ཀུན་མཁྱེན་ཀློང་ཆེན་རབ་འབྱམས་པའི་གསུང་འབུམ། ཉ༽

རྫོགས་པ་ཆེན་པོ་གསང་བ་སྙིང་ཐིག་གི་མན་ངག་ཟབ་པ་པོ་ཏི་བཞིའི་ཁ་བྱང་ཉི་མས་བརྒྱན་པ།

རྫོགས་པ་ཆེན་པོ་གསང་བ་སྙིང་ཐིག་གི་མན་ངག་ཟབ་པ་པོ་ཏི་བཞིའི་ཁ་བྱང་ཉི་མས་བརྒྱན་པ་བཞུགས་སོ༔

བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཕྱག་འཚལ་ལོ༔ འཇིག་རྟེན་གསུམ་པོ་སྣང་བར་བྱེད་པའི་འོད་ལྡན་པའོ༔ སངས་རྒྱས་རྣམས་ཀྱི་བདེ་ཆེན་ཐུགས་ལ་མངའོ༔ གཉིས་མེད་རྡོ་རྗེ་ལྟ་བུའི་ཡེ་ཤེས་ཅན་ནོ༔ གཞན་གྱི་རྣམ་པར་རྟོག་པའི་ཞེན་པ་གཅོད་ལ་མཁས༔ སྣང་བ་གཉིས་པོ་དག་ནི་ཟད་པར་མཛད་ལ་མཁས༔ སྐྱེ་མེད་སྙིང་པོ་རང་རིག་དངོས་ལ་སྤྱོད༔ བརྒྱུད་པ་གསུམ་གྱི་རྩ་བ་ཉིད་འཆང་བ༔ དམ་པ་དུས་གསུམ་བཞུགས་པའི་སྐུ་གསུམ་ལ༔ གཉིས་མེད་དད་པ་བརྟན་པོས་སེམས་གཡོས་ཏེ༔ ལུས་ངག་ཡིད་གསུམ་གུས་པས་ཕྱག་འཚལ་ནས༔ གསང་བའི་ཡང་བཅུད་རྣམས་ནི་གསལ་བྱའི་ཕྱིར༔ མོས་གུས་སྐལ་ལྡན་རྣམས་ཀྱི་དོན་ཆེད་དུ༔ ཐུགས་རྗེ་ཆེན་པོ་མཆོག་ལ་གསོལ་བཏབ་ནས༔ ཡང་གསང་སྦས་བའི་མན་ངག་སྙིང་ཐིག་མ༔ ཁ་བྱང་རྣམ་པ་བརྒྱད་དུ་མ་བཀོད་པའི༔ ཡང་གབ་སྦས་པ་གསང་བ་སྙིང་གི་ནོར༔ ལྷག་ཆད་འགྱུར་བ་མེད་པའི་དོན་ཆེད་དུ༔ གསང་བ་མཆོག་གི་ཡི་གེ་འདི་དག་ནི༔ མ་འོངས་སྐལ་ལྡན་རྣམས་ཀྱི་དོན་ཆེད་དུ༔ ཚིག་དོན་གསལ་བར་འདི་ཉིད་འབྲི་བར་བྱ༔ གསང་བ་གསང་མཆོག་བླ་ན་མེད་པའི་སྡེ༔ སྙིང་པོ་ཡང་ངེས་གསང་བའི་མན་ངག་རྣམས༔ རས་ཆོད་གཟུ་ལུམ་ཉིད་དང་བྲལ་བྱའི་ཕྱིར༔ འགྱུར་མེད་དོན་གྱི་ཡི་གེ་འདི་ལྟར་འབྲི༔ ཨེ་མ༔ གསང་མཆོག་དམ་པ་གཞན་དུ་མ་བསྟན་པའོ༔ སྙིང་ལས་ལྷག་པའི་མན་ངག་སྙིང་ཐིག་ལ༔ ཁ་བྱང་རྣམས་སུ་བཀོད་པར་མ་ཕོད་པའི༔ རྩ་རྣམས་མདུད་པ་སྙིང་ལ་འདུས་པ་ལྟར༔ བརྒྱ་དང་བཅུ་དགུ་མན་ངག་དམ་པ་རྣམས༔ ཡང་གསང་སྙིང་དང་འདྲ་བ་བཞི་ལ་འདུས༔ དེ་ཀུན་མཚན་ཙམ་བརྗོད་པར་མི་ཕོད་པའི༔ བདག་གི་ཁོང་སྙིང་ཕྱུངས་བ་འདི་ལྟ་སྟེ༔ དོན་གཉིས་རྫོགས་པར་འདོད་

པའི་སྐལ་ལྡན་གྱིས༔ གསང་བ་དུང་ཡིག་ཅན་ལ་གོམས་པར་བྱ༔ དེ་ཡི་མཚན་ཙམ་བརྗོད་པ་བླ་མ་དང་༔ བདེ་གཤེགས་མཁའ་འགྲོ་རྣམས་ལ་བཟོད་པར་གསོལ༔ སྐལ་ལྡན་སྙིང་གི་བུ་ལ་དགོས་སྲིད་ན༔ འདི་ཉིད་ཚིག་ཏུ་བརྗོད་པ་མ་གཏོགས་པ༔ སུ་ཡིས་ཐོས་ན་མཁའ་འགྲོའི་ཆད་པ་ཕོབ༔ དེ་བས་སྙིང་པོ་སེམས་ལ་རྒྱས་ཐོབ་ལ༔ སྙིང་པོ་བྱང་ཆུབ་བར་དུ་ཁར་མི་དབྱུང་༔ གཞན་གྱིས་ཐོས་ཤིང་མཐོང་ན་རང་སྲོག་འཚིག༔ དེ་བས་རླུང་ཕྱོགས་ཙམ་དུ་བསྒྲག་པ་མིན༔ འབྱུང་བའི་སྒྲ་དང་བྲལ་བའི་གནས་སུ་བསྐྱལ༔ སྐབས་སུ་བལྟ་ཞིང་བསྙེན་བཀུར་ཆེན་པོ་བྱ༔ རང་གིས་གོམས་པར་བྱས་ལ་གཏེར་དུ་སྦ༔ གཞན་དུ་བསྟན་ཞིང་གཞན་ལ་མ་ཡིན་ནོ༔ ཡང་གསང་སྙིང་དང་འདྲ་བའི་མན་ངག་ལ༔ བསྟན་པ་ཐམས་ཅད་འདུས་པའི་བུ་གཅིག་པོ༔ སུས་ཀྱང་བྱས་པ་མེད་པའི་ཡི་གེ་ཉིད༔ རང་བྱུང་ཀུན་གྱི་ཐོག་མར་བྱུང་བས་ན༔ སྐད་དང་བརྡ་རྣམས་མི་མཐུན་མེད་པའི་ཕྱིར༔ སྐལ་ལྡན་རྣམས་ཀྱིས་མཐོང་ཞིང་བལྟས་པའི་ཚེ༔ ཡི་གེ་རང་རང་མཐུན་པ་ཉིད་དུ་ཤེས༔ དེ་ཡི་དབང་གིས་འབྱུང་བའི་སྒྲ་དང་བྲལ༔ ས་ཡིས་བསུབ་ཅིང་ཆུ་ཡིས་ཁྱེར་བ་དང་༔ རླུང་གིས་འཐོར་བ་མེད་ཅིང་མེས་བསྲེག་བྲལ༔ སྐྱེས་བུ་རྣམས་ཀྱིས་བཤིགས་ཤིང་མཐོང་བ་མེད༔ འདི་ནི་བསྟན་པ་ཐམས་ཅད་འདུས་པའི་གནད༔ སྐལ་ལྡན་སྙིང་གི་བུ་ཡིས་འདི་བྲིས་ཏེ༔ བསྟན་པ་གང་ལ་བབ་པའི་ཁ་དོག་ནི༔ རིན་ཆེན་སྙིང་པོ་དག་གིས་བྲིས་ནས་ནི༔ རང་གི་ལུས་དང་འབྲལ་བ་མེད་པར་བཅང་༔ ལྟ་ཞིང་ཀློག་པའི་ཚེ་ན་གཞན་དག་གིསཿའདི་ཉིད་མཐོང་བར་གྱུར་ན་དངོས་གྲུབ་ཡལ༔ དེ་ཕྱིར་དུར་ཁྲོད་དམ་ནི་ནགས་ཀྱི་ཀློང་༔ སུས་ཀྱང་རྒྱུ་བར་དཀའ་བའི་གནས་སུ་ནི༔ ཆུ་གླིང་ལ་སོགས་དབེན་པར་བཀླག་ཅིང་

མཆོད༔ འདི་ཉིད་སུ་ལ་སྣང་བའི་མི་དེ་ནི༔ སྐལ་དང་ལྡན་པ་ངེས་པར་གྲོལ་བ་འོ༔ དེ་ལྟར་ངེས་པའི་མན་ངག་སྙིང་གི་ནོར༔ རབ་ཏུ་ཟབ་ལ་མེད་ཐབས་མེད་པ་ཡི༔ བདུད་རྩིའི་ཐིག་པ་འགྲོ་རྣམས་ནད་སེལ་པའི༔ སྙིང་ཐིག་མན་ངག་ངེས་པ་འདི་དག་གསང་༔ སུ་ལའང་མི་བསྟན་རང་གི་སེམས་ལ་བརྣགས༔ སྙིང་པོའི་དོན་རྣམས་ལྟ་ཞིང་སྤྱོད་པ་ལས༔ རླུང་དང་སེར་བུའི་སྒྲ་ཙམ་ཕྱོགས་སུ་སྤང་༔ གཞན་རྣམས་འདི་དང་སྐལ་པ་མེད་པའི་མིས༔ མཐོང་བར་གྱུར་ཡང་དམ་ཚིག་ཆད་པར་འགྱུར༔ ཐོས་པར་གྱུར་ན་ལུས་ངག་མེ་ཡིས་བསྲེག༔ དེ་བས་རང་གི་སེམས་ལ་རྒྱས་བཏབ་སྟེ༔ རྐུན་པོའི་ནོར་ལྟར་གསང་ཞིང་སྤྱད་པར་བྱ༔ སུ་ལའང་བསྒྲགས་པ་མེད་པའི་གསང་བ་འདི༔ སྐལ་ལྡན་སྙིང་གི་བུ་དང་འཕྲད་པར་ཤོག༔ ཨྠྀི༔ ༔ མཆོག་ཏུ་གསང་བའི་མན་ངག་སྙིང་ནོར་འདི༔ མཚན་ཙམ་བརྗོད་པར་བདག་གིས་མི་ཕོད་སྟེ༔ བླ་མ་བརྒྱུད་པ་རྣམས་ལ་གསོལ་བཏབ་ནས༔ སྙིགས་མའི་དུས་སུ་འདི་ཉིད་དགོས་སྲིད་པས༔ སྙིང་ཐིག་ཟབ་པའི་ཁ་བྱང་འདི་ཉིད་འབྲི༔ གསང་ཆེན་སྙིང་དང་འདྲ་བའི་མན་ངག་ཉིད༔ ཡང་དག་རྫོགས་པའི་རྡོ་རྗེ་འཆང་ཆེན་གྱིས༔ སྔོན་ཆད་ཐུགས་ཀྱི་ཀློང་ནས་མ་རྡོལ་བའི༔ འཁོར་བའི་ཆོས་ཉིད་གཏན་ནས་སྤང་བའི་ཕྱིར༔ འདའ་བ་མེད་ལས་འདའ་བའི་ཚུལ་བསྟན་པའི༔ སྟོན་པ་མྱ་ངན་འདས་པའི་རྗེས་ཞབས་ལ༔ ནམ་མཁའ་མི་ཕྱེད་བར་སྣང་ཉིད་ལས་ཀྱང་༔ བྱིན་བརླབས་ཐོག་མར་རང་བྱུང་ཡི་གེ་ཉིད༔ སྤྲུལ་པའི་གདུང་བ་བཅད་པ་འདི་ཉིད་ཀྱང་༔ རིན་ཆེན་ལྔ་ཡི་རྒྱན་དང་བཅས་པ་དང་༔ འདས་རྗེས་གསུམ་པོ་

མན་ངག་སྙིང་གི་ནོར༔ སུ་ལ་སྣང་བ་དེ་ནི་མངོན་རྫོགས་འགྱུར༔ གང་ལ་སྣང་བར་གྱུར་པའི་སྐལ་ལྡན་དེས༔ རང་གི་ཟག་བཅས་ཕུང་པོ་མ་ཞིག་བར༔ རང་ཉིད་སྙིང་ལ་བཅངས་ཏེ་སུ་ལ་ཡང་༔ བསྟན་ཞིང་བསྒྲགས་ན་རང་སྲོག་འཚིག་པར་འགྱུར༔ དེ་བས་རང་གི་སེམས་ལ་རྒྱས་ཐོབ་ཅིག༔ གལ་ཏེ་ཕུང་པོ་འདོར་བའི་དུས་བྱུང་ན༔ སྐལ་ལྡན་སྙིང་གི་བུ་ལ་གཏད་པར་བྱ༔ འདི་ཡི་གོང་དུ་གཅིག་ལ་བསྟན་སྲིད་ཀྱང་༔ དམྱལ་ཁམས་མེ་ཡིས་རང་གི་ལུས་སེམས་བསྲེག༔ དེ་བས་འཆི་ཁར་སྐལ་ལྡན་ཞིག་ལ་བྱིན༔ གཉིས་དང་གསུམ་ལས་མང་ན་ཆད་པ་ཕོག༔ རིན་ཆེན་ཡི་གེ་དག་ནི་བྲིས་ཏེ་འཆང་༔ འདི་ལྟར་བགྱིས་ན་བྱིན་རླབས་ཆུ་རྒྱུན་ལྟར༔ རྣལ་འབྱོར་དམ་པ་དེ་ལ་གནང་བ་འོ༔ གལ་ཏེ་བསྟན་པའི་བདག་པོ་མ་རྙེད་ན༔ ཕྱི་རབས་དོན་དུ་རིན་ཆེན་གཏེར་དུ་སྦོས༔ འདི་ལྟར་འདས་རྗེས་གསུམ་པོའི་དོན་ལ་རེག༔ གསང་བའི་ཡང་བཅུད་སྙིང་གི་གདམས་པ་འོ༔ གསང་བ་མཆོག་དེ་རྫོགས་པ་ཡོངས་རྫོགས་ཆེ༔ དེ་ཡི་མན་ངག་སྙིང་གི་བཅུད་ཕྱུངས་པ༔ གཞན་དུ་བསྟན་པ་མེད་པའི་སྙིང་ཐིག་མ༔ འདི་ཡི་མཚན་ཙམ་བརྗོད་པར་མི་ཕོད་སྟེ༔ སྙིང་གི་ཡང་བཅུད་འདི་ཉིད་གསལ་བྱའི་ཕྱིར༔ དབང་པོའི་དྭངས་མ་མིག་དང་ཁོང་གི་སྙིང་༔ ཕྱི་རུ་ཕྱུངས་ཏེ་སྐལ་ལྡན་དོན་ཆེད་དུ༔ ཡི་དམ་དམ་པ་འདི་ཉིད་འབྲི་བར་བྱ༔ གསང་བ་སྙིང་གི་གཟེར་བུ་རིག་པའི་གནད༔ ལུས་དང་ངག་ལ་བརྟེན་ནས་མངོན་སུམ་དུ༔ ཐོབ་མཐོང་འཕེལ་བའི་རིག་པ་འདི་དག་ཉིད༔ དབང་པོའི་ཡུལ་དང་འབྲེལ་བར་བསྟན་པའི་ཕྱིར༔ སྙིང་ཏིག་ཡང་བཅུད་གསང་བ་ཀུན་གྱི་མཆོག༔ གསང་བའི་ཡི་གེ་མ་རུ་

སྙིང་གི་ནོར༔ སྔོན་ཆད་ཕྱུངས་པ་མེད་པའི་མན་ངག་ཉིད༔ ཐེག་པ་མཐའ་དག་རྣམས་དང་མི་འདྲ་བའི༔ སྙིང་གི་དཀྱིལ་དུ་མདའ་ཡིས་ཕོག་པ་ལྟར༔ ཕྱིར་མི་ལྡོག་པར་བྱེད་པའི་ཐབས་ཆེན་ནི༔ མཚན་ནས་བརྗོད་པར་བླ་མ་བརྒྱུད་པ་དང་༔ མཁའ་འགྲོ་རྣམས་ཀྱིས་བཟོད་པ་ཆེན་པོ་མཛོད༔ འདི་དང་འཕྲད་པའི་སྐལ་ལྡན་ངེས་ལུང་ཅན༔ ཟག་བཅས་ཕུང་པོ་འབྱུང་བ་རང་ཟད་ལ༔ འགྲོ་བར་འགྱུར་བ་ཐེ་ཚོམ་སོམ་ཉི་མེད༔ གལ་ཏེ་སྙིང་པོ་གསང་བའི་དོན་འདི་དང་༔ ཕྲད་དེ་ཉམས་སུ་མ་བླངས་དོན་གཡེལ་ན༔ མ་སྤྱད་བཞག་པའི་གཏེར་འདྲ་ཡོན་ཏན་མེད༔ དེ་ཡི་ཕྱིར་ན་སྙིང་པོའི་དོན་འདི་ཉིད་༔ ཉམས་སུ་ལོངས་ཤིག་སྐལ་ལྡན་སྙིང་གི་བུ༔ སྙིང་པོའི་ཡང་བཅུད་གང་དང་མི་འདྲ་བའི༔ གསང་ཆེན་ངེས་པའི་སྙིངཔོ་འདི་དག་ནི༔ གཞན་གྱིས་ཐོས་པར་གྱུར་ན་དངོས་གྲུབ་བརླག༔ མཐོང་བས་རྣལ་འབྱོར་རྣམས་ཀྱི་འབྲས་བུ་ཡལ༔ མཚན་ཙམ་ཉིད་ཀྱང་བརྗོད་པར་བྱ་བ་མིན༔ འབྱུང་བའི་དགྲས་མི་ཚུགས་པའི་གནས་ཉིད་དུ༔ བྲག་གི་ཐེམ་པ་ཉིད་དམ་དབེན་པར་ནི༔ ལྕགས་སམ་ཟངས་སམ་དངུལ་གྱི་སྣོད་དུ་བསྩལ༔ རབ་ཏུ་སྦས་ཏེ་སུས་ཀྱང་མཐོང་མེད་པར༔ བཞུགས་སུ་གསོལ་ཏེ་སྐབས་སུ་ལྟ་བའི་ཚེ༔ མཁའ་འགྲོ་རྣམས་ལ་ཚོགས་གཏོར་བྱིན་ནས་ནི༔ བལྟ་ཞིང་སྤྱད་པར་བྱ་བ་འདི་ཉིད་ལས༔ གཞན་དུ་རང་དགར་སྤྱོད་ཅིང་ལྟ་བ་མིན༔ དེ་ཡི་ཕྱིར་ན་ཐབས་འདི་མཆོག་ཏུ་གསང་༔ ཨེ་མ་འདི་ལྟར་ངོ་མཚར་ཆེ་བ་ཡི༔ མན་ངག་ངེས་པ་སྙིང་གི་ནོར་མཆོག་འདི༔ འདས་དང་མ་བྱོན་ད་ལྟར་བཞུགས་པ་ཡི༔ སངས་རྒྱས་རྣམས་ཀྱིས་འདི་དོན་གསུངས་པ་དང་༔ གསུང་བ་དང་ནི་གསུང་བར་འགྱུར་བ་མིན༔ དེ་ཡི་ཕྱིར་

ཡང་ཐབས་འདི་མཆོག་ཏུ་གསུང་༔ རང་གི་རིག་པ་མངོན་སུམ་སྟོན་པ་ཡི༔ ཡང་གསང་དྲིལ་བ་སྙིང་པོ་རྣམས་ཀྱི་བཅུད༔ འདི་དང་ཕྲད་པའི་སྐལ་ལྡན་ངེས་ལུང་ཅན༔ སངས་རྒྱས་ཉིད་དུ་འགྱུར་བར་ཐེ་ཚོམ་མེད༔ གལ་ཏེ་ངེས་པའི་སྙིང་པོ་འདི་ཉིད་དང་༔ ཕྲད་དེ་དོན་འདི་ཉམས་སུ་མ་བླངས་ན༔ བསྐལ་པ་བྱེ་བ་བརྒྱ་སྟོང་དུང་ཕྱུར་དུའང་༔ སངས་རྒྱས་འབྲས་བུ་ཉིད་ནི་ཐོབ་པ་མིན༔ དེ་བས་འཁྲུལ་བའི་བྱ་བ་ཀུན་སྤངས་ཏེ༔ དུར་ཁྲོད་དམ་ནི་ནགས་ཚལ་ཆེན་པོའི་ཀློང་༔ སུས་ཀྱང་རྒྱུ་བ་མེད་པའི་གནས་མཆོག་ཉིད༔ རབ་ཏུ་དབེན་ཞིང་དཔག་ཚད་མང་པོ་ཡི༔ གྲངས་ཚད་འདས་པ་རྣམས་ཀྱི་ཕ་རོལ་ཏུ༔ ལུས་དང་ངག་དང་ཡིད་ཀྱི་གནད་གཅུན་ལ༔ སུ་དང་འཕྲད་པ་མེད་པར་གཅིག་པོར་འདུག༔ རང་གི་དེ་ཉིད་འབྲལ་བ་མེད་པར་ལྟ༔ དེ་ལྟར་གནས་པས་སྙིང་པོའི་དོན་དང་ཕྲད༔ ཡང་དག་པ་ལ་སྣང་བ་འདི་ལ་འགྱུར༔ དེ་ལྟར་རབ་ཏུ་གནས་པའི་སྟོབས་མེད་ན༔ ལུང་སྟོང་རི་རྩེ་ལ་སོགས་ཉིད་དུ་ཡང་༔ རྟག་ཏུ་ངག་བཅད་ལྐུགས་པ་ལྟ་བུར་རྒྱུ༔ གཞན་གྱི་མཐོང་ན་རི་དྭགས་བཞིན་དུ་བྲོས༔ འདི་ལྟར་བྱེད་པའི་སྐལ་ལྡན་སྙིང་གི་བུ༔ ཡང་དག་དམ་ཚིག་དམ་པ་དེ་ལ་ཡོད༔ རྣལ་འབྱོར་དབང་ཕྱུག་ཆེན་པོ་ཞེས་བྱའོ༔ མན་ངག་སྙིང་པོ་འདི་ནི་ངེས་པའི་ཐབས༔ ཡང་སྙིང་དྲིལ་བ་སུ་ལ་བསྟན་པ་མེད༔ དེས་ན་གསང་ཆེན་དམ་པ་མཆོག་གི་ཐབས༔ རབ་ཏུ་གསང་སྟེ་རང་གི་ཡིད་ལ་བརྣོགས༔ ཚིག་ཟུར་ཙམ་དང་མཚན་ཡང་བརྗོད་པ་མིན༔ མཐོང་བར་གྱུར་ན་ངེས་པའི་འབྲས་བུ་ཡལ༔ སངས་རྒྱས་རྣམས་ཀྱི་བདེ་ཆེན་དམ་པ་འོ༔ ཤེས་རབ་

ཀྱིས་མིན་དབང་པོའི་ཡུལ་ཅན་ནོ༔ ཚིག་གིས་འདི་དོན་རྟོགས་པ་མ་ཡིན་ཏེ༔ ལྕེ་ཡིས་བརྗོད་ཅིང་རྣ་བར་ཐོས་པ་མེད༔ བརྗོད་མེད་དོན་དེ་རྣལ་འབྱོར་ངག་གི་གནས༔ ལག་ཏུ་བླང་བའི་མན་ངག་ཚིག་གསུམ་མོ༔ འདི་ལྟར་ཡིན་ནོ་སེམས་ཀྱི་བུ་གཅིག་པོ༔ གཞན་གྱིས་འདི་དོན་གསལ་བར་སྟོན་པ་མེད༔ ཚིག་གསུམ་གྱིས་ནི་སྐུ་གསུམ་སྣང་བ་སྟོན༔ འདི་དོན་གསང་བ་ཡིན་ནོ་ས་མཱ་ཡ༔ ཁ་བྱང་རྣམས་སུ་བཀོད་པ་མེད་པ་ཡི༔ རབ་ཏུ་གསང་བའི་མན་ངག་རྣམ་བཞི་ཉིད༔ ཀུན་ལ་གསང་ངོ་རང་གི་སྙིང་ལ་ཕུར༔ གཞན་ལ་བརྗོད་པ་མེད་དོ་ཕྱི་རབས་བུ༔ བདག་གིས་མན་ངག་མང་ལ་ལོངས་སྤྱད་ཀྱང་༔ མན་ངག་འདི་དོན་སྟོན་མི་མ་མཐོང་ངོ་༔ དེས་ན་སྙིང་གི་སྙིང་མཆོག་དམ་པར་ཟུངས༔ མན་ངག་རྣམ་པ་བཞི་ཡི་ཁོང་གི་སྙིང་༔ ཡི་གེ་མ་རུ་གསང་བ་ཟངས་ཡིག་ཅན༔ འདྲ་མིན་གཉིས་ལས་སྙིང་གི་ནོར་མཆོག་འདི༔ ཁྱད་འཕགས་བསྟན་པ་ཀུན་གྱི་ཁོང་གཟེར་ཡིན༔ གསང་བ་སྙིང་གི་མན་ངག་བཞི་མེད་པར༔ ཡི་གེ་མང་པོ་དཀར་ཆབ་སྤུངས་པ་འདྲ༔ དོན་མེད་སྙིང་པོའི་དོན་ལ་རེག་པ་མེད༔ དེ་ཀུན་ཐད་ཀའི་བདེན་པ་སྟོན་པ་མིན༔ སྙིང་ཐིག་གསང་བ་ཟངས་ཡིག་ཅན་མེད་ན༔ ལྷག་མ་གསུམ་ཡང་དོན་མེད་ཡུགས་ས་རྐྱང་༔ དེས་ན་འདེག་པར་འདྲིལ་བ་འདི་རང་ཉིད༔ རྣལ་འབྱོར་དམ་ཚིག་རབ་དང་འདི་ཕྲད་ནས༔ འདི་དོན་རྫོགས་པའི་འབྲས་བུ་འགྲུབ་པར་ཤོག༔ ཨྠྀི༔ ༔ ཤེས་བྱ་རང་ཚད་ཕེབས་ལ་ཕྱག་འཚལ་ལོ༔ དངོས་པོ་གཤིས་ཀྱི་འདུག་ཚུལ་གཞན་གང་གིས༔ རྟོགས་པར་འགྱུར་བ་ཡང་ནི་མ་ཡིན་ཏེ༔ དེ་དོན་དབང་པོའི་ཡུལ་དང་འབྲལ་མེད་པར༔ མཐོང་ཞིང་དངོས་པོ་རྩ་བ་ལྟ་བུ་ནི༔ གནད་ཀྱི་ཡི་གེ་དམ་པ་འདི་

བཞི་ལ༔ དུམ་བུ་ངེས་པའི་གྲངས་ནི་དུ་ཡོད་པ༔ མ་བུ་ངེས་པ་ཉིད་ནི་འདི་ལྟ་སྟེ༔ བསྟན་པ་ཐམས་ཅད་འདུས་པའི་བུ་གཅིག་པོ༔ དུམ་བུ་གཅིག་སྟེ་མ་བུ་གཉིས་ཡོད་དོ༔ སངས་རྒྱས་རྣམས་ཀྱི་འདས་རྗེས་རྣམ་གསུམ་ལ༔ དུམ་བུ་གསུམ་སྟེ་མ་བུ་གསུམ་ཡོད་དོ༔ གསང་བ་རྒྱུད་ཀྱི་ཁོག་སྙིང་མན་ངག་ཉིད༔ དུང་ཡིག་ཅན་ལ་དུམ་གཅིག་མ་བུ་བདུན༔ ཡང་གསང་ཟབ་མོ་གསང་བ་སྙིང་ཐིག་མ༔ ཡང་གབ་ཟངས་ཀྱི་ཡི་གེ་ཅན་ལ་ནི༔ སྤྲོས་བཅས་རྣམས་ལ་དུམ་བུ་བཅུ་དྲུག་ཡོད༔ སྤྲོས་མེད་རྣམས་ལ་དུམ་བུ་གཅིག་གིས་སྟོན༔ བུ་བརྒྱད་མ་དང་དགུ་ཡིས་དོན་གཉིས་འགྲུབ༔ དེ་ལྟར་རབ་ཟབ་མན་ངག་རྣམ་བཞི་ལ༔ དུམ་བུ་མ་བུའི་རྟོག་པ་བཅད་པའི་ཕྱིར༔ གསང་བའི་ཁ་བྱང་དེམས་ཞེས་བྱ་བ་འོ༔ ཨྠྀི༔ ༔ རང་སེམས་ངེས་པའི་དཔལ་ཕྱག་འཚལ་ལོ༔ རྩ་རྣམས་མདུད་པ་རྣམ་བཞི་ཉིད་དང་ནི༔ སྐྱེ་གནས་ཉིད་དང་སྙིང་དང་མགྲིན་པ་དང་༔ ཚངས་པའི་བུ་ག་དག་ལ་མདུད་པ་ལྟར༔ གསང་ཆེན་རྒྱུད་དང་མན་ངག་བསམ་ཡས་ཀྱང་༔ སྙིང་པོ་དོན་གྱི་མན་ངག་བཞི་ལ་འདུས༔ དེ་ཡི་མན་ངག་རྩིས་སུ་བྱས་པ་ནི༔ དུམ་བུའི་མིང་དང་མ་བུའི་མིང་ཉིད་དང་༔ རིམ་པ་གསལ་བར་ཕྱེ་སྟེ་འདི་ལྟར་འབྲི༔ ཀུན་ལ་བསྟན་པ་མེད་པའི་མན་ངག་བཞི༔ རྣལ་འབྱོར་ཀུན་གྱི་སྙིང་གི་ནོར་ཡིན་པས༔ རང་གི་སེམས་ལ་ཞེ་དགའི་ཡིད་ཀྱིས་འགྲོགས༔ དེ་དག་རྣམས་ཀྱི་མ་དང་བུ་ཡི་མཚན༔ ཚིག་ཏུ་བརྗོད་པར་བདག་གིས་མི་ཕོད་ཀྱང་༔ བླ་མ་ཉིད་དང་མཁའ་འགྲོའི་རིགས་ཉིད་ལ༔ བཟོད་པར་གསོལ་ཏེ་ཕྱི་རབས་དོན་ཉིད་དུ༔ དུམ་བུ་ངེས་པའི་གྲངས་འདི་སེམས་ལ་བརྣོགས༔ འདས་རྗེས་རྣམ་པ་གསུམ་

གྱི་དུམ་བུ་ནི༔ དགའ་ལྡན་རྣམས་ཀྱི་འདས་རྗེས་དང་པོ་ནི༔ མན་ངག་རྣམས་ཀྱི་རྩ་བ་དང་པོར་བསྟན༔ གསང་ཆེན་རོལ་པའི་དུར་ཁྲོད་ཉིད་བབས་པ༔ དང་པོ་ཉིད་ཀྱི་འགྲེལ་པའི་ཚུལ་དུ་བསྟན༔ གསུམ་པ་བྱ་རྒོད་ཕུང་པོའི་རིར་བབས་པ༔ གཉིས་པ་དག་གི་ཊི་ཀའི་ཚུལ་དུ་བསྟན༔ དེ་ལྟར་དུམ་བུ་གསུམ་གྱིས་འདས་རྗེས་རྫོགས༔ དེ་བས་མང་ན་སྙིང་པོའི་དོན་ཉིད་བསླད༔ ཉུང་བར་གྱུར་ན་མན་ངག་ཁ་མི་སྐོང་༔ དེ་ཡི་ཕྱིར་ན་གསང་བའི་ཁ་བྱང་གཅེས༔ རང་གི་སྙིང་ལས་ལྷག་པའི་ཟངས་ཡིག་མ༔ འདི་ཡི་མཚན་ཙམ་བརྗོད་པར་འཕངས་ན་ཡང་༔ དེ་ཉིད་དུམ་བུ་ངེས་པ་འདི་ལྟ་སྟེ༔ གང་ཞིག་སྤྲོས་ལ་དགའ་བའི་གང་ཟག་གིས༔ དུམ་བུའི་མིང་དེས་འདི་དག་ངེས་པར་ཟུངས༔ སྤྲོས་པ་གཅོད་པའི་སྒྲོན་མས་འབྱུང་བའི་བསླབ་ཐབས་བསྟན༔ གོམས་པ་གནད་ཀྱི་མན་ངག་དྲུག་གིས་མཚོན་པའི་གཞི་མ་བསྟན༔ སེམས་ཉིད་སྦྱོང་པར་བྱེད་པ་ཐབས་ཀྱི་མན་ངག་གིས༔ དམན་པ་རྣམས་ཀྱི་འཇུག་པའི་རིམ་པ་བསྟན༔ དེས་ན་རིས་ཆད་རྗེས་སུ་བཟུང་བའི་མན་ངག་གཅེས༔ སྦས་པ་མིག་འབྱེད་ཀྱིས་ནི་ལྟ་སྒོམ་སྤྱོད་པ་བསྟན༔ སྤྱོད་པ་བསྡུས་པའི་སྒྲོན་མེས་སྤྱོད་པའི་མཚན་ཉིད་བསྟན༔ སྒོམ་པ་བསྡུས་པའི་སྒྲོན་མས་མིག་གི་སྒོམ་པ་བསྟན༔ ལྟ་བ་བསྡུས་པའི་སྒྲོན་མས་ཕྱི་ནང་ལྟ་བ་བསྟན༔ འབྲས་བུ་བསྡུས་པ་ཉིད་ཀྱིས་འབྲས་བུའི་ཐོབ་ཚུལ་བསྟན༔ ཉམས་ལེན་གཅུད་ཐག་ཉིད་ཀྱིས་སྔོན་འགྲོའི་མན་ངག་བསྟན༔ བཅོས་པ་ལུས་ཀྱི་གནད་ཀྱིས་རིག་པ་ཡུལ་ལ་བསྟན༔ རྒན་མོ་མཛུབ་ཚུགས་ཀྱིས་ནི་རིག་པའི་ལྟ་ལུགས་བསྟན༔ རིག་པ་སྤང་ཟིན་གྱིས་ནི་རིག་པའི་འཆར་ལུགས་བསྟན༔ རིག་པའི་རྒྱབ་བརྟེན་བཅུད་

རྣམས་བསྡུས་པའི་སྙིང་པོས་ཡིད་ཆེས་གཏན་ལ་ཕབ༔ འགལ་བ་བསྡུས་པའི་སྒྲོན་མས་འགལ་ཉམས་གཏན་ལ་ཕབ༔ གཞན་འདོད་བསྡུས་པའི་གཅུད་ཕུར་གྱིས་ནི་གཞན་ལྟའི་འདོད་པ་དགག༔ རིག་པ་བསྡུས་པའི་སྒྲོན་མས་རིག་པ་གཏན་ལ་ཕབ༔ སྐུ་གསུམ་བསྡུས་པའི་སྒྲོན་མས་སྐུ་གསུམ་རང་ལ་སྦྱར༔ ལྟ་སྒོམ་བསྡུས་པའི་སྒྲོན་མས་རྣམ་གསུམ་རིག་པར་སྦྱར༔ ཉག་ཅིག་བསྡུས་པའི་སྒྲོན་མས་ཆོས་སྐུའི་ཐིག་ལེ་ཉག་ཅིག་བསྟན༔ དགེ་སྡིག་བསྡུས་པའི་སྒྲོན་མས་འཁོར་འདས་ལ་ཡང་བཟླ༔ དེ་ལྟར་ཉེར་གཅིག་དུམ་བུས་གསང་བ་ཟངས་ཡིག་རྫོགས༔ ཤེས་རབ་ཟབ་མོའི་བློ་ཡིས་ཡང་བརྟགས་ན༔ དུམ་བུ་བཞི་ཅུ་རྩ་གཅིག་དག་ཏུ་ངེས༔ སྤྲོས་མེད་རྣམས་ནི་སྙིང་ཐིག་ཉམས་ལེན་དངོས༔ འདི་ཡིས་རྣལ་འབྱོར་རྣམས་ཀྱི་དོན་ཆེན་འགྲུབ༔ དེ་ལས་མང་ན་གསང་བ་ཟངས་ཡིག་འཆལ༔ ཉུང་བར་གྱུར་ན་སྙིང་པོའི་དོན་མི་རྙེད༔ དེ་ཡི་ཕྱིར་ན་གསང་བའི་ཁ་བྱང་གཅེས༔ གསང་བའི་མན་ངག་དུང་ཡིག་ཅན་ཉིད་ལ༔ ཤེས་རབ་ཞིབ་མོའི་བློ་ཡིས་ཡང་བརྟག་ན༔ དུམ་བུ་བཅོ་བརྒྱད་རྒྱུད་ཀྱི་མཚན་གྱིས་ཤེས༔ འདི་ལས་མང་ན་གསང་བའི་མན་ངག་བསླད༔ ཉུང་བར་གྱུར་ན་དོན་གྱི་སྙིང་པོ་ཉམས༔ དེ་ཡི་ཕྱིར་ན་གསང་བའི་ཁ་བྱང་གཅེས༔ ཨྠྀི༔ ༔ རང་གི་ཆ་རྐྱེན་རྫོགས་ལ་ཕྱག་འཚལ་ལོ༔ ངེས་པའི་སྙིང་པོ་རང་བཞིན་དོན་གྱི་བཅུད་༔ རྣམ་བཞི་གཞན་དུ་གྲགས་པ་མེད་པའི་ཆོས༔ སྙིང་ཐིག་སྲང་ལ་ཕབ་པ་འདི་དག་ལ༔ གསལ་བྱེད་སྙིང་པོ་བུ་ཡི་མིང་ཉིད་ནི༔ ངེས་པར་ཚིག་ཙམ་བརྗོད་པར་མི་ཕོད་

ཀྱང་༔ བླ་མ་ཡི་དམ་རྣམས་ལ་གསོལ་བཏབ་ནས༔ གནད་ཀྱི་མན་ངག་འདི་དག་གསལ་བྱའི་ཕྱིར༔ སྐལ་ལྡན་སེམས་ཀྱི་བུ་ཡི་དོན་ཉིད་དུ༔ གསང་བའི་སྙིང་པོ་འདི་དག་ཚིག་ཏུ་བཀོད༔ སྙིང་པོ་ངེས་པའི་རང་སྣང་འདི་ལྟ་བུ༔ ཡ་མཚན་མཆོག་ཏུ་ཆེ་བའི་གསང་བ་ཉིད༔ གནད་ཀྱི་སྙིང་པོ་འདི་ཀུན་ཡིད་ལ་བརྣོགས༔ རྡོ་རྗེ་འཆང་གི་ཚིག་གནད་ངེས་པ་མེད་ན་མཆོད་པའི་དུས་མི་ཤེས༔ དེ་ལྟར་མ་དང་བུ་གཉིས་བསྡེབས་པས་བསྟན་པ་བུ་གཅིག་འགྲུབ༔ དེ་ཡི་ཕྱིར་ན་གསང་བའི་ཁ་བྱང་གཅེས༔ གསང་བ་ཟངས་ཡིག་མེད་ན་གདམས་པ་གནད་མི་ཁྲོལ༔ རིགས་འཛིན་ཞལ་ཆེམས་མེད་ན་འཇུག་སྒོ་གསལ་བ་མིན༔ དེ་ལྟར་བུ་གཉིས་མ་དང་གསུམ་གྱིས་འདས་རྗེས་གསུམ་པ་འགྲུབ༔ དེ་ཡི་ཕྱིར་ན་གསང་བའི་ཁ་བྱང་གཅེས༔ ཆགས་པའི་པྲ་ཁྲིད་མེད་ན་ཆགས་ཅན་ལམ་མི་ཚུད༔ རླུང་གི་པྲ་ཁྲིད་མེད་ན་ཉམས་ལེན་དུས་མི་ཤེས༔ ཡང་གབ་སྦས་དུམ་མེད་ན་ཟབ་པའི་གནད་མི་ཤེས༔ མདོ་བྱང་བསྡུས་པའི་སྒྲོན་མ་མེད་ན་དམིགས་པའི་རབ་མི་ཕྱེད༔ དམིགས་གཏད་གསལ་བའི་སྒྲོན་མ་མེད་ན་ལྷག་ཆད་ངོ་མི་ཤེས༔ གསང་བ་རྟགས་ཡིག་མེད་ན་ཡིད་ཆེས་གདིང་དང་བྲལ༔ ཚད་ཀྱི་ཡི་གེ་མེད་ན་དུས་ཀྱི་ཚད་མི་ཟིན༔ གསང་བ་རྒྱབ་ཡིག་མེད་ན་དོན་མེད་ཡུགས་ས་རྐྱང་༔ དེ་ལྟར་བུ་བརྒྱད་མ་དང་དགུ་ཡིས་གསང་བ་ཟངས་ཡིག་འགྲུབ༔ དེ་ཡི་ཕྱིར་ན་གསང་བའི་ཁ་བྱང་གཅེས༔ པྲ་ཁྲིད་མ་གཏོགས་དུང་ཡིག་ཅན་ཡང་འདྲ༔ སྙིང་ཐིག་ཟབ་མོ་དོན་གྱི་མན་ངག་ལ༔ མ་དང་བུ་སྟེ་དུམ་བུའི་རྟོག་པ་ཅན༔ འདི་ལྟར་དོན་ལ་ཡིད་ཆེས་གསལ་

བྱས་པས༔ ཕྱི་རབས་འཇུག་པའི་སྐལ་ལྡན་སེམས་ཀྱི་བུ༔ ཐེ་ཚོམ་ཡིད་གཉིས་བློ་དང་བྲལ་ནས་ནི༔ སྙིང་པོའི་དོན་རྣམས་བདེ་བླག་ཉིད་དུ་ཡང་༔ མ་ནོར་འཁྲུལ་པ་མེད་པའི་སེམས་ཀྱིས་རྟོགས༔ དེ་ཡི་ཕྱིར་ན་གསང་བའི་ཁ་བྱང་འདི༔ འཇུག་སྒོ་གསལ་བའི་དོན་དུ་བདག་གིས་བྱས༔ ཡང་དག་སྙིང་པོ་བདེ་བ་ཆེན་པོ་སྟེ༔ རང་སྣང་ཆེན་པོ་སྒྲོ་འདོགས་ཀུན་དང་བྲལ༔ ཀུན་གྱིས་མཐོང་བ་མེད་པའི་ཡེ་ཤེས་ཏེ༔ སྤྲུལ་སྐུ་བསྒྲུབ་སྟེ་གཞན་གྱི་དོན་བྱེད་ཕྱིར༔ འབྱུང་བ་རྣམས་ཀྱི་སྒྲ་ལ་གོམས་བྱེད་པ༔ འབྱུང་བ་ཆེན་པོ་བཅོམ་ལྡན་འདས༔ འགྲོ་བ་ཀུན་ལ་ཡང་དག་གནས༔ དེ་ཉིད་སྔོན་འགྲོའི་སྤྱོད་པ་གསུམ༔ ལུས་སེམས་གནད་ལ་འབེབས་པ་ནི༔ ཐབས་ཀྱིས་གར་ཐབས་སྤྱོད་པ་ཡིས༔ ཨཱ་ལི་ཀཱ་ལི་རབ་ཏུ་བསྟན༔ ཇི་ལྟར་བསམ་པ་བསམ་གཏན་ཉིད༔ དེ་རྗེས་སོར་འཇུག་ཆོ་ག་ནི༔ མི་གཡོ་བ་ནི་སྐུ་ཡི་རྒྱ༔ མི་བརྗོད་པ་ནི་ཡེ་ཤེས་ཏེ༔ མི་ལེན་པ་ནི་བདག་མེད་ཅིང་༔ དེས་ན་ལུས་ངག་ཡིད་ཀྱི་གནད༔ དེ་ལ་བསྐྱོད་པ་མེད་བཞིན་དུ༔ རྣ་དབང་གཞན་ལ་ཐོས་མི་འགྱུར༔ དེ་བཞིན་ལྕེ་ཡི་དབང་པོས་ཀྱང་༔ བརྗོད་པར་བྱ་བ་རྡུལ་ཙམ་མེད༔ གཅིག་སྟེ་རྣམ་པ་ཡོངས་ཀྱི་མེད༔ དེ་ནས་རིག་པའི་ཡུལ་བསྟན་པ༔ རྣལ་འབྱོར་ནམ་མཁའི་བྱ་ལམ་གནས༔ དེ་ནས་རིག་པ་ཉིད་བསྟན་པ༔ དེ་ལ་དེ་བསྟན་དེ་ཡང་ཐོབ༔ དེ་ཉིད་ཐབས་ཀྱི་ཁྱད་པར་ནི༔ ཟླ་བ་ལས་བྱུང་རྟེན་དང་བཅས༔ རིག་པ་མངོན་པར་སྣང་བ་ནི༔ མངོན་སུམ་བདེ་བ་རང་ལས་འབྱུང་༔

དེ་ཉིད་རིག་པའི་ངོ་བོ་ནི༔ བཟུང་བས་མི་ཟིན་ཆུ་ཟླ་འདྲ༔ དེ་ཉིད་སྣང་བ་གོང་འཕེལ་བས༔ དེ་ལ་ཕྱོགས་ཀྱི་འོད་འདུས་པས༔ ངོ་མཚར་རྨད་བྱུང་རོལ་པ་ནི༔ རིག་པ་ཚད་ལ་ཕེབས་པ་སྟེ༔ བྱ་བ་མེད་པའི་ལས་རྣམས་ཏེ༔ ཆོས་རྣམས་ཟད་པའི་སར་ཕྱིན་པ༔ ཟབ་གཅིག་ན། ཟབ་པའི་ཆ་ཤས་སོགས་ཡུལ་མེད་ཟེར་མོའི་ཆ་ཞེས་རྟོག་ཡུལ་མེད༔ ཐ་ཚིག་མིང་དུ་བཏགས་པ་མེད༔ སྒྲོ་བཏགས་ཆོས་ཀུན་ག་ལ་ཡོད༔ དེ་ལྟར་ལུང་ཆེན་རྣམས་ཀྱིས་མཚོན་ནས་ནི༔ རིག་པའི་ཡེ་ཤེས་མངོན་སུམ་གཏན་ལ་ཕབ༔ རང་བཞིན་རྫོགས་པ་ཆེན་པོའི་མན་ངག་དང་༔ འགལ་བ་མེད་ཅིང་དབང་པོའི་གནད་དང་བསྟུན༔ གཞན་གྱི་མན་ངག་ཚད་ཕེབས་རྒྱབ་ཡིག་དང་༔ རང་གི་སྣང་བ་གཏན་ལ་དབབ་པའི་གཟེར༔ ངེས་པར་གཏན་ལ་ཕབ་པ་འདི་ཉིད་དོ༔ རྣལ་འབྱོར་རྣམས་ཀྱི་གསང་ཆེན་དམ་པ་འོ༔ སངས་རྒྱས་རྣམས་ཀྱི་དགོངས་པ་ཉག་གཅིག་དང་༔ རིག་པ་ཉིད་ཀྱི་ཡེ་ཤེས་ཟང་ཀ་མ༔ ཡུལ་ལ་གཅེར་མཐོང་ཉིད་དུ་སྟོན་པའི་ཕྱིར༔ སངས་རྒྱས་སྤྲུལ་པ་དགའ་རབ་རྡོ་རྗེ་ཡིས༔ སྙིང་གི་སྲང་ལ་ཕབ་པའི་མན་ངག་ཉིད༔ ཡི་གེ་མ་རུ་གསང་བ་སྙིང་ཐིག་མ༔ གཞན་དུ་བསྟན་རེ་མཁའ་འགྲོ་རྣམ་གསུམ་དཔང་༔ དེ་ཡི་ཕྱིར་ན་གསང་བ་མན་ངག་སྙིང་༔ རང་སེམས་སྟོང་པ་ཉིད་ལ་རྒྱས་བཏབ་ལ༔ སྐལ་ལྡན་སེམས་ཀྱི་བུ་དང་མ་འཕྲད་བར༔ ཆུ་སྲིན་པིར་གྱི་གྲེ་བ་བཞིན་དུ་བསྡམ༔ གལ་ཏེ་བསྐལ་པ་འཇིག་པའི་དུས་བྱུང་ན༔ རང་གི་ཡིད་ལ་རང་གིས་རྒྱས་བཏབ་ལ༔ ཁོང་དུ་སྦྲུལ་ཞུགས་ལུས་ལ་མེ་ཤོར་ཡང་༔ ཇི་སྲིད་གནས་པའི་བར་དུ་ཁར་མི་དབྱུང་༔ དེ་ནས་བསྟན་པ་

ཀུན་གྱི་བཙས་སུ་སྦོས༔ དངོས་གྲུབ་འདོད་པའི་རྣལ་འབྱོར་དམ་པ་ཡིས༔ སྐབས་སུ་མཆོད་ཅིང་སྐབས་སུ་བལྟས་པ་ཡིས༔ མཆོག་དང་ཐུན་མོང་གཉིས་ལ་ཅི་དགར་རོལ༔ རིག་པ་མངོན་སུམ་ལྟ་བའི་མེ་ལོང་ཉིད༔ ཟངས་ཀྱི་ཡི་གེ་རྣལ་འབྱོར་ཀུན་གྱིས་སྙིང་༔ སྐལ་ལྡན་སེམས་ཀྱི་བུ་དང་འདི་ཕྲད་ནས༔ ལུས་ངག་ཡིད་ལ་བར་ཆོད་མི་འབྱུང་བར༔ རིག་པའི་ཡེ་ཤེས་ཚད་ལ་ཕེབས་པར་ཤོག༔ ཡང་གསང་དྲིལ་བ་མན་ངག་ཀུན་གྱི་སྙིང་༔ སངས་རྒྱས་ཀུན་གྱི་བདེ་ཆེན་སྙིང་པོའི་དོན༔ ཐེག་པ་ཐུན་མོང་རྣམས་ལས་ཁྱད་འཕགས་པའི༔ དབང་བོའི་ཡུལ་དང་འབྲེལ་བའི་གནད་མཆོག་འདི༔ ལུས་ཀྱི་གནས་ལ་བརྟེན་ནས་མངོན་སུམ་བར༔ སྟོང་པའི་ཡུལ་ལ་འགྱུར་མེད་སྲང་དུ་ཚུད༔ འབྲལ་བ་མེད་ཅིང་རང་གི་དོན་དམ་ཉིད༔ རྟོག་པ་མ་ཡིན་མཐོང་ཡུལ་རྣམ་པར་དག༔ འདི་ལྟར་ངག་གི་གནད་ལ་བརྟེན་པས་ནི༔ བརྗོད་དུ་མེད་པའི་རང་གནད་ཡུལ་ལ་མཐོང་༔ དེ་ཡི་ཕྱིར་ན་གཏན་ཚིགས་ལུང་གི་གནད༔ མི་གསུང་མཉམ་པར་བཞག་པ་སྔགས་ཚིག་ཡིན༔ སེམས་ཀྱི་གནད་ལ་བརྟེན་པ་ཡིས༔ མེ་ལོང་ནང་དུ་བཞིན་ལྟར་བསྟན༔ རིག་པའི་ངོ་བོ་མངོན་དུ་མཐོང་༔ དེ་ཡི་ཕྱིར་ན་ངེས་པའི་བཀའ༔ མངོན་སུམ་པ་དང་རྒྱབ་ནས་འབྱུང་༔ སྤྱིར་ན་གསང་སྔགས་འབྲས་བུ་ཉིད༔ མངོན་སུམ་པ་དང་ཕྱི་ནས་ཡིན༔ འདི་ནི་རྒྱབ་ཐོབ་མ་ཡིན་པར༔ མངོན་སུམ་ཉིད་དུ་བྱེད་པས་ན༔ འབྲས་བུ་ཉིད་ལས་ལམ་དུ་བྱེད༔ གཞན་གྱི་ཚིག་གིས་མ་ཡིན་པར༔

རང་གི་མཐུ་ཡིས་རིག་པ་འོ༔ འདི་དག་ཚིག་ཏུ་བཀོད་པ་ཡིས༔ རིག་པའི་དོན་ལ་ཡིད་ཆེས་པ༔ མི་འགྱུར་བརྟན་པའི་དོན་དུ་ུའོ༔ རིན་ཆེན་སྙིང་པོ་ལྟ་བུའི་དེབས༔ སྙིང་དུ་གདམས་ཏེ་གསང་བའི་དོན༔ ཕྱི་རབས་བསྐལ་ལྡན་ངེས་ལུང་ཅན༔ འཇུག་སྒོ་གསལ་བར་བྱ་བའི་ཕྱིར༔ ཡི་གེ་དམ་པ་བརྗོད་པའི་བརྡ༔ བླ་མའི་མན་ངག་ཐུགས་ཀྱིས་བཅུད༔ རྒྱལ་བའི་བཀའ་དང་འགལ་མེད་པར༔ སེམས་ཀྱི་བུ་ཡི་དོན་དུ་བསྡེབས༔ འདི་ལ་འཁྲུལ་པ་ཡོངས་མེད་ཀྱང་༔ གལ་ཏེ་འཁྲུལ་པ་བྱུང་སྲིད་ན༔ རྒྱལ་བ་སྲས་དང་བཅས་པ་དང་༔ བླ་མ་ཉིད་དང་མཁའ་འགྲོ་ལ༔ བཟོད་པར་གསོལ་ཞིག་ས་མ་ཡཱ༔ དེ་ཡི་ཕྱིར་ན་འཁྲུལ་མེད་དངོས༔ གསང་བའི་གནད་དང་བསྟུན་ནས་ནི༔ མཚན་ཡང་བརྗོད་པར་མ་ཕོད་པའི༔ སྙིང་ཐིག་གསང་བའི་ཆོས་བཞི་ཡི༔ ཚིག་ལ་འགྱུར་བ་མེད་པའི་ཕྱིར༔ དབང་པོ་མིག་དང་དོན་གྱིས་སྙིང་༔ ལུས་ཀྱི་རྩ་གནད་ཇི་བཞིན་དུ༔ ཆོས་རྣམས་ཀུན་གྱི་གནད་བཀྲོལ་ནས༔ ཟབ་མོ་རྣམས་ཀྱི་ཡང་ཟབ་པ༔ སྙིང་པོ་ཡང་ནས་ཡང་བསྡུས་པ༔ ཐིག་ལེ་ཉག་ཅིག་མདོར་བསྡུས་ནས༔ དགོས་དོན་གསལ་བ་འདི་ཉིད་དུ༔ བསྟན་ནས་ཚེགས་ཆུང་དོན་ཆེ་བའི༔ སྙིང་པོ་ཉིད་ལ་འགྱུར་མེད་པའི༔ རིན་ཆེན་གསང་བའི་ཁ་བྱང་འདི༔ སྐལ་ལྡན་ཡིད་ཆེས་བསྐྱེད་པའི་ཕྱིར༔ སྙིང་ཐིག་མན་ངག་འཁྲུལམེད་པར༔ ཉམས་བླང་ཚད་དུ་ཕྱིན་པར་ཤོག༔ གསང་ཆེན་ངེས་པའི་སྙིང་པོ་ལ༔ རང་དབང་ཉིད་དུ་ཐོབ་པ་དང་༔ སྐུ་གསུམ་ཡེ་ཤེས་ལྔ་རྣམས་ཀྱི༔ སྣང་བ་ལམ་དུ་རྫོགས་པར་ཤོག༔ མཐར་ཐུག་ཆེན་པོའི་ཚད་ཕེབས་དང་༔ ཆོས་

རྣམས་ཟད་པའི་སར་སྐྱོལ་ཤོག༔ ཁ་བྱང་གི་རྒྱལ་པོ་ཉི་མས་བརྒྱན་པ་ཞེས་བྱ་བ༔ རབ་ཏུ་ཟབ་པ་རྣམས་ཀྱི་མན་ངག་མི་འགྱུར་བའི་དོན་དུ༔ མཁས་པ་ཆེན་པོ་བི་མ་ལ་མི་ཏྲས་ལྷོ་ཕྱོགས་བྷེ་ཏའི་ཡུལ་རིན་པོ་ཆེ་སྣང་བར་མཛད་པ་རྫོགས་སོ༔ ས་མ་ཡཱ༔ རྒྱ་རྒྱ྄་རྒྱ༔ གུཧྱ༔ ཤུབྷཾ༔

ཤོག་ཚད་ངེས་པའི་ཁ་བྱང་སྒྲོན་མ་རང་གསལ།

ཤོག་ཚད་ངེས་པའི་ཁ་བྱང་སྒྲོན་མ་རང་གསལ་བཞུགས༔ ཚད་ལྡན་རྡོ་རྗེ་འཛིན་ལ་ཕྱག་འཚལ་ལོ༔ རྡོ་རྗེ་ལྟ་བུའི་ཡེ་ཤེས་ཆེན་པོ་དེ༔ གཉིས་མེད་དབང་པོའི་ཡུལ་དུ་རྟོགས་བྱའི་ཕྱིར༔ རང་སྣང་བཅར་ལ་འབེབས་པའི་ཐབས་དག་ནི༔ བླ་མའི་བྱིན་རླབས་སྔོན་གྱི་སྐལ་བ་དང་༔ རང་གི་དད་པ་མོས་གུས་བྱས་པ་ལ༔ བརྟེན་ནས་གཉིས་མེད་རང་སྣང་བདེ་བ་ཆེ༔ དབང་པོ་རྣམས་ཀྱི་དྭངས་མ་གང་ཡིན་ལ༔ བརྟེན་ནས་རྡོ་རྗེ་ལུ་གུ་རྒྱུད་དེ་ཉིད༔ མངོན་སུམ་གསལ་བར་གཏན་ལ་དབབ་པའི་ཕྱིར༔ གཞན་དུ་བསྟན་པ་མེད་པའི་ཡི་གེ་ཉིད༔ རྣམ་བཞི་ཁ་བྱང་རྣམས་སུ་མ་བཀོད་པའི༔ གསང་ཆེན་སྙིང་དང་འདྲ་བའི་གདམས་པ་ལ༔ ཡི་གེའི་འབྲེལ་པོ་ཤོག་བུའི་གྲངས་ཉིད་ནི༔ འགྱུར་བ་མེད་པའི་ཕྱིར་ན་འདི་དག་ཉིད༔ བླ་མའི་གདམས་པ་སྙིང་པོའི་རྒྱུད་རྣམས་ལ༔ བརྟེན་ནས་འཁྲུལ་པ་མེད་པའི་བློ་གྲོས་ཀྱིས༔ རང་བཞིན་རྫོགས་ཆེན་རྣམས་ཀྱི་བཅུད་ཕྱུངས་པ༔ གསང་བའི་མན་ངག་བཞི་ཡི་རྒྱན་འདི་བཀོད༔ ཡང་གསང་དྲིལ་བའི་མན་ངག་འདི་དག་ལ༔ སྙིང་ཐིག་གསང་བ་ངེས་པའི་གནད་དང་བསྟུན༔ མངོན་སུམ་ཉིད་དེ་རྒྱབ་ནས་འབྱུང་བ་མིན༔ སྙིང་པོ་ངེས་པའི་རང་བཞིན་འདི་ལྟ་བུ༔ ཕྱིས་ཀྱང་འབྱུང་བར་ཤིན་ཏུ་དཀོན་པ་འོ༔ དེ་ཡི་དོན་གྱི་ཚད་ནི་འདི་ལྟ་བུ༔ གཞན་གྱིས་བསྒྱུར་ཅིང་གཞིག་པར་དཀའ་བའི་ཕྱིར༔ ཤོག་ཚད་སྣོད་ཀྱི་བྱེ་བྲག་འདི་ལྟ་སྟེ༔ རིན་ཆེན་ལྔ་ཡི་རང་བྱུང་བྱང་བུ་ནི༔ སུས་ཀྱང་བྱས་ཤིང་བཟོ་ཡིས་མ་བསྒྲུབས་པ༔ འབྱུང་བའི་དགྲ་དང་བྲལ་བའི་བྱང་བུ་ནི༔ བཞི་ཅུ་བརྒྱད་སྟེ་སུས་ཀྱང་བཤིག་ཏུ་མེད༔ རང་བྱུང་ཡི་གེ་སྐད་ཀྱི་རིགས་ལྟར་སྣང་༔ རྫོགས་པའི་སངས་རྒྱས་བགྲང་གིས་མི་ལངས་པའི༔ བྱིན་བརླབས་ཉིད་ལས་རང་སྣང་ཉིད་དུ་ཤར༔ རིན་ཆེན་ཤེལ་ཀྱི་གླེགས་

ཤིང་བར་དུ་གཏེམས༔ རྣམ་བདུན་རིན་ཆེན་གཟེར་ཆེན་བཞི་ཡིས་བསྡམས༔ བསྟན་པ་ཐམས་ཅད་འདུས་པའི་བུ་གཅིག་པོ༔ རང་བྱུང་ཡི་གེ་འབྱུང་བའི་སྒྲ་དང་བྲལ༔ བཅངས་པ་ཙམ་གྱིས་བླ་མེད་འབྲས་བུ་ཐོབ༔ དེ་ཕྱིར་ཡི་གེ་འདི་ཉིད་གསང་བར་བྱ༔ ཨྠྀི༔ ༔ རིན་ཆེན་མཐིང་སྔོན་བྱང་བུ་བཅུ་དྲུག་ལ༔ རིན་ཆེན་གསེར་གྱི་ཡི་གེས་སྤྲས་པ་སྟེ༔ ཟངས་ཀྱི་དྲ་བའི་ནང་དུ་བཅུག་པ་ནི༔ འདས་རྗེས་གསུམ་པ་ཉིད་དེ་རབ་ཏུ་གསང་༔ ཨྠྀི༔ ར་གན་གླེགས་པའི་བྱང་བུ་ལྔ་བཅུ་ལ༔ དཀར་པོ་དུང་ཞུན་ཡི་གེས་བཏབ་པ་ནི༔ གསང་བ་དུང་ཡིག་ཅན་ཏེ་འདི་ཡང་གསང་༔ ཨྠྀི༔ ར་གན་གླེགས་པའི་བྱང་བུ་དྲུག་ཅུ་ལ༔ དམར་པོ་ཟངས་ཞུན་ཡི་གེར་བཏབ་པ་ནི༔ རིན་ཆེན་མཆོང་གི་གླེགས་ཤིང་བར་དུ་གཏེམས༔ རིན་ཆེན་ལྔ་ཡི་གཟེར་ཆེན་གཉིས་ཀྱིས་བསྡམས༔ བསེ་ཡི་སྒྲོམ་བུ་ཁོང་ནག་ནང་དུ་བསྩལ༔ གསང་བའི་མན་ངག་ཟངས་ཡིག་ཅན་དེ་ནི༔ རབ་ཏུ་གསང་བས་རྣལ་འབྱོར་དོན་རབ་འགྲུབ༔ དེ་ཡི་ཕྱིར་ན་ཡང་གསང་དྲིལ་པའི་བཅུད༔ སུ་ལའང་མི་བསྟན་རང་གི་སྙིང་ལ་ཕུར༔ སྙིང་གི་མན་ངག་ཡི་གེ་རྣམ་པ་བཞི༔ གཞན་ལ་མ་སྟེར་རང་གི་སེམས་ལ་སྦོས༔ ཨྠྀི༔ ༔ ༔ དེ་དག་རྣམས་ཀྱི་བུ་ཡི་ཤོག་གུའི་ཚད༔ ཡི་གེའི་རྒྱུ་དང་སྣོད་ཀྱི་བྱེ་བྲག་ནི༔ རིན་ཆེན་མཐིང་ཤོག་བྱང་བུ་བཅུ་དྲུག་ལ༔ སེར་པོ་གསེར་གྱིས་ཡི་གེ་བཏབ་པ་ནི༔ དར་ཆེན་ལྔས་དྲིལ་གསེར་གྱི་སྐུད་པས་བཅིངས་༔ རྡོ་རྗེ་འཆང་གསུང་མཆོད་འོས་རང་བཞིན་ཚིག༔ འདི་ཉིད་ཀྱིས་ནི་བསྟན་པ་བུ་གཅིག་གི༔ མན་ངག་ཡིག་སྣ་ལྷག་མ་མེད་པར་རྫོགས༔ གཞན་ལ་གསང་སྟེ་ཚིག་ཏུ་མི་བརྗོད་དོ༔ ཨྠྀི༔ པྲ་ཁྲིད་རྣམ་པ་གཉིས་ལ་ཤོག་དྲིལ་ཆུང་བ་གཅིག༔ ཁ་བྱང་རྣམ་པ་གཉིས་ལ་ཤོག་དྲིལ་ཆུང་བ་གཅིག༔ རྟགས་ཀྱི་ཡི་གེ་ཉིད་ལ་ཤིན་ཏུ་

ཆུང་བ་གཅིག༔ གསང་བའི་ཚད་ཡིག་ལ་ཡང་ཤིན་ཏུ་ཆུང་བ་གཅིག༔ འདི་དག་རིན་ཆེན་གསེར་གྱི་སྐུད་པས་སྦྲེེལ་ནས་ནི༔ མུ་ཏིག་སྔོན་པོའི་དྲ་བའི་ནང་དུ་བཅུག་ནས་དྲིལ༔ གསང་བ་རྒྱབ་ཡིག་ཉིད་ལ་པོ་ཏི་ཆག་གང་པ༔ གླེགས་ཤིང་ཕྲ་མོ་གསེར་གྱི་འཇིམ་བག་ཅན་གྱིས་གཏེམས༔ ལྕགས་ཀྱི་གཟེར་ཆེན་སྒོ་ལྕགས་ཀྱིས་བཏང་སྟེ༔ ཟ་འོག་གུར་ཁྱིམ་གསེར་ཐིག་ཅན་གྱིས་དྲིལ༔ འདི་དག་རྣམས་ཀྱིས་སྙིང་ཐིག་ཟངས་ཡིག་གི༔ མན་ངག་ཡིག་སྣ་ལྷག་ཆད་མེད་པར་རྫོགས༔ འདི་དག་རང་གི་སེམས་ལ་བརྣག་པར་བྱ༔ སྐལ་མེད་ལ་བསྟན་མཁའ་འགྲོས་སྙིང་ཁྲག་འཇིབས༔ དེ་བས་སེམས་ཀྱི་བུ་གཅིག་མ་གཏོགས་པ༔ ཚིག་གི་ཟུར་ཙམ་གཞན་ལ་བསྟན་པ་འམ༔ བརྗོད་ཅིང་བཤད་པར་མི་བྱ་སེམས་ལ་ཕུར༔ གལ་ཏེ་སྐལ་ལྡན་སེམས་ཀྱི་བུ་གཅིག་དང་༔ ཕྲད་དེ་སྟེར་ན་དབང་བཞི་རྫོགས་བྱས་ལ༔ འདི་ཉིད་བསྟན་ཏེ་ཉམས་སུ་བླངས་པ་ཡིས༔ རྡོ་རྗེ་འཆང་དང་མཉམ་པ་ཉིད་དུ་ཡང་༔ འགྱུར་བ་འདི་ལ་ཐེ་ཚོམ་ཅི་སྟེ་ཟ༔ དབང་བཞི་རྫོགས་པའི་སྐལ་ལྡན་སྙིང་གི་བུ༔ སྐུ་གསུམ་ཉིད་དང་མཉམ་པར་འདི་ཉིད་ལ༔ སྨོས་ཅི་དགོས་ཏེ་དེ་ཉིད་རང་ཡིན་ནོ༔ དེ་ཡི་ཕྱིར་ན་འདི་ཡང་རབ་ཏུ་གསང་༔ ཨྠྀི༔ ༔ ཁ་བྱང་གསུམ་པོ་གོང་དང་འདྲ་བ་ལ༔ ཚད་དང་རྟགས་ཡིག་གཉིས་ལ་ཤོག་དྲིལ་ཆུང་བ་གཅིགཿགསང་བ་རྒྱབ་ཡིག་ལ་ནི་པོ་ཏི་ཕྱེད༔ དེ་དག་དུང་གི་བ་ཐག་དཀར་པོས་སྦྲེལ་ནས་ནི༔ དུང་གི་གའུ་སྦྲུལ་ཆེན་འཁྱིལ་བའི་ནང་ན་ཡོད༔ དེ་དག་རྣམས་ཀྱིས་གསང་བ་དུང་ཡིག་གི༔ བུ་ཡིག་ཚད་རྣམས་གཏན་ལ་ཕབ་པ་ཡིན༔ འདི་དག་རྣམས་ཀྱི་མ་དང་བུ་

ཡིག་ནི༔ ཀུན་ལ་གསང་ངོ་རང་གི་སེམས་ལ་བརྣགས༔ བྱང་ཁོག་དམར་པོའི་ནང་དུ་ཨ་ཐམ་མོ༔ གསང་ཆེན་མན་ངག་དམ་པ་འདི་ཉིད་ནི༔ སྐལ་ལྡན་སེམས་ཀྱི་བུ་གཅིག་མ་གཏོག་པར༔ ལུང་མེད་སེམས་ཅན་དོན་མ་མི་མོས་ལ༔ རླུང་དང་སེར་བུའི་ཕྱོགས་ཙམ་ཉིད་དུ་ཡང་༔ བསྒྲག་པར་བྱ་བ་མིན་ནོ་སེམས་ཀྱི་བུ༔ རབ་ཏུ་གསང་བས་དངོས་གྲུབ་ཅི་དགར་རོལ༔ དེ་ཡི་ཕྱིར་ན་རང་གི་སྙིང་ལ་ཕུར༔ ཨྠྀི༔ གསང་ཆེན་མན་ངག་དམ་པ་རྣམ་པ་བཞི༔ སུ་ལའང་བསྟན་པ་མེད་པ་སྙིང་གི་ནོར༔ ཡང་གསང་བཅུད་བསྡུས་ཡི་གེ་དཀར་དམར་གཉིས༔ མཚན་ཙམ་བརྗོད་པར་སུ་ཡང་མི་ཕོད་དོ༔ འབྲིད་མཁན་གཡོན་ཅན་ཁ་གསག་སླུ་བ་ཡིས༔ འདི་ཉིད་ཁ་དྲངས་ཕྲིད་དེ་མིང་ཙམ་ཡང་༔ གལ་ཏེ་མཆན་ཚིག་ཙམ་དུ་འདི་ཤོར་ན༔ དེ་ལ་དགོས་པའི་དོན་དུ་འདྲ་མིན་གཉིས༔ མིང་མཐུན་དོན་དུ་ཁྱད་པར་ཆེ་བར་བསྟན༔ གསང་བ་སྙིང་གི་སྙིང་ཐིག་འདི་དག་ཉིད༔ ཁ་བྱང་རྣམས་ཀྱི་ནང་དུ་བཀོད་པ་མེད༔ དེ་ཡི་ཕྱིར་ན་གསང་བའི་ཁ་བྱང་འདི༔ སུས་ཀྱང་མཐོང་དུ་རུང་བ་མ་ཡིན་ནོ༔ དེ་ཡི་ཕྱིར་ན་སྙིང་འདྲའི་གདམས་པ་འདི༔ ནགས་ཀློང་ཉིད་དམ་དུར་ཁྲོད་མི་མེད་པར༔ གྲོགས་མེད་གཅིག་པུར་འདུག་སྟེ་འདི་ཉིད་ལ༔ ཉམས་སུ་བླངས་ཏེ་གྲུབ་པའི་འབྲས་བུ་བདེན༔ གསང་བ་འདི་ནི་བདེ་ཆེན་གསང་བའི་གནད༔ གཞན་དུ་མེད་དེ་འདི་ཉིད་བཅུད་ཕྱུངས་ནས༔ སངས་རྒྱས་རྣམས་ཀྱིས་གཤེགས་པའི་ཤུལ་དེ་ཉིད༔ འདི་ཉིད་རང་དུ་ཚད་ལ་ཕབ་ནས་ནི༔ བླ་མའི་ཞལ་ལ་ལུས་པ་མེད་པར་ཡང་༔ ཚིག་དོན་གསལ་བར་ཡི་གེ་ཉིད་དུ་བཀོད༔ རང་རིག་རྒྱུ་རྐྱེན་གཉིས་ལ་མ་ལྟོས་པས༔

ཤེས་རབ་ཀྱིས་ནི་སྤྱོད་ཡུལ་མིན་པའི་ཕྱིར༔ དབང་པོ་ཉིད་ལ་རྣོ་དང་རྟུལ་མེད་པར༔ འདི་ཉིད་མཐོང་སྟེ་དོན་རིག་ཉམས་བླངས་ན༔ གསང་སྔགས་རྣམས་ཀྱི་འབྲས་བུ་འདི་ཉིད་ལ༔ ཐོབ་པར་འགྱུར་བ་འདི་ལ་ཐེ་ཚོམ་མེད༔ དེ་ཡི་ཕྱིར་ན་གསང་བ་ངེས་པའི་གནད༔ བཤད་ཅིང་བསྟན་པ་མི་དགོས་ངོ་མཚར་ཆེ༔ ཡང་དག་ཡེ་ཤེས་ཚིག་གིས་མི་རྟོགས་ཏེ༔ མངོན་སུམ་རང་གནད་ཚད་འདི་ངོ་མཚར་ཆེ༔ རང་བཞིན་རྫོགས་པ་ཆེན་པོའི་དོན་དེ་ཉིད༔ དགེ་སྡིག་གཉིས་ཀྱིས་ཕན་གནོད་ལ་བཟླས་ཕྱིར༔ དབང་པོ་ཉིད་དང་འབྲེལ་བ་ངོ་མཚར་ཆེ༔ སྨྲ་བསམ་བརྗོད་དུ་མེད་པའི་དོན་དེ་ཉིད༔ གཞན་གྱིས་བཤད་པས་དེ་དོན་མི་རྙེད་ཕྱིར༔ རང་གི་གནད་ལས་བྱུང་བ་ངོ་མཚར་ཆེ༔ གསང་བ་ཆེན་པོ་སུས་ཀྱང་མ་རྙེད་པ༔ ཐེག་པ་ཐུན་མོང་རྣམས་ལས་ཁྱད་འཕགས་ཕྱིརཿངེས་པའི་དོན་ཉིད་གསུངས་པ་ངོ་མཚར་ཆེཿབླ་མའི་མན་ངག་རྐྱེན་ལ་རག་མ་ལུས༔ རང་སྣང་དབང་པོའི་གནད་དང་བསྟུན་ནས་ནི༔ སྔོན་ཆད་མཐོང་མ་མྱོང་བའི་ཡུལ་དེ་ཉིདཿགོམས་ཤིང་སྦྱོངས་པ་མི་དགོས་ཅིག་ཅར་དུ༔ སྟོང་པའི་ཡུལ་ལ་ལྷག་མཐོང་ཉིད་དུ་ཡོང་༔ ལས་ལ་དག་དང་མ་དག་མེད་པའི་མིས༔ མངོན་སུམ་ཉིད་དུ་མཐོང་བར་གྱུར་པ་ལ༔ ཐེ་ཚོམ་ཡོད་པ་ཉིད་ནི་མ་ཡིན་ནོ༔ དེ་ཡི་ཕྱིར་ན་གསང་བའི་ཐབས་ཆེན་འདི༔ སངས་རྒྱས་ཐུགས་རྗེ་ལྡན་པ་རྣམས་ཀྱིས་ཀྱང་༔ སྙིང་ཐིག་འདི་ནི་བརྗོད་པར་ནུས་མ་ཡིན༔ དེ་ཡི་ཕྱིར་ན་སངས་རྒྱས་ཐམས་ཅད་ཀྱིས༔ རྡོ་རྗེ་འཆང་ལ་དབང་བཞི་རྫོགས་བྱས་ནས༔ གསང་བ་མཆོག་ལ་དབང་བར་དབང་བསྐུར་བས༔ ཉིད་ཀྱི་གསང་དོན་འདི་ནི་བརྗོད་པ་ལས༔ གཞན་གྱིས་

