སྔ་འགྱུར་བཀའ་མའི་ཆོས་སྡེའི་གླེགས་བམ་སོ་དགུ་པ།
མགོ་བརྗོད།
རྒྱལ་སྲས་གཞན་ཕན་མཐའ་ཡས་མཆོག་ཉིད་རྒྱལ་བསྟན་སྤྱི་དང་། བྱེ་བྲག་ཏུ་སྔ་འགྱུར་བཀའ་མའི་ཕྱོགས་འདི་ག་དར་བ་ཞིག་བྱེད་དགོས་དགོངས་པའི་ཐུགས་འདུན་དྲག་པོ་རྒྱུན་ཆགས་སུ་ཡོད་ཁར། དབུས་ཕེབས་སྔ་མ་སྤུ་ཀོང་བརྒྱུད་ནས་ཕེབས་སྐབས། སྔར་དྭགས་བརྒྱུད་པའི་གདན་ས་ཕྱིས་སྨིན་གྲོལ་གླིང་བའི་དགོན་ལག་ཏུ་གྱུར་པ་ལྷ་ལུང་པད་རི་རུ་བྱོན། དེར་མཆོག་གི་སྤྲུལ་བའི་སྐུ་རིག་འཛིན་པདྨ་དབང་རྒྱལ་རྡོ་རྗེ་དང་ཞལ་མཇལ། ལེགས་བཤད་ཀྱི་འབེལ་གཏམ་ཞིབ་ཏུ་བྱས་པས་ཐུགས་ཡིད་གཅིག་འདྲེས་སུ་གྱུར་ཅིང་ཕྱི་ནང་གསང་བའི་ཡོན་ཏན་དང་། འཆད་རྩོད་རྩོམ་པའི་ཕྲིན་ལས་སོགས་གང་ནས་ཀྱང་གཏེར་ཆེན་ཆོས་ཀྱི་རྒྱལ་པོ་དངོས་དང་ཐ་མི་དད་པར་དགོངས་ཏེ། རྗེ་དེ་ཉིད་ཀྱི་དབུ་ཞྭ་དང་ཁྲི་བེར་བཅས་སྐུ་ལ་ཕུལ་ཏེ་མི་འཇིགས་སེང་གེའི་ཁྲི་ལ་མངའ་གསོལ། ཚེ་སྒྲུབ་འཆི་མེད་ཡང་སྙིང་གི་དཀྱིལ་འཁོར་དུ་བརྟན་བཞུགས་ཀྱི་ཆོ་ག་རྒྱས་པར་མཛད་པ་དང་བསྟུན། སྔ་འགྱུར་ནང་རྒྱུད་སྡེ་གསུམ་གྱི་ཆོ་གའི་རིམ་པ་ལྟར་ཆོག་ཁྲིགས་ཡོད་པ་རྣམས་སོར་བཞག་དང་། མེད་པ་རྣམས་རྗེ་ཉིད་ཀྱིས་ལྗགས་སྒྲིགས་མཛད་ནས་མཐའ་དག་ཕྱོགས་གཅིག་ཏུ་བསྡུས་ཏེ་དབང་ལུང་གི་འཆད་སྤེལ་སོགས་ཆུན་གཅིག་ཏུ་བྱེད་རྒྱུ་ཞིག་བྱུང་ན། དངོས་སུ་དེ་དག་གི་རྒྱུན་བཙལ་སླ་བ་དང་། བརྒྱུད་ནས་བསྟན་པ་མི་ཉམས་པའི་གཙས་སུ་དགོས་པ་དང་། ཕན་ཆ་ཤིན་ཏུ་ཆེ་བར་འདུག་ཅེས་ནན་ཏན་ཆེན་པོས་ཞུ་མཆིད་ཚིགས་བཅད་ཀྱི་ལམ་ནས་སྤེལ་བ་འདི་ལྟར།
ཨོཾ་སྭ་སྟི། ཕྱོགས་དུས་རྒྱལ་བ་ཀུན་གྱི་སྲས། །ཐར་འདོད་འགྲོ་བའི་དེད་དཔོན་ཆེ། །ལུས་ཅན་ཀུན་ལས་སེམས་འཕགས་པའི། །རྣམ་འདྲེན་བླ་མ་མཆོག་གི་དྲུང་། །སྒོ་གསུམ་ཐ་དད་མ་ཡིན་གཅིག་བསྡུས་ཏེ། །གུས་ཕྱག་བསྟོད་དབྱངས་གདུང་ཤུགས་བཅས་ཏེ་གསོལ། །ཐོག་མཐའ་བར་གྱི་དུས་ཚིགས་མི་མངོན་པའི། །དང་པོར་བྱང་ཆུབ་མཆོག་ཏུ་ཐུགས་བསྐྱེད་ནས། །ཕྱི་ལྟར་མདོ་ལུགས་བསྐལ་བ་གྲངས་མེད་དང་། །ནང་ལྟར་སྔགས་ལུགས་ཚེ་ལུས་གཅིག་གི་མཐར། །གསང་བ་གསང་ཆེན་རིག་སྟོང་ཆོས་སྐུའི་ཞལ། །མངོན་གྱུར་རྡོ་རྗེ་སྙིང་པོའི་ཀློང་དེར་གྲོལ། །རྣམ་འདྲེན་མཆོག་དང་ཀུན་མཁྱེན་ཉི་མའི་གཉེན། །སྤང་དང་རྟོགས་པའི་ཡོན་ཏན་མཉམ་གྱུར་ཀྱང་། །མཚན་དཔེའི་རྒྱན་འདིས་ཐུབ་པའི་དབང་པོ་དང་། །སྙིགས་དུས་བསྟན་འགྲོའི་མགོན་ཁྱོད་སོ་སོར་རྟོགས། །མ་རྟོགས་ལོག་པར་རྟོགས་དང་ཕྱོགས་ཙམ་རྟོགས། །ཡང་དག་ཇི་བཞིན་ཉིད་དུ་མ་རྟོགས་སོགས། །རང་རང་གྲུབ་མཐའི་འདོད་ཞེན་ཇི་སྙེད་ཀུན། །གཅོད་ལ་འཇིགས་བྲལ་དཔལ་མགོན་ཀླུ་སྒྲུབ་དངོས། །མཛེས་སྐུ་མིག་གི་བདུད་རྩིར་གྱུར་པ་དང་། །ཟབ་རྒྱས་གསུང་དབྱངས་རྣ་བའི་བཅུད་ལེན་དུ། །ཐོབ་པའི་སྐལ་བཟང་སོ་སྐྱེས་དངོས་ཡིན་ཀྱང་། །ས་བཅུའི་དབང་ཕྱུག་རྣམས་ཀྱི་ཟླ་བོར་སོང་། །ཅི་སླད་ཟབ་ཞི་སྤྲོས་དང་བྲལ་བ་ཡི། །དོན་བཟང་ལུས་ཅན་ཀུན་ལ་ལྷན་སྐྱེས་སུ། །ཡོད་ཀྱང་མི་རྟོགས་བསྟན་ཀྱང་ཤེས་དཀའ་བའི། །དེ་ཉིད་ཁྱོད་ཀྱི་དྲིན་ལས་མངོན་སུམ་རྙེད། །ཐུབ་པ་རྣམས་ཀྱིས་དམ་པའི་ཆོས་བཙལ་ཚེ། །ལེགས་པར་བཤད་པའི་ཚིགས་བཅད་ཕྱེད་གཅིག་གི །ཕྱིར་ཡང་རྒྱུ་ནོར་ལོངས་སྤྱོད་རྒྱལ་སྲིད་དང་། །སྲོག་གི་བར་དུ་བཏང་ཞེས་ཡོངས་གྲགས་ན། །བསྐལ་བར་རྙེད་དཀའི་ཆོས་མཆོག་འདི་འདྲ་བའི། །ཆེད་དུ་གླིང་བཞིའི་འཇིག་རྟེན་ཁོར་ཡུག་བཅས། །འཛམ་བུའི་ཆུ་བོའི་གསེར་གྱིས་བཀང་བྱས་ཀྱང་། །དེ་ཡི་ཆ་ཤས་ཙམ་ཡང་གཞལ་ནུས་མིན། །བདག་འདྲའི་སྐྱེ་བོ་སྲེད་པའི་གཞན་དབང་ཅན། །རྟག་ཏུ་རྙེད་དང་བཀུར་སྟིས་ཟིལ་ནོན་ཞིང་། །ཁབ་སྐུད་ཙམ་ཞིག་གཏོང་ལའང་སྙིང་ཞུམས་པས། །བཀའ་དྲིན་ཇི་ལྟར་འཁོར་སྙམ་ཡིད་ལ་བཅགས། །དེ་ལྟ་ནའང་ཆོས་དྲིན་གསོ་ཕྱིར་དང་། །ཁྱད་པར་སྔ་འགྱུར་རྫོགས་པ་ཆེན་པོ་ཞེས། །སེམས་ཀློང་མན་ངག་སྡེ་ལས་ཉེར་འཕྲོས་པའི། །རྒྱུད་ལུང་སྦས་པ་ཤིན་ཏུ་ཟབ་མོའི་ཆོས། །དེང་སང་དུས་ན་མདོ་སྔགས་ཐུན་མོང་གི །བསྟན་འཛིན་ཕལ་གྱི་སྤྱོད་ཡུལ་མ་གྱུར་པས། །ཉི་ནུབ་ཟེར་དང་འཆི་ཁའི་མར་མེ་བཞིན། །ཟད་ལ་ཉེ་བར་གྱུར་པའི་གནས་སྐབས་འདིར། །བདག་གིས་ལྷག་བསམ་ཚངས་པའི་གསེར་འཁོར་འདི། །སྐུ་གསུམ་སྟོན་པའི་སྤྱི་གཟུགས་ཁྱོད་དྲུང་དུ། །འབུལ་ན་བརྩེ་ཆེན་ཐུགས་རྗེས་བཞེས་ནས་ཀྱང་། །རྒྱུད་ལུང་མན་ངག་ཆོས་འཁོར་བསྐོར་དུ་གསོལ། །ཕྱི་དུས་བསྟན་པའི་བཙས་སུ་དེ་དག་གི །གླེགས་བམ་མི་ཟད་སྤར་གྱི་ཕྱི་མོ་རུ། །བསྐྲུན་པའི་བཀའ་དྲིན་ནམ་ཡང་མ་ཆུང་ཞེས། །ཞུ་མཆིད་ཐལ་མོ་སྦྱར་ཏེ་གསོལ་བའི་རྟེན། །བསྐལ་བརྒྱར་ཞབས་པད་བརྟན་པའི་རྟེན་འབྱུང་དུ། །དྲི་བྲལ་ལྷ་གོས་རྡོ་རྗེའི་རེ་ཁ་ཅན། །གསང་ཆེན་ཆོས་ཀྱི་བདག་པོར་མངའ་གསོལ་ཕྱིར། །མཚན་དཔེའི་གཟི་འབར་རྡོ་རྗེ་སེམས་དཔའི་སྐུ། །གསུང་དབྱངས་མཐོན་པོའི་འགྲོ་བློའི་གཉིད་སད་ཕྱིར། །གསུང་རྟེན་ཐུགས་ཐིག་རྒྱུད་ཀྱི་གླེགས་བམ་དང་། །འགྱུར་མེད་བདེ་ཆེན་རྡོ་རྗེར་མངའ་བརྙེས་ཕྱིར། །རྒྱལ་བའི་ཐུགས་རྟེན་ཟླུམ་འཁྱིལ་ཆོས་སྐུའི་རྟེན། །བཀྲ་ཤིས་རྟགས་མཚན་དངུལ་གྱི་མཎྜ་ལར། །གླིང་བཞིའི་བཀོད་མཛེས་གསེར་གྱི་འཁོར་ལོས་སྤྲས། །ཐབས་ཤེས་རྒྱུད་ཀྱི་དོན་མཚོན་རྡོར་དྲིལ་ཆ། །བར་ཆད་འདུལ་ཕྱིར་རྡོ་རྗེ་ཕུར་པའི་སྐུ། །ན་བཟའ་གསོལ་དོད་རིན་འཁོར་སྲང་གསུམ་དང་། །ན་གཞོན་འགྲོ་མགྱོག་ཡིད་འོང་རྟ་ཡི་མཆོག །དངུལ་དཀར་ལས་གྲུབ་མར་མེའི་མཆོད་སྐོང་དང་། །བཟང་སྤོས་སྡེ་སེར་དཀར་པོའི་ཆུན་པོ་སོགས། །རྒྱ་མོའི་སོར་འཐག་ནང་མཛོད་འགུལ་དར་བཅས། །དངོས་སུ་འབྱོར་བའི་ཡོ་བྱད་དེ་ཙམ་ཡང་། །ཡིད་སྤྲུལ་མཁའ་ཁྱབ་མཆོད་པའི་སྤྲིན་ཆེན་པོར། །སྤྲོས་འདི་གསང་ཆེན་བསྟན་པ་རྒྱས་ཕྱིར་ཡིན། །ཞེས་དང་། སྐབས་འདིར་ཡན་ལག་བདུན་པའི་ཚིགས་སུ་བཅས་པ་མང་ཙམ་འདུག་ཀྱང་ཡི་གེ་མང་བས་མ་བྲིས། དེ་འཕྲོས། དེ་ལྟར་མ་ལ་བུས་འབོད་ལྟར། །རྩེ་གཅིག་གདུང་བས་གསོལ་འདེབས་ན། །གང་ལ་རེ་བའི་འབྲས་བུ་རྣམས། །རིང་མིན་འགྲུབ་པར་མཛོད་ཅིག་ཀྱཻ། །ནན་ཏན་འདི་ལྟར་བསྐུལ་བའི་རྐྱེན། །རྒྱལ་དང་པདྨའི་གདུལ་ཞིང་མཆོག །བོད་ཡུལ་དབུས་ཀྱི་ཤར་ཕྱོགས་ངོས། །ཀོང་ཡུལ་ལྗོན་པའི་ནགས་ཁོང་དུ། །ང་ཕོད་མི་རྗེ་ལྷ་ཡི་གདུང་། །ཟླ་པ་ཚེ་བརྟན་རྒྱལ་པོ་ཡིས། །སྔ་འགྱུར་བཀའ་མའི་དབང་ལུང་རྒྱུན། །ཕྱོགས་གཅིག་བསྡེབས་ན་བསྟན་ལ་ཕན། །དེ་སྐད་ཡང་ཡང་བསྐུལ་བའི་ཚེ། །རྒྱལ་བའི་དགོངས་པ་མཁའ་འདྲ་བ། །བདག་བློས་གཞལ་བར་ནུས་མིན་ཡང་། །སྨོན་ལམ་སྟོབས་བསྐྱེད་ཨེ་འགྲུབ་སྙམས། །དེ་ལྟར་རིང་ནས་སྨོན་འབྲས་ཀྱི། །ས་བོན་ཞིང་སར་ཐེབས་ཟིན་པས། །འདོད་དོན་སྙེ་མ་གཡུར་ཟ་བར། །བར་ཆད་མེད་ཅིང་མཐར་ཕྱིན་ཤོག །ཅེས་སྒྲུབ་རྒྱུད་ཀརྨ་ཚང་གི་གདན་སའི་ཤུལ་འཛིན། ཨོ་རྒྱན་སྨིན་གྲོལ་གླིང་གི་གྲ་བའི་ཐ་ཤལ་བླ་མིང་སེར་གཟུགས་ཙམ་འཛིན་པའི་རྨོངས་རྟུལ་བ། རིག་འཛིན་པདྨ་དབང་རྒྱལ་རྡོ་རྗེ་ཞེས་འབོད་པས། རབ་ཡིད་ལྕགས་ཡོས་ཀྱི་ཟླ་ཚེས་བཟང་པོར་ལྷག་བསམ་རབ་ཏུ་དཀར་བས་བྲིས་ཏེ་ཕུལ། ཞེས་ནན་ཏན་ཆེན་པོས་བསྐུལ་བ་དང་། སླད་ནས་ཨོ་རྒྱན་སྨིན་གྲོལ་གླིང་བའི་གདུང་འཛིན་ཁྲི་རབས་དྲུག་པ་འགྱུར་མེད་སངས་རྒྱས་ཀུན་དགའི་ཞལ་སྔ་ནས་ཀྱང་། བཀྲ་ཤིས་པའི་རེ་ཁ་བཀྲ་བའི་མཛོད་བཏགས། སྟོད་འགག་གསེར་ཇུས་མ། བཟང་ཕྲུག་གི་ན་བཟའ་རྣམས་ཀྱི་སྐྱེས་དང་བཅས་ཏེ། ཉེ་བར་བསྐུལ་བས་མཚམས་སྦྱར། གཞན་ཡང་དབུས་ཕྱོགས་སུ་བཞུགས་ཡོད་པའི་སྐབས་ཤིག་གི་མནལ་ལམ་དུ། རྗེ་ཉིད་ཀྱི་མ་ཡུམ་དེ་ཡིན་སྙམས་པའི་བུད་མེད་ཞིག་གིས་ལྟོས་དང་ཟེར། གཟིགས་པས། གང་སྣང་ཐམས་ཅད་ཡིག་འབྲུ་ཤིན་ཏུ་ཆེ་བ་མང་པོས་གང་ནས་ཁྲ་ཆེམ་ཆེམ་འདུག་པ་ལ། བུད་མེད་དེས་གསེར་གྱི་རྡོ་རྗེ་འོད་འབར་བ་ཞིག་མདུན་ཐད་ཀྱི་ནམ་མཁར་ལན་གསུམ་འཕང་བའི་མཐར་བར་སྣང་དེར་རྟེན་མེད་དུ་བསྡད་སོང་བ། སྡིགས་མཛུབ་ཀྱི་བརྡའ་ཐབས་གང་དུ་བསྟན་པའི་ཕྱོགས་དེར་ཧྲིལ་ཧྲིལ་འགྲོ་བ་ཞིག་གཟིགས་པས། རྡོ་རྗེ་ཐེག་པའི་བསྟན་ལ་རི་མོར་གྱིས་ཤིག་ཅེས་མཁའ་འགྲོས་བརྡས་བསྐུལ་བར་ཐུགས་སུ་ཆུད། སྔ་འགྱུར་བཀའ་མའི་སྐོར་གྱི་དཔེ་རྒྱུན་དཀོན་རིགས་རྣམས་དབུས་གཙང་ཀུན་ཏུ་བཙལ་བས་མ་རྙེད་པར་ཡོད་པའི་ཚེ། སྨིན་གླིང་དུ་བཞུགས་སྐབས་ཆ་ཤས་ཙམ་འདི་གའི་དཔེ་མཛོད་དུ་ཡོད་ཟེར་བ་ཞིག་གཟིམས་ལམ་དུ་བྱུང་ནས་ཉིན་གཅིག་ཐོག་ཐག་ལ་ཕྱག་དཔེ་ཐམས་ཅད་ཀློག་ཀྱང་རྙེད་རྒྱུ་མ་བྱུང་བར་སླར་གཟིམས་ཤག་ཏུ་ཕེབས། དེ་ནུབ་ཀྱང་ད་དུང་ཚོལ་དང་ངེས་པར་ཡོད་ཟེར་བ་ཞིག་གསན་ནས་སླར་ཡང་བཙལ་བས་སྒྱུ་འཕྲུལ་ཕྲ་མོའི་སྐོར་སོགས་ཀྱི་པུ་སྟི་གཉིས་ཙམ་ཕྱག་ཏུ་འབྱོར། དེ་ལ་སོགས་པ་མཁའ་འགྲོ་དང་ཆོས་སྐྱོང་རྣམས་ཀྱིས་ཀྱང་བསྐུལ་མ་དང་ཕྲིན་ལས་སྒྲུབ་པའི་རྟགས་མཚན་ངོ་མཚར་བ་མང་པོ་ཡང་ཡང་བྱུང་། ཞེས་བཀའ་མ་ཐེག་རིམ་དགུའི་ཕྲིན་ཆོག་མཐའ་དག་ཕྱོགས་གཅིག་ཏུ་བསྡུས་པའི་དཀར་ཆག་ཡིད་བཞིན་དབང་གི་རྒྱལ་པོའི་བང་མཛོད་ཅེས་བྱ་བའི་ལྡེབ་༤༣པའི་སྲིབ་ཕྲེང་༢པ་ནས་༤༦པའི་ཉིན་ཕྲེང་༣པའི་བར་དུ་གསལ་བ་ཇི་བཞིན་འདིར་དྲངས་པ་ལགས།
བཀའ་མ་བསྒྲིགས་རིམ་གྱི་ལོ་རྒྱུས། སྔ་འགྱུར་བཀའ་མའི་ཆོས་སྡེ་རྩ་གཞུང་སྒྲུབ་ཕྲིན་སྤྱིན་དབང་བཅས་དང་རྒྱབ་ཆོས་འགྲེལ་བཤད་སྐོར་གྱི་བཞུགས་བྱང་དཀར་ཆག་བཀོད་པ་ལ་སྔོན་དུས་སྔ་འགྱུར་བསྟན་པའི་ཉིན་བྱེད་རྒྱལ་སྲས་གཞན་ཕན་མཐའ་ཡས་ཀྱིས་རུ་དམ་རྫོགས་ཆེན་ཨོ་རྒྱན་ཆོས་གླིང་དུ་བཀའ་མའི་སྒྲུབ་ཕྲིན་པོ་དེ་དགུའི་དཀར་ཆག་ཡིད་བཞིན་དབང་རྒྱལ་ལྟར་ཤིང་པར་བཞུགས་པ་དང་། གྲུབ་དབང་དཔལ་ཡུལ་བྱང་ཆུབ་ཆོས་གླིང་དུ་བཀའ་མ་གཞུང་དང་ཆོག་ཕྲིན་བཅས་པུ་སྟི་ཀ་ཉི་ཤུ་རྩ་ལྔ་པར་དུ་བཞེངས་སྐབས་རག་སྤྲུལ་ཐུབ་བསྟན་བཤད་སྒྲུབ་རྒྱ་མཚོས་མཛད་པའི་དཀར་ཆག་བསྟན་པ་རྒྱ་མཚོའི་གྲུ་གཟིངས་བཀྲ་ཤིས་དཔལ་གྱི་འབྱུང་གནས་ལྟར་ལེགས་པར་བཞུགས་ནའང་ཕྱིས་དུས་འགྱུར་སྐབས་ཉག་འབྱུང་ཁུངས་དགོན་དུ་མཁན་རིན་པོ་ཆེ་ལེགས་བཤད་འབྱོར་ལྡན་གྱི་ཕྱག་དཔེ་ཅུང་མ་ཚང་བ་ཆ་གཅིག་ཁོ་ན་བཞུགས་པ་ལྷག་ཡོད་པ་ལས་མ་ཕྱི་ཤིང་པར་དང་པར་རྡེབ་ཟིན་པའི་དཔེ་བཅས་ཕྱོགས་གང་དུའང་མ་རྙེད། ཀཿཐོག་པ་སི་ཏུ་ཆོས་ཀྱི་རྒྱ་མཚོས་ཁམས་དབུས་ཀྱི་དགོན་སྡེ་རྙིང་བགྲེས་མང་བོའི་ནང་ནས་བཙལ་སྟེ་ཕྱག་ཏུ་འབྱོར་བ་བཀའ་བསྟན་སྔ་མ་རྣམས་ཀྱི་གྲལ་དུ་འཁོད་མ་ཐུབ་པའི་རྒྱུད་དང་རྒྱ་བོད་ཀྱི་མཁས་གྲུབ་སྔོན་བྱོན་རྣམས་ཀྱི་གསུང་འགྲེལ་བཤད་དཔེ་དཀོན་མང་པོ་སྔ་འགྱུར་རྒྱུད་འབུམ་རིན་པོ་ཆེའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་ནས་རིན་པོ་ཆེ་ཉིད་ཀྱི་ཞལ་སློབ་བྱང་དཀར་བསྟན་འཛིན་ནོར་བུའི་སྤྲུལ་སྐུ་མི་འགྱུར་རིན་པོ་ཆེ་ལ་བཀའ་གནང་སྟེ་ཤིང་པར་དུ་བརྐོས་ཟིན་པ་པོད་བཞི་བཅུ་ཁ་ལྷག་བཞུགས་ནའང་དུས་འགྱུར་སྐབས་འཐོར་བརླགས་ཤོར་བས་ད་ལྟ་མི་བཞུགས། དཔལ་ཡུལ་གྲུབ་དབང་པདྨ་ནོར་བུ་རིག་འཛིན་དཔལ་ཆེན་འདུས་པ་དང་། གོ་འཇོ་མཁར་ལེགས་མཆོག་སྤྲུལ་པདྨ་ཀུན་གྲོལ་རྣམ་གཉིས་ཀྱི་བཀའ་མའི་ཆོས་སྐོར་སྔར་བཞུགས་དར་སྤེལ་མཛད་རྒྱུ་དང་། ད་དུང་ཁ་སྐོང་དགོས་པ་རྣམས་ཞལ་བཀོད་ཕྱག་རིས་བཅས་ད་ལྟའང་བཞུགས་མོད་མཛད་རྗེས་མཐར་མ་ཕྱིན། དེ་རྣམས་ནི་བསྟན་འགྲོ་སྤྱི་དང་སྔ་འགྱུར་རྙིང་མར་གཏོགས་པའི་ཕྱོགས་རྣམས་ལ་བསོད་ནམས་ཀྱི་བགོ་སྐལ་དེ་ཙམ་དུ་ཟད། འོན་ཀྱང་སྲིད་པ་ལས་ཀྱི་འཁོར་ལོ་དོང་ནས་སྤྲུགས་པར་མ་གྱུར་གྱི་བར་དེ་སྲིད་དུ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རོལ་རྩལ་གང་འདུལ་ཆུ་ཟླའི་གཟུགས་བརྙན་གདུལ་བྱའི་བློ་མཚོར་འགོག་མེད་འཆར་བ་ལ་དུས་ནམ་ཡང་ཡོལ་བ་མི་མངའ་བས་སྙིགས་དུས་ཀྱི་དུག་རླངས་འཁྲུགས་པས་སྔ་འགྱུར་བསྟན་པའི་ཉིན་བྱེད་ཆུ་ལྷའི་ཕང་ལ་འཛེག་ཉེ་བའི་སྐབས་འདིར་ཁྲག་འཐུང་རིག་འཛིན་བདུད་འདུལ་རྡོ་རྗེའི་རྣམ་འཕྲུལ་གསང་ཆེན་བསྟན་པའི་སྒྲོན་མེ་འཇིགས་བྲལ་ཡེ་ཤེས་རྡོ་རྗེ ཐུགས་བསྐྱེད་རྨད་དུ་བྱུང་བས་རྒྱ་གར་འཕགས་པའི་ཡུལ་དུ་སྔ་འགྱུར་རྙིང་མའི་ཕྱོགས་ཀྱི་ཆོས་མཚན་བཀའ་གཏེར་ཡོངས་ཀྱི་བཀའ་བསྡུ་དང་འབྲེལ་སྨིན་གྲོལ་གྱི་དགའ་སྟོན་ནུབ་མེད་དུ་སྐྱོང་བ་དང་། ཁྱད་པར་དུ་རིང་བརྒྱུད་བཀའ་མའི་ཆོས་སྐོར་གཞུང་དང་སྒྲུབ་ཕྲིན་ཆ་ལག་བཅས་དང་། འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱིས་མཛད་པའི་སྔ་འགྱུར་རྒྱུད་སྡེ་གཙོ་བོ་རྣམས་ཀྱི་འགྲེལ་བཤད་ཕྱག་ཏུ་ཅི་འབྱོར་རྣམས་བཀའ་མའི་རྒྱབ་ཆོས་ཀྱི་ཚུལ་དུ་ཕྱོགས་གཅིག་ཏུ་བསྒྲིགས་པ་ལ་པུ་སྟི་ལྔ་བཅུར་བརྒྱད་རྒྱ་གར་དུ་འཕྲུལ་པར་བཏབ་ནས་ད་ལྟའི་བོད་ཡུལ་རྙིང་དགོན་ཁག་ལ་ཕྱག་དཔེ་དངོས་མཇལ་ཐོབ་པར་མ་ཟད་དཔེ་དེ་ལ་བརྟེན་ཏེ་སྨིན་གྲོལ་གྱི་རྒྱུན་གང་བཞུགས་འཆད་སྤེལ་འཕེལ་བཞིན་པ་ནི་རྗེ་དེའི་བཀའ་དྲིན་ཁོ་ན་ལས་བྱུང་བའོ། །ཡང་ཉེ་ཆར་ཆོས་རྗེ་རྒྱལ་བ་ཀཿཐོག་པའི་སྙན་བརྒྱུད་འཛིན་པ་རྒྱུ་སྐར་གྱི་ཕྲེང་བ་ལྟ་བུའི་དབུས་ན་མཚན་མོའི་མགོན་པོ་ལྟར་མངོན་པར་མཐོ་བ་ཆོས་སྲིད་ཀྱི་སྟོབས་འབྱོར་དྲེགས་པས་སྙན་གྲགས་སྒྲུབ་པའི་ཆེད་ཙམ་མ་ཡིན་པར་བསྟན་པ་ཁོ་ན་ཐུགས་ལ་བཅང་བའི་ངེས་པ་དོན་གྱི་རྣལ་འབྱོར་པ་ཆེན་པོ་གདོད་མའི་མགོན་པོ་མིའི་ཤ་ཚུགས་སུ་བསྒྱུར་བ་མཁན་ཆེན་ཐམས་ཅད་མཁྱེན་པ་ཐུབ་བསྟན་མུན་སེལ་ཚུལ་ཁྲིམས་རྡོ་རྗེ་མཆོག་ནས་རླབས་ཆེན་གྱི་ཐུགས་བསྐྱེད་རྨད་དུ་བྱུང་བས་ནང་ཐུགས་ཀྱི་ཞལ་སློབ་དམ་པ་རི་བོ་ཆེའི་མཁས་བཙུན་བླ་མ་ཀརྨ་བདེ་ལེགས་དང་། ཉག་བྱམས་འབྱོར་དགོན་གྱི་རྣམ་དཔྱོད་ལྷག་བློ་མཚུངས་མེད་ཚེ་རིང་རྒྱལ་མཚན་སོགས་ལ་ཐོག་མར་བཀའ་སྩལ་པ་སྔ་འགྱུར་བཀའ་མ་ཆོས་སྐོར་སྔོན་དུས་བཀའ་མའི་གྲས་སུ་བཞུགས་པའི་རྩ་གཞུང་དང་། ནང་རྒྱུད་སྡེ་གསུམ་གྱི་འགྲེལ་བཤད་ཚད་ལྡན་བཀའ་མའི་རྒྱབ་ཆོས་ཀྱི་ཁོངས་སུ་བཞག་དགོས་ངེས་ཀྱི་དཔེ་རྙིང་རྒྱ་གར་དུ་སླེབས་མ་ཐུབ་པ་ད་དུང་ཁམས་དབུས་ཀྱི་དཔེ་ཉོབ་རྣམས་ཀྱི་ནང་དུ་ཆ་ཤས་རེ་ཡོད་སྲིད་པས་དེ་རྣམས་ཅི་ནུས་གང་ནུས་ཀྱི་ཉུལ་བཙལ་བྱས་ཏེ་སྐྱབས་རྗེ་བདུད་འཇོམས་རིན་པོ་ཆེའི་བཀའ་མའི་དཔེ་འདི་དང་ཕྱོགས་སྒྲིག་ཐུབ་པ་ཞིག་བྱུང་ན་དཔེ་རྒྱུན་དང་འཆད་ཉན་མི་ནུབ་པ་དང་། རྙིང་བསྟན་སྤྱི་ལ་ཞབས་འདེབས་སུ་འགྱུར་བར་མ་ཟད་སྔོན་གྱི་མཁས་གྲུབ་སྐྱེས་ཆེན་རྣམས་ཀྱི་གསུང་ཤོ་ལོ་ཀ་གཅིག་ཙམ་སྲུང་སྐྱོབ་ནུས་ན་ཡིད་བཞིན་ནོར་བུ་ལས་ཀྱང་གཅེས་སྤྲས་སུ་བྱ་འོས་ཆེ་བས་དེ་བཞིན་འགྲུབ་ཐུབ་པ་ཞིག་ཅི་ནས་གལ་ཆེ། །ཁོ་བོས་ཀྱང་མཐུན་འགྱུར་གང་ནུས་བྱེད་ཅེས་གསུངས་པ་དང་། ཕྱོགས་གཞན་དུ་བཞུགས་པའི་ཞལ་སློབ་ཡོངས་ལ་དེ་ལྟར་བསྒྲུབས་པའི་མཐུན་རྐྱེན་རོགས་སྐྱོར་ཅི་འབྱོར་སྒྲུབས་ངེས་དགོས་ཞེས་པའི་གསུངས་བྲིས་ཕྱག་རྟགས་ཀྱིས་སྤྲས་པ་གནང་ཡོད་པར་མ་ཟད་དམན་བུ་བདག་ལའང་དཔེ་རྙིང་ཉུལ་བཙལ་དང་ཕྱོགས་བསྒྲིག་བྱེད་རྒྱུ་བཅས་ཀྱི་ལས་དོན་སྒྲུབས་དགོས་ཅེས་ཕྱག་དར་བཅས་བཀའ་ཕེབས་གནང་བྱུང་བ་ལ། བདག་ནི་བགྲང་བྱའི་ཁུར་ཀྱིས་ནོན་པ་དང་བྲོ་འཚལ་བས་དེ་ལྟར་བསྒྲུབ་པའི་རེ་བ་བྲལ་ནའང་བླ་མ་རིན་པོ་ཆེའི་ཐུགས་རྗེ་ དང་བྱིན་མཐུས་སེམས་ཤུགས་ཀྱི་སྤོབས་པ་སྔར་མེད་གསར་སྐྱེས་ལྟ་བུས་དབུས་གཙང་ཁམས་གསུམ་གྱི་དགོན་རྙིང་རྣམས་དང་རྒྱ་བོད་ཀྱི་དཔེ་མཛོད་ཁག་ལ་དཀའ་ངལ་དང་དངུལ་གྱི་འགྲོ་གྲོན་ཅི་ལའང་མ་འཛེམས་པར་བློ་ཐག་རྦད་བཅད་ཀྱིས་སྔ་འགྱུར་བཀའ་མའི་སྐོར་གྱི་དཔེ་རྙིང་འཚོལ་བསྡུ་ཅི་ཐུབ་འབད་བརྩོན་བྱས་ཁུལ་བགྱིས་ནའང་། སྤྱིར་བསྟན་པའི་གེགས་ཆགས་ཆེན་པོའི་རྗེས་སུ་ཁེལ་བ་དང་། ཁྱད་པར་རང་ལ་ཤེས་ཡོན་དང་དཔལ་འབྱོར་གྱི་ནུས་ཤུགས་ཧ་ཅང་ཕྲ་བ་བཅས་ཀྱིས་སྔ་མའི་སྐྱེས་ཆེན་དམ་པ་རྣམས་ཀྱི་ཕྱག་ཐོ་ནང་བཞུགས་ལྟར་གྱི་ཡིག་ཆ་ཕལ་ཆེར་མཇལ་བའི་སྐལ་བ་མ་བྱུང་རུང་། བཀའ་དྲིན་ཅན་གྱི་བླ་མ་རྣམས་ཀྱི་ཐུགས་བསྐྱེད་དང་། རྡོ་རྗེའི་ཆོས་གྲོགས་མང་པོའི་རོགས་སྐྱོར། སྔ་འགྱུར་རྒྱུད་སྡེའི་སྲུང་མ་རྣམས་ཀྱི་སྡོངས་གྲོགས་བཅས་ཀྱི་མཐུ་ལ་བརྟེན་ནས་དཔེ་རྙིང་ལག་ཏུ་འབྱོར་ཚུལ་རག་བསྡུས་ཙམ་སློས་ན། ཨ་འཛོམས་བཀྲ་ཤིས་དུང་དཀར་ཆོས་སྒར་ནས་རྒྱལ་སྲས་འགྱུར་མེད་རྡོ་རྗེའི་ཕྱག་དཔེ། འབྲུག་སྤྲུལ་རིན་པོ་ཆེའི་མདུན་ནས་རྫོགས་པ་ཆེན་པོ་སེམས་སྡེ་སྐོར་གྱི་འགྲེལ་པ་རྣམས་དང་། རྩ་རྒྱུད་སྤྱི་དོན་རོག་ཤེར་འབྱུང་གསུང་། རྟོགས་ལྡན་ཤཱཀྱ་རྡོ་རྗེའི་ལམ་རིམ་མཆན་འགྲེལ། མཁས་གྲུབ་ཡེ་ཤེས་རྒྱལ་མཚན་དང་། སྒྲོ་འདོགས་ནམ་མཁའ་དཔལ་གྱི་ལམ་རིམ་འགྲེལ། ཆོས་རྗེ་གཙང་སྟོན་པའི་དམ་ཚིག་གསལ་བཀྲའི་འགྲེལ། རྒྱལ་སྲས་རིན་པོ་ཆེའི་ལམ་རིམ་འགྲེལ་ཆེ་ཆུང་། གཞན་ཡང་དཔེ་རྙིང་ཚན་ཆུང་ཕལ་ཆེར་འདི་ནས་བཀའ་དྲིན་ཐོབ། རྨུགས་སངས་གསང་སྔགས་སྨིན་གྲོལ་ཆོས་གླིང་ནས་མཁན་ཆེན་མཁྱེན་བརྩེའི་བློ་གྲོས་དང་མཁར་ལེགས་མཆོག་སྤྲུལ་རིན་པོ་ཆེ་པདྨ་ཀུན་གྲོལ་གཉིས་ཀྱི་ཕྱག་ལས་བྱུང་བ་རྫོགས་པ་ཆེན་པོ་ཀློང་དྲུག་འགྲེལ་ཆེན་དང་། སྒྱུ་འཕྲུལ་ཕྲ་མོ་སྐོར། མགོན་པོ་ལེགས་ལྡན་གཞུང་པོད་པདྨའི་ལམ་རིམ་རང་འགྲེལ་སོགས་དཔེ་ཚན་ཁ་ཤས་དང་། ནམ་མཁའ་རྒྱལ་མཚན་དང་ནམ་མཁའ་དཔལ་གྱི་ཐུགས་ཐིག་འགྲེལ། རོང་ཟོམ་དང་མཁན་མཁྱེན་བརྩེའི་བློ་གྲོས་ཀྱི་གསུང་ཚང་མ་དེ་མིན་གྱི་དཔེ་དཀོན་མང་ཙམ་ཐོབ། དཔལ་ཡུལ་མཆོག་སྤྲུལ་ཐུབ་བསྟན་དཔལ་བཟང་ཕྱག་ནས་རྒྱ་གར་ནས་བྱུང་བའི་མདོ་དབང་སྦྲང་རྩིའི་ཆུ་རྒྱུན་དཔེ་བཤུ་དཀའ་བ་དང་། ནམ་མཁའ་དཔལ་གྱི་གསང་སྙིང་སྤར་ཁབ་མཆན་འགྲེལ། གྲུབ་དབང་ཆོས་ཀྱི་གླང་པོའི་གསུང་ཁ་ཤས་སོགས་ཡིག་ཆ་མང་ཙམ་ཐོབ། ཉག་ཡོན་ཏན་འབྱུང་ཁུངས་དགོན་ནས་མཁན་རིན་པོ་ཆེ་ལེགས་བཤད་འབྱོར་ལྡན་ཕྱག་དཔེ། སྒྲ་ཐལ་འགྱུར་སོགས་རྫོགས་པ་ཆེན་པོ་རྒྱུད་བཅུ་བདུན་ནང་ད་བཞུགས་འགྲེལ་པ་དྲུག་ཙམ་རྫོགས་ཆེན་པར། དཔལ་ཡུལ་ཤིང་པར་བཀའ་མ་ལས་བྱུང་བ་བཀའ་བརྒྱད་རྫོང་འཕྲང་གཞུང་པོད། མཁན་ཆེན་བྷོ་དྷི་སཏཱའི་སྨན་བླ་གཞུང་། ཤེས་གྲུབ་དང་གཟའ་ཡུམ་སོགས་ཁ་ཤས་དང་། རྡོར་བྲག་མདོ་དབང་བླ་བརྒྱུད་རྣམ་ཐར། ཀ་ཐོག་ཞི་ཁྲོ་ཕུར་གསུམ་ཅུང་མ་ཚང་བ། རྒྱལ་སྲས་གཞན་ཕན་མཐའ་ཡས་དང་མཁན་པོ་པད་རྡོར། ཀཿཐོག་དགེ་པཎ་སོགས་ཀྱི་བཀའ་འབུམ་ལས་ཚན་ཁ་ཤས། ཀུན་དགའ་འབུམ་གྱི་གཅོད་གཞུང་། ཀཿཐོག་ལུགས་ཀྱི་མ་མོ་ བེའུ་བུམ་སོགས་དཔེ་གཡར་ཐོབ། ཉག་བྱམས་འབྱོར་དགོན་ནས་སྟག་བླ་པདྨ་བློ་ལྷན་གསུང་སྡོམ་འགྲེལ། ཉག་བླ་སྨན་དམ་པ་ཨོ་རྒྱན་མདུན་ནས་ལས་རབ་གླིང་པའི་ཕྱག་དཔེ། ཟུར་ཤཱཀྱ་བཤེས་གཉེན་གྱི་མདོ་དབང་དཔེ་རྙིང་རྩ་ཆེན། འགུ་ལོག་མཁན་པོ་པད་བློའི་མདུན་ནས་མཁན་པོ་གཞན་ཕན་སྣང་བའི་གསུང་ཀུན་བྱེད་རྒྱལ་པོའི་འགྲེལ་ཆེན། ཉག་གླུ་རབ་དགོན་ནས་སྒྱུ་འཕྲུལ་ཕྲ་མོ་ཤིང་པར་ཅན། ལྷ་གདན་དཔེ་ཁང་ནས་ཀརྨ་བདེ་ལེགས་བརྒྱུད་དེ་རྒྱ་གར་ནས་འབྱོར་བའི་གནུབས་ཆེན་བསམ་གཏན་མིག་སྒྲོན་དང་། གཤིན་རྗེ་གདོང་དྲུག་གཞུང་པོད། རྒྱ་ནག་ཁྲིན་ཏུའུ་ནས་སྐྱབས་རྗེ་གཟན་དཀར་རིན་པོ་ཆེའི་ཕྱག་ནས་བསམ་གཏན་མིག་སྒྲོན་དང་། ལྕགས་ལ་སྲས་པོ་སྤྲུལ་སྐུ་བུ་ཕྲུག་མདུན་ནས་པེ་ཅིང་བསྟན་འགྱུར་གྲས་ནང་བཞུགས་པའི་རྙིང་གཞུང་པོད་གཉིས་དང་། མི་ཉག་རི་ཁུག་དགོན་པའི་མཆོག་སྤྲུལ་ཆོས་ཀྱི་རྒྱལ་མཚན་ནས་སྒྱུ་འཕྲུལ་ཕྲ་མོ་དང་ཀློང་དགུ་སོགས་དཔེ་རྙིང་འཕྲུལ་པར་བཏབ་པའི་པོད་ཆེན་གཅིག། ཀཿཐོག་ཏུ་མཁན་རྒན་རྒྱལ་མཚན་འོད་ཟེར་ཕྱག་ན་བཞུགས་པའི་དཔེ་ཆ་སྐོར་ལ་རྫོགས་པ་ཆེན་པོ་ཀློང་དགུ་དཔེ་རྙིང་། སོག་ཟློག་པ་དང་རཏྣ་གླིང་པའི་རྩོད་ཟློག །ལམ་རྣམ་བཀོད་སོགས་སྒྱུ་འཕྲུལ་སྐོར། ཞེ་ཆེན་པར་ཀཿདམ་པ་དང་གཙང་སྟོན་པའི་གསུངས་ཐེག་པ་སྤྱི་ཆིངས་སོགས་དང་། ལྟ་ཕྲེང་གཙང་ཊིཀ །ཡེ་ཤེས་རྒྱལ་མཚན་གྱི་ཐེག་སྤྱི་འགྲེལ། ཤཱཀ་རྡོར་ཀུན་འདུས་རིག་པའི་སྒྲོན་མེ། ཀཿཐོག་སི་ཏུའི་གསུང་སོགས་པོད་ཁ་ཤས། རྫོགས་ཆེན་ནས་མཁན་གཞན་དགའི་གསང་འགྲེལ་སོགས་ལག་ཏུ་གང་འབྱོར་གྱི་དཔེ་རྣམས་ལྡེབ་ཚད་དང་འབྲུ་ཚུགས་བཅས་རྒྱ་གར་དཔེ་ལྟར་ རྩིས་བྱས་མོད་ཐོག་མར་དཔེ་བཙལ་སྐབས་དང་ཡང་དུ་དངོས་སུ་བྲི་རྒྱུ་སླར་དཔེ་བསྡུར་དང་ཞུ་བཅོས་བཅས་ལ་འགྲོ་སོང་གྲོན་དངུལ་གཏོང་རྒྱུ་ལག་ཁར་མེད་པས་བྱ་ཐབས་བྲལ་བ་ལ། མཁན་རིན་པོ་ཆེ་ལེགས་བཤད་འབྱོར་ལྡན་ཡང་སྲིད་མཆོག་སྤྲུལ་བློ་གྲོས་རྒྱ་མཚོ་མཆོག་ནས་ཐུགས་ཁུར་ཆེར་བཞེས་གཙོ་འགན་བཞེས་ཐོག །རྒྱ་རོང་བླ་མ་ཚེ་རིང་ནོར་བུ་དང་། ཀཿཐོག་མཁན་པོ་ཡེ་ཤེས་ཕུན་ཚོགས་གཉིས་ཀྱིས་རྒྱུས་ཤེས་རོག་སྐྱོང་ཚགས་གཉེར་བཅས་ཀྱི་དབུ་འདྲེན་ཐོབ་པ་ལ་བརྟེན་ཏེ། སྔ་འགྱུར་བཀའ་མའི་དཔེ་རྙིང་ཉུལ་བཙལ་བྱེད་རྒྱུ་དང་གསར་བྲིས་བྱས་ཏེ་འཕྲུལ་པར་རྡེབ་རྒྱུའི་འཆར་གཞི་བཅས་ལ་གྲོན་དངུལ་འགྲོ་སོང་ཞབས་འདེབས་རོགས་སྐྱོར་ཞུ་ཡིག་བཀྲམ་པས། རྒྱ་ནག་ཞིང་ཆེན་མང་པོའི་ཆོས་པ་ཁག་གིས་དད་འབྱོར་ལྡན་པ་རྣམས་ཀྱིས་སྔ་ཕྱིར་ཀྲུང་སྒོར་ཁྲི་༡༢ཙམ་ལག་ཐོབ་བྱུང་བ་དང་། མཁན་རིན་པོ་ཆེ་པད་བློའི་མདུན་ནས་སྒོར་ཁྲི་༡ལྷག་བླ་མའི་ཞལ་སློབ་མཁས་བཙུན་དམ་པ་ཉག་ཚེ་རིང་རྒྱལ་མཚན་ནས་ཁོ་རང་གི་དད་སྦྱིན་རྣམས་ལས་ཐོབ་པའི་ཀྲུང་སྒོར་ཁྲི་༣ཁ་ལྷག་གནང་འབྱོར་བྱུང་བ་དང་། ཀཿཐོག་འཇམ་སྤྲུལ་རིན་པོ་ཆེ་འཇམ་དཔལ་བསྟན་འཛིན་མཆོག་ནས་ཕོག་སྐྱོར་འབྲུ་རིགས་བདག་རྐྱེན་གནང་བ་བཅས་ལ་བརྟེན་སྟེ། རྨུགས་སངས་བླ་མ་ཆོས་རྣམ་ལ་དཔེ་བྲིས་བཀྲམ་བསྡུའི་གཙོ་འགན་གནང་རོགས་ཞུས་ཏེ་རྨུགས་སངས་དགོན་གྱི་བླ་གྲྭ་རྣམས་དང་ཀུ་སེའི་ཕྱོགས་ཀྱི་བྲིས་པ་གང་ལོན་ཐོག་ལོ་ངོ་ལྔ་ཙམ་གྱི་རིང་ལ་གསོལ་ཕོགས་དང་གླ་ཆ་བཅས། རབ་གནས་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནང་བཟོ་བོ་རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་པ་ལྟ་ལག་ཤེས་ཅན་གྱི་ཡིག་བྲིས་རྣམས་ལ་སེམས་མི་འཕངས་པ་བྱས་ཏེ་བྲི་བཅོལ་ནན་ཟབ་བྱས་ཀྱང་། མ་དཔེ་ཕལ་ཆེར་དཔེ་རྙིང་འབྲི་དཀའ་བ་དང་། པར་རྙིང་ཁ་ཤས་ཡང་སྔོན་དུ་ཞུ་བཅོས་མ་ཐུབ་པ་མང་ཤིང་། ཡིག་མཁན་རྣམས་ཀྱང་ལག་རྩལ་བཟང་ངན་མང་བས་དཔེ་བྲིས་སྤུས་ཚད་འདྲ་མཉམ་རེད་མ་ཐུབ་པ་དང་། ཁྱད་པར་དུ་ཞུ་བཅོས་པ་གཙོ་བོ་མཁན་རིན་པོ་ཆེ་ཐུབ་བསྟན་ཡེ་ཤེས་འོད་ཟེར་དང་། ཐུབ་བསྟན་ཤཱཀྱ་འོད་ཟེར། ཐུབ་བསྟན་ཆོས་དབྱིངས། རི་བོ་ཆེའི་མཁས་དབང་དམ་པ་པདྨ་མཁྱེན་རབ་རྣམིས་ཀྱི་གཙོས་ཀཿཐོག་བཤད་གྲུའི་ཤེས་ཡོན་ཅན་མང་པོས་ངལ་ལ་མ་ལྟོས་པར་དཔེ་བསྡུས་ཞུ་དག་གནང་ནའང་དཔེ་རྙིང་ཕལ་ཆེར་བརྡ་རྙིང་མང་བ་དང་། སྔ་མའི་གསུང་སྒྲོས་ལ་ད་ལྟའི་རྒྱུན་སྲོལ་རྣམས་དང་མི་འདྲ་བ་ཡོད་པ་སོགས་ཀྱིས་ཇི་བཞིན་བཅོས་ཚོད་མ་འཐུས་པས་དི་རྣམས་རང་མལ་དུ་བཞག་པ་ལས་ཕོ་ཚོད་གཟུ་ལུམ་ཀྱིས་དཔེ་བཅོས་བྱེད་མ་སྤོབས་པ་དང་། མ་དཔེ་རྙིང་པ་ཁ་ཤས་ནང་འབྲུ་ངོས་མ་ཟིན་པའི་སྟོང་པ་དང་། ལྡེབ་ཕྲེང་མི་ཚང་བའང་འདུག་པས་དེ་རྣམས་སྟོང་པ་མི་བཞག་ཀ་མེད་བྱུང་བ་བཅས་ལ་བརྟེན་ནས་ད་དུང་ཞུ་བཅོས་མ་ཐུབ་པ་ཤིན་ཏུ་མང་བ་དང་། ཁྱད་པར་ཤེས་ཡོན་གྱི་མཐོང་རྒྱ་ཆུང་བའི་སྟབས་ཀྱིས་ཆ་ལ་ནོར་འཁྲུལ་དུ་མ་ཡོད་ངེས་ལགས་པས་མཁྱེན་སྤྱན་ཡངས་པའི་བཤེས་གཉེན་དམ་པ་རྣམས་ཀྱི་མདུན་དུ་མཐོལ་བཤགས་འབུལ་བ་ལགས་ན་ནོངས་པ་ཅི་མཆིས་བཟོད་པར་གནང་བ་དང་། ཚིག་དང་དོན་ལ་འགལ་ངེས་པའི་ནོངས་སྐྱོན་བཅོས་དགོས་འདུག་ན་ཞུས་བཅོས་དག་པ་མཛད་རྒྱུ་དང་ད་དུང་དཔེ་རྙིང་རྩ་ཆེན་ཕྱག་འབྱོར་བྱུང་ན་བཀའ་མའི་དཔེ་ཚོགས་འདི་རྣམས་དང་ཕྱོགས་གཅིག་ཏུ་འཛུད་རྒྱུ་མཛད་ན་དཔེ་རྒྱུན་མི་ནུབ་པའི་བཙས་སུ་འགྱུར་ངེས་པས་དེ་ལྟར་ལྷག་བསམ་ལྡན་པའི་མཁས་དབང་རྣམས་ཀྱིས་ཐུགས་འཁུར་བཞེས་རྒྱུ་ཅི་ནས་ཀྱང་བཀའ་དྲིན་ཆེ་ཞེས་སྙིང་ནས་གསོལ་བ་འདེབས་པ་ལགས། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ།
༈ སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་པའི་ཁ་གསབ་ཇི་ལྟར་བསྒྲུབས་པའི་ཚུལ་སླར་ཡང་བཤད་པ། བོད་རབ་བྱུང་བཅུ་བདུན་པའི་ཆུ་སྤྲེལ་༡༩༩༢ལོའི་ཟླ་བ་བཅུ་གཅིག་པའི་ཚེས་༡༥ཉིན་ཀཿཐོག་རྡོ་རྗེ་གདན་གྱི་ཆོས་སྡེ་ཆེན་པོར་མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མདུན། ཀཿཐོག་མཆོག་སྤྲུལ་འཇམ་དཔལ་བསྟན་འཛིན་དང་། མཁན་པོ་བསྟན་པ་དར་རྒྱས། མཁན་པོ་ཚེ་རིང་རྡོ་རྗེ་སོགས་ལུང་རིག་སྨྲ་བའི་དགེ་འདུན་པ་བརྒྱ་ཕྲག་ཙམ་དང་ལྷན་དུ། སྔ་འགྱུར་བཀའ་མ་རྩ་གཞུང་དང་། ཆོག་འཕྲིན། གཞུང་པོད། རྒྱབ་ཆོས་དང་བཅས་པ་སྐྱབས་རྗེ་བདུད་འཇོམས་རིན་པོ་ཆེའི་ཕྱོགས་བསྒྲིགས་གནང་བའི་དཔེ་གཞིར་བཞག་ཐོག །དེར་མ་འདུས་པ་ཁ་འཐོར་དུ་བཞུགས་པ་ཁམས་ལུགས་མདོ་དབང་སྦྲང་རྩི་ཆུ་རྒྱུན་སོགས་ཀྱི་དབང་ལུང་དང་། རྙིང་མ་རྒྱུད་འབུམ་སྡེ་དགེའི་སྤར་མའི་ལུང་ཞུས་སྐབས། རྙིང་རྒྱུད་སྡེ་དགེ་སྤར་མའི་ནང་དུ་མ་ཚུད་པ་འབྲུག་མཚམས་བྲག་དགོན་གྱི་རྒྱུད་འབུམ་སོགས་ཀྱི་ནང་། པོ་ཏི་བཅུ་གསུམ་ལ་ཆོས་ཚན་བཞི་བརྒྱ་དགུ་བཅུ་ཙམ་མཇལ་རྒྱུ་བྱུང་བ་དང་། སྔ་འགྱུར་བཀའ་མ་ཕྱོགས་བསྒྲིགས་ཐེངས་གསུམ་ཆར་གྱི་གྲས་སུ་མ་འཁོད་པ། ཁམས་ལུགས་མདོ་དབང་སྦྲང་རྩི་ཆུ་རྒྱུན་དང་། མདོ་དབང་རིན་ཆེན་ཕྲེང་བ་སོགས་གཞུང་པོད་སྐོར་དང་། གསང་སྙིང་འགྲེལ་པ་དངུལ་དཀར་མེ་ལོང་དང་། དམ་ཚིག་གསལ་བཀྲའི་འགྲེལ་པ། སྒྱུ་འཕྲུལ་ཐུག་ཐིགས་འགྲེལ་པ་སོགས་དཔེ་དཀོན་མང་པོ་ཞིག་དངོས་སུ་མཇལ་རྒྱུའི་སྐལ་བཟང་ལྡན་པ་དང་། གཞན་ཡང་ཀཿཐོག་སི་ཏུའི་གསན་ཡིག་དང་དཔེ་རྙིང་དཔེ་དཀོན་གྱི་མཚན་ཐོ་འགའ་ཤས། མཁན་པོ་ལེགས་བཤད་འབྱོར་ལྡན་གྱི་གསན་ཡིག་སོགས་མཇལ་རྒྱུ་བྱུང་བ་ལས། དེང་སང་ཕྱོགས་བསྒྲིགས་བྱས་ཟིན་པའི་བཀའ་མ་དང་རྒྱུད་འབུམ་གཉིས་སུ་མ་ཚུད་པའི། སྔ་འགྱུར་བཀའ་མའི་སྐོར་གྱི་དཔེ་དཀོན་མང་པོ་ཞིག་སྤྱི་ཚོགས་ཐོག་འཚོལ་བསྡུ་བྱ་རྒྱུ་ཡོད་པ་ཤེས་རྟོགས་བྱུང་། དེ་ནས་རབ་བྱུང་བཅུ་བདུན་པའི་ཆུ་བྱ་ལོའི་ཧོར་ཟླ་ལྔ་པའི་ཚེས་ཤར། སྤྱི་ལོ་༡༩༩༣ལ་མཁན་མུན་སེལ་རིན་པོ་ཆེའི་ཞབས་དྲུང་དུ་མདུན་བཅར་ཞུས་ཏེ། སྔ་འགྱུར་བཀའ་མ་དང་རྒྱུད་འབུམ་གཉིས་ཀྱི་སྨིན་གྲོལ་ལེགས་གྲུབ་ཟིན་ཚུལ་དང་། དེར་མ་འཁོད་པའི་དཔེ་དཀོན་ཁ་འཐོར་དུ་གནས་པའི་ལོ་རྒྱུས་ཟིན་ཐོ་དང་བཅས་པ་སྙན་ཞུ་ཕུལ་བས། ཐུགས་དགྱེས་ཚུལ་དཔག་མེད་ཀྱི་ངང་ནས་རྗེ་ཉིད་ཀྱི་ཐུགས་དམ་གྱི་རྟེན་ཀློང་ཆེན་མཛོད་བདུན། བཟང་གོས་ཀྱི་ན་བཟའ་གསོལ་བ་ཞིག་དཔེ་སྒྲོམ་དུ་བཞུགས་པ་དེ་གནང་སྟེ། དཔེ་དཀོན་དེ་རྣམས་འཚོལ་བསྡུ་བྱ་དགོས་ཚུལ་གྱི་བཀའ་སློབ་མང་པོ་གནང་བྱུང་། དེ་ནས་མི་རིང་བར་རྗེ་ཉིད་ཀྱི་སློབ་མ་ཉག་ཚེ་རིང་རྒྱ་མཚོ་ཕེབས་འབྱོར་བྱུང་བ་ལ། ཁོང་གི་ཁུ་བོ་མཁན་པོ་ཚུལ་ཁྲིམས་མཐར་ཕྱིན་བདག་གི་དཔེ་ཆའི་དགེ་རྒན་དང་བླ་མ་ཡིན་པའི་བརྒྱུད་ནས་འབྲེལ་འདྲིས་ཟབ་ཏུ་ཕྱིན། ཁོང་ལ་གོང་གི་བཀའ་མའི་དཔེ་དཀོན་མང་པོ་ཞིག་འཚོལ་བསྡུ་བྱ་རྒྱུ་ཡོད་ཚུལ་གྱི་ལོ་རྒྱུས་ཞིབ་ཕྲ་གླེང་མོལ་བྱུང་རྗེས། གུས་པ་གཉིས་ནས་དཔེ་དཀོན་དེ་རྣམས་འཚོལ་བསྡུ་བྱ་རྒྱུའི་འཆར་གཞི་གཏིང་སྟེ་བླ་མ་མུན་སེལ་རིན་པོ་ཆེར་སྙན་ཞུ་ཕུལ་བས། ཐུགས་དགྱེས་པའི་ངང་ནས་བྱ་བ་དེ་རྣམས་ལེགས་འགྲུབ་ཡོང་བའི་ཐུགས་སྨོན་བཟང་པོའི་མཚམས་སྦྱོར་དང་བཅས། ཐེབས་རྩའི་ཆེད་སྒོར་༡༠༠༠དང་གུས་པ་གཉིས་ལ་དར་ཉིན་མོ་བདེ་ལེགས་རེ་དང་། ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་ལ་ཡང་། དར་ཉིན་མོ་བདེ་ལེགས་ཤིག་བསྐུར་གནང་མཛད་དེ་བཀའ་སློབ་གནང་བ། གསང་ཆེན་སྔ་འགྱུར་བའི་བསྟན་པའི་གཞི་དང་སྙིང་པོར་གྱུར་པ་བཀའ་མདོ་སྒྱུ་སེམས་གསུམ་འདི་ཉིད། འཇིག་རྟེན་ཁམས་འདིར་ཡུན་རིང་གནས་ཐུབ་ན་སྔ་འགྱུར་བའི་བསྟན་པ་གནས་པ་ཡིན། འདི་ཉིད་ནུབ་ན་སྔ་འགྱུར་བའི་བསྟན་པ་ནུབ་པ་རེད། དེས་ན་དགོན་ཆུང་རེ་ཟུང་དང་། གཏེར་ཆོས་རེ་ཟུང་ནུབ་པ་དང་འདི་མི་འདྲ། དེང་སང་རྙིང་མར་ཁས་འཆེ་བ་མང་དག་ཅིག་བཀའ་མདོ་སྒྱུ་སེམས་གསུམ་གྱི་མཚན་ཙམ་ཡང་སྨྲ་མི་ཤེས་པར། རང་ཉིད་དང་འབྲེལ་འདྲིས་ཆེ་བའི་གྲོང་ཆོག་པོ་ཏི་འགའ་ཤས་དང་། རྔ་རོལ་འབག་འཆམ་ཁོ་ན་ཤེས་པ་ཙམ་གྱིས་ཡིད་ཁེངས་ཏེ་སྡོད་པ་ལས། རྒྱུད་གཞུང་གི་མན་ངག་ཟབ་མོ་འདི་ལྟ་བུ་རྣམས་ལ་བློ་ཁ་ཙམ་ཡང་མ་ཕྱོགས་པར། རང་སྣ་རང་གིས་བསུམ་སྟེ་སྡོད་པ་འདི་དག་ནི་ཧ་ཅང་ཡིད་མུག་གི་གནས་སུ་མཆིས། དེས་ན་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་རྒྱ་གར་འཕགས་པའི་ཡུལ་དུ་བཀའ་མའི་དཔེ་དཀོན་རྣམས་ཕྱོགས་བསྒྲིགས་གནང་བའི་བཀའ་དྲིན་བསམ་གྱིས་མི་ཁྱབ་ཀྱང་། ཁོང་ལ་ཡུལ་དུས་ཀྱི་རྐྱེན་པས་ཕྱག་དཔེ་མ་འཛོམས་པ་མང་པོ།་བོད་ཀྱི་ཆོས་སྡེ་གང་སར་འཐོར་ཏེ་གནས་པ་དེ་རྣམས་ཀྱི་དཔེ་ལུང་གི་རྒྱུན་ད་ཡོད་རྣམས་མ་ནུབ་པ་ཞིག །སྔ་འགྱུར་བའི་བསྟན་ཞབས་སུ་སྐྱེས་པ་ཚང་མར་འོས་འགན་ཞིག་ངེས་པར་ཡོད་དགོས་གསུངས་ཏེ། སྔ་འགྱུར་བཀའ་མའི་དཔེ་དཀོན་ཁ་གསབ་བྱ་ཚུལ་གྱི་བཀའ་སློབ་དུ་མ་གནང་སྟེ་ལོ་དེ་ཉིད་དུ་ཞི་བར་གཤེགས་སོ། །དེ་ནས་ཀཿཐོག་མཁན་པོ་འཇམ་དབྱངས་ལེགས་བཤད་བསྟན་པའི་རྒྱལ་མཚན་དང་། བླ་མ་ཚེ་རིང་རྒྱ་མཚོ་གཉིས་ནས་ཐུགས་འགན་ཆེ་བཞེས་ཀྱིས་ཉག་རོང་དང་ཨ་འཛོམས། རྨུག་སངས་ཀཿཐོག་སོགས་ཁམས་ཁུལ་ནས་འཚོལ་བསྡུ་གནང་། ཁོ་བོས་ལྷ་ས་དང་བལ་ཡུལ་ཕྱོགས་ནས་འཚོལ་བསྡུ་བྱས་པ་ཁྱོན་པོ་ཏི་ལྔ་བཅུ་ལྷག་ཙམ་ཞིག །ཀཿཐོག་ཏུ་རྨུག་སངས་ཕྱོགས་ནས་བྲིས་པ་རྣམས་གདན་དྲངས་ཏེ་འབྲི་བཅུག་པ་དང་། འགའ་ཤས་ལྷ་ས་དང་ཁམས་རི་བོ་ཆེའི་ཕྱོགས་ཀྱི་བྲིས་པ་རྣམས་ལ་འབྲིར་བཅུག་པ་རྣམས། སྒྲིག་སྟངས་ཀྱི་གོ་རིམ་ཡང་ཐེག་པའི་རིམ་པ་དང་། རྩ་བའི་ས་བཅད་སོ་སོར་མ་འཛོལ་བར་བདུད་འཇོམས་རིན་པོ་ཆེས་གནང་བ་བཞིན་མཛད་དེ། མཁན་རིན་པོ་ཆེ་འཇམ་དབྱངས་ལེགས་བཤད་བསྟན་པའི་རྒྱལ་མཚན་མཆོག་གིས་གཙོ་འགན་གནང་སྟེ། ཀཿཐོག་ཏུ་ཚེས་བཅུའི་དུས་སྟོན་ཆེད་དུ་བཀའ་མ་སྔ་ཕྱིའི་དཔེ་རྣམས་ཕྱོགས་གཅིག་ཏུ་བསྡོམས་ཏེ། ཚར་བརྒྱ་ཐམ་པ་པར་བསྐྲུན་གནང་བའི་ལོ་རྒྱུས་རྒྱས་པ་ཁོང་གིས་ལྗགས་རྩོམ་གནང་བ། སྔ་འགྱུར་བཀའ་མའི་དཀར་ཆག་ཡིད་བཞིན་རིན་པོ་ཆེའི་མཛོད་ཁང་ལས་གསལ། དེའི་རྗེས་སུ་རྙེད་སོན་བྱུང་བ་མདོ་དབང་སྦྲང་རྩིའི་ཆུ་རྒྱུན་དཔེ་དག་པ་ཞིག་དང་། དབུས་སྟོན་ཡེ་ཤེས་རྡོ་རྗེའི་གསང་སྙིང་འགྲེལ་ཆེན་སོགས་པོ་ཏི་བཅུ་སྐོར་ཙམ་རྙེད་པ་རྣམས། ཕྱོགས་བསྡོམས་ཀྱིས་པོད་ལྔ་བཅུ་རྩ་བཞི་ཅན་ཞིག་བདུད་འཇོམས་རིན་པོ་ཆེས་ཕྱོགས་བསྒྲིགས་གནང་བའི་ཀ་རྟགས་སིའི་མཇུག་ཏུ། ཧི་ནས་བཟུང་སྟེ་ཟེའི་བར་དུ་པོད་ལྔ་བཅུ་རྩ་བཞི། ཁ་གསབ་ཀྱི་ཚུལ་དུ་བཞགས་ཏེ་སྒྲིག་སྟངས་ཀྱི་གོ་རིམ་ཡང་སྔ་མ་བཞིན་བྱས་ཏེ་ཚར་བརྒྱ་ཐམ་པ་པར་བསྐྲུན་ཞུས་པ་ཡིན། འོན་ཀྱང་ང་ཚོས་པར་སྐྲུན་ཞུས་པ་སྔ་ཕྱི་གཉིས་ཆར་བྲིས་པ་མང་བས་བྲིས་གཟུགས་ཆ་མི་མཉམ་པ་དང་། ཡི་གེ་དག་ཆ་ཞན་པ་སོགས་ཀྱིས་སྤུས་ལེགས་པོ་ཞིག་མ་བྱུང་བས། སླར་ཡང་རྩིས་འཕྲུལ་ནང་དུ་བླུག་སྐབས་ཀྱི་འགྲོ་སོང་ནི། གྲོགས་མཆེད་ཚེ་རིང་རྒྱ་མཚོའི་སློབ་མ་རྒྱ་རིགས་ཆོས་པ་རྣམས་ཀྱིས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་སྐྱོར་བྱུང་བ་དང་། གུས་པའི་ཁྱིམ་གཞིས་མགོ་སང་ཚང་གི་མ་རྒན་ཚེ་དབང་དབྱངས་འཛོམས་ནས། རྩིས་འཕྲུལ་གཅིག་དང་མི་དམངས་ཤོག་སྒོར་ཉིས་ཁྲི་ལྔ་སྟོང་རོགས་རམ་བྱུང་བ་དང་། གུས་པའི་ལས་གླ་སྔ་ཕྱི་ཀུན་བསྡོམས་པ་མི་དམངས་ཤོག་སྒོར་ཉིས་ཁྲི་བཅས་ཀྱིས་འགྲོ་སོང་གི་རྨང་གཞི་བྱས་པ་བརྒྱུད། ཁྲེང་ཏུ་ཅོ་ཏ་མེ་ཏོག་ར་བའི་ལྡུམ་རར། རྒྱ་རིགས་ཀྱི་དད་ལྡན་མ་ནིང་ཡུ་ཧྥ་ཡིས་ཁང་པ་གཡར་གནང་བ་དེར། གཙང་གི་བུ་མོ་ཚེ་རིང་ཆོས་སྒྲོན་དང་། ཚེ་རིང་དབྱངས་འཛོམས། ཁམས་རི་བོ་ཆེའི་བུ་མོ་འཇམ་དབྱངས་མཚོ་མོ་གསུམ་གྱིས་རྩིས་འཕྲུལ་ནང་དུ་བླུགས་སྐབས་ཀྱི་གཙོ་བོའི་ཐུགས་འགན། ཚེ་རིང་རྒྱ་མཚོ་མཆོག་ནས་བཞེས་ཤིང་གུས་པས་ཀྱང་གང་ནུས་ཀྱི་ཞབས་ཕྱི་ཞུས་པ་བརྒྱུད། སྤྱི་ལོ་༢༠༠༡ལོའི་མཇུག་ཏུ་པོད་བརྒྱ་དང་བཅུ་རྩིས་འཕྲུལ་ནང་དུ་བླུག་ཟིན། དེ་ནས་ཞུ་དག་བྱེད་སྐབས་གཟན་དཀར་མཆོག་སྤྲུལ་ཐུབ་བསྟན་ཉི་མས་ལས་ཀའི་སློབ་སྟོན་ཐེངས་མང་གནང་བ་མ་ཟད། ཁོང་གི་འབྲེལ་ཡོད་ནས་ལག་ཐོག་རྩིས་འཕྲུལ་བཞི་དང་། སྤར་ཆས་བཞི། མི་དམངས་ཤོག་སྒོར་ཁྲི་ཉི་ཤུ་ཙམ་གནང་བ་བཅས་ཀྱི་མཐུ་རྐྱེན་འོག །ལས་ཀའི་འགན་ཡོངས་རྫོགས་ཚེ་རིང་རྒྱ་མཚོ་ནས་ཆེ་བཞེས་མཛད། དེ་ནས་ཡང་བསྐྱར་ཡང་གཟན་དཀར་རིན་པོ་ཆེས་སི་ཁྲོན་ཞིང་ཆེན་གྲངས་ཉུང་མི་རིགས་གནའ་དཔེ་སྡུད་སྒྲིག་ལས་ཁང་དང་། སི་ཁྲོན་མི་རིགས་དཔེ་སྐྲུན་ཁང་གཉིས་ལ་འབྲེལ་མཐུད་གནང་སྟེ། ད་ལྟ་ལས་ཁང་དེ་གཉིས་ཀྱིས་འགྲོ་སོང་བཏང་སྟེ་པར་སྐྲུན་བྱེད་བཞིན་ཡོད་པའི་ལོ་རྒྱུས་རྒྱས་པ་ནི་དེ་ཕྱོགས་ཀྱི་ཆ་འཕྲིན་ལས་ཤེས་པར་བྱའོ། །ཞེས་པ་རི་བོ་བླ་མ་ཀརྨ་བདེ་ལེགས་ཀྱིས་བྲིས་པའི་ཤེས་བྱའི་ལྡུམ་ར་ཞེས་པའི་ཤོག་ངོས་༨༥པ་ནས་༨༦པའི་བར་གསལ་བ་ལས་བཏུས་པ་ལགས།
༈ རྩིས་འཕྲུལ་ནང་ཕབ་བླུག་བྱས་པའི་བཀའ་མ་ཇི་ལྟར་བཞེངས་པའི་ཚུལ། བོད་ནང་དུ་རྒྱལ་བསྟན་སླར་གསོའི་སྐབས་སུ་སྙིགས་དུས་བསྟན་པའི་སྒྲོན་མེ་མཁན་ཆེན་རྡོ་རྗེ་འཆང་མུན་སེལ་རིན་པོ་ཆེའི་ཐུགས་བསྐྱེད་བླ་ན་མེད་པའི་བཀས་བསྐུལ་ལས་དགེ་ཚེ་རིང་རྒྱ་མཚོ་ལགས་ཀྱིས་གཙོས་པའི་ཆེད་ལས་པ་མཁས་དབང་མང་པོས་བཀའ་བསྡུའི་བྱ་བ་འདི་ལ་འཇུག་པ་སྟེ། དེ་ཡང་སྔ་འགྱུར་བཀའ་མ་ཤིན་ཏུ་རྒྱས་པའི་བཀའ་བསྡུ་ཕྲིན་ལས་ཀྱི་དབུ་སྤྱི་ལོ་༡༩༨༧ལ་བཟུང་ཞིང་། མ་དཔེ་འཚོལ་སྡུད་དང་ཞལ་བཤུས་ཆེད་ལོ་དགུ་ཙམ་ཕྱི་ལ་བསྐྱོད་པའི་ཚེ། ནོར་རྫས་དངུལ་དང་མི་ཤུགས་ཀྱི་ཆ་རྐྱེན་ཤིན་ཏུ་ཞན་ཅིང་འགྲིམ་འགྲུལ་མཁོ་ཆས་བདག་དབང་ཅན་མེད་པས། གཞན་གྱི་ལྗིད་ཐེག་རླངས་འཁོར་དང་འདྲུད་འཐེན་འཁོར་ལོ་ལྕགས་རྟ་སོགས་ལ་བརྟེན་ནས་སོང་བའམ། རྐང་ལམ་ཕྲ་མོ་བརྒྱུད་ནས་བོད་ཡུལ་མཐོ་སྒང་གི་ལ་ལུང་དུ་མར་རྐང་ཐང་གོམ་འགྲོས་ཀྱིས་བསྐྱོད་དུས་ཁྲེས་པོ་རྒྱབ་ཏུ་ཁུར། འཁར་བ་ལག་ཏུ་བཟུང་། ཚ་པོ་མི་རག་སར་རྩམ་ཕྱེ་འགམས་ལ་ཆུ་གྲང་མོ་བཏུང་བ་དང་། ཤིང་སྡོང་རྒན་གྱི་འོག་དང་བྲག་སྐྱིབས་ཟུར་དུ་གནས་བཅའ་དགོས་བྱུང་བ་ལྟ་བུའི་མཚོན་ཁོང་རྣམ་པར་འོ་བརྒྱལ་མང་པོ་མྱོང་ཡོད་ངེས་རེད། ཕྱག་དཔེ་ཡིག་ཆ་མི་ཚང་བ་རྣམས་བོད་ཡུལ་ལ་ལུང་ཡུལ་དགོན་ཀུན་ལ་ཉུལ་ཏེ་འཚོལ་སྡུད་བྱས་པས་དཔེ་དཀོན་དཔེ་རྙིང་ཧ་ཅང་མང་པོ་རྙེད་པ་དང་། གཞན་ཡང་རྒྱ་གར་རྒྱ་ནག་བལ་ཡུལ་ཨ་རི་དབྱིན་ཡུལ་སོགས་ཕྱིའི་རྒྱལ་ཁབ་ཏུ་འཐོར་བ་རྣམས་མཆོག་སྤྲུལ་གཟན་དཀར་རིན་པོ་ཆེ་སོགས་ཀྱིས་ཐབས་མང་སྤྱད་ནས་བཙལ་བས་ཐོབ་ཡོད། ལམ་ཏུ་སོན་ཟིན་པ་རྣམས་ཐོག་མའི་སྐབས་ལག་བྲིས་ཀྱིས་ཞལ་བཤུས་ཏེ་ལེགས་པར་བསྒྲིགས། གསར་རྙེད་མ་དཔེ་མང་ཆེ་བ་ནི་དཔེ་རྙིང་ཡིན་ལ་ཡིག་གཟུགས་མི་འདྲ་བ་དབུ་ཅན་དང་དབུ་མེད་གཉིས་ཀ་ཡོད་པ། དབུ་མེད་ལ་ཚུགས་མའམ་འཁྱུགས་མ་སོགས་ཡིག་གཟུགས་གཅིག་གྱུར་མིན་པ་རྣམས་གཅིག་གྱུར་ཡོང་ཆེད་བོད་ཡིག་སཾ་བྷོ་ཊ་ཞེས་པའི་མཉེན་པའི་ཡོ་བྱད་བེད་སྤྱད་ནས་རྩིས་འཕྲུལ་ནང་བཅུག་འདུག །དཔེ་རྙིང་བྲིས་མ་ཕལ་ཆེར་དང་པར་མ་མ་ཕྱི་འགའ་ལའང་སྐུང་ཡིག་མང་བ་དཔེར་ན་དཀཽགསུཾ་སདྱས་བྱུཾབ་ཡཻས་ཤྲེབ་སོགས་རིམ་བཞིན་དཀོན་མཆོག་སངས་རྒྱས་བྱང་ཆུབ་ཡེ་ཤེས་ཤེས་རབ་སོགས་བཀྲམ་པ་དང་། བསྐུར་འདེབ་གཞུགས་གསོལ་བཟུང་འཛིན་རིགས་འཇིན་སོགས་ཡིག་ནོར་ཡིན་ངེས་རྣམ་རིམ་བཞིན་སྐུར་འདེབས་བཞུགས་གསོལ་གཟུང་འཛིན་རིག་འཛིན་སོགས་སུ་དག་བཅོས་བྱས་པ། གཞན་བརྡ་རྙིང་མྱི་རྟོག་མྱེ་ལོང་གཉིས་སུ་མྱེད་མྱྀ་དམྱིགས་སོགས་མ་ཡ་བཏགས་ཅན་དང་། གཞའ་ཚོན་ནམ་འཇའ་ཚོན་གློ་བུར་རམ་བློ་བུར་སོགས་མིང་གཞི་བརྗེ་རེས། རྩེ་ནེའམ་ཙེ་ནེ་བྱ་བརྩལ་ལམ་བྱ་བཙལ་གཙིགས་ཆེན་ནམ་བརྩིགས་ཆེན་སོགས་ཙ་ར་མགོ་ཡོད་མེད། ཐར་པའ་རྟོག་པའ་བདེ་བའ་སོགས་རྗེས་འཇུག་འ་ཅན། ལས་སྩོག་པ་ལསྩོགས་པ་ལྟ་བུ་ས་ཙ་བརྩེགས་མ། བཞུགས་སྷོ་ལྟ་བུ་ས་ཧ་བརྩེགས་མ་སོགས་དང་། གཉིས་མེད་ལ་གཉིས་ཎ་ལྟ་སྒོམ་ལ་ལྟ་བྷེཾ་གཏན་ཚིགས་ལ་ཧེ་དུ་སོགས་བརྡ་རྙིང་ལུགས་སམ་སྒྲ་ཟུར་ཆག་པ་རྣམས་སོར་བཞག་བྱས་པ་ལས་བཅོས་མེད། བསྒྲིབ་སྦྱང་དང་བསྒྲིབ་སྦྱངས་སྒྲིབ་སྦྱང་སྒྲིབ་སྦྱོང་ལྟ་བུའམ་སྒྲུབ་པ་དང་བསྒྲུབ་པ་ལྟ་བུ་བྱ་ཚིག་གམ་བྱེད་ཚིག་གི་ཚིག་ཏུ་གྲུབ་པ་སོགས་ཡིན་གཅིག་མིན་གཉིས་དེང་སང་གི་བརྡ་སྤྲོད་ལུགས་ཁོ་ནར་བསྟུན་མི་འདུག །མ་དཔེ་འགའ་ལ་ཆད་ལྷག་མང་ཙམ་ཡོད་པ་རྣམས་ཕྱག་དཔེ་གཞན་ལས་ཆད་པ་བསབས། ལྷག་པ་དོར། ཡིག་ནོར་ཡིན་ངེས་རྣམས་དག་བཅོས་གནང་འདུག །དོགས་གཞི་ཅན་ནམ་ཐག་མ་ཆོད་པའི་ཚིག་དོན་རྣམས་མ་དཔེ་སོར་བཞག་ལས་བཅོས་མི་འདུག །མ་དཔེ་གཅིག་ལས་ལག་སོན་མ་བྱུང་བ་བསྡུར་བྱ་སྡུར་བྱེད་མེད་པ་རྣམས་ལ་ཕྱི་མོར་ཆད་ལྷག་འདུག་ཅེས་མཆན་རྟགས་གསལ་བཤད་བྱས་འདུག །རྩིས་འཕྲུལ་ནང་བཞག་རྗེས་ཡིག་ནོར་ཤོར་ཡོད་པར་མ་དཔེ་དང་བསྡུར་ནས་དག་བཅོས་ཐེངས་ལྔ་དང་ཡིག་སྐྱོན་ཆེ་ཤོས་རྣམས་དག་བཅོས་ཐེངས་དྲུག་ཙམ་བྱས་འདུག་པ་སོགས་བྱ་བ་ཅུང་ཞིབ་མོ་བྱུང་ཡོད་པ་འདྲ། རྩིས་འཕྲུལ་དུ་བཅུག་པ་དང་། ཞུ་དག་དང་དཔེ་སྒྲིག་བྱས་པའི་ཚེ་ལོ་བཅུ་ཙམ་ལ་གྲོང་ཁྱེར་ཁྲེང་ཏུའུ་རུ་ཕྱག་ལས་གནང་བ་བཅས་སྔ་ཕྱི་མི་ལོ་ཉི་ཤུ་ཙམ་རྒྱུན་བསྐྱངས་པའི་མཐར་འབྲས་བཀའ་མདོ་སྒྱུ་སེམས་གསུམ་དགོངས་འགྲེལ་ཡན་ལག་དང་བཅས་པ་ལྡེབ་འབྲིང་ཀ་ནས་པོའི་བར་པོད་བརྒྱ་དང་སུམ་ཅུ་སོ་གསུམ་ཕྱོགས་གཅིག་ཏུ་བསྒྲིགས་འདུག །དེ་ལ་ཤོག་གྲངས་བཞི་ཁྲི་གཉིས་སྟོང་དགུ་བརྒྱ་བདུན་ཅུ་དོན་ལྔ་ལ་ཆོས་ཚན་ཆིག་སྟོང་ཆིག་བརྒྱ་ཙམ་ལེགས་སྒྲིག་བྱུང་འདུག་པ་ལགས། བྱ་བ་འདིའི་ཐད་ལ་བཀའ་དྲིན་ཆེ་བའི་མཁན་ཆེན་མུན་སེལ་རིན་པོ་ཆེ་ཁོང་དང་ཁོང་གི་ཞལ་སློབ་ཚོས་དཀའ་ཚེགས་ཆེ་བའི་ཕྱག་ལས་མང་པོ་གནང་བ་དང་། མཆོག་སྤྲུལ་གཟན་དཀར་རིན་པོ་ཆེས་ཐོག་མཐར་བར་གསུམ་དུ་ཐུགས་ཁུར་གནང་བ། སི་ཁྲོན་ཞིང་ཆེན་མི་རིགས་དོན་བྱེད་ཨུ་ཡོན་ལྷན་ཚོགས་ཀྱི་ཚོགས་གཙོ་ཧོ་ཞའོ་ཕིང་ལགས་དང་། དཔེ་རྙིང་དཔེ་དཀོན་འཚོལ་སྡུད་ལེགས་སྒྲིག་གཞུང་ལས་ཁང་གི་བསོད་ནམས་ལྷ་མོ་ལགས་དང་འཇམ་དབྱངས་ཚུལ་ཁྲིམས་ལགས་སོགས་ཀྱིས་རང་རིགས་ཀྱི་རིག་གཞུང་རྩ་ཆེ་བར་ཉམས་པ་སླར་གསོ་དང་། མི་ཉམས་གོང་འཕེལ་གཏོང་བའི་ཆེད་དུ་རྒྱལ་ཡོངས་གྲངས་ཉུང་མི་རིགས་དོན་བྱེད་ལྷན་ཚོགས་ལ་སྙན་ཞུ་ཕུལ་ཏེ་རྩ་ཆེའི་རིག་གནས་སྲུང་སྐྱོབ་བྱ་རྒྱུའི་དོན་ཆེན་གྲས་སུ་བརྩིས་ཡོད་པར་མ་ཟད། སྤྱི་ལོ་༢༠༠༥ལོ་ནས་འགྲོ་གྲོན་ཟླ་རེ་ལ་མི་དམངས་ཤོག་སྒོར་༢༤༠༠ཙམ་རེ་བཏང་བ་དང་། རྩིས་འཕྲུལ། པར་འཕྲུལ། པར་ཤོག་སོགས་གནང་སྦྱིན་དང་། སི་ཁྲོན་མི་རིགས་དཔེ་སྐྲུན་ཁང་ནས་དཔེ་བསྐྲུན་འགྲོ་གྲོན་པར་ཡོན་མི་དམངས་ཤོག་སྒོར་ཁྲི་བརྒྱ་དང་སུམ་ཅུ་བཏང་སྟེ་མཐུན་རྐྱེན་ཕུན་སུམ་ཚོགས་པ་བསྒྲུབས་འདུག་པ་ནི་བོད་ཀྱི་རིག་གནས་ལ་སྲུང་སྐྱོབ་དང་དར་སྤེལ་གཏོང་བའི་ཐད་བྱས་རྗེས་བླ་ན་མེད་པ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས་སོ། །ཞེས་པ་ཉག་རོང་རྒྱ་མཚོ་བླ་མ་ལགས་ཀྱིས་བྲིས་པ་ལས་བཏུས་སིང་ཚིག་ཁ་ཤས་ཡོངས་གྲགས་ལྟར་ཅུང་ཟད་བཅོས་པ་ལགས།
སྔ་འགྱུར་བཀའ་མ་དཔེ་སྒྲིག་ལྷན་ཚོགས།
ཐུགས་རྗེ་ཆེ་ཞུ།
ཐུ་བྷོད་མི་རིགས་ཀྱི་བླ་སྲོག་དང་། ནང་བསྟན་རིན་པོ་ཆེའི་ཆ་ཤས་སུ་གྱུར་པའི་སྔ་འགྱུར་བཀའ་མ་པོད་གྲངས་བརྒྱ་དང་སུམ་ཅུ་སོ་གསུམ་ཡོད་པ་འདི་གུས་ཕྲན་ཆུང་ནས་རིག་གཞུང་ལ་དུང་བའི་རང་མི་རིགས་དང་། ལྷག་པར་བོད་ཀྱི་ནང་པ་སངས་རྒྱས་པའི་བཀའ་བསྟན་ལ་ཞིབ་འཇུག་མཛད་པ་པོ་སྤྱི་ལ་གཟིགས་བདེའི་ཆེད་དེང་དུས་ཀྱི་མཚན་རྩལ་ལམ་ནས་དྲྭ་རྒྱའི་སྟེང་འཇོག་ཐུབ་པ་འདི་ནི། སྔ་འགྱུར་བཀའ་མ་དཔེ་སྒྲིག་ལྷན་ཚོགས་དང་སི་ཁྲོན་མི་རིགས་དཔེ་སྐྲུན་ཁང་གཉིས་ནས་རིན་ཐང་ཅན་གྱི་གླེགས་བམ་འདི་དག་མི་ཉམས་སྲུང་སྐྱོབ་དང་ཉམས་པ་སླར་གསོའི་ཆེད་དུ་ལྷག་བསམ་དང་ལ་རྒྱས་ཕྱུག་པའི་རང་མི་རིགས་དེ་དག་གི་འབད་པ་ཁོ་ན་ལ་བརྟེན་ནས་བྱུང་བ་ཡིན་པས་ཁོང་རྣམ་པ་ལ་སྙིང་ཁོང་རུས་སྟེང་ནས་འཚམས་འདྲི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། དཔེ་མཛོད་དོ་དམ་པས།
འཕགས་པ་རྡོ་རྗེ་ནག་མོ་དབང་ཕྱུག་མ་ཞེས་བྱ་བའི་སྔགས་རྒྱུད་ཀྱི་རྒྱལ་པོ།
འཕགས་པ་རྡོ་རྗེ་ནག་མོ་དབང་ཕྱུག་མ་ཞེས་བྱ་བའི་སྔགས་རྒྱུད་ཀྱི་རྒྱལ་པོ་བཞུགས་སོ། །རྒྱ་གར་སྐད་དུ། ཨཱརྱ་བཛྲ་དི་བཱི་ཀཱ་ལཱི་ཤྭ་རཱི་ནཱ་མ་མནྟྲ་ཏནྟྲ་རཱ་ཛ། བོད་སྐད་དུ། འཕགས་པ་རྡོ་རྗེ་ནག་མོ་དབང་ཕྱུག་མ་ཞེས་བྱ་བའི་སྔགས་རྒྱུད་ཀྱི་རྒྱལ་པོ། བཅོམ་ལྡན་འདས་མངོན་རྫོགས་ཀྱི་རྒྱལ་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་མངོན་རྫོགས་ཀྱི་རྒྱལ་པོ་ལ་ཐམས་ཅད་ཀྱི་རང་བཞིན་གྱི་བཞུགས་གནས། ཡུམ་རྡོ་རྗེ་མུ་ཁ་ལེ་མའི་བྷ་ག་རྣམ་པར་དག་པའི་དབྱིངས་ན་བཞུགས་སོ། །གཞན་ཡང་ཉིད་ལས་མི་གཞན་པའི་འཁོར། ཐིག་ལེའི་ཆོས་མཐར་ཐུག་པའི་ངང་ནས་སྤྲུལ་པ། སྣང་སྲིད་ཀྱི་བདག་མོ་ཆེན་མོ་སྣོད་བཅུད་ལ་དབང་སྒྱུར་བ་འབྱུང་བའི་རྒྱལ་པོ་ལྔ་དང་། ཡེ་ཤེས་ཚོགས་ཀྱི་མ་མོ་བཅུ་བཞི་དང་། དམན་མོ་ལྟར་སྣང་བ་ལྔ་བཅུ་རྩ་བརྒྱད་དང་། ཡང་ཐབས་ཅིག་གོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་གསང་བའི་བདག་པོ་ཕྱག་ན་རྡོ་རྗེ་དང་ཐབས་ཅིག་གོ། །སྲིད་པ་གསུམ་གྱི་གནོད་སྦྱིན་མའི་ཚོགས་གདུག་པའི་མཚོན་ཆ་དང་པོ་དང་། གདུག་པ་དཔལ་གྱི་མཚོན་ཆ་ཅན་དང་གདུག་པ་མིག་གི་མཚོན་ཆ་ཅན། གདུག་པའི་དམོད་པ་ཅན་ལ་སོགས་པ། མིའི་ཤ་ཁྲག་དང་སྲོག་དབུགས་ལ་སོགས་པ་ལ་དབང་བྱེད་པ། འཇིག་རྟེན་དུ་བསྐལ་པ་མ་ཡིན་བསྐལ་པ་དང་། དུས་མ་ཡིན་པའི་ཆོ་འཕྲུལ་དང་། མི་མཐུན་པའི་ནད་དང་། འཇིགས་པའི་ས་གཡོས་དང་། ཐོག་དང་། སེར་བ་དང་། སྲིད་པ་གསུམ་ན་བཀའ་ནན་ཆེ་བ། བརྡ་མི་འཕྲོད་པ། འཇིགས་པའི་སྤྱུགས་གླུ་ལེན་ཅིང་། ལག་པའི་བརྡ་གཏོང་བ། ཁྲག་དང་ཞག་གི་དྲི་སྣོམ་པ། སེམས་ཅན་ཐམས་ཅད་ལ་རྣམ་པར་འཚེ་བ། ནང་གི་རྒྱན་བབ་ན་གཅིག་ལ་གཅིག་གི་རིགས་ཁྱོད་དང་། བུ་ལ་སོགས་པ་ཟ་བར་བྱེད་པ། ཉུངས་བདུན་འཆའ་ཞིང་སྨུག་རྩི་སྐུད་པ་དང་། ཤིན་ཏུ་སྒེག་པའི་ཚོགས་རྣམས་ལ། མ་མོའི་ཚོགས་འདི་ལྟ་སྟེ། ཤིང་འཛམ་བུ་པྲྀ་ཀྵ་ལ་གནས་པའི་སྲིན་མོ་ཆེན་མོ་ཤ་དང་ཁྲག་གི་དྲི་ཚོར་ན། མཚན་གཅིག་ལ་དཔག་ཚད་བརྒྱད་ཁྲིར་རྒྱུག་པར་བྱེད་པའི་སྲིན་མོ་ཆེན་མོ་དམོད་པའི་མཚོན་ཆ་ཅན་དང་། ཨེ་ཀ་ཙ་ཏི་དམོད་པའི་མཚོན་ཆ་ཅན་དང་། དམག་གི་རྒྱལ་མོ་དམོག་པའི་མཚོན་ཆ་ཅན་དང་། མ་བདུན་སྲིང་བཞི་དམོད་པའི་མཚོན་ཆ་ཅན་དང་། བདག་མོ་དམོད་པའི་མཚོན་ཆ་ཅན་དང་། མ་བདུད་གནོད་སྦྱིན་དཔོན་གཡོག་དམོད་པའི་མཚོན་ཆ་ཅན་དང་། བདུད་མོ་གནོད་སྦྱིན་སྤུན་གསུམ་དམོད་པའི་མཚོན་ཆ་ཅན་དང་། དུས་ཀྱི་ཞགས་པ་དམོད་པའི་མཚོན་ཆ་ཅན་དང་། དེ་ལ་སོགས་ཏེ་སྲིད་པ་གསུམ་ཕུང་བར་བྱེད་པའི་མ་མོའི་དམོད་པའི་མཚོན་ཆ་ལ་སོགས་པ་ལས་དྲག་པོའི་རྐྱེན་ལས་གྱུར་པ་བསམ་གྱིས་མི་ཁྱབ་པ་དང་ཐབས་ཅིག་ཏུ་བཞུགས་ཏེ། དེའི་ཚེ་དེ་དག་གི་ནང་ནས། བྱང་ཆུབ་སེམས་དཔའ་སེམས་དཔའ་ཆེན་པོ། གསང་བའི་བདག་པོ་ཕྱག་ན་རྡོ་རྗེས། བཅོམ་ལྡན་འདས་མངོན་རྫོགས་ཀྱི་རྒྱལ་པོ་ལ་འདི་སྐད་ཅེས་གསོལ་ཏོ། །ཞིང་དང་བསྐལ་པ་འདི་ཉིད་ལ། །ལས་དང་རྐྱེན་ལས་གྱུར་པ་ཡིས། །སྤྲུལ་པར་ནུས་པའི་མ་མོ་ཞིག །སེམས་ཅན་རྣམས་ལ་རྣམ་པར་འཚེ། །གདུལ་ཕྱིར་དབང་ནི་བསྐུར་བ་དང་། །དམ་ལ་བཏགས་ཏེ་རྣལ་འབྱོར་པས། །སྒྲུབ་ཐབས་ལ་སོགས་བཤད་པར་བྱོས། །རྡོ་རྗེ་འཛིན་ལ་བདག་ཉན་འཚལ། །ཅེས་གསོལ་བ་དང་། དེ་ནས་བཅོམ་ལྡན་འདས་ཀྱིས་འདི་སྐད་ཅེས་གསུངས་སོ། །གསང་བདག་རྡོ་རྗེ་འཛིན་པ་ཁྱོད། །ཕྱག་རྒྱ་དབང་བསྐུར་སྦྱོར་བ་གཉིས། །དུས་ལ་བབ་ན་ཉན་པར་བྱོས། །བྱིན་རླབས་དབང་ནི་བསྐུར་བར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཉིད་ཀྱི་རྒྱུད་དང་། སྲིན་མོ་ཆེན་པོ་སྤྲུལ་པར་ནུས་པའི་རྒྱུད་གཉིས་སུ་མངོན་པར་སྤྲུལ་ཏེ། གསང་བའི་བདག་པོ་ཉིད་ཀྱི་རྒྱུད་ནི། དོན་དམ་པ་འདྲི་བར་གྱུར་ཏོ། །སྲིན་མོ་ཆེན་མོའི་རྒྱུད་ནི། ནུབ་ཕྱོགས་ཀྱི་སྒོ་ནས་ཐལ་མོ་སྦྱར་ཏེ། དབང་ནོད་པར་གྱུར་ཏོ། །དེ་ནས་བཅོམ་ལྡན་འདས་མངོན་རྫོགས་རྒྱལ་པོས། ཡུམ་གྱི་བྷ་ག་ལ་གསང་བའི་རྡོ་རྗེ་བཟླས་པས། ཉི་ཟླའི་སྟེང་དུ་གནས་ཡུལ་གྱི་ཁྲོ་མོར་གྱུར་ཏེ། དེ་ཉིད་ཧ་ཧོར་གྱུར་པ་རྣམས། སྦོམ་པོ་དང་དབང་མོ་གཉིས་ཀྱིས་བཟུང་སྟེ། བཛྲ་ཀོའུ་རཱི་ཧ། བཛྲ་ཙོའུ་རཱི་ཏཱ། བཛྲ་བེ་ཧཱ་ལི་ཧཱ། བཛྲ་པུསྐ་སཱི་ཧ། བཛྲ་གྷ སྨ་རཱི་ཧ། བཛྲ་སྨ་ཤ་ནི་ཧ། བཛྲ་ཙཎྜ་ལཱི་ཧ། བཛྲ་སིངྷ་མུ་ཁཱ་ཧེ། བཛྲ་བྱཱ་གྷཱ་མུ་ཁཱ་ཧེ། བཛྲ་སྲྀ་ལ་མུ་ཁཱ་ཧེ། བཛྲ་ཀྲྀ་ཌྷ་མུ་ཁཱ་ཧེ། བཛྲ་ཀངྐ་མུ་ཁཱ་ཧེ། བཛྲ་ཀཱ་ཀ་མུ་ཁཱ་ཧེ། བཛྲ་ཨཱུ་ལུ་ཀ་མུ་ཁཱ་ཧེ། ཨ་བྷི་ཥིཉྩ་ཧཱུྃ་ཞེས་སྤྱི་བོའི་སྟེང་དུ་བཞག་པས་ལྷ་མོ་དེ་ཉིད་དབུ་བཅུ་བདུན། ཕྱག་སུམ་ཅུ་རྩ་བཞི་དང་ལྡན་པར་གྱུར་ཏོ། །དེ་ནས་ལྷ་མོ་འཇིགས་པའི་གཟུགས་ཅན་དེས། སྤྲུལ་པའི་འོད་ཟེར་ཐུགས་ཀ་ནས་ཉིད་དང་འདྲ་བ་བཀྱེས་ནས། སྲིན་མོ་ཆེན་མོ་དེ་སྐད་ཅིག་གིས་གཡོག་དང་བཅས་པ་དེ་མ་ཐག་ཏུ་དཔལ་ཆེན་པོའི་ཐད་དུ་སྐད་ཅིག་གིས་ཁ་སྦུབ་ཏུ་འདྲེས་ཀྱིས་སོང་བར་གྱུར་ཏོ། །དེ་ནས་དཔལ་ཆེན་པོས་དབུགས་ཕྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པས། དེ་མ་ཐག་ཏུ་དྲན་པ་སྟོར་བ་རྙེད་པར་གྱུར་ཏོ། །དེ་ནས་སྲིན་མོ་ཆེན་མོ་དེས། འདི་སྐད་ཅེས་གསོལ་ཏོ། །སྔར་སེམས་ཅན་རྣམས་ལ་རྣམ་པར་འཚེ་བ་ཡང་རབ་ཏུ་གནོད། ཕྱིས་མི་བྱེད་པར་ཡང་དམ་བཅའ། སྲོག་གི་སྙིང་པོ་ཡང་འདི་འབུལ་ལོ། །ༀ་རུ་རུ་རོ་རུ་ཙ་པ་ལ་ཨ་ཤུག་མེ་ཧཱུྃ་བྷྱོ། འཇིག་རྟེན་མགོན་ལ་བདག་སྐྱབས་མཆི། །དེ་ཡང་བདག་ལ་དབང་བསྐུར་གསོལ། །འཚལ་བའི་སྐལ་པ་སྩལ་དུ་གསོལ། །ལས་དང་བྱ་བའང་བསྐོ་རུ་གསོལ། །ཞེས་སྨྲས་པ་དང་། དེ་ནས་བཅོམ་ལྡན་འདས་ཀྱི་ཐུགས་རྗེ་ཆེན་པོའི་ཏིང་ངེ་འཛིན་ཅེས་བྱ་བ་ལ་སྙོམས་པར་ཞུགས་ནས། སྲིན་མོ་ཆེན་མོ་ཁྱོད་ཉིད་ལ། །ཡེ་ཤེས་རྣམས་ཀྱིས་དབང་བསྐུར་ཏེ། །རྫོགས་པའི་ཚུལ་གྱིས་ཕྱག་རྒྱ་ཆེ། །ས་བརྒྱད་གནོན་པའི་སེམས་མར་ཤོག །ཅེས་ལྷག་པའི་བྱང་ཆུབ་སེམས་སྤོམ་པོ་དང་དབང་མོས་བཟུང་སྟེ། སྲིན་མོ་ཆེན་མོ་དེ་ལ་ཕྱི་ནང་གསང་བ་གསུམ་གྱི་དབང་བསྐུར་བས། ས་བརྒྱད་པའི་བྱང་ཆུབ་སེམས་མར་གྱུར་ཏོ། །ཟས་སྐལ་ནི་དེ་བཞིན་གཤེགས་པའི་བསྟན་པ་ལ་གནོད་པར་བྱེད་པ་ཐམས་ཅད་ཟོ་ཞིག །ལས་ཀྱི་སྐལ་བ་ནི་རྣལ་འབྱོར་པ་སྒྲུབ་པ་པོ་ཐམས་ཅད་ཀྱི་གྲོགས་གྱིས་ཤིག །ཅེས་གསུངས་སོ། །ཞེས་འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས། གླེང་གཞིའི་ལེའུ་སྟེ་དང་པོའོ།། ༈ །།དེ་ནས་བཅོམ་ལྡན་འདས་མངོན་རྫོགས་རྒྱལ་པོས། སྲིན་མོ་ཆེན་མོ་དེ་ལ་འདི་སྐད་ཅེས་གསུངས་སོ། །ཁྱོད་ཀྱིས་སྟེང་ལྷ་ཡུལ་དུ་ཕུང་བར་བྱེད་པའི་དམོད་པའི་མཚོན་ཆ་ནི་གང་ཡིན། འོག་ཀླུ་ཡུལ་དུ་ཕུང་བར་བྱེད་པའི་དམོད་པའི་མཚོན་ཆ་ནི་གང་ཡིན། གླེང་གཞི་ཕུང་བར་བྱེད་པའི་དམོད་པའི་མཚོན་ཆ་ནི་གང་ཡིན། ཁྱོད་སྒྲུབ་པའི་གནས་ནི་གང་ཡིན། འཁོར་ལ་སོགས་པའི་བསྟན་པའི་རྫས་གང་ཡིན། སྲོག་གི་སྙིང་པོ་ནི་གང་ནས་ཇི་སྐད་དྲང་། དམོད་པའི་མཚོན་ཆ་ནི་གང་ལ་ཇི་ལྟར་བྱ། བསད་པ་ལ་སོགས་པའི་དཀྱིལ་འཁོར་ཇི་ལྟར་བྲི་བར་བྱ། ཁྱོད་ཀྱིས་སྨྲོས་ཤིག །ཧི་ཧི་མངོན་རྫོགས་བཀའ་སྩལ་ཉན། །རྫོགས་པའི་སངས་རྒྱས་སྤྱན་སྔ་རུ། །དམོད་པ་ལ་སོགས་སྨྲ་བར་བྱ། །རྡོ་རྗེ་འཛིན་པ་ཆེན་པོ་ཡིས། །དམོད་པ་འདི་ལ་བྱིན་རླབས་མཛོད། །དཀྱིལ་འཁོར་ལ་སོགས་ཐམས་ཅད་ལ། །བྱིན་རླབས་དམ་པ་ཐོབ་པར་མཛོད། །ཐེག་པར་ཞུགས་པའི་རྣལ་འབྱོར་ལ། །ཐུགས་རྗེ་ཆེན་པོ་བསྒྲག་པར་གསོལ། །སྟེང་ལྷ་ཡུལ་དུ་ལྷ་མིན་གྱི་རྒྱལ་པོ་ཐགས་ཟངས་རིས་ལ་སོགས་པའི་དམག་དཔོན་ནི། མན་དྷ་ཨ་སུ་ར་བྱ་བ། ལང་བ་མགོ་གསུམ་པ། ལག་པ་བཞི་པ་གཅིག་གིས་སྣ་དྲངས་ནས་འོང་ངོ་། །ལྷའི་དབང་པོ་བརྒྱ་བྱིན་ལ་སོགས་པའི་དམག་དཔོན་ནི། བ་སུ་ཏ་བྱ་བ་གཅིག་གིས་སྣ་དྲངས་ནས་འོང་། མིའི་རིགས་ཐམས་ཅད་ཀྱིས་ལྷའི་གྲོགས་བྱས། སྲིན་གྱི་རིགས་ཐམས་ཅད་ཀྱིས་ལྷ་མ་ཡིན་གྱི་གྲོགས་བྱས་ཏེ། ལྷ་མ་སྲིན་ཐམས་ཅད་དཔག་བསམ་གྱི་ཤིང་ལ་མ་འཚམས་ཏེ། རྩོད་པ་ཆེན་པོ་བྱས་པས། ལྷ་ཕམ་ལྷ་མ་ཡིན་རྒྱལ་ཏེ། དེའི་དུས་སུ་ལྷ་ཐམས་ཅད་ཀྱི་མདངས་དང་དྲོད་ལ་སོགས་པའི་བཅུད་ལ་བདག་གི་སྲོག་ཞུགས་པར་གྱུར་ཏེ། ལྷ་མོ་མདངས་ལྡན་མར་གྱུར་ཏེ། །གནས་ནི་ཤིང་ཆེན་པོ་ཡོངས་འདུ་ཞེས་བྱ་བ་ལ་གནས་བཅས་ནས། དེའི་དུས་སུ་མདངས་དང་དྲོད་ལས་སྤྲུལ་པའི་གནོད་སྦྱིན་མོ་གཉིས་ལས་ཀྱིས་བསྟུན་ཏེ། གཡོག་ཏུ་བྱུང་ནས། ལྷ་མ་ཡིན་གྱི་རིས་ཐམས་ཅད་ལ་དམོད་པ་དམོས་པ་ནི་འདི་ལགས་ཏེ། རུ་རུ་རག་མོ་ཐགས་ཟངས་རིས་པ་ཀྱི་ཙིཏྟ་མཱ་ར་ཡ། ཐང་མུ་ལེ་ཐང་མུ་ལེ། ཙ་ཐང་ཙ་ཐང་། ཐགས་ཟངས་རིས་ཀྱི་སྲོག་རྦད་རྦད། མུཾ་ནྲྀ་མུཾ་ནྲྀ་རྦད་ནན། རག་མོ་ནི་ཁ་ལོ། རག་མོ་ནི་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། མུ་ཁ་ལོ་རྦད། དེ་ནི་བདག་ཉིད་ཀྱི་དམོད་པའོ། །ཙི་སྟི་ཙི་སྟི་རྦད། ནིར་སྟི་ནིར་སྟི་རྦད། མུགས་མུགས། དེ་ནས་གནོད་སྦྱིན་མོ་དྲེ་སྣ་མའི་དམོད་པའོ། །ཐུབས་ཐུབ་སུབས་ཏི་རྦད། ས་ཁ་ལོ་རྦད། མུ་ཁ་ལོ་རྦད། དེ་ནི་ཁྲི་སྨན་ལྡེམ་དྲུག་གིའོ། །དེས་ནི་ཐགས་ཟངས་རིས་ཀྱི་རིགས་ཐམས་ཅད་བརླགས་པར་བྱས་སོ། །དེ་ནས་ལྷ་ཐམས་ཅད་ཕྲག་དོག་གི་དབང་གིས། །བདག་དང་དབང་ཕྱུག་ཆེན་པོ་མ་ཧཱ་དེ་བ་ཉལ་པོ་བྱས་པ། ལྷ་དྲན་ཐམས་ཅད་ཀྱིས་དཔྱས་པས། ལྷ་བྲན་ཐམས་ཅད་ལ་དམོད་པ་འདི་དམོས་པའོ། །ཨེ་ར་ཙ་ར་ཨེ་ར་ཙ་ར། དེ་བ་ཙིཏྟ་མཱ་ར་ཡ། ཐད་མུ་ལེ་ཐང་མུ་ལེ། ཙ་ཐང་ཙ་ཐང་། དེ་བ་ཙིཏྟ་རྦད་རྦད། མུཾ་ནྲྀ་མུཾ་ནྲྀ་ནན་ནན། རག་མོ་ནི་རག་མོ་ནི་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། ཙི་ཏི་ཙ་ཏི་རྦད། ནིར་ཏི་ནིར་ཏི། མུགས་མུགས། ཐུབ་ཐུབ་སུབས་ཏི་རྦད། སེང་ཁ་ལོ་རྦད། མུ་ཁ་ལོ་རྦད། དེས་ནི་ལྷའི་ཚོགས་ཐམས་ཅད་བརླགས་པར་བྱས་སོ། །རྒྱལ་ཆེན་བཞི་ལ་དོ་བསྡོས་ཏེ། རྐང་པ་རྒྱ་མཚོའི་གཏིང་དུ་བརྐྱང་། །སྤྱི་བོ་རི་རབ་རྩེ་དང་མཉམ་པས་རྒྱལ་ཆེན་བཞིའི་འཁོར་ཐམས་ཅད་ཞེ་སྡང་སྐྱེས་ནས། དམག་དང་བཅས་ནས་རྒོལ་དུ་བྱུང་བ་ལ། དམོད་པ་དམོས་པ་འདིའོ། །ད་ནི་དུན་ཏིང་དུ་ལ་ཡ་བཛྲ། དེ་བ་ཙིཏྟ་མཱ་ར་ཡ། ཐང་མུ་ལེ་ཐང་མུ་ལེ། ཙ་ཐང་ཙ་ཐང་། དེ་ལ་ཙིཏྟ་རྦད་རྦད། མུཾ་ནྲྀ་མུཾ་ནྲྀ་ནན། རག་མོ་ནི་རག་མོ་ནི་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། མུ་ཁ་ལོ་རྦད། ཙ་ཏི་ཙ་ཏི་རྦད། མུགས་མུགས། ཐུབ་ཐུབ་སུབས་ཏི་རྦད། པེ་ཁ་ལོ་རྦད། མུ་ཁ་ལོ་རྦད། དེས་ནི་རྒྱལ་ཆེན་རིགས་བཞིའི་འཁོར་ཚོགས་བརླགས་པར་བྱས་སོ། །དེ་ནས་ཡང་ལྷ་མ་སྲིན་གྱི་རྒྱལ་པོ་ཧེ་རུ་ན་ཀེ་ཤུ་བྱ་བས། བདག་ཅག་ལ་མཚོན་གྱི་ཆར་ཕབ་པས། མཚོན་ཐམས་ཅད་ཀྱང་རྣལ་བར་གྱུར་ཏེ། ཡང་དམོད་པ་དམོས་པ་ནི་འདིའོ། །དུ་རུ་ཙ་ལ་ནི་ཧ་ན་བཛྲ་ཧེ་རུ་ན་ཀེ་འུ་ཤུ་ཙིཏྟ་མཱ་ར་ན། ཙ་ཐང་ཙ་ཐང་། ཐང་མུ་ལེ་ཐང་མུ་ལེ། ཧེ་ར་ན་ཀེའུ་སྲོག་རྦད་རྦད། མུཾ་ནྲྀ་མུཾ་ནྲྀ་ནན་ནན། རག་མོ་ནི་རག་མོ་ནྲྀ་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། ཙི་ཏི་ཙ་ཏི་རྦད། ནིར་ཏི་ནིར་ཏི་རྦད། མུགས་མུགས། ཐུབ་ཐུབ་སུ་མ་ས་ཏི་རྦད། སེ་ཁ་ལོ་རྦད། དེས་ནི་ཧེ་རུ་ན་ཀེའུ་ཤུ་བརླགས་པར་བྱས་སོ། །དེ་ནས་ཡང་ཧེ་རུ་ན་ཧེའུ་ཤུའི་ཆུང་མ་ཕག་གི་སྣ་ཅན་མས་ཁྱོ་ཤི་བའི་དུས་སུ་དམོད་པ་དམོས་པས། བདག་ཅག་ལ་ནི་མ་ཚུགས་ཏེ་དམོད་པའི་ལན་བཏབས་པ་འདིའོ། །དུ་མ་ཧཱ་ར་བཛྲ་བྷྱོ། ཕག་གི་སྣ་ཅན་མའི་ཙིཏྟ་མཱ་ར་ཡ། ཙ་ཐང་ཙ་ཐང་། ཐང་མུ་ལེ་ཐང་མུ་ལེ། ཕག་གི་སྣ་ཅན་མའི་མའི་སྲོག་རྦད་རྦད། མུཾ་ནྲྀ་མུཾ་ནྲྀ་ནན་ནན། རག་མོ་ནི་རག་མོ་ནི་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། མུ་ཁ་ལོ་རྦད། ཙ་ཏི་ཙ་ཏི། ནིར་ཏི་ནིར་ཏི་རྦད། མུགས་མུགས། ཐུབ་ཐུབ་སུ་མ་ས་ཏི་རྦད། སེ་ཁ་ལོ་རྦད། མུ་ཁ་ལོ་རྦད། དེས་ནི་ཕག་གི་སྣ་ཅན་མ་བརླགས་པར་བྱས་སོ། །དེས་ནས་སྟེང་ལྷ་ཡུལ་དུ་མ་ཆགས་ནས་འོག་ཀླུ་ཡུལ་དུ་འོངས་པས་ཀླུ་རིགས་བཞིས་འདུག་ཏུ་མ་སྟེར་ཏེ། རྒྱལ་རིགས་ནི་ཕྲག་དོག་སྐྱེས། རྗེ་རིགས་ནི་འདོད་ཆགས་སྤྱ ད་པར་མཐོང་། བྲམ་ཟེའི་རིགས་ནི་བསྔོ་བར་མཐོང་། རིགས་ངན་ནི་ཤིན་ཏུ་སྐྲག་ནས་འདུག་ཏུ་མ་སྟེར་ཏེ། ཡང་དམོས་པ་འདིའོ། །ནཱ་ག་ནཱ་ག །ནཱ་ག་ཙིཏྟ་མཱ་ར་ཡ། ཀྱི་སྲོགས་ཀྱི་མ་ཙ། ནཱ་ག་ཙིཏྟ་མཱ་ར་ཡ། མ་ར་ཏིག་མ་ར་ཏིག །ནཱ་ག་ཙིཏྟ་མཱ་ར་ཡ། ཙེ་ཙེ་ན་མ་ར་རིག །ནཱ་ག་ཙིཏྟ་མཱ་ར་ཡ། ཙ་ཐང་ཙ་ཐང་། ཐང་མུ་ལེ་ཐང་མུ་ལེ། ནཱ་ག་མ་སྲོག་རྦད་རྦད། མུཾ་ནྲྀ་མུཾ་ནྲྀ་ནན་ནན། རག་མོ་ནི་རག་མོ་ནི་ཁ་ལོ་རྦད། དུག་ནྲྀ་དུག་ནྲྀ་ཁ་ལོ་རྦད། ཀྱི་ཁ་ལོ་རྦད། མུ་ཁ་ལོ་རྦད། ཙ་ཏི་ཙ་ཏི་རྦད། ནིར་ཏི་ནིར་ཏི་རྦད། མུགས་མུགས། ཐུབ་ཐུབ་སུབས་ཏི་རྦད། པེ་ཁ་ལོ་རྦད། མུ་ཁ་ལོ་རྦད། དེས་ནི་ཀླུ་རིགས་བཞིའི་ཚོགས་ཐམས་ཅད་ཕུང་བར་བྱས་སོ། །དེ་ནས་འཛམ་བུ་གླིང་གི་བྱང་ཕྱོགས་སུ། མྱ་ངན་གྱི་སྣམ་བུ་ལ། མཁའ་འགྲོ་མའི་ཚོགས། མཁར་རྨང་བཞི་ནི་ལྕགས། ལོགས་བཞི་ནི་བསྲེ། བྱུང་བཞི་ནི་མཆོང་། ཁ་བདག་ཡུ། པུ་ཤུ་ཤེལ། སྒོ་ནི་དུང་། མཐའ་མ་ནི་ལྕགས་རི། ནང་ནི་འབར་བའི་ཐོད་དགུ། མི་རོ་རྟ་རོའི་ཁྲི། དེ་ན་མཆིས་ཤིང་མཚན་མོ་དུར་ཁྲོད་རུ་ཉུལ་ཏེ། ཟས་སུ་མའི་ཤ་ཟ་ཞིང་ཁྲག་འཐུང་སྟེ་གནས་པ་ལ། ལས་ཀྱི་འཕྲོ་ཟད་ནས་ཚེའི་དུས་བྱས་ནས་ཤི་བར་གྱུར་ཏོ། །དེ་ནས་ཕ་ནི་དམུ། མ་ནི་ཀུན་འགྲོ་མ། དེ་གཉིས་ཀྱི་བུ་མོ་བདག་རང་དབུ་ཟང་ན་ཏིང་ཤག་བྱ་བར་སྐྱེས་ཏེ། ཁྱོ་ཏྲ་ལེ་ཏ་བྱ་བ་ལ་ཕྱིན་པས། ཁྱོ་གམ་དུ་འོང་དུ་མ་འདོད་དོ། །ཕག་རྫི་དང་འཚོས་པས། ནལ་བུ་བཙས་བར་གྱུར་ཏེ། རྒྱ་མཚོར་ལྕེབ་ཏུ་ཕྱིན་པས། རྒྱ་མཚོའི་ནང་དུ་ཨེ་ཀ་ཙ་ཏི་མའི་ཞལ་མཐོང་། དེ་ནས་ཨེ་ཀ་ཙ་ཏི་ལ་དབང་ནོས་ཏེ། ཨེ་ཀ་ཙ་ཏིས་ཚེ་རབས་སྔ་མའི་གནས་བསྟན། བྱང་མྱ་ངན་གྱི་སྣམ་བུར་ཕྱིན་ཏེ། ཁྱོ་དང་ཆེན་མ་ལ་དམོད་པ་དམོས་པ་ནི་འདི་ཡིན་ཏེ། རུ་རུ་རག་མོ་ཏྲ་ལི་ཏིའི་ཙིཏྟ་མཱ་ར་ཡ། ཙ་ཐང་ཙ་ཐང་། ཐང་མུ་ལེ་ཐང་མུ་ལེ། ཏྲ་ལི་ཏའི་སྲོག་རྦད་རྦད། མུཾ་ནྲྀ་མུཾ་ནྲྀ་ནན་ནན། རག་མོ་ནི་རག་མོ་ན་ཁ་ལོ་རྦད་རྦད། དུག་ནྲྀ་དུག་ནྲྀ་ཁ་ལོ་རྦད་རྦད། ཀྱི་ཁ་ལོ་ཀྱི་ཁ་ལོ་རྦད་རྦད། ཙ་ཏི་ཙ་ཏི་རྦད་རྦད། ནིར་ཏི་ནིར་ཏི་སྙིང་ལ་མུགས་མུགས། ཐུབ་ཐུབ་སུབས་ཏི་རྦད། ཁ་འདར་ཡེད་ཡེད། ཐུམ་ཐུམ་རྦད་རྦད། པེ་ཁ་ལོ་རྦད། མུ་ཁ་ལོ་རྦད། གཞན་ཡང་། ཨེ་ར་ཙ་ན་ཨེ་ར་ཙེ་ར་ཏྲ་ལི་ཏའི་ཙིཏྟ་མཱ་ར་ཡ། ཙ་ཐང་ཙ་ཐང་། ཐང་མུ་ལེ་ཐང་མུ་ལེ། ཏྲ་ལི་ཏའི་སྲོག་རྦད་རྦད། མུཾ་ནྲྀ་ལ་སོགས་པའི་དམོད་པ་གོང་མ་དང་མཐུན་པར་དམོས་ཏེ། གཞན་ཡང་ནི་དུན་ཏིང་དུ་ལ་བཛྲ། དུ་རུ་ཙ་ལ་ནི་ཧ་ན་བཛྲ། དུ་མ་ར་བཛྲ་ཐཱ། ནཱ་ག་ར་ག །ཀྱེ་མ་སྲོག་ཀྱི་མ་ཙ། ན་མ་ར་ཏིག་ན་མ་ར་ཏིག །ཙེ་ཙེ་ན་མ་ར་ཏིག །ཅེས་ལྷ་དང་ལྷ་མ་ཡིན་དང་། ཀླུ་ལ་སོགས་པའི་དམོད་པ་དང་སྦྲགས་ཏེ། དེ་ཡང་མའི་རིགས་ལ་རྒྱུད་གཅིག་ལ་ཡང་ལྷ་ལྟ་བུ་དལ་ཞིང་འཇམ་པ་ཡང་ཡོད། ལྷ་མ་ཡིན་ལྟ་བུ་ཁྲོ་བའི་སེམས་ཀྱང་ཡོད། རྒྱལ་པོ་ལྟ་བུ་བསོད་ནམས་ཆེ་ཞིང་དབང་ཐང་ཆེ་བའི་ཞད་བྱང་ཡོད། ཀླུ་ལྟ་བུ་གདུགས་པའི་སེམས་ཀྱི་རྒྱུད་ལ་སོགས་པ་ཡོད་པས། དམོད་པ་དེ་དག་དང་སྦྱར་བ་ལགས། དེས་རྟ་ལི་ཏ་དང་། ཚན་མ་ཀུན་བརླགས་པར་བྱས་སོ། །དེས་ནི་ཁད་ཀྱིས་གླིང་བཞི་ཕུང་བར་བྱས་ཏེ་དམོད་པས་བསད་ཅིང་ཟོས་པ་ལགས། བདག་སྒྲུབ་པའི་རྣལ་འབྱོར་པའི་གནས་ནི། བདག་ཉིན་མོ་བྲག་དམར་པོ་ཆོས་ལ་ཟངས་འདྲ་བ་ན་གནས། མཚན་མོ་ནི་དུར་ཁྲོད་ལ་སོགས་པ་ཉུལ་བས། རྣལ་འབྱོར་པས་ཀྱང་གནས་དེ་ལྟ་བུར་བྱ། བདག་དང་དྲེགས་པའི་འཁོར་མཆོད་ཅིང་བརྟེན་པའི་རྫས་ནི། ལུག་ནག་པོ་སྤྱི་དཀར་ལ་འབེབས་བཅའ། ནལ་བུའི་ཤ་ལ་ལྷ། ཁྲག་ལ་ཨརྒྷཾ་བྱ། ཚིལ་བུ་ལ་མེ་མར་བྱ། དབང་པོ་ལྔས་མེ་ཏོག་བྱ། གོ་རོ་ཙ་ན་དང་ཚིལ་ཆེན་གྱིས་དྲི་ཆུ་བྱ། ཤ་དང་ཁྲག་དང་ཚིལ་ལས་སྦོས་བྱ། ཤུན་གྱིས་རྒྱལ་མཚན་བྱ། ཐོད་པས་གཏོང་སྣོད་བྱ། རྒྱུ་ལས་ཐིག་སྐུད་བྱ། སྙིང་གིས་གཏོར་མའི་དབུས་བྱ། གློ་བ་དང་མཁལ་མ་དང་མཆིན་པས་མཐའ་བྱས་ཏེ་བཞག །གཞན་ཡང་ནལ་བུའི་རྐང་གིས་གླིང་བུ་བྱ། སྐད་ནི་པུ་རུ་རུ་པུ་རུ་རུ་ཟེར། ཐོད་པ་ལྟག་སྤྲོད་ཀྱི་རྔ་ལ་ཞིང་གི་པགས་པས་གཡོགས་མ་བྱས་ལ། ནལ་བུའི་རྐང་གིས་བྲབ། སྐད་ནི་ཅང་ཅང་ཏོག་ཅང་ཅང་ཏོག་ཟེར། ནལ་བུའི་ཐེབ་རྡོག་གཉིས་པ་ལྷོ་རྡེབས་སུ་བྱ། སྐད་ནི་བུ་ལ་ཏོག་བུ་ལ་ཏོག་ཟེར་རོ། །བྷནྡྷ་མ་ཀ་གཉིས་ལ་ཆ་ལང་བྱ། སྐད་ནི་ཀྲོག་ཀྲོག་ཅིང་བུག་ཀྲོག་ཀྲོག་ཅིང་བུག་ཟེར་རོ། །དེ་ལྟ་བུའི་སྒྲ་དང་རྫས་གང་ན་ཡོད་པའི་རྣལ་འབྱོར་པ་དེའི་དྲུང་དུ་སྲོག་གི་སྙིང་པོ་ནས་མ་དྲངས་ཀྱང་། སྐད་ཅིག་གིས་བདག་དང་། བདག་གི་འཁོར་འཇིགས་སུ་རུང་བ་བརྡ་མི་འཕྲོད་པ་དེ་དག་ཀྱང་བཀའ་ཉན་ཅིང་། གམ་དུ་མཆིའོ། །གཞན་ཡང་བདག་འཚལ་པའི་རྫས་ནི། ལག་གི་འདུ་བྱེད་ལས་ལྷུང་བའི་བྱང་ཆུབ་སེམས་དང་། འཆི་ཀའི་མཚལ་ཐིགས་དང་། ཚིལ་དཀར་ནག་དང་། ཐལ་ཆེན་དང་། ཤིང་ལོ་རླུང་གིས་ཁྱེར་བ་བཟུང་བ་དང་། མཛེས་སྡུག་མེ་ཏོག་སྣ་བརྒྱད་དང་། ཤ་སྣ་རྩ་བརྒྱད་དང་། བདུད་རྩི་ཤི་སོགས་པ་ཀུན་གྱི་གམ་དུ་མཆིའོ། །འཁོར་ལྡིང་བགྱིད་ལགས་སོ། །དྲེའུ་སྣ་རི་ལྷོ་ཡང་ལྷ་རྫས་དང་། དྲེའུ་ཁྱི་ཁྲག་གང་ན་མཆིས་པ་དེར་མཆི་ཞིང་འཁོར་ལྡིང་བགྱིད་ལགས་སོ། །ཁྲི་སྨན་ནི་མཆིས་མཁྲིས་དང་། སྨྱུག་མ་དང་། བལ་ཚོན་སྣ་ལྔ་དང་། སྣ་ཁྲག་དང་དེ་རྣམས་གང་ན་མཆིས་པ་དེར་མཆི་ཞིང་འཁོར་ལྡིང་བགྱིད་ལགས་སོ། །སྲོག་གི་སྙིང་པོ་ནི། ཨཱོཾ་རུ་རུ་རོ་རུ་པ་ཙ་པ་ལ་ཨ་ཤུག་མེ་ཧཱུྃ་བྷྱོ་ཛ་ཛཿ བདག་གིའོ། །མ་མ་ད་དུང་ཁྱེར་ཡ་བྷྱོ། དྲེའུ་སྣའི་འོ། །རུ་རུ་རོ་རུ་ཁ་དུར་མ་ཏི་བྷྱོ། ཁྲི་སྨན་གྱིའོ། །ཨཱོཾ་རུ་རུ་རོ་རུ་ཙ་པ་ལ་ཨ་ཤུག་མེ་ཧཱུཾ་བྷྱོ་ཛ་ཛཿ བདག་ཅག་གསུམ་སྤྱི་དྲིལ་བ་ལགས་ཏེ། བདག་ཅག་གི་སྲོག་གི་སྙིང་པོ་འདི་རྣམས་རྣལ་འབྱོར་པ་གང་ཞིག་འདྲེན་པ་དེའི་སྤྱན་སྔར་མཆི་ཞིང་ལས་ཀུན་བགྱིད་དོ། །དམོད་པའི་མཚོན་ཆ་ནི་གང་ལ་ཇི་ལྟར་དམོས་ཀྱང་རུང་སྟེ། རྩ་ཀོ་ལ་ནག་པའི་ནང་དུ་ཁྲག་དང་དང་སྙིང་བཏགས་པའི་ཕྱེ་མ་བླུགས་ལ། དེ་ལ་ཞིང་སྐྲའི་ཐག་པ་བཏགས་ཏེ། དམོད་པ་ཞིང་སྐྲའི་ཐགས་པ་ནས་ཞུགས་ཏེ། ཐུན་ལ་དུག་གི་ན་བུན་འཐིབས་པར་བསམ་ནས་འཕང་ན་ལྷ་ལ་སོགས་པ་ཡང་ཤི་བར་འགྱུར་ན། མི་ལ་སོགས་པ་ཀུན་སྨོས་ཅི་དགོས། བདག་ཅག་བསྙེན་ཅིང་སྒྲུབ་པའི་དཀྱིལ་འཁོར་ནི། གྲུ་གསུམ་མཐིང་ནག་ཟླ་གམ་གསུམ་དང་། སྒོ་དང་ཁྱུང་ལ་སོགས་པ་དང་ལྡན་པར་བྱས་ཏེ། གྲུ་གསུམ་ལ་མངོན་རྫོགས་རྒྱལ་པོ་ཉིད་དགོད། ཟླ་གམ་ལ་བདག་ཅག་བཀོད་ནས་བསྒྲུབས་ན། དེའི་བཀའ་བཞིན་བགྱིད་དོ། །གསང་བའི་དཀྱིལ་འཁོར་ཡང་གྲུ་གསུམ་མཐིང་ནག་གི་དབྱིབས་ལ། མངོན་རྫོགས་ཀྱི་རྒྱལ་པོས་བཀའ་ཇི་ལྟར་སྩལ་བ་གང་ལགས་པ་དེའི་ལས་བགྱིའོ་སྙིང་པོ་དང་། དམོད་པ་ལ་སོགས་པ་གཞན་ཡང་མངོན་རྫོགས་རྒྱལ་པོས་བཀའ་ཅི་ལྟར་སྩལ་བ་དེ་བཞིན་ལས་བགྱིད་དོ། །ཞེས་སྨྲས་སོ། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ཀྱི་རྒྱལ་པོ་ལས། རྗེས་སུ་སྨྲ་བའི་ལེའུ་སྟེ་གཉིས་པའོ།། ༈ །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕྱག་ན་རྡོ་རྗེས། མངོན་རྫོགས་རྒྱལ་པོ་ལ་འདི་སྐད་ཅེས་གསོལ་ཏེ། ཧེ་ཧེ་མངོན་རྫོགས་རྒྱལ་པོ་ཡིས། །དཔལ་ལྡན་ནག་མོ་ཆེན་མོ་ཡི། །སྒྲུབ་རྦད་གསང་བའི་ལས་རྣམས་དང་། །བཏུ་དང་མཐུན་སྔགས་ཐམས་ཅད་དང་། །ལྟ་སྤྱོད་དམ་ཚིག་མྱུར་འགྲུབ་དང་། །རྒྱུད་དང་མ་འགྲུབ་གནད་བོར་དང་། །ཐམས་ཅད་མ་ལུས་བཤད་པར་བྱོས། །རྡོ་རྗེ་འཛིན་པ་བདག་ཉན་འཚལ། །མངོན་རྫོགས་རྒྱལ་པོས་བཀའ་སྩལ་པ། །དཔལ་ལྡན་ནག་མོ་ཆེན་པོ་དེ། །བསྙེན་ཅིང་བསྒྲུབ་པར་བྱ་བ་ནི། །ཕྱི་དང་ནང་དང་གསང་བ་སྟེ། །དབང་ནི་ཚུལ་བཞིན་ཐོབ་པ་དེས། །དཀྱིལ་འཁོར་མཐིང་ནག་གྲུ་གསུམ་བྲི། །ཟླ་གམ་གསུམ་ལྡན་སྒོ་དང་ཁྱུད། །ནལ་བུའི་རྒྱུ་མས་ཐིག་བཏབ་པ། །གྲུ་གསུམ་ནལ་བུའི་རྐང་གསུམ་ཚད། །ཟླུམ་པོ་དེ་དང་དེ་ཡིས་བསྐོར། །ཕྱི་ལུམ་རྐང་མགོའི་ཚད་ཀྱིས་བྱ། །གྲུ་ཆད་དྲངས་ཏེ་བསྒོ་བྱ་བ། །མགོ་སྦུབ་པ་ཡི་ཚད་དུ་བྱ། །རྟག་པ་བཞུགས་པའི་གཏོར་མ་དང་། །རྒྱུན་གཏོར་ལ་སོགས་ཀུན་གྱིས་སྤྲས། །ཟླ་གམ་གསུམ་དབུས་རལ་གཅིག་མ། །ནལ་ཐོད་སྔགས་བྲིས་སྦུབ་ལ་དགོད། །མཐའ་མར་རྟེན་རྫས་གཞག་པར་བྱ། །ཟུར་ལ་ཕུབ་བུ་སྔགས་ལ་དགོད། །ཞིང་གི་རྒྱལ་མཚན་རྐང་གི་རུང་། །ཐོད་པའི་རྔ་ཆེན་ཆ་ལང་དང་། །སོར་ཕྲེང་སྤྱི་བླུགས་ཞེ་ཆེན་དགོད། །དེ་ནས་བསྙེན་བསྒྲུབ་ཚུལ་བཞིན་བྱ། །མཚན་མ་བཟང་པོ་མ་བྱུང་བར། །འཛབ་གདོན་བསྟོད་དང་སྐུལ་བ་བཏང་། །རྒྱུ་དུས་དག་ཏུ་རྒྱུན་གཏོང་ནི། །གནད་ནས་བོར་ཅིང་གཅུན་པར་བྱ། །དེ་ནས་མཚན་མ་བྱུང་བ་དང་། །དངོས་གྲུབ་གང་འདོད་རྫས་ལ་བླང་། །དེ་ནི་སྒྲུབ་པ་བཤད་པ་ཡིན། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔ་བརྒྱུད་ལས། བསྙེན་ཅིང་སྒྲུབ་པ་དང་། བཅའ་གཞི་དཀྱིལ་འཁོར་གྱི་ལེའུ་སྟེ་གསུམ་པའོ།། ༈ །།དེ་ནས་མང་དག་བཤད་བྱ་བ། །བསད་ཅིང་འཕོ་བའི་དཀྱིལ་འཁོར་ནི། །གྲུ་བཞི་མཐའ་རས་གསུམ་ལྡན་པ། །དབུས་སུ་གྲུ་གསུམ་བཅུ་དྲུག་སྟེ། །དབུས་བཞི་གནག་ལ་འཚེར་བ་ཡིན། །དབུས་ཀྱི་ལྷག་མ་ནལ་བུའི་ཁྲག །བྱང་ཤར་ལྷོ་དང་ནུབ་བྱང་གསུམ། །གཡས་དཀར་གཡོན་སྔོ་རྒྱབ་ཀྱང་སེར། །དེ་ལ་ཁམ་བུ་བརྒྱད་བཀོད་དེ། །ནས་ནག་བྲ་བོ་སྐྱེ་ཚེ་དང་། །ཉུང་ནག་དུག་དང་རམ་བུ་དང་། །སྣེའུ་སྐྱེ་ཕིབ་མ་ལ་སོགས་པ། །ནལ་བུའི་མཛུབ་མོའི་ཚད་དུ་བྱ། །རིགས་དང་མཐུན་པའི་མདོག་ཏུ་སྐུ། །ཡང་ན་ཀུན་ཀྱང་ནག་པོར་བྱ། །ཁམ་བུའི་བརྒྱ་ཡི་དཀྱིལ་འཁོར་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་མཐའ་རས་གསུམ་ལྡན་ལ། །གྲུ་གསུམ་ཐོག་ཏུ་ཟླ་གམ་དྲུག །དེ་དབུས་ཟླུམ་པོ་གྲུ་གསུམ་ལྡན། །ཁམ་བུ་དེ་ལ་དགུ་བཀོད་དེ། །ཁམ་བུ་དགུ་བསྒྲུབ་དཀྱིལ་འཁོར་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་ཟླུམ་པོ་གྲུ་གང་ཚན། །ཟླ་གམ་ཕྱིར་བལྟས་རྩ་གཅིག་དང་། །དེ་ན་ཟླ་གམ་དུག་དང་གསུམ། །གྲུ་གསུམ་མཐིང་གནག་དབུས་སུ་བྲི། །ཟླ་གམ་གསུམ་ལ་ཕག་ཐོད་གསུམ། །ཁྲག་དང་དུག་དང་མིང་རུས་དང་། །ཁ་སྐོར་དཔོན་གཡོག་སྔགས་ཀྱང་བྲི། །ཟླ་གམ་དྲུག་ལ་སྒོ་ནི་དྲུག །སྙིང་གཏུབ་སྔགས་དྲུག་ཕུར་དྲུག་དགོད། །ཟླ་གམ་ཕྱིར་བལྟས་རྩ་གཅིག་དང་། །སྒོ་ང་ཉི་ཤུ་རྩ་གཅིག་དང་། །སྙིང་པོ་ཕུར་བུ་རྩ་གཅིག་དགོད། །སྒོང་ཟོར་ནག་པོའི་དཀྱིལ་འཁོར་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་རྩི་གསུམ་བསྙེན་བསྒྲུབ་གསུམ། །རྩ་བ་དབུས་བྲི་རྒྱབ་ཏུ་གསུམ། །ཟླ་གམ་ཕྱིར་བལྟས་གསུམ་པ་བྲི། །བྱང་གི་ཟླ་གམ་དཀར་ནག་ཅན། །ཤར་དཀར་ནུབ་ནི་ལྗང་གུར་བྱ། །བྱང་ཤར་ལ་སོགས་ཟླ་གམ་གསུམ། །དམར་དང་ལྗང་དང་གནག་པར་བྱ། །ཁྲག་དང་ཁམ་བུ་དུག་ཐུན་བཞག །ནང་གི་ཟླ་གམ་གསུམ་དག་ལ། །འབྲང་རྒྱས་ཕྱེད་དཀར་ཕྱེད་ནག་དང་། །ཚེ་དང་མར་གསུམ་སྦྱར་བའི་རྫས། །བྱང་ལ་སོགས་པར་རིམ་བཞིན་བཞག །ཛ་གསུམ་མཚོ་ལ་ཁ་ཕྱིས་བསྟན། །ཕུར་པ་བཅུ་གཉིས་དགོད་པར་བྱ། །ཕོ་ཐོང་མོ་ཐོང་སྟེང་དང་འོག །ཡ་དང་མ་ནུ་གནག་དང་དམར། །མཐའ་མར་གསུམ་གྱི་སྙིང་པོས་བསྐོར། །བར་དུ་མིང་དང་རུས་བཅུག་ནས། །མཁར་ནག་དག་གིས་བསྡམ་པ་དགུ། །ཟུར་དགུ་ལ་ནི་བཞུགས་པ་སྟེ། །ཕུར་བུ་དགུ་ལ་བསྔགས་ཏེ་གནན། །ཐོད་པ་དགུ་བརྩེགས་མཎྜལ་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་བརྩེགས་པའི་ཁྱད་པར་ཅན། །བྱང་དང་ཤར་དང་ལྷོ་ནུབ་དང་། །མཐའ་རས་ཟུར་གསུམ་ཕྱེད་ཚལ་བྲིས། །དབུས་སུ་མུ་ཁྱུད་གསུམ་ལྡན་པ། །གྲུ་གསུམ་བྲིས་པས་ཟླ་གམ་གསུམ། །ཁྱུད་འཁོར་དཀར་དང་སེར་བར་བྱ། །གཙོ་ལ་ཁ་བལྟས་དོན་དག་གིས། །གཡས་དཀར་གཡོན་ནག་གྲུ་གསུམ་དྲུག །སྤྱན་དྲུག་ཕུར་དྲུག་སྔགས་དྲུག་དགོད། །དྲག་སྔགས་དགུག་སྔགས་ཟླ་གམ་སྔགས། །རིམ་པ་བཞིན་དུ་བྲི་བར་བྱ། །མཚོ་ལྗང་སྙིང་སྣའི་སྔགས་ཀྱང་བྲི། །ཕོ་ཐོད་མོ་ཐོད་སྟེང་དང་འོག །ཡ་དང་མ་ནི་བྲིས་པ་ཡིས། །ཟུར་གསུམ་དག་ལ་རེ་རེ་གནག །ཚེ་དང་འབྲང་རྒྱས་མཆོད་པ་ཡི། །སྔགས་ཀྱི་སྒྲུབ་པའི་དཀྱིལ་འཁོར་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་མཐའ་རས་གསུམ་ལྡན་ལ། །ལོགས་ལ་ཕྱིར་བལྟས་ཟླ་གམ་གསུམ། །ཟུར་དུ་ནང་བལྟས་ཟླ་གམ་གསུམ། །དབུས་སུ་རྩ་བའི་མཎྜལ་བྲི། །ཚེ་དང་འབྲང་རྒྱས་མཆོད་པ་ཡིས། །ཟླ་གམ་ཁ་དོག་དེ་བཞིན་བྱ། །ཟུར་གྱི་ཟླ་གམ་གསུམ་པོ་ལ། །སྔགས་དྲུག་ཕུར་དྲུག་ཐུན་དྲུག་དགོད། །ཟླ་གམ་ཁ་དོག་དེ་བཞིན་བྱ། །ཟུར་དུ་ཐོད་པ་གསུམ་པོ་མནན། །སྐུ་ཡི་མཎྜལ་གསང་བ་ཡིན། །དེ་ནས་ཡང་དག་བཤད་བྱ་བ། །དཀྱིལ་འཁོར་གོང་དང་གཞི་མཐུན་བྱ། །དུག་ཐུན་ཁམ་བུ་ཁྲག་ཐུན་གསུམ། །སྒྲུབ་པ་གསུམ་ཞེས་བྱ་བ་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་མཐའ་རས་གསུམ་ལྡན་ལ། །ལོགས་ལ་ཟླ་གམ་གསུམ་གསུམ་དགུ། །རྩ་བ་ལ་ནི་འབྲུ་དགུ་དགོད། །ཁ་དོག་དམར་ནག་དག་ཏུ་བྱ། །ཟུར་དུ་ཐོད་པ་གསུམ་པོ་གནོན། །དབུས་སུ་རྩ་བའི་སྙིང་པོ་བྲི། །ཁྱམས་ནི་ནག་པོ་དག་ཏུ་གཏོང་། །དུག་ཐུན་ཁམ་ཐུན་ལ་སོགས་བཅའ། །ཐུགས་ཀྱི་དཀྱིལ་འཁོར་བྱ་བ་ཡིན། །དེ་ནས་ཡང་དག་བཤད་བྱ་བ། །གྲུ་གསུམ་མཐའ་རས་གསུམ་དང་ལྡན། །དབུས་སུ་རྩ་བའི་མཎྜལ་ལ། །ལོགས་ལ་ཁ་བལྟས་ཟླ་གམ་གསུམ། །ཚེ་དང་འབྲང་རྒྱས་ཟླ་གམ་ཀྱང་། །ཁ་དོག་དེ་བཞིན་བྱ་བར་བཤད། །ཟུར་ལ་སྔགས་དྲུག་ཐུན་དྲུག་དང་། །ཕུར་དྲུག་ཚུལ་བཞིན་དགོད་པར་བྱ། །དབུས་ལ་མུ་ཁྱུད་གཉིས་ལ་སྔགས། །རྩ་བའི་སྔགས་ནི་བྲི་བར་བྱ། །ཕྲིན་ལས་དཀྱིལ་འཁོར་ཡིན་པར་བཤད། །དེ་ནས་ཡང་དག་བཤད་བྱ་བ། །གྲུ་གསུམ་ཟླུམ་པོ་ཟུར་གསུམ་ཅན། །མཐའ་མ་མེ་རི་འབར་བ་སྟེ། །ཟུར་གསུམ་ལ་ནི་ཐོད་པ་གནས། །གྲུ་གསུམ་མཐིང་ལ་ཟླ་གམ་དམར། །བསྒྲུབས་གཏོར་དུག་ཐུན་རྒྱུན་གཏོང་དང་། །ཟླ་གམ་གསུམ་ལ་རིམ་བཞིན་དགོད། །དབུས་སུ་བསྒྲུབ་བྱ་གཞག་པར་བྱ། །གཞན་ཡང་ཐོད་པ་མཚན་ངན་དུ། །ཐུན་ཁྲག་ཕུར་བུ་རྩེ་མོ་ཡང་། །མཁས་པས་གནམ་ལ་བསྟན་ལ་བཞག །ཚུལ་བཞིན་བསྒྲུབ་ན་འགྲུབ་པར་འགྱུར། །དེ་ནས་ཟོར་ནི་བྱེད་པ་ན། །མདུང་གསུམ་དར་སྣ་བཏགས་པ་གསུམ། །དྲེའུ་སྣ་མ་ཡིས་སྣ་དྲངས་ལ། །མདུང་དར་ནག་པོ་ཐོགས་ནས་སུ། །རེ་མ་ཏི་ཡིས་དབུས་བྱས་ཏེ། །མདུང་དང་དར་ནི་དམར་པོ་བྱ། །ལྡེམ་དྲུག་མ་ཡིས་མཇུག་བརྟུལ་ཏེ། །མདུང་དར་སེར་པོ་བྱས་ནས་ནི། །བདག་ཉིད་བདུད་ཀྱི་ཆས་སུ་འཇུག །གཡས་སུ་མདུང་ཐོགས་གཡོན་དུ་ཐུན། །ཕྱར་ནག་ལུས་ལ་གོན་ནས་ནི། །ཁྲག་ཐུན་ལ་སོགས་འཕང་བར་བྱ། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ཀྱི་རྒྱལ་པོ་ལས། ཕྲིན་ལས་བསྒྲུབ་པའི་ལེའུ་སྟེ་བཞི་པའོ།། ༈ །།དེ་ནས་ཡང་དག་བཤད་བྱ་བ། །དཔལ་ལྡན་ནག་མོ་ཆེན་མོ་ཡི། །དམོད་པའི་ན་ཡ་བརྩི་བྱ་ན། །བྱིན་རླབས་བྱེད་པའི་སྔགས་ཚན་དགུ། །མེ་ཡི་ས་བོན་ཨུ་ཡིས་བརྒྱན། །སྣ་དྲངས་བདུན་དུ་བཤད་པ་སྟེ། །ལྷ་ཡི་སྙིང་པོ་ཨེས་བརྒྱན་ནས། །དམོད་པ་བཅུ་ཡི་གཅིག་དག་གོ། །ང་ཡིས་སྣ་དྲངས་བཅུ་གཅིག་སྟེ། །དེ་ནས་ཨུས་བརྒྱན་བཅུ་གཅིག་པའོ། །གོང་སླང་སྣ་དྲངས་དགུའོ། །དེ་འོག་བདུན་དུ་འདོད་པ་ཡིས། །ཀ་ལ་ཡ་སྟེ་ཨིས་སྦས་པ། །དགུ་ཡི་རྣམ་པ་ཚང་བའོ། །མ་ཡིས་སྣ་དྲངས་དགུར་འདོད་པ། །ཙི་ལ་ཨེས་སྦྲས་བཅོ་ལྔ་ཡིན། །དང་པོ་རུ་རུ་རག་མོ་ཞེས། །ཐ་མར་མ་ར་མཱ་ར་ཡ་ཞེས་པ། །ཐགས་ཟངས་རིས་ལ་དམོད་པ་ཡིན། །ཨུ་ཨུ་ཨོ་ཞེས་བྱ་བས་སྤྲས། །ཨེ་ར་རྩ་ར་ཨེ་ར་རྩ་ར་མཱ་ར་ཡ་ཞེས་པ། །ལྷ་ཡི་གཞོན་ནུ་རྣམས་ལ་དམོས། །ཨེ་ཨ་གཉིས་ཀྱིས་མཛེས་པའི་སྒྲ། །ད་ནི་དུན་ཏིང་དུ་ལ་ཡ། །བཛྲ་མཱ་ར་ཡ་ཞེས་པས། །རྒྱལ་ཆེན་བཞི་ཡི་འཁོར་ལ་དམོས། །ཨི་ཨུ་ཨི་ཨུའི་རྣམ་པས་མཚན། །དུ་རུ་རྩལ་ནི། ཧ་ན་བཛྲ་མཱ་ར་ཡ། ནཱ་ག་གེ་ཤུ་སྟེ་ལྷ་མ་ཡིན། དམོད་པ་ཨུ་ཨུ་ཨི་ཡིས་སྤྲས། དུ་མ་ཧ་ར་བཛྲ་བྷྱོ། མཱ་ར་ཡ་ཞེས་བྱ་བ་ནི། ཕག་གི་སྣ་ཅན་གསོད་པ་སྟེ། །ཨུ་ཨོ་ཧ་ལ་ཡས་ཀྱང་བརྒྱན། །ནཱ་ག་ར་ག་ཞེས་པ་ནི། མཱ་ར་ཡ་ཞེས་པ་ནི་ཀུན་ལ་སྤྲས། ཀླུ་ཡི་སྒྲ་སྟེ་བྲམ་ཟེའི་རིགས། །ཀྱེ་མ་སྲོག་དང་ཀྱེ་མ་ཙ། །མཱ་ར་ཡ་སྟེ་སོད་ཅིག་སྒྲ། །རྒྱལ་རིགས་ཀླུ་སྟེ་དམོད་པ་ཡིན། །ཀ་ལ་ཡས་བརྒྱན་ཨི་ཡིས་སྤྲས། །པ་ལ་མེས་མཛེས་ཨོ་དང་ལྡན། །གང་བཞིན་ཀ་ལ་བརྒྱན་ཏེའོ། །ར་དང་ཙ་བསྡེབ་གསོད་པའི་སྒྲ། །མ་ར་ཏི་དང་མ་ར་ཏིག །གསོད་པའི་སྒྲ་སྟེ་མཱ་ར་ཡ། །རྗེ་རིགས་དམོད་པའོ་ཨི་ཨིས་བརྒྱན། ཙེ་ཙེ་ན་དང་མ་ར་ཏིག །གོང་མ་ལྟ་བུ་རབ་བརྗོད་པ་དང་། མཱ་ར་ཡ་ཡང་ཤམ་བུར་བཏགས། །རིགས་ངན་ཀླུ་ཡི་དམོད་པ་ཡིན། །ཨེ་ཨེ་ཨི་དང་ཨེ་ཨེ་ཨེ། །སྨྲས་པ་རང་བྱུང་ལྡན་པའོ། །བྱིན་རླབས་གསང་བའི་དམོད་པ་དགུ། །རྣམ་ཤེས་བརྒྱད་ཀྱི་གཤེད་མ་སྟེ། །རལ་གྲི་ལྟ་བུའི་དམོད་པ་ཡི། །ངར་བླུད་དམོད་སྔགས་བྱིན་རློབ་པའོ། །དེ་ལ་དམོད་པའི་ཐང་བ་ནི། །ན་ཡ་གྲངས་སུ་བརྩི་བ་འདི། །དཔལ་ཆེན་དཔོན་གཡོག་དམོད་པ་ལ། །དེ་ལ་བཅུ་ཡི་དྲུག་དག་དང་། །བདུན་དྲུག་ལྡན་པའི་མཚོན་ཆ་ཅན། །ཐང་མུ་ལེ་ཐང་མུ་ལེ། ཨུ་ཨེ་ཨུ་ཨེ་བཞི་དང་ལྡན། །ཙ་ཐང་ཙ་ཐང་རྦད་རྦད་ལ། །ར་དང་ཙ་བསྡེབས་ར་དང་ཙ། །བསྡེབས་ཏེ་ར་གཉིས་པ་ཡིས་མཚན། མུཾ་སྣི་མུཾ་སྣི་ནན་ནན་ཞེས། །ཨུ་དང་ཨཾ་དང་ཨུ་དང་ཨཾ། །ས་གཉིས་ན་ས་ཨི་ཨི་གཉིས། །མཚན་ཏེ་དེ་ནས་རག་མོ་ནི། །རག་མོ་ནི་དང་ཁ་ལོ་རྦད། །ཨོ་ཨི་ཨོ་ཨི་ཨོ་སྟེ་ཡང་། །ར་ཡི་སྣ་ལ་པ་ཡི་ལེགས། །ཀླུ་ཡུལ་ཐ་མའི་ཨོ་ཉིད་སྤངས། །དུག་སྣི་དུག་སྣི་ཁ་ལོ་རྦད། །ཨུ་དང་ཨི་དང་ཨུ་ཨི་ཨོ། །ས་གཉིས་ན་ཡིས་སྣ་སྤྲས་པ། །ར་ལ་བས་མཚན་ཨོ་གཅིག་ནི། །ཀླུ་ཡི་ཡུལ་དུ་སྤངས་པ་ཡིན། །ཀྱི་ཁ་ལ་དང་མུ་ཁ་ལོ། །ཨོ་གཉིས་རྟིང་ལ་རྦད་རེའོ། །ཀ་ལས་ཡ་བརྒྱན་ཨོ་ཡིས་སྤྲས། །ལ་ལ་ཨོ་དང་ཨོ་ཡིས་མཚན། །ཨུ་དང་ཨོ་དང་ར་ལ་བ། །ཀླུ་ཡུལ་ཨོ་ཨོ་གཉིས་པོ་སྤང་། །དྲེའུ་སྣ་མ་ཡི་དམོད་པ་ཡིན། །རྩ་སྟི་རྦད་རྩ་སྟི་རྦད་ཅེས་པ། ར་ལ་ཅས་སྤྲས་པ་ལ་ཏ། ཨི་དང་ལྡན་ཏེ་གོང་མ་སྦྲགས། །དེ་ནས་ར་ལ་བས་མཚན་པའོ། །ནི་སྟི་དང་ནི་སྟི་རྦད། །ཨི་སྟེ་ས་སྣ་ཏས་མཛེས་པ། །ཨི་དང་དེ་ལྡན་ཏས་མཛེས་པ། །ཨི་དང་དེ་ལྡན་གོང་མ་ལྔ་བས། །ཐ་མར་བཅད་པའི་སྔགས་དང་ལྡན། །མུགས་མུགས་ཞེས་པས་དྲེའུ་སྣ་མ། །ཨུ་ཨུ་དང་ཨུ་དང་གཉིས་ཀྱི་སྦྲགས། །ལྡེམ་དྲུག་མ་ཡི་དམོད་པ་ནི། །ཐུབ་ཐུབ་ཅེས་དང་སུབས་སྟི་རྦད། །ཨུ་ཨུ་ཨུ་ཨི་དང་ས་སྣ་ཏ། །ཐ་མར་བཅད་པའི་སྔགས་དང་ལྡན། །སེ་ཁ་ལོ་དང་མུ་ཁ་ལོ། །རྦད་རྦད་བར་དང་ཐ་མར་སྦྱར། །ཨེ་ཨོ་ཨུ་ཨོ་བསད་གཉིས་ལྡན། །ཀླུ་ཡི་ཡུལ་དུ་ཨོ་གཉིས་དང་། །ལྷ་ཡུལ་ཐ་མའི་རྦད་གཅིག་སྤང་། །ལྡེམ་དྲུག་གདུག་པའི་དམོད་པ་ཡིན། །དེ་ལ་མི་ཡུལ་ཐང་པ་ནི། །ན་ཡ་རབ་ཏུ་བརྩི་བ་ལ། །བཅུ་ཚོ་བདུན་དང་བརྒྱད་དང་ལྡན། །ཙ་ཐང་རྩ་ཐང་། ར་གཉིས་འོག་ཏུ་རྩ་ཡིས་མཛེས། །དེ་ནས་ཐང་མུ་ལེ་ཐང་མུ་ལེ། །ཨེ་ཨེ་གཉིས་ཀྱིས་མཛེས་པར་བྱ། །ཨུ་དང་ཨེ་ཡིས་མཚན་པའོ། །སྔོན་གྱི་གོང་བཞིན་ཤེས་པར་བྱ། །རྩིས་ཀྱི་ན་ཡ་མ་བརྩིས་པའི། །རྦད་གཉིས་གོང་དུ་མིང་དང་སྲོག །མུཾ་སྣི་མུཾ་སྣི་ནན་ནན་ཞེས། །ཨུ་དང་དེ་ལ་ཨཾ་དང་ལྡན། །ས་སྣ་ནས་མཛེས་སྟེང་དུ་ཨི། །དེ་གཉིས་འོག་ཏུ་གཉིས་པོ་དྲངས། །རག་མོ་ནྲྀ་དང་རག་མོ་ནི། །ཐ་མ་ཁ་ལོ་རྦད་རྦད་དུ། །ཨི་ཨོ་ཨི་དང་ཨོ་ཨུ་ལྡན། །ཐ་མར་བཅད་གཉིས་ར་ལ་བ། །དུག་སྣི་དུག་སྣི་ཁ་ལོ་དང་། །རྦད་རྦད་ཨུ་ཨིས་སྣན། །འོག་ཏུ་དེ་དྲངས་སྟེང་དུ་ༀ། །བཅད་པ་གཉིས་ཀྱི་མཐའ་མཛེས་པ། །ཀྱི་ཁ་ལོ་དང་ཀྱི་ཁ་ལོ། །ཐ་མར་རྦད་རྦད་ཅེས་པ་སྟེ། ཀ་ལ་ཡས་མཛེས་གླད་དུ་ཨི། ཨོ་དང་དེ་འདྲ་འོག་མར་སྦྲགས། །བཅད་གཉིས་བར་མ་བས་འོག་ལེགས། །རྩ་སྟི་སྟ་སྟི་རྦད་རྦད་ཅེས། །ར་ཡི་འོག་ཏུ་ཙ་ཡིས་སྤྲས། །ས་ལ་ཏ་སྟེ་དེ་ལ་ཨི། །འོག་ཏུ་སྦགས་ཏེ་བཅད་པ་གཉིས། །རེ་མ་ཏི་ཡིས་མི་ལ་མོས། །ནི་སྟི་ནི་སྟི་ཞེས་པ་ལ། །ཨི་དང་ས་སྣ་ཏ་ཡིས་མཛེས། །དེ་ལ་ཨིས་བརྒྱན་འོག་ཏུ་དྲངས། །མུགས་དང་མུགས་ཞེས་མུགས་གཉིས་གོང་། །ན་ཡ་མ་བརྩིས་དྲན་བྱེད་མིང་། །བཅུག་སྟེ་འོག་ཏུ་ཨུས་མཛེས་པ། །དྲེའུ་སྣ་དམོད་མོ་མི་ཡུལ་མཚོན། །ཐུབ་ཐུབ་ཐུབས་དང་ཏི་སྟ་རྦད། །ཨུ་ཨུ་ཨུ་ཨི་པ་སྣ་ཏ། །ཐ་མར་བཅད་པའི་རྦད་གཅིག་མཛེས། །ཐུབ་ཐུབ་རྦད་རྦད་ཅེས་པ་སྟེ། །ཨུ་ཨུ་བཤད་པ་གཉིས་ངང་ལྡན། །སེ་ཁ་ལོ་མུ་ཁ་ལོ། རྦད་རྦད་ཅེས་པ་ཡང་དག་དམོས། །ཨེ་ཨོ་ཨུ་ཨོ་བཅད་པ་གཉིས། །ལྡེམ་དྲུག་མ་ཡི་དམོད་པའོ། །དེ་ནས་ཡང་དག་བཤད་བྱ་བ། །དེ་བཞིན་མི་ལ་བསྔགས་པ་ནི། །གཞན་ཡང་འདི་ལྟར་སྦྱར་བར་བྱ། །གླིང་བཞི་དག་གི་མི་ལ་ཡང་། །སྙིང་རྗེ་ཆེ་དང་ཁྲོ་མེད་དང་། །ང་རྒྱལ་ཁེངས་སེམས་མེད་པ་དང་། །ཤིན་ཏུ་དཀར་ཞིང་གཟུགས་བྱད་བཟང་། །དེ་ནས་དེ་ལ་ལྷ་ཡུལ་དམོག་པ་སྔགས། །ཤིན་ཏུ་ཁྲོ་གཏུམ་ང་རྒྱལ་ཅན། །ཁ་རླངས་ཆེ་ཞིང་འཁྲུགས་པར་དགའ། །གཟུགས་བྱད་གཏུམ་པོར་གནས་པ་ལ། །ལྷ་མ་ཡིན་གྱི་དམོད་པ་བསྔགས། །བུད་མེད་ལུས་དང་བུད་མེད་ལ། །ཕག་གི་སྣ་ཅན་དམོད་པ་བསྔགས། །རྒྱལ་པོ་ལྟ་བུའམ་རྒྱལ་རིགས་ལ། །རྒྱལ་ཆེན་བཞི་ཡི་དམོད་པ་བསྔགས། །སྨ་ར་ཆེ་ཞིང་གདུག་པ་ཆེ། །ལུས་ནི་སྤྲུལ་ལྟར་མཉེན་པ་ལ། །གདུག་པ་བྲམ་ཟེའི་དམོད་པ་བསྔགས། །ཞེ་སྡང་གདུག་པ་དབང་མོ་ཆེ། །རྒྱལ་རིགས་ཀླུ་ཡི་དམོད་པ་བསྔགས། །ལེགས་ཉེན་གཅོད་ཅིང་འཁོར་ཚིམ་ཆེ། །སྤྱོད་པ་གཟོབ་ཅིང་གདུག་པ་ཅན། །ཤ་རྩི་སེར་ལ་ལུས་པོ་མཉན། །རྗེ་རིགས་ཀླུ་ཡི་དམོད་པ་བསྔགས། །དམན་པའི་སྤྱོད་པ་འཕྲལ་དུ་བྱེད། ལུས་བྱད་ངན་ལ་གྱོང་ཤིང་བཤན། །གདུག་པ་ཆེ་ཞིང་ཁ་མི་སྨྲ། །རིགས་ངན་ཀླུ་ཡི་དམོད་པ་བསྔགས། །གཞན་ཡང་འདི་ལྟར་སྦྱར་བར་བྱ། །མགོ་ལ་ངར་བླུད་མཇུག་ལ་གྲི། །ཐང་བྱས་བཟླས་ན་གང་ཡང་འཆི། །མཇུག་ལ་ངར་བླུད་མགོ་ལ་གྲི། །སྦྱོར་ཤེས་བཟླས་ཀྱང་འགལ་བ་མེད། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས། དམོད་སྔགས་ཐང་པ་ན་ཡང་བརྩི་བ་དང་། །ཤིས་པའི་དམོད་པའི་ལེའུ་སྟེ་ལྔ་པའོ།། ༈ །།དེ་ནས་ཡང་དག་བཤད་བྱ་བ། ཏྲག་ཤ་དང་ཁ་མུན་ཏྲ། །ཏ་མ་མེས་སྦྲས་ཨུ་དང་ལྡན། །དེ་བཞིན་ཏ་ལ་མེས་མཛེས་པའོ། །མུ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨུ་ཨུ་ཨུ་ཨུ་ཨུ་དང་ལྡན། ཧ་ལ་འས་སྤྲུལ་ཨུ་ལྡན་ཀླན་དུ་ཨཾ། །བ་ལ་ཧས་མཛེས་ཧ་ལ་ཡ། །དེ་ལ་ཨོ་དང་མ་མོ་སྲོག །ཧ་ལ་འ་སྟེ་ཨུ་ལྡན་ཨོ་གྱིས་སྤྲས། དཔོན་མོ་ཉིན་མོ་རྒྱུ་བའི་སྔགས། རག་མོ་ཏེ་ཀེཾ་ཙ་ཙ་ཞེས། །ཨོ་དང་ཨེ་ཨེ་ལྡན་པའོ། །ཐ་མ་ཁ་ལ་བྷྱོ་ཞེས་བརྗོད། །པ་ལ་ཧས་མཛེས་ཡ་སྟེ་ཨོ། །དེ་ལ་མ་མོ་སྲོག་དང་ལྡན། །མཚན་མོ་རྒྱུ་བ་དཔོན་གཡོག་གོ། །རུ་ལུ་རུ་ལུ་མ་ཏི་བྷྱོ། །ཨུ་ཨུ་ཨུ་ཨུ་ཨི་ཡིས་མཛེས། །བ་ལ་ཧས་སྤྲས་ཧ་ལ་ཡ། །གོང་བཞིན་ཨོ་སྟེ་སྲོག་དང་ལྡན། །ཉིན་མོ་རྒྱུ་བའི་སྔགས་སུ་ཤེས། །ཐུཾ་ལིས་ཐུཾ་ལིས་སྙིང་རྩ་འདུ་འདུ་ཞེས། །ཨུ་ཨི་ཨུ་ཨིས་སྣ་ཉ་དང་ཨི། །ཨུ་ཨུ་ཞེས་ནི་མཇུག་ལ་སྟེ། །སྲོག་སྲིག་སྲོག་སྲིག་ཤམ་ཤཾ་ཞེས། །ས་ལ་མེ་སྟེ་ཀླད་དུ་ཨོ། །ས་ལ་མེ ས་མཚན་ཨོ་དེས་སྤྲས། །དེ་ཡང་སྔོན་བཞིན་འོག་ཏུ་བཏུ་བར་ཤེས། །ཤ་ཤ་གཉིས་ལ་གླད་པ་ༀ། །ཐ་མར་ཁྱེར་བྷྱོ་འདུ་ཤེས་ཏེ། །ཁ་ལ་ཡ་ཏེ་དེ་ལ་ཨེ། །བ་ལ་ཧས་མཛེས་ཡ་དང་ཨོ། །དེ་ལ་སྲོག་ལྡན་ཨུ་ཨུ་ཞེས། །དེ་ནི་ཨེ་ཀ་ཙ་ཏིའི་སྔགས། །བ་ལ་ཨ་ཤ་ཛྭ་ལ་ཧྲཱི། ཧ་ལ་མེས་སྤྲས་གླད་དུ་ཨི། །སྐུ་ཡི་སྔགས་ཏེ་ལས་མཛད་པའོ། །མ་ནི་སྲོག་དང་ཛྭ་ལ་ཧཱུཾ། །ཨི་དང་ས་ལ་མེ་ཡིས་མཚན། །དེ་ལ་ཨོ་སྟེ་ཛ་ལ་ཝ། །ཧ་ལ་འས་སྤྲས་ཨུ་སྟེ་ཨཾ། །གསུང་སྟེ་ཕྲིན་ལས་མཛད་པའོ། །ཨཱོཾ་དུ་རུ་བག་ཤ་ཧཱུཾ། ཡེ་ཤེས་ལྔ་སྟེ་ཨུ་ཨུ་དང་། །ཧ་ལ་འ་སྟེ་ཨུ་ཨཾ་ལྡན། ཐུགས་ཀྱི་སྙིང་པོ་བསྟན་པ་ཡིན། །མ་ཧཱ་སྲོག་ཐུན་སྙིང་ལཾ་བྷྱོ། །ས་ལ་མེ་སྟེ་ༀ་དང་ཨུ། །ཕྲིན་ལས་སྙིང་པོ་ཀུན་འགྲུབ་པའོ། །ཨཱོཾ་དང་བཛྲ་སྙིང་ཁ་རག །སྙིང་ཁ་རག་དང་བྷྱོ་ཞེས་པ། །ཡེ་ཤེས་ལྔ་སྟེ་ཛ་ལ་ར། །ས་ལ་ཉ་སྟེ་སྟེང་དུ་ཨི། །དེ་ཉིད་དྲངས་ཏེ་སྔོན་བཞིན་སྲོག །མཱ་ར་ཡ་དང་ཐུན་ཡང་སྦྱར། །ཁམ་བུ་དགུར་ཡང་བཤད་པ་ཡིན། །མཱ་ར་ཡ་དང་ཐུན་ཡ་བཅད། །ཁམ་བུ་བརྒྱ་ཡི་སྤྱི་སྒྲུབ་ཡིན། །ཕྲིན་ལས་ཀུན་ལས་འཇུག་པ་ཡིན། །རྒྱུན་དུ་བཟླས་པ་ཁམ་བུ་ཡི། །རྒྱུན་དུ་སྐུ་གསུང་ཐུགས་ལ་སོགས། །བསྙེན་བསྒྲུབ་ཀྱང་ནི་བྱ་བ་ཡིན། །གཞན་ཡང་ཡང་དག་བཤད་བྱ་བ། །ཏྲག་རག་ཤ་དང་མུ་ཏྲ་ཞེས། །ཏ་ལ་མེ་སྟེ་ཨུ་ཏ་མི། །དབུས་ཀྱི་ཐུན་ཏེ་ནག་པོ་ལ། །ཁ་མུན་ཏྲ་དང་རག་མོ་ཛ། །དེ་ནས་ཛ་སྟེ་ཨུ་ཏ་མེ། །ༀ་སྟེ་མན་ཏྲ་ཁྲག་ལ་བཟླས། །ཁ་ལ་མ་ཏི་བྷྱོ་དང་ནི། །དེ་ནས་རག་ཤ་དང་ཨི་དང་སྲོག །དེ་ལྡན་གཡས་སུ་ཁྲག་ལའོ། །ཏྲག་རག་ཤ་དང་མུ་ཏྲ་ཞེས། །དེ་ནས་མུ་ཏྲ་དང་སྙིང་ཁ་རག །ཏ་ལ་མི་སྟེ་ཨུ་ཏ་མེ། །དབུས་ཀྱི་ཐུན་ཏེ་ནག་པོ་ལ། །ཁ་མུན་ཏྲ་དང་རག་མོ་ཛ། །དེ་ནས་ཛ་སྟེ་ཨུ་ཏ་མེ། །ཨོ་སྟེ་མན་ཏྲ་ཁྲག་ལ་བཟླས། །ཁ་ལ་མ་མ་ཏི་བྷྱོ་དང་ནི། དེ་ནས་རག་ཤ་དང་ཨི་དང་སྲོག །དེ་ལྡན་གཡས་སུ་ཁྲག་ལའོ། །ཏྲག་རཀ་ཤ་དང་མུ་ཏྲ་ཞེས། དེ་ནས་མུ་ཏྲ་དང་སྙིང་ཁ་རག །ཏ་ལ་མེ་སྟེ་ཨུ་ཏ་མེ། །ཨུ་དང་ཏ་མེ་ས་སྣ་ཉ། །ཨི་དང་ལྡན་པ་གཡོན་ལ་བཟླས། །ཀུན་གྱི་མཇུག་ལ་མཱ་ར་ཡ། །ཐུན་ཡང་སྦྱར་ཏེ་དྲང་བར་བྱ། །ཨཱོཾ་དང་མ་མ་ཏྲག་རག་ཤ །ཡེ་ཤེས་ལྔ་སྟེ་ཏ་མེས་སྤྲས། །དབུས་ཏེ་ནག་པོ་ཐུན་ལ་བཟླས། །ཙ་ལ་ལ་ཞེས་བརྗོད་ནས་ཀྱང་། །ཁ་ལ་མ་ཏིང་ཨུ་དང་ལྡན། །ཟུར་གྱི་བཅུ་ལ་བཟླས་པ་ཡིན། །སྙིང་ལ་ཟབ་ཙིཏྟ་ལ། ས་སྣ་ཉ་སྟེ་ཨི་ཨིའོ། །གཡས་ཀྱི་ཐུན་ཏེ་དཀར་པོ་ལའོ། །རག་ཤ་མུ་ཏྲ་བྷྱོ་ཞེས་པ། ཨུ་དང་ཧ་མེ་སྔོན་བཞིན་སྲོག །གཡོན་དུ་སྔོན་པོ་དག་ལ་བཟླས། །རེ་མ་ཏི་སྟེ་བྱང་ཤར་རོ། །ཨཱོཾ་དང་རུ་རུ་རོ་རུ་ཞེས། །ཡེ་ཤེས་ལྔ་སྟེ་ཨུ་ཨུ་ཨོ། །ཨུ་ལྡན་ལྷོ་ཡི་ཟུར་ལ་བཟླས། །རུ་རུ་དེ་ནས་རག་ཤ་ན། །ཨུ་ཨུ་གཉིས་ཀྱིས་འོག་ཏུ་ལེགས། །དབུས་ཀྱི་ཐུན་ལ་བཟླས་པ་ཡིན། །རུ་དང་རག་ཤ་ཏྲག་རག་ཤ་ཞེས། །ཨུ་དང་མེས་སྤྲས་གཡས་སུ་བཟླས། །རུ་ལུ་རུ་ལུ་རག་ཤ་ཞེས། །ཨུ་ཨུ་ཨུ་ཨུས་འོག་ཏུ་ལེགས། །གཡོན་གྱི་ཕྱོགས་སུ་འཕང་པའི་སྔགས། །རུ་རུ་རོ་རུ་རུ་ལུ་ཞེས། །ཐ་མར་ཙག་ཤ་སྦྱར་བྱས་ནས། །ཨུ་ཨུ་ཨོ་ཨུ་ཨུ་ཨུས་སྤྲས། །ཁྲི་སྨན་ཁམ་བུ་སྤྱི་བསྒྲུབ་བོ། །ཐོག་མར་ཏྲག་རག་ཤ་ཞེས་བརྗོད་དང་། ཐ་མར་སྙིང་ཁྲག་སྙིང་བྷྱོ་ཞེས། སྤུ་ཏ་སྤུ་ཏ་བྷྱོ་ཞེས་པ། །ཏ་ལ་མེས་སྤྲས་པ་ལ་ཉ། །དེ་ལ་ཨི་སྟི་ཁ་ལ་མེ། །ས་ལ་ཉ་སྟེ་དེ་ལ་ཨི། །དེ་རྟིང་སྔོན་བཞིན་སྲོག་གི་མཐའ། །ས་ལ་སས་སྤྲས་དེ་ལ་ཨུ། །དེ་འདིར་དྲངས་ཏེ་སྲོག་མཐའ་ཅན། །དྲེའུ་སྣ་ཁམ་བུ་སྤྱི་བསྒྲུབ་པའོ། །སྙིང་ཁ་རག་དང་ནིར་ཤ་ཞེས། །ས་ཡི་སྣ་ལ་ཉ་ཡིས་སྤྲས། །དེ་ལ་ཨི་སྟེ་དེ་ནས་ཨི། །ནུབ་ཟུར་ཁུམ་བུ་བཅུ་ལ་བཟླས། །རུ་ལུ་རཀ་ཤ་ཏི་ན་ཞེས། །ཨུ་ཨུ་ཨི་གསུམ་དེ་ལ་བརྒྱན། །དབུས་ལ་བཟླས་པ་ཉིད་དུའོ། །རག་མོ་ཙ་ཙ་ཤ་ཤ་ཞེས། །ཨོ་སྟེ་གཡས་ཀྱི་ཕྱོགས་སུ་བཟླས། །སྙིང་ཁྲག་དེ་ནས་རྩ་བ་ཡ། །ས་ཡི་སྣ་ཉ་དེ་ལ་ཨི། །ཁ་ལ་མེ་སྟེ་ར་ལ་ཙ། །གཡོན་གྱི་ཕྱོགས་སུ་བཟླས་པའོ། །དེ་ནས་ཡང་དག་བཤད་བྱ་བ། །ཁམ་བུ་སྤྱི་བསྒྲུབ་སྒོས་སྒྲུབ་ཀྱི། །རྩིས་ཀྱི་ཡན་བརྩི་བ་ནི། །སྔགས་ཚན་དགུ་པོ་དག་ལ་ཡང་། །ཐོག་མར་བཅུ་བཞི་དེ་འོག་དགུ། །དེ་འོག་བདུན་ཏེ་བཅུ་དྲུག་འོག །ལྔ་པ་བདུན་ཏེ་དྲུག་པ་དྲུག །བདུན་དྲུག་བདུན་ལྡན་བརྒྱད་པའོ། །དགུ་པ་དེ་ཉིད་ཡང་དག་ལྡན། །ཐོག་མ་ལྔ་སྟེ་དེ་འོག་བདུན། །གསུམ་པ་བདུན་ཏེ་དེ་འོག་བཅུ། །དང་པོ་ལྔ་པ་གཉིས་པ་བདུན། །གསུམ་པ་བདུན་ཏེ་བཞི་པ་ལྔ། །ཐོག་མ་ལྔ་སྟེ་གཉིས་པ་ལྔ། །གསུམ་པ་ལྔ་སྟེ་བཞི་པ་དྲུག །ལྔ་པ་བརྒྱད་དུ་གྲགས་པའོ། །ཐོག་མ་བཅུ་གཅིག་གཉིས་པ་ལྔ། །གསུམ་པ་དྲུག་སྟེ་བཞི་པ་དྲུག །ལྔ་པ་དག་ཀྱང་དེ་དག་ལྡན། །མཇུག་ལ་མཱ་ར་ཡ་ཐུན་ལ་གདགས། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ཀྱི་རྒྱལ་པོ་ལས། ཐུན་སྔགས་སྒྲུབ་པ་དང་། ན་ཡ་བརྩི་བའི་ལེའུ་སྟེ་དྲུག་པའོ།། ༈ །།དེ་ནས་ཡང་དག་བཤད་བྱ་བ། །དྲག་པོ་ལས་ཀྱི་བྱ་བ་བཤད། །ཨཱོཾ་ནི་ཡེ་ཤེས་ལྔ་ལྡན་པའོ། །རུ་རུ་ཀེའུ་རིས་དབང་བསྐུར་བ། །ཨུ་ཨུ་གཉིས་ཀྱི་འོག་ཏུ་ལེགས། །རོ་རུ་སེངྷ་བརྒྱད་དང་ལྡན། །ཨོ་ཨུ་ལྡན་ཏེ་ཙ་བ་ལ། །རལ་པ་གཅིག་མའི་ཕྱག་རྒྱ་ཡིན། །ཨ་ཤུག་མེ་སྟེ་ཨུ་ཨེ་གཉིས། །གསང་བའི་མ་བདུན་གཡོག་དང་བཅས། །མ་ཧཱུཾ་མ་བྷྱོ་ཛ་ཛ་ཞེས། །ཧ་ལ་འ་ལྡན་ཨུ་སྟེ་ཨཾ། །དཀྱིལ་འཁོར་ལྷ་ཡི་སྒོ་མ་བཞི། །སྔོན་བཞིན་མ་མོའི་སྲོག་སྔགས་ཏེ། །དབང་ཕྱུག་ལྡན་རུ་རུ་སྲིན་མོ་ཚ་བའི་ནད། རོ་རུ་རབ་ཏུ་ཚ་བའི་ནད། །ཙ་པ་ལ་ནི་བསྒྲུབ་མི་སྟེ། །མ་མོ་བདུན་ནི་ཨ་ཤུག་མེ། །ཧཱུྃ་ཞེས་ཐམས་ཅད་སྡུག་བྱེད་པ། །བྷྱོ་ཞེས་ཐམས་ཅད་ལས་ལ་སྡུད། །དེ་རྣམས་ཛ་ཡིས་ཡང་དག་འགུགས། །གཉིས་པས་བསྒྲུབ་བྱའི་ངོ་བོ་འགུགས། །རྒྱལ་བ་རྣམས་ཀྱིས་བྱིན་བརླབ་པ། །སྔགས་དེ་དང་པོར་བཟླས་པར་བྱ། །ཨཱོཾ་དང་ཙ་པ་ལ་ཞེས་ཏེ། །ཨ་ཤུག་མེ་དང་མི་ཞེས་སྒྲ། །གཉིས་ཏེ་སྭཱ་ཧཱ་གཞག་པར་བྱ། །ཡེ་ཤེས་ལྔ་སྟེ་ཨུ་ཨེ་ཨི། །ས་སྣ་ཝ་སྟེ་ཉིན་མོ་དང་། །ནུབ་མོ་དྲག་དང་ཞི་བ་བཟླས། །ཞི་བ་བས་ཡི་གེ་དགུ་ལ་རྩ་བའི་སྔགས། ཨཱོཾ་དང་བཛྲ་ཁ་རག་སྙིང་ཁ་རག །ཏྲག་ཤ་ཙ་མུན་ཙ་ཀ་ཤ་ཞེས། ཡི་གེ་ལྔ་དང་ཛ་ལ་མེ། །ས་ཉ་ཨི་སྟི་ཏ་ལ་མེ། །ཨུ་སྟེ་བཅུ་གསུམ་དེ་ཉིད་སྔགས། །ཁ་མུ་ཏྲ་དང་པ་ཏྲ་ཞེས། །མཇུག་ཏུ་ཏྲག་དང་རག་ཤ་སྦྱར། །ཨུ་དང་ཏ་མེ་ཏ་ཡང་མེ། །ཏ་མེ་བརྒྱད་པ་རི་མ་སྟི། །རུ་རུ་རོ་རུ་ཁ་ཞེས་པ། །ཨུ་ཨུ་ཨོ་ཨུ་བཞི་པ་ནི། །ཁྲི་སྨན་ཟླ་གམ་བྲི་བའི་སྔགས། །རུ་རུ་རོ་རུ་མུ་ཏྲ་ཞེས། །ཨུ་ཨུ་ཨོ་ཨུ་ཨུ་སྟེ་མེ། །དྲུག་པ་དྲེ་སྣ་ཞེས་པའོ། །དུར་མི་ཏིག་དང་མ་དུང་། །བྷྱོ་ཞེས་ཨུ་ཨི་ཨུ་དང་སྲོག །མ་མོ་ནག་མོ་ཁྲོ་སྟེ་སྟོང་། །བདུན་དང་ལྡན་པ་བཟླས་པ་བྱ། །ཏྲག་རག་ཤ་དང་ཁ་མུན་ཏྲ། །བྷྱོ་ཞེས་རུ་ལུ་རུ་ལུ་རུ་སྟེ། །ཏ་མེ་ཨུ་སྟེ་ཧ་ལ་མེ། །སྲོག་དང་ཨུ་ཨུ་ཨུ་ཨུ་སྟེ། །ཨེ་ཀ་ཙ་ཏི་ཡང་རྗེ་མོ། །ཏྲག་རཀ་ཤ་སྙིང་ཁྲག་སྙིང་། །བྷྱོ་ཞེས་ཏ་མེ་ས་སྣ་ཉ། །དེ་ལ་ཨི་སྟེ་ཁ་ལ་མེ། །ས་ཉ་དེ་ཨི་སྔོན་བཞིན་སྲོག །མཐའ་ཅན་རེ་མ་ཏི་ཡི་སྔགས། །སྤུ་ཏ་སྤུ་ཏ་བྷྱོ་པ་ལས། །ཨུ་ཡིས་དེ་སྤྲས་གཉིས་ཏེ་སྲོག །ཁྲི་སྨན་དྲག་པོས་སྔགས་ཞེས་པ། །ཤ་ཤ་ཏྲག་དང་ཤ་ཏྲག་ཅེས། །ཏ་གཉིས་མཛེས་མཆན་དྲེའུ་སྣ་མ། །དྲག་མོ་དྲག་པ་སྙིང་ཏྲག་ཅེས། །མཇུག་ཏུ་སྙིང་ཏྲག་ཏ་ལ་མཛེས། །ཨོ་ཏ་མེ་སྟེ་ས་སྣ་དེ། །ཨིས་སྤྲས་ཏ་ལ་མེ་ཡིས་མཚན། །དེ་ཉིད་འོག་ཏུ་དེ་དང་འདྲ། །ཨེ་ཀ་ཙ་ཏི་དྲག་པོའི་སྔགས། །ཏྲག་མུ་ཏྲག་པ་རེ་མ་ཏི། །གཉིས་མེས་མཚན་ཏེ་བར་དུ་ཨུ། །ལས་ཀུན་བྱེད་དེ་མཱ་ར་ཡ། །ཐུན་ཡ་སྦྱང་སྟེ་སྒོ་ང་དྲུག །སུམ་ཅུ་རྩ་དྲུག་དྲིལ་ལ་བཟླས། །ཕག་ཐོད་ལ་སོགས་ཀུན་ལ་འཇུག །དེ་ནས་ཡང་དག་བཤད་བྱ་བ། །མ་མ་ཏྲག་དང་རག་ཤ་ཞེས། །དེ་ནས་མུ་ཏྲ་ཁ་མུ་ཏྲ། །ཏ་མེ་ཨུ་ཏ་མེས་སྤྲས་པ། །ཨུ་སྟེ་ཏ་ལ་གོང་བཞིན་མེ། །མུ་རུ་མུ་རུ་ལུ་ཞེས། །ཨུ་ཨུ་དྲུག་གིས་ལོག་ཏུ་ལེགས། །བྷྱོ་ཧཱུཾ་བྷྱོ་ཞེས་མཇུག་ཏུ་བཏགས། །སྲོག་གཉིས་བར་དུ་ཧ་ཨུ་ཨཾ། ཏྲག་རག་ཤ་ཁ་མུ་ཏྲ་ཞེས། །ཏ་མེ་ཨུ་སྟེ་ཏ་ཡང་མེ། །དུར་མ་ཏི་སྟི་རག་ཤ་མོ། །ཙ་ཞེས་ཨུ་ཨི་ཨོ་གསུམ་བརྒྱན། །མ་མ་དུར་ཏེ་ཨུ་འོག་ལེགས། །དུ་མ་ལོན་ཡ་ཨུ་ཨོས་མཚན། །སྙིང་ཞེས་ཁ་ལ་རག་ཤ་བརྗོད། །ས་ལ་ཉ་སྟེ་ཨིས་སྤྲས་པ། །རྦད་གཏུབས་བཅད་སྔགས་ཨུ་དང་ལྡན། །ཙིཏྟ་བཾ་ཞེས་ཨཾ་ཨཾ་ལྡན། །ཁ་ལ་ཐུཾ་མྱོས་སྙིང་ཁྲག་ཅེས། །ཨུ་སྟེ་མ་ལ་ཡིས་མཚན། །དེ་ལ་ཨོ་སྟེ་ས་སྣ་ཉ། །དེ་ལ་ཨི་དང་ཁ་ལ་མེས་སྤྲས་པྲའོ། །ཧ་སྲ་རུ་རུ་ཐུཾ་ཞེས་པ། །ཨུ་གསུམ་གོང་དུ་ས་ལ་མེས། །ཨེ་པ་ཐུམ་སྟེ་ཨི་ཨུ་གཉིས། །དུ་ཐུ་བྲ་ར་ཐུ་ཞེས་པ། །ཨུ་གསུམ་སྐབས་སུ་ས་ལ་མེ། །དུམ་ལ་ན་ཡང་འཇུག་པ་སྟེ། །ཨུ་ཨོ་གཉིས་ཀྱིས་མཚན་པར་བྱ། །ཨི་ཡུ་ན་དང་ས་མ་ཡ། །ཐིབས་ཐིབས་ལི་ཤར་ཡང་ངེས་སོང་། །ས་མ་ཡ་ཞེས་ཏི་སྟ་ནི། །ཨི་ཨུ་ཨི་གསུམ་ཨེ་ཨ་ལྡན། །ཨི་སྟེ་ཚ་སྣ་ཏ་ཡིས་མཛེས། །སྒོ་ངའི་ཐུན་སྔགས་མན་བར་བཤད། །མ་མ་མ་རུ་ཐིབས་ཐིབས་ཞེས། །ཨུ་ཨི་ཨི་གསུམ་རྒྱན་དུ་བྱས། །ཐབ་སྲ་བུར་དང་ཁ་ཤ་བམ། །ས་ལ་མེ་སྟེ་ཨུ་ཨཾ་ལྡན། །ཡང་ཐུཾ་རི་ལི་ལི་ཞེས་པ། ཨཾ་ཨུ་ཨི་ཨི་ཨི་བརྒྱན་ལྡན། ཐིབ་ནིག་གཅིག་མེད་ཨི་ཨི་ཨི། ཨི་ཡིས་བརྒྱན་པ་ལེགས་པར་བྱ། །གཉིས་ཧྲག་བརྒྱད་རྩ་ཨི་ཏ་མེ། ར་སྣ་ག་སྟེ་དེ་ལ་ཡ། །གནམ་མཐོངས་ཕྱེད་དང་ལྕགས་སྒྲོག་ཁྲོལ། །ཨོ་ལྡན་ཕ་ལ་དེ་ལ་ཨེ། །ལ་འོག་ཅ་སྟེ་ས་སྣ་ག །དེ་ལ་མེ་ཨོ་ཁ་མེ་ཨོ། །མི་རིང་སོང་དེ་ཨི་ཨ་ལྡན། །བཛྲ་ནེ་ཕཊ་མཇུག་ཏུ་བརྗོད། །ཇ་ལ་མི་ལྡན་ཨེ་རྒྱན་ཅན། །མཱ་ར་ཡ་དང་ཐུན་ཡ་གདགས། །སྒོ་ང་རྩ་གཅིག་ཐུན་སྔ་ཡིན། །བཛྲ་ཏེ་ཕཊ་བཛྲ་ཛ་ཏ་ཏེ་ཕཊ་ཅེས། །ཛ་མེ་ཨེ་དང་ཛ་མེ་ཨེ། ཏ་ཡི་བརྒྱན་ཏེ་ཨེས་སྤྲས་པའི། །བཛྲ་ཨེ་ཧི་ཨེ་ཧི་ཞེས། །ཛ་མེ་ཨེ་ཨི་ཨེ་ཨིས་སྤྲས། །ནཱ་ག་ལེ་དང་ནཱ་ག་ལེ། །ཨེ་གཉིས་སྟེང་དུ་བརྒྱན་པའོ། །སུམྦྷ་ལེ་དང་སུབྷ་ལེ། །ཨུ་ཨེ་ཨུ་ཨེས་བརྒྱན་དུ་བྱ། །ཙིན་ཡ་ཙིན་ཡ་ཞེས་པ་ནི། །ཨི་ཨི་གཉིས་ཀྱིས་བརྒྱན་པའོ། །ལེན་ཡང་ལེན་ཡང་ཞེས་པ་ཡང་། །ཨེ་ཨེས་སྟེང་ནས་མཚན་པར་བྱ། །ཁ་ཤ་ཕ་དང་ཁ་ཤ་བ། །ཨཾ་ཨཾ་གཉིས་དང་ལྡན་པའོ། །མ་དུང་ང་བྷྱོ་མ་དུ་བྷྱོ། །ཞེས་ཨུ་ཨུ་སྲོག་དང་ལྡན་པའོ། །བརྒྱ་དང་བཅུ་བདུན་གཅིག་ལྡན་པ། །སྒོ་ང་དྲུག་དང་ཁྲག་དང་ཐུན། །ཐམས་ཅད་ཀུན་ལ་བསྔགས་པ་ཡིན། །འཕགས་པ་རྡོ་རྗེ་ནག་མོ་དབང་ཕྱུག་མའི་བསྔགས་རྒྱུད་ཀྱི་རྒྱལ་པོ་ལས། རྩ་བའི་སྔགས་དང་། ཟོར་ཐུན་ཐམས་ཅད་ཀྱི་ན་ཡ་བརྩི་བའི་ལེའུ་སྟེ་བདུན་པའོ།། ༈ །།དེ་ནས་ཡང་དག་བཤད་བྱ་བ། མ་ཧཱ་ཤ་རཀྴ་ཙཏྟ་ཞེས། །ཨི་སྟེ་དྲུག་ལྡན་གསང་བའི་སྔགས། །ཀ་ལ་མ་དང་རཀ་ཤ་ཞེས། །སི་ཏི་ཙིཏྟ་ཨི་ཨི་ཨི། །ཨོ་ཨེ་ཨུ་དང་མ་མོ་སྲོག །དགུ་དང་ལྡན་པར་བཤད་པའོ། །རུ་ལུ་རུ་ལུ་མ་ཧི་བྷྱོ། །ཨུ་བཞི་ཨི་སྲོག་ལྡན་པ་ཡིན། །ཏྲག་རཀྴ་དད་མུ་ཏྲ་ཁ། །མུ་ཏ་ནག་མོ་ཛ་ཛཿཞེས། །ཏ་གཉིས་མེད་སྟེ་དབུས་སུ་སུ། །ཨུ་ཨོ་བར་དུ་ཏ་མེས་སྤྲས། །ཡི་གེ་བཅུ་གཉིས་གསང་བའོ། །ཏེ་ཀུཾ་ཁ་ལ་མ་བྷྱོ་ཞེས། །ཨེ་ཨོ་སྲོག་སྟེ་དྲུག་པ་ཡིན། །སོད་པ་ཞེས་བྱ་རིགས་བསྔགས་སོ། །ཏྲ་ཤ་རག་དང་མུ་ཏྲ་སྙིང་། །ཁ་རག་ཐད་ཐུཾ་སི་ཁི་བྷྱོ་ཧཱུཾ། རི་ལུ་བྷྱོ་སྟེ་ཏ་མེ་གཉིས། །དབུས་སུ་ཨུ་སྟེ་ས་སྣ་ཉ། །དེ་ལ་ཨི་ལྡན་བཅད་པའོ། །དེ་ཡི་ཡི་གེ་ན་ཡའོ། །འགུ་ཡ་རག་ཤ་ཙིཏྟ་ཞེས། །ཨུ་ཨི་ཡི་གེ་དྲུག་པ་ཡིན། །ཧྲི་བཾ་ཤ་ཙ་ཏི་ཙིཏྟ། །ཨཾ་དང་ཨཾ་སྟེ་ཨི་ཨོ་བདུན། །མ་མ་རྩ་ཕུར་ཏི་ཙིཏྟ། །རསྣ་ཙ་ལྡན་ཨུ་ཨི་ཨི། །བདུན་དང་ལྡན་པར་བཤད་པའོ། །པུ་རུ་ཛ་ལྟུམ་ཙིཏྟ་ཞེས། །ཨུ་ཨུ་ལ་སྣ་ཏ་ཨུས་བརྒྱན། །ཨི་ཞེས་དྲུག་པ་རྒྱན་ཅན་ནོ། །ཐུན་སྔགས་དྲུག་ཅེས་བྱ་བར་བཤད། །ཨ་ཧ་ཁ་ཏང་ཨ་བི་ར། །ཙ་ཙིཏྟ་ཞེས་ཁ་ལ་ཝ། །ཨི་གཉིས་ཡི་གེ་བཅུ་པའོ། །ཧ་ཏྲར་དང་ནི་མ་ཧཱ་ཏྲང་། །རུ་ལུ་ཙིཏྟ་ཏ་མེ་གཉིས། །ཨུ་ཨུ་ཨི་ཞེས་ཡི་གེ་དགུ། །བརྒྱད་ཀྱི་ཐ་མར་སྲོག་ཏུང་ཏུང་། །བསྐུལ་བའི་སྔགས་ཏེ་སྦྱར་བར་བཤད། །དེ་ནས་ཡང་དག་བཤད་བྱ་བ། །བོད་དང་རྦད་དང་བསད་པའི་སྔགས། །ཏྲག་རག་ཤ་དང་མུ་ཏྲ་ཡ། །སྙིང་ཁ་རག་མ་བྷྱོ་བྷྱོ་ཞེས། །ཏ་མེ་གཉིས་ཏེ་དགུས་སུ་ཨུ། །ས་སྣ་ཉ་སྟེ་དེ་ལ་ཨི། །མ་མོ་སྲོག་ཉིང་གཉིས་མཐའ་ཅན། །རྦད་སྔགས་ཡི་གེ་བཅུ་གཉིས་པའོ། །ཏྲག་རཀྴ་དང་ཁ་མུ་ཏྲ། །རུ་ལུ་རུ་ལུ་ཧཱུཾ་བྷྱོ་ཧཱུཾ། །ཏ་གཉིས་མེ་སྟེ་དབུས་སུ་ཨུ། །ཨུ་བཞི་ཧ་ལ་ཨུ་ཨཾ་ཅན། །བར་དུ་སྲོག་སྟེ་བཅུ་གསུམ་པའོ། །རག་མོ་ཏེ་ཀུམ་ཙ་ཙ་ཁ་ལ་བྷྱོ། །ཨོ་ཨེ་ཨུ་དང་མ་མོ་སྲོག །དགུ་དང་ལྡན་པར་བཤད་པའོ། །རུ་ལུ་རུ་ལུ་མ་ཏི་བྷྱོ། །ཨུ་བཞི་ཨ་སྲོག་བདུན་པ་ཡིན། །ཏྲག་རཀ་ཤ་དང་མུ་ཏྲ་ཁ། །མུ་ཏྲ་རག་མོ་ཛ་ཛ་ཞེས། །ཏ་གཉིས་མེ་སྟེ་དབུས་སུ་ཨུ། །ཨུ་ཨོ་བར་དུ་ཏ་མེས་སྤྲས། །ཡི་གེ་བཅུ་གཉིས་གསང་བའོ། །ཏེ་ཀུ་མ་ཁ་ལ་མ་བྷྱོ་ཞེས། །ཨི་ཨུ་སྲོག་སྟེ་དྲུག་པ་ཡིན། །བོད་པ་ཞེས་བྱའི་གསང་སྔགས་སོ། །ཏྲག་རག་ཤ་དང་མུ་ཏྲ་སྙིང་། །ཁ་རག་རྦད་ཐུཾ་རི་ལི་ཞེས། །རི་ལི་བྷྱོ་སྟེ་ཏེ་མི་གཉིས། །དབུས་སུ་ཨུ་སྟེ་ས་སྣ་ཉ། །དེ་ལ་ཨི་ལྡན་བཅད་པ་འོག །ཨུ་སྟེ་ཨི་བཞི་སྲོག་མཐའ་ཅན། །བཅོ་ལྔ་ལྡན་པ་བསད་པའོ། །དེ་ནས་ཡང་དག་བཤད་བྱ་བ། །དཀར་ནག་སྔོན་དམར་སེར་པོ། །ཕྱིང་ཀ་ལོག་སྟེ་གསང་བའི་ཐུན། །ཨཱོཾ་བཛྲ་ཀི་བི་རི་ཧཱུཾ་ཕཊ། ཡེ་ཤེས་ལྔ་སྟེ་མགོ་ལ་བཞག །ཛ་ལ་མེ་སྟེ་ཨི་གསུམ་ཧ། །ཨུ་ཨཾ་མཛེས་པ་ཡི་གེ་བདུན། །མ་ཧཱ་ས་ར་ག་ན་ཧཱུཾ། །ཕཊ་མཐའ་ཨུ་ཨཾ་བརྒྱན་པའོ། །ས་ཤི་ས་ཤི་གླ་ཤི་ཞེས། །ས་ཟད་ཧཱུཾ་ཞེས་བཤད་པ་ནི། །ཨི་གསུམ་པ་ལ་ལ་འོག་ལེགས། །ཨུ་ཨ་སྤྲས་པ་དགུ་པར་བཤད། །ལོ་ཤི་ཁ་ལ་རག་བཤད་དང་། །རྦད་ན་ཧཱུཾ་སྟེ་ཨོ་ཨི་བཅད། །ཨུ་ཨ་ཧ་སྤྲས་དེ་ཡང་དགུ། །དུ་ན་ས་ར་ཐིམས་ན་དགྲ་བོ་ཧཱུཾ། ཨུ་ཨི་ཧ་ལ་ཨུ་ཨཾ་མཛེས། །ཡི་གེ་བདུན་པ་དག་ཏུ་བཤད། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས། །བོད་པ་དང་། རྦད་པ་དང་། བསད་པ་དང་། ཁར་ནག་ཐུན་གྱི་ལེའུ་སྟེ་བརྒྱད་པའོ།། ༈ །།དེ་ནས་ཡང་དག་བཤད་བྱ་བ། །སྤྱན་དྲང་མཆོད་དང་ཆོ་ག་ཀུན། །སྙིང་པོ་འདི་ཡིས་བྱ་བར་བཞག །ནག་མོ་ཏིང་ལ་མ་མདུན་བྷྱོ། །སྤྱན་དྲང་བའོ། །ཀཱ་ལཱི་རག་མོ་དུན་བྷྱོ་མ་མ་ཡ་ཡ་ཧའི། །ཕྱག་གོ། །རག་ཤའི་མའི་ཀུན་ལ་པདྨས་མ་ཡ་ཏིཥྛ་ལྷན། །བརྟན་པའོ། །མ་མ་ཀཱ་ལཱི་སེ་ཏ་ཀུ་ལུ་ལུ་ཧ་ཧ་ཧ། མཱཾ་ས་ཁཱ་ཧི། རཀྟ་ཁཱ་ཧི། མཆོད་པའོ། །མ་མ་སྙིང་ཁྲག་ཚལ་པ་དུན་ཏིང་ན་བྷྱོ་བྷྱོ། ལས་བཅོལ་བའོ། །ཏྲ་རག་ཤ་མ་ཧི་དུན་བྷྱོ། མ་ཧཱ་ཡག་ཤ་ཏིག་སྣ་ཀ་ལི་དུན་བྷྱོ་ཁྱེར། སྲོག་སྙིང་དུ་ཤེས་པར་བྱའོ། །རག་མོ་རག་མོ་མ་མདུན་ཏིང་ཧེར་མ་ཧེར་བྷྱོ། རྦད་པའོ། །བཛྲ་ཀ་རུ་ན་རྦད། སྙིང་ཁྲག་ཚལ་པ་རྦད། གཏུབ་ཙིཏྟ་རྦད། མུགས་མུགས་རྦད། སྙིང་ཁྲག་ཁ་ལ་རྦད། ཚལ་བུས་ན་སི་དུ་རྦད། ཧུར་ཐུཾ་སྲོག་ལ་རྦད། ཕུར་པ་གདབ་པའི་སྔགས་སོ། །རྦད་དུ་རྦད་དུ་རྦད་དུ་ཡ་ག་མོ་སོད་ཅིག་སོད་ནིར་ཛ་ཐུཾ་ལི་ལི་ནིར་ཛཿ མྱུར་དུ་བསྒྲལ་བའི་སྙིང་པའོ། །ཏྲཀ་ཤ་མུ་ཏྲ་སྙིང་ཁ་རག་མོ་བྷྱོ། །མདུན་ཕུང་གཏེར་བའོ། །ཡང་འདྲི་ནི་ཡཾ། བཾ་ལཾ་མ་ནི་ཡཾ། དཀྲུག་པའོ། །རག་མོ་ནི་ཤི་ཀུ་རུ་ཐཾ་རི་ལ་རྦད། །རག་མོ་ཁ་ལ་ཙ་ཅ་དུན་བྷྱོ་བྷྱོ། རཀྴ་ཐུཾ་རྦད། ཁ་ལ་ཙ་ཙ་བྷྱོ་བྷྱོ་ཙ་ཏི་རྦད། སྙིང་ལ་དྲན། རག་མོ་ཁ་ལ་ཙ་ཙ་དུན་བྷྱོ་བྷྱོ། ས་མ་ཡ་དུན་བྷྱོ་བྷྱོ། འུང་ཀམ་ཀ་མེ་ཤམ་བྷྱོ། རྦད་པའོ། །ད་ནི་གཏན་ཅིང་མནན་པ་བཤད། ཕ་མེས་ཐོད་པར་མིང་དང་རུས། །ཁར་ནག་དག་གིས་དཀྲིས་བྱས་ལ། །རལ་ཐེབས་ན་ཐེ་ཚོམ་མེད། །འུར་ཀ་མ་ཀ་མེ་ཤ་རག་ཁ་ཁ་ཧ་ཧ་ཏྲི་ཏྲི་ཛཿ དེ་ནས་ཐོད་པའི་དངོས་པོ་དེ། །བཅོ་ལྔ་ལོན་ནས་དེ་བཞིན་དུ། །ལྷ་ཁང་དུར་ཁྲོད་ལམ་པོ་ཆེ། །དེ་དག་ཏུ་ནི་གནན་པར་བྱ། །མ་མོ་ལས་བྱེད་མ་བཏུལ་ན། །ཞིང་ཤུན་དག་ལ་གཟུགས་བྱས་ལ། །གཟུགས་དེ་བརྡུངས་ཤིང་དཀྲུག་སྔགས་བཟླས། །ཛ་ཛ་ཧི་ཧི་ས་མ་ཡ་སྙིང་ཁ་རག །དེ་དག་དེ་བཞིན་བཟླས་བྱ་ཞིང་། །ཀཱི་ལ་ཡ་ནི་བརྗོད་པར་བྱས། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས། མཆོད་པ་ལས་ཀྱི་མདེའུ་ཐུང་བསྟན་པའི་ལེའུ་སྟེ་དགུ་པའོ།། ༈ །།དེ་ནས་ཡང་དག་བཤད་བྱ་བ། །སྤྱོད་པའི་རྣལ་འབྱོར་བསྟན་པ་ནི། །གཉིས་མེད་ལྟ་བས་ཐག་བཅད་དེ། །སྤྱོད་པ་ཆེན་པོ་ལ་དོར་བ། །འཁོར་བ་མྱ་ངན་འདས་པའི་ཆོས། །རྟོགས་ན་དེ་གཉིས་ག་ལ་སྲིད། །རྟོག་པ་ལོག་པས་གཉིས་སྣང་སྟེ། །དེ་ལ་མི་མོས་ལོག་རྟོགས་ཅན། །རང་ལ་རྔན་བྱེད་འཁྲུལ་པའི་སེམས། །བསྟན་ལ་བསྐུར་འདེབས་འཇིག་བྱེད་པ། །དེ་ཡིས་འཁོར་བའི་ངན་འགྲོར་ལྷུང་། །ཐུགས་རྗེ་ཆེན་པོས་བསྒྲལ་བར་བྱ། །དེ་ལྟ་བུ་ཡི་བསམ་པ་དང་། །ལྡན་ན་སངས་རྒྱས་སངས་རྒྱས་ཉིད། །དེ་མི་ལྡན་གྱི་རྣལ་འབྱོར་པས། །ཤིན་ཏུ་གདུག་པའི་ཞེ་སྡང་ཅན། །ཇི་སྲིད་འདི་ནི་གསད་པར་བྱ། །འདི་ནི་ང་ཡི་དགྲ་ཡིན་ཞེས། །རྒྱ་ཆེན་མ་རྟོགས་འཁྲུལ་པའི་སེམས། །ཞེ་སྡང་སོལ་བའི་སྡོང་པོ་འདྲ། །དེ་ཉིད་འཁོར་བའི་གཡང་སར་ལྷུང་། །གཞན་ཡང་ཕྲ་མོའི་ལྟ་བ་ནི། །སྤྱོད་ལམ་ཀུན་དུ་མ་འཁྲུལ་པར། །བདག་ཉིད་མངོན་རྫོགས་རྒྱལ་པོར་བལྟ། །གཡོན་གནས་ཐམས་ཅད་ཡུམ་དུ་བལྡ། །གཡས་གནས་རལ་གཅིག་ཕྱག་རྒྱར་བལྟ། །མདུན་གནས་ཐམས་ཅད་མ་མོ་གསུམ། །བཀའ་ལུང་ཉན་ཅིང་ལས་བྱེད་བལྟ། །རྩི་ཤིང་ནགས་ཚལ་ལ་སོགས་ཀུན། །ཐམས་ཅད་མ་མོའི་ཚོགས་སུ་ལྟ། །བཟའ་དང་བཅས་དང་བཏུང་དང་བགོ། །ལོངས་སྤྱོད་ཚོགས་སུ་སྣང་བ་ཀུན། །ཐམས་ཅད་མ་མོའི་རྫས་སུ་བལྟ། །སྣོད་ཀྱི་འཇིག་རྟེན་གཞལ་ཡས་ཁང་། །བཅུད་དུ་གནམ་པ་འཁོར་ཚོགས་བལྟ། །སྟེང་ན་ཞིང་ཆེན་གཡང་གཞིའི་ཚོགས། །འོག་ན་ཁྲག་གི་རྒྱ་མཚོའི་ཀློང་། །བར་ན་ཀེཾ་རུས་བརྩེགས་པར་བལྟ། །སྤྱོད་ལམ་ཀུན་ཏུ་བལྟ་བར་བྱ། །འཕགས་པ་རྡོ་རྗེ་ནག་མོའི་སྔགས་རྒྱུད་ལས། །ལྟ་བ་བསྟན་པའི་ལེའུ་སྟེ་བཅུ་པའོ།། ༈ །།དེ་ནས་ཡང་དག་བཤད་བྱ་བ། །གཞན་ཡང་སྤྱོད་པ་བསྟན་པ་ནི། །ལོངས་སྤྱོད་མི་ཁྲག་ཤ་ལ་རློམ། །ནལ་བུའི་ཚིལ་དང་ཤ་དང་རྐང་། །བྲིས་སྐུའི་གཡས་གཡོན་ཀུན་ཏུ་ཡང་། །སྤོས་ཀྱི་ན་བུན་འཐིབ་པར་བྱ། །མདོ་བ་དྲེའུ་རྟ་ཞོན་པར་ནུས། །བུད་མེད་ཚུལ་དུལ་བ་ཆུང་གོན། །སོར་ཚིགས་ཕྲེང་བ་འབྲས་མི་བྱ། །ན་ཆུང་གཞོན་པའི་མགོ་ལྤགས་གོན། །མི་དབང་མར་མེ་བལྟམས་བྱས་ལ། །བྲིས་སྐུ་དེ་ཡི་མཐར་མ་རུ། །འགྲོ་དང་འདུག་དང་བསྐོར་དང་འབུད། །རྐང་གི་གླིང་བུ་ཆ་ལང་བརྡབ། །གསང་བའི་སྔགས་ཀྱི་སྒྲ་དག་ཀྱང་། །མིས་མ་ཚོར་བར་དྲག་ཏུ་བཟླས། །གྲོང་དང་འདུ་འཛིན་ཟས་དག་ལ། །ཆགས་པར་མི་བྱ་ཐོད་པའི་རྔ། །བརྡུང་ཞིང་འདུ་ལོང་སྤྲུགས་གླུ་བླང་། །དྲག་པོ་དག་ལ་མཇུག་པའི་ཚེ། །ཕྱར་བ་གོན་ལ་མཆི་མ་དབྱུང་། །གདུང་བའི་སྨྲེ་སྔགས་འདོན་པར་བྱ། །ཐུན་ལ་ཞིང་སྐྲ་བཏགས་ལ་འཐེན། །ཤ་ཆེན་དག་ཀྱང་བཟའ་བར་བྱ། །སྐོམ་ན་ཁྲག་ཀྱང་འཐུང་བར་བྱ། །དེ་ལྟར་བྱས་ན་འགྲུབ་པར་འགྱུར། །གཞན་ཡང་རྣལ་འབྱོར་ཆེན་པོ་དེས། །རས་ཆེན་དག་ཀྱང་བླང་བྱས་ལ། །གྲུ་གསུམ་ཚད་བྱས་རེ་མ་ཏི། །མདོག་ནག་མཆེ་གཙིགས་རལ་གཅིག་མ། །སྦྲུལ་དང་སེང་གེའི་རྣ་ཆ་ཅན། །རུས་པའི་ཕྲེང་བའི་ཐོད་ཆེན་པོ། །ལག་ན་མདུང་དང་རལ་གྲི་ཅན། །གོས་སུ་མི་ཡི་པགས་པ་གོན། །སྨད་དུ་རེ་སྡེ་སེར་པོས་གཡོགས། །སྐེ་རགས་གདུག་པའི་སྦྲུལ་གྱིས་བྱས། །དྲེལ་ལ་ཞོན་པ་དབུས་སུ་བྲི། །དེ་ཡི་མདུན་གྱི་ངོས་སུ་ཡང་། །དྲེལ་སྣ་མ་ཞེས་མདོག་གནག་མ། །གཅེར་བུ་མི་འགྲུངས་འཇིགས་པ་ཆེ། །གཡས་ན་མདུང་ཐོགས་གཡོན་པ་ནི། །རྒྱུ་མའི་མཐུར་མདས་དྲེའུ་སྣ་ཁྲིད། །བོང་བུ་གྭ་བ་ཞོན་པ་བྲི། །རེ་མ་ཏི་ཡི་རྒྱལ་ངོས་ལ། །ཁྲི་སྨན་ཞེས་བྱ་ལྡེམ་དྲུག་མ། །མདོག་ནག་རེ་ལྡེ་ནག་པོ་གོན། །བྱ་མོ་ནག་མོ་ཞོན་ནས་ནི། །གཡས་ན་མདུང་ཐོགས་གཡོན་ན་ནི། །ཐོད་དབྱུག་དྲེའུ་ལ་རྡེག་པ་བྲི། །དེ་ལྟ་བུ་ཡང་སྤྱོད་ལམ་མོ། །གཞན་ཡང་ནལ་བུ་ལ་སོགས་ཀྱི། །ཤ་དང་ཁྲག་དང་ཚིལ་ལ་སོགས། །གཏོར་མ་གཏན་དུ་གཏང་བར་བྱ། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས་སྤྱོད་ལམ་བསྟན་པའི་ལེའུ་སྟེ་བཅུ་གཅིག་པའོ།། ༈ །།དེ་ནས་ཡང་དག་བཤད་བྱ་བ། །རྣལ་འབྱོར་ཆེན་པོའི་དམ་ཚིག་ནི། །སྙིང་རྗེ་དུས་དང་རྣམ་པ་རུ། །ཆུ་བོ་ཆེན་པོའི་རྒྱུན་བཞིན་བྱ། །ལྷ་ནི་མི་སྤང་བླ་མ་བཀུར། །དམ་འདྲེས་གསར་པའི་མཚང་མི་བྲུ། །དམན་ལ་མི་གཤེ་སྙིང་རྗེ་བསྐྱེད། །གསང་སྔགས་སྒྲ་དང་ཏིང་ངེ་འཛིན། །སྤྱོད་ལམ་ཀུན་ཏུ་རྒྱུན་མི་གཅད། །བཟའ་དང་བཏུང་བ་ཐམས་ཅད་ལ། །ལྷ་ལ་ཕུད་འབུལ་ནོངས་པ་བཤགས། །དམ་རྫས་མ་ཚང་ལྷ་མི་འབོད། །བུད་མེད་ཚོགས་ལ་སྨད་མི་བྱ། །རང་གི་ཉེས་ན་དབང་མི་གཟུགས། །རྣལ་འབྱོར་རྣལ་འབྱོར་ཐམས་ཅད་ལ། །དུས་དང་རྟག་ཏུ་མི་སྤང་མི་བྱ། །དཀོན་མཆོག་སྤྱི་ཆད་གཉེར་དུ་བླང་། །དེ་ལྟར་བྱས་ན་མྱུར་དུ་འགྲུབ། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས་དམ་ཚིག་བརྒྱན་པའི་ལེའུ་བཅུ་གཉིས་པའོ།། ༈ །།དེ་ནས་ཡང་དག་བཤད་བྱ་བ། རེ་མ་ཏི་སྟེ་དཔོན་གཡོགས་གསུམ། །ཚེས་གཅིག་ལོ་གསར་གཉན་པ་ལ། །རྒྱུ་སྟེ་གཏོང་མ་སྦྱིན་པར་བྱ། །ཟླ་བ་གཅིག་ལ་རྒྱུ་བ་ནི། །ཉི་ཤུ་དགུ་སྟེ་གཏོར་མ་གཏོང་། །ཞག་གཅིག་དག་ལ་རྒྱུ་བ་ནི། །ནང་ནུབ་ཉིན་གུང་མཚན་གུང་གཉིས། །གནད་ནས་བོར་ཞིང་ཕྲིན་ལས་བཅོལ། །འཕགས་པ་རྡོ་རྗེ་ནག་མོའི་སྔགས་རྒྱུད་ལས་དམ་ཚིག་དང་རྒྱུ་བའི་དུས་བསྟན་པའི་ལེའུ་སྟེ་བཅུ་གསུམ་པའོ།། ༈ །།དེ་ནས་ཡང་དག་བཤད་བྱ་བ། །གལ་ཏེ་བཀའ་བཞིན་མི་བྱེད་ན། །དཀྱིལ་འཁོར་གྲུ་གསུམ་སུམ་བརྩེགས་ལ། །མ་མོ་དེ་གསུམ་ཤེས་པ་གཟིར། །དུར་ཁྲོད་རོ་རས་འཁར་སིལ་ལ། །མ་ཡི་མཐའ་མར་རང་སྙིང་བྲི། །ལུས་དུ་སེང་ལྡེང་ལྕགས་སྐྱེར་ཕུར། །བྱང་ཤར་གཏོར་མ་སྤྲིན་ཁེངས་ཅན། །ལྷོ་རུ་བྲུབ་ཁུང་ཚེར་མས་དགང་། །ཀཱི་ལ་ཡའམ་ཆེ་མཆོག་གི། །ང་རྒྱལ་བསྐྱེད་དེ་ཐུགས་ཀར་ཕཊ། །གྲངས་མེད་ཧཱུཾ་གིས་མཐའ་མ་བསྐོར། །བསྙེན་བྲིས་ཕུར་བུ་གཡོན་བཟུང་ལ། །ཤ་སེར་གཟིར་བའི་སྔགས་འབུམ་བཟླས། །མ་མ་ཏྲིག་ནན་རེ་མ་ཏི། །ཏ་ལ་མེས་སྤྲས་དེ་ལ་ཨི། །ཨོ་ཨི་གཉིས་ཀྱིས་བརྒྱན་པར་བྱ། །ཙིཏྟ་པ་ལ་ཏྲག་རཀྴ། །ཨི་སྟེ་ཧ་ལ་མེས་མཚན་བྱ། །ཁ་མུན་ཏྲ་བཾ་རཀྴ་དུན། །དུན་ཛ་ཏྲི་སྟེ་ཨུའི་འོག་ལེགས། །ཏ་ལ་མེ་སྟེ་ཨུ་ཨུ་དབང་། །ཡི་གེ་ཉི་ཤུ་རྩ་བཞི་ནི། །ཡ་མོ་གསུམ་པོ་གནད་ལ་བོར། །འབུམ་ཕྲག་གཅིག་གི་བཟླས་པ་བྱེད། །ཧཱུཾ་ཕཊ་ནག་པོའི་འོད་ཟེར་གྱིས། །སྲིད་པའི་མ་གསུང་དབང་བསྡུས་ཏེ། །མར་ཐིམ་ནག་མོ་རལ་པ་ཅན། །ཉི་མའི་གོ་ཟུ་མདོག་དམར་ཅན། །ཁྲོ་བོས་དབུ་མནན་མདངས་བཀྲག་ཕྲོག །རཀྴ་མ་མ་ས་མ་ཡ། །སྟྭཾ་ཞེས་ས་སྣ་ཏས་སྤྲས་པ། །དེ་ལ་ཝ་ལྡན་ཨ་ཨཾ་སྟེ། །ཏྲིག་ནན་ས་མ་ཡ་སྟཾ་ཞེས། །ཏ་ལ་མེས་ཏེ་སྟེང་དུ་བཀྲ། །ས་ལ་ཏེ་སྟེ་དེ་ལ་ཝ། །དེ་སྟེང་ཨོ་ཨེ་ལྡན་པར་བྱ། །ཡི་གེ་བཅུ་བཞི་དེ་དག་ནི། །ཕུར་བཏབ་བདུད་རྩི་བླུད་པ་ཡིན། །ཛ་ཛ་རེ་མ་ཏི་ཛ་ཞེས། །ཨེ་ཨི་མཛེས་པའི་གོང་མི་སྒྲགས། །དབུགས་རྒྱུན་རྩ་ནི་ཛ་ལ་ཛ་ལ། །ཨ་དང་རསྣ་ག་ཡ་ཨུ། །ར་ཡིས་སྣ་ལ་ཙ་ཡིས་སྤྲས། །རྩ་རྒྱུན་དེ་ནི་སྙིང་ལ་བྷྱོ། །རསྣ་ཙ་སྟེ་ར་ལ་ག །དེ་ལ་ཨུས་སྤྲས་ས་སྣ་ཉ། །དེ་ལ་ཨི་སྟེ་མཐའ་མར་སྲོག །རཀྨོ་ཧ་ར་ཧུར་དུན་བྷྱོ། །ཨོ་ཨུ་ཨ་སྟེ་ཐ་མར་སྲོག །རག་མོ་ཐུན་ནི་བྷྱོ་བྷྱོ་ཞེས། །ཨོ་ཨུ་ཨི་སྟེ་སྲོག་གཉིས་མཐའ། །རྩ་བདུན་སྔགས་ཀྱི་ཕྲེང་བ་སྟེ། །ཐོབ་པར་འཕགས་པའི་ལས་བྱ་ན། །མ་ཧཱ་དེའང་འཇིགས་པར་འགྱུར། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས་ཤིས་བསྟན་པའི་ལེའུ་སྟེ་བཅུ་བཞི་པའོ།། ༈ །།དེ་ནས་བྱང་ཆུབ་སེམས་དཔའ་ཆེན་པོས་ཕྱག་ན་རྡོ་རྗེ་ལ་སོགས་པའི་འཁོར་འདུས་པ་ཆེན་པའི་ཚོགས་ཀྱིས། བཅོམ་ལྡན་འདས་མངོན་རྫོགས་ཀྱི་རྒྱལ་པོ་དང་རལ་པ་གཅིག་མ་ལ་བསྟོད་པ། ཨེ་མ་ཧོ་ངོ་མཚར་མངོན་རྫོགས་ཆེ། །ཨེ་མ་ཧོ་སངས་རྒྱས་ཀུན་གྱི་སྐུ། །འབར་བ་ཆེན་པོའི་གར་དགུ་ཡིས། །དོན་བྱེད་རང་བཞིན་ཁྱོད་ལ་འདུད། །ཨེ་མ་ཨེ་མ་ཡ་མཚན་ཆེ། །སྒྲ་ནི་རི་རབ་འབུམ་བསྙིལ་བཞིན། །སེམས་ཅན་ཐམས་ཅད་དབང་དུ་སྡུག །ཧཱུཾ་ཕཊ་སྒྲ་ཆེན་ཁྱོད་ལ་འདུད། །ཨེ་མ་དེ་བཞིན་གཤེགས་པའི་ཐུགས། །ཤིན་ཏུ་ཟད་པ་རྒྱ་མཚོའི་གཏིང་། །ཉོན་མོངས་ཐམས་ཅད་སྲེག་པར་བྱེད། །མི་རྟོག་ཐུགས་ཆེན་ཁྱོད་ལ་འདུད། །ཨེ་མ་དཔལ་ལྡན་རལ་གཅིག་མ། །ཡ་མཚན་ཆེན་མོ་དབུ་བཅུ་བདུན། །སྤྱན་ནི་ལྔ་བཅུ་གཅིག་དང་ལྡན། །ཕྱག་ནི་སུམ་ཅུ་རྩ་བཞི་སྟེ། །ཤིན་ཏུ་འཇིགས་པའི་ཕྱག་མཚན་ཅན། །སྲིན་མོའི་ཚོགས་རྣམས་འདུལ་བྱེད་མ། །འཇིག་རྟེན་རྣམས་ནི་བདེ་ལ་བཀོད། །ཐུགས་རྗེ་ཆེ་ལ་ཕྱག་འཚལ་འདུད། །ཅེས་བསྟོད་ནས། བྱང་ཆུབ་སེམས་དཔའ་ཕྱག་ན་རྡོ་རྗེ་ལ་སོགས་པའི་འཁོར་ཐམས་ཅད་རྗེས་སུ་ཡི་རང་བར་གྱུར་ཏོ། །འཕགས་པ་རྡོ་རྗེ་ནག་མོ་དབང་ཕྱུག་མའི་སྔགས་རྒྱུད་ལས། བསྟོད་ཅིང་རྗེས་སུ་ཡི་རངས་པའི་ལེའུ་སྟེ་བཅོ་ལྔ་པའོ།། ༈ །།རྫོགས་སོ།། །།
དཔལ་ལྡན་ལྷ་མོའི་གསོལ་མཆོད་ཕྲིན་ལས་ཀྱི་གཞུང་། པྲ་ཛྙཱ་སེང་ཧ།
དཔལ་ལྡན་ལྷ་མོའི་གསོལ་མཆོད་ཕྲིན་ལས་ཀྱི་གཞུངས་བཞུགས་སོ། །ན་མོ་གུ་རུཿ དུས་གསུམ་སངས་རྒྱས་ཀུན་གྱི་ཐུགས། །རྡོ་རྗེ་འཛིན་ལ་ཕྱག་འཚལ་ལོ། །བདུད་མོ་སྲོག་གི་གཟེར་ཆུང་གི། །བསྙེན་བསྒྲུབ་ལས་ཀྱི་རིམ་པ་བསྟན། །དེ་ལ་ལྷ་མོ་བསྒྲུབ་པའི་ཐབས་འདི་ལ། །དོན་གསུམ་སྟེ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དེ་ལ་དང་པོ་སྔོན་འགྲོའི་རིམ་པ་ནི། གནས་ནི་དུར་ཁྲོད་ཤིང་གཅིག་གམ། ས་མདོའམ། བྱང་ཤར་དུ་ལྟ་བའི་བྲག་ཕུག་གམ་ལྷ་འདྲེ་དྲག་པོ་གནས་པའི་སར་བསྒྲུབ་པར་བྱ་སྟེ། རྣལ་འབྱོར་པ་དབང་ཐོབ་ཅིང་དམ་ཚིག་དང་ལྡན་པས་གཉེན་པོ་ལྷ་ཡི་བསྙེན་པ་ཐེམ་པའི་རྣལ་འབྱོར་པས་གང་དུ་བྱ་བས་གནས་དེར་དཀྱིལ་འཁོར་མདའ་གང་གྲུ་བཞི་པའི་སྟེང་དུ། ཕུང་ཤུལ་ལ་སོགས་པའི་ས་ལ་གྲུ་གསུམ་ནག་པོ་བང་རིམ་གསུམ་པ། རྒྱར་གྲུ་གང་ཟབས་སུ་ཁྲུ་ཕྱེད་པ་དུག་ཁྲག་གི་ནག་པོར་བྱུག་ལ། གྲུ་གསུམ་དུ་མཆོག་ཕུར་གསུམ་ལོག་གསུམ་ལ་གཙང་བརྒྱད་སྲིན་མོའི་འགྲོས་སུ་སྒྲེལ་ལ། དེ་རྣམས་ཀྱི་ཁ་ཤ་དུམ་རེ་འོག་ཏུ་ལིང་ག་རེ་བཞག །དེའི་ཕྱི་རིམ་ཟླུམ་སྐོར་གསུམ་བྱས་ལ། ནང་མ་ཐོད་ཕྲེང་། བར་མ་མེ་རི། རྒྱབ་མ་ལུང་རི། དེའི་ནང་དུ་ལིང་ག་གཞུག་པ་སོགས་འོག་ཏུ་འབྱུང་བ་བཞིན་བྱའོ། །དེ་ནས་བསྟན་རྫས་ཀྱི་རིམས་པ་ནི། གཏོར་མ་འབྲུ་སྣ་ཚོགས་ལས་བྱས་པའི་ཕྱེ་མ་རཀྟ་ཆང་ཕུད་བདུད་རྩི་སྦྲུས་པའི་བཤོས་བུ་ནག་པོ་ཟུར་གསུམ་པ་གཅིག་སྣོད་གང་ཡང་རུང་བའི་ནང་དུ་བཞག །དེའི་མཐར་མི་དབང་གི་ཤ །དྲི་རྒོད་སྙིང་། ཁྲིམ་འཆལ་ཤ་ལ་སོགས་པའི་ཤ་སྣ་ཚོགས་ཀྱི་བསྐོར། མདའ་བྱ་རྒོད་མ་གཅིག་ལ་སྐྱེས་དར་མ་དྲིར་ཤི་བའི་ཙིཏྟའི་རྩ་སྦུབ་དབུ་མར་འབོད་རྦད་བསད་གསུམ་གྱི་སྔགས་དྲི་ཁྲག་དང་ཚལ་གྱི་བྲིས་ལ་གཞུག །དར་ནག་གི་དྲིལ་ལ་མདའི་མགུལ་དུ་བཏག་གོ། །གཞན་ཡང་ཙཀ་ལི་དང་ནེའུ་ལེའི་རྐྱལ་བུའི་ནང་དུ་མི་དབང་གི་དབང་པོ་ལྔ་དང་། བྱེ་རུ་ལ་སོགས་རིན་པོ་ཆེ་སྣ་ཚོགས་དང་། འབྲུ་སྨན་སྣ་ཚོགས་དང་། རྨ་བྱའི་སྒྲོ་དར་སྣ་ཚོགས་བོང་བུའི་སྙིང་། ཤིང་ལོ་རླུང་ཁྱེར་བྱང་སེམས་དཀར་དམར། དྲི་རྒོད་དབང་པོ་ལྔ། མི་བསོད་པའི་མཚོན་ཆ་ལ་རལ་གྲི་སོར་བརྒྱད་པ་ཡུ་བར། བྷྱོ་བྲིས་པ་གཅིག་དང་། དེ་རྣམས་མདའ་ཡི་མགུལ་དུ་བཏག་བརྟེན་གཏོར་ཁར་གཟུགས། དེའི་སྟེང་དུ་དར་ནག་གི་གདུག་ཕུབ། གཞན་ཡང་མདའ་བྱ་རྒོད་མའི་མགུལ་དུ་བུད་མེད་ཆུར་ཤི་བའི་སྲིན་ལག་དང་། བ་དན་རྩེ་གསུམ་རྣམས་བཏག་ལ་རང་གི་གཡས་སུ་བཞག་དེ་རྣམས་བརྟེན་པའི་རྫས་ཀྱི་རིམ་པའོ། །དེ་ནས་དངོས་གཞིའི་རིམ་པ་ལ། ཐོག་མར་མཚམས་དང་བསྲུང་བས་འཁོར་ལོ་དང་སྐྱབས་སེམས་ཡན་ལག་བདུན་པ་རྣམས་བྱས་ལ། རང་ཉིད་ཕྱག་རྡོར་རམ་ཡི་དམ་གང་རུང་བ་བཟླས་པའི་བར་རྫོགས་པར་བྱའོ། །དེ་ནས་ལྷ་བསྒོམ་པའི་རིམ་པ་ནི། བདག་ཅག་གི་ཕྱི་ནང་གི་བར་ཆད་ཞི་ཞིང་བསྟན་ལ་སྡང་བའི་དགྲ་བོ་རྣམས་བསྒྲལ་ནས་སངས་རྒྱས་ཀྱི་བསྟན་པ་དར་ཞིང་རྒྱས་པར་བྱ་བས་དོན་དུ་ལྷ་མོ་བསྙེན་ཅིང་བསྒྲུབ་པར་བྱ་བསྙམས་དུ་བསམ་ལ། སེམས་བསྐྱེད་དེ་ལྷ་མོའི་མངོན་རྟོགས་བསྒོམ་པ་ནི། ༀ་སྭ་བྷ་ཝ་ཤུདྡྷ་སརྦ་དྷརྨཱ་སྭ་བྷ་ཝ་ཤུདྡྷོ྅་ཧཾ། སྐད་ཅིག་གིས་མི་དམིགས་པའི་ངང་ལས་མདུན་དུ་བྷྲཱུཾ༔སྨུག་ནག་འབར་བ་གཅིག་ཡོངས་སུ་གྱུར་པ་ལས་ཐོད་པ་སྐོམ་རློན་གྱིས་གཞལ་ཡས་ཁང་གྲུ་བཞི་གོ་བཞི་པ། ཞིང་ཆེན་གྱི་ཀ་གདུང་། ཞིང་ཆུང་གི་དྲལ་དྲབ། ཤ་ཆེན་གྱི་ནག་ལེབ། ཚིལ་ཆེན་གྱི་འཕན་གདུགས། ཙིཏྟའི་ཕོ་ལོང་། རྒྱུ་མའི་ལྡ་ལྡིབ། ཉི་ཟླའི་སྐར་ཁུང་བྱས་པ། སྟེང་ན་ཞིང་ཆེན་གྱི་རྒྱལ་མཚན་གཙུག་པ། གཏོག་ལ་ཞིང་གི་གདུག་འཁོར་བ། ཡངས་ཤིང་རྒྱ་ཆེ་བ། བློས་རྫོགས་ཚད་གཅིག་བསྐྱེད་དོ། །དེའི་ཕྱི་རོལ་དུ་བསྐལ་པའི་མེ་རི་འབར་བས་གུར་ཁང་། དེའི་ཕྱི་རོལ་དུ་བསྐལ་པའི་རླུང་ནག་འཚུབ་མའི་གུར་ཁང་འཁོར་བ། འོག་གི་ས་གཞི་ལ་མི་རོ་དང་རྟ་རོ་གཅལ་དུ་བཀྲམ་པ། མི་ཁྲག་དང་རྟ་ཁྲག་གི་མཚོ་འཁྱིལ་བ། དེ་ནས་གང་དུ་གྷརྦྷ་པ་ཧཱུཾཿཞེས་བརྗོད་པའི། གཞལ་ཡས་ཁང་དེའི་དབུས་སུ་ཏིཿལས་སྤྲུལ་པས་བོང་དུ་དམར་ག་རླུང་གི་གཤོག་པ་ཅན། ཐོད་སྐོམ་འབར་བས་སྒ་བསྟད་པ། སྲིན་པོའི་ཡན་འགལ་ལ་སྔ་རུ་བྱས་པ་སྲིན་མོའི་མན་འགལ་ལ་ཕྱི་རུ་བྱས་པ། གོང་ཐག་གློ་སྨེད་སྦྲུལ་ལ་བྱས་པ། རུ་སྦལ་ནག་པོའི་ཕོག་གུ་བཏབ་པ། སྔ་ཤད་གཡས་ན་བདུད་ཀྱིས་ཁྲམ་བམ། སྔ་ཤད་གཡོན་ན་ཚོན་གྱི་གྲུ་གུ། ཕྱི་ཤད་གཡས་ན་བྱང་དམར་གྱི་བམ་རོ། ཕྱི་ཤད་གཡོན་ན་ནད་ཀྱི་རྐྱལ་པ་འགེལ་བ། མི་མགོའི་ཐོད་སྡོམ་བྱས་པ་སྙན་གཉིས་ན་མི་ལག་གཉིས་འཕྱང་བ། མཇུག་མ་ན་མིག་གཅིག་ཡོད་པ། བཱ་སུ་ཏ་ཡི་ཞག་པའི་མཐུར་ཆིང་བྱས་པ། དེའི་སྒ་གོང་དུ་ཞིང་ཆེན་བསྣོལ་བས་གདན་གྱི་སྟེང་དུ། རཾཿལས་ཉི་མའི་དཀྱིལ་འཁོར། དེའི་སྟེང་དུ་རང་གི་ཐུགས་ཀ་ནས་བྷྱོཿནག་མོ་གཅིག་འཕྲོས། དེ་ལས་འོད་ཟེར་འཕྲོས། བསྟན་ལ་སྡང་བའི་དགྲ་བགེགས་ཐམས་ཅད་ཚར་བཅད། ཚུར་འདུས་བྷྱོ་ལ་ཐིམཿ དེ་ཡོངས་སུ་གྱུར་པ་ལས་དཔལ་ལྡན་ལྷ་མོ་སྐུ་མདོག་མཐིང་ནག་ལ་རྔམ་པ་ཞལ་གཅིག་ཕྱག་གཉིས་སྤྱན་གསུམ་དམར་ལ་ཟླུམ་པ། མེ་སྟག་གི་ཚ་ཚ་འཕྲོ་བ། ཕྱག་གཡས་པས་རལ་གྲི་སྡིག་པ་ཅན་ནམ་མཁའ་ལ་ཕྱར་བ། གཡོན་པས་བྷནྡྷ་ལྕང་ལོ་ཅན་ཁྲག་གི་བཀང་བ་ཐུགས་ཀར་འཛིན་པ། མཆན་ན་ནེ་ལེའི་རྐྱལ་པ་ཐོག་པས་ཁ་ནས་རིན་པོ་ཆེ་འཕྱུར་བའི་ཚུལ་གྱི་ཆུན་བུ་འཕྱང་བ། རལ་པ་དམར་སེར་གྱེན་དུ་བརྫེས་པའི་སྐྲ་མཚམས་སུ་ཐོད་པ་སྐོམ་པོ་ལྔས་དབུ་བརྒྱན་དང་། རིན་པོ་ཆེའི་རྩེ་ཕྲན་ལྔའི་བརྒྱན་པ། སྤྱི་བོ་ནས་ཟླ་བ་ཚེས་པ། ལྟེ་བ་ནས་ཉི་མ་ཤར་བ། སྤྱི་གཙུག་ན་རྨ་བྱའི་རྒྱལ་མཚན་གཙུག་པ། སྙན་ཤལ་གཡས་གོང་ན་སེང་གེ་འགྱིང་བ། གཡོན་ན་སྦྲུལ་ནག་གི་གདེངས་ཀ་འཕྱོ་བ། སྙན་གཉིས་ན་གསེར་གྱི་དྲིལ་བུ་འཁྲོལ་བ། ཞིང་ཆེན་གྱི་གཡང་གཞི་དང་། གླང་ཆེན་གྱི་ཀོ་རློན་སྐུ་སྟོད་ལ་མནབ་པ། སྟག་ལྤགས་གིས་ཤམ་ཐབས་དང་། མི་རྩིད་ཀྱི་རེ་ལྡེའི་སྐུ་སྨད་དཀྲིས་པ། ཐོད་རློན་ལྔ་བཅུའི་དོ་ཤལ་བྱས་པ། རུས་པ་དང་རིན་པོ་ཆེའི་རྒྱན་གྱིས་བརྒྱན་པ། སྐུ་དང་ཡན་ལག་ཐམས་ཅད་སྦྲུལ་གྱིས་བརྒྱན་པ། དེའི་ཐུགས་ཀར་རཾཿལས་ཉི་མའི་དཀྱིལ་འཁོར་གྱིས་སྟེང་དུ་བྷྱོཿནག་མོ་གཅིག་ལ་སྔགས་ཀྱིས་གཡོན་དུ་འཁོར་བར་བསམ། བྷྱོཿདེ་ལས་བྷྱོཿནག་མོ་འབུམ་འཕྲོས་པས་འཁོར་བདུད་མོ་བྱེ་བ་འབུམ་གྱི་ཚོགས་དང་བཅས་པ་ཐམས་ཅད་སྐུ་མདོག་ནག་མོ་རལ་པ་སྔོ་དམར་ཐུད་དུ་འཕྱོང་བ། གཡས་པ་རྣམས་ཀྱི་གྲི་གུག །གཡོན་པ་རྣམས་ཀྱི་ཐོད་ཁྲག་ཐོག་པ། མཆན་ན་ནད་ཀྱི་རྐྱལ་པ་སྔོ་དམར་འཆང་བ། ཞིང་ཆེན་གྱི་གཡང་གཞི་སྐུ་ལ་མནབ་པ། འཇིག་འཇིག་རྔམས་རྔམས་བྱེད་ཅིང་། །འཁོར་བདུད་མོའི་ཚོགས་ཀྱི་གཙོ་མོའི་བཀའ་ཉན་ཅིང་ལས་བྱེད་པའི་ཚུར་གྱི་བསྐོར་བར་བསམ། དེ་ནས་ཡེ་ཤེས་པ་སྤྱན་དྲངས་པ་ནི། སྲིན་ལག་གི་གཡབ་དར་ཐོག་ལ། གཙོ་འཁོར་ཐམས་ཅད་ཀྱི་དཔྲལ་བར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་བདག་ཉིད་ཀྱི་ཐུགས་ཀའི་ཧཱུྃ་སྔོན་པོ་དེ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས། རི་རབ་ཀྱི་རྩེ་མོ་བྱང་ཤར་གྱི་མཚམས་ནས་དཔལ་ལྡན་ལྷ་མོ་བཞུགས་པའི་ཐུགས་ཀའི་བྷྱོཿལ་ཕོག་པས་སྔོན་གྱི་ཐུགས་དམ་རྗེས་སུ་དྲན་ནས་འཁོར་དང་བཅས་པ་སྐད་ཅིག་གིས་བྱོན་པར་བསམ་ལ། བྷྱོཿ དད་པ་དང་ནི་དམ་ཚིག་གིས། །ཚུར་གཤེགས་ཚུར་བྱོན་དཔལ་ལྷ་མོ། །བདུད་མོ་དཔལ་ལྡན་རེ་མ་ཏི། །རྣལ་འབྱོར་བདག་གི་གདོངས་ཏེ་བོས་པའི་ཚེ། །ཉི་མ་བྱང་ཤར་ཕ་གི་ན། །ཡོངས་འདུས་ཤིང་གི་རྩ་བ་ན། །མཚོཿམུ་ལེ་མཐིང་གི་ནང་ཤེད་ན། །མཐིང་ཤུན་སྔོན་པོའི་གུར་ཁང་ན། །ཐོད་པ་དགུ་བརྩེགས་གཞལ་ཡས་ན། །བསྭེ་ཡི་སྐུ་མཁར་གྲུ་བཞིའི་ནང་། །རིན་ཆེན་སྣ་ཚོགས་ཕོ་བྲང་ནས། །མི་རོ་རྟ་རོ་གཅལ་དུ་བཀྲམ། །མི་ཁྲག་རྟ་ཁྲག་འདམ་རྫབ་ལྡང་། །དེ་ན་མ་གཅིག་ལྷ་མོ་བཞུགས། །ལྷ་མོ་ནག་མོ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །འདོད་པ་ཁམས་ཀྱི་དབང་ཕྱུག་མ། །ཆིབས་སུ་བོང་བུ་དམར་ག་བཅིབས། །ཁལ་དུ་ལྕགས་ཀྱི་དྲ་བ་མིག་དགུ་འགེལ། །མཆན་ན་ནད་ཀྱི་རྐྱལ་པ་ཐོག །གཡས་ན་རལ་གྲི་སྡིག་པ་ཅན། །གཡོན་ན་སྡུག་པས་ཐོད་ཁྲག་ཐོག །སྟོང་གསུམ་ཀུན་གྱི་བྱོས་བླུག་མཁན། །བདུད་མོ་དཔལ་ལྡན་རེ་མ་ཏི། །དམ་ཚིག་དབང་གི་སྤྱན་འདྲེན་ནོ། །དམ་ལ་མ་འདའ་ད་ཚུར་བྱོན། །མ་གཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་དང་བཅས། །རྣལ་འབྱོར་བདག་གི་གདོང་སྟེ་བོས་པའི་ཚེ། །མ་མཆིས་མ་ཐོག་མྱུར་དུ་བྱོན། །མ་ཅིག་ལྷ་མོ་ནག་མོ་ཁྱོད། །སྔོན་ཚེ་ཕྱག་ན་རྡོ་རྗེ་ལ། །རང་རྟག་སྲོག་གིས་སྙིང་པོ་ཕུལ། །བོས་ནས་འོང་བར་ཁས་བླངས་བཞིན། །ཁས་བླང་དམ་ལ་མ་འདའ་བར། །རྣལ་འབྱོར་བདག་གི་ཁྱོད་བསྐུལ་ན། །དམ་ཚིག་དབང་གི་ད་ཚུར་བྱོན། །ཐུགས་དམ་དབང་གི་གཤེགས་སུ་གསོལ། །མ་གཅིག་ལྷ་མོ་འཁོར་ཚོགས་རྣམས། །ན་ཆུང་མཚན་ལྡན་ཆུར་ཤི་ཡི། །སྲིན་ལག་གཡབ་མོས་སྤྱན་འདྲེན་ནོ། །མི་དབང་སྨིན་པས་ཤ་ཁྲག་དང་། །དམ་རྫས་འདི་ལ་མྱུར་དུ་བྱོན། །ཨེ་ཨཱཿར་ལི་མ་ཧཱ་ཀ་ལི་རེ་མ་ཏི་ས་མ་ཡ་ཛ་ཛཿ ཛཿཧཱུྃ་བཾ་ཧོཿ ཞེས་སྤྱན་དྲངས་སོ། །བྷྱོཿ མ་གཅིག་དཔལ་ལྡན་རེ་མ་ཏི༔ ཕྱག་བརྙན་བདུད་མོ་འབུམ་ཕྲག་རྣམས། །མི་རོ་གཤིབས་པས་གདན་མཆོག་དང་། །སྲིད་པའི་བོང་བུའི་གདན་ལ་བཞུགས་སུ་གསོལ། །ༀ་མ་ཧཱ་ཀ་ལི་རེ་མ་ཏིཿས་མ་ཡཱ་ཏིཥྛ་ལྷན། ཅེས་གདན་འབུལ་ལོ། །བྷྱོཿ མ་ཅིག་དཔལ་ལྡན་རེ་མ་ཏི། །ནག་མོ་ཆེན་མོ་རྣལ་འབྱོར་མ། །ཕོ་ཉ་བདུད་མོའི་འཁོར་ཚོགས་ལ། །བདག་གི་དད་པའི་ཕྱག་བགྱིའོ། །ༀ་མ་ཧཱ་ཀ་ལི་རེ་མ་ཏི་ཨ་ཏི་པཱུ་ཧོ། པྲ་ཏི་ཛ་ཧོ། དེ་ནས་དམ་སྲེ་བ་འདི་སྐད་དོ། །ཧཱུཾ་བྷྱོ། རྡོ་རྗེ་དྲི་ཆུ་བདུད་རྩིའི་མཆོག །པཉྩ་ཨ་མྲྀ་ཏ་དང་སྦྱར། །དམ་ཚིག་དབང་གི་ཁྲག་ཆེན་པོ། །བསྲེ་བས་མཆོག་སྟེ་སྲོག་གི་སྙིང་། །མ་ཅིག་བདུད་མོའི་འཁོར་ཚོགས་རྣམས། །ཁྱོད་དང་བདག་ཉིད་དམ་བསྲེའོ། །རྟག་ཏུ་དམ་ལ་མ་འདའ་ཅིག །དམ་ལས་འདས་ན་བསྲེགས་པར་བྱེད། །ༀ་མ་ཧཱ་ཀུ་ཀུ་ས་མ་ཡ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། དམ་བསྲེའོ། །དེ་ནས་མཆོད་པ་འབུལ་བ་ནི། བྷྱོ༔ མ་ཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་སྡེ་ལ། །བུ་ཡི་མཆོད་པ་འབུལ་བ་ནི། །རྒྱ་མཚོ་འབབ་ཆུ་ཆུ་མིག་རྫིངས། །དམར་ཆེན་ཁྲག་གི་ཨརྒྷཾ་འདི། །མ་ཡི་སྐུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་བདག་ལ་སྩོལ། །ༀ་མ་ཧཱ་ཀ་ལི་རེ་མ་ཏི་ཨརྒྷཾ་ཨ་ཧཱུྃ། །ཆུ་སྐྱེས་ཐངས་སྐྱེས་མེ་ཏོག་དང་། །དབང་པོ་ལྔ་ཡི་མེ་ཏོག་འདི། །མ་ཡི་དབུ་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ་ཀ་ལི་རེ་མ་ཏི་པུཥྤེ་ཨཱཿཧཱུྃ། ག་བུར་གླ་རྩི་ཀུ་ཀུལ་དང་། །ཤ་ཆེན་སྤོས་ཀྱི་དུད་པ་འདི། །མ་ཡི་ཤང་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ་ཀ་ལི་རེ་མ་ཏི་དྷུཔྤེ་ཨཱཿཧཱུྃ། ཉི་ཟླ་གློག་དང་གསལ་བས་སྒྲོན། །ཞུན་ཆེན་མདངས་ཀྱི་མར་མེ་འདི། །མ་ཡི་སྤྱན་ལ༴ ཐུགས་མཆོག་དམ་པ༴ དངོས་གྲུབ་དམ་པ༴ ༀ་མ་ཧཱ་ཀ་ལི་རེ་མ་ཏི་ཨ་ལོ་ཀེ་ཨ་ཧཱུཾ། །ཁྲག་ཆེན་དུག་དང་སྦྱར་བ་ཡི། །རཀྟའི་དྲི་ཆབ་དམར་པོ་འདི། །མ་ཡི་ཐུགས་ལ༴ ཐུགས་མཆོག༴ དངོས་གྲུབ་དམ་པ༴ ༀ་མ་ཧཱ་ཀ་ལི་རེ་མ་ཏི་གྷནྡྷེ་ཨཱཿཧཱུཾ། །ཕྱེ་མ་ལྔ་ཡི་བཤོས་བུ་དང་། །ནལ་ཤ་ཡོན་ཏན་ལྔ་ལྡན་འདི། །མ་ཡི་ལྗག་ལ༴ ཐུགས་མཆོག༴ དངོས་གྲུབ་དམ༴ ༀ་མ་ཧཱ་ཀ་ལི་རེ་མ་ཏི་ནེ་ཝི་ཏེ་ཨ་ཧཱུྃ། །པི་ཝཾ་གླིང་བུ་མཁར་བའི་རྔ། །མན་འགལ་ཆ་ལང་རྐང་གི་དུང་། །མ་ཡི་སྙན་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ་ཀ་ལི་རེ་མ་ཏི་ཤབྟ་ཨ་ཧཱུྃ། ཕྱི་ཡི་མཆོད་པའོ། །བྷྱོཿ རྨད་དུ་བྱུང་བའི་གཏོར་མ་དང་། །བུམ་དང་རིལ་དང་ཕྱེ་ཚལ་དང་། །ནང་རོལ་གློ་སྙིང་མཁལ་མར་བཅས། །ཤ་དང་རུས་པ་རྐང་ཚིལ་རྣམས། །མ་བདུད་འཁོར་དང་བཅས་ལ་འབུལ། །བསྟན་པ་བསྲུངས་ཕྱིར་བཞེས་སུ་གསོལ། །མ་ཏ་མ་མཾ་ས་ལ་ཁཱ་ཧི། །མ་ཧཱ་ཏཀྟ༴ མ་ཧཱ་ཙིཏྟ་ལ༴ མ་ཧཱ་བ་སུ་ཏ༴ མ་ཧཱ་ཀོ་རོ་ཙ་ན༴ མ་ཧཱ་ཀི་ནི་རི་ཏི་ལ་ཁཱ་ཧི། །ཞེས་གཏོར་མ་འབུལ་ལོ། །བྷྱོཿ མ་ཅིག་བདུད་མོ་འཁོར་ཚོགས་རྣམས། །ཐུགས་དམ་དབང་གི་སྙིང་ཁྲག་དམར་ལ་རོལ། །མ་ཅིག་ཁྲག་འཐུང་དཔག་ཚད་བརྒྱད་ཁྲིར་རྒྱུག །དམ་རྫས་རྨད་དུ་བྱུང་བས་དམར་ཆེན་བཞེས། །མ་ཧཱ་རཀྟ་ལ་ཁཱ་ཧི། །ཅེས་པའི་རཀྟ་སྦྲེང་ལ་འབུལ་ལོ། །བྷྱོཿ སངས་རྒྱས་བསྟན་པ་བསྲུངས་བའི་ཕྱིར། །མ་ཅིག་བདུད་མོའི་འཁོར་ཚོགས་རྣམས། །ཐུགས་དམ་དབྱིངས་ཉིད་བསྐང་བའི་ཕྱིར། །བདུད་རྩི་སྨན་གྱིས་མཆོད་པ་བཞེས་སུ་གསོལ། །མ་ཧཱ་པཉྩ་ཨ་མྲྀ་ཏ་ལ་ཁཱ་ཧི། ཞེས་ཨ་མྲྀ་ཏ་ལ་འབུལ་ལོ། །བྷྱོཿ མ་ཅིག་བདུད་མོའི་འཁོར་བཅས་ལ། །ཡང་ཅིག་མཆོད་པ་འབུལ་བ་ནི། །མི་དབང་སྨིན་པའི་ཤ་ཁྲག་དང་། །འཆི་ཀའི་མཚལ་ཏིག་དམར་པོ་དང་། །ཤིང་ལོ་རླུང་ཁྱེར་སར་མ་ལྷུང་། །འབྲས་བུ་སྨིན་པའི་ཤིང་ཏོག་དང་། །ན་ཆུང་མོ་ཡི་བྱུང་ཟད་ཁྲག །མ་ཉམས་བྱང་སེམས་དཀར་དམར་དང་། །དྲི་རྒོད་སྙིང་དང་དབང་པོ་ལྔ། །བོང་བུའི་སྙིང་དང་ཁྲམ་འཆལ་ཤ །རྣམ་ལྔ་བདུད་རྩིའི་མཆོད་པ་འདི། །མ་ཅིག་འཁོར་དང་བཅས་ལ་འབུལ། །བསྟན་པ་བསྲུངས་ཕྱིར་བཞེས་སུ་གསོལ། །ཅེས་བརྟེན་པའི་དམ་རྫས་ཀྱི་མཆོད་པ་འབུལ་ལོ། །དེ་ནས་དངོས་གྲུབ་བླང་བ་ནི། ཧཱུྃ་བྷྱོཿ མ་ཅིག་ཆེན་མོ་འཁོར་བཅས་རྣམས། །དངོས་གྲུབ་སྩོལ་བའི་དུས་ལ་བབ། །མ་ཡི་བུ་ལ་དངོས་གྲུབ་རྩལ་དུ་གསོལ། །ཡེ་ཤེས་གསང་བའི་དངོས་གྲུབ༴ འདོད་ཁམས་འདུལ་བའི༴ འཇིག་རྟེན་དབང་བསྒྱུར༴ ཡེ་ཤེས་ལྔ་ཡི༴ ཚེ་བསོད་རྒྱས་པའི༴ བདུད་རྩི་སྨན་གྱི༴ གྲུབ་ཆེན་བརྒྱད་ཀྱི༴ ཕྲིན་ལས་རྣམ་བཞིའི༴ སྐུ་གསུང་ཐུགས་ཀྱི་དངོས་གྲུབ་རྩལ་དུ་གསོལ། །ༀ་ཤྲི་དེ་ཝི་མ་ཧཱ་ཀ་ལི་རེ་མ་ཏི་ཀ་ཡ་སིདྡྷི་ༀ། ཝཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃཿ སརྦ་སིདྡྷི་ཧྲཱིཿ ཞེས་དངོས་གྲུབ་བླང་ངོ་། །དེ་ནས་གདུང་ཤུགས་དྲག་པོས་བཤགས་པ་བྱ་བ་ནི། བྷྱོཿ བསྐལ་པ་མེ་རླུང་འཚུབས་མའི་ཀློང་དཀྱིལ་ནས། །མ་ཅིག་ལྷ་མོ་ནག་མོ་གློག་འགྱུ་མ། །ཕོ་ཉ་བདུད་ཀྱི་བུ་མོའི་འཁོར་ཚོགས་རྣམས། །མ་ཅིག་འཁོར་བཅས་བཙེ་བས་བདག་ལ་དགོངས། །བདག་ཉིད་མི་མཁས་རྨོངས་པའི་དབང་གྱུར་ཏེ། །སྐུ་གསུང་ཐུགས་དང་རྩ་བ་ཡན་ལག་གིས། །དམ་ཚིག་ཉམས་ཆག་འགལ་འཁྲུལ་གྱུར་པ་དང་། །ཏིང་འཛིན་མི་གསལ་ར་རིས་ཁལ་ཁོལ་དང་། །སྔགས་དང་ཕྱག་རྒྱ་དྲ་ཆགས་ཟུར་ཉམས་དང་། །ཉམས་པ་ཅན་གྱི་གྲིབས་ཀྱི་ཕོག་པ་དང་། །ཕུད་ཉམས་ལྷག་མར་གྱུར་པ་ཐམས་ཅད་དང་། །དམ་རྫས་མཆོད་རྫས་དུས་སུ་མ་འཚོགས་དང་། །དཔོན་གཡོག་མཆེད་ལྕམ་ཐུགས་དད་འགལ་བ་དང་། །ཁྱད་པར་མ་གཅིག་དཔལ་ལྡན་ལྷ་མོ་ཡི། །སྐུ་གསུང་ཐུགས་དང་རྩ་བ་ཡན་ལག་གིས། །དམ་ཚིག་ཉམས་ཆག་འགལ་འཁྲུལ་ཅི་མཆིས་པ། །མ་ཅིག་བདུད་མོའི་འཁོར་ཚོགས་རྣམས་ལ་བཤགས། །རབ་ཏུ་བཤགས་སོ་ཚངས་པའི་དངོས་གྲུབ་སྩོལ། །ཅེས་བཤགས་པ་བྱའོ། །དེ་ནས་བསྟོད་པ་བྱ་བ་ནི་འདི་སྐད་དོ། །བྷྱོཿ བསྐལ་པ་མེ་ལྟར་འབར་བའི་ཀློང་དཀྱིལ་ནས། །རླུང་ནག་དགུ་ཀློང་འཁྲིག་པའི་ཕོ་བྲང་ནས། །མ་ཅིག་ལྷ་མོ་འདོད་ཁམས་གཙོ་མོ་སྟེ། །ནག་མོ་ཟ་བྱེད་འཇིག་པའི་ཆ་ལུགས་ཅན། །མཐིང་ནག་མི་བསྲུན་ཁྲག་གི་རལ་པ་ཅན། །མཿཁྱོད་ཀྱི་སྐུ་མདོག་ནག་མོར་སྟོན། །དོན་དམ་དབྱིངས་ནས་བསྐྱེད་པ་མེད་པའི་རྟགས། །རལ་པ་གཡས་ནས་གཡོན་དུ་འཁྱིལ་བ་ནི། །ཡུམ་གྱི་མཁའ་ལ་སྤྲུལ་པའི་འགྱེད་པའི་རྟགས། །རལ་པའི་གསེབ་ནས་མེ་སྟག་འཕྲོ་བ་ནི། །ཐུགས་རྗེས་སྤྲུལ་པ་ཕྱོགས་བཅུར་འགྱེད་པའི་རྟགས། །རལ་པ་སྤྱི་བོའི་གཙུག་ཏུ་འཁྱིལ་བ་ནི། །ཐུགས་དམ་དགོངས་སྤྱོད་གཅིག་ཏུ་འཁྱིལ་པའི་རྟགས། །ཐོད་སྐམ་ཕྲེང་བས་དབུ་ལ་བརྒྱན་པ་ནི། །ཐུགས་རྗེས་སྤྲུལ་སྐུའི་འགྲོ་དོན་མཛད་པའི་རྟགས། །རྨ་བྱའི་རྒྱལ་མཚན་དབུ་ལ་བཅུག་པ་ནི། །ཕྲིན་ལས་རྣམ་བཞི་སོ་སོར་མཛད་པའི་རྟགས། །སྙན་ཆ་གཡས་ན་སེང་གེ་འགྱིང་བ་ནི། །དམན་མོ་ཐམས་ཅད་ཟིལ་གྱི་གནོན་པའི་རྟགས། །སྙན་གཡོན་སྦྲུལ་ནག་གདེང་ཀ་འཕྱོ་བ་ནི། །ཞེ་སྡང་མ་སྤངས་དབྱིངས་སུ་དག་པའི་རྟགས། །སྙན་ཆ་གསེར་གྱི་དྲིལ་བུ་འཁྲོལ་བ་ནི། །སངས་རྒྱས་ཀུན་ལ་བསྙེན་བསྐུར་མཛད། །སྤྱན་རྩ་དམར་པོ་ཕྱོགས་བཅུར་གཟིགས་པ་ནི། །རྣལ་འབྱོར་སྲིད་གསུམ་བྱ་ར་མཛད་པའི་རྟགས། །ཤང་ནས་ནད་ཀྱི་རླངས་པ་འཐུལ་བ་ནི། །སྡང་དགྲ་ལ་ནད་ཡམས་འབེབས་པའི་རྟགས། །ཞལ་གྱི་ཧོམ་ཁེང་དྲག་པོ་གདེངས་པ་ནི། །དམ་རྫས་གང་ཡིན་ཞལ་དུ་གསོལ་བའི༴ རྣོ་སྡུག་མཆེ་བ་ཟུར་གསུམ་གཙིགས་པ་ནི། །བསྒྲལ་བའི་ཞིང་བཅུའི་ཤ་ལ་རོལ་བའི་རྟགས། །ཞིང་ཆེན་གཡང་གཞི་སྐུ་ལ་མནབས་པ་ནི། །ཆོས་ཉིད་ཡང་དག་དོན་དང་ལྡན་པ་ཡི། །སྐུ་བསྟོད་གླང་ཆེན་ཀོ་རློན་གསོལ་བ་ནི། །ཐེག་པ་མཆོག་གི་དོན་དང་ལྡན། སྣམ་བྱེད་རེ་ལྡེ་ནག་པོས་དཀྲིས་པ་ནི། །འཇིག་རྟེན་འདི་ན་ཆེ་བཙུན་ལྡན༴ སྤྱི་བོའི་གཙུག་ན་ཟླ་རྒྱས་གསལ་བ་ནི། །མ་རིག་མུན་པ་དབྱིངས་སུ་དག་པའི༴ ལྟེ་བའི་དབུས་ན་ཉི་མ་ཤར་བ་ནི། །སྲིད་པའི་རྒྱལ་མོ་གཏིང་ནས་བསྐོམ། །སྟག་གི་ལྤགས་པས་ཤམ་ཐབས་བྱས་པ་ནི། །དྲག་པོའི་ཆ་ལུགས་མངོན་དུ་གྱུར་པའི༴ ཕྱག་གཡས་གདུག་པའི་རལ་གྲི་ཕྱར་བ་ནི། །དགྲ་བགེགས་སྐྱེ་རྒྱུད་རྩད་ནས་གཅོད་པའི་རྟགས། །ཕྱག་གཡོན་བྷནྡྷ་དམར་ཆེན་བསྣམས་པ་ནི། །འཁོར་བའི་སྡུག་བསྔལ་ཁྲག་ལྟར་འཐུང་བའི་རྟགས། །མཆན་ན་ནེའུ་ལེའུ་རྐྱལ་པ་ཐོག་པ་ནི། །བསྒྲུབ་པ་པོ་ལ་དངོས་གྲུབ་སྟེར་བའི༴ ཞབས་ལ་དབང་གི་ལྕགས་སྒྲོག་སྒྲོག་པ་ནི། །ཐབས་དང་ཤེས་རབ་གཉིས་སུ་མེད་པའི༴ ཕྱིར་ཕྱོགས་དྲིལ་གྱི་ཕ་ལ་བཅིབས་པ་ནི། །ལོག་པར་ལྟ་བའི་དགྲ་བགེགས་སྒྲོལ་བའི༴ སྲིན་པོའི་ཡ་འགལ་སྔ་རུ་བྱས་པ་ནི། །སྲིན་ཡུལ་ལང་ག་པཱུ་རི་བསྒྲོད་པའི༴ སྲིན་མོའི་མ་མགལ་ཕྱི་རུ་བྱས་པ་ནི། །སྲིན་ཁམས་མ་ལུས་དབང་དུ་བསྡུད་པའི༴ གོང་ཐག་གློ་སྨེད་སྦྲུལ་ལ་བྱས་པ་ནི། །ཞེ་སྡང་གདུག་པ་ཅན་རྣམས་འདུལ་བའི༴ རུས་སྦལ་ནག་པོའི་ཕོག་གུས་བཏབ་པ་ནི། །ཀླུ་བདུད་མ་རུང་དམ་ལ་འདོག་པའི༴ སྔ་ཤད་བདུད་ཀྱི་ཁྲམ་བམ་བཀལ་བ་ནི། །དམ་ཉམས་དགྲ་བོ་ཁྲམ་ལ་འདེབས་པ༴ ཕྱི་ཤད་ནད་ཀྱི་རྐྱལ་བ་བཀལ་བ་ནི། །དམ་ཉམས་དགྲ་ལ་ནད་ཡམས་འབེབས་པའི་རྟག །དོན་དམ་བཅུད་ཀྱི་རྟགས་སུ་ཞག་གི་ཟོ་རིས་བརྒྱན། །ཐུགས་རྗེས་ཆགས་པས་རྟགས་སུ་རཀྟའི་ཐིག་ལེའི་བརྒྱན། །འདུལ་ཕྱེད་ཕྲིན་ལས་རྟགས་སུ་ཐལ་བས་ཚོམ་བུ་བྱུག །མ་མོ་འབུམ་ཕྲག་འཁོར་གྱིས་བསྐོར་བ་ནི། །སྟོང་གསུམ་ཁྱབ་པར་ཕྲིན་ལས་མཛད་པའི་རྟགས། །བྷྱོཿ མ་ཅིག་ཁ་ནས་མེ་འབར་རྒྱ་མཚོ་སྐོམས། །ལག་ན་རྡོ་རྗེ་འཕེན་པས་རི་རབ་སིལ་བུར་བསྙིལ། །ལྷ་མོ་ཁྱེད་ལ་བདག་གི་བཙུན་པར་བསྟོད། །བྷྱོཿ དཔལ་ལྡན་ལྷ་མོ་མཐུ་ཆེན་ཁྱོད། །ཆོས་སྐྱོངས་རྒྱལ་མོ་མི་ཟད་མ། །གསང་བའི་དབྱིངས་ཕྱུག་རྡོ་རྗེ་མཁའ་འགྲོ་མ། །བསྟན་པ་བསྲུངས་མཛད་མ་ལ་ཕྱག་འཚལ་བསྟོད། །བསྟན་པ་རྒྱས་མཛད་མ་ལ་ཕྱག་འཚལ་བསྟོད། །དངོས་གྲུབ་སྟེར་མཛད་མ་ལ་ཕྱག་འཚལ་བསྟོད། །ཕྲིན་ལས་བསྒྲུབ་མཛད་མ་ལ་ཕྱག་འཚལ་བསྟོད། །དགྲ་བགེགས་འདུལ་མཛད་མ་ལ་ཕྱག་འཚལ་བསྟོད། །ཅེས་བསྟོད་དོ། །དེ་ནས་བཟླས་པ་བྱ་བ་ནི། རང་ཉིད་ཡི་དམ་གྱི་ཐུགས་ཀའི་ཧཱུྃ་གིས་མཐར་བསྐོར་དུ་ཡི་དམ་གྱི་སྔགས་ཀྱི་གཡས་སུ་བསྐོར་བ་དེའི་མཐར་ལྷ་མོའི་སྔགས་ཀྱི་བསྐོར་བར་བསམ། ལྷ་མོའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་བྷྱོཿལས་སྔགས་ཀྱི་གཡོན་དུ་བསྐོར་བར་དམིགས་ལ། སྔགས་བསྒྲང་ཞིང་། བདག་གིས་ཐུགས་ཀ་ནས་འོད་ཟེར་འཕྲོས་པའི་ལྷ་མོའི་ཞལ་དུ་ཞུགས་ཐུགས་ཀའི་སྔགས་ཕྲེང་ལ་ཕོག །དེ་ལས་འོད་ཟེར་སྔགས་ཀྱི་ཕྲེང་བ་སྲོག་གི་སྙིང་པོ་ཡར་ཞལ་ནས་ཕྱུང་། བདག་གི་ཞལ་དུ་ཞུགས་ཐུགས་ཀའི་སྔགས་ཕྲེང་ལས་གཡས་བསྐོར་དུ་བསྐོར་བར་བསམ། དེ་ལས་འོད་ཟེར་འཕྲོས་རྩ་དབུ་མའི་ནང་དུ་མར་ཞུགས་གསང་བའི་རྡོ་རྗེ་ནས་བྱུང་། མ་མོའི་པད་མར་ཞུགས་པའི་མཆོད་པ་སྣ་ཚོགས་ཀྱིས་མཆོད་ནས་མཉེས་ཤིང་ཚིམས་ནས་མཐུ་དང་ནུས་པ་དང་ལྡན་པར་བསམ། ཐུགས་ཀ་ནས་ཞལ་ནས་ཚུར་བྱུང་བ་དག་གི་ཞལ་དུ་ཞུགས་ཤིང་དངོས་གྲུབ་སྣ་ཚོགས་སྟེར་བསམ་ལ། འགལ་མེའི་འཁོར་ལོ་བཞིན་དུ་འཕྲེང་མ་ཆད་པར་བསྙེན་པ་གང་རུང་བཟླས་སོ། །ཐུན་འཇོག་དུས་སུ་རང་གི་ཐུགས་ཀའི་ཧཱུྃ་གི་མཐར་འཁོར་བར་བསམ་ལ་ཉེར་བསྡུ་སོགས་བྱའོ། །མ་མོ་སྲོག་གི་ལས་བརྒྱད་དང་། འབོད་རྦད་བསད་གསུམ་གྱི་དམིགས་པ་དང་སྔ་ནི་ཟུར་དུ་བསྐོལ་བ་ལས་ཤེས་སོ། །དེ་ནས་ཅི་ཙམ་བཟླས་པའི་མཐར། ༀ་ཤྲི་དེ་ཝི་ས་པཱ་རི་ཝ་ར་ཨརྒྷཾ་ནས། ཤབྟའི་བར་གྱི་མཆོད་ཅིང་སླར་ཡང་གཏོར་མ་ལ་འགུགས་གཞུག་བྱིན་རླབས་བྱས་ཏེ། གཏོར་སྔགས་རྒྱས་པའི་འབུལ་བའམ། ཡང་ན། ༀ་མ་ཧཱ་ཀ་ལི་རེ་མ་ཏི་ས་པ་རི་ཝ་ར་ཨི་དམ་བ་ལནྟིཾ་ཁ་ཁ་ཁཱ་ཧི་ཁཱ་ཧི། ཞེས་པ་ལན་གསུམ་མམ་བདུན་གྱི་འཕུལ་ལ། ༀ་ཨཱཿཧཱུྃ། མཆོད་དོ་དཔལ་ལྡན་ནག་མོ། །མ་རིག་པ་རང་བྱུང་གི་རྒྱལ་མོ་དུས་བཞིའི་ལྷ་མོའི་སྐུ་ལ་བརྒྱན་པ། བདུད་ཀྱི་ཡུམ་ལ་གཤིན་རྗེའི་ལྕམ། འདོད་པ་ཁམས་ཀྱི་དབང་ཕྱུག་མ་འཁོར་མཁའ་འགྲོ་འབུམ་སྡེའི་ཚོགས་དང་བཅས་པ་རྣམས་དང་། དམ་པ་ཡེ་ཤེས་ཀྱི་ཆོས་སྐྱོང་བསྲུང་མའི་ཚོགས་རྣམས་ལ། གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ་འདི་འབུལ་ལོ། །མཆོད་དོ་བཞེས་སུ་གསོལ། བཞེས་ནས་ཀྱང་སངས་རྒྱས་ཀྱི་བསྟན་པ་བསྲུང་། དཀོན་མཆོག་གི་དབུལ་འཕང་བསྟོད། དགེ་འདུན་གྱི་ཆོས་འཁོར་བསྲུང་། བདག་ཅག་རྣལ་འབྱོར་པ་འཁོར་དང་བཅས་པ་རྣམས་ཀྱི་བསྟན་པ་དར་ཞིང་རྒྱས་པར་མཛོད་ཅིག །དཔལ་དང་གྲགས་པ་སྤེལ་ཅིག །ཚེ་དང་དབང་ཐང་བསྐྱེད་ཅིག །སྐྱེ་བོ་སྡང་བྱེད་ཀྱི་དགྲ་སོད་ཅིག །འབྱུང་པོ་གནོད་བྱེད་ཀྱི་བགེགས་ཐུལ་ཅིག །ལྷ་འདྲེ་བར་ཆད་ཀྱི་རྐྱེན་བཟློག་ཅིག །འཆི་བདག་གི་བདུད་བསྒྱུར་ཅིག །བར་དུ་གཅོད་པའི་གནོད་བྱེད་ཐམས་ཅད་ཐལ་བ་རྡུལ་ཕྲན་བཞིན་དུ་བརླག་པར་མཛོད་ཅིག །ཞེས་འདོད་དོན་གསོལ། དེ་ནས་བསྟོད་པ་བྱ་བ་ནི། བྷྱོ་དཔལ་གྱི་སྲུང་མ་ཁམས་གསུམ་གཙོ་མོ་ཁྱོད། །བོང་བུ་རྟ་མཆོག་དཔག་ཚད་བརྒྱད་ཁྲི་རྒྱུག །རེ་ལྡེའི་སྨད་གཡོག་སྦྲུལ་གྱི་ཤམ་ཐབས་ཅན། །འབར་བའི་དབང་རྟག་ཕྱག་ན་རལ་གྲི་བསྣམས། །དགོས་འདོད་འབྱུང་བའི་ནེའུ་ལེ་ཞགས་པ་གཡོན། །ལྟེ་བ་ཉི་ཤར་གཙུག་ཏུ་ཟླ་རྒྱས་གསལ། །ནག་མོ་ཁྲག་འཐུང་དབྱིངས་ཀྱི་དཔལ་འབར་མ། །མ་ཅིག་འདོད་པ་ཁམས་ཀྱི་དབང་ཕྱུག་མ། །དཔལ་ལྡན་རེ་མ་ཏི་ལ་བདག་གིས་བསྟོད། །དམ་རྫས་བརྒྱན་གྱི་གཏོར་མ་འདི་བཞེས་ལ། །རྣལ་འབྱོར་བདག་དང་བདག་གིས་འཁོར་རྣམས་ལ། །བདུད་དང་དགྲ་བགེགས་ཐམས་ཅད་ཞི་བ་དང་། །མི་མཐུན་གནོད་པའི་ཕྱོགས་དང་བྲལ་བ་དང་། །དཔལ་དང་འབྱོར་བ་ཚེ་དང་གཟི་མདངས་དང་། །འཁོར་དང་ལོངས་སྤྱོད་གྲགས་པ་རྒྱས་པར་མཛོད། །བཀའ་དང་བསྟན་པ་བསྟན་འཛིན་ཀུན་བསྲུངས་ཤིག །བསྡུ་ན་དེ་ཙམ་དང་རྒྱས་པར་མོས་ན། བྷྱོཿ འཕྲུལ་གྱི་ཕོ་བྲང་ཐོད་པའི་ལྡིང་ཁང་ན། །དཔལ་ལྡན་ལྷ་མོ་ཁྲག་འཐུང་རེ་མ་ཏི། །སྲིན་པོ་ནག་པོའི་ཆུང་མ་རལ་པ་ཅན། །ཡ་མཚན་རྨད་བྱུང་ལྷ་མོ་ཁྲོ་རྒྱལ་གཙོ། །ཞལ་གདེངས་མཆེ་གཙིགས་དྲག་པའི་རྐན་སྒྲ་ཅན། །རྔམས་པའི་ཚུལ་གྱིས་དམར་ཆེན་ཁྲག་ལ་རོལ། །ཁ་འབར་ཆེན་མོ་སྲོག་གི་བཤན་པ་མོ། །སྐུ་ནི་ནག་མོ་འབུམ་གྱི་དབུས་ན་བཞུགས། །སྐྱེ་བ་རྣམ་བཞི་སྒྲོལ་བས་གང་ཆེན་མོ། །ཁྱོད་ནི་སྲིད་པ་གསུམ་གྱི་བསྐུར་བར་འོས། །ཚངས་པའི་རྒྱལ་པོས་རྨ་བྱའི་རྒྱལ་མཚན་ཕུལ། །བདུད་ཀྱི་རྒྱལ་པོའི་ཁྲམ་བམ་ནག་པ་ཕུལ། །འཆི་བདག་རྒྱལ་པོའི་ཕྱག་མཚན་རལ་གྲི་ཕུལ། །དུར་ཁྲོད་མ་མོའི་བྷནྡ་ལྕང་ལོ་ཕུལ། །གནོད་སྦྱིན་རྒྱལ་པོའི་ནེའུ་ལེ་རྐྱལ་པ་ཕུལ། །ཀླུའི་རྒྱལ་པོའི་སྦྲུལ་ནག་གདེངས་ཀ་ཕུལ། །ཁྱབ་འཇུག་ཆེན་པོའི་ཉི་མ་ཟླ་བ་ཕུལ། །རྣམ་ཐོས་སྲས་ཀྱི་སེང་གེའི་སྙན་ཆ་ཕུལ། །ཐོགས་ཆེན་རྒྱལ་པོའི་གླང་ཆེན་ཀོ་རློན་ཕུལ། །མ་བདུད་རྒྱལ་མོའི་རེ་ལྡེའི་ཤམ་ཐབས་ཕུལ། །མ་མོ་རྣམས་ཀྱི་ནད་ཀྱི་རྐྱལ་པ་ཕུལ། །ཀླུ་མོ་རྣམས་ཀྱི་འཕྲུལ་གྱི་མེ་ལོང་ཕུལ། །སྨན་མོ་རྣམས་ཀྱི་མཚོན་གྱི་གྲུ་གུ་ཕུལ། །ཤ་ཟའི་རྒྱལ་པོའི་ཐོད་པའི་ཕྲེང་བ་ཕུལ། །ལྷ་ཕྲན་རྣམས་ཀྱི་གསེར་གྱི་དྲིལ་བུ་ཕུལ། །ས་བདག་རྒྱལ་པོའི་རུས་སྦལ་ཕོ་དགུ་ཕུལ། །བཙན་གྱི་རྒྱལ་པོའི་ཤྭ་དྷེའུ་དཀར་ནག་ཕུལ། །སྲིན་པོའི་རྒྱལ་པོའི་ལྕགས་སྒྲོག་འབར་བ་ཕུལ། །རྣལ་འབྱོར་བདག་གི་བདུད་རྩི་གཏོར་མ་ཕུལ། །རཀྟ་དམར་གྱི་ཨརྒྷཾ་བསྒྲེངས་ཙམ་ན། །མ་ལ་བུས་འབོད་གདུངས་སེམས་མ་ཆུང་བར། །སྨུག་ནག་འཇིག་པས་རྒྱལ་མོའི་སྐུར་བཞེངས་ལ། །ལྕགས་ཀྱུ་འདྲ་བས་སྡེར་མོའི་གཏོར་མ་ལོངས། །གྲུ་གསུམ་མཐིང་ནག་འབར་བའི་ཞལ་གདོངས་ལ། །ཟ་བྱེད་རྣོ་གདུག་འབར་བའི་མཆེ་བས་གསོལ། །ལེ་བརྒན་ཁྲག་འཐུང་འབར་བས་ལྗགས་རྐྱང་ལ། །ཆོས་ཀྱི་དབྱིངས་དང་མཉམ་པས་མགུལ་དུ་བསྟིམ། །སློབ་དཔོན་པད་མ་འབྱུང་གནས་ཀྱི་མཛད་པའོ། །བྷྱོ་ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །སུམ་ཅུ་རྩ་གསུམ་གནས་ཀྱི་གཙོ་མོ་སྟེ། །ལྷ་མོ་དཔལ་འབར་མ་ལ་ཕྱག་འཚལ་བསྟོད། །ཀླུ་ལ་དབང་བསྒྱུར་ཀླུ་མོ་དཔལ་འབར་མ། །གཙུག་ན་རིན་ཆེན་བུ་མོ་ཡིད་འོང་མ། །རོལ་པའི་མཚོ་བདུན་གནས་ཀྱི་གཙོ་མོ་སྟེ། །ཀླུ་མོ་དཔལ་འབར་མ་ལ༴ གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་པོའི་བུ་མོ་ཤང་དཀར་ཏི། །ནགས་ཚལ་དྲ་བ་ཅན་གྱི་གཙོ་མོ་སྟེ། །གནོད་སྦྱིན་རེ་མ་ཏི་ལ༴ བདུད་ལ་དབང་བསྒྱུར་བདུད་མོ་དཔལ་འབར་མ། །རེ་ལྡེམ་གོ་ཉག་བུ་མོ་རེ་མ་ཏི། །བདུད་མཁར་རྩེ་དགུའི་གནས་ཀྱི་གཙོ་མོ་སྟེ། །བདུད་མོ་རེ་མ་ཏི་ལ༴ སངས་རྒྱས་བསྟན་པ་བསྲུངས་བར་ཞལ་བཞེས་པས། །ཆོས་ཉིད་དོན་རྟོགས་འཕག་མ་རེ་མ་ཏི། །ས་བརྒྱད་གནོན་པའི་སེམས་མ་རེ་མ་ཏི། །ལྷ་མོ་མཐུ་ཆེན་ཁྱོད་ལ༴ དཀོན་མཆོག་མཐུ་ཆེན་ཁྱོད་ལ་ཕྱག་འཚལ་བསྟོད། །རྣལ་འབྱོར་དགྲ་འདུལ་ཁྱོད་ལ་ཕྱག་འཚལ་བསྟོད། །ཁྱོད་ཀྱི་དངོས་གྲུབ་མ་ལུས་བདག་ལ་དགོངས། །དམ་རྫས་བརྒྱན་གྱི་གཏོར་མ་འདི་བཞེས་ལ། །རྣལ་འབྱོར་བཅོལ་པའི་ཕྲིན་ལས་གྲུབ་པར་མཛོད། །དེ་ནས་ཡང་དུས་བཞིའི་བསྟོད་པ་ནི། བྷྱོཿ མ་བཅོས་ཆོས་སྐུ་བདེ་བ་ཆེན་པོ་ལ། །སྲིད་དང་ཞི་བར་མི་གནས་མཉམ་པ་ཉིད། །ཡོན་ཏན་ཕྲིན་ལས་མཚན་པས་སྐུར་སྟོན་པས། །དཔལ་དང་ལྡན་པའི་ལྷ་མོ་ཁྱོད་ལ་འདུད། །སྐུ་ཡི་དཀྱིལ་འཁོར་ཆོས་ཀྱི་དབྱིངས་དང་མཉམ། །མྱ་ངན་མི་འདའ་མཐུན་པར་སྣང་བ་ཉིད། །མཛེས་པའི་བརྒྱད་ལྡན་མ་གཅིག་རེ་མ་ཏི། །འགྲོ་བའི་གཉེན་ཅིག་མ་ལ་ཕྱག་འཚལ་བསྟོད། །ཆོས་སྐུ་མཁའ་ལྟར་རྟོག་པའི་ཤེས་རབ་ལ། །ཐུགས་རྗེས་རྨད་དུ་བྱུང་བའི་ཐབས་ཚུལ་གྱིས། །མ་རུང་གདུག་པ་ཅན་རྣམས་ཚར་གཅོད་དང་། །མི་བསྙིལ་ཐུགས་དམ་ཅན་ལ་བདག་བསྟོད་དོ། །དམན་པ་མི་འདོར་རྟགས་སུ་བོང་བུ་བཅིབས། །ལྷ་ཡི་ལྷ་གྱུར་ལྷ་མིན་སྐྲག་མཛད་མ། །རྫུ་འཕྲུལ་ཤུགས་འཆང་སྟོང་གསུམ་ཁྱབ་པར་ཉུལ། །བསྟན་པ་གཉེན་མཛད་མ་ལ་བདག་བསྟོད་དོ། །དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བདག་དང་བདག་གི་འཁོར་རྣམས་ལ། །བདུད་དང་དགྲ་བགེགས་ཐམས་ཅད་ཞི་བ་དང་། །མི་མཐུན་གནོད་པའི་ཕྱོགས་དང་བྲལ་བ་དང་། །དཔལ་དང་འབྱོར་པ་ཚེ་དང་གཟི་མདངས་དང་། །འཁོར་དང་ལོངས་སྤྱོད་གྲགས་པ་རྒྱས་པར་མཛོད། །བཀའ་དང་བསྟན་པ་བསྟན་འཛིན་ཀུན་སྲུངས་ཤིག །ཁྱུང་པོ་རྣལ་འབྱོར་བས་བསྟོད་པ་རྫོགས་སོ། །བྷྱོཿ གྲུ་གསུམ་མཐིང་ནག་ཞལ་གྱི་དཀྱིལ་འཁོར་ནས། །དུར་ཁྲོད་མཐའ་མཛད་དཔལ་ལྡན་རེ་མ་ཏི། །འདས་དང་མ་བྱོན་ཀུན་ལ་དབང་བསྒྱུར་ཞིང་། །སྟོང་གསུམ་འཇིག་རྟེན་ཀུན་གྱི་མདངས་འཕྲོག་མ། །ཀུན་ལ་དབང་བསྒྱུར་འཁོར་ལོ་རིན་ཆེན་འདྲ། །བསམ་པའི་དོན་འགྲུབ་ནོར་བུ་རིན་ཆེན་འདྲ། །མི་འབྲལ་གཟུགས་མཛེས་བཙུན་མོ་རིན་ཆེན་འདྲ། །བླ་མེད་གྲོགས་ཚོལ་བློན་པོ་རིན་ཆེན་འདྲ། །ཐེག་པའི་མཆོག་ལྡན་གླང་པོ་རིན་ཆེན་འདྲ། །ས་བཅུ་སྒྲོལ་མཛད་རྟ་མཆོག་རིན་ཆེན་འདྲ། །འཇིག་རྟེན་མགོན་སྐྱབས་དམག་དཔོན་རིན་ཆེན་འདྲ། །མཿའཇིག་རྟེན་མགོན་པོ་ལྟར་ནི་བསོད་ནམས་ཆེ། །ལྷ་དབང་བརྒྱ་བྱིན་ལྟར་ནི་ལོངས་སྤྱོད་ཆེ། །ཨུ་མ་དེ་བ་ལྟར་ནི་ཆོ་རིགས་བཙུན། །ཨུ་དུམ་ཝ་ར་ལྟར་ནི་སྐྱེ་བ་ཀུན། །མེ་ཏོག་པད་མ་ལྟར་ནི་ལྟ་བས་མཛེས། །ཕྱག་ན་རྡོ་རྗེ་ལྟར་ནི་མཐུ་སྟོབས་ཆེ། །གཅན་གཟན་སེང་གེ་ལྟར་ནི་དཔའ་བརྫི་ཆེ། །ནམ་མཁའི་ལྷ་ཕྲན་ལྟར་ནི་སྐུ་འཁྲུས་གསོལ། །ནོར་བུ་རིན་ཆེན་ལྟར་ནི་གཙུག་ཏུ་ཁུར། །འཛམ་གླིང་རྒྱལ་པོ་ལྟར་ནི་བདག་བསྟོད་དོ། །གཉིས་པ་བརྡུང་བྱ། ༈ དེ་ནས་བསྐང་བ་བྱ་བ་ནི། བྷྱོཿ ཡོངས་འདུས་ཤིང་སོགས་བསྐང་བ་རྒྱས་པའམ། བསྡུ་ན་འདི་བྱའོ། །བྷྱོཿ མ་ཅིག་ལྷ་མོ་གསན་ཅིང་དགོངས་སུ་གསོལ། །སྲིང་ཅིག་ལྷ་མོ་གསན་ཅིང་དགོངས་སུ་གསོལ། །བདུད་ཀྱི་ཡུམ་ལ་གཤིན་རྗེའི་ལྕམ་ཅིག་མ། །ནད་དང་རིམས་ཀྱི་བདག་མོ་ཆེན་མོ་ཁྱོད། །ཐུགས་དམ་བསྐང་ཕྱིར་གནས་འདིར་གཤེགས་སུ་གསོལ། །ཉམས་ཆག་སེལ་ཕྱིར་གནས་འདིར་གཤེགས་སུ་གསོལ། །ཕྲིན་ལས་བསྒྲུབ་ཕྱིར་གནས་འདིར་གཤེགས་སུ་གསོལ། །བསྐང་ངོ་བསྐལ་པས་ཐུགས་དམ་བསྐང་། །འབོད་པའི་དམ་རྫས་ཡིན་པའི་ཕྱིར། །ཞིང་ཆེན་གཡབ་མོའི་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །མི་དབང་སྙིང་གི་ཐུགས༴ རང་བཞིན་གནས་ནས་སྤྱན་འདྲེན༴ མི་རྐང་གླིང་བུའི༴ དམ་ཚིག་གཉེན་པོ་བསྲེ་བའི་ཕྱིར། །བདུད་རྩི་སྨན་གྱི། འདོད་ཁམས་གཙོ་མོ་ཡིན༴ རྨ་བྱའི་རྒྱལ་མཚན༴ ལྗགས་ཀྱི་དབང་པོ་ཚིམ་བྱའི་ཕྱིར། །ཤ་ཆེན་དུད་པས༴ མགྲིན་པའི་གསང་གནས་སྦྱང་བའི་ཕྱིར། །དམར་ཆེན་རཀྟས༴ ཉམས་ཆག་མ་ལུས་གསོ་བའི༴ བྱ་ནག་ལུག་ནག་གཡག་ནག་གི། །དཀར་མོ་འབུམ་སྡེའི༴ སེར་མོ་འབུམ༴ དམར་མོ་འབུམ༴ ལྗང་མོ་འབུམ༴ སྨུག་མོ་འབུམ༴ མཐིང་ནག་འབུམ༴ མ་ཡམ་རྒྱལ་མོའི༴ བོད་ཁམས་བརྟེན་མའི༴ འཛམ་གླིང་སྐྱོངས་མའི་ཐུགས་དམ་བསྐང་། །མཿཁྱོད་ཀྱང་དམ་ལ་མ་འདའ་ཅིག །ང་ཡང་དམ་ལ་མི་འདའོ། །གལ་ཏེ་དམ་ལས་འདའ་གྱུར་ན། །སྲོག་གི་སྙིང་པོ་མེ་འབར་ནས། །རང་སྲོག་རང་གིས་གཅོད་པར་བྱེད། །དེ་བས་དམ་ལ་མ་འདའ་བར། །ཐུགས་དམ་གཉེན་པོ་འདི་བསྐང་བས། །ཉམས་ཆག་གྱུར་ན་བཟོད་པར་གསོལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཕྲིན་ལས་དྲག་ཤུལ་མཐུ་མ་ཆུང་། །བཅོལ་པའི་ཕྲིན་ལས་གྲུབ་པར་མཛོད། །ཡི་གེ་བརྒྱ་པའི་བསྐང་བར་བྱའོ། །དེ་ནས་བསྐུལ་པ་བྱ་བ་ནི། གཏོར་མ་ལ་འགུགས་ཞུགས་བྱིན་རླབས་བྱ་བ་ལ་འདི་སྐད་དོ། །བྷྱོཿ ཀྱེ་མ་ནད་དང་རིམས་ཀྱི་བདག་མོ་ཁྱོད། །གཤིན་རྗེའི་ལྕམ་གྱི་སྲིང་གཅིག་མ། །མཛེས་པའི་ལན་བུ་ཅིག་མ་ལ། །རེ་ལྡེ་མཛེས་པའི་རྣལ་འབྱོར་བརྒྱན། །རྐང་སྒྲོག་ལྕགས་ཀྱི་རབ་ཏུ་སྒྲོགས། །ཕྱིར་ཕྱོགས་དྲིལ་གྱི་ཕ་ལ་བཅིབས། །འབྱུང་པོ་ཕལ་ཆེར་ཀུན་གྱི་མཐོང་། །འབྱུང་པོ་ཡོངས་ཀྱི་ཤ་ལ་ཆེམས་ཆེམས་ཟོ། །མི་ཁྲག་ཆང་གིས་ར་རོས་མྱོས། །དཔག་ཚད་བརྒྱད་ཁྲི་བཞི་སྟོང་ཡང་། །མཚན་མོ་གཅིག་ལ་ཁྱབ་པར་ཉུལ། །རྣལ་འབྱོར་ཆེན་མོ་ཨཱཿལ་ལ། །དབང་ཕྱུག་ཆེན་མོ་ཨ༴ གཤིན་རྗེའི་ལྕམ་མོ་ཨ༴ བདུད་ཀྱི་ཡུམ་ཅིག༴ མདོག་བཟང་ནག་མོ༴ མཚན་བཟང་རེ་ཏི་ཨ་ལ་ལ། །ཀྱེཿ མཿནད་དང་རིམས་ཀྱི་བདག་མོ་ཁྱོད། །རེ་འགའ་དྲག་ཏུ་འཁྲོས་པའི་ཚེ། །སྐུ་ནི་མཐིང་ནག་ཆེན་མོ་ལ། །བུད་མེད་ནག་མོའི་སྟོང་ཁམས་གང་། །རལ་པ་སིལ་བུ་མུན་ལྟར་གཏིབས། །སྤྱན་ནས་ཁྲག་གི་མཆི་མ་འཛག །ཤངས་ནས་ནད་ཀྱི་དུད་པ་འཐུལ། །ཞལ་ནས་འོ་དོད་དྲག་པོ་འབད། །གཡས་ནས་ཞིང་གི་གཡང་གཞི་རྡེབས། །གཡོན་ནས་ནད་ཀྱི་རྐྱལ་པ་ཐོག །ནད་དང་རིམས་ཀྱིས་བདག་མོ་ཆེན་མོ་ཁྱོད། །འདིར་བྱོན་རྒྱན་གྱི་གཏོར་མ་འདི་བཞེས་ལ། །རྣལ་འབྱོར་བདག་གིས་བཅོལ་པའི་ཕྲིན་ལས་མཛོད། །ཅེས་བསྐུལ་ལོ། །བསྡུ་ན་དེ་ཙམ་གྱི་ཆོག་གོ། །ཐུགས་དམ་བསྐུལ་བ་རྒྱས་པར་བྱེད་ན་འདི་སྐད་དོ། །བྷྱོཿ མ་གཡེལ་མ་གཡེལ་མ་ཅིག་མ། །མ་གཡེལ་མ་གཡེལ་བདུད་མོའི་ཚོགས། །མ་ཅིག་ལྷ་མོ་དཔའ་འབར་མ། །རྡོ་རྗེ་ལྷ་མོ་རེ་མ་ཏི། །ནད་དང་རིམས་ཀྱི་མངའ་བདག་མ། །སད་དང་སེར་བའི་སྣ་འདྲེན་མ། །དམ་ཉམས་ཀུན་གྱི་སྲོག་གཅོད་མ། །དམ་ཚིག་ཅན་གྱི་གྲོགས་མཛད་མ། །རྣལ་འབྱོར་ཡོངས་ཀྱི་དགྲ་ལྷ་མོ། །སྐྱེ་འགྲོའི་སྲོག་ལ་མངའ་མཛད་མ། །འབྱུང་པོ་ཡོངས་ཀྱི་རྗེ་མ་ཁྱོད། །དགྲ་བོའི་དུས་མཐའ་སྟུང་བྱེད་མ། །ཁམས་གསུམ་ཟ་བའི་ཟ་མཁན་མ། །སྲིད་གསུམ་ཟ་བའི་མཐུ་མོ་ཆེ། །མཐིང་ནག་གཅེར་བུའི་རལ་པ་ཅན། །མིག་ནས་ཁྲག་གི་མཆི་མ་འཛག །ཤངས་ནས་ནད་ཀྱི་རླབས་པ་འཐུལ། །ཆིབས་སུ་དྲིལ་སྔོན་རླུང་ཤོགས་བཅིབས། །རེ་འགའ་ཁྲོས་ནས་ཆལ་ཆོལ་བྱེད། །སྲིད་པས་བོང་བུ་དམར་གྭ་ཞོན། །གཡས་ན་གདུག་པའི་རལ་གྲི་ཕྱར། །སྲིད་གསུམ་མ་ལུས་རྩད་ནས་གཅོད། །གཡོན་ན་གདུག་པའི་ཐོད་ཁྲག་ཐོག །སྐྱེ་འགྲོའི་སྲོག་ལ་མངའ་མཛད་མ། །བྷྱོཿ མ་གཡེལ་མ་གཡེལ་དམ་ལ་དགོངས། །མ་ཅིག་བདུད་མོ་རེ་མ་ཏི། །ཕྱག་བརྙེན་བདུད་མོ་འབུམ་སྡེ་རྣམས། །བུ་ལ་སྡང་བའི་དགྲ་བྱུང་གི། །མ་ཅིག་ལྷ་མོའི་རལ་མདའ་ལོག །སྡང་བའི་དགྲ་ལ་ཕྲིན་ལས་མཛོད། །མ་ཅིག་ཐུགས་དམ་དུས་ལ་བབ། །བཅོལ་པའི་ལས་ལ་མཐུ་མ་ཆུང་། །དམ་ཚིག་ཡལ་བར་མ་བཏང་བར། །བུ་ཡི་འཕྲིན་ལས་མྱུར་དུ་བསྒྲུབས། །མ་ཅིག་བདུད་མོ་རེ་མ་ཏི། །ཁྱོད་ཀྱི་ཐུགས་ཀྱི་དཀྱིལ་འཁོར་ནས། །ལས་ཀྱི་ཕོ་ཉ་བདུད་མོ་འབུམ། །ནག་མོ་རྔམ་པའི་ང་རོ་ཅན། །མ་བདུད་ནག་མོ་འཁོར་དང་བཅས། །སྔགས་པས་བོས་ཞིང་བསྐུལ་བའི་ཚེ། །མིག་ནས་ཁྲག་གི་མཆི་མ་འཛག །ཁ་ནས་གདུག་པའི་ངན་སྔགས་སྒྲོགས། །ཞལ་ནས་ཀུན་འདེབས་སྟོང་གསུམ་གང་། །ནད་ཀྱི་ཁ་འཕྲུ་དགྲ་ལ་འདེབས། །མཚན་ཅིང་དཔག་ཚད་བརྒྱད་ཁྲི་རྒྱུག །བདུད་མོ་ནག་མོ་འཁོར་བཅས་རྣམས། །བདག་གིས་ལས་སུ་ཁྱོད་མཆོད་ན། །བདག་ལ་སྡང་བའི་དགྲ་བོ་འདི། །ལོ་དང་ཟླ་བ་མ་བཏང་བར། །ཞག་དང་ཟ་མར་དུས་མཐའ་བསྟུང་། །སྲོག་རྩ་དམར་པོ་རྒལ་ནས་ཆོད། །སྙིང་ཁྲག་དྲོན་མོ་ཁ་ནས་དྲངས། །ཀུན་གཞིའི་རྣམ་ཤེས་གཞི་ནས་ཤིག །གཟུགས་ཕུང་ཐལ་བ་རྡུལ་དུ་རློག །མ་ལ་བཅོལ་ན་ཕྲིན་ལས་མཛོད། །བུ་ལ་སྡང་བའི་དགྲ་བྱུང་གི། །མ་ཅིག་བུ་ལ་མི་དགོངས་སམ། །མིང་ལ་སྡང་བའི་དགྲ་བྱུང་གིས། །སྲིང་གཅིག་ཕྲིན་ལས་མི་མཛད་དམ། །བདག་ལ་སྡང་བའི་དགྲ་བྱུང་གི། །བྲན་ཅིག་རྗེ་ལ་མི་དགོངས་སམ། །མ་མོ་ནག་མོ་རེ་མ་ཏི། །ཁྱོད་ཀྱི་ལས་ཀྱི་ཕོ་ཉ་ནི། །བདུད་མོ་ནག་མོ་འབུམ་ཕྲག་འགྱེད། །ནག་མོ་འབུམ་སྡེའི་འཁོར་ཚོགས་རྣམས། །གོས་སུ་མི་ལྤགས་རློན་པ་གྱོན། །ཟས་སུ་མི་ཤ་རྟ་ཤ་ཟ། །སྐོམ་དུ་མི་ཁྲག་རྟ་ཁྲག་འཐུང་། །ལས་སུ་སངས་རྒྱས་བསྟན་པ་བསྲུངས། །སྲོག་གཅོད་ལས་ལ་ཤིན་ཏུ་འགྱེས། །ཕྱག་གཡས་རལ་གྲི་འབར་བ་ཡི། །བསྟན་པ་སྡང་བྱེད་སྲོག་རྩ་ཆོད། །ཕྱག་གཡོན་གདུག་པའི་ཐོད་ཁྲག་ཐོག །དགྲ་བོའི་སེམས་ཀྱི་མར་མེ་སོད། །མ་བདུད་ནག་མོའི་འཁོར་ཚོགས་རྣམས། །སྔོན་གྱི་དམ་ཚིག་མ་གཡེལ་བར། །ཤ་ཁྲག་དམར་གཏོར་འདི་བཞེས་ལ། །ཁྱེད་ལ་བཅོལ་པའི་ཕྲིན་ལས་ནི། །སངས་རྒྱས་བསྟན་པ་འཇིག་བྱེད་དང་། །རྡོ་རྗེ་སློབ་དཔོན་སྨོད་བྱེད་དང་། །བསྟན་ལ་སྡང་བྱེད་དགྲ་བོ་འདི། །མ་བདུད་ནག་མོའི་འཁོར་ཚོགས་ཀྱིས། །རིང་པར་ཁུག་ལ་གཟུགས་ལ་ཕོབ། །འདུ་བ་རྣམ་བཞིའི་ནད་སོགས་ཁོངས་ན་སློངས། །དྲན་པ་མེད་པ་སྨྱོ་འབོག་རྒྱལ་དུ་ཆུག །གཞོངས་པ་དཀར་པོ་སྲོག་རྩ་རྒལ་ནས་ཆོད། །མཁལ་མ་གཡུ་རྒོང་གསང་བའི་གནས་ནས་དྲོངས། །སྲོག་རྩ་དམར་པོ་ལུས་ཀྱི་རྒྱབ་ནས་ཆོད། །ཁ་ནས་ལག་ཆུག་ཁོངས་པའི་སྙིང་ནས་དྲོངས། །དྲན་པ་རྣམ་ཤེས་ཙིཏྟའི་དཀྱིལ་ནས་དྲོངས། །ལྷན་ཅིག་སྐྱེས་པའི་ལྷ་དང་ཕྱེས། །མཉམ་པར་འོང་བའི་བདུད་དང་སྤྲོད། །འགོ་བའི་ལྷ་ལྔའི་ལག་ནས་ཁུག །སྔགས་དང་རྫས་ཀྱི་ནུས་པ་ཕྲོག །ས་ལ་བརྟེན་པའི་བརྟེན་ཕུར་ཕུད། །གནམ་ལ་འཇུ་བའི་འཇུ་ཐག་ཆོད། །གྲི་ཐབས་ཉི་ཤུ་རྩ་ལྔས་སོད། །བདུན་རྒྱུད་ཚུན་ཆད་རྩ་ནས་ཆོད། །གཏན་ནས་བརླག་པའི་ཕྲིན་ལས་མཛད། །མ་ཅིག་ཐུགས་དམ་དུས་ལ་བབས། །བཅོལ་པའི་ཕྲིན་ལས་གྲུབ་པར་མཛད། །མ་མ་ས་མ་ཡ་རེ་མ་ཏི་ལས་ལ་བྷྱོ་བྷྱོཿ འདི་མན་ངག་དང་རྒྱུད་ལས་བྱུང་བའི་དཔོག་གཡོག་གནད་ནས་བསྐུལ་སྔགས་ནི། ༀ་རུ་རུ་ཙ་ཧཱུྃཿ ཨ་ཤུག་མེ་བ་ཧྲི་རུ་ཏྲ་ཁ་ཤ་ལ་ནག་མོ་ཧཱུྃ་རཀྴ་ཙིཏྟ་མ་ཧཱ་ས་མ་ཏི་མ་རུ་ཁ་ཙིཏྟ་ནན། རཀྨོ་ཏི་ཀི་མ་ཛཿ མ་མ་ཏི་ཏི་ཧཱུྃ་བྷྱོཿ འདི་ཡན་གཉིས་ལོགས་སུ་སྣང་། ཅེས་བསྐུལ་པ་བྱའོ། །དེ་ནས་མཁྱེན་དབང་ནས་བཟུང་ཞལ་བསྟབ་ཀྱི་བར་བསྒྲལ་ལས་བཞིན་བྱས་ལ། གཏོར་མ་སྟོབས་པ་ནི། འབུལ་གཏོར་ལ་དཔལ་འབར་གཙུག །སྤོས་དང་རོལ་མོ་གསེར་སྐྱེམས་ཀྱི་མཚོན་པར་བསྒྲུབ་ཁང་གི་ཡང་ཐོག་སོགས་གང་དུ་གཏང་བའི་སར་ཁྱེར་ལ། དམིགས་བྱ་འགུག་ཞུགས་བྱ། ༀ་ཨཱཿཧཱུྃ་ཧོས་སླར་ཡང་བྱིན་གྱི་རླབས། གོང་གི་གཏོར་སྔགས་ལན་གསུམ་མམ་བདུན་ནམ་གོང་རུང་གི་འབུལ་ལ། གོང་གི་བསྐུལ་པ་རྒྱས་བསྡུས་གང་རིགས་ཀྱི་འབུལ་བའམ། ཡང་ན། བྷྱོཿ ཕྱོགས་ཕྱོགས་དག་ཀྱང་ཕ་ཀི་ན། །ཉི་མ་བྱང་ཤར་ཕ་ཀི་ནས། །ཡོངས་འདུས་ཤིང་གི་རྩ་བ་ནས། །མཚོ་མུ་ལེ་མཐིང་གི་ནང་ཤེད་ན། །བྱང་ཐང་དེ་ནི་བྱད་མ་བྱེད། །བྱང་རི་དེ་ནི་གྱ་མ་གྱུ། །བྱང་རྩེ་དེ་ནི་བྱར་མ་བྱུར། །བྱང་ལམ་དེ་ནི་བྲ་མ་བྲང་། །དེ་འདྲའི་ཐང་གིས་མར་ཟུར་ན། །བྲག་དང་ཆུ་འཐབས་འུ་རུ་རུ། །བྲག་དང་ཆུ་འཐབས་མར་ཟུར་ན། །མཚོ་ཅིག་དེ་ནས་མེ་རེ་རེ། །མུ་ལེ་མཚོ་ཡི་ནང་ཤེད་ནས། །མཐིང་གུར་སྨུག་པོ་ལྡི་རི་རི། །མཐིང་གུར་སྨུག་པོ་ལྡིར་ཙམ་ན། །གསེར་གྱི་ཚུགས་ཤིག་རིགས་སེ་རིང་། །དངུལ་གྱི་ཆོན་ཐག་བྲེངས་སེ་བྲེང། །དུང་གི་ཁྱོན་ཕུར་ཁྲ་ལ་ལ། །དེ་འདྲའི་གུར་གྱི་ནང་ཤེད་ན། །མི་རོ་འབུམ་གྱི་ཁྲི་རུ་བཙིགས། །རྟ་རོ་འབུམ་ནི་གཅལ་དུ་བཀྲམ། །མི་ཁྲག་རྟ་ཁྲག་འདམ་རྫབ་གཡོ། །ཞིང་ཆེན་བསྣོལ་བའི་ཁྲི་སྟེང་ན། །མ་ཅིག་ལྷ་མོ་བཞུགས་པ་ནི། །མ་མོ་ཡོངས་ཀྱི་ཀློང་དཀྱིལ་ན། །གཅེར་བུར་འདུག་པས་གཟི་མདངས་ཅན། །གཅིག་པུར་འདུག་པས་འགྱིང་བག་ཅན། །མཿཨེ་ཀ་ཙ་ཏི་དེ་ན་བཞུགས། །བདུད་ཀྱི་ཡུམ་ཅིག་དེ་ན་བཞུགས། །བདུད་ཀྱི་ཡུམ་ཅིག་དེ་ན་བཞུགས། །གཤིན་རྗེའི་ལྕམ་ཅིག་དེ་ན་བཞུགས། །མཿརུ་ལུ་བྷྱོཿཡི་འཛབ་བསྒྲེང་ཞིང་། །རཀྟའི་རྒྱུན་བབས་བྲིངས་སེ་བྲིང་། །རཀྟའི་རྒྱུན་བབ་བྲིང་ཙ་ན། །མ་ཅིག་ལྷ་མོའི་སྐུ་བསྐྱོད་འཚལ། །མ་ཅིག་ལྷ་མོ་བསྐྱོད་ཙམ་ན། །ཆིབས་སུ་དྲེལ་རྟ་རྐང་གསུམ་བཅིབ། །གཡུ་ཐུར་སྔོན་པོ་བྲངས་སེ་བྲང་། །གསེར་སྲབ་སེར་པོ་སི་ལི་ལི། །གསེར་སྒ་སྨུག་པོ་ཝངས་སེ་ཝང་། །ཟ་འོག་དར་སྟོན་ལྷུབས་སེ་ལྷུབ། །དར་སྣའི་གློ་ལན་ཆུམས་སེ་ཆུམ། །སྦྲུལ་ནག་གོང་སྨད་ཁྱུགས་སེ་ཁྱུག །དངུལ་དཀར་ཡོབ་ཆེན་ཁྲ་ལ་ལ། །དྲེལ་རྟའི་རྣ་བ་གཡས་པ་ལ། །དར་ནག་ཅོད་པོན་པཱུ་རུ་རུ། །དྲིལ་རྟའི་རྣ་བ་གཡོན་པ་ལ། །ལེ་བརྒན་དར་ནག་པཱུ་རུ་རུ། །མ་ཅིག་ལྷ་མོ་སྐུ་བསྐྱོད་འཚལ། །དྲིལ་སྐད་ལན་གསུམ་སྟེང་དུ་འཚེར། །སྟེང་གི་ལྷ་རྣམས་དབང་དུ་བསྡུས། །དྲིལ་མཇུག་ལན་གསུམ་བར་དུ་གཡུག །བར་གྱི་བཙན་རྣམས་དབང་དུ་བསྡུས། །དྲིལ་རྨིག་ལན་གསུམ་ས་ལ་བརྡུང་། །འོག་གི་ཀླུ་རྣམས་དབང་དུ་བསྡུས། །མ་ཅིག་ལྷ་མོ་སྐུ་བསྐྱོད་འཚལ། །མ་ཅིག་ལྷ་མོ་བསྐྱོད་ཙམ་ན། །བན་ངན་འཕུར་ཁ་མ་ཡི་བཟློག །བོན་ངན་ཟོར་ཁ་མ༴ ལོ་ཀེག་ཟླ་ཀེག་མ་ཡི༴ བདུད་ཀྱི་ཞགས་པ་མ༴ གཤིན་རྗེའི་ཁྲམ་ཁ་མ༴ ཆགས་ཆེན་ཉམ་ང་མ་ཡི་བཟློག །རླུང་མཁྲིས་བད་ཀན་ལས་གྱུར་པས། །བཞི་བརྒྱ་རྩ་བཞིའི་ནད་རྣམས་ཀྱང་། །མ་ཅིག་ལྷ་མོས་བཟློག་ཏུ་གསོལ། །མ་འདིར་གཤེགས་བརྒྱན་གྱི་གཏོར་མ་བཞེས། །བདག་གིས་བཅོལ་པའི་ཕྲིན་ལས་གྲུབ་པར་མཛོད། །ཅེས་དང་། དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བདག་དང་བདག་གི་འཁོར་རྣམས་ལ། །བདུད་དང་དགྲ་བགེགས་ཐམས་ཅད་ཞི་བ་དང་། །མི་མཐུན་གནོད་པའི་ཕྱོགས་དང་བྲལ་བ་དང་། །དཔལ་དང་འབྱོར་པ་ཚེ་དང་གཟི་མདངས་དང་། །འཁོར་དང་ལོངས་སྤྱོད་གྲགས་པ་རྒྱས་པར་མཛོད། །བཀའ་དང་བསྟན་པ་བསྟན་འཛིན་ཀུན་སྲུངས་ཤིག །ཅེས་གཏོ་མ་སྟོབས་ལ། གཞན་ཡང་། ཧོ་དགོངས་སུ་གསོལ་ལོ། །སྔོན་ཚེ་རི་མ་ལ་ཡའི་རྩེ་མོ་ནས། དཔལ་ཕྱག་ན་རྡོ་རྗེ་ལ་དཔལ་ལྡན་ལྷ་མོ་ནག་མོ་འཁོར་བདུད་མོ་འབུམ་དང་བཅས་པས་སྲོག་གི་སྙིང་པོ་ཕུལ་ཏེ། སངས་རྒྱས་ཀྱི་བསྟན་པ་བསྲུང་བ་དང་ཕྱི་རབས་ཀྱི་རྣལ་འབྱོར་པ་ཚུལ་བཞིན་བསྒྲུབ་པ་རྣམས་ཀྱི་ཕྲིན་ལས་བསྒྲུབ་པར་ཞལ་གྱི་བཞེས་པ་བཞིན་དུ། བདག་ཅག་རྣལ་འབྱོར་བསྒྲུབ་པ་པོའི་དཔལ་ལྡན་ལྷ་མོ་ཚུལ་བཞིན་དུ་བསྒྲུབས་ཏེ་ལས་བསྐུལ་བས། རྩ་བ་དང་བརྒྱུད་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལ་མ་འདའ་བར་དམ་རྫས་བརྒྱན་པའི་གཏོར་མ་འདི་བཞེས་ལ། བདག་ལ་སྡང་བའི་དགྲ་བོ་འདི་ལོ་དང་ཟླ་བ་མ་བཞག་ཞགས་དང་ཟ་མར་མ་འགོར་ཚེ་ཕྱི་མ་ལ་དུས་མ་འདེབས། ནམ་མཁའ་སྟོང་པ་ལ་ཚད་མ་བཙུགས། ལས་ཀྱི་རྣམ་པར་སྨིན་པ་ལ་ཁུང་མ་བྱེད་པར་ད་ལྟ་ཉིད་དུ་དུས་ཀྱི་མཐའ་སྟུངས་ཤིག །ཚེའི་འདུ་བྱེད་སྐུམས་ཤིག །གཟུགས་ཀྱི་ཕུང་པོ་ཤིགས་ཤིག །སྲོག་གི་རྩ་བ་ཆོད་ཅིག །སེམས་ཀྱི་མར་མེ་སོད་ཅིག །ལུས་སེམས་ཁ་སྦྱོར་ཕྱེས་ཤིག །ལྔ་ཕུང་འདུས་གཟུགས་ཕྲོལ་ཅིག །ཚེ་བསོད་དབང་ཐང་སྣུབ་ཅིག །བཀྲག་མདངས་ལོངས་སྤྱོད་ཕྲོག་ཅིག །བསྲུངས་སྐྱོབས་ལྷ་སྲུང་ཕྱེས་ཤིག །དཔོན་གཡོག་གཟའ་ཚང་གཏོར་ཅིག །ཐལ་བ་རྡུལ་དུ་བཟློག་ཅིག །བདག་ཅག་བསྒྲུབ་པ་པོའི་བསྟན་པ་དར་བ་དང་རྒྱས་པ་དང་བར་ཆད་མི་འབྱུང་བར་མཛད་དུ་གསོལ། །ལྷ་མོའི་སྲོག་གི་གཟེར་ཆུང་གི་ཕྲིན་ལས་རྫོགས་སོ། །བཀྲ་ཤིས་པར་གྱུར་ཅིག །པྲཛྙཱ་སེང་ཧས་བཀོད་པའོ།། །།
དཔལ་ལྡན་ལྷ་མོའི་སྤྱན་འདྲེན་ཆུང་བ།
༈ དཔལ་ལྡན་ལྷ་མོའི་སྤྱན་འདྲེན་ཆུང་བ་ནི། བྷྱོ། མ་ཡི་ནང་ནས་མ་ཅིག་མ། །སྲིང་གི་ནང་ནས་སྲིང་གཅིག་མ། །དཔལ་ལྡན་གཉེན་གྱི་རྡོ་རྗེ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །ལྷ་ཡི་གནས་ནས་ལྷ་མོ་ནམ་གྲུ་མ། །ཀླུ་ཡི་གནས་ནས་ཀླུ་མོ་གློག་འགྱུ་མ། །སྲིན་གྱི་ནང་ནས་སྲིན་མོ་ཤམ་ཤམས་མ། །མི་ཡི་གནས་ནས་བདུད་མོ་རེ་ཏི་མ། །དགྲ་བགེགས་བདུད་ལ་ཁྱོད་པས་ཆེ་བ་མེད། །གནས་ནི་བྱང་ཤར་མཚམས་ན་གནས། །རྒྱུག་ནི་བར་སྣང་ཁམས་སུ་རྒྱུག །སྐྱེ་འགྲོ་ཡོངས་ཀྱི་སྲོག་འཕྲོག་མ། །རྐང་ལ་ལྕགས་ཀྱིས་ལྷམ་གྱོན་མ། །སྐུ་ལ་མཛེས་པའི་རེ་ལྡེ་གསོལ། །མི་མགོ་རྟ་མགོ་མཁར་དུ་བརྩེགས། །ཐོད་པ་དགུ་བརྩེགས་གཞལ་ཡས་ནས། །མ་ཅིག་ལྷ་མོ་སྤྱན་འདྲེན་ནོ། །དོ་ནུབ་ནམ་གྱི་གོང་ཐུན་ལ། །མིང་པོ་རྡོ་རྗེའི་ལས་བཅོལ་ན། །སྲིང་མོ་དམ་ཅན་ལས་མཛོད་ཅིག །མ་བོས་པའི་ཚེ་ན་སྙན་མ་སྲ། །གཡབ་པའི་ཚེ་ན་སྤྱན་མ་རྡུལ། །བརྟེན་པའི་ཚེ་ན་རྒྱངས་མ་རིང་། །བསྐུལ་བའི་ཚེ་ན་བང་མ་བུལ། །རྦད་པའི་ཚེ་ན་མཐུ་མ་ཆུང་། འདིར་བྱོན་རྒྱལ་བའི་བསྟན་པ་བསྲུངས། །བཅོལ་པའི་ཕྲིན་ལས་གྲུབ་པར་མཛོད། །ཅེས་སྤྱན་དྲངས་སོ།། །།
དཔལ་ལྡན་ལྷ་མོའི་མཆོད་ཕྲིན་ཆེན་པོ་དོན་ཀུན་གྲུབ་པའི་དབྱངས་སྙན། ཆོས་ཀྱི་རྒྱ་མཚོ།
དཔལ་ལྡན་ལྷ་མོའི་མཆོད་ཕྲིན་ཆེན་མོ་དོན་ཀུན་གྲུབ་པའི་དབྱངས་སྙན་བཞུགས་སོ། །ༀ་སྭ་སྟི། བླ་མ་མཆོག་དང་ཡུམ་ཆེན་ཕ་རོལ་ཕྱིན། །བསྟན་དགྲ་བསྒྲལ་སླད་ཁྲོས་པའི་སྐུར་བསྟན་པ། །མ་ཅིག་འདོད་ཁམས་དབང་མོ་ལ་བཏུད་ནས། །གང་དེ་མཆོད་ཅིང་བསྒྲུབ་པའི་ཆོ་ག་དབྱེ། འཇིག་རྟེན་དང་འཇིག་རྟེན་ལས་འདས་པའི་མ་མོ་མཁའ་འགྲོ་ཐམས་ཅད་ཀྱི་སྤྱི་རྗེ་བདུད་མོ་སྲོག་གི་གཟེར་ཆུང་མའམ་དཔལ་ལྡན་ལྷ་མོ་ནག་མོ་རང་བྱུང་རྒྱལ་མོ་འདོད་པ་ཁམས་ཀྱི་དབང་ཕྱུག་མ་ཞེས་གསང་སྔགས་རྡོ་རྗེ་ཐེག་པའི་སྲུང་མ་ཆེན་མོ་གང་དེའི་མཆོད་ཅིང་བསྒྲུབ་པའི་ཚུལ་ལ་དོན་གསུམ། སྔོན་དུ་འགྲོ་བའི་རིམ་པ་དང་། དངོས་གཞི་དང་། རྗེས་ཀྱི་བྱ་བའི་རིམ་པའོ། །དང་པོ་སྔོན་དུ་བྱ་བའི་རིམ་པ་ལ། གནས་ནི་དུར་ཁྲོད་དམ། ཤིང་གཅིག་གམ། ས་མདོའམ། ཁ་བྱང་ཤར་དུ་བལྟ་བའི་བྲག་ཕུག་གམ། ལྷ་འདྲེ་དྲག་པོ་གནས་པའི་སར། བྱེ་བྲག་ལ་སྤྱི་མཐུན་དམ་ལྡན་འདུ་བའི་དབེན་གནས་སུ་བསྒྲུབ་པར་བྱ་སྟེ་རྣལ་འབྱོར་པ་མདོ་སྒྱུ་ཡང་ཕུར་གང་རུང་གི་དཀྱིལ་འཁོར་དུ་དབང་བསྐུར་བ་ཐོབ་ཅིང་། བྱེ་བྲག་མ་མོའི་སྲོག་གཏད་དམ། རྗེས་གནང་ཐོབ་པ། དམ་ཚིག་དང་ལྡན་ཅིང་། རྒྱུད་སྡེ་ནས་འབྱུང་བའི་བསྙེན་ཆེན་དང་། ཕུར་པའམ། ཕྱག་རྡོར་ལྟ་བུའི། གཉེན་པོ་ལྷ་ཡི་བསྙེན་པ་ཐོན་པའི་རྣལ་འབྱོར་པས་རས་བྲིས་ཀྱི་ཆོ་ག་ལྟར་བྲིས་པའི་སྐུ་ཐང་དགྲམ་པའི་མདུན་དཀྱིལ་འཁོར་མདའ་གང་གྲུ་བཞི་པའི་སྟེང་དུ། རྟེན་རྫས་ཀྱི་རིམ་པ་ནི། རྟེན་གྱི་གཏོར་མ་འབྲུ་སྣ་ཚོགས་ལས་བྱས་པའི་ཕྱེ་ལ་རཀྟ་ཆང་ཕུད་བདུད་རྩིའི་སྦྲུས་པའི་དཔལ་བཤོས་སྙིང་གཟུགས་མ་ཐོད་མཁར་བཅས་པ་ཕྱག་ལེན་ལྟར་བཅས་པའི་མཐར། མི་དབང་གི་ཤ །གྲི་རྒོད་སྙིང་། ཁྲིམས་འཆལ་ཤ་ལ་སོགས་པའི་ཤ་སྣ་ཚོགས་ཀྱི་བསྐོར། མདའ་བྱ་རྒོད་མ་བཟང་པོ་གཅིག་ལ་སྐྱེས་དར་མ་གྲིར་ཤི་བའི་ཙིཏྟའི་རྩ་སྦུབས་དབུས་མར་འབོད་རྦད་བསད་གསུམ་གྱི་སྔགས་གྲི་ཁྲག་དང་མཚལ་གྱིས་བྲིས་ལ་གཞུག །དར་ནག་གིས་བྲིལ་ལ་མདའི་མགུལ་དུ་བཏག་གོ། །གཞན་ཡང་ཙཀླི་དང་ནེའུ་ལེའི་རྐྱལ་བུའི་ནང་དུ་མི་དབང་གི་དབང་པོ་ལྔ་དང་། བྱེ་རུ་ལ་སོགས་རིན་པོ་ཆེ་སྣ་ཚོགས་དང་། འབྲུ་སྨན་སྣ་ཚོགས་དང་། རྨ་བྱའི་སྒྲོ། དར་སྣ་ཚོགས། བོང་བུའི་སྙིང་། ཤིང་ལོ་རླུང་ཁྱེར། བྱང་སེམས་དཀར་དམར། གྲི་རྒོད་དབང་པོ་ལྔ། མི་བསད་པའི་ལྕགས་ལས་བརྡུང་བའི་རལ་གྲི་སོར་བརྒྱད་པ་ཡུ་བར་བྷྱོཿབྲིས་པ་གཅིག་དང་། དེ་རྣམས་མདའ་ཡི་མགུལ་དུ་བཏགས་ལ་བརྟེན་གཏོར་སྟེང་གཟུགས། བླ་རྡོ་དང་སྲོག་འཁོར་ཡོད་ན་བཤམས། དེའི་སྟེང་དར་ནག་གི་གདུག་ཕུབ། རྒྱུན་དུ་རྟེན་གཏོར་རྩམ་གྱིས་མཐུས། མཐའ་བསྐོར་དུ་གཡས་གཡོན་སྨན་རཀ །དབུས་སུ་མཆོད་པའི། གཏོར་མ་ལ་མཐུན་རྫས་སྦྱར་བ། དྲག་མཆོད་གཡས་བསྐོར། ཕྱི་མཆོད་གཡོན་བསྐོར། འདོད་ཡོན་སོགས་མཆོད་པས་བག་དྲོ་ཞིང་བརྗིད་ཆགས་པར་བསྐོར་ལ། མདུན་དུ་འབུལ་བའི་གཏོར་མ། ཁྲག་ཆང་གི་སྐྱེམས། ལ་དུ། འབྲུ་སྣ་ཚོགས། ཤ་དུམ་བ་ལིཾ་རྣམས་ཚོགས་པར་བྱས་ལ། རང་གི་མདུན་དུ། རྡོར་དྲིལ། གསང་བའི་རྔེའུ་ཆུང་། མཐུན་སྤོས། སྨན་ཁྱད་པར་གྱི་གཡབ་དར་ནག་པོ་བྷྱོཿཡིག་གི་མཚན་པ། མདའ་བྱ་རྒོད་མའི་མགུལ་དུ་བུད་མེད་ཆུར་ཤི་བའི་སྲིན་ལག་དང་། བ་དན་རྩེ་གསུམ་རྣམས་བཏགས་པ་བཀོད། སྒྲུབ་གྲོགས་རྣམས་ཀྱི་མདུན་མི་རྐང་གི་དུང་དང་རྔ་རོལ་སོགས་འདུ་བྱས་ཏེ། ལྟེ་ཕུར་མནན་པ་སོགས་བསྙེན་སྒྲུབ་དང་འབྲེལ་ན་བྱ། སྒྲུབ་རྐྱང་ངམ་དུས་གཏོར་ཙམ་ལ་མི་དགོས། བདག་གི་རྣལ་འབྱོར་བཟླས་པ་དང་བཅས་པ་རྫོགས་ནས། འོད་གསལ་དུ་བསྡུ་ལྡང་བྱ་བ་རྣམས་ནི་ཐོག་མར་བྱ་བའི་རིམ་པའོ། །གཉིས་པ་དངོས་གཞི་ལ་གནས་ཡོ་བྱིན་བརླབས་པ་དང་། མཆོད་ཅིང་བསྒྲུབ་པའི་ཡུལ་གསལ་གདབ་པ་དང་། དེ་ལ་གསོལ་མཆོད་ཇི་ལྟར་བྱ་བའི་རིམ་པའོ། །དང་པོ་ནི། ཧཱུྃ་བིགྣན་ཏ་ཀྲིཏྟ་ཧཱུྃ་ཕཊ། རཾ་ཡཾ་ཁཾ་གིས་བསངས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་ས་ཕྱོགས་དུར་ཁྲོད་རོལ་པའི་གཞལ་མེད་ཆེན་པོ་འཇིགས་སུ་རུང་བའི་ཨཱ་ཡིག་ལས་བྱུང་བའི་སྣོད་ནོར་བུ་ཆུ་ཤེལ་དང་། པད་མའི་གཞོང་པ། བདེ་སྐྱོང་གི་དུང་ཆེན་ལ་སོགས་པར་ༀ་ཡིག་ལས་བྱུང་བའི་མཆོད་རྫས་ངོ་བོ་སྟོང་ཉིད་ལ། རྣམ་པ་ཅིར་ཡང་འཆར་བ། བྱེད་ལས་བདེ་སྟོང་གི་ཡེ་ཤེས་བསྐྱེད་པར་བྱེད་པ། མཆོད་ཡོན། ཞབས་བསིལ། མེ་ཏོག་བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་ཞི་བ་ཡིད་དུ་འོང་བ་དང་། ཁྲོ་བོ་དྲག་པོ་ཁྲག །མཁྲིས་པ། དུག་ཆུ་ལ་སོགས་པའི་འཐོར་འཐུང་། དབང་ལྔའི་མེ་ཏོག །ཚིལ་ཆེན་བདུག་སྤོས། ཞུན་ཆེན་མར་མེ། ཤ་རུས་ཞལ་ཟས། རྐང་གི་གླིང་བུ། ཐོད་པའི་རོལ་མོ། བཀྲ་ཤིས་རྫས་རྟགས་སྣ་བདུན། མ་དཱ་ན་དང་རུ་དྷིར་ཡི་ཚོགས་གཏོར། ཤ་ལྔ་བདུད་རྩི་ལྔ་ཡི་སྨན་ཆེན་རིགས་ལྔ་མཉམ་པར་སྦྱོར་བའི་རྩི་དང་འདྲེས་པ། ཁམས་གསུམ་ཞེན་ཆགས་ཐམས་ཅད་གཅིག་ཏུ་བསྡུས་པའི་དམར་གྱི་རྒྱ་མཚོ་སྦུ་ཕྲེང་འཁྲིགས་པ། གཟུགས་སྒྲ་དྲི་རོ་རེག་ཆོས་རྡོ་རྗེའི་ལྷ་མོས་ས་དང་བར་སྣང་གི་ཁྱོན་ཡོངས་སུ་གང་བ། ཧཱུྃ་ཡིག་གི་འོད་ཀྱིས་གཉིས་འཛིན་དག་པའི་ཡེ་ཤེས་ལས་ཅིར་ཡང་འཆར་བས་རེ་རེའང་གྲངས་མེད་པར་འཕྲོ་བའི་འདོད་འབྱུང་གི་དཔལ་དུ་འཆར་ཞིང་རྒྱས་པར་གྱུར་ཅིག །སྔགས་དྲུག་ཕྱག་དྲུག་བྱ་སྟེ་དྲི་མ་སྦྱང་བའི་ཕྱག་རྒྱ་ཐལ་མོ་ཁང་སྟོང་སྙིང་ཁར་སྦྱར་ལ། ༀ་སྭཱ་བྷཱ་ཝ་སོགས། མང་པོར་སྤེལ་བའི་ཕྱག་རྒྱ་ཐལ་མོ་ཁང་སྟོང་ཚིག་ཟུར་ཅན་སྨིན་མཚམས་སུ་སྦྱར་ལ ། ༀ་ན་མ་སརྦ་ཏ་ཐཱ་ག་ཏ་བྷྱོ་སོགས། ཅི་འདོད་བསྒྱུར་བའི་ཕྱག་རྒྱ་ཐལ་མོ་གོང་མ་སྦྱར་ཞིང་འོག་མ་ཅུང་ཟད་བསྐྱེད་པ་ལ་ཁ་ཡི་ཐད་དཀར་བཞག་ལ། ༀ་བཛྲ་ཨ་མྲྀ་སོགས། སོ་སོར་ཐོབ་པའི་ཕྱག་རྒྱ་ལག་གཡོན་ཐལ་མོ་མཆོད་སྦྱིན་སྣོད་བཏེགས་པའི་ཚུལ་དུ་པུས་མོར་བཞག་གཡས་རྡོ་རྗེ་ཁུ་ཚུར་སྙིང་ཁར་བཞག་སྟེ། ༀ་ཛྙཱ་ན་ཨ་ཝ་ལོ་ཀི་སོགས་དགྱེས་ཤིང་ཚིམ་པར་དབང་བའི་ཕྱག་རྒྱ་ལག་གཡས་མཛུབ་མོ་གཏོར་མའི་རྩ་ར་བསྒྲེང་ལ། ༀ་ན་མཿསརྦ་ཏ་ཐཱ་ག་ཏ་སོགས་མཉེས་ནས་དོན་བྱེད་པའི་ཕྱག་རྒྱ་ལག་གཉིས་སོ་སོར་བསྣོལ་མཐེ་བོང་གཤིབ་ལ། ༀ་ན་མ་ས་མན་ཏ་བུདྡྷ་སོགས། སྭཱ་ཧཱ། ༀ་བཛྲ་ཨརྒྷཾ་ཨཱཿཧཱུྃ་ནས་ཤཔྡ་ཨཱཿཧཱུྃ་བར་དང་། རཱུ་པ་ནས་དྷརྨ་ཨཱཿཧཱུྃ། ༀ་བཛྲ་མངྒ་ལ་རཏྣ་ཨཱཿཧཱུྃ། ༀ་སརྦ་བིད་པཱུ་ར་དང་ༀ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཋཱ། ༀ་མ་ཧཱ་རཀྟ་ཧཱུྃ། ༀ་མ་ཧཱ་བྷ་ལིཾ་ཏ་ཨཱཿཧཱུྃ། ༀ་དྷརྨ་ར་ཎི་ཏས་མཆོད་པའི་རོལ་མོས་བྱིན་དབབ་བོ། །གཉིས་པ་ལ་གཞི་རྟེན་གཞལ་ཡས་ཁང་གདན་བཅས་གསལ་གདབ་པ་དང་། བརྟེན་པ་ལྷ་གསལ་གདབ་པ་དང་། དེ་ལ་ཡེ་ཤེས་པ་བཀུག་ཅིང་སྤྱན་འདྲེན་བཞུགས་གསོལ་བྱ་བ་དང་། དབང་བསྐུར་ཞིང་དམ་འབོགས་པའོ། །དང་པོ་ལ་སེམས་བསྐྱེད་པ་དང་། དངོས་གཞི་གཉིས་ལས། དང་པོ་ནི། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་བྱ། དེ་ཡི་ཕྱིར་ས་ལམ་གྱི་བར་ཆད་ཞི་ཞིང་སངས་རྒྱས་ཀྱི་བསྟན་པ་བསྲུང་བའི་ཆེད་དུ་དཔལ་ལྡན་ལྷ་མོ་ཆེན་མོ་བསྒྲུབ་པར་བྱའོ། །སེམས་ཅན་བདེ་དང་༴ སྡུག་བསྔལ༴ བདེ་དང་༴ ཆོས་ཀུན༴ དེ་ལྟར་གསལ་བའི་ཀུན་རྫོབ་བྱང་ཆུབ་ཀྱི་སེམས་དེའི་རང་བཞིན་གདོད་ནས་མི་དམིགས་པ་དོན་དམ་བྱང་ཆུབ་ཀྱི་སེམས་སྟོད་པ་ཉིད་དོ། །ༀ་སྭཱ་བྷ་ཝ་སོགས་གཉིས་པ་ནི། སྟོང་པའི་ངང་ལས་སྐད་ཅིག་མདུན་དུ་ཡྃ་ལྗང་གུ། རྃ་དམར། བྷྲཱུྃ་ཡིག་སྨུག་ནག་འབར་བ་རྣམས་འོད་དུ་ཞུ་བ་ལས། འཐོར་བྱེད་དྲག་ཏུ་འཁྲུགས་པའི་རླུང་གི་དཀྱིལ་འཁོར་གྲུ་བཞི་ཡངས་ཤིང་རྒྱ་ཆེ། ནང་སྟོང་པ་འཕང་མཐོའི་ཟུར་ལ་གཡོ་བའི་བ་དན་གྱིས་མཚན་པའི་སྟེང་དུ། དམར་ནག་འབར་བའི་མེ་དཀྱིལ་རླུང་དང་མཚུངས་པ་ཤིན་ཏུ་གཏུམ་ཞིང་རབ་ཏུ་མཆེད་པའི་སྟེང་ན་ཐོད་པ་སྐོམ་རློན་རྙིང་གསུམ་གྱིས་བརྩིགས་པ་ལ་གནམ་ལྕགས་ཀྱི་གཟེར་བཏབ་པའི་གཞལ་ཡས་ཁང་ཆེན་པོ་གྲུ་བཞི་སྒོ་བཞི་པ། འདོད་སྣམ་མཆེད་པའི་སྤྲིན་གྱིས་གང་བའི་དྲག་པོའི་རྟ་བབས་བཞི་བཞི་སོགས་པའི་མདའ་ཡབ་དང་བཅས་པ། ཆུ་སྲིན་རྒྱལ་པོའི་སྒོ་རྒྱན། བདུད་ཀྱི་མགོ་བོ་ཚལ་པར་བཀས་པའི་ཀ་གདན། ཞིང་ཆན་གྱི་ཀ་གདུང་། ཞིང་ཆུང་གི་དྲལ་དྲབ། ཤ་ཆེན་གྱི་ནག་ལེབ། ཚིལ་ཆེན་གྱི་འཕན་གདུག །ཙིཏྟའི་ཕོ་ལོང་། རྒྱུ་མའི་ལྡ་ལྡིབ། ཉི་ཟླའི་སྐར་ཁུང་། བགེགས་ཀྱི་གློ་ཕྲེང་འབྱུང་པོའི་རྐང་ལག་གི་ཤར་བུ་བྱས་པའི་སྟེང་། རིན་པོ་ཆེ་དབང་གི་རྒྱལ་པོའི་ཏོག་གིས་མཛེས་པའི་ཞིང་ཆེན་གྱི་རྒྱལ་མཚན་བཙུགས་པ། དབུས་སུ་ཞིང་གི་གདུགས་འཁོར་བ་ཡངས་ཤིང་རྒྱ་ཆེ་བ་བློས་རྫོགས་ཚད་གཅིག་བསྐྱེད་གསུང་། དབུས་གྲུ་གསུམ་མཐིང་ནག་ངོས་ཟླ་གམ་ལོག་གསུམ་ཁྲག་མཚོ་འཁྱིལ་བ། དེ་རྒྱབ་ཐོད་པའི་རྭ་བ་དེ་རྒྱབ་གྲུ་ཆད་ཁྱམས་དང་བཅས་པའི་དབུས་གརྦྷ་པ་ཧཱུྃ་ཞེས་བརྗོད་པས་འོག་གི་ས་གཞི་ཀུན་མི་རོ་དང་རྟ་རོ་གཅལ་དུ་བཀྲམ་པ་མི་ཁྲག་དང་རྟ་ཁྲག་གི་མཚོ་འཁྱིལ་བ་འཁོར་ཀུན་ལ་ཞིང་ཚལ་པའི་གདན་དང་། དབུས་ཀྱི་གཙོ་མོའི་གནས་སུ་རང་ཉིད་ཡི་དམ་གྱི་ལྟེ་བ་ནས་ཡི་གེ་ཏིཿནག་པོ་གཅིག་སྤྲོས། འོད་དུ་ཞུ་བ་ལས་སྲིན་གྱིས་སྤྲུལཔའི་བོང་དུ་དམར་ག་རླུང་གི་གཤོགས་པ་ཅན་དབོ་དཀར་བ་ལ་ཞིང་གི་སྟན་དང་ཐོད་སྐོམ་འབར་བས་མཚན་པའི་སྒ་བསྟད་པ། སྲིན་པོའི་ཡ་ཐོད་ལས་སྔ་རུ་བྱས་ཤིང་། སྲིན་མོའི་མན་འགལ་ལས་ཕྱི་རུ་དང་། ཞིང་གི་ལྤགས་པས་སྒ་གཡོགས་བྱས་པ། སྦྲུལ་ནག་གིས་གོང་ཐག་དང་གློ་ནན་ཞིང་ཆུང་ངུ་གཉིས་ཀྱི་སྨེད་བྱིལ་ལག་པ་གཉིས་འཕྱང་ཞིང་སྐྲ་མདུད་ཡར་བཏགས་པའི་སྨེད་ཐུང་། དམ་ཉམས་པ་བསྒྲལ་བའི། བཱ་སུ་ཏ་ཡི་ཞགས་པས་མཐུར་སྲབ་བཅིངས་པ། རུས་སྦལ་ནག་པོའི་ཕོག་གུ་བཏབ་ཅིང་། མི་མགོའི་ཐོད་སྡོམ་བགྱིས་པའི་སྔ་ཤད་གཡས་ན་བདུད་ཀྱི་ཁྲམ་བམ་བཀལ་ཅིང་། སྔ་ཤད་གཡོན་ན་མཚོན་གྱི་གྲུ་གུ་བཅིངས་པ། ཕྱི་ཤད་གཡས་ན་བྱང་དམར་བམ་པོ་འདོགས་ཤིང་། ཕྱི་ཤད་གཡོན་ན་ནད་ཀྱིས་རྐྱལ་པ་འགེལ་བ། བོང་བུའི་མཇུག་མའི་རྩ་བ་གཡས་གཉིས་ན་མིག་གཉིས་ཡོད་ཅིང་རྣ་བ་དཀྲོག་བཞིན་རླུང་དམར་འཚུབས་མའི་ནང་དུ་རྒྱུག་པ་དང་བཅས་པའི་གཞལ་མེད་ཁང་གི་ཕྱི་ཡེ་ཤེས་བསྐལ་པའི་མེ་རི་འབར་བའི་གུར་ཁང་དེའི་ཕྱིར་བསྐལ་པའི་རླུང་ནག་འཚུབས་མའི་གུར་ཁང་འཁོར་བའི་ཕྱིར་ན་མུ་ལེ་མཐིང་གི་རྒྱ་མཚོ་རྦ་རླབས་ཀྱི་རི་ལེན་པར་ནུས་ཤིང་། འོད་ཟེར་ལྔ་ཡི་མདངས་ཕྲོ་བ། ཞིང་བཅུ་ཚངས་པའི་དགྲ་རོ་དུམ་བུ་ཉིལ་ཉིལ་གཡོ་ཞིང་རྒྱ་ཁྱོན་ཤིན་ཏུ་ཆེ་བའི་མཐའ་མུ་ལེ་ཤིང་ནགས་དང་། དུར་ཁྲོད་ཆེན་པོའི་ས་གཞི་འཇིགས་རུང་བཀོད་པའི་ཚོགས་མ་ཚང་བ་མེད་པས་གང་བ་ན་མ་མོ། མཁའ་འགྲོ། ཤུགས་འགྲོ། བདུད་མོ། སྨན་མོ་འབུམ་སྡེ་སོགས་ཅི་དགའ་བར་རྩེན་ཞིང་། ལྕམ་ཀ་དང་། ཀངྐ་ནག་པོ་སོགས་བྱ་ཚོགས་ལྡིང་ཞིང་། ལྕེ་སྤྱང་འདུར་བ་སྲིན་མོས་སྐན་སྒྲ་གཏོགས་ཤིང་། ལས་བྱེད་མཁའ་འགྲོས་བཤུགས་གླུ་ལེན་པའི་མཐར་རི་བོ་བྲག་དམར་གནམ་ལ་ཟུག་པ་དང་བཅས་པ་གསལ་བར་གྱུར། གཉིས་པ་ལ་གཙོ་མོ་དང་། འཁོར་བསྐྱེད་པའོ། །དང་པོ་ནི། དེ་ནས་རང་ཉིད་ཡི་དམ་གྱི་ཐུགས་ཀ་ནས་ཡི་གེ་མཱཿནག་མོ་གཅིག་འཕྲོས། བོང་བུའི་སྒ་གོང་ཞིང་ཆེན་བསྣོལ་བའི་གདན་གྱི་སྟེང་། རཾ་ལས་ཉི་མའི་དཀྱིལ་འཁོར་དུ་གྱུར་པའི་ཐོག་ཏུ་དབབ། དེ་འོད་དུ་ཞུ་བ་ལས་རལ་གྲིའི་ཡུ་བ་མར་བསྟན་པ་རྩེ་མོ་ཡར་བསྟན་པ་གཞུང་བ་རང་ལ་བསྟན་པའི་སོ་ཡུའི་མཚམས་ནས་ཉི་མའི་ཐོག་ཏུ་མཿནག་མོ་དང་བྷྱོཿམཐིང་ཀས་མཚན་པ་དེ་ལས་འོད་ཟེར་འཕྲོས་རྒྱལ་བ་མཆོད། བྱིན་རླབས་བསྡུས། སེམས་ཅན་གྱི་སྒྲིབ་པ་སྦྱངས། འཇིག་རྟེན་གྱི་མཁའ་འགྲོ་མ་ཐམས་ཅད་ལ་ཕོག །ཐམས་ཅད་ལྷ་མོ་ནག་མོ་ཉིད་དུ་གྱུར། ཀུན་ཚུར་འདུས་རལ་གྲི་ལ་ཐིམ་དེ་ལས་རལ་གྲིའི་འོད་ཟེར་སྤྲོས། རྒྱལ་བའི་བསྟན་པ་ལ་སྡང་བའི་དགྲ་བགེགས་ཐམས་ཅད་ཚར་བཅད། ཚུར་འདུས་ཏེ་རལ་གྲི་འོད་དུ་ཞུ་སྔགས་ཀྱི་སྒྲ་རང་སྒྲར་གྲགས་པ་ནི། ༀ་རོ་རུ་རོ་རུ་ཏྲི་ཡོད་པ་སྣང་མོད་མ་དག་པ་འདྲ་སྟེ་ཡི་གེ་བཅོ་ལྔ་པར་གྲགས་པའི་ཕྱིར། ཙ་པ་ལ་ཨ་ཤུགྨེ་ཧཱུྃ་བྷྱོ་ཛ་ཛཿ སྐད་ཅིག་གིས་སྤྲུལ་པའི་ལྷ་མོ་ནག་མོའི་སྐུར་གྱུར་ཏེ། དེ་ཡང་དཔལ་ཡེ་ཤེས་ཀྱི་ལྷ་མོ་ནག་མོ་ཆེན་མོ་སྐུ་མདོག་མཐིང་ནག་ལ་རྔམས་པ་ཞལ་གཅིག་ཕྱག་གཉིས་དམར་ལ་ཟླུམ་པའི་སྤྱན་གསུམ་མེ་སྟག་གི་ཚ་ཚ་འཁྲུགས་པས་བདུད་བགེགས་ལོག་འདྲེན་ཐམས་ཅད་བསྲེགས་པ་དམ་ཉམས་དགྲ་རོ་དུམ་བུར་འདྲལ་བའི་ཞལ་གདངས་ཤིང་མཆེ་བ་བཞི་གཙིགས་པའི་ལྗགས་འདྲིལ་བ། ཕྱག་གཡས་སྡིག་པ་ཅན་གྱི་རལ་གྲི་ཡེ་ཤེས་མེ་རི་འཚུབས་པ་ནམ་མཁའ་ལ་ཕྱར་བ། རལ་གྲིའི་སྟིང་པ་ལ་དམར་ཐིག་གཅིག་སྣང་གསུངས། གཡོན་པས་ལོག་ལྟ་ཅན་གྱི་ཁྲག་གིས་བཀང་བའི་བྷནྷ་ལྕང་ལོ་ཅན་ཐུགས་ཀར་འཛིན་པ། སྟ་ཟུར་གཡོན་གྱི་མཆན་ན་རིན་པོ་ཆེས་ཕྱུར་བུར་བཀང་བའི་ནེའུ་ལེའུ་རྐྱལ་པ། ཁ་ནས་རིན་པོ་ཆེ་ཕྱུར་བ་བསྣམས་པ་བོང་བུ་ལ་ཕྱིར་ལོག་ཏུ་བཅིབ་ཤིང་། མི་ཡི་ཐོད་པའི་ཡོབ་ཆེན་ལ་བརྫིས་པ། དབུ་སྐྲ་ཁམས་ནག་གི་རལ་པ་གྱེན་དུ་ཐོར་ཚུགས་སུ་མཐོ་ཞིང་། ཐུར་དུ་ཡང་ས་ལ་བཤར་བ། དགའ་བ་བཅུ་དྲུག་གིས་ཐུགས་རྒྱུད་མྱོས་པའི་བརྡར་རྩ་ཆིངས། རལ་པའི་མཚམས་ཚུར་ཐོད་པ་སྐོམ་པོ་བཅུ་དྲུག་གི་ཕྲེང་བ་དང་། ཐོད་སྐོམ་རིན་པོ་ཆེའི་རྩེ་བྲན་ཅན་ལྔ་ཡིས་དབུ་བརྒྱན་པ། སྐབས་འདིར་བླ་མ་ཀཿཐོག་པའི་བཞེད་པ་ལ་ཐོད་སྐོམ་བཅུ་དྲུག་གི་དབུ་འཁོར་མར་བརྒྱན་པ་ལས་མ་གསུངས་ཀྱང་། རྒྱུད་དོན་མན་ངག་གི་ལུགས་སུ་བྱས། སྤྱི་བོའི་གཙུག་ན་ཚེས་བརྒྱད་པའི་ཟླ་བ་དང་། རྨ་བྱའི་མདངས་ཀྱི་རྒྱལ་མཚན་བརྒྱན་ཅིང་། སྙན་གཡས་པའི་སྟེང་ན་གསེར་གྱི་འཁོར་ལོ་རྩིབས་བརྒྱད་པ་སེང་གེ་དཀར་མོ་གཡུ་ཡི་རལ་པ་ཅན་གྱིས་མཛེས་པའི་སྙན་ཆ་དང་། གཡོན་པའི་སྙན་ཆ་གདེངས་ཀ་ཅན་གྱིས་སྤྲུལ་ནག་གིས་བཏགས་པའི་གསེར་གྱི་དྲིལ་བུ་འཁྲོལ་བ། སྐུ་སྟོད་ཞིང་ཆེན་ལྤགས་པའི་ན་བཟའ་གསོལ་ཞིང་། སྐུ་སྨད་སྣམ་བུ་གཡས་ཕྱོགས་སྨྱུགས་མའི་མི་སྐྲའི་རེ་ལྡེ་ཞེས་ཀྱང་གསུངས་། རེ་ལྡེ་དང་། གཡོན་ཕྱོགས་གླང་པོ་ཆེའི་ཀོ་བརླ་རྩ་བསྐོར་བ་ཐུང་ཐུང་ཡིན་གསུངས། རློན་ཀྲིས་ཤིང་། སྟག་ལྤགས་ཀྱི་ཤམ་ཐབས་ལ་སྦྲུལ་ནག་གིས་སྐུ་རགས་བཅིངས་པ། མགོ་བོ་རློན་པ་ལྔ་བཅུའི་དོ་ཤལ་སེ་རལ་ཁར་ཐོགས་པ་ལས་ཁྲག་འབབ་པ། འཁོར་ལོའི་སྐྲ་ཁེབ་ཕྱག་ཞབས་དཔུང་པའི་གདུབ་བུ། མཆོད་ཕྱིར་ཐོག་བཅས་རུས་པའི་ཕྱག་རྒྱ་ལྔ་དང་། ཡིད་བཞིན་ནོར་བུའི་མགུལ་རྒྱན་ཁྲག་ཞག་ཐལ་བ་ཞག་གིས་མཚན་མས་བཏབས་ཤིང་ཏིལ་མར་གྱིས་ལུས་ཀུན་ཁྱབ་པར་བྱུགས་པ་ཞབས་ལ་ལྕགས་སྒྲོག་གིས་མཛེས་ཤིང་། སྐུ་དང་ཡན་ལག་ཐམས་ཅད་སྦྲུལ་རིགས་ལྔས་བཅིངས་པའི་ལུས་ལས་གཡུ་ཡི་དྲིལ་བུས་བསིལ་བ། ལྟེ་བར་ཉི་མའི་དཀྱིལ་འཁོར་ཚ་ཞིང་བསྲེགས་པ་དང་། མཚོན་ཆའི་རྫོང་ནས་ལྷ་ཡི་དམག་དཔུང་སྤྲིན་གཏིབ་པ་བཞིན་སྤྲོ་བ་ཁྲོ་གཏུམ་བཟོད་པར་དཀའ་བའི་གཟི་བརྗིད་ཅན་དུ་གྱུར། གཉིས་པ་ནི། མ་མོའི་ཐུགས་ཀ་ནས་འཁོར་གྱི་གནས་སོ་སོར་བྷྱོ་ཡིག་རེ་སྤྲོས་པ་འོད་དུ་ཞུ་བའི་བོང་བུའི་ཁ་དུར་ཞབས་སུ་ཁོལ་མོ་རེ་མ་ཏི་སྟེ་ལྷ་མོ་སྐེམས་མ་ཆུ་སྲིན་གྱི་མགོ་ཅན་སྐུ་མདོག་དམར་ནག་ཞལ་གཅིག་གཙོ་མོ་ལ་ཕྱོགས་ལ། གཡས་པས་རྒྱུ་ཞགས་ཀྱིས་བོང་བུ་ཁྲིད་ཅིང་། གཡོན་པས་སྦྲུལ་ནག་གི་ཞགས་པ་བསྣམས་པ། ཞིང་ལྤགས་ཀྱི་ཤམ་ཐབས་དང་། སྦྲུལ་ནག་གི་སེ་རལ་ཐོག་ནས་རྒྱུག་སྟེ་འགྲོ་བའི་ཉམས་ཅན། གྲུ་གསུམ་ཟླ་གམ་ངོས་ཀྱི་གཙོ་མོའི་མདུན་ན་གསུམ་དང་། གཡས་གཡོན་དུ་གཉིས་ཏེ་བཅས་པའི་མ་མོ་བདུན་ནི། རྡོ་རྗེ་ཀུན་གྲགས་མ་དང་ཀུན་ཏུ་བཟང་མོ། རྡོ་རྗེ་ཀུན་གསལ་མོ་དང་། རྡོ་རྗེ་ཡེ་ཤེས་མཆོག །རྡོ་རྗེ་འོད་ཆགས་མ་དང་རྡོ་རྗེ་གསལ་འཕྲོ་མ། རྡོ་རྗེ་གཡུ་ཡི་སྒྲོན་མར་བཅས་པའི་སྐུ་མདོག་ནག་མོ་གྲི་ཁུག་དག་ཐོད་པ་ཁྲག་གིས་བཀང་བ་འཛིན་ཅིང་། གཙོ་མོ་ལ་མདུན་ཕྱོགས་པས་ཞབས་གཡས་བརྐྱང་གཡོན་བསྐུམ་གྱིས་རོལ་པ། གྲུ་གསུམ་གྱི་ཟུར་གསུམ་དུ་མ་མོ་གསུམ་ནི་སྐུ་ཡི་སྤྲུལ་པ་རེ་མ་ཛ། གསུང་གི་སྤྲུལ་པ་རེ་མ་ཛི། ཐུགས་ཀྱི་སྤྲུལ་པ་རེ་མ་ཛུ་རྣམས་སྐུ་མདོག་ནག་མོ་གཡས་ལྕགས་ཀྱུ་གཡོན་ཐོད་ཁྲག་འཛིན་པ། དེའི་ཕྱི་རོལ་དུ་གྲུ་ཆད་ནང་མའི་ཤར་སྟོད་དུ་དཀར་མོ་ཕོ་ཉ་མཛེས་མ། ལྷོ་སྟོད་སྔོན་མོ་རལ་པ་འཛིང་མ། ནུབ་སྟོད་དམར་མོ་དབང་ཆེན་གཏུམ་མོ། །བྱང་སྟོད་སེར་མོ་མཁའ་ལ་བཞད་མ་བཞི་གཡས་བ་དན། གཡོན་ཐོད་ཁྲག་བསྣམས་པ། གྲུ་ཆད་ཀྱི་ཤར་སྨད་སེང་གེ་དཀར་མོ། ལྷོ་སྨད་སྟག་སེར་མོ། ནུབ་ཏུ་འབྲུག་དམར་མོ། བྱང་དུ་སྤྱང་གདོང་ཅན་ལྗང་གུ་རྣམས་ཀྱང་ཕྱག་ན་བ་དན་དང་ཐོད་ཁྲག་ཐོགས་པ། དེ་ཡི་ཕྱི་ཁྲག་ཁྱམས་ལ་ཤར་སྟོད་ནས་རིམ་བཞིན། སྲིན་མོ། ཚངས་མ། ལྷ་ཆེན་མོ། གཏོགས་འདོད་མོ། གཞོན་ནུ་མོ། བརྒྱ་བྱིན་མོ་རྣམས་དང་། ལྷོ་སྟོད་ནས་རྡོ་རྗེ་དམར་མོ། བདུད་རྩི་མོ། ཟླ་བ་མོ། བེ་བོན་མོ། སྲིན་མོ། ཟ་བ་མོ། ནུབ་སྟོད་ནས། དགའ་བ་མོ། སྟོབས་ཆེན་མོ། གཅིག་པུར་སྤྱོད་མ། འདོད་པ་མོ། ནོར་སྲུང་མོ། རླུང་ལྷ་མོ། བྱང་སྟོད་ནས། གསོད་བྱེད་མོ། མེ་མོ། ཕག་གདོང་མོ། རྒན་བྱེད་མོ། སྣ་ཆེན་མོ། ཆུ་ལྷ་མོ། སྒོ་བཞི་རྡོ་རྗེ་ནག་མོ་ལྕགས་ཀྱུ་ཅན། ཤན་པ་ཞག་པ་མ། ཁམས་སྣ་ལྕགས་སྒྲོག་ཅན། གསུས་འཛིན་དྲིལ་བུ་མ་རྣམས་སྐུ་མདོག་སྨུག་ནག་གཡས་རྡོ་རྗེ་དང་། གཡོན་ཐོད་པ་ཁྲག་གིས་བཀང་བ་འཛིན་པ། ཡང་ན་སྒྱུ་འཕྲུལ་ལྟར་བྱ་བར་གསུངས། ཞིང་གི་གདན་ལ་བརྐྱང་བསྐུམ་གྱིས་རོལ་པ། དེ་ལྟར་གསལ་བའི་མ་མོ་ཐམས་ཅད་ཀྱང་ཁྲོ་གཏུམ་སྡང་མིག་ཡོན་པོར་བལྟ་བས། བདུད་དཔུང་བསྲེགས་ཤིང་། ཐོད་རློན་དང་སྙིང་གི་ཕྲེང་བ་མགུལ་དུ་རྒྱང་བ། མི་ཡི་རྒྱུ་མ་རློན་པ་ཞགས་སུ་འཁྱིལ་བ་ནར་མར་འདྲེན་ཅིང་། སྟག་གི་ལྤགས་པའི་ཤམ་ཐབས་སྦྲུལ་གྱིས་འཆིང་བ། ཞིང་ལྤགས་སྐེད་ལ་དཀྲིས་ཤིང་། མཆེ་བ་ཁྲག་གིས་སྦགས་པའི་རྩེ་མོ་གནམ་ལྕགས་ཐོག་གི་མདའ་ལྟར་བགེགས་ཀྱི་གློ་བའི་ངོས་ན་རབ་ཏུ་གཟན་པ། ཐམས་ཅད་ཀྱང་གཙོ་མོའི་བཀའ་ལ་ཉན་ཅིང་དམ་ལྡན་རྣལ་འབྱོར་པས་ཅི་བསྒོ་བའི་ལས་ཡིད་བཞིན་དུ་བསྒྲུབ་པ། དེ་ཡི་ཕྱི་ན་དུར་ཁྲོད་ཀྱི་འཁོར་སར་བྷྱོ་ཡིག་ལས་སྐྱེས་པ་འཁོར་མ་མོ་སྟོང་དང་། བདུད་མོ་བྱེ་བ་འབུམ་གྱི་ཚོགས་དང་བཅས་པ་ཐམས་ཅད་ཡོད་པར་མོས་ཀྱང་ཆོག །སྤྱན་ཉི་མའི་དཀྱིལ་འཁོར་ལྟར་འབར་ཞིང་། འོད་ཀྱི་མདོག་ཁྲག་ལྟར་དམར་བ། དར་ནག་གི་གོ་ཟུ་འཇའ་ཚོན་གྱི་མཐའ་སྐུད་ཅན་གསོལ་བ། ཉི་ཟླའི་ཞགས་པ་འཕེན་པ། སྐུ་མདོག་ནག་མོ་རལ་པ་སྔོ་དམར་མཐུར་དུ་འཕྱང་བ། གཡས་པ་རྣམས་ཀྱི་གྲི་གུག་དང་། གཡོན་པ་རྣམས་ན་ཐོད་ཁྲག་ཐོགས་ཤིང་། མཆན་ན་ནད་ཀྱི་རྐྱལ་པ་སྔོ་དམར་འཆང་བ། ཞིང་ཆེན་གཡང་གཞི་སྐུ་ལ་མནབ་པ། འཇིགས་འཇིགས་རྔམ་རྔམས་སུ་རོལ་པ་འཁོར་དེ་དག་ཐམས་ཅད་ཀྱང་ཕྲིན་ལས་རྣམ་བཞིའི་རོལ་པ་བསམ་གྱིས་མི་ཁྱབ་པ་འདོད་དགུར་བསྒྱུར་བའི་སྤྲིན་ཆེན་པོ་འཕྲོ་བ་གཅིག་ཏུ་གྱུར། གསུམ་པ་ནི། དེ་ལྟར་གསལ་བའི་གཙོ་འཁོར་ཐམས་ཅད་ཀྱི་སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པར་པད་མའི་སྟེང་དུ་ཨཱཿདམར་པོ། སྙིང་ཁར་ཉི་མའི་སྟེང་དུ་ཧཱུྃ་སྔོན་པོ་རྣམས་རྒྱལ་བ་ཐམས་ཅད་ཀྱི་རྡོ་རྗེ་གསུམ་གྱི་ངོ་བོ་རྒྱས་བཏབ་པར་གྱུར། ཐུགས་ཀའི་ཧཱུྃ་གི་འོད་དང་། བདག་ཉིད་ལྷའི་ཐུགས་ཀ་ནས་ལྕགས་ཀྱུ་ལྟ་བུའི་ཚ་ཞིང་རྩུབ་པའི་འོད་ཟེར་འཕྲོས་པས། དག་པ་མཁའ་སྤྱོད་ཀྱི་གཞལ་མེད། བྱང་ཤར་མཚོ་མུ་ལེ་མཐིང་གི་གུར་ཁང་། རི་རབ་རི་ཡི་རྩེ་མོ་སུམ་ཅུ་རྩ་གསུམ་གྱི་དཔག་བསམ་ཤིང་ལྗོན་པ་རྒྱས་པའི་ལོ་མའི་ཚལ་ནུབ་ཕྱོགས་ཨུ་རྒྱན་བྱང་ཆུབ་ཤིང་གི་དྲུང་ལ་སོགས་རང་བཞིན་དང་ཁྱད་པར་གྱི་གནས་མཆོག་ཐམས་ཅད་ནས་སྔོན་གྱི་ཐུགས་དམ་རྗེས་སུ་བསྐུལ་ཏེ་དཔལ་ལྡན་ལྷ་མོ་ནག་མོ་ཆེན་པོ་ལ། འཁོར་ཡེ་ཤེས་ལས་དང་འཇིག་རྟེན་གྱི་མཁའ་འགྲོ་བྱེ་བ་འབུམ་སྡེ་སྣང་སྲིད་མ་མོའི་ཚོགས་ཐམས་ཅད་ཀྱིས་བསྐོར་བ། གཞལ་ཡས་ཁང་དང་བཅས་པ་སྐད་ཅིག་གིས་བྱོན་པར་བསམ་ལ། དང་པོ་རྡོ་རྗེ་ཀ་གོ་ནའི་རྒྱ་བཅས། ༀ་རུ་རུ་རོ་རུ་ཙ་པ་ལ་ཨ་ཤུགྨེ་ཧཱུྃ་བྷྱོ་ཛ་ཛཿ ཨེ་ཧྱེ་ཧི་མ་མོ་ནག་མོ་ཏིང་ལམ་མ་མོ་ནག་མོ་དུནྟིཾ་བྷྱོ་ཛཿ ཧཱུཾ་བཾ་ཧོཿནག་མོ་དུན་བྷྱོཿཁྱད་པར་གྱི་གཡབ་དར། རྐང་གི་གླིང་བུ་དང་། རོལ་མོས་བསྐུལ། ཚིལ་སྤོས་བསྲེགས་ཤིང་། སྤྱན་འདྲེན་ཆེ་བ་སྙན་པའི་དབྱངས་ཚིག་དང་བཅས་ཏེ། ཧཱུྃ། དོན་དམ་དག་པ་ཆོས་དབྱིངས་དང་ཉིད་ལས། །རྒྱལ་བ་ཀུན་ཡུམ་རྡོ་རྗེ་དབྱིངས་ཕྱུག་མ། །དཔལ་ལྡན་མཁའ་འགྲོ་མ་མོ་ཡོངས་ཀྱི་རྗེ། །མཁའ་འགྲོའི་འཁོར་ལོ་ཆེ་ལ་འདིར་གཤེགས་ཤིག །ཀུན་ཏུ་བཟང་མོ་དཔལ་ལྡན་ཐུགས་སྤྲུལ་མ། །དོན་དམ་དབྱིངས་ན་བསྐྱེད་པར་མི་མངའ་ཡང་། །ཐུགས་རྗེས་ཐབས་ཀྱི་སེམས་ཅན་གདུལ་བའི་སླད། །མ་འགགས་སྟོང་པ་ཆེ་ལས་བཞེངས་སུ་གསོལ། །མ་ཅིག་ཧེ་རུ་ཀ་དཔལ་ཌཱཀྐི་མོ། །དུར་ཁྲོད་གནས་ཉུལ་རྒྱ་མཚོའི་དབུས་ན་རོལ། །མི་སྡུག་ནག་པོ་ཅིར་ཡང་བསྒྱུར་བའི་གཟུགས། །དུས་བཞི་མངའ་མཛད་ཆེན་མོ་སྤྱན་འདྲེན་ནོ། །བྷྱོ། དད་པ་དང་ནི་དམ་ཚིག་གིས། །ཚུར་གཤེགས་ཚུར་བྱོན་དཔལ་ལྷ་མོ། །བདུད་མོ་དཔལ་ལྡན་རེ་མ་ཏི། །རྣལ་འབྱོར་གདུངས་བས་བོས་པའི་ཚེ། །ཉི་མ་བྱང་ཤར་ཕ་ཀི་ན། །ཡོངས་འདུས་ཤིང་གི་རྩ་བ་ན། །མཚོ་མུ་ལེ་མཐིང་གི་ནང་ཤེད་ན། །མཐིང་ཤུན་སྔོན་པོའི་གུར་ཁང་ན། །མི་མགོ་རྟ་མགོ་མཁར་དུ་བརྩིགས། །ཐོད་པ་དགུ་བརྩེགས་གཞལ་ཡས་དབུས། །བསེ་ཡི་སྐུ་མཁར་གྲུ་བཞིའི་ནང་། །རིན་ཆེན་སྣ་ཚོགས་ཕོ་བྲང་ནས། །མི་རོ་རྟ་རོ་གཅར་དུ་བཀྲམ། །མི་ཁྲག་རྟ་ཁྲག་འདམ་རྫབ་ལྡང་། །དེ་ན་མ་ཅིག་ལྷ་མོ་བཞུགས། །ཀྱཻ། མ་ཅིག་ལྷ་མོ་དཔལ་ལྷ་མོ། །དད་པ་དང་ནི་དམ་ཚིག་གིས། །མ་ཅིག་ལྷ་མོ་སྤྱན་འདྲེན་ནོ། །བྱང་ཤར་མཚམས་ནས་གཤེགས་སུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཡི་ནང་ནས་མ་ཅིག་མ། །སྲིང་གི་ནང་ནས་སྲིང་གཅིག་མ། །ལྷ་མོ་ཆེན་མོ་དུང་སྐྱོང་མ། །བདུད་ཀྱི་ཡུམ་ལ་གཤིན་རྗེའི་ལྕམ། །འདོད་པ་ཁམས་ཀྱི་དབང་ཕྱུག་མ། །ཆིབས་སུ་བོང་བུ་དམར་གྭ་བཅིབས། །ཁལ་དུ་ལྕགས་དྲྭ་མིག་དགུ་འགེལ། །མཆན་ན་ནད་ཀྱི་རྐྱལ་པ་ཐོགས། །གཡས་ན་རལ་གྲི་སྡིག་པ་ཅན། །གཡོན་ན་གདུག་པའི་ཐོད་ཁྲག་ཐོགས། །སྟོང་གསུམ་ཀུན་གྱི་བྱོས་བླུགས་མཁན། །གནས་ནི་བྱང་ཤར་མཚམས་སུ་གནས། །རྒྱུག་ནི་བར་སྣང་ཁམས་སུ་རྒྱུག །སྐྱེ་འགྲོ་ཡོངས་ཀྱི་སྲོག་འཕྲོག་མ། །རྐང་ལ་ལྕགས་ཀྱི་ལྷམ་གྱོན་མ། །སྐུ་ལ་མཛེས་པའི་རེ་ལྡེ་གསོལ། །མ་ཅིག་ལྷ་མོ་སྤྱན་འདྲེན་ནོ། །མིང་པོ་རྡོ་རྗེའི་ལས་བཅོལ་ན། །སྲིང་མོ་དམ་ཅན་གཤེགས་སུ་གསོལ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །ལྷ་ཡི་གནས་ན་ལྷ་མོ་ནམ་གྲུབ་མ། །ཀླུ་ཡི་གནས་ན་ཀླུ་མོ་གློག་འགྱུ་མ། །སྲིན་གྱི་ནང་ནས་སྲིན་མོ་ཤམས་ཤམ་མ། །མི་ཡི་གནས་ནས་བདུད་མོ་རེ་མ་ཏི། །དགྲ་བགེགས་བདུད་ལ་ཁྱོད་ལས་ཆེ་བ་མེད། །དཔལ་ལྡན་ཁྲོ་མོ་ནམ་མཁའི་ཀློང་ནས་གཤེགས། །མཿ འཚུབས་མ་སྟོང་དུ་འཁྱིལ་པའི་དབུས་ནས་གཤེགས། །བསྐལ་པའི་མེ་དཔུང་འབར་བ་དང་། །རླུང་དམར་ལྟ་བུའི་འཚུབས་མ་ནི། །སྐུ་ཡི་གནས་ཏེ་རྒྱན་གྱིས་མཆོག །དྲག་ཤུལ་ཁྱབ་འགྲོ་གློག་གི་དབང་། །བསམ་པ་ཙམ་གྱིས་གནས་སུ་ཕྱིན། །མ་དེའི་ཚུལ་དུ་གཤེགས་སུ་གསོལ། །མཿ བདུད་མོ་དཔལ་ལྡན་རེ་མ་ཏི། །དམ་ཚིག་དབང་གིས་སྤྱན་འདྲེན་ནོ། །དམ་ལས་མ་འདའ་ད་ཚུར་བྱོན། །མ་ཅིག་དཔལ་ལྡན་རེ་མཱ་ཏི། །ཕྱག་བརྙན་བདུད་མོ་འབུམ་དང་བཅས། །བདག་གིས་གསུངས་ཏེ་བོས་པའི་ཚེ། །མ་མཆིས་མ་ཐོགས་མྱུར་དུ་བྱོན། །མཿ བོས་པའི་ཚེ་ན་སྙན་མ་སྲ། །གཡབ་པའི་ཚེ་ན་སྤྱན་མ་རྡུལ། །ཀྱཻ་མ་ཅིག་ལྷ་མོ་ནག་མོ་ཁྱོད། །སྔོན་ཚེ་ཕྱག་ན་རྡོ་རྗེ་ལ། །རང་རྟགས་སྲོག་གི་སྙིང་པོ་ཕུལ། །བོས་ན་འོང་བར་ཁས་བླང་བཞིན། །ཁས་བླངས་དམ་ལ་མ་འདའ་བར། །རྣལ་འབྱོར་བདག་གིས་ཁྱོད་བསྐུལ་ན། །དམ་ཚིག་དབང་གིས་ད་ཚུར་བྱོན། །ཐུགས་དམ་དབང་གིས་གཤེགས་སུ་གསོལ། །རྡོ་རྗེ་གདན་དང་ཨོ་ཌི་ཡ། །བྱང་ཆུབ་ཤིང་དབང་བླ་མ་མཆོག །བརྒྱུད་པར་བཅས་པའི་བསྒྲུབ་གནས་ནས། །མཐུ་ཆེན་འདོད་ཁམས་དབང་ཕྱུག་མ། །མ་ཅིག་ལྷ་མོ་འཁོར་ཚོགས་རྣམས། །ན་ཆུང་མཚན་ལྡན་ཆུར་ཤི་བའི། །སྲིན་ལག་གཡབ་མོས་སྤྱན་འདྲེན་ནོ། །མི་དབང་སྨིན་པའི་ཤ་ཁྲག་དང་། །དམ་རྫས་འདི་ལ་མྱུར་དུ་བྱོན། །བྷྱོཿ རྒྱ་མཚོ་ཆེན་པོའི་ཀློང་དཀྱིལ་ནས། །ལྷ་མོ་སྐེམས་མ་ཆུ་སྲིན་གདོང་། །མ་བདུན་མ་གསུམ་སྲིང་མོ་བཞི། །དབང་ཕྱུག་ཉི་ཤུ་རྩ་བརྒྱད་དང་། །མ་མོ་སྟོང་དང་བདུད་མོ་འབུམ་སྡེའི་འཁོར། །དྲིལ་བུའི་སྒྲ་སྒྲོགས་གཡེར་ཁའི་ཕྲེང་བ་བཅས། །དམ་ཚིག་གནས་འདིར་སྨྱུར་དུ་སྤྱན་འདྲེན་ནོ། །དུར་ཁྲོད་བདག་མོ་མར་བཅས་ཛཿཛཿཛཿ ཨེ་ཨ་ར་ལི་ཧྲིཾ་ཧྲིཾ་མ་ཧཱ་ཀ་ལི་རེ་མ་ཏི་ས་པཱ་རི་ཝ་ར་ས་མ་ཡ་ཛ་ཛཿ ཛཿཧཱུྃ་བཾ་ཧོ། ཞེས་རོལ་འབེབས་པའི་འུར་ཆེམས་དྲག་པོ་བཅས་པའི་མཐར་བཞུགས་གསོལ། བྷྱོཿ བདེ་སྟོང་གནས་མཆོག་དམ་པ་འདིར། །ཏིང་འཛིན་སྤྲུལ་པའི་གཞལ་མེད་ཁང་། །འཇིགས་རུང་པདྨ་འབར་བ་ལ། །ལྕམ་མོ་ཆེན་མོ་བཞུགས་པར་འཚལ། །མ་ཅིག་དཔལ་ལྡན་རེ་མཱ་ཏི། །ཕྱག་བརྙན་བདུད་མོ་འབུམ་ཕྲག་བཅས། །མི་རོ་གཤིབས་པའི་གདན་མཆོག་དང་། །སྤྲུལ་པའི་བོང་བུའི་གདན་ལ་བཞུགས། །འཇིགས་རུང་ཁམས་གསུམ་ཟ་འདྲ་ཁྲོས་པའི་མེ། །ཡོན་པོར་འཁྱོགས་པའི་ལྕེ་ཞག་དུས་མཐའི་དབལ། །ཇི་བཞིན་མཁའ་དབྱིངས་དོགས་པོར་བྱེད་པའི་དབུས། །བསྟན་དགྲར་རྔམས་པའི་ཚུལ་གྱིས་བཞུགས་སུ་གསོལ། །ༀ་མ་ཧཱ་ཀ་ལི་རེ་མ་ཏི་རག་མོ་རཀྴ་མ་ཧེ་ཀུ་ལ་པདྨ་ས་མ་ཡ་ཏིཥྛ་ལྷན། བཞི་པ་དབང་བསྐུར་བ་དང་། དམ་འབོག་པའོ། །དང་པོ་ལའང་དངོས་དང་གྲིབ་སེལ་ལོ། །དང་པོ་ནི། རང་གི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ཕྱོགས་བཅུའི་སངས་རྒྱས་ཐམས་ཅད་མདུན་གྱི་ནམ་མཁར་བཛྲ་ས་མ་ཡ་ཛཿས་སྤྱན་དྲངས། ཁྱེད་རྣམས་ཀྱི་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དེའི་ཐུགས་ཀ་ནས་རིགས་ཀྱི་ཡུམ་བཞི་བུམ་པ་ཐོག་པ་སྤྲོས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུངས་ཤིང་ཁྲུས་བྱས་པས་དྲི་མ་ཐམས་ཅད་དག །ཆུ་ཡི་རྒྱུན་གྱིས་སྐུ་ལུས་དཀར་ལྷག་གེར་གྱུར། དབང་རྟགས་སུ་རལ་པའི་རྩ་བ་ཐོད་པ་བཅུ་དྲུག་ལ་མདུན་ནས་བརྩམས་ཏེ། ཀའུ་རི་མ་ལ་སོགས་པ་གནས་ཡུལ་གྱི་མ་མོ་བཅུ་དྲུག་གིས་དབུ་བརྒྱན་པར་གྱུར། གཉིས་པ་ནི། མ་མོའི་སྤྱི་བོར་པདྨ་དང་ཉི་མ་ཟླ་བའི་གདན་ལ་བླ་མ་དང་གཉིས་སུ་མེད་པའི་བཅོམ་ལྡན་འདས་དཔལ་རྡོ་རྗེ་སེམས་དཔའ་བདེ་བ་ཆེན་པོ་སྐུ་མདོག་དཀར་པོ་གངས་རི་ལ་ཉི་མ་ཤར་བ་ལྟ་བུ། ཤིན་ཏུ་ཞི་ཞིང་མཛེས་ལ་འཛུམ་པ་མཚན་དཔའི་ཕུང་པོ་འབར་བ་ཡབ་ཉིད་དར་གྱི་ཆས་གོས་ལྔ་གསོལ་ཞིང་། རྡོ་རྗེ་དང་དྲིལ་བུ་ཐུགས་ཀར་བསྣོལ་ཏེ་ཡུམ་རྡོ་རྗེ་སྙེམས་མ་གཡས་ཡབ་ལ་འཁྱུད་ཅིང་། གཡོན་དྲིལ་བུ་སྙན་རྩར་འཁྲོལ་བ་གཉིས་ཀའང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ལ་རང་བཞིན་གྱི་གནས་ནས་དེ་དང་འདྲ་བ་སྤྱན་དྲངས་བཛྲ་ས་མ་ཡ་ཛཿཛཿཧཱུྃ་བཾ་ཧོཿ དབང་བསྐུར་དྲི་མ་དག་མི་བསྐྱོད་པས་གཙོ་བོར་བྱས་པའི་རིགས་ལྔས་དབུར་བརྒྱན། བླ་མ་དང་དཔལ་ལྡན་རྡོ་རྗེ་སེམས་དཔའ་ཁྱེད་ཀྱིས་དཔལ་ལྡན་ལྷ་མོའི་སྐུ་གསུང་ཐུགས་ལ་དམ་ཚིག་ཉམས་ཆག་གིས་གྲིབ་ཕོག་པས་འཁོན་ལྕུག་སོང་བ་དང་། བདག་གི་རྒྱུད་ཀྱི་ཉམས་ཆག་སྒྲིབ་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས་བླ་མའི་སྐུ་གསུང་ཐུགས་ཀྱི་གནས་ནས་ཡི་གེ་བརྒྱ་པའི་རང་བཞིན་བདུད་རྩི་དཀར་དམར་མཐིང་གསུམ་འོད་ཟེར་དང་བཅས་པ་བྱུང་། རང་དང་མ་མོའི་སྐུ་ལུས་ཐམས་ཅད་གང་། དྲི་མ་ཐམས་ཅད་དག །གྲིབ་ཐམས་ཅད་སེལ། མཐུ་སྟོབས་ནུས་པའི་གཟི་བྱིན་མཆོག་ཏུ་འབར་བར་གྱུར། ཡི་གེ་བརྒྱ་པ་ཉེར་གཅིག་བཟླ། མཐར་རྡོ་རྗེ་སེམས་དཔའ་འོད་དུ་ཞུ་ནས་མ་མོ་ལ་ཐིམ་པར་གྱུར་པའི་མཐར་གྲིབ་སེལ་བྱ་སེལ་བྱེད་ཐམས་ཅད་མི་དམིགས་པའི་རང་སེམས་ནམ་མཁའ་ལྟ་བུའི་ངང་ལ་ངལ་གསོ་བ་ནི། གྲིབ་སེལ་ཐམས་ཅད་ཀྱི་མཆོག་དོན་དོན་དམ་པའི་གྲིབ་སེལ་ལོ། །གཉིས་པ་དམ་འབོག་པ་ལའང་། དམ་བསྲེ་བ་དམ་བསྒྲགས་པའོ། །དང་པོ་ནི། ཧཱུྃ་བྷྱོཿ རྡོ་རྗེ་དྲི་ཆུ་བདུད་རྩིའི་མཆོག །པཉྩ་ཨ་མྲྀ་ཏ་དང་སྦྱར། དམ་ཚིག་དབང་གིས་ཁྲག་ཆེན་པོ། །བསྲེ་བའི་མཆོག་སྟེ་སྲོག་གི་སྙིང་། །མ་ཅིག་བདུད་མོའི་འཁོར་ཚོགས་བཅས། །ཁྱེད་དང་བདག་ཉིད་དམ་བསྲེའོ། །རྟག་ཏུ་དམ་ལས་མ་འདའ་ཞིག །དམ་ལས་འདས་ན་བསྲེགས་པར་བྱེད། །ༀ་མ་ཧཱ་ཀུ་ཀུ་ས་མ་ཡ་པཉྩ་ཨ་མྲྀ་ཏ་ལ་ཁ་རཾ་ཁ་ཧི། གཉིས་པ། དཔལ་ཡེ་ཤེས་ཀྱི་མ་མོ་ནག་མོ་ཆེན་མོ་འཁོར་དང་བཅས་པ་རྣམས་ཀུན་བཟང་རྡོ་རྗེ་འཆང་དབང་། སྤྲུལ་སྐུ་ཤཱཀྱ་སེང་གེ། གསང་བདག་ཕྱག་ན་རྡོ་རྗེ། སློབ་དཔོན་དྷ་ན་སངྐྲི་ཏ། ཨུ་རྒྱན་པདྨ་ཐོད་ཕྲེང་། འབྲོག་མི་དཔལ་གྱི་ཡེ་ཤེས། གནུབས་ཆེན་སངས་རྒྱས་ཡེ་ཤེས། ཁུ་ལུང་ཡོན་ཏན་རྒྱ་མཚོ། སོ་དར་མ་དབང་ཕྱུག །སྤ་གོར་བླ་ཆེན་འཕགས། ཟུར་ཤཱཀྱ་འབྱུང་གནས། ཟུར་ཆུང་ཤེས་རབ་གྲགས་པ། བླ་མ་དཔལ་འཛིན་ཆེན་པོ། ཀུན་མཁྱེན་དམ་པ་བདེ་གཤེགས། ཐུགས་སྲས་རྡོ་རྗེ་རྒྱལ་མཚན། རྗེ་བྱམ་པ་འབུམ་པ་ལ་སོགས་པ་གྲུབ་ཐོབ་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་ཀྱི་བཀའ་དང་དམ་ཚིག་བཞིན་དུ་སངས་རྒྱས་ཀྱི་བསྟན་པ་སྲུངས། བསྟན་འཛིན་གྱི་དབུ་འཕང་བསྟོད། བཤད་སྒྲུབ་ཀྱི་སྡེ་སྤེལ། ཁྱད་པར་དམ་ཚིག་དང་ལྡན་པ་བདག་ཅག་ལ་མ་ལྟར་དུ་བརྩེ་བར་དགོངས། སྲིང་ལྟར་དུ་བྱམས་པས་སྐྱོངས། གྲོགས་ལྟར་དུ་སྙིང་ཉེ་ཞིང་། བྲན་ལྟར་དུ་བསྒོ་བ་བསྒྲུབས། མདོར་ན་སེམས་ཅན་གྱི་དོན་དུ་རྣམ་པ་ཐམས་ཅད་མཁྱེན་པའི་གོ་འཕང་བསྒྲུབ་པ་ལ་དུས་ནམ་དུ་ཡང་གཡེལ་བ་མེད་པར་ཕྲིན་ལས་རྣམ་པ་བཞིས་རྟག་ཏུ་སྲུངས་ཤིང་སྐྱོབས་པར་མཛོད་ཅིག །མ་མོའི་གསང་བའི་དམ་ཚིག་གི་རྒྱ་བཅས། ༀ་མ་ཧཱ་ཀཱ་ལཱི་དེ་བའི་བཛྲ་ས་མ་ཡ་རཀྵན་ཏུ། གསུམ་པ་གསོལ་མཆོད་བྱ་བའི་རིམ་པ་ལ། སྡོམས་ནི། མངའ་གསོལ། ཕྱག་འཚལ་ཕྱི་ནང་མཆོད། མཐུས་རྫས་ངོ་མཚར་མཆོད་པ་སྤྲོ། གསང་མཆོད་ཐུན་མིན་མཆོད་པ་འབུལ། མཆོད་བཤགས་དོན་རྣམས་བསྙེན་མཆོད་འབུལ། ཞེས་རིམ་པ་བཅུ་གཅིག་གིས་དང་པོ་ནི། ཀྱཻ། དུས་གསུམ་རྒྱལ་བ་ཀུན་གྱི་ཡུམ་ཆེན་མོ། །རྡོ་རྗེའི་ལྷ་མོ་དཔལ་ལྡན་དབྱིངས་ཕྱུག་མ། །མ་འགགས་ཐབས་ཀྱི་རོལ་གར་སྐུར་སྟོན་པའི། །བདེ་མཆོག་ཀུན་ཏུ་བཟང་མོ་རྒྱལ་གྱུར་ཅིག །རྡོ་རྗེ་འཆང་སོགས་བཀའ་དྲིན་གཏེར་གྱི་མཛོད། །འཁོར་ལོའི་དབང་ཕྱུག་ཐུགས་ལ་མཉམ་སྦྱོར་ཏེ། །ཁྱོད་ནི་ཡེ་ཤེས་སྟོང་པའི་རང་བཞིན་ཉིད། །རྩ་རྒྱུད་བླ་མ་མཆོག་ཏུ་མངའ་གསོལ་ལོ། །བདེ་ཆེན་ལྷན་ཅིག་སྐྱེས་པའི་ཡེ་ཤེས་ནི། །གནམ་ཞལ་རྒྱས་འདེབས་དགའ་མར་རོ་གཅིག་མ། །དཀྱིལ་འཁོར་རྒྱ་མཚོ་སྤྲོ་བསྡུའི་འབྱུང་བའི་གནས། །ཡི་དམ་དཀྱིལ་འཁོར་མཆོག་ཏུ་མངའ་གསོལ་ལོ། །གནས་གསུམ་མ་ཚོགས་ཀུན་གྱི་དབུས་ན་བརྗིད། །མཁའ་སྤྱོད་གྲོང་ཁྱེར་བདག་མོ་སྤྲུལ་པའི་གར། །རིག་ལྔ་འབུམ་སྡེའི་མཁའ་འགྲོའི་དབུས་བསྐོར་བཞུགས། །རྡོ་རྗེ་ཕག་མོ་ཆེན་མོར་མངའ་གསོལ་ལོ། །འབྱུང་ལྔའི་འོད་འཁྲུགས་བརྩེགས་པའི་གཞལ་མེད་ན། །རྟ་རོ་གཅར་བཀྲམ་མི་རོ་གདན་དུ་བཏིང་། །ཁྲག་གི་མཚོ་འཁྱིལ་ཐོད་པའི་མཁར་བརྩེགས་པ། །གཞལ་མེད་གསང་བ་ཆེན་མོར༴ སྟོང་ཉིད་འདི་ནི་གཟུགས་བྱད་མཚན་མ་དང་། རྣམ་པར་བྲལ་ཀྱང་རྣམ་པར་སྤྲོས་པའི་ཚུལ། །འགགས་མེད་ངོ་མཚར་ཤར་བ་ཆེས་མཚར་བས། དོན་གྱི་ལྷ་མོ་ཆེན་མོར༴ དུས་གསུམ་རྒྱལ་བ་ཀུན་གྱིས་ཕྱག་མཛད་ཅིང་། །འཕགས་བཞི་མ་ལུས་འབྱུང་བའི་ཡུམ་ཆེན་མོ། །གདུལ་བྱའི་དཔལ་ལ་དཔལ་ལྡན་མ་སྤྲུལ་པས། །མགོན་མེད་སྐྱོབས་མ་ཆེན་མོར༴ སེམས་ཉིད་གཟུགས་དབྱིབས་དུ་མ་ཁ་དོག་གིས། །སྤྲོས་པས་སྤྲོས་མེད་སྤྲོས་པའི་འཇིག་རུང་སྐུ། །མི་ཟད་དུས་ཀྱི་མུན་ལྟར་ཆེས་མནག་པ། །ཁམས་གསུམ་སྐྲག་བྱེད་ཆེན་མོར༴ རི་ཡི་གྲིབ་ལྟར་གཉེར་བའི་ཁྲོ་གཉེར་ཉིལ། སྡང་མིག་ཡོན་པོར་བསྒྱུར་བ་དེ་ཡིས་ཀྱང་། །བདུད་དཔུང་བྱེ་བ་ཐམས་ཅད་བསྲེགས་མཛད་མ། །བདུད་འཇོམས་ལྷ་མོ་ཆེན་མོར༴ མཆེ་གཙིགས་མི་རོ་རེངས་ཟ་བགེགས་ཀྱི་གཤེད། །ཨ་ཧ་མ་མ་རུ་རུའི་སྒྲ་སྒྲོགས་ཤིང་། །སྙན་ཆ་སྦྲུལ་ནག་གསེར་གྱི་དྲིལ་བུ་འཁྲོལ། །བགེགས་འདུལ་ལྷ་མོ་ཆེན་མོར༴ སྲིན་གྱི་རལ་གྲིས་ཕྱི་རོལ་ཕྱོགས་ནས་བསྟིགས། །ནེའུའི་རྐྱལ་པས་སྒྲུབ་པའི་རེ་འདོད་བསྐོངས། །སེང་གེའི་སྙན་ཆ་འཇིགས་མེད་རྟགས་སུ་ཆེ། །སྲིན་འཇོམས་ལྷ་མོ་ཆེན་མོར༴ ཝ་ཡ་ཝི་ཡི་རླུང་ཚུབ་མྱུར་མགྱོགས་ཅན། །སྲིན་བོངས་དམར་པོ་རྫུ་འཕྲུལ་སྟོང་གསུམ་སྤྱོད། །ལྟེ་བར་ཉི་རྒྱན་སྤྱི་བོར་ཟླ་ཚེས་མཛེས། །ཆོས་བསྒྲུབ་མྱུར་སྐྱོང་ཆེན༴ སྟོང་ཉིད་ནམ་མཁའི་ལུས་ཀྱི་སྒེག་ཅིང་དཔའ། །ཁྲོ་གཏུམ་མཆེ་གཟེངས་རྔམ་ཆེན་མ་མ་ནི། །ནུ་འཛིན་དུད་ཅིང་ཆུ་འཛིན་རབ་རྒྱས་མ། །སྒྲུབ་པའི་རེ་བ་སྐོངས་བར་༴ ཞེན་མེད་ལྕགས་སྒྲོག་ཞབས་ཀྱི་གདུ་བུ་བྱས། །དགའ་བ་བཅུ་དྲུག་ཐོད་སྐོམ་དབུ་ལ་སྒྲོགས། །ཐོད་པའི་དབུ་རྒྱན་རྨ་བྱའི་མདོངས་གཙུགས་མ། །དམ་ལྡན་སྲིང་མོ་ཆེན་མོར༴ རྒྱལ་བ་བཅོམ་ལྡན་འདས་ཀྱི་སྤྱན་སྔ་ནས། །ཆོས་བཞིན་བསྒྲུབ་པ་བུ་གཅིག་ཇི་ལྟ་བུར། །བརྩེ་བའི་ཐུགས་ཀྱི་མི་འདོད་ཞལ་བཞེས་པས། །རྣལ་འབྱོར་མ་མ་མཆོག་ཏུ༴ ཆུ་སྐྱེས་བདེ་བའི་འབྱུང་གནས་ལེགས་བསྟེན་ནས། །བདེ་སྟོང་རྣལ་འབྱོར་རྡོ་རྗེའི་དམ་ཚིག་སྤེལ། །ནང་གི་ཕྱག་རྒྱ་དགའ་བཞི་སྤེལ་བའི་ལུས། །སྙིང་གྲོགས་ཕྱག་རྒྱ་ཆེན་མོར༴ སློབ་དཔོན་ལ་སྡང་བསྟན་དགྲ་ཟའོ་ཞེས། །སྐན་སྒྲ་གཏོགས་ཤིང་སྔོན་གྱི་ཐུགས་དམ་ལ། །བྲེལ་བས་རྒྱུགས་མ་དམ་ཚིག་མ་མོ་ནི། །རྡོ་རྗེ་འཛིན་པའི་བྲན་དེར༴ ཞིང་བཅུ་ཚངས་བ་གང་ལ་གཏད་པ་རྣམས། །བརྩེ་བའི་ཐུགས་དེས་འཁོར་བར་མི་གཏོང་སླད། །ཁྲོས་པའི་ཞལ་གྱིས་དུམ་བུར་འདྲལ་མཛད་པས། །བསྟན་དགྲ་འཇོམས་མ་ཆེན་མོར༴ དཀོན་མཆོག་གསུམ་གྱི་དབུ་འཕང་བསྟོད་པ་དང་། །དབེན་གནས་ཆོས་འཁོར་སྐྱོངས་ལ་ཐུགས་རྗེས་པས། །བཀའ་སྲུང་ཀུན་གྱི་གཙོ་མོ་རྣལ་འབྱོར་མ། །དུས་གསུམ་རྒྱལ་བའི་བསྟན་སྲུངས༴ སྦྲུལ་གདུག་ཚངས་ལྟར་འཇིགས་རུང་འཁོར་བ་འདིར། །རྒྱུ་རྐྱེན་འབྲས་བུར་བཅས་པའི་སྣང་ཚུལ་ལ། །ཞེན་མེད་ངེས་འབྱུང་བསྒོམ་རྣམས་སྐྱོངས་མཛད་མས། །ཚུལ་ཁྲིམས་ལྷ་མོ་ཆེན་མོར༴ བདག་གཞན་དོན་དུ་ཐུགས་བསྐྱེད་མི་ཉམས་ཤིང་། །མཁའ་མཐའ་ཀླས་པའི་འགྲོ་བ་བྱང་ཆུབ་ཏུ། །འགོད་འདོད་རྒྱལ་སྲས་སྤྱོད་མའི་མགོན་སྐྱོབས་མཛད། །གཞན་ཕན་ལྷ་མོ་ཆེན་མོར༴ རྡོ་རྗེ་ཐེག་པའི་དམ་ཚིག་འདུ་བའི་སྒོར། །དཔལ་ལྡན་རྒྱུད་སྡེ་རྣམས་ཀྱི་མངའ་བདག་གི། །སྐལ་བཟང་བུ་ལ་རྟག་ཏུ་སྐྱོངས་མཛད་མ། །རྒྱུད་སྡེའི་སྲུང་མ་ཆེན་མོར༴ ཀྱཻ། ཆོས་དབྱིངས་ཆོས་འབྱུང་ཡངས་པའི་གཞལ་མེད་ན། །རྩ་བརྒྱུད་བླ་མའི་བསྒོ་བ་བསྒྲུབ་མཛད་དེ། །ལྷ་མོ་ཆེན་མོ་མ་མོ་ཀཱ་ལིར་གྲགས། །སྔོན་གྱི་ཐུགས་དམ་འཇིགས་རུང་རླབས་སུ་ཆེ། །ཙིཏྟ་དམར་ལ་རྟག་ཏུ་རྔམས་རོལ་མ། །ལྷ་ཆེན་དཔལ་འབར་སྲིད་གསུམ་བདག་མོ་ཁྱེད། །བསྟན་དགྲ་འཇོམས་མཛད་གཤེད་ཆེན་དམ་ལྡན་ནི། །སྤྲུལ་པའི་སྤྲིན་དཔུང་མཁའ་དང་མཉམ་སྤྲོ་བར། །ཐུགས་དམ་འགྱུར་མེད་ཆོས་སྐུའི་ཆོ་རོལ་ལས། །རང་རིག་ཡེ་ཤེས་སྤྲོས་ལས་འདས་པའི་འཛུམ། །བརྗོད་མེད་བརྗོད་པ་ཀུན་སྟོང་སེམས་ཀྱི་གཤིས། །ཡིན་ལུགས་ཅིར་ཡང་འཆར་བའི་རིག་པའི་འཕྲུལ། །ལྷ་མཆོག་སྟོབས་ལྡན་དཔའ་མོར་མངའ་གསོལ་ནས། །ཕྱོགས་ལས་རྣམ་པར་རྒྱལ་བའི་དཀྱིལ་འཁོར་དུ། །དགེ་ལེགས་བཀྲ་ཤིས་གདུགས་བཟང་འཁོར་ཡུག་ཏུ། །རྒྱལ་བསྟན་ཀུན་ཁྱབ་ཆེན་པོའི་བཀྲ་ཤིས་ཤོག །གཉིས་པ་ནི། བྷྱོཿ ནག་མོ་ཁྲག་འཐུང་རྡོ་རྗེ་རལ་པ་ཅན། ། དབང་ཆེན་རྡོ་རྗེ་ཐོག་དང་སེར་བ་འབེབས། །ཁམས་གསུམ་སྒྲོལ་མཛད་སྲིད་གསུམ་རྩད་ནས་གཅོད། །རལ་པ་བསིགས་པས་སྟོང་གསུམ་ཀུན་ཏུ་ཁྱབ། །མཆེ་བ་གཙིགས་པས་དགྲ་བགེགས་ཞལ་དུ་འདྲེན། །མ་ལུས་དབང་དུ་བསྡུད་ལ་ཕྱག་འཚལ་བསྟོད། །མ་གཅིག་དཔལ་ལྡན་རེ་མ་ཏི། །ནག་མོ་ཆེན་མོ་རྣལ་འབྱོར་མ། །ཕོ་ཉ་བདུད་མོའི་འཁོར་ཚོགས་ལ། །བདག་གིས་དད་པའི་ཕྱག་བགྱིའོ། །ༀ་མ་ཧཱ་ཀ་ལི་རེ་མ་ཏི་ཨ་ཏི་པཱུ་ཧོ། སྲ་ཏི་ཛ་ཧོ། གསུམ་པ་ནི། བྷྱོཿ མ་ཅིག་དཔལ་ལྡན་རེ་མ་ཏི། །ཕྱག་བརྙན་བྲན་གཡོག་འཁོར་དང་བཅས། །གསང་བའི་དམ་ཚིག་དཀྱིལ་འཁོར་འདིར། །བུ་ཡིས་མཆོད་པ་འབུལ་བ་ནི། །ཀྱཻ། རྒྱ་མཚོ་འབབ་ཆུ་ཆུ་མིག་རྫིང་། །དམར་ཆེན་ཁྲག་གི་ཨརྒྷཾ་འདི། །མ་ཡི་སྐུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་བདག་ལ་སྩོལ། །ༀ་མ་ཧཱ་ཀ་ལི་དེ་ཝི་རེ་མ་ཏི་ཨརྒྷཾ་ཨཱཿཧཱུྃ། ཡན་ལག་བརྒྱད་ལྡང་རྫིང་བུ་དང་། །དུག་གིས་སྦྱར་བ་དྲག་པོའི་ཆུ། །མ་ཡི་ཞབས་བསིལ་ཕྱིར་དུ་འབུལ། །ཐུགས་མཆོག༴ དངོས་གྲུབ༴ ༀ་མ་ཧཱ་ཀཱ་ལི་དེ་ཝི་རེ་མ་ཏི་པ་དྱཾ་ཨཱཿཧཱུྃ། ཆུ་སྐྱེས་ཐང་སྐྱེས་མེ་ཏོག་དང་། །དབང་པོ་ལྔ་ཡི་མེ་ཏོག་འདི། །མ་ཡི་དབུ་ལ༴ ཐུགས་མཆོག༴ དངོས་གྲུབ༴ ༀ་པཥྤེ༴ ག་བུར་གླ་རྩི་གུརྒུམ་དང་། །ཤ་ཆེན་སྤོས་ཀྱི་དུད་པ་འདི། །མ་ཡི་ཤངས་ལ༴ ཐུགས་མཆོག༴ དངོས་གྲུབ༴ ༀ༴ དྷུཥྤེ༴ ཉི་ཟླ་གློག་དང་གསལ་བའི་སྒྲོན། །ཞུན་ཆེན་མདངས་ཀྱི་མར་མེ་འདི། །མ་ཡི་སྤྱན་ལ་ཐིམ་གྱུར༴ ཐུགས་མཆོག༴ དངོས་གྲུབ༴ ༀ༴ ཨ་ལྐོ༴ ཁྲག་ཆེན་དུག་དང་སྦྱར་བ་ཡི། །རཀྟའི་དྲི་ཆབ་དམར་པོ་འདི། །མ་ཡི་ཐུགས་ཀར༴ ཐུགས་མཆོག༴ དངོས་གྲུབ༴ ༀ༴ གནྡྷེ༴ ཕྱེ་མ་ལྔ་ཡི་བཤོས་བུ་དང་། །ནལ་ཤ་ཡོན་ཏན་ལྔ་ལྡན་འདི། །མ་ཡི་ལྗགས་ལ༴ ཐུགས་མཆོག༴ དངོས་གྲུབ༴ ༀ༴ ནཻ་ཝིདྱ། པི་ཝཾ་གླིང་བུ་མཁར་བའི་རྔ། །མན་འགལ་ཆ་ལང་རྐང་གི་དུང་། །མ་ཡི་སྙན་ལ༴ ཐུགས་མཆོག༴ དངོས་གྲུབ༴ ༀ༴ ཤབྟ་ཨཱཿཧཱུྃ། བཞི་པ་ནི། ཀྱཻ། མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་གཟུགས་ཀྱི་མཆོད་པ་འབུལ་བ་ནི། །ལྷ་མོའི་གཟུགས་དང་ཀླུ་མོའི་གཟུགས། །བཟང་བའི་གཟུགས་དང་བརྗིད་པའི་གཟུགས། །ཁ་དོག་སྣ་ཚོགས་མཛེས་པའི་གཟུགས། །ཅིར་ཡང་བསྒྱུར་བའི་གཟུགས་ལ་སོགས། །མ་ཅིག་སྤྱན་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ་རཱུ་པ་ཨཱཿཧཱུྃ། མ་ཅིག་ལྷ་མོ་དཔལ་ལྷ་མོ། །མ་ཁྱོད་ལ་སྒྲ་ཡི་མཆོད་པ་འབུལ་བ་ནི། །པི་ཝཾ་གླིང་བུ་མཁར་བའི་རྔ། །རྫ་རྔ་ཆ་ལང་གཎྜེ་དུང་། །ཅང་ཏེའུ་སིལ་སྙན་ལ་སོགས་ཏེ། །དྲིལ་བུ་རྔ་དབྱང་སྣ་ཚོགས་དང་། །གླུ་དབྱངས་ཚིགས་སུ་བཅད་པའི་སྒྲ། །མ་ཅིག་སྙན་ལ༴ ཐུགས་མཆོག༴ དངོས་གྲུབ༴ ༀ༴ ཤཔྟ༴ མ་ཅིག་ལྷ་མོ༴ མ་ཁྱེད་ལ་དྲི་ཡི་མཆོད༴ ཨ་ཀ་རུ་དང་དུ་རུ་ཀ །ཤ་ཀ་རཿདང་ལྔ་སྦྱར་བའི། །ཙནྡ་དཀར་དམར་དྲི་སྤོས་ཆབ། །མ་གཅིག་ཐུགས་ཀར༴ ཐུགས་མཆོག༴ དངོས་གྲུབ༴ ༀ༴ གནྡྷེ༴ མ་ཅིག་ལྷ་མོ༴ མ་ཁྱོད་ལ་རོ་ཡི་མཆོད་པ་འབུལ་བ་ནི། །ལྷ་ཡིས་ཞལ་ཟས་བདུད་རྩིའི་བཅུད། །མ་ཡི་ལྗགས༴ ཐུགས་མཆོག༴ དངོས་གྲུབ་དམ་པ༴ ༀ༴ ར་ས༴ མ་ཅིག་ལྷ་མོ༴ མ་ཁྱེད་ལ་རེག་བྱའི་མཆོད་པ་འབུལ་བ་ནི། །ལྷ་རྫས་པཉྩ་ལི་ཀའི་དར། །སྟག་གླང་ཞིང་གི་ཤུན་པ་བཅས། །མ་ཅིག་སྐུ༴ ཐུགས་མཆོག༴ དངོས་གྲུབ༴ ༀ༴ པཪྴེ༴ མ་ཅིག་ལྷ་མོ་དཔལ༴ མ་ཁྱེད་ལ་ཆོས་ཀྱི་མཆོད་པ་འབུལ༴ སྣ་ཚོགས་སྣང་ཁམས་ཐམས་ཅད་ཀུན། །ཟག་མེད་བདེ་སྟོང་ཡེ་ཤེས་དངོས། །མ་མཉམ་པ་ཉིད་དུ་རོལ་གྱུར་ཅིག །ༀ་མ་ཧཱ་ཀ་ལི་དེ་ཝི་རེ་མ་ཏི་དྷརྨ་ཨཱཿཧཱུྃ། ལྔ་པ་ནི། བྷྱོཿ མ་ཅིག་བདུད་མོའི་འཁོར་བཅས་ལ། །ཡང་ཅིག་མཆོད་པ་འབུལ་བ་ནི། །མི་དབང་སྨིན་པའི་ཤ་ཁྲག་དང་། །འཆི་ཀའི་མཚལ་ཏིག་དམར་པོ་དང་། །ཤིང་ལོ་རླུང་ཁྱེར་སར་མ་ལྷུང་། །འབྲས་བུ་སྨིན་པའི་ཤིང་ཏོག་དང་། །ན་ཆུང་མོ་ཡི་བྱུང་ཟད་ཁྲག །མ་ཉམས་བྱང་སེམས་དཀར་དམར་དང་། །གྲི་རྒོད་སྙིང་དང་དབང་པོ་ལྔ། །བོང་བུའི་སྙིང་དང་ཁྲིམས་འཆལ་ཤ །རྣམ་ལྔ་བདུད་རྩིའི་མཆོད་པ་འདི། །མ་ཅིག་འཁོར་དང་བཅས་ལ་འབུལ། །བསྟན་པ་སྲུང་ཕྱིར་བཞེས་སུ་གསོལ། །ༀ་མ་ཧཱ་ཀཱ་ལི་དེ་ཝི་རེ་མ་ཏི་ས་པཱ་རི་ཝ་ར་ༀ་ཨཱཿཀ་རོ། །སོགས། དྲུག་པ་ནི། བྷྱོཿ རབ་ཡངས་ནམ་མཁའ་གང་བའི་མཆོད་སྤྲིན་ནི། །དཔག་པར་དཀའ་བ་སྒྱུ་མ་ལྟ་བུའི་མཛོད། །ཐོགས་མེད་ཏིང་འཛིན་བློ་ཡིས་ལེགས་ཕྱེས་ཏེ། །ཕྱོགས་ཀྱི་འཁོར་ལོ་དོགས་པོར་བྱེད་བཞིན་འབུལ། །ཏིང་འཛིན་སིལ་གྱིས་ལེགས་པར་བྲིས་པའི་གཟུགས། །རྟེན་འབྲེལ་འཛུམ་དཀར་བསུ་བའི་སྨིན་ལེགས་ཅན། །ཡིད་འཕྲོག་དགའ་བའི་ཉམས་བརྒྱར་འཆར་བའི་མ། །རིན་ཆེན་གཞོང་ཐོག་ཕྲེང་བའི་དོ་ཤལ་འཕྱང་། །མཛེས་པའི་གར་དང་སྙན་པའི་གླུ་བསྒྱུར་བའི། །མུ་ཏིག་དོ་ཤལ་ལེགས་འཛིན་འཁྲོལ་བཅས་ཏེ། །སྣང་སྟོང་བཀོད་པའི་མིག་མང་བརྩེ་བ་ཅན། །གཅིག་ལས་དུ་མར་འཕྲུལ་བ་འབྱུང་གྱུར་ཅིག །གསེར་སྦྱངས་འཁོར་ལོ་རྩིབ་སྟོང་འོད་དུ་འབར། །རིན་ཆེན་ལྷ་རྫས་ཟུར་བརྒྱད་འདོད་ཀུན་འབྱུང་། །སྐྱོན་བྲལ་ཡིད་ཀྱི་བརྟན་འཕྲོག་བུད་མེད་མཆོག །བསམ་པའི་དོན་བསྒྲུབ་བློན་པོ་རིན་པོ་ཆེ། །གངས་རི་ལྟར་དཀར་གླང་ཆེན་སྟོབས་དང་ལྡན། །འགྲོས་བཟང་མདོག་སྡུག་ཅང་ཤེས་རྟ་ཡི་མཆོག །ཕས་རྒོལ་དགྲ་ལས་རྣམ་རྒྱལ་དམག་དཔོན་དང་། །གདུགས་དཀར་སྟོང་ལྡན་དྲྭ་བ་ཕྱོགས་བརྒྱར་འཁོར། །དྲང་ཞིང་ལྡན་པའི་མི་ནུབ་རྒྱལ་མཚན་བརྟན། །ཟབ་ཅིང་ཁུག་མང་དཔལ་གྱི་བེའུ་ལྷས། །གྲགས་སྙན་རིང་དུ་འཁྲོལ་བ་སྐྱེ་ལྔ་པ། །སྣ་ཚོགས་མདོག་བཟང་ངོ་མཚར་པདྨའི་ཚལ། །ཤེས་རབ་གསེར་མིག་འཁྱིལ་པ་རབ་ཏུ་མཛེས། །ཛམྦུའི་པུར་ཝ་ཎ་ཡི་འཁོར་ལོ་བརྟན། །འདོད་འབྱུང་བུམ་བཟང་ཟད་མེད་གཏེར་གྱི་མཛོད། །མ་འདྲེས་གཟུགས་བརྒྱ་གསལ་བའི་ཨ་དཪྴ། །ཆོས་དུང་དམ་པའི་དབྱངས་སྙན་མངོན་པར་མཛེས། །གྷི་ཧཾ་ནད་འཇོམས་བདུད་རྩིའི་འཆི་མེད་སྨན། །དུརྦ་ལོ་བཟང་ཕང་ཕང་ཀུན་ཏུ་དཀྲིགས། །འདོད་འཇོའི་བ་བཟང་ཞོ་ཡི་སྙིང་པོ་ཅན། །བིལྦ་འབྲས་བུ་བཟང་འདོད་པའི་རོ་བདའ་བ། །ལི་ཁྲི་བཟང་མ་དབང་གི་རྫས་ཆེན་པོ། །བགེགས་འཇོམས་ཉུངས་དཀར་རྡོ་རྗེའི་རིགས་ཀྱི་གནས། །ཟད་མེད་ནམ་མཁའ་མཛད་ཀྱི་འཁོར་ལོ་འབུལ། །ༀ་མ་ཧཱ་ཀཱ་ལི་དེ་ཝི་རེ་མ་ཏི་ས་པ་རི་ཝ་ར་རཏྣ་མངྒ་ལ་པཱུ་ཛཿཨཱཿཧཱུྃ། ནམ་མཁའ་མཛོད་ཀྱི་སྔགས་རྒྱས་འབུལ། བདུན་པ་ལ་སྨན་གཏོར་རཀྟ་གསུམ་གྱི། དང་པོ་ནི། ཧོ། རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྷ་མིན་གསང་བ་ཡི། །ཐུགས་དམ་དབྱིངས་ཉིད་བསྐུལ་བའི་མཆོག །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་ཀྱི་ངང་ཉིད་ལས། །བདག་ཅག་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ༀ་ན་མ་སརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏི་ཙ་ཧོཿ ཁྱབ་བདག་དྲུག་པ་རྩ་བའི་བླ་མའི་བར། །བཀའ་བརྒྱུད་བླ་མ་ཡི་དམ་དཀྱིལ་འཁོར་ལ། །དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས། །རྣམ་དག་བདུད་རྩིའི༴ ཐུགས་རྗེས༴ ༀ་ན་མ་སརྦ༴ རྡོ་རྗེ་ལྷ་མོ་ནག་མོ་མཆེ་བ་གཙིགས་པའི་ཞལ། །དུས་གསུམ་སངས་རྒྱས་ཀུན་དང་སྤྱོད་ཡུལ་གཅིག་པའི་ཡུམ། །ཁམས་གསུམ་ལོག་པར་བལྟ་བ་ཐམས་ཅད་དབྱིངས་སུ་སྒྲོལ། །སྲིད་གསུམ་ལོག་འདྲེན་ཟ་བའི་ཡུལ་རྣམས་ལ། །རྣམ་དག་བདུད་རྩི༴ ཐུགས་རྗེས་བརྩེ་དགོངས༴ ༀ་ན་མ་སརྦ་ཏ་ཐཱ་ག་ཏ་མ་ཧཱ་སརྦ་པཉྩ་ཨ་མྲྀ་ཏ་ལ་ཁ་རཾ་ཁ་ཧིཿ བྷྱོཿ ཁྱོད་ཀྱི་གཡོག་མོ་སྲིན་མོ་ཆུ་སྲིན་གདོང་། །མ་མོ་བདུན་དང་མ་གསུམ་སྲིང་མོ་བཞི། །སེང་སྟག་འབྲུག་སྤྱང་གདོང་མོ་བཞི་རྣམས་ལ། །རྣམ་དག༴ ཐུགས་རྗེས༴ ༀ་ན་མ་སརྦ༴ དབང་ཕྱུག་ཆེན་མོ་ཉི་ཤུ་རྩ་བརྒྱད་དང་། །འཁོར་གྱི་མ་མོ་སྟོང་དང་རྩ་བརྒྱད་དང་། །གཞན་ཡང་བདུད་མོ་བྱེ་བ་འབུམ་སྡེའི་འཁོར། །མཁའ་འགྲོ་ཤུགས་འགྲོ་མ་སྲིང་རྒྱ་མཚོ་ལ། །རྣམ་དག༴ ཐུགས་རྗེས༴ ༀ་ན་མ་སརྦ༴ ཧཱུྃ་བྷྱོཿ མ་ཅིག་ནག་མོ་ཆེན་མོ་འཁོར་བཅས་རྣམས། །དངོས་གྲུབ་རྩོལ་བའི་དུས་ལ་བབ། །མ་ཡིས་བུ་ལ་དངོས་གྲུབ་སྩལ་དུ་གསོལ། །ཡེ་ཤེས་གསང་བའི་དངོས་གྲུབ་སྩལ་དུ་གསོལ། །འདོད་ཁམས་འདུལ་བའི༴ འཇིག་རྟེན་དབང་བསྡུད༴ ཡེ་ཤེས་ལྔ་ཡི༴ ཚེ་བསོད་རྒྱས་པའི༴ བདུད་རྩི་སྨན་གྱི༴ གྲུབ་ཆེན་བརྒྱད་ཀྱི༴ ཕྲིན་ལས་རྣམ་བཞིའི༴ སྐུ་གསུང་ཐུགས་ཀྱི༴ ༀ་ཤྲཱི་དེ་ཝི་མ་ཧཱ་ཀཱ་ལི་རེ་མ་ཏི། ཀཱ་ཡ་སིདྡྷི་ༀ། ཝཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། སརྦ་སིདྡྷི་ཧྲཱིཿ གཉིས་པ་ནི། རྟེན་གཏོར་ལ། མ་མོ་ཆགས་པས་བཞུགས་པར་བསམ་ནས་བྷ་ལིང་འབུལ་ཏེ། བྱེ་བྲག་ཏུ་བསངས་སྦྱངས། སྟོང་པའི་ངང་ལས་བྷྲཱུཾ་ལས་གཏོར་མའི་སྟེང་འདོད་ཡོན་གྱི་ལྷ་མོ་བར་བདུད་རྩིའི་རྒྱ་མཚོ། །འོག་ཤ་ཁྲག་རུས་པའི་གྲམ་ཁྲོད་ཆེན་པོར་གྱུར། ཀྱཻ། མ་ཅིག་ལྷ་མོ་དཔལ་ལྷ་མོ། །རྡོ་རྗེ་ལྷ་མོ་ནག་མོ་ཆེ། །གཏོར་མའི་གནས་འདིར་གཤེགས་སུ་གསོལ། །མ་ཅིག་ཐུགས་དམ་ཞལ་ཟས་སྣོད། །མེ་རླུང་དཀྱིལ་འཁོར་རྒྱས་པའི་སྟེང་། །པཱ་ལས་བྷནྡྷ་བཅུད་ཡངས་པའི། །འཁོར་ཡུག་གཏོགས་པའི་འཇིག་རྟེན་འདིར། །བདུད་རྩིའི་རང་བཞིན་ཡིན་པའི་ཕྱིར། །རྫོངས་དང་བཀའ་བཟློག་ནག་མོ་ཆེ། །གསོལ་ལོ་རོལ་གཅིག་དགྱེས་པར་མཛོད། །མ་ཅིག་ལྷ་མོ༴ མ་ཅིག་ཐུགས་དམ་ཞལ་ཟས་སྣོད། །བསད་པའི་ཤ་དང་མྱོས་པའི་ཆང་། །བསྲེག་པའི་གསུར་དང་རློན་པའི་ཤ །བཙོས་པའི་ཤ་དང་ཁུ་བ་ཁྲག །ནང་རོལ་གློ་སྙིང་མཁལ་མར་བཅས། །གསོལ་ལོ་རོལ་ཅིག །བྷྱོཿ རྨད་དུ་བྱུང་བའི་གཏོར་མ་དང་། །བུམ་དང་རིལ་དང་ཕྱེད་ཙལ་དང་། །ནང་རོལ་གློ་སྙིང་མཁལ་མ་བཅས། །ཤ་དང་རུས་པ་རྐང་ཚིལ་རྣམས། །མ་མོ་འཁོར་དང་བཅས་ལ་འབུལ། །བསྟན་པ་སྲུངས་ཕྱིར་བཞེས་སུ་གསོལ། །མ་ཅིག་ལྷ་མོ༴ མ་ཁྱེད་ལ་ཡིད་བཞིན་མཆོད་པ་འབུལ་བ་ནི། །འབྲས་བུ་ལྔ་ཡི་ཚོམ་བུ་བདུད་རྩི་དང་། །ཀོ་ར་ཙ་ན་དང་ནི་དྲི་ཆེན་ཐལ་ཆེན་དང་། །མ་ཧཱ་མཾ་ས་རཀྟ་ཙིཏྟ་བ་སུ་ཏ། །མ་ཅིག་ཞལ་དུ༴ ཐུགས་མཆོག༴ དངོས་གྲུབ༴ གསོལ་ལོ་རོལ་ཅིག་དགོངས་ཤིག་ས་མ་ཡ། རུ་རུ་བིཥྛ་བེ་དྷྭ་པི་དྲི་ཙ་པ་ལ་ཨ་ཤུགྨེ་ཧཱུྃ་བྷྱོ་ཛ་ཛ་ཁ་རཾ་ཁ་ཧི། འབྱུང་པོའི་ཕུང་པོ་ལ་ཁ་རཾ༴ མ་མོ་ནག་མོ་བཻ་ཏཱ་ལི་ཀུ་ལུ་ཀུ་ལུ། ཧ་ཧ། མ་ཧཱ་མཾ་ས༴ མ་ཧཱ་ཙིཏྟ༴ མ་ཧཱ་བ་སུ་ཏ། མ་ཧཱ་ཀོ་རོ་ཙ་ན༴ དགྲ་བགེགས་ཀྱི་དབང་པོ་རྣམ་ལྔ་ལ༴ ར་རྒྱ་རམ་པ་ལ༴ ཤིག་ཤིག་རྟོག་དཔྱོད་ཅིག །གསུམ་པ་ནི། བྷྱོཿ མ་ཅིག་ལྷ་མོ་བདུད་མོའི་འཁོར་ཚོགས་བཅས། །ཐུགས་དམ་དབང་གིས་སྙིང་ཁྲག་དམར་ལ་རོལ། །མ་ཅིག་ཁྲག་འཐུང་དཔག་ཚད་བརྒྱད་ཁྲིར་རྒྱུག །དམ་རྫས་རྨད་དུ་བྱུང་བའི་དམར་ཆེན་བཞེས། །མ་ཧཱ་རཀྟ་ལ་ཁ་ཧི། བརྒྱད་པ་ནི། བྷྱོཿ སེམས་ཉིད་ནམ་མཁའ་ལྟ་བུའི་རོལ་པ་ལས། །མཆོད་དང་མཆོད་པར་བྱ་བ་གཉིས་སུ་མེད། །དཔེ་དང་ཡི་གེ་ཁ་དོག་ཚིག་ལས་འདས། །ཀུན་རྫོབ་སྒྱུ་མ་ཙམ་དུ་རང་གི་སེམས། །ཐབས་དང་ཤེས་རབ་གཉིས་མེད་རོལ་པ་ལས། །བདེ་ཆེན་བྱང་ཆུབ་སེམས་ཀྱི་ཕྲིན་ལས་ནི། །ཟད་མེད་བདེ་སྟོང་རོལ་པའི་མཆོད་པ་སྟེ། །མཆོད་པ་ཐམས་ཅད་ཆོས་ཀྱི་དབྱིངས་སུ་དག །དགུ་པ་ནི། བྷྱོཿ བསྐལ་པ་མེ་རླུང་འཚུབས་མའི་ཀློང་དཀྱིལ་ནས། །མ་ཅིག་ལྷ་མོ་ནག་མོ་གློ་འགྱུ་མ། །ཕོ་ཉ་བདུད་ཀྱི་བུ་མོའི་འཁོར་ཚོགས་རྣམས། །མ་ཅིག་འཁོར་བཅས་བརྩེ་བས་བདག་ལ་དགོངས། །བདག་ཉིད་མི་མཁས་རྨོངས་པའི་དབང་གྱུར་ཏེ། །སྐུ་གསུང་ཐུགས་དང་རྩ་བ་ཡན་ལག་གིས། །དམ་ཚིག་ཉམས་ཆག་འགལ་འཁྲུལ་གྱུར་པ་དང་། །ཏིང་འཛིན་མི་གསལ་ར་རི་ཁ་ཁོལ་དང་། སྔགས་དང་ཕྱག་རྒྱ་གྲ་ཆགས་ཟུར་ཉམས་དང་། །ཉམས་པ་ཅན་གྱི་གྲིབ་ཀྱིས་ཕོག་པ་དང་། ཕུད་ཉམས་ལྷག་མར་གྱུར་པ་ཐམས་ཅད་དང་། །དམ་རྫས་མཆོད་རྫས་དུས་སུ་མ་ཚོགས་དང་། །དཔོན་གཡོགས་མཆེད་ལྕམ་ཐུགས་དང་འགལ་བ་དང་། །ཁྱད་པར་མ་ཅིག་དཔལ་ལྡན་ལྷ་མོ་ཡི། །སྐུ་གསུང་ཐུགས་དང་རྩ་བ་ཡན་ལག་གིས། །དམ་ཚིག་ཉམས་ཆག་འགལ་འཁྲུལ་ཅི་མཆིས་པ། །མ་ཅིག་བདུད་མོའི་འཁོར་ཚོགས་རྣམས་ལ་བཤགས། །རབ་ཏུ་བཤགས་སོ་ཚང་པའི་དངོས་གྲུབ་སྩོལ། །བཅུ་པ་ནི། བྷྱོཿ དཔལ་ལྡན་ལྷ་མོ་དཔལ་འབར་ནག་མོ་ནི། །རང་དོན་སྤངས་ཏེ་འཁོར་བའི་གནས་འདི་རུ། །དཔག་པར་དཀའ་བའི་རྣམ་འཕྲུལ་ཅིར་ཡང་སྟོན། །ཀུན་ཏུ་བཟང་མོ་རྡོ་རྗེ་དབྱིངས་ཕྱུག་མ།༡ །གསང་བ་ཡེ་ཤེས་མཁའ་འགྲོ་ཡོངས་ཀྱི་གཙོ། །སྤྲུལ་པས་སྟོང་ཁམས་མ་ལུས་འགེངས་བྱེད་མ། །ཁྱོད་ནི་ཤེར་ཕྱིན་ཡུམ་དང་གཉིས་མེད་ཀྱང་། །ཚུལ་སྟོན་ཐབས་མཁས་ལས་ཚུལ་ཅིར་ཡང་སྟོན།༢ །གསེར་ཐུབ་བསྟན་ལ་ལྷ་མོ་ལོང་གཏོང་གིས། །དགེ་བཅུ་སྤྱད་པས་དྲག་པའི་སྲས་མོར་འཁྲུངས། །མར་མེ་མཛད་བསྟན་དགེ་སློང་དབང་ཕྱུག་སྡེར། །མཆོད་པས་སངས་རྒྱས་དོན་ཀུན་གྲུབ་པ་མཇལ།༣ །འོད་སྲུང་བསྟན་ལ་ཞེ་སྡང་སྤྱོད་པའི་མཐུས། །སྲིན་པོའི་ཆུང་མ་རང་ལྕེབ་སྡུག་བསྔལ་བར། །སྟོན་ཀྱང་དོན་ལ་ཡེ་ཤེས་མཁའ་འགྲོ་སྟེ། །ཡེ་ཤེས་སྒྱུ་མའི་རོལ་པ་ཅིར་ཡང་འཆར།༤ །རྡོ་རྗེ་གདན་དུ་ཤཱཀྱ་སེང་གེ་ཡིས། །བདུད་རྩི་བརྙེས་ཚེ་སྲོག་གི་སྙིང་པོ་ཕུལ། །བསྟན་པ་སྲུངས་བའི་གཡར་དམ་མནོས་པས་ཀྱང་། །ས་བརྒྱད་ཐོབ་ཅིང་ལུང་བསྟན་བརྙེས་གྱུར་པ།༥ །དཔལ་ལྡན་རྒྱུད་སྡེ་རྒྱ་མཚོའི་བསྟན་སྲུང་མ། །འདོད་ཁམས་དབང་མོ་དྲག་ཤུལ་མཐུ་ཆེན་རོལ། །ཡེ་ཤེས་འཇིག་རྟེན་མ་མོའི་འཁོར་བཅས་ཏེ། །དམ་ཚིག་ཅན་སྐྱོངས་ཁྱེད་ལ་བདག་བསྟོད་དོ། །བྷྱོཿ སྐལ་པ་མེ་ལྟར་འབར་བའི་ཀློང་དཀྱིལ་ནས། །རླུང་ནག་དགུ་ཀློང་འཁྲིགས་པའི་ཕོ་བྲང་ནས། །མ་ཅིག་ལྷ་མོ་འདོད་ཁམས་གཙོ་མོ་སྟེ། །ནག་མོ་ཟ་བྱེད་འཇིགས་པའི་ཆ་ལུགས་ཅན། །མཐིང་ནག་མི་སྲུན་ཁྲག་གི་རལ་པ་ཅན། །མཿ ཁྱེད་ཀྱི་སྐུ་མདོག་ནག་མོ་སྟོན་པ་ནི། །དོན་དམ་དབྱིངས་ན་བསྐྱེད་པ་མེད་པའི་རྟགས། །རལ་པ་གཡས་ནས་གཡོན་དུ་འཁྱིལ་པ་ནི། །ཡུམ་གྱི་མཁའ་ལས་སྤྲུལ་པ་འབྱེད་པའི་རྟགས། །རལ་པའི་གསེབ་ནས་མེ་སྟག་འཕྲོ་བ་ནི། །ཐུགས་རྗེའི་སྤྲུལ་པ་ཕྱོགས་བཅུར་འགྱེད་པའི་རྟགས། །རལ་པ་སྤྱི་བོའི་གཙུག་ཏུ་འཁྱིལ་བ་ནི། །ཐུགས་དམ་དགོངས་སྤྱོད་གཅིག་ཏུ་མཛད་པའི་རྟགས། །ཐོད་སྐོམ་ཕྲེང་བས་དབུ་ལ་བརྒྱན་པ་ནི། །ཐུགས་རྗེས་སྤྲུལ་པའི་འགྲོ་དོན་མཛད་པའི་རྟགས། །རྨ་བྱའི་རྒྱལ་མཚན་དབུ་ལ་གཙུགས་པ་ནི། །ཕྲིན་ལས་རྣམ་བཞི་སོ་སོར་མཛད་པའི༴ སྙན་ཆ་གཡས་ན་སེང་གེ་འགྱིང་བ་ནི། །དམན་མོ་ཐམས་ཅད་ཟིལ་གྱིས་གནོན་པའི༴ སྙན་གཡོན་སྦྲུལ་ནག་གདེང་ཀ་འཕྱོ་བ་ནི། །ཞེ་སྡང་མ་སྤངས་དབྱིངས་སུ་དག་པའི་རྟགས། །སྙན་ཆ་གསེར་གྱི་དྲིལ་བུ་འཁྲོལ་བ་ནི། །སངས་རྒྱས་ཀུན་ལ་བསྙེན་བསྐུར་མཛད་པའི་རྟགས། །སྤྱན་རྩ་དམར་པོ་ཕྱོགས་བཅུར་གཟིགས་པ་ནི། །རྣལ་འབྱོར་སྲིད་གསུམ་བྱ་ར་མཛད༴ ཤང་ནས་ནད་ཀྱི་རླངས་པ་འཐུལ་བ་ནི། །སྡང་བའི་དགྲ་ལ་ནད་ཡམས་འབེབ་པའི་རྟགས། །ཞལ་གྱི་ཧོམ་ཁུང་དྲག་པོར་གདེངས་པ་ནི། །དམ་རྫས་གང་ཡིན་ཞལ་དུ་གསོལ་བའི༴ རྣོ་གདུག་མཆེ་བ་ཟུར་གསུམ་གཙིགས་པ་ནི། །བསྒྲལ་བའི་ཞིང་བཅུའི་ཤ་ལ་རོལ་པའི་རྟགས། །ཞིང་ཆེན་གཡང་གཞི་སྐུ་ལ་མནབ་པ་ནི། །ཆོས་ཉིད་ཡང་དག་དོན་དང་ལྡན་པའི༴ སྐུ་སྨད་གླང་ཆེན་ཀོ་རློན་གསོལ་བ་ནི། །ཐེག་པ་མཆོག་གི་དོན་དང་ལྡན་པའི༴ སྣམ་ཕྱེ་རེ་ལྡེ་ནག་པོས་དཀྲིས་པ་ནི། །འཇིག་རྟེན་འདི་ན་ཆེ་བཙན་ལྡན་པའི༴ སྤྱི་བོའི་གཙུག་ན་ཟླ་རྒྱས་གསལ་བ་ནི། །མ་རིག་མུན་པ་དབྱིངས་སུ་དག་པའི་རྟགས། །ལྟེ་བའི་དབུས་ན་ཉི་མ་ཤར་བ་ནི། །སྲིད་པའི་རྒྱ་མཚོ་གཏིང་ནས་སྐེམ་པའི༴ སྟག་གི་ལྤགས་པའི་ཤམ་ཐབས་བྱས་པ་ནི། །དྲག་པོའི་ཆ་ལུགས་མངོན་དུ་གྱུར་པའི༴ ཕྱག་གཡས་གདུག་པའི་རལ་གྲི་འཕྱར་བ་ནི། །དགྲ་བགེགས་སྐྱེ་རྒྱུད་རྩད་ནས་གཅོད་པའི༴ ཕྱག་གཡོན་བྷནྡྷ་དམར་ཆེན་བསྣམས་པ་ནི། །འཁོར་བའི་སྡུག་བསྔལ་ཁྲག་ལྟར་འཐུང་བའི༴ མཆན་ན་ནེའུའི་རྐྱལ་པ་ཐོགས་པ་ནི། །བསྒྲུབ་པ་པོ་ལ་དངོས་གྲུབ་སྟེར་བའི༴ ཞབས་ལ་དབང་གི་ལྕགས་སྒྲོག་སྒྲོགས་པ་ནི། །ཐབས་དང་ཤེས་རབ་གཉིས་སུ་མེད་པའི༴ ཕྱིར་ཕྱོགས་དྲིལ་གྱི་ཕ་ལ་བཅིབས་པ་ནི། །ལོག་པར་ལྟ་བའི་དགྲ་བགེགས་སྒྲོལ་བའི༴ སྲིན་པོའི་ཡ་འགལ་སྔ་རུ་བྱས་པ་ནི། །སྲིན་ཡུལ་ལངྐ་པཱུ་རིར་བསྒྲོད་པའི་རྟགས། །སྲིན་མོའི་མན་འགལ་ཕྱི་རུ་བྱས་པ་ནི། །སྲིན་ཁམས་མ་ལུས་དབང་དུ་བསྡུད་པའི༴ གོང་ཐག་གློ་སྨད་སྤྲུལ་ལ་བྱས་པ་ནི། །ཞེ་སྡང་སྡུག་པ་ཅན་རྣམས་འདུལ་བའི༴ རུས་སྦལ་ནག་པོའི་ཕོག་གུས་བཏབ་པ་ནི། །ཀླུ་བདུད་མ་རུངས་དམ་ལ་འདོགས་པའི༴ སྔ་ཤད་བདུད་ཀྱི་ཁྲམ་བམ་བཀལ་བ་ནི། །དམ་ཉམས་དགྲ་བོ་ཁྲམ་ལ་འདེབས་པའི༴ ཕྱི་ཤད་ནད་ཀྱི་རྐྱལ་པ་བཀལ་བ་ནི། །དམ་ཉམས་དགྲ་ལ་ནད་ཡམས་འབེབས་པའི༴ དོན་དམ་བཅུད་ཀྱི་རྟགས་སུ་ཞག་གི་ཟོ་རིས་བརྒྱན། །ཐུགས་རྗེའི་ཆགས་པའི་རྟགས་སུ་རཀྟའི་ཐིག་ལེའི་བརྒྱན། །འདུལ་བྱེད་ཕྲིན་ལས་རྟགས་སུ་ཐལ་བའི་ཚོམ་བུས་བྱུགས། །འབུམ་ཕྲག་མ་མོའི་འཁོར་གྱིས་རབ་ཏུ་བསྐོར་བ་ནི། །སྟོང་གསུམ་ཀུན་ཏུ་ཁྱབ་པའི་ཕྲིན་ལས་མཛད་པའི་རྟགས། །བྷྱོཿ མ་ཅིག་ཁ་ནས་མེ་འབར་རྒྱ་མཚོ་ཆེན་པོ་སྐེམས། །ལག་ན་རྡོ་རྗེ་འཕེན་པའི་རི་རབ་སིལ་བུར་བསྙིལ། །མཐུ་ཆེན་སྤྲིན་གྱི་ཤུགས་འཆང་གློག་ལྟར་མྱུར་མགྱོགས་པ། །ལྷ་མོ་དཔལ་ལྡན་ཁྱེད་ལ་བདག་གིས་བཙུན་པར་བསྟོད། །བྷྱོཿ དཔལ་ལྡན་མ་ཆེན་ཅིར་ཡང་སྤྲུལ་པ་ལས། །འཁོར་གྱི་མ་མོ་སྲིད་གསུམ་ཁྱབ་པ་དང་། །ཁྱོད་དང་ཡེ་ནས་དམ་ཚིག་གཅི ག་པ་ཡིན། །སྐེམ་མ་སྔོན་ནས་འགྲོ་ལ་ཕྱག་འཚལ་བསྟོད། །འཇིག་རྟེན་སྟོང་ལ་དབང་བསྒྱུར་ཞིང་། །རྒྱ་མཚོ་ཧུབ་ཀྱིས་རྔུབ་པ་དང་། །རི་རབ་དཔང་དུ་འདེབས་ནུས་པ། །མ་བདུན་མ་གསུམ་སྲིང་མོ་བཞི། །སེང་སྟག་འབྲུག་སྤྱང་གདོང་མོ་བཞི། །དབང་ཕྱུག་ཆེན་མོ་ཉི་ཤུ་བརྒྱད། །མ་མོ་སྟོང་དང་འབུམ་སྡེའི་ཚོགས། །བྱེ་བ་སྤྲུལ་པའི་བདུད་མོའི་ཚོགས། །དྲག་ཤུལ་རོལ་པ་བསམ་མི་ཁྱབ། །ཕྲིན་ལས་རྣམ་བཞིའི་རོལ་པ་ཅན། །དམ་ཚིག་འདོད་དགུར་བསྒྱུར་བ་ཡི། །མཁའ་འགྲོའི་ཚོགས་ལ་བདག་བསྟོད་དོ། །རྡོ་རྗེ་དབྱིངས་ཕྱུག་རིག་མ་ནི། །ལོག་རྟོག་གཞོམས་པའི་དཔའ་བོ་ལ། །མ་ཆེན་དཔལ་ལྷར་མཚན་གསོལ་བ། །ཡུམ་ཆེན་ཁྱེད་ལ་བདག་བསྟོད་དོ། །བྷྱོཿ དཔལ་ལྡན་ལྷ་མོ་མཐུ་ཆེན་ཁྱོད། །ཆོས་སྐྱོང་རྒྱལ་མོ་མི་ཟད་མ། །གསང་བ་དབྱིངས་ཕྱུག་མཁའ་འགྲོ་མ། །བསྟན་སྲུངས་མཛད་ལ་ཕྱག་འཚལ་བསྟོད། །ལྷ་མོ་ཀླུ་མོ་གནོད་སྦྱིན་མོ། །གྲུལ་བུམ་དྲི་ཟ་འབྱུང་པོ་དང་། །ཅིར་ཡང་སྤྲུལ་པའི་རྫུ་འཕྲུལ་ཅན། །མིང་བརྒྱ་མ་ལ་མཚན་སྟོང་མ། །རྒྱལ་བསྟན་རྒྱས་མཛད་མ་ལ་ཕྱག་འཚལ་བསྟོད། །དངོས་གྲུབ་སྟེར་མཛད་མ་ལ༴ ཕྲིན་ལས་བསྒྲུབ་མཛད་མ། །དགྲ་བགེགས་འདུལ་མཛད་མ་ལ་ཕྱག་འཚལ་བསྟོད། །བཅུ་གཅིག་པ་བསྙེན་པ་འབུལ་བ་ལ་སྤྱིར་དབུལ་བ་དང་། བྱེ་བྲག་ཏུ་འབུལ་བའོ། །དང་པོ་ནི། རང་ཉིད་ཡི་དམ་གྱི་ཐུགས་ཀའི་ཧཱུྃ་གིས་མཐར་བསྐོར་ཡི་དམ་སྔགས་ཀྱིས་གཡས་སུ་བསྐོར་བ། དེ་ཡི་མཐར་ལྷ་མོའི་སྔགས་ཀྱིས་བསྐོར་བར་གྱུར་པར་བསམ་ནས་ཡི་དམ་གྱི་བསྙེན་མཐར་སྔགས་བདུན་བཟླ་བ་གོང་ནོན་ནོ། །དམ་ཚིག་གི་སེམས་དཔའ་མདུན་གྱི་མ་མོའི་ཐུགས་ཀར་ཧ་ལས་ཡེ་ཤེས་སེམས་དཔའི་ལྷ་མོ་ཀ་རི་མ་སྔོན་མོ། གཡས་ཞིང་དབྱུག་གཡོན་ཐོད་ཁྲག་བསྣམས་པ། དེ་ཡི་ཐུགས་ཀར་ཟླ་བའི་སྟེང་དུ་ཏིང་འཛིན་སེམས་དཔའ་རལ་གྲི། དེའི་སོ་ཡུའི་མཚམས་སུ་མ་ནག་མོ་གཅིག་ལ་ཡི་གེ་བཅོ་ལྔས་བསྐོར་བས། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་དགྱེས་པ་བསྐྱེད། དེའི་མ་ཡིག་སྔགས་ཕྲེང་དང་བཅས་པའི་འོད་ཟེར་གྱིས་ཅི་འདོད་པའི་ལས་རབ་འབྱམས་བསྒྲུབ་ནས་ཐུགས་ཀའི་ས་བོན་ལ་ཐིམ་པས་མ་མོའི་ནུས་མཐུ་བདག་གིས་ཐོབ་པར་བསམ་ལ། ༀ་རུ་རུ་རོ་རུ་ཙ་པ་ལ་ཨ་ཤུགྨེ་ཧཱུྃ་བྷྱོཿཛཿཛཿ ཡི་གེ་བཅོ་ལྔ་པ་འདི་རྩ་སྔགས་སོ། །གཉིས་པ་ལ་བརྟེན་ཚུལ་བཞིའི་བསྙེན་དམིགས་དང་། འབོད་རྦད་བསད་གསུམ་གྱིས་སྒྲུབ་པ་དང་། སྲོག་གི་ལས་བརྒྱད་ཀྱི་དམིགས་རིམ་མོ། །དང་པོ་ལ་བཞི་ལས་མ་ལྟར་དུ་བསྟེན་པ་ནི། བདག་གི་ཐུགས་ཀ་ནས་འོད་ཟེར་འཕྲོས་ལྷ་མོའི་ཐུགས་ཀར་ཕོག །ལྷ་མོའི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་བྱུང་། བདེ་ལྡན་ལྷ་མོ་བརྙེས་ནས་ཐུགས་ཀའི་ནུ་འབུར་ནས་ཚུར་ལ་སྔགས་ཕྲེང་གི་དངོས་གྲུབ་སྩོལ་བར་བསམ་ནས། གཙོ་མོའི་སྲོག་སྙིང་། ༀ་རུ་རུ་བེ་ཏིསྟ་བ་དོ་སི་རུ་རུ་རོ་རུ་བེ་ཏིཥྛ་བ་དོ་པི་ཙ་པ་ལ་ཨ་ཤུགྨེ་ཧཱུྃཿབྷྱོཿཛཿ འོད་ཟེར་དེས་འཁོར་རྣམས་ཀྱང་ལས་ལ་བསྐུལ་བར་གྱུར། ཁོལ་མོ་རེ་ཏི་ཆུ་སྲིན་གདོང་སྲོག་སྙིང་། ༀ་རུ་རུ་རོ་རུ། ནུ་ཏིཥྛ་བ་དོ་སི། རགྨོ་ཙིཏྟ་ཁ་རགྨོ་ཧཱུྃ་བྷྱོཿ མ་མ་ཏྲཀ་རཀྴ། ཁ་མུན་དྲ་བ་དྲ་རཀྴ་ཙིཏྟ་ཁ་རག་མ། རེ་མ་ཏི་ས་མ་ཡ། བྲ་མ་མ་ཧཱ་སྟེ་པྲན་དུན་བྷྱོ་རུ་ལུ་རུ་ལུ་བྷྱོ་ཛ་ཛཿ འཁོར་མ་མོ་ཐམས་ཅད་ཀྱི་སྙིང་པོ། ས་མ་ཡ་དུ་ལིང་རཀྴ་སི། ཧཱེ་རཀྴ། བྷྱོ་རཀྴ། དུ་རཀྴ། མ་རཀྴ་སི། མཱ་མཱ་མཱ་མཱ་རུ་ལུ་རུ་ལུ། བྷྱོ་བྷྱོ་བྷྱོ་བྷྱོ། རུ་རུ་རུ་རུ། གཉིས་པ་སྲིང་ལྟར་བསྟེན་པ། རང་གི་ཐུགས་ཀ་ནས་སྔགས་ཀྱི་འོད་ཟེར་འཕྲོས། ལྷ་མོའི་ཐུགས་ཀར་ཐིམ། དེ་ལས་འོད་ཟེར་འཕྲོས། བདེ་བར་གཤེགས་པ་སྲས་བཅས་མཆོད། བྱིན་རླབས་བསྡུས། དགྲ་བགེགས་བསྒྲལ། བར་ཆད་བསལ། ལྷ་མོའི་སྐུ་གསུང་ཐུགས་མཉེས། དངོས་གྲུབ་རྣམས་ལྟེ་བ་ནས་བྱུང་། རང་གི་སྙིང་ཁར་འོད་ཟེར་རབ་ཏུ་འཁོར་བའི་རྣམ་པར་གྱུར་པ་བསྒོམ་མཐར། ༀ་མ་ཧཱ་ཀ་ལི་རེ་མ་ཏི། མ་མ་རུ་ལུ་རཀྴ་རེ་མ་ཏི། མ་མ་རུ་ལུ་རཀྴ་རེ་མ་ཏི། རུ་ལུ་རུ་ལུ་བྷྱོཿཛཿཛཿ སྙིང་པོའོ། །གསུམ་པ་མཛའ་མོའི་ཆུང་མ་ལྟར་བསྟེན་པ། བདག་གི་ཐུགས་ལས་འཕྲོས་པའི་སྔགས་ཀྱི་འོད་ཟེར་རྩ་དབུ་མའི་ནང་ནས་མར་ཞུགས། གསང་བའི་རྡོ་རྗེ་ནས་ཕྱིར་ཕྱུང་། མ་མོའི་པདྨར་ཞུགས། མཆོད་པ་སྣ་ཚོགས་ཀྱིས་མཆོད་ནས་བརྙེས་ཤིང་ཚིམས། མཐུ་ནུས་འབར། ཐུགས་ཀ་ནས་ཞལ་བརྒྱུད་ཚུར་བྱུང་བདག་གི་ཞལ་དུ་ཞུགས་པས་དངོས་གྲུབ་སྣ་ཚོགས་སྟེར་བར་གྱུར་པའི་མཐར་འགལ་མེའི་འཁོར་ལོ་ལྟར་བསྒོམ་སྟེ། ༀ་ཏྲག་རཀྴ་མ་ཧི་དུན་བྷྱོཿ མ་ཧཱ་ཡཀྴ་ཏཱིཀྞ་ཀཱ་ལི་དུན་བྷྱོཿ ཡང་སྙིང་བཅུ་བདུན་མའོ། །བཞི་པ་བྲན་ལྟར་བསྟེན་པ། བདག་གི་ཐུགས་ཀའི་སྔགས་འོད་ཟེར་བཅས་པ་ལྷ་མོའི་ཐུགས་ཀར་ཕོག །མ་མོ་མཉེས་ཤིང་སྐུ་གསུང་ཐུགས་ཀྱི་དངོས་གྲུབ་ཐམས་ཅད་མ་མོའི་ཞལ་ནས་འོད་ཟེར་གྱི་རྣམ་པར་རང་གི་ཞལ་དུ་ཞུགས་ཏེ་སྙིང་ཀར་འཁོར་བར་གྱུར་པ་བསྒོམ་ནས། ༀ་ཏྲཀྴ་མ་མ་མ་ཏི་དུན་བྷྱོཿ མ་ཧཱ་རཀྴ་མ་ཧཱ་ཏིཀྵྞ་ནག་མོ་དུན་ཏིང་མ་བྷྱོཿ ཉེར་སྙིང་ཉེར་བཞི་མའོ། །གཉིས་པ་བསྒྲུབ་པའི་མན་ངག །རང་ཡི་དམ་གྱི་ཐུགས་ཀ་ནས་ཧཱུྃ་གི་འོད་ཟེར་གྱིས་མདུན་དུ་གནས་པའི་ལྷ་མོའི་ཐུགས་ཀའི་མ་ལ་ཐིམ་ཞིང་ཡོངས་སུ་བསྐུལ་བས་ཉི་མ་བྱང་ཤར་གྱི་མཚམས་དང་། རང་བཞིན་གྱི་གནས་ནས་སླར་ཡང་། མ་མོ་འཁོར་དང་བཅས་པ་བཀུག །རྒྱལ་བའི་བསྟན་པ་རིན་པོ་ཆེའི་ཚུལ་བཞིན་བསྒྲུབ་པ་ལ་སྡང་བའི་དགྲ་བགེགས་ཐམས་ཅད་ཚར་བཅད། གནོད་པའི་བགེགས་མ་ལུས་པ་ཐལ་བའི་རྡུལ་ཕྲན་བཞིན་དུ་བརླག །ཕྲིན་ལས་འདོད་དགུ་ཡིད་བཞིན་དུ་བསྒྲུབ་པར་བསམ་ནས། ༀ་རུ་རུ་ཙ་རུར་ཨ་ཤུགྨེ། པྲ་ཏི་རུ་དྲ་པྲ་ཁ་ཤག་རཀྨོ་ཧཱུྃ། རཀྴ་ཙིཏྟ་ས་མ་ཡ། ཀུ་རུ་ཁ་ཙིཏྟ་ནན། འབོད་པའོ། །ༀ་རུ་རུ་པེ་རུ་རེ་ཧཱུྃ། ཏིསྟ་ཐ་བ་ཏོ་སིལ། རགྨོ་རྙིང་ཁ་ལ་རགྨོ་ཐུན་བྷྱོ་ཛཿཛཿ རྦད་པའོ། །རུ་ལུ་རེ་མ་ཏི་ས་མ་ཡ། བྲ་མ་ཧསྟི། པྲ་མ་རགྨོ་རུ་ལུ་རུ་ལུ་བྷྱོ་ཛཿཛཿ ཁ་རག་དེ་ཁེམ་ཛཿཛཿ ཁ་ལེ་ཐུན་བྷྱོ་ཐུན་མ་མོ་བྷྱོ། ཧཱུྃ་རགྨོ་ནི་ཤ་ཀུ་རུ་རྦད། རགྨོ་ཨརྱ་ཛཿཛཿ ཏི་ཁེཾ་ཁ་ལེ་བྷྱོ་བྷྱོ། ས་མ་ཡ་དགྲ་བགེགས་མ་ར་ཡ་ཧཱུྃ་ཕཊཿ བསད་པའོ། །གསུམ་པ་ནི། དབབ་དང་དམ་བཏགས་སྲོག་སྐོར་བ། གཅུན་དང་ཡང་རིག་བླང་བ་དང་། གཟེར་བ་གཟི་བྱིན་བླང་བ་དང་། ཟིལ་གྱིས་མནན་པ་རྣམ་པ་བརྒྱད། ཅེས་གསུང་སྟེ་ཤིན་ཏུ་གཉན་པས་གཞུང་དུ་མ་བཀོད་པ་བེའུ་བུམ་ལས་ཤེས་པར་བྱའོ། །བཅུ་གཅིག་པ་ལས་བསྙེན་མཆོད་དངོས་དང་། བསྙེན་བསྟོད་དོ། །དང་པོ་ནི། ༀ་ཤྲི་དེ་ཝི་མ་ཧཱ་ཀཱ་ལི་མ་མ་ས་པཱ་རི་ཝ་ར་བཛྲ་ཨརྒྷཾ་པྲ་ཏིཙྪ་ཡེ་སྭཱ་ཧཱཿནས། ཤཔྟའི་བར་གྱིས་མཆོད་ཅིང་རོལ་མོ་བྱ། གསེར་སྐྱེམས་འབུལ་བཞིན། ༀ་ཨཱཿཧཱུྃ། མཆོད་དོ། །མཿ རིག་པ་རང་བྱུང་གི་རྒྱལ་མོ། དཔལ་ལྡན་ལྷ་མོ་ནག་མོ། དུས་བཞིས་ལྷ་མོས་སྐུ་ལ་བརྒྱན་པ། བདུད་ཀྱི་ཡུམ་ལ། གཤིན་རྗེའི་ལྕམ། འདོད་པ་ཁམས་ཀྱི་དབང་ཕྱུག་མ་སྔོན་དུ་རྒྱུགས་པ་ཆུ་སྲིན་མགོ་ཅན། མ་མོ་བདུན་དང་མ་གསུམ་སྲིང་མོ་རྣམ་བཞི། རྗེས་སུ་རྒྱུག་ཅིང་གཡས་གཡོན་མྱུལ་བ། ཉི་ཟླ་སྟོང་གིས་ཁྱབ་པར་འགྲོ་མ། གདོང་མོ་ཆེན་མོ་སེང་སྟག་འབྲུག་སྤྱང་བཞི། དབང་ཕྱུག་ཆེན་མོ་ཉི་ཤུ་རྩ་བརྒྱད། མ་མོ་ནག་མོ་སྟོང་གི་ཚོགས་དང་། བདུད་མོ་བྱེ་བ་འབུམ་སྡེའི་བཀའ་འཁོར་དང་བཅས་པ། མཐུ་ཆེན་དམ་པ་ཆོས་སྐྱོང་བའི་སྲུང་མའི་དབང་པོ་རྣམས་ལ། མཆོད་ཅིང་གསེར་སྐྱེས་ཕུད་ཀྱིས་གསོལ་ལོ། །ཀུན་མཁྱེན་སངས་རྒྱས་ཀྱི་བསྟན་པ་རིན་པོ་ཆེ་བཤད་དང་སྒྲུབ་པའི་སྒོ་ནས་འཇིག་རྟེན་གྱི་ཁམས་འདིར་ཡུན་རིང་དུ་འཚོ་བ ཞེས་པ་དང་། དེར་འཛིན་གྱི་སྐྱེས་བུ་དམ་པ་འགྲོ་བའི་ཕན་བདེ་སྤེལ་བར་བཞེད་པ་རྣམས་ཀྱི་ཞབས་པད་བརྟེན་ཅིང་བཞེད་དོན་གེགས་མེད་པར་འགྲུབ་པར་མཛད་དུ་གསོལ། བདག་ཅག་འཁོར་དང་བཅས་པའི་དཔལ་དང་གྲགས་པ་སྤེལ། ཚེ་དང་དབང་ཐང་བསྐྱེད། སྐྱེ་བོ་སྡང་བར་བྱེད་པའི་དགྲ་སོད། འབྱུང་པོ་གནོད་པར་བྱེད་པའི་བགེགས་ཐུལ། ལྷ་འདྲེས་བར་དུ་གཅོད་པའི་རྐྱེན་བཟློག །དུས་མ་ཡིན་པའི་འཆི་བདག་གི་བདུད་བསྒྱུར། གནོད་བྱེད་བར་དུ་གཅོད་པ་ཐམས་ཅད་ཐལ་བ་རྡུལ་ཕྲན་བཞིན་དུ་བརླག་པར་མཛོད་ཅིག །གཉིས་པ་ནི། བྷྱོཿ འཕྲུལ་གྱི་ཕོ་བྲང་ཐོད་པའི་ལྡིང་ཁང་ནས། །དཔལ་ལྡན་ལྷ་མོ་ཁྲག་འཐུང་རེ་མ་ཏི། །སྲིན་པོ་ནག་པོའི་ཆུང་མ་རལ་པ་ཅན། །ཡ་མཚན་རྨད་བྱུང་ལྷ་མོ་ཁྲོ་རྒྱལ་གཙོ། །ཞལ་གདོངས་མཆེ་གཙིགས་དྲག་པོའི་རྐན་སྒྲ་ཅན། །རྔམ་པའི་ཚུལ་གྱི་དམར་ཆེན་ཁྲག་ལ་རོལ། །ཁ་འབར་ཆེན་མོ་སྲོག་གི་ཤན་པ་མོ། །སྐུ་ནི་ནག་མོ་འབུམ་གྱི་དབུས་ན་བཞུགས། །སྐྱེ་བ་རྣམ་བཞི་སྒྲོལ་བའི་གིང་ཆེན་མོ། །ཁྱོད་ནི་སྲིད་པ་གསུམ་གྱིས་བསྐུལ་བར་འོས། །ཚངས་པའི་རྒྱལ་པོས་རྨ་བྱའི་རྒྱལ་མཚན་ཕུལ། །བདུད་ཀྱི་རྒྱལ་པོས་ཁྲམ་བམ་ནག་པོ་འཕུལ། །འཆི་བདག་རྒྱལ་པོས་ཕྱག་མཚན་རལ་གྲི༴ དུར་ཁྲོད་མ་མོས་བྷཉྫ་ལྕང་ལོ༴ གནོད་སྦྱིན་རྒྱལ་པོས་ནཻའུའི་རྐྱལ་པ་ཕུལ། ཀླུ་ཡི་རྒྱལ་པོས་སྦྲུལ་ནག་གདེངས་ཀ༴ ཁྱབ་འཇུག་ཆེན་པོས་ཉི་མ་ཟླ་བ༴ རྣམ་ཐོས་སྲས་ཀྱི་སེང་གེ་སྙན་ཆ༴ ཐེག་ཆེན་རྒྱལ་པོས་གླང་ཆེན་ཀོ་རློན༴ མ་བདུད་རྒྱལ་མོས་རེ་ལྡེའི་ཤམ་ཐབས། མ་མོ་རྣམས་ཀྱིས་ནད་ཀྱིས་རྐྱལ་པ༴ ཀླུ་མོ་རྣམས་ཀྱི་འཕྲུལ་གྱི་མེ་ལོང་༴ སྨན་མོ་རྣམས་ཀྱི་མཚོན་གྱི་གྲུ་གུ༴ ཤ་ཟའི་རྒྱལ་པོས་ཐོད་པའི་ཕྲེང་བ༴ ལྷ་ཕྲན་རྣམས་ཀྱི་གསེར་གྱི་དྲིལ་བུ༴ ས་བདག་རྒྱལ་པོས་རུས་སྦལ་ཕོག་གུ༴ བཙན་གྱི་རྒྱལ་པོས་ཤྭ་དྷེལ་དཀར་ནག༴ སྲིན་པོའི་རྒྱལ་པོས་ལྕགས་སྒྲོག་འབར་བ༴ རྣལ་འབྱོར་བདག་གིས་བདུད་རྩིའི་གཏོར་མ་འཕུལ། །རཀྟ་དམར་གྱི་ཨརྒྷཾ་བསྒྲེངས་ཙམ་ན། །མ་ལ་བུས་འབོད་གདུང་སེམས་མ་ཆུང་བར། སྨུག་ནག་འཇིགས་པའི་རྒྱལ་མོའི་སྐུར་བཞེངས་ལ། །ལྕགས་ཀྱུ་འདྲ་བའི་སྡེར་མོས་གཏོར་མ་ལོངས། །གྲུ་གསུམ་མཐིང་ནག་འབར་བའི་ཞལ་གདོང་ལ། །ཟ་བྱེད་རྣོ་གདུག་འབར་བའི་མཆེ་བས་གསོལ། །ལེ་བརྒན་ཁྲ་འཐུང་འབར་བའི་ལྗགས་རྐྱང་ལ། །ཆོས་ཀྱི་དབྱིངས་དང་མཉམ་པའི་མགུལ་དུ་བསྟིམས། །སློབ་དཔོན་པདྨས་མཛད་པའོ། །བྷྱོཿ ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །སུམ་ཅུ་རྩ་གསུམ་གནས་ཀྱི་གཙོ་མོ་སྟེ། །ལྷ་མོ་དཔལ་འབར་མ་ལ་ཕྱག་འཚལ་བསྟོད། །ཀླུ་ལ་དབང་བསྒྱུར་ཀླུ་མོ་དཔལ་འབར་མ། །གཙུག་ན་རིན་ཆེན་བུ་མོ་ཡིད་འོང་མ། །རོལ་པའི་མཚོ་བདུན་གནས་ཀྱི་གཙོ་མོ་སྟེ། །ཀླུ་མོ་དཔལ་འབར་མ་ལ༴ གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་བོའི་བུ་མོ་ཤང་ཀར་ཏི། །ནགས་ཚལ་དྲྭ་བ་ཅན་གྱི་གཙོ་མོ་སྟེ། །གནོད་སྦྱིན་རེ་མ་ཏི༴ བདུད་ལ་དབང་བསྒྱུར་བདུད་མོ་དཔའ་འབར་མ། །རེ་ལྡེ་མགོ་ཉག་བུ་མོ་རེ་མ་ཏི། །བདུད་མཁར་རྩེ་དགུའི་གནས་ཀྱི་གཙོ་མོ་སྟེ། །བདུད་མོ་རེ་མ་ཏི༴ སངས་རྒྱས་བསྟན་པ་སྲུང་བར་ཞལ་བཞེས་པའི། །ཆོས་ཉིད་དོན་རྟོགས་འཕགས་མ་རེ་མ་ཏི། །ས་བརྒྱད་ནོན་པའི་སེམས་མ་རེ་མ་ཏི། །ལྷ་མོ་མཐུ་ཆེན་ཁྱེད་ལ་ཕྱག་འཚལ་བསྟོད། །དཀོན་མཆོག་མཐུ་ཆེན་ཁྱེད་ལ༴ རྣལ་འབྱོར་དགྲ་འདུལ་ཁྱེད་ལ་ཕྱག་འཚལ་བསྟོད། །ཞེས་གནས་བཞིའི་བསྟོད་པའོ། །བྷྱོཿ མ་བཅོས་ཆོས་སྐུ་བདེ་བ་ཆེན་པོ་ལས། །སྲིད་དང་ཞི་བར་མི་གནས་མཉམ་པ་ཉིད། །ཡོན་ཏན་ཕྲིན་ལས་མཚོན་པའི་སྐུར་སྟོན་པ། །དཔལ་དང་ལྡན་པའི་ལྷ་མོ་ཁྱོད་ལ་འདུད། །སྐུ་ཡི་དཀྱིལ་འཁོར་ཆོས་ཀྱི་དབྱིངས་དང་མཉམ། །མྱ་ངན་མི་འདའ་མཐུན་པར་སྣང་བ་ཉིད། །མཛེས་པའི་རྒྱན་ལྡན་མ་གཅིག་རེ་མཱ་ཏི། །འགྲོ་བའི་གཉན་གཅིག་མ་ལ་ཕྱག་འཚལ་བསྟོད། །ཆོས་སྐུ་མཁའ་ལྟར་རྟོགས་པའི་ཤེས་རབ་ལ། །ཐུགས་རྗེས་རྨད་དུ་བྱུང་བའི་ཐབས་ཚུལ་གྱིས། །མ་རུང་གདུག་པ་ཅན་རྣམས་ཚར་གཅོད་ཅིང་། །མི་བསྙེལ་ཐུགས་དམ་ཅན་ལ་བདག་བསྟོད་དོ། །དམན་པ་མི་འདོར་རྟགས་སུ་བོང་བུ་བཅིབས། །ལྷའི་ལྷར་གྱུར་ལྷ་མིན་སྐྲག་མཛད་མ། །རྫུ་འཕྲུལ་ཤུགས་འཆང་སྟོང་གསུམ་ཁྱབ་པར་ཉུལ། །བསྟན་པ་གཉེར་མཛད་མ་ལ་བདག་བསྟོད་དོ། །ཁྱུང་པོ་རྣལ་འབྱོར་གྱིས་མཛད་པའོ། །བྷྱོཿ དཔལ་གྱི་སྲུང་མ་ཁམས་གསུམ་གཙོ་མོ་ནི། བོང་བུ་རྟ་མཆོག་དཔག་ཚད་བརྒྱད་ཁྲིར་རྒྱུག །ནག་མོ་ཁྲག་འཐུང་དབྱིངས་ཀྱི་ད པལ་འབར་མ། །དཔལ་ལྡན་མ་ཆེན་ཅིར་ཡང་འཁྲུལ་པ་ནི། །སྟོང་ཁམས་ཀུན་ལ་དབང་མཛད་ཆེན་མོ་བཞི། །ནམ་ཟླ་དཔྱིད་ཀྱི་རྒྱལ་མོར་གཤེགས་པའི་ཚེ། །དཀར་མོ་ཤྲི་རི་དུར་ཁྲོད་གནས་ཉུལ་མ། །ཁྲག་འཐུང་ཆེན་མོའི་སྐུ་ལ་ཕྱག་འཚལ་བསྟོད། །འགྲོ་བ་ཀུན་ལ་བདེ་བ་སྩོལ་བའི་སླད། །ནམ་ཟླ་དབྱར་གྱི་རྒྱལ་མོས་གཤེགས་པའི་ཚེ། །བྷ་ག་ཧིསྟི་མཁའ་ལས་ཆར་འབེབས་མ། །སེར་མོ་སྦྱོར་བདག་ཆེན་མོར་ཕྱག་འཚལ་བསྟོད། །ཁམས་གསུམ་ཀུན་ཏུ་བསྐྱོད་ཅིང་བསྡུད་པའི་སླད། །ནམ་ཟླ་སྟོན་གྱི་རྒྱལ་མོར་གཤེགས་པའི་ཚེ། །སྤྲུལ་པ་མཐིང་ནག་མི་སྲུན་རལ་པ་ཅན། །མ་མོ་སྲོག་བདག་ཆེན་མོར༴ ལོག་འདྲེན་དགྲ་བགེགས་ཐལ་བར་བརླག་པའི་ཕྱིར། །ནམ་ཟླ་དགུན་གྱི་རྒྱལ་མོར་གཤེགས༴ མེ་ཟླ་བྲག་གྱོན་རྒྱ་མཚོའི་གཏིང་ཉུལ་མ། །ཁྲི་ཟ་སྟོང་སྒྲོལ་ཆེན་མོར༴ བྷྱོཿ དམ་ལྡན་རྣམས་ལ་རྟག་འདུ་ཕྱིར། །རྒྱ་མཚོའི་ཀློང་ནས་མེ་མཆེད་ཅིང་། །རླུང་འཚུབས་དབུས་ན་ཆུ་འཐོར་བ། །མུན་པའི་དཀྱིལ་ན་མེ་འབར་ནས། །རེ་ཏི་དཔོན་གཡོག་མཁའ་ལ་འགྲོ། །མཚན་མོ་འཇིགས་རུང་སྦེག་པའི་གཟུགས། །ཀེང་རུས་གར་རྩེའི་དུར་ཁྲོད་རོལ། །དུར་བྱ་ལྡིང་བ་རྣམས་བསྐོར་བའི། །དུར་ཁྲོད་རྣམས་ན་ལས་བརྩོན་ཅིང་། །དགུ་དང་བཅུ་གཅིག་ཉེར་བཞིའི་ཚེས། །གསང་སྔགས་བསྒྲུབ་དང་སྡེ་སྣོད་ཀྱི། །དམ་ཆོས་འཛིན་སྐྱོངས་རྒྱུད་ལ་བསྟོད། །དེ་དག་དུས་བཞིའི་བསྟོད་པའོ། །བྷྱོཿ གྲུ་གསུམ་མཐིང་ནག་ཞལ་གྱི་དཀྱིལ་འཁོར་ནས། །དུར་ཁྲོད་མངའ་མཛད་དཔལ་ལྡན་རེ་མ་ཏི། །འདས་དང་མ་བྱོན་ཀུན་ལ་དབང་བསྒྱུར་ཞིང་། །སྟོང་གསུམ་འཇིག་རྟེན་ཀུན་གྱི་མདངས་འཕྲོག་མ། །ཀུན་ལ་དབང་བསྒྱུར་འཁོར་ལོ་རིན་ཆེན་འདྲ། །བསམ་པའི་དོན་གྲུབ་ནོར་བུ་རིན་ཆེན་འདྲ། །མི་འབྲལ་གཟུགས་མཛེས་བཙུན་མོ་རིན་ཆེན་འདྲ། །བླ་མེད་གྲོགས་ཚོལ་བློན་པོ་རིན་ཆེན་འདྲ། །ཐེག་པའི་མཆོག་ལྡན་གླང་པོ་རིན་ཆེན་འདྲ། །ས་བཅུ་བགྲོད་མཛད་རྟ་མཆོག་རིན་ཆེན་འདྲ། །འཇིག་རྟེན་མགོན་སྐྱབས་དམག་དཔོན་རིན་ཆེན་འདྲ། །མཿ འཇིག་རྟེན་མགོན་པོ་ལྟར་ནི་བསོད་ནམས་ཆེ། །ལྷ་དབང་བརྒྱ་བྱིན་ལྟར་ན་ལོངས་སྤྱོད་ཆེ། །ཨུ་མ་དེ་ཝ་ལྟར་ནི་ཆོ་རིགས་བཙུན། །ཨུ་དུམྺ་ར་ལྟར་ནི་སྐྱེ་བ་དཀོན། །མེ་ཏོག་པདྨ་ལྟར་ནི་བལྟ་བས་མཛེས། །ཕྱག་ན་རྡོ་རྗེ་ལྟར་ནི་མཐུ་སྟོབས་ཆེ། །གཅན་གཟན་སེང་གེ་ལྟར་ན་དཔའ་བརྗིད་ཆེ། །ནམ་མཁའི་ལྷ་ཕྲན་ལྟར་ནི་སྐུ་ཁྲུས་གསོལ། །ནོར་བུ་རིན་ཆེན་ལྟར་ནི་གཙུག་ཏུ་ཁུར། །འཛམ་གླིང་རྒྱལ་པོ་ལྟར་ནི་བདག་བསྟོད་དོ། །གསུམ་པ་རྗེས་ཀྱི་རིམ་པ་ལ། བསྐངས་གསོལ་བསྐུལ་པ་གཏོར་འབུལ་གསུམ། མཐའ་བསྡུས་བཀྲ་ཤིས་རིམ་པ་དང་ལྔ། དང་པོ་ལ་བསྐང་གསོལ་དངོས་དང་། བསྐང་བའི་བཤགས་པའོ། །དང་པོ་ལ། བསྐང་བ་དང་། མཐུན་རྫས་འབུལ་བའོ། །དང་པོ་ནི། ཧཱུྃ་བིགྣན་ཏ་ཀྲིཏ་ཧཱུྃ་ཕཊཿ རཾ་ཡཾ་ཁཾ༴ སྭཱ་བྷཱ་ཝ༴ རྣམས་ཀྱིས་སྦྱངས། སྟོང་པའི་ངང་ལས་བྷྲུཾ་ཡིག་ལས་བྱུང་བ་འཇིགས་རུང་ཐོད་པ་བསོ་ལྕགས་ཀྱི་མཁར། ཞིང་ཆེན་བླ་བྲེ། མི་རོའི་རྒྱལ་མཚན་འཕྱར་བའི་ནང་དུ་དམ་ཉམས་དགྲ་བོ་བསྒྲལ་བའི་མགོ་རུས་དོན་སྣོད་དབང་ལྔ། ནལ་བུའི་སྙིང་། བྱ་ནག །རྟ་ནག །ཁྱི་ནག །གཡག་ནག །མི་ནག་དབང་པོ་ཚངས་ཤིང་རྒྱན་གྱིས་བརྒྱན་པ། སྟག་གཟིགས་གོས་དར་སོགས་ཕྱི་ནང་གསང་བའི་དམ་རྫས་དངོས་འབྱོར་ཡིད་སྤྲུལ་གྱི་བསྐངས་རྫས་ཟག་མེད་ནམ་མཁའི་མཛོད་དུ་འབྱུང་བར་གྱུར་ཅིག །ནམ་མཁའ་མཛོད་ཀྱི་སྔགས་རྒྱས་སྤེལ། རྒྱས་པར་སྤྲོ་ན་འཁྲུགས་བསྐངས་ཆེན་མོ་སྦྱར་ཞིང་། དཀྱུས་ཙམ་དུ་སྙན་པའི་དབྱངས་རོལ་བཅས། བྷྱོཿ ཡོངས་འདུས་ཤིང་གི་གནས་མཆོག་ནས། །རིན་ཆེན་མཛེས་པའི་ཕོ་བྲང་ནས། །བདེ་ལྡན་འཕྲུལ་གྱིས་ལྡིང་ཁང་ནང་། །འགྱིང་བག་ཚུལ་གྱིས་གར་མཛད་མ། །དབང་ཕྱུག་སྲས་མོ་དུང་སྐྱོངས་མ། །གདུང་བས་སྤྱན་འདྲེན་གཤེགས་སུ་གསོལ། །ཆིབས་སུ་བོང་བུ་དམར་གྭ་བཅིབས། །རལ་གྲི་ནཻའུ་ལེ་ཕྱག་ན་བསྣམས། །སྐུ་ལ་དུར་ཁྲོད་ཆས་ཀྱི་བརྒྱན། །དཔལ་ལྡན་ལྷ་མོ་གནས་འདིར་བྱོན། །བྱང་ཤར་ཐོད་པའི་སྐུ་མཁར་ན། །མི་རོ་འབུམ་གྱི་ཁྲི་སྟེང་ནས། །དྲེལ་ནག་རྐང་གསུམ་ཆིབས་སུ་བཅིབས། །སྐུ་མདོག་ནག་མོ་རེ་ལྡེས་བརྒྱན། །ཕྱག་ན་ཁྲམ་བམ་ཤྭ་དྷིལ་བསྣམས། །བདུད་མོ་ཆེན་མོ་གནས་འདིར་གཤེགས། །ཀླུ་རྣམས་དབང་བསྡུད་ཆུ་སྲིན་གདོང་། །བཀའི་བློན་པོ་བ་ལམ་མ། །ལས་ཀྱི་ཕོ་ཉ་ཁྲི་སྨོན་མ། །དཔོན་གཡོག་འཁོར་བཅས་གནས་འདིར་བྱོན། །ༀ་མ་མ་རེ་མ་ཏི་ས་པཱ་རི་ཝ་ར་བཛྲ་ས་མ་ཡ་ཛ་ཛཿ ཧཱུྃ་བྷྱོཿ དཔལ་ལྡན་མ་མོ་དགོངས་སུ་གསོལ། །ཁྱེད་ཀྱི་ཐུགས་དམ་བསྐང་བ་ནི། །ཤ་ཁྲག་སྣ་ཚོགས་གཏོར་མ་ལ། །སྙིང་སྣ་སྣ་ཚོགས་རྒྱལ་མཚན་བཙུགས། །དར་ཟབ་མཛེས་པའི་རྒྱན་གྱིས་བརྒྱན། །ཤ་ཆང་སྒོག་གཙོང་ལ་སོགས་པའི། །མཆོད་རྫས་སྣ་ཚོགས་གཅལ་དུ་བཀྲམ། །ཚིལ་ཆེན་དུད་པ་སྤྲིན་ལྟར་འཁྲིགས། །རཀྟའི་རྒྱ་མཚོའི་རྦ་རླབས་འཁྲུགས། །ཞུན་ཆེན་མར་མེ་ཏ་ལ་ལ། །ཐོད་རྔ་མི་རྐང་དུང་ལ་སོགས། །རོལ་མོ་སྣ་ཚོགས་ཏི་རི་རི། །སྙན་པའི་ཛབ་བགྲང་ཡེ་རེ་རེ། །བསྐང་ངོ་བསྐལ་པའི་ཐུགས་དམ་བསྐང་། །མཿ བདག་གིས་དུས་གསུམ་དབང་གྱུར་པས། །དཔལ་ལྡན་ལྷ་མོ་འཁོར་བཅས་ཀྱིས། །སྐུ་གསུང་ཐུགས་དང་འགལ་བ་རྣམས། །མཆོད་སྦྱིན་འདི་ཡིས་བསྐང་གྱུར་ཅིག །འབོད་པའི་དམ་རྫས་ཡིན་པའི་ཕྱིར། །ཞིང་གི་ལྤགས་པའི་གཡབ་མོ་དང་། །གཡབ་དར་ནག་པོས་ཐུགས་དམ་བསྐང་། །བརྟེན་པའི་དམ་རྫས༴ ཙིཏྟ་སྙིང་གི་ཐུགས་དམ་བསྐང་། །རང་བཞིན་གནས་ནས་སྤྱན་འདྲེན་ཕྱིར། །ཚིལ་ཆེན་གསུར་གྱི་དུད་པ་དང་། །མི་རྐང་གླིང་བུས༴ དམ་ཚིག་གཉེན་པོ་བསྲེ་བའི་ཕྱིར། །བདུད་རྩི་སྨན་གྱིས༴ མགྲིན་པའི་གསང་ནས་སྦྱངས་པའི་ཕྱིར། །དམར་ཆེན་རཀྟས༴ ལྗགས་ཀྱི་དབང་པོ་ཚིམ་བྱའི་ཕྱིར། །ཤ་ཆེན་རུས་པས༴ ཉམས་ཆག་མ་ལུས་གསོ་བའི་ཕྱིར། །ལྷ་ལུག་ནག་པོ་སྤྱི་དཀར་དང་། །བྱ་ནག་སྒོ་ང་དཀར་མོ་ལ། །ཡོན་ཏན་སྣ་ཚོགས་ལྡན་པ་འདིས། །མ་མོ་ཡོངས་ཀྱི༴ རྨ་བྱ་འཇོལ་སྒེག་ལྡན་པ་ལ། །རིན་ཆེན་སྣ་ཚོགས་གཤོག་པ་ཅན། །རིན་ཆེན་འབར་བས་སྤྱི་བོར་བརྒྱན། །མ་ཅིག་གཙོ་མོའི༴ དེ་མོ་ནག་མོ་གསེར་མིག་མ། །ཡིད་བཞིན་ནོར་བུས་སྐུ་ལ་བརྒྱན། །ཡོན་ཏན་དུ་མར་ལྡན་པ་འདིས། །ཁོལ་ལོ་རེ་མཱ་ཏི་ཡི༴ ནལ་ཕྲུག་སྙིང་དང་ཤ་ཁྲག་དང་། །སེང་གེ་སྙིང་དང་བྱ་ནག་སྙིང་། །ནལ་སྤགས་སེང་གེའི་རྒྱལ་མཚན་གྱིས། །རྗེ་བློན་ཡོངས་ཀྱི༴ ཧཱུྃ། བསྐང་ངོ་བསྐལ་པའི་ཐུགས་དམ་བསྐངས། །ཕྱག་ན་རྡོ་རྗེའི་ཐུགས་དམ་བསྐངས། །མ་ཧཱ་དེ་ཝའི༴ ཨུ་མ་དེ་ཝའི༴ དཔལ་ལྡན་ལྷ་མོའི༴ མ་ཧཱ་ཀཱ་ལིའི༴ བྲམ་ཟེ་མཆོག་སྲེད༴ ཨེ་ཀ་ཛ་ཊིའི༴ ཧཱུྃ། བསྐང་ངོ་བསྐལ་པའི༴ གཤིན་རྗེའི་ཆོས་རྒྱལ༴ རེ་ལྡེ་མགོ་ཉག༴ དྲན་པ་དབང་བྱེད༴ བདུད་མོ་རེ་ཏིའི༴ བཀའ་བཞིན་ལས་རྣམས་བསྒྲུབ་པའི་ཕྱིར། །ཆུ་སྲིན་གདོང་གིས༴ དགྲ་བགེགས་རྩད་ནས་གཅོད་པའི༴ བ་ལམ་ནག་མོའི༴ བསྟན་སྲུངས་ཕོ་ཉ་འབྱེད་པའི་ཕྱིར། །ཁྲི་སྨན་ས་ལེའི༴ རྡོ་རྗེ་ཀུན་གྲགས༴ རྡོ་རྗེ་ཀུན་བཟང་༴ རྡོ་རྗེ་ཀུན་གསལ༴ རྡོ་རྗེ་ཡེ་ཤེས༴ རྡོ་རྗེ་འོད་ཆགས༴ རྡོ་རྗེ་གསལ་འཕྲོ༴ རྡོ་རྗེ་གཡུ་སྒྲོན༴ རེ་མ་ཛ་ཡི༴ རེ་མ་ཛུ་ཡི༴ དཀར་མོ་མཛེས་མ༴ སྔོན་མོ་རལ་འཛིང་༴ དམར་མོ་དབང་ཆེན༴ སེར་མོ་མཁའ་བཞད༴ སེང་སྟག་འབྲུག་སྤྱང་༴ ཞི་བའི་ལས་རྣམས་བསྒྲུབ་སླད་དུ། །ཤར་གྱི་མ་དྲུག༴ རྒྱས་པའི་ལས་རྣམས༴ ལྷོ་ཡི་མ་དྲུག༴ དབང་གི་ལས་རྣམས༴ ནུབ་ཀྱི་མ་དྲུག༴ དྲག་པོའི་ལས་རྣམས༴ བྱང་གི་མ་དྲུག༴ ཚད་མེད་བཞི་ཡི་ལས་མཛད་ཕྱིར། །སྒོ་མ་བཞི་ཡི༴ སྨྲ་བོ་ལག་རིང་ལ་སོགས་པ། །སྨྲ་བསྲུང་བརྒྱད༴ དགྲ་བགེགས་ཁྲམ་ལ་འདེབས་པའི་ཕྱིར། །ཁྲམ་ཐོགས་བརྒྱད༴ སྟོང་གསུམ་མ་ལུས་ཉུལ་བའི༴ བོང་ཞོན་བརྒྱད༴ བྱ་བའི་ལས་རྣམས་བསྒྲུབ་པའི་ཕྱིར། །ནམ་གྲུ་བརྒྱད་འཁོར་དུ་ལས་ཀུན་བསྒྲུབ་པའི་ཕྱིར། །སྲིད་པའི་མ་མོ་སྟོང་༴ ཧཱུྃ། ཤ་ཟ་ཁྲག་འཐུང་ལས་ཀྱི་སྲིན་མོའི་ཚོགས། །སྟོང་ཕྲག་དྲུག་ཅུ་རྩ་བཞིའི༴ ཤར་ཕྱོགས་དཀར་མོ་འབུམ་གྱི༴ ལྷོ་ཕྱོགས་སེར་མོ་འབུམ་གྱི༴ ནུབ་ཕྱོགས་དམར་མོ་འབུམ༴ བྱང་ཕྱོགས་ལྗང་མོ༴ མཐའ་བསྐོར་སྨུག་མོ་འབུམ་སྡེའི༴ སྤྲུལ་པའི་མཐིང་ནག་འབུམ་སྡེའི༴ མ་མོ་མ་ཡམས་རྒྱལ་མོའི༴ མ་མོ་བྱེ་བའི་ཚོགས་ཀྱི༴ བདུད་མོ་བྱེ་བའི་ཚོགས༴ ཛམ་གླིང་སྐྱོངས་མ་ཆེན་མོའི་བཀའ་ཉན་པ། །བོད་ཁམས་བརྟེན་མ་བཅུ་གཉིས༴ སྣང་སྲིད་ལྷ་སྲིན་སྡེ་བརྒྱད་ཐུགས་དམ་བསྐངས། །གཉིས་པ་ནི། བྷྱོཿ བདེ་སྟོང་ཀློང་ཡང་གང་ཤར་རོལ་པ་ནི། །ཅིར་ཡང་འཆར་བའི་འགགས་མེད་ཏིང་འཛིན་རྩལ། །སྣ་ཚོགས་སྒྱུ་མའི་བཀོད་པ་ཁ་ཕྱེས་ཏེ། །མ་ཁྱེད་ཐུགས་དམ་བསྐང་བའི་དཔྱིད་དུ་སྤྲོ། །གསར་རྙིང་ཐོད་བརྩེགས་ཀླད་ཞག་ཞལ་བས་མཛེས། །ལྕང་ལོའི་ཁ་བད་རྒྱུ་མིའི་དྲྭ་ཕྱེད་འཕྱང་། །དབུགས་བྲལ་རྒྱལ་མཚན་ཞིང་གི་བླ་བྲེ་དཀྲིགས། །རྔམས་བརྗིད་རོལ་པ་དྲག་པོའི་ཕོ་བྲང་འདིས། །འདོད་ཁམས་དབང་མོ་འཁོར་བཅས་ཐུགས་དམ་བསྐང་། །ལྕང་ལོར་བཅས་པའི་བྷནྫའི་སྣོད་ཡོང་པོར། །ནང་གསང་ཕྱི་ཡི་དགྲ་བགེགས་བསྒྲལ་བ་ཡི། །ཤ་རི་ཁྲག་མཚོ་རུས་པའི་གྲམ་ཁྲོད་འཁྲུགས། །དགུང་སྙེད་བྲག་གི་རི་ཁྲོ ས་པའི་གཏོར་མ་འདིས། །འདོད་ཁམས་དབང་མོ༴ བརྟན་གཡོའི་བཅུད་ལེན་བརྒྱད་སྟོང་ར་ས་ཡན། །རཀྟའི་རྒྱ་མཚོ་ལྦུ་བའི་ཕྲེང་བ་འཕར། །བདུད་རྩིའི་སྐྱེམས་དང་དབང་ལྔའི་མེ་ཏོག་གིས། །འདོད་ཁམས་དབང་མོ༴ གཟུགས་རེག་སྒྲ་སྙན་གསུང་ཞིམ་རོ་མཆོག་བདའ། །ཡིད་བྱུང་སྨིན་ལེགས་བུ་མོ་ཡིད་འཕྲོག་མས། །ལེགས་པར་མཆོད་པའི་ངོ་མཚར་བཀོད་པ་ནི། །རྣམ་མང་མིག་འཕྲུལ་ལྟ་བུར་རྩེ་བ་ཡིས། །འདོད་ཁམས་དབང་མོ༴ འཛམ་གླིང་ཡུད་ཀྱིས་བསྐོར་བའི་ཅང་ཤེས་དང་། །མི་སྡུག་རྭ་ཅན་འགྱིང་བའི་གཡག་ཞོལ་ཆེན། །སྤུ་སྡུག་འཇོམ་ལེགས་གཡང་མོ་མིག་སྨན་མདོག །རྡོ་རྗེའི་མཆུ་སྡེར་དགྲ་བགེགས་ཀླད་འགེམ་བྱས། །འདོད་ཁམས་དབང་མོ༴ རྣམ་བཀྲའི་མདངས་གསལ་རྨ་བྱའི་རྒྱལ་མཚན་དང་། །ལྷབ་ལྷུབ་གཡོ་བའི་དར་གྱི་འཕན་བཟང་པོ། །དབང་པོའི་གཞུ་འདྲ་བ་དན་ལྡ་ལྡིབ་དང་། མི་དབང་ལས་སྐྱེས་རྟེན་གྱི་ཕྲེང་བ་འདིས། །འདོད་ཁམས་དབང་མོ༴ ཕྱི་ནང་གསང་མཆོད་བཀྲ་ཤིས་རྟགས་རྫས་དང་། །སྣ་བདུན་རིན་ཆེན་ངོ་མཚར་ནོར་བུའི་རི། །སྲ་ཞིང་བརྟན་པ་རྡོ་རྗེའི་གོ་དང་ཁྲབ། །ཕས་རྒོལ་དགྲ་འཇོམས་མཚོན་ཆའི་འཁྲུལ་འཁོར་སོགས། །འདོད་ཁམས་དབང་མོ༴ འཇིགས་རུང་མི་ནག་གནས་དུ་འོ་དོད་འབོད། །ཤ་ཟ་མཆེ་གཙིགས་སྲིན་མོ་སྐན་སྒྲ་གཏོགས། །མོན་མོ་དུག་འདེབས་ཅི་སྤྱང་ངུར་སྐད་ལྡིར། །དར་གྱི་ཅོད་པཎ་གཡོ་བའི་ཁྱི་ནག་གིས། །འདོད་ཁམས་དབང་མོ་འཁོར་བཅས་ཐུགས་དམ་བསྐང་། །ལང་ཀའི་ཡུལ་གྱི་མགྲིན་བཟང་དམར་གྭ་ལ། །སྲིན་ཐོད་སྒ་དང་ལྤགས་པས་རབ་གཡོགས་ཤིང་། །གོང་སྨེད་སྲབ་མཐུར་གདུག་པའི་སྦྲུལ་གྱིས་བརྒྱན། །ཛམ་གླིང་ཡུད་ཀྱིས་བསྐོར་བའི་བཞོན་པ་འདིས། །འདོད་ཁམས་དབང་མོ༴ མི་ལྤགས་གོས་དང་རེ་ལྡེའི་སྨད་གཡོགས་དང་། །རྨ་བྱའི་གདུག་དང་ཉི་མ་ཟླ་བའི་བརྒྱན། །འཚུབས་རླུང་གུར་ཁང་ཁྲག་ནག་ཞག་གི་རྫིང་། །སྲ་རྣོ་ཁྲོ་ཆུའི་རལ་གྲི་སྡིག་པ་ཅན། །འདོད་ཁམས་དབང་མོ་འཁོར་བཅས༴ བདུད་ཁྲག་ཐོད་བཀང་ནེའུ་ལེའི་རྐྱལ་པ་དང་། །ནད་ཀྱི་དཔལ་བུ་ཚོན་གྱི་གྲུ་གུ་དང་། །བདུད་ཀྱི་ཁྲམ་ཤིང་ཤྭ་དྷིལ་དཀར་ནག་དང་། །མདའ་དར་མེ་ལོང་དུང་ཤྭས་བརྒྱན་པ་སོགས། །འདོད་ཁམས་དབང་མོ༴ མགོ་རློན་ཁྲག་འཛག་གཡོ་བའི་དོ་ཤལ་དང་། །རཀྟའི་བྱུགས་པ་ཐལ་ཆེན་ཚོམ་བུ་དང་། །གླང་ཆེན་ཀོ་བ་དུག་སྦྲུལ་གདུ་བུ་དང་། །ཕྱག་རྒྱ་ལྔ་དང་སྙན་རྒྱན་སེང་གེ་སྦྲུལ། །འདོད་ཁམས་དབང་མོ༴ བཀོད་ལེགས་གསེར་རི་རོལ་མཚོས་འཁྱུད་པའི་རི། །གླིང་བཞི་གླིང་ཕྲན་ཉི་ཟླ་དཔག་བསམ་ཤིང་། །རིན་ཆེན་གཏེར་བུམ་དགོས་འདོད་འབྱུང་བ་དང་། །ལྷ་མི་ལོངས་སྤྱོད་དཔལ་འབྱོར་ལེགས་སྤྲུལ་པས། །འདོད་ཁམས་དབང་མོ༴ ཆོས་དབྱིངས་བཟང་མོ་ཨེ་ཀ་ཛ་ཊི་མ། །གདུག་པ་འདུལ་ཕྱིར་འདོད་ཁམས་དབང་ཕྱུག་གི། །སྐུར་བཞེངས་ཡེ་ཤེས་མ་མོ་ལྷུན་གྱིས་གྲུབ། །ཡིད་ཆེས་གསོལ་འདེབས་བླ་མེད་རྟེན་མཆོག་འདིས། །འདོད་ཁམས་དབང་མོ༴ དེ་ལྟར་དགྱེས་མཆོད་བསྐངས་ཤིང་བཤགས་པའི་མཐུས། །མ་ཡི་མཐུ་སྟོབས་ཉི་མ་བྱེ་བའི་གཟིས། །བདུད་སྡེའི་ཀུ་མུད་ཟུམ་པས་བསྟན་འཛིན་གྱི། །འདབས་སྟོང་ཉམས་མེད་ཕྱོགས་བརྒྱར་དར་བར་མཛོད། །གཉིས་པ་ནི། ཧཱུྃ། རྡོ་རྗེ་རྒྱལ་པོ་བདེ་བར་གཤེགས་པའི་བཀའ། །གསང་སྔགས་རྣལ་འབྱོར་མཉེས་པའི་གྲུབ་པ་མོ། །ཡོན་ཏན་མང་པོས་འགྲོ་བའི་དོན་མཛད་མ། །སྔོན་གྱི་ལས་ཀྱི་འབྲེལ་བས་བདག་བཟུང་སྟེ། །སྐུ་གསུམ་སྒྱུ་མར་བསྟན་པའི་བཀའ་དྲིན་ཅན། །དུས་ངན་སྙིགས་མའི་དུས་འདིར་བདག་སྐྱེས་ཏེ། །མ་རིག་ཉོན་མོངས་བདག་མེད་དབང་གྱུར་ཏེ། །དམ་ཚིག་ཉམས་ཤིང་ཐུགས་དང་འགལ་གྱུར་པ། །རྡོ་རྗེ་དམ་ལྡན་མ་ལ་བཟོད་པར་གསོལ། །རྒྱས་པར་སྤྲོ་ན་འཁྲུགས་བསྐང་གི་མཇུག་ནས་སྦྱར། བྷྱོཿ ཐོད་པ་དགུ་བརྩེགས་སྲིད་པའི་གཞལ་ཡས་ནས། །དཔལ་ལྡན་ལྷ་མོ་གསན་ཅིང་དགོངས་སུ་གསོལ། །རང་ལ་རིག་པའི་ཡེ་ཤེས་རྒྱུད་ལྡན་ཡང་། །འཕྲལ་བྱུང་ལོག་རྟོག་ཤིན་ཏུ་དབང་ཆེ་བས། །མ་ཡི་ཐུགས་དང་འགལ་བ་བཟོད་པར་གསོལ། །གཤིན་རྗེ་ཡེ་ནས་ལྷ་མོའི་ཁྱོ་ཡིན་ཡང་། །ཕྲག་དོག་དབང་གིས་བགྱིས་པ༴ རླུང་ནག་ཡེ་ནས་ལྷ་མོའི་སྤྲུལ་ཡིན་ཀྱང་། །ལོག་པར་བལྟས་ཏེ་མ་དད༴ བོང་བུ་ཡེ་ནས་ལྷ་མོའི་བཅིབས་ཡིན་ཀྱང་། །མ་བརྟེན་བརྡེག་པར་གྱུར༴ ནལ་མ་ཡེ་ནས་ལྷ་མོའི་གྲོགས་ཡིན་ཡང་། །ལོག་པར་བལྟས་ཏེ་གཤེ་བ༴ ནལ་བུ་ཡེ་ནས་ལྷ་མོའི་སྲས་ཡིན་ཀྱང་། །མ་བརྟེན་བསྐྲད་པར་གྱུར་པ༴ ཡུག་ས་ཡེ་ནས་ལྷ་མོའི་དགྲ་ཡིན་ཀྱང་། །འདོད་ཆགས་དབང་གིས་སྤྱོད་པ༴ ཕག་རྫི་ཡེ་ནས་ལྷ་མོའི་ཁྱོ་ཡིན་ཀྱང་། །མ་བརྟེན་བསྐྲད་པར་གྱུར་པ༴ མགར་བ་ཡེ་ནས་ལྷ་མོའི་དགྲ་ཡིན་ཀྱང་། །མ་བསྐྲད་བརྟེན་པར༴ སློབ་དཔོན་ཐུགས་འགལ་དམ་ཉམས་འདྲེས་པ་སོགས། །བདག་ཅག་མ་རིག་གྱུར་པ༴ བདག་ཅག་ཡེ་ནས་སེར་སྣའི་དབང་གྱུར་པས། །མཆོད་ཚོགས་གཏོར་མ་ཞན་པ༴ ལེ་ལོ་སྙོམས་ལས་དབང་དུ་གྱུར་ལགས་པས། །མཆོད་པ་ལོ་ཟླར་འདས་པ་བཟོད་པར་གསོལ། །གཏོར་མ་དུས་ལས་ཡོལ་ལ༴ གཅོམ་ལ་འཕྱར་བས་མན་ངག་གསང་མ་ཐུབ། །ཟབ་མོའི་ཐུགས་དང་འགལ་བ་བཟོད་པར་གསོལ། །མཿ ཁྱེད་ཀྱི་ཐུགས་དམ་བསྐངས་ནས་ཀྱང་། །བདག་ཅག་འཁོར་དང་བཅས་པ་ཡི། །ལུས་ངག་ཡིད་གསུམ་བྱ་བ་རྣམས། །ཉམས་པར་གྱུར་པ་ཅི་མཆིས་པ། །དམ་ཅན་ཁྱེད་ལ་མཐོལ་ལོ་བཤགས། །ཕྱིན་ཆད་ཉེས་པ་མི་བགྱི་འཚལ། །བསྐང་ངོ་བཤགས་སོ་བཟོད་པར་གསོལ། །ཡི་གེ་བརྒྱ་པ་ལན་བདུན་བཟླ། གཉིས་པ་ནི། བསྐུལ་གཏོར་འབུལ་བཞིན། བྷྱོཿ མ་གཡེལ་མ་གཡེལ་མ་ཅིག་མ། །མ་གཡེལ་མ་གཡེལ་བདུད་མོའི་ཚོགས། །མ་གཡེལ་དེ་ནི་ཕ་བི་ནས། །སྤྲིན་ནག་འཁྲུགས་པའི་ཀློང་རོལ་ནས། །སྲིན་གྱི་རྒྱལ་མོ་སྐུར་བཞེངས་ནས། །བསྐུལ་བའི་གནས་འདིར་བྱོན་ཏུ་གསོལ། །མཿ མ་ཅིག་ལྷ་མོ་དཔལ་འབར་མ། །རྡོ་རྗེ་ལྷ་མོ་རེ་མ་ཏི། །ནད་དང་རིམ་གྱི་མངའ་བདག་མ། །སད་དང་སེར་བའི་སྣ་འདྲེན་མ། །དམ་ཉམས་ཀུན་གྱི་སྲོག་གཅོད་མ། །དམ་ཚིག་ཅན་གྱི་གྲོགས་མཛད་མ། །རྣལ་འབྱོར་ཡོངས་ཀྱི་དགྲ་ལྷ་མོ། །སྐྱེ་འགྲོའི་སྲོག་ལ་མངའ་མཛད་མ། །འབྱུང་པོ་ཡོངས་ཀྱི་རྗེ་མོ་ཁྱོད། །དགྲ་བོའི་དུས་མཐའ་བསྟུང་བྱེད་མ། །ཁམས་གསུམ་ཟ་བའི་ཟ་མཁན་མ། །སྲིད་གསུམ་ཟ་བའི་མཐུ་མོ་ཆེ། །མཿ མཐིང་ནག་གཅེར་བུ་རལ་པ་ཅན། །མིག་ནས་ཁྲག་གི་འཆི་མ་འཛག །ཤངས་ནས་ནད་ཀྱི་རླངས་པ་འཐུལ། །ཆིབས་སུ་དྲིལ་སྔོན་རླུང་གཤོགས་བཅིབས། །རེས་འགའ་ཁྲོས་ནས་ཆལ་ཆོལ་བྱེད། །སྲིད་པའི་བོང་བུ་དམར་ག་ཞོན། །གཡས་ན་གདུག་པའི་རལ་གྲི་འཕྱར། །སྲིད་གསུམ་མ་ལུས་རྩད་ནས་གཅོད། །གཡོན་ན་གདུག་པའི་ཐོད་ཁྲག་ཐོག །སྐྱེ་འགྲོའི་སྲོག་ལ་མངའ་མཛད་མ། །མ་བྷྱོཿ མ་གཡེལ་མ་གཡེལ་དམ་ལ་དགོངས། །མ་ཅིག་བདུད་མོ་རེ་མ་ཏི། །ཕྱག་བརྙན་བདུད་མོ་འབུམ་སྡེ་རྣམས། །བུ་ལ་སྡང་བའི་དགྲ་བྱུང་གི། །མ་ཅིག་ལྷ་མོ་ར་མདའ་ལོག །སྡང་བའི་དགྲ་ལ་ཕྲིན་ལས་མཛོད། །མ་ཅིག་ཐུགས་དམ་དུས་ལ་བབ། །བཅོལ་པའི་ལས་ལ་མཐུ་མ་ཆུང་། །དམ་ཚིག་ཡལ་བར་མ་བཏང་བར། །བུ་ཡི་ཕྲིན་ལས་མྱུར་དུ་བསྒྲུབས། །མ་ཅིག་བདུད་མོ་རེ་མ་ཏི། །ཁྱོད་ཀྱི་ཐུགས་ཀྱི་དཀྱིལ་འཁོར་ནས། །ལས་ཀྱི་ཕོ་ཉ་བདུད་མོ་འབུམ། །ནག་མོ་རྔམ་པའི་ང་རོ་ཅན། །མ་བདུད་ནག་མོ་འཁོར་དང་བཅས། །སྔགས་པས་བོས་ཤིང་བསྐུལ་བའི་ཚེ། །མིག་ནས་ཁྲག་གི་མཆི་མ་འཛག །ཁ་ནས་གདུག་པའི་ངན་སྔགས་སྒྲོགས། །ཞལ་ནས་ཀུས་འདེབས་སྟོང་གསུམ་གང་། །ནད་ཀྱི་ཁ་ཕྲུ་དགྲ་ལ་འདེབས། །མཚན་ཞིང་དཔག་ཚད་བརྒྱད་ཁྲིར་རྒྱུག །བདུད་མོ་ནག་མོ་འཁོར་བཅས་རྣམས། །བདག་གི་ལས་སུ་ཁྱོད་མཆོད་ན། །བདག་ལ་སྡོང་བའི་དགྲ་བོ་འདི། །ལོ་དང་ཟླ་བར་མ་བཏང་བར། །ཞག་དང་ཟ་མར་དུས་མཐའ་བསྟུངས། །སྲོག་རྩ་དམར་པོ་རྒལ་ནས་ཆོད། །སྙིང་ཁྲག་དྲོན་མོ་ཁ་ནས་དྲོངས། །ཀུན་བཞིའི་རྣམ་ཤེས་གཞི་ནས་ཤིགས། །གཟུགས་ཕུང་ཐལ་བ་རྡུལ་དུ་རློག །མ་ལ་བཅོལ་ནས་ཕྲིན་ལས་མཛད། །བུ་ལ་སྡང་བའི་དགྲ་བྱུང་གི། །མ་ཅིག་བུ་ལ་མི་དགོངས་སམ། །མིང་ལ་སྡང་བའི་དགྲ་བྱུང་གིས། །སྲིང་གཅིག་ཕྲིན་ལས་མི་མཛད་དམ། །བདག་ལ་སྡང་བའི་དགྲ་བྱུང་གི། །བྲན་གཅིག་རྗེ་ལ་མི་དགོངས་སམ། །མཿ མ་མོ་ནག་མོ་རེ་མ་ཏི། །ཁྱོད་ཀྱི་ལས་ཀྱི་ཕོ་ཉ་ནི། །བདུད་མོ་ནག་མོ་འབུམ་ཕྲག་འགྱེད། །ནག་མོ་འབུམ་སྡེའི་འཁོར་ཚོགས་རྣམས། །གོས་སུ་མི་ལྤགས་རློན་པ་གྱོན། །ཟས་སུ་མི་ཤ་རྟ་ཤ་ཟ། །སྐོམ་དུ་མི་ཁྲག་རྟ་ཁྲག་འཐུང་། །ལས་སུ་སངས་རྒྱས་བསྟན་པ་སྲུངས། །སྲོག་གཅོད་ལས་ལ་ཤིན་ཏུ་དགྱེས། །ཕྱག་གཡས་རལ་གྲི་འབར་བ་ཡིས། །བསྟན་ལ་སྡང་བྱེད་སྲོག་རྩ་གཅོད། །ཕྱག་གཡས་གདུག་པའི་ཐོད་ཁྲག་ཐོགས། །དགྲ་བོའི་སེམས་ཀྱི་མར་མེ་སོད། །མ་བདུད་ནག་མོའི་འཁོར་ཚོགས་རྣམས། །སྔོན་གྱི་དམ་ཚིག་མ་གཡེལ་བར། །ཤ་ཁྲག་དམར་གཏོར་འདི་བཞེས་ལ། །ཁྱེད་ལ་བཅོལ་པའི་ཕྲིན་ལས་ནི། །སངས་རྒྱས་བསྟན་པ་འཇིག་བྱེད་དང་། །རྡོ་རྗེ་སློབ་དཔོན་སྨོད་བྱེད་དང་། །བསྟན་ལ་སྡང་བྱེད་དགྲ་བོ་འདི། །མ་བདུད་ནག་མོའི་འཁོར་ཚོགས་ཀྱི། །རེངས་པར་ཁུག་ལ་གཟུགས་ལ་ཕོབ། །འདུ་བ་རྣམ་བཞི་ནས་སོགས་ཁོངས་ནས་སློང་། །དྲན་པ་མེད་པར་སྨྱོ་འབོག་བརྒྱལ་དུ་ཆུག །གཞུང་པ་དཀར་པོའི་སྲོག་རྩ་བརྒལ་ནས་ཆོད། །མཁལ་མ་གཡུ་རྒོང་གསང་བའི་གནས་ནས་དྲོངས། །སྲོག་རྩ་དམར་པོ་ལུས་ཀྱི་རྒྱབ་ནས་ཆོད། །ཁ་ནས་ལག་ཆུག་ཁོང་པའི་སྙིང་ནས་དྲོངས། །དྲན་པ་རྣམ་ཤེས་ཙིཏྟའི་དཀྱིལ་ནས་དྲོངས། །ལྷན་ཅིག་སྐྱེས་པའི་ལྷ་དང་ཕྱེས། །མཉམ་པོར་འོང་བའི་བདུད་དང་སྤྲོད། །འགོ་བའི་ལྷ་ལྔའི་ལག་ནས་ཁུག །སྔགས་དང་རྫས་ཀྱི་ནུས་པ་འཕྲོག །ས་ལ་བརྟེན་པའི་བརྟེན་ཕུར་ཕུད། །གཏན་ནས་འཇུ་བའི་འཇུ་ཐག་ཆོད། །གྲི་ཐབས་ཉི་ཤུ་རྩ་ལྔས་སོད། །བདུན་རྒྱུད་ཚུན་ཆད་རྩད་ནས་ཆོད། །གཏན་ནས་བརླག་པའི་ཕྲིན་ལས་ཀྱིས། །མ་ཅིག་ཐུགས་དམ་དུས་ལ་བབ། །བཅོལ་པའི་ཕྲིན་ལས་འགྲུབ་པར་མཛོད། །ཧོ་དགོངས་སུ་གསོལ་ལོ། །སྔོན་རི་བོ་མ་ལ་ཡ་ཡི་རྩེ་མོར་དཔལ་ཕྱག་ན་རྡོ་རྗེར་ཁྱེད་ཀྱི་སྲོག་གི་སྙིང་པོ་ཕུལ་བ་བཞིན། རྩ་བ་དང་རྒྱུད་པར་བཅས་པའི་བླ་མ་དམ་པ་རྣམས་ཀྱི་དམ་ལས་མ་འདའ་བར། བསྟན་པ་ལ་སྡང་བའི་དགྲ་བོ་འདི་ལོ་དང་ཟླ་བར་མ་བཞག །ཞག་དང་ཟ་མར་མ་འགོར། ཚེ་ཕྱི་མ་ལ་དུས་མ་འདེབས། ནམ་མཁའ་སྟོང་པ་ལ་ཚད་མ་བཙུགས། ལས་ཀྱི་རྣམ་པར་སྨིན་པ་ལ་ཁུང་མ་བྱེད་བར་ད་ལྟ་ཉིད་དུ་དུས་ཀྱི་མཐའ་བསྟུང་ཞིག །ཚེ་ཡི་འདུ་བྱེད་བསྐུམ་ཅིག །གཟུགས་ཀྱི་ཕུང་པོ་ཤིག་ཅིག །སྲོག་གི་རྩ་བ་ཅོད་ཅིག །སེམས་ཀྱི་མར་མེ་སོད་ཅིག །ལུས་སེམས་ཁ་སྦྱོར་ཕྱེས་ཤིག །ལྔ་ཕུང་འདུས་གཟུགས་ཕྲོལ་ཅིག །ཚེ་བསོད་དབང་ཐང་སྣུབ་ཅིག །བཀྲག་མདོང་ལོངས་སྤྱོད་ཕྲོག་ཅིག །བསྲུངས་སྐྱོབ། ལྷ་སྲུང་ཕྱེས་ཤིག །དཔོན་གཡོག་ནང་འདྲལ་ཐོངས་ཤིག །ཐལ་བ་རྡུལ་དུ་བརླག་པར་མཛད་དུ་གསོལ། རྒྱུད་ནས་འབྱུང་བའི་དཔོན་གཡོག་གནད་བསྐུལ་བསྔགས། ༀ་རུ་རུ་ཙ་ཧཱུྃཿ ཨ་ཤུག་མེ་བ་དྲི་རུ་ཏྲ་ཁ་ཤ་ལ་ནག་མོ་ཧཱུྃ་རཀྴ་ཙིཏྟ་མ་ཧཱ་ས་མ་ཏི་མ་རུ་ཁ་ཙིཏྟ་ནན། རཀྨོ་ཏི་ཀི་མ་ཛཿ མ་མ་ཏི་ཏི་ཧཱུྃ་བྷྱོཿ མ་མ་ས་མ་ཡ་རེ་མ་ཏི་ལས་ལ་བྷྱོཿབྷྱོཿ ཞེས་བསྐུལ་ལོ། །བསྒྲུབ་པ་དང་འབྲེལ་ན་སྨད་ལས་དྲག་པོའི་རིམ་པ་མཁྱེན་དབང་ནས་བསྒྲུལ་བསྟབས་ཀྱི་བར་དུ་བྱ། གསུམ་པ་ལ་གཏོར་བསྐུལ། གཏོར་འདེགས། གཏོར་བསྟོད། འདོད་གསོལ་རྣམས་སོ། །དང་པོ་ནི། གཏོར་མ་ལ་ཟན་ལིང་ཁྲག་སྐྱུ་འབྲུ་སོགས་འབུལ་ལ། ན་མོ། རྗེ་བཙུན་རྩ་རྒྱུད་ཀྱི་དཔལ་ལྡན་བླ་མ་དམ་པ་མཆོག་གསུམ་བླ་ན་མེད་པའི་བཀའ་བདེན་པ་དང་། མཐུ་ཆེན་དམ་པ་རྡོ་རྗེའི་ཆོས་སྐྱོང་བའི་སྲུང་མའི་དབང་པོ་བཀའ་སྡོད་དྲག་ཤུལ་རྒྱ་མཚོའི་ཚོགས་དང་བཅས་པ་རྣམས་ཀྱིས་བདེན༴ བླ་མེད་མ་མོ་རོལ་པ་ཁྲག་འཐུང་རྦོད་གཏོང་གི་རྒྱལ་མོ་མ་འཁོར་དང་བཅས་པའི་བདེན༴ གསང་སྔགས་དང་རིག་སྔགས་དང་གཟུང་སྔགས་དང་སྙིང་པོ་ཕྱག་རྒྱ་ཏིང་ངེ་འཛིན་གྱི་བདེན་པ། ཆོས་ཉིད་རྣམ་པར་དག་ཅིང་ཆོས་ཅན་བསླུ་བ་མེད་པའི་བདེན་པ༴ བདེན་པ་ཆེན་པོའི་མཐུ་ལ་བསྟེན་ནས། བསྟན་པ་ལ་སྡང་བའི་དགྲ་དང་། བསྟན་འཛིན་ལ་སྡང་བའི་དགྲར་གྱུར་པ་དང་། གནོད་པར་བྱེད་པའི་ཉམས་པའི་བགེགས་ཀྱི་ཚོགས་སྲིད་པ་གསུམ་གྱི་ཁམས་གང་ན་གནས་ཀྱང་སྐད་ཅིག་ཡུད་ཙམ་ལ་འདིར་མཆིས་པར་གྱུར་ཅིག །ཞེས་གཏོར་མ་ལ་བསྟིམ། ནྲི་ཡ་མ་ཛ། ནྲི་བཛྲ་ཨངྐུ་ཤ་ཛཿ ཏྲཾ་ཡམ་ཛཿ ཏྲི་བཛྲ་ཨངྐུ་ཤ་ཛཿ ཛཿཧཱུྃ་བཾ་ཧོ། ཞེས་བཀུག་པའི་གཏོར་མ་ལ་སྤོས་སམ་དཔལ་འབར་བཙུགས་ཏེ། མ་ཧཱ་ཀཱ་ལི་ཨ་བེ་ཤ་ཡ། ཨ་ཏི་མ་ཏི་ས་མ་ཏིཥྛནྟུ། མ་མ་དེ་ཝི་མ་ཧཱ་ཀཱ་ལི་རེ་མ་ཏི་བྷ་ལིང་ཏ་ཁ་ཁ་ཁཱ་ཧི་མ་ཧཱ་པཱུ་ཙ་ཧོ། ཨ་མྲྀ་ཏ་ཁ་ཧི། གསུམ་བདུན་ནམ་ཉེར་གཅིག་གིས་ཕུལ་ལ། དབྱངས་རོལ་བཅས། བྷྱོཿ རྡོ་རྗེ་གདན་གྱི་ཤིང་དྲུང་ནས། །ཕྱོགས་ཕྱོགས་དེ་ནི་ཕ་བེ་ནས། །ཉི་མ་བྱང་ཤར་ཕ་ཀི་ན། །ལྷུན་པོ་ཆུ་གཏེར་གསེར་རི་ཅན། །ཡོངས་འདུས་ཤིང་གི་རྩ་བ་ན། །མཚོ་མུ་ལེ་མཐིང་གི་ནང་ཤེད་ནས། །བྱང་ཐང་དེ་ནི་བྱ་མ་བྱེད། །བྱང་རི་དེ་ནི་གྱ་མ་གྱུ། །བྱང་རྩེ་དེ་ནི་བྱ་མ་བྱུར། །བྱང་ལམ་དེ་ནི་བྲ་མ་བྲེང་། །དེ་འདྲེའི་ཐང་གི་མ་ཟུར་ན། །བྲག་དང་ཆུ་འཐབས་འུ་རུ་རུ། །བྲག་དང་ཆུ་འཐབས་མ་ཟུར་ན། །མཚོ་གཅིག་དེ་ནི་མེ་རེ་རེ། །མུ་ལེ་མཚོ་ཡི་ནང་ཤེད་ནས། །མཐིང་གུར་སྨུག་པོ་ལྡི་རི་རི། །མཐིང་གུར་སྨུག་པོ་ལྡིར་ཙམ་ན། །གསེར་གྱི་ཚུགས་ཤིང་རེངས་སེ་རེང་། །དངུལ་གྱི་ཆོན་ཐག་བྲེངས་སེ་བྲེང་། །དུང་གི་ཆོན་ཕུར་ཁྲ་ལ་ལ། །དེ་འདྲའི་གུར་གྱི་ནང་ཤེད་ན། །མི་རོ་འབུམ་ནི་ཁྲི་རུ་བརྩིགས། །རྟ་རོ་འབུམ་ནི་གཅལ་དུ་བཀྲམ། །མི་ཁྲག་རྟ་ཁྲག་འདམ་རྫབ་གཡོ། །ཞིང་ཆེན་བསྣོལ་བའི་ཁྲི་སྟེང་ན། །མ་ཅིག་ལྷ་མོ་བཞུགས་པ་ནི། །ལྷ་མོ་ཡོངས་ཀྱི་ཀློང་དཀྱིལ་ན། །གཅེར་བུ་འདུག་པས་གཟི་མདངས་ཅན། །གཅིག་པུར་འདུག་པས་འགྱིང་བག་ཅན། །མཿ ཨེ་ཀ་ཛ་ཊི་དེ་ན་བཞུགས། །དཔལ་ལྡན་ལྷ་མོ་དེ་ན་བཞུགས། །བདུད་ཀྱི་ཡུམ་གཅིག་དེ་ན་བཞུགས། །གཤིན་རྗེའི་ལྕམ་གཅིག་དེ་ན་བཞུགས། །མཿ རུ་ལུ་བྷྱོ་ཡི་ཛབྡ་བགྲངས་ཞིང་། །རཀྟའི་རྒྱུན་འབབ་བྲེངས་སེ་བྲེང་། །རཀྟའི་རྒྱུན་འབབ་བྲེང་ཙམ་ན། །མ་ཅིག་ལྷ་མོ་སྐུ་བསྐྱོད་འཚལ། །མ་ཅིག་ལྷ་མོ་སྐུ་བསྐྱོད་ཙ། །ཆིབས་སུ་དྲིལ་རྟ་རྐང་གསུམ་དང་། །རེས་དགའ་སྲིན་གྱི་བོང་བུ་བཅིབས། །གཡུ་མཐུར་སྔོན་པོ་བྲེངས་སེ་བྲེང་། །གསེར་ཁྲབ་སེར་པོ་སི་ལི་ལི། །གསེར་སྒ་ཕུག་པོ་ཝངས་སེ་ཝང་། །ཟ་འོག་དར་སྟན་ལྷུབས་སེ་ལྷུབ། །དར་སྣའི་གློ་ལན་ཆུམས་སེ་ཆུམ། །སྦྲུལ་ནག་གོང་སྨེད་ཁྱུགས་སེ་ཁྱུག །དངུལ་དཀར་ཡོབ་ཆེན་ཁྲ་ལ་ལ། །དྲེལ་རྟའི་རྣ་བ་གཡས་པ་ལ། །དར་ནག་ཅོད་པཎ་པུ་རུ་རུ། །དྲེལ་རྟའི་རྣ་བ་གཡོན་པ་ལ། །ལེ་བརྒན་དར་སྣ་པུ་རུ་རུ། །མཿ མ་ཅིག་ལྷ་མོ་སྐུ་བསྐྱོད་ཚལ། །དྲེལ་སྐད་ལན་གསུམ་སྟེང་དུ་འཚེར། །སྟེང་གི་ལྷ་རྣམས་དབང་དུ་བསྡུད། །དྲེལ་མཇུག་ལན་གསུམ་བར་དུ་གཡུག །བར་གྱི་བཙན་རྣམས་དབང་དུ༴ དྲེལ་རྨིག་ལན་གསུམ་ས་ལ་བརྡུང་། །འོག་གི་ཀླུ་རྣམས་དབང་དུ་བསྡུས། །བྷྱོཿ མ་ཅིག་ལྷ་མོ་སྐུ་བསྐྱོད་འཚལ། །མ་ཅིག་ལྷ་མོ་བསྐྱེད་ཙམ་ན། །བན་ངན་ཕུར་ཁ་མ་ཡིས་བཟློག །བན་ངན་ཟོར་ཁ་མ༴ ལོ་ཀེག་ཟླ་ཀེག༴ བདུད་ཀྱི་ཞགས་པ༴ གཤིན་རྗེའི་ཁྲམ་ཁ༴ ཆགས་ཆེན་ཉམ་ང༴ རླུང་མཁྲིས་བད་ཀན་འདུ་བ་ཡི། །བཞི་བརྒྱ་རྩ་བཞིའི་ནད་རྣམས་ཀྱང་། །མ་ཅིག་ལྷ་མོས་བཟློག་ཏུ་གསོལ། །མཿ འདིར་གཤེགས་རྒྱན་གྱི་གཏོར་མ་བཞེས། །བཅོལ་པའི་ཕྲིན་ལས་འགྲུབ་པར་མཛོད། །གཉིས་པ་ནི། །རྔ་གླིང་རོལ་མོར་བཅས་བསྒྲུབ་ཁང་གི་སྟེང་དུ་གཏོར་མ་འདེགས་ཏེ། བྷྱོཿ ཀཿཐོག་པ་སོགས་རྩ་རྒྱུད་བླ་མའི་གནས། །ཁ་བ་ཅན་འདིར་ཐེག་མཆོག་བསྟན་པའི་གཞི། །གང་གི་བཤད་སྒྲུབ་ཆོས་ཀྱི་དཔལ་འཕེལ་སླད། །ང་རོར་བཅས་ཏེ་ལྷ་མོ་ཁྱོད་ལ་འབོད། །ཅ་ཅོ་ཆེན་མོས་བདུད་ཀྱི་རྣ་བ་དྲལ། །ཆ་ལུགས་སྲིན་མོ་ཁྲོས་པའི་སྐུར་སྟོན་པ། །ཇ་ཆང་ཕུད་དང་གཏོར་མ་འདི་རོལ་ལ། །ཉམས་པའི་དགྲ་བོ་ཆོམ་ལ་འབེབ་པར་མཛོད། །ཏ་ཐཱ་ག་ཏའི་སྤྱན་སྔར་དམ་མནོས་ལྟར། །ཐ་ན་ཉིན་ཞག་གཅིག་ཀྱང་མ་གཡེལ་བར། །ད་ལྟ་བདག་གི་མདུན་འདིར་བཞུགས་པ་བཞིན། །ནམ་ཡང་ཆོས་བྱེད་བུ་ལ་གཡེལ་མེད་སྲུངས། །པ་ར་མི་ཏ་རྒྱ་མཚོའི་རླབས་བསྡུད་ཅིང་། །ཕ་མཐའ་བྲལ་བའི་སྨོན་ལམ་མཐའ་མེད་ཁྱེད། །བ་སུ་ཏ་ཡི་ཞགས་པས་ཉམས་པའི་བགེགས། །མ་རུང་དྲག་ཏུ་འཆིང་ཞིང་ཟ་བར་མཛོད། །ཙ་མུཎྜི་ཡུམ་མིག་སྨན་ལྟར་གནག་ཅིང་། །ཚད་མེད་ཐུགས་ཀྱི་དགོངས་པ་བསྟན་པའི་དཔལ། །ཛམ་གླིང་ཀུན་ཏུ་ཁྱབ་པའི་བཀའ་འཁོར་བཅས། །ཝ་ལེར་འཁྲོལ་བའི་རོལ་གླིང་འདིས་བསྐུལ་ཏེ། །ཞྭ་ཡི་ཏོག་ལྟར་བཀུར་ནས་རྟེན་འདི་ལ། །ཟད་མེད་སྤྲུལ་པའི་བཀོད་པ་དང་བཅས་བཞུགས། །འ་ཅག་བསྟན་པར་དཀར་རྣམས་རྟག་ཏུ་སྲུངས། །ཡ་བྲལ་ལུང་རྟོགས་འཛིན་རྣམས་ཟ་སྐལ་ལགས། །རབ་འབར་མེ་རིའི་ལྡིང་ཁང་འཚུབས་ལུང་བཅས། །ལ་ལུང་མེད་པའི་གཙུག་ལག་ཁང་འགྲིམ་ནས། །ཤ་སཱ་ན་སྤེལ་རྒྱུད་སྡེའི་བསྟན་པའི་མགོན། །ས་ཆེན་གང་བའི་སྤྲུལ་པའི་གཏོར་མ་བཞེས། །ཧ་ཧ་རྒྱལ་རྔ་རྟག་ཏུ་བརྡུང་བ་ཡིས། །ཨ་ཏི་རྫོགས་ཆེན་བསྟན་པའི་བྱ་ར་མོས། །ཧི་ཧིའི་བཞད་སྒྲ་འབྱིན་པ་དང་བཅས་ཏེ། །དམ་ཚིག་གཏོར་མའི་སྟེགས་འདིར་གཤེགས་སུ་གསོལ། །གསུམ་པ་ནི། བྲམ་ཟེ་མཆོག་སྲེད་ཀྱིས་མཛད་པའི་ཏིལ་མར་མའམ། ཡང་ན། མ་ནོ་བཛྲ་མ་ཧཱ་ཀཱ་ལི་རེ་མ་ཏི་ཡེ། །གདོང་བཞི་དབང་པོ་འཇུག་སྲེད་ཉེ་དབང་དྲག་པོ་རྣམས་ཀྱང་ཁྱེད་བསྔགས་ཕྱིར། །འཆི་མེད་ན་ཆུང་ཚོགས་ཀྱིས་བསྐོར་བ་ལེགས་བྲིས་དགའ་བའི་ཚལ་དུ་རྩེན། །ཡོངས་འདུས་རྒྱལ་པོའི་ལྗོན་པའི་རྩ་བར་མཐུང་ཤུན་འཁྲིགས་པའི་ཆུ་གཏེར་དབུས། །དཔལ་ལྡན་རླུང་ཤུགས་དྲིལ་བུའི་སྒྲ་སྒྲོག་མི་རོ་རེངས་ཟ་མཁའ་ལ་འགྲོ། །རླུང་འཚུབས་བུ་མོ་རླུང་གོས་ཀླུབས་པ་རླུང་གི་ཕྲེང་བར་རོལ་པ་མོ། །ལྷོ་ཕྱོགས་རྒྱ་མཚོར་ཆོས་རྒྱལ་གཤིན་རྗེའི་སྲིང་གཅིག་འགྲོ་ཀུན་སྲོག་བདག་མོ། །ས་བརྒྱད་བརྙེས་ཀྱང་བུད་མེད་ལུས་ལ་བསྟན་པ་སྲུང་བའི་གཡར་དམ་ཅན། །བསྔགས་འོས་ཀུན་གྱིས་དཔལ་འཛིན་ཡིད་བཞིན་ཡ་མཚན་རྨད་བྱུང་འཕགས་མ་ནི། །ཀཱ་ལི་དེ་ཝི་ཝ་ཡ་ཝེ་དང་འབར་མ་བྱིན་ཟ་འཐབ་པའི་དབུས། །འཇིགས་རུང་འཇིགས་པར་སྟོན་ཀྱང་འཇིགས་པ་སེལ་མཛད་བསམ་པའི་དོམ་གྲུབ་མ། །ཁྱོད་སྐུ་མི་སྡུག་ཁྲོ་ཡང་ཁྱོད་ཐུགས་དེ་ནི་འགྲོ་ལ་རྟག་ཏུ་བྱམས། །བསྟན་དགྲ་རྒྱུན་དུ་བསྒྲལ་ཡང་ངན་སོང་གནས་ནས་དེ་དག་སྐྱོབས་མཛད་ཕྱིར། །སྲིན་པོའི་ཆུང་མ་ཡིན་མོད་མཁའ་འགྲོ་ཀུན་གྱི་གཙོ་མོར་བསྔགས་པའི་ཡུལ། །འཇིག་རྟེན་ཚུལ་དུ་སྟོན་ཀྱང་འཇིག་རྟེན་པ་ལས་མངོན་པར་འཕགས་པ་ནི། །ཤཱཀྱ་སེང་གེར་སེམས་བསྐྱེད་རྡོ་རྗེ་འཛིན་པའི་ཁོལ་མོ་མཆོག་སྲེད་གྲོགས། །རྣལ་འབྱོར་མ་སྟེ་བསྟན་དགྲའི་ཟ་བྱེད་འཁོར་བ་རྣམས་ལ་འདྲེན་པ་མོ། །བདུད་བརྡུང་བྱུག་པ་བགེགས་འཇོམས་རལ་གྲི་དགྲ་འཇོམས་ཐོ་བ་ཉིད་ཀྱང་ཡིན། །དུར་ཁྲོད་རྣམས་ཉུལ་ཉིན་པར་ཐལ་ཆེན་སྔོ་སྐྱ་བྱུགས་པའི་ཁ་དོག་ཅན། །མཚན་མོ་ནག་མོ་ག་ཤལ་ཆུ་གཉེར་ལྟར་འཁྲུགས་འོ་འཛིན་ཀུན་ཏུ་གཡོ། །སྨིན་མའི་མེ་རྩེ་དུམ་དུམ་ཆད་པའི་ཚ་དབལ་མདའ་ལྔ་པ་ལ་སྟེར། །སྲིན་གྱི་ཀླད་ཕོར་ཁྲག་ཞག་ཞོས་དཀར་འཐུང་བ་འདི་ན་རྒྱུ་བ་དེ། །ཆུ་སྲིན་ཀེམས་རེད་མར་བཅས་དམ་ཚིག་དཀྱིལ་འཁོར་སྟེགས་ལ་གཤེགས་ནས་ཀྱང་། །ལྕང་ལོའི་ཞགས་གཡོ་མི་མགོར་ཤ་ལྔ་གཏོར་མའི་རྫས་ལ་མགུར་སྟོན་ཁྱོད། །གང་ཞིག་འདི་ན་སྲིད་གསུམ་དབང་མོར་ཐུབ་པའི་བསྟན་ཕྱིར་བདག་སྙིང་ནས། །ཨངྐུ་ཤས་བཀུག་ཨ་ལ་ལ་ཧོས་ཏི་ར་པདྨར་བཞུགས་གསོལ་ཏེ། །དྲན་པ་ལ་ནི་དོན་རྣམས་ཀུན་བསྒྲུབ་བརླབས་ཆེན་རྡོ་རྗེ་ཌཱཀྐི་མ། །ཁ་ཁ་ཀམ་ཀས་སྒྲས་འབྱིན་དུར་གླིང་དག་ཏུ་ཁྱབ་པར་དུར་བདག་མོ། །སྲིད་པའི་མིག་བསྒྱུར་ཅིར་ཡང་སྟོན་པ་བདེ་སྐྱོང་མ་ཧཱ་མུ་དྲ་ལ། །ཡིད་ནི་མངོན་པར་རོལ་པས་དད་པའི་འདོད་དོན་གསོལ་ལ་བདག་ཕྱོགས་ཏེ། །བདག་ཡིད་ཤིང་རྟ་ཆོས་ནོར་ཐར་པའི་རེ་བ་ནོར་བུས་ཕྱུར་བུར་བཀང་། །ཛམྦུ་གསེར་གྱི་སྙེ་མས་ཁྱབ་འདིར་བསྟན་འདི་ཕྱོགས་ལས་རྣམ་རྒྱལ་བ། །ཇི་སྲིད་དྲན་པ་དེ་སྲིད་རྟག་ཏུ་དགེ་ལེགས་བསམ་པ་ཀུན་འགྲུབ་མཛོད། །འདི་ལ་མ་ཆེན་དགྱེས་པའི་མཚན་མ་ཡང་པ་དག་ཡོད་དོ། །བཞི་པ་ནི། དམ་རྫས་བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བདག་དང་བདག་གིས་འཁོར་རྣམས་ལ། །བདུད་དང་དགྲ་བགེགས་ཐམས་ཅད་ཞི་བ་དང་། །མི་མཐུན་གནོད་པའི་ཕྱོགས་དང་བྲལ་བ་དང་། །དཔལ་དང་འབྱོར་པ་ཚེ་དང་གཟི་མདངས་དང་། །འཁོར་དང་ལོངས་སྤྱོད་གྲགས་པ་རྒྱས་པར་མཛོད། །བཀའ་དང་བསྟན་པ་བསྟན་འཛིན་ཀུན་སྲུངས་ཤིག །ཁྱེད་ལ་བདག་གིས་འདོད་པ་གསོལ་བ་ནི། །ཤཱཀྱའི་བསྟན་ལ་རྣམ་དག་ཚུལ་ཁྲིམས་ཀྱི། །འབྱུང་གནས་དགེ་སློང་དགེ་འདུན་འདུས་པའི་སྡེར། །བདེ་གཤེགས་བསྟན་པ་ཕྱོགས་བཅུར་རྒྱས་པ་དང་། །ལྷག་པར་གསང་ཆེན་རྡོ་རྗེ་ཐེག་པ་ཡི། །བསྟན་པའི་སྙིང་པོ་རྒྱུད་སྡེ་ཆེན་པོ་དྲུག །དེ་ལས་དཔལ་ལྡན་རྒྱུད་རྒྱལ་འཇིག་རྟེན་གྱི། །རིན་ཆེན་གཅིག་པུ་གསང་བ་སྙིང་པོ་ཡི། །རིག་འཛིན་དགེ་འདུན་རྨད་བྱུང་འདུས་པའི་ཆུས། །རིམ་གཉིས་ལྷུར་ལེན་བར་ཆད་མེད་པ་ཡིས། །མཐུན་པའི་བཀའ་ཐུབ་དགེ་བ་རྒྱས་པ་དང་། །ཁྲིམས་བཟང་ཉམས་མེད་འཕེལ་བར་མཛད་དུ་གསོལ། །རི་སུལ་ཤིན་ཏུ་རྣལ་འབྱོར་སྒོམ་པའི་སྡེ། །གཡོ་མེད་བསམ་གཏན་གྲུབ་པས་མཛེས་པ་དང་། །ནགས་སུ་ཞི་བ་ངེས་པར་འབྱུང་བའི་སྡེས། །འདོད་ཆུང་ཆོག་ཤེས་སྦྱངས་བརྩོན་དཔལ་གྱིས་དུལ། །གཙུག་ལག་ཁང་རྣམས་ལུང་དང་རིགས་པ་ལ། །ཁ་ཏོན་ཀློག་པས་རྟག་ཏུ་རྒྱས་པ་ཡིས། །ངུར་སྨྲིག་རྒྱལ་མཚན་ཐོགས་པའི་རྒྱལ་བའི་འཁོར། །དགེ་འདུན་བསླབ་སྡེ་འཕེལ་བར་མཛད་དུ་གསོལ། །ཞེས་རོལ་མོར་བཅས་ཏེ་གཞུང་ནས་དུར་ཁྲོད། རི་རྩེ་སོགས་གསུངས་པའམ། གཙང་ས་སྒྲུབ་ཁང་སྟེང་དུ་རྡོ་རྗེ་ཤུགས་ཀྱི་རྒྱས་བཞག །བཞི་པ་ནི། ༀ་མ་ཧཱ་ཀཱ་ལི་ཤྲི་རེ་མ་ཏི་ས་པཱ་རི་ཝ་ར་བཛྲ་ཨརྒྷཾ་ནས། ཤབྟའི་བར་གྱིས་མཆོད། མ་ཧཱ་པཉྩ་ཨ་མྲྀ་ཏ་ཁ་ཧི། མ་ཧ་རཀྟ་ཁ་ཧཱིས་སྨན་རཀ་བྲན། མ་བྷྱོཿཛ་ལས་བྱུང་བ་མ་མོའི་ཚོགས། །ཅེ་སྤྱང་བོང་དྲེལ་འབྱུང་བ་བཞི་ལ་ཆིབ། །དཔལ་ལྡན་ལྷ་མོ་རེ་ཏི་མཆེད་བཞི་སོགས། །འཁོར་བཅས་མ་མོའི་ཚོགས་ལ་ཕྱག་འཚལ་བསྟོད། །ཅེས་བསྟོད། མ་རྙེས་ཡོངས་སུ་སོགས་དང་ཡི་གེ་བརྒྱ་པ་ལན་གསུམ་གྱིས་བཤགས་ཚར་ནས་ཡེ་ཤེས་པ་གཤེགས་མི་དགོས་གསུངས། འཁོར་རྣམས་སྐེམ་མ་དང་བཅས་པ་མ་མོའི་ཐུགས་ཀར་བསྡུ། བོང་བུ་མ་མོ་ལ་ཐིམ། མ་མོ་བདག་གི་ཐུགས་ཀར་ཐིམ། གཞལ་ཡས་ཁང་དང་མེ་རླུང་མི་དམིགས་པར་གྱུར་པའི་ངང་མཉམ་པར་བཞག་གོ། །ལྔ་པ་བཀྲ་ཤིས་ནི། ཀུན་བཟང་ཤཀ་ཐུབ་ལག་ན་རྡོ་རྗེ་ཅན། །དྷ་ན་སང་ཀྲི་སློབ་དཔོན་པད་མ་སོགས། །དྲན་པས་སྲིད་ཞིའི་གདུང་སེལ་ཡིད་བཞིན་ནོར། །རབ་འབྱམས་རྩ་རྒྱུད་བླ་མའི་བཀྲ་ཤིས་ཤོག །མཆོག་ཐུན་དངོས་གྲུབ་དཔལ་འབར་ཧེ་རུ་ཀཿ བདུད་དཔུང་བྱེ་བའི་མུན་ནག་གཏོས་ཆེན་པོ། །རྣམ་པར་འཐགས་མཛད་བཅོམ་ལྡན་ཡི་དམ་ལྷ། །ཞི་ཁྲོ་དཀྱིལ་འཁོར་འཁོར་ལོའི་བཀྲ་ཤིས་ཤོག །དཔལ་ལྡན་དགྱེས་མཛད་བདེ་ཆེན་ཤེར་ཕྱིན་མོ། །ཆོས་ཉིད་རྣམ་དག་ངང་ལས་མ་གཡོས་ཀྱང་། །སྐྱེ་མེད་དོན་གྱི་མ་ཆེན་སྐུར་སྟོན་པ། །ཡུམ་གྱུར་རྡོ་རྗེ་མཁའ་འགྲོའིབཀྲ་ཤིས་ཤོག །གཡར་དམ་དབང་གིས་བདེར་གཤེགས་བསྟན་པ་སྲུངས། །ཐུགས་རྗེའི་དབང་གིས་མཐུ་ཆེན་ཁྲོས་པར་བསྟོན། །དམ་ཚིག་དབང་གིས་སྒྲུབ་པ་པོ་ཡི་མགོན། །བརྒྱུད་གསུམ་དྲེགས་པའི་ཚོགས་ཀྱི་བཀྲ་ཤིས་ཤོག །ཅེས་མེ་ཏོག་ཆར་དུ་སྙིལ་བས་དགེ་ལེགས་སུ་བྱའོ། །དེ་ལྟར་ཐུབ་བསྟན་རིན་པོ་ཆེ་ཁོ་ན་བསམ་པའི་སྒྲུབ་པོ་དམ་ལྡན་རང་འདོད་ཀྱིས་ཕྱིར་ཆོས་སྐྱོངས་བསྙེན་པ་མ་ཡིན་པར། བསམ་པ་བཟང་པོས་ཆོས་ཐམས་ཅད་བྱང་ཆུབ་སེམས་ཀྱི་དཀྱིལ་འཁོར་དུ་རྟོགས་པའི་ལྟ་བ་ལ་བསྒོམ་པས་སྣང་སྲིད་མ་མོའི་སྲོག་ནས་དྲངས་ཏེ། ཕྲིན་ལས་རྣམ་པ་བཞིའི་རོལ་པ་ཅི་བསྒྲུབ་ཀྱང་བསླུ་བ་མེད་པ་རྡོ་རྗེའི་གསུང་གི་ཚད་མ་ཡིན་པས། བསྙེན་པ་རྟགས་མཚན་དུས་ཀྱིས་དྲངས་པ་དང་། བསྒྲུབ་པ་ལས་སྦྱོར་གྱི་གནད་ཁེལ་བའི་ལག་ལེན་མན་ངག་གི་ཡི་གེ་བཞིན་དུ་ཁོང་དུ་ཆུད་པས། སེམས་ཅན་གྱི་དོན་དུ་རྣམ་པ་ཐམས་ཅད་མཁྱེན་པ་བསྒྲུབ་པའི་ལམ་གྱི་བར་ཆད་སེལ་བའི་དགོངས་པ་ཁྱད་པར་བ་ལ། ཐར་འདོད་དག་གིས་སེམས་གཞོལ་བར་བྱ་བ་ནི་ཆེད་དུ་བྱ་བའི་དོན་འབྲས་ཡིན་ནོ་ཞེས་འདོམ་མོ། །གྲུབ་མཆོག་དུ་མས་བསྟེན་པའི་བཀའ་སྲུང་འདིས། མཆོད་ཆོག་ལེགས་པར་བྲིས་པའི་དགེ་བ་དེས། །མཐའ་ཡས་འགྲོ་ཀུན་བྱང་ཆུབ་སྒྲུབ་པ་ལ། །བར་ཆད་གདུག་པ་མཐའ་དག་གཞོམ་གྱུར་ཅིག །ཅེས་པའང་བླ་མེད་མ་མོའི་རྒྱུད་དང་རྒྱ་གཞུང་རྣམས་དང་འཇམ་པའི་དབྱངས་༧ཤར་ཀཿཐོག་པ་ཆེན་པོའི་སྙན་བརྒྱུད་མན་ངག་གི་གཞུང་བཟང་རྣམས་ལས་ཇི་ལྟར་འབྱུང་བ་བཞིན་དུ་འགལ་བ་མེད་པའི་ཡི་གེ་འདི་ལྟ་བུ་བྱེད་དུ་རུང་བའི་ལྟས་དང་མཚན་མ་བཟང་པོའང་མཐོང་ཞིང་ཉེ་བར་གནས་པའི་དགེ་སློང་བློ་བཟང་ཆོས་དབྱིངས་ཀྱིས་ནན་དུ་བསྐུལ་ངོར། ཤཱཀྱའི་དགེ་སློང་རྡོ་རྗེ་འཛིན་པ་སི་ཏུ་པ་ཆོས་ཀྱི་རྒྱ་མཚོའི་སྤྲིན་གྱིས་བཀོད་པ་གསང་ཆེན་རྡོ་རྗེ་ཐེག་པའི་རྒྱུད་སྡེའི་བསྟན་པ་རིན་པོ་ཆེ་འཇིག་རྟེན་གྱི་ཁམས་ཀུན་ཏུ་འཕེལ་བའི་རྒྱུར་གྱུར་ཅིག་གུ། །དགེའོ། །དགེའོ། །དགེའོ།། །།
བསྐང་རྫས་བྱིན་རླབས།
༈ བསྐང་རྫས་བྱིན་བརླབས་པ་ནི། ཨཱོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨཱོཾ་སྭཱ་བྷཱ་ཝ་ཤུདྡྷ་སརྦ་དྷརྨ་སྭཱ་བྷ་ཝ་ཤུདྡྷོ྅་ཧཾཿ སྟོང་པའི་ངང་ལས་གནས་ཁང་དྲག་པོའི་གཞལ་ཡས་ཁང་པ༔ མི་མགོ་སྐོམ་པོའི་རྩིག་པ་དང་། རྒྱུ་མའི་དྲྭ་ཕྱེད་འཕྱང་བ། བསེ་སྨུག་པོའི་སྒོ་ཅན༔ སྟེང་དུ་ཞིང་ཆེན་གྱི་བླ་རེ་དང་། མི་རོའི་རྒྱལ་མཚན་ཕྱར་བ་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨཱ་ལས་བྱུང་བའི་ཐོད་པ་དཀར་པོ་ཡངས་ཤིང་རྒྱ་ཆེ་བ་ཕྱི་ནང་གསང་གསུམ་གྱིས་དགྲ་བགེགས་ཐམས་ཅད་བཀུག་ནས་བསྒྲལ་བས་ཤ་ཁྲག་རུས་གསུམ་གྱི་གཏོར་མ་རི་རབ་དང་རྒྱ་མཚོ་མཉམ་པ། ཁྲག་གི་མཆོད་ཡོན། དབང་པོ་ལྔའི་མེ་ཏོག །ཚིལ་ཆེན་གྱི་བདུག་སྤོས། ཞུན་ཆེན་གྱི་མར་མེ། མཁྲིས་པའི་དྲི་ཆབ། ཤ་རུས་ཀྱི་ཞལ་ཟས་རྐང་གླིང་ཐོད་རྔ་སོགས་རོལ་མོའི་བྱེ་བྲག་རྣམས་དང་། གཞན་ཡང་ཧཱུྃ་མཐིང་ནག་རེ་རེ་ལས་བྱུང་བའི་བྱ་ནག༔ རྟ་ནག །གཡག་ནག །ལུག་ནག །ཁྱི་ནག །མི་ནག་རྣམས་དབང་པོ་ཚངས་ཤིང་རྒྱན་གྱི་བརྒྱན་པ། སྟག་གཟིག་གོ་ཁྲབ་གོས་དར་ལ་སོགས། ཕྱི་ནང་གི་དམ་རྫས་དངོས་སུ་འབྱོར་པ་དང་ཡིད་ཀྱི་སྤྲུལ་པ་འདི། རྡོ་རྗེ་ནག་པོ་ལྕམ་དྲལ་ལ་སོགས་དམ་ཅན་རྒྱ་མཚོ་མཉེས་པར་བྱེད་པའི་མཆོད་པའི་སྤྲིན་ཕུང་ནམ་མཁའི་ཁམས་གང་བར་གྱུར། ༀ་སརྦ་བྷི་པཱུ་ར་པཱུ་ར་སུ་ར་སུ་ར། ཨ་བརྟ་ཡ་ཨ་བརྟ་ཡ་ཧོ། བཛྲ་སྥ་ར་ཎ་ཁཾ་སྭཱ་ཧཱ།། །།
མ་མོའི་སྤྱི་བསྐང་རིན་ཆེན་དཔུང་པ།
