། ཞི་བའི་ལྷ་བཞི་བཅུ་རྩ་གཉིས་ཀྱི་འཕྲོ་གཞི་ཡབ་ཀུན་ཏུ་བཟང་པོ་སྐུ་མདོག་མཐིང་ག་ཕྱག་མཉམ་བཞག་དང་། ཡུམ་ཀུན་ཏུ་བཟང་མོ་སྐུ་མདོག་དཀར་མོ་ཡབ་ཀྱི་པང་དུ་འཁྲིལ་བ་ཅན་གྱི་ཀུན༷་བཟ༷ང་ཡ༷བ་ཡུམ༷་གཉིས་ཀྱིས་ཉམས་ཆག་བཤགས་པ་པོ་བདག་ལ་སྙན་གྱིས་གས༷ན་ཅིང༷་ཐུགས་ཀྱིས་དགོང༷ས་པས་གཟིགས་སུ༷་གསོ༷ལ་ཞེས་དང་པོ་བཤགས་ཡུལ་གྱི་ལྷ་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

ཡི༷ད་ཅེས་པ་ནི་རང་ཡུལ་དང་ལྡན་པའི་ཡུལ་ཅན་དང༷་། ཆོས༷་ཞེས་པ་ནི༷་རང་གི་ངོ་བོ་འཛིན་པའི་ཆོས་ཏེ་ཡུལ་ལ་གོ་དགོས་ཤིང་། གཞི་གྲུབ་ན་ཡུལ་དང་ཡུལ་ཅན་གྱི་ཆོས་གང་རུང་གིས་ཁྱབ་པས། འདིར་ཆོས་ཐམས་ཅད་ལ་གོ། དེས་ན་དོན་དམ་པའི་དབང་དུ་ན་ཡུལ་དང་ཡུལ་ཅན་གྱིས་བསྡུས་པའི་ཆོས་ཐམས་ཅད་འཛིན་པ་ཡིད་རྣམ་པར་དག་པ་རང་བྱུང་དྲན་རིག་ཟག་མེད་ཀྱི་ཡེ་ཤེས་རྟོགས་བྱེད་དཀྱིལ་འཁོར་ཀུན་གྱི་བྱེད་པ་པོ་ཡབ་ཀུན་ཏུ་བཟང་པོ་དང་། གཟུང་བ་ཡུལ་གྱིས་བསྡུས་པའི་སྣང་བའི་ཆོས་ཐམས་ཅད་རྣམ་པར་དག་པ་མཚན་མའི་སྐྱོན་དང་བྲལ་བའི་རྟོགས་བྱ་ཆོས་ཀྱི་དབྱིངས་ཟག་པ་མེད་པ་དཀྱིལ་འཁོར་ཐམས་ཅད་སྐྱེད་པའི་གཞི་ཡུམ་ཀུན་ཏུ་བཟང་མོ་ཞེས་དམིགས་པ་དང་བྲལ་བའི་དབྱིངས་དང་ཡེ་ཤེས་གཉིས་སུ་མེད་པ་ཆོས་ཉིད་ཀ་དག་བསམ་བརྗོད་དང་བྲལ་བ་ཡེ༷་ན༷ས་མངོ༷ན་པར་སང༷ས་རྒྱས༷་པའི་རང་བཞིན་ཅན་ཡིན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་ཉི་ཤུ་པ་ལས། ཡིད་དང་ཆོས་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་དམིགས་པའོ། །ཞེས་དང་། སྙིང་རྗེ་ཆེན་པོ་ངེས་པར་བསྟན་པའི་མདོ་ལས། ཡིད་དང་ཆོས་ཀྱི་ཁམས་ཀྱང་རྟག་ཏུ་སྟོང་པར་མཁྱེན། །ཞེས་དང་། དྲི་མ་མེད་པར་གྲགས་པར་བསྟན་པའི་མདོ་ལས། བྱང་ཆུབ་ནི་ཡིད་དང་ཆོས་མེད་པ་གཉིས་སུ་མེད་པའོ། །ཞེས་དང་། ཆོ་འཕྲུལ་ཆེན་པོ་བསྟན་པའི་མདོ་ལས། དེ་བཞིན་གཤེགས་པ་ནི་ཡིད་དང་ཆོས་ཀྱི་ཡུལ་མ་ཡིན་ཞིང་ཆོས་ཀྱི་དབྱིངས་སུ་ཡང་དག་པར་འདུ་བ་ཡིན་པས་ཞེས་དང་། བདེ་མཆོག་འབྱུང་བའི་རྒྱུད་ལས། ཡིད་དང་ཆོས་དང་ཡིད་རྣམ་ཤེས། །སྙིང་པོ་ཉིད་དུ་རྣམ་པར་དག །ཅེས་གསུངས་པའི་ཕྱིར་རོ།།

དེས་ན་དེ་ལྟར་འཛིན་པ་ཡིད་རྣམ་པར་དག་པའི་ངོ་བོ་ལ་ཆོས་སྐུ་ཀུན་ཏུ་བཟང་པོ་དང་། གཟུང་བ་ཡུལ་ཆོས་རྣམ་པར་དག་པའི་ཆོས་ཉིད་ལ་ཡུམ་ཀུན་ཏུ་བཟང་མོ་ཞེས་བརྡ་བཏགས་པ་ཙམ་ལས་དོན་དམ་པར་ཞལ་ཕྱག་མཚན་མའི་རྣམ་པ་ཅན་གྱི་ཀུན་བཟང་ཡབ་ཡུམ་ཟེར་བ་ཞིག་མ་དམིགས་ཏེ། གཞུང་འདིའི་བཤད་བྱ་རྩ་བའི་རྒྱུད་དྲི་མེད་བཤགས་པའི་རྒྱུད་ཀྱི་རྒྱལ་པོ་ལས། ཨ་ལ་ལ་ཧོ། ཆོས་རྣམས་རྣམ་དག་ཡེ་ནས་ལྷུན་གྲུབ་པས། །བྱ་བ་བྱེད་དང་ཡིད་ཆོས་རྣམ་པར་དག །ནམ་མཁའི་མཐའ་བཞིན་ཀུན་ལ་སྙོམས་མཛད་པ། །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཞེས་དང་། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་ལས། ཡིད་ཤེས་རྣམ་དག་ཀུན་ཏུ་བཟང་པོ་ཡབ༔ ཆོས་ཁམས་རྣམ་དག་ཀུན་ཏུ་བཟང་མོ་ཡུམ༔ དུས་གསུམ་སངས་རྒྱས་ཀུན་གྱི་སྤྱི་མྱེས་ལྷ༔ ཀུན་བཟང་ཡབ་ཡུམ་གཉིས་ཕྱག་འཚལ་ལོ༔ ཞེས་དང་། གསང་བ་སྙིང་པོ་ཁོ་ན་ཉིད་ངེས་པའི་རྒྱུད་ལས། ཆོས་དབྱིངས་ཀུན་ཏུ་བཟང་པོ་དང་། །ཀུན་ཏུ་བཟང་མོའི་མཁའ་དབྱིངས་ལ། །འགྱུར་བ་མེད་པའི་ཚུལ་གྱིས་གཟིགས། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཡིད་ཆོས་བཟང་པོ་བཟང་མོ་ཉིད། །ཅེས་དང་། བདེ་ཆེན་ཡིད་ཆོས་རང་རིག་ཉིད། །ཀུན་བཟང་རོ་ཡི་བདེ་བ་ཉིད། །ཉོན་མོངས་དྲུག་གི་ཡུལ་རྣམས་སུ། །སྤྲུལ་པའི་ཐིག་ལེར་རང་ཤར་བའོ། ། ཞེས་དང་། ཡེ་ཤེས་རྔམ་གློག་ལས། སྲིད་གསུམ་སེམས་ཅན་ཐམས་ཅད་ཀྱི། །ཆོས་རྣམས་ཀུན་ལ་ངེས་སྤྱོད་པའི། །ཡིད་ཀྱི་རྣམ་ཤེས་ཞེས་སུ་གྲགས། །རྟོགས་པའི་ཡེེ་ཤེས་ཡིན་པའི་ཕྱིར། །ཀུན་ཏུ་བཟང་པོའི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །འདུས་བྱས་མ་བྱས་ཆོས་རྣམས་ཀུན། །ཆོས་ཀྱི་སྐྱེད་བྱེད་ཡིན་པར་གྲགས། །རྣམ་པར་ཤེས་པའི་ཡུལ་ཡིན་པས། །ཀུན་ཏུ་བཟང་མོའི་རང་བཞིན་ཡིན། །ཞེས་དང་། དཔལ་མཆོག་དང་པོའི་སྔགས་ཀྱི་རྟོག་པའི་དུམ་བུ་ལས། ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའི་ཆོ་ག་མཆོག །ཅེས་གསུངས་པའི་ཕྱིར་རོ།།

ཡང་ཀུན་ཏུ་བཟང་པོ་ལའང་རྫོགས་པ་ཆེན་པོའི་གཞུང་སོགས་ནས་རང་བཞིན་ཀུན་ཏུ་བཟང་པོའམ་གཞི་ཀུན་ཏུ་བཟང་པོ་དང་། རྒྱན་ཀུན་ཏུ་བཟང་པོ་དང་། སྟོན་པ་ཀུན་ཏུ་བཟང་པོ་དང་། རིག་པ་ཀུན་ཏུ་བཟང་པོ་དང་། རྟོགས་པ་ཀུན་ཏུ་བཟང་པོ་དང་ཀུན་བཟང་ལྔ་གསུངས་ཏེ། ཀུན་བཟང་ཐུགས་ཀྱི་མེ་ལོང་ལས། ཆོས་ཐམས་ཅད་ཀུན་ཏུ་བཟང་པོ་ལྔའི་རང་བཞིན་དུ་ཤེས་པར་བྱའོ། །གང་ཞེ་ན་འདི་ལྟ་སྟེ། རང་བཞིན་ཀུན་ཏུ་བཟང་པོ་དང་། རྒྱན་ཀུན་ཏུ་བཟང་པོ་དང་། སྟོན་པ་ཀུན་ཏུ་བཟང་པོ་དང་། རིག་པ་ཀུན་ཏུ་བཟང་པོ་དང་། རྟོགས་པ་ཀུན་ཏུ་བཟང་པོའོ། །ཞེས་གསུངས་པའི་ཕྱིར། དང་པོ་རང་བཞིན་ཀུན་ཏུ་བཟང་པོ་ནི། ཡེ་ཤེས་གྲུབ་པ་ལས། ཀུན་ཏུ་བཟང་པོ་ཞེས་བཤད་ཅིང་། །ཕྱག་རྒྱ་ཆེན་པོ་ཞེས་ཀྱང་བྱ། །མེ་ལོང་ཡེ་ཤེས་ཞེས་བྱ་སྟེ། །འདི་ནི་ཆོས་སྐུར་ཤེས་པར་བྱ། །ཞེས་དང་། དམ་ཚིག་གསུམ་བཀོད་པའི་རྒྱུད་ལས། ཨེ་མའོ་བདག་ནི་རང་བྱུང་བའི། །ཀུན་ཏུ་བཟང་པོ་སེམས་དཔའ་བརྟན། །དེ་ནི་བརྟན་ཕྱིར་ལུས་མིན་ཡང་། །སེམས་དཔའི་ལས་སུ་གྱུར་པ་ཡིན། །ཞེས་དང་། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ལས། ཀུན་ཏུ་བཟང་པོ་ཀུན་གྱི་བདག །སངས་རྒྱས་ཐམས་ཅད་ཉིད་སྐྱེས་འདི། །ཞེས་གསུངས་པ་ལྟར་ཆོས་ཐམས་ཅད་ཀྱི་རང་བཞིན་སྐྱེ་འགགས་གནས་གསུམ་དང་བྲལ་བའི་སྤྲོས་པ་མེད་པའི་ཆོས་ཉིད་དེ་ལ་གཞི་ཀུན་ཏུ་བཟང་པོ་ཞེས་བྱ་བ་ཡིན་ནོ།།

གཉིས་པ་རྒྱན་ཀུན་ཏུ་བཟང་པོ་ནི། རྫོགས་པ་ཆེན་པོ་ཀུན་བྱེད་རྒྱལ་པོ་ལས། ཀུན་བཟང་དགོངས་པ་འདུས་པ་ནི། །ཇི་ལྟར་སྣང་བ་ཐམས་ཅད་ཀུན། །བཟང་ངན་བླང་དོར་མེད་པ་རུ། །ཀུན་བྱེད་མངོན་དུ་ཕྱུང་བར་འདུས། །ཞེས་དང་། རྣལ་འབྱོར་གྲུབ་པའི་རྒྱུད་ལུང་ཀུན་འདུས་རིག་པ་ལས། ཀུན་བཟང་སེམས་ཀྱི་ཆོས་ཉིད་ལས། །ཀུན་གཞི་མ་འདྲེས་ཡོངས་རྫོགས་ཆོས། །ཞེས་གསུངས་པ་ལྟར། ཆོས་ཉིད་ཀྱི་དབྱིངས་ལས་ཆོས་ཅན་རྒྱན་གྱི་རོལ་བར་འགགས་མེད་དུ་ཤར་བའི་སྒྱུ་མ་ལྟ་བུར་སྣང་བའི་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་སྣང་བ་དེའོ།།

གསུམ་པ་སྟོན་པ་ཀུན་ཏུ་བཟང་པོ་ཞེས་པ་ནི། དེ་ཁོ་ན་ཉིད་བསྡུས་པའི་རྒྱུད་ལས། བཅོམ་ལྡན་འདས་ཀུན་ཏུ་བཟང་པོ་དེ་ཉིད་ཟླ་བའི་དཀྱིལ་འཁོར་དུ་གྱུར་ནས་བྱུང་སྟེ། ཞེས་དང་། དམ་ཚིག་གསུམ་བཀོད་པའི་རྒྱུད་ལས། དེ་བཞིན་གཤེགས་པའི་ཀུན་ཏུ་བཟང་པོ་ཡེ་ཤེས་ཀྱི་སྐུ་ཡོངས་སུ་རྫོགས་པ་ཞེས་དང་། གསང་བ་ནོར་བུའི་ཐིག་ལེའི་རྒྱུད་ལས། དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་བཅོམ་ལྡན་འདས་ཀྱི་ཐུགས་ཀ་ནས་འཐོན་ནས་ཞེས་དང་། བློ་གྲོས་མི་ཟད་པའི་མདོ་ལས། དེ་ནས་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་བཟང་པོས་སྐུ་ལས་འདི་ལྟ་བུའི་འོད་ཕྱུང་སྟེ། ཞེས་དང་། རྣམ་འགྲེལ་ལས། རྟོག་པའི་དྲྭ་བ་རྣམ་བསལ་ཞིང་། །ཟབ་དང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ། །ཞེས་གསུངས་པ་ལྟར་གྱི་སངས་རྒྱས་ཐམས་ཅད་ཀྱི་ཆོས་སྐུ་དང་ལོངས་སྐུའི་ངོ་བོ་འོག་མིན་སྟུག་པོ་བཀོད་པ་ན་བཞུགས་ཏེ་སྤྲུལ་པའི་སེམས་ཅན་གྱི་དོན་འཁོར་བ་ཇི་སྲིད་གནས་པའི་བར་དུ་མཛད་པའི་སངས་རྒྱས་ཀུན་ཏུ་བཟང་པོ་དེའོ།།

བཞི་བ་རིག་པ་ཀུན་ཏུ་བཟང་པོ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། རིག་པའི་རྒྱལ་པོ་ཀུན་དབྱེར་མེད། །ཀུན་གཞི་རྡོ་རྗེ་མི་ཕྱེད་པ། །ཀུན་ཏུ་བཟང་པོར་དེ་བཤད་དོ། །ཞེས་དང་། གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ལས། ཡུམ་ནི་གཉིས་མེད་ཆོས་ཀྱི་དབྱིངས། །ཀུན་བཟང་མཉམ་བཞག་ཡེ་ཤེས་འཕྲོ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པའི་མདོའམ་རྒྱུད་དགོངས་འདུས་ལས། ཇི་བཞིན་པ་ཡི་དེ་བཞིན་ཉིད། །ཐམས་ཅད་འབྱུང་བའི་མ་ཡིན་པས། །ཀུན་བཟང་ཤེས་རབ་ཕ་རོལ་ཕྱིན། །སེམས་ཅན་སངས་རྒྱས་ཀུན་གྱི་གནས། །ཞེས་དང་། གསང་བ་རྒྱན་གྱི་བཀོད་པའི་རྒྱུད་ལས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཡེ་ཤེས་ཀུན་ཏུ་བཟང་པོ་དང་། ཞེས་གསུངས་པ་ལྟར། གནས་ལུགས་རང་བྱུང་གི་ཡེ་ཤེས་གཞི་བདེ་གཤེགས་སྙིང་པོ་གཉུག་མ་དོན་དམ་པ་འབྲས་ཆོས་ཀྱི་ཡོན་ཏན་ཡེ་རྫོགས་སུ་གནས་པའི་རིག་པའི་ཆོས་ཉིད་ལ་གོ་བ་ཡིན་ནོ། །དེས་ན་དང་པོ་ནི་སྟོང་པ་ཀ་དག་གི་ཆ་ནས་དང་། འདི་ནི་སྣང་བ་ལྷུན་གྲུབ་ཀྱི་ཆ་ནས་བཞག་པ་ཡིན་ནོ།།

ལྔ་བ་རྟོགས་པ་ཀུན་ཏུ་བཟང་པོ་ནི། གསང་བའི་སྙིང་པོའི་རྒྱུད་ལས། དཀྱིལ་འཁོར་བསམ་ཡས་ཡེ་ཤེས་རོལ། །འཇིགས་མེད་ཀུན་བཟང་ཕྱག་རྒྱ་མཆོག །ཅེས་དང་། ཀུན་བྱེད་རྒྱལ་པོ་ལས། རྡོ་རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་ཆོས་ཀྱི་དབྱིངས། །རྣམ་དག་ལམ་ཆེན་ཀུན་སྒྲོལ་ཕྱིར། །མི་སྐྱེ་མི་འགགས་ཅིར་མི་དགོངས། །ཞེས་གསུངས་པ་ལྟར། ཆོས་ཐམས་ཅད་ཀྱི་གནས་ལུགས་བསམ་བརྗོད་དང་བྲལ་བའི་དོན་ཇི་བཞིན་དུ་རྟོགས་པའི་ཡེ་ཤེས་སམ་ཐར་བ་སྒྲུབ་བྱེད་ཀྱི་ཟག་མེད་ལམ་གྱི་བདེན་པ་དེ་ཉིད་ལ་བྱ་ཞིང་། དེ་ལ་ལམ་ཀུན་ཏུ་བཟང་པོ་ཞེས་ཀྱང་བྱ་བ་ཡིན་ནོ།།

གཞན་ཡང་རྡོ་རྗེ་སྙིང་པོ་རྒྱན་གྱི་རྒྱུད་ལས། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་དང་། ཞེས་དང་། རྣམ་སྣང་མངོན་བྱང་ལས། ཀུན་ཏུ་བཟང་པོ་དང་། བྱམས་པ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ངན་སོང་སྤོང་བ་རྣམས་ཀྱིས་བྱིན་གྱིས་བརླབས་པས་སྤྱི་བོ་ནས་དབང་བསྐུར་རོ། །ཞེས་དང་། ལག་ན་རྡོ་རྗེ་དབང་བསྐུར་བའི་རྒྱུད་ལས། བཅོམ་ལྡན་འདས་ཤཱཀྱ་ཐུབ་པ་དེ་ཡང་བསྟན་པ་རྒྱུན་མི་འཆད་པའི་ཕྱིར། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོ་དང་། ཞེས་དང་། ཀུན་ཏུ་བཟང་པོའི་མཚན་བརྒྱ་རྩ་བརྒྱད་པ་ལས། བྱང་ཆུབ་སེམས་དཔའ་ཆེན་པོའི་མཆོག་འཕགས་པ་ཀུན་ཏུ་བཟང་པོ་ལ་མཚན་བརྒྱ་རྩ་བརྒྱད་བླ་ན་མེད་པའི་ཡོན་ཏན་གྱི་སྣང་བ་ཞེས་བྱ་བས་བསྟོད་པ། ཞེས་གསུངས་པ་དེ་ལྟར་ཀུན་བཟང་ལྔའི་ནང་དུ་མ་འདུས་པ་ས་བཅུའི་རྒྱུན་མཐའ་བའི་ཚུལ་དུ་སྤྲུལ་པའི་ཉེ་བའི་སྲས་ཆེན་བརྒྱད་ཀྱི་གྲས་ཀྱི་བྱང་ཆུབ་སེམས་དཔའ་ཀུན་ཏུ་བཟང་པོ་ཞེས་པའང་ཡོད་པ་ཀུན་གྱིས་ཤེས་སོ།།

གཞན་ཡང་ཆོས་སྐུ་ཀུན་ཏུ་བཟང་པོ་ཞེས་པ་ནི་སྐབས་དུ་མར་རྡོ་རྗེ་འཆང་དང་རྡོ་རྗེ་སེམས་དཔའ་ཉིད་དུ་གསུངས་པས། དོན་ལ་རྒྱུད་སོ་སོར་མཚན་གྱི་བསྟན་ཚུལ་ཙམ་ལས་རྡོ་རྗེ་འཆང་དང་། རྡོ་རྗེ་སེམས་དཔའ་དང་། ཀུན་ཏུ་བཟང་པོ་དང་། ཕྱག་ན་རྡོ་རྗེ་རྣམས་ངོ་བོ་གཅིག་ཡིན་ཏེ། གསང་བ་སྙིང་པོ་དེ་ཁོ་ཉིད་ངེས་པའི་བླ་མ་ཆེན་པོ་ལས། ཀུན་བཟང་རྡོ་རྗེ་སེམས་དཔའ་དང་། །དུས་གསུམ་རྒྱལ་བ་རྒྱ་མཚོ་རྣམས། །ཉག་གཅིག་ཡབ་ཏུ་ངེས་པར་རྫོགས། །ཞེས་དང་། རྡོ་རྗེ་གུར་གྱི་རྒྱུད་ལས། རྡོ་རྗེ་སེམས་དཔའ་དེ་ནས་རྡོ་རྗེ་ཅན། །རྣམ་པར་རྒྱལ་བ་ཕྱག་ན་རྡོ་རྗེ་དང་། །དཔེ་མེད་རོ་མཉམ་ཤིན་ཏུ་དགའ་བ་དང་། །དམ་པ་དང་པོ་བདེ་བ་ཆེན་པོའོ། །ཞེས་དང་། དཔལ་མཆོག་དང་པོའི་སྔགས་ཀྱི་རྟོག་པའི་དུམ་བུ་ལས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་ཆེ། །ཀུན་ཏུ་བཟང་པོ་ཁྱོད་ཡིན་ཏེ། །རྡོ་རྗེ་བསྙེམས་བདག་ཁྱབ་བདག་ཡིན། །སེམས་ཀྱི་སེམས་དཔའ་ཏིང་ངེ་འཛིན། །དེ་བཞིན་རྡོ་རྗེ་རྡོ་རྗེ་འཛིན། །ཀུན་མཆོག་དམ་ཚིག་དངོས་གྲུབ་ཅན། །རྡོ་རྗེ་སེམས་དཔའ་བདག་གྲུབ་མཛོད། །ཅེས་དང་། དེ་ཉིད་བསྡུས་པ་ལས། རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་ཕྱག་ན་རྡོ་རྗེ་ལའོ། །ཞེས་དང་། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ལས། འདི་ནི་དང་པོའི་སེམས་དཔའ་འདོད་པའི་བདག་པོ་འདོད་པའི་དབང་པོ་ཀུན་ཏུ་བཟང་པོ་རྡོ་རྗེ་སེམས་དཔའོ། །ཞེས་གསུངས་པའི་ཕྱིར་རོ།།

གཞན་ཡང་སྒྱུ་མ་བདེ་མཆོག་ལས། རྡོ་རྗེ་སེམས་དཔའ་སྒེག་པ་ལ། །དཔའ་ལ་དཔའ་བོ་དེ་བཞིན་གཤེགས། །རྡོ་རྗེ་འཛིན་པ་སྙིང་རྗེ་ལ། །རྒོད་པ་འཇིག་རྟེན་དབང་ཕྱུག་མཆོག །རྡོ་རྗེ་ཉི་མ་ཁྲོ་བ་ལ། །རྡོ་རྗེ་དྲག་པོ་འཇིགས་པ་ལ། །ཤཱཀྱ་ཐུབ་པ་མི་སྡུག་པ། །ངོ་མཚར་ལ་ནི་ཨ་ར་ལི། །རབ་ཏུ་ཞི་ལ་སངས་རྒྱས་རྟག །སྡུག་བསྔལ་ཐམས་ཅད་ཞི་བའི་ཕྱིར། །དངོས་པོ་ཀུན་གྱི་རང་བཞིན་གྱིས། །ཉེ་བར་གནས་ཤིང་བྱིན་གྱིས་རློབས། །ལྟ་བས་མི་ངོམས་པ་ཡི་གཟུགས། །ཐམས་ཅད་བདག་ཉིད་སྟོན་པར་མཛད། །ཅེས་དང་། རྡོ་རྗེ་གུར་གྱི་རྒྱུད་ལས། རྟག་པ་དང་ནི་གཏི་མུག་རྡོ་རྗེ་དང་། །རྣམ་པར་སྣང་མཛད་དང་ནི་ཐམས་ཅད་སྐྱོབ། །སྒྱུ་འཕྲུལ་དང་ནི་དེ་ནས་ཨོཾ་མཛད་དང་། །སྐུ་ཡི་རྡོ་རྗེ་རབ་ཏུ་གྲགས་པ་དང་། །ས་སྙིང་དང་ནི་གཏི་མུག་ཆེན་པོ་དང་། །གཤིན་རྗེའི་གཤེད་དང་ཐོ་བའི་དབང་ཕྱུག་དང་། །དེ་བཞིན་གཤེགས་དང་ཤཱཀྱ་ཐུབ་པ་དང་། །སངས་རྒྱས་ཞེས་བྱར་རབ་ཏུ་གྲགས་པའོ། །ཞེས་དང་། གཉིས་མེད་རྣམ་རྒྱལ་ལམ་རྡོ་རྗེ་དཔལ་མཆོག་དང་པོའི་བརྟག་པ་ལས། དེ་ནས་རྒྱལ་པོ་རྡོ་རྗེ་འཛིན། །དེ་ཉིད་ཀུན་ཏུ་སྤྲུལ་མཛད་པས། །རྡོ་རྗེ་སེམས་དཔའི་གཟུགས་སྦས་ནས། །ཞི་བའི་སྐུས་ནི་མི་འདུལ་བའི། །སེམས་ཅན་གདུག་པ་གདུལ་བའི་ཕྱིར། །རང་རིག་ཡེ་ཤེས་བྱང་ཆུབ་སེམས། །དྲག་པོ་ཁྲོ་བོའི་སྐུར་བསྟན་པས། །ཁྲོ་བོ་ཞེས་ནི་རྣམ་པར་བརྗོད། །གང་དུ་རྗེས་སུ་འཛིན་པ་ནི། །རྣམ་པར་བསྒྱུར་ཏེ་ཞི་བས་ན། །སླར་ཡང་ཞི་བ་དེ་བཞིན་གཤེགས། ཆོས་ཉིད་མཉམ་པར་འབྱུང་བའོ། །འདི་དག་གསང་བ་རྡོ་རྗེ་འཛིན། །སེམས་ཅན་དོན་དུ་ཐབས་སྟོན་མཛད། །ཤཱཀྱ་ཐུབ་པ་བཅོམ་ལྡན་འདས། །བདག་ཉིད་ཆེན་པོའི་བྱིན་བརླབས་ལས། །རྔ་བོ་ཆེ་དང་གཎྜཱི་དང་། །ཆོས་ཀྱི་དུང་ལས་གྲགས་པ་དང་། །སྣ་ཚོགས་རོལ་མོའི་སྒྲ་ལས་ནི། །གང་ཞིག་དམ་ཆོས་སྒྲ་བྱུང་བ། །འཕགས་པ་ཉན་ཐོས་རྣམས་དང་ནི། །བྱང་ཆུབ་སེམས་དཔའི་ཚོགས་ཀྱིས་ཀྱང་། །ཆོས་ཀྱི་འགྲོ་བ་གང་ཡིན་དང་། །དུས་དེར་བརྒྱུད་པའི་ཆོས་བསྟན་པ། །དེ་སྙེད་བདེ་གཤེགས་རྒྱལ་བ་ཡི། །དངོས་ཀྱི་བྱིན་བརླབ་རིག་པར་བྱ། །ཞེས་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྡོ་རྗེ་འཛིན་པའི་ངོ་བོ་ཉིད་དུ་གནས་ཏེ། དེ་བཞིན་གཤེགས་པ་སྣ་ཚོགས་བདག་ཉིད་དུ་གཅིག་པའི་སྐུའོ། །ཞེས་དང་། འཕྲིན་ལས་ཐམས་ཅད་འབྱུང་བ་འདུས་པའི་ཕྱི་མའི་རྒྱུད་ལས། དེ་ནས་བཅོམ་ལྡན་འདས་ཤཱཀྱ་ཐུབ་པ་ཁྲོས་པ་རྡོ་རྗེ་གཏུམ་པོ་སྤྲོས་པ་ནི། ཧཱུྃ། རལ་གྲི་ཞགས་པ་བསྣམས་པའི་མཆོག །སྐྲ་སེར་མཁྲང་ལ་གྲིམས་པའི་ལུས། །མ་རུངས་གཏུམ་པོ་ཆེར་འཁྲུགས་པ། །མདོག་ནག་མིག་ཡོན་སྤྲོ་བ་ཆེ། །ཞེས་གསུངས་པ་དང་། ཕྱག་ན་རྡོ་རྗེས་མཛད་པའི་རྡོ་རྗེ་འཆང་གི་བསྟོད་པ་ལས། དགེ་དང་མི་དགེའི་རྣམ་རྟོག་དང་། །ཡིད་ལ་བྱེད་དང་སེམས་པ་མེད། །རང་བཞིན་གྱིས་ནི་ནམ་མཁའི་ཚུལ། །རྡོ་རྗེ་སེམས་དཔའ་ཁྱོད་ཕྱག་འཚལ། །ཞེས་རྒྱུད་སྡེ་རྣམས་སུ་རྡོ་རྗེ་འཆང་དེ་རྡོ་རྗེ་སེམས་དཔའ་ཡིན་པར་གསལ་བར་བཤད་པ་དང་། སློབ་དཔོན་ཆེན་པོ་ཌྷཾ་ཀ་དཱ་ཤས་མཛད་པའི་ཀྱེའི་རྡོ་རྗེའི་འགྲེལ་བཤད་ཁ་སྦྱོར་ཤིན་ཏུ་དྲི་མ་མེད་པ་ལས། ས་བཅུའི་དབང་ཕྱུག་སངས་རྒྱས་དང་མགོན་པོ་རྡོ་རྗེ་འཆང་གཉིས་སོ་ཞེས་བརྗོད་བྱ་གཞན་གྱིས་མིན། ཐ་དད་པ་རྣམས་ཀྱིས་མིན་ཏེ་སངས་རྒྱས་དང་རྡོ་རྗེ་འཆང་གི་ཐ་དད་མེད་པ་ཉིད་ས་བཅུ་གཅིག་གོ །ཞེས་དང་། དེ་ལ་རྡོ་རྗེ་སེམས་དཔའ་ནི་རྡོ་རྗེ་འཆང་ངོ་། །ཞེས་གསུངས་པ་ལྟར། ཀུན་ཏུ་བཟང་པོ་དང་། རྡོ་རྗེ་འཆང་དང་། རྡོ་རྗེ་སེམས་དཔའ་དང་། ཕྱག་ན་རྡོ་རྗེ་རུ་བརྗོད་པ་རྣམས་ཀྱང་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཉིད་ཐེག་པ་ཆེ་ཆུང་དང་། མདོ་སྔགས་ཀྱི་གཞུང་སོ་སོར་མཚན་གྱིས་བསྟན་ཚུལ་མི་འདྲ་བ་ཙམ་དང་། དཔལ་མཁའ་འགྲོ་རྒྱ་མཚོའི་རྒྱུད་ཀྱི་དཀྱིལ་འཁོར་གྱི་འཁོར་ལོའི་སྒྲུབ་ཐབས་པདྨ་རཱ་གའི་གཏེར་ལས། ཤཱཀྱ་ཐུབ་པ་ནི་མཁའ་འགྲོ་རྒྱ་མཚོ་རང་ཉིད་ཡིན་པའི་ཕྱིར། བཞི་པོ་མ་གཏོགས་པའོ། །ཞེས་གསུངས་པ་ལྟར། སྔགས་ལས་ཀྱང་རྒྱུད་སྡེ་སོ་སོ་གསུངས་པའི་སྐབས་སུ་གང་སྐུར་བཞེངས་ཡུལ་གྱི་གཙོ་ལྷ་དང་སྟོན་པ་པོའི་རྣམ་འགྱུར་མི་འདྲ་བའི་དབང་གིས་མཚན་གྱི་རྣམ་གྲངས་མི་འདྲ་བ་ཙམ་ལས་དོན་ལ་ཤཱཀྱ་ཐུབ་པ་ཉིད་ལ་གོ་བ་ལས་གཞན་པའི་ཀུན་ཏུ་བཟང་པོ་དང་རྡོ་རྗེ་འཆང་སོགས་མེད་ལ། ཀུན་ཏུ་བཟང་པོ་དང་རྡོ་རྗེ་འཆང་སོགས་ལས་གཞན་པའི་ཤཱཀྱ་ཐུབ་པ་མེད་པ་འདི་ལུང་དང་རིགས་པ་བརྒྱ་ཕྲག་གིས་གྲུབ་པས་ཤཱཀྱ་ཐུབ་པ་དང་ཐ་དད་ཅིང་། ཤཱཀྱ་ཐུབ་པ་ལས་ལྷག་པའི་ཀུན་ཏུ་བཟང་པོ་དང་རྡོ་རྗེ་འཆང་ཡོད་པར་འདོད་པའི་བློ་ཕྱིན་ཅི་ལོག་གི་ཚེེར་མའི་ཚལ་དུ་གནས་འཆའ་ཞིང་རྨོངས་པའི་ཀླག་ཅོར་དབྱངས་སུ་གྱེར་བའི་ཝ་སྐྱེས་འདྲ་མཆིས་ཚེ་རྒོལ་བའི་དཀྱིལ་འཁོར་མངོན་སུམ་དུ་བཤམ་པར་བཟོད་དོ། །དེས་ན་དུ་མར་སྣང་ཞིང་དུ་མར་བརྗོོད་ཀྱང་གཅིག་ལས་མེད་ལ་གཅིག་པུ་ཉིད་དུ་གཟུང་བར་འདི་གནད་དམ་པའོ།།

ད་ནི་དཀྱུས་ལ་འཇུག་སྟེ། དེ་ལྟར་གོང་དུ་སྨོས་པ་ལྟར་ཡུལ་ཅན་ཡིད་ཀྱིས་བསྡུས་པའི་ཆོས་ཐམས་ཅད་ཡེ་གདོད་མ་ནས་རྣམ་པར་དག་ཅིང་ཅིར་ཡང་མ་གྲུབ་པ་ཆོས་ཉིད་སྤྲོས་པ་དང་བྲལ་བ་དབྱིངས་དང་ཡེ་ཤེས་གཉིས་སུ་མེད་པའི་སྣང་ཆ་རྣམ་པ་ཐམས་ཅད་མཁྱེན་པ་འོད་གསལ་བའི་ཡེ་ཤེས་ཡེ་ནས་འབྲས་བུའི་ངོ་བོར་མངོན་པར་རྫོགས་པར་སངས་རྒྱས་པའི་རང་བཞིན་ཅན་གང་ཡིན་པ་དེ་ལ་ཡབ་ཀུན་ཏུ་བཟང་པོ་དང་། ཡུལ་ཆོས་ཀྱིས་བསྡུས་པའི་ཆོས་ཐམས་ཅད་ཡེ་གདོད་མ་ནས་རྣམ་པར་དག་ཅིང་ཅིར་ཡང་མ་གྲུབ་པ་སྤྲོས་པ་དང་བྲལ་བའི་དབྱིངས་ལ་ཡེ་ནས་མངོན་པར་རྫོགས་པར་སངས་རྒྱས་པའི་སྒྲིབ་བྲལ་ངོ་བོ་ཉིད་སྐུའི་ཆོས་ཉིད་གང་ཡིན་པ་དེ་ལ་ཡུམ་ཀུན་ཏུ་བཟང་མོ་ཞེས་བརྗོད་ཅིང་། ཀུན༷་བཟ༷ང་ཡ༷བ་ཡུ༷མ་གྱི་དགོང༷ས་པ་ཆོས་ཉིད་དམིགས་པ་མེད་པ་དང་། སྤྱོད༷་པ་བླང་དོར་བྱ་བྱེད་ལས་འདས་པ་ནི་དེ༷་འདྲ༷་ལྟར་ཡིན་པ་མ་ཟད་རང་གིས་ཀྱང་ཀུན་བཟང་ཡབ་ཡུམ་གྱི་གོ་འཕང་ཐོབ་ཕྱིར་ལམ་ལ་སློབ་པ་ན་དགོངས་དོན་དང་། རྟོགས་པའི་སྤྱོད་པ་དེ་དང་འདྲ་བ་དགོས་པ་ཡིན་ན་ཡ༷ང་། དེ༷་ལྟ༷ར་དུ་བད༷ག་གིས༷་ནི་ཆོས་ཉིད་ཀྱི་དོན་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོག༷ས་ཏེ༷། ཀུ༷ན་བཟ༷ང་ཡ༷བ་ཡུམ༷་གྱི་ཐུག༷ས་ཀྱི་དགོངས་སྤྱོད་ད༷ང་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་ཀུན་བཟང་ཡབ་ཡུམ་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་ཀུན་བཟང་ཡབ་ཀྱི་དགོངས་སྤྱོད་ཀྱི་དོན་ལས་གོལ་ཞིང་། ཀུན་བཟང་ཡབ་ཡུམ་ཞེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པ་ཆོས་ཉིད་ཀྱི་དོན་དང་འགལ་བ་ཉིད་དང་དེའི་དབང་གིས་བསགས་པའི་ཉེས་ལྟུང་ཐམས་ཅད་བཤགས་པའོ།།

གཉིས་པ་རྒྱལ་བ་རིགས་ལྔའི་ཀློང་བཤགས་ནི། རྒྱལ་བ་རིགས་ལྔ་གསན་ཅིང་དགོངས་སུ་གསོལ༔ ཕུང་པོ་ལྔ་ནི་ཡེ་ནས་མངོན་སངས་རྒྱས༔ རྒྱལ་བ་རིགས་ལྔའི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ རྒྱལ་བ་རིགས་ལྔའི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ།

རྡོ་རྗེ་མཁའ་འགྲོ་མ་དྲྭ་བ་སྡོམ་པའི་རྒྱུད་ལས། མི་སྐྱོད་རྣམ་སྣང་རིན་ཆེན་འབྱུང་། །དཔག་མེད་དོན་གྲུབ་རྡོ་རྗེ་སེམས། །ཞེས་དང་། རྡོ་རྗེ་ཕྲེང་བ་ལས། རྣམ་སྣང་མཛད་དང་མི་སྐྱོད་དང་། །དོན་ཡོད་གྲུབ་དང་འོད་དཔག་མེད། །རིན་ཆེན་རྒྱལ་མཚན་ལྔ་པོ་ནི། །ཞེས་གསུངས་པ་ལྟར། དེ་བཞིན་གཤེགས་པའི་རིགས་རྣམ་པར་སྣང་མཛད་དང་། རྡོ་རྗེའི་རིགས་མི་སྐྱོད་པའམ་རྡོ་རྗེ་སེམས་དཔའ་དང་། རིན་ཆེན་རིགས་རིན་ཆེན་འབྱུང་ལྡན་དང་། པདྨའི་རིགས་སྣང་བ་མཐའ་ཡས་སམ་འོད་དཔག་མེད་དང་། ལས་ཀྱི་རིགས་དོན་ཡོད་གྲུབ་པ་སྟེ་རྒྱལ༷་བ༷་རིག༷ས་ལྔ༷་པོ་རྣམས་ཉམས་ཆག་བཤགས་པ་པོ་བདག་ལ་སྙན་གྱིས་གས༷ན་ཅིང༷་ཐུགས་ཀྱིས་ཉེ་བར་དགོང༷ས་ཏེ་གཟིགས་སུ༷་གསོ༷ལ་ཅིག་ཅེས་རྒྱལ་བ་རིགས་ལྔ་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

རྒྱུད་གསང་བའི་སྙིང་པོ་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་དང་། ཡེ་ཤེས་རྔམ་གློག་ལས། ཕུང་པོ་ལྔ་དོན་སངས་རྒྱས་ལྔ། །ཞེས་དང་། དཔལ་མཆོག་ཆེན་པོའི་བརྟག་པ་དང་པོ་ལས། ཕུང་པོ་ལྔ་ནི་སངས་རྒྱས་ལྔ། །ཞེས་དང་། དཔལ་འཁོར་ལོ་སྡོམ་པ་གསང་བ་བསམ་གྱིས་མི་ཁྱབ་པ་ལས། རིགས་ལྔ་ཡི་ནི་སངས་རྒྱས་ལྔ། །ཕུང་པོ་ལྔ་དང་ཆགས་སྡང་ལྔ། །བསམ་གྱིས་མི་ཁྱབ་ལྔ་པའོ། །ཞེས་དང་། དཔལ་དམ་ཚིག་ཆེན་པོའི་རྒྱུད་ལས། ཕུང་པོ་ལྔ་ནི་རིགས་ལྔ་སྟེ། །ཞེས་གསུངས་པ་ལྟར། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་ཤེས་ཀྱི་ཕུང་པོ་སྟེ་ཕུང༷་པོ༷་ལྔ༷་ནི༷་ཡེ༷་ནས༷་རྣམ་པར་དག་པ་སྤྲོས་པ་དང་བྲལ་བ་དབྱིངས་དང་ཡེ་ཤེས་གཉིས་སུ་མེད་པར་མངོ༷ན་པར་རྫོགས་པ་སང༷ས་རྒྱས༷་པའི་རང་བཞིན་ཅན་ཡིན་ཏེ། གཟུགས་ཀྱི་ཕུང་པོ་རྣམ་པར་དག་པ་རྣམ་པར་སྣང་མཛད་དཀར་པོ་འཁོར་ལོ་དང་དྲིལ་བུ་འཛིན་པ་དང་། ཚོར་བའི་ཕུང་པོ་རྣམ་པར་དག་པ་རིན་ཆེན་འབྱུང་ལྡན་སེར་པོ་ནོར་བུ་དང་དྲིལ་བུ་འཛིན་པ་དང་། འདུ་ཤེས་ཀྱི་ཕུང་པོ་རྣམ་པར་དག་པ་སྣང་བ་མཐའ་ཡས་དམར་པོ་པདྨ་དང་དྲིལ་བུ་འཛིན་པ་དང་། འདུ་བྱེད་ཀྱི་ཕུང་པོ་རྣམ་པར་དག་པ་དོན་ཡོད་གྲུབ་པ་ལྗང་གུ་རྒྱ་གྲམ་དང་དྲིལ་བུ་འཛིན་པ་དང་། རྣམ་ཤེས་ཀྱི་ཕུང་པོ་རྣམ་པར་དག་པ་རྡོ་རྗེ་སེམས་དཔའམ་རྡོ་རྗེ་མི་བསྐྱོད་པ་མཐིང་ག་རྡོ་རྗེ་དང་དྲིལ་བུ་འཛིན་པའི་རང་བཞིན་ཅན་ཡིན་པའི་ཕྱིར། གྲུབ་སྟེ། ཞི་ཁྲོའི་ལས་བྱང་ཚོར་བ་རང་གྲོལ་ལས། གཟུགས་ཕུང་རྣམ་དག་བཅོམ་ལྡན་རྣམ་སྣང་མཛད༔ རྣམ་ཤེས་རྣམ་དག་བཅོམ་ལྡན་རྡོ་རྗེ་སེམས༔ ཚོར་བ་རྣམ་དག་བཅོམ་ལྡན་རིན་ཆེན་འབྱུང་༔ འདུ་ཤེས་རྣམ་དག་བཅོམ་ལྡན་སྣང་མཐའ་ཡས༔ འདུ་བྱེད་རྣམ་དག་བཅོམ་ལྡན་དོན་ཡོད་གྲུབ༔ ཅེས་དང་། རྟ་མཆོག་རོལ་བའི་རྒྱུད་ལས། གཟུགས་ཕུང་རྣམ་པར་སྣང་མཛད་ཆེ། །ཚོར་བ་རིན་ཆེན་འབྱུང་ལྡན་སྐུ། །འདུ་ཤེས་སྣང་བ་མཐའ་ཡས་སྐུ། །འདུ་བྱེད་དོན་ཡོད་གྲུབ་པ་ཡིན། །རྣམ་ཤེས་རྡོ་རྗེ་སེམས་དཔའ་སྟེ། །ཐམས་ཅད་བདེ་གཤེགས་ལྔ་ཡི་སྐུ། །ཞེས་དང་། ཡེ་ཤེས་རྔམ་གློག་ལས། གཟུགས་ཕུང་སྣང་བ་རྣམ་སྣང་མཛད། །ཚོར་བ་རིན་ཆེན་འབྱུང་ལྡན་གཙོ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་གདོན་མི་ཟ་གྲུབ་པ། །རྣམ་ཤེས་རྡོ་རྗེ་སེམས་དཔའོ། །ཞེས་དང་། དཔལ་ཡེ་ཤེས་ཐིག་ལེ་ལས། གཟུགས་ནི་རྣམ་པར་སྣང་མཛད་གྲགས། །གཏི་མུག་རྡོ་རྗེའི་ངོ་བོ་ཉིད། །ཚོར་བ་རིན་ཆེན་རྒྱལ་པོ་ནི། །ང་རྒྱལ་རྡོ་རྗེའི་ངོ་བོ་ཉིད། །འདུ་ཤེས་དེ་ནི་སྣང་མཐའ་ཡས། །ཆགས་པ་རྡོ་རྗེའི་ངོ་བོ་ཉིད། །འདུ་བྱེད་དོན་ཡོད་གྲུབ་པ་སྟེ། །ཕྲག་དོག་རྡོ་རྗེ་རུ་ནི་གྲགས། །རྣམ་པར་ཤེས་འདིར་མི་བསྐྱོད་པ། །ཞེ་སྡང་རྡོ་རྗེ་རབ་ཏུ་བསྒོམ། །ཞེས་དང་། དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས། གཟུགས་རྣམས་ཀྱི་ནི་རང་བཞིན་དུ། །རྣམ་པར་སྣང་མཛད་ཐུབ་པ་བཞུགས། །ཚོར་བ་རིན་ཆེན་མགོན་པོ་ཡིན། །མཐའ་ཡས་འོད་ནི་འདུ་ཤེས་སུའོ། །འདུ་བྱེད་ཀུན་ཏུ་གདོན་མི་ཟ། །མི་བསྐྱོད་པ་ནི་ཕུང་པོ་ལྔར། །དེ་བཞིན་གཤེགས་པ་ལྔ་རྣམས་ནི། །ཞེས་དང་། དཔལ་དམ་ཚིག་ཆེན་པོའི་རྒྱུད་ལས། གཟུགས་ཕུང་རྣམ་པར་སྣང་མཛད་ལ། །བརྗེད་དང་བརྙས་པ་ལ་སོགས་སྤང་། །དེ་ལ་མཆོད་དང་བསྟོད་སོགས་བྱ། །དོན་དམ་པར་ནི་རང་རིག་སྟེ། །ཚོགས་བསགས་ཕྱིར་ན་ང་ཡིས་གསུངས། །ཚོར་བ་ལ་སོགས་དེ་དང་འདྲ། །ཞེས་གསུངས་པའི་ཕྱིར་རོ།།

དེ་ལྟར་ཀུན་རྫོབ་ཀྱི་ཕུང་པོ་ལྔ་པོ་ཡེ་ནས་སྟོང་ཞིང་ཟབ་གསལ་གཉིས་སུ་མེད་པའི་ངོ་བོར་རྣམ་པར་དག་པ་ལ་རྒྱལ་བ་རིགས་ལྔའི་རང་བཞིན་ལས་གཞན་དུ་མེད་པ་དེའི་ཕྱིར་རྒྱལ༷་བ༷་རིག༷ས་ལྔ༷འི་དགོང༷ས་པ་ཕུང་ལྔ་དམིགས་པ་མེད་པ་དང་། སྤྱོ༷ད་པ་ཕུང་ལྔའི་མཚན་མ་དང་མཚན་མར་ཞེན་པ་ལ་བླང་དོར་བྱ་བྱེད་ལས་འདས་པ་ཅན་ཡིན་ཞིང་། རང་གིས་ཀྱང་དེ་ལྟར་ཡིན་པ་ལ་ཡིན་པར་ཤེས་པས་དེ་འདྲའི་དགོངས་པ་རྟོགས་པ་དང་། སྤྱོད་པ་དེ༷་འདྲ༷་བ་ལ་སྤྱོད་དགོས་ན་ཡ༷ང་། དེ༷་ལྟ༷ར་ཕུང་པོ་ལྔ་རྣམ་པར་དག་པའི་དོན་ཇི་བཞིན་བད༷ག་གིས༷་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོག༷ས་ཏེ༷། དེ་བཞིན་གཤེགས་པ་དང་། རྡོ་རྗེ་དང་། རིན་ཆེན་དང་། པདྨ་དང་། ལས་ཀྱི་རིགས་རྒྱ༷ལ༷་བ་རིག༷ས་ལྔ༷འམ་རིགས༷་ཀྱི༷་ཡ༷བ་རྣམ༷ས་ཀྱི་ཐུག༷ས་ཀྱི་དགོངས་སྤྱོད་དང༷་ཅི༷་

འག༷ལ་བ༷འམ་རྒྱལ༷་བ༷་རིག༷ས་ལྔ༷འི་ཐུགས༷་དང༷་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་རྒྱལ་བ་རིགས་ལྔའི་ཚོགས་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་རྒྱལ་བ་རིགས་ལྔའི་དགོངས་སྤྱོད་ཀྱི་དོན་ལས་གོལ་ཞིང་། རྒྱལ་བ་རིགས་ལྔ་ཞེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་ཕུང་པོ་ལྔ་རྣམ་པར་དག་པའི་ཀློང་ཆོས་ཉིད་ཀྱི་དོན་དང་འགལ་བ་ཉིད་དང་དེའི་དབང་གིས་བྱུང་བའི་ཉེས་ལྟུང་རྣམས་བཤགས་པའོ།།

གསུམ་པ་རིགས་ཀྱི་ཡུམ་ལྔའི་ཀློང་བཤགས་ནི། རིགས་ཀྱི་ཡུམ་རྣམས་གསན་ཅིང་དགོངས་སུ་གསོལ༔ འབྱུང་བ་ལྔ་ནི་ཡེ་ནས་མངོན་སངས་རྒྱས༔ རིགས་ཀྱི་ཡུམ་ལྔའི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ རིགས་ཀྱི་ཡུམ་ལྔའི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། ལས་བྱང་ཚོར་བ་རང་གྲོལ་ལས། དབྱིངས་ཕྱུག་སངས་རྒྱས་སྤྱན་དང་མཱ་མ་ཀཱི༔ གོས་དཀར་སྒྲོལ་མ་ལ་སོགས་ཡུམ་མཆོག་ལྔ༔ ཞེས་གསུངས་པ་ལྟར། དེ་བཞིན་གཤེགས་པའི་རིགས་དང་། རྡོ་རྗེའི་དང་། རིན་ཆེན་དང་། པདྨ་དང་། ལས་ཀྱི་རིག༷ས་ཀྱི༷་ཡུམ༷་ཆེན་མོ་དབྱིངས་ཕྱུག་མ་དང་། སངས་རྒྱས་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་། དམ་ཚིག་སྒྲོལ་མ་རྣམ༷ས་ཉེས་ལྟུང་འགྱོད་གདུང་གིས་བཤགས་པར་བྱེད་པ་པོ་བདག་ལ་སྙན་གྱིས་གས༷ན་ཅི༷ང་ཐུགས་ཀྱི་དགོང༷ས་ཏེ་བརྩེ་བས་གཟིགས་སུ༷་གསོ༷ལ་ཞེས་བཤགས་ཡུལ་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

དོན་དམ་པར་ས་ཆུ་མེ་རླུང་ནམ་མཁའ་སྟེ་འབྱུང༷་བ༷་ལྔ༷་ནི༷་ཡེ༷་ནས༷་བདེན་པར་མ་གྲུབ་པར་སྤྲོས་པ་དང་བྲལ་བའི་རྣམ་པར་དག་པ་དབྱིངས་དང་ཡེ་ཤེས་གཉིས་སུ་མེད་པ་ཡེ་ནས་མངོ༷ན་པར་སང༷ས་རྒྱས༷་པའི་རང་བཞིན་ཅན་ཡིན་ལ། དེ་ལ་ཡུམ་ལྔ་ཞེས་བཏགས་པ་ཙམ་པ་ལས་ཞལ་ཕྱག་གི་མཚན་མ་ཅན་གྱི་ཡུམ་ལྔ་ཞེས་པ་གང་དུའང་མ་གྲུབ་སྟེ། རྒྱུད་གསང་བའི་སྙིང་པོ་ལས། འབྱུང་བ་སོ་སོའི་མཚན་ཉིད་དེ། །ཡུམ་ལྔ་དག་ཏུ་བསྒོམ་པར་བྱ། །ཞེས་དང་། བདུད་རྩི་བུམ་པའི་ལུང་ལས། འབྱུང་ལྔ་ཡུམ་གྱི་དཀྱིལ་འཁོར་དག །བྱང་ཆུབ་སེམས་ལས་རིམ་བཞིན་བསྐྱེད། །ཅེས་དང་། དམ་ཚིག་ཆེན་པོའི་རྒྱུད་ལས། འབྱུང་བ་ལྔ་ནི་ཡུམ་ལྔའོ། །ཞེས་དང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། འབྱུང་བ་ལྔ་ཉིད་སངས་རྒྱས་ལྔར། །མི་ཡི་ལུས་ནི་བརྟག་བྱ་སྟེ། །དངོས་དེ་ངེས་པར་བསྒོམ་པ་ཡིས། །རང་སེམས་མཐུ་ཡིས་སངས་རྒྱས་འགྱུར། །ཞེས་གསུངས་པའི་ཕྱིར་རོ།།

དེ་ཡང་དོན་དམ་པར་འབྱུང་བ་སའི་ངོ་བོ་རྣམ་པར་དག་པ་རྡོ་རྗེ་རིགས་ཀྱི་ཡུམ་སངས་རྒྱས་སྤྱན་མ་མཐིང་སྐྱ་རྡོ་རྗེ་དང་དྲིལ་བུ་འཛིན་པ་དང་། ཆུའི་ངོ་བོ་རྣམ་པར་དག་པ་རིན་ཆེན་རིགས་ཀྱི་ཡུམ་མཱ་མ་ཀཱི་སེར་སྐྱ་ནོར་བུ་དང་དྲིལ་བུ་འཛིན་པ་དང་། མེ་ཡི་ངོ་བོ་རྣམ་པར་དག་པ་པདྨའི་རིགས་ཀྱི་ཡུམ་གོས་དཀར་མོ་དམར་སྐྱ་པདྨ་དང་དྲིལ་བུ་འཛིན་པ་དང་། རླུང་གི་ངོ་བོ་རྣམ་པར་དག་པ་ལས་ཀྱི་རིགས་ཀྱི་ཡུམ་དམ་ཚིག་སྒྲོལ་མ་ལྗང་སྐྱ་རྒྱ་གྲམ་དང་དྲིལ་བུ་འཛིན་པ་དང་། ནམ་མཁའི་ངོ་བོ་རྣམ་པར་དག་པ་དེ་བཞིན་གཤེགས་པའི་རིགས་ཀྱི་ཡུམ་དབྱིངས་ཕྱུག་མ་དཀར་དམར་མོ་འཁོར་ལོ་དང་དྲིལ་བུ་འཛིན་པའི་རང་བཞིན་ཅན་ཡིན་ཏེ། ལས་བྱང་ཚོར་བ་རང་གྲོལ་ལས། ནམ་མཁའ་རྣམ་དག་ཡུམ་མཆོག་དབྱིངས་ཕྱུག་མ༔ ས་ཁམས་རྣམ་དག་ཡུམ་མཆོག་སངས་རྒྱས་སྤྱན༔ ཆུ་ཁམས་རྣམ་དག་ཡུམ་མཆོག་མཱ་མ་ཀཱི༔ མེ་ཁམས་རྣམ་དག་ཡུམ་མཆོག་ན་བཟའ་དཀར༔ རླུང་ཁམས་རྣམ་དག་ཡུམ་མཆོག་དམ་ཚིག་སྒྲོལ༔ ཞེས་དང་། གསང་བ་སྙིང་པོ་ལས། ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ཤེས་སངས་རྒྱས་ཞིང་། །ཞེས་དང་། རྟ་མཆོག་རོལ་བའི་རྒྱུད་ལས། ས་ཁམས་སངས་རྒྱས་སྤྱན་ཡིན་ཏེ། །ཆུ་ཁམས་ལྷ་མོ་མཱ་མ་ཀཱི། །མེ་ཁམས་ན་བཟང་དཀར་མོ་སྟེ། །རླུང་ཁམས་དམ་ཚིག་སྒྲོལ་མའོ། །ནམ་མཁའ་ཀུན་ཏུ་བཟང་མོའི་སྐུ། །འབྱུང་ལྔའི་དཀྱིལ་འཁོར་རྣམ་དག་པའོ། །ཞེས་དང་། རྡོ་རྗེ་སྙིང་པོ་རྒྱན་གྱི་རྒྱུད་ལས། ས་ཡི་ཁམས་ཀྱི་རང་བཞིན་དུ་ནི། །དེ་ནས་སྤྱན་ནི་བཞུགས་བྱ་སྟེ། །རྣལ་འབྱོར་ཡིད་ཀྱིས་བསམ་པ་ནི། །དེ་ཡང་སྤྲོ་བར་གནས་པར་བསམ། །མཱ་མ་ཀཱི་ཡང་ཆུ་ཡི་ཁམས། །བརླན་ཞིང་ཁྲག་ནི་རྒྱུ་བའི་ཕྱིར། །རྣལ་འབྱོར་པས་ནི་ཡིད་ཀྱིས་བསམ། །དེ་ཡི་ལུས་ནི་རྒྱས་པར་འགྱུར། །མེ་ཡི་ཁམས་ཀྱི་རང་བཞིན་ནི། །གོས་དཀར་མོ་ཡང་གཞུག་པར་བྱ། །ཀུན་ཏུ་ཁྱབ་པར་བཞུགས་པ་ཡི། །འོད་རྣམས་སུ་ནི་དེར་འགྱུར་རོ། །སྒྲོལ་མ་རླུང་གི་རང་བཞིན་དུ། །བཞུགས་པ་དེ་ནི་བསམ་པར་བྱ། །རླུང་ནི་རྣམ་པ་ལྔ་རུ་འགྱུར། །དེ་བཞིན་ཡིད་མགྱོགས་རྫུ་འཕྲུལ་འགྲུབ། །རྡོ་རྗེ་དབྱིངས་ཀྱི་དབང་ཕྱུག་མ། །ནམ་མཁའི་རང་བཞིན་དག་ཏུ་འཇུག །ཅེས་དང་། མངོན་པར་འབྱུང་བའི་རྒྱུད་བླ་མ་ལས། ས་ནི་སྤྱན་ཞེས་བྱ་བར་བཤད། །ཆུ་ཁམས་མཱ་མ་ཀཱི་རུ་བཤད། །མེ་ནི་གོས་དཀར་མོ་རུ་བཤད། །རླུང་ནི་སྒྲོལ་མ་དག་ཏུ་གྲགས། །འོ་བྱེད་མ་ནི་སྟོང་པ་སྟེ། །དེ་བཞིན་ཕ་རོལ་ཕྱིན་པ་ཡིན། །ཞེས་དང་། བདེ་མཆོག་ཉུང་ངུའི་རྒྱུད་ལས། ས་ནི་སྤྱན་ཞེས་བྱ་བར་བཤད། །ཆུ་ཁམས་མཱ་མ་ཀཱི་རུ་བརྗོད། །མེ་ནི་གོས་དཀར་མོར་བཤད་དེ། །རླུང་ནི་སྒྲོལ་མར་རབ་ཏུ་བརྗོད། །ཙུམ་བི་ཀ་ནི་སྟོང་པ་སྟེ། །དེ་བཞིན་ཕ་རོལ་ཕྱིན་པ་ཡིན། །ཞེས་དང་། ཁྲག་འཐུང་མངོན་པར་འབྱུང་བའི་རྒྱུད་ལས། ས་ནི་སྤྱན་མར་བཤད་པ་ཡིན། །ཆུ་ཁམས་མཱ་མ་ཀཱི་རུ་བརྗོད། །གོས་དཀར་མོར་དང་སྒྲོལ་མ་ནི། །མེ་དང་རླུང་དུ་རྣམ་པར་གནས། །འོ་བྱེད་མ་ནི་སྟོང་པའོ། །དེ་བཞིན་ཕ་རོལ་ཕྱིན་པའོ། །ཞེས་གསུངས་པའི་ཕྱིར་རོ།།

དེ་ལྟར་དོན་དམ་པར་འབྱུང་ལྔ་ཡེ་ནས་རྣམ་པར་དག་པ་མངོན་པར་སངས་རྒྱས་པའི་རང་བཞིན་ཅན་གང་ཡིན་པ་ནི་རིག༷ས་ཀྱི༷་ཡུམ༷་ལྔ༷འི་དགོང༷ས་པ་དང་སྤྱོད༷་པ་ཡིན་ལ། གནས་ལུགས་ཀྱི་དོན་ལ་འབྱུང་བ་ལྔ་དང་ཡུམ་ལྔ་ཞེས་པའང་གཞན་དུ་མེད་པར་འབྱུང་ལྔ་ཡེ་ནས་རྣམ་པར་དག་པ་དོན་དམ་བརྗོད་བྲལ་བློ་འདས་ཆེན་པོའི་གཤིས་ལས་མ་འདས་པ་དེ༷་འདྲ༷་ཡིན་ན་ཡ༷ང་། དེ༷་ལྟར༷་ཡིན་པར་བད༷ག་གིས༷་བདག་ཏུ་ཞེན་པ་དང་མཚན་མར་འཛིན་པའི་བློ་ཡི་དབང་གིས་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོག༷ས་ཏེ༷། རིག༷ས་ཀྱི༷་ཡུམ༷་ལྔ༷འི་ཐུག༷ས་ཀྱི་དགོངས་སྤྱོད་ད༷ང་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་རིགས་ཀྱི་ཡུམ་ལྔའི་ཚོགས་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་རིགས་ཀྱི་ཡུམ་ལྔའི་དགོངས་སྤྱོད་ཀྱི་དོན་ལས་གོལ་ཞིང་། རིགས་ཀྱི་ཡུམ་ལྔ་ཞེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་འབྱུང་བ་ལྔ་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་འགལ་བ་དེའི་དབང་ལས་བྱུང་བའི་ལྟུང་བ་དང་སྡིག་པ་དང་ཉེས་བྱས་རྣམས་བཤགས་པའོ།།

བཞི་བ་སེམས་དཔའ་བརྒྱད་ཀྱི་ཀློང་བཤགས་ནི། སེམས་དཔའ་བརྒྱད་རྣམས་གསན་ཅིང་དགོངས་སུ་གསོལ༔ རྣམ་ཤེས་ཚོགས་བརྒྱད་ཡེ་ནས་མངོན་སངས་རྒྱས༔ སེམས་དཔའ་བརྒྱད་ཀྱི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ སེམས་དཔའ་བརྒྱད་ཀྱི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། ཞི་ཁྲོའི་ལས་བྱང་ཚོར་བ་རང་གྲོལ་ལས། ས་སྙིང་བྱམས་པ་ཀུན་བཟང་ནམ་མཁའི་སྙིང་༔ སྤྱན་གཟིགས་འཇམ་དཔལ་སྒྲིབ་སེལ་ཕྱག་རྡོར་བརྒྱད༔ ཅེས་དང་། རྡོ་རྗེ་དཔལ་མཆོག་ཆེན་པོ་བརྟག་པ་དང་པོ་ལས། བྱམས་པ་ས་ཡི་སྙིང་པོ་དང་། །ཕྱག་ན་རྡོ་རྗེ་མཁའ་སྙིང་པོ། །འཇིག་རྟེན་དབང་ཕྱུག་འཇམ་པའི་དབྱངས། །སྒྲིབ་སེལ་ཀུན་ཏུ་བཟང་པོ་སྟེ། །སེམས་དཔའ་བརྒྱད་ནི་ལྷ་ཁྱམས་ལ། །ཞེས་དང་། རྡོ་རྗེ་མཁའ་འགྲོ་ལས། ཕྱག་ན་པདྨ་བྱམས་པ་དང་། །མཁའ་སྙིང་ཀུན་ཏུ་བཟང་པོ་དང་། །གནོད་སྦྱིན་བདག་དང་འཇམ་པའི་དཔལ། །ས་སྙིང་སྒྲིབ་སེལ་དེ་བཞིན་ཏེ། །ལྷ་ནི་བརྒྱད་པོ་འདི་དག་ཉིད། །ཅེས་གསུངས་པ་ལྟར། བྱང་ཆུབ་སེམས་དཔའ་ས་ཡི་སྙིང་པོ་དང་། བྱམས་པ་དང་། ཀུན་ཏུ་བཟང་པོ་དང་། ནམ་མཁའི་སྙིང་པོ་དང་། འཇིག་རྟེན་དབང་ཕྱུག་སྤྱན་རས་གཟིགས་དང་། འཇམ་པའི་དབྱངས་དང་། སྒྲིབ་པ་རྣམ་སེལ་དང་། ཕྱག་ན་རྡོ་རྗེ་སྟེ་བྱང་ཆུབ་སེམ༷ས་དཔ༷འ་བརྒྱད༷་པོ་རྣམ༷ས་ཉམས་ཆག་བཤགས་པ་པོ་བདག་ལ་སྙན་གྱིས་གས༷ན་ཅིང༷་ཐུགས་ཀྱིས་ལེགས་པར་དགོང༷ས་ཏེ་བརྩེ་བས་གཟིགས་སུ༷་གསོ༷ལ་ཞེས་བཤགས་ཡུལ་སེམས་དཔའ་བརྒྱད་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

དེ་ཡང་དོན་དམ་པར་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཉོན་ཡིད་དང་། ཀུན་གཞིའི་རྣམ་པར་ཤེས་པ་སྟེ་རྣམ༷་པར་ཤེ༷ས་པའི་ཚོ༷གས་བརྒྱད༷་པོ་ཡེ་ནས་བདེན་པར་མ་གྲུབ་པར་སྤྲོས་པ་དང་བྲལ་བའི་རྣམ་པར་དག་པ་དབྱིངས་དང་ཡེ་ཤེས་གཉིས་སུ་མེད་པར་ཡེ༷་ནས༷་མངོ༷ན་པར་ས༷ངས་རྒྱས༷་པའི་རང་བཞིན་ཅན་ཡིན་ཏེ། མིག་གི་རྣམ་ཤེས་རྣམ་པར་དག་པ་བྱང་ཆུབ་སེམས་དཔའ་ས་ཡི་སྙིང་པོ་དཀར་པོ་མྱུ་གུ་དང་དྲིལ་བུ་འཛིན་པ་དང་། རྣ་བའི་རྣམ་ཤེས་རྣམ་པར་དག་པ་ནམ་མཁའི་སྙིང་པོ་སེར་པོ་རལ་གྲི་དང་དྲིལ་བུ་འཛིན་པ་དང་། སྣའི་རྣམ་ཤེས་རྣམ་པར་དག་པ་སྤྱན་རས་གཟིགས་དབང་ཕྱུག་དཀར་དམར་པདྨ་དང་དྲིལ་བུ་འཛིན་པ་དང། ལྕེའི་རྣམ་ཤེས་རྣམ་པར་དག་པ་ཕྱག་ན་རྡོ་རྗེ་ལྗང་གུ་རྡོ་རྗེ་དང་དྲིལ་བུ་འཛིན་པ་དང་། ལུས་ཀྱི་རྣམ་ཤེས་རྣམ་པར་དག་པ་བྱམས་པ་མགོན་པོ་དཀར་པོ་ཀླུ་ཤིང་དང་དྲིལ་བུ་འཛིན་པ་དང་། ཡིད་ཀྱི་རྣམ་ཤེས་རྣམ་པར་དག་པ་སྒྲིབ་པ་རྣམ་སེལ་ལྗང་གུ་པུསྟི་དང་དྲིལ་བུ་འཛིན་པ་དང་། ཉོན་ཡིད་རྣམ་ཤེས་རྣམ་པར་དག་པ་ཀུན་ཏུ་བཟང་པོ་དམར་སེར་སྙེ་མ་དང་དྲིལ་བུ་འཛིན་པ་དང་། ཀུན་གཞིའི་རྣམ་ཤེས་རྣམ་པར་དག་པ་འཇམ་དཔལ་དབྱངས་དམར་སེར་ཨུཏྤལ་དང་དྲིལ་བུ་འཛིན་པའི་རང་བཞིན་ཅན་ཡིན་ལ། དེ་ལྟར་སེམས་དཔའ་བརྒྱད་ཅེས་བཏགས་པ་ཙམ་པ་ལས་དོན་དམ་པར་ཞལ་ཕྱག་གི་མཚན་མ་ཅན་གྱི་སེམས་དཔའ་བརྒྱད་ཅེས་པ་གང་དུའང་མ་གྲུབ་པར་རྣམ་ཤེས་བརྒྱད་ཀྱི་དག་པ་གནས་ལུགས་དོན་དམ་བསམ་བརྗོད་མེད་པའི་དབྱིངས་ཉིད་ལ་གོ་དགོས་པའི་ཕྱིར་ཏེ། ལས་བྱང་ཚོར་བ་རང་གྲོལ་ལས། ཚོགས་བརྒྱད་གནས་དག་བྱང་ཆུབ་སེམས་དཔའ་བརྒྱད༔ ས་སྙིང་བྱམས་པ་ཀུན་བཟང་ནམ་མཁའི་སྙིང་༔ སྤྱན་གཟིགས་འཇམ་དཔལ་སྒྲིབ་སེལ་ཕྱག་རྡོར་བརྒྱད༔ ཅེས་དང་། རྡོ་རྗེ་ཕྲེང་བའི་རྒྱུད་ལས། མིག་སོགས་དབང་པོ་ལ་བརྟེན་པ། །རྣམ་པར་ཤེས་པའི་ཚོགས་བརྒྱད་ནི། །རིམ་པ་ཇི་ལྟ་བ་བཞིན་དུ། །བྱང་ཆུབ་སེམས་དཔའ་བརྒྱད་དུ་ཤེས། །བྱང་ཆུབ་སེམས་དཔའི་བདག་ཉིད་ཆེ། །ཞེས་དང་། དཔལ་དམ་ཚིག་ཆེན་པོའི་རྒྱུད་ལས། སྐྱེ་མཆེད་སེམས་དཔའ་སེམས་མ་ཡིན། །ཞེས་དང་། མིག་ལ་སོགས་པ་དེ་བཞིན་ནོ། ། གཟུགས་ལ་སོགས་པ་དེ་བཞིན་བསྲུང་། །དཀྱིལ་འཁོར་དུ་ཞུགས་རྣལ་འབྱོར་པ། །རྡོ་རྗེ་འཛིན་པ་བཞིན་དུ་མཆོད། །ཅེས་གསུངས་པའི་ཕྱིར་རོ།།

དེ་ལྟར་རྣམ་ཤེས་ཚོགས་བརྒྱད་པོ་རྣམ་དག་གི་སེམས་དཔའ་བརྒྱད་པོ་སོ་སོར་གང་ལ་སྦྱར་བའི་ཚུལ་འདི་ཞི་ཁྲོའི་དབང་གི་དངོས་གཞི་འཕྲད་ཚད་རང་གྲོལ་སྤྲོས་བཅས་བུམ་དབང་ཆེན་མོ་དང་། དབང་སྐུར་གནས་སྤར་འགྲོ་དྲུག་རང་གྲོལ་གྱི་ལྷ་དབང་ངོ་སྤྲད་པའི་སྐབས་སུ་གསུངས་པ་ལྟར་ཡིན་ཏེ། དེ་ཉིད་ལས། འོ་སྐལ་ལྡན་རིགས་ཀྱི་བུ་རྣམས་སེམས་དཔའ་བརྒྱད་ཀྱང་གཞན་ན་མེད་དེ༔ རང་གི་རྣམ་པར་ཤེས་པ་ཚོགས་བརྒྱད་འགགས་མེད་དུ་གསལ་བ་འདི་ཀ་ཡིན་ནོ༔ མིག་གི་རྣམ་པར་ཤེས་པ་གཟུགས་འགགས་མེད་དུ་མཐོང་མཁན་གྱི་ཤེས་པ་འདི་ནི་སའི་སྙིང་པོའོ༔ རྣ་བའི་རྣམ་པར་ཤེས་པ་སྒྲ་འགགས་མེད་དུ་ཚོར་མཁན་གྱི་ཤེས་པ་འདི་ནི་ནམ་མཁའི་སྙིང་པོའོ༔ སྣའི་རྣམ་པར་ཤེས་པ་དྲི་འགགས་མེད་དུ་ཚོར་མཁན་གྱི་ཤེས་པ་འདི་ནི་སྤྱན་རས་གཟིགས་སོ༔ ལྕེའི་རྣམ་པར་ཤེས་པ་རོ་འགགས་མེད་དུ་མྱོང་མཁན་གྱི་ཤེས་པ་འདི་ནི་ཕྱག་ན་རྡོ་རྗེའོ༔ ལུས་ཀྱི་རྣམ་པར་ཤེས་པ་རེག་བྱ་འགགས་མེད་དུ་ཚོར་མཁན་གྱི་ཤེས་པ་འདི་ཀ་བྱམས་པའོ༔ ཡིད་ཀྱི་རྣམ་པར་ཤེས་པ་ཀུན་ཏུ་ཐོགས་མེད་དུ་གསལ་བའི་ཡིད་ཤེས་འདི་ཀ་སྒྲིབ་པ་རྣམ་སེལ་ལོ༔ ཉོན་མོངས་པའི་ཡིད་ཅན་ངར་འཛིན་གྱི་ཤེས་པ་ཧུ་རེ་བ་འདི་ཀ་སེམས་དཔའ་ཀུན་ཏུ་བཟང་པོ་ཡིན་ནོ༔ ཀུན་གཞིའི་རྣམ་པར་ཤེས་པ་ཁྱབ་བརྡལ་དུ་གསལ་བ་འདི་ཀ་འཇམ་དཔལ་གྱི་རང་བཞིན་ཡིན་པས་ངོ་ཤེས་པར་གྱིས་ཤིག༔ ཅེས་གསུངས་པའི་ཕྱིར་རོ།།

ཞི་ཁྲོའི་བརྒྱ་ཕྱག་སྡིབ་སྒྲིབ་རང་གྲོལ་ལས་ནི་མིག་ས་སྙིང་དུ་དབང་བཤད་དང་མཐུན་པ་ཙམ་ལས་གཞན་རྣམས་དེ་དང་མི་མཐུན་པར་རྣ་བ་བྱམས་པ་དང་། སྣ་ཀུན་ཏུ་བཟང་པོ་དང་། ལྕེ་ནམ་མཁའི་སྙིང་པོ་དང་། ལུས་སྤྱན་རས་གཟིགས་དང་། ཡིད་འཇམ་པའི་དབྱངས་དང་། ཉོན་ཡིད་ཕྱག་ན་རྡོ་རྗེ་དང་། ཀུན་གཞིའི་རྣམ་ཤེས་སྒྲིབ་སེལ་དུ་སྦྱར་འདུག་ལ། ལུང་རང་གཞུང་དུ་བལྟ་བར་བྱ་ཞིང་། འདི་གཉིས་ཀས་རྣམ་ཤེས་ཚོགས་བརྒྱད་ཀྱི་དག་པ་ལ་སྦྱར་བའོ།།

ཞི་ཁྲོའི་སྐོང་བཤགས་ཉམས་ཆགས་རང་གྲོལ་ལས། མིག་གི་རྣམ་ཤེས་གནས་དག་པའི། །ས་ཡི་སྙིང་པོའི་ཐུགས་དམ་བསྐང་༔ རྣ་བའི་རྣམ་ཤེས་གནས་དག་པའི། །ནམ་མཁའི་སྙིང་པོའི་ཐུགས་དམ་བསྐང་༔ སྣ་ཡི་རྣམ་ཤེས་གནས་དག་པའི། །སྤྱན་རས་གཟིགས་ཀྱི་ཐུགས་དམ་བསྐང་༔ ལྕེ་ཡི་རྣམ་ཤེས་གནས་དག་པའི། །ཕྱག་ན་རྡོ་རྗེའི་ཐུགས་དམ་བསྐང་༔ ཞེས་ས་སྙིང་རྣམ་སྙིང་སྤྱན་གཟིགས་ཕྱག་རྡོར་ཏེ་སེམས་དཔའ་བཞི་དངོས་སུ་རྣམ་ཤེས་གནས་དག་ལ་སྦྱར་བ་དབང་བཤད་དང་མཐུན་ལ། སེམས་དཔའ་ཕྱི་མ་བཞི་པོ་བྱམས་པ་མིག་གི་དབང་པོ་དང་། སྒྲིབ་སེལ་རྣ་བའི་དབང་པོ་དང་། ཀུན་བཟང་སྣ་ཡི་དབང་པོ་དང་། འཇམ་དཔལ་ལྕེ་ཡི་དབང་པོ་སྟེ་དབང་པོ་གཟུགས་ཅན་པ་བཞིའི་གནས་དག་བཞི་ལ་སྦྱར་བ་ལས་ལུས་ཀྱི་རྣམ་ཤེས་དང་། ཡིད་དང་། ཉོན་ཡིད་དང་། ཀུན་གཞི་བཞིའི་རྣམ་ཤེས་གནས་དག་ལ་སྦྱར་བར་མི་སྣང་སྟེ། དེ་ཉིད་ལས། མིག་གི་དབང་པོ་གནས་དག་པའི། །བྱམས་པ་མགོན་པོའི་ཐུགས་དམ་བསྐང་༔ རྣ་བའི་དབང་པོ་གནས་དག་པའི། །སྒྲིབ་པ་རྣམ་སེལ་ཐུགས་དམ་བསྐང་༔ སྣ་ཡི་དབང་པོ་གནས་དག་པའི། །ཀུན་ཏུ་བཟང་པོའི་ཐུགས་དམ་བསྐང་༔ ལྕེ་ཡི་དབང་པོ་གནས་དག་པའི། །འཇམ་དཔལ་གཞོན་ནུའི་ཐུགས་དམ་བསྐང་༔ ཞེས་གསུངས་པའི་ཕྱིར། དེས་ན་ཞི་ཁྲོའི་སྐོང་བཤགས་ཉམས་ཆགས་རང་གྲོལ་གྱི་ལུགས་དེ་ནི་གཞུང་འདིའི་བསྡུས་ཡུལ་རྩ་བའི་རྒྱུད་དྲི་མེད་བཤགས་རྒྱུད་ཀྱི་ལུགས་ཡིན་ཏེ། རྒྱུད་དེ་ལས། མིག་གི་རྣམ་པར་ཤེས་པ་གནས་སུ་དག་པ་བྱང་ཆུབ་སེམས་དཔའ་སའི་སྙིང་པོ། ཞེས་དང་། རྣ་བའི་རྣམ་པར་ཤེས་པ་གནས་སུ་དག་པ། བྱང་ཆུབ་སེམས་དཔའ་ནམ་མཁའི་སྙིང་པོ། ཞེས་དང་། སྣའི་རྣམ་པར་ཤེས་པ་གནས་སུ་དག་པ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག། ཅེས་དང་། ལྕེའི་རྣམ་པར་ཤེས་པ་གནས་སུ་དག་པ། བྱང་ཆུབ་སེམས་དཔའ་ཕྱག་ན་རྡོ་རྗེ། ཞེས་དང་། མིག་གི་དབང་པོ་གནས་སུ་དག་པ། བྱང་ཆུབ་སེམས་དཔའ་བྱམས་པ། ཞེས་དང་། རྣ་བའི་དབང་པོ་གནས་སུ་དག་པ། བྱང་ཆུབ་སེམས་དཔའ་སྒྲིབ་པ་རྣམ་པར་སེལ་བ། ཞེས་དང་། སྣའི་དབང་པོ་གནས་སུ་དག་པ། བྱང་ཆུབ་སེམས་དཔའ་ཀུན་ཏུ་བཟང་པོ། ཞེས་དང་། ལྕེའི་དབང་པོ་གནས་སུ་དག་པ། བྱང་ཆུབ་སེམས་དཔའ་འཇམ་དཔལ། ཞེས་གསུངས་པའི་ཕྱིར། དེ་གཉིས་ལས་ནི་འཇུག་ཤེས་ལྔ་ལས་ལུས་ཀྱི་རྣམ་ཤེས་དང་དབང་པོ་གཟུགས་ཅན་ལྔ་ལས་ལུས་ཀྱི་དབང་པོ་མ་གཏོགས་པའི་འཇུག་ཤེས་བཞི་དང་། དབང་པོ་གཟུགས་ཅན་པ་བཞི་ལ་སྦྱར་འདུག་གོ།

ཡེ་ཤེས་རྔམ་གློག་ལས། སྲིད་གསུམ་སེམས་ཅན་ཐམས་ཅད་ཀྱི། །ཁ་དོག་དབྱིབས་ལ་སྤྱོད་པ་ཀུན། །མིག་གི་རྣམ་ཤེས་ཞེས་སུ་གྲགས། །མཐོང་བའི་ཡེ་ཤེས་ཡིན་པའི་ཕྱིར། །ས་ཡི་སྙིང་པོའི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །སྒྲ་རྣམས་ཀུན་ལ་སྤྱོད་པ་ཀུན། །རྣ་བའི་རྣམ་ཤེས་ཞེས་སུ་གྲགས། །ཐོས་པའི་ཡེ་ཤེས་ཡིན་པས་ན། །ལག་ན་རྡོ་རྗེའི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །དྲི་རྣམས་ཀུན་ལ་སྤྱོད་པ་ཀུན། །སྣ་ཡི་རྣམ་ཤེས་ཞེས་སུ་གྲགས། །ཚོར་བའི་ཡེ་ཤེས་ཡིན་པས་ན། །ནམ་མཁའི་སྙིང་པོའི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །རོ་རྣམས་ཀུན་ལ་སྤྱོད་པ་ཀུན། །ལྕེ་ཡི་རྣམ་ཤེས་ཞེས་སུ་གྲགས། །མྱོང་བའི་ཡེ་ཤེས་ཡིན་པའི་ཕྱིར། །སྤྱན་རས་གཟིགས་ཀྱི་རང་བཞིན་ཡིན། །ཞེས་མིག་གི་རྣམ་ཤེས་ས་ཡི་སྙིང་པོ་དང་། རྣ་བའི་རྣམ་ཤེས་ལག་ན་རྡོ་རྗེ་དང་། སྣ་ཡི་རྣམ་ཤེས་ནམ་མཁའི་སྙིང་པོ་དང་། ལྕེ་ཡི་རྣམ་ཤེས་སྤྱན་རས་གཟིགས་ཏེ་ལུས་ཤེས་མ་གཏོགས་པའི་འཇུག་ཤེས་བཞི་ལ་སྦྱར་བ་དང་། ཡང་དེ་ཉིད་ལས། སྲིད་གསུམ་སེམས་ཅན་ཐམས་ཅད་ཀྱི། །མཐོང་བྱེད་དང་བའི་བདག་ཉིད་དེ། །མིག་གི་ཁམས་ཞེས་བྱ་བར་གྲགས། །མཐོང་བའི་བྱ་བ་བྱེད་པའི་ཕྱིར། །བྱམས་པ་མཻ་ཏྲིའི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །ཐོས་པར་བྱེད་པའི་བདག་ཉིད་དེ། །རྣ་བའི་ཁམས་ཞེས་བྱ་བར་གྲགས། །ཐོས་པའི་བྱ་བ་བྱེད་པའི་ཕྱིར། །སྒྲིབ་པ་རྣམ་སེལ་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །མནོམ་བྱེད་དང་བའི་བདག་ཉིད་དེ། །སྣ་ཡི་ཁམས་ཞེས་བྱ་བར་གྲགས། །ཚོར་བར་བྱ་བ་བྱེད་པའི་ཕྱིར། །འཇམ་དཔལ་ཉིད་ཀྱི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །མྱོང་བྱེད་དག་པའི་བདག་ཉིད་དེ། །ལྕེ་ཡི་ཁམས་ཞེས་བྱ་བར་གྲགས། །མྱོང་བའི་བྱ་བ་བྱེད་པའི་ཕྱིར། །ཀུན་ཏུ་བཟང་པོའི་རང་བཞིན་ཡིན། །ཞེས་བྱམས་པ་སོགས་སེམས་དཔའ་བཞི་ཁམས་ཞེས་པ་ནི་དབང་པོ་ཡིན་ཕྱིར་དབང་པོ་གཟུགས་ཅན་པ་བཞི་ལ་སྦྱར་བ་བསྐང་བཤགས་སོགས་དང་མཐུན་མོད། མི་མཐུན་པ་ནི་རྣ་བའི་རྣམ་ཤེས་སྐོང་བཤགས་ལྟར་ནམ་མཁའི་སྙིང་པོ་མིན་པར་ལག་ན་རྡོ་རྗེ་དང་། སྣ་ཡི་རྣམ་ཤེས་སྤྱན་རས་གཟིགས་མིན་པར་ནམ་མཁའི་སྙིང་པོ་དང་། ལྕེ་ཡི་རྣམ་ཤེས་ཕྱག་ན་རྡོ་རྗེ་མིན་པར་སྤྱན་རས་གཟིགས་ལ་སྦྱར་བ་དང་། སྣ་ལྕེའི་དབང་པོ་གཉིས་བཤགས་རྒྱུད་དང་བསྐང་བཤགས་ལས་ལྡོག་སྟེ་བཀོད་པའོ།།

ཞི་ཁྲོའི་རིགས་དྲུག་གནས་འདྲེན་གྱི་ཟས་བསྔོའི་སྐབས་སུ། མིག་ས་ཡི་སྙིང་པོ་དང་། རྣ་བ་ནམ་སྙིང་དང་། སྣ་སྤྱན་རས་གཟིགས་དང་། ལྕེ་ཕྱག་ན་རྡོ་རྗེ་དང་། ལུས་སྒྲིབ་པ་རྣམ་སེལ་ལ་སྦྱར་ཞིང་ཡེ་ཤེས་ལྔ་དང་སྦྱར་ནས་འཇུག་ཤེས་ལྔ་གསུངས་པ་ནི་འདོད་ཡོན་ལྔ་བསྔོ་བའི་སྐབས་ཡིན་པའི་དབང་དུ་བྱས་ལ། ཡིད་ཤེས་སུ་གྱུར་པའི་རྣམ་ཤེས་ཕྱི་མ་གསུམ་པོ་ལ་སྦྱར་བ་མི་སྣང་སྟེ། དེ་ཉིད་ལས། མེ་ལོང་ཡེ་ཤེས་ངང་ལས་སྐུ་སྤྲུལ་བའི༔ རྒྱལ་སྲས་ས་ཡི་སྙིང་པོའི་ཐུགས་རྗེ་ཡིས༔ ཚེ་འདས་མིག་གི་དབང་པོའི་སྐྱོན་བསལ་ནས༔ རབ་རིབ་ནད་བསལ་གཟུགས་ལ་བལྟ་བར་ཤོག༔ ཅེས་དང་། མཉམ་ཉིད་ཡེ་ཤེས་ངང་ལས་སྐུ་སྤྲུལ་བའི༔ རྒྱལ་སྲས་ནམ་མཁའི་སྙིང་པོའི་ཐུགས་རྗེ་ཡིས༔ ཚེ་འདས་རྣ་བའི་དབང་པོའི་སྐྱོན་བསལ་ནས༔ འོན་པའི་ནད་བསལ་གསུང་མཆོག་ཉན་པར་ཤོག༔ ཅེས་དང་། སོར་རྟོགས་ཡེ་ཤེས་ངང་ལས་སྐུ་སྤྲུལ་བའི༔ རྒྱལ་སྲས་སྤྱན་རས་གཟིགས་དབང་ཐུགས་རྗེ་ཡིས༔ ཚེ་འདས་སྣ་ཡི་དབང་པོའི་སྐྱོན་བསལ་ནས༔ འཚུབས་པའི་ནད་བསལ་དྲི་ལ་སྣོམ་པར་ཤོག༔ ཅེས་དང་། བྱ་གྲུབ་ཡེ་ཤེས་ངང་ལས་སྐུ་སྤྲུལ་བའི༔ རྒྱལ་སྲས་ཕྱག་ན་རྡོ་རྗེའི་ཐུགས་རྗེ་ཡིས༔ ཚེ་འདས་ལྕེ་ཡི་དབང་པོའི་སྐྱོན་བསལ་ནས༔ དིག་པའི་ནད་བསལ་རོ་མཆོག་མྱོང་བར་ཤོག༔ ཅེས་དང་། ཆོས་དབྱིངས་ཡེ་ཤེས་ངང་ལས་སྐུ་སྤྲུལ་བའི༔ རྒྱལ་སྲས་སྒྲིབ་པ་རྣམ་སེལ་ཐུགས་རྗེ་ཡིས༔ ཚེ་འདས་ལུས་ཀྱི་དབང་པོའི་སྐྱོན་བསལ་ནས༔ ཚ་གྲང་ནད་བསལ་རེག་བྱ་མྱོང་བར་ཤོག༔ ཅེས་གསུངས་པའི་ཕྱིར་རོ། །དེས་ན་དེ་ལས་ནི་ལུས་ཀྱི་དབང་པོ་དབང་བཤད་དང་མི་མཐུན་པ་ལས་སེམས་དཔའ་སྔ་མ་བཞི་སྦྱར་ཚུལ་དབང་བཤད་དང་མཐུན་ནོ། །བརྒྱ་ཕྱག་ལས་ནི་ས་ཡི་སྙིང་པོ་ཙམ་ལས་ཞི་ཁྲོ་རང་གཞུང་གི་དེ་དག་ཐམས་ཅད་དང་མི་མཐུན་ནོ།།

རྒྱུད་གཞན་དུ་མིག་གི་རྣམ་པར་ཤེས་པ་ས་ཡི་སྙིང་པོ་དང་། རྣ་བའི་རྣམ་པར་ཤེས་པ་ཕྱག་ན་རྡོ་རྗེ་དང་། སྣ་ཡི་རྣམ་པར་ཤེས་པ་ནམ་མཁའི་སྙིང་པོ་དང་། ལྕེའི་རྣམ་པར་ཤེས་པ་འཇིག་རྟེན་དབང་དང་། ལུས་ཀྱི་རྣམ་པར་ཤེས་པ་སྒྲིབ་པ་རྣམ་སེལ་དང་། ཡིད་ཀྱི་རྣམ་པར་ཤེས་པ་ཀུན་ཏུ་བཟང་པོ་དང་། ཉོན་ཡིད་རྣམ་ཤེས་བྱམས་པ་དང་། ཀུན་གཞིའི་རྣམ་ཤེས་འཇམ་པའི་དབྱངས་ཉིད་དུ་སྦྱར་བའང་ཡོད་དེ། རྡོ་རྗེ་དཔལ་མཆོག་ཆེན་པོ་བརྟག་པ་དང་པོའི་རྒྱུད་ལས། མིག་གི་རྣམ་ཤེས་ས་སྙིང་པོ། །རྣ་བའི་རྣམ་ཤེས་གསང་འཛིན་པ། །སྣ་ལ་ནམ་མཁའི་སྙིང་པོ་དང་། །ལྕེ་ནི་འཇིག་རྟེན་དབང་ཕྱུག་སྟེ། །ལུས་ལ་སྒྲིབ་པ་རྣམ་པར་སེལ། །ཡིད་ལ་ཀུན་ཏུ་བཟང་པོས་སོ། །ཉོན་མོངས་ཅན་ཡིད་བྱམས་པ་སྟེ། །ཀུན་གཞི་འཇམ་པའི་དབྱངས་ཀྱིས་ནི། །དེ་ལྟར་བྱིན་རླབས་དབང་སྐུར་ཏེ། །རྣམ་ཤེས་བརྒྱད་ནི་དག་ཕྱིར་རོ། །ཞེས་གསུངས་པ་དང་། གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་བླ་མ་ཆེན་པོ་ལས། མིག་ལ་ས་ཡི་སྙིང་པོ་སྟེ། །ཞེས་དང་། སྣ་ལ་ནམ་མཁའི་སྙིང་པོ་སྟེ། །ཞེས་དང་། ལྕེ་ལ་སྤྱན་རས་དབང་ཕྱུག་སྟེ། །ཞེས་དང་། རྣ་བར་ཕྱག་ན་རྡོ་རྗེ་སྟེ། །ཞེས་དང་། ཀུན་འདུས་སྒྲིབ་པ་རྣམ་སེལ་ཏེ། །ཞེས་དང་། ཀུན་ཤེས་ཀུན་ཏུ་བཟང་པོ་སྟེ། །ཞེས་དང་། གཅོད་ཤེས་བྱམས་པའི་བདག་ཉིད་དེ། །ཞེས་དང་། འཇུག་ཤེས་འཇམ་དཔལ་གཞོན་ནུ་སྟེ། །ཞེས་གསུངས་པ་དང་། རྡོ་རྗེ་ཕྲེང་བའི་རྒྱུད་ཀྱི་ལེའུ་ཉེར་གསུམ་པ་ལས། མིག་གཉིས་ས་ཡི་སྙིང་པོར་གསུངས། །གཟུགས་ལ་སོགས་པ་ཅི་རིགས་པར། །རང་གི་ངོ་བོ་སྤྲོ་བར་བྱེད། །སྒྲ་ཡི་རྣམ་པ་ཐམས་ཅད་ནས། །བྱེ་བྲག་སོ་སོ་ཅི་རིགས་པར། །སྒྲ་ཡི་རྣམ་པར་ཤེས་པ་ནི། །ཕྱག་ན་རྡོ་རྗེར་ཡང་དག་བཤད། །དྲི་ཡི་བྱེ་བྲག་ལ་སྤྱོད་པ། །སོ་སོར་ཇི་ལྟར་རིགས་པར་ནི། །སྣ་ཡི་རྣམ་ཤེས་མཚན་ཉིད་ནི། །ནམ་མཁའི་སྙིང་པོ་རྣམ་པར་ཤེས། །རོ་ཡི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ལྕེ་ཡི་རྣམ་ཤེས་མཚན་ཉིད་ནི། །འཇིག་རྟེན་དབང་ཕྱུག་ཏུ་ནི་ཤེས། །རེག་བྱའི་བྱེ་བྲག་ལ་སྤྱོད་པ། །བྱེ་བྲག་སོ་སོའི་གོ་རིམས་བཞིན། །རེག་བྱའི་རྣམ་ཤེས་མཚན་ཉིད་ནི། །སྒྲིབ་པ་རྣམ་པར་སེལ་བ་ཤེས། །ཡིད་ཀྱི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ཡིད་ཀྱི་རྣམ་ཤེས་ཞེས་གསུངས་པ། །འཇམ་དཔལ་ཞེས་བྱའི་མིང་ཅན་ནོ། །རྒྱུས་པ་ཀུན་ལ་ཡང་དག་སྦྱོར། །དབྱེ་བ་སོ་སོའི་གོ་རིམས་བཞིན། །བག་ཆགས་ཡུལ་གྱི་བདག་ཉིད་ཅན། །བྱམས་པ་རུ་ནི་རྣམ་པར་ཤེས། །རྩ་རྣམས་སོ་སོའི་མཚན་ཉིད་ཅན། །བདེ་བ་ཀུན་གྱི་གཞི་ཡི་མཆོག །དངོས་པོ་ཀུན་གྱི་རང་བཞིན་ཅན། །འདི་ནི་ཀུན་ཏུ་བཟང་པོར་བཤད། །དེ་ལྟར་རྣམ་ཤེས་ཚོགས་བརྒྱད་མཆོག །ཡང་དག་དེ་བཞིན་བླ་ན་མེད། །ཅེས་དང་། དེའི་ལེའུ་ཞེ་ལྔ་བར། མིག་གཉིས་ས་ཡི་སྙིང་པོ་དང་། །རྣ་བ་ཕྱག་ན་རྡོ་རྗེ་དང་། །སྣ་ནི་ནམ་མཁའི་སྙིང་པོ་དང་། །ལྕེ་ནི་འཇིག་རྟེན་མགོན་པོ་དང་། །ལུས་ནི་སྒྲིབ་པ་རྣམ་སེལ་མཛོད། །ཡིད་ནི་ཀུན་ཏུ་བཟང་པོ་དང་། །རྩ་ནི་བྱམས་པ་རུ་ནི་བརྗོད། །ཡེ་ཤེས་མཆོག་ནི་འཇམ་དཔལ་ཉིད། །ཁྱབ་པ་རུ་ནི་ཡང་དག་བཤད། །ཅེས་གསུངས་པའི་ཕྱིར། འོན་ཀྱང་རྡོ་རྗེ་ཕྲེང་བ་ལས་ནི་ལེའུ་ཉེར་གསུམ་པ་དྲངས་ཟིན་པ་དེ་ལས་ཡིད་འཇམ་དབྱངས་དང་། ཀུན་གཞི་ཀུན་བཟང་དུ་བཤད་པ་དང་། ལེའུ་དྲུག་ཅུ་རྩ་བཞི་བ་ལས། དེ་ཡི་ཡིད་ཀྱི་དབང་པོ་ལ། །དེ་བཞིན་གཤེགས་པ་འཇམ་དབྱངས་བཞུགས། །ཞེས་དང་། ལུས་ཀྱི་ཚིགས་ནི་ཐམས་ཅད་ལ། །དེ་བཞིན་གཤེགས་པ་ཀུན་ཏུ་བཟང་། །ཞེས་དང་། ལེའུ་དྲུག་ཅུ་རྩ་བརྒྱད་པ་ལས། ཀུན་བཟང་ཚིགས་ཀྱི་མཚམས་སུ་བཞུགས། །ཞེས་དང་། ཡིད་ཀྱི་རྣམ་ཤེས་འཇམ་རྡོ་རྗེ། །ཞེས་གསུངས་པ་ལྟར་ཡིད་ཀྱི་རྣམ་ཤེས་འཇམ་དཔལ་དང་། ཀུན་ཏུ་བཟང་པོ་ལུས་ཀྱི་ཚིགས་རྣམས་དང་། དྲངས་ཟིན་པར་གསལ་བ་ལྟར་དེའི་ལེའུ་ཞེ་ལྔ་བ་ལས་ནི་ཀུན་བཟང་ཡིད་ཀྱི་རྣམ་ཤེས་དང་། འཇམ་དཔལ་ཡེ་ཤེས་མཆོག་སྟེ་དོན་ལ་ཀུན་གཞི་རུ་བཤད་པ་ནི་ནང་མི་མཐུན་པའི་ཁྱད་པར་རོ། །དེ་ཕྱིར་ཀུན་བཟང་ཀུན་གཞི་རུ་བཤད་པ་དེ་ནི་རྡོ་རྗེ་དཔལ་མཆོག་ཆེན་པོ་དང་ལྡོག་པའོ།།

ཡེ་ཤེས་རྔམ་གློག་ལས་སེམས་དཔའ་སྔ་མ་བཞི་མིག་ནས་ལྕེའི་བར་གྱི་རྣམ་པར་ཤེས་པ་བཞིའི་དག་པ་ལ་སྦྱར་བ་ནི་རྒྱུད་འདི་དག་དང་མཐུན་ཏེ། དེ་ཉིད་ལས། སྲིད་གསུམ་སེམས་ཅན་ཐམས་ཅད་ཀྱི། །ཁ་དོག་དབྱིབས་ལ་སྤྱོད་པ་ཀུན། །མིག་གི་རྣམ་ཤེས་ཞེས་སུ་གྲགས། །ཞེས་པ་ནས། སྤྱན་རས་གཟིགས་ཀྱི་རང་བཞིན་ཡིན། །ཞེས་པའི་བར་གོང་དུ་དྲངས་ཟིན་པ་ལྟར་ཡིན་པའི་ཕྱིར་རོ།།

རྡོ་རྗེ་ཕུར་བ་གསང་རྒྱུད་ལས། ཀུན་གཞི་གནས་འགྱུར་ས་ཡི་སྙིང་པོ་ཀུན། །ཞེས་ས་སྙིང་ཀུན་གཞི་དང་། ཡིད་ཀྱི་རྣམ་ཤེས་གནས་འགྱུར་ནམ་མཁའི་སྙིང་པོའི་སྐུ། །ཞེས་ནམ་སྙིང་ཡིད་ཤེས་དང་། ཉོན་མོངས་ཡིད་ཤེས་གནས་འགྱུར་སྤྱན་རས་གཟིགས་དབང་སྐུ། །ཞེས་སྤྱན་གཟིགས་ཉོན་ཡིད་དང་། ལུས་ཀྱི་རྣམ་ཤེས་གནས་འགྱུར་ཕྱག་ན་རྡོ་རྗེའི་སྐུ། །ཞེས་ཕྱག་རྡོར་ལུས་ཤེས་དང་། མིག་གི་ཀྱི་རྣམ་ཤེས་གནས་འགྱུར་བྱམས་པ་མཻ་ཏྲཱིའི་སྐུ། །ཞེས་བྱམས་པ་མིག་ཤེས་དང་། རྣ་བའི་རྣམ་ཤེས་གནས་འགྱུར་སྒྲིབ་པ་རྣམ་སེལ་སྐུ། །ཞེས་རྣ་བའི་རྣམ་ཤེས་སྒྲིབ་སེལ་དང་། སྣ་ཡི་རྣམ་ཤེས་གནས་འགྱུར་ཀུན་ཏུ་བཟང་པོའི་སྐུ། །ཞེས་ཀུན་བཟང་སྣ་ཤེས་དང་། ལྕེ་ཡི་རྣམ་ཤེས་གནས་འགྱུར་འཇམ་དཔལ་གཞོན་ནུའི་སྐུ། །ཞེས་འཇམ་དཔལ་ལྕེ་ཤེས་སུ་བཤད་པ་དང་། ད་དུང་རྡོ་རྗེ་སྙིང་པོ་རྒྱན་གྱི་རྒྱུད་ལ་སོགས་པ་གསང་སྔགས་ཀྱི་རྒྱུད་དུ་མའི་དགོངས་པ་འདྲ་བ་དང་མི་འདྲ་མཐའ་ཡས་པ་མཆིས་མོད་ཡི་གེས་འཇིགས་པས་མི་སྤྲོའོ།།

ད་དཀྱུས་ལ་འཇུག་སྟེ། བྱང་ཆུབ་སེམས་དཔའ་བརྒྱད་ཅེས་པ་དེ་ལྟར་དོན་དམ་པར་རྣམ་པར་ཤེས་པའི་ཚོགས་བརྒྱད་གདོད་ནས་རྣམ་པར་དག་པ་སྐྱེ་བ་མེད་པའི་ཆོས་ཉིད་དེ་བཞིན་ཉིད་དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་གང་ཡིན་པ་དེ་ལ་བྱ་བ་ལས་ཞལ་ཕྱག་མཚན་མའི་ཆོས་ཅན་དུ་མ་གྲུབ་པ་དེ་ནི་སེམ༷ས་དཔ༷འ་བརྒྱད༷་ཀྱི༷་དགོང༷ས་པ་དང་སྤྱོད༷་པ་ཡིན་ཞིང་། དོན་ལ་དེ༷་འདྲ༷་ཡིན་ན་ཡ༷ང་། དེ༷་ལྟར༷་ཡིན་པར་སྒྲིབ་པ་དང་ཉེས་ལྟུང་སྟུག་པོས་བསྒྲིབས་པ་བད༷ག་གིས༷་ནི་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོ༷གས་ཏེ༷། སེམ༷ས་དཔ༷འ་བརྒྱད༷་ཀྱི༷་ཐུག༷ས་ཀྱི་དགོངས་སྤྱོད་ད༷ང་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་སེམས་དཔའ་བརྒྱད་ཀྱི་ཚོགས་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་སེམས་དཔའ་བརྒྱད་ཀྱི་དགོངས་སྤྱོད་ཀྱི་དོན་ལས་གོལ་ཞིང་། སེམས་དཔའ་བརྒྱད་ཅེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་རྣམ་པར་ཤེས་པ་ཚོགས་བརྒྱད་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་། དེ་ཡི་དབང་གིས་བྱུང་བའི་ཉེས་ལྟུང་རྣམས་བཤགས་པའོ།།

ལྔ་བ་བྱང་ཆུབ་སེམས་མ་བརྒྱད་ཀྱི་ཀློང་བཤགས་ནི། སེམས་མ་བརྒྱད་རྣམས་གསན་ཅིང་དགོངས་སུ་གསོལ༔ རྣམ་ཤེས་ཡུལ་བརྒྱད་ཡེ་ནས་མངོན་སངས་རྒྱས༔ སེམས་མ་བརྒྱད་ཀྱི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ སེམས་མ་བརྒྱད་ཀྱི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། དེ་ཡང་སངས་རྒྱས་རབས་བདུན་གྱི་བཀྲ་ཤིས་པའི་ཚིགས་བཅད་ལས། ལྷ་མོ་སྒེག་མོ་དང་ནི་ལྷ་མོ་ཕྲེང་བ་མ། །ལྷ་མོ་གླུ་མ་དང་ནི་ལྷ་མོ་གར་མར་བཅས། །ནང་གི་མཆོད་པའི་ལྷ་མོའི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ལྷ་མོ་བདུག་སྤོས་མ་དང་ལྷ་མོ་མེ་ཏོག་མ། །ལྷ་མོ་མར་མེ་མ་དང་ལྷ་མོ་དྲི་མར་བཅས། །ཕྱི་ཡི་མཆོད་པའི་ལྷ་མོའི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ཞེས་དང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། སྒེག་མོ་ཕྲེང་བ་གླུ་དང་གར་མ་དང་། །མེ་ཏོག་བདུག་སྤོས་མར་མེ་དྲི་ཆབ་མ། །ཞེས་དང་། ཞི་ཁྲོའི་ལས་བྱང་ཚོར་གྲོལ་ལས། ལཱ་སྱེ་པུཥྤེ་མཱ་ལེ་དྷཱུ་པེ་མ༔ གིརྟི་ཨ་ལོ་གནྡྷེ་ནཱིརྟི་བརྒྱད༔ ཅེས་གསུངས་པ་ལྟར། གཟུགས་ཀྱི་ལྷ་མོ་བྱང་ཆུབ་སེམས་མ་ལཱ་སྱེ་མ་དང་། ལྷ་མོ་མེ་ཏོག་མའམ་པུཥྤེ་མ་དང་། ཕྲེང་བ་མའམ་མཱ་ལེ་མ་དང་། དྲི་ཡི་ལྷ་མོ་བདུག་སྤོས་མའམ་དྷཱུ་པེ་མ་དང་། སྒྲ་ཡི་ལྷ་མོ་གླུ་མའམ་གིརྟི་མ་དང་། དྲི་ཆབ་མའམ་གནྡྷེ་མ་དང་། མར་མེ་མའམ་ཨ་ལོ་ཀེ་དང་། གར་གྱི་ལྷ་མོ་ནཱིརྟི་མ་སྟེ་བྱང་ཆུབ་སེམ༷ས་མ༷་ཆེན་མོ་བརྒྱད༷་རྣམ༷ས་ཉེས་ལྟུང་བཤགས་པ་པོ་བདག་ལ་སྙན་གྱིས་གས༷ན་ཅིང༷་ཐུགས་ཀྱིས་ལེགས་པར་དགོ༷ངས་ཏེ་བརྩེ་བས་གཟིགས་སུ༷་གསོ༷ལ་ཞེས་བཤགས་ཡུལ་སེམས་མ་བརྒྱད་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

རྣམ༷་པར་ཤེས༷་པར་བརྒྱད་ཀྱི་ཡུལ་གཟུགས་དང་། སྒྲ་དང་། དྲི་དང་། རོ་དང་། འདས་པ་དང་། མ་འོངས་པ་དང་། ད་ལྟ་དང་། འབྱུང་བར་མ་ངེས་པའི་དུས་དང་བརྒྱད་ཀྱི་ཡུལ༷་བརྒྱད༷་དང་དེར་འཛིན་གྱི་རྟོག་པ་བརྒྱད་དོན་དམ་པར་གདོད་ནས་རྣམ་པར་དག་པ་སྐྱེ་བ་མེད་པ་ཆོས་ཉིད་དེ་བཞིན་ཉིད་དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་དུ་ཡེ༷་ནས༷་མངོ༷ན་པར་སང༷ས་རྒྱས༷་པ་གང་ཡིན་པ་དེ་ལ་བྱང་ཆུབ་སེམས་མ་བརྒྱད་ཅེས་བྱ་བ་ཡིན་ཏེ། ཞི་ཁྲོའི་ལས་བྱང་ཚོར་གྲོལ་ལས། ཡུལ་བརྒྱད་གནས་དག་སེམས་མ་ཆེན་མོ་བརྒྱད༔ ལཱ་སྱེ་པུཥྤེ་མཱ་ལེ་དྷཱུ་པེ་མ༔ གིརྟི་ཨ་ལོ་གནྡྷེ་ནཱིརྟི་བརྒྱད༔ སེམས་མའི་སར་གནས་དགྱེས་པ་སྐོང་མཛད་མ༔ གསང་བའི་ལྷ་མོ་སེམས་མ་བརྒྱད་རྣམས་ལ༔ ཞེས་གསུངས་པའི་ཕྱིར། དེ་ཡང་དོན་དམ་པའི་དབང་དུ་ན་ཡུལ་གཟུགས་དང་གཟུགས་སུ་རྟོག་པ་རྣམ་པར་དག་པ་རྡོ་རྗེ་སྒེག་མོའམ་སེམས་མ་ལཱ་སྱེ་དཀར་མོ་མེ་ལོང་འཛིན་པ་དང་། སྒྲ་དང་སྒྲ་རུ་རྟོག་པ་རྣམ་པར་དག་པ་རྡོ་རྗེ་ཕྲེང་བ་མའམ་སེམས་མ་མཱ་ལེ་སེར་མོ་ཕྲེང་བ་འཛིན་པ་དང་། དྲི་དང་དྲི་རུ་རྟོག་པ་རྣམ་པར་དག་པ་རྡོ་རྗེ་སྒྲ་དབྱངས་མའམ་སེམས་མ་གིརྟི་དམར་མོ་པི་ཝང་འཛིན་པ་དང་། རོ་དང་རོ་རུ་རྟོག་པ་རྣམ་པར་དག་པ་རྡོ་རྗེ་གར་མའམ་སེམས་མ་ནཱིརྟི་ལྗང་མོ་ཞལ་ཟས་འཛིན་པ་དང་། འདས་པའི་ཆོས་དང་དེར་རྟོག་པ་རྣམ་པར་དག་པ་རྡོ་རྗེ་མེ་ཏོག་མའམ་སེམས་མ་པུཥྤེ་དཀར་མོ་མེ་ཏོག་འཛིན་པ་དང་། ད་ལྟའི་ཆོས་དང་དེར་རྟོག་པ་རྣམ་པར་དག་པ་རྡོ་རྗེ་བདུག་སྤོས་མའམ་སེམས་མ་དྷཱུ་པེ་སེར་མོ་སྤོས་ཕོར་འཛིན་པ་དང་། མ་འོངས་པའི་ཆོས་དང་དེར་རྟོག་པ་རྣམ་པར་དག་པ་རྡོ་རྗེ་མར་མེ་མའམ་སེམས་མ་ཨ་ལོ་ཀེ་དམར་མོ་མར་མེ་འཛིན་པ་དང་། འབྱུང་བར་མ་ངེས་པའི་དུས་དང་ཆོས་ཅན་དང་དེར་རྟོག་པ་རྣམ་པར་དག་པ་རྡོ་རྗེ་དྲི་ཆབ་མའམ་སེམས་མ་གནྡྷེ་ལྗང་མོ་དུང་ཕོར་འཛིན་པའི་རང་བཞིན་ཡིན་པར་གསུངས་ཏེ། ཞི་ཁྲོའི་ལྷ་དབང་ངོ་སྤྲོད་ལས། འོ་སྐལ་ལྡན་རིགས་ཀྱི་བུ་རྣམས༔ བྱང་ཆུབ་སེམས་མ་བརྒྱད་ཀྱང་གཞན་ན་མེད་དེ༔ ཕྱི་ཡུལ་བརྒྱད་ཀྱི་རྟོག་པ་རང་སར་དག་པ་ཉིད་བྱང་ཆུབ་སེམས་མ་བརྒྱད་དོ༔ དེ་ཡང་མིག་གི་ཡུལ་དུ་གཟུགས་སུ་སྣང་བ་རྣམ་པར་དག་པ་ཉིད་སེམས་མ་ལཱ་སྱེ་དཀར་མོའོ༔ དེ་བཞིན་དུ་རྣ་བའི་ཡུལ་དུ་སྒྲ་རྣམ་པར་དག་པ་མཱ་ལྱེ་སེར་མོའོ༔ སྣའི་ཡུལ་དུ་དྲི་རྣམ་པར་དག་པ་གཱིརྟི་དམར་མོའོ༔ ལྕེའི་ཡུལ་དུ་རོ་བྲོ་བ་གནས་སུ་དག་པ་ནཱིརྟི་ལྗང་གུའོ༔ འདས་པའི་རྟོག་པ་གནས་སུ་དག་པ་པུཥྤེ་དཀར་མོའོ༔ ད་ལྟར་གྱི་རྟོག་པ་གནས་སུ་དག་པ་དྷུ་པེ་སེར་མོའོ༔ མ་འོངས་པའི་རྟོག་པ་གནས་སུ་དག་པ་ཨཱ་ལོ་ཀེ་དམར་མོའོ༔ འབྱུང་བར་མ་ངེས་པ་དང་ཆོས་ཅན་གྱི་རྟོག་པ་གནས་སུ་དག་པ་ལྷ་མོ་གནྡྷེ་ལྗང་མོའི་རང་བཞིན་ཡིན་པར་ངོ་ཤེས་པར་གྱིས་ཤིག༔ ཅེས་གསུངས་པའི་ཕྱིར་རོ།།

བསྐང་བཤགས་ཉམས་ཆགས་རང་གྲོལ་ལས། གཟུགས་སུ་སྣང་བ་གནས་དག་པའི༔ རྡོ་རྗེ་སྒེག་མོའི་ཐུགས་དམ་བསྐང་༔ སྒྲ་རུ་གྲགས་པ་གནས་དག་པའི༔ ཕྲེང་བ་མ་ཡི་ཐུགས་དམ་བསྐང་༔ དྲི་རུ་བསྣམས་པ་གནས་དག་པའི༔ གླུ་དབྱངས་མ་ཡི་ཐུགས་དམ་བསྐང་༔ རོ་བྲོའི་ངོ་བོ་གནས་དག་པའི༔ རྡོ་རྗེ་གར་མའི་ཐུགས་དམ་བསྐང་༔ འདས་པའི་རྟོག་པ་གནས་དག་པའི༔ པུཥྤེ་མ་ཡི་ཐུགས་དམ་བསྐང་༔ ད་ལྟའི་གནས་དག་པའི༔ དྷཱུ་པེ་མ་ཡི་ཐུགས་དམ་བསྐང་༔ མ་འོངས་གནས་དག་པའི༔ ཨ་ལོ་ཀེ་ཡི་ཐུགས་དམ་བསྐང་༔ འབྱུང་བ་མ་ངེས་ལྷ་མོ་ནི༔ གནྡྷེ་མ་ཡི་ཐུགས་དམ་བསྐང་༔ ཞེས་རྡོ་རྗེ་སྒེག་མོ་ནི་ལཱ་སྱེ་མ་ཡིན་ཕྱིར་གཟུགས་ལ་སྦྱར་ཚུལ་ནི་ཀུན་དང་མཐུན་ལ། ཕྲེང་བ་ནི་མཱ་ལེ་མ་ཡིན་པས་སྒྲ་དང་། གླུ་དབྱངས་མ་ནི་གིརྟི་མ་ཡིན་པས་དྲི་དང་། རོ་ལ་རྡོ་རྗེ་གར་མ་ཞེས་པ་ནཱིརྟི་མ་ཡིན་དགོས་པས་དེ་གསུམ་དབང་བཤད་དང་མཐུན་པ་དང་། འདས་པ་པུཥྤེ་མ་དང་། ད་ལྟ་དྷཱུ་པེ་མ་དང་། མ་འོངས་པ་ཨ་ལོ་ཀེ་དང་། འབྱུང་བར་མ་ངེས་པའི་དུས་གནྡྷེ་མ་དང་སྦྱར་ཚུལ་ཡང་དབང་བཤད་དང་མཐུན་པས་དེ་ནི་དབང་བཤད་ལྟར་རོ།།

དྲི་མེད་བཤགས་རྒྱུད་ལས། དོན་དམ་པར་སེམས་ཅན་གྱི་མིག་གི་ཡུལ་གཟུགས་སུ་སྣང་བ་གནས་སུ་དག་པ། བཛྲ་ལཱ་སྱ་སྟེ། ཞེས་དང་། སྣའི་ཡུལ་དྲིར་སྣོམ་པ་གནས་སུ་དག་པ། བཛྲ་མཱ་ལེ་སྟེ། ཞེས་དང་། རྣ་བའི་ཡུལ་སྒྲར་གྲག་པ་གནས་སུ་དག་པ། བཛྲ་གཱི་ཏི་སྟེ། ཞེས་དང་། ལྕེའི་ཡུལ་རོར་བྲོ་བ་གནས་སུ་དག་པ། བཛྲ་ནྲྀ་ཏྱེ་སྟེ། ཞེས་མཱ་ལེ་དྲི་དང་། གཱིརྟི་སྒྲ་ལ་སྦྱར་འདུག་པ་ནི་དབང་བཤད་དང་བསྐང་བཤགས་གཉིས་དང་མི་མཐུན་ལ། སྤྱིར་གཱིརྟི་ཞེས་པ་གླུ་མ་ལ་བྱེད་པ་ཡིན་ཕྱིར་བཤགས་རྒྱུད་ལྟར་བྱས་ན་དོན་དང་འགྲེལ་ཡང་རྒྱུད་དོན་དཀྱུགས་པའི་དབང་གིས་ཡིན་ནམ་དགོས་པ་གཞན་ཡོད་ཆ་མ་འཚལ་བས་རྡོ་རྗེའི་གནས་ཟབ་མོ་ལ་ལབ་ལབ་མང་པོ་མི་ཕོད་དོ།།

བཤགས་རྒྱུད་ལས། དོན་དམ་པར་སེམས་ཅན་གྱི་དུས་འདས་པ་ཞེས་བྱ་བ་གནས་སུ་དག་པ། བཛྲ་པུཥྤེ་སྟེ་ཞེས་དང་། དུས་ད་ལྟ་བ་ཞེས་བྱ་བ་གནས་སུ་དག་པ། བཛྲ་དྷཱུ་པེ་སྟེ། ཞེས་དང་། དུས་མ་འོངས་པ་ཞེས་བྱ་བ་གནས་སུ་དག་པ། བཛྲ་ཨཱ་ལོ་ཀེ་སྟེ། ཞེས་དང་། དུས་ཕྱིས་འབྱུང་བར་མ་ངེས་པ་ཞེས་བྱ་བ་གནས་སུ་དག་པ། བཛྲ་གནྡྷེ་སྟེ། ཞེས་ཞི་ཁྲོའི་བསྐང་བཤགས་སོགས་དང་མཐུན་པར་གསུངས་སོ།།

ཞི་ཁྲོའི་བརྒྱ་ཕྱག་ལས་ནི། གཟུགས་ལཱ་སྱེ་མ་དང་། འདས་པ་པུཥྤེ་མ་དང་། མ་འོངས་པ་ཨ་ལོ་ཀེ་དང་། རོ་ནཱིརྟི་མ་བཞི་པོ་དབང་བཤད་དང་འདྲ་ལ། མི་འདྲ་བ་ནི་སྒྲ་གིརྟི་མ་དང་། དྲི་དྷཱུ་པེ་མ་དང་། ད་ལྟ་བ་གནྡྷེ་མ་དང་། འབྱུང་བར་མ་ངེས་པའི་དུས་དང་ཆོས་ཅན་གྱི་རྟོག་པ་མཱ་ལེ་མ་རུ་བཤད་པས་དབང་བཤད་སོགས་དང་མི་མཐུན་ཞིང་། རྒྱུ་མཚན་དཔྱད་པར་བྱ་ལ། ལུང་རང་ཁུངས་ན་གསལ་བས་དེར་ལྟོས་ཤིག།

ཞི་ཁྲོའི་ལས་བྱང་གི་སེམས་མ་བརྒྱད་ཀྱི་གོ་རིམ་ཡང་ཤར་ལྷོ་ནུབ་བྱང་གི་རིམ་པ་ལྟར་ན་ནི། ཤར་དུ་ལཱ་སྱེ་མ་དང་པུཥྤེ་མ་དང་། ལྷོ་རུ་མཱ་ལེ་མ་དང་དྷཱུ་པེ་མ་དང་། ནུབ་ཏུ་གཱིརྟི་མ་དང་ཨ་ལོ་ཀེ་དང་། བྱང་དུ་ནཱིརྟི་མ་དང་གནྡྷེ་མ་རྣམས་བཀོད་འདུག་ལ། བརྒྱ་ཕྱག་གི་གོ་རིམ་ཡང་དེ་དང་འདྲའོ།།

བཤགས་རྒྱུད་ལས། སྒེག་མོ་ཕྲེང་ཐོགས་རིན་ཆེན་གླུ་གར་ཅན། །ནམ་མཁའ་མཉམ་པའི་མཆོད་པས་རྒྱལ་བ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །ཞེས་དང་། བདུག་པ་མེ་ཏོག་མར་མེ་དྲི་ཆབ་མ། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །ཞེས་དང་། ངན་སོང་སྦྱོང་རྒྱུད་ལས། སྒེག་མོ་ཕྲེང་བ་དེ་བཞིན་གླུ། །གར་མཁན་ལྷ་མོ་བཞི་པོ་དང་། །སྤོས་དང་མེ་ཏོག་མར་མེ་མ། །དྲི་ཡི་ལྷ་མོ་ཁྱོད་ཕྱག་འཚལ། །ཞེས་གསུངས་པ་གཉིས་གོ་རིམ་མཐུན་ན་ཡང་སྤོས་མ་སྔོན་དུ་བླངས་པས་ཤར་ལྷོ་ནུབ་བྱང་གི་རིམ་པ་ལྟར་ན་ཞི་ཁྲོའི་ལས་བྱང་སོགས་དང་ཅུང་མི་འདྲ་བ་ལྟ་བུ་གོ་རིམ་ལའང་དཔྱད་དུ་ཡོད་མཆི་ཡང་། དེ་ཙམ་གྱི་འཐུས་པར་བྱའོ།།

རྡོ་རྗེ་ཕུར་བ་གསང་རྒྱུད་ལས། གཟུགས་སྐུ་ལྷ་མོ་ལཱ་སྱཱ་སེམས་མའི་ཚུལ་འཛིན་མ། །སྐྱེ་མེད་ཆོས་ཀྱི་དབྱིངས་ལ་མངའ་བརྙེས་ཏེ། །ཀུན་གཞི་ཡུལ་ལ་སྣང་བ་གནས་འགྱུར་ལཱ་སྱཱ་མ། །ཞེས་ལཱ་སྱེ་མ་ནི་ཀུན་གཞིའི་རྣམ་ཤེས་ཀྱི་ཡུལ་གནས་འགྱུར་དང་། ཡིད་ཀྱི་ཡུལ་དུ་གནས་འགྱུར་མཱ་ལེ་མ། །ཞེས་མཱ་ལེ་མ་ཆོས་ཁམས་དང་། ཉོན་མོངས་ཡུལ་དུ་སྣང་བ་གནས་འགྱུར་གཱི་ཏི་མ། །ཞེས་གཱི་ཏི་མ་ཉོན་ཡིད་དང་། ལུས་ཀྱི་ཡུལ་དུ་སྣང་འགྱུར་ནིར་ཏི་མ། །ཞེས་ནཱིརྟི་མ་རེག་བྱ་དང་། མིག་གི་ཡུལ་དུ་སྣང་བ་གནས་འགྱུར་དྷཱུ་པེ་མ། །ཞེས་དྷཱུ་པེ་མ་གཟུགས་དང་། རྣ་བའི་ཡུལ་དུ་སྣང་བ་གནས་འགྱུར་པུཥྤེ་མ། །ཞེས་པུཥྤེ་མ་སྒྲ་དང་། སྣ་བའི་ཡུལ་དུ་སྣང་བ་གནས་འགྱུར་ཨཱ་ལོ་ཀེ། །ཞེས་ཨཱ་ལོ་ཀེ་ནི་དྲི་དང་། ལྕེ་ཡི་ཡུལ་དུ་སྣང་བ་གནས་འགྱུར་གནྡྷེ་མ། །ཞེས་གནྡྷེ་མ་རོ་རུ་སྦྱར་བ་ལ་སོགས་པ་རྒྱུད་རྣམས་སུ་སྦྱར་ཚུལ་མི་འདྲ་བ་མཐའ་ཡས་པ་མོད་སྤྲོས་པས་ཆོག་གོ།

རྡོ་རྗེ་དཔལ་མཆོག་ཆེན་པོའི་བརྟག་པ་ལས། མེ་ལོང་པི་ཝང་གླིང་བུ་རྫ་རྔ་དང་། །བཞད་མ་གླུ་མ་ཕྲེང་མ་གར་མ་དང་། །རྫ་རྔ་ཆེ་དང་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་སྣོད་འཛིན་དང་། །གོས་དང་ཆོས་འབྱུང་ལ་སོགས་འཛིན་པ་ཡི། །བཅུ་དྲུག་རིག་མ་ལྷ་མོ་རྣམ་སྒེག་ཅིང་། །ཞེས་གསུངས་པ་ནི་མཆོད་པའི་ལྷ་མོ་བཅུ་དྲུག་ཏུ་གྲགས་པ་དེ་ལགས་ཤིང་། འདིར་བཤད་པའི་སེམས་མ་བརྒྱད་ཀྱང་དེའི་གྲས་སོ།།

ད་ནི་དཀྱུས་ལ་འཇུག་སྟེ། དོན་དམ་པར་དེ་ལྟར་སེམ༷ས་མ༷་བརྒྱད༷་ཀྱི༷་དགོང༷ས་པ་ཡུལ་བརྒྱད་དམིགས་མེད་བསམ་བརྗོད་དང་བྲལ་བ་དང་། སྤྱོད༷་པ་ཡུལ་བརྒྱད་སེམས་མ་བརྒྱད་ཀྱི་རང་བཞིན་དུ་ཤེས་པའི་བླང་དོར་བྱ་བྱེད་ལས་འདས་པ་དེ༷་འདྲ༷་ཡིན་ན་ཡང༷་། དོན་ལ་དེ༷་ལྟར༷་ཡིན་པར་མ་བཟུང་བར་ཡུལ་བརྒྱད་བདེན་གྲུབ་རང་མཚན་པ་དང་། སེམས་མ་བརྒྱད་ཞལ་ཕྱག་མཚན་མའི་ཆོས་ཅན་དུ་བཟུང་ནས་གནས་ལུགས་རྣལ་མའི་དོན་གང་ཡིན་པ་དེ་སྒྲིབ་པ་དང་ཉེས་ལྟུང་སྟུག་པོས་བསྒྲིབས་པ་བད༷ག་གིས༷་ནི་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོག༷ས་ཏེ༷། སེམ༷ས་མ༷་བརྒྱད༷་ཀྱི༷་ཐུག༷ས་ཀྱི་དགོངས་སྤྱོད་དང༷་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་སེམས་མ་བརྒྱད་ཀྱི་ཚོགས་ཁྱེད༷་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་སེམས་མ་བརྒྱད་ཀྱི་དགོངས་སྤྱོད་ཀྱི་དོན་ལས་གོལ་ཞིང་། སེམས་མ་བརྒྱད་ཅེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་རྣམ་པར་ཤེས་པ་ཚོགས་བརྒྱད་དང་། དེའི་ཡུལ་བརྒྱད་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་། དེའི་དབང་གིས་བྱུང་བའི་ཉམས་ཆག་རྣམས་བཤགས་པའོ།།

དྲུག་པ་ཐུབ་པ་དྲུག་གི་ཀློང་བཤགས་ནི། ཐུབ་པ་དྲུག་རྣམས་གསན་ཅིང་དགོངས་སུ་གསོལ༔ ཉོན་མོངས་དྲུག་ནི་ཡེ་ནས་མངོན་སངས་རྒྱས༔ ཐུབ་པ་དྲུག་གི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ ཐུབ་པ་དྲུག་གི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། ཡེ་ཤེས་རྔམ་གློག་ལས། སྤྲུལ་སྐུ་ཐུབ་པ་ཆེན་པོ་དྲུག །ཅིས་འདུལ་ཐབས་ཀྱི་སྐུར་སྟོན་པས། །ཆ་ལུགས་མ་ངེས་འདུལ་བར་སྟོན། །ཞེས་དང་། ཞི་ཁྲོའི་ལས་བྱང་ཚོར་གྲོལ་ལས། གཉིས་མེད་རོལ་བའི་འགྲོ་འདུལ་སྤྲུལ་སྐུ་དྲུག༔ བརྒྱ་བྱིན་ཐག་བཟང་ཤཱཀ་ཐུབ་སེངྒེ་བརྟན༔ ཁ་འབར་ཆོས་རྒྱལ་རིགས་དྲུག་འདུལ་མཛད་དྲུག༔ འགྲོ་འདུལ་སྤྲུལ་པའི་ཐུབ་དྲུག་ཆེན་པོ་ཡང་༔ ཞེས་གསུངས་པ་ལྟར། ལྷ་ཡི་ཐུབ་པ་དབང་པོ་བརྒྱ་བྱིན་དང་། ལྷ་མ་ཡིན་གྱི་ཐུབ་པ་ཐག་བཟང་རིས་མཆོག་དང་། མི་ཡི་ཐུབ་པ་ཤཱཀྱ་ཐུབ་པ་དང་། དུད་འགྲོའི་ཐུབ་པ་སེངྒེ་རབ་བརྟན་དང་། ཡི་དྭགས་ཀྱི་ཐུབ་པ་ཁ་འབར་མ་དང་། དམྱལ་བའི་ཐུབ་པ་ཆོས་ཀྱི་རྒྱལ་པོ་སྟེ། འགྲོ་བ་འདུལ་བའི་སྤྲུལ་སྐུ་ཐུབ༷་པ༷་ཆེན་པོ་དྲུག༷་རྣམ༷ས་ཉེས་ལྟུང་བཤགས་པ་པོ་བདག་ལ་སྙན་གྱིས་གས༷ན་ཅིང༷་། ཐུགས་ཀྱིས་ལེགས་པར་དགོང༷ས་ཏེ་བརྩེ་བས་གཟིགས་སུ༷་གསོ༷ལ་ཞེས་ཡང་བཤགས་ཡུལ་ཐུབ་པ་དྲུག་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

དོན་དམ་པར་ཉོན་མོངས་པ་འདོད་ཆགས་ཞེ་སྡང་གཏི་མུག་ཕྲག་དོག་ང་རྒྱལ་སེར་སྣ་དྲུག་པོ་ནི་གདོད་མ་ནས་རྣམ་པར་དག་པ་སྐྱེ་བ་མེད་པའི་ཆོས་ཉིད་དེ་བཞིན་ཉིད་དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་དུ་ཡེ་ནས་མངོན་པར་སངས་རྒྱས་པ་གང་ཡིན་པ་དེ་ལ་ཐུབ་པ་དྲུག་ཅེས་བྱ་བ་ལས་བདེན་པར་གྲུབ་པ་དང་ཞལ་ཕྱག་མཚན་མའི་རང་བཞིན་ཅན་དུ་གྲུབ་པའི་ཐུབ་པ་དྲུག་ཟེར་བ་ཞིག་ག་ཤེད་ཅིག་ཏུ་མ་མཆིས་པ་ཡིན་ཏེ། ཉོན་མོངས་པ་ང་རྒྱལ་ཡེ་ནས་རྣམ་པར་དག་པ་ལྷ་ཡི་ཐུབ་པ་དབང་པོ་བརྒྱ་བྱིན་དཀར་པོ་པི་ཝང་འཛིན་པ་དང་། ཉོན་མོངས་པ་ཕྲག་དོག་ཡེ་ནས་རྣམ་པར་དག་པ་ལྷ་མིན་གྱི་ཐུབ་པ་ཐག་བཟང་རིས་ལྗང་གུ་གོ་མཚོན་འཛིན་པ་དང་། ཉོན་མོངས་པ་འདོད་ཆགས་ཡེ་ནས་རྣམ་པར་དག་པ་མི་ཡི་ཐུབ་པ་ཤཱཀྱ་ཐུབ་པ་སེར་པོ་ལྷུང་བཟེད་དང་འཁར་གསིལ་འཛིན་པ་དང་། ཉོན་མོངས་པ་གཏི་མུག་ཡེ་ནས་རྣམ་པར་དག་པ་བྱོལ་སོང་ངམ་དུད་འགྲོའི་ཐུབ་པ་སེངྒེ་རབ་བརྟན་མཐིང་ག་པུསྟི་འཛིན་པ་དང་། ཉོན་མོངས་པ་སེར་སྣ་ཡེ་ནས་རྣམ་པར་དག་པ་ཡི་དྭགས་ཀྱི་ཐུབ་པ་ཁ་འབར་མ་དམར་པོ་སྒྲོམ་བུ་འཛིན་པ་དང་། ཉོན་མོངས་པ་ཞེ་སྡང་ཡེ་ནས་རྣམ་པར་དག་པ་དམྱལ་བའི་ཐུབ་པ་ཆོས་ཀྱི་རྒྱལ་པོ་སྨུག་ནག་མེ་ཆུ་འཛིན་པ་རྣམས་སུ་བཏགས་པ་ཙམ་ཡིན་པའི་ཕྱིར་ཏེ། ཞི་ཁྲོའི་ལས་བྱང་ཚོར་གྲོལ་ལས། ཉོན་དྲུག་རང་གྲོལ་སྤྲུལ་སྐུ་ཐུབ་དྲུག་ཤར༔ བརྒྱ་བྱིན་ཐག་བཟང་ཤཱཀྱ་ཐུབ་པ་དང་༔ སེངྒེ་བརྟན་ཁ་འབར་ཆོས་ཀྱི་རྒྱལ༔ ཞེས་དང་། ཉོན་མོངས་དྲུག་དག་རིགས་དྲུག་གནས་ནས་འདྲེན༔ བརྒྱ་བྱིན་ཐག་བཟང་ཤཱཀ་ཐུབ་སེངྒེ་བརྟན༔ ཁ་འབར་ཆོས་རྒྱལ་རིགས་དྲུག་དོང་ནས་སྤྲུག༔ འགྲོ་བའི་དོན་མཛད་མཛད་པ་བསམ་མི་ཁྱབ༔ སྤྲུལ་པའི་སྐུ་མཆོག་ཐུབ་པ་དྲུག་རྣམས་ལ༔ ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཆགས་སོགས་ཉོན་མོངས་དྲུག་པོ་ཉིད། །ཐུབ་པ་སྤྲུལ་པ་དྲུག་ཏུ་བཤད། །ཅེས་གསུངས་པའི་ཕྱིར་རོ།།

གཞུང་འདིར་ཐུབ་དྲུག་གི་སྐུ་མདོག་མ་བཤད་མོད་གཞུང་འདིའི་རྒྱབ་རྟེན་ཞི་ཁྲོའི་ལས་བྱང་ཆེ་བ་རྩ་ཕྲེང་ཚོར་བ་རང་གྲོལ་ལས་བཤད་པ་དང་རྒྱུད་སྡེ་གཞན་པ་འགའ་ནས་བཤད་པ་དག་མི་འདྲ་བའི་ཕྱིར་ཅུང་ཟད་དཔྱད་ན། ལས་བྱང་ཚོར་ལས། སྟེང་དུ་བརྒྱ་བྱིན་པི་ཝང་དཀར༔ འོག་ཏུ་ཆོས་རྒྱལ་མེ་ཆུ་ནག༔ ཤར་ལྷོར་ཐག་བཟང་གོ་མཚོན་ལྗང་༔ ལྷོ་ནུབ་ཤཱཀ་ཐུབ་གསེག་པར་སེར༔ ནུབ་བྱང་སེངྒེ་པུསྟི་མཐིང་༔ བྱང་ཤར་ཁ་འབར་སྒྲོམ་བུ་དམར༔ ཞེས་གསུངས་པ་ལྟར་བཤད་མ་ཐག་པ་བཞིན་དང་། ཞི་ཁྲོའི་བརྒྱ་ཕྱག་སྡིག་སྒྲིབ་རང་གྲོལ་དང་། ཞི་ཁྲོའི་སྒོམ་རིམ་ལྷན་སྐྱེས་ཡེ་ཤེས་རྣམས་ཚུལ་འདི་དང་དགོངས་པ་གཅིག་དང་དབྱངས་གཅིག་ལགས་མོད། མི་འདྲ་བ་ནི་གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་ལས། ཐུབ་དྲུག་ཕྱག་རྒྱ་ཆེན་པོ་ནི། །རྒྱུད་དྲུག་གནས་ནས་འདྲེན་པ་སྟེ། །གསེག་པར་ཕྱག་རྒྱ་ཚུལ་འཛིན་པས། །སྐུ་མདོག་སེར་པོས་མི་རྣམས་འདྲེན། །པི་བང་ཕྱག་རྒྱ་ཚུལ་འཛིན་པས། །སྐུ་མདོག་དཀར་པོ་ལྷ་རྣམས་འདྲེན། །ཞེས་ཤཱཀྱ་ཐུབ་པ་དང་། དབང་པོ་བརྒྱ་བྱིན་གཉིས་ཞི་ཁྲོ་དང་སྤྱི་ལུགས་རྣམས་དང་མཐུན་པར་བཤད་ལ། གོ་ཆ་མདུང་ཐུང་ཕྱག་རྒྱ་ཡིས། །སྐུ་མདོག་མཐིང་ནག་ལྷ་མིན་འདྲེན། །ཞེས་ཐག་བཟང་རིས་ཞི་ཁྲོ་ལྟར་ལྗང་གུ་མིན་པར་མཐིང་ནག་ཏུ་བཤད་པ་དང་། རིན་ཆེན་འབར་བའི་ཕྱག་རྒྱ་ཡིས། །སྐུ་མདོག་སྔོན་པོ་ཡི་དྭགས་འདྲེན། །ཞེས་ཐུབ་པ་ཁ་འབར་མ་ཞི་ཁྲོ་ལྟར་དམར་པོ་མིན་པར་སྔོན་པོར་བཤད་པ་དང་། པོ་ཏི་བརྩེགས་པའི་ཕྱག་རྒྱ་ཡིས། །སྐུ་མདོག་སེར་ནག་བྱོལ་སོང་འདྲེན། །ཞེས་སེང་གེ་རབ་བརྟན་ཞི་ཁྲོ་ལྟར་མཐིང་ག་མིན་པར་སེར་ནག་ཏུ་བཤད་པ་དང་། མེ་འབར་ཆུ་འབེབས་ཕྱག་རྒྱ་ཡིས། །སྐུ་མདོག་སྔོན་པོ་དམྱལ་བ་འདྲེན། །ཞེས་ཆོས་རྒྱལ་ཡང་ནག་པོ་མིན་པར་སྔོན་པོ་རུ་བཤད་དོ།།

རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཐུབ་དྲུག་དཀར་སེར་མཐིང་ག་དང་། །དམར་ནག་སེར་ནག་དུད་ཀ་སྟེ། །ཕྱོགས་བཞི་སྟེང་འོག་ཤར་ནུབ་ཚུལ། །པི་ཝང་གོ་ཆ་སེག་པར་སྒྲོམ། །པོ་ཏི་མེ་ཆུར་ཤེས་པར་བྱ། །ཞེས་བརྒྱ་བྱིན་དང་། ཤཱཀྱ་ཐུབ་པ་དང་། ཁ་འབར་མ་དང་། ཆོས་རྒྱལ་བཞི་ཞི་ཁྲོ་དང་མཐུན་པ་དང་། ལྷ་མིའི་ཐུབ་པ་གཉིས་ཀྱི་ཁར་ཐག་བཟང་རིས་དང་། སེངྒེ་རབ་བརྟན་གཉིས་གསང་སྙིང་དང་འདྲ་བར་བཤད་པས་དེ་ལྟར་རྒྱུད་སོ་སོར་མི་འདྲ་བའི་ཁྱད་པར་མངའ་བ་ཤེས་པར་བྱའོ།།

རྡོ་རྗེ་བཀོད་པའི་རྒྱུད་རྣལ་འབྱོར་གྲུབ་པའི་ལུང་ཀུན་འདུས་རིག་པའི་མདོ་ལས་ནི། ཇི་ལྟར་འཇིག་རྟེན་དྲུག་གི་ཕྱོགས་བཅུར་ཡང་ཐུབ་པ་ཆེན་པོ་ཞེས་བྱ་བ་ཡང་གྲགས་པ་ནི་འདི་ལྟ་སྟེ། ལྷའི་གནས་སུ་ཐུབ་པ་ཆེན་པོ་སྲིད་ཐུབ་འཛིན་ཞེས་བྱ་བར་གྲགས་སོ། །ལྷ་མིན་གྱི་གནས་སུ་ཐུབ་པ་ཆེན་པོ་རྣམ་པར་རྒྱལ་བ་ཞེས་བྱ་བར་གྲགས་སོ། །མི་ཡི་གནས་སུ་ཐུབ་པ་ཆེན་པོ་ཤཱཀྱ་སེང་གེ་ཞེས་བྱ་བར་གྲགས་སོ། །བྱོལ་སོང་གི་གནས་སུ་ཐུབ་པ་ཆེན་པོ་རྣམ་པར་གནོན་པ་ཞེས་བྱ་བར་གྲགས་སོ། །ཡི་དྭགས་ཀྱི་གནས་སུ་ཐུབ་པ་ཆེན་པོ་རྣམ་པར་སྣང་བྱེད་ཅེས་བྱ་བར་གྲགས་སོ། །དམྱལ་བའི་གནས་སུ་ཐུབ་པ་ཆེན་པོ་ཆོས་ཀྱི་རྒྱལ་པོ་ཞེས་བྱ་བར་གྲགས་སོ། །ཞེས་ཐུབ་པ་ཆེན་པོ་དྲུག་གི་མཚན་ཡང་ཡོངས་གྲགས་དང་མི་འདྲ་བ་ཡང་གསུངས་སོ།།

འོ་ན་དེ་དག་འགལ་བ་ཡིན་ནམ་ཞེ་ན། དེ་ནི་མ་ཡིན་ཏེ། གསང་བ་སྙིང་པོ་སྒྱུ་འཕྲུལ་བླ་མ་ཆེན་པོ་ལས། ལ་ལ་ནི་འགྲོ་བ་དྲུག་འདུལ་བའི་དོན་དུ་ཐུབ་པ་ཆེན་པོ་དྲུག་ཏུ་བཞུགས་པ་འདི་ལྟ་སྟེ། ལྷ་ཡི་གནས་ན་བརྒྱ་བྱིན་མགོན། །ལྷ་མ་ཡིན་ལ་ཐག་བཟང་རིས། །མི་ལ་བདུད་འདུལ་ཤཱཀྱ་མགོན། །ཡི་དྭགས་གནས་ན་ཁ་འབར་བདེ། །བྱོལ་སོང་སེངྒེ་ཉིད་དུ་སྨྲ། །དམྱལ་བ་ལ་ནི་གཤིན་རྗེ་མགོན། །སྐུ་དང་ཆ་ལུགས་ཚུལ་སྟོན་ཅིང་། །ལ་ལ་ལྷུམས་ཞུགས་སྐུ་ལ་བལྟམས། །ལ་ལ་ཚུལ་སྲུང་རབ་ཏུ་བྱུང་། །ལ་ལ་བསྙེན་རྫོགས་དཀའ་ཐུབ་བྱེད། །ལ་ལ་དམ་ནོད་འགྲོ་བ་སྒྲོལ། །ལ་ལ་བཅུ་དྲུག་ཆོས་ལ་བཙུད། །ལ་ལ་མེར་འབར་ཆུ་ཡང་འབར། །ལ་ལ་རྡོ་རྗེ་བྲག་ཏུ་སྲ། །ལ་ལ་གསོ་གསོད་ཕམ་རྒྱལ་བྱེད། །ལ་ལ་བཅིང་སྒྲོལ་འགུག་སྒྲོལ་བྱེད། །ལ་ལ་བདུད་འདུལ་ངན་སོང་སྦྱོང་། །ལ་ལ་དཀྱིལ་འཁོར་མཆོད་སྤྲིན་འཁྲིལ། །ཀུན་ཀྱང་ཆོས་ཀྱི་འཁོར་ལོ་སྐོར། །ཞེས་གསུངས་པ་ལྟར་འགྲོ་བ་འདུལ་བའི་ཚུལ་གྱི་གཟུགས་སྟོན་ཚུལ་མི་འདྲ་བ་སྣ་ཚོགས་པའི་དབང་གིས་ཡིན་པའི་ཕྱིར་རོ།།

