དཔལ་མགོན་འཕགས་པ་ཀླུ་སྒྲུབ་ཀྱི་གསང་འདུས་རིམ་ལྔའི་ཟིན་བྲིས་ནག་འགྲོས་སུ་བཀོད་པ་དཔལ་ལྡན་བླ་མའི་ཞལ་ཆབ་མྱོང་གྲོལ་བདུད་རྩིའི་ཐིགས་པ།

དང་པོ་ལུས་དབེན་ལ་ལུས་དབེན་སྐུ་རྡོ་རྗེའི་ཏིང་ངེ་འཛིན་ཞེས་བྱ་ཞིང་། བསྐྱེད་རིམ་ཕྲ་རགས་མཐར་ཕྱིན་པའི་རྣལ་འབྱོར་བས་འོག་སྒོར་ཕྲ་མོར་བསྒོམས་པས་རླུང་དབུ་མའི་ཡར་སྣེ་དང་མར་སྣེར་ཞུགས་གནས་ཐིམ་གསུམ་བྱས་པ་ལས་བྱུང་བའི་སྟོང་པའི་ཡེ་ཤེས་སྐྱེས་པ་ནས་བཟུང་སྟེ་སྟེང་འོག་གི་རླུང་རྣམས་སྙིང་ཀའི་དྷཱུ་ཏཱིར་ཐིམ་པ་ལས་བྱུང་བའི་སྣང་བའི་ཡེ་ཤེས་མ་སྐྱེས་པའི་བར་གྱི་རྫོགས་རིམ་དེ་ཡིན་ཞིང་། དེ་ཡང་བསྐྱེད་རིམ་ནས་རྫོགས་རིམ་དུ་འཕོ་བའི་ཚུལ་ལས་རྫོགས་རིམ་ལུས་དབེན་དུ་འཕོ་ཚུལ་ཡང་བསྐྱེད་རིམ་མཐར་ཕྱིན་པའི་རྣལ་འབྱོར་བས་མཉམ་བཞག་ཏུ་རླུང་དྷཱུ་ཏཱིར་ཐིམ་པ་ལས་བྱུང་བའི་བདེ་སྟོང་གི་ཡེ་ཤེས་བསྒོམས་ཤིང་། དེ་ལས་ལངས་པའི་རྗེས་ཐོབ་ཏུ་ཡུལ་སྣང་ཐམས་ཅད་ལ་བདེ་སྟོང་གི་ཡེ་ཤེས་ཀྱི་རྒྱ་ཡིས་བཏབ་ནས་རིགས་བརྒྱ་དང་། རིགས་གཅིག་ལ་སོགས་པའི་ལྷའི་རྣམ་པར་ཤར་བའི་རྣལ་འབྱོར་སྐྱེས་པ་ན་བསྐྱེད་རིམ་ནས་རྫོགས་རིམ་ལུས་དབེན་དུ་འཕོས་པ་ཡིན་ཞིང་། རྣལ་འབྱོར་བ་དེ་ནི་རྫོགས་རིམ་གྱི་ལུས་དབེན་པ་ཡིན་ནོ།།

སློབ་དཔོན་ཨ་བྷྱ་ཀཱ་ར་དང་། ཐུབ་པ་དཔལ་དང་། ལཀྵསྨི་དང་། སྐལ་ལྡན་གྲགས་པ་ལ་སོགས་པས་ལུས་དབེན་རིལ་བོ་བསྐྱེད་རིམ་དུ་འདོད་པ་དང་། བླ་མ་བཙུན་མོ་ཅན་དང་། མངོན་ཤེས་ཅན་གྱིས་ལུས་དབེན་དེ་རིལ་བོ་རྫོགས་རིམ་དུ་འདོད་པ་དང་། ནག་པོ་དམ་ཚིག་རྡོ་རྗེས་རིགས་བརྒྱ་དང་། རིགས་ལྔ་དང་། རིགས་གསུམ་གྱི་ལུས་དབེན་བསྐྱེད་རིམ་དང་། རིགས་གཅིག་གི་ལུས་དབེན་རྫོགས་རིམ་དུ་འདོད་པ་དང་། བོད་ནས་འགོས་ལུགས་པ་ཕལ་མོ་ཆེས་ལུས་དབེན་རྫོགས་རིམ་དུ་འདོད་པ་སོགས་ལུགས་དུ་མ་ཡོད་པར་རྗེ་རིན་པོ་ཆེའི་གསལ་སྒྲོན་དུ་གསུངས་སོ།།

རང་ལུགས་ལ་ནི། དེ་དག་གི་འདོད་པའི་དོན་ལྟར་ནི་མིན་པར་སྤྱིར་ལུས་དབེན་ལ་བསྐྱེད་རྫོགས་གཉིས་ཀའི་ཆར་གྱུར་པའི་ལུས་དབེན་ཡོད་པར་འདོད་ཅིང་། སྟོང་ཉིད་རྟོགས་པའི་སྟོབས་ཀྱིས་བྱུང་བ་མ་ཡིན་པར་སྟོང་ཉིད་རྟོགས་པ་མ་ཡིན་པའི་བློའི་གཟུང་རྣམ་ལྷར་ཤར་བའི་ལུས་དབེན་ཞིག་དང་། ཞུ་བདེའི་སྟོབས་ཀྱིས་སྟོང་ཉིད་རྟོགས་པ་མ་ཡིན་པའི་སྟོང་ཉིད་རྟོགས་པའི་བློའི་གཟུང་རྣམ་ལྷར་ཤར་བའི་ལུས་དབེན་ཞིག་དང་། རླུང་དབུ་མར་ཞུགས་གནས་ཐིམ་པ་ལས་བྱུང་བ་མ་ཡིན་པའི་ཞུ་བདེ་ཙམ་ལ་བརྟེན་ནས་བྱུང་བའི་སྟོང་ཉིད་རྟོགས་པའི་བློའི་གཟུང་རྣམ་ལྷར་ཤར་བའི་ལུས་དབེན་ཞིག་དང་། རླུང་དབུ་མར་ཞུགས་གནས་ཐིམ་པ་ལས་བྱུང་བའི་ཞུ་བདེ་ལ་བརྟེན་ནས་བྱུང་བའི་སྟོང་ཉིད་རྟོགས་པའི་བློའི་གཟུང་རྣམ་ལྷར་ཤར་བའི་ལུས་དབེན་ཞིག་དང་བཞི་ཡོད་པ་ལས་སྔ་མ་གསུམ་བསྐྱེད་རིམ་གྱི་སྐབས་ཀྱི་ལུས་དབེན་དང་། ཕྱི་མ་ནི་རྫོགས་རིམ་དུ་གྱུར་པའི་ལུས་དབེན་ཡིན་ཕྱིར། ལུས་དབེན་དེ་ལ་བསྐྱེད་རྫོགས་གཉིས་ཀའི་ཆ་ཡོད་པར་བཞེད་པ་སྟེ། རྗེའི་གསལ་སྒྲོན་ལས། རང་གི་ལུགས་ནི། ལུས་དབེན་ལ་རིམ་གཉིས་ཀྱི་ཆ་གཉིས་ཡོད་པའི་རིམ་པ་གཉིས་པའི་ལུས་དབེན་འཕགས་པས་ངག་དབེན་གྱི་སྔོན་དུ་མ་གསུངས་པ་ནི། རྡོ་རྗེ་བཟླས་པའི་རིམ་པར་བསྡུས་པ་ལ་དགོངས་པ་ཡིན་ནོ། །ཞེས་གསུངས་པ་དེ་ལྟར་ཤེས་པར་བྱའོ།།

ལུས་དབེན་དེ་ལ། རྗེས་ཐོབ་ཏུ་ཡུལ་དབང་སོགས་ཆོས་ཐམས་ཅད་བདེ་སྟོང་གི་རྒྱས་བཏབ་ནས་ཐམས་ཅད་བདེ་སྟོང་གི་རྣམ་འགྱུར་དུ་འཆར་བ་ཞིག་ཡོད་པ་ནི་སོར་སྡུད་དང་། བདེ་སྟོང་གི་རྣམ་འགྱུར་ལྷ་སྐུ་རུ་འཆར་བ་ཞིག་ཡོད་པ་ནི་བསམ་གཏན་ཡིན་པས་དེ་ལ་དབྱེ་ན་སོར་སྡུད་དང་། བསམ་གཏན་གཉིས་ཡོད་དོ།།

དེས་ན་ལུས་དབེན་ནི་བསྒོམས་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་བདེ་སྟོང་གི་ཡེ་ཤེས་ཀྱིས་རྒྱས་བཏབ་པའི་སྒོ་ནས་ཕུང་ཁམས་སྐྱེ་མཆེད་ལྷ་རུ་བསྒོམ་པ་ལ་བྱེད་པས་དམ་པ་རིགས་བརྒྱ་སོགས་ལྷའི་དཀྱིལ་འཁོར་བསྒོམས་པའི་ལམ་ཞིག་ལ་བྱེད་པས་ལུས་དབེན་ཞེས་སོ།།

དེ་ཕྱིར་རྗེ་ཙོང་ཁ་པ་བློ་བཟང་གྲགས་པའི་ཞལ་ཤེས་གནད་ཀྱི་ཐེམ་ཡིག་ལས། བསྐྱེད་རིམ་ནི་རྫོགས་རིམ་གྱི་སྨིན་བྱེད་དུ་བསྒོམ་པ་ཡིན་པས། ལུས་དབེན་ནས་བཟུང་སྟེ་ཟུང་འཇུག་གི་བར་ཐམས་ཅད་དུ་རང་རྡོ་རྗེ་འཆང་དུ་ལངས་པ་ན་བརྟེན་པའི་དཀྱིལ་འཁོར་ཡོངས་རྫོགས་སུ་ལང་དགོས་པ་ཡིན་ནོ། །ཞེས་གསུངས་པ་ལྟར་ལུས་དབེན་ནས་ཟུང་འཇུག་གི་བར་གྱི་རྫོགས་རིམ་ཡོངས་ལའང་རང་ལྷའི་སྐུར་བསྒོམ་དགོས་པ་ཡིན་ཞིང་། དེ་ཡང་གསང་བ་འདུས་པའི་ལྷ་ཚོགས་ལྟ་བུ་དཀྱིལ་འཁོར་ཡོངས་རྫོགས་ཀྱི་སྐུར་བཞེངས་པ་ཞིག་དགོས་པ་ཡིན་ནོ།།

གསང་བ་འདུས་པའི་སྐབས་ཀྱི་དམ་པ་རིགས་བརྒྱ་ནི། རྒྱུད་ཕྱི་མ་ལས། དམ་པའི་རིགས་ནི་རྣམ་པ་བརྒྱ། །ཞེས་གསུངས་པ་ལྟར། གཟུགས་ཀྱི་ཕུང་པོ་སོགས་ཕུང་ལྔ་གཤེགས་པ་ལྔ་དང་། ས་སོགས་ཁམས་བཞི་ཡུམ་བཞི་དང་། མིག་གི་སྐྱེ་མཆེད་སོགས་དྲུག་བྱམས་པ་དང་ཀུན་བཟང་དོར་བའི་ས་སྙིང་སོགས་སེམས་དཔའ་དྲུག་དང་། གཟུགས་སྒྲ་སོགས་ལྔ་ལ་གཟུགས་རྡོ་རྗེ་མ་ལ་སོགས་པའི་སེམས་མ་ལྔ་སྟེ་ལྷ་ཉི་ཤུ་ལ་རེ་རེ་ལ་རྣམ་སྣང་གི་རྣམ་སྣང་དང་། རྣམ་སྣང་གི་མི་བསྐྱོད་པ་སོགས་ནས་རེག་བྱ་རྡོ་རྗེ་མའི་རྣམ་སྣང་ལ་སོགས་རིགས་ལྔ་རེ་བྱས་པའི་བརྒྱ་ཐམ་པ་བསྒོམ་པ་དེ་ཉིད་ཡིན་ཏེ། གསང་ཆེན་གསང་བ་འདུས་པ་བརྟག་པའི་རྒྱལ་པོ་ཆེན་པོ་སྟེ་གསང་འདུས་རྩ་རྒྱུད་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་བསྒྲགས། །རྡོ་རྗེའི་སྐྱེ་མཆེད་རྣམས་ཉིད་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཞེས་དང་། ས་ནི་སྤྱན་ཞེས་བྱ་བ་ཡིན། །ཆུའི་ཁམས་མཱ་མ་ཀཱི་ཞེས་བྱ། །དཀར་དང་སྒྲོལ་མ་ཞེས་བྱ་བ། །མེ་དང་རླུང་དུ་རབ་ཏུ་བསྒྲགས། །མཁའ་དབྱིངས་རྡོ་རྗེའི་དམ་ཚིག་ནི། །དེ་ཉིད་རྡོ་རྗེ་འཛིན་པ་ཡིན། །ཞེས་དང་། གཟུགས་སྒྲ་དྲི་སོགས་སྔགས་པ་ཡིས། །ལྷ་ཉིད་དུ་ནི་རྟག་ཏུ་བསྒོམ། །ཞེས་གསུངས་པའི་ཕྱིར་རོ།།

དེ་ཉིད་རིགས་ལྔ་ནི། དམ་པ་རིགས་བརྒྱའམ་རིགས་ཅན་ཉི་ཤུ་བོ་སའི་ཁམས་དང་། ཆུ་དང་། མེ་དང་། རླུང་དང་། རྣམ་ཤེས་ཀྱི་ཁམས་ལྔའི་རིགས་ཀྱི་ལྷའི་ཁོངས་སུ་བསྡུས་ནས་རིགས་ལྔ་བྱེད་པ་ཡིན་ཏེ། རྒྱུད་ཕྱི་མ་ལས། དེ་ཉིད་རྣམ་པ་ལྔ་རུ་བཤད། །ཅེས་གསུངས་པའི་ཕྱིར་རོ།།

གསང་བ་རིགས་གསུམ་ནི། ཁམས་ལྔར་བསྡུས་པའི་ལྷ་དེ་དག་ལས་རིན་ཆེན་འབྱུང་ལྡན་སྐུ་རྡོ་རྗེར་བསྡུས་ཏེ་རིན་ཆེན་འབྱུང་ལྡན་དང་རྣམ་སྣང་ལུས་ཀྱི་ངོ་བོ་རྣམ་པར་དག་པ་སྐུ་རྡོ་རྗེ་དང་། དོན་ཡོད་གྲུབ་པ་གསུང་རྡོ་རྗེ་རུ་བསྡུས་ཏེ་དོན་ཡོད་གྲུབ་པ་དང་འོད་དཔག་མེད་ངག་གི་ངོ་བོ་རྣམ་པར་དག་པ་གསུང་རྡོ་རྗེ་དང་། རིགས་དྲུག་པ་ཐུགས་རྡོ་རྗེར་བསྡུས་ཏེ་རྡོ་རྗེ་འཆང་དང་མི་བསྐྱོད་པ་ཡིད་རྣམ་པར་དག་པ་ཐུགས་རྡོ་རྗེ་སྟེ། དབེན་གཞི་རང་གི་ལུས་ངག་ཡིད་ཀྱི་སྒོ་གསུམ་པོ་རྣམ་པར་དག་པ་རྡོ་རྗེ་གསུམ་གྱི་ངོ་བོར་བསྒོམས་པའི་བདེ་སྟོང་གི་ཡེ་ཤེས་ཀྱིས་རྒྱས་ཐེབས་པའི་རྣལ་འབྱོར་ཞིག་ལ་བྱེད་པ་ཡིན་ཏེ། རྒྱུད་ཕྱི་མ་ལས། གསང་བ་རྣམ་པ་གསུམ་དུ་བཤད། །ཅེས་གསུངས་པའི་ཕྱིར་རོ།།

གསང་ཆེན་རིགས་གཅིག་ནི། རྡོ་རྗེ་གསུམ་དེ་ཡང་གསང་ཆེན་རྡོ་རྗེ་འཆང་གི་སྐུ་གསུང་ཐུགས་སུ་བསྡུས་པའི་རིགས་གཅིག་སྟེ། དེ་ཉིད་ལ་བདེ་སྟོང་གི་ཡེ་ཤེས་ཀྱི་རྒྱས་བཏབ་པའི་ལམ་དེ་ལ་བྱེད་པ་ཡིན་ཏེ། དེ་ཉིད་ལས། གསང་བ་རྣམ་པ་གསུམ་དུ་བཤད། །ལྷག་མའི་ལྷ་ནི་གསང་ཆེན་ཏེ། །ཞེས་གསུངས་པའི་ཕྱིར་རོ།།

དེ་ཡང་ལུས་དབེན་བསྒོམ་ཚུལ་དངོས་ནི། བསྐྱེད་རིམ་ཕྲ་རགས་མཐར་ཕྱིན་པའི་རྣལ་འབྱོར་བས་དུས་གནད་ཐོ་རངས་དང་། ཕྱི་དྲོ་མེ་ཡི་དུས་ལྟ་བུ་ལ། ལུས་གནད་རྣམ་སྣང་ཆོས་བདུན་གྱི་ངང་ནས་། རླུང་གནད་མ་བཅོས་པ་རང་སོ་བ་དེ། ཡུལ་གནད་རྩ་དབུ་མའི་ནང་དུ་བསྒོམ་དགོས་ཤིང་། རང་ལུས་གསང་ཆེན་རིགས་གཅིག་རྡོ་རྗེ་འཆང་གི་སྐུར་གསལ་བའི་དྷཱུ་ཏཱིའི་མར་སྣེ་ནོར་བུའི་རྩ་འཁོར་གྱི་དབུས་སུ་དམིགས་རྟེན་ལྷ་གང་ཡིན་གྱི་རང་རིགས་ཀྱི་ཕྱག་མཚན་ནམ་ཐིག་ལེ་ཕྲ་མོ་གང་རུང་བསྒོམ་པ་ལ་སེམས་གཏད་ཏེ་གནས་པས། རླུང་སེམས་འཇུག་པ་གཅིག་པའི་གནད་ཀྱིས་སེམས་གང་དུ་བཟུང་བའི་གནས་དེར་རླུང་འདུ་ཞིང་། དེའི་དབང་གིས་རླུང་དབུ་མར་ཞུགས་པ་དང་། གནས་པ་དང་། ཐིམ་པ་གསུམ་བྱེད་པའམ་འབྱུང་བ་ཡིན་ལ། དེ་དུས་རླུང་དབུ་མར་ཞུགས་པའི་རྟགས་སུ་སྣ་བུག་ནས་མཉམ་རྒྱུ་ཤེད་མཚུངས་ཅན་ཐེངས་པ་འབྱུང་བ་དང་། རླུང་དབུ་མར་གནས་པའི་རྟགས་སུ་སྣ་བུག་ནས་རླུང་གི་རྒྱུ་བ་ཆད་པ་དང་། ཐིམ་པའི་རྟགས་སུ་ས་ཁམས་ཆུ་ལ་ཐིམ་པས་སྨིག་རྒྱུ་ལྟ་བུའི་སྣང་བ་འཆར་བ་དང་། ཆུ་ཁམས་མེ་ལ་ཐིམ་པའི་རྟགས་སུ་དུ་བ་ལྟ་བུ་དང་། མེ་ཁམས་རླུང་ལ་ཐིམ་པའི་རྟགས་སུ་མཁའ་སྣང་མེ་ཁྱེར་ལྟ་བུ་དང་། རླུང་ཁམས་སྣང་བ་ལ་ཐིམ་པའི་རྟགས་སུ་མར་མེ་འབར་བ་ལྟ་བུའི་སྣང་བ་འཆར་བ་ཡིན་ཏེ། སློབ་དཔོན་སངས་རྒྱས་ཡེ་ཤེས་ཀྱི་རིམ་གཉིས་དེ་ཁོ་ན་ཉིད་བསྒོམ་པའི་ཞལ་ལུང་ལས། དེ་ནས་གསང་བའི་ཐིག་ལེ་ཆེ། །རབ་ཏུ་ཕྲ་བ་གོང་མ་བཞིན། །རང་སེམས་དལ་བུ་དལ་བུས་གཟུང་། །དངོས་པོ་མེད་པའི་གནས་སུ་འགྱུར། །དེ་ཡང་བཟུང་བ་གོམས་པ་ཡིས། །ཕྱིན་ཅི་ལོག་ནི་རྣམ་པར་ལྡོག །སྨིག་རྒྱུ་ལྟ་བུ་སྣང་བ་ནི། །རྟགས་ནི་དང་པོར་ཤེས་པར་བྱ། །དེ་བཞིན་དུ་ནི་ཆུ་ལོག་པས། །དུ་བ་ལྟ་བུར་འབྱུང་བ་ནི། །གཉིས་པ་ཡིན་པར་ཤེས་པར་བྱ། །མེ་ནི་རྣམ་པར་ལོག་གྱུར་པས། །མཁའ་སྣང་འདྲ་བ་གསུམ་པའོ། །རླུང་ནི་དེ་བཞིན་ལོག་པས་ན། །མར་མེ་ལྟ་བུ་རབ་སྣང་བས། །རྟགས་ནི་བཞི་པར་ཤེས་པར་བྱ། །ཞེས་གསུངས་པའི་ཕྱིར་རོ།།

དེ་ཉིད་ལས། དེ་བཞིན་ཕྱིན་ལོག་རྣམ་པར་ཤེས། །ལོག་པས་ཟབ་གསལ་གཉིས་མེད་ཀྱི། །དོན་དྲན་སྤྲིན་མེད་ནམ་མཁའ་ལྟར། །གསལ་བ་རྟགས་ནི་ལྔ་པའོ། །ཞེས་པ་ནི་ཉེར་ཐོབ་ཀྱི་སྣང་བ་ལོག་སྟེ་འོད་གསལ་འཆར་བའི་རྟགས་སུ་ནམ་མཁའ་སྤྲིན་མེད་པ་གཡའ་དག་པའི་སྣང་བ་འཆར་བ་དེ་བསྟན་པ་ཡིན་པར་ངེས་སོ།།

རྟགས་འདི་དག་ཀྱང་ཐིམ་པར་བརྩམ་པ་ན་འབྱུང་བ་ཡིན་གྱི་ཐིམ་པ་དང་ཐིམ་ནས་བྱུང་བ་ནི་མ་ཡིན་པའི་ཕྱིར་ན་ཐིམ་པའི་སྔ་ལོགས་དེ་མ་ཐག་ཏུ་སྔ་རྟགས་སུ་བྱུང་བ་ཡིན་ནོ།།

ལུས་དབེན་ཞེས་པའི་དོན་ཡང་དབེན་གཞི་ལུས་རང་རྒྱུད་ཀྱིས་བསྡུས་པའི་ཕུང་ཁམས་སྐྱེད་མཆེད་སོགས་ལ་རྫོགས་རིམ་གྱི་བདེ་སྟོང་གི་ཡེ་ཤེས་ཀྱི་རྒྱས་བཏབ་ནས་ཐ་མལ་གྱི་སྣང་ཞེན་ལས་དབེན་པར་བྱས་ཏེ་དག་པ་ལྷའི་རྣམ་པར་ཤར་བའི་རྣལ་འབྱོར་ཞིག་ཡིན་པའི་ཕྱིར་ན་ལུས་དབེན་ཞེས་བརྗོད་པ་ཡིན་པར་གསུངས་ཤིང་། དབེན་གཞི་ལུས་ཀྱི་ཕུང་པོ་ལྔ་དང་། ཁམས་བཞི་དང་། སྐྱེ་མཆེད་དྲུག་དང་། གཟུགས་སྒྲ་སོགས་ལྔ་སྟེ་རགས་པ་ཉི་ཤུ་དང་། དབེན་བྱ་ནི་ཐ་མལ་སྣང་ཞེན་དང་། དབེན་པའི་དོན་ནི་བདེ་སྟོང་གི་ཡེ་ཤེས་ཀྱི་རྣམ་འགྱུར་རམ་ལྷ་སྐུའི་རྣམ་པར་བསྒོམས་ནས་ཤར་བའོ། །དེ་ནི་ལུས་དབེན་གྱི་ངེས་ཚིག་གམ་སྒྲ་བཤད་དོ།།

ལུས་དབེན་གྱི་སྐབས་སུ་སྒོམ་སྟོབས་ཀྱིས་རླུང་དབུ་མར་ཞུགས་གནས་ཐིམ་གསུམ་བྱས་ཏེ་ལུས་དབེན་བསྒོམ་དགོས་ཤིང་། དེ་ཡང་ལུས་དབེན་གྱི་སྐབས་སུ་རླུང་རྩ་དབུ་མར་ཐིམ་ཡང་དབུ་མའི་ཡར་སྣེ་དང་མར་སྣེ་ལ་ཐིམ་པ་ལས་སྙིང་ཁའི་དབུ་མ་དང་། སྙིང་གའི་རྩ་འཁོར་དང་། མི་ཤིགས་པའི་ཐིག་ལེ་ལ་ཐིམ་ཐུབ་ཀྱིན་མེད་པ་དང་། བསྒོམ་བྱའི་རླུང་དེ་ཡང་སྲོག་འཛིན་དང་། མེ་མཉམ་དང་། ཐུར་སེལ་དང་། གྱེན་རྒྱུ་སྟེ་རྩ་བའི་རླུང་བཞི་དང་། རྒྱུ་བ་དང་། རྣམ་པར་རྒྱུ་བ་སོགས་ཡན་ལག་གི་རླུང་ལྔ་དེ་ཉིད་དབུ་མར་ཞུགས་གནས་ཐིམ་གསུམ་བྱེད་པ་ལས་ཁྱབ་བྱེད་ཀྱི་རླུང་ནི་དེ་ལྟར་བྱེད་ཐུབ་ཀྱིན་མེད་པར་བཞེད་དོ།།

སྒོམ་སྟོབས་ཀྱིས་རླུང་དབུ་མར་དངོས་སུ་ཐིམ་ནས་སྣང་མཆེད་ཐོབ་གསུམ་གྱི་རྗེས་ཐོག་གམ་སྐབས་སུ་སྟོང་པའི་ཡེ་ཤེས་སྐྱེ་བ་ཡིན་ཞིང་དེ་བར་ནི་ལུས་དབེན་ཡིན་པར་གསུངས་སོ།།

རྡོར་བཟླས་བཤད་པ།

རིམ་པ་ལྔའི་དང་པོ་རྡོར་བཟླས་ཀྱི་རིམ་པ་ནི། དབེན་པ་གསུམ་གྱི་གཉིས་པ་ངག་དབེན་དང་དོན་གཅིག་ལ། དེ་ལ་ནི་ངག་དབེན་གསུང་རྡོ་རྗེའི་ཏིང་ངེ་འཛིན་ཞེས་ཀྱང་བྱ་ཞིང་། དེ་ནི། སྙིང་གའི་སྣ་རྩེ་སྟེ་དབུ་མའི་དབུས་སུ་གཞི་དུས་ཀྱི་ཡེ་ཤེས་ལྔ་དང་འབྱུང་བ་ལྔའི་ངོ་བོར་གྱུར་པའི་རླུང་ཕྲ་བ་ཐིག་ལེའི་གཟུགས་སུ་གྱུར་པ་ཨ་ཐུང་གི་རྣམ་པར་གྱུར་པའི་སྔགས་ཀྱི་ཐིག་ལེ་བསྒོམས་པས་སྟེང་འོག་གི་རླུང་རྣམས་དབུ་མ་མ་ཟད་སྙིང་གའི་དྷཱུ་ཏཱིའི་ནང་དུའང་ཞུགས་གནས་ཐིམ་གསུམ་བྱས་པ་ལས་སྙིང་གའི་རྩ་མདུད་ལྷོད་པོར་ཡོངས་སུ་གྲོལ་ཞིང་། དེ་ལས་བྱུང་བའི་སྣང་བའི་ཡེ་ཤེས་སྐྱེས་པ་ནས་སྙིང་གའི་མི་ཤིགས་པའི་ཐིག་ལེ་ལ་རླུང་ཞུགས་གནས་ཐིམ་གསུམ་བྱས་པའི་སྣང་བའི་ཡེ་ཤེས་མ་སྐྱེས་པའི་བར་གྱི་རྫོགས་རིམ་གྱི་རྣལ་འབྱོར་དེ་ལ་བྱའོ།།

རྡོར་བཟླས་ལ་དབྱེ་ན་དུ་མ་ཡོད་པར་བཤད་ཀྱང་། རང་ལུགས་ལ་ནི་རྩ་བའི་རླུང་ལ་དམིགས་པའི་རྡོར་བཟླས་དང་། ཡན་ལག་གི་རླུང་ལ་དམིགས་པའི་རྡོར་བཟླས་གཉིས་ཡོད་ཅིང་། དང་པོ་ལ་རིན་པོ་ཆེའི་བཟླས་པ་དང་། གཉིས་པ་ལ་ཐོགས་མེད་ཀྱི་བཟླས་པ་ཞེས་བཤད་པ་ཡིན་ཏེ། གསང་བ་འདུས་པའི་རྒྱུད་ལས། དོན་གྱི་རྗེས་འགྲོ་བཟླས་པ་ནི། །ངོ་བོ་ཉིད་མེད་བཟང་པོ་ཡིས། །དུས་གསུམ་སངས་རྒྱས་རྣམ་དཔྱད་པ། །དེ་ནི་རིན་ཆེན་བཟླས་པར་བཤད། །སངས་རྒྱས་ཞིང་རྣམས་ཐམས་ཅད་དུ། །སྐུ་ཡི་སྤྲིན་རྣམས་སྤྲོ་བ་དང༌། །བཞུད་ཅིང་བྱོན་པ་རྡོ་རྗེའི་དོན། །དེ་ནི་ཐོགས་མེད་བཟླས་པར་བཤད། །ཅེས་གསུངས་པའི་ཕྱིར་རོ།།

དེ་ཡང་སྔ་མ་ལ་རིན་པོ་ཆེའི་བཟླས་པ་ཞེས་བརྗོད་པའི་རྒྱུ་མཚན་ཡང་རིན་པོ་ཆེ་དོན་གྱི་འོད་གསལ་བསྐྱེད་པར་བྱེད་པའི་བཟླས་པ་ཡིན་པས་དེ་ལྟར་བརྗོད་པ་དང་། ཕྱི་མ་ལ་ཐོགས་མེད་ཀྱི་བཟླས་པ་ཞེས་བརྗོད་པའི་རྒྱུ་མཚན་ཡང་དབང་ཤེས་ལྔ་ལྐོག་གྱུར་གྱི་ཡུལ་ལ་ཐོགས་མེད་དུ་འཇུག་ནུས་སུ་བསྒྲུབ་པར་བྱེད་པའི་བཟླས་པ་ཡིན་པས་ན་དེ་ལྟར་བརྗོད་པ་ཡིན་པར་གསུངས་སོ།།

ཡང་རྡོར་བཟླས་ལ་ངོ་བོའི་སྒོ་ནས་དབྱེ་ན། ཡི་གེ་གསུམ་གྱི་རྡོར་བཟླས་དང་། ཡི་གེ་གཉིས་ཀྱི་རྡོར་བཟླས་གཉིས་ཡོད་ལ། བཟླས་པའི་སྔགས་ཀྱི་སྒོ་ནས་ཕྱེས་པ་ཡིན་པར་རྗེ་རིན་པོ་ཆེས་གསུངས་ཤིང་། ཡི་གེ་གཉིས་ཀྱི་རྡོར་བཟླས་ནི་ཡི་གེ་ཧཱུཾ་ཧོཿ གཉིས་སོ།།

རྡོར་བཟླས་ཀྱི་བཟླ་བྱའི་ཡུལ་རླུང་གི་སྒོ་ནས་དབྱེ་ན་རྩ་བ་དང་། ཡན་ལག་གི་རྡོར་བཟླས་གཉིས་ཡོད་པ་དང་། རྩ་བ་ལ་རླུང་བཞི་དང་། ཡན་ལག་ལ་རླུང་ལྔའི་དབྱེ་བ་ཡོད་དོ།།

རྟེན་གྱི་སྒོ་ནས་དབྱེ་ན། བསྐྱེད་རིམ་དང་། ངག་དབེན་དང་། སེམས་དབེན་དང་། སྒྱུ་ལུས་དང་། ཟུང་འཇུག་གི་རྡོར་བཟླས་ལྔ་ཡོད་པར་བཤད་ལ། སྒྲའི་བརྗོད་རིགས་ཀྱི་དབྱེ་བའོ།།

རྡོར་བཟླས་ཞེས་བརྗོད་པའི་རྒྱུ་མཚན་ནི། བཛྲ་ནི་རྡོ་རྗེའི་སྐད་དོད་དེ། མི་ཕྱེད་པའི་དོན་ཡིན་ཞིང་། རྡོར་བཟླས་ནི་རླུང་སྔགས་དབྱེར་མི་ཕྱེད་པར་སྦྱོར་བའི་བཟླས་པ་ཡིན་པའི་ཕྱིར་ན་དེ་ལྟར་བརྗོད་ལ། དེ་ནི་རྡོར་བཟླས་ཀྱི་སྒྲ་བཤད་དོ།།

དེ་ལ་རྗེས་འགྲོའི་བཟླས་པ་ཞེས་བརྗོད་པའི་རྒྱུ་མཚན་ཡང་། ཡིད་དེ་རླུང་སྔགས་དབྱེར་མེད་པའི་རྗེས་སུ་འགྲོ་བའི་བཟླས་པ་ཡིན་པའི་ཕྱིར་ན་དེ་ལྟར་བརྗོད་པར་གསུངས་སོ།།

རྡོར་བཟླས་བསྒོམ་ཚུལ་དངོས་ནི། རིམ་ལྔ་གསལ་སྒྲོན་ལས། དྲུག་པ་ངག་དབེན་ཇི་ལྟར་ཉམས་སུ་བླང་པའི་ཚུལ་ལ་གསུམ། ཞེས་པ་ནས། སྙིང་ཁའི་སྣ་རྩེར་སྔགས་ཀྱི་ཐིག་ལེའི་སྲོག་རྩོལ་བསྒོམ་པ་དང༌། གདོང་གི་སྣ་རྩེར་འོད་ཀྱི་ཐིག་ལེའི་སྲོག་རྩོལ་སྒོམ་པ་དང༌། གསང་བའི་སྣ་རྩེར་རྫས་ཀྱི་ཐིག་ལེའི་སྲོག་རྩོལ་སྒོམ་པའི་བཤད་པའོ། །ཞེས་གསུངས་པ་ལྟར། སྙིང་གའི་སྣ་རྩེར་སྔགས་ཀྱི་ཐིག་ལེའི་སྲོག་རྩོལ་དང་། གདོང་གི་སྣ་རྩེར་འོད་ཀྱི་ཐིག་ལེའི་སྲོག་རྩོལ་དང་། གསང་བའི་སྣ་རྩེར་རྫས་ཀྱི་ཐིག་ལེའི་སྲོག་རྩོལ་གསུམ་ལ་སྲོག་རྩོལ་གསུམ་ཞེས་གྲགས་ཤིང་དེ་གསུམ་བསྒོམ་དགོས་སོ།།

དང་པོ་ནི། རང་ཉིད་གསང་ཆེན་རིགས་གཅིག་རྡོ་རྗེ་འཆང་གི་སྐུར་གསལ་ཞིང་དེའི་ང་རྒྱལ་དང་ལྡན་པའི་ངང་ནས་དེའི་སྙིང་གའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཐིག་ལེ་དཀར་དམར་གའུ་ཁ་སྦྱོར་ལྟ་བུ་ཡུངས་འབྲུ་ཙམ་གྱི་ནང་དུ་ཡི་གེ་ཧཱུཾ་ཡིག་གམ་ཡང་ན་ཨ་ཐུང་གི་རྣམ་པ་བསྒོམས་པས་སྙིང་གར་རླུང་བསྡུད་པ་སྔགས་ཐིག་ཉི་ཚེ་བ་བསྒོམ་པ་དང་། ཡང་ན་སྙིང་ཁའི་དབུ་མའི་ནང་དུ་པདྨ་དམར་པོ་འདབ་མ་བརྒྱད་པ་སུམ་རིམ་བསྒོམ། དེ་སྙིང་གའི་རྩ་བརྒྱད་ཀྱི་ངོ་བོར་མོས། དེའི་འདབ་མ་ཕྱི་རིམ་ལ་དབྱངས་ཡིག་བཅུ་གཉིས་སྣང་བ་མཚོན་པའི་ཁ་དོག་དཀར་པོ་དང་། པད་འདབ་རིམ་པ་བར་མ་ལ་མ་ཡིག་དོར་བའི་ལྷག་མ་གསལ་བྱེད་ཀྱི་ཡི་གེ་མཆེད་པ་མཚོན་པའི་མདོག་དམར་པོ་དང་། པད་འདབ་ནང་རིམ་གྱི་ཕྱོགས་བཞི་ལ་ཡི་གེ་རྀ་ལྀ་བཞི་ཉེར་ཐོབ་མཚོན་པའི་མདོག་ནག་པོ་དང་། ཡི་གེ་ཐམས་ཅད་ཀྱི་མགོ་བོར་ཐིག་ལེས་མཚན་པ་དང་། དེ་དག་རྩ་ཡི་ནང་ན་ཕྱི་རིམ་ནང་རིམ་གྱི་རིམ་པ་བསྒྲིགས་པ་དང་། པད་འདབ་ཀྱི་སྟེང་ལ་ཕྲེང་བསྒྲིགས་པ་ཞིག་བསྒོམ། དེའི་དབུས་སུ་མི་ཤིགས་པའི་ཐིག་ལེ་ལ་སེམས་འཛིན་པ་ནི་སྔགས་འཁོར་བསྒོམ་པ་སྟེ། དེ་ལ་རླུང་སྡུད་ནས་བསྒོམས་པ་ལ་བྱ་སྟེ། རྒྱུད་ཕྱི་མ་ལས། རང་སྔགས་སྙིང་གར་བསམ་ནས་ནི། །སྲོག་ནི་ཐིག་ལེར་གྱུར་པར་བཞག །ཅེས་གསུངས་པའི་ཕྱིར་རོ།།

ཡང་སྙིང་གའི་སྣ་རྩེ་སྟེ་སྙིང་ཐད་ཀྱི་དྷཱུ་ཏཱིའི་ནང་གི་རྩ་འཁོར་གྱི་པད་འདབ་ཀྱི་དབུས་སུ་ཐིག་ལེ་དཀར་དམར་གའུ་ཁ་སྦྱར་ལྟ་བུ་ཚད་ཡུངས་འབྲུ་ཙམ་བསྒོམ་དགོས་པའི་ཁུངས་དང་ཚུལ་ནི་ཡོད་དེ། གསང་འདུས་རྩ་རྒྱུད་ལས། རིན་ཆེན་ཆེན་པོ་ཁ་དོག་ལྔ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །ཞེས་དང་། སྒྲོན་གསལ་ལས། །ཁ་དོག་རྣམ་པ་ལྔ་པའི་དེ་བཞིན་གཤེགས་པའི་བདག་ཉིད་ཅན་རིན་པོ་ཆེ་ནི་མི་ཤིགས་པར་གྲགས་པ་སྟེ། སངས་རྒྱས་རིན་པོ་ཆེ་སྐྱེད་པས་སོ། །ཡུངས་ཀར་གྱི་འབྲུ་ཚད་ཙམ་ཞེས་བྱ་བ་ནི་ཐིག་ལེའི་གཟུགས་ཅན་ཡིན་པས་སོ། །སྣའི་རྩེ་མོར་ཞེས་བྱ་བ་ནི་སྙིང་གའི་པདྨའི་ལྟེ་བར་རོ། །ནན་ཏན་དུ་ཞེས་པ་ནི་དེ་ལ་ཞེན་པས་འཇུག་པ་དང་། གནས་པ་དང་། ལྡང་བ་དང་། སྡུད་པའི་རྣལ་འབྱོར་གྱིས་རྟག་པར་ཉིན་མཚན་དུ་བསྒོམ་པར་བྱའོ། །ཞེས་གསུངས་པའི་ཕྱིར་རོ།།

དེ་ཡང་ཁམས་དཀར་དམར་གྱི་ཐིག་ལེ་དེ་གའུ་ཁ་སྦྱར་ལྟ་བུ་ཡིན་པའི་ཁུངས་ཡོད་དེ། སློབ་དཔོན་ཀུ་ཀུ་རི་པའི་རྡོ་རྗེ་སེམས་དཔའི་སྒྲུབ་ཐབས་ལས། དེ་ཡི་ལྟེ་བར་བསམ་པ་ནི། །ཉི་དཀྱིལ་ཐིག་ལེ་ཟླ་བ་སྟེ། །དབྱིབས་ནི་གའུ་ཁ་སྦྱར་འདྲ། །ཉི་མ་ཐབས་ལ་ཤེས་རབ་ཟླ། །ཞེས་གསུངས་པའི་ཕྱིར་རོ།།

གཞན་ཡང་གའུ་ཁ་སྦྱོར་ལྟ་བུའི་ནང་གི་ཡི་གེ་དེ་ཧཱུཾ་ཡིག་ཡིན་པའི་ཁུངས་ཡོད་དེ། རྡོ་རྗེ་ཕྲེང་བ་ལས། ཆོས་ཀྱི་འཁོར་ལོ་དེ་ཉིད་མཆོག །སྙིང་གའི་པདྨའི་ལྟེ་བ་ལ། །དབུས་སུ་ཧཱུཾ་ནི་བཀོད་ནས་ནི། །ཞེས་དང་། རྣལ་འབྱོར་མའི་རྒྱུད་གདན་བཞི་ལས། སྙིང་གར་ཟླ་བ་བསམས་ནས་སུ། །དབུས་སུ་ཧཱུཾ་ནི་བསྒོམ་པར་བྱ། །ཞེས་གསུངས་པའི་ཕྱིར་རོ།།

ཡང་གའུ་ཁ་སྦྱོར་ལྟ་བུའི་ནང་གི་ཡི་གེ་དེ་ཨ་ཐུང་གི་ཡི་གེ་ཡིན་པའི་ཁུངས་ཡོད་དེ། རྡོ་རྗེ་སྙིང་པོ་རྒྱན་གྱི་རྒྱུད་ལས་། སྙིང་གའི་དབུས་ན་མི་ཤིགས་པ། །རབ་ཏུ་འབར་བ་མར་མེ་བཞིན། །མི་འགྱུར་མཆོག་ཏུ་ཕྲ་བ་ཡི། །ཨ་ནི་གཙོ་བོ་དམ་པའོ། །ཞེས་དང་། སློབ་དཔོན་སྙན་གྲགས་བཟང་པོའི་གསང་བ་ཐམས་ཅད་ཀྱི་སྒྲོན་མའི་རྒྱ་ཆེར་འགྲེལ་པ་ལས། རང་གི་སྙིང་གའི་པདྨ་ལས་ཨ་ཐུང་ངུ་བསམས་ཏེ། ཞེས་གསུངས་པའི་ཕྱིར་རོ།།

གཉིས་པ་གདོང་གི་སྣ་རྩེར་འོད་ཀྱི་ཐིག་ལེའི་སྲོག་རྩོལ་ནི། རྫོགས་རིམ་པའི་རྡོར་བཟླས་འདིར་ནི། སྙིང་གའི་སྣ་རྩེར་སྔགས་ཐིག་བསྒོམ་པའི་སྲོག་རྩོལ་ལ་བརྟན་པ་ཐོབ་པའི་རྗེས་དུས་ནས་རྡོར་བཟླས་བྱེད་པ་ཞིག་ཡིན་ཏེ། གསང་འདུས་ལས། རིན་ཆེན་ཆེན་པོ་ཁ་དོག་ལྔ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །རིན་ཆེན་བརྟན་པར་གྱུར་ན་སྤྲོ། །བརྟན་པར་མ་གྱུར་ཡོང་མི་སྤྲོ། །ཞེས་གསུངས་པའི་ཕྱིར་རོ།།

དེ་ཕྱིར་གདོང་གི་སྣ་རྩེ་སྟེ་སྨིན་དབྲག་གམ་ཡང་ན་སྣའི་རྩེ་མོའི་རྩ་དབུ་མའི་ཡར་སྣེའི་སྟེང་དུ་ཡེ་ཤེས་ལྔ་དང་འབྱུང་བ་ལྔའི་ངོ་བོར་གྱུར་པའི་རླུང་ཕྲ་བ་ཐིག་ལེའི་གཟུགས་སུ་གྱུར་པ་ཨ་ཐུང་གི་རྣམ་པར་གྱུར་པ་དེ་ལ་སེམས་གཏད་དེ་རླུང་ཡི་གེ་གསུམ་གྱི་གདངས་སུ་ཤར་བ་ལ་རྡོར་བཟླས་བྱེད་པ་ནི་གདོང་གི་སྣ་རྩེར་འོད་ཀྱི་ཐིག་ལེའི་སྲོག་རྩོལ་ཞེས་བྱ་སྟེ། རྒྱུད་ཕྱི་མ་ལས། རིན་ཆེན་ཁ་དོག་སྣ་ལྔ་པ། །སྲོག་དང་རྩོལ་བ་ཞེས་བྱར་བཤད། །ཅེས་གསུངས་པའི་དོན་ཡིན་པའི་ཕྱིར། ཡང་སྟེང་གི་སྣ་རྩེར་དང་། སྟེང་སྒོར་ཞེས་བསྟན་པའང་འདི་དང་དོན་གཅིག་གོ།

དེས་ན་འདི་ནི་སེམས་དབེན་འདྲེན་པའི་ཕྱིར་དུ་རྩ་བའི་རླུང་ལ་རྡོར་བཟླས་བྱེད་པ་དང་། དེ་རྗེས་ཡན་ལག་གི་རླུང་ལ་རྡོར་བཟླས་བྱེད་པའི་ཚུལ་དེ་ཡིན་ཞིང་། འདི་དང་། གཞན་ཡང་འཕྲིན་ལས་རྣམ་བཞི་བསྒྲུབ་ཕྱིར་དུ་རྩ་འཁོར་བཞི་དང་རྩ་བའི་རླུང་བཞི་ལ་རྡོར་བཟླས་བྱེད་པ་དང་། མངོན་ཤེས་ལྔ་ཐོབ་ཕྱིར་དུ་ཡན་ལག་གི་རླུང་ལ་རྡོར་བཟླས་བྱེད་པ་དང་གསུམ་གྱི་ཚུལ་ཡོད་པར་གསུངས་སོ།།

སྙིང་ཁའི་དབུ་མའི་གདོང་གི་སྣ་རྩེར་འོད་ཀྱི་ཐིག་ལེ་བསྒོམ་པའི་སྲོག་རྩོལ་འདི་དང་། སྙིང་ཁར་སྔགས་ཐིག་བསྒོམ་པའི་སྲོག་རྩོལ་གཉིས་ཀ་རྡོར་བཟླས་ལགས་ཤིང་། མདོར་ན་སེམས་དབེན་འདྲེན་པའི་ཕྱིར་དུ་རང་ཉིད་གསང་ཆེན་རིགས་གཅིག་རྡོ་རྗེ་འཆང་གི་སྐུར་གསལ་ཞིང་དེའི་སྙིང་གའི་དྷཱུ་ཏཱིའི་ནང་གི་མི་ཤིགས་པའི་ཐིག་ལེ་ལ་དམིགས་པ་གཏད་དེ་རླུང་འབྱུང་འཇུག་གནས་གསུམ་གྱི་རང་གདངས་དེ་ཕོ་མོ་མ་ནིང་གི་ཡི་གེ་ཨོཾ་ཨཱཿ ཧཱུཾ་གསུམ་གྱི་གདངས་སུ་ཤར་བ་དེ་ཉིད་ལ་ཡིད་ཀྱིས་ཉན་པའི་ཚུལ་གྱིས་དམིགས་པ་འཛིན་པའི་སྒོ་ནས་རླུང་ཞུགས་གནས་ཐིམ་གསུམ་བྱེད་པ་ནི་རྡོར་བཟླས་བྱེད་པའི་དོན་ནོ།།

དེ་ནི་རླུང་སྔགས་དབྱེར་མེད་པའི་རྣལ་འབྱོར་ཏེ། རྫོགས་རིམ་གྱི་རྡོར་བཟླས་ལ་ནི་སྔགས་དེ་ངག་དང་ཡིད་ཀྱིས་བཟླ་བ་གང་ཡང་མེད་ལ། རླུང་སྔགས་ཐ་དད་དུ་ཞེན་པ་ནི་སྐབས་འདིའི་རྡོར་བཟླས་ཀྱི་དགག་བྱ་ཡིན་པར་གསུངས་ཏེ། དགོངས་པ་ལུང་སྟོན་ལས། ཐ་དད་ཡི་གེ་སློང་མོ་ཡིན། །དེ་འདོན་པ་ནི་ཟ་བ་སྟེ། །གང་ཞིག་ཟློས་ལ་དགའ་བ་དེ། །དེ་དག་སློང་མོ་ཟ་བར་འདོད། །ཅེས་གསུངས་པའི་ཕྱིར་རོ།།

གསུམ་པ་གསང་བའི་སྣ་རྩེར་རྫས་ཀྱི་ཐིག་ལེའི་སྲོག་རྩོལ་ནི། རང་དང་ལས་རྒྱ་གཉིས་སྙོམས་པར་ཞུགས་པས་ལས་བྱང་སེམས་དྷཱུ་ཏཱིའི་མ་སྣ་གཉིས་འཕྲད་མཚམས་སུ་འཕོ་མེད་དུ་འཛིན་པ་སྣ་རྩེར་རྫས་ཐིག་བསྒོམ་པའི་རྣལ་འབྱོར་ཞེས་བྱ་སྟེ། རྒྱུད་ཕྱི་མ་ལས། ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱི་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །ཅེས་གསུངས་པའི་དོན་དེ་ཡིན་པའི་ཕྱིར། དེ་ལ་ལས་རྒྱ་རིག་མ་ལ་བརྟེན་པ་དང་། ཡེ་རྒྱ་ལ་བརྟེན་པ་གཉིས་ཡོད་དོ།།

སྣ་རྩེར་རྫས་ཐིག་བསྒོམ་པའི་དགོས་པ་ནི། སྙིང་གའི་རྩ་མདུད་གྲོལ་བའི་ཆེད་དུ་ཡིན་ཏེ། སྲོག་རྩོལ་སྔ་མ་གཉིས་ཀྱིས་སྔར་སྙིང་གར་རླུང་སྡུད་མ་ནུས་པ་དེ་འདི་ཡིས་སྡུད་པར་བྱས་ཏེ་རྩ་མདུད་གྲོལ་བའི་ཐབས་མཆོག་ཡིན་པའི་ཕྱིར་རོ།།

རླུང་འབྱུང་འཇུག་གནས་གསུམ་གྱི་རང་གདངས་དེ་ཡི་གེ་ཨོཾ་ཨཱཿ ཧཱུཾ་གསུམ་གྱི་གདངས་སུ་ཤར་བ་དེ་ཉིད་ལ་ཡིད་གཏད་དེ་ཡང་ཡང་བསྒོམས་པས་རླུང་དབུ་མར་ཐུགས་གནས་ཐིམ་གསུམ་བྱེད་པའི་རླུང་སྔགས་དབྱེར་མེད་པའི་རྡོ་རྗེའི་བཟླས་པ་དེས་ནི། སྙིང་གའི་རྩ་མདུད་གྲོལ་བར་བྱེད་ཅིང་གྲོལ་ནུས་པ་ཡང་ཡིན་ཏེ། དཔེར་ན་སྨྱུག་མའི་སྦུབས་འགགས་པ་ཐུར་མ་རིང་པོ་ཡང་ཡང་འབྱུང་འཇུག་བགྱིས་པས་སེལ་བ་ལྟར། རྡོར་བཟླས་ཀྱིས་སྙིང་གར་རླུང་འབྱུང་འཇུག་ཡང་ཡང་བགྱིས་པས་ཁད་ཀྱིས་ཁད་ཀྱིས་རྩ་མདུད་ལྷོད་པོར་སོང་ནས་གྲོལ་བར་བྱས་ཏེ་མ་རིག་པའི་སྦུབས་འབྱེད་པ་ཡིན་པའི་ཕྱིར་རོ།།

དེ་ཡང་སྙིང་གའི་རྩ་མདུད་ནི་ཐོག་མར་ཆགས་ཤིང་། རྩ་གཞན་རྣམས་དང་མི་འདྲ་བར་སྙིང་ཁའི་དབུ་མ་ལ་རོ་རྐྱང་གཉིས་ཀྱི་མདུད་པ་སུམ་དཀྲིས་སུ་ཡོད་པས་སྙིང་གའི་རྩ་མདུད་གྲོལ་དཀའ་བ་ཡིན་ཏེ། རྡོར་ཕྲེང་ལས། དེ་ཡང་དབྱེ་བར་དཀའ་བ་ཡི། །དབུས་སུ་མདུད་པ་གསུམ་གྱིས་དཀྲིས། །ཞེས་གསུངས་པའི་ཕྱིར།

དེས་ན་སྙིང་གའི་རྩ་མདུད་མ་གྲོལ་ན་སེམས་དབེན་མཐར་ཐུག་གི་འོད་གསལ་མི་འཆར་ཞིང་། སྙིང་གའི་རྩ་མདུད་ནི་རྩ་མདུད་གཞན་རྣམས་ཀྱི་རྩ་བ་ཡིན་པས་སྙིང་གའི་རྩ་མདུད་མ་གྲོལ་ན་རྩ་མདུད་གཞན་རྣམས་གྲོལ་མི་ནུས་པས་ན་སྙིང་གའི་རྩ་མདུད་གྲོལ་དགོས་པ་ཡིན་ཏེ། རྡོར་ཕྲེང་ལས། སྔགས་ཀྱི་དེ་ཉིད་ཀྱིས་ནི་འབྱེད། །རྣལ་འབྱོར་མདུད་པ་བཀྲོལ་ནས་ནི། །རླུང་གི་དེ་ཉིད་རིག་པ་དེ། །ཞེས་གསུངས་པའི་ཕྱིར་རོ།།

མདོར་ན་མཆོག་གི་དངོས་གྲུབ་ཐོབ་པ་ལ་སྙིང་གར་འོད་གསལ་རྫོགས་པར་འཆར་དགོས་ཤིང་། དེ་འཆར་ཕྱིར་དུ་ནི་སྙིང་གར་སྲོག་ཐུར་བསྲེ་དགོས་ལ། དེ་བསྲེ་བ་ལ་སྙིང་གའི་རྩ་མདུད་གྲོལ་དགོས་པ་དང་། དེ་གྲོལ་བ་ལ་རྡོ་རྗེའི་བཟླས་པ་འདི་དགོས་པའི་རྒྱུ་འབྲས་ཀྱི་ཚུལ་འདི་ལྟར་ཡིན་ནོ།།

རྡོར་བཟླས་ལ་གོམས་ནས་དངོས་སུ་རླུང་སྙིང་གའི་དྷཱུ་ཏཱིར་ཐིམ་ནས་སྙིང་གའི་རྩ་ཡི་མདུད་པ་ལྷོད་པོར་གྲོལ་བ་ལས་རང་བཞིན་བརྒྱད་ཅུའི་རྟོག་པ་རྣམས་འགགས་ནས་སྣང་བ་སྟོང་པའི་ཡེ་ཤེས་སྐྱེས་པ་དང་། དེ་ནས་མཆེད་པ་ཤིན་ཏུ་སྟོང་པའི་ཡེ་ཤེས་དང་། དེ་ནས་ཉེར་ཐོབ་སྟོང་པ་ཆེན་པོའི་ཡེ་ཤེས་དང་། དེ་ནས་ཐམས་ཅད་སྟོང་པ་འོད་གསལ་གྱི་ཡེ་ཤེས་སྐྱེ་བའི་བར་ཐམས་ཅད་ངག་དབེན་དུ་འཇོག་ལ། འདི་ནི་རྡོ་རྗེའི་བཟླས་པ་ཞེས་བྱ་ལ། དེ་ཡང་བསྐྱེད་རིམ་གྱི་རྡོར་བཟླས་དང་མི་འདྲ་བར་ཡི་གེ་གསུམ་གྱི་འགྲོ་འོང་གི་གདངས་ལ་དམིགས་པ་གཏད་པ་ཙམ་ལས་སྔགས་ངག་དང་ཡིད་ཀྱིས་བཟླ་བ་ནི་མེད་པར་བཤད་ཟིན་ལྟར་རོ།།

ལུས་དབེན་ནས་ངག་དབེན་དུ་འཕོ་ཚུལ་ཡང་དེ་ཇི་བཞིན་ཏེ། སྙིང་ཁའི་མི་ཤིགས་པ་ལ་སེམས་གཏད་དེ་རླུང་ལྡང་འཇུག་གནས་གསུམ་གྱི་རང་གདངས་དེ་ལ་རླུང་ལྡང་བ་ཧཱུཾ་དང་། འཇུག་པ་ཨོཾ་དང་། གནས་པ་ཨཱཿ སྟེ་ལྡང་འཇུག་གནས་གསུམ་གྱི་ཕོ་མོ་མ་ནིང་གི་ཡི་གེ་གསུམ་གྱི་རང་གདངས་སུ་ཤར་བའི་རྡོ་རྗེའི་བཟླས་པ་ལ་བརྟེན་ནས་སྙིང་གའི་གོང་འོག་གི་རྩ་མདུད་ལྷོད་པོར་སོང་སྟེ་སྟེང་འོག་གི་རླུང་རྣམས་སྙིང་གའི་དྷཱུ་ཏཱིའི་ནང་དུ་ཐིམ་པ་ལས་བྱུང་བའི་སྣང་བའི་ཡེ་ཤེས་སྐྱེས་པ་ན་ལུས་དབེན་ནས་ངག་དབེན་དུ་འཕོས་པ་ཡིན་པར་བཤད་དོ།།

ངག་གི་རྩ་བ་ཤིན་ཏུ་ཕྲ་བའི་རླུང་ཐ་མལ་དུ་རྒྱུ་བ་ལས་དབེན་པར་བྱས་ཏེ་རླུང་སྔགས་དབྱེར་མེད་སྦྱོར་བའི་རྣལ་འབྱོར་ཡིན་ཕྱིར་ངག་དབེན་ཞེས་བྱ་ཞིང་། དེ་ནི་ངག་དབེན་གྱི་སྒྲ་བཤད་དམ་ངེས་ཚིག་ཡིན་ནོ།།

རང་བཞིན་གྱི་བཟླས་པ་རླུང་ལྡང་འཇུག་གནས་གསུམ་ནི་དབེན་གཞིའི་ངག་དང་། དེ་གསུམ་དང་ཡི་གེ་གསུམ་གྱི་གདངས་ཐ་དད་དུ་ཞེན་པ་ནི་དབེན་རྒྱུའམ་དབེན་བྱའི་དགག་བྱ་དང་། རླུང་ལྡང་འཇུག་གནས་གསུམ་གྱི་གདངས་དང་ཡི་གེ་གསུམ་གྱི་གདངས་དབྱེར་མི་ཕྱེད་པར་སྦྱོར་བ་ནི་དབེན་པའི་དོན་ཡིན་པར་གསུངས་སོ།།

ངག་དབེན་ནམ་རྡོར་བཟླས་ཀྱི་སྐབས་སུ་རླུང་དེ་སྙིང་ཁའི་དབུ་མའི་རྩ་འཁོར་ལ་ཐིམ་ནུས་ཀྱང་མི་ཤིགས་པའི་ཐིག་ལེ་ལ་ཞུགས་གནས་ཐིམ་གསུམ་བྱེད་ཐུབ་ཀྱིན་མེད་པ་དང་། རླུང་ཡང་རྩ་བའི་རླུང་བཞི་དང་། ཡན་ལག་གི་རླུང་ལྔ་དེ་དབུ་མར་ཞུགས་གནས་ཐིམ་གསུམ་བྱེད་པ་ལས་ཁྱབ་བྱེད་ཀྱི་རླུང་དེ་ལྟར་ཐུབ་ཀྱིན་མེད་པར་འདོད་ཅིང་། སྙིང་གའི་རྩ་མདུད་གྲོལ་ཡང་རྫོགས་པར་གྲོལ་ཐུབ་མེད་པར་འདོད་དོ།།

དེ་དུས་རླུང་སྙིང་གའི་མི་ཤིགས་པའི་ཐིག་ལེ་ལ་ཐིམ་པ་མ་ཡིན་པའི་ཕྱིར་ན་སྣང་མཆེད་ཐོབ་ཀྱི་རིམ་པ་ཐིམ་ཡང་གཉུག་སེམས་ཕྲ་མོ་ལ་ཐིམ་པ་མ་ཡིན་དགོས་ཏེ། མི་ཤིགས་པའི་ཐིག་ལེ་དང་གཉུག་སེམས་གཉིས་ངོ་བོ་དབྱེར་མེད་དུ་གནས་པའི་ཕྱིར། དེས་ན་དེ་དུས་ཀྱི་རྟགས་དང་སྣང་བ་གསུམ་ཐིམ་པ་ཡང་གཉུག་སེམས་སུ་གྱུར་པའི་འོད་གསལ་ལ་ཐིམ་པ་མ་ཡིན་ཕྱིར། སྙིང་གའི་རྩ་མདུད་ལྷོད་པོར་སོང་ཡང་རྫོགས་པར་མ་གྲོལ་བའི་རྫོགས་རིམ་གྱི་དུས་སུ་འཆི་བ་དངོས་ལྟ་བུའི་ཐིམ་རིིམ་བྱུང་བ་དང་། ཐིམ་རིམ་གྱི་རྟགས་རྣམས་འཆར་བ་དང་། གཉུག་སེམས་ཕྲ་མོ་མངོན་དུ་གྱུར་པ་ནི་མེད་པར་བཞེད་དོ།།

སྙིང་གའི་རྩ་མདུད་རྫོགས་པར་གྲོལ་བ་ནས་འཆི་བ་དངོས་དང་འདྲ་བའི་ཐིམ་རིམ་དང་ཐིམ་རིམ་གྱི་རྟགས་རྣམས་འཆར་ཞིང་། གཉུག་སེམས་ཕྲ་མོ་མངོོན་དུ་གྱུར་ཀྱང་ཁྱབ་བྱེད་ཀྱི་རླུང་ཆ་ཚང་སྙིང་གའི་མི་ཤིགས་པ་ལ་མ་ཐིམ་པའི་བར་དུ་རླུང་ཡོངས་རྫོགས་སྙིང་གའི་མི་ཤིགས་པ་ལ་ཐིམ་པ་ལས་བྱུང་བའི་བདེ་སྟོང་གི་རྣམ་ཅན་གྱི་གཉུག་སེམས་ཀྱི་བཞོན་པའི་རླུང་དེ་ལས་སྒྱུ་མའི་ལྷ་སྐུ་མངོན་དུ་བྱེད་མི་ནུས་ཏེ། དེ་འདྲའི་སྒྱུ་མའི་ལྷ་སྐུ་མངོན་དུ་བྱེད་པ་ནི་ཁྱབ་བྱེད་ཀྱི་རླུང་བཅས་རླུང་མཐའ་དག་སྙིང་གའི་མི་ཤིགས་པ་ལ་ཐིམ་པའི་སྟོབས་ལ་ལྟོས་དགོས་པ་ཡིན་པའི་ཕྱིར་རོ།།

སེམས་དབེན་བཤད་པ།

རིམ་ལྔའི་རིམ་པ་གཉིས་པ་སེམས་དམིགས་ཀྱི་རིམ་པའམ་སེམས་དབེན་གྱི་རིམ་པ་ནི། དབེན་པ་གསུམ་ལས་གསུམ་པ་སེམས་དབེན་ཐུགས་རྡོ་རྗེའི་ཏིང་ངེ་འཛིན་ཞེས་བྱ་ཞིང་། ནང་གི་རྐྱེན་རྩ་བའི་རླུང་བཞི་པོ་སྙིང་གའི་དབུ་མར་སྡུད་པའི་ངག་དབེན་རྡོར་བཟླས་དང་། བསམ་གཏན་གཉིས་ཀྱི་སྡུད་རིམ་དང་། ཕྱིའི་རྐྱེན་ཕྱག་རྒྱ་མའི་སྲོག་རྩོལ་ལ་བརྟེན་ནས་སྙིང་གའི་རྩ་མདུད་རྫོགས་པར་གྲོལ་ཏེ་རླུང་རྣམས་སྙིང་གའི་མི་ཤིགས་པའི་ཐིག་ལེ་ལ་ཐིམ་པ་ལས་བྱུང་བའི་སྣང་བའི་ཡེ་ཤེས་སྐྱེས་ཤིང་། མ་དག་པའི་སྒྱུ་ལུས་མ་ཐོབ་པའི་བར་གྱི་རྫོགས་རིམ་གྱི་རྣལ་འབྱོར་དེ་ནི་སེམས་དབེན་གྱི་མཚན་ཉིད་དེ་སེམས་དབེན་ཡིན་ནོ།།

དེ་ཡང་ཚེ་འདིར་སངས་རྒྱས་ཐོབ་པར་འདོད་པ་ལ་སེམས་ཀྱི་གནས་ལུགས་རྟོགས་དགོས་པ་མདོ་སྔགས་གཉིས་ཀའི་དགོངས་པ་ལགས་ཤིང་། བླ་མེད་ཀྱི་སྐབས་འདིར་སྒྱུ་ལུས་མངོན་དུ་བྱེད་པ་ལ་སེམས་ཀྱི་དེ་ཁོ་ན་ཉིད་རྟོགས་དགོས་པས་སེམས་དབེན་གྱི་སྐབས་སུ་སེམས་ཀྱི་གནས་ལུགས་རྟོགས་ཕྱིར་དུ་ཐོག་མར་རང་ཉིད་ལྷར་བསྐྱེད། དེའི་སྙིང་གའི་སྣ་རྩེར་སྔགས་ཀྱི་ཐིག་ལེ་བསྒོམས་པས་སྙིང་གར་རླུང་བསྡུས་ཏེ་རྡོར་བཟླས་དང་། གདོང་གི་སྣ་རྩེར་འོད་ཀྱི་ཐིག་ལེ་བསྒོམས་པ་ལ་རླུང་རྡོ་རྗེའི་བཟླས་པ་བྱས་པས་སྙིང་གའི་དབུ་མའི་མདུད་པའི་ནང་ནས་རླུང་འགྲོ་འོང་གནས་གསུམ་བྱས་པ་ནང་གི་རྐྱེན་ནམ་ནང་གི་ཐབས་དང་། དེ་རྗེས་གསང་བའི་སྣ་རྩེར་རྫས་ཀྱི་ཐིག་ལེ་བསྒོམས་ཏེ་ཕྱག་རྒྱ་མ་མཚན་ལྡན་ལ་བརྟེན་ནས་བདེ་སྟོང་གི་དགའ་བཞིའི་ཡེ་ཤེས་བསྐྱེད་དེ་སྙིང་གའི་རྩ་མདུད་གྲོལ་བར་བྱེད་པ་ཕྱིའི་རྐྱེན་ནམ་ཕྱིའི་ཐབས་ཏེ། རྐྱེན་དེ་རྣམས་ལ་བརྟེན་ནས་རླུང་སྙིང་གའི་ཐིག་ལེ་ལ་ཐིམ་ནས་དང་པོ་རིལ་འཛིན་དང་རྗེས་གཞིག་གི་ཐབས་ཀྱིས་རྡོར་བཟླས་ཀྱི་རྟེན་ལྷའི་དཀྱིལ་འཁོར་བསྡུས་ཏེ། ཀླུ་སྒྲུབ་ཀྱི་རིམ་ལྔ་ལས། སྟོང་ཉིད་ཤིན་ཏུ་སྟོང་པ་དང་། །གསུམ་པ་ཆེན་པོ་སྟོང་པ་དང་། །བཞི་པ་ཐམས་ཅད་སྟོང་པ་ནི། །རྒྱུ་དང་འབྲས་བུའི་བྱེ་བྲག་གོ། ཞེས་གསུངས་པ་ལྟར། སྟོང་པ་སྣང་བའི་ཡེ་ཤེས་ནས། ཤིན་ཏུ་སྟོང་པ་མཆེད་པའི་ཡེ་ཤེས་དང་། སྟོང་པ་ཆེན་པོ་ཉེར་ཐོབ་ཀྱི་ཡེ་ཤེས་དང་། ཐམས་ཅད་སྟོང་པ་སྟོང་ཉིད་རྟོགས་པའི་དཔེའི་འོད་གསལ་གྱི་ཡེ་ཤེས་རྣམས་སྔ་མ་སྔ་མ་རྒྱུ་དང་། ཕྱི་མ་ཕྱི་མ་འབྲས་བུའི་ཚུལ་དུ་རིམ་གྱིས་སྐྱེས་ཏེ་དཔེའི་འོད་གསལ་གྱི་མཇུག་ཏུ་སླར་ཉེར་ཐོབ་འཆར་ནས་སྒྱུ་ལུས་ལ་འཕོ་བ་ཡིན་ནོ།།

དེ་ཡང་ནང་གི་རྐྱེན་ཁྱབ་བྱེད་ཀྱི་རླུང་གི་རྡོར་བཟླས་དང་། ཕྱིའི་རྐྱེན་ཕྱག་རྒྱའི་སྲོག་རྩོལ་ལ་བརྟེན་ནས་སྙིང་གའི་རྩ་མདུད་རྫོགས་པར་གྲོལ་ཏེ་ཁྱབ་བྱེད་ཀྱི་རླུང་གི་ཆ་ཤས་གཅིག་བཅས་རྩ་བ་དང་ཡན་ལག་གི་རླུང་རྣམས་སྙིང་གའི་མི་ཤིགས་པའི་ཐིག་ལེ་ལ་ཐིམ་པའི་སྣང་བའི་ཡེ་ཤེས་སྐྱེས་པ་ནས་ངག་དབེན་ནས་སེམས་དབེན་དུ་འཕོས་པ་ཡིན་ནོ།།

འཁོར་འདས་ཀྱི་རྩ་བར་གྱུར་པའི་སེམས་ཀུན་རྟོག་བཞོན་པའི་རླུང་དང་བཅས་པ་ལས་དབེན་པར་བྱས་ཏེ་བདེ་སྟོང་དབྱེར་མི་ཕྱེད་པའི་ངོ་བོར་ཤར་བའི་རྣལ་འབྱོར་ཞིག་ཡིན་ཕྱིར་སེམས་དབེན་ཞེས་བྱ་ལ། དེ་ནི་སེམས་དབེན་གྱི་སྒྲ་བཤད་དམ་ངེས་ཚིག་ཀྱང་ཡིན་ནོ།།

སེམས་དབེན་གྱི་སྐབས་སུ་རླུང་དབུ་མར་ཐིམ་པ་དང་སྙིང་གའི་རྩ་ལ་ཐིམ་ནུས་པ་མ་ཟད་སྙིང་ཀའི་མི་ཤིགས་པའི་ཐིག་ལེ་ལ་ཞུགས་གནས་ཐིམ་གསུམ་བྱེད་ཐུབ་ཀྱིན་ཡོད་ལ། དེར་ཞུགས་གནས་ཐིམ་གསུམ་གྱིས་སྣང་བའི་ཡེ་ཤེས་སྐྱེ་བ་ནས་སེམས་དབེན་ཡིན་ལ། དེ་ནས་མཆེད་པའི་ཡེ་ཤེས་དང་། ཉེར་ཐོབ་ཀྱི་ཡེ་ཤེས་དང་། འོད་གསལ་གྱི་ཡེ་ཤེས་སྐྱེ་བ་ཡིན་པའི་ཚུལ་འདི་ངེས་དགོས་ཤིང་། དཔེར་ན་འཆི་བའི་གནས་སྐབས་སུ་སྙིང་ཀའི་མི་ཤིགས་པའི་ཐིག་ལེ་ལ་ཁྱབ་བྱེད་ཀྱི་རླུང་ཐིམ་པ་ལྟར་བསྒོམས་སྟོབས་ཀྱིས་ཁྱབ་བྱེད་ཀྱི་རླུང་དེ་སྙིང་ཀའི་མི་ཤིགས་པ་ལ་ཞུགས་གནས་ཐིམ་གསུམ་བྱས་པའི་སེམས་དབེན་མཐར་ཐུག་པའི་ཉེར་ཐོབ་ཀྱི་ཡེ་ཤེས་སྐྱེ་བའི་མཇུག་ཏུ་འོད་གསལ་སྐྱེ་བ་ནི་སེམས་དབེན་མཐར་ཐུག་དཔེ་ཡི་འོད་གསལ་ཞེས་བྱ་ལ། འོད་གསལ་དེ་ནི་དེའི་ཉེར་ཐོབ་ཏུ་བསྡུས་ནས་ལོགས་སུ་འོད་གསལ་ཞེས་མ་ཕྱེས་ཤིང་། དབེན་པ་གསུམ་ཀའི་ཉེར་ཐོབ་ཀྱི་མཇུག་ཏུ་འོད་གསལ་སྐྱེ་མོད་དེ་ནི་དེའི་སྔ་ལོགས་ཀྱི་ཉེར་ཐོབ་དང་གཉིས་ཀ་འདྲ་བར་གཉིས་སྣང་ཅན་གྱི་ཤེས་པ་ཡིན་ཕྱིར་དཔེ་ཡི་འོད་གསལ་ལས་དོན་གྱི་འོད་གསལ་མ་ཡིན་པས་དབེན་པ་གསུམ་ཀའི་འོད་གསལ་དེ་རང་རང་གི་ཉེར་ཐོབ་ཏུ་བསྡུ་བར་གསུངས་སོ།།

དེ་ལའང་སེམས་དབེན་ཙམ་པོ་བ་དང་། ཁྱད་པར་བའམ་མཐར་ཐུག་པ་གཉིས་ཡོད་ལ། སེམས་དབེན་ཙམ་པོ་བའི་སྐབས་སུ་ཁྱབ་བྱེད་ཀྱི་རླུང་གི་ཆ་ཤས་གཅིག་ཙམ་དབུ་མའི་ནང་གི་སྙིང་ཀའི་མི་ཤིགས་པའི་ཐིག་ལེ་ལ་ཞུགས་གནས་ཐིམ་གསུམ་བྱེད་པ་ལས་ཁྱབ་བྱེད་ཀྱི་རླུང་ཆ་ཚང་ཞུགས་གནས་ཐིམ་གསུམ་བྱེད་ཐུབ་ཀྱིན་མེད་པས་ཙམ་པོ་བ་ཞེས་བྱའོ།།

སེམས་དབེན་ཁྱད་པར་བའམ་མཐར་ཐུག་པའི་སྐབས་སུ་ཁྱབ་བྱེད་ཀྱི་རླུང་ཆ་ཚང་དབུ་མའི་ནང་གི་མི་ཤིགས་པའི་ཐིག་ལེ་ལ་ཞུགས་གནས་ཐིམ་གསུམ་བྱེད་ཐུབ་ཀྱིན་ཡོད་ལ། དེ་ལ་ཞུགས་གནས་ཐིམ་གསུམ་བྱས་ནས་སྣང་བའི་ཡེ་ཤེས་སྐྱེ་བ་ནས་སེམས་དབེན་མཐར་ཐུག་པར་བཞག་པ་ཡིན་ནོ།།

ཞལ་ཤེས་གནད་ཀྱི་ཐེམ་ཡིག་ལས། ཁྱབ་བྱེད་ཀྱི་རླུང་འདི་རླུང་གཞན་ལས་བསྡུ་དཀའ་ཞིང༌། འདི་རྫོགས་པར་མ་ཐིམ་ན་སེམས་དབེན་གྱི་འོད་གསལ་མཚན་ཉིད་པ་མི་འབྱུང་བས་རླུང་ཅུང་ཟད་སྡུད་ནུས་པ་ནས་འདིའི་སྡུད་རིམ་རེ་ཡང་ངེས་པར་བྱེད་དགོས་སོ། །ཞེས་གསུངས་པ་ལྟར་སེམས་དབེན་ཁྱད་པར་བ་འདིའི་དུས་མ་གཏོགས་ཁྱབ་བྱེད་ཀྱི་རླུང་ཡོངས་རྫོགས་སྙིང་ག་དང་སྙིང་གའི་མི་ཤིགས་པའི་ཐིག་ལེར་ཐིམ་མི་ནུས་པའི་ཚུལ་དེ་ཤེས་གལ་ཆེའོ།།

ཚེ་འདིར་སེམས་དབེན་མཐར་ཐུག་འདྲེན་པ་ལ་ཕྱིའི་རྐྱེན་ལས་རྒྱ་ལ་སྙོམས་པར་འཇུག་པ་ལ་ངེས་པར་དུ་ལྟོས་དགོས་ཏེ། རྒྱུ་མཚན་ནི་ལས་རྒྱ་བསྟེན་པ་ནི་སེམས་དབེན་མངོན་དུ་གྱུར་པའི་ཐབས་དང་། དེ་མངོན་དུ་གྱུར་པ་ནི་བདེ་བ་ཆེན་པོའི་ཏིང་ངེ་འཛིན་གྱི་ཡེ་ཤེས་སྐྱེ་བའི་ཐབས་ཡིན་ཞིང་། ལས་རྒྱ་ལ་མ་བརྟེན་པར་བདེ་བ་ཆེན་པོའི་ཡེ་ཤེས་མི་རྟོགས་པའམ་མི་སྐྱེ་བར་གསུངས་ཏེ། ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། རྡོ་རྗེ་དང་པདྨ་ཡང་དག་པར་སྦྱོར་བ་ནི་སེམས་དང་སེམས་ལས་བྱུང་བ་དག་གི་ཐབས་སུ་གྱུར་པའོ། །སེམས་དང་སེམས་ལས་བྱུང་བ་མཉམ་པར་སྦྱར་བ་ནི་བདེ་བ་ཆེན་པོའི་ཏིང་ངེ་འཛིན་གྱི་ཐབས་སུ་གྱུར་པའོ། །ཞེས་དང་། ཇི་ལྟར་འོ་མ་དང་ཏིལ་དག་ཡང་དག་པར་མངོན་པར་འདུས་བྱས་པ་མེད་པར་ཏིལ་མར་མི་འབྱུང་བ་དེ་བཞིན་དུ། སྔགས་དང་ཕྱག་རྒྱ་མངོན་པར་འདུས་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །གང་གིས་བྷ་ག་དང་ལིང་ག་ཡང་དག་པར་སྦྱོར་བར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །ཞེས་གསུངས་པའི་ཕྱིར་རོ།།

དེ་ཡང་བསྐྱེད་རིམ་ཕྲ་རགས་མཐར་ཕྱིན་ནས་ཡེ་ཤེས་ཀྱི་ཕྱག་རྒྱ་ལ་བརྟེན་ནས་བྱང་སེམས་སྤྱི་བོ་ནས་གསང་གནས་ཀྱི་རྩེའི་བར་དུ་འབེབས་ཤིང་། དགའ་བ་བཞིའི་ཡེ་ཤེས་སྐྱེད་ནུས་པ་ཡོད་ནའང་། དེ་ནི་རླུང་དབུ་མར་ཐིམ་པ་ལས་བྱུང་བའི་དགའ་བཞིའི་ཡེ་ཤེས་མིན་པའི་ཕྱིར་ན་རྫོགས་རིམ་དུ་གྱུར་པའི་བདེ་བ་ཆེན་པོའི་ཡེ་ཤེས་སུ་མི་འཇོག་ཅིང་། དེ་མཚན་ཉིད་པ་མ་ཡིན་པ་དང་། དེ་ཕྱིར་དེ་ལྟ་བུའི་བདེ་སྟོང་དགའ་བཞིས་ཟིན་པའི་ལྷ་སྐུ་སྒོམ་པ་དེ་རྫོགས་རིམ་དུ་གྱུར་པའི་ལུས་དབེན་ཡང་མིན་པར་གསུངས་ཏེ། རྗེའི་རིམ་ལྔ་གསལ་སྒྲོན་ལས་། བསྐྱེད་རིམ་ཕྲ་རགས་མཐར་ཕྱིན་པ་ན་ཡེ་ཤེས་ཀྱི་ཕྱག་རྒྱ་ལ་བརྟེན་ནས། བྱང་ཆུབ་ཀྱི་སེམས་སྤྱི་བོ་ནས་གསང་གནས་ཀྱི་རྩེའི་བར་དུ་འབེབས་ནུས་ཤིང་། དེ་ཡང་དམིགས་པ་ཤིན་ཏུ་བརྟན་པས་ཕཊ་ཡིག་གིས་འགོག་ནུས་པས། དེ་ལ་བརྟེན་ནས་དགའ་བ་བཞི་སྐྱེད་ནུས་མོད་ཀྱང་། དེ་ནི་རླུང་དྷཱུ་ཏཱིར་བསྡུས་ནས་ཐིམ་པ་ལས་བྱུང་བ་མིན་པས་རྫོགས་རིམ་པའི་བདེ་ཆེན་དུ་མི་འཇོག་པའི་ཕྱིར། དེ་འདྲ་བའི་བདེ་སྟོང་སྦྱར་བའི་སྒོ་ནས་ཕུང་སོགས་ལྷར་སྒོམ་པ་ཡང་རྫོགས་རིམ་པའི་ལུས་དབེན་དུ་མི་འདོད་དོ། །ཞེས་གསུངས་པའི་ཕྱིར་རོ།།

དེས་ན་ལུས་དབེན་གྱི་སྐབས་སུ་ལས་རྒྱ་བསྟེན་པ་ཡོད་པ་དེ་ནི་སྤྱི་བོ་ནས་རྟགས་ཀྱི་བར་དུ་དགའ་བཞི་ལུགས་འབྱུང་ལྡོག་ཏུ་འདྲེན་པ་ཙམ་ཡིན་ལ། རྫོགས་རིམ་གྱི་སྐབས་འདིར་ནི་འཆི་བའི་རིམ་པ་ཇི་ལྟ་བ་བཞིན་དུ་སྙིང་ཁར་སེམས་དབེན་གྱི་སྟོང་པ་དང་། ཤིན་ཏུ་སྟོང་པ་དང་། སྟོང་པ་ཆེན་པོ་སྟེ་སྟོང་པ་གསུམ་དགའ་བཞིའི་ངོ་བོར་འདྲེན་པའི་ཆེད་དུ་ཡིན་པའི་ཕྱིར། འདིར་ནི་རླུང་དང་བྱང་སེམས་ལུས་ཀྱི་སྟོད་སྨད་དུ་བསྡུས་པའི་ལུགས་འབྱུང་གི་དགའ་བཞི་དེ་འོད་གསལ་གྱི་ངོ་བོར་གྱུར་པའི་ལུགས་ལྡོག་གི་དགའ་བཞི་ལ་མི་འཇོག་པར་བཤད་པས་དེ་ཙམ་དེས་མི་ཆོག་པར་རླུང་དྷཱུ་ཏཱིར་ཐིམ་སྟོབས་ཀྱིས་དགའ་བཞི་སྟོང་བཞིར་འདྲེན་པ་ཞིག་དགོས་པ་ཡིན་ནོ།།

དེ་ཡང་དགའ་བ་བཞི་ལ་ནི་ལུགས་འབྱུང་གི་དགའ་བ་བཞི་དང་། ལུགས་ལྡོག་གི་དགའ་བ་བཞི་ཡི་དབྱེ་བ་ཡོད་ཅིང་། སྔ་མ་ལ་ཡས་བབས་ཀྱི་དགའ་བ་བཞི་དང་། ཕྱི་མ་ལ་མས་བརྟན་གྱི་དགའ་བ་བཞི་ཞེས་ཕྱེས་པ་ཡིན་ཏེ། རྡོ་རྗེ་ཕྲེང་བ་ལས། དེ་ནས་གཞན་ཡང་བཤད་བྱ་བ། །དགའ་བ་བཞི་ཡི་མཚན་ཉིད་ནི། ལུགས་འབྱུང་ལུགས་ལས་བཟློག་པ་ཡི། །ཇི་ལྟ་བ་ཡི་རིམ་པ་ཡི། །ཞེས་གསུངས་པའི་ཕྱིར་རོ།།

དེས་ན་དགའ་བ་བཞི་ནི། དགའ་བ་དང་། མཆོག་དགའ་དང་། དགའ་བྲལ་དང་། ལྷན་སྐྱེས་ཀྱི་དགའ་བ་བཞི་ལ་བྱེད་པ་ཡིན་ཏེ། ཡང་རྡོ་རྗེ་ཕྲེང་བ་ལས། དགའ་བའི་བདེ་བ་དང་པོ་སྟེ། །མཆོག་ཏུ་དགའ་བ་གཉིས་པ་དང་། །དགའ་བྲལ་ཞེས་པ་གསུམ་པ་དང་། །བཞི་པ་ལྷན་ཅིག་སྐྱེས་པར་བཤད། །ཅེས་དང་། ཡང་དག་སྦྱོར་བ་ལས། དང་པོ་དགའ་བ་ཙམ་ཉིད་དེ། །མཆོག་ཏུ་དགའ་བ་གཉིས་པའི་གྲངས། །གསུམ་པ་དགའ་བྲལ་དགའ་བར་བཤད། །བཞི་པ་ལྷན་ཅིག་སྐྱེས་པར་བརྗོད། །ཅེས་དང་། ཕྱག་ཆེན་ཐིག་ལེ་ལས། དགའ་དང་མཆོག་གི་དགའ་བ་དང་། །དགའ་བྲལ་ལྷན་སྐྱེས་དེ་བཞིན་ནོ། །ཞེས་གསུངས་པའི་ཕྱིར་རོ།།

དགའ་བྲལ་ལ་ཁྱད་པར་གྱི་དགའ་བ་སྟེ་ཁྱད་དགའ་ཞེས་བརྡ་སྦྱར་བའང་མཆིས་ཏེ། གཏུམ་པོ་དཔའ་གཅིག་ལས། ཙ་ཡིག་དགའ་དང་མཆོག་དགའ་དང་། །ཁྱད་པར་དགའ་བ་ཉིད་དང་ནི། །ལྷན་ཅིག་སྐྱེས་དགའ་ཞེས་བྱ་བའི། །དགའ་བ་བཞི་ཡི་རང་བཞིན་གསུངས། །ཞེས་དང་། དྲི་མེད་འོད་ལས། དགའ་བ་དང་། མཆོག་དགའ་དང་། ཁྱད་པར་གྱི་དགའ་བ་དང་། ལྷན་ཅིག་སྐྱེས་པའི་དབྱེ་བས་དེ་ཁོ་ན་ཉིད་བཅུ་དྲུག་ཅེས་གསུངས་པའི་ཕྱིར་རོ།།