མ་མོའི་སྤྱི་བསྐང་རིན་ཆེན་སྤུངས་པ་བཞུགས་སོ། །བསྐང་གསོའི་ཆོ་ག་འདི། མཆོག་ཆེན་བསྒྲལ་བའི་དུས་སམ། མ་མོའི་མཚན་ལྟས་ངན་པའི་དུས་སམ། ལས་མི་དགེ་བ་འབྱུང་བའི་དུས་སམ། རྒྱུ་བསྒྲལ་བའི་དུས་སམ། དམ་རྫས་ཚོད་དམ། དྲག་པོའི་ལས་ལ་སྦྱར་བའི་དུས་སུ། སྔོན་དུ་བསྐང་བཤགས་ཀྱི་ཆོ་ག་འདི་བྱའོ། །འདི་ནི་ལས་ཐམས་ཅད་གང་ལ་གཅེས། རྣལ་འབྱོར་སྒྲུབ་པ་ལ་བརྩོན་པ་རྣམས་ཀྱི་ཤིན་ཏུ་བརྩོན་པར་བྱའོ། །མཁའ་འགྲོ་མ་རྣམས་ཀྱི་བསྐང་བཤགས་ཀྱི་ཆོ་ག་རྫོགས་པ་ཡོད། ཧཱུྃ། དུར་ཁྲོད་ཆེན་པོའི་ཀློང་དཀྱིལ་ནས། །བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ །མཐིང་ནག་འབར་བ་འཇིགས་པའི་ཆ་ལུགས་ཅན། །གཡས་དཀར་གཡོན་དམར་དབུས་མཐིང་ཞལ། །སྤྱན་དགུ་ཕྱག་དྲུག་ཞལ་བཞི་བསྒྲད། །སྨ་ར་སྨིན་མ་དབུ་སྐྲ་གྱེན་འབྲར་ཁམས། །གླང་ཆེན་ཞིང་སྟག་ཐོད་སྦྲུལ་བརྒྱན། །ཁྲག་ཞག་ཐལ་བའི་མཚན་མས་བཏབ། །ཐུགས་རྗེས་དབྱིངས་ལས་རོལ་པར་མཛད། །གཙོ་མཆོག་འབར་བའི་ཐུགས་དམ་བསྐང་། །གཙོ་མཆོག་འབར་བའི་ཐུགས་དམ་བསྐང་བ་ནི། །ལྕང་ལོར་བཅས་པའི་པདྨ་བྷན་དྷ་ལ། །ཚེ་འཛིན་མཆོག་གི་མར་མེ་དམ་པས་སྐང་། །པདྨ་ཟིལ་ཏིག་དྲི་དང་རཀྟ་ཁྲག །རྡོ་རྗེ་ལས་ཀྱི་ཆུ་དང་པན་ཙ་ཨ་མྲྀར་ཏ། །ཤ་ཆེན་མཁའ་ལྡིང་ཤེལ་སྒོང་གཟུགས་ཀྱིས་སྐོང་། །སྨན་ཆེན་ལྔ་དང་ཚེ་འཛིན་བྱི་མ་དེར། །སྦྱོར་དང་སྒྲོལ་བའི་བདུད་རྩི་མཆོག་ཉིད་འདིས། །དཔལ་ཆེན་འབར་བའི་ཐུགས་དམ་བསྐང་གྱུར་ཅིག །ཐུགས་དམ་བསྐང་བའི་བྱིན་རླབས་ཀྱིས། །རྣལ་འབྱོར་བདག་ལ་དངོས་གྲུབ་སྩོལ། །སྲིད་པའི་མ་མོ་དབང་དུ་བསྡུས། །དམིགས་པའི་དགྲ་བོ་མྱུར་དུ་སྒྲོལ། །འདི་ནས་མར་ཡུམ་ཆེན་མོ་འདོད་པའི་དབང་མོ་ཆེ་མུ་ཁ་ལེ་ལ་སོགས་པའི་དབྱིངས་ཀྱི་ཡུམ་དྲུག་གི་བསྐང་བ་འབྱུང་ངོ་། །བྷྱོ། གཙོ་མོ་ཡུམ་གྱི་མངོན་སྤྱོད་མ། །སྤྱི་གཙུག་གཡུ་ཡི་རྡོ་རྗེ་རྩེ་དགུ་འབར། །གཡུའི་རལ་པ་ཁམས་གསུམ་ཁྱབས། །གཡས་ཀྱི་ཕྱག་ན་རིགས་ལྔའི་སངས་རྒྱས་བསྣམས། །གཡོན་གྱི་ཕྱག་ན་བདུད་རྩི་ལོངས་སྤྱོད་འབྱེད། །ཡེ་ཤེས་རོལ་པའི་སྤྱན་གྱིས་ཀུན་དུ་གཟིགས། །ཁམས་གསུམ་སྲིད་གསུམ་ཀུན་ལ་མངའ་མཛད་མ། །གཙོ་མོ་ཡུམ་ཆེན་ཐུགས་དམ་བསྐང་། །ཧཱུྃ། ཆོས་ཀྱི་དབྱིངས་ཕྱུག་ཆེན་མོ་ནི། །ནམ་མཁའ་རིགས་ཀྱི་བདག་མོ་ནི། །མཁའ་འགྲོ་ཆེན་མོ་རྡོ་རྗེའི་གདོང་། །རྟག་པའི་རྒྱལ་མོ་བཀྲག་གསལ་མཉམ། །ན་བཟའ་སེར་པོ་གཙོ་མ་གསོལ། །ཕྱག་ན་རྒྱལ་མཚན་སྤུ་གྲི་བསྣམས། །ནམ་མཁའ་སྟོང་ལ་དབང་བསྒྱུར་ཞིང་། །འགྲོ་བའི་བཀྲག་ལ་མངའ་མཛད་མ། །མཁའ་འགྲོ་བཀྲག་གསལ་ཐུགས་དམ་བསྐང་། །ཧཱུྃ། རྡོ་རྗེ་དབྱིངས་ཕྱུག་ཆེན་མོ་ནི། །ཤར་ཕྱོགས་ཁམས་ཀྱི་མངའ་བདག་སྟེ། །མཁའ་འགྲོ་ཆེན་མོ་སེང་གེའི་གདོང་། །རྟག་པའི་རྒྱལ་མོ་རྣམ་སྣང་གསལ། །ན་བཟའ་དཀར་མོ་ཤེལ་ལྟར་གསལ། །ཕྱག་ན་དགྲ་སྟ་གཏུན་ཤིང་བསྣམས། །འབྱུང་བ་ས་ལ་དབང་བསྒྱུར་ཞིང་། །འགྲོ་བའི་ཤ་ལ་མངའ་མཛད་མ། །མཁའ་འགྲོ་རྣམ་སྣང་ཐུགས་དམ་སྐང་། །ཧཱུྃ། རིན་ཆེན་དབྱིངས་ཕྱུག་ཆེན་མོ་ནི། །ལྷོ་ཕྱོགས་ཁམས་ཀྱི་མངའ་བདག་སྟེ། །མཁའ་འགྲོ་ཆེན་མོ་བན་གླང་གདོང་། །རྟག་པའི་རྒྱལ་མོ་འོད་གསལ་འབར། །ན་བཟའ་སྔོན་པོ་བཻཌཱུརྱ། །ཕྱག་ན་མེ་དཔུང་དབྱུག་ཏོ་བསྣམས། །འབྱུང་བ་མེ་ལ་དབང་བསྒྱུར་ཞིང་། །འགྲོ་བའི་དྲོད་ལ་མངའ་མཛད་མ། །མཁའ་འགྲོ་འོད་གསལ་ཐུགས་དམ་སྐང་། །ཧཱུྃ། པདྨ་དབྱིངས་ཕྱུག་ཆེན་མོ་ནི། །ནུབ་ཕྱོགས་ཁམས་ཀྱི་མངའ་བདག་སྟེ། །མཁའ་འགྲོ་ཆེན་མོ་ཀང་ཀའི་གདོང་། །རྟག་པའི་རྒྱལ་མོ་གཉེན་གསལ་མ། །ན་བཟའ་དམར་པོ་དབང་གི་མཛེས། །ཕྱག་ན་ཞགས་པ་ཏྲི་ཤུ་ལ། །འབྱུང་བ་ཆུ་ལ་དབང་བསྒྱུར་ཞིང་། །འགྲོ་བའི་ཁྲག་ལ་མངའ་མཛད་མ། །མཁའ་འགྲོ་གཉེན་གསལ་ཐུགས་དམ་སྐང་། །ཧཱུྃ། ལས་ཀྱི་དབྱིངས་ཕྱུག་ཆེན་མོ་ནི། །བྱང་ཕྱོགས་ཁམས་ཀྱི་མངའ་བདག་སྟེ། །མཁའ་འགྲོ་ཆེན་མོ་ཁྱུང་ཆེན་གདོང་། །རྟག་པའི་རྒྱལ་མོ་ཡང་གསལ་གཡོས། །ནབ་བཟའ་ལྗང་གུ་ཤིན་ཏུ་འབར། །ཕྱག་ན་དབྱུག་ཆེན་རྒྱུ་འཕྲིང་འདྲེན། །འབྱུང་བ་རླུང་ལ་དབང་༴ འགྲོ་བའི་དབུགས་ལ་མངའ༴ མཁའ་འགྲོ་ཡང་གསལ་ཐུགས་དམ་བསྐང་། །གཙོ་མོ་ཡུམ་ཆེན་ལ་སོགས་ཏེ། །དབྱིངས་ཀྱི་ཡུམ་དྲུག་ཐུགས་དམ་བསྐང་བ་ནི། །མཁའ་ལྡིང་ནག་པོ་ཟངས་མཆུ་དང་། །ཙ་ར་རོག་པོ་མཁལ་དཀར་དང་། །ཤེལ་སྒོང་ནག་པོ་སྤྱི་དཀར་དང་། །མཁའ་ལྡིང་ནག་མོ་གསེར་མིག་དང་། །ཁྲག་གི་འོད་ཟེར་འབར་བ་དང་། །ཤ་ཆེན་ཚིལ་ཆེན་ཨ་མྲྀ་ཏ། །དམ་རྫས་རྨད་བྱུང་གཏོར་མ་དང་། །བདུད་རྩི་རྣམ་ལྔར་སྦྱར་བ་འདིས། །དབྱིངས་ཀྱི་ཡུམ་དྲུག་ཐུགས་དམ་སྐོང་གྱུར་ཅིག །འབུལ་ལོ་མཐུན་པའི་དམ་རྫས་འབུལ། །མཆོད་དོ་མ་སྲིན་རྒྱ་མཚོ་མཆོད། །བསྐང་ངོ་བསྐལ་པར་ཐུགས་དམ་བསྐང་། །དམ་ཚིག་ཉམས་ནི་མ་ཉམ་ན། །ཉམས་ན་བདུད་རྩི་སྨན་གྱི་བསྐང་། །ལྟ་བ་ལོག་ནི་མ་ལོག་ན། །ལོག་ན་ཆོས་ཉིད་དབྱིངས་ལ་ལྟ། །མ་མོ་གཡེལ་ནི་མ་གཡེལ་ན། །མ་མོ་གཡེལ་ན་རྫས་ཀྱིི་བསྟེན། །སྤྱོད་པ་འཁྲུལ་ནི་མ་འཁྲུལ་ན། །འཁྲུལ་ན་ནོངས་པ་རྗེས་སུ་བཤགས། །བསྐང་གསོ་རྒྱན་ཆེན་ལྷ་ལ་འབུལ། མཐུན་པའི་རྫས་ཆེན་ངས་འབུལ་གྱིས། །ང་ཡི་ལས་བཅོལ་གྲུབ་པར་མཛོད། །ཐུགས་དམ་བསྐང་བའི་བྱིན་རླབས་ཀྱི། །བདག་ཅག་རྣལ་འབྱོར་འཁོར་བཅས་ལ། །མི་ལ་ན་ཚ་མ་བཏང་ལ། །ཕྱག་ལ་གོད་འགྲམ་མ་ཤོར་ཅིག །ཞིང་ལ་བཙའ་སད་སེར་གསུམ་སྣམ་མ་འདྲེན། །དམ་ཚིག་ཉམས་ཆག་བསྐངས་བར་མཛོད། །ཆགས་ཆེན་ཉམས་པ་བཟློག་ཏུ་གསོལ། །བདུད་ཀྱི་ཞགས་པ་ནག་པོ་ཆོད། །གཤིན་རྗེའི་ཁྲམ་ཁ་དགྲ་ལ་བསྒྱུར། །རྣལ་འབྱོར་སྐུ་ཚེ་བསྲིང་བ་དང་། །དགྲ་བོ་དམ་ཉམས་བརླག་བའི་ཕྱིར། །སྒྲུབ་མཆོག་བདག་ལ་དངོས་གྲུབ་སྩོལ། །སྡང་བའི་དགྲ་ལ་རྟགས་ཕྱུང་ཅིག །ཐུགས་དམ་གཉེན་པོ་བསྐང་གྱུར་ཅིག །ཧཱུྃ། སྲིད་པ་བདེ་འགྲོ་ཁམས་གསུམ་ཡུལ་མཆོག་མ། །སྐུ་མདོག་མཐིང་ནག་ཆེན་མོ་ལ། །དབུ་དང་ཞབས་ཀྱི་སྟོང་ཁམས་ཁྱབ། །རིན་ཆེན་རལ་པས་སྣང་སྲིད་ཁེབ། །ཕྱག་ན་གཡང་བཞི་བ་དན་བསྣམས། །ཁྱོད་ནི་འདོད་ཁམས་གཙོ་མོ་སྟེ། །ཕུད་ཀྱི་བདག་མོའི་ཐུགས་དམ་བསྐང་། །ཧཱུྃ། དཔག་བསམ་ཤིང་གི་ཡལ་ག་ལ། །དཀར་མོ་གཡག་ཐོད་རལ་གཅིག་མ། །ཉི་ཟླ་སྟོང་གི་ཐོད་ཕྲེང་ཅན། །ཕྱག་ན་ཟངས་ཀྱི་དྲིལ་ཞིག་བསྣམ། །སྣང་སྲིད་སྙིང་གི་བདག་མོ་སྟེ། །ཉི་ཟླ་ཐོད་ཕྲེང་ཐུགས་དམ་བསྐང་། །ཧཱུྃ། རྡོ་རྗེ་ཉི་མ་ཁྲག་འཐུང་འཁྲོས་པའི་དབང་མོ་ཆེ། །སྐུ་མདོག་མཐིང་ནག་འབར་བ་ལ། །ཕྱག་ན་ཟངས་ཀྱི་དྲིལ་ཞག་འབར་བ་བསྣམས། །ཁམས་གསུམ་ཐམས་ཅད་གསལ་མཛད་མ། །ཆེ་ཞེ་ཆེན་མོའི་ཐུགས་དམ་བསྐང་། །ཧཱུྃ། རིན་ཆེན་ཁྲག་འཐུང་འཁྲོས་པའི་དབང་མོ་ཆེ། །སྐུ་མདོག་སེར་ནག་འབར་བ་ལ། །ཕྱག་ན་དར་ནག་འཁོར་ལོ་བསྣམས། །ཁམས་གསུམ་ཐམས་ཅད་དབང་དུ་བསྡུད། །ཆེ་ཞེ་ཆེན་མོའི་ཐུགས་དམ་བསྐང་། །ཧཱུྃ། པད་མ་སྲིད་གསུམ་ཁྲག་འཐུང་འཁྲོས་པའི་དབང་མོ་ཆེ། །སྐུ་མདོག་དམར་ནག་འབར་བ་ལ། །ཕྱག་ན་ལྕགས་གཏུན་རལ་གྲི་བསྣམ། །ཁམས་གསུམ་ཐམས་ཅད་བདེ་ལ་སྦྱོར། །ཆེ་ཞེ་ཆེན་མོའི་ཐུགས་དམ་བསྐང་། །ཧཱུྃ། ལས་ཀྱི་སྟོང་གསུམ་ཁྲག་འཐུང་ཁྲོས་པའི་དབང་མོ་ཆེ། །སྐུ་མདོག་ལྗང་ནག་འབར་བ་ལ། །ཕྱག་ན་གསལ་ཤིང་ལྕགས་ཀྱུ་བསྣམ། །ཁམས་གསུམ་ཐམས་ཅད་གསལ་བར་སྦྱོར། །ཆེ་ཞེ་ཆེན་མོའི་ཐུགས་དམ་བསྐང་། །ཧཱུྃ། མཚན་ནི་དབྱིངས་ཕྱུག་ཆེན་མོ་ལ། །སྐུ་མདོག་དཀར་མོ་སེང་གེའི་གྷོ། །ལག་ན་མིའི་ཐོད་པ་ཐོག །མ་མོ་ཁྲག་འཐུང་ཐུགས་དམ་བསྐང་། །ཧཱུྃ། མཚན་ནི་སྲིད་པའི་རྒྱན་བྱེད་མ། །སྐུ་མདོག་སེར་མོ་སྟག་ལྤགས་གྱོན། །ལག་ན་སྐྲའི་ཞགས་པ་བསྣམས། །མ་མོ་ཤ་ཟན་ཐུགས་དམ་བསྐང་། །ཧཱུྃ། མཚན་ནི་བདག་ཉིད་ཆེན་མོ་ལ། །སྐུ་མདོག་ནག་མོ་ཆུ་སྲིན་གྱོན། །ལག་ན་ཞིང་གི་དབྱུག་པ་ཐོག །མ་མོ་མེ་འབར་ཐུགས་དམ་བསྐང་། །ཧཱུྃ། མཚན་ནི་གཅིག་པུ་ཆེན་མོ་ལ། །སྐུ་མདོག་ལྗང་ནག་ཤིང་ལྤགས་གྱོན། །ལག་ན་ཞིང་གི་གཡང་གཞི་ཐོག །མ་མོ་རྩིས་འདེབས་ཐུགས་དམ་བསྐང་། །ཧཱུྃ། མ་མོ་ཆེན་མོ་མེ་འབར་མ། །སྲིད་པ་ཤར་གྱི་བདག་མོ་སྟེ། །དཀར་མོ་ཆེན་མོ་སྤྱན་གཅིག་མ། །འཁོར་ནི་དཀར་མོ་འབུམ་སྡེར་བཅས། །དཀར་མོའི་ཚོགས་ཀྱི་ཐུགས་དམ་བསྐང་། །ཧཱུྃ། མ་མོ་ཆེན་མོ་མེ་འབར་མ། །སྲིད་པ་ལྷ་མོའི་བདག་མོ་སྟེ། །ནག་མོ་ཆེན་མོ་ཆེ་བ་ཅན། །འཁོར་ན་ནག་མོ་འབུམ་སྡེར་བཅས། །ནག་མོའི་ཚོགས་ཀྱི་ཐུགས་དམ་བསྐང་། །ཧཱུྃ། མ་མོ་ཆེན་མོ་མེ་འབར་མ། །སྲིད་པ་ནུབ་ཀྱི་བདག་མོ་སྟེ། །དམར་མོ་ཆེན་མོ་དབང་བསྒྱུར་མ། །འཁོར་ནི་དམར་མོ་འབུམ་སྡེར་བཅས། །དམར་མོའི་ཚོགས་ཀྱི་ཐུགས་དམ་བསྐང་། །ཧཱུྃ། མ་མོ་ཆེན་མོ་མེ་འབར་མ། །སྲིད་པ་བྱང་གི་བདག་མོ་སྟེ། །སེར་མོ་ཆེན་མོ་ལས་མཁན་མ། །འཁོར་ནི་སེར་མོ་འབུམ་སྡེར་བཅས། །སེར་མོའི་ཚོགས་ཀྱི་ཐུགས་དམ་བསྐང་། །སྲིད་པ་བདེ་འགྲོ་ལ་སོགས་ཏེ། །ཡེ་ཤེས་མ་མོ་བཅུ་བཞིའི་ཐུགས་དམ་བསྐང་བ་ནི། །མཁའ་ལྡིང་ནག་མོ་ཟངས་ཆུ་དང་། །ཙ་ར་རོག་པོ་མཁལ་དཀར་དང་། །ཤེལ་སྒོང་ནག་མོ་སྤྱི་དཀར་དང་། །མཁའ་ལྡིང་ནག་མོ་གསེར་མིག་དང་། །ཁྲག་གི་འོད་ཟེར་འབར་བ་དང་། །ཤ་ཆེན་ཚིལ་ཆེན་ཨ་མྲྀ་ཏ། །དམ་རྫས་རྨད་བྱུང་གཏོར་མ་དང་། །བདུད་རྩི་རྣམ་ལྔ་སྦྱར་བ་འདིས། །ཡེ་ཤེས་མ་མོ་བཅུ་བཞིའི་ཐུགས་དམ་བསྐང་གྱུར་ཅིག །འབུལ་ལོ༴ སོགས་འདྲེས། ཧཱུྃ། མེ་རླུང་འཚུབ་མའི་དཀྱིལ་འཁོར་ནས། །དཔལ་ལྡན་ལྷ་མོ་ནག་མོ་ཆེ། །སྐུ་མདོག་མཐིང་ནག་ཆེན་མོ་ལ། །ཕྲ་མེན་བཅུ་དྲུག་དབུ་ལ་རྫོགས། །རྨ་བྱའི་སྒྲོས་ནི་རྒྱན་དུ་བྱས། །ཕྱག་གཡས་རླུང་འཚུབ་རལ་གྲི་འཕྱར། །ཕྱག་གཡོན་ནེའུ་ལེ་རིན་ཆེན་མཛོད། །ཆིབས་སུ་བོང་བུ་དམར་གྭ་བཅིབ། །ནག་མོ་ཆེན་མོའི་ཐུགས༴ དེའི་གཡོག་མོ་ཁ་ཁྲིད་ནི། སྲིན་མོ་མ་དྷ་ཕུར་པའི་ལྷ། །ཀླུ་མོ་གཞོག་སྐེམ་ཆུ་སྲིན་མགོ། །སྐུ་མདོག་དམར་ནག་འབར་བ་ལ། །ལག་ན་ཁ་ཊྃ་རྩེ་གསུམ་ཐོག །ཁོལ་མོ་ནག་མོའི་ཐུགས་དམ་བསྐང་། །ཧཱུྃ། མ་ཆེན་ཐུགས་ཀྱི་སྤྲུལ་པ་ནི། །དཔལ་ལྡན་གཉེན་གྱི་རེ་མ་ཏི། །སྐུ་མདོག་མཐིང་ནག་འབར་བ་ལ། །ཞིང་ལྤག་རེ་ལྡེ་ནག་པོ་གསོལ། །ཕྱག་ན་ཁྲམ་ཤིང་ཤོ་དྷིལ་བསྣམ། །ཆིབས་སུ་དྲེལ་རྟ་རྐང་གསུམ་བཅིབ། །རེ་མ་ཏིའི་ཐུགས་དམ༴ གཡོན་གཉིས་མཛེས་པའི་ཚུལ་གྱི་རོལ། །བ་ལམ་ཆེན་མོ་དྲེལ་སྣ་མ། །ཕྱག་ན་གཡབ་དར་ནག་པོ་ཐོག །ཆིབས་སུ་བོང་ནག་ཁ་འར་བཅིབས། །བ་ལམ་ནག་མོའི་ཐུགས་དམ༴ ཁྲིས་སྨན་ནག་མོ་ལྡེམ་དྲུག་མ། །ཕྱག་ན་མི་མགོ་ཐོད་དབྱུག་ཐོག །ཆིབས་སུ་ཆུ་བྱ་རོག་མོ་བཅིབ། །ཁྲི་སྨན་སི་ལིའི་ཐུགས་དམ་བསྐང་། །ཧཱུྃ། སྐུ་གསུང་ཐུགས་ཀྱི་སྤྲུལ་པ་ནི། །ཕྱག་བརྙན་ནག་མོ་འབུམ་གྱི་བསྐོར། །སྐུའི་སྤྲུལ་པ་ཆེན་མོ་ནི། །དཔལ་ལྡན་ནག་མོ་རེ་མ་ཛ། །སྐུ་ལ་རེ་ལྡེ་ནག་མོ་གསོལ། །ཕྱག་ན་གཤིན་རྗེ་ཁྲམ་ཤིང་བསྣམ། །ཆིབས་སུ་དྲེལ་ནག་རྐང་གསུམ་བཅིབ། །སྐུའི་སྤྲུལ་པའི་ཐུགས༴ གསུང་གི་སྤྲུལ་པ་ཆེན་མོ་ནི། །དཔལ་ལྡན་ལྷ་མོ་རེ་མ་ཛི། །སྐུ་ལ་སྨུག་ནག་འཐིབ་པ་གྱོན། །ལག་ན་ནད་ཀྱི་རྐྱལ་པ་བསྣམ། །ཆིབས་སུ་ཆུ་གླུང་ནག་པོ་བཅིབ། །གསུང་གི་སྤྲུལ་པའི་ཐུགས་དམ་བསྐང་། །ཐུགས་ཀྱི་སྤྲུལ་པ་ཆེན་མོ་ནི། །དཔལ་ལྡན་ནག་མོ་རེ་མ་ཏི། །སྐུ་ལ་མི་ལྤགས་རློན་པ་གྱོན། །ལག་ན་མི་གོ་ཁྲམ་བམ་བསྣམས། །ཆིབས་སུ་བསྭེའི་ཤ་བ་བཅིབ། །ཐུགས་ཀྱི་སྤྲུལ་པའི་ཐུགས༴ དཔྱིད་ཀྱི་རྒྱལ་མོ་གཤེགས་པའི་ཚེ། །དཀར་མོ་ཤ་རི་དུར་ཁྲོད་གནས་ཉུལ་མ། །ཁྲག་འཐུང་ཆེན་མོའི་ཐུགས་དམ་བསྐང་། །དབྱར་གྱི་རྒྱལ་མོར་གཤེགས་པའི་ཚེ། །བ་ཀ་ཧྲི་སྟི་མཁའ་ལ་ཆར་འབེབས་མ། །སྦྱོར་བདག་ཆེན་མོའི་ཐུགས༴ སྟོན་གྱིས་རྒྱལ་མོར་གཤེགས་པའི་ཚེ། །མཐིང་ནག་མི་སྲུན་རལ་པ་ཅན། །སྲོག་བདག་ཆེན་མོའི༴ རྒུན་གྱི་རྒྱལ་མོར་གཤེགས་པའི་ཚེ། །མེ་ཟ་བྲག་གྱོན་རྒྱ་མཚོའི་གཏིང་ཉུལ་མ། །ཁྲི་ཟ་སྟོང་སྒྲོལ་ཐུགས་དམ་བསྐང་། །ལྷ་མོ་བཅུ་བཞིས་ཐུགས་དམ་བསྐང་བ་ནི། །མཁའ་ལྡིང་ནག་མོ་ཟངས༴ ཙ་ར་རོག་པོ་མཁལ༴ ཤེལ་སྒོང་ནག་པོ་སྤྱི༴ མཁལ་ལྡིང་ནག་མོ་གསེར༴ ཁྲག་གི་འོད་ཟེར༴ ཤ་ཆེན་ཚིལ༴ དམ་རྫས་རྨད༴ བདུད་རྩི་རྣམ་ལྔར་སྦྱར་བ་འདིས། །ལྷ་མོ་བཅུ་བཞིས་ཐུགས་དམ་བསྐང་གྱུར་ཅིག །འབུལ་ལོ་སོགས་འདྲེས། ཧཱུྃ། སྲིན་མོ་ཆེན་མོ་ཤམ་ཤམ་མོ། །གོས་སུ་མི་ལྤགས་རློན་པ་གྱོན། །སྲིད་པ་ཆགས་བྱེད་ཆེན་མོ་ནི། །ཕྱག་ན་མོ་གྷོ་སོར་འཕྲེང་བསྣམ། །སྲིད་པ་ཀུན་གྱི་བདག་ཉིད་མ། །ཨ་ཕྱི་ཆེན་མོའི་ཐུགས༴ ཧཱུྃ། ཁྱིམ་བདག་ཆེན་མོ་རྣལ་འབྱོར་མ། །སྟག་ལྤགས་གཡང་གཞི་གོས་སུ་གྱོན། །ཕྱག་ན་རྩེ་གསུམ་འབར་བ་བསྣམ། །གསང་མཚན་ཧེ་རུ་ཀ་ནི་བྱ། །ཁྱོད་ནི་འདོད་ཁམས་གཙོ་མོ་སྟེ། །ཨ་ཕྱི་ཆེན་མོའི་ཐུགས༴ ཧཱུྃ། རྣལ་འབྱོར་ཆེན་མོ་སྲིད་པའི་བདག །ཨེ་ཀ་ཙ་ཏི་རལ་གཅིག་མ། །སྐུ་ལ་སྤྲིན་ནག་གོས་སུ་གྱོན། །ཕྱག་ན་ཁ་ཊྃ་འབར་བ་བསྣམ། །གསང་མཚན་ཕོ་ཉ་ཡོངས་ཀྱི་གཙོ། །མ་མོ་ཆེན་མོའི་ཐུགས༴ ཧཱུྃ། རིན་ཆེན་ས་སྟེག་མཛེས་པའི་མཆོག །སྐུ་ལ་མུ་སྟེགས་གོས་སུ་མནབ། །ཕྱག་ན་གཡུའི་ཟ་མ་ཏོག །ནམ་མཁའ་རྒྱལ་མོའི་ཐུགས༴ ཧཱུྃ། གྲུབ་པའི་རྣལ་འབྱོར་མཐུ་མོ་ཆེ། །བདུད་ཀྱི་ཡུམ་ལ་གཤིན་རྗེའི་ལྕམ། །ཕྱག་ན་ཁྲམ་བམ་ཤོད་དྲིལ་བསྣམ། །གླིང་བཞི་སྤྱི་ཕུད་ཐུགས༴ ཧཱུྃ། རྣལ་འབྱོར་འཇིག་རྟེན་དབང་ཕྱུག་མ། །སྐུ་ལ་དར་དཀར་གཡུ་བྲན་མནབ། །ཕྱག་ན་གསེར་གྱི་ལྕགས་ཀྱུ་བསྣམ། །གླིང་བཞི་སྤྱི་འགྲོའི་ཐུགས༴ ཧཱུྃ། རྡོ་རྗེ་གར་གྱི་དབང་ཕྱུག་མ། །དབུ་བརྒྱ་མ་ལ་སྤྱན་སྟོང་མ། །འཇིག་ཚུལ་རྔམས་པའི་ཆ་བྱད་ཅན། །རྡོ་རྗེ་སྒེག་མོའི་ཐུགས༴ ཧཱུྃ། པད་མ་གར་གྱི་དབང་ཕྱུག་མ། །ས་བདག་ཆེན་པོ་པད་མ་འཕྲིང་། །ལག་ན་ཐོད་པ་ཁྲག་གི་བཀང་། །ས་བདག་ཆེན་མོའི་ཐུགས༴ སྲིད་པའི་མ་མོ་བརྒྱད་ཀྱི་ཐུགས་དམ་བསྐང་བ་ནི། །མཁའ་ལྡིང་ནག༴ ཙ་ར༴ ཤེལ་སྒོང་༴ མཁའ་ལྡིང་༴ ཁྲག་གི༴ ཤ་ཆེན༴ དམ་རྫས༴ བདུད་རྩི༴ སྲིད་པའི་མ་མོ་བརྒྱད་ཀྱི་ཐུགས་དམ་བསྐང་། །འབུལ་ལོ༴ སོགས༴ ཧཱུྃ། ཧར་ཏིང་དཀར་མོ་ཆེན་མོ་ལ། །བྱང་ཤར་མཚམས་ཀྱི་གྲུ་འདེག་མ། །དུན་ཏིང་ནག་མོ་ཆེན་མོ་ལ། །ཤར་ལྷོ་མཚམས་ཀྱི་གྲུ་འདེག་མ། །ཤན་ཏིང་དམར་མོ་ཆེན་མོ་ལ། །ལྷོ་ནུབ་མཚམས་ཀྱི་གྲུ༴ དུན་ཏིང་སེར་མོ་ཆེན་མོ་ལ། །ནུབ་བྱང་མཚམས་ཀྱི་གྲུ༴ གླིང་བཞི་གྲུ་འདེག་ཐུགས༴ ཧཱུྃ། ཤར་གྱི་དཀར་མོ་མཆེ་བ་གཙིགས། །ལྷོའི་ནག་མོ་ཁ་རླལ་མ། །ནུབ་ཀྱི་མ་མོ་མཆུ་འཇིབ་མ། །བྱང་གི་སེར་མོ་སྐང་ལྡག་མ། །རིག་བཞི་དམག་དཔུང་མང་པོའི་བསྐོར། །དམག་གི་རྒྱལ་མོའི་ཐུགས༴ ཧཱུྃ། ལས་ཀྱི་སྲིང་མོ་ཆེན་མོ་བཞི། །གླིང་བཞི་མགྱོག་མ་ལྷའི་སྲིང་མོ་དང་། །མཁའ་ལ་ཁྱུང་ལྡིང་གཤིན་རྗེའི་སྲིང་། །དམར་མོ་གཡག་ཐོད་ཀླུའི་སྲིང་༴ ནག་མོ་སྡེར་འཛིན་གནོད་སྦྱིན༴ ལས་ཀྱི་སྲིང་བཞིའི་ཐུགས༴ འདོད་ཁམས་མ་མོ་བཅུ་བཞིས་ཐུགས་དམ་བསྐང་བ་ནི། །མཁའ་ལྡིང་ནག་མོ༴ ཙ་ར་རོག་པོ༴ ཤེལ་སྒོང་ནག༴ མཁའ་ལྡིང་༴ ཁྲག་གི་འོད་ཟེར༴ ཤ་ཆེན༴ དམ་རྫས༴ བདུད་རྩི་རྣམ༴ འདོད་ཁམས་མ་མོ་བཅུ་བཞིས༴ འབུལ་ལོ་སོགས༴ ཧཱུྃ། དུར་ཁྲོད་གནས་པའི་མ་མོ་བདུན། །རྒྱ་མཚོ་ཆེན་མོའི་དཀྱིལ་འཁོར་ནས། །དཔལ་ལྡན་ཤུགས་འགྲོའི་བདག་མོ་སྟེ། །རི་རབ་བསྙིལ་བའི་རྔམ་སྟབས་ཅན། །རྡོ་རྗེ་ཀུན་གྲགས་ཐུགས༴ ཧཱུྃ། ཁྲོ་བོ་རྔམ་པའི་དཀྱིིལ་འཁོར་ནས། །མཛེས་པའི་ཚུལ་གྱི་འོད་འཕྲོ་ཞིང་། །འཇིག་རྟེན་འཆི་བདག་ཆེན་མོ་སྟེ། །ཀུན་ཏུ་བཟང་མོའི་ཐུགས༴ ཧཱུྃ། ཕྱག་རྒྱ་འབར་བའི་དཀྱིལ་འཁོར་ནས། །ནམ་མཁའ་སྟོང་ལ་དབང་བསྒྱུར་ཞིང་། །བདུད་དཔུང་དྲག་སྟོབས་ཀུན་འདུས་མ། །རྡོ་རྗེ་ཀུན་གསལ་ཐུགས༴ ཧཱུྃ། དམ་ཚིག་ཆེན་པོའི་དཀྱིལ་འཁོར་ནས། །ཕོ་ཉ་དྲུག་ཅུའི་གཙོ་མོ་སྟེ། །ཤ་ཆེན་ཁྲག་གི་ལོངས་སྤྱོད་མ། །ཡེ་ཤེས་མཆོག་གི་ཐུགས༴ ཧཱུྃ། ཁྲག་གི་རྒྱ་མཚོའི་དལ་ལ་གནས། །མ་མོ་གཏུམ་ཆེན་ཟ་བྱེད་མ། །རྡོ་རྗེ་ར་བའི་འཕྲེང་ཐོག་མ། །རྡོ་རྗེ་འདོད་ཆགས་ཐུགས༴ ཧཱུྃ། འོད་དཔུང་འབར་བའི་དཀྱིལ་འཁོར་ནས། །ཞགས་པ་སྟོང་གི་འདེབས་ལྡན་མ། །འབྱུང་པོ་མ་ལུས་འཆིང་མཛད་མ། །རྡོ་རྗེ་གསལ་འཕྲོའི་ཐུགས༴ ཧཱུྃ། དབང་ཕྱུག་ཆེན་པོའི་དཀྱིལ་འཁོར་ནས། །ལྕགས་ཀྱུ་འབར་བའི་འཕྲོ་འདུ་ལས། །དམ་ཚིག་ཉམ་པ་བསྲེག་མཛད་མ། །རྡོ་རྗེ་གཡུ་སྒྲོན་ཐུགས༴ སྲིད་པའི་མ་བདུན་ཐུགས་དམ་བསྐང་བ་ནི། །མཁའ་ལྡིང་ནག་མོ༴ ཙ་ར་རོག་པོ༴ ཤེལ་སྒོང་ནག་མོ༴ མཁའ་ལྡིང་༴ ཁྲག་གི༴ ཤ་ཆེན་ཚིལ༴ དམ་རྫས་རྨད༴ བདུད་རྩི་རྣམ༴ སྲིད་པའི་མ་བདུན༴ འབུལ་ལོ༴ སོགས། ཧཱུྃ། ཕྱི་རིམས་འབར་བའི་མེ་དཔུང་ལས། །དབང་ཕྱུག་སྨུག་ནག་ཉི་ཤུ་བརྒྱད། །སྲིན་མོ་སྨུག་ནག་ཐོད་རློན་འཆང་། །ཚངས་པ་དམར་སེར་རིན་ཆེན་འཛིན། །དབང་ཕྱུག་ལྷ་ཆེན་ཏྲི་ཤུ་ལ། །གཏོག་འདོད་སྔོན་མོ་འཁོར་ལོ་འཛིན། །གཞོན་ནུ་དམར་མོ་མདུང་ཐུང་འཕེན། །རྒྱལ་བྱིན་དཀར་མོ་རྡོ་རྗེ་གདིང་། །ཀ་ལ་ནག་མོ་ལྕགས་ཀྱུ་འཛིན། །ཤར་གྱི་མ་བདུན་ཐུགས་དམ་བསྐང་། །རྡོ་རྗེ་དམར་མོ་ཐོད་ཁྲག་འཐུང་། །བདུད་རྩི་དམར་མོ་བུམ་པ་བསྣམས། །ཟླ་བ་དཀར་མོ་སུ་དྷ་རི། །བེ་ཅོན་ལྗང་གུ་དབྱུག་ཏོ་ཕྱར། །སྲིན་མོ་དམར་མོ་དུང་ཆེན་ཁྲག །ཟ་བ་ལྗང་ནག་བ་སུ་འདྲེན། །ཙནྡྷ་དམར་སེར་ར་གྷོ་ཞག །ལྷོའི་མ་བདུན་ཐུགས༴ རྡོ་རྗེ་དམར་མོ་གཏེར་འཆང་མ། །སྟོབས་ཆེན་དཀར་མོ་བྷན་དྷ་གཤོལ། །རྡོ་རྗེ་དམར་མོ་སྤུ་གྲིས་གཅོད། །འདོད་པ་དམར་མོ་འདའ་གཞུ་འགིང་། །ནོར་སྲུང་དཀར་མོ་བུམ་པ་འཛིན། །རླུང་ལྷ་སྔོན་མོ་བ་དན་འཛིན། །བུམ་པ་ཀ་རྣ་ལྕགས་སྒྲོག་དམར། །ནུབ་ཀྱི་མ་བདུན་ཐུགས༴ གསོད་མ་ནག་མོ་རལ་གྲི་ཕྱར། །མི་མོ་དམར་མོ་གསལ་ཤིང་འཛིན། །ཕག་མོ་ནག་མོ་ཆེ་ཞགས་འཛིན། །རྒན་བྱེད་ནག་མོ་ཞིང་ཆུང་ཟ། །སྣ་ཆེན་དཀར་མོ་ཐོད་ཁྲག་འཆང་། །རྡོ་རྗེ་ཆུ་སྲིན་སྦྲུལ་ཞགས་འཛིན། །ལམ་པོ་ད་ར་དབྱངས་བསྙེན་འཆང་། །བྱང་གི་མ་བདུན་ཐུགས་དམ་བསྐང་། །དབང་ཕྱུག་ཉི་ཤུ་རྩ་བརྒྱད་ཐུགས་དམ་བསྐང་བ་ནི། །མཁའ་ལྡིང་ནག་པོ་ཟང༴ ཙ་ར༴ ཤེལ་སྒོང་༴ མཁའ་ལྡིང་༴ ཁྲག་གི་འོད་ཟེར༴ ཤ་ཆེན༴ དམ་རྫས༴ བདུད་རྩི་རྣམ་ལྔ༴ དབང་ཕྱུག་ཉི་ཤུ་རྩ་བརྒྱད་ཐུགས་དམ་བསྐང་གྱུར་ཅིག །འབུལ་ལོ༴ སོགས། ཧཱུྃ། སྲིད་གསུམ་སྒྲོལ་བའི་ཁས་ཆེས་མ། །གཙོ་ཆེན་འབར་བ་བདུན་གྱི་ཐུགས་དམ་བསྐང་། །ཐོག་མེད་ཤུགས་ཀྱི་བསྒྲོད་པའི་འཕྲུལ་མོ་ཆེ། །འབར་མ་སྲིན་མོ་བདུན་གྱི་ཐུགས༴ ཅི་བགྱི་བཀའ་ཉན་ལས་བྱེད་མ། །ཕོ་ཉ་ལས་མཁན་བདུན་གྱི༴ གདུག་རྩུབ་ཐོད་དབྱུག་དྲག་པོའི་འདུལ་མཛད་མ། །སྲིན་མོ་ཐོར་རྩུག་བཞིའི༴ དཀྱིལ་འཁོར་ཕྱི་རིམ་དབང་དུ་བསྡུད་མཛད་མ། །བརྟན་མ་བཅུ་གཉིས་ཐུགས༴ ཤུགས་ཀྱི་འདྲེན་པའི་ཐུགས༴ ཕོ་ཉ་རྒྱ་མཚོ་ཅི་བགྱིས་བཀའ་ཉན་ཚོགས། །མ་སྲིང་རྒྱ་མཚོའི་ཐུགས་དམ་བསྐང་བ་ནི། །མཁའ་ལྡིང་ནག་མོ་ཟང་༴ ཙ་ར་རོག་པོ༴ ཤེལ་སྒོང་༴ མཁའ་ལྡིང་༴ ཁྲག་གི༴ ཤ་ཆེན༴ དམ་རྫས༴ བདུད་རྩི༴ མ་སྲིང་རྒྱ་མཚོའི་ཐུགས་དམ་བསྐང་གྱུར་ཅིག །འབུལ་ལོ༴ སོགས། ཧཱུྃ། གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །རྡོ་རྗེ་ཡ་ཕྱིན་མཐུ་མོ་ཆེ། །རྡོ་རྗེ་དེ་ཕྱིན་རྩལ་མོ་ཆེ། །རྡོ་རྗེ་བསེ་ཕྱིན་དབང་མོ་ཆེ། །རྡོ་རྗེ་ཕག་ཕྱིན་སྟོབས་མོ་ཆེ། །དམ་ཅན་བཞིའི་ཐུགས༴ ཧཱུྃ། རི་རབ་གླིང་བཞིའི་དཀྱིལ་འཁོར་ནས། །ཤར་གྱི་སྟག་སྲིན་ཟོར་གདོང་མ། །ལྷོའི་བམ་སྲིན་དྲེད་མོང་གདོང་། །ནུབ་ཀྱི་སྐོང་སྲིན་བན་གླང་གདོང་། །བྱང་གི་འབྲང་སྲིན་ཆུ་སྲིན་གདོང་། །གདོང་མོ་བཞིའི་ཐུགས༴ ཧཱུྃ། ཐོག་བདག་ཆེན་མོ་བུ་ཡུག་མ། །གནམ་སྨན་བཅུ་གསུམ་ཐུགས༴ སྲས་མོ་མཆོག་གི་ཙ་མུན་ཏི། །མ་མོ་སྤུན་གསུམ༴ མཁའ་འགྲོ་སྡེ་བཞིའི༴ དམན་མོའི་ཚོགས་ཀྱི༴ སྐྱོང་མ་ཆེན་མོའི༴ བརྟན་མ་བཅུ་གཉིས། སྐྱོང་མ་བཅུ་གཉིས། མ་མོ་སེང་གེའི་མགོ་ཅན་དང་། །མ་མོ་སྟག་གི་མགོ༴ མ་མོ་འབྲུག་གི་མགོ༴ མ་མ་བྱ་རྒོད་མགོ༴ སྤྲུལ་པ་བཞིའི་ཐུགས༴ ཤེལ་གྱི་སེང་གེ་འབར་བ་དང་། །གསེར་གྱི་སྟག་མོ་མགོ་ལྔ་པ། །ཨུར་མོ་འབྲུག་སྔོན་སོ་སྣོན་མ། །ལྕགས་ཀྱི་ཁྱི་སྟེ་རྐང་གསུམ་པ། །ཕོ་ཉ་བཞིའི་ཐུགས༴ ལྕགས་ཀྱི་སྤྱང་མོ་གྷོ་དགུ་མ། །ཟངས་ཀྱི་ཝ་མོ་རྐང་བརྒྱད་མ། །ཕྱོགས་བཅུའི་སྟེང་གི་འཇིག་རྟེན་ནས། །དཔའ་བོ་དང་ནི་དཔའ་མོའི་ཚོགས། །མཁའ་འགྲོ་མུ་མཐའ་ཁྱབ་པའི་ཐུགས་དམ་བསྐང་། །མུ་མཐའ་ཁྱབ་པའི་ཐུགས་དམ་བསྐང་བ་ནི། །མཁའ་ལྡིང་ནག་པོ་ཟང་༴ ཙ་ར་རོག་པོ༴ ཤེལ་སྒོང་ནག་པོ༴ མཁའ་ལྡིང་ནག་མོ༴ ཁྲག་གི༴ ཤ་ཆེན༴ དམ་རྫས༴ བདུད་རྩི༴ དཔའ་བོ་དཔའ་མོའི་ཚོགས་ཀྱི་ཐུགས་དམ་བསྐང་གྱུར་ཅིག །འབུལ་ལོ༴ སོགས། སྤྲུལ་པའི་ཕོ་ཉ་མགྱོག་མའི་ཚོགས། །སེང་སྟག་དམ་དྲེད་འཕར་སྤྱང་དང་། །ལྕེ་སྤྱང་ལི་འདུ་ཝ་དང་གཟིགས། །སྟག་དང་སྲེ་མོང་བྱི་ལའི་གཟུགས། །རྒོད་ཁྱུང་ཀང་ཀ་བཞད་དང་ཁྭ། །ཀྱི་ལིང་འུག་པ་བྱ་རོག་དང་། །ནེ་ཙོ་ཁྲུང་ཁྲུང་བྱ་ཀླག་ཁྱི། །ཁ་དང་སྦྲུལ་དང་ནེ་ལེ་དང་། །སྤྲུལ་པའི་ཚོགས་ཀྱི་ཐུགས༴ སྤྲུལ་པའི་ཚོགས་ཀྱི་ཐུགས་དམ་བསྐང་བ་ནི། །མཁའ་ལྡིང་ནག་མོ་ཟང་༴ ཙ་ར་རོག་པོ༴ ཤེལ་སྒོང་ནག་མོ༴ མཁའ་ལྡིང་༴ ཁྲག་གི་འོད་ཟེར༴ ཤ་ཆེན༴ དམ་རྫས་རྨད༴ བདུད་རྩི་རྣམ་ལྔ༴ སྤྲུལ་པའི་ཚོགས་ཀྱི་ཐུགས་དམ་བསྐང་གྱུར་ཅིག །འབུལ་ལོ་སོགས་འདྲེས། བྱ་ནག །ལུག་ནག །ར་ནག །ལྕོང་ཁྲ། དེ་མོ་ནག་མོ། བམ་ཆེན་སར་པ། རྨད་དུ་བྱུང་བའི་གཏོར་མ། དམ་རྫས་ཚང་བ་ཕྱུང་ལ། ཨ་མྲིར་ཏ་དང་། ཤ་ཆེན་ལང་ལིང་དང་། ཚིལ་ཆེན་རས་རོས་དང་། ལྷུ་དུམ་ཁལ་ཁོལ་དང་། ཙི་ཏ་རཀྟ་དང་། ཚིལ་ཆེན་མར་མེ་སྦར་དང་། གསུར་ཆེན་དང་། མི་དབང་དང་། སྤོས་རྣམ་གཉིས་དང་། རས་ཆེན་གྱི་རྒྱལ་མཚན་དང་། ཕན་གདུག་དང་། གཡབ་དར་དང་། ཐོད་པ་ལྟག་སྤྲད་ཀྱི་རྔ་དང་། བྷནྡ། ཆ་ལང་། མི་རྐང་གི་ཕོ་གླིང་མོ་གླིང་དང་། ཅང་ཏིལ་དང་། མཆོག་ཕུར། ཆང་ཕུད། གསེར་སྐྱེམས། བདུད་རྩི་རྣམ་ལྔ། ལྷ་བཤོས་ཁྲག་གི་བྱུག་པ་དགུ། སེམས་ཅན་སྲོག་དབུགས་ཚང་བ། དེ་ལ་སོགས་པའི་རྫས་རྣམས་གསོག་པ་དང་། ལས་གཞུང་སོ་སོ་ནས་འབྱུང་བའི་ཐུགས་དམ་བསྐང་བ་དང་། དྲག་པོའི་ལས་བྱའོ། །ཉམས་པ་ཆེ་ན་སེམས་ཅན་གསུམ། སྦྱིན་བསྲེག་འབུམ། གཏོར་མ་འབུམ། ཉམས་པ་འབྲིང་ན་སེམས་ཅན་གཉིས། སྦྱིན་སྲེག་ཁྲི། གཏོར་མ་ཁྲི། ཉམས་པ་ཆུང་ན་སྦྱིན་སྲེག་བརྒྱ། གཏོར་མ་བརྒྱ། འཛབ་བརྒྱ་ཡང་ཡིག་བརྒྱ་དེ་དང་འདྲ། གང་བྱེད་པའི་རྒྱུད་ཀླགས། ཚ་ཚ་མཆོད་རྟེན། ཀློག་འདོན་བྱ། སྲིད་པའི་མ་མོའི་རྒྱུད་ཐམས་ཅད་ནས་བསྐང་གསོ་རིན་ཆེན་སྤུང་པ་ཞེས་བྱའོ། །རྣལ་འབྱོར་སྒྲུབ་པ་ལ་བརྩོན་པའི་དོན་དུ་མཛད་པ། མཁའ་འགྲོ་མ་ཐམས་ཅད་ཀྱི་བསྐང་གསོ་བསྡུ་ལེགས་བརྟེན་པ་རྫོགས་སོ། །རྒྱུད་ལས་ཕྱུང་བའོ། །པྲ་ཛྙཱ་སེང་ཧས་རྡོ་རྗེ་རྒྱལ་མཚན་ལ་གནང་བའོ།། །།
མ་མོའི་འགྲེས་བྱང་།
༈ མ་མོའི་འགྲེས་བྱང་བཞུགས་སོ། །འབུལ་ལོ་མཐུན་པའི་དམ་རྫས་འབུལ། །མཆོད་དོ་མ་སྲིང་རྒྱ་མཚོ་མཆོད། །བསྐང་ངོ་སྐལ༴ དམ་ཚིག་ཉམས་ནི་མ་ཉམས་ན། །ཉམས་ན་བདུད་རྩི་སྨན་གྱིས་བསྐང་། །ལྟ་བ་ལོག་པ་ལོག་ནི་མ་ལོག་ན། །ལོག་ན་ཆོས་ཉིད་དབྱིངས་ལ་ལྟ། །མ་མོ་གཡེལ་ནི་མ་གཡེལ་ན། །མ་མོ་གཡེལ་ན་རྫས་ཀྱི་བསྟེན། །སྤྱོད་པ་འཁྲུལ་ནི་མ་འཁྲུལ་ན། །འཁྲུལ་ན་ནོང་པ་རྗེས་སུ་བཤགས། །བསྐང་གསོ་ལྷ་ལ་རྒྱ་ཆེན་འབུལ། །མཐུན་པའི་རྫས་ཆེན་ངས་འབུལ་གྱིས། །ང་ཡི་ལས་བཅོལ་གྲུབ་པར་མཛད། །ཐུགས་དམ་བསྐང་བའི་བྱིན་རླབས་ཀྱིས། །བདག་ཅག་རྣལ་འབྱོར་འཁོར་བཅས་ལ། །མི་ལ་ན་ཚ་མ་བཏང་ལ། །ཕྱུག་ལ་གོད་འགྲམ་མ་ཤོར་ཅིག །ཞིང་ལ་བཙའ་སད་སེར་གསུམ་སྣ་མ་འདྲེན། །དམ་ཚིག་ཉམས་ཆག་སྐོངས་པར་མཛོད། །ཆག་ཆེན་ཉམས་པ་བཟློག་ཏུ་གསོལ། །རྣལ་འབྱོར་སྐུ་ཚེ་བསྲིང་བ་དང་། །དགྲ་བོ་དམ་ཉམས་བརླག་པའི་ཕྱིར། །སྒྲུབ་མཆོག་བདག་ལ་དངོས་གྲུབ་སྩོལ། །སྡང་བའི་དགྲ་ལ་རྟགས་ཕྱུང་ཞིག། །།
དཔལ་ལྡན་ལྷ་མོ་རེ་མ་ཏིའི་བསྐང་བ། ཀཿདམ་པ་བདེ་གཤེགས།
༈ དཔལ་ལྡན་ལྷ་མོ་རེ་མ་ཏིའི་བསྐང་བའི་དབུ་ཕྱོགས་བཞུགས་སོ། །དཔལ་ལྡན་ལྷ་མོ་རེ་མ་ཏིའི་བསྐང་བ་ནི། དམ་ཚིག་ཉམས་ན་ལས་འདི་བྱ། །མཚན་རྟགས་མ་བྱུང་ན་རྣལ་འབྱོར་པས་མ་མོ་མཆོད་པ་གལ་ཆེའོ། །དེ་ལ་བསྐང་གསོ་བྱ་ཐབས་བྱ་ནག་ལུག་ནག་དྲིལ་ནག་ཙ་ར། དེ་མོ་ནག་མོ། ཤ་ཆེན་ལང་ལིང་། ཚིལ་ཆེན་ར་རས་ལུ་དུམ་རཀྟ་གསུར་ཆེན་དུད་པ། རས་ཆེན་རྒྱལ་མཚན་ཕྱར་དར་གཡབ་དར་ཐོད་པ་ལྟག་སྤྲོད་ཀྱི་རྔ་སྒྲ། རྐང་གླིང་དང་གསེར་སྐྱེམས་བདུད་རྩི་རྣམ་ལྔ། སེམས་ཅན་སྲོག་དབུགས་ཚང་བ་དང་། ཨ་མྲྀ་ཏ་དང་གཏོར་མ་གཏོར་མ་གཞུང་བཞིན་བཤམས་ལ། རང་ཉིད་ཧེ་རུ་ཀ་ཡི་ང་རྒྱལ་གྱིས་མ་མོ་མཆོད་ཅིང་བསྐང་བ་ནི། མི་དབང་རྒྱལ་མཚན་ཕྱར་ལ་འདི་སྐད་དོ། །ཀྱཻ། ཕྱོགས་ཕྱོགས་དག་ཀྱང་ཕ་ཀི་ན། །ཉི་མ་བྱང་ཤར་ཕ་ཀི་ན། །རི་རབ་རི་ཡི་རྩེ་མོ་ན། །ཡོངས་འདུས་ཤིང་གི་གནས་མཆོག་ནས། །མི་རོ་གསར་རྙིང་ལྕགས་རིའི་ནང་། །ཐོད་པའི་སྐུ་མཁར་ལྡེམ་པའི་དབུས། །མེ་རླུང་འཚུབས་མའི་ཀློང་དཀྱིལ་ན། །མི་རོ་འབུམ་ནི་རྩིགས་པ་བརྩིགས། །རྟ་རོ་འབུམ་ནི་གཅལ་དུ་བཀྲམ། །མི་ཁྲག་རྟ་ཁྲག་མཚོ་ལྟར་བསྐྱིལ། །ཐེའུ་རང་བརྒྱ་ཡི་ཕྱག་ཚང་མ། །སྲིད་པ་གསུམ་གྱི་མངའ་བདག་མ། །འདོད་ཁམས་གཙོ་མོ་དབང་ཕྱུག་མ། །བདུད་ཀྱི་ཡུམ་ལ་གཤིན་རྗེའི་ལྕམ། །དཔལ་ལྡན་ལྷ་མོ་རེ་མ་ཏི། །མིང་བརྒྱ་མ་ལ་མཚན་སྟོང་མ། །ལྷ་སྲིན་སྡེ་བརྒྱད་གཙོ་མོ་སྟེ། །རུ་ཏྲ་སྟོང་གི་ལིང་པ་མོ། །རྣལ་འབྱོར་ཀུན་གྱི་ཚེ་བསྲིང་མ། །དམ་ཉམས་ཀུན་གྱི་སྲོག་གཅོད་མ། །བདག་ཅག་རྣམས་ཀྱི་སྐུ་སྲུང་མ། །སྔགས་འཆང་བདག་གི་མཆོད་ལེན་མ། །སྐྱེ་འགྲོ་ཡོངས་ཀྱི་ཤན་པ་མོ། །ཚེ་དང་སྲོག་གི་སྤུ་གྲི་མ། །རྣམ་ཤེས་སེམས་ཀྱི་སྒྲོལ་མཁན་མ། །སངས་རྒྱས་སྟོང་གི་གདུང་འཛིན་མ། །ཐེག་པ་ཆེན་པོའི་འཁོར་སྐྱོང་མ། །དྲེག་པ་ཀུན་གྱི་ཆར་འབེབས་མ། །གླིང་བཞི་ཀུན་གྱི་ཉུ་ལེ་མ། །ཁྲག་གི་རྒྱ་མཚོའི་རྦ་ཀློང་དུ། །དུག་གསུམ་ཕྱག་རྒྱ་བོང་བུ་བརྫིས། །དུར་ཁྲོད་རྒལ་སྟན་རྒ་གང་དུ། །ཉི་མའི་དཀྱིལ་འཁོར་བརྡལ་བ་ལ། །མ་འདོད་ཁམས་གཙོ་མོ་བཞུགས་པ་ནི། །མ་ཚོགས་སྟོང་གི་དབུས་ན་འགྱིང་། །གཡས་ན་གཅོད་བྱེད་རལ་གྲི་བསྣམས། །གཡོན་པས་ཐོད་པ་ཁྲག་བཀང་འཛིན། །སྐུ་སྟོད་ཞིང་གི་གཡང་གཞི་བཀྲམ། །སྐུ་སྨད་རེ་ལྡེ་སྟག་ལྤགས་མནབས། །དུར་ཁྲོད་ཆས་བརྒྱད་སྐུ་ལ་བརྒྱན། །སྤྱི་བོའི་གཙུག་ན་ཟླ་བ་ཤར། །ལྟེ་བ་དུག་བསྲེགས་ཉི་མས་བརྒྱན། །སྦྲུལ་དང་སེང་གེའི་རྣ་ཆ་བྱས། །རིགས་བཞིའི་ཀླུ་ཡིས་ཆས་སུ་རྫོགས། །ཁྱེད་ཀྱི་སྔ་ཤད་གཡས་པ་ན། །བདུད་ཀྱི་ཁྲམ་བམ་ནག་པོ་བཀལ། །སོང་ཕོད་དེང་སང་སུ་འཆི་ན། །དོ་ཚིགས་ཁྱོད་ཀྱི་ཁྲམ་ལ་ཐོབ། །ཁྱེད་ཀྱི་སྔ་ཤད་གཡོན་པ་ན། །ནད་ཀྱི་རྐྱལ་པ་སྔོ་དམར་བཀལ། །སོང་ཕོད་དེང་སང་སུ་འཆི་བ། །ཁྱོད་ཀྱི་ནད་རྐྱལ་ཁ་ཕྱེས་ལ། །སྦྲུལ་ནག་ལྔ་བརྒྱའི་ཁ་འཆིང་ཁྲོལ། །དམ་ཉམས་སྡང་བའི་དགྲ་བོ་ལ། །ནད་ཀྱི་རྐྱལ་པ་ཁ་ཕྱེས་ཤིག །ཁྱོད་ཀྱི་མཆན་ཁུང་གཡས་པ་ན། །བདུད་ཀྱི་ཤྭ་རྡིལ་དཀར་ནག་བཀྲམ། །སོང་ཕོད་དོ་ཚིགས་སུ་འཆི་ན། །ཁྱོད་ཀྱི་ཤྭ་རྡིལ་དཀར་ནག་ཁྲོམས། །ཁྱོད་ཀྱི་མཆན་ཁུང་གཡོན་པ་ན། །བྱང་དམར་རྩིས་ཀྱི་བྱང་བུ་སྦས། །སོང་ཕོད་དོ་ཚིགས་སུ་འཆི་ན། །དོ་ཚིགས་ཁྱོད་ཀྱི་རྩིས་ལ་ཐོབས། །བསྐང་ངོ་མཆོད་དོ་ཐུགས་དམ་བསྐང་། །དམ་རྫས་མདོས་ཀྱི་ཐུགས་དམ་བསྐང་། །ཚོགས་ཀྱི་གཏོར་མས་ཐུགས་དམ་བསྐང་། །དམར་ཆེན་ཨརྒྷཾས་ཐུགས་དམ་བསྐང་། །གསུར་ཆེན་དུད་པས་ཐུགས༴ སྲོག་མེད་དབུགས་ཀྱི༴ དབུགས་མེད་སྲོག་གིས༴ བསྐང་ངོ་མཆོད་དོ༴ མཉེས་པ་དགུ་ཡིས༴ ཤེལ་སྒོང་ནག་པོས༴ ཙ་ར་ལུག་གིས༴ མཁའ་ལྡིང་ནག་པོས༴ བསྐང་ངོ་མཆོད་དོ༴ རྨད་བྱུང་གཏོར་མས༴ དབང་པོ་རྣམ་ལྔས༴ མི་དབང་འབྲས་སྨིན༴ བྱང་ཆུབ་སེམས་ཀྱིས༴ འདོད་པ་དུ་མས༴ ཨ་མྲྀ་ཏ་ཡིས༴ བསྐང་ངོ་༴ བསྐང་བ་འདི་ཡིས་བྱིན་རླབས་ཀྱིས། །བདག་ཅག་སྤུན་དང་མིང་སྲིང་དང་། །མཆེད་དང་ལྕམ་དྲལ་འཁོར་བཅས་ཀྱི། །ཉམས་པ་ཐམས་ཅད་སོར་ཆུད་ནས། །བཀྲག་དང་གཟི་མདངས་རྒྱས་པར་མཛོད། །ཚེ་དང་དབང་ཐང་དར་བར་མཛོད། །དཀོར་ནོར་ལོངས་སྤྱོད་འཕེལ་བར་མཛོད། །སྡང་བའི་དགྲ་ལ་རྟགས་ཕྱུང་ཞིག །གནོད་པའི་བགེགས་ལ་ལས་མཛོད་ཅིག །བཅོལ་པའི་ཕྲིན་ལས་གྲུབ་པར་མཛོད། །འདི་སྔོན་ཚེ་གསང་སྔགས་རྡོ་རྗེ་ཐེག་པ་ལ་སྨོན་ལམ་བཏབ་ཕྱིར་རྣལ་འབྱོར་པ་དམ་ཚིག་དང་ལྡན་པ་རྣམས་ཀྱིས་མ་མོ་མཆོད་ན་རྟག་ཏུ་མགོན་སྐྱབས་བྱེད་པ་འདུག །གསང་སྔགས་སྤྱི་ཡི་སྲུང་མ་ཆེན་པོའོ། །ཀཿདམ་པ་བདེར་གཤེགས་ཀྱིས་མཛད་པའོ།། །།
དཔལ་ལྡན་ལྷ་མོའི་བསྐང་གསོལ།
དཔལ་ལྡན་ལྷ་མོའི་བསྐང་གསོལ་བཞུགས་སོ། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དཔལ་ལྡན་ལྷ་མོའི་བསྐང་གསོལ་ཁྱེར་བདེ་ལ་འདི་སྐད་དོ། །བྷྱོ། ཡོངས་འདུས་ཤིང་གིས་གནས་མཆོག་ནས། །རིན་ཆེན་མཛེས་པའི་ཕོ་བྲང་ན། །བདེ་ལྡན་འཕྲུལ་གྱི་ལྡིང་ཁང་ནང་། །འགྱིང་བག་ཚུལ་གྱིས་གར་མཛད་མ། །དབང་ཕྱུག་སྲས་མོ་དུང་སྐྱོང་མ། །གདུང་བས་སྤྱན་འདྲེན་གཤེགས་སུ་གསོལ། །ཆིབས་སུ་བོང་བུ་གྭ་དམར་བཅིབས། །རལ་གྲི་ནེའུ་ལེ་ཕྱག་ན་བསྣམས། །སྐུ་ལ་དུར་ཁྲོད་ཆས་ཀྱིས་བརྒྱན། །དཔལ་ལྡན་ལྷ་མོ་གནས་འདིར་བྱོན། །བྱང་ཤར་ཐོད་པའི་སྐུ་མཁར་ནི། །མི་རོ་འབུམ་གྱི་ཁྲི་སྟེང་ན། །དྲེལ་ནག་རྐང་གསུམ་ཆིབས་སུ་བཅིབས། །སྐུ་མདོག་ནག་མོ་རེ་ལྡེའི་བརྒྱན། །ཕྱག་ན་ཁྲམ་བམ་ཤྭ་རྡེའུ་བསྣམས། །བདུད་མོ་ཆེན་མོ་གནས་འདིར་གཤེགས། །ཀླུ་རྣམས་དབང་བསྡུད་ཆུ་སྲིན་གདོང་། །བཀའ་ཡི་བློན་པོ་བ་ལམ་མ། །ལས་ཀྱི་ཕོ་ཉ་ཁྲི་སྨན་མ། །དཔོན་གཡོག་འཁོར་བཅས་གནས་འདིར་བྱོན། །ཁྱེད་ཀྱི་ཐུགས་དམ་བསྐང་བ་ནི། །ཤ་ཁྲག་སྣ་ཚོགས་གཏོར་མ་ལ། །སྙིང་སྣ་སྣ་ཚོགས་རྒྱལ་མཚན་བཙུག །དར་ཟབ་མཛེས་པའི་རྒྱན་གྱིས་བརྒྱན། །ཤ་ཆང་སྒོག་གཙང་ལ་སོགས་པའི། །མཆོད་རྫས་སྣ་ཚོགས་གཅལ་དུ་བཀྲམ། །ཚིལ་ཆེན་དུད་པ་སྤྲིན་ལྟར་འཁྲིགས། །རཀྟའི་རྒྱ་མཚོ་རྦ་རླབས་འཁྲུགས། །ཞུན་ཆེན་མར་མེ་ཏ་ལ་ལ། །ཐོད་རྔ་མི་རྐང་དུང་ལ་སོགས། །རོལ་མོ་སྣ་ཚོགས་ཏི་རི་རི། །སྙན་པའི་འཛབ་བགྲང་ཡེ་རེ་རེ། །བདག་གི་དུག་གསུམ་དབང་གྱུར་པས། །དཔལ་ལྡན་ལྷ་མོ་འཁོར་བཅས་ཀྱི། །སྐུ་གསུང་ཐུགས་དང་འགལ་བ་རྣམས། །མཆོད་སྦྱིན་འདི་ཡིས་བསྐང་གྱུར་ཅིག །རྨ་བྱ་འཇོལ་སྒེག་ལྡན་པ་ལ། །རིན་ཆེན་སྣ་ཚོགས་གཤོག་པ་ཅན། །རིན་ཆེན་འབར་བས་སྤྱི་བོ་བརྒྱན། །མ་ཅིག་གཙོ་མོའི་ཐུགས་དམ་བསྐང་། །དེ་མོ་ནག་མོ་གསེར་མིག་མ། །ཡིད་བཞིན་ནོར་བུའི་སྐུ་ལ་བརྒྱན། །ཡོན་ཏན་དུ་མར་ལྡན་པ་འདིས། །ཁོལ་མོ་རེ་མ་ཏི་ཡི་ཐུགས་དམ་བསྐང་། །ནལ་ཕྲུག་སྙིང་དང་ནལ་བུས་ཤ་ཁྲག་དང་། །སེང་གེའི་སྙིང་དང་བྱ་ནག་སྙིང་། །ནལ་ཕྲུག་སེང་གེའི་རྒྱལ་མཚན་གྱི། །རྗེ་བློན་ཡོངས་ཀྱི་ཐུགས་དམ་བསྐང་། །ལྷ་ལུག་ནག་པོ་སྤྱི་དཀར་དང་། །བྱ་ནག་སྒོ་ང་དཀར་པོ་ལ། །ཡོན་ཏན་སྣ་ཚོགས་ལྡན་པ་འདིས། །མ་མོ་ཡོངས་ཀྱིས་ཐུགས་དམ་བསྐང་། །ཙིཏྟ་སྙིང་གི་ཐུགས་དམ་བསྐང་། །ཚིལ་ཆེན་དུད་པས་ཐུགས་དམ་བསྐང་། །མི་རྐང་གླིང་བུས་ཐུགས་དམ་བསྐང་། །གཡབ་དར་ནག་པོས་ཐུགས་དམ་བསྐང་། །ཧཱུྃ། བསྐང་ངོ་བསྐལ་པས་ཐུགས་དམ་བསྐང་། །ཕྱག་ན་རྡོ་རྗེའི་ཐུགས་དམ་བསྐང་། །མ་ཧཱ་དཱེ་བའི་ཐུགས་དམ་བསྐང་། །ཨུ་མ་དཱེ་བའི་ཐུགས་དམ་བསྐང་། །དཔལ་ལྡན་ལྷ་མོའི་ཐུགས་དམ་བསྐང་། །མ་ཧཱ་ཀཱ་ལའི་ཐུགས་དམ་བསྐང་། །བྲམ་ཟེ་མཆོག་སྲེད་ཐུགས་དམ་བསྐང་། །ཨེ་ཀ་ཙ་ཏིའི་ཐུགས་དམ་བསྐང་། །ཧཱུྃ། བསྐང་ངོ་བསྐལ་པའི་ཐུགས་དམ་བསྐང་། །རེ་ལྡེ་མགོ་ཉག་ཐུགས་དམ་བསྐང་། །དྲན་པ་དབང་བྱེད་ཐུགས་དམ་བསྐང་། །བདུད་མོ་རེ་མ་ཏི་ཡི་ཐུགས་དམ་བསྐང་། །བཀའ་བཞིན་ལས་རྣམས་སྒྲུབ་པའི་ཕྱིར། །ཆུ་སྲིན་གདོང་གི་ཐུགས་དམ་བསྐང་། །དགྲ་བགེགས་རྩད་ནས་བཅད་པའི༴ བ་ལམ་ནག་མོའི༴ བསྟན་བསྲུང་ཕོ་ཉ་འགྱེད་པའི༴ ཁྲི་སྨན་ས་ལེའི༴ སྟག་སེང་ཁྱུང་དང་བྱ་རྒོད་མགོ། །སྒོ་མ་བཞི་ཡི༴ སྨྲ་བོ་ལག་རིང་ལ་སོགས་པའི། །སྨྲ་བསྲུང་བརྒྱད་ཀྱི༴ དགྲ་བགེགས་ཁྲམ་ལ་འདེབས་པའི་ཕྱིར། །ཁྲམ་ཐོགས་བརྒྱད་ཀྱི༴ སྟོང་གསུམ་མ་ལུས་ཉུལ་བའི་ཕྱིར། །བོང་ཞོན་བརྒྱད་ཀྱི༴ བྱ་བའི་ལས་རྣམས་བསྒྲུབ༴ ནམ་གྲུ་བརྒྱད་ཀྱི༴ འཁོར་དུ་ནག་མོ་འབུམ་སྡེ་དང་། །སྲིད་པའི་མ་མོ་སྟོང་གི་ཐུགས་དམ་བསྐང་། །ཤ་ཟ་ལས་ཀྱི་སྲིན་མོའི་ཚོགས། །སྟོང་ཕྲག་དྲུག་ཅུ་རྩ་བཞིའི༴ ཤར་ཕྱོགས་དཀར་མོ་འབུམ་གྱི༴ ལྷོ་ཕྱོགས་སེར་མོ་འབུམ༴ ནུབ་ཕྱོགས་དམར་མོ་འབུམ༴ བྱང་ཕྱོགས་ལྗང་མོ་འབུམ༴ སྣང་སྲིད་ལྷ་འདྲེའི་ཐུགས༴ བརྟན་མ་བཅུ་གཉིས༴ མ་མོ་བྱེ་བའི༴ བདུད་མོ་བྱེ་བའི༴ ཁྱེད་ཀྱི་ཐུགས་དམ་བསྐང་ནས་ཀྱང་། །བདག་ཅག་འཁོར་དང་བཅས་པ་ཡི། །ལུས་ངག་ཡིད་གསུམ་བྱ་བ་རྣམས། །ཉམས་པར་གྱུར་པ་ཅི་མཆིས་པ། །དམ་ཅན་ཁྱེད་ལ་མཐོལ་ལོ་བཤགས། །ཕྱིན་ཆད་ཉམས་པ་མི་བགྱིད་འཚལ། །ཁྱེད་ལ་ཕྲིན་ལས་ལས་བཅོལ་བ་ནི། །སངས་རྒྱས་བསྟན་པ་བསྲུང་བ་དང་། །སེམས་ཅན་བདེ་ལ་འགོད་པ་དང་། །ནད་གདོན་བར་ཆད་ཞི་བ་དང་། །ཕས་ཀྱི་རྦོད་གཏོང་བཟློག་པ་དང་། །དམ་ཉམས་དགྲ་བགེགས་སྒྲོལ་བ་དང་། །བདག་གི་བསམ་པའི་དོན་རྣམས་ཀུན། །མྱུར་དུ་འགྲུབ་པའི་ཕྲིན་ལས་མཛོད། །དེ་ནས་བཤགས་པ་ནི། བྷྱོ། མི་མངོན་དབྱིངས་ནས་བཞེངས་པའི་ལྷ་མོ་ནི། །དབང་ཕྱུག་སྲས་མོ་དཔལ་ལྡན་དུང་སྐྱོང་མ། །སྲིད་གསུམ་བདག་མོ་དཔལ་ལྡན་རེ་མ་ཏི། །དཔོན་གཡོག་འཁོར་བཅས་བདག་ལ་དགོངས་སུ་གསོལ། །ཐོག་མའི་དུས་ནས་དུག་གསུམ་དབང་གྱུར་པས། །ལུས་ངག་ཡིད་གསུམ་སྡིག་བགྱིས་བགྱིད་དུ་བརྩལ། །བགྱིས་ལ་ཡི་རང་མི་དགེ་སྣ་ཚོགས་བགྱིས། །ལྷ་མོ་འཁོར་བཅས་ཁྱེད་ལ་མཐོལ་ལོ་བཤགས། །སྐུ་ཡི་དམ་ཚིག་ཡི་དམ་ལྷ་དང་འགལ། །གསུང་གི་དམ་ཚིག་སྔགས་ཀྱི་བཟླས་བརྗོད་གཡེལ། །ཐུགས་ཀྱི་དམ་ཚིག་གསང་བ་སྤེལ་བ་འདི། །ལྷ་མོ་འཁོར་དང་བཅས་ལ་མཐོལ་ལོ་བཤགས། །སྤྲུལ་པ་ནལ་ཕྲུག་བོང་དྲེལ་ནེའུ་ལེ། །གུས་པས་མཆོད་བསྟོད་མ་བྱས་ཁྲོས་ཤིང་རྩུབ། །འཚུབས་མ་སྤངས་ཤིང་རྟེན་རྫས་སྤངས་བ་རྣམས། །ལྷ་མོ་འཁོར་དང་བཅས་ལ༴ ཉ་སྟོང་ལ་སོགས་དུས་ཀྱིས་བྱེད་པ་ལ། །བསྙེན་སྒྲུབ་བསྐང་བ་དུས་ཀྱི་ཆོ་ག་ཆགས། །ཤེས་ཤིང་ཁྱད་དུ་གསོད་པ་ཅི་མཆིས་པ། །དམ་ཅན་བསྲུང་མའི་ཚོགས་ལ༴ བསྲུང་བྱ་མ་བསྲུང་སྤང་བྱ་མ་སྤངས་དང་། །བརྟེན་བྱ་མ་བརྟེན་སྒྲུབ་བྱ་མ་བསྒྲུབ་པའི། །ཁས་བླངས་དམ་བཅའ་ཉམས་པ་ཅི་མཆིས་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །བདག་གི་དུས་རྣམས་ཀུན་ཏུ་ལྷ་ཁྱོད་དང་། །སྐད་ཅིག་མི་འབྲལ་ཕྲིན་ལས་རྣམ་བཞི་ཡི། །ནམ་མཁའི་མཐའ་མཉམ་སེམས་ཅན་མ་ལུས་རྣམས། །རྡོ་རྗེ་འཛིན་པའི་ས་ལ་འཁོད་པར་ཤོག །ཡི་གེ་བརྒྱ་པ་ལན་གསུམ་མམ་བདུན་བརྗོད་པར་བྱའོ། །བྲམ་ཟེ་མཆོག་སྲེད་ཀྱིས་མཛད་པའི་རྒྱ་གཞུང་ལགས། ༈ དེ་ནས་རེ་མ་ཏི་ལ། བདུད་རེ་ལྡེ་མགོ་ཉག་གིས། འདུལ་ཐབས་ཀྱི་དབང་གི་སྒོ་ནས་བསྟོད་པ། ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་ལྷ་མོ་གཟི་ལྡན་མ། །སུམ་ཅུ་རྩ་གསུམ་གནས་ཀྱི་གཙོ་མོ་སྟེ། །ལྷ་མོ་རེ་མ་ཏི་ལ་ཕྱག་འཚལ་བསྟོད། །བདུད་ལ་དབང་བསྒྱུར་བདུད་མོ་རེ་མ་ཏི། །རེ་ལྡེ་འགོང་ཉག་བུ་མོ་རེ་མ་ཏི། །ནག་མོ་རྩེ་དགུའི་གནས་ཀྱི་གཙོ་མོ་སྟེ། །བདུད་མོ་རེ་མ་ཏི་ལ་ཕྱག༴ ཀླུ་ལ་དབང་བསྒྱུར༴ གཙུག་ན་རིན་ཆེན་བུ་མོ་ཡིད་འོང་མ། །རོལ་མཚོ་བདུན་གྱི་གནས་ཀྱི་གཙོ་མོ་སྟེ། །ཀླུ་མོ་རེ་མ་ཏི་ལ༴ གནོད་སྦྱིན་དབང་བསྒྱུར༴ གང་བ་བཟང་པོའི་བུ་མོ་ཤང་ཀ་ན། །ནགས་ཚལ་དྲྭ་བ་ཅན་གྱི་གཙོ་མོ་སྟེ། །གནོད་སྦྱིན་རེ་མ་ཏི་ལ་ཕྱག་འཚལ་བསྟོད། །ཞེས་མེ་ལྕེ་འབར་བའི་རྒྱུད་ཀྱི་བསྟོད་པ་ཁོལ་ཕྱུང་ལགས།། །།
བསྐང་བཤགས། ཀཿདམ་པ།
༈ བྷྱོ༔ མ་ཅིག་ལྷ་མོ་གསན་ཅིང་དགོངས་སུ་གསོལ། །སྲིང་གཅིག་ལྷ་མོ་གསན་ཅིང་དགོངས་སུ་གསོལ། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །ནད་དང་རིམ་གྱི་བདག་མོ་ཆེན་མོ་ཁྱོད། །ཐུགས་དམ་བསྐང་ཕྱིར་གནས་འདིར་གཤེགས་སུ་གསོལ། །ཉམས་ཆག་སེལ་ཕྱིར་གནས་འདིར་གཤེགས་སུ་གསོལ། །ཕྲིན་ལས་སྒྲུབ་ཕྱིར་གནས་འདིར་གཤེགས་སུ་གསོལ། །བསྐང་ངོ་བསྐལ་པས་ཐུགས་དམ་བསྐང་། །འབོད་པའི་དམ་རྫས་ཡིན་པའི་ཕྱིར། ཞིང་ཆེན་གཡབ་མོས་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །མི་དབང་སྙིང་གིས་ཐུགས་དམ་བསྐང་། །འབོད་པའི་དམ་རྫས་ཡིན་པའི་ཕྱིར། །ཞིང་ཆེན་གཡབ་མོས་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །མི་དབང་སྙིང་གིས་ཐུགས་དམ་བསྐང་། །རང་བཞིན་གནས་ནས་སྤྱན་འདྲེན་ཕྱིར། །མི་རྐང་གླིང་བུས་ཐུགས་དམ་བསྐང་། །དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་གྱི་ཐུགས་དམ་བསྐང་། །འདོད་ཁམས་གཙོ་མོ་ཡིན་པའི་ཕྱིར། །རྨ་བྱའི་རྒྱལ་མཚན་ཐུགས་དམ་བསྐང་། །ལྗགས་ཀྱི་དབང་པོ་ཚིམ་བྱའི་ཕྱིར། །ཤ་ཆེན་རུས་པས་ཐུགས་དམ་བསྐང་། །མགྲིན་པའི་གསང་ནས་སྦྱང་བའི་ཕྱིར། །དམར་ཆེན་རཀྟས་ཐུགས་དམ་བསྐང་། །ཉམས་ཆག་མ་ལུས་གསོ་བའི་ཕྱིར། །བྱ་ནག་ལུག་ནག་གཡག་ནག་གིས། །དཀར་མོ་འབུམ་སྡེའི་ཐུགས་དམ་བསྐང་། །སེར་མོ་འབུམ་སྡེའི་ཐུགས་དམ་བསྐང་། །དམར་མོ་འབུམ་སྡེའི་ཐུགས་དམ་བསྐང་། །ལྗང་མོ་འབུམ་སྡེའི་ཐུགས་དམ་བསྐང་། །སྨུག་མོ་འབུམ་སྡེའི་ཐུགས་དམ་བསྐང་། །མཐིང་ནག་འབུམ་སྡེའི་ཐུགས་དམ་བསྐང་། །མ་ཡམས་རྒྱལ་མོའི་ཐུགས་དམ་བསྐང་། །བོད་ཁམས་བརྟན་མའི་ཐུགས་དམ་བསྐང་། །འཛམ་གླིང་སྐྱོང་མའི་ཐུགས་དམ་བསྐང་། །མ་ཁྱོད་ཀྱང་དམ་ལ་མ་འདའ་ཞིག །ང་ཡང་དམ་ལ་མི་འདའོ། །གལ་ཏེ་དམ་ལ་འདའ་གྱུར་ན། །སྲོག་གི་སྙིང་པོ་མེ་འབར་བས། །རང་སྲོག་རང་གིས་གཅོད་པར་བྱེད། །དེ་བས་དམ་ལ་མ་འདའ་བར། །ཐུགས་དམ་གཉན་པོ་འདི་བསྐང་ནས། །ཉམས་ཆག་གྱུར་ན་བཟོད་པར་གསོལ། །སྐུ་གསུང་ཐུགས་ཀྱིས་དངོས་གྲུབ་སྩོལ། །ཕྲིན་ལས་དྲག་ཤུལ་མཐུ་མ་ཆུང་། །བཅོལ་པའི་ཕྲིན་ལས་འགྲུབ་པར་མཛོད། །ཡི་གེ་བརྒྱ་པས་ཁ་བསྐང་བར་བྱའོ། །ཀཿདམ་པས་གསུངས་སོ།། །།
ལྷ་མོའི་གསོལ་མཆོད་ཉུང་ངུར་བསྡུས་པ། བྱང་ཆུབ་རྒྱལ་མཚན།
གསུང་འཐོར་བུ་མུ་ཏིག་ཕྲེང་བ་ལས༔ ལྷ་མོའི་གསོལ་མཆོད་ཉུང་ངུར་བསྡུས་པ་བཞུགས་སོ༔ ན་མོ་གུ་རུ་དྷྭེ་ཝ་ཌཱཀི་ནི་ཧཱུྃ༔ གསང་སྔགས་ཟབ་མོའི་བྷ་ག་ཀུན་བཟང་མ༔ ཡང་གསང་དངོས་གྲུབ་མཆོག་བརྙེས་མཚོ་རྒྱལ་མ༔ ཀློང་ཡངས་ཟག་མེད་གཏེར་མཛོད་དབྱངས་ཅན་མ༔ མ་རྒྱུད་མཁའ་འགྲོའི་ཚོགས་ལ་འདུད་དོ་མ༔ ཁྱེད་ནི་བློ་གྲོས་རྟ་བདུན་རྒྱས་པའི་མ༔ མི་བཟད་ཚ་ཟེར་ཕྱོགས་བཅུར་འགྱེད་པའི་མ༔ བདག་བློའི་གེ་སར་ཕྱོགས་བཅུར་བསྐྱེད་ཅིག་མ༔ ཁོ་བོས་མ་བསྐང་ཉུང་ངུར་གསོལ་ལོ་མ༔ ཞེས་དཔལ་ལྡན་ལྷ་མོ་ལ་ཇི་ལྟར་མཁོ་བའི་ཡོ་བྱད་དམ་རྫས་ཚང་བར་བསགས་ལ༔ རྣལ་འབྱོར་སྤྲོས་པ་ལ་དགའ་ན་དམ་པ་རིན་པོ་ཆེས་བྱས་པའི་ལས་བྱང་གི་དབྱངས་བཞིན་རོལ་མོ་དང་བཅས་པས༔ བྷྱོ༔ མ་གཡོས་བྱང་ཤར་མེ་རླུང་གཏིང་གི་རུང༔ མ་བཀོད་ཁྲག་མཚོ་རྦ་རླབས་གཡོ་བའི་དབུས༔ མ་བརྩེགས་ཐོད་མཁར་དགུ་རིམ་གཞལ་ཡས་ནས༔ མ་ཅིག་དཔལ་ལྡན་ལྷ་མོ་རེ་མ་ཏི༔ མ་ལུས་བྲན་དང་གཡོག་འཁོར་བཅས་པ་རྣམས༔ མ་ཐོགས་གནས་འདིར་མྱུར་དུ་གཤེགས་སུ་གསོལ༔ མ་ཉིད་ཐུགས་རྗེས་བརྩེ་བའི་བདག་ཉིད་མ༔ མ་གཟིགས་ཡལ་བར་དོར་ན་སུ་ལ་རེ༔ མ་འཁྲུགས་འདོད་ཁམས་དབང་ཕྱུག་འཁོར་བཅས་ཀྱིས༔ མ་ལྟར་བྱམས་ཤིང་སྲིང་ལྟར་བརྩེ་བར་མཛོད༔ མ་གཡེལ་མ་གཡེལ་དཔལ་ལྡན་རེ་མ་ཏི༔ མ་འཆུག་རྣལ་འབྱོར་བདག་གི་གྲོགས་མཛོད་ཅིག༔ མ་ལ་མཆོད་པ་འབུལ་བའི་ཡོ་བྱད་ནི༔ མ་བསླད་མེ་ཏོག་བདུག་སྤོས་དྲི་ཞལ་རོལ༔ མ་སྤངས་གཟུགས་སྒྲ་དྲི་རོ་རེག་བྱའི་ཚོགས༔ མ་ཚང་མེད་པའི་སྨན་གཏོར་རཀྟ་འདིས༔ མ་མོ་ནག་མོ་འཁོར་བཅས་ཐུགས་དམ་བསྐང༔ མ་ཉམས་མཁའ་ལྡིང་ཟངས་མཆུ་གསེར་མིག་ལུག༔ མ་བྲེག་ཙ་ར་ཤ་ཆེན་གསུར་ཆེན་དྲི༔ མ་སྦགས་ཤེལ་སྒོང་བདུད་རྩི་རྣམ་ལྔའི་ཚོགས༔ མ་ཚོགས་འཁོར་དང་བཅས་པའི་ཐུགས་དམ་བསྐང༔ མ་འགྲན་རྫུ་འཕྲུལ་ཤུགས་ཆེན་བོང་བུ་དྲེལ༔ མ་རུང་སེང་གེ་སྦྲུལ་གྱི་སྙན་ཆ་རྒྱན༔ མ་བཟོས་མགོ་ཕྲེང་གཡང་གཞི་ནད་རྐྱལ་འདིས༔ མ་སྲིང་མཁའ་འགྲོའི་ཚོགས་ཀྱིས་ཐུགས་དམ་བསྐང༔ མ་སྒྲིབ་ཉི་ཟླའི་ལྟེ་རྒྱན་དབུ་རྒྱན་བཅས༔ མ་རྩོལ་གླང་ཆེན་ཀོ་རློན་རེ་ལྡེའི་གོས༔ མ་བསགས་ནོར་བུ་སྐྱུགས་པའི་ནེའུ་ལེ་འདིས༔ མ་དང་སྲུང་མར་བཅས་པའི་ཐུགས་དམ་བསྐང༔ མ་གྱུར་འགྲོ་བ་གཏོར་མར་སྦྱར་བ་དང༔ མ་བཙོས་ཆང་དང་མཾ་ས་ཙིཏྟའི་ཁྲག༔ མ་ནོར་མཆོད་རྫས་རྒྱ་མཚོ་དུ་མ་འདིས༔ མ་འཁོར་སྤྲུལ་པར་བཅས་པའི་ཐུགས་དམ་བསྐང༔ མ་འགྱངས་མྱུར་དུ་སྒྲུབ་པའི་རྣལ་འབྱོར་ལ༔ མ་སྒྲུབ་དངོས་གྲུབ་སྣ་ཚོགས་ཆར་ཕོབ་ཅིག༔ མ་ཐུབ་ཡིད་ལ་བརྣགས་པའི་བསྟན་དགྲ་ཀུན༔ མ་བཞག་ད་ལྟ་ཉིད་དུ་སོད་ལ་ཤོག༔ མ་ཆེན་སྲིན་པོ་ཁྲོས་པ་ལྷ་མོའི་སྐུ༔ མ་འགགས་བྷྱོ་དང་ཨ་ར་ལི་ཡི་གསུང༔ མ་འཛིན་མཐའ་བྲལ་ཕྱོགས་ལྷུང་ཡངས་པའི་ཐུགས༔ མ་ཡེངས་ལྷ་མོའི་སྐུ་གསུང་ཐུགས་ལ་བསྟོད༔ ཧཱུྃཿ མ་ཧཱ་གུ་རུའི་བསྟན་སྲུང་དགོངས་སུ་གསོལ༔ མ་རིག་དབང་གིས་མཁའ་འགྲོའི་ཐུགས་དང་འགལ༔ མ་བརྩོན་དུས་ཀྱི་སྒྲུབ་པ་ཆགས་པ་དང༔ མ་གསལ་ཏིང་འཛིན་གཡེལ་བ་མཐོལ་ལོ་བཤགས༔ མ་བསྟེན་སྤྱོད་པ་ཚུལ་བཞིན་མ་རྟོགས་དང༔ མ་ཤེས་ལེ་ལོ་སོམ་ཉི་ཟོས་པའི་མཐུས༔ མ་བཤགས་གསང་དང་སྦ་བར་གྱུར་པ་དང༔ མ་ཚོགས་བསྙེན་པ་གྲངས་ལས་ཆགས་པ་བཤགས༔ མ་འབྱོར་དབང་གིས་མཆོད་པ་རྒྱུད་ཆུང་དང༔ མ་གཙང་ཕུད་ཉམས་འགལ་འཁྲུལ་སྣང་ལ་སོགས༔ མ་དག་ཉེས་པའི་ཚོགས་རྣམས་ཅི་མཆིས་པ༔ མ་དམིགས་ཀློང་ཡོངས་ངང་དུ་བཤགས་པར་བགྱི༔ ཨེ་མ། མ་བཞིན་སྐྱོངས་མཛད་ལྷ་མོའི་བསྐང་བ་འདི༔ མ་ནུས་འཁོས་ཆུང་བྱང་ཆུབ་རྒྱལ་མཚན་ཁོས༔ མ་ལོག་དད་པས་ཉམས་སུ་ལེན་པ་དང༔ མ་དད་སྐྱེ་བོ་ཧ་བགད་བྱེད་རྟེན་ལགས༔ མ་བཞུགས་འདས་པ་སེང་གེ་རྒྱལ་མཚན་སོགས༔ མ་སོགས་མང་པོའི་བསྟན་བཅོས་བརྩམས་པར་རིགས༔ མ་འཁོར་འདས་ཀྱང་སྐལ་བཟང་ཡིད་འཕྲོག་ནས༔ མ་འོངས་རྣལ་འབྱོར་པས་ཀྱང་དེ་བཞིན་མཛོད༔ ཅེས་སྤྲང་པོའི་ཡང་མཐའ་རུ་གྱུར་པ་བྱང་ཆུབ་རྒྱལ་མཚན་གྱིས་ཡོས་ལོར་རྟ་ཟླའི་ཉི་ཤུ་དགུར་རྨི་ལམ་དག་སྣང་འགའ་ཞིག་ལ་བརྟེན་ནས་སྦྱར་བའོ༔
མ་ཆེན་བསྐང་བསྡུས། བྱང་ཆུབ་རྒྱལ་མཚན།
མ་ཆེན་བསྐང་བསྡུས་བཞུགས་སོ༔ ཧཱུྃཿ མ་སྐྱེས་མ་འགགས་ཆོས་ཀྱི་དབྱིངས་ཉིད་ལས༔ མ་རུང་འདུལ་མཛད་ཆེ་མཆོག་སྲིན་པོའི་གཟུགས༔ མ་ཅིག་ཞལ་གསུམ་ཕྱག་དྲུག་ཞབས་བཞི་བསྒྲད༔ མ་ཆེན་ཧེ་རུ་ཀ་ཡི་ཐུགས་དམ་བསྐང༔ གཙོ་མོ་ཡུམ་ཆེན༴ མཁའ་འགྲོ་བཀྲག་གསལ༴ མཁའ་འགྲོ་རྣམ་གསལ༴ མཁའ་འགྲོ་འོད་གསལ༴ མཁའ་འགྲོ་མཉེན་གསལ༴ མཁའ་འགྲོ་ཡང་གསལ༴ ཧཱུྃཿ གཙོ་མོ་འདོད་ཁམས་མཐིང་ནག་འཇིགས་པའི་སྐུ༔ ལྷ་མོ་དབུ་ཞལ་རལ་པས་སྟོང་ཁམས་ཁྱབ༔ སྲིན་མོའི་ཆས་ཅན་གཡང་གཞི་བ་དན་བསྣམས༔ དཔལ་མོ་ཕུད་བདག་མ་ཡི་ཐུགས་དམ་བསྐང༔ ཉི་ཟླ་ཐོད་ཕྲེང་༴ རྡོ་རྗེ་ཁྲག་འཐུང་ཁྲོས་མའི༴ རིན་ཆེན་ཁྲག་འཐུང་ཁྲོས་མའི༴ པདྨ་ཁྲག་འཐུང་ཁྲོས་མའི༴ ལས་ཀྱི་ཁྲག་འཐུང་ཁྲོས་མའི༴ མཚན་གྱི་དབང་ཕྱུག་མའི༴ སྲིད་པ་རྒྱལ་བྱེད་མ་ཡི༴ བདག་ཉིད་ཆེན་མོའི༴ གཅིག་པུ་ཆེན་མོའི༴ སྲིད་པ་ཤར་གྱི་བདག་མོའི༴ སྲིད་པ་ལྷོ་ཡི་བདག་མོའི་ཐུགས་དམ་བསྐང༔ སྲིད་པ་ནུབ་ཀྱི་བདག་མོའི་ཐུགས་དམ་བསྐང༔ སྲིད་པ་བྱང་གི་བདག་མོའི་ཐུགས་དམ་བསྐང༔ ཧཱུྃཿ དཔལ་ལྡན་ལྷ་མོ་མཐིང་ནག་བོང་བུ་བཅིབས༔ དཔལ་གྱི་དབུ་ལ་རྨ་བྱའི་རྒྱལ་མཚན་ཕྱར༔ དཔལ་འབར་ཕྱག་གཉིས་རལ་གྲི་ནད་རྐྱལ་འཛིན༔ དཔལ་འབྱོར་ལྷ་མོ་ཆེན་མོའི་ཐུགས་དམ་བསྐང༔ ཁོལ་མོ་ནག་མོའི༴ རེ་མ་ཏི་ཡི༴ བ་གླང་ནག་མོའི༴ ཁྲི་སྨན་པི་ལའི༴ རེ་མ་ཛ་ཡི༴ རེ་མ་ཛི་ཡི༴ རེ་མ་ཛུ་ཡི༴ ཁྲག་འཐུང་ཆེན་མོའི༴ སྦྱོར་བདག་ཆེན་མོའི༴ སྲོག་བདག་ཆེན་མོའི༴ ཁྲི་ཟ་སྟོང་སྒྲོལ་ཐུགས་དམ་བསྐང༔ ཧཱུྃཿ སྟོབས་ལྡན་སྲིན་མོ་ཆེན་མོ་ཤམས་ཤམས་མོ༔ རིགས་ལྡན་ཞིང་ལྤགས་རློན་པའི་ན་བཟའ་གསོལ༔ མཐུ་ལྡན་མི་མགོ་སྭ་ཕྲེང་ཕྱག་ན་བསྣམས༔ དམ་ལྡན་ཨ་ཕྱི་ཆེན་མོའི་ཐུགས་དམ་བསྐང༔ ཡང་ཕྱི་ཆེན་མོའི༴ ཨེ་ཀ་ཙ་ཏིའི༴ ནམ་མཁའི་རྒྱལ་མོའི༴ གླིང་བཞི་སྤྱི་ཕུད༴ གླིང་བཞི་སྤྱི་འགྲོའི། རྡོ་རྗེ་སྒེག་མོའི༴ ས་བདག་ཆེན་མོའི༴ ཧཱུྃཿ ལྷ་མོ་བྱང་ཤར་མཚམས་ཀྱི་གྲུ་འདེགས་མ༔ ལྷ་མཆོག་སྐུ་ལ་ཞིང་ཆེན་གཡང་གཞི་གསོལ༔ ལྷ་ཚོགས་ཀུན་ཀྱང་དུར་ཁྲོད་ཆས་ཀྱིས་བརྒྱན༔ ལྷ་མོ་ཧར་ཏིང་དཀར་མོའི་ཐུགས་དམ་བསྐང༔ དུན་ཏིང་ནག་མོའི༴ ཤན་ཏིང་དམར་མོའི་ཐུགས་དམ་བསྐང༔ གྲུབ་ཏིང་སེར་མོའི༴ དཀར་མོ་མཆེ་གཙིགས༴ སྔོན་མོ་ཁ་ཧ་ལ༴ དམར་མོ་མཆུ་འཇིབ༴ སེར་མོ་རྐང་ལྡག༴ ལྷ་ཡི་སྲིན་མོའི༴ གཤིན་རྗེའི་སྲིང་མོའི་ཐུགས་དམ་བསྐང༔ ཀླུ་ཡི་སྲིང་མོའི༴ གནོད་སྦྱིན་སྲིང་མོའི༴ ཧཱུྃཿ དུར་ཁྲོད་བདག་མོ་མི་སྲུན་འཇིགས་པའི་སྐུ༔ རྒྱ་མཚོ་ཆེན་པོ་འཁྲུགས་པའི་ཀློང་ན་བཞུགས༔ ཤུགས་འགྲོའི་གཙོ་མོ་རི་རབ་བསྙིལ་སྟོབས་ཅན༔ ཀུན་གྲགས་ཆེན་མོ་རྔམས་པའི་ཐུགས་དམ་བསྐང༔ ཀུན་ཏུ་བཟང་མོའི་ཐུགས་དམ་བསྐང༔ རྡོ་རྗེ་ཀུན་གསལ་ཐུགས་དམ་བསྐང༔ ཡེ་ཤེས་མཆོག་གི་ཐུགས་དམ་བསྐང༔ རྡོ་རྗེ་འོད་ཆགས༴ རྡོ་རྗེ་གསལ་བའི༴ རྡོ་རྗེ་གཡུ་སྒྲོན༴ ཧཱུྃཿ ཕྱི་རིམ་ལྕགས་རི་འབར་བའི་བསྐོར་བ་ལ༔ ཕྱི་འཁོར་དབང་ཕྱུག་ཉི་ཤུ་རྩ་བརྒྱད་དང༔ ཕྱི་རིམ་སྐྱོང་བའི་བརྟན་མ་བཅུ་གཉིས་སོགས༔ ཕྱི་མོ་མ་སྲིང་སུམ་བརྒྱའི་ཐུགས་དམ་བསྐང༔ ཧཱུྃཿ མ་ཆེན་ལ་སོགས་འཁོར་བཅས་བསྐང་བའི་རྫས༔ དམར་ཆེན་ཁྲག་གི་མཆོད་ཡོན་རྒྱ་མཚོ་དང༔ མཆོག་ཆེན་དབང་པོ་ལྔ་ཡི་མེ་ཏོག་དང༔ ཚིལ་ཆེན་རབ་ཏུ་བསྲེག་པའི་བདུག་སྤོས་དང༔ ཞུན་ཆེན་རྐང་མར་བསྟམས་པའི་མར་མེ་དང༔ སྟོབས་ཆེན་ཀོ་རོ་ཙ་ནའི་དྲི་ཆབ་དང༔ ཤ་ཆེན་རུས་པར་བཅས་པའི་ཞལ་ཟས་དང༔ རྐང་ཆེན་ཐོད་རྔ་གསང་བའི་རྔེའུ་ཆུང་རོལ༔ རླབས་ཆེན་ཚོགས་དང་རྨད་བྱུང་གཏོར་མ་དང༔ དཔལ་ཆེན་སྨན་དང་བསྐང་རྫས་རྒྱུན་གཏོར་དང༔ ཆས་ཆེན་མགོ་ཕྲེང་ཞིང་ལྤགས་གཡང་གཞི་དང༔ གླང་ཆེན་ཀོ་རློན་སྟག་ཤམས་སྦྲུལ་ཆུན་དང༔ ངར་ཆེན་ཙ་ར་མཁའ་ལྡིང་ཟངས་མཆུ་དང༔ ཐལ་ཆེན་ཚོམ་བུ་ཞག་གི་ཟོ་རིས་དང༔ སྨན་ཆེན་ལྔ་སོགས་མཆོད་རྫས་རྒྱ་མཚོ་འདིས༔ དཔལ་ཆེན་ཁྱེད་རྣམས་ཐུགས་དམ་བསྐང་གྱུར་ཅིག༔ ཁུར་ཆེན་ཁྱེར་བའི་རྣལ་འབྱོར་འཁོར་བཅས་ཀྱིས༔ ཐེག་ཆེན་ལྟ་བ་ཀློང་དུ་མ་གྱུར་དང༔ ལུང་ཆེན་བསྙེན་པ་གྲངས་ལས་ཆགས་པ་དང༔ གསང་ཆེན་དམ་མེད་མི་ལ་སྤེལ་བ་དང༔ དུས་ཆེན་མཆོད་གཏོར་ཆགས་པ་མཐོལ་ལོ་བཤགས༔ ཐེག་ཆེན་གཡར་དམ་ཉམས་པ་ཅི་མཆིས་པ༔ ཀློང་ཆེན་ཟང་ཐལ་ངང་དུ་བཤགས་པར་བགྱི༔ ཨེ་མ། མ་ཆེན་བསྐང་བ་ཉུང་ངུར་བཀོད་པ་འདི༔ ཚུལ་མིན་ཁེངས་སེམས་རློམ་པ་མ་ཡིན་ཞིང༔ བཀའ་བརྒྱུད་གོང་མའི་བཀའ་སྲོལ་ཡིན་ཕྱིར་རོ༔ ཚིང་ཉུང་དོན་ལ་དབྱེར་མེད་གཅིག་པ་འདི༔ སྟོན་པའི་བཀའ་ལ་བསྲེ་བསླད་མ་ཡིན་ཞིང༔ རང་འདྲའི་བློ་ཆུང་རྒྱུན་ཁྱེར་བདེ་ཕྱིར་རོ༔ མ་མོ་དཔལ་ལྡན་ལྷ་མོའི་ཚིག་རྒྱན་འདི༔ ཆེ་མཐོ་མཁས་འདོད་བྱེད་པ་མ་ཡིན་ཞིང༔ རྣལ་ལམ་སྣང་བར་རེ་མ་ཏིའི་ཝཀྐ༔ དེ་ལྟར་མཐོང་བའི་རྟགས་ཚད་མི་ལྡན་ན༔ ཁོ་བོ་དམན་པའི་གང་ཟག་མ་ཡིན་ཞིང༔ བསྐྱེད་དང་རྫོགས་པའི་རང་རྟགས་ཤར་ཕྱིར་རོ༔ འདི་དང་འདི་འདྲའི་ལེགས་བཤད་ཕྲེང་བ་ཀུན༔ རང་མཐོའི་ང་རྒྱལ་གླེང་བ་མ་ཡིན་ཞིང༔ ཚད་གསུམ་གཞུང་ལ་འགལ་བ་མེད་ཕྱིར་རོ༔ དེ་ཕྱིར་སླད་ནས་འབྱོན་པའི་རྣལ་འབྱོར་ཀུན༔ དེ་ན་འདི་ལ་ཐེ་ཚོམ་མི་བྱེད་ཅིང༔ མཁས་རྨོངས་གང་གིས་ཉམས་སུ་ལེན་པར་ཞུ༔ ཞེས་ཚིག་རྒྱན་ལ་མངོན་པར་ཕྱོགས་པའི་ཁོལ་རི་པ་བྱང་ཆུབ་རྒྱལ་མཚན་གྱིས་ཡོས་ལོ་ལུག་ཟླའི་ཚེས་གཅིག་ལ་གནས་མཆོག་ཁོལ་རི་རྣ་གོང་མགོར་ཡི་གེར་བཀོད་པའོ༔ ༔
མ་མོ་དམ་ལྡན་གྱི་ལྷ་མོ་རྡོ་རྗེ་རེ་མ་ཏིའི་དགྱེས་བསྐྱེད་མ ཆོད་སྤྲིན་དུ་སྤྲོ་བའི་ཐབས་ཉུང་ངུར་བསྡུས་པ། ཆོས་ཀྱི་རྡོ་རྗེ།
མ་མོ་དམ་ལྡན་གྱི་ལྷ་མོ་རྡོ་རྗེ་རེ་མ་ཏིའི་དགྱེས་བསྐྱེད་མཆོད་སྤྲིན་དུ་སྤྲོ་བའི་ཐབས་ཉུང་ངུར་བསྡུས་པ་བཞུགས་སོ། །ན་མོ་ཤྲཱི་གུ་རུ་ཝེ། འདིར་མ་མོའི་མཆོད་གསོལ་བྱ་བར་འདོད་པ་དག་གིས་གཏོར་ཆེན་ཤ་ཁྲག་གིས་བརྒྱན་པ་དང་། སྐྱེམས་ཕུད་དང་གསུར་ཆེན་གྱི་དུད་པ་དང་བཅས་ཏེ་རྣལ་འབྱོར་པས་ཡི་དམ་རྒྱུན་སྤྱོད་ཀྱི་ངང་ལ་འཇུག་བཞིན་མཆོད་རྫས་རྣམས་སྤེལ་སྦྱངས་ཀྱི་སྔགས་དང་ཕྱག་རྒྱ་དང་། ༀ་ཨཱཿཧཱུྃ་གིས་བྱིན་གྱིས་བརླབས་ཏེ། ཧཱུྃ་བྷྱོ། མ་རུངས་གདུག་པའི་བསྟན་དགྲའི་གཤེད་མ་རུ། །མ་ཅིག་བཟང་མོའི་རྣམ་རོལ་ཡེ་ཤེས་ཀྱི། །མ་མོ་དཔལ་ལྡན་ལྷ་མོ་རེ་མ་ཏི། །མ་ཐོགས་མཆོད་པའི་གནས་འདིར་གཤེགས་སུ་གསོལ། །མ་བཀོད་རང་བྱུང་དགྱེས་པའི་གདན་ལ་བཞུགས། །མ་ལ་དད་དང་གུས་པས་ཕྱག་འཚལ་ཏེ། །མ་ཚོགས་མཉེས་བྱེད་མཆོད་རྫས་དངོས་བཤམས་རྣམས། །མ་གཙང་དྲིས་གོས་བསྲེགས་གཏོར་བཀྲུས་སྦྱངས་ཤིང་། །མ་ཡེངས་ཏིང་འཛིན་སྔགས་རྒྱས་བྱིན་རླབས་པའི། །མ་འདྲེས་ཕྱི་མཆོད་ཆུ་གཉིས་ཉེར་སྤྱོད་ལྔ། །མ་སྤང་ནང་གི་འདོད་ཡོན་ཚོགས་དང་གཞན། །མ་བཅོས་བྱང་ཆུབ་སེམས་ཀྱི་བདུད་རྩི་སྨན། །མ་དག་ཉོན་མོངས་བསྒྲལ་བའི་ཁྲག་ཆེན་པོ། །མ་ཧཱ་མཾ་སའི་གཏོར་མ་སྤུངས་པ་བཅས། །མ་དང་མཁའ་འགྲོ་རྒྱ་མཚོར་མཆོད་པར་འབུལ། །མ་ཁྱོད་སྟོང་གསུམ་དབང་བསྒྱུར་གཤེགས་ཙམ་ན། །མ་འབད་རྫུ་འཕྲུལ་སྟོབས་ལྡན་ཤུགས་འགྲོ་དང་། །མ་ཡི་ཡོ་བྱད་རྣམ་མང་ཇི་སྙེད་པ། །མ་ཚངས་མེད་པས་ནམ་མཁའི་ཁམས་བཀང་ནས། །མ་ཆེན་དཔལ་ལྡན་རྡོ་རྗེ་ལྷ་མོ་ནི། །མ་འཁོར་སྤྲུལ་པ་ཡང་སྤྲུལ་ཉིང་སྤྲུལ་གྱི། །མ་སྲིང་འཁོར་བཅས་ཐུགས་དམ་བསྐང་གྱུར་ཅིག །མ་ནོར་ངེས་གསང་སྙིང་པོའི་རྣལ་འབྱོར་ལ། །མ་འགྱངས་མཆོག་ཐུན་དངོས་གྲུབ་སྣ་ཚོགས་སྩོལ། །མ་ཐུབ་རིང་ནས་བརྣགས་པའི་དགྲ་བོ་རྣམས། །མ་ཤོར་ད་ལྟར་བསྒྲལ་བའི་གཟུགས་ཕུང་ཚོགས། །མ་འགགས་ཡངས་པའི་ཞལ་གྱི་ཧོམ་ཁུང་དུ། །མ་བཞག་ད་ལྟར་རོལ་ཅིག་དམ་ལྡན་མ། །མ་རྒྱུད་ཡོངས་ཀྱི་གཙོ་མོ་རེ་མ་ཏི། །མ་ཅིག་བུ་བཞིན་བརྩེ་གདུང་བྱམས་པ་ཡི། །མ་གཡེལ་རྟག་ཏུ་བརྟེན་པའི་གྲོགས་མཛད་ཕྱིར། །མ་བཟོད་གདུང་བའི་དབྱངས་ཀྱིས་བསྟོད་པར་བགྱི། །མ་ཉིད་ཡེ་ཤེས་སྤྱན་ལྡན་རྣལ་འབྱོར་བདག །མ་རིག་དབང་གིས་འགལ་འཁྲུལ་གྱུར་པ་ཀུན། །མ་དམིགས་ཀློང་ཡངས་ཟང་ཐལ་ཆེན་པོའི་ངང་། །མ་ལུས་མཐོལ་ཞིང་བཤགས་སོ་བཟོད་པར་བཞེས། །མ་གྱུར་སྐྱབས་གཅིག་གུ་རུའི་དམ་བཞག་ལས། །མ་འདའ་མ་འདའ་རྡོ་རྗེ་རེ་མ་ཏི། །མ་བོར་བདག་ཅག་དཔོན་སློབ་ཆབ་སྲིད་བརྟན། །མ་དྲོས་རྒྱ་མཚོའི་འཇིངས་ལས་འགྲན་པར་མཛོད། །ཅེས་པའང་དམ་ལྡན་རྡོ་རྗེའི་ལྷ་མོའི་མཆོད་གསོལ་སྔར་གཤེགས་པ་བྱང་ཆུབ་རྒྱལ་མཚན་གྱིས་མཛད་པ་ལས། མ་འོངས་རྣལ་འབྱོར་བས་ཀྱང་དེ་བཞིན་མཛོད། ཅེས་མཐོང་བ་དང་ཡིད་ལ་འདི་ལྟར་བྱ་བར་སེམས་ཚེ་མ་མོ་དགྱེས་པའི་མཚན་མ་ངེས་པར་བྱུང་བར་བརྟེན་ནས། ངེས་གསང་སྙིང་པོའི་བསྟན་གནས་ཀཿཐོག་རྡོ་རྗེ་གདན་གྱི་གཙུག་ལག་ཁང་དུ་ཤཱཀྱའི་བན་སྡོམ་ཆོས་ཀྱི་རྡོ་རྗེས་རང་ལོ་བཅོ་བརྒྱད་པར་ཡི་གེར་བཀོད་པ་དགེའོ། །སརྦ་མངྒ་ལམ།། །།
མ་མོ་དཔལ་ལྡན་ལྷ་མོའི་མཆོད་གསོལ་རཏྣའི་ཕྲེང་བ། ཆོས་ཀྱི་རྒྱལ་མཚན།
མ་མོ་དཔལ་ལྡན་ལྷ་མོའི་མཆོད་གསོལ་རཏྣའི་ཕྲེང་བ་དགེའོ། །རྣལ་འབྱོར་དམ་ཚིག་ཅན་གྱིས་མ་མོའི་བསྙེན་བསྒྲུབ་སྔོན་དུ་སོང་བའི་དབང་དུ་བྱས་ནས་སྐྱེམས་ཕུད་གཙང་མ་འདུ་བྱས། སྤོས་ཀྱི་བདུག་ཅིང་། ༀ་ཨཱཿཧཱུྃ། རྃ་ཡྃ་ཁྃ༔ ཞེས་ལན་གསུམ། ཧཱུྃ་བྷྱོཿ མ་རིང་ཡོངས་འདུ་དཔག་བསམ་ལྗོན་པའི་འགྲམ། །མ་གཡོས་རྡོ་རྗེའི་རླབ་བསྐྱོད་རཀྟའི་མཚོ། །མ་རྙོག་མུ་ལེ་ཐོད་པའི་སྐུ་མཁར་ནས། །མ་མོ་དུས་བཞིའི་རྒྱལ་མོ་དབྱིངས་ཕྱུག་མ། །མ་ཅིག་ཨེ་ཀ་ཛ་ཊི་ཁྲོས་མ་ནག །མ་སྤྲུལ་ཉིང་བཞི་ཤ་ཟ་མུ་ཁ་ལེ། །མ་འཁོར་འཇིག་རྟེན་འདས་དང་མ་འདས་པ། །མ་ལུས་པུ་ཧསྟི་ཡིས་གཡབ་ཀྱིན་འབོད། །མ་འགྱང་ཐོགས་མེད་གནས་འདིར་གཤེགས་ནས་ཀྱང་། །མ་ཕེབ་ཀུན་ཏུ་བཟང་མོ་ཡུམ་ལྔའི་མཁར། །མ་སྤང་ཆོས་ཉིད་འཕྲུལ་གྱི་ཕོ་བྲང་དབུས། །མ་ཆགས་པད་ཉི་སྟོན་ལ་ཏིཥྛན་ཏུ། །མ་གུས་སྤངས་པའི་ག་བུ་ཆུང་བརྟུལ་ཞུགས། །མ་ལ་གདུང་བའི་རྣམ་འགྱུར་ས་མ་དྷིར། །མ་ཉུང་རྡུལ་སྙེད་སྤྲུལ་པའི་གར་དང་བཅས། །མ་དམིགས་མཉམ་པའི་ཀློང་ནས་ཕྱག་འཚལ་ལོ། །མ་དག་རྣམ་རྟོག་མཐའ་འདས་ཀུན་ཏུ་བཟང་། །མ་སྦར་མཆོད་པ་ཉེར་སྤྱོད་ནམ་མཁའི་ཁམས། །མ་ཡངས་དོག་གོར་བྱས་པའི་རྒྱ་མཚོའི་རྡུལ། །མ་ཆེན་རཱེ་མ་ཏི་ལ་འབུལ་བར་བགྱི། །མ་སྤངས་རང་བྱུང་དབྱིངས་ཀྱི་ཀཱ་པ་ལར། །མ་ཧཱ་ཤ་ལྔ་བདུད་རྩིའི་བྷ་ལིངྟ། །མ་བཅོས་རྩ་བརྒྱད་སྟོང་སྦྱར་བྱང་ཆུབ་སེམས། །མ་ཡི་བྷ་གར་རྒྱུ་ལྔ་བསྒྲལ་ཁྲག་བཅས། །མ་ལ་གཞན་ཡང་ཐུགས་དམ་སྐོངས་བའི་རྫས། །མ་འཛིན་ཕྱི་ནང་རྟོག་པའི་དྲྭ་བ་ཀུན། །མ་རྣམས་བསྐྱེད་པའི་ཀློང་ཆེར་གང་བ་རུ། །མ་ཉིད་བསྟེན་ཕྱིར་འབུལ་ལ་བསྟོད་པར་བྱ། །མ་ཐུགས་སྟོང་ཉིད་ཁྲོ་བ་མ་མཆིས་མོད། །མ་འཁོར་དྲེགས་པའི་ཐུགས་དང་ཅི་འགལ་བ། །མ་གཞན་ཀུན་བརྟག་གཉུག་མར་དེངས་པ་ཡི། །མ་གནས་ཡོངས་གྲུབ་ཀློང་དུ་བཤགས་པར་བགྱི། །མ་ལ་གཤེ་ཞིང་བདག་ལ་འཁུ་བ་ཡིས། །མ་རུང་གདུག་པའི་དུ་རུ་ཥ་ལ་སོགས། །མ་བཞག་རྣམ་ཐར་གསུམ་ལྡན་ཧོམ་ཁུང་དུ། །མ་འགོར་མྱུར་དུ་བསྟན་དགྲ་ལ་ཁཱ་ཧཱི། །མ་བརྗེད་བྱང་ཆུབ་ཤིང་དྲུང་ཤཱཀ་ཐུབ་དང་། །མ་ཡིས་མར་མེ་མཛད་དྲུང་ཁས་བླངས་ལྟར། །མ་གྱུར་བདེ་བྱེད་བསྟན་དང་བསྟན་འཛིན་དག །མ་ནུས་ཤུགས་ཕྱུང་འཕེལ་ཞིང་རྒྱས་པར་མཛོད། །མ་ལ་མོས་པའི་རྣལ་འབྱོར་བདག་ཅག་ཀུན། །མ་བོར་འབྲལ་མེད་གྲིབ་མ་བཞིན་འགྲོགས་ཤིང་། །མ་འདའ་ཅི་བཅོལ་ལས་བཞིའི་བྱ་བ་ཀུན། །མ་གཡེལ་ཐོགས་མེད་འགྲུབ་པའི་བཀྲ་ཤིས་མཛོད། །ཅེས་པའང་ཉག་གཏེར་སྟོན་ཆེན་པོ་བྱང་ཆུབ་རྒྱལ་མཚན་གྱིས་བཀའ་ལས་གསུངས་པ་ལྟར་བྱ་བ་སེམས་ཏེ། གནས་མཆོག་ཀརྨ་འོད་འབར་སྨུག་ཆུང་གི་འགྲམ་དཔལ་འབྱོར་དགོན་དུ་སྤྲུལ་མིང་ཆོས་ཀྱི་རྒྱལ་མཚན་པས་བྲིས་པ་མ་མོ་དགྱེས་ཤིང་རྒྱལ་བསྟན་མཐའ་དག་སྲུང་བ་ལ་ཐོགས་པ་མེད་པར་གྱུར་ཅིག །སརྦ་མངྒ་ལཾ།། །།
མ་མོ་འཁྲུངས་བསྐང་།
མ་མོ་འཁྲུགས་བསྐང་གི་དབུ་ཕྱོགས་སོ། །མ་མོའི་འཁྲུགས་པ་བསྐང་བ་ནི། ཤིན་ཏུ་གཉན་པས་གལ་ཐོད་ཐོད་དུ་མི་བྱའོ། །བྷྱོ༔ སྙིགས་མ་ལྔ་ཡི་དུས་བྱུང་ན༔ བཀའ་བཞིན་མི་བྱེད་བཀའ་སྩལ་བཀྲམ༔ གསང་སྔགས་མི་གསང་ནོར་ལ་བརྩེང༔ བོན་དུ་གྱེར་ཞིང་གྲོང་བསྙེན་བྱེད༔ མངོན་དུ་གྱེར་ཞིང་མངོན་སྤྱོད་བྱེད༔ དོན་མི་རྟོགས་ཤིང་ཟུང་དུ་སྤྱོད༔ ནང་འཐབ་བྱེད་ཅིང་འདུལ་ཁྲིམས་ཉམས༔ སློབ་དཔོན་ཕ་མའི་བཀའ་བཅག་ཅིང༔ སྐྱེ་བོ་རང་སྡིག་སྤྱོད་པའི་ཚེ༔ དེ་ཚེ་སྲིད་པའི་མ་མོ་འཁྲུགས༔ འཁྲུག་པའི་མ་མོའི་ཐུགས་དམ་བསྐང༔ བསྐང་ངོ་བསྐལ་པའི་ཐུགས་དམ་བསྐང༔ གཞན་ཡང་མ་མོ་འཁྲུག་པའི་རྒྱུ༔ མཆོད་པ་ལོ་ཟླར་འདས་པ་དང༔ ཁས་བླང་དགེ་བ་ཆགས་པ་དང༔ ཡོ་བྱད་ཉམས་དང་རྫས་མ་ཚངས༔ བཟླས་བརྗོད་བར་ཆད་བྱེད་པ་དང༔ ཕུད་ཉམས་ལྷག་མའི་གཏོར་མ་དང༔ བདེན་ནམ་མི་བདེན་བསམ་པ་དང༔ ཐེ་ཚོམ་སོམ་ཉི་ཟོས་པ་ཡི༔ སྒྲུབ་པའི་མ་མོ་འཁྲུག་པར་འགྱུར༔ དེ་ཚེ་སྲིད་པའི་མ་མོ་འཁྲུག༔ འཁྲུག་པའི་མ་མོའི་ཐུགས་དམ་བསྐང༔ བསྐང་ངོ་བསྐལ༔ སྐུ་ཡི་ཕྱག་རྒྱ་རིང་དུ་སྤང༔ རྡོ་རྗེ་སློབ་དཔོན་མ་མཉེས་དང༔ རྡོ་རྗེ་སྤུན་ལ་དམ་ཚིག་མེད༔ སྐུ་ཡི་དམ་ཚིག་ཉམས་གྱུར་པའི༔ དེ་ཚེ་སྲིད་པའི་མ་མོ་འཁྲུག༔ འཁྲུག་པའི་མ་མའི་ཐུགས་དམ་བསྐང༔ བསྐང་ངོ་བསྐལ་པའི༴ གཞན་ཡང་དམ་ཚིག་ཉམས་པའི་རྒྱུ༔ བཟླས་བརྗོད་ཕྱག་རྒྱ་རྒྱུན་ཆད་པས༔ གསུང་གི་དམ་ཚིག་ཉམས་གྱུར་པའི༔ བསྐང་ངོ་༴ གསང་བའི་མན་ངག་སྤེལ་བ་ཡིས༔ ཐུགས་ཀྱི་དམ་ཚིག་ཉམས་གྱུར་པའི༔ བསྐང་ངོ་༴ ཏ་ན་གཱ་ན་ལྔ་མི་སྤྱོད༔ ཡན་ལག་དམ་ཚིག་ཉམས་གྱུར༴ བསྐང་ངོ་༴ མ་མོ་འཁྲུག་པའི་སྤྱོད་པ་ནི༔ ཡུག་ས་དག་ལ་ཆགས་པ་དང༔ སྦྲུམ་མ་མི་དགའ་བཅུག་པ་དང༔ ཕ་མེད་བུ་ཚ་སྤངས་བ་དང༔ བོང་བུ་བརྩེགས་བརྡུང་བསྒྱུར་བ་དང༔ རལ་གྲི་དག་ལ་མ་མོས་དང༔ རྨ་བྱ་རིང་དུ་སྤངས་པ་དང༔ ཁུ་བ་དཀར་དམར་མ་བརྟེན་དང༔ མ་ལ་དད་པ་ལོག་པ་དང༔ ནེའུ་ལེ་རྐྱང་པ་བཀྲམ་པ་དང༔ ཤིང་ལོ་རླུང་ཁྱེར་མ་བཟུང་དང༔ རྡོ་སོལ་ཆུ་ལ་བསྒྱུར་བ་དང༔ འཚུབས་མཐོང་ནས་མ་མོས་དང༔ རྗེས་ཆགས་མ་བྱང་རཀྟ་སྤངས༔ ཡོངས་སུ་མ་སྨིན་སེམས་ཅན་ལ༔ ལྷ་ཡི་ཁ་དོག་བསྟན་པ་དང༔ སྙིང་པོ་གསང་སྔགས་གྱེར་བ་དང༔ ཕྱག་རྒྱ་གཞན་ལ་གྱེར་བ་དང༔ རྟག་ཏུ་དམ་ཚིག་བཟློ་བ་དང༔ དུས་ཚོད་མཆོད་པ་ཆགས་པ་དང༔ བསྙེན་པ་གྲངས་ཀྱི་མ་ཐེམ་དང༔ སངས་རྒྱས་སྐུ་གཟུགས་མ་བྲིས་དང༔ བྲམ་ཟེ་མཆོག་སྲིད་སྤངས་པ་དང༔ དམ་ཚིག་ཕྱག་རྒྱ་མ་བརྟེན་དང༔ བྱ་ནག་ལུག་ནག་ཁྱི་ནག་མ་བརྟེན་དང༔ མཆེད་དང་ལྕམ་དྲལ་ཞེ་གཅོད་པས༔ མ་མོ་དཔོན་གཡོག་འཁྲུགས་པར་འགྱུར༔ དེ་ཚེ་སྲིད་པའི༴ མ་མོ་འཁྲུག་པའི༴ བསྐང་ངོ་བསྐལ་པའི༔ གཞན་ཡང་དམ་ཚིག་ཉམས་པའི་རྒྱུ༔ མ་ཉེས་བགེགས་ཆེན་བཏགས་པ་དང༔ ས་བདག་ཀླུ་གཉན་རྒྱུད་དཀྲུག་དང༔ དམ་ཚིག་ཉམས་སུ་བཅུག་པ་དང༔ མི་ཐུབ་ལྷ་འདྲེ་དོ་བསྡོས་པས༔ འཇིག་རྟེན་མ་མོ་འཁྲུག་པར་འགྱུར༔ དེ་ཚེ་སྲིད༴ འཁྲུག་པའི་མ་མོའི༴ བསྐང་ངོ་༴ གཞན་ཡང་མ་མོ་འཁྲུག་པའི་རྒྱུ༔ བཀའ་དྲིན་ཅན་གྱི་སློབ་དཔོན་ལ༔ སྒྱུ་མའི་ནོར་གྱིས་མ་མཉེས་པས༔ དྲིན་ཆེན་དམ་ཚིག་མི་སྟེར་རོ༔ དངོས་གྲུབ་ཐོབ་པའི་རྒྱུ་ཡང་མེད༔ རང་ཉིད་ཤེས་རབ་ཆུང་བ་ཡིས༔ དོན་དམ་རྟོགས་པའི་དུས་ཡང་མེད༔ འཇིག་རྟེན་མ་མོ་འཁྲུག་པར་འགྱུར༔ དེ་ཚེ་སྲིད༴ འཁྲུག་པའི༴ བསྐང་ངོ་༴ གཞན་ཡང་མ་མོ་འཁྲུག་པའི་རྒྱུ༔ མཚན་མ་ཅུང་ཟད་བུལ་བའི་ཚེ༔ མ་མོ་གནད་ལ་བོར་ནས་ནི༔ མི་མཐུན་འཁོར་ལོ་བཅས་བྱས་ནས༔ མ་མོ་འཁྲུག་པའི་སྔགས་ཀྱང་བཟླས༔ སྙིང་རྟོག་བྱེད་ཅིང་ལས་ཀྱི་གཟེར༔ སེམས་འཁྲུག་ང་རོ་མི་བསྙེན་པས༔ དམ་དུ་བདར་ཅིང་གཡབ་མོ་འདེབས༔ དེ་ཚེ་སྲིད༴ འཁྲུག་པའི༴ བསྐང་ངོ་༴ མ་མོ་འཁྲུག་པའི་འཇིག་རྟེན་དུ༔ མི་མཐུན་སྣ་ཚོགས་འབྱུང་བར་འགྱུར༔ མ་མོ་ནང་འཐབ་མཚོན་ཆ་འཁྲུག༔ གཅན་གཟན་འཁྲུག་ཅིང་འཐབ་པ་དང༔ བྱ་ནག་རྣམས་ཀྱང་ནང་འཐབ་བྱེད༔ མེ་ཡི་ལུས་ལ་ཚིག་ཉམས་བྱེད༔ བུད་མེད་སྨྲ་བ་མང་པོ་བྱེད༔ ངུ་འབོད་བྱེད་ཅིང་འཐབ་མོ་བརྡེབ༔ ངོ་འཛུམ་ནག་ཅིང་ཁ་དོག་ངན༔ གོས་ཀྱང་ཁ་དོག་ངན་པ་ཡིན༔ དགྲ་བྱུང་ཟེར་ཞིང་ཕུ་མདར་རྒྱུག༔ མིག་ཚུག་ལག་བསྩོག་བརྒོལ་བར་འགྱུར༔ དམག་མི་རྣམས་ཀྱང་ནང་འཐབ་བྱེད༔ འཁོར་ཡང་མི་བརྟན་དབྱེན་ལ་དགའ༔ བདག་ཀྱང་མི་དགའ་རླུང་སེམས་འཕྱོ༔ ཡིད་ལ་མི་འདོད་སྣ་ཚོགས་འབྱུང༔ འཇིག་རྟེན་འདི་ན་གཟའ་ཡང་འཁྲུགས༔ སྐར་མདའ་ལྷུང་དང་ས་གཡོས་འཁྲུགས༔ འུར་སྒྲ་ཐུག་ཆོམ་མི་ཆད་གྲགས༔ ཁྲག་གི་ན་བོན་དམར་དང་སེར༔ ནག་པོས་སྟོང་གསུམ་གང་བ་དང༔ སྔོན་པོས་སྟོང་གསུམ་འབྱུང་བར་འགྱུར༔ ཁྲག་གི་ཆར་པ་སྟོང་ཁམས་གང༔ ཐོག་དང་སེར་བ་བུ་ཡུག་འཚུབས༔ དུས་མིན་ཁ་ཆར་དྲག་པོ་འབེབས༔ འཚུབས་མ་མང་པོས་རི་ལུང་གང༔ མི་ལ་སྲོག་ཆགས་ཐམས་ཅད་སྡང༔ གཤིན་རྗེ་ཨ་ཝ་གླང་མགོ་ཡི༔ ས་རིམ་པ་དགུ་ཡི་འོག་ཤེད་ན༔ མཛེ་ནད་རྣམ་པ་སྣ་ཚོགས་བཏང༔ གདོན་དང་ཡམས་ནད་མང་བར་བྱེད༔ དེ་ཚེ་བསྐང་བར་བྱེད་པ་ཡིན༔ བསྐང་ངོ་བསྐལ༴ ཚད་ནད་འབྲུམ་ནད་མང་པོ་བཏང༔ རིམ་ནད་སྣ་ཚོགས་འབྱུང་བར་འགྱུར༔ གློ་བུར་ནད་ཚ་མང་བ་དང༔ ཕྱུག་དང་ཞིང་ནི་གདོན་གྱི་ཁྱེར༔ དེ་ཚེ་བསྐང༴ བསྐང་ངོ༴ གཞན་ཡང་མ་མོ་འཁྲུག་པའི་རྟགས༔ བྲོས་ཤིང་མི་སྡུག་གཟུགས་སུ་སྟོན༔ རྒྱབ་ཀྱི་ཕྱོགས་སུ་ཚུར་ལ་བླངས༔ འཁོར་ར་བྱེད་ཅིང་བྲང་ལ་བརྡུངས༔ ཆེ་ཚུལ་བྱེད་ཅིང་བ་ག་སྟོན༔ དེ་ཡང་མ་མོ་འཁྲུག་པའི་རྟགས༔ དེ་ཚེ་སྲིད་པའི༴ འཁྲུག་པའི༴ བསྐང་ངོ༔ གཞན་ཡང་མ་མོ་འཁྲུག་པའི་རྟགསཿ རལ་གྲི་ཆགས་དང་བོང་བུ་འཐིང༔ དྲེལ་ཁྱི་ཕྲད་དང་རྨ་བྱ་རྙག༔ ཟླ་བ་ཕྱེད་དང་ཉི་མ་ཐལ༔ མེ་ཡི་ཚིག་དང་ཆུ་ཡི་ཁྱེར༔ དེ་ཡང་འཁྲུག་པའི་མ་མོ་ཡང༔ བསྐང་ངོ་༴ གཞན་ཡང་མ་མོ་ཆད་པའི་རྟགས༔ བྱ་ནག་གཏོར་མ་མི་ཟ་ཞིང༔ བཅའ་རོག་བྱེད་ཅིང་ཕར་ལ་འགྲོ༔ ཐིབ་ཐིབ་དང་ནི་ཏལ་ཏལ་སྨྲ༔ རིང་གྲོགས་བྱེད་ཅིང་འབོད་འགྲོགས་བྱེད༔ བུད་མེད་མང་པོ་ངུ་བཞིན་དུ༔ བཀྲ་མི་ཤེས་པའི་ཚིག་ཀྱང་བརྗོད༔ རང་ཉིད་གཅེར་བུར་བུད་པ་དང༔ གོས་དང་ཁ་དོག་ངན་པ་རྨིས༔ འཚུབ་མ་ཐུད་དུ་འཁྱིལ་བ་དང༔ རྐེད་དུ་ཆགས་དང་རལ་བ་དང༔ མཐུར་དུ་རྒྱུག་ཅིང་དུམ་བུར་བཏང༔ དེ་ཡང་མ་མོ་ཆད་རྟགས་ཡིན༔ དེ་ཚེ་བསྐང་བར་བྱེད་པ་ཡིན༔ འཁྲུག་པའི་མ་མོའི༴ བསྐང་ངོ་༴ གཞན་ཡང་མ་མོ་ཆད་རྟགས་ཡིན༔ རྒོལ་ཞིང་ངོ་ནག་ཆོ་ངེས་འདེབས༔ མཚོན་བྱུང་དགྲ་རྒོལ་ཕུ་མདར་རྒྱུགས༔ འཇིག་རྟེན་བུད་མེད་མང་པོ་ནི༔ ངུ་འབོད་ཐལ་མོ་བརྡེབ་ཅིང་བྱོན༔ ངོ་ནག་བྱེད་ཅིང་འབེབས་མི་ཉན༔ དེ་མ་ལྟར་བསྟེན་པའི་ཉམས་རྟགས་ཡིན༔ བསྐང་ངོ་༴ ཁྲེལ་འཛེམ་བྱེད་ཅིང་ལྐོག་ན་གབ༔ ངོ་ནག་བྱེད་ཅིང་འཐབ་མོ་འོང༔ དེ་སྲིང་ལྟར་བསྟེན་པའི་ཉམས་རྟགས་ཡིན༔ བསྐང་ངོ་༴ མཚང་བྲུ་འཐབ་མོ་གསང་ཞིང་བྱེད༔ ཚུལ་ལ་གཏམ་ཞིང་ཕར་ལ་འགྲོ༔ དེ་མཛའ་ལྟར་བསྟེན་པའི་ཉམས་རྟགས་ཡིན༔ དེ་ཚེ་སྲིད་པའི་མ་མོ་འཁྲུག༔ འཁྲུག་པའི་མ་མོའི༴ སྐོང་ངོ་༴ ལྟོ་མཁོན་བྱེད་ཅིང་ངོ་འཛུམ་ནག༔ མཆུ་འབུག་བྱེད་ཅིང་ལྐག་ན་གབ༔ འཐབ་མོ་བཏགས་སོ་ཞེས་ཀྱང་ཟེར༔ དེ་དྲན་ལྟར་བསྟེན་པའི་ཉམས་རྟགས་ཡིན༔ དེ་ཚེ་སྲིད་པའི༴ འཁྲུགས་པའི་མ་མོའི༴ བསྐང་ངོ་༴ གཞན་ཡང་མ་མོ་ཆད་རྟགས་ནི༔ བོང་བུ་མཆོང་སྟག་འགྲོས་ཀྱང་བྱེད༔ གསོད་དང་རྒོལ་དང་གཅོད་པ་མཐོང༔ རླུང་ནག་འཚུབས་མའི་ནང་ནས་ཕྱིན༔ ཚུར་ལ་མི་འོང་ཕར་ལ་འགྲོ༔ གཅན་གཟན་ཕར་སྤྱང་མང་པོས་ཀྱང༔ ཟ་འདོད་བྱེད་ནས་ཕར་ལ་འགྲོ༔ འབུད་དུ་བཟུང་ཞིང་བུད་མེད་ཀྱང༔ ནའོ་ཚའོ་ཟེར་ཞིང་ཕར་ལ་འགྲོ༔ བུད་མེད་རྐུབ་དང་བཱ་ག་བཟུང་ཞིང་དུ༔ ཟ་འདོད་བྱེད་ནས་ཕར་ལ་འགྲོ༔ ཟ་འདོད་སྦྱོར་འདོད་ཟེར་ཞིང་ནི༔ ཚུལ་ལ་མི་འོང་ཕར་ལ་འགྲོ༔ དེ་ཚེ་བསྐང་བར་བྱེད་པ་ཡིན༔ སྐོང་ངོ་༴ གཞན་ཡང་མ་མོ་ཆད་རྟགས་ནི༔ བུད་མེད་ཤིན་ཏུ་ངུ་བ་དང༔ བོང་བུ་ཤའམ་ཆགས་པ་དང༔ རལ་གྲི་ཆག་གམ་ནེ་ལེ་ཤི༔ མེ་རླུང་ལྕགས་སྒྲོག་ཤིང་དམ་ཆགས༔ སྦྱོར་དང་ནད་དང་རྒོལ་བ་དང་༔ ངུ་དང་མཁུན་དང་སྐྱུགས་པ་དང༔ རྒྱལ་དང་མགོ་ན་གླད་པ་དང༔ སྣ་ཁྲག་བྱུང་དང་རྨ་རྩལ་འདོད༔ ཤི་དང་ན་དང་ཚ་བ་དང༔ བྱིང་དང་རྨུག་དང་རྒོད་བ་དང༔ དེ་ཚེ༴ བསྐང་ངོ་༴ དགྲ་གཟུགས་མདུན་དུ་བཞག་བྱས་ནས༔ མི་ཁྲག་རྟ་ཁྲག་ཕྱར་ནས་ནི༔ ལྷ་གཉན་གཟུ་དང་དཔང་བཙུགས་ཏེ༔ གནམ་དུ་འོ་དོད་བོས་ནས་ནི༔ ཉིན་ཁྱེར་མཚན་ཁྱེར་བྱས་ནས་སུ༔ དམིགས་བྱ་མི་འཆི་མི་གྲངས་འཕེལ༔ ཡིད་ཀྱང་ཆད་ལ་ལྷ་ཡང་གན༔ དེ་ཚེ་བསྐང་༴ བསྐང་ངོ་༴ གཞན་ཡང་བར་ཆད་ཞུགས་པའི་རྟགས༔ རང་ཡང་འཇིགས་ཤིང་འགྲོ་སྙིང་འདོད༔ གཉིད་བྲོ་སྙིང་ནི་མི་དགའ་སྨྲ༔ སྐྱེ་ཞིང་བཀྲེས་ལ་ཁ་རློན་བྱེད༔ ངུ་སྙིང་འདོད་ལ་འགྲོ་སྙིང་འདོད༔ བུད་མེད་གཟུགས་མཐོང་རྐུབ་དང་བཱ་ག་སྟོན༔ དེ་ཚེ༴ བསྐང་ངོ་༴ གཏོར་མ་དུས་ལས་ཡོལ་བའི་ཚེ༔ བཱ་ག་སྟོན་དང་སྔོན་གྱི་དབང་རྟགས་སྟོན༔ དུད་པ་འཁྲིགས་དང་བུད་མེད་གླེན་པ་མཐོང༔ དེ་ཚེ༴ བསྐང་ངོ་༴ མ་མོ་དབང་དུ་མ་འདུས་ན༔ མི་སྡུག་གཟུགས་སུ་སྟོན་ཅིང་འདྲེ་མོར་བརྫུས༔ གཅན་གཟན་ཟ་འོང་མ་མོས་གཤེག་འཁྲུག་གོ༔ དེ་ཚེ་བསྐང་༴ བསྐང་ངོ་༴ བསྒྲུབ་རྟགས་རིང་བའི་རྟགས་སུ་རྒྱང་གླུ་ལེན༔ བར་ཆད་འོང་བའི་རྟགས་སུ་འབག་འབུག་བཟློ༔ སོ་སྒྲ་སྒྲིགས་ནས་གཞན་དང་འཐབ་མོ་འོང༔ ཁ་ལ་འོ་འབྱམས་སྦྱོར་བ་འདོད་པ་ཡིན༔ དེ་ཚེ་བསྐང་༴ བསྐང་ངོ་༴ མ་མོ་བཞད་ན་དགྲ་བགེགས་བསྒྲལ་བའི་རྟགས༔ སྦྱོར་བ་བྱེད་ན་དངོས་གྲུབ་སྟེར་བའི་རྟགས༔ བྲོ་གར་བྱེད་ན་ཅི་བསམ་འགྲུབ་པའི་རྟགས༔ འཛུམ་བག་ལྡན་པས་རང་ཉིད་ཚེ་རིང་རྟགས༔ ཤ་བ་ཞོན་ན་དཀོར་ནོར་འཕེལ་བའི་རྟགས༔ དེ་ཚེ་བསྐང་༴ བསྐང་ངོ་༴ གཞན་ཡང་མ་མོ་བཞུགས་པའི་མཚན་མ་ནི༔ མངོན་སུམ་བྱུང་ངམ་རྟགས་ཀྱི་རྨི་ལམ་དང༔ དངོས་གྲུབ་བླང་བའི་ཆེད་དུ་ཡང༔ ཡང་ནས་ཡང་དུ་ཐུགས་དམ་བསྐང༔ ད་ནི་མ་མོ་འབོད་པའི་རྫས་ལྔའི་ཐུགས་དམ་བསྐང༔ གཡབ་དར་ཏས་སྟི་མི་ཚིལ་དང༔ ལྕོག་ཞུན་བདུག་སྤོས་དག་གི་བསྐང༔ མ་མོ་འབད་པའི་རྫས་དྲུག་ནི༔ ཐོད་པའི་རྟགས་སྤྲོད་སྐུ་མཁར་དང༔ ཐོད་བརྩལ་རལ་གྲི་གཡང་གཞི་དང༔ བྱ་ནག་གཤེལ་ནག་གོ་ཟུ་ནག་པོ་ཡིས༔ བསྐང་ངོ་༴ ཡང་མ་མོ་མཆོད་པའི་བསྐང་བ་ནི༔ ཀེ་རའི་ཤ་དང་དེ་མོའི་ཤ༔ དྲི་ཤ་དབང་པོ་རྣམ་ལྔ་དང༔ འཆི་ཁ་མཚལ་ཐིག་དམར་པོ་ཡིས༔ ཤ་ཁྲག་གཏོར་མ་བདུད་རྩི་དང༔ གུར་གུམ་མངར་ཁྲག་ཨ་མྲྀ་ཏ༔ ཤེལ་ནག་བྱང་སེམས་དཀར་དམར་གྱིས༔ མ་མོ་རྣམས་ཀྱི༴ བསྐང་ངོ་༴ མུར་མཐར་ཁྱབ་པའི་ཐུགས་དམ་བསྐང༔ མ་ལྟར་འཁྲུག་པའི་བསྐང་བ་ནི༔ ན་ཆུང་ཚལ་དང་མི་དབང་ཤ༔ རཀྟ་བདུད་རྩི་ཤ་མེད་དང༔ དབུགས་མེད་སྲོག་མེད་རྣམས་ཀྱིས་བསྐང༔ ཁྲག་མེད་རུས་མེད་རྣམས་ཀྱིས་བསྐང༔ བྲན་ལྟར་འཁྲུག་པའི་བསྐང་བ་ནི༔ ཁ་ཏི་ཤ་དང་དྲེལ་གྱི་ཤ༔ རྐང་དམར་ཟངས་ཀྱི་གླད་པ་དང༔ ཤིང་ཏོག་མེ་ཏོག་རྣམས་ཀྱིས་བསྐང༔ སྲིང་ལྟར་འཁྲུག་པའི་བསྐང་བ་ནི༔ དྲེལ་གྱི་ཤ་དང་སྤྱང་མོའི་ཤ༔ རྟ་ནག་ཤ་དང་རཀྟས་བསྐང༔ བསྐང་ངོ་༴ མཛའ་ལྟར་འཁྲུགས་པའི་བསྐང་བ་དང༔ ངང་པ་དང་ནི་སོ་བྱ་དང༔ བྱ་ནག་དང་ནི་ལུག་ནག་དང༔ ཨ་མྲི་ཏ་ཡི་ཐུགས་དམ་བསྐང༔ རྗེ་མོ་འཁྲུག་པའི་བསྐང་བ་ནི༔ རཀྟ་སྨན་དང་གླད་པས་བསྐང༔ དམ་བདར་འབོད་ཅིང་ཟིལ་གྱིས་གནོན༔ བདུད་རྩི་དྲོང་ལ་གསོལ་བ་འདེབས༔ ཡང་ཞིག་ཐུགས་དམ་བསྐང་བ་ནི༔ ཏྲི་ཤུལ་ཕྱག་རྒྱ་འདི་ཡིས་བསྐང༔ ཁ་ཊྭཾ་ཁ་དང་རལ་གྲི་མུ་ཏྲས་བསྐང༔ འབྲུ་ཟན་ངར་མིའི་རྒྱས་པས་བསྐང༔ བྱ་གཅན་སྣ་ཚོགས་གཟུགས་ཀྱིས་བསྐང༔ གོམ་པའི་སྟབས་ཀྱི་གར་གྱིས་བསྐང༔ བྷནྡྷ་རཀྟས་བསྐང་བས་བསྐང༔ སྦྱིན་སྲེག་ཆེན་པོ་རྣམས་ཀྱིས་བསྐང༔ ཤ་ཆེན་རྣམས་དང་གཏོར་མ་དང་༔ གླང་པོ་ཆེན་པོ་རྣམ་བཅུ་དང༔ བྱ་རོག་ཤ་དང་དེ་མོའི་ཤ༔ དེ་མོའི་སྒོ་ང་རྣམས་ཀྱིས་བསྐང༔ བསྐང་ངོ་༴ ཞིང་གི་ཁོག་པ་དུར་ཁྲོད་དང༔ ཤ་ཁྲག་རྣམ་པ་སྣ་ཚོགས་དང༔ འཇིག་རྟེན་འདས་དང་འཇིག་རྟེན་གྱིས༔ མཁའ་འགྲོ་རྣམས་ཀྱིས་ཐུགས་དམ་བསྐང༔ རས་ཀྱི་མི་མགོ་གཏུམ་པོ་ལ༔ དམན་མོ་རྣམས་ཀྱིས་མིང་བྲིས་ནས༔ བོང་བུ་ཞོན་ནས་སྔགས་ཀྱིས་བསྐོར༔ འབྲུ་ཟན་ཤ་ཆེན་ཨ་མྲི་ཏ༔ ཁྲག་དང་སྙིང་དང་མི་དགོས་བསྐང༔ རིན་ཆེན་རྣམ་པ་སྣ་ཚོགས་དང༔ སྣ་ཚོགས་སྦྱོར་བ་བདུག་སྤོས་དང༔ བུ་ཆུང་སྙིང་དང་རྫས་ཀྱིས་བསྐང༔ བསྐང་ངོ་༴ ཙིཏྟ་རྩ་ལག་མ་ཉམས་དང༔ བུ་ཆུང་སྦུ་གུ་མ་ཉམས་དང༔ ན་ཆུང་འབྱུང་བའི་མཚལ་དང་ནི༔ བྷནྡྷ་མཚན་ལྡན་ནང་དུ་ནི༔ སྨན་དང་མཚལ་གྱི་བཀང་བས་བསྐང༔ བསྐང་ངོ་༴ གླང་ཆེན་ཤ་དང་མི་དབང་ཤ༔ ནེའུ་ལེ་དང་རྨ་བྱའི་ཤ༔ བུད་མེད་གཙང་མར་སྦྱོར་བ་ཡིས༔ བྱང་ཆུབ་སེམས་དང་ཚལ་གྱིས་བསྐང༔ བྱ་ནག་ཤེལ་ནག་བོང་བུ་ཡིས༔ སྨན་དང་གཏོར་མ་མང་པོས་བསྐང༔ ཤིང་འབྲས་མེ་ཏོག་སྣ་ཚོགས་དང༔ ཤ་ཁྲག་མི་དབང་རྡོ་སོལ་དང༔ རལ་གྲི་ལ་སོགས་རྫས་རྣམས་ཀྱིས༔ བསྐང་ངོ་༴ སྲོག་མེད་མ་ནི་སྲོག་གི་བསྐང༔ དབུགས་མེད་མ་ནི་དབུགས་ཀྱིས་བསྐང༔ ཤ་མེད་མ་ནི་ཤ་ཡིས་བསྐང༔ རུས་མེད་མ་ནི་རུས་ཀྱིས་བསྐང༔ ཁྲག་མེད་མ་ནི་ཁྲག་གི་བསྐང༔ བསྐང་ངོ་༴ གཞན་ཡང་སྲོག་གིས་བསྐང་བ་ནི༔ བྱ་ནག་ལུག་ནག་སྲོག་གིས་བསྐང༔ མི་དབང་བྱ་ལུག་སྙིང་གིས་བསྐང༔ མི་རུས་རྐང་ཀིང་ལ་སོགས་པའི༔ རྒྱུད་པའི་འབྲེལ་བས་རྣམས་ཀྱི་ནི༔ མོ་རིགས་དག་གི་མངལ་ཁྲག་དང༔ ན་ཆུང་ལས་བྱུང་ཟག་པའི་ཁྲག༔ མི་དབང་སྙིང་ཁྲག་རྣམས་ཀྱིས་བསྐང༔ ཡང་ཞིག་རྫས་ཀྱི་བསྐང་བ་ནི༔ བདག་གི་སྤྱི་བོར་ཁྲག་དང་ནི༔ སྣ་ཁྲག་བྱ་མོའི་སྙིང་ཁྲག་དང་༔ ཁྲག་སྣ་མང་པོས་བསྐང་གྱུར་ཅིག༔ ཤེལ་ནག་སྤྱི་དཀར་མང་པོ་རིགས༔ དམིགས་པ་རྐང་དང་རྐང་མར་བཅས༔ བམ་དང་རྟ་དང་གུ་གུ་གླང༔ གླད་པའི་རྩ་ཆེན་ཕུག་པའི་ཁྲག༔ སྲིན་ལག་ཁྲག་དང་སྣ་ཁྲག་དང༔ གཞན་ཡང་ཁྲག་སྣ་མང་པོ་ཡི༔ ཡང་ནས་ཡང་དུ་མཆོད་པ་འབུལ༔ ཐུགས་དམ་གཉན་པོ་བསྐང་གྱུར་ཅིག༔ བྱ་ཁྱི་ར་ལུག་ཕག་དང་གཡག༔ ཤ་ཁྲག་གཏོར་མ་མང་པོ་དང༔ སྙིང་སྣའི་ཚོགས་ཀྱིས་ཐུགས་དམ་བསྐང༔ རྡོ་རྗེ་རྒྱལ་པོ་རྒྱལ་ཐེབ་དང༔ ལས་ཀྱི་ཀརྨ་གྲོགས་མཆེད་དང༔ བདག་ཅག་འདིར་འདུས་འཁོར་དང་བཅས༔ རྒྱུ་འབྱོར་ཡོན་བདག་འཁོར་བཅས་ལ༔ མི་ལ་ན་ཚ་མ་བཏང་ཅིག༔ ཕྱུག་ལ་གོད་ཁ་མ་བཏང་ཅིག༔ ཞིང་ལ་བཙའ་སད་སེར་གསུམ་མ་བཏང་ཅིག༔ བདུད་ཀྱི་ཞགས་པ་ནག་མོ་ཆོད༔ གཤིན་རྗེའི་ཁྲམ་ཁ་དགྲ་ལ་བསྒྱུར༔ བཙན་གྱི་ཤྭ་དྷིལ་དགྲ་ལ་སྤོས༔ བདག་ཅག་རྣལ་འབྱོར་འཁོར་བཅས་ལ༔ ཚེ་ལ་བར་ཆད་མ་བཏང་ཅིག༔ སྲོག་ལ་ཧུར་ཐུམ་མ་བཏང་ཅིག༔ དབུས་ཀྱི་གཙོ་མོ་མ་ཡོ་ཅིག༔ འཁོར་གྱི་མ་མོ་མ་འཁྲུག་ཅིག༔ ནང་གི་གཙོ་མོ་མ་འཁྲུག་ཅིག༔ ཕྱི་ཡི་བརྟན་མ་མ་གྱེས་ཅིག༔ བསྐང་ངོ་བསྐལ་བར་ཐུགས་དམ་བསྐང༔ བཅོལ་པའི་ཕྲིན་ལས་གྲུབ་པར་མཛོད༔ གནོད་པར་བྱེད་པའི་དམ་སྲི་དང༔ སྡང་བར་བྱེད་པའི་དགྲ་བོ་རྣམས༔ ལོ་དང་ཟླ་བ་མ་བཞག་ཅིག༔ ཞག་དང་ཟ་མར་མྱུར་དུ་སྒྲོལ༔ བཅོལ་བའི་ཕྲིན་ལས་གྲུབ་པར་མཛོད༔ དཔལ་ལྡན་ལྷ་མོ་ནག་མོའི་བསྐང་བ་རྫོགས་སོ༔ དགེའོ༔ ༔
རྡོ་རྗེ་ཐེག་པའི་བསྟན་བསྲུང་ཆེན་མོ་རེ་མ་ཏིའི་སྐོང་བཤགས་ཀྱི་རིམ་པ་ཌཱཀྐི་གར་མཁན་བརྩེ་བའི་རྒྱང་གླུ། ཀུན་བཟང་ངེས་དོན་དབང་པོ།
རྡོ་རྗེ་ཐེག་པའི་བསྟན་བསྲུང་ཆེན་མོ་རེ་མ་ཏིའི་སྐོང་བཤགས་ཀྱི་རིམ་པ་ཌཱཀྐི་གར་མཁན་བརྩེ་བའི་རྒྱང་གླུ་ཞེས་བྱ་བ་བཞུགས་སོ། །ན་མོ་མ་ཧཱ་གུ་རུ་རཏྣ་ཡེ། དུར་ཁྲོད་བརྒྱད་སོགས་གནས་ཡུལ་ཞིང་སྐྱེས་ཀྱི། །ཚོགས་ཀྱི་འཁོར་ལོས་བསྒྱུར་མཛད་ཧེ་རུ་ཀ །རྔ་ཡབ་གླིང་གི་བདག་པོ་གང་དེ་དང་། །དབྱེར་མེད་དྲིན་ཆེན་བླ་མ་སྤྱི་བོར་རྒྱལ། །ཆོས་དབྱིངས་སྐྱེ་མེད་རྒྱལ་ཡུམ་གྱིས། །རྣམ་རོལ་ཛ་ཊཱི་དབང་ཕྱུག་ཆེ། །ཡང་བཞེངས་འདོད་ཁམས་དབང་མོ་ཡིས། །ཐུགས་དམ་བསྐང་བའི་རིམ་པ་བྲི། །དེ་ལ་འདིར་རྒྱལ་བ་ཀུན་གྱི་ཡུམ་མཆོག་མ་ཅིག་རྡོ་རྗེ་རེ་མ་ཏི་ཐུགས་དམ་བསྐང་ཞིང་དགྱེས་པ་བསྐྱེད་པའི་ཕྱིར་ན། །ཐབས་འདི་ལ་ནན་ཏན་དུ་བྱ་བར་རིག་སྟེ། དེ་ཡང་དུར་ཁྲོད་ལ་སོགས་པ་འཇིགས་ཤིང་ཡ་ང་བའི་གནས་སུ། རྟེན་གྱི་དཀྱིལ་འཁོར་མངོན་པར་འདུ་བགྱི་པར་བཤམ་པའི་མདུན་དུ་འབྲུ་ཚོམ་གྱི་དབུས་སུ། མ་མོའི་གཏོར་མ་བརྗིད་ལྡན་ཤ་ཁྲག་གིས་བརྒྱན་པ་ངར་མཐིང་གི་གདུག་དང་བཅས་པ་བཤམས། མཐའ་བསྐོར་དུ་ཆུ་གཉིས་ཉེར་སྤྱོད་ལྔ་དང་སྨན་རཀྟ་སོགས་སྦྲེང་ཚར་དུ་བཤམས། གཞན་ཡང་ཉེ་མཁོའི་ཡོ་བྱད། ཌཱ་དྲིལ། རྐང་གླིང་། རྔ་རོལ། མ་མོ་འབད་པའི་སྤོས་སོགས་ཡོ་བྱད་ཐམས་ཅད་ཚོགས་པར་བྱའོ། །གཉིས་པ་རང་ཉིད་ལྷ་ཡི་རྣལ་འབྱོར་ལ་གནས་པའི་ངང་ནས་ཆོ་གའི་ལས་གཞུང་བསྲངས་ནས་བསྙེན་བསྟོད་ཡན་སོང་ནས། གསུམ་པ་ཐུགས་དམ་བསྐང་བའི་རིམ་པ་དངོས་ལ་རྣམ་པ་བཞི་ལས། དང་པོ་བསྐང་རྫས་བྱིན་རླབས་ནི། སྟོང་པའི་ངང་ལས་སོགས་ནས། མ་མོ་ཆེན་མོ་རྡོ་རྗེ་རེ་མ་ཏི་ལ་སོགས་པ་བསྟན་སྲུང་དམ་ཅན་རྒྱ་མཚོའི་སྤྱན་ལ་ལམ་དུ་འབྱུང་བར་གྱུར་ཅིག །ༀ་སརྦ་སོགས་ནས། ཁམ་སྭཱ་ཧཱ། བར་གྱི་གནས་ཡོ་བསྐང་རྫས་བཅས་བྱིན་གྱིས་རླབས་སོ། །གཉིས་པ་ཐུགས་དམ་བསྐང་བའི་རིམ་པ་རོལ་མོ་དབྱངས་བཅས། ཧཱུྃ་བྷྱོ། རྡོ་རྗེ་སྲིན་མོ་ཆེན་མོ་རེ་མ་ཏི། །རྡོ་རྗེའི་བཀའ་སྡོད་ཕོ་ཉ་བྲན་གཡོག་བཅས། །རྡོ་རྗེ་པདྨའི་ཐུགས་དམ་གཅེར་དགོངས་ལ། །རྡོ་རྗེའི་ཐ་ཚིག་བཞིན་དུ་ད་ཚུར་བྱོན། །རྣམ་མང་མཆོད་པའི་བྱེ་བྲག་སྣ་ཚོགས་པ། །ནམ་མཁའ་མཛོད་ཀྱི་སྒོ་འཕར་ཡང་ཕྱེས་ནས། །སྔགས་རྒྱ་ཏིང་འཛིན་དག་པའི་བྱིན་རླབས་པ། །མ་ཁྱེད་ཐུགས་དམ་བསྐང་བའི་དཔྱིད་དུ་སྤྲོ། །གསར་རྙིང་ཐོད་རྩེགས་གླད་ཞག་ཞལ་བས་མཛེས། །ལྕང་ལོའི་ཁ་བད་རྒྱུ་མའི་དྲ་ཕྱེད་འཕྱོང་། །དབུགས་བྲལ་རྒྱལ་མཚན་ཞིང་གི་བླ་རེ་དང་། །རྔམ་བརྗིད་རོལ་པ་དྲག་པའི་ཕོ་བྲང་འདིས། །རེ་ཏི་བྲན་གཡོག་འཁོར་བཅས་ཐུགས་དམ་བསྐང་། །ལྕང་ལོར་བཅས་པའི་བྷནྫའི་སྣོད་ཡང་པོར། །ནང་གསང་ཕྱི་ཡི་དགྲ་བགེགས་བསྒྲལ་བ་ཡི། །ཤ་རི་ཁྲག་མཚོ་རུས་པའི་གྲམ་ཁྲོད་འཁྲིགས། །རྨད་བྱུང་གཏོར་མ་རྒྱན་ལྡན་དམ་པ་འདིས། །འདོད་ཁམས་དབང་ཕྱུག་འཁོར་བཅས་ཐུགས་དམ་བསྐང་། །རྩ་བརྒྱད་ཡན་ལག་སྟོང་སྦྱར་ར་ས་ཡན། །དམར་ཆེན་རཀྟའི་རྒྱ་མཚོ་སྦུ་འཕྲེང་འཁྲིགས། །འབྲུ་བཅུད་འཆི་མེད་བདུད་རྩིའི་སྐྱེམས་སོགས་ཀྱིས། །རེ་ཏི་བྲན་གཡོག་འཁོར་བཅས༴ གཟུགས་རེག་སྒྲ་སྙན་དྲི་ཞིམ་རོ་བདའ་དང་། །ཏ་ན་ག་ན་སྦྱོར་སྒྲོལ་གསང་མཆོད་ཆེ། །གསང་རྟེན་ཙིཏྟ་ཤིང་ལོ་རླུང་ཁྱེར་སོགས། །ཕྱི་ནང་གསང་བའི་རྟེན་རྫས་སྣ་ཚོགས་ཀྱིས། །འདོད་ཁམས་དབང་ཕྱུག་འཁོར་བཅས༴ དབང་པོའི་མེ་ཏོག་ཚིལ་གསུར་དུད་སྤྲིན་འཁྲིགས། །རྐང་ཆེན་སྒྲོན་མེ་མཁྲིས་སྣའི་དྲི་ཡི་ཁྱབ། །ཤ་རུལ་ཞལ་ཟས་རྐང་གླིང་ཐོད་རྔ་སོགས། །མཆོད་པའི་བྱེ་བྲག་རྣམ་མང་རྒྱ་ཆེན་པོས། །རེ་ཏི་བྲན་གཡོག་འཁོར་བཅས༴ རྣམ་བཀྲ་དར་གྱི་རྒྱན་ལྡན་རྟ་ནག་དང་། །མི་སྡུག་རྭ་རྩེ་གཡོ་བའི་ཞོལ་ཆེན་ཚོགས། །འཇམ་ལེགས་སྤུ་སྡུག་ཡིད་འོང་ལུག་ནག་དང་། །དགྲ་བགེགས་གླད་པ་འགེམ་པའི་བྱ་ཚོགས་ཀྱིས། །འདོད་ཁམས་དབང་ཕྱུག་འཁོར་བཅས༴ འཇིགས་རུང་མཆེ་གཙིགས་རྔམས་པའི་མི་ནག་དང་། །མོན་མོ་ནག་མོ་དགྲ་ལ་དུག་ནད་འདེབས། །དམ་ཉམས་སྲོག་འཕྲོག་དམ་དང་གཅན་སྤྱང་དང་། །དར་གྱི་ཅོད་པཎ་གཡོ་བའི་ཁྱི་ནག་འདིས། །རེ་ཏི་བྲན་གཡོག༴ ལོང་ཀའི་ཡུལ་གྱི་མགྲིན་བཟང་དམར་གྭ་ལ། །སྲིན་ཐོད་དགའ་དང་ལྤགས་པས་རབ་གཡོགས་ཤིང་། །གོང་སྨེད་སྲབ་མཐུར་གདུག་པའི་སྦྲུལ་གྱིས་བརྒྱན། །འཛམ་གླིང་ཡུད་ཀྱིས་བསྐོར་བའི་ཞེན་པ་འདིས། །འདོད་ཁམས་དབང་ཕྱུག་འཁོར་བཅས༴ མི་ལྤགས་གོས་དང་རེ་ལྡེའི་སྨད་གཡོག་དང་། །རྨ་བྱའི་གདུག་ལ་ཉི་མ་ཟླ་བས་བརྒྱན། །རླུང་ནག་འཚུབས་གུར་ནད་རྫིང་ཁྲག་ཞག་མཚོ། །སྲ་རྣོ་གོ་མཚོན་སྤྱན་གཟིགས་རྣམ་མང་འདིས། །རེ་ཏི་བྲན་གཡོག་འཁོར༴ རལ་གྲི་འབར་བ་ནེ་ལེའི་རྐྱལ་བུ་དང་། །ནད་ཀྱི་རྐྱལ་པ་ཚོན་གྱི་གྲུ་གུ་དང་། །བདུད་ཀྱི་ཁྲམ་ཤིང་ཤྭ་དྷིལ་དཀར་ནག་སོགས། །མགོ་ཕྲེང་བྱུག་པ་དུར་ཁྲོད་རྒྱན་རྣམས་ཀྱིས། །འདོད་ཁམས་དབང་ཕྱུག་འཁོར་བཅས༴ ཕྱག་རྒྱ་ལྔ་དང་སྙན་རྒྱན་སེང་གེ་སྦྲུལ། །མདའ་དར་མེ་ལོང་དུང་ཤྭོས་རྒྱན་པ་དང་། །རི་གླིང་གསེར་གྱི་རི་བདུན་རོལ་མཚོ་བདུན། །ཉི་མ་ཟླ་བ་ལྷ་མའི་དཔལ་འབྱོར་རྣམས། །རེ་ཏི་བྲན་གཡོག༴ གཞན་ཡང་འཁོར་བཅས་སྲིད་པའི་དཔལ་འབྱོར་ཚོགས། །དངོས་སུ་འབྱོར་བཤམས་ཡིད་ཀྱི་ལེགས་སྤྲུལ་ནས། །རྒྱལ་པོར་འོས་པ་བདུན་དང་རིན་ཆེན་བརྒྱད། །ཀུན་བཟང་མཆོད་སྤྲིན་རབ་འབྱམས་དཔག་མེད་འདིས། །འདོད་ཁམས་དབང་ཕྱུག༴ ཆོས་དབྱིངས་བཟང་མོ་ཨེ་ཀ་ཛ་ཊི་མ། །གདུག་པ་འདུལ་ཕྱིར་འདོད་ཁམས་དབང་ཕྱུག་གི། །སྐུར་བཞེངས་ཡེ་ཤེས་མེ་མོ་ལྷུན་གྱིས་གྲུབ། །ཡིད་ཆོས་གསོལ་འདེབས་བླ་མེད་རྟེན་མཆོག་འདིས། །རེ་ཏི་བྲན་གཡོག་འཁོར་བཅས་ཐུགས་དམ་བསྐང་། །གསུམ་པ་བཤགས་པ་བྱ་བ་ནི་སྒོ་གསུམ་གནོང་འགྱོད་དང་བཅས་པས། ཧཱུཾ་བྷྱོ། དབྱིངས་ཀྱི་རྒྱལ་མོ་ཡེ་ཤེས་རོལ་པའི་རྩལ། །མ་མོ་ཆེན་མོ་དམ་ལྡན་རེ་མ་ཏཱི། །འཁོར་ཚོགས་སྡེ་དང་བཅས་པ་མ་ལུས་པ། །ཐུགས་རྗེའི་བདག་ལ་གསན་ཅིང་དགོངས་སུ་གསོལ། །བདག་ཅག་མི་ཤེས་རྨོངས་འཁྲུལ་ལེ་ལོ་ཡིས། །སློབ་དཔོན་སྨོད་དང་གསང་སྔགས་བཟླས་བརྗོད་གཡེལ། །གསང་བཅུ་བསྒྲག་ཅིང་མན་ངག་འཆལ་བར་སྤྱོད། །རྩ་བའི་དམ་ལས་འགལ་བ་མཐོལ་ལོ་བཤགས། །མི་སྤང་ལྔ་དང་དང་ལེན་སྤྱོད་བྱ་ལྔ། །ཤེས་བྱ་ལྔ་དང་བསྒྲུབ་བྱ་ལྔ་ལ་སོགས། །རྩ་བ་ཡན་ལག་དམ་ཚིག་ཉམས་པ་རྣམས། །རང་གནང་འགྱོད་པ་ཆེན་པོས་བཤགས་པར་བགྱི། །ཐུགས་རྗེའི་གཏེར་གྱུར་ལྷ་མོ་ཁྱོད་ཉིད་ཀྱིས། །བདག་ཅག་དཔོན་སློབ་ཡོན་ཆོད་འཁོར་བཅས་རྣམས། །གཡེལ་མེད་རྟག་ཏུ་སྲུང་ཞིང་སྐྱབས་པ་ལ། །གཏང་རག་དུས་སུ་མ་མཐོང་མཐོལ་ལོ་བཤགས། །བསྟན་དང་བསྟན་འཛིན་ཡོངས་ལ་གནོད་པ་ཡི། །དམ་ཉམས་དགྲ་བགེགས་སྡིག་ཅན་དེ་དག་ལ། །དབང་བསྐུར་བྱིན་རླབས་བྱམས་ཀྱིས་སྐྱོང་བ་སོགས། །ཁྱོད་ཀྱི་ཐུགས་དམ་འགལ་ཉམས་མཐོལ་ལོ་བཤགས། །ཕྱི་ནང་གསང་བའི་མཆོད་རྫས་རྟེན་རྫས་ལ། །རྒྱུ་ཆུང་ཕུད་ཉམས་འབག་རྩོག་དྲི་མས་གོས། །དུས་ཀྱི་མཆོད་གཏོར་ཆགས་ཤིང་ཉམས་པ་སོགས། །སྒོ་གསུམ་གནང་འགྱོད་དྲག་པོའི་བཤགས་པར་བགྱི། །ཁྱོད་ནི་དམ་ཚིག་གཉེན་ལ་རྟག་གནས་ཤིང་། །བདག་གི་ཉམས་ཆག་ཕྲ་མོ་བྱུང་སྲིད་ན། །མི་དམིགས་ཆོས་ཉིད་ཀློང་དུ་བཟོད་བཞེས་ནས། །འགྱུར་མེད་དག་ཅིང་ཚང་པར་སྩལ་དུ་གསོལ། །ཅེས་ཡིག་བརྒྱ་བརྗོད་ཅིང་དགོས་པ་ཅན་ལ་སྐབས་སུ་སྲུང་མ་དང་ཁོན་བཅུག་བཤགས་པ་ནི་གཞན་དུ་ཤེས་སོ། ༈ །བཞི་པ་འཕྲིན་ལས་བཅོལ་བ་ནི། ཧཱུཾ་བྷྱོ། དེ་ལྟར་དགྱེས་མཆོད་ཉམས་ཆག་བཤགས་པའི་མཐུས། །ཁྱོད་ཀྱི་མཐུ་སྟོབས་ཉི་མ་བྱེ་བའི་གཟིས། །ཕས་རྒོལ་ཀུ་མུ་ཏ་ཚལ་ཟུམ་བྱས་ནས། །བདག་སོགས་བསྟན་འཛིན་པད་ཚལ་རྒྱས་པར་མཛོད། །བདག་ཅག་དཔོན་སློབ་རྒྱུ་འཁོར་བཅས་ལ། །ནད་མུག་མཚོན་འཁྲུགས་དལ་ཡམས་བར་ཆད་བདུད། །བཤད་སྒྲུབ་སྡེ་དགོན་འཇིགས་པའི་སྦྱོར་རྩུབ་ཀུན། །མ་ལུས་ཞི་ཞིང་ཚེ་བསོད་ཡེ་ཤེས་སྟོབས། །ཐོས་བསམ་བསྒོམ་པའི་ཡོན་ཏན་རྒྱས་པར་མཛོད། །སྣང་སྲིད་འཁོར་འདས་རླུང་སེམས་སྣང་བ་ཀུན། །དབང་དུ་འདུས་ཤིང་བདུད་བཞིའི་ཉེར་ཚེའི་དགྲ། །མ་ལུས་དྲག་པོ་བརླག་པའི་ཕྲིན་ལས་མཛོད། །གནས་སྐབས་མི་མཐུན་ལས་རྒྱལ་གྲིབ་བཞིན་འགྲོགས། །མཐུར་ཐུག་ཟག་བྲལ་འགྱུར་མེད་ཐིག་ལེའི་གཞིར། །མངོན་གྱུར་གདོད་མའི་དཔལ་མཆོག་དང་པོ་ཉིད། །ཧེ་རུ་ཀ་དཔལ་མྱུར་དུ་འགྲུབ་པར་ཤོག །ཅེས་ཕྲིན་ལས་བཅོལ་བ་དྲག་ཏུ་བྱའོ། །དེ་ལྟར་རྡོ་རྗེའི་བསྟན་སྐྱོང་ཆེན་མོ་དཱེ་ཝ་ཊི་དགྱེས་བསྐྱེད་བསྐོང་བཤགས་ཀྱི་རིམ་པ་ཌཱཀྐི་གར་མཁན་བརྩེ་བའི་རྒྱང་གླུ་ཞེས་བྱ་བ་འདིའང་བསྟན་བསྲུང་ཆེན་མོ་དགྱེས་པའི་མཚན་མ་བྱུང་བར་བརྟེན་ཏེ། ཆོས་རྗེ་ཀཿཐོག་པའི་བྲན་གྱི་ཐ་ཤལ་གསང་ཆེན་རྡོ་རྗེ་ཐེག་པའི་བསྟན་པ་ལ་མོས་པ་ལམ་བྱེད་ཀྱི་སྤྲུལ་མིང་རྨོངས་བཏུལ་བ་ལ་འགྱུར་མེད་ཀུན་བཟང་ངེས་དོན་དབང་པོ་ཞེས་པའི་ཀཿཐོག་རྡོ་རྗེའི་གདན་གྱིས་གཙུག་ལག་ཁང་གིས་མགོན་ཁང་རབ་འཇིགས་རྩུབ་འགྱུར་ཚལ་དུ་རྡོ་རྗེ་གཞོན་ནུའི་བསྙེན་བསྒྲུབ་ཀྱིས་མཐུན་སེང་ཞིག་ཏུ་འཕྲལ་བྱུང་དུ་བྲིས་པ་དགེ། མངྒ་ལཾ། །དགེའོ།། །།
གཏིག་བཤགས།
༈ གཏིག་བཤགས་བྱ་བ་ནི། ཨཱོཾ་བདག་ནི་རང་རིག་ཡེ་ཤེས་བློ་དང་མ་ལྡན་པས། །བག་མེད་ཚུལ་གྱི་དམ་ལ་འགལ་གྱུར་ཏེ། །དཔལ་ཆེན་ཧེ་རུ་ཀ་ཡི་ཐུགས་དང་ཅི་འགལ་བ། །ཐུགས་རྗེ་ཆེ་མངའ་རྣམས་ལ་བཟོད་པར་གསོལ། །ཨཱོཾ་བདག་ནི་རང་རིག་ཡེ་ཤེས༴ བག་མེད་ཚུལ་གྱིས་དམ་ལ༴ མ་མོ་མཁའ་འགྲོ་ཐུགས་དང་ཅི༴ མ་སྲིང་རྒྱ་མཚོའི་ཚོགས་ལ་བཟོད་པར་གསོལ། །གསང་སྔགས་རྨད་བྱུང་ཐེག་ཆེན་རྒོར་ཞུགས་རྣམས། །ལྟ་བ་འཕང་དམའ་ཆོས་ཉིད་དོན་མ་རྟོགས། །བསྒོམ་པ་ཡུན་ཐུང་ཡི་དམ་ལྷ་མ་འདྲེས། །སྤྱོད་པ་བརླབས་ཆུང་ཡི་དམ་ལྷ་མ་མཉེས། །སྦྱིན་པ་སྟོབས་ཆུང་སེར་སྣའི་མདུད་པ་གྲོལ། །བསམ་གཏན་སྟོབས་ཆུང་འདོད་ཆགས་སེམས་མ་ནོན། །སྙིང་རྗེ་ཤུགས་ཆུང་ཞེ་སྡང་སྤྲོ་མ་ཞི། །ཤེས་རབ་སྟོབས་ཆུང་གཏི་མུག་མུན་མ་སེལ། །མ་མཐོང་མཐོང་གི་ལྷ་འདྲེས་བསྐུར་བཏབ་བམ། །མ་ཉེས་པ་ལ་སྔགས་ཀྱི་ཟེར་ཐལ་ལམ། །མ་རྟོགས་པ་ལ་ཕུར་བུའི་དབལ་ཐལ་ལམ། །སྨན་མེད་པ་ལ་ཡི་དམ་ལྷ་མཆོད་དམ། །སྟ་ན་བྱིན་གྱིས་མ་རློབས་གནས་འཁྱམས་སམ། །གྷ་ན་བྱིན་གྱིས་མ་རློབས་རྡུལ་ཁྱེར་རམ། །དཀྱིལ་འཁོར་བྲི་ནོར་མར་མེ་འབར་བསད་དམ། །ཕྱི་ཡི་འདུལ་ཁྲིམས་མ་བསྲུངས་ཁྲིམས་ཉམས་སམ། །ནང་གི་དམ་ཚིག་མ་སྲུངས་དམ་ཉམས་སམ། །བསྲུང་འཚེམ་མ་མཆིས་སྡིག་དང་གྲལ་ཅིག་གམ། །སློབ་དཔོན་བཀའ་དྲིན་གྱི་བཀའ་བཅགས་གམ། །གྲོགས་མཆེད་ཁྱད་པར་ཅན་གྱི་ཐུགས་དཀྲུགས་སམ། །དམག་ཆེན་དཔོན་བྱས་ལིང་ཆེན་ཁ་བསྒྱུར་རམ། །ཆུ་བསྒྱུར་མེ་བཀྱེས་སེམས་ཅན་སྲོག་བཅོད་དམ། །མཚམས་མེད་ལྔ་དང་དེ་དང་ཉེ་བ་ལྔ། །ལྕི་བ་བཞི་དང་ལོག་པ་བརྒྱད་པོ་བཅས། །དེ་ལ་སོགས་ཏེ་ཉེས་སྒྲིབ་ཅི་མཆིས་པ། །འཕགས་པ་མངོན་སུམ་བཞུགས་པའི་སྤྱན་སྔ་རུ། །གནོང་འགྱོད་ཡིད་ལ་དྲན་ཏེ་མཐོལ་ཞིང་བཤགས། །བདག་ནི་སེམས་ཅན་ལགས་པ་མ་རིག་འཁྲུལ་པ་བགྱི། །སྒྱུ་མ་ལགས་པས་གནོང་པ་རྗེས་སུ་བཤགས། །ཐུགས་རྗེ་ཆེན་པོ་བཟོད་པ་དང་དུ་བཞེས། །ཡེ་ཤེས་ཆེན་པོས་ཚངས་པ་རྩལ་དུ་གསོལ། །ཡི་གེ་བརྒྱ་པ་ཅི་རིགས་སུ་འདོན།།
མ་ཚོགས་འཁོར་བཅས་བཤགས་པ།
མ་ཚོགས་འཁོར་བཅས་བཤགས་པ་བགྱི་བ་ནི། ཧཱུྃ། འགྲོ་བའི་དོན་ཆེད་སྐུ་མཆོག་འཇིགས་པ་ལ། །མ་ལུས་ཁྱད་པར་གསལ་བར་མཛད་པ་ཡི། །ང་རྒྱལ་དྲེགས་པ་ཐམས་ཅད་འདུལ་མཛད་པ། །ཡོན་ཏན་རྫོགས་པའི་སྐུ་ལ་ཕྱག་འཚལ་བསྟོད། །ཧཱུྃ། རྡོ་རྗེ་རྒྱལ་པོ་བདེ་བར་གཤེགས་པའི་བདག །གསང་སྔགས་རྣལ་འབྱོར་མཉེས་པའི་གྲུབ་པ་མོ། །ཡོན་ཏན་མང་པོའི་འགྲོ་བའི་དོན་མཛད་མ། །སྔོན་གྱིས་ལས་ཀྱི་འབྲེལ་བའི་བདག་བཟུང་སྟེ། །སྐུ་གསུམ་སྒྱུ་མར་བསྟན་པའི་བཀའ་དྲིན་ཆེ། །དུས་ངན་སྙིགས་མའི་དུས་འདིར་བདག་སྐྱེས་ཏེ། །མ་རིག་ཉོན་མོངས་བག་མེད་དབང་གྱུར་ཏེ། །དམ་ཚིག་ཉམས་ཤིང་ཐུགས་དང་འགལ་གྱུར་པ། །རྡོ་རྗེ་དམ་ལྡན་མ་ལ་བཟོད་པར་གསོལ། །ཧཱུྃ། མ་མོ་དབྱིངས་ཕྱུག་རྡོ་རྗེ་རིག་མ་ལ། །ལོག་རྟོག་གཞོམ་ཕྱིར་ཡུམ་གྱི་ཚུལ་སྟོན་ཅིང་། །ཁྲོ་བཞད་ལྕང་ལོར་བཅས་པའི་ཅོད་པན་ཅན། །ཡོན་ཏན་ལྡན་པའི་སྐུ་གསུང་ཐུགས་ཉིད་ལ། །མ་རིག་དབང་གིས་སྒྲོས་དང་བསྐུར་བཏབ་སྟེ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །ཧཱུྃ། བདེར་གཤེགས་རྒྱལ་བའི་བསྟན་པ་རྒྱས་མཛད་ཅིང་། ཐམས་ཅད་འཇིགས་ཚུལ་ཆས་ཆེན་རྣམས་ཀྱི་བརྒྱན། །དུར་ཁྲོད་གནས་པའི་བོང་བུ་ཞབས་ཀྱི་བརྟེན། །དྲིལ་ཆུང་ཕྲེང་བས་སྐུ་ཡི་རྒྱན་དུ་བྱས། །གསང་བར་དམ་བཅའ་བུ་རྣམས་ཀྱིས། །སེམས་ཅན་ལག་པས་ཉོན་མོངས་ལྔ་རྒྱས་པས། །སྨིན་ཅིང་བསྒྲུབ་པར་བྱ་བ་མ་གྲུབ་པས། །མ་ཅིག་མེ་འབར་སྐུ་ལ་བཟོད་པར་གསོལ། །ཧཱུྃ། དྷ་ཀ་རྡོ་རྗེ་དམ་ཚིག་གཏན་གྱི་གཉེར། །གསང་བར་དམ་བཅས་སྐུ་ཡི་དམ་ཚིག་ལས། །སྐུ་ཡི་སྤྱོད་པ་ཚུལ་བཞིན་མ་རྟོགས་ཏེ། །ལེ་ལོ་སེམས་གཉིས་ཟོས་པ་ཐམས་ཅད་ཀུན། །བསྒོམ་དང་བསྒྲུབ་པའི་ཚུལ་བཞིན་མ་བསྲུང་བ། །བྱམས་པའི་ཐུགས་རྗེ་གཡེལ་བར་གྱུར་པ་ནི། །ཁམས་གསུམ་རྒྱལ་མོའི་སྐུ་ལ༴ ཧཱུྃ། མ་ཅིག་བདེར་གཤེགས་རིགས་ལྔ་དཔལ་གྱི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་པའི་མ། །ཅི་བཞིན་འགྲོ་བ་ཐམས་ཅད་དེ་འདུས་པའི། །མ་ཅིག་སྤྲུལ་པའི་སྐུ༴ ཧཱུྃ། རྣལ་འབྱོར་གདུང་འཚོབ་བདག་ཅག་འདིར་འདུས་རྣམས། །སྤྱི་དང་ཁྱད་པར་ལྷག་པའི་དམ་ཚིག་ལས། །མ་ཅིག་དམ་ཚིག་རྗེས་སུ་མི་བཏང་ཡང་། །ཀློང་དུ་མ་གྱུར་རྩལ་ཤུགས་གོམས་ཆུང་བས། །མ་ཅིག་སྐྱོང་མའི་སྐུ་ལ༴ ཧཱུྃ། ཐུགས་རྗེས་ངེས་པར་གཟིགས་པའི་ཡུལ་རྣམས་ལ། །དམ་རྫས་མ་ཚངས་མཆོད་པ་མ་བཤམས་ཏེ། །འཕང་སེམས་དབང་གི་མཆོད་པ་རྒྱུ་ཆུང་བས། །རྗིད་མོ་བཀང་བཟློག་སྐུ༴ ཧཱུྃ། མ་ཅིག་སྐུ་མདོག་ཕྱག་མཚན་ཕྱག་རྒྱ་ལས། །དོན་དང་མཐུན་པར་ཚུལ་བཞིན་མ་རྟོགས་ཏེ། །འཕགས་པའི་ཐུགས་རྗེས་གཡེལ་བར་གྱུར་པ་རྣམས། །བདུད་འདུལ་རྒྱལ་མོའི་སྐུ༴ ཧཱུྃ། ཐམས་ཅད་འཇིགས་ཚུལ་ཁྲོ་བཞད་འབར་བའི་ཞལ། །མཛེས་པར་རྒྱན་ལྡན་ཀོ་རློན་ཤམ་ཐབས་ཅན། །གདུག་པའི་ཚོགས་འདུལ་སྦྲུལ་གྱིས་སྐེ་རག་བཅིངས། །བུ་ཡི་ཚུལ་དུ་རྒྱུན་གྱིས་དམ་ཚིག་ལས། །ལེ་ལོ་ཡུལ་ཐུམ་བྲེ་མོའི་གཏམ་ལ་སོགས། །ཐུགས་དང་འགལ་བར་གྱུར་པ་ཅི་མཆིས་པ། །ཐམས་ཅད་མ་ལུས་བྱམས་པའི་རང་བཞིན་ལ། །མ་ཅིག་ཐུགས་རྗེས་ཚངས་པ་རྩལ་དུ་གསོལ། །ཧཱུྃ། རྣལ་འབྱོར་མ་ཡི་དམ་ཚིག་འཛིན་པ་རྣམས། །བུ་ཡི་ཚུལ་གྱི་ཐམས་ཅད་བསྲུང་བ་དང་། །ཞེ་སྡང་གདུག་པའི་དགྲ་བགེགས་གང་བྱུང་ཡང་། །མ་ཅིག་ཐུགས་རྗེས་ལྷག་པར་དེར་ཕྱུང་ཞིང་། །དྲག་ཤུལ་ཞི་རྒྱས་དབང་དང་མངོན་སྤྱོད་ཀྱིས། །ཐམས་ཅད་མ་ལུས་རྫོགས་པར་ཕྲིན་ལས་མཛོད། །ཧཱུྃ། ཐུགས་བརྩེར་ལྡན་པའི་རྡོ་རྗེ་རྫོང་མོ་ལ། །འདི་སྐད་བཤགས་ཤིང་གསོལ་བར་འཚམས་པ་དང་། །ཉོན་མོངས་ཐལ་བའི་སེམས་ཀྱི་མ་བཤགས་ཏེ། །འགྲོ་དོན་བྱང་ཆུབ་སེམས་ཀྱི་བཤགས་གྱུར་ཏེ། །ཐུགས་དང་འགལ་བར་ཅི་མཆིས་བཟོད་པར་གསོལ། །རེ་ཞིང་སྨོན་པ་ཡིད་བཞིན་འགྲུབ་གྱུར་ཅིག །ཧཱུྃ། རྡོ་རྗེ་ལས་ཀྱི་སྲིང་མོ་བོང་ཞོན་མ། །ཡེ་ནས་རང་བཞིན་དག་པའི་སྐུ་བཞུགས་ཀྱང་། །རྣལ་འབྱོར་བདག་འདྲའི་སེམས་ཀྱི་བག་ཆགས་སྐྱེན་རྣམས་སྦྱང་བའི་ཕྱིར། །འདོད་ཁམས་སྐྱོང་མའི་གཙོ་མོ་ཁྱོད་ལ་བཟོད་པར་གསོལ། །གདུང་བ་དྲག་པོས་སེམས་ཀྱི་ཤུགས་ཕྱུང་ནས། །ང་རོ་དྲག་པོས་ངུ་ཞིང་མཆི་མ་བསིལ། །ཉམས་གྲིལ་མཆིས་པ་རྣལ་འབྱོར་ཡོངས་སུ་སྨྲེ། །འདོད་ཁམས་ལྷ་མོ་ཁྱེད་ལ་སྨྲེ་གསོལ་ལོ། །བྷྱོ། ཐོད་པ་དགུ་བརྩེགས་སྲིད་པའི་གཞལ་ཡས་ནས། །དཔལ་ལྡན་ལྷ་མོ་གསན་ཅིང་དགོངས་སུ་གསོལ། །རང་ལ་རིག་པའི་ཡེ་ཤེས་རྒྱུད་ལྡན་ཡང་། །འཕྲལ་བྱུང་ལོག་རྟོག་ཤིན་ཏུ་འབང་ཆེ་བས། །མ་ཡི་ཐུགས་དང་འགལ་བར་བཟོད༴ གཤིན་རྗེ་ཡེ་ནས་ལྷ་མོའི་ཁྱོད་ཡིན་ཀྱང་། །ཕྲག་དོག་དབང་གིས་བགྱིས་པ་བཟོད༴ རླུང་ནག་ཡེ་ནས་ལྷ་མོའི་སྤྲུལ་ཡིན་ཀྱང་། །ལོག་པར་བལྟས་ཏེ་མ་དད་བཟོད༴ བོང་བུ་ཡེ་ནས་ལྷ་མོའི་བཅིབས་ཡིན་ཡང་། །མ་བརྟེན་བརྡེག་པར་གྱུར་པར་བཟོད༴ ནལ་མ་ཡེ་ནས་ལྷ་མོའི་གྲོགས་ཡིན་ཡང་། །ལོག་པར་བལྟས་ཏེ་གཤེ་བ་བཟོད༴ ནལ་བུའི་ཡེ་ནས་ལྷ་མོའི་སྲས་ཡིན་ཡང་། །མ་བརྟེན་བསྐྲད་པར་གྱུར་པར༴ ཡུག་ས་ཡེ་ནས་ལྷ་མོའི་དགྲ་ཡིན་ཡང་། །འདོད་ཆགས་དབང་གིས་སྤྱོད་པར་བཟོད༴ ཕག་རྫི་ཡེ་ནས་ལྷ་མོ་ཁྱོད་ཡིན་ཡང་། །མ་བརྟེན་བསྐྲད་པར་གྱུར་པར༴ འགར་བ་ཡེ་ནས་ལྷ་མོའི་དགྲ་ཡིན་ཡང་། །མ་བསྐྲད་བརྟེན་པར་གྱུར་པར༴ བདག་ཅག་ཡེ་ནས་སེར་སྣའི་དབང་གྱུར་པས། །མཆོད་ཚོགས་གཏོར་མ་ཞན་པ་བཟོད༴ ལེ་ལོ་སྙམ་ལས་དབང་དུ་གྱུར་ལགས་པས། །མཆོད་པ་ལོ་ཟླར་འདས་པ་བཟོད༴ གཏོར་མ་དུས་ལ་གཡེལ་བ་བཟོད༴ གཅོམ་ལ་ཕྱར་བས་མན་ངག་གསང་མ་ཐུབ། །ཟབ་མོའི་ཐུགས་དང་འགལ་བ་བཟོད༴ ཀྱཻ། གསང་སྔགས་ཟབ་མོའི་ཚོགས་རྣམས་དགོངས་སུ་གསོལ། །མ་དང་མཁའ་འགྲོ་སྲུང་མ་དམ་ཚིག་ཅན། །ཐམས་ཅད་མ་ལུས་བདག་ལ་དགོངས་སུ་གསོལ། །རྡོ་རྗེ་སློབ་དཔོན་དམ་ཚིག་མཆེད་ལ་སོགས། །བདག་ལ་དམ་ཚིག་བཞིན་དུ་དགོངས་སུ་གསོལ། །བདག་གིས་ཐོག་མ་མེད་པའི་དུས་མཐའ་ནས། །ཆོས་ཉིད་ཡེ་ནས་མཉམ་པ་ཆེན་པོ་ལ། །བདག་བློ་རྨོངས་པས་དེ་ལྟར་མ་རྟོགས་ཏེ། །ཀུན་རྫོབ་རྟོག་པའི་བག་ཆགས་རྗེས་འབྲང་ནས། །ཆོས་དང་མི་མཐུན་རྣམ་སྨིན་སྣ་ཚོགས་བསགས། །བྱམས་མགོན་ཐུགས་རྗེའི་ཐུགས་དང་ཅི་འགལ་བ། །རྒྱལ་བ་རྒྱལ་མཚོའི་ཚོགས་ལ༴ བཟོད་པར་བཞེས་ནས་ཚངས་པར་རྩལ་དུ་གསོལ། །ལེ་ལོའི་དབང་གིས་བསྒོམ་བསྒྲུབ་ལས་ལ་གཡེལ། །ཡི་དམ་ལྷ་ཚོགས་ཚུལ་བཞིན་མ་བསྒོམ་པས། །གསང་སྔགས་ལྷ་ཚོགས་ཐུགས་དང་ཅི་འགལ་བ། །ཡི་དམ་ཞི་ཁྲོའི་ཚོགས་ལ་བཟོད༴ སྐུ་གསུང་ཐུགས་ཀྱི་དངོས་གྲུབ་བདག་ལ་སྩོལ། །དམ་རྫས་མ་ཚང་ལྷ་མོ་མ་བརྙེས་པས། །དབྱིངས་ཕྱུག་རྒྱལ་མོའི་ཚུལ་བཞིན་མ་བརྟེན་པས། །རང་བྱུང་རྒྱལ་མོའི་ཐུགས༴ འདོད་ཁམས་དབང་ཕྱུག་ལ༴ སེར་སྣའི་དབང་གི་སློབ་དཔོན་ཐུགས་དང་འགལ། །ཆོས་བཞིན་མ་ལྕོག་གཟུང་འཛིན་དབང་དུ་གྱུར། །རྡོ་རྗེ་སློབ་དཔོན་ཐུགས་དང་ཅི་འགལ་བ། །ཕྲིན་ལས་ཆེན་པོའི་སྐུ་ལ༴ ཞེ་སྡང་དབང་གི་གཞན་ལ་གནོད་སེམས་བསྐྱེད། །ཉོན་མོངས་དབང་གི་རྡོ་རྗེ་མཆེད་དང་འགལ། །མཆེད་དང་ལྕམ་དྲལ་དམ་ཚིག་གཟུང་མ་ལ། །གཏི་མུག་དབང་གྱུར་འགལ་བའི་ལས་བགྱིས་པ། །མི་ལྡོག་དམ་ལྡན་སྐུ་ལ་བཟོད་པར་གསོལ། །བཟོད་པར་བཞེས་ནས་ཚངས་པ་སྩལ་དུ་གསོལ། །དཔལ་ལྡན་ལྷ་མོའི་བསྐང་བཤགས་དམ་པ་བདེ་གཤེགས་ཀྱིས་རྒྱུད་ལས་བཏུས་པའོ།། །།
བདུད་མོ་སྲོག་གི་གཟེར་ཆུང་མའི་བསྙེན་བསྒྲུབ་ལས་གསུམ་གསལ་བ།