ད་ནི་དཀྱུས་ལ་འཇུག་སྟེ། དེ་ལྟར་དོན་དམ་པར་ཐུབ༷་པ༷་དྲུག༷་གི༷་དགོ༷ངས་པ་ཉོན་མོངས་པའི་དུག་དྲུག་དམིགས་པ་མེད་ཅིང་བསམ་བརྗོད་དང་བྲལ་བའི་གཉིས་མེད་མཉམ་པ་ཆེན་པོ་དང་། སྤྱོད༷་པ་ཉོན་མོངས་པ་དྲུག་གི་ངོ་བོ་ཐུབ་པ་དྲུག་གི་རང་བཞིན་དུ་ཤེས་པའི་བླང་དོར་བྱ་བྱེད་ལས་འདས་པ་དེ༷་འདྲ༷་ཡིན་ན་ཡ༷ང་། དོན་ལ་དེ༷་ལྟར༷་དུ་མ་བཟུང་བར་ཐུབ་པ་དྲུག་བདེན་གྲུབ་རང་མཚན་པ་དང་། ཞལ་ཕྱག་མཚན་མའི་ཆོས་ཅན་དུ་བཟུང་ནས་གནས་ལུགས་རྣལ་མའི་དོན་གང་ཡིན་པ་དེ་སྒྲིབ་པ་དང་ཉེས་ལྟུང་སྟུག་པོས་བསྒྲིབས་པ་བད༷ག་གིས༷་ནི་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོགས༷་ཏེ༷། ཐུབ༷་པ༷་དྲུག༷་གི༷་ཐུག༷ས་ཀྱི་དགོངས་སྤྱོད་དང༷་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་ཐུབ་པ་དྲུག་གི་ཚོགས་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་ཐུབ་པ་དྲུག་གི་དགོངས་སྤྱོད་ཀྱི་དོན་ལས་གོལ་ཞིང་། ཐུབ་པ་དྲུག་ཅེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་ཉོན་མོངས་དྲུག་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་དེས་བསྐྱེད་པའི་ཉེས་ལྟུང་རྣམས་བཤགས་པའོ།།

བདུན་པ་སྒོ་བ་བཞི་ཡི་ཀློང་བཤགས་ནི། སྒོ་བ་བཞི་རྣམས་གསན་ཅིང་དགོངས་སུ་གསོལ༔ རྟག་ཆད་མུ་བཞི་ཡེ་ནས་མངོན་སངས་རྒྱས༔ སྒོ་བ་བཞི་ཡི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ སྒོ་བ་བཞི་ཡི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། སྒོ་བཞིར་རིམ་པ་ཇི་བཞིན་དུ། །སྟོབས་ཆེན་གཤིན་རྗེ་གཤེད་པོ་དང་། །རྟ་མགྲིན་བདུད་རྩི་འཁྱིལ་བ་བཞི། །ཞེས་དང་། ཧེ་རུ་ཀ་སྙིང་རྗེ་རོལ་བའི་རྒྱུད་ལས། གཤིན་རྗེ་འཇོམས་དང་སྟོབས་པོ་ཆེ། །རྟ་མགྲིན་དང་ནི་བདུད་རྩིར་འཁྱིལ། །སྒོ་བཞི་དག་ཏུ་རིམ་བཞིན་ནོ། །ཞེས་དང་། ལས་བྱང་ཚོར་གྲོལ་ལས། རྣམ་རྒྱལ་གཤེད་པོ་དབང་ཆེན་བདུད་རྩི་འཁྱིལ༔ ཞེས་གསུངས་པ་ལྟར་དཀྱིལ་འཁོར་གྱི་སྒོ་སྲུང་བར་བྱེད་པའི་ལྷ་ཁྲོ་བོ་ཆེན་པོ་རྣམ་པར་རྒྱལ་བ་དང་། གཤིན་རྗེ་གཤེད་པོ་དང་། རྟ་མགྲིན་དབང་ཆེན་དང་། བདུད་རྩི་འཁྱིལ་བ་སྟེ། སྒོ༷་བ༷་བཞི༷་པོ་རྣམ༷ས་དམ་ཚིག་ཉེས་ལྟུང་བཤགས་པ་པོ་བདག་ལ་སྙན་གྱིས་གས༷ན་ཅིང༷་། ཐུགས་ཀྱིས་ལེགས་པར་དགོང༷ས་ཏེ་བརྩེ་བས་གཟིགས་སུ༷་གསོ༷ལ་ཞེས་ཡང་བཤགས་ཡུལ་སྒོ་བ་བཞི་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

དོན་དམ་པར་འཁོར་འདས་ཀྱིས་བསྡུས་པའི་ཆོས་ཐམས་ཅད་བདེན་གྲུབ་ཏུ་ཡོད་པ་རྟག༷་པའི་མཐའ་དང་། ཐ་སྙད་དུ་མེད་པ་ཆ༷ད་པའི་མཐའ་དང་། ཆོས་དང་གང་ཟག་གི་བདག་གི་ངོ་བོར་ལྟ་བ་བདག་ལྟའི་མཐའ་དང་། དེ་དང་འདིའོ་ཞེས་མཚན་མར་ལྟ་བའི་མུ༷་སྟེ་མཐའ་བཞི༷་པོ་གང་གི་ངོ་བོར་ཡང་མ་གྲུབ་པར་གདོད་མ་ནས་སྐྱེ་འགགས་མཚན་མའི་ཆོས་ལས་འདས་པ་ཡེ༷་ནས༷་རྣམ་པར་དག་པ་མངོ༷ན་པར་རྫོགས་པར་སང༷ས་རྒྱས༷་པའི་རང་བཞིན་ཅན་གང་ཡིན་པ་དེ་ནི་ཁྲོ་ཆེན་སྒོ་བ་བཞིའི་རང་བཞིན་ཡིན་ཏེ། ལས་བྱང་ཚོར་གྲོལ་ལས། ཚད་མེད་བཞི་ལྡན་རྟག་ཆད་མུ་བཞི་བྲལ༔ འཕྲིན་ལས་འགྲོ་དོན་སྒོ་བ་ཡབ་ཡུམ་བརྒྱད༔ ཞེས་དང་། མུ་བཞི་གནས་དག་ཚད་མེད་བཞི་དང་ལྡན་༔ རྣམ་རྒྱལ་གཤིན་རྗེ་རྟ་མགྲིན་བདུད་རྩི་འཁྱིལ༔ ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ༔ སྒོ་བ་ཡབ་ཡུམ་བརྒྱད་ལ་ཕྱག་འཚལ་ལོ༔ ཞེས་གསུངས་པའི་ཕྱིར། དེ་ཡང་དོན་དམ་པར་རྟག་ལྟ་རྣམ་པར་དག་པ་ཤར་གྱི་སྒོ་བ་རྣམ་པར་རྒྱལ་བ་དཀར་པོ་ལྕགས་ཀྱུ་འཛིན་པ་དང་། ཆད་ལྟ་རྣམ་པར་དག་པ་ལྷོ་ཡི་སྒོ་བ་གཤིན་རྗེའི་གཤེད་པོ་སེར་པོ་ཞགས་པ་འཛིན་པ་དང་། བདག་ཏུ་ལྟ་བ་རྣམ་པར་དག་པ་ནུབ་ཀྱི་སྒོ་བ་རྟ་མགྲིན་རྒྱལ་དམར་པོ་ལྕགས་སྒྲོག་འཛིན་པ་དང་། མཚན་མར་ལྟ་བ་རྣམ་པར་དག་པ་བྱང་གི་སྒོ་བ་བདུད་རྩི་འཁྱིལ་བ་ལྗང་གུ་དྲིལ་བུ་འཛིན་པའི་རང་བཞིན་ཡིན་ཞིང་། དེ་ལྟར་དུ་བཏགས་པ་ཙམ་ལས་ཞལ་ཕྱག་མཚན་མ་ཅན་དུ་མ་གྲུབ་སྟེ། ཞི་ཁྲོའི་ལྷ་དབང་གི་དབང་བཤད་ལས། འོ་སྐལ་ལྡན་རིགས་ཀྱི་བུ་རྣམས༔ སྒོ་བ་བཞི་ཡང་གུད་ན་མེད་དེ༔ རྟག་པར་ལྟ་བ་གནས་སུ་དག་པ་རྣམ་པར་རྒྱལ་བ༔ ཆད་པར་ལྟ་བ་གནས་སུ་དག་པ་གཤིན་རྗེའི་གཤེད་པོ༔ བདག་ཏུ་ལྟ་བ་གནས་སུ་དག་པ་རྟ་མགྲིན༔ མཚན་མར་ལྟ་བ་གནས་སུ་དག་པ་སྒོ་བ་བདུད་རྩི་འཁྱིལ་པའི་རང་བཞིན་ཡིན་པས་ངོ་ཤེས་པར་མཛོད་ཅིག༔ ཅེས་གསུངས་པའི་ཕྱིར་རོ།།

དེ་ལྟར་ཀློང་བཤགས་འདི་ཉིད་དང་། བརྒྱ་ཕྱག་སྡིག་སྒྲིབ་རང་གྲོལ་དང་། ལས་བྱང་ཚོར་གྲོལ་དང་། དབང་བཤད་རྣམས་སུ་རྟག་ཆད་མུ་བཞི་རྣམ་པར་དག་པ་ལ་སྒོ་བ་བཞི་ལ་སྦྱར་འདུག་ལ། ཞི་ཁྲོའི་བསྐང་བཤགས་ཉམས་ཆགས་རང་གྲོལ་ལས་ནི་རྟག་ཆད་མུ་བཞི་སྒོ་མ་བཞི་ལ་སྦྱར་ནས་སྒོ་བ་བཞི་ལ་ལུས་ཀྱི་རྣམ་པར་ཤེས་པ་དང་། ལུས་ཀྱི་དབང་པོ་དང་། ལུས་ཀྱི་རེག་ཡུལ་ཏེ་རེག་བྱ་དང་། ལུས་ཀྱི་རེག་ཤེས་ཏེ་ལུས་ཤེས་འདས་མ་ཐག་པའི་ཡིད་དབང་སྟེ། རེག་བྱ་འཇམ་རྩུབ་ཏུ་རྟོག་པའི་ཡིད་ཤེས་རྟོག་བཅས་ཀྱི་སྔ་ལོག་དེ་མ་ཐག་ཏུ་འགགས་པའི་ལུས་ཤེས་ཡིད་དབང་དུ་གྱུར་པ་བཞི་གནས་སུ་དག་པ་ལ་སྦྱར་འདུག་སྟེ། དེ་ཉིད་ལས། ལུས་ཀྱི་རྣམ་ཤེས་གནས་དག་པའི༔ གཤིན་རྗེ་གཤེད་པོའི་ཐུགས་དམ་བསྐང་༔ ལུས་ཀྱི་དབང་པོ་གནས་དག་པའི༔ སྟོབས་པོ་ཆེ་ཡི་ཐུགས་དམ་བསྐང་༔ ལུས་ཀྱི་རེག་ཡུལ་གནས་དག་པའི༔ རྟ་མགྲིན་རྒྱལ་པོའི་ཐུགས་དམ་བསྐང་༔ ལུས་ཀྱི་རེག་ཤེས་གནས་དག་པའི༔ བདུད་རྩི་འཁྱིལ་བའི་ཐུགས་དམ་བསྐང་༔ ཞེས་གསུངས་པའི་ཕྱིར། དེ་ལྟར་ན་བསྐང་བཤགས་འདིའི་དགོངས་པ་ནི། ཀློང་བཤགས་ཀྱི་བཤད་བྱ་རྩ་བའི་རྒྱུད་དྲི་མེད་བཤགས་པའི་རྒྱུད་ཀྱི་དགོངས་པ་ཡིན་ཏེ། དེ་ཉིད་ལས། དོན་དམ་པར་སེམས་ཅན་གྱི་ལུས་ཀྱི་རེག་པ་གནས་སུ་དག་པ། ཁྲོ་བོ་ཆེན་པོ་གཤིན་རྗེའི་གཤེད་པོ་སྟེ། ཞེས་དང་། ལུས་ཀྱི་དབང་པོ་གནས་སུ་དག་པ། ཁྲོ་བོ་ཆེན་པོ་སྟོབས་པོ་ཆེ་སྟེ། ཞེས་དང་། ལུས་ཀྱི་རེག་བྱ་གནས་སུ་དག་པ། ཁྲོ་བོ་ཆེན་པོ་རྟ་མགྲིན་ཏེ། ཞེས་དང་། ལུས་ཀྱི་རེག་ཤེས་གནས་སུ་དག་པ། ཁྲོ་བོ་ཆེན་པོ་བདུད་རྩི་འཁྱིལ་པ་སྟེ། ཞེས་གསུངས་པའི་ཕྱིར། དེ་དང་དགོངས་པ་ཕལ་ཆེར་གཅིག་ཏུ་མཐུན་པར་ནི་རྒྱུད་གཞན་གྱི་ལུགས་སུའང་སྣང་སྟེ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གང་དུ་ལུས་དང་བཅས་པ་ཡི། །དབང་པོ་ཡུལ་དང་རྣམ་ཤེས་རེག །རང་རྒྱུད་བཅད་པའི་ཡེ་ཤེས་ཉིད། །སྒོ་བ་རྣམ་པ་བཞི་རུ་གསུངས། །ཞེས་དང་། ཡེ་ཤེས་རྔམ་གློག་ལས། སྲིད་གསུམ་སེམས་ཅན་ཐམས་ཅད་ཀྱི། །རེག་བྱེད་དང་བའི་བདག་ཉིད་དེ། །ལུས་ཀྱི་ཁམས་ཞེས་བྱ་བར་གྲགས། །རེག་བྱེད་བྱ་བ་བྱེད་པས་ན། །གཤིན་རྗེ་འཇོམས་པའི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །རེག་བྱ་ཀུན་ལ་སྤྱོད་པ་ཀུན། །ལུས་ཀྱི་རྣམ་ཤེས་ཞེས་སུ་གྲགས། །རེག་པའི་ཡེ་ཤེས་ཡིན་པའི་ཕྱིར། །རྣམ་པར་རྒྱལ་བའི་རང་བཞིན་ཡིན། །སྲིད་གསུམ་སེམས་ཅན་ཐམས་ཅད་ཀྱི། །འབྱུང་དང་འབྱུང་འགྱུར་རེག་བྱ་རྣམས། །རེག་བྱའི་སྐྱེ་མཆེད་ཉིད་དུ་གྲགས། །རེག་པར་བྱ་བའི་ཡུལ་ཡིན་པས། །རྟ་མཆོག་དཔལ་གྱི་རང་བཞིན་ནོ། །སྲིད་གསུམ་སེམས་ཅན་ཐམས་ཅད་ཀྱི། །ཚོགས་དྲུག་འགགས་པའི་དེ་མ་ཐག །གོ་འབྱེད་གསལ་བའི་བདག་ཉིད་དེ། །ཡིད་ཀྱི་ཁམས་ཞེས་བྱ་བར་གྲགས། །དེ་སྤྱོད་བྱ་བ་བྱེད་པའི་ཕྱིར། །བདུད་རྩི་འཁྱིལ་བའི་རང་བཞིན་ཡིན། །ཞེས་གསུངས་པའི་ཕྱིར་རོ།།

འོན་ཀྱང་བསྐང་བཤགས་དང་ཡེ་ཤེས་རྔམ་གློག་གིས་རེག་སོགས་བཞི་སྒོ་བ་སོ་སོར་སྦྱར་ཚུལ་ནི་མི་འདྲ་བ་ལུང་ལ་བལྟས་པ་ཙམ་གྱིས་ཤེས་པ་ལྟར་རོ། །ཁྲོ་བོའི་རྒྱལ་པོ་མི་གཡོ་བ་གསང་སྔགས་གསང་བའི་རྒྱུད་ལས། འབྱུང་བ་སྒོ་བ་བཞི་ཉིད་དེ། །ཞེས་ས་ཆུ་མེ་རླུང་གི་འབྱུང་བ་བཞི་དག་པ་སྒོ་བ་བཞི་རུ་བཤད་པའང་ཡོད་དོ།།

དྲི་མེད་བཤགས་རྒྱུད་ལས། བྱམས་པ་ཆེན་པོས་འགྲོ་བའི་དོན་ཚར་གཅོད་པར་མཛད་པས་ཕྱག་རྒྱ་ནྲྀ་མགོ་གདེངས་པ་ཅན། ཤར་སྒོའི་བདག་པོ་ལ་ཕྱག་འཚལ་ལོ། །ཞེས་དང་། སྙིང་རྗེ་ཆེན་པོས་འགྲོ་བའི་དོན་དུག་ལྔ་ཡེ་ཤེས་ལྔས་འཇོམས་པར་མཛད་པས་ཕྱག་རྒྱ་རྡོ་རྗེ་རྩེ་ལྔ་ཅན། ལྷོ་སྒོའི་བདག་པོ་ལ་ཕྱག་འཚལ་ལོ། །ཞེས་དང་། དགའ་བ་ཆེན་པོས་འགྲོ་བའི་དོན་མཛད་པས་ཕྱག་རྒྱ་ཐོད་དབྱུག་སྦྲུལ་གྱིས་དཀྲིས་པ་ཅན། ནུབ་སྒོའི་བདག་པོ་ལ་ཕྱག་འཚལ་ལོ། །ཞེས་དང་། བཏང་སྙོམས་ཆེན་པོས་འགྲོ་བའི་དོན་མཐར་ཕྱིན་པར་མཛད་པས་ཕྱག་རྒྱ་རྡོ་རྗེ་རྒྱ་གྲམ་ཅན། བྱང་སྒོའི་བདག་པོ་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང་། །ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །ཞེས་གསུངས་པས་ཚད་མེད་རྣམ་བཞིའི་དག་པ་ལའང་སྦྱར་འདུག་པ་ཤེས་སོ།།

གཞན་ཡང་རྟ་མཆོག་རོལ་བ་ལས། ཤར་སྒོར་གཤིན་རྗེ་གཤེད་པོ་ཆེ། །མཐིང་ནག་བེ་ཅོན་རྩེ་གསུམ་ཕྲེང་། །ལྷོ་སྒོར་སྟོབས་ཆེན་སེར་སྐྱའི་མདངས། །རྡོ་རྗེ་ཞགས་པ་རིན་ཆེན་ཕྲེང་། །ནུབ་སྒོར་རྟ་མཆོག་འཇིགས་བྱེད་རྒྱལ། །ཐོད་སྤྲུལ་དྲིལ་བུ་ལུ་གུ་རྒྱུད། །བྱང་སྒོར་རྡོ་རྗེ་འཁྱིལ་པ་སྟེ། ལྗང་སྐྱ་རྡོ་རྗེ་རྩེ་གསུམ་མཐུ། །ཁྲོ་བོ་ཆ་ལུགས་རྔམ་བརྗིད་དང་། །དུར་ཁྲོད་རིམ་པའི་ཆས་ཀྱིས་བརྒྱན། །ལྕགས་གྱུ་ཞགས་པ་ལྕགས་སྒྲོག་དྲིལ། །སྤྱན་དམར་འཇིགས་བྱེད་འོད་དཔུང་དང་། །རྡོ་རྗེ་མཆེ་སོགས་ཁྲོ་གཉེར་ཅན། །ཡབ་ཡུམ་འཁྱིལ་བ་བརྐྱང་བསྐུམ་སྐུ། །ཞེས་ཕྱོགས་ཀྱི་འགོད་ཚུལ་དང་སྐུ་མདོག་སོགས་མི་འདྲ་བ་ཡོད་ཀྱང་མི་སྤྲོའོ།།

དཀྱུས་ལ་འཇུག་སྟེ། དེ་ལྟར་དོན་དམ་པར་སྒོ༷་བ༷་བཞི༷་ཡི༷་དགོང༷ས་པ་རྟག་ཆད་མུ་བཞིའི་སྤྲོས་པ་དང་བྲལ་བའི་ཆོས་ཉིད་གཉིས་མེད་མཉམ་པ་ཆེན་པོ་དང་། སྤྱོད༷་པ་རྟག་ཆད་མུ་བཞིའི་ངོ་བོ་སྒོ་བ་བཞིའི་རང་བཞིན་དུ་ཤེས་པའི་དམིགས་མེད་སྨྲ་བསམ་དང་བྲལ་བའི་བླང་དོར་བྱ་བྱེད་ལས་འདས་པ་དེ༷་འདྲ༷་ཡིན་ན་ཡ༷ང་། དོན་ལ་དེ༷་ལྟར༷་མ་བཟུང་བར་སྒོ་བ་བཞི་བདེན་གྲུབ་རང་མཚན་པ་དང་། ཞལ་ཕྱག་མཚན་མའི་ཆོས་ཅན་དུ་བཟུང་ནས་གནས་ལུགས་རྣལ་མའི་དོན་གང་ཡིན་པ་དེ་ཉིད་སྒྲིབ་པ་དང་ཉེས་ལྟུང་སྟུག་པོས་བསྒྲིབས་པ་བད༷ག་གིས༷་ནི་ཇི་བཞིན་མ༷་རིག༷་ཅིང་དགོངས་སྤྱོད་དེ་དང་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོ༷གས་ཏེ༷། སྒོ༷་བ༷་བཞི༷་ཡི༷་ཐུག༷ས་ཀྱི་དགོངས་སྤྱོད་ད༷ང་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་སྒོ་བ་བཞིའི་ཚོགས་ཁྱེ༷ད་ཅག་གི་སྤྱན་སྔ་ལ་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་སྒོ་བ་བཞིའི་དགོངས་སྤྱོད་ཀྱི་དོན་ལས་གོལ་ཞིང་། སྒོ་བ་བཞི་ཞེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་རྟག་ཆད་མུ་བཞི་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་། དེའི་རྐྱེན་ལས་བྱུང་བའི་ཉེས་ལྟུང་གི་ཚོགས་དག་བཤགས་པའོ།།

བརྒྱད་པ་སྒོ་མ་བཞི་ཡི་ཀློང་བཤགས་ནི། སྒོ་མ་བཞི་རྣམས་གསན་ཅིང་དགོངས་སུ་གསོལ༔ ཚད་མེད་བཞི་ནི་ཡེ་ནས་མངོན་སངས་རྒྱས༔ སྒོ་མ་བཞི་ཡི་དགོངས་སྤྱོད་དེ་འདྲ་ཡང་༔ དེ་ལྟར་བདག་གིས་མ་རིག་མ་རྟོགས་ཏེ༔ སྒོ་མ་བཞི་ཡི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཉིས་ཀྱིས་བསྟན་ལ། སངས་རྒྱས་རབས་བདུན་གྱི་བཀྲ་ཤིས་པའི་ཚིགས་བཅད་ལས། སྒོ་བ་ལྕགས་ཀྱུ་མ་དང་སྒོ་བ་ཞགས་པ་དང་། །སྒོ་བ་ལྕགས་སྒྲོག་མ་དང་སྒོ་བ་དྲིལ་བུར་བཅས། །བཅོམ་ལྡན་སྒོ་སྲུང་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ཅེས་དང་། ངན་སོང་སྦྱོང་རྒྱུད་ལས། དད་སོགས་ངོ་བོ་ལས་བྱུང་བ། །སྒོ་བཞིའི་དབུས་ན་གང་བཞུགས་པ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྒོ་སྐྱོང་ཁྱེད་རྣམས་ལ་ཕྱག་འཚལ། །ཞེས་དང་། རྡོ་རྗེ་མཁའ་འགྲོ་ལས། རྡོ་རྗེ་ལྕགས་ཀྱུ་ཞགས་པ་དང་། །རྡོ་རྗེ་ལྕགས་སྒྲོག་དྲིལ་བུ་ཉིད། །ལྷ་མོ་དག་ནི་བཞི་པོ་འདི། །ཞེས་དང་། ལས་བྱང་ཚོར་གྲོལ་ལས། ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ༔ ཞེས་གསུངས་པ་ལྟར། ཐབས་བདེ་བ་ཆེན་པོའི་ཡེ་ཤེས་ཀྱི་ངོ་བོ་རིགས་ཀྱི་སྒོ་སྐྱོང་ཁྲོ་བོ་བཞིའི་ཡུམ་དུ་གྱུར་པ་ཤེས་རབ་སྟོང་པ་ཉིད་མཚོན་བྱེད་སྒོ༷་མ༷་ལྕགས་ཀྱུ་མ་དང་། ཞགས་པ་མ་དང་། ལྕགས་སྒྲོག་མ་དང་། དྲིལ་བུ་མ་བ༷ཞི་པོ་དེ་རྣམ༷ས་ཉེས་སྒྲིབ་ངན་པ་འགྱོད་པས་བཤགས་པ་པོ་བདག་ལ་སྙན་གྱིས་གས༷ན་ཅི༷ང་། ཐུགས་ཀྱིས་ལེགས་པར་དགོང༷ས་ཏེ་བརྩེ་བས་གཟིགས་སུ༷་གསོ༷ལ་ཞེས་ཡང་བཤགས་ཡུལ་སྒོ་མ་བཞི་ལ་སྙན་གསན་ཕབ་ཅིང་དགོངས་པ་གཏད་པར་གསོལ་བའོ།།

དེ་ཡང་སྙིང་རྗེ་ཚད་མེད་དང་། བྱམས་པ་ཚད་མེད་དང་། དགའ་བ་ཚད་མེད་དང་། བཏང་སྙོམས་ཚ༷ད་མེ༷ད་བཞི༷་ཡི་ངོ་བོ་ནི༷་དོན་དམ་པར་བདེན་པར་མ་གྲུབ་པས་གདོད་ནས་མ་གྲུབ་པར་དོན་དམ་བརྗོད་མེད་འོད་གསལ་དམིགས་བྲལ་ཆེན་པོར་ཡེ༷་ནས༷་ཡང་དག་པར་མངོ༷ན་པར་སང༷ས་རྒྱས༷་པའི་རང་བཞིན་ཅན་གང་ཡིན་པ་དེ་ནི་སྒོ་མ་བཞིའི་རང་བཞིན་ཡིན་ཏེ། སྙིང་རྗེ་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་ལྕགས་ཀྱུ་མ་དཀར་མོ་ལྕགས་ཀྱུ་འཛིན་པ་དང་། བྱམས་པ་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་ཞགས་པ་མ་སེར་མོ་ཞགས་པ་འཛིན་པ་དང་། དགའ་བ་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་ལྕགས་སྒྲོག་མ་དམར་པོ་ལྕགས་སྒྲོག་འཛིན་པ་དང་། བཏང་སྙོམས་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་དྲིལ་བུ་མ་ལྗང་གུ་དྲིལ་བུ་འཛིན་པའི་རང་བཞིན་ཡིན་པར་གསུངས་པའི་ཕྱིར། གྲུབ་སྟེ། བརྒྱ་ཕྱག་སྡིག་སྒྲིབ་རང་གྲོལ་ལས། སྙིང་རྗེ་ཚད་མེད་རིགས་དྲུག་གནས་ནས་འདྲེན༔ སྐུ་མདོག་དཀར་མོ་འགུགས་བྱེད་ལྕགས་ཀྱུ་འཛིན༔ ཁྲོ་བོའི་སྐུ་ལ་གཉིས་མེད་དགྱེས་པར་འཁྲིལ༔ རྡོ་རྗེ་ལྕགས་ཀྱུ་མ་ལ་ཕྱག་འཚལ་ལོ༔ བྱམས་པ་ཚད་མེད་འགྲོ་བའི་དོན་མཛད་མ༔ སྐུ་མདོག་སེར་མོ་འཆིང་བྱེད་ཞགས་པ་འཛིན༔ ཁྲོ་བོའི་སྐུ་ལ་གཉིས་མེད་དགྱེས་པར་འཁྲིལ༔ རྡོ་རྗེ་ཞགས་པ་མ་ལ་ཕྱག་འཚལ་ལོ༔ དགའ་བ་ཚད་མེད་འགྲོ་བ་དང་དུ་ལེན༔ སྐུ་མདོག་དམར་མོ་སྡོམ་བྱེད་ལྕགས་སྒྲོག་འཛིན༔ ཁྲོ་བོའི་སྐུ་ལ་གཉིས་མེད་དགྱེས་པར་འཁྲིལ༔ རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ༔ བཏང་སྙོམས་ཚད་མེད་འགྲོ་ལ་ཉེ་རིང་མེད༔ སྐུ་མདོག་ལྗང་གུ་འབེབས་བྱེད་དྲིལ་བུ་འཛིནཿ ཁྲོ་བོའི་སྐུ་ལ་གཉིས་མེད་དགྱེས་པར་འཁྲིལ༔ རྡོ་རྗེ་དྲིལ་བུ་མ་ལ་ཕྱག་འཚལ་ལོ༔ ཞེས་གསུངས་པའི་ཕྱིར། དེ་ལྟར་གཞུང་འདི་དང་། བརྒྱ་ཕྱག་དང་། ལས་བྱང་ཚོར་གྲོལ་རྣམས་ཀྱི་དགོངས་པ་ཚད་མེད་བཞི་རྣམ་པར་དག་པ་སྒོ་མ་བཞི་རུ་བཞེད་ལ། གཞན་ཡང་རྫུས་སྐྱེས་དང་། མངལ་སྐྱེས་དང་། སྒོང་སྐྱེས་དང་། དྲོད་གཤེར་ལས་སྐྱེས་པ་སྟེ་སྐྱེ་གནས་བཞི་ཡི་ངོ་བོ་དང་། དེར་རྟོག་པའི་རྣམ་རྟོག་བཞིའི་རང་བཞིན་གནས་སུ་དག་པ་སྟེ་ཡེ་ནས་སངས་རྒྱས་པའི་རང་བཞིན་ཅན་གང་ཡིན་པ་དེ་ནི་སྒོ་མ་བཞིའི་རང་བཞིན་ཡིན་པར་གསུངས་ཏེ། ཞི་ཁྲོའི་ལྷ་དབང་གི་ངོ་སྤྲོད་ལས། འོ་སྐལ་ལྡན་རིགས་ཀྱི་བུ་རྣམས༔ སྒོ་མ་བཞི་ཡང་གུད་ན་མེད་དེ༔ སྐྱེ་གནས་ཀྱི་རྟོག་པ་བཞི་གནས་སུ་དག་པ་སྒོ་མ་བཞིའི་རང་བཞིན་ཏེ༔ རྫུས་སྐྱེས་ཀྱི་རྟོག་པ་གནས་སུ་དག་པ་ལྕགས་ཀྱུ་མ༔ མངལ་སྐྱེས་ཀྱི་རྟོག་པ་གནས་སུ་དག་པ་ཞགས་པ་མ༔ སྒོང་སྐྱེས་ཀྱི་རྟོག་པ་གནས་སུ་དག་པ་ལྕགས་སྒྲོག་མ༔ དྲོད་གཤེར་ལས་སྐྱེས་པའི་རྟོག་པ་གནས་སུ་དག་པ་ནི་སྒོ་མ་དྲིལ་བུ་མའི་རང་བཞིན་ཡེ་ནས་ཀྱང་ཡིན་ཏེ༔ སྐལ་ལྡན་རྣམས་ཀྱིས་ཀྱང་ཡིན་པ་ལ་ཡིན་པར་ཤེས་པའི་ངེས་ཤེས་དང་ལྡན་པར་མཛོད་ཅིག༔ ཅེས་གསུངས་པའི་ཕྱིར་རོ།།

བསྐང་བཤགས་ཉམས་ཆགས་རང་གྲོལ་ལས་ནི་སྨོས་ཟིན་རྣམས་དང་མི་མཐུན་པར་སྒོ་བ་བཞི་ལ་སྦྱར་བའི་ལྟ་བ་བཞི་པོ་གནས་སུ་དག་པ་བཞི་སྒོ་མ་བཞི་ལ་སྦྱར་འདུག་སྟེ། རྟག་ལྟ་གནས་དག་སྒོ་མ་ལྕགས་ཀྱུ་མ་དང་། ཆད་ལྟ་གནས་དག་སྒོ་མ་ཞགས་པ་དང་། བདག་ལྟ་གནས་དག་སྒོ་མ་ལྕགས་སྒྲོག་མ་དང་། མཚན་མར་ལྟ་བ་གནས་དག་སྒོ་མ་དྲིལ་བུ་མ་ལ་སྦྱར་འདུག་པའི་ཕྱིར། གྲུབ་སྟེ། དེ་ཉིད་ལས། རྟག་པར་ལྟ་བ་གནས་དག་པའི༔ ལྕགས་ཀྱུ་མ་ཡི་ཐུགས་དམ་བསྐང་༔ ཆད་པར་ལྟ་བ་གནས་དག་པའི༔ ཞགས་པ་མ་ཡི་ཐུགས་དམ་བསྐང་༔ བདག་ཏུ་ལྟ་བ་གནས་དག་པའི༔ ལྕགས་སྒྲོག་མ་ཡི་ཐུགས་དམ་བསྐང་༔ མཚན་མར་ལྟ་བ་གནས་དག་པའི༔ དྲིལ་བུ་མ་ཡི་ཐུགས་དམ་བསྐང་༔ ཞེས་གསུངས་པའི་ཕྱིར་རོ།།

འདི་དང་མཐུན་པའི་རྒྱུད་ཀྱི་ཁུངས་ནི་ཡོད་དེ། དྲི་མེད་བཤགས་རྒྱུད་ལས། དོན་དམ་པར་སེམས་ཅན་གྱི་རྟག་པར་བལྟ་བ་གནས་སུ་དག་པ། བཛྲ་ཨངྐུ་ཤ་སྟེ། འཁོར་བའི་ཉོན་མོངས་པ་ཐུགས་རྗེས་འཛིན་པར་བྱེད་པས་ཕྱག་རྒྱ་ལྕགས་ཀྱུ་ཅན། རྡོ་རྗེ་ལྕགས་ཀྱུ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་ཆད་པར་བལྟ་བ་གནས་སུ་དག་པ། བཛྲ་པཱ་ཤ་སྟེ། འཁོར་བའི་ཉོན་མོངས་པ་ཐུགས་རྗེས་འདྲེན་པར་བྱེད་པས་ཕྱག་རྒྱ་ཞགས་པ་ཅན། རྡོ་རྗེ་ཞགས་པ་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་བདག་ཏུ་བལྟ་བ་གནས་སུ་དག་པ། བཛྲ་སྥོ་ཊ་སྟེ། འཁོར་བའི་ཉོན་མོངས་པ་ཐུགས་རྗེས་མི་འཆོར་བར་མཛད་པས་ཕྱག་རྒྱ་ལྕགས་སྒྲོག་ཅན། རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །དོན་དམ་པར་སེམས་ཅན་གྱི་མཚན་མར་བལྟ་བ་གནས་སུ་དག་པ། བཛྲ་གྷཎྜ་སྟེ། འཁོར་བའི་ཉོན་མོངས་པ་ཐུགས་རྗེས་ཐལ་བར་རློག་པར་མཛད་པས་ཕྱག་རྒྱ་དྲིལ་བུ་ཅན། རྡོ་རྗེ་དྲིལ་བུ་མ་ལ་ཕྱག་འཚལ་ལོ། །རྟག་ཆད་མཐར་ཕྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མ། །སྒོ་མ་ཆེན་མོ་བཞི་ལ་ཕྱག་འཚལ་ལོ། །ཞེས་གསུངས་པའི་ཕྱིར་རོ།།

གཞན་ཡང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། རང་རྒྱུད་རྟག་ཆད་བཟློག་པ་དང་། །གཟུངས་དང་ལྷ་དང་བདེ་བ་དང་། །ཐིག་ལེ་རིག་པར་བཅས་པ་ཉིད། །གང་ཕྱིར་གནས་ནས་དགུག་པ་དང་། །གང་དུའང་འགྲོ་བར་མི་ནུས་དང་། །དེ་ལས་འདའ་བར་དཀའ་བ་དང་། །བསྟིམས་ནས་བདེ་བས་དྲིལ་བུ་མ། །གཟུང་དང་འཁྱུད་དང་བསྡམ་པ་དང་། །གཉིས་སུ་མེད་པས་བདེ་ཆེན་པོ། །རང་ལུས་སྣང་སྲིད་བརྟན་གཡོ་ལ། །རྟོགས་པ་གོམས་པའི་ཚུལ་གྱིས་སྦྱར། །ཞེས་དང་། ཡེ་ཤེས་རྔམ་གློག་ལས། སྣོད་བཅུད་འགྲོ་བ་ཐམས་ཅད་ཀྱི། །འཇིག་དང་སྐད་ཅིག་མི་རྟག་པ། །རྟག་པར་མ་ཡིན་ཞེས་སུ་གྲགས། །སྒྱུ་མ་ལྟ་བུ་ཡིན་པའི་ཕྱིར། །ལྕགས་ཀྱུ་མ་ཡི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །ཀུན་རྟོག་གཞན་དབང་མེད་མིན་པ། །ཆད་པར་མ་ཡིན་ཞེས་སུ་གྲགས། །རྨི་ལམ་ལྟ་བུ་སེམས་སྣང་ཕྱིར། །ཞགས་པ་མ་ཡི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །གཟུང་འཛིན་དངོས་པོར་མ་གྲུབ་པ། །མཚན་མར་མ་ཡིན་ཞེས་སུ་གྲགས། །སྨིག་རྒྱུ་ལྟ་བུ་ཡིན་པའི་ཕྱིར། །ལྕགས་སྒྲོག་མ་ཡི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །སྐྱེས་བུ་བྱེད་པ་མ་གྲུབ་པ། །བདག་ཏུ་མ་ཡིན་ཞེས་སུ་གྲགས། །སྒྲ་བརྙན་ལྟ་བུའི་སེམས་སྣང་ཕྱིར། །དྲིལ་བུ་མ་ཡི་རང་བཞིན་ཡིན། །ཞེས་གསུངས་པའི་ཕྱིར། འོན་ཀྱང་ཡེ་ཤེས་རྔམ་གློག་གི་ལུགས་འདིར་བསྐང་བཤགས་དང་བཤགས་རྒྱུད་སོགས་དང་མི་འདྲ་བར་མཚན་མར་ལྟ་བ་ལྕགས་སྒྲོག་མ་དང་། བདག་ལྟ་དྲིལ་བུ་མར་སྦྱར་འདུག་གོ།

གོང་དུ་ངན་སོང་སྦྱོང་རྒྱུད་དྲངས་པ་ལས་གསལ་བ་ལྟར་རྒྱུད་གཞན་དུ་དད་པའི་དབང་པོ་དང་། བརྩོན་འགྲུས་ཀྱི་དབང་པོ་སོགས་ལ་སྦྱར་བ་སོགས་མང་པོ་མཆིས་མོད་མི་སྤྲོའོ།།

རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། རྣམ་རྒྱལ་གཤིན་རྗེ་གཤེད་པོ་དང་། །རྟ་མགྲིན་བདུད་རྩི་འཁྱིལ་བ་ཅི། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་ཞེས་བྱ་གང་ཕྱིར་བརྗོད། །ཅེས་དང་། གསང་བ་སྙིང་པོ་དེ་ཁོ་ན་ཉིད་ངེས་པ་ལས། སྟོབས་ཆེན་ཁྲོ་བོ་ཆེན་པོ་ཡང་། །ཡུམ་མཆོག་རྡོ་རྗེ་ལྕགས་ཀྱུ་དང་། །གཉིས་མེད་དབྱིངས་ཀྱི་ངང་དུ་འཁྲིལ། །ཞེས་དང་། ཁྲོ་ཆེན་གཤིན་རྗེ་གཤེད་པོ་ཡང་། །ཡུམ་མཆོག་རྡོ་རྗེ་ཞགས་པ་དང་། །གཉིས་མེད་དབྱིངས་ཀྱི་ངང་དུ་འཁྲིལ། །ཞེས་དང་། ཁྲོ་ཆེན་རྟ་མགྲིན་དཔའ་བོ་ཡང་། །ཡུམ་མཆོག་རྡོ་རྗེ་ལྕགས་སྒྲོག་དང་། །གཉིས་མེད་དབྱིངས་ཀྱི་ངང་དུ་འཁྲིལ། །ཞེས་དང་། ཁྲོ་ཆེན་བདུད་རྩི་འཁྱིལ་བ་ཡང་། །ཡུམ་མཆོག་རྡོ་རྗེ་དྲིལ་འཁྲོལ་དང་། །བྱང་གི་སྒོ་ནས་དབྱིངས་སུ་འཁྲིལ། །ཞེས་གསུངས་པ་ལྟར། ཞི་ཁྲོའི་གཞུང་འདིར་ཡང་ཡང་གསལ་བར་བྱུང་བ་ལྟར་སྒོ་བ་བཞི་ཐབས་ཀྱི་རང་བཞིན་ཡབ་དང་། སྒོ་མ་བཞི་ནི་ཤེས་རབ་ཀྱི་རང་བཞིན་ཡུམ་ཏེ་སྒོ་བ་བཞིའི་ཡུམ་དུ་བཤད་པས་སྐབས་འགར་སྒོ་མ་བཞི་ལ་གཤིན་རྗེ་གཤེད་མོ་དང་། རྣམ་པར་རྒྱལ་མ་དང་། རྟ་མགྲིན་མོ་དང་། བདུད་རྩི་འཁྱིལ་མོ་ཞེས་པའི་ཡབ་རྣམས་ཀྱི་མིང་གི་ཆ་ཤས་ནས་བརྗོད་པའང་ཡོད་དེ། ཡེ་ཤེས་རྔམ་གློག་ལས། གཤེད་མོ་དང་ནི་རྒྱལ་མ་དང་། །རྟ་མགྲིན་མོ་དང་འཁྱིལ་མོ་རྣམས། །ལག་མཚན་ལྕགས་ཀྱུ་ཞགས་པ་དང་། །སྒྲོག་དང་དྲིལ་བུ་ཐོགས་ཤིང་རྔམ། །ཆ་ལུགས་འཇོམས་པ་དག་དང་འདྲ། །སྒོ་ཁྱུད་དག་ཏུ་ལྷུན་གྱིས་གྲུབ། །ཅེས་གསུངས་པའི་ཕྱིར། དེ་ཕྱིར་རྒྱུད་འདི་ལས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་རྣམས་ཕྱག་མཚན་དུ་བཤད་པ་ལྟར་དོན་ལའང་ཕྱག་མཚན་ཡིན་མོད། ཕྱག་མཚན་གྱི་མིང་ལྷ་མིང་དུ་བཏགས་པ་ནི་རྒྱུད་ཐམས་ཅད་དབྱངས་གཅིག་སྟེ། རྡོ་རྗེ་རྩེ་མོ་ལས། ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་དག་ནི་སྒོ་བ་བཞི། །རྡོ་རྗེ་སེམས་མའི་རྡོ་རྗེ་ཆེ། །དེ་བཞིན་རྡོ་རྗེ་རིན་ཆེན་ནོར། །པདྨ་རྡོ་རྗེ་ཆོས་མ་སྟེ། །རྡོ་རྗེ་རྣོན་པོ་ལས་མ་ཡིན། །ཞེས་གསུངས་པ་ལྟར་ཡིན་པའི་ཕྱིར་རོ།།

དཀྱུས་ལ་འཇུག་སྟེ། དེ་ལྟར་སྒོ༷་མ༷་བཞི༷་ཡི༷་དགོང༷ས་པ་ཚད་མེད་རྣམ་བཞི་དང་སྐྱེ་གནས་བཞི་སྤྲོས་པ་དང་བྲལ་བའི་ཆོས་ཉིད་གཉིས་མེད་མཉམ་པ་ཆེན་པོ་དང་། སྤྱོད༷་པ་ཚད་མེད་རྣམ་བཞི་དང་སྐྱེ་གནས་བཞིའི་ངོ་བོ་སྒོ་མ་བཞིའི་རང་བཞིན་དུ་ཤེས་པའི་དམིགས་པ་མེད་པ་སྨྲ་བསམ་དང་བྲལ་བའི་བླང་དོར་བྱ་བྱེད་ལས་འདས་པ་དེ༷་འདྲ༷་ཡིན་ན་ཡ༷ང་། དོན་ལ་དེ༷་ལྟར༷་ཡིན་མོད་སྒོ་མ་བཞི་བདེན་གྲུབ་རང་མཚན་པ་དང་། ཞལ་ཕྱག་མཚན་མའི་ཆོས་ཅན་དུ་བཟུང་ནས་གནས་ལུགས་རྣལ་མའི་དོན་གང་ཡིན་པ་དེ་ཉིད། སྒྲིབ་པ་དང་ཉེས་ལྟུང་སྟུག་པོས་བསྒྲིབས་པ་བད༷ག་གིས༷་ནི་ཇི་བཞིན་མ༷་རི༷ག་ཅིང་དགོངས་སྤྱོད་དེ་ཐོབ་བྱེད་ཀྱི་ལྟ་སྒོམ་ལམ་གྱི་རིམ་པ་རྣམས་མ༷་རྟོག༷ས་ཏེ༷། སྒོ༷་མ༷་བཞི༷་ཡི༷་ཐུག༷ས་ཀྱི་དགོངས་སྤྱོད་ད༷ང་ཅི༷་འག༷ལ་བ༷་ཐམས་ཅད་ཟག་པ་མེད་ཅིང་ཚད་མེད་པའི་ཐུག༷ས་རྗེ༷་རྒྱ་ཆེ༷་བ་མང༷འ་བ་ཡེ་ཤེས་ཀྱི་སྒོ་མ་བཞིའི་ཚོགས་ཁྱེ༷ད་ཅག་གི་སྤྱན་སྔ་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་སྒོ་མ་བཞིའི་དགོངས་སྤྱོད་ཀྱི་དོན་ལས་གོལ་ཞིང་། སྒོ་མ་བཞི་ཞེས་པ་ཀུན་རྫོབ་ཞལ་ཕྱག་ཅན་གྱི་ལྷ་ཉིད་དུ་མཚན་མར་འཛིན་པས་ཚད་མེད་རྣམ་བཞི་དང་སྐྱེ་གནས་བཞི་རྣམ་པར་དག་པའི་ཆོས་ཉིད་ཀྱི་དོན་དང་འགལ་བ་ཉིད་དང་། དེའི་དབང་གིས་བྱུང་བའི་ལྟུང་བ་དང་ཉེས་སྡིག་རྣམས་བཤགས་པའོ།།

ཞི་བའི་ལྷ་ལ་གནོང་བཤགས་བྱ་བ།

གཉིས་པ་ཞི་བའི་ལྷ་ལ་གནོང་བཤགས་བྱ་བ་ལ་ནི། མདོར་བསྟན་པ་དང་། རྒྱས་པར་བཤད་པ་དང་། མཇུག་བསྡུ་བ་གསུམ་ལས། དང་པོ་ཞི་བ་སྤྱིའི་གནོང་བཤགས་མདོར་བསྟན་པ་ནི། ཨོཾ་རང་རིག་ཡེ་ཤེས་བློ་དང་མ་ལྡན་ཏེ༔ བདག་གི་ཕུང་པོ་ཁམས་སྐྱེ་མཆེད་རྣམས༔ ཞི་བའི་དཀྱིལ་འཁོར་ལྷ་རུ་སྦྱོར་མ་འཚལ༔ སངས་རྒྱས་བཞི་བཅུ་གཉིས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། དེ་ནས་ཞི་བ་སྤྱིའི་ལྷ་ལ་ཉེས་ལྟུང་གི་གནོང་བ་བཤགས་པར་བྱ་བའི་སྒོ་ནས་མདོར་བསྟན་པ་ནི། ཨོཾ༷་ནི་གོང་ལྟར་སྐུ་ལྔ་ཡེ་ཤེས་ལྔ་མཚོན་པ་དང་། དེའི་སྒོ་ནས་ཤིས་པ་བརྗོད་པའི་ཚིག་སྟེ། དམ་ཚིག་ཉམས་པ་རྣམས་ལེགས་པར་ཕྱིར་བཅོས་པས་སྒྲིབ་གཉིས་བག་ཆགས་དང་བཅས་པ་མྱུར་དུ་དག་སྟེ་སྐུ་ལྔ་ཡེ་ཤེས་ལྔའི་འབྲས་བུ་མངོན་དུ་གྱུར་ཅིག་ཅེས་པའོ།།

རང་རིག་ཡེ་ཤེས་ཞེས་པ་ནི་ཐེག་པ་ཆེན་པོའི་མདོ་སྔགས་གཉིས་ཀའི་ཆོས་སྐད་ལ་བྱུང་ཞིང་། དེ་ཡང་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་རང་བཞིན་གྱིས་མ་གྲུབ་པ་སྤྲོས་པ་མཐའ་དག་དང་བྲལ་བའི་གནས་ལུགས་སྟོང་ཉིད་པ་དང་། དེ་རྟོགས་པའི་འཕགས་པ་རྣམས་ཀྱི་རྣམ་པར་མི་རྟོག་པའི་ཡེ་ཤེས་ཏེ། ཡུལ་དང་ཡུལ་ཅན་གཉིས་སུ་མེད་པར་ཆུ་ལ་ཆུ་བཞག་པ་ལྟར་སོང་བའི་དབྱིངས་དང་ཡེ་ཤེས་གཉིས་མེད་ཟུང་འཇུག་ཆེན་པོའི་ཡེ་ཤེས་དེའི་དོན་དེ་ལ་གོ་དགོས་ཤིང་། ཁྱད་པར་དུ་འདིར་ནི་ཆོས་རྣམས་ཀྱི་ཆོས་ཉིད་ཀ་དག་ཆེན་པོའི་རང་བཞིན་ལ་རྡུལ་བྲལ་དྲི་མ་མེད་པའི་ཡེ་ཤེས་ཡེ་ནས་དབྱེར་མེད་པར་ཆོས་ཉིད་ཀྱི་ངོ་བོ་སོ་སོར་རང་གིས་རིག་པའི་ཚུལ་དུ་དབྱིངས་དང་ཡེ་ཤེས་འདུ་འབྲལ་མེད་པར་གནས་པར་འདོད་པ་དེའམ་དེ་འདྲའི་ཡུལ་ཅན་ཡེ་ཤེས་ལ་རང་རིག་ཡེ་ཤེས་བྱ་སྟེ། འཕགས་པ་ལང་ཀར་གཤེགས་པའི་མདོ་ལས། ཟབ་མོ་སྟོང་ཉིད་སྟོང་པའི་དོན། །བྱིས་པ་རྣམས་ཀྱིས་རྟོགས་མི་ནུས། །དངོས་པོ་ཐམས་ཅད་རང་བཞིན་དང་། །ཚིག་གི་ཆོས་ནི་མིག་ཡོར་འདྲ། །རང་རིག་ཡེ་ཤེས་ཡང་དག་མཐའ། །བུ་རྣམས་ལ་ནི་ངས་བཤད་དོ། །ཞེས་དང་། དམ་པའི་ཆོས་པདྨ་དཀར་པོ་ལས། སྲོག་ཆགས་རྣམས་ཀྱི་མོས་དང་བསམ་མཁྱེན་ནས། །ཆོས་རྣམས་རྣམ་པ་མང་པོ་རབ་ཏུ་བཤད། །རྣམ་པ་སྣ་ཚོགས་ཐབས་ཀྱིས་དགའ་བ་བསྐྱེད། །དེ་ནི་ང་ཡི་རང་རིག་ཡེ་ཤེས་སྟོབས། །ཞེས་དང་། དཔལ་གསང་བ་ཐམས་ཅད་གཅོད་པའི་རྒྱུད་ལས། དེ་ནས་རང་རིག་ཡེ་ཤེས་ཏེ། །ཆོས་ཀུན་སྟོང་པ་རོ་གཅིག་པའོ། །ཞེས་དང་། དཔལ་ཡེ་ཤེས་ཕྲེང་བའི་རྒྱུད་ལས། ལྟ་བ་ཤེས་རབ་ཕ་རོལ་ཕྱིན། །གདོད་ནས་སྤྲོས་བྲལ་ལྷུན་གྱིས་གྲུབ། །རང་རིག་ཡེ་ཤེས་དབྱིངས་ན་གསལ། །མ་རིག་མུན་པའི་སྒྲིབ་པ་མེད། །ཤེས་རབ་སྙིང་པོ་རྩེར་བྱུང་བ། །ལྟ་བ་ཀུན་གྱི་ཡང་རྩེ་ཡིན། །ཞེས་དང་། གསང་བ་སྙིང་པོ་ལས། ཡེ་ནས་མཉམ་ཉིད་དཀྱིལ་འཁོར་ལ། །ཐབས་དང་ཤེས་རབ་གཉིས་ལྡན་ཏེ། །རང་རིག་ཡེ་ཤེས་རྒྱལ་པོ་ཡིས། །ཐམས་ཅད་མ་ལུས་མཎྜ་ལ། །ཞེས་དང་། གསང་བ་བདུད་རྩིའི་རྒྱུད་ལས། ཆོས་སྐུ་སྐྱེ་མེད་ནམ་མཁའ་བཞིན། །རང་རིག་སྟོང་པ་འོད་གསལ་ལ། །ཞེས་གསུངས་པའི་ཕྱིར། ལས་བྱང་ཚོར་གྲོལ་ལས། རང་རིག་སྟོང་གསལ་རིག་པའི་མདངས༔ ཀུན་བཟང་རིགས་ལྔ་རྡོ་རྗེ་སེམས༔ སྣང་ལ་རང་བཞིན་མེད་པ་ཡིས༔ ཞེས་ཞི་ཁྲོའི་ལྷ་ཚོགས་རྟེན་དང་བརྟེན་པ་ཀུན་ཀྱང་རང་རིག་ཡེ་ཤེས་ཀྱི་རྩལ་ལས་སྣང་བ་དང་། དེའི་རྩལ་ཀློང་ནས་སྒྱུ་མ་ལྟ་བུའི་དཀྱིལ་འཁོར་ཀྱི་བཀོད་པ་ཡོངས་རྫོགས་གསལ་དགོས་པར་གསུངས་སོ།།

ཉམས་ཆགས་བཤགས་པ་པོ་རང་གི་རྒྱུད་ལ་དེ་ལྟ་བུའི་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། ཡེ་ཤེས་རྔམ་གློག་ལས། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་དྲི་མ་མེད། །ཕུང་པོ་ལྔ་དོན་སངས་རྒྱས་ལྔ། །འབྱུང་བ་ལྔ་དོན་དབྱིངས་ཕྱུག་ཡུམ། །ཁམས་དང་སྐྱེ་མཆེད་མང་པོ་ཀུན། །སེམས་དཔའ་སེམས་མའི་དཀྱིལ་འཁོར་ཡིན། དེས་ན་སྲིད་གསུམ་དཀྱིལ་འཁོར་ཆེ། །ཞེས་དང་། དམ་ཚིག་ཆེན་པོའི་རྒྱུད་ལས། ཕུང་པོ་ལྔ་ནི་རིགས་ལྔ་སྟེ། །འབྱུང་བ་ལྔ་ནི་ཡུམ་ལྔའོ། །སྐྱེ་མཆེད་སེམས་དཔའ་སེམས་མ་ཡིན། ། གཟུགས་ཕུང་རྣམ་པར་སྣང་མཛད་ལ། །ཞེས་དང་། དཔལ་ཕྱག་རྒྱ་ཆེན་པོའི་ཐིག་ལེའི་རྒྱུད་ལས། ཕུང་པོ་ལྔ་ནི་བདག་ཉིད་སྐུ། །མཁའ་འགྲོ་ལྔར་ནི་རབ་ཏུ་གྲགས། །མཁའ་འགྲོ་ལྔ་ནི་ཡེ་ཤེས་ལྔ། །འབྱུང་བ་ལྔ་ཡི་རང་བཞིན་ཅན། །ཞེས་དང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། ཕུང་པོ་ལྔ་ནི་སངས་རྒྱས་ལྔ། །འབྱུང་བཞི་ལྷ་མོ་བཞི་རུ་བརྗོད། །ཡུལ་ལྔ་འདོད་ཡོན་ལྷ་མོ་ལྔ། །རྣམ་ཤེས་བརྒྱད་ནི་བྱང་ཆུབ་སེམས། །ལུས་ཚིག་ལ་གནས་ཁྲོ་རྒྱལ་བཅུ། །བསྡུས་པ་ཡེ་ཤེས་ལྔར་སྦྱོར་བ། །བདེ་བ་ཆེན་པོའི་ཡེ་ཤེས་ནི། །དཔལ་ལྡན་རྡོ་རྗེ་འཆང་གི་དངོས། །ཞེས་གསུངས་པ་དང་གོང་དུ་བཤད་ཟིན་ལྟར། བད༷ག་རང་གི༷་རྒྱུད་ཀྱི་གཟུགས་ཕུང་སོགས་གཙོ་བོར་གྱུར་པའི་གཟིགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་སྟེ་ཕུང༷་པོ༷་ལྔ་དང་། མིག་གི་ཁམས་དང་། རྣ་བའི་ཁམས་དང་། སྣའི་ཁམས་དང་། ལྕེའི་ཁམས་དང་། ལུས་ཀྱི་ཁམས་དང་། ཡིད་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་དང་། རྣ་བའི་རྣམ་པར་ཤེས་པའི་ཁམས་དང་། སྣའི་རྣམ་པར་ཤེས་པའི་ཁམས་དང་། ལྕེའི་རྣམ་པར་ཤེས་པའི་ཁམས་དང་། ལུས་ཀྱི་རྣམ་པར་ཤེས་པའི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་དང་། གཟུགས་ཀྱི་ཁམས་དང་། སྒྲའི་ཁམས་དང་། དྲིའི་ཁམས་དང་། རོའི་ཁམས་དང་། རེག་བྱའི་ཁམས་དང་། ཆོས་ཀྱི་ཁམ༷ས་ཏེ་ཁམས་བཅོ་བརྒྱད་ དང༷་། མིག་གི་སྐྱེ་མཆེད་དང་། རྣ་བའི་སྐྱེ་མཆེད་དང་། སྣའི་སྐྱེ་མཆེད་དང་། ལྕེའི་སྐྱེ་མཆེད་དང་། ལུས་ཀྱི་སྐྱེ་མཆེད་དང་། ཡིད་ཀྱི་སྐྱེ་མཆེད་དང་། གཟུགས་ཀྱི་སྐྱེ་མཆེད་དང་། སྒྲའི་སྐྱེ་མཆེད་དང་། དྲིའི་སྐྱེ་མཆེད་དང་། རོའི་སྐྱེ་མཆེད་དང་། རེག་བྱའི་སྐྱེ་མཆེད་དང་། ཆོས་ཀྱི་སྐྱེ་མཆེད་དེ་སྐྱེ༷་མཆེ༷ད་བཅུ་གཉིས་པོ་རྣམ༷ས་ཀྱིས་བསྡུས་པའི་ཕྱི་ནང་གི་ཆོས་རྣམས་དོན་དམ་པར་ཞི༷་བ༷འི་ལྷ་ཚོགས་བཞི་བཅུ་རྩ་གཉིས་ཀྱི་དཀྱིལ་འཁོར་གྱི་ལྷ༷་སོ་སོའི་ངོ་བོ་རུ༷་སྦྱོར༷་བར་བྱེད་མ༷་འཚ༷ལ་བར་དེ་དག་གི་དག་པ་ལས་གཞན་དུ་འཛིན་པའི་རྟོག་པ་དང་། དེས་བསགས་པའི་ཉེས་ལྟུང་གི་ཚོགས་དེ་ཉིད། སྒྲིབ་གཉིས་སངས་ཤིང་བློ་གྲོས་རྣམ་པར་རྒྱས་པའི་སང༷ས་རྒྱ༷ས་ཞི་བ་བཞི༷་བ༷ཅུ་རྩ་གཉིས༷་པོ་རྣམས་ཀྱི་སྤྱན་སྔ་ལ༷་གནོང་འགྱོད་དྲག་པོས་བཤགས་ཤིང་བཟོ༷ད་པར༷་གསོ༷ལ་བ་འདེབས་སོ་ཞེས་ཕུང་ཁམས་སྐྱེ་མཆེད་ཀྱི་ངོ་བོ་ཞི་བའི་ལྷ་ཚོགས་ཀྱི་རང་བཞིན་རང་རིག་པའི་ཡེ་ཤེས་ལས་གཞན་དུ་འཛིན་པ་དང་། དེའི་དབང་གིས་བྱུང་བའི་ཉེས་ལྟུང་གི་ཚོགས་རྣམས་བཤགས་པའོ།།

གཉིས་པ་རྒྱས་པར་བཤད་པ་ལ། ཞི་བ་ཡབ་ལྔའི་གནོང་བཤགས་དང་། ཡུམ་ལྔ་དང་། སེམས་དཔའ་བརྒྱད་དང་། སེམས་མ་བརྒྱད་དང་། ཐུབ་པ་དྲུག་དང་། སྒོ་བ་ཡབ་ཡུམ་དང་། ཀུན་བཟང་ཡབ་ཡུམ་གྱི་གནོང་བཤགས་དང་བདུན་ལས། དང་པོ་ནི། རང་རིག་ཡེ་ཤེས་བློ་དང་མ་ལྡན་ཏེ༔ ཕུང་པོ་ལྔ་པོ་རིགས་ལྔར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ རིགས་ཀྱི་ཡབ་ལྔའི་ཚོགས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། ཉམས་ཆག་བཤགས་པ་པོ་རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། ཞི་ཁྲོའི་ལས་བྱང་ཚོར་བ་རང་གྲོལ་ལས། ཕུང་ལྔ་རྣམ་དག་བཅོམ་ལྡན་རིགས་ལྔ་ཡབ༔ ཞེས་གསུངས་པ་ལྟར། དོན་དམ་པའི་དབང་དུ་ན་གཟུགས་ཀྱི་ཕུང་པོ་རྣམ་པར་དག་པ་རྣམ་པར་སྣང་མཛད་དང་། ཚོར་བའི་ཕུང་པོ་རྣམ་པར་དག་པ་རིན་ཆེན་འབྱུང་ལྡན་དང་། འདུ་ཤེས་ཀྱི་ཕུང་པོ་རྣམ་པར་དག་པ་སྣང་བ་མཐའ་ཡས་དང་། འདུ་བྱེད་ཀྱི་ཕུང་པོ་རྣམ་པར་དག་པ་དོན་གྲུབ་པ་དང་། རྣམ་པ་ཤེས་པའི་ཕུང་པོ་རྣམ་པར་དག་པ་རྡོ་རྗེ་སེམས་དཔའ་སྟེ་ཕུ༷ང་པོ༷་ལྔ༷་པོ༷་དེ་ཉིད་རྒྱལ་བ་རིག༷ས་ལྔ༷འི་རང་བཞིན་ཡིན་པ་ལ་དེ་ལྟར་ཡིན་པར༷་སྦྱོར༷་བར་བྱེད་མ༷་འཚ༷ལ་བར་ཕུང་ལྔ་རིགས་ལྔ་ལས་གཞན་དུ་བཟུང་སྟེ། དེ་དང་དེར་རྟོག་པ་དང་མཚན་མར་འཛིན་པའི་སྒོ་ནས་ཆོས་ཀྱི་གནས་ལུགས་ཇི་བཞིན་མི་ཤེས་པའི་མ༷་རི༷ག་པའི་དབང་གིས་ར༷ང་སེམ༷ས་ནི་བདག་གོ་ཞེས་དང་། ཕུང་པོ་ལྔ་ནི་བདག་གིའོ་ཞེས་བད༷ག་ཏུ༷་གྲུབ་པར་བཟུང༷་བ༷ས་ཕུང་པོ་ལྔ་རྣམ་པར་དག་པའི་དོན་མ་རྟོགས་སོ།།

དེས་ན་དེ་ལྟར་མ་རྟོགས་པས་སེམས་ནོང༷ས་པ་སྟེ་ནོར་ཞིང་འཁྲུལ་བར་གྱུར་ཅིང་། དེའི་དབང་གིས་ཉེས་ལྟུང་མི་བཟད་པ་མང་པོ་བྱུང་བ་ལགས་ལ། ད་ནི་འགྱོད་པ་ཆེན་པོས་སངས་རྒྱས་རྡོ་རྗེ་རིན་ཆེན་པདྨ་ལས་ཀྱི་རིག༷ས་ཀྱི༷་ཡ༷བ་ལྔ༷འི་ཚོག༷ས་ལ༷་བཤགས་ཤིང་བཟོ༷ད་པ༷ར་མཛོད་ཅིག་ཅེས་གསོ༷ལ་བ་འདེབས་སོ་ཞེས་ཕུང་ལྔ་རྒྱལ་བ་རིགས་ལྔའི་རང་བཞིན་ཡིན་པ་ལས་གཞན་དུ་འཛིན་པའི་དབང་གིས་ཕུང་ལྔ་རིགས་ལྔར་རྟོགས་པའི་རང་རིག་པའི་ཡེ་ཤེས་མ་སྐྱེས་ཤིང་། མ་རྟོགས་པ་དེ་ལས་བྱུང་བའི་ཉོན་མོངས་པས་བསྐྱེད་པའི་ཉེས་པ་རྣམས་བཤགས་པའོ།།

ཀློང་བཤགས་ཀྱི་དཔེ་ལ་ལར། སྐབས་འདིར་རྒྱལ་བ་རིགས་ལྔ་ཞེས་པ་མེད་པར། ཀུན་ཏུ་བཟང་པོའི་ཚོགས་ལ་བཟོད་པར་གསོལ༔ ཞེས་དང་། འོག་གི་ཡུམ་ལྔའི་སྐབས་སུ་ཡུམ་ལྔའི་ཚོགས་ལ་སོགས་མེད་པར། ཀུན་ཏུ་བཟང་མོའི་ཚོགས་ལ་བཟོད་པར་གསོལ༔ ཞེས་པ་ཡོད་མོད། དེ་གཏེར་གཞུང་ན་དེ་ལྟར་ཡིན་པ་མཁས་པས་རིགས་ཀྱི་ཡབ་ལྔ་སོགས་སུ་བཅོས་པ་ཡིན་ནམ་ཡི་གེ་ནོར་བ་གང་ཡིན་ཆ་མི་འཚལ་ཡང་། དཔྱད་ན་དྲི་མེད་བཤགས་རྒྱུད་དུ་ཀུན་བཟང་ཡབ་ཡུམ་གྱི་གནོང་བཤགས་དབུ་འདིར་ཡོད་མོད། ཀློང་བཤགས་འདིར་འོག་ཏུ་ཡོད་པ་དང་། འདིར་རིགས་ལྔ་དང་ཡུམ་ལྔའི་གནོང་བཤགས་ཡིན་པ་མངོན་སུམ་ཀྱིས་གྲུབ་ཕྱིར་ཡི་གེ་ནོར་བ་ནི་ཡིན་པ་འདྲའོ། །འོན་ཀྱང་ཡི་གེ་གཅིག་ནོར་ཡང་གཉིས་ཀ་ནོར་བ་མི་སྲིད་སྙམ་མོད། ཀུན་ཏུ་བཟང་པོ་ཞེས་པ་ནོར་བས་ཀུན་ཏུ་བཟང་མོ་ཞེས་པ་བཅོས་པས་ནོར་ཏེ་མོན་ཡུལ་གྱི་རྡོ་གཅོད་ལྟར་སོང་བ་ཡང་ཡིན་སྲིད་དོ།།

གཉིས་པ་ནི། རང་རིག་ཡེ་ཤེས་བློ་དང་མ་ལྡན་ཏེ༔ འབྱུང་བ་ལྔ་པོ་ཡུམ་ལྔར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ རིགས་ཀྱི་ཡུམ་ལྔའི་ཚོགས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་ད༷ང་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། ས་ཆུ་མེ་རླུང་ནམ་མཁའ་སྟེ་འབྱུང༷་བ༷་ལྔ༷་པོ༷་སྤྱན་མ་མཱ་ཀཱི་གོས་དཀར་སྒྲོལ་མ་དབྱིངས་ཕྱུག་སྟེ་ཡུམ༷་ལྔའི་རང་བཞིན་ཡིན་པ་ལ་དེ་ལྟར་ཡིན་པར༷་སྦྱོར༷་བར་བྱེད་མ༷་འཚ༷ལ་བར་བདག་འཛིན་མ༷་རི༷ག་པའི་དབང་གིས་ར༷ང་སེམ༷ས་ལ་བདག་གོ་སྙམ་པའམ་རང་སེམས་ཀྱིས་འབྱུང་ལྔ་ལ་བད༷ག་ཏུ༷་དང་བདག་གིར་ཉིད་དུ་བཟུང༷་བ༷ས་འབྱུང་ལྔ་རྣམ་དག་གི་དོན་མ་རྟོགས་སོ།།

དེ་ཕྱིར་དེ་ལྟར་མ་རྟོགས་པས་སེམས་ནོར་བའམ་ནོང༷ས་པ་དང་། དེའི་དབང་གིས་ཉེས་ལྟུང་སྣ་ཚོགས་བྱུང་བ་ལགས་ན། ཚུལ་དེ་དག་ལ་འགྱོད་པ་ཆེན་པོས་རིག༷ས་ཀྱི༷་ཡུམ༷་ལྔ༷འི་ཚོག༷ས་ལ༷་བཤགས་ཤིང་བཟོ༷ད་པ༷ར་མཛོད་ཅེས་གསོ༷ལ་བ་འདེབས་སོ་ཞེས་འབྱུང་ལྔའི་རང་བཞིན་རིགས་ཀྱི་ཡུམ་ལྔ་ལས་གཞན་དུ་འཛིན་པའི་གནས་ལུགས་ཀྱི་དོན་དང་འགལ་ཞིང་། རང་རིག་པའི་ཡེ་ཤེས་མ་སྐྱེས་པ་དང་། དེའི་དབང་གིས་བྱུང་བའི་ཉེས་པ་བཤགས་པའོ།།

གསུམ་པ་ནི། རང་རིག་ཡེ་ཤེས་བློ་དང་མ་ལྡན་ཏེ༔ རྣམ་ཤེས་ཚོགས་བརྒྱད་སེམས་དཔར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ བྱང་ཆུབ་སེམས་དཔའི་ཚོགས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། མིག་གི་རྣམ་ཤེས་སོགས་རྣམ༷་པར་ཤེས༷་པའི་ཚོག༷ས་བརྒྱད༷་པོ་དོན་དམ་པར་ས་ཡི་སྙིང་པོ་ལ་སོགས་པའི་བྱང་ཆུབ་སེ༷མས་དཔ༷འ་བརྒྱད་ཀྱི་རང་བཞིན་ཡིན་པ་ལ་དེ་ལྟར་ཡིན་པར༷་སྦྱོར༷་བར་བྱེད་མ༷་འཚ༷ལ་བར་རྨོངས་པ་མ༷་རི༷ག་པའི་བློ་ཡིས་ར༷ང་སེམ༷ས་བད༷ག་ཏུ༷་བཟུ༷ང་བའམ་མ་རིག་པའི་རང་སེམས་ཀྱིས་ཡུལ་ཀུན་བདེན་པར་གྲུབ་པའམ་བདག་ཏུ་གྲུབ་པར་བཟུང་བས༷་ནི་ལྟ་བ་ཕྱིན་ཅི་ལོག་པས་རང་སེམས་འཁྲུལ་ནོང༷ས་སུ་གྱུར་ཅིང་། ཉོན་མོངས་པ་དང་། དེ་དག་གིས་བསྐྱེད་པའི་ཉེས་སྒྲིབ་བྱུང་ཞིང་། ཚུལ་དེ་ལ་ད་ལྟ་ནི་འགྱོད་པ་ཆེན་པོས་བྱང༷་ཆུབ༷་སེམ༷ས་དཔ༷འ་ཉེ་བའི༷་སྲས་ཆེན་བརྒྱད་ཀྱི་ཚོག༷ས་ལ༷་བཤགས་ཤིང་བཟོ༷ད་པ༷ར་གསོ༷ལ་བ་འདེབས་སོ་ཞེས་རྣམ་པར་ཤེས་པའི་ཚོགས་བརྒྱད་ཀྱི་རང་བཞིན་སེམས་དཔའ་བརྒྱད་ལས་གཞན་དུ་འཛིན་པའི་དབང་གིས་གནས་ལུགས་ཀྱི་དོན་དང་འགལ་ཞིང་། རང་རིག་པའི་ཡེ་ཤེས་ཀྱི་རྟོགས་པ་མ་སྐྱེས་པ་ལས་བྱུང་བའི་ཉེས་པ་དང་ལྟུང་བ་རྣམས་བཤགས་པའོ།།

བཞི་བ་ནི། རང་རིག་ཡེ་ཤེས་བློ་དང་མ་ལྡན་ཏེ༔ ཡུལ་བཞི་དུས་བཞི་སེམས་མར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ བྱང་ཆུབ་སེམས་མའི་ཚོགས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། ཡེ་ཤེས་རྔམ་གློག་ལས། སྣོད་བཅུད་འགྲོ་བ་ཐམས་ཅད་ཀྱི། །ཁ་དོག་དབྱིབས་དང་མཚན་མ་ཀུན། །གཟུགས་ཀྱི་སྐྱེ་མཆེད་ཉིད་དུ་གྲགས། །མཐོང་བར་བྱ་བའི་ཡུལ་ཡིན་པས། །གཟུགས་མཛེས་ལཱ་སྱཻའི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །ཟིན་དང་མ་ཟིན་གཉིས་ག་ལས། །བྱུང་བའི་སྒྲ་ཡི་ཁམས་སུ་གྲགས། །ཐོས་པར་བྱ་བའི་ཡུལ་ཡིན་པས། །ནྲྀར་ཏྱ་མ་ཡི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །ལྷན་ཅིག་སྐྱེས་དང་སྦྱར་དང་གྱུར། །ཞིམ་དང་ང་དང་དེ་བཞིན་གཞན། །དྲི་ཡི་ཁམས་དང་སྐྱེ་མཆེད་དེ། །མནམ་པར་བྱ་བའི་ཡུལ་ཡིན་པས། །མཱ་ལེ་ཉིད་ཀྱི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །ཁ་མངར་ལ་སོགས་རོ་རྣམས་ཀུན། །རོ་ཡི་སྐྱེ་མཆེད་ཉིད་དུ་གྲགས། །མྱང་བར་བྱ་བའི་ཡུལ་ཡིན་པས། །གཱིརྟི་ཉིད་ཀྱི་རང་བཞིན་ཡིན། །ཞེས་གསུངས་པ་ལྟར། མཐོང་བར་བྱ་བའི་ཡུལ་གཟུགས་དང་། ཐོས་པར་བྱ་བའི་ཡུལ་སྒྲ་དང་། མནམ་པར་བྱ་བའི་ཡུལ་དྲི་དང་། མྱང་བར་བྱ་བའི་ཡུལ་རོ་སྟེ་ཡུལ༷་བཞི༷་དང་། ཡང་དེ་ཉིད་ལས། དེ་ལ་དུས་བཞི་མཆོད་པའི་ལྷ་མོ་བཞིའི་རང་བཞིན་དུ་གསུངས་པ། སྣོད་བཅུད་འགྲོ་བ་ཐམས་ཅད་ཀྱི། །རྒྱུ་འབྲས་ཀུན་ཏུ་རྣམ་པར་སྤྱད། །སྔོན་འདས་དུས་སུ་རྣམ་པར་གྲགས། །སྔོན་འདས་དཔྱིད་ཀྱི་རང་བཞིན་ཡིན། །སྤོས་མའི་རང་བཞིན་ཉིད་ཡིན་ནོ། །སྣོད་བཅུད་འགྲོ་བ་ཐམས་ཅད་ཀྱི། །རྒྱུ་སྤྱད་འབྲས་བུ་མ་སྤྱད་ཀུན། །ད་ལྟར་དབྱར་གྱི་རང་བཞིན་ཡིན། །མེ་ཏོག་ཉིད་ཀྱི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །རྒྱུ་འབྲས་ཡོངས་ཀྱིས་མ་སྤྱད་པ། །མ་འོངས་དུས་སུ་རྣམ་པར་གྲགས། །འོང་མ་རག་སྟོན་རང་བཞིན་ནི། །ཨཱ་ལོ་ཀེ་ཡི་རང་བཞིན་ཡིན། །སྣོད་བཅུད་འགྲོ་བ་ཐམས་ཅད་ཀྱི། །རྒྱུ་འབྲས་ངེས་པར་མ་ཚོགས་པ། །འབྱུང་བར་མ་ངེས་དུས་ཤེས་གྲགས། །མ་འོངས་དགུན་གྱི་རང་བཞིན་ནི། །གན་དྷེའི་རང་བཞིན་ཡིན་པར་ཤེས། །ཞེས་གསུངས་པ་ལྟར་འདས་པའི་དུས་དང་། མ་འོངས་པའི་དུས་དང་། ད་ལྟར་གྱི་དུས་དང་། འབྱུང་བར་མ་ངེས་པའི་དུས་ཏེ་དུས༷་བ༷ཞི་དང་དེར་རྟོག་པ་བཞི་སྟེ་ཡུལ་བཞི་དུས་བཞི་སྟེ་བརྒྱད་པོའི་ངོ་བོ་དོན་དམ་པར་ན་རྣམ་པར་དག་པ་ལཱ་སྱེ་དཀར་མོ་ལ་སོགས་པ་བྱང་ཆུབ་སེམ༷ས་མ༷་བརྒྱད་ཀྱི་རང་བཞིན་ཡིན་པར༷་བློ་ཡིས་སྦྱོར༷་བར་བྱེད་མ༷་འཚ༷ལ་བར་མ༷་རི༷ག་པའི་ར༷ང་སེམ༷ས་ཀྱིས་བད༷ག་ཏུ༷་གྲུབ་པར་བཟུང་བའམ་རང་སེམས་བདག་དང་ཡུལ་བརྒྱད་བདག་ཏུ་གྲུབ་པར་བཟུང༷་བ༷ས་སེམས་ནོང༷ས་པ་ཅི་མཆིས་པའི་དབང་གིས་བྱུང་བའི་ལྟུང་བ་དང་ཉེས་སྡིག་གི་ཚོགས་དེ་དག་གནོང་འགྱོད་དྲག་པོས་བཤགས་ཤིང་བྱང༷་ཆུབ༷་སེམ༷ས་མ༷འི་ཚོག༷ས་བརྒྱད་ཀྱི་སྤྱན་སྔ་ལ༷་བཟོ༷ད་པར༷་གསོ༷ལ་བ་འདེབས་སོ་ཞེས་ཡུལ་བརྒྱད་ཀྱི་རང་བཞིན་སེམས་མ་བརྒྱད་ལས་གཞན་དུ་འཛིན་པའི་དབང་གིས་གནས་ལུགས་ཀྱི་དོན་དང་འགལ་ཞིང་། རང་རིག་པའི་ཡེ་ཤེས་ཀྱི་རྟོགས་པ་མ་སྐྱེས་པ་ལས་བྱུང་བའི་ཉེས་པ་དང་དེས་བསགས་པའི་ལྟུང་བ་ཀུན་བཤགས་པའོ། །འདིར་དུས་བཞི་བཤད་པའི་འདས་པའི་དུས་ནི་ལས་གང་ཞིག་གི་རྒྱུ་འབྲས་གཉིས་ཀ་སྤྱད་ཟིན་པའི་དུས་ཏེ་དཔྱིད་ལྟ་བུ་དང་། ད་ལྟར་གྱི་དུས་ནི་ལས་གང་གི་རྒྱུ་སྤྱད་ལ་འབྲས་བུ་མ་སྨིན་པའི་དུས་དབྱར་ལྟ་བུ་དང་། མ་འོངས་པའི་དུས་ནི་རྒྱུ་ཡང་མ་སྤྱད་ལ་འབྲས་བུ་ལ་ཡང་མ་སྤྱད་པ་སྟོན་དུས་ལྟ་བུ་དང་། འབྱུང་བར་མ་ངེས་པའི་དུས་ཞེས་པ་ནི། སྣོད་བཅུད་གང་ཞིག་གི་ལས་ཀྱི་རྒྱུ་འབྲས་ངེས་པར་མ་འཚོགས་པས་འབྱུང་བར་མ་ངེས་པ་གང་ཡིན་པའི་དུས་ཏེ་དགུན་དུས་ལྟ་བུ་ལ་བྱེད་པ་ཡིན་ཏེ། དྲངས་མ་ཐག་པའི་ཡེ་ཤེས་རྔམ་གློག་གི་ལུང་ལས་གསལ་བ་ལྟར་ཡིན་པའི་ཕྱིར། དེ་དག་གི་དག་པ་ནི་བྱང་ཆུབ་སེམས་མའི་དག་པ་ཡིན་པའི་ཚུལ་ཡང་དེ་ཉིད་ལས། སྤོས་མའི་རང་བཞིན་ཉིད་ཡིན་ནོ། །ཞེས་དང་། མེ་ཏོག་ཉིད་ཀྱི་རང་བཞིན་ཡིན། །ཞེས་དང་། ཨཱ་ལོ་ཀེ་ཡི་རང་བཞིན་ཡིན། །ཞེས་དང་། གན་དྷེའི་རང་བཞིན་ཡིན་པར་ཤེས། །ཞེས་གསུངས་པ་དེས་ཤེས་པའི་ཕྱིར། དེ་ལྟར་དུས་བཞི་པོ་སྤྲོས་མེད་མཉམ་པ་ཉིད་ཀྱི་རང་བཞིན་དུ་རྣམ་པར་དག་པ་གང་ཡིན་པ་དེ་ལ་བྱང་ཆུབ་སེམས་མ་ཞེས་བརྡ་སྦྱར་བ་ལགས་ཏེ། རྡོ་རྗེ་བཀོད་པའི་རྒྱུད་རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། གཞན་ཡང་དུས་བཞི་མཉམ་རིག་ན། །དུས་ཞེས་བྱ་བར་ག་ལ་རིགས། །དུས་བཞི་མཉམ་པར་རབ་ཤེས་ན། །དེ་ཉིད་མཉམ་པའི་རང་བཞིན་ནོ། །རྡོ་རྗེ་ལྷ་མོ་དུས་ཀྱི་ཚོགས། །འདས་དང་ད་ལྟར་བྱུང་བ་དང་། །མི་འབྱུང་མ་ངེས་ཆ་རྣམས་ལ། །དབང་སྒྱུར་མཉམ་པའི་རྒྱལ་མོ་རྣམས། །འཇིག་དང་སྐྱེ་དང་སྨིན་པ་དང་། །སྟོང་པར་གྱུར་པ་དེ་དག་ཏུ། །རྡོ་རྗེ་རྣམ་ཐར་ཚད་མེད་དང་། །སེམས་དང་དེ་བཞིན་མཉམ་པ་ཡི། །ཤེས་རབ་འཁོར་དང་དམ་པའི་དཀྱིལ། །ཞེས་གསུངས་པ་ལྟར་ཡིན་པའི་ཕྱིར་རོ།།

ལྔ་བ་ནི། རང་རིག་ཡེ་ཤེས་བློ་དང་མ་ལྡན་ཏེ༔ ཉོན་མོངས་དྲུག་པོ་ཐུབ་པར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ ཐུབ་དྲུག་སྤྲུལ་པའི་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། ཉོན༷་མོང༷ས་པ་འདོད་ཆགས་སོགས་དྲུག༷་པོ༷་དོན་དམ་པར་རྣམ་པར་དག་པ་བཅོམ་ལྡན་ཐུབ༷་པ༷་དྲུག་གི་རང་བཞིན་ཡིན་པར༷་བློ་ཡིས་སྦྱོར༷་བར་བྱེད་མ༷་འཚ༷ལ་བར་མ༷་རི༷ག་པའི་ར༷ང་སེམ༷ས་ཀྱིས་བདག་ཏུ་གྲུབ་པར་འཛིན་པའམ་རང་སེམས་བདག་དང་ཉོན་མོངས་པ་དྲུག་པོ་བད༷ག་ཏུ༷་གྲུབ་པར་བཟུ༷ང་བ༷འི་དབང་གིས༷་སེམས་ནོང༷ས་པ་ཅི་མཆིས་པ་དེས་བསྐྱེད་པའི་ཉེས་ལྟུང་གི་ཚོགས་རྣམས་གནོང་འགྱོད་དྲག་པོས་བཤགས་ཤིང་རིགས་དྲུག་གི་ཐུབ༷་པ་དྲུག༷་སྟེ་རྒྱལ་བའི་སྤྲུལ༷་པའི་སྐུ༷་དྲུག་གི་སྤྱན་སྔ་ལ༷་བཟོ༷ད་པར༷་གསོ༷ལ་བ་འདེབས་སོ་ཞེས་ཉོན་མོངས་པ་དྲུག་གི་རང་བཞིན་རྣམ་པར་དག་པ་ཐུབ་པ་དྲུག་ཡིན་པ་ལ་དེ་ལས་གཞན་དུ་འཛིན་པའི་དབང་གིས་གནས་ལུགས་ཀྱི་དོན་དང་འགལ་ཞིང་། རང་རིག་པའི་ཡེ་ཤེས་ཀྱི་རྟོགས་པ་མ་སྐྱེས་པ་ལས་བྱུང་བ་དེས་བསྐྱེད་པའི་ཉེས་པའི་ཚོགས་ཀུན་བཤགས་པའོ།།

དྲུག་པ་ནི། རང་རིག་ཡེ་ཤེས་བློ་དང་མ་ལྡན་ཏེ༔ རེག་པ་རྟག་ཆད་སྒོ་བར་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ ཁྲོ་བོ་ཁྲོ་མོ་རྣམས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། དོན་དམ་པར་རེ༷ག་པ༷་དང་། རེག་ཡུལ་སོགས་བཞི་བདེན་པར་མ་གྲུབ་པ་ཡེ་ནས་རྣམ་པར་དག་པ་སྒོ་བ་བཞི་དང་། རྟག༷་ལྟ་དང་ཆ༷ད་པར་ལྟ་བ་ལ་སོགས་པ་བཞི་ཡེ་ནས་རྣམ་པར་དག་པ་སྒོ་མ་བཞི་རུ་སྦྱོར༷་བར་བྱེད་པར་མ༷་འཚལ་༷བར་བདག་དང་མཚན་མར་ཞེན་པའི་མ༷་རི༷ག་པའི་ར༷ང་སེམ༷ས་ཀྱིས་བདག་ཏུ་གྲུབ་པར་འཛིན་པའམ་རང་སེམས་བདག་དང་། རེག་སོགས་བཞི་དང་། རྟག་ལྟ་སོགས་བཞི་བད༷ག་ཏུ༷་གྲུབ་པར་བཟུང༷་བའམ་རང་སེམས་རེག་སོགས་བཞི་བདེན་གྲུབ་དང་ལྟ་བཞིའི་དབང་དུ་ཤོར་བ༷ས་སེམས་ནོང༷ས་ཏེ་མི་དགེ་བ་དང་ཉེས་ལྟུང་བསགས་པ་ཅི་མཆིས་པ་དེ་གནོང་འགྱོད་དྲག་པོས་བཤགས་ཤིང་སྒོ་བ་ཁྲོ༷་བོ༷་ཡབ་བཞི་དང་། སྒོ་མ་ཁྲོ༷་མོ༷་ཡུམ་བཞི་རྣམ༷ས་ཀྱི་སྤྱན་སྔ་ལ༷་བཟོ༷ད་པར༷་གསོ༷ལ་བ་འདེབས་སོ་ཞེས་རེག་སོགས་བཞི་དང་རྟག་ཆད་ལ་སོགས་པའི་རང་བཞིན་སྒོ་བ་ཡབ་ཡུམ་བརྒྱད་ལས་གཞན་དུ་འཛིན་པའི་གནས་ལུགས་ཀྱི་དོན་དང་འགལ་བ་དང་། རང་རིག་པའི་ཡེ་ཤེས་ཀྱི་རྟོགས་པ་མ་སྐྱེས་པ་དེའི་དབང་གིས་བསགས་པའི་ཉེས་པའི་ཚོགས་རྣམས་བཤགས་པའོ།།

ཞི་ཁྲོའི་ཀློང་བཤགས་ཀྱི་དཔེ་དུ་མར། རིག་པ་རྟག་ཆད་སྒོ་བར་སྦྱོར་བར་མ་འཚལ༔ ཞེས་པ་ཡོད་པའི་དབང་གིས་བདག་གིས་དྲི་བ་ཕུལ་ཡུལ་གྱི་མཁས་པ་མང་པོ་ཞིག་གིས། རིག་སྟོང་གཉིས་སུ་མེད་པའི་རི༷ག་པ༷་ཡེ་ཤེས་ཀྱི་སྐུ་ལ་རྟག༷་པར་ལྟ་བ་དང་ཆ༷ད་པར་ལྟ་བ་དང་། བདག་ཏུ་ལྟ་བ་དང་། དངོས་པོ་མཚན་མའི་རང་བཞིན་དུ་བཟུང་བའི་དབང་གིས་སྒོ་བ་བཞི་དང་སྒོ་མ་བཞི་སྟེ་སྒོ༷་བ༷་ཡབ་ཡུམ་བརྒྱད་ཀྱི་རང་བཞིན་ཡིན་པར༷་བློ་ཡིས་སྦྱོར༷་བར་བྱེད་མ༷་འཚ༷ལ་བར་ཞེས་འགྲེལ་དགོས་ཟེར་མོད། དེ་ནི་གཞུང་དོན་གཏན་ནས་མ་ཡིན་པར་རིག་པ་ཞེས་པ་ཡིག་ནོར་ཡིན་ཞིང་། དོན་ལ་རེག་པ་ཞེས་པ་ཡིན་ཏེ། གོང་དུ་སྒོ་བ་བཞིའི་སྐབས་སུ་ཞི་ཁྲོའི་བསྐང་བཤགས་ཉམས་ཆགས་རང་གྲོལ་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང་། ཡེ་ཤེས་རྔམ་གློག་གི་ལུང་དྲངས་ཟིན་པ་ལྟར་དང་། ཀློང་བཤགས་འདིའི་རྩ་བའི་རྒྱུད་དྲི་མེད་བཤགས་རྒྱུད་ལས། རང་རིག་ཡེ་ཤེས་བློ་དང་མི་ལྡན་པས། །རེག་སོགས་རྣམ་བཞི་སྒོ་བར་སྦྱོར་མ་འཚལ། །ཞེས་རེག་པ་སོགས་བཞི་བོར་སྦྱར་བ་དངོས་སུ་བྱུང་བའི་ཕྱིར་རོ།།

རྒྱུད་གཞན་དུ་ཡང་སྒོ་བ་བཞི་ལ་རེག་སོགས་བཞི་སྦྱར་བའི་ལུགས་ཀྱང་བྱུང་སྟེ། དཔལ་གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ལས། འཇོམས་པ་ཆེན་པོ་རེག་པ་དང་། འཇོམས་པ་ཆེན་པོ་རེག་བྱེད་དང་། འཇོམས་པ་ཆེན་པོ་རེག་བྱ་དང་། འཇོམས་པ་ཆེན་པོ་རེག་ཤེས་དང་། བཙུན་མོ་རྟག་པར་མ་ཡིན་པ་དང་། ཆད་པར་མ་ཡིན་པ་དང་། བདག་ཏུ་མ་ཡིན་པ་དང་། མཚན་མར་མ་ཡིན་པ་ལ་སོགས་པ་དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་རེག་སོགས་བཞི་སྒོ་བ་བཞི་དང་། རྟག་སོགས་བཞི་སྒོ་མ་བཞི་ལ་སྦྱར་བར་གསུངས་པའི་ཕྱིར་རོ།།

དེ་ཡང་བསྐང་བཤགས་ལས་ནི། ལུས་ཀྱི་རྣམ་ཤེས་གནས་དག་པའི༔ གཤིན་རྗེ་གཤེད་པོའི་ཐུགས་དམ་བསྐང་༔ ཞེས་ལུས་ཀྱི་རྣམ་ཤེས་གནས་སུ་དག་པ་སྒོ་བ་གཤིན་རྗེ་གཤེད་པོ་དང་། ལུས་ཀྱི་དབང་པོ་གནས་དག་པའི༔ སྟོབས་པོ་ཆེ་ཡི་ཐུགས་དམ་བསྐང་༔ ཞེས་ལུས་ཀྱི་དབང་པོ་གནས་སུ་དག་པ་སྒོ་བ་སྟོབས་པོ་ཆེའམ་རྣམ་པར་རྒྱལ་བ་དང་། ལུས་ཀྱི་རེག་ཡུལ་གནས་དག་པའི༔ རྟ་མགྲིན་རྒྱལ་པོའི་ཐུགས་དམ་བསྐང་༔ ཞེས་ལུས་ཀྱི་རེག་ཡུལ་ཏེ་རེག་བྱ་གནས་སུ་དག་པ་སྒོ་བ་རྟ་མགྲིན་རྒྱལ་པོ་དང་། ལུས་ཀྱི་རེག་ཤེས་གནས་དག་པའི༔ བདུད་རྩི་འཁྱིལ་བའི་ཐུགས་དམ་བསྐང་༔ ཞེས་ལུས་ཀྱི་རེག་ཤེས་ཏེ་ལུས་ཀྱི་ཡིད་དབང་གནས་སུ་དག་པ་སྒོ་བ་བདུད་རྩི་འཁྱིལ་བའི་རང་བཞིན་ཡིན་པར་གསུངས་པ་གོང་དུ་བཤད་ཟིན་ལྟར་རོ།།

ཡེ་ཤེས་རྔམ་གློག་ལས། རེག་བྱེད་དང་བའི་བདག་ཉིད་དེ། །ལུས་ཀྱི་ཁམས་ཞེས་བྱ་བར་གྲགས། །རེག་བྱེད་བྱ་བ་བྱེད་པས་ན། །གཤིན་རྗེ་འཇོམས་པའི་རང་བཞིན་ཡིན། །ཞེས་ལུས་ཀྱི་ཁམས་སམ་དབང་པོ་དེ་གཤིན་རྗེ་གཤེད་པོ་དང་། རེག་བྱ་ཀུན་ལ་སྤྱོད་པ་ཀུན། །ལུས་ཀྱི་རྣམ་ཤེས་ཞེས་སུ་གྲགས། །རེག་པའི་ཡེ་ཤེས་ཡིན་པའི་ཕྱིར། །རྣམ་པར་རྒྱལ་བའི་རང་བཞིན་ཡིན། །ཞེས་ལུས་ཀྱི་རྣམ་ཤེས་དེ་རྣམ་པར་རྒྱལ་བ་ལ་སྦྱར་བ་ནི་བསྐང་བཤགས་དང་གོ་ལྡོག་པ་དང་། འབྱུང་དང་འབྱུང་འགྱུར་རེག་བྱ་རྣམས། །རེག་བྱའི་སྐྱེ་མཆེད་ཉིད་དུ་གྲགས། །རེག་པར་བྱ་བའི་ཡུལ་ཡིན་པས། །རྟ་མཆོག་དཔལ་གྱི་རང་བཞིན་ནོ། །ཞེས་ལུས་ཤེས་ཀྱི་རེག་པར་བྱ་བ་རེག་བྱའི་སྐྱེ་མཆེད་དེ་རྟ་མགྲིན་དང་། ཚོགས་དྲུག་འགགས་པའི་དེ་མ་ཐག །གོ་འབྱེད་གསལ་བའི་བདག་ཉིད་དེ། །ཡིད་ཀྱི་ཁམས་ཞེས་བྱ་བར་གྲགས། །དེ་སྤྱོད་བྱ་བ་བྱེད་པའི་ཕྱིར། །བདུད་རྩི་འཁྱིལ་བའི་རང་བཞིན་ཡིན། །ཞེས་རེག་ཤེས་ཞེས་པ་ལུས་ཤེས་སུ་གྱུར་པའི་དེ་མ་ཐག་པའི་རྐྱེན་ཡིད་དབང་དེ་བདུད་རྩི་འཁྱིལ་བར་སྦྱར་བ་ནི་བསྐང་བཤགས་དང་མཐུན་ནོ།།

དཔལ་གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ནི་ཡེ་ཤེས་རྔམ་གློག་དང་དགོངས་པ་གཅིག་མཐུན་ཡིན་ལ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གང་དུ་ལུས་དང་བཅས་པ་ཡི། །དབང་པོ་ཡུལ་དང་རྣམ་ཤེས་རེག །རང་རྒྱུད་བཅད་པའི་ཡེ་ཤེས་ཉིད། །སྒོ་བ་རྣམ་པ་བཞི་རུ་གསུངས། །ཞེས་དང་པོ་ལུས་དབང་དང་། གཉིས་པ་རེག་ཡུལ་སྟེ་རེག་བྱ་དང་། གསུམ་པ་ལུས་ཀྱི་རྣམ་ཤེས་དང་། བཞི་བ་རེག་ཤེས་སུ་བྱས་པའི་གོ་རིམ་དེ་ལུང་སྔ་མ་གསུམ་དང་མི་མཐུན་པ་བྱུང་ཞིང་། སྒོ་བ་གང་ལ་སྦྱར་བ་གསལ་བར་མི་མངོན་ཡང་རྣམ་པར་རྒྱལ་བ་ཤར་དུ་འགོད་པའི་གོ་རིམ་ལྟར་སྦྱར་ན་ལེགས་སམ་སྙམ་ལ། གང་ལྟར་ཡང་འདིར། རེག་པ་རྟག་ཆད་སྒོ་བར་སྦྱོར་མ་འཚལ༔ ཞེས་པའི་རེག་པ་ཞེས་པ་རེག་སོགས་བཞི་དང་། རྟག་ཆད་ཅེས་པ་རྟག་སོགས་བཞི་དང་། སྒོ་བར་ཞེས་པས་སྒོ་བ་དང་སྒོ་མ་གཉིས་ཀ་བསྟན་ཅིང་གོ་རིམ་བཞིན་སོ་སོར་སྦྱར་བ་ནི་གཞུང་དོན་ཡིན་ལ། དྲི་མེད་བཤགས་རྒྱུད་ལས་ནི། རང་རིག་ཡེ་ཤེས་བློ་དང་མི་ལྡན་པས། །རྟག་ཆད་མུ་བཞི་སྒོ་མར་སྦྱོར་མ་འཚལ། །མ་རིག་རང་སེམས་བདག་ཏུ་བཟུང་བས་ནོངས། །སྒོ་སྐྱོང་ཁྲོ་མོ་བཞི་ལ་བཟོད་པར་གསོལ། །ཞེས་སྒོ་བ་བཞི་དང་སྒོ་མ་བཞི་སོ་སོར་གསུངས་ཀྱང་འདིར་གཅིག་ཏུ་བསྡུས་པ་ཡིན་ནོ།།

བདུན་པ་ནི། རང་རིག་ཡེ་ཤེས་བློ་དང་མ་ལྡན་ཏེ༔ ཡིད་ཆོས་ཀུན་བཟང་ཡབ་ཡུམ་སྦྱོར་མ་འཚལ༔ མ་རིག་རང་སེམས་བདག་ཏུ་བཟུང་བས་ནོངས༔ ཀུན་བཟང་ཡབ་ཡུམ་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེས༷་ཀྱི་བློ༷་དང༷་མ༷་ལྡ༷ན་པར་ཆོས་ཐམས་ཅད་བདག་ཏུ་འཛིན་པའི་མ་རིག་པའི་དབང་ཏུ་གྱུར་ཏེ༷། དོན་དམ་པར་ཡུལ་ཅན་ཡིད༷་ཀྱི་ཆོས་རྣམ་པར་དག་པ་ཀུན་ཏུ་བཟང་པོ་དང་། ཡུལ་ཆོས༷་ཀྱི་ཁམས་རྣམ་པར་དག་པ་ཀུན༷་བཟང༷་མོ་སྟེ་ཀུན་བཟང་ཡབ༷་ཡུམ༷་གྱི་རང་བཞིན་ཡིན་པར་བློ་ཡིས་སྦྱོར༷་བར་བྱེད་མ༷་འཚ༷ལ་བར་མ༷་རི༷ག་པའི་ར༷ང་སེམ༷ས་ཀྱིས་བདག་ཏུ་གྲུབ་པར་འཛིན་པའམ་རང་སེམས་བད༷ག་ཏུ༷་གྲུབ་པར་བཟུང༷་བས༷་སེམས་ནོང༷ས་ཏེ་ཉེས་ལྟུང་བསགས་པ་ཅི་མཆིས་པ་དེ་གནོང་འགྱོད་དྲག་པོས་བཤགས་ཤིང་ཀུན༷་བཟ༷ང་ཡ༷བ་ཡུམ༷་གཉིས་ཀྱི་སྐུ༷་ཡི་སྤྱན་སྔ་ལ༷་བཟོ༷ད་པར༷་གསོ༷ལ་ལོ་ཞེས་ཡིད་ཆོས་གཉིས་ཀྱི་རང་བཞིན་ཀུན་བཟང་ཡབ་ཡུམ་གཉིས་ལས་གཞན་དུ་འཛིན་པའི་གནས་ལུགས་ཀྱི་དོན་དང་འགལ་ཞིང་རང་རིག་པའི་ཡེ་ཤེས་མ་སྐྱེས་པ་དེའི་དབང་གིས་བསགས་པའི་ཉེས་པ་རྣམས་བཤགས་པའོ།།

གསུམ་པ་དུས་གསུམ་གྱི་གནོང་བཤགས་ཀྱིས་མཇུག་བསྡུ་བ་ལ་མཇུག་བསྡུ་བ་དངོས་དང་། བཤགས་པའི་འཐད་པ་བསྟན་པ་གཉིས་ལས། དང་པོ་ནི། རང་རིག་ཡེ་ཤེས་བློ་དང་མ་ལྡན་ཏེ༔ མ་རིག་འཁྲུལ་བའི་ནོངས་པ་བགྱིད་ལགས་ན༔ ཉོན་མོངས་ལས་ཀྱིས་ཡི་དམ་ལྷ་སྤངས་ཏེ༔ སླུ་བྱེད་དབང་གིས་སློབ་དཔོན་སྙིང་ནས་སྨད༔ ང་རྒྱལ་དྲེགས་པས་མཆེད་དང་ལྕམ་དྲལ་འཁྲུགས༔ སྔགས་ལ་འཕྱར་བས་གསང་སྔགས་གཞན་ལ་སྤེལ༔ སེར་སྣའི་དབང་གིས་མཆོད་པ་དུས་ལས་འདས༔ གྲོགས་ངན་རྐྱེན་གྱིས་ཆོ་གའི་གསང་བ་ཆག༔ བརྟུལ་ཞུགས་ཆུང་བས་བགེགས་རྣམས་ཚར་མ་ཆོད༔ རྔམས་ཤིང་ཐུག་ཐུབ་ལྷག་ཕུད་ཉམས་ལ་སོགས༔ ཚེ་རབས་ཐོག་མ་མེད་པའི་དུས་མཐའ་ནས༔ ཚེ་འདིའི་ལུས་འདི་བཟུང་བ་ཡན་ཆད་དུ༔ སྡིག་པ་མི་དགེའི་ལས་རྣམས་ཅི་བགྱིས་པ༔ དུས་རིག་རྒྱུན་མཁྱེན་རྣམས་ལ་བཟོད་པར་གསོལ༔ ཞེས་པའི་ཤོ་ལོ་ཀ་གསུམ་དང་ཕྱེད་ཀྱིས་བསྟན་ལ། རང་གི་རྒྱུད་ལ་སོ་སོ་ར༷ང་རི༷ག་པའི་ཡེ༷་ཤེ༷ས་ཀྱི་བློ༷་དང༷་མ༷་ལྡ༷ན་པར་གྱུར་ཏེ༷་ཆོས་ཐམས་ཅད་བདག་དང་མཚན་མར་གྲུབ་པ་མེད་པ་ལ་བདག་དང་མཚན་མར་འཛིན་པའི་བློ་མ༷་རི༷ག་པ་འཁྲུལ༷་བ༷འི་ནོར་བའམ་ནོང༷ས་པ་བྱུང་ཞིང་། དེའི་དབང་གིས་ངོ་གནོང་དགོས་པ༷འི་ཉེས་ལྟུང་མི་དགེ་བའི་ཆོས་དུ་མ་བགྱིས་པ་དང་། བགྱིད༷་པ་ལ༷གས་ན༷་སྟེ་ཡིན་ན། ད་ནི་དེ་དག་བཤགས་པ་ལ་འབད་པར་བགྱིའོ།།

དེ་ལྟར་ཆོས་ཐམས་ཅད་ལ་བདག་ཏུ་གྲུབ་པར་ཞེན་པའི་དབང་གིས་ཉོན༷་མོང༷ས་པ་འདོད་ཆགས་ལ་སོགས་པ་བྱུང་ཞིང་དེ་དག་གིས་ཉེས་པའི་ལས་ངན་པ་ལྕི་བ་དུ་མ་བསགས། ལས༷་ཀྱིས༷་གཡེང་བ་དང་སྡུག་བསྔལ་ལ་འཕྱན་པར་གྱུར་ཏེ་ཡི༷་དམ༷་ཞི་བའི་ལྷ༷་ཇི་བཞིན་མ་བསྒྲུབ་པར་སྤང༷ས་ཏེ༷་ལྷ་མ་གྲུབ་པ་དང་། སངས་རྒྱས་ཀྱི་མཛོད་ཀྱི་ཆོས་ཀྱི་ཡི་གེ་ལས། ཤཱ་རིའི་བུ་ལེ་ལོ་ཡར་སྐྱེ་བ་ནི་ཀུན་བདུད་ཀྱི་གྲོགས་པོ་ཡིན་ཏེ། བདུད་ཀྱི་དོན་གྲུབ་པར་སྟོན་ཅིང་ཀུན་སྐྱེ་བ་མེད་པའི་ཆོས་ལ་འཕྱ་ཞིང་གཤེའོ། །ཞེས་གསུངས་པ་ལྟར། ལེ་ལོ་དང་ལོག་ལྟ་ལ་སོགས་པའི་དབང་གིས་གསང་སྔགས་ཟབ་མོའི་དོན་ལ་མི་བརྩོན་པ་དང་དགེ་བའི་རྩ་བ་མ་བསགས་པར་བདུད་ཀྱི་བཤེས་གཉེན་དང་སྡིག་གྲོགས་ལ་སོགས་པ་རང་བསླུ༷་བར་བྱེད༷་པའི་བཤེས་གྲོགས་ངན་པའི་དབ༷ང་གིས༷་རང་ལ་དབང་ཁྲིད་མན་ངག་གནང་བའི་རྡོ་རྗེ་སློབ༷་དཔོ༷ན་ལ་ཁ་ཙམ་མིན་པར་སྙིང༷་ནས༷་སྡང་སྟེ་སྨ༷ད་པ་དང་། རང་ལ་ཡོན་ཏན་ཕྲན་བུ་ཡོད་པས་སེམས་ཁེངས་པའི་ང༷་རྒྱལ༷་དང་། རིགས་གཟུགས་འབྱོར་བ་གོ་ས་ལ་སོགས་ཀྱིས་སེམས་གཟེངས་མཐོ་བའི་དྲེག༷ས་པ༷་རྒྱས་པའི་དབང་གིས༷་བླ་མ་གཅིག་པའི་རྡོ་རྗེའི་མཆེ༷ད་དང༷་། བླ་མ་དང་དཀྱིལ་འཁོར་གཉིས་ཀ་གཅིག་པའི་དཔའ་མོ་རྡོ་རྗེའི་ལྕམ༷་མོ་སྟེ་རྡོ་རྗེའི་སྲིང་མོ་དང་། དཔའ་བོ་རྡོ་རྗེའི་དྲལ༷་པོ་སྟེ་རྡོ་རྗེའི་མིང་པོ་རྣམས་ལ་རྡེག་སྨོད་རྩོད་པས་ནང་འཁྲུགས༷་པ་དང་། གསང་སྔགས༷་བླ་ན་མེད་པའི་ཆོས་ལ༷་སེམས་ཆེས་ཆེར་འཕྱར༷་བ་སྟེ་འདོད་པ༷ས་གཡོས་ཏེ་བུད་མེད་གཡེམ་མ་ལ་སོགས་པ་སློབ་མ་སྣོད་ལྡན་མི་ལྡན་གཉིས་ཀ་བསྡུས་པས་གས༷ང་སྔག༷ས་གཞ༷ན་ལ༷་ཁྲོམ་བསྒྲགས་ཀྱིས་སྤེལ༷་བའི་ཉེས་ཆེན་བསགས་པ་དང་། རང་བློ་མཆོད་གཏོང་མི་ཕོད་པར་སེར༷་སྣ༷འི་ཀུན་དཀྲིས་ཀྱིས་བསྡམས་པའི་དབ༷ང་གིས༷། ཇི་སྐད་དུ། དམ་ཚིག་བཀོད་པའི་རྒྱུད་ལས། མཚན་མོ་ཤེས་རབ་སྐུ་གསུང་ཐུགས། །ཉིན་མོ་ཐབས་ཀྱི་སྐུ་གསུང་ཐུགས། །ཉི་མ་ནུབ་དང་ཉི་མ་ཤར། །ཉི་མ་གུང་ནི་ཐབས་ཀྱི་དུས། །ནམ་སྲོས་ནམ་ནི་ལངས་པ་དང་། །ནམ་གྱི་གུང་ནི་ཤེས་རབ་དུས། །དུས་དྲུག་མཆོད་པ་རྒྱུན་མི་གཅད། །ཅེས་དང་། གསང་བ་མེ་འབར་བའི་རྒྱུད་ལས། དེ་ལ་དུས་དྲུག་མཆོད་པས་མཆོད། །ཅེས་དང་། རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། ཉ་སྟོང་དུས་མཆོད་སྲི་ཞུས་བསྐོར། །དེ་ནས་དོན་རྣམས་འགྲུབ་པར་འགྱུར། །ཞེས་དང་། རྡོ་རྗེ་ཕུར་བ་གཏོར་མའི་རྒྱུད་ལས། དུས་དྲུག་གཏོར་མ་འབུལ་བྱས་ལ། །མི་འཛིན་གཏོང་བས་གཏོར་མ་སྟེ། །དུས་རྣམས་ཀུན་ཏུ་གཏོང་བ་དང་། །ལོ་དང་ཟླ་བས་གཏང་བ་དང་། །ཐམས་ཅད་ཀུན་ཏུ་གཏང་བ་དང་། །ཞེས་སོགས་གཞུང་ནས་བཤད་པ་ལྟར་བླ་མ་དང་། ཡི་དམ་གྱི་ལྷ་ལ་མཆོད་པའི་དངོས་པོ་ནི་ཉ་སྟོང་དུས་དྲུག་ལ་རྒྱུན་མཆོད་མ་ནུས་པར་མཆོ༷ད་པ༷་ཕྱིས་སུ་འགྱངས་ཏེ་དུས༷་ཀྱི་ཚད་ལས༷་འདས༷་པ་དང་། འཕགས་པ་བྱང་ཆུབ་སེམས་དཔའི་སྤྱོད་ཡུལ་གྱི་ཐབས་ཀྱི་ཡུལ་ལ་འཕྲུལ་བ་བསྟན་པའི་མདོ་ལས། གང་ཞིག་སྡིག་གྲོགས་སྦྲུལ་གྱིས་སེམས་ཟིན་ཅིང་། །དགེ་བའི་བཤེས་ཀྱི་དུག་སྨན་རྣམ་སྤངས་པ། །ཞེས་དང་། འཕགས་པ་ཐར་བ་ཆེན་པོ་ཕྱོགས་སུ་རྒྱས་པའི་མདོ་ལས། ལོག་པར་ལྟ་བ་དང་ནི་སྡིག་གྲོགས་བསྟེན། །གང་ཞིག་ཐེག་པ་ཆེན་པོར་མ་དད་པ། །དེས་ནི་ཉོན་མོངས་བདུད་རྣམས་འཇོམས་མི་ནུས། །ཞེས་གསུངས་པ་ལྟར་གྱི་གླུ་གར་རྩེད་འཇོ་དང་། བྱ་བ་མི་ལེགས་པའི་ཕྱོགས་ལ་སོགས་པའི་གཡེང་བའི་གནས་སུ་འཁྲིད་པར་བྱེད་པའི་གྲོ༷གས་ང༷ན་པའི་དབང་དུ་ཤོར་བའི་རྐྱེན༷་གྱིས༷་ཐུན་བཞིའི་རྣལ་འབྱོར་ལ་གཡེལ་བ་སོགས་ཉམས་ལེན་གྱི་ཆོ༷་ག༷་དུ་མའི༷་གས༷ང་བ༷་བསྒྲུབ་དགོས་མང་པོར་མ་གྲུབ་པར་ཆ༷ག་པ་དང་། གསང་སྔགས་དྲག་པོ་མངོན་སྤྱོད་ཀྱི་བརྟུལ༷་ཞུག༷ས་གདེང་དུ་མ་གྱུར་པར་རྩལ་ཤུགས་ཆུང༷་བ༷འི་དབང་གིས༷། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། དྲེགས་པ་རུ་དྲ་སྡིག་ཅན་འདི། །ནམས་ཀྱང་བསྒྲལ་བའི་ཞིང་ཡིན་ཏེ། །ཞེས་གསུངས་པ་ལྟར། སྒྲུབ་པ་ལ་བར་དུ་གཅོད་པར་བྱེད་པའི་འབྱུང་པོ་བགེ༷གས་ཀྱི་རྒྱལ་པོ་བི་ན་ཡ་ཀ་ལ་སོགས་པ་རྣམ༷ས་སྒྲལ་བའི་ལས་ཀྱིས་ཚར་གཅོད་དགོས་པ་ལ། དེ་ལྟར་ཚར༷་མ༷་ཆོ༷ད་པར་ཡན་པོར་ཤོར་བ་དང་། ཚོགས་འཁོར་གྱི་རྫས་སོགས་ལ་འདོད་པས་རྔམ༷ས་ཤིང༷་གང་འདོད་འདོད་དུ་ཐུག༷་ཐུབ༷་ཀྱིས་འཁྱེར་ཞིང་སྤྱད་ནས་རྫས་འཛད་པས། ཇི་སྐད་དུ་དུས་འཁོར་བསྡུས་རྒྱུད་ལས། ཕོ་ཉ་མོ་རྣམས་དག་ལ་ཟས་ཀྱི་ཕུད་ནི་ས་སྟེང་རྣམས་སུ་བདག་པོ་རྡོ་རྗེ་རྣམས་ཀྱིས་སྦྱིན། །འབྱུང་པོ་རྣམས་ལ་ཟོས་པའི་ལྷག་མ་སླར་ཡང་དགེ་བའི་དོན་དུ་སྦྱིན་པའི་ཚིགས་བཅད་འདི་བཀླག་གོ །ཞེས་དང་། བདེ་མཆོག་འབྱུང་བའི་རྒྱུད་ལས། ལྷག་མའི་གཏོར་མ་བསྡུས་ནས་ནི། །འབྱུང་པོ་འཆོལ་བ་རྣམས་ལ་སྦྱིན། །གནས་དང་ཞིང་གནས་རྣལ་འབྱོར་མའི། །ཚོགས་ལ་དྲི་ཞིམ་ཚིམ་པར་བྱ། །ཞེས་དང་། གདན་བཞི་ལས། དངོས་གྲུབ་འདོད་པའི་རྣལ་འབྱོར་བས། །ནན་ཏན་དུ་ནི་གཏོར་མ་སྦྱིན། །ཡེ་ཤེས་ཅན་གྱི་དཔལ་འདོད་པས། །ལྷག་མའི་གཏོར་མ་སྦྱིན་པར་བྱ། །ཞེས་དང་། ཕྱག་ཆེན་ཐིག་ལེའི་རྒྱུད་ལས། དེ་རྣམས་མཆོད་པའི་དངོས་གྲུབ་ནི། །གང་ཞིག་སེམས་ལ་བསམ་པ་ཡོད། །ལྷག་མའི་གཏོར་མ་གཟུང་ནས་ནི། །དགོན་པ་ཆེན་པོར་གཏང་བར་བྱ། །ཞེས་དང་། གསང་སྙིང་ལས། སླས་དང་བྱི་མོ་བྲན་མོའི་ཚོགས། །ལྷག་མའི་མཆོད་སྦྱིན་འདོད་པ་སྦྱིན། །ཞེས་གསུངས་པ་ལྟར། དཀྱིལ་འཁོར་གྱི་མུ་རན་ནམ་མཐའ་ལ་གནས་པའི་མ་མོ་ལྷག་སྡུད་ཀྱི་རིགས་ལ་སོགས་པ་འབྱུང་པོ་ལྷག་མའི་གཏོར་རྫས་ལ་དབང་བ་རྣམས་ལ་ལྷག་གཏོར་མ་ཕུལ་བར་ལྷག༷་མ་ཉམས་པ་དང་། ཇི་སྐད་དུ་རྡོ་རྗེ་མཁའ་འགྲོའི་རྒྱུད་ལས། ས་བོན་སྨིན་པ་བཟུང་ནས་ནི། །མཁས་པས་སྔོན་བཞིན་མཆོད་བྱས་ནས། །གྲུབ་པའི་རྫས་ཀྱི་ཕུད་དག་གིས། །ཁྱད་པར་དུ་ནི་བླ་མར་འབུལ། །ཞེས་དང་། གཤིན་རྗེ་གཤེད་ནག་པོའི་རྒྱུད་ལས། གཞན་ཡང་བཟའ་བ་ཐམས་ཅད་ཀྱི། །ཕུད་ནི་གཤིན་རྗེ་གཤེད་ལ་དབུལ། །དེ་ནས་ཡང་དག་བཤད་བྱ་བ། །བླ་མ་ལ་ཡང་ཡོན་འབུལ་བ་འོ། །ཞེས་དང་། ལག་ན་རྡོ་རྗེ་དབང་བསྐུར་བའི་རྒྱུད་ལས། བྱེ་བྲག་ཏུ་ནི་ཟས་ཀྱི་ཕུད་སྩལ་ལ་དོན་ཐམས་ཅད་བསྒྲུབ་པར་བགྱིའོ། །ཞེས་གསུངས་པ་ལྟར་བླ་མ་དང་ཡི་དམ་ལྷག་པའི་ལྷ་ཞི་ཁྲོའི་དཀྱིལ་འཁོར་ལ་ཟས་ཀྱི་ཕུད་དང་ཚོགས་ཀྱི་ཕུད་སོགས་ཀྱིས་རྟག་ཏུ་མཆོད་དགོས་པ་ལ་དེ་ལྟར་མ་མཆོད་པར་ཕུད༷་མཆོད་ཉམ༷ས་པ་ལ༷་སོག༷ས་པ་ཚེ༷་རབ༷ས་འཁོར་བ་ཐོ༷ག་མ༷་མེ༷ད་པ༷འི་དུས༷་ཀྱི་ཡ་མཐ༷འ་ནས༷་ཚེ༷་འདིའི༷་ལུས༷་རྟེན་འདི༷་ཉིད་བཟུང༷་བ༷་ད་ལྟ་བའི་དུས་ཡ༷ན་ཆ༷ད་དུ༷་ལྟུང་བ་དང་སྡི༷ག་པ༷་མི༷་དགེ༷་བ་ཉེས་པའི༷་ལས༷་རྣམ༷ས་ཀྱི་ཚོགས་དཔག་ཏུ་མེད་པ་ཅི༷་ཙམ་བསགས་པའམ་བགྱིས༷་པ༷་རྣམས་ནོངས་ཤིང་འགྱོད་པའི་སྒོ་ནས། ཇི་སྐད་དུ་གསང་བ་སྙིང་པོ་ལས། དབང་པོ་ཡུལ་དུས་རིག་པ་རྣམས། །ཀུན་ཏུ་བཟང་པོའི་དཀྱིལ་འཁོར་ལ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། ཡུལ་རིག་པ་དང་མཚན་ཉིད་རིག་པ་དང་། དུས་རིག་པ་དང་། རྐད་ཅིག་མའི་རྒྱུན་རིག་པ་དང་། ཞེས་དང་། སྤྱན་འདྲེན་རྒྱུད་གསུམ་པ་ལས། མ་འོས་འཁྲུལ་པའི་ནོངས་པ་མཆིས་སོ་འཚལ། །དུས་རིག་རྒྱུན་མཁྱེན་ཀུན་ལ་བཟོད་པར་གསོལ། །ཞེས་གསུངས་པ་ལྟར། འདས་མ་འོངས་ད་ལྟར་གྱི་དུས་གསུམ་དང་། འབྱུང་བར་མ་ངེས་པའི་དུས་ཏེ་དུས༷་བཞི་མཉམ་པ་ཉིད་དུ་རི༷ག་པ་དང་། ཡུལ་རིག་པ་དང་། མཚན་ཉིད་རིག་པ་དང་། སྐད་ཅིག་མའི་རྒྱུན༷་རྣམས་མཉམ་པ་ཉིད་དུ་རིག་ཅིང་ཆགས་ཐོགས་མེད་པར་ཇི་བཞིན་མཁྱེ༷ན་པའི་རྫོགས་པའི་སངས་རྒྱས་ཕྱོགས་བཅུའི་ཞིང་ན་བཞུགས་སོ་ཅོག་རྣམ༷ས་དང་། ཁྱད་པར་དུ་ཞི་བའི་ལྷ་ཚོགས་བཞི་བཅུ་རྩ་གཉིས་པོ་རྣམས་ཀྱི་སྤྱན་སྔ་ལ༷་མཐོལ་ཞིང་བཤགས་ལ། བཟོ༷ད་པར༷་གསོ༷ལ་ལོ། །ཞེས་པའོ།།

གཉིས་པ་བཤགས་པའི་འཐད་པ་བསྟན་པ་ནི། འཕགས་པ་ལགས་པས་ཁྱེད་ཀྱིས་དང་དུ་བཞེས༔ སེམས་ཅན་ལགས་པས་ནོངས་ཤིང་འཁྲུལ་པ་བྱུང་༔ སྒྱུ་མ་ལགས་པས་བཤགས་པ་གནང་བར་མཛོད༔ ཐབས་ལ་མཁས་པའི་ཚངས་པ་བསྩལ་དུ་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། དེ་ཡང་བཤགས་པ་འདི་ལྟར་བགྱི་བ་ནི་ཤིན་ཏུ་འཐད་དེ། བཤགས་ཡུལ་ཞི་བའི་ལྷ་ཚོགས་རྣམས་ནི་སྒྲིབ་གཉིས་མཐའ་དག་གམ་ཅི་རིགས་སྤངས་ཤིང་བྱམས་པ་དང་། སྙིང་རྗེ་དང་། བྱང་ཆུབ་ཀྱི་སེམས་ཀྱིས་ཐུགས་རྒྱུད་ཕྱུག་པའི་འཕ༷གས་པ༷་ལ༷གས་པས༷་ན་ཁྲོ་བ་དང་། འཁོན་སེམས་དང་། ཕྱོགས་དང་རིས་སུ་ལྷུང་བའི་སེམས་མི་མངའ་བས་བཤགས་ཡུལ་ཁྱེད༷་ཅག་རྣམས་ཀྱིས༷་བདག་གི་འགྱོད་བཤགས་དང་བཟོད་གསོལ་དང༷་དུ༷་བཞེ༷ས་ངེས་ལ། བཞེས་པར་མཛོད་ཅིག། བཤགས་པ་པོ་བདག་ནི་ལས་དང་ཉོན་མོངས་པའི་ཁོལ་པོར་འཕྱན་པའི་སེམ༷ས་ཅ༷ན་རང་ག་བ་ལ༷གས་པས༷་ན་སྒོ་གསུམ་གྱི་བྱ་བ་ལ་ནོར་བའམ་ནོང༷ས་ཤིང༷་། གནས་ལུགས་དོན་དམ་པའི་དོན་མ་རྟོགས་པར་འཁྲུལ༷་བ༷་བྱུང༷་བ་དང་། དེའི་དབང་གིས་ཉེས་ལྟུང་གི་ཚོགས་དེ་དག་བྱུང་བ་ཡིན་ཞིང་། དེ་ལྟར་བྱུང་བའང་སྲིད་པའོ།།

འོ་ན་ནོངས་པ་བྱུང་ཟིན་ནས་བཤགས་ཐབས་མེད་པ་དང་། ཉེས་ལྟུང་འདག་ཏུ་མེད་པ་དང་། བཟོད་པ་དང་དུ་ལེན་དུ་མེད་པ་ཡིན་ནམ་ཞེ་ན། དེ་ནི་མ་ཡིན་ཏེ། ཆོས་ཐམས་ཅད་བདེན་པར་མ་གྲུབ་པར་སྒྱུ༷་མ༷་ལྟ་བུ་ལ༷གས་པ༷ས་ཉེས་ལྟུང་ཡང་དོན་ལ་བདེན་མེད་སྒྱུ་མ་ལྟ་བུ་ཡིན་ཕྱིར་བཤགས་པ་བྱ་བར་རུང་ལ། འདག་ཏུའང་ཡོད་པ་དང་། བཟོད་གསོལ་བྱ་བ་དང་། དེ་དང་དུ་ལེན་པའང་འཐད་པ་དང་། ལྷག་པར་དུ་སྒྱུ་མ་ལྟ་བུ་དེའི་དོན་རྟོགས་ན་བཤགས་ཐབས་དང་འདག་པ་ཡང་སླ་བ་ཡིན་པས་བདག་གི་བཤ༷གས་པ༷་འདི་ཡང་ཞི་བའི་ལྷ་ཚོགས་རྣམས་ཀྱིས་བཟོད་གསོལ་དང་། དང་ལེན་གནང༷་བ༷ར་མཛོ༷ད་ཅིག། ཞི་བའི་ལྷ་ཚོགས་ཐབས་མཁས་ལ་ཐུགས་རྗེ་དང་ལྡན་པ་དག་གིས་ཐབ༷ས་ལ༷་མཁ༷ས་པ༷འི་འཕྲིན་ལས་སྣ་ཚོགས་ཀྱིས་སྡིག་པ་མི་དགེ་བ་དང་ལྟུང་བ་མི་བཟད་པ་རྣམས་དག་ནས་ཟུང་འཇུག་མི་གནས་པ་ཚ༷ངས་པ༷་ཆེན་པོའི་གོ་འཕང་མྱུར་བ་མྱུར་དུ་བདག་གི་རྒྱུད་ལ་བསྩ༷ལ་ཏུ༷་གསོ༷ལ་ལོ་ཞེས་པ་སྟེ་ཉེས་ལྟུང་སྡིག་པ་རྣམས་བཤགས་སུ་ཡོད་པའི་འཐད་པ་བཅས་པའི་སྒོ་ནས་འདོད་དོན་སྩོལ་བར་གསོལ་བ་བཏབ་པའོ།།

ཞི་བའི་ལྷ་ལ་འགྱོད་བཤགས་བྱ་བ།

གསུམ་པ་ཞི་བའི་ལྷ་ལ་འགྱོད་བཤགས་བྱ་བ་ལ་ནི། ཀུན་བཟང་ཡབ་ཡུམ་གཉིས་དང་། རིགས་ལྔ་ཡབ་ཡུམ་བཅུ་དང་། སེམས་དཔའ་སེམས་མ་བརྒྱད་དང་། སྤྲུལ་སྐུ་ཐུབ་པ་དྲུག་དང་། སྒོ་བ་ཡབ་ཡུམ་བརྒྱད་ལ་འགྱོད་བཤགས་བྱ་བ་སྟེ་ལྔ་ལས།

དང་པོ་ནི། ཨོཾ་ཀུན་ཏུ་བཟང་པོ་ཐུགས་མཆོག་རིན་པོ་ཆེ༔ ཁམས་གསུམ་དབང་དུ་སྡུད་པ་ཡབ་ལགས་ཀྱང་༔ དོན་དམ་དབྱིངས་སུ་སྡུད་པ་ཡུམ་ལགས་ཀྱི༔ བདག་ལུས་རྟོག་པས་སྒྱུ་མའི་སྐུ་བསླུས་ཏེ༔ བདག་དམ་ཉམས་པས་སེམས་ལ་འགྱོད་པ་སྐྱེས༔ ཀུན་བཟང་ཡབ་ཡུམ་སྐུ་ལ་གཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་ཕྱེད་ཀྱིས་བསྟན་ལ། ཨོཾ༷་ནི་གོང་ལྟར་སྐུ་ལྔ་ཡེ་ཤེས་ལྔ་ཡི་ཤིས་པ་བརྗོད་པའོ། །དཔལ་ཧེ་རུ་ཀ་སྙིང་རྗེ་རོལ་བ་ལས། ཐུགས་རྗེས་འཕྲོག་བྱེད་འཇིག་རྟེན་དབང་དུ་སྡུད། །ཡེ་ཤེས་ཐུགས་རྗེས་གཉིས་མེད་དབང་དུ་འུབ། །ཅེས་གསུངས་པ་ལྟར། གདོད་མའི་མགོན་པོ་ཆོས་སྐུ་ཀུན༷་ཏུ༷་བཟ༷ང་པོ༷་དེ༷འི་ཐུགས་མཆོ༷ག་ཏུ་གྱུར་པ་ཟུང་འཇུག་མི་གནས་པའི་ཡེ་ཤེས་ནོར་བུ་རི༷ན་པོ༷་ཆེ༷་ལྟ་བུ་དེ་གང་ཡིན་ཞེ་ན། འདོད་ཁམས་དང་། གཟུགས་ཁམས་དང་། གཟུགས་མེད་ཀྱི་ཁམ༷ས་གསུ༷མ་གྱིས་བསྡུས་པའི་ཆོས་ལ་སོགས་པ་དག་དང་མ་དག་པའི་འཁོར་འདས་ཀྱི་ཆོས་ཐམས་ཅད་ཡེ་ཤེས་གཅིག་གིས་སྐྱེ་མེད་བློ་འདས་ཆེན་པོར་རྟོགས་ཏེ་སྤྲོས་མེད་ཀ་དག་གི་ཀློང་དུ་འུབ་ཀྱིས་ཆུད་ཅིང་དབ༷ང་དུ༷་སྡུད༷་པ༷་དེའི་སྣང་ཆ་ཐབས་བདེ་བ་ཆེན་པོ་དོན་དམ་ལྷན་ཅིག་སྐྱེས་པའི་ཡེ་ཤེས་འགགས་མེད་ཡེ་གྲོལ་ཆེན་པོ་དེ་ནི་ཡ༷བ་ཀུན་ཏུ་བཟང་པོ་ལགས་ཏེ། རྡོ་རྗེ་ཕུར་བ་མྱང་འདས་ཀྱི་རྒྱུད་ལས། ཆོས་ཉིད་དབང་སྒྱུར་བྱེད་པའི་གཙོ། །བདེ་གཤེགས་རྒྱལ་བ་ཀུན་བཟང་ཡིན། །རང་བཞིན་ཡིད་ཤེས་དག་ཡིན་ཏེ། །ཀུན་བཟང་ཡེ་ཤེས་ཉིད་ཀྱི་རྒྱན། །བདེ་ཆེན་ཐབས་ཀྱི་རང་བཞིན་ནོ། །ཞེས་གསུངས་པའི་ཕྱིར་རོ།།

དོན་ལ་དེ་ལྟར་ལ༷གས་ཀྱང༷་དེ་ལྟར་མ་རྟོགས་པ་དང་། དེ་བཞིན་དུ་འཁོར་འདས་ཀྱིས་བསྡུས་པའི་ཆོས་ཐམས་ཅད་དོན༷་ད༷མ་པར་སྐྱེ་མེད་སྤྲོས་པ་དང་བྲལ་བའི་ཆོས་ཉིད་ཀྱི་དབྱིང༷ས་སུ༷་མཚན་མའི་སྤྲོས་པ་དམིགས་སུ་མེད་པའི་ཚུལ་གྱིས་དབང་དུ་སྡུད༷་པ༷་ཡི་དབྱིངས་དེ་ལ་ཡུམ༷་ཀུན་ཏུ་བཟང་མོ་ཞེས་བརྗོད་པ་ལ༷གས་ཀྱི༷་དེ་ལས་གཞན་པའི་མཚན་མའི་ཆོས་སུ་སྣང་བ་རྡུལ་ཙམ་མེད་ནའང་བད༷ག་གི་གདོས་བཅས་ཀྱི་ལུས༷་ཀྱི་རང་བཞིན་ཙམ་ཡང་སྒྱུ་མར་མ་རྟོགས་པར་འཁྲུལ་བའི་རྣམ་པར་རྟོག༷་པས༷་ཇི་སྐད་དུ་རྟ་མཆོག་རོལ་བ་ལས། མ་སྐྱེས་ཐབས་ཀྱི་ཡེ་ཤེས་ལྡན། །ཐམས་ཅད་མཉམ་པ་ཉིད་ཀྱི་དབྱིངས། །བདེན་གཉིས་དབྱེ་བ་མེད་པ་ཡིས། །ཡང་དག་དོན་མཆོག་སྒྱུ་མའི་སྐུ། །ཞེས་གསུངས་པ་ལྟར་གྱི་གདུལ་བྱ་ལ་སྣང་བའི་སྐུ་བདེན་མེད་སྒྱུ༷་མ༷་ལྟ་བུའི༷་རྒྱལ་བའི་སྐུ་དེ་མ་རྟོགས་པར་བདེན་གྲུབ་མཚན་མ་ཅན་གྱི་ཀུན་བཟང་ཡབ་ཡུམ་དུ་བཟུང་བས་རང་ཉིད་དང་ཀུན་བཟང་ཡབ་ཡུམ་གྱི་སྐུ༷་བསླུས༷་ཤིང༷་། དེའི་དབང་གིས་བད༷ག་ལ་དམ༷་ཚིག་ཉམ༷ས་པའི་ལས་དག་བྱུང་བ་ལགས་པ༷ས། དེ་ལྟར་ཀུན་བཟང་ཡབ་ཡུམ་གྱི་དོན་མ་རྟོགས་པ་དང་། དམ་ཚིག་ཉམས་པའི་ཉེས་པ་ཅི་བྱུང་ལ་སེམ༷ས་ལ༷་རབ་ཏུ་འགྱོད༷་པ༷་སྐྱེས༷་ཏེ་ཀུན༷་བཟ༷ང་ཡ༷བ་ཡུམ༷་གཉིས་ཀྱི་སྐུ༷་ལ༷་མཐོལ་ཞིང་བཤགས་པར་བྱ་ལ་བཟོ༷ད་པར༷་གསོལ༷་ལོ། །ཞེས་སྣང་བ་ཡབ་ཀྱི་རོལ་བ་ཀུན་བཟང་དང་། སྟོང་བ་ཡུམ་གྱི་རང་བཞིན་ཀུན་ཏུ་བཟང་མོ་རུ་ངེས་པའི་སྒོ་ནས་བཤགས་པ་བྱ་བར་བསྟན་པའོ།།

གཉིས་པ་རིགས་ལྔ་ཡབ་ཡུམ་བཅུ་ལ་འགྱོད་བཤགས་བྱ་བ་ལ་ནི། རིགས་ལྔའི་སངས་རྒྱས་ཐུགས་མཆོག་རིན་པོ་ཆེ༔ ཁམས་གསུམ་དབང་དུ་སྡུད་པ་ཡབ་ལགས་ཀྱང་༔ དོན་དམ་དབྱིངས་སུ་སྡུད་པ་ཡུམ་ལགས་ཀྱི༔ བདག་ལུས་རྟོག་པས་སྒྱུ་མའི་སྐུ་བསླུས་ཏེ༔ བདག་དམ་ཉམས་པས་སེམས་ལ་འགྱོད་པ་སྐྱེས༔ རིགས་ལྔ་ཡབ་ཡུམ་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་ཕྱེད་ཀྱིས་བསྟན་ལ། རིག༷ས་ལྔ༷འི་སང༷ས་རྒྱས༷་ཀྱི་ཐུག༷ས་མཆོ༷ག་ཏུ་གྱུར་པ་ཟུང་འཇུག་མི་གནས་པའི་ཡེ་ཤེས་ནོར་བུ་རི༷ན་པོ༷་ཆེ༷་ལྟ་བུ་དེ་གང་ཡིན་ཞེ་ན། འདོད་ཁམས་སོགས་ཁམ༷ས་གསུམ༷་གྱིས་བསྡུས་པ་ལ་སོགས་པའི་འཁོར་འདས་ཀྱི་ཆོས་ཐམས་ཅད་ཡེ་ཤེས་གཅིག་གིས་སྐྱེ་མེད་བློ་འདས་ཆེན་པོར་རྟོགས་ཏེ་སྤྲོས་མེད་ཀ་དག་གི་ཀློང་དུ་འུབ་ཀྱིས་ཆུད་ཅིང་དབ༷ང་དུ༷་སྡུད༷་པ༷་དེའི་སྣང་ཆ་མེ་ལོང་ལྟ་བུའི་ཡེ་ཤེས་དང་། མཉམ་ཉིད་ཡེ་ཤེས་དང་། སོར་རྟོགས་ཡེ་ཤེས་དང་། བྱ་གྲུབ་ཡེ་ཤེས་དང་། ཆོས་དབྱིངས་ཡེ་ཤེས་ཏེ་ཡེ་ཤེས་ལྔ་ནི་ཡ༷བ་རྒྱལ་བ་རིགས་ལྔའི་རང་བཞིན་ལགས་སོ།།

དེ་ལག༷ས་ཀྱང༷་དེ་ལྟར་མ་རྟོགས་པ་དང་། དེ་བཞིན་དུ་འཁོར་འདས་ཀྱིས་བསྡུས་པའི་ཆོས་ཐམས་ཅད་དོན༷་དམ༷་པར་སྐྱེ་བ་མེད་པའི་ཆོས་ཉིད་ཀྱི་དབྱིང༷ས་སུ༷་མཚན་མའི་སྤྲོས་པ་དམིགས་སུ་མེད་པའི་ཚུལ་གྱིས་དབང་དུ་སྡུད༷་པ༷་ཡི་དབྱིངས་དེ་ནི་དབྱིངས་ཕྱུག་ཡུམ༷་ལྔ་ཞེས་བརྗོད་པ་ལ༷གས་ཀྱི༷་དེ་ལས་གཞན་པའི་མཚན་མའི་ཆོས་སུ་སྣང་བ་རྡུལ་ཙམ་མེད་ནའང་བད༷ག་གི་གདོས་བཅས་ཀྱི་ལུས༷་ཀྱི་རང་བཞིན་ཙམ་ཡང་སྒྱུ་མར་མ་རྟོགས་པར་འཁྲུལ་བའི་རྣམ་པར་རྟོག༷་པ༷ས་གདུལ་བྱ་ལ་སྣང་བའི་བདེན་མེད་སྒྱུ༷་མ༷་ལྟ་བུའི༷་སྐུ་དེ་ཡང་མ་རྟོགས་པར་བདེན་གྲུབ་མཚན་མ་ཅན་གྱི་རྒྱལ་བ་རིགས་ལྔ་ཡབ་ཡུམ་དུ་བཟུང་ཞིང་རང་ཉིད་དང་རིགས་ལྔ་ཡུམ་གྱི་སྐུ༷་བསླུས༷་ཤིང༷་། དེའི་དབང་གིས་བད༷ག་ལ་དམ༷་ཚིག་ཉམ༷ས་པ༷འི་ལས་དེ་བྱུང་བ་ལགས་པས། དེ་ལྟར་རྒྱལ་བ་རིགས་ལྔ་ཡབ་ཡུམ་གྱི་དོན་མ་རྟོགས་པ་དང་། དམ་ཚིག་ཉམས་པའི་ཉེས་པ་ཅི་བྱུང་ལ་སེམ༷ས་ལ་རབ་ཏུ་འགྱོད༷་པ༷་སྐྱེས༷་ཏེ་རྒྱལ་བ་རིག༷ས་ལྔ༷་ཡ༷བ་ཡུམ༷་གྱི་སྐུ༷་ལ༷་མཐོལ་ཞིང་བཤགས་པར་བྱ་ལ་གཟོ༷ད་པ༷ར་གསོ༷ལ་ལོ། །ཞེས་ཡང་སྣང་བ་ཡབ་ཀྱི་རོལ་བ་རྒྱལ་བ་རིགས་ལྔ་དང་། སྟོང་པ་ཡུམ་གྱི་རང་བཞིན་བདེ་གཤེགས་ཡུམ་ལྔ་རུ་ངེས་པའི་སྒོ་ནས་བཤགས་པ་བྱ་བར་བསྟན་པའོ།།

སེམས་དཔའ་སེམས་མ་ཐུགས་མཆོག་རིན་པོ་ཆེ༔ ཁམས་གསུམ་དབང་དུ་སྡུད་པ་ཡབ་ལགས་ཀྱང་༔ དོན་དམ་དབྱིངས་སུ་སྡུད་པ་ཡུམ་ལགས་ཀྱི༔ བདག་ལུས་རྟོག་པས་སྒྱུ་མའི་སྐུ་བསླུས་ཏེ༔ བདག་དམ་ཉམས་པས་སེམས་ལ་འགྱོད་པ་སྐྱེས༔ སེམས་དཔའ་སེམས་མའི་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་ཕྱེད་ཀྱིས་བསྟན་ལ། བྱང་ཆུབ་སེམ༷ས་དཔ༷འ་སེམ༷ས་མ༷་ཡི་ཐུག༷ས་མཆོ༷ག་ཏུ་གྱུར་པ་ཟུང་འཇུག་མི་གནས་པའི་ཡེ་ཤེས་ནོར་བུ་རི༷ན་པོ༷་ཆེ༷་ལྟ་བུ་དེ་གང་ཡིན་ཞེ་ན། འདོད་ཁམས་སོགས་ཁམ༷ས་གསུ༷མ་གྱིས་བསྡུས་པ་ལ་སོགས་པའི་འཁོར་འདས་ཀྱི་ཆོས་ཐམས་ཅད་ཡེ་ཤེས་གཅིག་གིས་སྐྱེ་མེད་བློ་འདས་ཆེན་པོར་རྟོགས་ཏེ་སྤྲོས་མེད་ཀ་དག་གི་ཀློང་དུ་འུབ་ཀྱིས་ཆུད་ཅིང་དབ༷ང་དུ༷་སྡུད༷་པ༷་དེའི་སྣང་ཆ་ཚོགས་བརྒྱད་རྣམ་པར་དག་པ་ལ་སོགས་པ་ཐབས་བདེ་བ་ཆེན་པོའི་ཡེ་ཤེས་ཀྱི་ཆ་ནི་ཡ༷བ་བྱང་ཆུབ་སེམས་དཔའ་བརྒྱད་ཀྱི་རང་བཞིན་ལགས་སོ།།

དེ་ལག༷ས་ཀྱང༷་དེ་ལྟར་མ་རྟོགས་པ་དང་། དེ་བཞིན་དུ་འཁོར་འདས་ཀྱིས་བསྡུས་པའི་ཆོས་ཐམས་ཅད་དོན༷་ད༷མ་པར་སྐྱེ་བ་མེད་པའི་ཆོས་ཉིད་ཀྱི་དབྱིང༷ས་སུ༷་མཚན་མའི་སྤྲོས་པ་དམིགས་སུ་མེད་པའི་ཚུལ་གྱིས་དབང་དུ་སྡུད༷་པ༷་ཡི་དབྱིངས་དེ་ནི་ཡུམ༷་བྱང་ཆུབ་སེམས་མ་བརྒྱད་ཅེས་བརྗོད་པ་ལ༷གས་ཀྱི༷་དེ་ལས་གཞན་པའི་མཚན་མའི་ཆོས་སུ་སྣང་བ་རྡུལ་ཙམ་མེད་ནའང་བད༷ག་གི་གདོས་བཅས་ཀྱི་ལུས༷་ཀྱི་རང་བཞིན་ཙམ་ཡང་སྒྱུ་མར་མ་རྟོགས་པར་འཁྲུལ་བའི་རྣམ་པར་རྟོག་པས་གདུལ་བྱ་ལ་སྣང་བའི་བདེན་མེད་སྒྱུ༷་མ༷་ལྟ་བུའི༷་སྐུ་དེ་ཡང་མ་རྟོགས་པར་བདེན་གྲུབ་མཚན་མ་ཅན་གྱི་སེམས་དཔའ་སེམས་མ་རུ་བཟུང་བས་རང་ཉིད་དང་སེམས་དཔའ་སེམས་མའི་སྐུ༷་བསླུས༷་ཤིང༷་། དེའི་དབང་གིས་བད༷ག་ལ་དམ༷་ཚིག་ཉམ༷ས་པའི་ལས་དེ་བྱུང་བ་ལགས་པ༷ས། དེ་ལྟར་སེམས་དཔའ་སེམས་མ་ཡབ་ཡུམ་གྱི་ངེས་པའི་དོན་མ་རྟོགས་པ་དང་། དམ་ཚིག་ཉམས་པའི་ཉེས་པ་ཅི་བྱུང་ལ་སེམ༷ས་ལ༷་རབ་ཏུ་འགྱོ༷ད་པ༷་སྐྱེས༷་ཏེ་སེམ༷ས་དཔ༷འ་སེམ༷ས་མ༷འི་སྐུ༷་ལ༷་མཐོལ་ཞིང་བཤགས་པར་བྱ་ལ་གཟོ༷ད་པར༷་གསོ༷ལ་ལོ། །ཞེས་ཡང་སྣང་བ་ཡབ་ཀྱི་རོལ་བ་སེམས་དཔའ་བརྒྱད་དང་། སྟོང་པ་ཡུམ་གྱི་རང་བཞིན་སེམས་མ་བརྒྱད་དམ་བྱེད་པ་ཚོགས་བརྒྱད་ཀྱི་རང་བཞིན་སེམས་དཔའ་དང་བྱ་བ་ཡུལ་གཟུགས་སོགས་ཀྱི་ངོ་བོ་སེམས་མ་བརྒྱད་དུ་ངེས་པའི་སྒོ་ནས་བཤགས་པ་བྱ་བར་བསྟན་པའོ།།