དེ་བཞི་སོ་སོར་དངོས་བཟུང་ན་རྫོགས་རིམ་གྱི་ཕྱག་རྒྱ་ལ་བརྟེན་པས་བྱང་སེམས་ཞུ་བས་རྩ་གནས་གང་དུ་སླེབས་པ་ན་ཡས་བབས་དང་མས་བརྟན་གྱི་དགའ་བ་བཞི་སྐྱེ་ཚུལ་ནི། ཕྱག་རྒྱ་མ་མཚན་ཉིད་དང་ལྡན་པའི་མཁའ་ལ་སྦྱོར་བའི་སྒོ་ནས་རླུང་དབུ་མར་ཞུགས་གནས་ཐིམ་གསུམ་བྱས་ཏེ་བསྒོམས་པའི་སྟོབས་ཀྱིས། མཐར་རླུང་དབུ་མར་ཐིམ་པས་ལྟེ་བའི་གཏུམ་མོའི་མེ་སྦར་ནས་སྤྱི་བོའི་བྱང་སེམས་ཞུ་བས་མར་རྩ་གནས་སུ་འབེབས་པའི་གནས་སྐབས་ན། སྤྱི་བོ་བདེ་ཆེན་འཁོར་ལོ་ནས་བབས་པའི་བདེ་བ་སྟོང་པར་སྦྱར་བ་ནི་དགའ་བ་དང་། དེ་ནས་མགྲིན་པ་ལོངས་སྤྱོད་འཁོར་ལོ་ནས་བབས་པའི་བདེ་བ་སྟོང་པར་སྦྱར་བ་ནི་མཆོག་དགའ་དང་། དེ་ནས་སྙིང་ག་ཆོས་ཀྱི་འཁོར་ལོ་ནས་བབས་པའི་བདེ་བ་སྟོང་པར་སྦྱར་བ་ནི་དགའ་བྲལ་དང་། དེ་ནས་ལྟེ་བ་སྤྲུལ་པའི་འཁོར་ལོ་ནས་བབས་པའི་བདེ་བ་སྟོང་པར་སྦྱར་བ་ནི་ལྷན་སྐྱེས་ཀྱི་དགའ་བར་འཇོག་དགོས་ཤིང་། དེ་བཞི་ནི་སྤྱི་བོའི་གནས་ཡས་ནས་མར་གསང་གནས་བར་དུ་བྱང་སེམས་འབེབས་པའི་བདེ་བ་དང་དེ་སྟོང་པར་སྦྱར་བའི་ཡེ་ཤེས་ཡིན་ཕྱིར་ཡས་བབས་ཀྱི་དགའ་བ་བཞི་ཞེས་བྱ་ཞིང་དེ་སྐྱེ་ཚུལ་ཡིན་ཏེ། རྡོ་རྗེ་ཕྲེང་བ་ལས། དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་དང་། །དགའ་བྲལ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་པའི་ཕྱིར་རོ།།

མས་བརྟན་གྱི་དགའ་བཞི་སྐྱེ་ཚུལ་ཡང་གསང་གནས་བདེ་སྐྱོང་འཁོར་ལོ་ནས་ཡར། སྤྲུལ་པའི་འཁོར་ལོར་ལྡོག་པ་དགའ་བ་དང་། ལྟེ་བ་ནས་སྙིང་ག་ཆོས་ཀྱི་འཁོར་ལོར་ལྡོག་པ་ནི་མཆོག་དགའ་དང་། སྙིང་ག་ནས་མགྲིན་པ་ལོངས་སྤྱོད་འཁོར་ལོར་ལྡོག་པ་ནི་དགའ་བྲལ་དང་། མགྲིན་པ་ནས་ཡར་ལྡོག་སྟེ་སྤྱི་བོར་བརྟན་པ་ནི་ལྷན་ཅིག་སྐྱེས་པའི་དགའ་བ་སྟེ། མས་བརྟན་གྱི་དགའ་བ་བཞི་དང་ལུགས་ལྡོག་གི་དགའ་བ་བཞི་ཞེས་བྱ་ཞིང་རིམ་པ་དེ་ལྟར་བསྐྱེད་པ་ཡིན་ཏེ། དེ་ཉིད་ལས། སྤྲུལ་པའི་འཁོར་ལོར་དགའ་བ་དང་། །མཆོག་དགའ་ཆོས་ཀྱི་འཁོར་ལོར་གནས། །ལོངས་སྤྱོད་བྲལ་བའི་དགའ་བ་དང་། །ལྷན་ཅིག་སྐྱེས་དང་བདེ་བ་ཆེ། །ལུགས་བཟློག་རིམ་པ་ཞེས་ནི་གསུངས། །ཞེས་དང་། མངོན་པར་བརྗོད་པའི་རྒྱུད་བླ་མ་ལས། དགའ་བ་བཞི་པོ་དགའ་བ་དང་། །ལྟེ་བའི་སྙིང་པད་ནུ་མའི་དབུས། །ལྕེ་ཡི་རྩ་དང་མགོ་སྟེང་དུ། །དགའ་བ་དང་ནི་མཆོག་དགའ་ཉིད། །དམ་པར་དགའ་དང་ལྷན་ཅིག་སྐྱེས། །ཞེས་གསུངས་པའི་ཕྱིར་རོ།།

དེ་ཡང་ཡས་བབས་ནས་ནོར་བུའི་རྩ་བར་སླེབས་པའི་བར་ལ་ལྷན་སྐྱེས་ཀྱི་དགའ་བར་ངོས་བཟུང་དགོས་པ་ལས། ནོར་བུའི་རྩེ་ནས་ཕྱིར་འཕོ་མི་རུང་བས་ནོར་བུའི་རྩེར་སླེབས་ན་བྱང་སེམས་བཟུང་བའམ་འགོག་དཀའ་བ་ཡིན་པས་ནོར་བུའི་རྩེར་སླེབས་པ་བར་དུ་འབེབས་མི་རུང་ཞིང་། བྱང་སེམས་ནོར་བུ་ནས་ཕྱིར་མ་འཕོས་ནའང་ནོར་བུར་སླེབས་པ་ནས་རང་ལོག་བྱེད་པ་དང་། གར་སོང་ཆ་མེད་དུ་འགྲོ་བ་དང་། ཕྱིར་ལོག་ཙམ་དུ་འགྲོ་ཡང་སྤྱི་བོའི་བར་དུ་ཤར་སེར་འགྲོ་བའི་ངེས་པ་མེད་པ་དང་། རྩ་གནས་དམའ་མོ་ནས་འགྲམ་ནས་འགྲོ་བ་ཡང་འོང་བ་ཡོད་པས། དེས་ན་བྱང་སེམས་དམིགས་པ་དང་རླུང་ཡར་འདྲེན་པའི་སྦྱོར་བས་ཀུནྡ་ཡར་ལ་འདྲིལ་ནས་སྤྱི་གཙུག་བར་དུ་འགྲོ་བ་རྣལ་འབྱོར་བས་ཆེད་དུ་བྱ་བའི་མས་བརྟན་གྱི་སྦྱོར་བ་འདི་དགོས་པར་གསུངས་ཏེ། རྡོར་ཕྲེང་ལས། རླུང་གི་དེ་ཉིད་སྔོན་སོང་ནས། །དེ་ཉིད་སྟེང་དུ་རྒྱུ་བར་ནི། །རྣལ་འབྱོར་པས་ནི་སྒྲུབ་པར་བྱེད། །དེ་ལས་སྤྲུལ་པའི་འཁོར་ལོར་ནི། །དགའ་བ་ཞེས་བྱར་རྣམ་པར་ཤེས། །ཞེས་གསུངས་པའི་ཕྱིར་རོ།།

ཡས་བབས་ཀྱི་དགའ་བ་བཞི་བས་མས་བརྟན་གྱི་དགའ་བ་བཞི་བདེ་བ་ཆེ་བ་ཅིག་འོང་དགོས་ཤིང་། མས་བརྟན་གྱི་དུས་སུ་བྱང་སེམས་ཕྱིར་ལོག་པ་སྤྱི་བོར་མ་བརྟན་བར་དུ་བདེ་བ་མི་བརྟན་པ་དང་། བྱང་སེམས་སྤྱི་བོར་བརྟན་ནས་བདེ་བ་བརྟན་པར་གསུངས་པས་མས་བརྟན་ནི་གལ་ཆེ་བའོ།།

བྱང་སེམས་ཡར་མར་དུ་འབབ་ཅིང་ལྡོག་པ་གང་ཡིན་ཡང་དེ་ལ་སྤྱི་མགྲིན་སྙིང་ལྟེ་བཞིའམ་ལྟེ་སྙིང་མགྲིན་སྤྱིའི་གནས་བཞི་པོ་རེ་རེ་ལ་ཆ་བཞི་བཞིར་བྱས་པའི་ཆ་རེ་རེའི་མཚམས་རེ་རེ་ནས་བདེ་བ་རེ་མྱོང་བས་ཁམས་བྱང་སེམས་ཀྱི་དབང་གིས་བདེ་བ་བཞི་བཞི་བྱུང་བ་ཟླ་བའི་ཆ་བཅུ་དྲུག་སྟེ། དེ་ལ་ཡས་བབས་ཀྱི་དགའ་བ་བཅུ་དྲུག་དང་། མས་བརྟན་གྱི་དགའ་བ་བཅུ་དྲུག་སྟེ་སོ་གཉིས་ཡོད་དེ། ཕྱག་རྒྱ་ཆེན་པོ་ཐིག་ལེའི་རྒྱུད་ལས། ཚངས་བུག་ནས་ནི་མགྲིན་གནས་སུ། །དེ་ཙམ་དུ་ནི་ཐིག་ལེ་བཞི། །དེ་ཡི་གནས་སུ་དགའ་བ་བཞི། །རོ་གཉིས་དང་ནི་ལྡན་པའོ། །མགྲིན་པ་ནས་ནི་སྙིང་གར་གནས། །ཡང་ནི་དེ་ཙམ་བཞི་ཡིན་ནོ། །མཆོག་གི་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །སྙིང་གའི་གནས་ནས་རིན་ཆེན་སྐེར། །ཡང་ནི་དེ་ཙམ་བཞི་ཡིན་ནོ། །དགའ་བྲལ་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །རིན་ཆེན་སྐེ་ནས་སྟེང་གི་གནས། །ཡང་ནི་དེ་ཙམ་བཞི་ཡིན་ནོ། །ལྷན་ཅིག་སྐྱེས་དགའ་བཞི་ཡིན་ཏེ། །རོ་གཉིས་དང་ནི་ལྡན་པའོ། །དགའ་བ་བཅུ་དྲུག་ཐིག་ལེ་སྟེ། །ཟླ་བའི་ཆ་རུ་རབ་ཏུ་དྲན། །ཨཱ་ལི་ཐིག་ལེར་ཤེས་པར་བྱ། །འཁོར་ལོ་བཞི་ཡི་རིམ་པས་སོ། །ཞེས་གསུངས་པའི་ཕྱིར་རོ།།

དེ་བཞིན་དུ་བྱང་སེམས་ཡར་མར་དུ་འབབ་པ་དང་ལྡོག་པ་དང་ལྷན་དུ་ཁམས་དམར་པོ་ཁྲག་དང་བཅས་པ་ཡང་འབབ་ལ། དེ་ལ་གནས་བཞི་རེ་རེ་ལ་ཆ་གསུམ་རེ་བྱས་པའི་མཚམས་རེ་རེར་ཁྲག་བབ་པའི་སྒོ་ནས་བདེ་བ་ཆུང་འབྲིང་ཆེ་གསུམ་རེ་རེ་སྐྱེ་བ་ཡོད་པས་དེ་ལྟར་བྱས་ན་བདེ་བ་ཆུང་འབྲིང་ཆེན་གསུམ་བཅུ་གཉིས་ཡོད་པར་བཤད་དེ། ཕྱག་རྒྱ་ཆེན་པོ་ཐིག་ལེའི་རྒྱུད་མན་ངག་སྙེ་མར་དྲངས་པ་ལས། རི་བོང་མཚན་མའི་ཆ་འདི་རྣམས། །དགའ་བའི་ཐིག་ལེ་བཅུ་དྲུག་སྟེ། །ཨཱ་ལིའི་ངོ་བོར་ཤེས་པར་བྱ། །འཁོར་ལོ་བཞི་རུ་རིམ་པ་ལས། །ཇི་སྐད་བཤད་རྣམས་དེ་ལྟ་ནའང་། །ཉི་མའི་བཅུ་གཉིས་རྣམས་སུ་བཤད། །ཅེས་གསུངས་པ་ལྟར་ཡིན་པའི་ཕྱིར་རོ།།

དེས་ན་ཡས་མས་ཀྱི་དགའ་བ་བཞི་ལ་ཆ་བཞི་རེའི་མཚམས་ནས་བྱང་སེམས་ཞུ་བའི་དགའ་བདེ་ཆུང་ངུ་རེ་རེ་སྐྱེ་བ་དང་། དགའ་བཞིའི་ཆ་གསུམ་རེའི་མཚམས་ནས་ཁྲག་འབབ་ཤིང་དེ་ཁམས་དཀར་དང་འཕྲད་པའི་བདེ་བ་ཆུང་འབྲིང་ཆེན་པོ་གསུམ་དུ་སྐྱེ་བ་སོ་སོར་ཉམས་སུ་མྱོང་ཞིང་དེ་དག་སོ་སོར་ཕྱེད་པ་ནི་དགའ་བཞིའི་ཡེ་ཤེས་འདྲེན་པ་ལ་ཉམས་མྱོང་ཁྱད་པར་ཅན་ཐོབ་པའི་རྣལ་འབྱོར་བས་ཤེས་དགོས་པ་ལས། ལས་དང་པོ་བའམ་རང་དགར་སྦྱོང་བ་ཅུང་ཐོན་པའི་གང་ཟག་གིས་ནི་ཤེས་ཤིང་ངོས་འཛིན་པའི་གནས་མེད་དེ། འདི་དག་ནི་ཤིན་ཏུ་ཕྲ་བར་སྣང་བའི་ཕྱིར་རོ།།

དེ་ལྟར་ཕྱག་ཆེན་ཐིག་ལེ་ལས། དགའ་བ་ཞེས་བྱ་སྣང་བ་ཡིན། །མཆོག་དགའ་སྣང་བ་མཆེད་པར་བསྟན། །དགའ་བྲལ་སྣང་བ་ཐོབ་ཅེས་བྱ། །ལྷན་སྐྱེས་དེ་ནི་ཡང་དག་འོད། །དེ་ཡི་དུས་ན་སྐད་ཅིག་སྐྱེ། །སྣ་ཚོགས་ལ་སོགས་མཚན་ཉིད་དོ། །སྣང་བ་ཟླ་བ་ཞེས་སུ་བསྟན། །སྣང་བ་མཆེད་པ་ཉི་མའོ། །མཚམས་ནི་སྣང་བ་ཐོབ་པར་གྲགས། །གསུམ་དང་བྲལ་བ་ཡང་དག་འོད། །ཅེས་གསུངས་པ་ལྟར། རླུང་དབུ་མར་ཐིམ་པ་ལས་བྱུང་བའི་བྱང་སེམས་བབ་པའི་རིམ་པ་ལས་དགའ་བཞི་སྐྱེད་པ་སྣང་མཆེད་ཐོབ་གསུམ་འོད་གསལ་དང་བཅས་པའི་སྟོང་པ་བཞིའི་ཡེ་ཤེས་བཞིར་སྦྱོར་བའི་སྒོ་ནས་སྒྱུ་ལུས་ལ་འཇུག་ཚུལ་ནི་འདིར་རིག་མ་བསྟེན་ནས་སེམས་དབེན་མཐར་ཐུག་འདྲེན་པའི་ཚུལ་ཡིན་པ་ཤེས་པར་བྱའོ།།

ལས་རྒྱ་བསྟེན་པ་དེ་ཡང་རྒྱུན་དུ་མི་དགོས་པར་ལན་གཅིག་ཙམ་གྱིས་ཆོག་ལ། དང་པོ་རིག་མ་དང་། དེ་ནས་ཡེ་རྒྱ་ལ་བརྟེན་ནས་སེམས་དབེན་མཐར་ཐུག་འདྲེན་ནུས་པར་གསུངས་ཏེ། ཀླུ་སྒྲུབ་ཀྱི་རིམ་ལྔ་ལས། གང་ཞིག་ཆུ་སྐྱེས་རྡོ་རྗེ་སྦྱོར། །ཀུན་རྫོབ་ཏུ་ཡང་མེད་གྱུར་ན། །ལན་ཅིག་ཙམ་ཞིག་མྱོང་ནས་ཀྱང་། །རྣལ་འབྱོར་སྟོབས་ཀྱིས་འགྲུབ་པར་འགྱུར། །ཞེས་གསུངས་པའི་ཕྱིར་རོ།།

སྤྱིར་ལས་རྒྱ་ངེས་པར་དུ་བསྟེན་དགོས་པའི་ཚད་ལ་སླེབས་པ་ན་བསྟེན་ཅིང་། བདེ་བ་ཆེན་པོའི་ཡེ་ཤེས་དྲངས་ནས་དགོས་པ་གྲུབ་ན་རིག་མ་དོར་དགོས་པར་གསུངས་ཏེ། དཔལ་སྟོབས་པོ་ཆེའི་རྒྱུད་ལས། དེ་བཞིན་རང་རིག་ཚོལ་བས་ཀྱང་། །བུད་མེད་སྒྱུ་མ་ལ་བརྟེན་ཏེ། །རང་རིག་ཡེ་ཤེས་ཐོབ་པར་བྱ། །རང་རིག་ཡེ་ཤེས་ཐོབ་པ་དང་། །བུད་མེད་སྒྱུ་མ་དོར་བར་བྱ། །ཞེས་གསུངས་པའི་ཕྱིར་རོ།།

བསྟེན་བྱའི་ལས་རྒྱའམ་ཕྱག་རྒྱ་ལ་ནི། ལྷན་སྐྱེས་ཀྱི་རྣལ་འབྱོར་མ་དང་། ཞིང་སྐྱེས་ཀྱི་རྣལ་འབྱོར་མ་དང་། སྔགས་སྐྱེས་ཀྱི་རྣལ་འབྱོར་མ་སྟེ་རིགས་གསུམ་ཡོད་ལ། དང་པོ་ནི་ཟུང་འཇུག་ལ་གནས་པའི་ཕྱག་རྒྱ་དང་། གཉིས་པ་ནི་དབེན་གསུམ་དང་སྒྱུ་ལུས་ཅི་རིགས་ལ་གནས་པའི་ཕྱག་རྒྱ་དང་། གསུམ་པ་ནི་བསྐྱེད་རིམ་ལ་གནས་པའི་ཕྱག་རྒྱ་མ་རྣམས་ཡིན་ཞིང་། སྔགས་སྐྱེས་ཀྱི་རྣལ་འབྱོར་མ་ལ་པདྨ་ཅན་དང་། དུང་ཅན་མ་དང་། གླང་པོ་ཅན་མ་དང་། རི་དྭགས་མ་བཞི་ཡི་རིགས་ཀྱི་དབྱེ་བའི་མཚན་ཉིད་ལྡན་དགོས་པར་གསུངས་སོ།།

སེམས་དབེན་གྱི་སྐབས་སུ་སྣང་བ་གསུམ་མམ་སྟོང་པ་གསུམ་གྱི་ཡེ་ཤེས་གསུམ་བསྐྱེད་ཚུལ་ནི། རླུང་སྙིང་གའི་མི་ཤིགས་པའི་ཐིག་ལེ་ལ་ཐིམ་པ་ན་ཀུན་རྟོག་གཡོ་བའི་རླུང་ཐིམ་པའི་རྟགས་མར་མེ་འབར་བ་ལྟ་བུའི་རྟགས་འཆར། དེ་ནས་རང་བཞིན་བརྒྱད་ཅུའི་ཀུན་རྟོག་གཡོ་བྱེད་ཀྱི་རླུང་དང་བཅས་པ་རྣམས་འགགས་ནས་སྟོན་ནམ་གཡའ་དག་པ་ལ་མཚན་མོ་ཟླ་འོད་ཀྱིས་ཁྱབ་པ་ལྟ་བུའི་འོད་དཀར་པོའི་རྣམ་པ་ཅན་གྱི་སྟོང་སང་སྒྲིབ་མེད་དྭངས་པའི་སྣང་བ་ཞིག་འབྱུང་བ་ནི་སྣང་བ་དཀར་ལམ་པའོ།།

དེ་དུས་དེ་མ་གཏོགས་པའི་གཉིས་སྣང་རགས་པ་གང་ཡང་མི་འཆར་ཞིང་བློ་དེ་ཉིད་ཀྱང་སྟོང་ཉིད་རྟོགས་པའི་རྣམ་པ་ཅན་དུ་གྱུར་པ་ཡིན་ཏེ། རྡོ་རྗེ་དཔལ་མཆོག་ཆེན་པོ་ལས། སྣང་བ་ཞེས་བྱ་རྣམ་པར་མི་རྟོག་པ། །གསལ་བའི་ཆ་སྟེ་གཟུང་རྟོག་སྤངས་པ་ལས། །འབྱུང་བ་མི་མངོན་རླུང་དང་བཅས་པ་གང་། །ལྷང་ངེར་གནས་པ་སྐད་ཅིག་དང་པོ་ཡིན། །ཞེས་དང་། སྟོན་ཀའི་ནམ་མཁའ་སྤྲིན་མེད་པ། །ཟླ་བའི་འོད་ཟེར་ཀུན་གསལ་ལྟར། །གཟུང་འཛིན་སྤངས་པའི་ཡེ་ཤེས་ནི། །བདག་གཞན་བཅས་པས་སྣང་བའོ། །ཞེས་གསུངས་པའི་ཕྱིར་རོ།།

དེ་ནས་རླུང་འགགས་པ་ཆེར་ཕྱིན་ནས་སྣང་བ་དཀར་ལམ་པ་དེ་བསྡུས་པའམ་ནུབ་ནས་དེ་མཆེད་པ་ལ་ཐིམ་སྟེ་སྟོན་ནམ་གཡའ་དག་པ་ལ་ཉི་འོད་ཀྱིས་ཁྱབ་པ་ལྟ་བུ་སྔ་མ་ལས་ཀྱང་དྭངས་པའི་སྟོང་སང་དམར་འོད་ལམ་མེ་བའི་སྣང་བ་འཆར་བ་ནི་མཆེད་པ་དམར་ལམ་པ་ཞེས་བྱ་ལ། དེ་དུས་ཀྱང་གཉིས་སྣང་རགས་པ་གང་ཡང་མི་འཆར་ཞིང་སྟོང་ཉིད་རྟོགས་པའི་བདེ་བ་ཆེན་པོའི་ཡེ་ཤེས་ཀྱི་རྣམ་པ་ཅན་དུ་གྱུར་པ་ཡིན་ཏེ། ཡང་རྡོ་རྗེ་དཔལ་མཆོག་ཆེན་པོ་ལས། མཆེད་པའི་སྣང་བ་རབ་ཏུ་མི་རྟོག་སྟེ། །ཆེས་གསལ་བ་ལས་འཛིན་རྟོག་མ་ཞུགས་པ། །ཡེ་ཤེས་ཕྲ་བ་རླུང་ལྡན་མི་སྣང་བ། །ལྷན་ནེ་གནས་པ་སྐད་ཅིག་གཉིས་པ་ཡིན། །ཞེས་དང་། སྟོན་དུས་སྤྲིན་མེད་ནམ་མཁའ་ལ། །ཉི་མ་གསལ་བར་ཤར་བ་བཞིན། །ཐབས་ཀྱི་ཡེ་ཤེས་གཉིས་པ་ནི། །དོན་དང་སེམས་བཅས་སྣང་བར་བྱེད། །ཅེས་གསུངས་པའི་ཕྱིར་རོ།།

དེ་ནས་རླུང་འགགས་པའི་ཤུགས་ཆེར་གྱུར་ནས་སྣང་བ་དམར་ལམ་པ་དེ་ནུབ་པའམ་བསྡུས་ནས་དེ་ཉེར་ཐོབ་ལ་ཐིམ་པས་སྟོན་ནམ་གཡའ་དག་པ་ལ་སྲོད་ཀྱི་སྨག་མཐུག་པོས་ཁྱབ་པ་ལྟ་བུའི་སྟོང་སང་ནག་ལམ་པ་དྲན་པ་མ་ཉམས་པའི་ཚད་ཙམ་གྱི་སྣང་བ་འཆར་བ་ནི་ཉེར་ཐོབ་ནག་ལམ་པ་ཞེས་བྱ་ཞིང་། དེ་དུས་ཀྱང་དེ་ལས་གཞན་པའི་གཉིས་སྣང་རགས་པའི་སྣང་བ་གང་ཡང་མི་འཆར་ཞིང་སྟོང་ཉིད་རྟོགས་པའི་བདེ་བ་ཆེན་པོའི་ཡེ་ཤེས་ཀྱི་རྣམ་ཅན་དུ་གྱུར་པ་ཡིན་ཏེ། ཡང་རྡོ་རྗེ་དཔལ་མཆོག་ཆེན་པོ་ལས། ཐོབ་པའི་ཆ་ནི་ཤིན་དུ་མི་རྟོག་པ། །གསལ་བ་ཙམ་དུའང་མི་གནས་ཤིན་དུ་ཕྲ། །རླུང་སེམས་མི་ཕྱེད་གསལ་བར་འཆར་བ་མིན། །ལྷམ་མེ་གནས་པ་སྐད་ཅིག་གསུམ་པ་ཡིན། །ཞེས་དང་། སྤྲིན་མེད་མཁའ་དང་མུན་ལྟ་བུ། །སྣང་བྱེད་ཡེ་ཤེས་གོམས་བྱེད་པས། །རང་རིག་རྩལ་ལས་གྲུབ་པ་ཡི། །སྒྱུ་མའི་ལུས་ནི་ལེན་པར་བྱེད། །ཅེས་གསུངས་པའི་ཕྱིར་རོ།།

དེ་ནས་རླུང་ཧྲིལ་གྱིས་འགགས་ནས་སེམས་ཅན་རང་ག་བ་དྲན་མེད་དུ་བརྒྱལ་བ་ཇི་བཞིན་རྣལ་འབྱོར་བ་ཡང་བར་དུ་ཡུལ་ཅན་གྱི་དྲན་པ་ཉམས་ནས་དྲན་མེད་དུ་འགྲོ། དེའི་རྗེས་སུ་དྲན་པ་ཉམས་པ་སངས་ནས་དྲན་པ་སླར་སྐྱེས་པ་ན་ནམ་མཁའ་སྤྲིན་མེད་གཡའ་དག་པ་ལྟ་བུའི་སྟོང་སེང་གི་སྣང་བ་འཆར་བ་ནི། གཞི་དུས་ཀྱི་འཆི་བ་འོད་གསལ་དང་། ལམ་དུས་ཀྱི་ཐམས་ཅད་སྟོང་པའི་འོད་གསལ་ཞེས་པ་དེ་འཆར་བ་ཡིན་ཞིང་། ལུགས་འབྱུང་ཉེར་ཐོབ་དྲན་མེད་དུ་སོང་བ་ཇི་ལྟར་མཐུག་ཅིང་རྒྱུན་རིང་ན་དེ་ཙམ་གྱིས་མཇུག་གི་འོད་གསལ་བརྟན་ལ་རྒྱུན་རིང་བ་ཡིན་པར་བཤད་ལ། སེམས་ཅན་རང་ག་བ་འཆི་བའི་དུས་ཀྱི་སྟོང་པ་བཞི་ནི་ཡུན་ཐུང་པ་དང་། རྣལ་འབྱོར་བའི་སྒོམ་སྟོབས་ཀྱིས་ཐོབ་པའི་སྟོང་པ་བཞི་ནི་ཡུན་རིང་ཞིང་བརྟན་པ་ཡིན་པར་བཞེད་དོ།།

ཐམས་ཅད་སྟོང་པའི་འོད་གསལ་དེ་ཉིད་བདེ་སྟོང་གི་ཡེ་ཤེས་ཀྱི་ངོ་བོར་བསྐྱེད་པས་སྟོང་ཉིད་རྟོགས་པའི་འོད་གསལ་གྱི་ཡེ་ཤེས་ཐམས་ཅད་སྟོང་པའི་ཡེ་ཤེས་ཞེས་པ་དེ་ཡིན་ཏེ། དེ་ཉིད་ལས། ཉེ་བར་ཐོབ་པ་དྲི་མ་མེད་པ་སྟེ། །རང་བྱུང་རང་གསལ་བདེ་བ་དམིགས་སུ་མེད། །ཕྲ་རགས་རབ་གསལ་ཏིང་ངེ་འཛིན་དུ་གནས། །སྐད་ཅིག་བཞི་པ་མི་འགྱུར་ཁྱབ་བྱེད་ཡིན། །ཞེས་གསུངས་པའི་ཕྱིར་རོ།།

རིམ་པ་བཞི་བའི་འོད་གསལ་མ་སྐྱེས་ཀྱི་བར་དུ་ཐམས་ཅད་སྟོང་པ་དེ་ལ་དཔེའི་འོད་གསལ་ཞེས་བྱ་བ་དང་། རིམ་པ་གསུམ་པ་མན་ཆད་ལ་སྨོས་ཟིན་ལྟར་དེ་ཉིད་ཉེར་ཐོབ་ཀྱི་ཁོངས་སུ་བསྡུས་ནས་སྟོང་པ་གསུམ་ཞེས་བཤད་ལ། དེ་ལོགས་སུ་ཕྱེས་ན་སྟོང་པ་བཞིར་འགྱུར་པ་ཡིན་ནོ།།

དཔེའི་འོད་གསལ་ལས་སླར་སྣང་བ་གསུམ་ལུགས་ལྡོག་ཏུ་འཆར་ཚུལ་ཡང་། དཔེའི་འོད་གསལ་བསྡུས་པ་སྟེ་ནུབ་ནས་ཉེར་ཐོབ་འཆར། དེ་བསྡུས་ནས་མཆེད་པ་འབྱུང་། དེ་བསྡུས་ནས་སྣང་བ་འཆར། དེ་བསྡུས་ནས་འདི་སྣང་རགས་པ་འཆར་ཞིང་རང་བཞིན་གྱི་ཀུན་རྟོག་རྣམས་ཀྱང་སྔོན་བཞིན་དུ་སྐྱེ་བ་ཡིན་ནོ།།

རྣལ་འབྱོར་བས་དེ་ལྟར་སེམས་དབེན་བསྒོམས་ནས་རླུང་སྙིང་གའི་མི་ཤིགས་པའི་ཐིག་ལེ་ལ་ཡང་ཡང་ཐིམ་པར་བགྱིས་ན་སྣང་བ་བཞི་འོད་གསལ་དང་བཅས་པ་ཡང་ཡང་འབྱུང་ལ། དེ་ཡང་སྣང་བའི་ཡེ་ཤེས་བྱུང་ནས་སླར་རྗེས་ཐོབ་དུ་ལྡང་སྟེ་ཡུན་རིང་དེའི་རྒྱུ་ཚོགས་དེ་དག་གོམས་པར་བྱས་ཏེ་མཆེད་པའི་ཡེ་ཤེས་སྐྱེ་བ་དང་། ཡང་མཆེད་པ་བར་བྱུང་ནས་སླར་རྗེས་ཐོབ་དུ་ལྡང་བ་སོགས་ཡོད་པས་ལམ་དུས་ཀྱི་སྣང་མཆེད་ཐོབ་གསུམ་དཀྱུས་ཐོག་གཅིག་ཏུ་སྔ་མ་སྐྱེས་པའི་རྒྱུན་གཅིག་ལ་སྐྱེས་པར་ནི་མ་ངེས་པར་གསུངས་སོ།།

སྣང་མཆེད་ཐོབ་གསུམ་འོད་གསལ་དང་བཅས་པ་ལས་སྔ་མ་འགགས་པའམ་ཐིམ་མ་ཐག་ནས་ཕྱི་མ་འབྱུང་བའི་ངེས་པ་ནི་མེད་པར་དཔེར་ན་སྣང་བ་དཀར་ལམ་པའི་སྣང་བ་འགགས་པའམ་ཐིམ་ཞིང་བསྡུས་ནས་དེ་མ་ཐག་ཏུ་མཆེད་པ་དམར་ལམ་པའི་སྣང་བ་མི་འབྱུང་བར་ནམ་མཁའ་གཡའ་དག་ལྟ་བུ་སྟོང་སང་ངེ་བའི་སྣང་བ་ལ་གནས་པ་ཡུན་རིང་འོང་བ་དང་། དེ་ནས་ཡང་མཆེད་པ་དམར་ལམ་པ་འགགས་ཤིང་ཐིམ་ནས་ཐོབ་པ་ནག་ལམ་པའི་སྣང་བ་མི་འབྱུང་བར་ནམ་མཁའ་གཡའ་དག་ལྟ་བུ་སྟོང་སང་ངེ་བའི་སྣང་བ་ལ་གནས་པ་དང་། ཐོབ་པ་ནག་ལམ་པ་འགགས་ནས་བརྒྱལ་བ་དང་འོད་གསལ་གྱི་སྣང་བ་དེ་མ་ཐག་ཏུ་མི་འབྱུང་བར་ནམ་མཁའ་གཡའ་དག་ལྟ་བུ་སྟོང་སང་ངེ་བའི་སྣང་བ་ལ་གནས་པ་ཡོད་པ་དང་། སྣང་མཆེད་ཐོབ་གསུམ་འོད་གསལ་དང་བཅས་སྐྱེ་རིམ་དེ་མ་ཐག་ཏུ་སྐྱེ་བ་བཅས་ཅི་རིགས་པ་ཡོད་པར་གསུངས་སོ།།

དབེན་པ་གསུམ་ཀའི་སྐབས་སུ་སྣང་བ་གསུམ་དང་དཔེའི་འོད་གསལ་ཡོད་མོད། སྣང་བ་གསུམ་མཚན་ཉིད་པ་ནི་གཞི་ལ་འཆི་བའི་དུས་སུ་ཡོངས་སུ་རྫོགས་པར་འཆར་བ་དང་། ལམ་དུས་སེམས་དབེན་གྱི་སྐབས་ནས་བརྩམས་ཏེ་བྱུང་བ་ཡིན་ཞིང་། རྡོར་བཟླས་མན་ཆད་ཀྱི་སྣང་མཆེད་ཐོབ་གསུམ་འོད་གསལ་དང་བཅས་པ་རྗེས་མཐུན་པར་ཁས་ལེན་དགོས་པ་དང་། དབེན་གསུམ་གྱི་སྐབས་སུ་གཉིས་སྣང་ཤིན་ཏུ་ཕྲ་བ་མི་ལྡོག་ཀྱང་བསྒོམས་སྟོབས་ཀྱིས་སྙིང་གའི་རླུང་དྷཱི་ཏཱིར་ཐིམ་པའི་སྟོབས་ཀྱིས་གཉིས་སྣང་རགས་པ་འགགས་ནས་སྣང་བ་དཀར་དམར་ནག་གསུམ་འཆར་ཞིང་། སྣང་བ་དེ་དག་བདེ་སྟོང་དུ་སྦྱར་ནས་སྒོམ་དགོས་པ་ཡིན་ནོ།།

སེམས་དབེན་མན་ཆད་ཀྱི་ཉེར་ཐོབ་ཀྱི་མཇུག་ཏུ་དཔེའི་འོད་གསལ་བྱུང་ཡང་རིམ་ལྔ་དང་སྤྱོད་བསྡུས་སུ་དཔེའི་འོད་གསལ་མ་བཤད་པ་ནི། སྨོས་ཟིན་ལྟར་དཔེའི་འོད་གསལ་དེ་ཉེར་ཐོབ་ཀྱི་ནང་དུ་བསྡུས་པའི་དབང་དུ་བྱས་པ་ཡིན་ཞིང་། དཔེའི་འོད་གསལ་དང་དེའི་སྔ་ལོགས་ཀྱི་ཉེར་ཐོབ་གཉིས་པོ་གཉིས་སྣང་ཅན་གྱི་ཤེས་པ་ཡིན་པ་ལ་འདྲ་བས་དེ་གཉིས་གཅིག་ཏུ་འདུ་རུང་བས་ལོགས་སུ་རིམ་པར་མ་ཕྱེས་པ་དང་། དོན་གྱི་འོད་གསལ་གྱི་སྔ་ལོགས་ཀྱི་ཉེར་ཐོབ་ནི་གཉིས་སྣང་ཅན་གྱི་ཤེས་པ་དང་། དོན་གྱི་འོད་གསལ་ནི་གཉིས་སྣང་ཅུང་ཟད་ཀྱང་མེད་པའི་ཤེས་པ་ཡིན་པས་དེ་གཉིས་གཅིག་ཏུ་འདུ་མི་རུང་བའི་ཕྱིར་ན་དོན་གྱི་འོད་གསལ་རིམ་པ་བཞི་བར་ལོགས་སུ་བཤད་པ་ཡིན་པར་གསུངས་སོ།།

རྣལ་འབྱོར་བ་སྣང་བ་གསུམ་ལ་གོམས་པ་ཤས་ཆེ་ཆུང་དང་། ཁོའི་རྒྱུད་ལ་རླུང་འདུ་བ་དང་། ཕུལ་བ་དང་། ཐིམ་པ་ཆེ་ཆུང་གི་དབང་གིས་ཡུལ་སྣང་བ་དཀར་དམར་ནག་གསུམ་འོད་གསལ་དང་བཅས་པ་ལའང་རྒྱ་ཆེ་ཆུང་དང་། སྲབ་མཐུག་དང་། གནས་ཡུན་རིང་ཐུང་དང་། བརྟན་མི་བརྟན་གྱི་ཁྱད་པར་ནི་མི་འདྲ་བ་དུ་མ་ཡོད་པར་གསུངས་ལ། དེ་འདྲའི་སྟོང་པ་གསུམ་ནི་སྒྱུ་ལུས་ཐོབ་ནས་དོན་གྱི་འོད་གསལ་མངོན་དུ་མ་བྱས་པ་དང་། དོན་གྱི་འོད་གསལ་ལས་ལུགས་ལྡོག་ཏུ་ལྡང་བའི་སྐབས་དང་། སློབ་པའི་ཟུང་འཇུག་ཐོབ་ནས་མི་སློབ་པའི་ཟུང་འཇུག་མ་ཐོབ་པའི་བར་རྣམས་སུ་འབྱུང་བ་ཡོད་མོད། དེ་དག་ནི་སེམས་དབེན་མིན་ལ། དེ་བཞིན་དུ་སེམས་དབེན་མ་ཐོབ་པའི་སྔོན་ལའང་སྟོང་པ་གསུམ་གྱི་ཡེ་ཤེས་འབྱུང་བ་ཡོད་པ་དེ་ཡང་སེམས་དབེན་མ་ཡིན་པའི་ཕྱིར་ན་སྟོང་པ་གསུམ་གྱི་ཡེ་ཤེས་དང་སེམས་དབེན་གྱི་སྟོང་པ་གསུམ་གྱི་ཡེ་ཤེས་ལ་ཁྱབ་ཆེ་ཆུང་གི་ཁྱད་པར་ཡོད་པ་ཡིན་པར་གསུངས་སོ།།

ལམ་དུས་སུ་སྟོང་པ་བཞི་ཀའི་ཚེ་བློ་དེ་སྟོང་ཉིད་སྒོམ་པའི་ངོ་བོར་བསྐྱེད་དེ་བདེ་སྟོང་སྦྱོར་དགོས་ཤིང་། གཙོ་བོ་ཐམས་ཅད་སྟོང་པ་དཔེའི་འོད་གསལ་གྱི་སྐབས་སུ་ནི་བདེ་སྟོང་གི་རྟོག་པའི་ངོ་བོར་བསྐྱེད་དགོས་པར་གསུངས་ལ། དེ་དུས་དེ་བཞི་སྟོང་ཉིད་རྟོགས་པའི་རྣམ་པ་ཅན་ཡིན་ཚུལ་ནི། དེ་དུས་སུ་སྣང་བ་གསུམ་གྱི་སྣང་ངོར་དཀར་དམར་ནག་གསུམ་གྱི་སྣང་བ་འབྱུང་བ་ཡིན་ནའང་། ངེས་ངོར་སྣང་བ་དེ་ཡང་བཀག་ནས་སྟོང་ཉིད་འཛིན་སྟངས་ཀྱི་ཡུལ་དུ་བྱས་ནས་རྩེ་གཅིག་ཏུ་སྒོམ་པར་བྱེད་པ་ཡིན་ཕྱིར་སྣང་བའི་ཡེ་ཤེས་དེ་གསུམ་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཀྱི་ངོ་བོར་སྐྱེད་པའི་སྟོང་ཉིད་རྟོགས་པའི་བློ་ཡིན་ནོ།།

བདེ་སྟོང་སྦྱོར་བ་ཞེས་པའི་སྟོང་པ་ནི་ཆོས་དང་གང་ཟག་གི་བདག་གིས་སྟོང་པའི་སྟོང་ཉིད་དེ་ཉིད་ལ་བྱ་ཞིང་། རྒྱུ་མཚན་ཉིད་ཐེག་པ་དང་འབྲས་བུ་རྡོ་རྗེ་ཐེག་པ་གཉིས་ཀའི་སྐབས་སུ་བཤད་པའི་ཐར་བ་ཐོབ་པ་ལ་ངེས་པར་རྟོགས་དགོས་པའི་སྟོང་ཉིད་དེ་དཔལ་ལྡན་ཐལ་འགྱུར་བའི་བཞེད་པའི་བདག་མེད་པའི་ལྟ་བ་དེ་ལ་གོ་དགོས་སོ། །

འོན་ཀྱང་གདུལ་བྱའི་དབང་གིས་སེམས་ཙམ་པ་དང་རང་རྒྱུད་པའི་བཞེད་པའི་བདག་མེད་ལྟར་གྱི་སྟོང་ཉིད་དེ་སྔགས་ཀྱི་བདེ་བ་ལ་སྦྱོར་བའང་ཡོད་པར་བཤད་དོ།།

དེས་ན་སྟོང་ཉིད་ཀྱི་ཕྱོགས་ནས་མདོ་སྔགས་གཉིས་ཀྱི་ལྟ་བ་ལ་ཁྱད་པར་མེད་པར་འཇམ་མགོན་བླ་མ་ཙོང་ཁ་པས་གསུངས་ཏེ། གསལ་སྒྲོན་ལས། སྟོང་ཉིད་ཀྱི་གོ་བའི་ཕུ་ཐག་གཅོད་ལུགས་དབུ་མ་ནས་འབྱུང་བ་ལས་ལྷག་པོ་མེད་པས། ཐེག་པ་འདི་དང་ཕར་ཕྱིན་གྱི་ཐེག་པ་གཉིས་སྟོང་ཉིད་ཀྱི་ལྟ་བ་ལ་མཆོག་དམན་མེད་དོ། །ཞེས་གསུངས་པའི་ཕྱིར།

འོ་ན་མདོ་སྔགས་ཀྱི་ལྟ་བ་ལ་ཁྱད་པར་མེད་དམ་ཞེ་ན། ཡུལ་སྟོང་ཉིད་ཀྱི་ངོས་ནས་ཁྱད་པར་མེད་ཀྱང་ཡུལ་ཅན་ཡེ་ཤེས་ཀྱི་ངོས་ནས་ཁྱད་པར་ཡོད་པར་འདོད་དེ། དེ་ཉིད་ལས། ངེས་རྒྱུའི་དོན་གཅིག་ཡིན་ཀྱང་ངེས་བྱེད་ཀྱི་བློ་ལ་ལྷན་སྐྱེས་ཀྱི་བདེ་བས་སྟོང་ཉིད་ངེས་པའི་སྟོབས་འདྲ་བ་ཡུལ་ཅན་གཞན་གང་གིས་ངེས་པ་ལ་མེད་པས། སྟོང་པ་ལ་ཁྱད་མེད་ཀྱང་ཐབས་བདེ་བས་ཁྱད་པར་དུ་འཕགས་པར་གསུངས་སོ། །ཞེས་གསུངས་པའི་ཕྱིར་རོ།།

བདེ་བ་ནི། སེམས་རྩེ་གཅིག་པའི་ཏིང་ངེ་འཛིན་བསྒོམས་ནས་སེམས་ཤིན་སྦྱངས་གྲུབ་པ་ན་ལུས་ཀྱི་རླུང་རྣམས་ལས་རུང་དུ་གྱུར་ནས་ལུས་ཤིན་སྦྱངས་གྲུབ་ཅིང་། དེ་ལ་བརྟེན་ནས་ལུས་ལ་བདེ་བ་དང་སེམས་ལ་དགའ་བདེ་ཆེན་པོ་སྐྱེ་བ་ཡོད་པ་སོགས་ཕྱི་ནང་གཉིས་དང་། ཐེག་པ་ཆེ་ཆུང་དང་། མདོ་སྔགས་གཉིས་ཀའི་ལུགས་ལ་སེམས་མི་རྟོག་པར་འཇོག་པ་རྒྱུན་རིང་བ་ཀུན་ལ་སེམས་བདེ་འབྱུང་བ་ཡོད་པ་དང་། གཞན་ཡང་མདོ་ལས་རླུང་འབྱུང་རྔུབ་སྒོམ་པ་དང་། ས་དང་པོ་རབ་དགའ་ཐོབ་པ་དང་། བྱ་རྒྱུད་བསམ་གཏན་ཕྱི་མ་དང་། སྤྱོད་རྒྱུད་རྣམ་སྣང་མངོན་བྱང་རྣམས་སུ་རླུང་ཕྱིར་རྒྱུ་བ་བཀག་ནས་ནང་དུ་བཟུང་བ་ལ་ལྷའི་རྣལ་འབྱོར་སྒོམ་པའི་སྲོག་རྩོལ་ཞེས་པ་སོགས་ཏིང་ངེ་འཛིན་གྱི་མཐུས་བྱུང་བའི་བདེ་བ་ཡོད་མོད་དེ་དག་ནི་སྔགས་བླ་མེད་ཀྱི་སྐབས་འདིའི་བདེ་བ་མ་ཡིན་ཞིང་། སྐབས་འདིའི་བདེ་བ་ནི་ནང་ལུས་ཀྱི་རྩ་འཁོར་རྣམས་སུ་གནད་དུ་བསྣུན་པ་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་ལྷན་སྐྱེས་ཀྱི་བདེ་བ་ཁྱད་པར་བ་ཞིག་ལ་བྱེད་དགོས་པ་ཡིན་ནོ།།

དེ་ལ་བླ་མེད་ཀྱི་ལུགས་འདིར་དེ་འདྲའི་ཐབས་བདེ་བ་ཆེན་པོའི་ཡེ་ཤེས་དེ་ལ་དམིགས་པ་མེད་པའི་སྙིང་རྗེ་ཞེས་

ཀྱང་བཤད་དེ། སྤྲོས་པ་མེད་པའི་རང་བཞིན་སྟོང་པ་ཉིད་ངེས་པའི་ཆ་ནས་ནི་ཤེས་རབ་དང་། དེ་ལྟར་རྟོགས་པའི་ཡེ་ཤེས་དེ་ཉིད་ཐབས་བདེ་བ་ཆེན་པོའི་ངོ་བོར་སྐྱེས་པའི་ཆགས་པ་ཆེན་པོའི་ཡེ་ཤེས་ཡིན་པའི་ཆ་ནས་སེམས་ཅན་གྱི་དོན་བྱེད་པའི་སྙིང་རྗེ་ཆེན་པོའི་བློ་སྟེ་དམིགས་པ་མེད་པའི་སྙིང་རྗེ་ཞེས་བརྗོད་པ་ཡིན་པའི་ཕྱིར། གྲུབ་སྟེ། ཡང་དག་སྦྱོར་བ་ལས། སྤྲོས་པ་མེད་པའི་རང་བཞིན་ཉིད། །ཤེས་རབ་ཅེས་ནི་རབ་ཏུ་གྲགས། །ཡིད་བཞིན་ནོར་ལྟར་མ་ལུས་པའི། །ཐམས་ཅད་དོན་བྱེད་སྙིང་རྗེ་ཉིད། །དམིགས་མེད་གནས་སུ་ཤེས་རབ་དང་། ། དམིགས་མེད་སྙིང་རྗེ་ཆེན་པོ་ཉིད། །བློ་དང་ལྷན་ཅིག་གཅིག་གྱུར་པ། །ནམ་མཁར་ནམ་མཁའ་ཇི་ལྟ་བའོ། །ཞེས་གསུངས་པའི་ཕྱིར། དེས་ན་ཐབས་ཀྱི་ཆ་དེ་ལ་བརྟེན་ནས་འགྲོ་བའི་དོན་བྱུང་བས་ན་དེ་ལྟར་བརྗོད་པ་ཡིན་པ་འདྲའོ།།

དེ་ཡང་བདེ་བ་ཆེན་པོ་དང་དེའི་རྟོགས་བྱའི་ཆོས་ཉིད་ངོ་བོ་དབྱེར་མེད་ཡིན་པ་ནི། བདེ་བ་ཆེན་པོ་གྲུབ་ཙམ་ནས་དེའི་ངོ་བོ་སྟོང་ཉིད་ཡིན་ཞིང་དེ་དང་དབྱེར་མེད་ཡིན་པ་ལས་རྣལ་འབྱོར་བའི་སྒོམ་གྱི་ནུས་པས་དབྱེར་མེད་དུ་གྱུར་པ་ནི་མ་ཡིན་ཞིང་། སྟོང་ཉིད་རྟོགས་པའི་བློ་གཞན་ཞིག་ལ་བདེ་བས་རྒྱས་འདེབས་པ་དང་། བདེ་བའི་ཡེ་ཤེས་སྐྱེས་པའི་འོག་ཏུ་སྟོང་ཉིད་རྟོགས་པའི་བློ་གཞན་ཞིག་གིས་བདེ་བ་ལ་རྒྱས་འདེབས་པའང་མ་ཡིན་པར་བདེ་བ་སྐྱེས་ཙམ་ནས་སྟོང་ཉིད་དང་ངོ་བོ་དབྱེར་དུ་གྱུར་པ་ལ་བདེ་སྟོང་དབྱེར་མེད་དང་བདེ་སྟོང་སྦྱོར་བ་ཞེས་གོ་དགོས་ཤིང་། ཡུལ་ཅན་ཤེས་པ་ལྷན་སྐྱེས་བདེ་བ་ཆེན་པོའི་ངོ་བོར་སྐྱེས་པ་དེས་ཡུལ་སྟོང་པ་ཉིད་རྟོགས་པའི་སྒོ་ནས་ཡུལ་དང་ཡུལ་ཅན་སྦྱོར་ཏེ་བདེ་སྟོང་དབྱེར་མེད་དུ་སོང་པ་ལ་གོ་དགོས་པ་དང་། སྟོང་ཉིད་མངོན་སུམ་དུ་མ་རྟོགས་པར་ལྷན་སྐྱེས་བདེ་བ་ཆེན་པོའི་ཡེ་ཤེས་མ་སྐྱེས་པའི་སྔོན་ལ་བདེ་སྟོང་སྦྱོར་བ་ནི་མོས་པ་ཡིད་བྱེད་ཀྱིས་རོ་གཅིག་ཏུ་མོས་པ་ཙམ་ལས་དོན་ལ་རོ་གཅིག་ཏུ་མ་སོང་བ་ཡིན་པར་འཇམ་མགོན་བླ་མ་ཙོང་ཁ་པས་གསུངས་སོ།།

གོང་ལྟར་སྣང་བ་གསུམ་ལམ་གྱི་ངོ་བོར་སྐྱེད་ཚུལ་མ་ཤེས་ན་དེ་གསུམ་ལས་རང་བཞིན་བརྒྱད་ཅུའི་ཀུན་རྟོག་རྣམས་སྐྱེ་ཞིང་། དེ་ལས་འཇིག་ལྟ་སྐྱེ། དེ་ལས་ཉོན་མོངས་པ་གཞན་རྣམས་སྐྱེ། དེ་དག་གིས་ལས་བསགས། དེ་ཡིས་རྣམ་སྨིན་གྱི་འབྲས་བུ་སྡུག་བསྔལ་སྣ་ཚོགས་མྱོང་ནས་འཁོར་བར་འཁོར་དགོས་པ་ཡིན་ཞིང་དེ་ནི་སྣང་བ་གསུམ་ལམ་གྱི་ངོ་བོར་སྐྱེད་ཚུལ་མ་ཤེས་པའི་སྐྱོན་ཡིན་ལ། ལམ་གྱི་ངོ་བོར་སྐྱེད་ཚུལ་ཤེས་ན་ནི། དཔེ་དང་དོན་གྱི་འོད་གསལ་འཆར་ཞིང་། འོད་གསལ་དེ་ཡིས་ཆོས་སྐུའི་རིགས་འདྲའི་རྒྱུ་བྱེད་པ་དང་། འོད་གསལ་དེའི་བཞོན་པའི་རླུང་འོད་ཟེར་ལྔ་པ་ལས་སྒྱུ་མའི་སྐུ་གྲུབ་སྟེ་གཟུགས་སྐུའི་རིགས་འདྲའི་རྒྱུ་བྱས་ཏེ་ཟུང་འཇུག་གི་དག་པའི་སྒྱུ་མའི་གཟུགས་སྐུ་གྲུབ་ནས་སངས་རྒྱས་པ་ཡིན་ནོ།།

སྣང་བ་གསུམ་རྣམ་པར་དག་པ་གང་ཡིན་པའི་ཡེ་ཤེས་དེ་ནི་གསང་འདུས་འཕགས་ལུགས་འདིར་ཐམས་ཅད་སྟོང་པ་འོད་གསལ་ཞེས་བྱ་སྟེ། ཡེ་ཤེས་གསུམ་རྣམ་པར་དག་པ་དེ་ནི་སྣང་མཆེད་ཐོབ་གསུམ་བཞོན་པ་རླུང་དང་བཅས་པ་ཐམས་ཅད་ཐིམ་པའི་ཐམས་ཅད་སྟོང་པ་འོད་གསལ་དུ་བརྗོད་པ་ཡིན་པའི་ཕྱིར་ཏེ། ཀླུ་སྒྲུབ་ཀྱི་རིམ་ལྔ་ལས། སྟོང་པ་གསུམ་གྱི་རྣམ་དག་གང་། །འོད་གསལ་བར་ནི་འདིར་བཤད་དོ། །ཐམས་ཅད་སྟོང་པར་དེ་བརྗོད་དེ། །ཡེ་ཤེས་གསུམ་ནི་རྣམ་དག་པ། །ཡེ་ཤེས་དག་ནས་དེ་ཉིད་རྟོགས། །ཞེས་གསུངས་པའི་ཕྱིར་རོ།།

སྤྱིར་གཞི་ལ་སེམས་ཅན་ཐ་མལ་བའི་རྒྱུད་ཀྱི་དེ་ལ་སྣང་བའི་སེམས་དང་། མཆེད་པའི་སེམས་དང་། ཉེར་ཐོབ་ཀྱི་སེམས་ཞེས་བརྗོད་པ་དང་། སྣང་བ་དང་། སྣང་བ་མཆེད་པ་དང་། སྣང་བ་ཉེར་ཐོབ་ཅེས་བརྗོད་པ་དང་། སྣང་བ་སྟོང་པ་དང་། མཆེད་པ་ཤིན་ཏུ་སྟོང་པ་དང་། ཉེར་ཐོབ་སྟོང་པ་ཆེན་པོ་ཞེས་བརྗོད་པ་དང་། ལམ་གྱི་དུས་ན་སྣང་བའི་ཡེ་ཤེས་དང་། མཆེད་པའི་ཡེ་ཤེས་དང་། ཉེར་ཐོབ་ཀྱི་ཡེ་ཤེས་ཞེས་འབོད་པ་དང་། སྣང་བ་སོགས་གསུམ་གྱི་ཡེ་ཤེས་ནི་སྟོང་པ་གསུམ་ཞེས་བྱ་ལ། དེ་སྟེང་དཔེའི་འོད་གསལ་བསྣན་པ་བཞི་ནི་སྟོང་པ་བཞི་ཞེས་གྲགས་པ་སྨོས་ཟིན་པ་ལྟར་རོ།།

དེ་ཡང་སྣང་བ་ནི། ཀུན་རྟོག་གཡོ་བྱེད་ཀྱི་རླུང་དྷཱུ་ཏཱིར་ཐིམ་ནས་ཟླ་འོད་ལྟ་བུའི་སྣང་བ་འབྱུང་བས་སྣང་བ་དང་། ཐ་མལ་བའི་འདི་སྣང་ནུབ་པས་དེ་ཡིས་སྟོང་པ་དང་། གཙོ་བོ་ཀུན་རྟོག་བཞོན་པའི་རླུང་དང་བཅས་པས་སྟོང་པས་ན་སྟོང་པ་དང་། མཆེད་པ་ནི། སྣང་བ་དེ་ཉི་འོད་བཞིན་དུ་ཆེས་གསལ་བའི་སྒོ་ནས་སྣང་བས་སྣང་བ་མཆེད་པ་དང་། སྣང་བ་བཞོན་པའི་རླུང་དང་བཅས་པས་སྟོང་པས་ན་ཤིན་ཏུ་སྟོང་པ་དང་། ཉེར་ཐོབ་ནི། ཐུན་མཚམས་ཀྱི་སྨག་བཞིན་དུ་ཤིན་ཏུ་མི་གསལ་བར་སྣང་ཞིང་འོད་གསལ་དང་ཉེ་བས་ན་སྣང་བ་ཉེར་ཐོབ་དང་། མཆེད་པ་བཞོན་པའི་རླུང་དང་བཅས་པས་སྟོང་པས་སྟོང་པ་ཆེན་པོ་དང་། འོད་གསལ་ནི། མཁས་པ་འགའ་རེས་འདི་སྣང་དང་སྣང་བ་གསུམ་ཀུན་རྟོག་རླུང་དང་བཅས་པས་སྟོང་པས་སྟོང་པ་ཞེས་དང་། འགའ་རེས་འཆི་བ་འོད་གསལ་གྱི་ངོར་འཆར་བའི་སྟོང་པའམ་ཡུལ་འོད་གསལ་ནི་ཆོས་ཐམས་ཅད་བདེན་གྲུབ་ཀྱིས་སྟོང་པའི་སྟོང་པ་གཞིའི་ཆོས་ཉིད་དམ་སྟོང་ཉིད་ཡིན་ཕྱིར་ཐམས་ཅད་སྟོང་པ་ཞེས་བརྗོད་པ་ཡིན་པར་བཞེད་ལ། གང་ལྟར་ཡང་ཡེ་ཤེས་རྡོ་རྗེ་ཀུན་བཏུས་ལས། སྟོང་དང་སྟོང་པ་ཆེན་པོ་དང་། །ཤིན་ཏུ་སྟོང་པ་དངོས་མེད་པ། །ཐམས་ཅད་སྟོང་པ་ཟག་པ་མེད། །ཅེས་དང་། རྡོ་རྗེ་ཕྲེང་བ་ལས། སྟོང་དང་ཤིན་ཏུ་སྟོང་པ་དང་། །སྟོང་ཆེན་ཞེས་ཀྱང་རབ་ཏུ་བརྗོད། །ཅེས་གསུངས་པ་ལྟར་རོ།།

སྣང་བ་སོགས་སྐྱེ་ཚུལ་ནི། གཞིའི་དུས་སུ་སེམས་ཅན་ཐ་མལ་བ་འཆི་བ་ལ་ཕྱོགས་དུས་སུ་ས་ཆུ་ལ་ཐིམ་ཞིང་། དེའི་ཕྱི་རྟགས་སུ་ལུས་ལྕི་ཞིང་ཐུར་དུ་ས་ལ་བྱིང་བའི་སྣང་བ་འབྱུང་། ལུས་ལྷོད་ནས་འགུལ་བསྐྱོད་མི་ནུས། ནང་རྟགས་སུ་སྨིག་རྒྱུ་ལྟ་བུའི་སྣང་བ་འབྱུང་ངོ་། །ཆུ་མེ་ལ་ཐིམ་ཞིང་། དེའི་ཕྱི་རྟགས་སུ་ཁ་སྣའི་ཆུ་སྐམ། ལྕེ་ཐུང་དུ་འགྲོ། གཏམ་འགགས། ནང་རྟགས་སུ་དུ་བ་ལྟ་བུའི་སྣང་བ་འབྱུང་ངོ་།།

མེ་རླུང་ལ་ཐིམ་ཞིང་། དེའི་ཕྱི་རྟགས་སུ་ལུས་དྲོད་ཆུང་དུ་འགྲོ། དྲོད་མཐའ་ནས་ལྡོག། ནང་རྟགས་སུ་སྲིན་བུ་མེ་ཁྱེར་ལྟ་བུའི་སྣང་བ་འབྱུང་ངོ་། །ཀུན་རྟོག་གི་རླུང་སེམས་ལ་ཐིམ་ཞིང་། དེའི་ཕྱི་རྟགས་སུ་དབུགས་ཕྱི་རོལ་དུ་རིང་དུ་རྒྱུ་ཞིང་ནང་དུ་སྡུད་མི་ནུས། ནང་དུ་ཅུང་སྡུད་པ་ཡང་ཐུང་ཞིང་རྩུབ་པ་འབྱུང་། ནང་རྟགས་སུ་མར་མེ་རླུང་གིས་བསྐྱོད་པ་ལྟ་བུའི་སྣང་བ་འབྱུང་ངོ་།།

དེ་ནས་སྣང་བ་མཆེད་པ་ཉེར་ཐོབ་གསུམ་བྱུང་ནས་ཉེར་ཐོབ་ནག་ལམ་པའི་མཇུག་ཏུ་བརྒྱལ་ཞིང་། བརྒྱལ་སངས་པ་ན་ནམ་མཁའ་སྤྲིན་མེད་གཡའ་དག་གི་སྣང་བ་ལྟ་བུ་འཆར་ཏེ་ཐམས་ཅད་སྟོང་པ་འོད་གསལ་གྱི་སྣང་བ་འཆར་ཞིང་། དེའི་འོག་ཏུ་འོད་གསལ་ཉམས་ནས་ཉེར་ཐོབ་དང་། མཆེད་པ་དང་། སྣང་བ་རྣམས་རིམ་པར་ལུགས་ལྡོག་ཏུ་སྐྱེས་ནས་སླར་རང་བཞིན་བརྒྱད་ཅུའི་རྟོག་པ་རྣམས་བྱུང་ནས་བར་དོར་འཁྲུལ་བ་ཡིན་ནོ།།

སྨིག་རྒྱུ་སོགས་ཀྱི་རྟགས་འཆར་བ་ཡང་སྣང་བ་སྔ་མ་ཕྱི་མ་ལས་ཇེ་གསལ་དུ་སོང་བ་ལ་སྨིག་རྒྱུ་སོགས་དང་འདྲ་བར་བཤད་པ་ལས་དངོས་སུ་སྨིག་རྒྱུ་ལྟ་བུ་ལ་སོགས་པའི་སྣང་བ་འཆར་བ་ནི་མིན་པར་འདོད་མཁན་དང་། རྟགས་ཅན་གྱི་ཤེས་པ་བརྟན་པ་དང་གཡོ་བའི་ཚད་ཡིན་པར་འདོད་མཁན་དང་། དངོས་སུ་སྨིག་རྒྱུ་དང་། དུ་བ་ལྟ་བུའི་སྣང་བ་འཆར་བར་འདོད་མཁན་དང་གསུམ་ཡོད་ཅིང་། ཕྱི་མའི་བཞེད་པ་དེ་ལེགས་པར་རྗེ་བླ་མ་ཙོང་ཁ་པ་ཆེན་པོས་གསུངས་སོ།།

རྟགས་ལྔ་ཞེས་པ་སྨིག་རྒྱུ་དུ་བ་མེ་ཁྱེར་མར་མེ་ནམ་མཁའ་ལྔའི་རྟགས་དེ་དག་དང་། རྟགས་བརྒྱད་ཅེས་པའི་སྐབས་སུ་དེ་ལྔའི་སྟེང་དུ་ཟླ་ཉི་མུན་པ་ལྟ་བུའི་སྣང་མཆེད་ཐོབ་གསུམ་གྱི་སྣང་བའི་རྟགས་དེ་བསྣན་པས་བརྒྱད་དོ།།

དེ་ཡང་ཟླ་ཉི་མུན་གསུམ་ནི་སྣང་མཆེད་ཐོབ་གསུམ་གྱི་རང་དུས་སུ་སྣང་བ་དང་། སྤྲིན་མེད་ནམ་མཁའ་གཡའ་དག་ནི་ཐམས་ཅད་སྟོང་པ་འོད་གསལ་གྱི་རང་དུས་སུ་འཆར་བ་དང་། སྨིག་རྒྱུ་སོགས་བཞི་ནི་སྟོང་བཞིའི་ཡེ་ཤེས་རྒྱུད་ལ་སྐྱེ་བའི་སྔ་ལྟས་སུ་འཆར་བའི་རྟགས་ཡིན་ནོ།།

སེམས་མི་རྟོག་པ་ལ་མཉམ་པར་བཞག་པས་རྟགས་དེ་དག་དང་འདྲ་བ་འཆར་བ་ཡོད་མོད་དེ་ནི་སྟོང་བཞིའི་ཡེ་ཤེས་སྐྱེ་བའི་རྟགས་མ་ཡིན་ལ། སྟོང་བཞིའི་ཡེ་ཤེས་སྐྱེ་བའི་རྟགས་ནི་གཡས་གཡོན་གྱི་རླུང་དྷཱུ་ཏཱིར་བསྟིམས་ནས་ལུས་ལ་གནད་དུ་བསྣུན་ནས་བྱུང་བའི་རྟགས་ཡིན་དགོས་ལ། ལུས་ལ་གནད་དུ་བསྣུན་པའི་སྐབས་སུ་ཡང་དབང་པོའི་སྒོ་ནས་ཕྱི་རོལ་དུ་ཆེར་གཡོ་བའི་རླུང་རྣམས་ཅུང་ཟད་ནང་དུ་ལྡོག་པར་རྩོམ་པ་དང་། ཅུང་ཟད་ལོག་པ་དང་། དབུ་མར་ཅུང་ཟད་ཚུད་པ་ནས་བཟུང་ལམ་མཐོན་པོར་སླེབས་པའི་སྐབས་ཀྱི་རླུང་ལྡོག་པའི་བར་དུ་བྱུང་བའི་རྟགས་དུ་མ་ཞིག་ཡོད་པ་དང་། སྟར་སྣང་གི་རྟགས་ཀྱང་ཡོད་པར་གསུངས་སོ།།

དེ་ལྟར་འཆི་དུས་སྣང་མཆེད་ཐོབ་གསུམ་ལུགས་འབྱུང་ལུགས་ལྡོག་ཏུ་སྐྱེ་བ་ཡོད་ལ། གཉིད་མཐུག་པོར་འགྲོ་བ་དང་། བརྒྱལ་བ་དང་། ཕོ་མོ་སྦྱོར་བ་ལ་སོགས་པའི་སྐབས་ནའང་འབྱུང་དུ་ཡོད་པས་དེ་དག་གི་དུས་ཀྱི་དེ་གསུམ་ནི་སྣང་མཆེད་ཐོབ་གསུམ་རྗེས་མཐུན་པ་དང་། འཆི་དུས་དང་། བསྒོམས་སྟོབས་ཀྱིས་རླུང་དབུ་མར་ཐིམ་དུས་སུ་མཚན་ཉིད་པ་སྐྱེ་བ་ཡོད་ཅིང་། འཆི་བའི་དུས་སུ་སྣང་མཆེད་ཐོབ་གསུམ་ལུགས་འབྱུང་དུ་བྱུང་བའི་སྔོན་དུ་རང་བཞིན་བརྒྱད་ཅུའི་རྟོག་པ་རྣམས་འགགས་པ་ཡིན་པར་བཤད་དོ།།

དེ་དག་སོ་སོར་ངོས་འཛིན་ཚུལ་བཤད་ན་འདི་ལྟ་སྟེ། དེ་དག་ལ་ལུགས་འབྱུང་ལྡོག་གཉིས་ཡོད་པ་ལས། ཕྱག་རྒྱ་ཆེན་པོའི་ཐིག་ལེའི་རྒྱུད་ལས། སྣང་བ་ཟླ་བ་ཞེས་སུ་བསྟན། །ཞེས་གསུངས་པ་ལྟར། དང་པོ་ལུགས་འབྱུང་གི་སྣང་བ་ནི། ལུགས་འབྱུང་གི་སྟོང་པ་གསུམ་པོ་གང་རུང་གང་ཞིག། རང་རྒྱུ་ཀུན་རྟོག་བཞོན་པའི་རླུང་དང་བཅས་པ་ཐིམ་པ་ལས་བྱུང་ཞིང་སྟོན་ནམ་གཡའ་དག་པ་ལ་མཚན་མོ་ཟླ་འོད་ཀྱིས་ཁྱབ་པ་ལྟ་བུའི་སྟོང་སང་དཀར་ལམ་པའི་སྣང་བ་འཆར་བ་ལས་གཞན་པའི་གཉིས་སྣང་རགས་པ་འགགས་པའི་ཡིད་ཀྱི་ཤེས་པ་

དེ་ལུགས་འབྱུང་གི་སྣང་བའི་མཚན་ཉིད། འདི་ལ་སྣང་བ་དང་། སྟོང་པ་དང་། ཤེས་རབ་དང་། སེམས་དང་། གཞན་དབང་ཞེས་པའི་ངོ་བོ་དང་ལྡན་པས་དེ་དག་གིས་མིང་གིས་བརྗོད་དེ། ཀླུ་སྒྲུབ་ཀྱི་རིམ་ལྔ་ལས། སྣང་བ་སྟོང་པ་ཤེས་རབ་དང་། །སེམས་དང་གཞན་གྱི་དབང་དག་སྟེ། །ཞེས་གསུངས་པའི་ཕྱིར་རོ།།

དེ་ཡང་བཤད་མ་ཐག་པ་ལྟར་རང་མངོན་དུ་གྱུར་པའི་སྣང་ངོར་སྟོན་ནམ་གཡའ་དག་པ་ལ་མཚན་མོ་ཟླ་འོད་ཀྱིས་ཁྱབ་པ་ལྟར་དཀར་ལམ་གྱི་སྣང་བ་སྣང་བས་ན་སྣང་བ་དང་། འདི་སྣང་འགགས་པ་དང་། རང་བཞིན་བརྒྱད་ཅུ་བཞོན་པའི་རླུང་དང་བཅས་པ་འགགས་ཤིང་དེ་དག་གིས་སྟོང་པས་སྟོང་པ་དང་། ལམ་དུས་དེ་ཉམས་སུ་ལེན་པའི་ཚེ་བདེ་སྟོང་གཉིས་ལས་ཐབས་བདེ་བ་ཤས་ཆུང་ཞིང་ཤེས་རབ་སྟོང་ཉམས་ཆེ་བས་ཤེས་རབ་དང་། རང་གི་ཡུལ་ཐམས་ཅད་ལ་རྟོག་པས་ན་སེམས་དང་། སྔགས་དང་ཕྱག་རྒྱའི་རྒྱུ་རྐྱེན་གཞན་གྱི་དབང་ལས་བྱུང་བས་གཞན་དབང་གི་ངོ་བོར་གྲུབ་པ་ཡིན་ཞིང་དེ་སྐད་ཅེས་བརྗོད་པ་ཡིན་པར་གསུངས་སོ།།

གཞི་དུས་སུ་སྣང་མཆེད་ཐོབ་གསུམ་གྱི་རང་བཞིན་ཀུན་ཏུ་རྟོག་པ་བརྒྱད་ཅུ་ཡོད་པར་བཤད་ཅིང་། དེ་ཡང་དང་པོ་ལ་ཀུན་རྟོག་སོ་གསུམ་དང་། གཉིས་པ་ལ་བཞི་བཅུ་དང་། གསུམ་པ་ལ་བདུན་ཡོད་པར་བཤད་དེ། དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རྟོག་པ་དང་ལྡན་པའི་རང་བཞིན་གྱི་སྣང་བ། རང་བཞིན་སུམ་བཅུ་རྩ་གསུམ་དང་། མཚན་ཉིད་བཞི་བཅུ་དང་མ་རིག་པའི་སྐད་ཅིག་མ་བདུན་དུ་རབ་ཏུ་གསལ་བར་ཉིན་དང་མཚན་དུ་སྤྱོད་པས། རྗེས་སུ་ཉམས་སུ་མྱོང་བར་བྱེད་པ་མ་དག་པའི་དུས་སོ། །ཞེས་གསུངས་པའི་ཕྱིར་རོ།།

དེ་ལྟར་ན་དང་པོ་འདིར་སྣང་བའི་རང་བཞིན་ཀུན་རྟོག་སོ་གསུམ་ནི། ཀླུ་སྒྲུབ་ཀྱི་རིམ་ལྔ་ལས། ཆགས་བྲལ་དང་ནི་བར་མ་ཉིད། །དེ་བཞིན་དུ་ནི་ཆེན་པོ་དག །ཡིད་ལ་འགྲོ་ཞིང་འོང་བ་དང་། །མྱ་ངན་ལ་སོགས་གསུམ་དེ་བཞིན། །ཞི་དང་རྣམ་རྟོག་འཇིགས་པ་དང་། །འཇིགས་པ་བར་དང་ཤིན་ཏུ་འཇིགས། །སྲེད་དང་སྲེད་པ་བར་མ་དང་། །ཤིན་ཏུ་སྲེད་དང་ཉེར་ལེན་པ། །མི་དགེ་བཀྲེས་དང་སྐོམ་ཉིད་དང་། །ཚོར་དང་ཚོར་བ་བར་མ་དང་། །ཤིན་ཏུ་ཚོར་བའི་སྐད་ཅིག་དང་། །རིག་པ་པོ་དང་རིག་འཛིན་བཞི། །སོ་སོར་རྟོག་དང་ངོ་ཚ་ཤེས། །སྙིང་རྗེ་དང་ནི་བརྩེ་བ་གསུམ། །དོགས་དང་བསམ་པ་ཉིད་དང་ནི། །ཕྲག་དོག་ཅེས་ནི་བྱ་བར་གྲགས། །རང་བཞིན་སུམ་ཅུ་རྩ་གསུམ་གང་། །ལུས་ཅན་རྣམས་ཀྱི་རང་རིག་སྟེ། །ཞེས་གསུངས་པ་ལྟར་རོ།།

སྣང་བ་འདི་ཡི་མིང་ལ་ཀུན་རྫོབ་ཀྱི་གཟུགས་ཀྱི་སྣང་བ་གསལ་བའི་ཆོས་མཐུན་སྦྱར་ནས་སྣང་བའི་ངོ་བོ་མཚོན་བྱེད་ཀྱི་མཚན་མོ་དང་། བུད་མེད་དང་། འཇམ་པོ་དང་། གཡོན་པ་དང་། ཟླ་བ་དང་། པདྨ་ཅན་དང་། དང་པོའི་ཡི་གེ་དང་། ཐིག་ལེ་དང་། ཟླ་བའི་འོད་ཟེར་ཞེས་པའི་མིང་གིས་སྣང་བའི་ཡེ་ཤེས་ལ་བརྗོད་པ་དང་དེའི་དོན་དུ་སྦྱར་དུ་ཡོད་པ་ཡིན་ཏེ། ཀླུ་སྒྲུབ་ཀྱི་རིམ་ལྔ་ལས། ཀུན་རྫོབ་གསལ་བའི་གཟུགས་ཀྱིས་ནི། །མཚན་མོའི་མིང་དུ་ངེས་པར་བཤད། །དེ་བཞིན་བུད་མེད་མིང་དུ་བརྗོད། །འཇམ་པོ་ལྟ་བུའང་དེ་བཞིན་ནོ། །གཡོན་པའི་མིང་ཡང་དེ་ཉིད་དེ། །ཟླ་བའི་དཀྱིལ་འཁོར་པདྨ་ཅན། །བརྟན་པར་བྱ་བའི་རྒྱུར་གྱུར་པ། །དང་པོའི་ཡི་གེ་ཐིག་ལེར་བཅས། །ཟླ་བའི་འོད་ཟེར་ལྟར་སྣང་ཞིང་། །སྣང་བའི་ཡེ་ཤེས་ཡང་དག་འབྱུང་། །ཞེས་གསུངས་པའི་ཕྱིར་རོ།།

གཉིས་པ་མཆེད་པ་ནི། ཕྱག་རྒྱ་ཆེན་པོའི་ཐིག་ལེའི་རྒྱུད་ལས། སྣང་བ་མཆེད་པ་ཉི་མའོ། །ཞེས་གསུངས་པ་ལྟར། ལུགས་འབྱུང་གི་སྟོང་པ་གསུམ་པོ་གང་རུང་གང་ཞིག། རང་རྒྱུ་སྣང་བ་བཞོན་པའི་རླུང་དང་བཅས་པ་ཐིམ་པ་ལས་བྱུང་ཞིང་སྟོན་ནམ་གཡའ་དག་པ་ལ་ཉི་འོད་ཀྱིས་ཁྱབ་པ་ལྟ་བུའི་སྟོང་སང་དམར་ལམ་པའི་སྣང་བ་འཆར་བ་ལས་གཞན་པའི་གཉིས་སྣང་རགས་པ་འགགས་པའི་ཡིད་ཀྱི་ཤེས་པ་དེ་ལུགས་འབྱུང་གི་སྣང་བ་མཆེད་པའི་མཚན་ཉིད། འདིའི་ངོ་བོ་ཡང་། ཤིན་ཏུ་སྟོང་པ་དང་། ཐབས་དང་། སྣང་བ་མཆེད་པ་དང་། ཀུན་བཏགས་དང་། སེམས་ལས་བྱུང་བའི་ངོ་བོ་དང་ལྡན་པས་དེ་དག་གིས་མིང་གིས་བརྗོད་དེ། ཀླུ་སྒྲུབ་ཀྱི་རིམ་ལྔ་ལས། ཤིན་ཏུ་སྟོང་པ་ཐབས་ལྡན་པ། །སྣང་བ་མཆེད་པ་ཞེས་བརྗོད་དེ། །དེ་བཞིན་དུ་ནི་ཀུན་བརྟགས་དང་། །དེ་བཞིན་སེམས་ལས་བྱུང་བར་བཤད། །ཅེས་གསུངས་པའི་ཕྱིར་རོ།།

ཡང་གོང་དུ་སྨོས་ཟིན་ལྟར་རང་བཞིན་བརྒྱད་ཅུ་བཞོན་པའི་རླུང་དང་བཅས་པ་མ་ཟད་སྣང་བ་བཞོན་རླུང་དང་བཅས་པ་འགགས་ཤིང་དེ་དག་གིས་སྟོང་པས་ཤིན་ཏུ་སྟོང་པ་དང་། ལམ་དུས་དེ་ཉམས་སུ་ལེན་པའི་ཚེ་བདེ་སྟོང་གཉིས་ལས་སྣང་བ་དང་མི་འདྲ་བར་འདི་བདེ་བ་ཤས་ཆེ་བས་ཐབས་དང་ལྡན་པ་དང་། ཉི་འོད་ལྟ་བུའི་སྣང་དམར་ལམ་པ་མཆེད་ཅིང་གསལ་བས་མཆེད་པ་དང་། སྟོང་པ་རྣམས་ཀྱི་ཐོག་མའི་གཞི་སྣང་བ་ཡིན་ཞིང་། དེ་ལ་བརྟེན་ནས་བྱུང་བ་ཡིན་པས་ཀུན་བཏགས་དང་། སེམས་ཀྱི་བྱེ་བྲག་ཏུ་བྱུང་བ་ཡིན་པས་སེམས་བྱུང་ཞེས་དེ་དག་གི་ཚུལ་དང་མཐུན་ཞིང་ངོ་བོར་གྲུབ་པའི་རྒྱུ་མཚན་དེ་ལྟར་བརྗོད་པ་ཡིན་ནོ།།

མཆེད་པའི་རང་བཞིན་ཀུན་ཏུ་རྟོག་པ་བཞི་བཅུ་ནི། ཀླུ་སྒྲུབ་ཀྱི་རིམ་ལྔ་ལས། ཆགས་དང་ཞེན་དང་དེ་བཞིན་དགའ། །དགའ་བ་བར་མ་ཤིན་ཏུ་དགའ། །རངས་དང་རབ་ཏུ་མགུ་བ་དང་། །ངོ་མཚར་དེ་བཞིན་དགོད་པ་དང་། །ཚིམ་དང་དེ་བཞིན་འཁྱུད་པ་དང་། །འོ་བྱེད་དེ་བཞིན་འཇིབ་པ་དང་། །བརྟན་དང་བརྩོན་དང་ང་རྒྱལ་དང་། །བྱ་དང་འཕྲོག་དང་སྟོབས་དང་ནི། །སྤྲོ་དང་ལྷན་ཅིག་སྐྱེས་ཉིད་དང་། །དེ་བཞིན་ལྷན་སྐྱེས་བར་མ་དང་། །ཤིན་ཏུ་ལྷན་ཅིག་སྐྱེས་དང་གྲག །རྣམ་པར་སྒེག་དང་ཞེ་འགྲས་ཉིད། །དགེ་དང་ཚིག་གསལ་བདེན་པ་དང་། །མི་བདེན་པ་དང་དེ་བཞིན་ངེས། །ཉེ་བར་མི་ལེན་སྦྱིན་པའོ། །སྐུལ་དང་དེ་བཞིན་དཔའ་བོ་དང་། །ངོ་ཚ་མེད་དང་སྒྱུ་དང་གདུག །མི་སྲུན་པ་དང་གྱ་གྱུ་ཉིད། །མཚན་ཉིད་བཞི་བཅུ་གང་ཡིན་པ། །ཤིན་ཏུ་སྟོང་པའི་སྐད་ཅིག་སྟེ། །ཞེས་གསུངས་པ་ལྟར་རོ།།

མཆེད་པ་འདི་ཡི་མིང་ལ་ཀུན་རྫོབ་ཀྱི་གཟུགས་ཀྱི་སྣང་བ་གསལ་བའི་ཆོས་མཐུན་སྦྱར་ནས་སྣང་བ་མཆེད་པའི་ངོ་བོ་མཚོན་བྱེད་ཉིན་མོ་དང་། སྐྱེས་པ་དང་། རྩུབ་མོ་དང་། གཡས་པ་དང་། ཉི་མ་དང་། རྡོ་རྗེ་དང་། ཐིག་ལེ་དང་། གཉིས་ཀྱི་མིང་གིས་སྣང་བ་མཆེད་པའི་ཡེ་ཤེས་ལ་བརྗོད་པ་དང་དེའི་དོན་དུ་སྦྱར་དུ་ཡོད་པ་ཡིན་ཏེ། ཀླུ་སྒྲུབ་ཀྱི་རིམ་ལྔ་ལས། ཉིན་མོ་སྐྱེས་པའི་མིང་དང་ནི། །རྩུབ་མོ་གཡས་པར་བསྟན་པ་ཡིན། །ཉི་མའི་དཀྱིལ་འཁོར་མིང་དང་ནི། །དེ་བཞིན་དུ་ནི་རྡོ་རྗེའི་མིང་། །ཐིག་ལེ་གཉིས་ཀྱིས་བརྒྱན་པ་ཡི། །ཆ་རུ་དེ་ཉིད་ཤེས་པར་བྱ། །ཉི་མའི་འོད་ཟེར་འདྲ་བ་ཡང་། །སྣང་བ་མཆེད་པའི་སྦྱོར་ལས་བྱུང་། །ཞེས་གསུངས་པའི་ཕྱིར་རོ།།

གསུམ་པ་ཉེར་ཐོབ་ནི། ཕྱག་རྒྱ་ཆེན་པོའི་ཐིག་ལེའི་རྒྱུད་ལས། མཚམས་ནི་སྣང་བ་ཐོབ་པར་གྲགས། །ཞེས་གསུངས་པ་ལྟར། ལུགས་འབྱུང་གི་སྟོང་པ་གསུམ་པོ་གང་རུང་གང་ཞིག། རང་རྒྱུ་མཆེད་པ་བཞོན་པའི་རླུང་དང་བཅས་པ་ཐིམ་པ་ལས་བྱུང་ཞིང་སྟོན་ནམ་གཡའ་དག་པ་ལ་སྲོད་ཀྱི་སྨག་མཐུག་པོས་ཁྱབ་པ་ལྟ་བུའི་སྟོང་སང་ནག་ལམ་པའི་སྣང་བ་འཆར་བ་ལས་གཞན་པའི་གཉིས་སྣང་རགས་པ་འགགས་པའི་ཡིད་ཀྱི་ཤེས་པ་དེ་ལུགས་འབྱུང་གི་ཉེར་ཐོབ་ཀྱི་མཚན་ཉིད། འདིའི་ངོ་བོ་ཡང་། རང་དུས་སུ་སྨག་ནག་པོས་ཁྱབ་པ་ལྟ་བུ་སྣང་བ་མི་གསལ་ཞིང་ཕྲ་བས་ན་སྣང་བ་ཐོབ་པ་ཞེས་དང་། དེ་ལྟ་བུའི་སྣང་བ་མི་གསལ་བ་ཕྲ་བ་ཐོབ་ཅིང་འོད་གསལ་གྱི་ཤེས་པ་དང་ཉེ་བའི་ཕྱིར་ན་ཉེ་བར་ཐོབ་པ་ཞེས་དང་། ཉེར་ཐོབ་རང་དུས་སུ་སྣང་མཆེད་གཉིས་ཀྱི་སྣང་བ་འགགས་ནས་མི་སྣང་བས་ཡོངས་གྲུབ་དང་། ཉེར་ཐོབ་ནི་སྣང་མཆེད་གཉིས་ལས་ཀྱང་སྣང་བ་མི་གསལ་བ་དང་ཕྲ་བས་ན་མ་རིག་པ་དང་། མཆེད་པ་བཞོན་པའི་རླུང་དང་བཅས་པས་སྟོང་པས་ན་སྟོང་པ་ཆེན་པོ་ཞེས་པ་རྣམས་ཀྱི་མིང་གི་རྣམ་གྲངས་དང་ངོ་བོའི་དོན་དེ་ལྟར་ཡིན་པར་རྒྱལ་བས་གསུངས་ཏེ། ཀླུ་སྒྲུབ་ཀྱི་རིམ་ལྔ་ལས། སྣང་བ་ཐོབ་པ་དག་དང་ནི། །ཉེ་བར་ཐོབ་པ་དེ་བཞིན་ཏེ། །ཡོངས་སུ་གྲུབ་པ་ཉིད་དང་ནི། །མ་རིག་པ་ནི་ཉིད་ཅེས་བྱ། །སྟོང་པ་ཆེན་པོའི་ཚིག་གིས་ནི། །རྣམ་གྲངས་འདི་དག་རྒྱལ་བས་གསུངས། །ཞེས་གསུངས་པའི་ཕྱིར་རོ།།

ཉེར་ཐོབ་ཀྱི་རང་བཞིན་གྱི་རྟོག་པ་བདུན་ནི། ཀླུ་སྒྲུབ་ཀྱི་རིམ་ལྔ་ལས། ཆགས་པ་བར་མའི་སྐད་ཅིག་དང་། །བརྗེད་ངས་པ་དང་འཁྲུལ་པ་དང་། །མི་སྨྲ་གྱུར་དང་སྐྱོ་བ་དང་། །ལེ་ལོ་དེ་བཞིན་ཐེ་ཚོམ་སྟེ། །མ་རིག་སྐད་ཅིག་བདུན་པོ་ནི། །ཕྲ་མོའི་རྣལ་འབྱོར་པས་ཤེས་བྱ། །ཞེས་གསུངས་པ་ལྟར་རོ།།