བདུད་མོ་སྲོག་གི་གཟེར་ཆུང་མའི་བསྙེན་བསྒྲུབ་ལས་གསུམ་གསལ་བ་བཞུགས་སོ། །ན་མོ་གུ་རུ། དུས་གསུམ་སངས་རྒྱས་ཀུན་གྱི་ཐུགས། །རྡོ་རྗེ་འཛིན་ལ་ཕྱག་འཚལ་ནས། །བདུད་མོ་སྲོག་གི་གཟེར་ཆུང་གི། །བསྙེན་བསྒྲུབ་ལས་གསུམ་གསལ་བར་བྲི། །དེ་ལ་དང་པོ་ལྷ་མོ་བསྒྲུབ་པའི་ཐབས་འདི་ལ། དོན་རྣམ་པ་གསུམ་གྱིས་སྟོན་ཏེ། སྔོན་དུ་འགྲོ་བའི་རིམ་པ་དང་། དངོས་གཞི་དང་། རྗེས་ཀྱི་བྱ་བའི་རིམ་པའོ། །དེ་ལ་སྔོན་དུ་བྱ་བའི་རིམ་པ་ལ། གནས་ནི་དུར་ཁྲོད་དམ། ཤིང་གཅིག་གམ། ས་མདོའམ། བྱང་ཤར་དུ་བལྟ་བའི་བྲག་ཕུག་གམ། ལྷ་འདྲེ་དྲག་པོ་གནས་པའི་སར། བསྒྲུབ་པ་བྱ་སྟེ་རྣལ་འབྱོར་པ་དབང་ཐོབ་ཅིང་། དམ་ཚིག་དང་ལྡན་པ། གཉེན་པོ་ལྷའི་བསྙེན་པ་ཐོན་པའི་རྣལ་འབྱོར་པས། དཀྱིལ་འཁོར་མདའ་གང་གྲུ་བཞིའི་སྟེང་དུ། ཕུད་ཤུལ་ལ་སོགས་པའི་ས་ལ། གྲུ་གསུམ་ནག་པོ་བང་རིམ་གསུམ་པ། རྒྱར་ཁྲུ་གང་བ། ཟབ་སུ་ཁྲུ་ཕྱེད་པ། དུག་དང་ཁྲག་གི་ནག་པོ་བྱུག་ལ། ཟུར་གསུམ་དུ་ས་མཆོག་ཕུར་གསུམ། ལོག་གསུམ་དུ་རྩང་བརྒྱད། སྲིན་མོའི་འགྲོས་སུ་སྦྲེལ་ལ། དེ་རྣམས་ཀྱི་ཁ་ལ་ཤ་དུམ་རེ། འོག་ཏུ་ལིང་ག་རེ་བཞག །དེའི་ཕྱི་རིམ་ཟླུམ་སྐོར་གསུམ་བྱས་ལ་ནང་མ་ཐོད་ཕྲེང་། བར་མ་ལ་མེ་རི། རྒྱབ་མ་ལ་རླུང་རི་བྲི། དེ་ནས་རྫས་ཀྱི་རིམ་པ་ལ། བརྟེན་པའི་རྫས་དང་། བསད་པའི་རྫས་སོ། །བརྟེན་པའི་རྫས་ལ། འབྲུ་སྣ་ཚོགས་ལ་བྱས་པའི་ཕྱེ་མ། རཀྟ་ཆང་ཕུད། བདུད་རྩིའི་སྦྲུས་པའི་བཤོས་བུ་ནག་པོ་ཟུར་གསུམ་གྲུ་གང་བ་གཅིག །སྣོད་གང་ཡང་རུང་བའི་ནང་དུ་བཞག །དེའི་མཐར་མི་དབང་ཤ་དང་། གྲི་རྒོད་སྙིང་དང་། ཁྲིམས་འཆལ་ཤ་སོགས་པའི། ཤ་སྣ་ཚོགས་ཀྱིས་བསྐོར། མདའ་བྱ་རྒོད་མ་གཅིག་ལ། སྐྱེས་པ་དར་མ་གྲིར་ཤི་བའི་ཙི་ཏའི། རྩ་སྦུགས་དབུས་མར། འབོད་རྦད་བསད་གསུམ། གྲི་ཁྲག་དང་མཚལ་གྱིས་བྲིས་ལ་གཞུག །དར་ནག་གི་དྲིལ་ལ་མདའི་མགུལ་དུ་བཏགས་གོ། །གཞན་ཡང་ཙ་ག་ལི་དང་། ནཻའུ་ལེ་རྐྱལ་གྱི་ནང་དུ་མི་དབང་གི་དབང་པོ་ལྔ་དང་། བྱེ་རུ་ལ་སོགས་པའི་རིན་པོ་ཆེ་སྣ་ཚོགས་དང་། འབྲུ་སྣ་ཚོགས་དང་། རྨ་བྱའི་སྒྲོ། དར་སྣ་ཚོགས། བོང་བུའི་སྙིང་། ཤིང་ལོ་རླུང་ཁྱེར། བྱང་སེམས་དཀར་དམར། དྲི་རྒོད་དབང་པོ་ལྔ། མི་བསད་པའི་མཚོན་ལ། རལ་གྲི་སོར་བརྒྱན་པ། ཡུ་བར་བྷྱོ་བྲིས་པ་གཅིག་དང་། དེ་རྣམས་མདའི་མགུལ་དུ་བཏགས་ལ། བརྟེན་གཏོར་ཁར་གཟུག །དེའི་སྟེང་དུ་དར་ནག་གི་གདུག་ཕུབ། གཞན་ཡང་མདའ་བྱ་རྒོད་མའི་མགུལ་དུ་བུད་མེད་ཆུར་ཤི་བའི་སྲིན་ལག་དང་། བ་དན་རྩེ་གསུམ་རྣམས་བཏགས་ལ། རང་གི་གཡས་སུ་བཞག །དེ་རྣམས་བརྟེན་པའི་རྫས་སོ། །དེ་ནས་བསད་པའི་རྫས་ནི། དགྲ་གཅིག་ཡིན་ཀྱང་ལིང་ག་ལྔ། བརྒྱ་ཡིན་ཀྱང་ལིང་ག་ལྔ། མིང་རུས་མཚན་གསུམ་བྲི། གཅིག་གཡག་རུའམ། ལྐུག་པའི་ནང་དུ་བཅུག་ལ། གྲུ་གསུམ་དབུས་སུ་གཞུག །གཅིག་བརྟེན་གཏོར་ཞབས་སུ་གཞུག །དེ་གཉིས་ཚོན་སྐུད་ཀྱི་དཀྲིས་ལ། མདུན་དུ་མཆོག་ཕུར་ལ་བསྟོད་དེ། གཅིག་བག་ཟན་གྱི་སྦྲུས་པའི་སྙིང་དཀར་བཅུག་ལ། རྒྱུན་གཏོར་ཁར་བཞག །ལིང་རྐྱང་གསུམ་དཀྱིལ་འཁོར་གྱི་ཟུར་གསུམ་དུ་བཞག་གོ། །དེ་ནས་ཐུན་གྱི་རིམ་པ་ནི། ཕུར་པ་དང་མི་བསད་པའི་མཚོན་དང་། གཞན་ཡང་སྣ་ཚོགས་དང་། དུག་སྣ་ཚོགས་དང་། ཡུངས་ཀར་ནག་དང་། ལྕགས་ཕྱེ་ཟངས་ཕྱེ། སྒོ་ཚ། ཤང་ཚེ། དེ་རྣམས་ཐོད་ཚལ་དུ་བླུག་ལ། མདུན་དུ་བཞག་ལ། དེ་རྣམས་ནི་བསད་པའི་རྫས་སོ། །དེ་ནས་སྔོན་དུ་ལྟེ་ཕུར་མནན་ཏེ། དེ་སྔོན་དང་པོ་ལྷ་མོ་དང་། ཆུ་སྲིན་གྱི་རྒྱལ་པོ་ཀུ་བེ་ར་གཉིས་ཀྱི་སྦྱོར་བ་བྱས་པས། བུ་མོ་ལྟེར་ཕུར་མ་བྱུང་སྟེ། དེ་མ་མནན་ན་བར་ཆད་བརྩམས་པས། མནན་པའི་ཐབས་ལ། ཤོག་གུ་ལ་བུད་མེད་ཀྱི་གཟུགས་ལ། ལུས་པོ་མིག་གི་གང་བ། རྐང་པ་བྱའི་རྐང་པ་གཅིག་བྲིས་ལ། སྙིང་ཀར་ཚེ་དང་ལོངས་སྤྱོད། དངོས་གྲུབ་ཀྱི་བར་དུ་གཅོད་པར་བྱེད་པའི་འདྲེ་ལྟེ་ཕུར་ནག་མོ་མ་ར་ཡ་ཛ་ཛ། བདུད་མོ་མ་ར་ལ་ནན་བྱ་བ་བྲི། མཐའ་ཛཱས་བསྐོར། དེ་ནས་མདུན་དུ་གྲུ་གསུམ་མཐོ་གང་བ་གཅིག་བྱས་པའི་ནང་དུ་གཞུག །དེ་ནས་ཐུན་སྐབས་སུ་ཕྱག་ན་རྡོ་རྗེར་བསྒོམ་ལ། དམ་སྲི་མོ་གོང་དུ་བྲིས་པ་འདྲ་བ་གཅིག་བསྐྱེད་ལ། བདག་གི་ཐུགས་ཀ་ནས་འོད་ཟེར་འཕྲོས་པས། །སྤྲུལ་པའི་ཁྲོ་བོའི་ཚོགས་འཕྲོས་པས་འགུག་ལ་བསྟིམ། །ཕུར་པ་གཅིག་ཕྱག་ན་རྡོ་རྗེ་བསྒོམ། །བཏབ་ཅིང་གཟིར་བར་བསམ། དེ་ནས་རྟ་བྲ་ནག་གི་རྨིག་པ་ལ་ཛཿཁུག་བྲིས་ལ། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊཿ ཚེ་དང་བསོད་ནམས་ལོངས་སྤྱོད་དངོས་གྲུབ་ལ་བར་དུ་གཅོད་པའི་ལྟེ་ཕུར་མ་ར་ཡ་ཛ་ཛ། བདུད་མོ་མ་ར་ཡ་ནན། ཅེས་བརྡུང་བཏག་བྱའོ། །དེ་ནས་རྡོ་ལེབ་ལ་རྡོ་རྗེ་རྒྱ་གྲམ་བྲིས་ལ་ཁ་བཅད། ཐུན་མཚམས་སུ་རྡོ་ལེབ་བཀོག་ལ། སྔར་བཞིན་བརྡུང་བཏག་བྱ། བསྒྲུབས་པ་ཐོན་པའི་ཚེ་ཞབས་དུ་མནན་པ་བྱ། དེ་རྣམས་ནི་སྔོན་དུ་བྱ་བའི་རིམ་པའོ། །དེ་ནས་དངོ་གཞི་ནི། བསྙེན་བསྒྲུབ་ལས་གསུམ་གཅིག་ཏུ་བྱ་བའི་རིམ་པ་ལ། ཐོག་མར་བསྒྲུབ་པ་ལ་འཇུག་པའི་ནུབ་མོ། ལིང་ག་རྣམས་སྒོ་རྒྱབ་ཏུ་ཁྱེར་ལ། སྔགས་ཏིང་འཛིན་ཅི་འོས་གཅིག་གི་འགུག་གཞུག་བྱ་ལ། གུ་གུལ་དང་ཡུག་ས་མའི་ཞབས་མའི་སའམ། ལྷམ་འབོལ། ཁྱི་ལུད་རྟ་བོན་རྣམས་བསྲེགས་པའི་ལིངྒ་དུ་བདུག་ཅིང་སྔགས་ཀྱི་ཤམས་དུ་ཆྒཻ་མོ་བསྲུང་བའི་ལྷ་དང་ཕྱེས་ཤིག །སྐྱོབས་པའི་ལྷ་དང་ཕྱེས་ཤིག །འགོ་བའི་ལྷ་དང་ཕྱེས་ཤིག །ཅེས་བརྗོས་པས། ལྷ་རྣམས་ཀྱི་ཁོ་ཉེས་པ་ཅན་དུ་རིག་ནས་ཁོ་རང་གཤེད་བྱེད་པར་བསམ། དེ་ནས་ལིང་ག་རྣམས་ནང་དུ་འོངས་ལ། གདན་དུ་བཀོད་ལ། དེ་ནས་མཚམས་དང་བསྲུངས་བའི་འཁོར་ལོ་དང་། ཡན་ལག་བདུན་པ་རྣམས་བྱ་ལ། ཕྱག་རྡོར་འམ་ཡི་དམ་གང་ཡང་རུང་བའི་བཟླས་པ་རྫོགས་པར་བྱའོ། །དེ་ནས་ལྷ་མོ་བསྒོམ་པའི་རིམ་པ་ནི། བདག་ཅག་གི་ཕྱི་ནང་གི་བར་ཆད་ཞི་ཞིང་བསྟན་པ་ལ་སྡང་བའི་དགྲ་བོ་རྣམས་བསྒྲལ་ནས། སངས་རྒྱས་ཀྱི་བསྟན་པ་དར་ཞིང་རྒྱས་པའི་དོན། ལྷ་མོ་བསྙེན་ཅིང་བསྒྲུབ་པར་བྱ་སྙམ་དུ་བསམ་མོ། །སྐད་ཅིག་གིས་མི་དམིགས་པའི་ངང་ལས། བྷྲཱུྃ་ནག་པོ་གཅིག་ཡོངས་སུ་གྱུར་པ་ལས། ཐོད་པ་སྐམ་རློན་གྱི་གཞལ་ཡས་ཁང་པ། གྲུ་བཞི་སྒོ་བཞི་པ། ཞིང་ཆེན་གྱི་གདོང་མ། ཞིང་ཆུང་གི་དྲལ་དྲབ། ཤ་ཆེན་གྱི་ནག་ལེབ། ཚིལ་ཆེན་གྱི་འཕན་གདུག །ཙིཏྟའི་ཕོ་ལོང་། རྒྱུ་མའི་རྡ་ལྡི། ཉི་ཟླའི་སྐར་ཁུང་བྱས་པ། སྟེང་དུ་ཞིང་གི་རྒྱལ་མཚན་འཛུགས་པ། ཏོག་ལ་ཞིང་གི་གདུག་འཁོར་བ་ཡངས་ཤིང་རྒྱ་ཆེ་བ་བློས་རྫོགས་ཚད་གཅིག་བསྐྱེད། དེའི་ཕྱི་རོལ་དུ་བསྐལ་པའི་རླུང་ནག་འཚུབས་མའི་གུར་ཁང་འཁོར་བ་ནང་ན་མེ་རི་འཚུབ་མ་གཅིག་བསྐྱེད། དེ་ནས་ངག་ཏུ། གྷར་བྷ་ཏ་བ་ཧཱུྃཿ ཞེས་པའི་དེའི་དབུས་སུ་རིམས་ཏེ་བསྐྱེད། གཞལ་ཡས་ཁང་དེའི་དབུས་སུ་སྤྲུལ་བའི་བོང་བུ་དམར་ག་བ། རླུང་ནག་གི་གཤོག་པ་ཅན། ཐོད་སྐམ་འབར་བའི་སྒ་བསྟད་པ། སྲིན་པོའི་ཡ་གལ་ལ་སྔ་རུ་བྱས་པ། སྲིན་མོའི་མན་གལ་ལ་ཕྱི་རུ་བྱས་པ། གོང་སྨད་སྦྲུལ་ལས་བྱས་པ། རུས་སྦལ་ནག་པོའི་ཕོ་གུ་བཏགས་པ། སྔ་ཤད་གཡས་ན་བདུད་ཀྱི་ཁྲམ་བམ། སྔ་ཤད་གཡོན་ན་མཚོན་གྱི་གྲུ་གུ། ཕྱི་ཤད་གཡས་ན་བྱང་དམར་བམ་རོ། ཕྱི་ཤད་གཡོན་ན་ནད་ཀྱི་རྐྱལ་བ་འགེལ་བ། མི་མགོའི་ཐོད་དོམ། ཐོད་རློན་ཁྲག་གི་ཞལ་ཞལ། སྙན་ཤལ་གཉིས་ན་མི་ལག་འཕྱང་བ། མཇུག་མ་ན་མིག་གཅིག་ཡོད་པ། ས་བུ་ཏ་ཡི་ཞག་པའི་མཐུར་ཆིངས་བྱས་པ། དེའི་སྒ་གོང་དུ་ཞིང་བསྣོལ་བའི་སྟེངས་སུ། རཾ་ལས་ཉི་མའི་དཀྱིལ་འཁོར་དེའི་སྟེང་དུ། བདག་གི་ཐུགས་ཀ་ནས་བྷྱོ་ནག་པོ་གཅིག་འཕྲོས་པས། དེ་ལས་འོད་ཟེར་བྱུང་བས། བསྟན་པ་ལ་སྡང་བའི་དགྲ་བགེགས་བསྒྲལ། ཚུར་འདུས་བྷྱོ་ལ་ཐིམ། དེ་ཡོངས་སུ་གྱུར་པ་ལས། དཔལ་ལྡན་ལྷ་མོ་སྐུ་མདོག་མཐིང་ནག་རྔམ་པ་ཞལ་གཅིག་ཕྱག་གཉིས་པ། སྤྱན་གསུམ་དམར་ལ་ཟླུམ་པ། མེ་སྟག་འཕྲོ་བ། གཡས་པས་རལ་གྲི་མཁའ་ལ་ཕྱར་ནས་བསྣམས་པ། གཡོན་པའི་བྷནྡྷ་ལྕང་ལོ་ཅན་ཁྲག་གི་བཀང་བ་བསྣམས། མཆན་ནེའུ་ལེ་རྐྱལ་པ་ཅན། ཁ་ནས་རིན་པོ་ཆེའི་མུ་ཏིག་བྲུལ་བའི་ཆུན་པོ་འཕྱང་བ། རལ་པ་དམར་སེར་གྱེན་དུ་བརྫེས་པའི་སྐྲ་མཚམས་སུ། ཐོད་པ་སྐམ་པོ་ལྔའི་དབུ་བརྒྱན་དང་། རིིན་པོ་ཆེའི་ཟེར་འཕྲོ་ལྔའི་བརྒྱན་པ། སྤྱི་བོ་ནས་ཟླ་བ་ཤར་བ། ལྟེ་བ་ལ་ཉི་མ་ཤར་བ། སྤྱི་གཙུག་ན་རྨ་བྱའི་རྒྱལ་མཚན་བཙུགས་པ། རྣ་བ་གཡས་གོང་ན་སེང་གེ་འགྱིང་བ། །གཡོན་ན་སྦྲུལ་ནག་གི་གདེང་ཀ་འཕྱོ་བ། སྙན་གཉིས་ན་གསེར་གྱི་དྲིལ་བུ་འཁྲོལ་བ། ཞིང་ཆེན་གྱི་གཡང་གཞི་དང་། གླ་ཆེན་གྱི་ཀོ་རློན་སྐུ་སྨད་ལ་མནབས་པ། སྟག་ལྤགས་ཀྱི་ཤམ་ཐབས་དང་། མི་རྩིད་ཀྱི་རེ་ལྡེས་སྐུ་སྨད་དཀྲིས་པ། ཐོད་རློན་ལྔ་བཅུའི་དོ་ཤལ་དང་། རུས་པའི་བརྒྱན་དང་། རིན་པོ་ཆེའི་བརྒྱན་གྱི་སྐུ་དང་ཡན་ལག་ཐམས་ཅད་ལ་བརྒྱན་པ་དེའི་ཐུགས་ཀར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་བྷྱོ་ནག་པོ་གཅིག་ལ་སྔགས་ཀྱིས་བསྐོར་བར་བསམ། བྷྱོ་དེ་ལ་བྷྱོ་ནག་པོ་འབུ མ་ཕྲག་འཕྲོས་པའི་བདུད་མོ་བྱེ་བ་འབུམ་གྱི་ཚོགས་དང་བཅས་པ་སྐུ་མདོག་ནག་མོ་རལ་པ་སྔོ་དམར་ཐུར་དུ་བཤལ་བ་གཡས་པས་གྲི་གུག་གཡོན་པས་ཐོད་ཁྲག་ཐོག་པ་མཆན་ན་ནད་ཀྱི་རྐྱལ་པ་སྔོ་དམར་འཕྱང་བ། ཞིང་ལྤགས་ཀྱི་གཡང་གཞི་སྐུ་ལ་མནབ་པ། འཇིགས་འཇིགས་རྔམ་རྔམ་གྱི་མ་མོའི་ཚོགས་ཀྱི་གཙོ་མའི་བཀའ་བཞིན་བསྒྲུབ་ཅིང་བསྐོར་བར་བསམ། དེ་ནས་ཡེ་ཤེས་པ་སྤྱན་དྲངས་བ་ནི། སྲིན་ལག་གིས་གཡབ་དར་ཐོགས་སྤྱན་དྲངས་ཀྱི་ཚིག་བཅད་བརྗོད་ལ། བདག་གི་ཐུགས་ཀ་ནས་འོད་ཟེར་དམར་པོ་ལྕགས་ཀྱུའི་རྣམ་པ་ཅན་འཕྲོས། རི་རབ་ཀྱི་བྱང་ཤར་ནས། ལྷ་མོ་བཞུགས་པའི་ཐུགས་ཀའི་བྷྱོ་ལ་ཕོག་པས་སྔོན་གྱི་ཐུགས་དམ་གྱི་ཐུགས་རྗེའི་རྒྱུད་དྲན་ནས་འཁོར་དང་བཅས་པ་བྱོན་པར་བསམ། དེ་ནས་བཞུགས་སུ་གསོལ་བ་ནི། མདུན་གྱི་དམ་ཚིག་པ་དང་གཉིས་སུ་མེད་པར་བསམ། རྟེན་གཏོར་ནི་མེ་རླུང་གིས་བྱིན་གྱིས་བརླབས་ལ། འདོད་ཡོན་སྣ་ཚོགས་འཕྲོས་པས་མ་མོར་མཆོད་པར་བསམ། མ་མོ་ཡང་དེ་ལ་ཞེ་ཆགས་ཞིང་ཞེན་ནས་བཞུགས་པར་བསམ། བདག་ལ་དངོས་གྲུབ་སྣ་ཚོགས་སྟེར་བར་བསམ། ཕྱི་མཆོད་ལ་སོགས་པའི་མཆོད་པས། རྒྱུན་གྱི་གཏོར་མ་འབུལ་བ་ནི། མེ་ལུང་གི་སྦྱོར་བ་གང་ཡང་རུང་བས་བྱིན་གྱིས་བརླབས་ལ། སྔགས་ཀྱི་ཤམ་བུ་ལ་བྷ་ལིངྟ་ཁཱ་ཧི། དགྲ་བོའི་ཙིཏྟ་ལ་ཁཱ་ཧི། རཀྟ་ལ༴ བ་སུ་ཏ་ལ༴ ཀོ་རོ་ཙ་ན་ལ་ཁཱ་ཧི། ཞེས་བཏག་ལ། ཐོད་རློན་གྱིས་ཕྱག་རྒྱ་ལ་སྔགས་གསུམ་མམ་བདུན་ནམ་ཉི་ཤུ་རྩ་གཅིག་གང་རུང་གི་ཕུལ་ལ་མ་མོ་འཁོར་དང་བཅས་པ་མཉེས་པར་བསམ། བསྟོད་པས་བསྟོད་ལ། བསྙེན་པ་བྱ་བ་ནི། ཨཱོཾ་མ་ཧཱ་ཀ་ལི་རེ་མ་ཏི། མ་མ་རུ་ལུ་རཀྴ་རེ་མ་ཏི། རུ་ལུ་རུ་ལུ་བྷྱོ་ཛ་ཛ། ༀ་རུ་རུ་ཙ་ཏུར། ༀ་ཨ་ཤུག་མེ་ཤྲི་ཏྲི་དུ་ཏྲ་པྲ་ཁ་ཤག་རག་མོ་ཧཱུྃ༔ རཀྴ་ཙིཏྟ་ས་མ་ཡ། ཀུ་རུ་ཙི་ཏ་ནན། ༀ་རུ་རུ་པེ་རུ་རོ་ཧཱུྃ། ཏིཥྛ་ཏིསྟ་བ་ཏོ་སི་རག་མོ་སྙིང་ཁ་ལ། རག་མོ་ཐུན་བྷྱོ་ཛ་ཛ། རུ་ལུ་རེ་མ་ཏི་ས་མ་ཡ། བྲ་མ་ཧ་སྟི་བྲ་མ་རག་མོ་རུ་ལུ་བྷྱོ་ཛ་ཛཿ ཁ་རག་ཏེ་ཁེམ་ཛ། ཁ་ལེ་ཐུན་བྷྱོ། ཐུ་མ་མ་བྷྱོ། ཧཱུྃ་རག་མོ་ནི་ཤ་ཀུ་རུ་ཐུན་རྦད། རག་མོ་ཨརྱ་ཛ་ཛ། ཏེ་ཁེམ་ཁ་ལེ་བྷྱོ་བྷྱོ། ས་མ་ཡ་ཆྒཻ་མོ་མ་ར་ཡ་ཧཱུྃ་ཕཊ། རང་ཡི་དམ་སྔགས་ཀྱི་རྒྱབ་ལྷ་མོའི་སྔགས་ཀྱི་བཏབ་པའི་གཡོན་བསྐོར་གཅིག་བྱས་པས། ལྷ་མོའི་ཞལ་དུ་ཚུར་བྱུང་བས་བདག་གིས་ཞལ་དུ་ཞུག །ཐུགས་ཀའི་སྔགས་ལ་གཡས་བསྐོར་གཅིག་བྱས་པས། རྩ་དབུ་མའི་ནང་དུ་མར་སོང་ནས། གསང་བའི་རྡོ་རྗེར་བྱུང་མ་མོའི་པདྨར་ཞུགས་པས་མཆོད་པ་སྣ་ཚོགས་ཀྱི་མཆོད་ནས་མཉེས་ཤིང་ཚིམ་ནས་མཐུ་དང་ནུས་པ་དང་ལྡན་པ་ལ་ཐུགས་ཀ་ནས་ཚུར་བྱུང་བའི་དུས་སུ་དངོས་གྲུབ་སྣ་ཚོགས་སྟེར་བར་བསམ་ཞིང་བདག་གི་ཞལ་ནས་ཐུགས་ཀར་ཕྲེང་མ་ཆད་པའི། འགལ་མེའི་འཁོར་ལོ་བཞིན་དུ་མཁའ་གསང་དུ་བསྐོར་རོ། །འཇོག་པའི་དུས་སུ་རང་གི་ཧཱུྃ་གི་མཐའ་མར་བསམ་མོ། །དེ་ནས་གཏོར་མ་འབུལ་ལ་བསྟོད་པ་དང་བསྐུལ་པ་ཅི་རིག་པ་བྱའོ། །མཁྱེན་གསོལ་བྱ། ཉེས་པ་བགོ། དམ་བསྒྲག །མདུན་གྱི་བླ་མ་དང་། ཕྱག་ན་རྡོ་རྗེར་ལ་སོགས་པའི་ལྷ་ཚོགས་ཀྱིས་ཀྱང་། སོད་ཅིག་སྒྲོལ་ཅིག་བཀའ་ཡི་ལུང་མ་མོ་ལ་བྱིན་པར་བསམ། དེའི་དུས་སུ་བདུད་མོ་གཙོ་མོ་ལ་བསྡུས། གཙོ་མོ་རང་ལ་བསྡུ། བདག་ཡི་དམ་ལྷ་ཡི་ངོ་བོ་ལ་རྣམ་པ་ལྷ་མོར་དམིགས་ལ་དགྲ་བོ་འགུག་པའི་ལས་ལ། མ་མོ་སྔགས་ཀྱི་གཤམ་བུ་ལ། དགྲ་བོ་ཨཾ་གུ་ཤ་ཡ་ཛཿ ཞེས་བརྗོད་པས། ལྕགས་ཀྱུའི་ཕྱག་རྒྱ་བཅས་ལ། བདག་གི་ཐུགས་ཀ་ནས་སྤྲུལ་པའི་ལྷ་མོའི་ཚོགས་ཀྱིས་ཕྱག་ན་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཅན་གྱིས་ཚོགས་སྤྲོས་པས་རང་དབང་མེད་པར་བཀུག་ནས་མདུན་གྱི་ལིངྒ་དང་གཉིས་སུ་མེད་པར་བསྟིམ་ལ་སྔགས་ཉེར་གཅིག་གམ་ལྔ་བཅུའི་བར་བརྗོད་དོ། །དེ་ནས་ལྷ་དབྱེའི་ཐབས་གོང་བཞིན་བྱ། སྔགས་གསུམ་མམ་བདུན་བཟླས་པའི་མཐར། མདུན་དུ་བསྒྲུབ་བྱ་དེ་གསལ་བར་དམིགས་ནས་རང་གི་སྣ་བུག་ནས་རླུང་བྱུང་བའི་ཁོའི་སྣ་བུག་གཡོན་དུ་ཞུགས། སྙིང་གི་རྣམ་པར་ཤེས་པ་མར་མེ་ལྟ་བུ་དེ་ནག་གམ་བཏང་བར་བསམ། ཡང་གཡོན་ནས་བྱུང་བའི་ཁོའི་སྣ་བུག་གཡས་སུ་ཞུགས་པས་བཀྲགས་མདངས་ལོངས་སྤྱོད་ཐམས་ཅད་རྡོ་རྗེའི་སྦུ་གུར་དྲངས་ནས་རང་གི་རྡོ་རྗེའི་ལམ་དུ་ཚུར་ཐིམ་པས། རང་ཉིད་ཉི་མ་ཤར་བའམ། ཟླ་བ་ཉ་གང་བ་ལྟར་བཀྲགས་དང་གཟི་མདངས་དང་ལྡན་པར་བསམ། ཁོ་ནག་རྙིད་ཀྱི་སོང་བར་བསམ། དེ་ནས་གཟུང་ཐག་ལ་སྔགས་ལྔའམ་བདུན་བརྗོད་ཀྱི་བར་དུ་གཟུང་ལ། ཁོའི་སྲོག་རྩ་ལ་བཟུང་བར་བསམ། སྔགས་ཀྱི་འོད་ཟེར་གྱི་དེ་རྦད་རྦད་བཅད་པར་བསམ། དེ་ནས་ཐུན་བརྡེག་པ་ནི་ཕུར་བུ་ལྷ་མོ་ཞལ་གཅིག་ཕྱག་གཉིས། སྨད་ཕུར་བུ་མགར་གྱི་སོ་མལ་ནས་བྱུང་བ་ལྟར་དམར་ལ་མེ་འབར་བ་ལྟར་བསམ། དེ་ནས་བསད་པའི་ཏིང་འཛིན་གཞན་ཡང་བྱ། སྤྱི་བོ། མགྲིན་པ། སྙིང་ཀ །ལྟེ་བ། གསང་གནས་རྣམས་སུ་བསམ། དབང་ཆེན་གསེར་གྱིས་གཞི་ལ་མ་ཐུག་བར་དུ་ཐལ་བར་བསམ་ཞིང་དྲུག་ཅུ་རྩ་གཅིག་གམ། ཅི་ནུས་ཀྱི་བར་བརྡེག་གོ། །དེ་ནས་མི་བསད་པའི་མཚོན་ལྷ་མོའི་རལ་གྲིར་བསམ་ལ། སྙིང་དཀར་ནག་མཚམས་སུ་སྤྱི་བོ་ནས་རྐང་པའི་མཐིལ་བར་དུ་ཤག་ཤག་བཏང་བར་བསམ་ལ། སྔ་དྲུག་ཅུ་རྩ་གཉིས་སམ། ཅི་རིགས་ཀྱི་བརྡེག་གོ། །དུག་ཐུན་ན་དུག་དང་ནད་རྣམས་པ་སྣ་ཚོགས་ཀྱི་བཏབ་པར་བསམ། ཁྲག་ཐུན་ནི་ཁྲག་ནད་ཕོལ་མིག །གླང་ཐབས་གག་ལྷོག་མཛེ་འབྲུམ་ཚད་རིམ་ནད་རྣམ་པ་སྣ་ཚོགས་ཀྱི་བཏབ་པར་བསམ། རུལ་མྱག་མྱག་མྱོས་པར་བསམ། རྡོ་ཐུན་ནི་ཟངས་ལྕགས་ཕྱེ་མ་ལ་སོགས་པ་བདུད་མོའི་ཚོགས། ཤ་ཟ་གཅན་གཟན་གྱི་ཚོགས་ཀྱི་རྒོད་རོ་བརྡབ་པ་བཞིན་དུ་ལ་ལས་ཤ་ཟོས། ལ་ལས་ཁྲག་འཐུང་། ལ་ལས་རུས་པ་འཆོས། ཡུང་འབྲུ་ཙམ་ཡང་མ་ལུས་པར་བསམ་ཞིང་། སྔགས་དྲུག་ཅུ་རྩ་གཅིག་གིས་བརྡེག་གོ། །དེ་ནས་མདུན་དུ་ལྷ་མོ་འཁོར་དང་བཅས་པ་ལ་བརྫུས་སྐྱེས་སུ། དཔལ་གྱི་བསྐྱེད་ལ། མདུན་གྱི་དགྲ་བོའི་ཤ་ཁྲག་གསོལ་བར་བསམ་ཞིང་ལས་བྱའོ། །དེ་ནས་གཏོར་མ་མདོག་ལྟར་འབུལ་ལ་བསྐུལ་བ་བྱ། གཏོར་མ་དགྲ་བོའི་ཕྱོགས་སུ་བསྐྱལ། དམོད་བཅོལ་བྱ། ཐལ་མོ་བརྡབ། མ་མོ་འཁོར་དང་བཅས་པ་དགྲ་ཡུལ་དུ་གཤེགས་ནས་དགྲ་བོ་བརླག་པའི་ལས་བྱེད་པར་བསམ། དེ་ལྟར་བསྒྲུབ་པའི་རྟག་ནི་མ་མོའི་ཞལ་དངོས་སུ་མཐོང་བ་དང་། མ་དང་སྲིན་མོ་ཆུང་མ་མཛའ་མོ་གཡོག་མོ། བུད་མེད་ཀྱི་ཚོགས་སུ་འདུས་ནས་བདག་ལ་བཀུར་སྟི་བྱེད་པ་དང་། གནས་དེར་འོད་འབྱུང་བའམ། འཚུབ་མ་འཁོར་བ་ལ་སོགས་པ་རྣམས་འབྱུང་ངོ་། །ལས་འགྲུབ་པའི་རྟག་ནི། དམིགས་བྱ་ལ་སོགས་པ་དངོས་སུབསད་པ་དང་། ཤ་ཟ་བ་དང་། གཡག་བསད་པ་དང་། ར་བསད་པ་དང་། བྱ་བསད་པ་དང་། རི་དྭགས་བསད་པ་ལ་སོགས་པ་དང་། སྙིང་དང་མགོ་སྟེར་བར་འབྱུང་ངོ་། །དེ་ལྟར་བྱུང་ན་བསྒྲུ བ་པ་འགྲུབ་པ་ཡིན། ཐེབས་དུས་ནམ་ཕྱེད་ཉི་མ་རྒས་ཁའི་དུས་སུ་བསད་ལས་ཐམས་ཅད་སྔ་མ་ལྟར་བྱས་ལ་ཕུར་པ་གསུམ་ཡང་རིམ་པ་ལྟར། སྔགས་རིང་གི་ལིངྒ་ལྟར་བརྡེག་གོ། །རྩང་རྣམས་ཀྱང་རིམ་པ་ལྟར་བརྡེག་གོ། །ལྷ་མོ་བདུད་མོ་དང་བཅས་པས། ཤ་ཟོས་ཁྲག་འཐུང་། རྡུལ་དུ་བརླག་པར་བསམ། དེ་ལྟར་མ་བྱུང་ན་ལན་གསུམ་བར་དུ་ལེགས་སོ། །དེས་རྟག་འོང་ངེས་སོ། །རྒྱ་ལ་དེས་ཀྱང་མ་བྱུང་ན། མ་མོ་གནད་ལས་བྱ། དེ་ནི་དངོས་གཞིའི་ཆོ་གའོ། །དེ་ནས་མཇུག་བསྡུ་བའི་རིམ་པ་ནི། ཟོར་སྦྱིན་བསྲེགས་མནན་པ་ཡིན་ཏེ། དེ་ལ་བསད་པ་ཟོར་གྱི་རིམ་པ་ནི། བསྒྲུབ་ཁ་ཟོར་དུ་བྱེད་ན་ཐུན་ཁང་གི་བྱང་ཤར་ཟུར་ལ་ལྟས་ངན་སྲེ་མང་གི་སྒོ་ངའི་སྣེ་བརྡོལ་ལ། ནང་དུ་རིམ་གྱིས་ཤི་བའི་ཁྲག་དང་དུག་སྣ་ཚོགས་བླུག་ལ་བཞག །ཤར་ལྷོའི་ཟུར་ལ་གྲིར་ཤི་བའི་ཐོད་པའི་ནང་གྲི་ཁྲག་དང་དུག་སྣ་ཚོགས་བླུག་ལ་བཞག །ནུབ་བྱང་ཟུར་ལ་ཕག་ཐོད་ནང་དུ་མཚོ་རམ་བུ་དུག་སྣ་ཚོགས་བླུག་ལ་བཞག །དེ་རྣམས་ཀྱི་ཁ་ལ་ལིངྒ་རེ་བཞག །ཡུང་ཀར་ལ་སོགས་པའི་ཐུན་རྫས་ལ་སྔགས། དགྲ་བོ་མཱ་ར་ཡ་ཐུན་ཡ། ཞེས་བཏགས་པ་ནམ་ཕྱེད་ཐོད་ཟོར་བརྡེག་གོ། །བསད་པའི་སྔགས་ལ། དགྲ་བོ་མ་ར་ཡ་ཐུན། ཅེས་ཐོ་རངས་ཁྲག་ཟོར་ལ་བརྡེག་གོ། །ཐུན་རྫས་རྣམས་ནི་མ་མོའི་དམག་ཚོགས་ཀྱིས་མཚོན་ཆའི་ཆར་དང་། དུག་ཁྲག་སྣ་ཚོགས་ཀྱི་དགྲ་བོ་རྡུལ་དུ་བརླག་པར་བསམ་ཞིང་བསྒྲུབ་བོ། །དེ་ནས་ཟོར་ལ་མེ་འབར་བ་དང་། མེ་སྟག་འཕྲོ་བ་དང་། བུད་མེད་ལས་བྱེད་པ་སོགས་འབྱུང་ངོ་། །དེ་ལྟར་ཞག་ཏུ་བསྒྲུབ་ལ། བྷྱོ། སྣང་སྲིད་མ་མོ་ར་མདའ་ལོག །ཅེས་པའི་མ་མོ་བདུད་མོའི་ཚོགས་ཀྱི་ནད་སྣ་ཚོགས་དང་། དུག་སྣ་ཚོགས་མཚོན་ཆ་སྣ་ཚོགས་དགྲ་བོའི་ཡུལ་དུ་ཁྱེར་ནས་གཏུབ་པར་བསམ་ཞིང་། རྡུལ་དུ་བརླག་པར་བསམ་ལ། ཉེ་ན་ཡུལ་འཁོར། རིངས་ན་ཡུལ་ཕྱོགས་སུ། སྲོད་ལ་སྒོང་ཐུན། ནམ་ཕྱེད་ཐོད་ཟོར། ཐོ་རངས་ཁྲག་ཟོར་འཕོང་ངོ་། །བརྟེན་གཏོར་དགྲ་ཕྱོགས་འམ། བྱང་ཤར་དུ་བསྐྱལ་ལོ། །དེ་ནི་དཔལ་ལྷ་མོའི་བསད་པ་ཟོར་གྱི་རིམ་པའོ། །དེ་ནས་དཔལ་ལྷ་མོའི་ལས་ཀྱི་མཐའ་བསྡུད་སྦྱིན་བསྲེག་བྱ་བ་ནི། སྔར་གྱི་གྲུ་གསུམ་ཡིན་ཡང་རུང་། གྲུ་གསུམ་བང་རིམ་གསུམ་པར། དུར་ཁྲོད་ཀྱི་སོལ་ལ་སོགས་པས་ནག་པོར་བྱ་ལ། དེའི་དབུས་སུ་ཉི་མ་ལ་བྷྱོའམ་རལ་གྲི་བྲིས། ཁ་ཁྱེར་ནང་མ་ལ་རལ་གྲི་བྲི། བར་མ་ལ་གྲི་གུག །ཕྱི་མ་ལ་མེ་རི། དེ་ནི་ཐབས་བཅའ་བའོ། །རྫས་བསགས་པ་ནི། གཡས་སུ་མཆོད་པའི་གྲངས་ལ། དྲག་པོའི་མཆོད་པ་ལྔ། ཁྲག་གི་ཨརྒྷཾ་བདུན་ནམ་ཉེར་གཅིག་འབུལ། དེ་ནས་དམིགས་བྱ་ལ་དགུག་པ་དང་། སྔགས་དང་ཏིང་འཛིན་ཅི་འགྲུབ་བྱས་ལ། གོང་གི་སྔགས་ཀྱིས་དུག་ཚེར་ཤང་བཞི་སྔགས་སུ་བརྒྱ་རྩ་བརྒྱད་ཀྱི་བར་དུ་ཕུལ་བས། དགྲ་བགེགས་གང་ཡིན་པའི་ཤ་ཁྲག་བུམ་དང་རིལ་དང་། ཕྱེད་ཚལ་དུ་བསམ་མོ། །ལྷ་མོ་ཤིན་ཏུ་འཁྲོས་པའི་ཐུགས་ཀ་ནས་ཡེ་ཤེས་ཀྱི་མེ་བྱུང་བས་ཞལ་ནས་ཚུར་འབར་བའི་ནང་དུ་ཕུལ་བས། ལྷ་མོས་གསོལ་ཞིང་དྲངས་ནས་མདུན་དུ་མར་བརྒྱུད་ནས་ཡེ་ཤེས་ཀྱི་བདུད་རྩིར་གྱུར་ནས་ལྟེ་བར་བདུད་མོ་འབུམ་བསྐྱེད་ནས། གཙོ་འཁོར་ཐམས་ཅད་མཉེས་པར་བསམ་ཞིང་འབུལ། བརྒྱ་རྩ་བརྒྱད་ཚང་བ་ཡང་གོང་བཞིན་ཁྲག་གི་ཨརྒྷཾ་བདུན་ཞལ་མར་འབུལ། བདུན་ནམ་ཉེར་གཅིག་འབུལ། དེ་ནས་བསྟོད་པ་ལྟར། རྣམ་ལྔ་བཟོད་གསོལ་དང་། འདོད་པའི་དོན་ལ་གསོལ་བ་གདབ་བོ། །དེ་ནས་གཏོར་མ་མྱུར་མགྱོག་ལྟར་འབུལ། བསྐུལ་པ་དང་གཏོར་རྫོངས་བྱས་ལ། དགྲ་ཕྱོགས་སུ་བསྐྱལ་ལོ། །ཡེ་ཤེས་པ་གཤེགས་སོ། །དམ་ཚིག་པ་བདག་ལ་བསྡུ། ཡི་གེ་བརྒྱ་པ་བརྗོད། མི་དམིགས་པ་རྒྱས་གདབས། དགེ་བ་བསྔོ་བར་བྱ། དེ་རྣམས་ནི་སྦྱིན་བསྲེག་གི་ཆོ་ག་བྱ་བའི་རིམ་པའོ། །དེ་ནས་ལས་མཇུག་མནན་པ་བྱ་བ་ནི། བརྟེན་གཏོར་མ་དང་གཡག་རུ་ནང་གི་ལིངྒ་གཉིས། གཡག་རུ་རྩེ་རྒྱལ་དུ་བཅུག་ལ། ཁར་སྦྱིན་བསྲེག་གི་ཐལ་འཇིམ་བླུག་ལ་རྡོ་རྗེ་རྒྱ་གྲམ་གྱི་ཁ་བཅད། རེ་བའི་ནང་དུ་དྲིལ་ལ། རི་སྣ་དང་། བྲག་སྣ་དང་། ལམ་རྒྱ་གྲམ། མཆོད་བརྟེན་ཞབས་སུ་འགུག་གཞུགས། ལྷ་དབྱེ་ལ་སོགས་སྤྱི་ལྟར་བྱས་ལ། ལས་ཀྱི་གཤིན་རྗེའི་ལྟོ་བར་ཚུད་པར་བསམ་ལ། འབྱུང་བ་བརྩེགས་ཀྱི་རིམ་པ་ལྟར་རྒྱས་བཏབ་པར་བསམ་མོ། །དེའི་སྟེང་དུ་ལམ་ལས་དབང་ཆེན་གསེར་གྱི་ས་གཞི། བྷྲཱུྃ་ལས་རི་རབ་དེའི་སྟེང་དུ་ལྷ་མོ་དང་བདུད་མོ་འབུམ་དང་བཅས་པའི་ཕྱག་ཏུ་རི་རབ་བསྣམས་པས། ཁོ་རང་མནན་ནས་བསྐལ་པ་བརྒྱར་ཡང་མི་ཐར་བར་བསམ། རྒྱུན་གཏོར་གྱི་ནང་གི་ལིངྒ་ཟོར་རམ་བརྟེན་གཏོར་བསྐྱེལ་བའི་དུས་སུ་གཏོར་མ་གཅིག་གི་ནང་དུ་གཏུབ་ལ་གཞུག་སྟེ། མྱུར་མགྱོགས་སུ་བདུད་མོ་འཁོར་དང་བཅས་པ་ལ་བསྔོ། ལིང་ག་གཞན་ཐམས་ཅད་སྦྱིན་བསྲེག་བྱའོ། །དཔལ་ལྷ་མོའི་དམ་ཚིག་ལས། ནལ་བུ་ནལ་མོའི་མཚངས་མི་འབྲུ། མ་མོ་དང་རིག་གཅིག་པ་ལ་ཁ་ཟས་མགྲོན་དུ་སྦྱིན་ཅིང་དགའ་བར་བྱ། ཡུག་ས་ལ་ཆགས་པའི་མི་སྤྱད། མགར་བ་དག་དང་ཚང་མི་སྲེད། མེའི་དཀྱིལ་འཁོར་མཐོང་ན་དགའ་བར་བྱས་ཞིང་མི་བསད། འཚུབ་མ་དང་འཕྲད་ན་སྐེད་དུ་མི་དགབ། རྒྱབ་མི་བསྟན། མ་མོ་བསྟོད་པ་བྱ། བོང་བུ་མོའི་བཅིབས་པ་ཡིན་པས་མི་དེ་བརྡེག་ཅིང་བྱམས་པར་བྱ། བུད་མེད་ལ་སྨོད་ཚུག་མི་སྨྲ། དེ་ལ་སོགས་པ་རྣམས་ནན་ཏན་བྱའོ། །བདུད་མོ་སྲོག་གི་གཟེར་ཆུང་གིས་བསྙེན་བསྒྲུབ་ལས་ཀྱི་རིམ་པ་རྣམས་ལེགས་པར་གསལ་བར་བྱས་པ་ཡིན། སངས་རྒྱས་ཀྱི་བསྟན་པ་བསྲུང་བར་ཤོག །དེ་ནས་གསང་བའི་འགྲུབ་རྟག་བཤད་པར་བྱ། སྔགས་དང་ཏིང་འཛིན་ནུས་པ་བསྐྱེད་ཙམ་ནི། །རྡོ་རྗེའི་དབུས་ཀྱི་རྩ་བའི་ནམ་མཁའ་ལ། །བྱང་ཆུབ་སེམས་ཀྱི་དགའ་བདེ་བསྐྱེད་ཙམ་ན། །མཁའ་འགྲོ་རང་ལ་ཤར་བར་ཡིན་པར་ཤར། །དེ་ནས་ཕྱིའི་འགྲུབ་རྟག་བཤད་པར་བྱ། །ཕྱིའི་འགྲུབ་རྟགས་རབ་འབྲིང་ཐ་མ་གསུམ། །རབ་ནི་མ་མོ་ཉིད་ཀྱི་སྐུ་མཐོང་སྟེ། །ནམ་མཁའི་དཀྱིལ་དུ་ཕྱག་ན་རྡོ་རྗེ་མཐོང་། །བུད་མེད་དཀར་མོ་བཞད་ཅིང་མཐོང་བ་ན། །གསང་བ་ཡེ་ཤེས་དངོས་གྲུབ་སྟེར་བ་ཡིན། །ནག་མོ་རལ་པ་ཅན་དུ་བྱུང་བ་ན། །འདོད་འཚམས་མཐུ་རྩལ་བདག་ལ་སྟེར་བའི་རྟགས། །དམར་མོ་བསེའི་རལ་པ་ཅན་དུ་བྱུང་བ་ན། །འཇིག་རྟེན་དབང་དུ་བསྡུད་པའི་དངོས་གྲུབ་སྟེར་བ་ཡིན། །སེར་མོ་ཐོད་པའི་རལ་པ་ཅན་དུ་བྱུང་བ་ན། །ཚེ་དང་བསོད་ནམས་རྒྱས་པའི་འགྲུབ་པ་ཡིན། །མཁའ་འགྲོ་མའི་འགྲུབ་རྟག་འབྲིང་པོ་ནི། །རྡོ་རྗེ་མཁའ་ལ་བབ་ནས་གཙོ་མོ་ཡིན། །རྗེས་མོ་དུང་སྐྱོང་མ་ཡི་འགྲུབ་རྟག་ལ། །རྫས་དང་ལུང་རྣམས་མུན་པ་ཤིན་ཏུ་ནག །མེ་ཏོག་ཆར་བབ་རླུང་འབྲུག་རླུང་དམར་དང་། །བུད་མེད་གཟུགས་དང་འཇའ་ཚོན་སྟོན་པའོ། །ཁོལ་མོ་རེ་མ་ཏིའི་འགྲུབ་རྟག་ནི། །འབྲུག་དང་རླུང་དམར་སྒོ་དང་ཁང་ཐོག་འཚག །ཐིབས་ཐིབས་སླེབ་སླེབ་པའོ། །འགྲུབ་རྟགས་ཐ་མའི་རྨི་ལམ་དག་ཏུ་སྟོན། །བྱང་ཆུབ་སེམས་དཔའི་རྨི་ལམ་ནི་གཙོ་བོ་ཡིན། །མ་དང་སྲིང་མོའི་རྨི་ལམ་རྗེ་མོ་ཡིན། །ཆུང་མ་ཁོལ་མོའི་རྨི་ལམ་གཡོག་མོ་ཡིན། །བོང་བུ་ཞོན་པ་རྨིས་ན་གཡོག་མོ་ཡིན། །དྲེའུ་བྱ་ནག་རྨིས་ན་ཁོལ་མོ་ཡིན། །མ་མོ་འགྲུབ་ནས་དབང་བསྡུས་ན། །བུད་མེད་དག་གི་བདག་ལ་ཕྱག་འཚལ་ནས། །འཛུམ་ཞིང་འོ་བྱེད་འཁྲིག་པ་སྤྱོད་པའོ། །མ་མོ་མ་འགྲུབ་དབང་དུ་མ་འདུས་ན། །མི་སྡུག་གཟུགས་སུ་སྟོན་ཅིང་རྗེ་མོར་རྫུ། །གཅན་གཟན་ཟར་ལོ་མ་མོ་ཕྱག་བསྒྲུབས་སོ། །དམ་ཚིག་ཉམས་ནས་མ་མོ་འཁྲུག་གྱུར་ནས། །མ་མོ་ནང་འཐབ་ཁྲག་གི་ན་བུན་འཁྲིག །ལྟས་དེ་མཐོང་ན་བཀའ་ཆད་འོང་། །གལ་ཏེ་ལྟེ་ཕུར་ནག་མོ་ལ་སོགས་པའི་དམ་སྲི་རྣམས་ཀྱི་བསྒྲུབ་པ་ལ་བར་དུ་གཅོད་ན་གྲངས་ལ་འཇིགས་ཤིང་ཁྱིམ་ནས་འགྲོ་སྙིང་འདོད། གཉིད་བྲོ། སྙིང་མི་དགའ་ལ་བསྙོ་ཞིང་འགྲོ། ཁ་སྙིང་འདོད་ལ་འཁྲོ་ཞིང་ཚིགས། །བུད་མེད་རྒྱུས་དང་མོ་མཚན་སྟོན་པ་རྨིས། གལ་ཏེ་གཏོར་མ་དུས་ལས་ཡོལ་བ་ནི། མོ་མཚན་དང་ནི་སྔོན་གྱི་དབང་རྟགས་སྟོན། །དུ་བ་འཁྲིགས་དང་བུད་མེད་རྣལ་བ་མཐོང་། །བུད་མེད་རྒྱུ་བ་མཐོང་ན་ཉམས་པ་གནོད། །མིག་ནི་འཛུམ་པ་མཐོང་ན་ཏིང་འཛིན་གསལ། །ཐལ་མོ་བརྡགས་པས་མཐོང་ན་རྫས་རྣམས་མ་ཚངས་ཟེར། །ལྕེ་རྩེ་སྟོན་ན་སྙིང་པོ་ཆད་པ་ཡིན། །སོ་སྒྲ་སྒྲིགས་ན་གཞན་དང་འཐབ་མོ་འོངས། །རྒོད་པ་མཐོང་ན་དགྲ་བགེགས་སྒྲོལ་བའི་རྟགས། །འཁྲོས་ནས་བར་ཆད་འོང་བ་སྟོན་པ་ཡིན། །རྒྱང་གླུ་ལེན་པ་མཐོང་ན་འགྲུབ་ཐག་རིང་། །ཆུ་རིས་ངོ་ལ་ཡོད་ན་རིམ་ནད་འོང་། །གར་ཐབས་བྱེད་ཅིང་མཐོང་ན་ཅི་བསམ་འགྲུབ། །གླིང་བུ་འབུད་ཅིང་བྱུང་ན་གཏོར་མ་འདོད་པ་ཡིན། །འཕྲེང་བ་བསྒྲང་ན་སྦྱིན་བསྲེག་འདོད་པ་ཡིན། །ཁ་ལ་འོ་བྱེད་སྦྱོར་བ་བྱེད་པ་ཡིན། །བོང་བུ་ཞོན་པ་རྨིས་ན་རྗེ་མོ་ཡིན། །དྲིལ་ལ་ཞོན་པ་རྨིས་ན་ཁོལ་མོ་ཡིན། །སྙིང་སྦྲེལ་ཐོག་པ་མཐོང་ན་རང་ལ་ཆགས། །གཡབ་དར་ཐོག་པ་མཐོང་ན་རང་ལ་ཆགས། །མེ་ཏོག་ཐོག་པ་མཐོང་ན་ཆུང་མ་ལུས་ལ་ཆགས། །སྟང་སྟབས་བྱེད་པ་མཐོང་ན་སློབ་མའི་ལུས་ལ་ཆགས། །བྱ་དང་གཅན་གཟན་གཏོར་མ་ལེན་ན་བཟང་། །ཁ་རོག་འདུག་ན་སྙིང་པོ་ཕྱག་རྒྱ་ནོར། །འཛུམ་པ་མཐོང་ན་བདག་ཚེ་རིང་བར་རྟགས་ཡིན། །ཀོས་ལ་མི་རེག་པར་ཡོད་སློབ་མ་ཡིན། །ཤ་བ་ཞོན་ན་ནོར་རྣམས་འཕེལ་བའི་རྟགས། །མ་མོ་འགྲུབ་པའི་རྟགས་རྣམས་གང་འབྱུང་ཡང་། །དེ་ནས་རྟག་བཟང་འབྱུང་བ་ནི། །བདུད་རྩི་བུམ་པའི་ཕྱག་བཅས་པ་ནི། དངོས་གྲུབ་བླང་བའི་སྔགས་བཟླས་པར་བྱས་ལ། །མ་དང་སྲིང་མོ་ཁོལ་མོ་དམ་ལ་བཏགས། །མཚན་མ་ངན་པ་དག་ནི་མཐོང་བ་ནི། །མཚན་མ་བཟློག་པའི་དྲི་ཤུལ་ཕྱག་རྒྱ་བཅའ། །མཚན་མ་ངན་པ་སྔགས་ཀྱི་བཟློག །རྡོ་རྗེའི་གསང་སྔགས་བཤད་པར་བྱ། །དཔལ་ལྡན་ལྷ་མོའི་སྲོག་གི་སྙིང་པོ་ནི། ཨཱོཾ་རུ་རུ་བཱེ་ཏི་ཤུ་མ་ཧེ་སིང་། རུ་རུ་རོ་བྷེ་ཏི་ཤཱ་བ་ཏོ་སི། ཙ་ཤ་བ་ལ་ཨ་ཤུག་མེ་ཧཱུྃ་བྷྱོ་ཛ་ཛ། ཁོལ་མོ་རི་ཏིའི་སྙིང་པོ་ནི། ཨཱོཾ་རུ་རུ་བེ་རོ་རུ་ཏི་ཤུ་བ་ཏོ་སི་རག་མོ་སྟེ་མ་རག་མོ་ཐུན་བྷྱོ། མ་མ་ཏྲག་རཀྴ་ཁ་མུན་ཏྲ་བ་ཏྲ་བ་ཏྲག་རཀྴ་ཙིཏྟ་ཁ་རག་མོ་རི་མ་ཏི་ས་མ་ཡ། བྲ་མ་མ་ཧཱ་སྟི་པྲ་ཏ་ན་བྷྱོ། མུ་རུ་ལུ་རུ་ལུ་བྷྱོ་ཛ་ཛ། དེ་ནས་སྲོག་ལ་བརྟེན་པའི་སྔགས་ཡིན་ཏེ། ས་ཡ་བཟླས་ན་མ་མོ་མངོན་དུ་འོང་བ་མཐོང་། བྱེ་བ་བཟླས་ན་ཕྱག་རྒྱ་སྟོན་པར་བྱེད་དེ། འབུམ་ཕྲག་གིས་ཀྱང་དངོས་གྲུབ་མཚན་མ་སྟོན། ཁོ་མོའི་སྙིང་པོ་བཟླས་མ་ཐག་ཏུ་འོང་། ས་མ་ཡ་དུ་རཀྴ་སིང་ཧ་རཀྴ་བྷྱོ། རཀྴ་དུ་རག་ཤ་སི་མ་མ་མ་མ་རུ་ལུ་རུ་ལུ་རུ་ལུ་བྷྱོ་བྷྱོ་བྷྱོ་བྷྱོ། དེ་ནས་འཁོར་ནག་མོ་སྟོང་གི་སྙིང་པོ། ཨཱོཾ་མ་ཧཱ་ཀ་ལི་མ་ཧཱ་ཀ་ལི་མ་ཏི་ཨ་གད་ཛ་ཡ་ཨ་གད་ཛ་ཡ་པྲ་བེ་ཤ་ཡ་པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏི་པཱ་ཏིཥྛ། ཨ་གུ་ཤ་ཛ་ཡ། གཙོ་མོའོ། །ཨཱོཾ་རུ་རུ་རོ་རུ་ཏྲི་ཙ་པ་ལ་ཨ་ཤུག་མེ་བྷྱོ་ཛ་ཛ། ཁོལ་མོའོ། །མ་ཧཱ་ཀ་ལི་ཨ་བེ་ཤ་ཡ། ཨ་ཏི་མ་ཏི་ས་མ་ཡ་འབེབས་ཏེ་ལྷན། དེ་ནས་གཏོར་མའི་སྔགས་སོ། །མ་མ་དཱེ་བི་མ་ཧཱ་ཀ་ལི་རེ་མ་ཏི་བྷ་ལིངྟ་ཁ་ཁ་ཁཱ་ཧི་མ་ཧཱ་པུ་ཙ་ཧོ། ཨ་མྲྀ་ཏ་ཁ་ཧིཿ དེ་ནས་གཏོར་མའི་སྔགས་སོ། །ས་མ་ཡ་མ་བྲ་ཧ་ག་བཱ་ལ་ས་མ་ཡ། མ་ཧཱ་ག་ལི་ག་ཡ་ས་མ་ཡ། མ་ཧཱ་ག་ལི་སག་ས་མ་ཡཱ། མ་ཧཱ་ཀ་ལི་ཙིཏྟ་ས་མཱ་ཡ་མ་ཡ་མུ་དྲ་ག་ས་ལ་ཧཱུྃ། དེ་ནས་དམ་ཚིག་བརྟེན་ཅིང་གང་དུ་དམ་བསྐུར་བའི་སྔགས་སོ། །ཨཱོཾ་ཛི་གི་གི་དེ་བི། མ་ཧཱ་ཀ་ལི་ས་མ་ཡ། བཛྲ་ཀྲོ་ཏ་ཀརྨ་རཀྵ་ཧཱུྃ། དེ་ནས་ལས་ལ་བསྐུལ་བའོ། །ༀ་རུ་རུ་ཙིཏྟ་ཨ་ཤུག་མེ་ས་ཏི་རུ་ཏྲ་ཁ་རཀྴ་རཀ་མོ་ཧཱུྃ། རགྴ་ཙིཏྟ་མ་ཧཱ་ཀ་ལི་ཡཾ་ཏི་མུ་རུ་ཁ་ཙིཏྟ་ནན། རག་མོ་དེ་གེམ་ཛ་ཛ། ཛ་ཛ་མ་མ་དྲི་ཏི་ཧཱུྃ་བྷྱོ། དེ་ནས་དཔོན་གཡོག་གནད་ལ་བསྐུལ་བའི་སྔགས་སོ། །ༀ་བཛྲ་ཙཎྜའང་གི་ནི་ཏི་མི་མ་ཧཱ་ཀ་ལི་རེ་མ་ཏི་ཀ་ཡ་ཝཀ་ཙིཏྟ་སིདྡྷི་ས་མ་ཡ་ཕ་ལ་ཨ་བེ་ཤ་ཡ། དེ་ནས་དངོས་གྲུབ་བླང་བའི་སྔགས་སོ། །ༀ་མ་ཧཱ་ཀ་ལི་ཡེ་ཧཱུྃ། རུ་རུ་ཙ་པ་ལ་ཨ་ཤུག་མེ་ཧཱུྃ། མ་ཧཱ་ཀ་ལི་ཨ་བེ་ཤ་ཡ། ག་བ་ལ་དྲི་ནི་མ་ཧཱ་ཛྙཱ་ན་ག་ཡ་སག་ཙིཏྟ་ཧཱུྃ། དེ་ནས་དབང་བསྐུར་བའི་སྔགས་སོ། །ཏྲི་དྷི་ཙ་མུན་འགྱུར་ཏེ་ཧཱུྃ། དེ་ནས་ཉམས་ལེན་རྟགས་པའི་སྔགས་སོ། །ཧཱུྃ་ཕཊ་མ་ཧཱ་ཀ་ལི། དེ་བིས་འདུས་སྟན། ཏ་ཀ་ཧ་ན་ད་ཧ་པ་དྷ་རུ་ལུ་ཁ་དྷ་མ་ཙ་མ་ར་ཡ་ཧཱུྃ་ཕཊ། དེ་ནི་མཚན་ངན་པ་བཟློག་པའི་སྔགས་སོ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཧྲིང་ཧྲིང་ཧྲིང་ཧྲིང་ཧྲིང་ཧྲིང་ཧྲིང་ཧྲིང་། ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ་ཀི་ཏ། བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ་བྷྲཱུྃ་གོཾ། །ཧུ་དུ་ཧུ་དུ་ཧུ་དུ་ཧུ་དུ་ཧུ་དུ་ཧུ་དུ་ཧུ་དུ་ཧུ་དུ། ཕ་དང་ཀ་ཕ་དང་ཀ་ཕ་དང་ཀ་ཕ་དང་ཀ་ཕ་དང་ཀ་ཕ་དང་ཀ་ཕ་དང་ཀ་ཕ་དང་ཀ །རྡོ་རྗེའི་མཁའ་འགྲོའི་མེ་ལྕེ་འབར་བའི་རྒྱུད་ལས་སྔགས་བསྟན་པའི་ལེའུ་སྟེ་བརྒྱད་པའོ། །དེ་ནས་བསྒྲུབ་པའི་དཀྱིལ་འཁོར་བྱང་ཤར་དུ། དུར་ཁྲོད་ས་ལ་གྲུ་གསུམ་གྱིས་ཁང་བུ་གྲུ་གང་ཡོད་པ་བརྩིགས། མི་ཁྲག་གི་ཆགས་ཆགས་བཏབ། དེ་ནས་ཞིང་སོགས་གཡབ་པ་ལ། ལྷ་མོ་ཉིད་ཀྱི་སྐུ་བྲི་སྟེ། རྒྱུས་ཆེན་གཟུང་ཐག་ལ་སྙིང་ཀར་བཏག་ལ། གྲུ་གསུམ་སྟེང་དུ་གན་རྐྱལ་མནན། གཟུང་ཐག་རྩེ་མོ་གཟུང་ལ། ཧཱུྃ་མཚན་ཆེན་པོར་གསལ་བར་བསྒོམ། མ་མོ་གསང་བའི་སྙིང་པོ་བཟླས། རག་མོ་ཙིཏྟ་རག་ཏ་སི་ར་ཏི་ཏི་ས་མ་ཡ་ཧཱུྃ་ཛ། དེ་སྐད་གསང་སྔགས་བཟླས་པའི་ཚིགས། །མ་མོའི་སྙིང་ཁྲག་རུས་པར་བསྒོམ། །མ་མོ་བོང་བུར་བཅས་པ་རྣམས། །མ་དང་བཞིན་དུ་འགྱེལ་བར་བསམ། །དེ་ནས་སྙིང་ཁར་བརྡོག་པས་མནན། ཙི་ཏ་ཛ་ལ་རཾ། ཞེས་བརྗོད་པས། བདག་གི་ཞལ་ནས་མེ་བྱུང་ནས། །མ་མོ་ཐུལ་གྱི་ཚིག་པར་བསྒོམ། །མ་མོའི་ས་བོན་བྷྱོ་ནག་མོ། བདག་གི་ཞབས་འོག་ཏུ་འདུག་པ་ལ། མ་མོ་རུ་ལུ་ཞེས་བརྗོད་པས། བདག་ཉིད་ཀྱི་ཞབས་འོག་ནས་ལྷ་མོ་འདུག་པའི་ཐོད་འབྲིང་ཅན། ཐལ་མོ་སྦྱར་ནས་འདུག་པར་བསྒོམ། རྟ་མགྲིན་ཕྱག་རྒྱའི་དབང་དུ་བསྡུས། ཁྱུང་གཤོག་ཕྱག་རྒྱའི་ཟིལ་གྱིས་མནན། གནད་དམ་དབབ་པའི་དམ་ཚིག་བསྲེས། དེ་ལྟར་ལན་གཅིག་བསད་པ་སྟེ། གཟུགས་ནི་རྟོག་པའི་འོག་ནས་ཕྱུང་། བྱང་ཤར་མཚམས་ན་བཞུགས་སུ་གསོལ། སྨེ་བཤགས་བྱ་ཞིང་གདུང་གླུ་བླངས། བདུད་རྩི་རྣམ་པ་གསོས། མཚངས་ནས་བྲུས་ཞིང་གནད་ལ་བསྐུལ། དེ་ནས་བསྒྲུབ་པ་བསྐྱར་ལ་བརྩམས། ཐེ་ཚོམ་མེད་པར་འགྲུབ་པ་འགྱུར། སྲོག་གི་ལས་བརྒྱད་ནི། སྲོག་དབབ་པ་དང་གཅིག །སྲོག་སྙིང་དམ་ལ་བཏགས་པ་དང་གཉིས། སྲོག་གི་སྲོག་སྐོར་བ་དང་གསུམ། སྲོག་བཅུན་པ་དང་བཞི། སྲོག་གི་ཡང་ཏིག་བླང་བ་དང་ལྔ། སྲོག་གཟེར་བ་དང་དྲུག །གཟི་བྱིན་བླང་བ་དང་བདུན། ཟིལ་ཡིས་མནན་པ་དང་བརྒྱད་དོ། །བདག་གི་ཐུགས་ཀ་ནས་འོད་ཟེར་འཕྲོས་པའི་ཕྱོགས་བཅུའི་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ་ནས། མཐུ་དང་བྱིན་རླབས་མ་མོ་ལ་ཐིམ། ཧཱུྃ་དུ་གྱུར་པར་བསམ་མོ། །དེ་ནས་སྲོག་དབབ་པའོ། །ཡང་བདག་གི་ཐུགས་ཀ་ནས་འོད་ཟེར་འཕྲོས་པས་བདེ་བར་གཤེགས་པའི་བྱིན་རླབས་བསྡུས་མ་མོའི་ཐུགས་ཀར་ཐིམ། སྔགས་ཀྱི་འཁོར་བར་བསམ། དེ་ནས་སྲོག་དམ་ལ་བཏགས་པའོ། །ཡང་བདག་གི་ཐུགས་ཀ་ནས་འོད་ཟེར་འཕྲོས་པས་མ་མོའི་སྙིང་པོ་ཚུར་དྲངས་ནས་བདག་གི་ས་བོན་ལ་བསྐོར་བར་བསམ། དེའི་རྒྱབ་ཏུ་ཡི་དམ་སྔགས་ཀྱི་འཁོར་བར་བསམ་ལ་བཟླའོ། །དེ་ནས་སྲོག་གི་སྲོག་འཁོར་བསྐོར་བའོ། །ཡང་བདག་གི་ཐུགས་ཀ་ནས་འོད་ཟེར་འཕྲོས་པས། མ་མོའི་ཐུགས་ཀར་ཐིམ། བྷྱོ་སྔགས་དང་བཅས་པ་ཚུར་དྲངས་པས། བདག་གི་ཐུགས་ཀ་ནས་གདན་ཉི་ཟླ་ཁ་སྦྱོར་བར་དུ་ཚུད་པར་བསམ། སྲོག་གི་གཟེར་བའོ། །ཡང་བདག་གི་ཐུགས་ཀ་ནས་འོད་ཟེར་འཕྲོས་པས། མ་མོའི་མཐུ་སྟོབས་གཟི་བྱིན་བླང་ལ། བདག་ལ་ཐིམ་པས་མཐུ་སྟོབས་དང་ལྡན་པར་བསམ། མ་མོ་ཉམས་ཤིང་རིད་ནས་ཉམས་ཆུང་བར་བསམ། བསྟན་པ་བསྲུངས་བར་ཁས་བླང་དམ་བཅས་པར་བསམ། གཟི་བྱིན་བླང་བའོ། །བདག་གི་ཐུགས་ཀ་ནས་ཧཱུྃ་འོད་ཟེར་དང་བཅས་པ་འཕྲོས་པས་མ་མོའི་སྙིང་པོ་སྤྱི་བོར་ཕྱག་ན་རྡོ་རྗེ། འཕྲག་པ་གཡས་སུ་རྟ་མགྲིན་བསམ། འཕྲག་པ་གཡོན་དུ་ཨེ་ཀ་ཙ་ཏི་བསམ། དེ་གསུམ་གྱི་མནན་ནས་གཟིར་བར་བསམ། སྔགས་བདག་གིས་བསྟན་པ་བསྲུངས་བར་ཁས་བླངས་དམ་བཅས་པར་བསམ། སྲོག་གི་གཟེར་བའོ། །ཡང་བདག་གི་ཐུགས་ཀ་ནས་སྔགས་འོད་ཟེར་དང་བཅས་པ་འཕྲོས་པས། མ་མོའི་སྙིང་པོ་ཡི་དམ་སྔགས་ཀྱི་བསྐོར་བར་བསམ། རང་དབང་མེད་པར་ལས་བྱེད་པར་བསམ། སྔགས་དྲགས་སུ་བཟླས་སོ། །སྲོག་བསྐོར་བའོ། །ཡང་བདག་གི་ཐུགས་ཀ་ནས་འོད་ཟེར་འཕྲོས་པས། མ་མོའི་བྷྱོ་ཚུར་བླང་བའི། མ་མོས་བདག་ལ་གཟི་མདང་ཤོར་བར་བསམ། སྔགས་དྲགས་སུ་བཟླའོ། །སྲོག་གི་ཡང་ཏིག་བླང་བའོ། །སྲོག་གི་ལས་བརྒྱད་དོ། །མ་མོ་ས་མ་ཡ། ཨཐྎ། བརྒྱ་བྱིན་ཉོན་ཅིག །ད་ངའི་ལྷ་མོ་འདི་ནི་སྟོན་པ་སངས་རྒྱས་གསེར་ཐུབ་ཀྱི་བསྟན་པ་ལ། ལྷ་མོ་ལོང་གཏོང་དུ་གྱུར་ནས། དགེ་བ་བཅུ་དག་པར་སྤྱོད་དོ། །དེ་ནས་འོད་སྲུང་གི་བསྟན་པ་ལ། ཞེ་སྡང་རང་གར་སྤྱོད། དེ་ནས་མར་མེ་མཛད་ཀྱི་བསྟན་པ་ལ་ཤ་རིས་བུར་འགྱུར་རོ། །དུས་དེ་ཙམ་ཤཱཀྱ་ཐུབ་པ་འདི་ནི་དགེ་སློང་དབང་ཕྱུག་ཞེས་པ་ཡིན། ལྷ་མོ་ཤ་ཟ་རང་མོ་མཆོད་གནས་བྱ། ཤིང་སྟག་གཤེགས་སོ། །སྨོན་ལམ་གཅིག་ཏུ་བཏབ་བོ། །བརྒྱ་བྱིན་ཉོན་ཅིག །ད་ལྷ་མོ་འདི་ལས་སངས་རྒྱས་གཉིས་ཀྱི་རིང་རྣམས་ཤཱཀྱ་ཐུབ་པའི་བསྟན་པ་ལ་དུས་གཅིག་ཏུ་སྨིན་ནོ། །ལྷ་མོ་འདི་ལ་སྔོན་མ་ཧཱ་དེ་བའི་བུ་མོར་སྐྱེས་པ་ནི་དགེ་བ་སྤྱད་པའི་མཐུའོ། །བར་དུ་སྲིན་པོའི་ཆུང་མར་གྱུར་པ་ནི། རང་ལྕེབ་དང་ཞེ་སྡང་སྤྱོད། ༈ གུ་རུ་ན་མོ། བྷྱོ། དད་པ་དང་ནི་དམ་ཚིག་གི། །ཚུར་གཤེགས་ཚུར་བྱོན་དཔལ་ལྷ་མོ། །བདུད་མོ་དཔལ་ལྡན་རེ་མ་ཏི། །རྣལ་འབྱོར་བདག་གི་གདོངས་ཏེ་བོས་པའི་ཚེ། །ཉི་མ་བྱང་ཤར་ཕ་གི་ན། །ཡང་འདུས་ཤིང་གི་རྩ་བ་ནི། །མཚོ་མུ་ལེ་མཐིང་གི་ནང་ཤེད་ན། །མཐིང་ཤུག་སྔོན་པོའི་གུར་ཁྱིམ་ན། །ཐོད་པ་དགུ་བརྩེགས་གཞལ་ཡས་ན། །བསེའི་སྐུ་མཁར་གྲུ་བཞིའི་ནང་། །རིན་ཆེན་སྣ་བདུན་ཕོ་བྲང་ནས། །མི་རོ་རྟ་ཏོ་གཅལ་དུ་བཀྲམ། །མི་ཁྲག་རྟ་ཁྲག་འདམ་རྫབ་ལྡང་། །དེ་ན་མ་ཅིག་ལྷ་མོ་བཞུགས། །ལྷ་མོ་ནག་མོ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །འདོད་ཁམས་ཀྱི་དབང་ཕྱུག་མ། །ཆིབས་སུ་བོང་བུ་དམར་ག་བཅིབས། །ཁལ་དུ་ལྕགས་ཀྱི་དྲྭ་བ་མིག་དགུ་འགེལ། །མཆན་ན་ནད་ཀྱི་རྐྱལ་པ་ཐོགས། །གཡས་ན་རལ་གྲི་སྡིག་པ་ཅན། །གཡོན་ན་གདུག་པའི་ཐོད་ཁྲག་ཐོགས། །སྟོང་གསུམ་ཀུན་གྱི་བྱོ་བླུགས་མཁན། །བདུད་མོ་དཔལ་ལྡན་རེ་མ་ཏི། །དམ་ཚིག་དབང་གི་སྤྱན་འདྲེན་ནས། །དམ་ལ་མ་འདའ་ད་ཚུར་བྱོན། །མ་ཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་དང་བཅས། །རྣལ་འབྱོར་བདག་གི་གདུང་སྟེ་བོས་པའི་ཚེ། །མ་མཆི་མ་ཐོག་མྱུར་དུ་བྱོན། །མ་ཅིག་ལྷ་མོ་ནག་མོ་ཁྱོད། །སྔོན་ཚེ་ཕྱག་ན་རྡོ་རྗེ་ལ། །རང་རྟག་སྲོག་གི་སྙིང་པོ་ཕུལ། །བོས་ནས་འོང་བར་ཁས་བླང་ཤིང་། །ཁས་བླངས་དམ་ལ་མ་འདའ་བར། །རྣལ་འབྱོར་བདག་གི་ཁྱེད་བསྐུལ་ནས། །དམ་ཚིག་དབང་གི་ད་ཚུར་བྱོན། །ཐུགས་དམ་དབང་གི་གཤེགས་སུ་གསོལ། །མ་ཅིག་ལྷ་མོའི་འཁོར་ཚོགས་རྣམས། །ན་ཆུང་མཚན་ལྡན་ཆུར་ཤི་ཡི། །སྲིན་ལག་གཡབ་མོའི་སྤྱན་འདྲེན་ན། །མི་དབང་སྨིན་པའི་ཤ་ཁྲག་དང་། །དམ་རྫས་འདི་ལ་མྱུར་དུ་བྱོན། །ཨེ་ཨཱོཾ་ཨེ་ཨ་ར་ལི་མ་ཧཱ་ཀ་ལི་རེ་མ་ཏི་ཛཿཧཱུྃ་བྃ་ཧོ། སྤྱན་འདྲེན་ནོ། །ཧཱུྃ། མ་ཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་ཕྲག་རྣམས། །མི་རོ་གཤིབ་པའི་གདན་མཆོག་དང་། །སྲིད་པའི་བོང་བུའི་གདན་ལ་བཞུགས་སུ་གསོལ། །ༀ་མ་ཧཱ་ཀ་ལི་རེ་མ་ཏི། ས་མ་ཡ་ཏིཥྛ་ལྷན། ཅེས་གདན་འབུལ་ལོ། །བྷྱོ། མ་ཅིག་ལྷ་མོ་རེ་མ་ཏི། །ནག་མོ་ཆེན་མོ་རྣལ་འབྱོར་མ། །ཕོ་ཉ་བདུད་མོ་འབུམ་ཚོགས་ལ། །རྣལ་འབྱོར་བདག་གི་དད་པས་ཕྱག་འཚལ་ལོ། །ཨཱོཾ་མ་ཧཱ་ཀ་ལི་རེ་མ་ཏི། ཨ་ཏི་པུ་ཧོ་པྲ་ཏི་ཛ་ཧོ། ཧཱུྃ། རྡོ་རྗེ་དྲི་ཆུ་བདུད་རྩི་མཆོག །པཉྩ་ཨ་མྲྀ་ཏ་དང་སྦྱར། །དམ་ཚིག་སྙིང་ཁྲག་ཆེན་པོ་འདི། །བསྲེས་པའི་མཆོག་སྟེ་སྲོག་གི་སྙིང་། །མ་ཅིག་བདུད་མོ་འཁོར་ཚོགས་རྣམས། །མ་ཁྱོད་དང་བདག་གི་དམ་བསྲེའོ། །རྟག་ཏུ་དམ་ལ་མ་འདའ་ཞིག །དམ་ལ་འདའ་ན་བསྲེག་པར་བྱེད། །ༀ་མ་ཧཱ་ཀུ་ཀུས་ས་མ་ཡ་མ་ཧཱ་པཉྩ་ཨ་མྲྀ་ཏ་ལ་ཁ་ཁ་ཁཱ་ཧི། དམ་བསྲེའོ། །བྷྱོ། མ་ཅིག་བདུད་མོ་རེ་མ་ཏི། །ཕྱག་བརྙན་བདུད་མོ་འབུམ་སྡེར་བཅས་པ་ལ། །བུ་ཡི་མཆོད་པ་འབུལ་བ་ནི། །རྒྱ་མཚོ་འབབ་ཆུ་ཆུ་མིག་རྫིང་། །དམར་ཆེན་ཁྲག་གི་ཨརྒཾ་འདི། །མ་ཡི་སྐུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་བདག་ལ་སྩོལ། །ༀ་མ་ཧཱ་ཀ་ལི་རེ་མ་ཏི་ཨརྒྷཾ་ཧཱུྃ། དམ་འདྲེས་སོ། །ཆུ་སྐྱེས་ཐང་སྐྱེས་མེ་ཏོག་དང་། །དབང་པོ་ལྔ་ཡི་མེ་ཏོག་འདི། །མ་ཡི་དབུ་ལ༴ ཐུགས་མཆོག༴ དངོས་གྲུབ་དམ་པ༴ ༀ་མ་ཧཱ༴ པུཥྤེ་ཨཱཿཧཱུྃ། ག་བུར་གླ་རྩི་གུ་གུལ་དང་། །ཤ་ཆེན་སྤོས་ཀྱི་དུད་པ་འདི། །མ་ཡི་ཤང་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ༴ སོགས་ནས་དྷཱུཔྤེ་ཨཱཿཧཱུྃ། ཉི་ཟླ་གློག་དང་གསལ་བའི་སྒྲོན། །ཞུན་ཆེན་མདངས་ཀྱི་མར་མེ་འདི། །མ་ཡི་སྤྱན༴ ཐུགས་མཆོག༴ དངོས་གྲུབ༴ ༀ་མ་ཧཱ༴ ཨ་ལོ་ཀེ༴ ཁྲག་ཆེན་དུག་དང་སྦྱར་བ་ཡི། །རཀྟའི་དྲི་ཆབ་དམར་པོ་འདི། །མ་ཡི་ཐུགས་ལ༴ ཐུགས་མཆོག༴ དངོས་གྲུབ༴ ༀ་མ་ཧཱ༴ གྷནྡྷེ་ཨ་ཧཱུྃ། ཕྱེ་མ་ལྔ་ཡི་བཤོས་བུ་དང་། ནལ་ཤ་ཡོན་ཏན་ཀུན་ལྡན་འདི། །མ་ཡི་ལྗགས་ལ༴ ཐུགས་མཆོག་དམ༴ དངོས་གྲུབ༴ ༀ་མ་ཧཱ༴ ནཻ་ཝི་ཏྱེ་ཨ་ཧཱུྃ། པི་ཝང་གླིང་བུ་མཁར་བའི་རྔ་། །མན་གལ་ཆ་ལང་རྐང་གི་དུང་། །མ་ཡི་སྙན་ལ༴ ཐུགས་མཆོག༴ དངོས་གྲུབ་དམ་པ༴ ༀ་མ་ཧཱ་ཀ་ལི་རེ་མ་ཏི་ཤབྡ་ཨཱཿཧཱུྃ། ཕྱི་ཡི་མཆོད་པའོ། །ཧཱུྃ། བུམ་དང་རིལ་དང་ཕྱེད་ཚལ་དང་། །ནང་རོལ་གློ་སྙིང་མཁལ་མར་བཅས། །ཤ་དང་རུས་པ་རྐང་ཚིལ་རྣམས། །མ་བདུད་འཁོར་དང་བཅས་ལ་འབུལ། །བསྟན་པ་བསྲུངས་ཕྱིར་བཞེས་སུ་གསོལ། །མ་ཧཱ་མཾ་ས་ལ་ཁཱ་ཧི། །མ་ཧཱ་རཀྟ༴ མ་ཧཱ་ཙིཏྟ༴ མ་ཧཱ་བཱ་སུ་ཏ༴ མ་ཧཱ་ཀོ་རོ་ཙ་ན༴ མ་ཧཱ་ཀིཾ་ནི་རི་ཏི་ལ་ཁཱ་ཧི། གཏོར་མ་འབུལ་ལོ། །བྷྱོ། མ་ཅིག་བདུད་མོ་འཁོར་ཚོགས་རྣམས། །ཐུགས་དམ་དབང་གི་སྙིང་ཁྲག་དམར་ལ་རོལ། །མ་ཅིག་ཁྲག་འཐུང་དཔག་ཚད་བརྒྱད་ཁྲིར་རྒྱུག །དམ་རྫས་རྨད་དུ་བྱུང་བས་དམར་ཆེན་བཞེས། །མ་ཧཱ་རཀྟ་ལ་ཁཱ་ཧི། རཀྟ་འབུལ་ལོ། །བྷྱོ། སངས་རྒྱས་བསྟན་པ་བསྲུངས་བའི་ཕྱིར། །མ་ཅིག་བདུད་མོའི་འཁོར་ཚོགས་རྣམས། །ཐུགས་དམ་དབྱིངས་ཉིད་བསྐང་བའི་ཕྱིར། །བདུད་རྩི་སྨན་གྱི་མཆོད་པ་བཞེས་སུ་གསོལ། །མ་ཧཱ་པཉྩ་ཨ་མྲྀ་ཏ་ལ་ཁཱ་ཧི། ཨ་མྲྀ་ཏ་འབུལ་ལོ། །བྷྱོ། མ་ཅིག་བདུད་མོ་འཁོར་བཅས་ལ། །ཡང་ཅིག་མཆོད་པ་འབུལ་བ་ནི། །མི་དབང་སྨིན་པའི་ཤ་ཁྲག་དང་། །འཆི་ཀའི་མཚལ་ཐིག་དམར་པོ་དང་། །ཤིང་ལོ་རླུང་ཁྱེར་སར་མ་ལྷུང་། །འབྲས་བུ་སྨིན་པའི་ཤིང་ཏོག་དང་། །ན་ཆུང་མོའི་བྱུང་ཟད་ཁྲག །མ་ཉམས་བྱང་སེམས་དཀར་དམར་དང་། །དྲི་རྒོད་སྙིང་དང་དབང་པོ་ལྔ། །བོང་བུའི་སྙིང་དང་ཁྲིམས་འཆལ་ཤ །རྣམ་ལྔ་བདུད་རྩིའི་མཆོད་པ་འདི། །མ་ཅིག་འཁོར་དང་བཅས་ལ་འབུལ། །བསྟན་པ་བསྲུངས་ཕྱིར་བཞེས་སུ་གསོལ། །ཧཱུྃ། མ་ཅིག་ཆེན་མོ་འཁོར་དང་བཅས་པ་རྣམས། །དངོས་གྲུབ་སྩོལ་བའི་དུས་ལ་བབ། །མ་ཡི་བུ་ལ་དངོས་གྲུབ་སྩལ་དུ་གསོལ། །འདོད་ཁམས་འདུལ་བའི་དངོས་གྲུབ༴ ཡེ་ཤེས་གསལ་བའི༴ འཇིག་རྟེན་དབང་དུ་བསྡུད་པའི༴ ཚེ་དང་བསོད་ནམས་རྒྱས་པའི༴ ཡེ་ཤེས་ལྔ་ཡི་དངོས་གྲུབ༴ གྲུབ་ཆེན་བརྒྱད་ཀྱི༴ ཕྲིན་ལས་བཞིའི་དངོས་གྲུབ༴ སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། ༀ་ཤྲཱི་དེ་བའི་མ་ཧཱ་ཀ་ལ་ཀ་ཡ་ༀ་ཨཱཿཧཱུྃ། དངོས་གྲུབ་བླངས་ངོ་། །བྷྱོ། བསྐལ་པ་མེ་རླུང་འཚུབས་མའི་ཀློང་དཀྱིལ་ནས། །མ་ཅིག་ལྷ་མོ་གློག་འགྱུ་མ། །ཕོ་ཉ་བདུད་མོ་འབུམ་ཕྲག་རྣམས། །མ་ཅིག་འཁོར་བཅས་བདག་ལ་དགོངས་སུ་གསོལ། །བདག་ཉིད་མི་མཁས་རྨོང་པའི་དབང་གྱུར་པས། །སྐུ་གསུང་ཐུགས་དང་རྩ་བ་ཡན་ལག་དམ་ཚིག་ལ། །ཏིང་འཛིན་མི་གསལ་ར་རི་ཁལ་ཁོལ་དང་། །སྔགས་དང་ཕྱག་རྒྱ་གྲ་ཆགས་ཟུར་ཉམས་དང་། །ཉམས་པ་ཅན་གྱི་གྲིབ་ཀྱི་ཕོག་པ་དང་། །ཕུད་ཉམས་ལྷག་མར་གྱུར་པ་ཐམས་ཅད་དང་། །དམ་རྫས་མཆོད་རྫས་དུས་སུ་མ་ཚོགས་དང་། །དཔོན་དང་མཆེད་ལྕམ་ཐུགས་དང་འགལ་བ་དང་། །ཁྱད་པར་མ་ཅིག་ལྷ་མོ་དམ་ཚིག་དང་། །དམ་ཚིག་ཉམས་ཆག་ཞིག་རལ་ཅི་མཆིས་པ། །མ་ཅིག་བདུད་མོ་འཁོར་ཚོགས་རྣམས་ལ་བཤགས། །རབ་ཏུ་བཤགས་སོ་དངོས་གྲུབ་རྩལ་དུ་གསོལ། །བཤགས་པ་བྱའོ། །ཧཱུྃ། བསྐལ་པ་མེ་ལྟར་འབར་བའི་ཀློང་དཀྱིལ་ནས། །རླུང་ནག་དགུ་ཀློང་འཁྱིལ་པའི་ཕོ་བྲང་ནས། །མ་ཅིག་ལྷ་མོ་འདོད་ཁམས་གཙོ་མོ་སྟེ། །ནག་མོ་ཟ་བྱེད་འཇིགས་པའི་ཆ་ལུགས་ཅན། །མཐིང་ནག་མི་སྲུན་ཁྲག་གི་རལ་པ་ཅན། །མ་ཁྱོད་ཀྱི་སྐུ་མདོག་ནག་མོར་སྟོན་པ་ནི། །དོན་དམ་དབྱིངས་ནས་བསྐྱོད་པ་མེད་པའི་རྟགས། །རལ་པ་ཁམས་ནག་གཡས་ནས་གཡོན་དུ་འཁྱིལ་བ་ནི། །ཡུམ་གྱི་མཁའ་ལ་སྤྲུལ་པ་འགྱེད་པའི་རྟགས། །རལ་པའི་གསེབ་ནས་མེ་སྟག་འཕྲོ་བ་ནི། །ཐུགས་རྗེའི་སྦྲུལ་པ་ཕྱོགས་བཅུར་འགྱེད་པའི་རྟགས། །རལ་པ་སྤྱི་བོར་གཙུག་ཏུ་འཁྱིལ་བ་ནི། །ཐུགས་རྗེས་དགོངས་སྤྱོད་ཅིག་ཏུ་སྤྱོད་པའི་རྟགས། །ཐོད་སྐམ་འཕྲེང་བའི་དབུ་ལ་བརྒྱན་པ་ནི། །ཐུགས་རྗེས་སྤྲུལ་སྐུའི་འགྲོ་དོན་མཛད་པའི་རྟགས། །སྙན་ཆ་གཡས་ནས་སེང་གེ་འགྱིང་བ་ནི། །དམན་མོ་ཐམས་ཅད་ཟིལ་གྱི་གནོན་པའི་རྟགས། །སྙན་ཆ་གཡོན་ནས་སྦྲུལ་ནག་གདེངས་ཀ་འཕྱོ་བ་ནི། །ཞེ་སྡང་མ་སྤང་དབྱིངས་ནས་དག་པའི་རྟགས། །སྙན་ཆ་གསེར་གྱི་དྲིལ་བུ་འཁྲོལ་བ་ནི། །སངས་རྒྱས་ཀུན་ལ་བསྙེན་བསྐུར་མཛད་པའི་རྟགས། །སྤྱན་རྩ་དམར་པོ་ཕྱོགས་བཅུར་གཟིགས་པ་ནི། །རྣལ་འབྱོར་སྲིད་གསུམ་བྱ་ར་མཛད་པའི་རྟགས། །ཤངས་ན་ནད་ཀྱི་རླངས་པ་འཐུལ་བ་ནི། །སྡང་བའི་དགྲ་ལ་ནད་ཡམ་འབེབས་པའི་རྟགས། །ཞལ་གྱི་ཧོམ་ཁུང་དྲག་པོར་གདངས་པ་ནི། །དམ་ཉམས་གང་ཡིན་ཞལ་དུ་གསོལ་བའི་རྟགས། །རྣོ་གདུགས་མཆེ་བ་ཟུར་གསུམ་གཙིགས་པ་ནི། །དམ་ཉམས་དགྲ་བོའི་སྲོག་རྩ་གཅོད་པའི་རྟགས། །ཞིང་ཆེན་གཡང་གཞི་སྐུ་ལ་གསོལ་བ་ནི། །ཆོས་ཉིད་ཡང་དག་དོན་དང་ལྡན༴ གླང་ཆེན་ཀོ་རློན་གོས་སུ་གྱོན་པ་ནི། །ཐེག་པ་དོན་དམ་ཡང་དག་ལྡན་པའི༴ སྣམ་ཕྱེད་རེ་ལྡེ་ནག་པོས་དཀྲིས་པ་ནི། །འཇིག་རྟེན་འདི་ན་ཆེ་བཙན་ལྡན༴ ལྟེ་བའི་ཁུང་ན་ཉི་མ་ཤར་བ་ནི། །སྲིད་པའི་རྒྱ་མཚོ་གཏིང་ནས་སྐེམ་པའི༴ སྤྱི་བོའི་གཙུག་ན་ཟླ་རྒྱས་གསལ་བ་ནི། །དུས་གསུམ་མ་རིག་མུན་པ་དབྱིངས་ནས་གསལ༴ ཕྱག་གཡས་གདུག་པའི་རལ་གྲི་ཕྱར་བ་ནི། །དགྲ་བགེགས་སྐྱེ་ཤི་རྩད་ནས་གཅོད་པའི༴ ཕྱག་གཡོན་བྷན་དྷ་དམར་པོ་བསྣམས་པ་ནི། །འཁོར་བའི་སྡུག་བསྔལ་ཁྲག་ལྟར་གསོལ་བའི༴ མཆན་ནས་ནཻའུ་ལེའུའི་རྐྱལ་པ་ཐོགས་པ་ནི། །བསྒྲུབ་པ་པོ་ལ་དངོས་གྲུབ་སྟེར་བའི་རྟགས། །ཞབས་ལ་དབང་གི་ལྕགས་སྒྲོག་བསྒྲོགས་པ་ནི། །ཐབས་དང་ཤེས་རབ་གཉིས་སུ་མེད་པའི་རྟགས། །ཕྱིར་ཕྱོགས་དྲིལ་གྱི་ཕ་ལ་བཅིབས་པ་ནི། །ལོག་པར་བལྟ་བའི་དགྲ་བགེགས་སྒྲོལ་བའི་རྟགས། །སྲིན་པོའི་ཡན་གལ་སྔ་རུ་བྱས་པ་ནི། །སྲིན་ཡུལ་ལོང་ཀ་པུ་རི་བསྒྲོད་པའི༴ སྲིན་མོའི་མན་གལ་ཕྱི་རུ་བྱས་པ་ནི། །དམན་མོ་ཐམས་ཅད་ཟིལ་གྱིས་གནོན་པའི་རྟགས། །གོང་སྨད་སྦྲུལ་ནག་ཆུན་པོས་བྱས་པ་ནི། །ཞེ་སྡང་གདུག་པ་བཙན་པོ་འདུལ་བའི༴ རུས་སྦལ་ནག་པོ་ཕོག་གུ་བྱས་པ་ནི། །ཀླུ་བདུད་ནག་པོ་དམ་ལ་བཏགས་པའི༴ སྔ་ཤད་གཡས་ནས་བདུད་ཀྱི་ཁྲམ་བམ་བཀལ་བ་ནི། །དམ་ཉམས་དགྲ་བོ་ཁྲམ་ལ་བཏགས་པའི༴ ཕྱི་ཤད་ནད་ཀྱི་རྐྱལ་པ་བཏགས་པ་ནི། །དམ་ཉམས་དགྲ་ལ་ཡམས་ནད་འབེབ་པའི་རྟགས། །དོན་དམ་བཅུད་ཀྱི་རྟགས་སུ་ཞག་གི་ཟོ་རིས་བྱས། །ཐུགས་རྗེ་ཆགས་པའི་རཀྟའི་ཐིག་ལེས་བརྒྱན། །འདུལ་བྱེད་རྟགས་སུ་ཐལ་བའི་མཚན་མ་བྱུགས། །མ་མོ་འབུམ་ཕྲག་འཁོར་གྱི་བསྐོར་བ་ནི། །ཁམས་གསུམ་ཁྱབ་པའི་ཕྲིན་ལས་མཛད་པའི་རྟགས། །བྷྱོ་མ་ཅིག་ཁ་ནས་མེ་འབར་རྒྱ་མཚོ་སྐེམས། །ལག་ན་རྡོ་རྗེ་རི་རབ་འཚོགས་པོར་འཕེན། །ལྷ་མོ་ཁྱོད་ལ་བདག་གི་བཙུན་པར་བསྟོད། །བྷྱོ། དཔལ་ལྡན་ལྷ་མོ་མཐུ་ཆེན་ཁྱོད། །ཆོས་སྐྱོང་རྒྱལ་མོ་མི་བཟད་མ། །གསང་བའི་དབྱིངས་ཕྱུག་རྡོ་རྗེ་མཁའ་འགྲོ་མ། །བསྟན་པ་བསྲུངས་མཛད་ཁྱོད་ལ་ཕྱག་འཚལ་བསྟོད། །ལེགས་སོ། །སྐབས་འདིར་བསྟོད་པ་ཐམས་ཅད་ཀྱི་བསྟོད། བསྐང་ངོ་བསྐལ་པའི་ཐུགས་དམ་བསྐངས། ལྷ་བསྙེན་མཛོད། བླ་མ་དཔལ་འཛིན་ལས་བརྒྱུད་པའོ།། །།
དཔལ་ལྡན་ལྷ་མོ་སྲོག་གི་གཟེར་ཆུང་གི་ཆོ་གའི་ལས་འགྲིགས་ཀྱི་རིམ་པ།
དཔལ་ལྡན་ལྷ་མོ་སྲོག་གི་གཟེར་ཆུང་གི་ཆོ་གའི་ལས་འགྲིགས་ཀྱི་རིམ་པ་བཞུགས་སོ། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དབང་ཐོབ་ཅིང་དམ་ཚིག་དང་ལྡན་པའི་གང་ཟག་གིས། སྔོན་དུ་ཕྱག་ན་རྡོ་རྗེའི་བསྙེན་པ་དང་བསྒྲུབ་པའི་མཚན་མ་མཐར་ཕྱིན་པའི་གང་ཟག་གིས། དཔལ་ལྡན་ལྷ་མོ་སྲོག་གི་གཟེར་ཆུང་བསྒྲུབ་པར་འདོད་པས། འདི་ལ་དོན་རྣམ་པ་གསུམ་སྟེ། རྫས་བསགས་པ། ལྷ་བསྒོམ་པ། བསྙེན་པའི་རིམ་པ་དང་གསུམ་མོ། །དང་པོ་རྫས་བསགས་པ་ལའང་། བསྒྲུབ་པའི་རྫས་དང་བརྟེན་པའི་རྫས་གཉིས། དང་པོ་བསྒྲུབ་པའི་རྫས་ལ། དང་པོ་གནས་དབེན་པར་བཀྲ་ཤིས་པའི་ས་ལ་མཎྜལ་གྲུ་བཞི་པ་གཅིག་བྱས་ལ། དབུས་སུ་གྲུ་གསུམ་གྲུ་གང་པ་ཅིག་བྱ། དེ་ལ་མི་ཁྲག་དང་ཁྱི་ཁྲག་རྟ་ཁྲག་གསུམ་དང་། དུར་ཁྲོད་སོལ་བ་ནག་པོ་བྱས་ལ། དེའི་ཁ་ལ་རྩང་བཅོ་བརྒྱད་མཆོག་ཕུར་གསུམ་དང་ཉི་ཤུ་རྩ་གཅིག་སྦྲེལ་བར་བཀོད། དགྲ་གཅིག་ཡོད་ཀྱང་ལིངྒ་ལྔ་བྱས་ལ། གསུམ་གྲུ་གསུམ་གྱི་ཟུར་གསུམ་དུ་བཞག །གཅིག་གཡག་རུ་རྐུག་པའི་ནང་དུ་བཞུག །གྲུ་གསུམ་གྱི་དབུས་སུ་བཞག །གཅིག་གི་སྙིང་གར་ཚོན་སྐུད་ཀྱི་ཐག་པ་བཏགས་ལ་བརྟེན་གཏོར་གྱི་ཞབས་སུ་བཅུག་གཉིས་ཐུན་རྫས་ནི་མི་བསད་པའི་མཚོན་ཆ་དང་ཡུངས་ཀར། ཡུངས་ནག །གུ་གུལ། མི་ཟི། སྐེ་ཚེ། ཤང་ཚེ། ཐང་ཕྲོམ། འབྲུ་གུ། ལྕགས་ཕྱེ། མཁར་ཕྱེ། དུག་སྣ་མང་པོ་ལས་ཁྲག །དེ་ནས་གྲུ་གསུམ་མཐོ་གང་བ་གཅིག་གི་ནང་དུ། དམ་སྲི་འདྲེ་མོའི་གཟུགས་ལ་འགུག་གཞུགས་བྱས་ལ། ཐུན་མཚམས་སུ་རང་ཉིད་ཡི་དམ་གྱི་སྔགས་ཤམ་བུ་ལ། དངོས་གྲུབ་ལ་བར་དུ་གཅོད་པའི་དམ་སྲི་ལྟེ་ཕུར་ནག་མོ་མ་ར་ཡ་ཕཊ༔ ཅེས་སོགས་པའི་རྟ་ནག་གི་རྙིག་པ་ཛ་བཞི་བྲིས་པའམ། ཡང་ན་ལྕགས་ཕུར་གྱི་བཏོག །གཉིས་པ་བརྟེན་པའི་རྫས་མདའ་བྱ་རྒོད་མ་ལ་དར་སྣ་ཚོགས་དང་སྙིང་སྣ་ཚོགས་དང་། སྟག་རས་དང་ནེའུ་ལེའི་རྐྱལ་པ་དང་། ནལ་མའི་ཤ་ཁྲག་དང་འབྲུ་སྣ་ཚོགས་ཕྱེ་མ་བྱས་ལ་བཏག་གོ། །བུད་མེད་གཞོན་ནུ་མཚན་ལྡན་ཆུར་ཤི་བའི་སྲིན་ལག་ལ། གཡབ་དར་ནག་པོ་བཏགས་ལ་མདུན་དུ་བཙུགས། དེ་ནས་ཤ་ཆེན་ཏྲི་སྙིང་བོང་བུའི་སྙིང་མི་དབང་ཤ་ཁྲག་གི་གཞི་བྱས་པས་གཏོར་མ་ཆེ་བ་གཅིག་བྱས་ལ། ལྷ་མོའི་ཙཀ་ལི་ཡང་བཏག་གོ། །ཁ་དར་ནག་གི་བཀག་ལ། གཟུགས་བྱང་གི་ཟུར་ལ་བཞག་གོ། །བརྟེན་རྫས་བསྐང་རྫས་དམ་རྫས་ཚད་ཀྱི་མཐའ་བསྐོར། འགྱེད་གཏོར་གཅིག་ཀྱང་བྱ། ཡི་དམ་གྱི་གཏོར་མ་སྤྱི་ལ་གཞུང་ལྟར་བྱའོ། །དེ་རྣམས་ནི་རྫས་བསགས་པ་དང་། དམ་བཅའ་བའི་རིམས་པའོ། །དེ་ནས་ལམ་ལ་འཇུག་པའི་ནུབ་མོ་ལིངྒ་རྣམས་བསྡུས་ལ་སྒོ་རྒྱབ་ཏུ་ཁྱེར་ལ། རང་ཉིད་ཡི་དམ་ལྷ་ཡི་ང་རྒྱལ་གྱི་ལིངྒ་ལ་འགུགས་གཞུགས་བྱས་ལ། གུ་གུལ་དང་ཁྱི་ལུད་ཀྱི་བདུག་ཅིང་ལྷ་དབྱེ་བ་དང་བསད་ལས་རྣམས་བྱས་ལ། ནང་དུ་འོང་ལ་ལིངྐ་ཐམས་ཅད་གནས་སུ་བཀོད། གཉིས་པ་དངོས་གཞི་ལ་ལྷ་བསྒོམ་པ་དང་བསྙེན་པའི་རིམ་པའོ། །དང་པོ་ལྷ་བསྒོམ་པ་ནི། དེ་ནས་གཞི་བདག་ལ་གཏོར་མ་གཏང་ལ། བཀའ་བསྒོ་བྱས་ལ་མཐུ་དཔུང་བཅོལ། བགེགས་ལ་ལན་ཆགས་གཏོར་མ་སྦྱིན་ལ་ལན་ཆགས་བྱང་བར་བསམ། དེ་ནས་ཡི་དམ་གཞུང་ལྟར་བྱས་ལ། གཏོར་མ་བསྔོ་བ་དང་། བསྟོད་པ་བསྐུལ་བ་རྣམས་བྱའོ། །དེ་ནས་ཕྱག་ན་རྡོ་རྗེ་བསྒོམ་ལ་བསྙེན་པ་ཅི་མང་བྱ། གཟུངས་རིང་ཁྱུང་སྔགས་རྣམས་བཟླས་ལ་གཏོར་མ་བསྔོའོ། །དེ་ནས་ལྷ་མོ་བསྒོམ་སྙོམས་སུ་བསྐྱེད། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པའི་ཆེད་དུ་ཚད་མེད་བཞི་བསྒོམ་ལ། ༀ་སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་མདུན་དུ་ཡི་གེ་བྷྲཱུཾཿསྨུག་ནག་ཡོངས་སུ་གྱུར་པ་ལས། ཐོད་པ་སྐོམ་རློན་ལས་གྲུབ་པའི་གཞལ་ཡས་ཁང་གྲུ་བཞི་པ་སྒོ་བཞི་པ། ཞིང་ཆེན་གྱི་ཀ་གདུང་ཞིང་ཆུང་གི་དྲལ་དྲབས། ཤ་ཆེན་གྱི་ནག་ལེབ། ཚིལ་ཆེན་གྱི་འཕན་གདུག །ཙིཏྟའི་ཕོ་ལོང་། རྒྱུ་མའི་ལྡ་ལྡི། ཉི་ཟླའི་སྐར་ཁུང་བྱས་པ། དེའི་སྟེང་ན་ཞིང་གི་རྒྱལ་མཚན་བཙུགས་པ། ཏོག་ལ་ཞིང་གི་གདུག་འཁོར་བ། ཡངས་ཤིང་རྒྱ་ཆེ་བའི་གུར་ཁང་། དེའི་ཕྱི་རོལ་དུ་བསྐལ་པའི་རླུང་ནག་འཚུབ་མའི་དགུ་ཀློང་རླུང་གི་གུར་ཁང་། དེའི་ནང་དུ་མེ་རི་དམར་ནག་འཚུབ་མའི་གུར་ཁང་། དེའི་དབུས་སུ་མི་རོ་རྟ་རོ་བསྣོལ་ཞིང་འཕྱོ་བ། མི་ཁྲག་དང་རྟ་ཁྲག་གི་རྒྱ་མཚོ་འཁྱིལ་པ། དེའི་ནང་དུ་གྷར་ཌ་པ་ཧཱུྃ་དེ་ཡོངས་སུ་གྱུར་པ་ལས། སྲིད་པའི་བོང་བུ་དམར་ཀ་རླུང་གིས་གཤོག་པ་ཅན། ཐོད་སྐམ་འབར་བའི་སྒ་བསྟད་པ། སྲིན་པོའི་ཡ་འགལ་ལས་སྔ་རུ་བྱས་པ། སྲིན་མོའི་འགལ་ལས་ཕྱི་རུ་བྱས་པ། མིག་མཇུག་མ་ན་ཡོད་པ། རྣ་བ་གནམ་ལ་སླེབས་པ། སྤུ་རྩ་ན་ཁྲག་འཛག་པ། སྲིན་པོའི་ལྤགས་པ་ལས་སྒ་གཡོག་བྱས་པ། གོང་ཐག་དང་གློ་སྙེད་སྦྲུལ་ལ་བྱས་པ། རུས་སྦལ་ནག་པོའི་ཕོ་ཀུ་བཏབ་པ། སྔ་ཤད་གཡས་ནས་བདུད་ཀྱི་ཁྲམ་བམ། གཡོན་ནས་ཚོན་གྱི་གྲུ་གུ། ཕྱི་ཤད་གཡས་ན་བྱང་དམར་བམ་པོ། གཡོན་ནས་ནད་ཀྱི་རྐྱལ་པ། མི་མགོའི་ཐོད་དམ་བྱས་པ། སྙེད་སྨེད་ལ་མི་ལག་འཕྱང་བ། བ་སུ་ཏའི་ཞགས་པའི་མཐུར་ཆིངས་སུ་བྱས་པ། ནམ་མཁའ་ལས་མཆེད་པ་ལྟ་བུ་གཅིག་བསྐྱེད། དེའི་སྒ་གོང་དུ་ཞིང་ཆེན་བསྣོལ་བའི་སྟེང་དུ་བཾ་ལས་པདྨ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་བྷྱོཿནག་མོ་གཅིག་བསམ། རང་གི་ཐུགས་ཀའི་ཧཱུྃ་ལས་བྷྱོ་ཕར་འཕྲོས་གདན་ཐོག་གི་བྷྱོ་ལ་ཐིམ་པར་བསམ། བྷྱོ་ལས་འོད་ཟེར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད་ཚུར་འདུས་བྷྱོ་ལ་ཐིམ། རལ་གྲི་བྷྱོ་ཡི་མཚན་པ་གཅིག་ཏུ་གྱུར། བྷྱོ་དེ་ཡོངས་སུ་གྱུར་པ་ལས་དཔལ་ལྡན་ལྷ་མོ་སྐུ་མདོག་མཐིང་ནག་རྔམ་པ། ཞལ་གཅིག་ཕྱག་གཉིས་པ་སྤྱན་གསུམ་དམར་ལ་ཟླུམ་པ། རལ་པ་ཁམ་ནག་ལས་མེ་སྟག་དམར་ཙིག་ཙིག་འཕྲོ་བ། ཕྱག་གཡས་རལ་གྲི་སྡིག་པ་ཅན་ནམ་མཁར་ཕྱར་བ། གཡོན་པས་ཐོད་པ་ལྕང་ལོ་ཅན་ཁྲག་གིས་བཀང་བ་ཐུགས་ཀར་འཛིན་པ། མཆན་ན་ནེའུ་ལེའི་རྐྱལ་པའི་ཁ་ནས་རིན་པོ་ཆེ་འཕུར་བའི་ཚུལ་དུ་འཕྱང་བ། རལ་པ་དམར་སེར་གྱེན་དུ་བརྫེས་པའི་སྐྲ་མཚམས་ནས་ཐོད་པ་སྐམ་པོ་ལྔ་ཡི་དབུ་ལ་བརྒྱན་པའི་སྟེང་དུ། རིན་པོ་ཆེའི་རྩེ་བྲན་ལྔའི་བརྒྱན་པ། སྤྱི་བོ་ནས་ཟླ་བ་ཤར་བ། ལྟེ་བ་ནས་ཉི་མ་ཤར་བ། སྤྱི་གཙུག་ན་རྨ་བྱའི་རྒྱལ་མཚན་བཙུགས་པ། རྣ་བ་གཡས་པའི་གསེར་གྱི་འཁོར་ལོ་རྩིབས་བརྒྱད་པའི་ཐོག་ཏུ་སེང་གེ་འགྱིང་བ། གཡོན་ན་སྦྲུལ་ནག་གི་གདེང་ག་འཕྱོ་བ། སྙན་ཆ་གཉིས་ན་གསེར་གྱི་དྲིལ་བུ་འཁྲོལ་བ། ཞིང་ཆེན་གྱི་གཡང་གཞི་དང་། གླང་པོ་ཆེའི་ཀོ་བ་རློན་པའི་སྟོད་གཡོགས་ཤིང་། སྟག་ལྤགས་ཀྱིས་ཤམ་ཐབས་དང་མི་རྩིས་ཀྱི་རེ་ལྡེས་སྐུ་སྨད་དཀྲིས་པ། ཐོད་རློན་ལྔ་བཅུའི་དོ་ཤལ་བྱས་པ། རུས་པ་དང་རིན་པོ་ཆེའི་རྒྱན་གྱིས་སྐུ་དང་ཡན་ལག་ཐམས་ཅད་བརྒྱན་པ། དེའི་ཐུགས་ཀར་ཉི་མའི་སྟེང་དུ་བྷྱོ་ནག་མོ་གཅིག་འཁོར་བ། དེའི་མཐར་སྔགས་ཀྱི་གཡོན་བསྐོར་དུ་འཁོར་བའོ། །བྷྱོ་དེ་ལས་ནག་མོ་འབུམ་སྤྲོས་པའི་འཁོར་བདུད་མོ་འབུམ་སྡེ་སྐུ་མདོག་ནག་མོ་རལ་པ་ཐུར་དུ་ཕྱལ་བ། གཡས་གྲི་གུག་དང་གཡོན་ཐོད་ཁྲག་ཐོགས་པ། མཆན་ན་ནད་ཀྱི་རྐྱལ་བ་སྔོ་དམར་འཆང་བ། ཞིང་ཆེན་གྱི་གཡང་གཞི་སྐུ་ལ་མནབ་པ། འཇིགས་འཇིགས་རྔམ་རྔམ་མཁའ་འགྲོའི་ཚོགས་ཀྱིས་བསྐོར་བའི་གཙོ་འཁོར་ཐམས་ཅད་ཀྱི་སྤྱི་བོར་འཁོར་ལོ་དཀར་པོ་རྩིབས་བཞི་པའི་སྟེང་དུ་ༀ་དཀར་པོ། མགྲིན་པར་པདྨ་དམར་པོ་འདབས་མ་བཞི་པའི་ལྟེ་བར་ཨཱཿདམར་པོ། ཐུགས་ཀར་ཉི་མའི་སྟེང་དུ་རྡོ་རྗེ་སྔོན་པོ་རྩ་ལྔ་པའི་ལྟེ་བར་ཧཱུྃ་སྔོན་པོས་མཚན་པར་གྱུར། ༀ་ཤྲཱི་དཱེ་ཝི་མ་ཧཱ་ཀཱ་ལི་རེ་མ་ཏི་བཛྲ་ཌཱ་ཀི་ནེ་ཕེཾ། བདག་ཉིད་ཀྱི་ཐུགས་ཀའི་ཧཱུྃ་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས། དེ་ནས་ཡེ་ཤེས་པ་སྤྱན་དྲངས་བ་ནི། སྲིན་ལག་གཡབ་དར་ཐོགས་ལ་ཚིལ་ཆེན་དང་སྤོས་དུད་ཀྱི་གསུར་བཏང་། རྐང་གླིང་འབུད། བྷནྡྷ་སྟག་སྤྲོད་ཀྱི་རྔ་བརྡུངས་ལ། འབར་བའི་ཕྱག་རྒྱས་དཔྲལ་བའི་དབྱིངས་སུ་བསྐོར་ལ། ངག་ཏུ་ཕེཾ་ཞེས་བརྗོད་ལ། བདག་ཉིད་ཀྱི་ཐུགས་ཀའི་ཧཱུྃ་ལས་འོད་ཟེར་འཕྲོས་པའི་མདུན་གྱི་ལྷ་མོའི་ཐུགས་ཀར་ཕོག །དེའི་ཐུགས་ཀར་ནས་འོད་ཟེར་འཕྲོས་པས་བྱང་ཤར་གྱི་མཚམས་ཕྱོགས་བཅུར་འཕྲོས་པའི་ལྷ་མོ་ཡེ་ཤེས་པའི་ཐུགས་ཀར་ཕོག་པས་སྔོན་གྱི་ཐུགས་དམ་རྗེས་སུ་དྲན་ནས། ལྷ་མོ་འཁོར་བཅས་བདུད་མོ་འབུམ་གཞལ་ཡས་ཁང་དང་བཅས་པ་མདུན་དུ་བྱོན་པར་བསམ་ལ། སྤྱན་འདྲེན་པ་ནི། བྷྱོ། རླུང་ནག་དགུ་རླུང་འཚུབས་མ་འཁྱིལ་བའི་དབུས། །རིན་ཆེན་ཕོ་བྲང་ཐོད་པའི་སྐུ་མཁར་དབུས། །ཉི་ཟླའི་གདན་བཤམས་མཛེས་པའི་རོལ་མོས་བརྒྱན། །དུང་སྒོ་དཀར་མོར་ཤེལ་གྱི་སྐས་བཙུགས་ཏེ། །རྫུ་འཕྲུལ་གྲུབ་པའི་གནས་འདིར་སྤྱན་འདྲེན་ནོ། །དབང་ཕྱུག་གཙོ་མོ་ལྷ་མོ་ནག་མོའི་སྐུ། །བསྟན་པ་བསྲུང་བའི་བདུད་མོ་རེ་མ་ཏི། །མཐིང་ནག་གཅེར་བུ་ཁྲག་གི་རལ་པ་ཅན། །ནག་མོ་ཟ་བྱེད་རྔམ་པའི་མཆེ་བ་ཅན། །དབུ་སྐྲ་མཐོན་མཐིང་ལྕང་ལོར་ནམ་མཁར་འཁྱིལ། །གསེར་དང་མུ་ཏིག་གཡུ་ཡི་ལན་ཕྲན་ཅན། །དབུ་རྒྱན་མགུལ་ཆུར་ཐོད་པའི་ཕྲེང་བས་བརྒྱན། །ཆགས་པའི་སྤྱན་རྩ་དམར་པོ་གློག་ལྟར་འགྱུ། །སྒེགས་པའི་ཆ་ལུགས་རྣ་བ་སེང་གེས་བརྒྱན། །དོ་ཤལ་ཕྱག་གདུབ་དཔུང་རྒྱན་སྦྲུལ་གྱིས་བརྒྱན། །དྲག་པོའི་སྟོབས་ལྡན་ཁྲག་གི་མཆིལ་རིས་ཅན། །འཇིག་རྟེན་གསལ་བའི་ཉི་ཟླའི་སྒྲོན་མེས་བརྒྱན། །དུར་ཁྲོད་དབང་མཛད་ཞིང་ལྤགས་རེ་ལྡེ་གསོལ། །ཕྱག་མཚན་རལ་གྲིས་དུག་གསུམ་རྩད་ནས་གཅོད། །བྷནྡྷ་དམར་པོས་བདུད་ཀྱི་དམག་དཔུང་སྒྲོལ། །ཁྲམ་བམ་ནག་པོས་སྐྱེ་འགྲོ་རྩིས་ལ་འདེབས། །ནད་ཀྱི་རྐྱལ་པས་བསྟན་པ་གཉེན་པོ་བསྲུང་། །མི་འབྲལ་གཟུགས་མཛེས་ལྕགས་སྒྲོག་མཛེས་པས་བརྒྱན། །མྱུར་མགྱོགས་མཐུ་ལྡན་བདུད་མོ་དྲིལ་ཞོན་མ། །བདག་གིས་བསྒྲུབ་པའི་གནས་འདིར་སྤྱན་འདྲེན་ནོ། །སྤྲུལ་པའི་ཕྱག་བརྙན་ཀླུ་མོ་ཆུ་སྲིན་གདོང་། །བཀའ་ཡི་བློན་མོ་བ་ལམ་དྲིལ་སྣ་མ། །ལས་ཀྱི་ཕ་ཉ་ཁྲི་སྨན་ས་ལེ་མ། །སླད་ཀྱི་རྗེས་འབྲང་སེང་གེའི་གདོང་པ་ཅན། །འཁོར་བཅས་སྤྱན་འདྲེན་གནས་འདིར་གཤེགས་སུ་གསོལ། །ༀ་མ་ཧཱ་ཀ་ལི་རེ་མ་ཏི། ཨེ་ཧྱ་ཧི་ཨ་ཀར་ཥ་ཡ་ཛ་ཛཿ ཛ་ཧཱུྃ་བྃ་ཧོ། ཞེས་སྤྱན་དྲང་ངོ་། །བྷྱོ། མ་ཡི་ནང་ན་མ་གཅིག་མ། །སྲིང་གི་ནང་ན་སྲིང་གཅིག་མ། །དཔལ་ལྡན་གཉེན་གྱི་རྡོ་རྗེ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ། །འདོད་པའི་ཁམས་ཀྱི་དབང་ཕྱུག་མ། །ལྷའི་གནས་ན་ལྷ་མོ་ནམ་གྲུ་མ། །ཀླུའི་གནས་ན་ཀླུ་མོ་གློག་འགྱུ་མ། །སྲིན་གྱི་གནས་ནས་སྲིན་མོ་ཤམ་ཤམ་མ། །མིའི་གནས་ནས་བདུད་མོ་རེ་མ་ཏི། །མིའི་བདུད་ལས་ཁྱོད་པས་ཆེ་བ་མེད། །གནས་ནི་བྱང་ཤར་མཚམས་ན་གནས། །རྒྱུ་ནི་བར་སྣང་ཁམས་ན་རྒྱུ། །སྐྱེ་འགྲོ་ཡོངས་ཀྱི་དབུགས་འཕྲོག་མ། །རྐང་གདུབ་ལྕགས་ཀྱི་ལྷྭམ་གྱོན་མ། །སྐུ་ལ་མཛེས་པའི་རེ་ལྡེ་གསོལ། །མི་མགོ་རྟ་མགོ་མཁར་དུ་བརྩིགས། །ཐོད་པ་དགུ་བརྩེགས་གཞལ་ཡས་ནས། །མ་ཅིག་ལྷ་མོ་སྤྱན་འདྲེན་ནོ། །དོ་ནུབ་ནམ་གྱི་དགུང་ཐུན་ལ། །མིང་པོ་རྡོ་རྗེས་ལས་བཅོལ་ནས། །སྲིང་མོ་དམ་ཅན་ལས་མཛོད་ཅིག །བརྣག་པའི་ཕྲིན་ལས་འགྲུབ་པར་མཛོད། །མ་བོས་པའི་ཚེ་ན་སྙན་མ་སྲ། །གཡབ་པའི་ཚེ་ན་སྤྱན་མ་རྟུལ། །བསྒྲུབ་པའི་ཚེ་ན་རྒྱང་མ་རིང་། །མངག་པའི་ཚེ་ན་བང་མ་བུལ། །རྦད་པའི་ཚེ་ན་མཐུ་མ་ཆུང་། །དམ་རྫས་བརྒྱན་གྱི་གཏོར་མ་འདི་བཞེས་ལ། །བདག་གིས་བཅོལ་པའི་ཕྲིན་ལས་འགྲུབ་པར་མཛོད། །ཅེས་མན་ངག་ལ། སྲིན་ལག་གཡབ་དར་གང་རུང་ལ། བྷྲཱུྃ་ཧཱུྃ་བྷྱོ་ཛཿ མི་དབང་ཏྲི་ཁྲག་གིས་བྲིས་ལ་མདུན་དུ་ལྷ་མོ་དམ་ཚིག་པ་བསྐྱེད། རང་ཉིད་ཡི་དམ་གྱི་མདུན་གྱི་གཡབ་དར་ཡི་གེ་དང་བཅས་པའི་འོད་ཟེར་ཛ་ཡི་རྣམ་པ་ཅན་འཕྲོས་པས། བྱང་ཤར་མཚམས་ནས་ལྷ་མོ་བཞུགས་པས་ཐུགས་ཀའི་བྷྱོ་ལ་ཛའི་འཁྱུད་པའི་དུས་སྔོན་གྱི་ཐུགས་དམ་དྲན་ནས་རང་དབང་མེད་པར་གཡབ་དར་གཡབ་པ་ཙམ་གྱིས་བྱོན་པར་བསམས་ལ། མདུན་གྱི་དམ་ཚིག་པ་དང་གཉིས་སུ་མེད་པར་བསམས་ལ། བྷྱོ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་དཔལ་ལྡན་མ། །བདུད་མོ་དཔལ་ལྡན་རེ་མ་ཏི། །བདག་གིས་གདུངས་ཏེ་བོས་པའི་ཚེ། །ཉི་མ་བྱང་ཤར་ཕ་གི་ནས། །ཡོངས་འདུས་ཤིང་གི་རྩ་བ་ནས། །མཚོ་མུ་ལེ་མཐིང་གི་ནང་ཤེད་ནས། །མཐིང་ཤོག་སྔོན་པོའི་གུར་ནང་ནས། །ཐོད་པ་ལེ་བརྩིགས་གཞལ་ཡས་ནས། །བསེ་ཡི་སྐུ་མཁར་གྲུབ་བཞིའི་ནང་། །རིན་ཆེན་སྣ་བདུན་ཕོ་བྲང་ནས། །མི་རོ་རྟ་རོ་གཅལ་དུ་བཀྲམ། །མི་ཁྲག་རྟ་ཁྲག་འདམ་རྫབས་སྟངས། །དེ་ན་མ་གཅིག་ལྷ་མོ་བཞུགས། །ལྷ་མོ་ནག་མོ་རེ་མ་ཏི། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །འདོད་པ་ཁམས་ཀྱི་དབང་ཕྱུག་མ། །ཆིབས་སུ་བོང་བུ་དམར་གྭ་བཅིབས། །ཁལ་དུ་ལྕགས་ཀྱི་དྲ་བ་མིག་དགུ་འགེལ། །མཆན་ནས་ནད་ཀྱི་རྐྱལ་པ་ཐོང་། །གཡས་ན་རལ་གྲི་སྡིག་པ་ཅན། །གཡོན་ན་གདུག་པའི་ཐོད་ཁྲག་ཐོགས། །སྟོང་གསུམ་ཀུན་གྱི་བྷྱོ་ལུགས་མཁན། །བདུད་མོ་དཔལ་ལྡན་རེ་མ་ཏི། །དམ་ཚིག་དབང་གིས་སྤྱན་འདྲེན་ནོ། །དམ་ལ་མ་འདའ་ད་ཚུར་བྱོན། །མ་ཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་དང་བཅས། །རྣལ་འབྱོར་བདག་གིས་གདུང་ཏེ་བོས་པའི་ཚེ། །མཆིལ་མ་ཐུལ་ཐུལ་མ་ཐོགས་མྱུར་དུ་བྱོན། །མ་ཅིག་ལྷ་མོ་ནག་མོ་ཁྱེད། །སྔོན་ཚེ་ཕྱག་ན་རྡོ་རྗེ་ལ། །རང་རྟགས་སྲོག་གི་སྙིང་པོ་ཕུལ། །བོས་ན་འོང་བར་ཁས་བླངས་ཤིང་། །ཁས་བླངས་དམ་ལ་མ་འདའ་བར། །རྣལ་འབྱོར་བདག་གིས་ཁྱོད་བསྐུལ་ན། །དམ་ཚིག་དབང་གིས་ད་ཚུར་བྱོན། །ཐུགས་དམ་དབང་གིས་གཤེགས་སུ་གསོལ། །མ་ཅིག་ལྷ་མོ་འཁོར་ཚོགས་རྣམས། །ན་ཆུང་མཚན་ལྡན་ཆུར་ཤི་བའི། །སྲིན་ལག་གཡབ་མོས་སྤྱན་འདྲེན་ནོ། །མི་དབང་སྨིན་པའི་ཤ་ཁྲག་དང་། །དམ་རྫས་འདི་ལ་མྱུར་དུ་བྱོན། །ༀ་ཨེ་ཨ་ར་ལི་རེ་མ་ཏི་ས་མ་ཡ་ཛ་ཛཿ ཛ་ཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། དེ་ནས་གདན་འབུལ་བ་ནི། བྷྱོཿ མ་ཅིག་དཔལ་ལྡན་རེ་མ་ཏི། །ཕྱག་བརྙན་བདུད་མོ་འབུམ་ཕྲག་རྣམས། །མི་རོ་གཤིབས་པའི་གདན་མཆོག་དང་། །སྲིན་པོའི་བོང་བུའི་གདན་ལ་བཞུགས། །ༀ་མ་ཧཱ་ཀ་ལི་རེ་མ་ཏི་ས་མ་ཡ་ཏིཥྛ་ལྷན། དེ་ནས་ཕྱག་འཚལ་བ་ནི། བྷྱོ། མ་ཅིག་དཔལ་ལྡན་རེ་མ་ཏི། །ནག་མོ་ཆེན་མོ་རྣལ་འབྱོར་མ། །ཕོ་ཉ་བདུད་མོ་འབུམ་ཚོགས་ལ། །བདག་ཅག་དད་པས་ཕྱག་འཚལ་ལོ། །ༀ་མ་ཧཱ་ཀ་ལི་རེ་མ་ཏི་ཨ་ཏི་པུ་ཧོ་པྲ་ཏི་ཛ་ཧོ། དེ་ནས་དམ་བསྲེ་བ་ནི། བྷྱོ། རྡོ་རྗེ་དྲི་ཆུ་བདུད་རྩིའི་མཆོག །པཉྩ་ཨ་མྲྀ་ཏ་དང་སྦྱར། །དམ་ཚིག་སྙིང་ཁྲག་ཆེན་མོ་འདི། །བསྲེས་པའི་མཆོག་སྟེ་སྲོག་གིས་སྙིང་། །མ་གཅིག་བདུད་མོ་འཁོར་ཚོགས་རྣམས། །ཁྱོད་དང་བདག་ཉིད་དམ་བསྲེའོ། །རྟག་ཏུ་དམ་ལ་མ་འདའ་ཞིག །དམ་ལ་འདའ་བས་བསྲེག་པར་བྱེད། །མ་ཧཱ་ཀུ་ཀུ་ས་མ་ཡ་མ་ཧཱ་པཉྩ་ཨ་མྲྀ་ཏ་ས་མ་ཡ་ཧཱུྃ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས། དབང་གི་ལྷ་རྣམས་སྤྱན་དྲངས། ཁྱེད་རྣམས་ཀྱི་འདི་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པའི་དེ་རྣམས་ཀྱི་ཡེ་ཤེས་ཀྱི་བདུད་རྩིའི་བཀང་བའི་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར་ལུས་གང་དྲི་མ་དག་ཆུ་ཡི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། རྡོ་རྗེ་འཇིགས་བྱེད་ཡུམ་དང་བཅས་པས་དབུ་བརྒྱན་པར་གྱུར། ཕྱག་ན་རྡོ་རྗེ་ཡིན་པར་བསམ། དེ་ནས་མཆོད་པ་འབུལ་བ་ནི། བྷྱོ། བདུད་མོ་བྱེ་བ་འབུམ་གྱི་གཙོ་མོ་ནི། །དཔལ་ལྡན་གཉེན་གྱི་རྡོ་རྗེ་རེ་མ་ཏི། །ཁྱོད་ལ་དཔྱིད་གསུམ་མཆོད་པ་དམ་པ་འབུལ་བ་ནི། །སྤོས་སྦྱོར་ས་ཡི་བདུད་རྩི་རྣམ་ལྔ་དང་། །ཏྲི་རྒོད་སྙིང་དང་རཀྟ་ག་བུར་དང་། །འཚུབས་ནག་རླུང་གི་བསྡུས་པའི་རྫས་མཆོག་འདི། །མ་དཔྱིད་ཀྱི་རྒྱལ་མོའི་ཐུགས་དམ་བསྐང་བར་མཛོད། བྷྱོ། དཔལ་ལྡན་གཉེན་གྱི་རྡོ་རྗེ་རེ་མ་ཏི། །མ་ཁྱོད་ལ་དབྱར་གསུམ་མཆོད་པ་དམ་པ་འབུལ་བ་ནི། །སྤོས་སྦྱོར་པ་ཡི་བདུད་རྩི་རྣམ་པ་ལྔ། །མེ་ཏོག་ཆུ་སྐྱེས་ཐང་སྐྱེས་རྣམ་པར་སྦྱར། །བྱུང་འཛག་ཁྲག་དང་འཆི་ཀའི་མཚལ་ཐིག་དང་། །གསོན་ཁྲག་སྤོས་དང་སྦྱར་བའི་བདུད་རྩི་འདིས། །མ་དབྱར་གྱི་རྒྱལ་མོའི་ཐུགས་དམ་བསྐང་བར་མཛོད། བྷྱོ། དཔལ་ལྡན་གཉེན་གྱི་རྡོ་རྗེ་རེ་མ་ཏི། །མ་ཁྱོད་ལ་སྟོན་གསུམ་མཆོད་པ་དམ་པ་འབུལ་བ་ནི། །འབྲས་དང་གྲོ་དང་མོན་སྲན་དང་། །ཤིང་ཏོག་སྣ་ཚོགས་སྦྱར་བའི་བདུད་རྩི་དང་། །གོ་རོ་ཙ་ཎའི་བརྫེས་པའི་རྫས་མཆོག་འདིས། །མ་སྟོན་གྱི་རྒྱལ་མོའི་ཐུགས་དམ་བསྐང་བར་མཛོད། བྷྱོ། དཔལ་ལྡན་གཉེན་གྱི་རྡོ་རྗེ་རེ་མ་ཏི། །མ་ཁྱོད་ལ་དགུན་གསུམ་མཆོད་པ་དམ་པ་འབུལ་བ་ནི། །བསད་པའི་ཤ་དང་མྱོས་པའི་ཆང་། །བསྲེགས་པའི་གསུར་དང་རློན་པའི་ཤ། །གློ་སྙིང་ནང་རོལ་མཁར་མར་བཅས། །འབྲས་བུ་མི་དབང་སྨིན་པའི་ཤ །ཚིལ་ཆེན་དྲི་དང་བདུག་སྤོས་རྣམས། །མ་དགུན་གྱི་རྒྱལ་མོའི་ཐུགས་དམ་བསྐང་བར་མཛོད། བྷྱོ། མ་ཅིག་བདུད་མོ་རེ་མ་ཏི། །ཕྱག་བརྙན་བདུད་མོ་འབུམ་སྡེ་ལ། །བུའི་མཆོད་པ་འབུལ་བ་ནི། །རྒྱ་མཚོ་འབབ་ཆུ་ཆུ་མིག་རྫིངས། །དམར་ཆེན་ཁྲག་གི་ཨརྒྷཾ་འདི། །མ་ཡི་སྐུ་ལ་ཐིམ་གྱུར་ཅིག །ༀ་མ་ཧཱ་ཀ་ལི་རེ་མ་ཏི་ས་པ་རི་ཝ་ར་ཨརྒྷཾ་པྲ་ཏིཙྪི་ཧཱུྃ་སྭཱ་ཧཱ། ཆུ་སྐྱེས་ཐང་སྐྱེས་མེ་ཏོག་དང་། །དབང་པོ་ལྔ་ཡི་མེ་ཏོག་འདི། །མ་ཡི་དབུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ཅེས་པ། པུཥྤེ༴ ག་བུར་གླ་རྩི་གུ་གུལ་དང་། །ཤ་ཆེན་སྤོས་ཀྱི་དུད་པ་འདི། །མ་ཡི་ཤང་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །དྷུཔྤེ༴ ཉི་ཟླ་གློག་དང་གསལ་བའི་སྒྲོན། །ཞུན་ཆེན་མདངས་ཀྱི་མར་མེ་འདི། །མ་ཡི་སྤྱན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ཨ་ལོ་ཀེ༴ ཁྲག་ཆེན་དུག་དང་སྦྱར་བ་ཡིས། །རཀྟ་དྲི་ཆབ་དམར་པོ་འདི། །མ་ཡི་ཐུགས་ཀར་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །གྷནྡེ༴ ཕྱེ་མ་ལྔ་ཡི་བཤོས་བུ་དང་། །ནལ་ཤ་ཡོན་ཏན་ལྔ་ལྡན་འདི། །མ་ཡི་ལྗགས་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ནེ་ཝི་ཏྱ༴ པི་ཝཾ་གླིང་བུ་མཁར་བའི་རྔ། །བྷནྡྷ་ཆ་ལང་རྐང་གི་དུང་། །མ་ཡི་སྙན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ༀ་མ་ཧཱ་ཀ་ལི་རེ་མ་ཏི་ས་པ་རི་ཝ་ར་ཤབྡ་པྲ་ཏིཙྪ་ཧཱུྃ་སྭཱ་ཧཱ། དེ་རྣམས་ཕྱི་ཡི་མཆོད་པའོ། །དེ་ནས་ནང་མཆོད་འབུལ་བ་ནི། ༀ་བཛྲ་མ་ཧཱ་ཀ་ལི་རེ་མ་ཏི་ཧཱུྃ། ༀ་ཨཱཿཧཱུྃ། ཞེས་ནང་མཆོད་འབུལ་ལོ། །དེ་ནས་གཏོར་མ་བྱིན་གྱིས་རླབས་ཏེ་འབུལ་བ་ནི། ཧཱུྃ། རྨད་དུ་བྱུང་བའི་གཏོར་མ་དང་། །བུམ་དང་རིལ་དང་ཕྱེད་ཚལ་དང་། །ནང་རོལ་གློ་སྙིང་མཁལ་མར་བཅས། །ཤ་དང་རུས་པ་རྐང་ཚིལ་རྣམས། །མ་བདུད་འཁོར་དང་བཅས་ལ་འབུལ། །བསྟན་པ་བསྲུང་ཕྱིར་བཞེས་སུ་གསོལ། །དགྲ་བོ་མ་ཧཱ་མང་ས་ལ་ཁ་ཁ་ཁཱ་ཧཱི་ཁཱ་ཧི། རཀྟ་ལ་ཁ་ཁ་ཁཱ་ཧི་ཁཱ་ཧི། ཙིཏྟ་ལ་ཁ་ཁ་ཁཱ་ཧི་ཁཱ་ཧི། བ་སུ་ཏ་ལ་ཁ་ཁ་ཁཱ་ཧི་ཁཱ་ཧི། ཀོ་རོ་ཙ་ན་ལ་ཁ་ཁ་ཁཱ་ཧི་ཁཱ་ཧི། ཀིང་ནི་རི་ཏི་ལ་ཁ་ཁ་ཁཱ་ཧི་ཁཱ་ཧི། སྐྱེ་མཆེད་བཅུ་གཉིས་ལ་ཁ་ཁ་ཁཱ་ཧི་ཁཱ་ཧི། སྲོག་དང་དབུགས་ལ་ཁ་ཁ་ཁཱ་ཧི་ཁཱ་ཧི། དེ་ནས་གཏོར་མ་འབུལ། བྷྱོ། མ་ཅིག་བདུད་མོ་འཁོར་ཚོགས་རྣམས། །དམ་ཚིག་དབང་གི་སྙིང་ཁྲག་དམར་ལ་རོལ། །མ་ཅིག་ཁྲག་འཐུང་དཔག་ཚད་བརྒྱད་ཁྲིར་རྒྱུག །དམ་རྫས་རྨད་དུ་བྱུང་བའི་དམར་ཆེན་ཁྲག་ལ་རོལ། །མ་ཧཱ་རཀྟ་ལ་ཁ་ཁ་ཁཱ་ཧི་ཁཱ་ཧི། ཞེས་རཀྟ་འབུལ། བྷྱོ། སངས་རྒྱས་བསྟན་པ་བསྲུང་བའི་ཕྱིར། །མ་ཅིག་བདུད་མོ་འཁོར་ཚོགས་རྣམས། །ཐུགས་དམ་དབྱིངས་ཉིད་བསྐངས་བའི་ཕྱིར། །བདུད་རྩི་སྨན་གྱི་མཆོད་པ་འདི་བཞེས་ཤིག །མ་ཧཱ་པཉྩ་ཨ་མྲྀ་ཏ་ལ་ཁ་ཁ་ཁཱ་ཧི་ཁཱ་ཧི། བདུད་རྩི་འབུལ་ལོ། །བྷྱོ། མ་ཅིག་ཆེན་མོ་འཁོར་བཅས་ལ། །ཡང་གཅིག་མཆོད་པ་འབུལ་བ་ནི། །མི་དབང་འབྲས་བུའི་ཤ་ཕྱེད་དང་། །འཆི་ཀའི་མཚལ་ཏིག་དམར་པོ་དང་། །ཤིང་ལོ་རླུང་ཁྱེར་ས་ལ་མ་རེག་དང་། །འབྲས་བུ་སྨིན་པའི་ཤིང་ཏོག་དང་། །ན་ཆུང་མ་ཡི་བྱུང་ཟད་ཁྲག །དམ་ཉམས་བྱང་སེམས་དཀར་དམར་དང་། །དྲི་རྒོད་སྙིང་དང་དབང་པོ་ལྔ། །བོང་བུའི་སྙིང་དང་ཁྲིམས་འཆལ་ཤ །རྣམ་ལྔ་བདུད་རྩིས་མཆོད་པ་འདིས། །མ་ཅིག་འཁོར་དང་བཅས་ལ་འབུལ། །བསྟན་པ་བསྲུང་ཕྱིར་བཞེས་སུ་གསོལ། །བསྟེན་པའི་དམ་རྫས་ལ་ཁ་ཁ་ཁཱ་ཧི་ཁཱ་ཧི། བསྟེན་པའི་དམ་རྫས་ཀྱིས་མཆོད་པ་འབུལ། བྷྱོ། མ་ཅིག་ཆེན་མོ་འཁོར་བཅས་རྣམས། །དངོས་གྲུབ་སྩོལ་བའི་དུས་ལ་བབ། །མ་ཡི་བུ་ལ་དངོས་གྲུབ་སྩོལ། །ཡེ་ཤེས་གསང་བའི་དངོས་གྲུབ་སྩལ་དུ་གསོལ། །འདོད་ཁམས་འདུལ་བའི་དངོས་གྲུབ་སྩལ་དུ་གསོལ། །འཇིག་རྟེན་དབང་དུ་སྡུད་པའི་དངོས་གྲུབ་སྩལ་དུ་གསོལ། །ཚེ་དང་ལོངས་སྤྱོད་རྒྱས་པའི་དངོས་གྲུབ་སྩལ་དུ་གསོལ། །ཡེ་ཤེས་ལྔ་ཡི་དངོས་གྲུབ་སྩལ་དུ་གསོལ། །གྲུབ་ཆེན་བརྒྱད་ཀྱི་དངོས་གྲུབ་སྩལ་དུ་གསོལ། །ཕྲིན་ལས་བཞིའི་སྐུ་གསུང་ཐུགས་ཀྱི༴ ཤྲཱི་དེ་བི་མ་ཧཱ་ཀ་ལི་ཀ་ཡ་ཝཀྐ་ཙིཏྟ་སིདྡྷི་ཕ་ལ་ཧཱུྃ་ཨཱཿ ཞེས་དངོས་གྲུབ་བླང་ངོ་། །བྷྱོ། བསྐལ་པའི་མེ་རླུང་འཚུབས་མའི་ཀློང་དཀྱིལ་ནས། །མ་ཅིག་ལྷ་མོ་ནག་མོ་གློག་འགྱུ་མ། །ཕོ་ཉ་བདུད་ཀྱི་བུ་མོ་འཁོར་ཚོགས་རྣམས། །མ་ཅིག་འཁོར་བཅས་བརྩེ་བས་དགོངས་སུ་གསོལ། །བདག་ཉིད་མི་མཁས་རྨོངས་པའི་དབང་གྱུར་པས། །སྐུ་གསུང་ཐུགས་དང་རྩ་བ་ཡན་ལག་གིས། །ཏིང་འཛིན་མ་གསལ་རབ་རིབ་ཁལ་ཁོལ་དང་། །སྔགས་དང་ཕྱག་རྒྱའི་གྲ་ཆགས་ཟུར་ཉམས་དང་། །ཉམས་པ་ཅན་གྱི་སྐྱོན་གྱིས་ཕོག་པ་དང་། །ཕུད་ཉམས་ལྷག་མར་གྱུར་པ་ཐམས་ཅད་དང་། །དམ་རྫས་མཆོད་རྫས་དུས་སུ་མ་འཚོགས་དང་། །དཔོན་དང་མཆེད་ལྕམ་ཐུགས་དང་འགལ་བ་དང་། །ཁྱད་པར་མ་ཅིག་ལྷ་མོའི་དམ་ཚིག་ལས། །སྐུ་གསུང་ཐུགས་དང་རྩ་བ་ཡན་ལག་གིས། །ཉམས་ཆག་ཞིག་རལ་གྱུར་པ་ཅི་མཆིས་པ། །མ་ཅིག་བདུད་མོ་འབུམ་ཚོགས་རྣམས་ལ་བཤགས། །རབ་ཏུ་བཤགས་པས་ཚངས་པའི་དངོས་གྲུབ་སྩོལ། །ཡི་གེ་བརྒྱ་པ་བཟླའོ། །དེ་ནས་བསྐང་རྫས་རྣམས་གཞུང་ལྟར་བྱིན་གྱིས་རླབས་སོ། །སྔགས་དྲུག་དང་ཕྱག་དྲུག་ལ་སོགས་པ་གཞུང་བཞིན་བྱའོ། །དེ་ནས་རོལ་མོ་དབྱངས་དང་བཅས་པའི། རྒྱས་པ་སྤྲོ་ན་གཟེར་ཆུང་བསྐང་བ་རིང་ཐུང་གཉིས། བསྐང་ཐུང་འདི་དང་གསུམ་འདོན་པར་བྱའོ། །མི་སྤྲོ་ན་འདི་ལས་འདུས་པར་སྣང་ངོ་། །བྷྱོ། དཔལ་ལྡན་ལྷ་མོ་གསན་ཅིང་དགོངས་སུ་གསོལ། །སྲིང་གཅིག་ལྷ་མོ་གསན་ཅིང་དགོངས་སུ་གསོལ། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །ནད་དང་རིམ་གྱི་བདག་མོ་ཆེན་མོ་ཁྱོད། །ཐུགས་དམ་བསྐང་ཕྱིར་གནས་འདིར་བྱོན། །ཉམས་ཆག་གསོ་ཕྱིར་གནས་འདིར་བྱོན། །ཕྲིན་ལས་སྒྲུབ་ཕྱིར་གནས་འདིར་བྱོན། །བསྐང་ངོ་སྐལ་པར་ཐུགས་དམ་བསྐང་། །འབོད་པའི་དམ་རྫས་ཡིན་པའི་ཕྱིར། །ཞིང་ཆེན་གཡབ་མོས་ཐུགས་དམ་བསྐང་། །བསྟེན་པའི་དམ་རྫས་ཡིན་པའི་ཕྱིར། །མི་དབང་སྙིང་གི་ཐུགས་དམ་བསྐང་། །རང་བཞིན་གནས་ནས་སྤྱན་འདྲེན་ཕྱིར། །མི་རྐང་གླིང་བུའི་ཐུགས་དམ་བསྐང་། །དམ་ཚིག་གཉེན་པོ་བསྲེ་བའི་ཕྱིར། །བདུད་རྩི་སྨན་གྱི་ཐུགས་དམ་བསྐང་། །འདོད་ཁམས་གཙོ་མོ་ཡིན་པའི་ཕྱིར། །རྨ་བྱའི་རྒྱལ་མཚན་གྱི་ཐུགས་དམ་བསྐང་། །ལྗགས་ཀྱི་དབང་པོ་ཚིམ་བྱའི་ཕྱིར། །ཤ་ཆེན་རུས་པས་ཐུགས་དམ་བསྐང་། །མགྲིན་པའི་གསང་ནས་སྦྱངས་བའི་ཕྱིར། །དམར་ཆེན་རཀྟས་ཐུགས་དམ་བསྐང་། །ཚིལ་ཆེན་དྲི་ལ་སྣོམས་པའི་ཕྱིར། །གསུར་ཆེན་དུད་པས་ཐུགས་དམ་བསྐང་། །རྟག་ཏུ་མི་འབྲལ་འགྲོགས་པའི་ཕྱིར། །རྒྱུན་གྱི་གཏོར་མས་ཐུགས་དམ་བསྐང་། །ཉམས་ཆག་མ་ལུས་བསྐང་བའི་ཕྱིར། །བྱ་ནག་གཡག་ནག་ལུག་ནག་གི། །ནག་མོ་འབུམ་སྡེའི་ཐུགས་དམ་བསྐང་། །བྷྱོ། དཀར་མོ་འབུམ་སྡེའི་ཐུགས་དམ་བསྐང་། །དམར་མོ་འབུམ་སྡེའི་ཐུགས་དམ་བསྐང་། །སེར་མོ་འབུམ་སྡེའི་ཐུགས་དམ་བསྐང་། །ལྗང་མོ་འབུམ་སྡེའི་སྔོན་མོ་འབུམ་སྡེའི༴ མཐིང་ནག་འབུམ་སྡེའི་ཐུགས་དམ་བསྐང་། །དམར་ནག་འབུམ་སྡེའི་ཐུགས་དམ་བསྐང་། །སེར་ནག་འབུམ་སྡེའི་ཐུགས་དམ་བསྐང་། །ལྗང་ནག་འབུམ་སྡེའི་ཐུགས་དམ་བསྐང་། །སྔོ་ནག་འབུམ་སྡེའི་ཐུགས་དམ་བསྐང་། །སྨུག་ནག་འབུམ་སྡེའི་ཐུགས་དམ་བསྐང་། །མ་ཡེ་ཤེས་རྒྱལ་མོའི་ཐུགས་དམ་བསྐང་། །བོད་སྐྱོང་བརྟན་མའི་ཐུགས་དམ་བསྐང་། །འཛམ་གླིང་སྐྱོང་མའི་ཐུགས་དམ་བསྐང་། །མ་ཁྱོད་ཀྱང་དམ་ལ་མ་འདའ་ཞིག །ང་ཡང་དམ་ལ་མ་འདའོ། །གལ་ཏེ་དམ་ལ་ཁྱོད་འདའ་ན། །སྲོག་གི་སྙིང་པོ་མེ་འབར་བས། །རང་སྲོག་རང་གི་གཅོད་པར་བྱེད། །དེ་བས་དམ་ལ་མ་འདའ་ཞིག །ཐུགས་དམ་གཉེན་པོ་འདིར་སྐོང་ལ། །ཉམས་ཆག་ཅི་མཆིས་བཟོད་པར་གསོལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཕྲིན་ལས་དྲག་ཤུལ་མཐུ་མ་ཆུང་། །སྡང་བའི་དགྲ་ལ་རྟགས་ཕྱུངས་ཤིག །གནོད་པའི་བགེགས་ལ་ཕྲིན་ལས་མཛོད། །ཕས་ཀྱི་རྦོད་གཏོང་བཟློག་ཏུ་གསོལ། །བཅོལ་པའི་ཕྲིན་ལས་འགྲུབ་པར་མཛོད། །དེ་ནས་བསྟན་པ་བསྲུངས་བའི་ཆེད་དུ་འབུལ་བ་ནི། བྷྱོ། འཕྲུལ་གྱི་ཕོ་བྲང་ཐོད་པའི་ལྡིང་ཁང་ནས། །དཔལ་ལྡན་ལྷ་མོ་ནག་མོ་རེ་མ་ཏི། །སྲིན་པོ་ནག་པོའི་ཆུང་མ་རལ་པ་ཅན། །ཡ་མཚན་རྨད་བྱུང་ལྷ་མོ་འཕྲོས་པའི་གཙོ། །ཞལ་གདངས་མཆེ་གཙིགས་དྲག་པོའི་རྐན་སྒྲ་རྡེབས། །རྔམ་པའི་ཚུལ་གྱིས་དམར་ཆེན་ཁྲག་ལ་རོལ། །ཁ་འབར་ཆེན་མོ་སྲོག་གི་ཤན་པ་མོ། །ཁ་མཆུ་ཆེན་མོ་སྲོག་གིས་ཙ་ལ་མོ། །མཁའ་འགྲོ་ཆེན་མོ་བསེའ་གདོང་ལས་མཁན་མ། །སྐུ་ནི་ནག་མོ་འབུམ་གྱི་དབུས་སུ་བཞུགས། །སྐྱེ་བ་རྣམ་བཞི་བསྒྲོལ་བའི་གིང་ཆེན་མོ། །ཁྱེད་ནི་སྲིད་པ་ཀུན་གྱི་བཀུར་བར་འོས། །ཚངས་པའི་རྒྱལ་པོའི་རྨ་བྱའི་རྒྱལ་མཚན་ཕུལ། །ནམ་མཁའི་ལྷ་བྲན་རྣམས་ཀྱི་སིལ་སྙན་དྲིལ་བུ་ཕུལ། །འཆི་བདག་རྒྱལ་པོས་ཕྱག་ན་རལ་གྲི་ཕུལ། །བདུད་ཀྱི་རྒྱལ་པོས་ཁྲམ་བམ་ནག་པོ་ཕུལ། །དུར་ཁྲོད་བདག་པོས་བྷནྡྷ་ལྕང་ལོ་ཕུལ། །གནོད་སྦྱིན་རྒྱལ་པོས་ནེའུ་ལེའི་རྐྱལ་པ་ཕུལ། །རྣམ་ཐོས་སྲས་ཀྱི་སེང་གེའི་སྙན་ཆ་ཕུལ། །ཁྱབ་འཇུག་ཆེན་པོས་ཉི་མ་ཟླ་བ་ཕུལ། །ཐེག་ཆེན་རྒྱལ་པོས་གླང་ཆེན་ཀོ་རློན་ཕུལ། །མ་བདུད་རྒྱལ་མོས་རེ་ལྡེ་ཤམ་ཐབས་ཕུལ། །མ་མོ་རྣམས་ཀྱིས་ནད་ཀྱི་རྐྱལ་པ་ཕུལ། །ཀླུ་མོ་རྣམས་ཀྱི་འཕྲུལ་གྱི་མེ་ལོང་ཕུལ། །སྨན་མོ་རྣམས་ཀྱིས་ཚོན་གྱི་གྲུ་གུ་ཕུལ། །ཤ་ཟའི་རྒྱལ་པོས་ཐོད་པའི་ཕྲེང་བ་ཕུལ། །ལྷ་སྲིན་རྣམས་ཀྱིས་གསེར་གྱི་དྲིལ་བུ་ཕུལ། །ས་བདག་རྒྱལ་པོས་རུས་སྦལ་ཕོ་གུ་ཕུལ། །བཙན་གྱི་རྒྱལ་པོས་ཤྭ་དྷིལ་དཀར་ནག་ཕུལ། །སྲིན་པོའི་རྒྱལ་པོས་ལྕགས་སྒྲོག་འབར་བ་ཕུལ། །རྒྱལ་པོ་དཀར་པོས་སྤྱན་མིག་གཡས་པ་ཕུལ། །རྣལ་འབྱོར་བདག་གི་བདུད་རྩི་གཏོར་མ་ཕུལ། །རཀྟ་དམར་གྱི་ཨརྒྷ་བསྐྱེད་པ་ནས། །མ་ལ་བུས་བོས་གདུང་སེམས་མ་ཆུང་བར། །སྨུག་ནག་འཇིགས་པའི་རྒྱལ་མོ་སྐུ་བཞེངས་ལ། །ལྕགས་ཀྱུ་འདྲ་བའི་སྡེར་མོས་གཏོར་མ་ལོངས། །གྲུ་གསུམ་མཐིང་ནག་འབར་བའི་ཞལ་གདོངས་ལ། །ཟ་བྱེད་རྣོ་གདུག་འབར་བའི་མཆེ་བ་གཙིགས། །ལེ་བརྒན་ཁྲག་འཐུང་འབར་བའི་ལྗགས་རྐྱོང་ལ། །ཆོས་ཀྱི་དབྱིངས་དང་མཉམ་ཞིང་མགུལ་ལ་བསྟིམ། །ཁ་ཁ་ཁཱ་རཾ་ཁཱ་ཧི། བྷྱོ། དུར་ཁྲོད་མངའ་མཛད་ལྷ་མོ་རེ་མ་ཏི། །འདས་དང་མ་འོངས་ད་ལྟ་ཀུན་ལ་དབང་བསྒྱུར་ཞིང་། །སྟོང་གསུམ་འཇིག་རྟེན་ཁམས་ཀྱི་གཟུགས་འཕྲོག་མ། །བློ་མེད་གྲོགས་འཚོལ་བློན་པོ་རིན་ཆེན་འདྲ། །འཇིགས་པའི་མགོན་སྐྱོབ་དམག་དཔོན་རིན་ཆེན་འདྲ། །མི་འབྲལ་ཟུང་འཇུག་བཙུན་མོ་རིན་ཆེན་འདྲ། །ཐེག་པའི་དོན་དམ་གླང་པོ་རིན་ཆེན་འདྲ། །ས་བཅུ་བགྲོད་པའི་རྟ་མཆོག་རིན་ཆེན་འདྲ། །གཞན་ལ་དབང་བསྒྱུར་འཁོར་ལོ་རིན་ཆེན་འདྲ། །བསམ་འཕེལ་དོན་ལྡན་ནོར་བུ་རིན་ཆེན་འདྲ། །འཇིག་རྟེན་མགོན་པོ་ལྟར་ནི་བསོད་ནམས་འཕེལ། །ལྷ་དབང་བརྒྱ་བྱིན་ལྟར་ནི་ལོངས་སྤྱོད་ཆེ། །ཨུ་མ་དེ་བ་ལྟར་ནི་ཆེ་ལུགས་བཙུན། །ཨུ་དུམ་ཝར་བ་ལྟར་ནི་སྐྱེ་བར་དཀོན། །མེ་ཏོག་པདྨ་ལྟར་ནི་ལྷ་རྫས་མཛེས། །ནམ་མཁའི་ལྷ་བྲན་ལྟར་ནི་སྐུ་འཁྲུངས་ལེགས། །གཅན་གཟན་སེང་གེ་ལྟར་ནི་གཞན་ལ་བརྗིད། །ཕྱག་ན་རྡོ་རྗེ་ལྟར་ན་མཐུ་སྟོབས་ཆེ། །འཇམ་དཔལ་གཞོན་ནུ་ལྟར་ནི་ཤེས་རབ་ཆེ། །སྤྱན་རས་གཟིགས་དབང་ལྟར་ནི་ཐུགས་རྗེ་ཆེ། །སྤྱི་གཙུག་ནོར་བུ་ལྟར་ནི་གཙུག་ན་འབར། །འཛམ་གླིང་རྒྱལ་པོ་ལྟར་ནི་རྟག་ཏུ་བསྟོད། །དཔལ་ལྡན་རེ་མ་ཏི་ལ་བདག་གིས་བསྟོད། །དེ་ནས་བརྟེན་གཏོར་མེ་རླུང་གང་རུང་གིས་སྦྱོར་བས་བྱིན་གྱིས་རླབས་ལ་འབུལ་བ་ནི། སྔགས་ཀྱི་གཤམ་དུ་བྷ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་པ་ཐོད་པའི་ཕྱག་རྒྱ་བཅིང་ལ་ལན་གཉིས་སམ་གསུམ་མམ་བདུན་གྱིས་འབུལ་ལ། ལྷ་མོ་འཁོར་དང་བཅས་པས་གསོལ་ནས་མཉེས་པར་བསམ་ལ། དེ་ནི་གནས་གཞིའི་དམིགས་པ་བྱས་ལ། བསྙེན་པ་བྱེད་ཚུལ་ནི། བདག་གི་ཐུགས་ཀའི་སྔགས་ཕྲེང་ཧཱུྃཿདང་བཅས་པ་ལས་འོད་ཟེར་དཀར་པོ་གཅིག་སྐུ་ཡི་དབྱིབས་མར་བརྒྱུད་ནས། རྡོ་རྗེ་ནོར་བུའི་རྩེར་བྱུང་ནས་བྱང་ཆུབ་སེམས་ཀྱི་མཆོད་པ་རྣམས་ཕུལ་བས་མཉེས་ཤིང་ཚིམ་པར་བསམ། འོད་ཟེར་ཡང་ལྷ་མོའི་སྐུའི་དབྱིབས་མར་བརྒྱུད་ནས་བྷྱོ་ལ་གཡོན་དུ་བསྐོར་བས། བདག་ལ་འགལ་བ་དང་ཉེས་སྐྱོན་ཐམས་ཅད་དག་པར་བསམ། ལྷ་མོའི་ཞལ་ནས་བདག་གི་ཞལ་དུ་ཚུར་ཞུགས་པའི་དུས་སུ་ཡི་གེ་གསུམ་གྱི་སྣ་དྲངས་ནས་མཆོག་ཐུན་མོང་གི་དངོས་གྲུབ་དང་ཕྲིན་ལས་རྣམ་པ་བཞིའི་དངོས་གྲུབ་དང་མཐུ་སྟོབས་ནུས་པ་བྱིན་རླབས་ཐམས་ཅད་བདག་ལ་ཕུལ་བས། བདག་བཀྲག་གཟི་མདངས་ནུས་པ་མཐུ་སྟོབས་ཐམས་ཅད་དང་ལྡན་པའི། ཁམས་གསུམ་ཐམས་ཅད་དུས་གཅིག་ཏུ་སྒྲོལ་ནུས་པ་གཅིག་བསྒོམ། ནད་དང་གནོད་པ་རྐྱེན་དང་བར་ཆད་ཐམས་ཅད་ཞི་བར་བསམ། དེ་ནས་བདག་གི་ཐུགས་ཀའི་སྔགས་ཕྲེང་ཧཱུྃ་དང་བཅས་པ་ལས་འོད་ཟེར་གཡས་སུ་ལན་གསུམ་བསྐོར་བའི་ལྷ་མོ་འཁོར་བཅས་ཐམས་ཅད་བདག་གི་དབང་དུ་འདུས་ནས་བཀའ་ཉན་གསུངས་སྡོད་བྱེད་ཅིང་ཅི་བཅོལ་པའི་ལས་ཐམས་ཅད་སྐད་ཅིག་གིས་བསྒྲུབ་པར་བསམ། སྔགས་མ་ཡེངས་བར་ཏིང་འཛིན་དང་ལྡན་པའི་རྟགས་མ་བྱུང་གི་བར་དུ་ཞག་གཅིག་གི་བར་ཐུན་བཞིར་བྱས་ལ་བཟླས་པ། འབུམ་དུང་བཟླའོ། །ཡང་ན་བདག་གི་ཅི་རིགས་བར་དུ་བསྙེན་པ་བཟླའོ། །ༀ་མ་ཧཱ་ཀཱ་ལི་རེ་མ་ཏི་ཧཱུྃ། སྙིང་པོའོ། །བྷྱོ་མ་མོ་ནག་མོ་བེ་ཏ་ལི་སིདྡྷི་ཀུ་ལུ་ཀུ་ལུ་མ་ཧཱ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཉེ་བའི་སྙིང་པོའོ། །ཏདྱ་ཐཱ། ༀ་རུ་རུ་རོ་རུ་པཱི༴ ཏིཥྛ་བ་ཏོ་པཱི་ཙ་ཝ་ལ་ཨ་ཤུག་མེ་བྷྱོཿཧཱུྃ་ཛཿ འཇུག་ལ་མ་ཧཱ་ཀ་ལི་སོགས་ཚར་གཅིག །སྲོག་ན་འདྲེན་པའི་སྔགས་སོ། །སྙིང་པོ་ཉེ་སྙིང་སྲོག་སྔགས་འདི་གསུམ་རེ་རེ་ལ་འབུམ་ཕྲག་རེ་བཟླས་དངོས་གྲུབ་ཀྱི་མཚན་མའོ། །གྲངས་བསྙེན་འབུམ་ཕྲག་གསུམ་བྱེ་བ་གཅིག་བཟླས་ན་ཕྱག་མཚན་མཐོང་། ས་ཡ་གཅིག་བཟླས་ན་ལྷ་མོ་མངོན་དུ་མཐོང་། དེ་ནས་བསྙེན་སྔགས་ལ་ནན་ཏན་བྱེད་པ་གལ་ཆེའོ། །ཡི་གེ་བརྒྱ་པ་ཁ་སྐོང་ངོ་། །དེ་ནས་ནང་གཏོར་མ་འབུལ་བ་ནི། དཔལ་ལྡན་ལྷ་མོ་འཁོར་དང་བཅས་པའི་ལྗགས་ཧཱུྃ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་དུ་གྱུར་ནས་གཏོར་མའི་བཅུད་དྲངས་ནས་གསོལ་བར་གྱུར། ༀ་མ་མ་དེ་བི་ཀ་ལི་རེ་མ་ཏི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨ་མྲྀ་ཏ་པཱུ་ཛ་ཧོ། ཞེས་པ་ལན་གསུམ་གྱི་གཙོ་མོ་དང་འབོད་རྦད་བསད་གསུམ་གྱི་སྔགས་རིང་གི་ལན་གསུམ་གཙོ་འཁོར་ཐམས་ཅད་ལ་ཕུལ། ༀ་མ་ཧཱ་ཀཱ་ལི་རེ་མ་ཏི་ས་པ་རི་ཝ་ར་ཨརྒྷཾ༴ ཅེས་པ་ནས། ཤབྡ་པྲ་ཏིཙྪ་ཧཱུྃ་སྭཱ་ཧཱ། ༀ་མ་ཧཱ་ཀ་ལི་རེ་མ་ཏི་ཧཱུྃ། ༀ་ཨཱཿཧཱུྃ། ཧཱུྃ། དུས་གསུམ་སངས་རྒྱས་ཀུན་གྱི་ཕྲིན་ལས་མགོན། །རང་བཞིན་དོན་རྫོགས་ཕྱིར་མི་ལྡོག་པའི་ཡུམ། །གཞོན་ནུའི་ཚུལ་འཆང་ས་བརྒྱད་གནོན་པ་མོ། །རལ་གྲི་ནེའུ་ལེ་འཛིན་ལ་ཕྱག་འཚལ་ལོ། །གཏོར་རྫོངས་ནི་གཞན་དང་འདྲའོ། །དེ་ནས་བསྟོད་པ་བྱ་བ་ནི། བྷྱོ། དཔལ་གྱི་སྲུང་མ་ཁམས་གསུམ་གཙོ་མོ་ཁྱོད། །བོང་བུའི་རྟ་མཆོག་དཔག་ཚད་བརྒྱད་ཁྲིར་རྒྱུག །རེ་ལྡེའི་སྟོད་གཡོག་སྦྲུལ་གྱི་ཤམ་ཐབས་ཅན། །འབར་བའི་དབང་རྟགས་ཕྱག་ན་རལ་གྲི་བསྣམས། །ལྟེ་བར་ཉི་ཤར་གཙུག་ན་ཟླ་རྒྱས་གསལ། །ནག་མོ་ཁྲག་འཐུང་དབྱིངས་ཀྱི་དཔལ་འབར་མ། །ཁྲམ་བམ་ནད་ཀྱི་རྐྱལ་པ་ཕྱག་ན་བསྣམས། །ནག་མོ་རེ་མ་ཏི་ལ་བདག་གིས་བསྟོད། །བདག་གི་བཙུན་པར་ཁྱོད་བསྟོད་ནས། །ཁྱོད་ལ་བཅོལ་བའི་ལས་རྣམས་ནི། །ཡུད་ཙམ་གཅིག་གིས་འགྲུབ་པར་མཛོད། །བྷྱོ། ཡང་ཐོག་དགུ་བརྩེགས་འཕྲུལ་གྱི་ཕོ་བྲང་ནས། །མ་ཅིག་ལྷ་མོ་ནག་མོ་རེ་མ་ཏི། །སྐུ་མདོག་ཉི་འོད་འབར་བའི་སྨན་གཅིག་མ། །སྐུ་ནི་མི་འགྱུར་རི་རབ་ལྷུན་པོ་འདྲ། །གསུངས་སྙན་འབྲུག་སྒྲ་ནམ་མཁའི་དབྱིངས་དང་མཉམ། །ཐུགས་ཀྱི་དཔལ་བེའུ་ཡེ་ཤེས་ལྔ་དང་ལྡན། །མགུལ་གྱི་བུམ་པ་རྨ་བྱའི་མགྲིན་པ་འདྲ། །ཕན་གནོད་མྱུར་དུ་བསྒྲུབ་པའི་མཁའ་འགྲོ་མ། །ལྗགས་ནི་པདྨ་ལེ་བརྒན་དུང་སྭོ་བཞེད། །བསྟན་པ་སྲུང་མཛད་མ་ལ་ཕྱག་འཚལ་བསྟོད། །བསྟན་པ་རྒྱས་མཛད་མ་ལ་ཕྱག་འཚལ་བསྟོད། །དགྲ་བགེགས་འདུལ་མཛད་མ་ལ་ཕྱག་འཚལ་བསྟོད། །བུ་ནོར་མཐུའི་དངོས་གྲུབ་བདག་ལ་སྩོལ། །དེ་ནས་དཔལ་ལྡན་ལྷ་མོ་ལ་ནམ་མཁའི་ལྷ་བྲན་རྣམས་ཀྱིས་རྟག་གིས་སྒོ་ནས་བསྟོད་པ་ནི། བྷྱོ། བསྐལ་པ་མེ་ལྟར་འབར་བའི་ཀློང་དཀྱིལ་ནས། །རླུང་ནག་དགུ་རླུང་འཁྱིལ་པའི་ཕོ་བྲང་ནས། །མ་ཅིག་ལྷ་མོ་ནག་མོ་འདོད་ཁམས་གཙོ། །ནག་མོ་ཟ་བྱེད་འཇིགས་པའི་ཆ་ལུགས་ཅན། །མཐིང་ནག་མི་སྲིན་ཁྲག་གི་རལ་པ་ཅན། །མ་ཁྱོད་ཀྱི་སྐུ་མདོག་ནག་མོར་སྟོན་པ་ནི། །དོན་དམ་དབྱིངས་ནས་སྐྱེ་བ་མེད་པའི་རྟགས། །རལ་པ་གཡས་དང་གཡོན་དུ་འཁྱིལ། །ཡུམ་གྱི་མཁའ་ལ་སྤྲུལ་པ་འགྱེད་པའི་རྟགས། །རལ་པའི་གསེབ་ནས་མེ་སྟག་འཕྲོ་བ་ནི། །ཐུགས་རྗེའི་སྤྲུལ་སྐུ་ཕྱོགས་བཅུར་འགྱེད་པའི་རྟགས། །རལ་པ་སྤྱི་བོར་གཙུག་ཏུ་འཁྱིལ་པ་ནི། །ཐུགས་དམ་དགོངས་སྤྱོད་གཅིག་ཏུ་མཛད་པའི་རྟགས། །རྨ་བྱའི་རྒྱལ་མཚན་དབུ་ལ་གཙུག་པ་ནི། །ཕྲིན་ལས་རྣམ་བཞི་སོ་སོར་མཛད་པའི་རྟགས། །ཐོད་སྐམ་ཕྲེང་བས་དབུ་ལ་བརྒྱན་པ་ནི། །ཐུགས་རྗེའི་སྤྲུལ་སྐུའི་འགྲོ་དོན་མཛད་པའི་རྟགས། །སྙན་ཆ་གཡས་ན་སེང་གེ་འཕྱོ་བ་ནི། །དམན་མོ་ཐམས་ཅད་ཟིལ་གྱིས་གནོན་པའི་རྟགས། །སྙན་ཆ་གཡོན་ནས་སྦྲུལ་ནག་འཕྱོ་བ་ནི། །ཞེ་སྡང་མ་སྤངས་དབྱིངས་སུ་དག་པའི་རྟགས། །སྙན་ཆ་གསེར་གྱི་དྲིལ་བུ་དཀྲོལ་བ་ནི། །སངས་རྒྱས་རྣམས་ལ་བསྙེན་བསྐུར་བྱེད་པའི་རྟགས། །སྤྱན་གསུམ་དམར་ཟླུམ་ཕྱོགས་བཅུར་བགྲད་པ་ནི། །སྲིད་གསུམ་རྣལ་འབྱོར་བྱ་ར་མཛད་པའི་རྟགས། །ཞལ་ནི་དྲག་པོའི་ཧོམ་ཁུང་གདངས་པ་ནི། །དགྲ་བགེགས་གང་ཡིན་ཞལ་དུ་གསོལ་བའི་རྟགས། །རྣོ་གདུགས་མཆེ་བ་ཟུར་གསུམ་གཙིག་པ་ནི། །བསྒྲལ་བའི་ཞིང་བཅུའི་ཤ་ལ་རོལ་པའི་རྟགས། །ཞིང་ཆེན་གཡང་གཞི་སྐུ་ལ་གསོལ་བ་ནི། །ཆོས་ཉིད་ཡང་དག་དོན་དང་ལྡན་པའི་རྟགས། །གླང་ཆེན་ཀོ་རློན་གོས་སུ་གོན་པ་ནི། །ཐེག་པ་མཆོག་གི་དོན་དང་ལྡན་པའི་རྟགས། །ནམ་ཕྱེད་རེ་ལྡེ་ནག་པོས་དཀྲིས་པ་ནི། །འཇིག་རྟེན་འདི་ན་ཆེ་བཙན་ལྡན་པའི་རྟགས། །སྟག་གི་ལྤགས་པས་ཤམ་ཐབས་བྱས་པ་ནི། །དྲག་པོའི་ཆ་ལུགས་མངོན་དུ་མཛད་པའི་རྟགས། །ལྟེ་བའི་དབུས་ནས་ཉི་མ་ཤར་བ་ནི། །སྲིད་པའི་རྒྱ་མཚོ་གཏིང་ནས་སྐེམ་པའི་རྟགས། །སྤྱི་བོའི་གཙུག་ནས་ཟླ་བ་རྒྱས་པ་ནི། །མ་རིག་མུན་པ་གཏིང་ནས་སེལ་བའི་རྟགས། །ཕྱག་གཡས་བདུད་ཀྱི་རལ་གྲི་བསྣམས་པ་ནི། །དགྲ་བགེགས་སྐྱེ་ཤི་རྩད་ནས་གཅོད་པའི་རྟགས། །ཕྱག་གཡོན་བྷནྡྷ་དམར་ཆེན་བསྣམས་པ་ནི། །འཁོར་བའི་སྡུག་བསྔལ་ཁྲག་ལྟར་འཐུང་བའི་རྟགས། །མཆན་ནས་ནེའུ་ལེའི་རྐྱལ་པ་བསྣམས་པ་ནི། །སྒྲུབ་པ་པོ་ལ་དངོས་གྲུབ་སྟེར་བའི་རྟགས། །ཞབས་ལ་དབང་གི་ལྕགས་སྒྲོག་བསྒྲོགས་པ་ནི། །ཐབས་དང་ཤེས་རབ་གཉིས་སུ་མེད་པའི་རྟགས། །ཕྱིར་ཕྱོགས་བོང་བུ་དམར་ཀ་བཅིབས་པ་ནི། །ལོག་པར་ལྟ་བའི་དགྲ་བགེགས་སྒྲོལ་བའི་རྟགས། །སྲིན་པོའི་ཡ་མགལ་སྔ་རུ་བྱས་པ་ནི། །སྲིན་ཡུལ་ལངྐ་པུ་རི་བསྒྲོད་པའི་རྟགས། །སྲིན་མོའི་མ་མགལ་ཕྱི་རུ་བྱས་པ་ནི། །བདུད་དང་གཤིན་རྗེའི་གདུག་པ་དུལ་བའི་རྟགས། །གོང་ཐག་གློ་སྨེད་སྦྲུལ་ལས་བྱས་པ་ནི། །ཞེ་སྡང་གདུག་པ་ཆེན་པོ་འདུལ་བའི་རྟགས། །རུས་སྦལ་ནག་པོ་ཕོ་ཀུ་བཏབ་པ་ནི། །ཀླུ་བདུད་མ་རུང་དམ་ལ་འདོག་པའི་རྟགས། །སྔ་ཤད་བདུད་ཀྱི་ཁྲམ་བམ་བཏགས་པ་ནི། །དམ་ཉམས་དགྲ་བོ་ཁྲམ་ལ་འདེབས་པའི་རྟགས། །ཕྱི་ཤད་ནད་ཀྱི་རྐྱལ་པ་བཀལ་བ་ནི། །བསྟན་པའི་དགྲ་ལ་ན་ཁ་འབེབས་པའི་རྟགས། །དོན་དམ་བཅུད་ཀྱི་རྟགས་སུ་ཞག་གིས་ཟོ་རིས་བྱས། །ཐུགས་རྗེའི་ཆགས་པས་རྟགས་སུ་རཀྟའི་ཐིག་ལེའི་བརྒྱན། །འདུལ་བྱེད་ཕྲིན་ལས་རྟགས་སུ་ཐལ་ཆེན་ཚོམ་བུས་བྱུག །མ་མོ་འབུམ་ཕྲག་བྲན་དུ་འཁོལ་བ་ནི། །སྟོང་ཁམས་ཁྱབ་པར་དབང་དུ་བསྡུས་པའི་རྟགས། །མ་ཅིག་ཁ་ནས་མེ་འབར་རྒྱ་མཚོ་སྐེམ། །ལག་ན་རྡོ་འཕེན་རི་རབ་སི་བུར་བསིལ། །ལྷ་མོ་ཁྱེད་ལ་བདག་གི་བཙུན་པར་བསྟོད། །དཔལ་ལྡན་ལྷ་མོ་མཐུ་ཆེན་མ། །ཆོས་སྐྱོང་རྒྱལ་མོ་མི་བཟད་མ། །གསང་བའི་དབང་ཕྱུག་རྡོ་རྗེ་མཁའ་འགྲོ་མ། །བསྟན་པ་བསྲུང་མཛད་དམ་ལ་ཕྱག་འཚལ་ལོ། །རྒྱུད་འབུམ་ནས་འབྱུང་བ་ལྟར་ལྷ་མོ་དཔལ་བཞིའི་བསྟོད་དོ། །བྷྱོ། དཔལ་ལྡན་ལྷ་མོ་ཁྱོད་ལ་ཕྱག་འཚལ་ལོ། །དཔལ་ཆེན་དཔལ་དང་ལྡན་པའི་བདག་ཉིད་མ། །འགྲོ་བ་ཐུགས་རྗེས་སྐྱོབས་མཛད་བྱམས་ཆེན་མ། །མི་མཐུན་ཕྱོགས་ལས་རྣམ་པར་རྒྱལ་བ་མོ། །དངོས་གྲུབ་བདག་ལ་སྩོལ་ཅིག་དཔལ་ལྡན་མ། །མཛེས་ཤིང་ཡིད་འོངས་མཚན་དཔའི་རབ་བརྒྱན་མ། །སྲིད་གསུམ་ཀུན་དུ་གཟི་བརྗིད་དཔལ་འབར་མ། །འཇིག་རྟེན་གྲགས་པ་ཟིལ་གྱིས་གནོན་པ་མོ། །དངོས་གྲུབ་མྱུར་དུ་སྩོལ་ཅིག་བདག་ཉིད་མ། །ཉི་མ་སྟོང་གི་འོད་ཟེར་རབ་འབར་མ། །དངོས་གྲུབ་བཟང་པོར་སྩོལ་ཅིག་མཁའ་འགྲོ་མ། །བདེ་ཆེན་བདེ་བའི་ཡེ་ཤེས་ཀུན་རྫོགས་མ། །དཔལ་ཆེན་སྐུ་ལ་དགྱེས་པར་འཁྲིལ་སྦྱོར་མ། །རྣལ་འབྱོར་ཡོངས་ཀྱི་དཔལ་དང་དགྲ་བླ་མོ། །མཆོག་གིས་དངོས་གྲུབ་སྩོལ་ཅིག་ཡུམ་མཆོག་མ། །ནག་མོ་བཟང་མོ་འཇིགས་པའི་གཟུགས་ཅན་མ། །ཤེས་རབ་རལ་གྲིས་མ་རིག་རྩད་གཅོད་མ། །ནེའུ་ལེའི་དགོས་འདོད་རེ་བ་སྐོང་བ་མོ། །ནད་དང་གདོན་རྣམས་སོལ་ཅིག་དབང་ཕྱུག་མ། །ཡོན་ཏན་ཀུན་རྫོགས་དབྱིངས་ཕྱུག་ནམ་གྲུ་མ། །ལང་ཀ་པུ་རིའི་གྲོང་ཁྱེར་འཇིགས་མཛད་མ། །སྲིན་པོའི་བོང་བུ་ཞབས་ཀྱིས་གནོན་པ་མོ། །ཐུགས་རྗེས་རྟག་ཏུ་གཟིགས་ཤིག་མ་ཅིག་མ། །ཐེག་ཆེན་དོན་ལྡན་གླང་ཆེན་གོས་འཛིན་མ། །སྟོང་གསུམ་འཚུབས་མའི་ནང་ནས་འགྲོ་མགྱོགས་མ། །གསང་སྔགས་བསྒྲུབ་པའི་རྣལ་འབྱོར་སྐྱོང་བ་མོ། །བདག་ལ་བྱིན་གྱིས་རློབས་ཤིག་རྣལ་འབྱོར་མ། །ཡིད་འོང་དུང་མདོག་དཀར་ལ་རྒྱན་མཛེས་མ། །བཞི་བརྒྱ་རྩ་བཞིའི་ནད་རྣམས་སེལ་མཛད་མ། །ནད་བདག་འཆི་གདོན་ནད་རྣམས་སེལ་བ་མོ། །ནད་རྣམས་ཞི་བར་མཛོད་ཅིག་རལ་གཅིག་མ། །རིན་ཆེན་རྒྱན་དང་གསེར་མདོག་བརྗིད་འབར་མ། །རྒྱལ་སྲིད་ནོར་ཀྱང་དང་ལྡན་འབྱོར་ལྡན་མ། །ཡིད་བཞིན་ནོར་ལྟར་དགོས་འདོད་སྐོང་བ་མོ། །བསྟན་པ་རྒྱས་པར་སྤེལ་ཅིག་དཔའ་འཕེལ་མ། །ཕྲིན་ལས་ཀུན་ལ་མངའ་མཛད་ལས་མཁན་མ། །ཐོད་ལེ་བརྩེགས་པའི་མཁར་ནས་རབ་བརྗིད་མ། །གནས་མཆོག་བྱང་ཤར་མཚམས་ན་བཞུགས་པ་མོ། །དགྲ་བགེགས་དབང་དུ་བསྡུས་ཤིག་ཡུམ་མཆོག་མ། །ལྷ་ཆེན་ཆུང་མ་རྡེ་སོགས་ཀུན་སྦྱར་མ། །ལྷ་མིན་གཡུལ་བཟློག་དཀའ་ཐུབ་རལ་གཅིག་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །གཤིན་རྗེའི་ལྕམ་གཅིག་རཀྟ་ཙ་མུན་ཌི། །གདུག་པའི་དགྲ་བགེགས་ཐུལ་ཅིག་རེ་མ་ཏི། །བདག་ལ་གནོད་པའི་གདོན་དང་བགེགས་ལ་སོགས། །མི་མཐུན་ཕྱོགས་རྣམས་ཞི་བའི་ལས་མཛོད་ཅིག །འགྲོ་རྣམས་རྟག་ཏུ་བྱམས་དང་སྙིང་རྗེ་ཡིས། །དབང་དུ་བསྡུས་ནས་བདག་དང་གཅིག་ཏུ་མཛོད། །དཀོན་མཆོག་སྐུ་དགྲ་བསྟན་པའི་རུ་ཏྲ་དང་། །རྡོ་རྗེ་སློབ་དཔོན་སྐུ་དགྲར་གྱུར་པ་དང་། །རྣལ་འབྱོར་བདག་ལ་གནོད་པ་ཡི། །དགྲ་བགེགས་རྣམ་ཤེས་འགུགས་དང་གསོད་དང་བསྐྲད་པ་དང་། །ཐམས་ཅད་རྡུལ་ཕྲན་བཞིན་དུ་བརླག་པའི་ཕྲིན་ལས་མཛོད། །སྔོན་ཚེ་རྫོགས་པའི་སངས་རྒྱས་ཆེ་མཆོག་ཧེ་རུ་ཀ །ཕྱག་ན་རྡོ་རྗེ་པདྨ་འབྱུང་གནས་དང་། །རིག་འཛིན་རྒྱལ་བའི་བཀའ་ལ་མ་འདའ་བར། །བདག་གི་བཅོལ་པའི་ལས་རྣམས་འགྲུབ་པར་མཛད་དུ་གསོལ། །སྐབས་འདིར་བསྒྲལ་ལས་རྒྱས་པར་བྱའོ། །དེ་ནས་བསྐུལ་པ་བྱ་བ་ནི། བྷྱོཿ ཀྱེ་མ་ནད་དང་རིམ་གྱི་བདག་མོ་ཆེན་མོ་ཁྱོད། །གཤིན་རྗེའི་ཁམས་ཀྱི་སྲིང་གཅིག་མ། །བདུད་ཀྱི་ཡུམ་ལ་གཤིན་རྗེའི་ལྕམ། །མཛེས་པའི་ལན་བུ་གཅིག་མ་ལ། །རེ་ལྡེ་མཛེས་པས་རྣམ་པར་བརྒྱན། །རྐང་ལ་ལྕགས་ཀྱི་ལྷྭམ་གྱོན་མ། །ཕྱིར་ཕྱོགས་དྲིལ་གྱི་ཕ་ལ་བཅིབས། །འབྱུང་པོ་ཕལ་ཆེར་ཀུན་གྱི་བདག །འབྱུང་པོ་ཡོངས་ཀྱི་ཤ་ལ་ཆེམ་ཆེམ་གསོལ། །མི་ཁྲག་ཆང་གི་ར་རོས་མྱོས། །དཔག་ཚད་བརྒྱད་ཁྲིར་བཞི་སྟོང་ཡང་། །མཚན་མོ་གཅིག་ལ་ཁྱབ་པར་ཉུལ། །རྣལ་འབྱོར་ཆེན་མོ་ཨ་ལ་ལ། །དབང་ཕྱུག་ཆེན་མོ་ཨ་ལ་ལ། །གཤིན་རྗེའི་ལྕམ་གཅིག་ཨ་ལ་ལ། །བདུད་ཀྱི་ཡུམ་གཅིག་ཨ་ལ་ལ། །མདོག་བཟང་ནག་མོ་ཨ་ལ་ལ། །ཨེ་མ་ནད་དང་རིམ་གྱི་བདག་མོ་ཆེན་མོ་ཁྱོད། །རེ་འགས་དྲག་ཏུ་ཁྲོས་པའི་ཚེ། །སྐུ་ནི་ནག་མོ་ཆེན་མོ་ལ། །བུད་མེད་ནག་མོས་སྟོང་ཁམས་ཁེངས། །རལ་པའི་སེ་ལན་མུན་ལྟར་གཏིབ། །སྤྱན་ནས་ཁྲག་གི་མཆི་མ་འཛག །ཤང་ནས་ནད་ཀྱི་རླངས་པ་འཐུལ། །ཞལ་ནས་འོ་དོད་དྲག་པོར་འབོད། །གཡས་ནས་མི་ལྤགས་གཡང་གཞི་རྡེབས། །གཡོན་ན་ནད་ཀྱི་རྐྱལ་བ་བསྣམས། །ནད་དང་རིམ་གྱི་བདག་མོ་ཆེན་མོ་ཁྱོད། །འདིར་གཤེགས་བརྒྱན་གྱི་གཏོར་མ་འདི་བཞེས་ལ། །བདག་གིས་བཅོལ་པའི་ཕྲིན་ལས་འགྲུབ་པར་མཛོད། །དེ་ནས་དམག་བསྐུལ་བྱེད་ཡིན། བྷྱོ། མ་རི་སྨུག་ནག་དགུ་ཀླུང་ནས། །བདུད་ཀྱི་ཡུམ་ལ་གཤིན་རྗེའི་ལྕམ། །བདུད་མོ་ནག་མོ་རེ་མ་ཏི། །རྡོ་རྗེ་ཁྲོས་མོ་གཏུམ་བག་ཅན། །བལ་ནད་རྒྱུ་གཟེར་བདག་མོ་ཁྱོད། །སྐྱེ་ཤི་གཉིས་ཀྱི་མངའ་བདག་མོ། །ཐོད་པ་དགུ་བརྩེགས་མཁར་ན་བཞུགས། །རལ་པ་ཁྲག་གི་ཆར་པ་འབེབས། ། སྤྱན་དམར་རྡོ་རྗེའི་གློག་སྟོང་འགྱུ། །རྐན་སྒྲ་རྡབས་པས་བདུད་དཔུང་འཇོམས། །མཁའ་ལ་བཞད་པས་གནམ་ལྕགས་སེར་ཆེན་འབེབས། །ཕྱག་ན་གསོད་པའི་ཁྲམ་བམ་ཐོགས། །ནད་ཀྱི་རྐྱལ་པ་དགྲ་ལ་བྷྱོ་བཟློག་མཛོད། །ཐོད་དམར་རྡོ་རྗེ་ཕྲེང་བས་བརྒྱན། །བདུད་ཀྱི་དྲིལ་ནག་རྐང་གསུམ་བཅིབས། །བདུད་ཀྱི་མངའ་བདག་རྗེས་གཅོད་མ། །དགྲ་བོ་གསོད་པའི་དུས་ལ་བབ། བྷྱོ། སྤྲུལ་པ་ཕྱག་བརྙན་ཀླུ་མོ་ཆུ་སྲིན་གདོང་། །སྦྲུལ་ནག་ཆེན་པོའི་གདུ་བུ་ཅན། །སུ་དང་འཕྲད་ན་སྲོག་ལ་རྒོལ། །དགྲ་བོ་གསོད་པའི་དུས་ལ་བབ། །རྡོ་རྗེ་བ་ལམ་དྲེལ་སྣ་མ། །ཁྲག་གི་རལ་པའི་ཅོད་པཎ་ཅན། །སྐུ་ལ་རེ་ལྡེ་གོས་སུ་གསོལ། །ཕྱག་ན་ཞིང་གི་གཡང་གཞི་རྡེབས། །ཆིབས་སུ་དྲིལ་ནག་རྐང་གསུམ་བཅིབས། །དུས་ལ་བབ་པོ་ས་མ་ཡ། །རྡོ་རྗེ་ཁྲི་སྨན་ས་ལེ་མ། །གསེར་གཡུ་སྤེལ་མའི་ཆུ་འཁོར་ཅན། །སྐུ་ལ་ལེ་བརྒན་གོས་སུ་གསོལ། །ཕྱག་ན་ཆུ་སྲིན་རྒྱལ་མཚན་ཐོགས། །ཆིབས་སུ་སོལ་བྱ་རོག་མོ་བཅིབས། །འདིར་སྤྱོན་བཅོལ་པའི་ཕྲིན་ལས་འགྲུབ་པར་མཛོད། །དེ་ནས་དྲག་བསྐུལ་བྱེད་པ་ནི། བྷྱོ། མ་གཡེལ་མ་གཡེལ་དམ་ལ་དགོངས། །མ་གཡེལ་མ་གཡེལ་མ་ཅིག་མ། །མ་གཡེལ་མ་གཡེལ་བདུད་མོའི་ཚོགས། །མ་ཅིག་ལྷ་མོ་དཔལ་ལྡན་མ། །རྡོ་རྗེ་ལྷ་མོ་རེ་མ་ཏི། །ནད་དང་རིམ་གྱི་མངའ་བདག་མོ། །སད་དང་སེར་བའི་སྣ་འདྲེན་མ། །དམ་ཉམས་ཀུན་གྱི་སྲོག་གཅོད་མ། །དམ་ཚིག་ཅན་གྱི་གྲོགས་མཛད་མ། །རྣལ་འབྱོར་ཡོངས་ཀྱི་དགྲ་བླ་མོ། །སྐྱེ་འགྲོའི་སྲོག་ལ་མངའ་མཛད་མ། །འབྱུང་པོ་ཡོངས་ཀྱི་རྗེ་མོ་ཁྱོད། །དགྲ་བོ་དུས་མཐའ་སྡུད་བྱེད་མ། །སྲིད་གསུམ་ཟ་བའི་ལས་མཁན་མོ། །ཁམས་གསུམ་ཟ་བའི་མཐུ་མོ་ཆེ། །མཐིང་ནག་གཅེར་བུ་ཁྲག་གི་རལ་པ་ཅན། །མིག་ནས་ཁྲག་གི་མཆི་མ་འཛག །ཤང་ནས་ནད་ཀྱི་དུད་པ་འཐུལ། །ཆིབས་སུ་དྲིལ་སྔོན་རླུང་གཤོག་བཅིབས། །རེ་འགའ་ཁྲོས་ན་ཅ་ཅོ་བྱེད། །སྲིན་པོའི་བོང་བུ་དམར་གྭ་བཅིབས། །གཡས་ནས་གདུག་པའི་རལ་གྲི་ཕྱར། །གཡོན་ནས་གདུག་པའི་ཐོད་ཁྲག་ཐོགས། །སྐྱེ་འགྲོའི་སྲོག་ལ་མངའ་མཛད་མ། །མ་གཡེལ་མ་གཡེལ་དམ་ལ་དགོངས། །མ་ཅིག་བདུད་མོ་རེ་མ་ཏི། །ཕྱག་བརྙན་བདུད་མོ་འབུམ་སྡེ་རྣམས། །བུ་ལ་སྡང་བའི་དགྲ་བྱུང་གིས། །མ་ཅིག་ལྷ་མོ་རབ་མདའ་ལོག །སྡང་བའི་དགྲ་ལ་ཕྲིན་ལས་མཛོད། །མ་ཅིག་ཐུགས་དམ་དུས་ལ་བབ། །བཅོལ་པའི་ལས་ལ་མཐུ་མ་ཆུང་། །དམ་ཚིག་གཉེན་ལ་མ་འདའ་བར། །བུའི་ཕྲིན་ལས་མྱུར་དུ་སྒྲུབས། །བྷྱོ། མ་ཅིག་བདུད་མོ་རེ་མ་ཏི། །ཁྱོད་ཀྱི་ཐུགས་ཀྱི་དཀྱིལ་འཁོར་ནས། །ལས་ཀྱི་ཕོ་ཉ་བདུད་མོ་འབུམ། །ནག་མོ་རྔམ་པའི་རལ་པ་ཅན། །མ་བདུད་ནག་མོ་འཁོར་དང་བཅས། །སྔགས་པས་བོས་ཤིང་བསྐུལ་བའི་ཚེ། །མིག་ནས་ཁྲག་གི་མཆིལ་མ་འཛག །ཁ་ནས་གདུག་པའི་ངན་སྔགས་བཟློག །ཞལ་ནས་ཀུས་འདེབས་སྟོང་གསུམ་འགེངས། །ནད་ཀྱི་ཁ་ཕུས་དགྲ་ལ་ཐོབས། །མཚན་གཅིག་དཔག་ཚད་ལྔ་རྒྱར་རྒྱུག །མ་ཅིག་བདུད་མོ་འཁོར་ཚོགས་རྣམས། །བདག་གི་ལས་སུ་ཁྱེད་མཆོད་ན། །བདག་ལ་སྡང་བའི་དགྲ་བོ་འདི། །ལོ་དང་ཟླ་བ་མ་བཞག་པར། །ཞག་དང་ཟ་མའི་དུས་མཐའ་སྡུས། །སྲོག་རྩ་དམར་པོ་རྒལ་ནས་གཅོད། །སྙིང་ཁྲག་དྲོན་མོ་ཁ་ནས་དྲོངས། །ཀུན་གཞིའི་རྣམ་ཤེས་གཞི་ནས་ཤིག །ཕུང་པོ་ལྔ་པོ་གཏན་ནས་ཐལ་བར་རློག །མ་ལ་སྡང་བའི་དགྲ་བྱུང་གིས། །མ་གཅིག་བུ་ལ་མི་དགོངས་སམ། །མིང་ལ་སྡང་བའི་དགྲ་བྱུང་ན། །སྲིང་གཅིག་ཕྲིན་ལས་མི་མཛད་དམ། །བདག་ལ་སྡང་བའི་དགྲ་བྱུང་ན། །བྲན་གཅིག་རྗེ་ལ་མི་མཛད་དམ། །མ་མོ་ནག་མོ་རེ་མ་ཏི། །ཁྱོད་ཀྱི་ལས་ཀྱི་ཕོ་ཉ་ནི། །བདུད་མོ་ནག་མོ་འབུམ་ཕྲག་འགྱེད། །ནག་མོ་འབུམ་སྡེའི་འཁོར་ཚོགས་རྣམས། །གོས་སུ་མི་ལྤགས་རློན་པ་གྱོན། །ཟས་སུ་མི་ཤ་རྟ་ཤ་ཟ། །སྐོམ་དུ་མི་ཁྲག་རྟ་ཁྲག་འཐུང་། །ལས་སུ་སངས་རྒྱས་བསྟན་པ་བསྲུངས། །སྲོག་གཅོད་ལས་ལ་ཤིན་ཏུ་དགྱེས། །ཕྱག་གཡས་གྲི་གུག་འབར་བ་ཡིས། །བསྟན་ལ་སྡང་བྱེད་སྲོག་རྩ་གཅོད། །ཕྱག་གཡོན་ཐོད་ཁྲག་དམར་པོ་ཡིས། །དགྲ་བོའི་སེམས་ཀྱི་མར་མེ་སོད། །མ་བདུད་ནག་མོ་འཁོར་ཚོགས་རྣམས། །སྔོན་གྱི་དམ་བཅའ་མ་གཡེལ་བར། །ཤ་ཁྲག་དམར་གྱི་གཏོར་མ་འདི་བཞེས་ཤིག །ཁྱོད་ལ་ཕྲིན་ལས་བཅོལ་བ་ནི། །སངས་རྒྱས་བསྟན་པ་འཇིགས་བྱེད་ཅིང་། །སློབ་དཔོན་ལ་ནི་བརྙས་བྱེད་པ། །བདག་ལ་སྡང་བའི་དགྲ་བོ་འདི། །མ་བདུད་ནག་མོ་འཁོར་བཅས་ཀྱི། །རིང་པར་ཁུག་ལ་གཟུགས་ལ་ཕོབ །འདུ་བ་རྣམ་བཞིའི་ནད་རྣམས་ཁོང་དུ་སྡུས། །དྲན་པ་མེད་པར་སྨྱོ་འབོག་བརྒྱལ་དུ་ཆུག །གཞུངས་པ་དཀར་པོ་སྲོག་རྩ་རྒལ་ནས་ཆོད། །མཁལ་མ་གཡུ་སྒོང་གསང་བའི་གནས་ནས་དྲངས། །སྲོག་རྩ་དམར་པོ་ལུས་ཀྱི་དཀྱིལ་དུ་ཆོད། །ཁ་ན་ལག་ཆུག་ཁོང་བའི་སྙིང་ཕྱུངས་ཤིག །དཔལ་གྱི་མདངས་འཕྲོག་སྐྱེ་བའི་རྒྱུན་ཐག་ཆོད། །ཁོང་ཁྲག་དྲོན་མོ་ཁ་ནས་སྐྱུགས་སུ་ཆུགས། །ཀླད་ཁྲག་དྲོན་མོ་མཆིན་པའི་གསེབ་ནས་དྲོངས། །དོན་སྙིང་རྣམ་ལྔ་ལུས་ཀྱི་རྒྱབ་ཏུ་ཕྱུང་། །ཕུང་པོ་ལྔ་པོ་གདན་ནས་ཐལ་བར་རློག །དྲན་པའི་རྣམ་ཤེས་ཙིཏྟའི་དཀྱིལ་ནས་དྲོངས། །ལྷན་ཅིག་སྐྱེས་པའི་ལྷ་དང་ཕྱེས། །མཉམ་པོར་འོངས་བའི་བདུད་དང་སྤྲོད། །འགོ་བའི་ལྷ་ལྔ་ལག་ཏུ་ཁུག །སྔགས་དང་རྫས་ཀྱི་བསྲུང་མ་འཕྲོག །ས་ལ་བརྟེན་པའི་བརྟེན་ཕུར་ཕུད། །གནམ་ན་འཇུ་བའི་འཇུ་ཐག་ཆོད། །གྲི་ཐབས་ཉི་ཤུ་རྩ་ལྔར་སོད། །བདུན་བརྒྱུད་ཚུན་ཆད་མ་བཏང་པར། །གཏིང་ནས་དྲོངས་ལ་རྩད་ནས་ཆོད། །མ་ཅིག་ཐུགས་དམ་དུས་ལ་བབ། །བཅོལ་པའི་ཕྲིན་ལས་འགྲུབ་པར་མཛོད། །དེ་ནས་མ་གཅིག་མཁའ་འགྲོའི་དམག་བསྡུད་པ་ནི། བྷྱོ། དཔལ་ལྡན་ལྷ་མོ་རེ་མ་ཏི། །རླུང་ནག་འཚུབ་མ་ཀྱི་ལི་ལི། །སྟོང་གསུམ་མཁའ་འགྲོའི་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །བསྐལ་པའི་མེ་རི་སྟོང་གསུམ་འུར་རུ་རུ། །སྲིད་གསུམ་རྩེ་ནས་དམག་བསྡུད་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་བའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །ཡུངས་ཀར་རྦབ་ཐུན་སྟོང་གསུམ་སི་ལི་ལི། །འདོད་ཁམས་ལྷའི་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། བྷྱོ། མ་ཅིག་དཔལ་ལྡན་རེ་མ་ཏི། །ནད་ཀྱི་ན་བུན་སྟོང་གསུམ་འཐིབས་སེ་འཐིབས། །ལྷ་སྲིན་སྡེ་བརྒྱད་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །ཁྲག་གི་ཆར་པ་སྟོང་གསུམ་ཤ་ར་ར། །གཤིན་རྗེའི་ཡུལ་ནས་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །ཚོན་གྱི་གྲུ་གུ་སྟོང་གསུམ་ཉི་ལི་ལི། །བདུད་རྣམས་ཡོངས་ཀྱི་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །ཕུར་པའི་རྩེ་མོས་སྟོང་གསུམ་ཁྲ་ལ་ལ། །བཙན་རྣམས་ཡོངས་ཀྱི་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །བོང་བུའི་སྙན་མཆོག་རྒྱུགས་སེ་རྒྱུག །སྲིན་པོའི་ཡུལ་དུ་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །དུག་གི་ཁ་རླང་སྟོང་གསུམ་འུ་རུ་རུ། །ཀླུའི་ཡུལ་ནས་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །ནག་མོ་དམག་ཚོགས་སྟོང་གསུམ་གང་། །མཁའ་འགྲོ་ཡོངས་ཀྱི་དམག་བསྡུས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོ་མི་ནོར་རྡུལ་དུ་རློག །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །བྷྱོ། མ་ཅིག་དཔལ་ལྡན་རེ་མ་ཏི། །སྐུ་ཡི་སྤྲུལ་པས་ནམ་མཁའ་ཁེངས། །དགྲ་བོའི་གནམ་གྱི་འཇུ་ཐག་ཆོད། །གསུང་གི་སྤྲུལ་པས་བར་སྣང་ཁེངས། །དགྲ་བོ་མི་ནོར་འུབ་ཀྱིས་བསྡུས། །ཐུགས་ཀྱི་སྤྲུལ་པས་ས་གཞི་ཁེངས། །དགྲ་བོ་ཡུལ་མཁར་རྨིང་ནས་སྐྱེལ། །མ་ལ་བཅོལ་ནས་མཐུ་མ་ཆུང་། །མ་ཅིག་བཅོལ་པའི་ཕྲིན་ལས་འགྲུབ་པར་མཛོད། །གསེར་སྐྱེམས་གཏོར། ཟོར་ལམ་དབྱེ་སྲིན་མོ་ཟ་ལམ་གོམ་པ་བདུན་ཅུའི་སྣར་གཏོར་མ་བཏབ། དམོད་ཕྲེང་རྒྱས་པར་བྱས། དེ་ནང་དུ་ལོག་ལ་བསྲུང་འཁོར་བསྒོམ། བསྒྲུབ་པའི་དུས་སུ་བསྙེན་པ་ནི། ༀ་མ་ཧཱ་ཀ་ལི་རེ་མ་ཏི། མ་མ་རུ་ལུ་རཀྴ་རེ་མ་ཏི། རུ་ལུ་རུ་ལུ་བྷྱོ་ཛ་ཛཿ ༀ་རུ་རུ་ཙ་དུར་ཨ་ཤུག་མེ། པྲ་ཏི་རུ་ཏྲ་ཁ་ཤག་རག་མོ་ཧཱུྃ། རཀྴ་ཙིཏྟ་ས་མ་ཡ་ཀུ་རུ་ཁ་ཙི་ཏ་ནན། ཨ་རུ་རུ་བེ་རུ་ཧཱུྃ། ཏི་པྲ་བ་ཏི་སི། རགྨོ་སྙིང་ཁ་ལ་རཀ་མོ་ཐུན་བྷྱོ་ཛཿཛཿ རུ་ལུ་རེ་མ་ཏི་ས་མ་ཡ་པྲ་མ་ཧཱ་ཏི། པྲ་མ་རག་མོ་རུ་ལུ་རུ་ལུ་བྷྱོ་ཛ་ཛཿ ཁ་རཀ་ཏི་ཁེཾ་ཛ་ཛཿ ཁ་ལེ་རཀ་མོ་ཐུན་བྷྱོ་ཐུན་མ་མོ་བྷྱོ། ཧཱུྃ་རགྨོ་ཪྣྲྀ་ཤ་ཀུ་རུ་ཐུན་རྦད། རག་མོ་ཨརྱ་ཛ་ཛཿ ཏི་ཁེཾ་ཁ་ལེ་བྷྱོ་བྷྱོཿ ས་མ་ཡ་དགྲ་བོ་ཪྣྲི་མ་ར་ཡ་རྦད་རྦད་སོད་སོད་ཛ་ཛཿ བསྒྲུབ་པའི་དུས་སུ་འབུམ་བཟླའོ། །ཧོ། དགོངས་སུ་གསོལ་ལོ། །སྔོན་རི་མ་ལ་ཡི་རྩེ་མོ་ནས། དཔལ་ལྷ་མོ་འཁོར་བདུད་མོ་འབུམ་དང་བཅས་པ། དཔལ་ཕྱག་ན་རྡོ་རྗེ་ལ་ཁས་བླངས་ཤིང་དམ་བཅས་པ་ནི། ཕྱི་རབ་ཀྱི་རྣལ་འབྱོར་པ་རྣམས་ཀྱི་ལྷ་མོ་ཁྱོད་ཚུལ་བཞིན་དུ་བསྒྲུབ་ནས་བདག་གི་ཅི་བཅོལ་བའི་ལས་བྱེད་དོ། །ཞེས་ཁས་བླང་བའི་དམ་ལས་མི་འདའ་བར་རྣལ་འབྱོར་པ་བདག་གི་ལྷ་མོ་ཁྱོད་ཚུལ་བཞིན་དུ་བསྒྲུབ་པར་བགྱིད་དོ། །དམ་རྫས་ཀྱི་གཏོར་མ་འདི་ཡང་ལྷ་མོ་ནག་མོ་འཁོར་བདུད་མོ་འབུམ་དང་བཅས་པ་རྣམས་ལ་འབུལ་ལོ། །དམ་ཉམས་དགྲ་བོའི་སྙིང་སྲོག་རྣམ་པར་ཤེས་པ་དེ་རྣམས་དཔལ་ལྡན་ལྷ་མོ་འཁོར་བདུད་མོ་འབུམ་དང་བཅས་པ་རྣམས་ཀྱིས་ཟ་སྐལ་དང་། འཐུང་སྐལ་དང་། རྔམ་སྐལ་དུ་བཀའི་གཏོར་མ་དམར་པོ་འདི་དང་མཉམ་པོར་བཞེས་ཤིག །རོལ་ཅིག །ཁ་ཁ་ཁཱ་ཧི་ཁཱ་ཧི། མཐུ་མ་ཆུང་། རྩལ་མ་ཞེན་ཅིག །ལོ་དང་ཟླ་བར་མ་བཞག་པར་ཞག་དང་ཟ་མར་མ་བཞག་པར་ད་ལྟ་ཉིད་དུ་སྒྲོལ་ཅིག །དེ་ནས་མཆོད་བསྟོད་བྱས་པ་ནི། གཞུང་གཞན་དུ་ཤེས་པར་བྱའོ། །དགེ་རྩ་བྱང་ཆུབ་ཏུ་བསྔོའོ། །ཡི་གེ་བརྒྱ་པས་ལྷག་ཆད་ཁ་སྐོང་ལ། བྲིས་སྐུ་ཡོད་ན་སྤྱན་དྲངས་པའི་ཡེ་ཤེས་པ་བརྟན་བཞུགས་བྱ། མེད་ན་ཡེ་ཤེས་པ་གཤེགས་ཤིང་། དམ་ཚིག་པ་རང་གི་སྙིང་ཁར་བསྡུ། དེ་ནས་ཤིས་པ་བརྗོད་པ་ནི། ཁམས་གསུམ་དབང་ཕྱུག་དཔལ་ལྡན་ལྷ་མོ་ཡི། །སོགས་བྱའོ། །བླ་མ་ཀཿཐོག་པའི་ཞལ་ཤེས་རྫོགས་སོ།། །།