བཞི་བ་ཐུབ་པ་དྲུག་གི་འགྱོད་བཤགས་ནི། སྤྲུལ་སྐུ་ཐུབ་དྲུག་ཐུགས་མཆོག་རིན་པོ་ཆེ༔ བཅུད་ཀྱི་སེམས་ཅན་ཁམས་གསུམ་དབང་དུ་སྡུད༔ སྣོད་ཀྱི་འཇིག་རྟེན་དོན་དམ་དབྱིངས་སུ་སྒྲོལ༔ བདག་ལུས་རྟོག་པས་སྒྱུ་མའི་སྐུ་བསླུས་ཏེ༔ བདག་དམ་ཉམས་པས་སེམས་ལ་འགྱོད་པ་སྐྱེས༔ སྤྲུལ་སྐུ་ཐུབ་པ་དྲུག་ལ་གཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་ཕྱེད་ཀྱིས་བསྟན་ལ། སྤྲུལ༷་སྐུ༷་ཐུབ༷་པ་དྲུག༷་གི་ཐུག༷ས་མཆོ༷ག་ཏུ་གྱུར་པ་ཟུང་འཇུག་མི་གནས་པའི་ཡེ་ཤེས་ནོར་བུ་རི༷ན་པོ༷་ཆེ༷་ལྟ་བུ་དེ་གང་ཡིན་ཞེ་ན། ཧེ་རུ་ཀ་སྙིང་རྗེ་རོལ་བ་ལས། ཕྱི་ནི་སྣོད་ཀྱི་འཇིག་རྟེན་རྟོགས་འགྱུར་ན། །འབྱུང་བ་ལྔ་ལས་སངས་རྒྱས་གཞན་ན་མེད། །ནང་གི་བཅུད་ཀྱི་འཇིག་རྟེན་རྟོགས་འགྱུར་ན། །སེམས་ལས་མ་གཏོགས་སངས་རྒྱས་གཞན་ན་མེད། །ཅེས་གསུངས་པ་ལྟར། ནང་བཅུད༷་ཀྱི༷་སེམ༷ས་ཅ༷ན་རྣམ་སྨིན་གྱི་འགྲོ་བ་ཁམ༷ས་གསུམ༷་གྱིས་བསྡུས་པ་རྣམས་ཟག་པ་མེད་པའི་ཐུགས་རྗེའི་རྩལ་གྱི་ལྕགས་ཀྱུས་ཉེ་བར་དྲངས་ཏེ། དོན་དམ་བདེ་བ་ཆེན་པོའི་ཡེ་ཤེས་ཀྱིས་སྐྱེ་འགགས་མེད་པ་སྤྲོས་བྲལ་མཉམ་པ་ཉིད་ཀྱི་རང་བཞིན་དུ་རྟོགས་ཤིང་ཀ་དག་སྟོང་པ་ཆེན་པོའི་ས་རུ་དབ༷ང་དུ༷་སྡུད༷་པར་བྱེད་པའི་སྒོ་ནས་ཕྱི་སྣང་བ་སྣོད༷་ཀྱི༷་རང་བཞིན་གྱིས་བསྡུས་པའི་འཇི༷ག་རྟེན༷་ཀྱི་ཁམས་ཀུན་ཀྱང་དོན༷་དམ༷་པར་སྐྱེ་བ་མེད་པར་ངེས་ཏེ། རིགས་དྲུག་གི་འགྲོ་བའི་ཁམས་ཀུན་དེ་འདྲའི་སྣོད་བཅུད་གཉིས་སུ་མེད་པའི་ཆོས་ཉིད་ཀྱི་དབྱིང༷ས་སུ༷་དམིགས་པར་མེད་པ་སྒྲོལ༷་བའམ་ཞི་བར་བྱེད་པའི་དབྱིངས་དང་ཡེ་ཤེས་གཉིས་སུ་མེད་པ་དེ་ནི་སྤྲུལ་སྐུ་ཐུབ་པ་དྲུག་ཅེས་པའམ་ཐུབ་པ་དྲུག་གི་ཐུགས་རྗེ་ཟག་པ་མེད་པའི་ནོར་བུ་རིན་པོ་ཆེ་འགྲོ་དྲུག་སོ་སོའི་འདུལ་བྱེད་དུ་སྣང་བ་ཞེས་བརྗོད་པ་ལགས་ཀྱི་དེ་ལས་གཞན་པའི་མཚན་མའི་ཆོས་སུ་སྣང་བ་རྡུལ་ཙམ་མེད་ཅིང་། བད༷ག་གི་གདོས་བཅས་ཀྱི་ལུས༷་ཀྱི་རང་བཞིན་ཡང་དེ་ལྟར་ཡིན་ནའང་བདག་ལུས་ཙམ་ཡང་སྒྱུ་མར་མ་རྟོགས་པར་འཁྲུལ་བའི་རྣམ་པར་རྟོག༷་པ༷ས་གདུལ་བྱ་ལ་སྣང་བའི་བདེན་མེད་སྒྱུ༷་མ༷་ལྟ་བུའི༷་ཐུབ་དྲུག་གི་སྐུ་དེ་ཡང་མ་རྟོགས་པར་བདེན་གྲུབ་མཚན་མ་ཅན་གྱི་སྤྲུལ་སྐུ་ཐུབ་པ་དྲུག་ཏུ་བཟུང་བས་རང་ཉིད་དང་ཐུབ་པ་དྲུག་གི་སྐུ༷་བསླུས༷་ཤིང༷་། དེའི་དབང་གིས་བད༷ག་ལ་དམ༷་ཚིག་ཉམ༷ས་པའི་ལས་དེ་བྱུང་བ་ལགས་པ༷ས། དེ་ལྟར་སྤྲུལ་སྐུ་ཐུབ་པ་དྲུག་གི་དོན་མ་རྟོགས་པ་དང་། དམ་ཚིག་ཉམས་པའི་ཉེས་པ་ཅི་བྱུང་ལ་སེམ༷ས་ལ༷་རབ་ཏུ་འགྱོ༷ད་པ༷་སྐྱེས༷་ཏེ་སྤྲུལ༷་སྐུ༷་ཐུབ༷་པ༷་དྲུག༷་གི་སྐུ་ལ༷་མཐོལ་ཞིང་བཤགས་པར་བྱ་ལ་བཟོ༷ད་པ༷ར་གསོ༷ལ་ལོ། །ཞེས་ནང་བཅུད་ཀྱི་སེམས་ཅན་སྣང་བ་ཐབས་ཀྱི་ཡེ་ཤེས་དང་། ཕྱི་སྣོད་ཀྱི་འཇིག་རྟེན་སྟོང་པ་ཤེས་རབ་ཀྱི་རང་བཞིན་དང་། ཐབས་ཤེས་ཡེ་ནས་གཉིས་སུ་མེད་པ་སྤྲུལ་སྐུ་ཐུབ་པ་དྲུག་གི་རང་བཞིན་དུ་ངེས་པའི་སྒོ་ནས་བཤགས་པ་བྱ་བར་བསྟན་པའོ།།

ལྔ་བ་སྒོ་བ་ཡབ་ཡུམ་བརྒྱད་ཀྱི་འགྱོད་བཤགས་ནི། སྒོ་བ་སྒོ་མ་ཐུགས་མཆོག་རིན་པོ་ཆེ༔ ཁམས་གསུམ་དབང་དུ་སྡུད་པ་ཡབ་ལགས་ཀྱང་༔ དོན་དམ་དབྱིངས་སུ་སྡུད་པ་ཡུམ་ལགས་ཀྱི༔ བདག་ལུས་རྟོག་པས་སྒྱུ་མའི་སྐུ་བསླུས་ཤིང་༔ བདག་དམ་ཉམས་པས་སེམས་ལ་འགྱོད་པ་སྐྱེས༔ སྒོ་བ་སྒོ་མའི་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་ཕྱེད་ཀྱིས་བསྟན་ལ། སྒོ༷་བ༷་བཞི་དང་སྒོ༷་མ༷་བཞིའི་ཐུག༷ས་མཆོ༷ག་ཏུ་གྱུར་པ་ཟུང་འཇུག་མི་གནས་པའི་ཡེ་ཤེས་ནོར་བུ་རི༷ན་པོ༷་ཆེ༷་ལྟ་བུ་དེ་གང་ཡིན་ཞེ་ན། ཁམ༷ས་གསུམ༷་གྱིས་བསྡུས་པའི་ཆོས་ལ་སོགས་པ་སྣང་བ་ཀུན་རྫོབ་ཀྱི་དངོས་པོ་ཀུན་བདེ་བ་ཆེན་པོའི་ཡེ་ཤེས་ཀྱིས་སྤྲོས་མེད་ཀ་དག་གི་ངོ་བོར་རྟོགས་པར་དབ༷ང་དུ༷་སྡུད༷་པ༷ར་བྱེད་པའི་རྟག་ཆད་མུ་བཞི་གནས་སུ་དག་པའི་བདེ་བ་ཆེན་པོའི་ཡེ་ཤེས་ནི་ཡ༷བ་སྒོ་བ་བཞིའི་རང་བཞིན་ལགས་སོ།།

དེ་ལ༷གས་ཀྱང༷་དེ་ལྟར་མ་རྟོགས་པ་དང་། དེ་བཞིན་དུ་ཕྱི་སྣང་གི་ཆོས་ཐམས་ཅད་དོན༷་དམ༷་པར་སྐྱེ་བ་མེད་པའི་ཆོས་ཉིད་ཀྱི་དབྱིང༷ས་སུ༷་དམིགས་མེད་དུ་དབང་དུ་སྡུད༷་པ༷་དེའི་དབྱིངས་དེ་ནི་ཚད་མེད་རྣམ་བཞི་གནས་སུ་དག་པ་ཡུམ༷་སྒོ་མ་བཞིའི་རང་བཞིན་ལག༷ས་ཀྱི༷་དེ་ལས་གཞན་པའི་མཚན་མའི་ཆོས་སུ་སྣང་བ་རྡུལ་ཙམ་མེད་ཅིང་། བད༷ག་གི་གདོས་བཅས་ཀྱི་ལུས༷་ཀྱི་རང་བཞིན་ཡང་དེ་ལྟར་ཡིན་ནའང་བདག་ལུས་ཙམ་ཡང་སྒྱུ་མར་མ་རྟོགས་པར་འཁྲུལ་བའི་རྣམ་པར་རྟོག༷་པ༷ས་གདུལ་བྱ་ལ་སྣང་བའི་བདེན་མེད་སྒྱུ༷་མ༷་ལྟ་བུའི༷་སྒོ་བ་ཡབ་ཡུམ་གྱི་སྐུ་དེ་ཡང་མ་རྟོགས་པར་བདེན་གྲུབ་མཚན་མ་ཅན་དུ་བཟུང་བས་རང་ཉིད་དང་སྒོ་བ་ཡབ་ཡུམ་བརྒྱད་ཀྱི་སྐུ༷་བསླུས༷་ཤིང༷་། དེའི་དབང་གིས་བད༷ག་ལ་དམ༷་ཚིག་ཉམ༷ས་པའི་ལས་དེ་བྱུང་བ་ལགས་པ༷ས། དེ་ལྟར་སྒོ་བ་ཡབ་ཡུམ་བརྒྱད་ཀྱི་དོན་མ་རྟོགས་པ་དང་། དམ་ཚིག་ཉམས་པའི་ཉེས་པ་ཅི་བྱུང་ལ་སེམ༷ས་ལ༷་རབ་ཏུ་འགྱོ༷ད་པ༷་སྐྱེས༷་ཏེ་སྒོ༷་བ༷་ཡ༷བ་ཡུམ༷་བརྒྱད་ཀྱི་སྐུ༷་ལ༷་མཐོལ་ཞིང་བཤགས་པར་བྱ་ལ་བཟོ༷ད་པ༷ར་གསོ༷ལ་ལོ། །ཞེས་སྣང་བ་ཐབས་ཀྱི་ཡེ་ཤེས་ཡབ་སྒོ་བ་བཞི་དང་། སྟོང་པ་ཤེས་རབ་ཀྱི་རང་བཞིན་ཡུམ་སྒོ་མ་བཞི་རུ་ངེས་པའི་སྒོ་ནས་བཤགས་པ་བྱ་བར་བསྟན་པའོ།། །།

ཁྲོ་བོའི་ཀློང་བཤགས་དངོས།

༈ རྩ་བའི་ས་བཅད་གསུམ་པ་ཁྲོ་བོའི་ཀློང་བཤགས་ལ་ནི། ཁྲོ་བོའི་ཀློང་བཤགས་དངོས་དང་། ཁྲོ་བོའི་དཀྱིལ་འཁོར་ལ་བཤགས་ཤིང་བཟོད་གསོལ་བྱེ་བྲག་ཏུ་བྱ་བ་དང་གཉིས་ལས།

དང་པོ་ལའང། ཏིང་འཛིན་རྣམ་གསུམ་གྱི་བཤགས་པ་དང་། སྐུའི་ཕྱག་རྒྱ་ཁྲག་འཐུང་རིགས་ལྔའི་ཀློང་བཤགས་དང་། ཀྲོ་ཏི་ཡུམ་ལྔའི་ཀློང་བཤགས་དང་། ཀཽ་རི་མ་བརྒྱད་ཀྱི་ཀློང་བཤགས་དང་། སེང་ཧ་ཕྲ་མེན་བརྒྱད་ཀྱི་ཀློང་བཤགས་དང་། སྒོ་མ་བཞིའི་ཀློང་བཤགས་དང་། དབང་ཕྱུག་མ་ཉེར་བརྒྱད་ཀྱི་ཀློང་བཤགས་དང་། ཏིང་འཛིན་ཉམས་པའི་བཤགས་པ་དང་། ཐོག་མེད་ཀྱི་ཉམས་ཆག་གི་བཤགས་པ་དང་དགུ་ལས།

དང་པོ་ལའང་། དེ་བཞིན་ཉིད་ཀྱི་ཏིང་ངེ་འཛིན་གྱི་བཤགས་པ་དང་། ཀུན་སྣང་གི་ཏིང་ངེ་འཛིན་གྱི་བཤགས་པ་དང་། རྒྱུའི་ཏིང་ངེ་འཛིན་གྱི་བཤགས་པ་དང་གསུམ་ལས།

དང་པོ་ནི། ཨོཾ་དང་པོ་རང་བཞིན་མཉམ་པའི་དཀྱིལ་འཁོར་དུ༔ གཟུང་འཛིན་གཉིས་ཀྱི་བདག་དང་མ་བྲལ་བས༔ གཉིས་སུ་མེད་པའི་གནས་ལུགས་དོན་མ་རྟོགས༔ གཉིས་མེད་ཆོས་ཀྱི་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པ་གཅིག་གིས་བསྟན་ལ། ཨོཾ༷་ཡིག་གི་དོན་ནི་གཙོ་བོ་གོང་བཞིན་ཡིན་ལ། རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་མཁའ་འགྲོ་ལས། ཨོཾ་ནི་ཐམས་ཅད་གསལ་བྱེད་དོ། །གྲུབ་གསོལ་འདོད་པ་ཐམས་ཅད་ལ། །རྣལ་འབྱོར་དམ་མཆོག་འདི་མཐོང་ན། །གཞན་དག་སྙིང་པོ་མེད་རྩྭར་མཚུངས། ། ཞེས་གསུངས་པ་ལྟར། ཨོཾ་ཡིག་ནི་རྟོགས་བྱའི་དོན་དང་། སྒྲུབ་བྱའི་ལས་ཐམས་ཅད་གསལ་བར་བྱེད་པ་དང་། དངོས་གྲུབ་འགྲུབ་པ་དང་། ལྷ་ལ་གསོལ་བ་འདེབས་པ་དང་། འདོད་པའི་དོན་ཐམས་ཅད་ལ་ཤིས་ཤིང་རྒྱལ་བའི་བྱིན་རླབས་སྐུལ་བའི་ཡི་གེ་དང་། དེའི་དོན་ཅན་དུ་གོ་བར་བྱའོ།།

སྔ་འགྱུར་གྱི་རྒྱུད་སྡེ་རྣམས་ཀྱི་ལུགས་ལ་བསྐྱེད་རིམ་གྱི་དཀྱིལ་འཁོར་གང་བསྒོམ་ཡང་ཐོག་མར་ཏིང་འཛིན་རྣམ་གསུམ་བསྒོམ་པའི་སྒོ་ནས་བསྐྱེད་རིམ་ལ་འཇུག་དགོས་པར་འདོད་ལ། དེ་གསུམ་གང་ཞེ་ན། དེ་བཞིན་ཉིད་ཀྱི་ཏིང་ངེ་འཛིན་དང་། ཀུན་ཏུ་སྣང་བའི་ཏིང་ངེ་འཛིན་དང་། རྒྱུ་ཡི་ཏིང་ངེ་འཛིན་གསུམ་ཡིན་ཏེ། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། ལང་ཀའི་བདག་པོ་གྲོང་ཁྱེར་གསུམ་གྱི་ཆེད་དུ་ཏིང་ངེ་འཛིན་གསུམ་སྣང་བ་ནི་འདི་ལྟ་སྟེ། དེ་ཉིད་ཀྱི་ཆེད་དུ་དེ་བཞིན་ཉིད་ཀྱི་ཏིང་ངེ་འཛིན་དང་། དེ་འཛིན་གྱི་ཆེད་དུ་ཀུན་ཏུ་སྣང་བའི་ཏིང་ངེ་འཛིན་དང་། དེ་འཇུག་གི་ཆེད་དུ་རྒྱུའི་ཏིང་ངེ་འཛིན་ཏོ། །ཞེས་དང་། གསང་བ་སྙིང་པོ་དེ་ཁོ་ན་ཉིད་ངེས་པའི་བླ་མ་ཆེན་པོའི་རྒྱུད་ལས། མཚོན་དུ་མེད་པའི་བྱང་ཆུབ་སེམས། །ཡེ་ཤེས་སྙིང་པོ་གསལ་བ་དང་། །སྒོམ་པ་རྣམ་གསུམ་དུས་གཅིག་རྫོགས། །བྱང་ཆུབ་སེམས་ཀྱི་ཐིག་ལེ་ལ། །མ་བཀག་ལྷུན་གྱིས་རྫོགས་པས་ན། །དེ་ནི་ཐིག་ལེ་ཆེན་པོའི་དོན། །དེ་ནི་དེ་བཞིན་ཉིད་ཀྱི་དབྱིངས། །དེ་ནི་ཀུན་ཏུ་སྣང་བའི་ངང་། །དེ་ནི་རྒྱུ་ཡི་རིམ་པར་ཧོ། །ཞེས་དང་། ཡེ་ཤེས་རྔམ་པ་གློག་གི་འཁོར་ལོ་ལས། དེ་བཞིན་ཉིད་དང་ཀུན་ཏུ་སྣང་། །རྒྱུ་ཡི་ཏིང་འཛིན་རབ་བསྒོམས་པས། །རྫོགས་པའི་བྱང་ཆུབ་ཐོབ་པ་སྟེ། །ཞེས་གསུངས་པའི་ཕྱིར་རོ།།

དང༷་པོ༷་སྟེ་ཐོག་མར་བསྒོམ་པར་བྱ་བའི་དེ་བཞིན་ཉིད་ཀྱི་ཏིང་ངེ་འཛིན་ནི། ཤེས་རབ་ཀྱི་ཕ་རོལ་དུ་ཕྱིན་པ་སྡུད་པ་ཚིགས་སུ་བཅད་པ་ལས། བྱང་ཆུབ་སེམས་དཔའ་གང་ཞིག་དོགས་མེད་དེ་ལྟར་སྤྱོད། །ཤེས་རབ་ལྡན་ཏེ་མཉམ་ཉིད་གནས་པར་ཤེས་པར་བྱ། །ཆོས་རྣམས་རང་བཞིན་མེད་པ་ཡོངས་སུ་ཤེས་གྱུར་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། ཏིང་འཛིན་རྒྱལ་པོ་ལས། དེ་ཕྱིར་རང་བཞིན་མཉམ་ཉིད་རྣམས་སྤྲོས་པ། །ངོ་བོ་ཉིད་ཀྱིས་ཆོས་ཀུན་རང་བཞིན་མེད། །བདེ་བར་གཤེགས་པའི་ཡུམ་འདི་སུ་འདོད་པ། །རྒྱལ་བ་རྣམས་ཀྱི་ཡུམ་ནི་ཐོབ་པར་འགྱུར། །ཞེས་དང་། ཡེ་ཤེས་ཕྱག་རྒྱའི་ཏིང་ངེ་འཛིན་གྱི་མདོ་ལས། སྒྱུ་མེད་གཅམ་མེད་འདོད་མེད་ང་མེད་དང་། །གཟུང་མེད་དགའ་དང་རྣམ་པར་འཛིན་བྲལ་དང་། །ནམ་མཁའི་ལམ་ལྟར་མཉམ་ཉིད་རབ་ལྡན་པར། །དེ་ལྟར་སྦྱོར་བ་ཏིང་འཛིན་འདི་འཐོབ་བོ། །ཞེས་དང་། གསང་བའི་སྙིང་པོ་དེ་ཁོ་ན་ཉིད་ངེས་པ་ལས། ཡེ་ནས་མཉམ་ཉིད་གསང་བའི་དཀྱིལ་འཁོར་དབྱིངས། །དབྱིངས་ལས་མི་གཞན་ཡེ་ནས་ཐིག་ལེའི་ངང་། །ཡེ་ཤེས་དབྱིངས་ཉིད་གཟུགས་བརྙན་སྒྱུ་མའི་ཚུལ། །སྣང་བྱེད་ཉིད་ན་བྱ་བྱེད་མེད་པར་གནས། །ཞེས་གསུངས་པ་ལྟར། ཆོས་ཐམས་ཅད་ཀྱི་རང༷་བཞི༷ན་ཡེ་གདོད་མ་ནས་རྟག་ཆད་འགྲོ་འོང་བྱ་བྱེད་སྐྱེ་འགགས་ཐམས་ཅད་དང་བྲལ་བ་ནམ་མཁའ་ལྟ་བུའི་གནས་ལུགས་ཡོངས་གྲུབ་མཉ༷མ་པ༷་ཆེན་པོའི༷་དཀྱིལ་འཁོར་དུ་གྲགས་པ་གང་ཡིན་པ་ལ་བྱ་སྟེ། ལས་བྱང་ཚོར་གྲོལ་ལས། རྣམ་པར་རྟོག་གསུམ་བྲལ་བ་ཡི༔ དམིགས་མེད་བརྗོད་བྲལ་དེ་བཞིན་ཉིད༔ ཅེས་དང་། ཡེ་ཤེས་རྔམ་གློག་ལས། ཡོངས་སུ་གྲུབ་པའི་བློ་གསལ་ན། །དེ་བཞིན་ཉིད་དུ་རྣམ་པར་གྲགས། །ཞེས་དང་། ཏིང་ངེ་འཛིན་ཀྱང་རྣམ་གསུམ་སྟེ། །དང་པོར་དེ་བཞིན་ཉིད་ཀྱི་དང་། །དེ་བཞིན་ཉིད་ལ་གནས་བཅའི་ཕྱིར། །སྟོང་པ་ཆེན་པོའི་ཏིང་འཛིན་བསྒོམ། །ཞེས་གསུངས་པའི་ཕྱིར་རོ།།

འདི་ནི་དམིགས་མེད་དུ་མཉམ་པར་བཞག་པ་དེ་ལུས་ཞིག་ཅིང་འཇུག་ཤེས་ལྔ་དང་རྟོག་ཚོགས་རགས་པ་འགགས་པའི་འཆི་བ་དང་ཆོས་མཐུན་ཞིང་། འཆི་སྲིད་ཀྱི་བག་ཆགས་སྦྱོང་བྱེད་འཆི་བ་ཆོས་སྐུ་ལམ་ཁྱེར་ཏེ། ད་ལྟ་ནས་ཆོས་སྐུའི་རྣམ་པ་དང་རྗེས་སུ་མཐུན་པའི་ལམ་གྱི་རྣམ་པ་སྒོམ་པ་ཡིན་ཞིང་ཆོས་སྐུའི་ས་བོན་རྒྱུད་ལ་འཇོག་པ་དང་། རྫོགས་རིམ་འོད་གསལ་དང་སྟོང་པ་ཆེན་པོའི་རྣལ་འབྱོར་སྐྱེ་བ་ལྷུན་གྱིས་གྲུབ་པའི་རྒྱུའོ།།

དེ་ལྟ་བུའི་དཀྱིལ༷་འཁོ༷ར་དུ༷་གཟུང་བ་ཡུལ་དང་འཛིན་པ་སེམས་གཉིས་སུ་མ་གྲུབ་ན་ཡང་། བདག་གིས་ནི་གཟུང༷་འཛི༷ན་གཉི༷ས་ཀྱི༷་བད༷ག་སྟེ་གཟུང་བ་ཡུལ་དང་འཛིན་པ་སེམས་གཉིས་སུ་བདེན་པར་ཞེན་པའི་བདག་འཛིན་གྱི་བློ་དང་མ༷་བྲལ༷་བ༷ས་ན་གཟུང་འཛིན་གཉིས༷་སུ༷་མེ༷ད་པ༷འི་གན༷ས་ལུག༷ས་མཉམ་པ་ཉིད་ཀྱི་དོན༷་མ༷་རྟོག༷ས་པར་དེ་བཞིན་ཉིད་ཀྱི་ཏིང་འཛིན་ཇི་བཞིན་མ་གསལ་བ་དེས་བསྐྱེད་པའི་ཉེས་པ་རྣམས་གཟུང་འཛིན་གཉིས་སུ་མེད་པ་དང་། འཁོར་འདས་གཉིས་སུ་མེད་པ་དང་། སྣང་སྟོང་གཉིས་སུ་མེད་པ་ལ་སོགས་པའི་གཉིས༷་མེ༷ད་མཉམ་པ་ཆེན་པོ་སྤྲོས་བྲལ་ཆོས༷་ཀྱི༷་སྐུ༷་ལ༷་མཐོལ་ཞིང་བཤགས་ལ་བཟོ༷ད་པ༷ར་གསོ༷ལ་ལོ་ཞེས་ཆོས་ཉིད་མཉམ་པ་ཉིད་ཀྱི་དོན་མ་རྟོགས་པའི་མཚན་འཛིན་གྱིས་བསྐྱེད་པའི་ཉེས་པ་དེ་ཆོས་སྐུ་མཉམ་པ་ཆེན་པོའི་ངང་དུ་མཉམ་པར་བཞག་པའི་སྒོ་ནས་བཤགས་པར་བསྟན་པའོ།།

གཉིས་པ་ནི། དོན་དམ་མི་འགགས་གསལ་བའི་གོ་འབྱེད་ཅིང་༔ ཟླ་གསལ་དྭངས་པའི་དབྱིངས་སུ་སྐུ་བཞེངས་ལ༔ བྱང་ཆུབ་ཐིག་ལེ་འོད་ཀྱིས་ཁྱབ་མཛད་པ༔ ཀུན་སྣང་དྭངས་པའི་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། གང་སྣང་བའི་ཆོས་ཐམས་ཅད་ཆོས་ཉིད་དེ་བཞིན་ཉིད་ཀྱི་དབྱིངས་སུ་དམིགས་པ་མེད་པར་རྒྱས་བཏབ་པའི་ངང་ནས་དེ་ལྟར་མ་རྟོགས་པའི་མཁའ་ཁྱབ་ཀྱི་སེམས་ཅན་ལ་སྒྱུ་མ་ལྟ་བུའི་སྙིང་རྗེ་འགགས་མེད་དུ་བསྒོམ་པ་ནི་ཀུན་ཏུ་སྣང་བའི་ཏིང་ངེ་ཡིན་ཏེ། ལས་བྱང་ཚོར་གྲོལ་ལས། རྟོག་བྲལ་ངང་ལས་རང་བྱུང་རྩལ༔ སྟོང་ཉིད་སྙིང་རྗེ་ཀུན་ཏུ་སྣང་༔ ཞེས་དང་། ཧེ་རུ་ཀ་སྙིང་རྗེ་རོལ་བ་ལས། ཆོས་ཐམས་ཅད་ཡེ་ནས་སངས་རྒྱས་ཀྱིས་ཀྱང་མཁྱེན་པའི་ཡེ་ཤེས་ལ་སྐུ་གསུང་ཐུགས་མངའ་བའི་རྟགས་སུ་དང་པོ་ཕྱག་རྒྱ་ཆེན་པོ་དྲུག་དང་ལྡན་པར་བསྒོམ་མོ། །དེ་ནས་ཀུན་མཁྱེན་ཡེ་ཤེས་ཀྱིས་ཐབས་མཁས་པའི་ཐུགས་རྗེས་གོ་ཤག་གིས་ཕྱེ་ལ་ཀུན་སྣང་གི་ཏིང་ངེ་འཛིན་དུ་བསྒོམ་མོ། །ཞེས་དང་། ཡེ་ཤེས་རྔམ་གློག་ལས། གཉིས་པ་ཀུན་སྣང་ནམ་མཁའ་དང་། །སྙིང་རྗེ་ཡུམ་གྱིས་ཁྱབ་པའི་ཕྱིར། །མཚམས་སྦྱོར་ཆེན་པོའི་ཏིང་འཛིན་བསྒོམ། །ཞེས་དང་། ཀུན་སྣང་སྙིང་རྗེའི་ངོ་བོ་དང་། ། ཞེས་གསུངས་པའི་ཕྱིར་རོ།།

འདི་ནི་ཆོས་ཉིད་སྟོང་པ་ནམ་མཁའ་ལྟ་བུ་རྟོགས་པའི་ངང་ནས་དེ་ལྟར་མ་རྟོགས་པའི་འགྲོ་བ་ལ་སྙིང་རྗེ་སྒྱུ་མ་ལྟ་བུ་སྒོམ་པའི་ཆ་ནས་འཆི་སྲིད་ལས་འཕོས་ཏེ་བར་དོའི་སྣང་བ་ཤར་བ་དང་ཆོས་མཐུན་པ་དང་། ཆོས་ཀྱི་དབྱིངས་ལས་གཟུགས་སྐུ་སྒྱུ་མ་ལོངས་སྤྱོད་རྫོགས་སྐུ་སྣང་བ་དང་རྗེས་སུ་མཐུན་པས་བར་སྲིད་ཀྱི་བག་ཆགས་སྦྱོང་བྱེད་བར་དོ་ལོངས་སྐུ་ལམ་ཁྱེར་ཏེ། འབྲས་བུ་ལོངས་སྐུའི་རྣམ་པ་དང་མཐུན་པའི་ལམ་གྱི་སྒོམ་པ་ཡིན་ཞིང་། ལོངས་སྐུའི་ས་བོན་རྒྱུད་ལ་འཇོག་ཅིང་། སྙིང་རྗེ་སྒྱུ་མའི་རྣལ་འབྱོར་འབྱུང་བའི་རྒྱུའོ།།

ཀུན་ཏུ་སྣང་བའི་ཏིང་ངེ་འཛིན་ཞེས་པའི་ཐ་སྙད་ནི་སྔགས་མ་ཟད་མདོ་ལས་ཀྱང་བྱུང་སྟེ། ཤེས་རབ་ཀྱི་ཕ་རོལ་ཕྱིན་པ་སྟོང་ཕྲག་བརྒྱ་བ་ལས། སེམས་གནས་པའི་ཏིང་ངེ་འཛིན་དང་། ཀུན་ཏུ་སྣང་བའི་ཏིང་ངེ་འཛིན་དང་། རབ་ཏུ་གནས་པའི་ཏིང་ངེ་འཛིན་དང་། ཞེས་དང་། སྙིང་རྗེ་པདྨ་དཀར་པོ་ལས། ཀུན་ཏུ་སྣང་བའི་ཏིང་ངེ་འཛིན་གྱིས་ནི་ཏིང་ངེ་འཛིན་ཐམས་ཅད་ལ་སྣང་བ་ཡང་དག་པ་རྗེས་སུ་མཐོང་བར་བྱེད་དོ། །ཞེས་དང་། གླང་པོའི་རྩལ་གྱི་མདོ་ལས། ཀུན་ཏུ་སྣང་བའི་ཏིང་ངེ་འཛིན་ཀྱང་ཐོབ་པའི་རེ་བར་བྱའོ། །ཞེས་གསུངས་པའི་ཕྱིར།

མདོ་ལས་བཤད་པའི་སྒྱུ་མ་ལྟ་བུའི་ཏིང་ངེ་འཛིན་དེ་ཀུན་སྣང་འདི་ཡིན་པར་བཤད་ལ། དེ་ཡང་དང་པོ་ནི་མདོ་ལས་བཤད་པའི་རྡོ་རྗེ་ལྟ་བུའི་ཏིང་ངེ་འཛིན་དང་། གཉིས་པ་འདི་སྒྱུ་མ་ལྟ་བུའི་ཏིང་ངེ་འཛིན་དང་། གསུམ་པ་དེ་དཔའ་བར་འགྲོ་བའི་ཏིང་ངེ་འཛིན་ཡིན་པར་མཁས་པ་ཁ་ཅིག་གསུངས་ཀྱང་སྐབས་འདིར་དམིགས་རྣམ་ལ་ཁྱད་པར་ཆེ་བས་ཇི་བཞིན་མཐུན་པར་ནི་མི་སྣང་ངོ་།།

དཀྱུས་དོན་ནི་དང་པོ་གོང་ལྟར་དེ་བཞིན་ཉིད་ཀྱི་ཏིང་ངེ་འཛིན་དོན༷་དམ༷་མཉམ་པ་ཉིད་ཀྱི་དབྱིངས་ལ་མཉམ་པ་བཞག་ཅིང་། དེ་ཉིད་རྟོགས་པའི་གཟུང་འཛིན་གཉིས་སུ་མེད་པའི་ཡེ་ཤེས་ཀྱི་ངད་མ་ཡལ་བའི་ངང་ལས་འགྲོ་ཁམས་ཚད་མེད་པ་ལ་དམིགས་པའི་སྙིང་རྗེ་ཆེན་པོ་བསྒོམ་པ་སྟེ། དེའི་རྒྱུན་མི༷་འག༷གས་ཤིང་རྣམ་པ་གས༷ལ་བ་སྐྱེ་བ༷འི་གོ༷་ཧར་གྱིས་འབྱེད༷་ཅིང༷་ཟླ༷་བ་རབ་ཏུ་གས༷ལ་ཞིང་ཉ་གང་པའི་དཀྱིལ་འཁོར་ཆེན་པོ་དྲི་མ་མེད་པ་དྭང༷ས་པ༷འི་ནམ་མཁའི་དབྱིང༷ས་སུ༷་ཤར་བ་ལྟ་བུའི་དམིགས་པ་མེད་པའི་སྙིང་རྗེ་ཆེན་པོའི་སྐུ༷་ཐོལ་གྱིས་བཞེང༷ས་པར་བྱ་བ་སྟེ་བསྒོམ་པར་བྱ་ལ༷། དེ་འདྲའི་སྙིང་རྗེ་ཆེན་པོའི་རྒྱུ་ལས་ཀུན་རྫོབ་བྱང༷་ཆུབ༷་སེམས་ཀྱི་ཐི༷ག་ལེ༷་དཀར་པོའི་འོ༷ད་ཀྱིས༷་སེམས་ཅན་མཐའ་ཡས་པའི་ཁམས་ལ་ཁྱབ༷་པར་མཛ༷ད་པ༷་སྟེ་དེ་ལྟར་བསྒོམ་པ་ནི་ཀུན་ཏུ་སྣང་བ་དྭངས་པའི་ཏིང་ངེ་འཛིན་ཡིན་ཞེས་འདིར་སྙིང་རྗེ་ཙམ་མ་ཡིན་པར་རྒྱུ་སྙིང་རྗེ་ཆེན་པོ་དང་། དེའི་འབྲས་བུ་བྱང་ཆུབ་ཀྱི་སེམས་གཉིས་ཀ་སྟོང་པ་དང་དབྱེར་མེད་དུ་བསྒོམ་པ་ཀུན་སྣང་གི་ཏིང་ངེ་འཛིིན་ཡིན་པར་བཞེད་ལ། དེ་ལྟར་ཏིང་ངེ་འཛིན་དེ་མ་རྟོགས་པའམ་མ་གསལ་བ་དང་། མ་གསལ་བ་དེའི་དབང་ལས་བྱུང་བའི་ཉེས་པ་དེ་ཀུན༷་ཏུ་སྣ༷ང་བ་དྭང༷ས་པ༷འི་ཏིང་ངེ་འཛིན་གྱི་སྐུ༷་ཉིད་ལ༷་འགྱོད་པས་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་ཀུན་སྣང་གི་ཏིང་ངེ་འཛིན་མ་གསལ་བ་དེ་དང་། དེ་དབང་གིས་བྱུང་བའི་ཉེས་པ་དག་དེའི་ངང་ལ་མཉམ་པར་བཞག་ཅིང་བསྒོམ་པས་བཤགས་པར་བསྟན་པའོ།།

གསུམ་པ་ནི། དོན་དམ་སྐྱེ་བ་མེད་པའི་མཁའ་དབྱིངས་སུ༔ འབྲས་བུ་ཡོན་ཏན་འབྱུང་བའི་སྐུར་སྣང་བ༔ དབང་ཆེན་རིམ་གྱིས་བསྐྱེད་པའི་བཞུགས་གནས་རྟེན༔ དབང་ཆེན་གཞལ་ཡས་གསལ་བར་མ་གྱུར་པ༔ ཕོ་བྲང་འབར་བའི་ཀློང་དུ་བཟོད་པར་གསོལ༔ ཞེས་པའི་ཚིགས་སུ་བཅད་པ་གཅིག་དང་རྐང་པ་གཅིག་གིས་བསྟན་ལ། རྒྱུ་ཡི་ཏིང་ངེ་འཛིན་ཞེས་པ་ནི་དང་པོ་སྤྲོས་མེད་དེ་བཞིན་ཉིད་ཀྱི་ཏིང་འཛིན་གྱི་ངད་མ་ཡལ་བའི་ངང་ནས་མཁའ་ཁྱབ་ཀྱི་སེམས་ཅན་ལ་སྙིང་རྗེ་ཆེན་པོ་ཕྱོགས་མེད་དུ་བསྒོམ། དེའི་ངང་ནས་ཡི་དམ་གྱི་ལྷ་གསལ་བའི་རྒྱུའམ་ས་བོན་ཡིག་འབྲུ་ཕྲ་མོ་བསྒོམ་པ་ནི་རྒྱུའི་ཏིང་ངེ་འཛིན་ཡིན་ཏེ། ལས་བྱང་ཚོར་གྲོལ་ལས། གསལ་སྟོང་སྙིང་རྗེའི་ངང་ཉིད་ལས༔ རང་སེམས་རིག་རྩལ་འགགས་མེད་འདི༔ མཐིང་ནག་རྒྱུ་ཡི་ཡི་གེ་ཨ༔ ཞེས་དང་། ཡེ་ཤེས་རྔམ་གློག་ལས། གསུམ་པ་རང་གི་ས་བོན་ནམ། །རབ་ཏུ་བརྟན་པའི་ཡིག་འབྲུ་ཨ། །དེ་ལས་ཕྲ་མོ་ཨ་འཕྲོས་འདུས། །སྤྲོས་ཤིང་བསྡུས་ཀྱང་འཕེལ་འགྲིབ་མེད། །དེ་ལས་བདག་ཉིད་ཆེན་པོར་བསྒོམ། །ཞེས་དང་། ཡིག་འབྲུ་ཁ་དོག་གསལ་བ་ཡི། །རྒྱུ་ཡི་ཏིང་འཛིན་གསལ་བ་ནི། །ཞེས་དང་། ཧེ་རུ་ཀ་སྙིང་རྗེ་རོལ་བ་ལས། དེ་ནས་རྒྱུའི་ཏིང་ངེ་འཛིན་དུ་ཡི་གེ་ཧཱུྃ་མཐིང་ནག་ལས་སྐུ་སྨུག་ནག་འཇིགས་པའི་སྐུ། ཞེས་གསུངས་པའི་ཕྱིར་རོ།།

འདི་ནི་ཆོས་ཐམས་ཅད་ཀྱི་གནས་ལུགས་དོན་དམ་པ་སྐྱེ་བ་མེད་པའི་དོན་ཚུལ་བཞིན་དུ་རྟོགས་པ་ལ་བསྐྱེད་རིམ་ཟབ་མོ་བསྒོམ་དགོས་པ་དང་། བསྐྱེད་རིམ་ཡང་དག་པ་ལ་གོམས་པ་ལ་ཐོག་མར་དོན་དམ་གྱི་ལྟ་བས་ཟིན་དགོས་པས། སྤྱིར་དོན༷་དམ༷་སྐྱེ༷་བ༷་མེ༷ད་ཅིང་འགགས་པ་མེད་པ་སྤྲོས་པ་མེད་པ༷འི་ནམ་མཁ༷འ་ལྟ་བུའི་ཆོས་ཀྱི་དབྱིང༷ས་སུ༷་མཉམ་པར་བཞག་པའི་སྒོ་ནས་འབྲ༷ས་བུ༷་སྐུ་དང་ཡེ་ཤེས་ཀྱི་རྣམ་པ་དང་མཐུན་པའི་ལམ་ལྷ་ཡི་དཀྱིལ་འཁོར་བསྒོམ་ཏེ་མ་འོངས་པའི་མི་འཇིགས་པ་བཞི་དང་། མ་འདྲེས་པ་བཅོ་བརྒྱད་ལ་སོགས་པ་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ཡོ༷ན་ཏན༷་མཐའ་དག་འབྱུང༷་བ༷་ཡིན་པའི༷་ཕྱིར་ན། ད་ལྟ་ནས་ལམ་རིམ་པ་དང་པོ་ཡི་དམ་གྱི་སྐུར༷་སྣང༷་བ༷་ཡི་རྒྱུ་ལ་ནི་ཡི་གེ་ཨ་ལ་སོགས་པ་བསྒོམ་པ་ནི་རྒྱུའི་ཏིང་ངེ་འཛིན་ཡིན་ཞེས་འགྲེལ་བའམ། ཡང་ན་དོན༷་དམ༷་པ་སྐྱེ༷་བ༷་མེ༷ད་པ༷འི་མཁ༷འ་དབྱིང༷ས་སུ༷་འབྲ༷ས་བུ༷་སྐུ་དང་ཡེ་ཤེས་ཀྱི་ཡོ༷ན་ཏ༷ན་ཐམས་ཅད་གཞི་བཞུགས་སུ་མངའ་བ་ཉིད་རིམ་པ་དང་པོའི་ལམ་ལ་བརྟེན་ནས་གཞི་བཞེངས་སུ་བསླང་པ་ལ་འབྱུང༷་བ༷འི་འཁོར་ལོ་རིམ་བརྩེགས་ཀྱི་སྟེང་གཞལ་ཡས་ཁང་དང་བཅས་པའི་ཡི་དམ་གྱི་སྐུར༷་སྣང༷་བ༷་ལ་ཐོག་མར་ས་བོན་རྒྱུ་ཡི་གེ་ཨ་ལ་སོགས་པ་བསྒོམ་པ་ནི་རྒྱུའི་ཏིང་ངེ་འཛིན་ཡིན་ཞེས་འགྲེལ་ཡང་རུང་ངམ་སྙམ་མོ།།

འདི་ནི་སྟོང་དང་སྙིང་རྗེའི་ངང་ནས་ས་བོན་ཡིག་འབྲུ་ལ་སོགས་པ་སྒོམ་པའི་ཆ་ནས་བར་སྲིད་ལས་འཕོས་ཏེ་སྐྱེ་གནས་སུ་ཉིང་མཚམས་སྦྱར་བ་དང་ཆོས་མཐུན་ཞིང་། ཆོས་སྐུ་ལས་ལོངས་སྐུ་དང་། ལོངས་སྐུའི་བདག་རྐྱེན་ལས་སྤྲུལ་སྐུ་འབྱུང་བ་དང་མཐུན་པས་སྐྱེ་སྲིད་ཀྱི་བག་ཆགས་སྦྱོང་བྱེད་སྐྱེ་བ་སྤྲུལ་སྐུ་ལམ་ཁྱེར་ཏེ། དེའི་རྣམ་པ་དང་མཐུན་པའི་ལམ་གྱི་སྒོམ་པ་ཡིན་ཞིང་། སྤྲུལ་སྐུའི་ས་བོན་རྒྱུད་ལ་འཇོག་ཅིང་། ཕྱག་རྒྱ་གཅིག་པ་ཕྲ་མོའི་རྣལ་འབྱོར་འབྱུང་བའི་རྒྱུའོ།།

ལས་བྱང་ཚོར་གྲོལ་ལས། ཨ་ལས་འོད་ཟེར་ཨེ་རུ་ཆད༔ ཨེ་ལས་ཆོས་འབྱུང་ཟུར་དྲུག་ལྡན༔ དེ་སྟེང་ཨ་ལས་ཡྃ་འཕྲོས་པས༔ ཡེ་ཤེས་ལྔ་ལྡན་རྒྱམ་གྲམ་རླུང་༔ དཀར་སེར་དམར་ལྗང་མཐིང་གའི་མདོག༔ ཆོས་སྐུའི་རང་བརྩལ་ཤུགས་ལྡན་གནས༔ དེ་སྟེང་ཨ་ལས་བྃ་འཕྲོས་པས༔ བྃ་ལས་ཡེ་ཤེས་འབྱུང་བ་ཆུ༔ བཅུད་ལྡན་ཤིན་ཏུ་གཟུགས་མཛེས་པ༔ ཁ་དོག་མ་ངེས་རྒྱ་མཚོར་འཁྱིལ༔ ལྃ་འཕྲོས་རིན་ཆེན་ས་གཞི་བརྡལ༔ གསེར་གཡུ་མུ་ཏིག་ཟངས་ལྕགས་ཚོགས༔ ཟུར་བཞི་ལོགས་བརྒྱད་ཁྲི་རྐང་དང་༔ རིན་ཆེན་ལྔ་ཡི་རི་རབ་བརྩེགས༔ ཨ་ལས་བྷྲུྃ་འཕྲོས་གཞལ་ཡས་ཁང་༔ ཞེས་གསུངས་པ་ལྟར། ཞི་ཁྲོའི་ལས་བྱང་གི་གཞུང་འདིར་དང་པོ་ཡི་གེ་ཨ་བསྒོམ་པ་ནི་རྒྱུའི་ཏིང་ངེ་འཛིན་ཡིན་ལ། དེ་ནས་ཨ་ལས་ཡི་གེ་ཨེ་གཅིག་འཕྲོས་པ་ལས་ཆོས་འབྱུང་སྣོལ་མ་ཟུར་དྲུག་པ་དང་། དེའི་སྟེང་དུ་ཨ་ལས་འཕྲོས་པའི་ཡྃ་ཡིག་ལས་རླུང་སྔོན་པོ་རྡོ་རྗེ་རྒྱ་གྲམ་གྱི་དབྱིབས་ཅན་ཁ་དོག་དཀར་སེར་དམར་མཐིང་ཅན་གྱི་དཀྱིལ་འཁོར་དང་། དེའི་སྟེང་དུ་ཨ་ལས་འཕྲོས་པའི་ཡི་གེ་བྃ་སྔོན་པོ་རྒྱ་མཚོའི་མདོག་ཅན་ལས་ཆུ་ཡི་དཀྱིལ་འཁོར་དང་། དེའི་སྟེང་དུ་ཨ་ལས་འཕྲོས་པའི་ཡི་གེ་ལྃ་སེར་པོ་ལས་དབང་ཆེན་ས་ཡི་དཀྱིལ་འཁོར་རི་རབ་དང་བཅས་པ་དང་། དེའི་སྟེང་དུ་ཨ་ཡིག་ལས་འཕྲོས་པའི་བྷྲུྃ་ཡིག་ལས་གཞལ་ཡས་ཁང་བསྐྱེད་ཅིང་། དེ་ནས་ཞི་ཁྲོའི་དཀྱིལ་འཁོར་རིམ་པར་བསྐྱེད་ཚུལ་གསལ་བ་ལྟར། འདིར་དབ༷ང་ཆེ༷ན་གསེར་གྱི་ས་གཞི་ནས་འབྱུང་བ་རིམ་བརྩེགས་ཀྱི་དཀྱིལ་འཁོར་རི༷མ་གྱིས༷་བསྐྱེད༷་པ༷འི་སྒོ་ནས་ལྷའི་བཞུག༷ས་གནས༷་ཀྱི་རྟེན༷་གསལ་བར་བསྒོམ་པ་ལ་དབང་ཆེན་གསེར་གྱི་ས་གཞིའི་འཁོར་ལོ་དང་། དེའི་ས་བོན་ལྃ་ཡིག་དང་། རྟེན་དབ༷ང་ཆེན༷་གསེར་གྱི་ས་གཞིའི་དཀྱིལ་འཁོར་ལ་བརྟེན་པའི་གཞ༷ལ་ཡ༷ས་ཁང་དང་ས་བོན་བྷྲུ༷ཾ་ཡིག་དང་བཅས་པ་ལ་སོགས་པ་སྒོམ་པའི་ཏིང་འཛིན་དེ་རྒྱུའི་ཏིང་འཛིན་ཡིན་ཞིང་། དེ་དག་གི་རྣམ་པར་གས༷ལ་བ༷ར་མ༷་གྱུར༷་པ༷་སྟེ་ཡིད་ལ་གསལ་མ་ནུས་པ་དང་། མ་ནུས་པ་དེའི་དབང་གིས་བྱུང་བའི་ཉེས་པ་དེ་ལ་ཡིད་ནོངས་ཤིང་འགྱོད་པས་ལྷའི་ཕོ༷་བྲ༷༷ང་གཞལ་མེད་ཁང་འབ༷ར་བ༷་ཁྲོ་བོའི༷་ཚོགས་ཀྱི་དཀྱིལ་འཁོར་གྱི་ཀློང༷་ཆེན་པོ་ཉིད་དུ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་རྒྱུའི་ཏིང་འཛིན་མ་གསལ་བ་དང་དེའི་ཉེས་པ་དེ་དེ་ལྟར་ཕོ་བྲང་རྟེན་ས་བོན་བཅས་བསྒོམ་པའི་རྒྱུའི་ཏིང་འཛིན་གསལ་པས་བཤགས་པར་བསྟན་པའོ།།

དབང་ཆེན་ཞེས་པ་ནི་ས་གཞིའི་དཀྱིལ་འཁོར་ལ་གོ་དགོས་པ་ནི་སྔགས་ཀྱི་རྒྱུད་སྡེ་དུ་མར་གསུངས་ཏེ། བདེ་མཆོག་འབྱུང་བའི་རྒྱུད་ལས། རི་རབ་སྟེང་དུ་དབང་ཆེན་གྱི། །དཀྱིལ་འཁོར་དབུས་སུ་ལྃ་གྱིས་ནི། །མཚན་ཞིང་སྣ་ཚོགས་རྡོ་རྗེ་ཡིས། །སྟེང་ནས་མནན་པར་རྣམ་པར་བསྒོམ། །ཞེས་དང་། རྡོ་རྗེ་ཕྲེང་བ་ལས། གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །ཞེས་དང་། དགོངས་པ་ལུང་བསྟན་པའི་རྒྱུད་ལས། ཇི་ལྟ་ཇི་ལྟར་གོས་དཀར་སོགས། །མེ་དང་རླུང་དང་དབང་ཆེན་དང་། །ཆུ་སྟེ་སོོ་སོའི་དཀྱིལ་འཁོར་ལ། །བཅོ་བརྒྱད་དག་ཏུ་ཡང་དག་བཤད། །ཅེས་དང་། ལྷ་མོ་བཞི་ཞུས་ལས། མེ་དང་དེ་བཞིན་རླུང་དང་ནི། །དབང་ཆེན་དང་ནི་ཆུ་དེ་བཞིན། །རླུང་གིས་མེ་ནི་འབར་བྱས་ཏེ། །ཆུ་ཡིས་ཡོངས་སུ་སྨིན་པར་བྱེད། །དབང་ཆེན་དཀྱིལ་འཁོར་ལས་བྱུང་བ། །གང་དུ་མེ་ནི་བསྐྱོད་པའོ། །ཞེས་དང་། རྡོ་རྗེ་གུར་ལས། མེ་ཡི་དཀྱིལ་འཁོར་དབུས་གནས་པར། །ཡང་ནི་ཆུ་ནི་བསྒོམ་པར་བྱ། །ཆུ་ཡི་དཀྱིལ་འཁོར་དབུས་གནས་པར། །བརྟུལ་ཞུགས་ཅན་གྱིས་དབང་ཆེན་བསྒོམ། །དབང་ཆེན་དཀྱིལ་འཁོར་སྟེང་དུ་ནི། །བདག་ཉིད་ཀྱང་ནི་བསྒོམ་པར་བྱ། །ཞེས་དང་། མངོན་པར་འབྱུང་བའི་རྒྱུད་བླ་མ་ལས། དབང་ཆེན་དང་ནི་ཆུ་དང་ནི། །མེ་དང་རླུང་གི་དཀྱིལ་འཁོར་གྱི། །ཞེས་དང་། དབང་ཆེན་མེ་དང་ཆུ་དང་ནི། །རླུང་གི་དཀྱིལ་འཁོར་དག་ཏུ་གནས། །ཞེས་དང་། རྡོ་རྗེ་མཁའ་འགྲོ་ལས། རླུང་དང་མེ་ཡི་དབུས་གནས་པར། །ཆུ་ཡི་དཀྱིལ་འཁོར་བསྒོམ་པར་བྱ། །དབང་ཆེན་དཀྱིལ་འཁོར་དབུས་སུ་ནི། །གསལ་བའི་དཀྱིལ་འཁོར་རབ་བསྒོམ་སྟེ། །ཞེས་གསུངས་པ་ལ་སོགས་མཐའ་ཡས་པའི་ཕྱིར། རྒྱུའི་ཡི་གེ་ཨ་ལྟ་བུ་བསྒོམ་པ་མ་ཟད་འབྱུང་བ་རིམ་བརྩེགས་ཀྱི་འཁོར་ལོའི་ས་བོན་ཡི་གེ་དག་བསྒོམ་པ་རྣམས་ཀྱང་སྐབས་འདིར་རྒྱུའི་ཏིང་ངེ་འཛིན་དུ་ཤེས་དགོས་སོ།།

དེ་ལྟར་ཏིང་འཛིན་རྣམ་པ་གསུམ་འདི་སྔ་འགྱུར་གྱི་རྒྱུད་ལས་རྒྱ་ཆེར་འབྱུང་ཞིང་སྔ་འགྱུར་བའི་ལུགས་སུ་གྲགས་མོད་ཀྱང་། གསང་སྔགས་གསར་མ་ལའང་མེད་པ་དང་མ་བྱུང་བ་ནི་མ་ཡིན་ཏེ། མཁའ་འགྲོ་རྒྱ་མཚོའི་རྒྱུད་ལས། སྙིང་རྗེ་ལ་སོགས་རྗེས་དྲན་བྱ། །སྟོང་ཉིད་རང་བཞིན་བདག་ཉིད་ཀྱི། །རྣལ་འབྱོར་དག་པ་རྣམ་བསྒོམ་བྱ། །ས་བོན་ལྔ་ཡི་རང་བཞིན་ལས། །ཁང་པ་བརྩེགས་པ་རྣམ་སྤྲུལ་བྱ། །ཞེས་པའི་རྐང་པ་དང་པོས་ཀུན་སྣང་དང་། དེ་ནས་རྐང་པ་གཉིས་ཀྱི་དེ་བཞིན་ཉིད་དང་། ས་བོན་ལྔ་སོགས་རྐང་པ་གཉིས་ཀྱིས་རྒྱུའི་ཏིང་ངེ་བསྟན་པ་ཡིན་པར་ཤིན་ཏུ་གསལ་བའི་ཕྱིར་རོ།།

གཉིས་པ་སྐུའི་ཕྱག་རྒྱ་ཁྲག་འཐུང་རིགས་ལྔའི་བཤགས་པ་ནི། བདེ་ཆེན་ཉིད་ལས་ཕྱག་རྒྱའི་སྐུར་བསྟན་ཅིང་༔ ཡེ་ཤེས་དྲུག་གི་ཕྱག་མཚན་རང་རང་རྣམས། །ཇི་ལྟར་གསལ་བའི་ངང་དུ་མ་གྱུར་པ། །ཁྲག་འཐུང་རིགས་ལྔའི་སྐུ་ལ་བཟོད་པར་གསོལ། །ཞེས་པའི་ཚིགས་སུ་བཅད་པ་གཅིག་གིས་བསྟན་ལ། རྟ་མཆོག་རོལ་བའི་རྒྱུད་ལས། གར་ཀྱི་དབང་ཕྱུག་ཕྱག་རྒྱའི་སྐུ། །རྣམ་སྤྲོ་ལྷ་ཡི་དཀྱིལ་འཁོར་གྱིས། །སོ་སོའི་འདོད་དོན་སྒྲུབ་པར་བྱེད། །ཅེས་གསུངས་པར་ལྟར། ཆོས་ཀྱི་དབྱིངས་དང་དབྱེར་མེད་པའི་ཐབས་བདེ༷་བ་ཆེ༷ན་པོ་དོན་དམ་ལྷན་ཅིག་སྐྱེས་པའི་ཡེ་ཤེས་ཉིད༷་ལ༷ས་ལྷ་སྐུ་ཕྱ༷ག་རྒྱ༷་ཆེན་པོའི༷་སྐུར༷་བསྟན༷་ཅིང༷་། གདུལ་བྱ་གདུག་པ་རྣམས་འདུལ་བར་བྱེད་པའི་འཇིགས་བྱེད་ཁྲོ་བོ་ཆེན་པོ་དཔལ་ཧེ་རུ་ཀ་རིགས་ལྔའི་བསྐྱེད་རིམ་བསྒོམ་པའི་ཚེ་ན་ཇི་སྐད་དུ་གསང་བ་སྙིང་པོ་ལས། ཡེ་ཤེས་དྲུག་གི་ཕྱག་ཡེ་ཤེས་རིན་པོ་ཆེའི་ཕྱག་འབར་བ་ཅན། ཞེས་དང་། རྟ་མཆོག་རོལ་བའི་རྒྱུད་ལས། ཡེ་ཤེས་དྲུག་གི་ཕྱག་མཚན་ནི། །གཡས་པའི་རྡོ་རྗེ་རྔེའུ་ཆུང་དང་། །མདུང་རྩེ་གསུམ་པ་འཛིན་པས་རོལ། །དྲིལ་བུ་རྒྱུ་ཞགས་ཐོད་རློན་གཡོན། །ཞེས་གསུངས་པ་ལྟར། དཔལ་ཆེན་ཆེ་མཆོག་ཧེ་རུ་ཀའི་ཕྱག་མཚན་གཡས་ཀྱི་རྡོ་རྗེ་དང་། མདུང་རྩེ་གསུམ་པ་སྟེ་ཁ་ཊཱྃ་དང་། ཐོད་པའི་རྔེའུ་ཆུང་དང་། གཡོན་གྱི་དྲིལ་བུ་དང་། བྷནྡྷ་དམར་ཆེན་ནམ་ཐོད་རློན་དང་། རྒྱུ་མའི་ཞགས་པ་དང་དྲུག་པོའི་དང་པོ་གཉིས་ཀུན་མཁྱེན་ཡེ་ཤེས་སམ་དབྱིངས་རྣམ་པར་དག་པའི་ཡེ་ཤེས་དང་མེ་ལོང་ཡེ་ཤེས་གཉིས་དང་། བར་བ་གཉིས་ཆོས་དབྱིངས་ཡེ་ཤེས་དང་མཉམ་ཉིད་ཡེ་ཤེས་གཉིས་དང་། ཐ་མ་གཉིས་སོར་རྟོགས་ཡེ་ཤེས་དང་བྱ་གྲུབ་ཡེ་ཤེས་གཉིས་ཏེ་ཡེ༷་ཤེས༷་དྲུག༷་གི༷་མཚོན་བྱེད་ཡིན་ལ། དེ་བཞིན་དུ་ཕྱག༷་མཚ༷ན་གཞན་ཡང་བྷུདྡྷ་ཧེ་རུ་ཀའི་གཡས་ཀྱི་འཁོར་ལོ་དགྲ་སྟྭ་རལ་གྲི་དང་། གཡོན་གྱི་དྲིལ་བུ་ཐོང་གཤོལ་བྷནྡྷ་དང་། བཛྲ་ཧེ་རུ་ཀའི་གཡས་ཀྱི་རྡོ་རྗེ་བྷནྡྷ་དྷ་དགྲ་སྟྭ་དང་། གཡོན་གྱི་དྲིལ་བུ་བྷནྡྷ་ཐོང་གཤོལ་དང་། རཏྣ་ཧེ་རུ་ཀའི་གཡས་ཀྱི་རིན་ཆེན་ཁ་ཊཱྃ་བེ་ཅོན་དང་། གཡོན་གྱི་དྲིལ་བུ་བྷནྡྷ་ཏྲི་ཤུལ་དང་། པདྨ་ཧེ་རུ་ཀའི་གཡས་ཀྱི་པདྨ་ཁ་ཊཱྃ་དབྱུག་ཏོ་དང་། གཡོན་གྱི་དྲིལ་བུ་བྷནྡྷ་རྔེའུ་ཆུང་དང་། ཀརྨ་ཧེ་རུ་ཀའི་གཡས་ཀྱི་རལ་གྲི་ཁ་ཊཱྃ་དབྱུག་ཏོ་དང་། གཡོན་གྱི་དྲིལ་བུ་བྷན་དྷ་ཐོང་གཤོལ་ཏེ། ཁྲག་འཐུང་རིགས་ལྔ་ར༷ང་ར༷ང་གི་ཡེ་ཤེས་དྲུག་གི་མཚོན་བྱེད་ཕྱག་མཚན་རྣམ༷ས་དང་། གཞན་ཡང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། རྡོ་རྗེ་འཁོར་ལོ་པདྨ་དང་། །ནོར་བུ་རལ་གྲི་འབར་བ་ལས། །འགྲོ་དྲུག་རྟོག་པ་གཅོད་ཕྱིར་ཏེ། །ཡེ་ཤེས་དྲུག་པའི་བདག་ཉིད་ཅན། །ཞེས་རིགས་ལྔའི་ཕྱག་མཚན་དག་ཀྱང་ཡེ་ཤེས་དྲུག་གི་མཚོན་བྱེད་ལགས་ཕྱིར་དེ་དོན་དང་། ཁྲོ་རྒྱལ་རིགས་ལྔའི་སྐུའི་རྒྱན་ཆ་ལུགས་དང་། སྐུ་མདོག་རྣམ་འགྱུར་ལ་སོགས་པ་རྣམས་ཇི༷་ལྟར༷་ཡིན་པ་དེ་ལྟར་དུ་གས༷ལ་བ༷འི་བསྐྱེད་རིམ་གྱི་ཏིང་འཛིན་བརྟན་པའི་ང༷ང་དུ༷་གནས་པར་མ༷་གྱུར༷་པ༷་སྟེ། གསལ་མ་ནུས་པར་གྱུར་པའི་ནོངས་པ་དེ་ཉིད་ནི། གཟུང་འཛིན་གྱི་ཁྲ༷༷ག་འཐུང༷་བའི་ཡེ་ཤེས་ཀྱི་ཁྲོ་རྒྱལ་སངས་རྒྱས་ཀྱི་རིགས་སམ་དེ་བཞིན་གཤེགས་པའི་རིགས་གཟུགས་ཀྱི་ཕུང་པོ་དང་གཏི་མུག་རྣམ་པར་དག་པ་ཁྲོ་བོ་ཐམས་ཅད་ཀྱི་སྐུའི་བདག་ཉིད་བྷུདྡྷ་ཧེ་རུ་ཀ་དམར་སྨུག་གཡས་ཞལ་དཀར་པོ། གཡོན་ཞལ་དམར་པོ། དབུས་ཞལ་སྨུག་ནག། ཞབས་བཞི་བགྲད་པ། ཕྱག་གཡས་གསུམ་ན་འཁོར་ལོ་དགྲ་སྟ་རལ་གྲི་འཛིན་པ། ཕྱག་གཡོན་གསུམ་ན་དྲིལ་བུ་ཐོང་གཤོལ་བྷནྟ་བསྣམས་པ་དང་། རྡོ་རྗེའི་རིགས་རྣམ་པར་ཤེས་པའི་ཕུང་པོ་དང་ཞེ་སྡང་རྣམ་པར་དག་པ་ཁྲོ་བོ་ཐམས་ཅད་ཀྱི་ཐུགས་ཀྱི་བདག་ཉིད་བཛྲ་ཧེ་རུ་ཀ་མཐིང་ནག་གཡས་ཞལ་དཀར་པོ། གཡོན་ཞལ་དམར་པོ། དབུས་ཞལ་མཐིང་ནག། ཞབས་བཞི་བགྲད་པ། ཕྱག་གཡས་གསུམ་ན་རྡོ་རྗེ་བྷན་དྷ་དགྲ་སྟ་འཛིན་པ། ཕྱག་གཡོན་གསུམ་ན་དྲིལ་བུ་བྷནྟ་ཐོང་གཤོལ་བསྣམས་པ་དང་། རིན་ཆེན་རིགས་ཚོར་བའི་ཕུང་པོ་དང་ང་རྒྱལ་རྣམ་པར་དག་པ་ཁྲོ་བོ་ཐམས་ཅད་ཀྱི་ཡོན་ཏན་གྱི་བདག་ཉིད་རཏྣ་ཧེ་རུ་ཀ་སེར་ནག་གཡས་ཞལ་དཀར་པོ། གཡོན་ཞལ་དམར་པོ། དབུས་ཞལ་སེར་ནག། ཞབས་བཞི་བགྲད་པ། ཕྱག་གཡས་གསུམ་ན་རིན་ཆེན་ཁ་ཊ྄ཱྃ་བེ་ཅོན་འཛིན་པ། ཕྱག་གཡོན་གསུམ་ན་དྲིལ་བུ་བྷན་དྷ་ཏྲི་ཤུལ་བསྣམས་པ་དང་། པདྨའི་རིགས་འདུ་ཤེས་ཀྱི་ཕུང་པོ་དང་འདོད་ཆགས་རྣམ་པར་དག་པ་ཁྲོ་བོ་ཐམས་ཅད་ཀྱི་གསུང་གི་བདག་ཉིད་པདྨ་ཧེ་རུ་ཀ་དམར་ནག་གཡས་དཀར་པོ། གཡོན་ཞལ་སྔོན་པོ། དབུས་ཞལ་དམར་ནག། ཞབས་བཞི་བགྲད་པ། ཕྱག་གཡས་གསུམ་ན་པདྨ་ཁ་ཊྲཱྃ་དབྱུག་ཏོ་འཛིན་པ། ཕྱག་གཡོན་གསུམ་ན་དྲིལ་བུ་བྷན་དྷ་རྔེའུ་ཆུང་བསྣམས་པ་དང་། ལས་ཀྱི་རིགས་འདུ་བྱེད་ཀྱི་ཕུང་པོ་དང་ཕྲོག་དོག་རྣམ་པར་དག་པ་ཁྲོ་བོ་ཐམས་ཅད་ཀྱི་འཕྲིན་ལས་ཀྱི་བདག་ཉིད་ཀརྨ་ཧེ་རུ་ཀ་ལྗང་ནག་གཡས་ཞལ་དཀར་པོ། གཡོན་ཞལ་དམར་པོ། དབུས་ཞལ་ལྗང་ནག། ཞབས་བཞི་བགྲད་པ། ཕྱག་གཡས་གསུམ་ན་རལ་གྲི་ཁ་ཊྲཱྃ་དབྱུག་ཏོ་འཛིན་པ། ཕྱག་གཡོན་ན་དྲིལ་བུ་བྷན་དྷ་ཐོང་གཤོལ་བསྣམས་པ་རྣམས་ཏེ་རིག༷ས་ལྔ༷འི་བདག་ཉིད་ཅན་གྱི་སྐུ༷་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་ཁྲག་འཐུང་རིགས་ལྔའི་བསྐྱེད་རིམ་གྱི་རྩལ་མ་ཐོན་པའི་ནོངས་པ་དང་དེ་ལ་མ་གོམས་པའི་དབང་གིས་བྱུང་བའི་ཉེས་པ་རྣམས་བཤགས་པའོ།།

ཁྲག་འཐུང་འབར་བ་དྲུག་ཅུའི་ལྷ་ཚོགས་སུ་ཕྱེས་ཚེ་ཞི་ཁྲོའི་བརྒྱ་ཕྱག་ལས། སྨུག་ནག་ཞལ་གསུམ་ཕྱག་དྲུག་དཀར་དམར་ཞལ༔ རྡོ་རྗེ་ཁ་ཊཱྃ་རྔེའུ་ཆུང་གཡས་ན་འཛིན༔ དྲིལ་བུ་བྷན་དམར་རྒྱུ་ཞགས་གཡོན་ན་བསྣམས༔ ཆེ་མཆོག་ཧེ་རུ་ཀ་ལ་ཕྱག་འཚལ་ལོ༔ ཞེས་གསུངས་པ་ལྟར་གྱི་ཉོན་མོངས་མ་སྤངས་གནས་སུ་དག་ཅིང་ཀུན་གཞི་བྱང་ཆུབ་སེམས་ཞེས་པ་ཤེས་རིག་མ་འགགས་ས་ལེ་ཧྲིག་གེ་པའི་ངོ་བོ་སྣང་ཆ་ཡེ་ཤེས་ཀྱི་རང་བཞིན་ནི་ཆེ་མཆོག་ཧེ་རུ་ཀ་དང་། ཡང་དེ་ཉིད་ལས། ཁྲོ་མོ་དབྱིངས་ཕྱུག་མཐིང་ནག་རྡོ་རྗེ་འཛིན༔ དམར་ཆེན་བྷན་དྷ་ཡབ་ཀྱི་ཞལ་དུ་སྟོབ༔ བདེ་བ་ཆེན་པོས་ཡབ་ལ་དགྱེས་པར་འཁྲིལ༔ ཀྲོ་ཏི་ཤྭ་རི་མ་ལ་ཕྱག་འཚལ་ལོ༔ ཞེས་པ་ལྟར་གྱི་མི་ཤེས་པའི་རྨོངས་པ་མ་སྤང་གནས་སུ་དག་པ་རིག་པའི་ངོ་བོ་དངོས་པོ་གདོས་པ་ཅན་སོགས་ཅིའི་ངོ་བོར་ཡང་བདེན་པར་མ་གྲུབ་པ་བདེ་སྟོང་གཉིས་སུ་མེད་པའི་གནས་ལུགས་སྟོང་པའི་རང་བཞིན་ནི་ཁྲོ་མོ་ཀྲོ་ཏི་ཤྭ་རི་མ་སྟེ་ཆེ་མཆོག་ཡབ་ཡུམ་གཉིས་བསྣན་པ་དང་། ཁྲག་འཐུང་ལྔ་བཅུ་རྩ་བརྒྱད་དུ་ཕྱེས་ཚེ་ཆེ་མཆོག་ཧེ་རུ་ཀ་ཡབ་ཡུམ་གཉིས་དྲག་པོའི་ལྷའི་སྤྲུལ་པ་འཕྲོ་གཞི་ཙམ་ལས་ལོགས་སུ་མི་བགྲང་བ་གོང་དུ་སྨོས་ཟིན་པ་ལྟར་ཡིན་ནོ།།

གསུམ་པ་ཀྲོ་ཏི་ཡུམ་ལྔའི་བཤགས་པ་ནི། གཉིས་མེད་སྐུ་ལ་འཁྲིལ་བའི་གཟུངས་མཆོག་མ༔ པདྨའི་དོན་ལ་ཆགས་པའི་མཁའ་དབྱིངས་སུ༔ གཉིས་མེད་བྱང་ཆུབ་སེམས་ཀྱི་འོད་འཕྲོས་པའི༔ ཀྲོ་ཏི་ཡུམ་ལྔའི་སྐུ་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། བདེ་སྟོང་གཉིས༷་སུ་མེ༷ད་པའི་ཡེ་ཤེས་ཀྱི་ངོ་བོའི་སྣང་ཆ་ལ་དཔལ་ཆེན་ཧེ་རུ་ཀ་རུ་བརྡར་བཏགས་པའི་སྐུ༷་ལ༷་འཁྲིལ༷་བ༷་སྟེ་དེ་དང་དབྱེར་མེད་པའི༷་ཤེས་རབ་སྟོང་པ་ཉིད་ཀྱི་རང་བཞིན་ལ་ཡུམ་ཀྲོ་ཏི་ཤྭ་རི་ལྔར་བརྡར་བཏགས་ཤིང་། དེ་ནི་གསང་སྔགས་ཕོ་ཉའི་ལམ་གྱི་གཟུང༷ས་མ་མཆོ༷ག་ཏུ་གྱུར་བ་མ༷འམ་མཆོག་ཏུ་གྱུར་བ་མོ་སྟེ་མཐའ་ཐུག་པ་དེ་ཡིན་ལ། དེ་ལྟ་བུའི་བདེ་སྟོང་མཆོག་ཏུ་གྱུར་པ་བྷ་ག་ཡངས་དོག་མེད་པའི་པ༷དྨ༷འི་དཀྱིལ་འཁོར་དོན༷་སྤྲོས་བྲལ་རྡོ་རྗེ་བཙུན་མོའི་རོ་ལ༷་བརྟེན་ནས་ཐ་མལ་བའི་ཆག༷ས་པ༷འི་རྟོག་པ་ཉོན་མོངས་རང་མཚན་པ་དེ་བདེ་སྟོང་ཆོས་ཉིད་ཀྱི་མཁ༷འ་དབྱིང༷ས་སུ༷་ཉེ་བར་བསྡུད་དེ། ཆགས་པ་མེད་པའི་དབྱིངས་སུ་བདེ་བ་དང་སྟོང་པ་གཉིས༷་སུ་མེ༷ད་པ་དོན་དམ་བྱ༷ང་ཆུབ༷་ཀྱི་སེམ༷ས་ཀྱི༷་དགའ་བདེ་མི་འགྱུར་པའི་རྟོགས་པའི་ཉི་མའི་འོད༷་ཟེར་རྣམ་པར་འཕྲོས༷་པས༷་ནི། གཟུང་མའི་པདྨ་ལ་བསྟེན་ནས་བདེ་བ་ཆེན་པོའི་ཡེ་ཤེས་འདྲེན་པར་བྱས་ཏེ་ཆགས་རྟོག་དབྱིངས་སུ་སྒྲོལ་བའི་ཐབས་ལམ་ཁྱད་པར་བ་ལ་ངེས་པ་གཏིང་ནས་རྙེད་དགོས་པ་ལ། དེ་ལྟར་རྙེད་མ་ནུས་པའི་དབང་གི་བྱུང་བའི་ཉེས་པ་དེ་དེ་བཞིན་གཤེགས་པའི་རིགས་ཀྱི་ཡུམ་ས་ཁམས་ཤ་རུ་ཞེན་པའི་རྟོག་པ་གནས་སུ་དག་པ་བྷུདྡྷ་ཀྲོ་ཏི་ཤྭ་མ་དམར་སྨུག་དུང་དམར་ཏེ་བྷན་དྷ་ཁྲག་གིས་བཀང་བ་ཡབ་ལ་སྟོབས་པ་མོ་དང་། རྡོ་རྗེ་རིགས་ཀྱི་ཡུམ་ནམ་མཁའི་ཁམས་སུ་ཞེན་པའི་རྟོག་པ་གནས་སུ་དག་པ་བཛྲ་ཀྲོ་ཏི་ཤྭ་མ་མཐིང་སྐྱ་ཐོད་ཁྲག་འཛིན་པ་དང་། རིན་ཆེན་རིགས་ཀྱི་ཡུམ་ཆུ་ཁམས་ཁྲག་ཏུ་ཞེན་པའི་རྟོག་པ་གནས་སུ་དག་པ་རཏྣ་ཀྲོ་ཏི་ཤྭ་མ་སེར་སྐྱ་ཐོད་ཁྲག་འཛིན་པ་དང་། པདྨའི་རིགས་ཀྱི་ཡུམ་མེ་ཁམས་དྲོད་དུ་ཞེན་པའི་རྟོག་པ་གནས་སུ་དག་པ་པདྨ་ཀྲོ་ཏི་ཤྭ་མ་དམར་སྐྱ་ཐོད་ཁྲག་འཛིན་པ་དང་། ལས་ཀྱི་རིགས་ཀྱི་ཡུམ་རླུང་ཁམས་དབུགས་སུ་ཞེན་པའི་རྟོག་པ་གནས་སུ་དག་པ་ཀརྨ་ཀྲོ་ཏི་ཤྭ་མ་ལྗང་སྐྱ་ཕྱག་ན་ཐོད་ཁྲག་འཛིན་པ་མ་སྟེ་ཀྲོ༷་ཏི༷་ཞེས་པ་ལེགས་སྦྱར་ལ་ཁྲོ་མོ་རུ་འབོད་པའི་ཡུམ༷་ལྔ༷་ཀ་དེ་དག་གི་སྐུ༷་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

དེ་ལྟར་རང་ཁྲག་འཐུང་རིགས་ལྔར་གསལ་བ་ཡུམ་ལྔར་སྦྱོར་ཏེ་བདེ་སྟོང་གི་ཡེ་ཤེས་ཁྱད་པར་བ་བསྐྱེད་པའི་མཚན་བཅས་རྫོགས་རིམ་དང་། སྐབས་འདིར་ཡབ་ལྔའི་སྐུ་ལ་འཁྲིལ་བའི་ཡུམ་ལྔ་གསལ་བའི་བསྐྱེད་རིམ་གྱི་རྣམ་པ་མ་གསལ་བ་དང་དེའི་དབང་གིས་བྱུང་བའི་ཉེས་ལྟུང་རྣམས་བཤགས་པར་གོ་ན་ལེགས་ལ། ཚིག་དངོས་རྐྱང་གི་གོ་བ་ནི་རྫོགས་རིམ་ལ་སྦྱར་བ་ལྟར་སྣང་ཞིང་། འགྲེལ་བའི་གོ་བ་ལེན་སྟངས་ཀྱང་སྨོས་ཟིན་ལྟར་དེ་ལྟར་བདེ་སྟོང་གི་རྟོགས་པ་ཉམས་སུ་ལེན་པའི་སྒོ་ནས་དེ་མ་རྟོགས་པའི་ཉེས་པས་ལྷ་ཞལ་མི་དགྱེས་པའི་ལས་བསགས་པ་རྣམས་བཤགས་པའི་དོན་ལྟར་གོ་ན་ལེགས་པ་ཡིན་ནོ།།

བཞི་བ་ཀཽ་རཱི་མ་བརྒྱད་ཀྱི་བཤགས་པ་ནི། ཐུགས་ལས་སྐྱེས་པའི་ཡེ་ཤེས་ཁྲོ་མོ་ནི༔ རྣམ་ཤེས་བརྒྱད་ཀྱི་ཡེ་ཤེས་མཁའ་འགྲོ་མ༔ ཀཽ་རཱི་ལ་སོགས་ཐུགས་དང་ཅི་འགལ་བ༔ གནས་ཀྱི་མ་མོ་བརྒྱད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། དེ་ཡང་ལས་བྱང་ཚོར་གྲོལ་ལས། ཞི་བ་ལོངས་སྐུའི་རིག་རྩལ་ཆོ་འཕྲུལ་ལས༔ ཧ་ཧ་ཕྱོགས་བཞི་མཚམས་བརྒྱད་དཀྱིལ་འཁོར་ནས༔ ཐུགས་རྗེ་འཕྲུལ་པའི་ཆ་འཛིན་ཀཽ་རཱི་བརྒྱད༔ རྣམ་ཤེས་ཚོགས་བརྒྱད་དག་པའི་ཆོ་འཕྲུལ་ལས༔ ཀཽ་རཱི་ཙཽ་རཱི་པྲ་མོ་བེ་ཏཱ་ལཱི༔ པུསྐ་གྷསྨ་སྨེ་ཤ་ཙཎྜ་ལཱི། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སྲིན་པོའི་ཉེ་གནས་ཆེན་མོ་བརྒྱད། །ཀཽ་རཱི་ཙོ་རི་པྲ་མོ་ཧ། །བེཏྟ་ལི་དང་པུསྐ་སི། །གྷསྨ་རི་དང་སྨ་ཤ་ནི། །ཙཎ་ཌ་ལི་ལ་སོགས་པ་ཡི། །གཏུམ་ཞིང་རྔམ་པའི་མ་ཚོགས་མ། །ཤིན་ཏུ་འཇིགས་པའི་གཟུགས་སུ་འཁོད། །ཅེས་དང་། མཁའ་འགྲོ་མ་སྒྱུ་བདེ་མཆོག་གི་རྒྱུད་ཕྱི་མའི་ཕྱི་མ་རྟོག་པ་ཐམས་ཅད་འདུས་པ་ལས། གཽ་རཱི་ཙཽ་རཱི་པྲ་མོ་ཧ། །བེ་ཏཱ་ལཱི་ཞེས་བྱ་བ་བཞི། །རྡོ་རྗེ་རྣལ་འབྱོར་མ་དག་ཡིན། །པུསྐ་སཱི་དང་ཙཎ་ཊ་ལཱི། །གྷསྨ་ཁྲག་འཐུང་འདྲ་བ་བཞི། །རྡོ་རྗེ་མཁའ་འགྲོ་མ་དག་ཡིན། །ཞེས་གསུངས་པ་ལྟར། ཕྱི་ལྟར་ན་དུད་ཁྲོད་བརྒྱད་ན་གནས་པའི་དབང་ཕྱུག་གི་ཆུང་མ་མ་མོ་བརྒྱད་རུ་དྲས་འཕྲོག་སྟེ་བྲན་མོ་ཉེ་གནས་མོར་བཀོལ་བ་སྲིན་མོ་ཆེན་མོ་ཀེང་རུས་ཐོད་ཡངས་མ་ལ་སོགས་པ་བརྒྱད་འདུལ་བའི་ཆེད་དུ་བཅོམ་ལྡན་དཔལ་ཆེན་ཧེ་རུ་ཁའི་ཐུགས་ཀ་ནས་འབྱུང་པོའི་མ་མོ་རྣམས་རང་དང་འདྲ་བའི་ཀཽ་རཱི་མ་སོགས་བརྒྱད་དུ་སྤྲུལ་ནས་འདུལ་བའམ་མ་མོ་བརྒྱད་དཔལ་ཆེན་པོའི་སྐུ་ལ་འཁྲིལ་བའི་སྒོ་ནས་འདོད་ཆགས་ཡེ་ཤེས་ཆེན་པོར་དག་པའི་སྦྱོར་བས་ཧེ་རུ་ཀའི་མི་རྟོག་པའི་ཡེ་ཤེས་ཆེན་པོའི་ངོ་བོ་དང་རོ་གཅིག་ཏུ་གྱུར་པས་ན་ཐུགས༷་ལ༷ས་སྐྱེས༷་པ་དང་། ནང་ལྟར་ན་ལས་བྱང་ཚོར་གྲོལ་ལས། བདག་ཉིད་ཆེ་མཆོག་ཐུགས་ཀ་ནས༔ ཧ་བརྒྱད་འོད་འཕྲོས་ཞུ་བ་ལས༔ ཤར་ཕྱོགས་ཀཽ་རཱི་ཞིང་དབྱུག་དཀར༔ ཞེས་སོགས་གསུངས་པ་ལྟར། བསྐྱེད་རིམ་གྱི་སྐབས་སུ་ཁྲག་འཐུང་འབར་བ་ལྔ་བཅུ་རྩ་བརྒྱད་པོ་ཐམས་ཅད་ཀྱང་དཔལ་ཆེན་ཆེ་མཆོག་ཧེ་རུ་ཀའི་ཐུགས་ཀ་ལས་ཆུ་ལས་ཆུ་བུར་བརྡོལ་བ་དང་། ཉི་མ་ལས་ཟེར་འཕྲོས་པ་ལྟར་གསལ་དགོས་ཤིང་དོན་ལ་སྤྲུལ་གཞི་གཅིག་ལས་སྤྲོས་ཏེ་སྤྲུལ་པ་ཙམ་ཡིན་པས་ཐུགས་ལས་སྐྱེས་པ་དང་། གསང་བ་ལྟར་ན་ཡང་དེ་ཉིད་ལས། ཁྲོ་རྒྱལ་སྐུ་གསུང་ཐུགས་ལས་སྤྲུལ་པའི་ལྷ༔ རང་སྣང་དབང་པོ་ཚོགས་བརྒྱད་གནས་དག་པའི༔ ཀཽ་རཱི་ལ་སོགས་གནས་ཀྱི་མ་མོ་བརྒྱད༔ ཅེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སེམས་དཔའ་ཡེ་ཤེས་སྤྲུལ་པའི་ཚོགས། །ཀོའུ་ཙོའུ་ལ་སོགས་མ་ཚོགས་དང་། །ཞེས་གསུངས་པ་ལྟར། ཆོས་ཐམས་ཅད་ཀྱི་གནས་ལུགས་ཇི་ལྟ་བ་བཞིན་རྟོགས་པ་ཟབ་གསལ་གཉིས་སུ་མེད་པ་དོན་དམ་ལྷན་ཅིག་སྐྱེས་པའི་ཡེ་ཤེས་རྒྱལ་བ་ཀུན་གྱི་ཐུགས་རྣམ་པར་མི་རྟོག་པའི་ཆ་ལ་ལོངས་སྤྱོད་རྫོགས་པའི་སྐུ་ཞི་བ་རྒྱལ་བ་རིགས་ལྔ་དང་། དྲག་པོ་དཔལ་ཆེན་ཆེ་མཆོག་ཧེ་རུ་ཀ་ཞེས་པ་ལ་སོགས་པར་བརྡར་བཏགས་པ་ཡིན་ལ། དེ་ལས་སྐྱེས་པའམ་དེ་འདྲའི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་ཆ་ཤས་བརྒྱད་ལ་བཏགས་པ་ཙམ་ཡིན་པས་ཐུགས་ལས་སྐྱེས་ཞེས་བརྗོད་ཀྱང་རུང་ངོ་།།

དེ་ལྟར་ཟབ་གསལ་གཉིས་སུ་མེད་པ༷འི་ཡེ༷་ཤེས༷་བཞོན་རླུང་ལྷའི་རྣམ་པར་ཤར་བ་འཇིགས་གཏུམ་བཟོད་པར་དཀའ་བའི་ཁྲོ༷་མོ༷་བརྒྱད་པོ་ནི༷་རྣམ་པར་མི་རྟོག་པའི་ཡེ་ཤེས་ཀྱི་ཆ་ཤས་རྣམ༷་པར་ཤེས༷་པ་ཚོགས་བརྒྱད༷་ཀྱི༷་རང་བཞིན་གནས་སུ་དག་པའམ་གནས་སུ་གྱུར་པའི་ཡེ༷་ཤེས༷་ཀྱི་ཆ་བརྒྱད་ལ་མཁ༷འ་འགྲོ༷་མ༷་ཀཽ༷་རཱི༷་མ་ལ༷་སོག༷ས་ཏེ། དེ་ཡང་དོན་པར་ཀུན་གཞིའི་རྣམ་ཤེས་རྣམ་པར་དག་པ་ཀཽ་རཱི་མ་དཀར་མོ་ཕྱག་གཡས་ཞིང་དབྱུག་དང་གཡོན་བྷནྡྷ་ཐོགས་པ་སྟེ། ཀོའུ་རཱི་ནི་མཛོད་ལྡན་མའམ་དཀར་མོ་ཞེས་པ་ཡིན་པས་ཀཽ་རཱི་ནི་དཀར་མོ་དང་། ཡིད་ཀྱི་རྣམ་ཤེས་རྣམ་པར་དག་པ་ཙཱོ་རཱི་མ་སེར་མོ་ཕྱག་གཉིས་མདའ་གཞུ་འགེངས་པ་སྟེ། ཙཱོ་རཱི་ནི་ཆོམ་རྐུན་མ་ཞེས་པ་དང་། ཉོན་ཡིད་རྣམ་ཤེས་རྣམ་པར་དག་པ་པྲ་མོ་ཧཱ་དམར་མོ་ཆུ་སྲིན་གྱི་རྒྱལ་མཚན་འཛིན་པ་སྟེ། པྲ་མོ་ཧཱ་ནི་རབ་ཏུ་རྨོངས་མོ་ཞེས་པ་དང་། ལུས་ཀྱི་རྣམ་ཤེས་རྣམ་པར་དག་པ་བེ་ཏཱ་ལཱི་ལྗང་མོ་གཡས་རྡོ་རྗེ་དང་གཡོན་བྷནྡྷ་ཐོགས་པ་སྟེ། བེ་ཏཱ་ལཱི་ནི་རོ་ལངས་མའམ་ཐལ་བྱེད་མ་ཞེས་པ་དང་། མིག་གི་རྣམ་ཤེས་རྣམ་པར་དག་པ་པུསྐ་སཱི་སེར་མོ་རྒྱུ་མ་འདྲེན་པ་སྟེ། པུསྐ་སཱི་ནི་སྦོས་མོ་ཞེས་པ་དང་། རྣ་བའི་རྣམ་ཤེས་རྣམ་པར་དག་པ་གྷསྨ་རཱི་ལྗང་མོ་བྷནྡྷ་དམར་ཆེན་ཐོགས་པ་སྟེ། གྷསྨ་རཱི་ནི་སྨེ་ཤ་ཅན་མ་ཞེས་པ་དང་། སྣ་ཡི་རྣམ་ཤེས་རྣམ་པར་དག་པ་སྨེ་ཤ་ནཱི་མཐིང་ག་ཕྱག་གཉིས་བམ་རོ་ཐོགས་ནས་ཟ་བ་སྟེ། སྨེ་ཤ་ནཱི་དུར་ཁྲོད་མ་ཞེས་པ་དང་། ལྕེ་ཡི་རྣམ་ཤེས་རྣམ་པར་དག་པ་ཙཎྜ་ལཱི་སེར་མོ་བམ་རོ་མགོ་ལུས་འཕྲལ་བ་ཐོགས་ཏེ་རྒྱུ་མ་ཟ་བ་སྟེ། ཙཎྜ་ལཱི་ནི་གཏུམ་མོ་ཞེས་པ་དང་བརྒྱད་དུ་བཏགས་པ་ཙམ་ཡིན་ལ། དེ་ལྟར་མཁའ་འགྲོ་མ་བརྒྱད་ཀྱི་ངེས་དོན་མ་རྟོགས་ཤིང་བསྐྱེད་རིམ་གྱི་རྣམ་པ་མ་གསལ་བ་ལ་སོགས་པའི་ཐུགས༷་དང༷་ཅི༷་འག༷ལ་བ༷་ཐམས་ཅད་འགྱོད་པ་ཆེན་པོས་རྣམ་ཤེས་ཚོགས་བརྒྱད་གནས་སུ་དག་པ་གནས་སུ་གྱུར་པའི་གན༷ས་ཀྱི༷་མ་མོའམ། ཡང་ན་གནས་དང་ཉེ་བའི་གནས་ཀྱི་གནས་ཡུལ་དུར་ཁྲོད་བརྒྱད་ཀྱི་གནས་ན་བཞུགས་ཤིང་རྒྱུ་བའི་མ༷་མོ༷་ཆེན་མོ་བརྒྱད༷་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་པའོ།།

མ་མོ་དེ་དག་གི་མིང་གི་ཁུངས་ནི་ཡོད་དེ། ཡེ་ཤེས་རྔམ་གློག་ལས། གནས་ན་བཞུགས་པ་ནི། དཀར་མོ་དང་། རྐུན་མོ་དང་། རྨོངས་མོ་དང་། ཐལ་བྱེད་མའོ། །ཉེ་བའི་གནས་ན་བཞུགས་པ་ནི། སྦོས་མོ་དང་། གཏུམ་མོ་དང་། སྨེ་ཤ་ཅན་དང་། མ་ཚོགས་མའོ། །ཞེས་དང་། དཀར་མོའི་ཚོགས་ཀྱིས་འགུགས་པར་བྱེད། །རྐུན་མོའི་ཚོགས་ཀྱིས་མཐུ་འཕྲོག་བྱེད། །རྨོངས་མོའི་ཚོགས་ཀྱིས་མྱོས་པར་བྱེད། །ཐལ་བྱེད་མས་ནི་ཐལ་བར་རློག །ལྦོས་མོའི་ཚོགས་ཀྱིས་དབང་དུ་བྱེད། །གཏུམ་མོས་སྒྲོལ་ཞིང་མྱོས་པར་བྱེད། །སྨེ་ཤ་ཅན་གྱིས་ཟ་བར་བྱེད། །མ་ཚོགས་མས་ནི་རྒྱུད་འཕེལ་བྱེད། །ཅེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པའི་རྒྱུད་ལས། གསང་བའི་བུ་མོ་དཀར་མོ་ཞེས་བྱ་བ་དང་། གསང་བའི་བུ་མོ་རྐུན་མོ་ཞེས་བྱ་བ་དང་། གསང་བའི་བུ་མོ་རྨོངས་མོ་ཞེས་བྱ་བ་དང་། གསང་བའི་བུ་མོ་རོ་ལངས་མ་ཞེས་བྱ་བ་དང་། གསང་བའི་བུ་མོ་ལྦོས་མོ་ཞེས་བྱ་བ་དང་། གསང་བའི་བུ་མོ་གཏུམ་མོ་ཞེས་བྱ་བ་དང་། གསང་བའི་བུ་མོ་སྨེ་ཤ་ཅན་ཞེས་བྱ་བ་དང་། གསང་བའི་བུ་མོ་མ་ཚོགས་མ་ཞེས་བྱ་བ་ལ་སོགས་པ་ཤིན་ཏུ་གསང་བའི་བུ་མོའི་འཁོར་བསམ་གྱིས་མི་ཁྱབ་པ་དང་། ཞེས་དང་། གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པ་ལས། བྱང་ཆུབ་སེམས་ཀྱི་སྤྲིན་དག་ལས་དཀར་མོའི་ཚོགས་དང་། རྐུན་མོའི་ཚོགས་དང་། རྨོངས་མོའི་ཚོགས་དང་། ཐལ་བྱེད་མའི་ཚོགས་དང་། སྦོས་མོའི་ཚོགས་དང་། གཏུམ་མོའི་ཚོགས་དང་། རྨེ་ཤ་ཅན་གྱི་ཚོགས་དང་། མ་ཚོགས་མའི་ཚོགས་རྣམས་རང་རང་གི་ལག་ཆ་དང་ངོ་མཚར་དུ་བཅས་ནས་འཐོན་ཏོ། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་མེ་ལོང་ལས། དཀར་མོའི་ཚོགས་དང་རྐུན་མོའི་ཚོགས། །རྨོངས་མོ་དང་ནི་ཐལ་བྱེད་མ། །སྤོས་མོ་དང་ནི་གཏུམ་མོ་དང་། །སྨེ་ཤ་ཅན་དང་མ་ ཚོགས་མའི། །སོ་སོའི་ཆ་ལུགས་རྔམ་འཐོན་ནས། །སྤྲུལ་པ་བཞི་པོ་ལ་ཐིམ་ཞིང་། །རང་རང་ལས་མཛད་སྙིང་པོ་སྒྲོག །འདུས་ཏེ་ཕྱོགས་ཕྱོགས་གནས་པར་བྱ། །ཞེས་གསུངས་པའི་ཕྱིར་རོ།།

དེ་མ་ཟད་ཕྱིས་འགྱུར་གསར་མའི་རྒྱུད་གྲས་དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། ཤར་ལ་སོགས་པའི་སྒོ་བཞི་རུ། །རྣལ་འབྱོར་མ་རྣམས་རིམ་ཇི་བཞིན། །དཀར་མོ་ཆོམ་རྐུན་རོ་ལངས་མ། །ཟ་ཕོད་མ་ཡང་རྣམ་པར་དགོད། །གྲྭ་ལ་གནས་པའི་ལྷ་མོ་བཞི། །སྦོས་མོ་རི་ཁྲོད་མ་དེ་བཞིན། །གཏུམ་མོ་དང་ནི་གཡུང་མོ་སྟེ། །རིམ་པས་སྔོན་བཞིན་བརྟག་ཤེས་བྱ། །ཞེས་གསུངས་པས་ཀྱང་ཀཽ་རཱི་བརྒྱད་དང་མཚན་དེ་ལྟར་དུ་གྲགས་པར་བསྟན་པས་གསར་རྙིང་འགལ་འདུ་ཅན་དུ་འཛིན་པ་རྣམས་ཀྱིས་བག་ཡོད་པར་མཛོད་ཅིག།

དང་པོ་དཔལ་ཆེན་པོས་འབྱུང་བོའི་མ་མོ་རྣམས་འདུལ་བའི་དབང་དུ་བྱས་ན་སྲིན་ཡུལ་གྱི་ཤར་ན་གནས་པའི་སྲིན་མོ་ཆེན་མོ་ཀེང་རུས་ཐོད་ཡངས་མ་ཞེས་བྱ་བ་ཀེང་རུས་ཐོད་དུ་བཅིངས་ཤིང་ཞིང་དབྱུག་དང་ཐོད་ཁྲག་ཐོགས་པ་མོ་དེ་བྱང་ཆུབ་སེམས་དཔའ་སའི་སྙིང་པོ་ཁྲོ་མོ་ཀཽ་རཱི་མར་སྤྲུལ་ནས་བཏུལ་བ་དང་། དེ་བཞིན་དུ་སྲིན་ཡུལ་གྱི་ལྷོ་ན་གནས་པའི་སྲིན་མོ་མདའ་འཕེན་མ་དེ་ནམ་མཁའི་སྙིང་པོ་ལྷ་མོ་ཙཽ་རཱི་མ་དང་། ནུབ་ཀྱི་སྲིན་མོ་འཛིན་བྱེད་མ་ཞེས་བྱ་བ་ལག་ན་ཆུ་སྲིན་གསོན་མ་པི་ཏ་ཐོགས་པ་དེ་སྤྱན་རས་གཟིགས་དབང་ཕྱུག་ཁྲོ་མོ་པྲ་མོ་ཧཱ་མ་དང་། བྱང་གི་སྲིན་མོ་བེ་ཏཱ་ནག་མོ་ཞེས་བྱ་བ་ལག་གཡས་སྤར་མོས་བུ་ལ་བརྡུང་ཞིང་། གཡོན་པས་བུའི་ཁོག་པ་ཟ་བ་དེ་ཕྱག་ན་རྡོ་རྗེ་ཁྲོ་མོ་བེ་ཏཱ་ལཱི་དང་། ཤར་ལྷོའི་སྲིན་མོ་ནང་ཁྲོལ་འདྲེན་མ་ཞེས་བྱ་བ་སེམས་ཅན་བསད་ནས་ནང་ཁྲོལ་དང་ཤ་ཁྲག་རློན་པར་ཟ་བ་དེ་བྱང་ཆུབ་སེམས་དཔའ་བྱམས་པ་ཁྲོ་མོ་པུཀྐ་སཱི་དང་། ལྷོ་ནུབ་ན་སྲིན་མོ་ཆེན་མོ་རབ་འཇིགས་མ་ཞེས་བྱ་བ་མགོ་བོའི་ཕོར་བར་ཤ་ཁྲག་ཚིལ་བུས་བཀང་བ་སོར་མོ་གསུམ་གྱིས་དཀྲུག་ཅིང་འཐུང་བ་དེ་སྒྲིབ་པ་རྣམ་སེལ་ཁྲོ་མོ་གྷས་མ་རཱི་དང་། ནུབ་བྱང་གི་སྲིན་མོ་ཆེན་མོ་སྲོག་གཅོད་མ་ཞེས་བྱ་བ་སྙིང་ཟ་བ་དེ་ཀུན་ཏུ་བཟང་པོ་ཁྲོ་མོ་སྨེ་ཤ་ནཱི་དང་། བྱང་ཤར་གྱི་སྲིན་མོ་སྨྱོན་མ་ཞེས་བྱ་བ་སྲོག་ཆགས་ཀྱི་མགོ་ལུས་བཅད་ནས་རོལ་བ་དེ་འཇམ་དཔལ་དབྱངས་ཁྲོ་མོ་ཙཎྜ་ལཱི་རྣམས་སུ་སྤྲུལ་ནས་བཏུལ་བ་ཡིན་པར་གསུངས་ལ། རྒྱུད་དུ་མར་སྦྱར་ཚུལ་སྣ་ཚོགས་མཆིས་སོ།།

དེ་ལྟར་གྱི་མ་མོ་ཀཽ་རཱི་མ་སོགས་བརྒྱད་པོའི་སྐུ་མདོག་ཕྱག་མཚན་ནི་ཞི་ཁྲོའི་ལས་བྱང་དང་བརྒྱ་ཕྱག་གཉིས་དང་། རྣམ་ཤེས་བརྒྱད་ཀྱི་དག་པ་སྦྱོར་ཚུལ་ནི་ཞི་ཁྲོའི་བསྐང་བཤགས་ཉམས་ཆགས་རང་གྲོལ་ལྟར་བྱས་པ་ཡིན་ལ། ཞི་ཁྲོའི་སྒོམ་རིམ་ལྷན་སྐྱེས་ཡེ་ཤེས་ལས་ནི་ལས་བྱང་དང་བརྒྱ་ཕྱག་གཉིས་དང་ཅུང་མི་འདྲ་བ་ནི། པྲ་མོ་ཧཱ་ཕྱག་གཡས་ཆུ་སྲིན་གྱི་རྒྱལ་མཚན་དང་གཡོན་བྷན་དྷ་འཛིན་པ་དང་། བེ་ཏཱ་ལཱི་ཡི་སྐུ་མདོག་འཕགས་པ་ཐབས་ཀྱི་ཞགས་པ་པདྨོའི་ཕྲེང་བའི་རྒྱུད་སོགས་དང་མཐུན་པར་ལྗང་གུ་མིན་པར་ནག་མོར་བཤད་པ་དང་། ཙནྜ་ལཱི་ཙིཏྟ་ཟ་བ་ཅན་དུ་གསུངས་པའོ།།

དེ་དང་འདྲ་བར་དྲི་མེད་བཤགས་རྒྱུད་ལས་ཀྱང་། ཁྲོ་མོ་མཐིང་ནག་རྡོ་རྗེ་འཛིན། །བཻ་ཏཱ་ལཱི་ལ་ཕྱག་འཚལ་ལོ། །ཞེས་བེ་ཏཱ་ལི་ལྗང་གུ་མིན་པར་མཐིང་གར་བཤད་དོ།།

ཞི་ཁྲོའི་ཁྲོ་བོའི་ལྷ་དབང་གི་བཤད་པ་རྒྱས་པ་དང་འཕྲད་ཚད་རང་གྲོལ་སྤྲོས་བཅས་བུམ་དབང་ཆེན་མོ་ལས་ནི། མིག་གི་རྣམ་ཤེས་མ་སྤངས་གནས་སུ་དག་པ་ཀཽ་རཱི་མ་དང་། རྣ་བ་ཙཽ་རཱི་མ་དང་། སྣ་པྲ་མོ་ཧཱ་དང་། ལྕེ་བེ་ཏཱ་ལཱི་དང་། ལུས་པུསྐ་སཱི་དང་། ཡིད་གྷསྨ་རཱི་དང་། ཉོན་ཡིད་ཙཎྜ་ལཱི་དང་། ཀུན་གཞི་སྨེ་ཤ་མར་སྦྱར་འདུག་གོ།

རྒྱུད་གཞན་དུ་ནི་དཔེར་ན། རྣམ་ཤེས་ཚོགས་བརྒྱད་ཀྱི་དག་པ་སྦྱོར་ཚུལ་ཀཽ་རཱི་མ་དང་། ཙཽ་རཱི་མ་དང་། པྲ་མོ་ཧཱ་དང་། བེ་ཏཱ་ལཱི་དང་། པུསྐ་སཱི་དང་ལྔ་བསྐང་བཤགས་དང་འདྲ་བ་ལ། གྷསྨ་རཱི་རྣ་བའི་རྣམ་ཤེས་མིན་པར་ལྕེ་ཡི་རྣམ་ཤེས་ལ་སྦྱར་བ་དང་། སྨེ་ཤ་ནཱི་སྣ་ཡི་རྣམ་ཤེས་མིན་པར་རྣ་བ་ལ་སྦྱར་བ་དང་། ཙཎྜ་ལཱི་ལྕེ་ཡི་རྣམ་ཤེས་མིན་པར་སྣ་ལ་སྦྱར་བ་དང་། སྐུ་མདོག་ཀྱང་ཙཽ་རཱི་མ་དང་། པྲ་མོ་ཧཱ་དང་། གྷསྨ་རཱི་དང་། སྨེ་ཤ་ནཱི་དང་། ཙཎྜ་ལཱི་ལྔ་ལས་བྱང་དང་བརྒྱ་ཕྱག་གཉིས་དང་འདྲ་བ་ལ། ཀཽ་རཱི་དཀར་མོ་མིན་པར་སྔོན་ནག་དང་། བེ་ཏཱ་ལཱི་ལྗང་གུ་མིན་པར་མཐིང་ནག་དང་། པུསྐ་སཱི་སེར་མོ་མིན་པར་དམར་ནག་ཏུ་བཤད་པ་ཡང་ཡོད་དེ། གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་བླ་མ་ཆེན་པོ་ལས། ཀུན་གཞི་གནས་གྱུར་ཕྲ་མེན་མ། །རྣལ་འབྱོར་སྔོ་ནག་གོའུ་རི་མ། །ཞེས་དང་། རྣམ་ཤེས་གནས་གྱུར་ཕྲ་མེན་མ། །རྣལ་འབྱོར་སེར་ནག་ཙོའུ་རི་མ། །ཞེས་དང་། ཉོན་མོངས་གནས་གྱུར་ཕྲ་མེན་མ། །རྣལ་འབྱོར་དམར་ནག་པྲ་མོ་ཧ། །ཞེས་དང་། རེག་བྱ་གནས་གྱུར་ཕྲ་མེན་མ། །རྣལ་འབྱོར་མཐིང་ནག་བེ་ཏ་ལི། །ཞེས་དང་། ལྟ་བྱེད་ཕྲ་མེན་གནས་གྱུར་པ། །རྣལ་འབྱོར་དམར་ནག་པུསྐ་སི། །ཞེས་དང་། ཉན་བྱེད་གནས་གྱུར་ཕྲ་མེན་མ། །རྣལ་འབྱོར་མཐིང་ནག་སྨ་ཤ་ནི། །ཞེས་དང་། མནོམ་བྱེད་གནས་གྱུར་ཕྲ་མེན་མ། །རྣལ་འབྱོར་སེར་ནག་ཙཎ་ཌ་ལི། །ཞེས་དང་། མྱོང་བྱེད་གནས་གྱུར་ཕྲ་མེན་མ། །རྣལ་འབྱོར་ལྗང་ནག་གྷས་མ་རི། །ཞེས་གསུངས་པའི་ཕྱིར་རོ།།

གཞན་ཡང་ཕྱག་མཚན་ཡང་ཕལ་ཆེ་བའི་ཕྱག་གཡོན་དུ་བྷན་དྷ་ཡོད་པ་དང་། བེ་ཏཱ་ལཱི་གཡས་རྡོ་རྗེ་རྩེ་ལྔ་བ་དང་། གཡོན་པས་སྟི་ར་ཆུང་ངུ་མགོ་མེད་བསྣམས་པ་ཅན་དུ་བཤད་པ་སོགས་མི་འདྲ་བ་མང་བས་རྒྱུད་རང་དུ་བལྟ་བར་བྱའོ།།

ད་དུང་གནས་ཕྱོགས་ཀྱང་ཞི་ཁྲོའི་ལས་བྱང་དང་བརྒྱ་ཕྱག་དང་སྒོམ་རིམ་གསུམ་དུ་གྷསྨ་རཱི་ལྷོ་ནུབ་དང་། སྨེ་ཤ་ནཱི་བྱང་ཤར་དུ་གནས་པར་བཤད་ལ། གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་བླ་མ་ལས་ནི། ལྷོ་ནུབ་མཚམས་སུ་བསམ་བྱ་བ། །བདེན་དྲལ་བསྒྱེལ་བའི་གདན་སྟེང་དུ། །ཉན་བྱེད་གནས་གྱུར་ཕྲ་མེན་མ། །རྣལ་འབྱོར་མཐིང་ནག་སྨ་ཤ་ནི། །ཞེས་དང་། བྱང་ཤར་མཚམས་སུ་བསམ་བྱ་བ། །དབང་ལྡན་བསྒྱེལ་བའི་གདན་སྟེང་དུ། །མྱོང་བྱེད་གནས་གྱུར་ཕྲ་མེན་མ། །རྣལ་འབྱོར་ལྗང་ནག་གྷས་མ་རི། །ཞེས་དེ་ལས་ལྡོག་སྟེ་ལྷོ་ནུབ་སྨེ་ཤ་ནཱི་དང་། གྷསྨ་རཱི་བྱང་ཤར་དུ་གནས་པར་བཤད་པ་ལ་སོགས་པ་རྒྱུད་སོ་སོར་གནས་ཕྱོགས་མི་འདྲ་བར་བཤད་པ་དུ་མ་ཡོད་མོད་སྤྲོས་པར་མི་བྱེད་དོ།།

དེ་ལས་གཞན་རྒྱུད་དུ་ཀཽ་རཱི་མ་སྔོན་མོ་ཡིན་པར་གསུངས་པའི་ཚུལ་སོགས་ནི། འཕགས་པ་ཐབས་ཀྱི་ཞགས་པ་པདྨོའི་ཕྲེང་བ་ལས། ཤར་ཕྱོགས་ན་ཕྲ་མེན་མ་ཀཽ་རི་ཁ་དོག་སྔོན་མོ་ཕྱག་གཉིས་པ་སྟེ། གཡོན་བནྡྷ་ཙན་དན་དམར་གྱིས་བཀང་བ་ཐོགས་པ། གཡས་ན་ཞིང་ཆུང་ངུའི་དབྱུག་པ་ཐོགས་པ། ཞེས་དང་། ཧེ་རུ་ཀ་སྙིང་རོལ་ལས། མཐིང་ག་མཆོག་སྟོན་དཔལ་གྱི་ཡུམ། །རྡོ་རྗེ་ཐུགས་ཀྱི་དབང་ཕྱུག་མ། །ཀཽ་རཱི་མ་ཡི་མཆོད་པས་རོལ། །ཞེས་དང་། ལྷ་མོ་སྒྱུ་འཕྲུལ་དྲྭ་བ་ཆེན་མོའི་རྒྱུད་ལས། དཔལ་ཆེན་འབར་བའི་ཐུགས་ཀ་ནས། །རྣམ་པར་བསྒྱུར་བའི་གཟུགས་བྱུང་བ། །ཅི་ཡང་འགྱུར་བའི་སྐུ་མངའ་བ། །རྣལ་འབྱོར་སྔོ་ནག་ཀེའུ་མ། །ཞེས་དང་། ཕུར་བ་ཐུགས་རྗེ་རྩ་རྒྱུད་ལས། ཀཱཽ་རི་བན་དམར་ཞིང་དབྱུག་སྔོ། །ཞེས་དང་། རྡོ་རྗེ་མ་མོ་ཀཱཽ་རི་མ། །གཡས་ན་ཞིང་དབྱུག་ཐོད་ཁྲག་མཐིང་། །ཞེས་དང་། ཁྲོ་བོ་པུཎྜ་རཱི་ཀའི་རྒྱུད་ལས། དེ་ཡི་བདག་མོ་ཀཻའུ་རི་མ། །མཐིང་ནག་འབར་བའི་རལ་པ་ཅན། །ཞེས་དང་། དྲི་མེད་བཤགས་རྒྱུད་ལས། ཁྲོ་མོ་སྔོན་མོ་བམ་དབྱུག་འཛིན། །གཽ་རཱི་མ་ལ་ཕྱག་འཚལ་ལོ། །ཞེས་གསུངས་པ་དང་། དེ་བཞིན་ཕྱག་མཚན་ཅུང་ཟད་མི་འདྲ་བ་སོགས་ཁྱད་པར་མང་མོད་མི་སྤྲོའོ།།

རྒྱལ་སྲས་གཞན་ཕན་མཐའ་ཡས་ཀྱིས། གོང་སྨོས་ལྟར་སྲིན་མོ་དཀར་མོ་བཏུལ་བའི་རྒྱུ་མཚན་གྱིས་རི་དྭགས་བཤོར་བ་ལ་རི་དྭགས་ཟེེར་བ་བཞིན་དུ་མཚན་ལ་དཀར་མོ་ཟེར་བ་མ་གཏོགས་རང་རིགས་ལས་རང་གི་སྐུ་མདོག་སྔོན་མོར་བཤད་པ་ཡིན་ནོ། །ཞེས་ཀརྨ་གླིང་པའི་ཞི་ཁྲོ་འདིའི་བཤད་བྱ་རྩ་བའི་རྒྱུད་གསང་བ་སྙིང་པོ་ཡིན་པས་སྒྱུ་འཕྲུལ་དང་མཐུན་ཚུལ་མང་དུ་གསུངས་ལ། དེ་ལས་ཀཽ་རཱི་མ་ནི་སྐུ་མདོག་དཀར་པོ་མིན་པར་གསང་སྙིང་ལྟར་སྔོན་པོ་ཡིན་དགོས་པས་དཀར་མོའི་མིང་ཅན་གྱི་ཀཽ་རཱི་སྔོན་མོ་ཞེས་པར་གོ་དགོས་པར་ཆེད་དུ་བསྒྲུབས་འདུག་མོད། མ་མོ་གཞན་རྣམས་ཀྱི་སྐུ་མདོག་སོགས་ལ་ནི་དེ་མཐུན་གྱི་མི་འདྲ་བ་ལ་དཔྱད་པ་མི་སྣང་མོད། འདིར་ཞི་ཁྲོ་རང་ལུགས་ལ་ནི་ཀཽ་རཱི་དཀར་མོ་ཞེས་གྲགས་པ་ལྟར་སྐུ་མདོག་ཀྱང་དཀར་པོ་ཡིན་པ་ཤིན་ཏུ་གསལ་སྙམ་སྟེ། ལས་བྱང་རྩ་ཕྲེང་ཚོར་བ་རང་གྲོལ་ལས། ཤར་ཕྱོགས་ཀཽ་རཱི་ཞིང་དབྱུག་དཀར༔ ཞེས་དང་། བརྒྱ་ཕྱག་སྡིག་སྒྲིབ་རང་གྲོལ་ལས། ཁྲོ་མོ་དཀར་མོ་ཞིང་ཆེན་གདན་ལ་འགྱིང་༔ འཁོར་བའི་རྣམ་རྟོག་གཞོམ་ཕྱིར་ཞིང་དབྱུག་ཕྱར༔ ཁྲོ་མོའི་གཟུགས་ཀྱིས་འགྲོ་བའི་དོན་མཛད་པའི༔ ཤར་ཕྱོགས་ཀཽ་རཱི་མ་ལ་ཕྱག་འཚལ་ལོ༔ ཞེས་དང་། སྒོམ་རིམ་ལྷན་སྐྱེས་ཡེ་ཤེས་ལས། ཤར་དུ་ཀཽ་རཱི་དཀར་མོ་ཞིང་གི་དབྱུག་ཏོ་དང་གཡོན་བྷན་དམར་འཛིན་པ༔ ཞེས་མིང་ཙམ་པོ་མིན་པར་སྐུ་མདོག་དཀར་པོ་ཡིན་པར་གསལ་བར་གསུངས་པའི་ཕྱིར་དང་། དཀར་ཞེས་པ་དང་དཀར་མོ་ཞེས་པ་སྐུ་མདོག་མིན་པར་མིང་ཙམ་ལ་ཟེར་བ་ཡིན་ན། བསྐྱེད་རིམ་གྱི་སྐབས་སུ་སྐུ་མདོག་ཅི་ཡིན་གྱི་གསལ་ཁ་ཡོད་རིགས་པ་ལ་ཞི་ཁྲོའི་བསྐྱེད་ཆོག་གི་གཞུང་གང་དུ་ཡང་ཀཽ་རཱི་མའི་སྐུ་མདོག་ལ་གསལ་ཁ་གཞན་པ་མ་གསུངས་པའི་ཕྱིར་དང་། ལས་བྱང་བདག་བསྐྱེད་དང་། བརྒྱ་ཕྱག་མདུན་བསྐྱེད་ཡིན་པའི་དབང་དུ་བྱས་ནའང་བདག་བདུན་གཉིས་ཀར་དཀར་ཞེས་གསུངས་པས་སྔོན་མོ་ཡིན་ན་དཀར་ཞེས་སྨོས་པ་འཁྲུལ་བ་བསྐྱེད་པ་ལས་དགོས་པ་གཞན་མ་མཆིས་པའི་ཕྱིར་རོ།།

འོ་ན་ཞི་ཁྲོའི་དབང་གི་དངོས་གཞི་འཕྲད་ཚད་རང་གྲོལ་ལས། མིག་གི་རྣམ་ཤེས་ཀོའུ་རཱི་མ༔ སྣང་བ་དཀར་དམར་ཡུལ་གྱི་སེམས༔ རྟོག་ཚོགས་རང་གྲོལ་དབྱིངས་སུ་གྲོལ༔ ཀོའུ་རཱི་སྔོན་མོའི་དབང་ཐོབ་ཤོག༔ ཅེས་སྔོན་མོར་གསུངས་པ་མ་ཡིན་དམ་ཞེ་ན། དེ་བདེན་མོད། དེ་ནི་དབང་གི་ཚིག་ཙམ་ལས་ལས་བྱང་ལྟ་བུའི་གལ་གནད་ཆེ་བའི་སྐབས་མ་ཡིན་ལ། རྒྱུད་གཞན་གྱི་རྗེས་སུ་འབྲངས་སམ་སྙམ་པས་མི་གནོད་པ་ཡིན་ནམ་དཔྱད་དོ།།

ཧེ་རུ་ཀ་སྙིང་རྗེ་རོལ་བ་ལས། ཚུལ་ཁྲིམས་དྲི་མེད་མཆོད་པས་མཉེས་མཛད་ཅིང་། །ཐོགས་མེད་ལས་ལ་དབང་བསྐུར་ཁྲོ་མོ་རྒྱལ། །ཐུགས་མཆོག་རྣམ་དག་ཡེ་ཤེས་དཀར་མོའི་ཚོགས། །འགུགས་མཛད་ཡེ་ཤེས་ལྔ་ཡི་དབྱུག་ཏོ་ཅན། །དྲན་པས་རྒྱུད་ལྔ་སྒྲོལ་མཛད་ཞི་བར་གཟིགས། །སྲིད་གསུམ་འཇོམས་བྱེད་དབྱུག་ཐོགས་གཽ་རི་མ། །ཞེས་དང་། གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་བླ་མ་ལས། དེ་ནས་དགྱེས་ཏེ་ཧ་ཧ་ཞེས་བརྗོད་པས་ཉིད་ཀྱི་ཤེས་པའི་ཚོགས་རྣམ་པར་ཤེས་པ་བརྒྱད་ལས་དཀར་པོ་ལ་སོགས་པ་བརྒྱད་རང་གི་ལག་ཆ་ངོ་མཚར་དུ་ཆས་ཏེ་འཐོན་པར་གྱུར་ཏོ། །ཞེས་དཀར་སྔོན་གཉིས་ཀར་གསུངས་པས་ཀྱང་དཀར་པོར་འཛིན་པ་དང་སྔོན་པོར་བསྒོམ་པ་འགལ་མེད་དུ་བསྟན་འདུག་པ་འདྲའོ།།

ཡེ་ཤེས་རྔམ་གློག་ལས། འཁོར་ལོ་འབར་བའི་རྩེ་མཚན་ལ། །དཀར་མོ་ལ་སོགས་རལ་བ་ཅན། །རང་སྟན་ལག་ཆར་ཆས་ཏེ་གནས། །ཕྱི་རོལ་ཤར་གྱི་ཕྱོགས་དག་ནས། །སེང་གདོང་ལ་སོགས་མགོ་བརྙན་ཚོགས། །སྟན་དང་ལག་ཆ་དེ་བཞིན་ཆས། །ཞེས་མ་མོ་ཀཽ་རཱི་མ་སོགས་དང་སེང་གེའི་གདོང་ཅན་གྱི་ཕྲ་མེན་མ་རྣམས་བསྟན་དུས་ཀཽ་རཱི་དཀར་མོར་བཤད་པ་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཧ་བརྒྱད་ས་བོན་ལས་བྱུང་བ། །དཀར་མོའི་ཚོགས་དང་རྐུན་མོའི་ཚོགས། །ཞེས་ཀཽ་རཱི་དཀར་མོར་བཤད་དོ།།

རྡོ་རྗེ་མཁའ་འགྲོའི་རྒྱུད་ལས། གཽ་རི་ལ་སོགས་མཁའ་འགྲོ་མར། །བཅས་པའི་ཧེ་རུ་ཀ་མགོན་མཆོག །ཅེས་གསུངས་པ་ལྟར། གཽ་རི་མ་བརྒྱད་འདི་གསར་མའི་རྒྱུད་རྣམས་ལས་བསྟན་པ་མ་ཟད་སྐུ་མདོག་ཀྱང་དཀར་པོ་ཡིན་པར་གསལ་བར་གསུངས་ཏེ། མངོན་བརྗོད་བླ་མ་ལས། ཤར་ཕྱོགས་སུ་ནི་གཽ་རི་སྟེ། །བྱང་དུ་དེ་བཞིན་ཙཽ་རི་མ། །ནུབ་ཏུ་རབ་སྨོངས་མ་ཡིན་ནོ། །ལྷོ་རུ་ཡང་ནི་རོ་ལངས་མ། །མེ་ལ་སྦོས་བྱེད་མ་ཡིན་ཏེ། །བདེན་བྲལ་དུ་ནི་གཏུམ་མོའོ། །རླུང་ཕྱོགས་སྨེ་མ་ཉིད་ཡིན་ཏེ། །དབང་ལྡན་ཧེ་རུ་ཀ་མ་སྟེ། །དེ་བཞིན་རྣལ་འབྱོར་མ་བརྒྱད་ནི། །དཀར་མོ་སེར་ལ་སྔོ་ལྗང་གུའོ། །ཞེས་དང་། ཀྱེ་རྡོ་རྗེ་ལས། དཀར་མོ་ཆོམ་རྐུན་རོ་ལངས་མ། །གྷསྨ་རཱི་དང་པུསྐ་སཱི། །རི་ཁྲོད་མ་དང་གདོལ་བ་མ། །བརྒྱད་པ་ཌོམ་བི་ནཱི་རུ་བརྗོད། །ཅེས་གསུངས་པའི་ཕྱིར་རོ།།

ད་དུང་རྒྱུད་གཞན་དུ་ཀཽ་རཱི་མ་ནག་པོ་ཡིན་པར་གསུངས་པ་ཡང་མཆིས་ཏེ། མཁའ་འགྲོ་མ་དྲྭ་བའི་སྡོམ་པའི་རྒྱུད་ལས། གཽ་རཱི་ཁ་དོག་ནག་པོར་འགྱུར། །ཆོམ་རྐུན་མ་ནི་བཙོད་དང་མཚུངས། །རོ་ལངས་མ་ནི་གསེར་བཙོས་བཞིན། །གྷསྨ་རཱི་ནི་མར་གད་མཚུངས། །པུསྐ་སཱི་ནི་དབང་སྔོན་མཚུངས། །རི་ཁྲོད་མ་ནི་ཟླ་ནོར་འོད། །གཏུམ་མོ་ནམ་མཁའི་སྔོ་སངས་མ། །གཡུང་མོ་སྣ་ཚོགས་པ་ཞེས་བརྗོད། །ཅེས་གསུངས་པའི་ཕྱིར། དེ་ལ་སོགས་པ་དང་། མ་མོ་གཞན་རྣམས་ཀྱི་སྐུ་མདོག་ཕྱག་མཚན་མཐུན་མིན་སོགས་སྤྲོ་བྱ་མང་ཡང་ཡི་གེས་འཇིགས་པས་མི་སྨྲའོ།།

ལྔ་བ་ཕྲ་མེན་བརྒྱད་ཀྱི་བཤགས་པ་ནི། ཐུགས་རྗེ་ཞི་བའི་ངང་ལས་མ་གཡོས་ཀྱང༔ ལོག་རྟོག་མཚན་མར་འཛིན་པ་ཞི་བའི་ཕྱིར༔ མཆེ་གཤོག་རྔམས་པ་འབར་བའི་སྐུར་སྤྲུལ་པ༔ སིང་ཧ་ལ་སོགས་ཐུགས་དང་ཅི་འགལ་བ༔ ཡུལ་གྱི་ཕྲ་མེན་བརྒྱད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་དང་རྐང་པ་གཅིག་གིས་བསྟན་ལ། ལས་བྱང་རྩ་ཕྲེང་ཚོར་བ་རང་གྲོལ་ལས། སིང་ཧ་བྱཱ་ཀྲི་སྲི་ལ་བ་ཤྭ་ན་མ༔ ཀྲྀ་ཏ་ཀང་ཀ་ཁ་ཁྭ་ཧུ་ལུ་མ༔ ཡུལ་གྱི་སིངྷ་ཕྲ་མེན་བརྒྱད་རྣམས་ཀྱང་༔ ཞེས་དང་། ཧེ་རུ་ཀ་སྙིང་རོལ་ལས། སིང་ཧ་གསོད་བྱེད་སེང་གེའི་མགོ །རོ་མཆོག་ཟ་བའི་ཕྲ་མེན་མ། །བྱཱ་གྷྲྀ་མགོ་གཅོད་སྟག་གི་མགོ །ཐོད་རློན་ཟ་བའི་ཕྲ་མེན་མ། །སྲི་ཀ་དུར་རྐུན་ཝ་ཡི་མགོ །དུར་སྲི་མ་ཡི་ཕྲ་མེན་མ། །ཤྭ་ན་ཤ་འདྲད་སྤྱང་མོའི་མགོ །ཤ་ཆེན་ཟ་བའི་ཕྲ་མེན་མ། །གྲྀཊྷ་ཁྲག་འཐུང་བྱ་རྒོད་མགོ །ཁྲག་ཚིལ་ཟ་བའི་ཕྲ་མེན་མ། །ཀང་ཀ་མུ་ཀ་དུར་བྱའི་མགོ །དུག་གསུམ་འཇོམས་པའི་ཕྲ་མེན་མ། །ཁྭ་ཁ་རྒྱུ་འདྲེན་ཕོ་རོག་མགོ །དགྲ་བགེགས་འདུལ་བའི་ཕྲ་མེན་མ། །ཧུ་ལུ་ཚེ་འཕྲོག་འུག་པའི་མགོ །གློ་སྙིང་ཟ་བའི་ཕྲ་མེན་མ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སྲིན་པོའི་བུ་མོ་དྲི་ཟ་བརྒྱད། སྟག་སེང་ཝ་སྤྱང་བཞད་ཚོགས་དང་། །དུར་བྱ་བྱ་རོག་འུག་པའི་ཚོགས། །བསྟོད་ཅིང་རྔམ་པའི་ཚུལ་དུ་འཁོད། །ཅེས་གསུངས་པ་ལྟར། ཡུལ་བདག་སིང་ཧ་མ་ལ་སོགས་པའི་ཕྲ་མེན་བརྒྱད་ནི་གོང་ལྟར་དཔལ་ཆེ་མཆོག་ཧེ་རུ་ཀ་ཡིས་རུ་དྲ་འདུལ་དུས་དབང་ཕྱུག་གི་བྲན་མོ་སོགས་རུ་དྲས་འཕྲོག་པ་རྣམས་འདུལ་བའི་ཆེད་དུ་རྒྱལ་བའི་འདུལ་བྱེད་ཀྱི་གཉེན་པོར་སྤྲུལ་བའམ་ཕྲ་མེན་མ་དེ་དག་བདེ་སྟོང་གི་རོས་སད་པར་བྱས་ཏེ་དོན་དམ་བདེ་བ་ཆེན་པོའི་ཡེ་ཤེས་ཀྱི་ངོ་བོར་སྦྱར་བས་འཕགས་ས་ཐོབ་པར་བགྱིས་པས་ན་དེ་དག་གི་ཐུག༷ས་ནི་ཚད་མེད་པའི་སྙིང་རྗེ༷་ཆེན་པོ་དང་སྟོང་པ་ཉིད་དབྱེར་མེད་པ་སྟེ། སྤྲོས་པ་དང་སྒྲིབ་པ་ཉེ་བར་ཞི༷་བ༷འི་ཆོས་ཉིད་དབྱིངས་ཀྱི་ངང༷་ལ༷ས་གཡོ་བ་མེད་པས་དེ་ལས་མ༷་གཡོ༷ས་ཀྱང༷་གདུལ་བྱའི་རྒྱུད་ཀྱི་ལོ༷ག་རྟོ༷ག་གིས་ཆོས་ཐམས་ཅད་ལ་མཚ༷ན་མ༷ར་ཞེན་པ་དང་། ཁྱད་པར་དུ་སིང་ཧ་མ་སོགས་ཕྲ་མེན་བརྒྱད་ཅེས་པ་མ་མོ་དྲེགས་པ་རང་རྒྱུད་པ་བརྒྱད་དམ། ཡང་ན་དྲེགས་པ་རང་རྒྱུད་པ་འབྱུང་པོའི་མ་མོ་རྣམས་ཀྱི་གཉེན་པོའི་ལྷ་ཕྲ་མེན་མ་བརྒྱད་ཅེས་པའི་བདེན་པར་གྲུབ་པའི་ཞལ་ཕྱག་མཚན་མ་ཅན་དུ་ཡོད་པར་འཛི༷ན་པ༷་ཞི༷་བ༷འི་ཕྱིར༷་དུ་ནི་དོན་དམ་ལྷན་ཅིག་སྐྱེས་པའི་ཡེ་ཤེས་ཀྱི་ཆ་ཤས་གཟུགས་སོགས་ཡུལ་བརྒྱད་གནས་སུ་དག་པ་གནས་སུ་གྱུར་པའི་ཡེ་ཤེས་བཞོན་རླུང་ལྷའི་རྣམ་པར་ཤར་བ་དྲག་ཏུ་ཁྲོས་པ་ཞལ་ན་ཁྲག་འཛག་པའི་མཆེ༷་བ་རྣོན་པོ་གཙིགས་པའི་གཅན་གཟན་གྱི་རིགས་ཀྱི་གདོང་ཅན་བཞི་དང་། ལུས་ལ་ཁྱུང་གཤོ༷ག་ཐོགས་པའི་འདབ་ཆགས་ཀྱི་རིགས་ཀྱི་མགོ་ཅན་བཞི་བཅས་འཇིགས་ཤིང་རྔམ༷ས་པ༷་ཕྱག་ན་མཚོན་ཆ་སྣ་ཚོགས་ཐོགས་པའི་དྲག་པོ་འབ༷ར་བ༷འི་ཕྲ་མེན་མ་འཇིགས་སུ་རུང་བ་བརྒྱད་ཀྱི་སྐུར༷་སྤྲུལ༷་པ༷་ནི་ཕྲ་མེན་སིང༷་ཧ༷་མ་ལ༷་སོ༷གས་པ་སྟེ། ལས་བྱང་ཚོར་གྲོལ་ལས། ཁྲག་འཐུང་སྐུ་གསུང་ཐུགས་ལས་སྤྲུལ་པའི་ལྷ༔ རང་སྣང་དབང་པོོ་ཡུལ་བརྒྱད་གནས་དག་པའི༔ སེང་ཧ་ལ་སོགས་ཡུལ་གྱི་ཕྲ་མེན་བརྒྱད༔ རང་སྣང་དག་པའི་གནས་འདིར་བཞུགས་སུ་གསོལ༔ ཞེས་དང་། ཡེ་ཤེས་རྔམ་གློག་ལས། ཡུལ་བརྒྱད་ཕྲ་མེན་བརྒྱད་ལ་བསྟིམ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སེང་སྟག་ལ་སོགས་ཡུལ་དུ་སྣང་། །ཞེས་གསུངས་པ་ལྟར། དེ་ཡང་ཕྱི་ལྟར་ན་ཡུལ་བཞི་དང་ཉེ་བའི་ཡུལ་བཞི་ན་གནས་པའི་སྲིན་མོ་འཇོམས་བྱེད་ཆེན་མོ་སེང་གེའི་མགོ་ཅན་ལ་སོགས་པ་བརྒྱད་འདུལ་བྱེད་ཀྱི་མཁའ་འགྲོ་མ་ཆ་ལུགས་མཐུན་པ་བརྒྱད་དུ་སྤྲུལ་བ་དང་། ནང་ལྟར་ན་ཡུལ་ཀུན་གཞིའི་རྣམ་ཤེས་ཀྱི་ཡུལ་རྣམ་པར་དག་པ་སིང་ཧ་མ་སེང་གེའི་གདོང་ཅན་སྨུག་ནག་མི་རོ་ཁ་ལ་ཐོགས་པ་དང་། ཡུལ་ཆོས་ཁམས་སམ་ཆོས་ཀྱི་སྐྱེད་མཆེད་ཀྱི་ངོ་བོ་རྣམ་པར་དག་པ་བྱཱ་ཀྲི་མ་སྟག་གདོང་ཅན་དམར་མོ་ལག་གཉིས་མདུན་ནས་ཐུར་དུ་བསྣོལ་བ་དང་། ཡུལ་ཉོན་ཡིད་རྣམ་ཤེས་ཀྱི་ཡུལ་བག་ཆགས་མཐུག་པོའི་གཞི་ཀུན་གཞིའི་ངོ་བོ་རྣམ་པར་དག་པ་སྲི་ལ་མ་ཝ་གདོང་ཅན་ནག་མོ་སྤུ་གྲི་ཐོགས་པ་དང་། ཡུལ་རེག་བྱའི་ངོ་བོ་རྣམ་པར་དག་པ་ཤྭ་ན་མ་སྤྱང་ཀིའི་གདོང་ཅན་མཐིང་ག་བམ་རོ་ཐོགས་ཤིང་འདྲད་པ་དང་། ཡུལ་གཟུགས་ཀྱི་ངོ་བོ་རྣམ་པར་དག་པ་ཀྲྀ་ཏ་མ་བྱ་རྒོད་གདོང་ཅན་སེར་མོ་ལག་པས་བམ་རོ་ཐོགས་ནས་རྒྱུ་མ་འདྲེན་པ་དང་། ཡུལ་སྒྲ་ཡི་ངོ་བོ་རྣམ་པར་དག་པ་ཀང་ཀ་མུ་ཁ་མ་དུར་བྱའི་གདོང་ཅན་དམར་མོ་ཞིང་ཆེན་ཕྲག་ལ་འཕྱར་བ་དང་། ཡུལ་དྲི་ཡི་ངོ་བོ་རྣམ་པར་དག་པ་ཁ་ཁྭ་མུ་ཁ་མ་བྱ་རོག་གི་གདོང་ཅན་ནག་མོ་བྷན་དྷ་དང་རལ་གྲི་འཛིན་པ་དང་། ཡུལ་རོ་ཡི་ངོ་བོ་རྣམ་པར་དག་པ་ཧུ་ལུ་མུ་ཁ་མ་འུག་པའི་གདོང་ཅན་མཐིང་ག་ལྕགས་ཀྱུ་འཛིན་པ་རྣམས་ཀྱི་ཐུག༷ས་དང༷་ཅི༷་འགལ༷་བ༷་ཡི་ཉེས་ལྟུང་གི་ཚོགས་ཐམས་ཅད་འགྱོད་པ་དྲག་པོས་རྣམ་པར་ཤེས་པ་ཚོགས་བརྒྱད་ཀྱི་ཡུལ༷་གྱི༷་དག་པ་ཕྲ༷་མེ༷ན་མ་བརྒྱད༷་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

དེ་ཡང་སྤྱང་གདོང་མའི་སྐབས་སུ་ཁྱི་གདོང་མ་དང་། བྱ་རྒོད་གདོང་མའི་སྐབས་སུ་བཞད་གདོང་མར་བྱས་པ་ནི་མི་འདྲ་བའི་ཁྱད་པར་ཡིན་ཏེ། གསང་སྙིང་ལས། ཁྱི་གདོང་མའི་ཚོགས་དང་། བཞད་གདོང་མོའི་ཚོགས་དང་། ཞེས་དང་། ཡེ་ཤེ་རྔམ་གློག་ལས། སེང་གདོང་གི་ཚོགས་ཞེས་བྱ་བ་དང་། སྟག་གདོང་གི་ཚོགས་ཞེས་བྱ་བ་དང་། ཝ་གདོང་གི་ཚོགས་ཞེས་བྱ་བ་དང་། ཁྱི་གདོང་གི་ཚོགས་ཞེས་བྱ་བ་དང་། བཞད་གདོང་གི་ཚོགས་ཞེས་བྱ་བ་དང་། ཀང་ཀའི་གདོང་གི་ཚོགས་ཞེས་བྱ་བ་དང་། དུར་བྱའི་གདོང་གི་ཚོགས་ཞེས་བྱ་བ་དང་། བྱ་རོག་གདོང་གི་ཚོགས་ཞེས་བྱ་བ་དང་། འུག་པའི་གདོང་གི་ཚོགས་ཞེས་བྱ་བ་དང་། ཞེས་གསུངས་པའི་ཕྱིར་རོ།།

ཕྲ་མེན་མ་དེ་དག་ནི་སྲིན་ཡུལ་གྱི་ཤར་ཕྱོགས་འཇིགས་པ་ཆེན་པོའི་ཡུལ་ན་སྲིན་མོ་ཕྲ་མེན་འཇོམས་བྱེད་ཆེན་མོ་སེང་གེའི་མགོ་ཅན་མི་རོ་ཁ་ཡིས་འདྲད་པ་དེ་བྱང་ཆུབ་སེམས་མ་ལྷ་མོ་ལཱ་སྱ་མ་དེ་ཉིད་ཕྲ་མེན་མ་སིང་ཧ་མར་སྤྲུལ་ཏེ་བཏུལ་བ་དང་། ལྷོ་ཕྱོགས་གཤིན་རྗེའི་ཡུལ་ན་སྲིན་མོ་ཟ་བྱེད་སྟག་མགོ་མ་ལག་པ་བསྣོལ་ནས་བམ་ཆེན་ཟ་བ་དེ་ལྷ་མོ་མཱ་ལེ་མ་དེ་ཉིད་བྱཱ་ཀྲི་མ་དང་། ནུབ་ཕྱོགས་ཀླུའི་ཡུལ་ན་ཕྲ་མེན་ལེན་བྱེད་མ་ཞེས་བྱ་བ་ཝའི་མགོ་ཅན་དཔག་ཚད་བརྒྱད་ཁྲི་བཞི་སྟོང་ནས་བམ་རོའི་དྲི་ཚོར་ན་ལེན་པར་རྒྱུག་པ་དེ་ལྷ་མོ་གཱིར་ཏི་མ་སྲི་ལ་མུ་ཁ་དང་། བྱང་ཕྱོགས་གནོད་སྦྱིན་གྱི་ཡུལ་ན་ཕྲ་མེན་མང་རོ་མ་ཞེས་བྱ་བ་ཁྱིའི་མགོ་ཅན་བམ་རོ་འདྲད་ཅིང་ཟ་བ་དེ་ལྷ་མོ་ནཱིར་ཏི་མ་ཕྲ་མེན་མ་ཤྭ་ན་མུ་ཁ་དང་། ཤར་ལྷོ་དྲང་སྲོང་གི་ཡུལ་ན་ཕྲ་མེན་ཁྲག་འཐུང་མ་བྱ་རྒོད་ཀྱི་མགོ་ཅན་ཐོད་ཁྲག་འཐུང་བ་དེ་ལྷ་མོ་དྷཱུ་པེ་མ་གྲྀཌྜྷའམ་ཀྲྀ་ཏ་མུ་ཁ་དང་། ལྷོ་ནུབ་ན་ཕྲ་མེན་རྐང་ཟ་བ་ཞེས་བྱ་བ་བྱ་ཀངྐའི་མགོ་ཅན་བམ་རོ་ཕྲག་ལ་ཁུར་ནས་ཤ་ཁྲག་རྐང་ཚིལ་ཟ་བ་དེ་ལྷ་མོ་བཛྲ་པུཥྤེ་མ་ཕྲ་མེན་ཀང་ཀ་མུ་ཁ་དང་། ནུབ་བྱང་རིག་སྔགས་འཆང་བའི་ཡུལ་ན་ཕྲ་མེན་མ་འཇོམས་བྱེད་མ་བྱ་རོག་གི་མགོ་ཅན་སྤུ་གྲི་ཀ་མ་ལ་ཐོགས་ནས་བམ་རོའི་མགོ་ཐོགས་ཤིང་ཟ་བ་དེ་ལྷ་མོ་མར་མེ་མ་ཁ་ཁྭ་མུ་ཁ་དང་། བྱང་ཤར་འབྱུང་པོ་མང་པོའི་ཡུལ་ན་ཕྲ་མེན་སྐུལ་བྱེད་མ་འུག་མགོ་ཅན་ལྕགས་ཀྱུ་དང་ཐོད་ཁྲག་ཐོགས་ནས་ཙིཏྟ་ཟ་བ་དེ་ལྷ་མོ་དྲི་ཆབ་མ་ཧུ་ལུ་མུ་ཁ་མ་རྣམས་སུ་སྤྲུལ་ནས་བཏུལ་བར་དཔལ་འབར་ཁྲོ་མོའི་རྒྱུད་ལས་བཤད་ལ། ཡེ་ཤེས་རྔམ་གློག་ལས། སེང་གདོང་ཚོགས་ཀྱིས་ཟིལ་གྱིས་གནོན། །སྟག་གདོང་ཚོགས་ཀྱིས་འཇོམས་པར་བྱེད། །ཝ་གདོང་ཚོགས་ཀྱིས་རོལ་པར་བྱེད། །ཁྱི་གདོང་ཚོགས་ཀྱིས་གསོད་ཅིང་ཟ། །རྒོད་གདོང་ཚོགས་ཀྱིས་རྒྱུག་པར་བྱེད། །དུར་བྱས་རྣམ་པར་འདྲེན་པར་བྱེད། །བྱ་རོག་ཚོགས་ཀྱིས་དབང་དུ་འདུ། །འུག་གདོང་ཚོགས་ཀྱིས་འདྲེན་ཅིང་ལྟ། །ཞེས་གསུངས་པ་ལྟར་རོ།།

ཕྲ་མེན་མ་ཞེས་པ་ནི། རྒྱུད་གདུག་ཅིང་རྩུབ་པ་མི་ཟ་ཞིང་ངན་སྔགས་ཀྱི་བྱད་གཏོང་པ་ལ་མཁས་པའི་བུད་མེད་ཀྱི་རིགས་དང་། གདོན་མ་རུང་བ་འབྱུང་བོའི་རིགས་ཀྱི་མ་མོ་འཇིགས་སུ་རུང་བ་ལ་བྱེད་པ་ཡིན་ཏེ། མདོ་ལང་ཀར་གཤེགས་པ་ལས། མི་ཤ་ཟ་བའི་ཕྲ་མེན་ཕ་དང་། ཕྲ་མེན་མ་མ་རུངས་པ་དག་ཏུ་སྐྱེའོ། །ཞེས་དང་། ཟ་མ་ཏོག་བཀོད་པའི་མདོ་ལས། ཤ་ཟ་དང་ཕྲ་མེན་ཕ་དང་། ཕྲ་མེན་མ་དང་། ཞེས་དང་། དེ་ཁོ་ན་ཉིད་བསྡུས་པ་ལས། དེ་ནས་དེ་སྨྲས་མ་ཐག་ཏུ་ཕྲ་མེན་མ་ལ་སོགས་པ་གདོན་མ་རུངས་པ་ཐམས་ཅད་རི་རབ་ཀྱི་རྩེ་མོའི་ཕྱི་རོལ་བསྐོར་ཏེ་འཁོད་དོ། །ཞེས་དང་། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ལས། འབྱུང་པོའི་གདོན་དང་ཕྲ་མེན་མ་ལ་སོགས་པའི་གདོན་ཀྱིས་བསད་པར་གྱུར་ཏ་རེ། ཞེས་དང་། སྒྱུ་མ་བདེ་མཆོག་ལས། རིམས་དང་དུག་དང་དབྱིག་དུག་བྱད། །ཕྲ་མེན་གདོན་གྱི་གནོད་པ་རྣམས། །ཞེས་མདོ་རྒྱུད་གཉིས་ཀར་མང་དུ་གསུངས་པའི་ཕྱིར་རོ།།