ཀུན་རྫོབ་ཀྱི་ཆོས་དང་མཐུན་པའི་མིང་དང་། ཉེར་ཐོབ་ཀྱི་ངོ་བོ་མཚོན་པ་ནི། ས་བོན་ཨཱཿ དང་ཐིག་ལེ་དང་ལྡན་པའི་ཨོཾ་ལས་བྱུང་བ་མིན་པར་ཨ་རྐྱང་པས་མཚོན་པ་དང་། ཉེར་ཐོབ་མངོན་དུ་གྱུར་དུས་སྲོག་རྩོལ་གྱི་རླུང་མི་རྒྱུ་བར་འགགས་པས་རླུང་གི་སྒོ་སྣ་བུག་ནས་བྱུང་བ་མིན་པ་དང་། ཉེར་ཐོབ་འབྱུང་བ་ལ་ཐོག་མར་སྣང་བ་དང་། བར་དུ་མཆེད་པ་དང་། དེ་ནས་ཉེར་ཐོབ་ཐོབ་པས་ན་ཉེར་ཐོབ་ནི་ཐོབ་པ་ཡོངས་སུ་རྫོགས་པའི་ངོ་བོའམ་མཚན་ཉིད་ཅན་ཡིན་ཏེ། ཡང་དེ་ཉིད་ལས། ས་བོན་ཐིག་ལེ་ལྡན་མིན་ལ། །རླུང་གི་སྒོ་ནས་འབྱུང་བ་མིན། །གང་ཞིག་སྣང་བ་ཐོབ་པ་ནི། །ཡོངས་སུ་རྫོགས་པའི་མཚན་ཉིད་དོ། །ཞེས་གསུངས་པའི་ཕྱིར་རོ།།

གཞན་ཡང་ཉེར་ཐོབ་ཀྱི་ངོ་བོ་མཚོན་པའི་མིང་གི་རྣམ་གྲངས་གཞན་ལ། མ་ནིང་དང་། ཐུན་མཚམས་དང་། གཡས་གཡོན་མིན་པས་ན་དབུས་དང་། འཇམ་རྩུབ་མིན་པས་བར་མ་དང་། ཐབས་ཤེས་འདྲེས་པའི་འདྲེས་མ་དང་། གདན་ཟླ་ཉི་གཉིས་ཀ་དང་། ཕྱག་མཚན་རྡོ་རྗེ་པདྨ་འདྲེས་པས་འདྲེས་པ་ཞེས་པའི་ངོ་བོ་དང་མིང་གིས་ཀྱང་བསྟན་པ་ཡོད་དོ།།

ཁ་ཅིག་སྣང་བ་དང་རང་བཞིན་རྣམས་སྤེལ་ནས་སྐྱེ་བ་དང་ཐིམ་པའམ་འགགས་པར་འདོད་པ་ནི་མི་འཐད་པར་སྐྱེས་པའི་དུས་སུ་སྣང་བ་གསུམ་སྐྱེས་པའི་རྗེས་སུ་རང་བཞིན་རྣམས་སྐྱེ་བ་དང་། ཐིམ་པའམ་འགགས་པའི་དུས་སུ་རང་བཞིན་རྣམས་འགགས་པའི་རྗེས་སུ་སྣང་བ་གསུམ་འགགས་པ་ཡིན་པར་འདོད་དེ། རྒྱུ་མཚན་ནི། ཤེས་པ་ཕྲ་རགས་སྤེལ་ནས་སྐྱེ་བ་དང་འགགས་པ་མི་སྲིད་པའི་ཕྱིར། དེར་ཐལ། སྐྱེས་པའི་ཚེ་སེམས་སམ་ཤེས་པ་ནི་ཕྲ་རིམ་ནས་རགས་སུ་འགྲོ་བ་དང་། ཐིམ་པའམ་འགགས་པའི་ཚེ་རགས་རིམ་ནས་ཕྲ་བར་འགྲོ་བ་ཡིན་པའི་ཕྱིར་རོ།།

འོ་ན་རང་བཞིན་བརྒྱད་ཅུ་པོ་དེ་སྣང་བ་གསུམ་གྱི་རང་བཞིན་དུ་བཤད་པས་སྣང་བ་གསུམ་དང་རང་བཞིན་ནམ་ངོ་བོ་གཅིག་པས་དེ་དག་གི་རང་བཞིན་དུ་བཤད་པ་ཡིན་ནམ་ཞེ་ན། དེ་ནི་མ་ཡིན་ཏེ། རང་བཞིན་གྱི་རྟོག་པ་ཚན་པ་གསུམ་པོ་རྣམས་ཀྱིས་སྣང་བ་གསུམ་པོ་དེ་བྱ་རོག་གིས་ཁང་བཟང་མཚོན་པ་ལྟར་མཚོན་པར་བྱེད་པས་ན་སྣང་བའི་མཚན་ཉིད་དང་རང་བཞིན་ཞེས་བརྗོད་པ་ལས། མཚོན་བྱ་མཚོན་བྱེད་ངོ་བོ་གཅིག་པའི་སྒོ་ནས་མཚོན་པ་ནི་མ་ཡིན་པའི་ཕྱིར་རོ།།

རང་བཞིན་རྣམས་ཀྱིས་སྣང་བ་གསུམ་ཇི་ལྟར་བྱས་ཏེ་དཔོག་ནུས་པ་ཡིན་ཞེ་ན། འདི་ལྟ་སྟེ། རང་བཞིན་གྱི་རྟོག་པ་རྣམས་ལ་ཤས་ཆེ་ཆུང་བར་མ་གསུམ་ཡོད་པ་ནི་དེ་དག་གི་བཞོན་པ་རླུང་ལ་ཤས་ཆེ་ཆུང་བར་གསུམ་ཡོད་པའི་དབང་གིས་ཡིན་ཞིང་། དེ་ཇི་བཞིན་དུ་དེ་དག་བསྐྱེད་པའི་ལག་རྗེས་འཇོག་མཁན་གྱི་སྣང་བ་གསུམ་གྱི་བཞོན་པའི་རླུང་ལ་ཡང་གཡོ་བ་ཆེ་འབྲིང་ཆུང་གསུམ་གྱི་ཤས་ཆེ་ཆུང་ཡོད་པར་དཔོག་ནུས་པ་ཡིན་ཕྱིར་རང་བཞིན་བརྒྱད་ཅུ་པོ་དེ་སྣང་བ་གསུམ་གྱི་དཔོག་བྱེད་དང་། མཚོན་བྱེད་དང་། མཚན་ཉིད་དང་། རང་བཞིན་ཞེས་བཤད་པ་ཡིན་ནོ།།

འདི་ལ་སྣང་བ་གསུམ་ཆོས་ཅན། ཁྱོད་ཀྱི་བཞོན་པའི་རླུང་ལ་གཡོ་བ་ཆེ་ཆུང་བར་མ་གསུམ་ཡོད་དེ། ཁྱོད་ཀྱིས་ལག་རྗེས་བཞག་པ་ལ་བརྟེན་ནས་བྱུང་བའི་རང་བཞིན་རྟོག་པ་ཚན་གསུམ་གྱི་བཞོན་པའི་རླུང་ལ་གཡོ་བ་ཤས་ཆེ་ཆུང་བར་མ་གསུམ་ཡོད་པའི་ཕྱིར། ཞེས་པའི་རྟགས་སྦྱོར་བཀོད་ན་རྟགས་སྦྱོར་རྣམ་དག་ཏུ་འགྲོ་བར་པཎ་ཆེན་བློ་བཟང་ཆོས་རྒྱན་གྱིས་གསུངས་སོ།།

དེ་ཡང་རང་བཞིན་གྱི་ཀུན་རྟོག་སོ་གསུམ་དང་། བཞི་བཅུ་དང་། བདུན་ཏེ་ཚན་གསུམ་སྡོམ་པ་བརྒྱད་ཅུ་པོ་ལུགས་ལྡོག་གི་སྣང་བ་གསུམ་གྱི་འབྲས་བུ་ཡིན་ཞིང་། དེ་ཡང་གསུམ་ཀའི་འབྲས་བུ་ཡིན་པ་ལ་མཚུངས་ཀྱང་། རང་བཞིན་གྱི་རྟོག་པ་བདུན་པོ་དེ་ཉེར་ཐོབ་ཀྱི་འབྲས་བུར་འཇོག་པའི་རྒྱུ་མཚན་ནི། རང་བཞིན་བདུན་པོའི་བཞོན་པའི་རླུང་དེ་གཡོ་བ་ཤིན་ཏུ་ཞན་པ་སྟེ་ཕྲ་བ་ནི་ཉེར་ཐོབ་ཀྱི་བཞོན་པར་གྱུར་པའི་རླུང་ཤིན་ཏུ་ཞན་པའམ་ཕྲ་བ་དེས་བཞག་པའི་ལག་རྗེས་ཡིན་པའི་ཕྱིར་དེའི་འབྲས་བུར་བཞག་པའོ།།

དེ་བཞིན་དུ་རང་བཞིན་བཞི་བཅུ་པོ་སྤྱིར་སྣང་བ་གསུམ་ཀའི་འབྲས་བུ་ཡིན་ཡང་བྱེ་བྲག་མཆེད་པའི་འབྲས་བུར་འཇོག་པའི་རྒྱུ་མཚན་ནི། རང་བཞིན་བཞི་བཅུ་པོའི་བཞོན་པའི་རླུང་དེ་གཡོ་བ་ཤས་བར་མ་སྟེ་འབྲིང་དུ་གྱུར་པ་ནི་མཆེད་པའི་བཞོན་པར་གྱུར་པའི་རླུང་གཡོ་བ་ཤས་བར་མ་དེས་བཞག་པའི་ལག་རྗེས་ཡིན་པའི་ཕྱིར་ན་དེའི་འབྲས་བུར་བཞག་པའོ།།

ཡང་རང་བཞིན་གྱི་ཀུན་རྟོག་སོ་གསུམ་པོ་སྣང་བ་གསུམ་ཀའི་འབྲས་བུ་ཡིན་པ་འདྲ་ཡང་བྱེ་བྲག་སྣང་བའི་འབྲས་བུར་འཇོག་པའི་རྒྱུ་མཚན་ནི། རང་བཞིན་སོ་གསུམ་པོའི་བཞོན་པའི་རླུང་དེ་གཡོ་བ་ཤས་ཆེ་བའམ་རགས་པར་གྱུར་པ་ནི་སྣང་བའི་བཞོན་པར་གྱུར་པའི་རླུང་གཡོ་བ་རགས་པ་དེས་བཞག་པའི་ལག་རྗེས་ཡིན་པའི་ཕྱིར་ན་དེ་ལྟར་བཞག་པར་འདོད་དོ།།

རང་བཞིན་བརྒྱ་དང་དྲུག་ཅུར་དབྱེ་བའང་ཡོད་ལ། དེའི་དོན་ནི་ཉིན་མོའི་དུས་ཀྱི་ཀུན་རྟོག་བརྒྱད་ཅུ་དང་། མཚན་མོའི་དུས་ཀྱི་ཀུན་རྟོག་བརྒྱད་ཅུ་སྟེ་ཉིན་མཚན་གྱིས་ཕྱེས་པ་ཡིན་ལ། རླུང་བརྒྱ་རྩ་བརྒྱད་ཀྱི་བཞོན་པ་ཅན་གྱིས་བསྐྱོད་པའམ་གཡོ་བའི་ཀུན་རྟོག་བརྒྱ་དང་རྩ་བརྒྱད་ཡོད་པར་ཡང་བཤད་དོ།།

གཞིའི་དུས་སུ་སྣང་བ་གསུམ་ཐིམ་དུས་རང་བཞིན་རྣམས་ཐིམ་ལ། སྣང་བ་གསུམ་ལུགས་ལྡོག་ཏུ་ཐིམ་ནས་སྐྱེ་དུས་ཀུན་རྟོག་རྣམས་སྐྱེ་བ་དང་། གང་ཟག་ཐ་མལ་བས་རང་སྐྱེ་འཆི་སོགས་ཀྱི་དུས་སུ་སྣང་བ་གསུམ་འོད་གསལ་དང་བཅས་པ་ཉམས་སུ་མྱོང་ན་ཡང་དེ་ལ་མངོན་སུམ་གྱི་སྟོབས་ཀྱིས་ངེས་པ་འདྲེན་མི་ནུས་ལ། ལམ་དུས་སུ་རྣལ་འབྱོར་བས་སྣང་བ་གསུམ་སྒོམ་སྟོབས་ཀྱིས་ངེས་པ་འདྲེན་ནུས་ཤིང་། དེ་གསུམ་ཐིམ་དུས་སྣང་བ་གསུམ་དང་འོད་གསལ་རྣམས་ལ་ངེས་པ་སྐྱེས་ནས་སྒྱུ་མའི་སྐུ་གྲུབ་པ་ཡིན་ནོ།།

སྒྱུ་ལུས་བཤད་པ།

རིམ་ལྔའི་རིམ་པ་གསུམ་པ་བདག་བྱིན་རླབས་ཀྱི་རིམ་པའམ་ཀུན་རྫོབ་སྒྱུ་མའི་རྫོགས་རིམ་མམ་སྒྱུ་ལུས་ཀྱི་རིམ་པ་ཞེས་པ་ནི། སེམས་དབེན་མཐར་ཐུག་དཔེ་ཡི་འོད་གསལ་ལས་རླུང་ཅུང་གཡོས་ཏེ་ལུགས་ལྡོག་གི་ཉེར་ཐོབ་གྲུབ་པ་དང་དུས་མཉམ་དུ་སེམས་དབེན་མཐར་ཐུག་དཔེ་ཡི་འོད་གསལ་གྱིས་ལྷན་ཅིག་བྱེད་རྐྱེན་དང་། དེའི་བཞོན་པར་གྱུར་པའི་གཉུག་མའི་རླུང་གིས་ཉེར་ལེན་གྱི་རྒྱུ་བྱས་ནས་མཚན་དཔེས་སྤྲས་པའི་ལྷའི་སྐུ་དངོས་སུ་གྲུབ་པ་ནས་དོན་གྱི་འོད་གསལ་གྱི་ཐབས་ཉེ་རྒྱུས་བསྐྱེད་པའི་ཡེ་ཤེས་རྣམས་མ་སྐྱེས་པའི་བར་གྱི་ལྷ་སྐུ་ཤར་བའི་རྣལ་འབྱོར་དེ་ལ་སྒྱུ་ལུས་ཞེས་བྱ་སྟེ། རྡོ་རྗེ་དཔལ་མཆོག་ཆེན་པོ་ལས། སྒྱུ་མ་འདི་ཉིད་ཡོད་མེད་ལས་འདས་ཤིང་། །དབུ་མ་ཙམ་དུའང་མི་གནས་ཀུན་རྫོབ་སྟེ། །ཆོས་རྣམས་ཐམས་ཅད་སྒྱུ་མའི་སྣང་བ་ལས། །འགག་པ་མེད་པའི་རོལ་པ་རང་བྱུང་བའོ། །ཞེས་གསུངས་པའི་ཕྱིར་རོ།།

དེ་ཡང་སེམས་དབེན་གྱི་ཡེ་ཤེས་རྫོགས་པར་བསྐྱེད་པའི་ལུགས་འབྱུང་གི་སྟོང་པ་དང་པོ་གཉིས་དང་། ཉེར་ཐོབ་ཀྱི་ཐོག་མ་དང་བར་གྱི་རླུང་སེམས་ལས་བརྒྱུད་ནས་མཐའི་དཔེའི་འོད་གསལ་སྐྱེས་ནས་དེ་ལས་ལུགས་ལྡོག་ཏུ་འཇུག་པའི་རླུང་སེམས་ལས་རྡོ་རྗེ་འཆང་གི་སྐུ་བཞིན་ལག་སྐྱེ་མཆེད་མཐའ་དག་ཚང་ཞིང་མཚན་དཔེས་བརྒྱན་པ་དྭངས་ཤིང་ཐོགས་རེག་མེད་པ་འཇའ་ཚོན་ཤར་བའམ་ཟླ་བ་ཆུ་སྣོད་དུ་ཤར་ལྟ་བུ་གསལ་བར་བྱུང་བ་ནི་སྒྱུ་ལུས་སོ།།

སེམས་དབེན་ནས་སྒྱུ་ལུས་སུ་འཕོ་བའི་ཚུལ་ཡང་བཤད་མ་ཐག་པ་ལྟར་སེམས་དབེན་མཐར་ཐུག་དཔེ་ཡི་འོད་གསལ་ལས་ལྡང་བར་རྩོམ་པ་ན་རླུང་ཅུང་ཟད་གཡོས་ཏེ་ལུགས་ལྡོག་གི་ཉེར་ཐོབ་གྲུབ་པ་དང་དུས་མཉམ་དུ་ཆུ་ལས་ཉ་ལྡང་བའི་ཚུལ་གྱི་དཔེ་ཡི་འོད་གསལ་གྱི་བཞོན་པའི་རླུང་འོད་ཟེར་ལྔ་ལྡན་གྱིས་ཉེར་ལེན་གྱི་རྒྱུ་དང་། དཔེའི་འོད་གསལ་གྱི་སེམས་དེས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་སྒྱུ་མའི་ལྷ་སྐུ་སྣང་བ་ནི་འཕོ་ཚུལ་ལོ།།

སྒྱུ་ལུས་ཞེས་པའང་སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་མཚོན་པའི་ཤིན་ཏུ་ཕྲ་བའི་རླུང་སེམས་ཀྱི་ལྷ་སྐུའམ་ལུས་ཡིན་པའི་ཕྱིར་ན་དེ་སྐད་དུ་བརྗོད་ཅིང་དེ་སྒྱུ་ལུས་ཀྱི་སྒྲ་བཤད་དམ་ངེས་ཚིག་གོ།

སྒྱུ་ལུས་དེ་ལ་བདག་བྱིན་རླབས་དང་། ཀུན་རྫོབ་བདེན་པ་དང་། སྒྱུ་མའི་སྐུ་དང་། ལོངས་སྤྱོད་རྫོགས་པའི་སྐུ་དང་། རྡོ་རྗེའི་སྐུ་དང་། དྲི་ཟའི་སེམས་ཅན་དང་། བར་དོའི་སྐུའི་ཐ་སྙད་ཀྱང་མཛད་པ་ཡིན་ཏེ། ཀླུ་སྒྲུབ་ཀྱིས། ཀུན་རྫོབ་བདེན་པའི་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་གྱུར། །རྡོ་རྗེའི་སྐུ་ཡང་དེ་ཉིད་ཡིན། །རྡོ་རྗེ་སེམས་དཔའ་བདག་ཉིད་དེ། །ཞེས་གསུངས་པས་སོ།།

སྒྱུ་ལུས་འདི་གཉུག་སེམས་ཀྱི་བཞོན་པའི་རླུང་ལས་བྱུང་ཕྱིར་ལམ་དུས་ཀྱི་ལོངས་སྐུ་ཞེས་བྱ་ཞིང་ལོངས་སྐུ་བཏགས་པ་བ་དང་། རྡོ་རྗེའི་སྐུ་ཡང་གཉུག་མའི་རླུང་ལས་གྲུབ་ཕྱིར་དེ་སྐད་དུ་གསུངས། སྒྱུ་ལུས་སུ་གྱུར་པའི་གསང་བ་འདུས་པའི་སྐུ་དེ་ལམ་དུས་ཀྱི་གསང་བ་འདུས་པ་ཡིན་གྱི་གསང་བ་འདུས་པ་མ་ཡིན་ཟེར་དགོས་ཞེས་སློབ་དཔོན་རིན་པོ་ཆེ་བློ་བཟང་རྒྱལ་མཚན་གྱི་ཞལ་སྔ་ནས་གསུངས་སོ།།

བསྐྱེད་རིམ་གྱི་སྐབས་སུ་ལྷ་སྐུ་འཇའ་ཚོན་བཞིན་དུ་དྭངས་ཤིང་ཤིན་ཏུ་གསལ་བ་ཐོགས་པ་མེད་པའི་སྐུར་སྣང་བའི་ཚེ་སྟོང་ཉིད་ཀྱི་ལྟ་བ་དྲན་པར་བྱས་ནས་དེ་རང་བཞིན་གྱིས་གྲུབ་པ་མེད་བཞིན་དུ་སྣང་བའི་སྒྱུ་མ་ལྟ་བུའི་རྣམ་པར་ཤར་བ་ཡོད་པ་དེ་ལའང་སྒྱུ་ལུས་ཀྱི་དོན་མི་ཚང་ལ། བསྐྱེད་རིམ་གྱི་སྐབས་སུ་སྣོད་བཅུད་རིམ་གྱིས་བསྡུས་ནས་སྟོང་ཉིད་དུ་བལྟ། དེ་ཚེ་ཡུལ་སྣང་རགས་པ་ཐམས་ཅད་ཞི་ནས་སེམས་གསལ་རིག་ཙམ་ཞིག་གནས་པ་ལས་མཐར་ལྡང་བ་ན་བློ་ཡི་གཡོ་བ་སྔོན་དུ་སོང་བ་མེད་པར་ལྷའི་སྐུར་འཆར་བ་ཡོད་པ་དེ་ཡང་སྒྱུ་ལུས་ཀྱི་དོན་མི་ལྡན་པ་དང་། སྒྱུ་ལུས་ནི། ལུས་དབེན་དང་། ངག་དབེན་དང་། སེམས་དབེན་བསྒོམས་ཏེ་སེམས་དབེན་གྱི་སྟོང་པ་གསུམ་གྱི་ཡེ་ཤེས་བསྐྱེད་པའི་མཐར་སྐྱེད་དགོས་པ་ཡིན་ཞིང་། གཙོ་བོ་རྫོགས་རིམ་གྱི་སྐུ་ནི་རླུང་དབུ་མའི་ནང་གི་སྙིང་གར་ཞུགས་གནས་ཐིམ་གསུམ་བྱས་པ་ལས་བྱུང་བ་ཞིག་ཡིན་ལ། བསྐྱེད་རིམ་གྱི་ལྷ་སྐུ་ནི་དེ་ལས་བྱུང་བ་མ་ཡིན་པའི་ཕྱིར་ན་དེ་གཉིས་མི་འདྲ་བའི་ཁྱད་པར་ཆེའོ།།

རྫོགས་རིམ་པའི་ལྷ་སྐུ་རུ་གྱུར་པའི་སྒྱུ་ལུས་ཀྱི་སྐུ་ནི་རླུང་སྙིང་གའི་མི་ཤིགས་པ་ལ་ཐིམ་པ་ལས་བྱུང་བའི་བདེ་སྟོང་གི་ཡེ་ཤེས་ཀྱི་གཟུང་རྣམ་ལྷར་ཤར་བའི་རང་ལུས་ལྷ་སྐུར་དངོས་སུ་གྱུར་པ་ཞིག་ཡིན་ལ། བསྐྱེད་རིམ་པའི་ལྷ་ནི་དངོས་པོའི་གནས་ཚོད་ལ་མ་གྲུབ་ཅིང་བདེ་སྟོང་གི་ཡེ་ཤེས་ཀྱི་གཟུང་རྣམ་ལྷར་ཤར་བའང་མ་ཡིན་པར་ཤེས་པའི་སྣང་ཆ་ཙམ་ཡིན་ནོ།།

སྒྱུ་ལུས་དེ་ལ་མཉམ་བཞག་སྒྱུ་མ་དང་། རྨི་ལམ་སྒྱུ་མ་དང་། བར་དོ་སྒྱུ་མ་ཞེས་སྒྱུ་མའི་དབྱེ་བ་མང་ལ། དང་པོ་ནི། རླུང་སེམས་ཙམ་ལས་གྲུབ་པའི་སྐུ་སྒྱུ་མ་ལྟ་བུའི་ཏིང་ངེ་འཛིན་ཞེས་པ་ལ་མཉམ་པ་བཞག་པའོ། །བསྡུ་རིམ་གྱི་རྣལ་འབྱོར་གྱིས་དཀྱིལ་འཁོར་བསྡུས་ནས་རླུང་མི་ཤིགས་པའི་ཐིག་ལེ་ལ་ཐིམ་པར་དངོས་སུ་བསྒོམ་པའམ། ཡང་ན་རླུང་རྣམས་དྷཱི་ཏཱིར་ཐིམ་པ་ལས་བྱུང་བའི་སེམས་དབེན་རྗེས་མཐུན་པའི་སྟོང་པ་རྣམས་ཤར་མཐར་རྡོ་རྗེ་འཆང་གི་སྐུར་ལངས་ཏེ་ཏིང་ངེ་འཛིན་བསྒོམ་པ་ནི་མཉམ་བཞག་སྒྱུ་མ་ཞེས་བྱ་ཞིང་སྒྱུ་ལུས་རྗེས་མཐུན་པ་ཡིན་ཞིང་། འདི་ནི་ལུས་དབེན་གྱི་སྐབས་ནས་ཀྱང་ཡོད་པས་རིམ་པ་ལྔ་རྗེས་མཐུན་པ་ནི་ལུས་དབེན་ནས་བཞག་ཏུ་ཡོད་པར་གསུངས་སོ།།

གཉིས་པ་ནི་རྨི་ལམ་གྱི་མན་ངག་སྦྱངས་ཏེ་རྨི་ལམ་གྱི་ལུས་སྒྱུ་ལུས་སུ་ལྡང་བ་དེའོ། །གསུམ་པ་ནི་འཆི་མཐར་བར་དོ་འོང་བའི་དོད་ལ་ལོངས་སྐུ་གྲུབ་པ་དེ་ལ་བྱའོ།།

སྤྱིར་གཞི་དངོས་པོའི་གནས་ཚུལ་དུ་ལུས་སེམས་གཉིས་ཀྱི་གནས་ཚུལ་ལ་ནི། སེམས་ཅན་རྣམས་ལ་ལུས་རགས་པ་དང་། ཕྲ་བ་དང་། ཤིན་ཏུ་ཕྲ་བ་གསུམ་ཡོད་ལ། དེ་བཞིན་དུ་སེམས་ལའང་དེ་ལྟར་གསུམ་ཡོད་དོ།།

དང་པོ་ལུས་རགས་པ་ནི། འབྱུང་བ་དང་འབྱུང་འགྱུར་གྱི་ལུས་དང་། ལུས་ཕྲ་བ་ནི་རྩ་རླུང་ཐིག་ལེ་གསུམ་དང་། ལུས་ཤིན་ཏུ་ཕྲ་བ་ནི་སྟོང་པ་བཞིའི་ཡེ་ཤེས་ཀྱི་བཞོན་པར་འགྱུར་པའི་རླུང་ཕྲ་མོ་དེའོ།།

གཉིས་པ་སེམས་རགས་པ་ནི། སྒོ་ལྔའི་རྣམ་ཤེས་དང་། སེམས་ཕྲ་བ་ནི། རྩ་ཉོན་ཉེ་ཉོན་དང་། རང་བཞིན་བརྒྱད་ཅུའི་རྟོག་པ་རྣམས་དང་མཚུངས་ལྡན་གྱི་སེམས་དང་། སེམས་ཤིན་ཏུ་ཕྲ་བ་ནི། སྣང་མཆེད་ཐོབ་གསུམ་འོད་གསལ་དང་བཅས་པའི་སྟོང་པ་བཞིའི་ངོ་བོར་གྱུར་པའི་སེམས་དེའོ།།

དེ་བཞིན་དུ་ལུས་སེམས་ཐུན་མོང་བ་ལ་ཡང་ཕྲ་རགས་གཉིས་ཡོད་དེ། རགས་པའི་ལུས་སེམས་གཉིས་ཀ་ཚོགས་ཙམ་དེ་ལུས་སེམས་ཐུན་མོང་བ་རགས་པ་དང་། འཁོར་འདས་ཀུན་གྱི་གཞིར་གྱུར་པའི་ཤིན་ཏུ་ཕྲ་བའི་རླུང་སེམས་ངོ་བོ་གཅིག་པ་དེ་ནི་ལུས་སེམས་ཐུན་མོང་བ་ཕྲ་བ་ཡིན་ནོ།།

དེ་ལྟར་སེམས་ཅན་རྣམས་ལ་རགས་པ་གནས་སྐབས་པའི་ལུས་སེམས་དང་། ཕྲ་བ་གཉུག་མའི་ལུས་སེམས་གཉིས་རེ་སྟེ་ལུས་སེམས་ཕྲ་རགས་གཉིས་རེ་གཉིས་རེ་ཡོད་པ་དེ་ལས་ཕྲ་བ་གཉུག་མའི་ལུས་དེ་ནི་རླུང་ལྔའི་ནང་གི་སྲོག་འཛིན་གྱི་རླུང་ཕྲ་རགས་གཉིས་ཡོད་པ་ལས་ཤིན་ཏུ་ཕྲ་བ་དེ་ཡིན་ལ། གཉུག་མའི་སེམས་སམ་གཉུག་མའི་ཤེས་པ་ཡང་ཡིད་ཤེས་ཡིན་ཞིང་། དེ་ཡང་ཡིད་ཤེས་ཕྲ་རགས་གཉིས་ཡོད་པའི་ཡིད་ཤེས་ཕྲ་བ་དེ་ཡིན་ནོ།།

སེམས་ཅན་ཐམས་ཅད་དེ་ལྟར་ལུས་སེམས་ཕྲ་རགས་གཉིས་རེ་ཡོད་ཀྱང་རྒྱུད་ཐ་དད་པར་མི་འགྱུར་ཏེ། རགས་པའི་ལུས་དེ་ཕྲ་བའི་ལུས་སེམས་ཀྱི་རྟེན་ཡིན་ཞིང་། གཞི་དུས་སུ་ཇི་སྲིད་རགས་པ་གནས་སྐབས་པའི་ལུས་སམ་རགས་པའི་ལུས་ཀྱིས་གཡོ་འགུལ་སོགས་ཀྱི་བྱ་བ་བྱེད་པ་དེ་སྲིད་དུ་ཕྲ་བ་གཉུག་མའི་ལུས་སམ་གཉུག་མའི་ལུས་དེ་བཞིན་ལག་གི་རྣམ་པར་མི་ལྡང་ཞིང་བག་ལ་ཞ་བའི་ཚུལ་དུ་གནས་པ་དང་། རགས་པའིི་ལུས་དེས་སེམས་ཅན་སྐྱེ་འཆི་བྱེད་པའི་ཚེ་འདོར་ལེན་བྱེད་པ་དཔེར་ན་ཆུ་དང་ཚ་བ་ལྟ་བུ་ཡིན་པ་དང་། གཉུག་མའི་ལུས་ཕྲ་བ་དེས་ཚེ་འདོར་ལེན་མི་བྱེད་པར་སེམས་ཅན་དང་དེའི་གཉུག་མའི་ལུས་གཉིས་པོ་ཆུ་དང་དེའི་གཤེར་བ་བཞིན་དུ་གནས་ཤིང་། རྨི་ལམ་དང་འཆི་བའི་དུས་སོགས་ལུས་རགས་པའི་གཡོ་འགུལ་སོགས་ཀྱི་བྱ་བ་བྱེད་པ་རྒྱུན་ཆད་པ་ན་གཉུག་མའི་ལུས་དེ་བཞིན་ལག་ཅན་གྱི་རྣམ་པར་ལངས་ཏེ་འགྲོ་འོང་སོགས་ཀྱི་བྱ་བ་བྱེད་ཅིང་ལུས་རགས་པ་དེ་བག་ལ་ཞ་ནས་བྱ་བ་མི་བྱེད་དོ།།

ཡང་ཇི་སྲིད་སེམས་རགས་པས་དམིགས་རྣམ་འཛིན་པའི་བྱ་བ་བྱེད་པ་དེ་སྲིད་དུ་སེམས་ཕྲ་བ་བག་ལ་ཞ་བའི་ཚུལ་གྱིས་གནས་པ་ལས་དམིགས་རྣམ་མི་འཛིན་ལ། འཆི་བ་དང་། རྨི་ལམ་དང་། སྒོམ་གྱི་སྟོབས་ཀྱིས་སེམས་རགས་པ་འགགས་པ་སོགས་ཀྱི་ཚེ་སེམས་ཕྲ་བས་དམིགས་རྣམ་འཛིན་པའི་བྱ་བ་བྱེད་པར་བཤད་དེ། སེམས་རགས་པ་འགགས་ནས་མེད་པའི་རྒྱུ་མཚན་གྱི་ཕྱིར་རོ།།

ཁྱད་པར་དུ་བསྒོམས་སྟོབས་ཀྱིས་རླུང་རགས་པ་མ་ལུས་པ་སྙིང་གའི་མི་ཤིགས་པའི་ཐིག་ལེ་ལ་ཐིམ་པའི་སྟོབས་ཀྱིས་ལུས་རགས་པའི་གཡོ་འགུལ་སོགས་ཀྱི་བྱ་བ་བྱེད་པ་རྒྱུན་ཆད་པ་ན་གཉུག་མའི་ལུས་དེ་བཞིན་ལག་ཅན་གྱི་རྣམ་པར་ཤར་ནས་སྒྱུ་མའི་སྐུར་ལྡང་བ་ཡིན་ནོ།།

སྤྱིར་སེམས་ཅན་རྣམས་འཆི་བ་ན་ཐོག་མར་རང་བཞིན་བརྒྱད་ཅུའི་ཀུན་རྟོག་རྣམས་འགགས་ཤིང་། དེ་ནས་སྣང་བ་དཀར་ལམ་པ་དང་། མཆེད་པ་དམར་ལམ་པ་དང་། ཐོབ་པ་ནག་ལམ་པ་རྣམས་བྱུང་ནས་དབུགས་ཆད་དེ་བརྒྱལ་བར་འགྱུར། བརྒྱལ་སངས་པ་ན་སྟོང་སང་ནམ་མཁའ་གཡའ་དག་གི་སྣང་བ་ལྟ་བུ་སྟོང་པའི་རྣམ་པ་འཆར་བ་ནི་འཆི་བ་འོད་གསལ་ཐམས་ཅད་སྟོང་པ་ཞེས་བྱ་ལ། དེ་ལས་བར་དོའི་འཁྲུལ་སྣང་འཆར་བ་དང་། བར་དོའི་ཚད་རྫོགས་པ་ན་སྐྱེ་བ་ལ་ཉིང་མཚམས་སྦྱོར་བ་ཡིན་ཞིང་། དེ་ནི་མི་དང་རྟ་གླང་རི་དྭགས་སོགས་འགྲོ་བ་ཡོད་དོ་ཅོག་ལ་བྱུང་བ་ཡིན་ནོ།།

དེས་ན་འགྲོ་བ་རྣམས་འཆི་བ་འོད་གསལ་སྔོན་དུ་སོང་བ་ལས་བར་སྲིད་གྲུབ་པ་སྟེ་བྱུང་གི་དེ་སྔོན་དུ་སོང་བ་ལ་མ་ལྟོས་པར་རང་དབང་དུ་མི་འབྱུང་བར་རང་རྒྱུ་ཐམས་ཅད་སྟོང་པ་འཆི་བ་འོད་གསལ་གྱི་ངོ་བོར་གྱུར་པའི་རླུང་སེམས་ལས་བར་དོར་སྐྱེས་ཏེ་འཁོར་བར་འཁོར་བ་ཡིན་ལ། རྣལ་འབྱོར་བ་སྔགས་ཀྱི་ཐབས་མཁས་ཀྱི་ཉམས་ལེན་ཅན་ལ་ཉམས་ལེན་གྱི་སྟོབས་ཀྱིས་འོད་གསལ་དེ་ཉིད་སྒྱུ་མའི་སྐུར་འཚང་རྒྱ་བ་ཡིན་པའི་ཕྱིར་རོ།།

དེ་ཕྱིར་འཆི་བ་འོད་གསལ་ཐམས་ཅད་སྟོང་པ་དེ་དང་། དེ་འཆར་བའི་བློའི་ངོ་བོར་གྱུར་པའི་ཤིན་ཏུ་ཕྲ་བའི་རླུང་སེམས་ངོ་བོ་དབྱེར་མེད་དུ་གྲུབ་པ་དེ་འཁོར་འདས་གཉིས་ཀའི་གཞིར་གྱུར་པར་བཤད་ཅིང་། འཁོར་འདས་ཀུན་གྱི་གཞི་བྱེད་ཚུལ་ཡང་། འཆི་བ་འོད་གསལ་ཐམས་ཅད་སྟོང་པ་དེ་ཡིས་མར་འཁོར་བར་འཁྲུལ་བ་དང་ཡར་མྱང་འདས་སུ་གྲོལ་བའི་གོ་འབྱེད་པས་གཞི་བྱེད་ཚུལ་དང་། འཆི་བ་འོད་གསལ་ཐམས་ཅད་སྟོང་པ་འཆར་བའི་རླུང་སེམས་ཕྲ་བ་དེས་གྲོལ་འཁྲུལ་གྱི་གཞི་བྱེད་ཚུལ་གཉིས་ལས། སྔ་མ་ནི་ཕར་ཕྱིན་ཐེག་པ་ནས་སྟོང་ཉིད་འཁོར་བ་དང་མྱང་འདས་ཀྱི་གཞི་ཡིན་པར་གསུངས་པ་ལྟར་ཏེ། ཕྱི་རབས་པའི་བཞེད་པ་ལྟར་ན་སེམས་བདེན་པར་གྲུབ་ཕན་ཆད་འཁོར་བ་ན་འཁོར་ཚུལ་གཏན་ནས་མེད་ཅིང་། སེམས་བདེན་གྲུབ་ཀྱིས་སྟོང་པས་ན་འཁོར་བར་སྐྱེ་བ་དང་། དེ་ལས་གྲོལ་བ་གཉིས་ཀ་འཐད་པའི་ཕྱིར་ན་སེམས་བདེན་གྲུབ་ཀྱིས་སྟོང་པའི་སྟོང་པ་ཉིད་ཆོས་ཀྱི་དབྱིངས་དེས་འཁོར་བར་སྐྱེ་བའི་གོ་འབྱེད་ཅིང་། དེའི་རང་བཞིན་མ་ཤེས་ན་འཁོར་བར་འཁྲུལ་བའི་རྒྱུ་བྱེད་པས་ན་ཆོས་ཉིད་འཁོར་བའི་གཞི་དང་། སྟོང་པ་ཉིད་ཀྱི་རང་བཞིན་ཇི་བཞིན་ཤེས་ཤིང་རྟོགས་ན་འཁོར་བ་ལས་གྲོལ་བར་བྱེད་པའི་ཕྱིར་ན་སྟོང་ཉིད་དམ་ཆོས་དབྱིངས་དེ་མྱང་འདས་ཀྱི་གཞི་ཡང་ཡིན་པས་སྟོང་ཉིད་དམ་ཆོས་ཀྱི་དབྱིངས་དེ་འཁོར་འདས་གཉིས་ཀྱི་གཞི་ཡིན་པར་གསུངས་ཏེ། དཔལ་མགོན་འཕགས་པ་ཀླུ་སྒྲུབ་ཀྱི་ཆོས་དབྱིངས་བསྟོད་པ་ལས། གང་ཞིག་ཀུན་དུ་མ་ཤེས་ན། །སྲིད་པ་གསུམ་དུ་རྣམ་འཁོར་བ། །སེམས་ཅན་ཀུན་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་བ། །དེ་བཞིན་ཉོན་མོངས་དང་འདྲེས་པས། །ཆོས་ཀྱི་དབྱིངས་ཀྱང་མི་མཐོང་ངོ་། །ཇི་ལྟར་འོ་མ་རྣམ་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམ་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཞེས་གསུངས་པའི་ཕྱིར་རོ།།

ཕྱི་མ་ནི་སེམས་དེ་རླུང་གི་སྦྱོར་བ་སྟེ་གཡོ་བ་མེད་ན་སེམས་ཀྱི་རང་བཞིན་ཀུན་རྟོག་རྣམས་དང་སྣང་མཆེད་ཐོབ་གསུམ་སྟེ་སྣང་བ་གསུམ་གྱི་སེམས་རྣམས་ཡུལ་གཟུང་བའི་རྣམ་ཅན་དུ་མེད་ཅིང་མི་སྐྱེ་ལ། ཤིན་ཏུ་ཕྲ་བའི་རླུང་དེ་གཡོས་པ་ན་དེ་དང་ངོ་བོ་གཅིག་པའི་ཤིན་ཏུ་ཕྲ་བའི་སེམས་དེ་གཡོ་ཞིང་། དེ་ལས་སྣང་བ་གསུམ་གྱི་ཤེས་པ་དང་། རང་བཞིན་རྣམས་བྱུང་བ་ཡིན་ཕྱིར་དེ་ལྟར་འཆི་བ་འོད་གསལ་ཐམས་ཅད་སྟོང་པ་འཆར་བའི་ཤིན་ཏུ་ཕྲ་བའི་རླུང་སེམས་ཡིད་ཤེས་ཕྲ་མོ་དེ་སྐྱེ་བ་ལེན་མཁན་དང་འཆི་མཁན་དེ་ཡིན་པ་ལས་དེ་ལས་གཞན་པའི་གང་དུ་ཡང་སྐྱེ་བ་ལེན་པ་པོ་དང་། འཆི་བ་པོ་གང་ཡང་ཡོད་པ་མ་ཡིན་པར་ཕྲ་བའི་རླུང་སེམས་དེ་ལས་ལུགས་ལྡོག་གི་སྣང་མཆེད་ཐོབ་གསུམ་གྱི་ཤེས་པ་གསུམ་དང་། དེ་ལས་རང་བཞིན་བརྒྱད་ཅུའི་རྟོག་པ་རྣམས་བྱུང་། དེ་ལས་འཁོར་བར་ཉིང་མཚམས་སྦྱོར་བའི་སྐྱེ་བ་གྲུབ། དེ་ལ་བརྟེན་ནས་ཉོན་མོངས་པ་དང་། ལས་གསོག་པ་དང་། སྐྱེ་རྒ་ན་འཆི་རྣམས་བྱུང་སྟེ་མགལ་མེའི་འཁོར་ལོ་ལྟར་འཁོར་བར་ཡང་ཡང་དུ་འཁོར་བ་ཡིན་ཏེ། ཡེ་ཤེས་རྡོ་རྗེ་ཀུན་ལས་བཏུས་པ་ལས། གང་དག་འོད་གསལ་ལས་བྱུང་དེ་ཉིད་ནི། ། སེམས་དང་ཡིད་དང་རྣམ་པར་ཤེས་པ་ཞེས། །ཆོས་རྣམས་ཀུན་གྱི་རྩ་བར་གྱུར་པ་སྟེ། །ཀུན་ཉོན་མོངས་དང་རྣམ་པར་བྱང་བ་ཡི། །བདག་ཉིད་དེ་ལས་རྟོགས་པ་གཉིས་རིག་བྱེད། །རྣམ་ཤེས་དེ་ཡི་བཞོན་པ་རླུང་ཡིན་ཏེ། །རླུང་ལས་མེ་དང་མེ་ལས་ཆུ་འབྱུང་ཞིང་། །ཆུ་ལས་ས་ཡང་རབ་ཏུ་འབྱུང་བར་བཤད། །དེ་རྣམས་འདུས་ལས་ཕུང་པོ་ལྔ་ཉིད་དང་། །སྐྱེ་མཆེད་དྲུག་དང་ཡུལ་ལྔར་སྣང་བ་གང་། །དེ་དག་རྟེན་ཅིང་འབྲེལ་པར་འབྱུང་བ་སྟེ། །རླུང་དང་རྣམ་ཤེས་ཉེ་བར་འདྲེས་པའོ། །དེ་ནས་རྣམ་པར་ཤེས་པ་གསུམ་གྱིས་ནི། །རང་བཞིན་གྱི་ནི་སྣང་བར་རབ་གསལ་བར། །སྤྱོད་པ་རྗེས་སུ་མྱོང་བར་བྱེད་པའོ། །སྣང་བའི་རྒྱུ་འབྲས་ཀྱིས་ནི་རང་བཞིན་རྣམས། །ཡང་དག་པར་ཡང་རབ་ཏུ་འབྱུང་བ་དང་། །རྨི་ལམ་སྒྱུ་མ་ལྟར་ནི་སྣང་བའོ། །ཞེས་དང་། ཀླུ་སྒྲུབ་ཀྱི་རིམ་ལྔ་ལས། འགྲོ་ཀུན་རང་དབང་མེད་པ་སྟེ། །རང་དབང་དུ་ནི་འབྱུང་མ་ཡིན། །དེ་ཡི་རྒྱུ་ནི་འོད་གསལ་བ། །འོད་གསལ་ཐམས་ཅད་སྟོང་པའོ། །སེམས་གང་གིས་ནི་བྱིས་པ་རྣམས། །འཁོར་བར་འཆིང་བས་བཅིངས་གྱུར་པ། །ཞེས་དང་། འདིར་ནི་གང་ཡང་སྐྱེ་བ་མེད། །གང་ཡང་འཆི་བ་ཡོད་མ་ཡིན། །སེམས་ཀྱི་རང་བཞིན་རྣམ་གནས་པར། །འཁོར་བ་ཉིད་ནི་ཤེས་པར་བྱ། །རླུང་གི་སྦྱོར་བ་མེད་པར་ནི། །སེམས་ཀྱི་རང་བཞིན་གཟུང་དུ་མེད། །སེམས་ཀྱི་རང་བཞིན་རྒྱུར་གྱུར་པ། །ལས་དང་སྐྱེ་བ་ཀུན་དུ་འབྱུང་། །ཞེས་གསུངས་པའི་ཕྱིར་རོ།།

དེས་ན་སྨོས་མ་ཐག་པ་ལྟར་ཐབས་མཁས་དང་བྲལ་བའི་གང་ཟག་འགྲོ་བ་རང་ག་བ་ལ་ཤིན་ཏུ་ཕྲ་བའི་རླུང་སེམས་ངོ་བོ་གཅིག་པ་དེ་བར་དོ་བཞིན་ལག་གི་རྣམ་ཅན་དུ་ལངས་ནས་འཁོར་བར་སྐྱེ་བ་ལེན་པས་རླུང་སེམས་ཕྲ་བ་དེ་ཉིད་འཁོར་བའི་རྩ་བ་དང་། ཐབས་མཁས་ཀྱི་མན་ངག་དང་ལྡན་པའི་རྣལ་འབྱོར་བས་སྒྱུ་མའི་སྐུར་ལངས་ནས་འཚང་རྒྱ་བར་བྱེད་པས་མྱང་འདས་ཀྱི་རྩ་བ་ཡིན་པར་གསུངས་ཏེ། ཀླུ་སྒྲུབ་ཀྱི་རིམ་ལྔ་ལས། སེམས་དེ་ཉིད་ཀྱིས་རྣལ་འབྱོར་པ། །བདེ་གཤེགས་གནས་སུ་འགྲོ་བར་འགྱུར། །ཞེས་སུངས་པའི་ཕྱིར་རོ།།

དེ་ཕྱིར་སེམས་ཅན་རྣམས་ཀྱི་རྒྱུད་ལ་སྒྱུ་ལུས་ཀྱི་སྒྲུབ་གཞི་རང་ཆས་སུ་ཡོད་དེ། ཤིན་ཏུ་ཕྲ་བ་གཉུག་མའི་ལུས་དེ་སྒྱུ་ལུས་ཀྱི་སྒྲུབ་གཞི་ཡིན་པའི་ཕྱིར། དེ་ཡིན་ཏེ། སེམས་ཅན་རྣམས་ཀྱི་རྒྱུད་ལ་རང་ཆས་སུ་ཡོད་པའི་ཤིན་ཏུ་ཕྲ་བའི་རླུང་སེམས་གཉིས་པོ་དེ་ཤིན་ཏུ་ཕྲ་བ་གཉུག་མའི་ལུས་ཡིན་པ་གང་ཞིག། དེ་སྒྱུ་ལུས་ཀྱི་སྒྲུབ་གཞི་བྱེད་ཚུལ་སྨོས་ཟིན་པ་ལྟར་ཡིན་པའི་ཕྱིར། ཞེས་བསྒྲུབ་པར་བྱ་དགོས་སོ།།

གཞན་ཡང་གཞིའི་དུས་སུ་སེམས་ཅན་ལ་འཆི་བ་འོད་གསལ་གྱི་རླུང་སེམས་ཙམ་དེ་ལས་བར་དོར་ལྡང་བ་དང་། ལམ་དུས་སུ་སེམས་དབེན་མཐར་ཐུག་གི་རླུང་སེམས་ཙམ་ལས་མ་དག་པའི་སྒྱུ་མའི་སྐུར་ལྡང་བ་ཡིན་ཏེ། ཀླུ་སྒྲུབ་ཀྱི་རིམ་ལྔ་ལས། དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་འབྱུང་། །སྒྱུ་མའི་ལུས་ཞེས་དེ་ལ་བཤད། །ཅེས་གསུངས་པའི་ཕྱིར་རོ།།

དེ་འདྲའི་སྒྱུ་ལུས་པའི་རྣལ་འབྱོར་བ་དེས་སྣོད་བཅུད་ཐམས་ཅད་སྤྱི་དོན་ལྟར་ན་བདེན་པར་མ་གྲུབ་པ་སྒྱུ་མ་ལྟ་བུའི་རང་བཞིན་དུ་དམིགས་ཤིང་མཐོང་བ་དང་། སྦས་དོན་ལྟར་ན་བླ་མེད་ཀྱི་ལམ་འདིར་འགྲོ་བ་ཐམས་ཅད་རླུང་སེམས་ཀྱི་ལུས་ཅན་དུ་བསྟན་པས་ན། སེམས་ཅན་ཐམས་ཅད་ཀྱི་ལུས་ཀྱང་གཉུག་སེམས་ཀྱི་བཞོན་པའི་རླུང་ལས་ལུས་ཀྱི་རོལ་བར་ཤར་བས་རྣལ་འབྱོར་བ་རང་གི་སྒྱུ་ལུས་དང་འདྲ་བར་སྒྱུ་མའི་ལུས་ཅན་དང་གཉུག་སེམས་ཀྱི་རོལ་བ་རུ་མངོན་སུམ་དུ་མཐོང་བ་ཡིན་ཞིང་། དེ་ལྟར་བལྟ་དགོས་པའང་ཡིན་ཕྱིར། སྣོད་བཅུད་ཐམས་ཅད་ཀྱང་རང་རྒྱུ་རླུང་སེམས་ཙམ་གྱི་རྣམ་འཕྲུལ་ལམ་རོལ་བ་ཉིད་དུ་མཐོང་བའི་སྒྱུ་མའི་ལུས་སུ་རྟོགས་པ་ཡིན་ཏེ། དེ་ཉིད་ལས། དེ་བས་འདི་ལྟར་འགྲོ་བ་ཀུན། །སྒྱུ་མ་ལྟ་བུར་འདིར་བཤད་དེ། །སྒྱུ་མ་ལྟ་བུའི་ཏིང་འཛིན་གནས། །ཐམས་ཅད་དེ་དང་འདྲ་བར་མཐོང་། །ཞེས་དང་། གསལ་སྒྲོན་ལས། སྒྱུ་ལུས་གྲུབ་པའི་རྣལ་འབྱོར་པས་སེམས་ཅན་ཐམས་ཅད་ཀྱང་དེ་དང་འདྲ་བར་མཐོང་བ་ནི། སྔར་བཤད་པ་ལྟར་དེ་དག་གི་གཉུག་མའི་ལུས་རྣམས་དེ་ལྟར་མཐོང་བའོ། །སྣོད་ཐམས་ཅད་ཀྱང་རང་གི་སྒྱུ་ལུས་དང་འདྲ་བར་མཐོང་བ་ནི། དེ་ཐམས་ཅད་ཀྱང་རླུང་དང་སེམས་ཀྱི་རྣམ་འཕྲུལ་དུ་མཐོང་བའོ། །ཞེས་གསུངས་པའི་ཕྱིར་རོ།།

མདོར་ན་སེམས་ཅན་ཐམས་ཅད་ཀྱི་སྐྱེ་འཆི་གནས་གསུམ་བར་དོ་དང་བཅས་པ་ཐམས་ཅད་རྒྱུ་ཤིན་ཏུ་ཕྲ་བའི་རླུང་སེམས་ཀྱི་རྣམ་འཕྲུལ་ལམ་རོལ་བ་དང་། ཤིན་ཏུ་ཕྲ་བའི་རླུང་སེམས་གཉིས་པོ་འགྲོ་བ་བཟང་ངན་སྣ་ཚོགས་སུ་འགྲོ་བ་ཡིན་པར་གསུངས་ཏེ། རྡོ་རྗེ་ཕྲེང་བ་ལས། སྐྱེ་དང་གནས་དང་འཇིག་པ་དང་། །སྲིད་པ་བར་མར་གནས་པ་སྟེ། །ཇི་སྙེད་འཇིག་རྟེན་གྱིས་བརྟགས་པ། །སེམས་ཀྱི་རླུང་ནི་རྣམ་འཕྲུལ་ལོ། །ཞེས་དང་། དགོངས་པ་ལུང་སྟོན་ལས། འདུ་ཤེས་ཅན་དང་འདུ་ཤེས་མེད། །སེམས་ཅན་དུ་བརྟགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཉིན་དང་མཚན་མོའི་ཆ་ཡིས་ཀྱང་། །རང་གི་རྣམ་པར་རྟོག་པར་ལྷུང་། །དེ་ནས་འཁོར་བར་སྐྲག་བཞིན་དུ། །སྣ་ཚོགས་འགྲོ་བར་དེ་དག་འགྲོ། །མི་རྟོག་པ་ཡི་སེམས་དེ་ནི། །འཁོར་བའི་རྒྱ་མཚོར་གནས་གྱུར་ཀྱང་། །དེ་ནི་ཕྱིན་ཅི་ལོག་གྱུར་པས། །ཁྱི་དང་ཅེ་སྤྱང་གླང་པོ་དང་། །སེམས་དེ་ལྟར་ཡང་འགྲོ་བར་འགྱུར། །ཞེས་གསུངས་པའི་ཕྱིར་རོ།།

དེ་ཕྱིར་སེམས་ཅན་ཐ་མལ་བའི་ངོར་སྣང་བའི་ཉེར་ཐོབ་ཀྱི་མཐའི་འཆི་བ་འོད་གསལ་ཐམས་ཅད་སྟོང་པ་དེ་གཞིའི་ཆོས་སྐུ་དང་། དེ་ནས་འཆི་བ་འོད་གསལ་དེའི་མཐར་རང་གི་ཕུང་པོ་རྙིང་བར་གནས་པའི་རླུང་སེམས་ལས་བར་དོར་ལྡང་སྟེ་ལུས་རྙིང་པ་ལས་ལོགས་སུ་ཕྱེས་པའི་བར་དོའི་ལུས་གྲུབ་པ་དེ་གཞིའི་ལོངས་སྐུ་དང་། བར་དོའི་རྣམ་ཤེས་སྐྱེ་བར་ཉིང་མཚམས་སྦྱོར་བ་དེ་གཞིའི་སྤྲུལ་སྐུ་རུ་གསང་འདུས་སོགས་སྔགས་བླ་མེད་ནས་བཤད་ལ། གཞིའི་ཆོས་ལོངས་སྤྲུལ་གསུམ་དེ་གཞིའི་ཆོས་ལོངས་སྤྲུལ་གསུམ་ཡིན་གྱི་ཆོས་ལོངས་སྤྲུལ་གསུམ་མ་ཡིན་པས་དེ་གསུམ་བཏགས་པ་ཡིན་པར་འདོད་དགོས་སོ།།

དེ་བཞིན་དུ་སྒྱུ་ལུས་ལ་དྲི་ཟའི་སེམས་ཅན་ཞེས་བརྗོད་པ་ཡང་། དྲི་ཟའི་སེམས་ཅན་ཞེས་པ་ནི་བར་དོའི་སེམས་ཅན་ལ་བཤད་ལ། ལམ་གྱི་སྒྱུ་ལུས་སམ་སྒྱུ་མའི་སྐུ་ནི་བཤད་མ་ཐག་པ་ལྟར་བར་དོ་བ་ལུས་རྙིང་པ་ལས་ལོགས་སུ་ཕྱེས་པའི་བར་དོའི་ལུས་གྲུབ་པ་ལྟར། རང་གི་ལུས་རྙིང་པ་ལས་ལོགས་སུ་སྒྱུ་མའི་སྐུ་གྲུབ་པ་ཡིན་ཕྱིར་ལམ་གྱི་སྒྱུ་མའི་སྐུ་ལ་བར་དོ་བར་བཏགས་པ་ཡིན་ལ། དེ་བཞིན་གཞིའི་བར་དོ་དངོས་ལའང་ལམ་གྱི་སྒྱུ་མའི་སྐུ་ཞེས་བཏགས་པ་ཡིན་པར་བཤད་དོ།།

དེ་ཡང་སྒྱུ་ལུས་བསྒོམ་པའི་སྐབས་སུ་ལུས་ཕྲ་རགས་གཉིས་སོ་སོར་ཕྱེ་དགོས་ཤིང་། དེ་ཡང་ལུས་ཕྲ་རགས་སོ་སོར་ཕྱེ་ཚུལ་ནི་བསྒོམས་སྟོབས་ཀྱིས་ཕྱེ་དགོས་པས་འཕོ་བ་དང་། གྲོང་འཇུག་གི་རྣལ་འབྱོར་གྱིས་སོ་སོར་འབྱེད་པ་ནི། རླུང་བུམ་ཅན་སྔོན་དུ་སྦྱངས་ནས་སྙིང་ག་ནས་རླུང་གི་བཞོན་པ་ཅན་གྱི་རྣམ་ཤེས་ཕྱིར་འདོན་པའི་དམིགས་པ་ཡང་ཡང་བྱེད་པས་ཕྱེ་བ་ཡིན་ཡང་དེས་ནི་ལྷ་སྐུ་མཚན་ཉིད་པ་མི་འགྲུབ་པ་དང་། རྡོར་བཟླས་ཀྱིས་སོ་སོར་འབྱེད་ན་ནི་ལྷ་སྐུ་མཚན་ཉིད་པ་འགྲུབ་པ་ཡིན་པའི་ཕྱིར་རྡོར་བཟླས་ནི་སྔ་མ་དག་ལས་ལུས་ཕྲ་རགས་སོ་སོར་འབྱེད་བྱེད་མཆོག་གྱུར་དེ་ཡིན་ཞིང་། ཚུལ་དེ་དག་ནི་སྒོམ་སྟོབས་ཀྱིས་ཕྱེས་པ་ཡིན་ནོ།།

སེམས་དབེན་ཐོབ་པའི་གང་ཟག་གིས་ལས་ཉོན་གྱི་དབང་གིས་འཆི་བའི་དུས་ཀྱི་རླུང་སྡུད་རིམ་དང་སྦྲགས་ནས་རྡོར་བཟླས་དང་བསམ་གཏན་གཉིས་ཀྱིས་སྡུད་རིམ་བསྒོམས་ཏེ་འཆི་བ་འོད་གསལ་ཐམས་ཅད་སྟོང་པ་དེ་ཉིད་སེམས་དབེན་མཐར་ཐུག་གི་དཔེའི་འོད་གསལ་གྱི་ངོ་བོར་བསྐྱེད་ཅིང་། བར་དོའི་ལུས་ལེན་པའི་དོད་ལ་སྒྱུ་མའི་ལུས་དང་། སྐྱེ་སྲིད་ལེན་པའི་དོད་ལ་སྤྲུལ་པའི་ལུས་བཟུང་སྟེ་རྟེན་དེ་ལ་རིམ་པ་ལྷག་མ་རྣམས་བསྒོམ་ནས་འཚང་རྒྱ་བར་བྱེད་པ་ཡིན་ནོ།།

སེམས་དབེན་མཐར་ཐུག་དཔེ་ཡི་འོད་གསལ་དེའི་མཇུག་ཐོག་ཏུ་ཉེར་ཐོབ་སྐྱེས་པ་དང་མཉམ་དུ་མ་དག་པའི་སྒྱུ་ལུས་ཞེས་པ་གསང་བ་འདུས་པའི་ལྷ་སོ་གཉིས་ཀྱི་དཀྱིལ་འཁོར་རྟེན་དང་བརྟེན་པ་ཤར་བའི་ཡེ་ཤེས་སྐྱེ་བ་དང་། སེམས་དབེན་མཐར་ཐུག་དཔེ་ཡི་འོད་གསལ་ནི་སྟོང་ཉིད་མངོན་གསུམ་དུ་མ་རྟོགས་པའི་རྟོག་པ་ཡིན་པས་སྔགས་ཀྱི་སྦྱོར་ལམ་ཡིན་པ་དང་། མ་དག་པའི་སྒྱུ་ལུས་ཀྱང་སྔགས་ཀྱི་སྦྱོར་ལམ་ཡིན་པར་བཤད་དོ།།

གཞི་དུས་སུ་འཆི་བ་འོད་གསལ་དུ་འགགས་པ་དང་བར་དོ་གྲུབ་པ་དུས་མཉམ་པ་ལྟར། ལམ་དུས་སུ་དཔེའི་འོད་གསལ་འགགས་པ་དང་སྒྱུ་ལུས་གྲུབ་པ་དུས་མཉམ་པ་དགོས་པས་ལུགས་ལྡོག་གི་ཉེར་ཐོབ་དང་དུས་མཉམ་དུ་སྒྱུ་ལུས་གྲུབ་པ་དང་དཔེའི་འོད་གསལ་འགགས་པ་ཡིན་པར་བཞེད་དོ།།

མ་དག་པའི་སྒྱུ་ལུས་ཀྱི་སྐབས་སུ་ཉོན་སྒྲིབ་སྤངས་པ་མེད་ཕྱིར་མ་དག་པའི་སྒྱུ་ལུས་ནི་ཉོན་སྒྲིབ་ཀྱིས་མ་དག་པས་ན་དེ་སྐད་དུ་བརྗོད་པ་དང་། ཟག་བཅས་ཀྱི་ཡེ་ཤེས་ཀྱི་སྐུ་ཞེས་ཀྱང་བྱ་བར་གསུངས་སོ།།

དེ་ཡང་མ་དག་པའི་སྒྱུ་ལུས་གྲུབ་པ་ནི་སྐུ་རྐྱང་པ་ཙམ་མིན་པར་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་ཀྱི་ངོ་བོར་ལྡང་བ་ཡིན་ཞིང་། སྒྱུ་ལུས་ནི་རང་གི་རྣམ་སྨིན་གྱི་ལུས་རགས་པ་ལས་ལོགས་སུ་གྲུབ་པ་ཡིན་ཕྱིར་ལུས་རགས་པའི་གོ་ས་ལ་ཡོད་པ་མིན་པར་ཐ་དད་དུ་ཡོད་པ་དང་། སྒྱུ་ལུས་ཐོག་མར་གྲུབ་དུས་ལུས་རྙིང་བའི་གོ་ས་སྙིང་གི་དྷཱུ་ཏཱིའི་ནང་དུ་གྲུབ་ནས་རྗེས་སུ་ལུས་རྙིང་པ་ལས་གོ་ས་ལོགས་སུ་ཕྱེ་ནས་ཕྱི་རོལ་དུ་གནས་པའམ་གྲུབ་པ་ཡིན་ཞིང་། དེ་ཕྱིར་སྙིང་གི་དྷཱུ་ཏཱིའི་ནང་དུ་གྲུབ་པ་ནང་ལྡང་དང་། རྣམ་སྨིན་གྱི་ཕུང་པོའི་ཕྱི་རོལ་ལོགས་སུ་གྲུབ་པ་ཕྱི་ལྡང་དུ་བཞེད་པའང་མཆིས་སོ། །མཁས་པ་འགའ་རེས་ཕྱི་ལྡང་ཁོ་ན་དང་། འགའ་རེས་ནང་ལྡང་ཁོ་ན་དང་། ཁ་ཅིག་གིས་ཕྱི་ལྡང་ནང་ལྡང་གཉིས་ཀ་ཡོད་པར་ཡང་བཞེད་དོ།།

ཁ་ཅིག་གིས་བསྒོམས་སྟོབས་ཀྱིས་ལུས་ཕྲ་རགས་སོ་སོར་ཕྱེ་སྐབས་ལུས་རགས་པའི་གོ་ས་ལས་ལོགས་སུ་སོ་སོར་ཕྱེ་མི་ཐུབ་ཟེར་བ་མཆིས་ལ། གང་ལྟར་ཡང་གཉུག་མའི་ལུས་དེ་མ་དག་པའི་སྒྱུ་ལུས་ཀྱི་སྐུར་ལངས་པ་ན་ཇི་སྲིད་ལུས་རགས་པ་དེ་དང་གཉུག་མའི་ལུས་ཕྲ་བ་དེ་གཉིས་ཀའི་རྟེན་བརྟེན་པའི་འབྲེལ་བ་མ་ཆད་པའི་ཡུན་ལ་དུས་ཐམས་ཅད་དུ་རགས་པའི་ལུས་སྤངས་ནས་སྒྱུ་ལུས་དེ་གནས་མི་ནུས་ལ། སྒྱུ་མ་ལྟ་བུའི་ཏིང་ངེ་འཛིན་ལ་མཉམ་པར་བཞག་པའི་ཡུན་ལ་རགས་ལུས་སྤངས་ནས་གོ་ས་ལོགས་སུ་ཕྱེ་བའི་ཚུལ་གྱིས་གནས་ཤིང་། མཉམ་བཞག་དེ་ལ་གནས་མི་ནུས་པའི་ཚེ་ན་སྒྱུ་ལུས་དེ་རང་ཤུགས་ཀྱིས་ལུས་རགས་པ་དེར་འཇུག་པ་ཡིན་པར་བཤད་དེ། རྒྱུ་མཚན་ཡང་། ཟུང་འཇུག་ཐོབ་ཚེ་ལུས་ཕྲ་རགས་གཉིས་སྔ་མའི་ལས་ཀྱིས་འཕངས་པའི་རྟེན་དང་བརྟེན་པའི་འབྲེལ་བ་བསྒོམས་སྟོབས་ཀྱིས་ཆད་པའི་ཕྱིར་ན་ལུས་རགས་པ་གཏན་དུ་སྤངས་ཏེ་གནས་ནུས་པས། དེ་ལྟར་འདོད་ན་ལུས་རགས་པ་ལས་ལོགས་སུ་གནས་ནུས་པ་དང་། ལུས་རགས་པ་གདུལ་བྱའི་དོན་དུ་འཛིན་འདོད་ན་ཡུན་ཇི་ལྟར་འདོད་པ་དེ་ལྟར་དེ་ལ་གནས་ནས་དེ་འཛིན་ནུས་པའི་ཕྱིར་རོ།།

བར་དོར་འཚང་རྒྱ་བའི་སྒྱུ་ལུས་ནི་ལུས་སྔ་མའི་ལས་ཀྱི་འཕེན་པ་ཟད་པའི་སྟོབས་ཀྱིས་ལུས་རགས་པ་དང་རྟེན་དང་བརྟེན་པའི་འབྲེལ་བ་ཆད་པས་ལུས་རགས་པ་གཏན་དུ་འདོར་ནུས་ཀྱང་། ཚེ་འདིར་འཚང་རྒྱ་བའི་མ་དག་པའི་སྒྱུ་ལུས་ནི་ལུས་རགས་པ་རྟེན་དང་བརྟེན་པའི་འབྲེལ་བ་ཆད་ཀྱང་ལུས་ཕྲ་བའི་འབྲེལ་བ་མ་ཆད་པས་དོན་གྱི་འོད་གསལ་མ་སྐྱེས་བར་དུ་སྔ་མའི་ལུས་རགས་པ་གཏན་དུ་འདོར་མི་ནུས་པ་ཡིན་ཞིང་། དོན་གྱི་འོད་གསལ་སྐྱེས་ནས་ཟུང་འཇུག་ཐོབ་པ་ན་ལུས་ཕྲ་རགས་ཀྱི་རྟེན་དང་བརྟེན་པའི་འབྲེལ་བ་ཆད་པས་ཚེ་གཅིག་ལ་འཚང་རྒྱ་བའི་རྟེན་དེས་ལུས་བརྗེས་ནས་འཚང་རྒྱ་བ་ཡིན་པར་བཞེད་པས། འཁོར་སློབ་སོགས་ཀུན་གྱིས་མཐོང་ནུས་པའི་ལུས་དེ་ལས་གཞན་པའི་དྭངས་མ་སྒྱུ་མའི་ལུས་ཤིག་གྲུབ་ནས་འཚང་རྒྱ་བ་ཡིན་ནོ།།

དེ་ལྟར་སྒྱུ་ལུས་ནི་རྣམ་སྨིན་གྱི་ལུས་རགས་པ་ལས་ལོགས་སུ་ཡེ་ཤེས་སྒྱུ་མའི་སྐུ་ཞིག་གྲུབ་པ་ཡིན་གྱི་ལུས་སྔ་མ་དེ་མིན་པ་མ་ཟད་ཡིད་ངོར་འཆར་བ་ཞིག་ཀྱང་མ་ཡིན་པས། སྣང་ལ་རང་བཞིན་མེད་པར་རྟོགས་པའི་ཏིང་ངེ་འཛིན་དེ་ཀུན་རྫོབ་སྒྱུ་ལུས་སུ་འདོད་པ་དང་། ལྷའི་སྐུ་སྣང་ལ་རང་བཞིན་མེད་པ་ཙམ་ཞིག་ཀུན་རྫོབ་སྒྱུ་ལུས་འདོད་པ་ནི་དོན་མ་ཡིན་པར་འཇམ་མགོན་བླ་མ་བློ་བཟང་གྲགས་པའི་དཔལ་གྱིས་གསུངས་སོ།།

འོ་ན་གདུལ་བྱ་རིན་པོ་ཆེ་ལྟ་བུ་དེ་ཡང་ཚེ་གཅིག་ལུས་གཅིག་གིས་འཚང་རྒྱ་བ་མེད་དམ་ཞེ་ན། དེ་ནི་མེད་དེ། རྒྱུ་མཚན་ཡང་ཇོ་བོ་རྗེ་དཔལ་ལྡན་ཨ་ཏི་ཤ་ཡིས་ཚེ་གཅིག་ལ་སངས་རྒྱས་པ་ཡོད་ཀྱང་ལུས་གཅིག་ལ་སངས་རྒྱས་པ་མེད་པར་གསུངས་ཞེས་གྲགས་ལ། མིའི་རྟེན་ལ་ཚེ་འདིར་སངས་རྒྱས་པ་ན་གང་ཟག་དེ་དག་པའི་སྒྱུ་མའི་སྐུ་གྲུབ་ནས་སངས་རྒྱས་ཀྱང་དེའི་སྡུག་བདེན་གྱི་ལུས་དེ་དེ་དང་ཐ་དད་དུ་གྱུར་པས་ལུས་དེས་སངས་རྒྱས་པ་མ་ཡིན་པར་བཞེད་པའི་ཕྱིར།

དཔེར་ན་ཀླུ་སྒྲུབ་ལུས་རྟེན་དེ་ལ་མི་སློབ་པའི་ཟུང་འཇུག་ཐོབ་པ་ཡིན་ཞིང་། མི་རང་བཞིན་པའི་མཐོང་ཐུབ་པའི་ཀླུ་སྒྲུབ་ཀྱི་ལུས་དེ་སྡུག་བདེན་ཡིན་ཕྱིར་དེ་ནི་ལས་ཉོན་གྱིས་འཕངས་པའི་ཀླུ་སྒྲུབ་ཀྱི་སྔ་མའི་ལུས་ཡིན་ཡང་ཀླུ་སྒྲུབ་ཀྱིས་རིམ་པ་བཞི་བའི་འོད་གསལ་མངོན་དུ་བྱས་པ་ནས་དེ་ཀླུ་སྒྲུབ་ཀྱི་ལུས་མ་ཡིན་པར་བཞེད་དེ། ཀླུ་སྒྲུབ་ཀྱི་སྔ་མའི་སྐུ་ལུས་དེ་དག་པའི་སྒྱུ་ལུས་སུ་གྱུར་པ་མ་ཡིན་པར་སྡུག་བདེན་ཡིན་ཞིང་། དེ་དག་པའི་སྒྱུ་ལུས་གྲུབ་པ་ནས་རྒྱུད་ཆད་དེ་ཀླུ་སྒྲུབ་ཀྱི་རྒྱུད་ཀྱིས་མ་བསྡུས་པར་བཞེད་པའི་ཕྱིར། དེ་ལྟར་གྲུབ་སྟེ། ཀླུ་སྒྲུབ་ཀྱིས་རིམ་པ་བཞི་བའི་འོད་གསལ་མངོན་དུ་བྱས་པ་ནས་ཀླུ་སྒྲུབ་ཀྱི་སྐུ་ལུས་སྔ་མ་དེ་དང་ཀླུ་སྒྲུབ་གཉིས་ཀྱི་ལས་ཉོན་གྱི་རྟེན་དང་བརྟེན་པའི་འབྲེལ་བ་དེ་ཆད་སོང་བ་ཡིན་པའི་ཕྱིར་ཞེས་བཞེད་དོ།།

དེས་ན་སྒྱུ་ལུས་ནི་རང་གི་ཉེར་ལེན་རླུང་ཕྲ་བ་ལས་གྲུབ་པ་ཡིན་ཕྱིར་གཟུགས་སུ་ཁས་ལེན་ཡང་རྡུལ་དུ་གྲུབ་པའི་བེམ་པོ་ནི་མ་ཡིན་པར་ཡེ་ཤེས་ཀྱི་བདག་ཉིད་ཅན་ཡིན་པར་བཞེད་ལ། སྒྱུ་ལུས་ཀྱི་སྒྲུབ་གཞི་གཉུག་མའི་ལུས་སམ་ཤིན་ཏུ་ཕྲ་བའི་རླུང་སེམས་ངོ་བོ་གཅིག་པའི་ཡ་གྱལ་གྱི་རླུང་དེ་གཟུགས་དང་ཤེས་པའི་བདག་ཉིད་དུ་འདོད་དགོས་པར་མཁས་པ་མང་པོ་གསུངས། དེས་ན་སྔགས་ལུགས་འདིར་གཟུགས་སུ་གྱུར་པའི་ལམ་ཡོད་པར་བཞེད་པ་ཡིན་དགོས་སོ།།

རིམ་པ་བཞི་བའི་འོད་གསལ་སྐྱེས་པ་ན་མ་དག་པའི་སྒྱུ་ལུས་དེ་ཐིམ་པར་གྱུར་པའམ་འགགས་འགྲོ་བའི་རྒྱུ་མཚན་ནི། སེམས་དབེན་མཐར་ཐུག་དཔེའི་འོད་གསལ་དང་། རིམ་པ་བཞི་བའི་དོན་གྱི་འོད་གསལ་གཉིས་གཉུག་སེམས་ཤིན་ཏུ་ཕྲ་བ་ཡིན་པ་དང་། དེ་གཉིས་ཀྱི་བཞོན་པའི་རླུང་དེ་ཡང་གཉུག་མའི་རླུང་ཤིན་ཏུ་ཕྲ་བ་ཡིན་པ་ལ་འདྲ་ཞིང་། སྟོང་ཉིད་རྟོགས་པའི་བློ་ཡིན་པ་ལ་པའང་འདྲ་མོད། སྔ་མ་རྟོག་བཅས་དང་། ཕྱི་མ་རྟོག་མེད་ཡིན་པའི་ཁྱད་པར་ནི་ཡོད་ལ། རིམ་པ་བཞི་བའི་དོན་གྱི་འོད་གསལ་སྐྱེས་པ་ན་རྟོག་པ་ཕྲ་རགས་བཞོན་པའི་རླུང་དང་བཅས་ཐིམ་དགོས་པ་ཡིན་པའི་རྒྱུ་མཚན་གྱིས་རྟོག་པའི་བཞོན་པར་གྱུར་པའི་རླུང་གི་དངོས་ཀྱི་ཉེར་ལེན་བྱས་པའི་མ་དག་པའི་སྒྱུ་ལུས་དེ་ཡང་ཐིམ་དགོས་པ་ཡིན་པར་བཞེད་དོ།།

སྒྱུ་ལུས་ལ་མཚུངས་པ་ལྔ་དང་། ཁྱད་པར་ལྔ་ལྡན་པར་གསུངས་ཏེ། དང་པོ་ལྔ་ནི། དཔེར་ན་གཉིད་ཀྱི་འོད་གསལ་དུ་ཞུགས་པ་ལས་རྨི་ལམ་གྱི་ལུས་སུ་ལྡང་བ་དང་མཚུངས་པར་སྒྱུ་ལུས་ནི་ལམ་དུས་ཀྱི་ཐིམ་རིམ་རྣམས་ཀྱི་མཐའི་དཔེའི་འོད་གསལ་ལས་སྒྱུ་ལུས་སུ་ལྡང་བ་དང་། དཔེར་ན་རྨི་ལམ་གྱི་ལུས་དེ་རླུང་སེམས་ཙམ་ལས་གྲུབ་པ་དང་མཚུངས་པར་སྒྱུ་ལུས་དེ་ཡང་རླུང་སེམས་ཙམ་ལས་གྲུབ་པ་དང་། དཔེར་ན་རྨི་ལམ་གྱི་ལུས་ལ་ངའོ་སྙམ་དུ་ང་རྒྱལ་འཕོ་བ་དང་མཚུངས་པར་སྒྱུ་ལུས་ལ་ངའོ་སྙམ་པའི་ང་རྒྱལ་འཕོ་བ་དང་། དཔེར་ན་རྨི་ལམ་གྱི་ལུས་དེ་རྣམ་སྨིན་གྱི་ལུས་རགས་པ་ལས་སོ་སོར་གྲུབ་པ་དང་མཚུངས་པར་སྒྱུ་ལུས་དེ་རྣམ་སྨིན་གྱི་ལུས་རགས་པ་ལས་གོ་ས་ལོགས་སུ་ཕྱེ་བ་དང་། དཔེར་ན་རྨི་ལམ་གྱི་ལུས་དེ་སླར་ལུས་རགས་པ་ལ་འཇུག་པ་དང་མཚུངས་པར་སྒྱུ་ལུས་དེ་སླར་རྣམ་སྨིན་གྱི་ལུས་དམ་ཚིག་པའི་ལྷར་གསལ་བ་ལ་འཇུག་པ་དང་ལྔའོ།།

གཉིས་པ་ལྔ་ནི། སྒྱུ་ལུས་ཀྱི་ལྷ་དེ་གང་ནས་ལྡང་བའི་གནས་ཀྱི་ཁྱད་པར་ནི། སྙིང་གའི་རྩ་འཁོར་དབུས་ཀྱི་དྷཱུ་ཏཱིའི་ནང་གི་ཐིག་ལེ་ཕྲ་མོ་གའུ་ཁ་སྦྱར་ལྟ་བུའི་གནས་ནས་ལྡང་བ་དང་། གང་ལས་ལྡང་བའི་རྒྱུའི་ཁྱད་པར་ནི། ཐིག་ལེ་དཀར་དམར་གྱི་དབུས་ཀྱི་མི་ཤིགས་པའི་སྲོག་རླུང་ཕྲ་མོ་ལས་ལྡང་བ་དང་། གང་གིས་ལྡང་བའི་རྟེན་གྱི་ཁྱད་པར་ནི། སྔ་མའི་སྒྱུ་མའི་སྐུར་ལྡང་བར་བྱའོ་སྙམ་པའི་འཕེན་པ་དྲག་པོ་ལས་ལྡང་བ་དང་། གང་གི་ཚེ་ལྡང་བའི་དུས་ཀྱི་ཁྱད་པར་ནི། རླུང་ཡོངས་རྫོགས་སྙིང་གའི་མི་ཤིགས་པ་ལ་ཐིམ་ནས་སྣང་བ་གསུམ་དང་དཔེའི་འོད་གསལ་མངོན་དུ་གྱུར་པའི་མཇུག་དེ་མ་ཐག་ཏུ་ལྡང་བ་དང་། གང་གི་ངོ་བོར་ལྡང་བ་འབྲས་བུའི་ཁྱད་པར་ནི། གསང་བ་འདུས་པ་ལ་སོགས་པའི་ཡབ་ཡུམ་ཞལ་སྦྱོར་ཅན་གྱི་ལྷ་སྐུའི་ངོ་བོར་ལྡང་བ་དང་ལྔའོ།།

སྒྱུ་མའི་སྐུ་གྲུབ་པ་ན་སྒྱུ་ལུས་དེ་ལ་ཁྱད་པར་གྱི་ཆོས་བཅོ་ལྔ་དང་ལྡན་ཏེ། རྒྱུའི་ཁྱད་པར་དང་། དུས་ཀྱི་ཁྱད་པར། གནས་ཀྱི་ཁྱད་པར། ངོ་བོའི་ཁྱད་པར། ཁ་དོག་གི་ཁྱད་པར། དབྱིབས་ཀྱི་ཁྱད་པར། མཐོང་ཚུལ་གྱི་ཁྱད་པར། འོད་ཟེར་འཕྲོ་བའི་ཁྱད་པར། ཡུལ་ལ་ལོངས་སྤྱོད་པའི་ཁྱད་པར། འཕེན་པའི་ཁྱད་པར། ཡོན་ཏན་གྱི་ཁྱད་པར། དཔེས་མཚོན་པའི་ཁྱད་པར། མཚན་གྱི་རྣམ་གྲངས་ཀྱི་ཁྱད་པར། ངེས་ཚིག་གི་ཁྱད་པར། ཡུན་ཚད་ཀྱི་ཁྱད་པར་དང་བཅོ་ལྔ་ལྡན་པ་ཡིན་པའི་ཕྱིར། དེ་ཡང་དང་པོ། སེམས་དབེན་མཐར་ཐུག་དཔེའི་འོད་གསལ་གྱི་བཞོན་པའི་རླུང་དང་དེ་དང་ངོ་བོ་གཅིག་པའི་གཉུག་སེམས་ཏེ་སེམས་ཙམ་ལས་བྱུང་བ་ཡིན་པ་ནི་རྒྱུའི་ཁྱད་པར་རོ།།

གཉིས་པ། སེམས་དབེན་མཐར་ཐུག་གི་ལུགས་ལྡོག་གི་ཉེར་ཐོབ་དང་དུས་མཉམ་དུ་གྲུབ་པ་ནི་དུས་ཀྱི་ཁྱད་པར་རོ། །གསུམ་པ། དྷཱུ་ཏཱིའི་དབུས་ཀྱི་མི་ཤིགས་པའི་ཐིག་ལེའི་ནང་དང་ཕྱི་རོལ་ཅི་རིགས་སུ་ལྷ་སྐུའི་ངོ་བོར་ལྡང་བ་ཡིན་ཕྱིར་ཕྱི་ནང་དེ་གཉིས་ནི་གནས་ཀྱི་ཁྱད་པར་རོ། །བཞི་བ། རླུང་སེམས་ཙམ་ལས་གྲུབ་ཅིང་དྭངས་ཤིང་ཐོགས་པ་མེད་པའི་འཇའ་ལུས་ཡིན་པ་དེ་ངོ་བོའི་ཁྱད་པར་རོ།།

ལྔ་བ། སྒྱུ་ལུས་ཀྱི་སྒྲུབ་གཞི་སྲོག་འཛིན་ཤིན་ཏུ་ཕྲ་བའི་རླུང་དེ་ཁ་དོག་དཀར་པོ་ཡིན་པའི་གནད་ཀྱིས་སྒྱུ་ལུས་ཀྱི་ཁ་དོག་དེ་གཙོ་བོ་དཀར་པོ་ཡིན་པ་ནི་ཁ་དོག་གི་ཁྱད་པར་རོ། །དྲུག་པ། གསང་འདུས་ལ་ཞལ་གསུམ་ཕྱག་དྲུག་པ་ཡུམ་དང་བཅས་པར་ཡོད་པ་ནི་དབྱིབས་ཀྱི་ཁྱད་པར་རོ། །བདུན་པ། སྒྱུ་ལུས་དེ་ཉིད་སྒྱུ་ལུས་མ་ཐོབ་པའི་སོ་སྐྱེས་ཀྱིས་མངོན་སུམ་དུ་མི་མཐོང་བ་ནི་མཐོང་ཚུལ་གྱི་ཁྱད་པར་རོ།།

བརྒྱད་པ། སྐུའི་འོད་ཟེར་གྱིས་འཇིག་རྟེན་གྱི་ཁམས་གྲངས་མེད་པ་སྣང་བར་བྱེད་པ་ནི་འོད་ཟེར་འཕྲོ་བའི་ཁྱད་པར་རོ། །དགུ་བ། དབང་ཤེས་ལྔ་ཚང་ཞིང་ཡན་ལག་གི་རླུང་ལྔ་དང་ལྡན་པ་ནི་ཡུལ་ལ་ལོངས་སྤྱོད་པའི་ཁྱད་པར་རོ།།

བཅུ་བ། སྒྱུ་མའི་སྐུ་དེ་འོད་གསལ་གྱི་ངང་ནས་འཕེན་པའི་སྟོབས་ཀྱིས་གྲུབ་པ་ཡིན་པ་ནི་འཕེན་པའི་ཁྱད་པར་རོ། །བཅུ་བཅིག་པ། ལམ་གྱི་མཚན་དཔེས་རྒྱན། ནམ་མཁའ་མཛོད་བརྙེས། སངས་རྒྱས་ལས་དབང་སྐུར་ཐོབ། ཚེ་དེ་ལ་འཚང་རྒྱ་བ་རྣམས་ཀྱི་ཡོན་ཏན་དང་ལྡན་པ་ནི་ཡོན་ཏན་གྱི་ཁྱད་པར་རོ།།

བཅུ་གཉིས། དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། སྒྲ་བརྙན་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་ནང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །ཞེས་པ་ལྟར་གྱི་སྒྱུ་མའི་དཔེ་བཅུ་གཉིས་ཀྱིས་མཚོན་པར་བྱེད་པ་ནི་དཔེས་མཚོན་པའི་ཁྱད་པར་རོ།།

བཅུ་གསུམ་པ། ཀླུ་སྒྲུབ་ཀྱི་རིམ་ལྔ་ལས། བདག་བྱིན་བརླབ་ཅེས་དེ་བཤད་དོ། །སྒྱུ་མར་བསྟན་པའི་མཚན་ཉིད་ཀྱིས། །འདི་ཉིད་ཉེ་བར་མཚོན་པ་སྟེ། །ཀུན་རྫོབ་བདེན་པའི་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་གྱུར། །རྡོ་རྗེའི་སྐུ་ཡང་དེ་ཉིད་ཡིན། །རྡོ་རྗེ་སེམས་དཔའ་བདག་ཉིད་དེ། །ཞེས་གསུངས་པ་ལྟར་གྱི་མཚན་གྱི་གྲངས་དུ་མས་བསྟན་པ་ནི་མཚན་གྱི་རྣམ་གྲངས་ཀྱི་ཁྱད་པར་རོ།།

བཅུ་བཞི་བ། བདག་ནི་ངའོ་སྙམ་དུ་ཐ་སྙད་འདྲོགས་པའི་གཞིར་གྱུར་པ་ནི་ཤིན་ཏུ་ཕྲ་བའི་རླུང་སེམས་དེ་ཡིན་ལ། དེ་ཉིད་བྱིན་གྱིས་བརླབས་ཏེ་ལྷའི་སྐུར་བསྐྱེད་པ་ཡིན་པ་ནི་ངེས་ཚིག་གི་ཁྱད་པར་རོ།།

བཅོ་ལྔ་བ། རྡོར་ཕྲེང་ལས། སྐྱེ་བའི་རིམ་ལྟར་ཐིམ་པར་འགྱུར། །ཞེས་གསུངས་པ་ལྟར་རིམ་པ་བཞི་བའི་དོན་གྱི་འོད་གསལ་མ་སྐྱེས་པའི་བར་དུ་གནས་ཤིང་། དོན་གྱི་འོད་གསལ་མངོན་དུ་བྱས་པ་ན་ནམ་མཁའ་ལ་འཇའ་ཡལ་བ་ལྟར་དག་འགྲོ་བ་ཡིན་པ་ནི་ཡུན་ཚད་ཀྱི་ཁྱད་པར་རོ།།

སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་མཚོན་ཚུལ་ཡང་། སྒྱུ་ལུས་དེ་ཉིད་རླུང་སེམས་ཙམ་རྡོ་རྗེ་འཆང་གི་སྐུར་བསྐྱེད་པ་ན་ཡན་ལག་དང་ཉིང་ལག་ཚང་བར་ཡོད་ཀྱང་རླུང་སེམས་ཙམ་ལས་མེད་པའི་ཕྱིར་ན་སྒྱུ་མའི་མི་ལྟ་བུ་དང་། གདུལ་བྱའི་གནས་གང་དུ་ཡོད་པ་དེར་རྣལ་འབྱོར་བས་དེར་བསམ་པ་ཙམ་གྱིས་ཁྱབ་པས་ཆུ་ཟླ་ལྟ་བུ་དང་། ཤ་ཁྲག་རུས་པ་ལ་སོགས་པ་དང་བྲལ་བས་མིག་ཡོར་ཏེ་མིའི་གྲིབ་མའི་ལུས་ལྟ་བུ་དང་། རྣལ་འབྱོར་བའི་སེམས་གཡོ་ན་སྒྱུ་ལུས་ཀྱི་སྐུ་དེ་ཡང་སྐད་ཅིག་གིས་གཡོ་བས་སྨིག་རྒྱུ་ལྟ་བུ་དང་། ལུས་རགས་པ་ལས་ཟུར་དུ་ཕྱེ་བའི་རླུང་སེམས་ཙམ་ལས་གྲུབ་པའི་ལུས་ཡིན་པས་རྨི་ལམ་གྱི་ལུས་ལྟ་བུ་དང་། རྣམ་སྨིན་གྱི་ལུས་རགས་པ་དང་རྒྱུད་གཅིག་ཏུ་གཏོགས་ཀྱང་གཞན་དུ་སྣང་བས་བྲག་ཆ་ལྟ་བུ་དང་། སྐུ་རྟེན་བརྟེན་པའི་དཀྱིལ་འཁོར་དངོས་སུ་སྣང་བས་དྲི་ཟའི་གྲོང་ཁྱེར་ལྟ་བུ་དང་། དོན་ལ་སྤྲུལ་གཞི་སྐུ་གཅིག་ཡིན་ཡང་སྤྲུལ་པ་དུ་མར་སྣང་བས་མིག་འཕྲུལ་ལྟ་བུ་དང་། སྐུ་ལ་ཁ་དོག་ལྔ་མ་འདྲེས་པར་སྣང་བས་འཇའ་ཚོན་ལྟ་བུ་དང་། རྣམ་སྨིན་གྱི་ཕུང་པོའི་ནང་ན་གནས་པས་སྤྲིན་གསེབ་ན་གློག་འགྱུ་བ་ལྟ་བུ་དང་། སྟོང་པའི་ངང་ལས་ཐོལ་གྱིས་བཞེངས་པས་ཤིན་ཏུ་དྭངས་པའི་ཆུའི་ཆུ་བུར་བརྡོལ་བ་ལྟ་བུ་དང་། ཡན་ལག་ཉིང་ལག་དང་དབང་པོ་ལྔ་སོགས་ཐམས་ཅད་ཡོངས་སུ་རྫོགས་པས་མེ་ལོང་དུ་རྡོ་རྗེ་འཆང་གི་སྐུ་འཆར་བ་ལྟ་བུ་ཞིག་ཡིན་པར་གསུངས་ཏེ། ཡེ་ཤེས་རྡོ་རྗེ་ཀུན་ལས་བཏུས་པ་ལས། སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། སྒྲ་བརྙན་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་ནང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །ཞེས་གསུངས་པའི་ཕྱིར་རོ།།

ཡང་སྒྱུ་ལུས་ཀྱི་སྐབས་སུ་སད་གཉིད་འཆི་གསུམ་གྱི་སྐུ་གསུམ་དགུ་ལ་བསྲེ་བ་དགུ་སྐོར་གྱི་མན་ངག་ཞེས་པ་བསྒོམ་པར་བཤད་ལ། དེ་ནི་སད་དུས་སྐུ་གསུམ་དང་བསྲེ་བ་དང་། གཉིད་དུས་སྐུ་གསུམ་དང་བསྲེ་བ་དང་། འཆི་དུས་སྐུ་གསུམ་དང་བསྲེ་བ་སྟེ་དགུ་ལ་བྱ་ཞིང་། དེ་ཡང་ལམ་དུས་ཀྱི་སྐུ་གསུམ་དང་བསྲེ་བ་གསུམ་སྟེ། ལམ་དུས་ཀྱི་ཆོས་སྐུ་དང་བསྲེ་བ་དང༌། ལམ་དུས་ཀྱི་ལོངས་སྐུ་དང་བསྲེ་བ་དང༌། ལམ་དུས་ཀྱི་སྤྲུལ་སྐུ་དང་བསྲེ་བ་སྟེ་གསུམ་དུ་ཕྱེས་ནས། སྐུ་གསུམ་པོ་རེ་རེ་ལ་སད་གཉིད་འཆི་བ་གསུམ་དུ་བསྲེ་བ་ཞེས་སྦྱར་རོ།།

དེ་ལས་དང་པོ་གཉིད་སད་པའི་དུས་སུ་ཆོས་སྐུ་དང་བསྲེ་བ་ནི། འོག་སྒོ་ནོར་བུའི་སྣ་རྩེ་དྷཱུ་ཏཱིའི་མར་སྣེར་རྫས་ཀྱི་ཐིག་ལེ་ཕྲ་མོ་བསྒོམ་པ་བརྟན་པའི་མཐར་རོ་རྐྱང་གི་རླུང་དྷཱུ་ཏཱིར་ཞུགས་ཤིང་ཐིམ་པ་ལ་བརྟེན་ནས། སྨིག་རྒྱུ་དང་། དུ་བ་དང་། མེ་ཁྱེར་དང་། མར་མེ་ལྟ་བུའི་རྟགས་བཞི་སྔོན་དུ་འཆར་ཞིང་། ས་ཆུ་མེ་རླུང་བཞི་ཐིམ་པའི་རིམ་པ་དང་། དེའི་འོག་ཏུ་སྣང་མཆེད་ཐོབ་གསུམ་རིམ་གྱིས་འཆར་ཞིང་ནུབ་པའི་མཐར་ཐམས་ཅད་སྟོང་པ་འོད་གསལ་ཆེན་པོ་འཆར་བའི་སྒོ་དང་པོ་དང་། སྙིང་གའི་སྣ་རྩེར་མི་ཤིགས་པ་སྔགས་ཀྱི་ཐིག་ལེ་བསྒོམ་པ་བརྟན་པའི་མཐར་རོ་རྐྱང་གི་རླུང་དྷཱུ་ཏཱིར་ཞུགས་ཤིང་ཐིམ་པ་ལ་བརྟེན་ནས་སྨིག་རྒྱུ་ལ་སོགས་པའི་རྟགས་བཞི་འཆར་ཞིང༌། དེའི་འོག་ཏུ་སྟོང་པ་དང་ཤིན་ཏུ་སྟོང་པ་དང༌། སྟོང་པ་ཆེན་པོ་སྟེ་སྣང་བ་གསུམ་ཤར་བའི་མཐར་ཐམས་ཅད་སྟོང་པ་འོད་གསལ་ཆེན་པོ་འཆར་བའི་སྒོ་གཉིས་པ་དང་། གདོང་གི་སྣ་རྩེར་འོད་ཀྱི་ཐིག་ལེ་རླུང་འོད་ཟེར་ལྔ་པ་སྣ་བུག་ནས་རྒྱུ་བའི་འཇུག་གནས་ལྡང་གསུམ་མ་བཅོས་པར་རྡོ་རྗེ་གསུམ་གྱི་རང་གདངས་སུ་འཆར་བའི་རྡོར་བཟླས་གོམས་པའི་མཐར་རོ་རྐྱང་གི་རླུང་དྷཱུ་ཏཱིར་ཞུགས་ཤིང་ཐིམ་པ་ལ་བརྟེན་ནས་རྟགས་བཞི་འཆར་མཐར་སྟོང་པ་བཞི་སྐྱེས་པའི་མཐར་ཐམས་ཅད་སྟོང་པ་འོད་གསལ་འཆར་བའི་དུས་སུ་སྟོང་ཉིད་ཀྱི་ལྟ་བའི་ཐོག་ཏུ་བཞག་ནས་སྒོམ་པ་དེ་ལ་བྱའོ།།

གཉིས་པ་གཉིད་ཀྱི་དུས་སུ་ཆོས་སྐུ་དང་བསྲེ་བ་ནི། བཤད་མ་ཐག་པའི་འོག་སྒོ་སྙིང་ག་གདོང་གི་སྣ་རྩེའི་སྒོམ་པ་གསུམ་པོ་གང་རུང་གིས་རོ་རྐྱང་གི་རླུང་དབུ་མར་ཞུགས་གནས་ཐིམ་སྟེ་སྟོང་པ་བཞི་རིམ་བཞིན་དྲང་ནུས་པ་ནས། མཚན་མོ་གཉིད་དུ་འགྲོ་ཁར་སྙིང་ཁར་མི་ཤིགས་པའི་ཐིག་ལེ་སྒོམ་པའམ། རྡོར་བཟླས་གང་རུང་ཉམས་སུ་བླངས་པ་ལ་བརྟེན་ནས་སྨིག་རྒྱུ་ལ་སོགས་པའི་རྟགས་བཞི་དང༌། སྟོང་པ་གསུམ་གྱི་མཐར་ཐམས་ཅད་སྟོང་པ་འོད་གསལ་འཆར་བའི་དུས་སུ་ལྟ་ཐོག་ཏུ་བཞག་ནས་སྒོམ་པ་དེ་ཡིན་ནོ།།

གཞི་དུས་སུ་མི་ཐ་མལ་བ་གཉིད་དུ་འགྲོ་བའི་ཚེ་རླུང་སྙིང་གར་རང་ཤུགས་ཀྱིས་འདུས་པ་ལ་བརྟེན་ནས་སྟོང་པ་བཞི་འོལ་སྤྱི་ཙམ་ཞིག་འཆར་དུ་ཡོད་པ་དེ་ཤེས་ནས་གཉིད་ཀྱི་འོད་གསལ་འཛིན་པའི་གདམས་ངག་གིས་ཉམས་སུ་བླངས་ན་སྟོང་པ་བཞི་འཆར་སླ་བའི་གནད་ཡོད་པ་དང་། གཉིད་དུ་སོང་བའི་ཐུན་སྟོད་ཀྱི་སྐབས་རྨི་ལམ་མི་འཆར་བའི་དུས་སུ་གཉིད་ཀྱི་འོད་གསལ་འཛིན་དགོས་པར་འཇམ་མགོན་བླ་མ་ཙོང་ཁ་པས་གསུངས་སོ།།

གསུམ་པ་འཆི་བའི་དུས་སུ་ཆོས་སྐུ་དང་བསྲེ་བ་ནི། ད་ལྟ་སད་གཉིད་གཉིས་ཀྱི་དུས་སུ་བཤད་མ་ཐག་པ་ལྟར་གྱི་འོད་གསལ་གྱི་ཆོས་སྐུ་དང་བསྲེ་བ་ལ་བྱང་བའི་གང་ཟག་ཞིག་ཡིན་ན་འཆི་བའི་དུས་སུ་ས་ཆུ་ལ་ཐིམ་པ་སོགས་ཀྱི་རྟགས་དང་པོ་ཤར་བའི་དུས་སུ་སྙིང་གར་མི་ཤིགས་པའི་ཐིག་ལེ་སྒོམ་པ་དང༌། སྙིང་གའི་དྷཱུ་ཏཱིའི་དབུས་ན་རླུང་ལྡང་འཇུག་གནས་གསུམ་གྱི་རྡོ་རྗེའི་བཟླས་པ་བྱས་ན། སྔར་བསྒོམས་པས་གོམས་པ་དང་། གཞི་དུས་འཆི་བའི་དུས་སུ་སྙིང་གར་རླུང་རང་ཤུགས་ཀྱིས་འདུ་བའི་གནད་ཡོད་པའི་མཐུས་རྟགས་བཞི་དང་སྟོང་པ་བཞི་རིམ་པར་འཆར་ལ། གཞི་དུས་འཆི་བའི་ཚེ་སྟོང་པ་བཞི་རང་ཤུགས་ཀྱིས་འཆར་བའི་ཐམས་ཆད་སྟོང་པ་འཆི་བ་འོད་གསལ་ནི་མ་དང་། བསྒོམས་པའི་སྟོབས་ཀྱིས་འཆར་བའི་འོད་གསལ་དེ་བུ་ཡིན་ཞིང་། དེ་འདྲའི་བུའི་འོད་གསལ་དེ་འཆི་བའི་འོད་གསལ་གྱི་དབྱིངས་སུ་འདྲེས་པ་ལ་འོད་གསལ་མ་བུ་འདྲེས་པ་ཞེས་ཟེར་ཞིང་། དེ་འདྲའི་འོད་གསལ་མངོན་དུ་གྱུར་པ་དེ་ལ་འཆི་དུས་ཆོས་སྐུ་དང་བསྲེ་བ་ཡིན་ནོ།།

གཉིས་པ་ལམ་དུས་ཀྱི་ལོངས་སྐུ་དང་བསྲེ་བ་གསུམ་ནི། སད་དུས་དང་། རྨི་ལམ་དང་། འཆི་བར་བསྲེ་བ་གསུམ་ལས། དང་པོ་གཉིད་སད་དུས་ཀྱི་སྒྱུ་མའི་ལུས་ལོངས་སྐུ་དང་བསྲེ་བ་ནི། གོང་བཤད་ལྟར་གྱི་འོག་སྙིང་གདོང་གསུམ་གྱི་སྒོ་གསུམ་པོ་བསྒོམས་ཏེ་རླུང་དྷཱུ་ཏཱིར་ཞུགས་ཤིང་ཐིམ་ནས་སྣང་མཆེད་ཐོབ་གསུམ་འོད་གསལ་དང་བཞི་འཆར་བའི་བར་གྱི་ཏིང་ངེ་འཛིན་ལེགས་པར་བསྐྱེད་ནས་འོད་གསལ་ལ་ཇི་གནས་སུ་མཉམ་པར་འཇོག །རླུང་ཐིམ་པ་སླར་ལངས་པའི་མཐུས་འོད་གསལ་གྱི་ཏིང་ངེ་འཛིན་དེ་ལས་ལྡང་བར་རྩོམ་པ་ན་དང་པོའི་མགོན་པོ་གསང་བ་འདུས་པའི་སྐུར་ལྡང་བར་བྱའོ་སྙམ་པའི་འཕེན་པ་སྔོན་སོང་གིས་སྒྱུ་མའི་སྐུར་ཆུ་ལས་ཉ་ལྡང་བའི་ཚུལ་དུ་འོད་གསལ་གྱི་ངང་ནས་དེར་ཀྲོང་ངེར་ལྡང་སྟེ། དེ་ལ་སེམས་ཅི་གནས་ཀྱི་བར་དུ་མཉམ་པར་འཇོག་པ་ལ་བྱའོ།།

གཉིས་པ་གཉིད་ཀྱི་དུས་སུ་རྨི་ལམ་གྱི་སྒྱུ་ལུས་ལོངས་སྐུ་དང་བསྲེ་བ་ནི། གོང་བཤད་གཉིད་ཀྱི་འོད་གསལ་ཆོས་སྐུ་ཤར་བའི་ཚེ་དེ་ལ་ཅི་ཙམ་གནས་པར་མཉམ་པར་འཇོག་པ་དང་། དེ་ནས་རླུང་ཐིམ་པ་སླར་ལངས་པའི་མཐུས་འོད་གསལ་གྱི་ཏིང་ངེ་འཛིན་དེ་ལས་ལྡང་བར་རྩོམ་པའི་སྒྱུ་མའི་སྐུར་ལྡང་བར་བྱའོ་སྙམ་པའི་བློ་ཡི་འཕེན་པ་སྔོན་སོང་གི་སྒོ་ནས་མཐར་རྨི་ལམ་གྱི་སྣང་བ་དེ་རྨི་ལམ་ཕལ་པ་གཞན་དུ་མ་ཤོར་བར་ཆུ་ལས་ཉ་ལྡང་བ་བཞིན་དུ་འོད་གསལ་གྱི་ངང་ནས་སྒྱུ་མའི་སྐུ་དེར་ཀྲོང་ངེར་ལྡང་ཞིང་། སྒྱུ་མའི་སྐུ་དེ་ལ་སེམས་ཅི་ཙམ་གནས་ཀྱི་བར་དུ་མཉམ་པར་འཇོག་པ་ལ་བྱའོ།།

གསུམ་པ་འཆི་བའི་དུས་སུ་སྒྱུ་ལུས་ལོངས་སྐུ་དང་བསྲེ་བ་ནི། འདི་ནི་འཆི་བ་དངོས་ལ་བསྲེ་བ་མིན་པར་འཆི་དུས་སུ་འཆི་བའི་འོད་གསལ་མངོན་དུ་ཤར་བའི་མཐར་འཆི་བ་ལས་བར་དོ་དངོས་སུ་འཆར་བ་ལ་བསྲེ་བའམ་བར་དོ་དང་རྗེས་སུ་མཐུན་པའི་སྒྱུ་ལུས་ལོངས་སྐུ་དང་བསྲེ་བ་ལ་བྱེད་ཅིང་། གོང་བཤད་ལྟར་སྒོ་གསུམ་གྱིས་རླུང་དབུ་མར་ཐིམ་པ་སོགས་ནས་འོད་གསལ་འཆར་བའི་བར་ཉམས་སུ་བླངས་ཤིང་འཆི་བའི་དུས་སུ་འཆི་བའི་མ་ཡི་འོད་གསལ་དང་། བསྒོམས་སྟོབས་ཀྱིས་གསལ་བའི་བུའི་འོད་གསལ་གཉིས་གཅིག་ཏུ་འདྲེས་པའི་འོད་གསལ་མ་བུ་བསྲེས་ཏེ་འོད་གསལ་ལ་ཅི་གནས་སུ་མཉམ་པར་འཇོག་ཅིང་། མཐར་རླུང་ཐིམ་པ་ལས་ལངས་ཏེ་འཆི་བ་འོད་གསལ་ལས་བར་དོ་འབྱུང་བར་རྩོམ་པ་ན་སྔར་ལྟར་དང་པོའི་མགོན་པོ་ཡབ་ཡུམ་གྱི་སྐུར་ལྡང་བར་བྱའོ་སྙམ་པའི་བློའི་འཕེན་པ་བཏང་ནས་དེའི་མཐར་འོད་གསལ་གྱི་ཏིང་ངེ་འཛིན་དེ་ལས་ལྡང་བ་ན་བར་དོ་ཐ་མལ་པའི་ལུས་སུ་མི་ལྡང་བར་ཆུ་ལས་ཉ་ལྡང་བའི་ཚུལ་དུ་འོད་གསལ་གྱི་ངང་ནས་སྒྱུ་མའི་སྐུར་ཀྲོང་གིས་ལྡང་ཞིང་། དེ་ལ་སེམས་བཟུང་ཅི་གནས་ཀྱི་བར་དུ་མཉམ་པར་འཇོག་པ་ལ་བྱའོ།།

འདི་ལ་བར་དོའི་ལུས་དེ་སྒྱུ་མའི་ལོངས་སྐུར་སྒོམ་པ་ཙམ་མིན་པར་སེམས་ཅན་རང་ག་བ་གཞན་ལ་བར་དོ་དངོས་སུ་གྲུབ་པའི་དོད་དུ་རྣལ་འབྱོར་བ་རང་གི་ལུས་དེ་དོན་དངོས་སྟེང་ནས་སྒྱུ་མའི་སྐུར་དངོས་སུ་སྐྱེས་པ་ཞིག་ཡོད་ལ། དེ་ནི་བར་དོར་སྒྱུ་ལུས་མཆོག་གྲུབ་པ་ཡིན་ལ། དེ་ལྟར་མི་ནུས་པར་རང་ཉིད་དོན་ལ་བར་དོ་རང་ཁ་བའི་ལུས་བླངས་པ་ཡིན་ན་ཡང་། ཡིད་ཀྱི་ངོར་བར་དོའི་ལུས་ཐ་མལ་པའི་སྣང་བ་དེ་རེ་ཞིག་མི་འཆར་བར་དང་པོའི་མགོན་པོ་ཡབ་ཡུམ་གྱི་ལྷ་སྐུ་རུ་ཤར་བ་ཞིག་སྟེ་བར་དོའི་ལོངས་སྐུའི་བསྲེ་བ་བྱུང་བ་ལ་གཉིས་ཡོད་དོ།།

གསུམ་པ་ལམ་དུས་ཀྱི་སྤྲུལ་སྐུ་དང་བསྲེ་བ་ནི། ཡང་སད་དུས་དང་། རྨི་ལམ་དང་། འཆི་དུས་ཀྱི་སྤྲུལ་སྐུ་དང་བསྲེ་བ་གསུམ་ལས། དང་པོ་གཉིད་སད་པའི་དུས་སུ་ལམ་དུས་ཀྱི་སྤྲུལ་སྐུ་དང་བསྲེ་བ་ནི། གོང་དུ་བཤད་པ་ལྟར་བསྒོམས་ཀྱིས་རླུང་དྷཱུ་ཏཱིར་ཐིམ་པ་ནས་གཉིད་སད་དུས་ཀྱི་འོད་གསལ་གྱི་ངང་ནས་རྣལ་འབྱོར་བ་རང་གི་རྣམ་སྨིན་གྱི་ལུས་དེ་ལས་ལོགས་སུ་ཕྱེ་བའི་སྒྱུ་མའི་སྐུར་ལྡང་། དེ་འདྲའི་སྒྱུ་མའི་ཏིང་ངེ་འཛིན་བསྒོམས་པའི་མཐར་སྒྱུ་ལུས་དེ་རྣམ་སྨིན་གྱི་ཕུང་པོ་ཉིད་ལ་སླར་ཞུགས་ཏེ། རྣམ་སྨིན་གྱི་ཕུང་པོ་དེ་ཉིད་རྡོ་རྗེ་སེམས་དཔའ་མི་བསྐྱོད་པར་གསལ་བའི་ཐུགས་ཀར་སྒྱུ་ལུས་དེ་ཡེ་ཤེས་སེམས་དཔའི་ཚུལ་གྱིས་གནས་པ་ལ་བྱའོ།།

དེ་ནི་འབྲས་བུའི་ལོངས་སྐུ་དེ་མ་དག་པའི་སེམས་ཅན་ཐ་མལ་བའི་མིག་གིས་མི་མཐོང་བས། ཡུམ་སྒྱུ་འཕྲུལ་ལྷ་མོ་ལྟ་བུའི་མངལ་དུ་ལུས་རགས་པའི་སྐྱེ་བ་བཟུང་སྟེ་སྤྲུལ་སྐུའི་རྣམ་པར་བྱོན་ན་ནི་དེ་ཉིད་སེམས་ཅན་མ་དག་པ་རྣམས་ཀྱིས་ཀྱང་མཐོང་ནུས་པ་དང་འདྲ་བར། ལམ་དུས་ཀྱི་སྒྱུ་མའི་ལུས་ཀྱི་ལོངས་སྐུ་དེ་སེམས་ཅན་རང་ག་བ་གཞན་གྱི་མིག་གིས་མཐོང་མི་ནུས་པས། དེ་ལུས་རགས་པ་ལ་ཞུགས་པ་ན། རགས་ལུས་དེས་བཟུང་བའི་སྒྱུ་ལུས་མི་བསྐྱོད་པར་སྣང་བའི་རགས་པའི་ལུས་དེ་ཤའི་མིག་གི་ཡུལ་དུ་གྱུར་པ་ཡིན་པས་ན་དེ་ལ་སྤྲུལ་སྐུ་ཞེས་པའི་ཐ་བརྗོད་པའམ། གཞན་ཡང་སྒྱུ་མའི་ལོངས་སྐུ་དེ་རགས་པའི་སྐུ་སེམས་ཅན་གཞན་གྱི་ཤའི་མིག་གིས་མཐོང་བའི་ཡུལ་དུ་སྤྲུལ་པ་ཡིན་པས་ན་སྤྲུལ་སྐུ་ཞེས་ཐ་སྙད་བྱས་པར་ཡིན་པར་གསུངས་སོ།།

གཉིས་པ་རྨི་ལམ་གྱི་དུས་སུ་ལམ་དུས་ཀྱི་སྤྲུལ་སྐུ་དང་བསྲེ་བ་ནི། གོང་བཤད་ལྟར་གཉིད་ཀྱི་འོད་གསལ་གྱི་ངང་ནས་ལོངས་སྐུ་སྒྱུ་མའི་སྐུར་ལངས་ཏེ་སྒྱུ་མ་ལྟ་བུའི་ཏིང་ངེ་འཛིན་བསྒོམས་པའི་མཐར། རྣམ་སྨིན་གྱི་ལུས་རགས་པ་ལས་ལོགས་སུ་ཕྱེས་པའི་སྒྱུ་མའི་སྐུ་དེ་སླར་རྣམ་སྨིན་གྱི་ལུས་ལ་ཞུགས་ནས་སྙིང་གར་ཡེ་ཤེས་སེམས་དཔའི་ཚུལ་གྱིས་གནས་པ་ལ་བྱ་ཞིང༌། ལམ་དུས་ཀྱི་ལོངས་སྐུ་སྒྱུ་མའི་སྐུ་དེ་རགས་པའི་སྐུ་རུ་སྤྲུལ་པས་ན་སྤྲུལ་སྐུ་དང་བསྲེ་བ་ཞེས་བྱ་ཞིང་གོ་དོན་སྔོན་མ་དང་འདྲའོ།།

རྨི་ལམ་གྱི་བསྲེ་བ་ཐམས་ཅད་དུ་གོང་དུ་སྨོས་པ་ལྟར་གཉིད་དུ་སོང་ནས་རྨི་ལམ་འཆར་བ་དང་མི་འཆར་བའི་དུས་གཉིས་ཡོད་པ་ལས་རྨི་ལམ་འཆར་བའི་དུས་སུ་སྤྲུལ་སྐུ་དང་བསྲེ་བ་དང་ལོངས་སྐུ་དང་བསྲེ་བ་ཡིན་པའི་ཚུལ་ནི་ཤེས་གལ་ཆེའོ།།

གསུམ་པ་འཆི་དུས་སུ་ལམ་དུས་ཀྱི་སྤྲུལ་སྐུ་དང་བསྲེ་བ་ནི། འཆི་བའི་འོད་གསལ་གྱི་མཐར་སྤྲུལ་སྐུ་དང་བསྲེ་བའི་ཚུལ་ནི། དེ་ཡང་སྔར་བཞིན་བསྒོམས་ནས་འཆི་བའི་འོད་གསལ་གྱི་དུས་སུ་འོད་གསལ་མ་བུ་འདྲེས་པར་བྱས་ཏེ་འོད་གསལ་དེའི་ངང་ནས་མཐར་རྣམ་སྨིན་གྱི་ལུས་རགས་པ་ལས་ལོགས་སུ་ལོངས་སྐུ་སྒྱུ་མའི་སྐུར་ལངས་ནས། སྒྱུ་མ་ལྟ་བུའི་ཏིང་ངེ་འཛིན་བསྒོམ། དེའི་རྗེས་སུ་རྣལ་འབྱོར་བ་རང་གང་དུ་སྐྱེ་འདོད་པའི་སྐྱེ་གནས་ཁྱད་པར་ཅན་དུ་སྐྱེ་བ་ལེན་པའི་འཕེན་པ་སྔོན་ནས་བཏང་ནས། སྟོང་པ་བཞི་སྔར་གོམས་པའི་ལམ་དང་བསྲེས་ཏེ་གང་སྐྱེ་བ་ལེན་པའི་ལུས་དེ་ལོངས་སྐུ་དང་པོའི་མགོན་པོའམ་རྡོ་རྗེ་འཆང་གི་སྐུར་བསྒོམ། དེའི་སྙིང་གའི་དབུས་སུ་སྔ་ལོགས་སུ་ལྡང་བའི་ཤིན་ཏུ་ཕྲ་བའི་རླུང་སེམས་ཙམ་ལས་གྲུབ་པའི་སྒྱུ་མའི་སྐུ་དེ་བཞུགས་པར་བསྒོམ་ནས་སྐྱེ་གནས་གང་དུ་སྐྱེ་བ་ལེན་པ་ལ་སྤྲུལ་སྐུ་དང་བསྲེ་བ་ཞེས་བྱ་ཞིང་། དེའི་གོ་དོན་ཡང་སྔར་བཤད་པའི་དོན་ལྟར་རོ།།

རྡོར་བཟླས་དང་སེམས་དབེན་སོགས་ཀྱིས་རླུང་དྷཱུ་ཏཱིར་ཐིམ་པའི་ནུས་པ་ཐོབ་ནས་དེ་ལྟར་བསྲེ་བ་ནི་ཤིན་ཏུ་ལེགས་ཤིང་། གལ་ཏེ་དེ་ལྟར་མ་ཐོབ་ནའང་ད་ལྟའི་དུས་སུ་འཆི་བའི་ཚེ་སྨིག་རྒྱུ་སོགས་རྟགས་བཞི་དང་སྟོང་པ་བཞི་འཆར་བ་རྣམས་ཡིད་ལ་དྲན་པར་བྱ་བ་དང་། འཆི་བ་འོད་གསལ་གྱི་མཐར་བར་དོའི་དུས་སུ་བར་དོ་ལོངས་སྐུར་ལྡང་བའི་མན་ངག་ཀྱང་ཡང་དང་ཡང་དུ་གོམས་པར་བྱས་ན་མཐར་འཆི་བ་དངོས་སུ་སླེབས་པའི་དུས་ཀྱི་ཚེ་ན་རྟགས་བཞི་དང་སྟོང་པ་བཞི་འཆར་བ་རྣམས་ངོས་ཟིན་པ་དང༌། བར་དོའི་དུས་སུ་བར་དོ་ངོས་ཟིན་པ་ལ་ཁྱད་པར་ཤིན་ཏུ་ཆེན་པོ་ཡོད་པར་འཇམ་མགོན་བླ་མ་ཙོང་ཁ་པ་ཆེན་པོས་གསུངས་སོ།།

འོད་གསལ་བཤད་པ།

རིམ་ལྔའི་རིམ་པ་བཞི་བ་དོན་གྱི་འོད་གསལ་ཞེས་པ་ནི། དོན་གྱི་འོད་གསལ་མངོན་ཏུ་གྱུར་པའི་ཐབས་ཉེ་རྒྱུ་རིག་མ་བསྟེན་པ་ནས་བཟུང་སྟེ་དེ་ཁོ་ཉིད་ཀྱི་ཆོས་ཉིད་མངོན་གསུམ་དུ་རྟོགས་ཤིང་ཟུང་འཇུག་མ་ཐོབ་ཀྱི་བར་ཀྱི་རྫོགས་རིམ་གྱི་རྣལ་འབྱོར་དེ་ནི་རིམ་པ་བཞི་བའི་འོད་གསལ་ཞེས་བྱ་བ་ཡིན་ཏེ། རྡོ་རྗེ་དཔལ་མཆོག་ཆེན་པོ་་ལས། འོད་གསལ་བ་ནི་བསམ་གཏན་ཟག་པ་མེད། །རྡུལ་མེད་ས་བོན་མེད་པས་མི་གཡོ་བ། །ལྷན་ཅིག་གནས་པ་ཆོས་སྐུའི་སྙིང་པོ་ནི། །ལྷུན་གྲུབ་བྱང་ཆུབ་སེམས་ཀྱི་ངོ་བོ་ཉིད། །ཅེས་གསུངས་པའི་ཕྱིར་རོ།།

དོན་གྱི་འོད་གསལ་ནི་ཡུལ་ཅན་ལྷན་སྐྱེས་བདེ་བ་ཆེན་པོའི་ཡེ་ཤེས་ཀྱིས་ཡུལ་དོན་དམ་བདེན་པ་འོད་གསལ་རྟོགས་པ་མངོན་དུ་གྱུར་པའི་སྒོ་ནས་ཀུན་རྫོབ་ཀྱི་སྤྲོས་པ་མ་ལུས་པ་དབྱིངས་སུ་ནུབ་པའི་ཡེ་ཤེས་ཡིན་ཕྱིར་དོན་གྱི་འོད་གསལ་ཞེས་བྱ་ཞིང་། དེ་ནི་དོན་གྱི་འོད་གསལ་གྱི་སྒྲ་བཤད་དམ་ངེས་ཚིག་ཡིན་པར་གསུངས་སོ།།

རིམ་པ་བཞི་བའི་འོད་གསལ་ཐོབ་པ་ལ་སྒྱུ་ལུས་སྔོན་དུ་འགྲོ་དགོས་ལ། རྒྱུ་མཚན་ནི། སྟོང་ཉིད་མངོན་གསུམ་དུ་རྟོགས་པ་དང་ཉོན་སྒྲིབ་སྤོང་བའི་ཆེད་དུ་སྒྱུ་ལུས་སྔོན་དུ་འགྲོ་དགོས་པ་མ་ཡིན་ཏེ། ཉན་རང་དགྲ་བཅོམ་པས་སྟོང་ཉིད་མངོན་གསུམ་དུ་རྟོགས་ཤིང་ཉོན་སྒྲིབ་སྤོང་མོད་དེ་སྔོན་དུ་འགྲོ་མི་དགོས་པའི་ཕྱིར་དང་། ཤེས་སྒྲིབ་རགས་པ་སྤོང་ཆེད་དུ་སྒྱུ་ལུས་སྔོན་དུ་འགྲོ་དགོས་པའང་མ་ཡིན་ཏེ། ཕར་ཕྱིན་ཐེག་པ་ནས་བྱང་འཕགས་ཀྱིས་ཀྱང་ཤེས་སྒྲིབ་རགས་པ་སྤོང་མོད་དེ་སྔོན་དུ་འགྲོ་དགོས་པའང་མ་ཡིན་པའི་ཕྱིར་རོ།།

འོ་ན་ཅི་ཞེ་ན། རིམ་པ་བཞི་བའི་འོད་གསལ་དེ་ཤེས་སྒྲིབ་སྤོང་བ་ལ་ནུས་པ་མཐུ་ཅན་དུ་འགྱུར་པའི་ཕྱིར་དུ་སྒྱུ་ལུས་སྔོན་དུ་འགྲོ་དགོས་པ་ཡིན་ཏེ། རིམ་པ་གསུམ་པའི་སྒྱུ་ལུས་དེ་ཐེག་པ་གཞན་གྱི་གྲངས་མེད་གསུམ་གྱི་བསོད་ནམས་ཀྱི་ཚོགས་ཀྱི་དོད་ཡིན་ཞིང་། འབྲས་བུ་སྐུ་གཉིས་ཀྱི་རིགས་འདྲའི་རྒྱུ་དུས་མཉམ་ངོ་བོ་དབྱེར་མེད་དུ་བྱེད་ནུས་པའི་ཕྱིར། གྲུབ་སྟེ། རིམ་པ་གསུམ་པའི་སྒྱུ་ལུས་འོད་གསལ་དུ་བཅུག་པའི་ཚེ་ཤིན་ཏུ་ཕྲ་བའི་རླུང་དེ་ཟག་མེད་ཀྱི་རླུང་དུ་གྱུར་ཏེ་གཟུགས་སྐུའི་ཉེར་ལེན་དང་། རླུང་དེ་དང་ངོ་བོ་གཅིག་པའི་སེམས་དེ་ཟག་མེད་ཀྱི་སེམས་སམ་ཡེ་ཤེས་སུ་གྱུར་ནས་ཆོས་སྐུའི་ཉེར་ལེན་བྱེད་པ་ཡིན་པའི་ཕྱིར། དེ་ཡང་སྒྱུ་ལུས་ཐོབ་ནས་མཉམ་བཞག་ཆིག་སྒྲིལ་དུ་བསྐྱངས་པས་བསོད་ནམས་ཀྱི་ཚོགས་ཀྱི་དོད་དུ་ཆོག་པ་ལས་དམིགས་བཅས་ཀྱི་བསོད་ནམས་གཞན་གསོག་དགོས་པ་མ་ཡིན་པར་གསུངས་སོ།།

རིམ་པ་བཞི་བའི་འོད་གསལ་མངོན་དུ་བྱེད་དུས་ནི། ཐོ་རེངས་ཀྱི་དུས་སུ་མངོན་དུ་བྱེད་པ་ཡིན་ཕྱིར། ཕྱིའི་ཟླ་ཉི་སྲོད་སྨག་གསུམ་སྟེ་ནམ་མཁའ་སླད་བྱེད་ཀྱི་སྐྱོན་གསུམ་ལས་འདས་པའི་ཐོ་རེངས་ཀྱི་དུས་སུ་མངོན་དུ་བྱས་པའི་ལྡོག་ཆ་ནས་ཕྱིའི་མངོན་བྱང་དང་། ནང་ཤེས་པ་སླད་བྱེད་ཀྱི་སྐྱོན་དཀར་དམར་ནག་གསུམ་སྟེ་སྣང་མཆེད་ཐོབ་གསུམ་གྱི་སྣང་བ་ལས་འདས་པའི་དུས་སུ་མངོན་དུ་བྱས་པའི་ལྡོག་ཆ་ནས་ནང་གི་མངོན་བྱང་དུ་བཞག་པ་ཡིན་ཞིང་། རིམ་པ་བཞི་བའི་འོད་གསལ་ཡིན་ན་ཕྱི་ནང་གི་མངོན་བྱང་གཉིས་ཀ་ཡིན་པས་ཁྱབ་པ་ཡིན་ནོ།།

ནམ་སྲོད་ནས་སྨག་ནག་པོ་མ་སངས་ཀྱི་བར་དུ་སྨག་འཐུག་པོས་ཁྱབ་པ་དང་། ཐུན་མཚམས་ཀྱི་སྨག་ནག་པོ་སངས་ནས་ཐོ་རངས་ཀྱི་བར་དུ་ཟླ་འོད་ཀྱིས་ཁྱབ་པ་དང་། ཟླ་འོད་ཡལ་ཡང་ཐོ་རེངས་ཀྱི་དུས་ནས་ཉི་འོད་ཀྱིས་མ་ཁྱབ་པའི་བར་གྱི་སྣང་བ་ནི་ནམ་མཁའ་སློད་བྱེད་ཀྱི་སྐྱོན་གསུམ་མམ་རྐྱེན་གསུམ་ཡིན་ཏེ། དེ་དག་ནི་ཐོ་རེངས་ནམ་མཁའི་རང་མདོག་ཇི་བཞིན་མི་ཐོན་པའི་རྒྱུ་གསུམ་ཡིན་པའི་ཕྱིར། དེས་ན་དེ་གསུམ་སྐྱོན་གསུམ་དང་། ཉིན་མོ་ཉི་འོད་ཀྱིས་ཁྱབ་པའི་ནམ་མཁའ་དེ་ནི་ནམ་མཁའ་གཡའ་དག་པ་ཞེས་པ་སྟེ་དེ་བཞི་ལ་རྟགས་བཞི་ཞེས་ཟེར་རོ།།

དེ་ཡང་སྒྱུ་ལུས་ནས་དོན་གྱི་འོད་གསལ་དུ་འཕོ་ཚུལ་ནི། མ་དག་པའི་སྒྱུ་ལུས་པ་དེས་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་ཀྱི་སྤྱོད་པ་གསུམ་པོ་གང་རུང་ཟླ་བ་དྲུག་ལ་སོགས་པར་སྤྱད་པས་དོན་གྱི་འོད་གསལ་ཐོབ་ཏུ་ཉེ་བའི་མཚན་མ་བྱུང་བ་ན་ཕྱག་རྒྱ་དང་སྙོམས་པར་འཇུག་བཞིན་པས་སྒྱུ་ལུས་དེ་ཉིད་འོད་གསལ་དུ་བཅུག་པ་སྟེ། རྡོ་རྗེ་དཔལ་མཆོག་ཆེན་པོ་ལས། སྒྱུ་མའི་ལུས་ཙམ་ལ་བརྟེན་ལ། །རིལ་པོར་འཛིན་དང་རྗེས་ཞིག་གིས། །དངོས་པོ་ཐམས་ཅད་བཅོམ་ནས་ནི། །དེ་ནས་དག་པའི་ངང་དུ་གནས། །ཞེས་དང་། ཡེ་ཤེས་རྡོ་རྗེ་ཀུན་ལས་བཏུས་པ་ལས། ཁམས་གསུམ་བརྟན་གཡོ་བདག་ཉིད་བཅས། །རིལ་འཛིན་རྗེས་གཞིག་ཏིང་འཛིན་གྱིས། །ཐམས་ཅད་འོད་གསལ་གནས་འཇུག་པ། །ཡེ་ཤེས་ཟུང་འཇུག་ཐོབ་འགྱུར་བའོ། །ཞེས་གསུངས་པ་ལྟར། ཐོག་མར་རང་གི་ལུས་ངག་ཡིད་གསུམ་དང་སེམས་ཅན་གྱི་ལུས་ངག་ཡིད་གསུམ་དབྱེར་མེད་དུ་མོས་ཤིང་། དེ་ནས་ལུས་ངག་ཡིད་གསུམ་ལས་ལུས་རྣམ་སྣང་སྐུ་དང་། ངག་འོད་དཔག་མེད་གསུང་དང་། ཡིད་མི་བསྐྱོད་པ་ཐུགས་གསུམ་གྱི་རང་བཞིན་དུ་བསྒོམ་པ་ནི་དམ་ཚིག་སེམས་དཔའ་དང་། དེ་ནས་དེ་གསུམ་གྱི་ཐུགས་ཀར་ཡི་གེ་ཨོཾ་ཨཱཿ ཧཱུཾ་གསུམ་བསྒོམ་པ་ནི་ཡེ་ཤེས་སེམས་དཔའ་དང་། ཡི་གེ་དེ་གསུམ་གྱི་ཐིག་ལེའི་ནང་དུ་རང་སེམས་ཨ་ཐུང་གི་རྣམ་པ་འཇོག་པའམ་བསྒོམ་པ་ནི་རང་སེམས་ཐིག་ལེར་འཇོག་པའི་ཏིང་ངེ་འཛིན་སེམས་དཔའ་སྟེ་དེ་ལྟར་སེམས་དཔའ་སུམ་བརྩེགས་བསྒོམ་མོ།།

དེ་ནས་རིལ་འཛིན་གྱི་བསམ་གཏན་ནི། དེ་ལྟར་ལུས་ངག་ཡིད་གསུམ་སྐུ་གསུང་ཐུགས་གསུམ་གྱི་རྡོ་རྗེ་གསུམ་དུ་བསྒོམས་པའི་རང་གི་ཐུགས་ཀའི་ས་བོན་གང་ཡིན་པའམ་ཡང་ན་ཨ་ཐུང་ལས་འོད་ཟེར་འཕྲོས་ཏེ་རང་དམ་ཚིག་སེམས་དཔའ་གསལ་བ་ལ་ཐིམ། དམ་ཚིག་སེམས་དཔའ་དེའི་མགོ་བོ་ནས་ཡས་རིམ་དང་། རྐང་མཐིལ་ནས་མས་རིམ་གྱིས་བསྡུས་ཏེ་སྙིང་གའི་ཡི་གེ་ཨོཾ་ཨཱཿ ཧཱུཾ་གསུམ་གྱི་ཡེ་ཤེས་སེམས་དཔའ་ལ་ཐིམ། ཡེ་ཤེས་སེམས་དཔའ་དེ་ཏིང་ངེ་འཛིན་སེམས་དཔའ་ཨ་ཐུང་ལ་ཐིམ། དེ་ཉིད་ཚུར་འོད་གསལ་ལ་བསྡུས་ཏེ་འོད་གསལ་ལམ་སྟོང་པ་ཉིད་ལ་སེམས་དམིགས་པ་མེད་པར་གཡོ་མེད་དུ་འཇོག་པའི་བསྡུ་རིམ་ནི་རིལ་འཛིན་གྱི་བསྡུ་རིམ་ཡིན་ཏེ། དེ་ལ་རིལ་འཛིན་ནི་རང་གི་མགོ་ནས་མར་སྡུད་ཅིང༌། རྐང་པ་ནས་ཡར་སྡུད་པའི་མཐའ་གཉིས་ཀ་སྙིང་གར་བསྡུས་ནས་རིམ་པ་བཞི་བའི་འོད་གསལ་ལམ་ཡང་དག་པའི་མཐའི་འོད་གསལ་དུ་འཇུག་པ་དཔེར་ན་མེ་ལོང་ལ་ཧས་བཏབ་ན་ཁ་རླངས་དེ་མཐའ་ཀུན་ནས་མེ་ལོང་གི་དབུས་སུ་སྡུད་འགྲོ་བ་ལྟར། རང་གི་ལུས་ཀྱི་སྟེང་འོག་དང་རྒྱབ་མདུན་དང་གཡས་གཡོན་ཀུན་ནས་སྙིང་གའི་དབུས་སུ་སྡུད་པ་ཞིག་ཏུ་གོ་དགོས་པའི་ཕྱིར་ཏེ། ཀླུ་སྒྲུབ་ཀྱི་རིམ་ལྔ་ལས། མགོ་བོ་ནས་ནི་རྐང་པའི་བར། །ཇི་སྲིད་སྙིང་གར་ཕྱིན་པའི་བར། །རྣལ་འབྱོར་ཡང་དག་མཐའ་ལ་འཇུག །རིལ་པོར་འཛིན་པ་ཞེས་བཤད་དོ། །ཞེས་དང་། དབུགས་ཀྱི་རླུང་ནི་མེ་ལོང་ལ། །ཇི་ལྟར་ཀུན་དུ་ཐིམ་གྱུར་པ། །དེ་བཞིན་རྣལ་འབྱོར་ཡང་དག་མཐར། །ཡང་དང་ཡང་དུ་འཇུག་པར་བྱེད། །ཅེས་གསུངས་པའི་ཕྱིར་རོ།།

དེ་ཡང་རིལ་བོ་ནི་རང་གི་ལུས་དང་། འཛིན་པ་ནི་ལུས་དེ་སྟོང་པ་ཉིད་རྟོགས་པའི་ཡེ་ཤེས་ཀྱིས་སྟོང་པ་ཉིད་ཀྱི་ངོ་བོར་འཛིན་པའི་དོན་དུ་བཤད་པས་གོ་དོན་དེ་ལྟར་བཟུང་ངོ་།།

ཁ་ཅིག་སྒྱུ་ལུས་པ་དེས་བསྒོམས་པའི་གསང་བ་འདུས་པའི་ཕྱིའི་དཀྱིལ་འཁོར་དེ་གཞལ་ཡས་ཁང་ལྷ་ལ་ཐིམ། ལྷ་ཚོགས་རང་ལ་ཐིམ། རང་ཡེ་ཤེས་སེམས་དཔའ་ལ་ཐིམ། ཡེ་ཤེས་སེམས་ཏིང་ངེ་འཛིན་སེམས་དཔའ་ལ་ཐིམ། དེ་འོད་གསལ་དུ་བསྡུ་བ་ནི་རིལ་འཛིན་ཡིན་ཟེར་བ་མི་འཐད་དེ། འཇམ་མགོན་བླ་མ་ཙོང་ཁ་པ་ཆེན་པོའི་གསང་བ་འདུས་པའི་རྒྱ་ཆེར་བཤད་པ་སྒྲོན་མ་གསལ་བའི་ཚིག་དོན་ཇི་བཞིན་འབྱེད་པའི་མཆན་གྱི་ཡང་འགྲེལ་ལས། སྔོན་དུ་སྣོད་བཅུད་སྡུད་པ་མེད་པར་སེམས་དཔའ་གསུམ་གྱི་སྡུད་རིམ་ཙམ་བྱེད་པ་ནི་རིལ་འཛིན་ནོ། །ཞེས་རིལ་འཛིན་དེ་ལ་དང་པོ་སྣོད་བཅུད་ཀྱི་བསྡུ་རིམ་དེ་མེད་པར་གསུངས་པས་སོ།།

སྒྱུ་ལུས་པ་དེ་ཉིད་ཀྱིས་ཐོག་མ་རང་གི་ལུས་ངག་ཡིད་གསུམ་སེམས་དཔའ་སུམ་བརྩེགས་སུ་བསྒོམ་པ་མ་ཟད་གསང་བ་འདུས་པའི་ལྷ་སོ་གཉིས་ལྟ་བུའི་དཀྱིལ་འཁོར་ཡོངས་རྫོགས་བསྒོམ་པ་ཡོད་མོད། སྒྱུ་ལུས་པ་དེས་འོད་གསལ་མངོན་དུ་བྱེད་དུས་དེ་ལྟར་སེམས་དཔའ་སུམ་བརྩེགས་ཙམ་ལས་དཀྱིལ་འཁོར་ཡོངས་རྫོགས་བསྒོམ་པ་མེད་པ་ཡིན་ནམ་ཡང་དཔྱད་དོ།།

གཉིས་པ་རྗེས་གཞིག་གི་བསམ་གཏན་ནི། གོང་ལྟར་སེམས་དཔའ་སུམ་བརྩེགས་བསྒོམས་པ་དེ་ཡི་ངང་ནས་རང་གི་སྙིང་གའི་ས་བོན་ནམ་ཨ་ཐུང་གང་རུང་ལས་འོད་ཟེར་འཕྲོས་ཏེ་ཐོག་མར་རང་མ་གཏོགས་པའི་སྣོད་ཐམས་ཅད་གཞལ་ཡས་ཁང་ལ་ཐིམ་པ་དང་། བཅུད་ཐམས་ཅད་ལྷ་དང་ལྷ་མོའི་ཚོགས་ལ་ཐིམ། གཞལ་ཡས་ཁང་ལྷ་ལ་ཐིམ། ལྷ་ཚོགས་མི་བསྐྱོད་པ་ལ་ཐིམ། དེ་ཧཱུཾ་ལ་ཐིམ་པ་ནས་ན་དཱའི་བར་དུ་ཐིམ་ནས་འོད་ཟེར་རང་ལ་ཕོག་སྟེ་རང་གིས་བསྒོམས་པའི་དམ་ཚིག་སེམས་དཔའ་ལ་ཐིམ། དེ་ཞུ་ནས་ཡེ་ཤེས་སེམས་དཔའ་ལ་ཐིམ། དེ་ཏིང་ངེ་འཛིན་སེམས་དཔའ་ལ་ཐིམ། དེ་འོད་གསལ་སྟོང་ཉིད་དུ་བསྡུ་བ་སྟེ། དང་པོ་སྣོད་བཅུད་འོད་གསལ་དུ་བསྡུས་ཤིང་། དེ་རྗེས་སུ་རང་ཉིད་འོད་གསལ་དུ་བསྡུ་བ་ནི་རྗེས་གཞུག་གི་བསམ་གཏན་སྟེ། དཔེར་ན་ལྟེང་ཀའི་ཆུ་ལ་ཁ་བའི་གོང་བུ་ཆགས་པ་རིམ་གྱིས་ཞུ་བ་ལྟ་བུ་ཞིག་ཏུ་བཤད་དེ། ཀླུ་སྒྲུབ་ཀྱི་རིམ་ལྔ་ལས། རྒྱུ་བ་དང་ནི་མི་རྒྱུ་ཉིད། །དང་པོ་འོད་གསལ་བར་བྱ་སྟེ། །ཕྱི་ནས་དེ་བཞིན་བདག་ཉིད་བྱེད། །རྗེས་སུ་གཞག་པའི་རིམ་པ་ཡིན། །ཞེས་གསུངས་པའི་ཕྱིར་རོ།།

དེས་ན་བསམ་གཏན་གཉིས་པོ་དེའི་ཁྱད་པར་ནི། རྗེ་ཙོང་ཁ་པའི་སྒྲོན་གསལ་དཀའ་གནས་མཐའ་གཅོད་རིན་པོ་ཆེའི་མྱུ་གུ་ལས། རང་གི་ཕུང་པོར་རིམ་གྱིས་འཇིག་པ་གཉིས་ཀ་ལ་ཡོད་ཀྱང༌། སྔོན་དུ་སྣོད་བཅུད་གཞན་བསྡུས་པ་ཡོད་མེད་ཀྱི་ཁྱད་པར་ཙམ་མོ། །ཞེས་དང་། ཡང་རྗེ་ཙོང་ཁ་པའི་མངོན་པར་བྱང་ཆུབ་པའི་རིམ་པའི་བཤད་པ་ལས། རྗེས་གཞིག་ནི། མི་རྒྱུ་བ་དང་ཞེས་པ་བཞི་སྟེ། ཐོག་མར་སྣོད་བཅུད་གཞན་འོད་གསལ་དུ་བསྡུས་པའི་རྗེས་སུ་རང་འོད་གསལ་དུ་འཇུག་པའོ། །ཞེས་གསུངས་པ་ལྟར་དང་པོ་སྣོད་བཅུད་བསྡུ་བ་མེད་པར་རང་ཉིད་འོད་གསལ་དུ་བསྡུ་བ་ནི་རིལ་འཛིན་དང་། དང་པོར་སྣོད་བཅུད་འོད་གསལ་དུ་བསྡུས་པ་དེའི་རྗེས་སུ་རང་ཉིད་འོད་གསལ་དུ་སྡུད་པ་ནི་རྗེས་གཞིག་གི་བསམ་གཏན་དུ་བཟུང་ངོ་།།

དེ་འདྲའི་རང་གཞན་གྱི་ལུས་ངག་ཡིད་གསུམ་སྐུ་གསུང་ཐུགས་གསུམ་གྱི་རྡོ་རྗེ་གསུམ་དུ་བསྒོམས་པ་བསྡུ་རིམ་བསམ་གཏན་རྣམ་པ་གཉིས་ཀྱིས་སྡུད་པའི་གནས་མཐར་ཐུག་སྙིང་ལ་སྡུད་པར་བྱས་ཏེ་སྟོང་ཉིད་ལ་མཉམ་པར་བཞག་པའི་སྒོམ་པ་ཡང་ཡང་བསྐྱངས་པས། བློ་ཇེ་གསལ་ཇེ་གསལ་དུ་སོང་སྟེ་བསྡུ་རིམ་གྱི་ཏིང་ངེ་འཛིན་དེ་གཉིས་ལ་བརྟེན་ནས་རང་གི་སེམས་འགོག་པའི་རྡོ་རྗེ་འོད་གསལ་དུ་འཇུག་པའི་རྟགས་སུ། རྡོ་རྗེ་དཔལ་མཆོག་ཆེན་པོ་ལས། དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་འགྱུར་ཏེ། །མེ་ནི་རླུང་ལ་ཐིམ་གྱུར་ནས། །རླུང་ཡང་རྣམ་པར་ཤེས་ལ་ཐིམ། །རྣམ་ཤེས་བཟུང་བ་དེ་ཉིད་ནི། །འོད་གསལ་བར་ཡང་འཇུག་པར་འགྱུར། །དང་པོ་སྒྱུ་མ་ལྟ་བུ་ལ། །དང་པོ་སྨིག་རྒྱུ་དེ་ཉིད་ཀྱང་། །འོད་ཟེར་ལྔ་དང་ལྡན་པར་མཐོང་། །གཉིས་པར་ཟླ་བ་ལྟ་བུ་དང་། །གསུམ་པར་ཉི་མ་ལྟ་བུ་དང་། །བཞི་པར་མུན་པ་ལྟ་བུ་ལ། །ལྔ་པ་སྤྲིན་མེད་ནམ་མཁའ་ལས། །མི་རྟོག་མཐའ་དབུས་མེད་པར་འཆར། །ཞེས་གསུངས་པ་ལྟར། ས་ཆུ་ལ་ཐིམ་པའི་རྟགས་སུ་སྨིག་རྒྱུ་ལྟ་བུའི་སྣང་བ་དང་། དེ་ནས་ཆུ་མེ་ལ་ཐིམ་པའི་རྟགས་སུ་དུ་བ་ལྟ་བུའི་རྟགས་དང་། མེ་རླུང་ལ་ཐིམ་པའི་རྟགས་སུ་མེ་ཁྱེར་ལྟ་བུའི་སྣང་བ་དང་། རླུང་སྣང་མཆེད་ཐོབ་གསུམ་གྱི་རྣམ་ཤེས་གསུམ་གྱི་དང་པོ་སྣང་བ་ལ་ཐིམ་པའི་རྟགས་སུ་མར་མེ་འབར་བ་ལྟ་བུའི་འོད་གསལ་རྟགས་བཞི་བྱུང་ཞིང་། དེ་ནས་སྣང་མཆེད་ཐོབ་གསུམ་སྔ་མ་སྔ་མ་ཕྱི་མ་ཕྱི་མར་ཐིམ་ནས་སྣང་བ་དཀར་དམར་ནག་གསུམ་འཆར་ནས་ཉེར་ཐོབ་འོད་གསལ་དུ་ཐིམ་པ་དང་དུས་མཉམ་དུ་འོད་གསལ་གྱི་སྣང་བ་འཆར་ཏེ་སྟོང་ཉིད་མངོན་སུམ་དུ་རྟོགས་པའི་རིམ་པ་བཞི་བའི་འོད་གསལ་མངོན་དུ་གྱུར་ཏེ། སྟོང་ཉིད་དང་དེ་རྟོགས་ཀྱི་ཡེ་ཤེས་ཆུ་ལ་ཆུ་བཞག་ལྟར་སོང་ཞིང་། གསང་བ་འདུས་པའི་དཀྱིལ་འཁོར་སོགས་ལྷ་སྐུའི་རྣམ་པ་མ་དག་པའི་སྒྱུ་ལུས་དེ་ཕར་འགགས་པ་ནས་འོད་གསལ་སྟོང་པའི་ཡེ་ཤེས་སྐྱེ་བ་ནི་རིམ་པ་བཞི་བའི་དོན་གྱི་འོད་གསལ་སྐྱེས་པ་ཞེས་བྱ་ཞིང་། སྒྱུ་ལུས་ནས་དོན་གྱི་འོད་གསལ་དུ་འཕོས་པའི་དོན་ཡང་ཡིན་ཏེ། རྡོ་རྗེ་དཔལ་མཆོག་ཆེན་པོའི་རྒྱུད་ལས། ཐོགས་པ་མེད་པའི་ཡེ་ཤེས་ཀྱིས། །སྣང་བ་ཐམས་ཅད་ནུབ་བྱས་ནས། །རང་འོད་རིག་མ་དབྱིངས་ཀྱི་ངང་། །སྣང་བའི་ཡེ་ཤེས་ཁྱབ་པར་འགྱུར། །བདག་དང་གཞན་དུ་རྟོག་པ་ཡི། །རྣམ་རྟོག་དྲ་བ་བསལ་ནས་ནི། །བདག་མེད་དམིགས་པ་མེད་པ་རུ། །མཉམ་ཉིད་ཡེ་ཤེས་ཁྱབ་པར་བྱེད། །ཅེས་གསུངས་པ་ལྟར་ཡིན་པའི་ཕྱིར་རོ།།

འདི་དུས་དམིགས་པ་སྙིང་གར་བསྡུ་བ་ལས་རླུང་བསྡུ་བར་མ་བཤད་ཀྱང་དོན་ལ་དེ་ལྟར་རིལ་འཛིན་དང་རྗེས་གཞིག་གིས་བསྡུ་རིམ་དེས་རླུང་ཡང་སྙིང་གར་བསྡུས་པས་རླུང་གི་སྡུད་རིམ་བླ་ན་མེད་པ་དེ་ལགས་ཕྱིར་རླུང་དང་བྱང་སེམས་སྙིང་གར་བསྡུས་ནས་འོད་གསལ་ལ་འཇུག་པར་བྱེད་པས་སྒྱུ་ལུས་པས་འོད་གསལ་དུ་འཇུག་པའི་ཐབས་བསམ་གཏན་གཉིས་བསྒོམ་དགོས་པར་གསུངས་པའི་དོན་ཡང་དེ་ལྟར་ཡིན་ཞིང་། ལས་རྒྱ་བསྟེན་པ་ཡང་རླུང་སེམས་ཐིག་ལེ་རྣམས་སྙིང་གར་བསྡུས་ནས་སྟོང་བཞི་བསྒོམ་པ་འོད་གསལ་དུ་འཇུག་པའི་ཐབས་སུ་གྱུར་པས་ན་དེའི་བྱེད་ལས་ཀྱང་བསྡུ་རིམ་གཉིས་དང་འདྲའོ།།

མ་དག་པའི་སྒྱུ་ལུས་དེ་ནི་མ་དག་པའི་སྒྱུ་ལུས་ཐོག་མར་གྲུབ་པ་ནས་བཟུང་དོན་གྱི་འོད་གསལ་མ་ཐོབ་བར་དུ་མཉམ་རྗེས་ཐམས་ཅད་ལ་རྒྱུན་མི་ཆད་པར་ཡོད་པ་ལ། དོན་གྱི་འོད་གསལ་ཐོབ་པ་ན་སྒྱུ་ལུས་དེ་ཐིམ་ནས་ཏེ་འགགས་ནས་རིགས་འདྲ་ཕྱི་མ་མི་འབྱུང་བར་རྒྱུན་ཆད་འགྲོ་བ་ཡིན་ཕྱིར་མ་དག་པའི་སྒྱུ་ལུས་དེ་མར་འགགས་པ་དང་རིམ་པ་བཞི་བའི་དོན་གྱི་འོད་གསལ་ཡར་སྐྱེས་པ་དུས་མཉམ་ཡིན་ནོ།།

དེས་ན་སྒྱུ་ལུས་ནི་སྟོང་ཉིད་རྟོགས་པའི་གཉུག་སེམས་བདེ་བ་ཆེན་པོའི་ཡེ་ཤེས་དང་། དེའི་བཞོན་པའི་གཉུག་རླུང་ལས་སྐབས་སྐབས་སུ་ལྡང་བའི་གཟུགས་ཀྱི་རྣམ་ཅན་གྱི་སྒྱུ་མའི་སྐུ་ཡིན་གྱི་སྒྱུ་ལུས་སྔ་མའི་རྫས་རྒྱུན་ལས་སྒྱུ་ལུས་ཕྱི་མ་སྐྱེ་བ་ནི་མ་ཡིན་པར་གསུངས་སོ།།

ཡེ་ཤེས་རྡོ་རྗེ་ཀུན་བཏུས་ལས། འོད་གསལ་དོན་དམ་བདེན་པ་ཉིད། །མཉམ་ཉིད་ཡེ་ཤེས་རྟོགས་པས་ནི། །དབྱིངས་ཀྱི་ངང་དུ་རྟོག་པའི་ཚོགས། །མ་དག་གཉེན་པོའི་བྱེད་པ་དང་། །རྒྱུ་རྐྱེན་ཡུལ་སྤྱོད་དངོས་པོ་ཀུན། །རྟོག་མེད་རང་འབྱུང་མེ་འབར་བས། །ཤིང་གི་བྱེ་བྲག་སྣ་ཚོགས་དང་། །རས་བལ་ཕུང་པོ་དུ་མ་ཡང་། །ཚིག་ཅིང་དངོས་མེད་བྱེད་པ་ལྟར། །དེ་བཞིན་གཟུང་འཛིན་མ་ལུས་པ། །ཆོས་ཀྱི་དབྱིངས་ཀྱི་གནས་ཉིད་དུ། །བསྲེགས་ཤིང་ཐིམ་གྱུར་མི་གནས་པའོ། །ཞེས་གསུངས་པ་ལྟར། རིམ་པ་བཞི་བའི་དོན་གྱི་འོད་གསལ་དེ་ནི་སྟོང་ཉིད་མངོན་གསུམ་དུ་རྟོགས་པའི་བློ་རྟོག་མེད་ཅིག་ཡིན་པས་ཟག་མེད་ཀྱི་ལམ་དུ་གྱུར་པའི་མཐོང་ལམ་བར་ཆད་མེད་ལམ་ཡིན་ཕྱིར་འདི་དུས་ནི་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་ཀྱིས་སྟོང་ཉིད་མངོན་གསུམ་དུ་རྟོགས་པའི་སྔགས་བླ་མེད་ཀྱི་མཐོང་ལམ་ཐོབ་པ་ཡིན་ཞིང་། དེ་དུས་མ་དག་པའི་སྒྱུ་ལུས་འགགས་པ་དང་། ཉོན་སྒྲིབ་མཐའ་དག་སྤོང་བའི་དངོས་གཉེན་མཐོང་ལམ་བར་ཆད་མེད་ལམ་མམ་བདེན་འཛིན་ལྷན་སྐྱེས་དང་ཀུན་བཏགས་ས་བོན་དང་བཅས་པའི་དངོས་གཉེན་བར་ཆད་མེད་ལམ་ཐོབ་པ་དང་། སྔགས་བླ་མེད་ཀྱི་ས་དང་པོ་ཐོབ་པ་དང་། སྒོམ་མཁན་གྱི་རྣལ་འབྱོར་བ་དེ་འཕགས་པར་གྱུར་པ་རྣམས་དུས་མཉམ་ཡིན་པར་བཤད་དོ།།

འདི་དུས་མཐོང་སྤང་ཉོན་སྒྲིབ་ཀུན་ལྷན་གཉིས་ཀ་སྤངས་པའི་སྤངས་པ་སོ་སོར་བརྟག་འགོག་ཐོབ་པ་ནི་མ་ཡིན་ཏེ། མཐོང་ལམ་དོན་གྱི་འོད་གསལ་སྐྱེ་བ་ལ་མངོན་དུ་ཕྱོགས་པ་དང་མཐོང་སྤངས་ཉོན་སྒྲིབ་འགགས་པ་ལ་ཕྱོགས་པ་དུས་མཉམ་པ་དང་། མཐོང་ལམ་དོན་གྱི་འོད་གསལ་སྐྱེས་པ་དང་མཐོང་སྤངས་ཉོན་སྒྲིབ་འགགས་པ་དུས་མཉམ་ཞིང་། དེ་དུས་ཉོན་སྒྲིབ་ཀྱི་དངོས་གཉེན་མཐོང་ལམ་བར་ཆད་མེད་ལམ་དངོས་སུ་སྐྱེས་ཤིང་། དེ་ཉིད་མཐོང་སྤོང་ཉོན་སྒྲིབ་སླར་སྐྱེ་མི་རུང་བའི་ཆོས་ཅན་དུ་བྱེད་པའི་ནུས་པ་བསྐྱེད་བཞིན་པ་ཅན་ཡིན་ལ། དེ་དུས་མཐོང་སྤང་ལ་རྒྱུ་ཚོགས་མ་ཚང་བའི་དབང་གིས་འགགས་ཟིན་ཀྱང་། ད་དུང་མཐོང་སྤང་སྤངས་པའི་འགོག་བདེན་ཐོབ་མེད་ལ། དེ་ཕྱིར་མཐོང་སྤང་མཐོང་ལམ་རང་དུས་སུ་སྤངས་པ་མ་ཡིན་པར་མཐོང་ལམ་རིམ་པ་བཞི་བའི་དོན་གྱི་འོད་གསལ་ལ་མཐོང་སྤང་སྤངས་པའི་ནུས་པ་ཡོངས་སུ་རྫོགས་པ་ན་དོན་གྱི་འོད་གསལ་འགགས་ནས་ཉེར་ཐོབ་གྲུབ་པ་དང་། རྣམ་གྲོལ་ལམ་སྐྱེས་ཤིང་། དེ་དང་དུས་མཉམ་དུ་ཉོན་སྒྲིབ་རྩ་བ་ནས་སྤངས་ཏེ་དེའི་སྤངས་པའི་འགོག་བདེན་ཐོབ་པ་ཡིན་པས་མཐོང་ལམ་གྱི་མཇུག་ཏུ་སྤངས་པ་ཡིན་པར་བཞེད་དོ།།

སྣང་མཆེད་ཐོབ་གསུམ་གང་རུང་ཡིན་ན་རྟོག་པ་ཡིན་པས་ཁྱབ་པས་ཁ་ཅིག་གིས་དེ་གསུམ་རྟོག་མེད་དུ་བཤད་པ་ནི་རང་བཞིན་བརྒྱད་ཅུའི་རྟོག་པ་ལ་ལྟོས་ན་སྣང་མཆེད་ཐོབ་གསུམ་རླུང་སེམས་ཀྱི་གཡོ་བ་ཤིན་ཏུ་ཞན་པས་གཉིས་སྣང་ཡོད་ཀྱང་གཉིས་སྣང་གི་སྤྲོས་པ་ཆུང་བ་ལ་དགོངས་ནས་རྟོག་མེད་དུ་བཤད་ཀྱི་རྟོག་བཅས་མིན་པར་བཤད་པ་མིན་པར་གསུངས། འོད་གསལ་གྱི་རིམ་པར་གྱུར་པའི་སྣང་མཆེད་ཐོབ་གསུམ་ནི་འོད་གསལ་མིན་པར་འོད་གསལ་གྱི་རིམ་པ་ཡིན་པར་འདོད་དོ།།

འོད་གསལ་ལ་ཡུལ་འོད་གསལ་དང་། ཡུལ་ཅན་འོད་གསལ་གཉིས་ཡོད་ལ། དེ་ཡང་སྒྲས་བརྗོད་རིགས་ཀྱི་དབྱེ་བ་ཡིན་ཞིང་། ཡུལ་འོད་གསལ་ནི་སྟོང་ཉིད་དང་དོན་གཅིག་པ་དང་། ཡུལ་ཅན་འོད་གསལ་ནི་ཡུལ་ཅན་གྱི་ཡེ་ཤེས་ཡིན་ཕྱིར། དེ་ལ་དཔེའི་འོད་གསལ་དང་། དོན་གྱི་འོད་གསལ་གཉིས་ཡོད་ལ། སྟོང་ཉིད་དོན་སྤྱིའི་ཚུལ་གྱིས་རྟོགས་པའི་ཉེར་ཐོབ་ཀྱི་མཇུག་གི་འོད་གསལ་དེ་དཔེའི་འོད་གསལ་དང་། སྟོང་ཉིད་མངོན་སུམ་དུ་རྟོགས་པའི་འོད་གསལ་དེ་དོན་གྱི་འོད་གསལ་ཞེས་བྱའོ།།

དཔེའི་འོད་གསལ་ལ་དབེན་པ་གསུམ་དང་སྒྱུ་ལུས་ཀྱི་དཔེའི་འོད་གསལ་རྣམས་ཡོད་པ་དང་། དོན་གྱི་འོད་གསལ་ལ་ཉོན་སྒྲིབ་ཀྱི་དངོས་གཉེན་དུ་གྱུར་པའི་དོན་གྱི་འོད་གསལ་དང་། ཉོན་སྒྲིབ་སྤངས་པའི་དོན་གྱི་འོད་གསལ་དང་། ཤེས་སྒྲིབ་ཀྱི་དངོས་གཉེན་དུ་གྱུར་པའི་དོན་གྱི་འོད་གསལ་དང་། ཤེས་སྒྲིབ་སྤངས་པའི་དོན་གྱི་འོད་གསལ་བཅས་དུ་མ་ཡོད་དོ།།

ཡང་འོད་གསལ་འདི་ལ་སྨོས་ཟིན་ལྟར་དཔེའི་འོད་གསལ་དང་། རིམ་པ་བཞི་བའི་དོན་གྱི་འོད་གསལ་དང་། ཟུང་འཇུག་གི་དོན་གྱི་འོད་གསལ་དང་། ཟུང་འཇུག་མཐའི་དོན་གྱི་འོད་གསལ་རྣམས་ཡོད་པའི་ཞིབ་ཆ་ནི་ཤེས་དགོས་སོ།།

དོན་གྱི་འོད་གསལ་ལ་མཐར་ཐུག་པའི་དོན་གྱི་འོད་གསལ་ཞེས་བྱ་ཞིང་། མཐར་ཐུག་པའི་དོན་ནི་ལམ་གྱི་བགྲོད་པ་མཐར་ཐུག་པ་ལ་མི་གོ་བར་ལྷན་སྐྱེས་ཀྱི་བདེ་བའི་ཡེ་ཤེས་ཀྱིས་དེ་ཁོ་ན་ཉིད་རྟོགས་པ་མཐར་ཐུག་པ་ལ་བྱེད་པར་ཡང་གསུངས་ཤིང་། འདི་གཉུག་སེམས་དེ་ཉིད་སྟོང་ཉིད་རྟོགས་པའི་བདེ་ཆེན་གྱི་ཡེ་ཤེས་ཀྱི་ངོ་བོར་སྨིན་པ་ཡིན་ཕྱིར་གཉུག་སེམས་ཀྱང་ཡིན་པར་གསུངས་སོ།།

དེ་ཡང་དཔེ་དོན་གཉིས་ཀའི་འོད་གསལ་ལ་བདེ་སྟོང་དབྱེར་མེད་ཀྱི་ཡེ་ཤེས་ཞེས་བྱ་ཞིང་། དཔེའི་ལྷན་སྐྱེས་ཀྱི་སྐབས་སུ་སྟོང་ཉིད་དོན་སྤྱིའི་ཚུལ་གྱིས་རྟོགས་པས་གཉིས་སྣང་ཕྲ་བ་མ་ལོག་པས་བདེ་སྟོང་རོ་གཅིག་ཏུ་སྦྱོར་བའམ་དབྱེར་མེད་དུ་མོས་པ་ཡིད་བྱེད་ཙམ་མ་གཏོགས་མེད་ལ། དོན་གྱི་ལྷན་སྐྱེས་ཀྱི་སྐབས་སུ་སྟོང་ཉིད་མངོན་སུམ་རྟོགས་པས་གཉིས་སྣང་ཕྲ་མོ་དག་ནས་ཡུལ་དང་ཡུལ་ཅན་ཆུ་ལ་ཆུ་བཞག་ལྟར་གཉིས་མེད་རོ་གཅིག་ཏུ་འདྲེས་ཏེ་བདེ་སྟོང་རོ་གཅིག་ཏུ་སྦྱོར་བ་རྫོགས་པར་ཡོད་པར་གསུངས་སོ།།

ཟུང་འཇུག་བཤད་པ།

རིམ་ལྔའི་རིམ་པ་ལྔ་བ་བདེན་གཉིས་དབྱེར་མེད་ཀྱི་རྫོགས་རིམ་མམ་ཟུང་འཇུག་ནི། རིམ་པ་བཞི་བའི་དོན་གྱི་འོད་གསལ་དེ་ལས་རླུང་ཅུང་ཟད་གཡོས་པ་དང་དུས་མཉམ་དུ་འོད་གསལ་དེའི་བཞོན་པར་གྱུར་པའི་རླུང་གིས་ཉེར་ལེན་གྱི་རྒྱུ་དང་། རིམ་པ་བཞི་བའི་དོན་གྱི་འོད་གསལ་གྱི་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་དག་པའི་སྒྱུ་མའི་སྐུར་བཞེངས་པ་ནས་བཟུང་སྟེ། སློབ་པ་མཐའི་དོན་གྱི་འོད་གསལ་བར་གྱི་རྫོགས་རིམ་གྱི་རྣལ་འབྱོར་དེ་རིམ་པ་ལྔ་བའི་སློབ་པའི་ཟུང་འཇུག་ཅེས་བྱ་སྟེ། རྡོ་རྗེ་དཔལ་མཆོག་ཆེན་པོ་ལས། ཟུང་འཇུག་བདེ་བ་ཆེན་པོའི་མཚན་ཉིད་ཅན། །ཆོས་དབྱིངས་ཆོས་ཉིད་དབྱེར་མེད་དག་པའི་སྐུ། །ཐ་དད་རྣམ་བྲལ་མི་ཕྱེད་ཡེ་ཤེས་ཏེ། །གསང་བ་ཆེན་པོའི་ལམ་ལས་འདིར་རྟོགས་བྱ། །ཞེས་གསུངས་པའི་ཕྱིར་རོ།།

འདི་ལ་ཐོ་རངས་ཀྱི་དུས་སུ་རིམ་པ་བཞི་བའི་དོན་གྱི་འོད་གསལ་མངོན་དུ་གྱུར་ཅིང་། དེ་ནས་དེ་སྔོན་དུ་སོང་བའི་མཇུག་ཐོག་ཏུ་འོད་གསལ་འགགས་པ་ན། དཔེར་ན་སེམས་ཅན་ཐ་མལ་བ་ཤི་བ་ན་འཆི་བའི་འོད་གསལ་ལས་ལུགས་ལྡོག་ཏུ་ལངས་ཏེ་ཉེར་ཐོབ་གྲུབ་པ་ན་བར་དོ་གྲུབ་པ་བཞིན་དུ་འོད་གསལ་གྱི་མཇུག་ཏུ་སྣང་བ་གསུམ་ལུགས་ལྡོག་གི་དང་པོ་ཉེར་ཐོབ་ཀྱི་སྣང་བ་དང་དུས་མཉམ་དུ་ཆུ་ལས་ཉ་ལྡང་བ་དང་། གཉིད་སད་པ་ཇི་བཞིན་བདེན་གཉིས་དབྱེར་མེད་ཀྱི་རྫོགས་རིམ་ཐོབ་སྟེ་ཟུང་འཇུག་ཐོབ་པ་ཡིན་ཏེ། ཀླུ་སྒྲུབ་ཀྱི་རིམ་ལྔ་ལས། ཇི་ལྟར་དང་བའི་ཆུ་ཀླུང་ལས། །ཉ་དག་མྱུར་དུ་ལྡང་བ་ལྟར། །དེ་བཞིན་ཐམས་ཅད་སྟོང་གསལ་ལས། །སྒྱུ་འཕྲུལ་དྲྭ་བ་འབྱུང་བར་འགྱུར། །ཞེས་གསུངས་པའི་ཕྱིར་རོ།།

དེས་ན་དེ་ལྟར་རིམ་པ་བཞི་བའི་དོན་གྱི་འོད་གསལ་ལས་ལུགས་ལྡོག་གི་ཉེར་ཐོབ་གྲུབ་པ་དང་། སློབ་པའི་ཟུང་འཇུག་གྲུབ་པ་དང་། དོན་གྱི་འོད་གསལ་འགགས་པ་དང་། ཉོན་སྒྲིབ་སྤངས་པའི་རྣམ་གྲོལ་ལམ་ཐོབ་པ་དང་། ས་གཉིས་པར་འཕོས་པ་དང་། ཐེག་པ་ཆེན་པོ་སྔགས་བླ་མེད་པའི་སྒོམ་ལམ་ཐོབ་པ་དང་། སྤངས་པ་ཟུང་འཇུག་ཐོབ་པ་དང་། དག་པའི་སྒྱུ་མའི་སྐུ་གྲུབ་པ་དང་། ཉོན་སྒྲིབ་སྤངས་པ་དང་། ཐར་བ་ཐོབ་པ་དང་། དགྲ་བཅོམ་པར་གྱུར་པ་རྣམས་དུས་མཉམ་ཡིན་ནོ།།

འདི་ལྟར་དེ་དག་དུས་མཉམ་དུ་ཐོབ་པར་བཤད་པའང་སྔགས་བླ་མེད་ཀྱི་ལམ་དུ་རིགས་ངེས་པའི་གང་ཟག་གི་རྒྱུད་ལ་ལམ་སྐྱེ་ཚུལ་གྱི་དབང་དུ་བྱས་པ་ཡིན་གྱི། མདོ་ལམ་སོགས་ལམ་གཞན་གྱི་མཐར་བྱུང་བའི་དོན་གྱི་འོད་གསལ་དང་། སློབ་པའི་ཟུང་འཇུག་སོགས་ནི་ས་བཅུ་བའི་ཡེ་ཤེས་སུ་འདོད་དེ། སྔགས་བླ་མེད་ཀྱི་ལམ་དུ་རིགས་མ་ངེས་པའི་གང་ཟག་དེ་ནི་ས་བཅུ་བ་ནས་སྔགས་ལམ་དུ་ཞུགས་དགོས་པར་བཤད་པའི་ཕྱིར་རོ།།

སྔགས་བླ་མེད་ཀྱི་ལུགས་འདིར་ལྷན་སྐྱེས་ཀྱི་ཉོན་མོངས་པ་རྣམས་ནི་རིམ་པ་བཞི་བའི་འོད་གསལ་གྱིས་དངོས་གཉེན་བྱས་ཏེ་སྤོང་ལ། འོད་གསལ་དེ་ལས་སློབ་པའི་ཟུང་འཇུག་ཐོག་མར་ཐོབ་པ་ན་ཉོན་མོངས་པ་སླར་སྐྱེ་མི་རུང་བའི་ཆོས་ཅན་དུ་བྱས་ཏེ་སྤོང་བར་བཞེད་དོ།།

དེ་ཕྱིར་རིམ་པ་བཞི་བའི་དོན་གྱི་འོད་གསལ་ནི་ཉོན་མོངས་པའི་དངོས་གཉེན་བར་ཆད་མེད་ལམ་དང་། དེ་ལས་བྱུང་བའི་ལུགས་ལྡོག་གི་ཉེར་ཐོབ་ནི་ཉོན་མོངས་སྤོང་བའི་རྣམ་གྲོལ་ལམ་ཡིན་ཟེར་ལ། ཁ་ཅིག་གིས་སྣང་མཆེད་ཐོབ་གསུམ་གང་རུང་ཡིན་ན་རྟོག་པ་ཡིན་པས་ཁྱབ་ཕྱིར་སྣང་བ་གསུམ་ནི་བློ་རགས་པ་དང་གཉིས་སྣང་ཅན་ཡིན་ཕྱིར་རྣམ་གྲོལ་ལམ་དུ་མི་རུང་ཞིང་སྟོང་ཉིད་མངོན་གསུམ་རྟོགས་པའི་ཡེ་ཤེས་སུ་མི་རུང་ཟེར་བ་དང་། འགའ་རེས། རིམ་པ་བཞི་བའི་དོན་གྱི་འོད་གསལ་དང་དེ་ལས་བྱུང་བའི་དེ་དུས་ཀྱི་ཉེར་ཐོབ་གཉིས་སྟོང་ཉིད་མངོན་གསུམ་དུ་རྟོགས་པའི་བློ་ཡིན་པ་ལ་མཚུངས་ཀྱང་སྟོང་ཉིད་འཛིན་ཚུལ་ལ་དམ་ལྷོད་ཀྱི་ཁྱད་པར་ཡོད་ཟེར་བ་དང་། ཡང་རིམ་པ་བཞི་བའི་དོན་གྱི་འོད་གསལ་ནི་གཉུག་སེམས་ཡིན་ཞིང་། སྣང་མཆེད་ཐོབ་གསུམ་གང་རུང་ཡིན་ན་གཉུག་སེམས་མ་ཡིན་པས་ཁྱབ་ཕྱིར་ཉེར་ཐོབ་ནི་གཉུག་སེམས་མ་ཡིན་པར་རིམ་པ་བཞི་བའི་དོན་གྱི་འོད་གསལ་ལ་ལྟོས་ན་བློ་ཅུང་རགས་པ་ཡིན་པས་རིམ་པ་བཞི་བའི་འོད་གསལ་དང་དེའི་རྗེས་ཀྱི་ཉེར་ཐོབ་གཉིས་ལ་ཕྲ་རགས་ཀྱི་ཁྱད་པར་ཡོད་ཅེས་བཤད་དོ།།

མདོ་ལམ་གྱི་རྣམ་གྲོལ་ལམ་ཡིན་ན་སྟོང་ཉིད་མངོན་གསུམ་དུ་རྟོགས་པའི་ལམ་ཡིན་པས་ཁྱབ་པས། དེ་ཡིན་ན་སྟོང་ཉིད་དོན་སྤྱིའི་སྒོ་ནས་རྟོགས་པའི་བློ་མ་ཡིན་པས་ཁྱབ་མོད། འདིར་ནི་རིམ་པ་བཞི་བའི་འོད་གསལ་གཉིས་སྣང་མཐའ་དག་དབྱིངས་སུ་ནུབ་པའི་ཡེ་ཤེས་དེ་འགགས་ཤིང་ལུགས་ལྡོག་གི་ཉེར་ཐོབ་ནམ་མཁའ་གཡའ་དག་ལ་མུན་པས་ཁྱབ་པ་ལྟ་བུའི་སྣང་བ་འཆར་བས་དེ་གཉིས་སྣང་ཅན་དུ་གྱུར་པས་ཉེར་ཐོབ་དེ་སྟོང་ཉིད་རྟོགས་པའི་བདེ་བ་ཆེན་པོའི་ཡེ་ཤེས་ཡིན་ཡང་རྟོག་བཅས་ཡིན་ལ། དེས་ན་གཉིས་སྣང་རིམ་གྱིས་ནུབ་པའི་སྟོང་ཉིད་མངོན་གསུམ་དུ་རྟོགས་པའི་གཉིས་མེད་བདེ་བ་ཆེན་པོའི་ཡེ་ཤེས་རིམ་པ་བཞི་བའི་འོད་གསལ་སྐྱེས་ནས་མཐོང་ལམ་ཐོབ། དེ་ནས་སླར་ལྡང་བ་ན་ཉེར་ཐོབ་དང་། མཆེད་པ། སྣང་བ་སོགས་སྐྱེས་ནས་བློ་ཇེ་རགས་སུ་སོང་ནས་གཉིས་སྣང་ཅན་གྱི་སྟོང་ཉིད་རྟོགས་པའི་བློ་རྟོག་བཅས་ལ་ལྡང་། དེ་ནས་རྗེས་ཐོབ་སྒྱུ་མ་ལྟ་བུའི་ཡེ་ཤེས་ལ་ལྡང་བ་ཡིན་ཕྱིར་སྔགས་བླ་མེད་ཀྱི་ལམ་འདིར་ས་བཅུའི་རྒྱུན་མཐའ་ནས་གཉིས་སྣང་མཐའ་དག་དབྱིངས་སུ་ནུབ་སྟེ་ཆོས་ཉིད་ལས་སླར་ལྡང་བ་མེད་པར་འབྲས་བུ་མངོན་དུ་གྱུར་པ་ནས་སླར་ཉེར་ཐོབ་ཏུ་ལྡང་བ་མེད་པས་སྣང་བ་གསུམ་སླར་སྐྱེ་བ་མེད་པར་འགགས་པ་དེ་ནས་བཟུང་གཉིས་སྣང་མཐའ་དག་ཟད་པ་ཡིན་ཞིང་། དེ་སྔོན་མཉམ་པར་བཞག་པ་ན་སྣང་བ་གསུམ་གྱི་ཡེ་ཤེས་སྟོང་ཉིད་ལ་གཉིས་སྣང་དང་བཅས་པའི་རིམ་པ་ཐིམ་ནས་དོན་གྱི་འོད་གསལ་གཉིས་སྣང་མེད་པའི་ཡེ་ཤེས་སྐྱེས་པ་དང་། དེ་སླར་ཉེར་ཐོབ་གཉིས་སྣང་ཅན་དུ་ལྡང་བའི་རིམ་པ་རེས་མོས་ཀྱིས་ལམ་བགྲོད་པ་ཡིན་པར་མཁས་པའི་དབང་པོ་འབའ་མདའ་དགེ་ལེགས་རྒྱ་མཚོས་གསུངས་པ་ལྟར་ཁས་བླང་ན་ཤིན་ཏུ་ལེགས་སོ།།

དེ་ཕྱིར་ལུགས་འབྱུང་ལྡོག་གི་སྣང་བ་གསུམ་པོ་རྟོག་བཅས་ཀྱིས་ཁྱབ་པ་དང་། དེ་ཡང་འཕགས་ལམ་དུ་ཡང་རྟོག་བཅས་ཀྱིས་ཁྱབ་ན་སོ་སྐྱེས་ཀྱི་ས་ན་ཐམས་ཅད་སྟོང་པ་འོད་གསལ་གྱི་ཡེ་ཤེས་བཅས་སྟོང་པ་བཞི་ཀའི་ཡེ་ཤེས་ལ་རྟོག་བཅས་ཀྱིས་ཁྱབ་པ་སྨོས་མ་དགོས་སོ།།