གསུང་ཞིང་བསྟན་པར་ནུས་མི་སྲིད༔ དེ་ཡི་ཕྱིར་ན་ཐབས་ཆེན་སྙིང་བཅུད་འདི༔ རབ་ཏུ་གསང་བར་བྱ་འོ་ས་མ་ཡཱཿཤོག་གུའི་ཚད་དང་ཡི་གེའི་རྒྱུད་ཉིད་དང་༔ སྣོད་དང་བཅས་པ་གསང་བའི་ཡི་གེར་བཀོད༔ འདི་ཡི་དགེ་བས་དོན་དམ་དེ་ཉིད་ལ༔ དབང་ཐོབ་སྐུ་གསུམ་ལམ་དུ་སྣང་བར་ཤོག༔ ཤོག་ཚད་གསལ་བའི་ཁ་བྱང་༔ སྒྲོན་མ་རང་གསལ་ཞེས་བྱ་བ༔ མཁས་པ་ཆེན་པོ་བི་མ་ལ་མི་ཏྲས་མཛད་པ་རྫོགས་སོ༔ དཔལ་སྔགས་སྲུང་གི་རྒྱལ་མོ་ཨེ་ཀ་ཙ་ཏིས་སྲུངས་ཤིག༔ ས་མ་ཡཱ༔ པ་ཏྲཾ་ཏྲ་ཀྵ༔ ཨཐཾ༔ ༔ གཏེར་ནས་གཏེར་དུ་དམ་པར་བཙས་ནས་བཀའ་གཞན་དུ་མ་འཁྱར་བ་ལགས་སོ༔ ཡི་གེ་དཀར་དམར་གཉིས་ལ་འདྲ་མིན་ཞེས་ཀྱང་བྱ༔ མི་འདྲ་བའི་ཡི་གེ་གཉིས་བཞུགས་པ་ལ༔ སྙིང་ཐིག་གི་ཁ་བྱང་འདིར་བཀོད་པའི་མ་བུ་རྣམས་སྙིང་ཐིག་ལགས་སོ༔ མི་འདྲ་མི་ཟབ་པ་དེ་ལ་བུ་མ་མཆིས༔ ས་མ་ཡཱཿརྒྱ་རྒྱ་རྒྱཿཤུབྷཾ༔ ༔

བསྟན་པ་བུ་གཅིག་གི་རྒྱུད་གསེར་གྱི་སྙིང་པོ་ཉི་མ་རབ་ཏུ་སྣང་།

བསྟན་པ་བུ་གཅིག་གི་རྒྱུད་གསེར་གྱི་སྙིང་པོ་ཉི་མ་རབ་ཏུ་སྣང་བྱེད་བཞུགས་སོ༔

རྒྱ་གར་སྐད་དུ༔ བུདྡྷ་སརྦ་པུ་ུཏྲ་ཨེ་ཀ་གུ་ཧྱ་པུ་རི་ས་མན་ཏནྟྲ་ནཱམ༔ བོད་སྐད་དུ༔ སངས་རྒྱས་ཐམས་ཅད་ཀྱི་སྲས་གཅིག་པོ༔ གསང་བ་ཐམས་ཅད་གཅོད་པ་ས་བོན་གྱི་རྒྱུད་ཅེས་བྱ་བ༔ དྲན་པ་ཀུན་གྱི་ཐོག་མ་ཡི༔ དངོས་མཛད་སངས་རྒྱས་ཐོག་མ་ལ༔ དང་པོ་ཉིད་ཏུ་ཕྱག་འཚལ་ལོ༔ འདི་སྐད་བདག་ལ་སོགས་པ་ཡི༔ སངས་རྒྱས་བྱེ་བ་དུང་ཕྱུར་གྱི༔ དགོངས་པ་ཉིད་དང་གྲངས་མེད་པར༔ ཐུགས་ཀྱི་སྙིང་པོ་ཇི་ལྟ་བར༔ གསུངས་ཤིང་བསྟན་པའི་དུས་གཅིག་ན༔ མྱ་ངན་འདས་པའི་ཐོག་མར་ནི༔ འདི་ནི་ཉག་ཅིག་རྣལ་མ་ཡི༔ དོན་གྱི་ས་བོན་རྣམས་སུ་ནི༔ ངེས་པའི་སྙིང་པོ་ཉིད་དུ་ཡང་༔ གསུངས་སོ་བསྟན་ཏོ་བཤད་པ་ཡིན༔ བསྟན་པའི་དོན་ནི་རྒྱ་མཚོ་ཀུན༔ ལ་ལ་གནས་སྐབས་ཡུལ་དོན་དུ༔ ལ་ལ་མ་འོངས་འཇུག་དོན་ཡིན༔ ལ་ལ་འདུལ་དོན་ཐ་དད་ཉིད༔ སྙིང་གི་སྙིང་པོ་ཚིག་འགའ་ལས༔ ཀུན་གྱིས་གྲུབ་པ་མ་ཡིན་ནོ༔ བསྟན་པ་འཕེལ་བྱེད་ས་བོན་དུ༔ འདི་ཀུན་བཞག་ཅིང་བྱིན་བརླབས་ལས༔ རང་བྱུང་ཉིད་དུ་ཐུགས་ལས་རྡོལ༔ དེ་ཕྱིར་སངས་རྒྱས་ཐམས་ཅད་ཀྱི༔ ཐུགས་

ཀྱི་སྲས་ནི་གཅིག་པར་ཡང་༔ རང་བྱུང་ཆེན་པོའི་འཕེལ་དང་བཅས༔ འབྱུང་བའི་སྒྲ་དང་བྲལ་བར་བྱུང་༔ འདི་ནི་བསྟན་པ་གང་བྱུང་དུ༔ འོད་དང་བཅས་ཏེ་འབྱུང་བ་ཡིན༔ གང་ལ་བབས་པར་གྱུར་པའི་མི༔ བསྟན་པ་ཀུན་གྱི་བདག་པོར་འགྱུར༔ འདི་ལ་ལྡེམ་པོར་བསྟན་པ་མེད༔ སུས་ཀྱང་བཤད་ཅིང་ཉན་མེད་པར༔ རང་བྱུང་དགོངས་པ་ཀློང་རྡོལ་དུ༔ ཉི་མ་ཉིན་ལས་ཐོན་པ་བཞིན༔ སུས་ཀྱང་མ་བསྒྲིབས་རང་བྱུང་ངོ་༔ འདི་ལ་འབྱུང་བཞིའི་གནོད་མེད་པས༔ ནམ་མཁའ་དག་ལ་འཕར་བར་སྣང་༔ སངས་རྒྱས་འབྲས་བུ་སུས་ཐོབ་པ༔ འདི་ཉིད་དེ་ལས་སྣང་བ་ཡིན༔ འདི་མ་མཐོང་བའི་སངས་རྒྱས་ནི༔ གཅིག་ཀྱང་འབྱུང་བ་སྔ་ཕྱིར་མེད་༔ དེ་ཕྱིར་བསྟན་པ་རྣམས་ཀྱི་བཙས༔ སངས་རྒྱས་ཀུན་གྱི་སྲས་གཅིག་པོ༔ མྱང་འདས་ཐོབ་པའི་སྣ་ཐག་ཡིན༔ དགོངས་པ་རང་ཐོག་འབེབས་པ་ཡི༔ གནད་ཀྱི་ཚིག་ཏུ་འདི་ཉིད་བྱུང་༔ འཇིག་རྟེན་ཁམས་ནི་གང་དུ་ཡང་༔ སངས་རྒྱས་ཉིད་ནི་སུས་

ཐོབ་པ༔ དེ་ཚེ་འདི་ནི་ལན་གསུམ་དུ༔ ནམ་མཁའ་དག་ལ་འཕར་བ་དང་༔ རང་འོད་ལྔ་པོ་འདི་ལས་བྱུང་༔ འདི་འཛིན་རྣལ་འབྱོར་སྐལ་ཆེ་བས༔ ལན་གསུམ་འདི་ཡི་ཚིག་ཀུན་ཡང་༔ ལྷག་དང་ཆད་པ་མེད་པར་ནི༔ རྡོ་རྗེའི་ལྕེ་ཡིས་སུས་བརྗོད་ན༔ འདི་ཡང་དེ་དང་མཉམ་པར་ཡང་༔ འགྱུར་པ་འདི་ལ་ཐེ་ཚོམ་མེད༔ དེ་ཕྱིར་བསྟན་པའི་རྒྱུད་རྣམས་ཀུན༔ ཐམས་ཅད་དུས་གཅིག་སྒོམ་ཤེས་ཀྱང་༔ འདི་མ་སྣང་བར་གྲོལ་བ་མེདཿའདི་ནི་ས་བོན་རབ་འཕེལ་བས༔ བསྟན་པའི་བདག་པོ་གང་སངས་རྒྱས༔ འདི་ཉིད་ས་བོན་མེད་པར་ནི༔ བསྟན་པའི་གསུང་ནི་ཚིག་ཙམ་ཡང་༔ ལྕེ་ཡི་དབང་པོས་བརྗོད་མི་ནུས༔ དེ་ཚིག་འདི་ལ་མ་བརྟེན་པར༔ རྡུལ་ཆ་ཙམ་ཡང་འབྱུང་བ་མིན༔ བསྟན་པ་གཅིག་གི་སྙིགས་མ་ལ༔ བྱིན་བརླབས་ཚིག་ནི་འདི་ཀུན་ཡང་༔ གང་ལ་སྣང་བའི་མི་དེས་ཀྱང་༔ མ་མཐོང་རྒྱུད་དང་བསྟན་བཅོས་ནི༔ ལྕེ་ཡི་དབང་པོས་བརྗོད་པར་ནུས༔ སེམས་ཅན་ཀུན་གྱི་བསམ་པ་དང་༔ སངས་རྒྱས་ཀུན་གྱི་དགོངས་པ་དང་༔ ཇི་ལྟར་མཐུན་པའི་ཆོས་ཀུན་ནི༔ འདི་ཡིས་སྟོན་པར་ནུས་པ་ཡིན༔ སངས་རྒྱས་རྣམས་ཀྱི་ཐུགས་དང་གཅིག༔ རྡོ་རྗེ་འཛིན་པའི་དགོངས་པ་དང་༔ དབྱེར་མི་ཕྱེད་པར་འདིས་འགྱུར་རོ༔ དེ་ཕྱིར་བསྟན་པའི་མེ་རོ་ཡིན༔ རང་བྱུང་ཚིག་གི་རྒྱལ་པོ་འདི༔ སོ་སོའི་སེམས་ཅན་སྐྱེ་གཟུགས་ལ༔ སོ་སོའི་བརྡ་སྐད་ཅི་ལྟ་བར༔ འདི་ཉིད་དེ་ལྟར་སྣང་བ་ཡིན༔ དེ་ཕྱིར་རང་བྱུང་ཡི་གེར་ནི༔ ཐོག་མ་བབས་ཀྱིས་གྲུབ་ནས་བྱུང་༔ རང་

བྱུང་བཅོམ་ལྡན་འདས་ལ་ཡང་༔ འདི་ལྟར་རྫོགས་པའི་ལུགས་སུ་སྣང་༔ ཆོས་ཀྱི་སྡེ་སྣོད་ཉིད་དུ་ནི༔ འདི་ཚིག་ཡེ་ནས་རང་ཤར་བས༔ ཐོག་མ་དྲན་པའི་གཞིར་གྱུར་ཏེ༔ དྲན་པ་ཐམས་ཅད་མ་སྟོངས་པར༔ ཚིག་འདི་ཀུན་ཀྱང་སྣང་བ་ཡིན༔ དྲན་ཟད་ཚིག་འདི་ཟད་པར་ནི༔ རྡོ་རྗེ་ཞེས་ནི་ཚིག་འདི་ཀུན༔ འབྱུང་བའི་རྐྱེན་དང་བྲལ་བས་ན༔ རྡོ་རྗེ་ཀུན་འབྱུང་གསང་སྔགས་ཡིན༔ ཐབས་ལམ་དུ་མ་མཚོན་པའི་ཕྱིར༔ རང་བབས་བསྒོམ་པ་འདི་ལས་བྱུང་༔ སྙིང་པོ་རང་འདུལ་བསྟན་པའི་བཅུད༔ གཞི་ཉིད་ཀྱི་ནི་བབས་ཡིན་ནོ༔ ཆོས་ཀུན་མཉམ་པའི་ནན་ཏན་ཚིག༔ རང་གནད་དུ་ནི་འདི་ཀུན་ཤར༔ འདི་ལ་ནུབ་པ་གཅིག་ཉིད་མེད༔ བསྒོམ་དང་བསྒྲུབ་པའི་རྩ་བར་ཡང་༔ འདི་སྔགས་འཁྲུལ་པའི་ཚིག་མ་ཡིན༔ མ་འཁྲུལ་སྔོན་ཐོག་ཉིད་ཀྱི་གཞི༔ འདི་ལས་འཕྲོས་པས་སྤྲོས་པའི་རྒྱུ༔ རྒྱུ་ལས་འབྲས་བུ་རང་བྱུང་བཞིན༔ འདི་ཉིད་ལས་ནི་ཚིག་ཀུན་ཡང་༔ དྲན་བསམ་བྲལ་བའི་ངང་ཉིད་ལས༔ བྱས་པ་མེད་པར་བྱུང་བ་ཡིན༔ འོད་ཟེར་འཛིན་པའི་སྐྱེས་བུ་ལ༔ འདི་ནི་སྣང་བར་འགྱུར་བའོ༔ དེ་ལས་འཕེལ་ནས་གྲངས་འགའ་འབྱུང་༔ གསང་བའི་བདེན་པ་གཅིག་པ་ཉིད༔ གྲངས་མེད་རྡོ་རྗེ་འཆང་རྣམས་ཀྱི༔ ཐུགས་རྡོལ་ཉག་གཅིག་དགོངས་དོན་གཅིག༔ འཛིན་མེད་ཡངས་པའི་གཏོད་ཕུར་ཡིན༔ ཐོད་རྒལ་ཐོག་བབས་ཀུན་གྱི་གནད༔ རང་ས་འབྱེད་པའི་ལྡེ་མིག་མཆོག༔ འདི་ནི་བདེ་བའི་ས་བོན་འཛིན༔ སངས་རྒྱས་རྣམས་ཀྱི་ཤེས་རབ་ཡིན༔ མཁའ་

མཉམ་དག་པའི་རྣམ་གཟེར་འདིས༔ བསྟན་པ་ཀུན་གྱི་རྩ་བ་འཛིན༔ འདི་ཡིས་གྲངས་སྣ་བཟུང་བས་ན༔ ལྷ་མིན་གཡུལ་རྣམས་རང་ལོག་ཏུ༔ འདི་ཚིག་བཟུང་བ་ཙམ་གྱིས་འགྱུར༔ ཁམས་གསུམ་གཡུལ་ཀུན་འདིས་བཟློག་ག༔ོརིགས་དྲུག་རྣམས་ཀྱི་འབྲོས་ཁུངས་འགེགས༔ མྱ་ངན་མེད་པའི་གྲོང་ཁྱེར་དུ༔ འཇུག་པར་བྱེད་པའི་འཁོར་ལོ་ཡིན༔ སྲིད་པས་བཅིངས་པ་རྣམས་ལ་ནི༔ འདི་ཡིས་གྲོལ་བར་བྱེད་པ་འོ༔ དམ་པའི་སྙིང་པོ་གཞུང་རྒྱུད་དུ༔ རང་བཞིན་དུ་ནི་བབས་ལས་བྱུང་༔ འདིས་ནི་བླ་མའི་སྐུ་མི་སྤོང་༔ སྙིང་ལ་ཉི་མའི་འོད་བརྡལ་བས༔ ཕྱོགས་བཅུར་ཁྱབ་པའི་མུན་པ་ནི༔ འདི་ཡིས་རང་སངས་ཉིད་དུ་འགྲོ༔ ལྷག་པར་གནས་པའི་ཡེ་ཤེས་ནི༔ འདི་ཡིས་མཆོག་ཏུ་སྟོན་པར་བྱེད༔ དཀོན་པའི་མཆོག་རྣམས་བསྐྱེད་པའི་ཡུམ༔ སེམས་དལ་བསམ་གཏན་ངང་གིས་འགྲུབ༔ ཆོས་སྐུའི་སྣང་བ་དུས་གཅིག་ཏུ༔ སྟོན་པར་བྱེད་པའི་སྒྲོན་མ་འོ༔ ཕྱིན་ཅི་ལོག་ལས་ཡང་དག་དུ༔ དག་པར་བྱེད་པའི་ཆུ་རྒྱུན་ཡིན༔ ཐེག་པ་ཀུན་གྱི་མཐར་ཐུག་ཏུ༔ སྐྱེལ་བར་བྱེད་པའི་ཤིང་རྟ་འོ༔ ཐོས་བསམ་སྒོམ་པའི་རྒྱངས་ཤིང་དུ༔ འཇུག་པར་བྱེད་པའི་དངོས་པོ་ཡིན༔ སྡེ་སྣོད་ཐམས་ཅད་འཛིན་པ་ཡི༔ མཉེན་ལྕུགས་ལྡན་པའི་ལྕགས་ཀྱུའོ༔ རྣལ་འབྱོར་དག་པའི་དཀྱིལ་འཁོར་གྱི༔ ལམ་དུ་འཇུག་པའི་ས་མཁན་ཡིན༔ མངལ་རྣམས་ཁུངས་སྒོ་འགེགས་པར་བྱེད༔ ཐར་པའི་སྐས་ནི་རང་འཛུགས་ཡིན༔ རྣམ་དག་འོད་ཀྱི་མཐོངས་འབྱེད་པ༔ ཆོས་རྣམས་ཀྱི་ནི་རེ་གནས་ས༔ བདུད་དང་མུ་སྟེགས་

མགོ་གནོན་ཡིན༔ ཤེས་པ་རྨུགས་པའི་གསལ་འདེབས་སོ༔ སྨོན་འཇུག་ཀུན་གྱི་སྲོག་ཤིང་ཡིན༔ ལྷ་དང་སྔགས་ཀྱི་མདོ་མདུད་དོ༔ ད་ལ་རྣམས་ཀྱིས་སྐྱེད་ཤིང་ངོ་༔ ལྟ་སྒོམ་ལོག་པའི་དག་བྱེད་ཁྲུས༔ མན་ངག་སྙིང་པོ་རྫོགས་པའི་ས༔ རྡོ་རྗེ་ཐེག་པའི་གྲངས་རྫོགས་ནས༔ འགྲོ་རྣམས་ལམ་ལ་འཛུད་པ་འོ༔ ཐེག་པའི་རྒྱལ་པོ་ཡོངས་རྫོགས་ཀྱི༔ ཡོན་ཏན་བྱུང་ཚུལ་རང་བྱུང་ངོ་༔ ༈ཨེ་མ་ཧོ༔ གསང་མཛད་རང་བཞིན་ཚིག་འདི་ཡང་༔ རང་བྱུང་ཡེ་དག་ཆེན་པོར་ནི༔ སྤེལ་ཚིག་གསང་བ་འདི་ལྟར་སྣང་༔ ཡེ་ཐོག་དང་པོའི་སངས་རྒྱས་ནི༔ དང་པོ་མངོན་འཕགས་དྲན་པ་མགོན༔ ཕྱག་རྒྱ་རང་དྲན་འཁོར་ལོ་ནི༔ གཞི་ལས་འཕགས་པའི་ཁྱད་པར་ཚིག༔ སྤྱི་ཕུད་སྔོན་གྱི་ཐོག་མར་བྱུང་༔ འདི་དུས་ཕྲག་ཁྲིག་བདུན་ཅུ་ཡིས༔ ཕྱག་རྒྱ་འདི་ནི་དམ་པ་འོ༔ སྙིང་པོས་བརྒྱན་པའི་བསྐལ་པ་ལ༔ སྡེ་སྣོད་དང་པོའི་སངས་རྒྱས་མགོན༔ མངའ་མཛད་ཕྱག་རྒྱ་འཁོར་ལོ་ལས༔ འཁོར་ནི་འཛིན་པ་བྱེ་བ་ལྔ༔ ཕྱག་རྒྱ་འདི་ནི་དམ་པ་འོ༔ སྤྱི་མེས་དང་པོ་ཕ་རོལ་མགོན༔ དཀྱིལ་འཁོར་སྙིང་པོ་རང་སྤྲོས་པས༔ བསྐལ་པ་གསེར་གྱི་ཡི་གེ་ལ༔ ས་ཡ་དྲུག་གི་ཕྱག་རྒྱར་བཟུང་༔ སྔོན་ཐོག་དང་པོ་འཕགས་པ་མགོན༔ ཕྱག་རྒྱ་དངོས་པོ་ཉིད་སྣང་བས༔ བསྐལ་པ་འོད་ཟེར་འབྱེད་པ་ལ༔ བདུན་འབུམ་གྱི་ནི་འབྲས་བུ་ུའོ༔ འཇིག་རྟེན་དྲ་བ་མགོན་པོ་ཡིས༔ སྤྲོས་བྲལ་ཕྱག་རྒྱ་འདི་སྤྲོས་ཏེ༔ བསྐལ་པ་མེ་ཏོག་མཛེས་པ་ལ༔ བསྟན་པའི་འབྲས་བུ་ཕྱལ་ཡལ་ལས༔ ཕྱག་རྒྱ་འདི་ནི་དམ་པ་འོ༔

སྙིང་པོ་སྟོང་གི་སྤྱི་ཕུད་མགོན༔ སྙིང་པོ་དམ་པའི་འཁོར་ལོ་ལས༔ བསྐལ་པ་རྩོད་པའི་སྙིང་པོ་ལ༔ གྲངས་མེད་བཞི་ཡི་སྙིང་པོ་འོ༔ འོད་ལྡན་དང་པོ་སེམས་ཅན་མགོན༔ སྤྲོས་མེད་སྙིང་པོ་རང་སྒྲ་ལས༔ བསྐལ་པ་སྣང་བའི་སྒྲོན་མ་ལ༔ བན་བུན་སྟོང་གི་ཕྱག་རྒྱར་བཟུང་༔ མཛེས་པའི་དང་པོ་འགྲོ་བའི་མགོན༔ ཡང་དག་སྙིང་པོ་རྣམས་སྤྲོས་ཏེ༔ བསྐལ་པ་རགས་པའི་ཡན་ལག་ལ༔ ཉར་ཉེར་བརྒྱ་ཡི་གྲངས་ཀྱིས་ནི༔ ཕྱག་རྒྱ་འདི་ནི་དམ་པའོ༔ ཐུགས་བརྩེ་སྙིང་པོ་ཉན་ཐོས་མགོན༔ ཕྱག་རྒྱ་ཡང་དག་ལམ་སྤྲོས་ཏེ༔ བསྐལ་པ་དུང་གི་སྒྲ་དག་ལ༔ བྲེང་བྲེང་བཅུ་ཡི་དམ་པར་རོ༔ མི་ཕམ་ཟང་མ་སྒྲ་བྲལ་མགོན༔ ཡང་དག་ངེས་པའི་རྒྱུད་ལས་ནི༔ བསྐལ་བ་དྲ་བའི་འོད་ཟེར་ལ༔ དུང་ཕྱུར་བདུན་གྱིས་ལམ་རྒྱལ་བཟུང་༔ སྙིང་པོ་སེམས་རྣལ་བདུད་རྩི་མགོན༔ ངེས་པའི་ས་བོན་རབ་བསྒྲགས་པས༔ བསྐལ་པ་ཚངས་པའི་དབྱངས་ཅན་ལ༔ འབུར་རྡུལ་བདུན་གྱིས་ངེས་པར་བཟུང་༔ རང་བཞིན་དྲག་པོ་ཏིང་འཛིན་མགོན༔ ཕྱག་རྒྱ་འཁོར་ལོ་བདེན་སྤྲོས་ཏེ༔ བསྐལ་པ་སྨྲ་བའི་གཞི་དག་ལ༔ ཕྱལ་ཕྱོལ་དགུ་ཡིས་དམ་པར་བཟུང་༔ གསང་བ་ཕྱག་རྒྱ་ལྷ་མིན་མགོན༔ ཡང་གསང་འཁོར་ལོ་རྣམ་སྤྲོས་ཏེ༔ བསྐལ་པ་འབུམ་པ་རེག་ལྡན་ལ༔ ཡལ་ཡོལ་དྲུག་ཅུའི་སྙིང་པ་ོའོ༔ རིམ་པ་ལྔ་པ་གཙུག་ཕུད་མགོན༔ བླ་མེད་སྙིང་པོ་ཡོངས་སྤྲོས་པས༔ བསྐལ་པ་ཡང་གསལ་རབ་འབྱམས་ལ༔ ཁྲག་ཁྲིག་བྱེ་བ་དགུ་བརྒྱ་ཡིས༔ བླ་ན་མེད་པའི་གསང་བ་འོ༔ འཇིག་རྟེན་ཐོག་མ་ཤེས་རབ་མགོན༔ བདེ་ཆེན་སྙིང་པོ་ཡོངས་སྤྲོས་ཏེ༔

བསྐལ་པ་བཀོད་པ་ཆེན་པོ་ལ༔ འབུམ་ཕྲག་དྲུག་ཅུ་རྩ་བཞི་ཡིས༔ ལྷ་ཡི་ལྷར་ནི་འདི་ཉིད་དོ༔ འཆད་པ་རྣམས་ཀྱིས་ཐོག་མ་མགོན༔ ངེེས་པའི་འབྲས་བུ་འདི་སྤྲོས་ཏེ༔ བསྐལ་པ་རིན་ཆེན་སྤུངས་པ་ལ༔ ས་ཡ་དགུ་བཅུའི་མགོན་པོ་ཡིས༔ རྒྱས་པར་བསྔགས་ཏེ་དམ་པར་རོ༔ ཡང་རྗེས་འབྱུང་བ་མེ་འོད་མགོན༔ དངོས་པོ་བསྒྱུར་བའི་ཕྱག་རྒྱ་ནི༔ སྙིང་པོ་ཉིད་དུ་སྤྲོས་པ་ལས༔ བསྐལ་པ་རབ་ཏུ་གཡོ་མེད་ལ༔ རབ་མཐའ་བཅུ་ཡི་མགོན་པོ་ཡིས༔ སྙིང་པོ་སྙིང་གི་དྭངས་མར་རོ༔ ཆགས་མེད་རྡུལ་བྲལ་དྲི་མེད་མགོན༔ གསང་ཆེན་ངེས་པ་ཉིད་ཏུ་སྟེ༔ བསྐལ་པ་གཡོ་སྒྱུ་བྲལ་བ་ལ༔ བྱེ་བ་དགུ་ཁྲིའི་གྲངས་མགོན་གྱིས༔ འདུ་བའི་ཕྱག་རྒྱ་ཉིད་དུ་འོ༔ དྲན་པ་དྲི་མེད་བསམ་གཏན་མགོན༔ དྲི་མེད་ངེས་པའི་གསང་ཚིག་སྤྲོས༔ བསྐལ་བ་མཐའ་ལྡན་སེང་གེ་ལ༔ ཉལ་ཉིལ་སུམ་ཅུའི་རྒྱལ་བ་ཡིས༔ འདི་ནི་བདེན་ཚིག་དམ་པར་རོ༔ དམ་པའི་སྐྱེས་བུ་ཆོས་ཀྱི་མགོན༔ སངས་རྒྱས་ཤེས་རབ་ས་བོན་སྤྲོས༔ བསྐལ་པ་གདུང་བ་སེལ་བ་ལ༔ སང་སེང་དགུ་ཁྲིའི་གདུང་འཕེལ་བས༔ དམ་པའི་ཕྱག་ནི་ཡང་དམ་དུའོ༔ སྤྱི་ཕུད་སྟོང་གི་ཡེ་ཐོག་མགོན༔ སྔགས་ཀྱི་རྩ་བ་འདི་བསྔགས་པས༔ བསྐལ་པ་དུང་གི་སྙིང་པོ་ལ༔ ཁ་ཡེལ་སྟོང་གི་གདུང་འཕེལ་བས༔ གསང་ཆེན་དམ་པར་རབ་བཟུང་པའོ༔ སངས་རྒྱས་དྲ་བ་མགོན་པོ་ཡིས༔ ཕྱག་རྒྱ་ཉིད་དུ་གདུང་གཟུང་པས༔ བསྐལ་བ་བྱེ་བའི་སྙིང་པོ་ལ༔ ཉག་ཐག་ཁྲི་ཡི་གདུང་འཛིན་པས༔ འདི་ཉིད་སྙིང་པོའི་དོན་དུའོ༔ ཡང་དག་

གསང་བ་པདྨ་མགོན༔ སྙིང་གི་སྙིང་པོ་དཀྱིལ་བཟུང་བས༔ བསྐལ་པ་ཡོངས་སུ་བརྩེ་བ་ལ༔ དར་དིར་སྟོང་གི་ཡང་འཕེལ་བས༔ འདི་ནི་སྙིང་ལ་ཡང་དག་སྤྲོས༔ སེམས་ཅན་སྙིང་བརྩེ་མེ་ཏོག་མགོན༔ དྲན་གཞི་དང་པོ་རབ་བཟུང་བས༔ བསྐལ་པ་ཡོད་པ་རབ་མཆོག་ལ༔ རྡུལ་མེད་དགུ་ཡི་གསང་འཛིན་པས༔ གསང་ཆེན་སྟོང་གི་དམ་པར་རོ༔ བསྐལ་པ་དྲ་བ་ཉི་འོད་མགོན༔ དམ་པའི་སྙིང་པོར་ངེས་ཕབ་པས༔ བསྐལ་བ་གླང་པོ་ཡོངས་རྫོགས་ལ༔ རབ་རྡུལ་ཉིད་ཀྱི་རྗེས་འཛིན་པས༔ སྟོང་ཉིད་གསལ་བའི་མིག་ཏུ་སྤྲོས༔ ཡོངས་རྫོགས་འཁོར་ལོ་རིགས་ཀྱི་མགོན༔ སེམས་ཀྱི་དངོས་པོ་དམ་པར་བཟུང་༔ བསྐལ་པ་བླ་ན་མེད་པ་ལ༔ ཁྲི་ཕྲག་དྲུག་ཅུའི་གདུང་འཕེལ་བས༔ གསང་ཆེན་འཁོར་ལོ་ཉིད་དུ་འོ༔ དྲི་མེད་དག་པ་ཆོས་ཀྱི་མགོན༔ ཡང་གསང་ངེས་པའི་ལུང་འདི་སྤྲོས༔ བསྐལ་པ་རྩོད་པ་རང་གྲོལ་ལ༔ ཉལ་ཉིལ་ཉིད་ཀྱི་འཕེལ་གདུང་གིས༔ རིམ་པས་མངོན་པར་རབ་སྤྲོས་པའོ༔ ཡང་གསང་དང་པོ་ཐོག་མ་མགོན༔ རྡོ་རྗེ་ཡང་དག་དམ་བཟུང་པས༔ བསྐལ་པ་ཁྱུང་ཆེན་གཤོག་རྫོགས་ལ༔ འབུམ་ཕྲག་ལྔ་ཡི་གདུང་འཕེལ་བས༔ ཕྱག་རྒྱ་རང་རྫོགས་ཉིད་དུ་འོ༔ སྣང་མཛད་དང་པོ་མར་མེ་མགོན༔ བླ་མེད་རྡོ་རྗེ་སྙིང་པོ་སྤྲོས༔ བསྐལ་པ་མདའ་ཡིས་ངོས་བཟུང་ལ༔ རྔ་ཡབ་གསུམ་གྱི་གདུང་འཕེལ་བས༔ རིགས་ལྡན་རྣམས་ཀྱི་ཕྱག་ཏུ་བཟུང་༔ ཡིད་ཤེས་དང་པོ་གནས་གསུམ་མགོན༔ སྙིང་ཐིག་རྩ་བའི་དྭངས་མར་སྤྲོས༔ བསྐལ་པ་རེག་པའི་སྟོབས་ཅན་ལ༔ ཁ་ཡེལ་དྲུག་གི་གདུང་

འཕེལ་བས། གོང་འཕེལ་ཕྱག་རྒྱ་དམ་པར་སྤྲོས༔ དཔའ་བོ་འཇིགས་སངས་དང་པོའི་མགོན༔ དྲི་མ་མེད་པའི་སྙིང་དུ་བབས༔ བསྐལ་པ་དྲན་བསམ་བྲལ་བ་ལ༔ ཡལ་ཡོལ་སྟོང་གི་གདུང་འཕེལ་བས༔ འདི་ཀུན་སྐྱོན་དང་བྲལ་བར་རོ༔ དྲག་པོ་ཆགས་བྲལ་བདེ་བའི་མགོན༔ ཆགས་མེད་རང་རིག་ཕྱག་རྒྱ་སྤྲོས༔ བསྐལ་པ་མྱ་ངན་བྲལ་བ་ལ༔ དུང་ཕྱུར་གསུམ་གྱིས་གདུང་འཕེལ་བས༔ མེད་པ་རྣམས་ཀྱི་དང་པོར་རོ༔ ཆོས་སྐུ་དངོས་དག་དྲི་མེད་མགོན༔ དམ་པ་གསུང་གི་སྙིང་པོ་སྤྲོས༔ བསྐལ་པ་ཟིལ་གྱིས་གནོན་པ་ལ༔ ས་ཡ་ཉིད་ཀྱི་གདུང་འཕེལ་བས༔ འདི་ཀུན་ཡང་དག་ཉིད་དུ་འོ༔ ཡང་གསང་རྒྱས་པ་སྒྱུ་མ་མགོན༔ ཚིག་བྲལ་བདེན་པའི་སྙིང་པོ་སྤྲོས༔ བསྐལ་པ་ཆོས་ཀྱི་འཁོར་ལོ་ལ༔ བྱ་བ་དགུ་ཡི་གདུང་འཕེལ་བས༔ ངེས་པའི་ལམ་གྱི་དྭངས་མར་རོ༔ སྟོང་པ་ཉིད་ནི་དགེ་ལྡན་མགོན༔ གསང་བའི་ཡང་གསང་ཆེན་པོར་སྤྲོས༔ བསྐལ་པ་པད་མ་བརྩེགས་པ་ལ༔ ཁ་ཡེལ་ལྔ་ཡི་གདུང་འཕེལ་བས༔ སྣང་བ་རྣམས་ཀྱི་ཐོག་མར་རོ༔ སྐྱེས་བུ་བྱེད་པ་འོད་ཟེར་མགོན༔ འབྲས་བུ་རྫོགས་པའི་རིམ་པ་སྤྲོས༔ བསྐལ་པ་དང་བའི་དབྱངས་ཅན་ལ༔ རྡུལ་མཐའ་བཞི་ཡི་གདུང་འཕེལ་བས༔ འདི་ཀུན་མངོན་པར་རང་འཐད་དོ༔ ཤེས་རབ་མིག་རྙེད་སྒྱུ་འཕྲུལ་མགོན༔ སེམས་ཉིད་ཐོག་མའི་དཀྱིལ་འཁོར་སྤྲོས༔ བསྐལ་པ་ལྷ་ཡི་ཕྱག་སོར་ལ༔ ཉལ་ཉིལ་བདུན་གྱི་གདུང་འཛིན་པས༔ སྙིང་པོ་རང་དག་གནད་དུ་འོ༔ བདེ་བ་དམ་པ་དངོས་གྲུབ་མགོན༔ གསང་ཆེན་སྙིང་པོ་དམ་པར་སྤྲོས༔ བསྐལ་པ་ཡན་ལག་མེད་པ་ལ༔

སང་སིང་དྲུག་གི་གདུང་འཕེལ་བས༔ འདི་ཀུན་ཡང་དག་དམ་པར་རོ༔ དངོས་པོ་ཡང་དག་སྟོང་པའི་མགོན༔ སྐྱོབ་པ་དམ་པའི་ཕྱག་རྒྱ་སྤྲོས༔ བསྐལ་པ་གྲངས་མཐའ་ལོག་པ་ལ༔ སྟོང་ཕྲག་དགུ་ཡི་གྲངས་འཛིན་པས༔ རྫོགས་པའི་སངས་རྒྱས་ཉིད་དུ་འོ༔ ཆོས་ཀྱི་གྲགས་པ་གཉིས་མེད་མགོན༔ ཡང་གསང་རང་བྱུང་ཚིག་འདི་སྤྲོས༔ བསྐལ་པ་ཡོངས་སུ་གྲོལ་བྱེད་ལ༔ ཉལ་ཉིལ་གསུམ་གྱི་གདུང་འཕེལ་བས༔ མཉམ་པ་རང་གནད་ཉིད་དུ་འོ༔ ཡེ་ནས་གསང་བ་དྲི་མེད་མགོན༔ བྱིན་བརླབས་རང་བྱུང་ཡི་གེ་སྤྲོས༔ བསྐལ་པ་སེང་གེ་རྩལ་སྤྲུག་ལ༔ ཁྲག་ཁྲིག་བདུན་གྱི་གདུང་འཕེལ་བས༔ འདི་ཀུན་དམ་པའི་ཐུགས་དཀྱིལ་དུའོ༔ མི་ཕམ་དང་པོ་སངས་རྒྱས་མགོན༔ གསང་བ་ཐུགས་ཀྱི་བུ་གཅིག་པར༔ བསྐལ་པ་དགའ་བས་མྱོས་པ་ལ༔ དུང་ཕྱུར་ཕྱེད་དང་དགུ་གདུང་གིས༔ འདི་ཉིད་དམིགས་མེད་རང་དམ་དུའོ༔ དྲན་སྤངས་མངོན་འཕགས་རང་བཞིན་མགོན༔ འབྱུང་བའི་དགྲ་དང་བྲལ་བར་སྤྲོས༔ བསྐལ་པ་འདུ་བ་ཆེན་པོ་ལ༔ ཁ་ཡེལ་ལྔ་ཡི་གདུང་འཕེལ་བས༔ འདི་ཚིག་རང་བྱུང་གསལ་བར་རོ༔ བར་མའི་དང་པོ་སྐྱེ་མེད་མགོན༔ འདི་ནི་ཕྱག་རྒྱ་རབ་བཏབ་སྟེ༔ བསྐལ་པ་ཁུ་བྱུག་རང་བྱུང་ལ༔ ཐར་ཐེར་གསུམ་གྱི་རྟགས་ཤར་བས༔ འདི་ཚིག་རབ་ཏུ་བསྔགས་པ་འོ༔ འཇིག་རྟེན་གྲངས་བསྐལ་ཨུད་པལ་མགོན༔ གསང་ཆེན་རབ་རྒྱས་ཕྱག་རྒྱ་སྤྲོས༔ བསྐལ་པ་རབ་ཏུ་མཐོང་བ་ལ༔ འབུམ་ཕྲག་དགུ་ཡི་གདུང་འཕེལ་བས༔ འདི་ཀུན་སྙིང་གི་དཀྱིལ་དུ་ཕབ༔ འདས་པའི་དང་པོ་དྲ་བ་མགོན༔ སྟོན་པ་གསང་བ་ཡང་དག་སྤྲོས༔ བསྐལ་པ་བུད་མེད་རང་འདུལ་ལ༔ ཕྱལ་