དེས་ན་སྐབས་འདིར་རུ་དྲའི་བྲན་མོ་ཕྲ་མེན་མ་སེང་གེའི་གདོང་བ་ཅན་ལ་སོགས་པ་དཔལ་ཆེན་པོས་བཏུལ་ནས་དཀྱིལ་འཁོར་དུ་བཀོད་པའི་ཆ་ནས་ཕྲ་མེན་མ་དང་། དཔལ་ཧེ་རུ་ཀ་ཉིད་ལས་མ་རུང་པའི་ཕྲ་མེན་མ་རྣམས་འདུལ་བའི་ཕྱིར་དུ་དེ་ལྟར་ཕྲ་མེན་མ་མགོ་བརྙན་སྣ་ཚོགས་ཅན་གདུག་པ་མོའི་སྐུ་རུ་སྤྲུལ་བས་ན་ཕྲ་མེན་མ་ཞེས་བྱའོ།།

ཕྲ་མེན་མ་དེ་དག་གི་སྐུ་མདོག་ཕྱག་མཚན་ནི་ལས་བྱང་ཚོར་གྲོལ་དང་། བརྒྱ་ཕྱག་དང་། སྒོམ་རིམ་གསུམ་ལ་བརྟེན་པ་ཡིན་ལ། སྒོམ་རིམ་དུ་ཚིག་ཟིན་ཅུང་སྔ་མ་གཉིས་དང་མི་མཐུན་པ་མཆིས། ཡུལ་བརྒྱད་ཀྱི་དག་པ་སྦྱར་ཚུལ་ནི་བསྐང་བཤགས་སྡིག་སྒྲིབ་རང་གྲོལ་ལྟར་ལགས་སོ།།

གོང་སྨོས་ཞི་ཁྲོའི་ཁྲོ་བོའི་དབང་གི་ངོ་སྤྲོད་ལས་ཕྲ་མེན་བརྒྱད་ཡུལ་བརྒྱད་ལ་སྦྱོར་ཚུལ་དེ་བསྐང་བཤགས་དང་མཐུན་ཞིང་ཀཽ་རཱི་བརྒྱད་མི་མཐུན་པ་ནི་ཅུང་མཚར་རོ།།

འཕྲད་ཚད་རང་གྲོལ་སྤྲོས་བཅས་བུམ་དབང་ཆེན་མོ་ལས། གཟུགས་ཕུང་རྣམ་དག་སིང་ཧ་མ༔ ཞེས་དང་། ཚོར་ཕུང་རྣམ་དག་བྱ་ཀྲི་མ༔ ཞེས་དང་། དྲི་ཕུང་རྣམ་དག་སྲི་ལ་མ༔ ཞེས་དང་། ཕུང་ཁམས་རྣམ་དག་ཤྭ་ན་མ༔ ཞེས་དོན་ལ། འབྱུང་ལ་ལྔ་འདུས་རོ་མཆོག་བརྒྱད༔ ཅེས་དང་། རོ་མཆོག་བརྒྱད་ལྡན་དབང་ཐོབ་ཤོག། ཅེས་པ་འདིས་ཕུང་ཁམས་ཞེས་པ་རོ་ཡི་སྐྱེད་མཆེད་ལ་གོ་བ་དང་། རེག་ཕུང་རྣམ་དག་ཀྲྀ་ཏ་མ༔ ཞེས་དང་། ཚོར་ཕུང་རྣམ་དག་ཀངྐ་མ༔ ཞེས་ཚོར་ཕུང་གཉིས་བྱུང་པའང་དོན་ལ། ཡིད་དང་རྟོག་པ་རང་སར་གྲོལ༔ ཞེས་པ་འདིས་ཡིད་ཚོར་ཏེ་ཡིད་ཀྱི་རྣམ་ཤེས་ཀྱི་འཁོར་གྱི་ཚོར་ཡིན་པར་གོ་བའམ་ཡིད་ཀྱི་རྣམ་ཤེས་ཉིད་གང་རུང་ལ་གོ་ཆོག་པ་དང་། ཉོན་མོངས་རྣམ་དག་ཁ་ཁཱ་མ༔ ཞེས་དང་། ཀུན་གཞིའི་ཕུང་པོ་ཧི་ལུ་མཐིང་༔ ཞེས་དཀྱུས་དང་མི་མཐུན་པ་ཤེས་པར་བྱའོ།།

དེ་ཡང་གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་བླ་མ་ལས། ཕྲ་མེན་ཐོགས་མེད་སེང་གེའི་གདོང་། །རྣལ་འབྱོར་སེར་ནག་སེང་གེ་མ། །མཆེ་གཙིགས་རྐན་བརྡབས་གཡང་གཞི་གྱོན། །ཕྱག་གཉིས་བསྣོོལ་ནས་ཤིན་ཏུ་འགྱིང་། །སྟི་ར་ཆེན་པོ་སྤྲུག་ཅིང་ཟ། །ཞེས་སིང་ཧ་མ་སྨུག་ནག་མིན་པར་སེར་ནག་དང་། ཕྲ་མེན་རྟོག་འདུལ་ཝ་ཡི་གདོང་། །རྣལ་འབྱོར་དམར་ནག་སྲི་ཀ་མ། །ཞེས་སྲི་ལ་མ་ནག་པོ་མིན་པར་དམར་ནག་དང་། ཕྲ་མེན་གཟི་ལྡན་བྱ་རྒོད་གདོང་། །རྣལ་འབྱོར་དམར་ནག་ཀྲྀ་དྷ་མ། །མཆུ་བདར་རྐན་བརྡབས་གཡང་གཞི་གྱོན། །ཟངས་གྲི་དམར་པོ་གཡས་པ་ན། །རྒྱུ་ཞགས་དྲང་བ་གཡོན་པ་ན། །ཞེས་ཀྲྀ་ཏ་མ་དཀར་སེར་མིན་པར་དམར་ནག་ཟངས་གྲི་ཅན་དང་། ཕྲ་མེན་ས་ལེ་བྱ་རོག་གདོང་། །རྣལ་འབྱོར་དམར་ནག་ཁ་ག་མ། །མཆུ་བདར་རྐན་བརྡབས་གཡང་གཞི་གྱོན། །ཟངས་གྲི་དམར་པོ་གཡས་པ་ན། །བན་དྷ་རཀྟ་གཡོན་པ་ན། །ཞེས་ཁ་ཁྭ་མ་ཡང་ནག་པོ་མིན་པར་དམར་ནག་ཏུ་བཤད་པ་དང་། བྱཱ་ཀྲི་མ་དང་། ཤྭ་ན་མ་དང་། ཀང་ཀ་མ་དང་། ཧུ་ལུ་མ་བཞིའི་སྐུ་མདོག་ཞི་ཁྲོའི་ལུགས་འདིར་མཐུན་ནའང་། ཕྱག་མཚན་མི་འདྲ་བ་ནི། སྟིར་ཆུང་བསྐྱུར་ནས་འབྲུ་ཚུགས་ལྟ། །ཞེས་བྱཱ་ཀྲི་མ་ལག་པ་སྣོལ་བ་ཙམ་མིན་པར་སྟི་ར་ཆུང་ངུ་བསྒྱུར་བར་བཤད་པ་སོགས་མི་མཐུན་པའི་ཆ་མང་ངོ་།།

གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་སྒྱུ་འཕྲུལ་བླ་མའི་ལུགས་ལའང་ཡུལ་བརྒྱད་ཀྱི་དག་པ་སྦྱོར་ཚུལ་ནི་བསྐང་བཤགས་དང་མཐུན་ཏེ། དེ་ཉིད་ལས། ཀུན་གཞི་ཡུལ་ལས་གནས་གྱུར་པ། །ཕྲ་མེན་ཐོགས་མེད་སེང་གེའི་གདོང་། །རྣལ་འབྱོར་སེར་ནག་སེང་གེ་མ། །ཞེས་སིང་ཧ་མ་ཀུན་གཞིའི་ཡུལ་དང་། རྣམ་ཤེས་ཡུལ་ལ་གནས་གྱུར་པ། །ཕྲ་མེན་དཔའ་བོ་སྟག་གདོང་མ། །རྣལ་འབྱོར་དམར་ནག་བྱཱ་གྷྲི་མ། །ཞེས་བྱཱ་ཀྲི་མ་རྣམ་ཤེས་ཀྱི་ཡུལ་ཆོས་ཁམས་དང་། ཉོན་མོངས་ཡུལ་ལ་གནས་གྱུར་པ། །ཕྲ་མེན་རྟོག་འདུལ་ཝ་ཡི་གདོང་། །རྣལ་འབྱོར་དམར་ནག་སྲི་ཀ་མ། །ཞེས་སྲི་ལ་མ་ཉོན་ཡིད་ཀྱི་ཡུལ་ཀུན་གཞི་དང་། རེག་བྱ་ཡུལ་ལ་གནས་གྱུར་པ། །ཕྲ་མེན་བཏང་སྙོམས་སྤྱང་མོའི་གདོང་། །རྣལ་འབྱོར་མཐིང་ནག་ཤྭ་ན་མ༔ ཞེས་ཤྭ་ན་མ་རེག་བྱ་དང་། ལྟ་བྱེད་ཡུལ་ལ་གནས་གྱུར་པ། །ཕྲ་མེན་གཟི་ལྡན་བྱ་རྒོད་གདོང་། །རྣལ་འབྱོར་དམར་ནག་ཀྲྀ་དྷ་མ། །ཞེས་ཀྲྀ་ཏ་མ་གཟུགས་དང་། ཉན་བྱེད་ཡུལ་ལ་གནས་གྱུར་པ། །ཕྲ་མེན་གསལ་བྱེད་དུར་བྱའི་གདོང་། །རྣལ་འབྱོར་རྣལ་མ་ཀངྐ་མ། །ཞེས་ཀང་ཀ་མ་སྒྲ་དང་། སྣོམ་བྱེད་ཡུལ་ལ་གནས་གྱུར་པ། །ཕྲ་མེན་ས་ལེ་བྱ་རོག་གདོང་། །རྣལ་འབྱོར་དམར་ནག་ཁ་ག་མ། །ཞེས་ཁ་ཁྭ་མ་དྲི་དང་། མྱོང་བྱེད་ཡུལ་ལ་གནས་གྱུར་པ། །ཕྲ་མེན་རྫོགས་བྱེད་འུག་པའི་གདོང་། །རྣལ་འབྱོར་ལྗང་ནག་ཧུ་ལུ་མ། །ཞེས་ཧུ་ལུ་མ་རོའི་སྐྱེད་མཆེད་ལ་སྦྱར་ཏེ་གསུངས་པའི་ཕྱིར་རོ།།

དྲུག་པ་སྒོ་མ་བཞིའི་བཤགས་པ་ནི། ཕོ་བྲང་རྒྱན་དང་ལྡན་པའི་དཀྱིལ་འཁོར་དུ༔ འགུག་དང་འཆིང་དང་སྡོམ་དགྱེས་སྒོ་མ་བཞི༔ རྟ་གདོང་ལ་སོགས་ཐུགས་དང་ཅི་འགལ་བ༔ སྒོ་མ་ཕྱག་རྒྱ་བཞི་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། ལས་བྱང་ཚོར་བ་རང་གྲོལ་ལས། རྟ་གདོང་ཕག་གདོང་སེང་གདོང་སྦྲུལ་གདོང་བཞི༔ འགུག་འཆིང་སྡོམ་དགྱེས་འཕྲིན་ལས་བཞི་མཛད་མ༔ ཞེས་དང་། ཧེ་རུ་ཀ་སྙིང་རོལ་ལས། ཛ་ཛ་ལྕགས་ཀྱུ་གློ་སྙིང་འདྲེན། །ཨ་མོ་སྔོན་མོ་ཐོད་སྦྲུལ་ཞགས། །ཨ་ལི་དམར་མོ་ལྕགས་སྒྲོག་སྡོམ། །བས་ནི་ལྗང་གུ་དྲིལ་འཁྲོལ་དགྱེས། །ཞེས་གསུངས་པ་ལྟར། ཁྲག་འཐུང་འབར་བ་ལྔ་བཅུ་རྩ་བརྒྱད་དམ་དྲུག་ཅུའི་གཞལ་ཡས་ཁང་དུ་གྱུར་པའི་ཕོ༷་བྲང༷་རྒྱན༷་སྣ་ཚོགས་ཀྱིས་བརྒྱན་པ་ད༷ང་ལྡ༷ན་པ༷འི་དཀྱིལ༷་འཁོར༷་ཆེན་པོའི་ཤར་ལྷོ་ནུབ་བྱང་ཕྱོགས་བཞིའི་སྒོ་བཞིའི་དྲུང་དུ༷་ཕྱི་ལྟར་བགེགས་དང་འབྱུང་པོ་འགུག༷་པ་དང༷་། འཆི༷ང་བར་བྱེད་པ་དང༷་། སྡོམ༷་པར་བྱེད་པ་དང་། མྱོ་འབོགས་འབེབས་པར་བྱེད་པའམ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གཟུང་དང་འཁྱུད་དང་བསྡམ་པ་དང་། །གཉིས་སུ་མེད་པས་བདེ་ཆེན་པོ། །ཞེས་གསུངས་པ་བདེ་སྟོང་གཉིས་སུ་མེད་པའི་ཡེ་ཤེས་ཀྱིས་བདེ་བ་ཆེན་པོའི་ངོ་བོར་དགྱེས༷་པར་བྱེད་པའི་སྒོ་སྲུང་བའི་སྒོ༷་མ༷་བཞི༷་ནི་རྟ༷་གདོང༷་མ༷་ལ༷་སོག༷ས་པ་མ་མོ་ཆེན་མོ་བཞི་སྟེ། དེ་ཡང་། ལས་བྱང་ཚོར་གྲོལ་ལས། སྙིང་རྗེས་འདྲེན་ཕྱིར་རྟ་གདོང་ལྕགས་ཀྱུ་མ༔ བྱམས་པས་འཆིང་ཕྱིར་ཕག་གདོང་ཞགས་པ་མ༔ དགའ་བས་སྡོམ་ཕྱིར་སེང་གདོང་ལྕགས་སྒྲོག་མ༔ བཏང་སྙོམས་འབེབས་ཕྱིར་སྦྲུལ་གདོང་དྲིལ་བུ་མ༔ ཚད་མེད་བཞི་ལྡན་སྒོ་མ་བཞི་རྣམས་ལ༔ ཞེས་དང་། ཁྲག་འཐུང་རིགས་བཞིའི་ཐུགས་ལས་སྤྲུལ་པའི་ལྷ༔ རྟ་གདོང་ལ་སོགས་ཡེ་ཤེས་སྒོ་མ་བཞི༔ ཞེས་གསུངས་པར་ལྟར། ཤར་ཕྱོགས་སུ་སྙིང་རྗེ་ཚད་མེད་ཀྱི་ངོ་བོ་རང་བཞིན་གྱིས་མ་གྲུབ་པའི་གཉིས་སུ་མེད་པ་རྣམ་པར་དག་པའི་ཡེ་ཤེས་ཀྱི་རང་བཞིན་སྒོ་མ་རྟ་གདོང་མ་དཀར་མོ་ལྕགས་ཀྱུ་འཛིན་པ་དང་། ལྷོ་སྒོར་བྱམས་པ་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་ཕག་གདོང་སེར་མོ་ཞགས་པ་ཐོགས་པ་དང་། ནུབ་སྒོར་དགའ་བ་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་སེང་གདོང་དམར་མོ་ལྕགས་སྒྲོག་འཛིན་པ་དང་། བྱང་སྒོར་བཏང་སྙོམས་ཚད་མེད་ཀྱི་ངོ་བོ་རྣམ་པར་དག་པ་སྒོ་མ་རྡོ་རྗེ་སྦྲུལ་གདོང་མ་ལྗང་མོ་དྲིལ་བུ་བསྣམས་པ་ཡིན་ཞིང་། དེ་རྣམས་ཀྱི་ཐུག༷ས་དང༷་ཅི༷་འག༷ལ་བ༷་ཡི་ཉེས་ལྟུང་གི་ཚོགས་ཡོད་དོ་ཅོག་འགྱོད་པ་དྲག་པོས་སྒོ༷་མ༷་ཆེན་མོ་ཛཿཧཱུྃ་བྃ་ཧོཿཡི་འགུག་པ་དང་། འཆིང་བ་དང་། སྡོམ་པ་དང་། མྱོས་པ་བཞིའི་ཕྱ༷ག་རྒྱ༷་བཞི༷་ཡིས་འགྲོ་བའི་དོན་མཛད་པ་བཞི་ལ༷་བཤགས་ཤིང་བཟོ༷ད་པར༷་གསོ༷ལ་ལོ་ཞེས་པའོ།།

དེ་ལྟར་སྒོ་མ་བཞིའི་སྐུ་མདོག་དང་ཚད་མེད་རྣམ་བཞིའི་དག་པ་ལ་སྦྱར་ཚུལ་འདི་ནི། དྲངས་མ་ཐག་པའི་ལས་བྱང་ཚོར་གྲོལ་གྱི་ལུང་ལྟར་དང་། བརྒྱ་ཕྱག་སྡིག་སྒྲིབ་རང་གྲོལ་ལས། ཤར་སྒོར་རྟ་གདོང་དཀར་མོ་ལྕགས་ཀྱུ་འཛིན༔ སྙིང་རྗེ་ཚད་མེད་འཁོར་བ་གནས་ནས་འདྲེན༔ སྒོ་མའི་གཟུགས་ཀྱིས་འགྲོ་བའི་དོན་མཛད་པའི༔ རྟ་གདོང་ལྕགས་ཀྱུ་མ་ལ་ཕྱག་འཚལ་ལོ༔ ལྷོ་སྒོར་ཕག་གདོང་སེར་མོ་ཞགས་པ་འཛིན༔ བྱམས་པ་ཚད་མེད་ལོག་རྟོག་འཆིང་བར་བྱེད༔ སྒོ་མའི་གཟུགས་ཀྱིས་འགྲོ་བའི་དོན་མཛད་པའི༔ ཕག་གདོང་ཞགས་པ་མ་ལ་ཕྱག་འཚལ་ལོ༔ ནུབ་སྒོར་སེང་གདོང་དམར་མོ་ལྕགས་སྒྲོག་འཛིན༔ དགའ་བ་ཚད་མེད་མ་རིག་ཉོན་མོངས་སྡོམ༔ སྒོ་མའི་གཟུགས་ཀྱིས་འགྲོ་བའི་དོན་མཛད་པའི༔ སེང་གདོང་ལྕགས་སྒྲོག་མ་ལ་ཕྱག་འཚལ་ལོ༔ བྱང་སྒོར་སྦྲུལ་གདོང་ལྗང་གུ་དྲིལ་བུ་འཛིན༔ བཏང་སྙོམས་ཚད་མེད་དུག་ལྔའི་རྟོག་པ་འཇོམས༔ སྒོ་མའི་གཟུགས་ཀྱིས་འགྲོ་བའི་དོན་མཛད་པའི༔ སྦྲུལ་གདོང་དྲིལ་བུ་མ་ལ་ཕྱག་འཚལ་ལོ༔ ཞེས་གསུངས་པ་ལྟར་ལགས་སོ།།

དྲི་མེད་བཤགས་རྒྱུད་ལས། སྒོ་མ་སྔོན་མོ་ལྕགས་ཀྱུ་འཛིན། །རྟ་གདོང་མ་ལ་ཕྱག་འཚལ་ལོ། །སྒོ་མ་ནག་མོ་ཞགས་པ་འཛིན། །ཕག་གདོང་མ་ལ་ཕྱག་འཚལ་ལོ། །སྒོ་མ་དམར་མོ་ལྕགས་སྒྲོག་འཛིན། །སེང་གདོང་མ་ལ་ཕྱག་འཚལ་ལོ། །སྒོ་མ་ལྗང་གུ་དྲིལ་བུ་འཛིན། །སྤྱང་གདོང་མ་ལ་ཕྱག་འཚལ་ལོ། །ཞེས་རྟ་གདོང་མ་དཀར་མོ་མིན་པར་སྔོན་མོ་ཡིན་པ་དང་། ཕག་གདོང་མ་སེར་མོ་ཡིན་པར་ནག་མོ་ཡིན་པར་གསུངས་སོ།།

དེ་ལྟར་ཚད་མེད་བཞིར་སྦྱར་བ་དེ་དག་གི་ཁུངས་རྒྱུད་གཞན་དུ་ཡང་མཆིས་ཏེ། ཧེ་རུ་ཀ་སྙིང་རྗེ་རོལ་བ་ལས། སྦྱིན་པས་རིགས་པའི་ཀླུང་དུ་མཚོ་དྲང་ལྟར། །འཁོར་བས་འཇིགས་ནས་ཐུགས་རྗེའི་ལྕགས་ཀྱུས་འདྲེན། །དཔའ་བར་འགྲོ་བའི་ཏིང་འཛིན་དོན་མཛད་མ། །ཐུགས་རྗེས་ཤར་མཛད་རྟ་གདོང་ལྕགས་ཀྱུ་མ། །དོན་དང་མཐུན་པས་ཀུན་ཀྱང་དགའ་བར་མཛད། །བྱམས་པའི་ཞགས་པ་འཁོར་བའི་རྒྱུན་འཛིན་ཅིང་། །རིན་ཆེན་ཕྱག་རྒྱས་སེམས་ཅན་རེ་འདོད་སྐོང་། །ཡོན་ཏན་ཚོགས་རྫོགས་ཕག་གདོང་ཞགས་པ་མ། །གཞན་གྱི་དོན་དུ་སྤྱད་པའི་བདག་གི་དོན། །ཤེས་རབ་སྒྲོན་མེས་མུན་པའི་སྡུག་བསྔལ་སེལ། །དོན་གཉིས་མི་འདའ་དགའ་བའི་མཆོག །ཀུན་གཉེན་མ་རིག་ནུབ་མཛད་ཉིི་ཟླའི་སྤྱན། །སྙན་པར་སྨྲ་བས་ཀུན་ཀྱང་བཀའ་བཞིན་བྱེད། །བཏང་སྙོམས་ཐབས་མཁས་ཐུགས་རྗེས་འགྲོ་དོན་དུ། །ཕབ་ནས་རྣམ་ཤེས་ཐལ་བའི་གཟུགས་ཀྱང་འཚོ། །ཆོས་སྟོན་བག་ཆགས་བྱང་མཛད་དྲིལ་འཁྲོལ་མ། །ཞེས་གསུངས་པའི་ཕྱིར། དེར་བསྡུ་དངོས་བཞི་ལའང་སྦྱར་བ་གསལ་བ་ལྟར་རོ།།

ལུང་འདི་ལས་ནུབ་ཀྱི་སྒོ་མའི་ཐད་ནས་ཡི་གེ་རྐང་པ་འཆོལ་བ་དང་འབྲུ་འགའ་ཆད་འདུག་སྙམ་མོད། སྡེ་དགེ་ཤིང་པར་སོགས་དེ་ནང་བཞིན་ལས་གཞན་མ་རྙེད་པས་ཆད་པ་གསོ་མ་ནུས་མོད་གལ་ཆེ་བར་བསམ་ནས་ལུང་འདི་དྲངས་པ་ལགས་སོ།།

སྒོམ་རིམ་ལྷན་སྐྱེས་ཡེ་ཤེས་སུ་སྒོ་མ་བཞི་ཀའི་ཕྱག་མཚན་ལ་བྷན་དྷ་དམར་ཆེན་བསྣམས་ཡོད་པར་གསལ་བས་དོན་ལ་གཡས་རྣམས་སུ་རང་རང་གི་ཕྱག་མཚན་དང་གཡོན་རྣམས་སུ་བྷནྡྷ་བསྣམས་ཡོད་པ་ལ་གོ་དགོས་སོ།།

བསྐང་བཤགས་ཉམས་ཆགས་རང་གྲོལ་ལས། རྟག་པར་འཛིན་པ་གནས་གྱུར་པའི༔ ལྕགས་ཀྱུ་མ་ཡི་ཐུགས་དམ་བསྐང་༔ ཞེས་སོགས་གསུངས་པ་ལྟར་དེ་དང་། ཞི་ཁྲོའི་ཁྲོ་བོའི་དབང་བཤད་ལས་ནི་སྒོ་མ་བཞི་རྟག་ཆད་མུ་བཞིའི་དག་པ་ལ་སྦྱར་འདུག་ལ། དེའི་ཁུངས་ཡང་ཡེ་ཤེས་རྔམ་གློག་དང་གསང་སྙིང་སོགས་ཡིན་ངེས་ཏེ། རྔམ་གློག་གི་ལུང་གོང་གི་ཞི་བའི་སྒོ་མ་བཞིའི་སྐབས་སུ་དྲངས་པ་ལྟར་རོ།།

གསང་བ་སྙིང་པོ་སྒྱུ་འཕྲུལ་བླ་མའི་རྒྱུད་ལས། རྟ་གདོང་སྲིན་མོའི་གཡང་གཞི་གསོལ། །རྡོ་རྗེ་ལྕགས་ཀྱུ་གཡས་པ་ན། །བྷན་དྷ་རཀྟ་གཡོན་པ་ན། །ཞེས་དང་། ཕག་གདོང་ཆེན་མོའི་གཡང་གཞི་གྱོན། །ལྕགས་ཀྱི་དྲིལ་ཞགས་གཡས་པ་ན། །བྷན་དྷ་རློན་པ་གཡོན་པ་ན། །ཞེས་ཤར་གྱི་སྒོ་མ་རྟ་གདོང་མ་དང་ལྷོ་ཡི་སྒོ་མ་ཕག་གདོང་མ་གཉིས་ཞི་ཁྲོ་དང་སྤྱི་མཐུན་ལྟར་དང་། དེ་ལས། དྲེད་གདོང་ཆེན་མོའི་གཡང་གཞི་གྱོན། །ལྕགས་སྒྲོག་མེ་འབར་གཡས་པ་ན། །བྷན་དྷ་རློན་པ་གཡོན་པ་ན། །ཞེས་དང་། སྤྱང་གདོང་ཆེན་མོ་གཡང་གཞི་གྱོན། །དྲིལ་བུ་ཐལ་ཆེན་གཡས་པ་ན། །བྷན་དྷ་རཀྟ་གཡོན་པ་ན། །ཞེས་དང་། དཔལ་འབར་ཁྲོ་མོའི་རྒྱུད་ལས། མིའམ་ཅིའི་སྲིན་མོ་རྟ་མགོ་ཅན་ལག་ན་ལྕགས་ཀྱུ་ཐོགས་ཏེ། ཐམས་ཅད་འཛིན་ཅིང་ཟ་བ་ལས། བྱམས་པ་ཆེན་པོས་ལྕགས་ཀྱུ་མར་སྤྲུལ་ནས་བཏུལ་ཏེ་བཞག་གོ །ཞེས་དང་། གྲུལ་བུམ་གྱི་སྲིན་མོ་ཕག་མགོ་ཅན་ལག་ན་ཞགས་པ་ཐོགས་ཏེ། ཞེས་དང་། ལྟོ་འཕྱེའི་སྲིན་མོ་དྲེད་མགོ་ཅན་ལག་ན་ལྕགས་ཀྱི་དྲ་བ་ཐོགས་ནས། ཞེས་དང་། ཤ་ཟའི་སྲིན་མོ་སྤྱང་ཀིའི་མགོ་ཅན། ཞེས་གསུངས་པས་ནི། ནུབ་སེང་གདོང་མིན་པར་དྲེད་གདོང་དང་། བྱང་སྦྲུལ་གདོང་མིན་པར་སྤྱང་ཀིའི་གདོང་ཅན་དུ་བཤད་པ་དང་། རྡོ་རྗེ་སེམས་སྒྱུ་འཕྲུལ་དྲྭ་བ་ལས། ཕཊ་བཞིས་རྟ་དང་ཕག་གདོང་དང་། །སྦྲུལ་དང་སྤྲེའུ་རིམ་པ་བཞིན། །ལས་དང་སྐུ་མདོག་ཕྱག་མཚན་ཡང་། །རིམ་པ་བཞིན་དུ་གནས་པ་ཡིན། །ཞེས་སེང་གེའི་གདོང་ཅན་མའི་ཚབ་ཏུ་སྤྲེའུ་གདོང་ཅན་དུ་བྱས་པ་ལས་གཞན་ཞི་ཁྲོ་དང་མཐུན་པར་གསུངས་པ་དང་། ཡེ་ཤེས་རྔམ་གློག་ལས། རྟ་གདོང་གི་ཚོགས་ཞེས་བྱ་བ་དང་། ཕག་གདོང་གི་ཚོགས་ཞེས་བྱ་བ་དང་། སེང་གདོང་གི་ཚོགས་ཞེས་བྱ་བ་དང་། སྤྲེ་གདོང་གི་ཚོགས་ཞེས་བྱ་བ་ལ་སོགས་པ། ཕྲ་མེན་མའི་ཚོགས་ཤིན་ཏུ་མང་བ་དང་། ཞེས་སྔ་མ་གསུམ་ཞི་ཁྲོ་དང་མཐུན་པ་ལ་བྱང་སྦྲུལ་གདོང་གི་ཚབ་ཏུ་སྤྲེའུའི་གདོང་ཅན་དུ་བཤད་པ་ལ་སོགས་པ་རྒྱུད་སོ་སོར་སྒོ་མ་བཞིའི་མགོ་བརྙན་དང་སྐུ་མདོག་སོགས་མི་མཐུན་པ་མཐའ་ཡས་པ་མཆིས་སོ།།

ཡང་སྒོ་མ་རྟ་གདོང་མ་ལ་རྡོ་རྗེ་སྲིང་འགྲོ་མ་དང་། ཕག་གདོང་མ་ལ་རྡོ་རྗེ་གདོང་མོ་མ་དང་། སེང་གདོང་ངམ་དྲེད་གདོང་མ་ལ་རྡོ་རྗེ་འཇིག་རྟེན་མ་དང་། རྡོ་རྗེ་སྦྲུལ་གདོང་མའམ་སྤྱང་གདོང་མ་ལ་རྡོ་རྗེ་རོ་ལངས་མ་ཞེས་བསྟན་པའང་ཡོད་དེ། གསང་བ་སྙིང་པོ་ལས། རྡོ་རྗེ་སྲིང་འགྲོ་མའི་ཚོགས་དང་། རྡོ་རྗེ་གདོང་མོའི་ཚོགས་དང་། རྡོ་རྗེ་འཇིག་རྟེན་མའི་ཚོགས་དང་། རྡོ་རྗེ་རོ་ལངས་མའི་ཚོགས་རྣམས་ཞེས་གསུངས་པའི་ཕྱིར། དཔལ་མཆོག་དང་པོའི་སྔགས་ཀྱི་རྟོག་པ་ལས། རྡོ་རྗེ་ལྕགས་ཀྱུ་ཞགས་པ་དང་། །རྡོ་རྗེ་ལྕགས་སྒྲོག་དྲིལ་བུ་རྣམས། །སྒོ་ནི་བཞི་པོ་རྣམས་ལ་ནི། །སྒོ་སྲུང་བཞི་པོ་དགོད་པར་བྱ། །ཞེས་དང་། རྡོ་རྗེ་རྩེ་མོ་ལས། སྒོ་བཞི་དག་ནི་ཐམས་ཅད་དུ། །སྒོ་སྲུང་རྣམས་ནི་དགོད་པར་བྱ། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་དབབ་པ་བླ་ན་མེད། །ཅེས་དང་། དཔལ་རྡོ་རྗེ་མཁའ་འགྲོ་ལས། རྡོ་རྗེ་ལྕགས་ཀྱུ་ཞགས་པ་དང་། །རྡོ་རྗེ་ལྕགས་སྒྲོག་དྲིལ་བུ་ཉིད། །ལྷ་མོ་དག་ནི་བཞི་པོ་འདི། །ཕྱོགས་ཀྱི་པདྨར་ཡང་དག་གནས། །ཞེས་གསུངས་པ་ལྟར་གསར་རྙིང་གང་གི་རྒྱུད་དུ་ཡིན་ཡང་སྒོ་མ་བཞི་བསྟན་དུས་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་བཞི་པོ་ཡིན་པ་དང་། དེ་དག་ཕྱོགས་བཞིར་བཀོད་སྟངས་ནི་ཕལ་མོ་ཆེ་འདྲ་ཡང་སྐུ་མདོག་དང་མགོ་བརྙན་མི་འདྲ་ལ། ཕལ་ཆེ་བ་ནི་གོང་གི་ཞི་བའི་སྐབས་ཀྱི་སྒོ་མ་བཞི་བོ་ལ་གོ་བ་མང་ཞིང་རྒྱུད་ཕལ་ཆེ་བ་མཐུན་ནོ།།

བདུན་པ་དབང་ཕྱུག་མ་ཉེར་བརྒྱད་ཀྱི་བཤགས་པ་ནི། མངོན་སྤྱོད་ལས་ལས་གྲུབ་པའི་དབང་ཕྱུག་མ༔ དགེ་དང་མི་དགེ་གཉིས་ཀྱི་སྟངས་འཛིན་མ༔ མ་ཚོགས་དབང་ཕྱུག་ཐུགས་དང་ཅི་འགལ་བ༔ མ་སྲིང་རྒྱ་མཚོ་རྣམས་ལ་བཟོད་པར་གསོལ༔ ཞེས་པའི་ཚིགས་བཅད་གཅིག་གིས་བསྟན་ལ། ལས་བྱང་ཚོར་གྲོལ་ལས། ཤར་ནས་ཞི་བའི་ལས་མཛད་དབང་ཕྱུག་བདུན༔ ལྷོ་ནས་རྒྱས་པའི་ལས་མཛད་དབང་ཕྱུག་བདུན༔ ནུབ་ནས་དབང་གི་ལས་མཛད་དབང་ཕྱུག་བདུན༔ བྱང་ནས་དྲག་པོའི་ལས་མཛད་དབང་ཕྱུག་བདུན༔ ཞེས་གསུངས་པ་ལྟར། ཕྱི་ལྟར་ན་སྔར་གནས་ཡུལ་ཉེར་བཞི་ན་གནས་པའི་དབང་ཕྱུག་གི་ཆུང་མ་དང་། ཚངས་པའི་ཆུང་མ་དང་། བརྒྱ་བྱིན་གྱི་ཆུང་མ་དང་། ཁྱབ་འཇུག་གི་ཆུང་མ་དང་། དགའ་རབ་དབང་ཕྱུག་གི་ཆུང་མ་དང་། གཞོན་ནུ་གདོང་དྲུག་གི་ཆུང་མ་དང་། ཉི་མའི་ཆུང་མ་དང་། ཟླ་བའི་ཆུང་མ་ལ་སོགས་པ་རུ་དྲའི་བྲན་མོར་གྱུར་པའི་འབྱུང་པོའི་རྗེ་མོ་སྲིན་མོ་ཆེན་མོ་གཡག་གདོང་མ་ལ་སོགས་པའི་མ་མོ་དང་ཕྲ་མེན་མ་རྣམས་བཅོམ་ལྡན་འདས་དཔལ་ཆེན་པོ་ཧེ་རུ་ཀས་བཏུལ་ཏེ་མངོ༷ན་སྤྱོད༷་དྲག་པོའི་ལས་ཀྱི་ཕོ་ཉར་བཀོལ་བའི་འཇིག་རྟེན་གྱི་ལས༷་ལ༷ས་གྲུབ༷་པ༷འི་དབ༷ང་ཕྱུག༷་མ༷་ཞི་ཁྲོའི་དཀྱིལ་འཁོར་གྱི་ཤར་གྱི་མུ་རན་དུ་སྒྲུབ་པ་པོའི་ཉོན་མོངས་པ་དང་། ནད་དང་སྡིག་སྒྲིབ་ལ་སོགས་པ་ཞི་བའི་ལས་བྱེད་པ་ལ་དབང་བའི་དབང་ཕྱུག་ཆེན་པོའི་ཆུང་མ་བྱོ་མིའི་སྲིན་མོ་གཡག་གདོང་མ་སྨུག་པོ་རྡོ་རྗེ་དང་བྷནྡྷ་འཛིན་པ་དང་། ཚངས་པའི་ཆུང་མ་ཚངས་པ་མོ་སྦྲུལ་གདོང་མ་སེར་མོ་རྡོ་རྗེ་དང་པདྨ་འཛིན་པ་དང་། ལྷ་ཆེན་དགའ་རབ་དབང་ཕྱུག་གི་ཆུང་མ་འཁྲུག་མོའམ་ལྷ་ཆེན་མོ་གཟིག་གདོང་མ་ལྗང་གུ་རྡོ་རྗེ་དང་ཏྲི་ཤཱུལ་འཛིན་པ་དང་། ཁྱབ་འཇུག་གི་ཆུང་མ་འཇུག་སྲེད་མོའམ་གཏོགས་འདོད་སྲེ་མོང་མགོ་ཅན་སྔོན་མོ་རྡོ་རྗེ་དང་འཁོར་ལོ་འཛིན་པ་དང་། གཞོན་ནུ་གདོང་དྲུག་གི་ཆུང་མ་གཞོན་ནུ་མོ་དྲེད་གདོང་དམར་མོ་རྡོ་རྗེ་དང་མདུང་ཐུང་འཛིན་པ་དང་། ལྷའི་དབང་པོ་བརྒྱ་བྱིན་གྱི་ཆུང་མ་དབང་མོ་དོམ་མགོ་དཀར་མོ་རྡོ་རྗེ་དང་རྒྱུ་ཞགས་འཛིན་པ་དང་། སྲིན་པོའི་བུ་བི་ཤ་ན་ནག་པོ་རྣམ་པར་འཇིག་བྱེད་ཆེན་པོའི་ཆུང་མ་རྡོ་རྗེ་ནག་མོ་ཆེན་མོའམ་སྒོ་མ་རྡོ་རྗེ་ཁུ་བྱུག་མགོ་ཅན་དཀར་མོ་རྡོ་རྗེ་དང་ལྕགས་ཀྱུ་འཛིན་པ་དང་བཅས་བདུན་པོ་གནས་པར་གསུངས་ཏེ། ལས་བྱང་ཚོར་གྲོལ་ལས། ཤར་ཕྱོགས་ཞི་བའི་ལས་མཛད་བདུན༔ སྲིན་མོ་གཡག་གདོང་རྡོ་རྗེ་སྨུག༔ ཚངས་པ་སྦྲུལ་གདོང་པདྨ་སེར༔ ལྷ་ཆེན་གཟིག་གདོང་ཏྲི་ཤུལ་ལྗང་༔ གཏོགས་འདོད་སྲེ་གདོང་འཁོར་ལོ་སྔོ༔ གཞོན་ནུ་དྲེད་གདོང་མདུང་ཐུང་དམར༔ བརྒྱ་བྱིན་དོམ་མགོ་རྒྱུ་ཞགས་དཀར༔ ཞེས་དང་། དཀྱིལ་འཁོར་ཕྱི་རིམ་ཤར་སྒོ་རུ༔ རྡོ་རྗེ་ཁུ་བྱུག་ལྕགས་ཀྱུ་དཀར༔ ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། སྲིན་མོ་སྨུག་ནག་ཐོད་རློན་འཆང་། །ཚངས་པ་དམར་སེར་པདྨ་བསྣམས། །ལྷ་ཆེན་དཀར་ལྗང་ཏྲི་ཤཱུ་ལ། །གཏོགས་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་ཐུང་འཕེན། །བརྒྱ་བྱིན་དཀར་མོ་ཨིནྡྲ་གདེངས། །ཞེས་དང་། རྡོ་རྗེ་ནག་མོ་ལྕགས་ཀྱུ་འཛིན༔ ཞེས་གསུངས་པའི་ཕྱིར་རོ།།

དེ་ཡང་ལས་བཞི་དང་དཀྱིལ་འཁོར་གྱི་ཕྱོགས་མདོག་གི་དབང་གིས་དང་། ཤར་སྐྱོང་གི་མ་མོ་ཡིན་པའི་དབང་གིས་དེ་ལྟར་མ་མོ་ཐམས་ཅད་ཀྱི་ཕྱག་ན་ཤར་ཕྱོགས་རྡོ་རྗེའི་རིགས་ཀྱི་མཁའ་འགྲོའི་ཕྱག་མཚན་རྡོ་རྗེ་ཡོད་པ་དང་། སྐུ་མདོག་གི་ཆ་ལ་དཀྱིལ་འཁོར་གྱི་མདོག་ཤར་དཀར་པོར་གྱུར་པའི་དཀར་ཆ་ཡོད་པས་དཀར་མོ་ཞེས་བརྗོད་པ་ཡང་ཡིན་ཏེ། ལས་བྱང་ཚོར་གྲོལ་ལས། དཀར་མོ་ཉོན་མོངས་ཞི་བའི་ལས་མཛད་བདུན༔ ཞེས་དང་། ཞི་ཁྲོའི་བསྐང་བཤགས་ལས། དཀར་མོ་མ་བདུན་ཐུགས་དམ་བསྐང་༔ ཞེས་གསུངས་པའི་ཕྱིར། ཤར་ཕྱོགས་ཀྱི་དབང་མོ་བདུན་པོའི་སྐུ་མདོག་གི་ཆ་ལ་དཀར་པོ་ཡོད་པ་དང་ཐམས་ཅད་ཀྱི་ཕྱག་ན་རྡོ་རྗེ་ཡོད་པ་ནི་བརྒྱ་ཕྱག་ལྟར་རོ།།

ཞི་ཁྲོའི་དཀྱིལ་འཁོར་གྱི་ལྷོ་ཡི་མུ་རན་དུ་སྒྲུབ་པ་པོའི་ཚེ་དང་བསོད་ནམས་དང་ཡོན་ཏན་སོགས་རྒྱས་པར་བྱེད་པ་ལ་དབང་ཐོབ་པའི་དབང་ཕྱུག་མ་ལ་འཇུག་སྲེད་ཀྱི་ཆུང་མ་དམར་མོའི་མིང་ཅན་རྡོ་རྗེ་ཕ་ཝང་མགོ་ཅན་སེར་མོ་རིན་པོ་ཆེ་དང་སྤུ་གྲི་འཛིན་པ་དང་། ཟླ་བའི་ཆུང་མ་ཞི་བ་ཆུ་སྲིན་གདོང་ཅན་དམར་མོ་རིན་ཆེན་དང་བུམ་པ་འཛིན་པ་དང་། ཉི་མའི་ཆུང་མ་བདུད་རྩི་སྡིག་པའི་མགོ་ཅན་དམར་མོ་རིན་ཆེན་དང་པདྨ་འཛིན་པ་དང་། བདུད་གསོད་བྱེད་ཀྱི་ཆུང་མ་གསོད་བྱེད་མོ་ཟླ་བ་ཁྲ་གདོང་ཅན་དཀར་མོ་རིན་ཆེན་དང་རྡོ་རྗེ་འཛིན་པ་དང་། བེ་ཅོན་གྱི་ཆུང་མ་བེ་ཅོན་ཝ་གདོང་ཅན་ལྗང་མོ་རིན་ཆེན་དང་དབྱུག་ཏོ་འཛིན་པ་དང་། སྲིན་པོ་ལང་ཀ་མགྲིན་བཅུའི་ཆུང་མ་སྲིན་མོ་སྟག་གདོང་མ་དམར་མོའམ་ནག་མོ་རིན་ཆེན་དང་ཐོད་ཁྲག་འཛིན་པ་དང་། སྲིན་པོའི་བུ་ད་ཤ་གྲཱྀ་ཝ་སྟེ་མགྲིན་བཅུའི་ཆུང་མ་ར་མགོ་དམར་སེར་རམ་སྒོ་མ་ར་གདོང་མ་སེར་མོ་རིན་ཆེན་དང་ཞགས་པ་འཛིན་པ་དང་བཅས་བདུན་པོ་གནས་པར་གསུངས་ཏེ། ལས་བྱང་ཚོར་གྲོལ་ལས། ལྷོ་རུ་རྒྱས་པའི་ལས་མཛད་བདུན༔ རྡོ་རྗེ་ཕ་ཝང་སྤུ་གྲི་སེར༔ ཞི་བ་ཆུ་སྲིན་བུམ་པ་དམར༔ བདུད་རྩི་སྡིག་གདོང་པདྨ་དམར༔ ཟླ་བ་ཁྲ་མགོ་རྡོ་རྗེ་དཀར༔ བེ་ཅོན་ཝ་གདོང་དབྱུག་ཏོ་ལྗང་༔ སྲིན་མོ་སྟག་ཐོད་ཁྲག་དམར༔ ཞེས་དང་། དཀྱིལ་འཁོར་ཕྱི་རིམ་ལྷོ་སྒོ་རུ༔ རྡོ་རྗེ་ར་གདོང་ཞགས་པ་སེར༔ ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། རྡོ་རྗེ་སེར་མོ་ཙནྡན་འཐུང་། །བདུད་རྩི་དམར་མོ་པདྨ་བསྣམས། །ཟླ་བ་དཀར་མོ་པུཎྜ་རཱི། །བེ་ཅོན་ལྗང་གནག་དབྱུག་ཏོ་འཕྱར། །སྲིན་མོ་དམར་མོ་དུང་ཁྲག་འཐུང་། །ཞེས་དང་། རྡོ་རྗེ་སེར་མོ་ར་མགོ་ཞགས། །ཞེས་གསུངས་པའི་ཕྱིར། ཡང་ལས་བཞི་དང་དཀྱིལ་འཁོར་གྱི་ཕྱོགས་མདོག་གི་དབང་གིས་དང་། ལྷོ་སྐྱོང་གི་མ་མོ་ཡིན་པའི་དབང་གིས་ལྷོ་ཕྱོགས་ཀྱི་དབང་མོ་བདུན་པོའི་སྐུ་མདོག་གི་ཆ་ལ་དཀྱིལ་འཁོར་ལྷོ་སེར་གྱི་ཆ་སེར་པོ་དང་ཐམས་ཅད་ཀྱི་ཕྱག་ན་རིན་ཆེན་རིགས་ཀྱི་མཁའ་འགྲོའི་ཕྱག་མཚན་རིན་པོ་ཆེ་ཡོད་པ་དང་། སེར་མོ་ཞེས་བརྗོད་པ་ཡང་ཡིན་ཏེ། ལས་བྱང་ཚོར་གྲོལ་ལས། སེར་མོ་སྐུ་གསུམ་རྒྱས་པའི་ལས་མཛད་བདུན༔ ཞེས་དང་། ཞི་ཁྲོའི་བསྐང་བཤགས་ལས། སེར་མོ་མ་བདུན་ཐུགས་དམ་བསྐང་༔ ཞེས་གསུངས་པའི་ཕྱིར། ཐམས་ཅད་ཀྱི་སྐུ་མདོག་ལ་སེར་པོའི་ཆ་ཡོད་པ་དང་། ཕྱག་ན་རིན་པོ་ཆེ་ཡོད་པ་ཡང་བརྒྱ་ཕྱག་ལྟར་རོ།།

ཞི་ཁྲོའི་དཀྱིལ་འཁོར་གྱི་ནུབ་ཀྱི་མུ་རན་དུ་སྒྲུབ་པ་པོ་ལ་མཆོག་དང་ཐུན་མོང་གི་དངོས་གྲུབ་དང་། ལྷ་ཀླུ་མི་ཡི་ལོངས་སྤྱོད་མངའ་ཐང་སོགས་དབང་དུ་འདུ་བར་བྱེད་པའི་ལས་ལ་དབང་བའི་དབང་ཕྱུག་མ་ལ་ལྷ་ཆེན་མ་ཧཱ་ཀཱ་ལའི་ཆུང་མ་ཟ་བ་མོ་བྱ་རྒོད་ཀྱི་མགོ་ཅན་ལྗང་མོ་པདྨ་དང་བེ་ཅོན་ཐོགས་པ་དང་། དགའ་བྱེད་དབང་ཕྱུག་སྟེ་ནོར་སྦྱིན་པས་དགའ་བར་བྱེད་པ་རྣམ་ཐོས་སྲས་ཀྱི་ཆུང་མ་དགའ་བ་མོ་རྟ་གདོང་ཅན་དམར་མོ་པདྨ་དང་བམ་རོའི་ཁོག་ཆེན་འཛིན་པ་དང་། ལྷ་སྟོབས་བཟང་གི་ཆུང་མ་ར་རོ་ཁྲག་འཐུང་མྱོས་མའམ་སྟོབས་ཆེན་ཁྱུང་གདོང་ཅན་དཀར་མོ་པདྨ་དང་དབྱུག་ཏོ་འཛིན་པ་དང་། དབང་ཕྱུག་གི་བུ་བྷྲཾ་གི་རི་ཏིའི་ཆུང་མ་གཅིག་པུར་སྤྱོད་མའམ་སྲིན་མོ་ཁྱི་གདོང་ཅན་དམར་མོ་པདྨ་དང་རྡོ་རྗེ་འཛིན་པ་དང་། འདོད་ལྷ་ཀ་མ་དེ་ཝའི་ཆུང་མ་ཡིད་འཕྲོག་མའམ་དཔལ་མོ་འདོད་པ་པུ་ཤུད་ཀྱི་མགོ་ཅན་དམར་མོ་པདྨ་དང་མདའ་གཞུ་འགེངས་པ་དང་། ནོར་སྲུང་གི་ཆུང་མ་གྲུབ་མོའམ་ནོར་སྲུང་ཤ་བའི་གདོང་ཅན་མ་ལྗང་གུ་པདྨ་དང་བུམ་པ་འཛིན་པ་དང་། སྲིན་པོའི་བུ་སུམ་པ་ཀ་ར་བུམ་སྣའི་ཆུང་མ་བུམ་སྣ་སྔོ་ནག་མའམ་སྒོ་མ་སེང་གདོང་མ་དམར་མོ་ལྕགས་སྒྲོག་འཛིན་པ་དང་བཅས་བདུན་པོ་གནས་པར་གསུངས་ཏེ། ལས་བྱང་ཚོར་གྲོལ་ལས། ནུབ་ཏུ་དབང་གི་ལས་མཛད་བདུན༔ ཟ་བ་བྱ་རྒོད་བེ་ཅོན་ལྗང༔ དགའ་བ་རྟ་གདོང་ཁོག་ཆེན་དམར༔ སྟོབས་ཆེན་ཁྱུང་གདོང་དབྱུག་ཏོ་དཀར༔ སྲིན་མོ་ཁྱི་གདོང་རྡོ་རྗེ་དམར༔ འདོད་པ་པུ་ཤུད་མདའ་འགེངས་དམར༔ ནོར་སྲུང་ཤ་མགོ་བུམ་པ་ལྗང་༔ ཞེས་དང་། དཀྱིལ་འཁོར་ཕྱི་རིམ་ནུབ་སྒོ་རུ༔ རྡོ་རྗེ་སེང་གདོང་ལྕགས་སྒྲོག་དམར༔ ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། ཟ་བ་ལྗང་ནག་བ་སུ་འདྲེན། །དགའ་བ་དམར་མོ་ཀ་ཏར་འཆང་། །སྟོབས་ཆེན་དཀར་མོ་གཤོལ་འཛིན་མ། །རྡོ་རྗེ་སེར་མོ་སྤུ་གྲི་གཅོད། །འདོད་པ་དམར་མོ་མདའ་གཞུ་འཛིན། །ནོར་སྲུང་དཀར་མོ་བུམ་པ་འཛིན། །ཞེས་དང་། རྡོ་རྗེ་དམར་མོ་ལྕགས་སྒྲོག་སྡོམ། །ཞེས་གསུངས་པའི་ཕྱིར་རོ།།

ཡང་ལས་བཞི་དང་དཀྱིལ་འཁོར་གྱི་ཕྱོགས་མདོག་གི་དབང་གིས་དང་། ནུབ་སྐྱོང་གི་མ་མོ་ཡིན་པའི་དབང་གིས་ནུབ་ཕྱོགས་ཀྱི་དབང་མོ་བདུན་པོའི་སྐུ་མདོག་གི་ཆ་ལ་དམར་པོ་དང་ཐམས་ཅད་ཀྱི་ཕྱག་ན་ནུབ་པདྨ་རིགས་ཀྱི་མཁའ་འགྲོའི་ཕྱག་མཚན་པདྨ་ཡོད་པས་ཀྱང་དམར་མོ་ཞེས་བརྗོད་པ་ཡིན་ཏེ། ལས་བྱང་ཚོར་གྲོལ་ལས། དམར་མོ་མཆོག་དང་ཐུན་མོང་དབང་སྡུད་བདུན༔ ཞེས་དང་། ཞི་ཁྲོའི་བསྐང་བཤགས་ལས། དམར་མོ་མ་བདུན་ཐུགས་དམ་བསྐང་༔ ཞེས་གསུངས་པའི་ཕྱིར། དོན་དེ་ཡང་བརྒྱ་ཕྱག་ལྟར་རོ།།

དེ་བཞིན་དུ་ཞི་ཁྲོའི་དཀྱིལ་འཁོར་གྱི་བྱང་གི་མུ་རན་དུ་སྒྲུབ་པ་པོ་ལ་གཞུག་པ་དང་། སྐྲོད་པ་དང་། བྱེར་བ་དང་། གནོན་པ་དང་། རྡུང་པ་དང་། སྣུན་པ་དང་། གཟིར་བ་དང་། འཕྲོག་པ་དང་། རྡུལ་དུ་བརླག་པ་ལ་སོགས་པ་དྲག་པོ་མངོན་སྤྱོད་ཀྱི་ལས་ཀྱི་དངོས་གྲུབ་སྩོལ་བ་ལ་དབང་བའི་དབང་ཕྱུག་མ་ལ་རླུང་ལྷའི་ཆུང་མ་རླུང་མོའམ་རླུང་ལྷ་སྤྱང་ཀིའི་གདོང་ཅན་ལྗང་མོ་རྒྱ་གྲམ་དང་རང་རྟགས་བ་དན་འཕྱར་བ་དང་། མེ་ལྷའི་ཆུང་མ་མེ་མོ་སྐྱིན་གྱི་གདོང་ཅན་དམར་མོ་རྒྱ་གྲམ་དང་གསལ་ཤིང་འཛིན་པ་དང་། ས་བདག་ཕག་ཆེན་གྱི་ཆུང་མ་ཕག་མོ་ཕག་གདོང་ཅན་ནག་མོ་རྒྱ་གྲམ་དང་མཆེ་བའི་ཞགས་པ་འཛིན་པ་དང་། གཤིན་རྗེའི་ཆུང་མ་རྒན་བྱེད་མོའམ་རྡོ་རྗེ་ཁྭ་གདོང་ཅན་དམར་མོ་རྒྱ་གྲམ་དང་ཞིང་ཆུང་འཛིན་པ་དང་། ཚོགས་བདག་གླང་སྣའི་ཆུང་མ་སྣ་ཆེན་མོ་གླང་ཆེན་གྱི་གདོང་ཅན་ལྗང་མོ་རྒྱ་གྲམ་དང་བམ་ཆེན་འཛིན་པ་དང་། ཆུ་ལྷའི་ཆུང་མ་ཆུ་ལྷ་མོ་སྦྲུལ་གདོང་ཅན་ལྗང་མོ་རྒྱ་གྲམ་དང་སྦྲུལ་ཞགས་འཛིན་པ་དང་། སྲིན་པོའི་བུ་ར་མན་ཏ་འབོད་སྒྲོག་གམ་གསུས་པོ་ཆེ་ཡི་ཆུང་མ་གསུས་འཛིན་སེར་ནག་མའམ་སྒོ་མ་རྡོ་རྗེ་སྦྲུལ་གདོང་མ་ལྗང་གུ་དྲིལ་བུ་འཛིན་པ་དང་བཅས་བདུན་པོ་གནས་པར་གསུངས་ཏེ། ལས་བྱང་ཚོར་གྲོལ་ལས། བྱང་ནས་དྲག་པོའི་ལས་མཛད་བདུན༔ རླུང་ལྷ་སྤྱང་གདོང་བ་དན་ལྗང་༔ མེ་མོ་སྐྱིན་གདོང་གསལ་ཤིང་དམར༔ ཕག་མོ་ཕག་གདོང་མཆེ་ཞགས་ནག༔ རྡོ་རྗེ་ཁྭ་གདོང་ཞིང་ཆུང་དམར༔ སྣ་ཆེན་གླང་ཆེན་བམ་ཆེན་ལྗང་༔ ཆུ་ལྷ་སྦྲུལ་གདོང་སྦྲུལ་ཞགས་ལྗང་༔ ཞེས་དང་། དཀྱིལ་འཁོར་ཕྱི་རིམ་བྱང་སྒོ་རུ༔ རྡོ་རྗེ་སྦྲུལ་གདོང་དྲིལ་བུ་ལྗང་༔ ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། རླུང་ལྷ་སྔོན་མོ་བ་དན་འཕྱར། །གསོད་བྱེད་དཀར་མོ་རལ་གྲིའི་སོ། །མེ་མོ་དམར་མོ་གསལ་ཤིང་འཆང་། །ཕག་མོ་ནག་མོ་མཆེ་ཞགས་ཅན། །རྒན་བྱད་དམར་མོ་ཞིང་ཆུང་ཟ། །སྣ་ཚོགས་དཀར་མོ་ཐོད་ཁྲག་འཐུང་། །ཆུ་ལྷ་དམར་སེར་སྦྲུལ་ཞགས་འཛིན། །ཞེས་དང་། རྡོ་རྗེ་ལྗང་ནག་དྲིལ་འཁྲོལ་འགྱིང་། །ཞེས་གསུངས་པའི་ཕྱིར་རོ།།

ཡང་ལས་བཞི་དང་དཀྱིལ་འཁོར་གྱི་ཕྱོགས་མདོག་གི་དབང་གིས་དང་། བྱང་སྐྱོང་གི་མ་མོ་ཡིན་པའི་དབང་གིས་བྱང་ཕྱོགས་ཀྱི་དབང་མོ་བདུན་པོའི་སྐུ་མདོག་གི་ཆ་ལ་ལྗང་གུ་དང་ཐམས་ཅད་ཀྱི་ཕྱག་ན་བྱང་ཕྱོགས་ལས་ཀྱི་རིགས་ཀྱི་མཁའ་འགྲོའི་ཕྱག་ཚན་རྡོ་རྗེ་རྒྱ་གྲམ་ཡོད་པས་ཀྱང་ལྗང་མོ་ཞེས་བརྗོད་པ་ཡིན་ཏེ། ལས་བྱང་ལས། ལྗང་གུ་དྲག་པོའི་འཕྲིན་ལས་སྒྲུབ་མཛད་བདུན༔ ཞེས་དང་། ཞི་ཁྲོའི་བསྐང་བཤགས་ལས། ལྗང་དག་མ་བདུན་ཐུགས་དམ་བསྐང་༔ ཞེས་གསུངས་པའི་ཕྱིར། དེ་ཡང་བརྒྱ་ཕྱག་ལྟར་རོ།།

དེ་ལྟར་ཕྱི་སྲིན་མོ་ཉེར་བརྒྱད་འདུལ་བའི་ཡེ་ཤེས་སྤྲུལ་པའི་མཁའ་འགྲོ་དབང་ཕྱུག་མ་ཉེར་བརྒྱད་དང་། ནང་ལྟར་ན་ཧེ་རུ་ཀ་སྙིང་རོལ་ལས། སྒལ་ཚིགས་དབང་ཕྱུག་མ་ཉི་ཤུ་རྩ་བརྒྱད། བ་སྤུ་ཉག་མ་རེ་རེ་སྤྲུལ་པའི་ཕྲ་མེན་མ་དང་ཕོ་ཉ། ཡན་ལག་སྒོ་བ་བཞི། སྤྲུལ་པ་ཐུགས་ཀྱི་རྒྱན་ཏེ། སྔགས་མ་ཧཱ་ཡོ་གའོ། །ཞེས་གསུངས་པ་ལྟར་སྒལ་ཚིགས་ཉེར་བརྒྱད་ཀྱི་རང་བཞིན་རྣམ་པར་དག་པ་བདེ་སྟོང་དོན་དམ་པའི་ཡེ་ཤེས་ཀྱི་ཆ་ལ་དབང་མོ་ཉེར་བརྒྱད་དུ་བཏགས་པ་ཙམ་དུ་གནས་སོ།།

དེ་ལྟར་ཞི་རྒྱས་དབང་དང་མངོན་སྤྱོད་ཀྱི་ལས་བྱེད་པ་ལ་དབང་ཐོབ་པའི་སྒོ་ནས་སྒྲུབ་པ་པོས་ལས་དགེ༷་བ་ནི་གང་དང༷་མི༷་དགེ༷་བ་ནི་གང་ཞེས་དགེ་མི་དགེ་གཉིས༷་ཀྱི༷་གང་བྱ་བཞིན་ཡོད་དཔྱད་དེ་ལེགས་པ་དང་ཉེས་པའི་སྟང༷ས་སམ་མཚམས་འཛི༷ན་མཁན་མ་རུ་གྱུར་པ༷་ཡི་མ༷་མོའི་ཚོ༷གས་དབ༷ང་ཕྱུག༷་མ་ཉི་ཤུ་རྩ་བརྒྱད་པོ་རྣམས་ཀྱི་ཐུག༷ས་དང༷་ཅི༷་འག༷ལ་བ༷འི་ཉེས་ལྟུང་གི་དངོས་པོ་རྣམས་འགྱོད་པ་ཆེན་པོས་སྒྲུབ་པ་པོ་ལ་མ༷་དང་སྲིང༷་མོ་ལྟ་བུ་སྙིང་བརྩེ་ཞིང་དུས་རྟག་ཏུ་བྱ་ར་མཛད་པའི་དབང་ཕྱུག་མ་མ་མོ་དང་། སྲིན་མོ་དང་། ཕྲ་མེན་མ་དང་། ཤ་ཟ་མོ་ལ་སོགས་པའི་འཁོར་ཚོགས་རྒྱ༷་མཚོ༷་ལྟ་བུ་རྒྱ་ཆེ་བ་དང་བཅས་པའི་ཚོགས་རྣམ༷ས་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

དབང་ཕྱུག་མ་ཉེར་བརྒྱད་ཀྱི་ངོས་འཛིན་དང་མགོ་བརྙན་དང་། སྐུ་མདོག་དང་། ཕྱག་མཚན་རྣམས་ནི་རྒྱུད་རྣམས་སུ་མི་མཐུན་པ་མཐའ་ཡས་པ་ཤིག་མཆིས་ལ། འདིར་ཞི་ཁྲོ་རང་གཞུང་ལྟར་བྱས་ཤིང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་ལུང་རྒྱབ་རྟེན་ལྟ་བུར་དྲངས་མོད་སྒྱུ་དྲྭ་འདིར་ཡང་མི་འདྲ་བ་ཡོད་པ་རྣམས་ཡིག་ཚོགས་སྐྱུང་ཕྱིར་གསལ་བཤད་མ་བགྱིས། ཞི་ཁྲོ་འདི་ཉིད་གཞི་བཟུང་སྟེ་རྡོར་སེམས་སྒྱུ་དྲྭའི་ལུང་རིམ་འདེད་བགྱིས་ཚེ་ལྷོ་ཡི་མ་བདུན་གྱི་ཐད་ལ་སྒོ་མ་ཕུད་པས་ལྔ་ལས་དྲུག་མེད་པར། ཟླ་བ་དཀར་མོ་པུཎྜ་རཱི། །ཞེས་པ་ཟླ་བ་ཁྲ་མགོ་ཡིན་པའི་དབང་དུ་བཏང་ན་ཞི་བ་ཆུ་སྲིན་གདོང་ཅན་མི་འདུག་ལ། ཟླ་བ་དཀར་མོ་པུཎྜ་རཱི། །ཞེས་པ་དེ་ཉིད་ཟླ་བའི་ཆུང་མ་ཞི་བ་མོ་ཡིན་པའི་དབང་དུ་བཏང་ན་ཟླ་བ་ཁྲ་མགོ་མི་འདུག་ཅིང་། འོག་ཏུ་བྱང་གི་མ་བདུན་གྱི་སྐབས་སུ། གསོད་བྱེད་དཀར་མོ་རལ་གྲིའི་སོ། །ཞེས་པའི་མ་བདུན་ལས་ལྷག་པོ་ཞིག་བྱུང་བ་དེ་ལྷོ་རུ་འཛུད་པར་བྱས་ན་ལྷོ་ལ་བདུན་ཚང་ཞིང་དབང་ཕྱུག་མ་ཉེར་བརྒྱད་དེ་ཁྲིགས་སེར་འོང་བས་གསོད་བྱེད་མོ་དེ་ཟླ་བ་ཁྲ་མགོ་ཡིན་ཤག་བགྱིས་ཏེ་ལྷོ་རུ་བཀོད་ཡོད་དོ།།

གཡག་ཟེ་པདྨ་དབང་ཕྱུག་གི་ཞི་ཁྲོའི་ལས་བྱང་འགྲེལ་བ་ཀུན་བཟང་དགོངས་རྒྱན་ལས། ཟླ་བའི་སྲིང་མོའི་ཚུལ། སྲིད་གསུམ་དབྱིངས་སུ་སྒྲོལ་བའི་ཁྲ་མགོ་ཅན། ཞེས་ཟླ་བ་ཁྲ་མགོ་མ་ཟླ་བའི་སྲིང་མོ་དང་། ཞི་བ་ཆུ་སྲིན་མགོ་ཟླ་བའི་ཆུང་མ་ཡིན་པར་བགྱིས་འདུག་ལ། གཞན་དུ་ཟླ་བའི་སྲིང་མོ་ཟེར་བ་མ་མཐོང་ངོ་།།

རྡོ་སེམས་སྒྱུ་དྲྭ་དང་མཐུན་པར་གསང་སྙིང་དང་། གསང་བ་སྙིང་པོའི་རྒྱུད་སྒྱུ་འཕྲུལ་བླ་མ་རྣམས་ཞལ་མཐུན་པར་ཞི་ཁྲོ་ལྟར་གྱི་ནུབ་ཀྱི་དབང་ཕྱུག་མའི་ཐོག་མ་ཟ་བ་བྱ་རྒོད་མགོ་དེ་ལྷོའི་དབང་ཕྱུག་མར་བྱས་ཏེ་ཡར་བསྣན་ནས་ལྷོར་དྲུག་དང་། ལྷག་མ་ནུབ་ཀྱི་ལྔའི་སྟེང་དུ་ཞི་ཁྲོ་ལྟར་གྱི་བྱང་གི་རླུང་ལྷ་སྤྱང་གདོང་མ་བསྣན་ནས་དྲུག་བྱས་པ་དང་། བྱང་དུ་གསོད་བྱེད་མོ་ལྷག་པོར་ཡོད་པས་དྲུག་ཏུ་བྱས་ཡོད་པ་རྒྱུད་རྣམས་རང་གཞུང་དུ་གསལ་ལ། གསང་བདག་དགོངས་རྒྱན་སོགས་གསང་བ་སྙིང་པོའི་འགྲེལ་བ་རྣམས་སུ་ཡང་དེ་ཇི་ལྟ་བ་བཞིན་དུ་བྱས་འདུག་གོ།

གཞུང་དེ་གསུམ་ལྟར་གཡག་གདོང་མ་ནས་རིམ་དེད་བགྱིས་ན་ཞི་ཁྲོའི་ལུགས་འདིར་ཤར་ལྷོ་ནུབ་བྱང་གི་དབང་ཕྱུག་མའི་ཕྱོགས་འཆོལ་བས་གོང་ལྟར་གསོད་བྱེད་མོ་ལྷོར་བཀོད་པ་ལྟར་བྱས་ན་ལེགས་སྙམ་པས་དཔྱད་དོ།།

ཞི་ཁྲོའི་འཛབ་བཟླས་ཚངས་པའི་སྒྲ་དབྱངས་འཁོར་འདས་རང་གྲོལ་དང་། བསྐྱེད་རིམ་ལྷན་ཐབས་འཛབ་དགོངས་གྲགས་སྟོང་ཚངས་དབྱངས་བཟླས་ཚད་རང་གྲོལ་ཟེར་བ་སོགས་འཛབ་ཀྱི་སྐབས་ལས་ནི་དབང་ཕྱུག་མ་ཉེར་བརྒྱད་ཀྱི་སྙིང་པོའི་སྔགས་ལེགས་སྦྱར་དག་ནི་གསང་སྙིང་སོགས་ཀྱི་གོ་རིམ་ལྟར་འདུག་པ་ལས་ཞི་ཁྲོའི་དཀྱུས་ལུགས་དང་མི་མཐུན་པ་ནི་ཅུང་མཚར་རོ།།

འཕྲད་ཚད་རང་གྲོལ་སྤྲོས་བཅས་བུམ་དབང་ཆེན་མོ་ལས་ནི་དབང་ཕྱུག་ཉེར་བརྒྱད་ཞི་ཁྲོའི་ལས་བྱང་དང་བརྒྱ་ཕྱག་རྣམས་དང་ཆེར་མི་མཐུན་ཞིང་། དྲེད་གདོང་དང་། དོམ་མགོ་དང་། ཕ་ཝང་མགོ་དང་། ཁྭ་གདོང་ཅན་དང་། ཁུ་བྱུག་མགོ་དང་། སྒོ་མ་སྦྲུལ་གདོང་མ་བཅས་མེད་ལ། དེ་དག་གི་ཚབ་ཏུ་ཁྱུང་མགོ་གཉིས་དང་། ཁྲ་མགོ་གཉིས་དང་། ཝ་མགོ་གཉིས་དང་། བ་ལང་གདོང་ཅན་དང་། འུག་པའི་གདོང་ཅན་དང་། ཀང་ཀའི་མགོ་ཅན་བཅས་བཤད་པ་དང་གོ་རིམ་ཡང་ཇི་བཞིན་སྒྲིག་མི་བཏུབ་པ་ཞིག་ཏུ་བགྱིས་འདུག་པས་དཔྱད་པར་བྱའོ།།

ལྷ་མོ་སྒྱུ་འཕྲུལ་དྲྭ་བ་ཆེན་མོ་ལས། གཡག་ཆེན་མགོ་ཡིས་ཞལ་གདངས་ཤིང་། །སྒྲ་དང་བཅས་པས་བཀའ་བཞིན་བྱེད། །ཅེས་པ་ནས། ལྗང་ནག་གསུས་འཛིན་ཆགས་པས་འགྱིང་། །ཞེས་པའི་བར་དུ། དམར་སེར་མི་སྲིན་གཡག་ཆེན་མགོ་དང་། དམར་སྐྱ་ཚངས་མ་སྦྲུལ་ཆེན་མགོ་དང་། སེར་སྐྱ་ཁྲོ་མོ་གཟིག་ཆེན་མགོ་དང་། དཀར་དམར་བྱ་བང་མགོ་དང་། སེར་ནག་གཞོན་ནུ་ཕ་ཝང་མགོ་དང་། དམར་སེར་དབང་པོ་དྲེད་ཆེན་མགོ་དང་། དམར་མོ་འཕྲོག་ཆེན་དོམ་ཆེན་མགོ་དང་། སྔོ་ནག་བདུད་རྩི་ཆུ་སྲིན་མགོ་དང་། སྔོ་སྐྱ་ཞི་བ་སྡིག་ཆེན་མགོ་དང་། ནག་མོ་བེ་ཅོན་ཁྲ་ཆེན་མགོ་དང་། སེར་ནག་ཁྲོ་མོ་ཝ་ཆེན་མགོ་དང་། མཐིང་ནག་ཟ་བྱེད་སྟག་ཆེན་མགོ་དང་། དམར་མོ་ཁྲག་འཐུང་རྒོད་ཆེན་མགོ་དང་། དམར་མོ་ཁྲག་འཐུང་རྟ་ཆེན་མགོ་དང་། དཀར་དམར་བྱི་ཆེན་མགོ་དང་། དམར་ནག་སྤྱང་ཆེན་མགོ་དང་། དཀར་དམར་པུ་ཤུད་མགོ་དང་། ལྗང་སེར་ཀླུ་མོ་ཤ་ཆེན་མགོ་དང་། དམར་ནག་གསོད་ཆེན་སྤང་ཏིའི་མགོ་དང་། ལྗང་དམར་མེ་མོ་སྐྱིན་ཆེན་མགོ་དང་། ལྗང་སེར་ཕག་མོ་ཕག་ཆེན་མགོ་དང་། ལྗང་ནག་སྣ་ཆད་རྔ་ཆེན་མགོ་དང་། སྔོ་སྐྱ་ཆུ་མོ་བྱ་རོག་མགོ་དང་། དམར་སྐྱ་རྒན་མོ་སྐེག་ཆེན་མགོ་དང་། ནག་མོ་ཁུ་བྱུག་མགོ་དང་། སྔོན་མོ་ར་ཆེན་མགོ་དང་། དམར་མོ་བུམ་སྣ་སྤྲེལ་ཆེན་མགོ་དང་། ལྗང་ནག་གསུས་འཛིན་སྤྱང་ཆེན་མགོ་བཅས་ཉེར་བརྒྱད་བཤད་པ་དང་། ཧེ་རུ་ཀ་སྙིང་རོལ་ལས། ལས་གྲུབ་པ་དབང་ཕྱུག་མ་བྱོ་མིའི་སྲིན་མོ་དམར་སེར་ཤིང་ཆེན་ཏྲི་ཤུལ་གཡག་མགོ་མ། ཞེས་སོགས་ནས། གསུས་འཛིན་སེར་མོ་བདུད་རྩི་དྲིལ་ཆེན་གཟིག་གི་མགོ། ཞེས་པའི་བར་གྱིས། སྲིན་མོ་དམར་སེར་གཡག་མགོ་མ་དང་། ཚངས་པ་དམར་སྐྱ་སྦྲུལ་མགོ་མ་དང་། སྙིང་འདྲེན་གཟིག་མགོ་མ་དང་། ཁྱབ་འཇུག་སྲེ་མོང་མགོ་དང་། རྡོ་རྗེ་ཕ་ཝང་མགོ་དང་། ཁྲོ་ཆེན་དྲེད་མགོ་མ་དང་། དམར་མོ་དོམ་མགོ་མ་དང་། བདུད་རྩི་སྔོན་མོ་ཆུ་སྲིན་མགོ་དང་། ཞི་བ་སྔོ་སྐྱ་སྟག་མགོ་མ་དང་། བེ་ཅོན་ནག་མོ་ཁྲ་མགོ་མ་དང་། སྲིན་མོ་ནག་མོ་ཝ་མགོ་མ་དང་། ཟ་བྱེད་ནག་མོ་སྟག་མགོ་མ་དང་། དགའ་བྱེད་ནག་མོ་བྱ་རྒོད་མགོ་དང་། ཁྲག་འཐུང་དམར་མོ་རྟ་མགོ་མ་དང་། གཅིག་པུ་དཀར་དམར་མཁའ་ལྡིང་མགོ་དང་། ཡིད་འཕྲོག་དམར་སེར་ཁྱི་མགོ་མ་དང་། གྲུབ་མ་དཀར་དམར་པུ་ཤུད་མགོ་དང་། རླུང་མོ་རྡོ་རྗེ་ཤ་བའི་མགོ་དང་། གསོད་བྱེད་སྐྱ་ལྗང་སྐེ་ཀའི་མགོ་དང་། མེ་མོ་དམར་སེར་སྐྱིན་མགོ་མ་དང་། ཕག་མོ་ལྗང་ནག་ཕག་མགོ་མ་དང་། བདུད་རྩི་ཁྲག་འཐུང་ཁྲ་ཡི་མགོ་དང་། སྣ་ཆེན་ལྗང་ནག་བ་ལང་མགོ་དང་། གྲུབ་མོ་ལྗང་སེར་སྦྲུལ་མགོ་མ་དང་། ཕག་མོ་རྡོ་རྗེ་ཁུ་བྱུག་མགོ་དང་། ར་ནི་སེར་མོ་ར་མགོ་མ་དང་། བུམ་ལྷ་དམར་མོ་སེང་གེའི་མགོ་དང་། གསུས་འཛིན་སེར་མོ་གཟིག་མགོ་མ་བཅས་ཉེར་བརྒྱད་བཤད་པའི་གཞུང་དེ་གཉིས་ཀྱི་གོ་རིམ་ལྟར་ཕྱོགས་བཞིའི་མ་མོ་སོ་སོར་ཕྱེས་ན་གོང་གི་གཞུང་དག་དང་ཞི་ཁྲོའི་གཞུང་དང་བཅས་པའི་གོ་རིམ་འཆོལ་ནས་བལ་བ་ཛ་ལྟར་འགྲོའོ།།

ནག་མོ་ཆེན་མོ་ནས་གསུས་འཛིན་སེར་ནག་བར་གྱི་བཞི་ནི་སྒོ་མ་བཞི་ཡིན་ཞིང་། གསང་སྙིང་དང་། གསང་སྙིང་སྒྱུ་འཕྲུལ་བླ་མ་དང་། ལྷ་མོ་སྒྱུ་དྲྭ་དང་། རྡོ་སེམས་སྒྱུ་དྲྭ་དང་། ཧེ་རུ་ཀ་སྙིང་རོལ་སོགས་ཕལ་ཆེར་འདྲ་ནའང་དེ་དག་ཞི་ཁྲོའི་རང་གཞུང་དང་བསྡུར་ན་ཁུ་བྱུག་ནག་པོ་དང་དཀར་པོའི་ཁྱད་པར་དང་། ནུབ་ཀྱི་སྒོ་མ་སེང་གེ་དང་སྤྲེལ་གྱི་ཁྱད་པར་དང་། གསུས་འཛིན་ཟེར་བ་སྦྲུལ་མགོ་མིན་པ་སོགས་མི་མཐུན་པའི་ཁྱད་པར་མང་ངོ་།།

ཧཱུྃ་མཛད་ཆེན་པོའི་རྒྱུད་ལས། ཁྱབ་འཇུག་ཟེར་མོ་མགོ་ཅན་བྷྱོ། །ཞེས་ཟེར་མོའི་མགོ་ཅན་ཞིག་དང་། སྨུག་ནག་སྟག་གདོང་ལྕགས་ཀྱུ་མ་བྷྱོ། །ཞེས་དང་། ཟ་བྱེད་སྟག་གི་མགོ་ཅན་བྷྱོ། །ཞེས་སྟག་མགོ་ཅན་གཉིས་བཤད་པ་དང་། ཕུར་བའི་རྒྱུད་འགའ་སོགས་རྒྱུད་དུ་མར་མི་འདྲ་བ་མཐའ་ཡས་པས་ཐམས་ཅད་དགོངས་པ་གཅིག་ཏུ་བསྒྲུབ་པ་ནི་འཕགས་པས་ཀྱང་དཀའོ།།

དེ་བཞིན་དུ་དྲི་མེད་བཤགས་པའི་རྒྱུད་ཞི་ཁྲོ་འདིའི་རྒྱུད་ཁུངས་ཡིན་པར་གསུངས་པས་དེ་དང་མཐུན་དགོས་རྒྱུ་ཡིན་པ་ལ། དེ་ཡང་ཞི་ཁྲོའི་ལས་བྱང་དང་བསྡུར་ན་གཏན་ནས་མི་མཐུན་པ་ནི། དེ་ཉིད་ལས། རྣལ་འབྱོར་དམར་ནག་ཏྲི་ཤཱུལ་འཛིན། །གཡག་མགོ་ཅན་ལ་ཕྱག་འཚལ་ལོ། །ཞེས་གཡག་གདོང་མ་ཞི་ཁྲོ་ལྟར་སྨུག་ནག་མིན་པར་དམར་ནག་དང་། ཕྱག་མཚན་རྡོ་རྗེ་མིན་པར་ཏྲི་ཤུལ་དུ་བཤད་པ་དང་། རྣལ་འབྱོར་དམར་སེར་རྩེ་ལྔ་འཛིན། །སྦྲུལ་མགོ་ཅན་ལ་ཕྱག་འཚལ་ལོ། །ཞེས་ཚངས་པ་སྦྲུལ་གདོང་མ་ཕྱག་མཚན་པདྨ་འཛིན་པ་ཅན་མིན་པར་རྩེ་ལྔ་འཛིན་པ་ཅན་དང་། རྣལ་འབྱོར་སེར་ནག་དབྱུག་སྡིག་འཛིན། །གཟིག་མགོ་ཅན་ལ་ཕྱག་འཚལ་ལོ། །ཞེས་ལྷ་ཆེན་གཟིག་མགོ་མ་ལྗང་གུ་མིན་པར་སེར་ནག་དང་། ཕྱག་མཚན་ཏྲི་ཤུལ་མིན་པར་དབྱུག་སྡིག་ཅེས་པ་འཛིན་པ་ཅན་དང་། རྣལ་འབྱོར་དཀར་དམར་དུང་དམར་འཛིན། །སྲེ་མོའི་མགོ་ལ་ཕྱག་འཚལ་ལོ། །ཞེས་གཏོགས་འདོད་སྲེ་མོང་མགོ་ཅན་མ་སྐུ་མདོག་སྔོན་པོ་མིན་པར་དཀར་དམར་དང་ཕྱག་མཚན་འཁོར་ལོ་མིན་པར་དུང་དམར་འཛིན་པ་དང་། རྣལ་འབྱོར་སེར་མོ་འཁོར་ལོ་འཛིན། །ཕ་ཝང་མགོ་ལ་ཕྱག་འཚལ་ལོ། །ཞེས་ཞི་ཁྲོ་ལྟར་གྱི་ལྷོའི་ཕ་ཝང་མགོ་ཡར་ཤར་དུ་བཙུད་ནས་དེ་ཕྱག་མཚན་སྤུ་གྲི་ཐོགས་པ་ཅན་མིན་པར་འཁོར་ལོ་འཛིན་པ་ཅན་དང་། རྣལ་འབྱོར་དམར་སྐྱ་བམ་དབྱུག་འཛིན། །དྲེད་མགོ་ཅན་ལ་ཕྱག་འཚལ་ལོ། །ཞེས་གཞོན་ནུ་དྲེད་གདོང་མ་བམ་དབྱུག་འཛིན་པ་ལས་མདུང་ཐུང་ཅན་མིན་པ་དང་། རྣལ་འབྱོར་དམར་མོ་རྒྱུ་ཞགས་འཛིན། །དོམ་མགོ་ཅན་ལ་ཕྱག་འཚལ་ལོ། །ཞེས་བརྒྱ་བྱིན་དོམ་མགོ་མ་དཀར་མོ་མིན་པར་དམར་མོར་བཤད་པ་དང་། དེ་བཞིན་དུ་རྣལ་འབྱོར་སྔོན་མོ་བུམ་པ་འཛིན། །ཆུ་སྲིན་མགོ་ལ་ཕྱག་འཚལ་ལོ། །ཞི་བ་ཆུ་སྲིན་མགོ་ཅན་མ་དམར་མོ་མིན་པར་སྔོན་མོར་བཤད་ལ་སོགས་པ་ནས་བྱང་གི་སྒོ་མ་སྐྱ་ཀའི་མགོ་ཅན་དུ་བཤད་པའི་བར་ལ་ཞི་ཁྲོའི་ལས་བྱང་དང་གཏན་ནས་མི་འདྲ་ཡང་ཡི་གེས་འཇིགས་ནས་མི་སྤྲོ་ལ་གཞུང་དངོས་དང་སྦྱར་ནས་དཔྱད་ན་ཤེས་ནུས་སོ།།

དབང་མོ་ཉེར་བརྒྱད་ཀྱི་ས་བོན་གྱི་སྔགས་བྷྱོ་ཞེས་པ་ནི་བྷ་གི་ནི་ཞེས་པ་སྲིང་མོ་དང་། བྷ་ར་ཡ་ཞེས་པ་ཆུང་མ་ལ་འཇུག་པས་དཔལ་ཆེན་པོའི་ཆུང་མ་དང་རྣལ་འབྱོར་བའི་སྲིང་མོ་ཉེར་བརྒྱད་ཅེས་པ་དེའི་སྐད་དོད་མཚམས་སྦྱར་བས་བྷྱོ་ཞེས་པར་གྱུར་པ་ཡིན་པར་མཁས་པས་གསུངས་ཤིང་། ཧཱུྃ་མཛད་ཆེན་པོའི་རྒྱུད་ལས། མཁའ་འགྲོ་རཀྴ་སི་ལ་སོགས་ཏེ་ཉི་ཤུ་བརྒྱད། །སྐུ་མདོག་ཅིར་ཡང་བྱེད་མ་ངེས། །ཐོད་པ་རྡོ་རྗེ་དབྱུག་པ་འཛིན། །བྷྱོ་བཟློག་བསྒྱུར་བའི་ལས་མཛོད་ཅིག །ཅེས་གསུངས་པ་ལྟར་གྱི་དབང་ཕྱུག་མ་རང་རང་གི་སྔགས་ནི་མ་ནུ་རཀྵ་སི་བྷྱོ་སོགས་ཡིན་པར་བཤད་ལ།

དེ་ཡང་ཨོཾ་ནི་རབ་བསྔགས་དང་། བྷྱོ་ནི་མ་མོ་རྣམས་ཀྱི་སྲོག་སྔགས་སམ་སྙིང་པོ་ཡིན་ལ། མ་ནུ་རཀྵ་སི་ནི་མིའི་སྲིན་མོ་སྟེ་གཡག་གདོང་མ་དང་། པྲ་ཧྨ་ནཱི་ཞེས་པ་ཚངས་པ་མ་དང་། རཻ་ཏྲི་མ་ནི་དྲག་མོའམ་འཁྲུག་མོ་དང་། བྷ་ན་བྷེ་ནི་ཁྱབ་འཇུག་མའམ་འཇུག་སྲེད་མ་དང་། ཀུ་མ་རཱ་ནི་གཞོན་ནུ་མ་དང་། འདི་ལ་ཀེའུ་རཱི་མ་ཞེས་པའང་མཆིས། ཨིནྡྲ་ཡ་ནི་བརྒྱ་བྱིན་མ་སྟེ་ཤར་གྱི་མ་དྲུག་གི་སྙིང་པོ་དང་སྐད་དོད་དོ།།

དེ་བཞིན་བཛྲ་སིངྷ་ཀཱ་ལ་ནི་ཞེས་པ་འཇུག་སྲེད་མོ་དང་། ཨ་མྲྀ་ཏ་ནི་བདུད་རྩི་མོ་དང་། སོའུ་ནི་ཞེས་པ་ཞི་བ་མོ་དང་། ཏ་ན་ཧཾ་ནི་བེ་ཅོན་མོ་དང་། རཀྴ་སི་ནི་སྲིན་མོ་དང་། བཀྴ་སི་ནི་ཟ་བྱེད་མོ་སྟེ་ལྷོ་ཡི་མ་དྲུག་གི་སྙིང་པོ་དང་སྐད་དོད་དོ།།

ར་ཏྲི་མ་ཞེས་པ་དགའ་བ་མོ་དང་། རེ་ཏྲི་རེ་མ་ཏྲི་ནི་ར་རོ་མྱོས་མ་དང་། ཨེ་ཀ་ཙ་ར་མ་ཞེས་པ་གཅིག་པུར་སྤྱོད་མ་དང་། མ་ནུ་ཧ་ར་ཞེས་པ་ཡིད་འཕྲོག་མ་དང་། སི་ཏི་ཀ་མ་གྲུབ་པ་མོ་དང་། བྷ་ཡ་བཱེ་རླུང་ལྷ་མོ་སྟེ་ནུབ་ཀྱི་མ་དྲུག་གི་སྙིང་པོའམ་སྐད་དོད་དོ།།

མ་ཧཱ་མ་ར་ན་ནི་གསོད་བྱེད་ཆེན་མོ་དང་། ཨགྣེ་ཡེ་ནི་མེ་ལྷ་མོ་དང་། དེ་ཡང་མེ་ལྷ་མོ་ཡིན་ཕྱིར། མེ་མོ་སྐྱིན་གྱི་མགོ་ཅན་བྷྱོ། །ཞེས་མེ་མོ་ཟེར་བ་ཡིན་པས་ཡི་གེ་དུ་མར་མི་མོ་ཟེར་བ་ཡོད་པ་ནོར་བ་དང་། བ་ར་ཧཱི་ནི་ཕག་མོ་དང་། ཙ་མུནྟྲི་ནི་དགའ་བྱེད་མ་དང་། བྷུ་ཏ་ན་ཞེས་པ་ཚོགས་བདག་སྣ་ཆེན་མོ་དང་། པཱ་ནི་བཛྲ་ནི་ཆུ་ལྷ་མོ་སྟེ་བྱང་གི་མ་དྲུག་གི་སྙིང་པོ་དང་སྐད་དོད་དོ།།

མ་ཧཱ་ཀ་ལ་ནི་ནག་མོ་ཆེན་མོ་སྟེ་ཤར་གྱི་སྒོ་མ་གཞུང་འདིར་ཁུ་བྱུག་མགོ་ཅན་མ་དང་། ཙ་ཀ་ལ་བཛྲ་ནི་རྡོ་རྗེ་ར་གདོང་མ་སྟེ་ལྷོ་ཡི་སྒོ་མ་དང་། བཛྲ་བུམ་པ་ཀ་ར་ན་ནི་རྡོ་རྗེ་བུམ་སྣ་མ་སྟེ་ནུབ་ཀྱི་སྒོ་མ་དང་། བཛྲ་ལམ་བྷོ་དྷ་ར་ན་ཞེས་པ་རྡོ་རྗེ་གསུས་འཛིན་མ་སྟེ་བྱང་གི་སྒོ་མ་བཅས་དབང་ཕྱུག་མའི་སྒོ་མ་བཞིའི་སྙིང་པོ་དང་སྐད་དོད་ཡིན་ལ། གོ་རིམ་འདི་ནི་གསང་སྙིང་སོགས་ལྟར་བགྱིས་ཤིང་ཞི་ཁྲོའི་འཛབ་གཞུང་ཀུན་ཀྱང་འདི་དང་མཐུན་པར་ཡོད་མོད་དོན་དངོས་ཀྱི་གོ་རིམ་ཕྱོགས་ཀྱི་དབང་ཕྱུག་མ་ངོས་འཛིན་ལྟར་ན་འཛབ་འདི་དག་གི་རིམ་པ་སྨོས་མ་ཐག་པ་ལྟར་ཞི་ཁྲོ་རང་གཞུང་དང་མི་མཐུན་པ་ཡིན་མིན་ལ་ནི་དཔྱད་དུ་ཡོད་དོ། །ཞར་བྱུང་སོང་ངོ་།།

བརྒྱད་པ་ཏིང་འཛིན་གྱི་ཉམས་པའི་བཤགས་པ་ནི། རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ༔ ཐུགས་རྗེ་མཉམ་པའི་ངང་ལས་མ་གཡོས་ཀྱང་༔ ཕྲ་མོའི་ཏིང་འཛིན་གསལ་བར་མ་གྱུར་པ༔ ཡོན་ཏན་འཛིན་པ་རྣམས་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། སྤྱིར་ཆོས་ཐམས་ཅད་ཀྱི་ར༷ང་བཞི༷ན་ཀ་དག་ཆེན་པོ་སྐུ་དང་ཡེ་ཤེས་ཀྱི་རོལ་བ་ཡེ་ནས་གཉིས་སུ་མེད་པར་ལྷུན༷་གྱིས༷་གྲུབ༷་པ༷འི་དཀྱི༷ལ་འཁོ༷ར་ཆེན་པོ་དེ་ཉིད་དུ༷་ནི་ཐུག༷ས་རྗེ༷་འོད་གསལ་འགགས་པ་མེད་པའི་ཡེ་ཤེས་ཆོས་ཉིད་མཉམ༷་པ༷འི་དབྱིངས་ཀྱི་ངང༷་ལས༷་མ༷་གཡོ༷ས་པ་སྟེ་གཡོ་མ་མྱོང་ཞིང་གཡོ་བ་མེད་ཀྱ༷ང་། གསང་སྙིང་ལས། དེ་ནས་ཕྲ་མོའི་ཏིང་འཛིན་བསྒོམ། །ཕྱི་ནང་སྣོད་བཅུད་ཧཱུཾ་དུ་བསྡུ། །གང་བསྒྲུབ་ཡི་གེ་སོ་སོ་སྟེ། །སྤྱིར་ནི་གང་བསྒོམ་ཀུན་ཏུ་འདྲ། །རྡོ་རྗེ་སེམས་དཔའ་ཉིད་དུ་འདུ། །ཞེས་དང་། ཡེ་ཤེས་རྔམ་གློག་ལས། རང་སེམས་ཤིན་ཏུ་སྦྱངས་པས་ན། །ཕྲ་མོའི་དངོས་གྲུབ་བསྒྲུབ་པ་གཅེས། །རབ་ཏུ་དབེན་པའི་གནས་དག་ཏུ། །བདག་ཉིད་ནམ་མཁའི་དབུས་སུ་ནི། །ཟླ་བའི་དཀྱིལ་འཁོར་ལ་གནས་པའོ། །རང་གི་ལྷར་ནི་རང་བསྒོམ་ནས། །ཕྲ་མོའི་སྦྱོར་བ་ཀུན་ཏུ་བརྩམ། །ཞེས་དང་། དགོངས་པ་ལུང་བསྟན་ལས། ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །སངས་རྒྱས་གཟུགས་ནི་རྣམ་བསྒོམ་ནས། །ཕྲ་མོའི་རྣལ་འབྱོར་བརྩམ་པར་བྱ། །ཞེས་གསུངས་པ་ལྟར། རྫོགས་རིམ་གྱི་རྒྱུ་ལ་བསྐྱེད་རིམ་ལ་བསྒོམ་པའི་ཕྱིར་དུ་ཆོས་ཀུན་སྟོང་པར་བསྒོམས་པའི་ངང་ལས་ཟླ་བ་ལ་ཡིག་འབྲུ་ཕྲ་མོ་གསལ་བ་ལ་སེམས་འཛིན་པའི་ཕྲ༷་མོ༷འི་ཏིང༷་འཛི༷ན་བསྒོམ་པས་ཡི་དམ་གྱི་དཀྱིལ་འཁོར་རྟེན་བརྟེན་པ་བསྐྱེད་དགོས་པ་ལ། དེ་དོན་མ་རྟོགས་པའི་གང་ཟག་ཐ་མལ་བ་གནས་ལུགས་ཀྱི་དོན་དང་ཕྲ་མོའི་ཏིང་འཛིན་ལ་སྦྱངས་པ་དམན་པ་རྣམས་ཀྱིས་ནི་དེ་ལྟ་བུའི་ཤིན་ཏུ་ཕྲ་མོར་གྱུར་པའི་ཏིང་ངེ་འཛིན་དེ་གས༷ལ་བ༷ར་མ༷་གྱུར༷་པ༷་ཡི་ནོངས་པའམ་འཁྲུལ་བས་གནས་ལུགས་ཀྱི་དོན་ལ་མཚན་མར་ཞེན་པ་དང་། དེའི་དབང་གིས་བསགས་པའི་སྡིག་ལྟུང་ཉེས་པའི་ཚོགས་ཅི་བགྱིས་པ་དེ་ཉིད་ཟག་མེད་འབྲས་བུའི་ཆོས་ཀྱི་ཡོན་ཏན་འཛིན་པ་རྒྱལ་བ་ཞི་ཁྲོའི་ལྷ་ཚོགས་དང་། བསྐྱེད་རིམ་གྱི་རྟོགས་པ་དང་། དེས་བསྐྱེད་པའི་ས་ལམ་གྱི་ཡོ༷ན་ཏན༷་འཛི༷ན་ཅིང་རྒྱུད་དོན་རྟོགས་པའི་བླ་མ་རིག་འཛིན་བརྒྱུད་པ་དང་བཅས་པ༷་རྣམ༷ས་ལ༷་འགྱོད་པས་མཐོལ་ཞིང་བཤགས་པར་བྱ་བ་དང་། བཟོ༷ད་པ༷ར་གསོ༷ལ་ལོ་ཞེས་ཏིང་ངེ་འཛིན་མ་གསལ་བར་ཉམས་པའི་ཉེས་པ་བཤགས་པའོ།།

འདི་ནི་བསྐྱེད་རིམ་གྱི་རྩལ་མ་ཐོན་ཅིང་དེའི་དབང་གི་རྣམ་རྟོག་རང་གར་ཤོར་ཏེ་ཉེས་ལྟུང་དུ་མ་བསགས་པ་བཤགས་པ་ཡིན་ཕྱིར། གོང་གི་ཏིང་འཛིན་རྣམ་གསུམ་ནས་འདི་བར་གྱིས་ཞི་ཁྲོའི་དཀྱིལ་འཁོར་ཡོངས་སུ་སྒོམ་པའི་བསྐྱེད་རིམ་ཡང་བསྟན་པ་ཡིན་སྙམ་ལ། དེའི་ཤུགས་ཀྱིས་གོང་གི་ཞི་བའི་བཤགས་པས་ཞི་བའི་དཀྱིལ་འཁོར་བསྒོམ་པ་ཡང་བསྟན་པས་ཀློང་བཤགས་འདིས་ཞི་ཁྲོ་དམ་པ་རིགས་བརྒྱའི་དཀྱིལ་འཁོར་ཡོངས་སུ་རྫོགས་པ་བསྒོམ་པའི་ཚུལ་བསྟན་ཅིང་། དེ་ལྟར་དཀྱིལ་འཁོར་གྱི་ལྷ་ཚོགས་ཡོངས་རྫོགས་གསལ་བའི་སྒོ་ནས་ཉམས་ཆག་བཤགས་པར་བསྟན་པ་ཡིན་པ་ཤེས་པར་བྱ་ཞིང་། གོང་གི་ཆོས་ཉིད་ཞི་བའི་ཀློང་སོགས་ནས་འོག་གི་ལྟ་བའི་ཀློང་བཤགས་སོགས་སྐབས་དུ་མར་མཚན་མེད་ཀྱི་རྫོགས་རིམ་རྒྱ་ཆེར་བསྟན་པ་དང་། ཞར་ལ་མཚན་བཅས་ཀྱི་རྫོགས་རིམ་ཡང་ཐོན་པས་ཀློང་བཤགས་འདི་ནི་ཕྱིར་བཤགས་པ་ངོས་རྐྱང་ཙམ་མ་ཡིན་པར་བསྐྱེད་རྫོགས་ཆ་ཚང་བ་ཉམས་སུ་ལེན་ཚུལ་བསྟན་པའི་བླ་མེད་ཀྱི་ལམ་ཡོངས་རྫོགས་བསྟན་པའི་གཞུང་ཅིག་ཏུ་གོ་བར་བྱའོ།།

དགུ་བ་ཐོག་མེད་ཀྱི་སྡིག་སྒྲིབ་བམ་ཉམས་ཆག་གི་བཤགས་པ་ནི། བདག་ནི་སྐྱེ་བ་ཐོག་མ་མ་མཆིས་ནས༔ ད་ལྟའི་ལུས་འདི་བཟུང་བ་ཡན་ཆད་དུ༔ མ་རིག་དབང་གིས་སྲིད་པའི་ཁ་འཁོར་ཞིང་༔ ཇི་སྲིད་མི་ལུས་བླངས་ནས་གར་སྐྱེས་ཀྱང་༔ མཚམས་མེད་ལྔ་དང་དེ་དང་ཉེ་བ་ལྔ༔ སྡིག་པའི་ལས་སུ་གྱུར་པ་ཅི་མཆིས་པ༔ དངོས་སུ་བགྱིས་དང་བགྱིད་དུ་བསྩལ་བ་དང་༔ དེ་ལ་རྗེས་སུ་ཡི་རངས་བགྱིས་པ་རྣམས༔ བྱང་ཆུབ་ཐུགས་རྗེས་བདག་ལ་དགོངས་ཀྱང་༔ ཚངས་པར་བསྩལ་ནས་དངོས་གྲུབ་བསྩལ་ཏུ་གསོལ༔ ཞེས་པའི་ཚིགས་སུ་བཅད་པ་གཉིས་དང་ཕྱེད་ཀྱིས་བསྟན་ལ། ཉེས་ལྟུང་བཤགས་པ་པོ་བད༷ག་གིས་ནི༷་ཚེ་རབས་ནས་ཚེ་རབས་བགྲངས་པའི་འཁོར་བར་སྐྱེ༷་བ༷་ཐོ༷ག་མ༷་མེད་པའམ་མ༷་མཆི༷ས་པའི་དུས་ནས༷་ད༷་ལྟའི༷་ལུས༷་རྟེན་འདི༷་ཉིད་བཟུང༷་བ༷་ཡི་བར་ཡ༷ན་ཆ༷ད་དུ༷་བདག་ཏུ་འཛིན་པ་མ༷་རི༷ག་པའི་དབ༷ང་གིས༷་སྲི༷ད་པ༷འི་སྡུག་བསྔལ་གྱི་རྒྱ་མཚོ་ཆེན་པོའི་ཁ༷་འདིར་ལས་དང་ཉོན་མོངས་པའི་རྦ་རླབས་ཀྱིས་དེད་དེ་འཁོ༷ར་ཞིང༷་། དེ་ཡང་དུས་ཇི༷་སྲི༷ད་ཅིག་ཏུ་མི༷་ཡི་ལུས༷་བླང༷ས་པ་ནས༷་རིགས་དྲུག་གི་གནས་གང་དང་གར༷་སྐྱེས༷་ཀྱ༷ང་ཉེས་པ་མ་བསགས་པའི་དཀར་རྐྱང་ཞིག་མ་ཡིན་པར་ཉེས་པ་ཤིན་ཏུ་ལྕི་བའི་དབང་དུ་བྱས་ན་ཕ་མ་གསོད་པ་སོགས་མཚ༷མས་མེ༷ད་པ་ལྔ༷་དང༷་། རྒྱལ་བའི་རྟེན་གསུམ་བཤིགས་པ་སོགས་དེ༷་དང༷་ཉེ༷་བ༷འི་མཚམས་མེད་པ་ལྔ༷་དང་། ལྕི་བ་བཞི་དང་། ལོག་པ་བརྒྱད་ལ་སོགས་པའི་འབྲས་བུ་རྣམ་སྨིན་ཡིད་དུ་མི་འོང་པ་འབྱིན་བྱེད་ཀྱི་སྡི༷ག་པ༷་མི་དགེ་བའི༷་ལ༷ས་སུ༷་གྱུར༷་པ༷་ཅི༷་ཙམ་མཆི༷ས་པ༷། དཔེར་ན་རང་གིས་དངོ༷ས་སུ༷་བསགས་པའམ་བགྱིས༷་པ་དང༷་། གཞན་ལ་གསོག་ཏུ་བཅུག་པའམ་བགྱི༷ད་དུ༷་བསྩལ༷་བ༷་དང༷་། གཞན་གྱིས་བསགས་པ་དེ༷་ལ༷་རྗེས༷་སུ༷་ཡི༷་རང༷་བགྱིས༷་པ༷་རྣམ༷ས་རྒྱལ་བ་ཞི་ཁྲོའི་ལྷ་ཚོགས་འགྲོ་བ་སྡུག་བསྔལ་གྱིས་མནར་བ་ཀུན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འགོད་པར་བྱའོ་སྙམ་པའི་ཀུན་རྫོབ་བྱང༷་ཆུབ༷་ཀྱི་སེམས་མངའ་བ་རྣམས་ཀྱི་ཐུག༷ས་རྗེས༷་བད༷ག་ཅག་ལས་ངན་སྡིག་པོ་ཆེ་བསགས་པ་དག་ལ༷་ཉེ་བར་དགོངས་པར་མཛོད་ཅིག། དགོང༷ས་ནས༷་ཀྱང༷་རིག་པ་འཛིན་པའི་ཚང༷ས་པ་མཚུངས་པ༷ར་སྤྱོད་པའི་ས་ལམ་གྱི་རྟོགས་པ་རྣམས་རྒྱུད་ལ་བསྩལ༷་ནས༷་མྱུར་དུ་ཟུང་འཇུག་མི་གནས་པའི་ཆོས་སྐུ་ཆེན་པོའི་དངོ༷ས་གྲུབ༷་མཆོག་གམ་མཐར་ཐུག་པ་དེ་བསྩལ༷་ཏུ༷་གསོ༷ལ་ལོ་ཞེས་བཅོམ་ལྡན་འདས་ཁྲོ་བོའི་དཀྱིལ་འཁོར་ལ་ཐོག་མེད་ནས་བསགས་པའི་ཉེས་ལྟུང་སྤྱི་བཤགས་པའོ།།

ཁྲོ་བོའི་དཀྱིལ་འཁོར་ལ་བཤགས་ཤིང་བཟོད་གསོལ་བྱེ་བྲག་ཏུ་བྱ་བ།

གཉིས་པ་ཁྲོ་བོའི་དཀྱིལ་འཁོར་ལ་བཤགས་པ་དང་བཟོད་གསོལ་བྱེ་བྲག་ཏུ་བྱ་བ་ལ་ནི། མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་མདོར་བསྟན་ནི། ཧཱུཾ་བསྐལ་བ་དུས་མཐའི་མེ་ལྟར་འབར་བའི་དབུས༔ དུག་ལྔ་གནས་གྱུར་ཡེ་ཤེས་ཧེ་རུ་ཀ༔ དབྱིངས་ཀྱི་ཡུམ་ཆེན་ཁྲོ་མོ་ལྔ་དང་སྦྱོར༔ ཀཽ་རཱི་ལ་སོགས་ནང་གི་མཁའ་འགྲོ་བཞི༔ པུསྐ་ལ་སོགས་ཕྱི་ཡི་རྣལ་འབྱོར་མ༔ སིངྷ་ལ་སོགས་ཟ་བྱེད་གདོང་ཅན་ཚོགས༔ ཀྲྀ་ཏ་ལ་སོགས་མཚམས་ཀྱི་གཤོག་པ་ཅན༔ འབར་བའི་བར་ཁྱམས་དབང་ཕྱུག་ཉི་ཤུ་བརྒྱད༔ སྒོ་བཞིར་འགུག་འཆིང་སྡོམ་དགྱེས་སྒོ་མ་བཞི༔ ཁྲག་འཐུང་ལྷ་ཚོགས་སྐུ་ཡང་མ་གསལ་ཞིང་༔ སྙིང་པོ་གྲངས་ཉུང་ཕྱག་རྒྱ་གནས་མ་སོན༔ ཚོགས་དང་གཏོར་མས་གནས་སུ་མ་བསྐངས་པ༔ ཁྲོ་བོའི་ལྷ་ཚོགས་རྣམས་ལ་བཟོད་པར་གསོལ༔ ཞེས་པའི་ཚིགས་སུ་བཅད་གསུམ་དང་རྐང་པ་གཅིག་གིས་བསྟན་ལ། དེ་ལྟར་ཁྲོ་བོའི་ལྷ་ཚོགས་རྣམས་ཀྱི་རང་བཞིན་ཆོས་ཉིད་མཉམ་པ་ཆེན་པོའི་དབྱིངས་སུ་ཐ་དད་དུ་མེད་པར་ངེས་པས་བཤགས་པ་ནི་ཁྲོ་བོའི་ཀློང་བཤགས་དང་། དེ་ནས་དམ་ཚིག་ཉམས་པའི་ཉེས་པ་ཅི་མཆིས་པ་ཐམས་ཅད་ཁྲོ་བོའི་དཀྱིལ་འཁོར་གྱི་མདུན་དུ་བཤགས་ཤིང་བཟོད་པར་གསོལ་བར་བྱ་བ་བསྟན་པ་ནི། ཧཱུཾ༷་ནི་གོང་དུ། ཡི་གེ་ཧཱུཾ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །ཅེས་སོགས་རྒྱུད་རྡོ་རྗེ་རྩེ་མོ་དྲངས་ཟིན་པ་ལྟར་རྒྱལ་བ་ཀུན་གྱི་ཐུགས་རྣམ་པར་མི་རྟོག་པའི་ཡེ་ཤེས་མཚོན་བྱེད་དེ། ཉེས་ལྟུང་དང་། སྒྲིབ་གཉིས་དང་། དེ་དག་གི་རྒྱུ་ཉོན་མོངས་པ་སོགས་འཇོམ་བྱེད་ཀྱི་གཉེན་པོའི་ཡེ་ཤེས་ཀྱི་དོན་མཚོན་པའོ།།

འཕགས་པ་ལང་ཀར་གཤེགས་པ་ལས། དུས་མཐའི་མེ་ནི་འབར་བ་བཞིན། །ཞེས་དང་། རྒྱུད་མངོན་བརྗོད་བླ་མ་ལས། དུས་མཐའི་མེ་ལྟར་རབ་ཏུ་འཇིགས། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གཏུམ་ཆེན་དུས་མཐའི་མེ་ལྟར་འབར། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། དུས་མཐའི་བསྐལ་བའི་མེ་ཆེན་འདྲ། །ཞེས་གསུངས་པ་ལྟར། བསྐ༷ལ་བ༷་ཆེན་པོ་འདི་མེ་ཡིས་འཇིག་པར་བྱེད་པའི་དུས༷་ཀྱི་དུས་མཐ༷འ་མའི༷་མེ༷་ལྟ༷ར་རེག་བྱའི་ཚ་ངར་བཟོད་པར་དཀའ་བ་རབ་ཏུ་འབ༷ར་བ༷འི་མེ་ལྕེ་དམར་ནག་གི་དཀྱིལ་འཁོར་གྱི་དབུས༷་སུ་ཉོན་མོངས་པ་འདོད་ཆགས་ཞེ་སྡང་གཏི་མུག་ཕྲག་དོག་ང་རྒྱལ་ལྔ་སྟེ་དུག༷་ལྔ༷་དེ་ཉིད་གཉེན་པོ་མེ་ལོང་ཡེ་ཤེས་དང་། མཉམ་ཉིད་དང་། སོར་རྟོགས་དང་། བྱ་གྲུབ་དང་། ཆོས་དབྱིངས་ཡེ་ཤེས་ཏེ་ཡེ་ཤེས་ལྔའི་ངོ་བོར་གན༷ས་གྱུར༷་པ་ཡེ༷་ཤེས༷་ཀྱི་ཧེ༷་རུ༷་ཀ༷་སྟེ་ཁྲག་འཐུང་རིགས་ལྔ་དང་། དེ་ལྔ་པོ་འབྱུང་ལྔ་གནས་སུ་གྱུར་པ་ཆོས་ཉིད་དབྱིང༷ས་ཀྱི༷་ངོ་བོ་ཡུམ༷་ཆེ༷ན་ཁྲོ༷་མོ༷་ལྔ༷་དང༷་སྦྱོར༷་བའི་ཁྲག་འཐུང་ཡབ་ཡུམ་བཅུ་དང་། ཀཽ༷་རཱི༷་མ་ལ༷་སོག༷ས་པ་སྟེ། ཀཽ་རཱི་མ་དང་། ཙཽ་རཱི་མ་དང་། པྲ་མོ་ཧཱ་དང་། བེ་ཏཱ་ལཱི་བཅས་ནང༷་གི༷་མཁ༷འ་འགྲོ༷་ཆེན་མོ་བཞི༷་དང་། པུ༷སྐ༷་ལ༷་སོ༷གས་པ་སྟེ། པུསྐ་སཱི་དང་། གྷསྨ་རཱི་དང་། སྨེ་ཤ་ནཱི་དང་། ཙཎྜ་ལཱི་སྟེ་ཕྱི༷་ཡི༷་རྣལ༷་འབྱོར༷་མ༷་བཞི་སྟེ་མ་མོ་ཀཽ་རཱི་མ་བརྒྱད་དང་། སི༷ངྷ༷་མ་ལ༷་སོ༷གས་སྟེ། སིང་ཧ་མ་དང་། བྱཱ་ཀྲི་མ་དང་། སྲི་ལ་མ་དང་། ཤྭ་ན་མ་སྟེ་གཞན་གྱི་ཤ་ཁྲག་ཟ༷་བྱེད༷་ཀྱི་མཆེ་བ་རྣོན་པོ་གཙིགས་པ་དང་ལྡན་པའི་སེང་གདོང་དང་། སྟག་གདོང་དང་། ཝ་གདོང་དང་། སྤྱང་གདོང་བཅས་གཅན་གཟན་གྱི་གདོ༷ང་བ་ཅ༷ན་གྱི་ཚོག༷ས་བཞི་དང་། ཀྲྀ༷་ཏ༷་ལ༷་སོག༷ས་པ་སྟེ། ཀྲྀ་ཏ་མུ་ཁ་མ་དང་། ཀང་ཀ་མུ་ཁ་མ་དང་། ཁ་ཁྭ་མུ་ཁ་མ་དང་། ཧུ་ལུ་མུ་ཁ་མ་སྟེ་དཀྱིལ་འཁོར་གྱི་མཚ༷མས་ཀྱི༷་གནས་བཞི་ལ་གནས་པའི་ བྱ་རྒོད་དང་། དུར་བྱ་དང་། བྱ་རོག་དང་། འུག་པ་སྟེ་ལུས་ལ་གཤོ༷ག་པ༷་ཅ༷ན་གྱི་བྱ་མགོ་ཅན་གྱི་མ་མོ་བཞི་བཅས་ཕྲ་མེན་སེང་ཧ་མ་བརྒྱད་དང་། ཕྱི་མེ་དཔུང་འབར་ཞིང་ནང་དྲག་པོ་ཁྲོས་པའི་ཡེ་ཤེས་རབ་ཏུ་འབ༷ར་བ༷འི་ཁྲོ་བོའི་དཀྱིལ་འཁོར་གྱི་འོག་གི་བ༷ར་ཁྱམ༷ས་སུ་རྒྱུ་ཞིང་གནས་པའི་གཡག་གདོང་མ་སོགས་དབ༷ང་ཕྱུག༷་མ་ཉི༷་ཤུ༷་རྩ་བརྒྱད༷་དང་། དཀྱིལ་འཁོར་གྱི་སྒོ༷་བཞི༷ར་གནས་པའི་འགུ༷ག་པ་དང་། འཆི༷ང་བ་དང་། སྡོམ༷་པ་དང་། བདེ་བ་ཆེན་པོའི་དགྱེས༷་པའི་ལས་མཛད་པའི་སྒོ༷་མ༷་རྟ་གདོང་མ་སོགས་བཞི༷་བཅས་ཁྲ༷ག་འཐུང༷་འབར་བ་ལྔ་བཅུ་རྩ་བརྒྱད་ཀྱི་ལྷ༷་ཚོ༷གས་རྣམས་གསལ་དག་བརྟན་པས་བསྒོམ་དགོས་པ་ལ་རང་ཉིད་ཀྱི་བསྐྱེད་རིམ་དམན་པས་སྐུ༷་ཡ༷ང་མ༷་གས༷ལ་བ་སྟེ་རྣམ་པ་གསལ་བར་བསྐྱེད་པ་དང་མ་ལྡན་ཞི༷ང་། སྙིང༷་པོ༷་བསྙེན་པའི་གྲ༷ངས་ཚད་དུ་མ་སླེབས་པར་ཉུང༷་བར་གྱུར་པ་དང་། གསང་བ་སྙིང་པོ་ལས། སྒྱུ་འཕྲུལ་དྲྭ་བས་མངོན་རྫོགས་པ། །ཐམས་ཅད་བྱང་ཆུབ་མཆོག་གི་རྒྱ། །གསང་བ་དེ་ཉིད་ངེས་པ་ཡི། །སྙིང་པོའི་ཕྱག་རྒྱ་འདའ་དཀའོ། །ཞེས་གསུངས་པ་ལྟར་གྱི་ཆོས་ཐམས་ཅད་ཟུང་འཇུག་ཞི་ཁྲོའི་དཀྱིལ་འཁོར་དམིགས་མེད་བརྗོད་བྲལ་ཆེན་པོའི་རང་བཞིན་དུ་ཡེ་ནས་མངོན་པར་བྱང་ཆུབ་པའི་ཕྱིར་རྟོག་ཚོགས་གཉིས་སྣང་ཀུན་ལ་ཆོས་ཉིད་དོན་དམ་བྱང་ཆུབ་ཀྱི་སེམས་ཀུན་ཏུ་བཟང་པོ་གཉུག་མ་མི་འགྱུར་བའི་ཡེ་ཤེས་ཀྱི་ཕྱག་རྒྱས་བཏབ་པ་ལ་ནི་རང་བཞིན་གྱི་ཕྱག་རྒྱ་ཞེས་བརྗོད་ལ།

དེ་གནས་པའི་སྐབས་ལ་རང་བཞིན་གྱི་ཕྱག་རྒྱ་དང་། རྟོགས་པའི་དུས་ན་ལྟ་བའི་ཕྱག་རྒྱ་དང་། མངོན་དུ་བྱས་པའི་གནས་སྐབས་ན་འབྲས་བུའི་ཕྱག་རྒྱ་ཞེས་བརྗོད་པ་དང་། ཡང་དེ་ཉིད་ལས། ཕྱག་རྒྱ་ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྒུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཞེས་གསུངས་པ་ལྟར། སྲིད་ཞིའི་མཐའ་འགོག་བྱེད་རྟོག་ཚོགས་ཐམས་ཅད་སྣང་སྟོང་དབྱེར་མེད་ལྷ་སྐུ་སྒྱུ་མ་ལྟ་བུའི་རྡོ་རྗེ་གསུམ་གྱི་རང་བཞིན་དུ་གནས་པ་ལྟ་བའི་ཕྱག་རྒྱ་དང་། ཡང་དེ་ཉིད་ལས། ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་དུ། །བཅུ་གཉིས་དྲུག་གི་འོད་འཕྲོ་འབར། །དེ་ལ་སོགས་ཏེ་བསམ་མི་ཁྱབ། །ཅེས་གསུངས་པ་ལྟར། ཞི་བའི་ལྷའི་ཡབ་ལྷ་བཅུ་བདུན་ཐུབ་དྲུག་དང་བཅས་ཉེར་གསུམ་དང་། ཡུམ་ལྷ་བཅུ་བདུན་བཅས་ཡན་ལག་གི་ལྷ་བཞི་བཅུ་དེ་རྩ་བའི་ལྷ་མི་བསྐྱོད་པ་ཡབ་ཡུམ་གཉིས་ལ་བསྒོམ་ནས་འགོད་པ་ཐབས་ཀྱི་ལྷ་བཞི་བཅུ་དང་། ཐབས་ལྷ་དེ་དག་གི་སྲོག་ཏུ་རང་དང་འདྲ་བ་རྒྱན་དང་ཕྱག་མཚན་མེད་པ་རེ་རེ་བསྒོམ་པས་འགོད་པ་ནི་ཕྲ་བ་དང་ནང་ན་གནས་པའི་ཆ་ནས་ཤེས་རབ་ཀྱི་ལྷ་རུ་བྱས་པ་བཞི་བཅུ་དང་། ཐབས་ལྷ་དེ་དག་རེ་རེ་ལ་སྐུ་གསུང་ཐུགས་གསུམ་གྱི་བྱིན་རླབས་ཀྱི་ལྷ་རེ་རེ་བྱས་པས་བྱིན་རླབས་ཀྱི་ལྷ་བརྒྱ་དང་ཉི་ཤུ་སྟེ་བསྡོམས་པའི་བརྒྱ་དང་དྲུག་ཅུ་དང་། བརྒྱ་དྲུག་ཅུ་པོ་རེ་རེ་ལ་དབུ་རྒྱན་གྱི་ལྷ་ལྔ་ལྔ་བྱས་པས་དབུ་རྒྱན་གྱི་ལྷ་བརྒྱད་བརྒྱ་དང་། དེའི་སྟེང་དུ་ཐབས་ལྷ་བཞི་བཅུ་དང་། ཤེས་རབ་ཀྱི་ལྷ་བཞི་བཅུ་དང་། བྱིན་རླབས་ཀྱི་ལྷ་བརྒྱ་དང་ཉི་ཤུ་སྟེ་བསྡོམས་པ་སྟོང་ཕྲག་པོ་བསྒོམ་པ་སངས་རྒྱས་སྟོང་གི་དཀྱིལ་འཁོར་དང་། དེ་ནི་རྩ་བའི་ལྷ་རྡོ་རྗེ་མི་བསྐྱོད་པའི་ལུས་ལ་འགོད་པའམ་འདིར་ཀུན་བཟང་རྩ་བར་བསྒོམ་པ་དེ་ལ་འགོད་པ་ཡིན་ནམ་སྙམ་ལ། དེ་ནས་ཀུན་བཟང་ངམ་ཡང་ན་མི་བསྐྱོད་པ་སོགས་རྒྱལ་བ་རིགས་ལྔ་ཡབ་ཡུམ་ཟུང་རེ་རེ་རྩ་ལྷར་བཞག་པའི་ལྷ་སྟོང་ཕྲག་ལྔ་དང་། སེམས་དཔའ་བརྒྱད་དང་སྒོ་བ་བཞི་སྟེ་ཡབ་བཅུ་གཉིས་ཡུམ་དང་བཅས་པར་ཟུང་རེ་རེ་ལ་དེ་ལྟར་སྟོང་ཕྲག་རེ་རེ་བསྒོམ་པས་ཆིག་ཁྲི་ཉིས་སྟོང་དང་། ཐུབ་དྲུག་ལ་སྟོང་ཕྲག་དྲུག་དང་། དེ་ལྟར་མི་བསྐྱོད་པའི་ཆིག་སྟོང་དང་། ཀུན་བཟང་སོགས་རིགས་ལྔའི་ལྔ་སྟོང་བཅས་ལྷ་ཉི་ཁྲི་བཞི་སྟོང་གི་དཀྱིལ་འཁོར་བསྒོམ་པ་དང་། དེ་ལྟར་སྣང་བ་ལ་དེས་རྒྱས་བཏབ་པས་ཏིང་ངེ་འཛིན་ལས་སུ་རུང་བར་གྱུར་ཏེ་སྣང་བ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་བསམ་གྱིས་མི་ཁྱབ་པར་བསྒོམ་པའི་བསམ་ཡས་ལྷུན་གྲུབ་ཀྱི་དཀྱིལ་འཁོར་ཏེ་ཕྱག་རྒྱ་སྤྲོས་བཅས་བསྒོམ་པ་དང་། ཡང་གསང་སྙིང་ལས། མི་བསྐྱོད་ཉི་མའི་དཀྱིལ་ཡི་གེ །རིན་ཆེན་ཟླ་བའི་དཀྱིལ་ཡི་གེ །ལྔ་གཉིས་ཟུང་དུ་སྤྲད་པ་ལས། །སྦྱར་བའི་ཕྱག་རྒྱ་འབྱུང་བའི་རྒྱུ། །ཨོཾ་དང་མཱུམ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་མཉམ་དང་ཀུན་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་སོགས་གསུངས་པ་ལྟར། མཛུབ་མོ་གུང་མོ་རྩེ་སྤྲད་པ་ལ་སོགས་པའི་རྒྱལ་བ་རིགས་ལྔའི་ཕྱག་རྒྱ་དང་ལྷ་སོ་སོའི་ཕྱག་རྒྱ་བཅས་ལྷག་པ་ཏིང་ངེ་འཛིན་གྱི་ཕྱག་རྒྱ་སྟེ་ཕྱག་རྒྱ་བཞི་དང་། གཞན་ཡང་། མཁའ་འགྲོ་མ་གུར་གྱི་རྒྱུད་ལས། ཕྱག་རྒྱ་ཆེན་པོའི་གནས་འདུག་ནས། །རང་གི་ལྷག་པའི་ལྷར་སྦྱོར་བདག །ཤཱཀྱ་སེང་གེ་སྙེམས་བྱས་ནས། །རྒྱལ་པོ་ཐམས་ཅད་ཐོབ་པར་འགྱུར། །ལས་ཀྱི་ཕྱག་རྒྱའི་གནས་འདུག་ནས། །རང་གི་ལྷག་པའི་ལྷར་སྦྱོར་བདག །ཀུན་གྱི་རྒྱལ་པོ་ཐོབ་པར་འགྱུར། །རྡོ་རྗེ་གཟི་བརྗིད་ཏིང་འཛིན་ལྡན། །དམ་ཚིག་ཕྱག་རྒྱའི་སྦྱོར་བ་ཡིས། །གནས་གསུམ་པོ་ཡང་བསྒྲུབ་པར་བྱ། །རང་གི་ལྷག་པའི་ལྷར་སྦྱོར་བས། །པདྨ་གར་གྱི་དབང་ཕྱུག་བདག །ཆོས་ཀྱི་ཕྱག་རྒྱའི་ཏིང་འཛིན་གནས། །རྡོ་རྗེ་ཆོས་ནི་བསྒོམ་པར་བྱ། །ཞེས་དང་། དཔལ་ཟླ་གསང་ཐིག་ལེའི་རྒྱུད་ལས། དང་པོ་ཆོས་ཀྱི་ཕྱག་རྒྱ་སྟེ། །གཉིས་པ་དམ་ཚིག་ཕྱག་རྒྱ་ཡིན། །གསུམ་པ་ཕྱག་རྒྱ་ཆེན་པོ་སྟེ། །བཞི་བ་ལས་ཀྱི་ཕྱག་རྒྱར་བཤད། །ཅེས་གསུངས་པ་ལྟར། ཕྱག་རྒྱའི་དབྱེ་བ་ཕྱག་རྒྱ་ཆེན་པོ་དང་། ཆོས་ཀྱི་ཕྱག་རྒྱ་དང་། དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་བཅས་བཞི་བཤད་པ་བཅས་ཡོད་མོད། འཕགས་པ་ཐབས་ཀྱི་ཞགས་པ་པདྨོའི་ཕྲེང་བ་ལས། སོར་མོ་ནང་དུ་བསྣོལ་ནས་བཀན། །གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བཀྱེད་དེ། །སྲིན་ལག་གཤིབས་བསྒྲེང་དམ་ཚིག་རྒྱ། །རྐང་སོར་གཡས་ཀྱིས་གཡོན་པ་མནན། །ལག་མཐིལ་གཡས་ཀྱིས་གཡོན་པ་མནན། །མཐེ་བོང་རྩེ་སྤྲད་པང་དུ་བླང་། །རྣམ་པར་སྣང་མཛད་རྒྱ་ཆེན་ཡིན། །ཞེས་པ་ནས། རྡོ་རྗེ་ཕྲེང་བའི་ཕྱག་རྒྱ་ཡིན། །ཞེས་དང་། ཀུ་རུ་ཀུ་ལླེའི་རྟོག་པ་ལས། ལག་པ་ཐལ་མོ་སྦྱར་བྱས་ནས། །མཐེའུ་ཆུང་གཉིས་ནི་བསྒོམ་པར་བྱ། །གུང་མོ་གཉིས་ནི་རྩེ་མོ་སྦྱར། །རྩེ་མོའི་ནང་དུ་མིང་མེད་གཞུག །མཛུབ་མོ་གཉིས་ནི་དབུ་མར་སྦྱར། །མཐེ་བོང་གཉིས་ནི་འོག་ཏུ་བཀུག །དམ་ཚིག་ཕྱག་རྒྱ་འདི་བཅིངས་ནས། །འཁོར་ལོ་བཀུག་ནས་གཞུག་པར་བྱ། །ཞེས་གསུངས་པ་ལྟར། རང་ཉིད་ཁྲག་འཐུང་འབར་བ་ཆེན་པོ་ལྔ་བཅུ་རྩ་བརྒྱད་ཀྱི་ལྷའི་སྐུ་སྣང་སྟོང་སྒྱུ་མ་ལྟ་བུའི་རང་བཞིན་གསལ་ལ་འཛིན་པ་མེད་པར་བསྒོམ་པ་ཕྱག་རྒྱ་ཆེན་པོ་དང་། ལག་སོར་སོགས་ལ་ལྷ་སོ་སོའི་ས་བོན་གྱི་ཡིག་འབྲུ་བསྒོམ་པ་ཆོས་ཀྱི་ཕྱག་རྒྱ་དང་། དེ་ལས་ལྷའི་ཕྱག་མཚན་སྣ་ཚོགས་གསལ་བ་དམ་ཚིག་གི་ཕྱག་རྒྱ་དང་། ལག་པ་གཡས་གཡོན་དུ་བསྒྱུར་བ་དང་ཁྱུད་པའི་རྒྱ་ལ་སོགས་པ་ནི་ལས་ཀྱི་ཕྱག་རྒྱ་སྟེ། དེ་ལྟར་བསྐྱེད་པའི་རིམ་པའི་ཕྱག༷་རྒྱ༷་རྣམས་སྒོམ་པའི་གན༷ས་སུ་མ༷་སོ༷ན་པ་སྟེ་སྒོམ་པའི་གནས་སྐབས་ཀྱི་རྩལ་ཇི་བཞིན་མ་ཐོན་ཅིང་བསྒོམ་མ་ནུས་པ་དང་། རྡོ་རྗེ་སེམས་སྒྱུ་འཕྲུལ་དྲྭ་བ་ལས། ཚོགས་ཀྱི་མཆོད་པའི་དམ་ཚིག་དང་། །ཚོགས་ཀྱི་དཀྱིལ་འཁོར་དམ་ཚིག་དང་། །ཚོགས་ཀྱི་འཕྲིན་ལས་དམ་ཚིག་དང་། །ཕྲ་མེན་ཚིམ་བྱེད་དམ་ཚིག་སྟེ། །སྒྲུབ་པའི་འཕྲིན་ལས་དམ་ཚིག་ཡིན། །ཞེས་དང་། བདེ་མཆོག་འབྱུང་བའི་རྒྱུད་ལས། སྦྱིན་སྲེག་གིས་ནི་རྫོགས་བྱ་ཞིང་། །དགེ་འདུན་ལ་ནི་སྟོན་མོ་དྲང་། །དེ་ནས་ཚོགས་ཀྱི་འཁོར་ལོ་བྱ། །ནད་པའམ་མགོན་མེད་རྣམས་ལའང་སྦྱིན། །ཞེས་དང་། སྟོབས་པོ་ཆེའི་རྒྱུད་ལས། དཔལ་ལྡན་མཁའ་འགྲོ་མ་ལ་སོགས། །བརྟག་པའི་རྫས་ཀྱི་བྱེ་བྲག་ཀྱང་། །མཆོད་དང་ཚོགས་ཀྱི་འཁོར་ལོ་སོགས། །བསྐོར་ལ་མཚན་མ་བརྟག་པར་བྱ། །ཞེས་དང་། སངས་རྒྱས་ཐོད་པ་ལས། སྦྱིན་དང་ཚོགས་ཀྱི་འཁོར་ལོ་དང་། །དེ་ནས་དཀྱིལ་འཁོར་མཆོད་པར་བྱ། །ཞེས་དང་། ཕུར་བ་འཕྲིན་ལས་ཀྱི་རྒྱུད་ལས། བརྟུལ་ཞུགས་ཆེན་པོའི་སྤྱོད་པ་ཡིས། །ཚོགས་ཀྱི་འཁོར་ལོ་བྱ་བ་ཡིན། །དམ་ཚིག་མེད་ཅིང་ངག་རྒྱུད་པའང་། །རྟོག་པ་ཅན་ལ་ཚོགས་འཁོར་གསང་། །དཔའ་བོ་དཔའ་མོ་བརྟུལ་ཞུགས་ལྡན། །དམ་ཚིག་ཅན་གྱིས་ཚོགས་འཁོར་བྱ། །རྡོ་རྗེའི་གླུ་ནི་རབ་ཏུ་བླང་། །མཁའ་འགྲོའི་ཚོགས་ལ་གཏོར་མ་སྦྱིན། །ཞེས་གསུངས་པ་ལྟར། ཁྲོ་བོའི་དཀྱིལ་འཁོར་དུ་ཚོ༷གས་ཀྱི་འཁོར་ལོ་དང༷་། དཔའ་བོའི་དགའ་སྟོན་དང་། དཔའ་མོའི་སྟོན་མོ་ལ་སོགས་པ་ཚོགས་ཀྱི་མཆོད་པས་མ་མཆོད་པ་དང་། བདེ་མཆོག་འབྱུང་བའི་རྒྱུད་ལས། གཏོར་མ་སློབ་དཔོན་གྱིས་རབ་བརྟག །ལྷ་ནི་བསྙེན་ཕྱིར་མཆོད་བྱ་ཞིང་། །ཞེས་དང་། དཔལ་རྡོ་རྗེ་གདན་བཞི་ལས། ཇི་ལྟར་བདག་ཉིད་ནགས་དེ་བཞིན། །རྟག་པ་ཉིད་དུ་གཏོར་མ་སྦྱིན། །མཚན་མོ་ཐུན་གཅིག་གནས་པ་ནི། །མཁས་པས་དཀྱིལ་འཁོར་མཉེས་པར་བྱ། །ཞེས་དང་། མི་གཡོ་བའི་གསང་རྒྱུད་ལས། བདུད་རྩི་ལྔ་དང་ཁྲག་ལ་སོགས། །གཏོར་མ་ཐམས་ཅད་སྦྱིན་པར་བྱ། །ཞེས་དང་། དཔལ་ནག་པོ་ཆེན་པོའི་རྒྱུད་ལས། རྟག་གཏོར་རྒྱུན་གཏོར་གཡས་དང་གཡོན། །ཞེས་གསུངས་པ་ལྟར་དཀྱིལ་འཁོར་གྱི་ལྷ་རྣམས་དང་འབྱུང་པོ་སོགས་ལ་མཆོད་པའི་ཞལ་ཟས་རྒྱུན་གཏོར་དང་དུས་གཏོར་ལ་སོགས་པའི་གཏོར༷་མ༷ས་མཆོད་དེ་སོ་སོའི་ཐུགས་ཀྱི་ཆ་ལ་འགལ་ཉེས་སོོང་བ་དེ་དག་སོར་ཆུད་པའི་གན༷ས་སུ༷་མཉེས་པས་བསྐང་དགོས་པ་ལ་དེ་ལྟར་མ༷་བསྐ༷ངས་པ༷་ལ་སོགས་པ་ཁྲོ་བོའི་དཀྱིལ་འཁོར་གྱི་ཏིང་འཛིན་བསྒོམས་པ་ལ་མི་འཚམ་པའི་ཉེས་འཁྲུལ་དང་། སྦྱིར་གྱི་དམ་ཚིག་ཉམས་ཆག་རྣམས་དྲག་པོ་ཁྲོ༷་བོ༷འི་ལྷ༷་ཚོ༷གས་ལྔ་བཅུ་རྩ་བརྒྱད་པོ་རྣམ༷ས་ལ༷་གཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

གཉིས་པ་ཁྲོ་བོའི་དཀྱིལ་འཁོར་ལ་བཤགས་པ་རྒྱས་པར་བཤད་པ་ལ་ནི། ཁྲག་འཐུང་རིགས་ལྔའི་བཤགས་པ་དང་། ཀྲོ་ཏི་ཡུམ་ལྔའི་བཤགས་པ་དང་། ཀཽ་རཱི་བརྒྱད་ཀྱི་བཤགས་པ་དང་། ཕྲ་མེན་བརྒྱད་ཀྱི་བཤགས་པ་དང་། སྒོ་མ་བཞིའི་བཤགས་པ་དང་། མཁའ་འགྲོ་བཅུ་གཅིག་གི་བཤགས་པ་དང་། དབང་ཕྱུག་ཉེར་བརྒྱད་ཀྱི་བཤགས་པ་དང་། གནས་ཉུལ་ཆེན་མོའི་བཤགས་པ་དང་། རྡོ་རྗེ་རྒྱལ་པོའི་བཤགས་པ་དང་། རྡོ་རྗེ་རྒྱལ་ཐེབས་ཀྱི་བཤགས་པ་དང་། ལས་ཀྱི་སློབ་དཔོན་གྱི་བཤགས་པ་དང་། གསང་ཡུམ་རིག་མའི་བཤགས་པ་དང་། སྒྲོལ་གིང་བདག་པོའི་བཤགས་པ་དང་། འགུག་འདྲེན་ཕོ་ཉའི་བཤགས་པ་དང་། རྡོ་རྗེ་མིང་སྲིང་གི་བཤགས་པ་དང་། དམ་ཚིག་བྱ་ར་བྱེད་པའི་བཤགས་པ་དང་། ཕྱི་འཁོར་བརྟན་མའི་བཤགས་པ་དང་བཅུ་བདུན་ལས།

དང་པོ་ནི། ཨོཾ་དང་པོ་གསང་མཆོག་སྡོམ་པ་འདི་མནོས་ནས༔ འདའ་དཀའ་ཁས་བླངས་དམ་ལས་གཡེལ་གྱུར་ཏེ༔ ཁྲག་འཐུང་རིགས་ལྔའི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ ཞེས་པའི་ཤོ་ལོ་ཀ་གཅིག་གིས་བསྟན་ལ། དེ་ལྟར་ཁྲོ་བོའི་བཤགས་པ་མདོར་བསྡུས་སུ་བསྟན་པའི་རྗེས་དེ་ནས་དབང་རྟུལ་དང་སྤྲོས་པ་ལ་དགའ་བའི་ངོར་སླར་ཡང་ཁྲོ་བོའི་དཀྱིལ་འཁོར་ལ་བཤགས་པ་དང་བཟོད་གསོལ་བྱེ་བྲག་ཏུ་གསོལ་བའི་ཚུལ་རྒྱས་པར་བྱ་བ་ནི། ཨོཾ༷་ནི་གོང་ལྟར་ཡེ་ཤེས་ལྔ་ལ་སོགས་པའི་ཤིས་པ་བརྗོད་པ་དང་བྱིན་གྱིས་བརླབས་པའོ།།

གསང་སྔགས་ཀྱི་སྒོར་ཞུགས་པ་ལ་དང༷་པོ༷་བརྒྱུད་པ་གཙང་མ་ལས་སྨིན་བྱེད་ཀྱི་དབང་ཞུས་ཏེ་གས༷ང་བ་མཆོ༷ག་ཏུ་གྱུར་པ་སྔགས་རྡོ་རྗེ་ཐེག་པའི་སྡོ༷མ་པ༷་འདི༷་ཉིད་རང་རྒྱུད་ལ་མནོ༷ས་ནས༷་བཟུང་དམ་ཚིག་ཉམས་ན་རྣམ་སྨིན་ཡིད་དུ་མི་འོང་བ་ལྕི་བ་བསྐྱེད་པའི་ཕྱིར་ན་ཤིན་ཏུ་འད༷འ་དཀ༷འ་བ་སྟེ་འདའ་བར་བྱ་མི་རུང་བ་དེ་ཉིད་བསྲུང་བར་ཁས༷་བླང༷ས་ཤིང་། དེ་ནས་བག་མེད་པ་ལ་སོགས་པའི་དབང་དུ་ཤོར་ནས་ད༷མ་ཚིག་སྲུང་བ་ལ༷ས་གཡེ༷ལ་བར་གྱུར༷་ཏེ༷་ཉེས་ལྟུང་བྱུང་བའི་དབང་གིས་བཅོམ་ལྡན་འདས་བྷུདྡྷ་བཛྲ་རཏྣ་པདྨ་ཀརྨ་སྟེ་ཁྲ༷ག་འཐུང༷་རིག༷ས་ལྔ༷འི་ཐུག༷ས་དང༷་དམ་ཚིག་ཏུ་བཞག་པ་ལས་ཅི༷་ཞིག་འག༷ལ་བ༷་ཡི་ཉེས་ཚོགས་རྣམས་ཐུག༷ས་སྙིང་རྗེ༷་རབ་ཏུ་ཆེ༷་བ་མང༷འ་བ་ཁྱེ༷ད་ཅག་གི་སྤྱན་སྔ་ལ༷་མཐོལ་ལོ། །བཤགས་སོ། །སླད་མའི་ཆར་ཡང་སྡོམ་པར་བགྱིའོ། །བཟོ༷ད་པ༷ར་གསོ༷ལ་ལོ། །བསྒྲིབ་པར་མ་གྱུར་ཅིག་ཅེས་པའོ།།

གཉིས་པ་ཀྲོ་ཏི་ཡུམ་ལྔའི་བཤགས་པ་ནི། གྷ་ནའི་སྦྱོར་མཆོད་རྟོག་འཛིན་བར་ཆད་ཀྱིས༔ ཀྲོ་ཏི་ཡུམ་ལྔའི་ཐུགས་དང་ཅི་འགལ་བ༔ ཁྲོ་མོ་དབྱིངས་ཕྱུག་མ་ལ་བཟོད་པར་གསོལ༔ ཞེས་པའི་ཚིགས་བཅད་པའི་རྐང་པ་གསུམ་གྱིས་བསྟན་ལ། གྷ༷་ན༷འི་དོན་ནི། གཞུང་དུ་མར་ཏ་ན་གྷ་ཎ་ཞེས་བྱུང་བ་ནི། དྲི་མེད་བཤགས་རྒྱུད་ལས། ཏ་ན་བསྒྲལ་བ་གནས་སུ་མ་སྟོབས་པ་དང་། ག་ཎ་སྦྱོར་བ་བྱིན་གྱིས་མ་བརླབས་པ་ལ་སོགས་པ། ཞེས་གསུངས་པ་ལྟར་ཏ་ནཿནི་སྒྲོལ་བ་དང་། ག་ཎཿནི་སྦྱོར་བའི་དོན་ཡིན་ལ། དེ་ཕྱིར་འདིར་ནི་ག་ཎཿསྦྱོར་བ་ཞེས་པའི་དོན་ཏེ། ཟླ་གསང་ཐིག་ལེ་ལས། ཨཱ་ལི་ཀཱ་ལི་རབ་སྦྱོར་བས། །བུད་མེད་རྣམས་དང་རྩེན་པར་བྱེད། །བློ་ལྡན་རྡོ་རྗེ་སེམས་དཔའ་ཡི། །འདི་ནི་ཤིན་ཏུ་དགྱེས་ཞེས་བྱ། །ཞེས་གསུངས་པ་ལྟར། གསང་སྔགས་ཕོ་ཉའི་ལམ་གྱི་ཉམས་ལེན་རིག་མའི་མཁའ་ལ་བརྟེན་ནས་བདེ་སྟོང་གི་ཡེ་ཤེས་གཉིས་མེད་དུ་སྦྱོར༷་བའི་དགྱེས་པ་ཆེན་པོའི་ས་ལ་སྦྱོར་བའི་ལམ་སྟེ། དགོངས་པ་ལུང་བསྟན་ལས། ཆོས་དང་རྫོགས་ལོངས་སྤྱོད་སྦྱོར་བ། །གསང་སྔགས་ཀྱིས་སྤྲུལ་དབང་པོ་གཉིས། །སྦྱོར་བ་བཞི་ཡི་སྦྱོར་བ་ཡིས། །དབང་པོ་གཉིས་ནི་རབ་སྦྱོར་བའི། །སྙོམས་ཞུགས་སྦྱོར་བ་དེ་ཡིས་ནི། །དེ་དག་ཐམས་ཅད་ཉེ་བར་སྤྱོད། །སྐུ་གསུམ་མི་ཕྱེད་སྔགས་རྣམས་ཀྱི། །འདི་ནི་སྒོམ་པ་མཆོག་དེ་ཡིན། །དེ་ཉིད་དམ་ཚིག་སྦྱོར་བ་འདི། །འདོད་ཆགས་རིགས་གཅིག་བསྒོམ་པའོ། །འདི་ནི་སངས་རྒྱས་ཐམས་ཅད་ཀྱི། །འདོད་ཆགས་ཆེན་པོའི་ཚུལ་མཆོག་སྟེ། །སྔགས་པ་རྣམས་ཀྱིས་ཉིན་རེ་ཞིང་། །རབ་ཏུ་འབད་པས་བསྒོམ་པར་བྱ། །ཞེས་དང་། གསང་བ་བདུད་རྩིའི་རྒྱུད་ལས། དེ་ནས་གསང་བའི་དཀྱིལ་འཁོར་ཡང་། །དབང་པོ་གཉིས་སྦྱོར་ཀུན་ཏུ་རུ། །དེ་ཡི་ཕྱིར་ན་བྷ་ག་ཡིན། །དགའ་བ་ལ་སོགས་སྒྱུ་མ་ཡི། །ཕྲ་བའི་ལམ་སྤོང་ལས་ཡིན་ཏེ། །སེམས་ཀྱི་དྲི་འཁྲུད་འདོད་ཆགས་དག །རང་རིག་སེམས་ཀྱི་རྒྱལ་པོའི་རྒྱུ། །ཞེས་དང་། གཉིས་མེད་རྣམ་རྒྱལ་ལམ་རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། དབང་པོ་གཉིས་ནི་མཉམ་སྦྱར་བས། །སངས་རྒྱས་དངོས་གྲུབ་ཐོབ་པར་འགྱུར། །བྷ་ག་ལ་ནི་ལིངྒ་གཞག །སངས་རྒྱས་གཟུགས་ནི་རྣམ་བསམ་ནས། །བ་སྤུའི་བུ་ག་ཐམས་ཅད་ནས། །རང་རིགས་ལས་བྱུང་རབ་ཏུ་སྤྲོ། །འདི་ནི་བདེ་བ་མཆོག་གྱུར་པ། །གསང་བ་ཡེ་ཤེས་གྲུབ་པའི་གཙོ། །ཞེས་དང་། མཚན་བརྗོད་ལས། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་གསུངས་པ་ལྟར་ས་ལམ་མིག་འཕྲུལ་བཞིན་དུ་བགྲོད་པའི་མྱུར་ལམ་དུ་མ་རྒྱུད་ཀྱི་རྒྱུད་སྡེ་གཙོ་བོར་གྱུར་བའི་སྔགས་བླ་མེད་ཀྱི་རྒྱུད་རྣམས་སུ་བསྔགས་པའི་ཕྱིར་རོ།།