རིམ་པ་བཞི་བའི་དོན་གྱི་འོད་གསལ་ནི་གཉིས་སྣང་ནུབ་པའི་སྟོང་ཉིད་མངོན་གསུམ་དུ་རྟོགས་པའི་བདེ་བ་ཆེན་པོའི་ཡེ་ཤེས་ཡིན་ཕྱིར། གཉིས་སྣང་ཅན་དང་རྟོག་བཅས་མ་ཡིན་པས་ཁྱབ་ཅིང་གཉིས་སྣང་མེད་པའི་རྟོག་མེད་ཉིད་ཡིན་ཕྱིར། སྟོང་པ་དང་པོ་གསུམ་མ་ཟད་སྔགས་ཀྱི་སྦྱོར་ལམ་སྐད་ཅིག་ཐ་མའི་དུས་སུ་སྟོང་པ་བཞི་བ་ཐམས་ཅད་སྟོང་པའི་ནམ་མཁའ་གཡའ་དག་གི་སྣང་བ་འཆར་བ་དེ་ཡང་རིམ་པ་བཞི་བའི་དོན་གྱི་འོད་གསལ་དུ་འཇོག་ཏུ་མི་རུང་བ་དང་། རིམ་པ་བཞི་བའི་དོན་གྱི་འོད་གསལ་ལས་ལྡང་བའི་ཉེར་ཐོབ་ཀྱི་སྨད་ནས་མཆེད་པ་སོགས་སྟོང་པ་གསུམ་གྱི་ཡེ་ཤེས་རྣམས་ཀྱང་དེ་ཉིད་དུ་འཇོག་མི་རུང་བ་ནི། གཉིས་སྣང་ཅན་ཡིན་པའི་རྒྱུ་ཚན་གྱིས་ཡིན་པར་བཤད་དོ།།

གོང་གི་ཉོན་སྒྲིབ་སྤངས་པའི་རྣམ་གྲོལ་ལམ་ཐོབ་པ་དང་། ས་གཉིས་པ་ཐོབ་པ་དང་། ཐེག་པ་ཆེན་པོ་སྔགས་བླ་མེད་པའི་སྒོམ་ལམ་ཐོབ་པ་རྣམས་དུས་མཉམ་པར་གསུངས། དེ་ལྟར་ན་ཉོན་སྒྲིབ་སྤངས་པའི་རྣམ་གྲོལ་ལམ་དེ་དོན་ལ་མཐོང་ལམ་རྣམ་གྲོལ་ལམ་ཡིན་དགོས་པ་འདྲ་མོད། དེ་ས་གཉིས་པ་དང་། སྔགས་བླ་མེད་པའི་སྒོམ་ལམ་དང་དུས་མཉམ་ཡིན་ན་སྒོམ་ལམ་གྱི་རྣམ་གྲོལ་ལམ་དུ་གྱུར་འདུག་པས། དེའི་སྔོན་དུ་མཐོང་ལམ་རྣམ་གྲོལ་ལམ་དང་། སྒོམ་ལམ་རྣམ་གྲོལ་ལམ་དེ་བསྐྱེད་པའི་སྒོམ་ལམ་བར་ཆད་མེད་ལམ་ཞིག་ཡོད་དགོས་པས་དེ་གཉིས་མེད་དོན་ཅི་ཡིན་དང་། གལ་ཏེ་དེ་མཐོང་ལམ་རྣམ་གྲོལ་ལམ་ཡིན་ན་སྒོམ་ལམ་དང་དུས་མཉམ་ཇི་ལྟར་ཡིན་སོགས་དོགས་པ་ཆེན་པོ་མཆིས་མོད། དེ་ལ་རྣམ་གྲོལ་ལམ་འདི་མཐོང་ལམ་རྣམ་གྲོལ་ལམ་ཡིན་མོད། དེ་སྒོམ་ལམ་ཐོབ་པ་དང་དུས་མཉམ་པར་འཇོག་ཆོག་པ་དང་། སྒོམ་ལམ་གྱི་བར་ཆད་མེད་ལམ་ནི་དེ་ཡི་དུས་ནས་ཀྱང་འཇོག་ཆོག་པ་ཡིན་ཏེ། མདོ་ལམ་ལ་སའི་ངོ་སྐལ་གྱི་སྤང་བྱ་སྤངས་ཟིན་ཀྱང་བསོད་ནམས་ཀྱི་ཚོགས་ཀྱི་གྲོགས་མེད་ན་ས་གོང་མར་བགྲོད་མི་ནུས་པས་ས་གོང་མར་འཕོ་བ་ལ་ངོས་སྐལ་གྱི་ཚོགས་རྫོགས་པ་ཡོད་དགོས་མོད། སྔགས་བླ་མེད་ཀྱི་ལུགས་འདིར་བདེ་སྟོང་གི་ཡེ་ཤེས་དང་སྒྱུ་ལུས་ཀྱིས་བསོད་ནམས་ཀྱི་ཚོགས་ཀྱི་དོད་ཐུབ་པ་ཕྱིར་ས་འོག་མ་ནས་གོང་མར་འཕོ་བ་ལ་ངོ་སྐལ་གྱི་ཚོགས་རྫོགས་པ་ལ་ལྟོས་མི་དགོས་ཤིང་། ས་འོག་མ་ནས་གོང་མར་འཕོས་མ་འཕོས་ནི་རང་གི་ངོ་སྐལ་གྱི་སྤང་བྱ་སྤངས་མ་སྤངས་ཀྱིས་འཇོག་པ་ཡིན་ཕྱིར་སྤང་བྱ་སྔ་མ་སྤངས་ཟིན་གྱི་རྣམ་གྲོལ་ལམ་ནམ་ཐོབ་ན་ས་གོང་མར་འཕོས་པ་ཡིན་པའི་ཕྱིར་ན་ཉོན་སྒྲིབ་སྤངས་པའི་མཐོང་ལམ་རྣམ་གྲོལ་ལམ་འདི་ས་གཉིས་པ་དང་། ས་གཉིས་པའི་ངོ་སྐལ་གྱི་ཤེས་སྒྲིབ་ཏུ་གྱུར་པའི་སྒོམ་སྤང་སྤངས་པའི་རྣམ་གྲོལ་ལམ་དེ་ས་གསུམ་པ་དང་། དེ་བཞིན་དུ་ས་གསུམ་པའི་ངོ་སྐལ་གྱི་སྤང་བྱ་སྤངས་པའི་རྣམ་གྲོལ་ལམ་དེ་ས་བཞི་པར་འཇོག་པ་སོགས་ནས་ས་བཅུ་བའི་རྣམ་གྲོལ་ལམ་དེ་སངས་རྒྱས་ཀྱི་ས་རུ་བཞག་པ་ཡིན་པར་མཁས་པའི་དབང་པོ་འབའ་མདའ་དགེ་ལེགས་རྒྱ་མཚོས་གསུངས་པ་ལྟར་གོས་དགོས་པ་ཡིན་ནོ།།

དེས་ན་ཉོན་སྒྲིབ་སྤངས་པའི་མཐོང་ལམ་རྣམ་གྲོལ་ལམ་ཐོབ་པ་དང་ཤེས་སྒྲིབ་ཆེན་པོའི་ཆེན་པོ་སྤོང་བའི་དངོས་གཉེན་སྒོམ་ལམ་བར་ཆད་མེད་ལམ་སྐྱེ་ཞིང་། དེ་ལ་ཤེས་སྒྲིབ་ཆེན་པོའི་ཆེན་པོ་སྤོང་བའི་ནུས་པ་རྫོགས་པ་ན་སྒོམ་ལམ་རྣམ་གྲོལ་ལམ་དུ་གྱུར་ནས་ས་གསུམ་པར་འཕོ་བ་ཡིན་ཞིང་། སློབ་ལམ་གྱི་སའི་རྣམ་གྲོལ་ལམ་འདི་དག་ཉེར་ཐོབ་དང་དུས་མཉམ་དུ་བྱུང་བས་ནག་ལམ་ལ་སོགས་པའི་གཉིས་སྣང་དང་བཅས་པའི་རྟོག་བཅས་ཀྱི་བློ་ཡིན་པས་སྟོང་ཉིད་རྟོགས་པའི་ཡེ་ཤེས་ཡིན་ཡང་སྒྱུ་མ་ལྟ་བུར་རྟོགས་པའི་ཡེ་ཤེས་ཡིན་པར་འདོད་དགོས་སོ།།

སྒྲིབ་པ་སྤོང་ཚུལ་གྱི་བཞེད་པ་གཞན་ཡང་ཉོན་སྒྲིབ་རིམ་པ་བཞི་བའི་འོད་གསལ་ཐོབ་པ་ནས་རྫོགས་པར་སྤངས་པ་ཡིན་ན་ལམ་འདིས་ཤེས་སྒྲིབ་ཇི་ལྟར་སྤང་ཞེ་ན། ཐེག་པ་གཞན་གྱིས་བསྐལ་ཆེན་གྲངས་མེད་གསུམ་ལ་གསོག་དགོས་པའི་བསོད་ནམས་ཀྱི་ཚོགས་ཀྱི་དོད་སྒྱུ་མའི་ལུས་དང་། ལྷན་སྐྱེས་བདེ་བ་ཆེན་པོའི་ཡེ་ཤེས་ཀྱིས་དེ་ཁོ་ཉིད་མངོན་གསུམ་དུ་རྟོགས་པའི་རིམ་པ་བཞི་བའི་དོན་གྱི་འོད་གསལ་གཉིས་ནི་ལམ་གཞན་ལས་མཐུ་ཆེས་ཆེར་ལྷག་པའི་རྒྱུ་མཚན་གྱིས། ཐེག་པ་གཞན་གྱིས་སྤོང་ཐེབས་བདུན་དང་བསྐལ་ཆེན་གྲངས་མེད་གཅིག་གི་ཡུན་ལ་སྤོང་དགོས་པའི་ལྷན་སྐྱེས་ཀྱི་ཉོན་མོངས་པའི་སྒྲིབ་པ་རྣམས་འོད་གསལ་མཉམ་བཞག་ཐུན་གཅིག་གིས་སྤོང་ནུས་པར་འདོད་པ་དང་། དེ་བཞིན་དུ་ཤེས་སྒྲིབ་ཀྱང་ཕར་ཕྱིན་ཐེག་པས་ས་བརྒྱད་པ་ནས་སྤོང་ཐེབས་བཞི་ཡིས་སྤོང་ནུས་པ་འདིར་གཞན་གྱི་འདོད་པ་ལྟར་སྒོམ་ལམ་སྐོར་དགུར་དབྱེ་བའི་སྤང་བྱ་སྐོར་དགུར་དབྱེ་བ་ལྟ་བུ་མི་དགོས་པར་སློབ་པའི་ཟུང་འཇུག་གིས་ས་བརྒྱད་པ་ནས་སྤོང་བའི་མགོ་རྩོམ་པའམ། ཡང་ན་སློབ་པ་མཐའི་དོན་གྱི་འོད་གསལ་གྱིས་ཤེས་སྒྲིབ་ཆེ་འབྲིང་ཆུང་གསུམ་ཅིག་ཆར་དུ་སྤོང་བར་འདོད་ཅེས་བཤད་དེ། ཆོས་རྗེ་ངག་དབང་དཔལ་ལྡན་གྱི་ས་ལམ་རྒྱུད་གཞུང་གསལ་བྱེད་ལས། དེས་ནས་སློབ་པའི་ཟུང་འཇུག་ལ་ས་དགུར་ཕྱེ་བའི་ས་བརྒྱད་པ་ནས་ཤེས་སྒྲིབ་སྤོང་བའི་མགོ་རྩོམ་པའམ། སློབ་པ་མཐའི་དོན་གྱི་འོད་གསལ་གྱིས་ཤེས་སྒྲིབ་ཆེ་འབྲིང་ཆུང་གསུམ་ཅིག་ཆར་སྤོང་བར་འདོད་དོ། །ཞེས་གསུངས་པའི་ཕྱིར་རོ།།

འོ་ན་སྔགས་ལུགས་འདིར་རིགས་ངེས་ཀྱི་སྔགས་ལམ་པས་མཐོང་ལམ་གྱིས་ཉོན་སྒྲིབ་ཀུན་བཏགས་དང་ལྷན་སྐྱེས་ལྷག་ལུས་མེད་པར་སྤངས་པ་ཡིན་ན། མཐོང་ལམ་གྱི་མཇུག་ནས་ས་བརྒྱད་པའི་བར་དུའམ་ཡང་ན་ས་བཅུའི་རྒྱུན་མཐའི་བར་དུ་སྒྲིབ་པ་ཅི་ཞིག་སྤོང་དཔྱད་དུ་ཡོད་ལ། སྔགས་ལམ་འདིར་ཉོན་མོངས་པ་སྤྱི་དང་ཐ་མལ་སྣང་ཞེན་དེ་ཉོན་སྒྲིབ་དང་། ཐ་མལ་དུ་སྣང་བ་ཤེས་སྒྲིབ་ཏུ་འཇོག་པར་བཤད་ནས་ཐ་མལ་སྣང་ཞེན་དེ་བསྐྱེད་རིམ་གྱིས་སྤོང་བར་བཤད་པས་རྫོགས་རིམ་དབེན་པ་གསུམ་དང་། སྒྱུ་ལུས་རྣམས་ཀྱི་སྐབས་སུ་སྐྱེ་བའི་ཀུན་རྟོག་བརྒྱད་ཅུ་དེ་ཐ་མལ་སྣང་ཞེན་ལྡོག་ཟིན་གྱི་གང་ཟག་ལ་སྐྱེ་བ་ཡོད་མེད་ཀྱང་དཔྱད་དགོས་པའི་དོགས་པ་སློང་མཁན་ཡོད་མོད། བསྐྱེད་རིམ་གྱིས་བསྐྱེད་རིམ་ལ་གནས་པའི་སྐབས་དེར་ཐ་མལ་སྣང་ཞེན་ལྡོག་པ་ཙམ་ལ་སྤངས་པའི་ཐ་སྙད་བཤད་པ་ལས་གཏན་སྤངས་བྱེད་ཐུབ་ཀྱིན་མེད་པར་གོང་དུ་བཤད་པ་ལྟར་གོ་བར་བྱའོ།།

རིམ་པ་བཞི་བའི་དོན་གྱི་འོད་གསལ་ལས་སློབ་པའི་ཟུང་འཇུག་ཏུ་འཕོ་བའི་ཚུལ་ནི། སྨོས་མ་ཐག་པ་ལྟར་དོན་གྱི་འོད་གསལ་ལས་ལུགས་ལྡོག་ཏུ་ལྡང་བར་རྩོམ་པ་ན། འོད་གསལ་དེ་ལས་རླུང་ཅུང་ཟད་གཡོས་པ་དང་མཉམ་དུ་འོད་གསལ་དེའི་བཞོན་པར་གྱུར་པའི་རླུང་འོད་ཟེར་ལྔ་བས་ཉེར་ལེན་གྱི་རྒྱུ་དང་། འོད་གསལ་གྱི་སེམས་ཀྱི་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་སྒྱུ་མའི་སྐུར་བཞེངས་པ་ན་ཉོན་སྒྲིབ་ཟད་པར་སྤངས་པའི་སྤངས་པ་དང་། དག་པའི་སྒྱུ་མའི་སྐུ་གཉིས་ཟུང་ཏུ་འཇུག་པའི་སྤངས་པ་ཟུང་འཇུག་གི་སྐུ་དེ་ལུས་རགས་པ་ལས་ལོགས་སུ་ཕྱེས་ཏེ་དངོས་སུ་གནས་པའམ་གྲུབ་པ་ནི་འཕོ་ཚུལ་ལོ།།

ཟུང་འཇུག་ཅེས་པའི་དོན་ཡང་ཉོན་སྒྲིབ་སྤངས་པའི་སྤངས་པ་དང་། དག་པའི་སྒྱུ་ལུས་ཟུང་དུ་འཇུག་པས་ན་ཟུང་འཇུག་ཅེས་བྱ་ལ། སློབ་པའི་ཟུང་འཇུག་ཐོག་མར་གྲུབ་པའི་དུས་སུ་སྤངས་པ་ཟུང་འཇུག་ལས་རྟོགས་པ་ཟུང་འཇུག་མེད་པར་བཞེད་ལ། སྤངས་པ་ཟུང་འཇུག་ཡོད་པས་ཀྱང་ཟུང་འཇུག་ཐོབ་པ་ཡིན་ཞིང་། ཟུང་འཇུག་ཉེར་གཅིག་དང་ཉེར་གསུམ་གྱི་དབྱེ་བ་ཡོད་མོད་དོན་ལ་སྤངས་པ་ཟུང་འཇུག་དང་རྟོགས་པ་ཟུང་འཇུག་གཉིས་སུ་འདུ་བར་གསུངས་སོ།།

ཟུང་འཇུག་གི་གོ་དོན་གཙོ་བོ་ནི། འཁོར་འདས་ཀྱི་ཆོས་ཐམས་ཅད་གཉིས་སུ་མེད་པ་ལ་གཉིས་ཆོས་སུ་འབྱེད་པའམ་འཛིན་པའི་བདེན་འཛིན་ཀུན་རྟོག་དེ་ཉིད་ཆོས་རྣམས་གཉིས་སུ་མེད་པར་རྟོགས་པའི་རིམ་པ་བཞི་བའི་འོད་གསལ་བདེ་བ་ཆེན་པོའི་ཡེ་ཤེས་ཀྱིས་སྤངས་པས། བདེན་འཛིན་གྱི་རྟོག་པས་མི་ཕྱེད་པའི་གཉིས་མེད་དུ་སོང་བའི་རྡོ་རྗེའི་སྐུ་ཐོབ་པ་ལ་བྱ་ཞིང་། དེ་ནི་སྤངས་པ་ཟུང་འཇུག་ཏུ་བཞག་པ་ཡིན་ཏེ། ཀླུ་སྒྲུབ་ཀྱི་རིམ་ལྔ་ལས། འཁོར་བ་དང་ནི་མྱ་ངན་འདས། །རྟོག་པ་གཉིས་པོ་སྤངས་པས་ན། །གང་དུ་དངོས་པོ་གཅིག་གྱུར་པ། །ཟུང་དུ་འཇུག་ཅེས་དེ་ལ་བཤད། །ཅེས་དང་། གཟུགས་ཅན་དང་ནི་གཟུགས་མེད་ཅེས། །རྟོག་པ་གཉིས་པོ་སྤངས་པས་ན། །གང་ཞིག་ཞི་རྟོགས་རྣལ་འབྱོར་དབང་། །དེ་ནི་ཟུང་འཇུག་ཐོབ་པའོ། །ཞེས་གསུངས་པའི་ཕྱིར་རོ།།

གཞན་ཡང་ལུས་སྒྱུ་མའི་སྐུར་སོང་བ་དང་། སེམས་དོན་གྱི་འོད་གསལ་གྱི་བདེ་བ་ཆེན་པོའི་ཡེ་ཤེས་ཀྱི་ངོ་བོར་སོང་བ་དེ་རེས་འཇོག་དུ་མ་སོང་བར་དུས་གཅིག་ལ་ཐུགས་དང་སྐུར་ཚོགས་པ་ནི་ཟུང་འཇུག་གི་དོན་ཡིན་ཞིང་། དེ་ནི་རྟོགས་པ་ཟུང་འཇུག་ཏུ་འདོད་དེ། དེ་ཉིད་ལས། དེ་ཉིད་ཤེས་པའི་རིམ་ཤེས་ནས། ། བདག་བྱིན་བརླབ་པའི་འོད་གསལ་ལ། །དེ་ཉིད་ལ་ནི་འདུས་པ་གང་། །ཟུང་དུ་འཇུག་པའི་རིམ་འདི་ཡིན། །ཞེས་གསུངས་པའི་ཕྱིར་རོ།།

དེ་ལས་སྔ་མ་ནི་རིམ་པ་བཞི་བའི་དོན་གྱི་འོད་གསལ་གྱི་མཇུག་དེ་མ་ཐག་ཏུ་བྱུང་བ་དང་། ཕྱི་མ་ནི་ཟུང་འཇུག་ཐོག་མར་ཐོབ་ཅིང་། དེ་ཐོབ་པའི་རྣལ་འབྱོར་བ་དེས་སླར་དོན་གྱི་འོད་གསལ་ལ་མཉམ་པར་བཞག་ནས་ཐོབ་པ་ཡིན་པར་བཤད་དོ།།

དེ་ཡང་ཟུང་འཇུག་གྲུབ་པའི་ཐོག་མ་ནི་རིམ་པ་བཞི་བའི་འོད་གསལ་འགགས་ཏེ་ལུགས་ལྡོག་གི་ཉེར་ཐོབ་གྲུབ་པ་ནས་ཟུང་འཇུག་གྲུབ་ཅིང་། ལུགས་ལྡོག་གི་ཉེར་ཐོབ་སྐྱེ་བ་དང་། དེ་ནས་མཆེད་པ་དང་། དེ་ནས་སྣང་བའི་ཡེ་ཤེས་སྐྱེ་བ་བཅས་སྣང་བ་གསུམ་ལུགས་ལྡོག་ཏུ་སྐྱེ་བ་དང་། རིམ་བཞིན་སྨིག་རྒྱུ་བར་གྱི་རྟགས་རྣམས་བྱུང་སྟེ་རྗེས་ཐོབ་ཏུ་ལྡང་བ་ཡིན་ཞིང་། རང་བཞིན་བརྒྱད་ཅུ་ལས་ཉོན་མོངས་པ་མ་ཡིན་པའི་རྟོག་པ་ཕྲ་མོ་རྣམས་འབྱུང་དུ་ཡོད་པར་བཤད་དོ།།

འོ་ན་རིམ་པ་བཞི་བའི་འོད་གསལ་གྱི་མཇུག་གི་ལུགས་ལྡོག་གི་ཉེར་ཐོབ་དེ་འོད་གསལ་འགགས་ནས་སྐྱེས་པ་ཡིན་ན་དེའི་ཉེར་ལེན་གྱི་རྒྱུ་རིམ་པ་བཞི་བའི་འོད་གསལ་ཡིན་ནམ་གཞན་ཞིག་ཡིན་ཞེ་ན། དེ་ནི་རིམ་པ་བཞི་བའི་འོད་གསལ་འགགས་པ་ན་སྔ་མའི་ལུགས་འབྱུང་གི་ཉེར་ཐོབ་ཀྱི་རྒྱུན་ལས་སྐྱེས་པ་ཡིན་ཟེར། སྔ་མའི་ལུགས་འབྱུང་གི་ཉེར་ཐོབ་དེ་རྒྱུན་ཆད་པ་མིན་ནམ་ཟེར་ན། རིམ་པ་བཞི་བའི་འོད་གསལ་སྐྱེས་དུས་ལུགས་འབྱུང་གི་ཉེར་ཐོབ་དེ་མར་ཤིན་ཏུ་ཞན་པར་གྱུར་པ་ལས་རྒྱུད་ཆད་མེད་པར་འདོད་པས་རྗེས་སུ་ལུགས་ལྡོག་གི་ཉེར་ཐོབ་དེ་རང་གི་རིགས་འདྲ་སྔ་མའི་རྫས་རྒྱུན་ལས་སྐྱེས་པ་ཡིན་པར་བཤད་ལ། རིམ་པ་བཞི་བའི་འོད་གསལ་དེ་དང་ལུགས་ལྡོག་གི་ཉེར་ཐོབ་གཉིས་བློ་རྒྱུན་སོ་སོ་བ་ཡིན་པར་འདོད་མོད་འདི་ལ་བློར་མི་འབབས་པའི་དོན་ཡང་མཆིས་སོ།།

གཞན་ཡང་སྔ་མའི་ཉེར་ཐོབ་འགགས་ནས་རྒྱུན་ཆད་ཀྱང་གཉུག་སེམས་ཀྱི་སྟེང་གི་ཉེར་ཐོབ་སྐྱེ་བའི་ནུས་པ་ལས་བྱུང་བ་ཡིན་ཞིང་། དེ་ཡང་གཉུག་སེམས་ཀྱི་ཉེར་ལེན་གྱི་རྒྱུ་ལས་བྱུང་བ་ཡིན་ཡང་ཟེར། དེས་ན་གཉུག་སེམས་ཀྱི་ནུས་པ་གཅིག་ཉེར་ཐོབ་ཀྱི་ཉེར་ལེན་དང་། གཅིག་མཆེད་པའི་ཉེར་ལེན་དང་། གཅིག་སྣང་བའི་ཉེར་ལེན་དུ་འགྲོ་བ་ཡིན་ཞིང་། གཉུག་སེམས་ནི་དབང་ཤེས་དང་སེམས་རགས་པའི་ངོ་བོར་འགྲོ་བ་མེད་ཀྱང་དེ་ལས་སེམས་རགས་པ་གཞན་སྐྱེ་བ་ཡོད་པས་སེམས་རགས་པ་ཀུན་གྱི་ཐོག་མའི་ཉེར་ལེན་གྱི་རྒྱུ་དེ་གཉུག་སེམས་ཡིན་པར་འདོད་ལ། དཔེར་ན་ཉི་མ་འཆར་བ་ན་འོད་ཟེར་ཕྱོགས་སུ་འཕྲོ་མོད་ཉི་མ་འགྱུར་ནས་འོད་ཟེར་དུ་འགྲོ་བ་མེད་པ་བཞིན་དུ་འདོད་ལ། གཞན་ཡང་སེམས་རགས་པ་རྣམས་གཉུག་སེམས་ཀྱི་རོལ་བ་ཡིན་པར་བཞེད་པའང་ཡོད་དོ།།

ཀླུ་སྒྲུབ་ཀྱི་རིམ་ལྔ་ལས། ཟུང་འཇུག་ཏིང་འཛིན་ལ་གནས་ནས། །སླར་ཞིང་གང་ལའང་མི་སློབ་བོ། །ཞེས་ཟུང་འཇུག་ཐོབ་པ་ནས་ལམ་གསར་བ་གང་ལའང་མི་སློབ་པར་གསུངས་པའི་དོན་ནི། ཟུང་འཇུག་ལས་གཞན་པའི་ལམ་གསར་བ་ཐོབ་ཏུ་མེད་པས་ལམ་གསར་བ་གཞན་ལ་མི་སློབ་པར་གསུངས་པ་ལས། ཟུང་འཇུག་གི་ལམ་དེ་ལ་ནི་སློབ་པས་མི་སློབ་པ་མ་ཡིན་པར་བཞེད་ལ། སློབ་ཟེར་བ་དེ་ཡང་སློབ་པའི་ཟུང་འཇུག་ལ་བྱེད་པ་ཡིན་གྱི་མི་སློབ་པའི་ཟུང་འཇུག་ཐོབ་པ་ནས་ནི་དོན་ལ་ལམ་གང་ལའང་མི་སློབ་པ་ཡིན་པ་ནི་ཤེས་སོ།།

ཉོན་སྒྲིབ་སྤངས་པའི་སྤངས་པ་དང་དག་པའི་སྒྱུ་མའི་སྐུ་གཉིས་ཟུང་དུ་འཇུག་པ་དེ་སྤངས་པ་ཟུང་འཇུག་ཟེར་ལ། དེ་ནི་སློབ་པའི་ཟུང་འཇུག་ལ་ཟེར་བ་ཡིན་ན། དེ་ཆོས་ཅན། ཁྱོད་ལམ་ཡིན་དགོས་པར་ཐལ། རྫོགས་རིམ་གྱི་ལམ་ཡིན་པའི་ཕྱིར། འདོད་ན། སྤོང་བ་འགོག་བདེན་ཆོས་ཅན། ཁྱོད་ལམ་ཡིན་པར་ཐལ། འདོད་པའི་ཕྱིར། འདོད་ན་འདུས་མ་བྱས་སུ་གྱུར་ཅིང་ཡེ་ཤེས་མ་ཡིན་པའི་ལམ་ཡོད་དམ་ཞེ་ན། འདོད་དོ་ཞེས་ལན་འདེབས་དགོས་པ་དང་། ཡང་དག་པའི་སྒྱུ་ལུས་ཆོས་ཅན། ཁྱོད་གཟུགས་སུ་གྱུར་པའི་ལམ་ཡིན་པར་ཐལ། ལམ་ཡིན་པར་འདོད་པ་གང་ཞིག། གཟུགས་ཡིན་པའི་ཕྱིར་ཟེར་ན། འདོད་དེ་འདིར་གཟུགས་སུ་གྱུར་པའི་ལམ་ཡོད་དོ་ཞེས་ཁས་ལེན་དགོས་པར་སློབ་དཔོན་གསུངས་ལ། མ་དག་པའི་སྒྱུ་ལུས་ཀྱང་དེ་དེ་བཞིན་ནོ།།

དེ་ལྟར་སློབ་པའི་ཟུང་འཇུག་གི་སྐབས་སུ་དོན་གྱི་འོད་གསལ་འགགས་ནས་ཉེར་ཐོབ་ལུགས་ལྡོག་གི་སྣང་བ་གསུམ་བྱུང་པའི་རྗེས་ཐོབ་ཏུ་བསོད་ནམས་ཀྱི་ཚོགས་བསགས་ཤིང་། དེ་ནས་སྤངས་པ་ཟུང་འཇུག་པ་དེས་སླར་ཕྱི་ནང་གི་བྱང་ཆུབ་གཉིས་ཀྱི་སྒོ་ནས་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པ་སྟེ་ཐོ་རངས་འོད་གསལ་བསྒོམས་པས་གཉིས་སྣང་མཐའ་དག་ཆོས་ཀྱི་དབྱིངས་སུ་ནུབ་སྟེ་འོད་གསལ་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་ཅིང་སྐུ་དག་པ་སྒྱུ་མའི་སྐུ་དང་། ཐུགས་དག་པ་འོད་གསལ་གཉིས་སྐུ་ཐུགས་ངོ་བོ་གཅིག་པའི་ཟུང་འཇུག་གྲུབ་པ་ནི་ཟུང་འཇུག་གི་གཙོ་བོ་རྟོགས་པ་ཟུང་འཇུག་ཐོབ་པ་ཡིན་ཞིང་། དེ་ནི་སྤངས་པ་ཟུང་འཇུག་ནས་རྟོགས་པ་ཟུང་འཇུག་ཏུ་འཕོས་པའི་ཚད་དམ་དོན་ནོ།།

དེ་ནི་སྒོམ་ལམ་དང་། ས་གཉིས་པ་སོགས་ཀྱིས་བསྡུས་ཤིང་། འདི་ལ་ནི་སློབ་ལམ་དང་མི་སློབ་པའི་ས་གཉིས་ཀས་བསྡུས་པ་ཡོད་པ་ཤེས་ཤིང་། སྤངས་པ་ཟུང་འཇུག་ལའང་སློབ་མི་སློབ་གཉིས་ཀས་བསྡུས་པ་ཡོད་དམ་སྙམ་མོ།།

རྟོགས་པ་ཟུང་འཇུག་ཐོབ་རྗེས་སླར་མཉམ་པར་བཞག་པ་སྟེ་མི་སློབ་པའི་ཟུང་འཇུག་དེ་མངོན་དུ་བྱེད་ཚུལ་ཡང་སློབ་པའི་ཟུང་འཇུག་པ་དེས་རང་གི་རགས་པའི་ལུས་རྟེན་ལ་གནས་ནས་ཤེས་སྒྲིབ་སྤང་བའི་དོན་དུ་རིལ་འཛིན་དང་རྗེས་གཞིག་གི་བསམ་གཏན་གཉིས་ཀྱིས་བསྡུ་རིམ་ཡང་ཡང་བསྒོམ་པ་དང་། ལས་རྒྱ་བསྟེན་པའི་སྤྱོད་པ་གསུམ་པོས་བོགས་འབྱིན་གོམས་པར་བྱས་པས་ཟུང་འཇུག་འགྲུབ་པའི་རྟགས་སམ་མཚན་མ་དབང་ཕྱུག་གི་ཡོན་ཏན་བརྒྱད་ཀྱི་རྟགས་རྣམས་ཐོབ་པ་ན། སྨོས་ཟིན་ལྟར་ཐོ་རངས་ཕྱི་ནང་གི་ཐབས་ཀྱིས་དྲངས་པའི་མངོན་པར་བྱང་ཆུབ་པ་གཉིས་ཀྱིས་དོན་གྱི་འོད་གསལ་མངོན་དུ་བྱས་པ་ནི་སློབ་མཐའི་དོན་གྱི་འོད་གསལ་ཡིན་ཏེ།

ཨིནྡྲ་བྷཱུ་ཏིའི་བདེ་མཆོག་བསྡུས་པའི་རྣམ་བཤད་ལས། སྲོག་རྩོལ་དབུ་མར་ཆུད་པས་ཡེ་ཤེས་ཀྱི་རླུང་དུ་གྱུར་པའོ། །གང་དང་གང་འདོད་པ་དེ་དང་དེ་འཐོབ་པར་འགྱུར་རོ་ཞེས། དབང་ཕྱུག་བརྒྱད་ལྡན་སློབ་པའི་ཟུང་འཇུག་མངོན་དུ་གྱུར་པའོ། །ཞེས་གསུངས་པ་ལྟར་རོ།།

དབང་ཕྱུག་གི་ཡོན་ཏན་བརྒྱད་ནི། ཕྲ་བ་དང་། ཡང་བ་དང་། ཕྲ་བར་ནུབ་པ་དང་། སྤྱོད་པར་ནུས་པ་དང་། བདག་ཉིད་ཆེན་པོ་དང་། དགའ་མགུར་བྱེད་པ་དང་། ཐམས་ཅད་དབང་དུ་འགྱུར་པ་དང་། ཅི་འདོད་བྱེད་པ་སྟེ་བརྒྱད་ལ་བྱེད་པ་ཡིན་ཏེ། རྡོ་རྗེ་དཔལ་མཆོག་ཆེན་པོ་ལས། ཐུན་མོངས་དབང་ཕྱུག་དང་ནི་རྟགས་བཅས་པ། །དབང་ཕྱུག་བརྒྱད་ལྡན་འཆར་བ་འདི་ཉིད་དོ། །ཕྲ་ཞིང་ཡང་ལ་ཕྲ་བར་ནུབ་པ་དང་། །སྤྱོད་པར་ནུས་དང་བདག་ཉིད་ཆེན་པོ་དང་། །དགའ་མགུར་བྱེད་ཅིང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་དོན་དུ་འཆར། །ཞེས་དང་། སློབ་དཔོན་འཇམ་དཔལ་གྲགས་པའི་མཚན་བརྗོད་ཀྱི་རྒྱ་ཆེར་བཤད་པ་ལས། ཡང་བ་དང་། ཕྲ་བ་དང་། མཆོད་པར་བྱ་བ་དང་། བདག་པོར་གྱུར་པ་དང་། དབང་ཕྱུག་ཏུ་གྱུར་པ་དང་། གར་ཡང་ཕྱིན་པ་དང་། འདོད་དགུར་ལྡན་པ་དང་། དགའ་དགུར་གནས་པ་སྟེ། ཡོན་ཏན་གྱི་དབང་ཕྱུག་བརྒྱད་ཕུན་སུམ་ཚོགས་པར་བྱེད་པའམ། ཞེས་གསུངས་པའི་ཕྱིར་རོ།།

ཡང་ཕྲ་བ་དང་། ཡང་བ། ཡང་དག་པར་ཐོབ་པ། ཁྱབ་པ། རབ་ཏུ་གསལ་བ། བརྟན་པ། དབང་དུ་གྱུར་པ། འདོད་དགུར་བསྒྱུར་པའི་ཡོན་ཏན་བརྒྱད་དུ་བྱས་པའང་མཆིས་ལ། དེ་དག་གི་དོན་ནི། རིམ་ལྔ་གསལ་སྒྲོན་གྱི་བཀྲལ་ཚུལ་ལྟར་ན། དཔེར་ན་དབང་ཕྱུག་ཆེན་པོས་བཅུད་ཀྱི་སེམས་ཅན་གྱི་འཇིག་རྟེན་སྐྱེ་འཇིག་བྱེད་པའི་ཕྲ་བའི་ཡོན་ཏན་དང་ལྡན་པ་བཞིན་དུ་སློབ་པའི་ཟུང་འཇུག་ལ་གནས་པའི་རྣལ་འབྱོར་བས་བཅུད་ཀྱི་འཇིག་རྟེན་སྒོམ་པས་སྤྲུལ་པ་དང་སྡུད་ནུས་པས་ཕྲ་བའི་ཡོན་ཏན་དང་། དབང་ཕྱུག་གིས་སྣོད་ཀྱི་འཇིག་རྟེན་སྐྱེ་འཇིག་བྱེད་པའི་ཡང་པའི་ཡོན་ཏན་དང་ལྡན་པ་བཞིན་དུ་སློབ་པའི་ཟུང་འཇུག་ལ་གནས་པའི་རྣལ་འབྱོར་བས་སྣོད་ཀྱི་འཇིག་རྟེན་སྤྲུལ་སྡུད་ནུས་པའི་ཡང་པའི་ཡོན་ཏན་དང་ལྡན་པ་དང་། དབང་ཕྱུག་གིས་སྣོད་བཅུད་གཉིས་ཀ་སྐྱེ་འཇིག་གི་བདག་པོ་བྱེད་པ་བཞིན་དུ་རྣལ་འབྱོར་བས་དེ་ལྟར་སྣོད་བཅུད་གཉིས་ཀ་སྤྲུལ་སྡུད་བྱེད་པ་ཡང་དག་པ་ཐོབ་པའི་ཡོན་ཏན་དང་། དབང་ཕྱུག་གིས་ཀུན་ལ་ཁྱབ་པའི་ཡོན་དང་ལྡན་པ་བཞིན་དུ་རྣལ་འབྱོར་བའི་ཡིད་ཀྱིས་གང་བསམ་པར་ཕྱིན་ནུས་པ་ཁྱབ་པའི་ཡོན་ཏན་དང་། དབང་ཕྱུག་ལ་འབྱུང་བོ་ཀུན་གྱིས་མཆོད་པ་བཞིན་དུ་རྣལ་འབྱོར་བའི་འོད་དང་གཟི་བརྗིད་ཀྱིས་གཞན་རྣམས་ཟིལ་གྱིས་གནོན་པ་རབ་ཏུ་གསལ་བའི་ཡོན་ཏན་དང་། དབང་ཕྱུག་གིས་གང་ཐོབ་པར་འདོད་པ་དག་ལ་དགའ་མགུར་སྤྱོད་པ་བཞིན་དུ་རྣལ་འབྱོར་བ་གང་ཐོབ་པར་འདོད་པའི་དོན་དེ་ལྟར་ཐོབ་ནུས་པ་བརྟན་པའི་ཡོན་ཏན་དང་། དབང་ཕྱུག་གིས་སེམས་ཅན་ཀུན་ལ་དབང་བྱེད་པ་བཞིན་དུ་རྣལ་འབྱོར་བ་གཞན་ཚར་གཅོད་རྗེས་འཛིན་གྱི་དབང་ཡོད་པ་ནི་དབང་དུ་གྱུར་པའི་ཡོན་ཏན་དང་། དབང་ཕྱུག་ཡོན་ཏན་ཀུན་ལྡན་ཡིན་པ་བཞིན་དུ་རྣལ་འབྱོར་བ་ཡོན་ཏན་ཀུན་ལ་འདོད་དགུར་བསྒྱུར་ནུས་པས་ན་འདོད་དགུར་ལྡན་པའི་ཡོན་ཏན་ཏེ་བརྒྱད་ལ་དབང་ཕྱུག་གི་ཡོན་ཏན་བརྒྱད་དུ་བཤད་ཅིང་། དཔེ་དབང་ཕྱུག་གི་ཡོན་ཏན་བརྒྱད་ལྟར་དུ་དཔེ་དོན་ཟུང་འཇུག་ཐོབ་པའི་རྟགས་ཉིད་དུ་འཆར་བའི་ཡོན་ཏན་བརྒྱད་བསྟན་པ་ཡིན་ནོ།།

འཇམ་མགོན་བླ་མའི་གསལ་སྒྲོན་ལས། དབང་ཕྱུག་གི་ཡོན་བརྒྱད་ཅེས་བྱ་ཡི། དབང་ཕྱུག་བརྒྱད་ནི་མིན་ནོ། །ཞེས་དབང་ཕྱུག་གི་ཡོན་ཏན་བརྒྱད་དང་། དབང་ཕྱུག་བརྒྱད་མི་འདྲ་བར་གསུངས་པས། དབང་ཕྱུག་གི་ཡོན་ཏན་བརྒྱད་སློབ་པ་དང་། དབང་ཕྱུག་བརྒྱད་ནི་མི་སློབ་པའི་འབྲས་བུའི་ཡོན་ཏན་དུ་གོ་དགོས་པ་ཡིན་པ་ཤེས་པར་བྱའོ།།

དེས་ན་ཕྱི་མ་དབང་ཕྱུག་བརྒྱད་ནི། སྐུ་ཡི་དབང་ཕྱུག་དང་། གསུང་གི་དབང་ཕྱུག་དང་། ཐུགས་ཀྱི་དབང་ཕྱུག་དང་། འཕྲིན་ལས་ཀྱི་དབང་ཕྱུག་དང་། རྫུ་འཕྲུལ་གྱི་དབང་ཕྱུག་དང་། ཕྱོགས་ཀུན་དུ་འགྲོ་བའི་དབང་ཕྱུག་དང་། གང་འདོད་བསྐྱེད་པའི་དབང་ཕྱུག་དང་། ཁྱད་པར་ཅི་འདོད་དུ་སྦྱིན་པའི་དབང་ཕྱུག་དང་བརྒྱད་ལ་ངོས་འཛིན་གནང་བ་ཡིན་ཏེ། རྡོ་རྗེ་དཔལ་མཆོག་ཆེན་པོ་ལས། སྐུ་ཡི་དབང་ཕྱུག་གསུང་གི་དབང་ཕྱུག་དང་། །ཐུགས་ཀྱི་དབང་ཕྱུག་དེ་ཉིད་འཕྲིན་ལས་དང་། །རྫུ་འཕྲུལ་ཀུན་དུ་འགྲོ་བའི་དབང་ཕྱུག་དང་། །གང་འདོད་བསྐྱེད་དང་ཁྱད་པར་དོན་བརྒྱད་དོ། །ཞེས་དང་། སློབ་དཔོན་ཐུགས་རྗེའི་དཔལ་གྱི་སྒྲོན་གསལ་གསལ་བྱེད་ལས། དབང་ཕྱུག་བརྒྱད་ཅེས་པ་ནི་སྐུའི་དབང་ཕྱུག་ལ་སོགས་པ་རྣམས་སོ། །ཞེས་གསུངས་པའི་ཕྱིར་རོ།།

དེ་དག་གི་དོན་ཕལ་མོ་ཆེ་ནི། སློབ་དཔོན་ཛཱ་ལནྡྷ་རའི་ཀྱེ་རྡོ་རྗེའི་སྒྲུབ་ཐབས་ཀྱི་མདོར་བཤད་པ་དག་པ་རྡོ་རྗེ་སྒྲོན་མ་ལས། སྐུ་ཡི་དབང་ཕྱུག་གསུང་དབང་ཕྱུག །དེ་བཞིན་ཐུགས་ཀྱི་དབང་ཕྱུག་དང་། །རྫུ་འཕྲུལ་ཅན་འགྲོའི་དབང་ཕྱུག་སྟེ། །འདོད་བྱེད་ཡོན་ཏན་བརྒྱད་པའོ། །ཞེས་སོ། །སྐུ་མཐའ་ཡས་པ་ནི་སྐུའི་དབང་ཕྱུག་དང་། སེམས་ཅན་ཐམས་ཅད་ཀྱི་སྐད་སྨྲ་བས་གསུང་གི་དབང་ཕྱུག་དང་། སེམས་ཅན་གྱི་སེམས་ཤེས་པས་ཐུགས་ཀྱི་དབང་ཕྱུག་དང་། རྫུ་འཕྲུལ་གྱིས་འཇིག་རྟེན་གྱི་ཁམས་མཐའ་ཡས་པ་མཐོང་བས་རྫུ་འཕྲུལ་གྱི་དབང་ཕྱུག་དང་། འཇིག་རྟེན་གསུམ་གཅིག་པའི་སྐུ་ནི་ཀུན་དུ་འགྲོ་བའི་དབང་ཕྱུག་དང་། འདོད་པས་བདེ་བ་ཆེན་པོའི་རང་བཞིན་སེམས་ཅན་རྣམས་མངོན་པར་འདོད་པས་འདོད་པའི་དབང་ཕྱུག་སྟེ། འདོད་པའི་སྒྲས་འདོད་པ་འདོད་པ་བརྗོད་པའོ། །བྱེད་པ་པོ་ཞེས་པ་ནི་བྱེད་པ་པོ་རྡོ་རྗེ་འཛིན་པ་ཉིད་ཀྱིས་བྱེད་པའི་དབང་ཕྱུག་གོ །ཟབ་མོའི་ལྷ་ཉིད་ཀྱི་རྣམ་པ་ལས་མྱ་ངན་ལས་འདའ་བར་གཤེགས་ཤིང་མྱ་ངན་ལས་འདས་ནས་ལྷ་ཉིད་ཀྱི་རྣམ་པར་རྒྱུ་བས་ཡོན་ཏན་གྱི་དབང་ཕྱུག་སྟེ། འདིས་ནི་མཚན་མ་རྣམས་ཀྱི་རྣམ་པར་དག་པའོ། །ཞེས་དང་། སློབ་དཔོན་དཔལ་སྒྲ་གཅན་གསང་བས། ནོར་སྦྱིན་གྱི་བར་དུ་ནི་དབང་ཕྱུག་བརྒྱད་རྣམ་པར་དག་པས་སོ། །འདི་ལྟ་སྟེ། སྐུ་ཡི་དབང་ཕྱུག་གསུང་གི་དབང་ཕྱུག་དང་། །དེ་བཞིན་ཁོ་ནར་ཐུགས་ཀྱི་དབང་ཕྱུག་ཀྱང་། །རྫུ་འཕྲུལ་དང་ནི་ཀུན་འགྲོའི་དབང་ཕྱུག་དང་། །འདོད་དང་བྱེད་པོ་ཡོན་ཏན་བརྒྱད་པའོ། །སྐུ་མཐའ་ཡས་པ་ནི་སྐུའི་དབང་ཕྱུག་གོ །ཐམས་ཅད་ཀྱི་སྐད་དུ་སྨྲ་བ་ནི་གསུང་གི་དབང་ཕྱུག་གོ །སེམས་ཅན་ཐམས་ཅད་ཀྱི་སེམས་ཤེས་པ་ནི་ཐུགས་ཀྱི་དབང་ཕྱུག་གོ །རྫུ་འཕྲུལ་གྱིས་མཐའ་ཡས་པའི་འཇིག་རྟེན་གྱི་ཁམས་ལྟ་བ་ནི་རྫུ་འཕྲུལ་གྱི་དབང་ཕྱུག་གོ །འཇིག་རྟེན་གསུམ་པོ་གཅིག་པའི་སྐུ་ནི་ཀུན་ཏུ་འགྲོ་བའི་དབང་ཕྱུག་གོ །ཨཱཙྪིའི་སྒྲས་ནི་འདོད་པ་གསུངས་ཏེ། འདོད་པས་སེམས་ཅན་རྣམས་ཀྱི་བདེ་བ་ཆེན་པོ་སྐྱེད་པར་བྱེད་པ་ནི་འདོད་པའི་དབང་ཕྱུག་གོ །བྱེད་པོ་ནི་རྡོ་རྗེ་འཆང་ཆེན་པོ་ཞེས་བྱེད་པོའི་དབང་ཕྱུག་གོ །ལྷའི་རྣམ་པས་སྤྱོད་པ་ནི་ཡོན་ཏན་གྱི་དབང་ཕྱུག་གོ །ཞེས་གསུངས་པ་ལྟར་རོ།།

དེ་གཉིས་ཀྱིས་ཡོན་ཏན་གྱི་དབང་ཕྱུག་ཅེས་ལོགས་སུ་ཕྱེས་ནས་བརྒྱད་དུ་བཤད་པ་ལས་འཕྲིན་ལས་ཀྱི་དབང་ཕྱུག་ཟེར་བ་མ་བཤད་ལ། དཔལ་ཐུགས་རྗེའི་དཔལ་གྱི་སྒྲོན་གསལ་དཀའ་འགྲེལ་ལས། དབང་ཕྱུག་བརྒྱད་ཅེས་པ་ནི། སྐུའི་དབང་ཕྱུག་གསུང་གི་དབང་ཕྱུག་དང་། །དེ་བཞིན་ཉིད་དུའང་ཐུགས་ཀྱི་དབང་ཕྱུག་དང་། །རྫུ་འཕྲུལ་ཀུན་དུ་འགྲོ་བའི་དབང་ཕྱུག་དང་། །འདོད་པ་བྱེད་པོ་ཡོན་ཏན་བརྒྱད་པ་རྣམས། །ཞེས་སོ། །ཞེས་དེ་གཉིས་དང་འདྲ་བར་གསུངས་སོ།།

སློབ་དཔོན་བི་མ་ལ་མི་ཏྲའི་མཚན་བརྗོད་འགྲེལ་པ་མཚན་དོན་གསལ་བར་བྱེད་པའི་སྒྲོན་མ་ལས། དབང་ཕྱུག་ཕུན་སུམ་ཚོགས་པ་ནི། ཡོན་ཏན་གྱི་དབང་ཕྱུག་བརྒྱད་ལ་བྱ་སྟེ། དེ་ཡང་ཕ་རོལ་ཏུ་ཕྱིན་པའི་གཞུང་གིས། སྐུ་ཡང་བ་དང་། ཕྲ་བ་དང་། གཞན་གྱིས་མཆོད་པ་དང་། བདག་པོར་གྱུར་པ་དང་། ལོངས་སྤྱོད་པ་དང་། གར་ཡང་ཕྱིན་པ་དང་། འདོད་དགུར་ལྡན་པ་དང་། དགའ་མགུར་སྤྱོད་པ་དང་བརྒྱད་དོ། །གསང་སྔགས་ཀྱི་གཞུང་གིས་སྐུའི་དབང་ཕྱུག་དང་། གསུང་གི་དབང་ཕྱུག་དང་། ཐུགས་ཀྱི་དབང་ཕྱུག་དང་། རྫུ་འཕྲུལ་གྱི་དབང་ཕྱུག་དང་། ཕྱོགས་ཐམས་ཅད་དུ་སོང་བའི་དབང་ཕྱུག་དང་། འདོད་སྤྱོད་ཀྱི་དབང་ཕྱུག་དང་། ཅི་འདོད་སྦྱིན་པའི་དབང་ཕྱུག་དང་། གནས་ཀྱི་དབང་ཕྱུག་དང་བརྒྱད་དོ། །ཞེས་སྔ་མ་བརྒྱད་ཕ་རོལ་ཕྱིན་པའི་གཞུང་གི་ལུགས་དང་། ཕྱི་མ་དེ་གསང་སྔགས་ཀྱི་ལུགས་སུ་གསུངས་པ་ལས་དེ་གཉིས་སློབ་པ་དང་མི་སློབ་པའི་ཡོན་ཏན་གྱི་ཁྱད་པར་དུ་མ་གསུངས་ལ། གནས་ཀྱི་དབང་ཕྱུག་ཅེས་པ་ལས་འཕྲིན་ལས་ཀྱི་དབང་ཕྱུག་ཅེས་པ་མ་གསུངས་ཀྱང་རྡོ་རྗེ་དཔལ་མཆོག་ཆེན་པོའི་རྒྱུད་ལས་འཕྲིན་ལས་ཀྱི་དབང་ཕྱུག་ཅེས་པ་དངོས་སུ་ཐོན་པས་དོན་ལ་གནས་ཀྱི་དབང་ཕྱུག་ཅེས་པ་དེ་ལ་གོ་དགོས་སམ་དཔྱད་དོ།

བི་མ་ལས་གསུངས་པ་ཇི་བཞིན་མི་སློབ་པའི་འབྲས་བུའི་དབང་ཕྱུག་བརྒྱད་ལའང་ཕྲ་བ་ལ་སོགས་པའི་མིང་དོན་ནི་སྦྱར་འདུག་པ་ཡོད་དེ། སློབ་དཔོན་བྷ་བྱ་ཀཱིརྟིའི་སྒྲོན་གསལ་དགོངས་པ་རབ་གསལ་ལས། དབང་ཕྱུག་བརྒྱད་ཀྱིས་བཅོམ་ལྡན་འདས། །ཞེས་བྱ་བ་སྨོས་ཏེ། དབང་ཕྱུག་བརྒྱད་ནི་སྐུའི་དབང་ཕྱུག་ལ་སོགས་པའམ་ཕྲ་བ་ལ་སོགས་པ་སྔོན་དུ་བཤད་ཟིན་ཏོ། །ཞེས་གསུངས་པའི་ཕྱིར། དེས་ནི། དཔལ་ལྡན་ཟླ་བའི་སྒྲོན་གསལ་ལས། དབང་ཕྱུག་བརྒྱད་ཀྱིས་བཅོམ་ལྡན་འདས། །བདེ་བ་ཆེན་པོའི་གནས་ལ་བཞུགས། །འདི་ཡི་ཕུང་པོ་ལྔ་རྒྱལ་བ། །དེ་བཞིན་གཤེགས་པ་ཐམས་ཅད་ཡིན། །ཞེས་གསུངས་པའི་ཐད་ཀྱི་འགྲེལ་བ་ཡིན་པས་དེ་དག་གིས་མི་སློབ་པའི་ཟུང་འཇུག་གི་དུས་ཀྱི་ཡོན་ཏན་དབང་ཕྱུག་བརྒྱད་ལ་བྱེད་པ་ལས་མི་སློབ་པའི་ཟུང་འཇུག་ཐོབ་ཁ་མའི་དབང་ཕྱུག་གི་ཡོན་ཏན་བརྒྱད་ཀྱི་རྟགས་བསྟན་པ་མིན་པར་གོ་པས་དཔྱད་པར་བྱའོ།།

འཕགས་པ་དགོངས་པ་ངེས་པར་འགྲེལ་པའི་མདོ་ལས། སྤྱན་རས་གཟིགས་དབང་ཕྱུག་བརྒྱད་ཀྱིས་ཏེ། ལྷག་པའི་བསམ་པ་རྣམ་པར་དག་པ་དང་། སེམས་རྣམ་པར་དག་པ་དང་། སྙིང་རྗེ་རྣམ་པར་དག་པ་དང་། ཕ་རོལ་ཏུ་ཕྱིན་པ་རྣམ་པར་དག་པ་དང་། སངས་རྒྱས་མཐོང་ཞིང་བསྙེན་བཀུར་བྱེད་པ་རྣམ་པར་དག་པ་དང་། སེམས་ཅན་ཡོངས་སུ་སྨིན་པར་བྱེད་པ་རྣམ་པར་དག་པ་དང་། སྐྱེ་བ་རྣམ་པར་དག་པ་དང་། མཐུ་རྣམ་པར་དག་པས་སོ། །ཞེས་མདོ་ལས་ནི་དབང་ཕྱུག་བརྒྱད་ཀྱི་ཅེས་པ་དེ་ལྟར་གསུངས་པའང་མཆིས་མོད་འདིར་བཤད་ཀྱི་འབྲས་བུའི་ཡོན་ཏན་བརྒྱད་ལ་འགྲེལ་ཆགས་མིན་དཔྱད་པར་བྱའོ།།

ད་ནི་དཀྱུས་ལ་འཇུག་སྟེ། དེ་ལྟར་སློབ་པའི་ཟུང་འཇུག་གི་སློབ་མཐའི་འོད་གསལ་དེ་ནི་རྒྱུན་མཐའི་སྒོམ་ལམ་རྡོ་རྗེ་ལྟ་བུའི་བར་ཆད་མེད་ལམ་དང་ཡང་ན་དེའི་དོད་ཐུབ་ཡིན་ཕྱིར་དེ་ཡིས་ཤེས་སྒྲིབ་ཕྲ་བའི་ཕྲ་བ་སྤོང་བའི་དངོས་གཉེན་བྱས་ཏེ། འོད་གསལ་དེའི་སྐད་ཅིག་གཉིས་པ་ནས་གཉིས་སྣང་འཁྲུལ་བའི་བག་ཆགས་ཀྱི་ལྷག་མ་མ་ལུས་པ་སྦྱངས་ནས་གཉིས་སྣང་མཐའ་དག་ཆོས་ཀྱི་དབྱིངས་སུ་ནུབ་སྟེ་ཤེས་སྒྲིབ་སྤངས་པ་དང་། སློབ་པའི་ཟུང་འཇུག་གི་རྒྱུན་རིགས་འདྲ་ཕྱི་མ་མི་སློབ་པའི་ཟུང་འཇུག་ཏུ་གྱུར་ཅིང་འོད་གསལ་ལྷན་ཅིག་སྐྱེས་པའི་ཡེ་ཤེས་མཐར་ཐུག་པ་མངོན་དུ་གྱུར་ཏེ་ཆོས་ཉིད་ཀྱི་དབྱིངས་སུ་གཟིགས་པ་སླར་མི་ལྡང་བའི་ཚུལ་གྱིས་སངས་རྒྱས་པ་ཡིན་ཏེ། ཡེ་ཤེས་རྡོ་རྗེ་ཀུན་བཏུས་ལས། རྡོ་རྗེ་ལྟ་བུའི་ཏིང་འཛིན་གྱིས། །ཀུན་རྟོག་མ་ལུས་བཅོམ་གྱུར་པའི། །རྣམ་པར་དག་པའི་ཡེ་ཤེས་ཀྱི། །མཁྱེན་པ་བྱང་ཆུབ་སེམས་ཀྱི་རྒྱུན། །མི་འགག་འཕྲིན་ལས་རྒྱུན་མི་འཆད། །མི་འགྱུར་སྟོང་ཉིད་བདེ་ཆེན་པོ། །ཟུང་འཇུག་རབ་ཏུ་མི་གནས་པ། །ཐོབ་ཏུ་མེད་ལས་ཀུན་དུ་འབྱུང་། །ལྷུན་གྲུབ་དེ་བཞིན་ཉིད་གནས་པའོ། །ཞེས་གསུངས་པའི་ཕྱིར་རོ།།

དེས་ན་སློབ་དཔོན་ནཱ་གཱརྫུ་ནའི་དབང་བཞི་པའི་རབ་བྱེད་ལས། ངོ་བོ་ཉིད་ནི་རྡོ་རྗེ་འཆང་། །ཡན་ལག་བདུན་དང་ལྡན་པ་སྟེ། །ལོངས་སྤྱོད་རྫོགས་པ་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ངེས་གང་རྒྱུན་མི་འཆད་ཅིང་འགོག་པ་མེད། །ཅེས་གསུངས་པ་ལྟར་གྱི་ཁ་སྦྱོར་ཡན་ལག་བདུན་ལྡན་གྱི་གོ་འཕང་ཡང་དེ་ནས་ཐོབ་པ་ཡིན་ནོ།།

ཁ་སྦྱོར་ཡན་ལག་བདུན་དེའི་དོན་ནི། སློབ་དཔོན་དགའ་བ་སྐྱོང་གི་དབང་བསྐུར་བ་ངེས་པར་བསྟན་པའི་དཀའ་འགྲེལ་ལས། དེ་ལ་ཡན་ལག་བདུན་ནི། ལོངས་སྤྱོད་རྫོགས་པའི་ཚོར་བ་དང་། ཁ་སྦྱོར་སྙོམས་པར་འཇུག་པ་དང་། བདེ་བ་ཆེན་པོ་བདེ་བའི་ངོ་བོ་ཉིད་དང་། མེད་པ་རྟོག་པ་དང་བྲལ་བ་དང་། སྙིང་རྗེ་ངེས་པར་གང་སྔོན་གྱི་སྨོན་ལམ་གྱི་དབང་གིས་ལོངས་སྤྱོད་རྫོགས་པ་ལ་སོགས་པས་སེམས་ཅན་གྱི་དོན་མཛད་པ་དང་། རྒྱུན་མི་འཆད་པར་རབ་ཏུ་རྒྱུན་ཆད་པ་མེད་པ་དང་། འགོག་པ་མེད་པས་རྒྱུད་རྒྱུན་འཆད་པ་མེད་པའོ། །ཞེས་གསུངས་པ་ལྟར་རོ།།

དེ་ཡང་ཡང་དག་མཐའ་ལས་ལྡང་ནས་ཟུང་འཇུག་ཐོབ་ཟེར་བ་ནི་སློབ་པའི་ཟུང་འཇུག་ལ་ཡིན་གྱི། མི་སློབ་པ་སངས་རྒྱས་ཀྱི་ཟུང་འཇུག་ནི་ཡང་དག་མཐའ་ལས་ལྡང་བ་མིན་པར་ཡང་དག་མཐའ་ལ་མཉམ་པར་བཞག་བཞིིན་པའི་ངང་ནས་ཐོབ་པ་ཡིན་པར་གསུངས་སོ།།

དེས་ན་མཐར་ཐུག་གི་ཟུང་འཇུག་གྲུབ་པ་ནས་སྣང་བ་གསུམ་གྱི་ཡེ་ཤེས་དབྱིངས་སུ་དག་ནས་སྐྱེ་བའམ་འབྱུང་བ་མེད་པ་ཡིན་པས་སློབ་པའི་ཟུང་འཇུག་གི་འོག་ནས་མི་སློབ་པའི་ཟུང་འཇུག་ཐོབ་པའི་ཆེད་དུ་འོད་གསལ་ལ་མཉམ་པར་བཞག་པའི་རྗེས་ནས་སྣང་མཆེད་ཐོབ་གསུམ་འགགས་ནས་མི་འབྱུང་བ་ཡིན་ཕྱིར། སྨོས་ཟིན་ལྟར་སྣང་བ་གསུམ་དེ་ནས་རྒྱུན་ཆད་པ་ཡིན་ཏེ། རྡོ་རྗེ་དཔལ་མཆོག་ཆེན་པོ་ལས། རྡོ་རྗེ་འོད་ཀྱི་ལུས་བཟུང་ནས། །བདག་དང་གཞན་དོན་སྒྲུབ་འགྱུར་ལ། །དམིགས་པ་ཐམས་ཅད་ཟད་བྱེད་པས། །བགྲོད་མེད་གནས་སུ་བདེ་བར་འགྱུར། །རང་འོད་ཡེ་ཤེས་ལྡན་པའི་སྐུ། །འཇའ་ཚོན་བཞིན་དུ་མཐའ་མི་དམིགས། །སྟོང་པ་གསུམ་ལ་འདས་པ་པོ། །ཐོགས་མེད་སྙིང་རྗེ་འབྱུང་བར་འགྱུར། །ཞེས་གསུངས་པའི་ཕྱིར་རོ།།

སངས་རྒྱས་ཀྱི་ས་རུ་ཡར་འགྲོ་བ་ནི། སེམས་མཐར་ཐུག་པ་ཞིག་སངས་རྒྱས་ཀྱི་ས་རུ་འགྲོ་བ་དང་། གཟུགས་མཐར་ཐུག་པ་ཞིག་སངས་རྒྱས་ཀྱི་ས་རུ་འགྲོ་བ་དང་། རླུང་མཐར་ཐུག་པ་ཞིག་སངས་རྒྱས་ཀྱི་ས་རུ་འགྲོ་བ་ཡིན་ཕྱིར། ཤིན་ཏུ་ཕྲ་བའི་རླུང་གིས་གཟུགས་སྐུ་དང་། ཤིན་ཏུ་ཕྲ་བའི་སེམས་ཀྱིས་ཡེ་ཤེས་ཆོས་སྐུ་དང་། ཤིན་ཏུ་ཕྲ་བའི་རླུང་སེམས་དངོས་པོ་གཅིག་པ་དེས་ཟུང་འཇུག་གི་སྐུ་གྲུབ་པ་ཡིན་ཕྱིར་ཕྱི་མ་དེ་ཟུང་འཇུག་གི་སྒྲུབ་གཞི་ཞེས་བྱ་ཞིང་། སེམས་ཀྱི་བཞོན་པར་གྱུར་པའི་རླུང་རགས་པ་འགགས་པ་ན་དེ་ལྷའི་རྣམ་པར་ཤར་བའི་སྒྱུ་ལུས་རགས་པའམ་མ་དག་པའི་སྒྱུ་ལུས་དེ་འགགས་ཤིང་། གཉུག་སེམས་ཕྲ་བའི་བཞོན་པར་གྱུར་པའི་རླུང་ཕྲ་བ་ལྷའི་རྣམ་པར་ཤར་བའི་དག་པའི་སྒྱུ་མའི་སྐུ་བསྒོམས་པ་ན་ཟུང་འཇུག་ཐོབ་པ་ཡིན་ནོ།།

དེས་ན་རིམ་པ་བཞི་བའི་དོན་གྱི་འོད་གསལ་གྱི་བཞོན་པའི་རླུང་ཕྲ་བ་དེས་ཉེར་ལེན་གྱི་རྒྱུ་བྱས་ཏེ་ཉོན་སྒྲིབ་སྤངས་པའི་དག་པའི་སྒྱུ་མའི་ལུས་མངོན་དུ་གྱུར་པ་དང་། དག་པའི་སྒྱུ་མའི་སྐུ་དེ་ཇེ་དག་ཏུ་སོང་ནས་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པའི་དུས་ཀྱི་དག་པའི་སྒྱུ་མའི་སྐུ་ནི་སངས་རྒྱས་ཀྱི་སའི་གཟུགས་སྐུ་དེ་ཡིན་ཞིང་། ལོངས་སྐུ་དེ་འཕགས་པ་འབའ་ཞིག་གི་སྤྱོད་ཡུལ་དུ་གསུངས་པས་སྐུ་དེ་ཡང་དག་པའི་སྒྱུ་ལུས་པའི་བྱང་སེམས་འཕགས་པ་རྣམས་ཀྱི་སྤྱོད་ཡུལ་དུ་གྱུར་པ་ཡིན་ལ། དག་པ་གཉིས་ལྡན་གྱི་ཡུལ་གྱི་འོད་གསལ་ནི་ཆོས་ཀྱི་སྐུ་སྟེ་ངོ་བོ་ཉིད་སྐུ་དང་། ཡུལ་ཅན་འོད་གསལ་ལྷན་ཅིག་སྐྱེས་པའི་གཉུག་མའི་ཡེ་ཤེས་ནི་ཡེ་ཤེས་ཆོས་སྐུ་ཡིན་ཞིང་དེ་ལ་བདེ་བ་ཆེན་པོའི་སྐུ་ཞེས་བྱ་བ་དང་། དེའི་རྟེན་དུ་གྱུར་པའི་རླུང་སེམས་ཕྲ་བ་མཐར་ཐུག་པ་ལས་གྲུབ་པའི་སྒྱུ་མའི་སྐུ་དེ་ལོངས་སྐུར་གྱུར་པའི་གཟུགས་སྐུ་ཡིན་ཞིང་། དེ་གཉིས་ངོ་བོ་གཅིག་ལ་ལྡོག་པ་ཐ་དད་ཀྱིས་ཕྱེས་པས་ན་གཟུགས་སྐུ་ལའང་གཉིས་སུ་མེད་པའི་ཡེ་ཤེས་ཀྱི་སྐུ་ཞེས་རྒྱུད་ལས་ལན་གྲངས་དུ་མར་གསུངས་ཏེ། རྡོ་རྗེ་དཔལ་མཆོག་ཆེན་པོ་ལས། སྟོབས་དང་མི་འཇིགས་ལ་སོགས་པའི། །ཆེ་བའི་ཡོན་ཏན་རྣམས་བརྒྱན་པ། །བདེན་གཉིས་སྦྱོར་བ་ཟུང་འཇུག་སྐུ། །བདེ་བ་ཆེན་པོ་དེས་ཐོབ་འགྱུར། །མཁའ་འདྲ་ཆོས་སྐུ་སྟོང་པ་ལས། །རྟོག་མེད་ཡེ་ཤེས་མཁའ་འདྲ་བ། །ཚོགས་དང་སྨོན་ལམ་སྟོབས་དག་གིས། །འབར་དང་བྲལ་བར་ལྷུན་གྱིས་གྲུབ། །ལོངས་སྤྱོད་རྫོགས་པའི་སྐུ་ལུས་ནི། །འབད་པ་མེད་པར་སྤྲུལ་པའི་སྐུ། །མཐའ་མེད་རྡུལ་བྲལ་ཇི་བཞིན་པས། །སེམས་ཅན་དོན་ཀུན་སྒྲུབ་པར་མཛད། །གང་དག་གང་གིས་འདུལ་གྱུར་པ། །དེ་དེ་བཞིན་དུ་སོ་སོར་སྣང་། །མོས་པའི་དབང་གིས་ཐ་དད་པར། །སེམས་ཅན་རྣམས་ནི་འདུལ་བར་འགྱུར། །ལྷུན་གྲུབ་བདེ་བ་ཆེན་པོའི་སྐུ། །རང་སྣང་རིག་མས་ཉེར་བརྒྱན་པའི། །འོག་མིན་གནས་སུ་དུས་རྟག་ཏུ། །མཚན་དང་དཔེ་བྱད་འབར་བས་བཞུགས། །ཡིད་བཞིན་ནོར་བུའི་རྒྱལ་པོ་ལྟར། །འབད་མེད་བདག་དང་གཞན་གྱི་དོན། །ཆེ་བའི་ཡོན་ཏན་རྣམས་ཀྱིས་བརྒྱན། །ཞེས་གསུངས་པ་ལྟར་ཡིན་པའི་ཕྱིར་རོ།།

ཟུང་འཇུག་ཉེར་གཅིག་བཤད་པ་ནི་གང་ཞེ་ན། དེ་ནི་ཡོད་དེ། འཁོར་འདས་ཟུང་འཇུག་དང་། ཀུན་བྱང་ཟུང་འཇུག་དང་། རྣམ་བཅས་རྣམ་མེད་ཟུང་འཇུག་དང་། གཟུང་འཛིན་གཉིས་མེད་ཀྱི་ཟུང་འཇུག་དང་། རྟག་ཆད་བྲལ་བའི་ཟུང་འཇུག་དང་། སྟོང་ཉིད་སྙིང་རྗེ་ཟུང་འཇུག་དང་། ཐབས་ཤེས་ཟུང་འཇུག་དང་། ལྷག་བཅས་ལྷག་མེད་ཟུང་འཇུག་དང་། ཆོས་དང་གང་ཟག་གི་བདག་མེད་ཟུང་འཇུག་དང་། སྒྱུ་ལུས་འོད་གསལ་ཟུང་འཇུག་དང་། རིལ་འཛིན་རྗེས་གཞིག་ཟུང་འཇུག་དང་། བདེན་གཉིས་ཟུང་འཇུག་དང་། མཉམ་པར་འཇུག་ལྡང་ཟུང་འཇུག་དང་། སད་གཉིད་ཟུང་འཇུག་དང་། མཉམ་རྗེས་ཟུང་འཇུག་དང་། དྲན་དང་དྲན་མིན་ཟུང་འཇུག་དང་། བདེ་སྟོང་ཟུང་འཇུག་དང་། བྱ་བྱེད་ཟུང་འཇུག་དང་། བསྐྱེད་རྫོགས་ཟུང་འཇུག་དང་། དག་པའི་ལྷ་དང་མ་དག་པའི་ལྷའི་ཟུང་འཇུག་དང་། གཟུགས་ཅན་གཟུགས་མེད་ཟུང་འཇུག་སྟེ་ཉེར་གཅིག་པོ་ཡིན་པའི་ཕྱིར། གྲུབ་སྟེ།

ཀླུ་སྒྲུབ་ཀྱི་རིམ་ལྔ་ལས། འཁོར་བ་དང་ནི་མྱ་ངན་འདས། །རྟོག་པ་གཉིས་པོ་སྤངས་པས་ན། །གང་དུ་དངོས་པོ་གཅིག་གྱུར་པ། །ཟུང་དུ་འཇུག་ཅེས་དེ་ལ་བཤད། །ཅེས་པ་ནས། གཟུགས་ཅན་དང་ནི་གཟུགས་མེད་ཅེས། །རྟོག་པ་གཉིས་པོ་སྤངས་པས་ན། །གང་ཞིག་ཞི་རྟོགས་རྣལ་འབྱོར་དབང་། །དེ་ནི་ཟུང་འཇུག་ཐོབ་པའོ། །ཞེས་གསུངས་པའི་བར་གྱིས་བསྟན་པ་ཡིན་པའི་ཕྱིར་རོ།།

ཡང་ཟུང་འཇུག་ཉེར་གཉིས་སུ་ཕྱེ་དུས་རིལ་འཛིན་རྗེས་གཞིག་གི་ཟུང་འཇུག་ལས་འཇུག་གནས་ལྡང་གསུམ་གྱི་ཟུང་འཇུག་ཅེས་བསམ་གཏན་དེ་གཉིས་ཀྱིས་འཇུག་པ་དང་གནས་པ་དང་ལྡང་བ་གསུམ་གྱི་བྱེད་ལས་ལོགས་སུ་ཕྱེས་ཏེ་བགྲང་བ་དང་། ཡང་མཉམ་རྗེས་ཟུང་འཇུག་ལ་གཉིས་ཕྱེས་ཏེ་ཟུང་འཇུག་ཉེར་གསུམ་དུ་བྱེད་པའང་ཡོད་དོ།།

ཡང་མར་བ་ལོ་ཙཱ་བ་ཆོས་ཀྱི་བློ་གྲོས་དང་འགོས་ལོ་ཙཱ་བ་ཁུག་པ་ལྷས་བཙས་ཀྱི་སྲོལ་འཛིན་ཁ་ཅིག་གིས་འགོག་པ་ཟུང་འཇུག་དང་། སྣང་བ་ཟུང་འཇུག་དང་། འབྲེལ་བ་ཟུང་འཇུག་སྟེ་ཟུང་འཇུག་གསུམ་དུ་དབྱེ་བར་བྱས་པ་ཡོད་ལ། དེ་ལས་གཉིས་པ་ནི། ཀླུ་སྒྲུབ་ཀྱི་རིམ་ལྔ་ལས། དངོས་པོ་རྣམ་བཅས་ཀུན་རྟོག་དང་། །དངོས་པོ་མེད་པར་རྟོག་པ་དག །རྣལ་འབྱོར་པས་ནི་ཅིག་ཅར་སྤྱོད། །དེ་ནི་ཟུང་འཇུག་ཤེས་པའོ། །ཞེས་གསུངས་པའི་དོན་གོང་དུ་རྣམ་བཅས་རྣམ་མེད་ཀྱི་ཟུང་འཇུག་ཅེས་པ་དེ་ལ་བྱའོ། །གསུམ་པ་ནི། ཡང་ཀླུ་སྒྲུབ་ཀྱི་རིམ་ལྔ་ལས། ཐབས་དང་ཤེས་རབ་སྙོམས་འཇུག་པར། །ཐམས་ཅད་བསྡུས་ལས་ཤེས་གྱུར་པ། །རྣལ་འབྱོར་ཆེན་པོ་གང་དུ་གནས། །དེ་ནི་ཟུང་དུ་འཇུག་པར་འགྱུར། །ཞེས་གསུངས་པའི་དོན་གོང་གི་ཐབས་ཤེས་ཟུང་འཇུག་ཟེར་བ་དེ་ལ་བྱ་བའོ།།

དེ་གསུམ་གྱི་དང་པོ་ནི། ཡང་ཀླུ་སྒྲུབ་ཀྱི་རིམ་ལྔ་ལས། འཁོར་བ་དང་ནི་མྱ་ངན་འདས། །སོགས་ནས། ཀུན་ཉོན་མོངས་དང་རྣམ་པར་བྱང་། །དོན་དམ་ཉིད་དུ་ཤེས་ནས་ནི། །གང་གིས་གཅིག་ཏུ་ཤེས་གྱུར་པ། །དེ་ཡིས་ཟུང་དུ་འཇུག་པར་ཤེས། །ཞེས་དང་། གཟུང་བ་དང་ནི་འཛིན་པ་ཞེས། །རྣམ་གཉིས་བློ་ནི་ཡོད་མིན་གྱི། །གང་དུ་མི་ཕྱེད་བློ་ཡོད་པ། །དེ་ནི་ཟུང་འཇུག་ཅེས་བྱར་བཤད། །རྟག་དང་ཆད་པའི་བློ་དག་ནི། །གང་གིས་སྤངས་ནས་གནས་པ་ཡི། །ཟུང་དུ་འཇུག་པའི་རིམ་འདི་ཡི། །དེ་ཉིད་ཤེས་ཏེ་མཁས་པ་ཡིན། །ཤེས་རབ་སྙིང་རྗེ་གཅིག་པར་ནི། །ཤེས་ནས་གང་དུ་འཇུག་གྱུར་པ། །ཟུང་འཇུག་ཅེས་བྱར་བཤད་པ་སྟེ། །རིམ་འདི་སངས་རྒྱས་སྤྱོད་ཡུལ་ལོ། །ཞེས་དང་། གང་དུ་ལྷག་མར་བཅས་པ་དང་། །ཞེས་པ་ནས། དེ་ནི་ཟུང་འཇུག་ཐོབ་པའོ། །ཞེས་གསུངས་པའི་བར་གྱིས་བསྟན་པའི་སྨོས་མ་ཐག་པའི་ཟུང་འཇུག་དེ་གཉིས་ལས་ལྷག་མའི་ཟུང་འཇུག་ཡོད་ཚད་ལ་བཤད་པ་ཡིན་པར་འདོད་དོ།།

ཟུང་འཇུག་ལ་གོ་བ་ཆགས་པའི་ཚད་ཅིག་བཤད་ན་ནི། འདི་ལྟ་སྟེ། སངས་རྒྱས་ཀྱི་ས་རུ་མི་སློབ་པ་འབྲས་བུའི་ཟུང་འཇུག་ཡོད་ལ། དེའི་རྒྱུར་སློབ་པའི་ཟུང་འཇུག་སྔོན་དུ་འགྲོ་དགོས་པ་དང་། དེའི་རྒྱུར་རིམ་པ་བཞི་བའི་འོད་གསལ་དང་། དེའི་རྒྱུར་རིམ་པ་གསུམ་པའི་སྒྱུ་ལུས་དང་། དེའི་རྒྱུར་སེམས་དབེན་གྱི་སྣང་མཆེད་ཐོབ་གསུམ་དང་། དེའི་རྒྱུར་སྲོག་རྩོལ་གསུམ་བསྒོམས་པ་ལས་བྱུང་བའི་སྙིང་གའི་རྩ་མདུད་རྫོགས་པར་གྲོལ་བ་འགྲོ་དགོས་པ་དང་། དེ་ཡང་ཚགས་ཆུང་ངུའི་སྒོ་ནས་སྔོན་དུ་འགྲོ་བ་ལ་ལུས་དབེན་དང་། དེ་ཐོབ་པ་ལ་སྐྱེ་ཤི་བར་དོ་ལམ་ཁྱེར་གྱི་བསྐྱེད་རིམ་ཕྲ་རགས་མཐར་ཕྱིན་པ་དང་། དེ་དག་གི་རྒྱུར་དབང་བཞི་རྫོགས་པར་ཐོབ་པ་དང་དམ་ཚིག་དང་སྡོམ་ལ་གནས་པ་དང་། དེའི་སྔོན་དུ་དགེ་བའི་བཤེས་གཉེན་བསྟེན་ནས་ཞི་ལྷག་གི་བར་གྱི་ལམ་ཐུན་མོང་བ་ལ་སྦྱངས་པ་འགྲོ་དགོས་པའི་ཚུལ་ལ་གོ་བ་ཆགས་པར་བྱ་དགོས་པ་ནི་ཟུང་འཇུག་ལ་གོ་བ་ཆགས་པའི་ཚད་ཡིན་པར་མཁས་པས་གསུངས་སོ།།

བཤེས་གཉེན་བསྟེན་ཚུལ།

གཉིས་པ་བར་དུ་དགེ་བ་གཞུང་གི་དོན་ལ་ཡོན་ཏན་ཐམས་ཅད་ཀྱི་འབྱུང་གནས་བྱིན་རླབས་འཇུག་པའི་རྩ་བ་བཤེས་གཉེན་བསྟེན་ཚུལ་དང་། མདོ་སྔགས་ཐུན་མོང་གི་ལམ་གྱི་སྔོན་འགྲོ་བློ་སྦྱོང་གི་སྐོར་བསྟན་པ་དང་། ཐུན་མིན་གྱི་ཉམས་ལེན་དང་སྦས་དོན་འགའ་ཞིག་གི་སྐོར་བསྟན་པ་དང་། རྫོགས་པ་ཆེན་པོའི་གནད་གསང་རྣམས་ལེགས་པར་བསྟན་པ་དང་ཚོམ་ཆེན་པོ་བཞི་ལས།དང་པོ་ལ་ནི། བླ་མའི་མཚན་ཉིད་དང་། སློབ་མའི་མཚན་ཉིད་དང་། དད་པས་བསྟེན་ཚུལ་དང་། མཇུག་བསྡུ་བ་དང་བཞི་ལས། དང་པོ་ནི། མཚན་ཉིད་ལྡན་པའི་དགེ་བའི་བཤེས་གཉེན་ལ། །བརྟེན་ན་ནམ་ཡང་ལེགས་པའི་ཡོན་ཏན་འཕེལ། །ཞེས་པའི་རྐང་པ་གཉིས་ཀྱིས་བསྟན། དེ་ཡང་མདོ་སྔགས་ཀྱི་གཞུང་ནས་ཇི་སྐད་བཤད་པའི་མཚན༷་ཉིད༷་ཐམས་ཅད་ལེགས་པར་ལྡན༷་པའི༷་བླ་མ་དགེ༷་བའི༷་གཤེས༷་གཉེན༷་ལ༷་བརྟེན༷་ནས་ཐོས་བསམ་སྒོམ་པའི་ཚུལ་ལ་བརྩོན་ན༷་ནི་དུས་ནམ༷་དུ་སྟེ་ཐོག་མཐའ་བར་གསུམ་དུ་ཡང༷་རྣམ་བྱང་གི་ལེགས༷་པའི༷་ཡོན༷་ཏན༷་མཐའ་དག་མ་སྐྱེས་པ་བསྐྱེད་པ་དང་། སྐྱེས་པ་མི་ཉམས་པར་གོང་ནས་གོང་དུ་འཕེལ༷་བ་ཡིན་པས་བཤེས་གཉེན་མཚན་ཉིད་དང་ལྡན་པ་འཚོལ་ཞིང་བརྟག་པ་ལ་མཁས་པས་གཙུག་ཏུ་བསྟེན་པ་ཤིན་ཏུ་གལ་ཆེའོ།།

བླ་མ་མཚན་ཉིད་དང་ལྡན་པ་དེ་ནི་མདོ་ལྟར་ན་མདོ་སྡེ་རྒྱན་ལས། བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པར་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་ལ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཅེས་གསུངས་པ་ལྟར་ཉེས་སྤྱོད་མཐའ་དག་ལ་མི་འཇུག་ཅིང་དེ་དག་ལས་ལྡོག་པའི་ལྷག་པ་ཚུལ་ཁྲིམས་ཀྱི་བསླབ་པ་རིན་པོ་ཆེ་གཙང་བས་སྒོ་གསུམ་དུལ་བ་དང་། གདམས་པའི་དོན་ལ་མཉམ་པར་བཞག་སྟེ་ཏིང་ངེ་འཛིན་གྱི་སྒོ་དུ་མ་ལ་མངའ་དབང་འབྱོར་བས་སེམས་རྒྱུད་ལ་རྣམ་རྟོག་ལེགས་པར་ཞི་བའི་ལྷག་པ་ཏིང་ངེ་འཛིན་གྱི་བསླབ་པ་ཆེན་པོ་ཆེ་དང་ལྡན་པ་དང་། རྟོགས་པའི་ཡོན་ཏན་ཁྱད་པར་བ་ལ་དབང་ཐོབ་པས་ཐུགས་རྒྱུད་ལ་ཉོན་མོངས་པའི་རྟོག་པ་ཉེ་བར་ཞི་བའི་ལྷག་པ་ཤེས་རབ་ཀྱི་བསླབ་པ་རིན་པོ་ཆེ་དང་ལྡན་པ་དང་། དེ་ལྟར་ལྷག་པའི་བསླབ་པ་གསུམ་གྱི་ཡོན་ཏན་སློབ་མ་ལས་ཁྱད་པར་དུ་ལྷག་ཅིང་ལམ་དང་གཞན་དོན་བསྒྲུབ་པ་ལ་ལེ་ལོ་མེད་པར་སྤྲོ་བའི་བརྩོན་འགྲུས་དང་བཅས་ཤིང་། གཞུང་ལུགས་རྒྱ་ཆེ་བའི་དོན་ལ་སྦྱངས་པ་མང་དུ་ཐོས་པ་ལུང་གི་ཡོན་ཏན་གྱིས་ལེགས་པར་ཕྱུག་པ་དང་། ཆོས་ཐམས་ཅད་ཀྱི་གནས་ལུགས་དེ་ཁོ་ན་རྟོགས་པའི་ཡོན་ཏན་དང་ལྡན་ཞིང་སློབ་མ་ལ་གདམས་དོན་བརྡ་སྤྲོད་ཅིང་སྨྲ་བ་ལ་མཁས་པ་དང་། སློབ་མ་འབུལ་བ་ཆེ་ཆུང་དང་ངོ་སོ་མཐོ་དམན་མེད་པར་ཀུན་ལ་སྙོམས་པའི་སྒོ་ནས་སློབ་མ་ལ་ཐུགས་བརྩེ་བ་དང་། ཉིན་མཚན་ཀུན་ཏུ་སློབ་མ་ལ་ཆོས་སྟོན་པ་དང་གཞན་དོན་མཛད་པ་ལ་སྐྱོ་བའི་ངལ་བ་སྤངས་ཏེ་རྟག་ཏུ་སློབ་མ་དང་གདུལ་བྱ་ལ་གང་ལ་གང་འདོད་ཀྱི་དོན་མཛད་པའི་བཤེས་གཉེན་དེ་ནི་བསྟེན་བྱ་མཚན་ཉིད་དང་ལྡན་པའི་སློབ་དཔོན་ཡིན་ནོ།།