ཕྱོལ་དགུ་ཡི་རྒྱལ་བ་ཡིས༔ འདི་ཚིག་རང་རིག་དམ་པར་རོ༔ གཉིས་འདས་དང་པོ་ཞིང་ཁམས་མགོན༔ རྡོ་རྗེ་ཆེན་པོའི་གསང་ཚིག་སྤྲོས༔ བསྐལ་པ་རང་སྒྲ་ཟད་པ་ལ༔ ས་ཡ་གཉིས་ཀྱི་གདུང་འཕེལ་བས༔ འདི་ཚིག་གཟིགས་དང་རབ་མཁྱེན་བཟུང་༔ གྲུབ་མཐའ་ཐོག་མ་གཉིས་པར་མགོན༔ འདུལ་ཚིག་སྙིང་པོ་བླ་མ་སྤྲོས༔ བསྐལ་པ་དགེ་ལྡན་ཆེན་པོ་ལ༔ འབུམ་ཕྲག་ལྔ་ཡི་གདུང་འཕེལ་བས༔ སྙིང་པོ་རྣམས་ཀྱི་ཡང་སྙིང་དུའོ༔ མཛད་པ་གཞི་ཐོག་ཐོད་རྒལ་མགོན༔ བླ་ན་མེད་པའི་ངེས་ལུང་སྤྲོས༔ བསྐལ་པ་བྲམ་ཟེ་བསྒྱིངས་པ་ལ༔ ཁྲི་ཕྲག་དགུ་ཡི་གདུང་འཕེལ་བས༔ འདི་ཀུན་གསང་བའི་ཚིག་ཏུ་འོ༔ མཐའ་བྲལ་ཡོངས་རྫོགས་སྐྱོན་བྲལ་མགོན༔ བྲལ་གསང་ཚིག་འདི་ཕྱག་རྒྱ་སྤྲོས༔ བསྐལ་པ་སྐྱེད་པར་བྱེད་པ་ལ༔ སྟོང་ཕྲག་དགུ་ཡི་གདུང་འཕེལ་བས༔ མེད་ཚིག་རྫོགས་པར་ཡང་དག་བཟུང་༔ ཡེ་རྫོགས་དང་པོ་སྒྱུ་མ་མགོན༔ ཡང་གསང་འབར་བ་འོད་ཟེར་སྤྲོས༔ བསྐལ་པ་རབ་ཏུ་འཕགས་པ་ལ༔ ཁྲག་ཁྲིག་གཉིས་ཀྱི་གདུང་འཕེལ་བས༔ འདི་ཉིད་ངེས་པའི་གསང་ཆེན་ནོ༔ དྲི་མ་དངོས་བྲལ་བདེ་བའི་མགོན༔ འདི་ཉིད་ལམ་རྒྱལ་དམ་པར་སྤྲོས༔ བསྐལ་པ་ཡང་གསང་ཆེན་པོ་ལ༔ ཁྲག་ཁྲིག་བདུན་གྱི་གདུང་འཕེལ་བས༔ འདི་ཚིག་རིམ་པ་དང་པོར་སྤྲོས༔ འདུས་པ་རྣམས་ཀྱི་ཐོག་མ་མགོན༔ ངེས་པའི་གསང་ཆེན་རབ་བསྔགས་ཏེ༔ བསྐལ་པ་གསེར་འོད་དམ་པ་ལ༔ ཡང་འཕེལ་དགུ་ཁྲིའི་མགོན་པོ་ཡིས༔ འདི་ཀུན་གསང་ཆེན་སྙིང་དུ་བབ༔ ཡང་འབྱེད་སྟོང་གི་དང་པོ་མགོན༔ གསང་བའི་སྙིང་པོ་ཡང་གསང་སྤྲོས༔ བསྐལ་པ་ལེ་ལོ་ཡེ་དག་ལ༔

ཐར་ཟུག་དགུ་ཡི་གདུང་འཕེལ་བས༔ འདི་ཡང་སྙིང་ཐིག་གསང་བར་ཕབ༔ གསང་བ་ཀུན་གྱི་མངོན་ཐོག་མགོན༔ ཕྱག་རྒྱ་སྙིང་གི་དཀྱིལ་དུ་སྤྲོས༔ བསྐལ་པ་དྲི་མེད་བཟང་པོ་ལ༔ ཉར་ཉེར་ལྔ་ཡི་གདུང་འཕེལ་བས༔ འདི་ཚིག་བླ་མེད་སྙིང་ལ་ཕབ༔ སྟོན་པའི་དང་པོ་ནམ་མཁའ་མགོན༔ ཡང་བསྡུས་རང་བྱུང་ཚིག་འདི་སྤྲོས༔ བསྐལ་པ་ཐར་ཆགས་ཆེན་པོ་ལ༔ ཉལ་ཉིལ་དྲུག་གི་གདུང་འཕེལ་བས༔ འདི་ཉིད་བསམ་གཏན་འཁོར་ལོར་བཟུང་༔ སྟོང་པའི་ཡང་མཛོད་དམ་པ་མགོན༔ འདི་ཀུན་གཡོ་མེད་རང་བྱུང་ཚིག༔ རྫོགས་པ་དངོས་དག་བསྐལ་པ་ལ༔ འབུམ་ཕྲག་དགུ་ཡི་ཡང་གདུང་གིས༔ འདི་ཀུན་ངེས་པའི་འབྲས་བུར་སྤྲོས༔ དང་པོ་གསང་འཛིན་དངོས་གྲུབ་མགོན༔ འདི་ཡང་མཛད་ཆེན་དག་པར་སྤྲོས༔ བསྐལ་པ་གྲངས་བརྡལ་གསང་ཆེན་ལ༔ ཁ་ཡེལ་གསུམ་གྱི་གདུང་འཕེལ་བས༔ འདི་ཀུན་ཡང་དག་ལམ་ཉེར་བཟུང་༔ དྲི་མེད་རང་ཟད་འབྱུང་བྲལ་མགོན༔ དཀྱིལ་འཁོར་ཀུན་དག་རྩ་བ་སྤྲོས༔ བསྐལ་པ་མོ་མཚན་རྒྱུན་གཅོད་ལ༔ ཐར་ཐེར་བརྒྱ་ལ་གདུང་འཕེལ་བས༔ གསང་བའི་ཡང་ཞུན་ཐིགས་པར་བཟུང་༔ མོས་ཆེན་རྣམས་ཀྱི་དང་པོ་མགོན༔ སྙིང་པོ་དམིགས་དག་ཕྱག་རྒྱ་སྤྲོས༔ བསྐལ་པ་འཁོར་བའི་མུན་སེལ་ལ༔ འབུམ་ཕྲག་ལྔ་ཡི་ཡང་གདུང་གིས༔ འདི་ཉིད་སྤྲོས་ཏེ་དམ་དུ་འོ༔ སེམས་རིག་ཀུན་གྱི་སྤྱི་ཕུད་མགོན༔ ང་མེད་སྔོན་དུ་ཕྱག་རྒྱ་སྤྲོས༔ བསྐལ་པ་སྔ་མོ་སྟོང་ལྡན་ལ༔ བྱེ་བ་དགུ་ཡི་གདུང་འཕེལ་བས༔ ངེས་ཤེས་ཀུན་གྱི་ཐོག་མར་བཟུང་༔ བསླབ་གནས་ཀུན་གྱི་དང་ཐོག་མགོན༔ ཕྱག་རྒྱ་མིག་ལྡན་

སྟོང་དུ་སྤྲོས༔ བསྐལ་པ་སྒྱུ་མ་སྣང་མཛད་ལ༔ ཡལ་ཡོལ་གསུམ་གྱི་ཡང་གདུང་གིས༔ འདི་ཚིག་གོང་མའི་གོང་མས་བཟུང་༔ རིམ་པ་སྔོན་གྱི་སྐྱེད་བྱེད་མགོན༔ བབས་བྱུང་མེད་སྣང་ཕྱག་རྒྱ་སྤྲོས༔ བསྐལ་པ་སྙིང་རྗེས་ཀུན་འདུལ་ལ༔ སང་སེང་ལྔ་ཡི་གདུང་འཕེལ་བས༔ སྙིང་པོ་གསང་བ་ཆེན་པོར་བཟུང་༔ འཇིགས་པ་ཀུན་བྲལ་སེང་གེ་མགོན༔ སངས་རྒྱས་སྲས་ནི་གཅིག་པ་སྤྲོས༔ བསྐལ་པ་བཟང་པོ་རབ་གང་ལ༔ སྟོང་ཕྲག་བདུན་གྱི་གདུང་འཕེལ་བས༔ འབྱུང་བའི་སྒྲ་དང་བྲལ་བར་བཟུང་༔ རྫོགས་པའི་ཡང་ཐོག་ཐ་མ་མགོན༔ དོན་དགོངས་ཉག་གཅིག་རྣལ་དུ་བཟུང་༔ བསྐལ་པ་རྩོད་ལྡན་ཆེན་པོ་ལ༔ བརྒྱ་ཕྲག་དགུ་ཡི་གདུང་འཕེལ་བས༔ འདི་ཚིག་རྩོད་དང་བྲལ་བར་བཟུང་༔ དྲན་པ་ཟད་པའི་ཡེ་ཤེས་མགོན༔ སྙིང་པོ་རང་ཚིག་གཅིག་པར་གོ༔ བསྐལ་པ་རྩོད་དང་ལྡན་པ་ལ༔ བཅུ་ཕྲག་དགུ་ཡི་གདུང་འཛིན་པས༔ ངེས་པའི་ཕྱག་རྒྱ་དམ་པར་བཟུང་༔ དེ་ལྟར་བརྗོད་ཀྱིས་མི་ལངས་པའི༔ སངས་རྒྱས་རྣམས་ཀྱི་བྱིན་བརླབས་ལས༔ རང་བྱུང་ཆེན་པོའི་ཡིག་གེར་ནི༔ གནས་པའི་ཀ་དག་ཆེན་པོ་ཡི༔ བབས་ལས་འདི་ཀུན་རང་བྱུང་ཤར༔ བྱིན་བརླབས་རིམ་པར་འདི་ཀུན་ཡང་༔ ཐོག་མ་བབས་ལས་རང་བསྟན་ནོ༔ ༈ཨེ་མ་རང་བྱུང་ཆེན་པོའི་ཚིག་ལས་ཀྱང་༔ འདི་ལྟར་ཁྱད་པར་རང་བྱུང་ཚིག༔ བབས་ལས་བྱུང་ཞིང་ཤར་བ་ལས༔ རང་གསལ་ཆོས་རྣམས་རང་བྱུང་ཚིག༔ ཕྱིས་ནི་འདི་ལྟར་ཡང་དག་གོ༔ རྒྱུད་དང་དེ་ཡི་རང་འགྲེལ་ལོ༔ ལྷ་སྔགས་ལ་སོགས་ཕྱག་རྒྱ་བཅུ༔ དེ་ལས་འདི་ཚིག་ཕྲག་ཡས་སུ༔

སྣང་བ་ཡིན་ནོ་དོན་ལ་སེམས༔ སྣང་མཛད་དོན་ཀུན་རང་རྫོགས་ཏེ༔ ཚིག་ཀུན་བདག་པོར་རང་བྱུང་བས༔ དགོངས་པ་ཉིད་ནི་དང་པོ་ལས༔ ཚིག་རྩོམ་མཁས་པ་འདི་ལས་ནི༔ གྲངས་ལས་འདས་རྣམས་འབྱུང་བ་ཡིན༔ བདག་འཛིན་བདག་མེད་སྔོན་ཐོག་ལས༔ མཐར་འཛིན་འདོད་པ་དགག་པའི་ཕྱིར༔ མངོན་སུམ་རྗེས་སུ་དཔག་པ་ཡི༔ གཏན་ཚིགས་ཆ་འཛིན་ཚིག་ཀུན་འབྱུང་༔ ཡིད་དཔྱོད་བློ་ཞེན་དགག་པའི་ཕྱིར༔ ཀུན་རྫོབ་དོན་དམ་གྲངས་ཕྱེ་སོགས༔ ཚིག་ནི་འདི་ཀུན་བྱིན་བརླབས་ལས༔ འདི་ལྟར་རྩོམ་པའི་དཔའ་བོ་མཁས༔ སེམས་ནི་མཐར་ཞེན་བློ་དགག་ཕྱིར༔ ཕུང་པོ་གྲངས་དང་ཁམས་སོགས་དང་༔ བསྟོད་དང་ཡོད་མེད་ཆོས་དང་ནི༔ ཆོས་མེད་ཇི་ལྟར་བརྩི་བ་ཡི༔ ཚིག་ཀུན་འདི་ལས་རབ་བརྩོན་ཐོབ༔ འཇིག་རྟེན་མཐུན་འཇུག་དྲང་བའི་ཕྱིར༔ སྒྲ་དང་རིག་པ་དུ་མ་ཡང་༔ འདི་ཡིས་རང་བྱུང་ཚིག་ལས་ཤར༔ ཕྱིར་འགྱུར་ཐེག་པའི་རང་གྲངས་ཀྱི༔ དབང་པོའི་འཇུག་སྒོ་གསལ་བའི་ཕྱིར༔ རིམ་པའི་འཇུག་སྲོལ་བཅུ་གཅིག་ནི༔ འདི་ཡི་ཡོན་ཏན་བབས་ལས་སྣང་༔ རང་འོད་ཇི་ལྟར་ཡོད་པའི་ཚིག༔ འདི་ལས་སྤྲོས་སོ་ཉེ་བར་བསྡུས༔ གྲགས་དང་མ་གྲགས་ཚིག་བཅུད་ནི༔ འདི་ལས་ཡང་གསང་ཆེན་པོར་ཡང་༔ གྱུར་ཏེ་སྣང་བར་འགྱུར་བ་ཡིན༔ ལྷ་མིས་ཇི་ལྟར་འདོད་པའི་ཚིག༔ སྒོ་དྲུག་ཐོབ་འདོད་རང་བཀོད་ཚིག༔ སྔགས་ལུང་སེམས་དཔའི་ལུང་རབ་སྣང་༔ འདི་ལས་གསང་ཆེན་གནད་དུ་གྲགས༔ དེ་བཞིན་སྐྱེ་འཇིག་བསྟན་བཅོས་དང་༔ ཡོད་དང་མེད་སྨྲ་སྡེ་གྲངས་སྤྲོས༔ མཐའ་གཉིས་རབ་འབྱེད་ཡོད་སྣང་ཕྱིར༔ དྲན་སེམས་ཉིད་ཀྱི་སྡེ་གྲངས་ནི༔ འདི་ཀུན་ལས་བྱུང་

སེམས་ཀྱི་ལུང་༔ འཇུག་སོ་ཆེན་པོའི་ཤིང་རྟ་ཡང་༔ སྣང་བའི་མཛད་འཕྲོས་ཁ་ལོ་ནི༔ འདི་ཚིག་དམ་པའི་འཁོར་ལོ་འོ༔ གྲགས་པའི་སྔགས་དང་དེ་སྤེལ་ཚིག༔ རིམ་པ་མདོ་སྡེ་རང་གྲགས་ཚིག༔ བཀོད་པ་རྣམས་ཀྱི་ཐོག་མར་ནི༔ འདི་ལས་འཕྲོ་འོ་ཕན་སེམས་ལྡན༔ ལུང་རྒྱལ་ཐེག་པ་ཀུན་དངོས་སོ༔ གཞི་རྩ་རྩལ་གྱི་ནན་ཏན་ཚིག༔ འདི་ཀུན་རྒྱན་གྱི་རྒྱལ་པོ་ལས༔ ཁ་ལོ་སྒྱུར་བའི་དཔའ་བོ་ཡིན༔ བྱེད་པའི་ལས་རྒྱལ་དཀྱིལ་འཁོར་འཇུག༔ དཔེ་མེད་པ་ཡི་སྒྲ་ཡིག་ཟེར༔ གྲངས་མཐའ་འགེགས་བྱེད་སེང་ཕྲུག་གོ༔ བཅོས་མའི་ཡང་ཆ་དེ་འཕེལ་བཟུང་༔ དཔའ་བར་འགྲོ་བའི་ལས་རྒྱས་སོ༔ མཐོ་དམན་སྙོམས་པའི་དགེ་འབྲས་ལུང་༔ དཔེ་བྲལ་རྣམས་ཀྱི་དང་པོ་འོ༔ དེ་ལྟར་སྤྲོས་ཚིག་དུ་མ་ཡིས༔ འཁོར་ལོ་འཛིན་པའི་སྤྲུལ་པ་འོ༔ མཁའ་གསལ་མཁའ་དག་ཀློང་ཆེན་གྱི༔ སྤྲོས་པ་རྣམས་ཀྱི་ཡང་སྤྲོས་ལས༔ སྐྱེ་སྒོ་རབ་ཏུ་སྤངས་པ་ཡིས༔ བླ་མེད་འདྲེན་པའི་དང་པོར་བྱུང་༔ བདེ་བས་བདེ་བ་འབྱེད་པ་ཡི༔ རིགས་མཐུན་ཀུན་གྱི་གསང་ཆེན་ཡིན༔ རིགས་ལ་གནས་ཤིང་རིགས་འབྱེད་པའི༔ གཙོ་བོ་གཙོ་བས་བླང་བ་འོ༔ ཀ་དང་རྟོགས་དང་རབ་ཏུ་དགོངས༔ རིམ་པར་རྒྱས་དང་དེ་རྗེས་ནི༔ འདི་ལས་རབ་ཏུ་འཕེལ་བ་ཡིན༔ རབ་ཏུ་རྟོགས་ཕྱིར་དཀྱིལ་འཁོར་ནི༔ དམ་པ་རྣམས་ནི་འདི་ལས་སྤྲུལ༔ ཐམས་ཅད་ལས་ཀྱི་མཐའ་རྒྱས་ཀྱང་༔ འདི་ལས་རབ་ཏུ་ཡང་འཕེལ་ལོ༔ འདི་ཚིག་བྱིན་རླབས་བརྒྱུད་པ་ཡང་༔ རབ་ཏུ་འཕེལ་ཕྱིར་འབྱུང་བའོ༔ ༈ཨེ་མ་ཧོ༔ འདི་ལྟར་ཡང་གསང་དོན་ཉིད་ལ༔ འཇུག་པར་འདོད་པའི་སྐལ་པ་རབ༔ སྔོན་དུ་ལུས་ངག་ཡིད་རྣམས་ཀྱི༔ མངོན་པར་ཞེན་པ་

བཟློག་པའི་ཕྱིར༔ སྔོན་དུ་སྤྱོད་པ་བརྩམ་པར་བྱ༔ ལུས་ནི་རྒྱུག་དང་ཉལ་བ་དང་༔ ལངས་དང་ཡན་ལག་བསྐྱོད་པ་དང་༔ སྐོར་བ་དང་ནི་ཕྱག་བྱ་དང་༔ ཡན་ལག་སྐོར་དང་མགོ་སྒྲིལ་དང་༔ ཇི་ལྟར་དྲན་པའི་ལས་རྣམས་དང་༔ གར་དང་ཕྱག་རྒྱ་བསྒྱུར་བ་དང་༔ ཇི་ལྟར་དམིགས་པའི་ལས་རྣམས་བྱ༔ འདི་ལྟར་སུ་ཡིས་བྱས་པའི་མི༔ ལུས་ཀྱི་མངོན་ཞེན་རང་བཅད་ནས༔ ལུས་ཀུན་རུ་ཤན་ཕྱེད་པར་ནི༔ འདི་ཡིས་འགྱུར་རོ་སྤྲུལ་པའི་སྐུ༔ དེ་འདས་ངག་གི་སྤྱོད་པ་བརྩམ༔ སྔགས་དང་ཁ་ཏོན་ཆོས་ཀྱི་སྒྲ༔ ཡོད་དང་མེད་དང་སྣང་བ་དང་༔ ཡིད་དཔྱོད་ཚིག་ནི་སྣ་ཚོགས་བརྗོད༔ བྱོལ་སོང་སྣ་ཚོགས་བརྡ་སྐད་དང་༔ སྐད་ནི་རྣམ་པ་སྣ་ཚོགས་པ༔ འདི་ལྟར་སུ་ཡིས་བྱས་པའི་མི༔ ངག་གི་མངོན་ཞེན་རང་ཆོད་ནས༔ འཁོར་འདས་རུ་ཤན་འདིས་ཕྱེད་དོ༔ དེ་འདས་ཉིད་ཀྱི་འོག་ཏུ་ཡང་༔ སེམས་ཀྱི་སྤྱོད་པ་བརྩམ་པར་བྱ༔ དགའ་དང་མི་དགའ་བདེ་སྡུག་དང་༔ རྟག་དང་མི་རྟག་ལ་སོགས་པ༔ ལྟ་སྒོམ་སྤྱོད་པའི་བསམ་པ་དང་༔ ཆོས་དང་ཆོས་མིན་ལ་སོགས་དང་༔ འདོད་ཆགས་ཞེ་སྡང་གཏི་མུག་དང་༔ དགེ་དང་མི་དགེ་ལ་སོགས་པའི༔ བསམ་དཔྱོད་རྣམ་པ་སྣ་ཚོགས་བྱ༔ འདི་ལྟར་སུ་ཡིས་བྱས་པའི་མི༔ སེམས་ཀྱི་མངོན་ཞེན་རང་ཆོད་ནས༔ འཁོར་འདས་རུ་ཤན་ཕྱེད་པ་འོ༔ དེ་ལྟར་སྔོན་དུ་འགྲོ་བྱས་ནས༔ མངོན་སུམ་དོན་ལ་བལྟ་བྱའི་ཕྱིར༔ ལུས་དང་ངག་ཡིད་རབ་ཏུ་གཅུན༔ ལུས་ནི་སེང་གེ་ལྟ་བུ་དང་༔ དྲང་སྲོང་དང་ནི་གླང་ཆེན་ཚུལ༔ འདི་ལས་གཡོ་བར་མ་བྱས་ན༔ སངས་རྒྱས་སུམ་སྟོང་ཉིད་དང་ཡང་༔ བསྐལ་པ་དག་ནི་མཉམ་པ་ཡིན༔ ངག་ནི་ཇི་ལྟར་ལྐུགས་པ་བཞིན༔ སུ་དང་བརྡ་ཙམ་ཉིད་མི་བྱ༔ འདི་

ལྟར་སུ་ཡིས་བྱས་པའི་མི༔ སེམས་ཀྱི་འཕྲོ་འདུ་རང་ཆོད་དོ༔ འདི་ལྟར་ལུས་ངག་སུས་གཅུན་པ༔ ཆོས་ཀྱི་དབྱིངས་ཀྱི་སྣང་བ་ལ༔ འདི་ཡིས་གོམས་པར་འགྱུར་བ་ཡིན༔ དེ་ལྟར་ལུས་ལ་སོགས་པ་ཡི༔ གནད་ཀུན་རབ་ཏུ་གཟིར་བ་ཡིས༔ རིག་པ་ཉིད་དང་མངོན་སུམ་དུ༔ བླ་མའི་ལུང་ལས་ཤེས་པ་ཡིན༔ དབྱིངས་དང་རིག་པའི་ལྟ་སྟངས་ནི༔ སྒྲིབ་བྱེད་བྲལ་བའི་ནམ་མཁའ་ལྟ༔ དབྱིངས་ཀྱི་ནང་དུ་ལུ་གུ་རྒྱུད༔ རྣམ་པར་བཞག་ཅིང་འབྲལ་མི་བྱ༔ འདི་ལྟར་སུ་ཡིས་མཐོང་བའི་མི༔ ཐོག་མའི་ཀུན་ཏུ་བཟང་པོ་དང་༔ སྐལ་པ་ཉིད་ནི་མཉམ་པ་འོ༔ དེ་ནས་ཐིག་ལེ་མཐོང་བ་ཡིན༔ དེ་གཏད་སྣང་བ་གོང་འཕེལ་བས༔ རང་ངོ་མཐོང་ལས་འདི་ལྟར་རོ༔ ཡར་མཚམས་ལས་ནི་སོར་བཞི་ལས༔ བྲལ་བའི་སྐྱེས་བུ་སྐལ་བཟང་པ༔ འཁོར་བར་འཇུག་པ་ག་ལ་སྲིད༔ གྲུ་ཆད་རྣམ་པ་གང་སྣང་བ༔ སྤྲུལ་པའི་ཡོན་ཏན་འདི་ཡིས་འགྲུབ༔ མཐོང་བའི་ཡུལ་ཙམ་གང་སྣང་བ༔ ཚོམ་བུ་ལ་ནི་དེ་བཞིན་ནོ༔ ཕྱིར་སྣང་འགག་པ་གང་ཡིན་པ༔ སྐད་ཅིག་མ་ནི་བཅུ་དྲུག་ལ༔ འདི་ཡང་དེ་ལྟར་འགྱུར་བ་འོ༔ མ་སྨིན་ལ་སོགས་ཐིག་ལེ་དང་༔ དེ་བཞིན་སྐུ་ལ་ཐུག་གི་བར༔ དྲུག་དང་བཅུ་དང་ལྔ་གསུམ་ལ༔ གདོན་མི་ཟ་སྟེ་ལོངས་སྐུར་རོ༔ ནང་ལུས་ཟད་པའི་སར་ཕྱིན་ཚེ༔ སོར་མོ་ལ་སོགས་དེ་བཞིན་སྣང་༔ འདི་གཏད་འབྱུང་བ་རང་དེངས་སོ༔ སྐྱེ་དང་འཇུག་པའི་ཁྱད་པར་གྱིས༔ ཆོས་ཀུན་ཟད་པའི་རང་ས་ལ༔ ཅི་ཡང་འཛིན་པ་མེད་པར་ནི༔ གནས་པ་ཡིན་ནོ་སྤྲུལ་པའི་སྐུ༔ འདི་ནི་འཇུག་པའི་ཤུགས་ཀྱིས་དབང་༔ སྐྱེ་བའི་རང་དབང་སུས་ཐོབ་པ༔ དེ་ཡང་དེ་ལ་གཏད་ནས་ནི༔ ཡང་དུས་འདི་ལྟར་བྱས་པ་ན༔ སྣང་བའི་རང་

སྒྲ་སིལ་སྐད་དེ༔ སྔོན་དུ་ལོག་སྟེ་འཁྲུལ་པར་སྣང་༔ འདིས་ནི་སེམས་ཅན་དོན་ཀུན་བྱེད་༔ རིག་པ་མཉམ་པར་གཅིག་པའི་ཕྱིར༔ སྟོང་ཕྲག་གསུམ་རྣམས་སེམས་ཅན་གྱི༔ འཕོ་བ་ཆེན་པོ་འདིས་འགྲུབ་བོ༔ དེ་བཞིན་རིམ་དང་ཅིག་ཅར་གྱི༔ ལུས་ནི་འདི་ཡིས་འགྲུབ་པ་ཡིན༔ དེ་ཀུན་ལུས་ཟད་མཚན་ལས་གྲོལ༔ འདི་ཀུན་འབྲས་བུ་ངེས་པ་ཡིས༔ ས་མཆོག་དཀྱིལ་འཁོར་ཆེན་པོ་འགྲུབ༔ འདི་ལྟར་ཐབས་ལས་ཡང་དག་བྱུང་༔ སངས་རྒྱས་འགྲུབ་པར་འདོད་པའི་མིས༔ འདི་ཐབས་ལྡན་ན་དེ་བཞིན་ནོ༔ གཞན་སྤྱོད་སྙམ་བྱེད་ཉིད་ཡིན་པས༔ དངོས་པོ་མཐོང་བ་མ་ཡིན་ནོ༔ དེ་ཕྱིར་འདི་ཀུན་དཀོན་པའི་ཚིག༔ རྟག་ཏུ་རིན་ཆེན་གཏེར་འདི་ལྟོས༔ འདི་ལྟར་ཟད་པ་ལ་སྤྱོད་ན༔ འདིས་ནི་སངས་རྒྱས་སྟོང་ཕྲག་གསུམ༔ འདི་ཡིས་ལེགས་པར་ཞལ་མཐོང་ཡིན༔ འདི་ཚིག་གསང་བ་ཉིད་ལས་བྱུང་༔ སྐྱེས་བུ་རྣམས་ཀྱིས་འདི་ལྟར་བྱ༔ གསང་ཆེན་ཡང་གསང་དམ་པ་འོ༔ ༈ཨེ་མ་འདི་ལྟར་འབྱུང་འདོད་སྐྱེས་བུ་གང་༔ ཐབས་ཀྱི་ཡན་ལག་འདི་ལྟ་བུ༔ རྣམ་པ་སྣ་ཚོགས་ཉིད་ལ་ནི༔ འདི་ལྟར་དེ་ཡི་སྔོན་དུ་སྦྱང་༔ སེམས་ཀྱི་རིམ་པ་ཅི་སྦྱངས་པ༔ འདིས་ནི་མི་རྟག་སེམས་ལ་འབྱོར༔ ཇི་ལྟར་སྒྲ་ཡི་རྣལ་འབྱོར་པས༔ ས་ཆུ་མེ་རླུང་འབྱུང་བ་བཞི༔ སྒྲ་དོན་རྣམས་ལ་གོམས་པ་ཡིས༔ རིགས་དྲུག་རྣམས་ཀྱི་རང་སྐད་ཀྱིས༔ མངོན་ཤེས་འཆར་བ་འདིས་འགྲུབ་བོ༔ ཞག་རིམ་དུས་ནི་རྣམ་དྲུག་གིས༔ འདི་ཡི་སྐད་ཀུན་རང་དུས་ཤེས༔ འགྲུབ་པ་མེད་པར་སུས་ཤེས་པ༔ མ་འོངས་ད་ལྟར་འདས་པ་ཡི༔ སེམས་

རྒྱུད་ཇི་ལྟར་ཤེས་པར་འགྱུར༔ གཞན་གྱི་དོན་བྱེད་སྤྲུལ་པ་པོས༔ འདི་ལ་སྔོན་དུ་མ་སྦྱངས་ན༔ སྤྲུལ་པའི་ས་བོན་འཇོག་པར་ནི༔ ནུས་པ་ཉིད་ནི་མི་ཐོབ་བོ༔ དེས་ན་འབྱུང་བའི་སྒྲ་ལ་བསླབ༔ བྱ་བྱེད་ཞེན་པ་ཟློག་པའི་ཕྱིར༔ ལག་ནི་བྱ་བྱེད་སྣ་ཚོགས་བྱ༔ དེ་བཞིན་འདུས་བྱས་རྣམ་པ་ཡིས༔ དབང་པོའི་མངོན་ཞེན་བཟློག་པ་སྟེ༔ ཡུལ་རྣམས་གོམས་པའི་གནས་གནད་ཀྱིས་སྦྱང༔ ཇི་ལྟར་གཉིད་དང་རྨི་ལམ་གྱི༔ དུས་བཞི་འབྱུང་བ་གནད་ཀྱིས་དབྱེ༔ ཚད་ནི་གནད་ལ་ཕེབས་པས་བཟུང༔ ཐིག་ལེ་ཕྱི་ནང་བསླབ་བྱའི་ཕྱིར༔ གང་ཟག་རྣམ་པ་གཉིས་དོན་བྱ༔ བཅོས་མ་འདུས་བྱས་སྒོམ་པ་ཡིས༔ དང་པོ་སེམས་ཡེངས་ཞེན་པ་དགག༔ འབྲས་བུ་ཅིག་ཅར་མ་ཡིན་པས༔ སྣང་བ་རིམ་གྱིས་གོམས་པར་བྱ༔ མིག་སྨན་ལ་སོགས་སྒོ་ལྔ་ཡི༔ སྨན་གྱི་རིམ་པ་སྦྱར་བར་བྱ༔ འདི་ཀུན་གསང་བའི་ཐབས་ཡིན་ནོ༔ ལམ་གྱི་རྟགས་ནི་ལུས་ལ་ནི༔ མངོན་པར་ཕྱི་རོལ་སྣང་གྱུར་པའི༔ སྨན་ཉིད་ཀྱང་ནི་དེ་བཞིན་ནོ༔ འདི་ཀུན་འཇིག་རྟེན་དྲང་དོན་དུ༔ སྐལ་པ་ཅན་གྱི་སྤྱོད་ཡུལ་ལོ༔ འདི་ཡི་ཐབས་ནི་སྣ་ཚོགས་པས༔ གཞན་གྱི་འདོད་ཞེན་མཐའ་དགག་ཕྱིར༔ རབ་ཏུ་གསང་བར་བྱུང་པའོ༔ ༈ཁམས་ལ་བསླབ་པའི་ཐབས་ཡོད་པས༔ དྲན་རྫོགས་ཕྱག་རྒྱའི་ངང་དུ་སྦྱོར༔ དབང་པོའི་ཞེན་པ་བཟློག་པའི་ཕྱིར༔ ཀརྨཱ་རཀྵ་གྷི་ཧཾ་ཏིཿཕུང་པོའི་ཞེན་པ་ཟློག་པའི་ཕྱིར༔ བྷེ་ག་ར་ན་སོ་གད་གླིང་༔ ཡུལ་ཀུན་ཞེན་པ་བཟློག་པའི་ཕྱིར༔ པུ་ཀཱ་རི་ལ་བྷ་དྷུ་ཏྲི༔ སེམས་ཀྱི་དངོས་པོ་སྤུར་བའི་ཕྱིར༔ རྃ་པ་ཀ་ས་ལ་མི་ཁྱེ༔ བྱུང་ཚོར་གནས་སུ་གཅད་པའི་ཕྱིར༔ མ་ཏང་ཕ་ཕེར་རསྨི་ཏི༔

འདུས་ཚོགས་སྣང་བ་ངོས་གཟུང་ཕྱིར༔ ཁ་ཊ་རེ་ཀ་ས་མིག་རླུང་༔ རིག་པ་བཙོན་རར་གཞུག་པའི་ཕྱིར༔ ཨ་ཀེ་ར་ན་བྷེ་ཙཀ་ཤ༔ འཁྲུལ་པའི་རང་རྒྱུད་ཁུངས་གཅད་ཕྱིར༔ ཡ་རི་མུ་ཌ་ས་གྷུ་ལི༔ རིགས་དྲུག་རིམ་གྱིས་བསྒྲལ་བའི་ཕྱིར༔ ཡ་སིང་ར་རླུང་པ་ལ་ཡཱ༔ འཁོར་བ་དོང་ནས་གདོན་པའི་ཕྱིར་༔ མ་མ་ཀོ་ལིང་སཱ་མཱ་ཏ༔ ཆོས་ཅན་ཐུར་དུ་གཞུག་པའི་ཕྱིར༔ གྷ་རིང་ཡཾ་པ་རི་མང་ཏི༔ རོལ་པའི་བྱུང་ཁུང་སྤུར་བའི་ཕྱིར༔ བུ་ག་སིང་ཧ་པ་གྷ་ལ༔ ཞེན་པའི་ཕྲེང་ཐག་གཅད་པའི་ཕྱིར༔ ར་མི་པི་པཱི་ཁེ་ཏ་པ༔ ལུག་རྒྱུད་ཨར་ལ་གཏད་པའི་ཕྱིར༔ བི་ཁུ་མ་ལ་པ་ཏིམ་ཀི༔ ལྷ་ཡི་ཕྱག་རྒྱ་བལྟ་བའི་ཕྱིར༔ ས་མཱ་ཉི་ཝ་དྷེ་ར་པ༔ ལྟ་སྒོམ་ལོག་པ་དག་བྱའི་ཕྱིར༔ བཛྲ་སཏྭ་ཌཱི་ཌྷོ་མེ༔ ས་ལམ་དུས་གཅིག་གཅད་པའི་ཕྱིར༔ གྷེ་པ་སུ་གྷར་རྣ་མ་ཡཻ༔ ཡིད་དཔྱོད་ལྟ་བ་ཁུངས་གཅད་ཕྱིར༔ དྷརྨཱ་པ་ཏི་ས་གྷུ་ལཱི༔ སྐུ་གསུམ་ལམ་དུ་བསླང་བའི་ཕྱིར༔ རས་རྨི་ས་མཱ་ཁ་རྒད་ཚེ༔ སྣང་བ་དངོས་སུ་བླང་བའི་ཕྱིར༔ རུ་པ་ས་མི་མི་ཏ་ལཾ༔ སྒྲ་ཡི་ཞེན་པ་མཐའ་གཅད་ཕྱིར༔ ང་ཏིག་པ་ཡང་ཀ་ལི་སཱ༔ བསམ་གཏན་ཆེན་པོའི་ས་ནོན་ཕྱིར༔ ག་ཚ་པ་ལ་ས་ཨི་ཊྂ༔ འཕྲིན་ལས་མཐའ་རུ་དབྱུང་པའི་ཕྱིར༔ ཀརྨ་ཨེ་ཀ་མ་ནུ་སཱ༔ སངས་རྒྱས་མངོན་ཞེན་བཟློག་པའི་ཕྱིར༔ སངས་ཏྲི་མ་མ་ཀརྨཱ་ཏ༔ རྒྱལ་སྲས་རྣམས་ཀྱི་གནས་བཙལ་ཕྱིར༔ ང་ལ་ཁེ་པ་ཀི་ལི་ས༔ འདི་ཀུན་རང་ཤུགས་ཚིག་དུ་བྱུང་༔ ༈ཨེ་མ་ཧོ༔ བཅོམ་པ་དད་ནི་ལྡན་པ་དང་༔ འདས་པ་ཡང་དག་ལམ་ཡིན་ནོ༔ འདི་ཚིག་ལམ་མིན་གདམས་པ་ཡིན༔ བསྟན་ཞིང་བཤད་མེད་བརྗོད་མ་ཡིན༔ གསུངས་པ་མ་ཡིན་བྱིན་བརླབས་ཡིན༔ བྲིས་ཤིས་བཀོད་མེད་རང་བྱུང་ཡིན༔ གནས་དང་དུས་མེད་སྔོན་ཐོག་ཡིན༔ ཆོས་མེད་སྙིང་པོ་ཐུགས་གསང་ཡིན༔ སུས་ཀྱང་ཉན་མེད་རང་ཤར་ཡིན༔ ཐོས་པ་མེད་ཅིང་རང་བསྒྲགས་ཡིན༔ བྱས་པ་