དེས་ན་སྦྱོར་བའི་ཉམས་ལེན་ནི་དེ་འདྲའི་ཐབས་ལམ་ཟབ་མོ་དང་དཀྱིལ་འཁོར་མཉེས་པར་བྱེད་པའི་མཆོ༷ད་པ་བླ་ན་མེད་པ་ཡིན་ནའང་བློ་གཉིས་འཛིན་དང་རེ་དོགས་ཀྱི་རྟོག༷་པའི་འཛི༷ན་པ་ཆེན་པོའི་བར༷་ཆ༷ད་ཀྱིས༷་སེམས་ཐ་མལ་བའི་ཆགས་པ་རང་ག་བའི་དབང་དུ་ཤོར་ཏེ་འཕོ་མེད་བདེ་བ་ཆེན་པོའི་ཡེ་ཤེས་ཀྱི་རོ་ཡི་མཆོད་པས་ཀྲོ༷་ཏི༷་སྟེ་ཁྲོ་མོ་རིགས་ཀྱི་མཁའ་འགྲོ་ཆེན་མོ་ཡུམ༷་ལྔ༷འི་ཐུགས་དགྱེས་པར་བྱ་མ་ནུས་པ་དང་། དེའི་དབང་གིས་དེ་རྣམས་ཀྱི་ཐུག༷ས་དང༷་མི་མཐུན་པར་ཅི༷་ཞིག་དང་ངམ་ཅི་ཙམ་འག༷ལ་བ༷འི་ཉེས་པ་དང་། སྤྱིར་གྱི་དམ་ཚིག་ཉམས་པའི་ཉེས་པ་ཅི་བྱུང་བ་ཐམས་ཅད་ཆགས་རྟོག་རང་ག་བའི་དགྲ་ལ་དྲག་ཏུ་ཁྲོས་པའི་ཁྲོ༷་མོ༷་ཆེན་མོ་བདེ་སྟོང་ཆོས་ཉིད་ཀྱི་དབྱིང༷ས་ཀྱི་དབང་ཕྱུག༷་མ༷་རྣམས་ལ༷་འགྱོད་པས་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

གསུམ་པ་ཀཽ་རཱི་བརྒྱད་ཀྱི་བཤགས་པ་ནི། རྫས་དང་ཕྱག་རྒྱ་མངོན་དུ་མ་གྱུར་ཏེ༔ ཤ་ཟ་ཀཽ་རཱིའི་ཐུགས་དང་ཅི་འགལ་བ༔ གནས་ཀྱི་མ་མོ་བརྒྱད་ལ་བཟོད་པར་གསོལ༔ ཞེས་པའི་རྐང་པ་གསུམ་གྱིས་བསྟན་ལ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། གང་གིས་དེ་དག་དེ་དོན་དུ། །ཚིགས་དང་སྔགས་རྫས་དཀའ་ཐུབ་ཀྱིས། །གང་བསྟན་དེ་ཡི་བྱིན་རླབས་ཀྱིས། །བདག་གཞན་ཕན་པ་གང་འདོད་པའོ། །ཞེས་དང་། རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། སྔགས་རྫས་ཏིང་འཛིན་འདུས་པ་བཞི། །དངོས་ཏེ་དགོངས་པ་ཐམས་ཅད་བྱེད། རྡོ་རྗེ་བྲག་དང་རིན་ཆེན་ཚུལ། །དུག་དང་མེ་བཞིན་མཚོན་ཆ་འདྲ། །ཞེས་གསུངས་པ་ལྟར། སྤྱིར་གསང་སྔགས་ལ་རྫས་སྔགས་ཏིང་འཛིན་གསུམ་དང་ལྡན་དགོས་ལ། བྱེ་བྲག་ཏུ་མ་མོ་མཉེས་པའི་རྫས་དང་། མཐུན་པའི་རྫས་དང་། དབང་དུ་བྱེད་པའི་རྫས༷་སོགས་གཞུང་ནས་བཤད་པ་བཞིན་ལག་ལེན་ཚད་ལྡན་དུ་ཡོད་དགོས་ནའང་། དེ་དག་མ་གྲུབ་པའམ་མེད་པ་ད༷ང་། མཁའ་འགྲོ་མ་རྡོ་རྗེ་གུར་ལས། རང་སྔགས་ཡི་གེ་རྫོགས་པ་དང་། །ཕྱག་རྒྱ་དང་ནི་ཕྱག་མཚན་བརྟག །སྤྲོ་དང་བསྡུ་བ་བྱས་པ་ནི། །དཀྱིལ་འཁོར་རྣམས་ཀྱི་འབྱུང་གནས་ཉིད། །ཅེས་དང་། ཕྱག་རྒྱ་ཆེན་པོ་ཐིག་ལེ་ལས། ཕྱག་རྒྱ་རྣམས་ཀྱིས་མཉེས་པར་བྱ། །ཇི་ལྟར་བསམ་པ་བཞིན་དུ་ནི། །མཉེས་ནས་དངོས་གྲུབ་སྟེར་བའོ། །ཞེས་དང་། རྡོ་རྗེ་རྩེ་མོ་ལས། རིག་པ་རྒྱ་ཆེན་འདི་རྣམས་དང་། ཕྱག་རྒྱ་དག་ཀྱང་ཡོངས་གསལ་བའི། །བསམ་པ་ཡིས་ནི་གཟུང་བར་བྱ། །ཞེས་དང་། དཔལ་མཆོག་དང་པོའི་སྔགས་ཀྱི་རྟོག་པ་ལས། དངོས་གྲུབ་ཐམས་ཅད་ཐོབ་པ་ནི། །ཕྱག་རྒྱ་དག་ཀྱང་བསྟན་བྱས་ནས། །དེ་ཡིས་གར་གྱི་མཆོད་པ་བྱ། །འདོད་པའི་ཡོན་ཏན་ལྔ་པོ་ཡིས། །རྟག་ཏུ་དཀྱིལ་འཁོར་མཆོད་པར་བྱ། །ཞེས་གསུངས་པ་ལྟར། མ་མོ་རྣམས་ཀྱི་དམ་ཚིག་གི་ཕྱག་རྒྱ་དང་། ལས་ཀྱི་ཕྱག་རྒྱ་དང་། མ་མོ་འགུག་པའི་ཕྱ༷ག་རྒྱ༷་དང་། ཏིང་ངེ་འཛིན་རྣམས་མངོན་དུ་གྱུར་དགོས་པར་གསུངས་ནའང་། དེ་ལྟར་མངོ༷ན་དུ༷་མ༷་གྱུར༷་པ་སྟེ་རྫས་མ་ཚང་ཞིང་། ཕྱག་རྒྱ་གསལ་མ་ནུས་པར་གྱུར་ཏེ༷་འབྱུང་པོ་དང་། བསྟན་པའི་དགྲ་བོ་དང་། མཚན་རྟོག་དམན་པའི་ཤ༷་ཟ༷་ཞིང་ཁྲག་འཐུང་བའི་འཇིགས་རུང་གི་མ་མོ་ཀཽ༷་རཱི༷་མ་ལ་སོགས་པ་བརྒྱད་པོའི༷་ཐུག༷ས་ད༷ང་ཅི༷་འག༷ལ་བ༷འི་ཉེས་པའི་ཚོགས་ཐམས་ཅད་གན༷ས་དང་ཉེ་བའི་གནས་ལ་སོགས་པའི་དུར་ཁྲོད་བརྒྱད་ཀྱི་གནས་ཀྱི༷་འབྱུང་པོའི་ཚོགས་ལ་དབང་བསྒྱུར་ཞིང་ཁམས་གསུམ་ཀུན་ཏུ་རྒྱུ་བའི་མ༷་མོ༷་ཆེན་མོ་བརྒྱད༷་ལ༷་མཐོལ་ཞིང་བཤགས་པ་དང་བཟོ༷ད་པར༷་གསོ༷ལ་ལོ་ཞེས་པའོ།།

འཕྲོས་དོན་དུར་ཁྲོད་བཤད་པ།

ཞི་ཁྲོའི་གཞུང་འདིར་ཀོ་རཱི་མ་བརྒྱད་ཀྱི་ཐད་དུ་གནས་ཀྱི་མ་མོ་དང་གནས་ཀྱི་མཁའ་འགྲོ་ཞེས་རྒྱུན་དུ་འབྱུང་བའི་གནས་ཞེས་པ་ནི། ཡེ་ཤེས་རྔམ་གློག་ལས། ཤེས་པ་བརྒྱད་ནི་མ་བརྒྱད་ལའོ། །ཞེས་གསུངས་པ་ལྟར། རྣམ་པར་ཤེས་པ་ཚོགས་བརྒྱད་པོ་ནི་འཁོར་བ་བསྐྱེད་པའི་གནས་དང་། དེ་གནས་སུ་དག་པ་ཀཽ་རཱི་མ་བརྒྱད་ཡིན་པས་གནས་མའམ་གནས་ཀྱི་ཞེས་དང་། ཡང་ཚོགས་བརྒྱད་གནས་སུ་དག་པ་གནས་གྱུར་པའི་ངོ་བོ་ལྷའི་རྣམ་པར་ཤར་བ་ལ་གནས་ཞེས་འགྲེལ་བ་ཡོད་མོད། དོན་གཙོ་ཆེ་བ་ནི་གནས་དང་ཉེ་བའི་གནས་ན་བཞུགས་པའི་མ་མོ་ཡིན་ཕྱིར་གནས་དང་ཉེ་བའི་གནས་ཀྱི་མཁའ་འགྲོ་མ་ཞེས་པའི་དོན་ཡིན་ལ། དེ་ཕྱིར། དཔལ་ཡེ་ཤེས་ཐིག་ལེ་ལས། དུར་ཁྲོད་བརྒྱད་ཀྱི་དབུས་སུ་ནི། །དཔའ་བོ་རྣལ་འབྱོར་མ་ཡིས་བསྐོར། །འཇིག་རྟེན་སྐྱོང་བ་བརྒྱད་དང་ལྡན། །ཤིང་གི་རྒྱལ་པོ་བརྒྱད་ཀྱིས་བསྐོར། །ཞེས་གསུངས་པ་ལྟར། མ་མོ་རྣམས་གནས་ཡུལ་མི་འདྲ་བ་དུར་ཁྲོད་ཀྱི་གནས་བརྒྱད་དུ་སོ་སོར་གནས་པའི་རྒྱུ་མཚན་གྱིས་གནས་ཀྱི་ཞེས་བརྗོད་པས་གནས་ཞེས་པ་ནི་མ་མོ་རྣམས་གནས་པའི་ཡུལ་དུར་ཁྲོད་བརྒྱད་ལ་གོ་རུང་བ་ཡིན་ཏེ། མཁས་པའི་དབང་པོ་སྨིན་གླིང་ལོ་ཆེན་དྷརྨ་ཤྲིས། གནས་ཞེས་པ་ནི་དུར་ཁྲོད་ཀྱི་གནས་བརྒྱད་ལས་བཏགས་པ་སྟེ། ཞེས་གསུངས་པའི་ཕྱིར། དེས་ན་འདིར་མ་མོ་ཀཽ་རཱི་མ་བརྒྱད་གནས་པའི་ཡུལ་དུར་ཁྲོད་ཀྱི་བཤད་པ་ཅུང་ཟད་འགོད་པར་བྱ་སྟེ། དེ་ཡང་སྤྱིར་དུར་ཁྲོད་ཅེས་པ་ནི་གནའ་བོའི་དུས་སུ་རྒྱ་གར་གྱི་ཡུལ་སྲོལ་ལ་མི་ཤི་བའི་རོ་ས་འོག་ཏུ་སྦ་བ་དང་མེ་ལ་བསྲེག་པ་སོགས་གཙོ་བོར་མི་བྱེད་པར་ཡུལ་དབེན་པ་མི་ཕལ་བའི་རྒྱུ་འགྲུལ་མེད་པའི་ནགས་ཁྲོད་ལྟ་བུ་གནས་གཅིག་ལ་དོར་བ་ཡིན་པས་ན་དེ་ལྟར་རོ་དོར་ཡུལ་དེ་ལ་ཟེར་ཞིང་། དེར་ཕྱི་ནས་ཁྱི་ལྡོམ་པོ་དང་། བྱ་དང་། སྤྲུལ་དང་། ཕག་རྒོད་དང་། གཅན་གཟན་གྱི་ཚོགས་དང་། མི་ཤ་ཟ་བའི་མི་ཡི་རིགས་གནས་པ་དང་འགྲོ་འོང་གི་རྒྱུ་འགྲུལ་ཡོད་པ་དང་། ནང་འབྱུང་བོ་གདོན་གྱི་ཚོགས་མ་རུང་བ་ཤ་ཁྲག་ལ་མོས་པ་རྣམས་མཚན་མོ་ཤས་ཆེ་བར་གནས་པ་དང་། རྒྱུ་འགྲུལ་ཆེར་བྱེད་པ་དང་། གསང་བ་ས་ལམ་ལ་གནས་པའི་དཔའ་བོ་དང་རྣལ་འབྱོར་མ་རིག་པ་བརྟུལ་ཞུགས་ཀྱི་སྤྱོད་པ་གྲུབ་པ་དང་། ཡེ་ཤེས་སྒྱུ་མའི་སྐུ་གྲུབ་པ་རྣམས་གནས་ཡོད་པ་ཡིན་ཞིང་། དེ་ཡང་མདོ་ལྟར་ན་མི་རྟག་པ་དང་། མི་སྡུག་པ་བསྒོམ་པའི་གནས་སུ་བསྔགས་པ་དང་། སྔགས་ལྟར་ན་སྣང་བ་ཐོག་བརྫིས་ཀྱིས་རིག་པ་བརྟུལ་གྱི་སྤྱོད་པ་སྐྱོང་བའི་གནས་སུ་བསྔགས་པ་སྟེ། ཡང་དག་སྦྱོར་བའི་རྒྱུད་ཆེན་པོ་ལས། བཟའ་དང་བཟའ་མིན་ཅི་སྙེད་པ། །སྨྱོན་པའི་སྦྱོར་བས་བཟའ་བར་བྱ། །གཞན་པའི་ཡུལ་འཁོར་གྲུབ་པ་དང་། །རི་ཡི་ཕུག་དང་ཚང་ཚིང་དང་། །གདོད་ནས་གྲུབ་པའི་དུར་ཁྲོད་ཆེ། །རྒྱ་མཚོ་ཆེན་པོའི་འགྲམ་དུ་ཡང་། །དེར་གནས་ཤེས་རབ་ཅན་གྱིས་བསྒོམ། །སྐྲག་པ་ཐམས་ཅད་རྣམ་སྤངས་ཏེ། །དེ་ལྟར་བྱས་ནས་རྣལ་འབྱོར་པས། །ཡང་ནི་ཕྱོགས་ལས་རྣམ་རྒྱལ་བརྩམ། །སྒྲིབ་པ་ཀུན་ལས་རྣམ་པར་གྲོལ། །ཞེས་གསུངས་པ་ལྟར་ཡིན་ནོ།།

དེ་འདྲའི་དུར་ཁྲོད་ལ་ཆེ་ཆུང་དང་གྲངས་ཀ་སོགས་ཚད་བགྲང་དཀའ་བ་ཡོད་མོད། འདིར་ནང་བའི་རྒྱུད་སྡེ་དུ་མར་གྲགས་པའི་དུར་ཁྲོད་བརྒྱད་ཅེས་པ་དེ་འཆད་ན། དེ་ལ་ཕྱིའི་དུར་ཁྲོད་དང་། ནང་གི་དུར་ཁྲོད་དང་། གསང་བའི་དུར་ཁྲོད་དང་། དེ་ཁོ་ན་ཉིད་ཀྱི་དུར་ཁྲོད་དང་བཞི་ཡོད་དེ། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། ཕྱི་ནང་གསང་བ་དེ་ཉིད་ཀྱིས། །དུར་ཁྲོད་རྣམ་པ་བཞི་རུ་འགྱུར། །ཞེས་གསུངས་པའི་ཕྱིར་རོ།།

དེ་ལས་དང་པོ་ཧེ་རུ་ཀ་གལ་པོ་ལས། ཕྱི་གནས་ཀྱི་དུར་ཁྲོད་བརྒྱད་དང་། ཞེས་གསུངས་པ་ལྟར། ཕྱིའི་དུར་ཁྲོད་ཆེན་པོ་བརྒྱད་ནི། འཇམ་དཔལ་དྲག་པོ་ཚེ་བདག་ནག་པོས་སྲོག་བདག་གཤིན་རྗེ་བཏུལ་བ་དང་། དཔལ་ཧེ་རུ་ཀ་ཡིས་རུ་དྲ་བསྒྲལ་བས་རུ་དྲའི་མགོ་བོ་ལྷོ་ནུབ་དང་། རྐང་པ་གཉིས་པོ་བྱང་ཤར་གྱི་མཚམས་སུ་བསྟན་ནས་གན་རྐྱལ་དུ་ཉལ་སྟབས་སུ་འགྱེལ་ཞིང་། ལག་པ་གཉིས་མདུན་ནས་ཅུང་ཟད་བསྣོལ་བ་དང་། ལག་པ་གཉིས་ཀྱི་གཡས་པའི་མཁྲིག་མ་ལ་དུར་གྱི་སྤྱང་ཀི་དང་དུར་བྱ་ཀང་ཀ་གཉིས་དང་། ལག་པ་གཡོན་པའི་མཁྲིག་མ་ལ་ཁྱི་དང་ནི་བྱ་རྒོད་གཉིས་བབས་པ་དང་། བམ་རོའི་མདོག་སྔོ་སྐྱ་ཐལ་བའི་མདོག་ཅན་གྱི་མགོ་ནི་ལྷོ་ཕྱོགས་དང་། སྙིང་ཤར་ཕྱོགས་སུ་འཐོར་བ་ལ་སོགས་པ་ཡན་ལག་དང་དོན་སྣོད་སོགས་ཕྱོགས་བརྒྱད་དུ་བཀྲམ་པ་རེ་རེ་ལ་གནས་བརྒྱད་དུ་བྱིན་གྱིས་བརླབས་པས་དུར་ཁྲོད་རེ་བྱུང་བ་ཡིན་ཕྱིར་དུར་ཁྲོད་བརྒྱད་ཡོད་པར་བཤད་དེ། ཧེ་རུ་ཀ་སྙིང་རྗེ་རོལ་བ་ལས། འགྲོ་བ་ཐམས་ཅད་སྤྱོད་པར་མཛད། །འགྲོ་བའི་བདག་པོ་ཚེ་དང་སྲོག །གསོན་པོ་བདེ་བའི་བར་གཅོད་པ། །བདུད་དང་གཤིན་རྗེ་འཁོར་བཅས་ཀུན། །བཅོམ་ཞིང་གསང་བའི་གཉེན་པོ་ནི། །འཇམ་དཔལ་འཕྲུལ་གྱི་ཁྲོ་བོ་དེས། །སྲིད་གསུམ་མཐར་བྱེད་རྔམ་པ་དང་། །ཐོད་དབྱུག་དྲག་པོ་མི་མཛད་པས། །གཤིན་རྗེ་བཅོམ་སྟེ་བསད་ནས་ཀྱང་། །རོ་ཡང་ལྷོ་ཡི་འཛམ་གླིང་དུ། །བོར་ནས་ས་གཞི་དུར་ཁྲོད་ཀྱི། །བདག་པོ་གདོལ་པ་དྲག་པོ་ཡིས། །རོ་ཡི་ཉལ་ཐབས་གན་རྐྱལ་ཏེ། །མགོ་ནི་ལྷོ་ནུབ་མཚམས་སུ་བསྟན། །རྐང་པ་བྱང་ཤར་མཚམས་སུ་བསྟན། །དེ་ཡང་ཅུང་ཟད་བསྣོལ་བའོ། །ལག་པ་གཡས་གཡོན་མཁྲིག་མ་ལ། །ཁྱི་གཉིས་དང་ནི་བྱ་རྒོད་དོ། །ཐལ་བའི་མདོག་ལ་སྐུ་སྒྲེང་བ། །དེ་ཡི་ལུས་སྙིང་ཡན་ལག་ནི། །མ་མོ་ཆེན་མོ་རྣམས་ཀྱི་གནས། །དུར་ཁྲོད་ཆེན་པོ་འདི་དག་གོ །ཞེས་དང་། འབྲས་བུ་ཆེན་པོ་ལྔ་བསྒྲལ་བ་ལས། རང་སེམས་མ་བཅོས་ཡེ་ནས་ཆུབ། །སྐྱེས་བུ་ཆེན་པོ་རྣལ་འབྱོར་གྱིས། །བསྒྲལ་བ་འབའ་ཞིག་སྙིང་རྗེའི་མཆོག །མ་ཏྲང་རུ་ཏྲ་དེ་བསྒྲལ་ཏེ། །ཞེས་དང་། བདུད་དང་དབང་ཕྱུག་གཤིན་རྗེ་དེ། །ཐུགས་རྗེ་ཚད་མེད་བཞིས་བསྒྲལ་ནས། །རོ་ཡི་ཉལ་ཐབས་གན་རྐྱལ་ཏེ། །འཛམ་བུ་གླིང་བའི་གླིང་ཁམས་སུ། །བོར་ནས་ས་གཞིར་གྱུར་པ་ནི། །དུར་ཁྲོད་ཆེན་པོ་བརྒྱད་དུ་གྱུར། །མགོ་ནི་ལྷོ་ནུབ་མཚམས་སུ་བསྟན། །རྐང་པ་བྱང་ཤར་མཚམས་སུ་བསྟན། །ལག་པ་གཉིས་ནི་གཡས་གཡོན་བརྐྱང་། །མགོ་དང་ལུས་སྙིང་ཡན་ལག་ཀུན། །གནས་ཀྱི་དུར་ཁྲོད་ཆེན་པོ་བརྒྱད། །དེ་ནི་དཔལ་ཆེན་བཞུགས་གནས་ཡིན། །ཞེས་དང་། རྒྱུད་ཀྱི་རྒྱལ་པོ་ཆེན་པོ་དཔལ་བདུད་རྩི་རོལ་བ་ལས། སྐྱེས་བུ་ཆེན་པོའི་རྣལ་འབྱོར་གྱིས། །བསྒྲལ་བ་འབའ་ཞིག་སྙིང་རྗེའི་མཆོག །བདུད་དང་དབང་ཕྱུག་སྙིང་རྗེ་དག །ཐུགས་རྗེ་ཚད་མེད་བཞིས་བསྒྲལ་ནས། །རོ་ཡི་ཉལ་ཐབས་གན་རྐྱལ་ཏེ། །འཛམ་གླིང་ལྷོ་ཡི་རྒྱལ་ཁམས་སུ། །བོར་ནས་ས་གཞིར་གྱུར་པ་ནི། །དུར་ཁྲོད་ཆེན་པོ་བརྒྱད་དུ་གྲགས། །མགོ་ནི་ལྷོ་ཕྱོགས་གནས་སུ་བསྟན། །ལག་གཉིས་གཡས་དང་གཡོན་དུ་བརྐྱང་། །མགོ་དང་ལུས་གཉིས་ཡན་ལག་ཀུན། །ཐུགས་རྗེ་ཆེན་པོའི་བྱིན་རླབས་ཀྱིས། །རང་བྱུང་སྤྲུལ་པའི་ལྷ་མོ་གནས། །ཞེས་དང་། རྟ་མཆོག་རོལ་བའི་ཏནྟྲ་ལས། འཇམ་དཔལ་སྤྲུལ་པ་ཁྲོས་པའི་མཆོག །སྲིད་གསུམ་མཐར་བྱེད་རྔམ་པ་དེས། །ཁ་ཊྭཱཾ་ཐོད་དབྱུག་མི་བཟད་པ། །གཤིན་རྗེ་བཅོམ་ནས་གསད་པར་བྱ། །རོ་ཡང་འཛམ་བུའི་གླིང་དུ་བོར། །ས་གཞི་དུར་ཁྲོད་བརྒྱད་པོ་ཡིས། །བདག་པོ་དྲེགས་པ་བསྣོལ་བ་ཡི། །རོ་ཡི་ཉལ་ཐབས་གན་རྐྱལ་ཏེ། །མགོ་ནི་ལྷོ་ནུབ་མཚམས་སུ་བསྟན། །རྐང་པ་བྱང་ཤར་ཐུག་པ་མེད། །དེ་ཡང་མཁྲིག་གཉིས་བསྣོལ་བའོ། །སྤྱང་ཀི་དང་ནི་ཀང་ཀ་བྱ། །ལག་པ་གཡོན་པའི་མཁྲིག་མ་ལ། །ཁྱི་གཉིས་དང་ནི་བྱ་རྒོད་དེ། །ཐལ་བའི་མདོག་ལ་ལུས་བསྒྲེང་བའོ། །ཞེས་དང་། དབང་ཆེན་བསྡུས་པའི་ཏན་ཏྲ་ལས། འཇིགས་བྱེད་ཆེན་པོ་ཁྲག་འཐུང་གིས། །ཤོར་བ་གཞོན་ནུ་ལ་སོགས་པའི། །བདུད་དང་གཤིན་རྗེ་དྲེགས་པ་དེ། །ཐུགས་རྗེ་ཚད་མེད་བཞིས་བསྒྲལ་ནས། །ཕུང་པོ་ཉལ་ཐབས་གན་རྐྱལ་ཏེ། །འཛམ་གླིང་ལྷོ་ཡི་གླིང་ཁམས་སུ། །རོ་ལངས་ས་གཞིར་གྱུར་པར་བཤད། །ཅེས་དང་། ཀརྨ་མཱ་ལེའི་རྒྱུད་ལས། འཇམ་དཔལ་འཕྲུལ་གྱི་དངོས་གྲུབ་མཆོག །སྲིད་གསུམ་མཐར་བྱེད་རྔམས་པ་དེས། །ཐོད་དབྱུག་ཆེན་པོ་མི་བཟད་པས། །གཤིན་རྗེ་བཏུལ་ཏེ་བསད་ནས་སུ། །རོ་ཡང་ལྷོ་ཡི་འཛམ་གླིང་དུ། །དུར་ཁྲོད་ཆེན་པོ་བརྒྱད་དུ་བརྩིགས། །ཞེས་དང་། ཁྲོ་བོ་པུཎྜ་རཱི་ཀའི་རྒྱུད་ལས། བགེགས་ཀྱི་རྒྱལ་པོ་རུ་ཏྲ་བསྒྲལ། །བདེ་བ་ཆེན་པོའི་ངང་ཡིན་ཏེ། །ང་ནི་དུར་ཁྲོད་དབང་ཕྱུག་སྟེ། །སངས་རྒྱས་སྐུ་སྟེ་ཡེ་ཤེས་ཡིན། །འཇམ་དཔལ་རྣོན་པོའི་མཚོན་ཆ་ཡིན། །ལོག་རྟོག་འཁོར་བའི་རྒྱུན་བཅད་དོ། །ཞེས་དང་། མགོ་ནི་ལྷོ་ནུབ་མཚམས་སུ་བསྒྲལ། །རྐང་པ་བྱང་ཤར་མཚམས་སུ་བསྒྲལ། །ཡན་ལག་གླིང་བཞིའི་ཡུལ་དུ་བསྒྲལ། །ཞེས་གསུངས་པའི་ཕྱིར་རོ།།

དེ་ཕྱིར་དུར་ཁྲོད་བརྒྱད་ཤར་ལྷོ་ལ་སོགས་ཀྱི་གནས་ཕྱོགས་དང་དཀྱིལ་འཁོར་དུ་འགོད་ཕྱོགས་སྔ་འགྱུར་རྙིང་མའི་ལུགས་ལྟར་ན་ནི། རུ་ཏྲའི་སྙིང་ཡུལ་མ་ག་དྷ་རུ་བཞག་པ་ལ་ནི་ཤར་གྱི་དུར་ཁྲོད་བསིལ་བའི་ཚལ་དང་། མགོ་བོ་སིང་ག་ལ་རུ་འཐོར་བ་ལྷོ་ཕྱོགས་དུར་ཁྲོད་སྐུ་ལ་རྫོགས་པ་དང་། ལག་པ་གཡས་པ་བལ་ཡུལ་དུ་འཐོར་བ་ཤར་ལྷོ་དུར་ཁྲོད་ལྷུན་གྲུབ་གཏེར་དང་། ལག་པ་གཡོན་པ་ས་ལའི་ཡུལ་དུ་འཐོར་བ་ལྷོ་ནུབ་དུར་ཁྲོད་གསང་ཆེན་རོལ་བ་དང་། རྐང་པ་གཡས་པ་ལི་ཡུལ་དུ་འཐོར་བ་བྱང་ཤར་དུར་ཁྲོད་འཇིག་རྟེན་བརྩེགས་པ་དང་། རྐང་པ་གཡོན་པ་ཁ་ཆེའི་ཡུལ་དུ་འཐོར་བ་ནུབ་བྱང་དུར་ཁྲོད་ཧེ་ཆེན་བརྡལ་བ་དང་། ཕོ་མཚན་ཨུ་རྒྱན་གྱི་ཡུལ་དུ་འཐོར་བ་བྱང་ཕྱོགས་དུར་ཁྲོད་པདྨ་བརྩེགས་པ་དང་། རུ་ཏྲའི་ནང་འཁྲོལ་རྣམས་སྲིན་ཡུལ་ལངྐ་པུ་རིར་འཐོར་བ་ནུབ་ལངྐ་བརྩེགས་པའི་དུར་ཁྲོད་དང་བརྒྱད་དུ་གསུངས་པ་དེ་ཡིན་ཏེ། ཧེ་རུ་ཀ་སྙིང་རོལ་ལས། དེ་ཡི་སྙིང་ནི་མ་ཧཱའི་ལྟོ། །དུར་ཁྲོད་ཆེན་པོ་བསིལ་ཚལ་ན། །མ་མོ་ཆེན་མོ་གཽ་རི་མ། །མཁས་མ་སྙིང་སྟོབས་ཆེ་བའི་གནས། །དེ་ཡི་མགོ་ནི་ལྷོ་ཕྱོགས་ཀྱི། །སིང་ག་ལ་ཡི་གླིང་ཕྲན་ན། །མ་མོ་ཆེན་མོ་ཙོོ་རི་མ། །མཐོང་ཐོས་རྔམ་པའི་རྫུ་འཕྲུལ་མངའ། །ལག་པ་གཡས་ནི་ཤར་ལྷོ་མཚམས། །བལ་ཡུལ་ན་ནི་པུཀྐ་སི། །འཁོར་དང་ལོངས་སྤྱོད་སྣ་ཚོགས་ལྡན། །ལྷག་པར་ཟས་ཀྱི་འབྱོར་པ་ཆེ། །ལག་པ་གཡོན་ནི་ལྷོ་ནུབ་མཚམས། །ས་ཡི་ཚལ་ན་བེ་ཏ་ལི། །ཕྱག་ན་རྡོ་རྗེ་དབང་གི་གནས། །དེ་ནས་མཐུ་དང་དབང་ཡང་ཆེ། །རྐང་པ་གཡས་པ་བྱང་ཤར་མཚམས། །ལི་ཡུལ་ན་ནི་ཙཎྜ་ལི། །ཤང་ཀ་ན་ཞེས་གྲགས་པ་དེ། །དེ་ཡང་འཁོར་དང་ལོངས་སྤྱོད་ལྡན། །རྐང་པ་གཡོན་པ་ནུབ་བྱང་མཚམས། །སྐད་ནི་སྐད་སྣ་མཐུན་པས་ན། །མ་མོ་ཆེན་མོ་པྲ་མོ་ཧ། །བདེ་སྐྱིད་ལྡན་པའི་ས་ལ་གནས། །ཕོ་མཚན་སྟེང་གི་བྱང་ཕྱོགས་ན། །ཨུ་རྒྱན་ཡུལ་ན་གྷསྨ་རི། །ཞེས་དང་། འབྲས་བུ་ཆེན་པོ་ལྔ་བསྒྲལ་བ་ལས། དེ་ཡི་ལུས་སྙིང་མ་ག་དྷ། །དུར་ཁྲོད་ཆེན་པོ་བསིལ་བའི་ཚལ། །མ་མོ་ཆེན་མོ་ཀེའུ་རི་གནས། །མཁས་ཤིང་སྙིང་སྟོབས་ཆེ་བའི་སའོ། །མཆོད་རྟེན་མིང་ནི་བདེ་བྱེད་རྟེན། །དེ་ཡི་མགོ་བོ་ལྷོ་ཕྱོགས་ཀྱི། །དུར་ཁྲོད་ཆེན་པོ་བཞག་པ་ནི། །སིང་ག་ཡུལ་གྱི་གླིང་ཕྲན་ཡིན། །མ་མོ་ཆེན་མོ་ཙོའུ་རི་གནས། །མཐོང་ཐོས་རྣམ་པའི་འཕྲུལ་བག་ཅན། །མཆོད་རྟེན་རི་བོ་ཏ་ལ་ལ། །ལག་པ་གཡས་པ་ཤར་ལྷོའི་མཚམས། །དུར་ཁྲོད་ཆེན་པོ་བལ་ཡུལ་ཡིན། །མ་མོ་ཆེན་མོ་པུསྐ་སི། །ལྷག་པར་ཟས་ཀྱི་ལོངས་སྤྱོད་ཆེ། །མཆོད་རྟེན་ཁ་ཤོ་བྱ་གྷྲྀ་ཁའོ། །ལག་པ་གཡོན་ནི་ལྷོ་ནུབ་མཚམས། །དུར་ཁྲོད་ཆེན་པོ་ས་ལའི་ཡུལ། །མ་མོ་ཆེན་མོ་བེ་ཏ་ལི། །ཕྱག་ན་རྡོ་རྗེ་དབང་གི་གནས། །དེ་ན་མཐུ་དང་དབང་ཡང་ཆེ། །གྱད་ཡུལ་ཆེན་པོའི་ས་ལས་ནི། །མཆོད་རྟེན་མ་ལ་ས་གན་ད། །རྐང་པ་གཡས་པ་བྱང་ཤར་མཚམས། །དུར་ཁྲོད་ཆེན་པོ་ལི་ཡི་ཡུལ། །མ་མོ་ཆེན་མོ་ཙནྜ་ལི། །ལྷ་མོ་ཤང་ཀི་ནི་ཞེས་གྲགས། །ཆུ་དང་མེ་གྲུབ་རྫུ་འཕྲུལ་ཅན། །མཆོད་རྟེན་མིང་ནི་གེའུ་ཏོ་ཤན། །རྐང་པ་གཡོན་པ་ནུབ་བྱང་མཚམས། །དུར་ཁྲོད་ཆེན་པོ་ཁ་ཆེའི་ཡུལ། །མ་མོ་ཆེན་མོ་པྲ་མོ་ཧ། །བདེ་སྐྱིད་ལྡན་པ་ཕུན་སུམ་ཚོགས། །མཆོད་རྟེན་མིང་ནི་སྐ་ནི་སྐ། །ཕོ་མཚན་སྟེང་གི་བྱང་ཕྱོགས་ན། །དུར་ཁྲོད་ཆེན་པོ་ཨུ་རྒྱན་ཡུལ། །མ་མོ་ཆེན་མོ་ཀས་སྨ་རི། །འབྱོར་པའི་ལོངས་སྤྱོད་ལྔ་དང་ལྡན། །དངོས་གྲུབ་ཅན་ཡང་དེ་ན་མང་། །གཟི་ཡི་མཆོད་རྟེན་ཆེན་པོ་སྟེ། །མིང་ཡང་དྷརྨ་ཙཀྲའོ། །དེ་ཡི་ནང་གྲོལ་ཐམས་ཅད་ཀུན། །དུར་ཁྲོད་ཆེན་པོ་ཟ་ཧོར་ཡུལ། །རྒྱ་མཚོའི་སྒོ་གླིང་མ་ཧཱ་དོ། །ལང་ཀ་པུ་རངས་སྲིན་པོའི་གནས། །མ་མོ་ཆེན་མོ་སྨ་ཤ་ནི། །མངོན་ཤེས་རྫུ་འཕྲུལ་བསམ་མི་ཁྱབ། །དུར་ཁྲོད་ཆེན་པོའི་གནས་བརྒྱད་དོ། །ཞེས་དང་། ཀརྨ་མཱ་ལེའི་རྒྱུད་ལས། འདི་ཡི་ལུས་སྙིང་མ་ག་དྷ། །དུར་ཁྲོད་ཆེན་པོ་བསིལ་ཚལ་དུ། །མ་མོ་ཆེན་མོ་གོའུ་རི་མ། །དུར་ཁྲོད་ཆེན་པོའི་རྒྱན་དུ་འབུལ། །མཁས་ལ་སྙིང་སྟོབས་ཆེ་བ་ཡི། །དངོས་གྲུབ་ཆེན་པོ་སྩལ་དུ་གསོལ། །འདི་ཡི་མགོ་བོ་ལྷོ་ཕྱོགས་ཀྱི། །སིངྒ་ལ་ཡི་གླིང་ཕྲན་ལ། །མ་མོ་ཆེན་མོ་ཙོའུ་རི་མ། །དུར་ཁྲོད་ཆེན་པོའི་རྒྱན་དུ་འབུལ། །མཐོང་ཐོས་རྣམ་པར་འཕྲུལ་བག་གི །དངོས་གྲུབ་དམ་པ་སྩལ་དུ་གསོལ། །འདི་ཡི་ལག་གཡས་ཤར་ལྷོ་མཚམས། །བལ་ཡུལ་ན་ནི་པུཀྐ་སཱི། །དུར་ཁྲོད་ཆེན་པོའི་རྒྱན་དུ་འབུལ། །ལྷག་པར་ཟས་ཀྱི་དངོས་འབྱོར་པའི། །དངོས་གྲུབ་དམ་པ་སྩལ་དུ་གསོལ། །འདི་ཡི་ལག་གཡོན་ལྷོ་ནུབ་མཚམས། །སཱ་ལའི་ཚལ་ན་བེ་ཏཱ་ལཱི། །དུར་ཁྲོད་ཆེན་པོའི་རྒྱན་དུ་འབུལ། །ཕྱག་ན་རྡོ་རྗེའི་མཐུ་སྟོབས་སྩོལ། །འདི་ཡི་རྐང་གཡས་བྱང་ཤར་མཚམས། །ལི་ཡི་ཡུལ་ན་ཙཎྜཱ་ལཱི། །དུར་ཁྲོད་ཆེན་པོའི་རྒྱན་དུ་འབུལ། །ལོངས་སྤྱོད་འཁོར་ལྡན་དངོས་གྲུབ་སྩོལ། །འདི་ལ་རྐང་གཡོན་ནུབ་བྱང་མཚམས། །ཀ་ནི་ཀ་མཐུན་པྲ་མོ་ཧཱ། །དུར་ཁྲོད་ཆེན་པོའི་རྒྱན་དུ་འབུལ། །བདེ་སྐྱིད་ལྡན་པའི་དངོས་གྲུབ་སྩོལ། །འདི་ཡི་ཕོ་མཚན་བྱང་ཕྱོགས་ན། །ཨུ་རྒྱན་ཡུལ་ན་གྷས་མ་རི། །དུར་ཁྲོད་ཆེན་པོའི་རྒྱན་དུ་འབུལ། །གྲུབ་པ་མྱུར་བའི་དངོས་གྲུབ་སྩོལ། །བཞག་ཤ་ཁོག་ཤ་ལ་སོགས་པ། །ཐམས་ཅད་ལོ་ཀའི་དུར་ཁྲོད་ན། །སྨ་ཤ་ནི་ཡི་རྒྱན་དུ་འབུལ། །ལས་རྣམས་ཀུན་གྱི་དངོས་གྲུབ་སྩོལ། །ཞེས་དང་། རྒྱུད་ཀྱི་རྒྱལ་པོ་ཆེན་པོ་དཔལ་བདུད་རྩི་རོལ་བ་ལས། དེ་ཡི་ལུས་སྙིང་མ་ག་དྷཱ། །མ་མོ་ཆེན་མོ་ཀོའུ་རི་གནས། །མཁས་ཤིང་སྙིང་སྟོབས་ཆེ་བའི་ཡུལ། །ཁྱད་པར་ཆོས་ཀྱི་ཚོགས་རྒྱས་ཤིང་། །ཞེས་པ་ནས། ལང་ཀ་པུ་རི་སྲིན་པོའི་ཡུལ། །མ་མོ་ཆེན་མོ་པྲ་མོ་ཧ། །རིན་ཆེན་ནོར་དང་དཔག་བསམ་ཤིང་། །འབྱོར་པའི་ལོངས་སྤྱོད་ཀུན་དང་ལྡན། །མཆོད་རྟེན་གྲུབ་པའི་དངོས་གྲུབ་ཅན། །ཐམས་ཅད་ཀུན་ལ་དབང་བསྒྱུར་བའོ། །ཞེས་གསུངས་པའི་ཕྱིར་རོ།།

འདིར་དྲངས་པའི་གཞུང་རྣམས་ལས་ཡུལ་ཙམ་ལས་དུར་ཁྲོད་ཀྱི་མིང་ལ་གསལ་ཁ་ཅན་ལེགས་པོ་མེད་ལ། ཧེ་རུ་ཀ་སྙིང་རོལ་དུ་ཡི་གེ་ཆད་དམ་ནུབ་ཀྱི་དུར་ཁྲོད་བསྟན་པའི་ཚིག་ཀྱང་མ་བྱུང་ཞིང་། འབྲས་བུ་ལྔ་བསྒྲལ་བ་ལས་དུར་ཁྲོད་ཆེན་པོ་བརྒྱད་པ་དེའི་ཡུལ་ནི། དུར་ཁྲོད་ཆེན་པོ་ཟ་ཧོར་ཡུལ། །རྒྱ་མཚོའི་སྒོ་གླིང་མ་ཧཱ་དོ། །ལང་ཀ་པུ་རི་སྲིན་པོོའི་གནས། །ཞེས་སྲིན་ཡུལ་ལངྐ་པུ་རི་ནུབ་ཟ་ཧོར་དུ་ཡོད་པར་བཤད་དང་། ལ། ཀརྨ་མཱ་ལེ་ལས། ཐམས་ཅད་ལོ་ཀའི་དུར་ཁྲོད་ན། །ཞེས་པ་ཙམ་ལས་ཕྱོགས་གང་ཡིན་གསལ་ཁ་མེད་ཀྱང་ནུབ་ཡིན་དགོས་ཤིང་། བདུད་རྩི་རོལ་བ་ལས། དེ་ཡི་ནང་ཁྲོལ་ཐམས་ཅད་ཀུན། །དུར་ཁྲོད་ཆེན་པོའི་ནུབ་ཕྱོགས་སྤངས། །རྒྱ་མཚོ་གླིང་གི་གནས་ཆེན་པོ། །ལང་ཀ་པུ་རི་སྲིན་པོའི་ཡུལ། །ཞེས་ནུབ་ཡིན་པར་བཤད་ཀྱང་རྒྱ་མཚོའི་གླིང་ཞིག་ཡིན་པ་ཙམ་ལས་ཟ་ཧོར་གྱི་ཡུལ་ཡིན་པར་མ་བཤད་ལ། དོན་ལ་ནུབ་ཕྱོགས་ཟ་ཧོར་གྱི་ཡུལ་དུ་འབོད་པ་དེ་ནི་ལ་ཧོར་ཏེ་ད་ལྟ་རྒྱ་གར་ནུབ་རྒྱུད་ཀྱི་ཡུལ་གྲུ་ཞིག་ཏུ་གོ་བས་དེ་རྒྱ་མཚོའི་གླིང་ཕྲན་ཞིག་ཡིན་མིན་དང་། སྲིན་པོའི་གནས་སུ་གོ་མིན་ལ་དོགས་པ་ཆེ་བ་སོགས་ཕྱོགས་ཀྱི་ངོས་འཛིན་སྤྱི་ལ་གྲགས་པ་དང་མི་མཐུན་པ་ཡོད་ངེས་སོ།།

དེ་བཞིན་དུ་རྙིང་རྒྱུད་ཧེ་རུ་ཀ་གལ་པོའི་རྒྱུད་ལས་ཀྱང་དུར་ཁྲོད་ཀྱི་ཕྱོགས་དང་། རུ་དྲའི་ཡན་ལག་རྣམས་གནས་ཕྱོགས་དང་། ཡུལ་གྲུ་རྣམས་རྒྱུད་དེ་རྣམས་དང་མཐུན་པར་གསུངས་འདུག་སྟེ། ཤར་ན་རྒྱ་གར་ཡུལ་ན་རུ་ཏྲའི་སྙིང་ལས་བྱུང་བའི་དུར་ཁྲོད་ཆེན་པོ་བསིལ་བའི་ཚལ་དང་། ལྷོ་ན་སིངྒ་ལ་ན་མགོ་ལས་བྱུང་བའི་དུར་ཁྲོད་ཆེན་པོ་སྐུ་ལ་རྫོགས་དང་། ནུབ་བྱང་ན་ཁ་ཆེའི་ཡུལ་ན་རྐང་གཡོན་ལས་བྱུང་བའི་དུར་ཁྲོད་ཆེན་པོ་ཧེ་ཆེན་རོལ་བ་དང་། ལྷོ་ནུབ་ཐོ་གར་ཡུལ་ན་ལག་པ་གཡོན་ལས་བྱུང་བའི་དུར་ཁྲོད་ཆེན་པོ་གསང་ཆེན་རོལ་བ་དང་། བྱང་ཕྱོགས་སུ་ཨོ་རྒྱན་ཡུལ་ན་ཕོ་མཚན་ལས་བྱུང་བའི་དུར་ཁྲོད་ཆེན་པོ་པདྨ་བརྩེགས་དང་། ཤར་ལྷོ་ན་བལ་པོའི་ཡུལ་ན་ལག་པ་གཡས་པ་ལས་བྱུང་བའི་དུར་ཁྲོད་ཆེན་པོ་ལྷུན་གྲུབ་བརྩེགས་དང་། ནུབ་ཕྱོགས་སུ་ཟ་ཧོར་ཡུལ་ན་ནང་ཁྲོལ་ལས་བྱུང་བའི་དུར་ཁྲོད་ཆེན་པོ་ཁུ་བྱུག་ཀློང་དང་། བྱང་ཤར་ན་ལི་ཡི་ཡུལ་ན་རྐང་པ་གཡས་ལས་བྱུང་བའི་དུར་ཁྲོད་འཇིག་རྟེན་མངོན་རྫོགས་རྣམས་ཡོད་པར་གསལ་བར་བཤད་དེ། ཧེ་རུ་ཀ་གལ་པོའི་རྒྱུད་ལས། དུར་ཁྲོད་ཆེན་པོའི་གནས་བརྒྱད་ནི། །ཡུལ་གྱི་མིང་ནི་རྒྱ་གར་ཡུལ། །ཞེས་པ་ནས་། དུར་ཁྲོད་འཇིག་རྟེན་མངོན་རྫོགས་ཡིན། །ཞེས་དང་། ཡང་དེ་ཉིད་ལས། ཤར་དུར་ཁྲོད་ཆེན་པོ་བསིལ་བའི་ཚལ། ཤར་ལྷོ་ལྷུན་གྲུབ་བརྩེགས། ལྷོ་སྐུ་ལ་རྫོགས། ལྷོ་ནུབ་གསང་ཆེན་རོལ་པ། ནུབ་ཁུ་བྱུག་ཀློང་དགུ། ནུབ་བྱང་ཧེ་ཆེན་རོལ་པ། བྱང་པདྨ་བརྩེགས་པ། བྱང་ཤར་འཇིག་རྟེན་མངོན་རྫོགས་རྣམས་སུ་བསམ་ཞིང་བྱིན་གྱིས་བརླབ་བོ། །ཞེས་གསུངས་པའི་ཕྱིར་རོ།།

དེས་ན་དེར་འཇིག་རྟེན་བརྩེགས་དང་། ལངྐ་བརྩེགས་ཞེས་པ་མི་འབྱུང་བར་། དུར་ཁྲོད་ཆེན་པོ་ཁུ་བྱུག་ཀློང་དང་། འཇིག་རྟེན་མངོན་རྫོགས་ཞེས་པའི་མིང་མི་འདྲ་བ་བྱུང་ཡང་དཔྱད་ན་དགོངས་པ་གཅིག་ཏུ་བབས་འདུག་སྙམ་ལ། གཞུང་དུ་མར་དུར་ཁྲོད་ཀྱི་མིང་དང་ཕྱོགས་ཀྱི་ངོས་འཛིན་སོགས་མི་འདྲ་བ་མང་ཕྱིར། དུར་ཁྲོད་ཆེན་པོ་བརྒྱད་པོའི་མིང་འདི་དག་ནི་རྙིང་མ་སྤྱི་ལ་ཡོངས་སུ་གྲགས་པའི་གཞུང་གུ་རུ་ཆོས་ཀྱི་དབང་ཕྱུག་གི་གཏེར་མ་དུར་ཁྲོད་བརྒྱད་ཀྱི་བྱིན་འབེབས་ལས་བྱུང་བ་ལྟར་བྱས་པ་ཡིན་ལ། དེ་ནི་གཤིན་རྗེ་གསལ་ཤིང་གི་རྒྱུད་ལས་བཏུས་ཟེར་ཡང་མིང་དེ་འདྲ་བའི་རྒྱུད་ཅིག་རྙིང་རྒྱུད་དང་གསར་རྒྱུད་གང་དུའང་མ་མཐོང་ལ། འཇམ་དཔལ་གསང་རྒྱུད་པྲ་ཁོག་སྣང་བརྟག་པ་ཕྱི་མའི་རྒྱུད་ཕྱི་མའི་ཡང་ཕྱི་མ་ཞེས་པའི་ལེའུ་བཅུ་བདུན་པ་གསལ་ཤིང་གི་རྒྱུད་དེ་རིམ་པར་ཕྱེ་བ་ཟེར་བ་ཞིག་མཆིས་མོད། དེར་དུར་ཁྲོད་བརྒྱད་ཀྱི་གསལ་ཁ་མི་སྣང་ལ་གཞན་དུ་གང་ཡོད་རྩད་མ་ཆོད་དོ།།

འོན་ཀྱང་དུར་ཁྲོད་རྣམས་ཀྱི་མིང་དེ་ལྟར་ཡིན་པའི་རྒྱུད་ཀྱི་ཁུངས་ནི་ཡོད་དེ། ཧེ་རུ་ཀ་གལ་པོའི་ལུགས་སུ་དུར་ཁྲོད་སོ་སོའི་མིང་བྱུང་བ་བཤད་ཟིན་པའི་ཕྱིར་དང་། གཞན་ཡང་པདྨ་དབང་ཆེན་དྲེགས་པ་གནད་འབེབས་ཀྱི་རྒྱུད་ལས། ཤར་ན་དུར་ཁྲོད་བསིལ་བའི་ཚལ། །ཤར་ལྷོར་དུར་ཁྲོད་ལྷུན་གྱིས་གྲུབ། །ལྷོ་ན་དུར་ཁྲོད་སྐུ་ལ་རྫོགས། །ལྷོ་ནུབ་དུར་ཁྲོད་གསང་ཆེན་རོལ། །ནུབ་ན་དུར་ཁྲོད་པདྨ་བརྩེགས། །ནུབ་བྱང་དུར་ཁྲོད་ཧེ་ཆེན་རོལ། །དུར་ཁྲོད་ཁུ་བྱུག་ཀློང་དགུ་བྱང་། །བྱང་ཤར་དུར་ཁྲོད་འཇིག་རྟེན་སྐྱོང་། །ཞེས་དང་། གླང་པོ་ཆེ་རབ་འབོག་གི་རྒྱུད་པཎྜི་ཏ་བི་ཤྭ་མི་ཏྲ་དང་། ལོ་ཙཱ་བ་འཇིང་གསལ་འབར་གྱི་འགྱུར་ལས། དུར་ཁྲོད་ཆེན་པོ་བསིལ་བའི་ཚལ། །མཁས་ཤིང་སྙིང་སྟོབས་ཆེ་བའི་གནས། །དུར་ཁྲོད་ཆེན་པོ་སྐུ་ལ་རྫོགས། །ཡོན་ཏན་མཐོང་ཐོས་ཅན་ནི་མང་། །དུར་ཁྲོད་ཆེན་པོ་ཧེ་ཆེན་བརྡལ། །བདེ་སྐྱིད་ལྡན་པ་དེ་ན་མང་། །དུར་ཁྲོད་ཆེན་པོ་གསང་ཆེན་རོལ། །མཐུ་དབང་ཡོན་ཏན་དེ་ན་ཆེ། །དུར་ཁྲོད་ཆེན་པོ་ལྷུན་གྲུབ་བརྩེགས། །ཟས་ཀྱི་ལོངས་སྤྱོད་ཆེ་བའི་གནས། །དུར་ཁྲོད་ཆེན་པོ་ལང་ཀ་བརྩེགས། །ཡོན་ཏན་དངོས་གྲུབ་ཐོབ་པ་མང་། །དུར་ཁྲོད་ཆེན་པོ་སྒྲོལ་བར་མཛད། །རྣལ་འབྱོར་ལོངས་སྤྱོད་རབ་ཏུ་ལྡན། །དུར་ཁྲོད་འཇིག་རྟེན་མངོན་རྫོགས་ན། །རྫུ་འཕྲུལ་ཡ་མ་ཟུང་དུ་སྟོན། །འཇིག་རྟེན་ལྷ་བརྒྱད་བསྒྲལ་འདུལ་བས། །དུར་ཁྲོད་ཆེན་པོ་བརྒྱད་དུ་བསྟན། །ཅེས་གསུངས་པའི་ཕྱིར་རོ།།

འོན་ཀྱང་དྲེགས་པ་གནད་འབེབས་ལས་ནུབ་པདྨ་བརྩེགས་པ་དང་། གོང་དུ་བྱང་པདྨ་བརྩེགས་པ་བྱས་པ་དང་། གོང་དུ་ལངྐ་བརྩེགས་པ་དང་འདིར་ཁུ་བྱུག་ཀློང་སྨོས་པ་ཙམ་ནི་མི་འདྲ་བའི་ཁྱད་པར་དང་། གླང་ཆེན་རབ་འབོག་ལས། པདྨ་བརྩེགས་པའི་ཚབ་ཏུ་སྒྲོལ་བར་མཛད་ཅེས་པ་དང་། ཕྱོགས་ཀྱི་གསལ་ཆ་མེད་པ་སོགས་ནི་ཁྱད་པར་རོ།།

གུ་རུ་ཆོས་དབང་གི་གཏེར་མ་དེ་ལས་ནི། དུར་ཁྲོད་བརྒྱད་ཀྱི་ཕྱོགས་ཀྱི་འགོད་ཚུལ་ནི་རྒྱུད་སྔ་མ་དྲེགས་པ་གནད་འབེབས་དང་གོང་གི་ཧེ་རུ་ཀ་སྙིང་རོལ་དང་། འབྲས་བུ་ཆེན་པོ་ལྔ་བསྒྲལ་བའི་རྒྱུད་སོགས་ཇི་བཞིན་ལ། མི་འདྲ་བ་ནི་རུ་དྲའམ་ལྷ་ཆེན་དགའ་རབ་དབང་ཕྱུག་གི་རྐང་པ་གཡས་པ་ནུབ་བྱང་དང་གཡོན་པ་བྱང་ཤར་དུ་བཞག་པར་བཤད་པ་དང་། དེ་བཞིན་དུ་ཤར་དུ་ལྷ་ཆེན་སྟོབས་བཟང་གི་རོ་དང་། ལྷོར་འཆི་བདག་གཤིན་རྗེའི་རོ་དང་། ནུབ་ཏུ་ཚངས་པའི་རོ་དང་། བྱང་དུ་ཁྱབ་འཇུག་གི་རོ་དང་། ཤར་ལྷོར་དགའ་དམར་གྱི་རོ་དང་། ལྷོ་ནུབ་ཏུ་ཚོགས་བདག་གི་རོ་དང་། ནུབ་བྱང་དུ་བྷྲིངྒི་རི་ཏིའི་རོ་དང་། བྱང་ཤར་དུ་གཞོན་ནུ་སྨིན་དྲུག་གི་རོ་རྣམས་ཡོད་པར་བཤད་དོ།།

ཁྲོ་བོ་པུཎྜ་རཱི་ཀའི་རྒྱུད་ལས། ལག་པ་གཡས་པ་རྒྱ་གར་དང་། ལག་པ་གཡོན་པ་ལི་ཡུལ་དང་། རྐང་པ་གཡས་པ་བལ་ཡུལ་དང་། རྐང་པ་གཡོན་པ་ཐོ་གར་ཡུལ་དང་། མགོ་བོ་ཟ་ཧོར་ཡུལ་དང་། མཁལ་མ་གཡས་པ་གླིང་དགུའི་ཡུལ་དང་། མཁལ་མ་གཡོན་པ་ཨུ་རྒྱན་ཡུལ་དང་། ཕོ་མཚན་སིང་ག་ལའི་ཡུལ་དུ་བཤད་ཅིང་། སྙིང་དང་། ནང་ཁྲོལ་དོར་བའི་ཚབ་ཏུ་མཁལ་མ་གཡས་གཡོན་བསྣན་པ་པས་གོང་དང་མི་འདྲ་སྟེ། དེ་ཉིད་ལས། ལག་པ་གཡས་པའི་དུར་ཁྲོད་ནི། །རྒྱ་གར་ཡུལ་དུ་བསྒྲལ་བར་བྱ། །ཞེས་དང་། དུར་ཁྲོད་ལག་པ་གཡོན་པ་ལ། །ལི་ཡི་ཡུལ་དུ་བསྒྲལ་བར་བྱ། །ཞེས་དང་། དུར་ཁྲོད་རྐང་པ་གཡས་པ་ནི། །བལ་པོའི་ཡུལ་དུ་བསྒྲལ་བར་བྱ། །ཞེས་དང་། དུར་ཁྲོད་རྐང་པ་གཡོན་པ་ལ། །ཐོ་གར་ཡུལ་དུ་བསྒྲལ་བྱའོ། །ཞེས་དང་། དུར་ཁྲོད་འདི་ཡི་མགོ་བོ་ནི། །ཟ་ཧོར་ཡུལ་དུ་བསྒྲལ་བར་བྱ། །ཞེས་དང་། དུར་ཁྲོད་མཁལ་མ་གཡོན་པ་ནི། །ཨུ་རྒྱན་ཡུལ་དུ་བསྒྲལ་བར་བྱ། ཞེས་དང་། དུར་ཁྲོད་འདི་ཡི་ཕོ་མཚན་ནི། །སིང་ཧ་ཡུལ་དུ་བསྒྲལ་བར་བྱ། །ཞེས་དང་། དུར་ཁྲོད་མཁལ་མ་གཡས་པ་ནི། །གླིང་དགུའི་ཡུལ་དུ་བསྒྲལ་བར་བྱ། །ཞེས་གསུངས་པའི་ཕྱིར་རོ།།

དཔལ་འབར་ཁྲོ་མོའི་རྒྱུད་ལས། སྲིན་ཡུལ་དུ་ཤར་ཕྱོགས་ན་དུར་ཁྲོད་ཆེན་པོ་ཁྲག་འཐུང་ཡུལ་དང་། ལྷོ་ཕྱོགས་ན་འཇིགས་པའི་ཡུལ་དང་། ནུབ་ཕྱོགས་ན་འཛིན་བྱེད་དང་། བྱང་ཕྱོགས་ན་སྒྲོལ་བ་དང་། ཤར་ལྷོར་འདྲེན་བྱེད་དང་། ལྷོ་ནུབ་ཏུ་ཚལ་སྔོན་དང་། ནུབ་བྱང་ན་ས་ལ་དང་། བྱང་ཤར་ན་དུར་ཁྲོད་ཆེན་པོ་ཀ་པ་ལ་ཟེར་བ་ཡོད་པར་བཤད་པ་ནི་སྲིན་ཡུལ་ཁོ་ན་ལ་གོའམ་རུ་དྲ་བསྒྲལ་བའི་ཕུང་པོ་གནས་བརྒྱད་དུ་གཏོར་བ་ལས་ཆགས་པའི་དུར་ཁྲོད་བརྒྱད་སྤྱི་ལ་གོ་བ་གང་ཡིན་བློ་ལྡན་དག་གིས་དཔྱད་པར་བྱའོ།།

གཞན་ཡང་ཕྱིས་འགྱུར་གསར་མའི་རྒྱུད་དག་ཏུ་བསྟན་པའི་དུར་ཁྲོད་ཆེན་པོ་བརྒྱད་ངོས་འཛིན་ཚུལ་དང་མིང་མི་འདྲ་བའི་ཁྱད་པར་ནི། ཤར་དུ་གཏུམ་དྲག་ཅན་དང་། བྱང་དུ་ཚང་ཚིང་ཅན་དང་། ནུབ་ཏུ་རྡོ་རྗེ་འབར་བའམ་འབར་བས་འཁྲིགས་པའི་ཀེང་རུས་དང་། ལྷོར་ཀེང་རུས་ཅན་ནམ་འཇིགས་སྡེ་ཞེས་པ་དང་། བྱང་ཤར་དུ་མི་བཟད་བཞད་པའམ་ཧ་ཧར་དགོད་པ་དང། ཤར་ལྷོ་ལ་བཀྲ་ཤིས་མཆོག་གམ་དཔལ་གྱི་ནགས་ཚལ་ཞེས་པ་དང་། ལྷོ་ནུབ་ཏུ་མུན་པ་ཅན་ནམ་འཇིགས་པའི་མུན་པ་དང་། ནུབ་བྱང་དུ་ཀི་ལི་ཀི་ལིའི་སྒྲ་ཅན་དང་བརྒྱད་དུ་འགོད་པ་དང་ཡོད་པར་ཡང་བཤད་དེ། བདེ་མཆོག་འབྱུང་བའི་རྒྱུད་ལས། དུར་ཁྲོད་བརྒྱད་ཀྱིས་བརྒྱན་པ་སྟེ། །གཏུམ་དྲག་དེ་བཞིན་ཚང་ཚིང་དང་། །རྡོ་རྗེ་འབར་བ་ཀེང་རུས་ཅན། །དབང་ལྡན་དུ་ནི་མི་བཟད་བཞད། །བྱིན་ཟ་རུ་ནི་བཀྲ་ཤིས་མཆོག །མུན་པ་དྲག་པོ་བདེན་བྲལ་དུ། །རླུང་ཕྱོགས་ཀི་ལི་ཀི་ལིའི་སྒྲ། །ཞེས་དང་། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུད་ཁྲོད་ཀྱི་རྒྱན་རྨད་དུ་བྱུང་བ་ལས། གཏུམ་དྲག་དང་ནི་ཚང་ཚིང་དང་། །འབར་བས་འཁྲུགས་པའི་ཀེང་རུས་དང་། །འཇིགས་སྡེ་རྣམས་ནི་ཤར་སོགས་ཀྱི། །ཕྱོགས་སུ་གཡོན་ནས་བསྐོར་ཏེ་གནས། །ཧ་ཧར་རྒོད་པ་དབང་ལྡན་ཏེ། །དཔལ་གྱི་ནགས་ཚལ་བྱིན་ཟར་རོ། །འཇིགས་པའི་མུན་པ་བདེན་བྲལ་དུ། །རླུང་མཚམས་ཀི་ལི་ཀི་ལིར་སྒྲོག །ཅེས་དང་། བཅོམ་ལྡན་འདས་རལ་བ་གཅིག་པའི་རྒྱུད་ལས། གཏུམ་དྲག་ཚང་ཚིང་འཁྲིགས་པ་དང་། །འུར་འུར་འབར་བས་ཁྱབ་པ་དང་། །ཀེང་རུས་འཇིགས་རུང་ཤར་སོགས་ཀྱིས། །ཕྱོགས་སུ་གཡོན་བསྐོར་གྱིས་ལེགས་གནས། །ཧ་ཧར་དགོད་པ་དབང་ལྡན་དུ། །བྱིན་ཟར་དཔལ་གྱི་ནགས་ཚལ་ལོ། །མུན་པ་མི་བཟད་བདེན་བྲལ་དུ། །རླུང་དུ་ཀི་ལི་ཀི་ལིར་སྒྲོག །ཅེས་གསུངས་པའི་ཕྱིར། རྒྱུད་ཕྱི་མ་གཉིས་ལས། ཤར་སོགས་ཀྱི། །ཕྱོགས་སུ་གཡོན་ནས་བསྐོར་ཏེ་གནས། །ཞེས་སོགས་ཕྱོགས་བཞི་པོ་ཤར་ནས་གཡོན་སྐོར་དུ་གནས་པ་དང་། དཀྱིལ་འཁོར་གྱི་རྒྱན་དུ་དེ་ལྟར་དགོས་པ་དངོས་སུ་གསལ་ཁ་བཏོད་པ་དང་། སྔ་མ་ལས་ཀྱང་གནས་ཕྱོགས་ཀྱི་ངོས་འཛིན་དེ་ལྟར་བཤད་པ་ཤེས་པས་རིམ་པ་བཞིན་ཤར་ནས་བྱང་དུ་འགོད་དགོས་པ་ནི་མ་རྒྱུད་ཀྱི་དགོངས་པར་སྣང་ལ། དུར་ཁྲོད་རྣམས་ཀྱི་མིང་སོགས་ལ་ཞིབ་ཏུ་དཔྱད་ནའང་མཐུན་པས་འདི་གསུམ་ཀ་བདེ་མཆོག་གི་རྒྱུད་དུ་གཏོགས་པ་ཡིན་ཕྱིར་དགོངས་པ་གཅིག་པར་སྣང་ངོ་།།

རྒྱུད་དེ་དག་གི་ལུང་དོན་འདི་དག་ལྟར་ན་དཀྱིལ་འཁོར་དུ་འགོད་པའི་དབང་དུ་བྱས་པ་ཡིན་གྱི་གནས་ཡུལ་སོ་སོར་དུར་ཁྲོད་བརྒྱད་དུ་གནས་པའི་ཕྱོགས་ཀྱི་བཤད་པ་མིན་པར་གསལ་ཞེ་ན། སློབ་དཔོན་རྣལ་འབྱོར་པས་མཛད་པའི་དུར་ཁྲོད་བརྒྱད་ཀྱི་བཤད་པ་ཞེས་པ་འགོས་ལོ་ཙཱ་བའི་འགྱུར་དེ་ལས། འདི་ནི་དུར་ཁྲོད་བརྒྱད་པོ་སྟེ། །དཔལ་ལྡན་རྡོ་རྗེ་རྣལ་འབྱོར་པས། །རྡོ་རྗེ་ར་བའི་ནང་ལོགས་སུ། །རབ་ཏུ་འབད་དེ་བསམ་པར་བྱ། །ཞེས་གསུངས་པ་ལྟར་འདིར་ནང་དུ་དཀྱིལ་འཁོར་དུ་བསྒོམ་སྟེ་འགོད་པའི་རིམ་པ་ལྟར་ཡིན་པ་བདེན་མོད། དཀྱིལ་འཁོར་དུ་བསྒོམ་དུས་དེ་ལྟར་ཡིན་ན་ཕྱི་རོལ་གྱི་གནས་ཀྱི་གནས་ཕྱོགས་དག་ཀྱང་དེ་ལྟར་བཞེད་པ་ཡིན་པར་འཐད་པས་ཕྱི་ནང་གི་ཁྱད་པར་ཀྱི་འགོད་ཕྱོགས་སོ་སོར་མེད་པ་ནི་རྒྱུད་དང་བསྟན་བཅོས་འདི་དག་དགོངས་པ་གཅིག་དང་དབྱངས་གཅིག་གམ་སྙམ་ལ། སློབ་དཔོན་རྣལ་འབྱོར་བའི་དུར་ཁྲོད་བརྒྱད་ཀྱི་བཤད་པ་དེ་ལས་ཀྱང་། གཏུམ་དྲག་དང་ནི་ཚང་ཚིང་དང་། །འབར་བས་འཁྲིགས་པའི་ཀེང་རུས་ཏེ། །འཇིགས་སྡེ་རྣམས་ནི་ཤར་ལ་སོགས། །ཕྱོགས་སུ་ཡོངས་སུ་བསྐོར་ཏེ་གནས། །ཧ་ཧར་དགོད་པ་དབང་ལྡན་ཏེ། །དཔལ་གྱི་ནགས་ན་བྱིན་ཟའོ། །འཇིགས་པའི་མུན་པ་བདེན་བྲལ་ཏེ། །རླུང་མཚམས་ཀཱི་ལི་ཀཱི་ལར་སྒྲོག །ཅེས་རྒྱུད་དེ་དག་དང་མཐུན་པར་གསུངས་སོ།།

དེ་བཞིན་དུ་ཡང་རྒྱུད་འགའ་རེར་དེ་དག་དང་ཅུང་མི་འདྲ་བར་ཤར་དུ་དུར་ཁྲོད་གཏུམ་དྲག་ནག་པོ་དང་། ལྷོར་ཧ་ཧར་དགོད་པ་སེར་པོ་དང་། ནུབ་ཏུ་མི་བཟད་དམར་པོ་དང་། བྱང་དུ་ཚང་ཚིང་ལྗང་གུ་དང་། ཤར་ལྷོར་གཡེར་ཁ་ཅན་དང་། ལྷོ་ནུབ་ཏུ་འབར་བ་འཛིན་དང་། ནུབ་བྱང་དུ་དམྱལ་གནས་དང་། བྱང་ཤར་དུ་དབྱིབས་ཅན་དང་བརྒྱད་འགོད་པ་དང་གནས་པའི་ཚུལ་ཡང་ཡོད་པ་ཡིན་ཏེ། དཔལ་དུར་ཁྲོད་རྒྱན་གྱི་རྒྱུད་ལས། ཤར་དུ་གཏུམ་དྲག་ནག་པོ་ཆེ། །ལྷོ་རུ་ཧ་ཧར་དགོད་སེར་ཆེ། །ནུབ་ཏུ་མི་བཟད་དམར་པོ་སྟེ། །བྱང་དུ་ཚང་ཚིང་ལྗང་གུ་ཆེ། །མེ་རུ་གཡེར་ཀ་ཅན་ཡིན་ཏེ། །བདེན་བྲལ་མཚམས་སུ་འབར་བ་འཛིན། །རླུངས་མཚམས་དམྱལ་སོགས་གནས་པ་སྟེ། །དབང་ལྡན་དུ་ནི་དབྱིབས་ཅན་ནོ། །ཞེས་གསུངས་པའི་ཕྱིར་རོ།།

དུར་ཁྲོད་བརྒྱད་པོ་དེར་མ་མོ་བརྒྱད་དང་། མཆོད་རྟེན་བརྒྱད་དང་། ཤིང་བརྒྱད་དང་། ཞིང་སྐྱོང་བརྒྱད་དང་། ཕྱོགས་སྐྱོང་བརྒྱད་དང་། ཀླུ་བརྒྱད་དང་། སྤྲིན་བརྒྱད་དང་། སློབ་དཔོན་བརྒྱད་དང་། ལྷ་ཆེན་ཆེན་པོ་བརྒྱད་དང་། རི་བརྒྱད་རྣམས་ཡོད་པར་གསུངས་ཏེ། རྒྱུད་ཀྱི་རྒྱལ་པོ་ཆེན་པོ་དཔལ་བདུད་རྩི་རོལ་བ་ལས། རང་བྱུང་སྤྲུལ་པའི་ལྷ་མོ་གནས། །དེ་དག་བྱིན་རླབས་ཁྱད་པར་མཐུས། །མཆོད་རྟེན་ཤིང་ལ་སོགས་པར་སྣང་། །འདི་ལྟར་ས་གཞི་དེ་དག་ཀུན། །བཀྲ་ཤིས་ཐུགས་རྗེ་ཡ་མཚན་ཅན། །ཆོས་དང་དངོས་གྲུབ་འབྱུང་བའི་གནས། །ཆོ་འཕྲུལ་རོལ་པར་བསྟན་པའོ། །ཞེས་དང་། འབྲས་བུ་ཆེན་པོ་ལྔ་བསྒྲལ་བ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །རོ་ཡི་སྲུང་མ་ཆེན་མོ་ནི། །མ་མོ་ཆེན་མོ་བརྒྱད་བཞག་གོ །ཞེས་དང་། རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། དུར་ཁྲོད་བརྒྱད་དུ་གནས་པ་སྟེ། །ལྷ་དབང་བཅས་དང་མ་མོ་དང་། །ཀླུ་དང་གནོད་སྦྱིན་ཚོགས་རྣམས་དང་། །འབྱུང་པོའི་ཚོགས་དང་དྲང་སྲོང་དང་། །ཤ་ཟ་རྣམས་དང་རིག་འཛིན་ཚོགས། །སྡེ་ཚན་བརྒྱད་ཀྱིས་བསྐོར་བ་ཡིན། །ཞེས་དང་། གཞན་ཡང་སངས་རྒྱས་མཉམ་སྦྱོར་སྔ་འགྱུར་ལས། དུར་ཁྲོད་བརྒྱད་ཀྱིས་ཡོངས་སུ་བསྐོར། །མ་མོ་བརྒྱད་དང་ལྷ་ཆེན་བརྒྱད། །ཞིང་སྐྱོང་ཤིང་དང་ཀླུ་ཆེན་བརྒྱད། །ཤཱཀྱ་ཐུབ་མཛད་མཐར་ཕྱིན་ཅིང་། །མཆོད་རྟེན་བརྒྱད་ནི་བསྒོམ་ཚུལ་མཛད། །ཅེས་སོགས་དང་། དཔལ་ཡེ་ཤེས་ཐིག་ལེ་ལས། དུར་ཁྲོད་བརྒྱད་ཀྱི་དབུས་སུ་ནི། །དཔའ་བོ་རྣལ་འབྱོར་མ་ཡིས་བསྐོར། །འཇིག་རྟེན་སྐྱོང་བ་བརྒྱད་དང་ལྡན། །ཤིང་གི་རྒྱལ་པོ་བརྒྱད་ཀྱིས་བསྐོར། །ཞེས་དང་། མཁའ་འགྲོ་རྒྱ་མཚོ་ལས། དུར་ཁྲོད་བརྒྱད་པོ་རྣམས་སུ་ཡང་། །ཤིང་དང་ཕྱོགས་སྐྱོང་ཀླུ་དབང་སྟེ། །ཞེས་དང་། སློབ་དཔོན་དཔལ་མར་མེ་མཛད་ཡེ་ཤེས་ཀྱིས་མཛད་པའི་དགྱེས་པ་རྡོ་རྗེའི་སྒྲུབ་ཐབས་རིན་པོ་ཆེའི་སྒྲོན་མ་ལས། དུར་ཁྲོད་བརྒྱད་ན་མཚོ་བརྒྱད་ཀླུ། །ཤིང་བརྒྱད་ཞིང་སྐྱོང་གདན་མགོ་བརྒྱད། །ཕྱོགས་སྐྱོང་ཆུང་མ་བུ་འཁོར་བརྒྱད། །སྟེང་ན་ལྷ་བརྒྱད་ལྷ་ཡི་འཁོར། །མཆོད་རྟེན་བརྒྱད་དང་རྣལ་འབྱོར་ཚོགས། །ཞེས་དང་། སློབ་དཔོན་མི་ཐུབ་ཟླ་བས་མཛད་པའི་འབྱུང་པོ་ཐམས་ཅད་ཀྱི་གཏོར་མ་ལས། རིམ་པར་ལྷ་ཆེན་བརྒྱད་དང་ནི། །ཕྱོགས་སྐྱོང་བརྒྱད་དང་ཀླུ་ཆེན་བརྒྱད། །པདྨའི་མདོག་བཞིན་བསྐྱེད་བྱ་སྟེ། །ཞེས་དང་། སློབ་དཔོན་དཔལ་སྒྲ་གཅན་གསང་བས་མཛད་པའི་ཀྱེ་རྡོར་སྒྲུབ་ཐབས་རབ་ཏུ་གསལ་བ་ལས། ཤིང་དང་། གནོད་སྦྱིན་དང་། ཕྱོགས་སྐྱོང་དང་། ཀླུ་དང་། སྤྲིན་དང་། རི་དང་། མཆོད་རྟེན་དང་ལྡན་པའི་དུར་ཁྲོད་བརྒྱད་བཤད་པར་བྱ་སྟེ། ཞེས་དང་། སློབ་དཔོན་དཱ་རི་ཀ་པས་མཛད་པའི་དཔལ་འཁོར་ལོ་སྡོམ་པའི་བསྟོད་པ་གཙུག་གི་ནོར་བུ་ལས། ཚོགས་བརྒྱད་དག་ཕྱིར་དུར་ཁྲོད་རབ་འཇིགས་བྱེད། །ཤི་རི་ཥ་སོགས་བྱང་ཆུབ་ཤིང་བརྒྱད་ལ། །ཁྭ་གདོང་ལ་སོགས་ཤིང་ལྷ་སྤྲིན་དང་བཅས། །ཀླུ་དང་གནོད་སྦྱིན་ལྷ་ཆེན་བརྒྱད་པོར་ལྡན། །དབང་པོ་མེ་དང་གཤིན་རྗེ་སྲིན་པོ་དང་། །ཆུ་བདག་རླུང་ལྷ་ནོར་བདག་འབྱུང་པོར་ལྡན། །ས་ཡི་ལྷ་མོ་ཉི་ཟླ་ཚངས་པ་དང་། །དྲག་པོ་ཞིང་སྐྱོང་ཕྱོགས་མཚམས་ཀུན་ན་གནས། །མཆོད་རྟེན་བྲག་སོགས་ཆུ་དང་མེ་བརྒྱད་དང་། །ཉི་ཤུ་རྩ་བཞི་མཁའ་འགྲོ་གནས་པའི་ས། །འབྱུང་པོ་འདུས་པ་ཅེ་སྤྱང་སྒྲ་སྒྲོགས་ཤིང་། །ཤ་ཟ་རོ་ལངས་འཕྲ་མེན་མ་བརྒྱད་དང་། །ཨུ་མ་དུས་མཚན་དུར་ཁྲོད་བདག་མོར་བཅས། །རྒྱལ་ཆེན་བཞི་སོགས་འཇིག་རྟེན་དབང་ཕྱུག་ལྡན། །གྲུབ་ཆེན་བརྒྱད་སོགས་ཕྱག་རྒྱ་མཆོག་ལྡན་ཞིང་། །གྲུབ་པའི་རྣལ་འབྱོར་སྤྱོད་པ་རྣམ་མཛེས་པའི། །སྒྲུབ་པའི་རྟེན་གྱུར་བདེ་གཤེགས་ཀུན་གྱི་གནས། །སྣོད་བཅུད་དག་ལ་གསང་བའི་དཀྱིལ་འཁོར་མཆོག །ཡོན་ཏན་ཀུན་ལྡན་ཐར་པའི་གྲོང་མཆོག་ལ། །བདག་ནི་རབ་གུས་དང་བས་ཕྱག་འཚལ་ལོ། །ཞེས་གསུངས་པའི་ཕྱིར་རོ།།

དེས་ན་དང་པོ་མ་མོ་བརྒྱད་དུར་ཁྲོད་བརྒྱད་པོར་གནས་ཚུལ་ཡོད་དེ། ཤར་དུ་མ་མོ་ཆེན་མོ་ཀཽ་རཱི་མ་གནས་པ་དང་། ལྷོ་རུ་མ་མོ་ཙཽ་རཱི་མ་དང་། ནུབ་ཏུ་སྨེ་ཤ་ནཱི་དང་། བྱང་དུ་གྷསྨ་རཱི་དང་། ཤར་ལྷོ་རུ་པུསྐ་སཱི་དང་། ལྷོ་ནུབ་ཏུ་བེ་ཏཱ་ལཱི་དང་། བྱང་ཤར་དུ་ཙཎྜ་ལཱི་དང་། ནུབ་བྱང་དུ་པྲ་མོ་ཧཱ་རྣམས་གནས་པར་བཤད་པའི་ཕྱིར་ཏེ། ཧེ་རུ་ཀ་སྙིང་རོལ་ལས། དེ་ཡི་སྙིང་ནི་མ་ཧཱའི་ལྟོ། །དུར་ཁྲོད་ཆེན་པོ་བསིལ་ཚལ་ན། །མ་མོ་ཆེན་མོ་ཀོའུ་རི་མ། །མཁས་མ་སྙིང་སྟོབས་ཆེ་བས་གནས། །དེ་ཡི་མགོ་ནི་ལྷོ་ཕྱོགས་ཀྱི། །སིང་ག་ལ་ཡི་གླིང་ཕྲན་ན། །མ་མོ་ཆེན་མོ་ཙོའུ་རི་མ། །མཐོང་ཐོས་རྔམ་པའི་རྫུ་འཕྲུལ་མངའ། །ལག་པ་གཡས་ནི་ཤར་ལྷོ་མཚམས། །བལ་ཡུལ་ན་ནི་པུས་ཀ་སི། །ཞེས་དང་། ལག་པ་གཡོན་ནི་ལྷོ་ནུབ་མཚམས། །ས་ཡི་ཚལ་ན་བེ་ཏ་ལི། །ཞེས་དང་། རྐང་པ་གཡས་པ་བྱང་ཤར་མཚམས། །ལི་ཡུལ་ན་ནི་ཙཎྜ་ལི། །ཞེས་དང་། རྐང་པ་གཡོན་པ་ནུབ་བྱང་མཚམས། །སྐད་དང་སྐད་སྣ་མཐུན་པ་ན། །མ་མོ་ཆེན་མོ་པྲ་མོ་ཧ། །ཞེས་དང་། ཕོ་མཚན་སྟེང་གི་བྱང་ཕྱོགས་ན། །ཨུ་རྒྱན་ཡུལ་ན་གྷསྨ་རི། །ཞེས་དང་། འབྲས་བུ་ཆེན་པོ་ལྔ་བསྒྲལ་བ་ལས། དེ་ཡི་ལུས་སྙིང་མ་ག་དྷ། །དུར་ཁྲོད་ཆེན་པོ་བསིལ་བའི་ཚལ། །མ་མོ་ཆེན་མོ་ཀོའུ་རི་གནས། །ཞེས་དང་། དེ་ཡི་མགོ་ནི་ལྷོ་ཕྱོགས་ཀྱི། །དུར་ཁྲོད་ཆེན་པོར་བཞག་པ་ནི། །སིང་ག་ཡུལ་གྱི་གླིང་ཕྲན་ཡིན། །མ་མོ་ཆེན་མོ་ཙོའུ་རི་གནས། །ཞེས་དང་། ལག་པ་གཡས་པ་ཤར་ལྷོའི་མཚམས། །དུར་ཁྲོད་ཆེན་པོ་བལ་ཡུལ་ཡིན། །མ་མོ་ཆེན་མོ་པུས་ཀ་སི། །ཞེས་དང་། ལག་པ་གཡོན་ནི་ལྷོ་ནུབ་མཚམས། །དུར་ཁྲོད་ཆེན་པོ་ས་ལའི་ཡུལ། །མ་མོ་ཆེན་མོ་བེ་ཏ་ལི། །ཞེས་དང་། རྐང་པ་གཡས་པ་བྱང་ཤར་མཚམས། །དུར་ཁྲོད་ཆེན་པོ་ལི་ཡི་ཡུལ། །མ་མོ་ཆེན་མོ་ཙཎྜ་ལི། །ཞེས་དང་། རྐང་པ་གཡོན་པ་ནུབ་བྱང་མཚམས། །དུར་ཁྲོད་ཆེན་པོ་ཁ་ཆེའི་ཡུལ། །མ་མོ་ཆེན་མོ་པྲ་མོ་ཧ། །ཞེས་དང་། ཕོ་མཚན་སྟེང་གི་བྱང་ཕྱོགས་ན། །དུར་ཁྲོད་ཆེན་པོ་ཨུ་རྒྱན་ཡུལ། །མ་མོ་ཆེན་མོ་གྷསྨ་རི། །ཞེས་དང་། དུར་ཁྲོད་ཆེན་པོ་ཟ་ཧོར་ཡུལ། །རྒྱ་མཚོའི་སྒོ་གླིང་མ་ཧཱ་དོ། །ལང་ཀ་པུ་རི་སྲིན་པོོའི་གནས། །མ་མོ་ཆེན་མོ་སྨ་ཤ་ནི། །ཞེས་གསུངས་པའི་ཕྱིར་དང་། ཧེ་རུ་ཀ་གལ་པོའི་རྒྱུད་ལས། གཽ་རཱིའི་གནས། རཱུ་ཏྲའི་སྙིང་ལས་བྱུང་བའི་དུར་ཁྲོད་ཆེན་པོ་བསིལ་བའི་ཚལ། ཞེས་དང་། ཙཽ་རཱིའི་གནས། མགོ་ལས་བྱུང་བའི་དུར་ཁྲོད་ཆེན་པོ་སྐུ་ལ་རྫོགས། ཞེས་དང་། སྨ་ཤ་ནཱིའི་གནས། ནང་ཁྲོལ་ལས་བྱུང་བའི་དུར་ཁྲོད་ཆེན་པོ་ཁུ་བྱུག་ཀློང་། ཞེས་དང་། གྷསྨ་རཱིའི་གནས། ཕོ་མཚན་ལས་བྱུང་བའི་དུར་ཁྲོད་ཆེན་པོ་པདྨ་བརྩེགས་དང་། ཞེས་དང་། བུཀྐ་སཱིའི་གནས། ལག་པ་གཡས་པ་ལས་བྱུང་བའི་དུར་ཁྲོད་ཆེན་པོ་ལྷུན་གྲུབ་བརྩེགས། ཞེས་དང་། བེ་ཏཱ་ལཱིའི་གནས། ལག་གཡོན་ལས་བྱུང་བའི་དུར་ཁྲོད་ཆེན་པོ་གསང་ཆེན་རོལ། ཞེས་དང་། ཙཎྜ་ལཱིའི་གནས། རྐང་གཡས་ལས་བྱུང་བའི་དུར་ཁྲོད་འཇིག་རྟེན་མངོན་རྫོགས་ཡིན། ཞེས་དང་། པྲ་མོ་ཧེའི་གནས། རྐང་གཡོན་ལས་བྱུང་བའི་དུར་ཁྲོད་ཆེན་པོ་ཧེ་ཆེན་རོལ། ཞེས་གསུངས་པའི་ཕྱིར་རོ།།

རྒྱུད་ཀྱི་རྒྱལ་པོ་ཆེན་པོ་དཔལ་བདུད་རྩི་རོལ་བ་ལས། དེ་ཡི་ལུས་སྙིང་མ་ག་དྷཱ། །མ་མོ་ཆེན་མོ་ཀོའུ་རི་གནས། །ཞེས་དང་། མགོ་ནི་ལྷོ་ཡི་ཕྱོགས་གནས་པའི། །དུར་ཁྲོད་ཆེན་པོ་རབ་སྣང་བྱེད། །སིངྒའི་ཡུལ་གྱི་གླིང་ཕྲན་དག །མ་མོ་ཆེན་མོ་ཙོའུ་རི་གནས། །ཞེས་དང་། ལག་པ་གཡས་པ་ཤར་ལྷོ་མཚམས། །དུར་ཁྲོད་ཆེན་པོ་བལ་པོའི་ཡུལ། །མ་མོ་ཆེན་མོ་པུཀྐ་སཱི། །ཞེས་དང་། ལག་པ་གཡོན་པ་ལྷོ་ནུབ་མཚམས། །དུར་ཁྲོད་ཆེན་པོ་སཱ་ལའི་ཡུལ། །མ་མོ་ཆེན་མོ་གྷསྨ་རཱི། །ཞེས་དང་། རྐང་པ་གཡས་པ་བྱང་ཤར་མཚམས། །དུར་ཁྲོད་ཆེན་པོ་ལི་ཡི་ཡུལ། །མ་མོ་ཆེན་མོ་ཙནྡ་ལཱི། །ཞེས་དང་། རྐང་པ་གཡོན་པ་ནུབ་བྱང་མཚམས། །དུར་ཁྲོད་ཆེན་པོ་ལི་ཡི་ཡུལ། །མ་མོ་ཆེན་མོ་སྨ་ཤ་ནཱི། །ཞེས་དང་། མཁའ་འགྲོའི་ཚོགས་ཀུན་རྒྱུ་བའི་གནས། །མཚན་མའི་གནས་ཏེ་བྱང་ཕྱོགས་གནས། །དུར་ཁྲོད་ཆེན་པོའི་ཨཽ་ཌིའི་གནས། །མ་མོ་ཆེན་མོ་བེ་ཏཱ་ལཱི། །ཞེས་དང་། དེ་ཡི་ནང་ཁྲོལ་ཐམས་ཅད་ཀུན། །དུར་ཁྲོད་ཆེན་པོའི་ནུབ་ཕྱོགས་སྤངས། །རྒྱ་མཚོ་གླིང་གི་གནས་ཆེན་པོ། །ལང་ཀ་པུ་རི་སྲིན་པོའི་ཡུལ། །མ་མོ་ཆེན་མོ་པྲ་མོ་ཧ། །ཞེས་མ་མོ་བརྒྱད་ཀྱི་གནས་ཕྱོགས་རྒྱུད་སྔ་མ་དག་དང་མི་མཐུན་པར་ལྷོ་ནུབ་མཚམས་སུ་མ་མོ་ཆེན་མོ་གྷསྨ་རཱི་དང་། ནུབ་བྱང་མཚམས་སུ་མ་མོ་ཆེན་མོ་སྨ་ཤ་ནཱི་དང་། བྱང་ཕྱོགས་སུ་མ་མོ་ཆེན་མོ་བེ་ཏཱ་ལཱི་དང་། ནུབ་ཕྱོགས་སྲིན་པོའི་ཡུལ་དུ་མ་མོ་ཆེན་མོ་པྲ་མོ་ཧ་གནས་པར་བཤད་ལ། ལི་ཡི་ཡུལ་གཉིས་བྱུང་བ་ནི་ཡི་གེ་ནོར་བ་ཡིན་ངེས་སོ།།

གོང་དུ་གསལ་བ་ལྟར་ཞི་ཁྲོའི་ལས་བྱང་དང་བརྒྱ་ཕྱག་ལས་ནི། ཁྲོ་བོའི་དཀྱིལ་འཁོར་གྱི་ཤར་ཕྱོགས་ཀོའུ་རི་མ་དང་། ལྷོ་ཕྱོགས་ཙོའུ་རི་མ་དང་། ནུབ་ཕྱོགས་པྲ་མོ་ཧ་དང་། བྱང་ཕྱོགས་བཻ་ཏ་ལཱི་ལ་དང་། ཤར་ལྷོ་པུསྐ་སཱི་དང་། ལྷོ་ནུབ་ཀསྨ་རིའམ་གྷསྨ་རི་དང་། ནུབ་བྱང་ཙན་ཙཎྜ་ལཱི་དང་། བྱང་ཤར་སྨེ་ཤ་ནི་རྣམས་འགོད་པ་ནི་རྒྱུད་འདི་དག་ཏུ་དུར་ཁྲོད་དུ་འགོད་པའི་ཕྱོགས་དང་ཕལ་ཆེར་མཐུན་ཡང་ཅུང་ཟད་མི་མཐུན་པ་ཡང་མཆིས་པས་དཀྱིལ་འཁོར་དུ་འགོད་ཚུལ་དང་དུར་ཁྲོད་བརྒྱད་དུ་གནས་ཚུལ་མི་མཐུན་པ་ཡིན་སྲིད་མོད། ལེགས་པར་དཔྱད་ན་མ་མོ་ཀཽ་རཱི་བརྒྱད་གནས་མ་ཡིན་པས་དཀྱིལ་འཁོར་དང་དུར་ཁྲོད་གཉིས་ཀར་གནས་ཕྱོགས་གཅིག་པ་ཡིན་དགོས་པའི་ཕྱིར་རོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས་ནི། རྒྱུད་དེ་དག་དང་ཅུང་མི་མཐུན་པ་ནི། མ་མོ་རྣམས་ཀྱི་གནས་ཕྱོགས་ཤར་དུ་ཀཽ་རཱི་མ་དང་། ལྷོར་ཙོ་རཱི་མ་དང་། ཤར་ལྷོ་རུ་པུསྐ་སཱི་དང་། བྱང་ཤར་དུ་ཙཎྜ་ལཱི་རྣམས་འདྲ་བ་དང་། མི་འདྲ་བ་ནི་ནུབ་ཏུ་པྲ་མོ་ཧཱ་དང་། བྱང་བེ་ཏ་ལཱི་དང་། ལྷོ་ནུབ་ཏུ་གྷསྨ་རཱི་དང་། ནུབ་བྱང་དུ་སྨེ་ཤ་ནཱི་གནས་པར་བཤད་པའི་ཁྱད་པར་ཡོད་པ་དང་། དེ་ཡང་ཞི་ཁྲོའི་ལས་བྱང་དང་བརྒྱ་ཕྱག་དང་ཕལ་ཆེར་འདྲ་ཡང་ནུབ་བྱང་དང་བྱང་ཤར་ཕན་ཚུལ་བརྗེས་པའི་ཚུལ་དུ་བཤད་འདུག་གོ།

དེ་བཞིན་དུ་ཁྲོ་བོ་པུཎྜ་རཱི་ཀའི་རྒྱུད་ལས། རྒྱ་གར་ཡུལ་ནས་གྲུབ་པ་མོ། །མ་མོ་ཆེན་མོ་ཀེའུ་རིའི་གནས། །དུར་ཁྲོད་ཆེན་པོའི་གནས་ཆེན་དུ། །འདི་ཡི་ཡན་ལག་གཡས་པ་ལ། །དགྱེས་ཤིང་བརྟན་པར་བཞུགས་སུ་གསོལ། །ཞེས་པ་ནས། ཀློང་དགུའི་ཡུལ་ནས་གྲུབ་པ་མོ། །མ་མོ་ཆེན་མོ་ཙནྡྲ་ལི། །དུར་ཁྲོད་ཆེན་པོའི་གནས་ཆེན་འདིར། །འདི་ཡི་ཕོ་མཚན་དཀྱིལ་འཁོར་ལ། །དགྱེས་ཤིང་བརྟན་པར་བཞུགས་སུ་གསོལ། །ཞེས་པའི་བར་གྱིས། རྒྱ་གར་ན་རུ་དྲའི་ལག་གཡས་འཐོར་བའི་དུར་ཁྲོད་དུ་ཀཽ་རཱི་མ་དང་། ལི་ཡུལ་དུ་ཙཽ་རཱི་མ་དང་། བལ་ཡུལ་དུ་པྲ་མོ་ཧཱ་དང་། ཐོ་གར་ཡུལ་དུ་བཻ་ཏ་ལི་དང་། ཟ་ཧོར་ཡུལ་དེར་པུཀྐ་སི་དང་། ཨུ་རྒྱན་ཡུལ་དེར་གྷསྨ་རཱི་དང་། སིང་ཧའི་ཡུལ་དེར་སྨེ་ཤ་ནཱི་དང་། ཀློང་དགུའི་ཡུལ་དུ་ཙཎྜ་ལཱི་གནས་པར་བཤད་པ་སོགས་རྒྱུད་དུ་མར་མི་འདྲ་བ་མཐའ་ཡས་པ་ཡོད་ཀྱང་སྤྲོས་པས་ཆོག་གོ།

དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། དཀྱིལ་འཁོར་གྱི་ཤར་དུ་ཀཽ་རཱི་མ་དང་། ལྷོར་ཙཽ་རཱི་མ་དང་། ནུབ་ཏུ་རོ་ལངས་མ་སྟེ་བཻ་ཏ་ལི་དང་། བྱང་དུ་ཟ་ཕོད་མ་སྟེ་པྲ་མོ་ཧ་རྣམས་འགོད་པ་དང་། གྲྭ་བཞིར་སྦོས་མོ་སྟེ་པུསྐ་སི་དང་། རི་ཁྲོད་མ་སྟེ་སྨེ་ཤཱ་ནི་དང་། གཏུམ་མོ་སྟེ་ཙཎྜ་ལི་དང་། གཡུང་མོ་སྟེ་གྷསྨ་རཱི་རྣམས་འགོད་དགོས་པར་བཤད་དེ། རྒྱུད་དེ་ཉིད་ལས། ཤར་ལ་སོགས་པའི་སྒོ་བཞི་རུ། །རྣལ་འབྱོར་མ་རྣམས་རིམ་ཇི་བཞིན། །དཀར་མོ་ཆོམ་རྐུན་རོ་ལངས་མ། །ཟ་ཕོད་མ་ཡང་རྣམ་པར་དགོད། །གྲྭ་ལ་གནས་པའི་ལྷ་མོ་བཞི། །སྦོས་མོ་རི་ཁྲོད་མ་དེ་བཞིན། །གཏུམ་མོ་དང་ནི་གཡུང་མོ་སྟེ། །རིམ་པས་སྔོན་བཞིན་རྟག་ཤེས་བྱ། །ཞེས་གསུངས་པའི་ཕྱིར་རོ།།

དེ་བཞིན་དུ་མངོན་པར་བརྗོད་པའི་རྒྱུད་བླ་མ་ལའ། ཤར་ཕྱོགས་སུ་ནི་གཽ་རི་སྟེ། །བྱང་དུ་དེ་བཞིན་ཙཽ་རི་མ། །ནུབ་ཏུ་རབ་རྨོངས་མ་ཡིན་ནོ། ། ལྷོ་རུ་ཡང་ནི་རོ་ལངས་མ། །མེ་ལ་སྦོས་བྱེད་མ་ཡིན་ཏེ། །བདེན་བྲལ་དུ་ནི་གཏུམ་མོ་ཡིན། །རླུང་ཕྱོགས་སྨེ་མ་ཉིད་ཡིན་ཏེ། །དབང་ལྡན་ཧེ་རུ་ཀ་མ་སྟེ། །དེ་བཞིན་རྣལ་འབྱོར་མ་བརྒྱད་ནི། །དཀར་མོ་སེར་ལ་སྔོ་ལྗང་གུའོ། །སྐུལ་བྱེད་དམར་ལ་སྔོ་ལྗང་གུ། །རབ་རྨོངས་མ་ནི་སྔོ་སེར་ལྗང་། །རོ་ལངས་མ་ནི་དཀར་སྔོ་ལྗང་། །སྦོས་བྱེད་མ་ནི་སྣ་ཚོགས་མདོག །དམར་དང་སྔོ་དང་ལྗང་གུའོ། །གཏུམ་མོ་ཡང་ནི་ལྗང་སྔོ་སེར། །སྨེ་མོ་ཡང་ནི་དུད་སྔོ་ལྗང་། ། ཧེ་རུ་ཀ་མ་སྔོ་ལྗང་དམར། །འདི་ལྟར་དེ་དག་ཐམས་ཅད་ཀྱང་། །སྤྱན་གསུམ་པ་ལ་སྐྲ་གྲོལ་བ། །ཕྱོགས་ཀྱི་གོས་འཆང་གར་དང་བཅས། །ཡི་དགས་གདན་ལ་ལེགས་པར་བཞུགས། །ཞེས་གོང་དུ་དྲངས་ཟིན་པ་ལྟར་ཕྱོགས་ཀྱི་འགོད་སྟངས་མི་འདྲ་བ་ཙམ་ལས་དེ་ལྟར་འགོད་དགོས་པར་བཤད་པ་སོགས་གསར་རྙིང་གི་རྒྱུད་དུ་མ་ནས་གསུངས་སོ།།

གཉིས་པ་དུར་ཁྲོད་བརྒྱད་དུ་ཡོད་པའི་མཆོད་རྟེན་བརྒྱད་ཡོད་དེ། ཤར་དུ་མཆོད་རྟེན་བདེ་བྱེད་བརྩེགས་པའམ་བདེ་བྱེད་རྟེན་དང་། ལྷོ་རུ་མཆོད་རྟེན་རི་བོ་ཏ་ལ་ལ་དང་། ཤར་ལྷོར་མཆོད་རྟེན་ཁ་ཤོ་བྱཱ་གྷྲྀ་ཁ་དང་། ལྷོ་ནུབ་ཏུ་མཆོད་རྟེན་མ་ལ་ས་གན་ད་དང་། བྱང་ཤར་དུ་མཆོད་རྟེན་གེའུ་ཏོ་ཤན་དང་། ནུབ་བྱང་དུ་མཆོད་རྟེན་ཀ་ནི་ཀ་()དང་། བྱང་ཕྱོགས་སུ་གཟི་ཡི་མཆོད་རྟེན་དྷརྨ་ཙཀྲ་དང་། ནུབ་ཏུ་མཆོད་རྟེན་བདེ་བྱེད་གཞོན་ནུ་དང་བརྒྱད་པོ་དེ་ཡིན་པའི་ཕྱིར་ཏེ། འབྲས་བུ་ཆེན་པོ་ལྔ་བསྒྲལ་བ་ལས། མཆོད་རྟེན་མིང་ནི་བདེ་བྱེད་རྟེན། །ཞེས་དང་། མཆོད་རྟེན་རི་བོ་ཏ་ལ་ལ། །ཞེས་དང་། མཆོད་རྟེན་ཁ་ཤོ་བྱཱ་གྷྲྀ་ཁའོ། །ཞེས་དང་། མཆོད་རྟེན་མ་ལ་ས་གན་ད། །ཞེས་དང་། མཆོད་རྟེན་མིང་ནི་གེའུ་ཏོ་ཤན། །ཞེས་དང་། མཆོད་རྟེན་མིང་ནི་སྐ་ནི་སྐ། །ཞེས་དང་། གཟི་ཡི་མཆོད་རྟེན་ཆེན་པོ་སྟེ། །མིང་ཡང་དྷརྨ་ཙ་ཀྲའོ། །ཞེས་དང་། མཆོད་རྟེན་བདེ་བྱེད་གཞོན་ནུའོ། །ཞེས་གསུངས་པའི་ཕྱིར་དང་། ཧེ་རུ་ཀ་གལ་པོ་ལས། ཡུལ་གྱི་མིང་ནི་རྒྱ་གར་ཡུལ། མ་ག་དྷཱ། མཁས་ཤིང་སྙིང་སྟོབས་ཆེ་བའི་ཡུལ། མཆོད་རྟེན་བདེ་བྱེད་བརྩེགས། ཞེས་དང་། ཡུལ་གྱི་མིང་ནི་སིངྒ་ལ། གླིང་ཕྲན། མཐོང་ཐོས་རྫུ་འཕྲུལ་ཅན་གྱི་ཡུལ། མཆོད་རྟེན་རི་བོ་ཏ་ལ། ཞེས་དང་། ཡུལ་གྱི་མིང་ནི་བལ་པོའི་ཡུལ། ཟས་ཀྱི་ལོངས་སྤྱོད་ཆེ་བའི་ཡུལ། མཆོད་རྟེན་བྱ་རི་ཁ་ཤོར། ཞེས་དང་། ཡུལ་གྱི་མིང་ནི་ཐོ་གར་ཡུལ། མཐུ་དབང་ཆེ་བ་གྱད་ཀྱི་ཡུལ། མཆོད་རྟེན་མགོ་མང་། ཞེས་དང་། ཡུལ་གྱི་མིང་ནི་ལི་ཡི་ཡུལ། མེ་ཆུའི་རྫུ་འཕྲུལ་གྱི་ཡུལ། མཆོད་རྟེན་དེའུ་ཤན། ཞེས་དང་། ཡུལ་གྱི་མིང་ནི་ཁ་ཆེའི་ཡུལ། བདེ་སྐྱིད་ལྡན་པའི་ཡུལ། མཆོད་རྟེན་ཀ་ནི་ཀ། ཞེས་དང་། ཡུལ་གྱི་མིང་ནི་ཨོ་རྒྱན་ཡུལ། ལོངས་སྤྱོད་འབྱོར་ལྡན་དངོས་གྲུབ་འཐོབ་པའི་ཡུལ། གཟིའི་མཆོད་རྟེན་དྷརྨ་ཙཀྲ། ཞེས་དང་། ཡུལ་གྱི་མིང་ནི་ཟ་ཧོར་ཡུལ། འབྱོར་པའི་ལོངས་སྤྱོད་ལྡན་པའི་ཡུལ། མཆོད་རྟེན་བདེ་བྱེད་གཞོན་ནུ། ཞེས་གསུངས་པའི་ཕྱིར་རོ།།

བདུད་རྩི་རོལ་བའི་རྒྱུད་ལས། མཆོད་རྟེན་བདེ་བྱེད་གཞོན་ནུ་ཉིད། །ཅེས་ཤར་དུ་དེ་དང་། མཆོད་རྟེན་རི་པོ་ཏ་ལ་ཡིན། །ཞེས་ལྷོ་རུ་དེ་དང་། མཆོད་རྟེན་ཁྲི་དེ་ཀ་ར་སྟེ། །ཤར་ལྷོ་རུ་དེ་དང་། གྱད་ཀྱི་མཆོད་རྟེན་མངོན་འཕགས་པ། །ཞེས་ལྷོ་ནུབ་ཏུ་དེ་དང་། མཆོད་རྟེན་མིང་ནི་མྱུ་གུའི་ཚོགས། །ཞེས་བྱང་ཤར་དུ་དེ་དང་། མཆོད་རྟེན་མིང་ནི་ཀ་ནི་ཀ །ཞེས་ནུབ་བྱང་དུ་དེ་དང་། མཆོད་རྟེན་ཆོས་ཀྱི་འཁོར་ལོའོ། །ཞེས་བྱང་ཕྱོགས་སུ་དེ་དང་། མཆོད་རྟེན་གྲུབ་པའི་དངོས་གྲུབ་ཅན། །ཞེས་ནུབ་ཕྱོགས་སུ་མཆོད་རྟེན་དེ་ཉིད་ཡོད་པར་བཤད་པ་ལ་སོགས་པ་མཆོད་རྟེན་གྱི་མིང་མི་མཐུན་པ་ཡང་མང་དུ་མཆིས་སོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས། ཤར་དང་ལྷོ་གཉིས་འདི་དག་དང་འདྲ་བ་ལ། མི་འདྲ་བ་ནི། ནུབ་ཏུ་བདེ་རྒྱས་ཁམས་སུམ་སྒྲོལ་ཞེས་པ་དང་། བྱང་དུ་དོན་ཡོད་འཕྲིན་ལས་གཏེར་དང་། ཤར་ལྷོར་གྷེའུ་དེ་ཤན་དང་། ལྷོ་ནུབ་ཏུ་ཀ་ནི་ཀ་དང་། ནུབ་བྱང་དུ་དགེ་ལྡན་མ་ཧཱ་བྷ་ལ་དང་། བྱང་ཤར་དུ་ཤིང་ཀུན་མཆོད་རྟེན་རྣམས་ཡོད་པར་བཤད་དོ།།

གཞན་ཡང་ཕྱི་འགྱུར་གསར་མའི་ལུགས་ལ་ནི། སློབ་དཔོན་བིར་ཝ་པས་མཛད་པའི་དཔལ་ཨུ་རྒྱན་གྱི་རྣལ་འབྱོར་པ་དང་རྣལ་འབྱོར་མའི་རང་བྱུང་གི་ལོངས་སྤྱོད་དུར་ཁྲོད་ཀྱི་རྟོག་པ་ཞེས་བྱ་བ་ལས། བྱང་ཆུབ་ཆེན་པོའི་མཆོད་རྟེན་གྱིས་ས་འཛིན། །ཞེས་ཤར་གྱི་མཆོད་རྟེན་དེ་བྱང་ཆུབ་ཆེན་པོའི་མཆོད་རྟེན་དང་། ཆོ་འཕྲུལ་སྟོན་པའི་མཆོད་རྟེན་གྱིས་ས་འཛིན། །ཞེས་ལྷོའི་མཆོད་རྟེན་དེ་ཆོ་འཕྲུལ་ཆེན་པོའི་མཆོད་རྟེན་དང་། ལྷ་ལས་བབས་པའི་མཆོད་རྟེན་གྱི་ས་འཛིན། །ཞེས་ནུབ་ཀྱི་མཆོད་རྟེན་དེ་ལྷ་བབས་མཆོད་རྟེན་དང་། བཀྲ་ཤིས་བརྩེགས་པའི་མཆོད་རྟེན་གྱིས་ས་འཛིན། །ཞེས་བྱང་གི་མཆོད་རྟེན་དེ་བཀྲ་ཤིས་འབྱུང་བའི་མཆོད་རྟེན་དང་། པདྨ་སྤུངས་པའི་མཆོད་རྟེན་གྱིས་ས་འཛིན། །ཞེས་ཤར་ལྷོའི་མཆོད་རྟེན་དེ་པདྨ་སྤུངས་པའི་མཆོད་རྟེན་དང་། བདུད་འདུལ་ཆེན་པོའི་མཆོད་རྟེན་གྱིས་ས་འཛིན། །ཞེས་ལྷོ་ནུབ་ཀྱི་མཆོད་རྟེན་དེ་བདུད་འདུལ་མཆོད་རྟེན་དང་། གཙུག་ཕུད་དག་པའི་མཆོད་རྟེན་གྱིས་ས་འཛིན། །ཞེས་ནུབ་བྱང་གི་མཆོད་རྟེན་དེ་གཙུག་ཕུད་དག་པའི་མཆོད་རྟེན་དང་། ཆོས་ཀྱི་འཁོར་ལོའི་མཆོད་རྟེན་གྱིས་ས་འཛིན། །ཞེས་བྱང་ཤར་གྱི་མཆོད་རྟེན་དེ་ཆོས་འཁོར་མཆོད་རྟེན་དུ་གསུངས་སོ།།

གཞན་ཡང་སློབ་དཔོན་དཔལ་སྒྲ་གཅན་གསང་བས་མཛད་པའི་ཀྱེ་རྡོར་སྒྲུབ་ཐབས་རབ་ཏུ་གསལ་བ་ལས། མཆོད་རྟེན་དཀར་པོ་རྡོ་རྗེ་ཞེས་བྱ་བ་གནས་སོ། །ཞེས་ཤར་དུ་གཏུམ་དྲག་གི་དུར་ཁྲོད་ན་མཆོད་རྟེན་དཀར་པོ་རྡོ་རྗེ་ཞེས་པ་དང་། མཆོད་རྟེན་ནག་པོ་རྡོ་རྗེ་ཞེས་བྱ་བ་གནས་སོ། །ཞེས་ལྷོར་ལྷག་མ་ཞེས་པའི་དུར་ཁྲོད་ན་མཆོད་རྟེན་ནག་པོ་རྡོ་རྗེ་ཞེས་བྱ་བ་དང་། མཆོད་རྟེན་དཀར་པོ་ཆགས་པའི་རྡོ་རྗེ་ཞེས་བྱ་བ་གནས་སོ། །ཞེས་ནུབ་ཏུ་འབར་ཞིང་འཁྲུགས་པའི་དུར་ཁྲོད་ན་མཆོད་རྟེན་དཀར་པོ་ཆགས་པའི་རྡོ་རྗེ་ཞེས་པ་དང་། མཆོད་རྟེན་དཀར་པོ་འདུ་བྱེད་རྡོ་རྗེ་ཞེས་བྱ་བ་གནས་སོ། །ཞེས་བྱང་དུ་རི་བོའི་ཕུག་ཅེས་པའི་དུར་ཁྲོད་ན་མཆོད་རྟེན་དཀར་པོ་འདུ་བྱེད་རྡོ་རྗེ་ཞེས་བྱ་བ་དང་། མཆོད་རྟེན་དཀར་པོ་ཐུགས་རྡོ་རྗེ་ཞེས་བྱ་བ་གནས་སོ། །ཞེས་བྱང་ཤར་དབང་ལྡན་དུ་དཔལ་མོའི་ནགས་ཞེས་པའི་དུར་ཁྲོད་ན་མཆོད་རྟེན་དཀར་པོ་ཐུགས་རྡོ་རྗེ་ཞེས་བྱ་བ་དང་། །མཆོད་རྟེན་དམར་པོ་སྐུ་རྡོ་རྗེ་ཞེས་བྱ་བ་གནས་སོ། །ཞེས་མེ་སྟེ་ཤར་ལྷོ་ན་དྲག་ཏུ་དགོད་པའི་དུར་ཁྲོད་ན་མཆོད་རྟེན་དམར་པོ་སྐུ་རྡོ་རྗེ་ཞེས་བྱ་བ་དང་། མཆོད་རྟེན་དཀར་པོ་རིན་ཆེན་རྡོ་རྗེ་ཞེས་བྱ་བ་གནས་སོ། །ཞེས་ནུབ་བྱང་ངམ་བདེན་བྲལ་དུ་འཇིགས་པའི་མུན་པའི་དུར་ཁྲོད་ན་མཆོད་རྟེན་དཀར་པོ་རིན་ཆེན་རྡོ་རྗེ་ཞེས་བྱ་བ་དང་། མཆོད་རྟེན་ལྗང་གུ་ཆོས་ཀྱི་རྡོ་རྗེ་ཞེས་བྱ་བ་གནས་སོ། །ཞེས་རླུང་ངམ་ནུབ་བྱང་དུ་ཀཱི་ལི་ཀཱི་ལི་སྒྲོག་པའི་དུར་ཁྲོད་ན་མཆོད་རྟེན་ལྗང་གུ་ཆོས་ཀྱི་རྡོ་རྗེ་ཞེས་བྱ་བ་ཡོད་པར་གསུངས་སོ།།

སངས་རྒྱས་མཉམ་སྦྱོར་སྔ་འགྱུར་ལས། མཆོད་རྟེན་བརྒྱད་ནི་བསྒོམ་ཚུལ་མཛད། །ཅེས་གསུངས་པ་ལྟ་བུ་རྒྱུད་རེ་ཟུང་ཙམ་ལས་རྒྱུད་གཞན་མང་པོར་མཆོད་རྟེན་བརྒྱད་ངོས་འཛིན་གྱི་སྐོར་ཡོད་པའི་གསུང་ཤིན་ཏུ་དཀོན་ནོ།།

གསུམ་པ་དུར་ཁྲོད་བརྒྱད་དུ་སྐྱེས་པའི་ཤིང་ཆེན་པོ་བརྒྱད་ཡོད་དེ། ཤར་དུ་ཤིརྵའི་ཤིང་སྟེ་ཙནྡན་གོར་ཤིརྵའམ་ཙནྡན་དཀར་པོའི་ལྗོན་ཤིང་དང་། ལྷོ་རུ་ཨ་ཤྭཏྠ་སྟེ་མྱ་ངན་མེད་པའི་ཤིང་གི་ལྗོན་པ་དང་། ནུབ་ཏུ་ཝང་གེ་ལིང་གི་ཤིང་ཞེས་པ་དང་། བྱང་དུ་ཙཱུ་ཏའི་ཤིང་སྟེ་ཨ་མྲའི་ལྗོན་ཤིང་དང་། ཤར་ལྷོར་ནྱ་གྲོ་དྷ་ཡི་ཤིང་སྟེ་བྱང་ཆུབ་ཀྱི་ཤིང་དང་། ལྷོ་ནུབ་ཏུ་པརྐ་ཏིའི་ཤིང་དང་། ནུབ་བྱང་དུ་ལྕུགས་ཤིང་སྟེ་ཀ་རཉྫ་ཤིང་འཚེར་མ་ཅན་ཞེས་པ་འཇམ་འབྲས་ཀྱི་ཤིང་དང་། བྱང་ཤར་དུ་པཱ་ཐཱའི་ཤིང་སྟེ་ཨ་རྫུ་ནའི་ཤིང་བཅས་ཡོད་པར་བཤད་པའི་ཕྱིར་ཏེ། དཔལ་དུར་ཁྲོད་རྒྱན་གྱི་རྒྱུད་ལས། ཤར་དུ་ཤི་རྀ་ཤ་ཡི་ཤིང་། །ལྷོ་རུ་ཨ་ཤྭད་ཐ་ཡི་ཤིང་། །ནུབ་ཏུ་ཝང་གེ་ལིང་གི་ཤིང་། །བྱང་དུ་ཙཱུ་ཏའི་ཤིང་དུ་ངེས། །གོང་དང་མཚུངས་པ་ནྱ་གྲོ་དྷ། །པརྐ་ཏི་ལྕུགས་པཱ་ཐཱ་དག །མེ་ནས་དབང་ལྡན་མཚམས་སུ་དགོད། །ཅེས་དང་། བདེ་མཆོག་འབྱུང་བ་ལས། ཤར་ཤིརྵ་ཨ་ཤྭཏ་ཤིང་། །ཀང་ཀེལ་ཁྱད་པར་ཙཱུ་ཏའི་ཤིང་། །བ་ཊཱཊ་དེ་བཞིན་ཀ་རཉྫ། །ལ་ཊཱ་པར་ཀ་ཏི་པཱརྠི། །ཞེས་དང་། མཁའ་འགྲོ་རྒྱ་མཚོ་ལས། ཤི་ཤིང་ཁྱབ་ནས་ཀྃ་ཀེ་ལི། །ཙུ་ཏའི་ཤིང་དང་ནྱ་གྲོ་དྷ། །དེ་བཞིན་ཀ་རཉྫ་ཀ་ཉིད། །ལ་ཏ་པར་ཀ་ཊི་དང་པ་ཐི་བ། །ཞེས་དང་། དཔལ་ཕྱག་ཆེན་ཐིག་ལེའི་རྒྱུད་ལས། དུར་ཁྲོད་རེ་རེའི་ཤིང་རེ་ནི། །དབང་བྱེད་པ་ནི་དེ་ན་ཡོད། །གཏུམ་དྲག་པ་ཏ་ལ་ཡི་ཤིང་། །དབྱིབས་ཅན་ནང་ན་ཤི་ཀ་རའོ། །ཚང་ཚིང་ས་ལི་ཤིང་ཡིན་ནོ། །འབར་བ་ཞེས་བྱ་སོ་རི་ཤའོ། །དམྱལ་སོགས་ཨུ་དུམ་བཱ་ར་སྟེ། །མི་བཟད་པ་ནི་བ་ཏའི་ཤིང་། །ཧ་ཧར་རྒོད་ན་ཨ་ཤྭད་ཐ། །གཡེར་ཁའི་ནང་ན་གེ་སར་ཤིང་། །ཞེས་གསུངས་པའི་ཕྱིར་རོ།།

བདེ་མཆོག་འབྱུང་བ་ལས་མཚམས་བཞིའི་ཤིང་དེ་བྱང་ཤར་དབང་ལྡན་ནས་མགོ་བརྩམས་པ་བཤད་པ་དང་། མཁའ་འགྲོ་རྒྱ་མཚོ་ལས། ཤལ་མ་ལི་ཤིང་མྱ་ངན་མེད། །ཡོངས་འདུ་ཨུ་དུམ་བཱར་དེ་བཞིན། །ཌོམ་བི་ར་དང་གམ་བྷ་རི། །རྒྱ་ཤུག་དང་ནི་བ་རུ་རའོ། །ཞེས་དང་། ཤིང་ནི་ཙན་དན་ག་པུར་དང་། །ཛཱ་ཏི་ཕ་ལ་དང་ཨེ་ལ། །ནཱ་ག་གེ་སར་ཙམ་པ་དང་། །ཀུན་དུ་རུ་དང་ལྷའི་ཤིང་ངོ་། །ཞེས་རྒྱུད་རང་དུ་གོང་གི་ཤིང་བརྒྱད་དེར་སྔ་མར་སྨོས་པའི་ཤིང་དག་དང་མི་འདྲ་བ་བརྒྱད་ཀྱང་གསུངས་སོ།།

མཁས་པ་འགའ་ཡིས་ཤར་ཤིང་དེ་ཤཱི་རྵིའི་ཤིང་སྟེ་ན་ག་གེ་སར་གྱི་ཤིང་དུ་བཤད། བདག་གིས་ནི་ཤི་རི་ཥའི་ཤིང་སྟེ་མེ་ཏོག་འཇམ་ཟེར་བའི་ཤིང་དུ་ངོས་བཟུང་ཡང་རུང་ངམ་སྙམ། དེ་བཞིན་དུ་ཀེང་ཀེལ་ལམ་ཝིང་གེ་ལིང་གི་ཞེས་པ་ནི་ཀངྐེ་ལའི་ཤིང་སྟེ་ཆུ་ཤིང་དུ་མཁས་པ་འགའ་ཡིས་གསུངས་པ་ལ་སོགས་པ་རྒྱུད་སོ་སོར་ཤིང་གི་ངོས་འཛིན་ཡང་མི་འདྲ་བར་ཡོད་ལ་བོད་པས་ངོས་བཟུང་ཡང་མི་འདྲ་བས་གསལ་དག་ངོ་སྤྲོད་པ་དཀའོ།།

སློབ་དཔོན་རྣལ་འབྱོར་པས་མཛད་པའི་དུར་ཁྲོད་བརྒྱད་ཀྱི་བཤད་པ་ཞེས་པ་ལས། ཤར་གྱི་དུར་ཁྲོད་དུ་ཨ་རུ་རིའི་ཤིང་དང་། ལྷོར་བ་རུ་རའི་ཤིང་དང་། ནུབ་ཏུ་མྱ་ངན་མེད་པའི་ཤིང་དང་། བྱང་དུ་བྱང་ཆུབ་ཀྱི་ཤིང་དང་། ཤར་ལྷོར་ཀ་རཉྫ་ཡི་ཤིང་དང་། ལྷོ་ནུབ་ཏུ་ཨུ་དུམ་ཝཱ་རའི་ཤིང་དང་། ནུབ་བྱང་དུ་སྲིད་སྒྲུབ་ཀྱི་ཤིང་དང་། བྱང་ཤར་དུ་ནྱ་གྲོ་དྷ་ཡི་ཤིང་རྣམས་ཡོད་པར་བཤད་པ་དང་། མཁན་པོ་རཏྣ་ཤྲཱི་མི་ཏྲ་དང་དགེ་སློང་ཤཱཀྱ་ཡེ་ཤེས་ཀྱི་འགྱུར་དུར་ཁྲོད་བརྒྱད་ཅེས་པ་ལས། ཤར་གྱི་དུར་ཁྲོད་དུ་ནཱ་ག་པུཥྤའི་ཤིང་དང་། ལྷོར་ཨ་མྲའི་ཤིང་དང་། ནུབ་ཏུ་ཨ་ཤྭཏྠའི་ཤིང་དང་། བྱང་དུ་པུནྣཱ་ག་ར་ཞེས་པའི་ཤིང་དང་། ཤར་ལྷོར་ཀ་རཉྫ་ཡི་ཤིང་དང་། ལྷོ་ནུབ་ཏུ་ཏ་ཛ་ཏའི་ཤིང་དང་། ནུབ་བྱང་དུ་ཨུ་དུམ་ཝཱ་རའི་ཤིང་དང་། བྱང་ཤར་དུ་ནྱ་གྲོ་དྷ་ཡི་ཤིང་རྣམས་ཡོད་པར་བཤད་པ་དང་། གཉིས་སུ་མེད་པའི་རྡོ་རྗེ་ཨ་བ་དྷཱུ་ཏཱི་པས་ནི། ཤར་ཤིང་ཤི་རི་ཤ་དང་། ཤར་ལྷོ་མེ་ཡི་ཤིང་ཀ་རཉྫ་དང་། ལྷོར་ཤིང་ཨ་མྲ་དང་། ལྷོ་ནུབ་བདེན་བྲལ་དུ་ཤིང་ལ་ཏཱ་པརྐ་ཊཱི་དང་། ནུབ་ཏུ་ཤིང་ཨ་ཤོ་ཀ་དང་། ནུབ་བྱང་རླུང་གི་ཤིང་ཨརྫུ་ན་དང་། བྱང་དུ་ཤིང་ཨ་ཤྭཏྠ་དང་། བྱང་ཤར་དབང་ལྡན་དུ་ཤིང་པ་ཊ་ཡོད་པར་བཤད་པ་དང་། གོང་སྨོས་སློབ་དཔོན་རྣལ་འབྱོར་བའི་དུར་ཁྲོད་བརྒྱད་ཀྱི་བཤད་པ་ཞེས་པ་ལས་ནི། ཤིང་ནི་གསེར་མདོག་ལོ་མ་བརྒྱར་གྱེས་ཤིང་། །ཞེས་ཤར་ཤིང་སེར་པོ་དང་། བཻ་ཌཱུརྱ་མདོག་ལོ་མ་བརྒྱར་གྱེས་ཤིང་། །ཞེས་ལྷོ་ཤིང་སྔོན་པོ་དང་། ཤིང་ནི་བྱི་རུའི་མདོག་ཅན་ལོ་འདབ་རྒྱས། །ཞེས་ནུབ་ཤིང་དམར་པོ་དང་། མ་རྒད་ལྗང་མདོག་ལོ་མ་བརྒྱར་གྱེས་ཤིང་། །ཞེས་བྱང་ཤིང་ལྗང་གུ་དང་། ཤིང་ནི་ཨ་མྲའི་མདོག་ཅན་ལོ་འདབ་རྒྱས། །ཞེས་ཤར་ལྷོའི་ཤིང་སེར་དཀར་དང་། ཨིནྡྲ་ནཱི་ལའི་ཤིང་ནི་ལོ་འདབ་རྒྱས། །ཞེས་ལྷོ་ནུབ་ཀྱི་ཤིང་ལྗང་སྔོན་ཨིནྡྲ་ནཱི་ལའི་མདོག་དང་། ཤེལ་གྱི་མདོག་ཅན་ཤིང་ནི་ལོ་འདབ་རྒྱས། །ཞེས་ནུབ་བྱང་གི་ཤིང་དཀར་པོ་ཤེལ་མདོག་དང་། རིན་ཆེན་དུང་མདོག་ཤིང་ནི་ལོ་འདབ་རྒྱས། །ཞེས་བྱང་ཤར་གྱི་ཤིང་ཡང་དཀར་པོར་བཤད་དོ།།

སྒྲ་གཅན་གསང་བས། ཤར་དུ་གཏུམ་དྲག་ཅེས་བྱ་བའི་དུར་ཁྲོད་ན་ཤིང་ཤི་རི་ཤ་དང་། ལྷོར་ལྷག་མ་ཞེས་བྱ་བའི་དུར་ཁྲོད་ཆེན་པོ་དེར་ཤིང་ཙུ་ཏ་དང་། ནུབ་ཏུ་འབར་ཞིང་འཁྲུགས་པ་ཞེས་པའི་དུར་ཁྲོད་ཆེན་པོ་དེར་ཤིང་མྱ་ངན་མེད་དང་། བྱང་དུ་རི་བོའི་ཕུག་ཅེས་བྱ་བའི་དུར་ཁྲོད་ཆེན་པོ་དེར་ཤིང་ཨ་ཤྭཏྠ་དང་། བྱང་ཤར་དུ་དཔལ་མོའི་ནགས་ཞེས་པའི་དུར་ཁྲོད་ཆེན་པོ་དེར་ཤིང་ནྱ་གྲོ་དྷ་དང་། ཤར་ལྷོར་དྲག་ཏུ་དགོད་པ་ཞེས་པའི་དུར་ཁྲོད་ཆེན་པོ་དེར་ཤིང་ཀ་རཉྫ་ཀ་དང་། ལྷོ་ནུབ་ཏུ་འཇིགས་པའི་མུན་པ་ཞེས་བྱ་བའི་དུར་ཁྲོད་ཆེན་པོ་དེར་ཤིང་ལ་ཏཱ་པརྐ་ཊི་དང་། ནུབ་བྱང་དུ་ཀཱི་ལི་ཀཱི་ལི་སྒྲོག་པའི་དུར་ཁྲོད་ཆེན་པོ་དེར་ཤིང་ཨ་རྫུ་ན་རྣམས་ཡོད་པར་བཤད་དེ། དེས་མཛད་པའི་ཀྱེ་རྡོར་སྒྲུབ་ཐབས་རབ་གསལ་ལས། དེར་ཤིང་ཤི་རི་ཤ་དང་། ཞེས་དང་། དེར་ཤིང་ཙུ་ཏ་དང་། ཞེས་དང་། དེར་ཤིང་མྱ་ངན་མེད་དང་། ཞེས་དང་། དེར་ཤིང་ཨ་ཤྭཏྠ་དང་། ཞེས་དང་། དེར་ཤིང་ནྱ་གྲོ་དྷ་དང་། ཞེས་དང་། དེར་ཤིང་ཀ་རཉྫ་ཀ་དང་། ཞེས་དང་། དེར་ཤིང་ལ་ཏཱ་པརྐ་ཊི་དང་། ཞེས་དང་། དེར་ཤིང་ཨ་རྫུ་ན་དང་། ཞེས་གསུངས་པའི་ཕྱིར་རོ།།

སློབ་དཔོན་ཆེན་པོ་སྟོང་ཉིད་རྡོ་རྗེས་མཛད་པའི་ཧེ་རུ་ཀ་ཉེ་བར་འབྱུང་བའི་དཀྱིལ་འཁོར་གྱི་ཆོ་ག་ལས། ཤི་རི་ཤ་དང་། ཙུ་ཏ་དང་། ཀང་ཀེ་ལི། ཨ་ཤྭད་ཐ། བྷ་ཐ། ཀ་རཉྫ། ལ་ཏ་ཊ། པྲ་ཀ་རི། ས་ལས་སྐྱེས་པ་ཤར་ལ་སོགས་པའི་རིམ་པས་བྲིའོ། །ཞེས་གསུངས་པ་དང་།

སློབ་དཔོན་ཀམྤ་ལས་མཛད་པའི་དགྱེས་པའི་རྡོ་རྗེའི་སྒྲུབ་ཐབས་དེ་ཁོ་ན་ཉིད་བཞིའི་རིམ་པ་ལས། དུར་ཁྲོད་བརྒྱད་ན་ཤིང་བརྒྱད་སོགས། །ཧ་ར་ཙུ་ཏ་ཨ་ཤོ་ཀ །ཨ་ཤྭཏྠ་དང་ཀ་རན་ཛ། །ཛ་ལི་ཏ་དང་པར་ཏི་པར། །བེ་ཏེ་བྷ་ཏྲ་ཕྱོགས་དང་མཚམས། །ཞེས་མི་འདྲ་བ་ལྟ་བུ་གསུངས་མོད། ཤིང་འདི་དག་ཕལ་མོ་ཆེ་བོད་ཡུལ་ནས་ངོས་མི་ཟིན་པ་དང་ལོ་ཙཱ་བའི་ཁྱད་པར་གྱིས་བསྒྱུར་དུས་ཡི་གེ་གཅིག་ཏུ་ངེས་པར་བྱ་མ་ནུས་པའི་དབང་གིས་ད་ལྟ་ནི་གཅིག་པ་དང་མི་གཅིག་པའི་ཁྱད་པར་དབྱེ་བ་ཤིན་ཏུ་དཀའོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས། ཤར་དུ་ཉ་ཡི་ཤིང་གོན་ཞེས་པ་དང་། ལྷོར་བཀྲ་ཤིས་ཙུན་དྷ་སྔོན་པོ་དང་། ནུབ་ཏུ་ཨ་ལ་ཨ་ལི་ཀ་དང་། བྱང་དུ་ཨ་སུ་ཏོ་ན་དང་། ཤར་ལྷོར་ནྱ་གྲོ་དྷ་དང་། ལྷོ་ནུབ་ཏུ་བཞི་ཁྲི་རྫོགས་ལྡན་འོད་དང་། ནུབ་བྱང་དུ་རྟ་ལྗང་ནག་པོ་དང་། བྱང་ཤར་དུ་ཏ་ལ་འོད་དམར་རྣམས་སྐྱེས་ཡོད་པར་བཤད་པ་སོགས་མི་འདྲ་བ་མང་ཡང་སོ་སོར་ངོས་ཟིན་པ་ཡང་དཀའ་ཞིང་སྤྲོས་པས་ཆོག་གོ།

བཞི་བ་དུར་ཁྲོད་བརྒྱད་དུ་གནས་པའི་ཞིང་སྐྱོང་བརྒྱད་ཡོད་དེ། ཤར་དུ་ཞིང་སྐྱོང་གནམ་འཕྲོ་དཀར་པོ་གླང་མགོ་ཅན་ཕྱག་མཚན་གྲི་གུག་དང་ཐོད་པ་འཛིན་པ་དང་། ལྷོ་རུ་ཞིང་སྐྱོང་འཚོ་བྱེད་མ་ཧེའི་གདོང་ཐོད་དབྱུག་ཐོགས་པ་དང་། ནུབ་ཏུ་ཞིང་སྐྱོང་རོལ་ཆེན་ཆུ་སྲིན་གདོང་ཅན་དང་། བྱང་དུ་ཞིང་སྐྱོང་དུད་ཁ་ཞེས་པ་རྟ་མགོ་ཅན་ལྗང་གུ་དང་། ཤར་ལྷོའི་འཇུག་པ་ར་གདོང་སེར་པོ་དང་། ལྷོ་ནུབ་ཏུ་ཞིང་སྐྱོང་སྤྲུལ་པ་མི་གདོང་སྔོན་པོ་དང་། ནུབ་བྱང་དུ་ཞིང་སྐྱོང་ལྷོ་འཕྱང་ཤ་བའི་མགོ་ཅན་དང་། བྱང་ཤར་དུ་ཞིང་སྐྱོང་དྲེགས་པ་སྤྱང་གདོང་ཅན་རྣམས་གནས་པར་བཤད་ལ། དེ་ནི་གུ་རུ་ཆོས་དབང་གི་དུར་ཁྲོད་བྱིན་འབེབས་ལས་བྱུང་བ་ལྟར་རོ།།

གཞན་ཡང་དེ་དང་མཐུན་སེ་བ་ནི་ཤར་གྱི་དུར་ཁྲོད་གཏུམ་དྲག་ནག་པོ་རུ་ཞིང་སྐྱོང་གཏུམ་དྲག་དཀར་པོ་གླང་པོ་ཆེའི་གདོང་ཅན་རྡོ་རྗེ་འཛིན་པ་དང་། བྱང་ཕྱོགས་དུར་ཁྲོད་ཚང་ཚིང་དུ་ཞིང་སྐྱོང་གྷ་ར་སེར་པོ་མི་ཡི་གདོང་ཅན་དབྱུག་ཏོ་འཛིན་པ་དང་། ནུབ་ཀྱི་དུར་ཁྲོད་རྡོ་རྗེ་འབར་འཁྲིགས་ཀེང་རུས་ཅན་དུ་ཞིང་སྐྱོང་འབར་འཁྲུགས་དམར་པོ་ཆུ་སྲིན་གདོང་ཅན་ཞགས་པ་འཛིན་པ་དང་། ལྷོ་ཕྱོགས་དུར་ཁྲོད་ཀེང་རུས་ཅན་དུ་ཞིང་སྐྱོང་འཇིགས་སྡེ་ནག་པོ་མ་ཧེའི་གདོང་ཅན་བེ་ཅོན་འཛིན་པ་དང་། བྱང་ཤར་དུར་ཁྲོད་མི་བཟད་བཞད་པའམ་ཧ་ཧ་དགོད་དུ་ཞིང་སྐྱོང་ཧ་ཧ་དགོད་པ་དཀར་པོ་ཁྱུ་མཆོག་གམ་བ་གླང་གདོང་ཅན་རལ་གྲི་འཛིན་པ་དང་། ཤར་ལྷོའི་དུར་ཁྲོད་བཀྲ་ཤིས་མཆོག་ཏུ་ཞིང་སྐྱོང་བཀྲ་ཤིས་དཔལ་མཆོག་དམར་པོ་ར་གདོང་ཅན་བགྲང་ཕྲེང་འཛིན་པ་དང་། ལྷོ་ནུབ་དུར་ཁྲོད་མུན་པ་ཅན་དུ་ཞིང་སྐྱོང་མུན་པ་ནག་པོ་མ་ཧེའི་གདོང་ཅན་བ་དན་འཛིན་པ་དང་། ནུབ་བྱང་དུར་ཁྲོད་ཀི་ལི་ཀི་ལིའི་སྒྲ་སྒྲོག་ཏུ་ཞིང་སྐྱོང་རི་དྭགས་ཤ་བའི་གདོང་ཅན་སྔོན་པོ་དུ་བའི་མདོག་ལྡན་ཏྲི་ཤཱུལ་འཛིན་པ་བཅས་ཡོད་པར་གསུངས་པའི་ཕྱིར་ཏེ། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། ཤར་དུ་ཧ་རི་པ་སྱེ་ལ། །གཏུམ་དྲག་དཀར་པོ་གླང་པོའི་གདོང་། །བྱང་དུ་བྱང་ཆུབ་ཤིང་བུ་ལ། །གྷ་ར་སེར་པོ་མི་ཡི་གདོང་། །ནུབ་ཏུ་མྱ་ངན་མེད་ཤིང་ལ། །འབར་འཁྲུགས་དམར་པོ་ཆུ་སྲིན་གདོང་། །ལྷོ་རུ་ཙཱུ་ཏའི་ཤིང་བུ་ལ། །འཇིགས་སྡེ་ནག་པོ་མ་ཧེའི་གདོང་། །མེ་རུ་ཀ་རན་ཙ་ན་སྡེ། །དཔལ་གྱི་ནགས་ཚལ་ར་གདོང་དམར། །བདེན་བྲལ་ཨརྫུའི་ཤིང་བུ་ལ། །འཇིགས་པའི་མུན་པ་མ་ཧེའི་གདོང་། །རླུང་དུ་སྲིད་སྒྲུབ་ཤིང་བུ་ལ། །ཀི་ལི་སྒྲ་སྒྲོག་རི་དྭགས་གདོང་། །དབང་ལྡན་ནྱ་གྲོ་དྷ་ཤིང་ལ། །ཧ་ཧར་རྒོད་པ་བ་གླང་གདོང་། །ཞེས་གསུངས་པའི་ཕྱིར་རོ།།

རྡོ་རྗེ་དཔལ་མཆོག་དང་པོའི་བརྟག་པ་འདི་ལས། གླང་པོ་མ་ཧེ་ཆུ་སྲིན་དང་། །རྟ་མཆོག་ཕྱོགས་གཅིག་གནས་པ་ཡིན། །ར་དང་རོ་ལངས་རི་དྭགས་དང་། །ཁྱུ་མཆོག་བཞི་ནི་མཚམས་སུ་གནས། །ཞེས་པའི་རོ་ལངས་ཞེས་པ་དེ་རྒྱུད་སྔ་མ་ལས་མི་ཡི་གདོང་ཞེས་པ་དེ་ཡིན་ངེས་ལ། དེ་ཕྱོགས་སུ་མིན་པར་མཚམས་སུ་བཀོད་པ་དང་། དེ་ཡང་རྒྱུད་སྔ་མ་ལྟར་ན་མ་ཧེའི་གདོང་ཅན་གཉིས་སུ་བཤད་ལ་རྟ་གདོང་ཅན་མི་སྣང་ལ། སློབ་དཔོན་བིར་ཝ་བས། ལྷོ་ནུབ་མི་དང་། ནུབ་བྱང་ཤ་བ་དང་། བྱང་ཤར་རྟ་གདོང་ཅན་དུ་བཤད་པ་དང་། སློབ་དཔོན་རྣལ་འབྱོར་བའི་དུར་ཁྲོད་ཀྱི་བཤད་པ་ལས། ལྷོ་མི་གདོང་ཅན་དང་། ལྷོ་ནུབ་མ་ཧེའི་གདོང་ཅན་དང་། ནུབ་བྱང་ཡང་མ་ཧེའི་གདོང་ཅན་དུ་བཤད་པ་ལ་སོགས་པ་ཡི་གེ་ནོར་རམ་སྙམ་པ་དང་རྒྱུད་དོན་མི་འདྲ་བའི་ཁྱད་པར་ནི་ཤིན་ཏུ་མང་ཡང་མི་སྤྲོའོ།།

ཞིང་སྐྱོང་རྣམས་ཀྱི་ཕྱག་མཚན་རྣམས་དེ་ལྟར་དུར་ཁྲོད་ཀྱི་རྒྱན་རྨད་དུ་བྱུང་བ་ལྟར་ཡིན་པའི་ཁུངས་ཡོད་དེ། རྡོ་རྗེ་དཔལ་མཆོག་དང་པོའི་བརྟག་པ་ལས། རྡོ་རྗེ་དབྱུག་ཏོ་ཞགས་པ་དང་། །བེ་ཅོན་བགྲང་ཕྲེང་རལ་གྲི་དང་། །བ་དན་ཏྲི་ཤཱུལ་འཛིན་པ་མཛད། །ཅེས་གསུངས་པའི་ཕྱིར་རོ།།

འོན་ཀྱང་དྲག་པོའི་ལས་བྱེད་པའི་ཚེ་ན་ཞིང་སྐྱོང་རྣམས་ལག་གཡས་གྲི་གུག་དང་། གཡོན་ན་ཐོད་པ་ཐོགས་པ་ཅན་དུ་བཤད་པ་དང་། གཞུང་འགའ་རེ་ན་ཐམས་ཅད་གྲི་ཐོད་འཛིན་པ་ཅན་དུའང་བཤད་དེ། རྡོ་རྗེ་དཔལ་མཆོག་དང་པོའི་བརྟག་པ་ལས། ཞིང་སྐྱོང་དྲག་པོའི་ལས་བྱེད་ཕྱིར། །ཕྱག་ན་གྲི་གུག་ཐོད་པ་བསྣམས། །ཞེས་དང་། དུར་ཁྲོད་ཀྱི་རྒྱན་རྨད་བྱུང་ལས། གཡས་ན་གྲི་གུག་ཐོད་པ་གཡོན། །ཞེས་གསུངས་པ་དང་། སློབ་དཔོན་ཀམྤ་ལས་མཛད་པའི་དགྱེས་པའི་རྡོ་རྗེའི་སྒྲུབ་ཐབས་དེ་ཁོ་ན་ཉིད་བཞིའི་རིམ་པ་ལས། གྲི་གུག་ཐོད་པ་གཡས་དང་གཡོན། །གཏོར་ལེན་ཞིང་དག་ལེགས་པར་སྐྱོང་། །ཞེས་དང་། སློབ་དཔོན་བིར་ཝ་པའི་དུར་ཁྲོད་ཀྱི་བཤད་པ་དེ་ལས་ཀྱང་། ཞིང་སྐྱོང་དཀར་པོ་གྲི་ཐོད་གླང་ཆེན་གདོང་། །ཞེས་པ་ནས། ཞིང་སྐྱོང་དཀར་ཤམ་གྲི་ཐོད་རྟ་ཡི་གདོང་། །ཞེས་པའི་བར་ཞིང་སྐྱོང་བརྒྱད་ཀ་གྲི་ཐོད་འཛིན་པ་ཅན་དུ་བཤད་པའི་ཕྱིར་རོ།།

སྤྱིར་ཞིང་སྐྱོང་རྣམས་ཀྱི་བཞུགས་ཚུལ་ཡང་ལྗོན་ཤིང་རྣམས་ཀྱི་ཤིང་ལོའི་གསེབ་ནས་ལུས་ཕྱེད་ཀྱི་རོ་སྟོད་ཕྱིར་མངོན་པར་བཞུགས་ཡོད་པ་དང་། ཤིང་གི་རྩ་བར་སོ་སོའི་ཆུང་མ་རྣམས་ལུས་སྦས་པའི་སྒོ་ནས་ཡབ་རྣམས་ལ་ཞལ་ཟས་སྟོབས་པའི་ཚུལ་དུ་གནས་ཡོད་པར་བཤད་དེ། རྡོ་རྗེ་དཔལ་མཆོག་དང་པོའི་བརྟག་པ་ལས། ཤིན་ཏུ་འཇིགས་པ་གཏུམ་པའི་གཟུགས། །ཤིང་བརྒྱད་ནང་ནས་ལུས་ཕྱེད་ཐོན། །ལུས་ཀྱི་ཕྱག་རྒྱ་སྦས་པ་ཡིན། །དེ་དག་སོ་སོའི་ཡུམ་དག་ནི། །ཤིང་གི་རྩ་བར་གནས་པ་སྟེ། །ཞལ་ཟས་སྟོབས་པའི་ཚུལ་དུ་གནས། །ཞེས་དང་། དུར་ཁྲོད་ཀྱི་རྒྱན་རྨད་བྱུང་ལས། ཤིང་ལོའི་སྟེང་ན་སྟོད་ཕྱུང་ངོ་། །ཞེས་གསུངས་པའི་ཕྱིར་རོ། །དེས་ན་དཀྱིལ་འཁོར་གྱི་རྒྱན་དུ་འབྲི་བ་དང་སྒོམ་པ་ཀུན་ལ་དེ་ལྟར་ཡིན་པར་ངེས་སོ།།

དེ་བཞིན་དུ་སྐུ་མདོག་ཡང་། སློབ་དཔོན་རྣལ་འབྱོར་བའི་དུར་ཁྲོད་ཀྱི་བཤད་པ་ལས། ནུབ་ཀྱི་ཞིང་སྐྱོང་གི་སྐུ་མདོག་ཡང་སེར་པོ་དང་། ཤར་ལྷོའི་དེའི་མདོག་དཀར་པོར་བཤད་པ་དང་། བིར་ཝ་པས། ཞིང་སྐྱོང་ལྗང་གུ་གྲི་ཐོད་ཁྱུ་མཆོག་གདོང་། །ཞེས་བྱང་གི་དེའི་མདོག་ལྗང་གུ་དང་། ཞིང་སྐྱོང་སེར་པོ་གྲི་ཐོད་ར་སྐྱེས་གདོང་། །ཞེས་ཤར་ལྷོའི་དེ་སེར་པོར་བཤད་པ་སོགས་མི་འདྲ་བ་མང་ངོ་།།