སྔགས་ལས་ནི། རྒྱུད་སྒྱུ་འཕྲུལ་རྡོ་རྗེ་ལས། མང་དུ་ཐོས་ཤིང་ཤེས་རབ་ཆེ། །ལུང་གི་དགོངས་པ་ངེས་པར་རྟོགས། །ཟང་ཟིང་རྙེད་པ་དོན་མི་གཉེར། །དཀའ་བ་སྤྱོད་ཅིང་སྐྱོ་ངལ་སྤངས། །མན་ངག་ཆེ་ཞིང་ལམ་ལས་གྲོལ། །རིགས་ལ་མཁས་ཤིང་དྲོད་ཚད་ཤེས། །བྱང་ཆུབ་སེམས་ལྡན་སྙིང་རྗེ་ཆེ། །རྒྱུད་ལྡན་བཀའ་བབས་སྒྲུབ་ལ་མཁས། །མཛོད་ལྡན་ཆུ་བོ་ཡོངས་སུ་རྫོགས། །རང་རྒྱུད་གྲོལ་ཞིང་གཞན་དོན་བརྩོན། །གསང་སྔགས་བླ་མའི་མཚན་ཉིད་དོ། །ཞེས་གསུངས་པ་ལྟར་གཞུང་ལུགས་དུ་མ་ལ་སྦྱངས་པ་མཐར་ཕྱིན་མཛད་པའི་མང་དུ་ཐོས་པའི་ཡོན་ཏན་དང་ལྡན་ཞིང་ཐོས་དོན་ལ་དཔྱད་པས་སྒྲོ་འདོགས་ལེགས་པར་ཆོད་པའི་བསམ་པའི་ཤེས་རབ་ཆེ་བ་དང་། ཐོས་བསམ་གྱི་ཡུལ་ལ་སྒོམ་པ་ཡུན་རིང་མཛད་པས་སྡེ་སྣོད་ཀུན་གྱི་ལུང་ལས་བསྟན་པའི་དོན་ངེས་པར་རྟོགས་པའི་རྟོགས་པ་རྒྱུད་ལ་འབྱོར་བ་དང་། འཇིག་རྟེན་ཆོས་བརྒྱད་ལ་ཞེན་པ་ཆུང་བས་ཟང་ཟིང་གི་རྒྱུ་ནོར་དོན་དུ་མི་གཉེར་བ་དང་། ཆོས་ཕྱིར་དང་སློབ་མ་དང་གཞན་དོན་གྱི་ཆེད་དུ་དཀའ་བ་སྤྱོད་པ་ལ་བློ་མི་ཞུམ་པར་སྐྱོ་ངལ་སྤངས་ཏེ་བསྒྲུབ་ནུས་པ་དང་། ཚིག་ཉུང་དོན་ཟབ་ཀྱི་བླ་མ་བརྒྱུད་པའི་མན་ངག་ལ་ཐུགས་རྒྱུས་ཆེ་ཞིང་ལམ་ཉམས་སུ་ལེན་སྟོབས་ཀྱིས་རང་རྒྱུད་ཉོན་མོངས་པ་ཅི་རིགས་ལས་གྲོལ་བའི་ཡོན་ཏན་དང་ལྡན་པ་དང་། ཐེག་པ་ཆེ་ཆུང་དང་དབང་པོ་རྣོ་རྟུལ་སོགས་སློབ་མའི་ཁམས་དང་དབང་པོ་རིགས་མཆོག་དམན་བརྟག་པ་ལ་མཁས་ཤིང་སློབ་མའི་རྒྱུད་ཀྱི་ཉམས་རྟོགས་ཀྱི་དྲོད་ཚད་ཤེས་པ་དང་། དབང་ལུང་མན་ངག་གི་རྒྱུད་པ་དང་ལྡན་ཞིང་མདོ་རྒྱུད་ཀྱི་བཀའ་བབས་སུ་གྱུར་པ་དང་། རྒྱུད་པའི་འཕྲིན་སྒྲུབ་ཕྱག་བཞེས་སོགས་ལ་མཁས་ཤིང་། རྟོགས་པའི་ཡོན་ཏན་གྱིས་རང་རྒྱུད་གྲོལ་ཞིང་གཞན་རྒྱུད་སྨིན་པར་བྱེད་ནུས་པའི་བླ་མ་དེ་ནི་མཚན་ཉིད་དང་ལྡན་པའི་བླ་མ་ཡིན་ནོ།།

གཞན་ཡང་སྒོ་གསུམ་དུལ་ཞིང་ཆ་ལུགས་དང་སྤྱོད་པ་མཛེས་པའི་ཚུལ་ཁྲིམས་གཙང་བ་དང་། གསང་སྔགས་ཀྱི་རྒྱུད་ཀྱི་དགོངས་པ་འགྲེལ་བ་དང་སྒྲུབ་ཐབས་ལ་མཁས་ཞིང་དེ་ཉིད་བཅུའི་སྦྱོར་བ་རྣམས་ཡོངས་སུ་ཤེས་པ་དང་། རྫུན་གྱི་ཚིག་མི་མངའ་བར་རྟག་ཏུ་བདེན་པར་སྨྲ་ཞིང་གཞན་ལ་འཚེ་བ་མི་བྱེད་པར་ངག་འཇམ་པ་དང་། སེམས་ཅན་ཀུན་ལ་ཉེ་རིང་གི་ཆགས་སྡང་མེད་པར་མ་གཅིག་པུའི་བུ་བཞིན་དུ་མཉམ་པར་བལྟ་ཞིང་སྙིང་རྗེ་དང་ཕན་སེམས་དང་། བྱང་ཆུབ་ཀྱི་སེམས་དང་ལྡན་པས་མགོན་མེད་ཀྱི་འགྲོ་བའི་མགོན་དང་དཔུང་གཉེན་དུ་གྱུར་པ་དང་། རྟག་ཏུ་དམན་པ་ལ་སྦྱིན་གཏོང་དང་མི་འཇིགས་པ་སྐྱབས་ཀྱི་སྦྱིན་པ་གནང་བ་ལ་དགའ་བ་དང་། གདུལ་བྱའི་རྒྱུད་ཚོད་ཤེས་ཤིང་ཉམ་ཐག་གི་འགྲོ་བ་ལ་ལྷག་པར་བརྩེ་བ་དང་། སྔགས་ཀྱི་ལྟ་དགོངས་དང་ལྡན་ཞིང་དམ་ཚིག་སྲུང་བ་ལ་མོས་པ་ཆེ་བའི་བླ་མ་དེ་ནི་སྔགས་ཀྱི་གདམས་པ་ཞུ་ཡུལ་གྱི་བླ་མར་འོས་པ་ཡིན་ཏེ། རྡོ་རྗེ་མཁའ་འགྲོའི་རྒྱུད་ལས། དུལ་ཞིང་ཆ་ལུགས་མཛེས་པ་དང་། །སེམས་ཅན་ཀུན་ལ་མི་འཇིགས་སྦྱིན། །སྔགས་དང་རྒྱུད་ཀྱི་སྦྱོར་བ་ཤེས། །རྣལ་འབྱོར་བཟོ་ཡི་ཆ་ལ་མཁས། །ཐམས་ཅད་དུ་ནི་འཇམ་པར་སྨྲ། །སེམས་ཅན་ཀུན་ལ་བུ་བཞིན་ལྟ། །རྟག་ཏུ་གཏོང་ལ་དགའ་བ་དང་། །བསམ་གཏན་སྦྱོར་ལ་མངོན་པར་བརྩོན། །སྙིང་རྗེ་ཕན་པའི་སེམས་ཀྱིས་ནི། །བདེན་པར་སྨྲ་ཞིང་འཚེ་མི་བྱེད། །རྟག་ཏུ་མཉམ་པའི་སེམས་བསྐྱེད་པས། །སེམས་ཅན་ཀུན་གྱི་མགོན་སྐྱོབ་སྟེ། །སེམས་ཅན་བསམ་པའི་བྱེ་བྲག་མཁས། །མགོན་མེད་རྣམས་ལ་གཉེན་ལྟར་བརྩེ། །མཛའ་སྡུག་གིས་ནི་ལེགས་པར་ལྟ། །སྔགས་ཀྱི་ཚུལ་ལ་ཤིན་ཏུ་གོམས། །དམ་ཚིག་སྤྱོད་ལ་རབ་ཏུ་གུས། །ཕྱག་རྒྱ་བརྡ་ཡི་སྦྱོར་བ་རིག །རྣལ་འབྱོར་མ་རྣམས་དམ་ཚིག་ལ། །བརྡ་ཡི་སྦྱོར་བ་སྟོན་པ་དང་། །གཉིས་མེད་སྦྱོར་བ་མི་ཕྱེད་གནས། །སྔགས་ཀྱི་འཁོར་ལོ་སྤྱོད་ལ་གུས། །དབང་བསྐུར་དོན་གྱི་ཡོན་ཏན་འབྱུང་། །གནས་སོགས་མཐོང་བའི་ངང་ཚུལ་ཅན། །དེ་ཉིད་བཅུ་ནི་ཡོངས་སུ་ཤེས། །འདི་ཉིད་སློབ་དཔོན་ཞེས་བྱར་བརྗོད། །ཅེས་དང་། རྡོ་རྗེ་བཀོད་པའི་རྒྱུད་ལས། སྟོན་པ་མཛོད་ལྡན་ཆུ་བོ་རྫོགས། །དམ་ཚིག་སྡོམ་པ་སྙིང་བརྩེར་ལྡན། །མཁས་ཤིང་གཞན་ལ་ཕན་བརྩོན་པ། །རྡོ་རྗེ་གསང་བའི་སློབ་དཔོན་ལ། །རྣམ་པ་ཀུན་ཏུ་བསྟེན་པར་བྱ། །ཞེས་གསུངས་པའི་ཕྱིར་རོ།།

དེས་ན་དང་པོ་ཡོན་ཏན་རྣམས་ལྡན་མི་ལྡན་བརྟག་པའི་སྒོ་ནས་བླ་མ་ལེགས་པར་བཙལ་ཞིང་། བར་དུ་བརྟགས་ནས་བརྙེད་པའི་ཡོན་ཏན་ཅན་གྱི་བླ་མ་དེ་ཁོང་པའི་སྙིང་དང་མིག་གི་འབྲས་བུ་བཞིན་དུ་གུས་པས་གཙུག་ཏུ་བསྟེན་པ་དང་། ཐ་མ་བླ་མས་ཇི་སྐད་བསྟན་པའི་གདམས་ངག་རྣམས་ཉམས་སུ་བླང་སྟེ་བླ་མ་དང་དགོངས་སྤྱོད་མཉམ་པའི་སློབ་མ་ཞིག་ཨེ་འགྲུབ་ལ་འབད་པ་བྱེད་པ་ནི་གལ་ཆེ་བ་ཡིན་ནོ། །

ཨྱོན་ཆེན་པོས། བླ་མ་མ་བརྟག་དུག་འཐུང་འདྲ། །ཞེས་གསུངས་པ་ལྟར་བླ་མ་མ་བརྟག་པར་བླ་མིང་ཐོགས་ཚད་དང་སེར་གཟུགས་ཆོས་སྟོན་པ་མཐོང་ཚད་ཀྱི་རྗེས་སུ་རྒྱུག་ན་ཁེ་ལས་ཉེན་ཆེ་བས་བླ་མ་བརྟག་པ་ལ་ནན་ཏན་བྱེད་པ་ཤིན་ཏུ་གལ་ཆེ། དེང་སང་དུས་དབང་གི་བླ་མ་མཚན་ཉིད་དང་ལྡན་པ་ཤིན་ཏུ་དཀོན་ཅིང་ཚེ་འདིར་སྣང་གི་བྱ་བཞག་ཁོ་ནས་གཡེངས་ཤིང་བདག་བསྟོད་གཞན་སྨོད་དང་རྙེད་བདེ་གྲགས་བསྟོད་སོགས་འཇིག་རྟེན་ཆོས་བརྒྱད་ཀྱིས་དུས་འདའ་བའི་བླ་མིང་ཅན་མང་དུ་ཡོད་པས་ཅི་ནས་ཀྱང་གཟབ་དགོས་པའི་ཚད་དུ་སོན་ཡོད་ལ། སློབ་མ་དག་གིས་ཀྱང་དོན་གྱི་ཡོན་ཏན་ཡོད་པའི་བླ་མ་ཞིག་འཚོལ་བ་འོས་སུ་ཆེ་ཡང་དེ་མི་འཚོལ་བར་མདོ་སྔགས་ལ་ཐོས་བསམ་སྒོམ་པའི་ཡོན་ཏན་གྱིས་དབེན་ཞིང་ཡོན་ཏན་ལ་ཆོག་ཤེས་ཀྱིས་རྟག་ཏུ་ཆགས་སྡང་རྨོངས་པའི་དུས་འདའ་ཡང་སླུ་ཐབས་ལ་མཁས་པའི་དབང་གིས་འཇིག་རྟེན་ན་ཆེ་བར་གཉན་པར་གྲགས་པའི་མགོ་སྐོར་རྫུན་ཤོབ་ལ་བྱང་བའི་དཀོར་ཟན་བུ་སྨད་ཀྱི་འཁོལ་པོར་འཕྱན་པ་དག་གི་ཁ་ལ་ཉན་ཅིང་རྗེས་སུ་རྒྱུག་པ་ནི་གྱོང་ཆེ་བས་རང་དྲིན་རང་ལ་ཆེ་བ་ཞིག་བྱེད་བསམ་ན་དེ་འདྲའི་བླ་མ་དེ་སྤངས་པ་ནི་གལ་ཆེ་སྟེ། རྡོ་རྗེ་མཁའ་འགྲོའི་རྒྱུད་ལས། གང་ཡང་ཁྲོ་དང་སྒྱུ་ཅན་དང་། །ངག་ནི་ཤིན་ཏུ་རྩུབ་པ་དང་། །ཡོན་ཏན་དག་གིས་ཆོག་ཤེས་པ། །དེ་ནི་བླ་མར་བསྟེན་མི་བྱ། །ཞེས་གསུངས་པའི་ཕྱིར་རོ།།

གཞན་ཡང་ཡིད་བཞིན་མཛོད་ལས། དེ་ཡང་ཉོན་མོངས་ཤས་ཆེ་རང་རྒྱུད་ངན། །ཚེ་འདི་དོན་གཉེར་སྲིད་ལས་ཡིད་མ་བྱུང་། །ཐོས་བསམ་རྒྱ་ཆུང་ཤེས་བྱའི་གནས་ལ་རྨོངས། །དད་བརྩོན་མི་ལྡན་དགེ་ཚོགས་རིང་དུ་བྱེད། །སྒོ་གསུམ་མ་དུལ་ཁེངས་དང་བཅོས་པའི་ཚུལ། །གཞན་ལ་གཤེ་ཞིང་དག་སྣང་མོས་གུས་མེད། །ཟས་སྐོམ་ནོར་དང་ལོག་པའི་ཆོས་ལ་སྲེད། །སྡོམ་དང་དམ་ཚིག་འཆལ་ཞིང་རང་རྒྱུད་རྩུབ། །འགྲོགས་ཚད་ཉོན་མོངས་ལོག་པའི་ལམ་ལ་འགོད། །མི་དགེ་འཕེལ་ཞིང་དགེ་ལེགས་འགྲིབ་པ་སྟེ། །སྡིག་པའི་བཤེས་གཉེན་གྲོགས་བཅས་མཚན་ཉིད་ཡིན། །ཞེས་གསུངས་པ་ལྟར་གྱི་བླ་མ་དེ་གསར་དུ་བླ་མར་མི་བསྟེན་པ་དང་། གལ་ཏེ་སྔོན་ནས་བསྟེན་ཟིན་པ་ཞིག་ཡིན་ན་ནི་སླར་དབང་ཆོས་ཀྱང་མི་ཞུ་མི་བསྟེན་ཅིང་གཤེ་བ་དང་སྐུར་འདེབས་ཀྱང་མི་བྱེད་པར་བཏང་སྙོམས་སུ་རང་དགར་འཇོག་དགོས་པ་ཡིན་ཏེ། ས་སྐྱ་པཎྜི་ཏས། སངས་རྒྱས་བསྟན་བཞིན་མི་བྱེད་པའི། །བླ་མ་ཡིན་ཡང་བཏང་སྙོམས་ཞོག །ཅེས་གསུངས་པའི་ཕྱིར་རོ།།

གཉིས་པ་སློབ་མའི་མཚན་ཉིད་བསྟན་པ་ནི། དད་བརྩོན་ཤེས་རབ་ལྡན་པ་སློབ་མའི་མཆོག །བཀའ་བཞིན་སྒྲུབ་པས་དངོས་གྲུབ་འབད་པ་མེད། །ཅེས་པའི་ཚིག་རྐང་གཉིས་ཀྱིས་བསྟན། ཨྱོན་ཆེན་པོས། སློབ་མ་མ་བརྟག་གཡང་མཆོང་འདྲ། །ཞེས་གསུངས་པས་དམ་ཆོས་སྟོན་པའི་སྣོད་རུང་དུ་གྱུར་པའི་སློབ་མ་སྤྱི་དང་ཁྱད་པར་དུ་གསང་སྔགས་ཀྱི་སྣོད་དུ་རུང་བའི་སློབ་མ་ནི་ངེས་པར་དུ་བརྟག་སྟེ་གདམས་པ་སྟོན་དགོས་ཀྱི་མ་བརྟག་པར་གང་བྱུང་ལ་གདམས་པ་བསྟན་ན་རང་གཞན་གཉིས་གནོད་ལས་མེད་པས་མཚན་ཉིད་ལྡན་པའི་སློབ་མ་དེ་འདི་ལྟ་བུ་ཞིག་དགོས་པ་ཡིན་ཏེ། ཆོས་དང་བླ་མ་ལ་དད༷་པ་ཆེ་ཞིང་གདམས་དོན་ཉམས་སུ་ལེན་པ་ལ་སྤྲོ་བའི་བརྩོན༷་འགྲུས་དང་ལྡན་པ་དང་། གཞུང་དོན་དང་ལེགས་ཉེས་བླང་དོར་གྱི་གནས་ལ་རྣམ་པར་དཔྱོད་པའི་ཤེས༷་རབ༷་ཕུལ་དུ་ཕྱིན་པ་དང་ལྡན༷་པ༷་དེ་ནི་དམ་ཆོས་སྟོན་པའི་སྣོད་རུང་དུ་གྱུར་པའི་སློབ༷་མའི༷་མཆོག༷་ཡིན་པ་དང་། དེ་འདྲའི་ཡོན་ཏན་གཙོ་བོ་རྣམས་ལྡན་པའི་སྟེང་དུ་བླ་མའི་ཅི་གསུངས་བཀ༷འ་བཞི༷ན་དུ་སྒྲུབ༷་སྟེ་མཉེས་པ་ཁོ་ན་ལས་མི་མཉེས་པ་ལན་ཅིག་ཙམ་ཡང་མི་བྱེད་པའི་སློབ་མ་མོས་གུས་དང་ལྡན་པ༷ས་ནི་བླ་མའི་ཐུགས་ངོ་ལོན་ཏེ་གདམས་ངག་ཚང་སྤྲུགས་སུ་གནང་ཞིང་དོན་བརྒྱུད་ཀྱི་བྱིན་རླབས་སྙིང་ལ་ཞུགས་ནས་ཉམས་རྟོགས་ཀྱི་དངོ༷ས་གྲུབ༷་འབ༷ད་པ་མེ༷ད་པར་ཐོབ་ནུས་པ་ཡིན་ནོ།།

མདོར་ཧྲིལ་གྱིས་བསྡུ་ན་ནི། ཆོས་ཀྱི་སྣོད་དུ་གྱུར་པའི་སློབ་མ་དེ་ཆོས་དང་བླ་མར་མི་ཕྱེད་པའི་དད་གུས་ཆེ་བ་དང་། རྒྱུ་ནོར་ལོངས་སྤྱོད་རྣམས་བླ་མ་ལ་འབུལ་བའི་གཏོང་ཕོད་དང་ལྡན་པ་དང་། བླང་དོར་དང་ཆོས་རབ་རྣམ་པར་འབྱེད་པའི་བློ་གྲོས་དང་ལྡན་ཞིང་བློ་སྣ་མི་མང་བར་བློ་རྩེ་བརྟན་ཅིང་དཀའ་སྤྱད་ལོག་སྒྲུབ་ལ་སོགས་པ་བཟོད་པའི་བློ་ཁོག་ཡངས་པ་དང་། ཐོས་བསམ་སྒོམ་གསུམ་སྤྱི་དང་ལྷག་པར་དུ་སྒྲུབ་པ་ཉམས་ལེན་ལ་སྤྲོ་བའི་བརྩོན་འགྲུས་ཆེ་བ་དང་། ཐེག་པ་ཆེན་པོའི་ཆོས་ཀྱི་མཆོག་སྙིང་རྗེ་དང་གཞན་ཕན་གྱི་བསམ་པ་དང་ལྡན་པ་དང་། ཚུལ་ཁྲིམས་གཙང་ཞིང་གསང་སྔགས་ཀྱི་དམ་ཚིག་ཉམས་པ་མེད་པར་ལེགས་པར་སྲུང་བ་ལ་སོགས་པའི་ཡོན་ཏན་དང་ལྡན་པ་དེ་ནི་དམ་ཆོས་སྤྱི་དང་བྱེ་བྲག་ཏུ་གསང་སྔགས་རྡོ་རྗེ་ཐེག་པ་སྟོན་པའི་སྣོད་རུང་དུ་གྱུར་པའི་སློབ་མ་ཡིན་ཏེ། རྡོ་རྗེ་བཀོད་པའི་རྒྱུད་ལས། སྐལ་ལྡན་གུས་དང་གཏོང་ཕོད་ཆེ། །བློ་བརྟན་ཡངས་ཤིང་སྒྲུབ་ལ་བརྩོན། །ཆོས་མཆོག་སྙིང་རྗེ་དམ་ཚིག་ལྡན། །རྡོ་རྗེ་སློབ་མར་ཤེས་པར་བྱ། །ཞེས་གསུངས་པའི་ཕྱིར་རོ།།གསུམ་པ་དད་པས་བསྟེན་ཚུལ་ནི། བྱིན་རླབས་རྩ་བ་རང་གི་མོས་གུས་ཡིན། །དད་པ་ཡོད་ན་བླ་མར་བཟང་ངན་མེད། །མོས་གུས་ཅན་མདུན་སངས་རྒྱས་མངོན་སུམ་བཞུགས། །དཔེར་ན་ཆུ་སྣོད་དྭངས་པར་ཟླ་གཟུགས་ལྟར། །དད་མོས་མེད་ན་རྫོགས་སངས་རྒྱས་མཇལ་ཡང་། །ལོག་རྟོག་ངན་པས་སྐྱོན་ཅན་ཁོ་ནར་མཐོང་། །དེ་ཕྱིར་བླ་མ་སངས་རྒྱས་དངོས་མཐོང་གི །འདུན་པ་ཡོད་ན་འདི་ཉིད་གཅིག་པུས་ཆོག །ཐང་ལྷོད་མེད་པ་སྐྱེ་བོའི་གཞུ་འགེང་བཞིན། །རྟག་ཏུ་བླ་མ་མཆོག་ལ་གསོལ་བ་ཐོབ། །ཅེས་པའི་ཤོ་ལོ་ཀ་གཉིས་དང་ཕྱེད་ཀྱིས་བསྟན།

བླ་མས་བསྟན་པའི་གདམས་དོན་ཉམས་སུ་ལོན་མི་ལོན་དང་བླ་མའི་བྱིན༷་རླབས༷་རང་རྒྱུད་ལ་ཞུགས་ཐུབ་མིན་གྱི་རྩ༷་བ༷་ནི་རང༷་གི༷་རྒྱུད་ལ་མོས༷་པ་དང་དད་གུས༷་ཡོད་མེད་ལ་རག་ལས་པ་ཡིན༷་པས་རང་ཉིད་ལ་དད༷་པ༷་ཡོད༷་ན༷་བླ༷་མ༷་དེ་བཟང༷་ཡང་རུང་ངན༷་པ་ཞིག་ཡིན་ཡང་རུང་ཁྱད་པར་མེད༷་པར་རང་རྒྱུད་ལ་རིག་འཛིན་གྲུབ་ཐོབ་བརྒྱུད་པའི་བྱིན་རླབས་ཞུགས་ཤིང་དོན་གྱི་རྟོགས་པ་དེ་སྐྱེ་ཐུབ་པ་ཡིན་ཏེ། ཐང་ཡིག་བསྡུས་པ་ལས། དད་པ་ཅན་ལ་པད་འབྱུང་སྒོ་ཉལ་ཡོད། །ཅེས་གསུངས་པ་ལྟར་མོས༷་གུས༷་དང་དག་སྣང་ཅན༷་གྱི་གང་ཟག་དེའི་མདུན༷་དུ་ནི་སངས༷་རྒྱས༷་མངོན༷་སུམ༷་དུ་བཞུགས༷་ཡོད་པ་དང་འདྲ་བར་བྱིན་རླབས་འཇུག་སླ་བ་ཡིན་པའི་ཕྱིར་ཏེ། དཀོན་མཆོག་སྒྲོན་མེའི་མདོ་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་ལེགས་གྲོང་ཁྱེར་མཚོན་བྱེད་ཡིན། །ཞེས་གསུངས་པའི་ཕྱིར།

དེ་ཡང་དཔེར༷་ན༷་ཆུ༷་སྣོད་དུ་ཆུ་ཤིན་ཏུ་དྭངས༷་པར༷་གྱུར་བླུགས་ན་ནང་དུ་ཟླ༷་བའི་གཟུགས༷་བརྙན་གསལ་བར་འཆར་བ་ལྟར༷་རང་ལ་དད་པ་དང་དག་སྣང་ཡོད་ན་ཕ་རོལ་པོའི་ངོས་ནས་བཟང་ངན་ཅི་ལྟར་ཡིན་ཡང་རང་ངོར་བཟང་པོར་སྣང་བ་ཡིན་ཏེ། རྒན་མོ་ཁྱི་སོས་སངས་རྒྱས་དང་ཀོང་པོ་འབེན་གྱིས་ཇོ་བོ་ཆུ་བོའི་ནང་དུ་མཐོང་བ་ལྟ་བུ་ཡིན་པའི་ཕྱིར་རོ། །

མདོ་སྡེ་དཀོན་མཆོག་བརྩེགས་པ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡིས་འཚིགས་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པ་ལྟར་རང་ལ་དད༷་པ་དང་མོས༷་པ་མེད༷་ན༷་རྫོགས༷་པའི་སངས༷་རྒྱས༷་དངོས་སུ་མངོན་སུམ་དུ་མཇལ༷་ན་ཡང༷་ལོག༷་རྟོག༷་ངན༷་པ༷་དེའི་དབང་གིས་སངས་རྒྱས་ཀྱི་ཡོན་ཏན་མི་མཐོང་བར་ཡོན་ཏན་རྣམས་ཀྱང་སྐྱོན༷་ཅན༷་ཁོ༷་ནར༷་མཐོང༷་བ་ཡིན་ཏེ། དཔེར་ན་སངས་རྒྱས་ཀྱི་སྐུ་དུས་སུ་ཡོད་པའི་ཕྱི་རོལ་བ་དག་དང་དགེ་སློང་ལེགས་པའི་སྐར་མ་ལྟ་བུ་ཡིན་པའི་ཕྱིར་ཏེ། གཏེར་སྟོན་རང་ཉིད་ཀྱི་ཞལ་ནས། མཉམ་འགྲོགས་ཆེ་བ་ལེགས་པའི་སྐར་མ་ཡིས། །ཐུབ་པའི་ཡོན་ཏན་མ་མཐོང་སྐྱོན་དུ་བཟུང་། །རང་མཐོང་ལྷས་བྱིན་ལོག་པའི་བརྟུལ་ཞུགས་རྩིང་། །ཐུབ་པའི་རྗེས་སུ་མ་ཞུགས་གཡང་ལ་ལྷུངས། །ལོག་རྟོག་ཆེ་བ་མུ་སྟེགས་བྱིས་པ་ཡིས། །ཐུབ་པ་མཆོག་གི་ལྟ་སྤྱོད་ལོག་པར་སྣང་། །སྐྱོན་ཡོན་མི་ཤེས་ཁྱིམ་བདག་འགའ་ཞིག་གིས། །ཐུབ་དབང་བསོད་ནམས་ཞིང་དུ་རྔོ་མ་ཐོགས། །ཞེས་གསུངས་པ་ལྟར་ཡིན་པའི་ཕྱིར་རོ།།

རྒྱུ་མཚན་དེ༷་ཉིད་ཀྱི་ཕྱིར༷་ན་བླ༷་མ༷་དེ་དོན་ལ་སངས་རྒྱས་བྱང་སེམས་ཀྱི་རྣམ་འཕྲུལ་ཅིག་མ་ཡིན་ཡང་རང་ངོས་ནས་སངས༷་རྒྱས༷་དངོས༷་མཐོང༷་གི༷་འདུན༷་པ༷འམ་སངས་རྒྱས་སུ་ལྟ་བའི་དད་པ་ཡོད༷་ན༷་འདི༷་ཉིད༷་གཅིག༷་པུས༷་ཀྱང་དོན་གྱི་རྟོགས་པ་རྒྱུད་ལ་སྐྱེས་ཏེ་འཁོར་བ་ལས་གྲོལ་ནུས་པའམ་ཆོག༷་པ་ཡིན་པས་ཐང༷་ལྷོད༷་མེད༷་པར༷་དཔེར་ན་སྐྱེ༷་བོ༷་རྩལ་དང་ལྡན་པས༷་གཞུ༷་འགེང༷་པ་བཞིན༷་དུ་དུས་རྟག༷་ཏུ༷་བླ༷་མ༷་མཆོག༷་དེ་སྙིང་དབུས་སུ་བསྒོམ་ལ༷་གསོལ༷་བ༷་དྲག་ཏུ་ཐོབ༷་ཅིག་ཅེས་གཞུང་མཛད་པ་པོས་གདམས་ཡུལ་ལ་ནན་ཏན་དུ་སྐུལ་མ་མཛད་པ་སྟེ། རྫོགས་པ་ཆེན་པོ་ཨ་ཏི་ལས། བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་གསུངས་པའི་དོན་ལྟར་རོ།།

དེས་ན་དང་པོ་བླ་མ་བརྟག་ལ་མཁས་པར་བྱས་ཏེ་བརྙེད་པའི་བླ་མ་དེ་ནི་བརྒྱད་སྟོང་པ་ལས་འཕགས་པ་རྟག་ཏུ་ངུས་སངས་རྒྱས་ཆོས་འཕགས་བསྟེན་ཚུལ་བཤད་པ་དང་། སྡོང་པོ་བཀོད་པ་ལས་རྒྱལ་སྲས་ནོར་བཟང་གི་རྣམ་ཐར་དང་། རྒྱ་གར་དུ་ནཱ་རོ་བས་ཏེ་ལོ་བ་བསྟེན་ཚུལ་དང་། གངས་ཅན་གྱི་ལྗོངས་འདིར་རྗེ་མི་ལ་རས་པས་མར་བ་ལོ་ཙཱ་བ་བསྟེན་པའི་ཚུལ་ལྟར། དཀའ་སྤྱད་དང་ལོག་སྒྲུབ་བཀའ་བཀྱོན་སོགས་བཟོད་སྲན་གྱི་སྒོ་ནས་ཁུར་ཐམས་ཅད་འཁུར་བས་མི་སྐྱོ་བ་ས་ལྟ་བུའི་སེམས་དང་། དབྱེན་གྱིས་མི་ཕྱེད་པ་རྡོ་རྗེ་ལྟ་བུའི་སེམས་དང་། སྡུག་བསྔལ་གྱིས་མི་བསྐྱོད་པ་ཁོར་ཡུག་ལྟ་བུའི་སེམས་དང་། ཅི་བགོ་བའི་ལས་ཐམས་ཅད་བྱེད་པ་བྲན་ལྟ་བུའི་སེམས་དང་། ངག་ཐམས་ཅད་མི་གཅག་པས་སློབ་མ་ལྟ་བུའི་སེམས་དང་། ང་རྒྱལ་རྣམ་པར་སྤངས་པ་ཕྱག་དར་བ་ལྟ་བུའི་སེམས་དང་། བྱའོ་ཅོག་ལ་མཐུན་པར་གཟུང་བ་གཡོག་ལྟ་བུའི་སེམས་དང་། དུས་དང་དུས་མ་ཡིན་པར་མཐོ་དམན་དུ་འགྱུར་བས་ཟླ་བ་ཉ་བ་ལྟ་བུའི་སེམས་དང་། ཁུར་ལྕི་བ་ཐེག་པ་གླང་པོ་ཆེ་ལྟ་བུའི་སེམས་དང་། བདག་པོ་ལ་མི་ཁྲོ་བ་ཁྱི་ལྟ་བུའི་སེམས་དང་། འགྲོ་འོང་གིས་མི་སྐྱོ་བ་གྲུ་ལྟ་བུའི་སེམས་དང་། ཉོན་མོངས་པས་མི་བསྐྱོད་པ་མ་ལྟ་བུའི་སེམས་དང་། མི་སྲུན་པ་སྤངས་པ་ཅང་ཤེས་ལྟ་བུའི་སེམས་དང་། རྐྱེན་གྱིས་མི་བསྒུལ་བ་རི་བོ་ལྟ་བུའི་སེམས་དང་། ཆེ་གྲགས་མེད་པ་གདོལ་བ་ལྟ་བུའི་སེམས་དང་། དྲེགས་པ་མེད་པ་ཁྱུ་མཆོག་རྭ་ཆད་པ་ལྟ་བུའི་སེམས་དང་། བླ་མའི་ངོར་གདུང་བས་བལྟ་བ་བུ་གཅེས་པའམ་མཛངས་པ་ལྟ་བུའི་སེམས་དང་། དགེ་བའི་བཤེས་གཉེན་གྱི་ངག་མཐར་ཕྱིན་པར་བྱེད་པ་ཟམ་པ་ལྟ་བུའི་སེམས་དང་། རློམ་སེམས་མེད་པ་འཕྱན་བུ་བྱེས་ན་འཁྱམས་པ་ལྟ་བུའི་སེམས་དང་། ཆོས་ཀྱི་རྒྱལ་པོའི་བཀའ་ལས་མི་འདའ་བ་རྒྱལ་བུ་གཞོན་ནུ་ལྟ་བུའི་སེམས་ཀྱིས་རྟག་ཏུ་བླ་མའི་བཀའ་ལ་བརྩི་ཞིང་གང་མཉེས་ཀྱི་ཞབས་ཏོག་ལེགས་པོ་བསྒྲུབ་པ་སངས་རྒྱས་ཕལ་པོ་ཆེའི་སྐབས་བཞི་པ་མདོ་སྡེ་ས་བཅུ་པའི་མདོ་སོགས་མདོ་རྒྱུད་དུ་མ་དང་། དཔའ་བོའི་བླ་མ་ལྔ་བཅུ་བ་དང་། ཀུན་མཁྱེན་ཆེན་པོའི་ཡིད་བཞིན་མཛོད་རྩ་འགྲེལ་སོགས་ལས་གསུངས་པ་ལྟ་བུའི་བྱ་མི་རུང་ཞིང་དགག་དགོས་ཀྱི་བསླབ་བྱ་མཐའ་དག་སྤོང་པ་དང་། སྒྲུབ་དགོས་ཀྱི་བསླབ་བྱ་ཅི་ཡོད་ལེགས་པར་དང་དུ་བླང་ནས་བསྒྲུབ་དགོས་པ་ཡིན་ནོ།།

སངས་རྒྱས་ཕལ་པོ་ཆེའི་མདོ་ལས། རིགས་ཀྱི་བུ་ཁྱོད་ཀྱིས་བདག་ལ་ནི་ནད་པར་འདུ་ཤེས་བསྐྱེད་དོ། །དགེ་བའི་བཤེས་གཉེན་ལ་ནི་སྨན་པའི་འདུ་ཤེས་དང་། གདམས་ངག་ལ་ནི་སྨན་གྱི་འདུ་ཤེས་དང་། ནན་ཏན་ཉམས་སུ་བླང་བ་ལ་ནི་ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་དྲོན་པོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་ལམ་མཚོན་པའི་འདུ་ཤེས་དང་། གདམས་ངག་ལ་ནི་ལམ་གྱི་འདུ་ཤེས་དང་། ནན་ཏན་ལ་ནི་ཕྱོགས་བདེ་བར་འགྲོ་བའི་འདུ་ཤེས་བསྐྱེད་པར་བྱའོ། །ཞེས་སོགས་གསུངས་པ་ལྟར། དགེ་བའི་བཤེས་གཉེན་ལ་སྨན་པའི་འདུ་ཤེས་དང་། ལམ་སྟོན་པའི་འདུ་ཤེས་དང་། དེ་བཞིན་མཉན་པ་དང་། ཀླུའི་དབང་པོ་དང་། ངལ་གསོ་པོ་དང་། བཟོའི་སློབ་དཔོན་དང་། དཔའ་བོ་དང་། སྐྱ་བ་འཛིན་པ་དང་། ཕ་མ་དང་། ཆོས་ཀྱི་རྒྱལ་པོ་དང་བློན་པོ་དམ་པའི་འདུ་ཤེས་བསྐྱེད་དགོས་པར་གསུངས་པ་ལྟར་བྱ་བ་གལ་ཆེའོ།།

དེ་ལྟར་དགོས་པའི་རྒྱུ་མཚན་ཡང་། མདོ་དེ་ཉིད་ལས། དེ་ཅིའི་ཕྱིར་ཞེ་ན། རིགས་ཀྱི་བུ་དེ་ལྟར་དགེ་བའི་བཤེས་གཉེན་ལ་ལྷག་པའི་བསམ་པ་ཡོངས་སུ་དག་པའི་བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་གྱི་ངག་ཐམས་ཅད་ཉམས་སུ་ལེན་པའི་ཚེ། གངས་ཀྱི་རི་ལ་རྟེན་པའི་རྩྭ་དང་གེལ་བ་དང་། སྨན་དང་ནགས་ཚལ་ལྟ་བུར་དགེ་བའི་རྩ་བ་ཐམས་ཅད་ཀྱིས་རྣམ་པར་འཕེལ་ལོ། །རྒྱ་མཚོ་ཆེན་པོ་ཆུའི་སྣོད་དུ་གྱུར་པ་ལྟར་ཆོས་ཐམས་ཅད་ཀྱི་སྣོད་དུ་འགྱུར་རོ། །གང་ཆེན་མཚོ་ཆེན་པོ་རིན་པོ་ཆེ་མང་པོའི་འབྱུང་གནས་སུ་གྱུར་པ་ལྟར་ཡོན་ཏན་ཐམས་ཅད་ཀྱི་འབྱུང་གནས་སུ་འགྱུར་རོ། །མྱེའི་དྲོད་ཀྱིས་གསེར་ཡོངས་སུ་འབྱང་བ་ལྟར་བྱང་ཆུབ་ཀྱི་སེམས་ཡོངས་སུ་བྱང་བར་འགྱུར་རོ། །རྒྱ་མཚོ་ཆེན་པོ་ལས་འཕགས་པའི་རི་རབ་ལྟར་འཇིག་རྟེན་ལས་མངོན་པར་འཕགས་པར་འགྱུར་རོ། །པད་མོ་ལ་ཆུས་མྱི་ཆགས་པ་ལྟར་འཇིག་རྟེན་གྱི་ཆོས་ཀྱིས་མྱི་གོས་པར་འགྱུར་རོ། །རྒྱ་མཚོ་ཆེན་པོ་རོ་རུལ་པ་དང་མི་འགྲོགས་པ་ལྟར། སྤྱོད་པ་ངན་པ་ཐམས་ཅད་དང་མི་འགྲོགས་སོ། །ཡུད་དུ་ཡར་གྱི་ཟླ་བ་ལྟར་ཆོས་དཀར་པོས་རྣམ་པར་འཕེལ་བར་འགྱུར་རོ། །འཛམ་བུའི་གླིང་སྣང་བར་བྱེད་པའི་ཉི་མ་ལྟར་ཆོས་ཀྱི་དབྱིངས་སུ་སྣང་བར་འགྱུར་རོ། །ཞེས་སོགས་ནས། སངས་རྒྱས་ཀྱི་ཆོས་ཐམས་ཅད་རབ་ཏུ་ཐོབ་ཅིང་ཡོངས་སུ་གྲུབ་པ་རྣམས་ནི་དགེ་བའི་བཤེས་གཉེན་ལ་རག་ལས་པ་དག་གོ །དགེ་བའི་བཤེས་གཉེན་རྩ་བར་གྱུར་པ་དག་གོ །དགེ་བའི་བཤེས་གཉེན་ལས་བྱུང་བ་དག་གོ །དགེ་བའི་བཤེས་གཉེན་སྐྱེ་གནས་སུ་གྱུར་པ་དག་གོ །དགེ་བའི་བཤེས་གཉེན་སྐྱེ་མཆེད་དུ་གྱུར་པ་དག་གོ །དགེ་བའི་བཤེས་གཉེན་ལས་ཡོངས་སུ་སྐྱེས་པ་དག་གོ །དགེ་བའི་བཤེས་གཉེན་གྱིས་ཡོངས་སུ་སྤེལ་བ་དག་གོ །དགེ་བའི་བཤེས་གཉེན་ལ་རབ་ཏུ་རྟེན་པ་དག་གོ །དགེ་བའི་བཤེས་གཉེན་རྒྱུར་གྱུར་པའོ། །དགེ་བའི་བཤེས་གཉེན་ལས་རབ་ཏུ་སྐྱེས་པ་དག་གོ །ཞེས་གསུངས་པ་ལྟར་གྱིས་ཕྱིར་རོ།།

དེ་ལྟར་བླ་མ་ཚུལ་བཞིན་དུ་བསྟེན་ཏེ་ཞབས་ཏོག་སྒྲུབ་ཅིང་བཀའ་ལ་ཉན་པའི་ཕན་ཡོན་ཡང་མཐའ་ཡས་པ་ཐོབ་པ་ཡིན་ཏེ། སའི་སྙིང་པོ་འཁོར་ལོ་བཅུ་བའི་མདོ་ལས། བླ་མ་ལ་བསྙེན་བཀུར་བྱེད་པ་ནི་ཡོན་ཏན་གྱི་ཆོས་བསམ་གྱིས་མི་ཁྱབ་པ་དང་ལྡན་པོའོ། །དེས་ཡོངས་སུ་ཟིན་པས་གཏེར་བཅུ་ཡོངས་སུ་རྙེད་པར་འགྱུར་ཏེ། སངས་རྒྱས་ཀྱི་ཆོས་ཐམས་ཅད་དྲང་པོར་སྦྱོང་བ་དང་། དེ་དེ་དག་ལ་ངེས་པར་སེམས་པ་དང་། གཟུངས་ཀྱི་སྣང་བ་དང་། སོ་སོ་ཡང་དག་པར་རིག་པ་བཞི་སྟོན་པ་དང་། བརྗོད་དུ་མེད་པ་ལ་མཁས་པར་རྟོགས་པ་དང་། སངས་རྒྱས་ཀྱི་རྣམ་པར་འཕྲུལ་པ་ཐམས་ཅད་མཐོང་བ་དང་། ཆོས་ཐམས་ཅད་མཉམ་པ་ཉིད་སྒྲུབ་པ་ལ་མཁས་པ་དང་། སངས་རྒྱས་ཐམས་ཅད་མཐོང་བ་དང་མི་འབྲལ་བ་དང་། སྒྱུ་མར་གྱུར་པའི་བསྐལ་བ་བསམ་གྱིས་མི་ཁྱབ་པར་གཞན་དོན་སྒྲུབ་པ་ལ་མཁས་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དགའ་བ་དང་པོའི་གཏེར་རོ། །ཞེས་དང་། རྒྱུད་དགོངས་པ་འདུས་པ་ལས། ཆོས་ཀུན་མི་ཤེས་མ་རྟོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་ནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །ཞེས་དང་། རྡོ་རྗེ་བེ་ཅོན་གྱི་རྒྱུད་ལས། བློ་དང་ལྡན་པ་སུ་ཞིག་གིས། །བླ་མའི་མདུན་དུ་ཚོགས་གཏོར་ལ། །གཏན་དུ་ཆོ་ག་རྫོགས་བྱས་ན། །ལོངས་སྤྱོད་ལྡན་དང་ཚོགས་རྫོགས་དང་། །རང་གཞན་བར་ཆད་ཀུན་སེལ་ཞིང་། །འཕོས་ནས་གསང་བདག་འཁོར་དུ་སྐྱེས། །ཞེས་གསུངས་པ་སོགས་ཀྱི་ཕྱིར་རོ།།

གཞན་ཡང་བླ་མ་ལ་དད་གུས་མེད་ཅིང་བཀུར་བསྟི་མ་བྱས་པར་བཀའ་དང་འགལ་ཞིང་ཐུགས་དཀྲུགས་པའི་ཉེས་པ་ཡང་ཚབ་ཆེ་བ་ཡིན་ཏེ། དགོངས་འདུས་ལས། བླ་མ་མཆོག་ཏུ་བཀུར་བྱ་སྟེ། །དམ་པར་གྱུར་པ་མ་ཡིན་ཡང་། །དམ་པ་མཆོག་བཞིན་ཕུ་དུད་བྱ། །གལ་ཏེ་བརྙས་ཤིང་ཁྱད་བསད་ན། །ཐུར་དུ་བལྟས་ནས་དམྱལ་བར་འཚོད། །ཅེས་དང་། དུ་མ་འདུས་པའི་རྒྱུད་ལས། སློབ་དཔོན་སྐྱོན་ལ་གང་སེམས་པ། །དགེ་བསགས་དོན་མེད་ལྷ་སྤངས་པས། །ལྷ་ཀླུ་གདུག་པ་ལ་སོགས་ཀྱིས། །མྱུར་དུ་སྲོག་གཅོད་དམྱལ་བར་ལྟུང་། །ཞེས་གསུངས་པའི་ཕྱིར་རོ།།བཞི་བ་མཇུག་བསྡུ་བ་ནི། བྱིན་རླབས་འཇུག་པའི་ཚུལ་བསྟན་པའི་ཚོམ་དང་པོའོ། །ཞེས་པ་དེ་ཡིན་ཞིང་ནང་དོན་གོ་སླའོ། །ཚོམས་དང་པོ་འགྲེལ་ཟིན་ཏོ།། །།

མདོ་སྔགས་ཐུན་མོང་གི་སྔོན་འགྲོ་བློ་སྦྱོང་གི་སྐོར་སོགས་བསྟན་པ།

གཉིས་པ་མདོ་སྔགས་ཐུན་མོང་གི་སྔོན་འགྲོ་བློ་སྦྱོང་གི་སྐོར་སོགས་བསྟན་པ་ལ་ནི། སླར་ཡང་བླ་མར་འདུད་དེ་མཚམས་སྦྱར་པ་དང་། བློ་སྦྱོང་དངོས་དང་། ཚོམ་གྱི་མཇུག་བསྡུ་དང་གསུམ་ལས། དང་པོ་ནི། ཀུན་མཁྱེན་སངས་རྒྱས་བླ་མར་ཡང་ཡང་འདུད། །ཅེས་པ་སྟེ། ཇི་ལྟ་བ་དོན་དམ་པ་སྟོང་པ་ཉིད་དང་ཇི་སྙེད་པ་ཀུན་རྫོབ་ཤེས་བྱའི་ཆོས་ཀུན༷་མ་འདྲེས་པར་ཅིག་ཆར་མངོན་སུམ་དུ་མཁྱེན༷་པའི་མཁྱེན་པ་མངའ་བའི་རྫོགས་པའི་སངས༷་རྒྱས༷་ཀུན་གྱི་ཞལ་སྐྱིན་དང་ངོ་བོར་གྱུར་པའི་དཔལ་ལྡན་བླ༷་མ༷་དམ་པར༷་གོང་དུ་མཆོད་པར་བརྗོད་པའི་སྐབས་སུ་བསྟོད་ཕྱག་མཛད་མོད་བྱིན་རླབས་འཇུག་པ་དང་བླ་མའི་བཀའ་དྲིན་མི་བརྗེད་པའི་ཕྱིར་དུས་རྟག་ཏུ་ཡང༷་ཡང༷་ཕྱག་བྱ་ཞིང་། འདིར་ཡང་འོག་གི་དོན་རྣམས་བཤད་པ་ལ་འཇུག་པའི་མཚམས་སྦྱོར་དུ་བསྟོད་ཕྱག་བྱ་ཞིང་འདུད༷་པར་བྱའོ་ཞེས་པའོ།།

གཉིས་པ་ལ། དལ་འབྱོར་རྙེད་པར་དཀའ་བ་དང་། འཁོར་བའི་ཉེས་དམིགས་དང་། ལས་རྒྱུ་འབྲས་དང་། འཆི་བ་མི་རྟག་པ་དང་། ངེས་འབྱུང་གི་བློར་སྦྱང་སྟེ་དབེན་པ་བསྟེན་ཚུལ་བཤད་པ་དང་ལྔ་ལས།དང་པོ་ནི། དལ་བརྒྱད་འབྱོར་བཅུ་ཚང་བའི་རིན་ཆེན་ལུས། །འདི་འདྲ་སྲིད་པ་གསུམ་ན་དཀོན་པའི་ནོར། །རྙེད་པ་དོན་དང་ལྡན་པ་མ་བྱས་ན། །མདོ་མེད་སྙིང་དང་བྲལ་བ་དེ་ལས་སུ། །ཞེས་པའི་ཤོ་ལོ་ཀ་གཅིག་གིས་བསྟན། དེའི་དོན་ནི་དལ༷་བ་བརྒྱད༷་དང་འབྱོར༷་བ་བཅུ༷་ཚང༷་བའི༷་རིན༷་ཐང་ཆེན༷་པོའི་མི་ལུས༷་འདི༷་འདྲ༷་བ་ནི་རྒྱུ་དང་དཔེ་དང་གྲངས་ཀ་གང་ལ་བསམ་ཡང་ཤིན་ཏུ་རྙེད་པར་དཀའ་བ་འདོད་ཁམས་དང་གཟུགས་དང་གཟུགས་མེད་པའི་སྲིད༷་པ༷་གསུམ༷་པོ་ན༷་ཤིན་ཏུ་དཀོན༷་པའི༷་ཡིད་བཞིན་གྱི་ནོར༷་བུ་རིན་པོ་ཆེ་ཞིག་ཡིན་ལ། ད་རེས་ཀྱི་ཚེ་འདིར་དེ་འདྲའི་ལུས་རྟེན་དེ་བརྙེད༷་པ༷་ལ་ཆོས་ཉམས་སུ་བླངས་ཏེ་ཕྱི་མ་ངན་སོང་དང་འཁོར་བའི་སྡུག་བསྔལ་མྱོང་མི་དགོས་པར་བྱས་ནས་ལུས་མཆོག་ལོན་པ་ལ་དོན༷་དང༷་ལྡན༷་པ༷་ཞིག་བྱེད་དགོས་ཀྱི། དེ་ལྟར་མ༷་བྱས༷་ན༷་ནི་མདོ༷་དོན་མེད༷་མེད་པ་སྟེ་དལ་འབྱོར་གྱི་མི་ལུས་ཐོབ་པ་རྩ་བའི་དགོས་དོན་མེད་ཅིང་ཁོག་པའི་ནང་གི་སྙིང༷་དང༷་བྲལ༷་བ༷་ལྟ་བུའམ་དོན་མེད་སྙིང་པོ་དང་བྲལ་བ་ཞིག་ལ་དེ༷་ལས༷་ཐུ་བ་ཞིག་སུ༷་ཡོད་དེ་མེད་དོ་ཞེས་པ་སྟེ། དལ་འབྱོར་སྟོང་ལོག་མི་བྱེད་པར་སྙིང་པོ་ལེན་དགོས་པ་གདམས་པ་ཡིན་ནོ།།

དེ་ཡང་དལ་བ་བརྒྱད་ནི། མདོ་དྲན་པ་ཉེར་བཞག་ལས། དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་བ། །ལྐུག་པ་འདི་དག་མི་ཁོམ་བརྒྱད། །ཅེས་གསུངས་པ་ལྟར་དམྱལ་བ་དང་། ཡི་དྭགས་དང་། དུད་འགྲོ་དང་། ཀླ་ཀློ་དང་། ལྷ་ཚེ་རིང་བོ་དང་། ལོག་ལྟ་ཅན་དང་། སངས་རྒྱས་མ་བྱོན་པའི་མུན་པའི་བསྐལ་བ་དང་། ལྐུག་པའི་གང་ཟག་དང་བརྒྱད་ནི་མི་ཁོམ་པའི་གནས་བརྒྱད་ཅེས་གྲགས་ཤིང་མི་དལ་བ་བརྒྱད་ཡིན་ལ། དེ་བརྒྱད་དུ་མ་སྐྱེས་པའི་མི་ལུས་དེ་ནི་མི་དལ་བརྒྱད་ལས་དལ་བས་ན་དལ་བ་བརྒྱད་ཚང་བའི་ལུས་ཞེས་བྱ་བ་ཡིན་ནོ།།

འབྱོར་བ་བཅུ་ནི། མགོན་པོ་ཀླུ་སྒྲུབ་ཀྱིས། །མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་ནི་བརྩེ་བའོ། །ཞེས་གསུངས་པ་ལྟར་མི་ལུས་ཉིད་དུ་སྐྱེས་པ་དང་། དེ་ཡང་ཆོས་དར་བའི་ཡུལ་དབུས་སུ་སྐྱེས་པ་དང་། མིག་རྣ་བ་སྣ་ལྕེ་སོགས་དབང་པོ་ཀུན་ལེགས་པར་ཚང་བ་དང་། སངས་རྒྱས་ཀྱི་ཆོས་ལས་ལས་མཐའ་མ་ལོག་པ་དང་། དད་པའི་གནས་སངས་རྒྱས་ཀྱི་ཆོས་ལ་དད་པ་དང་ལྔ་པོ་མི་ལུས་རིན་པོ་ཆེ་རྙེད་པའི་གང་ཟག་རང་ངོས་ནས་ཚང་དགོས་པས་ན་རང་འབྱོར་ལྔ་ཞེས་བརྗོད་དོ།།

སངས་རྒྱས་འཇིག་རྟེན་དུ་བྱོན་པ་དང་། དེས་ཆོས་ཀྱི་འཁོར་ལོ་ལེགས་པར་བསྐོར་བ་དང་། སངས་རྒྱས་ཀྱི་བསྟན་པ་མ་ནུབ་པར་གནས་པ་དང་། སངས་རྒྱས་ཀྱི་བསྟན་པའི་རྗེས་སུ་ཞུགས་པའི་གྲོགས་ཡོད་པ་དང་། རང་རྗེས་སུ་འཛིན་པའི་སྙིང་བརྩེ་བ་དང་ལྡན་པའི་དགེ་བའི་བཤེས་གཉེན་ཀྱིས་རྗེས་སུ་བཟུང་བ་དང་ལྔ་པོ་ནི་གཞན་ངོས་ནས་ཚང་དགོས་པས་གཞན་འབྱོར་ལྔ་ཞེས་བརྗོད་ཅིང་། རང་འབྱོར་གཞན་འབྱོར་གཉིས་སྡོམ་པའི་བཅུ་པོ་དེ་འབྱོར་བ་བཅུ་ཞེས་བྱ་ཞིང་དེ་འདྲའི་དལ་འབྱོར་བཅོ་བརྒྱད་ཇི་བཞིན་ཚང་བའི་མི་ལུས་དེ་ནི་རྒྱུ་དཔེ་གྲངས་གསུམ་གྱི་སྒོ་ནས་རྙེད་དཀའ་བ་ཡིན་པས་དེའི་ཚུལ་ལ་བསམ་ནས་ད་ལན་དེ་འདྲའི་མི་ལུས་ཤིག་ལོན་པ་ལ་དགའ་སྤྲོ་ཆེན་པོས་ཆོས་བསྒྲུབ་སྟེ་སྙིང་པོ་ཞིག་ཨེ་ལོན་ལ་འབད་པ་ནི་ཤིན་ཏུ་གལ་ཆེ་བར་གསུངས་ཏེ། སྤྱོད་འཇུག་ལས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་གྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་ནི་ཡང་དག་འབྱོར་བ་ག་ལ་འགྱུར། །ཞེས་དང་། ཀུན་མཁྱེན་ཆེན་པོའི་ཡིད་བཞིན་མཛོད་ལས། དལ་འབྱོར་དཔེས་མཚོན་རྙེད་པར་དཀའ་བ་ཡང་། །མཚོ་དབུས་གཡེངས་པའི་གཉའ་ཤིང་བུ་ག་རུ། །རུས་སྦལ་མགྲིན་ཆུད་སྲིད་ཀྱི་ངན་སོང་ལས། །མིར་གྱུར་རྙེད་དཀའ་དེ་བཞིན་རྩིག་ངོས་ཀྱི། །ཞལ་ཞལ་ལོགས་ལ་སྲན་མ་ཆགས་སྲིད་ཀྱི། །མིར་གྱུར་ན་ཡང་ཡུལ་དབུས་སྐྱེ་བ་དཀོན། །ཨུ་དུམྦཱ་ར་འཇིག་རྟེན་འབྱུང་དཀའ་བ། །དེ་བས་ཆོས་ཞུགས་ཡང་དག་ལམ་འཕྲད་དཀོན། །ཁབ་མིག་རས་ཡུག་ཆུད་པ་དཀའ་བས་ཀྱང་། །ལམ་རྙེད་དེ་དག་ཚུལ་བཞིན་སྒྲུབ་པ་དཀོན། །མཚོ་གླིང་དག་ནས་ནོར་བུ་རྙེད་པས་ཀྱང་། །ཡང་དག་བླ་མ་རྙེད་པར་དཀའ་བས་ན། །དེ་དག་བསམ་ལ་བརྩོན་པས་སྒྲུབ་འཚལ་ལོ། །ཞེས་གསུངས་པའི་ཕྱིར་རོ།།

གཞན་ཡང་མི་ལུས་ཐོབ་ཅིང་ཆོས་དར་བའི་ཡུལ་དུ་སྐྱེས་ཀྱང་རང་རྒྱུད་ལ་ཉོན་མོངས་དུག་ལྔ་ཤིན་ཏུ་རགས་པས་ནོན་ཅིང་སེམས་རྒྱུད་འཁྲུག་པ་དང་། བློ་བླུན་པས་རང་ཤེས་མེད་པར་སྡིག་གྲོགས་ཀྱིས་བསླུས་ཏེ་ཆོས་སྒྲུབ་པའི་སྐལ་བ་མེད་པ་དང་། ལྟ་སྒོམ་སྤྱོད་གསུམ་ཕྱིན་ཅི་ལོག་པར་གོལ་ཏེ་ལམ་ནོར་བའི་བདུད་ལས་ཀྱིས་ཟིན་པ་དང་། ཆོས་ལ་སྦྱོང་བར་འདོད་ཀྱང་ལེ་ལོའི་གཞན་དབང་དུ་གྱུར་པ་དང་། ཆོས་ལ་བརྩོན་ན་ཡང་སྡིག་སྒྲིབ་ཀྱི་དབང་གིས་ཡོན་ཏན་མི་སྐྱེ་བའི་ལས་ངན་པའི་མཚོ་ཆེན་པོ་བརྡོལ་བ་ཅན་དང་། ཆོས་སྒྲུབ་པའི་རང་དབང་མེད་པར་གཞན་གྱི་བྲན་གཡོག་ཏུ་གྱུར་པ་དང་། ཚེ་འདིའི་ལྟོ་གོས་དང་ནད་དང་རྒྱལ་པོའི་ཆད་པ་སོགས་འཚེ་བ་ལ་འཇིགས་ནས་ཆོས་སྒྲུབ་ཀྱང་ལས་དབང་གིས་ཆོས་མིན་ཕྱིན་ཅི་ལོག་པའི་ལམ་དུ་ཞུགས་པ་དང་། ལྟར་སྣང་ལ་ཆོས་སུ་བཅོས་ནས་ཚེ་འདིའི་བསྙེན་བཀུར་དང་སྙན་གྲགས་རྙེད་པ་ལ་སོགས་པར་གཡེང་བའི་ཆོས་ཀྱི་གཟུགས་བརྙན་པ་སྟེ་བརྒྱད་པོ་ལ་འཕྲལ་བྱུང་རྐྱེན་གྱིས་མི་ཁོམ་རྣམ་པ་བརྒྱད་ཅེས་བྱ་ཞིང་ཆོས་མཚན་ཉིད་པ་སྒྲུབ་པའི་དལ་འབྱོར་གྱི་ལུས་མ་ཡིན་ཞིང་ཐར་བ་ཡང་དག་པ་ལ་ལས་འབྲེལ་མེད་པར་དལ་བ་ཆུད་ཟོན་དུ་གཏོང་བའི་ཕྱིན་ཅི་ལོག་པ་ཞེས་བྱ་བ་ཡིན་ཏེ། ཀུན་མཁྱེན་ཆེན་པོས། དུག་ལྔ་འཁྲུག་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་རྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱིས་མི་ཁོམ་རྣམ་པ་བརྒྱད། །ཐར་ལམ་ཆོས་ཀྱི་སྣོད་མིན་ཕྱིན་ཅི་ལོག །ཅེས་གསུངས་པའི་ཕྱིར་རོ།།

དེ་བཞིན་དུ་ཚེ་འདིའི་རྒྱུ་ནོར་ལོངས་སྤྱོད་གཉེན་དང་མཛའ་བཤེས་ལ་སོགས་པའི་ཆེད་དུ་གཡེང་ནས་དེ་དག་གི་འཆིང་བ་དམ་པོ་དང་ལྡན་པ་དང་། མི་གཤིས་ངན་པས་ངང་རྒྱུད་ལ་བཅོས་སུ་མེད་པས་ཆོས་ཀྱི་ཀུན་སྤྱོད་ཡར་ཐོན་མེད་པའི་བྱ་སྤྱོད་ངན་པ་ཅན་དང་། འཁོར་བའི་སྡུག་བསྔལ་ལ་མི་སྐྲག་པ་དང་། མཆོག་གསུམ་གྱི་ཡོན་ཏན་དང་ཐར་བའི་ཕན་ཡོན་དང་ཡུལ་དམ་པ་སོགས་ལ་དད་པ་ཅུང་ཟད་མེད་པ་དང་། མི་དགེ་བའི་སྡིག་སྤྱོད་ཁོ་ནས་དུས་འདའ་བ་ཅན་དང་། དམ་པའི་ཆོས་དང་དགེ་བ་ལ་ཁྱི་མདུན་དུ་རྩྭ་བཞག་པ་ལྟར་མོས་པ་མེད་པར་ཆོས་སྒྲུབ་འདོད་ཀྱི་བསམ་པ་མེད་པ་ཅན་དང་། ཐེག་པ་ཆེན་པོའི་སྡོམ་པ་སོགས་ཉམས་པས་ངན་སོང་ལས་འགྲོ་ས་མེད་པ་ཅན་དང་། གསང་སྔགས་ཀྱི་དམ་ཚིག་ཉམས་ཏེ་བདེ་འགྲོ་དང་ཐར་བའི་སྲོག་རྩ་འགགས་པ་རྣམས་ནི་རིས་ཆད་བློ་ཡི་མི་ཁོམ་རྣམ་པ་བརྒྱད་ཅེས་བྱ་ཞིང་དམ་པའི་ཆོས་ལས་རྒྱང་རིང་དུ་གྱུར་ཅིང་ཐར་ལམ་གྱི་སྣང་བ་ནུབ་པའི་མི་ཁོམ་པ་དལ་རྟེན་དང་ཁ་བྲལ་བ་ཅན་ཡིན་ཏེ། ཡང་ཀུན་མཁྱེན་ཆེན་པོས། འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བས་མི་སྐྲག་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་མེད། །སྡོམ་དང་དམ་ཚིག་ཉམས་པ་ཞེས་བྱ་བ། །རིས་ཆད་བློ་ཡི་མི་ཁོམ་རྣམ་པ་བརྒྱད། །ཆོས་ལས་རིང་གྱུར་ཐར་ལམ་སྒྲོན་མེ་ནུབ། །ཅེས་གསུངས་པའི་ཕྱིར་རོ།།

དེ་ལྟར་ཚུལ་དེ་དག་ལ་བསམ་ན་དལ་འབྱོར་གྱི་མི་ལུས་ཟེར་བ་ཐོབ་པ་ཤིན་ཏུ་དཀའ་བས་ད་ལན་ལན་གཅིག་བརྙེད་པ་ལ་ཆུན་ཟོན་དུ་མི་གཏོང་བར་ཆོས་ཁོ་ན་སྒྲུབ་སྟེ་སྙིང་པོ་ཞིག་ལོན་དགོས་པར་གདམས་པ་ཡིན་ནོ།།

གཉིས་པ་འཁོར་བའི་ཉེས་དམིགས།

གཉིས་པ་འཁོར་བའི་ཉེས་དམིགས་ནི། འགྲོ་བ་དྲུག་ན་ལས་ཀྱིས་འཁོར་བའི་ཚོགས། །སྡུག་བསྔལ་གསུམ་གྱིས་དམ་ལ་བཞག་ནས་མནར། །དེ་ལྟའི་ཚུལ་འདི་ཡིད་ལ་གོམས་བྱས་ནས། །སྐྱོ་ནས་ངེས་འབྱུང་དྲག་པོས་ཡང་ཡང་སྐུལ། །ཞེས་པའི་ཚིགས་སུ་བཅད་པ་གཅིག་པོས་བསྟན། དལ་འབྱོར་གྱི་ལུས་ལ་ཆོས་སྒྲུབ་པའི་སྙིང་པོ་མ་ལོན་ཀྱང་འགྲོ་བའི་གནས་རིས་གཞན་དུ་སྐྱེས་ཀྱང་མི་ཆོག་པ་མེད་སྙམ་ན། དེ་ནི་མ་ཡིན་ཏེ། ལྷ་ལྷ་མིན་མི་དང་དུད་འགྲོ་དམྱལ་བ་ཡི་དྭགས་ཏེ་འགྲོ༷་བ༷འི་གནས་རིས་དྲུག༷་པོ་གང་ན༷་སྐྱེས་ཀྱང་རང་དབང་གིས་སྐྱེས་པ་ནི་མིན་པར་ལས༷་ཀྱི༷་དབང་གིས༷་བུམ་པར་ཆུད་པའི་བུང་བ་ཇི་བཞིན་འཁོར༷་ནས་ལུས་བླངས་པ་ཡིན་པས་དེ་འདྲའི་ལས་ཀྱིས་འཁོར་བ༷འི་རིགས་དྲུག་གི་ཚོགས༷་ནི་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་༷བསྔལ་༷གསུམ༷་གྱི༷་དམ༷་ཚིག་གི་རྒྱ་ལ༷་བཞག༷་ནས༷་རྟག་ཏུ་མནར༷་བཞིན་ཡོད་པ་ཡིན་ཞིང་། དེ༷་ལྟ༷་བུའི་ཚུལ༷་འདི༷་ཉིད་ལེགས་པར་ཤེས་པར་བྱས་ཏེ་ཡང་ཡང་འཁོར་བའི་སྡུག་བསྔལ་ཡིད༷་ལ༷་གོམས༷་པར་བྱས༷་ནས༷་བློ་སྦྱང་ན་ནམ་ཞིག་ན་སྲིད་རྩེ་ནས་མནར་མེད་དམྱལ་ཁམས་ཡན་གྱི་འཁོར་བའི་སྡུག་བསྔལ་ལ་སྐྱོ༷་ནས༷་དེ་ལས་ཐར་བར་འདོད་པའམ་ངེས༷་པར་འབྱུང༷་བར་འདོད་པའི་བློ་ཤུགས་དྲག༷་པོ༷་ཞིག་སྐྱེ་བ་ལ་ཐེ་ཚོམ་མེད་པ་ཡིན་པས་ཡང༷་ཡང༷་རང་བློ་དེ་ཕྱོགས་སུ་བསྐུལ༷་བར་མཛོད་ཅིག་ཅེས་པ་སྟེ་འཁོར་བའི་ཉེས་དམིགས་སྒོམ་པ་ལ་བསྐུལ་བའི་ཞལ་གདམས་སོ།།

དེ་ལྟར་དམྱལ་བ་ལ་ཚ་གྲང་གི་སྡུག་བསྔལ་དང་། ཡི་དྭགས་ལ་བཀྲེས་སྐོམ་དང་། དུད་འགྲོ་ལ་བླུན་རྨོངས་བཀོལ་སྤྱོད་དང་། མི་ལ་སྐྱེ་རྒ་ན་འཆི་དང་། ལྷ་མིན་ལ་འཐབ་རྩོད་དང་། ལྷ་ལ་འཆི་འཕོ་ལྟུང་བའི་སྡུག་བསྔལ་ཞེས་སོ་སོར་གསུངས་མོད་དོན་ལ་སྡུག་བསྔལ་ཆེ་ཆུང་ཙམ་ལས་འགྲོ་བ་དྲུག་པོ་ཀུན་ལ་སྡུག་བསྔལ་དེ་དག་མཐུན་པར་ཡོད་པ་མ་ཟད་ཀུན་མཁྱེན་ཆེན་པོའི་མན་ངག་མཛོད་ལས། འཁོར་བའི་གནས་ལ་འཇིགས་པའི་ཆོས་དྲུག་ནི། །མི་རྣམས་སྡུག་བསྔལ་བསམ་ན་ཡིད་རེ་སྐྱོ། །ལྷ་མིན་སྡུག་བསྔལ་བསམ་ན་སྐྱི་རེ་གཡའ། །ལྷ་ཡི་སྡུག་བསྔལ་བསམ་ན་གཡང་རེ་ཟ། །བྱོལ་སོང་སྡུག་བསྔལ་བསམ་ན་ངུ་རེ་བྲོ། །ཡི་དྭགས་སྡུག་བསྔལ་བསམ་ན་སྐྱི་རེ་བུང་། །དམྱལ་བའི་སྡུག་བསྔལ་བསམ་ན་སྙིང་རེ་འདར། །དེ་བས་འགྲོ་དྲུག་གནས་ནས་འབྲོས་རེ་རན། །ཞེས་གསུངས་པ་ལྟར་སྡུག་བསྔལ་གྱི་རྣམ་གྲངས་གཞན་ཡང་ཤིན་ཏུ་མང་བའི་ཚུལ་གཞུང་དུ་མར་གསུངས་པ་ཡིད་ཡུལ་དུ་ངེས་པར་བྱས་ནས་ཡང་ཡང་འཁོར་བ་མཐའ་དག་སྡུག་བསྔལ་གྱི་རང་བཞིན་ཅན་དུ་བསྒོམ་པ་གལ་ཆེའོ།།

གསུམ་པ་ལས་རྒྱུ་འབྲས།

གསུམ་པ་ལས་རྒྱུ་འབྲས་ནི། བཟང་ངན་ལས་ཀྱི་འབྲས་བུ་བསླུ་མེད་པ། །འདྲེན་མཆོག་རྒྱལ་བས་ཇི་བཞིན་གསུངས་པ་ལྟར། །དགེ་སྒྲུབ་སྡིག་སྤང་ཕྲ་ཞིང་ཕྲ་བ་ནས། །བླང་དོར་ཚུལ་བཞིན་བྱེད་པའི་དྲན་ཤེས་བསྐྱེད། །ཅེས་པའི་ཤོ་ལོ་ཀ་གཅིག་གིས་བསྟན། འཁོར་བའི་སྡུག་བསྔལ་དེ་རྒྱུ་མེད་དུ་བྱུང་བ་མིན་པར་ལས་ཀྱི་རྒྱུ་ལས་བྱུང་བ་ཡིན་པས་ལས་བཟ༷ང་པོ་དགེ་བའི་ལས་ཀྱི་འབྲས་བུ་ཡིད་དུ་འོང་བ་བདེ་བ་དང་། ངན༷་པ་མི་དགེ་བའི་ལས༷་ཀྱི༷་འབྲས༷་བུ༷་ཡིད་དུ་མི་འོང་བ་སྡུག་བསྔལ་ནི་ཆུད་ཟ་བ་མེད་པར་བསླུ༷་བ༷་མེད༷་པར་སྨིན་པ༷ར་འགྲོ་བ་རྣམས་རྣམ་པར་གྲོལ་བའི་ལམ་ལ་འདྲེན༷་པར་བྱེད་པའི་སྐྱབས་མཆོག༷་ཏུ་གྱུར་པ་ལྷའི་བུ་ཕུང་པོ་ཉོན་མོངས་འཆི་བདག་སྟེ་བདུད་བཞིའི་གཡུལ་ལས་རྣམ་པར་རྒྱལ༷་བ༷འི་རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས༷་ཚུལ་ཇི༷་བཞིན༷་གསུངས༷་པ༷་ལྟར༷་ཤེས་པར་བྱས་ཏེ་དགེ༷་བའི་ལས་མཐའ་དག་ཕྲ་ཞིང་ཕྲ་བ་ནས་སྒྲུབ༷་པ་དང་། མི་དགེ་བ་སྡིག༷་པའི་ལས་ཐམས་ཅད་སྤང་སྟེ་ཕྲ༷་ཞིང༷་ཕྲ༷་བ༷་ནས༷་ལས་ཀྱི་བླང༷་དོར༷་མ་ནོར་བར་ཚུལ༷་བཞིན༷་དུ་བྱེད༷་པ་དང་། རྟག་ཏུ་སྒོ་གསུམ་ལ་དྲན༷་དང་ཤེས༷་བཞིན་ཀྱིས་བྱ་ར་ལེགས་པར་བྱས་ནས་མི་དགེ་བའི་རྟོག་པ་དང་མི་དགེ་བའི་ལས་ལས་སེམས་སྲུང་ཞིང་དེ་ལས་ལྡོག་པ་དང་། དགེ་བའི་བློ་དང་དགེ་བའི་ལས་ལ་འཇུག་ཅི་ཐུབ་ཀྱིས་དགེ་སྡིག་གི་གནས་ལ་འཇུག་ལྡོག་མ་འཛོལ་བར་བསྐྱེད༷་པ་གལ་ཆེ་བ་ཡིན་ཏེ། མདོ་ཏིང་འཛིན་རྒྱལ་པོ་ལས། ལས་བསགས་པ་ན་ནམ་ཡང་མེད་མི་འགྱུར། །འཁོར་བ་ན་ཡང་དཀར་ནག་འབྲས་བུ་སྨིན། །ཞེས་གསུངས་པའི་ཕྱིར་རོ།།

ཡིད་བཞིན་མཛོད་ལས། རྒྱུ་འབྲས་ལས་ཏེ་དགེ་སྡིག་བླང་དོར་བྱ། །དགེ་བའི་ལས་ནི་བསོད་ནམས་ཆ་མཐུན་དང་། །ཐར་པ་ཆ་མཐུན་རྣམ་པ་གཉིས་དག་ལས། །ཞེས་གསུངས་པ་ལྟར་ལས་ཞེས་པ་ལ་ནི་ཉོན་མོངས་པས་ཀུན་ནས་བསླངས་ཏེ་སྲོག་བཅོད་པ་ལྟ་བུ་མི་དགེ་བའི་ལས་དང་། ཟག་བཅས་ཀྱི་དགེ་བློ་རྣམས་ཀྱིས་ཀུན་ནས་བསླངས་ཏེ་སྲོག་སྐྱོབ་པ་ལྟ་བུ་དགེ་བ་བསོད་ནམས་ཆ་མཐུན་གྱི་ལས་དང་། མཐོང་ལམ་གྱི་ངོ་བོར་གྱུར་པའི་སྙིང་རྗེས་བསླངས་པའི་གཞན་མགུ་བ་བསྐྱེད་པ་ལྟ་བུ་མྱང་འདས་ཀྱི་རྒྱུར་གྱུར་པའི་ཟག་མེད་ཀྱི་དགེ་བ་རྣམས་ནི་ཐར་བ་ཆ་མཐུན་གྱི་དགེ་བའི་ལས་ཡིན་ཞིང་། ལས་དེ་བསགས་མ་ཐག་ནས་ལས་དེའི་བག་ཆགས་སེམས་རྒྱུད་ལ་བཞག་ནས་ནམ་ཞིག་རྐྱེན་དང་འཕྲད་པ་ན་འབྲས་བུ་དེ་ཆུད་ཟ་བ་མེད་པར་འབྱུང་བ་ཡིན་པས་ལས་མ་བྱས་པ་དང་མི་འཕྲད་པ་དང་། བྱས་པ་ཆུད་མི་ཟ་བ་དང་། དགེ་སྡུག་གི་ལས་ཀྱི་འབྲས་བུ་སོ་སོར་ངེས་པ་དང་། རྒྱུ་དུས་སུ་ཆུང་ཡང་འབྲས་བུའི་དུས་སུ་འཕེལ་ཆེ་བ་དང་བཞི་ནི་ལས་འབྲས་ཀྱི་ཁྱད་ཆོས་བཞི་ཞེས་གྲགས་སོ།།

ལས་ལ་ཚེ་འདི་ཉིད་ལ་བསགས་པའི་དགེ་སྡུག་གི་ལས་དེ་ཚེ་འདི་ཉིད་ལ་སྨིན་ནས་འབྲས་བུ་བདེ་སྡུག་གང་ཡིན་པ་དེ་ཚེ་འདིར་སྤྱོད་པའི་མངོན་ཆོས་མྱོང་འགྱུར་གྱི་ལས་དང་། ཚེ་འདིར་བསགས་པའི་ལས་དེ་ཚེ་འདིའི་འཕྲོའི་སྐྱེ་བའམ་ལས་བསགས་པའི་སྐྱེ་བ་གཉིས་པ་དེར་ངེས་པར་དུ་འབྲས་བུ་སྨིན་པ་དེ་ནི་སྐྱེས་ནས་མྱོང་འགྱུར་གྱི་ལས་དང་། ཚེ་འདིར་བསགས་པའི་ལས་དེའི་འབྲས་བུ་ཚེ་འདིའི་སྐྱེ་བ་ཕྱི་མའི་ཕྱི་མ་ལ་སོགས་པ་སྐྱེ་བ་གསུམ་ནས་བཞི་ལྔ་དྲུག་བདུན་བརྒྱ་སྟོང་ལ་སོགས་པ་ནས་སྨིན་པ་དེ་ནི་ལན་གྲངས་གཞན་ལ་མྱོང་འགྱུར་གྱི་ལས་དང་གསུམ་ཡོད་དེ། ཐོགས་མེད་ཀྱི་གཞི་བསྡུ་བ་ལས། ཚེ་འདི་ལ་མྱོང་བར་འགྱུར་བ་དང་། སྐྱེས་ནས་མྱོང་བར་འགྱུར་བ་དང་། ལན་གྲངས་གཞན་ལ་མྱོང་བར་འགྱུར་བའོ། །ཞེས་གསུངས་པའི་ཕྱིར་རོ།།

གཞན་ཡང་ལས་དེ་ལ་མྱོང་ངེས་ཀྱི་ལས་དང་། མྱོང་བར་མ་ངེས་པའི་ལས་དང་གཉིས་ཡོད་དེ། ཡང་དེ་ཉིད་ལས། མྱོང་བར་འགྱུར་བར་ངེས་པ་དང་། མྱོང་བར་འགྱུར་བར་མ་ངེས་པའོ། །ཞེས་གསུངས་པའི་ཕྱིར། གཞན་ཡང་ལས་དེ་ལ་ལྕི་བ་དང་ཡང་བ་གཉིས་དང་། བསགས་པ་དང་། བསགས་པར་འགྱུར་བ་མ་ཡིན་པའི་ལས་གཉིས་དང་། ཆེད་དུ་བསམ་པ་དང་། ཆེད་དུ་བསམ་པ་མ་ཡིན་པའི་ལས་གཉིས་དང་། རྣམ་པར་སྨིན་པ་སྨིན་ཟིན་པ་དང་། རྣམ་པར་སྨིན་པ་སྨིན་བཞིན་པའི་ལས་གཉིས་དང་། དགེ་བའི་ལས་དང་། མི་དགེ་བའི་ལས་དང་། ལུང་མ་བསྟན་གྱི་ལས་གསུམ་དང་། ལས་གནག་ལ་རྣམ་སྨིན་གནག་པ་དང་། ལས་དཀར་ལ་རྣམ་སྨིན་དཀར་བ་དང་། ལས་དཀར་ནག་འདྲེས་མ་ལ་རྣམ་སྨིན་དཀར་ནག་འདྲེས་མ་དང་། ལས་དཀར་ནག་གང་ཡང་མིན་པ་ལ་འབྲས་བུ་ཡང་དཀར་ནག་གང་ཡང་མེད་པའི་ལས་དང་བཞི་ཡོད་པ་ལ་སོགས་པ་དུ་མ་ཞིག་ཡོད་དེ། སྔ་མ་དེ་ཉིད་ལས། ལས་ནི་གཉིས་གཉིས་ཏེ། ལས་ལྕི་བ་དང་ཡང་པའོ། །གཞན་ཡང་གཉིས་ཏེ། བསགས་པར་འགྱུར་བ་དང་། བསགས་པར་འགྱུར་བ་མ་ཡིན་པའོ། །གཞན་ཡང་གཉིས་ཏེ། ཆེད་དུ་བསམ་པ་དང་། ཆེད་དུ་བསམ་པ་མ་ཡིན་ནོ། །ཞེས་དང་། གཞན་ཡང་གཉིས་ཏེ། རྣམ་པར་སྨིན་པ་རྣམ་པར་སྨིན་ཟིན་པ་དང་། རྣམ་པར་སྨིན་པ་རྣམ་པར་སྨིན་པའོ། །ལས་ནི་གསུམ་སྟེ། དགེ་བ་དང་། མི་དགེ་བ་དང་། ལུང་མ་བསྟན་པའོ། །ཞེས་དང་། ལས་ནི་བཞི་སྟེ། ལས་གནག་ལ་རྣམ་པར་སྨིན་པ་ཡང་གནག་པ་དང་། ལས་དཀར་ལ་རྣམ་པར་སྨིན་པ་དཀར་བ་དང་། ལས་དཀར་གནག་འདྲེས་ལ་རྣམ་པར་སྨིན་པ་ཡང་དཀར་གནག་འདྲེས་པ་དང་། ལས་དཀར་བ་ཡང་མ་ཡིན་གནག་པ་ཡང་མ་ཡིན། རྣམ་པར་སྨིན་པ་ཡང་མེད་དེ་ལས་ཟད་པར་འགྱུར་བའོ། །ཞེས་གསུངས་པའི་ཕྱིར་རོ།།

དེས་ན་སྲོག་གཅོད་པ་དང་། མ་བྱིན་པ་ལེན་པ་དང་། འདོད་པས་ལོག་པར་གཡེམ་པ་སྟེ་ལུས་ཀྱི་མི་དགེ་བ་གསུམ་དང་། ཕྲ་མ་ཚིག་རྩུབ་རྫུན་ངག་འཁྱལ་ཏེ་ངག་གི་མི་དགེ་བ་བཞི་དང་། བརྣམ་སེམས་དང་། གནོད་སེམས་དང་། ལོག་ལྟ་སྟེ་ཡིད་ཀྱི་མི་དགེ་བ་གསུམ་དང་བཅུ་བོ་ལ་མི་དགེ་བ་བཅུ་ཞེས་རང་བཞིན་གྱི་ཁ་ན་མ་ཐོ་བ་ཡིན་པས་ཁྱིམ་པ་རང་བཞིན་པ་ཡན་ཆད་ཀྱིས་ཀྱང་སྤང་དགོས་ལ། མ་སྤང་པར་ལས་དེ་དག་བསགས་ན་རྣམ་སྨིན་ཤིན་ཏུ་ལྕི་བས་ངན་སོང་དུ་འགྲོ་བའི་རྒྱུ་ཚབ་པོ་ཆེ་ཡིན་ཞིང་། དེའི་ལྡོག་ཕྱོགས་དག་གམ་དེ་བཅུ་སྤངས་པ་ལ་དགེ་བ་བཅུ་ཟེར་བ་ཡིན་པས་དེ་དག་ཁྱིམ་པ་རང་བཞིན་པ་ཡན་ཆད་ཀྱིས་ཀྱང་ངེས་པར་དུ་བསྒྲུབ་དགོས་སོ།།

གང་ཟག་གང་ཞིག་གིས་སྡོམ་པ་ལ་གནས་པར་དམ་བཅས་དབང་གིས་སངས་རྒྱས་ཀྱིས་འདི་དང་འདི་བསྒྲུབ་པར་བྱ་ཞིང་འདི་དང་འདི་སྤང་བར་བྱ་ཞེས་གསུངས་པ་དེ་ནི་སངས་རྒྱས་ཀྱིས་ཁྲིམས་སུ་བཅས་པ་ཡིན་ཕྱིར་དེ་དག་དང་འགལ་བ་ལ་བཅས་པའི་ཁ་ན་མ་ཐོ་ཟེར་ཞིང་། དེ་དག་ལས་བསྒྲུབ་བྱ་མ་བསྒྲུབ་པ་དང་སྤང་བྱ་མ་སྤང་པ་ལ་ནི་བཅས་པ་དང་འགལ་བའི་ཉེས་པ་ལྕི་ཞིང་དེ་ལ་སོ་ཐར་གྱི་དགེ་བསྙེན་གྱི་བསླབ་པའི་གཞི་ལྔ་དང་། དགེ་ཚུལ་ཕ་མའི་བླང་འདས་སོ་དྲུག་དང་། དགེ་སློབ་མའི་བླང་འདས་སོ་དྲུག་གི་སྟེང་དུ་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་བསྣན་པའི་བསླབ་བྱ་ཞེ་བརྒྱད་དང་། དགེ་སློང་གི་འདུལ་ཁྲིམས་ཉིས་བརྒྱ་ལྔ་བཅུ་རྩ་གསུམ་དང་། དགེ་སློང་མའི་བསླབ་བྱ་སུམ་བརྒྱ་རེ་བཞི་དང་། བྱང་སེམས་ཀྱི་རྩ་ལྟུང་བཅོ་བརྒྱད་དང་། ཉེས་བྱས་བརྒྱད་ཅུ་དང་། གསང་སྔགས་ཀྱི་རྩ་ལྟུང་བཅུ་བཞི་དང་། བླ་མེད་ཀྱི་བརྟུལ་ཞུགས་ཉེར་ལྔ་དང་། ཡན་ལག་སྦོམ་པོའི་ལྟུང་བ་བརྒྱད་དང་། རིགས་ལྔ་སྤྱི་དང་བྱེ་བྲག་གི་དམ་ཚིག་དང་། རྫོགས་པ་ཆེན་པོའི་བླ་མའི་སྐུ་གསུང་ཐུགས་གསུམ་གྱི་དམ་ཚིག་ཉི་ཤུ་རྩ་བདུན་དང་། ཡན་ལག་གི་དམ་ཚིག་ཉེར་ལྔ་ལ་སོགས་པ་བཅས་པའི་བསླབ་བྱ་དང་དགག་བྱ་ཤིན་ཏུ་མང་ལ། སྲོག་གཅོད་པ་ལྟ་བུ་ལ་སོགས་པ་མང་པོ་ཞིག་ནི་བཅས་པ་དང་རང་བཞིན་གྱི་ཁ་ན་མ་ཐོ་གཉིས་ཀ་ཡིན་པ་ཡང་ཡོད་དོ།།