འདི་ཀུན་མ་ཡིན་ཚིག༔ འདི་ཡོད་འགྲོ་བ་སངས་རྒྱས་ཡིན༔ ཕ་རོལ་མཐོང་བའི་གསང་ཆེན་ལམ༔ སེམས་ཡོད་མ་ཡིན་སྤྲུལ་པ་ཡིན༔ འཁོར་བའི་སྐྱི་མདུད་གྲོལ་བ་འོ༔ ཤེས་བྱ་མ་ཡིན་ལམ་སྣ་ཐག༔ སྟོང་པ་མ་ཡིན་མངོན་སུམ་ཡུལ༔ ཡོད་མེད་མ་ཡིན་ཐབས་གསང་བ༔ ལྷ་མེད་འདི་ལ་སྔགས་ཡོད་མིན༔ ཕ་རོལ་ཕྱིན་པ་དྲུག་གི་གཞི༔ བསྙེན་གནས་ལ་སོགས་འདི་ཚུལ་ལོ༔ དེ་བཞིན་དུ་ཡང་བྱེ་བྲག་སྨྲ༔ དོན་དམ་ཀུན་རྫོབ་གཟུགས་ཀྱིས་སོ༔ རྒྱུད་ཀྱི་རྩ་བ་འདི་ཉིད་རང་༔ ལྷ་ཡི་རྣལ་འབྱོར་འདི་སྔགས་ཡིན༔ ལུང་ཆེན་རྣམས་ཀྱི་དམ་པ་འདི༔ ཆོས་རྣམས་རོ་གཅིག་འདྲེས་པའི་རྟེན༔ སྐུ་གསུང་ཐུགས་ཀྱི་དབྱེ་བ་འོ༔ བླ་མེད་འཁོར་ལོ་བསྐོར་བའི་གནས༔ དབང་པོ་རྣམས་ཀྱི་དམིགས་གཏད་ཡིན༔ ཤེས་རབ་རྣམས་ཀྱི་རྟོགས་པའི་གནས༔ སྐུ་གསུམ་ལམ་དུ་སློང་བའི་རྟེན༔ ཐིག་ལེ་མངོན་དུ་འབྱིན་པའི་མིག༔ ཐར་པའི་སྐས་ཀུན་སློང་བར་བྱེད༔ ལམ་དུ་འཇུག་པའི་ས་མཁན་ཡིན༔ སྐལ་ལྡན་འཛིན་པའི་ལྕགས་ཀྱུར་སྣང་༔ ཆོས་སྐུ་རང་འཇོག་གནས་ལུགས་ཡིན༔ སངས་རྒྱས་ཀུན་གྱི་ཕྱག་བྱེད་གནས༔ ཡུལ་རྣམས་གཅོད་པའི་རལ་གྲིར་སྣང་༔ གྲོལ་བ་རྣམས་ནི་འདི་ཉིད་ལ༔ རྣམ་པར་རྟེན་ནས་གྲོལ་བ་འོ༔ སངས་རྒྱས་ཐམས་ཅད་ཀྱི་སྲས་གཅིག་པོ༔ བསྟན་པ་རྣམས་ཀྱི་བཙས་སུ་རང་བྱུང་བ༔ རང་བྱུང་གི་ཡི་གེ་ཆེན་པོར་བསྐལ་པ་ཀུན་གྱི་ཐོག་མར་རང་བྱུང་བ༔ བྱིན་བརླབས་ལས་རང་བཀོད་པ༔ སྤྲུལ་པ་སྐུ་ཡི་ས་བོན་འཕེལ་བར་བྱེད་པ༔ རབ་ཏུ་དཀོན་པའི་ཚིག་རྫོགས་སོ༔ སཱ་མཱ་ཡཱ༔ རྒྱ་རྒྱ་རྒྱ༔ ཤོ་ལོ་ཀ་ཉིས་བརྒྱ་དང་ཕྱེད་དང་བརྒྱད་བཞུགས་སོ༔

བཏགས་པས་གྲོལ་བར་བསྟན་པ་བུ་གཅིག་གི་གསང་འགྲེལ་སློབ་དཔོན་དགའ་རབ་རྡོ་རྗེས་མཛད་པ།

རྡོ་རྗེ་འཆང་གིས་གསུངས་པ་མཆོད་འོས་རང་བཞིན་གྱི་ཚིག་དུས་གནད་ངེས་པ།

རྡོ་རྗེ་འཆང་གིས་གསུངས་པ་མཆོད་འོས་རང་བཞིན་གྱི་ཚིག་དུས་གནད་ངེས་པ་བཞུགས་སོ༔ ༼གསེར་ཡིག་ཅན༽

སརྦ་ཛ་ག་ཏཾ༔ རྒྱ་གར་སྐད་དུ༔ བུདྡྷ་སརྦ་པུ་ཏྲ་ཨེ་ཀ༔ ཏན་ཏྲ་ཨུ་པ་དྷེ་ཤ་ནཱ་མ༔ བོད་སྐད་དུ༔ སངས་རྒྱས་ཐམས་ཅད་ཀྱི་སྲས་གཅིག་གི་རྒྱུད་ཀྱི་མན་ངག་ཅེས་བྱ་བ༔ ཐོག་མའི་མགོན་པོ་འོད་མི་འགྱུར་བ་ལ་ཕྱག་འཚལ་ལོ༔ དེ་ནས་རྡོ་རྗེ་འཆང་གིས་ནི༔ ཐུགས་ཀྱི་དཀྱིལ་འཁོར་སྒོ་ཕྱེ་ནས༔ ཚིག་གི་རྒྱལ་པོ་འདི་དག་ཀུན༔ རྡོ་རྗེའི་མགུར་དུ་རབ་དྲིལ་ཏེ༔ ལྗགས་ཀྱི་དབང་པོ་ལ་བཀྲམ་ནས༔ ཚེམས་ནི་བཞི་ཅུའི་བར་ནས་ནི༔ གསང་ཆེན་དམ་པའི་ཚིག་འདི་ཀུན༔ མ་བརྗོད་འཕྲོས་པའི་ཚུལ་གྱིས་གསུངས༔ ཀྱཻ༔ སྣང་བའི་རྒྱལ་པོ་ཨ་ལ་ལ༔ སངས་རྒྱས་རྣམས་ཀྱི་སྲས་གཅིག་པོ༔ བསྟན་པའི་ས་བོན་ཡང་ཞུན་གདུང་༔ དོན་དམ་རྒྱལ་པོའི་རྟགས་ཆེན་པོ༔ སྙིང་པོ་སྤྲུལ་པའི་སྐུ་འདི་ནི༔ ཀློག་དང་འཛིན་དང་བཅང་བའི་ཐབས༔ འདི་ཉིད་རིམ་པ་ཇི་ལྟ་བར༔ སྙིང་པོ་གསང་བ་ང་ཡིས་ཀྱང་༔ སྤྲོ་བར་བྱ་འོ་གསང་བའི་བདག༔ རྣལ་འབྱོར་སྐལ་དང་སུ་ལྡན་པ༔ འདི་ནི་སྣང་བར་ཡང་དག་གོ༔ དེ་ཡི་སངས་རྒྱས་སྲས་པོ་འདི༔ སངས་རྒྱས་བདེན་པ་མཐོང་བ་དེས༔ སྤྲུལ་པའི་སྐུ་ནི་འདི་ལྟར་བཅང་༔ བདག་གི་སྤྱི་བོའི་གཙུག་གམ་ནི༔ མཆན་ཁུང་ངམ་ནི་མགུལ་དུ་འོ༔ རང་བྱུང་ཆེན་པོའི་ཡི་གེ་རྣམས༔ རིན་ཆེན་གསེར་གྱིས་བྲིས་ནས་ནི༔ གླེགས་བམ་སོར་ནི་བཞི་པའི་ཚད༔ སྣ་ཚོགས་དར་གྱིས་གྲིལ་ནས་ཀྱང་༔ རང་གི་སྤྱི་བོར་བཟུང་ན་ཡང་༔ འདི་ལ་སྤྲུལ་པའི་ཡོན་ཏན་ཐོབ༔ མཆན་ཁུང་གཡོན་དུ་བཅངས་

པ་ཡིས༔ འདི་ཡང་དེ་དང་མཉམ་པ་ཡིན༔ འདི་ཉིད་མགུལ་དུ་བཏགས་ནས་ནི༔ རྒྱུན་དུ་གུས་པར་བྱེད་པ་ལ༔ འདི་ཡང་སྤྲུལ་སྐུའི་ཡོན་ཏན་ཐོབ༔ རང་བྱུང་ཡི་གེ་འདི་དག་ལ༔ གླེགས་བམ་དེ་ལྟར་བཟུང་ནས་ནི༔ འདི་ལྟར་མཆོད་པ་ཡང་དག་བྱ༔ གལ་ཏེ་ས་གཡོས་བྱུང་ཚེ་ནཿའདི་ཉིད་ལན་དྲུག་ལན་བདུན་ནམ༔ ཡང་ན་ལན་ནི་ལྔ་འམ་གསུམ༔ རྡོ་རྗེའི་ལྕེ་ཡིས་བཀླག་པར་བྱ༔ ཚོགས་ནི་རྣལ་འབྱོར་ལོ་ཡི་གྲངས༔ འདི་ཡི་དུས་སུ་རབ་ཏུ་གཏང་༔ དམ་ཚིག་མཆོག་ལྡན་རྣལ་འབྱོར་པས༔ ཚོགས་ཀྱི་མཆོད་པ་དེ་བཞིན་བྱ༔ བཀླགས་པ་འབྱུང་བ་བྱེད་དུས་སུ༔ ཚོགས་ནི་སྙོམས་པའི་དུས་ན་བྱ༔ སྟོན་མོ་དེ་བཞིན་འཁྲུགས་པའི་དུས༔ རྣལ་འབྱོར་པ་ནི་ཟུག་པ་ཡི༔ དུས་ན་སོ་སོའི་གནས་ནས་འབོད༔ འདི་ལྟར་འབྱུང་བའི་ཁྱད་པར་ལས༔ རྣལ་འབྱོར་དེ་ནི་ཐར་ལམ་དུ༔ ཡང་དག་ངེས་པར་འཇུག་པ་ཡི༔ རྡོ་རྗེ་འཆང་བ་རྣམས་དང་ནི༔ སྐལ་པ་ཡང་དག་མཉམ་པ་འོ༔ སྒྲ་ནི་བྱུང་པའི་དུས་ན་ཡང༔ ལན་ནི་དྲུག་གམ་བདུན་དང་ལྔར༔ པད་མ་ཡི་ནི་ལྕེ་ཡིས་ནི༔ སྐལ་དང་ལྡན་པས་བཀླག་པར་བྱ༔ འདི་དུས་ལྷ་ལ་མཆོད་པར་འབུལཿདགེ་སློང་ཚུལ་ཁྲིམས་ལྡན་པ་ལ༔ ཆོས་དང་མཐུན་པའི་སྟོན་མོ་བྱ༔ བཀླག་པ་བྱེད་པའི་དུས་ན་ཡིན༔ མཆོད་པ་དེ་བཞིན་སྙོམས་པ་ལ༔ དགེ་སློང་ཟུག་པའི་དུས་ན་འབོད༔ སྟོན་མོ་འཁྲུགས་པའི་དུས་ན་བྱ༔ འདི་ལྟར་སུ་ཡིས་བྱས་པ་དེ༔ འདི་ཡང་སྤྲུལ་པའི་སྐུ་དང་མཉམཿ

འོད་ཀྱི་སྣང་བ་བྱུང་བའི་ཚེ༔ ལན་ལྔ་གསུམ་མམ་ལན་གཅིག་ཏུ༔ དུང་གི་ལྕེ་ཡིས་བཀླག་པར་བྱ༔ འདི་དུས་རླུང་ནི་བསྒོམ་པར་བྱ༔ རྣལ་འབྱོར་མ་ནི་དམ་ཚིག་ཅན༔ དགུ་འམ་བཅུ་གཅིག་མན་ཆོད་ལ༔ བཟའ་བཏུང་རྩུབ་པའི་སྟོན་མོ་བྱ༔ བཀླག་པ་སྙོམས་པའི་དུས་ན་ཡིན༔ རླུང་ནི་བྱེར་བའ ི་དུས་ན་ཡིན༔ རྣལ་འབྱོར་ལ་ནི་སྙོམས་པ་ལ༔ སྟོན་མོ་འཁྲུགས་པའི་དུས་ན་འོཿའདི་ལྟར་བྱས་པའི་རྣལ་འབྱོར་པ༔ སྤྲུལ་པའི་སྐུ་དང་ཡང་མཉམ་མོ༔ སད་ཀྱིས་རྒྱལ་ཁམས་ཁྱབ་པའི་ཚེ༔ རལ་གྲིའི་ལྕེ་ཡིས་འདི་བརྗོད་ནཿསངས་རྒྱས་ཡོན་ཏན་འདི་ཡིས་ཐོབ༔ འདི་དུས་སྒྲ་ཡི་མཆོད་པ་བྱ༔ རྣལ་འབྱོར་ལྔ་འམ་བཅོ་ལྔ་ལ༔ བྱིན་བརླབས་གཏོར་མ་ལན་བདུན་བཏང་༔ བཀླག་པ་ཟུག་པའི་དུས་ན་ཡིན༔ མཆོད་པ་སྙོམས་པའི་ཚེ་ན་འོ༔ བྱེར་བ་ལ་ནི་རྣལ་འབྱོར་འབོད༔ འཁྲུགས་པའི་ཚེ་ན་སྟོན་མོ་བཏང་༔ འདི་ལྟར་སུ་ཡིས་བྱས་པ་ལ༔ སྤྲུལ་པ་སྐུ་ཡི་ཡོན་ཏན་ཐོབ༔ རིམས་དང་ཡམས་ནད་བྱུང་བའི་ཚེ༔ དགུ་དང་བཅུ་གཅིག་བཅུ་དགུར་ནི༔ ལྕགས་ཀྱུའི་ལྕེ་ཡིས་བརྗོད་པར་བྱ༔ འདི་དུས་རྣམ་པར་མི་རྟོག་བསྒོམ༔ བྱིས་པ་དགུ་འམ་བཅོ་བརྒྱད་ལ༔ སྟོན་མོ་བྱ་བ་རབ་ཏུ་བསྔགས༔ བཀླག་པ་འཁྲུགས་པའི་དུས་ན་ཡིན༔ སྒོམ་པ་སྙོམས་པའི་དུས་ན་འོ༔ བྱིས་པ་བྱེར་པའི་དུས་སུ་འབོདཿསྟོན་མོ་ཟུག་པ་ཉིད་ལ་བྱ༔ དེ་ལྟར་བྱས་པའི་སྐྱེས་མཆོག་ནི༔ འདི་ལ་སྤྲུལ་པའི་ཡོན་ཏན་ཐོབ༔ ཉི་ཟླ་གཟའ་ཡིས་ཟིན་པའི་ཚེ༔ འདི་ནི་ལན་ལྔ་དྲུག་གམ་དགུ༔ འཁོར་ལོའི་ལྕེ་

ཡིས་ཡང་བརྗོད་ནཿའདི་ཡང་སྤྲུལ་པའི་སྐུ་དང་མཉམ༔ འདི་དུས་སྲོག་འདོན་དགེ་བ་བྱ༔ དུད་འགྲོའི་རིགས་ལ་སྟོན་མོ་གཏང་༔ བཀླག་བྱེར་པའི་དུས་ན་ཡིན༔ སྲོག་འདོན་སྙོམས་པ་ཉིད་ལ་འོ༔ དུད་འགྲོ་ཟུག་པའི་དུས་ན་ཡིན༔ སྟོན་མོ་འཁྲུགས་པའི་དུས་ན་བྱ༔ དེ་ལྟར་སྟོན་མོ་སུས་བྱས་པ༔ སྤྲུལ་པ་སྐུ་ཡི་ཡོན་ཏན་ཐོབ༔ མུ་གེ་དག་ནི་བྱུང་བའི་ཚེ༔ ཁ་ཊྭཱཾ་ལྕེ་ཡིས་རབ་བརྗོད་ན༔ འདིས་ཀྱང་སྤྲུལ་སྐུ་འཛིན་པ་ཡིན༔ ལན་ནི་ལྔའམ་གསུམ་གཉིས་ཡིན༔ འདི་དུས་དྲི་ཡི་མཆོད་པ་བྱ༔ ཤན་པ་འམ་ནི་མུ་སྟེགས་ལ༔ སྟོན་མོ་བྱ་བར་རབ་ཏུ་བཟང༔ བཀླག་པ་བྱེད་པའི་དུས་ན་ཡིནཿམཆོད་པ་སྙོམས་པ་ཉིད་ལ་བྱ༔ སྡིག་ཅན་སྤྲུལ་པ་ཉིད་ལ་འབོད༔ སྟོན་མོ་དེ་བཞིན་ཟུག་པ་ལའོ༔ འདིས་ཀྱང་སྤྲུལ་སྐུའི་ས་བོན་འཇོག༔ རྒྱལ་ཁམས་ཕྱུགས་ནད་བྱུང་བའི་དུས༔ རང་བྱུང་ཆེན་པོའི་ཡིག་གེ་འདི༔ ལན་བརྒྱད་དང་ནི་བཅུ་དྲུག་ཏུ༔ རྩེ་གསུམ་ལྕེ་ཡིས་འདི་བརྗོད་དོ༔ འདི་དུས་མར་མེའི་མཆོད་པ་བྱ༔ དགྲ་བཅོམ་པ་ནི་བདུན་ལ་ཡང༔ སྟོན་མོ་བྱ་བར་རབ་ཏུ་བསྔགས༔ བཀླག་པ་ཟུག་པ་ཉིད་ལ་ཡིན༔ མཆོད་པ་བྱེད་པ་ཉིད་ལ་བྱ༔ དགྲ་བཅོམ་སྙོམས་པའི་དུས་ན་འབོད༔ འཁྲུགས་པ་ལ་ནི་སྟོན་མོ་བྱ༔ དེ་ལྟར་བྱས་པའི་སྐྱེས་བུ་ལ༔ སྤྲུལ་པའི་ས་བོན་ངེས་པར་འཇོག༔ འདི་ལ་ཐེ་ཚོམ་བྱར་མི་རུང༔ ངེས་གསང་འབྲས་བུ་དམ་པ་འོ༔ ༀ་དང་ཡང་དག་སུ་ལྡན་པ༔ སངས་རྒྱས་རྣམས་ཀྱི་སྐུ་ལ་སྦྱོར༔ ཧཱུྃ་དང་ཡང་དག་སུ་ལྡན་པ༔ འདི་ནི་

ཐུགས་ཀ་དེ་བཞིན་ནོ༔ ཨཾ་དང་ཡང་དག་སུ་ལྡན་པ༔ གསུང་ལ་ཡང་དག་འདི་ཡིས་རེག༔ དེ་ཕྱིར་ངག་གི་སྤྱོད་པ་གཅེས༔ གང་གིས་སེང་གེ་བྱས་པ་ན༔ འདི་ལ་ནད་དང་འཇིགས་པ་བྲལ༔ གླང་པོ་སུ་ཡིས་བྱས་པ་ལ༔ འདི་ལ་སྲོག་མེད་དབུགས་ཀྱང་མེད༔ དྲང་སྲོང་གང་གིས་བྱས་པ་ལ༔ མི་རྟོག་ལས་བྱུང་ཐེར་ཟུག་སྙོམས༔ འདི་ལྟར་ལུས་ཀྱི་བྱ་བྱེད་གཅེས༔ སྨིན་རྒྱུ་རང་ཡུལ་སུས་ཤེས་པ༔ འདི་ལ་རྟག་མེད་ཆད་པ་མེད༔ དྲན་བསམ་བྲལ་བ་སུས་ཤེས་པ༔ འདི་ལ་འོང་མེད་འགྲོ་བ་མེདཿཅེར་མཐོང་རང་ངོ་སུས་ཤེས་པ༔ འདི་ལ་འཁོར་དང་མྱང་འདས་མེད༔ འདི་ལྟར་སེམས་ཀྱི་དངོས་པོ་གཅེས༔ ཨེ་མ་རང་བྱུང་ཆེན་པོའི་ཡིག་གེ་འདི༔ རབ་ཏུ་ངོ་མཚར་ཆེ་བས་ན༔ ཧ་ཧ༔ འདི་ལྟར་སུས་ཀྱང་མ་བྱས་པ༔ རང་བྱུང་ཀུན་གྱི་ཐོག་མར་བྱུང༔ ཨ་ལ་ལ་ཧོ་སྤྲུལ་པའི་སྐུ༔ འདི་ལ་བྱེད་པའི་རྐྱེན་མེད་པས༔ ཐ་མ་འཇིག་པ་ཀུན་དང་བྲལ༔ འབྱུང་བས་ཅུང་ཟད་གནོད་པ་མེད༔ འདི་ནི་ནམ་མཁའ་འཕར་བར་ངེས༔ སངས་རྒྱས་སྤྲུལ་པ་ཡིན་པ་ན༔ འདི་ལ་བཤད་ཅིང་སྒོམ་པ་མེད༔ འདི་བྲལ་བེམས་པོ་སྒོམ་པར་སྣང༔ དེ་ཕྱིར་འདི་དང་འཕྲད་པར་ཡང་༔ རབ་ཏུ་དཀའ་ཞིང་སྣང་བ་མིན༔ དེས་ན་འདི་དང་གང་ཕྲད་པ༔ སངས་རྒྱས་འབྲས་བུ་ཐོབ་པ་ལ༔ ཐེ་ཚོམ་དགོས་པ་མ་ཡིན་ནོ༔ ཨེ་མ་འཇིག་རྟེན་གང་ཞིག་ན༔ སངས་རྒྱས་འབྲས་བུ་སུས་ཐོབ་ཚེ༔ དེ་ཚེ་རང་བྱུང་ཆེན་པོ་འདི༔ འཕར་ཞིང་རང་འོད་ལྔ་པོ་

འབྱུང་༔ དེ་ཚེ་ལན་གསུམ་བཀླག་པར་བྱ༔ དེ་ཡང་དེ་དང་མཉམ་པར་འགྱུརཿའདི་ནི་བཅངས་པ་ཙམ་གྱིས་ཀྱང༔ སངས་རྒྱས་ཉིད་དུ་འགྱུར་བ་ལ༔ ཐེ་ཚོམ་ཟ་བ་ཅི་ཞིག་དགོས༔ གལ་ཏེ་བྱོལ་སོང་མགུལ་དུ་འདི༔ བཏགས་ན་དེ་ཉིད་གྲོལ་བས་ན༔ འགྲོ་བ་མི་རྣམས་སྨོས་ཅི་དགོས༔ ཨེ་མ་རང་བྱུང་ཡི་གེ་འདི༔ སེམས་ཅན་གཞན་གྱི་དོན་བྱེད་ན༔ ཚེ་འདས་དེ་ཡི་སྤྱི་བོ་འམཿམགུལ་དུ་འདི་བཏགས་བསྲེགས་ན་ནི༔ དེ་ཉིད་གྲོལ་བར་སྨོས་ཅི་དགོས༔ མཚམས་མེད་ལྔ་པོ་སྤྱད་པ་ཡངཿཉན་ཐོས་རྣམས་དང་སྐལ་པ་མཉམ༔ ལུང་དུ་མ་བསྟན་སྐྱེ་བོ་རྣམས༔ བྱང་ཆུབ་སེམས་དཔའི་ས་དང་མཉམ༔ ཡིད་དཔྱོད་འཛིན་པའི་གྲུབ་མཐའ་ཡང༔ རྡོ་རྗེ་འཆང་དང་མཉམ་པར་ངེས༔ འདི་དང་ཕྲད་པའི་སྐལ་པ་ཅན༔ སྙིང་འདྲ་སེམས་ཀྱི་བུ་གཅིག་ལ༔ རིག་པ་དངོས་ཀྱི་རྟགས་ཡོད་པས༔ བཀླག་ཅིང་བསྲེག་པར་བྱ་མི་དགོངས༔ ཕྲད་པ་ཙམ་གྱིས་འགྲུབ་པ་ཡིན༔ བྱེར་ཟུག་ལ་སོགས་བཤད་མི་དགོས༔ དེ་ཡི་རྟགས་རྣམས་འབྱུང་བ་ནི༔ བྱོལ་སོང་མེ་འོད་དཀར་གསལ་ལ༔ དུད་པ་སྔོན་པོ་ཤར་ཕྱོགས་སུ༔ རུས་པའི་འོད་ཀྱང་དམར་གསལ་ཡིན༔ གསེར་གྱི་ཡིག་འབྲུ་མ་ཞིག་བར༔ དེ་ཡི་རུས་པ་ཉིད་ལ་འབྱར༔ འདི་ནས་ཟླ་བ་བཅུ་གསུམ་ན༔ ས་རྣམས་ངེས་པར་གཡོ་བ་ཡིན༔ དེ་དུས་འོད་ཀྱང་མོག་མོག་པོ༔ སྣང་བ་ངེས་པར་འགྱུར་པ་ཡིན༔ སྡིག་ཅན་མེ་མདོག་སེར་ལ་གསལ༔ དུད་པ་ནུབ་ཕྱོགས་ཁ་དོག་དཀར༔ རུས་པའི་མདོག་

ནི་སྔོ་ནག་ལ༔ ཡིག་གེ་ཞིག་སྟེ་ཐིག་ལེར་སྣང་༔ འདི་ནས་ཟླ་བ་དགུ་ན་ཡང༔ སྒྲ་ནི་ཤར་གྱི་ཕྱོགས་སུ་འབྱུང་༔ འདི་ལ་འོད་ནི་མེར་མེར་པོ༔ འདི་དོན་ངེས་པར་ཡང་དག་གོ༔ ཡིད་དཔྱོད་གྲུབ་པའི་མཐའ་འཛིན་པའི༔ མ་མདོག་དཀར་གསལ་གཡོས་པ་མེདཿ དུད་པ་སྔོན་པོ་གྱེན་འགྲེང་འབྱུང༔ རུས་མདོག་དཀར་པོ་ཐིག་ལེ་ཅན༔ ཡི་གེ་དེ་ཉིད་མ་ཞིག་པར༔ ཁ་དོག་དཀར་པོ་འོད་དང་ལྡན༔ སྐབས་སྐབས་རུས་པའི་དཀྱིལ་ན་སྣང༔ འདི་ལ་སྐུ་དང་གདུང་ཡང་འབྱུང༔ འདི་ནས་ཞག་ནི་གསུམ་ན་ཡངཿསྒྲ་ནི་ཤར་ཀྱི་ཕྱོགས་ནས་འོང་༔ འོད་ནི་ནུབ་ཀྱི་ཕྱོགས་སུ་སྣང༔ འདི་ནི་ངེས་པར་སྤྲུལ་པ་ཡི༔ སྐུ་ཡི་འབྲས་བུ་རྙེད་པ་ཡིན༔ ཀྱེ་མ་སྣང་བདག་རང་བཞིན་སྤྲུལ་པའི་སྐུ༔ དེ་ཡི་ཕྱི་ནང་གསང་ཚིག་ནི༔ ཐུན་མོང་ཉིད་དུ་ཕྲད་པ་མིན༔ རིགས་ལྡན་སྐྱེས་བུ་སྐལ་ཆེན་པོ༔ འགའ་ལ་འདི་ཉིད་སྣང་བ་ལས༔ ཀུན་གྱིས་མཐོང་བ་མ་ཡིན་ནོ༔ རང་བྱུང་ཡི་གེ་འདི་མེད་པར༔ སྐྱེས་བུ་ཉིད་ནི་གང་སུ་རུང་༔ སེམས་ཅན་དོན་ཉིད་བྱེད་འདོད་ཀྱང༔ སེམས་ཅན་དོན་ནི་ནུས་པ་མིན༔ ཡང་དག་ལམ་ནི་མཐོང་བ་མིན༔ ཡང་དག་ལམ་ནི་མཐོང་སྲིད་ཀྱང༔ ཉན་ཐོས་རྣམས་དང་ཁྱད་ཅི་ཡོད༔ ཀུན་གྱི་སྤྱོད་ཡུལ་མ་ཡིན་ནོ༔ གལ་ཏེ་འདི་ཉིད་ཕྲད་ན་ཡང༔ འདི་ནི་ངེས་པའི་སྤྲུལ་པས་ན༔ སྒྲིབ་བྱེད་ཉིད་དང་མ་བྲལ་བས༔ འདི་ལ་ཐེ་ཚོམ་སྐྱེ་བར་འགྱུར༔ དེས་ན་འདི་ཉིད་རྣམ་སྤངས་པས༔ འབྲས་བུ་གཏན་ནས་བརླག་པ་ཡིན༔ སྐལ་པ་

མཆོག་རབ་ལྡན་པ་ཀུན༔ ཐེ་ཚོམ་སྐྱེ་བར་ག་ལ་སྲིད༔ དེ་ཡིས་འདི་ཉིད་གསང་ཆེན་དུ༔ ཡང་དག་པར་ནི་འགྱུར་བ་འོ༔ གལ་ཏེ་འདི་ཉིད་སྣང་བའི་མིས༔ འདི་ཉིད་ཡོད་པར་སུ་གཞན་ལ༔ སྨྲ་བར་བྱེད་པའི་མི་དེ་ཡི༔ རང་གི་འབྲས་བུ་རང་བརླག་ཏུ༔ འདི་ཡིས་བྱེད་པ་ཁོ་ན་ཡིན༔ དེ་ཡི་ཕྱིར་ན་རང་བྱུང་གིི༔ ཡི་གེ་འདི་ཉིད་ཡོད་པའི་མིས༔ ཚིག་ཟུར་ཙམ་ཡང་སྨྲ་མི་བྱ༔ གསང་བ་ལས་ནི་དངོས་གྲུབ་འབྱུང་༔ མ་གསང་མཆོག་དང་ཐུན་མོང་གི༔ དངོས་གྲུབ་དེ་ཡིས་སྤངས་པ་ཡིན༔ གསང་སྟེ་ལུས་ལ་ཡང་དག་བཅང་༔ འདི་དང་བྲལ་བར་མ་བྱས་ན༔ ནམ་ཞིག་འཆི་བའི་དུས་ཀྱི་ཚེ༔ འདི་ཉིད་ལུས་ལ་གནས་པ་ལ༔ རིགས་དྲུག་སྐྱེ་བ་རྣམ་བཞི་ཡི༔ གྲོང་ཁྱེར་དུ་ནི་འཇུག་མི་སྲིད༔ དེ་ཡི་ཕྱིར་ན་འདི་ཉིད་དང་༔ འགྲོ་དང་ཉལ་དང་འདུག་པ་དང་༔ དེ་བཞིན་ཟ་དང་འཆག་པ་དང༔ ཕྱག་དང་སྐོར་བ་ལ་སོགས་བྱེད༔ འདུད་པའི་ལག་པ་གར་ཉ ིད་དང༔ སྐྱུགས་དང་ཁྲུས་བྱེད་ཕྱི་ས་འདོར༔ དེ་བཞིན་སྨྲ་དང་སྔགས་ཟློས་དང་༔ ཡི་གེ་ཀློག་དང་མཆོད་བཤགས་དང་༔ ཇི་ལྟར་སྨྲ་བ་ལ་སོགས་དང་༔ བསམ་པ་ཇི་སྙེད་གཡོ་བ་དང་༔ ཇི་ལྟར་སྣ་ཚོགས་སྤྱོད་བྱེད་ཀྱང་༔ འདི་དང་འབྲལ་བར་མི་བྱ་འོ༔ འདི་ནི་རིས་མེད་སྤྲུལ་པའི་སྐུ༔ རང་གཞན་དོན་རྣམས་རྫོགས་པར་བྱེད༔ བྱོལ་སོང་རིགས་སམ་བུད་མེད་དང་༔ སྐྱེ་བ་དམན་པའི་སེམས་ཅན་ཡང་༔ འདི་དང་བྲལ་བར་མ་བྱས་ན༔ ངེས་པར་འབྲས་བུ་ཐོབ་པས་ན༔

བྲལ་པའི་བར་མཚམས་མ་ཞུགས་པ༔ འདི་ལ་རབ་ཏུ་གཅེས་པ་ཡིན༔ དེ་བཞིན་དྲོད་དང་མ་བྲལ་བར༔ རྒྱུན་དུ་ལུས་ལ་བཅང་བར་བྱ༔ གལ་ཏེ་དུས་ཚོད་བྱུང་བའི་ཚེ༔ འདི་ཉིད་ཀློག་པར་ཡང་དག་གོ༔ འདི་ཉིད་བཅངས་པས་ངེས་པར་འགྲུབ༔ འཆང་བའི་གསང་ཚིག་ཡིག་གེ་ནི༔ དྲན་པ་ཀུན་གྱི་ཐོག་མ་ཡི༔ དབང་པོའི་ཞེན་པ་བཟློག་པ་ནས༔ རབ་ཏུ་དཀོན་ཚིག་ཡན་ཆད་ལ༔ གསེར་རམ་བཻ་ཌཱུཪྱ་ཡིས་བྲི༔ མགུལ་ལམ་སྤྱི་བོར་བཏགས་པས་འགྲུབ༔ མངོན་རྫོགས་རྒྱལ་པོར་སངས་རྒྱས་ཐོབ༔ ཅེས་རྡོ་རྗེ་འཆང་གིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རང་ང་ོ༔ མཆོད་འོས་རང་བཞིན་གྱི་དམ་ཚིག་ཆེན་པོའི་ཚིག༔ ཤིན་ཏུ་གསང་ན་ངེས་པར་འགྲུབ་པའི་བཀའ་གསང་གཉན་པོ་རྫོགས་པ་ཆེན་པོ་གསེར་གྱི་སྙིང་པོ་ཉི་མ་རབ་ཏུ་སྣང་བྱེད་ཀྱི་མན་ངག༔ དུས་གནད་ངེས་པ་རྫོགས་སོཿ༔ སཱ་མཱ་ཡཱ༔ རྒྱ་རྒྱ་རྒྱ༔ ༔

སངས་རྒྱས་ཀྱི་འདས་རྗེས་གསུམ།

སངས་རྒྱས་ཀྱི་འདས་རྗེས་གསུམ་བཞུགས་སོ༔

རྒྱ་གར་སྐད་དུ༔ བུད་དྷ་དྷེ་ཀ་ར་ཡེ་དྷུ་ནཱ་མ༔ བོད་སྐད་དུ༔ སངས་རྒྱས་ཀྱི་ཞལ་ཆེམས་དང་པོ་ཞེས་བྱ་བ༔ ཡང་དག་པར་རྫོགས་པའི་སངས་རྒྱས་དྲུག་པ་རྡོ་རྗེ་འཆང་ལ་ཕྱག་འཚལ་ལོ༔ ཀྱེ་མ་ཀྱེ་མ༔ རིགས་ཀྱི་བུ་རྣམས་གསང་སྔགས་ཀྱི་གནད་ཐམསཅད་གཅིག་ཏུ་དྲིལ་ནས་ཉམས་སུ་ལོང་ཞིག༔ ལུས་ངག་ཡིད་ཀྱི་སྔོན་འགྲོ་ནི༔ མི་རྟག་སྙིང་རྗེ་བྱང་སེམས་སྦྱང་༔ ལུས་འདི་མ་རིག་རྒྱུས་བསྐྱེད་ཕྱིར༔ རིགས་དྲུག་ས་བོན་ཉིད་དུ་གནས༔ རིག་པ་སྐུ་གསུམ་དངོས་ཡིན་ཕྱིར༔ སྐུ་གསུམ་ཡི་གེ་གསུམ་དུ་ཤར༔ ཡི་གེའི་རྩལ་སྦྱང་རུ་ཤན་དབྱེ༔ དེ་ནས་རྣལ་དུ་དབབ་པའི་ཕྱིར༔ ཉན་ཐོས་བྱང་སེམས་ཁྲོ་བོ་ཡི༔ ལྟ་སྟངས་ཉིད་ཀྱིས་སོར་ཡང་གཞུག༔ གནས་བརྟན་གྲོལ་བའི་གདེང་ཐོབ་ནས༔ ཕྱི་ནང་བྱ་བ་ཀུན་བཏང་སྟེ༔ གླང་སེང་དྲང་སོང་འདུག་སྟངས་བཅའ༔ ངག་ནི་སྨྲ་བ་རྒྱུན་བཅད་ལ༔ སེམས་ནི་སྨིན་ཕྲག་མཁའ་ལ་གཏད༔ སྒོ་ཡུལ་རླུང་གི་གནད་བསྟུན་པས༔ ཡུལ་ལ་ཡེ་ཤེས་མངོན་དུ་སྣང་༔ མངོན་སུམ་གནད་ལས་འབྲལ་མི་བྱ༔ མི་འགུལ་གསུམ་ལ་གཞི་བཅས་པས༔ སྣང་བ་བཞི་ཡི་དྲོད་རྙེད་ནས༔ སྡོད་པ་གསུམ་གྱི་ཚད་ཟིན་ཏེ༔ ཐོབ་པ་གསུམ་གྱི་གཟེར་ཐེབས་ན༔ ཁམས་གསུམ་དག་ཏུ་ལྡོག་རེ་སྐན༔ མྱ་ངན་འདའ་བར་ཐེ་ཚོམ་མེད༔ ཅེས་སུམ་ཅུ་རྩ་གསུམ་གྱི་ལྷོ་ཕྱོགས་སྨན་འཚོ་བྱེད་གཞོན་ནུའི་ལྡུམ་རར༔ རྡོ་རྗེ་འཆང་ཆེན་པོ་ཡོངས་སུ་མྱ་ངན་ལས་འདའ་བའི་ཚུལ་བསྟན་པའི་ཚེ༔ དགའ་རབ་རྡོ་རྗེ་ས་ལ་འགྱེལ་ཞིང་གདུང་བའི་སྨྲེ་སྔགས་ཕྱུང་པ༔ ཀྱེ་མ་ཀྱེ་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔

འཇིག་རྟེན་མུན་པ་གང་གིས་སེལ༔ ཞེས་བརྗོད་དེ་བརྒྱལ་སངས་པ་དང་༔ འོད་ཕུང་གི་ནང་ནས་ཕྱག་གཡས་པའི་གྲུ་མོ་མན་ཆད་ཕྱུང་ནས༔ རིན་པོ་ཆེ་ཤེལ་གྱི་ཟ་མ་ཏོག་སེན་གང་པ་ཞིག༔ ཕྱག་གཡས་པའི་མཐིལ་དུ་བབས་ཏེ༔ དེ་ཞལ་ཕྱེ་བས་རིན་པོ་ཆེ་མཐིང་ཁ་ལ་བཻ་ཌཱུཪྱ་བཞུ་བའི་ཁུ་བས་བྲིས་པ་བབས་པས་དགའ་རབ་རྡོ་རྗེ་རྟོགས་པའི་གདེང་དང་ལྡན་པར་གྱུར་ཏོ༔ ས་མ་ཡཱ༔ ༔ རྒྱ་གར་སྐད་དུ༔ བུད་དྷ་དྷེ་ཀ་ར་མ་དུ་ནཱ་མཿབོད་སྐད་དུ༔ སངས་རྒྱས་ཀྱི་འདས་རྗེས་གཉིས་པ༔ ཡང་དག་པར་རྫོགས་པའི་སངས་རྒྱས་དབང་པོའི་སྟོབས་ཀྱིས་རྣམ་པར་གནོན་པ་ཉིད་ལ་ཕྱག་འཚལ་ལོ༔ ངེས་པར་སངས་རྒྱས་ཐོབ་འདོད་ན༔ སྔོན་དུ་འགྲོ་ལ་རྩལ་ཉིད་སྦྱང༔ ལུས་དང་ངག་དང་ཡིད་གསུམ་པོ༔ རུ་ཤན་ལེགས་པར་མ་ཕྱེད་ན༔ ཁམས་གསུམ་ཉིད་ལས་མི་བསྒྲོད་པས༔ སྔོན་དུ་འགྲོ་བ་དག་ལ་བསླབ༔ སྔོན་འགྲོའི་གནད་ལ་མཁས་གྱུར་ན༔ མཆོག་ཐུན་དགོངས་པ་ལ་མཁས་འགྱུར༔ དབེན་པའི་གནས་སུ་གཅིག་པུར་འདུག༔ ལུས་ཀྱི་སྔོན་འགྲོ་བྱ་བའི་ཕྱིར༔ རིགས་དྲུག་སྤྱོད་པ་སྣ་ཚོགས་སྤྱད༔ དཀོན་མཆོག་གསུམ་གྱི་སྤྱོད་པ་བྱ༔ སྐྱིལ་ཀྲུང་མཐིལ་སྤྲད་དྲང་པོར་བསྲང་༔ སྤྱི་བོར་ཐལ་མོ་སྦྱར་བར་བྱ༔ དེ་ལྟར་ལུས་ཀྱིས་སུས་བྱས་པ༔ ལུས་དེ་མི་ལྡོག་བར་ཆད་ཞི༔ ཞེན་པ་ལྡོག་ཅིང་སྒྲིབ་པ་འདག༔ ལུས་དེ་སྤྲུལ་པའི་སྐུར་གྲོལ་ནས༔ སངས་རྒྱས་སྐུ་དང་གཉིས་སུ་མེད༔ ལྷག་མེད་ཉིད་དུ་འགྱུར་བ་འོ༔ ངག་གི་སྔོན་འགྲོ་བྱ་བའི་ཕྱིར༔ རིགས་དྲུག་སྒྲ་སྐད་སྣ་ཚོགས་བརྗོད༔ ཞི་ཁྲོའི་སྒྲ་དང་འབྱུང་བའི་སྒྲ༔ རྣམ་པ་སྣ་ཚོགས་

ཉིད་ལ་སྦྱང༔ རྒྱས་གདབ་གནད་ལ་ཞག་གསུམ་བྱ༔ རྩལ་སྦྱང་གཉེན་བཙལ་ལམ་དུ་གཞུག༔ དེ་ལྟར་ངག་གིས་སུས་བྱས་པ༔ ཞེན་ལོག་ངག་གི་སྒྲིབ་པ་དག༔ མི་ལྡོག་གཉིས་མེད་ལོངས་སྐུར་གྲོལ༔ ཡིད་ཀྱི་སྔོན་འགྲོ་བྱ་བའི་ཕྱིར༔ རིགས་དྲུག་སྡུག་བསྔལ་བློ་ལ་བླང་༔ དེ་ནས་སེམས་ཀྱི་བྱུང་ས་བཙལ༔ མ་རྙེད་ཆོས་ཀྱི་སྐུ་དང་སྤྲད༔ དེ་ནས་སེམས་ཀྱི་གནས་ས་བཙལ༔ མ་རྙེད་ལོངས་སྤྱོད་སྐུ་དང་སྤྲད༔ དེ་ནས་སེམས་ཀྱི་འགྲོ་ས་བཙལ༔ མ་རྙེད་སྤྲུལ་པའི་སྐུ་དང་སྤྲད༔ དེ་ལྟར་སེམས་ཀྱིས་སུས་བྱས་པ༔ ཞེན་ལོག་བར་ཆད་ཞི་བ་དང་༔ ་སྒྲིབ་དག་ཁམས་གསུམ་ལྡོག་པ་མེད༔ ཆོས་ཀྱི་སྐུར་གྲོལ་གཉིས་མེད་འདའ༔ དེ་ནས་ལུས་ངག་ཡིད་གསུམ་པོ༔ རྣལ་དུ་འབེབས་ལ་མཁས་པར་བྱ༔ དེས་ནི་གསུམ་པོ་སོར་ཆུད་ནས༔ ཉམས་ལེན་ཉིད་ལ་བརྩོན་པར་འགྱུར༔ དེ་ལྟར་སྔོན་འགྲོ་རྫོགས་བྱས་ནས༔ དེ་དག་བློ་ཡིས་བོར་ནས་ཀྱང་༔ མངོན་སུམ་གནད་ལ་དབབ་པའི་ཕྱིར༔ ལུས་ངག་ཡིད་གསུམ་བྱ་བ་སྤང་༔ འདི་ནི་དུར་ཁྲོད་ཆེན་པོ་མི་རེ་འབར་བའི་ཤར་ཕྱོགས་ཌཱཀྐི་མ་སྣ་ཚོགས་འདུ་བའི་གནས་སུ༔ ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བའི་ཚུལ་བསྟན་པའི་ཚེ༔ དགའ་རབ་རྡོ་རྗེ་ས་ལ་འགྱེལ་ཏེ་གདུང་བའི་སྨྲེ་སྔགས་ཕྱུང་པས༔ ཀྱེ་མ་ཀྱེ་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་པ་བརྗོད་དེ་བརྒྱལ་སངས་པ་དང་༔ མདུན་གྱི་ནམ་མཁའ་འོད་ཕུང་གི་དཀྱིལ་དུ༔ ཕྱག་གཡས་པའི་གྲུ་མོ་མན་ཆད་ཕྱུང་ནས༔ བཻ་ཌཱུཪྱ་ཞུན་མ་ཉིད་ལ་རིན་པོ་ཆེ་ལྔ་ཡི་ཡི་གེ་རང་བྱུང་དུ་བཀོད་པ༔ རིན་པོ་ཆེ་ཤེལ་

གྱི་ཟ་མ་ཏོག་དང་བཅས་པ་བབས་པ༔ བྱིན་རླབས་ཆེན་པོ་མཆོག་གི་ཡི་གེ༔ སངས་རྒྱས་གྱི་ཞལ་ཆེམས་གཉིས་པ༔ སྤྲུལ་པ་པོ་དགའ་རབ་རྡོ་རྗེ་བཟུང་བའི་དོན་དུ་སྣང་བར་བྱས་པ༔ མྱ་ངན་ལས་འདའ་བ་ཐམས་ཅད་ཀྱི་སྣ་ཁྲིད་དང་འདྲ་བ༔ བསྟན་པ་ཐམས་ཅད་ཀྱི་བཅུད་བསྡུས་ཤིང་བུ་གཅིག་པར་བསྟན་པའོ༔ སཱ་མཱ་ཡཱ༔ ༔ རྒྱ་གར་སྐད་དུ༔ བུད་དྷ་དེ་ཀ་ར་ཡ་ཏྲི་ནཱ་མ༔ བོད་སྐད་དུ༔ སངས་རྒྱས་ཀྱི་འདས་རྗེས་གསུམ་པ༔ རང་གྲོལ་རྡོ་རྗེ་འཆང་ལ་ཕྱག་འཚལ་ལོ༔ ཀྱེ་མ་ཀྱེ་མ་རིགས་ཀྱི་བུ་རྣམས་གསོན་ཅིག༔ ལུས་ནི་མྱ་ངན་འདའ་འདོད་ན༔ སྐུ་གསུམ་བཞུགས་སྟངས་ཉིད་ལ་བསླབ༔ འདི་ལྟར་སུ་ཡིས་བྱས་པ་ནི༔ དུས་གསུམ་སངས་རྒྱས་ཐམས་ཅད་ཀྱི༔ སྐུ་ཡི་ཀློང་དུ་མྱ་ངན་འདའ༔ ངག་ནི་བསླབ་བྱའི་རིམ་པ་དང་༔ གནས་པ་བརྟན་ཞིང་ལ་ཡང་བཟླ༔ དེ་ལས་མི་འདའ་སུས་བྱས་པ༔ དུས་གསུམ་སངས་རྒྱས་ཐམས་ཅད་ཀྱི༔ གསུང་གི་ཀློང་དུ་མྱ་ངན་འདའོ༔ སེམས་གནད་གཟིགས་སྟངས་གསུམ་གཅུན་ཏེ༔ ཡུལ་གནད་ནམ་མཁའ་རྐྱེན་བྲལ་ལ༔ སྒོ་གནད་ཟློག་ཕབ་ཟུར་གྱིས་ལྟ༔ རླུང་གནད་ཤིན་ཏུ་དལ་ལ་བསླབ༔ དེ་ལྟར་གནད་གསུམ་གཟིར་བ་ཡིས༔ སྐུ་གསུམ་རིག་པ་སྟོང་པར་འཆར༔ ལུག་རྒྱུད་རིག་པ་བཙོན་དུ་བཟུང་༔ མངོན་སུམ་གནད་མཐོང་བཟློག་པ་མེད༔ ཆོས་ཉིད་མངོན་སུམ་སྣང་བ་ཡིས༔ ཡིད་དཔྱོད་འཛིན་པའི་ལྟ་བ་ནུབ༔ གོང་དུ་འཕེལ་བའི་ཉམས་སྣང་གིས༔ བར་དོའི་ཡེ་ཤེས་མངོན་དུ་བྱས༔ རིག་པ་ཚད་ཕེབས་སྣང་བ་ཡིས༔ ལོངས་སྤྱོད་རྫོགས་པའི་སྐུ་ངོས་ཟིན༔ ཆོས་ཉིད་ཟད་

པའི་སྣང་བ་ཡིས༔ རྫོགས་ཆེན་བྱ་བྲལ་འབྲས་བུ་ཐོབ༔ འདི་ལྟར་བཞི་ལ་མཐར་ཕྱིན་ན༔ མྱང་འདས་གཞན་དུ་བཙལ་མི་དགོས༔ མི་འགུལ་གསུམ་ལ་གཞི་བཅས་པས༔ སྡོད་པ་གསུམ་གྱི་ཚད་ཟིན་ཏེ༔ རྟགས་ནི་ལུས་ངག་ཡིད་ལ་འབྱུང་༔ ཐོབ་པ་གསུམ་གྱི་གཟེར་ཐེབས་སོ༔ དེ་ལས་བསྟན་དུ་མེད་དོ་སཱ་མཱ་ཡཱ༔ བསྟན་པ་གང་བབས་རིན་ཆེན་གྱིས༔ ལེགས་བྲིས་མཆན་ཁུང་དག་ཏུ་བཅང་༔ བཀུར་སྟི་སུས་བྱས་གྲོལ་བར་ངེས༔ འཇའ་འོད་སྒྲ་དང་ས་གཡོ་དང་༔ སད་སེར་མུ་གེ་གཟས་ཟིན་དུས༔ ཕྱོགས་བསྟུན་ལྕེ་ཡིས་འདི་བཀླགས་ན༔ སྟོང་གསུམ་སྤྲུལ་པའི་སངས་རྒྱས་ལ༔ ཡོན་ཕུལ་བ་བས་འདི་དོན་ཆེ༔ བསྟན་པ་ཐམས་ཅད་ཀྱི་རང་བབས་རང་བྱུང་བྱིན་བརླབས་ཀྱི་ཡི་གེ་འདི༔ རྒྱལ་པོ་ཛ་རི་ཞེས་བྱ་བའི་ཁབ་ཀྱི་ལྷོ༔ བྱ་རྒོད་སྤུངས་པའི་རི་ལ་སྟོན་པ་མྱ་ངན་ལས་འདའ་བའི་ཚུལ་བསྟན་པའི་ཚེ༔ དགའ་རབ་རྡོ་རྗེས་གདུང་བའི་སྨྲེ་སྔགས་བྱུང་བས༔ རིན་པོ་ཆེ་ལྔའི་ཡི་གེ་རང་བྱུང་བ་དགའ་རབ་རྡོ་རྗེའི་ཕྱག་གཡས་པའི་མཐིལ་དུ་བབས་པ༔ སངས་རྒྱས་ཀྱི་འདས་རྗེས་ཐ་མ་བསྟན་པ་ཐམས་ཅད་ཀྱི་བུ་གཅིག་པར་བཀོད་པའོ༔ སཱ་མཱ་ཡཱ༔ རྒྱ་རྒྱ་རྒྱ༔ ༔

སངས་རྒྱས་ཀྱི་འདས་རྗེས་གསུམ།

སངས་རྒྱས་ཀྱི་འདས་རྗེས་གསུམ་བཞུགས༔ ༼གསེར་ཡིག་ཅན༽

རྒྱ་གར་སྐད་དུ༔ བྷུདྡྷ་དྷེ་ཀ་ར་ཨེ་ཀ༔ བོད་སྐད་དུ༔ སངས་རྒྱས་ཀྱི་འདས་རྗེས་དང་པོ༔ ཨེ་ཨེ་ཨེ་མ་རིགས་ཀྱི་བུ༔ ལུས་དང་ངག་དང་ཡིད་ཀྱི་སྔོན་དུ་འགྲོ་བ་ལ་རྩལ་སྦྱང་བར་བྱའོ༔ རྣལ་དུ་དབབ་པའི་ཆོ་གས་སོར་གཞུག་པར་བྱའོ༔ དེ་ལྟར་བྱས་པས་སངས་རྒྱས་ཀྱི་མཛད་སྤྱོད་ལ་རེག་པའོ༔ ལུས་ནི་བཞུགས་སྟངས་ལས་མི་འདའ་བར་བྱའོ༔ ངག་ནི་སྨྲ་བའི་རྒྱུན་གཅད་པར་བྱའོ༔ སེམས་ནི་གཏད་པའི་འབེམ་དང་མི་འབྲལ་བར་བྱའོ༔ དེས་ནི་སངས་རྒྱས་ཀྱི་བདེན་པ་ལ་རེག་པའོ༔ ཨྠྀི༔ ༔ ༔ ཀྱེ་མ་ཀྱེ་མ་རིགས་ཀྱི་བུ༔ སྒོ་དང་ཡུལ་དང་རླུང་རིག་གི་གནད་བསྟུན་པར་བྱའོ༔ དེས་ནི་ཆོས་ཉིད་དངོས་ལ་རེག་པའོ༔ རིགས་ཀྱི་བུ་དེ་ལ་སྣང་བའི་རང་བཞིན་ཆོས་ཐམས་ཅད་དུ་འགྱུར་རོ༔ དེས་ནི་ཆོས་ཉིད་ལ་བྱན་ཚུད་པའོ༔ ཞེས་སུམ་ཅུ་རྩ་གསུམ་གྱི་གནས་སྨན་འཚོ་བྱེད་གཞོན་ནུའི་ལྡུམ་རར༔ རྡོ་རྗེ་འཆང་ཡོངས་སུ་མྱ་ངན་ལས་འདས་པའི་ཚུལ་བསྟན་པའི་ཚེ༔ སྤྲུལ་པ་པོ་དགའ་རབ་རྡོ་རྗེས་གདུང་བའི་སྨྲེ་སྔགས་བཏོན་པ༔ ཀྱེ་མ་ཀྱི་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པས་འོད་ཕུང་གི་དཀྱིལ་ནས་ཕྱག་གཡས་པའི་གྲུ་མོ་མན་ཆད་བསྟན་ནས་དགའ་རབ་རྡོ་རྗེའི་སྤྱི་བོ་དང་ལག་མཐིལ་དུ་རིན་པོ་ཆེ་ཤེལ་གྱི་ཟ་མ་ཏོག་སེན་གང་བ་གཅིག་བབས་ཏེ༔ དེ་ཞལ་ཕྱེ་བས་རིན་པོ་ཆེ་མཐིང་ག་ལ་བཻ་ཌཱུཪྱ་མཐིང་གའི་ཞུན་མས་བྲིས་པ་བབས་པས་དགའ་རབ་རྡོ་རྗེས་རྟོགས་པའི་གདེང་

རྙེད་དོ༔ འདས་རྗེས་དང་པོ་རྫོགས་སོ༔ ཨྠྀི༔ ༔ རྒྱ་གར་སྐད་དུ༔ བྷུདྡྷ་དྷེ་ཀ་ར་དྷུ་ཡེ༔ བོད་སྐད་དུ༔ སངས་རྒྱས་ཀྱི་ཞལ་ཆེམས་གཉིས་པ༔ ཨེ་མ་ཧོ༔ རིགས་ཀྱི་བུ༔ ལུས་རུ་ཤན་མ་ཕྱེད་པས་ཁམས་གསུམ་དུ་ལྡོག་པས་ན་ལུས་རུ་ཤན་འབྱེད་པ་ལ་མཁས་པར་བྱའོ༔ ངག་རུ་ཤན་མ་ཕྱེད་ན་ངག་ཁམས་གསུམ་དུ་ལྡོག་པར་འགྱུར་བས་ངག་རུ་ཤན་འབྱེད་པ་ལ་མཁས་པར་བྱའོ༔ སེམས་རུ་ཤན་མ་ཕྱེད་ན་སེམས་ཁམས་གསུམ་དུ་ལྡོག་པས་ན་སེམས་རུ་ཤན་འབྱེད་པ་ལ་མཁས་པར་བྱའོ༔ དེ་ནས་ལུས་རྣལ་དུ་མ་ཕབ་ན་ལུས་སོར་མི་ཆུད་དོ༔ ངག་རྣལ་དུ་མ་ཕབ་ན་ངག་སོར་མི་ཆུད་དོ༔ དེ་ནས་སེམས་རྣལ་དུ་མ་ཕབ་ན་སེམས་སོར་མི་ཆུད་དོ༔ ཨེ་མ་ཧོ༔ རིགས་ཀྱི་བུ༔ ལུས་ཡོངས་སུ་མྱ་ངན་ལས་འདའ་བར་འདོད་ན་ལུས་སྐུ་གསུམ་གྱི་བཞུགས་སྟངས་ལས་མི་འདའ་བར་བྱའོ༔ ངག་ཡོངས་སུ་མྱ་ངན་ལས་འདའ་བར་འདོད་ན་ངག་སྨྲ་བ་བཅད་པའི་འཁོར་ལོ་ལས་མི་འདའ་བར་བྱ་འོ༔ རིགས་ཀྱི་བུ་སེམས་ཡོངས་སུ་མྱ་ངན་འདའ་བར་འདོད་ན༔ ཡུལ་ནམ་མཁའ་སྟོང་པ་དང་མི་འདྲ་བར་བྱའོ༔ ཨྠྀི༔ ༔ དེ་ནི་སྐྱེ་བ་མེད་པའི་ཐབས་མཆོག་ཏུ་གསུངས་སོ༔ སྣང་བ་ཐམས་ཅད་ཆོས་ཉིད་དུ་འཆར་བར་འདོད་ན༔ མིག་སྐུ་གསུམ་གྱི་གཟིགས་སྟངས་ལས་མ་འདས་པར་གྱིས་ཤིག༔ དེས་ནི་སྣང་བ་གཟིགས་སྣང་ཐམས་ཅད་རང་སྣང་དུ་འཆར་བའི་གནད་དོ༔ ཨེ་མ་ཧོ༔ རིག་པ་ལ་བྱན་ཚུད་པར་འདོད་པའི་སྐྱེས་བུས་ཡུལ་སྟོང་པ་ལ་རིག་པ་སྟོང་པ་གཏད་པར་བྱའོ༔

དེས་ནི་ཡུལ་ཐམས་ཅད་ཆོས་ཀྱི་དབྱིངས་སུ་འདའ་བར་འགྱུར་རོ༔ ཨེ་མ་ཧོ༔ འགྱུ་བ་རང་སར་གྲོལ་བར་འདོད་ན་རླུང་རབ་ཏུ་དལ་བ་བརྟན་པར་བྱའོ༔ ཨེ་མ་ཧོ༔ དེས་ནི་ཁམས་གསུམ་འཁོར་ལོ་རྒྱུན་བཅད་པར་འགྱུར་བའི་མན་ངག་གོ༔ ཨེ་མ་ཧོ༔ དེ་ལྟར་སྣང་བ་བཞིའི་ཆོས་ཉིད་སྐྱེས་པ་ལས་འཁྲུལ་པའི་སྣང་བ་རྒྱུན་ཆད་པའོ༔ ཨེ་མ་ཧོ༔ རིགས་ཀྱི་བུ་མི་འགུལ་བ་གསུམ་ལ་གཞི་ཆོས༔ ཨྠྀི༔ ༔ སྡོད་པ་གསུམ་གྱིས་ཚད་ཟུངས་ཤིག༔ སོ་ཕག་ཤི་ཐཾ༔ ཐོབ་པ་གསུམ་གྱིས་གཟེར་ཐོག་ཅིག༔ ས་མ་ཡཱ༔ དེ་ལྟར་སུས་བྱེད་པ་ཁམས་གསུམ་དུ་ལྡོག་རེ་ཀན༔ དབུ་རྒྱ་འགར་བ་ལམ༔ ཞེས་དུར་ཁྲོད་ཆེན་པོ་མེ་རི་འབར་བར་སྤྲུལ་སྐུ་མྱ་ངན་ལས་འདས་པའི་ཚུལ་བསྟན་པའི་ཚེ༔ དགའ་རབ་རྡོ་རྗེ་བརྒྱལ་ཞིང་ས་ལ་འགྱེལ་ནས་གདུང་བའི་སྨྲེ་སྔགས་བཏོན་པ༔ ཀྱེ་མ་ཀྱེ་ཧུད་ཀྱི་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་པ་བརྒྱལ་སངས་ནས་བརྗོད་པས༔ ནམ་མཁའ་འོད་ཕུང་གི་དཀྱིལ་ནས་ཕྱག་གཡས་པའི་གྲུ་མོ་མན་ཆད་བསྟན་ནས༔ རིན་པོ་ཆེ་རབ་ཏུ་འོད་འབར་བ་ཁྱད་པར་གྱི་ཡི་གེ་བབས་པ་ཙམ་གྱིས་ཡུན་གྱི་སྒྲིབ་པ་མ་སྦྱངས་གནས་སུ་དག་གོ༔ མཁའ་འགྲོ་མའི་གནས་སུ་སྣང་བར་བྱས་སོ༔ སངས་རྒྱས་ཀྱི་འདས་རྗེས་གཉིས་པ་རྫོགས་སོ༔ ཨྠྀི༔ ༔ རྒྱ་གར་སྐད་དུ༔ བྷུདྡྷ་དྷེ་ཀ་ར་ཏྲི༔ བོད་སྐད་དུ༔ སངས་རྒྱས་ཀྱི་ཞལ་ཆེམས་གསུམ་པ༔ ཟག་པར་ཟད་པ་རང་ཟད་སྣང་བ་རང་སར་གྲོལ་བ་ལ་ཕྱག་འཚལ་ལོ༔ ཀྱེ་མ་ཀྱེ་མ་རིགས་ཀྱི་བུ༔ སྔོན་དུ་འགྲོ་བའི་གནད་

ལ་མཁས་ན་མཆོག་དངཐུན་མོང་གི་དགོས་པ་ལ་མཁས་པར་འགྱུར་རོ༔ དེ་ཡང་ལུས་ཀྱིས་བྱ་བྱེད་འཁོར་ལོ་བསྐོར༔ ངག་ནི་ཅ་ཅོའི་འཁོར་ལོ་བསྐོར༔ སེམས་ནི་འཕྲོ་འདུའི་འཁོར་ལོ་བསྐོར༔ དེ་ལྟར་བྱ་བྱེད་འཁོར་ལོ་ལས༔ འདས་པ་མེད་པའི་ཆོས་ཉིད་ལ༔ འཁོར་ལོ་ཞེས་ཀྱི་མིང་ནས་མེད༔ བར་ཆོད་སེལ་དང་ཞེན་པ་ལོག༔ སྡིག་པ་མ་ལུས་འདག་པར་ནི༔ ཐུན་མོང་གྱུར་པའི་དགོས་པ་འོ༔ མཆོག་ལ་ཁམས་གསུམ་མི་འཇུག་དང་༔ སོ་སོའི་སྐུ་རུ་གྲོལ་བ་དང་༔ སྐུ་གསུང་ཐུགས་སུ་འདས་པ་ཡིས༔ འདི་དུས་སྤྱོད་པར་བྱས་པ་འོ༔ དེ་ཡིས་ལུས་ཀྱི་འབྲེལ་ཆད་ནས༔ ཁམས་གསུམ་དག་ཏུ་ལྡོག་པ་མིན༔ ལུས་དང་ངག་དང་སེམས་ཉིད་ལ༔ རྣལ་དུ་ཕེབས་ལ་མཁས་པར་བྱ༔ དེས་ནི་ལུས་ངག་སོར་ཆུད་ནས༔ ཉམས་ལེན་ཉིད་ལ་བརྩོན་པར་འགྱུར༔ དེ་ལྟར་སྔོན་འགྲོ་རྫོགས་བྱས་ནས༔ དེ་དག་བློ་ཡིས་བོར་བྱས་ལ༔ ད་ནི་མངོན་སུམ་ཏིག་ལ་དབབ༔ ཅེས་པའོ༔ ཨེ་མ་ཧོ༔ རིགས་ཀྱི་བུ༔ ལུས་ཀྱི་གནད་དུ་ཆོས་ཀྱི་སྐུའི་བཞུགས་སྟངས་སེང་གེ་ལྟ་བུ་དང་༔ ལོངས་སྐུ་ནི་གླང་པོ་ཆེ་ལྟ་བུ་དང་༔ སྤྲུལ་པ་སྐུའི་བཞུགས་སྟངས་ནི་དྲང་སྲོང་ཙོག་པུའི་རྣམ་པ་ལྟ་བུའོ༔ དེ་ཉིད་ལས་མ་འདས་ན་སངས་རྒྱས་ཐམས་ཅད་ཀྱི་སྐུའི་ཀློང་དུ་མྱ་ངན་ལས་འདའ་བར་འགྱུར་རོ༔ ངག་ནི་བསླབ་པར་བྱ་བའི་རིམ་པ་དང་༔ གནས་དང་བརྟན་ཞིང་ལ་བཟླ་བ་ལས་མི་འདའ་བར་བྱའོ༔ དེ་ལྟར་བྱས་པས་སངས་རྒྱས་ཀྱི་གསུང་གི་ཀློང་དུ་མྱ་ངན་ལས་འདའ་བར་འགྱུར་རོ༔ ཨྠྀི༔ ༔ སྒོ་ནི་བཟློག་

ཕབ་ཟུར་གྱིས་ནི༔ གཟིགས་སྟངས་རྣམ་པ་གསུམ་དུ་གྲགས༔ ཆོས་སྐུ་ལོངས་སྐུ་སྤྲུལ་སྐུ་ཡི༔ གཟིགས་སྟངས་གསུམ་ལས་མི་འདའོ༔ ཡུལ་ནི་སྤྲིན་བྲལ་ནམ་མཁའ་ལ༔ རིག་པ་སྟོང་པ་འཆར་བ་འོ༔ རླུང་ནི་དལ་བ་བརྟེན་པ་ཡིས༔ འགྲོ་དྲུག་འཁྲུལ་པའི་རྒྱུན་ཆད་དོ༔ མངོན་སུམ་གནད་འདི་སུས་མཐོང་བ༔ ཁམས་གསུམ་ལྡོག་པ་མ་ཡིན་ནོ༔ ཨྠྀི༔ ༔ ཆོས་ཉིད་མངོན་སུམ་སྣང་བ་ཡིས༔ ཡིད་དཔྱོད་འཛིན་པའི་ལྟ་བ་ནུབ༔ ཉམས་སྣང་གོང་དུ་འཕེལ་བ་ཡིས༔ བར་དོའི་ཡེ་ཤེས་མངོན་དུ་བྱས༔ རིག་པ་ཚད་ཕེབས་སྣང་བ་ཡིས༔ ལོངས་སྤྱོད་རྫོགས་པའི་སྐུ་ངོས་ཟིན༔ ཆོས་ཉིད་ཟད་པའི་སྣང་བ་ཡིས༔ རྫོགས་ཆེན་བྱ་བྲལ་འབྲས་བུ་ཐོབ༔ འདི་ལྟར་བཞི་ལ་མཐར་ཕྱིན་ན༔ མྱང་འདས་གཞན་དུ་བཙལ་མི་དགོས༔ ཨྠྀི༔ ༔ མིག་དང་ལུས་དང་རིག་པ་ཉིད༔ འགུལ་བ་མེད་པར་གནད་ཟིན་ན༔ མངོན་སུམ་གནད་ལ་ཕེབས་པ་འོ༔ ལུས་དང་སྣང་བ་རླུང་ཉིད་ཀྱང་༔ བྱས་པ་མེད་པར་སྡོད་པ་འོ༔ ཆོས་ཉིད་དལ་བས་གྲུབ་པ་འོ༔ སྐྱེ་དང་འཇུག་དང་རླུང་སེམས་ལ༔ སུ་ཡིས་རང་དབང་ཐོབ་པའི་མི༔ སངས་རྒྱས་དགོངས་པའི་དྲོད་རྙེད་དོ༔ ཨྠྀི༔ ༔ བསྟན་པ་གང་ལ་དབང་བ་ཡི༔ ཁ་དོག་གིས་ནི་ལེགས་བྲིས་ནས༔ མཆན་ཁུང་གཡས་སུ་བཟུང་བྱས་ཏེ༔ རྟག་ཏུ་བཀུར་སྟི་སུས་བྱས་པ༔ འབད་པ་མེད་པར་གྲོལ་བར་ངེས༔ ཉི་ཟླ་གཟའ་ཡིས་ཟིན་པ་དང་༔ སྒྲ་དང་ས་གཡོས་མུ་གེའི་དུས༔ རྡོ་རྗེའི་ལྕེ་ཡིས་འདི་བཀླགས་ན༔ སྟོང་གསུམ་སྤྲུལ་པའི་སངས་རྒྱས་ལ༔ ཡོན་ཕུལ་བས་ནི་འདི་དོན་ཆེ༔ བསྟན་

པ་ཐམས་ཅད་ཀྱི་རྩ་བར་རང་བྱུང་གི་ཡི་གེ་ལས་བཀོད་པ་བྱིན་བརླབས་ཀྱི་བརྒྱུད་པའི་གནད༔ སུ་ལ་བབས་པ་འབད་པ་མེད་པར་གྲོལ་བ་ལ་ཐེ་ཚོམ་མེད་དོ༔ ལྷོ་ཕྱོགས་བདེ་ལྡན་ཡིད་འདྲེས་པ་བྱ་རྒོད་སྤུངས་པའི་རི་ལ་སྟོན་པ་མྱ་ངན་ལས་འདས་ཚུལ་བསྟན་པའི་ཚེ༔ སྤྲུལ་པ་པོ་དགའ་རབ་རྡོ་རྗེའི་ཕྱག་གཡས་པའི་མཐིལ་དུ་བབས་པ་སངས་རྒྱས་ཀྱི་འདས་རྗེས་གསུམ་པ་ཞལ་ཆེམས་སུ་བཀོད་པ་རང་བྱུང་བ་བསྟན་པ་ཐམས་ཅད་ཀྱི་བུ་གཅིག་པོ་རྫོགས་སོ༔ འདི་ཉིད་བཅངས་པ་ཙམ་གྱིས་ནི༔ སངས་རྒྱས་རྣམས་ཀྱི་དགོངས་པ་ཐོབ༔ རང་རིག་བྱིན་རླབས་རྒྱུད་བརྟེན་ནས༔ ངན་སོང་འཁོར་བ་དོང་སྤྲུག་གོ༔ འདི་ནི་བཤད་ཅིང་བསྟན་པ་མིན༔ རབ་ཏུ་གསང་ལ་ལུས་ལ་བརྟེན༔ དངོས་གྲུབ་ཀུན་གྱི་རྩ་བར་འབྱུང་༔ གྷུ་ཧྱ་ས་མ་ཡ༔ སོ་ཕག་ཤི་ཐཾ༔ རིན་པོ་ཆེ་བརྒྱ་རྩ་ནི་རྒྱུ་ལས་རང་བྱུང་བའོ༔ འཛམ་བུའི་གླིང་གཞན་མེད་པར་ཡིད་ཆེས་སོ༔ ཨྠྀི༔ ༔ ༼གསེར་ཡིན་ཅན༽

མན་ངག་མདོ་བྱང་བསྡུས་པའི་སྒྲོན་མ།

མན་ངག་མདོ་བྱང་བསྡུས་པའི་སྒྲོན་མ་བཞུགས་སོ༔

མཉམ་ཉིད་ཡེ་ཤེས་རྫོགས་ལ་ཕྱག་འཚལ་ལོ༔ དག་པའི་སྣང་བ་ཆེན་པོ་ནི༔ རྣལ་འབྱོར་དོན་ཆེན་ཉེར་མཚོན་ཏེ༔ འདི་ནི་ལུང་ཆེན་རྣམས་ཀྱི་དམ་པའོ༔ བདག་ཉིད་གཅིག་པུར་གནས་པའི་ཚེ༔ རི་དྭགས་ལྟ་བུར་ཤེས་པར་བྱ༔ དུར་ཁྲོད་དག་ཏུ་རྒྱུ་བའི་ཚེ༔ གླང་པོ་ལྟ་བུར་ཤེས་པར་བྱ༔ སྣང་བ་ཉམས་དང་ལྡན་པའི་ཚེ༔ རྒྱ་མཚོ་ལྟ་བུར་ཤེས་པར་བྱ༔ རིག་པ་ཚད་དུ་སྨིན་པའི་ཚེ༔ སྨྱོན་པ་ལྟ་བུར་ཤེས་པར་བྱ༔ རྣལ་འབྱོར་ཕུང་པོ་བོར་པའི་ཚེ༔ དུར་ཁྲོད་ལྟ་བུར་ཤེས་པར་བྱ༔ ཡེ་ཤེས་མ་བུ་ཕྲད་པའི་ཚེ༔ ཉི་ཟླ་ལྟ་བུར་ཤེས་པར་བྱ༔ ཤེས་པ་དྲན་མེད་ཡལ་བའི་ཚེ༔ ནམ་མཁའ་ལྟ་བུར་ཤེས་པར་བྱ༔ འདི་དག་ཤེས་པའི་རྣལ་འབྱོར་ནི༔ སྐྱེ་མེད་གདེང་ཆེན་ཁོང་དུ་ཚུད༔ སྣང་བ་རྣམས་ལ་ཕ་རོལ་ལོ༔ རྒྱུད་ཀྱི་ཁོང་སྙིང་བཅུ་བདུན་པོ༔ སྒོམ་ཁྲིགས་གཅིག་ཏུ་བསྡེབས་པ་ནི༔ ལོ་འདབ་རྒྱས་པའི་སྡོང་པོ་འདྲ༔ ཉམས་ལེན་ལག་ཁྲིད་བཅུ་དྲུག་ནི༔ རིག་པ་གཅིག་ལ་བསྡུས་པ་ནི༔ མུ་ཏིག་རྩར་ལ་བརྒྱུས་པ་འདྲ༔ དེབས་ཀྱི་མན་ངག་རྣམ་གཉིས་ཀྱིས༔ གཏད་པ་གཉིས་སུ་བསྟན་པ་ནི༔ བང་མཛོད་རྒྱས་པའི་ལྡེ་མིག་འདྲ༔ ངོ་མཚར་མན་ངག་རྣམ་བཞི་ནི༔ རྣལ་འབྱོར་གཅིག་ལ་ཚང་བ་ནི༔ མིག་གི་སྟེང་དུ་མཛུབ་བཞག་འདྲ༔ ཡ་མཚན་ཅན་གྱི་ཚིག་བཞི་ཡིས༔ སྐལ་ལྡན་སྙན་དུ་བསྩལ་བ་ནི༔ ལུག་རིད་རྣ་བར་ཁུ་བྱུག་འདྲ༔ མཐར་ཐུག་གསང་བའི་དོན་བཞི་ཡིས༔ འབྲས་བུ་གནད་དུ་ཕབ་པ་ནི༔ གནད་ནས་ཟིན་པའི་སྲོག་སྙིང་འདྲ༔ གསང་བའི་རྒྱུད་ཆེན་བཅུ་བདུན་པོ༔ རྣལ་འབྱོར་