དཔལ་ལྡན་ལྷ་མོའི་བསྐང་མདོས།
དཔལ་ལྡན་ལྷ་མོའི་བསྐང་མདོས་བཞུགས་སོ། །དཔལ་ལྡན་ལྷ་མོའི་བསྐང་མདོས་ཀྱི་བཅའ་ཐབས་ཞེས་བྱ་བ་ནི། དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །དཔལ་ལྡན་ལྷ་མོའི་བསྐང་མདོས་འདི་ནི། སྔགས་པ་དམ་ཚིག་ཉམས་པ་དང་། ནད་ཚབ་ཆེན་པོ་ཕོག་གམ། ཡི་དྭགས་ཆེན་པོ་ལུས་ཞུགས་གམ། གདོན་བགེགས་བཀྲ་མི་ཤིས་པ་བྱུང་ན་འདི་ལ་མདོས་བྱ། ལྷ་བསྙེན་ཅི་རིགས་པ་ལ་སོགས་ཏེ། གང་ལའང་འདི་བྱིན་རླབས་ཆེའོ། །དེ་ཡང་ལྷ་མོའི་བསྙེན་པ་གོང་དུ་སོང་ནས། མཆོད་རྫས་ཡོ་བྱད་བསགས་པ་ནི། ཤ་སྣ། ཁྲག་སྣ། མཐུན་རྫས་ཨ་མྲྀ་ཏ། དར་གདུག་འོད་ཟེར་སོ་སོའི། རིན་ཆེན་སྣ་ལྔ། རྒྱ་སྤོས། མེ་ཏོག་ཚོགས་པར་བྱ་ལ། བཤོས་བུ་བསླང་བ་ནི། གསང་ཕྱེ་བྲེ་གང་ལ། གཏོར་མ་སྟོད་ཟུར་གསུམ་པ་གཅིག་པ་ལེགས་པར་བྱ་ལ་ངོས་གཅིག་པདྨ་རཀྟའམ་མཚལ་གྱིས་བྱུགཿ །ངོས་གཅིག་ཁ་དེ་ཞིང་ཆེན་དཀར་པོ་བྱ། ངོས་གཅིག་ཀ་དུར་སོལ་གྱི་བྱུག །ངོས་གསུམ་དུ་ལུག་ནག་བདུན། བྱ་ནག་བདུན། ར་ནག་བདུན། བཤོས་བུའི་རྩེ་མོ་ལ་ལྷ་མོའི་འོད་ཟེར་སེར་པོ་བཞིན། ཕྱག་ན་ཁྲམ་ཕྱེས་ཀྱི་ཤེད་གཏོར་བྱ་བྲེ་ལ་བཞག་གོ། །དེ་བྱ་བ་དཔོན་སོར་གསུམ་བྱས་ལ་བཙུགས། དེའི་སྟེང་དུ་དར་ནག་གདུགས་ཕུབ། ནམ་མཁའ་མཐིང་ནག་གཅིག་བཙུགས། དེའི་ཕྱི་རིམ་ཡེ་ཤེས་མཁའ་འགྲོ་བཅུ་བཞི་ལ་ལུག་བཅུ་བཞི། དམན་མོ་ལྔ་བཅུ་རྩ་བརྒྱད་ལ་བྱ་ལྔ་བཅུ་རྩ་བརྒྱད། དབྱིངས་ཀྱི་ཡུམ་དྲུག་ལ་ལྕོང་ཁྲ་དྲུག །དེའི་རྒྱབ་ཏུ་འབྱུང་པོའི་ལོ་སྐོར་བཅུ་གཉིས། གཏོར་མའི་རྩེ་མོ་ལ་དཔལ་ལྡན་ལྷ་མོ་བོང་བུ་ལ་བཅིབ་པ། གཡས་སུ་བ་ལམ་དྲིལ་ནག་ལ་ཞོན་པ། གཡོན་དུ་ཁྲི་སྨན་མ་བྱ་མོ་ལ་བཅིབ་པ། རྒྱབ་ཏུ་སྐྱི་མཐིང་ཤ་བ་ལ་ཞོན་པ། ཁྱུང་སེང་གེ་དྲུག །བྱེ་བྲག་གི་རྩེ་མོར་གཟུག་གོ། །ཆུ་གནས། རྔོགས་ཆགས་རྣམས་རྩ་བར་གཟུག་གོ། །སྡེ་བརྒྱད་བཤོས་བུ། དེ་འདྲ་བའི་གཟུགས་འགྲོས་ཐམས་ཅད་ཚང་བར་བྱའོ། །དུག་ཁྲག །མཆན་གསེར་གཡུ་དངུལ་གསུམ། བྱེ་རུ། ཟངས་ལྕགས། ཟ་འོག་གིས་བེར་ཆེན། དར་ཚོན། རྔ་མཚོན་སྔོན་དམར། ལ་སོགས་ཏེ་མདའ་དར་ཡོ་བྱད་ཐམས་ཅད་ཚང་བར་བྱ་ལ། བསྐང་ཚོགས་སྤྱི་དང་མཐུན་པར་བྱའོ། །དེ་ནས་དུག་བྱུང་། ཁྲུས་གསོལ་མཆོད་རྫས་བྱིན་གྱིས་རླབས་ལ། ཡི་དམ་གྱི་ང་རྒྱལ་དང་ལྡན་པའི་འདི་སྐད་དོ། །ཧཱུྃ། དཔལ་ལྡན་ཐུགས་དམ་གཉེན་པོ་བསྐུལ། །ཐུགས་དམ་གཉེན་པོ་མི་བསྐུལ་དུ། །འཁོར་གྱི་འབང་ལ་བཀའ་ནན་ཆུང་། །བཙན་བཙུན་ཀུན་ལ་བཀའ་ནན་ཆུང་། །ད་ནི་དཔལ་ལྡན་ཁྱོད་ལ་ཚང་བག་ལོ། །ཁྱོད་ཀྱི་ཆོ་ལ་ང་རེ་མཁས། །ནམ་མཁའི་ཁམས་ལ་བཞུགས་ཙམ་ན། །སེམས་ཅན་སྐྱེ་ཤི་ལ མ་སྟོན་མ། །དེ་ཡང་བྱང་ཤར་རེ་མ་ཏི། །དམར་ཆེན་གཏོར་མ་འདི་བཞེས་ལ། །ཡོན་བདག་གླུད་བྱོལ་དགྲ་ལ་ཐོངས། །གནོད་བྱེད་བར་ཆད་བགེགས་ལ་ཐོང་། །རི་རབ་ཟམ་ལ་བཞུགས་པའི་ཚེ། །འབར་མ་མེ་ཁྱེར་གློག་འཕྲེང་འཛིན། །ཀླུ་རྒྱལ་ཀུན་གྱི་དགྱེས་སྡེ་མ། །ཀླུ་བྲན་ཀུན་གྱི་གཙོ་མོ་མཛད། །དེ་ཡང་བྱང་ཤར༴ དམར་ཆེན་གཏོར་མ༴ ཡོན་བདག་གླུད་བྱོལ༴ གནོད་བྱེད་བར་ཆད༴ མ་བདུན་གཙོ་མོ་མཛད་ཙམ་ན། །རྡོ་རྗེ་དཀར་མོ་དབང་ཕྱུག་མ། །གསང་སྔགས་འཆང་གི་བཀའ་ཉན་མ། །དེ་ཡང་བྱང་ཤར༴ དམར་ཆེན༴ ཡོན་བདག༴ གནོད་བྱེད༴ རྟ་མགྲིན་གཟུངས་མ་མཛད་པའི་ཚེ། ། བར་སྣང་ཁམས་ལ་ཁྱབ་པར་འཕྱོ། །དེ་ཡང་བྱང་ཤར༴ དམར་ཆེན༴ ཡོན་བདག༴ གནོད་པའི༴ སྲིན་མོ་བཞིའི་གཙོ་མོ་མཛད་པའི་ཚེ། །དཀར་མོ་ཉི་མའི་སྤྱན་གཅིག་མ། །གླིང་བཞི་མགྱོགས་མ་ལྷའི་སྲིང་། །དེ་ཡང་བྱང་ཤར༴ དམར་ཆེན༴ ཡོན་བདག༴ གནོད་པའི༴ སྲིན་མོ་བདུན་ཅུའི་ཕོ་མོའི་གཙོ་མོ་མཛད། །གནོད་བྱེད་སྲོག་འཕྲོག་སྲིན་མོ་འཁྲུང་འཁྲུང་མོ། །བརྒྱའི་གཙོ་མོ་ལས་མཁན་མ། །དེ་ཡང་༴ དམར་ཆེན༴ ཡོན་བདག༴ གནོད་པའི༴ བརྟན་མ་བཅུ་གཉིས་གཙོ་མོ་མཛད། །མ་བཙུན་ཨུག་ཆོས་དབྱར་མོ་སིལ། །དཀྱིལ་འཁོར་སྐྱོང་བར་ཁས་བླང་པས། །དེ་ཡང་༴ དམར་ཆེན༴ ཡོན་བདག༴ གནོད་པའི༴ བཟློག་བྱེད་མའི་དུས་ལ་བབ། །བཟློག་གོ་དམར་ཆེན་གཏོར་མས་བཟློག །མཚན་ཞིང་དུར་ཁྲོད་གནས་སུ་ཉུལ། །རྣལ་འབྱོར་ཐ་དག་ཚོགས་ཁང་འགྲིམས། །རྣལ་འབྱོར་དམ་ཚིག་གཙང་མི་གཙང་། །མཆེད་ལྕམ་བརྩེ་གདུང་ཆེའམ་ཆུང་། །སློབ་དཔོན་ཏིང་འཛིན་དྲོད་ཉུལ་མ། །ལེགས་ཉེས་གཉིས་ཀྱི་སྟོང་འཛིན་ཅིང་། །དམ་ཚིག་ཉམས་པའི་རྗེས་གཅོད་མ། །ཉིད་ཀྱི་སྐུ་མདོག་ནག་པོ་ལ། །རལ་པ་ནག་པོ་གཏིང་ཟབ་བཀང་། །རལ་བུའི་ཟར་བུ་གཡས་ནས་གཡོན་དུ་འཁྱིལ། །ཁ་ནས་མི་ཁྲག་རྟ་ཁྲག་འཛག །མིག་ནས་ཁྲག་འཛག་ཟུ་ལུ་ལུ། །དྲེལ་རྟ་ནག་གསུམ་སྤྱད་པའི་ཚེ། །དཔག་ཚད་བརྒྱད་ཁྲི་བཞི་སྟོང་ཡང་། །ཡུད་ཙམ་མཚན་མོ་གཅིག་གིས་ཁྱབ། །རྣལ་འབྱོར་ཆེན་མོ་ཨ་ལ་ལ། །དབང་ཕྱུག་ཆེན་མོ་ཨ་ལ་ལ། །ཁྱོད་ཀྱི་ལག་པ་གཡས་པ་ནས། །བདུད་ཀྱི་ཁྲམ་བམ་ནམ་མཁར་ཕྱར། །སྐྱེ་འགྲོའི་གཟུགས་སུ་སྣང་བ་ཀུན། །སང་ཕོད་དེང་སང་སུ་འཆི་བ། །དོ་ཚིགས་ཁྱོད་ཀྱི་ཁྲམ་ལ་ཐོབ། །རྒྱུ་འབྱོར་ཡོན་བདག་འཁོར་བཅས་ཀྱི། །སྐུ་གླུད་གཏོར་མ་འདི་བཞེས་ལ། །བདུད་ཀྱི་ཁྲམ་ཁ་ད་ཕྱེས་ཤིག །ཁྱོད་ཀྱི་ལག་པ་གཡོན་པ་ནས། །བཙན་གྱི་ཤྭོ་རྡིལ་དཀར་ནག་བཀྲམ། །ཤྭོ་ལ་མི་ཐེབ་མི་སྲིད་ཀྱིས། །ཤྭོ་ལ་བབ་པར་གྱུར་པ་ན། །རྒྱུ་འབྱོར་ཡོན་བདག་འཁོར་བཅས་ལ། །སྲོག་གླུད་གཏོར་མ་འདི་བཞེས་ལ། །བཙན་གྱི་ཤྭ་དྷིལ་ད་གཏོར་ཅིག །ཁྱོད་ཀྱི་མཆན་ཁུང་གཡོན་པ་ནས། །བྱང་དམར་དཀྱུས་ཀྱི་བམ་པོ་རྦེད། །སྐྱེ་འགྲོའི་གཟུགས་སུ་སྣང་བ་ཀུན། །སང་ཕོད་དེང་སོང་སུ་འཆི་བ། །དོ་ཚིགས་ཁྱོད་ཀྱི་ཁྲམ་ལ་འདེབས། །རྒྱུ་འབྱོར་ཡོན་བདག་འཁོར་བཅས་ལ། །སྲོག་གླུད་གཏོར་མ་འདི་བཞེས་ལ། །བྱང་དམར་དཀྱུས་ཀྱི་བམ་པོ་རྦེད། །ཁྱོད་ཀྱི་མཆན་ཁུང་གཡོན་པ་ནས། །ནད་ཀྱི་རྐྱལ་པ་སྔོན་དམར་ལ། །སྦྲུལ་ནག་ལྔ་བརྒྱའི་ཁ་འཆིང་ཅན། །ནད་ཡམས་དེ་ནི་དགྲ་ལ་གཏོར། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་འབྲས་བུའི་ཆོས་དར་ཏེ། །རྣལ་འབྱོར་གྲོང་བསྙེན་དར་དུས་ལ། །དགེ་སྡིག་འཆོལ་བར་སྤྱད་དུས་ལ། །རྣལ་འབྱོར་ཡང་ཉམས་མ་མོ་འཁྲུག །དེ་ཚེ་ཁྱོད་ཀྱི་བསྟན་པ་དར། །དེ་ཚེ་སྲིད་པའི་མ་མོ་འཁྲུག །མ་མོ་འཁྲུག་པའི་རྟགས་ཡིན་པས། །བཞི་བརྒྱ་རྩ་བཞིའི་ནད་རྣམས་དང་། །ཡེ་འགྲོགས་སུམ་བརྒྱ་དྲུག་ཅུ་དང་། །གློ་བུར་བརྒྱད་ཅུ་རྩ་གཅིག་བྱུང་། །དུས་མིན་འཆི་བ་རྣམ་བརྒྱད་དད། །ནད་ཀྱང་མ་མོ་ཁྱོད་ཀྱི་ནད། །ཁྲག་ཀྱང་མ་མོ་ཁྱོད་ཀྱི་ཁྲག །རིམས་ཀྱང་མ་མོ་ཁྱོད་ཀྱིས་རིམས། །དེ་རིང་ཡོན་བདག་འཁོར་བཅས་ཀྱི། །སྲོག་གླུད་གཏོར་མ་འདི་བཞེས་ལ། །ནད་ཀྱི་རྐྱལ་པ་ཁ་ཆིང་ལ། །མཚོན་གྱི་གྲུ་གུ་སླར་རྡོག་ཅིག །ནད་ཁ་ཆོད་ལ་རིམས་ཁ་བསྒྱུར། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་བོན་ལྟར་གྱེར་བ་དང་། །དགེ་སྡིག་འཆོལ་བར་སྤྱོད་པའི་ཚེ། །དཔལ་ལྡན་ལྷ་མོ་ཐུགས་འཁྲོས་པས། །ཁ་རླངས་སེར་པོ་བཏང་བའི་ཚེ། །བུད་མེད་ནག་མོ་ས་གཞི་གང་། །ནད་ཀྱིས་ན་བུན་སྤྲིན་ལྟར་གཏིབ། །དེ་ཚེ་མཚོན་གྱི་བསྐལ་པ་དར། །སྐྲང་པ་གཡན་པ་ཤུ་བ་དང་། །མཛེ་ནད་རྣམ་པ་སྣ་ཚོགས་དང་། །ནད་ཀྱང་མ་མོ་ཁྱོད་ཀྱི་ནད། །ཁྲག་ཀྱང་མོ་མོ་ཁྱོད༴ རིམས་ཀྱང་མ་མོ༴ དེ་རིང་ཡོན་བདག༴ སྲོག་གླུད་གཏོར་མ༴ མཚོན་གྱི་གྲུའུ༴ མི་དང་གླུད་དུ་ད་རྗེས་ཤིག །ནད་ཁ་ཆོད་ལ་རིམས་ཁ་བསྒྱུར། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་འབྲས་བུའི་ཆོས་དར་ཏེ། །རྣལ་འབྱོར་གྲོང་བསྙེན་དར་བ་དང་། །གསང་སྔགས་བོན་ལྟར་གྱེར་བ་དང་། དགེ་སྡིག་འཆོལ་བར་སྤྱོད་པ་ན། །དཔལ་ལྡན་ལྷ་མོ་ཐུགས་ཁྲོས་ནས། །བུད་མེད་སེར་པོས་ས་གཞི་གང་། །མཁའ་ལ་ནད་སྤྲིན་སེར་པོ་ཆགས། །ཆེ་བཞི་མཁྲིས་པས་བཤའ་ཡ་བཏང་། །ཤ་སེར་ཁྲག་སེར་མིག་ཀྱང་སེར། །རྒྱ་ནད་ཐམས་ཅད་དེ་ལ་བྱུང་། །ནད་ཀྱང་མ་མོ༴ ཁྲག་ཀྱང་མ་མོ༴ རིམས་ཀྱང་༴ དེ་རིང་༴ སྲོག་གླུད༴ ནད་ཀྱི༴ མཚོན་གྱི༴ དམར་ཆེན་གཏོར་མ༴ ནད་ཁ་ཆོད་ལ་རིམས་ཁ་བསྒྱུར། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་འབྲས་བུ་ཆོས་དར་ཚེ། །རྣལ་འབྱོར་གྲོང་བསྙེན་དར་དུས་ལ། །དགེ་སྡིག་འཆོལ་བ་སྤྱད་དུས་ལ། །རྣལ་འབྱོར་ཡང་ཉམས་མ་མོ་འཁྲུག །དེ་ཚེ་ཁྱོད་ཀྱི་བསྟན་པ་དར། །དཔལ་ལྡན་ལྷ་མོ་ཁྱོད་ཁྲོས་ནས། །ཁ་རླང་དམར་པོ་བཏང་བའི་ཚེ། །བུད་མེད་དམར་མོས་ས་གཞི་གང་། །མཁའ་ལ་ནད་སྤྲིན་དམར་པོ་ཆགས། །དེ་ཚེ་ནད་ཀྱི་བསྐལ་པ་དར། །རིམས་ནད་ཚ་བ་སྣ་ཚོགས་དང་། །ཁྱུག་ནད་རྒྱུ་གཟེར་སྣ་ཚོགས་དང་། །ཁྲག་ཏུ་སྐྱུག་པ་སྣ་ཚོགས་དང་། །ནད་ཀྱང་མ་མོ༴ ཁྲག་ཀྱང་༴ རིམས་ཀྱང་༴ བདག་དང་ཡོན་བདག༴ སྲོག་གླུད། ནད་ཀྱི༴ མཚོན་གྱི༴ དམར་ཆེན་གཏོར་མ༴ ནད་ཁ་ཆོད་ལ༴ ལྔ་བརྒྱ་དུས་ཀྱི་ཐ་མ་ལ། །གསང་སྔགས༴ རྣལ་འབྱོར་གྲོང་༴ གསང་སྔགས་བོན་ལྟར་གྱེར་བ་དང་། །དཔལ་ལྡན་ལྷ་མོ་ཁྱོད་ཁྲོས་ནས། །ཁ་རླང་སྨུག་པོ་བཏང་བའི་ཚེ། །བུད་མེད་སྨུག་པོས་ས་གཞི་གང་། །མཁའ་ལ་ནད་སྤྲིན་སྨུག་པོ་ཆགས། །དར་ནག་རུ་མཚོན་ཐིགས་སེ་ཐིབ། །ཕྱག་ན་མདུང་དམར་ཆིམས་སེ་ཆིམ། །བ་དན་སྨུག་པོ་ལྷུབས་སེ་ལྷུབ། །སྐུ་ལ་གོ་མཚོན་ཡ་ལ་ལ། །དུག་གི་འཁྲུག་པ་བསླང་བར་བྱེད། །མཚོན་གྱི་ཆར་པ་འབེབ་པར་བྱེད། །ཁྱོད་ལ་མཐུན་པའི་རྫས་འབུལ་བ། །དམར་ཆེན་གཏོར་མ༴ སྒྲུབ་མཆོག་བདག་དང་ཡོན་བདག་ལ། །འཁྲུགས་པའི་བསྐལ་པ་ཞི་བར་མཛོད། །མཚོན་གྱི་བསྐལ་པ་ཞི་བར་མཛོད། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་འབྲས་བུ༴ རྣལ་འབྱོར་གྲོང་༴ གསང་སྔགས་བོན་ལྟར༴ དགེ་སྡིག་འཆོལ་བར་སྤྱད་དུས་ལ། །དཔལ་ལྡན་ལྷ་མོ་ཁྱོད་ཁྲོས་ནས། །ཁ་རླང་ནག་པོ་བཏང་༴ བུད་མེད་ནག་མོས་ས་གཞི་གང་། །ནད་ཀྱི་ན་བུན་ནག་པོ་འཁྲིགས། །དེ་ཚེ་མཚོན་གྱིས་བསྐལ་པ་དར། །ལྷོག་པ་དཀར་ནག་འབུམ་ནག་དང་། །སྐྲངས་དང་གཡན་པ་ཤུ་བ་དང་། །མཛེ་ནད་རྣམ་པ་སྣ་ཚོགས་དང་། །ནད་ཀྱང་མ་མོ་ཁྱོད་ཀྱིས་ནད། །ཁྲག་ཀྱང་མ་མོ༴ རིམས་ཀྱང་༴ བདག་དང་ཡོན༴ སྲོག་གླུད་གཏོར་མ༴ ནད་ཀྱི་རྐྱལ༴ མཚོན་གྱི་བསྐལ་བ༴ དམར་ཆེན་གཏོར་མ༴ བདག་དང་ཡོན་བདག༴ ནད་ཁ་ཆོད་ལ་རིམས་ཁ་བསྒྱུར། །ལྔ་བརྒྱ་དུས་ཀྱི་ཐ་མ་ལ། །གསང་སྔགས་འབྲས་བུ༴ རྣལ་འབྱོར་གྲོང་བསྙེན༴ དགེ་སྡིག་འཆོལ་བར་སྤྱད་དུས་ལ། །གསང་སྔགས་བོན་ལྟར༴ དཔལ་ལྡན་ལྷ་མོ་ཐུགས་ཁྲོས་ནས། །ཁ་རླང་དཀར་པོ་བཏང་བ་དང་། །བུད་མེད་དཀར་མོས་ས་གཞི་གང་། །མཁའ་ལ་ནད་ཀྱི་སྤྲིན་ལྟར་གཏིབ། །དེ་ཚེ་ནད་ཀྱི་བསྐལ་པ་དར། །རླུང་ནག་འཚུབ་མ་མུ་གེ་དང་། །ཐོག་དང་སེར་བ་ཤྭ་བུད་དང་། །དུས་མ་ཡིན་པར་འཆི་བའི་ནད། །ནད་ཀྱང་མ་མོ༴ ཁྲག་ཀྱང་༴ རིམས་ཀྱང་མ༴ རྒྱུ་སྦྱོར་ཡོན་བདག༴ སྲོག་གླུད༴ ནད་ཀྱི་རྐྱལ༴ མཚོན་གྱི་བསྐལ༴ མི་དང་གླུད་དུ་ད་བརྗེ་ལ། །ནད་ཁ་ཆོད་༴ གསང་སྔགས་སྤྱོད་གྲངས་མང་པོ་ཡང་། །གཞུང་ལྟར་སྤྱོད་པ་ནོར་གྲང་ལ། །བཀའ་ལྟར་སྤྱོད་པ་དབང་ཕྱུག་བདག །མན་ངག་ཐུགས་དམ་རྒྱུད་བསྐུལ་ནས། །བདག་ཅག་རྣལ་འབྱོར་བསྒྲུབ་པ་པོ། །དཔལ་ཆེན་བདུད་རྩི་རྣམ་ལྔ་མཆོད། །ལུས་དང་གྲིབ་མ་བཞིན་དུ་མཆོད། །གསུར་ཆེན་དུད་པས་རྒྱུན་མི་ཆད། །དབང་ཕྱུག་ཕུ་ནས་གུས་འདེབས་ཀྱི། །དཔལ་ལྡན་མདའ་ན་སྙན་མ་སྲ། །རི་ལུང་མེད་པར་གུ་ཡི་ཐོབས། །དབང་ཕྱུག་མདའ་ན་གཡབ་དོར་ཅིག །དཔལ་ལྡན་ཕུ་ན་སྤྱན་མ་རྡུལ། །ནག་མོ་མང་པོའི་ནམ་མཁའ་གང་། །སྔོན་ཚེ་སྲིད་པའི་དབང་མོ་ཆེ། །དེ་ལྟར་དཔལ་ལྡན་རེ་མ་ཏི། །ལྷ་སྲིན་ཀུན་གྱི་གཤེད་བྱེད་མ། །སྐྱེ་འགྲོ་ཀུན་གྱི་བདུད་བཅོད་མ། །དགྲ་བོ་ཡོངས་ཀྱི་སྙིང་འབྱིན་མ། །བགེགས་དཔུང་ཐལ་བ་བརླག་མཛད་མ། །ཆོས་ཉིད་ངང་ལ་ཀློང་དག་མ། །ཐུགས་དང་འགལ་བ་མཛོད་པར་གསོལ། །རྫོགས་སོ། །
མ་མོའི་ཁྲག་མདོས་ལས་བཟློག་པའི་སྨྲང་ཆེན་མོ།
༈ མ་མོའི་ཁྲག་མདོས་ལས་བཟློག་པའི་སྨྲང་ཆེན་མོའི་དབུའོ། །ཧཱུྃ། ང་ནི་དབང་ཕྱུག་ཆེན་མོ་སྟེ། །ཁམས་གསུམ་སྲིད་གསུམ་མངའ་བདག་མོ། །ང་ནི་ཁྲོ་རྒྱལ་ཀུན་གྱི་རྗེ། །ང་ནི་མ་མོ་ཀུན་གྱི་ཡབ། །ཁམས་གསུམ་སྙིང་ཁྲག་དྭངས་མའི་བདག །འགྲོ་བའི་དོན་ལ་རབ་བརྩོན་ཕྱིར། །ཡོན་བདག་སྐྱབས་གསོལ་ཐུགས་རྗེས་བཟུང་། །དེ་རིང་བདུད་ལ་མི་གཅིག་བསླུ། །དེ་རིང་བཙན་ལ་ཐར་གཅིག་དགྱེས། །དེ་རིང་ཁམས་སུ་དབང་དུ་བསྡུ། །དེ་རིང་སྲིད་གསུམ་ཟིལ་གྱིས་མནན། །དེ་རིང་མ་མོའི་ཁྲམ་གཡས་གྱིས། །སྲིད་པའི་རྒྱལ་མོ་གནས་འདིར་བྱོན། །རིམས་ཀྱི་བདག་མོ་ད་ཚུར་བྱོན། །མ་མོ་སྲིད་པའི་རྒྱལ་མོ་འདི། །འོད་སྲུང་བསྟན་པ་ནུབ་ཁ་རུ། །རྒྱལ་བ་ཤཱཀྱ་ཐུབ་པ་དང་། །སྨོན་ལམ་དུས་གཅིག་བཏབ་པའི་ཚེ། །ཤཱཀྱ་ཐུབ་པའི་བསྟན་པ་ལ། །འགྲོ་བའི་དོན་དུ་རབ་ཏུ་བརྩོན། །སྐུ་ནི་ཀུན་ཏུ་བཟང་མོ་ལ། །གསུང་ནི་སྒྲ་དབྱངས་ཚིག་ལས་འདས། །ཐུགས་ནི་སྨྲ་བསམ་བརྗོད་ལས་འདས། །ཆེ་མཆོག་འབར་བའི་སྐུ་གསུང་ཐུགས། །གསང་བའི་མཁའ་ལ་ཕྱེད་ཕྱུན་ཙམ། །ཡབ་ཡུམ་དེ་གཉིས་འཕྲོ་འདུས་ལས། །འབྱུང་བའི་རྒྱལ་མོ་ཐམས་ཅད་བསྐྱེད། །སྣང་སྲིད་མ་མོ་འབྱུང་ཞིང་འཕྲོ། །ནད་ཀྱི་སྐལ་བ་གཏོང་ཞིང་བྱུང་། །སྐྱེ་འཆི་རྩད་གཅོད་བདེ་ཀློང་ཐུགས་སུ་ཆུད། །འབྱུང་བ་ཀུན་གྱི་ཆ་སྙོམས་མ། །ཐིག་ལེ་དབྱིངས་ལ་བསྐྱེད་པའི་ཡུམ་གཅིག་མ། །ཀུན་གྱིས་ཡུམ་བདག་མ་མོ་འདིར་གཤེགས་ཤིག །སྲིད་པའི་རྒྱལ་མོ་འདིར་གཤེགས་ཤིག །གླུད་འདི་སྲིད་པའི་རྒྱལ་མོས་བཞེངས། །དེ་རིང་བཟློག་བསྒྱུར་དུས་ལ་བབ། །ནད་ཀྱི་བདག་མོ་ཅི་ཕྱིར་དུ། །རིམས་ཁ་དེ་ནི་མི་ཆོད་དམ། །དཔལ་གྱི་བདག་མོ་ཅི་ཕྱིར་དུ། །དལ་ཁ་དེ་ནི་མི་བཟློག་གམ། །རིམས་ཀྱི་བདག་མོ་ཅི་ཕྱིར་དུ། །རིམས་ཁ་དེ་ནི་མི་བསྒྱུར་རམ། །ཟློག་ཅིག་དམར་ཆེན་གཏོར་མས་བཟློག །སྒྱུར་ཅིག་ལྟས་ངན་ཡུ་སྡིག་བསྒྱུར། །ཀྱེ་མ་ཅིག་སྲིད་པའི་རྒྱལ་མོ་སྟེ། །ཁྱོད་ཀྱིས་འཁོར་ཕྱོགས་ལྷ་སྲིན་འདུལ། །ཁྱོད་ཀྱིས་བདུད་ལ་བཀའ་ནན་ཆུང་། །བཙན་བཙུན་དམུ་ལ་བཀའ་ནན་ཆུང་། །མ་བརྒྱ་དང་སྒྲལ་ཚིག་གཡོན་པ་ནས། །མི་གཤེད་དྲག་པོའི་གཞུང་བྱས་ནས། །ཐོག་དམར་བུ་ཡུག་ཆར་དུ་འབེབ། །བཀའ་ལ་འདས་ན་དམྱལ་ཐག་གཅོད། །ཁྲག་མདའ་བུ་ཡུག་ཆར་དུ་འབེབ། །བཟློག་བྱེད་མའི་དུས་ལ་བབ། །དལ་ཁ་བཟློག་ཅིང་བསྒྱུར་བྱེད་མ། །སྔགས་ཀྱི་ཐུན་ཟོར་བཟློག་བྱེད་མ། །བྱང་བསྟིམས་དང་ནི་སྐུ་དུག་དང་། ལོ་ཀག་དང་ནི་ཟླ་ཀག་དང་། །ཞག་ཀག་དང་ནི་ཟ་ཀག་དང་། །གིང་ཀག་དང་ནི་གཤེད་བཞི་དང་། །བདུད་གཡོས་དང་ནི་སྲི་ལངས་དང་། །མཚན་ལྟས་ངན་པ་བཟློག་ཏུ་གསོལ། །གཙོ་མོའི་རྦབ་ཟོར་རབ་ཏུ་དྲག །ཡུང་ཀར་རྦབ་བསྒྲིལ་ཁྲ་ལ་ལ། །གནོད་བྱེད་བར་ཆད་བགེགས་ཟོར་བཟློག ། དལ་ཁ་ཆོད་ལ་རིམས་ཁ་བསྒྱུར། །ཟློག་ཅིག་དམར་ཆེན༴ སྒྱུར་ཅིག་ལྟས་ངན༴ ཧཱུྃ། ང་ནི་དབང་ཕྱུག་ཆེན་པོ་སྟེ། །ཁམས་གསུམ་སྲིད་གསུམ་མངའ་བདག་རྗེ། །འགྲོ་བའི་དོན་ལ་རབ་ཏུ་བརྩོན། །ཡོན་བདག་སྐྱབས་གསོལ་ཐུགས་རྗེས་བཟུང་། །ཀྱཻ། རིམས་ཀྱི་བདག་མོ་སྤྱན་འདྲེན་ནོ། །བསྒྱུར་བྱེད་མ་ཅིག་སྤྱན་འདྲེན་ནོ། །བཟློག་བྱེད་མ་ཅིག་སྤྱན་འདྲེན་ནས། །དེ་རིང་བཟློག་བསྒྱུར་དུས་ལ་བབ། །གླུད་བདག་ཆེན་མོ་གཤེགས་སུ་གསོལ། །ཁྲོ་རྒྱལ་ཀུན་གྱི་ཡུམ་ཅིག་མ། །མ་མོ་ཀུན་གྱི་བྱ་མ་རྟ། །བསྟེན་བྱེད་ཀུན་གྱི་ཡང་རྗེ་མོ། །འགྲོ་བ་ཀུན་གྱི་སྲོག་བདག་མོ། །བྱང་ཤར་མཚམས་ནས་གནས་བཅས་ཤིང་། །བསྭེའི་སྐུ་མཁར་གྲུ་བཞི་ལ། །ལོགས་བཞི་དེ་ནི་མཆོང་ལས་བྱས། །གསེར་སྦྲུལ་དེ་ནི་ཁྲ་བོ་ལ། །གཉེན་པོ་དེ་ལ་སྦྲུལ་མི་འགོས། །ཟུར་བཞི་དེ་ནི་མཆོང་ལ་བྱས། །ལྕགས་དང་འཆོང་ཟུར་སྨུག་པོ་ལ། །གཉེན་ཏེ་དེ་ལ་སྦྲུལ་མི་ཁྲིད། །ཁ་བད་མཚོ་རོག་གཡུ་ལ་བྱས། །གཡུ་འོད་དེ་ནི་སྔོན་པོ་ལ། །དེ་ལ་མཐོ་སྟེ་བྱ་མི་ལྡིང་། །འགྲམ་བཞི་དེ་ནི་ལྕགས་ལ་བྱས། །ལྕགས་འགྲམ་དེ་ནི་སྔོན་པོ་ལ། །དེ་ལ་ཞབས་སུ་བྱིལ་མི་འཛུལ། །ཐ་མ་ལྕགས་རི་འབར་བས་བརྒྱན། །དེ་ཡང་དབུས་སུ་བསྒྲོད་པ་ལ། །དེ་ལ་གཉེན་ཏེ་བདུད་མི་གདའ། །སྐུ་མཁར་དེའི་ནང་དབུས་ནས། །རིན་ཆེན་ཤེལ་གྱི་སྒོ་བཙུགས་ཤིང་། །མི་རོ་རྟ་རོའི་ཁྲི་སྟེང་དུ། །གཤིན་རྗེའི་ལྕམ་གཅིག་བཞུགས་པ་ནི། །སྐུ་མདོག་མཐིང་ནག་རལ་པ་ཅན། །དབང་རྟགས་ཁྲག་གི་ཐིག་ལེ་བརྒྱན། །ཆིབས་སུ་དྲེལ་རྟ་རྐང་གསུམ་བཅིབ། །དྲྭ་བ་དགུའི་སྟོང་ལ་ཅན། །ཉིན་ཞིང་ཁྱོ་དགུ་རྐུང་སུ་བྱེད། །བཟློག་གོ་དམར་ཆེན༴ བསྒྱུར་རོ་ལྟས་ངན༴ བྷྱོ། མ་ཅིག་དཔལ་ལྡན་རེ་མ་ཏི། །རེ་སྡེ་གོང་ཉག་མན་ཆད་དང་། །བདུད་རིགས་གཏོགས་པ་ཐམས་ཅད་དང་། །བསྐོར་བསྐོར་ཞུང་ཞུང་ཕྱག་བྱས་ནས། །ཇོ་མོ་དེ་ནི་སྤྱན་མི་བཟང་། །ཕྱག་ལེན་མི་སྟེར་ཁྲོ་ཚུལ་སྟོན། །དམར་ཆེན་གཏོར་མ་འདི་བཞེས་ལ། །བདུད་ཀྱི་ལག་ནས་མི་བླ་བསླུ། །སྐྱེས་བུ་ལུང་བཙན་མན་ཆད་དང་། །ཕྱི་ནང་མཐའ་ཡས་ཐམས་ཅད་ཀྱི། །བསྐོར་བསྐོར་ཞུང་ཞུང་༴ ཇོ་མོ་དེ༴ ཕྱག་ལེན་མི་སྟེར༴ དམར་ཆེན་གཏོར་མ༴ བཙན་གྱི་ལག་ནས་མི་བླ་བསླུ༴ གནམ་ལྷ་དཀར་པོ་མན་ཆད་དང་། །ནག་མོ་གྲོང་རྒྱུག་ཡན་ཆད་ཀྱི། །བསྐོར་བསྐོར་ཞུང་ཞུང་༴ ཇོ་མོ་དེ་ནི༴ ཕྱག་ལན༴ དམར་ཆེན༴ རྒྱལ་པོའི་ལག་ནས་མི་བླ་བསླུ། །བདུད་ཀྱི་རྒྱལ་པོ་མན་ཆད་དང་། །དུར་སྲི་སྲིན་མོ་ཡན་ཆད་དང་། །བགེགས་ཕྲན་གྲོང་རྒྱུག་ཡན་ཆད་ཀྱི། །བསྐོར་བསྐོར་ཞུང་ཞུང་༴ ཇོ་མོ་དེ་ནི༴ ཕྱག་ལན་མི༴ དམར་ཆེན་གཏོར་མ༴ བགེགས་ཀྱི་ལག་ནས་མི་བླ་བསླུ། །རྒྱུ་སྦྱོར་ཡོན་བདག་འཁོར་བཅས་ཀྱི། །དུས་ལ་བབ་པའི་ཚེ་ཟད་ཀྱང་། །ལོ་གསུམ་བར་དུ་བཤོལ་ཐོབ་ཅིག །དེ་རིང་བཟློག་བསྒྱུར་དུས་ལ་བབ། །ཁྱོད་ཀྱིས་བཟློག་ན་རྦབ་ཀྱང་བཟློག །མི་ཐུབ་པ་ནི་ཅིག་ཀྱང་མེད། །ཁྱོད་ཀྱིས་བཀྱག་ནས་འབྲུག་ཀྱང་ཁྱོག། །མི་ཁྱོག་པ་ནི་ཅི་ལྟ་བུ། །ཁྱོད་ནི་བཟུང་ནས་གློག་ཀྱང་བཟུང་། །མི་ཟུན་བྱ་བ་གང་ཡང་མེད། །བཟློག་བསྒྱུར་མཛད་པའི་དུས་ལ་བབ། །བཟློག་ཅིག་དམར་ཆེན་གཏོར་མས་བཟློག །བསྒྱུར་རོ་ལྟས་ངན་ཆོ་འཕྲུལ་བསྒྱུར། །མ་མོའི་ཟོར་ཁ་བརྡ་ལ་རེ། །མ་མོའི་ཟོར་སྣ་དགྲ་ལ་རྒྱོབ། །ཡོན་བདག་གླུད་བྱོལ་དགྲ་ལ་བྱོལ། །རྒྱུ་འབྱོར་ཡན་བདག་འཁོར་བཅས་ལ། །སེར་སྣའི་ཕྱི་འགྱོད་མ་བཏང་ཅིག །མ་མོའི་རྟ་བྲོ་ཀྱི་ལི་ལི། །དྲག་པོའི་བཤུག་གླུ་ཀྱུ་རུ་རུ། །མ་མོའི་ཟོར་ཁ་བརྡ་ལ་རེ། །བཟང་ན་བཟང་གསུམ་ཤ་ར་ར། །ངན་ན་ངན་གསུམ་ཀྱི་ལི་ལི། །ལྔ་ནུབ་དྲུག་ནུབ་ཚུན་ཚད་དུ། །དུས་ན་རྒྱལ་བའི་མངའ་བདག་མཛད། །གསུམ་ནུབ་བཞི་ནུབ་ཚུན་ཆད་དུ། །གསང་སྔགས་ངས་ཀྱང་མ་བཟློག་སྟེ། །མ་མོའི་སྐྱོག་ཁ་དགྲ་ལ་སྟོན། །དཔལ་ལྡན་གཉན་གྱི་རེ་མ་ཏི། །སྔོན་ཚེ་རྒྱལ་བས་འདི་སྐད་གསུང་། །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་བྱ། །རང་གི་སེམས་ནི་ཡོངས་སུ་དུལ། །གཞན་གྱིས་སེམས་ནི་དཀྲུགས་མི་བྱ། །འདི་ནི་སངས་རྒྱས་བསྟན་པ་ཡིན། །ད་ལྟ་ངས་ཀྱང་དེ་སྐད་བཤད། །ཡོན་བདག་དྲིན་ལེན་ཆུད་མ་གསན། །དབང་ཕྱུག་ངའི་བཀའ་མ་བཅག །ཡོན་བདག་འཁོར་དང་བཅས་པ་ཡི། །དུས་ལ་བབ་པ་ཚེ་ཟད་ཀྱང་། །ལོ་གསུམ་བར་དུ་ཤོལ་ཐོབ་ཅིག །ཀྱཻ། དཔལ་ལྡན་འཁོར་བཅས་དུས་ལ་བབ། །སོ་སོར་མཐུན་པའི་རྫས་བསོགས་པ། །སྙིང་གི་རྩ་ལགས་མ་ཉམས་དང་། །མི་དབང་འབྲས་བུ་སྨིན་པའི་ཤ། །འཆི་ཁའི་མཚལ་ཐིག་དམར་པོ་ལ། །ཉ་ཡི་རྒྱུ་ཁྲག་སྐམ་པོ་དང་། །མཐུན་པའི་རྫས་ཆེན་ཁྱེད་ལ་འབུལ། །མ་ཅིག་སྐུ་ལ་མཐུན་རྫས་འབུལ་བ་ནི། །ཆིབས་སུ་དྲེལ་ནག་ཁ་དཀར་དང་། །ནས་འབྲས་དང་ནི་གྲོ་དང་ཏིལ། །དྲེལ་ཆུང་གཞོན་ནུའི་ཤ་ཁྲག་དང་། །བཙོ་དང་ཞུ་མཁན་སྣ་ཚོགས་དང་། །མ་ཅིག་མཐུན་པའི་རྫས་སུ་བཞེས། །ཡུལ་ནི་ལྷོ་ཁ་མོན་ཁའི་ཚུལ། །མ་ཅིག་སྐྱིན་མཐིང་ཡ་མ་སྐྱོང་། །ཆིབས་སུ་ཤ་བ་དཀར་མོ་བཅིབས། །རཾ་དང་རྒྱ་སྐགས་མཚལ་དང་སྤོས། །མཛེས་པའི་མེ་ཏོག་སྣ་ཚོགས་དང་། །ཤ་བ་ཡུ་མོའི་ཤ་ཁྲག་དང་། །མ་ཅིག་མཐུན་རྫས་བཞེས་སུ་གསོལ། །མི་དང་གླུད་དུ་ད་རྗེས་ཤིག །བྷྱོ། རྡོ་རྗེ་གར་གྱི་དབང་ཕྱུག་མ། །མང་པོ་དྲི་ཟའི་བཀའ་བསྒྱུར་མ། །བདག་ཅག་རྡོ་རྗེ་སྤུན་རྣམས་དང་། །དེ་རིང་རྒྱུ་འབྱོར་ཡོན་བདག་ལ། །གཟའི་ཐོག་རྒྱུག་བྱུང་ལ་རེ། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ལྟས་ངན་ཆོ་འཕྲུལ་བསྒྱུར། །སྔོན་གྱི་བཀའ་བསྒྱུར་དམ་ཅན་མ། །དོ་ནུབ་བཟློག་བསྒྱུར་དུས་ལ་བབ། །བྷྱོ། རིན་ཆེན་གར་གྱི་དབང་ཕྱུག་མ། །མིང་པོ་གཤིན་རྗེའི་བཀའ་བསྒྱུར་ལ། །བདག་ཅག་རྡོ་རྗེ༴ དེ་རིང་རྒྱུ་འབྱོར༴ གཤིན་རྗེའི་དལ་ཀ༴ བཟློག་གོ་དམར་ཆེན༴ བསྒྱུར་རོ་ལྟས་ངན༴ སྔོན་གྱི་བཀའ་བསྒྱུར༴ དོ་ནུབ་བཟློག༴ བྷྱོ། པདྨ་རིགས་ཀྱིས་དབང་ཕྱུག་མ། །མིང་པོ་ཀླུའི༴ བདག་ཅག༴ དེ་རིང་༴ ཀླུའི་དལ་ཁ༴ བཟློག་གོ་དམར༴ བསྒྱུར་རོ༴ སྔོན་གྱིས༴ དོ་ནུབ་བཟློག༴ བྷྱོ། ལས་ཀྱི་རིགས་ཀྱིས་དབང་ཕྱུག་མ། །མིང་པོ་གནོད་སྦྱིན༴ བདག་ཅག༴ དེ་རིང་༴ གནོད་སྦྱིན༴ བཟློག་གོ་དམར༴ བསྒྱུར་རོ༴ སྔོན་གྱིས༴ དོ་ནུབ་བཟློག༴ བྷྱོ། དབང་ཕྱུག་ཕྲ་མེན་རྒྱ་མཚོ་ལ། །ཧེ་ལེན་གཅིག་ཁྱབ་བཀའ༴ བདག་ཅག༴ དེ་རིང་༴ གནོད་སྦྱིན་དལ་ཡམ༴ བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ་བཟློག༴ བྷྱོ། ཨེ་ཀ་ཙ་ཏི་ཐལ་མདོག་མ། །སྐོས་རྗེ་དྲང་དཀར་དམ་ཅན་མ། །བདག་ཅག༴ དེ་རིང་༴ སྐོས་ཀྱི་བྱན་མས་བསྐུལ་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། ཨེ་ཀ་ཙ་ཏི་རལ་གཅིག་མ། །རེ་སྡེ་མགོ་ཉག་བཀའ་བསྒྱུར་དམ་ཅན་མ། །བདག་ཅག༴ དེ་རིང་༴ བདུད་ཀྱི་ཁྲམ་ལ་ཐོབ་ཏ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། ཉི་མ་སྟོང་གི་ཐོད་ཕྲེང་མ། །གནམ་ཐིལ་དཀར་པོའི་བཀའ་བསྒྱུར་ལ། །བདག་ཅག་རྡོ་རྗེ༴ རྒྱུ་འབྱོར་ཡོན༴ རྒྱལ་པོའི་གདན་ལ་བབ་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། ནམ་མཁའི་ཁམས་ནས་ཐོག་འབེབ་མ༴ བར་ཐིལ་ཁྲ་བོའི་བཀའ་བསྒྱུར་མ། །བདག་ཅག༴ རྒྱུ་འབྱོར༴ བློན་པོའི་ཁྱིམ་དུ་བབ་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། ས་བདག་ཆེན་མོ་པདྨ་ཕྲེང་། །ས་ཐིལ་ནག་པོའི་བཀའ༴ བདག་ཅག༴ རྒྱུ་འབྱོར༴ ཡུལ་ཕྱིར་འབྱུང་པོ་བབ་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། བཙན་གྱི་གླ་བ་རོ་དང་བཙན། །བཙན་གྱི་རྟ་བབ་ཤོར་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། གནམ་ལ་ཡ་ཟ་སྨན་གཅིག་མ། །མིང་པོ་གཟའི་བཀའ་བསྒྱུར་ལ། །བདག་ཅག་རྡོ་རྗེ་སྤུན་རྣམས་ལ། །རྒྱུ་འབྱོར༴ གཟའི་དལ་ཀ་བབ་ལ་རེ། །བཟློག་གོ༴ བསྒྱུར་རོ༴ སྔོན་གྱིས༴ དོ་ནུབ༴ བྷྱོ། ལྷ་མོ་ནག་མོ་རེ་མ་ཏི། །ནོར་བུ་བཟང་པོའི་ཆོ་འཕྲུལ་བཀའ། །བདག་ཅག༴ རྒྱུ་འབྱོར༴ སྔོན་གྱིས༴ དོ་ནུབ༴ བྷྱོ། དཔལ་ལྡན་གཉེན་གྱི་རེ་མ་ཏི། །ཁྱོད་ནི་ནང་གི་སྲུང་མ་སྟེ། །དམ་རྫས་བདུད་རྩི་གཏོར་མ་འདི་བཞེས་ལ། །མ་མོ་འཁྲུགས་པའི་ཐུགས་དམ་བསྐང་གྱུར་ཅིག །བདག་ཅག༴ རྒྱུ་འབྱོར༴ གཡས་བདུད་གཡས་སུ་བྱོལ་ཁ་བཟློག །གཡོན་བདུད་གཡོན་དུ་བྱོལ་ཁ་བཟློག །བུ་ཚ་ཆུང་སྲིའི་བྱོལ་ཁ་བཟློག །སྔོན་གྱིས་གདུག་བྱེད་བྱོལ་ཁ་བཟློག །ཕ་ཚན་རྒྱབ་འདྲེ་བྱོལ༴ མ་ཚན་སྟོང་འདྲེའི་བྱོལ་ཁ༴ བདུད་ཀྱིས་ཁྲོམ་ཟུར་བྱོལ༴ བཙན་གྱི་བང་ཟུར༴ མ་མོའི་ནད་རིམས༴ བནྡྷེའི་སྔགས་ཟོར༴ བོན་པོའི་ཛོ་ཟོར༴ བྲམ་ཟེའི་ངན་སྔགས༴ རྐུ་དུག་བྱད་སྟེམས་བྱོལ༴ ལོ་ཀག་ཟླ་ཀག་ཞག་ཀག༴ ཀིང་ཀང་གཤེད་བཞིའི་བྱོལ༴ མཚན་ངན་ལྟས་ངན་བྱོལ༴ བདག་དང་ཡོན་བདག་འཁོར་བཅས་ལ། །ཕོ་བདུད་དལ་ཁ་གཡས་སུ་བསྒྱུར། །མོ་བདུད་དལ་ཁ་གཡོན་དུ་བསྒྱུར། །སྤྱི་བདུད་དལ་ཁ་མཁའ་ལ་བསྒྱུར། །དལ་ཁ་བསྒྱུར་ལ་རིམས་ཁ་བཟློག །ཡོན་བདག་གླུད་བྱོལ་དགྲ་ལ་བཟློག །སྡང་བའི་དགྲ་ལ་བྱོལ་ཁ་སྟོན། །གནོད་པའི་བགེགས་ལ་བྱོན་ཁ་སྟོན། །སྡང་བའི་དགྲ་ལ་བཏང་བའི་ཚེ། །ཡུལ་དུ་མཁར་ཞིང་རྒྱ་གྲོང་འཛིན། །ཆུང་མའི་ཞིང་ཡང་གཏན་མི་སྐྱེ། །བུ་ཚའི་རིགས་རྒྱུད་རྩད་ནས་ཆོད། །གནོད་པའི་བགེགས་ལ་བཏང་བའི་ཚེ། །གནམ་ལྷ་དཀར་པོ་ཁྲག་ཏུ་སྐྱུགས། །བྱི་ན་ཡ་ག་འདར་ཞིང་བརྒྱལ། །ད་ནི་བཟློག་བསྒྱུར་དུས་ལ་བབ། །དམག་གི་རྒྱལ་མོ་ཆེན་མོ་བྷྱོ། །དགྲ་བླའི་རྒྱལ་མོ་ཆེན་མོ་བྷྱོ། །དར་ནག་སྟོང་གི་ཚོགས་དང་བྷྱོ། །ལེ་བརྒན་སྟོང་གི་རྒྱལ་མོ་བྷྱོ། །བྷྱོ། ད་ནི་མ་མོའི་ཁྲམ་སྣ་བཟློག །རིམས་ནད་ཡམས་ཀྱི་ཁྲམ་སྣ་བཟློག །ཀག་ལ་འཁོར་བའི་ཡོན་བདག་འདི། །སྔོན་གྱིས་ལས་འཕྲོ་བྱུང་བའམ། །དུས་ལ་བབ་པའི་ཚེ་ཟད་ཀྱང་། །ལོ་གསུམ་བར་དུ་བཤོལ་ཐོབ་ཅིག །དབང་ཕྱུག་མའི་བཀའ་མ་བཅག །ཡོན་བདག་དྲིན་ལན་ཆུད་མ་གསན། །བཀའ་དང་དམ་ལ་མ་འདའ་ཞིག །འདོད་པའི་དངོས་གྲུབ་བདག་ལ་སྩོལ། །ཅི་བསམ་དོན་རྣམས་འགྲུབ་པར་མཛོད། །དཔལ་ལྡན་ལྷ་མོའི་བསྐང་མདོས་འཁྲུག་བཅོས་ཞེས་བྱ་བ་ནི། ནད་དྲག་པོའམ། མི་ཤི་བ་ཐམས་ཅད་ལ་འདི་བྱའོ། །ཁྱད་པར་དུ་ནད་ཡམས་དར་བའི་དུས་སུ་ལ་འདི་བྱས་ནས་རྒྱ་ནད་ཐམས་ཅད་མ་མོའི་ཁ་རླངས་ཡིན། དོན་འདི་ལ་བརྩོན་པར་བྱའོ། །མྱུར་དུ་ཕན་པར་སྣང་གསུངས་སོ། །བླ་མ་ཀཿཐོག་པའི་ཕྱག་ལེན་རྫོགས་སོ།། །།
དཔལ་ལྡན་ལྷ་མོའི་བསད་ལས་དགྲ་བགེགས་བསྒྲལ་ཆོག
དཔལ་ལྡན་ལྷ་མོའི་བསད་ལས་དགྲ་བགེགས་བསྒྲལ་ཆོག་བཞུགས་སོ། །ཧཱུྃ། ན་མོ། སངས་རྒྱས་དཀོན་མཆོག་གཟུ་དང་དཔང་། །དམ་ཆོས་དཀོན་མཆོག་གཟུ་དང་སྤང་། །དགེ་འདུན་དཀོན་མཆོག་གཟུ་དང་དཔང་། །བླ་མ་ཡི་དམ་གཟུ་དང་དཔང་། །དཔའ་བོ་མཁའ་འགྲོ་གཟུ་དང་དཔང་། །ཆོས་སྐྱོངས་སྲུང་མ་གཟུ་དང་དཔང་། །བཀའ་ཡི་ལྷ་སྲིན་སྡེ་བརྒྱད་གཟུ་དང་དཔང་། །གཟུ་དང་དཔང་དུ་དཀོན་མཆོག་བཞུགས། །ན་མོ། ཕྱོགས་བཅུའི་འཇིག་རྟེན་ཁམས་ན་བཞུགས་པ་ཡི། །བླ་མ་རིག་འཛིན་རིགས་ལྔ་ཡབ་ཡུམ་དང་། །རྒྱལ་བ་ཞི་ཁྲོའི་ལྷ་ཚོགས་མ་ལུས་ཀུན། །ཐུགས་རྗེས་བདག་ལ་དགོངས་སུ་གསོལ། །བདག་ནི་རིག་འཛིན་བསྒྲུབ་པའོ། །བདག་བསྒྲུབ་པ་པོ་ལ་དགྲ་བྱུང་ན། །ང་མ་ཉེས་མ་ལེན་བསྲུང་མ་མཁྱེན། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་སྣང་སྲིད་ལྷ་འདྲེས་ཆོད། །དགྲ་བགེགས་སྡིག་ཅན་ལས་ངན་འདིས། །དང་པོ་སངས་རྒྱས་བསྟན་པ་བཤིག །བར་དུ་དཀོན་མཆོག་དབུ་འཕང་སྨད། །ཐ་མ་གསང་སྔགས་གཉེན་པོ་དྲལ། །ད་ལྟ་རྣལ་འབྱོར་བདག་ལ་བསྔོས། །ལས་དགེ་བ་བཅུ་ནི་ཁྱད་དུ་བསད། །མི་དགེ་བཅུ་ནི་དང་དུ་བླངས། །མཚམས་མེད་ལྔའི་འབྲས་བུ་སྨིན། །འདི་ན་བསྒྲལ་བའི་ཞིང་ཡིན་པའི། །ད་ལྟ་ཉིད་དུ་བསྒྲལ་བར་བྱ། །རྒྱལ་བ་ཞི་ཁྲོའི་ལྷ་ཚོགས་རྣམས། །ཆོས་ཉིད་ངང་ལས་མ་གཡོས་ཀྱང་། །རྔམས་བརྗིད་ཁྲོ་བའི་སྐུར་བཞེངས་ལ། །དགྲ་བགེགས་སྡིག་ཅན་ལས་ངན་རྣམས། །ཐུགས་རྗེས་བསྒྲལ་བའི་ཕྲིན་ལས་མཛོད། །ཛཿཧཱུྃ་བཾ་ཧོཿབཛྲ་ༀ་ཀུ་ཤ་ཡ་ཛཿ བཛྲ་པ་ཤ་ཧཱུྃ། བཛྲ་སྥོ་ཊ་བཾ། བཛྲ་གྷནྚེ་ཧོ། བཛྲ་ཨ་ཀཪྴ་ཡ་ཛ་ཛཿ ན་མོ་གུ་རུ། བླ་ཚོལ་དུས་སུ་ལྷ་མོ་རེ་མ་ཏི། མདུན་དུ་བདུད་མོ་འབུམ་གྱི་ངོ་བོ་ལྕགས་ཀྱི་སྤྱང་མོ་མགོ་དགུ་ཞེས་བྱ་ལ། སྐུ་ལ་ལྕགས་ཀྱི་ཚ་ཚ་འཕྲོ། སྤྱང་ཀུའི་མགོ་དགུ་ཡོད་པ། ཕྱག་གཡས་ན་ལྕགས་ཀྱི་སྤྱང་མོ་མགོ་དགུ། གཡོན་ན་ཟངས་ཀྱི་འཕར་བ་ལྕེ་བརྒྱད་འགྱེད་ཐབས་སུ་བསྣམས་པ། སྐུ་ལ་ལྕགས་ཀྱི་ཚྭ་ཚྭ་འཕྲོ་བ། བསྐུལ་བ་བྱས་པ་ཙམ་གྱིས་མདུན་གྱི་མ་མོ་དང་སྤྲུལ་པའི་ཚོགས་རྣམས་མྱུར་དུ་སོང་ནས་དགྲ་བོ་རྣམས་བཀུག་ནས། མདུན་གྱི་ལིང་ག་ལ་ཐིམ་པར་བསམ། བྷྱོ། དོ་ནུབ་ནམ་གྱི་གུང་ལ་བབས། །ད་ལྟ་ཚོགས་ཀྱི་དུས་ལ་བབ། །མ་མོའི་བླ་ཚོལ་དུས་ལ་བབ། །ལྕགས་ཀྱི་སྤྱང་མོ་མགོ་དགུ་མ། །ཡ་འགལ་གནམ་ལ་མ་འགལ་ས། །སྐུ་ལ་ཅགས་ཀྱི་ཚྭ་ཚྭ་འཕྲོ། །ཕྱག་མ་གཡས་ན་འགྱེད་པ་ནི། །ལྕགས་ཀྱི་སྤྱང་མོ་མགོ་དགུ་འགྱེད། །ཕྱག་མ་གཡོན་ན་འགྱེད་པ་ནི། །ཟངས་ཀྱི་འཕར་བ་ལྕེ་བརྒྱད་འགྱེད། །དུང་གི་བྱ་རྒོད་གླད་ན་ལྡིང་། །བདུད་སྲིན་ཀུན་གྱི་མགོན་དུ་ཆེ། །སྲིད་པ་གསུམ་གྱི་བྱ་ར་མཁན། །སྲིད་པ་གསུམ་དུ་ཉུལ་ཞིང་རྒྱུག །ལེགས་ཉེས་གཉིས་ཀྱི་ཤན་འབྱེད་མ། །ཟས་སུ་དམ་ཉམས་དགྲ་བོའི་ཤ་ལ་ཟོ། །སྐོམ་དུ་དམ་ཉམས་དགྲ་བོའི་ཁྲག་ལ་འཐུང་། །དམ་ཉམས་དགྲ་བོའི་བླ་འཁྱམས་མ་བཏང་ཁུག་ལ་ཤོག །གཟུགས་ལིང་ག་འདི་ལ་མྱུར་དུ་ཁུག །མིང་བྱང་བུ་འདི་ལ་གནས་པར་མཛོད། །ༀ་མ་ཧཱ་ཀ་ལ་རེ་མཱ་ཏི། དགྲ་བོ་ནྲྀ་མ་ར་ཡ་ཁུག་ཛ། བྷྱོཿ དམ་ཉམས་དགྲ་བོའི་བླ་ཚེ་འདི། །ནམ་མཁའི་ཁམས་སུ་ཤོར་སྲིད་ཀྱི། །ནམ་མཁའི་ཁམས་སུ་ཤོར་བ་ན། །སྲིང་གཅིག་རྡོ་རྗེ་དཔལ་ལྡན་མ། །བྱ་རྒྱལ་ཁྱུང་དུ་སྐུར་སྤྲུལ་ལ། །ཐང་དཀར་རྒོད་པོ་ཕོ་ཉར་འགྱེད། །ནམ་མཁའི་ཁམས་ནས་མ་བཏང་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བར་སྣང་ཁམས་སུ་ཤོར་སྲིད་ཀྱི། །བར་སྣང་ཁམས་སུ་ཤོར་བ་ན། །སྲིང་གཅིག་རྡོ་རྗེ་དཔལ་ལྡན་མ། །རྒོད་གླག་དག་ཏུ་སྐུ་སྤྲུལ་པ། །བསྭེ་ཡི་གླག་མོ་ཕོ་ཉར་འགྱེད། །བར་སྣང་ཁམས་སུ་མ་བཏང་ཁྲིད་ལ་ཤོག །དམ་ཉམས་དགྲ་བོའི༴ ཕྱོགས་བཞི་མཚམས་བརྒྱད་དག་ཏུ་ཤོར་སྲིད་ཀྱི། །ཕྱོགས་བཞི་མཚམས་བརྒྱད་དག་ཏུ༴ སྲིང་གཅིག་རྡོ་རྗེ༴ ལྕགས་ཀྱི་སྤྱང་བརྒྱད་དུ༴ ལྕགས་ཀྱི་ཁྱི་སྡེར་རྐང་གསུམ་ཕོ༴ ཕྱོགས་བཞི་མཚམས་བརྒྱད་མ་བཏང་༴ དམ་ཉམས༴ ས་ཡི་འོག་ཏུ་ཤོར་སྲིད་ཀྱི། །ས་ཡི་འོག་ཏུ༴ སྲིང་གཅིག་རྡོ་རྗེ༴ ལྕགས་ཀྱི་བྱི་བར་སྐུ་སྤྲུལ་ལ། །ཟངས་ཀྱི་བྱི་བ་མགོ་ལྔ་ཕོ༴ ས་ཡི་འོག་ཏུ་མ་བཏང་༴ དམ་ཉམས་དགྲ་བོའི་རྒྱ་མཚོའི་གཏིང་དུ་ཤོར་སྲིད་ཀྱང་། །རྒྱ་མཚོའི་གཏིང་དུ་ཤོར༴ སྲིང་གཅིག་རྡོ་རྗེ༴ ཆུ་སྲིན་རྒྱལ་མོར་སྐུ༴ ཉ་ཆེན་ཡོར་པོ་ཕོ༴ རྒྱ་མཚོའི་གཏིང་དུ་མ་བཏང་༴ དམ་ཉམས༴ གངས་དཀར་རྩེ་ལ་ཤོར་སྲིད་ཀྱང་། །གངས་དཀར་རྩེ་ལ༴ སྲིང་གཅིག༴ དུང་གི་སེང་གེ་སྐུ་སྤྲུལ་ལ། །གངས་བྱི་དཀར་མོར་ཕོ་ཉར་འགྱེད། །གངས་དཀར་རྩེ་ལ་མ་བཏང་ཁྲིད་ལ་ཤོག །དམ་ཉམས་དགྲ་བོའི༴ ཉིན་རི་དཀར་ལ་ཤོར་སྲིད་ཀྱང་། །ཉིན་རི་དཀར་ལ་ཤོར་བ་ན། །སྲིང་གཅིག་རྡོ་རྗེ༴ ལྕགས་ཀྱི་སྤྱང་ཀུར་སྐུ༴ ཉིན་རི་དཀར་ལ་མ་བཏང་༴ དམ་ཉམས༴ སྲིབ་རི་ནག་ལ་ཤོར་སྲིད་ཀྱང་། །སྲིབ་རི་ནག་ལ༴ སྲིང་གཅིག༴ གསེར་གྱི་སྟག་མོ་མགོ་ལྔ་སྐུ༴ ཟངས་ཀྱི་འཕར་བ་ཕོ༴ སྲིབ་རི་ནག་ལ་མ་བཏང༴ དམ་ཉམས་བན་དྷེའི་ལག་ཏུ་ཤོར་སྲིད་ཀྱང་། །བན་དྷེའི་ལག་ཏུ་ཤོར༴ སྲིང་གཅིག༴ ཕྱག་ན་རྡོ་རྗེའི་སྐུ༴ ཡངས་དཀར་རྒྱལ་པོ་ཕོ༴ བན་དྷེའི་ལག་ནས་མ་བཏང་༴ དམ་ཉམས༴ བོན་པོའི་ལག་ཏུ་ཤོར་སྲིད༴ བོན་པོའི་ལག་ཏུ༴ སྲིང་གཅིག༴ མགོན་པོ་ནག་པོའི་སྐུ༴ ཀླུ་བདུད་ནག་པོའི་ཕོ༴ བོན་པོའི་ལག་ནས་མ་བཏང་༴ དམ་ཉམས་དགྲ་བོའི༴ སྲོག་ལྷ་གཉེན་པོའི་ལག་ཏུ་ཤོར་སྲིད་ཀྱང་། །སྲོག་ལྷ་གཉེན་པོའི་ལག་ཏུ་ཤོར༴ སྲིང་གཅིག་རྡོ་རྗེ༴ ཀླུ་བདུད་གདུག་པའི་སྐུ༴ འབྲུག་མོ་ངར་ཆེན་ཕོ༴ སྲོག་ལྷ་གཉེན་པོའི་ལག་ནས་མ་བཏང་༴ དམ་ཉམས་དགྲ་བོའི༴ འགོ་བའི་ལྷ་ལྔའི་ལག་ཏུ་ཤོར༴ འགོ་བའི་ལྔའི་ལག༴ སྲིང་གཅིག༴ ཞིང་ལྤགས་དག་ཏུ་སྐུ་སྤྲུལ༴ ཞིང་དབྱུག་དཀར་པོའི་ཕོ༴ འགོ་བའི་ལྷ་ལྔའི་ལག་ནས་མ་བཏང་༴ དམ་ཉམས༴ ལུས་ཀྱི་ལྷ་ལྔའི་ལག་ཏུ་ཤོར༴ ལུས་ཀྱི་ལྷ་ལྔའི་ལག་ན༴ སྲིང་གཅིག༴ དུང་གི་མོན་པ་ནག་པོ་དག་ཏུ་སྐུ༴ ཟངས་ལྕགས་བྱ་ཁྲ་ནག་པོ་ཕོ༴ ལུས་ཀྱི་ལྷ་ལྔའི་ལག་ནས་མ་བཏང་༴ དམ་ཉམས༴ ཕུར་བཟློག་མཁན་གྱི་ལག་ཏུ་མ་བཏང་ཁྲིད་ལ་ཤོག །སྔགས་བཟློག་མཁན་གྱི་ལག་ཏུ་མ་བཏང་༴ བསྲུང་བཟློག་མཁན་གྱི་ལག་ཏུ་མ༴ རྫས་བཟློག་མཁན་གྱི་ལག་ཏུ་མ༴ མཐོ་རི་རབ་རྩེ་ནས་མ་བཏང་ཁྲིད་ལ་ཤོག །དམའ་རྒྱ་མཚོའི་གཏིང་ནས་མ༴ བར་འཛམ་བུའི་གླིང་ནས་མ༴ སྲ་བ་བྲག་ལ་བབ་ཀྱང་༴ སྙི་བ་ཆུ་ལ་བབ་ཀྱང་མ༴ འཕྱོ་བ་ཆུ་ལ་བབ་ཀྱང་མ༴ དམ་ཉམས་དགྲ་བོའི་བླ་འཁྱམས་མ་བཏང་༴ གཟུགས་ལིང་ག་འདི་ལ་མྱུར་དུ་ཁྲིད་ལ་ཤོག །མིང་བྱང་བུ་འདི་ལ་གནས་པར་གྱུར། །དམ་ཉམས་དགྲ་བོའི་ལས་ངན་འདི། །དེས་བྱེད་མ་མོས་དེས་ལ་ཤོག །འདྲེན་བྱེད་མ་མོས་དྲངས་ལ་ཤོག །འགུག་བྱེད་མ་མོས་ཁུག་ལ་ཤོག །འདེད་བྱེད་མ་མོས་དེད་ལ་ཤོག །འཆིང་བྱེད་མ་མོས་འཆིང་ལ་ཤོག །བསྟོད་བྱེད་མ་མོས་བསྟོད་ལ་ཤོག །གསོད་བྱེད་མ་མོས་གསོད་ལ་ཤོག །རང་དབང་མེད་པར་འདིར་ཁུག་ལ། །གཟུགས་ལིང་ག་འདི་ལ་ཁུག་ལ་ཤོག །མཚན་བྱང་བུ་འདི་ལ་གནས་པར་གྱུར། །ཐོགས་པ་མེད་པར་ད་སྒྲོལ་ཅིག །ཚེ་བསོད་བཀྲགས་མདངས་དྲོད་དབུགས་རྣམས། །བདུད་མོ་རེ་མ་ཏིའི་ད་ཕྲོག་ལ། །གློ་སྙིང་ནང་རོལ་བཅས་པ་རྣམས། །དཔལ་ལྡན་མ་ཡི་རྔམ་ཟས་གྱིས། །ཤ་ཁྲག་རུས་གསུམ་ཐམས་ཅད་ཀྱང་། །མ་མོའི་མཁའ་འགྲོའི་ཚོགས་སུ་བཞེས། །ༀ་མ་ཧཱ་ཀཱ་ལི་རེ་མ་ཏི། །དགྲ་བོ་ནྲྀ་མ་ར་ཡ་ཛ་ཛཿ ཞེས་བླ་ཚུལ་འགུགས་ལེགས་སོ། །ཧཱུྃ། བསྟན་ལ་སྡང་བའི་དགྲ་བོ་འདི། །བསྒྲལ་བའི་ཞིང་དུ་གྱུར་པ་ཡིན། །འགོ་བའི་ལྷ་ལྔ་ལ་སོགས་པའི། །བསྲང་བྱེད་ལྷ་རྣམས་ཀུན་གྱིས་ཀྱང་། །སྡིག་ཅན་འདི་ལ་བསྲུང་བར་མ་བྱེད་པར། །དམ་ཉམས་དགྲ་འདི་མྱུར་དུ་སྤངས། །སྡིག་ཅན་དགྲ་ཡི་གཤེད་མཛོད་ཅིག །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་ཤག་ཕྱེ། །ཧཱུཾ། དགྲ་བོའི་ཕོ་ལྷ་འཕྲག་པ་གཡས་ནས་ཕྱེས། །མ་ལྷ་འཕྲག་པ་གཡོན་ནས་ཕྱེས། །ཞང་ལྷ་སྤྱི་བོའི་གཙུག་ནས་ཕྱེས། །ཉེ་ལྷ་རྐང་པའི་མཐིལ་ནས་ཕྱེས། །སྲོག་ལྷ་སྙིང་གི་དཀྱིལ་ནས་ཕྱེས། །སྒྲ་ལྷ་རྟག་པའི་རྒྱབ་ནས་ཕྱེས། །ལྷན་ཅིག་སྐྱེས་པའི་ལྷ་དང་ཕྱེས། །མཉམ་པོར་འོང་བའི་བདུད་དང་སྤྲོད། །གནམ་ལ་འཇུ་བའི་འཇུ་ཐག་ཆོད། །ས་ལ་བརྟེན་པའི་རྟེན་ཕུར་ཕུད། །གྲི་ཐབས་ཉི་ཤུ་རྩ་ལྔས་སོད། །བདུན་རྒྱུད་ཚུན་ཆད་མ་བཏང་བར། །གཏན་ནས་བརླག་པའི་ཕྲིན་ལས་མཛོད། །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་ཤག་ཕྱེས། །ཞེས་ལྷ་དབྱེ་བྱའོ། ༈ །རླུང་སྤྲོས་ལྷ་མོ་ནག་མོ་སྟེ། གཡས་ཀྱི་གྲི་གུག་སྲོག་རྩ་རྒལ་ནས་གཅོད། །གཡོན་གྱི་ཐོད་ཁྲག་སེམས་ཀྱི་མར་མེ་སོད། །བདུད་རྩི་ཧཱུྃ་གི་ངོ་བོ་ཕྲོག་པར་བྱ། །འབུད་པའི་རླུང་གི་མར་མེ་གསོད་པར་བྱ། །དྲངས་བའི་རླུང་གི་ཐིག་ལེ་དྲངས་པར་བྱ། །དྲུག་ཅུ་རྩ་གཉིས་ཐུན་གྱི་དམིགས་བྱ་སོད། །ཅེས་པ་ནི། བདག་གི་སྣ་བུག་གཡས་ནས་རླུང་སྔོ་དམར་སྤྲོས་པའི་རྩེ་མོ་ལས། བྷྱོ་ནག་མོ་གཅིག་འཕྲོས་པའི་བསྒྲུབ་བྱའི་སྣ་བུག་གཡོན་དུ་ཞུགས་པའམ། ལྷ་མོ་ནག་མོ་གཡས་ཀྱི་གྲི་གུག །གཡོན་ཐོད་ཁྲག་ཐོག་པ། གྲི་གུག་གིས་སྲོག་རྩ་བཅད། ཐོད་ཁྲག་གི་རྣམ་པར་ཤེས་པ་མར་མེ་ལྟ་བུ་དེ་ལ་བརྒྱབ་པས་ནག་གམ་གྱིས་བཏང་བར་བསམ། དེ་ནས་གཟུང་ཐག་ལག་ཏུ་བཟུང་ལ། ཁོའི་སྲོག་རྩ་ནས་བཟུང་བར་བསམ་ལ་སྔགས་བཟླས་པའི་སྔགས་ཀྱིས་འོད་ཟེར་གྱིས་སྲོག་རྩ་དེ་རྦད་རྦད་བཅད་པར་བསམ་མོ། །ཕུར་བུ་ལྷ་མོ་ཞལ་གཅིག་ཕྱག་གཉིས་སྨད་ཕུར་བ་མགར་གྱི་སོལ་མེ་ནས་བྱུང་བ་ལྟར་དམར་ལམ་མེ་འབར་བསམ། སྤྱི་བོར། མགྲིན་པ། གསང་གནས། སྙིང་ཀ་ལྟེ་བ་རྣམས་སུ་བཏབས་པའི་ཐལ་གྱིས་ཕུར་བར་བསམ་ཞིང་། བྷྱོཿ ཕུར་ཟོར་བསྲུང་མ་རེ་མ་ཏི། །དམ་ལ་མ་འདའ་ད་ཚུར་བྱོན། །ལྕགས་སམ་དྲག་པོའི་ཤིང་རྣམས་ལ། །མངོན་སྤྱོད་དྲག་པོའི་ཕུར་བུ་བྱས། །སྤྱི་བོར་རྒྱ་མདུད་གཞལ་ཡས་ཁང་། །རྐེད་པ་རྒྱ་མདུད་དཔལ་ལྡན་མ། །རྩེ་མོ་ཟུར་གསུམ་རེ་མ་ཏི། །སྤྱི་བོར་རྒྱ་མདུད་འབྲུག་སྟོང་ལྡིར། །རྐེད་པ་རྒྱ་མདུད་གློག་སྟོང་འགྱུ། །རྩེ་མོ་ཟུར་གསུམ་མེ་ལྟར་འབར། །མེ་ལྟར་འབར་བའི་རྩེ་མོ་ན། །ངན་སྔགས་དམོད་པའི་མཚོན་སྤྲོས་པས། །དམ་ཉམས་དགྲ་བོའི་སྙིང་ལ་གཟིར། །བྷྱོཿ བདུད་མོ་བྱེ་བ་འབུམ་གྱིས་གཙོ་བོ་ནི། །དཔལ་ལྡན་གཉེན་གྱི་རྡོ་རྗེ་རེ་མ་ཏི། །མཿཁྱེད་ཀྱི་ཐུགས་དམ་དུས་ལ་བབ། །སྐུ་མདོག་མཐིང་ནག་ཞལ་གཅིག་གཉིས་མ། །ཕྱག་གཡས་བདུད་ཀྱི་རལ་གྲི་འབར་བ་ཡི། །དམ་ཉམས་དགྲ་བགེགས་སྲོག་རྩ་རྒལ་ཆོད། །ཕྱག་གཡོན་གདུགས་པའི་ཐོད་ཁྲག་གིས། །དམ་ཉམས་དགྲ་བོའི་སྙིང་ཁྲག་ཞལ་དུ་གསོལ། །སྐུ་སྨད་ལྕགས་ཀྱི་ཕུར་པ་ཟུར་གསུམ་རྣོ། །བཏབ་པའི་ཐེབ་པར་མཛོད་ཅིག་རེ་མ་ཏི། །ཐེབས་པས་རྡུལ་དུ་རློག་ཅིག་རེ་མ་ཏི། །འཕང་བ་ཕྱིར་མ་ལྡོག་ཅིག་རེ་མ་ཏི། །དགྲ་བགེགས་འབྱུང་པོ་སོད་ཅིག་རེ་མ་ཏི། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མཿཁྱོད་ཀྱི་ཐུགས་དམ་དུས་ལ་བབ། །བྱད་མའི་ལུས་ཀྱི་སྦྱོར་བ་བཤིགས་པའི་དུས་ལ་བབ། །ལུས་ཀྱི་ནུས་པ་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱེད་ཀྱི་ཐུགས་དམ༴ བྱད་མའི་ངག་གི་སྦྱོར་བ་བཤིགས་པའི་དུས་ལ༴ ངག་གི་ནུས་པ་འཕྲོག་པའི༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱེད་ཀྱི་ཐུགས་དམ༴ བྱད་མའི་ཡིད་ཀྱི་སྦྱོར་བ་བཤིགས་པའི༴ ཡིད་ཀྱི་ནུས་པ་ཕྲོག༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱེད་ཀྱི་ཐུགས༴ བྱད་མའི་ཁམས་དང་སྐྱེ་མཆེད་བཤིག་པའི༴ བཀྲག་དང་གཟི་མདངས་འཕྲོག་པའི༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱེད་ཀྱི་ཐུགས༴ བྱད་མའི་ལྟེ་བའི་ཙཀྐྲ་བཤིག༴ བསྲུང་སྐྱོབས་ནུས་པ་འཕྲོག་པའི༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས༴ བྱད་མའི་བླ་དང་ཡན་ལག་བཅོམ་པའི་དུས་ལ་བབ། །རྟེན་དང་རྣམ་ཤེས་འཕྲོག༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །སྡིག་ཅན་སྡང་བའི་དགྲ་བོ་འདིས། །གཏན་ནས་བརླག་པའི་ཕྲིན་ལས་མཛོད། །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་རྦད། མཚོན་ཐུན་ནི། མཚོན་ཆའི་ཚོགས་ཐམས་ཅད་ལྷ་མོའི་རལ་གྲི་བསམ་ལ། དགྲ་བོའི་སྙིང་དཀར་ནག་མཚམས་སུ་བརྒྱབ་པའི་སྤྱི་བོ་ནས་རྐང་མཐིལ་བར་ཤག་ཤག་བཏང་བར་བསམ་མོ། །བྷྱོ། ལྷ་མོ་ནག་མོ་རེ་མ་ཏི། །ཁྱོད་ཀྱི་ལས་ཀྱི་ཕོ་ཉ་ནི། །བདུད་མོ་ནག་མོ་འབུམ་ཕྲག་འགྱེད། །ནག་མོ་འབུམ་སྡེའི་འཁོར་ཚོགས་རྣམས། །གོས་སུ་མི་ལྤགས་རློན་པ་གྱོན། །ཟས་སུ་མི་ཤ་རྟ་ཤ་ཟ། །སྐོམ་དུ་མི་ཁྲག་རྟ་ཁྲག་འཐུང་། །ལས་སུ་སངས་རྒྱས་བསྟན་པ་བསྲུང་། །སྲོག་གཅོད་ལས་ལ་ཤིན་ཏུ་དགྱེས། །ཕྱག་གཡས་གྲི་གུག་འབར་བ་ཡི། །བསྟན་ལ་སྡང་བྱེད་སྲོག་རྩ་ཆོད། །ཕྱག་གཡོན་གདུག་པའི་ཐོད་ཁྲག་གིས། །དགྲ་བོའི་སེམས་ཀྱི་མར་མེ་སོད། །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་སོད། དུག་མཐུན་ནི། དུག་ནད་སྣ་ཚོགས་ཀྱིས་བཏབ་པར་བསམ། ཁྲག་ཐུན་ནི། ཁྲག་ནད་ཕོ་ལོག་གླང་ཐབས། གག་ལྷོག་མཛེ་གྲུམ། ཕོལ་མིག །ཚ་ནད། ནད་རྣམ་པ་སྣ་ཚོགས་ཀྱིས་བཏབ་པར་བསམ། རུས་མྱག་ཚོས་པར་བསམ། དྷོ་ཐུན་ཟངས་ལྕགས་ཕྱེ་མ་ལ་སོགས་པ་རྣམས་ནི། བདུད་མོ་འཚོགས་ཤ་ཟའི་ཚོགས། གཅན་གཟན་གྱི་ཚོགས་ཀྱིས་གོ་རོ་བསྟོད་པ་བཞིན་དུ། ལ་ལས་ཤ་ཟོས། ལ་ལས་ཁྲག་འཐུང་། ལ་ལས་རུས་པ་འཆོས། ཡུངས་འབྲུ་ཙམ་ཡང་མ་ལུས་པར་གསོལ་བར་བསམ་ཤིང་། བྷྱོ། དུར་ཁྲོད་གནས་སུ་སྐྱེས་པ་ཡི། །དྲག་པོའི་དུག་གིས་ཐུན་རྫས་རྣམས། །ཡུངས་དཀར་ཐུན་དང་ཡུངས་ནག་དུག །སྐེ་ཚེ་དུག་དང་ཤངས་ཚེ་དུག །ཁྲག་དང་དུག་གིས་ཐུན་རྫས་རྣམས། །མ་མོ་མཁའ་འགྲོའི་ཚོགས་སུ་གྱུར། །ཤ་ཟ་གསོད་བྱེད་ཚོགས་རྣམས་ཀྱང་། །གསོད་བྱེད་བཤན་པའི་ཚོགས་སུ་གྱུར། །ཕྱག་ན་གདུག་པའི་མཚོན་ཆ་བསྣམས། །གདུག་པའི་མཚོན་ཆ་སྣ་ཚོགས་ཀྱིས། །དགྲ་བོའི་ལུས་སྲོག་རྟེན་དང་ཕྲལ་ནས་ཀྱང་། །ཏིལ་འབྲུ་ཙམ་ཡང་གཏིབ་པར་མཛོད། །ཁྲག་ནད་ས་དང་བཤལ་བའི་ནད། །ནད་ཀྱི་ན་བུན་སྤྲིན་དུ་གཏིབ། །དུག་འདུས་ནད་རིགས་སྣ་ཚོགས་ཀྱིས། །དམ་ཉམས་དགྲ་ལ་ནད་ཡམས་ཕོབ། །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་ཐུན་བྷྱོ་ཐུན་བྷྱོ། བྷྱོཿ ཡུངས་དཀར་རྒྱལ་པོ་ཕོ་ཉའི་ཚོགས། །ཡུངས་ནག་སྲིན་པོ་རོལ་པའི་ཚོགས། །སྐེ་ཚེ་ལས་ཀྱི་གཤིན་རྗེའི་ཚོགས། །ཤང་ཚེ་སྒྲོལ་བྱེད་གིང་གི་ཚོགས། །ཕྱེ་མ་གསུམ་དང་རྣོ་བའི་མཚོན། །ཁྲག་དང་དུག་ལས་ངར་བླུད་པའི། །དགྲ་བོ་གང་ལ་མངག་པའི་ཚེ། །ཕྱག་ན་རྡོ་རྗེའི་མཐུ་དང་མཉམ། །གསེར་གྱི་རི་རབ་ཆེན་པོ་བརྗིད། །གནམ་ལྕགས་ཐོག་གི་ཆར་པ་ལྟར། །དགྲ་བགེགས་སྡིག་ཅན་ལས་ངན་འདི། །སྤྱི་བོའི་གཙུག་ཏུ་བརྒྱབ་པའི་ཚེ། །རྐང་པའི་མཐིལ་དུ་ས་མ་ཡ། །སྙིང་གི་དཀྱིལ་དུ་ས་མ་ཡ། །དྲན་པ་མེད་པར་མྱོས་སུ་ཆུག །ཡན་ལག་བཞི་ལ་བརྒྱབ་ཏུ་ཆུག །རྡུལ་ཕྲན་བཞིན་དུ་བརླག་པར་མཛོད། །ༀ་མ་ཧཱ་ཀ་ལི་རེ་མ་ཏི། །དགྲ་བོ་ནྲྀ་མ་ར་ཡ་ཐུན་བྷྱོ། །དེ་ནས་ཟོར་ཐུན་ནི། བྷྱོ་སྣང་སྲིད་མ་མོའི་ར་མདའ་ལོག །བདུད་མོའི་འཁོར་ཚོགས་ར་མདའ་ལོག །ལྷ་སྲིན་སྡེ་བརྒྱད་ར་མདའ་ལོག །བདག་ནི་མ་ཉེས་མ་ལེན་ནོ། །བྷྱོ། སྣང་སྲིད་མ་མོ་དམ་ལ་འདུས། །བདུད་མོའི་འཁོར་ཚོགས་དམ་ལ་འདུས། །ལྷ་སྲིན་སྡེ་བརྒྱད་དམ་ལ་འདུས། །བདག་ནི་མ་ཉེས་མ་ལེན་ནོ། །བྷྱོ། སྣང་སྲིད་མ་མོ་ཆ་རེ་རན། །བདུད་མོའི་འཁོར་ཚོགས་ཆ་རེ་རན། །ལྷ་སྲིན་སྡེ་བརྒྱད་ཆ་རེ་རན། །བདག་ནི་མ་ཉེས་མ་ལེན་ནོ། །བསྟན་པ་བཤིག་པའི་དགྲ་བོ་ལ། །ནད་ཀྱི་བདག་མོའི་ནད་སྣ་དྲོངས། །རིམས་ཀྱི་བདག་མོས་རིམས་སྣ་དྲོངས། །ཡམས་ཀྱི་བདག་མོའི་ཡམས་སྣ་དྲོངས། །ཁྲག་གི་བདག་མོས་ཁྲག་སྣ་དྲོངས། །ཟོར་གྱི་བདག་མོས་ཟོར་སྣ་དྲོངས། །ཐུན་གྱི་བདག་མོས་ཐུན་དྲོངས། །དུག་གིས་བདག་མོས་དུག་སྣ་དྲངས། །ནད་ཀྱི་རྐྱལ་ཁ་དགྲ་ལ་ཕྱེས། །མཚོན་གྱི་གྲུ་གུ་དགྲ་ལ་སྐྱོངས། །ཐོག་དང་སེར་བའི་ཟོར་སྣ་དྲོངས། །དགྲ་བོའི་ཡུལ་དུ་དམག་སྣ་དྲངས། །དགྲ་བོ་མི་ནོར་དམར་མོ་གཏིང་ནས་ཤིག །ས་མཁར་སྐྱ་བོ་རྨོང་ནས་སྐྱིལ། །མ་ལ་བཅོལ་ན་མཐུ་མ་ཆུང་། །བཅོལ་པའི་ཕྲིན་ལས་གྲུབ་པར་མཛོད། །ༀ་མ་ཧཱ་ཀ་ལི་རེ་མ་ཏི། །དགྲ་ལ་ཐུན་བྷྱོ། དགྲ་ལ་ནད་བྷྱོ། དགྲ་ལ་རིམས་བྷྱོ། དགྲ་ལ་ཡམས་བྷྱོ། དགྲ་ལ་ཁྲག་བྷྱོ། དགྲ་ལ་ཟོར་བྷྱོ། ༀ་མ་ཧཱ་ཀ་ལི་རེ་མ་ཏི། དགྲ་བོ་ནྲྀ་མ་ར་ཡ་ཐུན་བྷྱོ། བྷྱོ། ཉི་མ་དེའི་སྔ་ཐུན་ལ། །མ་མོ་དཀར་མོ་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨང་ནས་ཤིག །དགྲ་བོ་ཐལ་བ་རྡུལ་དུ་རློག །བཅོལ་པའི་ཕྲིན་ལས་གྲུབ་པར་མཛོད། །བྷྱོ། ཉི་མ་དེའི་གོང་ཐུན་ལ། །མ་མོ་སེར་ནག་སྟོང་གི་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་གཤིག་པའི༴ ནད་དང་དུག་གི༴ དགྲ་བོའི་ཡུལ་དུ༴ དགྲ་བོའི་བླ༴ དགྲ་བོ་ཐལ་བ༴ བཅོལ་པའི་ཕྲིན་ལས༴ བྷྱོ་ཉི་མ་དེའི་ཕྱི་མཐུན་ལ། །མ་མོ་དམར་མོ་སྟོང་གི་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ༴ ནད་དང་༴ དགྲ་བོའི༴ དགྲ་བོ༴ དགྲ་བོ༴ བཅོལ་པའི༴ བྷྱོ། ཉི་མ་དེ་ཡི་འཛིང་པ་ལ། །མ་མོ་ལྗང་ནག་སྟོང་གི་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་གཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨང་ནས་ཤིག །དགྲ་བོ་ཐལ་བ་རྡུལ་དུ་རློག །བཅོལ་པའི་ཕྲིན་ལས་གྲུབ་པར་མཛོད། །དུས་བཞིའི་ཐུན་བསྐུལ་རྫོགས་སོ། །བྷྱོ། ཐུན་གྱི་མ་མོ་ཆེན་མོ་ནི། །ནམ་གྱི་ཆ་སྟོད་བསྐུལ་བའི་ཚེ། །ཆིབས་སུ་བོང་བུ་ག་བ་བཅིབས། །དེ་ལ་གསང་བའི་མཚན་གསོལ་བ། །དཔལ་ལྡན་གཉན་གྱི་རྡོ་རྗེ་རེ་མ་ཏི། །སྐུ་མདོག་མཐིང་ནག་འབར་བ་ལ། །ཁྲག་ཞག་བསྲེས་པའི་ཐིག་ལེ་ཅན། །གཡས་ན་ནད་ཀྱི་རྐྱལ་པ་བསྣམས། །གཡོན་ན་ཐུན་གྱི་ཁྲག་སྤྱོད་མ། ༈ །གསང་སྔགས་ཀུན་གྱི་མཆོད་ལེན་མ། །རྣལ་འབྱོར་ཀུན་གྱི་སྐུ་བསྲུངས་མ། །བདག་གིས་གདུང་སྟེ་བོས་པའི་ཚེ། །དེ་ཚེ་ཁྱོད་ཀྱི་ཐུན་རྒྱོབ་ལ། །ཐུན་ཁྲག་རིམས་སུ་བསྒྱུར་དུ་གསོལ། །རིམས་ནད་དགྲ་ལ་དབབ་ཏུ་གསོལ། །སྡང་སེམས་གནོད་སེམས་ལྡན་པ་ཡི། །མིང་རུས་གཟུགས་སུ་བྲིས་པ་ལ། །ཐུན་ཐོག་མ་མོས་ཐུན་ཕོབ་ལ། །ཁྲམ་ཐོག་མ་མོའི་ཁྲམ་ལ་ཐོབ། །ཤྭ་རྡེའུ་ནག་པོའི་རྩིས་སུ་ཆུག །བྱང་དམར་བམ་པོའི་ཀྱུས་ལ་ཐོབ། །ནད་ཀྱི་རྐྱལ་པ་ཁ་ཕྱེ་ལ། །མཚོན་གྱི་གྲུ་གུ་ནག་པོས་བཅིང་། །སྨྱོ་རུ་ཆུག་ལ་འབོག་ཏུ་ཆུགས། །བརྒྱལ་དུ་ཆུག་ལ་རིང་དུ་ཆུགས། །རྟགས་དང་མཚན་མ་མྱུར་དུ་སྟོན། །བཅོལ་པའི་འཕྲིན་ལས་གྲུབ་པར་མཛོད། །བྷྱོ། ཐུན་གྱི་མ་མོ་འབྲིང་མོ་ནི། །ནམ་གྱི་གོང་ལ་བསྐུལ་བའི་ཚེ། །ཆིབས་སུ་དྲེལ་ནག་ཁ་དཀར་བཅིབས། །དེ་ལ་གསང་བའི་མཚན་གསོལ་བ། །རྡོ་རྗེ་བ་ལམ་དྲེལ་སྣ་མ། །ཉིད་ཀྱི་སྐུ་ནི་གཅེར་བུ་ལ། །སྐུ་མདོག་མཐིང་ནག་རྔམ་པ་ལ། །ཁྲག་ཞག་བསྲེས་པའི་ཐིག་ལེའི་བརྒྱན། །གཡས་པས་མདུང་ནག་རྩེ་གསུམ་བསྣམས། །གཡོན་ན་ཐུན་གྱི་ཁྲག་སྤྱོད་མ། །གསང་སྔགས་ཀུན་གྱི་མཆོད་ལེན་མ། །སོགས༴ གྲུབ་པར་མཛོད། བྷྱོ། ཐུན་གྱི་མ་མོ་ཐ་ཆུང་ནི། །ནམ་གྱི་ཆ་སྨད་བསྐུལ་བའི་ཚེ། །ཆིབས་སུ་སོ་བྱ་རོག་མོ་བཅིབས། །དེ་ལ་གསང་བའི་མཚན་གསོལ་བ། །རྡོ་རྗེ་ཁྲི་སྨན་ལྡེམ་དྲུག་མ། །ཉིད་ཀྱི་སྐུ་ནི་གཅེར་བུ་ལ། །ཁྲག་ཞག་བསྲེས་པའི་ཐིག་ལེའི་བརྒྱན། །གཡས་ན་ནད་ཀྱི་རྐྱལ་ཁ་འབེབ། །གཡོན་ནད་ཐུན་གྱི་ཁྲག་སྤྱོད་མ། །གསང་སྔགས་བདག་གི་མཆོད་ལེན་མ། །རྣལ་འབྱོར་ཀུན་གྱི་སོགས། བཅོལ་པའི་ཕྲིན་ལས་འགྲུབ་པར་མཛོད། །ༀ་མ་ཧཱ་ཀ་ལི་རེ་མ་ཏི། དགྲ་བོ་ནྲྀ་མ་ར་ཡ་ཐུན་བྷྱོ། དེ་ནས་མཚོན་ཆ་རྣམས་ལག་ཏུ་བཟུངས་ལ། རང་ཉིད་ཡི་དམ་ལྷའི་ང་རྒྱལ་གྱིས་འདི་སྐད་དོ། །ཧཱུྃ། ང་ནི་དུས་གསུམ་བཞུགས་པ་ཡི། །སངས་རྒྱས་ཡིན་ཏེ་ཡེ་ཤེས་སྐུ། །ཡེ་ཤེས་རྣོ་དབལ་མཚོན་ཆ་ཡི། །དགྲ་བགེགས་ལོག་རྟོག་འཁོར་བའི་རྒྱུན་ཐག་ཆོད། །ཧཱུཾ། ང་ནི་དུས་གསུམ་བཞུགས་པ་ཡི། །སངས་རྒྱས་ཡིན་ཏེ་རྡོ་རྗེའི་སྐུ། །རྡོ་རྗེ་རྣོ་དབལ་མཚོན༴ དགྲ་བགེགས་ལོག་རྟོག༴ ཧཱུཾ། ང་ནི་དུས་གསུམ་བཞུགས་པ་ཡི། །སངས་རྒྱས་ཡིན་ཏེ་རིན་ཆེན་སྐུ། །རིན་ཆེན་རྣོ་དབལ༴ དགྲ་བགེགས་ལོག་རྟོག༴ ཧཱུྃ། ང་ནི་དུས་གསུམ་བཞུགས་པ་ཡི། །སངས་རྒྱས་ཡིན་ཏེ་པད་མའི་སྐུ། །པད་མ་རྣོ་དབལ༴ དགྲ་བགེགས་ལོག་རྟོག༴ ཧཱུྃ། ང་ནི་དུས་གསུམ་བཞུགས་པ་ནི། །སངས་རྒྱས་ཡིན་ཏེ་རྒྱ་གྲམ་སྐུ། །རྒྱ་གྲམ་རྣོ་དབལ༴ དགྲ་བགེགས་ལོག་རྟོག༴ ཧཱུཾ། ཡེ་ཤེས་རབ་ཏུ་འབར་བ་དང་། །རྡོ་རྗེ་རབ་ཏུ་འབར་བ་དང་། །རིན་ཆེན་རབ་ཏུ་འབར་བ་དང་། །པད་མ་རབ་ཏུ་འབར་བ་དང་། །རྒྱ་གྲམ་རབ་ཏུ་འབར་བ་དང་། །མཚོན་ཆ་ཤིན་ཏུ་འབར་བ་ཡི། །དམ་ཉམས་དགྲ་བོ་སྡིག་ཅན་འདིས། །གཏི་མུག་མགོ་ལ་བརྒྱབ་ན་ཚལ་པ་བརྒྱ། །ཞེ་སྡང་རུས་ལ་བརྒྱབ་ནས་དུམ་བུ་སྟོབ། །རྣམ་ཤེས་ཚོགས་ལ་བརྒྱབ་པའི་ཚེ། །དགྲ་བགེགས་གདུག་པ་ཅན་འདིའི་ཕུང་པོ་ཚལ་པ་ཚལ་པ། །དུམ་བུ་དུམ་བུ། ཕྱེ་མ་ཕྱེ་མ། རྡུལ་ཕྲན་རྡུལ་ཕྲན་བཞིན་དུ་གཏུབ་ཅིག །ཧཱུཾ། ཡེ་ཤེས་མགོན་པོ་ནག་པོ་དང་། །མ་ཅིག་ལྷ་མོ་ནག་མོ་དང་། །གཤིན་རྗེ་ནག་པོ་རྔམ་པའི་སྐུ། །མ་མོ་མགོན་པོ་གཤིན་རྗེ་ཡི། །སྐུ་ལས་སྤྲུལ་པའི་བཤན་པ་འབུམ། །སྤུ་གྲི་རླུང་གི་ངར་པ་ཅན། །སྒྲོལ་བྱེད་ཚོན་ཆ་སྣ་ཚོགས་ཀྱིས། །ལས་ངན་གདུག་པའི་དགྲ་བགེགས་ཀྱི། །ཤ་རུས་གཏུབ་ཅིང་སྲོག་དང་ཕྲོལ། །ལིང་ག་རྣམས་ལ་མཚོན་གྱིས་བརྡེག་ཅིང་བཏུབས་སོ། །དེ་ནས་གཏུན་བརྡུང་བྱ་བ་ནི་འདི་སྐད་དོ། །ཧཱུྃ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལ་འདའ་བྱེད་སྡིག་ཅན་རྣམས། །རྡོ་རྗེའི་མཚོན་ཆས་བསྒྲལ་ནས་ཀྱང་། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུང་བྱས་ནས། །དམ་ཉམས་ལྷ་བསྲུང་བརླག་པར་གྱུར། །དགྲ་དང་བགེགས་ལ་སྨོས་ཅི་དགོས། །ༀ་བཛྲ་ཀི་ལི་ཀི་ལ་ཡ་སརྦ་བཱིག་ནན་བམ་ཧཱུཾ་ཕཊ། ཧཱུཾ། རྡུངས་ཤིག་རིན་ཆེན་འབར་བའི་གཏུན། །བཀའ་ལ་འདའ་བྱེད་སྡིག་ཅན་རྣམས། །རིན་ཆེན་ཚོན་ཆས་བསྒྲལ་ནས་ཀྱང་། །ཁྲོ་མོ་འབར་བའི་གཏུན་ཁུང་དུ། །རིན་ཆེན་ཐོ་བས་བརྡུང་བྱས་ནས། །དམ་ཉམས་ལྷ་བསྲུང་བརླག་པར་འགྱུར། །དགྲ་དང་བགེགས་ལ་སྨོས་ཅི་དགོས། །ༀ་རཏྣ་ཀི་ལི་ཀི་ལ་ཡ་སརྦ་བཱིག་ནན་བཾ་ཧཱུཾ་ཕཊ། ཧཱུཾ། རྡུངས་ཤིག་པད་མ་འབར་བའི་གཏུན། །བཀའ་ལས་འདའ་བྱེད་སྡིག་ཅན་རྣམས། །པད་མ་མཚོན་ཆས་བསྒྲལ་ནས་ཀྱང་། །ཁྲོ་མོ་འབར་མའི༴ པད་མ་ཐོ་བས༴ དམ་ཉམས་ལྷ་བསྲུང་༴ དགྲ་དང་བགེགས་ལ༴ ༀ་པད་མ་ཀི་ལི་ཀི་ལ༴ ཧཱུཾ། རྡུངས་ཤིག་རྒྱ་གྲམ་འབར་བའི་གཏུན། །བཀའ་ལ་འདའ་བྱེད་སྡིག་ཅན༴ རྒྱ་གྲམ་མཚོན་ཆས༴ ཁྲོ་མོ་འབར་བའི༴ རྡོ་རྗེ་རྒྱ་གྲམ་ཐོ་བས༴ དམ་ཉམས་ལྷ་བསྲུངས༴ དགྲ་དང་བགེགས་ལ་སྨོས་ཅི་དགོས། །ༀ་ཀརྨ་ཀི་ལི་ཀི་ལ་ཡ་སརྦ་བཱིག་ནཾ་བཾ་ཧཱུཾ་ཕཊ། ཅེས་གཏུན་ཁུང་ཤེས་རབ་ཡུམ་གྱི་བྷ་གར། ཐོ་བ་ཡབ་ཀྱི་རྡོ་རྗེས་བརྡུང་བའི་དགྲ་བགེགས་ཀྱི་གཟུགས་ཕུང་དེ་རྡུལ་དུ་བརླག་པར་གྱུར་པར་བསམ། ཁྲོ་མོ་འབར་བའི་ཚོགས་རྣམས་ཀྱི། །ཞེས་སོགས་བརྗོད། དགྲ་བགེགས་བསྒྲལ་བའི་ཤ་ཁྲག་ལ་བཟའ་བ་ཤ་ཡི་རི་བོ། བཏུང་བ་ཁྲག་གི་རྒྱ་མཚོ། ངོ་བོ་ཟག་མེད་ཡེ་ཤེས་ཀྱི་བདུད་རྩིའི་རྒྱ་མཚོར་གྱུར། ༀ་ཨཱཿཧཱུྃ། ལན་གསུམ་གྱི་བདུད་རྩིར་བྱིན་གྱི་བརླབས་ལ་འབུལ་བ་ནི། དགྲ་བགེགས་གཟུགས་ཀྱི་ཕུང་པོ་འདི། །ཚོགས་ཀྱི་ཞལ་ཟས་གཏོར་མ་འདི། །དཔལ་ལྡན་ལྷ་མོ་ནག་མོ་ཡིན། །ཞལ་དུ་བཏབ་བོ་ཁ་རམ་ཁ་ཧི། །མགུལ་དུ་བསྒྲེང་ངོ་ཨ་རི་ལི། །དབྱིངས་སུ་བསྟིམ་མོ་ས་མཱ་ཡ། །ཐོབ་ཐོབ་ལྗིབ་ལྗིབ་ཧུབ་ཀྱི་ཐོབ། །བསྟབ་པ་བདག་གིས་མི་ནོར་ལ། །བཞེས་པ་ཁྱོད་ཀྱི་མ་ནོར་ཅིག །གསོལ་གསོལ་རོལ་ཅིག་ཁ་རམ་ཁ་ཧི། །བདུད་མོ་བ་ལམ་དྲེལ་སྣ་མ། །སྲིང་གཅིག་ཁྲི་སྨན་ས་ལེ་མ། །ཁོལ་མོ་ཆུ་སྲིན་མགོ་ཅན་གྱིས། །ཞལ་དུ་བསྟབས་སོ་ཁ་རཾ་ཁ་ཧི། །མགུལ་དུ་བསྒྲེང་ངོ་ཨ་ར་ལི། །དབྱིངས་སུ་བསྟིམ་མོ་ས་མ་ཡ། །ཐོབ་ཐོབ་ལྗིབ་ལྗིབ་ཧུབ་ཀྱི་ཐོབ། །བསྟབ་པ་བདག་གིས་མི་ནོར་ལ། །བཞེས་པ་ཁྱེད་ཀྱི་མ་ནོར་ཅིག །གསོལ་གསོལ་རོལ་ཅིག་ཁ་རཾ་ཁ་ཧི། །བསྟན་པའི་གཙོ་མོ་སྐྱིལ་དིང་མ། །དུས་བཞིས་རྒྱལ་མོ་ཆེན་མོ་བཞི། །ནང་གི་བློན་མོ་འཁོར་བཅས་ཀྱི། །ཞལ་དུ་བཏབས་སོ༴ མགུལ་དུ་བསྒྲེང་ངོ་༴ དབྱིངས་སུ་བསྟིམ་མོ༴ ཐོབ་ཐོབ་ལྗིབ་ལྗིབ༴ བསྟབ་པ་བདག་གིས༴ བཞེས་པ་ཁྱེད༴ གསོལ་གསོལ་རོལ་ཅིག༴ གཞན་ཡང་བདུད་མོ་བྱེ་བ་འབུམ། །ཤ་དང་ཁྲག་ལ་རྔམ་པ་ཡི། །སྣང་སྲིད་མ་མོ་འཁོར་བཅས་ཀྱིས། །ཞལ་དུ་བསྟབས་སོ༴ མགུལ་དུ་བསྒྲེང་ངོ་༴ དབྱིངས་སུ་བསྟིམ་མོ། །ཐོབ་ཐོབ་ལྗིབ་ལྗིབ༴ བསྟབ་པ་བདག་གིས༴ བཞེས་པ་ཁྱེད་ཀྱི༴ གསོལ་གསོལ་རོལ་ཅིག༴ ཁུག་ཆོས་དབྱར་མོ་ལ་སོགས་པས། །བརྟན་མ་བཅུ་གཉིས་འཁོར་བཅས་ཀྱིས། །ཞལ་དུ་བསྟབས་སོ༴ །མགུལ་དུ་བསྒྲེང་ངོ་༴ དབྱིངས་སུ་བསྟིམ་མོ༴ ཐོབ་ཐོབ་ལྗིབ་ལྗིབ༴ བསྟབ་པ་བདག་གིས༴ བཞེས་པ་ཁྱོད་ཀྱིས༴ གསོལ་གསོལ་རོལ་ཅིག༴ གཞན་ཡང་ལས་ལ་གྲུབ་པ་ཡི། །གནོད་སྦྱིན་མོ་དང་ཤན་པ་མོ། །ཤ་ཁྲག་ཟས་སུ་ཟ་བ་ཡི། །ཕོ་ཉ་མ་མོའི་ཚོགས་རྣམས་ཀྱིས། །ཞལ་དུ་བསྟབས་ས༴ །མགུལ་དུ་བསྒྲེང་ངོ་༴ དབྱིངས་སུ་བསྟིམ་མོ༴ ཐོབ་ཐོབ་ལྗིབ་ལྗིབ༴ བསྟན་པ་བདག༴ བཞེས་པ་ཁྱོད་ཀྱིས༴ གསོལ་གསོལ་རོལ་ཅིག༴ གཞན་ཡང་བསྟན་པ་བསྲུང་མཛད་པའི། །འཇིག་རྟེན་དྲེག་པའི་ཚོགས་བཅས་ཀྱི། །ཞལ་དུ་བསྟབས་སོ་ཁ་རཾ་ཁ་ཧི། །མགུལ་དུ་བསྒྲེང་ངོ་ཨ་ར་ལི། །དབྱིངས་སུ་བསྟིམ་མོ་ས་མཱ་ཡ། །ཐོབ་ཐོབ་ལྗིབ་ལྗིབ་ཧུབ་ཀྱི་ཐོབ། །བསྟབས་པ་བདག་གིས་མི་ནོར་ལ། །བཞེས་པ་ཁྱེད་ཀྱིས་མ་ནོར་ཅིག །གསོལ་གསོལ་རོལ་ཅིག་ཁ་རཾ་ཁ་ཧི། དེ་ནས་རིམ་པ་བཞིན་དུ་ཚན་དྲུག་ཏུ་འབུལ། ཆོས་སྐྱོང་གཞན་རྣམས་བསྒྲུབ་ན་ཆ་བདུན་བདུན་བརྒྱད་དུ་གསོལ་ལ་རིམ་པ་བཞིན་དུ་འབུལ། དེ་ནས་གཏོར་མ་འབུལ། དེ་ནས་འགུགས་འདྲེན་བྱ། དེ་ནས་བསྐུལ་པ་བྱ། གཏོར་འཕང་། དམོད་འཕྲིན་བཅོལ་འདོན་ནོ། །བཀྲ་ཤིས། མངྒ་ལམ།། །།
འགྲེས་བྱང་།
༈ འགྲེས་བྱང་ནི། སྔགས་འཆང་ཀུན་གྱི་དགྲ་འདུལ་མ། །རྣལ་འབྱོར་ཀུན་གྱི་སྐུ་བསྲུང་མ། །བདག་གིས་གདུང་ནས་བོས་པའི་ཚེ། །དེ་ཚེ་ཁྱོད་ཀྱིས་ཐུན་ཕོབ་ལ། །ཐུན་ཁྲག་རིམས་སུ་བསྒྱུར་དུ་གསོལ། །རིམས་ནད་དགྲ་ལ་དབབ་ཏུ་གསོལ། །སྡང་སེམས་གནོད་སེམས་ལྡན་པ་ཡི། །མིང་དང་གཟུགས་སུ་བྲིས་པ་ལ། །ཐུན་ཐོགས་མ་མོས་ཐུན་ཕོབ་ལ། །ཁྲམ་ཐོགས་མ་མོའི་ཁྲམ་ལ་ཐོབ། །ཤྭ་རྡེའུ་ནག་པོའི་རྩིས་སུ་ཆུགས། །བྱང་དམར་བེམ་པོའི་དཀྱུས་ལ་ཐོབས། །ནད་ཀྱི་རྐྱལ་པ་ཁ་ཕྱེས་ལ། །དགྲ་བོའི་ཡུལ་ཁམས་ནད་ཀྱི་ཁོངས། །ཚོན་གྱི་གྲུ་གུ་དམ་དུ་ཆིངས། །སྨྱོ་རུ་ཆུགས་ལ་འབོགས་སུ་ཆུགས། །བརྒྱལ་དུ་ཆུགས་ལ་རིང་དུ་ཆུགས། །རྟགས་དང་མཚན་མ་མྱུར་དུ་སྟོན། །བཅོལ་པའི་འཕྲིན་ལས་གྲུབ་པར་མཛོད། །
དཔལ་ལྡན་ལྷ་མོའི་ཐུན་དགྲ་བོའི་བསད་ལས།
དཔལ་ལྡན་ལྷ་མོའི་ཐུན་དགྲ་བོའི་བསད་ལས་ཚང་བར་ཡོད་པ་སརྦ་མང་ག་ལམ། ཀ༽ ཧཱུྃ། དཀོན་མཆོག་གསུམ་པོ་གཟུ་དང་དཔང་། །བླ་མ་ཡི་དམ་གཟུ་དང་དཔང་། །དཔའ་བོ་མཁའ་འགྲོ་གཟུ་དང་དཔང་། །ཆོས་སྐྱོང་སྲུང་མ་གཟུང་དང་དཔང་། །བཀའ་ཡི་ལྷ་སྲིན་སྡེ་བརྒྱད་གཟུ་དང་དཔང་། །བདག་ནི་མ་ཉེས་མ་ལེན་པར། །སྡིག་ཅན་དགྲ་བོ་ལས་ངན་འདི། །སངས་རྒྱས་བསྟན་པ་འདི་ཡིས་བཤིགས། །དཀོན་མཆོག་དབུ་འཕང་འདི་ཡིས་སྨད། །བླ་མའི་སྐུ་ལ་འདི་ཡིས་སྡོས། །སྲུང་མ་ཁྱོད་ལ་མཐུ་མེད་ཟེར། །རྣལ་འབྱོར་བདག་ལ་ཕོད་ཀྱང་བསྡོས། །དགྲ་བགེགས་སྡིག་ཅན་ལས་ངན་འདི། །ད་ལྟ་སྒྲོལ་བའི་དུས་ལ་བབ། །གཟུ་དང་དཔང་དུ་སྙན་གསོན་ཅིག །ཅེས་ཕྲིན་ལས་བཅོལ། ཁ༽ ཧཱུྃ། དམ་ཅན་སྲུང་མའི་ཚོགས་རྣམས་ཀྱིས། །དགྲ་བགེགས་སྡིག་ཅན་ལས་ངན་འདི། །གར་འགྲོ་གར་འདུག་གར་གནས་ཀྱང་། །རང་དབང་མེད་པར་འདིར་ཁུག་ལ། །གཟུགས་ལིངྒ་འདི་ལ་མྱུར་དུ་ཁུག །མིང་བྱང་བུ་འདི་ལ་བསྟིམ་པར་མཛོད། །གཟུགས་ལ་ཕོབ། བཛྲ་ཨཾ་གུ་ཤ་ཛཿ ཛཿཧཱུྃ་བྃ་ཧོཿ ག༽ དེ་ནས་བླ་འཚོལ་བྱ་བ་ནི། བྷྱོ། མ་ད་ལྟ་ནམ་གྱི་གུང་ལ་བབ། །ད་ལྟར་ཚོགས་ཀྱི་དུས་ལ་བབ། །མ་མོའི་བླ་འཚོལ་དུས་ལ་བབ། །ལྕགས་ཀྱི་སྤྱང་མོ་མགོ་དགུ་མ། །ཡན་གལ་གནམ་ལ་མན་གལ་ས། །སྐུ་ལ་ལྕགས་ཀྱི་ཚྭ་ཚྭ་འཕྲོ། །གཡས་ཀྱི་ཕྱག་ན་འགྱེད་པ་ནི། །ལྕགས་ཀྱི་སྤྱང་མོ་མགོ་དགུ་འགྱེད། །གཡོན་གྱི་ཕྱག་ན་འགྱེད་པ་ནི། །ཟངས་ཀྱི་འཕར་བ་ལྕེ་བརྒྱད་འགྱེད། །དུང་གི་བྱ་རྒོད་ཀླད་ན་ལྡེང་། །བདུད་སྲིན་ཀུན་གྱི་གཉེན་དུ་ཆེ། །སྲིད་པ་གསུམ་པོ་ཉུལ་ཞིང་རྒྱུག །སྲིད་པ་གསུམ་གྱི་བྱ་ར་མཁན། །ལེགས་ཉེས་གཉིས་ཀྱི་ཤན་འབྱེད་མ། །ཡོ་དྲང་གཉིས་ཀྱི་ཐིག་འབེབས་མ། །ཟས་སུ་དམ་ཉམས་དགྲ་བོའི་ཤ་ལ་ཟོ། །སྐོམ་དུ་དམ་ཉམས་དགྲ་བོའི་ཁྲག་ལ་འཐུང་། །དགྲ་བོའི་བླ་འཁྱམས་ཁྲིད་ལ་ཤོག །བྷྱོ། དམ་ཉམས་དགྲ་བོའི་བླ་ཚེ་འདི། །ནམ་མཁའི་མཐའ་ལ་ཤོར་སྲིད་ཀྱི། །ནམ་མཁའི་མཐའ་ལ་ཤོར་བ་ན། །སྲིང་གཅིག་དཔལ་ལྡན་རེ་མ་ཏི། །བྱ་རྒྱལ་ཁྱུང་དུ་སྐུ་སྤྲུལ་ལ། །ཐང་དཀར་རྒོད་པོ་ཕོ་ཉར་འགྱེད། །ནམ་མཁའི་མཐའ་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བར་སྣང་ཁམས་སུ་འཆོར་སྲིད་གྱིས། །བར་སྣང་ཁམས་སུ་འཆོར་བ་ན། །སྲིང་གཅིག་དཔལ་ལྡན་རེ་མ་ཏི། །རྒོད་གླག་དག་ཏུ་སྐུ་སྤྲུལ་ལ། །བདུད་ཁྲ་མཆུ་རྣོན་ཕོ་ཉར་འགྱེད། །བར་སྣང་ཁམས་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །ས་ཡི་འོག་ཏུ་ཤོར་སྲིད་ཀྱི། །ས་ཡི་འོག་ཏུ་ཤོར་བ་ན། །སྲིན་གཅིག་དཔལ་ལྡན་རེ་མ་ཏི། །ལྕགས་ཀྱི་བྱི་བ་མགོ་དགུར་སྐུར་སྤྲུལ་ལ། །ཟངས་ཀྱི་བྱི་བ་མགོ་ལྔར་ཕོ་ཉར་འགྱེད། །ས་ཡི་འོག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །རྒྱ་མཚོའི་གཏིང་དུ་ཤོར་སྲིད་ཀྱི། །རྒྱ་མཚོའི་གཏིང་དུ་འཆོར་བ་ན། །སྲིང་གཅིག་དཔལ་ལྡན་རེ་མ་ཏི། །ཆུ་སྲིན་རྔམ་པ་སྐུ་སྤྲུལ་ལ། །ཉ་ཆེན་ཡོར་པོ་ཕོ་ཉར་འགྱེད། །རྒྱ་མཚོའི་གཏིང་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །གངས་དཀར་རྩེ་ལ་ཤོར་སྲིད་ཀྱི། །གངས་དཀར་རྩེ་ལ་འཆོར་སྲིད་ན། །སྲིན་གཅིག་དཔལ་ལྡན་རེ་མ་ཏི། །ཤེལ་གྱི་སེང་གེར་སྐུར་སྤྲུལ་ལ། །གངས་གཡི་དཀར་མོ་ཕོ་ཉར་འགྱེད། །གངས་དཀར་རྩེ་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །ཉིན་རི་དཀར་ལ་ཤོར་སྲིད་ཀྱི། །ཉིན་རི་དཀར་ལ་འཆོར་བ་ན། །སྲིང་གཅིག་དཔལ་ལྡན་རེ་མ་ཏི། །དུང་སྤྱང་དཀར་མོར་སྐུར་སྤྲུལ་ལ། །འཕར་བ་ལྕེ་བརྒྱད་ཕོ་ཉར་འགྱེད། །ཉིན་རི་དཀར་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །སྲིབ་རི་ནག་ལ་ཤོར་སྲིད་ཀྱི། །སྲིང་གཅིག་དཔལ་ལྡན་རེ་མ་ཏི། །གསེར་གྱི་སྟག་མོ་མགོ་ལྔར་སྐུ་སྤྲུལ་ལ། །ཟངས་ཀྱི་འཕར་བ་ལྕེ་བརྒྱད་ཕོ་ཉར་འགྱེད། །སྲིབ་ཏི་ནག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །ཕྱོགས་བཞི་མཚམས་བརྒྱད་དག་ཏུ་ཤོར་སྲིད་ཀྱི། །ཕྱོགས་བཞི་མཚམས་བརྒྱད་དག་ཏུ་ཤོར་བ་ན། །སྲིན་གཅིག་དཔལ་ལྡན་རེ་མ་ཏི། །ལྕགས་ཀྱི་སྤྱང་མོ་མགོ་བརྒྱད་སྐུ་སྤྲུལ་ལ། །ལྕགས་ཀྱི་ཁྱི་སྡེར་རྐང་གསུམ་ཕོ་ཉར་འགྱེད། །ཕྱོགས་མཚམས་བརྒྱད་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བན་དེ་ཉམས་པའི་ལག་ཏུ་འཆོར། །བན་དེ་ཉམས་པའི་ལག་ཏུ་འཆོར་སྲིད་ཀྱི། །སྲིང་གཅིག་དཔལ་ལྡན་རེ་མ་ཏི། །ཕྱག་ན་རྡོ་རྗེའི་སྐུ་སྤྲུལ་ལ། །ཡུངས་དཀར་སེར་ཆུང་ཕོ་ཉར་འགྱེད། །བན་དེ་ཉམས་པའི་ལག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བོན་པོ་ཉམས་པའི་ལག་ཏུ་འཆོར། །བོན་པོ་ཉམས་པའི་ལག་ཏུ་འཆོར་སྲིད་ན། །སྲིང་གཅིག་དཔལ་ལྡན་རེ་མ་ཏི། །མགོན་པོ་ནག་པོའི་སྐུ་སྤྲུལ་ལ། །གུ་གུལ་ནག་པོ་ཕོ་ཉར་འགྱེད། །བོན་པོ་ཉམས་པའི་ལག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །སྲོག་ལྷ་གཉེན་པོའི་ལག་ཏུ་འཆོར། །སྲོག་ལྷ་གཉེན་པོའི་ལག་ཏུ་འཆོར་སྲིད་ན། །སྲིང་གཅིག་དཔལ་ལྡན་རེ་མ་ཏི། །ཀླུ་གླང་ས་འགུལ་སྐུ་སྤྲུལ་ལ། །འབྲུག་མོ་ངར་ཆེན་ཕོ་ཉར་འགྱེད། །སྲོག་ལྷ་གཉེན་པོའི་ལག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །འགོ་བའི་ལྷ་ལྔའི་ལག་ཏུ་འཆོར། །འགོ་བའི་ལྷ་ལྔའི་ལག་ཏུ་འཆོར་སྲིད་ན། །སྲིང་གཅིག་དཔལ་ལྡན་རེ་མ་ཏི། །དུག་གི་མོན་པ་ནག་པོའི་སྐུ་སྤྲུལ་ལ། །ཡོར་ཆེན་བྱ་ཁྲ་ཕོ་ཉར་འགྱེད། །འགོ་བའི་ལྷ་སྔའི་ལག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བསྲུང་བཟློག་ནག་པོའི་ལག་ཏུ་འཆོར། །སྲུང་བཟློག་ནག་པོའི་ལག་ཏུ་འཆོར་སྲིད་ན། །སྲིང་གཅིག་དཔལ་ལྡན་རེ་མ་ཏི། །ཞིང་ལྤགས་དག་ཏུ་སྐུ་སྤྲུལ་ལ། །ཀླུ་གཉན་ས་བདག་ཕོ་ཉར་འགྱེད། །སྲུང་བཟློག་ནག་པོའི་ལག་ནས་ཁུག་ལ་ཤོག །དམ་ཉམས་དགྲ་བོའི་བླ་ཚེ་འདི། །བསྲུང་བཟློག་མཁན་གྱི་ལག་ཏུ་མ་བཏང་། །སྔགས་ཟོར་མཁན་གྱི་ལག་ཏུ་མ༴ ཕུར་ཟོར་མཁན་གྱི་ལག་ཏུ་མ༴ སྲ་བ་བྲག་ལ་བབ་ཀྱང་མ་བཏང་ཅིག །སྙི་བ་ཆུ་ལ་བབ་ཀྱང་མ་བཏང་ཅིག །དགྲ་བོའི་གསོན་བླ་གསོན་ཚེ་འདི། །དོས་བདག་མ་མོས་དོས་ལ་ཤོག །འགུགས་བྱེད་མ་མོས་ཁུག་ལ་ཤོག །འདེད་བྱེད་མ་མོས་དེད་ལ་ཤོག །རང་དབང་མེད་པར་འདིར་ཁུག་ལ། །གཟུགས་ལིངྒ་འདི་ལ་མྱུར་དུ་ཁུག །ཐོག་པ་མེད་པ་ད་སྒྲོལ་ལ། །ཚེ་སྲོག་མདངས་དྲོད་དབུགས་བཅས་རྣམས། །བདུད་མོ་རེ་ཏིའི་ད་འཕྲོག་ཅིག །གློ་སྙིང་ནང་ཕྲོལ་བཅས་པ་རྣམས། །དཔལ་ལྡན་མའི་ཞལ་དུ་སྟོབས། །ཤ་ཁྲག་རུས་པར་བཅས་པ་རྣམས། །མ་མོ་བྱེ་བའི་ཚོགས་སུ་རོལ། །ནྲི་ཨརྐྴ་ཡ་མ་ར་ཡ་ཛཿཛ། དེ་ནས་སྲུང་མ་དང་དབྱེ་བ་ནི། ང༽ ཧཱུྃ། བསྟན་ལ་སྡང་བའི་དགྲ་བོ་འདི། །བསྒྲལ་བའི་ཞིང་དུ་གྱུར་པས་ན། །འགོ་བའི་ལྷ་ལྔ་ལ་སོགས་པའི། །བསྲུང་བྱེད་ལྷ་རྣམས་ཀུན་གྱིས་ཀྱང་། །འདི་ལ་བསྲུང་བར་མ་བྱེད་པར། །དམ་ཉམས་དགྲ་འདི་མྱུར་སྤོངས་ལ། །སྡིག་ཆེན་དགྲ་བོའི་གཤེད་མཛོད་ཅིག །མཱ་ར་ཡ་ཤག་ཕྱེ། དམ་ཉམས་དགྲ་བོ་འདིའི་ཕ་ལྷ་དང་ཕྱེ། མ་ལྷ་དང་ཕྱེ། ཡུལ་ལྷ་དང་ཕྱེ། ཞིང་ལྷ་དང་ཕྱེ། ཁ་འཛིན་བྱེད་པའི་ལྷ་དང་ཕྱེ། འགོ་བའི་ལྷ་ལྔ་དང་ཕྱེ། ལུས་ཀྱི་ལྷ་ལྔ་དང་ཕྱེ། མགོན་སྐྱབས་བྱེད་པའི་ལྷ་དང་ཕྱེ་ཞིག །དེ་ནས་རླུང་དྲངས་ནུས་པ་འཕྲོག་པ་ནི། ཅ༽ ཤང་ནས་རླུང་འཕྲོས་ལྷ་མོ་ནག་མོར་གྱུར། གཡས་ཀྱི་གྲི་གུག་དགྲ་བོའི་སྲོག་རྩ་རྒལ་ནས་གཅོད། །གཡོན་པས་ཐོད་ཁྲག་བསྣམས་པ་ཡི། །དགྲ་བོའི་སེམས་ཀྱི་མར་མེ་ཁ་ནས་གསོད། །བདུད་རྩི་ཧཱུྃ་གི་ངོ་བོ་འཕྲོག་པར་བྱེད། །འབུད་པའི་རླུང་གི་མར་མེ་ཁོང་ནས་གསོད། །དྲངས་བའི་སྟོབས་ཀྱི་ཐིག་ལེ་རྩད་ནས་འདྲེན། །དྲུག་ཅུ་རྩ་གཅིག་ཐུན་གྱི་དམིགས་བྱ་གསད། །ༀ་མ་ཧཱ་ཀཱ་ལི༴ ཅེས་པ་བར་འོག་ནས་འབྱུང་བའི་སྔགས་དྲུག་ཅུ་རྩ་གཅིག་གི་བརྡེག་གོ། །དེ་ནས་ཕུར་བུ་བསྐུལ་བ་ནི། ཆ༽ བྷྱོ། ཕུར་ཟོར་སྲུང་མར་རེ་མ་ཏི། །དམ་ལ་མ་འདའ་ད་ཚུར་བྱོན། །ལྕགས་སམ་དྲག་པོའི་ཤིང་ལས་བྱས། །མགོ་བོ་རྒྱ་མདུད་གཞལ་ཡས་ཁང་། །སྐེད་པ་རྒྱ་མདུད་དཔལ་ལྡན་མ། །རྩེ་མོ་ཟུར་གསུམ་རེ་མ་ཏི། །མགོ་བོ་རྒྱ་མདུད་གྲུ་བཞི་ལ། །དྲག་པོའི་འབྲུག་སྒྲ་ཆེམ་ཆེམ་སྒྲོགས། །སྐེད་པ་རྒྱ་མདུད་གློག་སྟོང་འགྱུ། །རྩེ་མོ་ཟུར་གསུམ་མེ་ལྟར་འབར། །མེ་ལྟར་འབར་བའི་རྩེ་མོ་ནས། །ངན་སྔགས་གདུག་པའི་ཚྭ་ཚྭ་འཕྲོ། །ཉམས་པ་ཅན་གྱིས་སྙིང་ལ་གཟེར། །ༀ་རུ་རུ་རཀྨོ་དགྲ་བོའི་སྙིང་རྩ་ལ་ཡཾ་ཡཾ། མ་ཧུར་ཐུམ་དགྲ་བོའི་སྲོག་རྩ་ལ་མ་ར་ཡ་རྦད། ཅེས་མང་དུ་བརྡེག་གོ། །དེ་ནས་ཕུར་ཐུན་བརྡེག་པ་ནི། བྷྱོ། བདུད་མོ་བྱེ་བ་འབུམ་གྱི་གཙོ་མོ་ནི། །དཔལ་ལྡན་གཉན་གྱི་རྡོ་རྗེ་རེ་མ་ཏི། །སྐུ་མདོག་མཐིང་ནག་ཞལ་གཅིག་ཕྱག་གཉིས་རྔམས། །ཕྱག་གཡས་བདུད་ཀྱི་རལ་གྲི་ཕྱར་བ་ཡིས། །དམ་ཉམས་དགྲ་བོའི་སྲོག་རྩ་རྒལ་ནས་གཅོད། །ཕྱག་གཡོན་ཐོད་པ་ཁྲག་བཀང་བསྣམས་པ་ཡིས། །དམ་ཉམས་དགྲ་བོའི་སེམས་ཀྱི་མར་མེ་སོད། །སྐུ་སྨད་དྲག་པོ་ཕུར་བ་ཟུར་གསུམ་རྣོ། །བཏབ་པས་ཐེབས་པར་མཛོད་ཅིག་རེ་མ་ཏི། །ཐེབས་པར་རྡུལ་དུ་རློག་ཤིག་རེ་མ་ཏི། །འཕང་བ་ཕྱིར་ལ་མ་ལྡོག་རེ་མ་ཏི། །མ་ཧཱ༴ བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་ལུས་ཀྱི་སྦྱོར་བ་བཤིགས་པའི་དུས་ལ་བབ། །ལུས་ཀྱི་ནུས་པ་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་ངག་གི་སྦྱོར་བ་བཤིགས་པའི་དུས་ལ་བབ། །ངག་གི་ནུས་པ་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་ཡིད་ཀྱི་སྦྱོར་བ་བཤིགས་པའི་དུས་ལ་བབ། །ཡིད་ཀྱི་ནུས་པ་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་ལྟེ་བའི་ཙཀྲ་བཤིགས་པའི་དུས་ལ་བབ། །བསྲུང་སྐྱོབས་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་སྙིང་དབུས་རྣམ་ཤེས་འཕྲོག་པའི་དུས་ལ་བབ། །རཀྟ་བྱིས་ཀླད་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་ཁམས་དང་སྐྱེ་མཆེད་བཤིགས་པའི་དུས་ལ་བབ། །བཀྲག་དང་གཟི་མདངས་འཕྲོག་པའི་དུས་ལ་བབ། །བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །བྱད་མའི་མཐུ་དང་ནུས་པ་འཕྲོག་པའི་དུས་ལ་བབ། །རྟེན་དང་རྣམ་ཤེས་འཕྲོག་པའི་དུས་ལ་བབ། །དགྲ་བོ་བྱད་མའི་མཐུ་དང་ནུས་པ་བརྟེན་དང་བཀྲག་གཟི་མདངས་རྟེན་དང་རྣམ་པར་ཤེས་པ་བཅུད་ཐམས་ཅད་བདག་ཉིད་ལ་ཐིམ་པར་གྱུར། བྷྱོ། དཔལ་ལྡན་གཉན་གྱི་རྡོ་རྗེ་རེ་མ་ཏི། །མ་ཁྱོད་ཀྱི་ཐུགས་དམ་དུས་ལ་བབ། །སྡིག་ཅན་དགྲ་བོ་ལས་ངན་འདི། །གཏན་ནས་བརླག་པའི་ཕྲིན་ལས་མཛོད། །ཅེས་བརྡེག་གོ། །དེ་ནས་མཚོན་ཐུན་བརྡེག་པ་ནི། ཇ༽ བྷྱོ། ལྷ་མོ་ནག་མོ་རེ་མ་ཏི། །ཁྱོད་ཀྱི་ལས་ཀྱི་ཕོ་ཉ་ནི། །བདུད་མོ་ནག་མོ་འབུམ་ཕྲག་འགྱེད། །ནག་མོ་འབུམ་སྡེ་འཁོར་ཚོགས་རྣམས། །གོས་སུ་མི་ལྤགས་རློན་པ་གྱོན། །ཟས་སུ་མི་ཤ་རྟ་ཤ་ཟ། །སྐོམ་དུ་མི་ཁྲག་རྟ་ཁྲག་འཐུང་། །ལས་སུ་སངས་རྒྱས་བསྟན་པ་བསྲུངས། །སྲོག་གཅོད་ལས་ལ་ཤིན་ཏུ་དགྱེས། །ཕྱག་གཡས་གྲི་ཁུག་འབར་བ་བསྣམས། །བསྟན་ལ་སྡང་བྱེད་སྲོག་རྩ་གཅོད། །ཕྱག་གཡོན་གདུགས་པའི་ཐོད་ཁྲག་གིས། །དགྲ་བོའི་སེམས་ཀྱི་མར་མེ་སོད། །ཅེས་བརྗོད་ལ་སྔགས་ཐུན་པས་བརྡེག་གོ། །དེ་ནས་སྣ་ཚོགས་ཐུན་བརྡེག་པས། ཉ༽ དུག་ཐུན་ལ། བྷྱོ། དང་པོ་དུག་ཐུན་མྱོས་པ་དང་། །ཁྲག་ཐུན་རིམས་ནད་སྣ་ཚོགས་དང་། །ཡུངས་ཐུན་མཛེ་ནད་སྣ་ཚོགས་དང་། །རྡོ་ཐུན་ཁྲག་ཟོར་སྣ་ཚོགས་དང་། །མ་མོ་མཁའ་འགྲོའི་ཁ་རླངས་ཡིན། །མ་མོའི་ཁ་རླངས་བཏང་བའི་ཚེ། །ཁ་རླངས་ནམ་མཁའི་ཁམས་སུ་འཐིབས། །ནམ་མཁའ་སྤྲིན་གྱི་དབྱིངས་རུམས་ནས། །བུད་མེད་ནག་མོ་ཆར་བཞིན་འབབས། །སྤྲུལ་པའི་མ་མོ་ཐམས་ཅད་ཀྱི། །དགྲ་བོའི་ཡུལ་དུ་ནད་ཡམས་ཕོབ། །ཁྲག་གི་ཆར་པ་དགྲ་ལ་ཕོབ། །རིམས་ཀྱི་ཆར་པ་དགྲ་ལ་ཕོབ། །ཐུན་གྱི་ཆར་པ་དགྲ་ལ་ཕོབ། །ཐུན་ཁྲག་རིམས་དུ་བསྒྱུར་དུ་གསོལ། །རིམས་ནད་དགྲ་ལ་དབབ་ཏུ་གསོལ། །སྡང་སེམས་གནོད་སེམས་ལྡན་པ་ཡིས། །མིང་དང་རུས་སུ་བྲིས་པ་ལ། །ཐུན་ཐོགས་མ་མོའི་ཐུན་ཕོབ་ལ། །ཁྲམ་ཐོགས་མ་མོའི་ཁྲམ་ལ་ཐོབ། །དགྲ་བོ་ཐལ་བ་རྡུལ་དུ་རློག །བཅོལ་པའི་ཕྲིན་ལས་འགྲུབ་པར་མཛོད། །ཅེས་སྔགས་ཐུན་བརྡེག་ལ། བྷྱོ། དཔལ་ལྡན་ལྷ་མོ་རེ་མ་ཏི། །ནད་ཀྱི་བདག་མོ་མཐུ་མོ་ཆེ། །ཆིབས་སུ་དྲེལ་སྔོན་རླུང་གཤོགས་བཅིབས། །མི་ནད་ལོང་དགུའི་མངའ་བདག་མོ། །རྟ་ནད་མཚེར་རྩུབ་ཕྱོགས་བཅུར་འགྱེད། །གཡས་ན་བདུད་ཀྱི་ཁྲམ་བམ་བསྣམས། །ཁྲག་ནད་རིམས་ནད་དགྲ་ལ་དྲོངས། །འཁོར་དུ་བདུད་མོའི་ཚོགས་སུ་བཅས། །ཕྱག་ན་གདུག་པའི་ཐོད་ཁྲག་ཐོགས། །དམ་ཉམས་དགྲ་ལ་ཐུན་ཁྲག་ཕོབ། །འཁོར་གྱི་མ་མོའི་ཐུན་སྤྱོད་རྣམས། །གཡས་ན་ཐུན་སྤྱོད་ཀྱི་ལི་ལི། །གཡོན་ན་སེར་བ་ཤ་ར་ར། །ཁྲག་གི་བུ་ཡུག་ཐུ་ལུ་ལུ། །ནད་ཀྱི་ན་བུན་ཐིབས་སེ་ཐིབ། །མ་མོའི་ཐུན་མདའ་དགྲ་ལ་རྒྱོབ། །བསྟན་པ་བཤིགས་པའི་དགྲ་བོ་ལ། །ནད་དང་རིམས་ཀྱི་སྣ་དྲོངས་ལ། །དུག་དང་མཚོན་གྱི་ཆར་པ་ཕོབ། །དགྲ་བོའི་ཡུལ་དུ་དམག་དྲོངས་ལ། །དགྲ་བོ་མི་མཁར་དམར་པོ་རྩེ་ནས་ཤིག །ས་མཁར་སྐྱ་བོ་རྨིང་ནས་སྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །ཅེས་བརྗོད་ལ་ཐུན་སྣ་ཚོགས་ཀྱི་བྲབ་བོ། །དེ་ནས་དུས་བཞིའི་ཐུན་བསྐུལ་བ་ནི། བྷྱོ། ཉི་མ་དེའི་སྔ་ཐུན་ལ། །མ་མོ་དཀར་མོ་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིགས་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨིང་ནས་བསྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཉི་མ་དེའི་གུང་ཐུན་ལ། །མ་མོ་མཐིང་ནག་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨིང་ནས་བསྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཉི་མ་དེའི་དགུང་ཐུན་ལ། །མ་མོ་དམར་ནག་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨིང་ནས་བསྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཉི་མ་དེའི་དགུང་ཐུན་ལ། །མ་མོ་དམར་ནག་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨིང་ནས་བསྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཉི་མ་དེའི་འཛིང་ལ་བབ། །མ་མོ་སྨུག་ནག་སྟོང་གིས་ཉུལ། །གཡས་ན་ཐུན་སྤྱོད་ཀྱི་ལི་ལི། །གཡོན་ན་ཐུན་འཕེན་ཤ་ར་ར། །བསྟན་པ་བཤིག་པའི་དགྲ་བོ་ལ། །ནད་དང་དུག་གི་སྣ་དྲོངས་ལ། །དགྲ་བོའི་ཡུལ་དུ་དམག་སྣ་དྲོངས། །དགྲ་བོའི་བླ་མཁར་རྨིང་ནས་བསྒྱེལ། །བཅོལ་པའི་ཕྲིན་ལས་འགྲུབ་པར་མཛོད། །སྔགས་བཟླའོ། །དེ་ནས་ཐུན་གྱི་མ་མོ་ཆེ་འབྲིང་ཆུང་གསུམ་བསྐུལ་བ་ནི། བྷྱོ། ཐུན་གྱི་མ་མོ་ཆེན་མོ་ནི། །ནམ་གྱི་ཆ་སྟོད་བསྐུལ་བའི་ཚེ། །ཆིབས་སུ་བོང་བུ་ཀ་བ་བཅིབས། །དེ་ལ་གསང་བའི་མཚན་གསོལ་བ། །དཔལ་ལྡན་གཉན་གྱི་རྡོ་རྗེ་རེ་མ་ཏི། །སྐུ་མདོག་མཐིང་ནག་འབར་བ་ལ། །ཁྲག་ཞག་བསྲེས་པའི་ཐིག་ལེ་ཅན། །གཡས་ན་ནད་ཀྱི་རྐྱལ་པ་ཐོགས། །གཡོན་ན་ཐུན་གྱི་ཁྲག་སྤྱོད་མ། །སྔགས་འཆང་ཀུན་གྱི་དགྲ་འདུལ་མ། །རྣལ་འབྱོར་ཀུན་གྱི་སྐུ་བསྲུང་མ། །བདག་གིས་གདུང་ནས་བོས་པའི་ཚེ། །དེ་ཚེ་ཁྱོད་ཀྱིས་ཐུན་ཕོབ་ལ། །ཐུན་ཁྲག་རིམས་སུ་བསྒྱུར་དུ་གསོལ། །རིམས་ནད་དགྲ་ལ་དབབ་ཏུ་གསོལ། །སྡང་སེམས་གནོད་སེམས་ལྡན་པ་ཡི། །མིང་དང་གཟུགས་སུ་བྲིས་པ་ལ། །ཐུན་ཐོགས་མ་མོའི་ཐུན་ཕོབ་ལ། །ཁྲམ་ཐོགས་མ་མོའི་ཁྲམ་ལ་ཐོབ། །ཤོ་རྡེའུ་ནག་པོའི་རྩིས་སུ་ཆུག །བྱང་དམར་བེམ་པོའི་དཀྱུས་ལ་ཐོབས། །ནད་ཀྱི་རྐྱལ་པ་ཁ་ཕྱེས་ལ། །དགྲ་བོའི་ཡུལ་ཁམས་ནད་ཀྱི་ཁོངས། །ཚོན་གྱི་གྲུ་གུའི་དམ་དུ་ཆིངས། །སྨྱོ་རུ་ཆུགས་ལ་འབོགས་སུ་ཆུགས། །མྱོས་སུ་ཆུགས་ལ་རིང་དུ་ཆུགས། །བཅོལ་པའི་ཕྲིན་ལས་འགྲུབ་པར་མཛོད། །བྷྱོ། ཐུན་གྱི་མ་མོ་འབྲིང་མོ་ནི། །ནམས་ཀྱི་གུང་ལ་བསྐུལ་བའི་ཚེ། །ཆིབས་སུ་དྲེའུ་རྟ་ཁ་དཀར་བཅིབས། །དེ་ལ་གསང་བའི་མཚན་བཏགས་པ། །རྡོ་རྗེ་བ་ལམ་དྲེའུ་སྣ་མ། །ཉིད་ཀྱི་སྐུ་ནི་གཅེར་བུ་ལ། །གཡས་ན་མདུང་ནག་རྩེ་གསུམ་བསྣམས། །གཡོན་ན་ཐུན་གྱི་ཁྲག་གཡོ་མ། །སྔགས་འཆང་ཀུན་གྱི་དགྲ་འདུལ་མ། །རྣལ་འབྱོར་ཀུན་གྱི་སྐུ་བསྲུང་མ། །བདག་གིས་གདུང་ནས་བོས་པའི་ཚེ། །དེ་ཚེ་ཁྱོད་ཀྱིས་ཐུན་ཕོབ་ལ། །ཐུན་ཁྲག་རིམས་སུ་བསྒྱུར་དུ་གསོལ། །རིམས་ནད་དགྲ༴ སྡང་སེམས༴ མིང་དང་གཟུགས༴ ཐུན་ཐོགས་མ་མོའི༴ ཁྲམ་ཐོགས༴ ཤོ་རྡེའུ༴ བྱང་དམར༴ ནད་ཀྱི༴ དགྲ་བོའི་ཡུལ༴ ཚོན་གྱི༴ སྨྱོ་རུ༴ མྱོས་སུ༴ བཅོལ་པའི༴ ཅེས་གོང་ལྟར་འགྲེའོ། །བྷྱོ། ཐུན་གྱི་མ་མོ་ཐ་ཆུང་ནི། །ནམ་གྱི་ཆ་སྨད་བསྐུལ་བའི་ཚེ། །ཆིབས་སུ་བདུད་བྱ་ནག་པོ་བཅིབས། །དེ་ལ་གསང་བའི་མཚན་བཏགས་པ། །རྡོ་རྗེ་ཁྲི་སྨན་ལྡེམ་དྲུག་མ། །སྐུ་མདོག་མཐིང་ནག་འབར་བ་ལ། །གཡས་ན་ནད་ཀྱི་རྐྱལ་བ་བསྣམས། །གཡོན་ན་ཐུན་གྱི་ཁྲག་གཡོ་མ། །སྔགས་འཆང་༴ རྣལ་འབྱོར༴ བདག་གི༴ དེ་ཚེ༴ ཁྲག་ཐུན༴ རིམས་ནད༴ སྡང་སེམས༴ མིང་དང་༴ ཐུན་ཐོགས༴ ཁྲམ་ཐོགས༴ ཤྭ་རྡེའུ༴ བྱང་དམར༴ ནད་ཀྱི༴ དགྲ་བོའི༴ ཚོན་གྱི༴ སྨྱོ་རུ༴ མྱོས་སུ༴ བཅོལ་པའི༴ དེ་ནས་གཟུགས་ལ་སྔགས་ཐུན་བརྡེག །རལ་གྲིས་གཏུབ་ཅིང་། དགྲ་བོ་ཚལ་པ་ཚལ་པ། དུམ་བུ་དུམ་བུ། ན་ཤ་ཡ། སྟྭཾ་བྷ་ཡ། མོ་ཧ་ཡ། བྷནྡྷ་ཡ། མ་ར་ཡ་རྦད་རྦད། བྱེད་པའི་དུས་སུ་གཏོར་མ་དེ་ཉིད་ལྷ་མོ་དངོས་སུ་བསྐྱེད་ལ་གཟུགས་ལ་བསྟབས། མི་དབང་དྲི་ཁྲག་དང་བྱང་སེམས་དཀར་དམར་གྱི་དར་ནག་ལ་འབོད་རྦད་བསད་གསུམ་བྲིས་ལ་བརྟེན་གཏོར་གྱི་ནང་དུ་གཞུགས། དེ་ལ་ཆགས་ཤིང་ཞེན་ནས། ལས་བསྒྲུབ་པའི་ཆེད་དོ། །རྒྱུན་གཏོར་རམ། འགྱེད་གཏོར་ནི། གཏོར་མ་ཤ་ཁྲག་གིས་བརྒྱན་པ་གཅིག་ལ། རུས་པ་དང་བཅས་པ་གསོད་ལས་བྱས་ལ། ཐ་མ་གཟུགས་ཀྱི་དུམ་བུ་དེ་ལ་བསྣན་ཏེ་བཞག་པ་ལ། བྱིན་རླབས་འོག་ཏུ་བཤད་པ་ལྟར་བྱས་ལ་ཕུལ་ཏེ་དགྲ་ཕྱོགས་སུ་འཕོང་ངོ་། །དེ་གཏོང་བའི་དུས་ནི། སྟག་སྐྱ་བོ་ཁ་བརླངས་ཤར་བ་དང་། རུས་སྦལ་ལྟོ་བ་ལ་གབ་པ་དང་། བྱ་ནག་གཟན་ལ་འཛུམ་པ་དང་། ཕུང་སྲི་རྔ་མང་འབུད་པ་དང་། དུས་དེ་བཞིར་གཏོང་ངོ་། ༈ །སྤྱན་འདྲེན་པའི་མན་ངག་ནི། །དར་ནག་ལ། བྷྲཱུྃ་བྷྱོ་ཛཿ མི་དབང་གིས་དྲི་ཁྲག་གིས་བྲིས་པ་མདའ་ལ་བཏགས་པའི་གཡབ་བོ། །གསུར་ཆེན་གྱི་དུད་པ་བཏང་། སྲིན་ལག་གཡབ། ལས་མི་བྱེད་ན་སྤྱི་བོར་ཕྱག་རྡོར་བསྒོམ་ནས་ཤི་ས་བསྟན་པ་ལས་བྱ་བ་ནི་ལོགས་སུ་ཤེས་སོ། །འབྲུབ་ཁུང་རྒྱུ་ནི། དགྲ་བོའི་ཟག་རྫས་ཚེ་ཟད་འབབ་ཆུའི་ས། རྦལ་རྒལ་ལ། རོ་སོལ། ཁྲག་སྣ། དུག་སྣ། རྡུང་དགུའི་རྭ། འཕྲ་དགུའི་རྐེད་པ། ཟ་དགུའི་མཆེ་བའོ། ༈ །ལིང་གའི་རྒྱུ་ནི། དགྲ་བོའི་རྗེས་ས། དྲི་ཆེན། དྲི་ཆུ། བག་ཕྱེ་དང་བསྲེས་པའོ། ༈ །བྱང་བུ་ནི། གྲོ་ག་ལ་གྲི་ཁྲག་གིས་བྲིས་སོ། །དེ་ནས་ལས་མཐར་གཏང་རག་ཚུལ་དུ་རྒྱུན་གཏོར་ཕུལ་ལ་དགྲ་ཕྱོགས་སུ་འཕངས་ལ། མྱུར་མགྱོགས་ལྟར་བྱིན་གྱིས་བརླབས་ཏེ། ཐོད་པའི་སྣོད་དུ་རྒྱུན་གཏོར་དེ་ཡོངས་སུ་གྱུར་པ་ལས་དགྲ་བོ་དངོས་སུ་གྱུར། དེའི་སྙིང་དཀར་ནག་གི་མཚམས་སུ་མ་མ་བྷྱོ་བྷྱོ་རལ་གྲིས་ཡུ་བ་བྷྱོས་མཚན་པ་གཅིག་གཡོན་དུ་སྒ་ར་ར་འཁོར་བས་ལུས་ཤག་གིས་གཤགས་ནས་དུམ་བུར་གཏུབ་ཤ་ཁྲག་སོ་མའི་ཕུང་པོ་ཆེན་པོར་གྱུར། ༀ་ཨཱཿཧཱུྃ། ཞེས་བརྗོད། དགྲ་བགེགས་ཀྱི་ཤ་ཁྲག་རུས་གསུམ་གྱི་གཏོར་མ་རྒྱ་ཆེན་པོ་འདི་དཔལ་ལྡན་ལྷ་མོ་འཁོར་དང་བཅས་པས་བཞེས་ཤིག །རོལ་ཅིག །བཞེས་ལ་རྣལ་འབྱོར་པ་བདག་གི་ལས་འདི་ད་ལྟ་ཉིད་དུ་སྒྲུབས་ཤིག །ཅེས་བརྗོད་ལ། དེ་ཡི་རྗེས་སུ་གཏོར་མ་དེ་ཉིད་དམིགས་པ་འདི་ལྟར་བསྒྱུར་ཏེ། གཏོར་མ་དུག་དང་མཚོན་དང་ནད་ཀྱི་རང་བཞིན་དང་། མ་མོ་དང་མཁའ་འགྲོ་དང་། ཤ་ཟ་དང་བདུད་མོའི་དམག་ཚོགས་སུ་གྱུར་ནས་དགྲ་བོའི་ཡུལ་དུ་སོང་ནས་དགྲ་བོའི་མི་ནོར་འཁོར་དང་བཅས་པ་ཐམས་ཅད་ཐལ་བ་རྡུལ་དུ་བརླག་པར་གྱུར་པར་བསམ་ལ། བསྐུལ་པ་བྱས་བྱས་ཏེ་གཏོར་མ་དགྲ་ཕྱོགས་སུ་འཕོངས། དེའི་རྗེས་ལ་དམོད་ཕྲིན་བྱ། ཐལ་མོ་བརྡབས། གོས་ནག་བརྡབ། བཟློག་སྔགས་བཟླ། བྲོ་བརྡུང་། རྒྱས་གདབ། ཡུལ་དུ་ལོག་ལ་བསྲུང་འཁོར་བསྒོམ། རྣམ་ཤེས་སྤར། དགེ་བ་བསྔོ། ལྷག་ཆད་བསྐངས། ཉེར་བསྡུ་བྱ། གཤེགས་གསོལ་བྱ། ལས་མཐའི་སྦྱིན་བསྲེག་དང་མནན་པ་སོགས་ལོགས་སུ་ཤེས་པར་བྱའོ། །དེ་ལྟར་ཐུན་གྱི་རིམ་པ་དེ་རྣམས་ནི་དུས་བཞི་ཐུན་དྲུག་ཏུ་བཅད་ལ་ལྷའི་མཚན་མ་དང་དགྲ་གསོད་པའི་མཚན་མ་གཞན་དུ་བཤད་པ་རྣམས་མ་བྱུང་གི་བར་དུ་བརྩོན་འགྲུས་དྲག་པོས་བསྐྱེད་ལ་བྱའོ། །དེ་ལྟར་མངོན་སྤྱོད་ཀྱི་ལས་དེ་རྣམས་བྱེད་པ་ནི། སྙིང་རྗེའི་སེམས་དང་མ་བྲལ་བའི་ངང་ནས་གཅིག་དྲིལ་དུ་སངས་རྒྱས་ཀྱི་བསྟན་པ་ལ་ཕན་གཏགས་པའི་སེམས་དང་། གདུག་པ་དེ་ཉིད་ལའང་ཕན་གཏགས་པའི་སེམས་ཀྱིས་རྩིས་དང་མ་བྲལ་བར་བྱས་ལ་བསྒྲུབ་ཀྱིས། དེ་མ་ཡིན་པར་ཞེ་སྡང་དྲག་པོས་ཀུན་ནས་བསླང་བའི་ངང་ནས། རང་དོན་དང་དེ་ཉིད་ལ་གནོད་པའི་བསམ་པ་ཁོ་ནས་བྱེད་པ་ནི། དམྱལ་བའི་རྒྱུ་ཤ་སྟག་བསྒྲུབ་པར་རྒྱུད་སྡེ་རྣམས་ནས་གསུངས་སོ། །དཔལ་ལྡན་ལྷ་མོ་ནག་མོའི་ཐུན་གྱི་ལས་རིམས་གོ་བདེ་ཞིང་ཞལ་ཤེས་ཀྱིས་ལེགས་པར་བརྒྱན་པའི་འདི་ནི་སྔོན་གྱི་དཔེ་རྙིང་ལ་གོང་འོག་དཀྲུགས་ནས་ཡོད་པ་རྣམས་འདིལྟར་ཡིག་ཆུང་གི་མཚན་ཉིད་བྱས་ནས་གོ་བདེ་བར་ཡོད་དེ། འདི་ནི་ཤིན་ཏུ་གསལ་བར་ཡོད་པས་གཅིག་མ་གཏོགས་སྤེལ་བར་མི་བྱ་ཞིང་ཤིན་ཏུ་དམ་པར་བྱའོ། །ཨཐྎ། མཁྱེན་གསོལ། གཟུ་དཔང་། ལིང་བསྐྱེད། བླ་འགུགས། བླ་འཚོལ། ལྷ་དབྱེ། རླུང་སྤྲོས། ཕུར་འདེབས། མཚོན་ཐུན། སྣ་ཚོགས་ཐུན། ཐུན་རིམ་ལ་དུས་བཞིའི་ཐུན། ཐུན་གྱི་མ་མོ་ཆེ་འབྲིང་ཆུང་གསུམ། བསྟབས་པ། གཏོར་བསྐུལ། ཁལ་ལས་ཁྱི་དང་སྣ་ཁྱོན། ཁའ་བརྒྱི་དང་སྣ་ཟོ་ཞ་ཏི་ཧ་ཁོ། ཞལ་ཤེས་ཀྱི་ཡི་གེའོ། །ཀུན་ལ་མ་སྤེལ་སེམས་ལ་འཆང་། བསྟན་པ་བསྲུང་བའི་མཚོན་ཆར་ཤོག །བླ་མ་ཀཿཐོག་པའི་མན་ངག་གོ།། །།
དཔལ་ལྡན་ལྷ་མོའི་དྲག་པོ་ཐུན་གྱི་ཡིག་ཆུང་ཐོག་མའི་དམིགས་པ།