དེ་བཞིན་དུ་རང་བཞིན་གྱི་ཁ་ན་མ་ཐོ་བར་གྱུར་པ་མཚམས་མེད་པ་ལྔ་དང་ཉེ་བའི་མཚམས་མེད་པ་ལྔའི་ལས་དང་། མཁས་པའི་གྲལ་གོང་ལྕི་བ་དང་། སྔགས་པའི་ནོར་ལྕི་བ་དང་། ཡོན་ཏན་ཅན་གྱི་ཕྱག་ལྕི་བ་དང་། སྒྲུབ་པ་པོའི་ཟས་ལྕི་བ་སྟེ་ལྕི་བ་བཞི་དང་། མི་དགེ་བ་ལ་བསྟོད་པ་དང་། དགེ་བ་ལ་སྨད་པ། དགེ་བ་ཅན་གྱི་ཚོགས་གཅོག་པ། དད་པ་ཅན་གྱི་ཐུགས་དཀྲུགས་པ། བཀའ་དྲིན་ཅན་གྱི་བླ་མ་སྤོང་པ། དངོས་གྲུབ་ཀྱི་རྩ་བ་ཡི་དམ་སྤོང་བ། རྡོ་རྗེ་མཆེད་ལྕམ་དང་འགལ་བ། དཀྱིལ་འཁོར་གཉན་པོ་དང་བྲལ་བ་སྟེ་ལོག་པ་བརྒྱད་ལ་སོགས་པ་མི་དགེ་བར་གྱུར་བའི་ལས་ཤིན་ཏུ་མང་པོ་ཡོད་ལ། དེ་དག་ལ་སྤྱོད་པ་ནི་མི་དགེ་བའི་ལས་བསགས་པ་དང་། དེ་དག་ལས་སེམས་སྲུང་ནས་སྤོང་བ་ནི་དགེ་བའི་ལས་བྱས་པ་ཡིན་ཞིང་། རིན་ཆེན་ཕྲེང་བ་ལས། དགེ་བ་ལས་ནི་བདེ་བ་དང་། །དེ་བཞིན་བདེ་འགྲོ་ཐམས་ཅད་དོ། །མི་དགེ་བ་ལས་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་དོ། །ཞེས་གསུངས་པ་ལྟར་དགེ་བའི་ལས་ནི་འབྲས་བུ་རྣམ་སྨིན་ཡིད་དུ་འོང་བའི་བདེ་བ་དང་བདེ་འགྲོ་མཐོ་རིས་ཀྱི་ཕུང་པོ་བསྐྱེད་བྱེད་དང་། མི་དགེ་བའི་ལས་ནི་འབྲས་བུ་རྣམ་སྨིན་ཡིད་དུ་མི་འོང་པ་སྡུག་བསྔལ་དང་ངན་སོང་གི་འགྲོ་བའི་ལུས་རྟེན་བསྐྱེད་བྱེད་ཡིན་པ་ཤེས་པར་བྱས་ནས་ལས་དགེ་སྡིག་གི་རྒྱུ་ལས་འབྲས་བུ་བདེ་སྡུག་མི་མཉམ་པའི་འཁོར་བའི་གནས་རིས་དྲུག་པོ་འདི་བྱུང་བ་ཡིན་པས་ལས་འབྲས་ལ་ཡིད་ཆེས་དང་སྤང་བླང་འཛོལ་མེད་མཛད་པ་ཤིན་ཏུ་གལ་ཆེའོ།།

བཞི་བ་འཆི་བ་མི་རྟག་པ།

བཞི་བ་འཆི་བ་མི་རྟག་པ་ནི། སྣོད་བཅུད་ཐམས་ཅད་མི་རྟག་སྒྱུ་མའི་ངང་། །རྟག་པར་འཛིན་པ་སྐྱེ་བོ་ཤིན་ཏུ་འཁྲུལ། །དེ་ཕྱིར་ཚེ་འགྲོ་ནམ་མཁའི་གློག་དང་མཚུངས། །འཆི་བ་མི་རྟག་སུས་དྲན་རྒྱལ་བའི་སྲས། །ཞེས་པའི་ཚིགས་སུ་བཅད་པ་གཅིག་གིས་བསྟན། དེའི་དོན་ནི་ཡུལ་ལྗོངས་རི་ལུང་ཆུ་མཚོ་མཁར་དང་ཁང་ཁྱིམ་ལ་སོགས་པ་ཕྱི་སྣོད༷་ཀྱི་འཇིག་རྟེན་དང་། མི་དང་དུད་འགྲོ་ལྷ་ཀླུ་ལ་སོགས་པ་ནང་བཅུད༷་ཀྱི་སེམས་ཐམས༷་ཅད༷་མི་འཇིག་པར་རྟག་པར་གནས་པ་ནི་གཅིག་ཀྱང་མེད་པར་མི༷་རྟ༷ག་པ་དཔེར་ན་སྒྱུ༷་མ་མཁན་གྱིས་བྱས་པའི༷་ཁང་བཟང་དང་རྟ་མཆོག་ལ་སོགས་པ་ལྟ་བུ་བདེན་པའི་རྟག་པ་མེད་པའི་ངང༷་ཚུལ་ཅན་མི་རྟག་པ་ཁོ་ན་ཡིན་པས་སྣོད་བཅུད་མཐའ་དག་རྟག༷་པར༷་འཛིན༷་པ༷་ཡོད་ན་དེ་འདྲའི་རྟག་འཛིན་ཅན་གྱི་སྐྱེ༷་བོ༷་དེ་ཤིན༷་ཏུ༷་འཁྲུལ༷་བ་ཡིན་པར་ཤེས་དགོས་ལ། དེ་ལྟར་རྟག་པར་གནས་པའི་འདུས་བྱས་ཀྱི་དངོས་པོ་གཅིག་ཀྱང་མེད་པའི་རྒྱུ་མཚན་དེ༷་ཡི་ཕྱིར༷་ན་སྐྱེ་བོ་དག་གི་ལུས་འདི་ཡང་རྟག་པ་མེད་པ་འཇིག་པའི་ཆོས་ཅན་ཡིན་པ་དང་། ཕུང་པོ་ལྔ་རིས་མཐུན་པར་གནས་པའི་རྒྱུན་གྱི་ཚེ༷་དེ་ཡང་སྐད་ཅིག་ཀྱང་གནས་པ་མེད་པར་འཆི་བའི་ཕྱོགས་སུ་འགྲོ༷་བ་ནི་ཇི་སྐད་དུ།སྐྱེས་བུའི་ཚེ་འགྲོ་ནམ་མཁའི་གློག་འདྲ་སྟེ། །ཞེས་གསུངས་པ་ལྟར་དཔེར་ན་ནམ༷་མཁར༷་གློག༷་འཁྱུག་པ་དང་ཀུན་ནས་མཚུངས༷་པས་ན་ཚེ་འདི་གཏན་དུའམ་ཡུན་རིང་མི་གནས་པར་འཆི༷་བར་འགྱུར་བ༷་མི་རྟག་པའི་རང་བཞིན་ཅན་ཡིན་ཞིང་། དེའི་ཚུལ་ཇི་བཞིན་ཤེས་ཤིང་རྟག་ཏུ་ཚེ་ལ་ལོང་སྐབས་མེད་པ་མི༷་རྟག༷་པ་འཆི་དགོས་པའི་རང་བཞིན་ཅན་ཡིན་པ་མི་བརྗེད་པར་དྲན༷་ནུས་པ་ནི་རྒྱལ༷་བའི༷་སྲས༷་བྱང་ཆུབ་སེམས་དངོས་སམ་དེ་དང་འདྲ་བའི་གང་ཟག་ཁྱད་པར་བ་ཞིག་ཡིན་པར་གོར་མ་ཆག་གོ་ཞེས་པའོ།།

དེ་ཡང་གཞུང་མང་པོར་དལ་འབྱོར་རྙེད་དཀའ་དང་འཆི་བ་མི་རྟག་པའི་ཉམས་ལེན་གྱིས་ཚེ་འདིར་སྣང་ལ་ཞེན་པའི་བློ་ལྡོག་པ་དང་། ལས་རྒྱུ་འབྲས་དང་འཁོར་བའི་ཉེས་དམིགས་དྲན་པའི་ཉམས་ལེན་གྱིས་ཚེ་ཕྱི་མར་ཞེན་པའི་སྣང་ཤེས་ལྡོག་པས་གོ་རིམ་ཡང་དེ་ལྟར་དང་པོ་དལ་འབྱོར་རྙེད་དཀའ་དང་། དེ་ནས་མི་རྟག་པ་དང་། དེ་ནས་ལས་འབྲས་དང་། དེ་ནས་འཁོར་བའི་ཉེས་དམིགས་བཤད་ཡོད་ཅིང་། འགར་རེར་འཁོར་བའི་ཉེས་དམིགས་སྔོན་དུ་བཤད་ཅིང་དེ་ནས་ལས་འབྲས་ཀྱི་རྣམ་བཞག་བཤད་ཡོད་མོད། འདིར་ནི་མི་རྟག་པ་སྒོམ་ཚུལ་བཞི་ཀའི་མཇུག་ཏུ་བཞག་པའི་རྒྱུ་མཚན་ནི། དལ་འབྱོར་ལ་སྙིང་པོ་མ་ལོན་པར་འཁོར་བའི་གནས་རིས་གཞན་དུ་སྐྱེས་ཀྱང་རུང་ངོ་སྙམ་ན། དེ་ནི་མི་རུང་བར་འཁོར་བའི་གནས་རིས་སུ་སྐྱེས་ན་སྡུག་བསྔལ་ཁོ་ནས་དུས་འདའ་དགོས་པས་དེའི་ཚུལ་ཤེས་པའི་ཆེད་དུ་དེ་འཕྲོར་འཁོར་བའི་ཉེས་དམིགས་བཤད་དོ།།

དེ་ནས་དེ་འདྲའི་འཁོར་བའི་ཉེས་དམིགས་དག་གང་ལས་བྱུང་བ་ཤེས་ཤིང་དེ་ལ་འཇུག་ལྡོག་མ་ནོར་བར་བྱ་བའི་ཆེད་དུ་འཁོར་བའི་རྒྱུ་ལས་ཡིན་པར་བསྟན་ཏོ།།

དེ་ལ་བསྟེན་ནས་དལ་འབྱོར་ལ་སྙིང་པོ་ལེན་དགོས་པ་དང་། འཁོར་བའི་སྡུག་བསྔལ་གྱི་རྒྱུ་ལས་ལ་སྤང་བླང་བྱེད་དགོས་པ་ཤེས་ཤིང་། དེའི་ཆེད་དུ་དམ་པའི་ཆོས་ཉམས་སུ་ལེན་དགོས་པ་ཤེས་ན་ཡང་སང་ཕོད་གནང་ཕོད་དང་མ་འོངས་པ་ཚེ་སྨད་ལྟ་བུ་ལ་ཆོས་བསྒྲུབ་སྙམ་ནས་ཕྱི་བཤོལ་དུ་བཞག་ན་དེ་ལྟར་བགྱིད་མི་རུང་པར་ད་ལྟ་ཉིད་དུ་ཆོས་སྒྲུབ་དགོས་པའི་སྐུལ་ལྕགས་སུ་འཆི་བ་མི་རྟག་པ་འདི་བསྟན་པ་ཡིན་པས་གོ་རིམ་འདི་ནི་གདམས་ངག་འདི་ཉིད་ཀྱི་ཐུན་མིན་གྱི་མན་ངག་ཏུ་གྱུར་པའི་གོ་རིམ་ཞིག་ཡིན་པ་ཤེས་པར་བྱའོ།།

དེ་ལྟར་ཀུན་མཁྱེན་ཆེན་པོའི་ཡིད་བཞིན་མཛོད་ལས། ཕྱི་ནང་དུས་བཞི་ན་ཚོད་འགྱུར་བས་ཀྱང་། །མི་རྟག་འཆི་བར་ངེས་ཀྱིས་རྟག་འཛིན་སྤོངས། །གཟུགས་ནི་རྡུལ་ཕྲན་དུས་ནི་སྐད་ཅིག་མ། །བར་སྣང་གློག་འགྱུ་བཞིན་དུ་མི་རྟག་པས། །མྱུར་བ་ཉིད་དུ་དམ་པའི་ཆོས་སྒྲུབས་ཤིག །ཅེས་གསུངས་པ་ལྟར་ཕྱི་སྣོད་ཀྱི་འཇིག་རྟེན་འདི་མི་རྟག་པར་ས་འགུལ་དང་། རི་ཉིལ། མཚོ་འཕྱུར། ཤྭ་འོད། གངས་ཐན། རླུང་ལྡིང་། མེ་རི་གད་པ། ཉི་ཚད་ཕྱེ་རླུང་གིས་གདུང་བ་ལ་སོགས་པ་སྐྱེ་བོའི་རྩོལ་སྒྲུབ་ལས་མ་བྱུང་བའི་རང་བྱུང་གི་འཇིག་རྐྱེན་སྣ་ཚོགས་དང་། དམག་འཁྲུག་དང་། གཏེར་འདོན། མཁར་ལས། ལམ་བཟོ། ཞིང་རྨོ་ལ་སོགས་པ་མིའི་རྩོལ་བ་ལས་བྱུང་བའི་ཆགས་འཇིག་འཕོ་འགྱུར་སྣ་ཚོགས་པས་འཇིག་པ་དང་། དུས་མཐར་མེ་བདུན་ཆུ་གཅིག་རླུང་དང་བཅས་པས་འཇིག་པ་ཡིན་ནོ།།

གཞན་ཡང་འདུལ་བ་ལུང་ལས། བསགས་པ་ཀུན་གྱི་མཐའ་འཛད་ཅིང་། །མཐོན་པོ་རྣམས་ཀྱི་མཐའ་ལྷུང་འགྱུར། །སྐྱེས་པའི་མཐའ་ནི་འཆི་བ་སྟེ། །འདུས་པའི་མཐའ་ནི་འབྲལ་བ་ཡིན། །ཞེས་གསུངས་པ་ལྟར་ནང་བཅུད་ཀྱི་སྐྱེ་འགྲོ་འདི་མི་རྟག་པར་སྐྱེས་པའི་མཐའ་མ་འཆི་བའི་འཇིགས་པས་ཉེན་པ་དང་། མཐོན་པོའི་གོ་ས་དེ་མི་རྟག་པར་མཐོ་བའི་མཐའ་མ་ལྷུང་བ་དང་། བཙན་པའི་དབང་ཆ་དེ་མི་རྟག་པར་གཉན་པའི་ཐ་མ་གཉོམ་པ་དང་། ཕྱུག་པོའི་འབྱོར་བ་དེ་མི་རྟག་པར་ཕྱུག་པའི་མཐའ་མ་དབུལ་བ་དང་། མཛེས་པའི་ལང་ཚོ་དེ་མི་རྟག་པར་དར་བའི་མཐའ་མ་རྒས་པ་དང་། མཁས་པའི་སྙན་གྲགས་དེ་མི་རྟག་པར་བསྟོད་པའི་མཐའ་མ་སྨོད་པ་དང་། འདུས་པའི་བཟའ་ཚང་དེ་མི་རྟག་པར་འདུས་པའི་མཐའ་མ་འབྲལ་བ་དང་། གཅེས་པའི་ལུས་པོ་འདི་མི་རྟག་པར་བདེ་བའི་མཐའ་མ་ན་བ་ལ་སོགས་པ་རང་ཅག་ལ་མིག་མཐོང་ལག་ཟིན་གྱིས་ཉམས་མྱོང་དང་བཅས་ཏེ་མི་རྟག་པ་ཡིན་པ་མངོན་སུམ་དུ་གྱུར་པའི་ཚུལ་ལ་བསམ་ན་རང་ཡང་ད་ལྟ་ཉིད་དུ་མི་འཆི་བའི་ངེས་པ་མེད་པའི་ཚུལ་ལ་བློ་རྩེ་དེ་འཇུག་སླ་ཞིང་དེ་འདྲ་ལ་ཡང་ཡང་སྦྱོང་དགོས་པ་ཡིན་ནོ།།

དེ་ཡང་མདོར་དྲིལ་ན། ཀུན་མཁྱེན་ཆེན་པོའི་མན་ངག་མཛོད་ལས། འདུས་བྱས་མི་རྟག་འཇིག་པའི་ཆོས་དྲུག་ནི། །རྒྱུ་རྐྱེན་འདུས་ཕྱིར་འཇིག་པ་ཉིད་དང་ནི། །སྔར་སྐྱེས་མ་ལུས་ཤི་བས་འཇིག་ངེས་དང་། །སྣོད་བཅུད་མི་རྟག་འགྱུར་བས་འཇིག་ངེས་དང་། །ཚེ་ལ་ངེས་མེད་འཆི་བས་འཇིག་པ་དང་། །ཉིན་མཚན་སྐད་ཅིག་འགྲོ་བས་འཇིག་པ་དང་། །སྐྱེས་མཐའ་འཆི་བར་ངེས་ཕྱིར་འཇིག་པ་བསམ། །ཞེས་མི་རྟག་པའི་ཆོས་དྲུག་གསུངས་པ་དང་མཐུན་པར་འཆི་བ་མི་རྟག་པ་བསྒོམ་པ་ལ་རྩ་བ་གསུམ་དང་། རྒྱུ་མཚན་དགུ། ཐག་གཅོད་རྣམ་པ་གསུམ་གྱི་སྒོ་ནས་བསྒོམ་དགོས་ཤིང་། རྩ་བ་གསུམ་ནི་འཆི་ངེས་པ་དང་། ནམ་འཆི་ངེས་མེད་དང་། འཆི་ཚེ་ཆོས་མིན་གཞན་ཅིས་ཀྱང་མི་ཕན་པ་གསུམ་མོ།།

དེ་གསུམ་པོ་རེ་རེ་ལ་ཡང་རྒྱུ་མཚན་རྣམ་པ་གསུམ་གསུམ་ཏེ་དགུ་ཡོད་པ་ལ་རྒྱུ་མཚན་དགུ་ཞེས་ཟེར། དང་པོ་འཆི་ངེས་པའི་རྒྱུ་མཚན་གསུམ་ནི། སྔར་མ་ཤི་བར་འཇིག་རྟེན་འདིར་ལུས་པ་གཅིག་ཀྱང་མེད་པ་དང་། ལུས་འདི་རྒྱུ་དང་རྐྱེན་དུ་མ་འདུས་ཏེ་བྱས་པའི་འདུས་བྱས་ཡིན་པ་དང་། ཚེ་འདི་སྐད་ཅིག་ཀྱང་མི་སྡོད་པར་ཟད་པའི་སར་འགྲོ་བ་དང་གསུམ་པོ་ཡིན་ལ་དེ་གསུམ་གྱི་རྒྱུ་མཚན་གྱིས་འཆི་ངེས་པ་ཅན་ཡིན་པར་གྲུབ་བོ།།

གཉིས་པ་ནམ་འཆི་ཆ་མེད་ཀྱི་རྒྱུ་མཚན་གསུམ་ནི། ཡིད་བཞིན་མཛོད་ལས། ཚེ་ལ་ངེས་མེད་ནམ་འཆི་ཆ་མེད་པས། །ངེས་པར་འཆི་ཞེས་སྙིང་ནས་བསམ་པར་བྱ། །ཞེས་གསུངས་པ་ལྟར་ཚེ་ལ་ངེས་པ་མེད་པ་དང་། ལུས་ལ་སྙིང་པོ་མེད་པ་དང་། འཆི་བའི་རྐྱེན་མང་བ་སྟེ་གསུམ་པོ་ཡིན་ཞིང་། དེ་གསུམ་གྱི་རྒྱུ་མཚན་གྱིས་དུས་ནམ་ཞིག་ལ་འཆི་བ་ཡིན་པ་ལ་ངེས་པ་མེད་དོ།།

གསུམ་པ་འཆི་ཚེ་ཆོས་མིན་གང་གིས་མི་ཕན་པའི་རྒྱུ་མཚན་གསུམ་ནི། ཡང་ཡིད་བཞིན་མཛོད་ལས། འཆི་བར་གྱུར་ཚེ་གནས་དང་ལོངས་སྤྱོད་དང་། །གཉེན་དང་དཔའ་རྩལ་དཔུང་གཉེན་ལ་སོགས་ཀྱིས། །སྟོངས་པ་འགའ་མེད་དམ་པའི་ཆོས་སྒྲུབས་ཤིག །ཅེས་གསུངས་པ་ལྟར་གཉེན་དང་བཤེས་ཀྱིས་མི་ཕན་པ་དང་། ཟས་དང་ནོར་གྱིས་མི་ཕན་པ་དང་། རང་གི་ལུས་ཀྱིས་མི་ཕན་པ་གསུམ་པོ་དེ་ཡིན་ཞིང་དེ་གསུམ་གྱི་རྒྱུ་མཚན་གྱིས་ཆོས་མ་གཏོགས་འཆི་ཚེ་ཕན་པའི་དངོས་པོ་གཞན་མེད་པ་ཤེས་ནུས་པ་ཡིན་ནོ།།

གསུམ་པ་ཐག་གཅོད་རྣམ་པ་གསུམ་ནི། ངེས་པར་དུ་འཆི་བས་འཆི་ཁར་ཕན་ངེས་ཀྱི་ཆོས་སྒྲུབ་དགོས་པར་ཐག་གཅོད་པ་དང་། ནམ་འཆི་ངེས་མེད་ཡིན་པས་ད་ལྟ་ཉིད་དུ་མྱུར་བ་མྱུར་བར་ཆོས་སྒྲུབ་དགོས་པར་ཐག་གཅོད་པ་དང་། འཆི་བ་ལ་ཆོས་མིན་པ་གང་གིས་ཀྱང་མི་ཕན་པས་ཆོས་ཁོ་ན་སྒྲུབ་དགོས་པར་ཐག་གཅོད་པ་གསུམ་པོ་དེ་ཡིན་ཞིང་། དེ་གསུམ་གྱིས་ཆོས་ལ་འཇུག་པའི་སྐུལ་ལྕགས་བྱེད་ནུས་པ་ཡིན་པས་ཚུལ་དེ་ལྟར་སྤྱིར་མི་རྟག་པ་དང་བྱེ་བྲག་ཏུ་རང་གི་ཚེ་འདི་མི་རྟག་པ་ཡིན་པའི་ཚུལ་དེ་ཉིན་མཚན་ཀུན་ཏུ་ཡིད་ཡུལ་དུ་མི་བརྗེད་པར་བྱའོ།།

ལྔ་བ་ངེས་འབྱུང་གི་བློར་སྦྱང་སྟེ་དབེན་པ་བསྟེན་དགོས་ཚུལ་གདམས་པ་ལ་ནི། ངེས་འབྱུང་གི་བློ་སྦྱོང་ཚུལ་དང་། དབེན་པ་བསྟེན་པ་དང་། དམ་ཆོས་གཤའ་མ་སྒྲུབ་དགོས་པར་གདམས་པ་དང་གསུམ་ལས།དང་པོ་ནི། འཇིག་རྟེན་འདི་སྣང་ཆོས་ལ་མི་ཞེན་པར། །ཕྱི་མ་དང་དུ་ལེན་པ་གདམས་ངག་མཆོག །ཅེས་པའི་རྐང་བ་གཉིས་ཀྱིས་བསྟན་ཅིང་དེའི་དོན་ནི། འཇིག༷་རྟེན༷་ཚེ་འདིའི་རྙེད་བདེ་གྲགས་བསྟོད་ལ་སོགས་པ་འཁོར་བ་འདི༷་སྣང༷་གི་ཆོས༷་ལ༷་གཙང་བདེ་རྟག་བདག་ཏུ་བལྟ་བའི་སྒོ་ནས་ཚེ་འདི་ལ་སོགས་པ་འཁོར་བའི་བདེ་བ་ཉི་ཚེ་དེ་ལ་མི༷་ཞེན༷་པར༷་སྲིད་རྩེ་ནས་མནར་མེད་བར་གྱི་འཁོར་བའི་སྣོད་བཅུད་ཐམས་ཅད་སྡུག་བསྔལ་གྱི་འཕྲུལ་འཁོར་དང་། སྡུག་བསྔལ་གྱི་ཡོ་ལང་དང་། སྲིན་མོའི་གླིང་དང་། དུག་སྤྲུལ་གྱི་ཚང་དང་། མེ་མ་ནུར་གྱི་འོབས་ལྟ་བུར་མཐོང་ནས་དེ་ལས་རང་གཞན་གཉིས་ཀ་ཐར་ཏེ་ཚེ་ཕྱི༷་མ༷་ཐར་བ་མྱ་ངན་ལས་འདས་པའི་གོ་འཕང་དོན་དུ་གཉེར་བར་འདོད་པའི་ངེས་འབྱུང་གི་བློ་རྣམ་པར་དག་པ་དང༷་དུ༷་ལེན༷་པ༷་ནི་ལམ་སྒྲུབ་ཐབས་ཐམས་ཅད་ཀྱི་མཆོག་དང་། དེ་ལྟར་དགོས་པར་གདམས་པ་ནི་གདམ༷ས་ངག༷་ཐམས་ཅད་ཀྱི་མཆོག༷་ཡིན་ཏེ། སྲིད་པ་མཐའ་དག་སྡུག་བསྔལ་དང་བདེ་བ་མེད་པའི་གནས་སུ་མཐོང་ནས་དེ་ལས་ཐར་འདོད་ཀྱི་བློ་དེ་ནི་ངེས་འབྱུང་ཡིན་ཞིང་། དེ་ནི་ཐར་བའི་སྒོ་ཉག་གཅིག་དེ་ཡིན་ནོ་ཞེས་པའོ།།

གཉིས་པ་ལ་ནི། དབེན་པ་བསྟེན་པ་དངོས་ལ་གདམས་པ་དང་། དབེན་པ་མ་བསྟེན་པའི་ཉེས་དམིགས་བསྟན་པ་དང་གཉིས་ལས།

དང་པོ་ནི། གྲོང་ཡུལ་སྡིག་གྲོགས་ངན་པའི་འདུ་འཛིས་བསྒྱུར། །དབེན་རི་གྲུབ་ཐོབ་གོང་མའི་གདན་ས་ཡིན། །འཇིག་རྟེན་བྱ་བ་བསྒྲུབ་ན་ཟིན་དུས་མེད། །དགོས་མེད་རྒྱུད་ལ་སྐྱེས་ན་བྱ་བཏང་གཙོ། །ཅེས་པའི་ཤོ་ལོ་ཀ་གཅིག་གིས་བསྟན། གྲོ༷ང་ཁྱིམ་དང་། གྲོང་དང་། གྲོང་རྡལ་དང་། གྲོང་ཁྱེར་ལ་སོགས་པའི་སྐྱེ་བོ་འདུ་ལོང་གི་རྒྱུ་འགྲུལ་ཆེ་བའི་ཡུལ༷་དེར་ནི་ཆོས་མིན་གྱི་གནས་ལ་བློ་བྲིད་པར་བྱེད་པའི་མཛའ་བཤེས་དང་ཉེ་དུ་ལ་སོགས་པའི་སྡིག༷་པའི་གྲོག༷ས་ངན༷་པ༷འི་རིགས་དུ་མས་རྩེ་རྒོད་བག་མེད་གཡེང་བ་དང་མི་དགེ་བ་སྲོག་གཅོད་ཆང་འཐུང་དགྲ་སྡང་གཉེན་ཆགས་ལ་སོགས་པའི་ཕྱི་ནང་གི་འདུ༷་འཛི༷་དུ་མས༷་བློ་ཁ་ལོག་པའི་ཕྱོགས་སུ་བསྒྱུར༷་བ་དང་། བསྒྱུར་འགྲོ་ངེས་པའི་གནས་ཡིན་པས་ན་དེ་འདྲའི་གནས་ཡུལ་ངན་པ་རྣམས་སྤང་བར་བྱ་ལ། དེ་དག་སྤངས་ནས་གཡའ་བྲག་གི་རྫ་རི་དང་། གངས་རི་དང་། ནགས་ཚལ་ལ་སོགས་པའི་མི་མེད་དབེན༷་པའི་རི༷་ཁྲོད་ལྟ་ན་སྡུག་པ་སྔོན་གྱི་གསང་སྔགས་ཀྱི་རིག་པ་འཛིན་པའི་གྲུབ༷་ཐོབ༷་གོང༷་མ༷་རྣམས་རྣམ་གྲོལ་གྱི་ས་ལ་གཤེགས་པའི་མཛད་པ་ཁྱད་པར་བ་བསྟན་པའི་གདན༷་ས༷་དག་ནི་ཡོན་ཏན་དུ་མས་བརྒྱན་པའི་དབེན་པའི་གནས་ཞེས་བྱ་ཞིང་། དབེན་གནས་དེ་དག་ཏུ་སྙིང་པོ་ནང་གི་ཉམས་ལེན་ལ་བརྩོན་ཏེ་དབེན་པ་བསྟེན་དགོས་པ་ཡིན༷་ཞིང་། འཇིག༷་རྟེན༷་ཚེ་འདིའི་བྱ༷་བ༷་ཐམས་ཅད་ཅི་ཙམ་བསྒྲུབ༷་ན༷་ཡང་སྙིང་པོ་ལོན་ཏེ་གྲུབ་ཟིན༷་པའི་དུས་ཤིག་ལ་སླེབས་པའི་དུས༷་མེད༷་པས། དེ་དག་ལ་དགོས༷་པ་མེད༷་པའི་བློ་རྒྱུད༷་ལ༷་སྐྱེས༷་ན༷་འཇིག་རྟེན་ལ་ཞེན་པ་སྤངས་ནས་ཚེ་འདིའི་བྱ༷་བ་བཏང༷་བའི་ཀུན་སྤངས་བྱ་བྲལ་བའི་གཙོ༷་བོ་ཉིད་དུ་གྱུར་པ་ཡིན་པས་དེ་ལྟར་དབེན་རིར་གནས་པ་ནི་གལ་ཆེ་བ་ཡིན་ཏེ། རྒྱལ་སྲས་ལག་ལེན་ལས། ཡུལ་ངན་སྤངས་པས་ཉོན་མོངས་རིམ་གྱིས་འགྲིབ། །རྣམ་གཡེང་མེད་པས་་དགེ་སྦྱོར་ངང་གིས་འཕེལ། །རིག་པ་དྭངས་པས་ཆོས་ལ་ངེས་ཤེས་སྐྱེ། །དབེན་པ་བརྟེན་པ་རྒྱལ་སྲས་ལག་ལེན་ཡིན། །ཞེས་གདམས་པའི་ཕྱིར་རོ།།

གཉིས་པ་ནི། ཡུན་རིང་སྡོད་གནས་རང་ཡུལ་ཆགས་སྡང་འཕེལ། །ངེས་མེད་འགྲིམ་ན་རྣམ་རྟོག་ཡུལ་གྱིས་འཕེལ། །ཞེས་པའི་རྐང་བ་གཉིས་ཀྱིས་བསྟན། དུས་ཡུན༷་རིང༷་པོར་སྡོད༷་པའི་གནས༷་དང་། རང༷་གི་ཕ་ཡུལ༷་གཉིས་ཀྱིས་ནི་རང་ཕྱོགས་ལ་ཆགས༷་པ་དང་གཞན་ཕྱོགས་ལ་སྡང༷་བའི་ཕྱོགས་རིས་ཀྱི་བློ་ངན་པ་འཕེལ༷་བར་བྱེད་པས་ན་དབེན་པ་མ་བསྟེན་པར་ཡུལ་གཅིག་ཏུ་ལོ་མང་སྡོད་པའམ་རང་ཡུལ་དང་ཁ་མ་བྲལ་བ་ནི་ཉེས་པ་ཀུན་གྱི་འབྱུང་གནས་ཡིན་ནོ།།

དེ་ཡིན་པ་མ་ཟད་གནས་གཅིག་ཏུ་ཡུན་རིང་མ་བསྡད་ཅིང་རང་ཡུལ་དེ་ཡང་སྤངས་ཁུལ་བྱས་ཀྱང་རྒྱ་གྲོང་ལ་སོགས་པ་གནས་ངེས༷་མེད༷་ཀུན་དུ་བྱ་སྒྲོ་རླུང་གིས་ཁྱེར་བ་ལྟར་འཁྱར་ཏེ་འགྲིམ༷་ན༷་ནི་ཡང་ཆགས༷་སྡང༷་དང་ངོ་ཚ་ཁྲེལ་མེད་ལ་སོགས་པའི་ཉོན་མོངས་པ་དང་དོན་མེད་ཀྱི་རྣམ་རྟོག་མང་པོ་ཡུལ༷་མཛེས་མི་མཛེས་བར་མ་ལ་སོགས་པ་མཐོང་རྐྱེན་གྱིས༷་འཕེལ༷་བར་བྱེད་པས་ན་དབེན་པ་མ་བསྟེན་པར་ཕ་ཡུལ་ལྟ་བུ་ཡུལ་གཅིག་ཏུ་སྡོད་པའམ། ཡུལ་གཞན་དུ་འཁྱམ་པ་གང་ཡིན་ཡང་ཉེས་པའི་འབྱུང་གནས་ཡིན་ཏེ། རྒྱལ་སྲས་ལག་ལེན་ལས། གཉེན་གྱི་ཕྱོགས་ལ་འདོད་ཆགས་ཆུ་ལྟར་གཡོ། །དགྲ་ཡི་ཕྱོགས་ལ་ཞེ་སྡང་མེ་ལྟར་འབར། །བླང་དོར་འབྱེད་པ་གཏི་མུག་མུན་ནག་ཅན། །ཕ་ཡུལ་སྤང་པ་རྒྱལ་སྲས་ལག་ལེན་ཡིན། །ཞེས་གསུངས་པའི་ཕྱིར་རོ།།

གསུམ་པ་ལ་ནི། དམ་ཆོས་ལྟར་སྣང་བ་སྒྲུབ་པའི་སྐྱོན་དང་། དམ་ཆོས་གཤའ་མ་སྒྲུབ་དགོས་པར་གདམས་པ་དངོས་དང་གཉིས་ལས།

དང་པོ་ནི། སེམས་ཀྱི་དགེ་བའི་བསོད་ནམས་རིན་ཆེན་ནོར། །ཆོས་བརྒྱད་ཇག་པས་བཅོམ་པའི་སྤྲང་པོ་དངོས། །སྙིགས་མའི་ཕུང་པོ་རིན་ཆེན་དར་ཟབ་ཀྱིས། །བརྒྱན་ནས་དབུལ་བོ་ཕྱུག་པོར་རྫུ་འདི་རྨོངས། །མི་ཚེའི་སྣང་བ་རྨི་ལམ་ཙམ་ཞིག་ལ། །ཞེན་ཆགས་བླང་དོར་མི་ཤེས་བླུན་པོ་ཡིས། །རང་མགོ་རང་གིས་བསྐོར་རྣམས་སྙིང་རེ་རྗེ། །འཆི་བདག་གློ་བུར་བྱུང་དུས་ཅི་ཞིག་བྱེད། །ཅེས་པའི་ཚིགས་བཅད་གཉིས་ཀྱིས་བསྟན། ཇི་སྐད་དུ། བསམ་པ་དགེ་དང་མི་དགེའི་བྱེ་བྲག་ལས། །དགེ་སྡུག་གཟུགས་བརྙན་ཆེ་ཆུང་རྗེས་མི་འགྲོ། །ཞེས་གསུངས་པ་ལྟར་ཕྱི་ལུས་ངག་གི་གཟུགས་བརྙན་ཙམ་མ་ཡིན་པར་ནང་ངེས་འབྱུང་དང་བྱང་ཆུབ་ཀྱི་སེམས་ཀྱིས་ཀུན་ནས་བསླངས་པའི་སེམས༷་ཀྱི༷་དགེ༷་བ༷་རླབས་པོ་ཆེའི་འབྲས་བུ་བསོད༷་ནམས༷་ཆེན་པོར་གྱུར་པའི་རིན༷་ཐང་ཆེན༷་པོ་དང་ལྡན་པ་ཡིད་བཞིན་གྱི་ནོར༷་བུ་མཆོག་དེ་བསྒྲུབ་དགོས་མོད། དེ་བསྐྱུར་ནས་མི་རྙེད་པ་དང་། མི་བདེ་བ་དང་། མི་སྙན་པ་དང་། སྨད་པ་བཞི་མི་འདོད་ཅིང་། རྙེད་པ་དང་། བདེ་བ་དང་། སྙན་གྲགས་དང་། བསྟོད་པ་བཞི་འདོད་པའི་འཇིག་རྟེན་ཆོས༷་བརྒྱ༷ད་ལ་མོས་ཤིང་ཞེན་པ་ཆེ་པོའི་བློ་ངན་གྱི་ཇག༷་ཚོགས་ཆེན་པོ༷ས་དགེ་སེམས་རྣལ་མ་བཅོ༷མ་པ༷འི་ཕྱིའི་གཟུགས་བརྙན་གྱི་དགེ་བ་ལྟར་སྣང་བ་ཙམ་ཞིག་སྒྲུབ་ཁུལ་བྱེད་པ་དེ་ནི་དོན་གྱི་དགེ་བ་ཡང་དག་པའི་ནོར་དང་བྲལ་བའི་སྤྲང༷་པོ༷་དངོས༷་ཡིན་ཞིང་། དེ་ལྟར་བླ་ཆེན་དང་མཁས་ཆེན་གྱི་མིང་གི་དྲེགས་པ་དང་བཅས་ཏེ་དབང་བསྐུར། ཆོས་འཆད། རྟེན་བཞེངས། འཁོར་སྐྱོང་སོགས་འདི་སྣང་གི་ཆེན་པོའི་བྱ་བ་དང་འདྲེས་པའི་དགེ་བ་བྱེད་པ་ཁས་འཆེ་བ་དག་གིས་སྡུག་བདེན་རྣམ་སྨིན་གྱི་གཟུགས་ཀྱི་ཕུང་པོ་དང་། བདེ་བ་ལ་ཞེན་ཅིང་མི་བདེ་ལ་འཚེར་བའི་ཚོར་བའི་ཕུང་པོ་དང་། འཁོར་བའི་རྙེད་བདེ་གྲགས་བསྟོད་སོགས་ཀྱི་སྤུ་རིས་འབྱེད་པའི་འདུ་ཤེས་ཀྱི་ཕུང་པོ་དང་། འཇིག་རྟེན་གྱི་བྱ་གཞག་ཁོ་ན་བྱེད་པའི་འདུ་བྱེད་ཀྱི་ཕུང་པོ་དང་། འཇིག་རྟེན་ཚེ་འདི་ཕྱིའི་དོན་ལ་ཞུགས་ཤིང་ཉམས་སུ་མྱོང་བའི་རྣམ་པར་ཤེས་པའི་ཕུང་པོ་སྟེ་རང་རྒྱུད་སྡུག་བདེན་གྱི་ཕུང་པོ་ལྔ་འདུས་པའི་གོང་བུ་ཤ་རུས་ཁྲག་དང་གཤང་གཅི་ལ་སོགས་པའི་སྙིགས༷་མ༷་མི་གཙང་བ་བེམ་པོ་ལུས་ཀྱི་ཕུང༷་པོ༷་དེ་གསེར་དངུལ་གཡུ་བྱུར་ལ་སོགས་པའི་རིན༷་ཐང་ཆེ༷ན་དང་ལྡན་པའི་ནོར་བུའི་རྒྱན་དང་། ཟ་འོག་དར༷་ཟབ༷་ཀྱི༷་གོས་བཟང་གིས༷་བརྒྱན༷་ན༷ས་འཇིག་རྟེན་གྱི་ཕྱུག་པོ་དང་ཆོས་ཀྱི་བསོད་ནམས་ཅན་དུ་རློམ་པ་ནི་དོན་ལ་དབུལ༷་པོ༷་ཕྱུག༷་པོར༷་བརྫུས༷་པ་ཙམ་ལས་མེད་པས་འདི༷་ཉིད་ཤིན་ཏུ་རྨོངས༷་པ་ཚབ་ཆེན་ཡིན་པ་དང་། མི༷་ཚེ༷་གཅིག་གི་སྣང༷་བ༷་དེ་བདེན་པར་མེད་ཅིང་ཡུན་ཐུང་ཡལ་སླ་རྨི༷་ལམ༷་གྱི་སྣང་བ་ཙམ༷་ཞིག༷་ལས་མེད་པ་ལ༷་ཞེན༷་ཅིང་ཆགས༷་ནས་འཇིག་རྟེན་ཆོས་བརྒྱད་དང་ལྟར་སྣང་དགེ་བའི་གཟུགས་བརྙན་ཙམ་ལ་གཡེང་སྟེ་དགེ་བ་རྣལ་མ་ཡང་དག་པ་བླང༷་བ་དང་། མི་དགེ་བ་དང་དགེ་བའི་གཟུགས་བརྙན་ཙམ་པོ་དོར༷་དགོས་པ་མི༷་ཤེས༷་པའི་བླུན༷་པོ༷་བ་གླང་ལྟ་བུ་ཡིས༷་ཚེ་འདིའི་བདེ་བ་དོན་གཉེར་དང་། དགེ་བ་མིན་པའི་དགེ་བའི་གཟུགས་བརྙན་རྫིག་པོ་དེ་ལ་དགེ་བར་རློམ་པ་ནི་རང༷་མགོ༷་རང༷་གིས༷་བསྐོར༷་བ༷་ཡིན་པས་དེ་འདྲ་རྣམ༷ས་ནི་སྙིང༷་རེ༷་རྗེ༷་བའི་གནས་ལགས་སོ།།

དེ་དག་ལ་འཆི༷་བདག༷་གིས་སྲོག་འཕྲོག་པ་གློ༷་བུར༷་དུ་བྱུང༷་སྟེ་ཚེ་འདིའི་བྱ་བ་ཐམས་ཅད་བྱེད་མཚམས་བཞག་ནས་འཇིག་རྟེན་ཕ་རོལ་དུ་འགྲོ་དགོས་པའི་དུས༷་ལ་བབས་པ་ན་ཅི༷་ཞིག༷་བྱེད༷་དེ་བྱེད་ཐབས་ཅི་ཡང་མེད་པར་ཆོས་མེད་དུ་ཕྱི་མར་འགྲོ་དགོས་པ་ཡིན་པས་དེ་འདྲ་དག་ནི་དམ་ཆོས་རྣལ་མ་མ་བསྒྲུབ་པར་དགེ་བ་ལྟར་སྣང་བ་ལ་མགོ་འཁོར་བའི་སྐྱོན་ནམ་ཉེས་དམིགས་ཡིན་པ་ཤེས་གལ་ཆེའོ་ཞེས་པའོ།།

གཉིས་པ་ནི། གདམས་ངག་ཡང་ཡང་ཉམས་ལེན་གནད་ཀྱི་འཆིང་། །རང་རྒྱུད་གང་ཕན་གནད་ཐོག་མེ་དང་མཚུངས། །དགའ་བྲོད་འཛིན་པའི་བློ་དང་རབ་བྲལ་ནས། །འཆི་ཆོས་གཤའ་མ་སྒྲུབས་དང་ཞལ་སློབ་མཆོག །ཅེས་པའི་ཤོ་ལོ་ཀ་གཅིག་གིས་བསྟན། ཐར་བའི་ལམ་བཟང་སྟོན་པའི་གདམས༷་ངག༷་བཟང་པོའི་དོན་དེ་ཡང༷་ནས་ཡང༷་དུ་རྒྱུད་ལ་ཉམས༷་སུ་ལེན༷་པའི་གནད་འགགས་ཀྱི་འཆིང༷་ནི་གང་ཞེ་ན། དེ་ནི་དོན་ལ་དགེ་བ་མིན་པར་མི་དགེ་བར་གྱུར་པའི་ཕྱིའི་དགེ་བའི་གཟུགས་བརྙན་ཙམ་པོ་བ་དང་། ཉམས་ལེན་ཁ་ཕྱིར་བལྟས་སུ་མ་སོང་བར་ནང་རང༷་རྒྱུད༷་ལ་གང༷་ཕན༷་ཅི་ཕན་བྱས་ཏེ། དཔེར་ན་ནད་ཀྱི་གནད༷་མིག་གི་ཐོག༷་ཏུ་མེ༷་བཙའ་འཇོག་པ་དང༷་མཚུངས༷་པར་སེམས་ཀྱི་གནད་ལ་ཕན་པ་ཞིག་དགོས་པ་ཡིན་ཞིང་། འཇིག་རྟེན་ཆོས་བརྒྱད་སོགས་ཚེ་འདི་སྣང་ལ་དགའ༷་བ་དང་། དམ་ཆོས་ལྟར་སྣང་བ་ཙམ་བསྒྲུབས་པས་ཡིད་ལ་བྲོད༷་པ་སྐྱེ་བའི་ཞེན་ཆགས་ཀྱི་འཛིན༷་པ༷འི་བློ༷་ངན་ད༷ང་རབ༷་ཏུ་བྲལ༷་ནས༷་འཆི༷་བའི་དུས་སུ་ངན་སོང་སོགས་སུ་མི་སྐྱེ་བར་བདེ་འགྲོ་མཐོ་རིས་དང་། ཁྱད་པར་དུ་ངེས་ལེགས་ཐར་བའི་ལམ་སྣ་ཟིན་ཐུབ་ངེས་ཀྱི་རྒྱུ་དམ་ཆོས༷་གཤའ༷་མ༷འམ་རྣལ་མ་ཡང་དག་པ་ཞིག་སྒྲུབས༷་ཤིག་དང༷་ཚེ་འདིར་མི་ལུས་བཟང་པོ་བརྙེད་པ་ལ་དོན་ཆོད་པ་ཡིན་པས་གདམས་ངག་མཛད་པ་པོ་རང་གི་ཞལ༷་སློབ༷་མཆོག༷་ཏུ་གྱུར་པའི་སྐུལ་བ་པོ་རྣམས་ཀྱིས་སེམས་ལ་ཟུངས་ཤིག་ཅེས་པའོ།།

གསུམ་པ་ཚོམ་གྱི་མཇུག་བསྡུ་བ་ནི། ཐུན༷་མོང༷་བློ༷་སྦྱོང༷་གི༷་སྐོར༷་སོགས༷་བསྟན༷་པའི༷་ཚོམ༷་གཉིས༷་པའོ༷། །ཞེས་པས་བསྟན་ལ་དོན་ནི་གོ་སླའོ། །ཚོམ་གཉིས་པའི་དོན་བཤད་ཟིན་ཏོ།། །།

སྐྱབས་འགྲོ།

གསུམ་པ་ཐུན་མིན་ཉམས་ལེན་དང་སྦས་དོན་འགའ་ཞིག་གི་སྐོར་བསྟན་པ་ལ། བླ་མ་ལ་ཕྱག་བྱ་བའི་སྒོ་ནས་མཚམས་སྦྱར་བ་དང་། གཞུང་དོན་དངོས་དང་། ཚོམ་གྱི་མཇུག་བསྡུ་བ་དང་གསུམ་ལས།དང་པོ་ནི། བདེ་ཆེན་དབྱེར་མེད་དོན་གྱི་བླ་མར་འདུད། །ཅེས་པ་སྟེ། རིག་པ་སྟོང་པ་ཀ་དག་ཆེན་པོ་དང་འོད་གསལ་ལྷུན་གྲུབ་བདེ༷་བ་ཆེན༷་པོའི་ཡེ་ཤེས་དབྱེར༷་མེད༷་པ་གཉུག་མ་མི་ཤིགས་དོན༷་གྱི༷་བླ༷་མ༷་དེ་རང་གི་སེམས་ཀྱི་ངོ་བོར་ཡེ་ནས་གནས་པའི་ཚུལ་དེ་ངོས་ཟིན་པའི་སྒོ་ནས་སྒོ་གསུམ་དེའི་ངང་ལ་ལྷོད་དེ་འཇོག་པས་དེར་ཡང་ཡང༷འདུད༷་ཅེས་པའམ་དེ་འདྲའི་བླ་མར་སྒོ་གསུམ་གུས་པས་འདུད་པར་བྱས་ཏེ་ཐུན་མིན་གྱི་ཉམས་ལེན་དང་སྦས་དོན་རྣམས་འཆད་པར་བྱ་ཞེས་པའི་དོན་ཏེ་ལྟ་བ་མཇལ་བའི་ཕྱག་དང་བཅས་འོག་གི་དོན་རྣམས་འཆད་པར་མཚམས་སྦྱར་བའོ།།གཉིས་པ་ལ། སྐྱབས་འགྲོ་དང་། སེམས་བསྐྱེད། མཎྜལ། རྡོར་སེམས་སྒོམ་བཟླས། བླ་མའི་རྣལ་འབྱོར། རྩ་རླུང་ཐིག་ལེའི་རྣལ་འབྱོར་དང་དྲུག་ལས།

དང་པོ་ནི། སླུ་མེད་དཀོན་མཆོག་རིན་ཆེན་རྣམ་གསུམ་དང་། །བླ་མ་ཡི་དམ་མཁའ་འགྲོ་རྩ་བ་གསུམ། །ངོ་བོ་རང་བཞིན་ཐུགས་རྗེ་དབྱེར་མེད་པར། །ཡེ་ནས་འདུ་འབྲལ་མེད་པར་སྐྱབས་སུ་འགྲོ། །ཞེས་པས་བསྟན་ཏེ། འདི་ལ་ཡང་ཕྱི་ནང་གསང་བ་གསུམ་གྱི་སྐྱབས་འགྲོ་ཡོད་པའི་དང་པོ་ཕྱིའི་སྐྱབས་འགྲོ་ནི་འཁོར་བའི་སྡུག་བསྔལ་ལས་སྐྱོབ་པའི་ཕྱིའི་སྐྱབས་ཡུལ་སླུ༷་བ་མེད༷་པ་སངས་རྒྱས་དཀོན༷་མཆོག༷་དང་། ཆོས་དཀོན་མཆོག་དང་། དགེ་འདུན་དཀོན་མཆོག་རིན༷་པོ་ཆེ༷་རྣམ༷་པ༷་གསུམ༷་ལས་སངས་རྒྱས་དེ་འཁོར་བའི་སྡུག་བསྔལ་ལས་སྐྱོབ་ཅིང་ཐར་བའི་སར་དབུགས་དབྱུང་བར་བྱེད་པའི་སྐྱབས་སྟོན་པ་པོ་དང༷་། ཆོས་དེ་སྐྱབས་དངོས་སུ་གྱུར་པའི་ཐར་བའི་ལམ་དང་། དགེ་འདུན་དེ་ལམ་སྒྲུབ་པའི་གྲོགས་ཉིད་དུ་བཟུང་ནས་རང་གཞན་འཁོར་བའི་སྡུག་བསྔལ་ལས་སྐྱོབ་པའི་སྐྱབས་ལ་དེ་གསུམ་ལས་གཞན་མེད་པར་ངེས་པའི་སྒོས་དེ་དག་ལ་སྐྱབས་སུ་འགྲོ་བ་ནི་ཕྱིའི་སྐྱབས་འགྲོའོ།།

དེ་བཞིན་དུ་བྱིན་རླབས་ཀྱི་རྩ་བ་བླ༷་མ༷་དང་། དངོས་གྲུབ་ཀྱི་རྩ་བ་ཡི༷་དམ༷་དང་། འཕྲིན་ལས་ཀྱི་རྩ་བ་དཔའ་བོ་མཁའ༷་འགྲོ༷་སྟེ་ནང་གི་སྐྱབས་ཡུལ་རྩ༷་བ༷་གསུམ༷་པོ་དེ་ལ་བསྟེན་སྒྲུབ་འགྲོགས་པའི་སྒོས་སྐྱབས་སུ་འགྲོ་བ་ནི་ནང་གི་སྐྱབས་འགྲོའོ།།

གནས་ལུགས་གསང་བའི་སྐྱབས་ཡུལ་གདོད་མ་གཞིའི་གནས་ལུགས་རང་བྱུང་འཕོ་འགྱུར་མེད་པའི་རིག་པ་ངོ༷་བོ༷་སྟོང་པ་དང་། རང༷་བཞིན༷་གསལ་བ་དང་། ཐུགས༷་རྗེ༷་ཀུན་ལ་ཁྱབ་པའི་དབྱིངས་དང་ཡེ་ཤེས་དབྱེར༷་མེད༷་པར༷་ཡེ༷་ནས༷་རང་སེམས་གཉུག་མའི་ངོ་བོ་དང་འདུ༷་བྲལ༷་མེད༷་པར༷་གནས་པ་དེ་ཉིད་རྩད་གཅོད་ལ་བཟླ་བའི་སྒོ་ནས་ལེགས་པར་རྟོགས་པར་བྱས་ཏེ་སྐྱབས༷་སུ༷་འགྲོ༷་བ་ནི་གསང་བའི་སྐྱབས་འགྲོ་ཡིན་ཞིང་འདི་སྔ་འགྱུར་རྙིང་མའི་ཐུན་མིན་གྱི་ཕྱི་ནང་གསང་བ་གསུམ་གྱི་སྐྱབས་དང་སྐྱབས་འགྲོའི་རྣམ་བཞག་དང་ལྷག་པར་དུ་གསང་བའི་སྐྱབས་དང་སྐྱབས་འགྲོ་ནི་རྫོགས་པ་ཆེན་པོའི་ལྟ་བ་རྟོགས་གོམས་གདེངས་ཐོབ་ཏུ་གྱུར་ཏེ་འཁྲུལ་སྣང་འཁོར་བའི་སྡུལ་བསྔལ་རྒྱུ་དང་བཅས་པ་དབྱིངས་སུ་ཞི་ནས་ཐར་བ་མཆོག་གཅིག་གདོད་མའི་གཞི་དབྱིངས་ཆེན་པོར་གྲོལ་བའི་ཚུལ་ལྟར་གྱི་སྐྱབས་འགྲོའོ།།

སྤྱིར་བཏང་ནི་སངས་རྒྱས་ཆོས་དགེ་འདུན་གསུམ་པོ་སྐྱབས་ཡུལ་དཀོན་མཆོག་གསུམ་ཞེས་བྱ་ཞིང་། སངས་རྒྱས་དཀོན་མཆོག་ནི་ཇི་ལྟ་ཇི་སྙེད་ཀྱིི་ཆོས་ཐམས་ཅད་མ་འདྲེས་པར་ཅིག་ཆར་དུ་མངོན་སུམ་དུ་མཁྱེན་པའི་མཁྱེན་པ་རྒྱུད་ལྡན་གྱི་གང་ཟག་དེ་དང་། དེའི་རྒྱུད་ཀྱི་ཆོས་གཟུགས་ཀྱིས་བསྡུས་པའི་འབྲས་བུའི་ཡོན་ཏན་ཐམས་ཅད་དང་། ཆོས་དཀོན་མཆོག་ནི་འགོག་བདེན་དང་ལམ་བདེན་གྱི་ངོ་བོར་གྱུར་བའི་ལམ་གྱི་ཡོན་ཏན་དག་དང་། དགེ་འདུན་དཀོན་མཆོག་ནི་མཐོང་ལམ་ཐོབ་པ་ཡན་ཆད་ཀྱི་འཕགས་པའི་གང་ཟག་ལམ་ལ་གནས་པ་དག་ལ་ངོས་འཛིན་དགོས་ཞིང་། དེ་ཡང་མ་འོངས་རང་རྒྱུད་ལ་ཐོབ་འགྱུར་གྱི་དཀོན་མཆོག་གསུམ་པོ་དེ་འབྲས་བུའི་སྐྱབས་དང་། དེ་སྐྱབས་སུ་བཟུང་བ་དེ་འབྲས་བུའི་སྐྱབས་འགྲོ་དང་། གཞན་རྒྱུད་ལ་བྱོན་ཟིན་གྱི་དཀོན་མཆོག་གསུམ་པོ་དེ་རྒྱུའི་སྐྱབས་ཡུལ་དང་། དེ་གསུམ་ལ་སྐྱབས་སུ་འགྲོ་བ་དེ་རྒྱུའི་སྐྱབས་འགྲོ་ཡིན་ཏེ། ཀུན་མཁྱེན་ཆེན་པོའི་ཡིད་བཞིན་མཛོད་ལས། རྒྱུ་ཡི་ཡུལ་གྱུར་གཞན་རྒྱུད་བྱོན་ཟིན་པའི། །སངས་རྒྱས་སྐུ་གསུམ་སྤངས་རྟོགས་འཕྲིན་ལས་ལྡན། །ཆོས་ནི་འགོག་ལམ་བདེན་པ་རྣམ་པ་གཉིས། །དགེ་འདུན་སར་བཞུགས་རྒྱལ་སྲས་འཕགས་རྣམས་ཏེ། །གནས་སྐབས་དེ་གསུམ་མཚུངས་པར་སྐྱབས་སུ་འགྲོ། །ཞེས་དང་། འབྲས་བུའི་སྐྱབས་འགྲོ་དཀོན་མཆོག་རྣམ་པ་གསུམ། །རང་ལ་གྲུབ་འདོད་སླད་དུ་སྨོན་པ་ཡིན། །ཞེས་གསུངས་པའི་ཕྱིར་རོ།།

དང་པོ་བླ་མ་མཚན་ཉིད་དང་ལྡན་པ་ཞིག་གི་མདུན་དུ་དཀོན་མཆོག་གསུམ་ལ་སྐྱབས་སུ་འགྲོ་བར་དམ་བཅས་ཏེ་སྐྱབས་འགྲོའི་སྡོམ་པ་བླང་ཞིང་། དེ་ནས་མདུན་གྱི་ནམ་མཁར་ཐ་གྲུ་ཡངས་པའི་ཡུལ་ལྗོངས་ལྟ་སྡུག་པར་མཚོ་དང་མཚེའུ་ལྗོན་ཤིང་དང་མེ་ཏོག་འབྲས་བུ་ལ་སོགས་པས་བརྒྱན་པའི་དབུས་སུ་ཡིད་དུ་འོང་བའི་པད་སྡོང་གི་ཟེའུ་འབྲུར་ཟླ་བའི་གདན་ལ་སྐྱབས་ཀུན་འདུས་པའི་ངོ་བོ་སློབ་དཔོན་པདྨ་འབྱུང་གནས་སྐུ་མདོག་དཀར་ལ་དམར་བའི་མདངས་ཆགས་པ་ན་བཟའ་དང་ཆ་ལུགས་ཐམས་ཅད་རྫོགས་པས་བརྒྱན་པ། ཕྱག་གཡས་རྡོ་རྗེ་རྩེ་དགུ་ཐུགས་ཀར་འཛིན་ཅིང་། ཕྱག་གཡོན་འཆི་མེད་བདུད་རྩིས་བཀང་བའི་ཀ་པ་ལ་ཚེ་བུམ་དང་བཅས་པ་འཛིན་པ་ཞབས་གཉིས་རྒྱལ་པོ་རོལ་བའི་སྟབས་ཀྱིས་བཞུགས་པའི་གཡས་སུ་སྟོན་པ་ཤཱཀྱ་ཐུབ་པ་ལ་འཁོར་བསྐལ་བཟང་གི་སངས་རྒྱས་སྟོང་དང་ཤཱ་རིའི་བུ་དང་མཱོ་གལ་གྱི་བུ་ལ་སོགས་པ་ཉན་ཐོས་ཆེན་པོ་དག་གིས་བསྐོར་བ་དང་། གཡོན་དུ་རྗེ་བཙུན་བྱམས་པ་མགོན་པོ་ལ་ཉེ་བའི་སྲས་ཆེན་བརྒྱད་ལ་སོགས་པ་བྱང་ཆུབ་སེམས་དཔའ་དུ་མས་བསྐོར་བ་དང་། རྒྱབ་ཏུ་སྡེ་སྣོད་གསུམ་དང་རྒྱུད་སྡེ་བཞི་དྲུག་གི་ཆོས་ཀྱི་ཡི་གེའི་པོ་ཏི་རྣམས་ཐུམ་གདོང་དར་དང་བཅས་ཏེ་འཇའ་འོད་འཕྲོ་ཞིང་བརྗོད་དོན་སྟོན་པའི་རང་སྒྲ་དང་བཅས་ཏེ་བརྩེགས་པ་དང་། སྟེང་དུ་ཆོས་སྐུ་ཀུན་ཏུ་བཟང་པོ་གཅེར་བུ་སྐུ་མདོག་མཐིང་ག་ཞལ་གཅིག་ཕྱག་གཉིས་མཉམ་བཞག་མཛད་པའི་པང་དུ་ཡུམ་ཀུན་ཏུ་བཟང་མོ་སྐུ་མདོག་དཀར་པོ་ཅན་གྱིས་འཁྱུད་པ་འཇའ་གུར་ཐིག་ལེའི་ཀློང་དུ་བཞུགས་པ་ལ་རྒྱ་བོད་ཀྱི་རིག་པ་འཛིན་པའི་པཎ་གྲུབ་དུ་མ་དང་བརྒྱུད་པའི་བླ་མ་རྣམས་ཀྱིས་བསྐོར་བ་དང་། མཐའ་འཁོར་དུ་འཇིག་རྟེན་ལས་འདས་པའི་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བར་བསྒོམ་ནས་རང་གཞན་སེམས་ཅན་ཐམས་ཅད་སྐྱབས་སུ་འགྲོ་བར་མོས་ཏེ་སྐྱབས་འགྲོའི་ཚིག་ཅི་ཤེས་བརྗོད་པར་བྱ་བ་ནི་སྐྱབས་འགྲོའི་ཚོགས་ཞིང་གསལ་འདེབས་པ་སྟེ། བྱིན་རླབས་འཇུག་པ་དང་སྐྱབས་འགྲོ་ལ་བློ་སྦྱོང་བའི་དགོས་པར་ཁྱད་པར་ཡོད་དེ། ཡིད་བཞིན་མཛོད་ལས། མདུན་གྱི་ནམ་མཁར་དཀོན་མཆོག་རབ་བསམ་ལ། །དངོས་དང་ཡིད་ཀྱི་མཆོད་སྤྲིན་རྒྱ་མཚོས་མཆོད། །བདག་དང་སེམས་ཅན་ཐམས་ཅད་ཐལ་སྦྱར་ཏེ། །གསུམ་ལ་ཕྱོགས་པས་སྐྱབས་སུ་འགྲོ་བར་བསམ། །བླ་མ་སངས་རྒྱས་ཆོས་དང་ཚོགས་མཆོག་ལ། །ལན་གསུམ་བར་དུ་སྐྱབས་སུ་འགྲོ་བར་བྱ། །ཞེས་གསུངས་པའི་ཕྱིར་རོ།།

དེ་ལྟར་དཀོན་མཆོག་གསུམ་ལ་སྐྱབས་སུ་སོང་ནས་བསླབ་བྱ་ཀུན་ལ་ལེགས་པར་བསླབ་དགོས་པས་མཆོག་གསུམ་སོ་སོའི་བསླབ་བྱ་ནི་སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་གུས་པས་འཁོར་བའི་སྡུག་བསྔལ་ལས་སྐྱོབ་པའི་སྐྱབས་སུ་བཟུང་ནས་ཕྱག་མི་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་ལྟ་སྤྱོད་ལོག་ལམ་དུ་ཁྲིད་པ་དང་འགྲོགས་པར་མི་བྱ་བ་སྟེ་དགག་པའི་བསླབ་བྱ་གསུམ་མོ།།

དང་པོའི་སྒྲུབ་པའི་བསླབ་བྱ་ལ་སངས་ཀྱི་སྐུ་གཟུགས་དང་ཐ་ན་སཙྪ་དུམ་གཅིག་ཡན་ལ་གུས་པའི་བྱ་བ་བསྒྲུབ་སྟེ་སངས་རྒྱས་ལ་གུས་པ་བསྐྱེད་པ་དང་། གཉིས་པའི་བསླབ་བྱ་ཆོས་ཀྱི་དོན་སྟོན་པའི་ཐ་ན་ཡེ་གེ་འབྲུ་གཅིག་ཡན་ཆད་ལ་གུས་པའི་བྱ་བ་བསྒྲུབ་སྟེ་ཆོས་དཀོན་མཆོག་ལ་གུས་པ་བྱེད་པ་དང་། གསུམ་པའི་བསླབ་བྱ་ཐ་ན་དགེ་འདུན་པའི་ན་བཟའ་དུམ་གཅིག་ཡན་ཆད་ལ་གུས་པའི་བྱ་བ་བསྒྲུབ་སྟེ་དགེ་འདུན་དཀོན་མཆོག་ལ་གུས་པ་བསྒྲུབ་པ་དང་གསུམ་པོ་སྒྲུབ་པའི་བསླབ་བྱའོ།།

ཅི་ཟ་ཅི་འཐུང་གི་ཕུད་སོགས་མཆོད་པ་ཅི་འབྱོར་བས་རྟག་ཏུ་དཀོན་མཆོག་གསུམ་ལ་མཆོད་པ་དང་། ཉིན་མཚན་དུས་དྲུག་ཏུ་སྐྱབས་འགྲོ་བ་ལ་བརྩོན་པ་དང་། སྐྱེས་བུ་དམ་པ་བླ་མ་དགེ་བའི་བཤེས་གཉེན་སོགས་ལ་བརྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་མཐུན་གྱི་སྤྱོད་པ་ལ་རྟག་ཏུ་བསླབ་པ་སྟེ་ཆ་མཐུན་གྱི་བསླབ་བྱ་གསུམ་སྟེ་གཙོ་བོ་དེ་དག་ལ་སྤང་བླང་བྱེད་པ་ནི་སྐྱབས་འགྲོའི་བསླབ་བྱ་ཡིན་ནོ།།

སེམས་བསྐྱེད།

གཉིས་པ་སེམས་བསྐྱེད་ནི། འགྲོ་རྣམས་གདོད་ནས་སངས་རྒྱས་རང་བཞིན་ལ། །གློ་བུར་གཉིས་སྣང་འཁྲུལ་བའི་དབང་གྱུར་བའི། །སེམས་ཅན་ཐམས་ཅད་ཡེ་གྲོལ་འབད་མེད་དུ། །བྱང་ཆུབ་སེམས་མཆོག་ཁྱད་པར་འཕགས་པ་བསྐྱེད། །ཅེས་པའི་ཚིགས་སུ་བཅད་པ་གཅིག་གིས་བསྟན། རྒྱུད་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དྲི་མ་དེ་བསལ་སངས་རྒྱས་དངོས། །ཞེས་གསུངས་པ་ལྟར་འགྲོ༷་བ་རྣམས༷་ཡེ་གདོད༷་མ་ནས༷་རྣམ་པར་དག་པ་སྐུ་གསུམ་རང་ཆས་སུ་རྫོགས་པའི་སངས༷་རྒྱས༷་ཀྱི་རང༷་བཞིན༷་ཡིན་པ་ལ༷་དྲི་མ་གློ༷་བུར༷་བ་གཟུང་འཛིན་གཉིས༷་སྣང༷་འཁྲུལ༷་བའི༷་བག་ཆགས་ཀྱི་གཞན་དབང༷་དུ་གྱུར༷་བ༷འི་སྒོ་ནས་མ་དག་འཁོར་བའི་གནས་སུ་རང་ངོ་མ་ཤེས་པའི་ཚུལ་དུ་འཁྱམ་པ་ཡིན་ཞིང་། ཚུལ་དེ་ལྟའི་སེམས༷་ཅན༷་ཐམས༷་ཅད༷་ཡེ༷་གྲོལ༷་གཉུག་མ་ཀ་དག་གི་ཀློང་དུ་བྱ་རྩོལ་འབད༷་མེད༷་ཅོག་བཞག་གི་ངང་ནས་གཞི་རྫོགས་འབྲས་བུའི་རང་སར་རང་གྲོལ་བའི་ཆེད་དུ༷་གཉུག་མ་དོན་དམ་བྱང༷་ཆུབ༷་སེམས༷་ཀྱི་དཀྱིལ་འཁོར་མཆོག༷་ཏུ་གྱུར་པ་ཐེག་པ་གཞན་ལས་མ་བསྟན་པར་རྫོགས་པ་ཆེན་པོ་གསང་བ་སྙིང་ཐིག་གི་ཁྱད༷་པར༷་དུ་འཕགས༷་པའི་ཆོས་སུ་གྱུར་པ༷་དེ་སྣང་བཞི་ལ་སོགས་པའི་གསང་ལམ་ལ་བརྟེན་ནས་བསྐྱེད༷་པར་བྱའོ་ཞེས་པ་འདི་ནི་ཀུན་རྫོབ་བྱང་ཆུབ་ཀྱི་སེམས་དང་དོན་དམ་བྱང་ཆུབ་ཀྱི་སེམས་གཉིས་ཅིག་ཆར་དུ་བསྐྱེད་ཚུལ་བསྟན་པའི་གདམས་པའོ།།

སངས་རྒྱས་བྱེད་ཀྱི་རྒྱུ་གཙོ་བོ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་པོ་ཡིན་ཞིང་། དེ་ལས་ཀྱང་ཀུན་རྫོབ་བྱང་ཆུབ་ཀྱི་སེམས་དེ་ཞི་མཐའ་འགོག་བྱེད་ཀྱི་རྒྱུ་ཡོད་ན་དེས་ཆོག་དང་མེད་ན་ཐབས་ཆག་ཁོ་ན་ཡིན་ཕྱིར་འདི་ཉིད་ནི་ཐེག་པ་ཆེན་པོ་མདོ་སྔགས་གཉིས་ཀྱི་ལམ་གྱི་རྨང་གཞི་དང་གཞུང་ཤིང་ཡིན་པས་འདི་རྒྱུད་ལ་བསྐྱེད་པ་གལ་ཧ་ཅང་ཆེ་བ་ལགས་སོ།།

དེ་ཡང་སྙིང་རྗེ་བྱམས་པ་དགའ་བ་བཏང་སྙོམས་ཏེ་ཚད་མེད་རྣམ་པ་བཞིས་བློ་སྦྱངས་ཏེ་བྱང་ཆུབ་ཀྱི་སེམས་ལ་སྦྱང་བའམ། བདག་གཞན་མཉམ་པ་དང་། བདག་གཞན་བརྗེ་བ། བདག་བས་གཞན་གཅེས་ཀྱི་སྒོ་ནས་བྱང་ཆུབ་ཀྱི་སེམས་ལ་སྦྱང་བའམ། ཡང་ན་སེམས་ཅན་ཐམས་ཅད་མར་ཤེས་པ་དང་། དྲིན་དྲན་པ། དྲིན་གཟོ་འདོད། ཡིད་འོང་གི་བྱམས་པ། བརྩེ་བའི་སྙིང་རྗེ། ལྷག་བསམ་རྣམ་དག་སྟེ་རྒྱུ་དྲུག་དང་འབྲས་བུ་བྱང་ཆུབ་ཀྱི་སེམས་དང་རྒྱུ་འབྲས་མན་ངག་བདུན་ཞེས་གྲགས་པ་ལ་བློ་སྦྱོང་བའི་སྒོས་སེམས་བསྐྱེད་མ་སྐྱེས་པ་བསྐྱེད་པ་དང་། སྐྱེས་པ་མི་ཉམས་པ་གོང་འཕེལ་དུ་བཏང་སྟེ་ནམ་ཞིག་བློས་བཅོས་ཏེ་ཕར་འཇོག་མི་དགོས་པར་ངང་ཤུགས་ཀྱི་སེམས་དེ་སྐྱེ་འོང་བ་ན་སེམས་བསྐྱེད་སྐྱེས་ཤིང་ཐེག་པ་ཆེན་པོའི་ལམ་ཞུགས་སུ་གྱུར་པ་དང་རང་ཉིད་རྒྱལ་བའི་ཐུགས་ཀྱི་སྲས་བྱང་ཆུབ་སེམས་དཔའ་ཞེས་པར་གྱུར་པ་ཡིན་ཏེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་ལ། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མི་བཅས་པའི་ཕྱག་བྱར་གྱུར། །ཞེས་གསུངས་པའི་ཕྱིར་རོ།།

དེས་ན་ཐོག་མར་ཐེག་པ་ཆེན་པོའི་དགེ་བའི་བཤེས་གཉེན་མཚན་ཉིད་དང་ལྡན་པ་ལས་ཀླུ་སྒྲུབ་ནས་བརྒྱུད་པའི་ཟབ་མོ་ལྟ་སྲོལ་དང་། ཐོགས་མེད་ནས་བརྒྱུད་པའི་རྒྱ་ཆེན་སྤྱོད་པའི་སྲོལ་ཏེ་སྲོལ་གཉིས་བྱང་ཆུབ་སེམས་དཔའི་སྡོམ་པ་ལེགས་པར་མནོས་ཤིང་དེ་ནས་མདུན་གྱི་ནམ་མཁར་རྒྱལ་བ་སྲས་བཅས་མངོན་སུམ་དུ་བཞུགས་པར་མོས་ལ་ཡང་ཡང་སེམས་སྡོམ་ལེན་པ་དང་། སྒོ་གསུམ་གཞན་གནོད་གཞི་དང་བཅས་པ་ལས་ལྡོག་པའི་ཉེས་སྤྱོད་སྡོམ་པའི་ཚུལ་ཁྲིམས་དང་། ཕར་རོལ་ཏུ་ཕྱིན་པ་དྲུག་གིས་བསྡུས་པའི་ཐེག་པ་ཆེན་པོའི་ཆོས་ཚུལ་ལ་ཉིན་མཚན་ཀུན་ཏུ་ལེགས་པར་སློབ་པའི་དགེ་བ་ཆོས་སྡུད་ཀྱི་ཚུལ་ཁྲིམས་དང་། བསྡུ་བ་རྣམ་པ་བཞིའི་སྒོ་ནས་སེམས་ཅན་གཞན་དོན་ལ་བརྩོན་པའི་སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ལ་གནས་ཤིང་བསླབ་པ་ལ་བརྩོན་པ་ནི་ཐེག་པ་ཆེན་པོའི་ཉམས་ལེན་ཡིན་ནོ།།

སེམས་བསྐྱེད་དེ་ཅི་འདྲ་ཞིག་ལ་གོ་དགོས་ཟེར་ན་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང་། ཡིད་བཞིན་མཛོད་ལས། དེ་ནས་བྱང་ཆུབ་སེམས་མཆོག་བསྐྱེད་པ་ནི། །གཞན་གྱི་དོན་ཕྱིར་སངས་རྒྱས་འདོད་པ་སྟེ། །ཞེས་གསུངས་པ་ལྟར་སྙིང་རྗེས་སེམས་ཅན་ལ་དམིགས་པ་དང་ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་གཉིས་སམ་ཆོས་གཉིས་དང་ལྡན་པའི་གཙོ་སེམས་ཁྱད་པར་བ་ཞིག་ལ་གོ་དགོས་ཤིང་། མཁས་པས་མཚན་ཉིད་བཞག་པ་ལྟར་ན། རང་རྒྱུ་གཞན་དོན་དོན་གཉེར་གྱི་འདུན་པས་དྲངས་ཤིང་རང་གྲོགས་བྱང་ཆུབ་འདོད་པ་དང་མཚུངས་ལྡན་དུ་གྱུར་བའི་ཐེག་ཆེན་ལམ་གྱི་གཞུང་ཤིང་དུ་གྱུར་པའི་ཆ་ནས་བཞག་པའི་གཙོ་བོའི་ཡིད་ཀྱི་རྣམ་རིག་ཁྱད་པར་ཅན་དེ་ཐེག་ཆེན་སེམས་བསྐྱེད་ཀྱི་མཚན་ཉིད་ཡིན་ནོ།།

དེ་ལ་དབྱེ་ན་སྨོན་པ་བྱང་ཆུབ་ཀྱི་སེམས་དང་། འཇུག་པ་བྱང་ཆུབ་ཀྱི་སེམས་གཉིས་ཡོད་དེ། ཡིད་བཞིན་མཛོད་ལས། སྨོན་དང་འཇུག་པའི་རང་བཞིན་གཉིས་ཡིན་ནོ། །ཞེས་གསུངས་པའི་ཕྱིར། དེ་གཉིས་ཀྱི་ཁྱད་པར་ནི། དཔེར་ན་མི་གཅིག་ཡུལ་ག་གེ་མོ་ཞིག་ཏུ་འགྲོ་བར་འདོད་པ་ལྟར་སེམས་ཅན་ཐམས་ཅད་སངས་རྒྱས་ཀྱི་སར་འགོད་པར་དམ་བཅའ་བ་ཙམ་དེ་སྨོན་པ་བྱང་ཆུབ་ཀྱི་སེམས་དང་། དཔེར་ན་མི་གཅིག་འགྲོ་བའི་ཡུལ་དེར་འཇུག་སྟེ་ལམ་ལ་དངོས་སུ་ཞུགས་པ་ལྟར་སེམས་ཅན་ཐམས་ཅད་སངས་རྒྱས་ཀྱི་སར་འགོད་པའི་ཆེད་དུ་དངོས་སུ་ཚུལ་ཁྲིམས་གསུམ་ལ་སློབ་ཅིང་ཐེག་པ་ཆེན་པོའི་ལམ་ཉམས་སུ་ལེན་པ་ལ་འཇུག་པའི་སེམས་བསྐྱེད་དེ་འཇུག་པ་བྱང་ཆུབ་ཀྱི་སེམས་བསྐྱེད་ཡིན་ཏེ། སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་གསུངས་པའི་ཕྱིར་རོ།།

མདོར་ཧྲིལ་གྱིས་བསྡུ་ན་སེམས་ཅན་ཐམས་ཅད་བླ་ན་མེད་པའི་བདེ་བ་རྫོགས་པའི་སངས་རྒྱས་ཀྱི་སར་འདོད་པའི་ཐབས་བདག་གིས་བསྒྲུབ་པར་བྱའོ་སྙམ་པ་དང་། དེ་ལྟར་བསམ་ནས་དངོས་སུ་ཐེག་པ་ཆེན་པོའི་ཆོས་ཉམས་སུ་ལེན་པ་དང་ལྡན་པའི་དེ་འདྲའི་བློ་དེ་ལ་ཀུན་རྫོབ་བྱང་ཆུབ་ཀྱི་སེམས་ཞེས་བྱ་བ་ཡིན་ནོ།།

འོ་ན་འདིར་གདོད་མའི་གནས་ལུགས་རྟོགས་པར་བྱ་བར་གདམས་པས་དེ་ནི་དོན་དམ་བྱང་ཆུབ་ཀྱི་སེམས་བསྐྱེད་ཡིན་ཞིང་། གཞུང་ཐུན་མོང་གི་ལུགས་ལྟར་དོན་དམ་བྱང་ཆུབ་ཀྱི་སེམས་བསྐྱེད་ནི་སེམས་བསྐྱེད་བཏགས་པ་བ་ལས་མཚན་ཉིད་པའང་མ་ཡིན་པར་བཞེད་པས་འདིར་བྱང་ཆུབ་ཀྱི་སེམས་བསྐྱེད་མཚན་ཉིད་པ་བསྒོམ་པར་མ་བསྟན་པ་ཡིན་ནམ་ཞེ་ན། དེ་ནི་མ་ཡིན་ཏེ། ཀུན་རྫོབ་བྱང་ཆུབ་ཀྱི་སེམས་བསྐྱེད་མཚན་ཉིད་པ་བསྟན་པ་ཡིན་པའི་ཕྱིར་ཏེ། རང་གཞན་མཁའ་ཁྱབ་ཀྱི་སེམས་ཅན་ཐམས་ཅད་ཀྱིས་འགྲོ་བའི་སེམས་ཉིད་རང་བྱུང་གི་སངས་རྒྱས་ཡིན་པ་ངོས་འཛིན་ཏེ། འབད་མེད་རང་བྱུང་གི་དོན་རྟོགས་ནས་གྲོལ་བར་འདོད་པ་ནི་དོན་གཉིས་ལྡན་པའི་ཀུན་རྫོབ་བྱང་ཆུབ་ཀྱི་སེམས་བསྐྱེད་ཡིན་ཕྱིར་འདིར་བསྟན་བྱ་གཙོ་བོར་གོ་ནུས་པའི་ཕྱིར་རོ།།

མཎྜལ་འབུལ་བ།

གསུམ་པ་མཎྜལ་ནི། རི་རབ་གླིང་བཞི་སྟོང་གསུམ་ཕྱིའི་མཎྜལ། །ནང་ལྟར་ཕུང་ཁམས་སྐྱེ་མཆེད་དགེ་ཚོགས་དང་། །གསང་བ་རང་སེམས་རྒྱན་གྱི་རོལ་མོའི་སྤྲིན། །དག་པ་གསུམ་ལྡན་ཞིང་ལ་རྟག་ཏུ་འབུལ། །ཞེས་པས་བསྟན་ཅིང་། དེ་ལ་ཡང་ཕྱི་ནང་གསང་བ་གསུམ་གྱི་མཎྜལ་ཡོད་པས་། དང་པོ་ཕྱིའི་མཎྜལ་ནི། རི་ཡི་རྒྱལ་པོ་རི༷་རབ༷་ལ་གསེར་གྱི་རི་བདུན་དང་རོལ་བའི་མཚོ་བདུན་གྱིས་བསྐོར་བའི་ཕྱི་རོལ་དུ་ཤར་ལུས་འཕགས་པོ་དང་། ལྷོ་འཛམ་བུ་གླིང་དང་། ནུབ་བ་ལང་སྤྱོད་དང་། བྱང་སྒྲ་མི་སྙན་ཏེ་གླིང༷་བཞི༷་དང་། ལུས་དང་ལུས་འཕགས་ཆུང་བ་སྟེ་ཤར་གྱི་གླིང་ཕྲན་གཉིས་དང་། རྔ་ཡབ་དང་རྔ་ཡབ་གཞན་པ་སྟེ་ལྷོ་ཡི་གླིང་ཕྲན་གཉིས་དང་། གཡོ་ལྡན་དང་ལམ་མཆོག་འགྲོ་སྟེ་ནུབ་ཀྱི་གླིང་ཕྲན་གཉིས་དང་། སྒྲ་མི་སྙན་དང་སྒྲ་མི་སྙན་གྱི་ཟླ་བོ་སྟེ་བྱང་གི་གླིང་ཕྲན་གཉིས་ཏེ་བརྒྱད་དང་། ཉི་མ་ཟླ་བ་དང་བཅས་པ་ནས་འདོད་ལྷ་དྲུག་གཟུགས་ཁམས་ཀྱི་ཚངས་པའི་འཇིག་རྟེན་མན་ཆད་གཅིག་ཏུ་བྱས་པ་དེ་འདྲ་སྟོང་ཕྲག་གཅིག་ཕྲེད་དུ་གཤིབས་པའི་མཐར་ལྕགས་རི་གཅིག་གིས་བསྐོར་བ་ནི་སྟོང་དང་པོ་སྤྱི་ཕུད་ཀྱི་འཇིག་རྟེན་ཟེར་ཞིང་། དེའི་སྟེང་དུ་བསམ་གཏན་གཉིས་པའི་འོད་གསལ་གྱི་ལྷ་གནས་གཅིག་པུས་ཁེབས་ནས་ཡོད་ལ། དེ་འདྲ་སྟོང་ཕྲེད་དུ་གཤིབ་པའི་མཐར་ལྕགས་རི་གཅིག་གིས་བསྐོར་བའི་གནས་དེ་ལ་སྟོང་བར་མའི་འཇིག་རྟེན་ཟེར་ཞིང་། དེའི་སྟེང་དུ་བསམ་གཏན་གསུམ་པའི་དགེ་རྒྱས་ཀྱི་ལྷ་གནས་གཅིག་པུས་ཁེབས་ནས་ཡོད་ལ། དེ་འདྲའི་བར་མའི་འཇིག་རྟེན་སྟོང་ཕྲེད་དུ་གཤིབ་པ་ལ་ལྕགས་རི་གཅིག་གིས་བསྐོར་བ་ལ་བསམ་གཏན་བཞི་བའི་འཕགས་པའི་གནས་གཙང་ལྔའི་འོག་མིན་གྱིས་ཁེབས་པ་མན་ཆད་ལ་སྟོང་གསུམ་གྱི་སྟོང་ཆེན་པོ་ཟེར་ཞིང་། དེ་ལ་རི་རབ་གླིང་བཞི་བྱེ་བ་ཕྲག་བརྒྱ་ཡོད་ཅིང་དེ་འདྲའི་སྟོ༷ང་གསུམ༷་དེ་ལ་བདག་པོས་ཡོངས་སུ་བཟུང་བ་དང་མ་བཟུང་བའི་ཡིད་དང་འོང་བའི་དངོས་པོ་ཅི་ཡོད་ཀྱིས་བརྒྱན་པའི་སྒོ་ནས་བླ་མ་དང་དབྱེར་མེད་པ་སངས་རྒྱས་སྤྲུལ་པའི་སྐུ་ཤཱཀྱ་ཐུབ་པ་ལ་སོགས་པ་ཕྱོགས་བཅུའི་འཇིག་རྟེན་ན་བཞུགས་པའི་རྒྱལ་བ་སྲས་དང་བཅས་པ་རྣམས་ལ་རང་གི་བསོད་ནམས་ཀྱི་ཚོགས་ཁྱད་པར་བ་གསོག་པའི་སླད་དུ་འབུལ་བ་ནི་ཕྱིའི༷་མ༷ཎྜལ༷་ཡིན་ནོ།།

ནང༷་ལྟར༷་ན་ནི་རང་རྒྱུད་གི་ཕུང༷་པོ་ལྔ་དང་། ཁམས༷་བཅོ་བརྒྱད་དང་། སྐྱེ༷་མཆེད༷་བཅུ་གཉིས་ཀྱིས་བསྡུས་པའི་ཆོས་ཐམས་ཅད་ཀྱི་རང་བཞིན་གནས་སུ་དག་པ་ལྷ་དང་ལྷ་མོའི་ཚོགས་ཐམས་ཅད་དང་། དུས་གསུམ་དུ་བསགས་པའི་རྣམ་དཀར་ཀྱི་དགེ༷་བ་ཟག་བཅས་ཟག་མེད་ཀྱི་ཚོགས༷་དང༷་བཅས་པ་རིགས་ལྔའི་ཞིང་ལ་སོགས་པར་ངེས་པ་ལྔ་ལྡན་གྱི་ཚུལ་ཏུ་འཁོར་ས་བཅུའི་སེམས་དཔའ་རྣམས་ལ་སྣང་བར་མཛད་པའི་བླ་མ་ལོངས་སྐུའི་ཚོགས་ལ་རང་གི་བསོད་ནམས་ཀྱི་ཚོགས་ཀྱི་སླད་དུ་འབུལ་བ་ནི་ནང་གི་མཎྜལ་ལོ།།

གསང༷་བ༷་ལྟར་ན་རང༷་སེམས༷་གདོད་ནས་བདེན་པར་མ་གྲུབ་པ་སྤྲོས་པའི་མཚན་མ་ཐམས་ཅད་དང་ཉེ་བར་བྲལ་ཡང་། ལྷུན་གྲུབ་འོད་གསལ་གྱི་སྣང་ཆ་འགགས་མེད་སྐུ་དང་ཡེ་ཤེས་རྒྱན༷་གྱི༷་རོལ༷་མོ༷འི་སྤྲིན༷་ཆེན་པོར་རང་ཤར་བའི་ཚུལ་དུ་སྣང་པའི་དོན་དམ་ལྷན་ཅིག་སྐྱེས་པའི་སེམས་ཉིད་གཉུག་མ་གཤིས་ཀྱི་རིག་པ་དེ་མཆོད་བྱ་མཆོད་བྱེད་དང་བྲལ་བར་ཀ་དག་ཆོས་སྐུའི་ཀློང་དུ་བྱ་རྩོལ་ཉེ་བར་ཞི་བའི་ཚུལ་དུ་རང་གནས་པ་ནི་གསང་བའི་མཎྜལ་སྟེ་རང་བཞིན་རྣམ་པར་དག་པ་བླ་མ་ཆོས་ཀྱི་སྐུ་ལ་འབུལ་བར་བྱའོ་ཞེས་པའོ།།

དེ་འདྲའི་ཕྱི་ནང་གསང་བ་གསུམ་གྱི་མཎྜལ་དེ་ལུས་དག་པ་སྤུལ་སྐུའི་ཞིང་དང་། ངག་དག་པ་ལོངས་སྐུའི་ཞིང་དང་། ཡིད་དག་པ་ཆོས་སྐུའི་ཞིང་སྟེ་དག༷་པ༷་གསུམ༷་དང་ལྡན༷་པའི་ཞིང༷་ལ༷་དུས་རྟག༷་ཏུ༷་འབུལ༷་བར་བྱ་བ་ནི་བསོད་ནམས་ཀྱི་ཚོགས་གསོག་པའི་ཐབས་དང་དོན་ཆེན་པོ་དང་ལྡན་པའི་མཎྜལ་འབུལ་བའི་ཚུལ་ཡིན་པ་ཤེས་པར་བྱའོ།།