གཞན་ཡང་སློབ་དཔོན་སྒྲ་གཅན་གསང་བས། ཤར་དུ་གནོད་སྦྱིན་གླང་པོའི་གདོང་དཀར་པོ་དང་། ལྷོར་གནོད་སྦྱིན་མ་ཧེའི་གདོང་པ་ཅན་ནག་པོ་དང་། ནུབ་ཏུ་གནོད་སྦྱིན་ཆུ་སྲིན་གྱི་གདོང་པ་ཅན་དཀར་པོ་དང་། བྱང་དུ་གནོད་སྦྱིན་མིའི་གདོང་པ་ཅན་དཀར་པོ་དང་། བྱང་ཤར་དུ་གནོད་སྦྱིན་བ་གླང་གི་གདོང་པ་ཅན་དཀར་པོ་དང་། ཤར་ལྷོར་གནོད་སྤྱིན་རའི་གདོང་པ་ཅན་དམར་པོ་དང་། ལྷོ་ནུབ་ཏུ་གནོད་སྦྱིན་ནག་པོ་དོམ་གྱི་གདོང་པ་ཅན་དང་། ནུབ་བྱང་དུ་གནོད་སྦྱིན་ལྗང་གུ་རི་དྭགས་ཀྱི་གདོང་པ་ཅན་རྣམས་གནས་པར་གསུངས་ཏེ། ཀྱེ་རྡོར་སྒྲུབ་ཐབས་རབ་གསལ་ལས། གནོད་སྦྱིན་གླང་པོའི་གདོང་དཀར་པོ་དང་། ཞེས་དང་། གནོད་སྦྱིན་མ་ཧེའི་གདོང་པ་ཅན་ནག་པོ་དང་། ཞེས་དང་། གནོད་སྦྱིན་ཆུ་སྲིན་གྱི་གདོང་པ་ཅན་དཀར་པོ་དང་། ཞེས་དང་། གནོད་སྦྱིན་མིའི་གདོང་པ་ཅན་དཀར་པོ་དང་། ཞེས་སོགས་གསུངས་པའི་ཕྱིར། དེ་ལས་ཞིང་སྐྱོང་རྣམས་ཞལ་གཅིག་ཕྱག་གཉིས་ཅན་ལུས་ཕྱེད་ཤིང་ལས་ཐོན་པ་ཕྱག་གཡོན་པ་མི་ཐོད་ཁྲག་གིས་བཀང་བ་དང་། གཡས་ན་པདྨའི་ཕྱག་རྒྱས་ཞལ་ཟས་རོ་སྣ་ཚོགས་ཅན་འཛིན་པ་ཅན་དུ་བཤད་དེ། དེ་ཉིད་ལས། གནོད་སྦྱིན་འདི་རྣམས་ནི་རྫུ་འཕྲུལ་ཆེན་པོ་ཅན་ཞལ་གཅིག་པ་ཕྱག་གཉིས་པ་ཤིང་ལས་ལུས་ཕྱེད་འཐོན་པ་དག་སྟེ། ཕྱག་གཡོན་པ་རྣམས་ན་ཁྲག་གིས་ཡོངས་སུ་གང་བའི་མིའི་ཐོད་པ་འཛིན་ཞིང་གཡས་པའི་ཕྱག་གི་པདྨས་རོ་སྣ་ཚོགས་པ་འཛིན་པའི་རྣམ་པར་བསམ་པར་བྱའོ། །ཞེས་གསུངས་པའི་ཕྱིར་རོ།།

གཉིས་སུ་མེད་པའི་རྡོ་རྗེ་ཨ་བ་དྷཱུ་ཏཱི་པས་ནི། རྫུ་འཕྲུལ་ཆེན་པོ་པ་གླང་པོའི་གདོང་དང་། ཞེས་ཤར་དུ་གླང་པོའི་གདོང་དང་། རྫུ་འཕྲུལ་ཆེན་པོ་པ་རའི་གདོང་དང་། ཞེས་ཤར་ལྷོར་ར་ཡི་གདོང་དང་། རྫུ་འཕྲུལ་ཆེན་པོ་པ་མ་ཧེའི་གདོང་དང་། ཞེས་ལྷོར་མ་ཧེའི་གདོང་དང་། རྫུ་འཕྲུལ་ཆེན་པོ་པ་རོའི་གདོང་དང་། ཞེས་ལྷོ་ནུབ་ཏུ་རོ་ཡི་གདོང་དང་། རྫུ་འཕྲུལ་ཆེན་པོ་པ་ཆུ་སྲིན་གྱི་གདོང་དང་། ཞེས་ནུབ་ཏུ་ཆུ་སྲིན་གྱི་གདོང་དང་། རྫུ་འཕྲུལ་ཆེན་པོ་པ་རི་དྭགས་ཀྱི་གདོང་དང་། ཞེས་ནུབ་བྱང་རི་དྭགས་ཀྱི་གདོང་དང་། རྫུ་འཕྲུལ་ཆེན་པོ་པ་མིའི་གདོང་དང་། ཞེས་བྱང་དུ་མིའི་གདོང་དང་། རྫུ་འཕྲུལ་ཆེན་པོ་པ་བ་ལང་གི་གདོང་དང་། ཞེས་བྱང་ཤར་དུ་བ་ལང་གི་གདོང་པ་ཅན་དུ་བཤད་པ་དང་། ཁ་དོག་ཀྱང་། དེ་ཉིད་ལས། སེར་པོ་དང་དམར་པོ་དང་ནག་པོ་དང་དུད་ཀ་དང་ལྗང་གུ་དང་། སེར་པོ་དང་དཀར་པོའོ། །ཞེས་གསུངས་པས་གཞུང་རང་གི་གོ་རིམ་ལྟར་སྦྱར་དགོས་པ་ཡིན་ངེས་སོ།།

སྟོང་ཉིད་རྡོ་རྗེས་མཛད་པའི་ཧེ་རུ་ཀ་ཉེ་འབྱུང་གི་དཀྱིལ་ཆོག་ལས། དེ་ལ་གླང་པོ་ཆེའི་གདོང་པ་ཅན་ནི་གླང་པོ་ཆེའི་ཚོགས་ཀྱིས་བསྐོར་བའོ། །མ་ཧེའི་གདོང་པ་ཅན་ནི་མ་ཧེའི་ཚོགས་ཀྱིས་བསྐོར་བའོ། །ཆུ་སྲིན་གྱི་གདོང་པ་ཅན་ནི་ཉའི་ཚོགས་ཀྱིས་བསྐོར་བའོ། །གནོད་སྦྱིན་གྱི་གདོང་པ་ཅན་ནི་མིའི་ཚོགས་ཀྱིས་བསྐོར་བའོ། །བ་གླང་གི་གདོང་པ་ཅན་ནི་ཁྱུ་མཆོག་གི་ཚོགས་ཀྱིས་བསྐོར་བའོ། །རའི་གདོང་པ་ཅན་ནི་རའི་ཚོགས་ཀྱིས་བསྐོར་བའོ། །སྲིན་པོའི་གདོང་པ་ཅན་ནི་ཡི་དྭགས་ཀྱི་ཚོགས་ཀྱིས་བསྐོར་བའོ། །ཤ་ར་བྷའི་གདོང་པ་ཅན་ནི་ཤ་ར་བྷའི་ཚོགས་ཀྱིས་བསྐོར་བའོ། །ཤིང་དེ་དག་གི་རྩར་ནི་ཕྱོགས་སྐྱོང་བ་རྣམས་ཇི་ལྟར་གསུངས་པ་བཞིན་འཁོར་དང་བཅས་པ་རང་གི་རིག་མ་ལ་འཁྱུད་པར་བཞུགས་སོ། །ཞེས་གསུངས་སོ། །དེ་ལ་སོགས་པ་མི་འདྲ་བ་ཤིན་ཏུ་མང་ཡང་ཡི་གེས་འཇིགས་སོ།།

རྡོ་རྗེ་དཔལ་མཆོག་དང་པོའི་བརྟག་པ་ལས། སྟེང་ཕྱོགས་ཚངས་པ་ངང་པ་བཞོན། །འོག་ཕྱོགས་ས་བདག་རུས་སྦལ་བཞོན། །ཞེས་པ་ནི་ཞིང་སྐྱོང་ཆེན་པོ་བཅུའི་དབང་དུ་བྱས་པའོ།།

དཔལ་རྡོ་རྗེ་ནག་པོ་ཆེན་པོ་མགོན་པོ་གསང་བ་དངོས་གྲུབ་འབྱུང་བའི་རྒྱུད་ལས། དུར་ཁྲོད་གནས་པའི་ཞིང་སྐྱོང་དང་། །ཉི་ཤུ་རྩ་བཞིའི་ཞིང་སྐྱོང་བཅས། །ཞེས་དང་། ཡུལ་ནི་ཉི་ཤུ་རྩ་བཞི་ཡི། །དྲག་པོའི་ཞིང་སྐྱོང་ཉི་ཤུ་བཞི། །སྐུ་གསུང་ཐུགས་ཀྱི་འཁོར་ལོ་ཡི། །ས་གསུམ་རྣམ་པར་ཁྱབ་ནས་གནས། །ཞེས་དང་། མཁའ་འགྲོ་རྒྱ་མཚོ་ལས། ཞིང་སྐྱོང་མཆོག་གི་ཞལ་ཅན་ཏེ། །མེ་ཡི་གདོང་ཅན་ཞེས་གྲགས་པ། །ཞེས་པ་ནས། ཞིང་སྐྱོང་སྣ་ཚོགས་དབང་ཕྱུག་སྟེ། །ཞེས་པའི་བར་གྱིས་གནས་ཡུལ་ཆེན་པོ་ཉི་ཤུ་རྩ་བཞི་རུ་གནས་པའི་ཞིང་སྐྱོང་ཉི་ཤུ་རྩ་བཞི་གསུངས་པ་སོགས་མི་འདྲ་བའི་དབྱེ་བ་དང་། སྐུ་མདོག་ཕྱག་མཚན་དང་། མིང་གི་ཁྱད་པར་སོགས་མི་འདྲ་བ་མཐའ་ཡས་པ་ཡོད་མོད་འདིར་ཞིང་སྐྱོང་བརྒྱད་བཤད་པ་ལ་འབྲེལ་བ་ཆེན་པོ་མ་མཆིས་པས་མི་སྤྲོའོ།།

ལྔ་བ་དུར་ཁྲོད་བརྒྱད་དུ་གནས་པའི་ཕྱོགས་སྐྱོང་ཆེན་པོ་བརྒྱད་ཡོད་དེ། ཤར་དུ་དབང་པོ་བརྒྱ་བྱིན་དཀར་པོ་ཕྱག་རྡོ་རྗེ་བསྡིགས་མཛུབ་ཅན་གླང་པོ་ཆེ་ལ་བཞོན་པ་དང་། ལྷོ་རུ་གཤིན་རྗེ་ནག་པོ་བེ་ཅོན་ཐོགས་ནས་མ་ཧེ་བཞོན་པ་དང་། ནུབ་ཏུ་ཆུ་བདག་ཆུ་ལྷ་ཀླུ་དབང་དམར་པོ་ཆུ་སྲིན་བཞོན་ནས་ཞགས་པ་ཐོགས་པ་དང་། བྱང་དུ་གནོད་སྦྱིན་ལུས་ངན་སེར་པོ་དབྱུག་པ་འཛིན་ཅིང་གཏེར་ཏེ་རྟ་ལ་བཞོན་པ་དང་། ཤར་ལྷོར་མེ་ལྷ་དམར་སེར་ར་ལ་བཞོན་ནས་མེ་ཡི་ཐབ་ཀ་འཛིན་པ་དང་། ལྷོ་ནུབ་མཚམས་སུ་སྲིན་པོོ་སྨུག་ནག་རལ་གྲི་ཐོགས་ཏེ་མི་ལ་བཞོན་པ་དང་། ནུབ་བྱང་མཚམས་སུ་རླུང་ལྷ་སྔོན་པོ་རི་དྭགས་ཤ་བ་ལ་བཞོན་ནས་བ་དན་འཕྱར་བ་དང་། བྱང་ཤར་མཚམས་སུ་དབང་ལྡན་དཀར་པོ་ཁྱུ་མཆོག་བཞོན་ནས་མདུང་རྩེ་གསུམ་པ་བསྣམས་པ་རྣམས་མི་ཡི་གདོང་ཅན་ལག་པ་གཉིས་པ་རང་རང་གི་ཆུང་མ་དང་བཅས་ཏེ་གནས་པར་བཤད་པའི་ཕྱིར་ཏེ། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། ཤར་དུ་བརྒྱ་བྱིན་དཀར་པོ་ལ། །རྡོ་རྗེ་བསྡིགས་མཛུབ་གླང་པོ་བཞོན། །བྱང་དུ་ལུས་ངན་སེར་པོ་ལ། །དབྱུག་པ་འཛིན་ཅིང་གཏེར་ལ་བཞོན། །ནུབ་ཏུ་ཆུ་བདག་དམར་པོ་ནི། །ཆུ་སྲིན་བཞོན་ནས་ཞགས་པ་ཐོགས། །ལྷོ་རུ་གཤིན་རྗེ་ནག་པོ་ལ། །མ་ཧེ་བཞོན་ནས་བེ་ཅོན་ཐོགས། །ཤར་ལྷོར་མེ་ལྷ་དམར་སེར་ལ། །ར་ལ་བཞོན་ནས་མེ་ཐབ་འཛིན། །ལྷོ་ནུབ་སྲིན་པོ་སྨུག་ནག་ལ། །རལ་གྲི་ཐོགས་ནས་མི་ལ་བཞོན། །ནུབ་བྱང་རླུང་ལྷ་མདོག་སྔོན་པོ། །རི་དྭགས་བཞོན་ནས་འཕན་ནི་འཕྱར། །བྱང་ཤར་དབང་ལྡན་དཀར་པོ་ནི། །ཁྱུ་མཆོག་བཞོན་ནས་རྩེ་གསུམ་ཐོགས། །ཐམས་ཅད་རང་རང་རིག་མས་འཁྱུད། །ཅེས་གསུངས་པའི་ཕྱིར་དང་། དཔལ་དུར་ཁྲོད་རྒྱན་གྱི་རྒྱུད་ལས། ཤར་དུ་དབང་པོ་གནས་པ་སྟེ། །ལྷོ་རུ་གཤིན་རྗེ་གནས་པའོ། །ནུབ་ཏུ་ཀླུ་དབང་གནས་པ་སྟེ། །བྱང་དུ་གནོད་སྦྱིན་ཡང་དག་གནས། །ཤར་ལྷོར་མེ་ནི་གནས་པ་སྟེ། །ལྷོ་ནུབ་མཚམས་སུ་སྲིན་པོ་གནས། །ནུབ་བྱང་མཚམས་སུ་རླུང་དགོད་དེ། །བྱང་ཤར་མཚམས་སུ་དབང་ལྡན་དགོད། །ཅེས་དང་། མཁའ་འགྲོ་རྒྱ་མཚོ་ལས། དབང་པོ་ནོར་སྦྱིན་དེ་བཞིན་དུ། །ཀླུ་ཡི་དབང་དང་གཤིན་རྗེའི་བདག །དབང་ལྡན་དེ་ནས་བསྲེག་ཟ་དང་། །སྲིན་པོའི་དབང་པོ་རླུང་བདག་པོ། །ཞེས་དང་། བདེ་མཆོག་འབྱུང་བ་ལས། དབང་པོ་དེ་བཞིན་སྦྱིན་བྱེད་དང་། །ཀླུ་ཡི་དབང་དང་གཤིན་རྗེའི་བདག །དབང་ལྡན་དེ་ནས་བྱིན་ཟ་དང་། །སྲིན་པོའི་དབང་པོ་རླུང་གི་བདག །ཅེས་གསུངས་པའི་ཕྱིར་རོ།།

ཡང་དེ་དང་ཕལ་ཆེར་འདྲ་བ་ལ་ཅུང་མི་འདྲ་བའི་ཁྱད་པར་ཡོད་པ་ནི། ཤར་གྱི་ཕྱོགས་སྐྱོང་བརྒྱ་བྱིན་དཀར་པོ་གླང་ཆེན་བཞོན་ནས་ཕྱག་མཚན་གཡས་རྡོ་རྗེ་དང་གཡོན་དྲིལ་བུ་བསྣམས་པ་དང་། ལྷོ་ཡི་ཕྱོགས་སྐྱོང་གཤིན་རྗེ་སྔོ་ནག་མ་ཧེ་བཞོན་ནས་ཕྱག་ན་ཐོད་དབྱུག་ཐོགས་པ་དང་། ནུབ་ཀྱི་ཕྱོགས་སྐྱོང་ཆུ་ལྷ་དཀར་པོ་ཆུང་མ་དང་བཅས་ཆུ་སྲིན་ལ་བཞོན་པ་གཡས་སྦྲུལ་ཞགས་དང་གཡོན་པདྨ་ཐོགས་པ་དང་། བྱང་གི་ཕྱོགས་སྐྱོང་གནོད་སྦྱིན་སེར་པོ་གཡས་དཔལ་འབྲས་དང་གཡོན་ནེའུ་ལེ་ཅན་ཆུང་མ་དང་བཅས་རྟ་དམར་ལ་བཞོན་པ་དང་། ཤར་ལྷོའི་ཕྱོགས་སྐྱོང་མེ་ལྷ་ཞུགས་ཕུད་ཅན་དམར་པོ་ཆུང་མ་དང་བཅས་ར་ལ་བཞོན་པ་གཡས་སྤྱི་བླུགས་དང་། གཡོན་དབྱུ་གུ་རྩེ་གསུམ་པ་བསྣམས་པ་དང་། ལྷོ་ནུབ་ཀྱི་ཕྱོགས་སྐྱོང་སྲིན་པོ་ཁམ་ནག་ཆུང་མ་དང་བཅས་མི་ལ་བཞོན་པ་གཡས་རལ་གྲི་དང་། གཡོན་ཐོད་པ་ཐོགས་པ་དང་། ནུབ་བྱང་གི་ཕྱོགས་སྐྱོང་རླུང་ལྷ་དུད་ཁ་ཆུང་མ་དང་བཅས་པ་ཤ་བ་ལ་བཞོན་ནས་གཡས་བ་དན་དང་གཡོན་ཞགས་པ་ཐོགས་པ་དང་། བྱང་ཤར་གྱི་ཕྱོགས་སྐྱོང་དབང་ལྡན་དཀར་པོ་ཆུང་མ་དང་བཅས་ཁྱུ་མཆོག་དཀར་པོ་ལ་བཞོན་པ་གཡས་མདུང་དང་། གཡོན་པ་ཐོད་པ་འཛིན་པ་རུ་བཤད་པའི་ཕྱིར་ཏེ། སློབ་དཔོན་ཀམྤ་ལས་མཛད་པའི་དགྱེས་རྡོར་སྒྲུབ་ཐབས་དེ་ཁོ་ན་ཉིད་བཞིའི་རིམ་པ་ལས། བརྒྱ་བྱིན་དཀར་པོ་གླང་པོའི་བདག །རྡོ་རྗེ་དྲིལ་བུ་གཡས་དང་གཡོན། །གཤིན་རྗེ་མཐིང་ནག་མ་ཧེ་ཞོན། །དབྱུག་པ་ཐོད་པ་དེ་བཞིན་ནོ། །ཆུ་ལྷ་དཀར་པོ་ཆུ་སྲིན་མནན། །སྦྲུལ་ཞགས་གཡས་དང་པདྨ་གཡོན། །གནོད་སྦྱིན་སེར་པོ་རྟ་ལ་ཞོན། །དཔལ་འབྲས་ནེའུ་ལེ་གཡས་དང་གཡོན། །འབྱུང་པོའི་བདག་པོ་དཀར་པོ་ནི། །ཁྱུ་མཆོག་དཀར་པོ་མདུང་ཐོད་འཛིན། །མེ་ལྷ་དམར་པོ་ར་ལ་ཞོན། །སྤྱི་བླུགས་དབྱུ་གུ་རྩེ་གསུམ་བསྣམས། །སྲིན་པོ་ཁམ་ནག་མི་རོའི་ཁྲི། །གྲི་དང་ཐོད་པ་གཡས་དང་གཡོན། །རླུང་ལྷ་དུད་ཁ་ཤ་བ་ཞོན། །གཡས་ན་བ་དན་ཞགས་པ་གཡོན། །ཐམས་ཅད་རིན་ཆེན་རྒྱན་ལྡན་ཏེ། །སྲིན་པོ་རུས་པས་བརྒྱན་པ་པོ། །ཆུང་མ་བུ་འཁོར་ཕྱོགས་མདོག་བཅས། །མདོག་རྣམས་ཞི་བྱེད་ཆོས་ལེགས་སྐྱོང་། །ཞེས་གསུངས་པའི་ཕྱིར་རོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས་ནི་ཕལ་མོ་ཆེ་དེ་ལྟར་འདྲ་བ་ལ་བརྒྱ་བྱིན་སེར་པོ་དང་། ཆུ་ལྷ་དམར་སྐྱ་དང་། གནོན་སྦྱིན་དབྱུག་ཐོ་ཐོགས་པ་དང་། ཕྱོགས་སྐྱོང་སྲིན་པོ་སྨུག་པོ་དང་། དབང་ལྡན་ལྗང་སྐྱ་ཕྱག་མཚན་རྩེ་གསུམ་ཐོགས་ནས་ལྕེ་སྤྱང་ལ་བཞོན་པ་ཅན་དུ་བཤད་པ་ནི་མི་འདྲ་བའི་ཁྱད་པར་རོ།།

དཔལ་ལྡན་གཤིན་རྗེ་གཤེད་དམར་པོའི་རྒྱུད་ལས། དབང་པོ་སེར་པོ་སྤྱན་སྟོང་བ་ཕྱག་ན་རྡོ་རྗེ་འཛིན་པ་ས་སྲུང་དཀར་པོ་ལ་ཞོན་པའོ། །ལྷོ་རུ་གཤིན་རྗེ་ནག་པོ་ལག་ན་དབྱུག་པ་ཅན་མ་ཧེ་ལ་ཞོན་པའོ། །ནུབ་ཏུ་ཆུ་ལྷ་དཀར་པོ་ཆུ་སྲིན་མ་ཀ་ར་ལ་ཞོན་པ་ལ་ན་ཀུ་མུད་ཅན་ནོ། །བྱང་གི་འདབ་མར་གནོད་སྦྱིན་སེར་པོ་མི་ལ་ཞོན་པ་ལག་ན་དཔལ་འབྲས་ཐོགས་པའོ། །འདི་རྣམས་ཐམས་ཅད་རྒྱན་ཐམས་ཅད་ཀྱིས་བརྒྱན་པ་རིན་པོ་ཆེའི་ཅོད་པན་ཅན། །གཤིན་རྗེ་ནི་ཉི་མའི་གདན་དང་ཉི་མའི་འོད་ཅན་ནོ། །ལྷག་མ་རྣམས་ཟླ་བའི་གདན་དང་ཟླ་བའི་འོད་ཅན་ནོ། །དབང་ལྡན་གྱི་འདབ་མར་འབྱུང་པོའི་བདག་པོ་དཀར་པོ་མིག་གསུམ་པ་རལ་བའི་ཅོད་པན་ ཅན་ཁྱུ་མཆོག་ལ་ཞོན་པ་ལག་ན་མདུང་ཐོགས་པ་སྟག་གི་པགས་པའི་གོས་འཛིན་པ་ལུས་ཐལ་བས་བྱུགས་པ། རུས་པའི་རྒྱན་ཐམས་ཅད་ཀྱིས་བརྒྱན་པ། ཟླ་བའི་གདན་དང་ཟླ་བའི་འོད་དོ། །མེའི་འདབ་མ་ལ་མེ་ལྷ་སེར་པོ་བོང་ཐུང་ཞིང་གསུས་པ་འཕྱང་བ་ར་ལ་ཞོན་པ་བགྲང་ཕྲེང་དང་རིལ་བ་སྤྱི་བླུགས་འཛིན་པ། རལ་པའི་ཅོད་པན་ཅན་ཉི་མའི་གདན་དང་ཉི་མའི་འོད་དཔའ་བོའི་གོས་སོ། །བདེན་བྲལ་གྱི་འདབ་མ་ལ་སྲིན་པོ་སྐྲ་གྲོལ་བ་ཅན་ལག་ན་གྲི་གུག་དང་ཐོད་པ་འཛིན་པ། ཁྲོས་པ་སྨིན་མ་ཁྲོ་གཉེར་དང་བཅས་པ་ནག་པོ་རོའི་སྟེང་ན་ཉི་མའི་གདན་དང་ཉི་མའི་འོད་མངའ་བའོ། །རླུང་ཕྱོགས་ཀྱི་འདབ་མ་ལ་རླུང་ལྷ་ལྗང་ཞིང་དམར་པ་ལག་ན་བ་དན་ཐོགས་པ། རིན་པོ་ཆེའི་ཅོད་པན་ཅན། རི་དྭགས་ལ་ཞོན་པ་ཟླ་བའི་གདན་དང་ཟླ་བའི་འོད་ཅན། རྒྱན་ཐམས་ཅད་འཛིན་པའོ། །ཟེ་འབྲུ་ལ་སའི་ལྷ་མོ་སེར་མོ་ལྷའི་གོས་དང་རྒྱན་ཐམས་ཅད་ཀྱིས་བརྒྱན་པ། ཟླ་བའི་ གདན་དང་ཟླ་བའི་འོད་དང་ཡི་དྭགས་དང་སའི་ལྷས་ཀུན་ནས་བསྐོར་ཏེ་གནས་པའོ། །དབང་པོ་ལ་སོགས་པ་རྣམས་གཡོན་ན་ཀླུའི་ཞགས་པ་འཆང་བ་ཐམས་ཅད་ཀྱང་གཡོན་བརྐྱང་བའི་ཞབས་ཀྱིས་གནས་པའོ། །ཞེས་དེ་དག་དང་ཅུང་མི་འདྲ་བའི་ཁྱད་པར་ཡོད་པ་ཅན་དུ་གསུངས་སོ།།

གཞན་ཡང་སློབ་དཔོན་རྣལ་འབྱོར་བའི་དུར་ཁྲོད་ཀྱི་བཤད་པ་ལས། ཤར་གྱི་དབང་པོ་བརྒྱ་བྱིན་དེ་སེར་པོ་དང་། ལྷོའི་དེ་ནག་པོ་དབྱུག་པ་དང་ཞགས་པ་གཉིས་ཀ་ཐོགས་པ་ཅན་དང་། ནུབ་ཀྱི་ཕྱོགས་སྐྱོང་ཀླུ་དབང་ནི་ཀླུའི་རྒྱལ་པོ་བ་རུ་ན་ཡིན་ཞིང་། དེའི་མདོག་དཀར་པོ་དང་སྡིགས་མཛུབ་དང་ཞགས་པ་ཐོགས་པ་ཅན་དུ་བཤད་པ་དང་། བྱང་གི་ལུས་ངན་པོའི་ཕྱག་ན་གྷ་ཧ་ཐོགས་པ་འཐུང་ཞིང་ཞེས་ཡོད་ལ། དེ་ནི་ཁྲག་གི་རྐྱལ་བ་འཛིན་པ་ལ་གོའམ་སྙམ། དེ་བཞིན་ཤར་ལྷོའི་མེ་ལྷ་ནི་དམར་པོ་རིལ་བ་སྤྱིལ་བླུག་དང་བགྲང་ཕྲེང་འཛིན་པ་དང་། ལྷོ་ནུབ་ཀྱི་སྲིན་པོ་ནི་ནག་པོ་སྡིགས་མཛུབ་དང་མི་མགོ་ཐོགས་པ་དང་རོ་ལ་བཞོན་པ་ཅན་དང་། ནུབ་བྱང་གི་རླུང་ལྷ་ནི་དཀར་པོ་རླུང་གི་སྣམ་བུ་འཛིན་པ་ཅན་དང་། བྱང་ཤར་གྱི་དབང་ལྡན་ནི་སྔོ་སྐྱ་རྩེ་གསུམ་དང་ཐོད་པ་ཐོགས་པ་ཅན་དུ་བཤད་པས་དེ་དག་དཀྱུས་སུ་བཤད་པ་རྣམས་དང་མི་མཐུན་ནོ།།

དེ་བཞིན་དུ་བིར་ཝ་པས། ཕྱོགས་སྐྱོང་བརྒྱ་བྱིན་གླང་ཆེན་གདན་རིགས་བཅས། །ཞེས་སོགས་ཕལ་ཆེར་འདིར་བཀོད་པའི་རྒྱུད་གཞུང་དང་འདྲ་བ་ལ། མི་འདྲ་བའི་ཁྱད་པར་ནི། ཕྱོགས་སྐྱོང་གནོད་སྦྱིན་ཁྱུ་མཆོག་གདན་རིགས་བཅས། །ཞེས་ལུས་ངན་པོ་ཁྱུ་མཆོག་བཞོན་པ་ཅན་དང་། ཕྱོགས་སྐྱོང་སྲིན་པོ་ཡི་དྭགས་གདན་རིགས་བཅས། །ཞེས་སྲིན་པོ་ཡི་དྭགས་ལ་བཞོན་པ་དང་། ཕྱོགས་སྐྱོང་འབྱུང་པོ་རྟ་ཡི་གདན་རིགས་བཅས། །ཞེས་དབང་ལྡན་རྟ་ལ་བཞོན་པ་ཅན་དུ་བཤད་ལ་སྐུ་མདོག་དང་ཕྱག་མཚན་གསལ་བར་མ་བཤད་དོ།།

སྒྲ་གཅན་གསང་བས། ཤར་དུ་ཕྱོགས་སྐྱོང་བརྒྱ་བྱིན་དཀར་པོ་དང་། ལྷོ་རུ་ཕྱོགས་སྐྱོང་གཤིན་རྗེ་ནག་པོ་དང་། ནུབ་ཏུ་ཕྱོགས་སྐྱོང་ཆུ་ལྷ་དཀར་པོ་དང་། བྱང་དུ་ཕྱོགས་སྐྱོང་ལུས་ངན་སེར་པོ་དང་། བྱང་ཤར་དབང་ལྡན་དུ་ཕྱོགས་སྐྱོང་དབང་ཕྱུག་ཆེན་པོ་དཀར་པོ་དང་། མེ་སྟེ་ཤར་ལྷོར་ཕྱོགས་སྐྱོང་མེ་ལྷ་དམར་པོ་དང་། ལྷོ་ནུབ་ཏུ་ཕྱོགས་སྐྱོང་སྲིན་པོ་ནག་པོ་དང་། ནུབ་བྱང་དུ་ཕྱོགས་སྐྱོང་རླུང་ལྷ་སྔོ་བསངས་རྣམས་གནས་པར་བཤད་དེ། ཀྱེ་རྡོར་སྒྲུབ་ཐབས་རབ་གསལ་ལས། ཕྱོགས་སྐྱོང་བརྒྱ་བྱིན་དཀར་པོ་དང་། ཞེས་དང་། ཕྱོགས་སྐྱོང་གཤིན་རྗེ་ནག་པོ་དང་། ཞེས་དང་། ཕྱོགས་སྐྱོང་ཆུ་ལྷ་དཀར་པོ་དང་། ཞེས་དང་། ཕྱོགས་སྐྱོང་ལུས་ངན་སེར་པོ་དང་། ཞེས་སོགས་གསུངས་པའི་ཕྱིར་རོ། །དེ་ལ་སོགས་པ་རྒྱུད་དང་སྒྲུབ་ཐབས་རྣམས་སུ་མི་འདྲ་བའི་ཁྱད་པར་ཡང་ཤིན་ཏུ་མང་ཡང་མི་སྤྲོ་ལ་གཞན་ནས་ཤེས་པར་བྱའོ།།

སྟོང་ཉིད་རྡོ་རྗེའི་ཧེ་རུ་ཀ་ཉེ་འབྱུང་གི་དཀྱིལ་ཆོག་ལས། དེ་ལ་དབང་པོ་ནི་སྐུ་མདོག་སེར་པོ་རིན་པོ་ཆེའི་དབུ་རྒྱན་ཅན་སྣ་ཚོགས་པའི་རྒྱན་གྱིས་བརྒྱན་པ། ཕྱག་ན་རྡོ་རྗེ་འཛིན་ཞིང་གླང་པོ་དཀར་པོ་ལ་འགྱིང་བག་གི་ཚུལ་གྱིས་བཞུགས་པ་བྲིའོ། །གཤིན་རྗེ་ནི་སྐུ་མདོག་ནག་པོ་སྤྱན་མེ་མདག་གི་ཕུང་པོ་འདྲ་བ། སྨིན་མ་དང་དཔྲལ་བར་ཁྲོ་གཉེར་བསྡུས་པ་སྐྲ་སེར་པོ་གྱེན་དུ་འབར་བ། ཕྱག་ན་དབྱུག་པ་དང་རྩེ་གསུམ་ འཛིན་ཅིང་མ་ཧེ་ལ་ཁྲོས་པའི་ཚུལ་གྱིས་བཞུགས་པ་བྲིའོ། །ཆུ་བ་དག་ནི་སྐུ་མདོག་དཀར་པོ་གདེངས་ཀ་བདུན་དང་ལྡན་པ། སྦྲུལ་གྱི་ཞགས་པ་དང་དུང་འཛིན་པ་ཆུ་སྲིན་ལ་བཞུགས་པའོ། །ནོར་བདག་ནི་སྐུ་མདོག་སེར་པོ་གསེར་གྱི་མདོག་ཅན་རིན་པོ་ཆེའི་དབུ་རྒྱན་ཅན་ལྕགས་ཀྱུ་དང་དབྱུག་པ་འཛིན་པ་གནོད་སྦྱིན་ལ་བཞུགས་པའོ། །དབང་ལྡན་ནི་སྐུ་མདོག་དཀར་པོ་རལ་པའི་ཐོར་ཚུགས་ཅན་ཟླ་བའི་དབུ་རྒྱན། སྤྱན་གསུམ་པ་ཐོད་པའི་ཕྲེང་བ་ཅན། ཕྱག་བཞི་པ། ཅང་ཏེའུ་དང་། ཐོད་པ་དང་། ཏྲི་ཤུ་ལ། ཁ་ཊྭཱཾ་ག་འཛིན་པ་ཁྱུ་མཆོག་གི་སྟེང་དུ་བཞུགས་པའོ། །མེ་ལྷ་ནི་སྐུ་མདོག་དམར་པོ་རལ་པ་ཐོར་ཚུགས་སུ་བྱས་པ། ཚངས་པའི་ཐོ་གུ་ཅན། ཕྱག་བཞི་པ། བགྲང་ཕྲེང་དང་སྐྱབས་སྦྱིན་དང་གུནྡྷེ་དང་། དབྱུག་པ་འཛིན་པ་རའི་སྟེང་ན་བཞུགས་པའོ། །བདེན་བྲལ་ནི་སྐུ་མདོག་སྔོན་པོ་དབུ་སྐྲ་དམར་པོ་གྱེན་དུ་འབར་བ། ཐོད་པའི་ཕྲེང་བ་ཅན་གྲི་གུག་དང་ཐོད་པ་འཛིན་པ་རོའི་སྟེང་ན་བཞུགས་པའོ། །རླུང་ནི་དུ་བའི་མདོག་ཅན་རླུང་གི་རས་འཛིན་པ། རིན་པོ་ཆེའི་དབུ་རྒྱན་ཅན་ཤ་བའི་སྟེང་ན་བཞུགས་པ་བྲིའོ། །དེ་དག་གི་གནས་སུ་ཡང་ལྷ་དང་ཡི་དགས་དང་ཀླུ་དང་གནོད་སྦྱིན་དང་འབྱུང་པོ་དང་ཐུབ་པ་དང་། སྲིན་པོ་དང་རླུང་བདག་དང་དེ་དག་གི་ཚོགས་ཀྱིས་བསྐོར་བ་བྲིའོ། །ཞེས་གསུངས་སོ།།

དེ་བཞིན་དུ་སློབ་དཔོན་རིན་ཆེན་འབྱུང་གནས་ཞི་བས་མཛད་པའི་མདོར་བསྡུས་པའི་སྒྲུབ་ཐབས་ཀྱི་འགྲེལ་པ་རིན་ཆེན་ཕྲེང་བ་ལས། དེ་ལ་ཤར་ཕྱོགས་སུ་བརྒྱ་བྱིན་དཀར་པོ་གདོང་གཅིག་པ། ལག་པ་གཉིས་པ། རྡོ་རྗེ་དང་ཨུཏྤལ་འཛིན་པ། གླང་པོ་ཆེ་ལ་གནས་པ། བདེ་སོགས་མ་དང་བཅས་པ། ཞེས་སོགས་སྐུ་མདོག་ཆ་ལུགས་འདི་དག་དང་མི་འདྲ་བ་གསུངས་མོད་དེ་ནི་ཕྱོགས་སྐྱོང་བཅུ་བཤད་པའི་སྐབས་སུ་ཡིན་གྱི་དུར་ཁྲོད་ཀྱི་བཀོད་པའི་ཕྱོགས་སྐྱོང་བཤད་པའི་སྐབས་མ་ཡིན་པས་འདིར་བསྡུར་དགོས་དོན་མེད་དོ། །དེ་ལ་སོགས་པ་མི་འདྲ་བ་མཐའ་ཡས་སོ།།

དྲུག་པ་དུར་ཁྲོད་བརྒྱད་དུ་གནས་པའི་ཀླུ་ཆེན་པོ་བརྒྱད་ཡོད་དེ། ཤར་དུ་ཀླུ་ཡི་རྒྱལ་པོ་ནོར་རྒྱས་སེར་པོ་དང་། ལྷོ་རུ་ཀླུ་རྒྱལ་འཇོག་པོ་དམར་པོ་དང་། ནུབ་ཏུ་ཀླུ་རྒྱལ་སྟོབས་རྒྱུ་ནག་པོ་དང་། བྱང་དུ་ཀླུ་རྒྱལ་པདྨ་དཀར་པོ་དང་། ཤར་ལྷོར་ཀླུ་རྒྱལ་པདྨ་ཆེན་པོ་སེར་ཆེན་དང་། ལྷོ་ནུབ་ཏུ་ཀླུ་རྒྱལ་ཧུ་ལུ་ཧུ་ལུ་སྔོན་པོ་དང་། ནུབ་བྱང་དུ་ཀླུ་རྒྱལ་རིགས་ལྡན་དཱུར་བའི་མདོག་ལྗང་གུ་དང་། བྱང་ཤར་དུ་ཀླུ་རྒྱལ་དུང་སྐྱོང་དམར་སྐྱ་དང་བརྒྱད་པོ་གནས་པ་ཡང་སྦྲུལ་གྱི་གདེངས་ཀ་བདུན་པ་དང་མཇུག་མ་སྦྲུལ་དུ་འཁྱིལ་བ་ཅན་ཕྱོགས་སོ་སོར་གནས་པར་གསུངས་ཏེ། དཔལ་དུར་ཁྲོད་རྒྱན་གྱི་རྒྱུད་ལས། ཤར་དུ་ནོར་རྒྱས་གནས་པ་སྟེ། །འཇོག་པོ་ལྷོ་སྟེ་སྟོབས་རྒྱུ་ནུབ། །པདྨ་བྱང་ལ་པད་ཆེན་མེ། །ཧུ་ལུ་ཧུ་ལུ་སྲིན་པོར་དགོད། །རིགས་ལྡན་རླུང་མཚམས་དགོད་པ་སྟེ། །དུང་སྐྱོང་དབང་ལྡན་མཚམས་སུ་དགོད། །ཅེས་དང་། མཁའ་འགྲོ་རྒྱ་མཚོ་ལས། ནོར་རྒྱས་འཇོག་པོ་དེ་བཞིན་དུ། །སྟོབས་ཀྱིས་རྒྱུ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང་། །རིགས་ལྡན་དང་ནི་དུང་སྐྱོང་ངོ་། །ཞེས་དང་། བདེ་མཆོག་འབྱུང་བ་ལས། བཱ་སུ་ཀི་དང་འཇོག་པོ་ཉིད། །ཀར་ཀོ་ཊ་དང་པདྨ་ཉིད། །པད་ཆེན་ཧུ་ལུ་ཧུ་ལུ་དང་། །རིགས་ལྡན་དང་ནི་དུང་སྐྱོང་ངོ་། །ཞེས་དང་གསུངས་པའི་ཕྱིར་རོ།།

འདི་དག་གི་གོ་རིམ་ཕྱོགས་མཚམས་བརྒྱད་དུ་འགོད་ཚུལ་ནི་དཔལ་དུར་ཁྲོད་རྒྱན་གྱི་རྒྱུད་ལྟར་བྱས་པ་ཡིན་ལ། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལྟར་ནི། ནོར་རྒྱས་དང་ནི་འཇོག་པོ་དང་། །སྟོབས་ཀྱིས་རྒྱུ་དང་པདྨ་དག །ཤར་ནས་བརྩམས་ཏེ་གཡོན་དུ་དགོད། །པདྨ་ཆེ་དང་མཐའ་ཡས་དང་། །རིགས་ལྡན་དང་ནི་དུང་སྐྱོང་ནི། །གཡས་ཀྱི་ཕྱོགས་ནས་དགོད་པའོ། །ཞེས་གསུངས་པ་ནི་མ་རྒྱུད་ལྟར་གཡོན་བསྐོར་གྱིས་ཤར་ནས་བྱང་སོགས་སུ་འགོད་ནས་གོ་རིམ་དཀྱུས་དང་མི་མཐུན་པར་དགོས་པ་ཡིན་ནམ་སྙམ་མོད་དཔྱད་དོ།།

ཀླུ་བརྒྱད་པོའི་ཁ་དོག་དེ་ལྟར་ཡིན་པའི་ཁུངས་ནི་ཡོད་དེ། ཕྱག་ན་རྡོ་རྗེ་གསང་བ་མངོན་བསྟན་གྱི་རྒྱུད་ལས། ཤར་ཕྱོགས་མཐའ་ཡས་སྔོན་པོ་སྟེ། །ལྷོ་ཕྱོགས་ནོར་རྒྱས་སེར་པོ་ཆེ། །ནུབ་ཕྱོགས་འཇོག་པོ་ཁ་དོག་དམར། །བྱང་ཕྱོགས་སྟོབས་རྒྱུ་ནག་པོ་སྟེ། །ཤར་ལྷོར་པདྨ་དུང་དང་འདྲ། །ལྷོ་ནུབ་པད་ཆེན་སེར་བ་སྟེ། །ནུབ་བྱང་དུང་སྐྱོང་བཙོད་དང་འདྲ། །བྱང་ཤར་རིགས་ལྡན་དཱུར་བའི་མདོག །མཇུག་མ་འཁྱིལ་བས་གཙོ་ལ་འདུད། །སྣ་ཚོགས་གཟུགས་ནི་རིགས་བཞི་དང་། །ས་བདག་སྣ་ཚོགས་གཟུགས་ཀྱིས་བསྐོར། །ཞེས་གསུངས་པའི་ཕྱིར་རོ།།

མདོག་ནི་རྒྱུད་གོང་མ་དྲངས་ཟིན་དག་ཏུ་མི་གསལ་བས་འདི་ལྟར་བགྱིས་ན་འགལ་བ་མེད་སྙམ་ལ། འདི་བསྟན་གྱི་ཕྱོགས་ནི་གོང་དང་མི་མཐུན་ནོ།།

ཡང་སྐུ་མདོག་ཕྱོགས་སྐྱོང་དག་གི་མདོག་དང་འདྲ་ཞིང་ཐམས་ཅད་སྦྲུལ་གྱི་གདེང་ཀ་ཅན་དང་། ཕྱག་མཚན་ནི་ཐམས་ཅད་ཀྱི་གཡས་སྦྲུལ་ཞགས་དང་། གཡོན་པདྨ་འཛིན་པ་ཅན་ཡིན་པར་བཤད་དེ། སློབ་དཔོན་ཀམྤ་ལས་མཛད་པའི་དགྱེས་རྡོར་སྒྲུབ་ཐབས་དེ་ཁོ་ན་ཉིད་བཞིའི་རིམ་པ་ལས། འོག་ནས་ཀླུ་བརྒྱད་ཕྱོགས་དང་མཚམས། །འཇོག་པོ་དུང་སྐྱོང་རིགས་ལྡན་དང་། །མཐའ་ཡས་པད་ཆེན་དགའ་བོ་དང་། །ནོར་རྒྱས་བུ་དང་པདྨ་རྣམས། །ཕྱོགས་སྐྱོང་མདོག་དང་སྦྲུལ་ཞགས་གཡས། །གདེངས་ཀ་དང་ལྡན་པདྨ་གཡོན། །ཞེས་གསུངས་པའི་ཕྱིར་རོ།།

དེ་དང་མི་འདྲ་བ་ཀླུ་བརྒྱད་རྡོ་རྗེ་དྲིལ་བུ་འཛིན་པ་ཅན་ཡིན་པར་ཡང་བཤད་པ་ཡོད་དེ། སློབ་དཔོན་མི་ཐུབ་ཟླ་བས། སྟོབས་ཀྱི་རྒྱུ་དང་དུང་སྐྱོང་དང་། །མཐའ་ཡས་ནོར་རྒྱས་དེ་བཞིན་ཏེ། །འཇོག་པོ་དང་ནི་རིགས་ལྡན་དང་། །པད་ཆེན་ཤིན་ཏུ་པདྨའོ། །ཀུན་ཀྱང་ཞལ་གཅིག་ཕྱག་གཉིས་ཏེ། །རྡོ་རྗེ་དྲིལ་བུ་ཕྱག་ན་བཅས། །རང་མདོག་རིག་མས་ཡན་ལག་ཁྱུད། །གདན་ལ་གཡས་བརྐྱང་བ་ཡིས་བཞུགས། །ཞེས་གསུངས་པའི་ཕྱིར། དེ་ལ་དཔྱད་ན་རང་མདོག་གི་ཡུམ་རྣམས་རྐང་ལག་ཏུ་འཁྱུད་པ་དང་། ཐམས་ཅད་ཞབས་གཡས་བརྐྱངས་ཤིང་གཡོན་བསྐུམས་ཏེ་བཞུགས་པ་ཅན་ཡིན་པ་ཡང་གསལ་ལོ།།

རྡོ་རྗེ་མཁའ་འགྲོའི་རྒྱུད་ལས། ཤར་དུ་ཀླུ་རྒྱལ་མཐའ་ཡས་ནི། །འདམ་སྐྱེས་སྔོན་པོ་ལྟ་བུའི་མདོག །གདེངས་ཀ་བདུན་ནི་བསྒྱིངས་པ་ལ། །ཀླུ་མོ་དང་ནི་བཅས་པར་དགོད། །ཕྱག་ན་པད་མ་བསྣམས་པའོ། །བྱང་ན་ནོར་རྒྱས་སེར་པོ་སྟེ། །ནུབ་དུ་འཇོག་པོ་དམར་པོ་ཡིན། །ལྷོ་རུ་སྟོབས་རྒྱུ་ལྗང་སྐྱ་སྟེ། །དབང་ལྡན་དུ་ནི་དུང་སྐྱོང་ཡིན། །རླུང་མཚམས་པད་མ་བདེན་བྲལ་དུ། །པད་མ་ཆེན་པོ་དགོད་པར་བྱ། །མེ་མཚམས་སུ་ནི་རིགས་ལྡན་ཏེ། །ཆོ་ག་སྔ་མས་བྲི་བར་བྱ། །ཀླུ་ནི་བརྒྱད་པོ་ཐམས་ཅད་ཀྱང་། །རིན་ཆེན་ཅོད་པན་དག་དང་ལྡན། །རྒྱན་ཀུན་གྱིས་ནི་རྣམ་པར་གླུབས། །གདེངས་ཀའི་ནོར་བུའི་འོད་ཀྱིས་ནི། །མུན་པ་ཐམས་ཅད་སེལ་བྱེད་པ། །ཞེས་ཕྱོགས་མཚམས་བརྒྱད་དུ་འགོད་ཚུལ་ལམ་གནས་པའི་ཚུལ་མི་འདྲ་བར་གསུངས་སོ།།

དེ་བཞིན་དུ་སྒྲ་གཅན་གསང་བས། ཀླུ་ནོར་རྒྱས་སེར་པོ་དང་། ཞེས་ཤར་དུ་ཀླུ་ནོར་རྒྱས་སེར་པོ་དང་། ཀླུ་པདྨ་དཀར་པོ་དང་། ཞེས་ལྷོ་རུ་ཀླུ་པདྨ་དཀར་པོ་དང་། ཀླུ་ཀརྐོ་ཊ་དམར་པོ་དང་། ཞེས་ནུབ་ཏུ་ཀླུ་ཀརྐོ་ཊ་དམར་པོ་དང་། ཀླུ་འཇོག་པོ་ནག་པོ་དང་། ཞེས་བྱང་དུ་ཀླུ་འཇོག་པོ་ནག་པོ་དང་། ཀླུ་དུང་སྐྱོང་ཞེས་པ་སེར་པོ་དང་། ཞེས་བྱང་ཤར་དབང་ལྡན་དུ་ཀླུ་དུང་སྐྱོང་སེར་པོ་དང་། ཀླུ་པདྨ་ཆེན་པོ་སྔོ་བསངས་དང་། ཞེས་ཤར་ལྷོར་ཀླུ་པདྨ་ཆེན་པོ་སྔོ་བསངས་དང་། ཀླུ་མཐའ་ཡས་ཞེས་བྱ་བ་དཀར་པོ་དང་། ཞེས་ལྷོ་ནུབ་ཏུ་ཀླུ་མཐའ་ཡས་དཀར་པོ་དང་། ཀླུ་རིགས་ལྡན་ཁྲ་བོ་དང་། ཞེས་ནུབ་བྱང་དུ་ཀླུ་རིགས་ལྡན་ཁྲ་བོ་རྣམས་གནས་པར་བཤད་དོ།།

སྟོང་ཉིད་རྡོ་རྗེའི་ཧེ་རུ་ཀ་ཉེ་འབྱུང་གི་དཀྱིལ་ཆོ་ག་ལས། དེའི་གཡོན་དུ་ཀླུ་ཆེན་པོ་བརྒྱད་གདེངས་ཀ་དང་བཅས་པར་བྲིའོ། །ནོར་རྒྱས་ནི་ཟླ་བའི་མདོག་ཅན་སྤྱི་བོར་ཨུཏྤལ་སྔོན་པོས་མཚན་པ་གདེངས་ཀ་དང་བཅས་པ། པདྨ་ནི་དུང་གི་མདོག་ཅན་དཔལ་བེའུས་མཚན་པའི་གདེངས་ཀ་ཅན། སྟོབས་ཀྱི་རྒྱུ་ནི་དཱུར་བ་ལྟ་བུར་མདོག་སྔོ་བ་རིན་པོ་ཆེ་གསུམ་གྱིས་མགྲིན་པར་མཚན་པའོ། །འཇོག་པོ་ནི་ཉེར་ལྡན་གྱི་མེ་ཏོག་ལྟ་བུའི་མདོག་ཅན་ནོར་བུ་འབར་བས་མཚན་པ། པདྨ་ཆེན་པོའི་མདོག་ཀུནྡ་ལྟ་བུར་མཚུངས་པ་རྩེ་གསུམ་གྱིས་མཚན་པ། ཧུ་ལུ་ཧུ་ལུ་ནི་ཤིན་ཏུ་གནག་པ་སྤྱི་བོ་མཚན་མས་མཚན་པ། རིགས་ལྡན་ནི་དུ་བའི་མདོག་ཅན་ཟླ་བའི་ནོར་བུས་མགྲིན་པ་མཚན་པ། དུང་སྐྱོང་ནི་གསེར་གྱི་མདོག་ཅན་མགྲིན་པ་ཟླ་བའི་དཀྱིལ་འཁོར་གྱིས་མཚན་པ་བྲིའོ། །ཞེས་ནོར་རྒྱས་དཀར་པོ་ཟླ་མདོག་དང་། པདྨ་དུང་མདོག་དང་། སྟོབས་རྒྱུ་སྔོན་པོ་དང་། འཇོག་པོ་ཉེར་ལྡན་མེ་ཏོག་མདོག་དང་། པདྨ་ཆེན་པོ་ཀུནྡའི་མདོག་དང་། ཧུ་ལུ་ནག་པོ་དང་། རིགས་ལྡན་དུད་མདོག་དང་། དུང་སྐྱོང་གསེར་མདོག་ཏུ་བཤད་དོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས། ཤར་དུ་མཐའ་ཡས་དཀར་པོ་དང་། ལྷོར་འཇོག་པོ་སེར་པོ་དང་། ནུབ་ཏུ་དུང་སྐྱོང་དམར་སྐྱ་དང་། བྱང་དུ་སྟོབས་རྒྱུ་ལྗང་གུ་དང་། ཤར་ལྷོར་པདྨ་སྔོན་པོ་དང་། ལྷོ་ནུབ་ཏུ་ཧུ་ལུ་སྨུག་པོ་དང་། ནུབ་བྱང་དུ་རིགས་ལྡན་ལྗང་གུ་དང་། བྱང་ཤར་དུ་བ་སུ་དཀར་པོ་རྣམས་གནས་པར་བཤད་པ་དང་། ཧེ་རུ་ཀ་གལ་པོ་ལས་ནི། མཐའ་ཡས་སེར་པོ་རིན་ཆེན་འཛིན་པ་དང་། འཇོག་པོ་དམར་པོ་ཨུཏྤལ་འཛིན་པ་དང་། སྟོབས་ཀྱི་རྒྱུ་སྔོན་པོ་སྤྲིན་འཛིན་པ་དང་། རིགས་ལྡན་དཀར་པོ་རིན་ཆེན་སྡོང་པོ་འཛིན་པ་དང་། ནོར་བུ་རྒྱས་སེར་པོ་རིན་པོ་ཆེའི་ཕྲེང་བ་འཛིན་པ་དང་། དུང་སྐྱོང་ལྗང་གུ་དུང་འཛིན་པ་དང་། པདྨ་དཀར་པོ་པདྨ་བསྣམས་པ་དང་། ཆུ་ལྷ་དཀར་སེར་ཞགས་པ་བསྣམས་པ་ཅན་དུ་བཤད་པ་དང་། སློབ་དཔོན་རྣལ་འབྱོར་བའི་དུར་ཁྲོད་བརྒྱད་ཀྱི་བཤད་པ་ལས་ཁ་དོག་སོགས་དེ་དག་དང་ཅུང་མི་མཐུན་པ་གསུངས་པ་སོགས་མི་འདྲ་བ་མང་དུ་ཡོད་མོད་སྤྲོ་བར་མི་བྱའོ།།

བདུན་པ་དུར་ཁྲོད་བརྒྱད་དུ་འཁྲིགས་པའི་སྤྲིན་ཆེན་པོ་བརྒྱད་ཡོད་དེ། ཤར་དུ་སྤྲིན་ཆེན་ཆར་སྤྲིན་དཀར་པོ་དང་། ལྷོ་རུ་སྤྲིན་ཆེན་པུ་མི་ཏི་དང་། ནུབ་ཏུ་སྤྲིན་ཆེན་འཇིགས་པ་དང་། བྱང་དུ་སྤྲིན་ཆེན་ཨ་བ་དང་། ཤར་ལྷོོར་སྤྲིན་ཆེན་སྔོ་ཉ་དང་། ལྷོ་ནུབ་ཏུ་སྤྲིན་ཆེན་གྷཱ་ཉ་དང་། ནུབ་བྱང་དུ་སྤྲིན་ཆེན་པར་ཤ་ན་དང་། བྱང་ཤར་དུ་སྤྲིན་ཆེན་གཏུམ་པོ་དང་བརྒྱད་པོ་ཡོད་པ་ཡིན་པའི་ཕྱིར་ཏེ། དཔལ་དུར་ཁྲོད་རྒྱན་གྱི་རྒྱུད་ལས། ཤར་དུ་ཆར་སྤྲིན་དཀར་པོར་དགོད། །ལྷོ་རུ་པུ་མི་ཏི་དགོད་དོ། །ནུབ་ཏུ་འཇིགས་པ་རྣམ་པར་གནས། །བྱང་དུ་ཨ་བ་ཡང་དག་གནས། །སྔོ་ཉ་མེར་ནི་ཡང་དག་གནས། །གྷཱ་ཉ་སྲིན་པོའི་མཚམས་སུ་དགོད། །རླུང་གི་མཚམས་སུ་པར་ཤ་ན། །གཏུམ་པོ་འདི་བརྒྱད་ཆར་སྤྲིན་བརྒྱད། །བཙོད་ཀྱི་མདོག་འདྲ་གུར་ཀུམ་མདོག །ནམ་མཁའི་མདོག་འདྲ་དུ་བའི་མདོག །སྤྲིན་གྱི་མདོག་འདྲ་སྤྲིན་གྱི་གཟུགས། །ཤར་ལ་སོགས་པ་བཞི་བཞི་སྟེ། །ཞེས་དང་། བདེ་མཆོག་འབྱུང་བ་ལས། སྒྲོག་པ་དང་ནི་ཆེར་སྒྲོག་དང་། །དྲག་དང་གཡོ་དང་བརྟན་དེ་བཞིན། །གང་བ་དང་ནི་དེ་བཞིན་འབེབས། །གཏུམ་པ་འདི་དག་སྤྲིན་དབང་ཕྱུག །ཅེས་དང་། མཁའ་འགྲོ་རྒྱ་མཚོ་ལས། སྒྲོག་པ་དང་ནི་འུར་སྒྲོག་དང་། །དྲག་པོ་འཁྱིལ་བ་མཐུག་དེ་བཞིན། །གང་བ་ཆར་འབེབས་གཏུམ་པོ་སྟེ། །འདི་རྣམས་སྤྲིན་གྱི་བདག་པོའོ། །ཞེས་གསུངས་པའི་ཕྱིར་རོ།།

ཆར་སྤྲིན་བརྒྱད་ཀྱི་གོ་རིམ་འདི་ཡང་དཔལ་དུར་ཁྲོད་རྒྱན་གྱི་རྒྱུད་ལྟར་བགྱིས་པ་ལགས་ཀྱི་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལྟར་ན། སྒྲ་སྒྲོག་པ་དང་རྨུགས་པ་དང་། །མུན་པ་ཅན་དང་ཀུན་ཏུ་འཁྱིལ། །ཤར་ནས་བྱང་གི་ཕྱོགས་སུ་དགོད། །འཁྲིགས་པ་གང་བ་འབབས་པ་དང་། །དྲག་པོ་སྤྲིན་ཚོགས་མཚམས་ལ་དགོད། །ཅེས་དཀྱུས་དང་མི་མཐུན་པར་གཡོན་ནས་བརྩམས་ཏེ་འགོད་པར་གསུངས་པ་ཡང་མ་རྒྱུད་ཀྱི་དགོངས་པ་ཡིན་ངེས་སོ།།

སྤྲིན་ཆེན་དག་གི་ཁ་དོག་ནི་གོང་གི་བཙོད་ཀྱི་མདོག་སོགས་ཤར་ཕྱོགས་ནས་རིམ་པར་འགོད་དགོས་པ་ཡིན་ནམ་ཤར་ལ་ཚིག་ཟིན་དུ་དཀར་པོ་དངོས་སུ་ཐོན་པ་ལྟར་དེའི་འཕྲོ་ནས་བགྲང་དགོས་པ་ཡིན་ཆ་མི་འཚལ། སློབ་དཔོན་རྣལ་འབྱོར་བའི་དུར་ཁྲོད་བརྒྱད་ཀྱི་བཤད་པ་ལས་ནི་ཤར་གྱི་སྤྲིན་ཆེན་སྒྲ་སྒྲོག་སྔོན་པོ་དང་། ལྷོ་ཡི་སྤྲིན་ཆེན་འཁྲིགས་པ་སེར་པོ་དང་། ནུབ་ཀྱི་སྤྲིན་ཆེན་དྲག་པོ་དཀར་པོ་དང་། བྱང་གི་སྤྲིན་ཆེན་རྨུགས་པ་དཀར་པོ་དང་། ཤར་ལྷོའི་སྤྲིན་ཆེན་འཁྱིལ་བ་དམར་པོ་དང་། ལྷོ་ནུབ་ཀྱི་སྤྲིན་ཆེན་སྒྲ་སྒྲོག་སེར་པོ་དང་། ནུབ་བྱང་གི་སྤྲིན་ཆེན་འབེབས་པ་ལྗང་གུ་དང་། བྱང་ཤར་གྱི་སྤྲིན་ཆེན་གཏུམ་པོ་སྣ་ཚོགས་མདོག་ཏུ་གསུངས་སོ།།

མཁན་པོ་རཏྣ་ཤྲཱི་མི་ཏྲའི་འགྱུར་དུར་ཁྲོད་བརྒྱད་ཀྱི་བཤད་པ་ལས། ཆར་སྤྲིན་གྷོ་ར་ཞེས་བྱ་བ་གུར་གུམ་གྱི་མདོག་ལྟ་བུའོ། །ཞེས་ཤར་གྱི་ཆར་སྤྲིན་སེར་པོ་གུར་གུམ་གྱི་མདོག་དང་། ཆར་སྤྲིན་ཙཎྜ་ཞེས་བྱ་བ་སྔོན་པོའོ། །ཞེས་ལྷོའི་དེ་སྔོན་པོ་དང་། ཆར་སྤྲིན་གྷ་ན་ཞེས་བྱ་བ་མདོག་དཀར་པོའོ། །ཞེས་ནུབ་ཀྱི་སྤྲིན་ཆེན་སྔ་མ་དང་འདྲ་བར་དཀར་པོ་དང་། ཆར་སྤྲིན་ཨ་པ་རྟོ་ཞེས་བྱ་བ་ཁ་དོག་སེར་པོའོ། །ཞེས་བྱང་སེར་པོ་དང་། ཆར་སྤྲིན་གྷརྨི་ཏ་ཞེས་བྱ་བ་ཁ་དོག་སྣ་ཚོགས་སོ། །ཞེས་ཤར་ལྷོ་ཁྲ་བོ་དང་། ཆར་སྤྲིན་འབབ་པ་ཞེས་བྱ་བ་ནག་པོའོ། །ཞེས་ལྷོ་ནུབ་ནག་པོ་དང་། ཆར་སྤྲིན་པུ་རཱ་ཎ་ཞེས་བྱ་བ་དཀར་ནག་གི་མདོག་གོ་ཞེས་ནུབ་བྱང་དཀར་ནག་དང་། ཆར་སྤྲིན་གརྫི་ཏ་ཞེས་བྱ་བ་ཁ་དོག་ནག་པོའོ། །ཞེས་བྱང་ཤར་དབང་ལྡན་གྱི་སྤྲིན་མདོག་ནག་པོ་ཡིན་པར་བཤད་དོ།།

དེ་བཞིན་དུ་སྒྲ་གཅན་གསང་བས་ནི། སྤྲིན་སྒྲོག་པ་ཞེས་བྱ་བ་ཁ་དོག་སྣ་ཚོགས་པ་དང་། ཞེས་ཤར་དུ་སྤྲིན་སྒྲོག་པ་ཞེས་པ་སྣ་ཚོགས་མདོག་ཅན་དང་། སྤྲིན་འཁྱིལ་བ་ཁ་དོག་སྣ་ཚོགས་པ་དང་། ཞེས་ལྷོ་རུ་སྤྲིན་འཁྱིལ་བ་དང་། སྤྲིན་འཇིགས་པ་ཞེས་བྱ་བ་ཁ་དོག་སྣ་ཚོགས་པ་དང་། ཞེས་ནུབ་ཏུ་སྤྲིན་འཇིགས་པ་དང་། སྤྲིན་འུར་འུར་སྒྲོག་པ་ཁ་དོག་སྣ་ཚོགས་པ་དང་། ཞེས་བྱང་དུ་སྤྲིན་འུར་འུར་སྒྲོག་པ་དང་། སྤྲིན་གཏུམ་པོ་ཞེས་བྱ་བ་ཁ་དོག་སྣ་ཚོགས་པ་དང་། ཞེས་བྱང་ཤར་དུ་སྤྲིན་གཏུམ་པོ་དང་། སྤྲིན་སྟུག་པོ་ཞེས་བྱ་བ་ཁ་དོག་སྣ་ཚོགས་པ་དང་། ཞེས་ཤར་ལྷོ་རུ་ སྤྲིན་སྟུག་པོ་དང་། སྤྲིན་གང་བ་ཅན་ཞེས་བྱ་བ་ཁ་དོག་སྣ་ཚོགས་པ་དང་། ཞེས་ལྷོ་ནུབ་ཏུ་སྤྲིན་གང་བ་ཅན་དང་། སྤྲིན་ཆར་འབེབས་ཞེས་བྱ་བ་ཁ་དོག་སྣ་ཚོགས་པ་དང་། ཞེས་ནུབ་བྱང་དུ་སྤྲིན་ཆར་འབེབས་ཞེས་བྱ་བ་རྣམས་ཡོད་པ་དང་། སྤྲིན་ཐམས་ཅད་ཁ་དོག་སྣ་ཚོགས་པ་རུ་བཤད་དོ།།

སྟོང་ཉིད་རྡོ་རྗེའི་ཧེ་རུ་ཀ་ཉེ་འབྱུང་གི་དཀྱིལ་ཆོག་ལས། དེ་དག་གི་རྒྱབ་ཚོགས་སུ་སྤྲིན་རྣམས་བྲི་སྟེ་སྒྲ་གྲག་པ་ནི་མདོག་ནག་པོ། འཁྱིལ་པ་ནི་མདོག་སྔོན་པོ། རྨུགས་པ་ནི་གུར་གུམ་གྱི་མདོག་ཅན། མུན་པ་ནི་སྣ་ཚོགས་པའི་མདོག་ཅན། གང་བ་ནི་དམར་སེར། འབབ་པ་ནི་སྔོན་དམར། དྲག་པོ་ནི་སྣག་ཚའི་མདོག་ཅན། འཁྲིགས་པ་ནི་དཀར་པོ། ཞེས་བྱུང་བ་དང་། འགོད་སྟང་ནི། ཤར་ལྷོ་ནུབ་བྱང་བཞི་དང་། བྱང་ཤར་ཤར་ལྷོ་ལྷོ་ནུབ་ནུབ་བྱང་བྱས་ཏེ་རིམ་བཞིན་འགོད་རྒྱུ་ཡིན་པར་གཞུང་དེ་ཉིད་དུ་གསལ་ཞིང་། གཉིས་མེད་རྡོ་རྗེ་ཨ་བ་དྷཱུ་ཏཱི་པས། ཤར་དུ་སྤྲིན་སྒྲོག་པ་དང་། ལྷོར་སྤྲིན་ཀུན་དུ་འཁོར་བ་དང་། ནུབ་ཏུ་སྤྲིན་འཇིགས་པ་དང་། བྱང་དུ་སྤྲིན་འཁྱམ་པ་དང་། ཤར་ལྷོར་སྤྲིན་སྟུག་པོ་དང་། ལྷོ་ནུབ་ཏུ་སྤྲིན་རབ་ཏུ་གང་བ་དང་། ནུབ་བྱང་དུ་སྤྲིན་ཆར་འབེབས་དང་། བྱང་ཤར་དུ་སྤྲིན་གཏུམ་པོ་རྣམས་སུ་བཤད་དོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་ལས། ཤར་སྤྲིན་དཀར་པོ་དང་། ལྷོ་སྤྲིན་གནམ་དུད་སྔོ་སྐྱ་དང་། ནུབ་སྤྲིན་སྒྲ་སྒྲོག་དམར་ནག་དང་། བྱང་སྤྲིན་རྨུག་བྱེད་མྱོས་སྤྲིན་ལྗང་གུ་དང་། ཤར་ལྷོའི་སྤྲིན་གཏོང་བྱེད་དམར་སེར་དང་། ལྷོ་ནུབ་ཀྱི་སྤྲིན་གྷེ་ཏ་སེར་ཁྲ་དང་། ནུབ་བྱང་གི་སྤྲིན་རབ་དགའ་ཆར་འབེབས་སེར་པོ་དང་། བྱང་ཤར་གྱི་སྤྲིན་ཉ་ཆེན་ནག་པོ་ཞེས་བཤད་དོ།།

བརྒྱད་པ་དུར་ཁྲོད་བརྒྱད་དུ་སློབ་དཔོན་རིག་པ་འཛིན་པ་བརྒྱད་བཞུགས་ཚུལ་ཡོད་དེ། དེ་ཡང་ཤར་ན་ཀླུ་སྒྲུབ་སྙིང་པོ་བཞུགས་ཤིང་དེས་བྱིན་གྱིས་བརླབས་པ་དང་། ཐོད་པ་བརྩེགས་པའི་སྤྱིལ་བུས་དུར་ཁྲོད་ཀུན་དུ་བཀང་བ་ལ་རྣལ་འབྱོར་པའི་རྒྱལ་པོ་ཨཱརྱ་དེ་བ་ལ་སོགས་པ་ཤིན་ཏུ་མང་པོ་དང་། །རྣལ་འབྱོར་མ་ནི་མཛེས་མ་དང་སྙིང་སྟོབས་ཅན་མ་ལ་སོགས་པ་བཞུགས་ནས་རྒྱུད་གསང་འདུས་ཀྱི་རྗེས་སུ་འཇུག་ཅིང་སྟོན་པ་ཀླུ་སྒྲུབ་ཡིད་ལ་བྱེད་པ་དང་། ལྷོ་ན་ཌོམྦི་ཧེ་རུ་ཀ་བཞུགས་ཤིང་དེ་ཡིས་བྱིན་གྱིས་བརླབས་པ་དང་། ཐོད་པ་དང་རུས་པའི་དུམ་བུའི་སྤྱིལ་བུས་དུར་ཁྲོད་ཀུན་ཏུ་བཀང་བ་ལ་རྣལ་འབྱོར་བ་ཨ་ཝ་དྷཱུ་ཏཱི་པ་དང་། རྣལ་འབྱོར་མ་ཕྱག་མོ་ལ་སོགས་པ་བཞུགས་ཤིང་གསང་འདུས་དང་།  གཤིན་རྗེ་གཤེད་ནག་པོའི་རྒྱུད་ཀྱི་རྗེས་སུ་འཇུག་ཅིང་སྟོན་པ་ཌོམྦི་ཧེ་རུ་ཀ་ཡིད་ལ་བྱེད་པ་དང་། ནུབ་ན་མཁས་པ་རྟ་དབྱངས་བཞུགས་ཤིང་དེས་བྱིན་གྱིས་བརླབས་པ་དང་། མི་རོ་རྟ་རོ་སོགས་རོ་རྣམས་བརྩེགས་པའི་སྤྱིལ་བུས་དུར་ཁྲོད་ཀུན་བཀང་བ་ལ་རྣལ་འབྱོར་བ་ཀུ་ཀུ་རི་པ་དང་། རྣལ་འབྱོར་མ་སྙིང་པོའི་རྒྱན་མ་ལ་སོགས་པ་བཞུགས་ཤིང་། རྒྱུད་སྒྱུ་འཕྲུལ་ཆེན་མོའི་རྗེས་སུ་འཇུག་ཅིང་སློབ་དཔོན་རྟ་དབྱངས་ཡིད་ལ་བྱེད་པ་དང་། བྱང་དུ་སློབ་དཔོན་པདྨ་ཅན་ནམ་མཚོ་སྐྱེས་རྡོ་རྗེ་བཞུགས་ཤིང་དེས་བྱིན་གྱིས་བརླབས་པ་དང་། ཡང་རོ་ཡི་སྤྱིལ་བུས་ཀུན་ནས་བཀང་བ་ལ་རྣལ་འབྱོར་བ་བཟང་པོ་དང་། །རྣལ་འབྱོར་མ་བརྡུང་མ་ལ་སོགས་པ་བཞུགས་ཤིང་རྒྱུད་དགྱེས་པ་རྡོ་རྗེའི་རྗེས་སུ་འཇུག་ཅིང་སློབ་དཔོན་མཚོ་སྐྱེས་རྡོ་རྗེ་རྗེས་སུ་དྲན་པར་བྱེད་པ་དང་། ཤར་ལྷོར་ས་ར་ཧ་བཞུགས་ཤིང་དེ་ཡིས་བྱིན་གྱིས་བརླབས་པ་དང་། ཡི་དྭགས་ཀྱི་རོ་ཡི་སྤྱིལ་བུས་ཀུན་ཏུ་བཀང་བ་ལ་རྣལ་འབྱོར་བ་གྷུ་ན་ཀ་ན་ཀ་དང་། རྣལ་འབྱོར་མ་པདྨ་རྡོ་རྗེ་ལ་སོགས་པ་བཞུགས་ཤིང་རྒྱུད་བདེ་མཆོག་འཁོར་ལོའི་རྗེས་སུ་འཇུག་ཅིང་སློབ་དཔོན་དཔལ་ས་ར་ཧ་པ་རྗེས་སུ་དྲན་པར་བྱེད་པ་དང་། ལྷོ་ནུབ་ཏུ་དཔལ་མཆོག་ནག་པོ་ཞབས་བཞུགས་ཤིང་དེས་བྱིན་གྱིས་བརླབས་པ་དང་། ཀེང་རུས་ཡི་དྭགས་ལོ་མའི་སྤྱིལ་བུས་གང་བ་རུ་རྣལ་འབྱོར་བ་བྲམ་ཟེ་སྟོབས་ཅན་གྱི་བུ་གསེར་མདོག་ཅན་དང་། རྣལ་འབྱོར་མ་བཞིན་ཁྲོ་མ་ལ་སོགས་པ་བཞུགས་ཤིང་རྒྱུད་སྙིང་པོ་གཉིས་དང་། རྟ་མཆོག་གི་རྒྱུད་ཀྱི་རྗེས་སུ་འཇུག་ཅིང་སྟོན་པ་དཔལ་ནག་པོ་ཞབས་རྗེས་སུ་དྲན་པར་བྱེད་པ་དང་། ནུབ་བྱང་དུ་གྲུབ་ཐོབ་ཀུ་ཀུ་རི་པ་བཞུགས་ཤིང་དེས་བྱིན་གྱིས་བརླབས་པ་དང་། རྩྭའི་སྤྱིལ་བུ་རུས་པའི་རྒྱན་ཀྱིས་སྤྲས་པ་མང་པོས་དུར་ཁྲོད་ཀུན་ཏུ་གང་བ་ལ་རྣལ་འབྱོར་བ་མང་པོ་དང་། རྣལ་འབྱོར་མ་ཞིང་ལ་སོགས་པ་རྒྱུན་ཏུ་ཞུགས་ཤིང་རྒྱུད་རྣལ་འབྱོར་མའི་རྗེས་སུ་འཇུག་ཅིང་སྟོན་པ་དཔལ་ཀུ་ཀུ་རི་རྗེས་སུ་དྲན་པར་བྱེད་པ་དང་། བྱང་ཤར་གྱི་དུར་ཁྲོད་དུ་མཁའ་འགྲོ་རྡོ་རྗེ་ཕག་མོ་བཞུགས་ཤིང་དེས་བྱིན་གྱིས་བརླབས་པ་དང་། སོ་ཕག་བརྩེགས་པའི་སྤྱིལ་བུས་ཀུན་ཏུ་བཀང་བ་ལ་རྣལ་འབྱོར་པ་དཔལ་ཧེ་རུ་ཀ་པ་དང་། རྣལ་འབྱོར་མ་ནི་བདག་མེད་མ་དང་བདུད་རྩི་མ་ལ་སོགས་པ་བཞུགས་ཤིང་རྒྱུད་མཱ་ཧཱ་མཱ་ཡ་ནམ་མཁའ་དང་མཉམ་པའི་རྗེས་སུ་འཇུག་ཅིང་སྟོན་པ་རྡོ་རྗེ་ཕག་མོ་རྗེས་སུ་དྲན་པར་བྱེད་པར་བཤད་དོ།།

འདི་ནི་སློབ་དཔོན་བིར་ཝ་བའི་དུར་ཁྲོད་ཀྱི་བཤད་པའི་ལུགས་ལས་བྱུང་བ་དེ་ལྟར་ལགས་ལ། གུ་རུ་ཆོས་དབང་གི་དུར་ཁྲོད་བྱིན་འབེབས་ལས། ཤར་དུ་ཧཱུཾ་ཆེན་ཀ་རཱ་དང་། ལྷོར་འཇམ་དཔལ་བཤེས་གཉེན་དང་། ནུབ་ཏུ་གླུ་སྒྲུབ་སྙིང་པོ་དང་། བྱང་དུ་པྲ་ཆེན་ཧིསྟི་དང་། ཤར་ལྷོར་བྷི་མ་ལ་མི་ཏྲ་དང་། ལྷོ་ནུབ་ཏུ་དྷ་ན་སིང་ཀྲྀ་ཏ་དང་། ནུབ་བྱང་དུ་རམྦུ་གུ་ཧྱ་དང་། བྱང་ཤར་དུ་ཤིནྟཾ་གརྦྷ་རྣམས་གནས་པར་བཤད་པ་འདི་རྙིང་མའི་བཀའ་བརྒྱད་དཔལ་དགུའི་བཀའ་བབས་ཚུལ་དང་མཐུན་པར་བཀོད་པ་ཡིན་པར་ངེས་སོ།།

རྣལ་འབྱོར་བའི་སློབ་དཔོན་བཞུགས་ཚུལ་ནི། དཱ་རི་ཀ་པའི་འཁོར་ལོ་སྡོམ་པའི་བསྟོད་པ་གཙུག་གི་ནོར་བུ་ལས། གྲུབ་ཆེན་བརྒྱད་སོགས་ཕྱག་རྒྱ་མཆོག་ལྡན་ཞིང་། །གྲུབ་པའི་རྣལ་འབྱོར་སྤྱོད་པ་རྣམ་མཛེས་པའི། །སྒྲུབ་པའི་རྟེན་གྱུར་བདེ་གཤེགས་ཀུན་གྱི་གནས། །སྣོད་བཅུད་དག་ལ་གསང་བའི་དཀྱིལ་འཁོར་མཆོག །ཅེས་གྲུབ་ཆེན་བརྒྱད་ཡོད་ཚུལ་བཤད་པ་སོགས་གསང་སྔགས་པ་ལ་ཡོངས་སུ་གྲགས་ཤིང་རྙིང་རྒྱུད་འགའ་ལས་གསུངས་མོད། ཀླུ་སྒྲུབ་སོགས་སློབ་དཔོན་འདི་དག་བཞུགས་ཡོད་པའི་གསལ་ཁ་ནི་རྒྱུད་གང་ལས་ཀྱང་མ་གསུངས་ལ་ལུང་བསྟན་པ་མིན་ན་གསུངས་ཚུལ་ཡང་ཡོད་མི་སྲིད་པས་ཀླུ་སྒྲུབ་སོགས་ཡོད་ཚུལ་དེ་ནི་ཕྱིས་སུ་རྒྱ་གར་དུ་བཤད་སྲོལ་དར་བ་ཞིག་ཡིན་ངེས་ཤིང་། སྤྱིར་བཏང་ནི། མར་མེ་མཛད་ཡེ་ཤེས་ཀྱི་དགྱེས་པ་རྡོ་རྗེའི་སྒྲུབ་ཐབས་རིན་ཆེན་སྒྲོན་མ་ལས། མཆོད་རྟེན་བརྒྱད་དང་རྣལ་འབྱོར་ཚོགས། །ཞེས་གསུངས་པ་ལྟར་དུར་ཁྲོད་དུ་སྔགས་ཀྱི་བརྟུལ་ཞུགས་གྲུབ་པ་དང་སྤྱོད་པའི་རྣལ་འབྱོར་བའི་ཚོགས་དུ་མ་ཡོད་པར་བཤད་པའི་དབང་གིས་དེ་ལྟར་དུས་ཕྱིས་སུ་ཀླུ་སྒྲུབ་སོགས་ཡོད་པར་འདོད་པ་ཡིན་ངེས་སོ།།

དགུ་བ་དུར་ཁྲོད་བརྒྱད་ཀྱི་བར་སྣང་གི་ནམ་མཁའ་ན་ལྷ་ཆེན་པོ་བརྒྱད་ཡོད་པར་བཤད་པ་ཡོད་དེ། གསང་བ་རྟ་མཆོག་རོལ་པའི་རྒྱུད་ཆེན་པོ་ལས། ཚངས་པ་ལ་སོགས་ལྷ་ཆེན་བརྒྱད་རྣམས་འགུགས། །ཞེས་པ་ལྟར་དབང་ཕྱུག་དཀར་པོ་ཕྱག་ན་དབུ་རྒྱན་འཛིན་པ་དང་། ཁྱབ་འཇུག་མཐིང་ག་འཁོར་ལོ་འཛིན་པ་དང་། བྷྲྀཾ་གི་རི་ཏི་ལྗང་སེར་པི་ཝང་བསྣམས་པ་དང་། དགའ་བྱེད་དབང་ཕྱུག་དམར་པོ་མདའ་གཞུ་འཛིན་པ་དང་། གཞོན་ནུ་སྨིན་དྲུག་དཀར་པོ་བུམ་པ་འཛིན་པ་དང་། ཚོགས་ཀྱི་བདག་པོ་དཀར་པོ་ལ་ཕུག་འཛིན་པ་དང་། སྟོབས་བཟང་སེར་ནག་གཤོལ་འཛིན་པ་དང་། ལྷ་ཆེན་ལེགས་ལྡན་ནག་པོ་སྨུག་ནག་དང་བརྒྱད་དུ་བཤད་དེ། ཧེ་རུ་ཀ་གལ་པོ་ལས། ལྷ་ཆེན་བརྒྱད་ནི་དབང་ཕྱུག་ཆེ་དང་དབང་ཕྱུག་ཆེན་པོ་དཀར་པོ་ཕྱག་ན་དབུ་རྒྱན་ནོ། །བིཥྞུ་དང་བེཥྞུ་ནི་ལྷ་ཆེན་ཁྱབ་འཇུག་སྟེ་མཐིང་ག་འཁོར་ལོའོ། བྷྲྀཾ་གི་རི་ཏི་སྐུ་མདོག་ལྗང་སེར་པི་ཝང་བསྣམས་པ། དགའ་བྱེད་དབང་ཕྱུག་དམར་པོ་མདའ་གཞུ། གཞོན་ནུ་སྨིན་དྲུག་དཀར་པོ་བུམ་པ། ཚོགས་ཀྱི་བདག་དཀར་པོ་ལ་ཕུག། སྟོབས་བཟང་སེར་ནག་གཤོལ། ལྷ་ཆེན་ལེགས་ལྡན་ནག་པོ་སྨུག་ནག་སེར་ཆེན་པོ་བརྒྱད། ཅེས་གསུངས་པའི་ཕྱིར་རོ།།

འོན་ཀྱང་སྤྱིར་དེ་དང་མི་འདྲ་བ་དུར་ཁྲོད་བརྒྱད་དུ་གནས་པའི་ལྷ་ཆེན་བརྒྱད་ནི། ཤར་ཕྱོགས་ཀྱི་ནམ་མཁའ་ལ་ལྷ་ཆེན་པོ་བརྒྱ་བྱིན་དཀར་པོ་གཡས་རྡོ་རྗེ་དང་གཡོན་དྲིལ་བུ་འཛིན་པ་དང་། ལྷོ་རུ་ཚངས་པ་སེར་པོ་གསེར་གྱི་མདོག་ཅན་གཡས་སྤྱི་བླུགས་དང་། གཡོན་དབྱུ་གུ་རྩེ་གསུམ་འཛིན་པ་དང་། ནུབ་ཏུ་ཁྱབ་འཇུག་དམར་པོ་གཡས་འཁོར་ལོ་དང་གཡོན་དུང་འཛིན་པ་དང་། བྱང་དུ་ལྷ་ཆེན་དབང་ཕྱུག་ཐལ་བའི་མདོག་ཅན་གཡས་རྩེ་གསུམ་དང་གཡོན་ཐོད་པ་འཛིན་པ་དང་། བྱང་ཤར་དུ་གཞོན་ནུ་གདོང་དྲུག་གི་བུ་དཀར་པོ་གཡས་མདའ་དང་གཡོན་གཞུ་འཛིན་པ་དང་། ཤར་ལྷོ་ན་ཚོགས་བདག་དཀར་པོ་གཡས་ལ་ཕུག་དང་གཡོན་ལ་དུ་འཛིན་པ་དང་། ལྷོ་ནུབ་བམ་བདེན་བྲལ་དུ་བྷྲིཾ་གི་རི་ཏི་སྨུག་པོ་གཡས་ན་མདུང་དང་གཡོན་ན་བ་དན་ཐོགས་པ་དང་། ནུབ་བྱང་དུ་ལེགས་ལྡན་ནག་པོ་གཡས་ན་རལ་གྲི་དང་གཡོན་ཕུབ་འཛིན་པ་བརྒྱད་ཡོད་ཅིང་འགོད་དགོས་པར་གསུངས་པའི་ཕྱིར། གྲུབ་སྟེ། སློབ་དཔོན་ཀམྤ་ལས་མཛད་པའི་དགྱེས་རྡོར་སྒྲུབ་ཐབས་དེ་ཉིད་བཞི་རིམ་ལས། སྟེང་གི་མཁའ་ལ་ལྷ་ཆེན་བརྒྱད། །ཤར་དུ་བརྒྱ་བྱིན་སྔོན་དང་འདྲ། །ལྷོ་རུ་ཚངས་པ་གསེར་གྱི་མདོག །སྤྱི་བླུགས་དབྱུ་གུ་རྩེ་གསུམ་འཛིན། །ནུབ་ཏུ་ཁྱབ་འཇུག་དམར་པོ་སྟེ། །འཁོར་ལོ་གཡས་དང་གཡོན་དུང་དང་། །བྱང་དུ་ལྷ་ཆེན་ཐལ་བའི་མདོག །རྩེ་གསུམ་ཐོད་པ་གཡས་དང་གཡོན། །དབང་ལྡན་གཞོན་ནུ་དྲུག་གི་བུ། །དཀར་པོ་མདའ་དང་གཞུ་འཛིན་པ། །ཤར་ལྷོ་ཚོགས་བདག་དཀར་པོ་ནི། །གཡས་གཡོན་ལ་ཕུག་ལ་དུ་འཛིན། །བདེན་བྲལ་བྷྲིཾ་གི་རི་ཏི་སྨུག །གཡས་ན་མདུང་དང་བ་དན་གཡོན། །རླུང་དུ་ལེགས་ལྡན་ནག་པོ་ནི། །རལ་གྲི་གཡས་ན་ཕུབ་ནི་གཡོན། །ཐམས་ཅད་ལྷ་རྒྱན་དག་དང་ལྡན། །འདོད་པའི་ལྷ་རྣམས་ཀྱིས་བསྐོར་ཉི་ཟླ་གཟའ། །ཞེས་གསུངས་པའི་ཕྱིར་རོ།།

གཞན་ཡང་ལྷ་ཆེན་པོ་བརྒྱད་པོ་དེ་དེ་ལྟར་གནས་ཤིང་འགོད་པའི་རིམ་པ་དེ་དང་ཅུང་མི་འདྲ་བ་གཞན་ཡང་ཡོད་དེ། སློབ་དཔོན་མི་ཐུབ་ཟླ་བས་མཛད་པའི་འབྱུང་པོ་ཐམས་ཅད་ཀྱི་གཏོར་མ་ལས། ཤར་དུ་དབང་ཕྱུག་ཆེན་པོ་བསྐྱེད། །ལྷོར་ནི་དབང་པོ་བསམ་པར་བྱ། །ནུབ་ཏུ་ཚངས་པ་བསྐྱེད་བྱ་སྟེ། །བྱང་ཕྱོགས་སུ་ནི་ཁྱབ་འཇུག་གོ །ཤར་ལྷོར་འདོད་པའི་དབང་ཕྱུག་བསྐྱེད། །ལྷོ་ནུབ་ཚོགས་ཀྱི་བདག་པོ་སྟེ། །བྷྲིཾ་གི་རི་ཏི་ནུབ་བྱང་དུ། །བྱང་ཤར་གཞོན་ནུ་ཀརྟི་ཀའོ། །ཞེས་གསུངས་པ་དང་། སློབ་དཔོན་ཧཱུཾ་མཛད་གྲགས་པས་མཛད་པའི་ཡན་ལག་བཞིའི་དོན་སྣང་བྱེད་ལས། མདུན་དུ་དབང་ཕྱུག་ཆེན་པོ་སྟེ། །གཡས་སུ་ཚངས་པ་བརྒྱ་བྱིན་ལྷ། །གཡོན་དུ་ཁྱབ་འཇུག་འདོད་ལྷ་སྟེ། །ཆུང་མ་བཞོན་པ་ལ་གནས་པའི། །མཚན་མ་རྒྱན་བཅས་འཇིགས་པའི་ཚུལ། །རང་གི་ས་བོན་སྔགས་ལས་སྐྱེས། །དབང་ལྡན་མེ་ལྷའི་རྒྱལ་པོ་དང་། །སྲིན་པོའི་རྒྱལ་པོ་རླུང་གི་བདག །ཆུང་མ་བཞོན་པའི་གདན་དང་བཅས། །ལྷོའམ་ཤར་དུ་ལྷ་ཆེན་བརྒྱད། །ཅེས་གསུངས་པའི་ཕྱིར་རོ།།

གུ་རུ་ཆོས་དབང་གི་དུར་ཁྲོད་བྱིན་འབེབས་སུ། གོང་སྨོས་ལྟར། ཤར་དུ་ལྷ་ཆེན་སྟོབས་བཟང་གི་རོ་དང་། ལྷོར་འཆི་བདག་གཤིན་རྗེའི་རོ་དང་། ནུབ་ཏུ་ཚངས་པའི་རོ་དང་། བྱང་དུ་ཁྱབ་འཇུག་གི་རོ་དང་། ཤར་ལྷོར་དགའ་རབ་དབང་ཕྱུག་དམར་པོའི་རོ་དང་། ལྷོ་ནུབ་ཏུ་ཚོགས་བདག་གི་རོ་དང་། ནུབ་བྱང་དུ་བྷྲིངྒི་རི་ཏིའི་རོ་དང་། བྱང་ཤར་དུ་གཞོན་ནུ་སྨིན་དྲུག་གི་རོ་རྣམས་ཡོད་པར་བཤད་པ་ལས་དངོས་སུ་བར་སྣང་དུ་གནས་པ་དང་བསྒོམ་པར་མ་གསུངས་ཀྱང་དོན་ལ་དུར་ཁྲོད་བརྒྱད་དུ་ལྷ་ཆེན་བརྒྱད་ཡོད་པར་བསྟན་པའོ།།

དེ་ལྟར་རྙིང་རྒྱུད་དུ་དུར་ཁྲོད་བརྒྱད་བྱུང་བ་ལས་ཕལ་མོ་ཆེར་རུ་དྲའི་ཡན་ལག་འཐོར་ཕྱོགས་དང་། མ་མོ་ཆེན་མོ་བརྒྱད་གནས་ཕྱོགས་དང་། མཆོད་རྟེན་བརྒྱད་ཀྱི་སྐོར་བྱུང་བ་ལས་ཞིང་སྐྱོང་ཕྱོགས་སྐྱོང་ཀླུ་དང་ཤིང་སྤྲིན་ཀྱི་སྐོར་སོགས་རྒྱ་ཆེར་བྱུང་བ་དཀོན་པ་དང་། གསར་འགྱུར་གྱི་རྒྱུད་དག་ལས་ཕྱི་མ་དག་བྱུང་ཡང་རུ་དྲའི་ཡན་ལག་འཐོར་ཕྱོགས་རྣམས་ཐོན་པ་མེད་དོ། །འོན་ཀྱང་མ་མོ་བརྒྱད་དཀྱིལ་འཁོར་དུ་འགོད་པའི་ཕྱོགས་ཐོན་པ་ནི་གོང་དུ་ལུང་དྲངས་ཟིན་ལྟར་མང་དུ་མཆིས་སོ། །དེ་ལ་སོགས་པ་བཤད་བྱ་མང་ཡང་སྤྲོ་བར་མི་བྱའོ།།

བཅུ་བ་དུར་ཁྲོད་བརྒྱད་པོ་དེར་རི་བོ་བརྒྱད་ཡོད་པར་བཤད་པའི་རི་བརྒྱད་ཡོད་དེ། ཤར་རི་རིན་པོ་ཆེའི་རང་བཞིན་གྱི་ལྷུན་པོ་རི་རབ་གྲུ་བཞི་བ་དང་། ལྷོ་རི་མ་ལ་ཡ་དཀར་པོ་དང་། ནུབ་རི་ཀེེ་ལ་ཤ་དཀར་པོ་དང་། བྱང་རི་མནྡ་ར་ལྗང་གུ་དང་། བྱང་ཤར་གྱི་རི་དབང་ཆེན་ནག་པོ་དང་། ཤར་ལྷོའི་རི་སྤོས་ངད་ལྡན་པ་སེར་པོ་དང་། ལྷོ་ནུབ་ཀྱི་རི་གསེར་རི་སེར་པོ་དང་། ནུབ་བྱང་གི་རི་དཔལ་གྱི་རི་སྔོན་པོ་རྣམས་ཡོད་པར་བཤད་པའི་ཕྱིར་ཏེ། སྒྲ་གཅན་གསང་བས་མཛད་པའི་ཀྱེ་རྡོར་སྒྲུབ་ཐབས་རབ་ཏུ་གསལ་བ་ལས། རི་རབ་གྲུ་བཞི་པ་རིན་པོ་ཆེའི་རང་བཞིན་དང་། ཞེས་དང་། རི་མ་ལ་ཡ་དཀར་པོ་དང་། ཞེས་དང་། རི་ཀེེ་ལ་ཤ་དཀར་པོ་དང་། ཞེས་དང་། རི་མནྡ་ར་ལྗང་གུ་དང་། ཞེས་དང་། རི་དབང་ཆེན་ནག་པོ་དང་། ཞེས་དང་། རི་སྤོས་ངད་ལྡན་པ་སེར་པོ་དང་། ཞེས་དང་། རི་གསེར་ཞེས་བྱ་བ་དང་། ཞེས་དང་། རི་དཔལ་གྱི་རི་ཞེས་བྱ་བ་སྔོན་པོ་དང་། ཞེས་གསུངས་པའི་ཕྱིར་རོ། །དེ་ཙམ་ལས་རི་བརྒྱད་གསལ་བོར་བཤད་པའི་གཞུང་མ་རྙེད་དོ།།

གཉིས་པ་ནང་གི་དུར་ཁྲོད་ནི། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། དེ་ནས་ནང་གི་དུར་ཁྲོད་ནི། །ལུས་ཀྱི་སྐྲ་སེན་སྤུ་ལ་སོགས། །སྐྱེ་ཞིང་འཇིག་པར་བྱེད་པས་ན། །དུར་ཁྲོད་ཆེན་པོ་ལུས་ལ་དགོད། །ཅེས་གསུངས་པར་ལྟར། རྣལ་འབྱོར་བའི་རྡོ་རྗེའི་ལུས་ཀྱི་གནས་སོ་སོར་དུར་ཁྲོད་བརྒྱད་འགོད་པ་སྟེ། དེ་ཡང་དཔེར་ན་ལུས་ཀྱི་གཞང་ཁ་ཤར་གཏུམ་དྲག་ཅན་དང་། གསང་བ་ཕོ་མཚན་མོ་མཚན་དེ་བྱང་ཤར་དུར་ཁྲོད་དབྱིབས་ཅན་དང་། ཁ་ནི་བྱང་ཚང་ཚིང་ཅན་དང་། སྣ་བུག་གཉིས་ལྷོ་ནུབ་འབར་བ་འཛིན་དང་། མིག་གཉིས་ནུབ་བྱང་དམྱལ་སོགས་དང་ནུབ་མི་བཟད་པ་གཉིས་དང་། རྣ་བ་གཉིས་ལྷོ་ཧ་ཧར་རྒོད་པ་དང་ཤར་ལྷོ་གཡེར་ཁ་ཅན་གཉིས་ཏེ། རང་གི་ལུས་དེ་དུར་ཁྲོད་བརྒྱད་ཀྱི་རང་བཞིན་ཡིན་པར་གསུངས་ཏེ། དཔལ་ཕྱག་རྒྱ་ཆེན་པོ་ཐིག་ལེའི་རྒྱུད་ལས། གཏུམ་དྲག་གཞང་ཁར་དབྱིབས་ཅན་ནི། །གསང་བ་ཚང་ཚིང་ཁ་རུའོ། །འབར་བ་ཞེས་བྱའི་དུར་ཁྲོད་ནི། །སྣ་ཡི་བུ་ག་གཉིས་ན་གནས། །དམྱལ་སོགས་དེ་བཞིན་མི་བཟད་པ། །མིག་གཉིས་ལ་ནི་གནས་པའོ། །ཧ་ཧ་རྒོད་དང་གཡེལ་ཁ་ཅན། །རྣ་བ་གཉིས་ལ་གནས་པའོ། །ཞེས་གསུངས་པའི་ཕྱིར་རོ།། དེ་བཞིན་དུ་ལག་པའི་དཔུང་བ་གཉིས་ལ་དཔུང་བ་དང་ཉེ་བའི་དཔུང་བ་གཉིས་རེ་ཕྱེ་བའི་བཞི་དང་། རྐང་པའི་བརླ་གཉིས་ལ་བརླ་དང་ཉེ་བའི་བརླ་གཉིས་རེ་ཕྱེ་བའི་བཞི་སྟེ་བརྒྱད་པོ་དུར་ཁྲོད་བརྒྱད་དང་། རྐང་པའི་རྗེ་ངར་ལ་དེ་ལྟར་ཕྱེ་བའི་བཞི་དང་། ལག་ངར་ལ་དེ་ལྟར་ཕྱེ་བའི་བརྒྱད་པོ་ཤིང་བརྒྱད་དང་། ལུས་ཀྱི་སྟོད་ཀྱི་ཚིགས་བཞི་དང་སྨད་ཀྱི་ཚིགས་བཞི་ལ་དེ་ལྟར་ཕྱེ་བའི་བརྒྱད་ནི་ཕྱོགས་སྐྱོང་བརྒྱད་དང་། རྐང་མཐིལ་གཉིས་ལ་བཞི་དང་། ལག་མཐིལ་གཉིས་ལ་བཞི་ཕྱེ་བའི་བརྒྱད་ནི་ཀླུ་བརྒྱད་དང་། རྐང་ལག་གི་རྩེ་བཞི་ལ་དེ་ལྟར་གཉིས་རེ་ཕྱེ་བའི་བརྒྱད་ནི་ཆར་སྤྲིན་བརྒྱད་དུ་བཤད་པ་ནི་ནང་ལུས་ཀྱི་དུར་ཁྲོད་ཀྱི་རྣམ་གཞག་བཤད་པ་ཡིན་ཏེ། དུར་ཁྲོད་རྒྱན་གྱི་རྒྱུད་ལས། དཔུང་པ་ཉེ་བའི་དཔུང་པ་སྟེ། །བརླ་དང་དེ་བཞིན་ཉེ་བའི་བརླ། །བརྒྱད་ནི་དུར་ཁྲོད་བརྒྱད་དུ་ངེས། །རྗེ་ངར་ཉེ་བའི་རྗེ་ངར་བཞི། །ལག་ངར་ཉེ་བའི་ལག་ངར་བཞི། །བརྒྱད་ནི་ནང་གི་ཤིང་བརྒྱད་དོ། །ཚིགས་དང་དེ་བཞིན་ཉེ་བའི་ཚིགས། །སྟེང་དང་འོག་ཏུ་བཞི་བཞི་སྟེ། །ནང་གི་ཕྱོགས་སྐྱོང་ཡིན་པར་འདོད། །མཐིལ་དང་དེ་བཞིན་ཉེ་བའི་མཐིལ། །སྟེང་འོག་དེ་བཞིན་ཀླུ་བརྒྱད་དོ། །རྩེ་དང་དེ་བཞིན་ཉེ་བའི་རྩེ། །བརྒྱད་ནི་ཆར་སྤྲིན་བརྒྱད་ཡིན་ཏེ། །ཞེས་དང་། ཧེ་རུ་ཀ་གལ་པོ་ལས། ནང་ལུས་ཀྱི་དང་། ཞེས་གསུངས་པའི་ཕྱིར་རོ།།

དེ་བཞིན་བསྐྱེད་རིམ་གྱིས་སྟོབས་ཀྱིས་ཐ་མལ་བའི་རྣམ་རྟོག་འགགས་པའི་རྟགས་སམ་མཚོན་བྱེད་དུར་ཁྲོད་བརྒྱད་དང་། རྩ་རླུང་གི་ངོ་བོ་ལ་གནད་དུ་བསྣུན་པས་ལས་སུ་རུང་བ་ཤིང་བརྒྱད་དང་། བསྐྱེད་རིམ་གྱི་སྟོབས་ཀྱིས་ཉོན་མོངས་པ་རགས་པ་བཅོམ་པ་ཀླུ་བརྒྱད་དང་། བསྐྱེད་རིམ་ལ་བདག་སྤྱོད་ཅིང་གཞན་ཡང་དེར་སྤྱོད་དུ་བཅུག་པ་ཆར་སྤྲིན་བརྒྱད་དེ། ཚུལ་དེ་ནང་གི་དུར་ཁྲོད་ཀྱི་རྣམ་གཞག་ཏུ་བྱས་པ་ཡོད་དེ། དེ་ཉིད་ལས། བསྐྱེད་རིམ་རྣམ་རྟོག་མི་མངའི་རྟགས། །དུར་ཁྲོད་བརྒྱད་ནི་ནང་ན་གནས། །རྩ་རླུང་ངོ་བོ་ཤེས་པ་རྒྱས། །དེ་ཕྱིར་ནང་གི་ཤིང་བརྒྱད་གནས། །རགས་པའི་གདུག་པ་འདུལ་བའི་ཕྱིར། །ནང་ན་ཀླུ་བརྒྱད་ཡང་དག་གནས། །བདག་སྤྱོད་གཞན་ཡང་སྤྱོད་པའི་ཕྱིར། །ཆར་སྤྲིན་བརྒྱད་ནི་ནང་དུ་གནས། །ཞེས་གསུངས་པའི་ཕྱིར་རོ།།

གསུམ་པ་གསང་བའི་དུར་ཁྲོད་ནི། རྫོགས་པའི་རིམ་པའི་ཉམས་ལེན་གྱིས་རྡོ་རྗེའི་ལུས་ཀྱི་རྩ་འཁོར་གྱི་ཆ་དང་དེ་རྣམས་སུ་རླུང་འབྱུང་འཇུག་གནས་པའི་ཆས་རྣམ་པར་མི་རྟོག་པའི་ཡེ་ཤེས་བསྐྱེད་ཅིང་དེའི་ལྡོག་ཕྱོགས་ཀྱི་མཚན་མའི་རྣམ་རྟོག་ཞི་བས་ཕྱེ་བ་སྟེ། དེ་ཡང་གསང་བའི་སྣ་རྩེར་རྩ་བརྒྱད་དུ་རླུང་སྦྱངས་པའི་སྟོབས་ལས་སྐྱེས་པའི་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ལ་དུར་ཁྲོད་བརྒྱད་དུ་བཏགས་པའམ་དུར་ཁྲོད་བརྒྱད་ཡེ་ཤེས་དེ་མཚོན་བྱེད་དང་། ལྟེ་བར་རྩ་བརྒྱད་དུ་རླུང་སྦྱངས་པའི་སྟོབས་ལས་སྐྱེས་པའི་བདེ་བ་ཚད་མེད་པའི་ཆ་དང་དེ་མཚོན་བྱེད་ལྗོན་ཤིང་བརྒྱད་དང་། སྙིང་གར་རྩ་བརྒྱད་དུ་རླུང་སྦྱངས་པའི་སྟོབས་ལས་སྐྱེས་པའི་མཚན་མའི་རྣམ་རྟོག་ཕྲ་མོ་འཇོམས་པའི་ཆ་དང་དེ་མཚོན་བྱེད་ཀླུ་ཆེན་བརྒྱད་དང་། མགྲིན་པར་རྩ་བརྒྱད་དུ་རླུང་སྦྱངས་པའི་སྟོབས་ལས་སྐྱེས་པའི་བདེ་བའི་ཡེ་ཤེས་ཀྱི་ཆ་དང་དེ་མཚོན་བྱེད་ཕྱོགས་སྐྱོང་བརྒྱད་དང་། སྤྱི་བོར་རྩ་བརྒྱད་དུ་རླུང་སྦྱངས་པའི་སྟོབས་ལས་སྐྱེས་པའི་བདེ་བས་བདག་བདེ་སྟོང་གི་ཡེ་ཤེས་ལ་སྤྱོད་ཅིང་གཞན་དེ་ལ་སྦྱོར་བའི་ཆ་དང་དེ་མཚོན་བྱེད་ཆར་སྤྲིན་བརྒྱད་དུ་བརྩིས་པའི་རྩ་ཆེན་སོ་གཉིས་དུར་ཁྲོད་རྟེན་དང་བརྟེན་པ་དང་། རྩ་དེ་རྣམས་སུ་རླུང་སྦྱངས་པའི་སྒོས་སྐྱེས་པའི་བདེ་བའི་ཡེ་ཤེས་ཁྱད་པ་བ་དག་དང་དེ་མཚོན་བྱེད་ལ་གསང་བའི་དུར་ཁྲོད་དུ་བྱེད་པ་ཡིན་པའི་ཕྱིར་ཏེ། དུར་ཁྲོད་རྒྱན་གྱི་རྒྱུད་ལས། དེ་ནས་གསང་བའི་དུར་ཁྲོད་ཀྱང་། །སྣ་རྩེར་རྩ་བརྒྱད་དུར་ཁྲོད་བརྒྱད། །ལྟེ་བར་རྩ་བརྒྱད་ཤིང་བརྒྱད་དོ། །སྙིང་གར་རྩ་བརྒྱད་ཕྱོགས་སྐྱོང་བརྒྱད། །མགྲིན་པར་རྩ་བརྒྱད་ཀླུ་བརྒྱད་དེ། །སྤྱི་བོར་རྩ་བརྒྱད་ཆར་སྤྲིན་བརྒྱད། །གསང་བར་རྣམ་རྟོག་མི་མངའི་རྟགས། །དུར་ཁྲོད་བརྒྱད་ནི་གསང་བར་གནས། །ཐམས་ཅད་བདེ་བར་སྣང་བའི་ཕྱིར། །གསང་བར་ཤིང་བརྒྱད་ཡང་དག་གནས། །ཕྲ་བའི་མཚན་མའི་རྣམ་རྟོག་གི །གདུག་པ་འཇོམས་ཕྱིར་ཀླུ་བརྒྱད་དགོད། །བདེ་བས་བདག་སྤྱོད་གཞན་སྦྱོར་བས། །དེ་ཡི་ཕྱིར་ན་ཆར་སྤྲིན་དགོད། །ཅེས་དང་། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུད་ཁྲོད་ཀྱི་རྒྱན་རྨད་དུ་བྱུང་བ་ལས། དེ་ནས་གསང་བའི་དུར་ཁྲོད་ནི། །རྩ་ཆེན་སུམ་ཅུ་རྩ་གཉིས་ནས། །འབྱུང་འཇུག་གནས་པའི་རླུང་རྣམས་ནི། །དབུགས་རྒྱུ་ཞེས་པ་དུར་ཁྲོད་དོ། །ཞེས་གསུངས་པ་ལྟར་གྱིས་སོ། །གཞན་ཡང་བདེ་སྟོང་གི་ཡེ་ཤེས་ཁྱད་པར་བ་འདྲེན་པའི་ལས་རྒྱའི་མཁའ་གསང་ཡང་གསང་བའི་དུར་ཁྲོད་དུ་བཤད་དེ། ཧེ་རུ་ཀ་གལ་པོ་ལས། གསང་བ་ཡུམ་གྱི་བྷ་གའི་དང་། ཞེས་གསུངས་པའི་ཕྱིར་རོ།།

བཞི་བ་དེ་ཁོ་ན་ཉིད་ཀྱི་དུར་ཁྲོད་ནི། རྣམ་པར་ཤེས་པ་ཚོགས་བརྒྱད་དང་། གཟུང་འཛིན་གྱི་རྟོག་པ་སྣ་ཚོགས་པ་ཡོད་དོ་ཅོག་རང་བཞིན་གྱིས་མ་གྲུབ་པར་ཆོས་དབྱིངས་སྤྲོས་བྲལ་ཆེན་པོའི་ངང་དུ་འཛིན་མེད་དུ་རང་ཞིག་པའམ་ཚུལ་དེ་རྟོགས་པའི་ཡེ་ཤེས་དང་། ཡེ་ཤེས་དེའི་ཡུལ་སྟོང་པ་ཉིད་དེ་ནི་གནས་ལུགས་དེ་ཁོ་ན་ཉིད་ཀྱི་དུར་ཁྲོད་ཅེས་བྱ་བ་སྟེ། དུར་ཁྲོད་རྒྱན་གྱི་རྒྱུད་ལས། དེ་ནས་བཞི་བའི་དུར་ཁྲོད་ཀྱང་། །རྣམ་ཤེས་བརྒྱད་ནི་དེ་ཉིད་བརྒྱད། །དུར་ཁྲོད་བརྒྱད་དུ་ངེས་པའོ། །ཞེས་དང་། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། རྣམ་པར་ཤེས་པའི་ཚོགས་བརྒྱད་དང་། །དངོས་པོའི་རྟོག་པ་སྣ་ཚོགས་པ། །ཆོས་ཀྱི་དབྱིངས་ཀྱི་དུར་དུ་མཆི། །གསང་བ་རིག་པའི་ཡེ་ཤེས་ཁྲོད། །ཅེས་གསུངས་པའི་ཕྱིར། དེ་ཡང་རྣམ་པར་ཤེས་པ་ཚོགས་བརྒྱད་དམ། ཚོགས་བརྒྱད་ཀྱི་ངོ་བོ་ཡེ་ཤེས་བརྒྱད་དུ་གནས་དག་ཅིང་། དེ་ཡང་རང་བཞིན་མེད་པ་དང་རྣམ་པར་རྟོག་པ་དང་བྲལ་བ་མཚོན་པའི་རྟགས་སུ་བསིལ་བའི་ཚལ་ལ་སོགས་པའི་དུར་ཁྲོད་བརྒྱད་ཕྱོགས་བརྒྱད་དུ་བསྒོམ་པར་གསུངས་ཏེ། དུར་ཁྲོད་རྒྱན་གྱི་རྒྱུད་ལས། རྣམ་ཤེས་ཚོགས་བརྒྱད་རྣམ་རྟོག་བརྒྱད། །མི་མངའི་རྟགས་སུ་དུར་ཁྲོད་བརྒྱད། །ཕྱོགས་དང་ཕྱོགས་བྲལ་དག་ཏུ་དགོད། །ཅེས་དང་། དུར་ཁྲོད་ཀྱི་རྒྱན་རྨད་དུ་བྱུང་བ་ལས། དེ་ནས་དུར་ཁྲོད་དགོས་པ་ནི། །རྣམ་ཤེས་དག་པའི་དུར་ཁྲོད་ལ། །ཞེས་དང་། སློབ་དཔོན་དཱ་རི་ཀ་པའི་འཁོར་ལོ་སྡོམ་པའི་བསྟོད་པ་གཙུག་གི་ནོར་བུ་ལས། ཚོགས་བརྒྱད་དག་ཕྱིར་དུར་ཁྲོད་རབ་འཇིགས་བྱེད། །ཅེས་གསུངས་པའི་ཕྱིར་རོ།།

མཆོད་རྟེན་བརྒྱད་པོ་ཡང་རང་སངས་རྒྱས་ཀྱི་བཞུགས་གནས་ལྟ་བུ་རང་གཅིག་པུས་ལམ་མངོན་པར་ཉམས་སུ་བླངས་པའི་གནས་ཏེ། རྣལ་འབྱོར་བའི་བརྟུལ་ཞུགས་ཀྱི་སྤྱོད་པ་སྐྱོང་བའི་གནས་ཀྱི་མཚོན་བྱེད་དང་། དེ་དག་གི་ངོ་བོ་སྤྲོས་བྲལ་ཆོས་ཉིད་ཆེན་པོའི་རང་བཞིན་དུ་གནས་ཤིང་དེ་དོན་རྟོགས་པའི་མཚོན་བྱེད་ལ་གསུངས་ཏེ། དེ་ཉིད་ལས། མཆོད་རྟེན་རང་སངས་རྒྱས་ཀྱི་གནས། །རྣལ་འབྱོར་བརྟུལ་ཞུགས་སྤྱོད་པ་

བྱེད། །ཅེས་གསུངས་པའི་ཕྱིར་རོ།།

ཤིང་བརྒྱད་པོ་ནི་རྣམ་པར་ཤེས་པ་ཚོགས་བརྒྱད་ཀྱི་ངོ་བོ་རང་བཞིན་མེད་པར་རྟོགས་པའི་རྣམ་པར་མི་རྟོག་པའི་ཡེ་ཤེས་ཀྱི་ཡོན་ཏན་བརྒྱད་དང་། འབྲས་དུས་ཀྱི་སྟོབས་སོགས་ཀྱི་ཡོན་ཏན་མཚོན་བྱེད་དམ་དེའི་རྟགས་སུ་ཤིང་བརྒྱད་དུ་བསྟན་པ་ཡིན་པར་གསུངས་ཏེ། དུར་ཁྲོད་རྒྱན་གྱི་རྒྱུད་ལས། ཚོགས་བརྒྱད་ཡོན་ཏན་བརྒྱད་ལྡན་པའི། །རྟགས་སུ་ཤིང་བརྒྱད་རིམ་པས་དགོད། །ཅེས་དང་། སྟོབས་སོགས་མཁྱེན་པའི་ཡོན་ཏན་རྒྱས། །རྟགས་སུ་ཤིང་བརྒྱད་ངེས་པའོ། །ཞེས་དང་། འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ལས། སངས་རྒྱས་བརྒྱད་ཀྱི་མཚན་མ་ཤིང་། །ཐུགས་རྗེའི་རྟགས་སུ་ཤིང་བརྒྱད་ལ། །ཞེས་དང་། ཧེ་རུ་ཀ་གལ་པོ་ལས། དེ་ཁོ་ན་ཉིད་རྣམ་ཤེས་ཀྱི་དང་། མཚོན་པ་དཔེའི་དང་། འབྲས་བུ་དོན་གྱི་དུར་ཁྲོད་བརྒྱད་དོ། ། ཞེས་གསུངས་པའི་ཕྱིར་རོ།།

ཞིང་སྐྱོང་རྣམས་ཀྱང་དོན་ལ་སྤྲོས་བྲལ་དེ་བཞིན་ཉིད་ཀྱི་ངང་ལས་ཆོས་ཐམས་ཅད་འདའ་བ་མེད་པའི་རང་བཞིན་ཅན་ཡིན་ནའང་། དེ་རྟོགས་བྱེད་ཀྱི་ལམ་མམ་ཐབས་ཟབ་མོ་གསང་སྔགས་ཀྱི་ཐེག་པ་སྲུང་བའི་མཚོན་བྱེད་དུ་གསུངས་ཏེ། དུར་ཁྲོད་ཀྱི་རྒྱན་རྨད་དུ་བྱུང་བ་ལས། ཞིང་སྐྱོང་སྔགས་ཀྱི་ཐེག་པ་སྲུང་། །ཞེས་གསུངས་པའི་ཕྱིར་རོ།།

ཕྱོགས་སྐྱོང་བརྒྱད་ཀྱང་མི་དགེ་བ་བཅུ་གཉེན་པོས་རྣམ་པར་བཅོམ་པ་དང་། དེའི་ངོ་བོ་དང་། རྣམ་ཤེས་ཚོགས་བརྒྱད་ཀྱི་ངོ་བོ་རང་བཞིན་མེད་པར་རྣམ་པར་དག་པ་དེའམ་དེ་དག་རྣམ་པར་དག་པར་རྟོགས་པའི་ཡེ་ཤེས་བརྒྱད་མཚོན་བྱེད་ཙམ་ལ་ཕྱོགས་སྐྱོང་བརྒྱད་ཅེས་བརྗོད་པ་ཡིན་ཏེ། དུར་ཁྲོད་རྒྱན་གྱི་རྒྱུད་ལས། ཚོགས་བརྒྱད་མི་དགེ་བཅུ་བཅོམ་པའི། །རྟགས་སུ་ཕྱོགས་སྐྱོང་རིམ་པས་འགོད། །ཅེས་དང་། དུར་ཁྲོད་ཀྱི་རྒྱན་རྨད་དུ་བྱུང་བ་ལས། ཕྱོགས་སྐྱོང་མི་དགེ་བཅུ་པོ་སྤོང་། །ཞེས་དང་། དཔལ་གསང་བ་གཅོད་པའི་རྒྱུད་ལས། རྣམ་རྟོག་མི་དགེ་བཅུ་ཡི་དོན། །འཇོམས་པའི་རྟགས་སུ་ཕྱོགས་སྐྱོང་དགོད། །ཅེས་གསུངས་པའི་ཕྱིར་རོ།།

ཡང་ཀླུ་བརྒྱད་པོ་ཡང་དོན་ལ་ཉོན་མོངས་པའི་རྣམ་རྟོག་གདུག་པ་དང་དེས་བསྐྱེད་པའི་གདུག་པའི་སྐྱེ་གནས་བརྒྱད་དུ་སྐྱེ་བའི་རྒྱུ་བཅོམ་པ་དང་། དེ་བརྒྱད་ཀྱི་ངོ་བོ་རྣམ་པར་དག་པ་དང་། རྣམ་པར་དག་པའི་ཡེ་ཤེས་མཚོན་བྱེད་ཡིན་ཏེ། དུར་ཁྲོད་རྒྱན་གྱི་རྒྱུད་ལས། དེ་བཞིན་གདུག་པ་བརྒྱད་བཅོམ་པའི། །རྟགས་སུ་ཀླུ་བརྒྱད་རིམ་པས་དགོད། །ཅེས་དང་། རྣམ་རྟོག་གདུག་པ་འདུལ་བ་ཡི། །རྟགས་སུ་ཀླུ་བརྒྱད་ངེས་

པའོ། །ཞེས་དང་། དུར་ཁྲོད་ཀྱི་རྒྱན་རྨད་དུ་བྱུང་བ་ལས། གདུག་པ་འཇོམ་ཕྱིར་

ཀླུ་བརྒྱད་འགོད། །ཅེས་དང་། དཔལ་གསང་བ་གཅོད་པའི་རྒྱུད་ལས། འདོད་ཆགས་ཞེ་སྡང་མ་རིག་པ། །གདུག་པ་འཇོམས་ཕྱིར་ཀླུ་བརྒྱད་འགོད། །ཅེས་གསུངས་པའི་ཕྱིར་རོ།།

ཆར་སྤྲིན་བརྒྱད་ཡང་ལམ་དུས་སུ་ལུས་ངག་གཉིས་ཀྱིས་སེམས་ཅན་གྱི་དོན་མཛད་པ་རྒྱུན་མི་ཆད་པའི་བརྡ་དང་། འབྲས་དུས་སུ་ཆོས་གཟུགས་ཀྱི་སྐུ་གཉིས་ཀྱིས་སེམས་ཅན་གྱི་དོན་མཛད་པ་རྒྱུན་མི་ཆད་པའི་མཚོན་བྱེད་དང་། དེ་ཡང་དོན་དམ་པར་དེ་དག་རང་བཞིན་གྱིས་མ་གྲུབ་པ་མཚོན་བྱེད་ལ་ཆར་སྤྲིན་བརྒྱད་དུ་བཤད་དེ། དུར་ཁྲོད་རྒྱན་གྱི་རྒྱུད་ལས། ལུས་ངག་གཉིས་ཀྱིས་སེམས་ཅན་གྱི། །དོན་མཛད་ཕྱིར་ནི་ཆར་སྤྲིན་དགོད། །ཅེས་དང་། གཟུགས་སྐུ་གཉིས་ཀྱིས་སེམས་ཅན་གྱི། །དོན་མཛད་རྟགས་སུ་ཆར་སྤྲིན་བརྒྱད། །ཅེས་དང་། དཔལ་གསང་བ་གཅོད་པའི་རྒྱུད་ལས། གཟུགས་སྐུ་གཉིས་ཀྱི་ང་རྒྱལ་དང་། །ལུས་དང་ངག་གིས་སེམས་ཅན་གྱི། །དོན་མཛད་ཕྱིར་ནི་ཆར་སྤྲིན་དགོད། །ཅེས་གསུངས་པའི་ཕྱིར་རོ།།

གཞན་ཡང་སངས་རྒྱས་མཉམ་སྦྱོར་སྔ་འགྱུར་ལས། ཡེ་ཤེས་མེ་བརྒྱད་རབ་ཏུ་འབར། །བྱམས་པའི་ཆུ་ཆེན་བརྒྱད་འབབ་ཅིང་། །སྙིང་རྗེའི་བྲག་བརྒྱད་མཛེས་པར་བརྩེགས། །དགའ་བའི་སྤྲིན་བརྒྱད་ཀུན་ཏུ་འཐིབས། །བཏང་སྙོམས་རླུང་བརྒྱད་རབ་ཏུ་འབུད། །ཕྱོགས་སྐྱོང་བཅུ་ནི་རབ་ཏུ་གནས། །ཞེས་དང་། འཁོར་ལོ་སྡོམ་པའི་བསྟོད་པ་གཙུག་གི་ནོར་བུ་ལས། མཆོད་རྟེན་བྲག་སོགས་ཆུ་དང་མེ་བརྒྱད་དང་། །ཉི་ཤུ་རྩ་བཞི་མཁའ་འགྲོ་གནས་པའི་ས། །ཞེས་གསུངས་པ་ལྟར་བཤད་ཟིན་དག་ཏུ་མ་འདུས་པའི་ཆུ་བརྒྱད་དང་། བྲག་བརྒྱད་དང་། མེ་བརྒྱད་དང་། རླུང་ཆེན་བརྒྱད་སོགས་བཤད་མོད་རྒྱུད་གཞན་ལས་ཁ་གསལ་ཅན་མ་བྱུང་བས་སྤྲོ་མ་ནུས་སོ།།

བདེ་མཆོག་འབྱུང་བ་ལས། གཞན་ཡང་སྣ་ཚོགས་དུ་མ་ཡི། །ཁྭ་དང་འུག་པ་བྱ་རྒོད་དང་། །ལྕེ་སྤྱང་ལྕེ་སྤྱང་མོ་དང་ནི། །འོལ་པ་དང་ནི་འོལ་པ་མོ། །སེང་གེའི་གདོང་དང་སྟག་གི་གདོང་། །དྲག་ཅིང་འཇིགས་པའི་གདོང་ཅན་མ། །སྦྲུལ་ནི་བ་ལང་མགོ་ཅན་དང་། །གདོང་གཉིས་ལ་སོགས་ཕྱོགས་སུ་རྒྱུ། །ཞེས་གསུངས་པ་དང་། འཁོར་ལོ་སྡོམ་པའི་བསྟོད་པ་གཙུག་གི་ནོར་བུ་ལས། འབྱུང་པོ་འདུས་པ་ཅེ་སྤྱང་སྒྲ་སྒྲོགས་ཤིང་། །ཤ་ཟ་རོ་ལངས་འཕྲ་མེན་མ་བརྒྱད་དང་། །ཨུ་མ་དུས་མཚན་དུར་ཁྲོད་བདག་མོར་བཅས། །རྒྱལ་ཆེན་བཞི་སོགས་འཇིག་རྟེན་དབང་ཕྱུག་ལྡན། །ཞེས་གསུངས་པ་ལྟར། དུར་ཁྲོད་བརྒྱད་དུ་དེ་འདྲ་འཇིགས་སུ་རུང་བའི་མགོ་བརྙན་ཅན་གྱི་ཡེ་ཤེས་དང་ལས་གྲུབ་ཀྱི་དཔའ་བོ་རྣལ་འབྱོར་མ་དང་མ་མོ་དང་ཕྲ་མེན་མ་འབྱུང་པོའི་ཚོགས་དཔག་ཏུ་མེད་པ་རྒྱུ་བ་དང་། གཅན་གཟན་དང་། དུར་བྱ་དང་། དུག་སྦྲུལ་དང་། ཁྱི་དང་ཕག་ལ་སོགས་པ་དང་། མེས་འཚིགས་དང་མ་འཚིགས་པའི་མི་རོ་དང་། ཀེང་རུས་ལ་སོགས་འཇིགས་པ་དང་། སྐྱུག་བྲོ་བ་དང་། ཡིད་སྐྱོ་བའི་དངོས་པོ་མང་པོ་མཆིས་པར་གསུངས་ཀྱང་མི་སྤྲོའོ།།

གནས་ཡུལ་ཉེར་བཞི་ཞར་བྱུང་དུ་བཤད་པ།

དེ་ཡང་ཧེ་རུ་ཀ་སྙིང་རྗེ་རོལ་པའི་རྒྱུད་ལས། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོ་གནས་བརྒྱད་ནས། །ཞེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་ལས། དུར་ཁྲོད་ཀྱི་གནས་བརྒྱད་དང་། ཧེ་རུ་ཀའི་གནས་བཅུ་དང་། ཞེས་དང་། ཀརྨ་མཱ་ལེའི་རྒྱུད་ལས། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །ཞེས་སྔ་འགྱུར་གྱི་རྒྱུད་སྡེ་རྣམས་སུ་ཧེ་རུ་ཀའི་གནས་བཅུ་ཟེར་བ་བཤད་ལ། དེ་བཅུ་གང་ཞེ་ན། གནས་དང་ཉེ་བའི་གནས་གཉིས་དང་། ཞིང་དང་ཉེ་བའི་ཞིང་གཉིས་དང་། ཡུལ་དང་ཉེ་བའི་ཡུལ་གཉིས་དང་། ཚནྡོ་དང་ཉེ་བའི་ཚནྡོ་གཉིས་དང་། དུར་ཁྲོད་ཉེ་བའི་དུར་ཁྲོད་གཉིས་ཏེ་བཅུ་བོ་དེ་ཡིན་པའི་ཕྱིར། གྲུབ་སྟེ། གླང་ཆེན་རབ་འབོག་གི་རྒྱུད་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་ཉིད་དང་། །ཡུལ་དང་ཉེ་བའི་ཡུལ་ཉིད་དེ། །ཚནྡོ་ཉེ་བའི་ཚནྡོ་དང་། །དུར་ཁྲོད་ཉེ་བའི་དུར་ཁྲོད་རྣམས། །གནས་ཀྱིས་འདུལ་བར་དགོངས་པ་རྣམས། །ཧེ་རུ་ཀ་ཡི་གནས་བཅུར་བསྟན། །ཞེས་དང་། པདྨ་དབང་ཆེན་དྲེགས་པ་གནད་འབེབས་ཀྱི་རྒྱུད་ལས། གནས་དང་ཉེ་བའི་གནས་དང་གཉིས། །ཡུལ་དང་ཉེ་བའི་ཡུལ་དང་གཉིས། །ཞིང་དང་ཉེ་བའི་ཞིང་དང་གཉིས། །དུར་ཁྲོད་ཉེ་བའི་དུར་ཁྲོད་གཉིས། །ཚནྡོ་ཉེ་བའི་ཚནྡོ་གཉིས། །ཕྱོགས་བཅུ་རྣམས་སུ་གཟིགས་པར་གྱུར། །ཞེས་གསུངས་པའི་ཕྱིར་རོ།།

བདེ་མཆོག་འབྱུང་བའི་རྒྱུད་ལས་ཀྱང་། གནས་དང་ཉེ་བའི་གནས་དང་ནི། །དེ་བཞིན་ཞིང་དང་ཉེ་བའི་ཞིང་། །ཚན་དྷོ་ཉེ་བའི་ཚན་དྷོ་ཧ། །འདུས་པ་ཉེ་བའི་འདུས་པ་དང་། །དུར་ཁྲོད་ཉེ་བའི་དུར་ཁྲོད་དེ། །འཛམ་བུའི་གླིང་ན་ཡང་དག་གནས། །ཞེས་གླང་པོ་རབ་འབོག་གི་རྒྱུད་སོགས་དང་མཐུན་པའི་གནས་བཅུ་བཤད་པས་ཧེ་རུ་ཀའི་གནས་བཅུ་ཟེར་བ་དེ་གསར་རྙིང་གཉིས་ཀའི་རྒྱུད་དུ་བསྟན་པ་ཞིག་ཏུ་ངེས་ཏེ། རྣལ་འབྱོར་མའི་ཀུན་དུ་སྤྱོད་པའི་རྒྱུད་ལས། ཧེ་རུ་ཀ་དཔལ་རྣལ་འབྱོར་ཆེའི། །གནས་ནི་ཡི་གེའི་ས་པ་ཡིན། །ཞེས་དང་། སློབ་དཔོན་ཆེན་པོ་ཧཱུཾ་མཛད་རྡོ་རྗེས་མཛད་པའི་དཔལ་ཧེ་རུ་ཀའི་སྒྲུབ་པའི་ཐབས་ཞེས་པ་ལས། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །ཞེས་ཧེ་རུ་ཀ་སྙིང་རོལ་གྱི་ལུང་དེ་དྲངས་པ་དང་། ཡང་ཧཱུཾ་མཛད་གྲགས་པས་མཛད་པའི་ཡན་ལག་བཞིའི་དོན་སྣང་བར་བྱེད་པ་ལས། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་དུ། །ཞེས་ཧེ་རུ་ཀ་སྙིང་རོལ་གྱི་ལུང་ཇི་བཞིན་གསུངས་པས་ཀྱང་ཤེས་པའི་ཕྱིར་རོ།།

དེ་བཞིན་དུ་ཧེ་རུ་ཀ་ཡི་གནས་དགུ་ཟེར་བ་ཡང་བཤད་དེ། སློབ་དཔོན་སངས་རྒྱས་ཡེ་ཤེས་ཀྱིས་མཛད་པའི་ཧེ་རུ་ཀའི་སྒྲུབ་ཐབས་ལས། གསང་ནས་རྣལ་འབྱོར་དུས་རྟག་ཏུ། །དེ་ལྟར་བརྟུལ་ཞུགས་ཧེ་རུ་ཀ །ཧེ་རུ་ཀ་ཡི་གནས་དགུ་ལ། །མཚན་མོ་བསྒྲུབ་པར་བསྙེན་པར་བྱ། །ཞེས་གསུངས་པའི་ཕྱིར་རོ།།

དེ་བཞིན་དུ་གནས་ཆེན་བཅུ་བོ་དེ་དག་རྣལ་འབྱོར་བའི་ལམ་བགྲོད་པའི་རིམ་པའི་ས་བཅུ་ལ་སྦྱར་ཏེ་ནང་གི་གནས་སུ་རྒྱུད་ལས་རྒྱ་ཆེར་གསུངས་ཏེ། དང་པོ་གནས་ནི་ས་དང་པོ་རབ་ཏུ་དགའ་བའི་ས་དང་། དེ་བཞིན་དུ་ཉེ་བའི་གནས་ནི་ས་གཉིས་པ་དྲི་མ་མེད་པ་དང་། ཞིང་ནི་ས་གསུམ་པ་འོད་བྱེད་པའི་ས་དང་། ཉེ་བའི་ཞིང་ནི་ས་བཞི་བ་འོད་འཕྲོ་བ་དང་། ཉེ་བའི་ཚན་དྷོ་བ་ས་ལྔ་བ་སྦྱང་དཀའ་བའི་ས་དང་། ཚན་དྷོ་བ་ས་དྲུག་པ་མངོན་དུ་གྱུར་པའི་ས་དང་། འདུས་པ་ས་བདུན་པ་རིང་དུ་སོང་བ་དང་། ཉེ་བར་འདུས་པ་ས་བརྒྱད་པ་མི་གཡོ་བ་དང་། དུར་ཁྲོད་ས་དགུ་བ་ལེགས་པའི་བློ་གྲོས་དང་། ཉེ་བའི་དུར་ཁྲོད་ས་བཅུ་བ་ཆོས་ཀྱི་སྤྲིན་གྱི་ས་ཡི་རྣམ་དག་ལ་སྦྱར་ནས་གསུངས་པའི་ཕྱིར། གྲུབ་སྟེ། བདེ་མཆོག་འབྱུང་བ་ལས། གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ས་ཡིན་ཏེ། །ཉེ་བའི་ཞིང་ནི་འོད་འཕྲོ་བ། །མངོན་དུ་གྱུར་པ་ཚན་དྷོར་ཤེས། །ཉེ་བའི་ཚན་དྷོ་སྦྱང་དཀའ་བའོ། །འདུས་པ་རིང་དུ་སོང་བ་སྟེ། །མི་གཡོ་བར་གྲགས་ཉེ་འདུས་པ། །དུར་ཁྲོད་དེ་བཞིན་ལེགས་བློ་གྲོས། །ཉེ་བའི་དུར་ཁྲོད་ཆོས་ཀྱི་སྤྲིན། །གནས་སོགས་ས་ཡི་རྣམ་དག་པ། །རིམ་པ་ཇི་བཞིན་བཤད་པ་ཡིན། །གནས་དང་ཉེ་གནས་སོགས་བསྟེན་པས། །མི་རྣམས་དྲི་མ་མེད་པར་འགྱུར། །བློ་ལྡན་རྣམ་རྟོག་མེད་པ་ནི། །རྒྱུ་ཞིང་མཚན་མ་ཡང་དག་བརྟག །ཅེས་གསུངས་པའི་ཕྱིར་རོ།།

གཞན་ཡང་མངོན་པར་བརྗོད་པའི་རྒྱུད་བླ་མ་ལས། ཉི་ཤུ་རྩ་བཞིར་ཕྱེ་བ་ཡི། །གནས་སོགས་འདི་ཉིད་ལ་གནས་ཏེ། །ཞེས་གསུངས་པ་ལྟར། བདེ་མཆོག་སོགས་རྒྱུད་དུ་མ་ནས་སྨོས་མ་ཐག་པའི་གནས་དེ་བཅུ་བོ་ཡང་དཔའ་བོ་མཁའ་འགྲོ་རིག་པ་འཛིན་པ་འདུ་བའི་ཡུལ་གནས་ཡུལ་ཉེར་བཞིར་ཕྱེས་འདུག་སྟེ། པུལླི་ར་དང་། ཛ་ལན་དྷ་ར་དང་། ཨུ་རྒྱན་གྱི་གནས་དང་། ཨར་བུ་ཏ་སྟེ་བཞི་གནས་དང་། གོ་དཱ་ཝ་རི་དང་། རཱ་མེ་ཤྭ་ར་དང་། དེ་ཝི་ཀོ་ཊི་དང་། མ་ལ་ཝ་སྟེ་བཞི་ཉེ་བའི་གནས་སུ་བསྟན་ཏེ། བདེ་མཆོག་འབྱུང་བའི་རྒྱུད་ལས། གནས་ནི་པུལླི་རིར་གྲགས་ཏེ། །དེ་བཞིན་ཛཱ་ལན་དྷ་རའང་གནས། །ཨུ་རྒྱན་དེ་བཞིན་གནས་ཡིན་ཏེ། །དེ་བཞིན་ཨར་བུ་ཏ་ཡང་གནས། །ཉེ་གནས་གོ་ད་བ་རི་སྟེ། །དེ་བཞིན་ར་མེ་ཤྭ་རིའི་མིང་། །དེ་བི་ཀོ་ཊིར་མངོན་བརྗོད་དང་། །མ་ལ་བ་ཡང་ཉེ་བའི་གནས། །ཞེས་གསུངས་པའི་ཕྱིར། ཡང་། ཀཱ་མ་རཱུ་པ་དང་། ཨོ་དྲེ་གཉིས་ནི་ཞིང་དང་། ཏྲི་ཤ་ཀུ་ན་དང་། ཀོ་ས་ལཱ་གཉིས་ནི་ཉེ་བའི་ཞིང་དུ་གསུངས་ཏེ། དེ་ཉིད་ལས། ཞིང་ནི་ཀཱམ་རཱུའི་མིང་ཅན་ཏེ། །ཨོ་དྲིར་མངོན་པར་བརྗོད་པའང་ཞིང་། །ཉེ་ཞིང་ཏྲི་ཤ་ཀུ་ན་སྟེ། །ཀོ་ས་ལཱའང་ཉེ་བའི་ཞིང་། །ཞེས་གསུངས་པའི་ཕྱིར། དེ་བཞིན་དུ་ཀ་ལིང་ཀ་དང་། ལམྤ་ཀ་གཉིས་ཚན་དྷོ་ཧ་དང་། ཀཱཉྩི་དང་། ཧི་མ་ལ་ཡ་གཉིས་ནི་ཉེ་བའི་ཚན་དྷོ་ཧ་རུ་བཤད་དེ། ཡང་དེ་ཉིད་ལས། ཀ་ལིང་ཀ་དང་ལམ་པ་ཀའང་། །དེ་བཞིན་ ཚན་དྷོ་ཧ་ཡིན་ཏེ། །ཀཱཉ་ཙི་ཧི་མ་ལ་ཡ་ནི། །ཁྱད་པར་ཉེ་བའི་ཚན་དྷོ་ཧའོ། །ཞེས་གསུངས་པའི་ཕྱིར། གཞན་ཡང་པྲེ་ཏ་པུ་རི་དང་། གྲྀ་ཧ་དེ་ཝ་གཉིས་འདུས་པ་དང་། སཽ་རཥྚ་དང་། སུ་བརྞ་དྭཱི ་པེའམ་གསེར་གླིང་གཉིས་ཉེ་བའི་འདུས་པ་ཡིན་པར་གསུངས་ཏེ། དེ་ཉིད་ལས། འདུས་པ་པྲེ་ཏ་བ་སི་ནི། །གྲི་ཧ་དེ་བ་ཡང་དེ་བཞིན། །སཽ་རཥྚ་དང་གསེར་གླིང་གང་། །ཉེ་བའི་འདུས་པ་གཉིས་ཡིན་ནོ། །ཞེས་གསུངས་པའི་ཕྱིར། ཡང་པ་ཏིལྤུ་ཏྲ་དང་། སིནྡྷུ་གཉིས་དུར་ཁྲོད་དང་། མ་རུ་ཙ་དང་། ཀུ་ལུ་ཏཱ་གཉིས་ཉེ་བའི་དུར་ཁྲོད་དུ་བཤད་དེ། དེ་ཉིད་ལས། པ་ཏིལ་པུ་ཏྲ་དུར་ཁྲོད་དེ། །སིན་དྷུའང་དེ་བཞིན་དུར་ཁྲོད་དོ། །མ་རུ་ཀུ་ལུ་ཏཱ་གཉིས་ནི། །ཉེ་བའི་དུར་ཁྲོད་གནས་སུ་བཤད། །ཅེས་གསུངས་པའི་ཕྱིར། དེ་ལྟར་གནས་བཅུ་ཡིས་བསྡུས་པའི་གནས་ཡུལ་ཉི་ཤུ་རྩ་བཞི་གསུངས་པ་བླ་མེད་ཀྱི་རྒྱུད་དུ་མར་ཡོངས་གྲགས་སོ།།

གཞན་ཡང་གནས་ཡུལ་ཉེར་བཞི་པོ་དེ་དག་རྣལ་འབྱོར་བའི་ནང་རྡོ་རྗེའི་ལུས་ཀྱི་ཆ་ཤས་དང་རྩ་གནས་ཀྱི་འཁོར་ལོ་ལ་སྦྱར་ཏེ་ལུས་ལ་གནས་ཉེར་བཞི་ཚང་ཚུལ་བསྟན་ཏེ། མགོ་བོ་ནི་པུལླཱི་ར་ཡི་གནས་དང་། སྤྱི་གཙུག་ཛཱ་ལན་དྷ་རའི་གནས་དང་། རྣ་བ་གཡས་པ་ཨོ་རྒྱན་གྱི་ཡུལ་དང་། མགོ་རྒྱབ་བམ་མགོ་ལྟག་ཨར་བུ་ཏ་ཡི་གནས་དང་། རྣ་བ་གཡོན་པ་གོ་དཱ་བ་རིའི་གནས་དང་། སྨིན་དབུས་ར་མེ་ཤྭ་རའི་གནས་དང་། མིག་གཉིས་ནི་དེ་བི་ཀོ་ཊིའི་གནས་དང་། དཔུང་པ་གཉིས་མ་ལ་ཝ་ཡི་གནས་དང་། མཆན་ཁུང་གཉིས་ཀཱ་མ་རཱུ་པའི་གནས་དང་། ནུ་མ་གཉིས་ནི་ཨོ་དྲེའམ་ཨོ་ཏྲིའི་གནས་དང་། ལྟེ་བ་ཏྲི་ཤ་ཀུ་ཡི་གནས་དང་། །སྣ་རྩེ་ཀོ་ས་ལ་ཡི་གནས་དང་། ཁ་ནི་ཀ་ལིང་ཀ་ཡི་གནས་དང་། མགྲིན་པ་ལམྤ་ཀ་ཡི་གནས་དང་། སྙིང་ག་ཀཉྩིའི་གནས་དང་། འདོམས་བར་ནི་ཧི་མ་ལ་ཡའི་གནས་དང་། མཚན་མ་པྲེ་ཏ་བུ་རིའི་གནས་དང་། བཤང་ལམ་གྲི་ཧ་དེ་བ་ཏ་ཡི་གནས་དང་། བརླ་གཉིས་སཽ་རཥྚ་ཡི་གནས་དང་། རྐང་བའི་བྱིན་པ་སྟེ་རྗེ་ངར་གཉིས་ནི་གསེར་གླིང་གི་གནས་དང་། རྐང་པའི་སོར་མོ་ནཱ་ག་རའི་གནས་དང་། རྐང་པའི་བོལ་གོང་ནི་སིན་དྷུའི་གནས་དང་། རྐང་བའི་མཐེ་བོ་ནི་མ་རུ་དེ་ཤའམ་མ་རུ་ཙའི་གནས་དང་། པུས་མོ་གཉིས་ནི་ཀུ་ལུ་ཏ་ཡི་གནས་ཡིན་པར་གསུངས་པའི་ཕྱིར། གྲུབ་སྟེ། བདེ་མཆོག་འབྱུང་བའི་རྒྱུད་ལས། རྩ་ཡི་གནས་དང་ཡུལ་རྣམས་ནི། །ཉི་ཤུ་རྩ་བཞིའི་གྲངས་ཡིན་ཏེ། །དེ་རྣམས་དབུས་ཀྱི་རྩ་གསུམ་གང་། །ཐམས་ཅད་ཁྱབ་ཅིང་རྟེན་པའོ། །མགོར་ནི་པུལླཱི་ར་ཡིན་ཏེ། །སོ་དང་སེན་མོ་འབབ་པས་གནས། །སྤྱི་གཙུག་ཛཱ་ལན་དྷ་ར་སྟེ། །སྐྲ་དང་སྤུ་ནི་འབབ་པར་གནས། །ཨོ་ཌི་ཡན་རྣ་བ་གཡས་པའི་རྩ། །ལྤགས་པ་དང་ནི་དྲི་མ་འབབ། །མགོ་རྒྱབ་ཨར་བུ་ད་ཡིན་ཏེ། །ཤ་ནི་ཡང་དག་འབབ་པའི་རྩ། །གོ་ཏ་བ་རི་རྣ་བ་གཡོན། །རྒྱུས་པ་ཡང་དག་འབབ་པའི་རྩ། །སྨིན་དབུས་ར་མེ་ཤྭ་རི་སྟེ། །རྟག་ཏུ་རུས་པ་འབབ་པའོ། །མིག་ནི་དེ་བི་ཀོ་ཊིར་གནས། །མཆིན་པ་འབབ་པའི་རྩ་ཡིན་ནོ། །མ་ལ་བ་ནི་དཔུང་པ་གཉིས། །སྙིང་ལ་འབབ་པའི་རྩ་གནས་སོ། །མཆན་ཁུང་ཀཱ་མ་རཱུ་པ་སྟེ། །རྟག་ཏུ་མིག་ནི་འབབ་པའོ། །ནུ་མ་གཉིས་ནི་ཨོ་ཏྲི་སྟེ། །རྟག་ཏུ་མཁྲིས་པ་འབབ་པའི་རྩ། །ཏྲི་ཤ་ཀུ་ནི་ལྟེ་བ་སྟེ། །རྩ་ནི་གློ་བ་འབབ་པས་གནས། །སྣ་རྩེ་ཀོ་ས་ལ་ཡིན་ཏེ། །རྒྱུ་མའི་ཕྲེང་བ་འབབ་པས་གནས། །ཁ་ནི་ཀ་ལིང་ཀ་ཡིན་ཏེ། །རྟག་ཏུ་གཉེ་མ་འབབ་པས་གནས། །མགྲིན་པ་ལམ་པ་ཀ་ཡིན་ཏེ། །རྟག་ཏུ་ལྟོ་བ་འབབ་པའི་རྩ། །ཀན་ཙི་སྙིང་གའི་གནས་ཡིན་ཏེ། །བཤང་བ་འབབ་པའི་རྩ་ཡིན་ནོ། །འདོམས་བར་ཧི་མ་ལ་ཡ་སྟེ། །མཚོགས་མའི་མཚམས་ནི་འབབ་པའི་རྩ། །པྲེ་ཏ་བུ་རི་མཚན་མ་སྟེ། །བད་ཀན་འབབ་པའི་རྩ་ཡིན་ནོ། །གྲི་ཧ་དེ་བ་ཏ་བཤང་ལམ་སྟེ། །རྟག་ཏུ་རྣག་ནི་འབབ་པའོ། །བརླ་གཉིས་སཽ་རཥྚ་ཡིན་ཏེ། །རྟག་ཏུ་ཁྲག་ནི་འབབ་པའོ། །བྱིན་པ་གཉིས་ནི་གསེར་གླིང་གནས། །རྡུལ་འབབ་པ་ཡི་རྩ་ཡིན་ནོ། །རྐང་པའི་སོར་མོ་ནཱ་ག་ར། །རྟག་ཏུ་ཚིལ་འབབ་རྩར་ཤེས་བྱ། །རྐང་པའི་བོལ་ནི་སིན་དྷུ་སྟེ། །མཆི་མ་འབབ་པའི་གཟུགས་ཅན་མ། །མ་རུ་དེ་ཤེ་མཐེ་བོ་སྟེ། །རྟག་ཏུ་མཆིལ་མ་འབབ་པས་གནས། །ཀུ་ལུ་ཏ་ནི་པུས་མོ་སྟེ། །རྟག་ཏུ་སྣ་ཆུ་འབབ་པས་གནས། །ཞེས་དང་། དེ་ལྟར་ཕྱི་རོལ་གནས་སུ་གྲགས། །ནང་གི་གནས་ཉིད་ལུས་སུ་བརྗོད། །རང་ལུས་རྩ་ཡི་གཟུགས་ལ་འདིར། །གནས་ཀྱི་མིང་དུ་རབ་ཏུ་གྲགས། །དེ་གཟུགས་ལྷ་ཡི་རྣམ་པ་སྟེ། །དེས་ན་ནང་གི་བདག་ཏུ་གནས། །དེ་ཕྱིར་དེ་ཡི་གོང་བུའི་དངོས། །ལུས་འདི་སངས་རྒྱས་ཀུན་མཚུངས་པའོ། །ཞེས་གསུངས་པ་དང་། རྣལ་འབྱོར་མའི་ཀུན་དུ་སྤྱོད་པའི་རྒྱུད་ལས། ཧེ་རུ་ཀ་དཔལ་རྣལ་འབྱོར་ཆེའི། །གནས་ནི་ཡི་གེའི་ས་པ་ཡིན། །པུལླཱི་ར་མ་ཡ་མགོ་བོ་ལ། །ཛཱ་ལན་དྷ་ར་སྤྱི་གཙུག་ཉིད། ། ཨཽ་དྱཱིན་རྣ་བ་གཡས་པ་སྟེ། །ཨར་བུ་ད་ནི་རྒྱབ་ཕྱོགས་ལའོ། །གནས་སོ། །གོ་དཱ་བ་རི་རྣ་བ་གཡོན། །རཱ་མེ་ཤྭ་ར་སྨིན་མའི་མཚམས། །དེ་བི་ཀོ་ཊ་མིག་གཉིས་ཏེ། །མཱ་ལ་བ་ནི་དཔུང་མགོར་རོ། །ཉེ་བའི་གནས་སོ། །ཀཱ་མ་རཱུ་པ་མཆན་ཁུང་དགོད། །ཨོ་ཊེ་ནུ་མ་གཉིས་ལའོ། །ཞིང་ངོ་། །ཏྲི་ཤ་ཀུ་ན་ལྟེ་བའི་དབུས། །ཀོ་ས་ལ་ནི་སྣ་རྩེར་རོ། །ཉེ་བའི་ཞིང་ངོ་། །ཀ་ལིང་ག་ནི་ཁ་ལ་དགོད། །ལྃ་པཱ་ཀ་ནི་མགྲིན་དབུས་ཉིད། །ཚན་དོ་ཧའོ། །ཀཉྩི་སྙིང་ལ་དགོད་པར་བྱ། །ཧི་མཱ་ལ་ཡ་མཚན་རྩར་རོ། །ཨུ་པ་ཚན་དོ་ཧའོ། །པྲེ་ཏ་པུ་རི་མཚན་ལ་སྟེ། །གྲྀ་ཧ་དེ་བ་བཤང་ལམ་ལའོ། །འདུ་བ་ཅན་ནོ། །སཽ་རཱཥྚ་བརླ་གཉིས་བསམ། །གསེར་གླིང་རྗེ་ངར་གཉིས་ལའོ། །ཉེ་བར་འདུ་བ་ཅན་ནོ། །ན་ག་ར་ནི་སོར་མོར་རོ། །སིན་དྷུ་རྐང་པའི་བོལ་གཉིས་ལའོ། །དུར་ཁྲོད་དོ། །མ་རུ་མཐེ་བོ་གཉིས་ལ་དགོད། །ཀུ་ལུ་ཏཱ་ནི་པུས་མོར་གནས། །ཉེ་བའི་དུར་ཁྲོད་དོ། །ཞེས་གསུངས་པ་དང་། ཕག་མོ་མངོན་བྱུང་གི་བཤད་པའི་རྒྱུད་ཕྱི་མ་ལས། ཕག་མོ་མངོན་པར་བྱང་ཆུབ་པ་ཞེས་བྱ་བ། པུ་ལླཱི་ར་མ་ལ་ཡ་སྟེ་མགོ་ལ་རབ་ཏུ་གཏུམ་མའོ། །ཛཱ་ལན་དྷ་ར་སྟེ་སྤྱི་གཙུག་ལ་གཏུམ་པའི་མིག་ཅན་མའོ། །ཨོཾ་ཊི་ཡན་ཏེ་རྣ་བ་གཡས་པ་འོད་ལྡན་མའོ། །ཞེས་སོགས་ནས། ཀུ་ལུ་ཏ་སྟེ་པུས་མོ་གཉིས་ལ་བརྩོན་འགྲུས་ཆེན་མོའོ། །ཞེས་གསུངས་པའི་ཕྱིར་རོ།།