གཅིག་གི་ཤེས་པ་ནི༔ ཕྱུག་པོའི་བང་མཛོད་སྒོ་ཕྱེ་འདྲ༔ དེ་རྣམས་དོན་ཏིག་བཅུ་བདུན་པོ༔ རྒྱུད་ཆེན་གཞུང་དང་སྦྱར་བ་ནི༔ གླང་ཆེན་སྣ་ནས་དཀྱུས་ཟིན་འདྲ༔ བཤད་པའི་མན་ངག་རྣམ་བཞི་ནི༔ སྐྱེས་བུའི་བློ་ལ་འདེབས་པ་ནི༔ རི་རྒྱལ་ཁ་ནས་རྦབ་གཏོང་འདྲ༔ ཁྱད་པར་མན་ངག་བཅུ་བདུན་གྱིས༔ གང་ཟག་གཅིག་གི་དབང་བྱས་པ༔ མུན་ཁུང་ནང་གི་སྒྲོན་མེ་འདྲ༔ ཡི་གེ་འཕྲུལ་གྱི་སྒྲོ་ཡིག་གིས༔ ཨཱ་ལི་ཀཱ་ལིའི་དོན་བསྡེབས་པ༔ ཀ་ལ་པིང་ཀའི་སྒྲ་བསྒྱུར་འདྲ༔ ཀ་དག་ལྷུན་གྲུབ་རྣམ་པ་གཉིས༔ གྲུབ་མཐའ་སྡེབས་སུ་བྱས་པ་ནི༔ བཙན་པོ་མཁར་དུ་ཞུགས་པ་འདྲ༔ སྨྲ་བྱེད་མཚོན་ཆ་རྣམ་པ་དྲུག༔ ཕ་རོལ་རྣམས་དང་སྨྲ་བ་ནི༔ ཏིལ་མར་ངར་བཏགས་རལ་གྲི་འདྲ༔ ཐིག་ལེ་ཕྱི་ནང་པྲ་ཁྲིད་གཉིས༔ གང་གིས་གོམས་པར་བྱས་པ་དེ༔ རྒྱལ་པོས་དམངས་ལ་དབང་བསྒྱུར་འདྲ༔ ཐུན་བཞི་དག་གི་མན་ངག་གིས༔ དེ་ཉིད་ལམ་དུ་སློང་པ་ནི༔ བྱ་བ་བཏང་པའི་སྐྱེས་བུ་འདྲ༔ བཞག་ཐབས་བཞི་ཡི་གདམས་པ་ཡིས༔ རྣལ་འབྱོར་རིག་པའི་གནས་བཙལ་བ༔ མཐོན་པོའི་རི་རྩེར་ཕྱིན་པ་འདྲ༔ ཞལ་ཆེམས་རྣམ་པ་ལྔ་རྣམས་ལ༔ འཆི་ཁར་ལམ་དུ་བྱེད་པ་ནི༔ ཐོག་ཆེན་ས་ལ་ལྟུང་བ་འདྲ༔ དེ་དག་འཛོམ་པའི་སྐྱེས་བུ་ཡིས༔ བྱ་བ་སྤངས་ནས་བལྟ་བ་ནི༔ མི་ཟད་གཏེར་དང་ཕྲད་པ་འདྲ༔ དེ་ཕྱིར་ཡི་གེ་འདི་དག་ནི༔ རྣལ་འབྱོར་པ་ཡིས་གསང་ཞིང་སྤྱད༔ རབ་ཏུ་དབེན་པའི་ས་ཕྱོགས་སུ༔ རི་དྭགས་དམན་པའི་ཚུལ་གྱིས་འདུག༔ འདུ་འཛི་སྤངས་པའི་ས་ཕྱོགས་སུ༔ ཐ་མལ་པ་ཡི་ཚུལ་གྱིས་འདུག༔

དགྲ་གཉེན་མེད་པའི་ས་ཕྱོགས་སུ༔ སྤྲང་པོ་ལྟ་བུའི་ཚུལ་གྱིས་འདུག༔ ཡུལ་དམིགས་མེད་པའི་ས་ཕྱོགས་སུ༔ ཅི་དགར་སྤྱོད་པའི་ཚུལ་གྱིས་འདུག༔ ཨེ་མ་ཧོ༔ གཞི་མཐོང་བ་ལ་རྩ་བ་མེད༔ ཆོས་ཉིད་མཐོང་ལ་སྒོམ་པ་མེད༔ རིག་པ་མཐོང་ལ་མན་ངག་མེད༔ སྣང་བ་མཐོང་ལ་ལྟ་བ་མེད༔ དོན་མཐོང་བ་ལ་སྙིང་རྗེ་མེད༔ སེམས་མཐོང་བ་ལ་སྤྱོད་པ་མེད༔ སྐྱེ་ཤི་མཐོང་ལ་དགེ་སྡིག་མེད༔ དངོས་པོ་མཐོང་ལ་སངས་རྒྱས་མེད༔ འཁྲུལ་པ་མཐོང་ལ་དམྱལ་བ་མེད༔ ང་རང་མཐོང་ལ་ཐམས་ཅད་མེད༔ ཉམས་སུ་ལེན་པ་གསང་བའི་དེབས༔ མན་ངག་ཀུན་གྱི་མདོ་བྱང་དུ༔ ཤྲཱི་སིང་ཧ་བདག་གིས་བཀོད༔ མན་ངག་གི་མདོ་བྱང་བསྡུས་པའི་སྒྲོན་མ་ཞེས་བྱ་བ་ཐམས་ཅད་ཀྱི་དོན་འགྲེལ་ཆེན་པོ་ཨི་ཏི༔ རྒྱ་རྒྱ་རྒྱ༔ སྔགས་ཀྱི་སྲུང་མ་ཨེ་ཀ་ཛ་ཏཱི་དང་༔ ཞྭའི་མགོན་པོ་དམ་ཚིག་གི་བདག་པོས་སྲུངས་ཤིག་གཏད་དོ༔ ལས་ཅན་ཅིག་དང་ཕྲད་པར་ཤོག༔ བདག་འདྲ་སྨྱོན་པ་ལྕེ་བཙུན་གྱིས༔ གཅིག་པུར་རི་ཁྲོད་བྱས་པས་ཉག་གཅིག་རྩ་བ་ཆོད༔ འདུ་འཛི་གཡོག་འཁོར་སྤངས་པས་སྣང་བ་གྲོགས་སུ་ཤར༔ མན་ངག་ནོར་ཕྱིར་མ་བཙོངས་བྱིན་རླབས་འོད་པོ་ཆེ༔ ཆོས་རྣམས་ཟད་སར་བསྐྱལ་བས་ལྟ་སྒོམ་གཉིས་དང་བྲལ༔ སྒྲ་བཞི་ཉམས་སུ་བླངས་པས་འབྱུང་བའི་དགྲས་མི་ཚུགས༔ མན་ངག་གཞུང་བཞིན་སྤྱད་པས་རྫུ་འཕྲུལ་སྣ་ཚོགས་གྲུབ༔ ད་ནི་གྲོལ་དང་མ་གྲོལ་གཉིས་སུ་མེད་དོ༔ ཨེ་མ་ཧོ༔ ༔ ་༼ཕྲ་ཡིག༽

རིགས་འཛིན་གྱི་འདས་རྗེས་བཞི་ཞར་བྱུང་དང་བཅས་པ།

རིགས་འཛིན་གྱི་འདས་རྗེས་བཞི་ཞར་བྱུང་དང་བཅས་པ་བཞུགས་སོ༔ གསེར་ཡིག་ཅན།

དགའ་རབ་རྡོ་རྗེའི་ཚིག་གསུམ་གནད་དུ་བརྡེག་པ་བཞུགས༔ ན་མོ་ཤྲཱི་གུ་རུ་ཡེ༔ རང་རིག་རྟོགས་པའི་གདེང་ལ་ཕྱག་འཚལ་ལོ༔ ཡིན་པ་གཞི་ཡི་ངོ་བོ་གནས་ཚུལ་གྲུབ་པ་མེད་པའི་རིག་པ་འདི༔ རང་སྣང་འཆར་ཚུལ་ཅིར་ཡང་སྣ་ཚོགས་སུ་སྣང་བ་མ་འགགས་པས༔ སྣང་ཞིང་སྲིད་པའི་ཆོས་ཀུན་ཀྱང་ཆོས་སྐུའི་ཞིང་དུ་ཤར༔ ཤར་བ་དེ་ཉིད་རང་གི་རིག་པ་ཉིད་ཀྱི་ཐོག་ཏུ་གྲོལ༔ དེ་དོན་བདེ་གཤེགས་ཀུན་གྱི་ཐུགས་གཉིས་སུ་མེད་པའི་ཡེ་ཤེས་ཀྱི་དགོངས་པ་ཐམས་ཅད་འདིར་འདུས་པ༔ འཇམ་དཔལ་བཤེས་གཉེན་བརྒྱལ་བ་བསླང་ཕྱིར་ཚིག་གསུམ་གནད་དུ་བརྡེག་པའི་མན་ངག་འདི་༔ འཁོར་འདས་གཉིས་ཀྱི་རྡོས་ཐག་གཉིས་ཀ་རང་ཡིན་པར་ཤེས་པས་བཅད་པའི་ཕྱིར༔ འཆི་ཁ་མའི་ཞལ་ཆེམས་ཤིན་ཏུ་དམ་པར་བཟུང་བར་བསྟན་པ་ནི་སྙིང་གི་དཀྱིལ་དུ་སྦོས༔ ཨ༔ སྐྱེ་མེད་དུ་ལ་བཟླ་བའོ༔ ཨྠྀི༔ ༔ རིག་པ་སྤྱི་བརྟོལ་དུ་བསྟན་པའི་མན་ངག་ནི༔ ངོ་རང་ཐོག་ཏུ་སྤྲད་པ་རིག་པ་ཉིད་རིག་པ་ཉིད་དུ་རང་ངོ་རྣམ་དག་ཏུ་བསྟན་པ་ཞེ་སྡང་ཉིད་ཞེ་སྡང་ཉིད་ཀྱིས་གྲོལ་བར་ངོ་སྤྲད་པའོ༔ དང་༔ ཐག་གཅིག་ཐོག་ཏུ་བཅད་པ་གཉིས་མེད་ཤེས་པའི་རིག་པ་དང་༔ གདེང་གྲོལ་ཐོག་ཏུ་བཅའ་དེ་ཕྱིར་ཕྱིར་རང་རིག་རང་གིས་གྲོལ་བའོ༔ བའོ༔ རང་ངོ་ཡིན་པ་ཐམས་ཅད་རང་སྣང་དུ་མ་གྲོལ་བ་གཅིག་ཀྱང་མེད་གཞན་ངོ་སྣང་ཚུལ་མ་རྟོགས་པ་ལ་རང་གཞན་གཉིས་སུ་བྱུང་གཉིས་འདྲེས་པ་རང་ཐོག་དུ་རང་གྲོལ་བའི་མན་ངག་གཅིག་རོལ་གཅིག་བཀལ་བ་མི་མཛེས་ཏེ་གཅིག་གིས་ཆོག་པའོ༔ འཕྲད་པའོ༔ ཨྠྀི༔ ༔ ཅིར་སྣང་རང་ཡིན་མ་ཡིན་པའི་ཆོས་ལོགས་ནས་མི་རྙེད་སྟོབས་རང་གི་དེས་ན་རིགས་མཐུན་གྱིས་རིགས་མཐུན་གྲོལ་ཏེ་གཉེན་པོ་གཞན་མེད་པའོ

རང་ཆེ༔ རང་རང་ཕྲད་པ་ནི་དཔེར་ན་སྐད་རིགས་མཐུན་པའི་མི་སྐད་མི་མཐུན་པའི་ཡུལ་གང་དུ་ཕྲད་ཀྱང་རང་དུ་ཤེས་པ་ལྟར་ཞེ་སྡང་དུ་ཤེས་པས་གྲོལ་པའོ༔ མ་ཐོག་ཏུ་མ་རང་ཕྲད་སྣང་བ་ཉིད་སྣང་བས་གྲོལ་ཏེ་དཔེར་ན་མར་ལ་མར་ཐིམ་པ་ལྟ་བུའོ༔ བུ་ཐོག་ཏུ་རང་ཕྲད༔ རིག་པ་ཉིད་རིག་པས་གྲོལ་ཏེ་ཆུ་ལ་ཆུ་ཐིམ་པ་ལྟ་བུའོ། །གཅིག་ཐོག་ཏུ་གཅིག་རང་ཕྲད་པའོ་རང་ངོ་རང་དུ་ཕྲད་པ་ངོ་བོ་བརྗོད་ལས་འདས་པ་དཔེར་ན་ནམ་མཁའ་ལ་ནམ་མཁའ་ཐིམ་པའམ་སྦྲུལ་གྱི་མདུད་གསུམ་དུས་གཅིག་ལ་གྲོལ་བ་ལྟ་བུའོ༔ རིག་པ་གཅིག་པུ་རང་དང་འབྲེལ་བ་དེ་ལྟར་ན་རང་གི་ངོ་བོ་ཤེས་ན་དུས་གཅིག་ལ་ཐམས་ཅད་འདུས་ཤིང་ངོ་བོ་གཅིག་ལས་མ་འདས་པའི་ཡེ་ཤེས་དཔེར་ན་ཡིད་མཐུན་པའི་ཕོ་མོ་དབེན་པར་ཕྲད་པ་ལྟ་བུའོ༔ རང་གཅིག་པུ་སྣ་ཚོགས་སུ་སྣང་ཡང་ཐ་དད་ཉིད་ཐ་དད་ཉིད་ཀྱིས་གྲོལ་བའི་ཡེ་ཤེས་སྤྱི་མདུད་གཅིག་བཅད་པས་དོ་ཐག་བརྒྱ་ཆད་པ་ལྟ་བུའོ་རང་དང་འབྲེལ་བ༔ གྲོལ་བ་གཅིག་པུ་རང་དང་འབྲེལ་བ་ནི་རང་སྣང་ཡིན་པས་གཞན་དུ་མི་རྙེད་པའི་ཡེ་ཤེས་ཏེ་ཡེ་ཤེས་ཉིད་དུའོ༔ དཔེར་ན་ལམ་བརྒྱ་སྟོང་གི་མཐའ་གྲོང་ཁྱེར་གཅིག་ལ་ཟུག་པ་ལྟ་བུའོ་འོ༔ རང་ཐོག་ཏུ་མཐར་སྣང་གི་ཐག་དེ་ལྟར་རང་གིས་རང་ངོ་ཤེས་པས་མ་རིག་པ་དང་གཉིས་སུ་མེད་པ་སྟེ་དཔེར་ན་མི་གཅིག་ལ་མིང་མང་པོ་ཡོད་པ་གང་ནས་བོས་ཀྱང་འོང་བ་དོན་གཅིག་ལས་མ་འདས་པ་ལྟ་བུའོ་ཆོད༔ གཅིག་ཐོག་ཏུ་རང་སྣང་གི་ཐག་ཆོད༔ གྲོལ་ཐོག་ཏུ་ཐེ་ཚོམ་གྱི་ཐག་ཆོད་རང་གིས་རང་གྲོལ་ཏེ་རིག་པས་རིག་པ་གྲོལ་བ་སྟེ་དེ་ལྟར་རང་ཡིན་པར་ངོ་ཤེས་པས་རྟོག་པ་ཐམས་ཅད་རང་སར་གྲོལ་བས་སྔར་འདྲིས་ཀྱི་མི་ཕྱིས་མཐོང་བ་ལྟ་བུའོ་པའོ༔

ཨྠྀི༔ ༔ རང་ལ་བྱན་ཚུད་པ་ཕྱུག་པོའི་བང་མཛོད་ལྟ་བུའི་གདིང་འགྱུ་བ་ཐམས་ཅད་རང་སར་གྲོལ་བ་དཔེར་ན་བང་མཛོད་ལ་ཅི་འདོད་པ་ལྟ་བུའི་༔ གཞན་ལ་བྱན་ཚུད་པ་འཁོར་ལོས་བསྒྱུར་བའི་རྒྱལ་པོ་ལྟ་བུའི་གདིང་རིག་པ་མངོན་སུམ་དུ་སྣང་བ་ལ་གཞན་མ་གྲུབ་པས་གླིང་བཞི་ལ་དབང་བསྒྱུར་བ་ལྟ་བུ༔ དེ་ཡང་འབྱུང་བ་ལ་དབང་བསྒྱུར་ནུས་པ་སྟེ་རྐྱེན་རྐྱེན་གྱིས་གྲོལ་བས་དབང་པོ་གཞན་ལ་རག་མ་ལུས་པའོ་༔ གྲོལ་ས་ལ་ཆོས་ཉིད་ཀ་དག་དྲི་མ་མེད་པ་ལ་རང་སར་གྲོལ་བ་ནམ་མཁའ་ལ་ནམ་མཁའ་ཐིམ་པའམ་མཁའ་ལ་སྤྲིན་དེངས་པ་ལྟ་བུའོ་བྱན་ཚུད་པ་མཁའ་ལ་མཁའ་ཐིམ་པ་ལྟ་བུའི་གདིང་ངོ་༔ ཨྠྀི༔ ༔ རང་ཐོག་ཏུ་རང་གྲོལ་རང་རང་གིས་གྲོལ་བ་རྡོ་བས་རྡོ་བ་བཅག་པ་ལྟ་བུ་དང་ལྕགས་ཀྱིས་ལྕགས་འཇོམས་པ་ལྟར་དྲི་མས་དྲི་མ་དག་པའོ༔ གཅིག་ཐོག་ཏུ་གཅིག་གྲོལ་བ་ནི་མེ་ལས་མེ་ལེན་པ་ཆུ་ལ་ཆུ་འཕོ་བ་ལྟ་བུ་མར་ལ་མར་བསྣན་པ་ལྟ་བུའོ༔ མ་བུ་གཉིས་སྦྱོར་རང་གི་མ་རང་ཡིན་པས་སྟོང་པས་སྟོང་པ་གྲོལ་བས་རིག་པ་སྣང་བ་ལ་ཐིམ་པའོ་བའོ༔ ཨྠྀི༔ ༔ རང་ངོ་ཤེས་པས་གཞི་དང་ངོ་ཕྲད་རང་གི་རང་སྣང་དུ་ཤེས་པ་དཔེ་མེ་ལོང་ནང་དུ་བཞིན་མཐོང་བ་ལྟ་བུའ་པའོ༔ དེའི་ཕྱིར་ན་ཡིད་ཆེས་པ་མ་དང་བུ་ཕྲད་པ་ལྟ་བུ་སྟེ་གྲོལ་ས་གཅིག་པུ་ཡིན་པར་ངོ་རང་གི་རང་ཐོག་ཏུ་གྲོལ་བས་སྣང་བ་སྟོང་པ་ལ་གསལ་བ་རིག་པར་ངོ་ཤེས་པའོ་ཤེས་པའོ༔ རང་གི་རང་གྲོལ་བར་ཤེས་པས་ཐོག་མ་འཁོར་བ་རང་གིས་ཤེས་པ་དེ་འདས་པ་ལ་འདས་པར་ཤེས་པ་མ་རིག་པ་རང་གྲོལ་བ་ཡིན་ནོ་རིག་པ་ཉིད་ལ་ཐག་བཅད་པའོ༔ དེའི་ཕྱིར་དཔེ་དངོས་དྲི་མས་དྲི་མ་འཁྲུ་བ་དང་༔ དོན་རང་ཡིན་པའི་ཕྱིར་རྣམ་རྟོག་ཉིད་ལ་རྣམ་རྟོག་སྟེ་གཉེན་པོ་གཞན་ལ་རག་མ་ལུས་པར་ཐག་བཅད་དོ༔ གཞི་ཉིད་ལས་ཆུ་ལ་ཆུ་བཞག་དང་མར་ལ་མར་བཞག་པ་ལྟ་བུ༔ གྲོལ་བས་གདིང་གང་ཡིན་ཏུ་བཅའ་བའོ༔ དེའི་ཕྱིར་སྦྲུལ་གྱི་མདུད་པ་ཉིད་སྦྲུལ་རང་གིས་གྲོལ་བ་ལྟ་བུ་སྟེ༔

གཞན་ལྟོས་ཀྱི་རིག་པ་ཚི་ཆད་པས་རང་གི་ཐོག་ཏུ་གྲོལ་བས་རིག་པ་རང་གནས༔ དངོས་གཞི་རང་ཐོག་ཏུ་གཞི་བཅའ་བའོ༔ ཨྠྀི༔ ༔ དགའ་རབ་རྡོ་རྗེ་ཡོངས་སུ་མྱ་ངན་ལས་འདའ་བའི་ཚུལ་བསྟན་པའི་ཚེ༔ འཇམ་དཔལ་བཤེས་གཉེན་བརྒྱལ་ཞིང་ས་ལ་འགྱེལ་ནས་ཀྱེ་མ་ཀྱི་ཧུད་ཅེས་སྒྲ་ཆེན་པོ་ཕྱུངས་པས༔ རོ་ལངས་བདེ་བ་འོད་ཀྱི་དཀྱིལ་ནས་ཕྱག་གཡས་པ་ཕྱུངས་ཏེ༔ འཇམ་དཔལ་བཤེས་གཉེན་བརྒྱལ་བ་སློང་བའི་དོན་དུ་གསང་བའི་ཞལ་ཆེམས་གང་ཟག་གཅིག་གྲོལ་བའི་ཚིག་གསུམ་གནད་དུ་བརྡེག་པ༔ ཕྱག་གཡས་པའི་མཐིལ་དུ་བཻཌཱུཪྱ་མཐིང་ཁ་ཞུན་མས་རང་ནན་ཏུ་བྲིས་པ་བབས་ཏེ༔ རིན་པོ་ཆེ་ཤེལ་གྱི་ཟ་མ་ཏོག་སེན་གང་པ་ཅིག་སྣོད་དུ་བབས་པས༔ འཇམ་དཔལ་བཤེས་གཉེན་བརྒྱལ་བ་ལས་གྲོལ་བར་གྱུར་ཅིང་༔ རྟོགས་པའི་གདེང་དང་ལྡན་པར་གྱུར་ཏོ༔ དེའི་ཕྱིར་ན་གཞན་ལ་གསང་བ་ཐུགས་ཀྱི་དཀྱིལ་འཁོར་དུ་སྦ་བར་བྱའོ༔ འཆི་ཁ་མའི་ཞལ་གདམས་ཚིག་གསུམ་རྒྱུད་ཐམས་ཅད་ཀྱི་བཅུད་ཕྱུངས་པ༔ ལྟ་བའི་དོན་གསེར་ལྟ་བུར་བསྟན་པ༔ དུར་ཁྲོད་ཆེན་པོ་བསིལ་བ་ཚལ་དུ་བབས་པ༔ ཆུ་བོ་དན་ཏིག་མགོར་སྣང་བར་བྱས་པའི་གདམས་ངག་དམ་པ༔ སེམས་ཅན་ཐམས་ཅད་དབུགས་འབྱིན་པར་བྱེད་པའི་ལམ༔ སངས་རྒྱས་ཀྱི་ཞིང་དུ་སྐད་ཅིག་ལ་གྲོལ་བར་བྱེད་པའི་མན་ངག་རྫོགས་སོ༔ ༔

མཁས་པ་བྱེ་མ་ལའི་ཞལ་ཆེམས།

མཁས་པ་བྱེ་མ་ལའི་ཞལ་ཆེམས་བཞུགས་སོ༔ ༼གསེར་ཡིག་ཅན༽ཐེམ་མེད༔

རང་རིག་གསལ་བའི་སྒྲོན་མ་ནི༔ རྟོགས་པའི་ཤེས་རབ་ཕྱག་བཙལ་ནས༔ སེམས་ཅན་སངས་རྒྱས་ས་ལ་འགོད༔ ཡུན་དུ་བསགས་པའི་སྒྲིབ་པ་འཐུག་པོ་ཡང་༔ ཚིག་གསུམ་གནད་དུ་བརྡེག་པས་ཤེལ་སྒོང་ཕྱིས་པ་འདྲ༔ སྐྱེ་མེད་ཀ་དག་བསྒྲུབ་པའི་མཐའ༔ སྐུ་གསུམ་ལྷུན་གྲུབ་འབྲས་བུའི་ལམ༔ དགོངས་པ་ཉག་གཅིག་སྒྲོན་མར་གསལ༔ དབྱིངས་རིག་རྣམ་པར་དག་པའི་སྒྲོན་མ་ཡིས༔ ལྟ་བ་གསལ་བྱེད་སྒྲོན་མ་བསྟན༔ སྡུད་པ་ལས་གསལ་བྱེད་སྒྲོན་མ་ཆོས་མཆོག་སྨྲ་བ་མི་འཁྲུགས་ཡིན༔ མཚན་བརྗོད་ལས་འགྲོ་བའི་མར་མེ་ཡེ་ཤེས་སྒྲོན༔ ཞེས་པའོ༔ ལྟ་བ་གསལ་བྱེད་དབང་པོའི་སྒོ་རུ་ཤར༔ ཞེས་པའོ༔ སྟོང་གསལ་ཐིག་ལེའི་སྒྲོན་མ་ཡིས༔ འཁྲུལ་སྣང་རྒྱ་ཡིས་འདེབས་པར་བསྟན༔ མཚན་བརྗོད་ལས་ཡེ་ཤེས་སྣང་བ་ལམ་མེ་བ༔ ཞེས་པའོ༔ ཤེས་རབ་རང་བྱུང་སྒྲོན་མ་ཡིས༔ རྟོག་པ་གདེང་དུ་ཚུད་པར་བསྟན༔ ཤེས་རབ་ཆེན་པོས་སྐད་ཅིག་ལ༔ ཆོས་ཀུན་ཁོང་དུ་ཆུད་པ་པོ༔ རྒྱང་ཞགས་ཆུ་ཡི་སྒྲོན་མ་ཡིས༔ རིག་པ་ལན་གསུམ་གནད་དུ་གཟུང་༔ སྣང་དང་སྟོང་དང་གསལ་དང་སྒྲོན་མ་ཆོས་ཀྱི་མཆོག༔ ཅེས་སོ༔ རིག་པའི་ལམ་གནས་སེམས་དང་ཡེ་ཤེས་རིག་པའི་ངོ་བོ་ངེས་ཚིག་གནས་ལ་འཆར་སྒོ་ལས་དེས་ཡུལ་ཆོས་འབྲས་བུ་ཡོན་ཏན་ཕྱོགས་ཚད་དབྱེ་བའི་དུས་སེམས་ཀྱིས་ཚེས་བཅོ་ལྔ་ཆོས་སུ་དབྱེ་བ་འོ་དབྱེ༔ ངོ་བོ་གནས་དང་ལམ་དང་སྒོ༔ སྐྱོན་དང་ཡོན་ཏན་སྣང་ཚུལ་གྱིས༔ དོན་གསུམ་ཐེ་ཚོམ་མེད་

དཔེ་དོན་རྟོགས༔ པའི་བློ༔ ཞེས་འབྲས་བུའི་གསང་ལམ་མེ་ལོང་ལྟ་བུའི་ཡེ་ཤེས་བསྐལ་པ་གསུམ་གཙུག་གི་རྒྱུད་ལས་ཀུན་གཞི་ཆོས་སྐུར་དབྱེ༔ ཀུན་གཞི་ཀུན་གྱི་གཞི་སྣ་ཚོགས་བསགས་པའི་ཀུན་གཞི་ཡིན་ཀྱང་༔ རྣམ་པར་བྱང་བའི་རྟེན་མ་ཡིན༔ ཞེས་སོ༔ ཡེ་ཤེས་མཐོང་ལམ་འབྱུང་བའི་དྭངས་སྙིགས་དབྱེ༔ རིག་པ་ཆོས་ཡིན་གྱི་གཉིས་མི་གནས་པར་ཤར་འཁྲུལ་སྣང་འཁྲུལ་བའི་སྣང་བ་དང་དག་པའི་སྣང་བ་དང་ཆོས་ཉིད་ཀྱི་སྣང་བ་སྣང་བ་གསུམ་སྦྱོར་རང་འབྱུང་ས་ལ་སྦྱོར་དག་སྣང་ཕྱེད་པས་ལམ་རྟགས་ཚད་ཀྱང་ཟིན༔ ཞེས་སོ༔ དབྱེ་བ་གསུམ་གྱི་རིག་པ་རྐྱེན་དང་རྐྱེན་མེད་ཀྱི་ཤེས་པ་རང་དག་ཕྲོལ༔ རིག་པའི་འཆར་སྒོ་མིག་གི་དབང་པོས་རིག་པ་གཅེར་ཐོན་པ༔ ཆོས་སྐུ་རྐྱེན་དག་པ་ཡིན་པས་རྐྱེན་མ་འཁྲུལ་ན་རིག་པ་རྟོག་མེད་ཟང་ཐལ་ཆོས་ཉིད་ཆོས་སྐུ་སྤྲོས་བྲལ་ཟང་ཐལ་དེ་བཞིན་ཉིད་ཀྱི་དོན༔ འབུམ་ལས་མིག་གིས་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ༔ ཞེས་པའོ༔ དེ་ཀ་ན་བྱེད་པ་མེད་པ་རང་བྱུང་གི་ཡེ་ཤེས་ཆེན་པོ་རང་ཤར་བས༔ ་མཚན་བརྗོད་ལས༔ ཡེ་ཤེས་སྣང་བ་ལམ་མེ་བ༔ ཞེས་པས་སོ༔ དེ་ཀ་མིག་ནས་ཕར་རིག་པ་དངོས་སུ་ཤར་བ་སེམས་ཅན་ཀུན་གྱི་སྣ་འཁྲིད་པར་ཤེས་པས༔ འགྲོ་བའི་མར་མེ་ཡེ་ཤེས་སྒྲོན༔ དེ་ཀ་མིག་ན་ཕར་མཁྱེན་པ་མ་འགགས་པར་ཤར་བས༔ ཡེ་ཤེས་མིག་གཅིག་དྲི་མ་གསུམ་བྲལ་དྲི་མ་མེད༔ ཅེས་པའོ༔ མིག་གི་དབང་པོ་མཐོང་བ་མ་འགགས་པར་རྟོག་མེད་ཀྱི་ཡེ་ཤེས་རང་གསལ་བ་ན༔ རིག་པ་དབང་པོའི་མངོན་སུམ་བསྟན་པ་སྟེ༔ མངོན་སུམ་མཐོང་བའི་མིག་ཅེས་དེ་ལ་བྱ༔ དེ་ཀ་ན་སངས་རྒྱས་ཀྱི་ཐུགས་ཡང་

དག་པའི་ཡེ་ཤེས་ཡིན་པས༔ སངས་རྒྱས་ཀུན་གྱི་ཁྱུང་རོལ་པ་ལས་ཐུགས་མཆོག་ནི༔ འགྲོ་བ་ཀུན་གྱི་སྤྱན་ལ་ཤར༔ ཞེས་པའོ༔ དེ་ཀ་ན་སེམས་ཅན་ཀུན་གྱི་སྣ་འཁྲིད་པར་ཤར་བས༔ སྡུད་པ་ལས་རིག་པ་ཁྱིམ་དུ་མི་གནས་ལམ་ལ་མཁས་པར་འགྱུར༔ ཞེས་པའོ༔ མི་གནས་པར་ཤར་བའི་རིག་པ་རང་ངོ་མ་ཤེས་ན་མ་རིག་པ་དེ་ལ་ཟེར་དམིགས་བུ་མེད་པས་རིག་པའང་ངོ་མ་ཤེས་ན་རྒྱུ་འཁོར་བ་ལས་མི་ཐར་བྱང་ཆུབ་རེག་པར་ནུས་མ་ཡིན༔ ཞེས་པའོ༔ མིག་ལྟ་བར་མ་རྟོགས་པའི་སེམས་ཅན་ཐམས་ཅད་ངོ་མ་ཤེས་ན་༔ སྡུད་པ་ལས་དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས༔ ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར༔ ཞེས་དང་༔ མ་རིག་འཁྲུལ་འཁོར་འདི་ལ་ཟད་མེད་འཕེལ་བ་མེད༔ ཅེས་སོ༔ ཡིད་དཔྱོད་ཀྱི་སྤྱི་འཇལ་གྱི་རྣམ་པ་སེམས་གཏན་ལ་འབེབས་པ་ནི༔ འདོངས་པ་ནམ་མཁའ་ནམ་མཁའ་ཆེ་ལས་སྙེག་པ་འདྲ༔ ཞེས་ཉམས་སུ་མྱོང་པའོ༔ སྐུ་གསུམ་རང་གི་སྣ་ཁྲིད་པར་འཆར་བ་ནི༔ མིག་གི་དབང་པོ་མཐོང་བ་བློ་ཡུལ་དུ་བྱ་བ་ལས་དོན་རང་གི་མཚན་ཉིད་དུ༔ མ་འགགས་པ༔ རིག་པ་ཆོས་ཀྱི་སྐུའོ༔ མཐོང་པ་ངེས་པར་མཁྱེན་པ་ཤེས་རབ༔ ལོངས་སྤྱོད་རྫོགས་པའི་སྐུའོ༔ མིག་གི་དེ་ཁོ་ན་ཉིད་སྙིང་པོ་ཡེ་ཤེས་ཀྱི་ལུས་ཅན་ནི་སྤྲུལ་པའི་སྐུ་སྟེ༔ སྐུ་གསུམ་འདུ་འབྲལ་མེད་པར་ཆོས་སྐུ་རང་གི་སྣ་ཁྲིད་པར་ཤར་བས༔ མཚན་བརྗོད་ལས་མཆོག་གི་དང་པོ་སྐུ་གསུམ་འཆང་༔ ཞེས་པའོ༔ དེ་དཔེ་ཤེལ་དོན་རྟགས་གསུམ་གྱི་ཡེ་ཤེས་ཀྱི་གཏན་ལ་ཕེབས་པས༔ དོན་གསུམ་ངོ་ཤེས་ཡིད་ཆེས་ཐག་ཆོད་པ་ཐེ་ཚོམ་མེད་པའི་བློ༔ ཞེས་

པའོ༔ དོན་གྱི་ཡེ་ཤེས་ཆོས་སྐུ་ཟང་ཐལ་རྟོག་མེད་ངོ་ཤེས་པས༔ ཀུན་དོན་ཡོན་ཏན་གསུམ་འགྲོ་བ་ཀུན་གྱི་སྙིང་པོ་ཡིན་གྱི་བདག༔ ཅེས་དོན་གསུམ་རིག་པའོ༔ ཕུང་པོ་ལྔ་ནི་ནང་དུ་རིག་པ་ངོས་གཟུང་བ་ནི༔ མིག་མ་འགུལ་བར་ཆོས་སྐུ་ཀ་དག་སྤྲོས་བྲལ་ཡིན་ནམ་མཁའ་སྤྲིན་བྲལ་གྱི་ཀློང་དུ་གཏད་པས༔ དབྱིངས་རྣམ་པར་དག་པའི་ཡེ་ཤེས་ཀྱི་སྤྱན་རྣམ་པར་དག་པ་སྒྲོན་མར་གསལ་ཏེ༔ རྡོ་རྗེ་ལུ་གུ་རྒྱུད་ཀྱི་སྣང་བའི་ཉམས་གོང་དུ་འཕེལ་བ་སྐུ༔ ཡེ་ཤེས་ཟང་ཐལ་ཆེན་པོའི་དགོངས་པ་སྟེ༔ ཅོག་བཞག་ཆེན་པོ་བཞིའི་ཡི་གེ་མེད་པར་ཤེས་པར་བྱ་ངང་ལ་བཞག་གོ༔ རིག་པ་ཚད་དངོས་མེད་ཀྱིརིག་པ་དངོས་ལྟར་སྣང་བ་ལ་ཕེབས་ཤིང་མངོན་སུམ་གྱིས་སྣང་བའོ༔ རིག་པ་ལམ་རྟགས་ཉམས་སྐྱེ་ལུགས་ཀྱི་སྣང་བ་ནི༔ འཆར་སྒོ་མིག་གི་འབྲས་བུ་མན་ཤེལ་གསལ་བྱེད་ཀྱི་མེ་ལོང་གོང་མི་དྲག་མནན་སྣང་བ་འཆར་ལུགས་པས༔ ཐུགས་རྗེ་འོད་ཟེར་གྱི་སྣང་བ་ཤར་ཏེ་འགྲེང་བུ་དང་ཕྱེད་ཉལ་ཟླུམ་འཁྱིལ་ཐིག་ལེ་དང་ཞིང་ཁམས་ཐིག་ཕྲན་ལོངས་སྐུ་དང་རིགས་དྲུག་སྤྲུལ་སྐུའི་སྣང་བ་འཆར་རོ༔ སྤྱན་ལྔ་ཡང་རིམ་པས་ཉམས་སུ་བླངས་པས་འཆར་རོ༔ སྤྱན་ལྔ་ཆགས་པ་མེད་པར་འཆང༔ ཞེས་པའོ༔ སྐྱེ་མེད་ཀྱི་དབྱིངས་དང་རིག་པ་དབྱེར་མི་ཕྱེད་ཀློང་དུ་འགག་མེད་ཀྱི་རིག་པ་རང་གྲོལ་བས་ཀ་དག་ཆེན་པོའི་བདག་ཉིད་ཆོས་རྣམས་ཐམས་ཅད་ཟད་སར་སྐྱེལ་བའོ༔ ངོ་བོ་སྤྲོས་བྲལ་ཀ་དག་རང་བཞིན་ལྷུན་གྲུབ་རྒྱ་མ་ཆད་ཐུན་མོང་མ་ཡིན་པའི་གཉུག་མ་ལ་ལྷུན་གྲུབ་གྱི་རོལ་པ་འགག་མེད་པའོ༔ མཐའ་བྲལ་ཕྱོགས་རིས་མེད་པ་ལྟ་བའི་གདིང་༔ མཐའ་བརྒྱདདང་བྲལ་བ་དམིགས་པ་གཏང་བཞག་མེད་པ་