དེ་ལྟར་མཎྜལ་ཞེས་པ་ལེགས་སྦྱར་གྱི་སྐད་ཡིན་ཞིང་བོད་སྐད་དུ་དཀྱིལ་འཁོར་ཞེས་པ་ཡིན་པས་རི་རབ་གླིང་བཞི་ལྕགས་རི་མུ་འཁྱུད་དང་བཅས་པའི་དཀྱིལ་འཁོར་དེ་དཀོན་མཆོག་གི་ཞིང་ལ་འབུལ་ཏེ་ཚོགས་གསོག་པའི་དོན་དུ་གོ་དགོས་ཤིང་། དེས་ན་མཎྜལ་ཞེས་པའི་གསེར་དངུལ་ལ་སོགས་པས་བཟོས་པའི་རྫས་དེ་དམིགས་རྟེན་ཙམ་ཡིན་ཞིང་། དེ་ཉིད་རི་རབ་གླིང་བཞིར་དམིགས་ནས་འབུལ་བ་ནི་དབུལ་བོ་དངོས་རྫས་མི་འབྱོར་བ་དང་། སླ་ཆོས་ཙམ་གྱིས་ཚོགས་གསོག་ཐབས་ཤིག་ཡིན་ལ། རང་ལ་འབྱོར་བ་ཡོད་ན་དངོས་སུ་རྟ་གླང་ཁང་ཁྱིམ་མལ་སྟན་ཟས་གོས་རིན་པོ་ཆེ་ལ་སོགས་པ་ཕུལ་ནས་ཚོགས་གསོག་པ་དང་། གཞན་ཡང་ཚོགས་གསོག་ཡན་ལག་བདུན་པ་ལ་སོགས་པའི་ཚོགས་གསོག་པའི་སྒོ་ཀུན་ལ་འཇུག་དགོས་པ་ཡིན་ནོ།།

རྡོར་སེམས་སྒོམ་བཟླས།

བཞི་བ་རྡོར་སེམས་བསྒོམ་བཟླས་ནི། ཕྱི་ནང་གསང་བ་གསུམ་གྱི་སྒྲིབ་སྦྱོང་གི་ཐབས་ཡོད་པ་ལས།དང་པོ་ཕྱིའི་སྒྲིབ་སྦྱོང་ནི། ཕྱི་ལྟར་བླ་མ་རྡོར་སེམས་སྤྱི་བོར་བསྒོམ། །ཞེས་པས་བསྟན་ཅིང་། དེ་ལ་ཡང་ཕྱི༷་ལྟར༷་གྱི་སྡིག་སྒྲིབ་སྦྱོང་བའི་ཐབས་ནི། ངོ་བོ་རང་གི་རྩ་བའི་བླ༷་མ༷་དང་དབྱེར་མེད་པ་ལ་རྣམ་པ་བཅོམ་ལྡན་འདས་རྡོ༷་རྗེ་སེམས༷་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཞབས་གཉིས་དཀྱིལ་ཀྲུང་གིས་བཞུགས་པ། ཕྱག་གཡས་པའི་རྡོ་རྗེ་དཀར་པོ་རྩེ་ལྔ་བ་ཐུགས་ཀར་གཏོད་དེ་འཛིན་པ། ཕྱག་གཡོན་པས་དངུལ་དཀར་གྱི་དྲིལ་བུ་སྐུའི་སྟ་ཟུར་གཡོན་དུ་བརྟེན་པ། རིན་པོའི་དབུ་རྒྱན། སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། དཔུང་གདུབ། སེ་མོ་དོ། དོ་ཤལ་ལ་སོགས་པས་བརྒྱན་པ། དར་སྣ་ཚོགས་ཀྱི་ཤམ་ཐབས་དང་། སྟོད་གཡོགས། སྐ་རགས་ལ་སོགས་པས་སྤྲས་ཤིང་། གནག་སྣུམ་དབུ་སྐྲ་སིལ་མ་སྤྱི་བོར་ཐོར་གཙུག་བཅིངས་པའི་ལྷག་མས་སྐུ་རྒྱབ་ཁེབས་པ། ཡུམ་སྙེ་མ་དཀར་མོ་རྡོར་དྲིལ་འཛིན་པས་པང་དུ་འཁྱུད་པ་གཅིག་རང་ཐ་མལ་དུ་གནས་པའི་སྤྱི་༷བོར༷་ཁྲུ་གང་ཙམ་གྱི་ནམ་མཁར་པདྨ་དང་ཟླ་བའི་གདན་ལ་གསལ་བ། དེའི་ཐུགས་ཀར་པདྨ་དང་ཟླ་བའི་གདན་སྲན་མ་ཕྱེད་པ་ཙམ་གྱི་སྟེང་དུ་ཡི་གེ་ཧཱུྃ་མཐིང་ག་གྱེན་དུ་འགྲེང་བའི་མཐའ་འཁོར་དུ་ཡི་གེ་བརྒྱ་བའི་སྔགས་ཀྱི་ཡིག་འབྲུ་ཐམས་ཅད་ལངས་ཏེ་གཡས་སུ་ཀྱི་ལི་ལི་འཁོར་བ་ལས་སྡིག་སྒྲིབ་ཁྲུད་བྱེད་ཀྱི་ཡེ་ཤེས་ཀྱི་བདུད་རྩི་དཀར་པོ་འོ་མ་ལྟ་བུ་ཆར་འབབས་པ་ལྟར་བབས་པས་རྡོ་རྗེ་སེམས་དཔའི་སྐུ་ལུས་གང་ཞིང་། ལྷག་མ་ཞབས་ཀྱི་མཐེ་བོང་ནས་ཕྱིར་ལུད་པ་རང་གི་སྤྱི་བོའི་ཚངས་བུག་ནས་ཞུགས་ཏེ་ལུས་ནང་ཀུན་གང་ཞིང་བཀྲུས་པས་སྡིག་སྒྲིབ་ཉམས་ཆགས་ཐམས་ཅད་དུད་ཁུ་དང་སོལ་ཁུ་ལྟ་བུ་ནག་ནུར་ནུར་གྱི་རྣམ་པར་ཕྱིར་ཐོན་ཅིང་ལུས་ཕྱི་ནང་ཀུན་དག་པ་གཙང་མའི་རྣམ་པར་འཁྲུས་ནས་རང་ལུས་དུང་ལྟར་དཀར་ལྟེམ་མེར་གྱུར་པར་བསྒོམ༷་མོ།།

སྔར་བྱས་ཀྱི་མི་དགེ་བ་ལ་འགྱོད་སེམས་དང་ཕྱིན་ཆད་དེ་ལྟ་བུ་མི་བགྱི་སྙམ་པའི་སྡོམ་སེམས་ཀྱིས་ཡི་གེ་བརྒྱ་བ་དང་བཛྲ་ས་ཏྭ་ངག་ཏུ་སྒྲ་གསལ་དག་དང་ལྡན་པར་དལ་བུར་བཟླ་བར་བྱ། མཐར་སྤྱི་བོའི་རྡོ་རྗེ་སེམས་དཔའ་ཞལ་འཛུམ་པ་དང་བཅས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉམས་ཆགས་ཐམས་ཅད་དག་པར་གྱུར་ཏོ་ཞེས་གཟེངས་བསྟོད་པའི་དབུགས་དབྱུང་བ་དང་མཉམ་དུ་རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་ཞིང་། རང་ཉིད་སྐད་ཅིག་གིས་རྡོ་རྗེ་སེམས་དཔར་གནས་གྱུར་པ་དང་། དེ་ནས་རྡོ་སེམས་ཡང་དམིགས་མེད་དུ་བསྡུ་བ་སོགས་ཐུན་བཅད་དེ་འབད་པར་བྱའོ།།

སྤྱིར་སྡིག་པ་བཤགས་པ་ལ་ཡིག་བརྒྱ་བཟླ་བ་དང་རྡོར་སེམས་བསྒོམ་པ་ཙམ་གྱིས་མི་ཆོག་པར་གཉེན་པོ་སྟོབས་བཞི་ཚང་བ་ཤིན་ཏུ་གལ་ཆེ། སྔོན་གྱི་སྨོན་ལམ་གྱི་སྟོབས་ཀྱིས་རྡོར་སེམས་སྒོམ་བཟླས་འདི་སྡིག་པ་འདག་སྟོབས་གཞན་ལས་ཆེ་བ་ཡིན་མོད་སྟོབས་བཞི་ཚང་ན་གཞན་པའི་ལྷ་བསྒོམ་པ་དང་། མདོ་སྡེ་ཟབ་མོ་དང་རྒྱུད་ཀློག་པ་དང་། རྟེན་ལ་ཕྱག་དང་སྐོར་བ་བྱེད་པ་དང་། གཟུངས་སྔགས་བཟླ་བ་དང་། ཕྱིན་དྲུག་སོགས་དགེ་བ་གང་དང་གང་ལ་འབད་ཀྱང་སྡིག་པ་འདག་ངེས་པ་ཅན་ཡིན་པ་ནི་མདོ་རྒྱུད་མན་ངག་དག་ན་གསལ་ལོ།།

གཉེན་པོ་སྟོབས་བཞི་ནི། དང་པོ་རྟེན་གྱི་སྟོབས་སྡིག་པ་བཤགས་ཡུལ་དང་། སུན་འབྱིན་གྱི་སྟོབས་སྔར་བྱས་ཀྱི་སྡིག་པ་ལ་འགྱོད་སེམས་བསྐྱེད་པ་དང་། སོར་ཆུད་པའི་སྟོབས་ཕྱིན་ཆད་ཅི་ནས་ཀྱང་སྔར་བྱས་པ་དེ་འདྲའི་སྡིག་པ་མི་དགེ་བ་དག་མི་བྱ་སྙམ་པའི་དམ་བཅའ་བ་དང་། ཀུན་སྤྱོད་ཀྱི་སྟོབས་སྡིག་པ་འདག་པའི་ཐབས་སྣ་ཚོགས་ལ་བརྩོན་པ་དང་བཞི་བོ་ཡིན་ལ། སྡིག་པ་ཅི་བསགས་དྲན་པ་ཐམས་ཅད་ནི་མི་གསང་མི་སྦེད་པར་བཤགས་ཡུལ་གྱི་དྲུང་དུ་བརྗོད་དགོས་པ་ཡིན་པས་སྡིག་བཤགས་ཀྱི་གཞུང་དག་ཏུ་མཐོལ་ལོ། །བཤགས་སོ། །མི་འཆབ་བོ། །མི་སྦེད་དོ། །ཞེས་གསུངས་པའི་མི་འཆབ་མི་སྦེད་པའི་དོན་ནི་དངོས་སུ་གོ་ལ་མཐོལ་ལོ་ཞེས་པ་སྨྲ་བའི་དོན་ཡིན་ནོ།།

མི་དྲན་པ་དང་ཁྱད་པར་ཚེ་རབས་ཐོག་མེད་ནས་བསགས་པའི་སྡིག་སྒྲིབ་དག་ནི་དེ་འདྲ་ཡོད་སྲིད་ན་སྙམ་དུ་ཡིད་ཡུལ་དུ་བླང་ནས་བཤགས་པར་བྱ་དགོས་པ་ལགས་ཤིང་། བཤགས་བྱའི་སྡིག་པ་ཡང་སྦྱང་བྱ་སྡིག་པའི་སྒོ་དྲུག་ཅེས་པ། དང་པོ་དུས་ཀྱི་སྒོ་ཚེ་རབས་ཐོག་མེད་ནས་དེ་རིང་གི་བར་དུ་བསགས་པའི་སྡིིག་པ་མི་དགེ་བ་ དང་། གཉིས་པ་ཀུན་སློང་གི་སྒོ་འདོད་ཆགས་ཞེ་སྡང་གཏི་མུག་ང་རྒྱལ་སོགས་ཀྱིས་ཀུན་ནས་བསླངས་པའི་སྡིག་པ་མི་དགེ་བ་དང་། གསུམ་པ་འགྲིམ་པའམ་བསགས་པའི་སྒོ་ལུས་ངག་ཡིད་གསུམ་གྱིས་བསགས་པའི་སྡིག་པ་དང་། བཞི་བ་ངོ་བོའི་སྒོ་མི་དགེ་བ་བཅུ་དང་མཚམས་མེད་པ་ལྔ་ལ་སོགས་པ་ངོ་བོ་སྡིག་པ་མི་དགེ་པར་གྱུར་པ་ཐམས་ཅད་དང་། ལྔ་བ་ཡུལ་གྱི་སྒོ་ཞི་བ་འདས་ཀྱི་ཕྱོགས་སངས་རྒྱས་དང་། འཕགས་པ་ས་ཐོབ་པ་དང་། ཆོས་དང་བླ་མ་ལ་སོགས་པར་གཤེ་ཞིང་སྐུར་བ་འདེབས་པ་ལྟ་བུ་དེ་དག་ལ་བརྟེན་ནས་བསགས་པའི་སྡིག་པ་དང་། ཀུན་ཉོན་འཁོར་བའི་ཕྱོགས་ཕ་མ་དང་། འགྲོ་བ་གཞན་ཀུན་ལ་བརྟེན་པའི་སྡིག་པ་མི་དགེ་བ་ཐམས་ཅད་དང་། དྲུག་པ་བྱེད་ལས་ཀྱི་སྒོ་ངན་སོང་གི་སྡུག་བསྔལ་མུ་མཐའ་མེད་པ་སྐྱེད་བྱེད་དུ་གྱུར་པའི་སྡིག་པ་མི་དགེ་བ་རྣམས་སོ།།

དེ་ཡང་བསགས་ཚུལ་ལ་གཞི་བསམ་པ་སྦྱོར་བ་མཐར་ཐུག་གི་ཡན་ལག་བཞི་ཚང་བས་བསགས་པ་སྡིག་པའི་དངོས་གཞི་རྫོགས་པ་དང་། འགའ་རེ་མ་ཚང་བས་བསགས་པ་ཡན་ལག་གི་ཉེས་པ་དང་། ཉེས་པ་ཕྲ་མོར་གྱུར་པ་དང་། བསམ་པ་ཡང་སྡིག་པ་ཡིན་པར་མ་ཤེས་པ་དང་། གོ་ཐོས་ཡོད་ཀྱང་སྡིག་པ་ཡིན་པར་ཡིད་མ་ཆེས་པའི་མ་གུས་པ་དང་། སྡིག་པ་ཡིན་པར་ཤེས་ཤིང་བྱ་མི་རུང་བ་ལ་ཡིད་ཆེས་ཙམ་ཡོད་ཀྱང་རྒོད་བག་གི་དབང་དུ་ཤོར་ཏེ་སྒོ་གསུམ་སྡོམ་མ་ནུས་པའི་བག་མེད་པ་དང་། ཉོན་མོངས་པ་མང་ཞིང་རགས་པའམ་ཆེ་བའི་དབང་གིས་སྒོ་གསུམ་ཉོན་མོངས་པའི་དབང་དུ་ཤོར་ནས་བྱས་པ་གང་ཡིན་ཡང་ཁྱད་མེད་པར་སྡིག་པའམ་ཉེས་པ་ཡོད་པ་ཡིན་ཏེ། འདུལ་བ་བསྡུ་བ་ལས། དེ་ཡི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པའོ། །ཞེས་གསུངས་པའི་ཕྱིར་རོ།།

སྡིག་བཤགས་ཀྱི་ཐབས་ལ་ཡང་སྦྱོར་བ་རྒྱལ་བའི་སྐུ་གསུང་ཐུགས་ཀྱི་རྟེན་ནམ་བླ་མ་དང་ཡུལ་གཉན་པོའི་དྲུང་དུ་ཕྱག་དང་མཆོད་པ་ལ་སོགས་པ་ཕུལ་ནས་སྡིག་པ་བཤགས་པའི་ཉེར་བསྡོག་རྩོམ་པ་དང་། དངོས་གཞི་སྔར་བྱས་ཀྱི་སྡིག་པ་དངོས་སུ་བཤགས་པ་དང་། རྗེས་སུ་རྒྱལ་བའི་བཀའ་མདོ་རྒྱུད་དག་ལས་སྡིག་པ་བཤགས་ན་འདག་ཐུབ་པར་གསུངས་པས་ད་ནི་བདག་གི་སྡིག་པ་དེ་རྣམས་དག་ཡོད་སྙམ་པའི་ངེས་ཤེས་བསྐྱེད་ཅིང་སྡིག་བཤགས་ལ་འབད་པའི་དགེ་རྩ་རྫོགས་བྱང་ལ་བསྔོ་དགོས་པ་ལགས་སོ།།གཉིས་པ་ནང་གི་སྦྱོང་ངམ་ནང་གི་བསྒོམ་བཟླས་ནི། ནང་དུ་ཧཾ་ཡིག་བདེ་ཆེན་ཡུམ་དང་སྦྱོར། །ཞེས་པས་བསྟན་ཅིང་དོན་ནི། རྡོར་སེམས་ལ་བརྟེན་ནས་ནང༷་ལྟར་གྱི་སྡིག་སྒྲིབ་སྦྱོང་བའི་ཐབས་ལ་ནི་རང་ཉིད་རྡོར་སེམས་ཡུམ་དང་བཅས་པ་བསྒོམ་པའི་རྩ་དབུ་མའི་ཡར་སྣེ་སྤྱི་བོ་བདེ་ཆེན་འཁོར་ལོའི་རྩ་འཁོར་གྱི་ནང༷་དུ༷་བྱང་ཆུབ་སེམས་ཀྱི་ངོ་བོ་ཡི་གེ་ཧཾ༷་ཡིག༷་དཀར་པོ་མགོ་ཐུར་དུ་བསྟན་པ་ཐབས་བདེ་བ་ཆེན་པོ་མཚོན་བྱེད་དང་། ཡུམ་གྱི་གསང་བ་བདེ་སྐྱོང་འཁོར་ལོའི་རྩ་འདབ་ཏུ་ཡེ་ཤེས་ཀྱི་གཏུམ་མོའི་ངོ་བོ་ཡི་གེ་ཨ་ཤད་ཀྱི་རྣམ་པ་ཤེས་རབ་སྟོང་པ་ཉིད་ཀྱི་མཚོན་བྱེད་དུ་གསལ་གདབ། དེ་ནས་བདེ༷་ཆེན༷་ལྷན་ཅིག་སྐྱེས་པའི་ཡེ་ཤེས་ངོས་བཟུང་བའི་ཆེད་དུ་ཡུམ༷་དང༷་སྦྱོར༷་ཞིང་རླུང་དབུ་མར་བཟུང་སྟེ་ཡུམ་གྱི་གསང་བའི་ཨ་ཤད་ལ་མེ་སྦར། མེ་དེ་ཡུམ་གྱི་པདྨོ་ལས་ཡབ་ཀྱི་རྡོ་རྗེའི་སྦུབས་ནས་དབུ་མའི་ནང་བརྒྱུད་ནས་སྤྱི་བོའི་ཧཾ་ཡིག་བཞུས་པ་ལས་ཐིག་ལེ་ཆར་ལྟར་འཛེག་པ་མགྲིན་པ་དང་། སྙིང་ག། ལྟེ་བ། གསང་བའི་རྩ་འཁོར་རྣམས་སུ་བབས་པ་ལས་དགའ་བདེའི་ཡེ་ཤེས་ངོས་བཟུང་སྟེ་གཉེན་པོ་སྟོབས་བཞི་དྲན་པས་ཡང་ཡང་བསྒོམ་པ་ནི་ནང་གི་བསྒོམ་བཟླས་སོ།།

གསུམ་པ་གསང་བའི་སྒྲིབ་སྦྱོང་ངམ་གསང་བའི་བསྒོམ་བཟླས་ནི། གསང་བ་རིག་སྟོང་དྲི་མས་མ་གོས་པ། །སྒྲིབ་སྦྱོང་རྒྱལ་པོ་རྡོར་སེམས་བསྒོམ་བཟླས་གཟབ། །ཅེས་པས་བསྟན་ལ། གསང༷་བ༷་ལྟར་གྱི་རྡོར་སེམས་བསྒོམ་བཟླས་སམ་སྡིག་པ་བཤགས་པའི་ཐབས་ནི། འཁོར་འདས་ཀྱིས་བསྡུས་པའི་ཆོས་ཐམས་ཅད་རིག་པའི་ཡེ་ཤེས་ཕྱོགས་གར་ཡང་མ་ལྷུང་རྒྱ་གང་དུ་ཡང་མ་ཆད་པར་སྤྲོས་པ་ཐམས་ཅད་དང་བྲལ་བའི་ཀློང་དུ་འུབ་ཀྱིས་རྫོགས་པའི་རིག༷་པ་དང་སྟོང༷་པ་དབྱེར་མེད་པ་གཟུང་འཛིན་སྤྲོས་པའི་དྲི༷་མས༷་ཡེ་ནས་མ༷་གོས༷་པ༷་ལ་མཉམ་པར་བཞག་ན་སྒྲིབ༷་སྦྱོང༷་ཐམས་ཅད་ཀྱི་མཆོག་གམ་རྒྱལ༷་པོ༷་ལྟ་བུ་ཡིན་ཏེ། ཇི་སྐད་དུ། ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་གསུངས། །ཞེས་གསུངས་པའི་ཕྱིར། དེས་ན་དེ་འདྲའི་སྒྲིབ་སྦྱོང་གི་མཆོག་དམིགས་མེད་ཀྱི་ལྟ་བ་བསྒོམ་པ་སོགས་དང་རྡོར༷་སེམས༷་བསྒོམ༷་བཟླས༷་ལ་དུས་རྟག་ཏུ་བརྩོན་པ་གཟབ༷་ནན་གྱིས་སྡིག་པ་བཤགས་པའི་ཐབས་ལ་འབད་པར་བྱའོ་ཞེས་པའོ།།

བླ་མའི་རྣལ་འབྱོར།

ལྔ་བ་བླ་མའི་རྣལ་འབྱོར་ལ་ནི། བླ་རྣམ་བསྒོམ་ཚུལ་དངོས་དང་། གསོལ་བ་ཕུར་ཚུགས་སུ་འདེབས་པ་དང་།བྱིན་རླབས་འཇུག་པའི་ཚད་བསྟན་པ་དང་གསུམ་ལས། དང་པོ་ལ་ཡང་ཕྱི་ནང་གསང་བ་གསུམ་ཡོད་པ་ལས། དང་པོ་ཕྱི་ལྟར་གྱི་བླ་མའི་རྣལ་འབྱོར་ནི། བླ་མ་མདུན་མཁར་བསྒོམ་ནས་དབང་བཞི་བླང་། །ཞེས་པས་བསྟན་ཅིང་། དེ་ཡང་གཞུང་དུ་མར་བྱིན་རླབས་འཇུག་པའི་དགོས་ཆེད་ལ་སོགས་པ་ཡོད་ཕྱིར་རང་ཉིད་ཐ་མལ་དུ་མི་འཛིན་པར་ཡེ་ཤེས་པའི་ལྷ་སྐུ་ཞིག་གི་རྣམ་པར་བསྒོམ་དགོས་པར་གསུངས་ཤིང་། གཞུང་དུ་མར་བསྒོམ་པར་བཤད་བྱའི་ལྷ་སྐུ་ལ་མི་མཐུན་པ་མང་ལ། གནམ་ཆོས་ལས་རྡོ་སེམས་བསྒོམ་བཟླས་ཀྱི་མཇུག་ཏུ་རྡོ་རྗེ་སེམས་དཔའ་འོད་དུ་ཞུ་ནས་རང་ལ་ཐིམ་ཞིང་རང་རྡོ་རྗེ་སེམས་དཔར་གྱུར་པ་བསྡུ་རིམ་མི་བྱེད་པར་རྡོ་རྗེ་སེམས་དཔའི་སྤྱི་བོར་བླ་མ་བསྒོམ་པར་གསུངས། འདིར་ནི་རྡོར་སེམས་འོད་ཞུ་དང་། བླ་མ་གང་གི་རྣམ་པར་བསྒོམ་པ་དང་། རང་གང་གི་རྣམ་པར་བསྒོམ་པ་སོགས་གསལ་ཁ་མི་སྣང་ཡང་རྡོར་སེམས་འོད་ཞུ་དང་མཐར་རང་ཡང་དམིགས་མེད་དུ་བསྡུ་བ་བཅས་གཞུང་གཞན་གྱི་རྒྱས་འགེབས་བྱས་པ་ཡིན་ལ། འདིར་ཡང་སྙིང་ཐིག་གི་གཞུང་ལྟར་བླ་མ་པདྨ་འབྱུང་གནས་དང་རང་ཉིད་ངོ་བོ་མཁའ་འགྲོ་ཡེ་ཤེས་མཚོ་རྒྱལ་ལ་རྣམ་པ་རྡོ་རྗེ་རྣལ་འབྱོར་མའི་རྣམ་པར་བསྒོམ་པར་བྱས་ན་མི་རུང་བ་མེད་པས། དེ་ལྟར་བྱས་ཏེ་རང་ཉིད་མཁའ་འགྲོ་རྡོ་རྗེ་རྣལ་འབྱོར་མ་སྐུ་མདོག་དམར་པོ་གཅེར་བུ་རུས་པའི་རྒྱན་གྱིས་བརྒྱན་པ་ཕྱག་གཡས་ཐོད་པའི་ཌ་མ་རུ་དང་། ཕྱག་གཡོན་གྲི་གུག་དཀུར་བསྟེན་པ་བཞེངས་སྟབས་ཅན་སྤྱན་གཉིས་ཧྲིག་ཧྲིག་བླ་མའི་ཞལ་ལ་བལྟ་བ་ཞིག་གསལ། དེ་བླ༷་མ༷་བསྒོམ་པ་ནི་རྡོ་རྗེ་རྣལ་འབྱོར་མ་རང་གི་མདུན༷་གྱི་ནམ་མཁར༷་ཅུང་ཟད་འཕགས་པའི་གནས་སུ་ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་རྗེ་བཙུན་གུ་རུ་རིན་པོ་ཆེ་པདྨ་འབྱུང་གནས་སྐུ་མདོག་དཀར་དམར་ཞི་མ་ཁྲོ་ལ་འཛུམ་པའི་ཉམས་དང་བཅས་པ། ཞལ་ཕྱག་ཆ་ལུགས་ཐམས་ཅད་གོང་གི་སྐྱབས་འགྲོའི་ཚོགས་ཞིང་གི་སྐབས་སུ་བཤད་པ་ལྟ་བུ་ཞིག་བསྒོམས་པའི་མཐའ་འཁོར་དང་སྟེང་ཕྱོགས་སུ། བརྒྱུད་པའི་བླ་མ་རྣམས་སྤྲིན་དཔུང་འཁྲིགས་པ་ལྟར་བཞུགས་པར་གསལ་བའམ་ཡང་ན་ཀུན་འདུས་ནོར་བུའི་ལུགས་སུ་བསྒོམ་པ་གང་བྱས་ཀྱང་རུང་ལ། དེའི་སྤྱི་བོར་སྐུའི་ངོ་བོ་ཨོཾ་དཀར་པོ་དང་། མགྲིན་པར་གསུང་གི་ངོ་བོ་ཨཱཿ དམར་པོ། སྙིང་ཀར་ཐུགས་ཀྱི་ངོ་བོ་ཧཱུྃ་མཐིང་ག་གསུམ་བསྒོམ༷ས་ན༷ས་སྤྱི་བོའི་ཨོཾ་ལས་འོད་ཟེར་དཀར་པོ་འཕྲོས་ཏེ་རང་གི་སྤྱི་བོར་ཐིམ་པས་སྐུ་བུམ་པའི་དབང་ཐོབ། ལུས་ཀྱི་སྒྲིབ་པ་དག། ལུས་བསྐྱེད་རིམ་བསྒོམ་པ་ལ་དབང་ཞིང་འབྲས་བུ་སྤྲུལ་སྐུ་ཐོབ་པའི་སྐལ་བ་རྒྱུད་ལ་བཞག་པར་བསམ། མགྲིན་པའི་ཨཱཿ ལས་འོད་ཟེར་དམར་པོ་འཕྲོས་ཏེ་རང་གི་མགྲིན་པར་ཐིམ་པས་ངག་གི་སྒྲིབ་པ་དག། གསུང་གསང་བའི་དབང་ཐོབ། ལམ་རྫོགས་རིམ་སྒོམ་པ་ལ་དབང་ཞིང་འབྲས་བུ་ལོངས་སྐུ་ཐོབ་པའི་སྐལ་བ་རྒྱུད་ལ་བཞག་པར་མོས། ཐུགས་ཀའི་ཧཱུྃ་ལས་འོད་ཟེར་མཐིང་ག་འཕྲོས་ཏེ་རང་གི་སྙིང་གར་ཐིམ་པས་ཡིད་ཀྱི་སྒྲིབ་པ་དག། ཤེས་རབ་ཡེ་ཤེས་ཀྱི་དབང་ཐོབ། ལམ་ཐིག་ལེ་བསྒོམ་པ་ལ་དབང་ཞིང་འབྲས་བུ་ཆོས་སྐུ་ཐོབ་པའི་སྐལ་བ་རྒྱུད་ལ་བཞག་པར་བསམ། དེ་ནས་སླར་ཡང་བླ་མའི་སྐུའི་ཆ་ཀུན་ནས་འོད་ཟེར་ཁ་དོག་སྣ་ལྔ་འཕྲོས་ཏེ་རང་གི་གནས་ལྔར་ཐིམ་པས་སྒོ་གསུམ་ཆ་མཉམ་པའི་སྒྲིབ་པ་དག། དབང་བཞི་བ་ཚིག་དབང་རིན་པོ་ཆེ་ཐོབ། ལམ་བསྐྱེད་རྫོགས་དབྱེར་མེད་བསྒོམ་པ་ལ་དབང་ཞིང་། འབྲས་བུ་ངོ་བོ་ཉིད་སྐུ་རྒྱུད་ལ་ཐོབ་པའི་སྐལ་བ་ཅན་དུ་བྱས་པར་བསམ་པའི་སྒོ་ནས་དབང༷་བཞི༷་དེ་ལྟར་ལེགས་པར་བླང༷་ཞིང་གསོལ་བ་ཤུགས་དྲག་འདེབས་པར་བྱ་བ་ནི་ཕྱིའི་བླ་མའི་རྣལ་འབྱོར་སྒོམ་ཚུལ་ལོ།།

གཉིས་པ་ནི། དབུ་མའི་ནང་བསྒོམ་བདེ་སྟོང་འབར་འཛག་དང་། །ཞེས་པའི་རྐང་པ་གཅིག་གིས་བསྟན་ཅིང་དོན་ནི། རང་ལུས་རྡོ་རྗེ་རྣལ་འབྱོར་མ་བསྒོམ་པའི་ལུས་དབུས་སུ་རྩ་དབུ༷་མའི༷་ནང༷་དུ་ངོ་བོ་བླ་མ་ཡིན་པ་ལ་རྣམ་པ་ཧཾ་ཡིག་དཀར་པོ་གཅིག་བསྒོམ༷་ནས་རླུང་དྷཱུ་ཏཱིར་ཐིམ་པའི་རླུང་གིས་ལྟེ་བའི་རཾ་ཡིག་ཨ་ཤད་ཀྱི་རྣམ་པ་ལས་གཏུམ་མོའི་མེ་སྦར་ཏེ་ཧཾ་ཡིག་བཞུས་པས་བླ་མའི་སྐུ་གསུང་ཐུགས་གསུམ་རྗེས་ཆགས་ཀྱི་བདུད་རྩིར་ཞུ་ནས་རང་གི་ལུས་ངག་ཡིད་གསུམ་གྱི་གནས་མགྲིན་པ་སྙིང་ཀ་ལྟེ་བ་རྣམས་ལ་ཐིམ་ཞིང་དགའ་བཞིའི་ཡེ་ཤེས་ཉམས་སུ་མྱོང་བ་དང་ཆབ་གཅིག་བླ་མའི་ཐུགས་དེ་རང་སེམས་བདེ༷་སྟོང༷་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་དབྱེར་མི་བྱེད་པར་གྱུར་བར་བསྒོམ་པའི་གོང་བཤད་ཐིག་ལེ་འབར༷་འཛག༷་གི་རྣལ་འབྱོར་ལྟར་བསྒོམ་པ་དང༷་མཐུན་པར་ཉམས་སུ་ལེན་པ་ནི་ནང་གི་བླ་མའི་རྣལ་འབྱོར་རོ།།

གསུམ་པ་ནི། སྙིང་ཁར་བསྒོམས་ནས་ཐུགས་ཡིད་དབྱེར་མེད་བསྲེ། །བླ་མའི་རྣལ་འབྱོར་རྒྱུན་དུ་ཆག་མེད་མཛོད། །ཅེས་པའི་གཙོ་བོ་ཚིག་རྐང་དང་པོས་བསྟན་ཅིང་ཚིག་རྐང་ཕྱི་མ་དེ་གསུམ་ཀའི་ཐ་མའི་གསལ་བྱེད་ཡིན་ཚུལ་འོག་ཏུ་འཆད། དོན་ནི་དུས་རྟག་ཏུ་བླ་མ་དེ་ཉིད་རང་གི་སྙིང༷་ཁ༷ར་རྩ་འདབ་མ་བརྒྱད་པའི་དབུས་སུ་བསྒོམས༷་ནས༷་བླ་མའི་ཐུགས༷་དང་རང་གི་ཡིད༷་གཉིས་གདོད་ནས་བདེན་པར་མ་གྲུབ་ཅིང་སྤྲོས་པའི་མཚན་མ་ཉེ་བར་ཞི་བའི་བདག་ཉིད་ཅན་གྱི་གཉུག་མ་ལྷན་ཅིག་སྐྱེས་པའི་ཡེ་ཤེས་དང་ཐ་དད་མེད་པར་དབྱེར༷་མེད༷་རོ་གཅིག་ཏུ་བསྲེ༷་བར་བྱས་ཏེ་གནས་ལུགས་བསམ་བརྗོད་མེད་པའི་ངང་ལ་མཉམ་པ་བཞག་པ་ནི་གསང་བའི་བླ་བའི་རྣལ་འབྱོར་ཞེས་བྱ་སྟེ། དེ་འདྲའི་ཕྱི་ནང་གསང་བ་གསུམ་གྱི་བླ༷་མའི༷་རྣལ༷་འབྱོར༷་དེ་རྒྱུན༷་དུ༷་ཆག༷་མེད༷་ཆད་མེད་དུ་ཉམས་སུ་ལེན་པ་ལ་བརྩོན་པར་མཛོད༷་ཅིག་ཅེས་ཞལ་གདམས་མཛད་པ་པོས་ཉེ་བར་ནན་སྐུལ་མཛད་པ་ཡིན་ཞིང་། ཚིག་རྐང་དེ་དེ་ལྟར་ཕྱི་ནང་གསང་གསུམ་གྱི་བླ་རྣམ་ལ་བརྩོན་པའི་སྐུལ་ལྕགས་གནང་བའི་ཐ་མའི་གསལ་བྱེད་དེ་ཕྱིའི་བླ་མའི་རྣལ་འབྱོར་ལ་རྒྱུན་དུ་ཆག་མེད་དང་། ནང་གི་བླ་རྣམ་ལ་རྒྱུན་དུ་ཆག་མེད་དང་། གསང་བའི་བླ་རྣམ་ལ་རྒྱུན་དུ་ཆག་མེད་མཛོད་ཅེས་པའོ།།

གཉིས་པ་གསོལ་བ་ཕུར་ཚུགས་སུ་འདེབས་པ་ནི། བླ་མ་ནམ་དྲན་ལག་པའི་ཐལ་མོ་སྦྱོར། །མོས་གུས་དྲག་པོས་མཐོ་དམན་གར་གཏོང་ཡང་། །རེ་ས་གཞན་ན་མེད་པའི་གདུང་ཤུགས་བསྐྱེད། །ཅེས་པའི་རྐང་གསུམ་གྱིས་བསྟན་ཅིང་། དོན་ནི་རང་གི་བཀའ་དྲིན་ཅན་གྱི་བླ༷་མ༷་དམ་པ་དེ་དུས་ནམ༷་དྲན༷་ན་དྲན་པའི་དུས་དེར་ལག༷་པ༷་གཉིས་ཀའི༷་ཐ༷ལ་མོ༷་སྦྱོ༷ར་ཏེ་དད་པ་དང་། མོས༷་པ་དང་། ཡིད་ཆེས་པའི་གུས༷་པ་ཤིན་ཏུ་དྲག༷་པོས༷་མཐོ༷་བདེ་འགྲོ་ལྷ་མིའི་འཇིག་རྟེན་ནས་མྱང་འདས་ཀྱི་ས་བར་དང་། དམའ་བའམ་དམན༷་པ་ངན་སོང་གི་གནས་རིས་གང་དུའམ་གར༷་གཏོང༷་བ་ནི་བླ་མ་ཁྱེད་ཤེས། ཁྱེད་མཁྱེན། ཞེས་པ་སྟེ་དོན་ལ་ཡར་མྱང་འདས་དང་མཐོ་རིས་སུ་འདྲེན་པ་ལས་མར་ངན་སོང་དང་མི་ལུས་ངན་པར་མི་གཏོང་བ་ཡང༷་བླ་མ་ཁྱེད་ཀྱིས་ཐུགས་རྗེས་གཟིགས་ཤིག། མཁྱེན་པར་མཛོད་ཅིག། བདག་ལ་ནི་བླ་མ་ཁྱེད་མ་གཏོགས་པའི་རེ་༷ས༷་གཞན༷་ནི་གང་ཟག་སུ་ཡང་མེད་ལ། ཡུལ་གང་ན༷འང་མེད༷་དོ་ཞེས་པའི༷་གདུང༷་ཤུགས༷་དྲག་པོ་བསྐྱེད༷་དེ་གསོལ་བ་ཕུར་ཚུགས་སུའམ་མདུང་འདེད་ཀྱི་ཚུལ་ལྟར་འདེབས་པར་མཛོད་ཅེས་པའོ།།

གསུམ་པ་བྱིན་རླབས་འཇུག་པའི་ཚད་བསྟན་པ་ནི། བ་སྤུ་གཡོ་ཞིང་མཆི་མ་འཁྲུགས་པ་ཞིག །འབྱུང་ན་ངེས་པར་བྱིན་རླབས་རྒྱུད་ལ་འཇུག །ཅེས་པས་བསྟན། དེ་ལྟར་བླ་མའི་རྣལ་འབྱོར་ཉམས་སུ་བླངས་ཤིང་བླ་མ་ལ་གསོལ་བ་བཏབ་པ་ན་བླ་མའི་ཡོན་ཏན་དང་བཀའ་དྲིན་དྲན་པ་དང། ཐ་ན་མཚན་དྲན་པ་དང་མཚན་ནས་བོས་པ་ཙམ་གྱིས་རང་དབང་མེད་པར་ལུས་ཀྱི་བ༷་སྤུ༷་གཡོ༷་ཞིང༷་མིག་ནས་མཆི༷་མ༷་འཁྲུགས༷་པ༷་དང་བླ་མ་དྲན་པའི་དད་གདུང་གིས་སྡོད་མི་ཚུགས་པ་ཞིག༷་ནམ་འབྱུང༷་བར་གྱུར་ན༷་དེ་དུས་ངེས༷་པར༷་དུ་བླ་མའི་བྱིན༷་རླབས༷་རྒྱུད༷་ལ་འཇུག༷་པ་ཡིན་པས་ཚད་དེ་འདྲ་ལ་སོན་པའི་བར་བླ་མར་གསོལ་བ་བཏབ་ཅིང་བླ་མའི་རྣལ་འབྱོར་བསྒོམ་ནས་བླ་མ་ལ་དད་གུས་ཡོད་པ་ཞིག་ཅིས་ཀྱང་གལ་ཆེའོ།།

དྲུག་པ་རྩ་རླུང་ཐིག་ལེའི་རྣལ་འབྱོར།

དྲུག་པ་རྩ་རླུང་ཐིག་ལེའི་རྣལ་འབྱོར་ལ་ནི། མདོར་བསྟན་པ་དང་། རྒྱས་པར་བཤད་པ་གཉིས་ལས། དང་པོ་ནི། གསང་བ་སྦས་དོན་རླུང་གི་རྣལ་འབྱོར་བསྒོམ། །ཞེས་པའི་རྐང་པ་གཅིག་གིས་བསྟན། དེ་ལྟར་ཐུན་མོང་གི་བློ་སྦྱོང་དང་། མདོ་སྔགས་ཀྱི་ལམ་གྱི་འཇུག་སྒོ་དང་རྨང་གཞི་སྐྱབས་འགྲོ་སེམས་བསྐྱེད་དང་། ཚོགས་གསོག་པ་མཎྜ་ལ་དང་། སྔགས་ཀྱི་ཐུན་མིན་གྱི་ཉམས་ལེན་རྡོར་སེམས་བསྒོམ་བཟླས་དང་། བླ་མའི་རྣལ་འབྱོར་བཅས་སྔོན་དུ་སོང་ནས། ད་ནི་གསང༷་བ༷་རྫོགས་པའི་རིམ་པ་ལས་རྒྱུད་སྡེ་འོག་མ་དག་ཏུ་མ་བསྟན་པའི་སྦས༷་དོན༷་ཟབ་མོ་མ་དག་མཚན་མའི་རྣམ་རྟོག་འཇོམ་བྱེད་རྩ་དང་རླུང༷་གི༷་སྦྱོར་བ་དང་། ཐིག་ལེའི་རྣལ༷་འབྱོར༷་ལ་བརྩོན་པ་བསྐྱེད་དེ་བསྒོམ༷་དགོས་པ་ཡིན་ཏེ། རིན་ཆེན་འབར་བའི་རྒྱུད་ལས། རང་བཞིན་གནས་པའི་རྩ་རླུང་སོགས། །ཁྱད་པར་ལམ་གྱི་རྒྱུ་ཡིན་ཏེ། །ཞེས་དང་། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས། འཇིག་རྟེན་འདས་དང་འཇིག་རྟེན་པའི། །ལམ་ནི་རྩ་དང་ཐིག་ལེ་དང་། །རླུང་ནི་ཕྱི་ནང་དྭངས་སྙིགས་དང་། །ལམ་དང་རྒྱུ་བའི་ཚུལ་ལས་བྱུང་། །ཞེས་གསུངས་པའི་ཕྱིར་རོ།།གཉིས་པ་རྒྱས་པར་བཤད་པ་ལ་རྩའི་རྣམ་བཞག་དང་། རླུང་གི་རྣམ་བཞག་དང་། ཐིག་ལེའི་རྣམ་བཞག་དང་། དེ་དག་གི་ཕན་ཡོན་དང་བཞི་ལས། དང་པོ་ནི། སྣོད་བཅུད་ཐམས་ཅད་སྐུ་གསུམ་རོལ་བའི་ཞིང་། །ཆོས་འབྱུང་ཉིས་བརྩེགས་མེ་དཔུང་འབར་བའི་ཀློང་། །རང་ཉིད་གསང་ཡེ་རྒྱན་དང་ཆ་ལུགས་རྫོགས། །སྐུ་དབུས་རོ་རྐང་དབུ་གསུམ་ཚུལ་བཞིན་བསྒོམ། །ཞེས་པའི་ཤོ་ལོ་ཀ་གཅིག་གིས་བསྟན། ཐོག་མར་རྩའི་སྟོང་ར་བསྒོམ་ཚུལ་ནི་ཕྱི་སྣོད༷་ཀྱི་འཇིག་རྟེན་ཐམས་ཅད་དག་པ་ཡེ་ཤེས་ལས་གྲུབ་པའི་ཞིང་དང་གཞལ་ཡས་ཁང་རྒྱན་དང་དབྱིབས་བཀོད་ཚད་མེད་པའི་རྣམ་པ་ཅན་དང་། ནང་བཅུད༷་ཀྱི་འགྲོ་བ་ཐམས༷་ཅད༷་དག་པ་ཡེ་ཤེས་པའི་ལྷ་དང་ལྷ་མོའི་རང་བཞིན་ཆོས་ལོངས་སྤྲུལ་གསུམ་སྟེ་སངས་རྒྱས་སྐུ༷་གསུམ༷་གྱི་བདག་ཉིད་ཅན་གྱིས་ལོངས་སྤྱོད་པའམ་རོལ༷་བའི༷་རང་བཞིན་པའི་ཞིང༷་ཁམས་ཀྱི་རྣམ་པར་མོས་ཤིང་། གཏེར་ཆེན་གྱི་རང་གཏེར་རྗེ་བཙུན་རྡོ་རྗེ་རྣལ་འབྱོར་མ་ལ་བརྟེན་པའི་བདེ་སྡོང་རླུང་གི་རྫོགས་རིམ་ལས། རང་ཉིད་རྡོ་རྗེ་རྣལ་འབྱོར་མ༔ རྒྱན་དང་ཆ་ལུགས་རྫོགས་པར་བསྒོམ༔ དབུ་མ་མཚན་ཉིད་བཞི་དང་ལྡན༔ གཡས་གཡོན་རོ་རྐྱང་དཀར་དམར་གཉིས༔ གཙོ་བོ་རྩ་གསུམ་འཁོར་ལོ་ལྔ༔ ཚུལ་བཞིན་མ་འདྲེས་ལམ་མེར་གསལ༔ ཞེས་གསུངས་པ་ལྟར། ཞིང་དང་གཞལ་ཡས་ཁང་དེའི་དབུས་སུ་ཆོས༷་འབྱུང༷་ཉིས༷་བརྩེག༷ས་ཏེ་ཆོས་འབྱུང་དམར་པོ་སྣོལ་མར་གནས་པའི་གདན་དང་། མེ༷་དཔུ༷ང་དམར་ནག་རབ་ཏུ་འབར༷་བའི༷་ཀློང༷་དབུས་སུ་རང༷་ཉིད༷་མཁའ་འགྲོ་མ་གསང༷་བ་ཡེ༷་ཤེས་སྐུ་མདོག་དམར་པོ་བྱུ་རུའི་ལྷུན་པོ་ལ་ཉི་བྱེད་འོད་ཀྱིས་འཁྱུད་པ་ལྟ་བུ། ཞལ་གཅིག་ཕྱག་གཉིས་པ། སྤྱན་གསུམ་ནམ་མཁའི་དབྱིངས་སུ་གཟིགས་པ། ཞི་ཆགས་ཁྲོ་འཛུམ་གྱི་ཉམས་དང་ལྡན་པ། ཕྱག་གཡས་ཀྱིས་ཁ་ཊྭཱཾ་ཀ་ཡབ་ཀྱི་ཚུལ་དུ་སྐུ་ལ་བརྟེན་པ་དང་། གཡོན་པས་ཀཱ་པ་ལ་རཀྟས་བཀང་བ་ཞལ་དུ་སྟོབ་པའི་ཚུལ་དུ་འཛིན་པ། ཞབས་གཉིས་འདོར་ཐབས་ཀྱིས་པད་ཟླ་ཉི་མ་ནོར་བུ་དགའ་འཁྱིལ་གྱི་གདན་ལ་བཞེངས་པ། བདེ་མཆོག་ཉུང་ངུ་ལས། མགུལ་རྒྱན་གདུ་བུ་དཔུང་རྒྱན་དང་། །རྣ་རྒྱན་ཚངས་པའི་སྐུད་པ་དང་། །དོ་ཤལ་མགོ་བོའི་ཕྲེང་བ་དང་། །སྐེ་རགས་སིལ་སིལ་སྒྲ་སྒྲོག་པ། །ཞེས་གསུངས་པ་ལྟར་གྱི་རིན་པོ་ཆེའི་དབུ་རྒྱན་དང་། མགུལ་རྒྱན། སྙན་རྒྱན། དཔུང་རྒྱན། དོ་ཤལ། སེ་མོ་དོ། ཕྱག་ཞབས་ཀྱི་གདུ་བུ་སོགས་དང་། ཕྱག་ཆེན་ཐིག་ལེ་ལས། རྣ་ཆ་གདུ་གུ་འཁོར་ལོ་དང་། །མགུལ་དོ་དེ་བཞིན་ཐལ་བ་དང་། །ཚངས་པའི་སྐུད་པ་ཕྱག་རྒྱ་དྲུག །ཅེས་གསུངས་པ་ལྟར་གྱི་རུས་པའི་རྒྱན་དྲུག་དང་། མེ་ཏོག་གི་ཕྲེང་བ་རྣམས་ཀྱི་རྒྱན༷་གྱིས་བརྒྱན་པ་དང༷་། གནག་ལ་སྣུམ་པའི་དབུ་སྐྲ་ཕྱེད་བཅིངས་དང་ལྷག་མའི་ཟུར་བུ་སིལ་མས་སྐུ་རྒྱབ་ཁེབས་པ། ནུ་འབུར་རྒྱས་ཤིང་སྐེད་སྟབས་ཕྲ་བ་སོགས་མཛེས་མའི་ཁྱད་ཆོས་དང་ཆ༷་ལུགས༷་ཐམས་ཅད་ཡོངས་སུ་རྫོགས༷་པ་ཤ་ཁྲག་གདོས་བཅས་ལས་མ་གྲུབ་པ་འོད་ཀྱི་ལུས་ཅན་གཅིག་སྐྱེད་པའི་སྐུ༷་ལུས་ཀྱི་དབུས༷་སུ་གཡས་ན་རྩ་རོ༷་མ་དམར་པོ་དང་། གཡོན་དུ་རྐྱང༷་མ་དཀར་པོ་དང་། དབུས་སུ་རྩ་དབུ༷་མ་སྔོ་སྐྱ་གསུམ༷་ཕན་ཚུན་མ་འཆོལ་ཞིང་། ཡ་ཡོ་དང་གཅུས་པ་མེད་པར་རོ་རྐྱང་གཉིས་མར་སྣེ་དབུ་མ་ལ་མདུད་ནས་ཡོད་པ་ཞིག་ལེགས་པར་གསལ་ཞིང་། དེ་ནས་སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་སོ་གཉིས་དང་། མགྲིན་པ་ལོངས་སྤྱོད་ཀྱི་འཁོར་ལོ་ན་རྩ་འདབ་བཅུ་དྲུག་དང་། སྙིང་ག་ཆོས་ཀྱི་འཁོར་ལོ་ན་རྩ་འདབ་བརྒྱད་དང་། ལྟེ་བ་སྤྲུལ་བའི་འཁོར་ན་རྩ་འདབ་དྲུག་ཅུ་རེ་བཞི་དང་། གསང་གནས་བདེ་སྐྱོང་འཁོར་ལོ་ན་རྩ་འདབ་སོ་གཉིས་ཡོད་པ་ཐམས་ཅད་དབུ་རྐྱང་རོ་གསུམ་ལས་གདུགས་ཀྱི་རྩིབས་མ་ལྟར་གྱེས་ཤིང་། རོ་མ་ལས་གྱེས་པ་ཐམས་ཅད་ལས་ཁམས་དམར་པོ་དང་ཁྲག་འབབས་པ་དང་། རྐྱང་མ་ལས་གྱེས་པ་དག་ལས་ཁམས་དཀར་པོ་འབབས་པ་དང་། དབུ་མ་ལས་གྱེས་པ་ཐམས་ཅད་ལས་རླུང་རྒྱུ་བ་ལ་སོགས་པ་ཚུལ༷་བཞིན༷་དུ་ལེགས་པར་བསྒོམ༷་མོ།།

མཁའ་འགྲོ་གསང་བ་ཡེ་ཤེས་ཀྱི་ཆ་ལུགས་ལ་ཞལ་གཅིག་ཕྱག་བཞི་བ། ཕྱག་གཡས་ཀྱི་དང་པོ་ན་གྲི་གུག་དང་། འོག་མ་ན་རལ་གྲི་འཛིན་པ། གཡོན་གྱི་དང་པོ་ན་ཐོད་པ་རཀྟས་གང་བ་དང་། འོག་མ་ན་ཁ་ཊྲཱཾ་ཀ་འཛིན་པ། ཞབས་གཉིས་གཡོན་བརྐྱངས་ཤིང་གཡས་བསྐུམ་པའི་བཞེངས་པའི་གར་སྟབས་ཅན། སྐུ་གཅེར་བུ་ལ་རུས་པའི་རྒྱན་དྲུག་གིས་བརྒྱན་པ་སོགས་མི་འདྲ་མང་པོ་བཤད་མོད་འདི་ནི་གཏེར་ཆེན་རང་ཉིད་ཀྱི་གཏེར་མ་རྫོགས་ཆེན་ཆོས་དྲུག་གི་སྔོན་འགྲོའི་ངག་འདོན་ཐར་ལམ་རིན་ཆེན་སྒྲོན་མེ་ལས། བཀོད་པ་ལྷུན་གྲུབ་ཆོས་འབྱུང་དམར་པོའི་དབུས༔ འོད་སྣང་འཇའ་གུར་བླ་བྲེ་འཁྲིགས་པའི་དལ༔ ཆགས་བྲལ་པདྨ་ཐབས་ཤེས་དགའ་འཁྱིལ་སྟེང་༔ སེམས་ཉིད་གཉུག་མ་གསང་བ་ཡེ་ཤེས་ཉིད༔ དམར་གསལ་གཞོན་ཚུལ་མཚན་དཔེའི་ལང་ཚོ་འབར༔ ཕྱག་གཡས་ཁ་ཊྭཱཾ་ཡབ་ལ་འཁྱུད་པའི་ཚུལ༔ གཡོན་པས་ཐོད་ཁྲག་ཞལ་དུ་སྟོབ་ཚུལ་མཛད༔ ཞལ་གཅིག་སྤྱན་གསུམ་སྐུ་གསུམ་དབྱིངས་སུ་གཟིགས༔ ཅུང་ཟད་ཞལ་གདངས་མཆེ་བ་ཟླ་ཚེས་དཀར༔ ལྗགས་རྩེ་གྱེན་འདྲིལ་ཞི་ཆགས་ཁྲོ་བཞད་ལྡན༔ ཞབས་གཉིས་མཉམ་པའི་འདོར་སྟབས་གདན་ལས་བཞེངས༔ དབུ་སྐྲ་ཕྱེད་བཅིངས་ཟར་བུས་སྐུ་རྒྱབ་ཁེབས༔ རཏྣ་སྣ་ཚོགས་པདྨ་རུས་པས་བརྒྱན༔ ཤིན་ཏུ་སྒེག་གཟུགས་འཇའ་དང་འོད་ཟེར་འཁྲིགས༔ ཞེས་དང་། ཡང་གཏེར་ཆེན་གྱི་རང་གཏེར་སྦས་དོན་གསང་བ་ཡུམ་གྱི་སྒྲུབ་པ་ཤིན་ཏུ་ཟབ་པ་བདེ་སྟོང་དགའ་བ་འཁྱིལ་བའི་རྒྱ་ཅན་ལས། ཡེ་ཤེས་མཁའ་འགྲོའི་གཙོ་མོ་ནི༔ གསང་བ་ཡེ་ཤེས་རྣལ་འབྱོར་མ༔ ཆགས་མེད་པདྨའི་རིགས་མཚོན་དམར༔ ཕྱག་གཡས་ཐབས་མཆོག་ཁ་ཊྭཱཾ་ཀ༔ དཔའ་བོ་ཡབ་ལྟར་སྐུ་ལ་འཁྱུད༔ གཟུང་འཛིན་བདག་མེད་དབྱིངས་སྒྲོལ་ཕྱིར༔ ཕྱག་གཡོན་ཐོད་ཁྲག་རྒྱུན་ལ་རོལ༔ རྣམ་བཞིའི་འཕྲིན་ལས་འགྲོ་འདུལ་ཕྱིར༔ ཞི་ཆགས་ཅུང་ཟད་ཁྲོ་ལ་བཞད༔ སྤྱན་གསུམ་སྐུ་གསུམ་དབྱིངས་སུ་གཟིགས༔ ཚད་མེད་བཞི་མཚོན་མཆེ་བ་དཀར༔ ཨེ་ཝཾ་འབར་འཛག་བབས་ལྡོག་མཚོན༔ ཞལ་གདངས་ལྗགས་རྩེ་ཡ་རྐན་འདྲིལ༔ དུས་གསུམ་འཕོ་འགྱུར་མེད་པའི་བརྡར༔ བཅུ་དྲུག་གཞོན་ནུ་ཤིན་ཏུ་མཛེས༔ འདོད་དགུ་ཆར་འབེབས་རིན་ཆེན་དང་༔ ཕར་ཕྱིན་དྲུག་ལྡན་རུས་ཆེན་རྒྱན༔ དྲི་མེད་ཆགས་བྲལ་པདྨའི་ཕྲེང་༔ ཡོན་ཏན་ལྷུན་རྫོགས་ཞི་ཚུལ་ལྡན༔ སྲིད་ཞིའི་མཐའ་ལ་མི་གནས་ཕྱིར༔ ཞབས་གཉིས་མཉམ་པའི་འདོར་ཐབས་ཅན༔ བདེ་སྟོང་སྔགས་ཀྱི་མྱུར་ལམ་གྱི༔ ས་ལམ་ཅིག་ཆར་ལྷུན་གྲུབ་ཕྱིར༔ གསང་བའི་པདྨ་རབ་ཏུ་རྒྱས༔ ཟབ་རྒྱས་དངོས་གྲུབ་བདུད་རྩིའི་རྒྱུན༔ འབད་མེད་སྩོལ་ཕྱིར་འོ་འཛིན་འབུར༔ སྐུ་གསུམ་མཁའ་འགྲོའི་དབང་ཕྱུག་མཚོན༔ སྨུག་ནག་དབུ་སྐྲ་ཕྱེད་བཅིངས་ཤིང་༔ ཟར་བུ་རྟིང་བའི་རྩ་བར་སླེབས༔ ཞེས་གསུངས་པ་ལྟར་གཏེར་ཆེན་རང་གི་ལུགས་དང་མཐུན་པར་བྱས་པ་ཡིན་ལ། ལས་དང་པོ་བའི་དབང་དུ་བྱས་ན་ཞབས་གཉིས་གདན་ལས་བཞེངས་པ་ཅན་ལ་དམིགས་པ་ཅུང་ཟིན་དཀའ་བ་དང་། ཞབས་གཡས་བསྐུམས་གཡོན་བརྐྱངས་ཀྱིས་གདན་ལ་བཞུགས་པ་ཅན་དུ་བསྒོམ་ན་དམིགས་པ་ཟིན་སླ་བ་ལ་ཕན་པས་དེ་ལྟར་བྱས་ཀྱང་འགལ་བ་མེད་སྙམ་མོ།།

དེ་ཡང་དབུ་མའི་ནང་དུ་ཀ་ཏི་གསེར་གྱི་རྩ་ཆེན་དང་། སྤྱི་བོར་དར་དཀར་སྣལ་མ། འཁོར་ལོ་བཞིར་ཕྲ་ལ་འཁྲིལ་བ། སྙིང་གར་ཤེལ་སྦུག་ཅན་བཞི་འོད་གསལ་གྱི་ཐིག་ལེ་འཆར་བའི་རྟེན་དུ་གྱུར་པའི་རྩ་ཆེན་བཞི་དང་། རྩ་འདབ་དག་གི་ཡལ་ག་སྟོང་ཕྲག་བདུན་ཅུ་རྩ་གཉིས་སོགས་རྩའི་དབྱེ་བ་གྱེས་ཚུལ་དང་རྡོ་རྗེའི་ལུས་གནས་སུ་བྱེད་ལས་གང་བྱེད་སོགས་མཐའ་ཡས་པ་འཆད་དུ་ཡོད་མོད་མི་སྤྲོའོ།།

སྨན་གྱི་རྒྱུད་བཞིར་ལུས་ཀྱི་རྩ་གནས་བཤད་པ་དག་ལ་དེང་སང་སྨན་པར་རློམ་པ་མང་པོ་ཞིག་གིས་དེ་དག་ནི་ཆོས་དང་འདྲེས་པའི་བཤད་པ་ཡིན་པས་སྒོམ་པ་པོའི་བསྒོམ་བྱ་ལས་དངོས་སུ་ལུས་ལ་དེ་འདྲ་ཡོད་པ་མ་ཡིན་ཞིང་འཕྲུལ་འཁོར་དག་གིས་བརྟགས་ནའང་མཐོང་རྒྱུ་ཅི་ཡང་མེད་ཟེར། ཧ་ཧ་ལུས་ལ་དངོས་སུ་མེད་ན་ནད་དཔྱད་ཀྱི་ཚེ་དེ་དག་བསྒོམ་པ་ལ་ནད་གསོའི་དགོས་པ་ཅི་ཞིག་ཡོད་དེ་ཤིང་གཅོད་སར་གཟར་བུ་ཡིད་ཀྱིས་བསྒོམ་པ་དང་ཁྱད་པར་ཅི་ཡོད། དེ་བཞིན་དུ་སྔགས་ལས་རྡོ་རྗེའི་ལུས་ཀྱི་རྩ་གནས་བཤད་པ་ལ་ཡང་རྣལ་འབྱོར་བའི་བསྒོམ་བྱ་ལས་ལུས་ལ་དངོས་སུ་ཡོད་པའི་རྩ་དང་རྩ་འདབ་ཀྱི་ཆགས་སྟངས་ཤིག་ཡིན་པར་མི་འཛིན་པའི་བླུན་པོ་ཤིན་ཏུ་མང་ངོ་།།

དེ་ནི་མིན་པར་ལུས་ལ་དངོས་སུ་དེ་འདྲའི་རྩ་ཆེ་ཆུང་མཐའ་ཡས་པ་ཞིག་ཡོད་པ་ཡིན་ལ། འགའ་རེ་ཤིན་ཏུ་དྭངས་ཤིང་ཕྲ་བའི་ཕྱིར་ཕལ་བའི་མིག་དང་འཕྲུལ་འཁོར་གྱིས་མཐོང་མི་ནུས། འཕྲུལ་འཁོར་གྱིས་ནི་དེ་འདྲའི་རྩ་དང་ཐིག་ལེ་ཕྲ་མོའི་རིགས་མ་ཟད་སྐྲང་འབུར་དང་མདོག་དབྱིབས་འགྱུར་པའི་ནད་ཚད་ཅུང་ཆེ་བར་གྱུར་པ་རྣམས་མ་གཏོགས་ནད་ཆུང་བ་དང་རླུང་ཁྲག་གི་ནད་སོགས་ཇི་བཞིན་མཐོང་ཐུབ་ཀྱིན་མེད་པ་མངོན་སུམ་མྱོང་གྲུབ་ཡིན་ནོ།།

ལུས་ལ་དངོས་སུ་དེ་འདྲའི་རྩ་དང་ཐིག་ལེ་དག་མེད་ན་བསྒོམ་བྱར་བསྟན་པ་ལ་ཡང་དགོས་པ་མེད་ཅིང་རྡོ་རྗེའི་ལུས་གནད་གཏན་ལ་དབབ་པ་ཡང་མ་ཡིན་པར་འགྱུར་པས་རྒྱུད་ནས་བཤད་པའི་རྩ་ཐིག་དག་ལུས་ལ་དངོས་སུ་མེད་པར་འདོད་པ་ནི་ལོག་རྟོག་ཆེན་པོ་སྟེ། ལོག་རྟོག་དེ་སྤོང་བར་འདོད་ན་སྔགས་ཀྱི་རྒྱུད་འགྲེལ་དག་དང་ཁྱད་པར་དུ་ཀུན་མཁྱེན་ཆེན་པོའི་ཐེག་མཆོག་མཛོད་དང་ཚིག་དོན་མཛོད་དུ་རྡོ་རྗེའི་ལུས་ཀྱི་རྩ་ཆགས་ཚུལ་དང་དེ་དག་གི་བྱེད་ལས་ལ་སོགས་པ་རྒྱས་པར་བཤད་པ་ལ་ལྟོས་དང་ལོག་རྟོག་དེ་རང་ཤུགས་སུ་འགགས་ཤིང་རྡོ་རྗེའི་ལུས་ཀྱི་རྣམ་བཞག་ལེགས་པར་ཤེས་པར་འགྱུར་ངེས་པས་མ་མཐོང་ཙམ་གྱིས་མེད་དོ་ཞེས་པའི་ཁ་ཐག་རྦད་ཀྱིས་མི་གཅོད་པ་ནི་གལ་ཆེའོ།།

གཉིས་པ་ནི། མ་དག་དུག་རླུང་སྣ་བུག་གཉིས་ནས་བསལ། །དྭངས་མ་ཡེ་ཤེས་ལྔ་ལྡན་རླུང་ཚུར་རྔུབ། །ལྟེ་བར་གསང་ཡེ་ནས་ཙམ་ཐུགས་ཀར་བསྟིམ། །རླུང་རྣམས་དབུ་མར་ཞུགས་མོས་དམ་དུ་བཟུང་། །སྙིགས་མའི་རླུང་བསལ་དེ་བཞིན་གྲངས་མང་བརྩོན། །ཅེས་པའི་ཚིགས་བཅད་གཅིག་དང་རྐང་བ་གཅིག་གིས་བསྟན། དེ་ལྟར་རྩའི་སྟོང་ར་ལེགས་པར་གསལ་ནས་ལུས་གནད་རྐང་པ་གཉིས་དཀྱིལ་ཀྲུང་འཆའ་ཞིང་ལག་པ་གཉིས་པུས་མོའི་སྟེང་དུ་འགེབས། མཇིང་པ་ཅུང་ཙམ་བཏེགས་ནས་དགྱེ། མིག་གཉིས་ཐད་ཀར་རང་བབས་སུ་གཏད། རླུང་གི་རྒྱུ་བ་རང་ཤུགས་སུ་བཞག་ལ་ཨེན་ཙམ་ལྷོད་དེ་སྡོད། དེ་ནས་ལག་པ་གཡས་པས་མཐེ་བོང་གིས་སྲིན་རྩ་སྟེ་ལག་པའི་སྲིན་མཛུབ་ཀྱི་འདྲེ་རྩ་མནན་ནས་མཛུབ་མོས་སྣ་སྦུག་གཡས་པ་བཀག་སྟེ་མ་དག་པ་དུག༷་གསུམ་གྱིས་བསྐྱེད་པའི་རླུང༷་རོ་རྣམས་ལན་གསུམ་དུ་སྤྲུག། དེ་ནས་ལག་པ་གཡོན་པས་དེ་ལྟར་བྱས་ཏེ་རླུང་རོ་ལན་གསུམ་སྟེ་ཁྱོན་དྲུག་གམ་དགུ་སྣ༷་སྦུག༷་གཉིས༷་ནས༷་ཕྱིར་སྤྲུག་ཅིང་བསལ༷་ནས། རོ་རྐྱང་གཉིས་ཀྱི་ཡར་སྣེ་སྣ་སྦུག་གཉིས་སུ་ཡོད་པ་ནས་ས་ཆུ་མེ་རླུང་ནམ་མཁའ་ལྔའི་རླུང་གི་དྭངས༷་མ༷་ཡེ༷་ཤེས༷་ལྔ༷་ལྡན༷་གྱི་རླུང༷་རྣམས་ཚུར༷་དལ་བུར་རྔུབ༷་ཅིང་དབུ་མའི་ནང་གི་ལྟེ༷་བ༷ར་གསལ་བའི་ཐད་དུ་མཁའ་འགྲོ་མ་གསང༷་བ་ཡེ༷་ཤེས་སྐུ་ནས༷་འབྲུ་ཙམ༷་གསལ་ལ་དེའི་ཐུགས༷་ཀར༷་བསྟིམ༷་ཞིང་རླུང༷་རྣམས༷་དབུ༷་མ༷འི་ནང་དུ་ཞུགས༷་པར་མོས༷་ལ་འོག་རླུང་བསྡམ་པ་དང་སྟེང་རླུང་མནན་པའི་སྒོ་ནས་རླུང་ཁ་སྦྱོར་དུ་དམ༷་དུ༷་བཟུང༷་ཞིང་། རླུང་ཐིམ་པ་ལས་བྱུང་བའི་བདེ་སྟོང་གི་དགའ་བ་ཉམས་སུ་མྱོང་བར་བྱ་བ་དང་། མཐར་རླུང་དབུ་མ་དང་སྙིང་གའི་ཐིག་ལེ་སོགས་ལ་ཐིམ་པའི་སྣང་བ་གསུམ་མམ་སྟོང་པ་བཞིའི་ཡེ་ཤེས་སྐྱེ་བ་ལ་འབད་པར་བྱ་བའོ།།

གཞུང་འགའ་རེ་ལས་འབྱུང་ལྔའི་རླུང་གི་ཁ་དོག་དང་དབྱིབས་ལ་སེམས་བཟུང་བ་དང་གྲངས་བགྲང་པར་ཡང་གསུངས་ཤིང་། རླུང་ཕྱིར་ཕུད་པའི་ལྷག་མའམ་སྐབས་འགར་རྩ་འཁོར་བཞིའི་གནས་སུ་རླུང་འཇུག་པར་བསྒོམ་དགོས་སོ།།

དེ་ལྟར་རླུང་ཅི་ཐུབ་བཟུང་མཐར་མ་ཐུབ་ཚེ་རླུང་དལ་བུས་ལྷག་རོ་མེད་པར་ཕྱིར་ཕུད་ཅིང་། དེ་ནས་ཡང་སྙིགས༷་མའི༷་རླུང༷་རྣམས་བསལ༷་ནས་གོང་བཤད་དེ༷་ཇི་ལྟ་བ་བཞིན༷་དུ་ཉིན་རེ་ལ་ལན་གྲངས༷་མང༷་དུ་བསྒོམ་ཏེ་བརྩོན༷་པ་བྱས་ན་ནམ་ཞིག་རླུང་ལྔ་ལས་སུ་རུང་བའི་རྟགས་སུ་ནང་དུ་ཤེས་པ་ལ་བདེ་གསལ་མི་རྟོག་པའི་ཉམས་དང་སྟོང་གཟུགས་སྣ་ཚོགས་འཆར་བ་དང་། གཡས་གཡོན་སོགས་ཀྱི་རླུང་རེ་རེ་དབུ་མར་ཞུགས་པའི་རྟགས་སུ་དུ་བ་རྨིག་རྒྱུ་མར་མེ་སྤྲིན་ལ་སོགས་པའི་སྣང་བའི་རྟགས་དང་། རླུང་ཐམས་ཅད་དབུ་མར་ཞུགས་པའི་རྟགས་སུ་འཇའ་ཚོན་དང་། ཐིག་ལེ། ལྷ་སྐུ། ཕྱག་མཚན་ལ་སོགས་པ་འཆར་བ་དང་། འགྲོ་དྲུག་གི་རླུང་སེམས་འདུས་པའི་རྟགས་སུ་ལྷ་དང་དམྱལ་བ་མི་ལ་སོགས་པའི་འགྲོ་དྲུག་གི་ཡུལ་སྣང་སྣ་ཚོགས་འཆར་བ་ཡིན་ནོ།།

དེ་ཚེ་འགྲོ་དྲུག་གི་སེམས་ཅན་ལ་སྙིང་རྗེ་བསྐྱེད་ཅིང་། རླུང་གི་ཐབས་དེས་རང་གི་ཤེས་པ་གསལ་དྭངས་བྱེད་དུས་ཆོས་ཐམས་ཅད་དང་རང་སེམས་བདེན་པར་མ་གྲུབ་པ་སྤྲོས་བྲལ་ནམ་མཁའ་ལྟ་བུའི་ལྟ་བ་ངོས་ཟིན་པར་བྱས་ཏེ། དེའི་ངང་སྐྱོང་བ་ནི་ཤིན་ཏུ་གལ་ཆེ་ཡི། གཞན་དུ་ལྟ་བ་དེ་འདྲས་མ་ཟིན་པར་མཐོང་སྣང་དེ་དག་ལ་བཟང་ངན་དུ་ཞེན་ནས་དགག་སྒྲུབ་བྱས་ཚེ་ཕྱི་རོལ་བ་དང་ཁྱད་མེད་དུ་གྱུར་ཅིང་ལམ་ལོག་པ་དང་རང་རྒྱུད་རུ་ཊར་གོལ་ཉེན་ཆེ་བའི་ཕྱིར་ན་རིག་སྟོང་ཀ་དག་གི་ལྟ་བའི་རང་ངོ་ཤེས་པར་བྱ་བ་ནི་གནད་དམ་པའོ།།

དེ་ལྟར་གོམས་པས་ནམ་ཞིག་ན་རླུང་ལས་སུ་རུང་སྟེ་ཉི་ཁྲི་ཆིག་སྟོང་དྲུག་བརྒྱའི་རླུང་ཐམས་ཅད་དབུགས་གཅིག་གི་རིང་ལ་འགགས་ཤིང་། ལུས་བལ་ལྟར་ཡངས་པ་དང་། འཇག་མའི་རྩེ་ལ་དཀྱིལ་ཀྲུང་འཆའ་ནུས་པ་དང་། མངོན་ཤེས་དང་རྫུ་འཕྲུལ་སྣ་ཚོགས་ཐོབ་པ་དང་། སྲོག་རྩོལ་དང་། མེ་མཉམ། ཁྱབ་བྱེད། ཐུར་སེལ། གྱེན་རྒྱུ་སྟེ་རང་བཞིན་གྱི་རླུང་ལྔ་དང་དབང་པོ་ལྔའི་རླུང་ལྔ་དབང་དུ་འདུ་བ་སོགས་པ་ཡོན་ཏན་མང་པོ་ཐོབ་པ་ཡིན་ནོ།།

གསུམ་པ་ནི། འབར་བ་ནང་གི་གསང་ཡེ་གཏུམ་མོར་གྱུར། །མེ་མཆེད་སྤྱི་བོའི་ཧཾ་ལ་རེག་པ་ཡིས། །འཛག་པ་དོན་གཉིས་བྱས་ནས་བདུད་རྩི་བབས། །སྦྱོར་བ་འཁོར་ལོ་བཞི་རུ་ཡས་མས་ཀྱི། །དགའ་བདེ་སྤེལ་བའི་ཉམས་རྟོགས་མེ་ལྟར་འབར། །རྟག་ཏུ་བར་རླུང་བུམ་པ་ཅན་དང་ནི། །ཕྲ་བ་ཡིད་ཀྱི་ཏིང་འཛིན་ཞེས་བྱར་བསྟེན། །ཞེས་པས་བསྟན། དེ་ལྟར་ལུས་གནད་དང་རྩ་འཁོར་དང་རླུང་རྣམས་ལེགས་པར་སྦྱངས་ནས་མཐར་རླུང་དབུ་མར་ཞུགས་ཏེ་ལྟེ་བར་རཾ་ཡིག་ཨ་ཤད་ཀྱི་རྣམ་པ་ཅན་ལས་གཏུམ་མོའི་མེ་འབར༷་བ༷་ན་ལྟེ་བའི་ནང༷་གི༷་མཁའ་འགྲོ་གསང༷་བ་ཡེ༷་ཤེས་ཀྱི་སྐུ་ནས་འབྲུ་ཙམ་པོ་དེ་གཏུམ༷་མོའི༷་མེ་ཡི་རྣམ་པར་གྱུར༷་ནས་དབུ་མའི་ནང་དུ་མེ་༷མཆེད༷་ཅིང་སྤྱི༷་བོ༷་བདེ་ཆེན་འཁོར་ལོའི་རྩ་འདབ་ཀྱི་དབུས་ན་བྱང་སེམས་ཀྱི་ངོ་བོ་ཡི་གེ་ཧ༷ཾ་དཀར་པོ་མགོ་བོ་ཐུར་དུ་བསྟན་ནས་གནས་པ་དེ་ལ༷་རེག༷་པ༷་ཡིས༷་ཧཾ་ཡིག་བདུད་རྩི་རུ་ཞུ་ཞིང་ཐིག་ལེ་ཆར་ལྟར་དུ་འཛག༷་པ༷ས་ཡར་སྐུ་གསུམ་ཀྱི་རྒྱལ་བ་མཉེས་ཤིང་མར་འགྲོ་དྲུག་གི་སེམས་ཅན་ཐམས་ཅད་ཀྱི་ལུས་སེམས་ལ་རེག་པ་ཙམ་གྱིས་སྡིག་བསྔལ་རྒྱུ་དང་བཅས་པ་ཞི་བའི་བདག་དོན་ཆོས་སྐུ་དང་། གཞན་དོན་གཟུགས་སྐུའི་རྒྱུ་སྒྲུབ་པའི་དོན༷་གཉིས༷་བྱས༷་ནས༷་བདུད༷་རྩི༷་ལུས་ཀྱི་རྩ་གནས་ཀུན་ཏུ་བབས༷་ཤིང་། བདེ་སྟོང་གཉིས་སུ་མེད་པའི་སྦྱོར༷་བ༷་ཁྱད་པར་ཅན་གྱི་ཡེ་ཤེས་སྐྱེས་ཏེ། སྤྱི་བོ་ནས་མགྲིན་པར་བབས་པའི་དགའ་བའི་ཡེ་ཤེས་སྐྱེ། མགྲིན་པ་ནས་སྙིང་གར་བབས་པ་ན་མཆོག་དགའ་དང་། དེ་ནས་ལྟེ་བར་བབས་པ་ན་དགའ་བྲལ་དང་། དེ་ནས་གསང་བའི་འཁོར་ལོར་བབས་ཤིང་བྱང་སེམས་འཛག་པ་མེད་པར་བརྟན་པ་ན་ལྷན་ཅིག་སྐྱེས་པའི་དགའ་བའི་ཡེ་ཤེས་ཏེ་རྩ་འཁོར༷་ལོ༷་བཞི༷་རུ༷་བརྒྱུད་རིམ་གྱིས་དེ་ལྟར་ཡས༷་བབས་ཀྱིི་དགའ་བ་བཞི་དང་། དེ་ནས་ཐིག་ལེ་ཡར་ལྡོག་སྟེ་གསང་བ་ནས་ལྟེ་བར་སླེབས་པ་ན་དགའ་བ་དང་། ལྟེ་བ་ནས་སྙིང་གར་ལྡོག་པ་ན་མཆོག་དགའ་དང་། སྙིང་ག་ནས་མགྲིན་པར་སླེབས་པ་ན་དགའ་བྲལ་དང་། མགྲིན་པ་ནས་སྤྱི་བོར་སླེབས་པ་ན་ལྷན་ཅིག་སྐྱེས་པའི་དགའ་བའི་ཡེ་ཤེས་སྐྱེས་པས་ན་དེ་འདྲའི་མས༷་བརྟན་གྱི༷་དགའ༷་བའི་ཡེ་ཤེས་རེ་རེ་སྐྱེ་བ་ངོས་བཟུང་སྟེ་ཆོས་ཉིད་སྨྲ་བསམ་དང་བྲལ་བའི་ངང་ལ་བློ་ལྷོད་ཀྱིས་བཞག་པ་བཅས་བདེ༷་སྟོང་གི་ཡེ་ཤེས་སྤེལ༷་བ༷ར་བྱས་པས༷་ཉམས༷་རྟོགས༷་ཁྱད་པར་ཅན་བདེ་སྟོང་གི་རྟོགས་པ་མེ༷་ལྟར༷་འབར༷་བ་ནི་ཐིག་ལེའི་རྣལ་འབྱོར་ཉམས་སུ་ལེན་ཚུལ་ཡིན་ནོ།།

འདི་ནི་རང་ལུས་ཐབས་ལྡན་གྱི་ལམ་སྒོམ་ཚུལ་ཡིན་ལ། ལས་རྒྱ་བརྟེན་ནས་སྒོམ་པ་ནི་འོག་སྒོ་ཁམས་གསུམ་རོལ་བའི་ཉམས་ལེན་ཡིན་མོད་འདིར་མ་བསྟན་ཏོ།།

རང་ལུས་ཐབས་ལྡན་གྱི་ལམ་འདི་ནི་ཚངས་སྤྱོད་དགེ་སློང་གི་སྡོམ་པ་དང་ལྡན་པས་ཀྱང་ཉམས་སུ་ལེན་རུང་ལ། འོག་སྒོའི་ལམ་ནི་ཕྱག་རྒྱ་དངོས་སུ་བསྟེན་དགོས་པས་རབ་བྱུང་ཚངས་སྤྱོད་ཀྱི་རྟེན་ཅན་ཡིན་ཚེ་རྩ་ཐིག་རླུང་གསུམ་གནད་དུ་འབྱོངས་ཤིང་། ཆོས་ཀུན་སྒྱུ་མར་གཟིགས་ཏེ་རི་མོའི་བུད་མེད་དང་བུད་མེད་ཁྱད་མེད་དུ་གཟིགས་པ་ཞིག་མིན་ན་རང་ག་བས་ཉམས་སུ་ལེན་ན་ཚངས་སྤྱོད་ཀྱི་སྡོམ་པ་ཉམས་པའི་ཉེས་པ་བསྐྱེད་པས་ཉམས་སུ་ལེན་རུང་བ་མ་ཡིན་ཏེ། ཇོ་བོ་རྗེའི་ལམ་སྒྲོན་ལས། གསང་བ་ཤེས་རབ་དབང་སྐུར་ནི། །ཚངས་སྤྱོད་ལྡན་པས་བླང་མི་བྱ། །ཞེས་དང་། རྒྱལ་དབང་ཀློང་ཆེན་པས། སྐལ་བ་ཅན་འགའ་ཡི་ལམ་ཡིན་གྱི། ཐམས་ཅད་ཀྱི་ནི་མ་ཡིན་ཏེ། རླུང་སེམས་འཛག་མེད་ལ་དབང་མ་ཐོབ་པའི་ཕྱིར་རོ། །ཁྱད་པར་དུ་ཚངས་པར་སྤྱོད་པས་མི་བྱ་སྟེ། ཕས་ཕམ་པས་གོས་པར་འགྱུར་ཏེ། ཞེས་གསུངས་པའི་ཕྱིར་རོ།།

དུས་རྟ༷ག་ཏུ༷་སྟེང་རླུང་མནན་འོག་རླུང་འཐེན་ཏེ་བར་དུ་རླུང་བཟུང་ཞིང་ལྟེ་བའི་ཨ་ཐུང་ལ་སེམས་གཏད་པའི་བར༷་རླུང༷་བུམ༷་པ༷འི་དབྱིབས་ཅན༷་གྱི་རླུང་གི་རྣལ་འབྱོར་དང༷་ནི༷་དེ་ལ་བརྟེན་ནས་གཉུག་མ་དོན་དམ་ལྷན་ཅིག་སྐྱེས་པའི་བདེ་སྟོང་གི་ཡེ་ཤེས་སམ་འོད་གསལ་གྱི་ཐིག་ལེ་ཕྲ་བ་ལ་སེམས་གནས་པའམ། ཡང་ན་ཡིག་འབྲུ་ཕྲ་མོ་དང་ཐིག་ལེ་ཕྲ་མོ་ལ་སོགས་པར་སེམས་གཏད་དེ་རྟོག་མེད་དུ་གནས་པའི་ཕྲ༷་བ༷་ཡིད༷་ཀྱི༷་ཏིང༷་ངེ་འཛི༷ན་ཞེས༷་བྱ༷་བ་དུས་རྒྱུན་དུ་རང་ལ་བསྟེན༷་པར་བྱ་ཞིང་གོམས་པར་བྱ་བ་ནི་རྩ་རླུང་ཐིག་ལེའི་རྣལ་འབྱོར་ཉམས་སུ་ལེན་ཚུལ་ལོ་ཞེས་པའོ།།

བཞི་བ་དེ་དག་གི་ཕན་ཡོན་ནི། རླུང་གིས་བཅུད་ལེན་ཚེ་རིང་ནད་མེད་ཅིང་། །རྩ་དང་ཁམས་ཀྱི་ཡོན་ཏན་དཔག་མེད་ཐོབ། །ཅེས་པ་སྟེ། དེ་ལྟར་བྱང་སེམས་ཀྱི་རྩལ་འབྱོངས་པའི་གནད་ལ་རླུང་དང་རྩ་གནད་སྦྱངས་ནས་མཐར་ཐུག་རྩ་ཐིག་རླུང་གསུམ་གནད་དུ་སྨིན་པའི་འབྲས་བུའམ་ཕན་ཡོན་ཡང་རླུང༷་འབྱོངས་པའི་དབང་གིས༷་ཟས་ཀྱི་བཅུད༷་ལེན༷་འགྲུབ་ཅིང་ལུས་ལ་གཟི་མདངས་རྒྱས་པ་དང་། ཚེ༷་ཉི་ཟླ་ལྟར་རིང༷་བ་དང་། ལུས་ལ་ནད༷་མེད༷་ཅིང༷་དབང་པོ་གསལ་བ་ལ་སོགས་པའི་ཡོན་ཏན་འབྱུང་བ་དང་། རྩ༷་དང༷་ཁམ༷ས་ཀྱི༷་ཐིག་ལེ་གནད་དུ་སྨིན་པའི་ཡོན༷་ཏན༷་ཏིང་ངེ་འཛིན་དུ་མ་སྐྱེ་བ་དང་། ཞབས་ས་ལ་མི་རེག་པར་ནམ་མཁར་འཕུར་ནུས་པ་དང་། ཟས་གོས་ལ་ཞེན་པ་བྲལ་ཞིང་གང་སྣང་སྒྱུ་མར་འཆར་བ་དང་། ལུས་རྡུལ་ཕྲན་ཟང་ཐལ་དུ་འགྲོ་བ་དང་། རྣམ་ཤེས་གཞན་གྱི་གྲོང་ཁྱེར་དུ་འཇུག་ནུས་པ་དང་། དག་པའི་ཞིང་སྣང་ཉུལ་བ་དང་། སེམས་རྟོག་མེད་ཀྱི་གདེངས་ཁྱད་པར་བ་ཐོབ་པ་དང་། བྱང་སེམས་འཕོ་མེད་དུ་བསྟེན་ནུས་པ་ལ་སོགས་པའི་ཕན་ཡོན་དཔག༷་ཏུ་མེད༷་པ་ཐོབ༷་པ་ཡིན་ཏེ། རྒྱུད་ལས། འདི་ཡི་ཡོན་ཏན་བརྗོད་མི་ལང་། །རྒས་དང་ཤི་བ་མེད་པ་དང་། །གཞོན་ཤ་ཆགས་ཤིང་བཟང་བ་དང་། །བཅུད་ཀྱིས་ལེན་པ་ཆེན་པོར་འགྱུར། །ཞེས་དང་། དུར་ཁྲོད་ཁང་བུ་བརྩེགས་པའི་རྒྱུད་ལས། བྱང་སེམས་ཐིག་ལེ་ལ་སྦྱངས་པས། །མཆོག་དང་ཐུན་མོང་ཡོན་ཏན་རྣམས། །རང་གི་སེམས་ལ་གང་འདོད་པ། །འདི་ཡིས་ངེས་པར་འགྲུབ་པར་འགྱུར། །ཞེས་གསུངས་པའི་ཕྱིར་རོ།།

གསུམ་པ་ཚོམ་གྱི་མཇུག་བསྡུ་བ་ནི། ཐུན༷་མིན༷་ཉམས༷་ལེན༷་སྐོར༷་དང༷་སྦས༷་དོན༷་བསྟན༷་པའི༷་ཚོམ༷་སྟེ༷་གསུམ༷་པའོ༷། །ཞེས་པས་བསྟན་ལ་དོན་གོ་སླའོ། །ཚོམ་གསུམ་པའི་རྣམ་པར་བཤད་བརྗོད་ཟིན་ཏོ།། །།