དེ་བཞིན་དུ་དཔལ་ཕྱག་རྒྱ་ཆེན་པོའི་ཐིག་ལེའི་རྒྱུད་ལས། ཨུ་ཌི་ཡ་ན་སྤྱི་བོའི་གནས། །ཛཱ་ལན་དྷ་ར་སྤྱི་གཙུག་དྲན། །པཱུལླི་ར་ནི་མཚོགས་མ་སྟེ། །ཀཱ་མ་རཱུ་ནི་སྨིན་ཕྲག་དབུས། །ཞེས་པ་ནས། ནེ་པ་ལ་ནི་ལྟག་པ་སྟེ། །ཀཾ་པོ་ཛི་ནི་རྐེད་པའོ། །ཞེས་ལུས་ཀྱི་གནས་སུ་འགོད་སྟངས་དང་ངོས་འཛིན་སྟངས་དང་། གནས་ཀྱི་མིང་དང་། གྲངས་ཀ་ཡང་བདེ་མཆོག་དང་མི་འདྲ་བ་ཙམ་གསུངས་མོད། གནས་ཡུལ་དེ་དག་རྡོ་རྗེའི་ལུས་ལ་འགོད་པ་ནི་དགོངས་པ་མཐུན་ལ། དཔལ་ཉི་མའི་འཁོར་ལོའི་རྒྱུད་ལས། པུལླི་ར་དང་ཛཱ་ལན་སོགས། །ནང་དུ་སྤྱི་བོ་སྤྱི་གཙུག་སོགས། །གནས་ཀྱི་དབྱེ་བ་མ་སྤངས་པའོ། །ཞེས་དང་། རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་ལས། དེ་ལ་གནས་ཀྱི་དབྱེ་བ་ནི། །མདོར་བསྡུས་ནས་ནི་བཤད་པར་བྱ། །པཱུ་ལླི་ར་ནི་མགོ་བོར་ཤེས། །སྤྱི་གཙུག་ཛཱ་ལན་དྷ་ར་དང་། །རྣ་བ་གཡས་པར་ཨོ་ཊུན་དང་། །སྤྱི་བོའི་རྒྱབ་ནི་ཨརྦུ་ད། །གོ་དཱ་བ་རི་རྣ་བ་གཡོན། །རཱ་མེ་ཤྭ་རི་སྨིན་མའི་དབུས། །མིག་གཉིས་དེ་ཝི་ཀོ་ཊི་དང་། །མཱ་ལ་ཝེ་ནི་དཔུང་པའི་རྩ། །ཀཱ་མ་རཱུ་པ་མཆན་ཁུང་གཉིས། །ཀུ་ལུ་ནུ་མ་གཉིས་སུ་གྲགས། ། ཀོ་ས་ལ་ནི་ལྟེ་བར་ཤེས། །ཏྲི་ས་ཀུ་ནི་སྣ་ཡི་རྩ། །ཁ་ཡི་པད་མ་ཀ་ལིང་ག །མགྲིན་པ་ལམ་བཱ་ཀར་ནི་བརྗོད། །སྙིང་ནི་ཀཉྩིར་ཤེས་པར་བྱ། །ཧི་མ་ལ་ཡ་འདོམས་སུ་ཤེས། །མཚན་མ་གྲྀ་ཧ་དེ་ཝ་དང་། །པྲེ་ཏ་པུ་རི་བཤང་བའི་ལམ། །བརླ་གཉིས་སུ་ཝརྞྞ་དྭཱི་པ། །སཽ་རཥྚ་ནི་བྱིན་པ་གཉིས། །རྐང་པའི་བོལ་ནི་སིན་དྷཱུའི་ཡུལ། །སོར་མོ་རྣམས་ལ་ནཱ་ག་ར། །མཐེ་བོང་གཉིས་ནི་མ་རུར་ཤེས། །ཀུ་ལུ་ཏ་ནི་རྐང་པའི་མཐིལ། །ཞེས་གསུངས་པ་རྣམས་ལ་དྲངས་མ་ཐག་པའི་བདེ་མཆོག་འབྱུང་བའི་རྒྱུད་དང་། རྣལ་འབྱོར་མའི་ཀུན་དུ་སྤྱོད་པའི་རྒྱུད་དང་། ཕག་མོ་མངོན་བྱུང་གི་བཤད་པའི་རྒྱུད་ཕྱི་མ་གསུམ་དང་སྦྱོར་ཚུལ་ཅུང་མི་འདྲ་ཡོད་པ་ལ་སོགས་པ་བླ་མེད་ཀྱི་རྒྱུད་རྣམས་ལས་གནས་ཡུལ་ཉེར་བཞི་ལུས་ཀྱི་གང་ལ་སྦྱར་མི་འདྲ་བའི་ཁྱད་པར་འགའ་རེ་བྱུང་བས་གཞུང་རང་དུ་བལྟ་བར་བྱ་ལ། དེ་ཙམ་མ་གཏོགས་རྣལ་འབྱོར་བའི་ནང་རྡོ་རྗེའི་ལུས་ཀྱི་ཆ་ཤས་དང་། རྩ་གནས་ཀྱི་དག་པ་ལ་སྦྱར་བའི་ཚུལ་ནི་ཐམས་ཅད་དགོངས་པ་མཐུན་པར་རྒྱ་ཆེན་པོར་གསུངས་སོ།།

ཡང་བཤད་མ་ཐག་པའི་གནས་བཅུའི་སྟེང་དུ་འཐུང་གཅོད་དང་། ཉེ་བའི་འཐུང་གཅོད་གཉིས་བསྣན་ཏེ་ཕྱི་གནས་ཆེན་པོ་བཅུ་གཉིས་དང་། ནང་དེ་བཅུ་གཉིས་ས་བཅུ་གཉིས་ལ་སྦྱར་བ་དང་། དེ་བཅུ་ལས་ཕྱེས་པའི་གནས་ཡུལ་ཉེར་བཞི་པོ་དེ་ལྟར་ས་བཅུ་ལ་སྦྱར་ཚུལ་ཡང་གསུངས་ཏེ། རྡོ་རྗེ་དཔལ་མཆོག་ཆེན་པོ་བརྟག་པ་དང་པོ་ལས། གནས་ནི་པུ་ལི་ར་ཡར་བརྗོད། །དེ་བཞིན་ཛ་ལན་དྷ་ར་དང་། །ཨཽ་རྒྱན་ཨར་བུ་ཏ་ཉིད་དེ། །རབ་ཏུ་དགའ་བའི་སར་བརྗོད་པའོ། །བ་གླང་བདག་པོ་ཉེར་གནས་ཏེ། །ར་མེ་ཤྭ་རི་ཉིད་དང་ནི། །དེ་བ་ཀོ་ཚ་མཱ་ལ་བ། །དྲི་མ་མེད་པའི་ས་རབ་གནས། །ཀཱ་མ་རཱུ་པ་ཨོ་ཊ་ནི། །ཞིང་དུ་བརྗོད་པ་ངེས་པ་ཡིན། །འོད་འཕྲོའི་ས་ནི་འདིར་ཐོབ་བྱེད། །ཏྲི་ཤ་ཀུ་ཎི་ཀོ་ས་ལ། །ཉེ་བའི་ཞིང་སྟེང་ས་བཞི་པ། །ཀ་ལིང་ཀ་དང་ལམ་པ་ཀ ། ཚན་དོ་ཧ་སྟེ་ས་ལྔ་པ། །ཀན་ཉྩི་ཧི་མ་ལ་ཡར་ནི། །ཉེ་བའི་ཚན་དོ་ས་དྲུག་པའོ། །པྲེ་ཏ་པུ་རི་ཁྱིམ་གྱི་ལྷ། །འདུས་པ་ཅན་ཏེ་ས་བདུན་པ། །སཽ་རཥྚ་གསེར་གླིང་སྟེ། །ཉེ་བའི་འདུས་པ་ས་བརྒྱད་པ། །ན་ག་ར་དང་སིན་དྷུ་སྟེ། །དུར་ཕྲོད་ས་ནི་དགུ་པ་ཡིན། །མ་རོ་ཀུ་ལུ་ཐ་འདི་དག །ཉེ་བའི་དུར་ཁྲོད་ས་བཅུ་པ། །ཆོས་ཀྱི་སྤྲིན་དུ་མངོན་པར་བརྗོད། །ཀོང་ཁ་ན་དང་ཁ་བའི་རི། །ཙ་རི་ཏྲ་དང་ཀྂ་པོ་ཙེ། །འཐུང་གཅོད་ས་ནི་བཅུ་གཅིག་པ། །ཧ་རི་ཀེ་ ལ་ཏྃ་བྷ་ལ། །ཙ་ར་སིང་ཧ་རི་ལྡན་པ། །ནི་རི་ཏི་པའི་གླིང་གྱུར་པ། །ཉེ་བའི་འཐུང་གཅོད་བརྗོད་པར་བྱ། །འདི་དག་ས་ནི་བཅུ་གཉིས་ཏེ། །ཁྱད་པར་འབིགས་བྱེད་གཞོན་ནུའི་གནས། །བཅུ་གསུམ་པ་ཡི་ས་བརྗོད་ལ། ། ཡོངས་སུ་གནས་པ་བདེ་བ་ཆེ། །ཞེས་དང་། མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ལས། སླར་ཡང་གནས་དང་ཉེ་གནས་སོགས། །དེ་ལྟར་ས་ཡི་དབུས་སུ་ཡང་། །ས་བཅུ་གཉིས་སུ་འདོད་པ་ཡིན། །ཞེས་དང་། ཀྱེའི་རྡོ་རྗེ་རྒྱུད་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་ཉིད་དང་། །ཙྪན་དོ་ཉེ་བའི་ཙྪན་དོ་དང་། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་ཉིད། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ཉིད། །འདིས་ནི་གཞན་གྱིས་བརྗོད་མི་བྱ། །ཞེས་དང་། དཔལ་རྡོ་རྗེ་ཕྲེང་བ་ལས། དེ་ལྟར་གནས་ཀྱི་རྣམ་དག་དང་། །ས་བཅུ་རྣམ་པར་དག་པ་ཉིད། །དེ་ཉིད་དང་ལྡན་ཤེས་པར་བྱ། །ཞེས་གསུངས་པ་སོགས་དང་། དཔལ་ཡང་དག་པར་སྦྱོར་བའི་རྒྱུད་ལ་སོགས་པ་བླ་མེད་ཀྱི་རྒྱུད་དུ་མ་ལས་གསུངས་སོ།།

བྱང་སེམས་རྡོ་རྗེ་སྙིང་པོས་མཛད་པའི་ཀྱེའི་རྡོ་རྗེ་བསྡུས་དོན་གྱི་རྒྱ་ཆེར་འགྲེལ་ལས། གནས་བཞི་རྣམས་དང་ཉེ་བའི་གནས་བཞི་རྣམས་དང་། ཞིང་བཞི་རྣམས་དང་ཉེ་བའི་ཞིང་བཞི་རྣམས་དང་། ཚནྡོ་ཧ་བཞི་དང་། ཉེ་བའི་ཚནྡོ་ཧ་བཞི་དང་། འདུ་བ་བཞི་རྣམས་དང་། ཉེ་བའི་འདུ་བ་བཞི་རྣམས་དང་། འཐུང་གཅོད་བཞི་རྣམས་དང་། ཉེ་བའི་འཐུང་གཅོད་བཞི་རྣམས་དང་། དུར་ཁྲོད་བཞི་རྣམས་དང་། ཉེ་བའི་དུར་ཁྲོད་བཞི་རྣམས་ཏེ། དེ་ལྟར་ཀྱེ་རྡོ་རྗེ་ནས་བཤད་པའི་གནས་བཅུ་གཉིས་པོ་རེ་རེ་ལ་བཞི་བཞི་ཕྱེས་པའང་མཆིས་མོད་སྤྲོས་པས་ཆོག་གོ།

ཕྲ་མེན་བརྒྱད་ཀྱི་བཤགས་པ།

བཞི་བ་ཕྲ་མེན་བརྒྱད་ཀྱི་བཤགས་པ་ནི། ཤ་ཁྲག་མཆོད་པ་གཞུང་བཞིན་མ་བཤམས་ཏེ༔ སེང་ཧ་ཕྲ་མེན་ཐུགས་དང་ཅི་འགལ་བ༔ ཡུལ་ཀྱི་མཁའ་འགྲོའི་སྐུ་བཟོད་པར་གསོལ༔ ཞེས་པའི་རྐང་པ་གསུམ་གྱིས་བསྟན། དེ་ཡང་ཟླ་གསང་ཐིག་ལེ་ལས། ཤ་ཁྲག་དང་ནི་རྒྱུ་མ་དང་། །རྐང་དང་ཚིལ་བུ་ཟ་སྤྱོད་པ། །དཀྱིལ་འཁོར་བྱས་ཏེ་འདུག་པ་ནི། །ཚོགས་ཀྱི་དཀྱིལ་འཁོར་གཞག་པར་བྱ། །ཞེས་དང་། རྡོ་རྗེ་ཁྲོ་བོའི་རྒྱལ་པོའི་རྟོག་པ་བསྡུས་པའི་རྒྱུད་ལས། ཚོགས་ཀྱི་བདག་པོ་གཏོར་མས་མཆོད། །མ་མོ་རྣམས་དང་ལེགས་ལྡན་སྲས། །ཤ་ཁྲག་མེ་ཏོག་ནག་པོས་མཆོད། །ཅེས་དང་། མཁའ་འགྲོ་མ་མེ་ལྕེ་འབར་བའི་རྒྱུད་ལས། རུ་ཏྲ་ནག་པོའི་སྙིང་དང་བདུད་རྩི་ལྔ། །སྨན་མའི་ཁྲག་དང་ཤ་ཁྲག་སྣ་ཚོགས་དང་། །ཕྱེ་མ་ལྔ་ཡིས་གཏོར་བས་གུར་ཀུམ་བརྫི། །པདྨའི་རཀྟས་བྱུགས་ལ་རྒྱུན་གཏོར་བྱ། །ཞེས་དང་། རྟ་མཆོག་རོལ་བའི་རྒྱུད་ལས། ཤ་ཁྲག་ནང་རོལ་བདུད་རྩི་དང་། །རུས་རྐང་དབང་པོར་བཅས་པ་ལ། །ཚོགས་ཀྱི་ལོངས་སྤྱོད་སྟོན་མོར་མཛད། །ཀུན་གྱི་དགྱེས་པ་རྡོ་རྗེའི་གླུས། །མཐུན་པར་སྒྲ་དབྱངས་གཅིག་གིས་བསྟོད། །ཅེས་དང་། མི་གཡོ་བའི་གསང་རྒྱུད་ལས། བདུད་རྩི་ཤ་དང་ཁྲག་ལ་སོགས། །གཏོར་མ་ཐམས་ཅད་སྦྱིན་པར་བྱ། །ཞེས་གསུངས་པ་ལྟར། སྔགས་བླ་མེད་ཀྱི་སྐབས་སུ་ཤ་ལྔ་བདུད་རྩི་ལྔ་དང་བསྟན་དགྲ་བསྒྲལ་བའི་ཤ༷་ཁྲ༷ག་ནང་རོལ་གྱི་མཆོ༷ད་པ༷་རྒྱ་ཆེན་པོས་རང་གིས་གང་བསྒྲུབ་པའི་ཡི་དམ་གྱི་ལྷ་ཡེ་ཤེས་པ་བཀའ་སྡོད་ཕོ་ཉའི་ཚོགས་དང་བཅས་པ་ལ་མཆོད་དགོས་པར་གསུངས་པ་དེ་རྒྱུད་གཞུང༷་ནས་ཇི་སྐད་བཤད་པ་བཞི༷ན་དུ་ཕྱག་ལེན་ལ་འཐེབས་པར་བྱས་ཏེ་ཁྲོ་བོའི་དཀྱིལ་འཁོར་སྤྱི་དང་། བྱེ་བྲག་ཏུ་ཕྲ་མེན་མ་ཤ་ཁྲག་ལ་དགྱེས་པའི་ཚུལ་འཆང་བའི་ལྷ་མོ་སེང་ཧ་སྨུག་ནག་མ་ལ་སོགས་པ་རྣམས་ལ་མཆོད་དགོས་པ་ལ། དེ་ལྟར་མ་མཆོད་ཅིང་དེའི་མཆོད་རྫས་ཚང་བར་མ༷་བཤ༷མས་པ་དང་། ཤ་ལྔ་བདུད་རྩི་ལྔ་སྔགས་ཀྱི་དམ་ཚིག་ཏུ་མ་བསྟེན་པས་མཆོད་རྫས་ཆག་པའི་ཉེས་ལྟུང་གི་ཚོགས་ངན་པ་བསགས་ཏེ༷། རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་མེ་ལོང་གི་རྒྱུད་ལས། ཧེ་བརྒྱད་ས་བོན་ལས་བྱུང་བ། །སྟག་དང་སེང་གེ་ཝ་དང་ཁྱི། །བྱ་རྒོད་ཀཱང་ཀ་འུག་པ་དང་། །ཕོ་རོག་ལ་སོགས་ཕྲ་མེན་རྣམས། །ཞེས་གསུངས་པ་ལྟར་གྱི་སེང༷་ཧ༷་མ་ལ་སོགས་པའི་ཕྲ༷་མེ༷ན་མ་བརྒྱད་ཀྱི་ཐུག༷ས་ད༷ང་ཅི༷་འག༷ལ་བ༷་ཡི་དམ་ཚིག་ཉམས་པའི་ཚོགས་དེ་ཉིད། ཡེ་ཤེས་རྔམ་གློག་ལས། གནས་དང་ཡུལ་གྱི་ཕྱག་རྒྱ་དགོད། །ཅེས་དང་། གསང་བའི་སྙིང་པོ་ལས། གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །ཅེས་དང་། མཁས་པ་ཆེན་པོ་བྷ་བ་བྷ་དྲའི་ཞབས་ཀྱིས་མཛད་པའི་འཁོར་ལོ་སྡོམ་པའི་དཀའ་འགྲེལ་ལས། ཡུལ་ཉི་ཤུ་རྩ་བཞི་ཉིད་གནས་ལ་སོགས་པའི་མཁའ་འགྲོ་མ་ནི། ཞེས་དང་། སློབ་དཔོན་ལྷ་སྦས་ཀྱིས་མཛད་པའི་འཁོར་ལོ་སྡོམ་པའི་སྒྲུབ་ཐབས་ཀྱི་རྒྱ་ཆེར་འགྲེལ་ལས། བླ་ན་མེད་པ་ཐམས་ཅད་དེ་ཡུལ་ཉི་ཤུ་རྩ་བཞི་པོ་རྣམས་སོ། །དེ་རྣམས་སུ་བླ་ན་མེད་པའི་གནས་ལ་སོགས་པ་ཐམས་ཅད་ཉི་ཤུ་རྩ་བཞིའི་མཁའ་འགྲོ་མ་རྣམས་སོ། །ཞེས་གསུངས་པའི་སྐབས་ཀྱི་ཡུལ་ཉི་ཤུ་རྩ་བཞི་ལ་སོགས་པ་ལས་ཡུལ་བཞི་དང་ཉེ་བའི་ཡུལ༷་བཞི་ན་གནས་ཤིང་རྒྱུ་བའི་ཡུལ་གྱི༷་མ་མོ་སེང་ཧ་སྨུག་ནག་མ་ལ་སོགས་པའི་ཕྲ་མེན་མ་བརྒྱད་ཀྱི་ཚུལ་བཟུང་བའི་མཁ༷འ་འགྲོ༷འི་ཚོགས་ཀྱི་སྐུ༷་ལ༷་འགྱོད་པས་མཐོལ་ཞིང་བཤགས་ལ། བཟོ༷ད་པ༷ར་གསོ༷ལ་ལོ་ཞེས་བཤགས་པའོ། །དེས་ན་སྐབས་འདིའི་ཡུལ་ཞེས་པ་ནི་ཡུལ་དང་ཉེ་བའི་ཡུལ་ལ་གོ་ཞིང་། ངེས་དོན་དང་སྦྱར་ན། ཡེ་ཤེས་རྔམ་གློག་ལས། ཡུལ་བརྒྱད་ཕྲ་མེན་བརྒྱད་ལ་བསྟིམ། །ཞེས་དང་། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སེང་སྟག་ལ་སོགས་ཡུལ་དུ་སྣང་། །ཞེས་གསུངས་པ་ལྟར། མིག་སོགས་ཀྱི་ཡུལ་གཟུགས་སྒྲ་དྲི་རོ་རེག་བྱ་ལྔ་དང་། ཡིད་ཀྱི་རྣམ་པར་ཤེས་པའི་ཡུལ་ཤེས་པ་དང་ལྡན་མིན་འདུ་བྱེད་དང་འདུས་མ་བྱས་ཀྱི་ཆོས་བཅས་ཆོས་ཁམས་དང་། ཉོན་ཡིད་ཀྱི་ཡུལ་ཀུན་གཞི་དང་། ཀུན་གཞིའི་ཡུལ་ཆོས་ཐམས་ཅད་བཅས་སྣང་བ་ཡུལ་བརྒྱད་ཀྱི་ངོ་བོ་རྣམ་པར་དག་པའི་དབྱིངས་དང་། དེ་ཇི་བཞིན་ངེས་པའི་ཡེ་ཤེས་ལ་ལས་དང་འཇིག་རྟེན་གྱི་མཁའ་འགྲོ་མའམ་སེང་ཧ་ཕྲ་མེན་བརྒྱད་དུ་བརྡར་བཏགས་པའོ། །ཡང་ན་དེ་འདྲའི་ཡེ་ཤེས་ཀྱི་ངང་ལས་འབྱུང་པོའི་མ་མོ་གདུག་པ་ཅན་རྣམས་འདུལ་བའི་ཆེད་དུ་མ་མོ་ཕྲ་མེན་མའི་གཟུགས་སུ་སྤྲུལ་པ་རྣམས་ཞེས་འགྲེལ་བར་བྱའོ།།

འཕྲོས་དོན་ཤ་ཁྲག་གི་མཆོད་པའི་སྐོར་བཤད་པ

རྟ་གདོང་སྒོ་མ་བཞིའི་བཤགས་པ།

ལྔ་བ་སྒོ་མ་བཞིའི་བཤགས་པ་ནི། ཤར་ལྷོ་ནུབ་བྱང་སྒོ་བཞི་མ་ཕྱེད་དེ༔ རྟ་གདོང་སྒོ་མའི་ཐུགས་དང་ཅི་འགལ་བ༔ ཡེ་ཤེས་སྒོ་མ་བཞི་ལ་བཟོད་པར་གསོལ༔ ཞེས་པའི་ཚིགས་བཅད་རྐང་པ་གསུམ་གྱིས་བསྟན་ལ། དམ་པ་རིགས་བརྒྱའི་བསྐྱེད་རིམ་བསྒོམ་པའི་ཚེ་ན་ཁྲོ་བོའི་དཀྱིལ་འཁོར་གྱི་ཤར༷་དུ་སྒོ་མ་རྟ་གདོང་མ་དང་། ལྷོ༷་རུ་ར་གདོང་མ་དང་། ནུབ༷་ཏུ་སེང་གདོང་མ་དང་། བྱང༷་དུ་སྦྲུལ་གདོང་མ་བཞི་པོ་བཀྲ་ལམ་མེ་རུ་གསལ་བའི་ཏིང་ངེ་འཛིན་མ་གསལ་ཞིང་། སྒོ་མ་དེ་བཞི་ལ་ཡང་ཚད་མེད་རྣམ་བཞིའི་ངོ་བོ་ལ་རྟོག་པ་དང་བྲལ་བའི་དག་པ་དྲན་པར་མ་ནུས་པར་དག་པས་མ་ཟིན་ཞིང་སྒོ༷་མ་བཞི༷་པོ་རྣམས་སོ་སོར་དབྱེ་པའི་བསྐྱེད་རིམ་གྱི་ང་རྒྱལ་བརྟན་པའི་རྣམ་པ་གསལ་མ་ནུས་པས་དེ་དག་གི་རྒྱན་དང་ཆ་ལུགས་དང་བཅས་པ་མ་འདྲེས་པར་སོ་སོར་མ༷་ཕྱེད༷་དེ༷་ལོག་པར་རྟོག་པ་དང་བདག་དང་མཚན་མར་ཞེན་དབང་གིས་སྒོ་མ་བཞིའི་དམ་ཚིག་དང་འགལ་བའི་ཉེས་པ་བྱུང་སྟེ་རྟ༷་གདོང༷་མ་ལ་སོགས་པའི་སྒོ༷་མའི༷་ཚོགས་ཀྱི་ཐུག༷ས་དང༷་ཅི༷་འག༷ལ་བ༷འི་ཉམས་ཆག་རྣམས་ཚད་མེད་རྣམ་བཞི་རྣམ་པར་དག་པའི་ཟག་པ་མེད་པའི་ཡེ༷་ཤེས༷་བཞོན་རླུང་ལྷའི་རྣམ་པར་ཤར་བའི་སྒོ༷་མ༷་བཞི༷་ལ༷་ནོངས་པས་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

མཁའ་འགྲོ་བཅུ་གཅིག་གི་བཤགས་པ།

དྲུག་པ་མཁའ་འགྲོ་བཅུ་གཅིག་གི་བཤགས་པ་ནི། འདའ་ཀ་ཁས་བླངས་འཁོར་དྲུག་མ་ཐུལ་ཏེ༔ མ་བདུན་སྲིང་བཞིའི་ཐུགས་དང་ཅི་འགལ་བ༔ མཁའ་འགྲོ་བཅུ་གཅིག་སྐུ་ལ་བཟོད་པར་གསོལ༔ ཞེས་པའི་ཚིགས་བཅད་པའི་རྐང་པ་གསུམ་གྱིས་བསྟན་ལ། དེ་ཡང་གསང་བ་འདུས་པའི་རྒྱུད་ལས། འདི་ནི་སྔགས་རྣམས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །ཞེས་དང་། དེ་ཉིད་བསྡུས་པ་ལས། འདི་ནི་ཤིན་ཏུ་འདའ་དཀའ་བར། །སངས་རྒྱས་ཆོས་ལ་མནའ་མདོར་ཞིང་། །བདེན་པ་མཆོག་འདི་གསུངས་ན་ནི། །དབང་བསྐུར་བ་ནི་ཐོབ་པར་འགྱུར། །ཞེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པའི་རྒྱུད་ལས། འདའ་དཀའ་རྡོ་རྗེ་དམ་ཚིག་གཏན་གྱི་གཉེར། །ཞེས་གསུངས་པ་ལྟར། ཤིན་ཏུ་འད༷འ་བར་དཀ༷འ་བ་སྟེ། འདའ་མི་རུང་ཞིང་འདའ་ན་ལས་སླ་བ་མ་ཡིན་པར་དཀའ་བར་གྱུར་པ་དམྱལ་བ་མནར་མེད་པ་ལ་སོགས་པའི་སྡུག་བསྔལ་དྲག་པོ་བཟོད་དཀའ་བ་རྣམས་བསྐྱེད་པའི་རྒྱུར་གྱུར་བའི་གསང་སྔགས་ཀྱི་དམ་ཚིག་མང་པོ་ཁས༷་བླང༷ས་ནའང་ཁས་བླངས་པ་ཇི་བཞིན་དུ་བསྲུང་བར་བྱ་མ་ནུས་པའི་དབང་གིས་དམ་ཚིག་རྣམས་ལས་འགལ་བ་དང་། ཁྱད་པར་དུ། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། འདོད་ཆགས་དམ་ཚིག་ཉམས་འགྱུར་ན། །མངལ་གྱི་གྲོང་ཁྱེར་ཆེན་པོར་འགྲོ། །ཞེ་སྡང་དམ་ཚིག་ཉམས་འགྱུར་ན། །རཀྵ་སྲིན་པོའི་རིགས་སུ་འགྲོ། །གཏི་མུག་དམ་ཚིག་ཉམས་འགྱུར་ན། །མི་གཙང་ཟས་སུ་ཟ་བ་ཡི། །རྨོངས་པའི་ཕག་ཆེན་ལུས་སུ་སྐྱེས། །ང་རྒྱལ་དམ་ཚིག་ཉམས་འགྱུར་ན། །རུས་སྦལ་ནག་པོའི་ལུས་སུ་ལྟུང་། །ཕྲག་དོག་དམ་ཚིག་ཉམས་འགྱུར་ན། །ཆུ་སྲིན་མགོ་དགུའི་ལུས་སུ་ལྟུང་། །དམ་ཚིག་ཆེན་པོ་ཀུན་ཉམས་ན། །རུ་དྲ་ནག་པོའི་ལུས་སུ་ལྟུང་། །ཞེས་གསུངས་པ་ལྟར། སྔོན་རུ་དྲ་འཁོར་དང་བཅས་པ་དེ་ལྟར་དུག་ལྔའི་དབང་གིས་དམ་ཚིག་ཉམས་པ་ལས་རུ་དྲར་སྐྱེས་ཤིང་། དེ་ལས་ཀྱང་གསང་སྔགས་ཀྱི་དོན་ལ་སྤྱོད་ཀྱང་ལོག་པར་སྤྱད་དེ་གཟུང་འཛིན་དང་རྟག་ཆད་ཀྱི་བལྟ་བ་སུམ་བརྒྱ་དྲུག་ཅུའི་མཐུ་བརྟས་པ་ལས་དམ་ཚིག་འདའ་དཀའ་བ་རྣམས་ལས་ཉམས་ཏེ་འབྲས་བུ་རུ་དྲའི་འཁོར་དུ་འབྱུང་པོ་མ་རུང་བ་སྙེགས་པའི་ཕོ་ཉ་དང་ཕྱག་བརྙན་གཤོག་པ་ཅན་བརྒྱ་དང་ཉི་ཤུ་དང་། འཛིན་པའི་ཕོ་ཉ་དང་ཕྱག་བརྙན་སྡེར་མོ་ཅན་བརྒྱ་དང་ཉི་ཤུ་དང་། གསོད་པའི་ཕོ་ཉ་དང་ཕྱག་བརྙན་མཆེ་བ་ཅན་བརྒྱ་དང་ཉི་ཤུ་བཅས་སྲིན་པོའི་ཕོ་ཉ་དང་ཕྱག་བརྙན་སུམ་བརྒྱ་དྲུག་ཅུ་བཅས་སྲིན་པོའི་ཡུལ་གྱི་ཤར་ལྷོ་ནུབ་བྱང་གི་ཕྱོགས་བཞི་རེ་རེ་ན་དྲུག་ཅུ་རེ་དང་། བླ་འོག་གཉིས་རེ་རེ་ན་དྲུག་ཅུ་རེ་གནས་ནས་སེམས་ཅན་ཐམས་ཅད་ལ་གནོད་པར་གྱུར་པ་ལ། དེ་བཞིན་གཤེགས་པ་ཐམས་ཅད་ཀྱི་སྐུ་ལས་འོད་ཟེར་དཀར་སེར་དམར་ལྗང་མཐིང་ག་དཔག་མེད་སྤྲོས་ཏེ་ཕྱོགས་བཅུ་ཐམས་ཅད་འོད་ཟེར་གྱི་སྣང་བ་ཆེན་པོས་ཁྱབ་པར་བྱས་ནས་ཤར་ཕྱོགས་སུ་མེ་ལོང་ཡེ་ཤེས་ཀྱི་འོད་དཀར་པོ་ལས་ཕོ་ཉ་རྡོ་རྗེ་འབར་མ་ལ་སོགས་པའི་དུང་གི་མི་མོ་དྲུག་ཅུ་དང་། ལྷོ་ནས་མཉམ་ཉིད་ཡེ་ཤེས་ཀྱི་འོད་མཐིང་ག་ལས་རིན་ཆེན་དབང་ཕྱུག་མ་ལ་སོགས་པའི་ལྕགས་ཀྱི་མི་མོ་དྲུག་ཅུ་དང་། ནུབ་ཕྱོགས་སུ་སོར་རྟོགས་ཡེ་ཤེས་ཀྱི་འོད་དམར་པོ་ལས་པདྨ་ཐོག་འབེབས་མ་ལ་སོགས་པའི་ཟངས་ཀྱི་མི་མོ་དྲུག་ཅུ་དང་། བྱང་ནས་བྱ་བ་ནན་ཏན་གྱི་ཡེ་ཤེས་ཀྱི་འོད་ལྗང་གུ་ལས་ལས་རྡོ་རྗེ་མ་ལ་སོགས་པའི་གཡུའི་མི་མོ་དྲུག་ཅུ་དང་། འོག་ཕྱོགས་སམ་དབུས་ནས་སྟོང་པ་ཉིད་ཀྱི་ཡེ་ཤེས་ཀྱི་འོད་ཟེར་སེར་པོ་ལས་ཁྲོ་མོ་ཆེན་མོ་རྡོ་རྗེ་རྣམ་སྙེམས་མ་ལ་སོགས་པའི་གསེར་གྱི་མི་མོ་དྲུག་ཅུ་དང་། སྟེང་ཕྱོགས་ནས་ཆོས་དབྱིངས་ཡེ་ཤེས་ཀྱི་འོད་མཐིང་ནག་ལས་མ་མོ་ཆེན་མོ་རལ་པ་གཅིག་མ་ལ་སོགས་པའི་བསེའི་མི་མོ་དྲུག་ཅུ་ནི་སྲིན་པོའི་ཕོ་ཉ་མ་དེ་རྣམས་དང་ཆ་ལུགས་མཐུན་པར་སྤྲུལ་ནས་དེ་དག་བཏུལ་ཏེ་དཔལ་ཆེན་པོའི་འཁོར་དུ་འདུས་པའི་ཚུལ་གྱིས་བཞུགས་པའི་ཕོ་ཉ་སུམ་བརྒྱ་དྲུག་ཅུ་སྟེ། དེ་འདྲའི་ཡེ་ཤེས་ཀྱི་ཕོ་ཉ་རྣམས་ལེགས་པར་བསྐྱེད་དེ་ཕྱོགས་བཞི་དང་སྟེང་འོག་གཉིས་ཏེ་དྲུག་གི་རུ་དྲའི་འཁོ༷ར་དྲུག༷་གི་འབྱུང་པོའི་ཕོ་ཉ་སུམ་བརྒྱ་དྲུག་ཅུ་རྣམས་འདུལ་དགོས་པ་ལ་མ༷་ཐུ༷ལ་བར་གྱུར་བ་སྟེ། གཙོ་བོ་སྲིན་པོའི་འཁོར་དྲུག་རྣམས་སུ་སྐྱེ་བའི་རྒྱུ་ཉོན་མོངས་པ་དང་། དེས་བསྐྱེད་པའི་དམ་ཚིག་ཉམས་པའི་ཉེས་པ་རྣམས་མ་འཐུལ་བར་རྒྱུད་ལ་བྱུང་བར་གྱུར་ཏེ༷། སེམས་ཅན་ཐམས་ཅད་ལ་ནད་དང་རིམས་རྣམ་པ་སྣ་ཚོགས་པ་བཏང་བར་བྱེད་པའི་སྲིན་པོའི་ཕོ་ཉ་མོ་ནད་ཀྱི་བདག་མོར་གྱུར་པ་སྲིན་མོ་ཆེན་མོ་བརྐམ་མ་དང་། སྲིན་མོ་ཆེན་མོ་རབ་ཏུ་བརྐམ་མ་དང་། སྲིན་མོ་ཆེན་མོ་དྲི་མ་འདོན་པ་དང་། སྲིན་མོ་ཆེན་མོ་ཕོར་ཐོགས་དང་། སྲིན་མོ་ཆེན་མོ་གཡང་གཞི་མ་དང་། སྲིན་མོ་ཆེན་མོ་སྐུལ་བྱེད་མ་དང་། སྲིན་མོ་ཆེན་མོ་མྱོས་བྱེད་མ་དང་བདུན་གྱི་འདུལ་བྱེད་ཀྱི་གཉེན་པོར་དཔལ་ཆེན་པོ་ཧེ་རུ་ཀའི་སྤྲུལ་པའི་གསང་བའི་མ་མོ་ཆེན་མོ་རྡོ་རྗེ་ཧཱུྃ་གྲགས་མ་དང་། རྡོ་རྗེ་ཀུན་གསལ་མ་དང་། རྡོ་རྗེ་ཀུན་བཟང་མོ་དང་། རྡོ་རྗེ་ཆེན་མོ་ཡེ་ཤེས་མཆོག་དང་། རྡོ་རྗེ་འོད་ཆགས་མ་དང་། རྡོ་རྗེ་འོད་གསལ་མ་དང་། རྡོ་རྗེ་གཡུ་སྒྲོན་རལ་གཅིག་མ་སྟེ་གསང་བའི་མ༷་མོ་ཆེན་མོ་བདུ༷ན་དུ་གྲགས་པ་རྣམས་ཀྱི་ཐུགས་དང་འགལ་བའི་ལས་ཅི་མཆིས་པ་དང་། དེ་བཞིན་དུ་སེམས་ཅན་ཐམས་ཅད་ཀྱི་ཡིད་བསླུ་ཞིང་ཆགས་པས་སྨྱོས་པར་བྱས་པས་སྲོག་དང་འབྲལ་བར་བྱེད་པའི་ལས་ཀྱིས་གནོད་བྱེད་པའི་ཤར་ཕྱོགས་ན་དྲི་ཟའི་མགྱོགས་མའམ་བདུད་ཀྱི་བུ་མོ་ཟ་བྱེད་མ་དང་། ལྷོར་གཤིན་རྗེའི་མགྱོགས་མའམ་རྨོངས་བྱེད་མ་དང་། ནུབ་ཏུ་ཀླུའི་མགྱོགས་མའམ་ཟ་བ་རྒྱས་འདེབས་མ་དང་། བྱང་ན་གནོད་སྦྱིན་གྱི་མགྱོགས་མའམ་རྨོངས་པ་སྐེམ་བྱེད་མ་བཞི་རུ་འབོད་པའི་སྲིན་པོའི་ཆུང་མ་བཞིར་གནས་པ་དེ་བཞི་དཔལ་ཆེན་པོའི་ཐུགས་གསང་བའི་ཡུམ་དཀར་མོ་མིག་གཅིག་རྒྱས་འདེབས་མ་དང་། བདེ་བ་རྨོངས་བྱེད་མ་དང་། བདེ་བ་ཟ་བྱེད་མ་དང་། བདེ་བ་ཚེ་འཕེལ་མ་དང་བཞི་ཡིས་སྲིན་མོ་དེ་རྣམས་དང་སྤྱོད་པ་དང་ཆ་ལུགས་མཐུན་པར་སྤྲུལ་ནས་བཏུལ་བར་བྱས་པའི་འདུལ་བྱེད་ཀྱིས་གཉེན་པོ་སྲིང༷་མོ་ཆེན་མོ་བཞིའི༷་ཐུག༷ས་ད༷ང་ཅི༷་འག༷ལ་བ༷འི་ཉེས་པའི་ཚོགས་ཅི་མཆིས་པ་རྣམས་མཁ༷འ་འགྲོ༷་མ་མོ་བཅུ༷་གཅི༷ག་སྟེ་མ་བདུན་དང་སྲིང་མོ་བཞིའི་སྐུ༷་ལ༷་འགྱོད་པས་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་མ་བདུན་སྲིང་བཞི་ལ་བཤགས་པའོ།།

དེ་ཡང་མ་བདུན་དང་སྲིང་མོ་བཞི་ནི། ཧེ་རུ་ཀ་སྙིང་རྗེ་རོལ་བ་ལས། མ་མོ་ཆེན་མོ་བདུན་རྣམས་དང་། །སྲིང་མོ་ཆེན་མོ་བཞི་རྣམས་དང་། །མཁའ་འགྲོ་འཁོར་བཅས་ཐམས་ཅད་ལ། །ཞེས་དང་། སྔ་འགྱུར་རཀྟ་དམར་གྱི་རྒྱུད་ལས། མ་བདུན་དང་། སྲིང་བཞི་དང་། ཞེས་དང་། རྙིང་རྒྱུད་ཚོགས་རྒྱུད་ཆེན་མོ་ལས། མ་བདུན་སྲིང་བཞི་གསང་བའི་ཡུམ་ཆེན་ལ། ཞེས་དང་། ལྷ་མོ་གཙུག་ཏོར་རོལ་བ་ལས། མ་མོ་བདུན་གྱིས་རིག་སྔགས་ཀྱིས་བཅད། སྲིང་མོ་བཞིའི་ཕུར་བུས་གདབ། ཅེས་དང་། འཇམ་དཔལ་རྩ་རྒྱུད་ལས། སྲིང་མོ་བཞི་ཞེས་རྣམ་གྲགས་པ། ཞེས་གསུངས་པ་ལྟར་གསར་རྙིང་གི་རྒྱུད་སྡེ་དུ་མ་ལས་བྱུང་ལ། མ་བདུན་སྲིང་བཞིའི་མཚན་ནམ་མིང་དེ་ལྟར་ཡིན་པའི་ཁུངས་ནི་ཡོད་དེ། མ་བདུན་གྱི་མཚན་དེ་ལྟར་ཡིན་པའི་ཁུངས་ཡོད་པ་གང་ཞིག། སྲིང་མོ་བཞིའི་མིང་དེ་ལྟར་ཡིན་པའི་ཁུངས་ཀྱང་ཡོད་པའི་ཕྱིར། དང་པོ་གྲུབ་སྟེ། དཔལ་འབར་ཁྲོ་མོའི་རྒྱུད་ལས། གསང་བའི་མ་བདུན་བྱུང་སྟེ། རྡོ་རྗེ་ཧཱུྃ་གྲགས་མ་དང་། རྡོ་རྗེ་ཀུན་གསལ་མ་དང་། རྡོ་རྗེ་ཀུན་བཟང་མོ་དང་། རྡོ་རྗེ་ཆེན་མོ་ཡེ་ཤེས་མཆོག་དང་། རྡོ་རྗེ་འོད་ཆགས་མ་དང་། རྡོ་རྗེ་འོད་གསལ་མ་དང་། རྡོ་རྗེ་གཡུ་སྒྲོན་རལ་གཅིག་མ་དང་བདུན་གྱིས། ཞེས་གསུངས་པའི་ཕྱིར་རོ།།

དེ་དག་དཀྱིལ་འཁོར་གྱི་ཕྱོགས་གང་དུ་འགོད་ཚུལ་ནི། མ་མོ་བདུན་ནི་དཀྱིལ་འཁོར་གྱི་ཤར་དུ་རྡོ་རྗེ་ཀུན་གྲགས་མ་དང་རྡོ་རྗེ་ཀུན་བཟང་མོ་དང་། ལྷོ་རུ་རྡོ་རྗེ་ཀུན་གསལ་མ་དང་རྡོ་རྗེ་ཡེ་ཤེས་མ་དང་། ནུབ་ཏུ་རྡོ་རྗེ་འོད་ཆགས་མ་དང་རྡོ་རྗེ་འོད་འཕྲོ་མ་དང་། བྱང་དུ་རྡོ་རྗེ་གཡུ་ཡི་སྒྲོན་མ་རྣམས་འགོད་པར་གསུངས་ཏེ། སྨིན་གླིང་གཏེར་ཆེན་རིག་འཛིན་འགྱུར་མེད་རྡོ་རྗེས་མཛད་པའི་ཚོགས་ཆེན་འདུས་པའི་སྒྲུབ་ཐབས་དངོས་གྲུབ་ཆར་འབེབས་ལས། ཁྱམས་ལྔ་པ་ལ་མ་བདུན་སྲིང་བཞི་སྟེ། ཞེས་པ་ནས། ཤར་དུ་རྡོ་རྗེ་ཀུན་གྲགས་མ་དང་ཀུན་བཟང་མོ། ལྷོར་རྡོ་རྗེ་ཀུན་གསལ་མ་དང་རྡོ་རྗེ་ཡེ་ཤེས་མ། ནུབ་ཏུ་རྡོ་རྗེ་འོད་ཆགས་མ་དང་རྡོ་རྗེ་འོད་འཕྲོ་མ། བྱང་དུ་རྡོ་རྗེ་གཡུ་ཡི་སྒྲོན་མའོ། །ཞེས་གསུངས་པའི་ཕྱིར་རོ།།

རྒྱུད་གཞན་དུ་རྡོ་རྗེ་གར་གྱི་དབང་ཕྱུག་མ་དང་། རྡོ་རྗེ་གསལ་བ་གློག་འཛིན་མ་དང་། རྡོ་རྗེ་ཀུན་བཟང་མཐུ་མོ་ཆེ་དང་། རྡོ་རྗེ་ཡེ་ཤེས་ཆེན་མོ་མ་དང་། རྡོ་རྗེ་གསུང་ཆེན་འོད་འབར་མ་དང་། རྡོ་རྗེ་གསུང་སྒྲོག་ཆེན་མོ་དང་། རྡོ་རྗེ་སྒྲོལ་མ་ཟ་བྱེད་མ་སྟེ་མ་མོ་བདུན་དང་། ཤར་ཀྱི་རྡོ་རྗེ་སྤྱན་གཅིག་མ་དཀར་མོ་དང་། ལྷོ་ཡི་རྡོ་རྗེ་རལ་གཅིག་མ་སེར་མོ་དང་། ནུབ་ཀྱི་རྡོ་རྗེ་དབང་སྡུད་མ་དམར་མོ་དང་། བྱང་གི་རྡོ་རྗེ་ལས་མཁན་མ་སྔོན་མོ་སྟེ་སྲིང་མོ་བཞི་ཞེས་མིང་ཅུང་མི་འདྲ་བའང་ཡོད་དེ། རྡོ་རྗེ་ཕུར་བ་མདུང་རྩེ་དམར་པོའི་རྒྱུད་ལས། རྡོ་རྗེ་གར་གྱི་དབང་ཕྱུག་མ། རྡོ་རྗེ་གསལ་བ་གློག་འཛིན་མ། རྡོ་རྗེ་ཀུན་བཟང་མཐུ་མོ་ཆེ། རྡོ་རྗེ་ཡེ་ཤེས་ཆེན་མོ། རྡོ་རྗེ་གསུང་ཆེན་འོད་འབར་མ། རྡོ་རྗེ་གསུང་སྒྲོག་ཆེན་མོ། རྡོ་རྗེ་སྒྲོལ་མ་ཟ་བྱེད་མ། ཞེས་མིང་བཏགས་སོ། །ཞེས་གསུངས་པའི་ཕྱིར་རོ།།

གཉིས་པ་གྲུབ་སྟེ། དཔལ་འབར་ཁྲོ་མོའི་རྒྱུད་ལས། དཔལ་ཆེན་པོའི་ཐུགས་གསང་བའི་གཟུངས་མ་བཞི་ལས། གསང་བའི་ཡུམ་ཆེན་མོ་བཞི་སྟེ། བདེ་བ་ཟ་བྱེད་མ་དང་། བདེ་བ་རྨོངས་བྱེད་མ་དང་། བདེ་བ་རྒྱས་འདེབས་མ་དང་། བདེ་བ་ཚེ་འཕེལ་མ་དང་བཞིར་སྤྲུལ་ནས། ཞེས་དང་། དཔལ་ཆེན་པོའི་ཐུགས་གསང་བའི་ཡུམ་དཀར་མོ་མིག་གཅིག་རྒྱས་འདེབས་མ་དང་། བདེ་བ་རྨོངས་བྱེད་མ་དང་། བདེ་བ་ཟ་བྱེད་མ་དང་། བདེ་བ་ཚེ་འཕེལ་མ་དང་བཞིས། ཞེས་གསུངས་པའི་ཕྱིར་རོ།།

སྲིང་མོ་དེ་དག་དཀྱིལ་འཁོར་གྱི་ཕྱོགས་གང་དུ་འགོད་ཚུལ་ནི། ཤར་དུ་གླིང་བཞི་མགྱོགས་མ་དང་། ལྷོ་རུ་མཁའ་ལ་ཁྱུང་ལྡིང་མ་དང་། ནུབ་ཏུ་དམར་མོ་གཡག་ཐོད་མ་དང་། བྱང་དུ་ནག་མོ་སྡེར་ཆེན་མ་སྟེ་བཞི་ནི་སྲིང་མོ་བཞི་ཡིན་ཞིང་དེ་ལྟར་འགོད་པར་གསུངས་ཏེ། སྨིན་གླིང་གི་སྒྲུབ་ཐབས་དངོས་གྲུབ་ཆར་འབེབས་ལས། ཤར་སྒོར་གླིང་བཞི་མགྱོགས་མ། ལྷོ་སྒོར་མཁའ་ལ་ཁྱུང་ལྡིང་མ། ནུབ་སྒོར་དམར་མོ་གཡག་ཐོད་མ། བྱང་སྒོར་ནག་མོ་སྡེར་ཆེན་མ་དང་བཞིའོ། །ཞེས་གསུངས་པའི་ཕྱིར་རོ།།

སྨིན་གླིང་གི་སྲིང་བཞིའི་མིང་བགྲང་ཚུལ་དེ་དཔལ་འབར་ཁྲོ་མོའི་རྒྱུད་དང་མི་འདྲ་ནའང་། རྒྱུད་ཁུངས་གཞན་ཡོད་དེ། ཕུར་བ་མདུང་རྩེ་དམར་པོའི་རྒྱུད་ལས། ཤར་ཀྱི་དཀར་མོ་རྡོ་རྗེ་སྤྱན་གཅིག་མ། ལྷོ་ཡི་སེར་མོ་རྡོ་རྗེ་རལ་གཅིག་མ། ནུབ་ཀྱི་དམར་མོ་རྡོ་རྗེ་དབང་སྡུད་མ། བྱང་གི་སྔོན་མོ་རྡོ་རྗེ་ལས་མཁན་མའོ། །ཞེས་གསུངས་པའི་ཕྱིར་རོ།།

རིག་འཛིན་འཇིགས་མེད་གླིང་པའི་རྒྱུད་ལུགས་ཕུར་བའི་དམ་ཅན་ལྕམ་དྲལ་གྱི་མཆོད་བསྐུལ་ལས། མ་བདུན་སྐུ་མདོག་དམར་ནག་ལ། །རྡོ་རྗེ་ཕུར་འདྲིལ་ཆས་དང་ལྡན། །ཞེས་མ་བདུན་ཀ་སྐུ་མདོག་དམར་ནག་ཅན་ཕྱག་ན་རྡོ་རྗེ་དང་ཕུར་བ་འདྲིལ་བ་དང་། ཡང་དེ་ཉིད་ལས། སྲིང་བཞི་སྨུག་ནག་ཐོད་ཁྲག་དང་། །ཕུར་འདྲིལ་རང་རང་རྒྱན་དང་ལྡན། །དཀར་སེར་དམར་དང་ལྗང་གུའི་མདོག །ཅེས་སྲིང་མོ་བཞིའི་སྐུ་མདོག་སྨུག་ནག་ཏུ་བཤད་པ་འདྲ་བ་ཞིག་གསུངས་མོད། དེ་མ་ཐག་ཏུ་མདོག་བཞི་བཤད་པ་དེས་སྨུག་ནག་ཅེས་པ་ཐོད་ཁྲག་གི་མདོག་ལ་གོ་བ་ཡིན་ནམ་སྙམ། འོན་ཀྱང་ཕྱི་མ་དེའི་ཁ་དོག་དེ་སྔོན་པོ་མིན་པར་ལྗང་གུར་གསུངས་པ་དེ་ཕུར་བའི་རྒྱུད་དྲངས་མ་ཐག་པ་དེར་མི་མཐུན་མོད། དོན་ལ་སྔོན་པོ་དང་ལྗང་གུ་ཁ་དོག་གཅིག་ཏུ་འདོད་དགོས་པ་ཡིན་ནམ་སྙམ་མོ།།

དེ་ལྟར་མ་བདུན་སྲིང་བཞིའི་ངོས་འཛིན་ཡང་དཀྱུས་སུ་བཀོད་པ་དེ་རྙིང་མ་སྤྱིར་གྲགས་པ་ལྟར་ལ། གཞན་ཡང་སྤྱན་འདྲེན་རྒྱུད་གསུམ་པ་ལས། ཚིག་དབང་ལྷ་མོ་སྒྲ་དབྱངས་དབྱངས་ཅན་མ། །བེའུ་འདྲ་དཔལ་གྱི་ལྷ་མོ་འོད་ཟེར་ཅན། །དཀར་ཤམ་བརྗོད་སྐྱོབ་གང་གཱ་ཡ་མུ་ན་། །སྲས་འཕན་དུང་ཅན་རི་མཁར་ནག་མོ་དང་། །མ་བདུན་སྲིང་མོ་བདུན་དང་སྲིང་མོ་བཞི། །ནག་མོ་ཆེན་མོ་རལ་པ་གཅིག་ལ་སོགས། །ལྷ་མོ་ཆེན་མོ་གནོད་སྦྱིན་ཆེན་མོ་དང་། །སྲིན་མོ་ཆེན་མོ་ཤ་ཟ་ཆེན་མོ་དང་། །གཞོན་ནུའི་སྐུ་འཚོ་རྫུ་འཕྲུལ་དབང་གིས་འཕགས། ཞེས་གསུངས་པ་ལྟར། མ་བདུན་ནམ་སྲིང་བདུན་དང་། སྲིང་མོ་བཞི་ཡི་ངོས་འཛིན་ཚུལ་གཞན་པ་ཡང་མཆིས་པ་དང་། འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ལས། འཇིག་རྟེན་ན་མ་བདུན་དང་། སྲིང་མོ་ཆེན་མོ་བདུན་དང་། ཞེས་གསུངས་པ་ཡང་ཀློང་བཤགས་འདིར་བསྟན་པའི་མ་བདུན་དང་གཅིག་གམ་སྙམ་མོ།།

ཕྱག་ན་རྡོ་རྗེ་དབང་བསྐུར་བའི་རྒྱུད་ལས། འོག་ལོགས་སུ་ནི་རྒྱ་མཚོ་དང་རྒྱ་མཚོའི་འགྲམ་ན་སྲིང་མོ་བཞི་རང་གི་ཕྱག་རྒྱ་དང་བཅས་པ་བྲི་བར་བྱ་སྟེ། དེ་ལ་ཏུམ་བུ་རུའི་ཕྱག་རྒྱ་ནི་དབྱུག་ཏོའོ། །རྒྱལ་མའི་ཕྱག་རྒྱ་ནི་མདུང་ཐུང་རྩེ་གསུམ་པའོ། །རྣམ་པར་རྒྱལ་མའི་ཕྱག་རྒྱ་ནི་པད་མའོ། །མི་ཕམ་མའི་ཕྱག་རྒྱ་ནི་འཁོར་ལོའོ། །གཞན་གྱིས་མི་ཐུབ་མའི་ཕྱག་རྒྱ་ནི་རྡོ་རྗེའོ། །ཞེས་སྲིང་མོ་བཞི་པོ་ནི་རྒྱལ་མ་དང་། རྣམ་པར་རྒྱལ་མ་དང་། མི་ཕམ་མ་དང་། གཞན་གྱིས་མི་ཐུབ་མ་དང་བཞི་རུ་གསུངས་ལ། འོ་ན་དེ་ལ་ཏུམ་བུ་རུའི་ཕྱག་རྒྱ་ནི་དབྱུག་ཏོའོ། །ཞེས་པ་དེ་ཅི་ཞེ་ན། དེ་ནི་འཇམ་དཔལ་རྩ་རྒྱུད་ལས། སྲིང་མོ་བཞི་ཞེས་རྣམ་གྲགས་པ། ཞེས་པའི་སྐབས་སུ། མིང་པོ་གཏུམ་བུ་རུ་ཞེས་གྲགས། ཞེས་པ་འབྱུང་བས་དེ་དང་དོན་མཐུན་པ་ཤེས་པར་བྱའོ།།

གསང་སྔགས་རྗེས་སུ་འཛིན་མའི་མདོ་ལས། ཀུན་དགའ་བོ་སྲིན་མོ་མདུན་ཡོད་དེ། དེ་དག་ནི་ཁྲག་གི་དྲི་ཚོར་ན་དཔག་ཚད་བརྒྱར་ཡང་རྒྱུག་གོ །དེ་དག་གང་ཞེ་ན། འདི་ལྟ་སྟེ། གཟི་བརྗིད་མཆོག་དང་། དགའ་བརྩེགས་དང་། སྣ་ཚོགས་སྦྱིན་སྤོངས་དང་། བྲན་དཀར་མོ་བཟང་དང་། འཇུག་འདོད་དང་། གྲོང་ཁྱེར་འཁོར་ཡུག་དང་། བདུན་པ་སྟེ་རི་སྲུང་ངོ་། །ཞེས་སྲིན་མོ་བདུན་གསུངས་པ་དང་། རིགས་སྔགས་ཀྱི་རྒྱལ་མོ་རྨ་བྱ་ཆེན་མོ་ལས། རབ་འཆར་ལྡན་དང་། སྲུང་བ་མོ་དང་། ཤ་ཟ་ཕྲ་མོ་དང་། གང་བ་བཟང་མ་དང་། མེ་སྲུང་མ་དང་། མཛའ་མོ་ནག་མོ་དང་། དྲང་སྲོང་སྲུང་མ་སྟེ། ཤ་ཟ་མོ་བདུན་པོ་འདི་དག་ནི་རྫུ་འཕྲུལ་དང་ལྡན་པ། འོད་དང་ལྡན་པ། ཁ་དོག་དང་ལྡན་པ། གྲགས་པ་དང་ལྡན་པ། རྫུ་འཕྲུལ་ཆེ་བ། ཞེས་སོགས་གསུངས་པའི་ཤ་ཟ་བདུན་བཤད་པ་རྣམས་ཀྱང་དོན་ལ་མ་མོ་བདུན་བསྟན་ཡུལ་དང་མིང་མི་འདྲ་བ་ཙམ་ལས་ཐམས་ཅད་གཅིག་གམ་སྙམ་མོད་ཐམས་ཅད་རྒན་མོའི་རྐང་པ་ཙནྡན་གྱི་དཔེར་འགྲོར་དོགས་པས་མི་སྤྲོའོ།།

གཞུང་འདི་དག་གི་འགྲེལ་བ་ནི་མ་མཐོང་བས་དེ་ལྟར་འགྲེལ་ལམ་སྙམ་པ་ལས་ཐག་ཆོད་པ་ནི་སྨྲ་བའི་སྤོབས་པ་མེད་པ་དང་། གོང་གི་སྤྱན་འདྲེན་རྒྱུད་གསུམ་པའི་ལུང་དོན་ཡང་འདི་ལྟར་ཡིན་ནམ་སྙམ་པས་དཔྱད་སྒོ་ཙམ་སྨྲས་པ་ལས་དེ་མཐུན་གྱི་རྒྱུད་གཞན་པ་ཡང་མ་མཐོང་བས་མ་བདུན་སྲིང་བཞི་ཞེས་འགྲེལ་ལམ་མ་བདུན་དང་། སྲིང་བདུན་དང་། སྲིང་བཞི་ཞེས་བཀྲལ་བ་གང་ཡིན་གསལ་ཁ་ལེགས་པོ་མ་མཐོང་ཡང་དཔྱད་ན་སྲིང་མོ་བཞི་ནག་མོ་རལ་གཅིག་མ་སོགས་ལྷ་མོ་དང་། གནོད་སྦྱིན་མོ་དང་། སྲིན་མོ་དང་། ཤ་ཟ་མོ་བཞིར་བྱས་ན་ཤིན་ཏུ་ལེགས་སྙམ་ལ། འོན་ཀྱང་སྲིང་མོ་བཞི་ཞེས་པའི་ཚིག་དེ་སྔོན་དུ་བཀོད་པ་དེས་དེ་ལྟར་ཡིན་པར་ཡང་སོམ་ཉི་དགོས་མིན་དཔྱད་པར་བྱའོ།།

དབང་ཕྱུག་ཉེར་བརྒྱད་ཀྱི་བཤགས་པ།

བདུན་པ་དབང་ཕྱུག་ཉེར་བརྒྱད་ཀྱི་བཤགས་པ་ནི། ལོངས་སྤྱོད་ཆུང་ནས་ཚོགས་ཀྱི་ཕུད་ཉམས་པས༔ ཕུད་ཉུལ་དབང་ཕྱུག་ཐུགས་དང་ཅི་འགལ་བ༔ དབང་མོ་ཉི་ཤུ་བརྒྱད་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ལ། མཁའ་འགྲོ་མ་མེ་ལྕེ་འབར་བའི་རྒྱུད་ལས། དེ་ནས་རྟག་ཏུ་སྔགས་དང་ཕྱག་རྒྱ་དང་། །ཏིང་འཛིན་རྫས་དང་དམ་ཚིག་མི་སྤོང་ངོ་། །རྟག་ཏུ་ཟས་ཀྱི་ཕུད་ཀྱིས་བསྟེན་པར་བཤད། །ཅེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། རྒྱུན་གྱི་རྒྱུན་དུ་མི་གཅད་པ། །རྡོ་རྗེ་ནམ་དང་ཉི་ཚོད་ལ། །ཡི་གེའི་ཚོགས་བསྐྱེད་ཚོགས་སྦྱར་ལ། །ཕུད་ལྷག་བཅས་སྦྱར་དེ་བཞིན་ནོ། །འདི་ནི་དོན་ལ་ཉེ་བའི་ལམ། །བསོད་ནམས་བསྐྲུན་པར་དེ་མྱུར་རོ། །ཞེས་གསུངས་པ་ལྟར། དུས་ལྟར་དཀྱིལ་འཁོར་དང་མ་མོ་དབང་ཕྱུག་མའི་ཚོགས་ལ་ཟས་ཕུད་དང་ཚོགས་ཕུད་དང་ལྷག་མའི་མཆོད་པ་འབུལ་དགོས་པར་གསུངས་ནའང་། རང་ཉིད་ལོང༷ས་སྤྱོད༷་ཀྱི་འབྱོར་བ་ཆུང༷་བ༷འི་དབང་གིས་མཆོད་པའི་རྫས་མང་པོ་མ་འབྱོར་བར་གྱུར་བས༷་ཚོག༷ས་ཀྱི༷་དགའ་སྟོན་དུས་ལྟར་དུ་མ་ཕུལ་ཞིང་གཏོར་ཕུད་དང་ཆང་ཕུད་སོགས་ཕུ༷ད་མཆོད་དང་། ཕུད་ཀྱི་ལྷག་མར་གྱུར་པའི་ཕུད་ལྷག་གི་གཏོར་མ་མཆོད་མ་ནུས་པར་ཉམ༷ས་པ༷་བྱུང་བས༷་ན། སྔོན་དཔལ་ཆེན་པོས་བཀའ་དམ་ལ་བཞག་པའི་དབང་གིས་ཕུད་དང་ལྷག་མ་ལ་དགྱེས་ཤིང་ཕུད་མཆོད་དང་ལྷག་མ་འཚོལ་ཞིང་ཉུལ་བའི་ཕུད༷་ཉུལ༷་མ་མ་མོ་ཆེན་མོ་དབ༷ང་ཕྱུག༷་མ་ཉེར་བརྒྱད་ལ་སོགས་པ་རྣམས་ཀྱི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་པ་དང་ཕུད་ཉམས་ཀྱི་ཉེས་པ་སོགས་ཅི་མཆིས་པ་ཐམས་ཅད་གཡག་གདོང་མ་ལ་སོགས་པའི་དབ༷ང་ཕྱུག་མོ༷་ཉི༷་ཤུ༷་རྩ་བརྒྱད༷་ཀྱི་ཚོགས་ལ༷་འགྱོད་པས་མཐོལ་ལོ། །བཤགས་སོ། །བཟོ༷ད་པ༷ར་གསོ༷ལ་ལོ། །ཞེས་ཚོགས་ཕུད་ཉམས་པའི་ཉེས་པའི་གཙོས་དབང་ཕྱུག་མ་རྣམས་མི་དགྱེས་པའི་ལས་བགྱིས་པ་བཤགས་པ་སྟེ། ཧེ་རུ་ཀ་སྙིང་རྗེ་རོལ་བ་ལས། ཟ་རོགས་ངན་པའི་དབང་དུ་གྱུར་པས་ན། །ཕུད་དང་ལྷག་མར་གྱུར་པ་མཐོལ་ཞིང་བཤགས། །ཕུད་དང་ལྷག་མ་ཉམས་པའི་སྐྱོན་དབང་གིས། །ཕུད་ཉུལ་ཐུགས་དང་འགལ་བ་མཐོལ་ཞིང་བཤགས། །ཕུད་ཉུལ་ཐུགས་དང་འགལ་བའི་སྐྱོན་དབང་གིས། །མཁའ་འགྲོའི་བཀའ་ཆད་གནས་གྱུར་མཐོལ་ཞིང་བཤགས། །ཞེས་གསུངས་པ་ལྟར་རོ།།

འདིར་དབང་ཕྱུག་མ་རྣམས་ཕུད་ཉུལ་དུ་གསུངས་པ་ནི། སྤྱིར་ཧེ་རུ་ཀ་གལ་པོ་ལས། དང་པོ་དབྱིངས་ནས་རྣམ་པར་བསྐུལ་བའི་གནས། གཉིས་པ་བྱིན་གྱིས་ཡང་དག་པར་བརླབ་པའི་གནས་དང་། གསུམ་པ་ཐབས་ཆེན་ཡབ་ཀྱི་གནས་ཏུ་བསྟན་པ་དང་། བཞི་པ་ཤེས་རབ་ཡུམ་གྱི་གནས་དུ་གནས་པ་དང་། ལྔ་པ་ཁྲོ་མོ་གཽ་རཱི་བརྒྱད་ཀྱི་གནས་རྣམས་དང་། དྲུག་པ་ཡུལ་གྱི་ཕྲ་མེན་གྱི་གནས་ཆེན་མོ་དང་། བདུན་པ་ཡེ་ཤེས་སྒོ་མ་བཞི་པོའི་གནས་རྣམས། ཡར་གྱི་གནས་བདུན་དཀྱིལ་འཁོར་སྟེང་། ཞེས་དང་། དང་པོ་རྫུ་འཕྲུལ་མཁའ་ལ་འགྲོ་བ་མཁའ་འགྲོ་མའི་གནས་སུམ་ཅུ་གཉིས། ཞེས་པ་ནས། དྲུག་ཅུ་རྩ་བཞི་ཕོ་ཉའི་གནས་དང་དྲུག་གོ །དེ་ཡན་ཆད་ལྷག་མ་དག་ལ་དབང་བའི་གནས་དྲུག་ཡིན་ནོ། །ཞེས་གསུངས་པ་ལྟར། ཕུད་ནི་ཡར་གྱི་གནས་བདུན་དང་། ལྷག་མ་ནི་མར་གྱི་གནས་དྲུག་ལ་འབུལ་དགོས་ཤིང་དེ་ལྟར་དབང་བ་ཡིན་པར་གསུངས་སོ།།

ལོ་ཆེན་དྷརྨཱ་ཤྲཱིའི་གསང་བདག་ཞལ་ལུང་དུ། དབྱིངས་ནས་རྣམ་པར་བསྐུལ་བ་དང་། །བྱིན་གྱིས་ཡང་དག་བརླབས་པ་དང་། །ཐབས་ཆེན་ཡབ་ཏུ་བསྟན་པ་དང་། ཤེས་རབ་ཡུམ་དུ་གནས་པ་དང་། །ཁྲོ་མོ་གཽ་རཱི་བརྒྱད་རྣམས་དང་། །ཡུལ་གྱི་ཕྲ་མེན་ཆེན་མོ་དང་། ཡེ་ཤེས་སྒོ་མ་བཞི་པོ་རྣམས། །ཡར་གྱི་གནས་བདུན་དཀྱིལ་འཁོར་ཏེ། །ཞེས་དང་། རྫུ་འཕྲུལ་མཁའ་ལ་འགྲོ་བ་སུམ་ཅུ་གཉིས། །སྦྱོར་དང་སྒྲོལ་ལ་དགའ་བའི་གིང་ཆེན་བརྒྱད། །ལངྒ་ཚར་གསུམ་རྟོགས་ཚད་འབུལ་བ་དང་། །ལུས་ངག་ཡིད་ཀྱིས་གནོད་པའི་འབར་མ་བརྒྱད། །བདུད་སྲིན་མ་མོ་བདུན་དང་སྲིང་མོ་བཞི། །དྲུག་ཅུ་རྩ་བཞི་ཕོ་ཉའི་གནས་རྣམས་ཏེ། །ལྷག་མ་དག་ལ་དབང་བའི་གནས་དྲུག་ཡིན། །ཞེས་ཧེ་རུ་ཀ་གལ་པོའི་ལུང་ཚིགས་བཅད་ཅིག་དྲངས་འདུག་ལ། བདག་གིས་རྒྱུད་དངོས་ནས་རྙེད་པ་ནི་གོང་དུ་དྲངས་པའི་ལུང་དེ་དག་གོ།

སྤྱིར་དབང་ཕྱུག་མ་རྣམས་ནི་རང་སྐལ་ཕུད་ལ་མི་རོལ་བར་ལྷག་མ་ལ་དགྱེས་པར་གསུངས་ཤིང་། དཔལ་ཆེན་པོའི་སྤྱན་སྔར་ལྷག་མ་ལེན་པར་དམ་བཅས་པར་གསུངས་ཏེ། རྣལ་འབྱོར་གྲུབ་པའི་ལུང་ཀུན་འདུས་རིག་པའི་མདོ་ལས། མ་སྲིང་བུ་མོ་ཆུང་མ་རྣམས། །འབངས་སུ་འབུལ་ལོ་ཚིས་མ་ཆུང༌། །དབུས་སུ་མཆི་སྐལ་མི་ལྡན་གྱི། །འབར་བའི་དཀྱིལ་འཁོར་མཐའ་ལ་ཞོག །ཕུད་ལ་འཚལ་སྐལ་མི་ལྡན་གྱི། །ལྷག་མ་ཞལ་ཆབ་བྲོན་ལ་སྩོལ། །ཉེ་གནས་གདུང་བའི་མ་སྲིང་རྣམས། །དེ་ནས་རྒྱལ་བའི་འབངས་ཡིན་གྱི། །ཁྱེད་ནི་ཅི་བགྱི་བཀའ་ཡི་ལས་མཁན་ཏེ། །བཀའ་ཡི་ལས་བྱུང་རྟག་པར་མྱུར་དུ་སྒྲུབས། །ཞེས་དང་། ཕུར་བ་མྱང་འདས་ཀྱི་རྒྱུད་ལས། མ་དང་སྲིང་མོ་བུ་མོ་རྣམས། །འབངས་སུ་འབུལ་ལོ་བཀའ་ལ་ཐོགས། །དབུས་སུ་མཆིས་པའི་སྐལ་མེད་ཀྱིས། །ཉིད་ཀྱིས་དཀྱིལ་འཁོར་ལ་མཐའ་ལ་ཞོག །ཕུད་ལ་འཚལ་བའི་སྐད་མེད་ཀྱིས། །ལྷག་མ་ཁ་ཆུས་བྲོན་ལ་གསོལ། །ཞེས་གསུངས་པའི་ཕྱིར་རོ།།

འོན་ཀྱང་ཧེ་རུ་ཀ་གལ་པོ་ལས། དབང་མོ་ཉི་ཤུ་རྩ་བརྒྱད་ཕུད་དང་ལྷག་མ་གཉིས་ཀ་ལ་དབང་བའོ། །ཞེས་དང་། ལོ་ཆེན་རིན་པོ་ཆེས་ཧེ་རུ་ཀ་གལ་པོའི་ལུང་དྲངས་པ་ལས། ཉི་ཤུ་རྩ་བརྒྱད་ཕུད་ལྷག་གཉིས་ལ་དབང་། །ཞེས་གསུངས་པ་ལྟར་འདིར་ནི་དབང་མོ་ཉེར་བརྒྱད་དེ་ཕུད་དང་ལྷག་མ་གཉིས་ཀ་ལ་དབང་བའི་ལུགས་ལྟར་བགྱིས་པ་ཡིན་ངེས་པས་དབང་ཕྱུག་མ་རྣམས་ཕུད་དང་ལྷག་མ་གཉིས་ཀ་ལ་དབང་བ་ལ་གོ་ན་རུང་གི། ཁ་ཅིག་གིས་ཟེར་བ་ལྟར་དཀྱིལ་འཁོར་གྱི་གཙོ་བོའི་ཚོགས་ལ་ཕུད་ཉམས་པའི་ཉེས་པ་འབྱུང་མིན་ཉུལ་བ་ཞེས་འགྲེལ་ན་མི་རུང་སྙམ་མོ།།

གནས་ཉུལ་ཆེན་མོའི་བཤགས་པ།

བརྒྱད་པ་གནས་ཉུལ་ཆེན་མོའི་བཤགས་པ་ནི། གནས་ལ་མ་བརྟེན་བྱ་བྱེད་འབྱུང་འཇུག་བགྱིས༔ སྟི་རའི་གནས་ཉུལ་ཐུགས་དང་ཅི་འགལ་བ༔ གནས་ཉུལ་ཆེན་མོའི་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ལ། དེ་ཡང་རྣལ་འབྱོར་བས་གསང་སྔགས་ཀྱི་དོན་ཟབ་མོ་ཉམས་སུ་བླང་བ་ལ་གཡའ་གངས་ནགས་ཀྱི་རི་བོའི་དབེན་པ་དང་། ཁྱད་པར་འཇིགས་སུ་རུང་བའི་དུར་ཁྲོད་ཀྱི་གནས་ལ་བརྟེན་ནས་བསྒྲུབ་དགོས་པ་ལ་དེ་ལྟར་གནས༷་དེ་དག་ལ་བརྟེན་ཏེ་བསྒྲུབ་པར་མ་བྱས་པའམ་གནས་དེ་འདྲ་ལ༷་མ༷་བརྟེན༷་པར་བྱ༷་བྱེད༷་གང་ཡོད་རྣམས་ཕྱི་དུར་ཁྲོད་ལ་སོགས་པ་སྒྲུབ་པའི་གནས་ནས་ཕྱིར་འབྱུང༷་བར་བགྱིད་པ་དང་། འདུ་འཛི་རབ་ཏུ་ཆེ་བའི་གནས་སུ་རྟག་པར་འཇུ༷ག་པའམ། ཡང་ན་ནང་ལྟར་ན་རྡོ་རྗེ་ཕུར་པ་གསང་བའི་རྒྱུད་ལས། བྱ་བྱེད་རྒྱུན་གྱི་ཏིང་འཛིན་ནི། །བྱ་དང་མི་བྱ་དབྱེར་མེད་པར། །མཁྱེན་ལྡན་ཧ་ཡི་འཕྲོ་འདུ་ལས། །བྱ་བ་མོ་ནི་ཆོས་ཀྱི་དབྱིངས། །བྱེད་པ་པོ་ནི་ཡེ་ཤེས་ཏེ། །བྱ་བྱེད་དབྱིངས་ལས་ཡེ་ཤེས་རོལ། །ཞེས་གསུངས་པ་ལྟར། ཉུལ་མ་ཆེན་མོ་དེ་དག་ཆོས་ཁམས་དང་བྱ་བ་ཡུམ་རྣམ་པར་དག་པ་ཆོས་ཀྱི་དབྱིངས་དང་། ཡིད་ཀྱི་ཁམས་དང་བྱེད་པ་ཡབ་རྣམ་པར་དག་པ་བདེ་བ་ཆེན་པོའི་ཡེ་ཤེས་ཀྱི་རང་བཞིན་དུ་ངེས་པའི་རྟོགས་པ་ལ་མ་གནས༷་ཤིང་དེ་ལ༷་མ༷་བརྟེན༷་པར། ནང་བྱ༷་བ་ཡུམ་དང་བྱེད༷་པ་ཡབ་ཀྱི་རྣམ་དག་དྲན་པའི་ལྟ་སྒོམ་ལས་ཕྱིར་འབྱུང༷་ཞིང་བྱ་བྱེད་ཀྱི་རང་བཞིན་གཞན་དུ་མཚན་མར་རྟོག་པའི་གནས་ལ་འཇུག༷་པ་གང་གི་དབང་གིས་སྔགས་ཀྱི་ལས་གང་བྱས་རྣམ་གཡེང་དང་རྣམ་རྟོག་མཚན་མའི་གཡེང་བར་ཤོར་བའི་དབང་དུ་བཏང་བར་བགྱི༷ས་པས་ན། སྟི༷་ར༷་སྟེ་བམ་རོ་དུ་མས་གང་བའི༷་དུར་ཁྲོད་ཀྱི་གན༷ས་ཉུལ༷་ཞིང་རྣལ་འབྱོར་བའི་སྒོམ་གྱི་དྲོད་ཚད་བགམ་པའི་མ་མོ་ཆེན་མོ་སྟི་རའི་གནས་ཉུལ་མ་དང་། རྡོ་རྗེ་ཕུང་ཉུལ་མ་དང་། མཆོད་པའི་ཚོགས་ཉུལ་མ་དང་། དེ་བྱའི་སྦྱོར་ཉུལ་མ་ལ་སོགས་པ་རྣམས་ཀྱི་ཐུག༷ས་ད༷ང་ཅི༷་འག༷ལ་བ༷འི་ཉེས་པའི་ཚོགས་ཐམས་ཅད་ཇི་སྐད་དུ། ཧེ་རུ་ཀ་སྙིང་རྗེ་རོལ་བ་ལས། དེའི་ཕྱི་རིམ་པདྨ་འདབ་བརྒྱད་ལ་ཤར་དུ་སྟི་རའི་གནས་ཉུལ་མ། ལྷོར་རྡོ་རྗེའི་ཕུང་ཉུལ་མ། ནུབ་ཏུ་མཆོད་པའི་ཚོགས་ཉུལ་མ། བྱང་དུ་དེ་བྱའི་སྦྱོར་ཉུལ་མ། ཤར་ལྷོར་དམ་ཚིག་རྗེས་གཅོད་མ། ལྷོ་ནུབ་ཏུ་ཕྱི་ནང་མཚམས་ཉུལ་མ། དུར་ཁྲོད་གནས་ཕྱུག་མའི་ལྷག་ཉུལ་མ། དེའི་མཚམས་བཞིར་རྡོ་རྗེ་སྒྲོལ་ཉུལ་མ། བསྙེན་པའི་མཚམས་ཉུལ་མ། དགོངས་པའི་དོན་ཉུལ་མ། དུར་ཁྲོད་གནས་ཉུལ་མ་དགོད་དོ། །ཞེས་གསུངས་པ་ལྟར་གྱི་གན༷ས་ཉུལ༷་ཆེན༷་མོ༷འི་ཚོགས་རྣམས་ཀྱི་སྐུ༷་ལ༷་མཐོལ་ཞིང་བཤགས་ལ་བཟོ༷ད་པ༷ར་གསོ༷ལ་ལོ་ཞེས་གནས་ཉུལ་མ་དག་ལ་བཤགས་པའོ།།

()

འདིར་ཤེས་པར་བྱ་བ་ནི། རྙིང་མའི་རྒྱུད་འབུམ་བྱིངས་ཀྱི་ཁྲོད་ཀྱི་དཔལ་ཧེ་རུ་ཀ་རོལ་པ་གསང་བ་ཟབ་མོའི་མཆོག་གི་རྒྱུད་དམ་གསང་བའི་སྙིང་པོ་ཟབ་མོ་མཆོག་དཔལ་སྙིང་རྗེའི་རོལ་པའི་རྒྱུད་ལེའུ་བཅུ་བདུན་ཅན་འགྱུར་བྱང་མེད་པ་དེ་ལས། རྡོ་རྗེ་ཕོ་ཉའི་ལེའུ་སྟེ་ལེའུ་ལྔ་པ་ལས། རྡོ་རྗེ་སྟི་ར་གནས་ཉུལ་བྱ་ཁྲག་ཁྱི་སྒྱིགས་ཅན་དང་། རྡོ་རྗེ་དམ་ཚིག་གི་ཚོགས་ཉུལ་མ་བྱ་ཁྲག་ཁྱི་སྒྲིགས་ཅན་དང་། རྡོ་རྗེ་ཕྱི་ནང་མཚམས་ཉུལ་མ་བྱ་ཁྲག་ཁྱི་སྡིགས་ཅན་དང་། རྡོ་རྗེ་དམ་ཚིག་གི་རྗེས་གཅོད་མ་བྱ་ཁྲག་ཁྱི་སྡིགས་ཅན། རྡོ་རྗེ་དེ་བྱའི་སྦྱོར་ཉུལ་མ་བྱ་ཁྲག་ཁྱི་སྡིགས་ཅན་དང་། ཞེས་གནས་ཉུལ་མ་རྣམས་བྱུང་ཡང་གནས་ཕྱོགས་དང་གྲངས་ཀ་ལ་ངེས་པ་དང་གསལ་ཁ་ཅན་མ་བྱུང་ལ། དེ་ཉིད་ཀྱི་ཕྲ་མེན་མ་སྒྲུབ་པའི་ལེའུ་སྟེ་ལེའུ་བཅོ་ལྔ་པའི་སྐབས་སུ། དེའི་ཕྱི་རིམ་པདྨ་འདབ་མ་བརྒྱད་ལ། ཤར་དུ་སྟི་རའི་གནས་ཉུལ་མ། ནུབ་ཏུ་མཆོད་པའི་ཚོགས་ཉུལ་མ། བྱང་དུ་དེ་བྱིའི་སྦྱོར་ཉུལ་མ། ཤར་ལྷོ་དམ་ཚིག་རྗེས་གཅོད་དོ། །ལྷོ་ནུབ་ཏུ་ཕྱི་ནང་མཚམས་ཉུལ་མ། ནུབ་བྱང་དུ་དབང་ཕྱུག་མ། དེའི་ཕྱི་མཚམས་བཞིར་རྡོ་རྗེ་སྒྲོལ་ཉུལ་མ་བསྙེན་པའི་མཚམས་ཉུལ་མ་དགོངས་པའི་དྲོད་ཉུལ་མ་དུར་ཁྲོད་གནས་ཉུལ་མ་དགོད་དོ། །ཞེས་གསུངས་ཀྱང་ལྷོའི་གནས་ཉུལ་དང་། བྱང་ཤར་གྱི་གནས་ཉུལ་ཡི་གེ་ཆད་པར་གྱུར་པ་དང་། བཀའ་འགྱུར་རོ་ཅོག་གི་པོ་ཏི་སྤྱི་རྒྱུག་ཆེ་བའི་གྲས་ཀྱི་རྙིང་རྒྱུད་གླེགས་བམ་གསུམ་ཅན་དེའི་གྲས་ཀྱི་ཧེ་རུ་ཀ་སྙིང་རྗེ་རོལ་བའི་རྒྱུད་ལོ་ཙཱ་བ་བལ་པོ་ཤྲི་ཀཱིར་ཏིས་སོག་པོ་མཆོག་གི་སྙིང་པོ་དང་། ཨན་བཀྲ་ཤིས་དང་། བལ་པོ་བཟང་བཀྲ་ཤིས་རྒྱ་མཚོ་རྣམས་ཀྱིས་ཡོན་བདག་བགྱིས་ནས་མང་ཡུལ་བྱམས་སྤྲིན་གྱི་གཙུག་ལག་ཁང་གི་ཡ་ཐོག་གི་དབུ་རྩེར་བསྒྱུར་བ་དེའི་ལུང་ནི་གོང་གི་དཀྱུས་སུ་དྲངས་མ་ཐག་པ་དེ་ལགས་མོད། དེར་ཡང་ནུབ་བྱང་དང་བྱང་ཤར་གང་རུང་གི་གནས་ཉུལ་སྟོན་པའི་རྒྱུད་ལུང་ཡི་གེ་ཆད་པས་དེར་ཡང་མི་གསལ་ཡང་དཔེ་གཉིས་ཀ་ལས་དོན་ལ་ནི་གནས་ཉུལ་མ་མོ་བཅུ་གཉིས་མཆིས་པ་ནི་གསལ་ལོ།།

()

ཀརྨ་མཱ་ལེའི་རྒྱུད་ལས། འདི་ཡི་དུས་ན་ཏི་རའི་གནས་འཕྲོག་མ། །ཞིང་བཅུ་སྒྲོལ་དང་མ་སྒྲོལ་ཉུལ་བ་ནི། །སྔགས་པས་བསྒྲིམས་ནས་བྱས་པ་ན། །ངས་ནི་ཁྱེད་ལ་གསལ་བར་བཤད། །ཅེས་གནས་ཉུལ་ཆེན་མོ་མང་པོ་གསུངས་མོད། དེ་དག་གསལ་བོར་འཁོད་པའི་ཆོ་གའི་གཞུང་གཞན་ནི་ལག་ཏུ་མ་སོན་པས་ཇི་བཞིན་བརྗོད་པར་རྔོ་མ་ཐོགས་སོ།།

གཞན་ཡང་ཤར་ན་ཏི་རའི་གནས་ཉུལ་མ་གཟི་ལྡན་ཡུམ་གྱི་སྤྲུལ་པ་སྲིན་མོ་ཐོད་ཕྲེང་ནག་མོ་ཁྲག་རལ་ཅན་ཏི་ར་ཆེན་མོ་ཁ་ན་ཐོགས་པ་དུས་ཚོད་ནི་ནམ་གྱི་སྲོད་ལ་རྒྱུག་པ་དང་། ལྷོ་ན་ཏི་རའི་གནས་ཉུལ་མ་གཤོག་པ་ཅན་གྱི་སྤྲུལ་པ་སྲིན་མོ་སྐམ་མ་རུ་གྲགས་པ་ནག་མོ་ཁྲག་རལ་ཅན་ཏི་ར་ཆེན་མོ་ཁ་ན་ཐོགས་པ་དུས་ནམ་གྱི་ཕྱེད་ན་རྒྱུག་པ་དང་། ནུབ་ན་ཏི་རའི་གནས་ཉུལ་མ་དྲ་བ་མོ་ཡི་སྤྲུལ་པ་སྲིན་མོ་ར་རོ་རུ་གྲགས་པ་ནག་མོ་དུང་གི་རལ་པ་ཅན་ཏི་ར་ཆེན་མོ་ཁ་ན་ཐོགས་པ་དུས་ནམ་གྱི་ཐོ་རངས་ལ་རྒྱུག་པ་དང་། བྱང་ན་ཏི་རའི་གནས་ཉུལ་མ་སྡེར་མོ་ཅན་གྱི་སྤྲུལ་པ་སྲིན་མོ་ཁྲག་འཐུང་མ་ནག་མོ་གཡུ་ཡི་རལ་པ་ཅན་ཏི་ར་ཆེན་མོ་ཁ་ན་ཐོགས་པ་དུས་ཉི་མའི་ཟེར་ཏེ་ཉི་མ་འཆར་བའི་དུས་ལ་རྒྱུག་པ་དང་། སྟེང་ཕྱོགས་ན་ཏི་རའི་གནས་ཉུལ་མ་གློག་འགྱུ་མ་ཡི་སྤྲུལ་པ་སྲིན་མོ་ཕོར་ཐོགས་མར་གྲགས་པ་ནག་མོ་གསེར་གྱི་རལ་པ་ཅན་ཏི་ར་ཆེན་མོ་ཁ་ན་ཐོགས་པ་དུས་ཉི་མ་ཕྱེད་དེ་ཉིན་གུང་ན་རྒྱུག་པ་དང་། འོག་ཕྱོགས་ན་ཏི་རའི་གནས་ཉུལ་མ་ཕེའུ་གཤོག་མའི་སྤྲུལ་པ་སྲིན་མོ་གཞོང་ཐོགས་མར་གྲགས་པ་ནག་མོ་ཟངས་ཀྱི་རལ་པ་ཅན་ཏི་ར་ཆེན་མོ་ཁ་ན་ཐོགས་པ་དུས་ཉི་མའི་གྲིབ་སོ་སྡུད་པའི་དུས་ན་རྒྱུག་པའི་དུས་དྲུག་གི་མ་མོ་དྲུག་ལ་སྟི་རའི་གནས་ཉུལ་དྲུག་ཏུ་གསུངས་པ་ཡོད་དེ། རྒྱུད་ཀྱི་རྒྱལ་པོ་ཁྲོ་བོ་རྟ་མཆོག་རོལ་པ་ལས། ཏི་ར་ཆེན་མོའི་གནས་ཉུལ་མ། །རྣལ་འབྱོར་དབང་ཕྱུག་ཆེན་པོ་རྣམས། །བཀའ་དང་དམ་ཚིག་མ་ཉམས་པའི། །སྒྲུབ་པ་རྣམས་ལ་དངོས་གྲུབ་སྩོལ། །གང་གི་བཀའ་ལས་འདའ་བྱེད་པའི། །སྒྲུབ་པ་པོ་ལ་བར་གཅོད་པའི། །མ་དག་ལས་ཀྱི་ཉུལ་ལེ་མོ། །སྲིད་པ་རྣམས་ཀྱི་བྱ་ར་བྱེད། །ཤར་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་སྲོད་ལ་རྒྱུག །ནག་མོ་ཁྲག་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གཟི་ལྡན་ཡུམ་གྱི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཐོད་ཕྲེང་ཡིན་པར་གྲགས། །ལྷོ་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་ཕྱེད་ན་རྒྱུག །ནག་མོ་ཁྲག་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གཤོག་པ་ཅན་གྱི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་སྐམ་མ་ཡིན་པར་གྲགས། །ནུབ་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་ཐོ་རངས་རྒྱུག །ནག་མོ་དུང་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །དྲ་བ་མོ་ཡི་སྤྲུལ་པ་སྟེ། །ཉམས་པའི་ཁྲག་འཐུང་དབང་པོ་ཆེ། །སྲིན་མོ་ར་རོ་ཡིན་པར་གྲགས། །བྱང་ནས་ཏི་རའི་གནས་ཉུལ་མ། །རྡོ་རྗེ་ཉི་མའི་ཟེར་ལ་རྒྱུག །ནག་མོ་གཡུ་ཡི་རལ་པ་ཅན། །ཏི་ར་ཆེན་མོ་ཁ་ན་ཐོགས། །སྡེར་མོ་ཅན་གྱི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཁྲག་འཐུང་ཡིན་པར་གྲགས། །སྟེང་ནས་ཏི་རའི་གནས་ཉུལ་མ། །རྡོ་རྗེ་ཉི་མ་ཕྱེད་ན་རྒྱུག །ནག་མོ་གསེར་གྱི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གློག་འགྱུ་མ་ཡི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཕོར་ཐོགས་ཡིན་པར་གྲགས། །འོག་ནས་ཏི་རའི་གནས་ཉུལ་མ། །རྡོ་རྗེ་ཉི་མའི་སྒྲིབ་སོ་སྡུད། །ནག་མོ་ཟངས་ཀྱི་རལ་པ་ཅན། །ཏི་ར་ཆེན་མོ་ཁ་ན་ཐོགས། །ཕེའུ་གཤོག་མའི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་གཞོང་ཐོགས་ཡིན་པར་གྲགས། །དུས་དྲུག་མ་མོ་ཁྱེད་རྣམས་ཀྱང་། །སྔོན་གྱི་འཕྲིན་ལས་ཇི་བཞིན་དུ། །སྒྲུབ་པ་ལས་ཀྱི་བྱ་ར་མཛོད། །དེ་སྐད་དུས་དྲུག་བསྐུལ་ནས་ནི། །གང་གིས་བདག་ཉིད་ཆེན་པོ་ཡི། །འདོད་པ་རྡོ་རྗེ་བཞིན་དུ་འགྲུབ། །གསང་བ་འདི་ནི་གཉན་པོ་ཡིན། །ཞེས་གསུངས་པའི་ཕྱིར་རོ།།

རྒྱུད་དེ་ལས་གསུངས་པའི་དུས་དྲུག་གི་མ་མོ་དྲུག་ལ་དཔྱད་ན་ནི་ཧེ་རུ་ཀ་སྙིང་རོལ་གྱི་ཤར་དུ་སྟི་རའི་གནས་ཉུལ་མ་ཞེས་པ་དེ་ཁོ་ན་ལ་ཕྱེས་པ་འདྲ་ཞིག་མཆིས་མོད་དོན་ལ་ནི་དེ་ལྟར་མ་ཡིན་སྙམ་པས་གཞན་དུ་འཚོལ་བར་བྱའོ། །དབང་ཆེན་བསྡུས་པའི་ཏནྟྲ་ཟེར་བའི་རྙིང་རྒྱུད་ལས་ཀྱང་། དེ་དག་བསྟན་ཅིང་ཚིག་ཕལ་མོ་ཆེ་དེ་རྒྱུད་ཀྱི་རྒྱལ་པོ་ཁྲོ་བོ་རྟ་མཆོག་རོལ་པ་ཇི་མ་ཇི་བཞིན་དུ་འབྱུང་བས་རྒྱུད་དེ་རིགས་དགོངས་པ་གཅིག་པར་ངེས་སོ།།

གསང་བ་སྙིང་པོ་དེ་ཁོ་ན་ཉིད་ངེས་པ་ལས། ཨ་སྤོར་བྱེད་ཆེན་མོ་ལ་སོགས་ཏེ། །ཉུལ་བྱེད་ཆེན་མོ་བརྒྱད་རྣམས་ལ། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཉུལ་བར་བྱེད། །མ་ལུས་གནས་ནས་སྤོར་བར་བྱེད། །ཅེས་དང་། སྒྱུ་འཕྲུལ་བླ་མ་ལས། ཉུལ་བྱེད་ཡུལ་ལ་གནས་གྱུར་པ། །སྤོར་བྱེད་ཆེན་མོ་མི་བཟད་མ། །ཞེས་གསུངས་པ་ལྟར་སྤོར་བྱེད་ཆེན་མོ་བརྒྱད་དུ་གྲགས་པ་དེ་དག་ལའང་ཉུལ་མ་དང་། འབར་མའི་མིང་གིས་བསྟན་པས་ན་འདིར་དེ་དག་ལ་སྦྱར་ཡང་རུང་ཟེར་བ་བདེན་མཆི་མོད། སྦྱར་ཟིན་ལྟར་ཧེ་རུ་ཀ་སྙིང་རོལ་ལྟར་སྟི་རའི་གནས་ཉུལ་མ་སོགས་ལ་འགྲེལ་ན་ལེགས་པ་ལས་སྤོར་བྱེད་མ་ལ་སྦྱོར་བ་ནི་མ་ཡིན་པར་ངེས་སོ།།

སྤོར་བྱེད་ཆེན་མོ་བརྒྱད་པོ་དེ་ཀརྨ་གླིང་པའི་ཞི་ཁྲོའི་ལས་བྱང་རང་གཞུང་ན་དངོས་སུ་མ་བྱུང་ཡང་དྲི་མེད་བཤགས་པའི་རྒྱུད་ལས་བྱུང་བ་ལྟར་བརྒྱ་ཕྱག་ལས་བྱུང་ལ། ཆགས་མེད་ཀྱིས། རྡོ་ར་དུར་ཁྲོད་ཡངས་པའི་ནང་། །རིག་འཛིན་ལྔ་དང་སྤོར་བྱེད་བརྒྱད། །ཅེས་ཞི་ཁྲོའི་དཀྱིལ་འཁོར་གྱི་རྡོ་རྗེའི་ར་བའི་ནང་རོལ་དུར་ཁྲོད་དུ་བསྒོམ་དགོས་པར་གསུངས་ཤིང་། གསང་སྙིང་གི་དཀྱིལ་འཁོར་གྱི་ལྷ་གྲལ་དུའང་བྱུང་ངོ་། །དེ་ལྟར་ཞར་བྱུང་ཙམ་དུ་སྨོས་སོ།།

རྡོ་རྗེ་རྒྱལ་པོའི་བཤགས་པ།

དགུ་བ་རྡོ་རྗེ་རྒྱལ་པོའི་བཤགས་པ་ནི། སྐུ་མཉེས་ཕ་མའི་ཚུལ་དུ་མ་གྱུར་ཏེ༔ རྡོ་རྗེ་སློབ་དཔོན་ཐུགས་དང་ཅི་འགལ་བ༔ རྡོ་རྗེ་རྒྱལ་པོའི་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ཅིང་། བདེ་མཆོག་འབྱུང་བ་ལས། བླ་མ་སངས་རྒྱས་བླ་མ་ཆོས། །བླ་མ་དགེ་འདུན་དེ་བཞིན་ཏེ། །སངས་རྒྱས་ཀུན་དང་མཉམ་སྦྱོར་བའི། །མཁའ་འགྲོ་མ་ཡི་དྲྭ་བ་སྡོམ། །དེའི་ཕྱིར་སངས་རྒྱས་གོ་འཕང་ནི། །འདོད་པས་བླ་མ་མཉེས་པར་བྱ། །ཞེས་དང་། ཡེ་ཤེས་འབར་བའི་རྒྱུད་ལས། བླ་མ་མཉེས་པར་བྱ་བའི་ཕྱིར། །ལུས་སྲོག་ལོངས་སྤྱོད་ཐམས་ཅད་ཀྱིས། །དུས་གསུམ་མཎྜལ་དང་བཅས་མཆོད། །ཅེས་དང་། སངས་རྒྱས་ཐོད་པ་ལས། བླ་མས་དངོས་གྲུབ་བླ་མས་ཐར། །བླ་མ་སྟོན་པ་རྣམ་ཀུན་པ། །དེས་ན་སློབ་མ་བློ་ཆེན་གྱིས། །འབད་པས་བླ་མ་མཉེས་པར་བྱ། །ཞེས་དང་། གཤིན་རྗེ་ནག་པོའི་རྒྱུད་རྟོག་པ་གསུམ་པ་ལས། དེ་ཡི་ཕྱིར་ན་སྔགས་པ་ཡིས། །རང་གི་ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །བསྙེན་བཀུར་བྱས་ན་ནུས་མཐུ་ཆེ། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། སྒྲུབ་ལ་བརྩོན་པའི་གང་ཟག་གིས། །ལུས་དང་ལོངས་སྤྱོད་འཚོ་བ་དང་། །བུ་དང་ཆུང་མ་རྒྱལ་སྲིད་ཀྱིས། །དང་པོར་བླ་མ་མཉེས་བྱས་ལ། །ཞེས་གསུངས་པ་ལྟར། རང་ལ་དབང་དང་གདམས་ངག་ཟབ་མོ་གནང་སྟེ་ཐར་བའི་ལུས་སྲོག་གསོ་བའི་ཕ་མ་ལྟ་བུར་གྱུར་པའི་བླ་མ་དམ་པའི་སྐུ་ལ་ལུས་ཀྱིས་ཞབས་ཏོག་དང་། ཟས་གོས་ལོངས་སྤྱོད་སྣ་ཚོགས་མཆོད་པ་དང་། སྒྲུབ་པ་སྙིང་པོར་བྱེད་པའི་ཚུལ་གྱིས་སྐུ༷་མཉེས༷་པར་བགྱིས་ཏེ་བླ་མ་དེ་ཉིད་རང་གི་ལུས་སྲོག་བསྐྱེད་པའི་ཕ༷་དང་མ༷འི་ཚུལ༷་དུ༷་འཛིན་པའི་འདུ་ཤེས་མངོན་དུ་གྱུར་ཏེ་དུས་རྟག་པར་བཀུར་སྟི་དང་གུས་པས་བསྟེན་དགོས་པ་ལ་དེ་འདྲའི་འདུ་ཤེས་མངོན་དུ་མ༷་གྱུར༷་ཏེ༷། བླ་མ་མཉེས་པའི་ལས་བསྒུབ་མ་ནུས་པར་རྡོ་རྗེ་སློབ་དཔོན་སྤྱི་དང་། བྱེ་བྲག་ཏུ་ཞི་ཁྲོའི་དཀྱིལ་འཁོར་བསྒྲུབ་པའི་སྒྲུབ་པ་ཟབ་མོ་འདིའི་རྡོ༷་རྗེ༷་སློབ༷་དཔོ༷ན་གྱི་ཐུགས་དང་མི་མཐུན་པའི་དམ་ཚིག་ཉམས་པའི་ལས་སྣ་ཚོགས་བསགས་ནས་དེའི་ཐུག༷ས་ད༷ང་ཅི༷་འག༷ལ་བ༷འི་ཉེས་པ་རྣམས་གནོང་འགྱོད་དྲག་པོས་ཇི་སྐད་དུ་རྣལ་འབྱོོར་གྲུབ་པའི་ལུང་ཀུན་འདུས་རིག་པ་ལས། རྡོ་རྗེ་རྒྱལ་པོ་བླ་མ་ལ། །འཁོར་བ་སྲེག་པར་མངའ་གསོལ་ཏེ། །ཞེས་དང་། རྟ་མཆོག་རོལ་བ་ལས། ཀྱེ་ཀྱེ་མཆོག་གསུམ་བདེ་བའི་སྐུ། །བྱམས་པའི་ཐུགས་མངའ་སྐུ་གསལ་མཛད། །རྡོ་རྗེ་རྒྱལ་པོ་བྱང་ཆུབ་སེམས། །བདག་དགོངས་འགྲོ་བའི་དོན་ཆེན་མཛད། །ཅེས་གསུངས་པ་ལྟར་སྔགས་ཀྱི་རྒྱུད་སྡེ་རྣམས་སུ་རྡོ༷་རྗེ༷་རྒྱལ༷་པོ༷འི་མཚན་ཀྱིས་བསྔགས་པའི་བླ་མ་དམ་པ་སྤྱི་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། བླ་མ་རྡོ་རྗེ་འཁོར་ལོ་རྒྱལ། །གསང་བ་སྦྱོར་བའི་དུས་ཆེན་དུ། །སྒྲུབ་ཆེན་སྒྲུབ་པའི་རྣལ་འབྱོར་རྣམས། །རྙིང་རྗེ་བྱམས་དང་དགའ་སྙོམས་དང་། །གདུང་བའི་བྱང་ཆུབ་སེམས་བསྐྱེད་དོ། །དེ་ཡང་ཤེས་དང་ཤེས་བྱ་ཡིས། །རྩལ་ཆེན་ཀུན་ཏུ་རྫོགས་པ་ནི། །རྡོ་རྗེ་སྙིང་པོ་འབྲུ་མཆོག་དག །ཤིན་ཏུ་གཏམས་པས་ཚོགས་པ་ནི། །བླ་མ་རྡོ་རྗེ་འཁོར་ལོ་རྒྱལ། །ཡོན་ཏན་མཆོག་གི་གཏེར་གྱུར་ཅིང་། །སྲིད་པས་ཞུས་ཀྱང་ཟད་མི་ཤེས། །རྐྱེན་ཐུབ་དབང་ལུང་རྫོགས་པར་གཟུང་། །ཞེས་གསུངས་པ་ལྟར་མཚན་ཉིད་ལྡན་པའི་རྡོ་རྗེ་སློབ་དཔོན་སྤྱི་དང་། ཁྱད་པར་དུ་སྒྲུབ་པ་དང་སྒྲུབ་ཆེན་ཟབ་མོའི་དུས་ཀྱི་རྡོ་རྗེ་སློབ་དཔོན་གྱི་སྐུ༷་ལ༷་མཐོལ་ཞིང་བཤགས་ལ། བཟོ༷ད་པ༷ར་གསོ༷ལ་ལོ་ཞེས་པའོ།།

རྡོ་རྗེ་རྒྱལ་ཐེབས་ཀྱི་བཤགས་པ།

བཅུ་བ་རྡོ་རྗེ་རྒྱལ་ཐེབས་ཀྱི་བཤགས་པ་ནི། ཏིང་འཛིན་མ་སྙེམས་ཞི་ཁྲོ་མ་ཕྱེད་དེ༔ རྡོ་རྗེ་རྒྱལ་ཐེབས་ཐུགས་དང་ཅི་འགལ་བ༔ སྟོན་པ་སྒྲོན་མེའི་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ཅིང་། རྣལ་འབྱོར་བ་གང་གིས་བསྐྱེད་པའི་རིམ་པའི་ཏིང༷་ངེ་འཛི༷ན་ཇི་བཞིན་མ་གསལ་བས་ཏིང་འཛིན་གྱི་ང་རྒྱལ་གྱི་སྙེམས་པ་དྲག་པོས་མ༷་སྙེམ༷ས་པའི་དབང་གིས་ཞི༷་བ་བཞི་བཅུ་རྩ་གཉིས་དང་། ཁྲོ༷་བོ་འབར་བ་ང་བཅུ་རྩ་བརྒྱད་ཀྱི་ལྷ་ཡི་དཀྱིལ་འཁོར་སོ་སོར་མ༷་ཕྱེད༷་དེ༷། ཞི་ཁྲོ་འདྲེས་པ་དང་། རྣམ་པ་ཇི་བཞིན་མི་གསལ་བ་དང་། བསྐྱེད་རིམ་གྱི་ང་རྒྱལ་བརྟན་པོ་མ་ལྡན་པར་བསྐྱེད་རིམ་གྱི་གདེང་ཚད་འཛིན་པ་པོའི་སློབ་དཔོན་རྡོ༷་རྗེ༷་རྒྱལ༷་ཐེབ༷ས་སམ་རྒྱལ་ཚབ་ཏུ་གྲགས་པ་སྟེ། ཇི་སྐད་དུ། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། སྒོ་དགུས་ཀུན་ཏུ་གསལ་བར་གྱུར་པའི་གནས་ན་རྡོ་རྗེ་རྒྱལ་ཚབ་ཅེས་བྱ་བའི་ཞེ་སྡང་རྡོ་རྗེ་དང་། ཞེས་དང་། ཨེ་མ་རྡོ་རྗེ་སེམས་ཆེན་པོ། །རང་རིག་མཁྱེན་པའི་ཡེ་ཤེས་འབར། །མགོན་པོ་ཡོན་ཏན་བསམ་ལས་འདས། །རྒྱལ་འཐེབ་ཁྱོད་ལ་ཕྱག་འཚལ་ལོ། །ཞེས་དང་། ཡེ་ཤེས་རྔམ་གློག་ལས། ལྟ་བས་མཉམ་པའི་དོན་རྟོགས་ན། །རྒྱལ་འཐེབ་འཆད་ཅིང་སྟོན་པའི་དབང་། །ཞེས་གསུངས་པ་ལྟར་གྱི་བླ་མ་རྡོ་རྗེ་དཔོན་དང་རྟོགས་པའམ་དགོངས་པ་མཉམ་པའི་རྡོ་རྗེ་རྒྱལ་ཚབ་བམ་རྒྱལ་ཐེབས་སུ་གྲགས་པའི་ཐུག༷ས་དང༷་ཅི༷་འག༷ལ་བ༷་ཡི་ཉེས་པ་རྣམས་སྟོ༷ན་པ༷་དཀྱིལ་འཁོར་གྱི་རྣམ་པ་ཇི་བཞིན་གསལ་བར་བྱེད་པའི་སྒྲོ༷ན་མེ༷་ལྟ་བུའི༷་སློབ་དཔོན་གྱི་སྐུ༷་ལ༷་འགྱོད་པས་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་པའོ།།

ལས་ཀྱི་སློབ་དཔོན་གྱི་བཤགས་པ།

བཅུ་གཅིག་པ་ལས་ཀྱི་སློབ་དཔོན་གྱི་བཤགས་པ་ནི། ལེ་ལོ་བྱས་པས་ཕྱག་རྒྱ་རྒྱུན་བཅད་དེ༔ ཀརྨ་ལས་མཁན་ཐུགས་དང་ཅི་འགལ་བ༔ ལས་ཀྱི་སློབ་དཔོན་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ལ། འཕགས་པ་གང་པོས་ཞུས་པའི་མདོ་ལས། སེམས་ཅན་རྟག་ཏུ་རྒུད་པ་ཡང་། །ལེ་ལོའི་དབང་དུ་གྱུར་པས་ན། །བདག་གིས་བརྩོན་འགྲུས་རབ་བསྐྱེད་དེ། །བྱང་ཆུབ་ཐོབ་བྱ་སྙམ་དུ་སེམས། །ཞེས་གསུངས་པ་ལྟར་རྒུད་པའི་རྩ་བ་དང་དགེ་བ་ལ་བར་དུ་གཅོད་པའི་ཆོས་གཙོ་བོ་ལེ་ལོ་ཡིན་ནའང་། ཉེས་ལྟུང་བཤགས་པ་པོའི་རྣལ་འབྱོར་བ་གང་གིས་ནི་བདག་ཉིད་བརྙས་པ་དང་། སྙོམས་ལས་དང་། སྒྱིད་ལུག་པའི་ལེ༷་ལོ༷་བྱ༷ས་པ༷ས་ཇི་སྐད་དུ་མཁའ་འགྲོ་རྒྱ་མཚོ་ལས། ལས་དང་ཆོས་དང་དམ་ཚིག་དང་། །ཕྱག་རྒྱ་ཆེན་པོ་བཞི་བ་ཡིན། ཞེས་དང་། ཐམས་ཅད་གསང་བའི་རྒྱུད་ལས། ཐུགས་ནི་ཕྱག་རྒྱ་ཆེན་པོ་སྟེ། །དམ་ཚིག་ཕྱག་རྒྱ་ཀུན་ཏུ་འགྲོ། །ཆོས་ཀྱི་ཕྱག་རྒྱ་གསུང་གི་སྟེ། །ལས་ཀྱི་ཕྱག་རྒྱ་སྐུ་ཡི་ཡིན། །ཞེས་གསུངས་པ་ལྟར། བསྐྱེད་རིམ་གྱི་སྐབས་ཀྱི་ཕྱག་རྒྱ་སྟེ། དེ་ཡང་ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱ༷ག་རྒྱ༷་སྟེ་ཕྱག་རྒྱ་ཆེན་པོ་བཞིའི་རིམ་པའི་བསྒོམ་པ་རྒྱུན༷་བཅ༷ད་དེ༷་ལུས་ཀྱི་ཕྱག་རྒྱ་ལ་སོགས་པ་སྒྲུབ་པའི་ཆ་ལག་མ་ཚང་བའི་དབང་གིས་ཇི་སྐད་དུ་ཁྲོ་བོ་རྡོ་རྗེ་རིགས་ཀུན་འདུས་རིག་པ་ལས། རྡོ་རྗེ་ཀརྨ་ཞེས་བྱ་བའི་ཕྲག་དོག་སྣ་ཚོགས་དང་། ཞེས་དང་། རྡོ་རྗེ་ཚིག་གི་གདངས་སྐད་ཅན། །རྡོ་རྗེ་མཐོང་བ་རྣམ་པར་དག །ངག་གི་དབང་ཕྱུག་ཚིག་ལ་མཁས། །ལས་ཀྱི་ཕྲེང་བ་རྫོགས་བྱེད་པའོ། །ཞེས་དང་། དཔལ་ཡེ་ཤེས་སྙིང་པོའི་རྒྱུད་ལས། ལས་ཀྱི་སློབ་དཔོན་ནི་བསྟན་བཅོས་ཐམས་ཅད་ལ་མཁས་པ། སེར་སྣ་མེད་པ། མཚན་མ་ཅུང་ཟད་ཐོབ་པའོ། །ཞེས་གསུངས་པ་ལྟར། ལེགས་སྦྱར་གྱི་སྐད་དུ་ཀ༷རྨ༷་ནི་ལས་ཏེ་སྒྲུབ་པ་ཟབ་མོའི་ལས་སྣ་ཚོགས་བྱེད་མཁན་གྱི་ལས་ཀྱི་སློབ་དཔོན་དུ་གྲགས་པ་སྐད་གདངས་མཐོ་ཞིང་ཆེ་ལ་ལས་ཀྱི་ཆོ་གའི་ཁྲིགས་ལ་མཁས་པའི་རྡོ་རྗེ་ལས༷་མཁ༷ན་ཞེས་འབོད་པའི་ཐུག༷ས་དང༷་ཅི༷་འག༷ལ་བ༷འི་ཉེས་པའི་ཚོགས་ཀུན་མཚན་ཉིད་དེ་དག་ལྡན་པའི་ལས༷་ཀྱི༷་སློབ༷་དཔོ༷ན་ཆེན་པོའི་སྐུ༷་ལ༷་འགྱོད་པས་བཤགས་ཤིང་བཟོ༷ད་པ༷ར་གསོ༷ལ་ལོ། །ཞེས་པའོ།།

གསང་ཡུམ་རིག་མའི་བཤགས་པ།

བཅུ་གཉིས་པ་གསང་ཡུམ་རིག་མའི་བཤགས་པ་ནི། སྦྱོར་བའི་ཚེ་ན་ཚད་ལ་མ་ཕེབས་ཏེ༔ ཤེས་རབ་སྙེམས་མའི་ཐུགས་དང་ཅི་འགལ་བ༔ གསང་ཡུམ་རིག་མའི་སྐུ་ལ་བཟོད་པར་གསོལ༔ ཞེས་པའི་ཚིགས་སུ་བཅད་པའི་རྐང་པ་གསུམ་གྱིས་བསྟན་ལ། དགོངས་པ་ལུང་བསྟན་པ་ལས། གང་ཞིག་སྔགས་ཀྱི་སྐྱེས་བུར་བཤད། །རྡོ་རྗེ་གསུམ་གྱི་ཡེ་ཤེས་གཟུགས། །དེ་ནི་དབང་པོ་གཉིས་སྦྱོར་བའི། །གཅིག་པར་བསྒོམ་པ་རྟག་ཏུ་བྱེད། །བདག་དམིགས་སེམས་ཅན་ཡོད་མིན་པའི། །སྔགས་ཀྱི་དབང་པོ་རྣམ་བསྒོམ་པ། །དབང་པོ་གཉིས་སྦྱོར་བཟང་པོ་སྟེ། །དངོས་པོ་ཐམས་ཅད་རྣམ་བརྟག་པའོ། །འདི་ནི་སངས་རྒྱས་ཐམས་ཅད་ཀྱི། །སྔགས་ཀྱི་དམ་ཚིག་མཆོག་བསྒོམ་པའོ། །རང་གཟུགས་རྡོ་རྗེ་ཡང་དག་སྦྱོར། །རིག་མ་དབང་ཕྱུག་བདག་ཀྱང་བསྒོམ། །གཉིས་མེད་གཉིས་སུ་མེད་ཆགས་པ། །ལྟ་བ་དམ་ཚིག་དཀྱིལ་འཁོར་རོ། །ཞེས་གསུངས་པ་ལྟར། རྣལ་འབྱོར་བ་གང་ཞིག་དབང་པོ་གཉིས་སྦྱོར༷་བ༷འི་གསང་སྔགས་ཕོ་ཉའི་ལམ་ལ་བརྟེན་ནས་ཟུང་འཇུག་བདེ་བ་ཆེན་པོོའི་ཡེ་ཤེས་མཐའ་ཐུག་པ་བསྒྲུབ་པའི་ཚེ༷་ན༷། དང་པོ་རྩ་ཐིག་རླུང་གསུམ་ལ་གནད་དུ་བསྣུན་ནས་དེ་གསུམ་ལས་སུ་རུང་བར་གྱུར་པ་ན་ད་གཟོད་རིག་མའི་མཁའ་ལ་བརྟེན་ནས་དགའ་བ་བཅུ་དྲུག་གི་ཡེ་ཤེས་ལུག་འབྱུང་ལྡོག་ཏུ་བསྐྱེད་པས་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཀྱི་སྐུ་མངོན་དུ་གྱུར་དགོས་པ་ཡིན་ལ། དེ་ཕྱིར་ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། རྡོ་རྗེ་ཀུན་གྱི་གཟུགས་འཛིན་པ། །ཀུན་སྡུད་ཀུན་འབྱུང་འཁྲུག་མེད་ཅིང་། །ནམ་མཁའི་ཁྱོན་ལྟར་ཀུན་ལ་ཁྱབ། །མ་ལྟར་བྱམས་པའི་ཡུམ་མཆོག་གཟུང་། །ཞེས་གསུངས་པ་ལྟར་བཤད་མ་ཐག་པའི་བདེ་ཆེན་གྱི་ཡེ་ཤེས་ཀྱི་ཆ་རྐྱེན་དུ་སྒྲུབ་པ་ཟབ་མོའི་དུས་སུ་དེ་ལྟར་རྩ་ཐིག་རླུང་སོགས་སྦྱངས་པ་དམན་ཞིང་རིག་མ་བསྟེན་པའི་ཚ༷ད་ལ༷་མ༷་ཕེབ༷ས་ཏེ༷་དགའ་བཞིའི་ཡེ་ཤེས་ཇི་བཞིན་འདྲེན་པའི་ནུས་པ་མ་ཐོབ་པར་འཇིག་རྟེན་ཐ་མལ་བའི་ཆགས་པ་རང་ག་བའི་དབང་དུ་ཤོར་བས་ན་ཇི་སྐད་དུ་གསང་བ་རྡོ་རྗེ་རྒྱུད་ཀྱིི་རྒྱལ་པོ་ལས། སྦྱོར་ཐབས་མཁས་པའི་ཤེས་རབ་མ། །ཐབས་ཀྱིས་རྟག་ཏུ་བསྟེན་པར་བྱ། །ཞེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། གསང་བ་སྦྱོར་བའི་ཤེས་རབ་མ། །དྲི་མེད་རྣམ་དག་ལྷ་མོ་ཞིག །མཚན་ལྡན་ཤིན་ཏུ་བརྒྱན་བྱས་ལ། །དབང་ཐོབ་དེ་ལ་སྦྱིན་པར་བྱ། །ཞེས་དང་། རྡོ་རྗེ་གཏུམ་པོ་ཐུགས་གསང་བའི་རྒྱུད་ལས། བྱིན་བརླབས་བྱས་པའི་ཤེས་རབ་མ། །རང་ལུས་ཐབས་ལྡན་གཏད་པ་དང་། །བདེ་བ་དང་ནི་བདེ་བ་ཆེ། །ཤིན་ཏུ་བདེ་ཆེན་བདེ་མཆོག་ཡིན། །ཞེས་དང་། སངས་རྒྱས་ཐོད་པ་ལས། གཙོ་ཆེན་དེ་ཡི་ཤེས་རབ་མ། །སྣ་ཚོགས་སྡེ་མ་རྣལ་འབྱོར་མ། །ཞེས་གསུངས་པ་ལྟར་རྒྱུད་དུ་མ་ནས་ཤེས་རབ་མ་ཞེས་གསང་སྔགས་ཀྱི་ལམ་གྲོགས་སམ་ལམ་རྟེན་དུ་རྒྱ་ཆེར་བསྔགས་པའི་བདེ་སྟོང་གི་ཤེས༷་ར༷བ་ཆེན་པོའི་སྙེམ༷་པ་འཆང་བ་མ་ཤེས་རབ་རིག་མ༷འི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་པའི་ཚོགས་ཐམས་ཅད་གས༷ང་བ་བདེ་སྟོང་གཉིས་མེད་དོན་དམ་མཉམ་པ་ཉིད་ཀྱི་མཁྱེན་པར་གྱུར་པ་འབྲས་བུ་ཆོས་གཟུགས་དབྱེར་མེད་ཀྱི་སྐུ་གཉིས་ཀྱི་སྲས་པོ་དམ་པ་གཞི་བཞེངས་སུ་སློང་བའི་ཡུམ༷་དང་། གསང་ཆེན་ཐབས་ལམ་ཟབ་མོ་ཉམས་སུ་ལེན་པའི་མཐུན་རྐྱེན་གྱི་གྲོགས་སུ་གྱུར་པའི་མཚན་ལྡན་རི༷ག་མ༷་བཟང་པོའི༷་སྐུ༷་ལ༷་བཤགས་ཤིང་བཟོ༷ད་པ༷ར་གསོ༷ལ་ལོ་ཞེས་སྦྱོར་བ་ཕོ་ཉའི་ཉེར་རྒྱུ་ལ་བརྟེན་པའི་ལམ་ཟབ་མོའི་ཚད་ལ་མ་སླེབས་ཀྱི་སྔོན་ནས་ལས་རྒྱ་བསྟེན་ནས་མཚན་ཉིད་ལྡན་པའི་གཟུང་མའི་རྒྱུད་ཆུད་གཟོན་དུ་བཏང་བ་རིག་མ་ཉིད་ཀྱི་མདུན་དུ་བཤགས་པར་བསྟན་པ་ཡིན་ཏེ། ཧེ་རུ་ཀ་སྙིང་རྗེ་རོལ་བ་ལས། སྦྱོར་བའི་དུས་སུ་ཏིང་འཛིན་མ་གསལ་བས། །གཟུང་མའི་ཐུགས་དང་འགལ་བའི་སྐྱོན་དབང་གིས། །ཆགས་ཤིང་འཁོར་བའི་གནས་སུ་མཐོལ་ཞིང་བཤགས། །བཤགས་ནས་སྐུ་གསུང་ཐུགས་ཀྱི་དངོས་གྲུབ་སྩོལ། །ཅེས་གསུངས་པ་ལྟར་ཡིན་པའི་ཕྱིར་རོ།།

སྒྲོལ་གིང་བདག་པོའི་བཤགས་པ།

བཅུ་གསུམ་པ་སྒྲོལ་གིང་བདག་པོའི་བཤགས་པ་ནི། སྒྲོལ་བའི་ཚེ་ན་ཏིང་འཛིན་གནས་མ་སྟོབས༔ སྐྱེས་བུ་གིང་བཞིའི་ཐུགས་དང་ཅི་འགལ་བ༔ སྒྲོལ་གིང་བདག་པོའི་སྐུ་ལ་བཟོད་པར་གསོལ༔ ཞེས་པའི་ཚིགས་བཅད་རྐང་པ་གསུམ་གྱིས་བསྟན་ལ། རྡོ་རྗེ་སྙིང་པོ་རྒྱན་གྱི་རྒྱུད་ལས། དྲག་ཤུལ་སྤྱོད་ཚུལ་ལ་གནས་པ། །ཧཱུྃ་ཞེས་པ་དང་ཕཊ་དང་བཅས། །ལུས་ནི་མེ་ལྕེ་འབར་བ་དང་། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དང་སྤེལ་བ་ཡི། །གསང་སྔགས་ཡི་གེ་ངེས་པར་སྦྱོར། །ཞེས་དང་། དཔལ་གདན་བཞིའི་རྒྱུད་ལས། བསད་དང་གདུག་པ་བསྐྲད་ལ་སོགས། །དྲག་པོའི་ལས་ནི་ཐམས་ཅད་ལ། །དངོས་གྲུབ་འདོད་པ་རྣལ་འབྱོར་པས། །འཇོམ་པའི་ཡི་གེ་ཐ་མར་རོ། །ཞེས་དང་། མཁའ་འགྲོ་རྒྱ་མཚོ་ལས། དབང་དང་མངོན་སྤྱོད་རེངས་པ་དང་། །བསད་དང་བསྐྲད་པ་ལ་སོགས་པ། །མངོན་སྤྱོད་དུས་ལས་ཤེས་པར་བྱ། །ཞེས་གསུངས་པ་ལྟར། གསང་སྔགས་ཀྱི་ཁྱད་ཆོས་ཟབ་མོ་ལྷའི་ང་རྒྱལ་བརྟན་པོ་དང་ལྡན་པས་སྐྲོད་པ་དང་། འགུག་པ་དང་། དབྱེ་བ་དང་། རེངས་པ་དང་། གཞུག་པ་དང་། གཟིར་བ་དང་། གནོན་པ་དང་། སྒྲོལ་བ་སོགས་དྲག་པོ་མངོན་སྤྱོད་ཀྱི་ལས་ཀྱིས་སྐལ་མེད་ལོག་ལྟ་ཅན་གྱི་གདུལ་བྱ་འདུལ་བའི་ཐབས་བསྟན་ལ། དེ་ཡང་རྡོ་རྗེ་ཕུར་བ་གསང་རྒྱུད་ལས། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་ཉིད་མིན་ཏེ། །ཕུང་པོ་རྡོ་རྗེའི་བདག་ཉིད་དེ། །རྣམ་པར་ཤེས་པར་རྡོ་རྗེར་བསྒོམ། །ཞེས་གསུངས་པ་ལྟར། རྒྱུའི་ཀུན་སློང་སྙིང་རྗེས་བསྐྱེད་ཅིང་། སྦྱོར་བ་ཡི་དམ་གྱི་ལྷ་ཡེ་ཤེས་པའི་བསྐྱེད་རིམ་གསལ་དག་བརྟན་པའི་ང་རྒྱལ་གྱིས་བསྒྲལ་བྱ་ཞིང་བཅུ་ཚང་བའི་དགྲ་བོ་བསྒྲལ་ཞིང་། བསྒྲལ་བྱའི་རྣམ་པར་ཤེས་པ་རིག་སྟོང་སྐྱེ་མེད་རྡོ་རྗེའི་ཀློང་དུ་རྒྱས་གདབ་སྟེ་འབྲས་བུ་ཡེ་ཤེས་ཆེན་པོའི་ཆོས་ཀྱི་སྐུའི་བག་ཆགས་རྒྱུད་ལ་འཐེབས་སུ་གཞུག་པ་ནི་སྒྲོལ་བ་ཞེས་བྱའོ།།

དེ་ལྟ་བུའི་སྒྲོལ༷་བ༷འི་ལས་མངོན་པར་སྤྱོོད་པའི་ཚེ༷་ན༷། ཇི་སྐད་དུ་ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། ཡེ་ནས་དག་པ་ཆོས་ཉིད་སེམས། །མཁའ་དང་སྦྱོར་བ་བྱང་ཆུབ་སེམས། །སྙིང་རྗེས་སྒྲོལ་བ་གསུམ་སྦྱར་ཏེ། །ཆོས་ཉིད་གསང་བ་ཉི་ཤར་ཁྱབ། །སྙིང་རྗེས་སྒྲོལ་བ་གསུམ་གྱིས་སྦྱར། །ཏིང་འཛིན་བྱིན་རླབས་ཡེ་ཤེས་ཀྱིས། །ཆོས་ཉིད་དུར་ཁྲོད་མཁའ་ལ་བསྒྲལ། །ཞེས་གསུངས་པ་ལྟར་ཆོས་ཐམས་ཅད་ཡེ་གདོད་མ་ནས་རྣམ་པར་དག་པ་ཆོས་ཉིད་སྤྲོས་པ་མེད་པའི་རང་བཞིན་དུ་ངེས་པའི་ལྟ་བ་དང་། བསྐྱེད་པའི་རིམ་པས་རང་ཉིད་ཡི་དམ་ཡབ་ཡུམ་གྱི་སྐུ་དངོས་སུ་གསལ་བའི་སྒོས་ཡུམ་གྱི་མཁའ་ལ་སྦྱོར་བའི་བདེ་སྟོང་དབྱེར་མེད་དོན་དམ་བྱང་ཆུབ་སེམས་ཀྱི་རྩི་དང་མ་བྲལ་བའི་སྒོམ་པ་དང་། དེའི་ངང་ནས་བསྒྲལ་བྱ་ལ་སྙིང་རྗེ་འགོག་མེད་དུ་བསྐྱེད་པའི་སེམས་གསུམ་སྔོན་དུ་འགྲོ་བའི་སྒོ་ནས་སྒྲོལ་བ་པོ་ལྷ་དངོས་སུ་གསལ་བ་དང་། ཡང་དེ་ཉིད་ལས། དེ་ལས་ཕྱག་མཚན་ཡེ་ཤེས་ལྔ། །མི་གནས་ཡེ་ཤེས་ངང་དུ་ཐིམ། །སྒྲིབ་པའི་ཕུང་པོར་སྨིན་པ་དེ། །རྡོ་རྗེ་རོལ་པའི་རྔམ་ཚོགས་ཀྱིས། །འཇོ་ཚུལ་སྟབས་ཀྱིས་སྦྱར་བར་བྱ། །ཁ་ཊ྄ཱྃ་ལ་སོགས་སྔགས་བཅས་པས། །བསྒྱེལ་ཏེ་མ་རིག་སྒོ་དབྱེ་བྱ། །ཞེས་དང་། ཁ་ཊ྄ཱྃ་ཕྱག་རྒྱས་བསྒྱེལ་ནས་ནི། །མ་རིག་མུན་པའི་སྒོ་ཕྱེ་ནས། །ཞེས་གསུངས་པ་ལྟར། ཕྱག་མཚན་ཕུར་བུ་དང་། ཁ་ཊ྄ཱྃ་སོགས་སྒྲོལ་བྱེད་ཡེ་ཤེས་ཀྱི་ཁྲོ་བོའི་སྐུ་དངོས་སུ་གསལ་བ་དང་། ཡང་དེ་ལས། བསྒྲལ་བའི་རྒྱུ་མཆོག་མན་ཆད་ནས། །ཤེལ་ཆེན་ཙ་ར་ལ་སོགས་པ། །དེ་ལ་རྒྱུ་དྲུག་ས་བོན་གདབ། །རང་བཞིན་ཡེ་ནས་དེ་གཞོམ་བྱ། །ཞེས་གསུངས་པ་ལྟར། ཉ་བོ་སོགས་དམིགས་བྱ་གང་ཡིན་པ་དེ་ཉིད་དངོས་སུ་གསལ་བ་སྟེ་གསལ་བ་གསུམ་གྱིས་ལྡོག་རྡུག་འབྱམས་པའི་སྐྱོན་མེད་པར་དམིགས་བྱ་དངོས་སུ་སྒྲོལ་ནུས་པ་དང་། ཡང་དེ་ཉིད་ལས། བཞི་ཚལ་དག་ཏུ་བྱས་ནས་ནི། །སྨན་གྱིས་བཏབ་སྟེ་ཕུང་པོར་བཙལ། །འཁོར་བའི་ཕུང་པོ་དེ་བསྡུས་ལ། །རྡོ་རྗེ་སྟབས་དང་གླུ་ཡིས་སྦྱངས། །གནས་གནས་དག་ཏུ་བསྔོ་བར་བྱ། །ཕུང་པོ་མཆོད་པའི་རྫས་སུ་བསྟིམ། །རྡོ་རྗེ་པྲ་ཡི་ལས་རྣམས་གདབ། །དེས་ནི་མཉེས་དང་སྐོང་བ་དང་། །རྡོ་རྗེ་ལས་རྣམས་འགྲུབ་པ་ཡིན། །ཞེས་དང་། སྐུ་གསུང་ཐུགས་རྡོ་རྗེ་བཀོད་པའི་རྒྱུད་ལས། ལྷག་མ་ལྷ་ལ་བསྟབ་པར་བྱ། །ཞེས་གསུངས་པ་ལྟར། བསྒྲལ་ཟིན་རྗེས་བསྒྲལ་བྱའི་གཟུགས་ཕུང་ཤ་ཁྲག་གི་ཚོགས་ཟག་པ་མེད་པའི་བདུད་རྩིར་བྱིན་གྱིས་བརླབ་ནས་ཆོས་སྐྱོང་ལས་བྱེད་ཕོ་ཉ་རྣམས་ལ་མཆོད་དེ་དངོས་སུ་དེ་དག་ལ་མཆོད་པས་འཚང་བར་བྱ་བ་དང་། ཡང་ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། རྣམ་ཤེས་དབུགས་ཀྱི་སྒྲོམ་དྲངས་ལ། །རྡོ་རྗེ་རྒྱལ་པོའི་རླུང་སྒྲོམ་དུ། །བསྡུས་ཏེ་རྡོ་རྗེ་དབུགས་ཅན་ལ། །ཧཱུྃ་བྱས་སྒྲིལ་མ་དེ་ལ་བསླན། །གསང་བ་ཐུགས་ཀྱི་དཀྱིལ་འཁོར་དུ། །ཚོན་གང་འོད་དུ་བསྟིམ་པར་བྱ། །ཡུ་ཏི་ཨ་ཧཾ་ གིས་སྦར་ཏེ། །གསལ་ན་དེ་དང་མཉམ་དུ་གསལ། །རྡོ་རྗེ་ཚེ་ལ་བསླན་པར་བྱ། །ཞེས་གསུངས་པ་ལྟར། བསྒྲལ་བྱ་དེའི་ཚེ་དང་། བསོད་ནམས་དང་། མངའ་ཐང་གི་ལྷག་མ་ཅི་མཆིས་རང་ཉིད་ཀྱི་ཚེ་བསོད་རྒྱས་བྱེད་ཀྱི་གསོས་སུ་བསྡུས་ནས་རྣལ་འབྱོར་བ་རང་ཉིད་ལ་དངོས་སུ་འཚང་བར་བྱ་བ་དང་། དེ་ལས། རྡོ་རྗེ་རླུང་གིས་དབུགས་སྦར་ཏེ། །ཐུགས་ལས་རླུང་སྒྲོམ་ལམ་དུ་སྦར། །ནམ་མཁའ་ཆོས་ཀྱི་གཞལ་ཡས་སུ། །ཉི་མའི་སྟེང་དུ་ཧཱུྃ་དུ་གསལ། །ཡེ་ཤེས་སེམས་དཔའ་ཚོན་གང་བ། །ཉི་ཟླ་གའུའི་བར་ན་གསལ། །ཨ་ཡང་ཕཊ་ཀྱིས་བསྐྱོད་འཕངས་པས། །རྡོ་རྗེ་སེམས་དཔའི་ཐུགས་ཀར་འཕྲོས། །ཡེ་ཤེས་སེམས་དཔར་གསལ་བ་ལ། །དངོས་པོར་སྣང་བར་འཛིན་དང་བྲལ། །གཡོ་འགུལ་འཕར་འཕྲིག་མ་ཆད་པར། །རྡོ་རྗེ་མིང་གི་དབང་བསྐུར་ཏེ། །རིགས་ཀྱི་ལྷ་དང་སྙིང་པོ་སྦྱིན། །ཞེས་དང་། རྣམ་ཤེས་ཨ་རུ་བྱིན་བརླབས་ཏེ། །གསང་ཆེན་ཐུགས་ཀྱི་ཀློང་དུ་བསྟིམ། །ཞེས་དང་། སྐུ་གསུང་ཐུགས་རྡོ་རྗེ་བཀོད་པའི་རྒྱུད་ལས། རྣམ་ཤེས་དབྱིངས་སུ་ཡང་དག་སྦྱར། །ཞེས་གསུངས་པ་ལྟར། གང་བསྒྲལ་བྱའི་རྣམ་པར་ཤེས་པ་འོག་མིན་དུ་རྡོ་རྗེ་སེམས་དཔའི་ཐུགས་ཀར་སྦྱར་བའི་སྒོས་མིི་གནས་པའི་ཆོས་སྐུ་ཐོབ་པའི་ས་བོན་དང་ལམ་རྒྱུད་ལ་སྨིན་པར་བྱས་པས་བསྒྲལ་བྱ་ལ་འཚང་བར་བྱ་བ་སྟེ་འཚང་བ་གསུམ་གྱིས་བསྒྲལ་བ་དང་ལྡན་པའི་སྒོ་ནས་སྒྲོལ་བའི་ལས་དེ་ལིང་པས་རི་དྭགས་དང་ཤན་པས་ར་ལུག་བསད་པའི་ཚུལ་དུ་མ་སོང་བ་ཞིག་དགོས་པ་ལ། དེ་འདྲའི་ཏིང་ངེ་འཛིན་ཁྱད་པར་བས་གང་བསྒྲལ་བ་དེ་ཉིད་སྒྲོལ་བ་ཚད་དང་ལྡན་པ་ཡིན་མོད། ཧེ་རུ་ཀ་སྙིང་རྗེ་རོལ་བ་ལས། སྒྲོལ་བའི་དུས་སུ་སྙིང་རྗེ་ཆུང་བ་ཡིས། །སེམས་ཅན་གནས་མ་སྟོབས་པ་མཐོལ་ཞིང་བཤགས། །ཉོན་མོངས་གནས་མ་སྟོབས་པའི་སྐྱོན་དབང་གིས། །ཡུན་གྱི་སྒྲིབ་པར་གྱུར་པ་མཐོལ་ཞིང་བཤགས། །ཞེས་གསུངས་པ་ལྟར། སྒྲོལ་བ་ཚད་དང་ལྡན་པའི་ཏི༷ང་ངེ་འཛི༷ན་ཁྱད་པར་བ་དང་མ་ལྡན་པར་བསྒྲལ་བྱའི་སེམས་ཅན་དེ་ཉིད་དག་པའི་གན༷ས་སུ་མ༷་སྟོབ༷ས་པ་སྟེ་སྟོབ་པར་བྱེད་མ་ནུས་པས། ཇི་སྐད་དུ་ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། རྒྱུད་སྦྱངས་བརྟུལ་ཞུགས་མཆོག་འཆང་ཞིང་། །ཐོགས་མེད་ཐེ་ཚོམ་སོམ་ཉི་བྲལ། །འཛིན་ཆགས་མེད་ཅིང་བླང་དོར་མེད། །བརྟན་ལྡན་གཟུང་ཐུབ་རྡོ་རྗེ་གིང་། །ཞེས་གསུངས་པ་ལྟར་གྱི་མཚན་ཉིད་དང་ལྡན་པའི་སློབ་དཔོན་མཁས་པ་རང་བཞིན་གྱིས་སྒྲོལ་བའི་ལྟ་བ་དང་། ཏིང་ངེ་འཛིན་གྱིས་སྒྲོལ་བའི་ཉམས་དང་། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་དང་། ཐབས་ཆེན་པོས་སྒྲོལ་བའི་གདམས་ངག་དང་། མངོན་དུ་ཕྱུང་བས་སྒྲོལ་བའི་མཛད་སྤྱོད་ལ་མཁས་པའི་སྒྲུབ་པ་དང་སྒྲུབ་ཆེན་གྱི་དུས་སུ་མ་ཏྲཾ་བསྒྲལ་བ་དང་། ཚོགས་བསྒྲལ་དང་། སྨད་ལས་ཀྱི་བསྒྲལ་བ་ལ་སོགས་པ་སྒྲོལ་བའི་ལས་གང་དང་གང་སྤྱོད་པའི་དུས་ན་སྒྲོལ་བའི་ལས་ལ་མཁས་པ་དང་། འདིར་བསྟན་གཙོ་བོ་ཀིང་ཀ་ར་སྟེ། གཏེར་ཆེན་རཏྣ་གླིང་པའི་ཕུར་བ་ཡང་གསང་བླ་མེད་ཀྱི་སྐུལ་བྱང་དུག་མདའ་ནག་པོ་ལས། མ་མོ་རྣམས་ཀྱི་མིང་པོ་གིང་ཆེན་རྣམས༔ འཛིན་གིང་དམར་པོ་འཛིན་པའི་ལྕགས་ཀྱུ་ཐོགས༔ འཆིང་གིང་ནག་པོ་འཆིང་པའི་ཞགས་པ་ཐོགས༔ སྒྲོལ་གིང་དཀར་པོ་ཤེལ་གྱི་སྤུ་གྲི་འཕྱར༔ ཟ་གིང་སྔོན་པོ་དུག་གི་མཆེ་བ་གཙིགས༔ ཞེས་གསུངས་པ་ལྟར། དགྲ་བགེགས་རྣམས་འགུག་པའི་ལས་བྱེད་པའི་འཛིན་གིང་དམར་པོ་ལག་ན་འཛིན་པའི་ལྕགས་ཀྱུ་ཐོགས་པ་དང་། འཆིང་བའི་ལས་བྱེད་པའི་འཆིང་གིང་ནག་པོ་ལག་ན་འཆིང་བྱེད་ཀྱི་ཞགས་པ་ཐོགས་པ་དང་། སྒྲོལ་བའི་ལས་བྱེད་པའི་སྒྲོལ་གིང་དཀར་པོ་ལག་ན་ཤེལ་གྱི་སྤུ་གྲི་འཕྱར་བ་དང་། ཟ་བ་སྟོབས་པའི་ལས་ལ་རྔམ་པའི་ཟ་གིང་སྔོན་པོ་དུང་གི་མཆེ་བ་གཙིགས་པའི་ལས་བྱེད་ཀྱི་ཕོ་ཉར་བསྐུལ་བའི་སྐྱེས་བུ་གིང་ཆེན་བཞི་བསྒྲལ་བྱ་འཛིན་པ་ལ་མཁས་པའི་ཐུགས་རྗེའི་འཛིན་གིང་དང་། བསྒྲལ་བྱ་སྒྲོལ་བ་ལ་མཁས་པའི་ཁམས་གསུམ་སྒྲོལ་གིང་དང་། བསྒྲལ་བྱ་སྟོབས་པ་ལ་མཁས་པའི་ཡེ་ཤེས་སྟོབས་གིང་དུ་གསུངས་པའི་སྐྱེ༷ས་བུ༷་རྡོ་རྗེའི་ཀིངྐ་ར་སྟེ་སྒྲོལ་བའི་ཕོ་ཉ་གིང༷་ཆེན་རྣམ་པ་བཞི༷འི་ཐུག༷ས་དང༷་ཅི༷་འག༷ལ་བ༷ར་གྱུར་པ་དེ་ཉིད་འགྱོད་པ་ཆེན་པོས་སྒྲོ༷ལ་བའི་ལས་ལ་དབང་བའི་གི༷ང་ཆེན་ཁམས་གསུམ་སྲོག་གི་བད༷ག་པོ་ཆེན་པོ༷འི་སྐུ༷་ལ༷་མཐོོལ་ཞིང་། བཤགས་ལ་བཟོ༷ད་པ༷ར་གསོ༷ལ་ལོ་ཞེས་གིང་ཆེན་ལ་བཤགས་པའོ།།