དཔལ་ལྡན་ལྷ་མོའི་དྲག་པོ་ཐུན་གྱི་ཡིག་ཆུང་ཐོག་མའི་དམིགས་པའོ། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །འདིར་དཔལ་ལྡན་ལྷ་མོས་དྲག་པོའི་ཕྲིན་ལས་ཀྱི་དགྲ་བགེགས་ཚར་གཅོད་པའི་ལས་ཚོགས་ལས། གོང་དུ་ཕྱག་ན་རྡོ་རྗེ་བདག་བསྐྱེད་བསྙེན་པ་དང་བཅས་པ་དང་། མདུན་དུ་ལྷ་མོའི་བསྙེན་བསྒྲུབ་ལས་གསུམ་གྱིས་ཕྲིན་ལས་བྱེད་ཚུལ་རྣམས་རྒྱས་པར་གཞུང་གཞན་དུ་བཤད་པའི་ཕྱག་ལེན་ལྟར་བྱས་ལ། འདིར་སྐབས་སུ་བབ་པའི་མདུན་གྲུ་གསུམ་དང་གཟུགས་བརྙན་ཐུན་རྫས་གཏོར་མ་དང་བཅས་འཚོགས་པར་བྱས། རང་ཉིད་ལྷའི་ང་རྒྱལ་བརྟན་པའི་ངང་ནས་ཆས་དང་ལྡན་པར་བྱས་ཏེ། དང་པོར་མཁྱེན་གསོལ་ནི། ༼ཀ༽ ཧོ་དགོངས་སུ་གསོལ་ལོ། །ན་མོ་སྐྱབས་དམ་པ་རྣམས་ཀྱི་མཆོག །མགོན་དམ་པ་རྣམས་ཀྱིས་གླིང་། བསོད་ནམས་བསགས་པ་རྣམས་ཀྱིས་དཔལ་ཞིང་། བདེ་ལེགས་ཐམས་ཅད་ཀྱི་རྩ་བ། བླ་ན་མེད་པའི་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཅག་ལུས་ངག་ཡིད་གསུམ་གུས་པས་ཕྱག་འཚལ་ཞིང་སྐྱབས་སུ་མཆིའོ། །སྐྱབས་གནས་དམ་པ་དཀོན་མཆོག་རིན་པོ་ཆེ་རྣམ་པ་གསུམ་གྱི་སྐྱབས་འོག་དམ་པར་བདག་ཅག་རྣམས་ཚུད་པར་མཛད་དུ་གསོལ། འདིར་བླ་མ་ཡི་དམ་ནི་གཟུ་དང་དཔང་ལ་མཁས་པ། དཔའ་བོ་མཁའ་འགྲོ་ནི་མཐུ་དང་རྩལ་ཆེ་བ། མ་མགོན་ལྕམ་དྲལ་ནི་བསྟན་པའི་བྱ་ར་ལ་མཁས་པ། བཀའ་སྡོད་ལྷ་སྲིན་སྡེ་བརྒྱད་ནི་ཤ་ཁྲག་ལ་རྔམ་པ། ལས་མཁན་དམ་ཅན་རྒྱ་མཚོ་ནི་གསོད་གཅོད་ཀྱི་ལས་ལ་བརྩོན་པ་རྣམས་ཀྱང་། དེ་རིང་རྡོ་རྗེ་ཉི་མའི་དུས་ཚོད་འདིར། སངས་རྒྱས་ཀྱི་བསྟན་པ་བསྲུང་བ་དང་སྡང་བྱེད་ཀྱི་དགྲ་བོ་གསོད་པ་དང་། གནོད་བྱེད་ཀྱི་བགེགས་གདུག་པ་ཅན་འདུལ་བའི་དོན་དུ། རྣལ་འབྱོར་པ་བདག་གི་དཔལ་དང་མགོན་མཛད་པ་ལ་མ་གཡེལ་བར། སྙན་གསན་ཅིང་ཐུགས་མཁྱེན་པར་དགོངས་སུ་གསོལ། ཧོ། དགོངས་སུ་གསོལ་ལོ། །གཞན་ཡང་ཉི་མ་བྱང་ཤར་གྱི་མཚམས། ཤིང་ཡོངས་འདུས་ས་བརྟོལ་གྱི་རྩ་བ། མཚོ་མུ་ལེ་ཏིང་གི་ནང་ཤེད། མཐིང་ཤུན་སྔོན་པོའི་གུར་ཁང་། རླུང་ནག་འཚུབས་མར་འཁྱིལ་པའི་དབུས། མེ་དཔུང་ཆེན་པོ་བསྐལ་པ་འཇིགས་པ་ལྟར་འབར་བའི་དཀྱིལ། ཐོད་པ་རྐམ་རློན་རྩིགས་པའི་སྐུ་མཁར། གནམ་ལྕགས་འུར་མོ་འབར་བའི་གཞལ་ཡས་ཁང་། མི་རོ་གསར་རྙིང་མང་པོ་རྩིགས་པའི་གདན་སྟེང་ན། དུས་གསུམ་གྱིས་རྒྱལ་བ་ཞི་ཁྲོ་རམ་འབྱམས་ཀྱི་ལྷ་ཚོགས་སྤྱན་སྔར་རྒྱལ་བའི་བསྟན་པ་རིན་པོ་ཆེ་བསྲུང་བར་ཞལ་གྱིས་བཞེས་པའི། མ་ཅིག་དཔལ་ལྡན་ལྷ་མོ་ནག་མོ། མ་སྲིན་གྱི་རྒྱལ་མོ། འདོད་ཁམས་ཀྱི་གཙོ་མོ། ཁྲག་འཐུང་གི་རྒྱལ་མོ། རང་བྱུང་གི་རྗེ་མོ། ཆིབས་སུ་དྲེལ་རྟ་རྐང་གསུམ་ལ་བཅིབས་པ། མི་རོ་རྟ་རོ་ཁལ་དུ་འགེལ་བ། མི་ཁྲག་རྟ་ཁྲག་སྐོམ་དུ་འཐུང་བ། མི་ཤ་རྟ་ཤ་ཟས་སུ་ཟ་བ། མི་ལྤགས་རྟ་ལྤགས་གདན་དུ་འདིངས་བ། ནད་ཀྱི་རྐྱལ་པ་སྔ་ཤད་ལ་བཏགས་པ། ཚོན་གྱི་གྲུ་གུ་ཕྱི་ཤད་ལ་བཏགས་པ། ཕྱག་གཡས་ན་བདུད་ཀྱི་རལ་གྲི་ཕྱར་བ། དགྲ་བགེགས་ཀྱི་སྐྱེ་རྒྱུད་གཅོད་པ། ཕྱག་གཡོན་ན་བྷནྡྷ་ལྕང་ལོ་ཅན་བསྣམས་པ། དགྲ་བགེགས་ཀྱི་སྙིང་ཁྲག་ཞལ་དུ་གསོལ་བ། སྤྱི་བོའི་གཙུག་ན་ཟླ་བས་བརྒྱན་པ། མ་རིག་པའི་མུན་པ་གཏིང་ནས་སེལ་བ། ལྟེ་བའི་དབུས་ནས་ཉི་མ་ཤར་བས་སྲིད་པའི་རྒྱ་མཚོ་གཏིང་ནས་སྐེམ་པར་མཛད་པ། སྐུ་ལ་དུར་ཁྲོད་ཀྱི་ཆས་བརྒྱད་ཀྱི་བརྒྱན་པ། སྐུ་ལ་ཡེ་ཤེས་ཀྱི་མེ་འབར་བ། འཁོར་བདུད་མོ་བྱེ་བ་འབུམ་གྱིས་བསྐོར་བ། འཁོར་ཟངས་ཀྱི་མཆེ་བ་ཅན། ལྕགས་ཀྱི་སྡེར་མོ་ཅན། སྤུ་གྲིའི་སོ་ཅན། ཆུ་སྲིན་གྱིས་གདོང་པ་ཅན། ཆུ་གྲིའི་གཤོག་པ་ཅན་བྱེ་བ་འབུམ་གྱིས་བསྐོར་བ། དེ་རྣམས་ཀྱི་མི་རོ་འཁུར་ཞིང་གནམ་མཐའ་བསྐོར་བ། མི་ཤ་ཟ་ཞིང་བསྭོ་སྒྲ་འདེབས་པ། མི་ཁྲག་འཐུང་ཞིང་ཀུ་སྒྲ་སྒྲོགས་པ། མི་ལྤགས་གྱོན་ཞིང་ས་གཞིར་རྒྱུག་པ། ཤ་ཟན་གྱི་གསུས་མོ་ཆེ། ཁྲག་འཐུང་གི་མཆེ་མར་མ། རུས་མཆན་གྱི་སོ་རྣོན་མ། ཉིན་གུང་གི་སོ་བྱེད་མ། ནམ་གོང་གི་བླ་ལེན་མ། བཙན་གྱི་སོ་བ་མ། བདུད་ཀྱི་ཉུལ་ལེ་མ། དགྲ་བོའི་སྲོག་གཅོད་མ། མ་བདུད་འབུམ་གྱིས་བསྐོར་བ་རྣམས་ཀྱང་བསྒྲུབ་པ་པོས་ཅི་བཅོལ་གྱི་ལས་བསྒྲུབ་ཅིང་ཅི་བགྱིད་ཀྱི་བཀའ་ཉན་པ། བྱམས་ཤིང་བརྩེ་བའི་མ་དང་འདྲ་བ། གདུང་བའི་ཚད་ནི་སྲིང་མོ་དང་འདྲ་བ། ད་ལོ་ཡོང་བའི་བྲན་མོ་དང་འདྲ་བ། བོས་ན་འོང་བ། རྦད་ན་འགྲོ་བ། ཡག་པའི་ཁ་འཛིན་ལ་དཔའ་བ། ཉེས་པའི་ངོ་བཟློག་ལ་སྐྱེན་པ། ཡག་ཉེས་ཀྱི་གཟུ་དཔང་ལ་མཁས་པ། དམ་ལ་གནས་པའི་མཆེད་ལ་གདུང་བ་མེ་བཞིན་འབར་བ། གློག་བཞིན་འགྱུ་བ། སྲིན་བཞིན་རྔམས་པ། དམ་ཉམས་སྒྲོལ་བ། རིང་པོ་ལ་སླེབས་པ། ཆུང་ངུ་ལ་ཕོག་པ། སྲ་བ་ལ་ཕུག་པ། སྦོམ་པོ་ལ་ཆོད་པ། དྲག་པོ་སྒྲོལ་བའི་ལས་ལ་མངའ་མཛད་པ་ཁྱེད་རྣམས་ཀྱང་། དེ་རིང་རྡོ་རྗེ་ཉི་མའི་དུས་ཚོད་འདིར། དོ་ནུབ་ནམ་གྱི་གུང་ཐུན་འདི་ལ། སངས་རྒྱས་ཀྱི་བསྟན་པ་བསྲུང་བ་དང་། སྡང་བྱེད་ཀྱི་དགྲ་བོ་གསོད་པ་དང་། གནོད་བྱེད་ཀྱི་བགེགས་གདུག་པ་ཅན་འདུལ་བའི་དོན་དུ་རྣལ་འབྱོར་བདག་གི་དཔལ་དང་མགོན་མཛད་པ་ལ་མ་གཡེལ་བར་སྙན་གསན་ཅིང་ཐུགས་ཀྱི་མཁྱེན་པར་དགོངས་སུ་གསོལ། ཧོ། དཔལ་ལྡན་ལྷ་མོ་ནག་མོ་འཁོར་དང་བཅས་པ་ཁྱེད་རྣམས་ཀྱི་རྣལ་འབྱོར་པ་བདག་གི་དུས་འདིར་བསྟན་པའི་དགྲ་བོ་སྒྲོལ་བའི་དྲག་པོའི་ཕྲིན་ལས་བྱེད་པ་འདི་ལ་གཟུ་དང་དཔང་མཛོད་ལ། དམ་ཉམས་དགྲ་བོ་རྣམས་ལ་སྔགས་ཀྱི་ལས་མཛོད། ཟོར་གྱིས་ལས་མཛོད་ཅིག །ཅེས་བརྗོད་ལ་སྙན་གསན་དབབ་བོ། །༼ཁ༽ ན་མོ་གུ་རུ། དཔལ་ལྡན་ལྷ་མོ་ནག་མོའི་སྲོག་གི་གཟེར་ཆུང་གི་མན་ངག་ལ། ལིངྐ་བསྐྱེད་པ་ནི། ཨེ་ཁང་བཛྲ་ཡཀྵ་ཁང་དེ་ཡོངས་སུ་གྱུར་པ་ལས་མདུན་དུ་གཤིན་རྗེའི་བཙོན་ཁང་ནག་པོ་ནག་ལ་གཏིང་ཟབ་པ་དེ་ཡི་ནང་དུ་ཨེ་ལས་གྲུ་གསུམ་མཐིང་ནག་གཏིངས་ཀ་ཆེ་བ། ནང་ན་གཏི་མུག་གི་མུན་པ་འཐིབ་པ། ཕྱི་ན་ཞེ་སྡང་གི་མེ་འབར་བ། ཁ་ལ་གསོད་བྱེད་ཀྱི་ཤན་པ་རྒྱུ་བ། ཟུར་ལ་བཤའ་གྲི་མདའ་མདུང་འདྲིལ་བ། ལོག་ལ་ཕྲག་དོག་གི་རླུང་འཚུབས་པ། དེ་ཡི་ནང་དུ་ཡི་གེ་ཪྣྲྀཿཡོངས་སུ་གྱུར་པ་ལས། དགྲ་བགེགས་གདུག་པ་ཅན་དེ་ཉིད་ལུས་རིད་པ། ཉམས་ཆུང་བ་མགོན་སྐྱབས་བྱེད་པའི་ལྷ་ཐམས་ཅད་དང་བྲལ་བ། འདར་ཕྲི་ལི་ལི་བྱེད་པ་ཅིག་ཏུ་གྱུར། ན་མོ། སངས་རྒྱས་ཀྱིས་བདེན་པ་དང་༴ ཞེས་པས་བདེན་སྟོབས་རྒྱས་པར་བརྗོད་ལ། ལནགསུམ་གྱིས་བར། རབ་བདུན་ནམ་ཉེར་གཅིག་ཏུ་བརྗོད་ལ་འགུགས་གཞུག་བྱ། དེ་ནས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་མདུན་གྱི་ལྷ་མོ་ལ་ཕོག་པས། ལྷ་མོས་འཁོར་རྣམས་ལ་གཟིགས་པས། འཁོར་བདུད་མོ་བྱེ་བ་འབུམ་རྣམས་ནམ་མཁའ་གང་བར་སྤྲོས། དགྲ་བོའི་བླ་ཚེ་སྲོག་གསུམ་གར་གནས་པ་དེ་ཉིད་དཔེར་ན་ཤ་བ་ཁྱིའི་དེད་པ་བཞིན་དུ་བཀུག་ནས་འོང་བ་སྔར་བསྐྱེད་པའི་གཟུགས་ལ་ཐིམ་པར་གྱུར། ལུས་ཀྱི་བྱ་བ་ལྕགས་ཀྱུའི་ཕྱག་རྒྱ་བྱ། ངག་གི་བྱ་བ། ཛཿཧཱུྃ་བྃ་ཧོཿ བཛྲ་ཨཾ་གུ་ཤ་ཛཿ ཡིད་ཀྱིས་དམིགས་པ་གསལ་གདབ། ༼ག༽ རང་ཉིད་ཡི་དམ་དུ་གསལ་བའི་མདུན་དུ་དཔལ་ལྡན་ལྷ་མོ་ཞལ་གཅིག་ཕྱག་གཉིས་མ་སྤྱན་གསུམ་མ། མཆེ་བ་གཙིགས་པ་གཡས་རལ་གྲི་དང་གཡོན་ཐོད་ཁྲག་ཐོགས་པའི་སྐུ་མཐེ་བོང་ཙམ་ཞིག་ཕར་འཕྲོས་པས། བསྒྲུབ་བྱའི་མཆན་ཁུང་གཡོན་པ་ཤགས་ཀྱིས་བཤགས་ནས། ཙིཏྟ་གུར་སྨུག་པོ་ཕུབ་པ་ལྟ་བུ། དེ་ཡི་ནང་ན་རྣམ་པར་ཤེས་པ་ཪྣྲིཿཁ་དོག་དཀར་པོ་ཤེལ་དྭངས་པ་ལྟ་བུ་དེ། གཡས་ཀྱིས་རལ་གྲིའི་རྩེ་མོའི་གཟེར་ནས། དཔེར་ན་རྡོ་ཁབ་ལེན་གྱིས་ཁབ་བླངས་པ་བཞིན་དུ་ཐལ་གྱིས་ཕུག་ནས་གཡོན་གྱི་ཐོད་ཁྲག་གི་ནང་དུ་བཅུག་པས། བསྒྲུབ་བྱའི་སྙིང་ནང་དུ་ཕར་ལིང་ལིང་བྱེད་པར་གྱུར་པར་བསམ། དེ་ནས་བླ་འགུགས་པའོ། །དེ་ནས་བླ་འཚོལ་བ་ནི། མདུན་གྱི་ལྷ་མོའི་འཁོར་བདུད་མོ་འབུམ་གཙོ་མོ་ལ་ཐིམ། གཙོ་མོ་རང་ལ་ཐིམ་པས། རང་ངོ་བོ་ཡི་དམ་ཡིན་པ་ལ་རྣམ་པ་དཔལ་ལྡན་ལྷ་མོ་ནག་མོ་ཞལ་གཅིག་ཕྱག་གཉིས་མ། སྤྱན་གསུམ་མ། མཆེ་བ་བཞི་གཙིགས་པ། རལ་གྲི་དང་ཐོད་ཕྲག་འཛིན་པར་གྱུར། མདུན་དུ་བདུད་མོ་འབུམ་གྱི་ངོ་བོ་ལྕགས་ཀྱི་སྤྱང་མོ་མགོ་དགུ་མ། སྐུ་མདོག་ནག་མོ་ཕྱག་གཡས་པས་ལྕགས་སྤྱང་མགོ་དགུ་འགྱེད་པ། གཡོན་ན་ཟངས་ཀྱི་འཕར་བ་ལྕེ་བརྒྱད་པ་འགྱེད་ཐབས་སུ་བསྣམས་པ། སྐུ་ལ་ལྕགས་ཀྱི་ཚྭ་ཚྭ་འཕྲོ་བ། ཐུགས་དམ་བསྐུལ་བ་ཙམ་གྱི་མདུན་གྱི་མ་མོ་དང་རང་གི་སྐུ་ལ་ལྕགས་སྤྱང་དང་ཟངས་འཕར། མ་བདུད་དང་ལས་མཁན་སྤྲུལ་པ་དཔག་ཏུ་མེད་པ་རྣམས་མྱུར་བར་སོང་ནས་དགྲ་བོ་གསོན་བླ་གསོན་ཚེ་གར་ཡོད་པ་བཀུག་ནས་མདུན་གྱི་ལིངྒ་ལ་བསྟིམ་པར་བསམ། ༼ང༽ ན་མོ་གུ་རུ། རང་ཐོག་མར་ཡི་དམ་དུ་གསལ་བར་གཞལ་ཡས་ཁང་བཞོན་པ་དང་བཅས་བསྐྱེད་པའི་སྟེང་དུ་བྷྱོཿདམ་ཚིག་པ་བསྐྱེད་ནས་ཡེ་ཤེས་པ་སྤྱན་དྲངས་ནས། གཞུགས་སུ་གསོལ་བ། ཕྱག་འཚལ་མཆོད་རིམས། གཏོར་བསྔོས། བསྟོད་པ། སྔགས་ཕྲེང་དང་བཅས་པ་བསྐྱེད་པ་ནི་འདིའི་གནད་དམ་སྟེ། ལས་བྱང་བཞིན། ཕྱག་མཚན། རལ་གྲི། གྲི་གུག་དང་བེ་ཅོན་ནོ། །གོང་དུ་ཕྲིན་ལས་གཞུང་བསྲོང་གསུངས་པའི་གསལ་བྱེད་ཡིག་ཆུང་འདིར་མ་བྲིས་པའོ། ༈ །དགྲ་བོ་ལྷ་དང་དབྱེ་བའི་དམིགས་པ་ནི། དགྲ་བོའི་རྐང་པའི་འོག་ཏུ་ཡི་གེ་དུཿནག་པོ་གཅིག་གནས་པར་གྱུར། དེ་ལས་འོད་ནག་པོ་འཕྲོས་པས་ལུས་ཐམས་ཅད་གང་ནས། ཁོ་དུག་ལྔ་ཤིན་ཏུ་རྒྱས་པའི་ཚིག་པ་ཟོས་ནས་མ་བཟོད་པར་ཉེས་པ་སྣ་ཚོགས་པ་དུ་མ་བྱེད་པར་བསམ། དེ་ནས་བླ་མ་ཡི་དམ་མཁའ་འགྲོ་ཆ ོས་སྐྱོང་ལ་ཞུས་འབུལ་གྱི་ཚུལ་གྱིས་ཉེས་པ་བསྒྲགས་པས་ཁོའི་འགོ་བའི་ལྷ་ལྔ་ཁྲོས་ནས་གནོད་པ་བྱེད་ཅིང་། ལྷ་ཚོགས་རྣམས་ཀྱིས་རིམས་ཀྱིས་སོད་ཅིག་སྒྲོལ་ཅིག་ཅེས་ལུང་ཕོག་པས། ཁོའི་མགོན་སྐྱབས་བྱེད་པ་རྣམས་བདུད་དུ་གྱུར་ནས། ཆོས་སྐྱོང་དང་ཤན་པའི་ཚོགས་ཀྱིས་སྐད་ཅིག་ཐལ་བརྡུལ་བཞིན་དུ་བརླག་པར་བསམ། རྒྱས་པ་ལ་སྤྲོ་ན་སྲོག་གཟེར་ཡིག་ཆུང་དུ་བལྟའོ། ། ༼ཅ༽ ༈ རླུང་སྤྲོས་པའི་དམིགས་པ་ནི། གཟུང་ཐག་ལག་ནས་བཟུངས་ལ་འབོད་རྦད་གསོད་གསུམ་དྲིལ་བའི་སྔགས་ཉེར་གཅིག་བཟླས། གཟུང་ཐག་ཁོའི་སྲོག་རྩ་དམར་ནར་གྱིས་དྲང་བར་བསམས། རང་གི་སྣ་བུག་གཡས་ནས་རླུང་སྔོ་ནག་གཅིག་ཕར་སྤྲོས་པས་ཁོའི་སྣ་བུག་གཡོན་དུ་ཞུགས་ནས་ཁོའི་སྙིང་ཀར་མར་སོང་བ་དང་། རླུང་དེ་ཉིད་ལྷ་མོ་ནག་མོ་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་བཞི་གཙིགས་པ། ཕྱག་གཡས་པས་གྲི་གུག་དང་། གཡོན་ཐོད་ཁྲག་བསྣམས་པ། བསྒྲུབ་བྱའི་རྣམ་པར་ཤེས་པ་མར་མེ་འབར་བ་ལྟར་དཀར་ད་ལ་ལ་བྱེད་པ་དེ། གཡོན་པའི་ཐོད་ཁྲག་གི་ནག་ཐུལ་གྱིས་བཏང་བར་བསམ། གཡས་པའི་གྲི་གུག་གི་རྩ་ཨ་བ་དྷུ་ཏིའི་ཞེས་བྱ་བའི་དངོས་སུ་སྒལ་ཚིག་གསེར་གྱི་དང་རྩེ་བརྩེགས་པ་འདྲ་བའི་དངོས་ནས། སྲོག་རྩ་ཞེས་བྱ་བའི་ཕྱི་དཀར་ལ་ནང་དམར་བ། གསེར་གྱི་རྡབས་ཤིང་བརྐྱང་པ་འདྲ་བའི་ནང་ན་ཀུན་གཞིའི་རྣམ་པར་ཤེས་པ་ཞའོ་མིག་ཅན། ལོང་བ་རྐང་བ་ཅན་ཞོན་པ། ཚོགས་དྲུག་ཀུན་ཏུ་རྒྱུག་པར་བྱེད་པ་གནས་པ་དེ་རྦད་ཀྱིས་བཅད་པར་བསམ། དེ་ནི་སེམས་ཀྱི་མར་མེ་བསད་པ་དང་། སྲོག་རྩ་དམར་པོ་རྒལ་ནས་གཅོད་པའི་ལས་སྦྱོར་ཡིན་ནོ། །ཡང་རང་གི་སྣ་བུག་གཡོན་པ་ནས་ཧཱུྃཿསྔོན་ནག་གཅིག་ཕར་འཕྲོས་པས་ཁོའི་སྣ་བུག་གཡས་སུ་ཞུགས་ནས་ཁོའི་སྙིང་ནང་དུ་ཧཱུྃཿའོད་ཟེར་ལྔ་འཕྲོས་པར་བསམ། འོད་ཟེར་དེའི་ཁོའི་རྒྱུད་ལ་ཡོད་པའི་བདུད་རྩི་དང་། སྨན་དང་སྔགས་ཀྱི་ནུས་པ་དང་། བཀྲག་དང་གཟི་དམངས་དང་སྲུང་སྐྱོབས་ཐམས་ཅད་བསྡུས་ནས་ཧཱུྃ་ལ་ཐིམ། སྔགས་ཕར་འཕྲོས་པས་རླུང་དེས་ཧཱུྃ་དེ་བཀྱག་ནས། ཚངས་པའི་བུ་གར་དྲངས་པ། བདག་གི་སྣ་བུག་གཡས་སུ་ཞུགས། ཐུགས་ཀའི་ཧཱུྃཿལ་ཐིམ་པས་བདག་བཀྲག་དང་གཟི་མདངས་ནུས་མཐུ་དང་ལྡན་པས་ཟླ་བ་ཡར་གྱི་ངོས་བཞིན་དུ་གྱུར། ཁོ་ལྕིམ་ལོ་ལ་བ་མོ་ཕོག་པ་ལྟར་བསམ། རྐྱལ་རྙིང་གཅུས་པ་ལྟར་ནག་རྙིད་རྙིད་སོང་བར་བསམ། རྒྱས་པ་ལ་སྤྲོ་ན། ཡིག་ཆུང་གི་ཞལ་གདམས་སུ་བལྟའོ། །དེ་ནི་སྲུང་མ་འཕྲོག་པ་བདུད་རྩི་དྲང་བའོ། ། ༼ཆ༽ ཕུར་ཐུན་གྱི་དམིགས་པ་ནི། ༀ་སྭ་བྷ༴ སྟོང་པའི་ངང་ལས་དྲག་པོའི་ཕུར་པ་སྟོད་དཔལ་ལྡན་ལྷ་མོ་ནག་མོ་ཞལ་གཅིག་ཕྱག་གཉིས་མ་རལ་གྲི་དང་ཐོད་ཁྲག་ཐོགས་པ་སྨད་མགར་བའི་སོལ་ལམ་ནས་བསྟན་པ་ལྟ་བུ་མེ་ཡི་ཚྭ་ཚྭ་འཕྲོ་བ་ཟུར་གསུམ་དུ་འཁོར་མ་མོ་གསུམ་གནས་པའི་རྒྱ་མདུད་གོང་མ་ལ་ༀ་དཀར་པོ། རྐེད་པར་ཨཱཿདམར་པོ། རྒྱ་མདུད་འོག་མ་ལ་ཧཱུྃཿནག་པོ། རྩེ་མོར་ཕཊཿདམར་ནག་གིས་མཚན་པ། རང་གིས་ཐུགས་ཀའི་ཧཱུྃ་གིས་འོད་ཟེར་གྱིས་རང་བཞིན་གྱིས་གནས་ནས་བསྐྱེད་པ་ལྟ་བུའི་ཡེ་ཤེས་པ་སྤྱན་དྲངས། ཛཿཧཱུྃ་བྃ་ཧོ། གཉིས་སུ་མེད་པར་གྱུར། ལིངྒ་གསལ་བར་དམིགས་ལ། དགྲ་བགེགས་ཀྱི་སྤྱི་བོར་བཏབ་པའི་ༀ་དྲངས་པས་རང་གི་སྤྱི་བོའི་ༀ་ལ་ཐིམ་པས། རང་བཀྲག་དང་གཟི་མདངས་དང་ལྡན་པར་གྱུར། མགྲིན་པར་བཏབ་པའི་ཨཱཿདྲངས་པས་རང་གི་མགྲིན་པའི་ཨཱཿལ་ཐིམ་པས་རང་ཉིད་ནུས་པ་དང་ལྡན་པར་གྱུར། སྙིང་གར་བཏབ་པའི་ཧཱུྃ་ནྲི་དྲངས་པས་རང་གི་ཐུགས་ཀའི་ཧཱུྃ་ལ་ཐིམ་པས། རང་ཉིད་བློ་གྲོས་དང་ལྡན་པར་གྱུར། ཁམས་དང་སྐྱེ་མཆེད་ལ་བཏབ་པའི་བཀྲག་དང་གཟི་མདངས་ཐམས་ཅད་བསྡུས་ནས་རང་ལ་ཐིམ་པས་རང་ཉིད་མཐུ་སྟོབས་དང་ལྡན་པར་གྱུར། ཁོ་ནི་མེ་ཏོག་སད་ཀྱི་ཁྱེར་བ་ལྟར་གྱུར། ལྟེ་བར་བཏབ་པའི་རྩ་ཡི་འཁོར་ལོ་ཐམས་ཅད་བཅོམ། མགོ་བོར་བཏབ་པའི་གཟུགས་ཕུང་རྡུལ་དུ་བརླག །སྙིང་ཀར་བཏབ་པས་རྣམ་པར་ཤེས་པ་སྙིང་ཀར་ནག་གི་མཚམས་ནས་རཀྟ་བྱེའུའི་ཀླད་པ་ཙམ་ཞིག་ཡོད་པ་དེ་བཅོམ། སྲོག་རྩར་བཏབ་པས་ལུས་སྲོག་རྟེན་དང་བྲལ། བླ་གནས་སུ་བཏབ་པའི་བླ་གནས་ཀྱི་རྟེན་ཐམས་ཅད་བཅོམ་པར་བསམ། དེ་ལ་ཏིང་འཛིན་གསལ་བའི་ངང་ནས། ༀ་མ་ཧཱ་ཀ་ལི་རེ་མ་ཏི༴ ཞེས་པས་སྔགས་ཐུན་མང་དུ་བརྡེགས། སྔགས་པ་ནང་འགྲས་བྱུང་ན་སྐུ་གསུང་ཐུགས་ཀྱི་སྦྱོར་བ་བཤིགས་པའི་མན་ངག་གོ། ། ༼ཇ༽ དེ་ནས་དར་མ་གསུམ་དུ་བསད་པའི་ལྕགས་ལས་བྱས་པའི་རལ་གྲིའི་བརྟེན་ཅིང་། དགྲ་བོའི་སྙིང་གི་ནང་དུ་མ་མ་བྷྱོ་བྷྱོ་རལ་གྲིས་ཡུ་བ་ལ་བྷྱོས་མཚན་པ་གཅིག་གནས་པར་གྱུར། ༀ་མ་ཧཱ་ཀ་ལི་རེ་མ་ཏི༴ ཅེས་སྔགས་དྲུག་ཅུ་རྩ་གཅིག་བརྟེགས། མཚོན་ཐུན་གྱིས་དམིགས་གསལ་ནི། སྔགས་བཟླས་ཤིང་བསྐུལ་པ་བྱས་པ་ཙམ་གྱིས། དགྲ་བོའི་སྙིང་དཀར་ནག་གི་མཚམས་སུ་རལ་གྲི་གཡོན་དུ་འཁོར་བའི་ཤག་ཤག་གཤེགས་པར་བསམ། རང་ལྷ་མོར་གསལ་བའི་ཕྱག་གིས་རལ་གྲིས་བརྡེགས་པ་དང་། འཁོར་གྱིས་ལྷ་མོ་རྣམས་ཀྱི་བརྡེགས་པས་སྤྱི་གཙུག་ནས་རྐང་མཐིལ་གྱིས་བར་དུ་ཤག་ཤག་གཤགས་ནས་དུམ་བུར་གཏུབ་པར་བསམ་ལ་སྔགས་ཐུན་བརྡེག་གོ། ། ༼ཉ༽ དེ་ནས་དུག་ཐུན་སོགས་ཐུན་སྣ་ཚོགས་ཀྱི་དམིགས་པ་ནི། དགྲ་བོ་ལ་དུག་ཐུན་སྣ་ཚོགས་བརྡེགས་པའི་དུག་ཐུན་གྱིས་དུག་སྣ་ཚོགས་ཀྱིས་བཏབ་པར་གྱུར། ཁྲག་ཐུན་ཁྲག་ནད། ཕོ་ལོག་གླང་ཐབས་གག་ལྷོག །མཛེ། འབྲུམ་བུ། ཕོལ་མིག །ཚ་ནད་སྣ་ཚོགས་ཀྱིས་བཏབ་པར་གྱུར་པའི་དགྲ་བོ་མྱལ་མྱལ་སོང་བར་བསམ། རྡོ་ཐུན་དང་ཟངས་ཐུན་དང་ལྕགས་ཐུན་རྣམས་ནི་མ་མོ་དང་བདུད་མོ་ཤན་པའི་ཚོགས་སུ་གྱུར་ནས་གཅན་གཟན་གྱི་གོད་རོ་བཞིན་དུ་ལ་ལས་ཤ་ཟོས་ལ་ལས་ཁྲག་འཐུང་། ལ་ལས་རུས་པ་འཆོས་པར་བསམ། ༀ་མ་ཧཱ་ཀ་ལི་རེ་མ་ཏི༴ ཞེས་སྔགས་དྲུག་ཅུ་རྩ་གཅིག་གིས་བརྟེག ། ༼ཏ༽ བསྟབས་པའི་དམིགས་པ་ནི། དང་པོ་བྱིན་རླབས་པ་ལ། ༀ་ཨཱཿཧཱུྃཿ བྷནྡྷའི་སྣོད་ཡོངས་ཤིང་རྒྱ་ཆེ་བའི་ནང་དུ་དགྲ་བགེགས་བསྒྲལ་བའི་གཏི་མུག་ཤ་ཡི་རི་བོ། འདོད་ཆགས་ཁྲག་གི་རྒྱ་མཚོ་ཞེ་སྡང་རུས་པའི་ཕུང་པོ། འདོད་པའི་ཡོན་ཏན་ལྔ་དང་ལྡན་པ། ནམ་མཁའ་དང་མཉམ་པར་གྱུར། ༀ་ཨཱཿཧཱུྃ། ཞེས་པས་བརྗོད། རང་གི་མདུན་དུ་རྟེན་གཏོར་དེ་ཉིད་དཔལ་ལྡན་ལྷ་མོ་འཁོར་དང་བཅས་པ་རྣམས་རྔམས་པས་ཞལ་གདངས་ཤིང་མཆེ་བ་གཙིགས་པ། འཁོར་དྲག་བྱེད་བསམ་གྱིས་མི་ཁྱབ་པ་དང་བཅས་པ་རྣམས་ཀྱིས་དགྲ་བགེགས་ཀྱི་ཤ་ཁྲག་རུས་གསུམ་བསྟབས་པ། འཁོར་དང་བཅས་པ་རྣམས་ཀྱིས་གཅན་གཟན་གྱི་གོད་རོ་བརྟོད་པ་བཞིན་དུ་ཤ་རྣམས་ཟོས། ཁྲག་རྣམས་འཐུང་། རུས་པ་རྣམས་འཆོས་ནས་ཏིལ་འབྲུ་ཙམ་ཡང་མ་ལུས་པ་གསོལ་བར་བསམ། ༼ཐ༽ དེ་ནས་རྒྱུན་གཏོར་བྱིན་རླབས་དམིགས་པ་དང་བཅས་པས་ཞོར་ལ་གཏོར་མའི་ཞལ་གདམས་དང་། ཕྲན་ཚེག་གིས་ཞལ་གདམས་འགའ་བྲིས་ཏེ། བརྟེན་གཏོར་གྱི་རྒྱུ་ནི་ཤ་ལྔ་བདུད་རྩི་དང་བཅས་པ་ནལ་བུའི་ཤ་ཁྲག་སོགས་ཐོད་པའི་སྣོད་དུ་བཤམས་ལ། དར་ནག་གི་གུར་ཕུབ་ལ་དུས་བཞིའི་ཐུན་དྲུག་ཏུ་བྱིན་གྱིས་རླབས་ལ་ལས་བྱང་གི་སྐབས་སུ་འབུལ། བསྟབས་ཞེས་བརྗོད་ལ། དུམ་བུར་གཏུབ་སྟེ་གཏོར་ཆུང་དང་བཅས་པ་ལྷ་མོའི་ཞལ་དུ། དེ་ནས་ལྷ་མོ་འཁོར་དང་བཅས་པ་ལ་དགྲ་བགེགས་ཀྱི་རུ་པ་བསྟབས་པ་ནི། ༼ཏ༽ བྷྱོ། རི་རབ་རི་ཡི་རྩེ་མོ་ནས། །ཡོངས་འདུས་ཤིང་གིས་རྩ་བ་ནས། །མཚོ་མུ་ལེ་མཐིང་གི་ནང་ཤེད་ནས། །དཔལ་ལྡན་ཡེ་ཤེས་མགོན་པོ་དང་། །དཔལ་ལྡན་ལྷ་མོ་ནག་མོ་གཉིས། །འཁོར་དུ་བདུད་མོ་འབུམ་གྱི་བསྐོར། །ཀུན་ཀྱང་དགྲ་བོའི་ཤ་དང་ཁྲག་ལ་དགྱེས། །ཀུན་ཀྱང་དགྲ་བོའི་གསོད་དང་གཅོད་ལ་བརྩོན། །ཟ་བྱེད་གསོད་བྱེད་མ་བདུན་འཁོར་བཅས་རྣམས། །གངས་རི་ཙམ་གྱི་མཆེ་བ་གཙིགས། །གནམ་ས་ཙམ་གྱི་ཞལ་གདངས་ལ། །གློག་དམར་ཙམ་གྱི་ལྗགས་བརྐྱོང་ལ། །ཉི་ཟླ་ཙམ་གྱི་སྤྱན་བགྲོད་ལ། །སྟོང་གསུམ་ཙམ་གྱི་མྱིད་པ་རུ། །གནོད་བྱེད་བྱད་མ་དགྲ་བགེགས་ཞལ་དུ་བསྟབས། །བག་ཆགས་ཀུན་སྦྱངས་འཁོར་བའི་ལམ་བཀག་ཕྱིར། །ཟ་བྱེད་མི་འགྱུར་ཆོས་ཉིད་ཀློང་དུ་རོལ། །བཛྲ་ཡཀྴ་ཁ་ཁ་ཁཱ་ཧི་ཁཱ་ཧི། ཧཱུྃ། དགྲ་བགེགས་གཟུགས་ཀྱི་ཕུང་པོ་དང་། །ཚོགས་ཀྱི་ཞལ་ཟས་གཏོར་མ་འདི། །དཔལ་ལྡན་ལྷ་མོ་ནག་མོ་ཡིས། །ཞལ་དུ་བསྟབས་སོ་ཁ་རཾ་ཁ་ཧི། །བདུད་མོ་བ་ལམ་དྲེའུ་སྣ་མ། །སྲིང་གཅིག་ཁྲི་སྨན་ས་ལེ་མ། །ཁོལ་མོ་ཆུ་སྲིན་གདོང་པ་ཅན། །བསྟན་པའི་གཙོ་མོ་སྐྱིད་འཐིང་མ། །དུས་བཞིའི་རྒྱལ་མོ་ཆེན་མོ་བཞི། །ནང་གི་བློན་མོ་འཁོར་བཅས་ཀྱི། །ཞལ་དུ་བསྟབས་སོ་ཁཱ་རཾ་ཁཱ་ཧི། གཞན་ཡང་བདུད་མོ་བྱེ་བ་འབུམ། །ཤ་དང་ཁྲག་ལ་རྔམ་པ་ཡིས། །མ་མོའི་ཚོགས་ཀྱིས་ཞལ་དུ་བསྟོབ། །ཁུག་ཆོས་དབྱར་མོ་ལ་སོགས་པའི། །བརྟན་མ་བཅུ་གཉིས་འཁོར་བཅས་ཀྱིས། །ཞལ་དུ་བསྟབས་སོ་ཁཱ་རཾ་ཁཱ་ཧི། །གཞན་ཡང་ལས་ལ་སྐྱེས་པ་ཡིས། །གནོད་སྦྱིན་མོ་དང་ཤ་ཟ་མོ། །ཤ་ཁྲག་ཟས་སུ་ཟ་བ་ཡིས། །ཕོ་ཉ་མ་མོའི་ཚོགས་རྣམས་ཀྱིས། །ཞལ་དུ་བསྟབས་སོ་ཁཱ་རཾ་ཁཱ་ཧི། །མགུལ་དུ་སྦྲིང་ངོ་ཨ་ར་ལི། །དབྱིངས་སུ་བསྟིམ་མོ་ས་མ་ཡ། །ཐོག་ཐོག་ལྗིབ་ལྗིབ་ཧུབ་ཀྱིས་ཐོབ། །བསྟབས་པ་བདག་གི་མི་ནོར་ལ། །བཞེས་པ་ཁྱོད་ཀྱི་མ་ནོར་ཅིག །གསོལ་ལོ་རོལ་ཅིག་ཁ་རམ་ཁཱ་ཧི། །མ་ཧཱ་མཾ་ས་ལ་ཁཱ་ཧི། །མ་ཧཱ་རཀྟ་ལ་ཁཱ་ཧི། །མ་ཧཱ་ཙིཏྟ་ལ་ཁཱ་ཧི། །མ་ཧཱ་བ་སུ་ཏ་ལ་ཁཱ་ཧི། །མ་ཧཱ་ཀོ་རོ་ཙ་ན་ལ་ཁཱ་ཧི། །མ་ཧཱ་ཀིང་ནི་རི་ཏི་ལ་ཁཱ་ཧི། བཞེས་ཤིག་རོལ་ཅིག །དཔལ་ལྡན་ལྷ་མོ་འཁོར་བཅས་ཀྱི་སངས་རྒྱས་ཀྱི་བསྟན་པ་བསྲུངས་ཤིག །དཀོན་མཆོག་གི་དབུ་འཕང་བསྟོད་ཅིག །སྡང་བྱེད་ཀྱི་དགྲ་སོད་ཅིག །གནོད་བྱེད་ཀྱི་བགེགས་ཐུལ་ཅིག །བར་ཆད་ཀྱི་རྐྱེན་བཟློག་ཅིག །ཅེས་བརྗོད་ལ་གཟུགས་ཆ་གཉིས་སུ་བྱ་བའི་ཆ་གཅིག་ལིང་ཆུང་བཅས་པ་རྟེན་གཏོར་དུ་བསྟབས། གཅིག་རྒྱུན་གཏོར་དུ་བསྣན་ལ་བཞག །དེ་ནས་རྒྱུན་གཏོར་དགྲ་ཕྱོགས་སུ་འཕངས་ལ་བསྐུལ་བ་བྱ་བ་ནི། ༼ཐ༽ བྷྱོ། སྣང་སྲིད་མ་མོ་རབ་མདར་ལོགས། །ལྷ་སྲིད་སྡེ་བརྒྱད་རབ་མདར་ལོགས། །བདུད་མོ་འཁོར་ཚོགས་རབ་མདར་ལོགས། །བདག་གིས་མ་ལན་མ་ཉེས་སོ། །བྷྱོ། སྣང་སྲིད་མ་མོ་དམ་ལ་འདུས། །ལྷ་སྲིན་སྡེ་བརྒྱད་དམ་ལ་འདུས། །བདུད་མོ་འཁོར་ཚོགས་དམ་ལ་འདུས། །བདག་གིས་མ་ལན་མ་ཉེས་སོ། །བྷྱོ། སྣང་སྲིད་མ་མོ་དགྲ་ལ་ཆ་རེ་རན། །ལྷ་སྲིན་སྡེ་བརྒྱད་དགྲ་ལ་ཆ་རེ་རན། །བདུད་མོ་འཁོར་ཚོགས་དགྲ་ལ་ཆ་རེ་རན། །བདག་གིས་མ་ལན་མ་ཉེས་སོ། །བསྟན་པ་བཤིགས་པའི་དགྲ་བོ་ལ། །ནད་ཀྱི་བདག་མོས་ནད་སྣ་དྲོངས། །ཡམས་ཀྱི་བདག་མོས་ནད་སྣ་དྲོངས། །རིམས་ཀྱི་བདག་མོས་ནད་སྣ་དྲོངས། །ཁྲག་གིས་བདག་མོས་ནད་སྣ་དྲོངས། །ནད་ཀྱི་རྐྱལ་པ་དགྲ་ལ་ཕྱེ། །ཚོན་གྱི་གྲུ་གུ་དགྲ་ལ་རྐྱོང་། །ཐོག་དང་ཟོར་གྱི་སྣ་དྲོངས་ལ། །དགྲ་བོའི་ཡུལ་དུ་དམག་ལ་ཆོས། །དགྲ་བོའི་མི་མཁར་དམར་པོ་རྩེ་ནས་ཤིག །ས་མཁར་སྐྱ་བོ་རྨིང་ནས་ཤིག །མ་ལ་ལས་བཅོལ་མཐུ་མ་ཆུང་། །བཅོལ་པའི་ཕྲིན་ལས་འགྲུབ་པར་མཛོད། །ༀ་མ་ཧཱ་ཀ་ལི་རེ་མ་ཏི་དགྲ་ལ་ཐུན་བྷྱོ་བྷྱོ། དཔལ་ལྡན་ལྷ་མོའི་དྲག་པོ་ལས་ཐུན་གྱི་ཆོ་ག་རྫོགས་སོ། །སངས་རྒྱས་བསྟན་པ་བསྲུང་བའི་མཚོན་ཆར་ཤོག །བསྟན་པའི་རྒྱལ་མཚན་རབ་ཏུ་བརྟན་གྱུར་ཅིག །བཟློག་སྔགས་བྱེད་ན་བྷྱོ་རྣམས་ཀྱི་ཤམ་དུ་བཟློག་གོ་ཞེས་པ་གདབས་ལ་བཟློག །དཔལ་ལྡན་ལྷ་མོའི་སྲོག་གི་གཟེར་ཆུང་གི་རྒྱུད་ནས་བཏུས་པའོ། །ལས་རིམ་ཐུན་གྱིས་ཞལ་གདམས་རྒྱུད་ལས་བྱུང་བ། སློབ་དཔོན་པདྨ་འབྱུང་གནས་ཀྱི་མཛད་པའོ། །གཞན་ལ་བཤད་ན་མཁའ་འགྲོའི་ཆད་པ་འབྱུང་བའི་ཤིན་ཏུ་དམ་པས་གསང་བར་བྱའོ། །ས་མ་ཡ། ན་ར་ཀན། བཀའ་རྒྱ། སྦས་རྒྱ། གསང་རྒྱ། ཨཐྎ། དགེ་ལེགས་འཕེལ།། །།
དམ་སྲི་ལྟེ་ཕུར་ནག་མོའི་མནན་པ།
༈ བཛྲ་པ་ཎི་ལ་ན་མོ། དམ་སྲི་ལྟེ་ཕུར་ནག་མོའི་མནན་པ། དེ་ཡང་སྔོན་དང་པོ་ལྷ་མོ་ཆུ་སྲིན་གྱི་རྒྱལ་པོ་ཀུ་བེ་ར་གཉིས་སྦྱོར་བ་བྱས་པས་བུ་མོ་ལྟེ་ཕུར་ནག་མོ་བྱུང་སྟེ། དེ་མ་མནན་ན་བསྒྲུབ་པ་པོ་ལ་གནོད་པའི། མནན་ཐབས་ཤོག་བུ་ལ་བུད་མེད་ཀྱི་གཟུགས་བྲིས། རྐང་པ་བྱ་རྐང་འདྲ་བའི་བྲིས་པའི་སྙིང་གར། ཚེ་དང་ལོངས་སྤྱོད་ལ་བར་དུ་གཅོད་པའི་དམ་སྲི་ལྟེ་ཕུར་ནག་མོ་མ་ར་ཡཱ་ཛཿཛཿ བདུད་མོ་མ་རཱ་ཡ་ཛཿནནཿ བྱ་བ་བྲིས་མཐར་ཛའི་བསྐོར། དེ་ནས་མདུན་དུ་གྲུ་གསུམ་མཐོ་གང་བའི་ནང་དུ་བཞག །བདག་ཕྱག་ན་རྡོ་རྗེ་བསྒོམ་ལ། དེ་ནི་དམ་སྲི་ནག་མོ་གང་བྲིས་པ་ལྟར་དུ་བསྐྱེད་ལས་ཐུགས་ཀ་ནས་འོད་ཟེར་འཕྲོས་པའི་སྤྲུལ་པའི་ཚོགས་སྤྲོས་པས་བཀུག་ལ་བསྟིམ། ཕུར་པ་ཕྱག་ན་རྡོ་རྗེ་བསྐྱེད་ལ་བཏབ་ཤིང་གཟིར་བར་བསམ། དེ་ནས་རྟ་ནག་གི་རྙིད་པ་ལ་ཛ་བྲིས། ༀ་བཛྲ་ཙཎྜི་མ་ཧ་རོ་ཥ་ཎ་ཧཱུྃ་ཕཊཿ ཚེ་དང་ལོངས་སྤྱོད་དངོས་གྲུབ་ལ་བར་དུ་གཅོད་པར་བྱེད་པའམ། དམ་སྲི་ལྟེ་ཕུར་ནག་མོའི་སྲོག་ལ་མཱ་ར་ཡཱ་ཛཿ བདུད་མོ་མ་ར་ཡ་ནནཿ ཡི་དམ་སྔགས་གཤམ་དུ་བསྒྲུབ། གྲུ་གསུམ་བསྐྱེད་པ་ནི། ༀ་སྭཱ་བྷ་ཝ་སྦྱང་། སྟོང་པའི་ངང་ལས་མདུན་དུ་ཡི་གེ་ཁངཿནག་པོ་ཡོངས་སུ་གྱུར་པ་ལས། གནམ་ལྕགས་ཀྱི་ཁང་སྒྲོམ་ནག་པོ་ནང་གྲུ་གསུམ་དམར་ནག་ཏུ་འདུག་པ་ཁ་ཁྱེར་བང་རིམ་གསུམ་དང་ལྡན་པ་བང་རིམ་དང་པོ་ལ་བྱ་ཤན་མང་པོ་ལྡིང་བ། བར་མ་ལ་གཅན་གཟན་མང་པོ་རྒྱུག་པ། འོག་མ་ན་མི་རོ་དང་རྟ་རོ་མི་ཁྲག་དང་རྟ་ཁྲག་འཁྱིལ་བ། དེའི་དབུས་སུ་ཡི་གེ་ཏྲི་ཡོངས་སུ་གྱུར་པ་ལས་དམ་སྲི་བྱ་མཆུ་ཅན་མགོན་སྐྱབས་མེད་པ་སྔོ་བ་སྐྱ་བ་འདར་འཁྲི་ལི་ལི་བྱེད་པ། ཁ་ནས་སྨྲེ་སྔགས་དང་འོ་དོད་འབོད་པ། ཡན་ལག་བཞི་སྒྲོགས་སུ་བཅུག་པ་གཅིག་ཏུ་གྱུར། འགུག་གཞུག་ལན་གསུམ་གང་རུང་བྱ། ལུག་གཅིག་ལ་འགབ་འདྲེའི་སྔགས་ནི། ཡ་མ་དམ་སྲི་འགབ་འདྲེ་མ་ར་ཡ་ཛཿཛཿནནཿནནཿ དྲེའུ་ཡ་མ་ཤ་ཁུག་ནནཿ བསྔོ་རཀྨོ་ཀུ་རུ་ཀོ་ཏྲི་ཙཎྜ་དམ་སྲི་ཤ་ར་གནོད་བྱེད་འགབ་འདྲེ་དམ་སྲི་གནོད་པ་ཐམས་ཅད་མ་ར་ཡ་ནན། ཕྲེང་བསྐོར་གཅིག་བཟླ། རྡོ་ལེབ་ལ་རྡོ་རྗེ་རྒྱ་གྲམ་བྲིས་ལ་མནན། ཐུན་མཚམས་སུ་སྔར་བཞིན་བྱ། སྒྲུབ་པ་ཐོན་པ་དང་། མཆོད་རྟེན་རྙིང་པའི་འོག་གམ་ལམ་རྒྱ་གྲམ་དུ་མནན། དེ་ནས་དམ་སྲི་ལྡང་མི་ནུས་སོ། །མནན་པའི་དུས་སུ་འདི་སྐད་དོ། །ཧཱུྃཿ ཉོན་ཅིག་དམ་སྲི་ཕོ་མོ་ཉོན། །ང་ནི་དཔལ་ཆེན་གསང་བའི་བདག །ངའི་བཀའ་ལས་མ་འདའ་ཞིག །ངའི་བཀའ་ལ་མི་གནས་མེད། །དམ་སྲི་ཕོ་མོ་བྱ་བ་ཁྱོད། །གསང་སྔགས་དམ་ཚིག་ཉམས་པ་ཡིས། །དྲེག་པ་ཕོ་མོ་རྩིས་ཆོས་ཀྱི། །བདུད་མོ་ནག་མོ་གནོད་སྦྱིན་མོ། །ལས་ཀྱི་དབང་གི་སྐྱེས་པ་ཏེ། །དགྲ་བོའི་གྲ་ཚོགས་འདུས་པ་ལགས། །བསྒྲུབ་ལ་བར་དུ་གཅོད་པ་དང་། །རྣལ་འབྱོར་ཕོ་མོ་གསང་བ་དང་། ལུས་ངག་ཡིད་གསུམ་དབང་བསྡུད་བྱེད། །མྱུར་མགྱོགས་རྫུ་འཕྲུལ་གློག་གི་དབང་། །བྱ་ཡི་མགོ་ལ་མི་ཡི་ལུས། །རླུང་གི་རྐང་ལ་སྐར་ཆེན་མིག །སྤུ་གྲིས་སོ་ལ་མི་ཟིན་པ། །རྣལ་འབྱོར་རྣམས་ལ་གནོད་བྱེད་པ། སློབ་དཔོན་པདྨ་འབྱུང་གནས་ཀྱིས། །ཆད་དམ་བཀའ་ལས་མི་འདའ་བར། །བསྒྲུབ་མཆོག་རྣམས་ལ་བར་མ་གཅོད། །བདག་ལ་གནོད་པ་མ་བྱེད་ཅིག །དམ་རྫས་གཏོར་མ་འདི་ལོངས་ལ། །བསྒྲུབ་པའི་རྫས་ལ་འདིར་མ་རྔམས། །གསང་སྔགས་དམ་ཚིག་གཉེན་པོ་ཡིས། །ལས་རྣམས་བསྒྲུབ་ལས་མ་ཟིན་པར། །དབྱེའོ་དཀར་རོ་མཚམས་ཆོད་ཅིག །དཔག་ཚད་བརྒྱད་ཁྲིའི་རི་རབ་འོག །མནན་ན་མ་ལྡང་དམ་སྲི་རྣམས། །བསྐལ་པ་འདི་ལས་མན་ཆད་ནས། །ཡ་ཡམ་རྒྱལ་མོ་བྱ་བ་དང་། །མ་ཡམ་རྒྱལ་མོ་གྲུལ་ཆེན་ཡོད། །དམ་སྲི་ཕོ་མོ་དེར་སོང་ཞིག །དེ་འོག་དཔག་ཚད་བརྒྱད་ཁྲིའི་འོག །ལྕགས་མཁར་མུན་རིབ་ནང་ཤེད་ན། །གཤིན་རྗེའི་རྒྱལ་པོའི་ཆོས་བཤད་འདུག །དེའི་དྲུང་དུ་ཆོས་ཉོན་ཅིག །ཕྱི་མིག་ཡར་ལ་མ་ལྟ་ཞིག །རི་རབ་ཆེན་པོའི་འོག་ཏུ་ནོན། །རྒྱ་མཚོ་ཆེན་པོའི་གཏིང་དུ་འཕངས། །བསྐལ་པ་ཆེན་པོ་གྲངས་མེད་དུ། །སངས་རྒྱས་བསྟན་པ་མ་རྫོགས་པར། །སྟེང་གི་ཕྱོགས་སུ་མ་ལྡང་ཞིག །རྡོ་རྗེ་རྒྱ་གྲམ་ཧཱུྃ་བཅས་ཀྱི། །མནན་ནོ་དམ་སྲི་ཕོ་མོ་མནན། །བསྐལ་པའི་བར་དུ་མ་ལྡང་ཞིག །ཆོས་སྤྱོད་ཐམས་ཅད་ལ་བར་དུ་གདོན་ངན་ཕོ་མོ། རཱུ་ཏྲཱ་ཕོ་མོ། དམ་སྲི་ཕོ་མོ་རྙབ་པ་ལག་རིང་བཙན་ཡམ་ཤུད་དམར་པོ། ཐེའུ་རང་སྟོང་འཁྲུགས་དམ་སྲི་ལྟེ་ཕུར་ནག་མོ་མ་ར་ཡ་ནན། སྟྭཾ་བྷ་ཡ་ནན། མོ་ཧ་ཡ་ནན། ཧཱུྃ་ནན། ཁ་ཏཾ་མ་ར་ཡ་ནན། ཅེས་མནན་པའི་ལས་བྱས། དམར་གཏོར་གཅིག་རྒྱབ་རྡོ་རྗེ་རྒྱ་གྲམ་གྱིས་ཁ་གཅོད། རྒྱས་འདེབས་བྱ། ལས་ཀྱི་རྗེས་མི་མངོན་པ་བྱ། ཕྱིར་མི་ལྟ་བར་འོང་། རང་ཕྱག་ན་རྡོ་རྗེའི་གུར་ཁང་བསྐྱེད། དེ་ལྟར་བྱས་ན་དམ་སྲི་མི་ལྡོང་བར་འགྱུར་རོ། །འདིའི་རྒྱུད་པ་ནི། སློབ་དཔོན་བཻ་རོ་ཙ་ན། རྨ་དངོས་གྲུབ་དབེན་ཆུང་། བླ་མ་དྲག་པོ་ལོ་ཙཱ་བ་རྗེ་བཙུན་རིན་སྤུར་ལྡན། མ་ར་ཙ་ཤེས་རབ་རྡོ་རྗེ། ཡེ་ཤེས་རྡོ་རྗེ། རིན་ཆེན་འབུམ། རྗེ་བཙུན་རེ་དྷ་བ་ལ་རིམ་བཞིན་དུ་རྒྱུད་པའི་ཤིན་ཏུ་ཁོ་ན་ཡིན་པའི་གསང་རྒྱ། ཁ་ཐཾ། ས་མ་ཡ། རྒྱ་རྒྱ་རྒྱ། སརྦ་ཛ་ཡནྟུ།། །།
སོ་དབལ་གྲིའི་རལ་ངག་མན་ལོའི་འཁོར་ཏིའི་མ་ཏིའི་མ་ཏེ་མོ་ལྷ་ལྡན་དཔལ་གཅིག་མ།
སོ་དབལ་གྲིའི་རལ་ངག་མན་ལོའི་འཁོར་ཏིའི་མ་ཏིའི་མ་ཏེ་མོ་ལྷ་ལྡན་དཔལ་གཅིག་མ་ཞེས་བྱ་བ་བཞུགས་སོ། །ན་མོ་བཛྲ་དྷ་ར་ཡེ། མ་འོངས་བསྐལ་པའི་སྙིག་མ་ཡི་དམ་ལྷ་མཆོག་གང་ལ་ཡང་། བསྙེན་བསྒྲུབ་ཟིན་པའི་སྔགས་པ་ཡིས། །བདེན་བྲལ་ཉེས་བྱས་སྒྲོལ་བའི་ལས། །བསད་འཁོར་དྲག་པོ་འདི་ན་སྟོན། །གྲོ་ག་ཤོག་བུ་གང་སྲིད་སྟེང་ཙཀྲ་མུ་ཁྱུད་གསུམ་བསྐོར་ལ། ཐབས་འཁོར་དབུས་སུ་དགྲ་གཟུགས་བཀོད། །ཕྱི་རིམས་རྩིབ་བརྒྱད་བྷྱོ་བརྒྱད་དང་། །མཆན་བརྒྱད་དག་ལ་དགྲ་བོའི། །བླ་སྲོག་ངོ་བོ་ཪྣྲྀཿདེས་ཆོག །དེའི་ཕྱི་རོལ་འབོད་རྦད་བསད། །ཐུན་སྔགས་དང་བཅས་རིམ་བཞིན་ནོ། །ཡིག་མགོ་ནང་དུ་བསྟན་ལ་མཇུག་མ་ཕྱི། །མིང་སྤེལ་གཤམ་བསྒྱུར་བསྔགས་བྱང་ལྟར། །ཡང་གཅིག་ཤེས་རབ་མོ་འཁོར་ལ། །རྩིབ་རྩེ་དབལ་སོ་ནང་དུ་བསྟན། །དེ་སྟེང་བྷྱོ་བརྒྱད་མཆན་དེ་ལ། །ཉེས་བྱས་བླའམ་ས་བོན་ཪྣྲྀཿ དབུས་སུ་ལིངྒ་མགོ་མཇུག་ལྡོག །ཡིག་མགོ་ཕྱིར་བསྟན་མཇུག་ལ་སོགས། །མྱུ་ཁྱུད་དང་བཅས་ཐབས་འཁོར་བཞིན། །བྲིས་པ་དེ་ཉིད་ཁ་སྦྱོར་བསྡོམ། །གཞན་ཡང་སྟེང་འོག་ཙཀྲ་གཉིས། །དགོས་པའི་སྟེང་འཁོར་མུ་ཁྱུད་གཉིས། །བསྐོར་དབུས་རེ་མ་ཏི་ཡི་སྐུ། །ནག་མོ་བོང་ཞོན་དར་ནག་གྱོན། །རལ་གྲི་ཐོད་ཁྲག་བསྣམས་པའོ། །ཡང་ན་མངོན་རྟོག་ལྟར་གསལ་བྲི། །སྐུ་ཡི་ཐུགས་ཀར་བྷྱོ་ཡིག་མཚན། །ཞེས་བཀོད་ཕྱིའི་མུ་ཁྱུད་ལ། །ཡིག་མགོ་ནང་བསྟན་སྔགས་རྣམས་བྲིས། །དེ་གསུམ་འོག་འཁོར་མུ་ཁྱུད་གཅིག །སྤྱི་དྲིལ་སྔགས་ཀྱི་བསྐོར་བར་བྱ། །ཡིག་འགོ་ཕྱིར་བསྟན་མིང་སྤེལ་ལ། །དམ་རྫས་ཟག་རྫས་དྲི་མ་བྱུག །མཎྜལ་སྟེང་བཞུགས་མདུན་བསྐྱེད་ལྟར། །བསྒོམ་ལ་སྤྱན་འདྲེན་མཆོད་པ་འབུལ། །འབོད་རྦད་བསད་གསུམ་གཤམ་དུ་བཏག །མན་ངག་རལ་གྲིའི་དབལ་སོ་ཡི། །དགྲ་ལས་བྱས་ཟིན་རླུང་འཁོར་བསྐོར། །དགྲ་བོ་མ་ལུས་འཇོགས་པར་བྱེད། །མ་ཅིག་ལྷ་མོ་རེ་མ་ཏི། །གནམ་ལྕགས་རལ་གྲིའི་འཁོར་ལོ་འདི། །ཉེས་མེད་མི་ལ་བསྐོར་མི་སྲིད། །ངན་སོང་ལ་འགྲོ་ཨ་ཙ་མ། །མ་ཅིག་ལྷ་མོ་རེ་མ་ཏིའི། །བསད་འཁོར་སྔགས་བྱང་ནག་པོ་ཡི། །མིང་སྤེལ་གཤམ་བསྒྱུར་འདི་ནའོ། །འབོད་རྦད་བསད་གསུམ་སྤྱི་དྲིལ་ནི། ༈ བསྙེན་པའོ། །ༀ་མ་ཧཱ་ཀཱ་ལི་རེ་མ་ཏི་མ་མ་རུ་ལུ་རེ་མ་ཏི་རུ་ལུ་རུ་ལུ་ཧཱུྃ་བྷྱོཿཛ་ཛཿ འབོད་པའོ། །ཆྒཻ་མོའི་བླ་སྲོག་རྣམ་པར་ཤེས་པ་ཁུག་ཅིག་ཪྣྲྀ་ཨཾ་གུ་ཤ་ཛཿཛཿ ཨཱོཾ་རུ་རུ་ཙ་ཏུར་ཨ་ཤུག་མེ། པྲ་ཏི་རཱུ་ཏྲ་ཁ་ཤག་རཀྨོ་ཧཱུྃ། རཀྴ་ཙིཏྟ་ས་མ་ཡ་ཀུ་རུ་ཁ་ཙིཏྟ་ནནཿ རྦད་པའོ། །ཆྒཻ་མོའི་ཡུལ་དུ་སྣང་སྲིད་མ་མོའི་འབུམ་གྱི་དམག་ཆོས་ཆོས། རྒྱུག་རྒྱུག་དགྲ་ལ་ནད་ཡམས་ཕོབ་ཕོབ་སོད་སོད། ༀ་རུ་རུ་བམ་རོ་རུ་ཧཱུྃ། ཏིཥྛ་བ་ཏོ་སི་རཀྨོ་སྙིང་ཁ་ལ་རཀྨོ་ཐུན་བྷྱོཿཛ་ཛཿ ཐུན་སྔགས། སྡིག་སོ། ཆྒཻ་མོའི་ལུས་སྲོག་ལ་ནད་རིམས་སྣ་ཚོགས་ཐང་ཐང་ཕོབ་ལ་སོད་སོད། ༀ་རུ་ལུ་རེ་མ་ཏི་ས་མ་ཡ་པྲ་མ་ཧ་སྟི། པྲ་མ་རཀྨོ་རུ་ལུ་རུ་ལུ་བྷྱོ་ཛ་ཛཿ ཁ་རག་ཏེ་ཁེམ་བྷྱོཿ ཁ་ལེ་ཐུན་བྷྱོཿ ཐུན་མ་མོ་བྷྱོཿ བསད་པའོ། །ཧཱུྃ་རཀྨོ་ཪྣྲི་ཤམ་ཀུ་རུ་ཐུན་རྦད། རཀྨོ་ཨརྱ་ཛ་ཛཿ ཏེ་ཁེམ་ཁ་ལེ་ཐུན་བྷྱོ། བསད་སྔགས་ཡིན། ས་མ་ཡ་དགྲ་བོ་ཆྒཻ་མོའི་སྲོག་རྩ་ཆོད་ཪྣྲི་མ་ར་ཡ་རྦད་ཛཿ འབོད་རྦད་བསད་གསུམ་འདི་ཡི་བསྐོར། །མ་ཅིག་དཔལ་ལྡན་ལྷ་མོ་ལ། །བསྙེན་བསྒྲུབ་ཕྲིན་ལས་བྱེད་པ་དང་། །རླུང་འཁོར་དྲག་པོ་བསྐོར་བའི་དུས། །མཆོད་བསྟོད་བསྐང་བཤག་བརྩོན་ན་ཤིས། །ལྷ་མོ་འཁོར་བཅས་རྒྱུ་བའི་དུས། །གནམ་སྟོང་ཚེས་བརྒྱད་བཅོ་ལྔ་དང་། །ཉི་ཤུ་གཉིས་སོགས་ནམ་ཕྱེད་ཀུན། །འཇིག་རྟེན་མ་ལུས་ཁྱབ་པར་ཉུལ། །རྒྱུ་དུས་ཕྲིན་ལས་ཅི་བྱས་མྱུར། །དུས་གཏོར་གཏའ་གཏོར་གྲངས་མེད་བསྔོ། །མངོན་སྤྱོད་ལས་བརྩོན་དྲག་སྔགས་བཟླས། །དགྲ་བགེགས་མ་ལུས་འཇོམས་པར་བྱེད། །དགེའོ། །རྫོགས་སོ།། །།
དཔལ་ལྡན་ལྷ་མོའི་སྦྱིན་སྲེག
དཔལ་ལྡན་ལྷ་མོའི་སྦྱིན་བསྲེག་བཞུགས་སོ། །ན་མོ་གུ་རུ། དཔལ་ལྡན་ལྷ་མོའི་སྦྱིན་བསྲེག་ལ། དང་པོ་མདུན་དུ་མེ་ཐབ་གཅིག །དེ་ནས་མཆོད་རྫས་བསགས། རྣམ་ལྔ་བཤམས། ལས་བུམ་བཤམས། ལས་བུམ་ནང་དུ་རྡོ་རྗེ་གནོད་སྦྱིན་བསྐྱེད་ལ། སྤྱན་དྲངས་བསྟོད་པ་བྱ། ཡིག་བརྒྱ་བརྒྱ་རེ་བྱ། དེ་ནས་ཡི་དམ་དུ་བསྐྱེད་ལ་མེ་སྦར། སུམ་བྷ་ནི་མཚམས་བཅད། དེ་ནས་ལས་བུམ་ཆུས་གཏོར་ལ་འདི་སྐད་དོ། །ཧཱུྃཿ ཡེ་ཤེས་སྤྲིན་དཔུང་མཁའ་ལ་བདུད་རྩིའི་ཆར་པ་འབབས། །མི་གཙང་ཚོགས་རྣམས་དག་གྱུར་ཅིག །ༀ་སརྦ་སཾ་ཤྭ་དྷ་ན་ཡེ་སྭཱ་ཧཱ། དེ་ནས་མེ་ལྷ་བསྐྱེད་པ་ནི། ཐབས། ཐབ་ལྕགས་ཁང་ནག་པོ་གྲུ་གསུམ་པ། མེ་རི་འབར་བའི་དབུས་སུ་བསྒྲང་ཕྲེང་རཾ་གྱིས་མཚན་པ། དེ་ཡོངས་སུ་གྱུར་པ་ལས། མེ་ལྷ་སྐུ་མདོག་མཐིང་ནག་ར་སྐྱེས་ཁམས་པ་ལ་བཅིབ་པ། ཞལ་གདངས་ཤིང་མཆེ་བ་གཙིགས་པ། སྤྱན་གསུམ་པ། གཡས་གཉིས་རལ་གྲི་དང་དབྱུག་ཐོ། གཡོན་གཉིས་དྲིལ་བུ་དང་ཞག་པ་འཛིན་པ། སྦྲུལ་ནག་པོའི་ཤིང་རལ་ཁར་བརྒྱན་པ། སྟག་གི་ལྤགས་པའི་ཤམ་ཐབས་བྱས་པ། དྲང་སྲོང་ནག་པོའི་འཁོར་གྱི་བསྐོར་བ། སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་ལས་འོད་ཟེར་འཕྲོས་པས་ཤར་ལྷོའི་མཚམས་ནས་མེ་ལྷ་སྤྱན་དྲངས་བ་ནི། ཧཱུྃ། དད་པ་དང་ནི་དམ་ཚིག་གིས། །ཚུར་བྱོན་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །བསྲེགས་བླུག་ཞལ་ཟས་བཞེས་སླད་དུ། །དྲག་པོའི་ལས་ལ་སྤྱན་འདྲེན་ནོ། །འབར་བའི་གདན་ལ་བཞུགས་སུ་གསོལ། །ཛཿཧཱུྃ་བཾ་ཧོ། ས་མ་ཡ་ཏིཥྛ་ལྷན། ཞལ་མར། ཧཱུྃ། མིའི་ཤ་ཚིལ་ཁྲག་ཆང་སྦྱར། །ཁྲག་གི་ཡོན་ཆབ་དམར་པོ་འདི། །མེ་ལྷ་འབར་བའི་ལྷ་ལ་འབུལ། །བཞེས་ཤིག་དགྲ་བགེགས་བསྒྲལ་དུ་གསོལ། །ཨགྞེ་ཨརྒྷཾ་ཨཿཧཱུྃཿ ༀ་ཨཱཿཧཱུྃ། དུར་ཁྲོད་གནས་སུ་སྐྱེས་པ་ཡིས། །དུག་གི་མེ་ཏོག་ནག་པོ་འདི། །མེ་ལྷ་འཁོར་དང་བཅས་ལ་འབུལ། །བཞེས་ཤིག་དགྲ་བགེགས་བསྒྲལ་དུ་གསོལ། །ཨགྞེ་པཥྤེ་ཨཱཿཧཱུྃཿ ཤ་ཆེན་དུག་དང་སྦྱར་བ་ཡིས། །དུག་གི་བདུག་སྤོས་ནག་པོ་འདི། །མེ་ལྷ་འཁོར་དང་བཅས་ལ་འབུལ། །བཞེས་ཤིག་དགྲ་བགེགས་བསྒྲལ་དུ་གསོལ། །ཨགྞེ་དྷུ་པྤེ་ཨཱཿཧཱུྃ། མི་ཚིལ་ཁྲག་དང་སྦྱར་བ་ཡི། །ཚིལ་ཆེན་ཞུན་མེའི་སྒྲོན་མེ་འདི། །མེ་ལྷ་འཁོར་དང་བཅས་ལ་འབུལ། །བཞེས་ཤིག་དགྲ་བགེགས་བསྒྲལ་དུ་གསོལ། །ཨགྞེ་ཨ་ལོ་ཀེ་ཨཱཿཧཱུྃ། ཁྲག་ཆེན་དུག་དང་སྦྱར་བ་ཡི། །རཀྟའི་དྲི་ཆབ་དམར་པོ་འདི། །མེ་ལྷ་འཁོར་དང་༴ བཞེས་ཤིག༴ ཨགྞེ་གནྡྷེ་ཨཱཿཧཱུྃ། འབྲུ་ནག་བཤོས་བུ་ཟུར་གསུམ་འདི། །ཤ་ཆེན་ཁྲག་གི་བྱུག་པ་འདི། །མེ་ལྷ༴ བཞེས་ཤིག༴ ཨགྞེ་ནཻ་ཝིཏྱ་ཨཱ་ཧཱུྃ། རྐང་ཆེན་གླིང་བུ་གྷནྜི་རྔ། དྲག་པོའི་རོལ་མོ་སྒྲ་སྒྲོགས་འདི། །མེ་ལྷ་འཁོར་དང་༴ བཞེས་ཤིག་དགྲ༴ ཨགྣེ་ཤབྟ་ཨཱ་ཧཱུྃ། ཧཱུྃ། མེ་ལྷའི་རྒྱལ་པོ་དྲང་སྲོང་མཆོག །ཁ་དོག་ནག་པོ་མི་བཟད་པ། །ཆར་སྤྲིན་འཁྲིག་པའི་མདོག་འདྲ་བ། །གཡས་གཉིས་རལ་གྲི་དབྱུག་ཏོ་བསྣམས། །གཡོན་གཉིས་དྲིལ་བུ་ཞག་པ་བསྣམས། །ཨུཏྤལ་སྔོན་པོ་སེ་རལ་ཁ། །སྙིང་ཀ་གསང་གནས་སྨིན་མཚམས་སུ། །ཡི་གེ་རཾ་གྱིས་རབ་མཛེས་པ། །འཇིགས་པའི་དུས་སུ་མེ་འོད་འཚུབ། །དེ་ལ་བདག་གིས་ཕྱག་འཚལ་བསྟོད། །ཞལ་མར་འབུལ། དེ་ནས་གཏོར་མ་འབུལ། དངོས་གྲུབ་ཞུ་བ་ནི། བདག་ཅག་རྣལ་འབྱོར་པ་རྣམས་ཀྱི་བསྟན་པ་དར་རྒྱས་སུ་མཛད་དུ་གསོལ། ཕྲིན་ལས་སུ་བཅོལ་བ་ནི། མིང་རུས་གཟུགས་སུ་བྲིས་པའི་དགྲ་བགེགས་རྣམས། །བསད་མནན་གཟིར་གསུམ་གྱི་ལས་དྲག་པོ་མྱུར་དུ་མཛོད་ཅིག །རམ་བུ་མར་ལ་གཏོར། མེ་ལྷ་མེའི་རང་བཞིན་དུ་གནས་པར་གྱུར། དེ་ནས་བྷྲཱུྃ་ལས་བསྐྱེད་རིམ་བྱ། མ་ཡི་ནང་ནས་མ་ཅིག་མ། །གདན་འབུལ། ཞལ་མར་འབུལ། རྣམ་ལྔ་འབུལ་བསྟོད་པ་བྱ། དཔལ་གྱི་སྲུང་མ༴སོགས་བསྟོད། དེ་ནས་འགུག་འདྲེན་བྱ། བསྟན་པ་བྱ། དེ་ནས་སྔགས་ནམ་བསྒྲངས་ནས་ཡར་གཏོར། དངོས་གྲུབ་ཞུ། རམ་བུ་དམར་གཏོར། ཕྲིན་ལས་བཅོལ་གཏོར་མ་འགུགས་འདྲེན་བསྐུལ་བ་བྱ། བཞེས་སྒྲ་འདྲེན། དེ་ནས། བྷྲཱུྃ་བྷྱོ། མ་བདུད་འཁོར་དང་བཅས་པ་རྣམས། །དགྲ་པོའི་ལས་ལ་སྤྱན་འདྲེན་ནོ། །འབར་བའི་གནས་འདིར་གཤེགས་སུ་གསོལ། །ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷན། ཞལ་མར་འབུལ། ཧཱུྃཿ མི་ཁྲག་ཁྱི་ཁྲག་སྦྱར་བ་ཡི། །རཀ་ཏའི་དྲི་ཆབ་དམར་པོ་འདི། །མ་བདུད་འཁོར་དང་བཅས་ལ་འབུལ། །བཞེས་ཤིག་དགྲ་བགེགས་བསྒྲལ་དུ་གསོལ། །ༀ་མ་ཧཱ་ཀ་ལི་རེ་མ་ཏི་ཨརྒྷཾ་ཨཱ་ཧཱུྃ། པ་ཏཾ་ཨ་ཧཱུྃ། པུསྤེ༴ དྷུཔྤེ༴ ཨ་ལོ་ཀེ༴ གནྡྷེ༴ ནཻ་ཝི་ཏེ༴ ཤབྟ་ཨཱཿཧཱུྃ། རྣམ་ལྔ་ཕུལ། རེ་མ་ཏི་ལ་བདག་གིས་བསྟོད། ཞལ་མར་འབུལ། ཤ་བྱང་ལ་འགུགས་འདྲེན་བྱ། བསྟབ་པ་བྱ། ཤ་བྱང་བསྒྲང་། བཞེས་སྒྲ་དྲངས། རྣམ་ལྔ། བསྟོད་པ། ཞལ་དམར། ནས་ཡར་གཏོར། དངོས་གྲུབ་ཞུ། རམ་བུ་མར་གཏོར། ཕྲིན་ལས་བཅོལ། འགྱེད་གཏོར་འཕང་། ཡིག་བརྒྱས་བཤགས། ལྷ་གཤེགས་གསོལ་བྱ། ཤ་བྱང་བདུན་ནམ་ཉེར་གཅིག་འབུལ། གཤེགས་གསོལ་བྱ། བསྟོད་པ་བྱ། ལས་ཀྱི་མཐའ་སྡུད་བྱའོ། །མ་བདུད་ཐུགས་དམ་བསྐུལ་ནས། ཐུགས་དམ་ཐུགས་རྗེས་བདག་ལ་བྱིན་གྱིས་རློབས། །ཕྲིན་ལས་དགྲ་བགེགས་བསྒྲལ་བའི་དུས་ལ་བབས། །བཅོལ་པའི་ཕྲིན་ལས་མྱུར་དུ་འགྲུབ་པར་མཛོད། །བསྐུལ་པ་ཐུང་བ་ཡིན། ལས་བུམ་ནང་དུ་པད་ཟླའི་གདན་ལ། ཀྵམ་ལས་མཆེ་བ་ཞེས། རྡོ་རྗེ་གནོད་སྦྱིན་བསྐྱེད། བུམ་ཆུ་བསྒྲུབ་པ། མངྒ་ལཾ།། །།
དཔལ་ལྡན་ལྷ་མོ་ནག་མོ་མཆོད་པའི་ཆོ་ག་དགྲ་བགེགས་རྡུལ་བརླག རྡོ་རྗེ་རྒྱལ་མཚན།
ཤཱི མཾ དཱེ བི བ ཥྞ པཱུ ཛ བི དྷི ཤ ཏྲུ དྷུ ལི པྲ སྟཾ། བི ཛ ཧ ར ཏི སྨ།
དཔལ་ལྡན་ལྷ་མོ་ནག་མོ་མཆོད་པའི་ཆོ་ག་དགྲ་བགེགས་རྡུལ་བརླག་བཞུགས་སོ། །
དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །མཁའ་འགྲོ་མ་མཆོད་ན། ཡི་དམ་གྱི་བྱ་བ་བརྟེན་ནས། མདུན་དུ་ཡཾཿའོད་དུ་ཞུ་བ་ལས། རླུང་གི་དཀྱིལ་འཁོར་དབྱིབས་གྲུ་བཞི། རྒྱ་ཆེ་ལ་འཕངས་མཐོ་བ། ནང་སྟོང་པར་སྒོམ། དེའི་ནང་གི་དབུས་སུ་རཾཿའོད་དུ་ཞུ་བ་ལས། མེའི་དཀྱིལ་འཁོར་དབྱིབས་རླུང་དང་འདྲ་བ་སྟེ། དེའི་ནང་དུ་བྷྲཱུཾཿའོད་དུ་ཞུ་བ་ལས་ཐོད་པའི་གཞལ་ཡས་ཁང་དབྱིབས་གྲུ་བཞི་རྒྱ་ཆེ་ཆེ་ལ་འཕངས་མཐོ་བ། ཐོད་ཁང་གི་འོག་གཞི་དུར་ཁྲོད་ས་གཞིས་གང་བར་བསྒོམ། རང་ཉིད་ཡི་དམ་གྱི་ལྟེ་བ་ནས། ཡི་དམ་གྱི་ལྟེ་བ་ནས། ཡི་གེ་ཏིཿནག་པོ་ཅིག་འཕྲོས། ཐོད་ཁང་གི་ནང་དུ་ཕོག །འོད་དུ་ཞུ་བ་ལས། བོང་བུ་དམར་གྭ་བ། དབོ་དཀར་བ། རྣ་བ་གཉིས་ཀྲོག་ཆུང་བྱས་པ། ཞིང་ལྤགས་ཀྱི་སྟན་བསྟད་པ། སྒའི་སྔ་རུ་སྲིན་པོའི་ཡ་ཐོད་ལ་བྱས་པ། མན་མཁལ་ལ་ཕྱི་རུ་བྱས་པ། ལྤག་པས་སྒ་གཡོག་བྱས་པ། སོགས་པས་སྒ་ལོག་བྱས་པ། སྦྲུལ་ནག་གི་གོང་ཐག་དང་གློ་ནན་བྱས་པ། ཞིང་ཆུ་ངུ་གཉིས་ལ་སྨད་བྱས་པའི། སྐྲ་མདུད་སྨད་ཐུང་ལ་ཡར་བཏགས་པ། ལག་པ་གཉིས་འཕྱང་བ་སྨེད་བྱིལ་བྱས་པ་ལྟ་བུའོ། །རྒྱུ་མའི་མཐུར་སྲབ་བྱས་པ། མཇུག་མའི་རྩ་བ་གཡས་གཡོན་གཉིས་ན་མིག་གཉིས་ཡོད་པ། དེའི་སྒ་གོང་དུ་ཡི་གེ་རཾཿཅིག་འོད་དུ་ཞུ་བ་ལས་ཉི་མའི་དཀྱིལ་འཁོར་དུ་བསྒོམ། དེ་ནས་ཡི་དམ་གྱི་ཐུགས་ཀ་ནས་ཡི་གེ་མཿནག་མོ་ཅིག་སྤྲོས། བོང་བུའི་སྒ་གོང་དུ་ཉི་མའི་ཐོག་ཏུ་བབ། དེ་འོད་དུ་ཞུ་བ་ལས། རལ་གྲི་ཡུ་བ་མར་བསྟན་པ། རྩེ་མོ་ཡར་བསྟན་པ། གཞུང་ས་རང་ལ་བསྟན་པ། སོ་ཕུད་ཡུ་མཚམས་ན་ཉི་མའི་ཐོག་ཏུ་མཿནག་མོ་གཅིག་ཡོད་པར་བསྒོམ། དེ་ནས་རལ་གྲི་ལས་འོད་ཟེར་འཕྲོས་ཏེ། འཇིག་རྟེན་གྱི་མཁའ་འགྲོ་མ་ཐམས་ཅད་ལ་ཕོག །ཐམས་ཅད་ལྷ་མོ་ནག་མོ་ཉིད་དུ་གྱུར། ཀུན་ཚུལ་འདུས་རལ་གྲི་ལ་ཐིམ། རལ་གྲི་འོད་དུ་ཞུ་སྟེ། ༀ་རུ་རུ་རོ་རུ་ཏྲི་ཙ་པ་ལ་ཨ་ཤུགྨེ་མ་ཧཱུྃ་མ་བྷྱོ་ཛ་ཛཿ ཞེས་བརྗོད་པས། ལྷ་མོ་ནག་མོ་སྐུ་གྱུར་ཏེ། སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་པ། མཆེ་བ་བཞི་གཙིགས་པ། ཕྱག་གཡས་རལ་གྲི་ནམ་མཁར་འཕྱར་བ། གཡོན་པས་ནེའུ་ལེའི་རྐྱལ་བུ་རིན་པོ་ཆེའི་བཀང་བ་སྟ་ཟུར་གཡོན་ན་བསྣམས་པ། བོང་བུ་ལ་ཕྱིར་ལོག་ཏུ་བཅིབས་པ། མིའི་ཐོད་པ་ཡོབ་ཆེན་ལ་བརྫིས་པ། དབུ་སྐྲ་ཁམ་ནག་གྱེན་དུ་ཐོར་ཙུག་མཐོ་བ། ཐུར་དུ་ཡང་པ་ལ་བཤལ་བ། རལ་པའི་སྐྲ་མཚམས་ནས་ཐོད་པ་སྐམ་པོ་བཅུ་དྲུག་གིས་ཕྲེང་བས་རྒྱན་པའོ། །སྤྱི་བོའི་གཙུག་ན་ཟླ་བ་ཚེས་བརྒྱད་པ་དང་། རལ་པའི་སྐྲ་མཚམས་ན་རྨ་བྱའི་མདངས་ཀྱིས་བརྒྱན་པ། སྙན་གཡས་པའི་སྟེང་ནས་གསེར་གྱི་འཁོར་ལོ་རྩིབས་བརྒྱད་པའི་ཐོག་ཏུ། སེང་གེ་དཀར་མོ་གཡུའི་རལ་པ་ཅན་གཅིག་གིས་སྣན་ཆ་བྱས་པ། གཡོན་པའི་སྙན་ཆ་སྦྲུལ་ནག་ལ་བྱས་པ། སྐུ་སྟོད་ལ་ཞིང་ལྤགས་ཀྱི་ན་བཟའ་གསོལ་བ་སྐུ་སྨད་ཀྱི་སྣམ་བུ་ལྟ་བུའི་གཡས་ཕྱོགས་སུ་སྨྱུག་མའི་རེ་ལྡེ་ལ་བྱས་པ། གཡོན་པ་གླང་པོ་ཆེའི་ཀོ་རློན་ལ་བྱས་པ། སྟག་ལྤགས་ཀྱིས་ཤམ་ཐབས་ལ་སྦྲུལ་ནག་གིས་སྐེ་རག་བཅིངས་པ། ཐོད་རློན་ཕྲེང་བ་སེ་རལ་ཁར་ཐོགས་པ། ལྟེ་བར་ཉི་མ་ཤར་བའོ། །བོང་བུའི་ཁ་ངུར་ཞབས་སུ་སྐེམ་མ་ཆུ་སྲིན་མགོ་ཅན། སྐུ་མདོག་དམར་ནག་ཞལ་གཅིག་ཕྱག་གཉིས་པ། གཡས་ཀྱི་བོང་བུའི་ཁ་ཁྲིད་བྱས་པ། གཡོན་ན་སྦྲུལ་ཞགས་བསྣམས་པ། ཞིང་ལྤགས་ཀྱི་ཤམ་ཐབས་ཅན། སྦྲུལ་ནག་གི་སེ་ར་ཁར་ཐོག་པའོ། །དེ་ནས་འཁོར་མ་མོ་བདུན་དང་། མ་གསུམ་དང་། སྲིང་མོ་བཞི་དང་། སེང་སྟག་འབྲུག་སྤྱང་བཞི་དང་། དབང་ཕྱུག་མ་ཉི་ཤུ་རྩ་བརྒྱད་དང་འཁོར་མ་མོ་སྟོང་ཡོད་པ་ཙམ་མོས་པར་བྱའོ། །ལྷ་ཚོགས་དེ་དག་ཐམས་ཅད་ཀྱི་སྤྱི་བོར་ཟླ་བའི་སྟེང་དུ་ༀ་དཀར་པོ་མགྲིན་པར་པདྨའི་སྟེང་དུ་ཨཱཿདམར་པོ། ཐུགས་ཀར་ཉི་མའི་སྟེང་དུ་ཧཱུྃ་མཐིང་ནག་གོ། །དེ་ནས་ཡེ་ཤེས་པ་སྤྱན་འདྲེན་པ་ནི། རང་གི་ཐུགས་ཀ་ནས་འོད་ཟེར་འཕྲོས་ཏེ། རི་རབ་བྱང་ཤར་མཚམས་ནས་ལྷ་མོ་འདིར་བསྐྱེད་པ་འདྲ་བ་གཙོ་འཁོར་གཞལ་ཡས་དང་བཅས་པ་བྱོན་པར་བསམ་ལ། ཀྱེ་མ་ཅིག་ལྷ་མོ་དཔལ་ལྷ་མོ། །དད་པ་དང་ནི་དམ་ཚིག་གིས། །མ་ཅིག་ལྷ་མོ་སྤྱན་འདྲེན་ནོ། །བྱང་ཤར་མཚམས་ནས་གཤེགས་སུ་གསོལ། །མ་ཅིག་ལྷ་མོ་དཔལ་ལྷ་མོ། །མ་འཚུབས་མའི་སྟེང་དུ་འཁྱིལ་པའི་དབུས་ན་བཞུགས། །བསྐལ་པའི་མེ་དཔུང་འབར་བ་དང་། །རླུང་ནག་ལྟ་བུའི་སུམ་མ་ནི། །སྐུ་ཡི་གནས་ཏེ་རྒྱན་གྱིས་མཆོག །དྲག་ཤུལ་ཁྱབ་འགྲོ་གློག་གི་བང་། །བསམ་པ་ཙམ་གྱི་གནས་སུ་ཕྱིན། །མ་དེ་ཡི་ཚུལ་དུ་གཤེགས་སུ་གསོལ། །ༀ་རུ་རུ་རོ་རུ་ཏྲི་ཙ་པ་ལ་ཨ་ཤུགྨེ་མ་ཧཱུྃ་མ་བྷྱོ་ཛ་ཛཿ ཛཿཧཱུྃ་བཾ་ཧོ། ཞེས་གཙོ་འཁོར་སོ་སོར་བསྟིམས། དེ་ནས་ཕྱག་འཚལ་བ་ནི། བྷྱོ། ནག་མོ་ཁྲག་འཐུང་རྡོ་རྗེ་རལ་པ་ཅན། །དབང་ཆེན་རྡོ་རྗེ་ཐོག་དང་སེར་ཆེན་འབེབས། །ཁམས་གསུམ་སྒྲོལ་མཛད་སྲིད་གསུམ་རྩད་ནས་གཅོད། །རལ་པ་བསིགས་པས་ཁམས་གསུམ་ཀུན་ཏུ་ཁེབ། །མཆེ་བ་གཙིགས་པས་དགྲ་བགེགས་ཞལ་དུ་འདྲེན། །མ་ལུས་དབང་དུ་བསྡུད་ལ་ཕྱག་འཚལ་བསྟོད། །མཆོད་པ་འབུལ་བ་ནི། གཏོར་མ་བྱིན་གྱིས་བརླབས་པ་གསལ་གདབ་ནི། ཀྱེ། མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་གཟུགས་ཀྱི་མཆོད་པ་འབུལ་བ་ནི། །ལྷ་མོའི་གཟུགས་དང་ཀླུ་མོའི་གཟུགས། །བཟང་བའི་གཟུགས་དང་བརྗིད་པའི་གཟུགས། །ཁ་དོག་སྣ་ཚོགས་མཛེས་པའི་གཟུགས། །ཅིར་ཡང་གྱུར་པའི་གཟུགས་ལ་སོགས། །མ་ཅིག་སྤྱན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་རྩལ་དུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་ཕྱི་ཡི་མཆོད་པ་འབུལ་བ་ནི། །མེ་ཏོག་ཆུ་སྐྱེས་ཐང་སྐྱེས་རྣམ་པ་སྣ་ཚོགས་དང་། །བཟང་ཞིང་འབྲས་བུ་ཕུན་སུམ་ཚོགས། །མ་ཅིག་སྐུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་སྒྲ་ཡི་མཆོད་པ་འབུལ་བ་ནི། །པི་ཝཾ་གླིང་བུ་མཁར་བའི་རྔ། །རྫ་རྔ་ཅང་ཏིལ་གཎྜེ་དུང་། །ཆ་ལང་སིལ་སྙན་ལ་སོགས་ཏེ། །རིལ་བུ་རྔ་གཤང་རྣམ་པ་སྣ་ཚོགས་དང་། །གླུ་དབྱངས་ཚིགས་སུ་བཅད་པའི་སྒྲ། །མ་ཅིག་སྙན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ཀྱེ། མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་དྲི་ཡི་མཆོད་པ་འབུལ་ནི། །ཨ་ཀ་རུ་དང་དུ་རུ་ཀ །ཤ་ཀ་ར་དང་ལྔ་སྦྱར་བས། །ཙནྡ་དཀར་དམར་དྲི་ཞིམ་སྤོས། །མ་ཅིག་ཤངས་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །ཅེས་ཕྱིའི་མཆོད་པ་རྣམས་ཀྱི་མཆོད་ནང་གི་མཆོད་པ་གཏོར་མ་བདུད་རྩི་རྒྱ་མཚོ་ཆེན་པོ། ཤ་རུས་ཁྲག་གསུམ་དང་བཅས་པ་རྣམས་ལྷ་མོ་འཁོར་དང་བཅས་པ་རྣམས་གསོལ་བར་བསམ་ཞིང་། ཀྱེ། མ་ཅིག་ལྷ་མོ་དཔལ་ལྷ་མོ། །རྡོ་རྗེ་ལྷ་མོ་ནག་མོ་ཆེ། །མ་ཅིག་ཐུགས་དམ་ཞལ་ཟས་སྣོད། །པཱ་ལ་བྷནྡ་བཅུད་ཡངས་པའི། །འཁོར་ཡུག་གཏོག་པའི་འཇིག་རྟེན་འདི། །བདུད་རྩིའི་རང་བཞིན་ཡིན་པའི་ཕྱིར། །རྫོང་དང་དཀག་བཟློག་ནག་པོ་ཆེ། །གསོལ་ལོ་རོལ་ཅིག་དགྱེས་པར་མཛོད། །མ་ཅིག་ལྷ་མོ་དཔལ་ལྷ་མོ། །མ་ཅིག་ཐུགས་དམ་ཞལ་ཟས་ནི། །བསད་པའི་ཤ་དང་མྱོས་པའི་ཆང་། །བསྲེག་པའི་གསུར་དང་རློན་པའི་ཤ། །བཙོས་པའི་ཤ་དང་ཁུ་བ་ཁྲག །ནང་རོལ་གློ་སྙིང་མཁལ་མར་བཅས། །གསོལ་ལོ་རོལ་ཅིག་དགྱེས་པར་མཛོད། །མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་ཡིད་བཞིན་མཆོད་པ་འབུལ་བ་ནི། །འབྲས་བུ་ལྔ་ཡི་ཚོམ་བུ་བདུད་རྩི་དང་། །ཀོ་རོ་ཙ་ན་དང་ནི་སྤྲིན་ཆེན་ཐལ་ཆེན་དང་། །མ་ཧཱ་མཾ་ས་རཀྟ་ཙིཏྟ་བ་སུ་ཏ། །མ་ཅིག་ཞལ་དུ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་རྩལ་དུ་གསོལ། །གསོལ་ལོ་རོལ་ཅིག་དགོངས་ཤིག་ས་མ་ཡཱ། །རུ་རུ་རོ་རུ་བེ་ཏིཥྛ་བ་དྷཱ་པི་ཙ་པ་ལ་ཨ་ཤུག་མེ་ཧཱུྃ་བྷྱོ་ཁ་རཾ་ཁ་ཧི། འབྱུང་པོའི་ཕུང་པོ་ལ་ཁ་རཾ་ཁ་ཧི། དགྲ་བགེགས་འདི་ཡི་དབང་པོ་རྣམས་ལྔ་ལ་ཁ་རཾ་ཁ་ཧི། ར་རྒྱ་རཾ་པ་ལ་ཁ་ཧི། ཤིག་ཤིག་རྟོག་སྤྱོད་ཤིག །དེ་ནས་སྨན་གྱིས་མཆོད་དོ། །ཧོ། རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུ་ལྔས་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོ་ཚོགས་ཆེན་དང་། །ལྷ་དང་ལྷ་མོ་གསང་བའི་བདག །ཐུགས་དམ་དབྱིངས་ནས་བསྐུལ་བའི་མཆོག །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངང་ཉིད་ལ། །བདག་གི་དད་པས་འབུལ་ལགས་ནས། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་རྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏིཙྪ་ཧོ། རྡོ་རྗེ་ནག་མོ་མཆེ་བ་གཙིགས་པའི་ཞལ། །དུས་གསུམ་སངས་རྒྱས་ཀུན་དང་སྤྱོད་ཡུལ་གཅིག་པའི་ཡུམ། ། ཁམས་གསུམ་ལོག་པར་ལྟ་བ་ཐམས་ཅད་དབྱིངས་སུ་སྒྲོལ། །སྲིད་གསུམ་ཟ་བར་བྱེད་པའི་ཡུམ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེ་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་སརྦ་པཉྩ་ཨ་མྲྀ་ཏ་ལ་ཁཱ་ཧི། བྷྱོ། དབྱིངས་ཕྱུག་དཔལ་ལྡན་རྡོ་རྗེ་མཁའ་འགྲོ་མ། །འགྲོ་བ་ཐུགས་རྗེས་སྐྱོང་ཕྱིར་ཡུམ་གྱི་ཚུལ། །མཚན་མའི་སྐྱོན་སྤངས་སྐུ་མདོག་ནག་མོར་སྟོན། །དྲག་ཤུལ་སྤྱོད་ཕྱིར་གཅེར་བུ་སྲིན་མོའི་ཚུལ། །ལྷ་ཆེན་འདུལ་ཕྱིར་སྡང་མིག་རོལ་པ་བསིགས། །སྐྱེ་ཤི་རྩད་གཅོད་ཟ་བྱེད་མཆེ་བ་གཙིགས། །འཁོར་བ་ལྗགས་ལ་ལྡག་ཕྱིར་རྐན་སྒྲ་ལྡེག །དུག་ལྔ་སེལ་ཕྱིར་རྨ་བྱའི་མདངས་ཀྱི་བརྒྱན། །བྱང་ཆུབ་སེམས་ལྡན་སྤྱི་གཙུག་ཟླ་རྒྱས་གསལ། །དམ་ཚིག་བྱ་ར་མཛད་ཕྱིར་སྤྱན་རྩ་དམར། །ལྷ་མིན་གཡུལ་ངོ་བཟློག་ཕྱིར་མདུང་དང་རུ་མཚོན་བསྣམས། །སྲིད་གསུམ་བསྒྲལ་ཕྱིར་ཤེས་རབ་རལ་གྲི་བསྣམས། །དགྲ་བགེགས་འདུལ་ཕྱིར་ནད་ཀྱི་རྐྱལ་པ་ཐོག །དབུལ་བ་སེལ་ཕྱིར་ནེའུ་ལེ་རྐྱལ་བུ་བསྣམས། །འཆི་བདག་བཟློག་ཕྱིར་སྙན་གཡས་སེང་གེས་བརྒྱན། །གདུག་པ་འདུལ་ཕྱིར་ཀླུ་དབང་སྙན་ཆས་བརྒྱན། །འབྱུང་པོ་སྔངས་ཕྱིར་ཐོད་པའི་ཕྲེང་བས་བརྒྱན། །རྣལ་འབྱོར་སྐྱོང་ཕྱིར་དྲིལ་ཆེན་སྒྲ་སྙན་སྒྲོགས། །ཀླུ་ཆེན་འདུལ་ཕྱིར་སྦྲུལ་གྱི་སྐེ་རཀ་བཅིངས། །བདུད་དཔུང་དཔའ་སྐུམ་ཞིང་ལྤགས་གོས་སུ་གྱོན། །ཐེག་ཆེན་དོན་ལྡན་གླང་ཆེན་ཀོ་རློན་གསོལ། །དཔའ་གཏུམ་བསྟན་ཕྱིར་སྟག་གི་ཤམ་ཐབས་མཛད། །སྨོན་ལམ་མི་འདོར་སྐུ་སྨད་རེ་ལྡེས་སྐྲིས། །མཛེས་པར་བྱ་ཕྱིར་རྐང་སྒྲོགས་ལྕགས་ལས་བྱས། །ཉོན་མོངས་མཚོ་སྐམ་ལྟེ་བ་ཉི་མས་བརྒྱན། །སྲིན་པོ་འདུལ་ཕྱིར་ཆིབས་སུ་བོང་བུ་བཅིབས། །སྟོང་གསུམ་བགྲོད་ཕྱིར་འཚུབས་མའི་ཀློང་ན་བཞུགས། །དུར་ཁྲོད་གནས་ཕྱིར་གཡོག་འཁོར་མང་པོས་བསྐོར། །འཁོར་བ་འཇིགས་ཚེ་སེམས་ཅན་སྡུག་བསྔལ་རྣམས། །ལྷ་མོ་ཁྱེད་ཀྱི་ཞལ་དུ་ཐམས་ཅད་ཞུགས་གྱུར་ཏེ། །བརྩེ་ལྡན་ཐུགས་རྗེས་འགྲོ་ཀུན་བསྐྱངས་ནས་ཀྱང་། །བྱང་ཆུབ་སྤྱོད་པའི་ཐར་ལམ་སྟོན་མཛད་པ། །ལྷ་མོ་མཐུ་ཆེན་ཁྱོད་ལ་ཕྱག་འཚལ་བསྟོད། །དེ་ནས་ཕྲིན་ལས་བཅོལ་ཚིག་ནི། ༀ་ཨཱཿཧཱུྃ། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་མཆོད་ཅིང་འབུལ་བའི་གནས་ནི། དཔལ་ལྡན་ལྷ་མོ་ནག་མོ། སྐུ་ཡི་མ་མོ། གསུང་གི་མ་མོ། ཐུགས་ཀྱི་མ་མོ། ཡོན་ཏན་གྱི་མ་མོ། ཕྲིན་ལས་ཀྱི་མ་མོ། འཁོར་མ་སྲིང་རྒྱ་མཚོའི་ཚོགས་དང་བཅས་པ་ལ། དམ་རྫས་བཀའི་གཏོར་མ་རྒྱན་གྱི་མཆོད་པ་འདི་བཞེས་ལ། སྡང་བར་བྱེད་པའི་དགྲ་ཐུལ་ཅིག །གནོད་པར་བྱེད་པའི་བགེགས་ཆོམ་གཅིག །བར་ཆད་ཀྱི་རྐྱེན་བཟློག་ཅིག །བསྒྲལ་བའི་ཞིང་བཅུ་རྡུལ་དུ་རློག་ཅིག །བདག་ཅག་རྣལ་འབྱོར་པའི་བསམཔ་ཡིད་བཞིན་དུ་འགྲུབ་པར་མཛད་དུ་གསོལ། མ་བྷྱོཿཛཿལས་བྱུང་བ་མ་མོའི་ཚོགས། །གཅན་སྤྱང་བོང་དྲིལ་འབྱུང་བ་བཞི་ལ་བཅིབས། །དཔལ་ལྡན་ལྷ་མོ་རི་ཏི་མཆེད་བཞི་སོགས། །འཁོར་བཅས་མ་མོའི་ཚོགས་ལ་ཕྱག་འཚལ་བསྟོད། །བཟླས་པ་བྱ་བ་ནི། ཐུགས་ཀར་ཡེ་ཤེས་སེམས་དཔའ་ལྷ་མོ་གོའུ་རི་མ་སྔོན་མོ་གཡས་ཞིང་དབྱུག་གཡོན་ཐོད་ཁྲག་བསྣམས་པ། དེའི་ཐུགས་ཀར་ཟླ་བ་དང་རལ་གྲིའི་སོ་ཡུ་མཚམས་ནས་མ་ནག་མོ་གཅིག་བསྒོམ་པ་ཡི་གེ་བཅོ་ལྔ་པས་སྐོར་བའོ། །དེའི་མཐར་བསྐོར་དུ། ༀ་རུ་རུ་རོ་རུ་ཏྲི་ཙ་པ་ལ་ཨ་ཤུག་མེ་མ་ཧཱུྃ་མ་བྷྱོ་ཛ་ཛཿ ཞེས་སོགས། བཟླས་པའི་འཕྲོ་འདུ་གཞུང་བཞིན་བྱའོ། །ཚར་ནས་ཡེ་ཤེས་སེམས་དཔའ་གཤེགས་མི་དགོས། འཁོར་རྣམས་སྙེམ་མ་བཅས་པ་མ་མོའི་ཐུགས་ཀར་བསྡུས། བོང་བུ་མ་མོ་ལ་ཐིམ། མ་མོ་བདག་གི་ཐུགས་ཀར་ཐིམ། གཞལ་ཡས་ཁང་མེ་དཔུང་གི་དམིགས་པ་གཤེགས། སྨོན་ལམ་བསྐུལ་བ་དང་བདག་སྐབས་དང་སྦྱར། བླ་མ་ཀཿཐོག་པའི་ཕྱག་ལེན་ལྟར། བཀའ་ལུང་ཤཱཀྱའི་དགེ་སློང་རྡོ་རྗེ་རྒྱལ་མཚན་གྱིས་སྒྲོ་བསྐུར་དང་བྲལ་བར་བྲིས་པ་རྫོགས་སོ། །
གསོལ་བསྡུས། ངེས་དོན་དབང་པོ།
༈ ཁྱོད་སྔོན་མཉམ་མེད་རྒྱལ་བ་ཀཿཐོག་པས། །གནས་འདིར་ཇི་སྲིད་བསྐལ་བརྒྱར་དམ་བཞག་ལྟར། །གཞན་དུ་མ་བཞུད་སྲིད་པ་མ་འཇིགས་པར། །གནས་འདིར་བཞུགས་ལ་བསམ་པའི་དོན་རྣམས་ཀུན། །འབད་མེད་མྱུར་དུ་འགྲུབ་པའི་ཕྲིན་ལས་མཛོད། །ཅེས་སྤྲུལ་མིང་ངེས་དོན་དབང་པོས་བྲིས་པའོ།། །།
མ་ཅིག་རང་བྱུང་རྒྱལ་མོའི་མཆོད་གསོལ་འབྲིང་པོ་ངོ་མཚར་འདོད་འཇོའི་རོལ་མཚོ།
མ་ཅིག་རང་བྱུང་རྒྱལ་མོའི་མཆོད་གསོལ་འབྲིང་པོ་ངོ་མཚར་འདོད་འཇོའི་རོལ་མཚོ་བཞུགས། དཔལ་ལྡན་ཁྲག་འཐུང་བདག་མེད་མཁའ་འགྲོའི་གར། །བདུད་བཞིའི་རོ་ལ་རྣམ་བསྒྱུར་བླ་མ་དང་། །གཉིས་མེད་སྲུང་མ་མཆོག་དེར་གུས་བཏུད་ནས། །ཡུམ་ཆེན་མཆོད་པའི་ཆོ་ག་རྣམ་པར་དབྱེ། །འདི་ལ་གསུམ། སྦྱོར། དངོས། རྗེས་སོ། །དང་པོ། རྟེན་གཏོར་སྙིང་གཟུགས་དང་། འབུལ་གཏོར། སྨན་རག་ཕྱི་ནང་གི་མཆོད་པས་གཡོན་དུ་བསྐོར་བའི་མདུན་སྟེགས་དང་། རང་གི་མདུན་ན་རྡོར་དྲིལ། ཌཱ་མཱ་རུ། ཁྱད་པར་གྱི་གཡབ་དར། རྔ་རོལ། རྐང་གི་གླིང་བུ་སོགས་ཚོགས་པར་བྱས་ལ། བདག་གི་རྣལ་འབྱོར་བཟླས་པ་བསྡུ་ལྡང་གི་བྱ་བ་བཅས་མཐར་ཕྱིན་པར་བྱས་ཏེ། ཧཱུྃ་བིགྷྣཱན་ཀྲྀ་ཏཱ་ཕཊ྄། རྃ་ཡྃ་ཁྃ་གིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་དུར་ཁྲོད་རོལ་པའི་གཞལ་མེད་ཆེན་པོར་བྷྲཱུྃ་ༀ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ཕྱི་ནང་གསང་བའི་མཆོད་རྫས། ངོ་བོ་སྟོང་ཉིད་ལ་རྣམ་པ་བདེ་སྟོང་གི་ཡེ་ཤེས་མཆོད་པའི་སྤྲིན་རབ་འབྱམས་སུ་འཆར་བར་གྱུར། ༀ་སརྦ་བིདྤུ་ར་སོགས་དང་། ནམ་མཁའ་མཛོད་ཀྱི་སྔགས་རྒྱ་དང་། ༀ་བཛྲ་ཨརྒྷཾ་ནས་ཤཔྟའི་བར་དང་། ༀ་མ་ཧཱ་སརྦ་པཉྩ་ཨ་མྲྀ་ཏ་ཨཱཿཧཱུྃ། ༀ་མ་ཧཱ་རཀྟ་ཨཱཿཧཱུྃ། ༀ་མ་ཧཱ་བ་ལིནྟ་ཨཱཿཧཱུྃ། བཛྲ་སྥ་ར་ཎ་ཁཾ། གཉིས་པ་ལ། རྟེན་བསྐྱེད། སྤྱན་དྲངས། དབང་བསྐུར། མཆོད་བསྟོད་བྱ་བའོ། །དང་པོ་ནི། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་བྱེད། དེ་ཡི་ཆེད་དུ་དཔལ་ལྡན་ལྷ་མོ་ནག་མོ་བསྒོམ་པར་བྱའོ། །ༀ་སྭ་བྷཱ་ཝ་སོགས། སྟོང་པའི་ངང་ལས་མདུན་དུ་ཡྃ་འོད་དུ་ཞུ་བ་ལས་རླུང་གི་དཀྱིལ་འཁོར་ལྗང་གུ། དབྱིབས་གྲུ་བཞི་རྒྱ་ཆེ་ལ་འཕང་མཐོ་བ་ནང་སྟོང་པར་བསྒོམ། དེ་ཡི་ནང་གི་དབུས་སུ་རྃ་འོད་དུ་ཞུ་བ་ལས་མེ་ཡི་དཀྱིལ་འཁོར་དམར་པོ་དབྱིབས་རླུང་དང་འདྲ་བ་སྟེ། དེ་ཡི་སྟེང་དུ་བྷྲཱུྃ་འོད་དུ་ཞུ་བ་ལས་ཆུ་སྲིན་བྱེ་བ་ས་ཡའི་ཐོད་པའི་རྩིག་རྨང་། དྲེགས་པའི་ཐོད་དགུའི་རྩིག་པ། ཐོད་པའི་གཞལ་ཡས་ཁང་དབྱིབས་གྲུ་བཞི་འཕང་མཐོ་ལ་རྒྱ་ཆེ་བ་བསེ་སྨུག་པོའི་སྒོ་བཞི་རྟ་བབས་འདོད་སྣམ་གཡུ་འོད་སྔོན་པོ་འབར་བའི་མདའ་ཡབ་ཀྱི་ལོགས་དང་བཅས་པ། ཞིང་ཆེན་ཚལ་པ་དང་གསོན་པོ་གཅལ་དུ་བཀྲམ་པའི་གདན། དོན་སྣོད་དབང་པོའི་རྒྱན་གྱིས་ཉེ་བར་སྤྲས་ཤིང་གྲུ་གསུམ་ཟླ་གམ་ཁྲག་མཚོ་ཐོད་རྭ་གྲུ་ཆད་ཁྲག་ཁྱམ་དང་བཅས་པའི་ལྷ་གནས་སུ་རོ་ཡི་གདན་བསྒྱེལ་བ། རུས་པའི་སྐུ་མཁར་ལྕོགས་ཆུང་གི་གློ་འབུར་འོག་གནམ་ལྕགས་ཨུརྨོའི་གཟེར་གྱིས་བཏབ་པའི་དུར་ཁྲོད་ཆེན་པོའི་ས་གཞི། མི་རོ་དང་རྟ་རོ་གཅལ་དུ་བཀྲམ་པ། མི་ཁྲག་དང་རྟ་ཁྲག་གི་འདམ་བསྒྱེལ་བ། དགྲ་བགེགས་ཀྱི་སྙིང་ཁྲག་ཞག་ཏུ་འཁྲུགས་པའི་རྒྱ་མཚོ། མེ་རླུང་འུར་འུར་འཐབ་པའི་གནམ་ལྕགས་འབར་བའི་རི་བོ་འཇིགས་སུ་རུང་བ་དང་བཅས་པར་གསལ་བར་གྱུར། ཐོད་ཁང་དེ་ཡི་ནང་དབུས་སུ་རང་ཉིད་ཡི་དམ་གྱི་ལྟེ་བ་ནས་ཡི་གེ་ཏི་ནག་པོ་གཅིག་སྤྲོས་འོད་དུ་ཞུ་བ་ལས་སྤྲུལ་པའི་བོང་བུ་དམར་གྭ་དབོ་དཀར་བ། རྣ་བ་གཉིས་དཀྲོག་ཆུང་བྱེད་ཅིང་རླུང་ནག་འཚུབས་མའི་དབུས་སུ་རྒྱུག་པ། རླུང་གི་གཤོག་པ་གཡེངས་ཤིང་། རྫུ་འཕྲུལ་མྱུར་མགྱོགས་ཀྱི་རྩལ་ཅན། །ཞིང་ལྤགས་ཀྱི་སྟན་བཏོད་ཅིང་། སྒ་ཡི་སྔ་རུ་སྲིན་པོའི་ཡན་འགལ་དང་རིན་པོ་ཆེ་འབར་བས་མཚན་ཅིང་། སྲིན་མོའི་མན་འགལ་གཉེར་མའི་ལྤགས་པ་སྐམ་རིད་ཁྲོལ་མ་ལས་ཕྱི་རུ་བྱས་པ། ལྤགས་པའི་སྒ་གཡོག་དང་སྦྲུལ་ནག་གི་གོང་ཐག་དང་གློ་ནན། ཞིང་ཆུང་ངུ་གཉིས་ཀྱི་སྨེད་བྱིལ་སྐྲ་མདུད་སྨེད་ཐུང་ལ་ཡར་བཏགས་པའི་ལག་པ་གཉིས་འཕྱང་བ། གཡུ་མཐུར་སྔོན་པོ། བྱི་རུ་དང་རྒྱུ་མའི་ཐུར་སྲབ་མི་མགོ་སྐམ་པོ་སྟོང་པའི་དོམ་དོམ་གཡེར་ཁའི་དྲྭ་བས་རྒྱན་པ། རུས་སྦལ་ནག་པོའི་ཕོག་གུ་བཏབ་ཅིང་། སྔ་ཤད་ལ་ཁྲམ་བམ་དང་། ཚོན་གྱི་གྲུ་གུ་འདོགས་པ། ཕྱི་ཤད་ལ་བྱང་དམར་བམ་པོ་དང་། ནད་ཀྱི་རྐྱལ་པ་བཀལ་པ། མཇུག་མའི་གཡས་གཡོན་ཡེ་ཤེས་ཀྱི་མིག་གཉིས་ལྷག་པོར་བལྟ་བའི་སྒ་གོང་དུ་རྃ་ལས་ཉི་མའི་དཀྱིལ་འཁོར་དུ་བསྒོམ། དེ་ནས་རང་ཉིད་ཡི་དམ་གྱི་ཐུགས་ཀ་ནས་ཡི་གེ་མཿནག་པོ་གཅིག་སྤྲོས། བོང་བུའི་སྒ་གོང་ཉི་མའི་ཐོག་ཏུ་བབ། མཿའོད་དུ་ཞུ་བ་ལས་རལ་གྲི་ཡུ་བ་མར་བསྟན་པ། རྩེ་མོ་ཡར་བསྟན་པ། གཞུང་པ་རང་ལ་བསྟན་པ། སོ་ཡུའི་མཚམས་སུ་ཉི་མའི་ཐོག་ཏུ་མཿནག་མོས་མཚན་པར་བསྒོམ། དེ་ནས་རལ་གྲི་ལས་འོད་ཟེར་འཕྲོས། འཇིག་རྟེན་གྱི་མཁའ་འགྲོ་མ་ཐམས་ཅད་ལ་ཕོག །ཐམས་ཅད་ལྷ་མོ་ནག་མོ་ཉིད་དུ་གྱུར། ཀུན་ཚུར་འདུས་རལ་གྲི་ལ་ཐིམ། །རལ་གྲི་འོད་དུ་ཞུ་སྟེ། ༀ་རུ་རུ་རོ་ཙ་པ་ལ་ཨ་ཤུགྨེ་ཧཱུྃ་བྷྱོ་ཛ་ཛཿ དཔལ་ཡེ་ཤེས་ཀྱི་ལྷ་མོ་ནག་མོའི་སྐུར་གྱུར་ཏེ། སྐུ་མདོག་ནག་མོ་ནག་པོའི་སྤྲིན་དང་བུང་བ་ལྟར་གནག་པ། ཤིན་ཏུ་སྒེག་ཅིང་གཏུམ་རྔམ་བཟོད་པར་དཀའ་བའི་གཟི་བྱིན་ཅན་ཞལ་གཅིག་ཕྱག་གཉིས། སྤྱན་གསུམ་དམར་པོ་ཁམས་གསུམ་དུ་བཟློག་ཅིང་གཟིགས་པ། མི་རོ་རེང་པོ་ཞལ་དུ་བཅུག་ནས་རྣོ་གདུག་གི་མཆེ་བ་བཞི་གཙིག་པ། ཕྱག་གཡས་སྡིག་པ་ཅན་གྱི་ཁྲོ་ཆུའི་རལ་གྲི་སྙན་གཡས་ཀྱི་ཐད་ནམ་མཁའི་ལ་འཕྱར་བ། གཡོན་པས་བདུད་ཁྲག་གིས་བཀང་བའི་ཐོད་པ་ཞལ་དུ་སྟོབ་པའི་ཚུལ་གྱིས་ཐུགས་ཀར་བསྣམས་ཤིང་། མཆན་གྱི་སྟྭ་ཟུར་གཡོན་ན་ནེའུ་ལེའི་རྐྱལ་པ་རིན་པོ་ཆེས་བཀང་བ་འཛིན་པ། བོང་བུ་ལ་ཕྱིར་ལོག་ཏུ་བཅིབ་ཅིང་། མི་ཡི་ཐོད་པའི་ཡོབ་ཆེན་ལ་བརྫིས་པ། དབུ་སྐྲ་ཁམས་ནག་གྱེན་དུ་ཐོར་ཚུགས་སུ་མཐོ་བ་ཀླུ་རྗེའུ་རིགས་ཀྱིས་བཅིངས་ཤིང་། ཐུར་དུ་ཡང་ས་ལ་བཤལ་བའི་གསེབ་ནས་མེ་སྟག་འཕྲོ་བ། རལ་པའི་སྐྲ་མཚམས་ནས་ཚུར་ཐོད་པ་སྐམ་པོ་བཅུ་དྲུག་གི་ཕྲེང་བའི་རྩ་ཆིངས་དང་། རིན་པོ་ཆེའི་རྩེ་བྲན་ཅན་གྱི་ཐོད་སྐམ་ལྔས་དབུ་བརྒྱན་པ། སྤྱི་བོར་ཟླ་བ་ཚེས་བརྒྱད་པ་དང་། རྨ་བྱའི་མདོངས་ཀྱིས་བརྒྱན་ཅིང་། སྙན་ཆ་གཡས་ན་གསེར་གྱི་འཁོར་ལོ་རྩིབ་བརྒྱད་པའི་ཐོག་ཏུ་དུང་གི་སེང་གེ་དཀར་མོ་གཡུ་ཡི་རལ་པ་ཅན་འཕྱོ་ཞིང་གཡོན་ན་སྦྲུལ་ནག་གི་མགུལ་པ་ལས་གསེར་གྱི་དྲིལ་བུ་བསིལ་པ། ལྷ་མ་ཡིན་ཧེ་རན་ཀེ་ཤུ་ལ་སོགས་པའི་ཐོད་པའི་དོ་ཤལ་སེ་རལ་ཁར་ཐོགས་པ་དང་། སྐུ་སྟོད་ལ་ཞིང་ལྤགས་ཀྱི་ན་བཟའ་གསོལ་བ། སྐུ་སྨད་ཀྱི་རྣམ་བུ་གཡས་ཕྱོགས་སུ་སྨུག་མའི་རེ་ལྡེ་དང་། གཡོན་པས་གླང་པོ་ཆེའི་ཀོ་རློན་ལས་བྱས་པ། སྟག་ལྤགས་ཀྱི་ཤམ་ཐབས་ལ་སྦྲུལ་ནག་གི་སྐུ་རགས་བཅིངས་པ། ལྟེ་བར་ཉི་མ་འཆར་ཞིང་། རུས་པའི་རྒྱན་ཆ་ལྔས་མཛེས་པ། ཀླུ་ཆེན་བརྒྱད་གཤིབ་པའི་སྐ་རགས། སྐུ་ལ་ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་བཏབ་པ། ཞབས་ལ་དབང་གི་ལྕགས་སྒྲོག་བཅིངས་ཤིང་ཡེ་ཤེས་ཀྱི་མེ་རླུང་འཚུབས་མའི་དབུས་ན་འགྱིང་བའོ། །བོང་བུའི་ཁ་ངུར་ཞབས་སུ་སྐེམས་མ་ཆུ་སྲིན་གྱི་མགོ་ཅན་སྐུ་མདོག་དམར་ནག་ཞལ་གཅིག་ཕྱག་གཉིས། གཡས་ཀྱིས་བོང་བུ་ཁ་ཁྲིད་ཅིང་གཡོན་ན་སྦྲུལ་ཞག་གི་ཞགས་པ་བསྣམས་པ། ཞིང་ལྤགས་ཀྱི་ཤམ་ཐབས་ཅན། སྦྲུལ་ནག་གི་སེ་རལ་ཁར་ཐོགས་པ། གྲུ་གསུམ་ཟླ་གམ་ངོས་ན། གཙོ་མོའི་མདུན་ན་གསུམ་རེ། གཡས་གཡོན་ན་གཉིས་རེ་བཅས་པའི་མ་བདུན་ནི། ཀུན་གྲགས་ཀུན་བཟང་ཀུན་གསལ་མོ། །ཡེ་ཤེས་མཆོག་དང་འོད་ཆགས་མ། །གསལ་འཕྲོ་རྡོ་རྗེ་གཡུ་སྒྲོན་བཅས། །ནག་མོ་གྲི་ཐོད་གར་གྱིས་རོལ། །ཟུར་གསུམ་མ་གསུམ་ཛ་ཛི་ཛུ། །ལྕགས་ཀྱུ་ཐོད་ཁྲག་ལྡག་ཅིང་རྔམ། །དེ་ཡི་ཕྱི་རོལ་གྲུ་ཆད་ལ། །དཀར་སྔོ་དམར་སེར་སྲིང་མོ་བཞི། །སེང་སྟག་འབྲུག་སྤྱང་གདོང་མོ་བཞི། །བ་དན་ཐོད་ཁྲག་འཐུང་ཞིང་གཏུམ། །ཁྲག་ཁྱམ་ཤར་ལྷོ་ནུབ་བྱང་ན། །ཞི་རྒྱས་དབང་དྲག་ལས་མཛད་པའི། །བདུན་བདུན་དབང་ཕྱུག་ཉེར་བརྒྱད་སྨུག །རྡོ་རྗེ་དུང་དམར་ཐོགས་པ་བརྗིད། །དེ་ཐམས་ཅད་ཀྱང་ཞིང་གི་གདན་ལ་མེ་རི་གོས་སུ་གྱོན་ཅིང་རླུང་འཚུབས་ཆིབས་སུ་བཅིབ་པ། རལ་པ་ནག་པོ་ཐུར་དུ་གཏིབ་ཅིང་། ཁྲོ་གཏུམ་མི་བཟད་པས། བསྟན་དགྲ་དམ་ཉམས་པ་གང་ན་འདུག་ཀྱང་ཡམ་དང་སྨྱོ་འབོག་ནད་སྤྲིན་ཆར་དུ་འབེབས་ཤིང་། མཆེ་རྩེ་དགྲ་སྟྭ་ལྟར་གཟས་པ། དུར་ཁྲོད་ཆས་ཀྱིས་བརྒྱན་ཅིང་། སྒྲུབ་པ་པོའི་རེ་བ་ཡོངས་སུ་སྐོང་བར་བྱེད་པའི་བདག་ཉིད་ཅན་ནོ། །དེ་ཡི་ཕྱི་རོལ་དུ་བྷྱོཿཡིག་ལས་སྐྱེས་པའི་འཁོར་མ་མོ་སྟོང་དང་། བདུད་མོ་བྱེ་བ་འབུམ་སྡེའི་ཚོགས་རྣམས་ཏེ། ཤ་ཟ། ནམ་གྲུ། སྲིན་མོ། གནོད་སྦྱིན་མོ། རི་རབ་དང་། རྒྱ་མཚོའི་གཏིང་དང་། བར་སྣང་ལ་གནས་པ་རྣམས་དང་། དམོད་པའི་མཚོན་ཆ་ཅན་དང་། ཡེ་ཤེས་ལས་དང་། དུར་ཁྲོད་ཀྱི་མ་མོ་མཁའ་འགྲོ། སྤྲུལ་པ་ཡང་སྤྲུལ་བྱེ་བ་འབུམ་སྡེ་དང་བཅས་པ། གཟུགས་དང་ལག་ཆ་སོགས་གཅིག་ཏུ་མ་ངེས་པ། ཀུན་ཀྱང་ཕྲིན་ལས་རྣམ་བཞིའི་རོལ་པ་འདོད་དགུར་བསྒྱུར་བས། ས་དང་ནམ་མཁའ་བར་སྣང་གི་ཁྱོན་ཡོངས་སུ་གང་བའི་སྤྲིན་ཆེན་པོ་འཕྲོ་བ་གཅིག་ཏུ་གྱུར། ལྷ་མོའི་སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པར་པདྨའི་སྟེང་དུ་ཨཱཿདམར་པོ། ཐུགས་ཀར་ཉི་མའི་སྟེང་དུ་ཧཱུྃ་མཐིང་ནག། འཁོར་གྱི་མ་མོ་རྣམས་ཀྱི་ཐུགས་ཀར་བྷྱོཿམཐིང་ནག་རེས་མཚན་པར་གྱུར། གཉིས་པ་ནི། རང་གི་ཐུགས་ཀ་ནས་འོད་ཟེར་འཕྲོས་པས་རི་རབ་ཀྱི་བྱང་ཤར་མཚམས་དཔག་བསམ་ཤིང་གི་དྲུང་། མུ་ལེ་མཐིང་གི་མཚོ་ནས། དཔལ་ལྷ་མོ་ནག་མོ་ཡེ་ཤེས་པ་འདིར་བསྐྱེད་པ་དང་འདྲ་བ་གཙོ་འཁོར་གཟལ་ཡས་ཁང་དང་བཅས་པ་སྐད་ཅིག་གིས་སྤྲིན་གྱིས་ཕུང་པོ་གཏིབ་པ་ལྟར་བྱོན་ནས་དམ་ཚིག་པ་ལ་ཐིམ་པར་གྱུར། རྡོ་རྗེ་ག་གོ་ནའི་རྒྱ་བཅས། ༀ་ཤྲཱི་མ་ཧཱ་ཀཱ་ལི་བཛྲ་ས་མ་ཡ་ཛཿཛཿ རྔ་རོལ་དབྱངས་སྙན་གྱིས་འགྱུར་བ་སྦྱར་ཏེ། ཀྱཻ། མ་ཅིག་ལྷ་མོ་དཔལ་ལྷ་མོ། །དད་པ་དང་ནི་དམ་ཚིག་གིས། །མ་ཅིག་ལྷ་མོ་སྤྱན་འདྲེན་ནོ། །བྱང་ཤར་མཚམས་ནས་གཤེགས་སུ་གསོལ། །རྐང་པས་དམན་པའི་ཤོ་ལོ་ཀ་གསུམ་མ་མོ་བྱང་ཆུབ་སེམས་རྒྱུད་ལས་ཏེ། འཇིག་བྱེད་ཆེན་མོ་གཤེགས་སུ་གསོལ། །སྤྱོད་པ་རླབས་ཆེན་གཤེགས་སུ་གསོལ། །ཤུགས་དྲག་མཐུ་ཆེན་གཤེགས་སུ་གསོལ། །ཁྱབ་འགྲོ་རྩལ་ཆེན་གཤེགས་སུ་གསོལ། །དགྲ་བགེགས་འདུལ་བྱེད་གཤེགས་སུ་གསོལ། །ཡོན་ཏན་འཆི་བཟློག་གཤེགས་སུ་གསོལ། །ཁྲག་འཐུང་ཆེན་མོ་གཤེགས་སུ་གསོལ། །འཇིག་རྟེན་འཁྲུག་ཆེན་གཤེགས་སུ་གསོལ། །བདུད་ཀྱི་ཡུམ་གཅིག་གཤེགས་སུ་གསོལ། །གཤིན་རྗེའི་ལྕམ་གཅིག་གཤེགས་སུ་གསོལ། །འདོད་ཁམས་དབང་ཕྱུག་གཤེགས་སུ་གསོལ། །མཿ འཚུབས་མ་སྟོང་དུ་འཁྱིལ་བའི་དབུས་ན་བཞུགས། །བསྐལ་པའི་མེ་དཔུང་འབར་བ་དང་། །རླུང་དམར་ལྟ་བུའི་འཚུབས་མ་ནི། །སྐུ་ཡི་གནས་ཏེ་རྒྱན་གྱི་མཆོག །དྲག་ཤུལ་ཁྱབ་འགྲོ་གློག་གི་བང་། །བསམ་པ་ཙམ་གྱིས་གནས་སུ་བྱོན། །མ་དེ་ཡི་ཚུལ་དུ་གཤེགས་སུ་གསོལ། །བྷྱོཿ ལྷ་ཡི་ནང་ནས་ཨུ་མའི་སྲས། །བཅོམ་ལྡན་འོད་སྲུང་བསྟན་པ་ལ། །ཤཱཀྱ་སེང་གེ་མགོན་དེ་ཡི། །བསྟན་པ་སྲུང་བར་སྨོན་ལམ་བཏབ། །དེ་ཉིད་དུས་སུ་སྨིན་པ་ཡི། །དཔལ་ལྡན་ལྷ་མོ་མཐུ་ཆེན་གཙོ། །ཆོས་སྐྱོང་རྒྱལ་མོ་གཤེགས་སུ་གསོལ། །བྷྱོཿ དཔལ་ལྡན་མ་ཆེན་དབྱིངས་ན་རྟག་བཞུགས་ཀྱང་། །སྐུ་གསུང་ཐུགས་ཀྱི་རྣམ་འཕྲུལ་བསམ་མི་ཁྱབ། །སྣ་ཚོགས་འཇིགས་པའི་གཟུགས་སུ་བསྟན་མཛད་མ། །སྲིད་གསུམ་དབང་མོ་འཁོར་བཅས་གཤེགས་སུ་གསོལ། །སྐྱེ་འགགས་གནས་གསུམ་བྲལ་ལས་མ་གཡོས་ཀྱང་། །སྐུ་མཆོག་རི་རབ་ཆེ་དང་འཁྲིལ་མཛད་ཅིང་། །ཉི་ཟླ་ལྟེ་བའི་ཐད་ནས་སྤྲུལ་མཛད་མ། །སྲིད་གསུམ་བྷ་གར་བསྡུད་མཛད་གཤེགས་སུ་གསོལ། །དཔལ་ལྡན་ལྷ་མོ་འགྲོ་ཀུན་བྱམས་པ་མོ། །སེམས་ཅན་ཀུན་ལ་བྱམས་པ་མ་དང་འདྲ། །མི་བསླུ་དམ་ཚིག་རྗེས་སུ་དགོངས་མཛོད་ལ། །བདག་ལ་བརྩེར་དགོངས་གནས་འདི་ཉིད་དུ་བྱོན། །བྷྱོཿ སྔོན་ཚེ་བྱང་ཆུབ་ཤིང་དྲུང་དུ། །ཐུབ་པ་ཆེན་པོའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་སྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །མ་རུ་རྩེ་ཡི་སྒོ་འགྲམ་དུ། །ཇི་ལྟར་ཁས་བླངས་དམ་བཅས་པའི། །ཁས་བླངས་དམ་ནས་བློས་བསྐུལ་གྱིས། །དམ་ཚིག་བཞིན་ལས་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་གསོལ། །ཨེ་ཧྱ་ཧི། ༀ་རུ་རུ་རོ་ཙ་པ་ལ་ཨ་ཤུགྨེ་ཧཱུྃ་བྷྱོ་ཛཿཛཿ ཛཿཧཱུྃ་བྃ་ཧོཿ ཨ་གཙྪ་ཡ་ཨ་གཙྪ་ཡ་ཧཱུྃ་ཛ། བཞུགས་སུ་གསོལ་བ་ནི། བྷྱོཿ རླུང་སྤྲིན་ཤུགས་འཆང་མགྲིན་བཟང་དམར་གྭའི་གདན། །དུར་ཁྲོད་རོ་དབུས་མཁའ་འགྲོ་མས་བསྐོར་ཏེ། རྒྱུ་བའི་ལྷ་མོ་གཏུམ་རྔམས་ང་རོ་ཅན། །དཔལ་ལྡན་མཐུ་ཆེན་འཁོར་བཅས་བཞུགས་སུ་གསོལ། །པདྨ་ཀ་མ་ལ་ཡེ་སྟམ༔ གསུམ་པ་ནི། ཐུགས་ཀ་ནས་འོད་ཟེར་འཕྲོས། དབང་གི་ལྷ་ཕྱོགས་བཅུའི་སངས་རྒྱས་ཐམས་ཅད་བཛྲ་ས་མ་ཛཿས་སྤྱན་དྲངས། འདི་ལ་མངོན་པར་དབང་བསྐུར་དུ་གསོལ། །ཞེས་གསོལ་བ་བཏབ་པས་ཐུགས་ཀ་ནས་རིགས་ཀྱི་ཡུམ་བཞི་བུམ་པ་ཐོགས་པ་སྤྲོས། ༀ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་ཤིང་ཁྲུས་བྱས་པས། དྲི་མ་ཐམས་ཅད་ཆུ་ཡི་རྒྱུན་གྱིས་སྐུ་ལུས་དཀར་ལྷག་གེར་གྱུར། དབང་རྟགས་སུ་རལ་པའི་རྩ་བ་ཐོད་པ་བཅུ་དྲུག་གི་མདུན་ནས་བརྩམས། ཀོའུ་རི་མ་ལ་སོགས་ཏེ་གནས་ཡུལ་གྱི་མ་མོ་བཅུ་དྲུག་གིས་དབུ་བརྒྱན་པར་གྱུར། སྤྱི་བོར་པད་ཟླ་ཉི་མའི་གདན་ལ་བླ་མ་རྡོ་རྗེ་སེམས་དཔའ་ཡབ་ཡུམ་མཉམ་པར་སྦྱོར་བའི་སྦྱོར་མཚམས་ནས་བྱང་སེམས་ཡེ་ཤེས་ཀྱི་བདུད་རྩིས་མ་མོའི་ལུས་ཐམས་ཅད་གང་། དྲི་མ་ཐམས་ཅད་དག །མཐུ་སྟོབས་ནུས་པའི་གཟི་བྱིན་མཆོག་ཏུ་འབར། རང་གི་དམ་ཚིག་ཉམས་ཆག་ཐམས་ཅད་དག །གྲིབ་ཐམས་ཅད་སོལ། རྡོ་རྗེ་སེམས་དཔའ་མ་མོ་ལ་ཐིམ་པས། མཐུ་སྟོབས་ནུས་པ་མཆོག་ཏུ་འབར་བར་གྱུར། ཡི་གེ་བརྒྱ་པ་ལན་བདུན་བཟླ། འདི་ནི་དམ་ཚིག་བདུད་རྩིའི་ཆུ། །བསྲེ་བའི་མཆོག་སྟེ་སྲོག་གི་སྙིང་། །དམ་ཚིག་རྣམས་ལས་འདའ་མ་བྱེད། །སྙིང་དང་སྙིང་གི་བུར་བྱའོ། །མ་ཧཱ་པཉྩ་ས་མ་ཡ་ཨ་མྲྀ་ཏ་ཧཱུྃ། དམ་ཚིག་གི་རྒྱ་བཅས། བྷྱོཿ གདོད་མའི་མགོན་པོ་ཤཱཀ་ཐུབ་གསང་བའི་བདག །དྷ་ན་སང་ཀྲི་སློབ་དཔོན་པདྨ་སོགས། །རབ་འབྱམས་རྩ་བརྒྱུད་བླ་མའི་དམ་མནོས་བཞིན། །རྣལ་འབྱོར་བདག་ལ་མ་སྲིང་བུ་ལྟར་སྐྱོབས། །ༀ་ཤྲཱི་མ་ཧཱ་ཀཱ་ལི་དེ་ཝི་བཛྲ་ས་མ་ཡ་རཀྵནྟུ། ཞར་བྱུང་མངའ་གསོལ་ཡང་། བྷྱོཿ བདེ་ཆེན་ལྷན་ཅིག་སྐྱེས་པའི་ཡེ་ཤེས་ནི། །ཁ་དོག་ཡི་གེ་མཚན་མའི་དཔེ་བྲལ་ཡང་། །བསམ་གྱིས་མི་ཁྱབ་ཉམས་བརྒྱར་ཤར་བའི་གཟུགས། །མཐུ་ཆེན་དྲག་ཤུལ་དཔལ་ལྡན་མ་མོ་ནི། །རྩ་བརྒྱུད་བླ་མའི་ངོ་བོར་མངའ་གསོལ་ལོ། །ཡི་དམ་དཀྱིལ་འཁོར་མཆོག་ཏུ་མངའ་གསོལ་ལོ། །མ་མོ་མཐུ་ཆེན་མཁའ་འགྲོར་མངའ་གསོལ་ལོ། །བསྟན་སྲུང་ཀུན་གྱི་གཙོ་བོར་མངའ་གསོལ་ལོ། །སྐལ་ལྡན་སྐྱོངས་མ་ཆེན་མོར་མངའ་གསོལ་ལོ། །རིག་འཛིན་སྲུང་མ་མཆོག་ཏུ་མངའ་གསོལ་ལོ། །མནའ་ཟན་རྣམས་ཀྱི་གཤེད་པོར་མངའ་གསོལ་ལོ། །དུས་གསུམ་ནད་ཀྱི་སྨན་པར་མངའ་གསོལ་ལོ། །དམ་ཉམས་ཞིང་བཅུའི་གཤེད་དུ་མངའ་གསོལ་ལོ། །ས་ལམ་བར་ཆད་སེལ་མཛད་མངའ་གསོལ་ལོ། །ཉམས་པའི་སྙིང་ཁྲག་འཐུང་བར་མངའ་གསོལ་ལོ། །ཆོས་འཁོར་སྐྱོངས་བའི་སྲུང་མར་མངའ་གསོལ་ལོ། །རྣལ་འབྱོར་བདག་གི་མགོན་དུ་མངལ་གསོལ་ལོ། །ཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །བཞི་པ་ལ་དྲུག །ཕྱག་འཚལ་བ། ཕྱི་མཆོད། ནང་མཆོད། གསང་མཆོད། ཐུན་མིན། བཤགས་པ་དང་། བསྟོད་པ་དབུལ་བའོ། །དང་པོ་ནི། བྷྱོཿ ནག་མོ་ཁྲག་འཐུང་རྡོ་རྗེ་རལ་པ་ཅན། །དབང་ཆེན་རྡོ་རྗེ་ཐོག་དང་སེར་ཆེན་འབེབ། །ཁམས་གསུམ་སྒྲལ་མཛད་སྲིད་གསུམ་རྩད་ནས་གཅོད། །རལ་པ་བསིགས་པས་སྟོང་གསུམ་ཀུན་ཏུ་ཁྱབ། །མཆེ་བ་གཙིགས་པས་དགྲ་བགེགས་ཞལ་དུ་འདྲེན། །མ་ལུས་དབང་དུ་བསྡུད་ལ་ཕྱག་འཚལ་བསྟོད། །ༀ་ཤྲཱི་མ་ཧཱ་ཀཱ་ལི་རེ་མ་ཏི་ན་མོ་ན་མ་མི་པྲ་ཏིཙྪ་ཧོ། གཉིས་པ་ནི། ཡན་ལག་བརྒྱད་ལྡན་བདུད་རྩིའི་རྒྱ་མཚོ་འཁྱིལ། །དྲི་བཟང་སྦྱར་བ་འཆི་མེད་ཞབས་བསིལ་ཆུ། །རྣམ་བཀྲ་ཡིད་འོང་ཆུ་སྐྱེས་འདབས་བཟང་བཞད། །ལྷན་སྐྱེས་སྦྱར་བའི་དྲི་བཟང་ཞིང་ཀུན་ཁྱབ། །ནོར་བུ་ཉི་ཟླ་གསལ་བྱེད་སྒྲོན་མ་རྡལ། །ག་བུར་ཙནྡན་གུརྒུམ་བྱུགས་པའི་ཆབ། །རོ་བརྒྱ་ལྷ་ཡི་བཟའ་བ་སྟོང་དུ་དཀྲིགས། །དུང་དང་སིལ་ཆོལ་སྙན་པའི་རོལ་མོ་ཡིས། དཔལ་ལྡན་མ་ཆེན་སྲིད་གསུམ་དབང་མོ་ནི། །ཀུན་ཏུ་མཉེས་པའི་མཆོད་སྤྲིན་ཆེན་པོ་རུ། །ཐོགས་མེད་ཏིང་འཛིན་བློ་ཡིས་ལེགས་སྤྲུལ་ཏེ། །སྣ་ཚོགས་སྲིད་པ་ཁྱབ་པའི་བཀོད་པས་མཆོད། །ༀ་ཤྲཱི་མ་ཧཱ་ཀཱ་ལི་དེ་ཝི་ས་པཱ་རི་ཝ་ར་བཛྲ་ཨརྒྷཾ་ནས་ཤཔྟ་པྲ་ཏིཙྪ་ཡེ་སྭཱ་ཧཱ། གསུམ་པ་ནི། ཀྱཻ་མ་ཅིག་ལྷ་མོ་དཔལ་ལྷ་མོ། །མ་ཁྱོད་ལ་གཟུགས་ཀྱི་མཆོད་པ་འབུལ་བ་ནི། །ལྷ་མོའི་གཟུགས་དང་ཀླུ་མོའི་གཟུགས། །བཟང་བའི་གཟུགས་དང་བརྗིད་པའི་གཟུགས། །ཁ་དོག་སྣ་ཚོགས་མཛེས་པའི་གཟུགས། །ཅིར་ཡང་བསྒྱུར་བའི་གཟུགས་ལ་སོགས། །མ་ཅིག་སྤྱན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཁྱོད་ལ་མཆོད་པ་སྣ་ཚོགས་འབུལ་བ་ནི། །མེ་ཏོག་ཆུ་སྐྱེས་ཐང་སྐྱེས་རྣམ་པ་མང་པོ་དང་། །བཟང་ཞིང་འབྲས་བུ་ཕུན་སུམ་ཚོགས། མ་ཅིག་སྐུ་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཁྱོད་ལ་སྒྲ་ཡི་མཆོད་པ་འབུལ་བ་ནི། །པི་ཝཾ་གླིང་བུ་འཁར་བའི་རྔ། །རྫ་རྔ་ཅང་ཏེའུ་གྷནྜེ་དུང་། །ཆ་ལང་སིལ་སྙན་ལ་སོགས་ཏེ། །དྲིལ་བུ་རྔ་དབྱངས་སྣ་ཚོགས་དང་། །གླུ་དབྱངས་ཚིགས་སུ་བཅད་པའི་སྒྲ། །མ་ཅིག་སྙན་ལ་ཐིམ་གྱུར་ཅིག །ཐུགས་མཆོག་དམ་པ་མཉེས་གྱུར་ཅིག །དངོས་གྲུབ་དམ་པ་སྩལ་དུ་གསོལ། །མ་ཅིག་ལྷ་མོ་དཔལ་ལྷ་མོ། །མ་ཁྱེད་ལ་དྲི་ཡི་མཆོད་པ་འབུལ་བ་ནི། །ཨ་ཀ་རུ་དང་དུ་རུ་ཀ །ཤ་ཀ་ར་དང་ལྔ་སྦྱར་བའི། །ཙནྡན་དཀར་དམར་དྲི་སྤོས་ཆབ། །མ་ཅིག་ཐུགས་ཀར༴ ཐུགས་མཆོག༴ དངོས་གྲུབ༴ མ་ཅིག༴ མ་ཁྱེད་ལ་རོ་ཡི་མཆོད་པ་འབུལ་བ་ནི། །ལྷ་ཡི་ཟས་སྣ་དམ་ཉམས་ཀྱི། །སྙིང་གི་ཁུ་བས་ལེགས་སྦྱར་བ། །ཞལ་ཟས་ཤ་ཁྲག་རུས་པར་བཅས། །མ་ཡི་ལྗགས༴ ཐུགས་མཆོག༴ དངོས་གྲུབ༴ མ་ཅིག༴ མ་ཁྱེད་ལ་རེག་བྱའི་མཆོད་པ་འབུལ་བ་ནི། །སྟག་གླང་ཞིང་གི་ཤུན་པ་དང་། །ལྷ་རྫས་དར་སྣའི་གོས་བཟང་པོ། །མ་ཅིག་སྐུ་ལ༴ ཐུགས་མཆོག༴ དངོས་གྲུབ༴ ༀ་ཤྲི་མ་ཧཱ་ཀཱ་ལི་དེ་ཝི་རེ་མ་ཏི་རཱུ་པ་ཤཔྟ་གནྡྷེ་ར་ས་སྤཪྴེ་ཨ་ཧཱུྃ། བཞི་པ་ལ་གཏོར་མ། སྨན། རཀྟ། མཆོད་སྤྲིན་སྤྲོ་བའོ། །དང་པོ་ནི། རྃ་ཡྃ་ཁྃ། སྟོང་པའི་ངང་ལས་གཏོར་མའི་སྟེང་འདོད་ཡོན་གྱི་ལྷ་མོ། བར་བདུད་རྩིའི་རྒྱ་མཚོ་འོག་དགྲ་བགེགས་ཀྱི་ཤ་ཁྲག་རུས་པའི་ཕུང་པོ། ཟེར་བདུན་རྩི་ལྔ་དང་། སྙིང་པོ་ཤ་ལྔས་ཁྱབ་པ། དོན་ཡེ་ཤེས་ལྔ་ཡི་མཆོད་པ་བླ་ན་མེད་པར་སྤྲོ་བར་གྱུར། རང་གི་ཐུགས་ལས་འོད་ཟེར་འཕྲོས། མ་མོ་ལ་ཕོག །མ་མོ་གཏོར་སྟེགས་ཀྱི་སྟེང་དུ་བཞུགས་ནས་ལྗགས་རྡོ་རྗེའི་སྦུ་གུས་གཏོར་མའི་བཅུད་དྲང་སྟེ་གསོལ་བར་གྱུར། ཀྱཻ། མ་ཕམ་དཔལ་ལྡན་ལྷ་མོ་ནི། །སྙིང་རྗེའི་རོ་ཡིས་རྟག་དགའ་བས། །འཁོར་བའི་ཁྲག་མཚོ་རྒྱས་པར་རོལ། །དངོས་གྲུབ་ཞལ་ནི་མཆེ་བ་གཙིགས། །མགོན་མེད་འགྲོ་ལ་མཐུས་སྐྱོབས་ཀྱང་། །ཉམས་པ་གསོད་པས་སྡིག་ཅན་གྱི། །སྲོག་གི་ཤན་པ་མི་བཟད་ཀྱང་། །བྱང་ཆུབ་སེམས་ནི་ཆེས་འཕེལ་བ། །འགལ་བ་མེད་པ་མ་ལགས་སམ། །དེ་ལྟའི་ཡ་མཚན་ལྷ་མོ་དེ། །རྨད་བྱུང་ཏིལ་མར་མཚོ་དབུས་ན། །རེས་འགའ་སྣུམ་ལ་རེས་འགའ་ནི། །མེ་ཟ་བྲག་གྱོན་རྒྱ་མཚོའི་ཀློང་། །སྐེམ་སྐྱ་མཚན་མོ་ནག་མོ་ནི། །རླུང་འཚུབ་མཁའ་ལ་འགྲོ་བ་དེ། །འཇའ་ཚོན་འབར་བ་གོས་སུ་ཀླུབ། །རེས་འགའ་ཡི་དྭགས་གྲོང་ནའང་། །སྐལ་མཚུངས་ཚུལ་སྟོན་འབྱུང་པོ་མ། །རེས་འགའ་མཁའ་འགྲོའི་ཚོགས་ཁང་དབུས། །དུར་ཁྲོད་བརྒྱད་ན་འགྲིམ་མཛད་མ། །ཅང་ཏེ་འུ་ནི་དྲག་ཏུ་དཀྲོལ། །རུས་པའི་རྒྱས་ཆ་སི་ལི་ལི། །མི་རྐང་གླིང་བུ་ཀྱུ་རུ་རུ། །མ་མོ་མཁའ་འགྲོ་སྣ་ཚོགས་བསྐོར། །མཿ ཚོགས་ཀྱི་གཙོ་མོ་གཏོར་མའི་ལས། །ཀུན་ཏུ་བསྒྲུབས་པ་གནས་ཡུལ་ཉུལ། །རྡོ་རྗེ་འཛིན་པ་རྣམས་ཀྱི་ཡུམ། །རིགས་སྔགས་འཆང་ལ་བདེ་ཆེན་སྤེལ། །འཇམ་དཔལ་དབྱངས་ཀྱི་ཡུམ་མཛད་ཙ། །དབྱངས་ཅན་ལྷ་མོ་ཞེས་སུ་གྲགས། །སྤྱན་རས་གཟིགས་ཡུམ་མཛད་ཙ་ན། །གསང་བ་ཡེ་ཤེས་མཁའ་འགྲོའི་གཙོ། །རྡོ་རྗེ་འཛིན་པའི་ཡུམ་གྱུར་པར། །གཏུམ་མོ་ཞེས་གྲགས་རེས་འགར་ཡང་། །དེ་དག་ཀུན་གྱི་འབངས་གྱུར་མ། །ཡིད་འོང་རི་དྭགས་མིག་ཅན་སྐུ། །དཀར་མོ་དུང་སྐྱོང་དབྱར་ཟླ་རར། །མངའ་མཛད་ཞ ི་ཚུལ་རིན་ཆེན་རྒྱན། །མཛེས་པའི་དོ་ཤལ་འཕྱང་འཕྲུལ་ཀླུབ། །ནོར་འཆང་མ་ལ་གསེར་འོད་ཀྱིས། །རིན་ཆེན་ལྷུན་པོ་སྦགས་འདྲ་བ། །ཚེ་གཡང་བདག་མོ་དཔལ་ལྷ་མོ། །ལྷ་མོ་བརྒྱད་ཀྱི་འཁོར་གྱིས་བསྐོར། །འཇིག་རྟེན་ཡིད་ལ་དབང་མེད་པ། །འགུགས་པར་བཏབ་པའི་ལྕགས་ཀྱུ་འཛིན། །ཡིད་འཕྲོག་པད་རག་ལྷུན་པོ་བཞིན། །ཁམས་གསུམ་དབང་བསྡུད་རིག་བྱེད་མ། །སྟོན་དང་དཔྱིད་ཟླ་ར་བ་ནི། །དབང་བསྒྱུར་རྒྱལ་མོ་ལྷ་མོའི་མཚན། །དྲག་ཤུལ་མ་རུང་སྲིན་མོ་ཡི། །གཟུགས་འཛིན་ཁྱོད་ནི་དྲག་པོ་སྟེ། །དགུན་གྱི་ནམ་ལ་དགྲ་བོ་བཅོམ། །མཐའ་ཡས་མཐུ་དང་རྫུ་འཕྲུལ་གཏེར། །སད་དང་སེར་བའི་སྣ་འདྲེན་མ། །ནད་དང་རིམ་གྱིས་བདག་མོ་སྟེ། །རེས་འགར་པཪྞ་ཤ་བ་རི། །འཆི་མེད་སྨན་གྱི་ལྷ་མོའང་ཡིན། །ཅིར་ཡང་འཕྲུལ་བའི་སེམས་མ་ནི། །མཆོད་བསྟོད་གསོལ་ལོ་གཏོར་མས་མཆོད། །གཏོར་མའི་གནས་འདིར་གཤེགས་སུ་གསོལ། །ཀྱཻ། རྨད་དུ་བྱུང་བའི་གཏོར་མ་དང་། །བུམ་དང་རིལ་དང་ཕྱེད་ཚལ་དང་། །ཀུ་ཀུ་རྟ་གླང་ན་ར་སོགས། །ཤ་ཆེན་ཐང་དམར་བརྡལ་བས་མཆོད། །མ་ཅིག་ལྷ་མོ་དཔལ་ལྷ་མོ། །མ་ཅིག་ཐུགས་དམ་ཞལ་ཟས་སྣོད། །པཱ་ལས་བྷནྡྷ་བཅུད་ཡངས་པའི། །འཁོར་ཡུག་གཏོགས་པའི་འཇིག་རྟེན་འདིར། །བདུད་རྩིའི་རང་བཞིན་ཡིན་པའི་ཕྱིར། །རྫོང་དང་དཀའ་བཟློག་ནག་མོ་ཆེ། །གསོལ་ལོ་རོལ་ཅིག་དགྱེས་པར་མཛོད། །མ་ཅིག་ལྷ་མོ་དཔལ་ལྷ་མོ། །མ་ཅིག་ཐུགས་དམ་ཞལ་ཟས་ནི། །གསོད་པའི་ཤ་དང་མྱོས་པའི་ཆང་། །བསྲེགས་པའི་བསུར་དང་རློན་པའི་ཤ། །བཙོས་པའི་ཤ་དང་ཁུ་བ་ཁྲག །ནང་རོལ་གློ་སྙིང་མཁལ་མ་བཅས། །གསོལ་ལོ་རོལ་ཅིག་དགྱེས་པར་མཛོད། །མ་ཅིག༴ མ་ཁྱེད་ལ་ཡིད་བཞིན་མཆོད་པ་འབུལ་བ་ནི། །འབྲས་བུ་ལྔ་ཡི་ཚོམ་བུ་བདུད་རྩི་དང་། །ཀ་རོ་ཙ་ན་དང་ནི་དྲི་ཆེན་དང་། །མ་ཧཱ་མཱཾ་ས་རཀྟ་ཙིཏྟ་བ་སུ་ཏ། །མ་ཅིག་ཞལ་དུ༴ ཐུགས་དམ༴ དངོས་གྲུབ༴ གསོལ་ལོ་རོལ་ཅིག་དགོངས་ཤིག་ས་མ་ཡ། མ་མོ་བྱང་ཆུབ་སེམས་རྒྱུད་ལས་བྱུང་བ། མ་མོ་འདིར་སྤྱོན་དམ་ཅན་རྣམས་སྤྱོན་ཅིག །འབྱུང་པོ་འབྱུང་མོའི་ཤ་ནི་ཟན་བས་ཞིམ། །མ་མོ་དམ་ཅན་འདིར་སྤྱོན་ཁྲག་ལ་སྤྱོན། །འབྱུང་པོ་འབྱུང་མོའི་ཁྲག་ནི་ཆང་བས་ཞིམ། །མ་མོ་དམ་ཅན་འདིར་སྤྱོན་རུས་ལ་སྤྱོན། །འབྱུང་པོ་འབྱུང་མོའི་རུས་པ་མར་བས་ཞིམ། །ཤ་ཁྲག་རུས་པའི་དམ་རྫས་འདི་གསོལ་ལ། །བདག་གི་བཅོལ་པའི་ལས་འདི་མཐར་དབྱུང་ཞིག །རུ་རུ་བེ་ཏིཥྛ་བ་དོ་པི་ཙ་པ་ལ་ཨུ་ཤུགྨོ་ཧཱུྃ་བྷྱོ་ཛཿཛཿ བྃ་མ་བྃ་མ་མ་ཁཱ་ཧི་ཁཱ་ཧི། དགྲ་བགེགས་ཀྱི་མ་ཧཱ་མཱཾ་ས་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་ཀི་ནི་ཏི་ལ་ཁཱ་ཧཱི། མ་ཧཱ་ཀ་རོ་ཙ་ན༴ འབྱུང་པོའི་ཕུང་པོ༴ དགྲ་བགེགས་འདི་ཡི་དབང་པོ་རྣམ་ལྔ་ལ༴ ར་རྒྱ་རམ་པ་ལ༴ ཤིག་ཤིག་རྟོག་དཔྱོད་ཅིག །མ་བྷྱོ་རུ་རུ་ཁཱ་ཧི། གཉིས་པ་ནི། རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་ཡི་གྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་མའི་ཚོགས་ཆེན་དང་། །ཁྲོ་བོའི་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྷ་མིན་གསང་བའི་བདག །ཐུགས་དམ་དབྱིངས་ཉིད་བསྐུལ་བའི་ཕྱིར། །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་ཀྱི་ངང་ཉིད་ལས། །བདག་ཅག་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ༀ་ན་མ་སརྦ་ཏཱ་ཐཱ་ག་ཏ་མ་ཧཱ་ཨརྒྷཱཾ་པྲ་ཏིཙྪ་ཧོ། དུས་གསུམ་བཞུགས་པའི་བཀའ་བརྒྱུད་བླ་མ་དང་། །དངོས་གྲུབ་འབྱུང་གནས་རྒྱུད་སྡེའི་དཀྱིལ་འཁོར་ལྷ། །ཡེ་ཤེས་མཁའ་འགྲོ་དམ་ཅན་རྒྱ་མཚོར་བཅས། །རྣམ་པར་དག་པའི་བདུད་རྩིས་མཆོད་པར་བགྱི། །ༀ་ན་མ་སརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏིཙྪ་ཧོ། བྷྱོཿ རྡོ་རྗེ་ལྷ་མོ་ནག་མོ་མཆེ་བ་གཙིགས་པའི་ཞལ། །དུས་གསུམ་སངས་རྒྱས་ཀུན་དང་སྤྱོད་ཡུལ་གཅིག་པའི་ཡུམ། །ཁམས་གསུམ་ལོག་པར་ལྟ་བ་ཐམས་ཅད་དབྱིངས་སུ་སྒྲོལ། །སྲིད་གསུམ་ལོག་འདྲེན་ཟ་བར་བྱེད་པའི་ཡུམ་རྣམས་ལ། །རྣམ་པར་དག་པའི་དམ་རྫས་བདུད་རྩིའི་མཆོད་པ་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་རྒྱ་མཚོ་སྩོལ། །ༀ་ན་མ་སརྦ་ཏ་ཐ་ག་ཏ་མ་ཧཱ་པཉྩ་ཨ་མྲྀ་ཏ་ཨརྒྷཾ་པྲ་ཏིཙྪ་ལ་ཁ་རཾ་ཁ་ཧི། དབང་ཕྱུག་ཆེན་མོ་ཀུན་གྱི་སྲིང་། །རྣལ་འབྱོར་ཀུན་གྱི་མ་ཅིག་མོ། །མཚན་བཟང་ནག་མོ་རེ་མཱ་ཏི། །མ་སྟོང་མ་མོའི་འཁོར་ཚོགས་ལ། །རྣམ་དག་དམ་རྫས་བདུད་རྩི་འབུལ། །ཐུགས་རྗེས་བརྩེ་བས་བཞེས་སུ་གསོལ། །ༀ་མ་ཧཱ་པཉྩ་ཨ་མྲྀ་ཏ་ལ་ཁཱ་ཧི། གསུམ་པ་ནི། ཆགས་པ་ཁམས་གསུམ་སྙིང་གི་རཀྟ་ནི། །དམར་སེར་ལྦུ་ཕྲེང་ཆལ་ཆིལ་གཡོ་བ་ཅན། །རྣམ་པར་འཁྲུགས་པའི་ཞག་གི་རྒྱ་མཚོ་ལས། །རྦ་རླབ་དམ་རྫས་ཁོལ་བ་བདག་གིར་བཞེས། །ༀ་མ་ཧཱ་རཀྟ་ལ་ཁཱ་ཧི། བཞི་པ་ནི། བྷྱོཿ སྟོང་གསུམ་ཁྱོན་ལ་འཕྱ་བས་བརྒལ་ནུས་པའི། །རྣམ་དག་ཡིད་ཀྱི་དོ་རར་ཏིང་འཛིན་གར། །རབ་བསྒྱུར་ཤེས་རབ་སྟོང་པའི་སྨིན་ལེགས་མའི། །ཕྱག་ན་ཛམྦུ་གསེར་གྱི་ཡོ་གོའི་དབུས། །ཕྱུར་བུར་སྲུངས་པའི་རྣམ་མང་མཆོད་པའི་གཏེར། །དཔག་ཡས་ཕུན་ཚོགས་འོད་སྟོང་འཕྲོ་བའི་མཛོད། །ཀུན་བཟང་རྣམ་པར་རོལ་པ་ལས་བྱུང་བའི། །བདེ་ཆེན་རྡོ་རྗེའི་འཁོར་ལོས་བདེ་བར་རོལ། །ༀ་ན་མ་སརྦ་ཏ་ཐཱ་ག་ཏ༴སོགས་ནམ་མཁའ་མཛོད་སྔགས་རྒྱ་བྱ། ལྔ་པ་ནི། ཨེ་ཡིག་རོལ་པ་ཆོས་འབྱུང་གཏུམ་མོའི་མེས། །ཝཾ་དཀར་ཁུ་བར་བཞུས་ནས་བླུགས་པའི་རྒྱུན། །སེམས་ཀྱི་རྡོ་རྗེ་བུང་བས་འཐུང་བ་ལས། །ལེགས་བྱུང་བདེ་སྟོང་སྦྲང་རྩིའི་མཆོད་ཡོན་སྟོབས། །དོན་དམ་ལྷ་ལམ་ཡངས་པའི་པད་དཀར་སྣོད། །རྣམ་རྟོག་ཕྱེ་མར་འཐགས་པ་རོ་མཉམ་བཅུད། །རྫོགས་པ་ཆེན་པོས་སྦྱར་བ་ལས་བྱུང་བའི། །གཉིས་མེད་བཤོས་བུ་གཏོར་མའི་འཇིག་རྟེན་འབུལ། །ཁམས་གསུམ་རྒྱུ་བ་ཡོན་བོར་འཁྱོགས་པའི་མིག །བློ་བྲལ་ཟུར་མདངས་བཀུག་པའི་ལྷན་སྐྱེས་ཀྱི། །མཛའ་ན་དྷཱུ་ཏིར་སྦྱོར་བས་དགའ་བ་ཡི། །རེག་བྱ་སྤྲོས་བྲལ་ལུས་ཕྲ་ཁྱོད་ཀྱི་གཉེན། །ཡེ་ཤེས་རྡོ་རྗེ་རལ་གྲིའི་འཁྲུལ་འཁོར་གྱིས། །བདག་འཛིན་བདུད་སྡེའི་མགོ་བོ་ཕྱེ་མ་བརྒྱར། །བཀས་པ་ལས་བྱུང་སྒྲོལ་བ་བདེ་ཆེན་དུ། །ཤར་བས་ཕྱོགས་ལས་རྣམ་རྒྱལ་མཚོན་ཏེ་མཆོད། །དྲུག་པ་ལ་གཉིས་ཀྱི། དང་པོ་ནི། བྷྱོཿ མི་མངོན་དབྱིངས་ནས་བཞེངས་པའི་ལྷ་མོ་ནི། །དབང་ཕྱུག་སྲས་མོ་དཔལ་ལྡན་དུང་སྐྱོང་མ། །སྲིད་གསུམ་བདག་མོ་དཔལ་ལྡན་རེ་མ་ཏི། །དཔོན་གཡོགས་འཁོར་བཅས་བདག་ལ་དགོངས་སུ་གསོལ། །ཐོག་མེད་དུས་ནས་དུག་གསུམ་དབང་གྱུར་པས། །ལུས་ངག་ཡིད་གསུམ་སྡིག་བགྱིས་བགྱིད་དུ་རྩལ། །བགྱིད་ལ་ཡི་རངས་མི་དགེ་སྣ་ཚོགས་བགྱིས། །ལྷ་མོ་འཁོར་བཅས་ཁྱེད་ལ་མཐོལ་ལོ་བཤགས། །སྐུ་ཡི་དམ་ཚིག་ཡི་དམ་ལྷ་དང་འགལ། །གསུང་གི་དམ་ཚིག་སྔགས་ཀྱི་བཟླས་བརྗོད་གཡོལ། །ཐུགས་ཀྱི་དམ་ཚིག་གསང་བ་སྤེལ་བ་འདི། །ལྷ་མོ་འཁོར་དང་བཅས་ལ་མཐོལ་ལོ་བཤགས། །སྤྲུལ་པ་ནལ་ཕྲུག་བོང་དྲིལ་ནེའུ་ལེ། །གུས་པས་མཆོད་བསྟོད་མ་བྱས་ཁྲོས་ཤིང་བརྩུབ། །འཚུབ་མ་སྤངས་ཤིང་རྟེན་རྫས་སྤངས་བ་རྣམས། །ལྷ་མོ་འཁོར་དང་བཅས་ལ་མཐོལ་ལོ་བཤགས། །ཉ་སྟོང་ལ་སོགས་དུས་ཀྱིས་ཕྱེད་པ་ལ། །བསྙེན་བསྒྲུབ་བསྐང་བ་དུས་ཀྱི་ཆོ་ག་ཆགས། །ཤེས་བཞིན་ཁྱད་དུ་གསོད་པ་ཅི་མཆིས་པ། །དམ་ཅན་སྲུངས་མའི་ཚོགས་ལ་མཐོལ་ལོ་བཤགས། །བསྲུང་བྱ་མ་སྲུངས་སྤང་བྱ་མ་སྤངས་དང་། །བརྟེན་བྱ་མ་བརྟེན་བསྒྲུབ་བྱ་མ་བསྒྲུབས་པའི། །ཁས་བླངས་དམ་བཅའ་ཉམས་པ་ཇི་མཆིས་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །བདག་གི་དུས་རྣམས་ཀུན་ཏུ་ལྷ་ཁྱོད་དང་། །སྐད་ཅིག་མི་འབྲལ་ཕྲིན་ལས་རྣམ་བཞི་ཡིས། །ནམ་མཁའི་མཐའ་མཉམ་སེམས་ཅན་མ་ལུས་རྣམས། །རྡོ་རྗེ་འཛིན་པའི་ས་ལ་འགོད་པར་ཤོག །གཉིས་པ་ནི། བྷྱོཿ རྡོ་རྗེ་འཆང་ཡུམ་བདེ་བ་ཆེན་མོ་ནི། །ཆར་སྤྲིན་དང་མཚུངས་འཇིག་པའི་སྐུ་མདོག་ཅན། །དྲག་ཤུལ་ག་ཞས་གདུག་པའི་སྙིང་འབྱིན་པའི། །རྣོ་དཀར་ཆེ་བ་གངས་རི་ལྟ་བུར་གཟེངས། །གདུག་པ་དུས་མཐའི་མེ་ལྟར་འབར་བ་ཡི། །སྨིན་མ་འཁྱོགས་པོས་བདུད་རིགས་གཞོབ་ཏུ་བསྲེག །ལོག་འདྲེན་སྙིང་ཆུ་ཚོམ་གྱི་རྒྱུན་ལས་འབབ། །ཨ་ལ་ཧ་ལའི་གད་རྒྱང་ས་གསུམ་གཡོ། །སྟོང་ཁམས་ཀུན་ཁྱབ་ཕྲིན་ལས་རོལ་པ་འཛིན། །ཅིར་ཡང་འཆར་བ་མ་མ་རུ་ལུའི་སྒྲས། །གསང་བ་མཁའ་འགྲོ་མ་ཚོགས་དབང་དུ་བསྡུད། །དུར་ཁྲོད་ཆེན་པོ་བརྒྱད་ལ་མངའ་མཛད་མ། །ཕྱག་གཡས་སྲ་བརྟན་རྡོ་རྗེའི་ཁྲབ་ཆེན་ཀྱང་། །བརྟན་པ་འཕྲོག་སྟེ་དུམ་བུར་འདྲལ་བ་ཡི། །མཐོན་མཐིང་ནམ་མཁའི་མདངས་འཚེར་རལ་གྲི་ནི། །རྣོ་ངར་ལྡན་པས་དམ་ལོག་མགོ་བོ་གཅོད། །ལྷ་མིན་ཁྲག་གིས་བཀང་བའི་མི་ཐོད་ནི། །དབང་ཕྱུག་མྱོས་པས་དཀའ་ཐུབ་བརྩོན་པ་བཞིན། །སྲིན་ཞལ་ཉེར་རླབ་ཆུ་གཏེར་འཁྲུགས་པ་ལྟར། །རྣམ་པར་སྡུད་པའི་དབྱིངས་སུ་ལེགས་པར་སྟོབས། །དཔལ་ལྡན་རྨད་བྱུང་འགྲོ་བའི་མ་མ་ནི། །སྐུ་གསུམ་རྒྱལ་བའི་བསྟན་པ་ཀུན་སྲུང་ཞིང་། །དམ་ཚིག་ལྡན་པ་ཀུན་གྱིས་མགོན་གྱུར་པ། །དབྱིངས་ཀྱི་མཁའ་འགྲོ་ཡུམ་ལ་ཕྱག་འཚལ་བསྟོད། །བྷྱོཿ དབྱིངས་ཕྱུག་དཔལ་ལྡན་རྡོ་རྗེ་མཁའ་འགྲོ་མ། །འགྲོ་བ་ཐུགས་རྗེས་སྐྱོངས་ཕྱིར་ཡུམ་གྱིས་ཚུལ། །མཚན་མའི་སྐྱོན་སྤངས་སྐུ་མདོག་ནག་མོར་སྟོན། །དྲག་ཤུལ་སྤྱོད་ཕྱིར་གཅེར་བུ་སྲིན་མོའི་ཚུལ། །ལྷ་ཆེན་འདུལ་ཕྱིར་སྡང་མིག་རལ་པ་བསིགས། །སྐྱེ་ཤི་རྩད་གཅོད་ཟ་བྱེད་མཆེ་བ་གཙིགས། །འཁོར་བ་ལྗགས་ལ་འདྲིལ་ཕྱིར་རྐན་སྒྲ་རྡེབ། །དུག་ལྔ་སེལ་ཕྱིར་རྨ་བྱའི་མདངས་ཀྱིས་བརྒྱན། །བྱང་ཆུབ་སེམས་ལྡན་སྤྱི་གཙུག་ཟླ་རྒྱས་གསལ། །དམ་ཚིག་བྱ་ར་མཛད་ཕྱིར་སྤྱན་རྩ་དམར། །ལྷ་མིན་གཡུལ་ངོ་བཟློག་ཕྱིར་མདུང་དང་རུ་མཚོན་བསྣམས། །སྲིད་གསུམ་བསྒྲལ་ཕྱིར་ཤེས་རབ་རལ་གྲི་བསྣམས། །དགྲ་བགེགས་འདུལ་ཕྱིར་ནད་ཀྱི་རྐྱལ་པ་ཐོགས། །དབུལ་བ་སེལ་ཕྱིར་ནེའུ་ལེའི་རྐྱལ་བུ་བསྣམས། །འཆི་བདག་བཟློག་ཕྱིར་སྙན་གཡས་སེང་གེས་བརྒྱན། །གདུག་པ་འདུལ་ཕྱིར་ཀླུ་དབང་སྙན་ཆས་བརྒྱན། །འབྱུང་པོ་འདུལ་ཕྱིར་ཐོད་པའི་ཕྲེང་བས་བརྒྱན། །རྣལ་འབྱོར་སྐྱོབས་ཕྱིར་དྲིལ་ཆུང་སྒྲ་སྙན་སྒྲོགས། །ཀླུ་ཆེན་འདུལ་ཕྱིར་སྦྲུལ་གྱི་སྐ་རགས་བཅིངས། །བདུད་དཔུང་དཔའ་བསྐུམ་ཞིང་ལྤགས་གོས་སུ་གྱོན། །ཐེག་ཆེན་དོན་ལྡན་གླང་ཆེན་ཀོ་རློན་གསོལ། །དཔའ་གཏུམ་བསྟན་ཕྱིར་སྟག་གི་ཤམ་ཐབས་ཅན། །སྨོན་ལམ་མི་དོར་སྐུ་སྨད་རེ་ལྡེས་དཀྲིས། །མཛེས་པར་བྱ་ཕྱིར་རྐང་སྒྲོགས་ལྕགས་ལས་བྱས། །ཉོན་མོངས་མཚོ་སྐེམ་ལྟེ་བར་ཉི་མས་བརྒྱན། །སྲིན་པོ་འདུལ་ཕྱིར་ཆིབས་སུ་བོང་བུ་བཅིབ། །སྟོང་གསུམ་བགྲོད་ཕྱིར་འཚུབས་མའི་ཀློང་ན་བཞུགས། །དུར་ཁྲོད་གནས་འདིར་འཁོར་གཡོག་མང་པོས་བསྐོར། །འཁོར་བ་འཇིགས་ཚེ་སྡུག་བསྔལ་སེམས་ཅན་རྣམས། །ལྷ་མོ་ཁྱེད་ཀྱི་ཞལ་དུ་ཐམས་ཅད་ཞུགས་གྱུར་ཏེ། །བརྩེ་ལྡན་ཐུགས་རྗེས་འགྲོ་ཀུན་སྐྱོབས་མཛོད་ཅིང་། །བྱང་ཆུབ་སྤྱོད་པའི་ཐར་ལམ་གསལ་མཛད་པ། །ལྷ་མོ་མཐུ་ཆེན་ཁྱོད་ལ་ཕྱག་འཚལ་བསྟོད། །བྷྱོཿ འཆི་མེད་ལམ་ཀུན་གང་བའི་ཆུ་འཛིན་ནི། །དཔག་ཡས་ཕྱོགས་འཁོར་ཀུན་ཁྱབ་དྲི་བཞོན་བཅས། །མངོན་པར་མཛེས་པའི་དབུས་སུ་རྒྱུ་བ་ལ། །ཆུ་སྲིན་མགོ་བོས་བརྒྱན་པའི་ཕྲ་མེན་མས། །བ་སུ་ཏ་ཡི་ཞགས་པས་དམ་བཞག་པ། །རླུང་གི་ཤུགས་འཆང་མགྲིན་བཟང་གྭ་པའི་སྟེང་། །བསིལ་ཟེར་བདུད་རྩིར་ཉིལ་བའི་ག་བུར་དབང་། །རྟ་བདུན་མོ་ཡི་དབལ་འཆང་འོད་བརྒྱ་པ། །སྐུ་ཡི་གནས་ནས་མུན་པའི་མདངས་འཕྲོག་ཅིང་། །ཡ་མཚན་པད་དཀར་བཞད་པའི་དཔལ་འཛིན་ལྷ། །ལྷ་མོ་ཁྱེད་ལ་དྭངས་བའི་སེམས་ཀྱིས་སུ། །ཇི་སྲིད་དྲན་པ་དེ་སྲིད་མདུན་གྱི་མཁའ། །རབ་འབར་མེ་རླུང་ལྡིང་གུར་དབུས་ན་བཞུགས། །སྣ་ལྔའི་འཇའ་གུར་འོད་ཀྱི་ཟིལ་པ་ཅན། །ཕུན་ཚོགས་རྐང་འཐུང་འཁྱིལ་བའི་ལྗོན་བཟང་གི། །འདབ་མ་ལས་སྐྱེས་ཁུ་བཅུད་རོ་བརྒྱ་པ། །ༀ་ཨཱཿཧཱུྃ་གིས་བྱིན་གྱིས་རླབས་ཏེ་འབུལ། །ལྷ་ལམ་མུན་པས་སྦགས་འདྲ་ཁྲོས་པའི་སྐུར། །སྤྱན་ཟླུམ་ནོར་བུ་གསུམ་འཁྱིལ་རྣོ་དཀར་ཚེམ། །གངས་རི་ལྟར་མཛེས་གློག་དམར་ལྗགས་སུ་འདྲིལ། །ལྷ་མིན་ཐོད་པའི་སྣོད་འཆང་ལྷ་དམག་རྫོང་། །ལྟོ་རླུང་ཆུ་ཁུར་འཁྲིགས་པའི་དབུས་ནས་ཐོན། །ཐུགས་རྗེས་ལི་ཤིའི་ལྡིང་ཁང་བསུང་ཞིམ་འདི། །བསྟན་པ་འཛིན་པར་མཆོད་པའི་བདུག་སྤྲིན་ལགས། །གནམ་སྔོན་དུམ་བུ་བླངས་འདྲའི་མཚོན་ཆ་དང་། །རིན་ཆེན་གཏེར་སྣོད་འཛིན་པའི་དཔལ་ལྷ་མོ། །འཁོར་བ་ཁྲག་གི་རྒྱ་མཚོར་རྟག་འགྲོ་ཡང་། །ཞི་བ་མྱ་ངན་འདས་ལ་ཕྱིར་གཟིགས་པའི། །འདོད་འབྱུང་དཔག་བསམ་ཡལ་ག་དུད་པ་ནི། །བདེ་བ་ལྷན་སྐྱེས་ཕང་ཕུང་འབྲས་བུའི་ཁུར། །རྣམ་པར་རྒྱས་འཛིན་རྣམ་དག་ལམ་བཟང་རོས། །སྐལ་པ་སྦོམ་པོའི་སྐལ་ལྡན་མཐའ་དག་ཀུན། །རྒྱལ་བའི་བསྟན་པ་ཆུ་གཏེར་ཆེན་པོ་ནི། །མང་ཐོས་གྲུ་བོ་ཡོངས་འཛིན་དེད་དཔོན་གྱིས། །དྲིན་ལས་བརྒལ་ཏེ་ངེས་གསང་རྡོ་རྗེའི་ཐེག །རྒྱུད་དོན་རིན་ཆེན་དབང་རྒྱལ་ཉེར་ཐོབ་ཅིང་། །བཤད་སྒྲུབ་ཀླུང་བརྒྱ་འདུ་བའི་མ་དྲོས་པ། །བསླབ་གསུམ་གདེངས་ཀ་རིམ་གཉིས་འོད་འཕྲོ་ཞིང་། །དགེ་འདུན་ཀླུ་དབང་ཚོགས་ཀྱིས་ཉེར་བསྟེན་པ། །བསྟན་པ་རྒྱ་མཚོའི་དཔལ་ཡོན་བརྒལ་བར་མཛོད། །ཤཱཀྱའི་བསྟན་པའི་བང་མཛོད་འགྲོ་འདིའི་གཉེན། །རྒུད་པའི་མི་མཐུན་སྲུང་མ་ཁྱེད་གཉེར་ཁ། །སྔོན་སྨོན་རྟེན་འབྲེལ་མཐུ་ཡིས་རབ་བསྐོས་ཕྱིར། །བསམ་པའི་རེ་ཀུན་བསྒྲུབ་མཛད་མ་ལ་བསྟོད། གསུམ་པ་རྗེས་ལ། བསྙེན་པ་འབུམ་བསྟོད་བསྐང་གསོལ་དང་། །བསྐུལ་དང་གཏོར་མ་འདེགས་མཐའ་བསྡུད། །དང་པོ། བདག་ཡི་དམ་དུ་གསལ་བའི་ཐུགས་སྲོག་གི་འོད་ཀྱིས་མ་མོའི་ཐུགས་ཀར་ཕོག་ཐུགས་རྒྱུད་བསྐུར་བར་གྱུར། གང་ནོན་ཡི་དམ་གྱི་རྩ་སྔགས་ཅུང་ཟད་བཟླས། མ་མོའི་ཐུགས་ཀར་ཧ་ལས་ལྷ་མོ་ཀའུ་རི་མ་སྔོན་མོ་གཡས་ཞིང་དབྱུག་གཡོན་ཐོད་ཁྲག་བསྣམས་པ། དེའི་ཐུགས་ཀར་ཟླ་བའི་སྟེང་དུ་རལ་གྲི། དེའི་སོ་ཡུའི་མཚམས་ན་མ་ནག་པོ་གཅིག་ལ་ཡི་གེ་བཅོ་ལྔས་ཡོངས་སུ་བསྐོར་བ་བདག་གི་ཐུགས་ཀ་ནས་འོད་ཟེར་འཕྲོས་སྔགས་ཕྲེང་ལ་ཕོག །དེ་ལས་འོད་ཟེར་འཕྲོས། ཕྱོགས་བཅུ་དུས་བཞིའི་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་བསྡུས། སླར་ཡང་དེ་ལས་འོད་ཟེར་འཕྲོས། བསྟན་པ་ལ་སྡང་བའི་དགྲ་བགེགས་ཐམས་ཅད་ཚར་བཅད། ཡེ་ཤེས་དང་འཇིག་རྟེན་གྱི་མ་མོ་སྣང་སྲིད་དྲེགས་པའི་ཚོགས་ཐམས་ཅད་ཀྱི་སྲོག་གི་སྙིང་པོ་རང་དབང་མེད་པར་བསྡུས། མ་མོའི་ཐུགས་སྲོག་ལ་ཐིམ། གཟི་བྱིན་མཆོག་ཏུ་འབར་བའི་འོད་ཀྱིས་ཕྲིན་ལས་རྣམ་པ་བཞི་ཅིར་ཡང་བསྒྲུབ་བསམ་ལ། ༀ་རུ་རུ་རོ་རུ་ཙ་པ་ལ་ཨ་ཤུགྴེ་ཧཱུྃ་བྷྱོཿཛ་ཛཿ ཞེས་རྡོ་རྗེ་ནག་མོ་དབང་ཕྱུག་མའི་རྒྱུད་ཀྱི་ལུགས་ཀཿཐོག་པས་བཞེད་པའི་སྔགས་བཅོ་ལྔ་མ་དང་། ཡང་འཕགས་མ་ལྷ་མོ་ནག་མོའི་རྒྱུད་ལས། ༀ་རུ་རུ་རོ་རུ་ཙ་པ་ལ་ཨ་ཤུགྴེ་མ་ཧཱུྃ་མ་བྷྱོ་ཛ་ཛ། ཞེས་བཅུ་བདུན་གསུངས། མཿབྷྱོཿམ་མ་བྷྱོཿ བྷྱོ་བྷྱོ་མཿ མ་བྷྱོཿམ། བྷྱོ་མ་མཿབྷྱོཿམ། ཞེས་བྷྱོཿབདུན་མ་དགུ་མའི་མ་མོའི་སྤྱི་དྲིལ་བསྙེན་མཐར། མ་མོའི་ཐུགས་ཀ་ནས་འོད་ཀྱི་ཕྲེང་བའི་རང་བཞིན་སྔགས་ཀྱི་འཁོར་ལོ་གཉིས་པ་ཞིག་བྱུང་ནས་རང་གི་ཐུགས་ཀར་ཐིམ་པར་བསམ་ནས་ཅུང་ཟད་བཟླས་སོ། །སྔགས་དོན་ནི། ༀ་ནི་ཡེ་ཤེས་ལྔ་ལྡན་ལ། །རུ་རུ་ཀོ་རི་རོ་རུ་ནི། །སེང་ཧ་ཙ་པ་ལ་རལ་གཅིག །ཨ་ཤུག་གསང་བའི་མ་བདུན་དང་། །མ་ཧཱུྃ་མ་བྷྱོ་ཛ་ཛཿནི། །སྒོ་མ་འཁོར་གཡོགས་བཅས་པའོ། །ཞེས་ངེས་པ་བསྐྱེད། གཉིས་པ་ནི། སྔགས་བཅོ་ལྔ་པའི་མཐར། ས་པཱ་རི་ཝ་ར་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། བཏགས་པ་ལན་བདུན་ནམ་གསུམ་གྱིས་འབུལ། ཤྲཱི་མ་ཧཱ་ཀཱ་ལི་དེ་ཝི་ཁྲག་འཐུང་གི་རྒྱལ་མོ། དུར་ཁྲོད་ཉུལ་མ། ཆོས་འཁོར་དང་བས་མཐའ་དང་སྡེ་དགོན་གཉན་པོའི་སྲུང་མ་དམ་པ། མིང་བརྒྱ་མ་ལ་མཚན་སྟོང་མ། རྡོ་རྗེ་འཛིན་པའི་བཀའ་ལ་སྡོད་ཅིང་། གསུང་གི་བྲན་བྱེད་པ། རྣལ་འབྱོར་པའི་མ་མ་གཅིག་པུ། རབ་འཇིགས་སྐུ་ཡི་མ་མོ། གཏུམ་རྔམས་གསུང་གི་མ་མོ། སྤྲུལ་པ་ཐུགས་ཀྱི་མ་མོ། མི་ཟད་ཡོན་ཏན་གྱི་མ་མོ། དྲག་ཤུལ་ཕྲིན་ལས་ཀྱི་མ་མོ། འཁོར་མ་སྲིང་རྒྱ་མཚོའི་ཚོགས་དང་བཅས་པ་རྣམས་ཀྱིས་དམ་རྫས་བཀའ་ཡི་གཏོར་མ་རྒྱན་གྱིས་མཆོད་པ་འདི་བཞེས་ལ། རྒྱལ་བའི་བསྟན་པ་དང་། བསྟན་འཛིན་གྱི་དབུ་འཕང་བསྟོད་ལ། འཇིག་རྟེན་གྱི་ཕན་བདེ་སྤེལ། རྣལ་འབྱོར་པ་བདག་ཅག་ལ། སྐྱེ་བོ་སྡང་བར་བྱེད་པའི་དགྲ་ཐུལ། འབྱུང་པོ་གནོད་པར་བྱེད་པའི་བགེགས་ཆོམས། འགལ་རྐྱེན་བར་དུ་གཅོད་པ་ཕྱིར་བཟློག ། བསྒྲལ་བའི་ཞིང་རྣམས་ཐལ་བའི་རྡུལ་དུ་བརླག་སྟེ། རྒྱུད་བསྐྱེད་རྫོགས་རྫོགས་པ་ཆེན་པོའི་བཤད་སྒྲུབ་འཕེལ་བ་དང་། ལམ་རིམ་པ་གཉིས་གསང་བའི་དཀྱིལ་འཁོར་འདིར་འདུས་པ་རྣམས་ལ། མཐུན་རྐྱེན་ལེགས་ཚོགས་སྨོན་པའི་དོན་ཐམས་ཅད་མྱུར་བ་ཉིད་དུ་འགྲུབ་པའི་ཕྲིན་ལས་རྒྱ་ཆེན་པོ་མཛོད་ཅིག །གསུམ་པ་ནི། བྷྱོཿ སྐྱེ་མེད་རྣམ་དག་མཁའ་དབྱིངས་དག་པ་ནས། །སྣང་ལ་མ་འགགས་སྣ་ཚོགས་གཟུགས་སུ་ཤར། །སྐྱེ་བའི་ཆོ་འཕྲུལ་འབར་བའི་སྐུར་སྟོན་པ། །ཧཱུྃ་ལས་བསྐྱེད་པའི་དཔལ་ཆེན་ཧེ་རུ་ཀ །ཡེ་ཤེས་ཐུགས་ཀྱི་ཁྱད་པར་ཆེན་པོ་ལས། །དུར་ཁྲོད་དབྱིངས་ནས་ཕྱག་རྒྱའི་སྐུར་གསལ་བར། །མདོག་བཟང་ནག་མོ་རལ་པའི་ཟར་བུས་བརྒྱན། །རྒྱན་དང་ཆ་ལུགས་སྣ་ཚོགས་འཇིགས་པས་བརྗིད། །རླུང་འཚུབ་ནང་ན་སྐུ་ཡི་ཕྱག་རྒྱ་གསལ། །རླུང་ནག་ནང་ནས་རལ་གྲི་ཕྱུང་བའི་ཚུལ། །དགྲ་བོ་གང་ལ་བྱ་བ་རྩད་གཅོད་མ། །གཡོན་ན་ནེའུ་ལེའི་རྐྱལ་པ་ཐོགས་པ་ནི། །ལོག་ཉམས་མི་མགོ་བཅད་པ་སྦེད་པའི་སྣོད། །སྔོན་ཁྱོད་དམོད་པའི་མཚོན་འཆང་ཆེན་མོ་ལ། །གསང་བ་པས་ཞུས་བླ་མེད་ཧེ་རུ་ཀས ། །སྤྲུལ་པའི་དཀྱིལ་འཁོར་ཆེན་པོར་ལེགས་བཏུལ་ནས། །སྦོམ་པོ་དབང་མོ་ནས་བཟུང་ཕྱི་ནང་གསང་། །དབང་བསྐུར་ས་བརྒྱད་ནོན་པའི་སེམས་མར་གྱུར། །ཐིག་ལེ་ཆོས་ཀྱི་སྐུ་ལ་མཉམ་གནས་ཀྱང་། །སྣང་སྲིད་འབྱུང་ལྔ་བྷ་ག་ཡུམ་ལྔའི་ཀློང་། །སྤྲུལ་སྐུས་འདོད་པ་ཁམས་ཀྱི་དབང་ཕྱུག་མ། །སངས་རྒྱས་བསྟན་ལ་གནོད་པ་ཟ་སྐལ་དུ། །གཏད་ནས་རྣམ་བཞིའི་འཁོར་སྲུངས་བཀའ་བསྒོས་པ། །བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཕྲིན་ལས་རྒྱ་མཚོ་གྲུབ་པ་ཁྱོད་ལ་བསྟོད། །བྷྱོཿ ཡང་དག་དོན་ལྡན་ཡེ་ཤེས་ལྷ་མོ་ནི། །བསྐལ་མང་སྔོན་ནས་རྒྱལ་བའི་ཞལ་མཐོང་བ། །ངང་ཚུལ་ཆོ་རོལ་གཅིག་ཏུ་མ་འཚལ་ཡང་། །ལྷ་ཆེན་སྲས་མོ་སྲིན་པོའི་ཆུང་མར་གྱུར། །ལྷག་པའི་མཐུ་ཅན་གཤིན་རྗེའི་བུ་མོ་ལ། །རོ་ཐང་ནག་པོར་ཕྱག་ན་རྡོ་རྗེ་ཡིས། །རྟ་མགྲིན་གསང་དབང་སྤྱི་བོར་རྒྱས་བཏབ་ཅིང་། །ལུས་ངག་ཡིད་ལ་ཧེ་རུ་ཀ་དཔལ་དང་། །ཐུགས་ཀྱི་དཔལ་བེའུ་རིགས་ལྔའི་སངས་རྒྱས་ལྔ། །ཕྲ་མེན་བཅུ་དྲུག་ལ་སོགས་རྒྱན་རྣམས་དང་། །རྡོ་རྗེ་ཕོ་ཉ་དྲུག་ཅུ་རྩ་བཞི་ནི། །འཁོར་དུ་དབང་བསྐུར་མཐུ་རྩལ་ཕ་རོལ་སོན། །པདྨ་དམ་པའི་དཔལ་གྱི་སངས་རྒྱས་སུ། །རྒྱལ་བས་ལུང་བསྟན་ད་ལྟ་ཤེས་སྒྲིབ་སྦྱོང་། །སྲིད་གསུམ་འགྲན་ཟླ་མེད་ལ་ཕྱག་འཚལ་བསྟོད། །བྷྱོཿ ལྷ་ཆེན་སྲས་མོ་མ་ཕམ་རོ་ལངས་མ། །ཀླུ་མོ་གཞོག་སྐམ་ཕུར་ལྷ་ཆུ་སྲིན་གདོང་། །ཁྱོད་ཀྱི་ཁོལ་མོ་རེ་མཱ་ཏི་ཞེས་གྲགས། །བསྟན་སྲུང་བྲན་དུ་གྱུར་ལ་ཕྱག་འཚལ་བསྟོད། །བྷྱོཿ ནམ་མཁའ་སྟོང་ལ་དབང་བསྒྱུར་ཞིང་། །འགྲོ་བའི་སྲོག་ལ་མངའ་མཛད་མ། །མ་གསུམ་སྲིང་ལ་སོགས་པ་ཡིས། །བྱེ་བ་ཕྲག་མང་སྤྲུལ་ལ་བསྟོད། །དབྱར་ཞིང་ནམ་མཁའི་ཁམས་ན་རྒྱུག །འབྲུག་དང་གློག་གི་བདག་པོ་མཛད། །ལྕེ་དང་བུ་ཡུག་འབེབ་མཛད་མ། །གློག་མ་སྤྲིན་ལ་ཕྱག་འཚལ་ལོ། །དཔྱིད་ཅིང་ཀུན་ལ་བྲོད་མཛོད་མ། །ཆུ་བོ་ཀུན་གྱི་སྣ་འདྲེན་མ། །ཆུ་བོ་ཀུན་གྱི་གཞུང་འབྱམས་མ། །ནག་མོ་གཙོ་ལ་ཕྱག་འཚལ་ལོ། །སྟོན་ཞིང་འབྲས་བུ་སྨིན་མཛད་མ། །སྤང་པོ་དེ་ནི་ཁ་སེར་ལ། །འབྲུ་དང་ལོ་ཡི་བཅུད་ལེན་མ། །མི་རྣམས་ཀུན་གྱི་དཔལ་འཕྲོག་མ། །གློག་འགྱུ་མ་ལ་ཕྱག་འཚལ་ལོ། །དགུན་ཞིང་རྒྱ་མཚོའི་གཏིང་ན་བཞུགས། །ཁམས་གསུམ་ཀུན་གྱིས་རྒྱས་འདེབས་མ། །ཀླུ་འབྲུག་ཀུན་གྱིས་དགྱེས་སྡེ་མོ། །གློག་འགྱུ་མ་ལ་ཕྱག་འཚལ་ལོ། །བཞི་པ་ནི། ཧཱུྃ་བིགྷྣཱན་ཧ་ཀྲིཏ་ཕཊ྄། ཀྱིས་བསངས། རྃ་ཡྃ་ཁྃ་གིས་སྦྱངས། སྟོང་པའི་ངང་ལས་གནས་ཁང་དུར་ཁྲོད་དྲག་པོའི་བཀོད་པ་འབྱམས་ཀླས་པའི་དབུས་སུ། །འཇིགས་རུང་ཐོད་པ་བསེ་ལྕགས་ཀྱི་མཁར། །དམ་ཉམས་པའི་དགྲ་བོ་བསྒྲལ་བའི་མགོ་རུས་དོན་སྣོད་དབང་ལྔ། ནལ་བུའི་སྙིང་། བྱ་ནག་ཁྱི་ནག །སྲིན་གྱི་བོང་བུ་དམར་གྭ་སོགས། ཕྱི་ནང་གསང་བའི་མཆོད་རྫས། རྟེན་རྫས། སྒྲུབ་རྫས། བསྐང་རྫས། ཁྱད་པར་གྱི་རྫས་རྣམས་ངོ་བོ་ཡེ་ཤེས་ལ། རྣམ་པ་ལྷ་རྫས་ཀྱི་མཆོད་སྤྲིན་མ་ཚངས་བ་མེད་པ། བདེ་སྟོང་ཟག་པ་མེད་པའི་དཔལ་དུ་ཅིར་ཡང་འཆར་ཞིང་རྒྱས་པར་གྱུར་ཅིག །ནམ་མཛོད་ཀྱི་སྔགས་རྒྱས་བྱིན་རླབས་ནས། བྷྱོཿ མ་ཅིག་ལྷ་མོ་གསན་ཅིང་དགོངས་སུ་གསོལ། །སྲིང་གཅིག་ལྷ་མོ་གསན་ཅིང་དགོངས་སུ་གསོལ། །བདུད་ཀྱི་ཡུམ་ལ་གཤིན་རྗེའི་ལྕམ་གཅིག་མ། །ནད་དང་རིམ་གྱི་བདག་མོ་ཆེན་མོ་ཁྱོད། །ཐུགས་དམ་བསྐང་ཕྱིར་གནས་འདིར་གཤེགས་སུ་གསོལ། །ཉམས་ཆག་སེལ་ཕྱིར་གནས་འདིར་གཤེགས་སུ་གསོལ། །ཕྲིན་ལས་སྒྲུབ་ཕྱིར་གནས་འདིར་གཤེགས་སུ་གསོལ། །ཧཱུྃ། བསྐང་ངོ་བསྐལ་པའི་ཐུགས་དམ་བསྐང་། །འབོད་པའི་དམ་རྫས་ཡིན་པའི་ཕྱིར། །ཞིང་ཆེན་གཡབ་མོས་ཐུགས་དམ་བསྐང་། །རང་བཞིན་གནས་ནས་སྤྱན་འདྲེན་ཕྱིར། །མི་རྐང་གླིང་བུའི་ཐུགས་དམ་བསྐང་། །མཆོད་པའི་མཐུན་རྫས་ལགས་པས་ན། །རོལ་མོ་སྒྲ་ཡིས་ཐུགས་དམ་བསྐང་། །དམ་ཚིག་གཉན་པོ་བསྲེ་བའི་ཕྱིར། །བདུད་རྩི་སྨན་གྱི་ཐུགས་དམ་བསྐང་། །བརྟེན་པའི་དམ་རྫས་ཡིན་པའི་ཕྱིར། །མི་དབང་སྙིང་གིས་ཐུགས་དམ་བསྐང་། །འཆི་ཁའི་མཚལ་ཏིག་དམར་པོ་དང་། །རྡོ་སོལ་མེ་ཡིས་ཐུགས་དམ་བསྐང་། །དགོས་པའི་དམ་རྫས་ཡིན་པའི་ཕྱིར། །ཤིང་ལོ་རླུང་ཁྱེར་སར་མ་ལྷུང་། །དགྱེས་པའི་དམ་རྫས་ཡིན་པའི་ཕྱིར། །མཆོད་ཡོན་ཞབས་བསིལ་མེ་ཏོག་དང་། །བདུག་སྤོས་མར་མེ་དྲི་ཞལ་ཟས། །རོལ་མོ་ཕྱི་ཡི་མཆོད་པ་དང་། གཟུགས་སྒྲ་དྲི་རོ་རེག་ཆོས་དང་། །མི་རྟ་གླང་ཁྱི་བྱ་ཤ་ལྔ། །བྱང་སེམས་རྒྱུད་པ་རཀྟ་སོགས། །བདུད་རྩི་གསང་མཆོད་ཐུགས་དམ་བསྐང་། །མགྲིན་པའི་གསང་ནས་སྦྱོར་བའི་ཕྱིར། །ར་བྱ་དགྲ་ཁྲག་ཐུགས་དམ་བསྐང་། །ལྗགས་ཀྱི་གཟའ་བའི་དམ་རྫས་སླད། །བཤོས་གཙང་ཆང་ཁུར་སྒོག་ཙོང་དང་། །དགྲ་བགེགས་ཤ་ཁྲག་ནལ་བུའི་ཤ། །ཤ་རུས་ཚོགས་ཀྱིས་ཐུགས་དམ་བསྐང་། །སྒྲུབ་པའི་དམ་རྫས་ཡིན་པའི་ཕྱིར། །རྟག་གཏོར་ཆེན་པོས་ཐུགས་དམ་བསྐང་། །མ་དང་མི་འབྲལ་འགྲོགས་པའི་ཕྱིར། །རྒྱུན་གཏོར་ཆེན་པོས་ཐུགས་དམ་བསྐང་། །ཕྱི་ནང་གསང་རྟེན་ཡིན་པའི་ཕྱིར། །བོང་བུ་གྭ་དམར་ལུག་ནག་དང་། །དེ་མོ་རྨ་བྱ་དར་ནག་པོ། །བྷནྫ་རྨ་བྱ་ནལ་བུ་ཡི། །རྒྱལ་མཚན་ཨ་མྲྀ་ཏ་མྱོས་བྱེད། །གྲི་ནལ་སྙིང་གིས་ཐུགས་དམ་བསྐང་། །སྐུ་གསུང་ཐུགས་རྫས་ཡིན་པའི་ཕྱིར། །བྲིས་ལུགས་སྐུ་དང་རྔ་དབྱངས་དང་། །དྲིལ་བུ་ཅང་ཏེའུ་བསྐུལ་བའི་སྒྲ། །ཛབ྄་དང་ཏིང་འཛིན་ཐུགས་དམ་བསྐང་། །འདོད་ཁམས་གཙོ་མོ་ཆེན་པོ་ལ། །རྒྱལ་སྲིད་བདུན་དང་རྫས་རྟགས་བརྒྱད། །རི་རབ་གླིང་བཞི་ཉི་ཟླ་དང་། །གོ་ཁྲབ་མཚོན་ཆའི་རིགས་ཐམས་ཅད། །སྐུ་འབག་ཕོད་ཀ་རུས་རྒྱན་ཞྭ། །ཕྲེང་བ་དར་སྣ་དཔག་བསམ་ཤིང་། །ཐོད་པ་ལྕགས་བསེ་རིན་ཆེན་ཁང་། །ལྕེ་སྤྱང་རི་དྭགས་གཡུང་དྭགས་དང་། །ཆུ་གནས་དབུགས་རྐྱལ་མདའ་དར་ཤ །ཁྲག་ནད་བསྐྱིལ་བའི་དུག་རྫིང་མཚོ། །ནད་རྐྱལ་ཁྲམ་ཤིང་དཔག་བསམ་ཤིང་། །ཚོན་གྱི་གྲུ་གུ་སྦྲུལ་ཞགས་དང་། །རླུང་འཚུབས་འཇའ་གུར་བྱང་དམར་བམ། །མེ་ལོང་སྒྲ་སྦྱར་ཏིང་ཏིང་ཤག །སྒ་དང་ལན་ཚ་སྤོད་ཀྱི་རིགས། །ཚིལ་གསུར་རྣམ་བྱ་མི་ནག་དང་། །ཤང་ཤང་འཁྲུང་འཁྲུང་ལ་སོགས་བྱ། །འཇོལ་བེར་ནག་པོ་རྣ་རྒྱན་སྦྲུལ། །སེང་གེ་དང་ནི་གསེར་འཁོར་དྲིལ། །ཆུ་སྲིན་ལྤགས་དང་ཞིང་ལྤགས་དང་། །གླང་ཀོ་སྟག་ཤམ་རེ་ལྡེ་དང་། །དུང་ཆེན་དམར་བསྐྱིལ་རལ་གྲི་དང་། །ནེའུ་ལེ་རྐྱལ་ལ་སོགས་པ། །མཐུན་རྫས་ཀུན་གྱིས་ཐུགས་དམ་བསྐང་། །ཧཱུྃ། གཞན་ཡང་ལྷ་གཡག་ངར་སྒྲས་སྟོང་གསུམ་ཁེང་། །གནམ་ལྕགས་རྡོ་རྗེའི་རྭ་རྩེས་དགྲ་བོའི་སྙིང་། །སྙིང་རྗེར་འདྲལ་བ་གདུག་པའི་འགྱིང་ཞོལ་ཅན། །ལྕེ་དམར་ནམ་མཁའི་ཁམས་སུ་ལྷབ་ལྷབ་འདིས། །རེ་ཏི་མ་གསུམ་མ་བདུན་སྲིང་གདོང་བཞི། །དབང་ཕྱུག་མ་སྟོང་བྱེ་འབུམ་སྤྲུལ་པའི་འཁོར། །ཕྱི་རོལ་དུར་ཁྲོད་རྒྱ་མཚོ་ལ་གནས་པའི། །སྣང་སྲིད་མ་མོའི་ཚོགས་ཀྱི་ཐུགས་དམ་བསྐང་། །ཐུགས་དམ་གཉན་པོ་འདི་བསྐང་ནས། །ཉམས་ཆག་གྱུར་ན་བཟོད་པར་གསོལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཕྲིན་ལས་དྲག་ཤུལ་མཐུ་མ་ཆུང་། །བཅོལ་པའི་ཕྲིན་ལས་གྲུབ་པར་མཛོད། །ལྔ་པ་ནི། བྷྱོཿ ཀུན་ཏུ་བཟང་མོ་དབྱིངས་ཡུམ་ཕ་རོལ་ཕྱིན། །བདེ་བ་ཆེན་པོའི་དགའ་མ་རྣལ་འབྱོར་མ། །གང་འདུལ་སྤྲུལ་པའི་ཆོ་རོལ་དཔལ་ལྷ་མོ། །སྐྱེ་མེད་ཀློང་ནས་གསན་ཅིང་དགོངས་སུ་གསོལ། །སྣང་བ་འཁྲུལ་པ་རྟག་འཁྱམས་མཁའ་མཉམ་འགྲོ། །སྲིད་མཚོར་ཐོག་མ་མེད་ནས་དྲིན་ཆེ་བ། །དེ་ཀུན་གཏན་དང་འཕྲལ་བདེ་ཀུན་གྱི་སྒོ། །ཐུབ་བསྟན་རིན་ཆེན་མཆོག་ལས་གཞན་ཡོད་མིན། །འོན་ཀྱང་ད་དུས་སྙིགས་མའི་མཐར་ལྷུང་བས། །རྒྱལ་གསུངས་འཆད་དང་སྒྲུབ་པ་ཆེས་ཉམས་ཤིང་། །ལྷག་པར་རྡོ་རྗེའི་ཐེག་དང་བླ་མེད་བསྟན། །ཤིན་ཏུ་འཆལ་བའི་གླིང་འདིའི་བདེ་སྐྱིད་ཟད། །ཁྱད་པར་གང་ལ་བརྟེན་ན་ཚེ་གཅིག་གིས། །མིག་འཕྲུལ་ལྟ་བུར་འཇའ་ལུས་ལ་བགྲོད་ཐབས། །དཔལ་ལྡན་མདོ་དང་སྙིང་པོའི་རྒྱུད་ཀྱི་རྒྱལ། །འཛིན་པའི་བསྟན་འཛིན་སྐྱེས་བུ་མ་དམིགས་སམ། །མཆིས་ཀྱང་ཐོས་བསམ་སློབ་སྒྲུབ་ཕྲིན་ལས་ཚོགས། །རིམ་པར་འགགས་ལས་དངོས་གྲུབ་གཉིས་ཀྱི་དཔལ། །དགུན་གྱི་ཆུ་བཞིན་འབྲི་བ་མ་གཟིགས་སམ། །རྡོ་རྗེ་མཁའ་འགྲོ་ཆེན་མོ་བྲན་དང་གཡོག །སྲིང་གཅིག་བརྩེ་ལྡན་རྡོ་རྗེའི་དམ་ཚིག་ཅན། །རྒྱལ་བསྟན་སྤྱི་དང་ཁྱད་པར་སྙིང་པོའི་བསྟན། །ས་ཡི་སྟེང་འདིར་རྒྱས་པའི་ཕྲིན་ལས་མཛོད། །ལྷག་པར་རྩ་བར་བརྒྱུད་པའི་བླ་མ་དང་། །རྒྱལ་བ་གཉིས་པ་ཀུན་མཁྱེན་རྡོ་རྗེ་འཆང་། །ཀཿཐོག་པ་ཡི་སྤྱན་སྔར་ཁས་བླངས་བཞིན། །བླ་མེད་རྒྱུད་སྡེ་ཀུན་གྱི་སྤྱི་བོ་པ། །གསང་བ་སྙིང་པོའི་བསྟན་པ་འཛིན་པ་ཡི། །རིག་འཛིན་དགེ་སློང་དགེ་འདུན་འདུས་པའི་སྡེ། །ཕྱོགས་མཐར་དར་ཞིང་རྒྱས་པར་མཛད་དུ་གསོལ། །བརྩེ་མ་མཁའ་འགྲོ་ཁྱོད་ལ་མཆོད་པའི་ཚོགས། །རབ་འབྱམས་ནམ་མཁའ་གང་བར་ཡོངས་སྤྲུལ་ཏེ། །གདུག་ཅན་བསྟན་དགྲ་བསྒྲལ་བའི་ཤ་ཁྲག་རུས། །རཀྟའི་ཆུ་གཏེར་ལྦུ་བའི་ཕྲེང་བར་འཕར། །དབང་པོ་རྣམ་ལྔའི་བཀྲག་མདངས་འོད་ཟེར་གསལ། །ཚིལ་ཆེན་བདུག་པའི་དུད་སྤྲིན་མཁའ་ལ་འཁྱིལ། །དམར་གྱི་གཏོར་མ་བྲག་རི་ཁྲོས་པ་འདྲ། །བདུད་རྩི་ཨ་མྲྀ་ཏ་ཡིས་རྦ་རླབས་ཁོལ། །ཟློས་གར་བསྒྱུར་བའི་བྱ་ནག་ཀླད་ལ་ལྡིང་། །མཐུན་རྫས་སྣ་ཚོགས་ཡིད་འོང་ཆར་ལྟར་འཐིབ། །ཅེ་སྤྱང་རྣམས་མང་ངུར་སྐད་གླུ་རུ་ལྡིར། །རྐྱང་ཤེས་གྱི་ལིང་སྨུག་ཆུང་དྲེའུ་བོང་། །དམར་གྭ་སྦྲུལ་དང་རུས་པའི་སྒ་ཆས་བརྒྱན། །དངོས་སུ་འབྱོར་དང་ཡིད་ལས་རབ་བྱུང་བ། །ཕུན་ཚོགས་སྲིད་པའི་དཔལ་ཡོན་ཅི་མཆིས་ཀུན། །ལྷ་མོ་ཁྱེད་ལ་དངས་བའི་སེམས་ཀྱི་འབུལ། །ཉམས་ཆག་མ་ལུས་སོ་སོར་བཤགས་པར་བགྱི། །བདག་ནི་མི་ཤེས་བྱིས་པའི་རང་བཞིན་ཅན། །ཁྱེད་ནི་མཁའ་དབྱིངས་ལྟ་བུའི་རྣལ་འབྱོར་མ། །དེ་ཕྱིར་སྐུ་གསུང་ཐུགས་དང་འགལ་བ་ཆགས། །བསམ་པ་འགྲུབ་པའི་དངོས་གྲུབ་སྩལ་དུ་གསོལ། །དྲུག་པ་བསྐུལ་བ་ནི། བསྐུལ་གཏོར་བཏེགས། འདི་མ་མོ་གསང་རྒྱུད་ལས་འབྱུང་བ་དངོས་སུ་གབ་སྟེ། བྷྱོཿ ཀྱེ་མའོ། །ནད་ཀྱི་བདག་མོ་ཆེན་མོ་སྟེ། །གཤིན་རྗེའི་ལྕམ་གྱི་སྲིང་གཅིག་མོ། །མཛེས་པའི་ལན་བུ་གཅིག་མ་ལ། །རེ་ལྡེ་མཛེས་པས་རྣམ་པར་བརྒྱན། །ཆ་ལུགས་མ་ལུས་འཆང་བྱེད་མ། །རྐང་སྒྲོག་ལྕགས་ཀྱིས་རབ་ཏུ་དཀྲིས། །ཕྱིར་ཕྱོགས་དྲིལ་གྱི་ཕ་ལ་བཅིབ། །འབྱུང་པོ་ཕལ་ཆེར་ཀུན་གྱིས་རྗེ་མོར་མཐོང་། །འབྱུང་པོ་ཕལ་ཆེར་ཤ་ལ་ཆེམ་ཆེམ་ཟ། །མི་ཁྲག་ཆང་གིས་ར་རོར་མྱོས། །དཔག་ཚད་བརྒྱད་ཁྲི་བཞི་སྟོང་ཡང་། །མཚན་མོ་གཅིག་ལ་ཁྱབ་པར་ཉུལ། །སོང་ཞིག་དེ་ནི་དགྲ་རྣམས་ལོང་། །རལ་པ་འབར་བ་སྟོང་ཁམས་མངགས། དགྲ་རྣམས་ཁྲག་གིས་སྐམ་གྱི་རྒྱ་མཚོ་བསྐྱིལ། །དགྲ་རྣམས་ཤ་ནི་ཁྱོད་ཀྱིས་རྒྱག་མིད་ཅིག །འཕང་བས་དགྲ་ཡི་སེམས་འདྲེན་མ། །དུས་ལ་བབས་ཀྱིས་ད་ཟོ་ཞིག །རྣལ་འབྱོར་ཆེན་མོ་ཨ་ལ་ལ། །དབང་ཕྱུག་ཆེན་མོ་ཨ་ལ་ལ། །གཤིན་རྗེའི་ལྕམ་མོ་ཨ་ལ་ལ། །བདུད་ཀྱི་ཡུམ་གཅིག་ཨ་ལ་ལ། །མདོག་བཟང་ནག་མོ་ཨ་ལ་ལ། །མཚན་བཟང་རེ་ཏི་ཨ་ལ་ལ། ཀྱེ་མའོ། །ནད་དང་རིམས་ཀྱི་བདག་མོ་ཆེན་མོ་ཁྱོད། །རེས་འགའ་དྲག་ཏུ་འཁྲོས་པའི་ཚེ། །སྐུ་ནི་མཐིང་ནག་ཆེན་མོ་ལ། །བུད་མེད་ནག་མོས་སྟོང་ཁམས་གང་། །རལ་པ་སིལ་བུ་མུན་ལྟར་གཏིབ། །སྤྱན་ནས་ཁྲག་གི་མཆི་མ་འཛག །ཤངས་ནས་ནད་ཀྱི་དུད་པ་འཐུལ། །ཞལ་ནས་འོ་དོད་དྲག་པོ་འབོད། །གཡས་ནས་ཞིང་གི་གཡང་གཞི་བརྡེབ། །གཡོན་ན་ནད་ཀྱི་རྐྱལ་པ་ཐོགས། །ནད་དང་རིམས་ཀྱི་བདག་མོ་ཆེན་མོ་ཁྱོད། །འདིར་བྱོན་རྒྱན་གྱི་གཏོར་མ་འདི་བཞེས་ལ། །སྡང་བའི་དགྲ་འདི་ད་ལྟ་ཉིད་དུ་སོད། །རྣལ་འབྱོར་བདག་གི་བཅོལ་པའི་ཕྲིན་ལས་མཛོད། །ༀ་ཏདྱ་ཐཱ། རུ་རུ་བེ་ཏི་སྟ་པ་དེ་ས། རུ་རུ་རོ་རུ་བེ་ཏི་སྟ་པ་དེ་སྭཱ་ཧཱ། ཏདྱ་ཐཱ། རུ་རུ་བ་ཏོ་རྟི་བ་དོ་མ། རུ་རུ་རོ་ཏིཥྛ་ས་དོ་ཧཱུྃ་ཛཿ སྙིང་པོ་འདི་གལ་ཆེན་ལན་དྲུག་ཅུ་བརྗོད་གསུངས། གདུང་བའི་ང་རོ་དབྱུང་ནས་གཏོར་མ་དགྲ་ཕྱོགས་སུ་འཕང་ངོ་། །བདུན་པ་ནི། གཏོར་མ་དཔལ་འབར་གྱིས་མཛེས་པ་ལ་དགུག་གཞུག་བྱས་པ་བཏེགས། ༀ་ཨཱཿཧཱུྃ་ཧ་ཧོ་ཧྲཱིས་བྱིན་རླབས། མ་མོའི་སྤྱི་དྲིལ་དང་འཁོར་སྔགས་ཀྱི་མཐར། ས་པཱ་རི་ཝ་ར་ཤ་ཏྲུཾ་མཱཾ་ས་རཀྟ་ཨི་དཾ་བ་ལིཾན་ཏ་ཁ་ཁ་ཁཱ་ཧི་ཁཱ་ཧི། ལན་བདུན་ནམ་ཉེར་གཅིག་གིས་ཕུལ། ཀྱཻ། བཅོམ་ལྡན་ཤཱཀྱ་སེང་གེའི་སྤྱན་སྔ་རུ། །ཁྱོད་ཀྱིས་དེངས་ནས་འཁོར་བ་ཇི་སྲིད་བར། །བསྟན་སྲུངས་འགྲོ་སྐྱོངས་དམ་བཅས་ཕྲིན་ལས་བཞིན། །འདིར་བྱོན་བ་ལིང་རི་ལྟར་སྤུངས་པ་དང་། །མཚོ་ལྟར་བསྐྱིལ་བའི་སྨན་རག་འདི་བཞེས་ཤིག །སྔར་བཅོལ་ལས་ཀྱི་བཏང་རག་གཉེན་པོ་དང་། །ད་བཅོལ་ཕྲིན་ལས་གཉེན་པོ་བསྒྲུབ་ཕྱིར་བཞེས། །དཔལ་ལྡན་མ་ལ་ཕྲིན་ལས་བཅོལ་བ་ནི། །ཀ་ཆེན་ལྷ་ཀླུས་བྱས་པའི་གཞལ་མེད་ཁང་། །ཁ་བད་གཡུ་འོད་འཕྲོ་བ་ཐོད་པའི་མཁར། །ག་ཛ་མུ་ཏིག་དོ་ཤལ་བརྒྱན་པའི་མཐར། །ང་རོས་འབོད་པའི་མ་ཚོགས་བྱེ་བ་ཡི། །ཅ་ཅོས་འཇིགས་བསྐྱེད་དྲག་པོའི་དུར་ཁྲོད་གནས། །ཆ་མེད་ཅིར་ཡང་འགྱུར་བ་མུ་ལེའི་མཚོར། །ཇ་རིལ་མགོ་སྐམ་ལྔ་ཡིས་དབུ་བརྒྱན་ཅིང་། །ཉ་རྒྱས་ཉི་ཟླའི་གཙུག་དང་ལྟེ་བའི་རྒྱན། །ཏ་གན་བདེ་བར་རོལ་མཁས་དཔལ་ལྷ་མོ། །ཐ་ཆད་སྡང་དགྲའི་སྙིང་གཟེར་མཆེ་བ་གཙིགས། །ད་ལྟ་བདག་གི་མདུན་འདིར་གཤེགས་ནས་ཀྱང་། །ན་མོ་སོར་འདབ་གཡོ་བའི་ཕྱག་གིས་བསྐུར། །པ་པཱྃ་སྒྲིབ་པས་ཁེང་བ་ཞིང་བཅུའི་ཁྲག །ཕ་མཐའ་ཡོངས་བྲལ་ཏིང་འཛིན་གྱིས་བརླབས་པའི། །བ་གླང་བྱ་རྟ་ཁྱི་སོགས་ཤ་ལྔ་དང་། །མ་ད་ན་དང་བདུད་རྩི་ལྔའི་ཚོགས། །ཙ་ཏུར་ཁྲག་ཞག་ཐལ་མཚན་ཁྱོད་ཀྱིས་གསོལ། །ཚ་ཟེར་ཉི་ལྟར་འབར་བའི་སྤྱན་ཟུང་གིས། །ཛ་ལང་བདུད་སྡེའི་ཚོགས་རྣམས་ཐལ་བར་རློག །ཝ་ལྟར་ལོག་ལྟས་བརྒྱལ་བའི་སློབ་བུ་ཡང་། །ཞྭ་རོངས་ལྐུག་སོགས་ཆད་པས་ཆོམ་ལ་ཕོབ། །ཟ་སྐལ་ཁྲམ་ལ་བཏབ་ནས་ཚོན་གྱིས་ཆིངས། །འ་འུར་མེ་ལུང་འཐབ་པའི་གུར་ཁང་ནས། །ཡ་མ་རཱ་ཛའི་སྲིང་གཅིག་བདག་ཅག་སྐྱོངས། རྭ་བ་རབ་དཀར་གངས་རིའི་ཡུལ་ལྗོངས་འདིར། །ལ་ལ་ཙམ་མིན་ཐུབ་བསྟན་བཀའ་དྲིན་ཅན། །ཤ་ཟ་འདུལ་མཛད་མཚོ་སྐྱེས་རྡོ་རྗེ་ཞེས། །ས་གསུམ་འགྲོ་བའི་མགོན་དེའི་དམ་མནོས་ལྟར། །ཧ་ཧ་སྔ་འགྱུར་རྒྱུད་སྡེའི་ལེགས་བཤད་དང་། ཨ་ཏིའི་སྒོམ་གྲྭ་རྒྱས་པའི་ཕྲིན་ལས་ལ། །ཧི་ཧིའི་བཞད་སྒྲ་འབྱིན་པ་ཁྱོད་གསོལ་ན། །ཨ་ལ་ལ་ཧོ་སྙིང་གི་བདུད་རྩིར་མཛོད། །ཅེས་ཐུགས་དམ་བསྐུལ་བའི་རོལ་མོ་བཅས་རྡོ་རྗེ་ཤུགས་རྒྱས་སྒྲུབ་ཁང་གི་སྟེང་དུ་བསྐྱལ་ལོ། །བརྒྱད་པ་ནི། ༀ་ཤྲཱི་མ་ཧཱ་ཀཱ་ལཱི་དེ་ཝི་རེ་མ་ཏི་ས་པཱ་རི་ཝ་ར་ཨརྒྷཾ་ནས། ཤཔྟའི་བར་གྱིས་མཆོད། སྨན་རག་འབུལ། མ་བྷྱོ་ཛ་ལས་བྱུང་བ་མ་མོའི་ཚོགས། །ཅེ་སྤྱང་བོང་དྲིལ་འབྱུང་བ་བཞི་ལ་ཆིབས། །དཔལ་ལྡན་ལྷ་མོ་རེ་ཏི་མཆེད་བཞི་སོགས། །འཁོར་བཅས་མ་མོའི་ཚོགས་ལ་ཕྱག་འཚལ་བསྟོད། །ༀ་བདག་ནི་རང་རིག་ཡེ་ཤེས༴སོགས། ཕུར་པ་ལས་འབྱུང་བའི་བརྟིང་བཤགས་བྱ་བའམ། མ་རྙེད་ཡོངས་སུ༴སོགས་དང་། ཡི་གེ་བརྒྱ་པས་བཤགས། འཁོར་རྣམས་སྐེམ་བཅས་མ་མོའི་ཐུགས་ཀར་ཐིམ། །བོང་བུ་མ་མོ་ལ་ཐིམ། མ་མོ་ཡང་བདག་གི་ཐུགས་ཀར་ཐིམ། གཞལ་ཡས་ཁང་དང་མེ་རླུང་ཡང་སྟོང་པ་ཉིད་དུ་གྱུར། སྨོན་ལམ་ནི། སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སངས་རྒྱས་ཀྱི། །ས་ལ་འགྲོ་བས་སངས་རྒྱས་ཀྱི། །ལམ་དེ་ཐམས་ཅད་མཐར་ཕྱིན་ཤོག །བཀྲ་ཤིས་ནི། རྣལ་འབྱོར་མ་དཔལ་སྙིང་རྗེའི་བདུད་རྩི་ལས། །ཡུམ་གྱུར་རྡོ་རྗེའི་རིགས་ཏེ་བུ་ལ་བརྩེ། །གཏུམ་ཆེན་རྔམས་མ་རྒྱུད་ཀྱི་བསྟན་པ་བསྲུངས། །གསང་བ་དབྱིངས་ཕྱུག་མཁའ་འགྲོའི་བཀྲ་ཤིས་ཤོག །དེ་ལྟར་གོང་མའི་གསུངས་བཟང་ལེགས་བཤད་ཀྱི། །ལང་ཚོས་རྣམ་འཁྱུད་སྙིང་གི་མཛའ་ན་མོ། །དོན་མཐུན་སྐལ་བཟང་ཚོགས་ལ་སྐྱེས་སུ་བྱིན། །འདོད་དོན་བདེ་མགུལ་རོལ་ཕྱིར་བརྟེན་པར་རིགས། །དེ་ལས་ཐོབ་པའི་རྣམ་དཀར་དགེ་བ་ནི། །ཏི་སེ་བརྩེགས་མའི་གངས་རི་ལས་འོངས་ལྟ། །དགེ་ཚོགས་ཆུ་རླུང་མ་ལུས་གཅིག་བསྡུས་ནས། །རྣམ་མཁྱེན་རྒྱ་མཚོར་འཇུག་པའི་ཕྱིར་བསྔོའོ། །དེ་ལྟར་རྒྱུད་དང་མན་ངག་ཀུན་གྱི་བཅུད་འགལ་མེད་དུ་བསྡེབས་པ་འདིའང་། བླ་མ་ཀཿཐོག་པའི་ཞབས་སེན་སྙིང་ལ་རྟག་ཏུ་གནས་པས་གསང་ཆེན་རྒྱུད་སྡེ་རིན་པོ་ཆེ་ལ་བློ་གྲོས་ཀྱི་སྣང་བ་ཅུང་ཟད་རྒྱས་པ་ཤཱཀྱའི་དགེ་སློང་རྡོ་རྗེ་འཛིན་པ་ཆོས་ཀྱི་རྒྱ་མཚོས། ཤར་ཀཿཐོག་གི་ཡང་དབེན་བཀྲ་ཤིས་བདེ་ལྡན་གླིང་དུ་སྦྱར་བ་དགེ་ལེགས་འཕེལ། །སརྦ་མངྒ་ལཾ།། །།
བཟླས་པ།
༈ བཟླས་པ་བྱ་བ་ནི། མ་མོའི་ཐུགས་ཀར་བཟླས་བྱའི་སྔགས་ཀྱི་བསྐོར་བ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པའི་དགྱེས་པ་བསྐྱེད། དེའི་མ་ཡིག་སྔགས་ཕྲེང་དང་བཅས་པའི་འོད་ཟེར་གྱིས་ཅི་འདོད་པའི་ཕྲིན་ལས་ཐམས་ཅད་རབ་འབྱམས་ཐོག་མེད་དུ་བསྒྲུབ་ནས་བདག་གི་ཐུགས་ཀའི་ས་བོན་ལ་ཐིམ་པས་མ་མོའི་མཐུ་ནུས་ཐམས་ཅད་བདག་གི་ཐོབ་པར་བསམ་ཞིང་། ༀ་དྲག་རཀྴ་མ་ཧེ་དུན་བྷྱོ་མ་ཧཱ་ཡཀྴ་ཏིཀྞ་ཀ་ལི་དུན་བྷྱོ། ཞེས་པས་ཡང་སྙིང་བཅུ་བདུན་མར་གྲགས་པ་སྟེ་རྗེས་གནང་ཙམ་ལ་འདི་ཁོ་ན་བཟླས་པའི་ཆོག་གོ། །དེ་ལྟར་བཟླས་པའི་མཐར་སླར་ཡང་མ་མོ་མཆོད་ཅིང་བསྟོད་པའོ། །ཡང་ན་སྔར་བཞིན་སྨན་རག་གི་མཆོད་པའི་རྗེས་ཉིད་དུ་བཟླས་པ་བྱས་ནས། གཏོར་འབུལ་བསྟོད་བསྐུལ་དང་བཅས་པ་རྗེས་སུ་བྱས་ནས་ཡང་ཟོར་ཡང་བར་འགྱུར། གང་ལྟར་ཡང་མཐར་གཏོར་མ་སྟབས་པ་དང་། མཆོད་བསྟོད་བཟོད་གསོལ་སོགས་སྤྱི་དང་མཐུན་མཚུངས་པར་བྱའོ། །དེ་ནས་རྗེས་གནང་མ་བྲིས་སོ། །ཡེ་ཤེས་དབྱིངས་ལས་རྣམ་འགྱུར་སྩལ། །འགག་མེད་སྲིན་མོའི་ཚུལ་བཟུང་ནས། །རྡོ་རྗེ་ཐེག་པའི་བསྟན་བསྲུངས་གཙོའི། །བསྒྲུབ་ཐབས་སྲོག་གཏད་ཟབ་མོའི། །འདོད་ཁམས་དབང་ཕྱུག་རེ་མ་ཏི། །རང་བྱུང་རྒྱལ་མོ་བཀའ་གཏེར་གཉིས་ལྡན་གྱི་བསྒྲུབ་ཐབས་དང་བཅས་པའི་ལེའུ་མཚན་ནོ།། །།
བསྒྲུབས་ཐབས་ཀྱི་སྔགས།
༈ བསྒྲུབས་ཐབས་ཀྱི་སྔགས་ནི། ༀ་མ་ཧཱ་ཀ་ལི་རེ་མ་ཏི། མ་མ་རུ་ལུ་རཀྴ་རེ་མ་ཏི། རུ་ལུ་རུ་ལུ་བྷྱོ་ཛ་ཛཿ སྙིང་པོའོ། །ༀ་རུ་རུ་ཙ་དུར་ཨ་ཤུག་མེ། པྲ་ཏི་རུ་དྲ་ཁ་ཤག་རགྨོ་ཧཱུྃ། རཀྴ་ཙིཏྟ་ས་མ་ཡ། ཀུ་རུ་ཁ་ཙིཏྟ་ནན། འབོད་པའོ། །ༀ་རུ་རུ་བེ་རུ་རོ་ཧཱུྃ། ཏི་སྟ་ཐ་བ་ཏོ་སི་ལ། རགྨོ་སྙིང་ཁ་ལ་རགྨོ་ཐུན་བྷྱོ་ཛ་ཛཿ རྦད་པའོ། །རུ་ལུ་རེ་མ་ཏི་ས་མ་ཡ། བྲ་མ་ཧ་སྟི། པྲ་མ་རགྨོ་རུ་ལུ་རུ་ལུ་བྷྱོ་ཛ་ཛཿ ཁ་རག་དེ་ཁེཾ་ཛ་ཛཿ ཁ་ལེ་ཐུན་བྷྱོ་ཐུན་བྷྱོ་མ་མོ་བྷྱོཿ བསད་པའོ། །ཧཱུྃ་རགྨོ་ནི་ཤ་ཀུ་རུ་རྦད། རག་མ་ཨཏྱ་ཛ་ཛཿ ཏི་ཁེཾ་ཁ་ལེཾ་བྷྱ། ས་མ་ཡ་ཆྒཻ་མོ་ཪྣྲི་མ་ར་ཡ་ཧཱུྃ་ཕཊཿ ༈ ལྷ་མོའི་རྒྱུད་ཀྱི་སྔགས་ནི་འདིའོ། །དཔལ་ལྡན་ལྷ་མོའི་ནག་མོའི་རྒྱུད་ཀྱི་སྲོག་སྙིང་ལ། ༀ་རུ་རུ་རུ་རུ་བི་ཏིཥྛ་བ་ཏོ་སི། ༀ་རུ་རུ་རོ་རུ་བི་ཏིཥྛ་བ་ཏོ་པི་ཙི་ས་ལ་ཨ་ཤུག་མེ་ཧཱུྃ་བྷྱོ་ཛཿ ཁོལ་མོ་རེ་མ་ཏིའི་སྲོག་སྙིང་ལ། ༀ་རུ་རུ་རུ་རུ་བེ་ཏ་ཧཱུྃ་ཏི་ཏི་བ་ཏོ་སི། རག་མོ་ཙ་ཙིཏྟ། ཏི་ཁ་རོགྨོ་ཧཱུྃ་བྷྱོཿ མ་མ་ཁ་མུན་ཏྲ་བ་ཏྲ་བ་ཏྲ་ཏྲག་རགྴ་ཙིཏྟ་ཁ་རག་མ། རེ་མ་ཏི་ས་མ་ཡ། བྲ་མ་མ་ཧཱ་ཏི་པྲ་དུན་བྷྱོ་རུ་ལུ་རུ་ལུ་བྷྱོ་ཛ་ཛཿ དེ་ནི་སྲོག་འདྲེན་པའི་སྔགས་ཡིན་ཏེ་ས་ཡ་བཟླས་ན་མ་མོ་མངོན་དུ་འོང་། བྱེ་བ་བཟླས་ན་ཕྱག་རྒྱ་སྟོན་པར་བྱེད། འབུམ་ཕྲག་གིས་ཀྱང་དངོས་གྲུབ་མཚན་མ་སྟེར། ཁོལ་མོའི་སྙིང་པོ་བཟླས་མ་ཐག་ནས་འོང་། ས་མ་ཡ་དུ་ལིང་རགྴ་སི། ཧེ་རཀྴ། བྷྱོ་རཀྴ། མ་རཀྴ་སི། མཱ་མཱ་མཱ་མཱ། རུ་ལུ་རུ་ལུ་རུ་ལུ་རུ་ལུ། བྷྱོཿབྷྱོཿབྷྱོཿབྷྱོཿ རུ་རུ་རུ་རུ། འཁོར་མ་མོ་འབུམ་གྱི་སྙིང་པའོ།། །།
འདོད་ཁམས་བདག་མོ་རྡོ་རྗེ་དབྱིངས་ཕྱུག་མའི་སྨིན་བྱེད་ཡོངས་འདུའི་ས་བརྟོལ།
ཀྲྀ པཱ ནུ ཿ ཀོ བི དཱ ར ཀཱ མ ཏུ པ ཏཱི ཿ བ ཛྲ དྷཱ ཏུ ཤྭཱ རི སྱ བི ཛ ཧ ར།
འདོད་ཁམས་བདག་མོ་རྡོ་རྗེ་དབྱིངས་ཕྱུག་མའི་སྨིན་བྱེད་ཡོངས་འདུའི་ས་བརྟོལ་བཞུགས་སོ། །
དུས་གསུམ་རྒྱལ་བའི་བསྟན་བསྲུང་མ། །དཔལ་ལྡན་ཡུམ་ཆེན་ལ་བཏུད་ནས། །གང་དེའི་སྨིན་བྱེད་བདུད་རྩིའི་མཚོ། །ངོ་མཚར་གྲུབ་པའི་གཞུང་བཞིན་སྤེལ། །འདིར་སློབ་དཔོན་ཆེན་པོ་དྷ་ན་སང་ཀྲི་ཏ་དང་། །པདྨའི་བཀའ་སྲོལ་ལྟར་ལྷ་མོ་རང་བྱུང་རྒྱལ་མོའི་དབང་བསྐུར་གྱི་ཆོ་ག་ལ་གསུམ། སྦྱོར་བ་དངོས་གཞི་རྗེས་སོ། །དང་པོ་ལ་ཆོ་གར་མི་གཏོགས་པའི་སྦྱོར་བ་དང་། ཆོ་གར་གཏོགས་པའི་སྦྱོར་བའོ། །དང་པོ་ནི། དབེན་ལ་ཡིད་དང་མཐུན་པའི་གནས་སུ་སྟེགས་བདེ་བ་ལ། དཀྱིལ་འཁོར་ནི་མ་མོ་བྱང་ཆུབ་སེམས་རྒྱུད་ལས། མཐིང་ནག་གྲུ་གསུམ་འབར་བའི་དཀྱིལ་འཁོར་འདིར། །ཟླ་གམ་དབང་ཆེན་འབར་བའི་མཎྜལ། །གྲུ་ཆད་གྲུ་བཞི་སྒོ་ཁྱུད་བཞི་དང་ལྡན། །དེ་རྒྱབ་ཐོད་ཕྲེང་རྡོ་རྗེའི་རྭ་བ་མེ་དཔུང་འབར། །ཞེས་གསུངས་པ་ལྟར། དབུས་སུ་གྲུ་གསུམ་མཐིང་ནག །དེའི་ལོགས་གསུམ་ཟླ་གམ་ལ་ཁྲག་མཚོ་དམར་པོ། དེ་རྒྱབ་ཐོད་པའི་རྭ་བ་གུར་ཁང་། དེ་རྒྱབ་གྲུ་ཆད་ཐོད་པས་ཁ་བད་བྱས། དེ་རྒྱབ་ཁྲག་མཚོ་དམར་པོ་འཇིགས་སུ་རུང་བ། སྒོ་རྫོགས་རྟ་བབ་བཞི་པ། དུར་ཁྲོད་རྡོ་རྭ་མེ་རི་དང་བཅས་པ། དབུས་སུ་གྲི་གུག་ཐོད་ཁྲག་དང་ཐིག་ལེ་དམར། གྲུ་གསུམ་ཟླ་གམ་ངོས་ཀྱི་གཙོ་མོའི་མདུན་ན་གསུམ། གཡས་གཡོན་དུ་གཉིས་རེ་རྣམས་དང་ཟུར་གསུམ་དུ་ཐིག་ལེ་ནག །གྲུ་ཆད་གྲི་གུག་ཐོད་ཁྲག་བརྒྱད། ཁྲག་ཁྱམ་ལ་ཐིག་ལེ་སྨུག་པོ་རྣམས་བཀོད་པ་བྲིས་པའི་རས་བྲིས་སམ། ཚོམ་བུ་བཀོད་པའི་སྟེང་། མཉྫུའི་ཁར། ཀ་པཱ་ལའི་ནང་དབང་གི་དམར་གཏོར་སྙིང་གཟུགས་མ་གྲུ་གང་བ་གཅིག་ཟས་སྣ་དང་ཆང་ཕུད་ཀྱིས་བྲན་པ། སྐུ་ཙཀ་དང་གཏོར་གདུགས་མེ་རི་རྒྱན་བཟང་པོས་བརྒྱན་ཅིང་འཁོར་ལྷ་གྲངས་གཏོར་ཆུང་ངམ། བྷ་ལིང་གིས་མཚན་པ་དང་། མདུན་དུ་རྟེན་གཏོར་བཤམས་དེ་མཐར་སྨན་རག་སོགས་མཆོད་པས་བསྐོར། ཨ་མྲྀ་ཏའི་རྫས་ཀྱིས་གང་བའི་ཀ་པཱ་ལ་སིནྡུ་རའི་མེ་ལོང་ཆོས་འབྱུང་གི་དབུས་སུ་མ་བྷྱོཿམཚན་པས་བཀབ་པ་མདུན་དུ་བཞག །རལ་གྲི། ཐོད་ཁྲག །ནེའུ་ལེའུ་རྐྱལ་པ། སྤྲོ་ན་ཟན་ལིང་སོགས་སྒྲ་ལ་ཆས། ལྕགས་ཕུར་དང་། ཐུན་མིན་ལ་སྦྱིན་རྒྱུ། བླ་རྡོ་སྲོག་འཁོར་འདུ་བྱས། འབུལ་གཏོར་རྔ་རོལ་སོགས་ཚོགས་པར་བྱའོ། །གཉིས་པ་ནི། རྡོ་རྗེ་གཞོན་ནུའི་དག་གི་རྣལ་འབྱོར་བཟླས་པ་དང་བསྡུ་ལྡང་གི་མཐར། སྔོན་དུ་སློབ་དཔོན་རང་ཉིད་ཀྱིས་མདུན་བསྐྱེད་ལ་དམིགས་མཆོད་གསོལ་བསྙེན་པ་དང་བཅས་པ་རྒྱས་པར་གྲུབ་འཕྲལ། བྷནྡྷའི་ནང་དུ་ཡེ་ཤེས་ཀྱི་དཔལ་ལྷ་མོ་བོང་དྲེལ་མེད་པ་གཅིག་གསལ་ནས་བསྙེན་པ་ཅུང་ཟད་བྱས་པ་མཐར་འོད་ཞུ་བྱ། སློབ་མའི་ལས་བྱ་བའི་ཆེད་དུ་འཁྲུགས་བསྐང་བྱས་ནས། ལས་བུམ་དུ་བགེགས་མཐར་བྱེད་སྒྱུ་འཕྲུལ་འབྱུང་བ་ལྟར་བསྒྲུབ། གཉིས་ལའང་ཐུན་མིན་དང་ཐུན་མོང་གི་དམིགས་རིམ་བྱ་ཚུལ་ལོ། །དང་པོ། དོན་དུ་གཉེར་བའི་དད་ལྡན་དམ་ཚིག་ཐུབ་ངོས་རྣམས་ལ་ཁྲུས་དང་། ཕྱག་གི་གྲལ་དུ་འཁོད་བཅུག་སྟེ། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་སངས་རྒྱས་ཀྱི་གོ་འཕང་ཐོབ་པར་བྱ། དེ་ཡི་ཆེད་དུ་བསྟན་པ་སྲུང་བའི་ཆོས་སྐྱོང་གི་སྨིན་བྱེད་ཞུ་སྙམ་པའི་ཐུགས་བསྐྱེད་པ་རིན་པོ་ཆེ་གསལ་བཏབ་ནས་གསན་པར་ཞུ། དེ་ཡང་ཡོན་ཏན་རིན་པོ་ཆེ་འཕགས་པ་སྡུད་པ་ལས། རིན་ཆེན་ཆོས་ཀྱང་དཀོན་ལ་རྟག་ཏུ་ཚེ་བའང་མང་། དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། ཞེས་གསུངས་པ་ལྟར་སྤྱི་དམ་པའི་ཆོས་སྒྲུབ་པའི་གང་ཟག་ལ་བར་ཆད་ཀྱི་འཚེ་བ་མང་ཞིང་། ཁྱད་པར་དུའང་བདུད་དང་ནག་པོའི་ཕྱོགས་ཐམས་ཅད་ཀྱིས་སྡང་བའི་གླགས་ཚོལ་བ་མང་བས་དེ་འདུལ་བའི་ཕྱིར། རྒྱལ་བ་ཐབས་མཁས་ལ་ཐུགས་རྗེའི་དབང་ཕྱུག་ཆེན་པོ་དེ་ཉིད་ཀྱིས་རྒྱུད་དང་མན་ངག་གི་ཚུལ་དུ། བར་ཆད་སེལ་ཞིང་གདུག་པ་འདུལ་བའི་བསྟན་བསྲུང་དུ་མ་ཞིག་བསྟན་པ། གངས་ཅན་གྱི་ལྗོངས་འདིར་རྡོ་རྗེ་ཐེག་པ་གསར་རྙིང་བཀའ་སྲོལ་རྣམས་སུ། ཡེ་ཤེས་དང་འཇིག་རྟེན་གྱི་རང་བཞིན་ཕོ་མོའི་རྒྱུད་དུ་གཏོགས་པའི་བསྟན་སྲུང་མི་འདྲ་བ་དུ་མ་ཞིག་བྱོན་པ་ལས། སྐབས་སུ་བབ་པ་རྗེ་བཙུན་བླ་མ་འཇམ་པའི་དབྱངས་ཤར་ཀཿཐོག་པ་ཆེན་པོ་བླ་ཆེན་སྤོབས་པ་མཐའ་ཡས་ཞེས་སྔ་འགྱུར་རྡོ་རྗེ་ཐེག་པའི་བསྐྱེད་རྫོགས་རྫོགས་པ་ཆེན་པོའི་བསྟན་པའི་བདག་པོར་གཞུགས་ཤིང་ཕྲིན་ལས་ནམ་མཁའ་དང་མཉམ་པ་དེའི་སྙན་བརྒྱུད་མན་ངག་གི་ཆོས་བསྐོར་ལས་བྱུང་བ་རྡོ་རྗེའི་ཆོས་སྐྱོང་བའི་བསྲུང་མ་དཔལ་ནག་པོ་ལྕམ་དྲལ་རྣམ་གསུམ་ནས་སྙིང་ཉེ་ལ་མཐུ་བྱིན་ཆེ་བ། འགྲུབ་སླ་ལ་བཀྲ་ཤིས་པ་སྟེ་ཐུན་མོང་དང་། བླ་མ་ལྟར་བསྟེན་པས་ཡེ་ཤེས་འཆར། ཡི་དམ་ལྟར་བསྟེན་པས་དངོས་གྲུབ་སྩོལ་བ། ཚེ་འདི་ཕྱི་བར་གསུམ་གྱི་ལེགས་ཉེས་སྐྱོང་ངེས་པ་སྟེ། མཆོག་གི་ཁྱད་པར་གསུམ་དང་ལྡན་པ་རྒྱུད་ཀྱི་ཁུངས་ཆེ་བ། མན་ངག་གི་ཕྱག་ལེན་ཞིབ་པ། ནུས་མཐུ་རྣོ་ངར་གྱི་གནད་ཚངས་བ། གྲུ་ཐོབ་ཀྱི་ལུགས་བཟང་པོ་ཁྱད་པར་དུ་འཕགས་པ་བཞུགས་པ་ལས། བྱེ་བྲག་འདིར་སྤྱི་རྒྱུད་སྲིད་པ་མ་མོའི་དེམས་ཆེན་མོ་སོགས་ལས་ཟིན་ཅིང་། སྒོས་རྒྱུད་མཁའ་འགྲོ་མ་མོ་ལྕེ་འབར་མ་དང་། མ་མོ་བྱང་ཆུབ་སེམས་ཀྱི་རྒྱུད་དང་། རྡོ་རྗེ་ལྷ་མོ་ནག་མོ་དབང་ཕྱུག་མའི་རྒྱུད་དང་། འཕགས་པ་དཔལ་ལྡན་ལྷ་མོ་ནག་པོའི་སྔགས་རྒྱུད་སོགས་ཀྱིས་བསྟན་དོན་ཐུགས་ཀྱི་མ་མོ་རང་བྱུང་རྒྱལ་མོ་རེ་ཏི་བྲན་གཡོག་གི་དབང་བསྐུར་དང་རྗེས་གནང་བསྒྲུབ་པར་བགྱི་བ། ལོ་རྒྱུས་ཅུང་ཟད་འབུལ་ན། དེ་ཡང་དོན་ལ་རྒྱལ་བ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་དུ་ཕྱིན་མའམ་ཀུན་ཏུ་བཟང་མོ་དང་། རྡོ་རྗེ་རྣལ་འབྱོར་མར་གྲགས་པ་ཉིད་མཚན་དང་སྐུ་ཡི་བཀོད་པ་ཙམ་ལས་ཐ་དད་མ་ཡིན་ཅིང་། ཆོས་ཐམས་ཅད་སྐྱེ་མེད་མ་མོ་རོལ་པའི་དཀྱིལ་འཁོར་གྱི་འཁོར་ལོ་སངས་རྒྱས་དང་། དེ་མ་རྟོགས་པའི་གདུལ་བྱ་ལ་ཕྲིན་ལས་དྲག་པོས་འདུལ་བའི་བཅོམ་ལྡན་འདས་བླ་མེད་ཧེ་རུ་ཀའི་ཉིད་བཞི་མུ་ཁ་ལེ་དང་དབྱེར་མ་མཆིས་པར་སྟོན་པ་ཉིད། ཐུན་མོང་གདུལ་བྱའི་ཚུར་མཐོང་ལ། ལས་ཚུལ་བསམ་གྱིས་མི་ཁྱབ་པའི་ཐབས་མཁས་ཀྱི་མཛད་པ་ཅིར་ཡང་འཆར་བས། སྔོན་རི་རབ་ཀྱི་རྩེ་མོ་སུམ་ཅུ་རྩ་གསུམ་ལྷ་ཡི་དགའ་ཚལ་དུ་ཡབ་དབང་ཕྱུག་ཆེན་པོ་དང་ཡུམ་ཨུ་མ་དཀའ་བཟློག་ལྷ་མོའི་སྲས་མོར་འཁྲུངས་ཏེ་ལྷ་མ་ཡིན་གྱི་དམག་དཔུང་ཚར་བཙད། དཀའ་ཐུབ་ཀྱི་ཚལ་བསྟེན་པས་ལྷ་མོ་དུང་སྐྱོང་མའམ། རི་ཁྲོད་ལོ་མ་གྱོན་པར་གྲགས། ལས་དབང་གིས་སྲིན་པོ་དྷ་ཤ་གྷྲི་ཝའི་གཡོ་ཐབས་ལ་བརྟེན་ནས་ཆུང་མར་ཁྱེར་བ། ཁྱོ་ཤི་བས་སྲིན་པོའི་རལ་གྲི་སོགས་ཁྱེར་ཏེ་འབྲོས་པས་ལྕེབ་ཅིང་། སྨོན་ལམ་མཐུས་ཆོས་རྒྱལ་གཤིན་རྗེའི་སྲིང་མོར་གྱུར་ནས། ཁོལ་མོ་རེ་མ་ཏིའམ་སྐེམ་མ་ཆུ་སྲིན་གདོང་དང་བཅས། རྫུ་འཕྲུལ་གྱི་བོང་དྲེལ་ལ་བཅིབས་ནས་ཕྱོགས་བཅུར་རྒྱུ་ཞིང་སེམས་ཅན་ལ་གནོད་ཚེའི་ཚུལ་སོགས་ཀྱང་མང་དུ་བསྟན་པའི་མཐར། བྲམ་ཟེ་མཆོག་སྲེད་ཀྱི་གྲོགས་སུ་བྱས་ཏེ་སྒྲུབ་ཐབས་བསྟན། བྱང་ཆུབ་ཤིང་གི་དྲུང་དུ་ཕྱིན་ཏེ་ཡང་དག་པར་རྫོགས་པའི་སངས་རྒྱས་སྟོན་མཆོག་ཐུགས་རྗེ་ཅན་ལས་སེམས་བསྐྱེད་དེ་སྲོག་གི་སྙིང་པོ་འབུལ། ཁྲོ་རྒྱལ་རྟ་མགྲིན་གྱི་གསང་བའི་གཟུངས་མ་བགྱིས། དཔལ་ཕྱག་ན་རྡོ་རྗེ་ལས་དམ་མནོས་ཏེ་ས་བརྒྱད་སའི་སེམས་མར་གྱུར། སངས་རྒྱས་ཐམས་ཅད་ཀྱི་བསྟན་པ་བསྲུང་བའི་གཙོ་མོ། ཡེ་ཤེས་ཀྱི་མགོན་པོ་རྣམས་ཀྱི་ཡུམ་དང་ལྕམ་སོགས་ཅིར་ཡང་སྟོན་པས་བཞུགས་པ་འདི་ཉིད་ཀྱི་སྒྲུབ་ཐབས་ལ་རྗེ་ན་རོ་པའི་བཀའ་སྲོལ་དུད་སོལ་མ་དང་། པཎ་ཆེན་དམར་མོའི་ལུགས་ཀྱིས་དམག་ཟོར་མ་སོགས་གསར་མའི་སྡེ་རྣམས་ཀྱང་འདི་དང་ངོ་བོ་གཅིག་ལ། མ་མོ་ཐམས་ཅད་ཀྱི་རྒྱུད་ལུང་མན་ངག་རྣམས་གྲུབ་པའི་སློབ་དཔོན་བརྒྱད་ཀྱི་ནང་ཚན་དྷ་ན་སཾ་ཀྲི་ཏ་ལ་བཀའ་བབ་པ་ལས་འདིར་དེར་ཨོ་རྒྱན་དུས་གསུམ་མཁྱེན་པ་ལ་གནང་བ་དང་། དེས་ཐུགས་སྲས་རྗེ་འབངས་ཉི་ཤུ་རྩ་ལྔའི་ནང་ཚན་མ་མོ་བྲན་ཁོལ་འབྲོག་མི་དཔལ་གྱི་ཡེ་ཤེས་ལ་གནང་བ་ནས་བཟུང་། སོ་ཟུར་གནུབ་གསུམ་སོགས་གསང་ཆེན་རྙིང་མའི་རིག་འཛིན་གསང་སྔགས་ཀྱི་རྒྱལ་པོ་གོང་མ་ཐམས་ཅད་ཀྱིས་བཀའ་སྲུང་དུ་བསྟེན་པ་དཔལ་རང་བྱུང་རྒྱལ་མོ་དང་། ཡང་སློབ་དཔོན་དྷ་ན་སཾ་ཀྲི་ལས་བཻ་རོ་ཙ་ནས་གསན་ཅིང་དེ་ལས་འབྲོག་མི་དཔལ་སེང་། དེ་ལས་རིམ་བཞིན་བརྒྱུད་པ་བླ་མ་དཔལ་འཛིན་ཆེན་པོ་ལས་ཤར་ཀཿཐོག་པས་གསན་པའི་མ་མོ་རང་བྱུང་རྒྱལ་མོའི་གཞུང་ཆེན་དང་། ཡང་སློབ་དཔོན་པདྨས་མཛད་པའི་གཞུང་ལྕགས་ཕུར་བདུན་པའམ། མ་མོ་སྲོག་སྒྲུབ་ཏུ་གྲགས་པའི་སྐོར་སུ་ཧྲིང་བ་ཞང་བཙུན་དར་མ་རིན་ཆེན་གྱིས་གཏེར་ནས་བཏོན་པ། ཞང་བཙུན་པའི་སློབ་མ་བླ་མ་བྲག་སྟོད་ཀྱི་ཅོག་རོ་ག་ཆུ་བ་ཆེན་པོ་ལས་གསན་པ་བཅས་བཀའ་གཏེར་གསུམ་ཆུ་བོ་གཅིག་འདྲེས་སུ་གྱུར་པའི་ཡེ་ཤེས་པ་ལྟར་དབང་བསྐུར་བ་དང་། འཇིག་རྟེན་པ་ལྟར་ལས་ཀྱིི་རྗེས་སུ་གནང་བ་གཉིས་འབུལ་བའི་དང་པོ་ལའང་སློབ་དཔོན་གྱི་བགྱི་བར་འོས་པ་གྲུབ་པ་སྐུ་ཉིད་ཀྱིས་བགྱི་བར་འོས་པ་སྤྱོར་བ་དབང་གི་སྣོད་སྒྲུབ་པ་དང་། དངོས་གཞི་དབང་བསྐུར་སྦྱིན་པ་གཉིས་ཀྱི་དང་པོ་བླ་མ་ལ་དབང་བསྐུར་ཞུ་བའི་ཡོན་དུ་མཎྜལ་འབུལ་བར་ཞུ། ཞེས་མཚམས་སྦྱར་ནས་མཎྜལ་འབུལ་དུ་བཞུགས། གསོལ་བ་གདབ་པ་འདི་ཡི་རྗེས་ཟློས་ཞུ། ཤཱཀྱ་སེང་གེའི་བསྟན་པ་ལ། །བྱང་ཆུབ་ཏུ་ནི་སེམས་བསྐྱེད་ནས། །སངས་རྒྱས་བསྟན་པ་བསྲུང་བའི་ཕྱིར། །དཔལ་ལྡན་ལྷ་མོ་ནག་མོ་ཡི། །སྐུ་གསུང་ཐུགས་ཀྱི་དངོས་གྲུབ་དང་། །དབང་དང་ཕྲིན་ལས་རྩལ་དུ་གསོལ། །ལན་གསུམ། མདུན་གྱི་ནམ་མཁར་བླ་མ་བླ་མེད་ཧེ་རུ་ཀ་ཡུམ་དང་བཅས་པའི་སྐུར་གསལ་བ་ལ་རྒྱལ་བ་སྲས་དང་བཅས་པས་བསྐོར་བ་མངོན་སུམ་བཞིན་དུ་བཞུགས་པའི་སྤྱན་སྔར་སྐྱབས་སུ་འགྲོ་བ་དང་། ཆོས་ཐམས་ཅད་རང་བཞིན་དག་པའི་ཆོས་སྐུ་ཡིན་པ་ལ་ངོ་མ་ཤེས་ཤིང་འཁོར་བར་འཁྱམས་པའི་སེམས་ཅན་ཐམས་ཅད་སངས་རྒྱས་ལ་འགོད་པར་བྱ་བའི་ཆེད་དུ་སེམས་བསྐྱེད་དེ་ཚོགས་བསགས་པ་ལ། རྒྱུན་བཤགས་ཡན་ལག་བརྒྱད་པ་བྱ་བ་འདི་ཡི་ཚིག་རྗེས་སུ་དོན་དྲན་པས་རྗེས་ཟློས་ཞུ། རྡོ་རྗེ་སློབ་དཔོན་སངས་རྒྱས་དཔལ་སོགས་ལན་གསུམ། ཚོགས་ཞིང་དེ་དག་གི་སྤྱན་སྔར་གསང་སྔགས་རྡོ་རྗེ་ཐེག་པའི་སྤྱི་དང་བྲེ་བྲག་གི། བསྡུས་པ་རྩ་བ་དང་ཡན་ལག་གི་དམ་ཚིག་ཐམས་ཅད་འཛིན་པར་བགྱིའོ་སྙམས་པས་འདིའི་རྗེས་ཟློས་ཤིག །ༀ། བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་ཕྱིར་བདག་གིས་སྤྱད། །བྱང་ཆུབ་སེམས་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རླབས་མཛོད། །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་བསྒྲུབ། །བྱང་ཆུབ་སྤྱོད་དཀའ་བདག་གིས་བསྐྱེད། །རྡོ་རྗེའི་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ལན་གསུམ། ད་ཡེ་ཤེས་མ་མོ་སྙིང་ཞུགས་ཀྱི་དབང་གི་གཞི་དང་པོ་དགོད་ཅིང་ཡེ་ཤེས་དབབ་པ་ལ་དམིགས་པ་འདི་བཞིན་མཛོད། ཁྱེད་རང་རྣམས་ཀྱི་ལུས་འོད་ཀྱི་རང་བཞིན་དུ་གྱུར་པའི་སྙིང་གའི་ནང་དུ་སྐད་ཅིག་གིས་སྤྲུལ་པའི་དྲེའུ་སྨུག་པོ་རླུང་གི་གཤོགས་པ་ཅན། རྐང་གསུམ་མྱུར་མགྱོག་རྫུ་འཕྲུལ་གྱི་རྩལ་དང་ལྡན་པ། ཐོད་སྐམ་འབར་བ་དང་བསྭེ་སྒ་དམར་པོ་སྦྲུལ་ནག་གི་གོང་སྨེད་ཅན། གཡུ་མཐུར་སྔོན་པོ། བྱི་རུ་དང་རིན་པོ་ཆེའི་སྲབ་དང་། མི་མགོ་སྐོམ་པོ་སྟོང་པའི་དམ་ལས་འཕྱང་བའི་དྲིལ་བུ་གཡེར་ཁའི་དྲྭ་བས་བརྒྱན་པའི་སྟེང་། དཔལ་ལྡན་ལྷ་མོ་སྐུ་མདོག་མཐིང་ནག་ཏུ་འདུག་པ། མེ་དཔུང་རབ་ཏུ་འབར་བ། རབ་ཏུ་ཁྲོ་པའི་ཞལ་གཅིག་སྤྱན་གསུམ་བགྲད་ཅིང་མཆེ་བ་བཞི་རྣམ་པར་གཙིགས་ནས་ལྗགས་གློག་ལྟར་འདྲིལ་བ། འགྱུར་བའི་ཁྲོ་གཉེར་བསྐྱོད་ཅིང་སྨིན་ཚུགས་དུས་རླུང་གི་བསྡུས་པའི་ཆར་སྤྲིན་ལྟར་གནག་པ་བསྡུད་པ། རལ་པ་ཁོམས་ནག་གྱེན་དུ་བརྫེས་ཤིང་མཐུར་དུ་བཤལ་བའི་ཐོད་པ་བཅུ་དྲུག་གི་རྩ་ཆིངས་དང་། ཐོད་སྐམ་ལྔས་དབུ་བརྒྱན་པ། རལ་གྲི་རྣོ་གདུག་འབར་བའི་སྡིགས་པའི་ཡུ་བ་ཅན་ཕྱག་གཡས་ན་འཛིན་ཅིང་། སྲིན་ཁྲག་བཅུད་ཀྱིས་གང་བའི་ཐོད་ཕོར་གཡོན་ན་འཛིན་པ། སྦྲུལ་དང་རུས་ཆས་སྟག་ལྤགས་གླང་ཀོ་རེ་ལྡེ་གསོལ་ཞིང་ཞིང་གི་ཕྲ་ཁེབ་གཡོ་བ། རྨ་བྱའི་མདོངས་སྒྲོ་དབུ་ལ་མཛེས་ཤིང་སྙན་ཆ་སེང་སྦྲུལ་འདོགས་པ། དཔྲལ་བར་ཟླ་བ་ཚེས་ཤིང་། ལྟོ་ན་ཉི་མ་འཆར་བ། འཇའ་ཚོན་མཐའ་སྐུད་བཏབ་པའི་དར་ནག་གི་གོ་ཟུ་བཅིང་བར་ལམ་སྟེ་གྱུར་པའི་མོས་པ་མཛོད། དེ་ཡི་གནས་གསུམ་དུ་ༀ་དཀར་ཟླ་བ། ཨཱཿདམར་པདྨ། ཧཱུྃ་མཐིང་ཉི་མ་ལ་གནས་པའོ། །དེ་ནི་དམ་ཚིག་སེམས་དཔའ་དང་ཏིང་འཛིན་སེམས་དཔའི་ཐུགས་ཀར་པདྨ་ཉི་མའི་གདན་སྟེང་ན་མཿདང་བྷྱོཿམཐིང་ཀ་འོད་ཟེར་འབར་བ་ཞིག་བསྒོམ་ནས་བླ་མ་ལ་དཔལ་རྡོ་རྗེ་གཞོན་ནུ་དངོས་ཡིན་སྙམས་པའི་འདུ་ཤེས་ཀྱིས་རྗེས་ཟློས་ཞུ། བླ་མ་རིན་པོ་ཆེ་བདག་ལ་དཔལ་ལྡན་ལྷ་མོ་དབབ་པར་མཛད་དུ་གསོལ། ཡུམ་ཆེན་མ་ཆེན་དབབ་པར་མཛད་དུ་གསོལ། ཞེས་ལན་གསུམ། གསོལ་བ་བཏབ་པས་སློབ་དཔོན་རྡོ་རྗེ་གཞོན་ནུའི་ཐུགས་ཀ་ནས་ཁྲོ་བོ་འདོད་རྒྱལ་ཞལ་གཅིག་ཕྱག་གཉིས་ལྕགས་ཀྱུ་དང་ཕུར་པ་ཐོགས་པ་སྤྲོས། ཕྱག་གཡས་ལྕགས་ཀྱུའི་བྱང་ཤར་མཚམས་ནས་ཡེ་ཤེས་སེམས་དཔའ་དཔལ་ལྡན་ལྷ་མོ་ནག་མོའི་དྲེལ་སྣ་ནས་བཟུང་། ཕྱག་གཡོན་གྱི་ཕུར་པས་ཕྱིར་འབྲང་གི་བགེགས་བསྐྲད་དེ་མདུན་དུ་སྤྱན་དྲངས་པའི་ཡེ་ཤེས་པ་སྙིང་གི་དབུས་སུ་ཞུགས། དམ་ཚིག་སེམས་དཔའ་དང་དབྱེར་མེད་དུ་གྱུར་པར་བསྒོམ་ཤིག །ཅེས་བསྐུལ་སྤོས་བསྲེགས་རོལ་མོར་བཅས། ཀྱཻ། མ་ཅིག་ལྷ་མོ་དཔལ་ལྷ་མོ། །དད་པ་དང་ནི་སོགས་མཆོད་ཕྲིན་འབྲིང་པོ་ལས་བྱུང་བའི་ཚིག་གིས་སྤྱན་འདྲེན་མཐར། ༀ་རུ་རུ་རོ་རུ་ཙ་པ་ལ་ཨ་ཤུགྨེ་ཧཱུྃ་བྷྱོ་ཛ་ཛཿ ཞེས་བདུན་ནམ་ཉེར་གཅིག་བརྗོད། ཡང་སྤོག་པའི་ཆོ་ག་བྱ་བ་ལ་དམིགས་པ་འདི་བཞིན་དུ་མཛོད་ཁྱད་པར་རང་རྣམས་ཀྱི་སྙིང་ཁར་བཞུགས་པའི་ལྷ་མོ་དྲེལ་དང་བཅས་པའི་ཞབས་སུ་ཡྃ་ཛྷིཾ་ལས་རླུང་གི་དཀྱིལ་འཁོར་ཁ་དོག་ལྗང་གུ། དབྱིབས་གཞུ་བརྡུང་བ་ལྟ་བུ། ཟུར་བཞིར་བ་དན་གཡོ་བས་མཚན་པའི་བ་དན་བསྐྱོད་རླུང་གིས་ལྷ་མོ་དང་ཁྱེད་རྣམས་ཀྱི་ལུས་བཅས་བཏེགས་ནམ་མཁའ་ལ་ལམ་ལམ་འཕྱོ། ལྷ་མོའི་སྐུ་ལས་བདུད་རྩིིས་ཆར་བབས། རང་གི་ལུས་ཐམས་ཅད་གང་། བདེ་བ་ཆེན་པོ་བཟོད་དུ་མེད་པ་འབར་སླར་ཡང་ལྷ་མོའི་སྐུ་མང་དུ་བྱུང་། སྙིང་ལ་ཐིམ། ལྷ་མོ་བླ་མ། བླ་མ་ལྷ་མོ་དབྱེར་མེད་པ་རང་སེམས་སྟོང་ཉིད་ལས་བདེ་བ་འབར་བར་བསམ། ནས་གོང་གི་སྔགས་ཀྱི་མཐར། ༀ་བེ་ཤ་ཡ་ཛྷཻཾ་ཨ་ཨཿ ཞེས་བཏང་བ་དྲག་ཏུ་བརྗོད་སྤོས་རོལ་བྱ། ཡང་མ་མོའི་ཐུགས་ཀའི་མ་བྷྱོཿལས་འོད་ཟེར་གྱེན་དུ་ཕྲོས། སྣ་བུག་གཡོན་ནས་ཚུར་བྱུང་བས་ཕྱོགས་བཅུ་ནས་རྡོ་རྗེ་རྣལ་འབྱོར་མ་དང་། ཡེ་ཤེས་ཀྱི་མཁའ་འགྲོ་ཐམས་ཅད་མ་མོ་ནག་མོའི་རྣམ་པར་སྤྱན་དྲངས་སྙིང་གི་མ་མོ་ལ་ཐིམ་པར། བསམ་ལ། བཛྲ་ཌཱཀྐ་ཌཀྐི་ནི་བྷ་ར་ཧི་བྃ་ཧ་རི་ནི་ས་མ་མོ་ནག་མོ་ཏིང་ལམ་མ་མོ་ནག་མོ་དུན་ཏིང་བྷྱོཿཛ་ཧཱུྃ་བྃ་ཧོཿ ཞེས་མང་དུ་བཟླས་ཤིང་སྤོས་རོལ་བྱ། ཡང་སློབ་དཔོན་གྱི་ཐུགས་ཀའི་འོད་དང་མ་མོའི་ཐུགས་ཀའི་འོད་ཟེར་ལྕགས་ཀྱུ་ལྟ་བུས་སྣང་སྲིད་མ་མོ་ཐམས་ཅད་ཀྱི་སྲོག་སྙིང་མ་བྷྱོཿའི་ཡི་གེར་དྲངས་ཏེ་ཁྱེད་རང་རྣམས་ཀྱི་སྙིང་གི་མ་མོ་ལ་ཐིམ་པར་བསམ། ནས་བྷྱོ་བདུན་མ་དགུ་མའི་སྔགས། མ་བྷྱོ། མ་མ་བྷྱོཿ བྷྱོཿབྷྱོཿམཿམཿབྷྱོཿམ། བྷྱོཿམ་མ་བྷྱོཿམ། བྷྱོཿམ་མ་བྷྱོཿམ། ཛ་ཛ་ཛཿ ཞེས་སྤོས་རོལ་བྱ། ཏིཥྛ་བཛྲ། ཡེ་ཤེས་པ་བསྟན་པར་གྱུར་ཅིག །ཅེས་རྡོ་རྗེ་སྤྱི་བོར་བཀོད། དེ་ཡང་མདུན་འདིར་ཆོས་ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི་རང་རྩལ་དུར་ཁྲོད་ཆེན་པོ་འཇིགས་སུ་རུང་བ་ཐོད་སྐམ་གྱི་གཞལ་མེད་ཁང་གི་གྲུ་གསུམ་གྱི་དབུས་སུ་དཔལ་ལྡན་ལྷ་མོ་ཆེན་མོ། མདུན་དུ་ཆུ་སྲིན་གདོང་ཅན། ཟླ་གམ་ཁྲག་མཚོ་གསུམ་གྱི་མདུན་དུ་གསུམ། གཡས་གཡོན་གཉིས་རེའི་མ་བདུན་ཟུར་གསུམ་མ་གསུམ། གྲུ་ཆད་ཀྱི་སྟོད་བཞིར་སྲིང་མོ་བཞི། སྨད་བཞིར་གདོང་མོ་བཞིར། ཁྱམས་ལ་དབང་མོ་ཉི་ཤུ་རྩ་བརྒྱད་དེ་རྩ་བའི་ལྷ་བཞི་བཅུ་ཞེ་བརྒྱད། ཡན་ལག་གི་ལྷ་མོ་སྟོང་། བདུད་མོ་བྱེ་བའི་ཚོགས་རྣམས་དང་བཅས་ཏེ། དཔལ་ལྷ་མོའི་ཐུགས་ཡེ་ཤེས་ཁོ་ནའི་རྣམ་པར་འཕྲུལ་པ་ལས་འཆར་བ་རྟེན་བརྟེན་པར་བཅས་པ་མངོན་སུམ་ན་མཐོང་བར་མོས་པ་དེ་དག་སྦྱོར་བ་དབང་གི་སྣོད་དུ་བསྒྲུབ་པའོ། ༈ །གཉིས་པ་དངོས་གཞི་དབང་བསྐུར་བ་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ལྔ་པོ། རྫས་ལ་བརྟེན་ནས་དབང་གི་ཚུལ་དུ་བསྐུར་བ་དང་། གཏོར་མ་ལ་བརྟེན་ནས་བྱིན་རླབས་ཀྱི་ཚུལ་དུ་བསྐུར་བའོ། །དང་པོའི་དོན་དུ་མཎྜལ་འབུལ། གསོལ་བ་འདེབས་པ་འདིའི་རྗེས་སུ་ཟློས་ཤིག །དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་བདག་ལ་དཔལ་ལྡན་ལྷ་མོའི་སྐུའི་དབང་བསྐུར་དུ་གསོལ་ཞེས་གསོལ་བ་བཏབ་པ་ལ། ཐོད་བུམ་གཞལ་མེད་ཁང་གི་ནང་དུ་ཡེ་ཤེས་ཀྱི་མ་མོ་ཞུ་བའི་ཤེས་རབ་ཀྱི་ཕ་རོལ་དུ་ཕྱིན་མའི་ཡེ་ཤེས་བདུད་རྩིས་ཁྲུས་བྱས་ཤིང་ངག་ལམ་དུ་བསྟིམས་ཏེ་དབང་བསྐུར་བས་ལྷ་མོའི་སྐུ་ཡི་དབང་བསྐུར་བ་ཐོབ་སྟེ་རང་གི་ལུས་ལྷ་མོའི་སྐུར་གྱུར། ལུས་ཕུང་ཁམས་ཀྱི་དྲི་མ་ཐམས་ཅད་དག་པར་མོས། སྲིད་གསུམ་བྷཉྫའི་བཟང་ཁང་དུ། དུས་གསུམ་རྣམ་རྟོག་སེལ་བ་ཡི། །ཡེ་ཤེས་བདུད་རྩི་དྲི་མེད་པས། །བདེ་བ་ཆེན་པོར་དབང་བསྐུར་རོ། །ༀ་སརྦ་ཏ་ཐཱ་ག་ཏ་པྲཉྫཱ་པཱ་ར་མི་ཏ་མ་མཿཀ་ཡ་ཨ་བྷི་ཥིཉྩ་ཧཱུྃ། ཞེས་རྡོ་རྗེའི་རྩེས་བདུད་རྩིའི་ཆུ་གཏོར་སྤྱི་བོར་བཞག །ངག་ཏུ་བླུད། ཡང་གསོལ་བ་གདབ་པ་འདིའི་རྗེས་སུ་ཟློས་ཤིག །དུས་གསུམ་ནས། གསུང་གི་ཞེས་བསྒྱུར། གསོལ་བ་བཏབ་པས་མདུན་བསྐྱེད་མ་མོའི་མགྲིན་པར་ནས་ཚུར་མ་དང་བྷྱོཿཡིག་དམར་པོ་ཆར་ལྟར་བབས་བདུད་རྩིར་འཁྱིལ་བ་ངག་ལམ་དུ་རོལ་པས་ལྷ་མོའི་གསུང་གི་དབང་བསྐུར་བ་ཐོབ་སྟེ། རང་གི་ངག་ཡེ་ཤེས་ཀྱི་ལྷ་མོའི་གསུང་དུ་གྱུར། ངག་གིས་བསགས་པའི་སྒྲིབ་པ་ཐམས་ཅད་དག་པར་མོས། པདྨ་བྷཉྫའི་སྣོད་ཡངས་པོར། །རྡོ་རྗེ་མཁའ་འགྲོའི་སྙིང་རྗེའི་ཚིག །ཡི་གེ་བདུད་རྩིའི་རྒྱ་མཚོ་ཡིས། །སྐྱེ་བ་མེད་པར་དབང་བསྐུར་རོ། །སྔགས་དེ་ཡི་མཐར། ཝཀྐ་ཨ་བྷི་ཥིཉྩ་ཧཱུྃ། མགྲིན་པར་བཞག་ཧུབ་རེ་བླུད། ཡང་གསོལ་གདབས་ནས་འགྲེས། ཐུགས་ཀྱི་བསྒྱུར། སིན་ཏུ་རིའི་མེ་ལོང་གི་སྟེང་ན་ལྷ་མོ་ནག་མོ་བཞུགས་པ་དགྱེས་བཞིན་དུ་འོད་དུ་ཞུ་ཁྱེད་རང་ལ་ཐིམ། ཡིད་ཀྱི་དྲི་མ་དག །རང་སྣང་ཡེ་ཤེས་ཀྱི་ལྷ་མོ་རང་སེམས་སྟོང་ཉིད་གཞི་རྩ་དང་བྲལ་བར་ཤེས་པས་སྣང་སྲིད་མ་མོའི་སྟོང་སྲོག་ལ་རང་དབང་དུ་བསྒྱུར་ཏེ་འཁོར་འདས་ཐམས་ཅད་སེམས་སུ་ཐག་ཆོད་པའི་གདེང་གིས་ལྷ་མོའི་ཐུགས་ཀྱི་དབང་བསྐུར་ཐོབ། རང་སེམས་ལྷ་མོའི་ཐུགས་སྲོག་མི་འགྱུར་བ་བློ་བྲལ་དུ་དབྱེར་མེད་པར་དུས་ནམ་ཡང་འགྱུར་བ་མེད། སྐྱེ་བ་མེད། གནས་པ་མེད། འགགས་པ་མེད་པར་རྟོགས། ཡིད་མཚན་མའི་རྟོགས་པ་ཐམས་ཅད་དག་པར་མོས། དོན་དམ་གཉིས་མེད་བྱང་ཆུབ་སེམས་ཉིད་ཡིན། རང་སེམས་རྣམ་དག་ཆོས་དབྱིངས་ཕོ་བྲང་ནས། སྐུ་གསུང་ཐུགས་ལས་སྤྲུལ་པའི་མ་མོ་ནི། མ་ཅིག་དཔལ་ལྡན་ལྷ་མོ་རེ་མ་ཏི། སྐྱེ་མེད་དབྱིངས་ནས་འགགས་མེད་དབང་བསྐུར་རོ། །སྔགས་མཐར་ཙིཏྟ་བསྒྱུར། སིན་དྷུ་རས་སྙིང་ཁར་ཐིག་ལེ་བྱ། ཡང་། ཡོན་ཏན་གྱི། ཞེས་བསྒྱུར། དཔལ་ལྡན་མ་མོས་འགྲོ་བའི་སྡུག་བསྔལ་གཞོམས་པ་དང་། བརྩེ་བས་བདེ་བའི་ཆགས་པ་ཆེན་པོ་སྤེལ་བ་དང་། དགོས་འདོད་བསྒྲུབ་པ་རྣམས་མཚོན་པའི་ཕྱག་མཚན་རྣམས། གཏད་པས་ལྷ་མོའི་ཡོན་ཏན་གྱི་དབང་བསྐུར་བ་ཐོབ་སྟེ་རང་ལ་ལྷ་མོའི་ཡོན་ཏན་ཡོངས་སུ་རྫོགས་ཡོན་ཏན་གཞན་དོན་ལ་དབང་ཐོབ། རང་དོན་ཡིད་བྱེད་ཀྱི་དྲི་མ་དག་པར་བསམ་ལ། རྣམ་རྟོག་འཁོར་བའི་སྡུག་བསྔལ་གཅོད། ཕྱག་མཚན་ཡེ་ཤེས་རལ་གྲི་དང་། །སྡུག་བསྔལ་འཁོར་བའི་ཆགས་པ་ཁྲག །བདེ་ཆེན་རོལ་པའི་ཐོད་པ་དང་། དགོས་འདོད་ཀུན་བསྐང་ནེའུ་ལེའི། །རྐྱལ་པས་ཁྱེད་ལ་དབང་བསྐུར་རོ། །སྣང་སྲིད་མ་མོ་རྒྱ་མཚོ་ཀུན། །སྟོང་སྲོག་དབང་དུ་འདུ་བར་ཤོག །སྔགས་མཐར། གུ་ཎ་ཞེས་བསྒྱུར། ཕྱག་མཚན་ཕྱག་ཏུ་གཏད། ཡང་གསོལ་གདབ། ཕྲིན་ལས་ཀྱི༴ ཞེས་བསྒྱུར། རྡོ་རྗེ་ཕུར་བུ་འདི་ཉིད་ཕྱག་ཏུ་གཏད་པ་ཙམ་གྱིས་ལྷ་མོའི་ཕྲིན་ལས་ཀྱི་དབང་བསྐུར་བ་ཐོབ་སྟེ་རང་གིས་བསྒྲུབ་པའི་ལས་ཐམས་ཅད་ལྷ་མོའི་ཕྲིན་ལས་སུ་གྱུར། ཕྲིན་ལས་བདུད་བགེགས་དགྲ་གདོན་ཐམས་ཅད་འདུལ། ཆོས་བྱང་ཆུབ་བསྒྲུབ་པ་ལ་བར་ཆོད་ཀྱི་དྲི་མ་ཐམས་ཅད་དག་པར་བསམ་ནས། ཧཱུྃ། ཕུར་བུའི་སྲུང་མ་རེ་མཱ་ཏི། མཐིང་ནག་མི་སྲུན་གཅེར་བུ་ལ། ཨུཏྤལ་སྔོན་པོ་འཁྲིགས་འདྲའི་འོད། རྣོ་དབལ་བར་ཆད་བགེགས་ལ་གཟིར། ཕྲིན་ལས་དྲག་པོའི་དབང་བསྐུར་རོ། །སྔགས་མཐར། ཀརྨ༴ ཞེས་བསྒྱུར། ཕུར་བུ་ལག་ཏུ་གཏད་ལ་ཕྱོགས་བཅུར་འདྲིལ་གཞུགས། སྤྲོ་ན་ཟན་ལིང་མདུན་དུ་བཀོད་དེ། བསད་མནན་འཕང་བ་ཚང་མའམ། བསད་ལས་ཞལ་སྟབས་བར་དུ་བྱ། དེ་ཡན་ཆད་ནི་རྫས་ལ་བརྟེན་པ་དབང་གི་ཚུལ་དུ་བསྐུར་བའོ། །གཉིས་པ་གཏོར་མ་ལ་བརྟེན་ནས་བྱིན་རླབས་ཀྱིས་ཚུལ་དུ་བསྐུར་བའི་དང་པོ། སྐུ་ཡི་བྱིན་རླབས་དབང་གི་སླད་དུ་དམིགས་པ་འདི་བཞིན་ཞུ། སྤོས་བཏུལ་ནས་གཏོར་མ་ལ་འཛུགས། གཏོར་མ་འདི་ཉིད་དཔལ་ལྡན་ལྷ་མོ་དྲེལ་ལ་བཅིབ་པའི་སྐུར་གྱུར་པ་དང་། ཁྱེད་རང་རྣམས་ཀྱི་སྙིང་ཁར་དཔལ་ལྡན་ལྷ་མོ་དྲེལ་ལ་བཅིབ་པར་མོས། དེ་གཉིས་ཀྱི་ཐུགས་ཀ་ནས་འོད་ཟེར་འཕྲོས། ཉི་མ་བྱང་ཤར་གྱི་མཚམས་ནས་འདིར་བསྐྱེད་པ་དང་འདྲ་བའི་ལྷ་མོ་གྲངས་མེད་པ་བྱུང་ནས། མཚོ་ལ་ཁ་བ་བབ་པ་བཞིན་དུ་ཁྱེད་རང་གི་སྙིང་གའི་ལྷ་མོ་ལ་ཐིམ་པར་བསྒོམས་མཛོད། གུ་གུལ་དཀར་ནག་དང་ཚིལ་སྤོས་བསྲེགས། རྐང་གླིང་གིས་བསྐུལ། རྩ་སྔགས་མང་དུ་ཟླ་ཞིང་རོལ་མོ་བྱ། མཆོད་ཕྲིན་འབྲིང་པོ་ནས་འབྱུང་བའི་ཕྱག་འཚལ། བྷྱོཿ ནག་མོ་ཁྲག་འཐུང་སོགས་བརྗོད་མཐར། གཏོར་མ་མགོ་ཐོག་ཏུ་བཟུང་ནས། དཔལ་ཡེ་ཤེས་ཀྱི་ལྷ་མོ་ནག་མོ་ཆེན་མོས་རིག་པ་འཛིན་པ་འདི་ཡི་ལུས་ལ་སྐུ་ཡི་བྱིན་གྱིས་རློབས་ཤོག །ལུས་ནད་གདོན་འབྱུང་པོའི་འཚེ་བ་ལས་སྐྱོབས་ཤིག །ཅེས་གསོལ་བ་བཏབ་པས་གཏོར་མའི་ལྷ་མོའི་དཔྲལ་བ་ནས་ༀ་དཀར་པོ་ཆར་ལྟར་བབས་ཏེ་བྱུང་ཁྱེད་རང་གི་དཔྲལ་བར་ཐིམ་པས་ལུས་ལྷ་ཡི་ནུས་པ་རྫོགས་པའི་མོས་པ་མཛོད། །རྩ་སྔགས་བཟླ་ཞིང་སྤོས་རོལ་བྱ། གཉིས་པ་གསུང་གི་དབང་བསྐུར་བ་ལ་འདུན་པ་འདི་བཞིན་མཛོད། །གཏོར་མ་དེ་མགྲིན་པར་བཟུང་ལ། དཔལ་ཡེ་ཤེས་སོགས། ངག་ལ་གསུང་གི་བྱིན་གྱིས་རློབས་ཤིག །ངག་ལས་སྒྲིབ་བག་ཆགས་ལས་སྐྱོབས་ཤིག་ཅེས་གསོལ་བཏབ་པས། གཏོར་མ་འདི་དང་ཐ་མི་དད་པའི་དཔལ་ལྡན་ལྷ་མོ་དཔག་ཏུ་མེད་པ་དང་། ཙ་བའི་དཔལ་ལྷ་མོའི་མགྲིན་པ་ནས་ཨཱཿཡིག་དམར་པོ་ཆར་ལྟར་བབས། ཁྱེད་རང་གི་མགྲིན་པར་ཐིམ་པས་ངག་སྔགས་ཀྱི་ནུས་པ་དང་ལྡན་པར་མོས་ཤིག །རྩ་སྔགས་བཟླ་ཞིང་སྤོས་རོལ་བྱ། ཞར་བྱུང་མ་ལྟར་བསྟེན་པའི་བཟླས་ལུང་བླང་བ་ལ། ལྷ་མོའི་ཐུགས་ཀར་ཡེ་ཤེས་སེམས་དཔའ་ཀ་རི་མ་སྔོན་མོ་གཡས་ཞིང་དབྱུག་གཡོན་ཐོད་ཁྲག་བསྣམས་པའི་ཐུགས་ཀར་ཟླ་བའི་སྟེང་དུ་རལ་གྲིའི་སོ་ཡུའི་མཚམས་སུ་མ་ནག་མོ་ལ་རྩ་སྔགས། སྲོག་སྙིང་དང་བཅས་པས་བསྐོར་བ་ལས་གཉིས་པ་ཞིག་ཐུགས་ཀའི་ནུ་འབུར་ནས་ཚུར་ལ་བྱུང་། ཁྱོད་རང་གི་སྙིང་ཁར་ཐིམ་པར་གྱུར་པའི་མོས་པས་སྔགས་འདི་རྣམས་རྗེས་ཟློས་ལན་གསུམ་ཞུ། ཕྲེང་བ་གཏད་ལ། རྩ་སྔགས་གཙོ་འཁོར་གྱི་སྲོག་སྙིང་རྣམས་བཟླར་འཇུག །གསུམ་པ་ཐུགས་ཀྱི་དབང་བསྐུར་བ་ལ་འདུན་པ་འདི་བཞིན་མཛོད། ཡང་གཏོར་མ་སྙིང་གར་བཟུང་ལ། དཔལ་ཡེ་ཤེས་སོགས་ནས། ཡིད་ལ་ཐུགས་ཀྱི་བྱིན་གྱིས་རློབས་ཤིག །ཡིད་སྡིག་པ་དང་དྲི་མ་ལས་སྐྱོབས་ཤིག །ཅེས་གསོལ་བ་བཏབ་པས་གཏོར་མ་དང་གཅིག་པའི་ལྷ་མོའི་སྙིང་ག་ནས་ལྷ་མོ་གྲངས་མེད་པ་དང་། ཁྱད་པར་དུ་མཿསྔོ་སྐྱ་ལས་འོད་ཟེར་སྣ་ཚོགས་གྲངས་མེད་པ་གཅིག་བྱུང་། ཐུགས་ཀའི་ཧཱུྃ་ལ་ཐིམ་པས་ཐུགས་གཉིས་སུ་མེད་པ་རྟོགས་པའི་ནུས་པ་དང་ལྡན་པར་བསྒོམས། ནས་རྩ་སྔགས་བཟླ་ཞིང་སྤོས་རོལ་བྱ། བཞི་པ་ཡོན་ཏན་ཕྲིན་ལས་གཉིས་ཀའི་བྱིན་རླབས་གསང་བའི་དབང་བསྐུར་བའི་སླད་དུ་དམིགས་པ་འདི་བཞིན་མཛོད། གཏོར་མ་ལག་ཏུ་གཏད་ནས། དཔལ་ཡེ་ཤེས་སོགས་ནས། སྐལ་ལྡན་འདི་དག་གི་རྒྱུད་ལ་ཡོན་ཏན་དང་ཕྲིན་ལས་ཀྱི་བྱིན་གྱིས་རློབས་ཤིག །ས་དང་ལམ་གྱི་ཡོན་ཏན་མ་ལུས་པ་རྫོགས་ནས་ཕྲིན་ལས་རྣམ་པ་བཞི་འགྲུབ་པར་མཛད་དུ་གསོལ། ཅེས་གསོལ་བ་བཏབ་པས་ལྷ་མོའི་ལྟེ་བ་ནས་འོད་ཟེར་སེར་པོ་དང་། གསང་གནས་ནས་འོད་ཟེར་ལྗང་གུ་གྲངས་མེད་པ་བྱུང་ཁྱེད་རྣམས་ཀྱི་ལྟེ་བ་དང་གསང་བར་ཐིམ་པར་བསྒོམ་ཤིག །ༀ། གསང་བ་དུར་ཁྲོད་དབྱིངས་ཀྱི་དཀྱིལ་འཁོར་ནས། །ཁམས་གསུམ་གདུལ་བ་ཟ་བྱེད་ཆེན་མོ་སྟེ། །རྡོ་རྗེ་དྲྭ་བ་དང་ནི་གློག་འགྱུ་མ། །རུ་ལུ་རུ་ལུའི་སྒྲ་སྐད་དྲག་པོ་ཡིས། །རཀ་མོ་ཀྲོ་དྷ་ཀྵ་ཡིས་བོས་པའི་ཚེ། །ཡུན་གྱི་དཔལ་དང་མགོན་དུ་ཁྱེད་བསྟེན་ན། །མྱུར་དུ་དངོས་གྲུབ་སྩལ་གཅིག་དཔལ་ལྷ་མོ། །ༀ་རུ་རུ༴ སོགས་རྩ་སྔགས་བཟླ་ཞིང་སྤོས་རོལ་བྱ། སློབ་མ་བརྒྱུད་འཛིན་འདྲ་ཡིན་ན་གཏོར་མའི་ལྷ་དེ་ལ་བསྟིམ། གཞན་སློབ་དཔོན་གྱི་ཐུགས་དཀར་བསྟིམ། གཏོར་ཟན་མ་མོའི་དངོས་གྲུབ་ཏུ་བསམ་ནས་གསོལ་གཅིག །ཅེས་བརྗོད་བཅིང་འདྲེས་ནས་སྦྱིན། དེ་ལྟར་དབང་བསྐུར་བའི་དོན་རང་སེམས་དོན་གྱི་དཔལ་ལྡན་ལྷ་མོའི་ཐུགས་ཡེ་ཤེས་ནི་རྡོ་རྗེ་ནམ་མཁའི་དཀྱིལ་ལྟ་བུ། སྤྲོས་པ་ཡོད་མེད་གང་ཡིན་མིན་སོགས་ཉེ་བར་ཞི་བ། དཔེ་དང་ཚིག་གིས་མི་མཚོན་པ་སོ་སོར་རང་གི་རིག་པ་རྣམ་ཀུན་མཆོག་ལྡན་གྱི་རང་བཞིན་སྒྱུ་མ་ལྟ་བུའི་རིག་སྟོང་ཟུང་དུ་འཇུག་པ་ནི་སྐྱེ་མེད་དོན་གྱི་དཔལ་ལྷ་མོ་སྟེ། དེ་རྣམས་ལུས་གནད་རང་བབ་ཏུ་ལྷོད་བག་རང་ཞིར་ཆུག །སེམས་འདས་མ་འོངས་ཡིད་བྱེད་ད་ལྟའི་རྟོག་པ་རང་ཞིར་ཞོག་ལ། དགག་སྒྲུབ་བློ་ཡིས་ངང་ཐད་ཀར་ལྷོད་དེ་བསྐྱངས་བར་བྱ་དགོས་པས་དེའང་། གལ་པོ་ལས། བསམ་དུ་མེད་དོ་སེམས་ཉིད་ནམ་མཁའ་ཆེ། སེམས་ཉིད་མ་དཔེར་ཚིག་ཆད་ཡོད་པ་ཀུན་དང་བྲལ། ཞེས་གསུངས་པ་ལྟར་ངང་བསྐྱངས་བ་ལ་བརྩོན་པར་ཞུ། ཚུལ་འདིའང་སྤུ་གྲི་ཡ་མའི་རྒྱུད་ལས། གསང་བའི་དབང་བསྐུར་ཐོབ་པ་ནི། །མ་ནོར་སྣང་བ་རང་གི་སེམས། །སེམས་ཉིད་མ་བཅོས་ཐིག་ལེའི་ངང་། །སེམས་ལ་རང་དབང་ཐོབ་པ་ན། །ཆོས་ཀྱི་སྐུ་ཡི་རང་བཞིན་ཏེ། །ཁམས་གསུམ་འཁོར་བའི་གཡུལ་ལས་རྒྱལ། །ཞེས་གསུངས་སོ། །དེ་དག་གིས་ནི་ཡེ་ཤེས་པ་ལྟར་དབང་བསྐུར་བའི་རིམ་པ་གྲུབ་བོ། །གཉིས་པ་འཇིག་རྟེན་པ་ལྟར་རྗེས་སུ་གནང་བ་བཀའ་གཏད་ཀྱི་དོན་དུ་མཎྜལ་ཕུལ། གསོལ་བ་འདེབས་པ་འདི་ཡི་རྗེས་ཟློས་མཛོད། ཤཱཀྱ་སེང་གེའི་བསྟན་བསྲུང་མ། མ་མོ་ཡོངས་ཀྱི་གཙོ་མོ་མཆོག །དཔལ་ལྡན་ལྷ་མོ་ནག་མོ་ཡི། །རྗེས་སུ་གནང་བ་སྩལ་དུ་གསོལ། །ལན་གསུམ་འཇིག་རྟེན་པའི་མ་མོ་ལ་རྟེན་བསྐྱེད་མི་དགོས་གསུངས། སློབ་དཔོན་གྱི་ཐུགས་ཀའི་འོད་ཟེར་ལྕགས་ཀྱུ་ལྟ་བུ་འཕྲོས་པའི་ཉི་མ་བྱང་ཤར་གྱི་མཚམས་ཐོད་པའི་སྐུ་མཁར་ནས་དཔལ་ལྷ་མོ་ནག་མོ་མ་མོ་བྱེ་བ་འབུམ་སྡེའི་བཀའ་འཁོར་དང་བཅས་སྐད་ཅིག་གི་གློག་འཁྱུགས་པ་ལྟར་སྤྱན་དྲངས་ནས་རྟེན་གཏོར་ལ་ཐིམ་པར་བསམ་ནས་རྩ་སྔགས་བཅོ་ལྔ་མ་དང་སྤོས་རོལ་བྱ། འབུལ་བའི་གཏོར་མ་བྱིན་རླབས་བྱ། དམ་བསྲེ་བའི་ཕྱིར་ནང་མཆོད་ནས་ཧུབ་གཅིག་སློབ་བུ་ལ་བྱིན་ནས། དེང་ཕྱིན་ཆད་ཁྱེད་ཀྱིས་དཔལ་ལྷ་མོ་ནག་མོ་བསྙེན་བསྒྲུབ་ལས་གསུམ་གྱི་སྒོ་ནས་རྒྱུན་དུ་བརྟེན་ཅིང་གསང་སྔགས་ཀྱི་རྩ་བ་དང་ཡན་ལག་གི་དམ་ཚིག་སྤྱི་དང་། བྱེ་བྲག་དུས་ཀྱི་གཏོར་མ་དང་བསྒྲུབ་བརྟེན་བསྐང་བའི་རྫས་དང་རྡོ་སོལ་ཆུ་མི་བསྐྱུར། བྱ་ནག་དང་ཁྱི་ནག་ལ་རྡོ་མི་བརྡེག །འཚུབས་མ་ལ་མོས་མགར་ཡུག་མི་བརྟེན། བོང་བུ་མི་བརྡེག །འཁྲུགས་སྐང་བྱ་བ་ལ་སོགས་པ་དམ་ཚིག་མཐའ་དག་ཚུལ་བཞིན་བསྒྲུབ་པ་ལ་བརྩོན་པར་བྱོས་ཤིག །སློབ་མས་ཀྱང་ཁས་བླང་བ་འདིའི་རྗེས་ཟློས། མི་ཕྱེད་རྡོ་རྗེའི་དམ་ཚིག་འདི། །གསུང་བ་གསུམ་གྱི་དབྱིངས་ནས་བྱུང་། །དཀྱིལ་འཁོར་གསུམ་གྱི་དམ་ཚིག་འདི། །གྲུབ་ན་འཇིག་པའི་དུས་མེད་པས། །དམ་ཚིག་རྣམས་ལས་བདག་མི་འདའ། །བཛྲ་ས་མ་ཡ་ན་ར་ཀན། ཞེས་དམ་བླངས། སླར་ཡང་བསྒོ་བ་ནི། སློབ་མ་དམ་པ་ཁྱེད་ཀྱིས་དེངས་ཕྱིན་ཆད་དཔལ་ལྡན་མའི་བསྙེན་བསྒྲུབ་ལས་གསུམ་འདི་དག་སུ་ལ་ཡང་གསང་བར་དམ་ནོས་ཤིག །ཅེས་བརྗོད་པས་བདུད་རྩི་ཐིག་གཅིག་ལྟེ་ཐོག་ཏུ་གཏོར། དེ་ནས་ནང་མཆོད་ཧུབ་ཆ་གཅིག་རྟེན་གཏོར་ལ་འབུལ་ནས། དམ་བསྲེ་བའི་སྐབས། ཁྱེད་དང་སློབ་བུ་དམ་བསྲེའོ། །ཞེས་སྦྱར་དམ་བསྒྲགས་པའི་སྐབས། དམ་ཚིག་དང་ལྡན་པ་འདི་དག་ལ། ཞེས་བསྒྱུར། གསང་བའི་དམ་ཚིག་གི་རྒྱ་བསྟན། མཆོད་ཕྲིན་ཆེན་མོའི་གཞུང་ནས་འབྱུང་བའི་སྨན་རཀ་གཏོར་གསུམ་འབུལ། མཆོད་ཕྲིན་འབྲིང་པོ་ནས་འབྱུང་བའི། བྷྱོཿ དབྱིངས་ཕྱུག་དཔལ་ལྡན་མས་བསྟོད། དེ་ནས་སྲིང་དང་གྲོགས་དང་བྲན་ལྟར་བསྟེན་པའི་ཟླས་ལུང་བླང་བ་ལ་དམིགས་པ་འདི་བཞིན་དུ་མཛོད། མཆོད་ཕྲིན་ཆེན་མོའི་བསྙེན་སྐབས་ཀྱི། རང་གི་ཞེས་པའི་དོད། ཁྱེད་རང་གི་ཞེས་བསྒྱུར་ནས་སྔགས་གསུམ་པོ་རེ་རེ་ནས་གསུམ་གསུམ་བཟླར་གཞུག །སློབ་བུ་ཐུན་མིན་བརྒྱུད་པ་འཛིན་ངེས་ལ་སྲོག་གི་ལས་བརྒྱད་ཀྱི་དམིགས་གནད་རྒྱུད་ནས་འབྱུང་བ་ལྟར་འབོག །རྟེན་གཏོར་སྤོས་བཅས་ལག་ཏུ་གཏད་ནས། དཔལ་ལྷ་མོ་ནག་མོ་རང་བྱུང་གི་རྒྱལ་མོ། སྐེམས་མ་ཆུ་སྲིན་མགོ་ཅན་མ་བདུན། མ་གསུམ། སྲིང་མོ་བཞི། སེང་སྟག་འབྲུག་སྤྱང་། དབང་ཕྱུག་ཉི་ཤུ་རྩ་བརྒྱད། འཁོར་གྱི་མ་མོ་སྟོང་རྩ། བདུད་མོ་བྱེ་བ་འབུམ་སྟེ་བཀའ་འཁོར་དང་བཅས་པས་དཔལ་ཆེན་པོའི་སྤྱན་སྔར་ཁས་བླངས་ཤིང་དམ་བཅས་པ་བཞིན་དུ། དམ་ལྡན་རྡོ་རྗེའི་སློབ་བུ་ཐུན་མིན་ཡིན་ན་འདི་ཞེས་བྱ་བའི་ཞེས་མིང་བརྗོད། ཐུན་མོང་ཙམ་དུ། འདི་རྣམས་ཀྱིས་རྩི་བྱིན་པའི་ཟས་ཟོ། ཅི་བཅོལ་བའི་ལས་གྱིས། ལུས་དང་གྲིབ་མ་བཞིན་དུ་འགྲོགས། སྡང་བར་བྱེད་པའི་དགྲ་ཐུལ། བར་དུ་གཅོད་པའི་རྐྱེན་བཟློག །སློབ་དཔོན་ཐུན་མོང་མིན་པ་ལ། སྐུ་བསྟན་ཅིང་རྟོགས་པའི་གྲོགས་སུ་མཛོད་ལ་ཉམས་དང་རྟོགས་པ་སྤོར། ཐུན་མོང་ཙམ་དུ། དམ་ཚིག་གི་བྱ་ར་མཛོད། དུས་འདི་ནས་བྱང་ཆུབ་ཀྱི་བར་དུ་འབྲལ་བ་མེད་པར་མཛོད་ཅིག་ཅེས་གསོལ་བ་དཔལ་ལྡན་ལྷ་མོས་ཀྱང་། བླ་མ་རྡོ་རྗེ་འཛིན་པའི་བཀའ་ཡི་བསྒོ་བ་བཞིན་རིགས་ཀྱི་བུ་ཁྱེད་ཀྱི་འགལ་རྐྱེན་བར་ཆད་ཐམས་ཅད་ངས་སེལ། མཐུན་རྐྱེན་དགེ་བ་ཐམས་ཅད་ངས་བསྒྲུབ་ཅེས་གསུང་ལྷང་ལྷང་བྱོན་པར་མོས། གཏོར་མའི་སྟོད་ནས་ཆ་གཅིག་ལྷ་མོ་ལ་འབུལ། སྨད་དེ་དངོས་གྲུབ་ཏུ་མོས་ལ་དཔོན་སློབ་ཀུན་ནས་ཅུང་ཟད་རོལ། དེ་ནས་བརྒྱུད་པ་འཛིན་ངེས་ཀྱི་སློབ་བུ་ཐུན་མིན་ལ་བླ་རྡོ་དང་སྲོག་འཁོར་སྦྱིན་ནས། རིགས་ཀྱི་བུ་ཁྱེད་ཀྱིས་དཔལ་ལྷ་མོ་ནག་མོའི་བླ་རྡོ་དང་སྲོག་གི་འཁོར་ལོ་འདི་ཉིད་མི་འབྲལ་བར་ལུས་དང་གྲིབ་མ་བཞིན་འཆངས་ཤིག །སྐལ་བ་དང་ལྡན་པ་ཁྱེད་ཅག་གི་མ་མོའི་དམ་ཚིག་གི་རིམ་པ་ཐུབ་པར་མཛོད་ཅིག །དངོས་གྲུབ་ཐོབ་པར་གྱིས་ལ་སངས་རྒྱས་ཀྱི་བསྟན་པ་བསྲུངས་ཤིག །དེ་ཕྱིན་ཆད་དཔལ་ལྡན་མའི་བསྙེན་བསྒྲུབ་ལས་གསུམ་གྱིས་ཤིག །ཅེས་བསྒོ། རྗེས་གནང་གི་གཏོར་མའི། ལྷ་ཚོགས་ཐམས་ཅད་རྗེས་ལ་བསྡུ་གཤེགས་གང་ཡང་མི་དགོས་གསུངས་སོ། །སློབ་མས་ཀྱང་ཇི་སྐད་གསུངས་པ་ལྟར་འཛིན་པར་བགྱི་འོ་སྙམས་པས་འདིའི་རྗེས་ཟློས་ཞུ། གཙོ་བོས་ཇི་ལྟར་སོགས། འདིར་དཔོན་སློབ་གཉིས་ཀས་གཏོར་མ་གསར་དུ་བཤམས་མཆོད་གསོལ་རྒྱས་པར་བྱའོ། །དེ་ནས་བཀྲ་ཤིས་བརྗོད། གཏང་རག་གི་མཎྜལ། ལུས་ལོངས་སྤྱོད་འབུལ་བ་རྣམས་སྤྱི་ལྟར་བྱའོ། །དེ་ནི་མ་གསོལ་རྒྱུན་དུ་བརྟེན་ཅིང་ཆོས་བརྒྱུད་འདི་ལ་གུས་ངོས་རྣམས་ལ་བྱའོ། །གཉིས་པ་དེ་ལ་ཐུན་མོང་གི་དམིགས་རིམ་སྤྱི་དབང་རྗེས་བྱ་ཚུལ་ལས། ཡེ་ཤེས་དབབ་པའི་བར་གང་བཞིན། དེ་ནས་གསོལ་བཏབ་མཐར། སློབ་དཔོན་རྡོ་རྗེ་གཞོན་ནུའི་ཐུགས་ཀ་ནས་ལྕགས་ཀྱུ་ལྟ་བུའི་འོད་ཟེར་འཕྲོས། ཉི་མ་བྱང་ཤར་གྱི་མཚམས། མཚོ་མུ་ལེ་མཐིང་གི་གཞལ་ཡས། ཐོད་པའི་སྐུ་མཁར་ནས། དཔལ་ལྡན་ལྷ་མོ་ཡེ་ཤེས་པ་སྤྱན་དྲངས་ཏེ་སྐད་ཅིག་གིས་ཁྱེད་རང་གི་སྙིང་གར་སིབ་ཀྱིས་ཐིམ། སྙིང་ནང་དུ་ཡེ་ཤེས་སེམས་དཔའ་ལྷ་མོ་དྲེའུ་ལ་བཅིབ་པ་ཞིག་ལ་ཐིམ་པར་བསྒོམས་ཤིག །ནས་སྤྱན་འདྲེན་དང་། ཕྱག་འཚལ་བྱ། སྤོས་ཆོག་སོགས་དོར། དབྱིངས་ཕྱུག་དཔལ་ལྡན༴ མས་བསྟོད། རྫས་ལ་རྟེན་ནས་དབང་ཡོངས་རྫོགས་བསྐུར་རྟེན་གཏོར་ལག་ཏུ་གཏད་ལ། དམ་བསྒྲགས་པའི་མཐར། དམ་ཚིག་ཁས་བླངས་ནས་འཇུག་སྟེ་རྫོགས་པར་བྱས་པས་ཀྱང་། གསོལ་ཀ་བཏང་བའི་གྲོགས་བཅོལ་བ་སོགས་པའི་སྣོད་དུ་རུང་བ་ཙམ་མོ། །དེ་ལྟར་ན་དེ་དག་གིས་གྲུབ་པའི་སློབ་དཔོན་ཆེན་པོ་དྷ་ན་སངྐྲི་ཏ་ཡི་ལུགས། སློབ་དཔོན་ཆེན་པོའི་བཀའ་སྲོག་ལས་བྱོན་པའི་བསྟན་སྲུང་གི་རྒྱལ་མོ་རྡོ་རྗེ་རེ་མཱ་ཏིའི་ཡེ་ཤེས་པའི་དབང་བསྐུར་དང་། འཇིག་རྟེན་པ་ལྟར་རྗེས་སུ་གནང་བ། རྒྱལ་བ་ཀཿཐོག་པའི་བསྟན་སྲུང་གི་གཙོ་མོ། ཐུགས་གཙིགས་ཏུ་མཛད་པ་ལེགས་པར་ཕུལ་གྲུབ་པ་ལགས། མཐར་དགེ་བ་བསྔོས་ལ་རང་གནས་སུ་བཏང་ངོ་། །གསུམ་པ་རྗེས་ལ། སླར་ཡང་སློབ་དཔོན་གྱིས་བསྐང་བཤགས་དང་། གཏོར་མ་ལ་འགུགས་གཞུགས་བྱས་ཏེ། རྗེས་ཆོག་གི་རིམ་པ་བྱའོ། །འདི་ནི་སྲིད་པ་མ་མོའི་ཡུམ་གཙོ་མོ་མུ་ཁ་ལེའི་ཐུགས་ལས་སྤྲུལ་པའི་ལྷ་མོ་རང་བྱུང་རྒྱལ་མོ་ཡིན་པས། ཤིན་ཏུ་གཉན་ཅིང་ཟབ་པས་སུ་ཐོད་ཐོད་ལ་སྤེལ་བར་མི་བྱའོ། །གང་གི་སྲོག་དབང་གི་ཤིན་ཏུ་ཟབ་པ་ལ། སྔོན་དུ་བསྙེན་པ་འགྲུབ་དགོས་ཤིང་། ཁྱད་པར་ཚོགས་དང་གཏོར་མ་མང་དུ་ཕུལ་ནས་བྱ་དགོས་གསུངས་སོ། །བསླུ་མེད་རིག་འཛིན་རྒྱུད་པའི་ཞལ་ལུང་ཆབ། །མན་ངག་ཡི་གེར་རྙིང་ནས་དུས་རིང་མོས། །འདས་ཀྱང་བྱིན་རླབས་དྲོད་ཆེན་མ། །སྙིང་ལ་སྙན་བརྒྱུད་བདུད་རྩི་ཅིར་ཡང་འཁོལ། །འདིར་འབད་གསང་བ་སྒྲོགས་པའི་ཉེས་སྐྱོན་གང་། །བླ་མ་མཁའ་འགྲོའི་ཚོགས་ལ་བཟོད་གསོལ་ཞིང་། །འདི་དགོས་ཚེ་རབས་ཀུན་ཏུ་ལྷ་མོ་ཡིས། །བྱང་ཆུབ་ལམ་གྱི་སྲུང་མར་འབྲལ་མེད་ཤོག །ཅེས་པའང་ཡུམ་ཆེན་མཁའ་འགྲོའི་བརྡས་བསྐུལ་ཏེ། གངས་ཅན་གྲུབ་གནས་ཐམས་ཅད་ཀྱི་རྒྱལ་མོ། ཤར་ཀཿཐོག་རྡོ་རྗེའི་གདན་གྱི་རི་བོའི་སྤོར། བསྟན་འགྲོར་ལྷག་བསམ་རབ་དཀར་ཟླ་བའི་ལང་ཚོས་སྙིང་ལ་བདེ་བ་ཡིན་པ། མང་ཐོས་སྙན་བརྒྱུད་འཛིན་པའི་དགེ་སློང་རིག་པ་འཛིན་པ་སི་ཏུ་ཆོས་ཀྱི་རྒྱ་མཚོས་བགྱིས་པ་དགེ་བར་གྱུར་ཅིག །དགེའོ། །དགེའོ། །དགེའོ། །རྗེ་བླ་མ་མཆོག་གི་ཕྱག་བྲིས་དངོས་ལས་ཞལ་བཤུས་སོ།། །།
དཔལ་ལེགས་ལྡན་ཚོགས་ཀྱི་བདག་པོ་མཆོད་པའི་ཆོ་ག་བདུད་ལས་རྣམ་རྒྱལ།
ཤྲཱི ག ཎ དྷི པཱ པ ཙི ཏི བི དྷཱ ན མ ནྨ ཐ བི ཛ ཡ ན བི ཧ ར ཏི སྨ། ཤུབྷཾ།
དཔལ་ལེགས་ལྡན་ཚོགས་ཀྱི་བདག་པོ་མཆོད་པའི་ཆོ་ག་བདུད་ལས་རྣམ་རྒྱལ་བཞུགས་སོ། །
ཀུན་བཟང་ཧེ་རུ་ཀ་དཔལ་གདུལ་ཀའི་འགྲོར། །རྗེས་ཆགས་གཏུམ་དྲག་གར་གྱིས་རྣམ་རོལ་པའི། །རྡོ་རྗེ་སྲིན་པོ་ལེགས་ལྡན་ཚོགས་ཀྱི་བདག །རྣལ་འབྱོར་རེ་སྐོང་བསྟན་བསྲུང་ཆེ་ལ་འདུད། །དེ་ལ་འདིར་དབང་ཐོབ་ཅིང་དམ་ལྡན་གྱི་རྣལ་འབྱོར་པས། ཉེར་དགུ་སོགས་དུས་གཉན་ལ་གནས་ཁང་བསྟར་ཞིང་སྤྱན་གཟིགས་སྣ་ཚོགས་ཀྱིས་བརྒྱན། དམ་ཚིག་གི་བྲིས་སྐུ་སོགས་རྟེན་གྱི་མདུན། ཐོད་སྣོད་ལ་སོགས་པའི་ནང་དུ་དམ་རྫས་གཏོར་མ་སོགས་གཞུང་བཞིན་བཤམས་ནས་མདུན་བསྐྱེད་གསལ་གདབ་ནི། བདག་གི་མདུན་གྱི་གཡོན་ཕྱོགས་ན་རྡོ་རྗེའི་བྲག་ནག་པོ་རི་རབ་ལྟ་བུར་དེའི་སྟེང་དུ་ཞིང་ཚལ་པ་དུམ་བུ། གསོན་པོ་གཅལ་དུ་བཀྲམ་པ། དུར་ཁྲོད་ཀྱི་ས་གཞིར་མདུང་དང་རལ་གྲི་གཤིབ་པའི་ཕོ་བྲང་། དབུས་གྲུ་གསུམ་དང་བཅས་པ། དེའི་ནང་དུ་དགྲ་བགེགས་ཀྱི་རོ་གན་རྐྱལ་དུ་ཡོད་པ། དེའི་སྟེང་དུ། ༀ་བྷུརྐུར་མ་ཧཱ་པདྨ་དྷེ་བུར་རྩི་བུར་བྱི་ཀེ་བྱི་མ་ན་སོ་ༀ་ཧོ་ཤོ་མོ་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བྷུར་ཀུརྨ་ཨ་པྲརྣ་བུད་རྩི་ཀེ་བི་མ་ན་སེ་ཁ་ཤོ་མོག་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བྷུ་རུ་ཀུ་རུ་ཨི་ཙི་ཀི་བྱི་ཙུཥྨ་ཀྲོ་དྷ་ཧཱུྃ་ཕཊ། ༀ་བྷུར་ཀུརྟི་ཧཱུྃ་ཕཊ། ཅེས་བསྙེན་བསྒྲུབ་བཞིའི་སྔགས་ལ་ལན་གསུམ་མམ་བདུན་བརྗོད་པས། དཔལ་ཡེ་ཤེས་ཀྱི་མགོན་པོ་ལེགས་ལྡན་ནག་པོ་ཞལ་གཅིག་ཕྱག་གཉིས་པ། སྤྱན་གསུམ་པ། དབུ་སྐྲ་དམར་སེར་མེ་ལྟར་འབར་བ། ཕྱག་གཡས་གཡོན་གཉིས་ཀྱིས་ཙནྡ་གྱི་བིང་སྔོན་པོ་ཟུར་བརྒྱད་པ་ཕྱར་ཐབས་སུ་བསྣམས་པ། ཞབས་གཉིས་འདོར་ཐབས་སུ་མཛད་པ། སྐུ་ལ་ན་བཟའ་ལྗང་ནག་བེར་ཆེན་མནབ་པ་ལ། གཡུང་དྲུང་རིས་དང་ཚོམ་བུ་རིས་ཀྱིས་བརྒྱན་པ། དར་གྱིས་ཅོད་པན་དང་། གསེར་སྐུད་དང་རིན་པོ་ཆེའི་སྐེ་རག་བཅིངས་པ། ཞབས་ལ་སག་ཏིའི་ལྷྭམ་པོ་ཆེ་མནབས་པ། དར་གྱི་ཅོད་པན་འཕུར་ལྕེ་ངང་ལྡན་པ། རལ་པ་གྱེན་དུ་བརྫེས་པ་ལ་དར་ནག་གི་ཐོད་ཀྱིས་དཀྲིས་པ། ཐོད་པས་བརྒྱན་པ་འཇིགས་པར་བྱེད་པ་ཞལ་གདངས་ལྗག་འདྲིལ་བ། མཆེ་བ་གཙིགས་པ། སྤྱན་བསྒྲད་པའོ། །ཟངས་གྲིའི་བིང་ཆུང་ངུན་སྐེད་ལ་བཙུགས་པ། བེར་དགུ་བརྩེགས་ནི། ངང་དཀར་སྨུག་གཉིས་ཕྱིར་དཀར། བེར་ལྗང་སེར་གཉིས་ཕྱི་ལྗང་། རྒྱབ་དམར་ནག་གཉིས་ཕྱི་ནག །བར་གསིན་གསུམ་དང་དགུའོ། །དེའི་གྲུ་གསུམ་གྱི་རྒྱབ་ཕྱོགས་བཞི་མཚམས་བཞི་དང་བརྒྱད་དུ། ཀྲོ་ཏ་ཛྭ་ལ་ས་མ་ཡཱ། རཀྴ་ཛྭ་ལ་ས་མ་ཡཱ། ཡཀྴ་ཛྭ་ལ་ས་མ་ཡཱ། ཙིཏྟ་ཛྭ་ལ་ས་མ་ཡཱ། མ་མ་ཛྭ་ལ་ས་མ་ཡཱ། ཞེས་པས་ལྷ་མ་སྲིན་སྡེ་བརྒྱད་འཁོར་ཚོགས་གཙོ་བོ་དང་འདྲ་བ་ཕྲག་པར་སླེབ་པ་ཙམ་བརྒྱད་བསྐྱེད་དོ། །དེའི་རྒྱབ་རང་གི་མདུན་གྱི་ཐད་སོར། ཡུམ་ཀྲོ་ཏི་ཤྭ་རི་མ། གཡས་གྲི་ཁུག །གཡོན་ཐོད་ཁྲག་ཅན། དེ་རྣམས་ཀྱིས་རྒྱབ་འཁོར་བ། དེའི་རྒྱབ་ཏུ་ཕྱོགས་སྐྱོང་བཅུ། རྒྱལ་ཆེན་བཞི། དེའི་རྒྱབ་ཏུ་རྟ་བ་ཅན་གྱི་ཚོགས། དེའི་ཕྱི་རོལ་དུ་གླང་ཆེན་གྱི་ཚོགས། དེའི་ཕྱི་རོལ་དུ་རྐང་ཐང་ཅན་གྱི་ཚོགས། དེའི་ཕྱི་རོལ་དུ་ལྷ་དམག་བྱེ་བ་དུང་ཕྱུར་དང་བཅས་པས་བསྐོར་བར་བསམ་ལ། གཙོ་འཁོར་ཐམས་ཅད་ཀྱི་སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པར་པདྨའི་སྟེང་དུ་ཨཱཿདམར་པོ། ཐུགས་ཀར་ཉི་མའི་སྟེང་དུ་ཧཱུྃ་སྔོན་པོས་མཚན་པར་གྱུར། དེ་ནས་ཡེ་ཤེས་པ་སྤྱན་དྲངས་བ་ནི། བདག་གིས། ཨེ་ཧྱ་ཧི་མ་ཧཱ་ཀ་ལ་ཛཿཧཱུྃ་བྃ་ཧོ། རི་མ་ལ་ཡ་གནམ་ལྕགས་ཡོད་པའི་རྩེ་མོ་ནས་ཡེ་ཤེས་ཀྱི་མགོན་པོ་འཁོར་དང་བཅས་པ་སྤྱན་དྲངས་ལ། སྔར་བསྐྱེད་པ་ལ་གཉིས་སུ་མེད་པར་བསྟིམ་ཞིང་། མཆོད་འབུལ། དམ་བཞག །དམ་བསྲེ། དམ་བརྡར་རྣམས་རིམ་པ་བཞིན་བྱ་སྟེ། ཧ་སྟིའི་གཡབ་དར་དང་། སྤོས་རོལ་དབྱངས་འགྱུ་དང་བཅས་པས། ཧཱུྃ། ལང་ཀའི་ཡུལ་གྱི་གྲོང་རྡལ་གྱི། །དབུས་ཀྱི་རི་བོ་མ་ལ་ཡ། །ཀོ་ཀ་ཐང་མར་རྒྱ་མཚོའི་དོ། །དྲག་ཤུལ་ཡོད་པའི་རྩེ་མོ་ནས། །དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་སྡེ་རྣམས་བརྟུལ་ནས་ཀྱང་། །གསང་སྔགས་འཁོར་ལོ་བསྐོར་བའི་ཚེ། །མིང་གི་དབང་བསྐུར་བྲན་དུ་ཁས་བླངས་པའི། །རྡོ་རྗེ་རོ་ལང་ཚོགས་ཀྱི་བདག །མགོན་པོ་ནག་པོ་ཆེན་པོ་དང་། །ཉེ་གནས་ཀྲོ་ཏི་ཤྭ་རི་མ། །ཡབ་ཡུམ་གཉིས་སུ་མེད་པའི་འཁོར། །ལངྐའི་བདག་པོ་ལ་སོགས་པའི། །འདུས་པ་ཆེན་པོའི་རྣལ་འབྱོར་པ། །ཕོ་མོ་འཁོར་དང་བཅས་པ་རྣམས། །འདིར་གཤེགས་མཆོད་པ་དམ་པ་བཞེས། །མཆོད་པ་དམ་པ་འདི་བཞེས་ལ། །བཅོལ་པའི་ལས་རྣམས་གྲུབ་པར་མཛོད། །ༀ་མ་ཧཱ་ཀ་ལ་ག་ཎ་པ་ཏི་ས་པ་རི་ཝ་ར་ཨེ་ཨ་ར་ལི་ཧྲིཾ་ཧྲིཾ་ཛཿཛཿ ས་མ་ཡ་སྟྭཾ་ཏིཥྛ་བཛྲ། ཨ་ཏི་པུ་ཧོ། པྲ་ཏིཙྪ་ཧོ། ཞེས་བསྟིམས་ནས་བརྟན་པར་བསམ་མོ། །ཧོ། ཚོགས་ཀྱི་བདག་པོ་མ་ཧཱ་ཀ་ལ་འདུས་པ་ཆེན་པོའི་རྣལ་འབྱོར་ཕོ་མོ་འཁོར་དང་བཅས་པ་རྣམས་ཀྱི་ཞལ་དུ་མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིང་ཏ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། མ་ཧཱ་ཀོ་རོ་ཙ་ན་ལ་ཁཱ་ཧི། ཨེ་ཧྱ་ཧི། མ་ཧཱ་ཀཱ་ལ། དྷུཔྤེ་པུཥྤེ་མཾ་ས་མ་ཧཱ་བྷ་ལིངྟ་པྲ་ཏི་ཛ་ཧོ། ཞེས་གཏོར་མ་བསྟབས་ཏེ་མཆོད། ཚོགས་བདག་གིས་གཏོར་མ་དམ་རྫས་ལོངས་སྤྱོད་ཆང་ཕུད་བདུད་རྩི་ངང་རཀྟའི་མཚོ་ཞལ་དུ་གསོལ་བར་བསམ། དེ་ནས་དམ་འབོག་སྟེ། རྡོ་རྗེ་ཅན་གྱི་རྣལ་འབྱོར་ཁྱེད། །རྡོ་རྗེ་ཅན་དུ་ཅི་ངེས་ན། །གསང་བ་གསུམ་གྱིས་མཉམ་པའི་ཕྱིར། །མི་ཕྱེད་རྡོ་རྗེའི་དམ་ཚིག་འདི། །གསང་བ་གསུམ་གྱི་དབྱིངས་ལས་བྱུང་། །དཀྱིལ་འཁོར་གསུམ་གྱི་དམ་ཚིག་འདི། །གྲུབ་ན་འཇིག་པའི་དུས་མེད་དོ། །ༀ་ཨཱཿཧཱུྃ། བཛྲ་ཨ་མྲྀ་ཏ་ཨེ་ཧྱ་ཧི་སརྦ་སྨན་ཧཱུྃ་ཧྲཱིཿཋཱཿ ཞེས་བདུད་རྩི་གཏོར་བས། ཚོགས་བདག་གི་གནས་སུ་སྙིང་ཁར་ཧཱུྃ། ལྕེ་ལ་ཨཱཿ གླད་པ་ལ་ༀ་ཐིམ་པས། སྐུ་གསུང་ཐུགས་ཀྱི་དམ་ཚིག །ཕོག་པ་ལས་མི་འདའ་བར་བསམ། མི་ཕྱེད་གསང་བའི་རྣལ་འབྱོར་པ། །གཉིས་མེད་དོན་གྱི་དབྱིངས་ནས་བྱུང་། །དབྱིངས་ཉིད་མི་འཇིག་རྡོ་རྗེ་སྟེ། །འདུ་འབྲལ་མེད་པར་གཅིག་པས་ན། །གཉིས་སུ་མེད་པར་ནན་ཏན་མཛོད། །ས་མ་ཡ་ཧོ། ས་མ་ཡ་སྟྭཾ། ཞེས་ཁོས་དམ་ཚིག་ཁས་བླངས་ནས་དམ་བཅའ་བར་བསམ། དེ་ལ་དམ་ཚིག་གི་ཆུ་བླུད་པ་ནི། ཁོ་ཏིང་ངེ་འཛིན་གྱིས་གཟེར་ལ། གསང་བ་གསུམ་གྱི་དམ་པ་རྣམས། །ཁྱེད་ཀྱི་རབ་ཏུ་བསྲུས་གྱུར་ན། །དེ་ཀུན་ཁྲོས་ནས་ཁྲག་ཆེན་པོ། །ཉམས་པའི་སྙིང་ནས་དྲངས་ཏེ་འཐུང་། །ཨི་དན་ཏི་ན་ར་ཀན། བ་ར་ཧྲཱི་ད་ཡེ། ན་མ་བྷ་ཏི་ནན། ས་མ་ཡ། རཀྴ་སི་ཏཾ་པ་ནི་བཛྲ་ཨ་མྲྀ་ཏ་ཏོད་ཏ་ཀན། ཞེས་བདུད་རྩི་གཏོར་བས། ཁོས་བདུད་རྩི་འཐུངས་བས། སྙིང་ལ་ཐིམ་ནས་ཡི་གེ་ཧཱུྃ་མཐིང་ནག་གཅིག་ཏུ་གསལ་བ་དེ། ཁོས་དམ་མ་ཉམས་པས་བདག་གི་གྲོགས་བྱས་ནས་ཡེ་ཤེས་སེམས་དཔའ་དང་། ཉམས་ན་བཛྲ་ཡཀྴ་ལྕགས་ཀྱི་སྡིག་པ་མགོ་དགུ་པ་ཁོའི་གཉེན་པོ་བྱེད་པར་བསམ། ནར་བུ་ཚར་བུ། ཞེས་བདུད་རྩི་གཏོར་བས་མནའ་བསྒག་པར་བསམ་ལ། དེ་ནས་དམ་བསྲེ་སྟེ། རྡོ་རྗེ་དྲི་ཡི་བདུད་རྩི་མཆོག །པཉྩ་ཨ་མྲྀ་ཏ་དང་སྦྱང་། བསྲེ་བའི་མཆོད་དེ་སྲོག་གིས་སྙིང་། །སྙིང་དང་སྙིང་གི་བུ་བྱའོ། །མ་ཧཱ་པཉྩ་ཨ་མྲྀ་ཏ་ས་མ་ཡ་ཨཱཿ ཞེས་བདག་གིས་ཀྱང་ལན་གསུམ་བླང་ངོ་། །ཁོས་ཟོས་འཐུངས་ནས་དམ་ལ་མི་འདའ་བར་བདག་གཅིག་ཏུ་གྲོགས་བྱེད་པར་བསམ། དམ་བརྡལ་བ་ནི། མ་ཧཱ་གླིང་གི་གྲུབ་གནས་སུ། །རྡོ་རྗེ་སྲིན་པོའི་སྤྱན་སྔ་རུ། །ཅི་ལྟར་ཁས་བླངས་དམ་བཅས་པའི། །དམ་ཚིག་གཉེན་ལས་མ་འདའ་ཅིག །མ་ཧཱ་ཀ་ལ་ས་མ་ཡ་སྟྭཾ། ཞེས་བརྗོད་དོ། །ཧཱུྃ། ཚོགས་ཀྱི་བདག་པོ་མཐུ་བོ་ཆེ། །བར་སྣང་ཁམས་སུ་རྒྱུ་བ་ལས། །བཅོམ་ལྡན་རྡོ་རྗེ་སྲིན་པོ་ཡིས། །ལག་ཏུ་རྡོ་རྗེ་བྱིན་ནས་ནི། །མངག་བྱེད་ཅེས་ཀྱང་བཏག་པ་སྟེ། །ཚོགས་ཀྱི་བདག་པོ་ཆེན་པོ་བསྐོས། །མ་ཧཱ་ཀ་ལ་མཐུ་བོ་ཆེ། །འཆང་བྱེད་རྡོ་རྗེ་ཕྲེང་བ་ཅན། །བདག་གིས་བསྙེན་ཅིང་སྒྲུབ་པ་ལས། །གཞུང་དང་འགལ་བ་མཐོལ་ཞིང་བཤགས། །ཕྲིན་ལས་སྙན་དུ་གསོལ་བ་ཡིས། །ལྷའི་དགྲ་བླ་ཆེན་པོར་གསོལ་བཏབ་ནས། །རྣལ་འབྱོར་ཡོངས་ཀྱི་ཕོ་ཉར་ཞལ་འཆེས་ཤིང་། །ལྷ་མིན་དམག་ཚོགས་འདུལ་བ་ཐུགས་དམ་ཅན། །བདག་གི་བཅོལ་པའི་ཕྲིན་ལས་གྲུབ་པར་མཛོད། །དམ་ཉམས་དགྲ་བགེགས་མྱུར་དུ་བསྒྲལ་དུ་གསོལ། །རྡོ་རྗེའི་བྲག་ཆེན་གདན་སྟེངས་སུ། །བསྙེན་པའི་ཚུལ་གྱིས་བཀའ་སྡོད་པ། །ཙནྡ་དབྱུག་པ་སྔོན་པོ་ཡིས། །ཁམས་གསུམ་རྡུལ་དུ་བརླག་མཛད་པ། །ཁྱེད་ཀྱི་ཐུགས་དམ་དུས་ལ་བབས། བདག་གིས་དགྲ་བགེགས་ཚོགས་དང་གཡུལ་འབྱེད་ན། །མགོན་དང་དཔལ་དུ་ཁྱོད་སྩོལ་ཅིག །ལོག་འདྲེན་དགྲ་བགེགས་རྡུལ་དུ་བརླག་མཛད་པ། བདག་གི་རྒྱལ་ཁ་འཕེལ་བར་མཛད་དུ་གསལ། །དམ་ཚིག་དབང་གིས་ལུས་དང་གྲིབ་མ་བཞིན། །འགྲོགས་ཏེ་བདག་དང་འཁོར་ཚོགས་སྲུང་། །དམ་ཉམས་དགྲ་བགེགས་མྱུར་དུ་བསྒྲལ་དུ་གསོལ། །ཚོགས་བདག་ཁྱེད་ཀྱི་འཁོར་ཚོགས་ཀྱི། །བཀའ་ཉན་རྣམས་ཀྱིས་བདག་ལ་ཁྲམ་བཏབ་ན། །ཁྲམ་ཁ་ཕྱི་ཞིང་བཟློག་ཏུ་གསོལ། །ཚེ་དང་རྫུ་འཕྲུལ་མཐུ་དང་མངོན་ཤེས་དངོས་གྲུབ་སྩོལ། །ཟས་ནོར་ཆོས་ཀྱི་དངོས་གྲུབ་རྩལ་དུ་གསོལ། །ཐུགས་དམ་དུས་ལ་བབས་པོ་ས་མ་ཡཱཿ ཞེས་པས་ལས་བཅོལ་ལོ། །དེ་ནས་ཐལ་མོ་སྦྱར་ཏེ་སྨོན་ལམ་བཏབ་པ་ནི། མགོན་པོ་ཁྱེད་མཆོད་བྱིན་རླབས་ཀྱིས། །ཕྱོགས་དང་དུས་ཀུན་ཐམས་ཅད་དུ། །སེམས་ཅན་ལེགས་དོན་འབྱོར་པ་ལ། །བགེགས་ཀྱི་རྣམ་པ་ཀུན་མེད་ཤོག །རྟ་དང་བ་གླང་ནོར་དང་འབྲུ། །བུ་ཚ་ཕ་མ་གཉེན་བཤེས་རྣམས། །དགེ་ཞིང་ཚེ་རིང་ནད་མེད་པར། །ཐམས་ཅད་འབྱོར་པ་ལྡན་པར་ཤོག །འགྲོ་ལ་ཉེས་མེད་བདེ་གྱུར་ནས། །ནད་དང་མུ་གེ་ཀུན་བྲལ་ཤོག །རྒྱལ་པོ་དགེ་ཞིང་བདེ་བ་དང་། །ཆོས་ཀྱི་ཡུལ་འཁོར་སྐྱོང་བར་ཤོག །བདེ་བར་གཤེགས་པའི་བསྟན་པ་འདི། །ཕྱོགས་བཅུ་ཀུན་ཏུ་དར་བ་དང་། །མྱུར་དུ་སེམས་ཅན་ཐམས་ཅད་ཀྱང་། །ཆོས་ཀྱི་སྣོད་དུ་འགྱུར་བར་ཤོག །དགེ་བ་ཐམས་ཅད་ཡོངས་བསྔོ་ཞིང་། །མགོན་པོ་ཁྱེད་མཆོད་བྱིན་རླབས་ཀྱིས། །བདག་ཅག་འཁོར་དང་བཅས་པ་རྣམས། །ལོངས་སྤྱོད་རྣམ་གཉིས་རྫོགས་པར་ཤོག །བདག་ཀྱང་བྱང་ཆུབ་མཆོག་ཐོབ་ཤོག །ཁྱེད་དང་མི་འབྲལ་འགྲོགས་པར་ཤོག །ཡེ་དྷརྨ་སོགས། ཞེས་བརྗོད་ལ་གཏོར་མ་བྱང་ཤར་མཚམས་སུ་བསྐྱལ་ལོ། །བསྙེན་པའི་མན་ངག་ནི། མགོན་པོའི་ཐུགས་ཀར་ཉི་མའི་སྟེང་དུ་ཧཱུྃ། དེ་ལ་བསྙེན་སྒྲུབ་བཞིའི་སྔགས་ཀྱིས་གཡས་སུ་བསྐོར་བར་བསམ་ལ། བཟླས་བྱའི་སྔགས་ནི། ༀ་བྷུརྐུར་མ་ཧཱ་པདྨ་དྷེ་བུར་རྩི་བུར་བྱི་ཀེ་བྱི་མ་ན་སེ་ཨེ་ཧོ་ཤོ་མོ་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བསྙེན་པ་དང་། ༀ་བྷུ་ཀུརྨ་ཨ་པྲརྣ་བུད་ཙི་ཀེ་བི་མ་ན་སོ་ཁ་ཤོ་མོ་ག་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ཉེ་བསྙེན་དང་། ༀ་བྷུ་རུ་ཀུ་རུ་ཨི་ཙི་ཀ་བྱི་ཨུ་ཙཥྨ་ཀྲོ་དྷ་ཧཱུྃ་ཕཊ། ཅེས་སྒྲུབ་པ་དང་། ༀ་བྷུར་ཀུརྟི་ཧཱུྃ་ཕཊ། ཅེས་སྒྲུབ་ཆེན་དང་། རང་གི་སྔགས་བཟླས་པའི་འོད་ཟེར་མགོན་པོ་ལ་ཕོག་པས་མགོན་པོའི་ཐུགས་དམ་གྱི་རྒྱུད་བསྐུལ། དེས་དྲག་བྱེད་འཁོར་རྣམས་བསྐུལ་བས། རང་གི་སྲོག་སྙིང་རམ་བུའི་ཚུལ་དུ་བརྗོད་པས། སྲོག་སྙིང་སྔགས་ཀྱི་ཚུལ་བདག་ལ་ཕུལ་བས། ཅི་བཅོལ་པའི་བཀའ་ཉན་པར་བསམས། རང་གི་ཅི་འདོད་པའི་ལས་མགོན་པོས་སྒྲུབ་པར་བསམ། ༀ་བཛྲ་ཀྲོ་དྷ་ཛྭ་ལ་ས་མ་ཡ་ཧཱུྃ། ༀ་བཛྲ་ཡཀྴ་ཛྭ་ལ་ས་མ་ཡ་ཧཱུྃ། ༀ་བཛྲ་རཀྴ་ཛྭ་ལ་ས་མ་ཡ་ཧཱུྃ། ༀ་བཛྲ་མ་མ་ཛྭ་ལ་ས་མ་ཡ་ཧཱུྃ། ཕཊཿ ཅེས་འཁོར་རྣམ་བཞིའི་སྔགས་སོ། །དེ་ལྟར་གཙོ་འཁོར་གྱི་སྔགས་རྣམས་གོ་རིམ་བཞིན་ཅི་ལྕོགས་ཟླས་ཤིང་འདོད་པའི་དོན་ལ་གསོལ་བ་ཡང་ཡང་གདབ་མཐར་མཆོད་བསྟོད་དངོས་བཤགས་རྗེས་བསྡུ་བསྔོ་ཤིས་སོགས་བྱའོ། །དེ་ཡང་བརྟེན་མེད་ན་ཡེ་ཤེས་པ་གཤེགས། དམ་ཚིག་པ་བསྡུ་ཙ་ན། ཧཱུྃ་ཞིག་ཏུ་གྱུར་ནས་རང་ཡི་དམ་གྱི་ཐུགས་ཀར་བསྟིམ་པར་གསུངས་སོ། །ཞེས་ལེགས་ལྡན་ཚོགས་བདག་མཆོད་པའི་ཆོ་ག་བདུད་ལས་རྣམ་རྒྱལ་ཞེས་བྱ་བ་ཀཿཐོག་པ་པྲ་ཛྙཱ་སེང་ཧའམ་དམ་པ་རིན་པོ་ཆེས་མཛད་པ་ལྟར་ཆགས་སུ་བཀོད་པ་རེ་ཞིག་རྫོགས་སོ། །འདོད་གསོལ་ནི། རྒྱལ་བ་ཀུན་གྱི་བདག་པོ་རྡོ་རྗེ་འཆང་། །བསྐལ་པ་སྔོན་ནས་ཡེ་སངས་རྒྱས་གྱུར་ཀྱང་། །གདུལ་དཀའ་འདུལ་ཕྱིར་དྲག་པོའི་སྐུ་སྟོན་པ། །དཔལ་ལྡན་ནག་པོ་ཆེ་ལ་ཕྱག་འཚལ་བསྟོད། །དུར་ཁྲོད་སྒྲོལ་གིང་འཇིགས་བྱེད་མགོན་པོ་དང་། །དགྱེས་བསྐྱེད་ཡུམ་ཆེན་ཀྲོ་དྷི་ཤྭ་རི་མ། །མདོ་སྒྱུའི་རིག་འཛིན་བརྒྱུད་པའི་ཚོགས་རྣམས་དང་། །ཁྱད་པར་རྒྱལ་བ་གཉིས་པ་ཀཿཐོག་པའི། །སྤྱན་སྔར་བསྟན་པ་སྲུང་བ་ཁས་བླངས་བཞིན། །ཐེག་མཆོག་སྙིང་པོའི་བཤད་སྒྲུབ་སྤེལ་མཛད་པའི། །འདུས་པའི་སྡེ་སྐྱོང་བཅོལ་པའི་ལས་རྣམས་གྱིས། །བདག་ཀྱང་འདི་ནས་བྱང་ཆུབ་མ་ཐོབ་པར། །ཚེ་རབས་སྲུང་མར་ལྷ་མཆོད་ཁྱེད་བསྟེན་ན། །བྱང་ཆུབ་བར་དུ་ལས་རྣམས་གྲུབ་པར་མཛོད། །སངས་རྒྱས་ཀུན་གྱི་སྙིང་རྗེ་ཁྲོས་པའི་གཟུགས། །སྤྱན་རས་གཟིགས་དབང་དྲག་པོ་ཧེ་རུ་ཀ །གདུག་པ་འདུལ་ཕྱིར་མགོན་པོ་ནག་པོར་ཆེར། །ཡོངས་ཤར་ཁམས་གསུམ་དཔའ་བོ་དེ་ལ་འདུད། །ལྷ་མཆོག་ཁྱོད་ཀྱི་རྡོ་རྗེ་ཡིས། །མ་རུང་དྲག་པོ་བདུད་སྡེའི་དཔུང་གི་ཚོགས། །མཐར་བྱེད་ཀླ་ཀློ་མི་སྲུན་གདུག་པ་ཀུན། །རྨེག་མེད་ཞི་བའི་ཕྲིན་ལས་མཛད་དུ་གསོལ། །ཞེས་སི་ཏུ་སྐུར་སྐྱེ་བཞི་པ་འཇིགས་མེད་ཆོས་ཀྱི་རྡོ་རྗེས་དཔལ་བཟང་པོས་སྦྱར་བའོ།། །།
རྣམ་སྲས་ཀྱི་བསྒྲུབ་པ་རིན་ཆེན་འཁྲིལ་བཞིའི་གཏོར་བསྒྲུབ་བསྙེན་མཆོད་དགོས་འདོད་ཀུན་འབྱུང་
༈ རྣམ་སྲས་ཀྱི་གཟིགས་ཕྱོགས་ལེགས་སོ། །ༀ་སྭ་སྟི། ཕྱོགས་དུས་རྒྱལ་བ་ཐབས་མཁས་པས། །འགྲོ་བའི་དབུལ་འཕོང་བསལ་བའི་ཕྱིར། །རིན་ཆེན་མང་གི་སྤྲུལ་པ་གཏེར་གྱི་བདག །རིན་ཆེན་འཁྲིལ་བཞིའི་བསྙེན་མཆོད་འདི་གསལ་བྱ། །རྒྱལ་པོ་རྣམ་ཐོས་སྲས་ཀྱི་བསྒྲུབ་པ་ལ་དྲུག་སྟེ། བཅའ་ཀའི་རིམ་པ་དང་། དམ་ཚིག་པ་བསྐྱེད་པ་དང་། དེ་འདྲ་སྤྱན་དྲངས་ལ་བསྟིམ་པ་དང་། མཆོད་པ་ཕུལ་བ་དང་། སྨོན་ལམ་འདོད་གསོལ་བྱ་བ་དང་། བསྙེན་ཅིང་ཕྲིན་ལས་བཅོལ་བའོ། །དང་པོ་ནི། དེ་ཡང་བཀྲ་ཤིས་པའི་ས་ལ། པདྨ་འདབ་བརྒྱད་སྒོ་ཅན། རིན་པོ་ཆེས་སྤྲས་བྲི་བའི་དབུས་སུ། གཏོར་མ་རི་རབ་བང་རིམ་གསུམ་པ། རྩོག་ཟླུམ་རིན་ཆེ་འབར་བ། ཉི་ཟླ། བཀྲ་ཤིས་རྫས་བརྒྱད། རྒྱལ་སྲིད་སྣ་བདུན་མ་ཧེ། བྱ། འབྲུ་སྣ་དང་སྨན་སྣ་དང་། དཀར་གསུམ་དང་། མངར་གསུམ་གྱིས་བརྒྱན་པ་བཤམས་ལ། སྨན་ཕུད་དང་། སྤོས་བསྲེག་ཅིང་གཉིས་པ་ནི། དེ་ཉིད་མི་དམིགས་པའི་ངང་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། དགོས་འདོད་འབྱུང་བའི་གཏེར་གྱི་ཕོ་བྲང་ཆེན་པོའི་དབུས་སུ། རིན་པོ་ཆེའི་གཏེར་གྱི་བུམ་པ། དེའི་སྟེང་དུ་སེང་གེ་དཀར་མོ་གཡུའི་རལ་པ་ཅན་རིན་པོ་ཆེའི་རྒྱན་ཆ་དང་ཁ་ནས་རིན་པོ་ཆེ་ཕྱུར་བ། དེའི་ཐོག་ཏུ་བྷཻཿསེར་པོ་འོད་དུ་བ་ལས། རྒྱལ་པོ་ཆེན་པོ་རྣམ་ཐོས་སྲས། སྐུ་མདོག་སེར་པོ། གསེར་གྱི་རི་ལ་ཉི་མ་ཤར་བ་འདྲ་བ། ཞལ་གཅིག་ཕྱག་གཉིས་སྤྱན་གསུམ་ཞི་མ་ཁྲོ། དབུ་སྐྲ་རལ་པ་ཡལ་ལ་བཅིང་ཤིང་ལྷག་མ་མར་ལ་གྲོལ་བས། སོག་འདབ་ཁེབ་པ། ཤ་རྒྱས་པ། ལྟོ་བ་ལྡིར། ཞབས་ཕྱེད་དྲུང་དུ་བཞུགས་པ། རིན་པོ་ཆེའི་རྒྱན་རྣམ་པ་སྣ་ཚོགས་ཀྱིས་བརྒྱན་པ། གཡས་རྒྱལ་མཚན། གཡོན་ནེའུ་ལེ་རིན་པོ་ཆེས་བཀང་ཞིང་། ཁ་ནས་དགོས་འདོད་ཐམས་ཅད་ཕྱུར་བ། ཐུགས་ཀ་ནས་བྷེཿསེར་པོ་ལ། རྩ་བའི་སྔགས་ཀྱི་འཁོར་བའོ། །དེའི་ཕྱོགས་བཞིར་བཙུན་མོ་བཞི། མོས་པས་བསྐྱེད། དེ་རྒྱབ་གནོད་སྦྱིན་བརྒྱད། དེ་རྒྱབ་ཀླུ་ཆེན་པོ་བརྒྱད། དེ་རྒྱབ་གནོད་སྦྱིན་བྱེ་བའི་ཚོགས་ཀྱིས་བསྐོར་བ། ཕྱག་ན་ལྕགས་ཀྱུ་དང་། ཞགས་པ་དང་། རིན་པོ་ཆེ་དང་། བུམ་པ་དང་། ལྗོན་ཤིང་དང་། སྙེ་མ་ལ་སོགས་པའི་ཕྱག་མཚན་སྣ་ཚོགས་བསྣམས་པ། ཤ་རྒྱས་པ། གསུས་པ་ལྡིར་བ། དངོས་གྲུབ་སྟེར་བའི་ཚུལ་དུ་བཞུགས་པར་བསམ་ལ། ༀ་བཛྲ་ས་མ་ཡ་ཛ་ཛཿ གསུམ་པ་ནི། སྤོས་བསྲེགས། དུང་འབུད། ཆ་ལང་དང་། སྡེ་རྔ་བརྡུངས་ལ། དབྱངས་སྙན་པོས་འདི་སྐད་དོ། །ཧཱུྃ། བྱང་ཕྱོགས་རིན་ཆེན་གཞལ་ཡས་ནས། །རིན་ཆེན་གཏེར་གྱི་ཕོ་བྲང་ན། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་བསྲུང་བར་ཞལ་བཞེས་པའི། །བྷེ་ལས་བྱུང་བའི་མགོན་པོ་ནི། །དཔལ་ལྡན་རྒྱལ་ཆེན་རྣམ་ཐོས་སྲས། །སྐུ་མདོག་སེར་གསལ་གསེར་གྱི་མདོག །ཕྱག་གཡས་ག་དར་རྒྱལ་མཚན་བསྣམས། །བསྟན་པའི་རྒྱལ་མཚན་དར་བར་མཛད། །ཕྱག་གཡོན་གཏེར་གྱི་ནེའུ་ལེ་འཛིན། །ཁ་ནས་རིན་ཆེན་རཏྣ་ཕྱུར། །བསྒྲུབ་པ་པོ་ལ་དངོས་གྲུབ་སྟེར། །སྐུ་ལ་རིན་ཆེན་རྒྱན་གྱིས་བརྒྱན། །འདོད་ཡོན་ལྔ་ཡི་ཆར་པ་འབེབས། །སེང་གེའི་ཁྲི་ལ་བཞུགས་སུ་གསོལ། །འཁོར་དུ་གནོད་སྦྱིན་ཆེན་པོ་བརྒྱད། །མཐུ་ཆེན་ཀླུའི་ཚོགས་ཀྱིས་བསྐོར། །གནོད་སྦྱིན་བྱེ་བ་འབུམ་དང་བཅས། །མ་ལུས་གནས་འདིར་གཤེགས་སུ་གསོལ། །དགྱེས་ཤིང་བརྟན་པར་བཞུགས་སུ་གསོལ། །བཞི་པ་ནི། ཁྱོད་ལ་མཆོད་པ་འབུལ་བ་ནི། མཛེས་པའི་གཟུགས་དང་སྙན་པའི་སྒྲ། །ཞིམ་པའི་དྲི་དང་མངར་བའི་རོ། །རེག་བྱ་བདེ་འཇམ་སྣ་ཚོགས་པའི། །ལྷུན་པོ་ལྟ་བུའི་གཏོར་མ་དང་། །དམ་རྫས་སྣ་ཚོགས་བསགས་པ་དང་། །རིན་ཆེན་སྣ་ཚོགས་འབྲུ་སྣ་ཚོགས། །བཀྲ་ཤིས་རྫས་བརྒྱད་འདོད་ཡོན་ལྔ། རྒྱལ་སྲིད་རིན་ཆེན་སྣ་བདུན་དང་། །རིན་ཆེན་གཏེར་གྱི་བུམ་པ་དང་། །ཕྱིི་ནང་ལྷ་མོ་བཅུ་དྲུག་དང་། །འཕན་གདུག་བླ་རེ་བ་དན་དང་། རྒྱལ་མཚན་རོལ་མོ་སྣ་ཚོགས་དང་། །རྟ་དང་མ་ཧེ་མཛེས་པའི་བྱ། །རིན་ཐང་ཆེ་བའི་དཀོར་ནོར་དང་། །ཀན་ཏ་ཀ་རི་སེང་ཁྲོམ་སླེ་ཏྲེས་དང་། །ཆུ་སྲིན་སྡེར་མོ་དབང་པོ་ལག་པ་སོགས། །དཀར་གསུམ་འོ་མའི་རྒྱ་མཚོ་དང་། །མངར་གསུམ་སྨན་གྱི་སྡོང་པོ་དང་། །འདོད་ཡོན་ལྔ་ལྡན་མཆོད་པ་འདི། །དཔལ་ལྡན་རྒྱལ་ཆེན་རྣམ་ཐོས་སྲས། །གནོད་སྦྱིན་ཆེན་པོ་བརྒྱད་དང་བཅས། །མཐུ་ཆེན་ཀླུ་ཡི་འཁོར་ཚོགས་དང་། །གནོད་སྦྱིན་འཁོར་དང་བཅས་ལ་འབུལ། །དངོས་གྲུབ་སྩོལ་ཕྱིར་བཞེས་སུ་གསོལ། །ཁྱེད་ཀྱི་ཐུགས་དམ་བསྐང་བར་མཛོད། །ལྔ་པ་ནི། ཁྱེད་ཀྱི་ཐུགས་དམ་བསྐངས་ནས་ཀྱང་། །བདག་ཅག་རྣལ་འབྱོར་བསྒྲུབ་པ་པོ། །འདི་ནས་བཟུང་སྟེ་བྱང་ཆུབ་བར། །ཚེ་རབས་སྐྱེ་བ་ཐམས་ཅད་དུ། །བསོད་ནམས་ཡེ་ཤེས་འབྱོར་ལྡན་ཞིང་། །སྙན་དང་གྲགས་པ་ཁྱབ་པ་དང་། །འགྲོ་བ་ཐམས་ཅད་འདུན་པ་དང་། །བསམ་པ་ཡིད་བཞིན་འགྲུབ་པ་ཤོག །སྐྱེ་དགུ་ཐམས་ཅད་རབ་དགའ་ཞིང་། །ཀུན་ཀྱང་གུས་ཤིང་འདུན་པ་དང་། །ཡིད་དང་མཐུན་པའི་དབང་བྱས་ཤིང་། །གྲགས་དང་སྙན་པས་ཁྱབ་པར་མཛོད། །བྱང་ཆུབ་ལམ་ལ་གནོད་པ་ཡི། །མི་དང་མི་མ་ཡིན་པ་རྣམས། །དྲག་པོའི་ལས་ཀྱི་ཚར་ཆོད་ལ། །བསྐྲད་ཅིང་རིང་པར་བྱེད་པ་དང་། །ཡང་ཡང་མཐུ་སྟོབས་ཕྲོག་ནས་སུ། །མ་ལུས་རྡུལ་དུ་རླག་པར་མཛོད། །མགོན་པོ་ཁྱོད་ཀྱི་ཐུགས་དམ་དུས་ལ་བབ་བོ་ས་མ་ཡཱ༔ གནོད་སྦྱིན་བརྒྱད་ཀྱི་ཐུགས་དམ་དུས་ལ་བབ་བོ་ས་མ་ཡཱ༔ མཐུ་ཆེན་ཀླུ་ཡི་ཚོགས་ཀྱི་ཐུགས་དམ་དུས་ལ་བབ་བོ་ས་མ་ཡཱ༔ ད་ལྟ་ཉིད་ནས་དངོས་གྲུབ་རྩོལ་ཅིག་ཐུགས་དམ་དུས་ལ་བབ་པོ་ས་མ་ཡཱ༔ བཅོལ་པའི་ཕྲིན་ལས་འགྲུབ་པར་མཛོད་ཅིག །ཐུགས་དམ་དུས་ལ་བབ་བོ་ས་མ་ཡཱ༔ དྲུག་པ་ནི། རང་གི་སྔགས་བརྗོད་པ་ཙམ་ལས་འོད་ཟེར་སྤྲོས། རྒྱལ་པོ་རྣམ་ཐོས་སྲས་འཁོར་བཅས་ཀྱི་ཟས་ནོར་ཆོས་གསུམ་གྱི་དངོས་གྲུབ་སྟེར་བར་བསམ་ལ། ༀ་བྷེ་ཤ་མ་ན་ཡཱེ་སྭཱ་ཧཱ། རཏྣ་སི་ཏི་ཧཱུྃ་ཧཱུྃ། ཞེས་ཅི་རིགས་པར་བཟླ་བསྙེན་ཐུན་འཇོག་ཁང་། ཕོ་ཉའི་མགོན་པོ་རྒྱལ་པོ་ཆེན་པོ་རྣམ་ཐོས་སྲས། །འཁོར་གནོད་སྦྱིན་ནོར་ལྷའི་ཚོགས་དང་བཅས་པ་རྣམས་ཀྱི། མཆོད་སྦྱིན་གྱི་གཏོར་མ་རྒྱ་ཆེན་པོ་འདི་བཞེས་ལ། འགལ་རྐྱེན་བར་ཆད་ཐམས་ཅད་སོལ་ལ། མཐུན་རྐྱེན་དགེ་བ་སྤེལ། བསམ་པའི་དོན་ཐམས་ཅད་ཆོས་བཞིན་དུ་འགྲུབ་པར་མཛོད་ཅིག །ཅེས་འདོད་པའི་དོན་ལ་གསོལ་གདབ་བོ། །བར་སྐབས་སུ་བསྐང་བ་དང་། ཚོགས་དང་མེ་མཆོད་ཅི་ལྟར་འགྲུབ་ལྟར་བྱའོ། །དགོས་འདོད་ཀུན་འབྱུང་རིན་ཆེན་འཁྲིལ་བ ཞི་ཡི། །གཏོར་བསྒྲུབ་བསྙེན་མཆོད་འདིར་བསྡུས་བསོད་ནམས་དེས། །འགྲོ་བའི་དབུལ་འཕོང་སྡུག་བསྔལ་རབ་བསལ་ཏེ། འབྱོར་ལྡན་བླ་མེད་བྱང་ཆུབ་ཐོབ་པར་ཤོག །འགལ་རྐྱེན་རྩད་ཆོད་བར་ཆད་ཞི་བ་དང་། །མཐུན་རྐྱེན་དཔལ་དང་གྲགས་དང་སྐལ་བ་བཟང་། །ཐོས་འཛིན་བློ་དང་ཤེས་རབ་ཆེ་བ་དང་། །མཐར་ཐུག་བླ་མེད་བྱང་ཆུབ་ཐོབ་པར་ཤོག །རིན་ཆེན་འཁྲིལ་བཞིའི་གཏོར་བསྒྲུབ་བསྙེན་མཆོད་དགོས་འདོད་ཀུན་འབྱུང་ཞེས་བྱ་བ་འདིས་སེམས་ཅན་ཐམས་ཅད་ལ་ཕན་ཐོབ་པར་ཤོག། །།
དམ་ཅན་འགར་བའི་བསྙེན་མཆོད་བྱ་ཐབས།
ས མ ཡ ས དྷུ ན མ དི ཀྶི དྷ བི ཛ ཧ ར ཏི སྨ།
དམ་ཅན་འགར་བའི་དབུ་ཕྱོགས་ལེགས་སོ། །
ༀ་སྭ་སྟི། བླ་མ་གསང་བདག་རྡོ་རྗེ་འཛིན། །ཕྱོགས་དུས་རྒྱལ་བ་ཐམས་ཅད་ལ། །གཉིས་མེད་གུས་པས་ཕྱག་འཚལ་ལོ། །དམ་ཅན་ཡིད་བཞིན་ནོར་བུ་ཡི། །བསྙེན་མཆོད་བྱ་ཐབས་བྲི་བར་བྱ། །དེ་ནས་ཡི་དམ་གྱི་བྱ་བ་གོང་དུ་སོང་ནས། མདུན་དུ་ལྕགས་མཁར་ནག་པོ་ཟུར་བཞི་པ་རྒྱ་ཆེ་ལ་འཕའ་མཐོ་བ་དབུ་རྩེ་བ་དང་ལྡན་པ། ཕྱི་ནང་མེད་པ་མེ་རླུང་འཚུབས་པ། དེའི་དབུས་སུ་བསྒྲུབ་བྱའི་རོ་གན་རྐྱལ་གྱི་སྟེང་དུ། །ར་སྐྱེས་ཁམས་པ་ཆེ་ལ་འཇིགས་པ། ཁ་དང་བ་སྤུའི་བུ་ག་ནས་རིན་པོ་ཆེ་ཕྱུར་བ། དེའི་གོང་དུ་ཏྲི་འོད་དུ་ཞུ་བ་ལས་ༀ་བཛྲ་ས་དྷུ་ས་མ་ཡཱ་རྒྱུགས་བྲིང་། ཐུམ་རིལ་ཛ་ཛ༔ བྷ་རི་བྷ་རི་ཛ་ཛ༔ ཤ་ལ་བཾ་ཤ་ལ་བཾ་ཛཿཛཿ ཀིང་ཀ་རི་ཀིང་ཀ་རི་ཛ་ཛཿ ཞེས་བརྗོད་པས། དམ་ཅན་རྡོ་རྗེ་ལེགས་པ། སྐུ་མདོག་སྔོ་ནག་ཞལ་གཅིག་ཕྱག་གཉིས། སྤྱན་གསུམ་མཆེ་བ་བཞི་གཙིགས་པ། གཡས་ཁྲོ་ཆུའི་དགྲ་སྟྭ་དང་། གཡོན་རའི་རྒྱལ་མཚན་རིན་པོ་ཆེའི་བཀང་བ་བསྣམས་པ། གཡས་སུ་སྟག་རལ། གཡོན་དུ་གཟིགས་ཤུབ། མདུན་དུ་ཟངས་གྲི། རྒྱབ་ཏུ་ཐོ་བ་བཙུགས་པ། ཐུགས་ཀར་ཏྲིཿལས་རང་སྔགས་ཀྱི་བསྐོར་བའོ། །བསྙེན་པ་ནི། བདག་གི་ཐུགས་ཀ་ནས་འོད་ཟེར་འཕྲོས་པས་དམ་ཅན་ལ་ཕོག །དམ་ཅན་གྱི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པས། དྲེགས་པ་ཅན་ཐམས་ཅད་ཚར་བཅད་དབང་དུ་བསྡུས། ཅི་འདོད་པའི་དངོས་གྲུབ་དང་ཁོའི་སྲོག་སྙིང་བདག་ལ་ཕུལ་བར་བསམ། བསྙེན་པ་ཡང་སྐབས་སུ་བྱ༔ གཡས་སུ་ཤ་མེད་གངས་དཀར་མ་སེང་གེ་ལ་བཅིབས་པ། གཡོན་དུ་ཁ་རག་དཔལ་མོ་བཙུན་རྒྱ་སྟག་ལ་བཅིབས་པ། རྒྱབ་ཏུ་ཀོང་བཙུན་དེ་མོ་བྱ་མོ་ནག་མོ་ལ་བཅིབས། གཡས་སུ་མོན་པ་ནག་པོ་བདུད་བྱ་ཕོ་རོག་ལ་བཅིབས་པ། གཡོན་དུ་མོན་མ་ནག་མོ་གསོད་བྱེད་བྱི་ལ་ག་པ་ལ་བཅིབས་པ། དེའི་རྒྱབ་ཏུ་སེང་ཞོན་གསུམ། སྟག་ཞོན་གསུམ། དོམ་ཞོན་གསུམ། སྤྱང་ཞོན་གསུམ། འཕར་ཞོན་གསུམ། སྤྲེལ་ཞོན་གསུམ་ར་ཞོན་གསུམ་དང་ཉི་ཤུ་རྩ་གཅིག་གིས་བསྐོར་བ། དེའི་རྒྱབ་ཏུ་མཆེད་འཁོར་སུམ་བརྒྱ་དྲུག་ཅུ། དེའི་རྒྱབ་ཏུ་ལྷ་མ་སྲིན་སྡེ་བརྒྱད་ཀྱིས་བསྐོར་ནས་ཡོད་པར་བསམ། དེ་ནས། བདག་གི་ཐུགས་ཀའི་ཏྲིཿལས་འོད་ཟེར་འཕྲོས་གཙང་འོ་ཡུག་ནས་དེ་འདྲ་བ་སྤྱན་དྲངས་ལ་བསྟིམ་མོ་སྤྱི་བོར་གཏུམ་པོ་ཚོན་གང་བ་གཅིག་བསྒོམ། བཀའ་ཉན་གསུང་སྡོད་ཅིང་ཅི་བཅོལ་བའི་ལས་བྱེད་པར་བསམ་མོ། །དེ་ནས་ར་གསུར་དང་སྤོས་བསྲེགས་ལ་འདི་སྐད་དོ། །ཀྱཻ། ཕྱོགས་ཕྱོགས་དེ་ནི་ཕ་ཝེ་ན། །ཉི་མ་ནུབ་ཕྱོགས་ཕ་ཝེ་ན། །ཟངས་ལྕགས་འདྲེས་པའི་མཁར་ནང་ནས། །སྡེ་བརྒྱད་ཡོངས་ཀྱི་སྤྱི་བོའི་རྗེ། །ཕ་ནི་མོན་པ་ནག་པོ་ཡིན། །མ་ནི་མོན་མ་ནག་མོ་ཡིན། །བུ་དམ་ཅན་རྡོ་རྗེ་ལེགས་པ་ནི། །ཞལ་གཅིག་ཕྱག་གཉིས་བརྗིད་པའི་སྐུ། །སྐུ་ལ་དར་བེར་དགུ་བརྩེགས་གསོལ། །གསེར་ཀ་རིན་ཆེན་སྐུ་རགས་བཅིངས། །ཞབས་ལ་སག་ཏི་ལྷྭམ་པོ་ཆེ། །དབུ་ལ་སག་ཞུ་དམར་སྨུག་གསོལ། །གཡས་པས་ཁྲོ་ཆུའི་དགྲ་སྟ་ཕྱར། །གཡོན་པས་ར་ཡི་རྒྱལ་མཚན་བསྣམས། །སྟག་རལ་གཡས་ལ་གཟིགས་ཤུབས་གཡོན། །ཡ་ཚ་དཀར་པོ་གློག་ལྟར་འགྱུར། །ཟངས་གྲི་དམར་པོ་རྐེད་དུ་མཛེས། །ཆིབས་སུ་ར་སྐྱེས་ཁམ་པ་བཅིབས། །གཡས་ན་ཤ་མེད་གངས་དཀར་མ། །སེང་གེ་བཅིབས་ཤིང་གཙོ་ལ་འདུད། །གཡོན་དུ་ཁ་རག་དཔལ་མོ་བཙུན། །རྒྱ་སྟག་ཞོན་ནས་གཙོ་ལ་སྟོབས། །རྒྱབ་ཏུ་ཀོང་བཙུན་དེ་མོ་ནི། །བྱ་མོ་བཅིབས་ཤིང་གཙོ་ལ་འདུད། །གཡས་སུ་མོན་པ་ནག་པོ་ནི། །བདུད་བྱ་ཕོ་རོག་ཆིབས་སུ་ཅིབས། །གཡོན་དུ་མོན་མ་ནག་མོ་ནི། །གསོད་བྱེད་བྱི་ལ་ག་པ་བཅིབས། །ཡབ་ཡུམ་ཕོ་མོ་སྲས་འཁོར་བཅས། །མཆེད་འཁོར་སུམ་བརྒྱ་དྲུག་ཅུ་དང་། །ཡོངས་འཁོར་ལྷ་སྲིན་སྡེ་བརྒྱད་རྣམས། །མ་ལུས་གནས་འདིར་གཤེགས་སུ་གསོལ། །རྒྱན་གྱི་གཏོར་མ་འདི་བཞེས་ལ། །རྣལ་འབྱོར་བདག་ཅག་བསྒྲུབ་པ་པོ། །འཁོར་བསྲུང་རྐྱེན་བཟློག་དཀོར་ནོར་སྲུང་། །མི་སྡུག་དགྲ་ལ་ཆོ་འཕྲུལ་ཐོད། །བཅོལ་པའི་ཕྲིན་ལས་འགྲུབ་པར་མཛོད། །འདོད་པའི་དངོས་གྲུབ་བདག་ལ་སྩོལ། །ཁྱོད་ལ་མཆོད་པ་འབུལ་བ་ནི། །མི་དང་ར་ཡི་གསུར་དུད་དང་། །འཛམ་བུ་གླིང་གི་ཟས་ཀྱི་མཆོག །སྔོན་མོ་ནས་ཀྱིས་སྙིང་ཁུ་དེར། །རིན་ཆེན་དམ་པ་གསེར་སྐྱེམས་ནས། །དམ་ཅན་ཁྱོད་ལ་མཆོད་པ་འབུལ། །ར་ཡི་དབང་པོ་རྣམ་ལྔ་དང་། །བླ་མཁར་སྨུག་པོའི་ལོགས་ལ་ཏྲི༔ ར་དང་ཕོ་རོག་བྱི་ལིའི་སྙིང་། །ཟངས་ཁབ་ཟ་འོག་སྣ་ཚོགས་དང་། །གསེར་དངུལ་གཡུ་དང་མུ་ཏིག་དང་། །དུང་དང་བྱེ་རུ་ཟངས་ལྕགས་དང་། །མདའ་དར་མེ་ལོང་དར་སྣ་དང་། །བཀའ་ཡི་གཏོར་མ་རྒྱན་ཅན་དང་། །ཉམས་པ་བསྒྲལ་བའི་ཤ་ཁྲག་འདི། །དམ་ཅན་ཁྱོད་ལ་མཆོད་པ་འབུལ། །ཁྱོད་ལ་ཕྲིན་ལས་བཅོལ་བ་ནི། །བདག་ཅག་རྣལ་བྱོར་བསྒྲུབ་པ་པོ། །ཕྱོགས་བཞི་མཚམས་བརྒྱད་གར་འགྲོ་ཡང་། །ས་ཕྱོགས་གང་དུ་བསྡད་པའི་སར། །བཙན་གྲོགས་ལོངས་སྤྱོད་ལྡན་པ་དང་། །བསྟན་པ་དར་ཞིང་རྒྱས་པ་དང་། །ཟ་ཁ་གྲོལ་ཞིང་དཀོར་ནོར་སྤེལ། །བུ་རྟ་ན་ཚ་མི་འོང་ཞིང་། །ཅི་བསམ་དོན་རྣམས་འགྲུབ་པ་ཡི། །སྡོང་གྲོགས་རྒྱབ་བརྟེན་ཁྱེད་ཀྱིས་མཛོད། །ཁྱེད་ལ་སྔ་མའི་གཏང་རག་དང་། །ཕྱི་མའི་ཞུ་སྐྱེམས་འདི་འབུལ་གྱིས། །ཡུལ་དུ་འདུག་ན་ཡུལ་དཔོན་གྱིས། །བྱེས་སུ་འགྲོ་ན་བྱས་དཔོན་གྱིས། །ངན་དང་བསྣོལ་ལ་བཟང་དང་སྤྲོད། །ཁྱོད་ལ་རྟག་ཏུ་ལས་བཅོལ་ན། །བདག་ལ་བརྙས་བྱེད་སྡིག་ཅན་དང་། །ཉམས་པ་ཅན་གྱི་དགྲ་བོ་འདི། །དམ་ཅན་དམག་དཔུང་འཁོར་བཅས་ཀྱིས། །སྲོག་གཅོད་སྙིང་ཕྱུངས་འབྱུང་བཞི་སྤྲུགས། །མེ་དབལ་གག་ལྷོག་གཟེར་གསུམ་སོགས། །ཚ་ནད་འབྲུམ་པ་ལྷོག་གམ་རིམས། །སྲོག་སྙིང་དཀྲུག་པའི་ནད་རྣམས་ཀྱིས། །གཏན་ནས་བརླག་པའི་ཕྲིན་ལས་མཛོད། །གལ་ཏེ་དམ་ལ་ཁྱོད་འདའ་ནས། །མངག་པ་བཞིན་དུ་མ་བྱས་ན། །སྔོན་གྱི་དམ་ཚིག་ཉམས་གྱུར་པས། །དུས་ལ་མི་འདའ་ཕྲིན་ལས་མཛོད། །ༀ་བཛྲ་ས་དྷུ་ས་མ་ཡཱ། རྒྱུག་བྲིང་ཐུམ་རིལ་ཛ་ཛ། བྷ་རི་བྷ་རི་ཛ་ཛ། ཤ་ལ་བཾ་ཤ་ལ་བཾ་ཛ་ཛཿ ཀིང་ཀ་རི་ཀིང་ཀ་རི་ཛ་ཛཿ ཨེ་དཾ་བྷ་ལིང་ཏ་ཁ་ཁ་ཁཱ་ཧི། མཆོད་ཅིག་ཕ་མོན་པ་ནག་པོ། མ་མོན་མ་ནག་མོ། བུ་དམ་ཅན་མགར་བ་ནག་པོ། ཤ་མེད་གང་དཀར་མ། ཁ་རག་དཔལ་མོ་བཙུན། ཀོང་བཙུན་དེ་མོ་སྐྱོང་། མཆེད་འཁོར་སུམ་བརྒྱ་དྲུག་ཅུ། ཡང་འཁོར་ལྷ་སྲིན་སྡེ་བརྒྱད་དང་བཅས་པ་རྣམས་ཀྱི་ཞལ་དུ་བཀའ་ཡི་གཏོར་མ་རྒྱན་གྱིས་མཆོད་པ་འདི་བཞེས་ལ། སྡང་བྱེད་ཀྱི་དགྲ་བོ་སོད། གནོད་བྱེད་ཀྱི་བགེགས་ཐུལ། བར་ཆད་ཀྱི་རྐྱེན་བཟློག །སངས་རྒྱས་ཀྱི་བསྟན་པ་སྲུང་། དཀོན་མཆོག་གི་དབུ་འཕངས་བསྟོད། རྡོ་རྗེ་སློབ་དཔོན་གྱི་སྐུ་ཚེ་བསྲིངས། བསྒྲལ་བའི་ཞིང་བཅུ་རྡུལ་དུ་བརློག །མི་མཐུན་པའི་ཕྱོགས་ངན་པ་ཐམས་ཅད་ཞི་བ་དང་། དུལ་བ་དང་བཟློག་པ་དང་། མེད་པ་ཚད་བཅད་པའི་ཕྲིན་ལས་མཛོད་ཅིག །ཅེས་འདོད་གསོལ་བྱ། ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པས། དྲེགས་པ་ཐམས་ཅད་ཚར་བཅད་ནས། བདག་ལ་ཅི་འདོད་པའི་དངོས་གྲུབ་ཐོབ་པ་བསམ། བསྙེན་པ་ཅི་ནུས་བྱ། ཞེས་པའང་ཀཿཐོག་རྡོ་རྗེའི་གདན་གྱིས་ལོངས་ཁྲོད་དུ་ཤི་ལ་ཀེ་ཏུའི་སྦྱར་བའོ། ༈ །ༀ་བཛྲ་ས་དྷུ་ས་མ་ཡ། སྲོག་ཏྲི་འདུ་མ་ར་ན། རཏྣ་ཕ་ལ་སིདྷི་ཧཱུྃ། ༀ་ཤྲི་ཏྲི་མི་ལི་ཧྲཱི་ཏྲི་ཨ་དཀར་ཤ་ཡ་རཏྣ་འདུས་འདུས་དབང་དུ་འདུས། སྲིད་པ་གསུམ་གྱི་སྐད་ཆ་ང་ལ་ཤོད། །ཟས་ནོར་ལོངས་སྤྱོད་དངོས་གྲུབ་བདག་ལ་རྩོལ། །ༀ་བཛྲ་ས་དྷུ་ས་མ་ཡཱ། རྡོ་རྗེ་འབར་བ་ཧས་བྱས་ཧུས་བྱས་ཙིཏྟ་ཨ་ར་ལི་ཧྲཱིང་ཧྲཱིང་ཛ་ཛ་སྐབས་སུ་འདོད་གསོལ་བྱའོ།། །།