འཇིག་རྟེན་མཆོད་བསྟོད་སྒྲུབ་པ་རྩ་བའི་རྒྱུད་ལས། རི་རབ་ཆེན་པོ་མཛེས་པ་ཡི། །བང་རིམ་གསུམ་པའི་ཤར་ཕྱོགས་ལ། །ཚངས་པ་དཀར་པོ་སྲོག་གི་བདག །ལྷ་ཆེན་གིང་གི་སྡེ་དཔོན་བཞེངས། །ཞེས་དང་། །བང་རིམ་གསུམ་པའི་ལྷོ་ཕྱོགས་ལ། །གནོད་སྦྱིན་རྒྱལ་པོ་ནོར་གྱི་བདག །ཅེས་དང་། བང་རིམ་གསུམ་པའི་ནུབ་ཕྱོགས་ལ། །རྡོ་རྗེ་མཛེས་པ་ཞེས་བྱ་བ། །འཇིག་རྟེན་ལྷ་ཡི་སྡེ་དཔོན་ཡིན། །ཞེས་དང་། བང་རིམ་ གསུམ་པའི་བྱང་ཕྱོགས་ལ། །ལྷ་ཆེན་ནག་པོ་ཆེན་པོ་ཏེ། །བསྟན་པ་བསྲུང་བའི་སྡེ་དཔོན་བཞེང། །ཞེས་གསུངས་པ་ནི་འདིར་བཤད་མ་ཐག་པའི་གིང་ཆེན་བཞི་དང་གཅིག་གམ་སྙམ་ལ། སྤྱིར་བཏང་ལ་གིང་ཆེན་བཅོ་བརྒྱད་ཅེས་པ་སྲིན་པོ་རུ་དྲ་ནག་པོའི་འཁོར་གསོད་གཅོད་སྒྲོལ་བའི་ལས་བྱེད་ཀྱི་གིང་ཆེན་པོ་བདུད་ལྷ་ཡོར་ཐོམ་དང་། བདུད་ལྷ་གར་གྱི་དབང་ཕྱུག་དང་། བདུད་མོ་བརྒྱ་བྱིན་ཀུན་དགའ་མོ་དང་། ཚངས་པ་དུང་གི་ཐོར་ཚུགས་ཅན་དང་། དབང་ཕྱུག་ཆེན་པོའི་ལས་མཁན་དང་། མ་བདུད་རྒྱལ་མོ་དང་། རྟ་ཞོན་རྐྱ་བཞི་དང་། དམུ་བདུད་རྔམས་པ་དང་། ཚངས་པའི་ཐེའུ་བྲང་དང་། འབྲོག་སྲིན་མགོ་དགུ་དང་། ཁམས་གསུམ་གྱི་བདག་པོ་དང་། སྤྲིན་གྱི་སྒྲོན་མ་དང་། རྡོ་རྗེ་མཆུ་དང་། བི་ནཱ་ཡ་ག་དང་། ལྷ་མོ་ནག་མོ་དང་། ནམ་གྲུ་དང་། གཤིན་རྗེའི་རྒྱལ་མོ་རྨིག་པ་མགོ་དང་། ཤེལ་གྱི་སྲོག་བདག་སྟེ་བཅོ་བརྒྱད་ཡོད་པ་ལ་བཅོམ་ལྡན་འདས་དཔལ་ཆེན་ཧེ་རུ་ཀའི་སྤྲུལ་པ་ལས་འབྱུང་བོ་དེ་དག་རྣམས་དང་སྤྱོད་པ་དང་ཆ་ལུགས་མཐུན་པར་སྤྲུལ་ནས་བཏུལ་བའི་འདུལ་བྱེད་ཆེན་པོ་དཔའ་བོ་ཆེན་པོ་ལས་རྣམས་ཀུན་བྱེད་པ་དང་། ཁྲོ་མོ་ཆེན་མོ་ཁམས་གསུམ་དབང་སྡུད་མ་དང་། རྡོ་རྗེ་གིང་ཀ་ར་དང་། རྡོ་རྗེ་གནོད་སྦྱིན་དང་། རྡོ་རྗེ་སྤྱང་ཀི་དང་། རྡོ་རྗེ་གཤིན་རྗེ་དང་། རྡོ་རྗེ་རོལ་པ་དང་། རྡོ་རྗེ་འཆི་བདག་དང་། རྡོ་རྗེ་དུས་མཚམས་དང་། རྡོ་རྗེ་རོ་ལངས་དང་། རྡོ་རྗེ་འཇོམ་མ་དང་། དབང་སྡུད་ལྕགས་ཀྱུས་འདྲེན་པ་ཆེན་མོ་དང་། ཁམས་གསུམ་གཡབ་མོས་འདེབས་པ་ཆེན་མོ་དང་། གཟུགས་མེད་རླུང་ལྟར་གྱུར་པ་ཆེན་མོ་དང་། གར་གྱི་གློག་ལྟར་སྒྱུར་བ་ཆེན་མོ་དང་། རྦོད་གཏོང་ལེན་པར་བྱེད་པ་ཆེན་མོ་དང་། རྣ་ཉན་ཕྲ་མ་ཆེན་མོ་དང་། སྲིད་གསུམ་སྒྲོལ་བར་བྱེད་པ་ཆེན་མོ་དང་། ཟ་བྱེད་ཆེན་མོ་མ་སྟེ་རྡོ་རྗེའི་གིང་ཆེན་བཅོ་བརྒྱད་དུ་གྲགས་པ་ཡོད་པར་བཤད་དོ།།

དེ་ཡང་། འཇིག་རྟེན་མཆོད་བསྟོད་སྒྲུབ་པ་རྩ་བའི་རྒྱུད་ལས། ཁྱོད་ཀྱི་ཆོ་འཕྲུལ་བསྟན་པ་ནི། །གིང་ཆེན་བཅྭ་བརྒྱད་ཕོ་ཉར་འགྱེད། །ཅེས་གིང་ཆེན་བཅོད་བརྒྱད་དེ་ཤར་གིང་གི་ཕོ་ཉ་ཡིན་པར་གསུངས་པ་དང་། ཡང་དེ་ཉིད་ལས། འཛིན་གིང་བཞི་བཅུ་ཕོ་ཉར་འགྱེད། །ཅེས་འཛིན་གིང་བཞི་བཅུ་ཡོད་པ་དང་། དེ་དག་ཀྱང་གོང་གི་ནུབ་ཀྱི་གིང་ཆེན་གྱི་ཕོ་ཉ་ཡིན་པར་གསུངས་སོ།།

འདིར་ནི་གིང་བཞི་སྨོས་པ་ནི་བསྐྱེད་བྱ་དང་མངགས་གཞུག་ཏུ་གཏོང་བའི་ལྷ་རིགས་ཀྱི་ཕོ་ཉ་དང་། དེ་དག་གི་ཚབ་སྒྲོལ་བའི་ལས་ལ་ཐབས་མཁས་པའི་རྣལ་འབྱོར་བ་རྡོ་རྗེ་གིང་གི་ལས་བྱེད་པ་པོ་དང་གཉིས་ཡོད་པ་རྣམས་ལ་གོ་བར་བྱ་ཞིང་། སྒྲོལ་ཞེས་པའང་མཐའ་གཅིག་ཏུ་དྲག་པོའི་ལས་ཀྱིས་སྒྲོལ་བ་ཁོ་ན་ལ་གོ་མི་དགོས་པར་སྙིང་རྗེས་སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྒྲོལ་བ་ལ་གོ་རུང་བ་ནི་དཔལ་འབར་ཁྲོ་མོའི་རྒྱུད་ལས་གསལ་ལོ།།

འདིར་དྲག་པོའི་ལས་ཀྱི་བསྒྲལ་བྱ་ལ་སྤྱིར་བཏང་ནི། རྒྱུད་བརྟག་པ་གཉིས་པ་མཁའ་འགྲོ་མ་དྲྭ་བའི་སྡོམ་པའི་རྒྱུད་ལས། བསྟན་ལ་གནོད་པ་བྱེད་པ་དང་། །བླ་མ་སངས་རྒྱས་འཇིག་པ་ནི། །བླ་མ་ཐུབ་པ་ལ་ཞུས་ནས། །སྙིང་རྗེས་བསད་པར་བྱ་བ་ཉིད། །

ཅེས་དང་། ཧེ་རུ་ཀ་སྙིང་རོལ་ལས། དེ་བཞིན་གཤེགས་པའི་ཚད་མ་ཁྱད་དུ་བསད་པ་དང་། ཞེས་པ་ནས་ཞིང་བཅུ་དང་ལྡན་པ་འདི་དམ་ཚིག་ཚུལ་བཞིན་དུ་བསྒྲལ་བས། འདིའི་རྣམ་པར་ཤེས་པ་བླ་ན་མེད་པའི་གནས་སུ་བསྒྲལ་བ་ཡང་གནས་སྟོབས་པར་བྱིན་གྱིས་བརླབ་ཏུ་གསོལ། ཞེས་པའི་བར་དུ་གསུངས་པ་ལྟར་གྱི་ཞིང་བཅུ་ཞེས་གྲགས་པ་གང་ཡིན་པ་དེ་དག་ལགས་མོད། ཕུར་བ་མྱང་འདས་ཀྱི་རྒྱུད་ལས། བྱ་རུ་མི་རུང་སྣ་ཚོགས་བྱེད། །རྫས་དང་ལག་ཆ་མངོན་པར་སྟོན། །སྦྱོར་སྒྲོལ་འཕྲིན་ལས་འཕྲོས་པར་བྱེད། །ལྟ་བ་ཆོས་ཉིད་རྒྱབ་ཏུ་འདོར། །ལོག་པའི་སྤྱོད་པ་དང་དུ་ལེན། །ང་རྒྱལ་གཏུམ་ཁྲོ་རང་ཁར་གཏོང་། །མན་ངག་དོན་བསྟན་ལོག་པར་གོ །ཕ་རོལ་དོན་ལ་ལོག་ཆོས་སྤྱོད། །དོན་ནི་ཕྱིན་ཅི་ལོག་ལ་མཁས། །བཀའ་གཞུང་བོར་ནས་ལོག་པར་རྩོམ། །སྤྱོད་པས་ལོག་པ་མཐའ་དག་བྱེད། །རུ་དྲ་དངོས་ཀ་དེ་ཡིན་ཏེ། །དངོས་སུ་བསྒྲལ་ཡང་མི་སྐྱོན་ནོ། །དོན་ལ་ཉམས་པའི་མཚན་ཉིད་དོ། །ཞེས་གསུངས་པ་ལྟར་གསང་སྔགས་ལོག་པར་སྤྱོད་པ་སོགས་བྱ་བ་མི་རུང་བ་སྣ་ཚོགས་ལ་བརྩོན་པ་ཀུན་བསྒྲལ་བྱར་གསུངས་པ་དང་། སྨོས་མ་ཐག་པའི་སྔགས་ཀྱི་ཉམས་ལེན་གྱི་ཚད་དེ་དང་ལྡན་ན་ནི་ཁམས་གསུམ་གྱིས་བསྡུས་པའི་འགྲོ་བ་མཐའ་དག་བསྒྲལ་བྱ་ཡིན་ཏེ། རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། སྲིད་གསུམ་བསྒྲལ་བའི་ཞིང་འདི་དག །སྟོང་པའི་མཚོན་ཆའི་རྒྱལ་པོ་ཡིས། །དངོས་པོ་མེད་པར་བསད་པ་ན། །ཡེ་གྲོལ་ཆེན་པོ་རྒྱུན་མི་ཆད། །ཅེས་དང། རྟ་མཆོག་རོལ་བ་ལས། བདུད་དང་སྲིན་མོ་འཇོམས་བྱེད་རྣམས། །ཁམས་གསུམ་ཟིལ་གྱིས་གནོན་པའི་གདན། །སྟོང་གསུམ་དུས་གཅིག་བསྒྲལ་བའི་ཞིང་། །རྟོག་པ་འཇོམས་པའི་བརྟུལ་ཞུགས་མཆོག །ཅེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། འཁོར་བ་བསྒྲལ་བའི་ཞིང་འདི་དག །ཡེ་ཤེས་འབར་བའི་མཚོན་ཆེན་གྱིས། །རང་བཞིན་མེད་པར་བསྒྲལ་ནས་ནི། །མཉམ་ཉིད་ཆོས་སྐུ་ཆེན་པོར་བཏོན། །ཅེས་དང་། འཇམ་དཔལ་ལས་བཞི་འཁོར་ལོ་ལས། ཉོན་མོངས་སྡུག་བསྔལ་དྲལ་བྱས་ནས། །གནས་དང་གནས་མ་ཡིན་པ་ཡི། །རྒྱུ་དང་རྒྱུ་མ་ཡིན་པ་ཡི། །ཉོན་མོངས་སེམས་ཅན་མཐོ་རིས་གནས། །བསྒྲལ་བའི་ཞིང་དུ་སྨོས་པ་སྟེ། །དེ་ལ་དེ་བཞིན་དྲག་ཏུ་བྱ། །ཞེས་དང་། འབྲས་བུ་ཆེན་པོ་ལྔ་བསྒྲལ་བ་ལས། ཡེ་ནས་རྒྱུ་ཉིད་དག་པ་ལས། །ང་དང་བདག་ཏུ་འཛིན་པ་ཡིས། །ཁམས་གསུམ་འཁོར་བའི་རྒྱུ་རུ་གྱུར། །ཁམས་གསུམ་དེ་དག་བསྒྲལ་བའི་ཞིང་། །ཞེས་གསུངས་པའི་ཕྱིར་རོ།།

དེ་ལྟར་སྔ་འགྱུར་གྱི་རྒྱུད་སྡེ་ལས་སྒྲུབ་པ་དང་སྒྲུབ་པ་ཆེན་པོ་ཚོམ་བུ་ཚོགས་སྒྲུབ་བཤད་པའི་སྐབས་སུ་སྨོས་ཟིན་ལྟར་སྒྲུབ་པའི་རྡོ་རྗེ་སློབ་དཔོན་དང་། རྡོ་རྗེ་རྒྱལ་ཚབ་དང་། རྡོ་རྗེ་ཀརྨ་དང་། རྡོ་རྗེ་གཟུང་མ་དང་། རྡོ་རྗེ་གིང་ཆེན་རྣམས་དགོས་པར་བཤད་ཟིན་པ་ལྟར་ལ། དེ་བཞིན་དུ་མི་མ་ཡིན་པ་མཐོང་ནུས་པའི་མིག་རྣོན་གྱིས་ཉུལ་ལེ་ཤེས་ཤིང་བཟློག་ནུས་པའི་རྡོ་རྗེ་སྤྱན་པ་དང་། སྒྲུབ་པའི་དྲོད་རྟགས་འཛིན་པའི་རྡོ་རྗེ་བྱ་རོག་དང་། སྒྲུབ་པའི་དུས་མཚམས་སམ་ནམ་ཚོད་འཛིན་པའི་རྡོ་རྗེ་དུས་མཚམས་དང་། སྒྲུབ་ཟས་གཡོས་ལ་མཁས་པའི་རྡོ་རྗེ་བྱན་པོ་དང་། ཕྱི་ནང་གི་གཙང་སྦྲ་དང་བརྡ་སྦྱོར་ལ་མཁས་པའི་རྡོ་རྗེ་རྡུལ་ཕྱགས་རྣམས་ཡོད་དགོས་པར་བཤད་དེ། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། རྡོ་རྗེ་བྱ་རོག་ཅེས་བྱ་བའི་དྲོད་ཀྱི་རྟགས་འཛིན་པ་དང་། རྡོ་རྗེ་དུས་མཚམས་ཅེས་བྱ་བའི་འཐུན་འཇུག་གི་བཀའ་སྡོད་དང་། ཞེས་དང་། ལྷ་མོ་སྒྱུ་འཕྲུལ་དྲྭ་བ་ཆེན་མོ་ལས། ལས་དང་གིང་དང་རྒྱལ་འཐེབས་དང་། །སྤྱན་དང་རྡོ་རྗེ་ཚད་འཛིན་པ་། །བྱེ་བྲག་མངགས་པ་ལ་སོགས་རྣམས། །ཞེས་དང་། རྡོ་རྗེ་ཕུར་བ་གསང་རྒྱུད་ལས། རྒྱལ་ཐེབས་སྟོབས་དང་ལྡན་པ་དང་། །ལས་མཁན་བྱེ་བྲག་ཕྱེད་པ་དང་། །བརྟུལ་ཞུགས་འཆང་བའི་གིང་ཆེན་དང་། །དྲོད་ཚད་ཟིན་པའི་སྤྱན་མཐོང་དང་། །གཙང་སྦྲས་ཕྱེད་པའི་གཡོས་པ་ནི། །སྒྲུབ་པ་རྩ་བའི་འཁོར་དུ་བྱ། །ཞེས་གསུངས་པའི་ཕྱིར་རོ། །ཞར་བྱུང་གི་བཤད་པ་ཐལ་ལོ།།

འགུག་འདྲེན་ཕོ་ཉའི་བཤགས་པ།

བཅུ་བཞི་བ་འགུག་འདྲེན་ཕོ་ཉའི་བཤགས་པ་ནི། སྤྲུལ་སྐུ་ཁྲོ་མོའི་ཚུལ་དུ་མ་གྱུར་ཏེ༔ འགུག་འདྲེན་ཕོ་ཉའི་ཐུགས་དང་ཅི་འགལ་བ༔ མགྱོགས་བྱེད་ལས་མཛད་སྐུ་ལ་བཟོད་པར་གསོལ༔ ཞེས་པའི་ཚིགས་བཅད་རྐང་པ་གསུམ་གྱིས་བསྟན་ལ། ཞི་རྒྱས་དབང་དྲག་གི་ལས་སྤྱི་དང་། ཁྱད་པར་དུ་མངོན་སྤྱོད་ཀྱི་ལས་བསྒྲུབ་པའི་དུས་ཀྱི་ཕོ་ཉ་དང་ལས་བྱེད་ཀྱི་མ་མོ་རྣམས་ཀྱང་ཡི་དམ་གྱི་ཐུགས་ལས་སྤྲུལ༷་པའི་སྐུ༷་ཁྲོ༷་མོ༷་འབར་མའི༷་ཚོགས་ཀུན་འགུག་འདྲེན་འཆིང་སྡོམ་གསོད་སྐྲོད་ཀྱི་ལས་བྱེད་དུ་སྤྲུལ་པ་ལས་གཞན་དྲེགས་པ་རང་རྒྱུད་པ་མ་ཡིན་པ་དང་དེར་འདུ་ཤེས་པ་མ་ཡིན་པ་ཞིག་དགོས་ནའང་། དེའི་ཚུལ༷་མངོན་དུ༷་མ༷་གྱུར༷་པའམ། ཡང་ན་བསྟན་པ་སྲུང་ཞིང་སྒྲུབ་པོ་སྐྱོང་བའི་དུས་ན་རང་ཉིད་དེ་འདྲའི་སྤྲུལ༷་པ༷་སྐུ༷་ཡི་ཁྲོ་མོ་འབར་བའི་ཚུལ༷་དུ༷་གསལ་བའི་མངོན་རྟོགས་སམ་ཏིང་འཛིན་གསལ་བར་མ༷་གྱུར༷་ཏེ༷་དྲེགས་པ་ཐ་མལ་བ་ཉིད་དམ་རང་ཐ་མལ་བ་ཉིད་དུ་བཟུང་བའི་དབང་གིས་ཇི་སྐད་དུ་དྲག་སྔགས་འདུས་པ་རྡོ་རྗེ་རྩ་བའི་རྒྱུད་ལས། འགུགས་འདྲེན་གྱིས་ནི་དེ་དག་འགུགས། །ཕོ་ཉས་ལས་ཀུན་བསྒྲུབ་པར་བྱེད། །ཅེས་གསུངས་པ་ལྟར། འགུག༷་ཅིང་འདྲེ༷ན་པའི་ཕོ་ཉ་མོ་ལྕགས་ཀྱུ་ཅན་དང་། འཆིང་བའི་ལས་བྱེད་ཀྱི་ཕོ་ཉ་མོ་ཞགས་པ་མ་དང་། སྡོམ་བྱེད་ཀྱི་ལས་མཁན་མ་ལྕགས་སྒྲོག་ཅན་དང་། སྒྲོལ་བྱེད་ཀྱི་ཕོ་ཉ་མོ་དྲིལ་བུ་དང་རལ་གྲི་ཅན་ལ་སོགས་པ་ཕོ༷་ཉ༷འི་ཚུལ་གྱིས་གནས་པའི་ལས་མཁན་རྣམས་ཀྱི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་པ་ཀུན་ཇི་སྐད་དུ་འཕགས་པ་ཐབས་ཀྱི་ཞགས་པ་ལས། རྔམ་ཞིང་གཏུམ་པའི་གཟུགས་ཅན་དང་། །མགྱོགས་མ་མགྱོགས་མའི་ཕོ་ཉར་ལྡན། །ཞེས་གསུངས་པ་ལྟར། འཕྲིན་ལས་ཀྱི་ཤུགས་ཤིན་ཏུ་མྱུར་ལ་མགྱོ༷གས་པར་བྱེད༷་པའི་སྒོ་ནས་བཅོལ་བསྐུལ་གྱི་ལས༷་རྣམས་མཛ༷ད་པའི་ལས་མཁན་རྣམས་ཀྱི་སྐུ༷་ལ༷་མཐོལ་ཞིང་བཤགས་ལ་བཟོ༷ད་པ༷ར་གསོ༷ལ་ལོ་ཞེས་ལས་མཛད་ཀྱི་ཕོ་ཉའི་ཚོགས་ལ་བཤགས་པའོ།།

རྡོ་རྗེ་མིང་སྲིང་གི་བཤགས་པ།

བཅོ་ལྔ་བ་རྡོ་རྗེ་མིང་སྲིང་གི་བཤགས་པ་ནི། ལེ་ལོའི་དབང་གིས་བརྩེ་དུང་རྒྱུན་བཅད་དེ༔ བྱང་ཆུབ་མཆེད་ལྕམ་ཐུགས་དང་ཅི་འགལ་བ༔ རྡོ་རྗེ་མིང་སྲིང་སྐུ་ལ་བཟོད་པར་གསོལ༔ ཞེས་པའི་ཚིགས་བཅད་རྐང་པ་གསུམ་གྱིས་བསྟན་ལ། འཕགས་པ་ཡོངས་སུ་མྱ་ངན་འདས་པ་ཆེན་པོའི་མདོ་ལས། སྤྱོད་ལམ་བཞི་པོ་ལེ་ལོའི་དབང་དུ་གྱུར་པས་ན། །འཕགས་པའི་ཐུགས་དང་འགལ་ཞིང་མཉེས་པར་མ་བགྱིས་པ། །ཞེས་གསུངས་པ་ལྟར། རྣལ་འབྱོར་བ་གང་ཞིག་སེམས་ལེ༷་ལོ༷འི་དབ༷ང་དུ་ཤོར་བའི་རྐྱེན་གང་གིས༷་བླ་མ་དང་དཀྱིལ་འཁོར་གཅིག་པའི་རྡོ་རྗེའི་མཆེད་གྲོགས་རྣམས་ལ་སྙིང་བརྩེ༷་བ་དང་དགའ་བའི་དུང༷་བ་རྒྱུན༷་བསྲིང་མ་ནུས་པར་དེའི་རྒྱུན་བཅ༷ད་དེ༷་བར་དུ་འགལ་བ་བྱུང་ནས་བྱང༷་ཆུབ༷་ཆེན་པོའི་གོ་འཕང་བསྒྲུབ་པའི་གྲོགས་གསང་སྔགས་ཀྱི་ལམ་གྱི་མཆེ༷ད་དང་ལྕམ༷་སྟེ་སྲིང་མོར་གྱུར་པ་རྣམས་ཀྱི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་ལྟུང་གི་ཚོགས་ཡོད་དོ་ཅོག་འགྱོད་པ་ཆེན་པོས་རྡོ༷་རྗེ༷་ཐེག་པའི་གྲོགས་མི༷ང་སྲིང༷་རྣམས་ཀྱི་སྐུ༷་ལ༷་བཟོ༷ད་པ༷ར་གསོ༷ལ་ལོ་ཞེས་པའོ།།

དམ་ཚིག་བྱ་ར་བྱེད་མཁན་གྱི་བཤགས་པ།

བཅུ་དྲུག་པ་དམ་ཚིག་བྱ་ར་བྱེད་མཁན་གྱི་བཤགས་པ་ནི། བྲེ་མོའི་ཕྱིར་ན་དམ་ཚིག་ཉམས་ལ་སོགས༔ ཕྱི་ནང་རྗེས་གཅོད་ཐུགས་དང་ཅི་འགལ་བ༔ དམ་ཚིག་བྱ་ར་བྱེད་ལ་བཟོད་པར་གསོལ༔ ཞེས་པའི་རྐང་པ་གསུམ་གྱིས་བསྟན་ལ། གོང་དུ་བཤད་པའི་སྔགས་ཀྱི་རྩ་བ་དང་ཡན་ལག་གི་དམ་ཚིག་དག་མ་ཟད་ཐ་ན་གཞན་ལ་བྲེ༷་མོ༷འི་ཚུལ་དུ༷་སྟེ་བསམ་བཞིན་མིན་པ་ཀྱལ་ཀ་ཀུ་རེ་ཙམ་གྱི་ཕྱིར༷་དུ་ན༷འང་ད༷མ་ཚི༷ག་ཉམ༷ས་པའི་སྐྱོན་ཕྲ་མོ་ཙམ་ཤོར་བ་ལ༷་སོ༷གས་པ་ཕྱི༷་ཡི་དམ་ཚིག་དང་། ནང༷་གི་དམ་ཚིག་དག་ལ་འགལ་ཉམས་འདས་རལ་གྱི་ཉེས་པ་ཡོད་མེད་རྗེས༷་གཅོ༷ད་པ་སྟེ་རྩད་གཅོད་པར་བྱེད་པའི་མཁའ་འགྲོ་མ་དང་རྡོ་རྗེའི་ཆོས་སྐྱོང་བ་རྣམས་ཀྱི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་པ་རྣམས་གནོང་འགྱོད་དྲག་པོས་རྡོ་རྗེའི་ད༷མ་ཚི༷ག་གཉན་པོ་ལ་ཉིན་མོའི་བྱ༷་ར༷་དང་མཚན་མོའི་མེལ་ཚེ་བྱེད༷་པའི་དམ་ཅན་རྣམས་ལ༷་མཐོལ་ལོ། །བཤགས་སོ། །མི་འཆབ་པོ། །མི་སྦེད་དོ། །བཟོ༷ད་པ༷ར་གསོ༷ལ་ལོ། །ཞེས་པའོ།།

ཕྱི་འཁོར་བརྟན་མའི་བཤགས་པ།

བཅུ་བདུན་པ་ཕྱི་འཁོར་བརྟན་མའི་བཤགས་པ་ནི། ལོངས་སྤྱོད་གསོལ་ནས་ལྷག་མའི་ཕུད་ཉམས་ཏེ༔ ཕྱི་འཁོར་བརྟན་མའི་ཐུགས་དང་ཅི་འགལ་བ༔ ཐུགས་རྗེ་ཆེ་མངའ་ཁྱོད་ལ་བཟོད་པར་གསོལ༔ བཟོད་པར་བཞེས་ནས་ཚངས་པའི་དངོས་གྲུབ་སྩོལ༔ ཞེས་པའི་ཚིག་རྐང་པ་བཞི་ཡིས་བསྟན་ལ། མཁའ་འགྲོ་སྒྱུ་མ་བདེ་མཆོག་ལས། ལྷ་རྣམས་ཐམས་ཅད་ཚོགས་པས་ན། །སྐྱེ་བོ་དམ་པ་ཀུན་ཚོགས་པ། །མཛའ་བ་ཐམས་ཅད་འདུས་པ་སྟེ། །སངས་རྒྱས་ཀུན་གྱི་བརྡ་དག་གིས། །དེ་བཞིན་མཛའ་བར་འདུས་པར་གསུངས། །ཞེས་གསུངས་པར་ལྟར། སྐྱེ་བོ་མཛའ་བ་ཐམས་ཅད་འདུས་ཏེ་ཡི་དམ་གྱི་དཀྱིལ་འཁོར་གྱི་ཞལ་ཕྱེས་ནས་ཚོགས་ཀྱི་འཁོར་ལོ་དང་མཆོད་པའི་སྤྲིན་བཤམས་ཤིང་ཟས་དང་གོས་དང་གཏོར་མ་ལ་སོགས་པའི་གནས་གཅིག་ཏུ་བདོག་པའི་ལོང༷ས་སྤྱོད༷་ཀྱི་ཚོགས་ཡོད་དོ་ཅོག་ལ་རོལ་ནས་གསོ༷ལ་ཟིན་པ་ནས༷་དེའི་ལྷག་མ་ཅུང་ལུས་པར་བགྱིས་ཏེ། རྡོ་རྗེ་ཕྲེང་བ་ལས། དེ་ནས་ལྷག་མའི་གཏོར་མ་སྦྱིན། །ཞེས་དང་། བདེ་མཆོག་འབྱུང་བ་ལས། ལྷག་མའི་གཏོར་མ་བསྡུས་ནས་ནི། །འབྱུང་བོ་འཆོལ་བ་རྣམས་ལ་སྦྱིན། །གནས་དང་ཞིང་གནས་རྣལ་འབྱོར་མའི། །ཚོགས་ལ་དྲི་ཞིམ་ཚིམ་པར་བྱ། །ཞེས་གོང་དུ་དྲངས་པ་ལྟར། དེ་ཉིད་ལས་ཆང་ཕུད་ལ་སོགས་བྲན་པའི་ཟས་ཕུད་ཀྱིས་ཕྱིའི་དཀར་སྐྱོང་གི་སྡེ་བརྒྱད་ལ་མཆོད་དགོས་པར་གསུངས་ནའང་། གོང་དུ་དྲངས་པའི་ཧེ་རུ་ཀ་སྙིང་རྗེ་རོལ་བ་ལས། ཕུད་དང་ལྷག་མ་ཉམས་པའི་སྐྱོན་དབང་གིས། །ཕུད་ཉུལ་ཐུགས་དང་འགལ་བ་མཐོལ་ཞིང་བཤགས། །ཕུད་ཉུལ་ཐུགས་དང་འགལ་བའི་སྐྱོན་དབང་གིས། །མཁའ་འགྲོའི་བཀའ་ཆད་གནས་གྱུར་མཐོལ་ཞིང་བཤགས། །ཞེས་གསུངས་པ་ལྟར། དེ་ལྟར་མ་བགྱིས་པར་ཚོགས་དང་ལྷ༷ག་མ༷འི་གཏོར་མ་དང་ཕུད༷་ལ་ཉམ༷ས་ཆག་ཤོར་ཏེ༷་དཀྱིལ་འཁོར་གྱི་ཕྱི༷་ཡི་འཁོར༷་དུ་གྱུར་པ་ཇི་སྐད་དུ་ཞི་ཁྲོའི་ལས་བྱང་ཤིན་ཏུ་མདོར་བསྡུས་པ་གཏོར་སྒྲུབ་རང་གྲོལ་སྙིང་པོ་ལས། བརྟན་སྐྱོང་དཔལ་ལྡན་མ་དང་ཡང་དག་ཤེས༔ ཁྱུང་བཙུན་ཀོང་ལྷ་གཡུ་བུན་མེ་ཏོག་མ༔ ཟླ་འོད་བྱང་རྒྱལ་གསེར་ཐང་ཀུན་བཟང་མ༔ ཤཱནྟིཾ་དཔལ་དང་ཀླུ་མོ་གཟི་འབར་སོགས༔ མ་སྲིང་འཁོར་བཅས་ཁྱེད་ཅག་དམ་ཚིག་ཅན༔ བོད་ཁམས་རྟག་ཏུ་བདེ་བའི་འཕྲིན་ལས་མཛོད༔ ཅེས་གསུངས་པ་ལྟར་གྱི། རྡོ་རྗེ་གཡུ་བུན་མ་ལ་སོགས་པ་མ་མོ་བརྟ༷ན་མ༷འི་ཚོགས་བཅུ་གཉིས་པོའི་ཐུག༷ས་ད༷ང་ཅི༷་འག༷ལ་བ༷་ཡི་ཉེས་པ་རྣམས་མ་མོ་དེ་རྣམས་དང་དེ་དག་གང་འཁོར་དུ་གནས་ཡུལ་གྱི་ཐུག༷ས་བརྩེ་བ་སྙིང་རྗེ༷་རྒྱ་ཆེ༷་བ་མང༷འ་བའི་བཅོམ་ལྡན་ཁྲོ་བོའི་དཀྱིལ་འཁོར་ཁྱེ༷ད་ཅག་རྣམས་ལ༷་མཐོལ་ལོ། །བཤགས་སོ། །མི་སྦེད་དོ། །བཟོ༷ད་པ༷ར་གསོ༷ལ་ལོ། །དེ་ལྟར་བཤགས་ན་བདག་ལ་ཉེས་པས་བསྒྲིབ་པར་མི་འགྱུར་ཞིང་། མ་མོ་ཆེན་མོ་རྣམས་ཀྱིས་བཟོ༷ད་གསོལ་ལེགས་པ༷ར་དང་དུ་ལེན་པ་སྟེ་དང་བཞེ༷ས་མཛད་ན༷ས་བདག་ལ་ཚང༷ས་པ་ཆེན་པོའི༷་མཆོག་གི་དངོ༷ས་གྲུབ༷་ཐོབ་པའི་གྲོགས་དང་། འཕགས་མ་ཀུ་རུ་ཀུ་ལླེའི་རྟོག་པ་ལས། རལ་གྲི་ས་འོག་དངོས་གྲུབ་དང་། །མི་སྣང་བ་དང་བཅུད་ལེན་དང་། །མི་མཐོང་བ་དང་མཁའ་སྤྱོད་ཉིད། །དེ་བཞིན་རྐང་བྱུག་མིག་སྨན་དང་། །རྨི་ལམ་མཚན་མ་འབྱུང་འགྱུར་ཞིང་། །དངོས་གྲུབ་རང་ཉིད་འབྱུང་བར་འགྱུར། །ཞེས་དང་། མཁའ་འགྲོ་རྒྱ་མཚོ་ལས། རལ་གྲི་མིག་སྨན་རི་ལུ་དང་། །རྐང་པ་བྱུག་དང་བཅུད་ལེན་དང་། །མཆིལ་ལྷམ་དངུལ་ཆུ་ས་འོག་གི །དངོས་གྲུབ་སྒྲུབ་པ་མཁས་པས་བྱ། །ཞེས་དང་། ཁྲག་འཐུང་མངོན་འབྱུང་ལས། རི་ལུ་མིག་སྨན་དངོས་གྲུབ་དང་། །མཆིལ་ལྷམ་རྒྱལ་པོ་རལ་གྲི་དང་། །སྦྱིན་དང་དགྲ་བོ་བརླག་པ་དང་། །རྐང་བྱུག་དང་ནི་བཅུད་ཀྱིས་ལེན། །ཞེས་གསུངས་པ་ལྟ་བུའི་ཐུན་མོང་གི་དངོས་གྲུབ་རྣམས་འབད་པ་མི་དགོས་པར་སྩོལ༷་བར་མཛོད་ཅིག་ཅེས་པའོ།།

སྐབས་འདིའི་ཕྱི་འཁོར་བརྟན་མ་ཞེས་པ་ནི་མ་མོ་སྲིད་པའི་རྒྱུད་ལུང་ཆེན་མོ་ཞེས་པ་སློབ་དཔོན་པདྨའི་སྤྱན་སྔར་ཛྙཱ་ན་ཀུ་མཱ་རས་བསྒྱུར་བ་དང་། པཎྜི་ཏ་གྷུ་ཡ་གསང་བའི་དབང་ཕྱུག་གི་དྲུང་ནས་འབྲོག་མི་དཔལ་གྱི་ཡེ་ཤེས་ཀྱིས་བསྒྱུར་ཟེར་བ་ཞིག་དང་། ལྷ་འདྲེ་སྟོང་གི་དྲྭ་བའི་རྒྱུད་ཆེན་པོ་ཟེར་བ་འགྱུར་བྱང་མེད་པ་བོན་པོའི་ལག་པ་ཐོན་འདུག་པས་བན་བོན་གང་ཡིན་དཔྱོད་དཀའ་བ་ཞིག་དང་། བདུད་མོ་བཀོལ་བྱང་ནམ་མཁའི་རྒྱུད་ཆེན་པོ་ཟེར་བ་རྣམས་ལས་བརྟན་མ་བཅུ་གཉིས་གསལ་བར་བྱུང་བ་སོགས་རྙིང་མའི་རྒྱུད་འགའ་དང་གཞུང་མང་པོར་ཡི་དམ་སོ་སོའི་སྒྲུབ་སྐོར་དུ་བརྟན་མ་བཅུ་གཉིས་རྒྱ་ཆེར་འབྱུང་བས་དེ་ལྟར་བགྱིས་སོ།།

དེ་ཡང་གཙོ་བོ་ནི་གྲུབ་པའི་འཁོར་བསྒྱུར་སློབ་དཔོན་པདྨ་འབྱུང་གནས་ཀྱིས་བརྟན་མ་བཅུ་གཉིས་གསང་སྔགས་བཀའ་ཡི་སྲུང་མར་བསྐོས་ཤིང་དཀྱིལ་འཁོར་གང་དུ་ཡང་གཏོར་མ་འབུལ་བའི་ཆད་མདོ་གནང་བའི་དབང་གིས་སློབ་དཔོན་ཆེན་པོས་རྒྱུད་འདི་དྲི་མེད་བཤགས་རྒྱུད་ལས་བསྡུས་པའི་སྐབས་སུ་བརྟན་མ་བཅུ་གཉིས་ལ་བཤགས་པ་ཁ་སྣོན་དུ་བཙུད་པའི་དབང་དུ་བྱས་པ་ཡིན་གྱི། རྒྱུད་ངོས་རྐྱང་གི་དབང་དུ་བྱས་ན་རྒྱ་གར་དུ་བརྟན་མ་བཅུ་གཉིས་མི་འབྱུང་ཞིང་གསར་རྒྱུད་རྣམས་དང་རྙིང་རྒྱུད་ཕལ་མོ་ཆེ་དག་ཏུའང་དེ་དག་གི་སྐོར་བྱུང་བ་ཤིན་ཏུ་དཀོན་པས་སྐབས་འདིའི་བརྟན་མ་ཞེས་པའང་ས་ཡི་ལྷ་མོ་བརྟན་མ་སོགས་ཕྱིའི་སྡེ་བརྒྱད་ལ་འགྲེལ་ཡང་ལེགས་ལ་འགྲེལ་དུ་བཏུབ་སྙམ་མོ།།

ས་ཡི་ལྷ་མོ་བརྟན་མ་ནི། འཕགས་པ་རྒྱ་ཆེར་རོལ་བ་ལས། དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སའི་ལྷ་མོ་བརྟན་མ་ཞེས་བྱ་བ་སའི་ལྷ་མོའི་འཁོར་བྱེ་བ་ཕྲག་བརྒྱ་དང་ལྡན་པ་གང་ཡིན་པ་དེས་ས་ཆེན་པོ་ཐམས་ཅད་གཡོས་པར་བྱས་ནས། ཞེས་དང་། སངས་རྒྱས་ཕལ་བོ་ཆེའི་མདོ་ལས། དེ་ནས་ཚོང་དཔོན་གྱི་བུ་ནོར་བཟངས་ཀྱིས་སའི་ལྷ་མོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། སའི་ལྷ་མོ་བརྟན་མ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་སའི་ལྷ་མོ་བརྟན་མའི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །ཞེས་དང་། མདོ་ཉི་མའི་སྙིང་པོ་ལས། ལྷ་མོ་ཆེན་མོ་དཔལ་དང་། ལྷ་མོ་ཆེན་མོ་དབྱངས་ཅན་དང་། སའི་ལྷ་མོ་བརྟན་མ་དང་། སྨན་གྱི་ལྷ་མོ་གྲུབ་པ་འཁོར་དང་བཅས་པས་ཞེས་དང་། གསེར་འོད་དམ་པ་མདོ་སྡེའི་དབང་པོ་ལས། ལྷ་མོ་ཆེན་མོ་དབྱངས་ཅན་དང་། །ནཻ་རཉྫ་ནར་གནས་པ་དང་། །འབྱུང་བོའི་མ་མོ་འཕྲོག་མ་དང་། །ས་ཡི་ལྷ་མོ་བརྟན་མ་དང་། །ཞེས་དང་། རྡོ་རྗེ་མཁའ་འགྲོ་ལས། བརྟན་མ་ཡི་ནི་འཁྲུལ་འཁོར་གྱི། །ཡི་གེའི་རྒྱལ་པོས་བཅིངས་པས་ན། །ས་འཛིན་ལྟ་བུར་བརྟན་པར་འགྱུར། །ཞེས་དང་། རྡོ་རྗེ་བདུད་རྩིའི་རྒྱུད་ལས། ས་ཡི་བརྟན་མ་འཇིག་རྟེན་ཡུམ། །རིན་ཆེན་ཐམས་ཅད་རབ་རྫོགས་པའོ། །ལྷ་ཡི་རྒྱན་གྱིས་བརྒྱན་བྱེད་མ། །ཧ་ར་ནུ་ཕུར་སྒྲ་འབྱིན་མ། །རྡོ་རྗེ་སེམས་དཔའ་རབ་ཏུ་མཆོད། །ཅེས་སོགས་མདོ་རྒྱུད་དུ་མ་ལས་རྒྱ་ཆེར་འབྱུང་ལ། དེ་ནི་བོད་ཀྱི་མ་མོ་བརྟན་མ་ཞེས་པ་དེ་དང་ཐ་དད་ཡིན་ཞིང་། ས་ལྷ་བརྟན་མ་དེ་བརྟན་མ་བཅུ་གཉིས་ཀྱི་གྲས་སུ་བགྲང་ན་ཤིན་ཏུ་ནོར་བ་ཡིན་པ་ཤེས་པར་བྱའོ།། །།

བཤགས་པ་སྤྱི།

༈ རྩ་བའི་ས་བཅད་དྲུག་པ་བདེ་གཤེགས་སྤྱི་བཤགས་ལ་ནི། བཤགས་པ་སྤྱི་དང་། བྱེ་བྲག་གཉིས་ལས།དང་པོ་ལ་ནི། བཤགས་ཡུལ་མངོན་དུ་བྱ་བའམ་བཤགས་ཡུལ་གྱི་ལྷ་ཚོགས་ལ་དགོངས་གསོལ་ཞུ་བ་དང་། གང་བཤགས་བྱའི་ཉེས་ལྟུང་ངོས་བཟུང་བ་དང་གཉིས་ལས།

དང་པོ་ནི། རྩ་བའི་ས་བཅད་དྲུག་པ་བདེ་བར་གཤེགས་པ་འཁོར་བཅས་སྤྱི་ལ་བཤགས་པ་བྱ་བའི་ཚུལ་ནི་འདི་སྐད་དུ་བརྗོད་དོ། །དེ་ཡང་ཐོག་མར་ནི། ཨོཾ་དུས་གསུམ་བདེ་གཤེགས་རྒྱལ་བ་འཁོར་དང་བཅས༔ རྡོ་རྗེའི་དམ་ཅན་མ་ལུས་དགོངས་སུ་གསོལ༔ ཞེས་པའི་རྐང་པ་གཉིས་ཀྱིས་བསྟན། ཨོཾ༷་ནི་གོང་དུ་སྨོས་པ་ལྟར་བྱིན་རླབས་དང་བཀྲ་ཤིས་པར་བྱེད་པ་བརྗོད་པའོ། །རྣལ་འབྱོར་གྲུབ་པའི་ལུང་ཀུན་འདུས་རིག་པ་ལས། དུས་གསུམ་བདེ་གཤེགས་བདག་གནས་ཐམས་ཅད་དུ། །རྡོ་རྗེ་ཅན་དང་དམ་ཚིག་སེམས་དཔར་བསྒྲུབས། །དེ་བཞིན་གཤེགས་པ་དགྱེས་པ་དགྱེས་པ་ཀྱེ། །རྡོ་རྗེས་བདག་ཡོང་གཏན་དུ་མ་བཏང་ཞིག །ཅེས་གསུངས་པ་ལྟར། འདས་པའི་དུས་དང་། ད་ལྟའི་དུས་དང་། མ་འོངས་པའི་དུས་ཏེ་དུས༷་གསུམ༷་དུ་ནི་རྒྱུ་བདེ༷་བ་བྱང་ཆུབ་ཆེན་པོའི་ལམ་ནས་འབྲས་བུ་བདེ་བ་རྫོགས་པའི་སངས་རྒྱས་སྐུ་ལྔ་ཡེ་ཤེས་ལྔའི་བདག་ཉིད་ཅན་གྱི་ས་རུ་གཤེ༷གས་པའི་བདུད་བཞིའི་གཡུལ་ལས་རྒྱལ་བའི་རྒྱལ༷་བ༷་ཞི་ཁྲོའི་ལྷ་ཚོགས་འཁོ༷ར་དང༷་བཅ༷ས་པ་དང་། སངས་རྒྱས་ཀྱི་བསྟན་པ་བསྲུང་བར་ཁས་བླངས་པའི་རྡོ༷་རྗེ༷འི་ད༷མ་ཚིག་གཉན་པོ་མནོས་པ་ཅ༷ན་གྱི་ཆོས་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་མ༷་ལུས༷་པས་བདག་ལ་ཐུགས་བརྩེ་བས་ཉེ་བར་དགོང༷ས་སུ༷་གསོ༷ལ་ཅིག་ཅེས་བཤགས་ཡུལ་ལ་དགོངས་སུ་གསོལ་བ་ཞུས་དེ་བཤགས་པའི་དཔང་པོར་བཞུགས་སུ་གསོལ་བའོ།།

གོང་དུ་བརྗོད་མེད་དོན་བཤགས་ཀྱི་དགོངས་གསོལ་ནས་ལེའུ་དུ་མར་དགོངས་གསོལ་མང་པོ་བྱུང་བ་ནི་གཞུང་གཅིག་ལ་ཟློས་པའི་སྐྱོན་བྱུང་བ་མ་ཡིན་ནམ་ཞེ་ན། དེ་ནི་མ་ཡིན་ཏེ། ལེའུ་སོ་སོར་བསྟན་པའི་བཤགས་ཐབས་སོ་སོ་བ་དང་རྒྱུད་གསུངས་པའི་གོ་རིམ་གྱི་དུས་མི་འདྲ་བ་དུ་མར་བསྟན་པའི་བཤགས་པ་ཡིན་གྱི་དུས་གཅིག་ལ་དཀྱུས་གཅིག་ཏུ་བཀོད་པའི་བཤགས་ཐབས་མ་ཡིན་པའི་ཕྱིར་རོ།།

གཉིས་པ་གང་བཤགས་བྱའི་ཉེས་ལྟུང་ངོས་བཟུང་བ་ལ་ནི། ཉེས་ལྟུང་ངོས་བཟུང་བ་དངོས་དང་། གང་ངོས་བཟུང་བའི་ཉེས་ལྟུང་བཤགས་པ་དང་གཉིས་ལས། དང་པོ་ནི། དང་པོ་བྱང་ཆུབ་མཆོག་ཏུ་སེམས་བསྐྱེད་དེ༔ སྒྲུབ་པའི་རིག་འཛིན་བྱང་ཆུབ་གོ་འཕང་དུ༔ སྐུ་གསུང་ཐུགས་ཀྱི་རྡོ་རྗེ་སྒྲུབ་པའི་ཕྱིར༔ ཡི་དམ་ལྷ་དང་རྡོ་རྗེ་སློབ་དཔོན་དང་༔ གསང་བའི་དམ་ཚིག་གྲངས་སུ་མནོས་པ་ལས༔ དམ་བཅས་བཀའ་ལས་འདའ་བར་མི་བགྱིད་དེ༔ ལས་དང་སྐལ་བས་དམྱལ་བར་སྐྱེ་བར་འགྱུར༔ ཞེས་པའི་ཤོ་ལོ་ཀ་གཅིག་དང་རྐང་པ་གསུམ་གྱིས་བསྟན། གང་བཤགས་བྱའི་ཉེས་ལྟུང་དེ་གང་ཡིན་ཞེ་ན། དེ་ནི་ཐར་བའི་ལམ་བསྒྲུབ་པའི་ད༷ང་པོ༷་སྟེ་ཐོག་མར་བླ་ན་མེད་པ་ཐེག་པ་ཆེན་པོ་བྱ༷ང་ཆུབ༷་མཆོ༷ག་ཏུ༷་སེམ༷ས་བསྐྱེ༷ད་དེ༷་གསང་སྔགས་ཀྱི་ལམ་སྒྲུབ༷་པ༷འི་རི༷ག་པ་འཛི༷ན་པའི་གང་ཟག་རྣམས་ཀྱིས་མཐའ་ཡས་པའི་སེམས་ཅན་རྣམས་བྱ༷ང་ཆུབ༷་ཆེན་པོའི་གོ༷་འཕ༷ང་བླ་ན་མེད་པ་ཉིད་དུ༷་དམིགས་ཏེ། ཇི་སྐད་དུ་རྡོ་རྗེ་དཔལ་མཆོག་ཆེན་པོའི་བརྟག་པ་དང་པོ་ལས། ལུས་དང་ངག་དང་ཡིད་རྣམས་ནི། །རྡོ་རྗེ་གསུམ་དུ་རྣམ་དག་པས། །སངས་རྒྱས་རྣམས་ཀྱི་སྐུ་གསུང་ཐུགས། །རྡོ་རྗེའི་ཚུལ་དུ་བསྟན་པའོ། །ཞེས་སྐུ༷་རྡོ་རྗེ་འགྱུར་བ་མེད་པ་དང་། གསུ༷ང་རྡོ་རྗེ་འགགས་པ་མེད་པ་དང་། ཐུག༷ས་ཀྱི༷་རྡོ༷་རྗེ༷་དྲི་མ་མེད་པ་གསུམ་བསྒྲུབ༷་པ༷ར་བྱ་བའི༷་ཕྱིར༷་དུ་ནི་ཡི་དམ་གྱི་ལྷ་ཞི་ཁྲོ་དམ་པ་རིགས་བརྒྱའི་དཀྱིལ་འཁོར་ལ་བརྟེན་ནས་རྒྱུད་སྨིན་པར་བྱ་བའི་ཆེད་དུ་བླ་མ་ལས་དབང་མནོས་ཏེ་དམ་ཚིག་དུ་མ་བསྲུང་བར་ཁས་བླངས་པ་སྟེ། དེ་ཡང་ཡི༷་ད༷མ་གྱི་ལྷ༷་ཡི་དམ་ཚིག་དང༷་བླ་མ་རྡོ༷་རྗེ༷་སློབ༷་དཔོ༷ན་གྱི་དམ་ཚིག་དང༷་། དེ་གཉིས་ལས་གཞན་པའི་དམ་ཚིག་ལ་སོགས་པ་གས༷ང་བ༷འི་ད༷མ་ཚི༷ག་གྲང༷ས་སུ༷་བགྲང་བས་མི་ལང་པ་ཞིག་མནོ༷ས་པ༷་རྣམས་ལ༷ས་ནི་སྣ་གཅིག་དང་ཕྲ་མོ་ཙམ་ཡན་ཆད་བསྲུང་བར་ཁས་བླངས་ཤིང་ཉམས་སུ་མི་འཇུག་པར་ད༷མ་བཅ༷ས་པ་ལགས་ཤིང་། བླ་མས་ཀྱང་དེ་ལྟར་མི་འདའ་བར་བཀ༷འ་བསྒོས་པའང་ཡིན་ན། ད་ནི་སྲོག་ལ་ཐུག་ཀྱང་དེ་ལ༷ས་འད༷འ་བ༷ར་མི༷་བགྱི༷ད་དེ༷། ཁྲོ་བོའི་རྒྱལ་པོའི་རྟོག་པ་བསྡུས་པ་ལས། དམ་ཚིག་སྡོམ་པ་མི་ལྡན་ལ། །བླ་མ་མཉེས་པར་མི་བྱེད་ན། །སྒྲུབ་པ་འབྲས་མེད་ངན་སོང་འགྲོ། །ལོག་ལྟ་ཅན་གང་བླ་མ་འཚེ། །དམྱལ་བའི་གནས་སུ་འགྲོ་བར་འགྱུར། །ཞེས་གསུངས་པ་ལྟར། གལ་ཏེ་འདའ་བར་བྱས་ན་ནི་དམ་ཚིག་ཉམས་པའི་ལ༷ས་དེ་དང༷་སྐ༷ལ་བ༷་ངན་པ་དེས༷་མནར་མེད་པའི་དམྱལ༷་བ༷ར་སྐྱེ༷་བ༷ར་འགྱུར༷་བའི་ཕྱིར་རོ། །དེས་ན་དེ་དག་བཤགས་དགོས་པ་ཡིན་ནོ་ཞེས་དམ་ཚིག་ཉམས་པའི་ཉེས་ལྟུང་སྤྱི་ཙམ་ངོས་བཟུང་བའོ།།

གཉིས་པ་གང་ངོས་བཟུང་བའི་ཉེས་ལྟུང་བཤགས་པ་ལ་ནི། སྐུའི་དམ་ཚིག་ཉམས་པའི་ཉེས་པ་བཤགས་པ་དང་། གསུང་གི་དམ་ཚིག་ཉམས་པའི་ཉེས་པ་བཤགས་པ་དང་། ཐུགས་ཀྱི་དམ་ཚིག་ཉམས་པའི་ཉེས་པ་བཤགས་པ་དང་། ཡན་ལག་གི་དམ་ཚིག་ཉམས་པའི་ཉེས་པ་བཤགས་པ་དང་། བསྙེན་སྒྲུབ་ཀྱི་དམ་ཚིག་ཉམས་པའི་ཉེས་པ་བཤགས་པ་དང་། ལུས་ངག་ཡིད་ཀྱི་སྒྲུབ་བྱའི་དམ་ཚིག་ཉམས་པ་བཤགས་པ་དང་དྲུག་ལས།

དང་པོ་ནི། འདོད་ཆགས་ཞེ་སྡང་གཏི་མུག་ང་རྒྱལ་དང་༔ ཕྲག་དོག་ལ་སོགས་ཤོར་ནས་གནོང་བགྱིས་པ༔ རྡོ་རྗེ་སློབ་དཔོན་བསྟན་པའི་སྒྲོན་མེ་ལ༔ སྙིང་ནས་སྨོད་ཅིང་དམ་ཚིག་ཉམས་པ་དང་༔ དམ་ཚིག་གཅིག་པའི་རྡོ་རྗེའི་སྤུན་རྣམས་ལ༔ ངན་སེམས་ལོག་པར་ལྟ་བ་ལ་སོགས་པ༔ སྐུ་ཡི་དམ་ཚིག་ཉམས་པ་མཐོལ་ལོ་བཤགས༔ ཞེས་པའི་ཚིགས་སུ་བཅད་པ་གཅིག་དང་རྐང་པ་གསུམ་གྱིས་བསྟན་ལ། ཧེ་རུ་ཀ་སྙིང་རྗེ་རོལ་བ་ལས། ང་རྒྱལ་ཁེངས་སེམས་དབང་དུ་བསྡུས་པས་ན། །སློབ་དཔོན་སྐུ་མ་མཉེས་པ་མཐོལ་ལོ་བཤགས། །བརྩེ་གདུང་ཆུང་བའི་དབང་དུ་གྱུར་པས་ན། །གྲོགས་མཆེད་ཐུགས་དང་འགལ་བ་མཐོལ་ལོ་བཤགས། །ཞེས་གསུངས་པ་ལྟར། ཀུན་སློང་འདོ༷ད་ཆ༷གས་དང་། ཞེ༷་སྡ༷ང་དང་། གཏི༷་མུ༷ག་དང་། ང༷་རྒྱལ༷་དང༷་། ཕྲ༷ག་དོ༷ག་དང་། སེར་སྣ་དང་། ལོག་ལྟ་དང་། ཐེ་ཚོམ་ལ༷་སོ༷གས་པའི་དབང་དུ་ཤོ༷ར་ནས༷་གནོང༷་པ་སྟེ་ངོ་ཚ་བ་དང་འཁྲུལ་པའི་ལས་དམ་ཚིག་ཉམས་པའི་བྱ་བ་བགྱི༷ས་པ༷་ནི་དཔེར་ན་ཡེ་ཤེས་རྔམ་གློག་ལས། སྐུ་ཡི་དམ་ཚིག་ཅེས་བྱ་བ། །བླ་མ་སྤུན་ལ་གདུང་སེམས་ལྡན། །མངན་དང་དཔྱ་སེམས་སྤངས་པ་ཡིན། །ཞེས་གསུངས་པ་ལྟར། བླ་མ་རྡོ༷་རྗེ༷་སློ༷བ་དཔོ༷ན་མདོ་སྔགས་ཀྱི་བསྟ༷ན་པ༷འི་སྒྲོན༷་མེ༷་ཆེན་པོར་གྱུར་པ་ལ༷་ཁ་ཙམ་མ་ཡིན་པར་སྙིང༷་ན༷ས་སྨོ༷ད་ཅི༷ང་སྐུ་ལ་བདོ་བ་ལ་སོགས་པས་བླ་མའི་ད༷མ་ཚི༷ག་ཉ༷མས་པ༷་དང༷་། དེ་བཞིན་དུ་བླ་མ་དང་དཀྱིལ་འཁོར་གཅིག་དུ་དབང་དང་གདམས་ངག་བླངས་པ་ལ་སོགས་པས་དམ༷་ཚི༷ག་ལྷན་གཅི༷ག་ཏུ་མནོས་པ༷འི་རྡོ༷་རྗེ༷འི་སྤུན༷་མཆེད་རྣམ༷ས་ལ༷་གནོད་པར་བྱ་འདོད་པ་སོགས་ང༷ན་སེ༷མས་འཆང་ཞིང་དེ་དག་གི་སྒོ་གསུམ་གྱི་སྤྱོད་པ་ལ་ལོ༷ག་པ༷ར་ལྟ༷་བ༷་ལ༷་སོ༷གས་པ༷་གོང་སྨོས་ལྟར་སྐུ༷་ཡི༷་དམ༷་ཚི༷ག་ཏུ་གྲགས་པ་རྣམས་ཉམ༷ས་པ༷་ལ་འགྱོད་པས་མཐོ༷ལ་ལོ༷། །མི་འཆབ་བོ། །ཕྱིན་ཆད་ཀྱང་སྡོམ་པར་བགྱི་བས་བཤ༷གས་པར་བྱའོ། །ཞེས་པའོ།།

གཉིས་པ་ནི། ཡི་དམ་ལྷ་ཡི་ཕྱག་རྒྱ་མ་གསལ་ཞིང་༔ སྔགས་ཀྱི་བསྙེན་པ་གྲངས་ལས་ཆད་པ་དང་༔ དུས་དྲུག་ལས་ཀྱི་ཆོ་གའི་ཁྱད་པར་དུ༔ བསྙེན་སྒྲུབ་བསྐང་བའི་ཆོ་ག་མ་བགྱིས་ཏེ༔ བཀའ་ལྟར་མ་ལྕོགས་གཞུང་ལྟར་རྔོ་མ་ཐོགས༔ གསུང་གི་དམ་ཚིག་ཉམས་པ་མཐོལ་ལོ་བཤགས༔ ཞེས་པའི་ཚིགས་སུ་བཅད་པ་གཅིག་དང་རྐང་པ་གཉིས་ཀྱིས་བསྟན་ལ། དེ་ཡང་འཇམ་དཔལ་རྩ་རྒྱུད་ལས། ཕྱག་རྒྱ་འདི་ནི་རབ་མཆོག་སྟེ། །ཕྱག་རྒྱ་མ་ལུས་རབ་ཏུ་སྒྲུབ། །ཅེས་དང་། དཀྱིལ་འཁོར་བདག་པོའི་སྔགས་དྲན་ནས། །སྔགས་ཤེས་པས་ནི་ཕྱག་རྒྱ་བཅིང་། །ཕྱག་རྒྱ་མ་ལུས་བཅིང་བ་ལ། །ཆོ་ག་མཆོག་འདི་འདོད་པ་ཡིན། །ཞེས་དང་། ཟླ་གསང་ཐིག་ལེ་ལས། དེ་ནས་ཕྱག་རྒྱ་བཅིང་བཤད་དེ། །རྟག་ལ་སོགས་པའི་དེ་ཁོ་ན། །གང་གིས་མྱུར་དུ་བཅིངས་པ་ཡིས། །སངས་རྒྱས་དངོས་གྲུབ་དེ་ཆེར་འགྲོ། །ཞེས་གསུངས་པ་ལྟར། ཡི་དམ་ཞི་ཁྲོ་དམ་པ་རིགས་བརྒྱ་ལ་སོགས་པའི་རང་གི་ཡི༷་དམ༷་གྱི་ལྷ༷་གང་ཡིན་པ་དེ་ཡི༷་ཆོས་དང་ལས་དང་དམ་ཚིག་གི་ཕྱག་རྒྱ་ལ་སོགས་པ་གསལ་དགོས་པ་ལ་དེ་ལྟར་གསལ་མ་ནུས་པས་མ༷་གས༷ལ་ཞི༷ང་། རྣམ་སྣང་མངོན་བྱང་ལས། གསང་སྔགས་གྲངས་ནི་སུམ་འབུམ་དུ། །ཕལ་ཆེར་ངས་ནི་བཤད་པ་དག །ལུས་ཅན་སྡིག་དང་བྲལ་བ་ཡི། །སྔགས་པ་རྣམ་པར་དག་པ་ལ། །བཟླས་བརྗོད་གྲངས་ནི་བསྟན་པ་སྟེ། ཞེས་དང་། ལེགས་གྲུབ་ཀྱི་རྒྱུད་ལས། མདོར་ན་ཟློས་པ་པོ་རྣམས་ཀྱིས། །བཟླས་བརྗོད་ཆོ་ག་གང་གསུངས་པ། །ཆོ་ག་དེ་དག་ཉིད་ཀྱིས་ནི། །རིག་སྔགས་བསྙེན་པས་འགྲུབ་པར་འགྱུར། །ཞེས་གསུངས་པ་ལྟར། ཡི་དམ་འགྲུབ་བྱེད་ཀྱི་ཡི་དམ་གང་ཡིན་གྱི་སྔག༷ས་ཀྱི༷་བསྙེ༷ན་པ༷་གྲངས་ཀའི་ཚད་ལ་ཟིན་དགོས་པ་ལ་དེ་ལྟར་མ་སླེབས་ཤིང་མ་ཚང་བར་གྲང༷ས་ཀ་ལ༷ས་ཆ༷ད་པ༷་ད༷ང་། དམ་ཚིག་ཆེན་པོའི་རྒྱུད་ལས། མཚན་མོ་ཤེས་རབ་སྐུ་གསུང་ཐུགས། །ཉིན་མོ་ཐབས་ཀྱི་སྐུ་གསུང་ཐུགས། །ཉི་མ་ནུབ་དང་ཉི་མ་ཤར། །ཉི་མ་གུང་ནི་ཐབས་ཀྱི་དུས། །ནམ་སྲོས་ནམ་ནི་ལངས་པ་དང་། །ནམ་གྱི་གུང་ནི་ཤེས་རབ་དུས། །དུས་དྲུག་མཆོད་པ་རྒྱུན་མི་ཆད། །ཅེས་དང་། དཔལ་རྡོ་རྗེ་གདན་བཞི་ལས། ཤ་དང་ཉ་ཡིས་སྦྱར་བ་ཡིས། །ཨོཾ་གྱིས་སྤྱན་དྲངས་གཏོར་མ་སྦྱིན། །ཇི་ལྟར་ལས་ལ་སོགས་བརྩམ་པ། །བཅོ་ལྔ་དང་ནི་བཅུ་བཞི་དང་། །ཁྱད་པར་དུ་ནི་ཚེས་བརྒྱད་ལའོ། །ཞེས་གསུངས་པ་ལྟར། ཚེས་ཀྱི་དབང་དུ་བྱས་ན་ཉ་སྟོང་གཉིས་དང་། ཡར་མར་གྱི་ཚེས་བཅུ་བཞི་གཉིས་དང་། ཡར་མར་གྱི་ཚེས་བརྒྱད་གཉིས་ཏེ་དུས་དྲུག་དང་། དུས་ཀྱི་དབང་དུ་བྱས་ན་ཉི་ཤར་གྱི་དུས་དང་། ཉིན་གུང་དང་། ཉི་ནུབ་ཀྱི་དུས་ཏེ་ཉིན་མོ་ཐབས་ཀྱི་དུས་གསུམ་དང་། མུན་སྲོས་པ་དང་། མཚན་གུང་དང་། ནམ་ལང་པའི་དུས་ཏེ་མཚན་མོ་ཤེས་རབ་ཀྱི་དུས་གསུམ་སྟེ་དུས༷་དྲུག༷་གི་ཐུན་གྱི་ཡི་དམ་ལ་མཆོད་པ་ལ་སོགས་པའི་ལ༷ས་ཀྱི་ཆོ༷་ག༷འི་ཁྱ༷ད་པ༷ར་མི་འདྲ་བ་ཉིད་དུ༷་གྱུར་པ་བསྙེ༷ན་སྒྲུབ༷་དང་། ལྷ་དང་སྲུང་མའི་ཐུགས་དམ་བསྐ༷ང་བ༷འི་ཆོ༷་ག༷་དང་། ཆད་ལྷག་གི་ཁ་སྐོང་གི་བསྙེན་པ་དང་སྦྱིན་སྲེག་རྣམས་བྱ་དགོས་པ་ལ་དེ་ལྟར་མ༷་བགྱི༷ས་ཏེ༷། བླ་མའི་བཀ༷འ་ལྟར༷་སྒྲུབ་པར་མ༷་ལྕོག༷ས་པ་དང་། གསང་སྔགས་ཀྱི་རྒྱུད་གཞུང༷་ནས་སྟོན་པ་ཐུགས་རྗེ་ཅན་གྱི་ཇི་སྐད་བཀའ་བསྩལ་པ་ལྟ༷ར་དུ་ཉམས་ལེན་དང་ལག་ལེན་བྱེད་པར་རྔོ༷་མ༷་ཐོག༷ས་པར་གསུ༷ང་གི༷་ད༷མ་ཚི༷ག་ཏུ་བཤད་པ་རྣམས་ལས་འགལ་ཏེ་ཉམ༷ས་པ༷་རྣམས་འགྱོད་པས་མཐོ༷ལ་ལོ༷། །བཤ༷གས་སོ། །མི་སྦེད་དོ། །ཕྱིན་ཆད་ཀྱང་སྡོམ་པར་བགྱི་ལགས་སོ་ཞེས་པའོ།།

གསུམ་པ་ནི། རྡོ་རྗེ་སློབ་དཔོན་བྱམས་པའི་སྐུ་དྲིན་གྱིས༔ སྙན་ཁུང་བརྒྱུད་ནས་སེམས་ཀྱི་དཀྱིལ་དུ་བཞག༔ ཐུགས་ཀྱི་མན་ངག་སྟེར་ནས་དམ་ཚིག་སྨོས༔ གསང་ཚིག་འདས་ནས་འཆོལ་བར་སྨྲ་ལ་སོགས༔ ཐུགས་ཀྱི་དམ་ཚིག་ཉམས་པ་མཐོལ་ལོ་བཤགས༔ ཞེས་པའི་ཚིགས་སུ་བཅད་པ་གཅིག་དང་རྐང་པ་གཅིག་གིས་བསྟན་ལ། བླ་མ་རྡོ༷་རྗེ༷་སློ༷བ་དཔོ༷ན་ཐུགས་གདུལ་བྱ་དང་སློབ་མ་ལ་རྟག་ཏུ་བྱམ༷ས་པ༷འི་བདག་ཉིད་ཅན་གང་གི་སྐུ༷་ཡི་དྲི༷ན་གྱི༷ས་ནི་གསང་སྔགས་རྡོ་རྗེ་ཐེག་པའི་ཉེ་ལམ་ཟབ་མོའི་རྒྱུད་སྨིན་བྱེད་ཀྱི་དབང་དང་། གྲོལ་བྱེད་ཀྱི་གདམས་པ་རྣམས་སྙ༷ན་ཁུང༷་སྟེ་རྣ་བའི་བུ་ག་རུ་བརྒྱུད༷་ནས༷་སློབ་མ་རང་གི་སེམ༷ས་ཀྱི༷་དཀྱི༷ལ་དུ༷་བཞ༷ག་པ་ལགས་ཤིང་། དེ་ལྟར་བཞག་པ་དེ་ཡང་གདམས་པ་ཉི་ཚེ་བ་ཙམ་མིན་པར་སློབ་དཔོན་ཉིད་ཀྱི་ཐུག༷ས་ཀྱི༷་དཀྱིལ་དུ་སྙིང་པོའི་ཡང་ཞུན་ཉིད་དུ་འཆང་བའི་གང་ཟག་གཅིག་འཚང་རྒྱ་བའི་མ༷ན་ང༷ག་ཟབ་མོ་ཆ་ཚང་ལ་དོན་མ་ནོར་བ་དེ་ཡིན་པ་ལ། དེ་ཉིད་སྟེར༷་ནས༷་ཐར་ལམ་ཡང་དག་པར་བསྟན་ཀྱང་དད་པས་མི་བཀུར་ཞིང་། དེ་ལྟར་སྟེར་བའི་མན་ངག་གི་སྐབས་ཀྱི་དམ༷་ཚི༷ག་གི་རྣམ་གྲངས་དང། དེ་དག་སྲུང་བའི་ཐབས་རྣམས་ཞིབ་པར་སྨོ༷ས་པ་རྣམས་མ་བསྲུང་པ་དང་། གོང་དུ་བཤད་ཟིན་ལྟར་གཞུང་ནས་གསང་བར་གདམས་པའི་གས༷ང་ཚི༷ག་དང་། བླ་མས་གནང་བའི་གསང་བ་རྣམས་གསང་དགོས་པར་གདམས་པ་ལྟར་གསང་བར་མ་བྱས་པར་སྣོད་མིན་དང་། རྒྱུད་མ་སྨིན་པ་དང་། ལོག་ལྟ་ཅན་རྣམས་ལ་བསྟན་པར་བགྱིས་ཏེ་བླ་མའི་བཀའ་ལས་འད༷ས་ན༷ས་ཅི་འདོད་གང་འདོད་དུ་གསང་སྒོ་འཆོ༷ལ་བ༷ར་ཕྱི་ལ་སྨྲ༷་བ་ལ༷་སོ༷གས་པ་ཐུག༷ས་ཀྱི༷་ད༷མ་ཚི༷ག་ཏུ་སྨོས་པ་དག་ལས་ཉམ༷ས་པ༷་རྣམས་རབ་ཏུ་འགྱོད་པས་མཐོ༷ལ་ལོ༷་བཤ༷གས་སོ་ཞེས་པའོ།།

དཔེ་ལ་ལའི་རྩ་བའི་ཚིག་ཏུ། ཐུགས་ཀྱི་མན་ངག་སྟོར་ནས་དམ་ཚིག་སྨོད༔ ཅེས་པ་ཡོད་པས་དེ་དག་ན་ནི་བླ་མས་ཐུག༷ས་ཀྱི༷་མ༷ན་ང༷ག་ཟབ་མོ་རྣམས་སློབ་མ་ལ་གནང་ནས་བསྐྱངས་ནའང་སློབ་མས་ནི་དམ་ཚིག་ལས་འདས་ཤིང་མན་ངག་གི་དོན་རྣམས་ཉམས་སུ་མི་ལེན་པར་སྟོར༷་བར་བྱས་ནས༷་བླ་མ་དང་དམ༷་ཚི༷ག་ལ་སྨོ༷ད་པས་ལོག་པར་ལྟ་བ་ལ་འཕྱན་ནས་གསང་སྒོ་འཆོལ་བ་ཞེས་པར་འགྲེལ་དགོས་སོ་སྙམ་མོ།།

བཞི་བ་ནི། ཆོས་རྣམས་མཉམ་པ་ཉིད་དུ་མ་རྟོགས་ཏེ༔ ཡན་ལག་དམ་ཚིག་ཉམས་པ་མཐོལ་ལོ་བཤགས༔ ཞེས་པའི་ཚིགས་སུ་བཅད་པའི་རྐང་པ་གཉིས་ཀྱིས་བསྟན། ཀུན་ཉོན་འཁོར་བ་དང་། རྣམ་བྱང་མྱང་འདས་ཀྱིས་བསྡུས་པའི་ཆོ༷ས་རྣ༷མས་བདེན་མེད་སྤྲོས་བྲལ་མཉ༷མ་པ༷་ཉི༷ད་དུ༷་གནས་པ་ལ་དེ་ལྟར་མ༷་རྟོ༷གས་པར་གྱུར་ཏེ༷་ཆོས་ཀུན་ལ་བདག་ཏུ་བཟུང་ཞིང་གཉིས་སུ་འཁྲུལ་བའི་དབང་གིས། ཇི་སྐད་དུ་ཡེ་ཤེས་རྔམ་གློག་ལས། ཡན་ལག་དམ་ཚིག་མི་སྤང་དང་། །མི་འདོར་སྤྱོད་དང་ཤེས་པ་དང་། །གྲུབ་པ་ཡིན་ཏེ་རྣམ་ལྔ་པོ། །དོན་ལ་རྣམ་པ་བརྒྱད་དུ་གྲགས། །ཞེས་དང་། དཔལ་སྐུ་གསུང་ཐུགས་ཀྱི་རྒྱུད་ལས། གཉིས་མེད་ཁྱོད་ཀྱིས་བླང་བར་བྱ། །མི་བསྐྱོད་བཅོམ་ལྡན་དང་མཚུངས་པའི། །ཟིལ་གྱིས་མི་ནོན་ཁྱོད་ཀྱིས་བླང་། །དམ་ཚིག་སྤྱོད་པ་སྤྱད་པ་ཡི། །མཆོག་གི་དེ་ཉིད་བླང་བར་བྱ། །ཐབས་དང་ཤེས་རབ་ཟུང་དུ་སྦྲེལ། །ནམ་ཡང་ཁྱོད་ཀྱིས་བླང་བར་བྱ། །ཚངས་སྤྱོད་དེ་བཞིན་བསམ་གཏན་ལ། །འབད་པས་སེམས་ནི་བརྟན་པར་བྱ། །ཆང་ནི་རྟག་བཏུང་ཁྲོ་མི་བྱ། །དེ་བཞིན་ཤ་ཡང་ངེས་པར་བྱ། །གཞན་གྱི་ཕྱག་རྒྱ་བསྟེན་པར་བྱ། །འདི་ནི་དམ་ཚིག་བརྒྱད་ཡིན་ནོ། །ཞེས་གསུངས་པ་ལྟར་གོང་སྨོས་ཀྱི་སྔགས་ཀྱི་ཡ༷ན་ལ༷ག་གི་ད༷མ་ཚི༷ག་དང་སྒོས་ཀྱི་དམ་ཚིག་རྣམས་ལས་ཉམ༷ས་པ༷་ལ་འགྱོད་པ་དྲག་པོས་མི་འཆབ་པར་མཐོ༷ལ་ལོ༷། །བཤ༷གས་པར་བགྱིའོ་ཞེས་པའོ།།

ལྔ་བ་ནི། ལེ་ལོ་སྙོམས་ལས་གཉིད་ཀྱི་དབང་གྱུར་ཏེ༔ བསྙེན་སྒྲུབ་དམ་ཚིག་ཉམས་པ་མཐོལ་ལོ་བཤགས༔ ཞེས་པའི་ཚིགས་སུ་བཅད་པའི་རྐང་པ་གཉིས་ཀྱིས་བསྟན། དེ་ཡང་འཕགས་པ་འོད་ཟེར་ཀུན་ཏུ་བཀྱེ་བ་བསྟན་པའི་མདོ་ལས། ལེ་ལོ་སྙོམས་ལས་ལ་གནས་པས། །རྟག་ཏུ་ལུས་དང་ངག་ཡིད་ཀྱི། །མི་དགེ་ལས་ནི་སྤྱོད་པས་ན། །དེ་ལ་ཚུལ་ཁྲིམས་དག་པ་དང་། །ཤེས་རབ་མང་ཐོས་ཅི་ཡང་མེད། །ཅེས་དང་། ཧེ་རུ་ཀ་སྙིང་རྗེ་རོལ་བ་ལས། ལེ་ལོ་གཉིད་ཀྱི་དབང་དུ་གྱུར་པས་ན། །སྒོམ་དང་སྒྲུབ་ལ་གཡེལ་བ་མཐོལ་ཞིང་བཤགས། །ཞེས་གསུངས་པ་ལྟར། རང་ཉིད་བརྙས་ཤིང་སེམས་སྒྱིད་ལུག་པའི་ལེ༷་ལོ༷་དང་། མི་བརྩོན་པར་བཏང་སྙོམས་སུ་འཇོག་པའི་སྙོམ༷ས་ལ༷ས་དང་། གཉི༷ད་ཀྱི༷་རོ་ལ་དགའ་བའི་དབ༷ང་དུ༷་གྱུར༷་ཏེ། གསང་བ་འདུས་པའི་རྒྱུད་ཕྱི་མ་ལས། བསྙེན་པའི་ཆོ་ག་དང་པོ་སྟེ། །ཉེ་བར་སྒྲུབ་པ་གཉིས་པ་ཡིན། །སྒྲུབ་པ་ཡང་ནི་གསུམ་པ་སྟེ། །སྒྲུབ་པ་ཆེན་པོ་བཞི་པའོ། །ཞེས་གསུངས་པ་ལྟར་གྱི་ཞི་ཁྲོ་དམ་པ་རིགས་བརྒྱའི་ལྷ་ལ་སོགས་པའི་ཡི་དམ་གྱི་བསྙེ༷ན་པ་དང་། ཉེ་བསྙེན་དང་། སྒྲུབ་པ་དང་། སྒྲུབ༷་པ་ཆེན་པོ་རྣམས་ལ་ཚུལ་བཞིན་བརྩོན་མ་ནུས་པ་དང་། བསྙེན་སྒྲུབ་ལ་དགོས་པའི་ད༷མ་ཚི༷ག་རྣམས་བསྲུང་མ་ནུས་པར་ཉམ༷ས་པ༷་རྣམས་ཀྱང་མི་འཆབ་པར་མཐོ༷ལ་ལོ༷། །བཤ༷གས་སོ། །ཕྱིན་ཆད་ཅི་ལ་ཐུག་ཀྱང་སླར་མི་བགྱིའོ་ཞེས་བསྙེན་སྒྲུབ་ལ་བརྩོན་པར་མ་ནུས་པ་དང་དེའི་ཕྱོགས་སུ་གཏོགས་པའི་ཉེས་པ་རྣམས་བཤགས་པའོ།།

དྲུག་པ་ནི། ལུས་ངག་ཡིད་ཀྱི་སྒྲུབ་བྱ་འདས་པ་ཡི༔ སྐུ་གསུང་ཐུགས་ཀྱི་དམ་ཚིག་ཉམས་པ་བཤགས༔ ཞེས་པའི་ཚིགས་སུ་བཅད་པའི་རྐང་པ་གཉིས་ཀྱིས་བསྟན། ཧེ་རུ་ཀ་སྙིང་རྗེ་རོལ་བ་ལས། འདོད་ཆགས་ཞེ་སྡང་གཏི་མུག་དབང་དུ་གྱུར་པས་ན། །ལུས་ངག་སེམས་ཀྱིས་སྡིག་བགྱིས་མཐོལ་ཞིང་བཤགས། །ཞེས་སུངས་པ་ལྟར། ཡང་ཀུན་སློང་འདོད་ཆགས་ལ་སོགས་པས་ཀུན་ནས་བསླངས་ཏེ་ལུ༷ས་ཀྱི་སྒྲུབ་བྱ་དང་། ང༷ག་གི་སྒྲུབ་བྱ་དང་། ཡི༷ད་ཀྱི༷་སྒྲུབ༷་པར་བྱ༷་བ་ཉིད་དུ་གྱུར་པའི་དམ་ཚིག་ཅི་ཡོད་པ་རྣམས་ཇི་བཞིན་བསྒྲུབ་མ་ནུས་པར་དེ་ལས་འད༷ས་པ༷་ཡི༷་ཉེས་ལྟུང་ཅི་མཆིས་པ་ཐམས་ཅད་དེ། མདོར་ཧྲིལ་གྱིས་བསྡུ་ན། ཡེ་ཤེས་རྔམ་གློག་ལས། གསང་སྔགས་རྒྱ་མཚོ་ཆེན་པོ་ཡི། །དམ་ཚིག་བསམ་ཡས་ཇི་སྙེད་པ། །རྩ་བ་ཡན་ལག་གཉིས་སུ་འདུས། །རྩ་བའི་དམ་ཚིག་གསུམ་ཡིན་ཏེ། །སྐུ་གསུང་ཐུགས་སུ་རྒྱལ་བས་གསུངས། །ཞེས་གསུངས་པ་ལྟར། སྔགས་ཀྱི་དམ་ཚིག་ཡོད་དོ་ཅོག་སྐུ༷་གསུ༷ང་ཐུག༷ས་ཀྱི༷་ད༷མ་ཚི༷ག་ལ་འདུས་པས་དེ་གསུམ་གྱིས་བསྡུས་པའི་དམ་ཚིག་ཉམ༷ས་པ༷་རྣམས་འགྱོད་པས་མཐོལ་ཞིང་བཤ༷གས་པར་བགྱིའོ་ཞེས་པས་མཇུག་བསྡུས་པའོ།།

བཤགས་པ་བྱེ་བྲག་པ།

གཉིས་པ་བཤགས་པ་བྱེ་བྲག་པ་ལ་ནི། རྩ་བ་གསུམ་གྱི་དང་པོ་བླ་མ་ལ་བཤགས་པ་དང་། གཉིས་པ་ཡི་དམ་ལ་བཤགས་པ་དང་། གསུམ་པ་མཁའ་འགྲོ་ལ་བཤགས་པ་དང་། ཆོས་སྐྱོང་སྲུང་མ་ལ་བཤགས་པ་དང་། ཕ་མ་ལ་བཤགས་པ་དང་། མཆེད་ལྕམ་ལ་བཤགས་པ་དང་། འགྲོ་དྲུག་གི་སེམས་ཅན་ལ་བཤགས་པ་དང་། སོ་བྱང་སྔགས་གསུམ་གྱི་བཤགས་པ་བསྡུས་ཏེ་བསྟན་པ་དང་། བཤགས་པའི་མཇུག་བསྡུ་བ་དང་དགུ་ལས།

དང་པོ་ནི། རྗེ་བཙུན་བླ་མ་རྣམས་ཀྱི་སྤྱན་ལམ་དུ༔ ཡོ་བྱད་འབྱོར་ཚོགས་ཆུང་བ་མཐོལ་ལོ་བཤགས༔ ཞེས་པའི་ཚིགས་སུ་བཅད་པ་ཕྱེད་ཀྱིས་བསྟན། དེ་ཡང་དཔལ་རྡོ་རྗེ་མཁའ་འགྲོ་ལས། རྡོ་རྗེ་སློབ་དཔོན་མཚན་ཉིད་ནི། །རབ་ཏུ་བཤད་ཀྱིས་ལྷ་མོ་ཉོན། །དུལ་ཞིང་ཆ་ལུགས་མཛེས་པ་དང་། །སེམས་ཅན་ཀུན་ལ་མི་འཇིགས་སྦྱིན། །སྔགས་དང་རྒྱུད་ཀྱི་སྦྱོར་བ་ཤེས། །རྣལ་འབྱོར་བཟོ་ཡི་ཆ་ལ་མཁས། །ཐམས་ཅད་དུ་ནི་འཇམ་པར་སྨྲ། །སེམས་ཅན་ཀུན་ལ་བུ་བཞིན་ལྟ། །རྟག་ཏུ་གཏོང་ལ་དགའ་བ་དང་། །བསམ་གཏན་སྦྱོར་ལ་མངོན་པར་བརྩོན། །སྙིང་རྗེ་ཕན་པའི་སེམས་ཀྱིས་ནི། །བདེན་པར་སྨྲ་ཞིང་འཚེ་མི་བྱེད། །རྟག་ཏུ་མཉམ་པའི་སེམས་བསྐྱེད་པས། །སེམས་ཅན་ཀུན་གྱི་མགོན་སྐྱོབ་སྟེ། །སེམས་ཅན་བསམ་པའི་བྱེ་བྲག་མཁས། །མགོན་མེད་རྣམས་ལ་གཉེན་ལྟར་བརྩེ། །མཛའ་སྡུག་གིས་ནི་ལེགས་པས་ལྟ། །སྔགས་ཀྱི་ཚུལ་ལ་ཤིན་ཏུ་གོམས། །དམ་ཚིག་སྤྱོད་ལ་རབ་ཏུ་གུས། །ཕྱག་རྒྱ་བརྡ་ཡི་སྦྱོར་བ་རིག །རྣལ་འབྱོར་མ་རྣམས་དམ་ཚིག་ལ། །བརྡ་ཡིས་སྦྱོར་བ་སྟོན་པ་དང་། །གཉིས་མེད་སྦྱོར་བ་མི་ཕྱེད་གནས། །སྔགས་ཀྱི་འཁོར་ལོ་སྤྱོད་ལ་གུས། །དབང་བསྐུར་དོན་གྱི་ཡོན་ཏན་འབྱུང་། །གནས་སོགས་མཐོང་བའི་ངང་ཚུལ་ཅན། །དེ་ཉིད་བཅུ་ནི་ཡོངས་སུ་ཤེས། །འདི་ནི་སློབ་དཔོན་ཞེས་བྱར་བརྗོད། །ཅེས་གསུངས་པ་ལྟར་གྱི་རྡོ་རྗེ་སློབ་དཔོན་དམ་པའི་ཡོན་ཏན་དང་ལྡན་པ་གདུལ་བྱ་ཀུན་གྱི་རྗེ༷་བོར་གྱུར་ཅིང་། ཐུགས་རྒྱུད་སོ་བྱང་སྔགས་གསུམ་གྱི་སྡོམ་པས་བཙུ༷ན་པའི་བླ༷་མ༷་དམ་པ་རྣམ༷ས་ཀྱི༷་སྤྱན༷་ལ༷མ་དུ༷། ཇི་སྐད་དུ་མཁའ་འགྲོ་རྒྱ་མཚོའི་རྒྱུད་ལས། སློབ་དཔོན་མཆོད་བྱ་ཡང་དག་པར། །རྡོ་རྗེ་འཆང་དུ་བྱས་ནས་ནི། །མུ་ཏིག་གསེར་དང་རིན་ཆེན་རྣམས། །གླང་རྟ་ས་གཞི་ཡུལ་ལྗོངས་དང་། །བྲན་ཕོ་བྲན་མོ་འཁོར་རྣམས་དང་། །ཆུང་མ་ཕུན་སུམ་ཚོགས་ཀུན་དང་། །གོས་ཟུང་དུ་མ་རྣམས་དང་ནི། །དགྱེས་པའམ་ས་ལ་གང་ཅུང་ཟད། །བདག་ཏུ་ལྟ་བ་དང་བྲལ་བས། །དབུལ་བྱ་གཙོ་བོ་ཞི་བར་གྱིས། །བདག་ཉིད་དངོས་པོ་ཐམས་ཅད་ཀྱིས། །ཕྱག་བྱས་ནས་ནི་དབུལ་བར་བྱ། །ཞེས་དང་། ཡེ་ཤེས་རྔམ་གློག་ལས། མགོ་དང་མིག་དང་གསང་མ་སྙིང་། །རྟག་ཏུ་འབྲལ་བར་འཕང་བ་ལྟར། །བླ་མ་རྡོ་རྗེ་སློབ་དཔོན་ལ། །མི་འབྲལ་སེམས་ཀྱིས་དེ་ལྟར་ལྟ། །དེ་ཡི་ཕྱི་བཞིན་བེའུ་ལྟར་འབྲང་། །དེ་ཡི་དགོས་པ་ཅི་ཡང་རུང་། །སྐོང་ན་སྲོག་ལའང་མི་ལྟ་ན། །ཟང་ཟིང་གཞན་ལྟ་སྨོས་ཅི་དགོས། །ཞེས་དང་། ཕྱག་ཆེན་ཐིག་ལེ་ལས། དེ་ནས་སྣ་ཚོགས་རྫས་ཀྱིས་ནི། །བླ་མ་དད་པས་མཆོད་པར་བྱ། །སྣ་ཚོགས་རས་ནི་བརྒྱ་སོགས་དང་། །རིན་ཆེན་སྣ་ཚོགས་རྒྱལ་མཚན་མཆོག །མུ་ཏིག་ཕྲེང་བ་རིན་ཐང་མེད། །གྲངས་མེད་གསེར་གྱིས་མཆོད་བྱའོ། །ཞེས་དང་། དཔལ་ཡེ་ཤེས་ཐིག་ལེ་ལས། དེ་བས་ཀུན་ཏུ་འབད་པ་ཡིས། །གུས་པས་བླ་མ་མཆོད་པར་བྱ། །རིན་ཆེན་སྣ་ཚོགས་བཟོར་བྱས་ལེགས། །གསེར་གྱི་པདྨ་དྲི་མ་མེད། །མུ་ཏིག་དོ་ཤལ་རིན་ཐང་མེད། །སྣ་ཚོགས་དུ་མ་ཡི་ནི་གོས། །གཅེས་པའི་བཙུན་མོ་བུ་དང་བཅས། །གླང་ཆེན་རྟ་དང་བྲན་ལ་སོགས། །དཔལ་ལྡན་བླ་མའི་སྤྱན་སྔ་རུ། །དད་གུས་བརྟན་པས་དབུལ་བར་བྱ། །ཞེས་དང་། ཆོ་ག་གསང་བ་སྤྱི་རྒྱུད་ལས། སློབ་མས་གསང་སྔགས་གྲུབ་འདོད་པས། །བླ་མ་མཆོད་པ་བྱ་བའི་ཕྱིར། །སློབ་མ་དམ་ཚིག་སྲུང་བ་ཡིས། །གོས་དང་གསེར་དང་བདག་ཉིད་དང་། །བུ་དང་བདོག་པ་ཐམས་ཅད་ནི། །བླ་མ་དག་ལ་ཡོན་དུ་འབུལ། །ཞེས་གསུངས་པ་ལྟར་རང་ལ་དབང་དང་གདམས་ངག་གནང་བའི་བླ་མ་དེ་ལ་བདོག་དགོས་ཀྱི་ཟང་ཟིང་གི་དངོས་པོ་སྣ་ཚོགས་ཀྱིས་མཆོད་དགོས་པ་ཡིན་ནའང་། རང་ཉིད་དབུལ་བའི་རྐྱེན་གྱིས་མཁོ་བའི་ཡོ༷་བྱ༷ད་དུ་མའི་ལོངས་སྤྱོད་ཀྱི་འབྱོ༷ར་བ་རྒྱ་ཆེན་པོ་ཚོ༷གས་པར་བགྱིད་མ་ནུས་པས་འབུལ་བའི་དངོས་པོ་རྒྱ་ཆུ༷ང་བ༷་དང་གྲངས་ཉུང་པ་སོགས་བླ་མ་དགྱེས་བྱེད་ཀྱི་ཡོན་ནམ་མཆོད་པ་འབུལ་བའི་སྒོས་ཟང་ཟིང་གིས་ཞབས་ཏོག་བསྒྲུབ་མ་ནུས་པ་དེ་མཐོ༷ལ་ལོ༷། །བཤ༷གས་སོ། །སླད་ཆད་ཀྱང་ཅི་ནུས་པས་མཆོད་པར་བགྱིད་ཅིང་བླ་མ་དམ་པ་མཉེས་པར་བྱའོ། །ཞེས་པའོ།།

འོ་ན་བླ་མ་ལ་གསེར་དངུལ་རྟ་གླང་དང་། བུ་དང་ཆུང་མ་སོགས་ཀྱིས་ངེས་པར་ན་མཆོད་དགོས་ཤིང་མ་འབྱོར་ན་མི་རུང་བ་ཡིན་ནམ་ཞེ་ན། དེ་ནི་གཏན་མ་ཡིན་པར་རབ་ན་རང་ལ་ཡོད་ཚད་དེ་དང་། ཡང་ན་རང་གིས་ཅི་འབྱོར་གྱི་དངོས་པོ་དེ་སེར་སྣ་དང་ངོམ་ཆོས་མེད་པར་འབུལ་ན་རུང་བ་ལས་སྲིད་ན་ལེགས་པོའི་དངོས་པོ་ཡོད་ཚད་བཙལ་ཏེ་འབུལ་དགོས་པ་དང་། བུ་དང་ཆུང་མ་དང་བཅས་པ་ངེས་པར་འབུལ་དགོས་པའི་དོན་ནི་མ་ཏེ། གསལ་རྒྱལ་གྱི་ཚིགས་སུ་བཅད་པ་ལས། སུ་དག་བདེ་བར་གཤེགས་པའི་མཆོད་པའི་རྟེན། །མཆོད་པའི་ཁྱད་པར་ཅི་ཡོད་ཅི་འབྱོར་པ། །འཚམ་པར་འབུལ་བྱེད་དེ་དག་དྲི་མེད་ཅིང་། །མྱ་ངན་མེད་པའི་བླ་མེད་བྱང་ཆུབ་འཐོབ། །ཅེས་གསུངས་པ་ལྟར་སྤྱིར་བདེ་བར་གཤེགས་པའི་རྟེན་ལ་འབྱོར་ཚེ་རིན་ཆེན་སྣ་ཚོགས་རིན་ཐང་དང་བྲལ་བ་ལ་སོགས་པ་བདོག་དགོས་ཀྱི་ལོངས་སྤྱོད་ཡོད་དོ་ཅོག་གིས་མཆོད་དགོས་པ་དང་། མ་འབྱོར་ན་ནི་རང་གི་འབྱོར་བ་དང་འཚམ་པ་ལྟར་འབུལ་དགོས་པ་ལས་རྒྱ་ཆེ་གྲངས་མང་རིན་ཐང་ཆེ་བ་ཞིག་ངེས་པར་ན་ལྡན་དགོས་པར་ནི་མ་གསུངས་ལ། བྱེ་བྲག་ཏུ་རང་གི་བླ་མ་ལ་འབུལ་བ་ཡང་སློབ་མས་ཅི་ཙམ་འབྱོར་ན་དེ་ཙམ་པོ་དེ་ལ་སེར་སྣ་དང་མ་དད་པས་མ་སྦགས་པར་མཆོད་པ་ལས་འཇིག་རྟེན་ན་བཟང་རྒུ་ཡོད་དོ་ཅོག་ཚང་བར་བགྱིས་ཏེ་ངེས་པར་ན་འབུལ་དགོས་པར་གང་དུའང་མ་གསུངས་ཏེ། སྤྱན་རས་གཟིགས་པདྨ་དྲྭ་བའི་རྒྱུད་ལས། རྡོ་རྗེ་སློབ་མ་རབ་དགའ་ནས། །ཅི་འབྱོར་ལྷ་དང་བླ་མ་མཆོད། །ཅེས་དང་། དཔལ་རྡོ་རྗེ་གདན་བཞི་ལས། བླ་མ་བསྙེན་བཀུར་བསྟེན་ལ་རིག །ཅི་འབྱོར་པ་ཡི་རྫས་ཉིད་དང་། །ཡང་ན་རིག་དང་རིག་པར་བརྗེ། །ཞེས་དང་། དཔལ་རྡོ་རྗེ་ཕྲེང་བ་ལས། ཡོ་བྱད་ཅི་འབྱོར་པ་ཡིས་ནི། །དཀྱིལ་འཁོར་མཆོད་པ་བགྱི་བར་འཚལ། །ཐུགས་ཀྱིས་བརྩེ་བར་ཉེར་དགོངས་ཏེ། །མགོན་པོས་མཆོད་པ་འདི་བཞེས་ཤིག །ཅེས་གསུངས་པའི་ཕྱིར་རོ།།

གཉིས་པ་ནི། ཡི་དམ་ལྷ་ཚོགས་རྣམས་ཀྱི་སྤྱན་ལམ་དུ༔ མངོན་རྟོགས་སྤང་ལེན་བགྱིས་པ་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན། ཡི༷་ད༷མ་གྱི་ལྷ༷་ཡི་ཚོ༷གས་ཡོད་དོ་ཅོག་ཉེས་ལྟུང་བཤགས་པ་པོ་བདག་ལ་དགོངས་ཤིག། བདག་གིས་དེ་རིང་ཁྱེད་རྣམ༷ས་ཀྱི༷་སྤྱན༷་ལ༷མ་དུ༷་རང་གིས་རྒྱུན་དུ་ཡི་དམ་དུ་བཟུང་བའི་སྒྲུབ་པར་བྱེད་པའི་ལྷ་ཞི་དྲག་གང་ཡིན་ཡང་ཞི་བ་མི་ལེགས་དྲག་པོ་དེ་མཆོག་སྙམ་ནས་ཞི་བའི་མངོ༷ན་རྟོག༷ས་བསྒོམ་པ་སྤངས་ནས་དྲག་པོ་བསྒྲུབས་པ་དང་། ཡང་ན་དྲག་པོ་མི་ལེགས་དེ་བས་ཞི་བ་མཆོག་སྙམ་པ་དང་། དེ་བཞིན་དུ་རྒྱུད་སྡེ་གོང་འོག་གི་ཡི་དམ་ལ་མཆོག་དམན་དུ་འཛིན་པའམ། ཡང་ན་ཡི་དམ་གང་ཡོད་ཀྱི་མངོན་རྟོགས་བསྒོམ་པར་མ་ནུས་པར་དེ་ལས་རེ་ཟུང་བླངས་པ་ལ་སོགས་པའི་སྒོ་ནས་ཡི་དམ་གྱི་མངོན་རྟོགས་ལ་སྤང༷ས་ལེ༷ན་ནམ་འདོར་ལེན་བགྱི༷ས་པ༷་དེ་འགྱོད་པས་མི་འཆབ་པར་མཐོ༷ལ་ལོ༷། །བཤ༷གས་པར་བགྱིའོ་ཞེས་པའོ།།

འདི་ཡང་ཡི་དམ་གཅིག་སྤངས་ནས་གཞན་པ་ཞིག་གི་མངོན་རྟོགས་དང་ལེན་བགྱིས་པའི་ཆ་ནས་ཡི་དམ་སྤངས་པའི་ཉེས་པར་སོང་བས་ཉེས་པ་ལྕི་བ་ཡིན་ཏེ། གསང་བ་སྙིང་པོ་ལས། ཡི་དམ་ལྷ་དེ་སྤངས་བྱས་ན། །ངན་སོང་མི་བདེ་རྟག་ཏུ་མྱོང་། །ཞེས་གསུངས་པའི་ཕྱིར་རོ།།

གསུམ་པ་ནི། མཁའ་འགྲོ་སྡེ་བཞི་རྣམས་ཀྱི་སྤྱན་ལམ་དུ༔ ཁས་བླངས་དམ་བཅས་ཉམས་པ་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན། མཁའ་འགྲོ་རྒྱ་མཚོ་ལས། ཡེ་ཤེས་མཁའ་འགྲོ་མ་ཡི་གཟུགས། །ལྷ་ཡི་ཚོགས་ནི་སྤྱན་དྲངས་ནས། །ནམ་མཁའི་ཁོངས་ཀྱི་དབུས་སུ་ནི། །འགྲོ་བའི་བདག་པོ་བཞག་བྱས་ལ། །ཞེས་གསུངས་པ་ལྟར་གྱི་རྡོ་རྗེའི་རིགས་ཀྱི་མཁའ་འགྲོ་མ་དང་། རིན་ཆེན་རིགས་ཀྱི་མཁའ་འགྲོ་མ་དང་། པདྨའི་རིགས་ཀྱི་མཁའ་འགྲོ་མ་དང་། ལས་ཀྱི་རིགས་ཀྱི་མཁའ་འགྲོ་མ་བཅས་ཡེ་ཤེས་ཀྱི་མཁ༷འ་འགྲོ༷་མ་སྡེ༷་བཞི༷་རྣམས་ཉེས་ལྟུང་བཤགས་པ་པོ་བདག་ལ་དགོངས་སུ་གསོལ། ཁྱོད་རྣམ༷ས་ཀྱི༷་སྤྱན༷་ལ༷མ་དུ༷་དམ་ཚིག་བསྲུང་ཞིང་སྒྲུབ་པ་ལ་བརྩོན་པར་ཁ༷ས་བླ༷ངས་ཤིང་དེ་ལས་མི་འདའ་བར་ད༷མ་བཅ༷ས་པ་རྣམས་ཇི་བཞིན་བསྒྲུབ་མ་ནུས་པར་ཉམ༷ས་པར་གྱུར་པ༷་དག་འགྱོད་པས་མི་འཆབ་པར་མཐོ༷ལ་ལོ༷། །སླད་ཆད་མི་བགྱིད་པར་སྡོམ་པས་བཤ༷གས་པར་བགྱིའོ། །ཞེས་པའོ།།

བཞི་བ་ཆོས་སྐྱོང་སྲུང་མ་ལ་བཤགས་པ་ནི། ཆོས་སྐྱོང་སྲུང་མ་རྣམས་ཀྱི་སྤྱན་ལམ་དུ༔ གཏོར་མ་ལོ་ཟླར་འགྱངས་པ་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན་ལ། ཆོས་སྐྱོང་ཞེས་པ་ནི། གང་པོ་ལ་སོགས་པའི་རྟོགས་པ་བརྗོད་པ་ལས། ཆོས་སྐྱོང་ཞེས་བྱ་བ་ནི། སངས་རྒྱས་བཅོམ་ལྡན་འདས་ལ་རྒྱལ་པོ་རྣམས་དང་བློན་པོ་ཆེན་པོ་རྣམས་དང་ཕྱུག་པོ་རྣམས་དང་ཕོ་བྲང་འཁོར་གྱི་མི་རྣམས་དང་ཚོང་དཔོན་རྣམས་དང་དེད་དཔོན་རྣམས་དང་ལྷ་རྣམས་དང་ཀླུ་རྣམས་དང་གནོད་སྦྱིན་རྣམས་དང་ལྷ་མ་ཡིན་རྣམས་དང་ནམ་མཁའ་ལྡིང་རྣམས་དང་མི་འམ་ཅི་རྣམས་དང་ལྟོ་འཕྱེ་ཆེན་པོ་རྣམས་ཀྱིས་བཀུར་སྟི་བྱས་བླ་མར་བྱས་རི་མོར་བྱས་མཆོད་པ་བྱས་ཏེ། ལྷ་དང་ཀླུ་དང་གནོད་སྦྱིན་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་རྣམས་ཀྱིས་མཆོད་ཅིང་ཤེས་པའི་སངས་རྒྱས་བཅོམ་ལྡན་འདས་བསོད་ནམས་ཆེན་པོ་ཞེས་སོགས་གསུངས་པ་ལྟར། ཡུལ་གྲུ་ཆེན་པོའི་རྒྱལ་པོ་རྣམས་དང་། བློན་པོ་ཆེན་པོ་རྣམས་དང་། དམག་དཔོན་ཆེན་པོ་རྣམས་དང་། ཕྱུག་པོ་རྣམས་དང་། རྒྱལ་པོའི་ཕོ་བྲང་གི་འཁོར་གྱི་མི་རྣམས་དང་། ཚོང་དཔོན་རྣམས་དང་། དེད་དཔོན་རྣམས་ཀྱང་རྒྱལ་བའི་བསྟན་པ་ལ་སྲུང་སྐྱོབ་དང་སྲི་ཞུ་བྱེད་པའི་ཆ་ནས་ཆོས་སྐྱོང་ཡིན་པ་དང་། མྱ་ངན་ལས་འདས་པའི་མདོ་ལས། ངའི་བསྟན་པ་ནི་དབང་ཕྱུག་དང་། དབང་ཕྱུག་ཆེན་པོ་དང་། ཚངས་པ་དང་། ཤིན་ཏུ་དཀོན་པའོ། །དབང་ཕྱུག་ནི་ཆོས་སྐྱོང་བ་སྟེ་ཆོས་སྐྱོང་བས་ན་རྒྱལ་པོའོ། །དེའི་ཕྱིར་དེ་ལ་འཇིག་རྟེན་སྐྱོང་བ་ཞེས་བྱའོ། །ཞེས་དང་། སྟོང་ཆེན་པོ་རབ་ཏུ་འཇོམས་པའི་མདོ་ལས། ལག་ན་རྡོ་རྗེ་གནོད་སྦྱིན་ཆེ། །ཆོས་སྐྱོང་རབ་ཏུ་དཀར་བ་དང་། །སེར་སྐྱ་རབ་མཛེས་ཁྱབ་འཇུག་པ། །བུམ་ལྟོ་གསུས་པ་ཟླུམ་པོ་དང་། །ཆུ་སྲིན་བདེན་པ་འཆང་བ་དང་། །ལྔ་ལྡན་རྒྱལ་བ་ཁྱུ་མཆོག་དང་། །གནོད་སྦྱིན་ཆེན་པོ་དབང་ཕྱུག་ཆེ། །ལག་པ་བཞི་ཅན་སྟོབས་པོ་ཆེ། །ཞེས་སོགས་དང་། འཕགས་པ་རིག་པ་མཆོག་གི་རྒྱུད་ལས། དེ་ནས་གནས་བརྟེན་ཆོས་སྐྱོང་བ། །བཅུ་གཉིས་དག་དང་ལྷན་ཅིག་ཏུ། ། སྒྲ་གཅན་འཛིན་ཞེས་གྲགས་པ་སྟེ། །སངས་རྒྱས་སྲས་ནི་མངོན་སུམ་གནས། །གནོད་སྦྱིན་ལྷ་མིན་ལྟོ་འཕྱེ་རྣམས། །ཉིན་མཚན་དུ་ནི་དེར་སོང་ནས། །དྲི་དང་ཕྲེང་བ་དཔེ་མེད་པས། །མཆོད་པ་བྱེད་ཅིང་ཕྱག་ཀྱང་འཚལ། །ཞེས་སོགས་གསུངས་པ་ལྟར། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མ་མོ་ལ་སོགས་པ་མི་མ་ཡིན་པའི་ཚོགས་ཀྱང་མཐའ་ཡས་ཡོད་པ་ནི་ཡོངས་གྲགས་ལྟར་ལ། འདིར་ནི་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་ལས། རི་རབ་གླིང་བཞིའི་ཕྱོགས་ཕྱོགས་ནས། །རྡོ་རྗེ་གསང་བདག་དབང་གི་མཐུས། །འཇིག་རྟེན་སྐྱོང་བའི་ཐ་ཚིག་ཅན། །མཐུ་ཆེན་མགོན་པོ་སྡེ་བཞི་རྣམས། །སོ་སོའི་བགེགས་རིས་འདུལ་ལ་མཁས། །ཆོས་སྐྱོང་ལོངས་སྤྱོད་རྫོགས་པའི་སྐུ། །འཕྲིན་ལས་རྣམ་བཞི་མཐར་ཕྱིན་པས། །རིགས་བཞི་ཁ་དོག་སོ་སོར་གསལ། །རང་རྟགས་ལྷ་ཡི་མཚན་མ་ཐོགས། །ཕྱི་འཁོར་སྐྱོང་བའི་རྫུ་འཕྲུལ་ཅན། །བདག་ཅག་རྣལ་འབྱོར་རྩལ་སྦྱོང་གིས། །རང་རང་འཁོར་རྣམས་ཐུབ་པར་མཛོད། །ཅེས་གསུངས་པ་ལྟར་རྒྱལ་བའི་མདོ་སྡེ་དང་སྔགས་རྒྱུད་དུ་མ་ནས་བསྔགས་པའི་དམ་པའི་ཆོ༷ས་སྐྱོ༷ང་བར་རྒྱལ་བའི་སྤྱན་སྔར་ཁས་བླངས་པའི་སངས་རྒྱས་ཀྱི་བསྟན་པའི་སྲུང༷་མ༷་ཡེ་ཤེས་པ་རྣམ༷ས་ཉེས་ལྟུང་བཤགས་པ་པོ་བདག་ལ་དགོངས་སུ་གསོལ། ཇི་སྐད་དུ་བདེ་མཆོག་ཉུང་ངུ་ལས། གུས་པ་ཡིས་ནི་གཏོར་མ་སྦྱིན། །རང་འདོད་ལས་ལ་རྣལ་འབྱོར་བས། །ཆོ་ག་ཇི་བཞིན་སྦྱིན་པར་བྱ། །མར་གྱི་ངོ་ཡི་ཚེས་བཅུའམ་ཟེར། །ཟླ་བ་ཡར་ངོའི་གང་གྱུར་ལ། །མྱུར་དུ་འབད་པས་མཆོད་བྱ་སྟེ། །ཞེས་དང་། ཁྲོ་བོ་རྡོ་རྗེའི་རིགས་ཀུན་འདུས་རིག་པ་ལས། ཐུགས་རྗེ་འབྱུང་བའི་འཁོར་ལོ་དག །གང་ལྟར་གོམས་ལྟར་འབད་རྩོལ་བྱ། །བསྟན་པ་སྐྱོང་བའི་ཚོགས་རྣམས་ལ། །སྦྱིན་མཆོད་སྤེལ་བའི་ལས་རྣམས་བྱ། །ཞེས་དང་། གསང་བའི་དོན་ལ་ཞུགས་བྱའི་ཕྱིར། །གསང་བའི་ལས་ཀྱི་སྔོན་ལོགས་སུ། །བསྟན་པ་སྐྱོང་བའི་མགོན་པོ་ལ། །སྦྱིན་མཆོད་བསྲུང་བའི་ལས་ཆེན་བཅོལ། །ཞེས་བསྟན་པ་སྐྱོང་བའི་དཀར་ཕྱོགས་ཀྱི་སྲུང་མ་རྣམས་ལ་ཉ་སྟོང་ལ་སོགས་པར་དུས་ལྟར་མཆོད་པ་ཆག་མེད་ཀྱིས་མཆོད་དགོས་པར་གསུངས་ནའང་། ཧེ་རུ་ཀ་སྙིང་རྗེ་རོལ་བ་ལས། སེར་སྣ་འཇུར་འགེགས་དབང་དུ་གྱུར་པས་ན། །མཆོད་པ་ལོ་ཟླར་འདས་པ་མཐོལ་ཞིང་བཤགས། །ཞེས་གསུངས་པ་ལྟར། བདག་གིས་དེ་རིང་ཆོས་སྐྱོང་ཁྱོད་རྣམ༷ས་ཀྱི༷་སྤྱ༷ན་ལ༷མ་དུ༷་སེར་སྣའི་དབང་དུ་ཤོར་བའམ། ཡང་ན་སྙོམས་ལས་སྒྱིད་ལུག་པའི་དབང་གིས་དེ་ལྟར་གཏོར༷་མ༷་འབུལ་བ་རྒྱུན་བསྲིང་མ་ནུས་པར་ལོ༷་དང་ཟླ༷་བར༷་འགྱ༷ངས་པ༷་ཡིས་དུས་མཆོད་ཆག་པའི་ཉེས་པ་རྣམས་མི་གསང་བར་མཐོ༷ལ་ལོ༷། །སླད་མར་འགྱོད་པས་བསྡམ་སྟེ་བཤ༷གས་པར་བགྱིའོ་ཞེས་པའོ།།

ལྔ་བ་ཕ་མ་ལ་བཤགས་པ་ནི། དུས་གསུམ་ཕ་མ་རྣམས་ཀྱི་སྤྱན་ལམ་དུ༔ དྲིན་ལན་ལན་གྱིས་མ་ལོན་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན། འདས་པ་སྟེ་སྐྱེ་བ་སྔ་མ་རྣམས་ཀྱི་དུས་སུ་ཕ་མར་གྱུར་ཟིན་པ་དང་། མ་འོངས་པ་སྟེ་སྐྱེ་བ་ཕྱི་མ་རྣམས་སུ་ཕ་མར་འགྱུར་ངེས་པ་དང་། ད་ལྟའི་རང་གི་ལུས་རྟེན་དངོས་སུ་བསྐྱེད་པའི་དྲིན་ཆེ་བའི་ཕ་མ་གཉིས་བཅས་དུས༷་གསུ༷མ་གྱི་ཕ༷་མ༷་རྣམ༷ས་ཀྱི༷་སྤྱན༷་ལ༷མ་དུ༷་སྟེ་སྤྱན་སྔར་གང་བཤགས་པར་བྱ་བ་ནི་ཕ་མ་དེ་རང་ལ་དྲིན་ཆེན་པོ་ཡིན་ནའང་རང་གིས་དེ་ལ་ཟས་གོས་གནས་མལ་ལེགས་པོས་སྐྱོང་བ་དང་། ལུས་ཀྱིས་ཞབས་ཏོག་བཟང་པོ་དང་། ངག་འཇམ་པོས་སེམས་སྤྲོ་བའི་གཏམ་སྨྲ་ཞིང་གོ་བརྡ་ལེགས་པར་སྤྲོད་པ་དང་། ནད་གཡོག་དང་སྨན་སྦྱིན་པ་དང་། དམ་པའི་ཆོས་ལམ་ལ་འཛུད་པ་ལ་སོགས་པས་དྲི༷ན་ལ༷ན་ལེགས་པར་གསོས་ཏེ་དྲིན་ཆེན་པོ་གང་ཡིན་པ་དེ་ཉིད་ལ༷ན་གྱི༷ས་ངེས་པར་དུ་ལོན་ཐུབ་པར་བྱ་དགོས་པ་ལ། དེ་ལྟར་མ༷་ལོ༷ན་ཞིང་མ་ནུས་པ་ནི་ཉེས་པ་ལྕི་བ་ཡིན་ཏེ། འཕགས་པ་སྤོབས་པའི་བློ་གྲོས་ཀྱིས་ཞུས་པའི་མདོ་ལས། ཕ་མ་རྣམས་ལ་རྨད་བྱུང་སྦྱིན་གནས་འདྲ་བར་འདུ་ཤེས་མི་བྱེད་པ། །དེ་དག་ཉེས་པས་གཞན་དུ་འཇིག་རྟེན་དབང་གྱུར་དམན་ཞིང་གཡོ་ཅན་འགྱུར་། །ཞེས་གསུངས་པའི་ཕྱིར། དེས་ན་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས། ཕ་མ་རྣམས་ལ་མ་གུས་པ། །དེ་དག་ཐམས་ཅད་བདག་འཆགས་སོ། །ཞེས་གསུངས་པ་ལྟར་དེ་ལྟར་ཕ་མའི་དྲིན་ལན་གསོ་བར་བྱེད་མ་ནུས་པའི་ཉེས་པ་དེ་སྒོ་གསུམ་འགྱོད་པ་ཆེན་པོས་མཐོ༷ལ་ལོ༷། མི་འཆབ་བོ། མི་སྦེད་དོ། །སླད་ཆད་ཀྱང་སྡོམ་པས་བཤ༷གས་པར་བྱའོ་ཞེས་པའོ།།

དྲུག་པ་མཆེད་ལྕམ་ལ་བཤགས་པ་ནི། མཆེད་དང་ལྕམ་དྲལ་རྣམས་ཀྱི་སྤྱན་ལམ་དུ༔ དམ་ཚིག་བརྩེ་དུང་ཆུང་བ་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན། དམ་པའི་ཆོས་ཐེག་པ་ཆེ་ཆུང་གི་གཞུང་མཉམ་དུ་གསན་པ་དང་ཉམས་སུ་ལེན་པའི་ཆོས་ཀྱི་གྲོགས་མཆེ༷ད་ད༷ང་། ཁྱད་པར་དུ་གསང་སྔགས་ཀྱི་དབང་དང་མན་ངག་ཟབ་མོ་མཉམ་ཞུས་དང་མཉམ་དུ་བསྒྲུབས་པའི་རྡོ་རྗེའི་སྤུན་མོ་ཡི་རིགས་གྱུར་ལྕ༷མ་མོའམ་སྲིང་མོ་དང་། ཕོ་ཡི་རིགས་གྱུར་དྲ༷ལ་པོའམ་མིང་པོ་རྣམ༷ས་ཀྱི༷་སྤྱན༷་ལ༷མ་དུ༷་ཕན་ཚུན་བར་དུ་ད༷མ་ཚི༷ག་ལ་བརྩི་བསྲུང་དང་གུས་པ་དང་དགའ་བའི་སེམས་ཀྱིས་མཛའ་ཞིང་བརྩེ༷་བ་དང་དུང༷་བའམ་གཅེས་གདུང་ཡོད་དགོས་པ་ལ། དེ་མེད་པའམ་ཡང་ན་བརྩེ་གདུང་ཆུང༷་བར་གྱུར་བ༷་དང་། དེ་ཙམ་མ་ཟད་རྡེག་རྩོད་སྡང་སྨོད་ལ་སོགས་པ་ཕན་ཚུན་འཁོན་དང་འགལ་བ་ཅན་དུ་གྱུར་པའི་ལས་ཅི་བསགས་པ་དང་བྱུང་བ་རྣམས་འགྱོད་པ་དྲག་པོས་མཐོ༷ལ་ལོ༷་བཤ༷གས་སོ་ཞེས་པའོ།།

བདུན་པ་འགྲོ་དྲུག་གི་སེམས་ཅན་ལ་བཤགས་པ་ནི། འགྲོ་དྲུག་སེམས་ཅན་རྣམས་ཀྱི་སྤྱན་ལམ་དུ༔ སྙིང་རྗེ་ཕན་སེམས་ཆུང་བ་མཐོལ་ལོ་བཤགས༔ ཞེས་པའི་རྐང་པ་གཉིས་ཀྱིས་བསྟན། ཧེ་རུ་ཀ་སྙིང་རྗེ་རོལ་བ་ལས། སྙིང་རྗེ་ཆུང་ཞིང་ཞེ་སྡང་དབང་དུ་གྱུར་པས་ན། །འགྲོ་བའི་དོན་མ་བགྱིས་པ་མཐོལ་ཞིང་བཤགས། །ཞེས་གསུངས་པ་ལྟར། དམྱལ་བ་ཡི་དྭགས་དུད་འགྲོ་སྟེ་ངན་སོང་གསུམ་དང་། མི་དང་ལྷ་དང་ལྷ་མིན་ཏེ་བདེ་འགྲོ་མཐོ་རིས་ཀྱི་གནས་གསུམ་བཅས་འགྲོ༷་བའི་གནས་རིས་དྲུག༷་ན་ལས་དབང་གིས་འཁོར་བའི་སེ༷མས་ཅ༷ན་རྣམ༷ས་ཀྱི༷་སྤྱན༷་ལ༷མ་དུ༷་སྒོ་གསུམ་གནོང་བ་དང་བཅས་པས་གང་བཤགས་པར་བྱ་བ་ནི། རང་རྒྱུད་ལ་བྱམས་པ་དང་སྙི༷ང་རྗེ༷་ཡི་སྒོས་ཐེག་པ་ཆེན་པོ་བྱང་ཆུབ་ཀྱི་སེམས་སྐྱེས་པ་མེད་པས་གཞན་ལ་ཕ༷ན་འདོད་ཀྱི་སེ༷མས་ཆུང༷་བ༷་དང་། དེའི་དབང་གིས་ཞེ་སྡང་སོགས་ཉོན་མོངས་པ་ཤུགས་བཙན་ཞིང་རང་འདོད་ཡིད་བྱེད་ཀྱི་བློ་ངན་ལ་གོམས་པས་སེམས་ཅན་གཞན་གྱི་དོན་ཁུར་དུ་འཁྱེར་བའི་ལྷག་བསམ་མེད་པ་དང་། སེམས་ཅན་གྱི་དོན་མ་བསྒྲུབས་པའི་ཉེས་པ་རྣམས་མཐོ༷ལ་ལོ། །བཤ༷གས་སོ། །དེ་ལྟར་བཤགས་པ་ཡིན་པས་སླད་མར་བདག་ལ་ལས་དེས་བསྒྲིབ་པར་མ་གྱུར་ཅིག་ཅེས་པའོ།།

བརྒྱད་པ་སོ་བྱང་སྔགས་གསུམ་གྱི་བཤགས་པ་བསྡུས་ཏེ་བསྟན་པ་ནི། སོ་སོར་ཐར་བ་རྣམས་ཀྱི་སྡོམ་པ་དང་༔ བྱང་ཆུབ་སེམས་དཔའ་རྣམས་ཀྱི་བསླབ་པ་དང་༔ རིག་འཛིན་སྔགས་ཀྱི་དམ་ཚིག་ལ་སོགས་པ༔ འགལ་ཞིང་ཉམས་པ་ཐམས་ཅད་མཐོལ་ལོ་བཤགས༔ ཞེས་པའི་ཤོ་ལོ་ཀ་གཅིག་གིས་བསྟན། གོང་དུ་སྨོས་ཟིན་ལྟར་དགེ་བསྙེན་ཕ་མ་དང་། བསྙེན་གནས་དང་། དགེ་ཚུལ་ཕ་མ་དང་། དགེ་སློབ་མ་དང་། དགེ་སློང་ཕ་མ་བཅས་སོ༷་སོ༷ར་ཐ༷ར་བ༷་རིགས་བརྒྱད་དམ་བདུན་པོ་རྣམ༷ས་ཀྱི༷་སྡོམ༷་པ༷་དང༷་། ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་གསུམ་གྱིས་བསྡུས་པའི་བྱ༷ང་ཆུ༷བ་སེ༷མས་དཔ༷འ་རྣམ༷ས་ཀྱི༷་བསླ༷བ་པ༷་རྒྱ་ཆེ་བ་རྣམས་དང༷་། རི༷ག་པ་འཛི༷ན་པ་གསང་སྔ༷གས་ཀྱི༷་རྒྱུད་སྡེ་བཞིའི་རིམ་པའི་ད༷མ་ཚི༷ག་ལ༷་སོ༷གས་པ༷་སྟེ་མདོར་ན་རྒྱལ་བའི་བཀའ་མདོ་རྒྱུད་ནས་ཇི་ལྟར་བཀའ་བསྩལ་བའི་མདོ་སྔགས་ཀྱི་ལམ་གྱི་ཡོན་ཏན་སྐྱེ་བའི་གཞི་རྟེན་དུ་གྱུར་པའི་སྒྲུབ་པར་བྱ་བ་དང་། དགག་པར་བྱ་བའི་བསླབ་པ་དང་དམ་ཚིག་ཡོད་དོ་ཅོག་ལས་ལུས་ངག་ཡིད་གསུམ་འག༷ལ་ཞི༷ང་། དེའི་དབང་གིས་སོ་ཐར་གྱི་སྡོམ་པ་ཉམས་པ་དང་། བྱང་སེམས་ཀྱི་བསླབ་བྱ་ཉམས་པ་དང་། སྔགས་ཀྱི་དམ་ཚིག་ཉམ༷ས་པ༷་ཐམ༷ས་ཅ༷ད་མི་གསང་བར་ངག་གིས་མཐོ༷ལ་ལོ༷། །ཕྱིན་ཆད་ཀྱང་སྲོག་ལ་བབས་ཀྱང་མི་བགྱིད་པར་བཤ༷གས་པར་བགྱི་ཞེས་སོ་བྱང་སྔགས་གསུམ་གྱི་བསླབ་བྱ་ཉམས་པ་བསྡུས་ཏེ་བཤགས་པའོ།།

གོང་དུ་ལེའུ་དང་པོའི་སྐབས་སུ་སོ་བྱང་སྔགས་གསུམ་གྱི་བསླབ་བྱ་ཉམས་པ་བཤགས་པ་ཡོད་པས་ཟློས་པར་འགྱུར་རོ་སྙམ་ན། དེ་ནི་མ་ཡིན་ཏེ། བདེ་གཤེགས་སྤྱི་བཤགས་འདི་ནི་གོང་དུ་བཤད་པ་དེ་དག་གི་དོན་བསྡུས་ཏེ་བདེ་བར་གཤེགས་པའི་དཀྱིལ་འཁོར་སྤྱི་ལ་བཤགས་པ་ཡིན་པས་མི་ཟློས་པའི་ཕྱིར་རོ།།

དགུ་བ་བཤགས་པའི་མཇུག་བསྡུ་བ་ནི། མི་འཆབ་མི་སྦེད་སླད་ཆད་སྡོམ་པར་བགྱི༔ དུས་གསུམ་བསགས་པའི་སྡིག་སྒྲིབ་མཐོལ་བཤགས་ན༔ ཚངས་པར་མཛད་ནས་སྐུ་གསུང་ཐུགས་ལ་སོགས༔ མཆོག་དང་ཐུན་མོང་དངོས་གྲུབ་བསྩལ་ཏུ་གསོལ༔ ཞེས་པའི་ཚིགས་སུ་བཅད་པ་གཅིག་གིས་བསྟན། བདག་ཅག་ནི་རྒྱུད་དག་པ་དང་། ལྟ་བ་མཐོན་པོར་སླེབས་པ་མ་ཡིན་པའི་དབང་གིས་དེ་ལྟར་ཞི་ཁྲོའི་ཀློང་བཤགས་བརྗོད་པ་རང་གྲོལ་འདིར་སྨོས་ཟིན་ལྟར་སོ་བྱང་སྔགས་གསུམ་གྱི་བསླབ་བྱའི་གནས་ལ་མི་ཤེས་པ་དང་། མ་གུས་པ་དང་། བག་མེད་པ་དང་། ཉོན་མོངས་པ་མང་བའི་དབང་གིས་འགལ་ཉམས་འདས་པའི་ཉེས་ལྟུང་གི་ཚོགས་བསགས་པ་ཅི་མཆིས་པ་ཐམས་ཅད་གནོང་འགྱོད་དྲག་པོས་མི༷་འཆ༷བ་བོ། །མི༷་སྦེ༷ད་དོ། །སླ༷ད་ཆ༷ད་ཀྱང་སྲོག་ལ་ཐུག་ཀྱང་མི་བགྱིད་པར་སྡོ༷མ་པ༷ར་བགྱི༷འོ།།

དེ་ཡང་ཚེ་འདིར་བསགས་པའི་ཉེས་ལྟུང་ཙམ་མིན་པར་ཚེ་རབས་ཐོག་མེད་ནས་བཟུང་འདས་པའི་དུས་སུ་བསགས་ཟིན་གྱི་ཉེས་པ་དང་། མ་འོངས་པའི་དུས་སུ་བསག་པར་འགྱུར་བའི་ཉེས་པ་དང་། ད་ལྟའི་དུས་དུ་གསོག་བཞིན་པའི་ཉེས་པ་སྟེ་དུས༷་གསུ༷མ་ཏུ་བས༷གས་པ༷འི་སྡི༷ག་སྒྲི༷བ་ཐམས་ཅད་མཐོ༷ལ་ཞིང་བཤ༷གས་པ་ཡིན་ན༷། ད་ནི་ཉེས་ལྟུང་སྡིག་སྒྲིབ་རྣམས་འདག་ཅིང་ཟུང་འཇུག་རབ་ཏུ་མི་གནས་པ་ཆོས་ཉིད་ཡེ་གྲོལ་ཚ༷ངས་པ༷་ཆེན་པོའི་གོ་འཕང་ཐོབ་པར༷་རྒྱལ་བ་ཞི་ཁྲོའི་ལྷ་ཚོགས་བཀའ་སྡོད་ཆོས་སྐྱོང་དང་བཅས་པས་མཐུན་པའི་འཕྲིན་ལས་མཛ༷ད་ན༷ས་ནི་སྐུ༷་གསུ༷ང་ཐུག༷ས་ཀྱི་ཡོན་ཏན་རྒྱ་ཆེ་བ་དང་ལྡན་པའི་མཐར་ཐུག་འབྲས་བུའི་གོ་འཕང་ལ༷་སོ༷གས་པ་ཟག་མེད་ལམ་དང་འབྲས་བུའི་ཆོས་སུ་གྱུར་པའི་མཆོ༷ག་གི་དངོས་གྲུབ་ད༷ང་། གནས་སྐབས་ཙམ་ལ་གདུལ་བྱ་རྗེས་སུ་འཛིན་པའི་ཕྱིར་དུ་རལ་གྲི་རིལ་བུ་རྐང་མགྱོགས་ལ་སོགས་པ་ཐུན༷་མོ༷ང་གི་དངོ༷ས་གྲུབ༷་རྣམས་མྱུར་བ་མྱུར་དུ་བསྩ༷ལ་ཏུ༷་གསོ༷ལ་ལོ་ཞེས་པ་སྟེ་མཇུག་བསྡུ་བའོ།།

བདེ་གཤེགས་སྤྱི་བཤགས་འདི་ལ་རྫ་དཔལ་སྤྲུལ་རིན་པོ་ཆེས་མཛད་པའི་ས་བཅད་ཅིག་ཡོད་མོད་འདིར་དེ་དང་ཅུང་མི་འདྲ་ཞིང་དེར་བསྟུན་མེད་མོད་དེ་ལྟར་བྱས་ཀྱང་ཤིན་ཏུ་ལེགས་སོ།།

དེ་ནས་གཞུང་ལས། ཞེས༷་སོ༷གས་ཡི༷་གེ༷་བརྒྱ༷་བ༷་བཟླ༷ས་ཤི༷ང་བཤ༷གས་པ༷ར་བྱ༷འོ༷༔ ཞེས་པ་འདི་ཡང་མཇུག་སྡུད་ཀྱི་གྲས་སུ་ཡར་བསྡུས་ན་ལེགས་སོ།།

ད་ནི་འདིར་རྡོ་རྗེ་སེམས་དཔའི་ཡི་གེ་བརྒྱ་བའི་འབྲུ་དོན་ཙམ་བཤད་ན། ཨོཾ༷་ནི་སྐུ་རྡོ་རྗེ་སྟེ། དེའི་དོན་མཚོན་པ་དང་། རྙིང་མ་ཁ་ཅིག་ཨོཾ་ནི་སྐུ་ལྔ་དང་ཡེ་ཤེས་ལྔ་ལྡན་གྱི་མཚོན་བྱེད་དུ་གསུངས་པ་དང་། གཟུངས་སྔགས་ཀྱི་མགོ་འདྲེན་དང་མཆོག་གི་དངོས་གྲུབ་སྩོལ་བའི་དོན་དུ་འགྲེལ་བའང་མཆིས། བ༷ཛྲ༷་རྡོ་རྗེ་དང་། ས༷་ཏྭ༷་སེམས་དཔའ། ས༷་མ༷་ཡ༷་ནི་དམ་ཚིག་སྟེ། རྡོ་རྗེ་སེམས་དཔས་སེམས་ཅན་འདྲེན་པར་ཇི་ལྟར་དམ་བཅས་པའི་དམ་ཚིག་དེ་དྲན་པར་མཛོད་ཅིག་ཅེས་རྡོ་རྗེ་སེམས་དཔའ་ལ་དམ་ཚིག་དྲན་པའི་ཐུགས་དམ་བསྐུལ་བའི་དོན་དང་། མ༷་ནུ༷་པཱ༷་ལ༷་ཡ༷་རྗེས་སུ་སྐྱོངས་ཞེས་པ་སྟེ་རྡོ་རྗེ་སེམས་དཔས་དམ་ཚིག་རྗེས་སུ་སྐྱོངས་ཤིག་ཞེས་པའམ་བདག་རྗེས་སུ་སྐྱོངས་ཤིག་ཅེས་པའི་དོན་དང་། བ༷ཛྲ་ས༷་ཏྭ༷་རྡོ་རྗེ་སེམས་དཔའ་དང་། ཏྭེ༷་ནོ༷་པ༷་ཏི༷ཥྛ༷་རང་བཞིན་ཉེ་བར་གནས་པར་མཛོད་ཅེས་པ་སྟེ། རྡོ་རྗེ་སེམས་དཔའ་ཉིད་ཀྱི་རང་བཞིན་ཉེ་བར་བརྟན་པར་གནས་པར་མཛོད་ཅིག་ཅེས་པའམ་རྡོ་རྗེ་སེམས་དཔའི་ཐུགས་བདག་ལ་ཉེ་བར་གནས་པར་མཛོད་ཅིག་པའི་དོན་དང་། དྲྀ༷་ཌྷོ༷་མེ༷་བྷ༷་ཝ༷་ནི་བདག་ལ་བརྟན་པའི་དངོས་པོར་མཛོད་ཅེས་པ་སྟེ། རྡོ་རྗེ་སེམས་དཔའ་བདག་རྒྱུད་ལ་བཞུགས་པ་བརྟན་པར་མཛོད་ཅིག་ཅེས་པ་དང་། འདི་རྡོ་རྗེ་སེམས་དཔས་བདག་གི་དགེ་བའི་རྩ་བ་རྣམས་བརྟན་པར་མཛོད་ཅེས་པར་འགྲེལ་བའང་མཆིས། སུ༷་ཏོ༷ཥྱོ༷་མེ༷་བྷ༷་ཝ༷་ནི་བདག་ལ་དགྱེས་པར་རམ་དགའ་བའི་དངོས་པོར་མཛོད་ཅིག་ཅེས་པ་སྟེ། རྡོ་རྗེ་སེམས་དཔས་བདག་ལ་ཐུགས་དགྱེས་པའམ་དགའ་བའི་རང་བཞིན་ཅན་དུ་མཛོད་ཅིག་ཅེས་པའམ་བདག་ཉོན་མོངས་པའི་དབང་དུ་སོང་ནའང་དེའི་དབང་གིས་ཐུགས་མི་དགྱེས་པ་མེད་པར་མཛོད་ཅིག་ཅེས་པ་དང་། ཡང་གསོ་སླ་བར་བདག་གྱུར་ཅིག་ཅེས་པར་འགྲེལ་བའང་མཆིས། སུ༷་པོ༷ཥྱོ༷་མེ༷་བྷ༷་ཝ༷་ནི་བདག་ལ་ཤིན་ཏུ་རྒྱས་པའི་དངོས་པོར་མཛོད་ཅེས་པ་སྟེ། རྡོ་རྗེ་སེམས་དཔས་བདག་ལ་ལུང་རྟོགས་ཀྱི་ཡོན་ཏན་ཐམས་ཅད་ཤིན་ཏུ་རྒྱས་པའི་རང་བཞིན་ཅན་དུ་མཛོད་ཅིག་ཅེས་པ་དང་། ཡང་རྡོ་རྗེ་སེམས་དཔའ་ཚིམ་པར་མཛོད་ཅིག་གམ་རྡོ་རྗེ་སེམས་དཔའ་ཡིས་ཡོན་ཏན་སྩོལ་ནས་བདག་རྒྱུད་ཚིམ་པར་མཛོད་ཟེར་བའང་ཡོད་དོ།།

ཨ༷་ནུ༷་ར༷ཀྟོ༷་མེ༷་བྷ༷་ཝ༷་ནི་བདག་ལ་རྗེས་སུ་ཆགས་པར་མཛོད་ཅེས་པ་སྟེ། རྡོ་རྗེ་སེམས་དཔས་བདག་ལ་བྱང་ཆུབ་མ་ཐོབ་བར་དུ་ཐུགས་རྗེས་སུ་ཆགས་པས་ཐུགས་རྗེས་མ་འདོར་བར་མཛོད་ཅེས་པ་དང་། ས༷རྦ༷་སི༷དྡྷི༷་མྨེ༷་པྲ༷་ཡ༷་ཙྪ༷ ་ནི་བདག་ལ་དངོས་གྲུབ་ཐམས་ཅད་སྩོལ་ཅིག་ཅེས་པ་སྟེ། རྡོ་རྗེ་སེམས་དཔས་བདག་ལ་མཆོག་ཐུན་མོང་གི་དངོས་གྲུབ་ཐམས་ཅད་སྩོལ་བར་མཛོད་ཅེས་པ་དང་། ས༷རྦ༷་ཀ༷རྨ༷་སུ༷་ཙ༷་མེ༷་ནི་བདག་ལ་ལས་ཐམས་ཅད་སྩོལ་ཅིག་ཅེས་པ་སྟེ། རྡོ་རྗེ་སེམས་དཔས་བདག་ལ་ལས་ཐམས་ཅད་འགྲུབ་པའི་དངོས་གྲུབ་སྩོལ་ཅིག་ཅེས་པ་དང་། ཙི༷ཏྟཾ༷་ཤྲི༷་ཡཾ༷་ཀུ༷་རུ༷་ནི་བདག་གི་སྙིང་ལའམ་སེམས་ལ་གནས་པར་མཛོད་ཅེས་པ་སྟེ། གང་དུ་གནས་ན་སྙིང་དང་། གང་གནས་ན། ཧཱུ༷ྃ་ནི་ཆོས་ཀྱི་དབྱིངས་མི་འགྱུར་བའི་ཡེ་ཤེས་སམ་ཡང་ན་བདེ་སྟོང་དབྱེར་མེད་ཀྱི་ཡེ་ཤེས་ཏེ། དེ་ཉིད་རྡོ་རྗེ་སེམས་དཔས་བདག་གི་སྙིང་ལ་གནས་པར་མཛོད་ཅིག་ཅེས་པ་དང་། ཧ༷་ཧ༷་ཧ༷་ཧ༷་ཧོ༷། ལྔ་ནི་ཡེ་ཤེས་ལྔ་མཚོན་པ་དང་། ཡང་ན་ཆོས་དབྱིངས་ཡེ་ཤེས་དེ་ཧཱུྃ་དུས་སུ་བརྗོད་ཟིན་པས་ཧ་བཞི་ནི་མེ་ལོང་མཉམ་ཉིད་སོར་རྟོགས་བྱ་གྲུབ་ཡེ་ཤེས་བཞི་དང་། ཧོ་ནི་དེ་བཞི་དང་ཡེ་ཤེས་ལྔ་དབྱེར་མེད་པ་སྟེ། བདག་ལ་ཡེ་ཤེས་ལྔ་ཐོབ་པར་མཛོད་ཅིག་གམ་ཡེ་ཤེས་ལྔ་དང་དབྱེར་མེད་པའི་དངོས་གྲུབ་བསྒྲུབ་པར་མཛོད་ཅེས་པ་དང་། བྷ༷་ག༷་ཝཱ༷ན་ནི་བཅོམ་ལྡན་འདས་དང་། ས༷རྦ༷་ཏ༷་ཐཱ༷་ག༷་ཏ༷་ནི་དེ་བཞིན་གཤེགས་པ་ཐམས་ཅད་ཀྱིས་ཞེས་དང་། བ༷ཛྲ༷་མ༷་མེ༷་མུ༷ཉྩ༷་ནི་རྡོ་རྗེ་བདག་མ་འདོར་རམ་བདག་གྲོལ་བར་མཛོད་ཅིག་ཅེས་པ་དང་། བ༷ཛྲ༷་བྷ༷་ཝ༷་ནི་རྡོ་རྗེ་ཅན་ནམ་རྡོ་རྗེའི་དངོས་པོ་དང་། མ༷་ཧཱ༷་ས༷་མ༷་ཡ༷་ས༷་ཏྭ༷་ནི་དམ་ཚིག་སེམས་དཔའ་ཆེན་པོ་ཞེས་པ་སྟེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་སེམས་དཔའ་བདག་གི་རང་བཞིན་དུ་མ་འདོར་ཅིག །བདག་གྲོལ་བར་གྱིས་ལ་བདག་རྡོ་རྗེ་སེམས་དཔའ་ཉིད་དུ་མཛོད་ཅིག། རྡོ་རྗེ་ཅན་ནམ་རྡོ་རྗེའི་དངོས་པོར་མཛོད་ཅིག། བདག་དམ་ཚིག་སེམས་དཔའ་ཆེན་པོར་མཛོད་ཅིག་ཅེས་པ་དང་། ཨ༷་ནི་སྐྱེ་བ་མེད་པའི་དོན་མཚོན་བྱེད་དམ། ཡང་ན་གསུང་རྡོ་རྗེ་ཉིད་དུ་འགྲེལ་བ་ཡོད་པས་རྒྱལ་བའི་གསུང་རྡོ་རྗེའི་བསྟན་དོན་མཐར་ཐུག་པ་ཨ་དོན་སྐྱེ་མེད་གནས་ལུགས་དོན་དམ་པའི་དོན་ལ་སྦྱོར་ཅིག། ཅེས་ཆོས་ཐམས་ཅད་ཆོས་ཉིད་སྐྱེ་མེད་ཀྱི་ཀློང་དུ་གཅིག་པར་བསྟན་པའི་དོན་ནོ།།

མཁའ་འགྲོ་མ་རྡོ་རྗེ་གུར་ལ་སོགས་པ་རྒྱུད་འགའ་ཞིག་ཏུ། སརྦ་ཏ་ཐཱ་ག་ཏ་ཧྲྀ་ད་ཡ་ཞེས་པ་ཡོད་ལ། དེ་ལྟར་ན་ཧྲྀ་ད་ཡ་ཞེས་པ་ནི་སྙིང་པོ་ཞེས་པའི་དོན་ཡིན་པས། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་དོན་བདག་ལ་སྩོལ་ཞེས་པའི་དོན་དུ་འགྲེལ་ཆོག་ལ། ད་དུང་མི་འདྲ་བ་འགའ་རེ་དང་། ཨོཾ་ཨཿཧཱུཾ་སྭཱ་ཧཱ། སྦྱར་བ་སོགས་མཆིས་མོད་མི་སྤྲོའོ།།

རྡོ་རྗེ་སེམས་དཔའ་རིགས་ལྔའི་ཡིག་བརྒྱ་ནི། རྡོ་རྗེའི་སྐད་དོད་བཛྲ་ཞེས་པའི་ཚབ་ཏུ་སངས་རྒྱས་བྷུདྡྷ་དང་། རིན་ཆེན་རཏྣ་དང་། སྣང་མཐའ་པདྨ་དང་། དོན་ཡོད་གྲུབ་པ་ཀརྨར་ཁ་བསྒྱུར་བས་ཆོག། འགའ་རེར་ཧེ་རུ་ཀའི་ཡིག་བརྒྱ་ལ་ཧེ་རུ་ཀ་དང་ཧཱུྃ་ཕཊ་ཡོད་ལ། དེ་ནི་ཧེ་རུ་ཀ་ཁྲག་འཐུང་དང་། ཧཱུྃ་ཐུགས་རྡོ་རྗེ་དང་། ཕཊ་ནི་གསལ་བར་བྱེད་པའི་དོན་དུ་བཤད་ལ་གཟུངས་སྔགས་ཐམས་ཅད་ཀྱི་མཇུག་ཏུ་ཧཱུྃ་དང་ཕཊ་སྦྱར་དགོས་པར་གསུངས་པའི་དོན་ཡིན་ཏེ། དཔལ་གདན་བཞིའི་རྒྱུད་ལས། ཧཱུྃ་ནི་ཉོན་མོངས་བསྲེག་པ་སྟེ། །ཐུགས་ཀྱི་རྡོ་རྗེར་བྱིན་གྱིས་བརླབ། །ཞེས་དང་། མངོན་པར་བརྗོད་པའི་རྒྱུད་བླ་མ་ལས། ཡི་གེ་ཧཱུྃ་ཕཊ་མཐའ་རུ་སྦྱར། །འདི་ནི་ཁམས་གསུམ་རྒྱལ་ཞེས་བྱ། །སྔགས་ཚིག་བཞི་ཡིས་རྣམ་བརྒྱན་པའོ། །ཞེས་དང་། ཧཱུྃ་དང་ཕཊ་ནི་མཐའ་རུ་སྦྱར། །རིག་རྒྱལ་འཁོར་ལོ་སྒྱུར་བའི་སྔགས། ། འདི་ནི་མ་བྱུང་འབྱུང་མི་འགྱུར། ། ཞེས་དང་། རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་མཁའ་འགྲོ་ལས། རང་མིང་བརྗོད་པའི་སྔགས་ལ་ནི། །མཐར་ནི་ཧཱུྃ་ཧཱུྃ་ཕཊ་དང་སྦྱར། །ཞེས་གསུངས་པའི་ཕྱིར་རོ།།

ཡང་ཡི་གེ་ཕཊ་དེ་གདུག་པ་དང་གདོན་ཐམས་ཅད་འཇོམས་བྱེད་དང་། བདག་འཛིན་དང་རྣམ་པར་རྟོག་པ་འཇོམ་བྱེད་དང་། ཉོན་མོངས་པ་དང་དེའི་འབྲས་བུ་མི་དགེ་བའི་ལས་དང་སྡུག་བསྔལ་འཇོམ་བྱེད་དང་། བདེ་བ་དང་དངོས་གྲུབ་ཐམས་ཅད་འགུག་བྱེད་ཡིན་པར་གསུངས་ཏེ། རྡོ་རྗེ་རྩེ་མོ་ལས། ཡི་གེ་ཕཊ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་དག་ནི་འགུག་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །གྲོགས་དང་བཅས་པ་འཇོམས་པར་བྱེད། །ཅེས་དང་། གེ་ཕཊ་ནི་མངོན་སྤྱོད་ལ། །ཞེས་གསུངས་པའི་ཕྱིར་རོ།། །།