ཞེ་འདོད་ཉམ་ང་མེད་པ་གླང་པོ་ཆེ་ལྟ་བུ་སྤྱོད་པའི་གདིང་༔ སྤངས་ཐོབ་རེ་དོགས་མེད་པ་འབྲས་བུའི་གདིང་༔ ལམ་གསུམ་གདིང་བཞི་གནད་ཀྱི་མན་ངག་ཡིན༔ ལུང་རྒྱལ་བའི་སྒྲ་ཚད་བསྟན་བཅོས་ལུང་རིག་གིས་དབབ་ཏུ་མེད་དང་རིག་པ་མན་ངག་གསུམ༔ ཡིད་ཆེས་བླ་མའི་གདམས་ངག་ལས་གདམས་པ་གནད་ལ་ཕོབ༔ གོལ་སར་ཡང་དག་པའི་ལྟ་བ་མི་ཐོབ་ལྟུང་པས་ལྟ་སྒོམ་ཤེས་པར་བྱོས༔ སྣ་ཚོགས་མུ་སྟེགས་བློ་གཟུང་གི་ལྟ་བ་ཨ་ནུ་མན་ཆད་བྱ་བྱེད་འབད་རྩོལ་གྱི་གོལ་ས་ཡིན༔ ལྷུན་གྲུབ་ཁྱབ་ཆེ་ལ་དོན་ཕྱལ་པ་མ་རིག་ལྷུན་གྱིས་གྲུབ་པས་སྟོང་རྫོང་འཁྲུལ་པའི་གོལ་ས་ཡིན༔ མཐའ་བྲལ་བརྗོད་མེད་སྟོང་པའི་ཁས་མི་ལེན་པས་ཆད་པའི་མཐར་ལྷུང་ལ་བཟླ་སྟེ༔ ཆད་པ་མཐའ་ཟད་ལྟ་བ་ཡིན༔ སྒྱུ་འཕྲུལ་སྙིང་གི་དཀྱིལ་ན་འོད་དང་འོད་ཀྱི་གོང་བུར་ཡོད་ཟེར་བ་གང་ཟག་གི་བདག་ཏུ་འགྲོ་འོད་གསལ་བདག་འཛིན་པ༔ རྟག་པར་ལྟ་དང་མཚུངས་པ་སྟེ༔ དེ་དག་ལྟ་བའི་གོལ་སར་ཤེས་པར་གྱིས༔ སྟོང་པ་ཧད་པོའི་ཤིན་ཏུ་སྤྱད་ནས་སྟོང་པ་ལྟ་སྒོམ་དང་༔ མི་རྟོག་མི་རེ་བ་ལྟེངས་པོའི་སེམས་འཛིན་དང་༔ བཏང་སྙོམས་རྟོག་སྒོམ་ལྟེངས་པོའི་མུན་སྒོམ་དང་༔ མ་ཚོར་ཉན་ཐོས་ཡིད་བྱེད་འགོག་པ་དང་༔ བདེ་བ་སྐྱེ་མེད་བདེ་སྟོང་རྩོལ་བཅས་ལུས་སྦྱངས་དང་༔ ཡིད་འགྱུ་གཅོད་པའི་རྩོལ་སྒྲུབ་བྱས་ཆོས་ཡིན་པས་དབུགས་འཛིན་རླུང་སྒོམ་རྣམས༔ འདི་རྣམས་བསྒོམས་ཀྱང་སངས་མི་རྒྱའོ་སྒོམ་པའི་གོལ་སར་ཤེས་པར་གྱིས༔ བླང་དོར་བདག་ཏུ་གཅིག་སྤང་གཅིག་བསྒྲུབ་པ་རྟོག་པའི་སྤྱོད་པ་དང་༔ རྩོལ་སྒྲུབ་དགེ་སྦྱོང་ངམ་ཚུལ་འཆོས་བྱེད་པའི་སྤྱོད་པ་དང་༔ བརྟུལ་ཞུགས་ཅི་དགའ་དགའ་བྱེད་པ་འི་སྨྱོན་པར་བྱེད་པའི་སྤྱོད་པ་དང་༔

འདི་རྣམས་རང་བཞིན་བརྟུལ་ཞུགས་མེད་པ་སྤྱོད་པའི་གོལ་སར་ཤེས་པར་གྱིས༔ རྒྱུ་རྐྱེན་ཟད་པའི་ཆད་པ་ཕྱོགས་མཚམས་ཀྱི་གོལ་ས་སྟོང་འཇམ་དང་༔ དུ་མ་རྫོགས་པ་ཆེན་པོ་ཉག་ཅིག་ཡིན་ཟེར་བ་དེའི་རིག་བྱེད་གསར་པར་སྨྲ་བའི་གོལ་སའོ་རོ་གཅིག་ཐིག་ལེ་ཆེན་པོའི་ངང་གྲོལ་དང༔ སྐུ་གསུམ་ལྷུན་གྲུབ་འབྲས་བུ་མིན་སྐྱེ་མཆེད་མུ་བཞིའི་འབྲས་བུའོ་ལམ་སྣང་འདོད་པ་རྣམས༔ འབྲས་བུ་རེ་དོགས་ཀྱི་ཐོབ་རྒྱུ་ཡོད་ཟེར་བ་གོལ་ས་ཡིན༔ སྣང་ལ་ལྷའིདེ་ཡང་མ་གྲུབ་སྟེ་སྟོང་ལ་ངོ་བ་ོཀ་དག་མཐའ་གྲོལ་གྱི་ལྟ་བ་རང་བཞིན་མེད་པ་ཆོས་ཉིད་ནམ་མཁའ་ལྟ་བའི་མཆོག༔ གསལ་ལ་རྟོག་པ་མེད་པ་ངོ་བོ་ཀ་དག་སྟོང་པ་ལ་ཕྱོགས་མ་ཆད་མཁྱེན་པ་ལ་མི་སྤྱོད་རང་ངོ་ལ་མི་འགགས་ཐིམ་པ་ལ་མི་རྨུགས་འབྲས་བུའི་དགོངས་པ་ཐམས་ཅད་དབྱེར་མི་ཕྱེད་པའོ་མཆོག༔ ཅིར་སྣང་བཀག་པ་མེད་པས་ངོ་བོ་སྟོང་གསལ་ཆེན་པོ་ཕྱོགས་གར་ཡང་མ་ལྷུང་མཚན་མ་རང་སར་གྲོལ་ལོ་རང་བཞིན་རྒྱ་མ་ཆད་དེ་སྤྱོད་པའི་མཆོག༔ མཐོང་རྟོག་སྒྱུ་མའི་རང་བཞིན་མེད་པའི་ཡིན་པས་ཅི་རྣམ་པར་རྟོག་པ་བློ་ཡིན་པས་ཅིར་བསམ༔ རྒྱུ་མེད་པ་བསམ་པ་ཀུན་བརྗོད་པ་དང་བྲལ་བ་སྤངས་ཡེ་ཤེས་མེ་ཆེན་གཡོ༔ དེའི་ངང་ལས་རང་བཞིན་མ་བསྐྱོད་ལྷན་ནེ་ཞོག༔ ལྷན་ནེ་ལྷང་ངེ་ཚོགས་དྲུགལྷུག་པ་དབང་པོ་རྒྱ་ཡན་ཁོག་ཐོང་ཐོང་ལ་གྲོང་ཆོད་ལ་ཐོང་བཞག་ན་མཉམ་བཞག་ཆེན་པོ་ཡིན་ཏེ་དོན་དེ་སྒོམ་པའི་མཆོག༔ དམིག་གཏད་མེད་པ་རྣམས་རྣལ་མ་རང་སོ་གཉུག་མ་མཆོག་གཞི་གདེང་བཞི་ཁྱེར་ན་གྲུབ་མཐའ་ངན་པའི་ལྟ་བ་ཆོད༔ ཕྱིན་བསྒྲོད་མེད་པར་སླེབས་པས་བྱང་ཆུབ་སེམས་ཀྱི་སྒྲོན་མ་ངོས་ཟིན་ན་ཀུན་ཏུ་འོད་ཀྱི་ས་ས་བཅུ་གཅིག་པ་ནོན༔ རྐང་མེད་མཁའ་སྒྲོན་མ་རྣམ་པར་དག་པ་བ་

ལ་འགྲོ་ན་ལྟ་བའི་རྒྱབ་ཤ་ནམ་མཁའ་རྣམ་པར་དག་པའི་ནང་དུ་ཆོད༔ གྲོགས་མེད་གཅིག་པུར་འདུག་ན་སྒོམ་པའི་རྒྱབ་ཤ་རིག་པ་ཐིག་ལེ་ཉག་གཅིག་ལ་བར་མཚམས་མེད་ཆོད༔ ལྟ་མེད་སྐུ་ལ་བལྟས་པས་འདིའི་ཕྱི་ནང་འདི་ཡིན་བྱ་བ་མེད་འབྲས་བུའི་རྒྱབ་ཤ་ཆོད༔ བྱེ་མ་ལ་བདག་ནི་ཐོས་ཆུང་བློ་ཞེན་མ་ཡིན་ཏེ༔ སྒྲ་ཚད་བསྟན་བཅོས་གྲུབ་མཐའ་སོགས༔ སྡེ་སྣོད་གསུམ་གྱི་འདུལ་བ་མདོ་སྡེ་མངོན་པ་དོན་གོ་ལོངས༔ རྒྱུད་སྡེ་བཞི་ཡི་བྱ་བའི་སྤྱོད་བའི་རྣལ་འབྱོར་བླ་ན་མེད་པའི་རྒྱུད་དོ་ཁོང་དོན་ཤིག༔ འབུམ་ཚོ་དྲུག་རྣམས་བཞུགས་པའི་ཨ་ཏི་ལ༔ བདག་གིས་དགོངས་པ་མ་ལོན་གཅིག་ཀྱང་མེད༔ ཁྱད་པར་སེམས་སྡེ་རྩ་གཅིག་དང་༔ ཀློང་སྡེ་ཉི་ཤུ་རྩ་གཅིག་དང་༔ དེ་རྣམས་ནང་ན་ཟབ་པ་མན་ངག་སྡེ༔ དེ་དག་མན་ངག་སྙིང་བཅུད་བདག་གིས་ཤེས༔ དེ་རྣམས་ནང་ན་མར་གྱི་ཡང་ཞུན་འདྲ་བ་ནི༔ རྫོགས་པ་ཆེན་པོ་གསེར་གྱི་ཉི་མ་གསང་བ་བླ་ན་མེད་པའི་སྐོར་རབ་ཏུ་སྣང་བྱེད་ཐིག་ལེ་གསང་བའི་མཆོག༔ རྒྱུད་སྡེ་བཅོ་བརྒྱད་ཏི་ཀ་ས་གཅོད་བཅས༔ བརྒྱ་དང་བཅུ་དགུའི་ཟངས་ཡིག་གཡུ་ཡིག་དུང་ཡིག་ལ་སོགས་པ་མན་ངག་སྡེ་དང་བཅས༔ དེ་ཡི་ནང་ནས་ཟབ་པའི་མན་ངག་ཞལ་ཐེམས་བརྒྱད་པོ་སངས་རྒྱས་ལ་གསུམ་རིག་འཛིན་ལ་ལྔ་འདི༔ དུས་གསུམ་གྱི་སངས་རྒྱས་སྟོང་གི་དགོངས་བཅུད་དྲིལ་ནས་ནི༔ སངས་རྒྱས་པ་ལ་དགོས་པའི་བསྟན་པའི་བུ་གཅིག་བསྟན་པའི་བཙས་སུ་བཞག༔ བདག་ནི་སྐྱེ་བ་ལྔ་བརྒྱའི་ལུས་བླངས་ཤེསརིག་པའི་གནས་བཅོ་བརྒྱད་མཁྱེན་པའོ༔ རིགས་འཛིན་ལྔ་ནི་རིམ་གྱིས་ཐོབ༔ ཆོས་ཉིད་ཟད་སར་སྐྱོལ་ནས་ལྷག་མེད་གྲོལ༔ སེམས་ཅན་དོན་ལ་དགོངས་ནས་འཕོ་བ་ཆེན་པོའི་སྐུ༔

སངས་རྒྱས་སྟོང་གི་བསྟན་པ་མ་ཞིག་བར༔ སེམས་ཅན་སངས་རྒྱས་སར་བཀོད་བདག་གིས་སྤྱོད་༔ ད་ལྟར་བདག་ནི་རྩེ་ལྔ་དག་ན་ཕྱིན༔ གང་ཟག་ལས་དག་སེང་གེ་དབང་ཕྱུག་ཁྱོད༔ རྒྱུ་ནི་རིན་ཆེན་སྣ་ལྔའི་བྱང་བུ་ལ༔ རིན་ཆེན་སྣ་ལྔས་ཡིག་བྲིས་པོད་ཆུང་གསུམ༔ མཆིམས་ཕུའི་དགེ་གོང་བྲག་ལ་ལྕགས་ཀྱི་གའུར་གཏིམས་ནས་ཡོད༔ བསྟན་པའི་བུ་གཅིག་ཞལ་ཐེམས་གདམས་པ་འདི༔ ཁྱོད་ཀྱི་སྙིང་ལ་ཕུར་ལ་ཉམས་སུ་ལོངས༔ རིགས་འཛིན་ཉི་ཤུ་རྩ་གཅིག་གདམས་པ་དང་༔ དགའ་རབ་རྡོ་རྗེའི་ཞལ་མཇལ་གདམས་ངག་ཡིན༔ སངས་རྒྱས་ཉག་གཅིག་དགོངས་པ་ཐུན་ཅིག་དང་༔ གདམས་ངག་ཚིག་གཅིག་ངང་ཞོག་བདག་ནི་ཧོར་གྱི་ཡུལ༔ བྱང་ཕྱོགས་སྡིག་སྐྱོང་རྒྱལ་པོའི་དམྱལ་བར་སྐྱེས་པ་གཅིག་འདོན་དུ་དོན་ལ་འགྲོ༔ ཞེས་གསུངས་སྤ་གོར་གཙང་ལུང་དགོན་པ་རུ༔ ཞལ་ཆེམས་ཕོག་ནས་མཁའ་ལ་རླུང་ལྟར་གཤེགས༔ ས་མ་ཡཱ༔ གུ་རུ་ན་མོ༔ ཨེ་ཀ་དུ་ན་ར་ཀན༔ ཨྠྀི༔ ༔ སུམ་རེ༔ ཚེ་དབང་༔ ལས་དབང༔ ཕྱག་རྒྱའི་དབང་༔ ལྷུན་གྲུབ་ཀྱི་དབང་༔ དེ་རྣམས་ཀྱིས་རིགས་འཛིན་ཐོབ་པའོ༔ སེང་གེ་དབང་ཕྱུག་གིས་ཕྱི་གོང་རྫའི་ར་བར་བསྒོམས་པས༔ ལོ་བདུན་གྱིས་ཟག་པ་མེད་པར་གྲོལ་ལོ༔ དགེའོ༔ ༔

རྫོགས་པ་ཆེན་པོ་གསང་བ་སྙིང་ཐིག་གི་མན་ངག་རིན་པོ་ཆེ་ཟངས་ཡིག་ཅན།

རྫོགས་པ་ཆེན་པོ་གསང་བ་སྙིང་ཐིག་གི་མན་ངག་རིན་པོ་ཆེ་ཟངས་ཡིག་ཅན་བཞུགས་སོ༔ ༼ཟངས་ཡིག་ཅན་༽

ཨྠྀི༔ ་ཁ་ཐཾ༔ སྤྲོས་གཅོད་དུམ་བུ་བཅུ་དྲུག་ཐེམ་མེད་བཞི་དང་ཉི་ཤུ༔ ཐ་གག་ཎརྦ།མཐ།༔ རྒྱ་གར་སྐད་དུ༔ ཡཱ་མ་ར་སཱ་མ་ཡེ༔ བོད་སྐད་དུ༔ སྤྲོས་པ་གཅོད་པའི་སྒྲོན་མ༔ ་སེམས་ཀྱི་སྤྲོས་པ་ལྟ་བས་གཅད༔ ཚིག་གི་སྤྲོས་པ་ཉམས་ལེན་གྱིས་གཅད༔ མཚན་མའི་སྤྲོས་པ་རིག་པས་གཅད༔ བློ་ཡི་སྤྲོས་པ་གདམས་པས་གཅད༔ ཉམས་ལེན་གྱི་སྤྲོས་པ་གོམས་པས་གཅད༔ གྲུབ་མཐའི་སྤྲོས་པ་ཤེས་རབ་ཀྱིས་གཅད་པའི་མན་ངག་གོ་ཨིཐི༔ དཔལ་ཀུན་ཏུ་བཟང་ངན་གྱི་སྤྲོས་པ་ཐམས་ཅད་རང་དེངས་སུ་འགྲོབའི་ཕྱིར་བཟང་པོ་ལ་ཕྱག་འཚལ་ལོ༔ དེ་བཞིན་གཤེགས་པ་ཐམས་ཅད་ཀྱི་དགོངས་པའི་དོན་བསྟན་པ་སརྦ་ཏ་ཐཱ་ག་ཏ་ཨ་བྷ་ཡུ་དྷཱརྨ་ཀཱ་སྱ་ཆོས་སྐུ་སྤྲོས་དང་བྲལ་བ་༔ ཨ་རིག་པ་དེ་ཡང་དབྱིངས་འགག་མེད་ལས་རིག་པ་སྐྱེ་མེད་ཤར་བའོ་ཨཱ༔ ཨརིག་པ་འབྱུང་བཞི་ཟད་པས་དབྱིངས་སྐྱེ་བ་མེད་པའོ༔ ཨ་འཁྲུལ་རྐྱེན་རང་སར་དག་པས་རིག་པ་རང་གི་ངོ་བོ་སྐྱེ་མེད༔ ཨསྐྱེ་མེད་ཀྱི་སེམས་སྐྱེ་

མེད་ཀྱི་ཀློང་དུ་མྱ་ངན་ལས་འདའ་བར་བྱེད་པའི་མན་ངག་རྟེན་པ་གཅིག་ཐོག་ཏུ་སྐྱེ་བའི་མན་ངག་བསམ་པ་རང་དེངས་པས་སྐྱེ་བའི་སྒོ་འགེག་པའོ་རིག་པ་འབྱུང་རིག་པ་འོད་སྣང་དུ་འཆར་བར་བྱེད་པའི་མན་ངག་གོ་བ་ཟད་ལ་ཕྱག་འཚལ་ལོ༔ དཔལ་ནམ་མཁའ་ཟད་པའི་རྒྱུད་ནི་རིག་པ་དབྱིངས་སུ་ཚུད་པའི་མན་ངག་ཨེ་ཀ༔ བྷ་རྡུ་སྟོང་པ་གསལ་བ་ཡངས་པ་གསུམ་གཅིག་གིས་གཅིག་གྲོལ་བས་སངས་རྒྱའོ༔ ཡཾ་དཔལ་འདེགས་རླུང་ཟད་པའི་རྒྱུད་ནི་དབུགས་ཆད་པ་དང་སངས་རྒྱ་བའི་མན་ངག །ཁཾ་དཔལ་ཆུ་རྒྱུན་ཟད་པའི་རྒྱུད་ནི་དྲན་པ་འགགས་པ་དང་སངས་རྒྱ་བའི་མན་ངག །རཾ་དཔལ་མེ་བཞི་ཟད་པའི་རྒྱུད་ནི་ཉམས་གཅིག་ཤར་བས་སངས་རྒྱས་པ་དང་མཉམ་པའི་མན་ངག །སུ་དཔལ་རྟེན་པ་ཟད་པའི་རྒྱུད་ནི་གཟུགས་དག་པ་སྐུ་དང་མཉམ་པའི་མན་ངག །དྷ་ཏུ་བྷི་ཀལྤ་འབྱུང་བཞིའི་རྟོག་པ་ཆད་པས་ཡེ་ཤེས་རང་སྣང་ཨེ་པྱྡྷྱདཔལ་འབྱུང་བ་ཡེ་དག་གི་དགོངས་པ་བྷེ་ཪྡྷྱ་ཤྲཱི་མཚན་མ་རང་གྲོལ་གྱི་བྷྣེ་རྨྱེ་ཤྲཱི་

འཁྲུལ་པ་རྒྱས་འདེབས་ཀྱི་མྤྨྨ་ཤྲཱི་འབྱུང་བ་རོ་སྙོམས་ཀྱི་མྟྨ་ཤྲཱི་སྤྲོས་པ་ཉེར་ཞིའི་དགོངས་པའོ༔ ༔བཊ།བཱམ།ཐག༔ དབྱིངས་གདལ་བ་ཆེན་པོ་ལ་བདེ་ཆེན་ཡངས་པ་ཉིད་ལ་ཕྱག་འཚལ་ལོ༔ གུ་པྟྲ་ལྤ་ཨྟ་ཆོས་སྐུའི་གནད་སྙིང་དུ་བསྟན་པས་ལུས་ཡོངས་སུ་མྱ་ངན་ལས་འདའ་བའི་མན་ངག༔ ལོངས་སྐུའི་གནད་རྩ་རུ་བསྟན་པས་ངག་ཡོངས་སུ་མྱ་ངན་ལས་འདའ་བའི་མན་ངག༔ སྤྲུལ་སྐུའི་གནད་མིག་ཏུ་བསྟན་པས་སེམས་ཡོངས་སུ་མྱ་ངན་ལས་འདའ་བའི་མན་ངག་གོ་ཨྠྀི༔ ༔ བྷུན་ནྱ་ཡྨ་པྡྷྱིིི༔ འབྱུང་བཞི་རང་དེངས་སྟོང་བ་སྟོང་པས་མཚོན་པ་སྟོང་པ་རང་སར་གྲོལ་བའི་མན་ངག་གཟུགས་རྣམ་པར་དག་པའི་དགོངས་པ་ཞེས་བྱའོ་ངང་ལ་ཕྱག་འཚལ་ལོ༔ ཏིང་ངེ་འཛིན་རྣམ་པར་དག་པས་ས་རྡོའི་སྣང་བ་འགགས་པ་འབྱུང་བཞི་ཟད་པའི་རྒྱུད་ཆེན་གསལ་བ་གསལ་བས་མཚོན་པས་གསལ་བ་རང་སར་གྲོལ་བའི་མན་ངགནམ་མཁའ་ལ༔ འཁྲུལ་གཞི་ཟད་པའི་རིག་པ་དངོས་པོ་དངོས་པོས་མཚོན་པ་འབྱུང་བ་རང་སར་གྲོལ་བའི་མན་ངག་ཚོར་བ་རྣམ་པར་དགོངས་པའོ་རྒོད་ཡན་ཏེ༔ སྣ་ཚོགས་ཁྱབ་གདལ་ཆེན་པོའི་ནང་དབྱིངས་རྣམ་པར་དག་པ་སྤྲོས་པ་རང་ཐོག་ཏུ་ཞི་བའི་མན་ངག་འདུ་ཤེས་རྣམ་པར་དག་པའི་དགོངས་པའོ་ཁང་བཟངས་སུ༔ འཛིན་བྱེད་དྲན་པ་ཟད་པའི་མཚན་མ་ཐམས་ཅད་ཉེ་བར་ཞི་བའི་རིག་པ་ལ་འཁྲུལ་དབང་མེད་པའི་མན་ངག་རྣམ་པར་ཤེས་པ་རྣམ་པར་དག་པའི་དགོངས་པའོ་ལྕགས་ཀྱུ་ཡིསཿགསལ་བྱེད་སྟེང་འོག་མེད་པའི་འཁྲུལ་པ་རང་སར་དེངས་པ་དབྱིངས་རིག་ལ་འགྱུར་བ་མེད་པའི་མན་ངག་གབ་པ་འདུ་བྱེད་རྣམ་པར་དག་པའི་དགོངས་པའོ་སྙིང་ནས་ནི༔ མ་ཡེངས་བསམ་པ་ཟད་པའི་དེའི་ཕྱིར་ལྟ་བ་མིག་དང་འབྲེལ་བས་གྲུབ་མཐའ་ཟད་སར་ཕྱིན་པ་ལྟ་བ་ལ་འགྱུར་དབང་

མེད་པའི་མན་ངག་ཕུང་པོ་རྣམ་པར་དག་པའི་ཚུལ་གྱིས་གཟུང་བར་བྱའོ༔ ཨ་སྐྱེ་བ་མེད་པའི་དོན་ཨྸ་ནམ་མཁའ་ང་ལོག་གི་དགོངས་པས་དབྱིངས་རིག་མཁའ་ལ་འདེགས་པ་འདེགས་རླུང་ཇ་ལོག་གི་དགོངས་པས་སྐུ་གསུམ་གཅེར་བུར་ཕྱུངས་པ་ཆུ་རྒྱུན་ཇ་ལོག་གི་དགོངས་པས་སྒྲོན་མ་བཞི་གཏོད་ལ་མནན་པ་མེ་བཞི་ཇ་ལོག་གི་དགོངས་པས་འབྱུང་བ་བཞི་རང་ཟད་དུ་བསྐྱལ་བ་ཨེ་མ་ངོ་མཚར་བ་ཧོ༔ སྤྲོས་པ་ཐམས་ཅད་ཉེ་བར་སྐུ་གསུམ་མཚན་མ་དང་བྲལ་བ་ཐབས་ཀྱི་འབྲས་བུ་མིང་དུ་བྱ་བའོ་ཞི་བར་བྱེད་པ་ཅེས་བྱ་བ་ནི་ཡིད་ཀྱི་སེང་གེ་རིག་པའི་ཆོ་འཕྲུལ་དྲན་པ་ལ་བལྟས་པས་དྲན་མེད་དུ་གྲོལ༔ དྲནམེད་ལ་བལྟས་པས་བློ་འདས་སུ་འདུག་པས་ཡེ་ནས་སྐྱེ་མེད་དུ་གོ་བའོ་ཡིད་ཀྱི་བུས་གཟུང་བ་རིག་པ་བློ་ལས་འདས་པ་ནི་མིག་གིས་གཟུང་ཆ་གཉིས་མ་ཟད་པར་འཛིན་ཆ་སྟོངས་པས་རིག་པ་ལ་གསལ་བ་ཆ་ཚང་བ་ནི་དབྱིངས་རིག་འདུ་འབྲལ་མེད་པའི་རིག་པ་དངོས་སུ་མཐོང་བས་སྐྱེ་བ་མེད་པ་ཞེས་བྱའོ་ལ་བྱའོ༔ ཨསྐྱེ་མེད་ཀྱི་རིག་པ༔ ཨེ་མ་ཧོ༔ རིག་པ་གཅེར་བུར་ཕྱུངས་པས་འོད་དང་ཁ་དོག་ལ་ཞེན་པར་མི་བྱ་བ་དང་མཚན་མ་ཐམས་ཅད་རང་སར་དངས་པ་ཅེས་བྱ་བ་ནི༔ ནམ་མཁའི་བུ་མོ་རིག་པ་སྟོང་པ་ཉིད་མཐའ་བཞི་ཕྱོགས་ལས་རང་འདས་པས་ཆོས་ཉིད་ཡུལ་སྣང་ཟད་པའོ་ནམ་མཁའི་བུས་བཙོན་དུ་གཟུང་བ་ནི་རིག་པ་དབྱིངས་དང་འདྲེས་པས་ཁ་དོག་ལྔ་རང་སར་དེངས་པའོ་ལ་བྱའོ༔ ཨྸ་རིག་པ་དང་གཉིས་སུ་མེད་པའི་ཚེ་སྐྱེ་མེད་ལ་སྐྱེ་མེད་མཚོན་པ་ཞེས་བྱའོ༔ ཨེ་མ་ཧོ༔ འཁྲུལ་པ་ཐམས་ཅད་རང་སར་གྲོལ་བ་ཞེས་བྱ་བ་ནི་དབྱིངས་ནམ་མཁའ་ལ་དབྱུང་པའི་ཐབས་ཀྱིས་མ་རིག་པ་སྐྱེ་བའི་རྒྱུ་མེད་པ་བྱས་པ་དང་

རླུང་གི་ཞགས་པ་རིག་པ་རྡོ་རྗེ་ལུ་གུ་རྒྱུད་ཤེས་པ་རྟོགས་མེད་དུ་གྲོལ་བའི་ཚེ་རླུང་གི་ལྕགས་ཀྱུས་གཟུང་པ་ནི་མིག་གི་ཟུར་མནན་ཏེ་བལྟས་པས་རྒྱ་ཆེ་བའི་སྣང་བ་མི་འགུལ་བ་ལ་བྱའོ༔ ཨྸྸ་སྐུ་གསུམ་དངོས་སུ་བསྟན་པ་རིག་པའི་སྣང་བ་དང་འགྲེའོ་ཨེ་མ་ཧོ༔ འབྱུང་བ་ཐམས་ཅད་རང་དག་ཏུ་སོང་བ་ཅེས་དྲན་རྟོག་མཁའ་ལ་ཟད་པར་བྱ་བའི་ཐབས་ཀྱི་གཟུགས་སྒྲ་ལས་གྲོལ་བར་བྱ་བ་དང་བྱ་བ་ནི༔ མེའི་མི་མོ་མེའི་རིག་མེད་ཀྱི་སྣང་བ་ལ་ཕྱོགས་མེད་ཀྱི་རིག་པ་ཤར་བས་ཡུལ་མེད་ཀྱི་ཡུལ་དུ་སོང་སྟེ་བལྟར་མེད་ཀྱི་སྐུ་ལ་བལྟས་པས་རྟོགས་མེད་ཀྱི་རིག་པ་མཐོང་སྟེ་གཏད་མེད་ཀྱི་ཤེས་པ་སྤྱོད་པ་ཞེས་བྱའོ་གསལ་ཤིང་གིས་བསྲེག་པ་ནིསྒྲོན་མའི་སྣང་བ་རང་རིག་རང་གིས་མཐོང་བས་འབྱུང་བཞི་ཟད་སར་བསྐྱལ་བ་ཞེས་བྱའོ་ལ་བྱའོ༔ ཨྸྸྸ་སྒྲོན་མ་བཞི་ཡུལ་ལ་ཤར་བས་རྟོགས་པ་བཞི་སྐྱེས་ཏེ་སྤྲོས་པ་བཞི་ཆོད་པའོ༔ ཨེ་མ་ཧོ༔ སྐུ་གསུམ་ཇ་ལོག་ཏུ་ཤར་བ་ལུས་གཏན་ལ་དབབ་པའི་ཐབས་ཀྱིས་འབྲས་བུ་གཞན་ལ་རག་མ་ལུས་པའོ་ཞེས་བྱ་བ་ནི༔ ས་ཡི་གྲོང་ཁྱེར་ནི་དངོས་བཅས་སྒྱུ་མ་འོད་སྐུར་ཤར་བས་འབྱུང་བ་ལ་ཐོགས་པ་མེད་པའི་ཐབས་དེ་རང་སྣང་དུ་ཤར་བའོ༔ ཆུའི་རྐུན་མོས་བཅོམ་པ་ནི་གཞི་འཛིན་པའི་རིག་པ་ལམ་དུ་ཕྱུངས་པས་གསལ་བྱེད་དུ་ཡོད་དོ་ལ་བྱའོ༔ ཨྸྸྸྸ་དེའི་ཕྱིར་ན་འབྱུང་བ་ལྔ་ཟད་པའི་རྒྱུད་ཅེས་རང་གི་རིག་པ་ལ་བྱའོ་འདི་ནི་སེམས་འཕྲོས་པ་རྣམས་ཀྱི་ལྕགས་མི་གནས་པ་གནས་པར་བྱ་བའི་ཐབས་ལ་དང་པོ་བྱ་བ་གཏང་ཀྱུའོ༔ ཨཏྱི༔ འདི་ནི་སེམས་མེད་པ་རྣམས་ཀྱི་དེ་ནས་ཤེས་པ་བཙལ་ཏེ་དེ་ལ་བརྟགས་མེ་ལོང་ངོ་༔ ཨ་ཏྱི༔ འདི་ནི་སེམས་རེངས་པ་རྣམས་ཀྱི་གཉའ་ཤིང་ངོ་དེ་ནས་ཡུལ་ལ་

འཆར་ཏེ་མིག་ལ་གཞུག་པར་བྱའོ་ཨ་ཏྱིཿའདི་ནི་སེམས་དེ་ནས་དྲན་མེད་དུ་འགྲོ་རྨུགས་པ་རྣམས་ཀྱི་སྒྲོན་མའི་སྣང་བ་ལྟའོ་སྒྲོན་མའོཿཨཏྱིཿའདི་ནི་སེམས་ཡེངས་པ་རྣམས་ཀྱི་དེ་ནས་ཤེས་པ་སྒྲོན་མའི་སྣང་བ་ལ་ཤར་བའི་ཚེ་རིགས་པ་སྤྱི་བོར་དྲང་བར་བྱ་ཕྱག་ཤིང་ངོ་༔ ཨ་ཏྱིཿདྲན་བྱེད་རྒྱུན་གཅོད་ཀྱི་མན་ངག་ཅེས་ཞེན་པ་ལས་གྲོལ་བར་བྱེད་པ་བྱ་བ༔ ཨཏྱིཿརྒྱ་རྒྱ་རྒྱ༔ ཕྱི་མའི་ཚེ་ལས་ཅན་ཅིག་དང་འཕྲད་པར་ཤོག༔ ༔ མི་རྟོག་པའི་ངོ་བོ་ལུས་ལ་ཁྱབ་པ་མཉམ་ཉིད་བདེ་བ་ཉིད་ལ་ཕྱག་འཚལ་ལོཿགོམས་པར་བྱ་བ་གནད་ཀྱི་གདམས་ངག་ཚིག་དྲུག་གིས་བྷུདྡྷ་བར་བྱེད་པའོ་དྲུག་ལས༔ རིག་པ་མི་གནས་པ་གནས་པར་བྱེད་པའི་གདམས་ངག་གིས་ལས་དང་པོ་པའི་ས་བསླབ་སྟེ་ལུས་ཀྱི་བསླབ་པར་བྱ་བ་ལས་དང་སོ་ནམ་གྱི་བྱ་བ་གཏང་སྟེ་དགོན་པར་གནས་པ་གཅེས་ངག་གི་བསླབ་པ་སྨྲ་བ་གཅད་པ་ཡིན༔ སེམས་ཀྱི་བསླབ་པ་ཡིད་བྱེད་པ་ཐམས་ཅད་དང་བྲལ་བར་བྱས་ལ་ལུས་ངག་དལ་བ་གཅེས༔ ཤེས་པ་བག་ལ་བཙལ་བར་བྱ་བ་དང་༔ རིག་པ་མ་ཟིན་པ་ཟིན་པར་བྱེད་པའི་གདམས་ངག་གིས་དེ་ནས་ལུས་ཀྱི་གནད་རིག་པ་མིག་ལ་གཞུག་ཡུལ་གྱི་གནད་ནམ་མཁའ་ལ་གཏད་རིག་པའི་གནད་ལུ་གུ་རྒྱུད་ལ་ལྟའོ་གནད་རྣམ་པ་གསུམ་ལ་མཁས་པར་བྱ་བ་དང་༔ རིག་པ་མི་བརྟན་པ་བརྟན་པར་བྱེད་པའི་གདམས་ངག་གིས་དེ་ལྟར་གོམས་པས་འོད་དུམ་བུ་དུམ་བུར་འཆར་ཏེ་ཕྱིར་དབྱིངས་སྣང་མཐོང་བས་སྣང་བ་ལས་དལ་བ་རྙེད་ཡུལ་དང་ཤེས་པ་ནང་དུ་ཤེས་པ་མི་རྟོག་པས་རིག་པ་དལ་བ་རྙེད་པའོ་བསྲེ་བར་བྱ་བ་དང་༔ རིག་པ་མ་སྐྱེས་པ་སྐྱེ་བར་བྱེད་པའི་

གདམས་ངག་གིས་སྣང་བའི་ཚད་དེ་ནས་ཐིག་ལེ་རེ་ནས་སྐུ་ཤར་བ་བསྟན་པའི་ཚད་དོ་གཟུང་བར་བྱ་བ་དང་༔ རིག་པ་མ་ཤེས་པ་ཤེས་པར་བྱེད་པའི་གདམས་ངག་གིས་རིག་པ་རྡོ་རྗེ་ལུ་གུ་རྒྱུད་དེ་ཡང་བློས་བཏགས་མིན་པས་ཐོག་མ་ནས་བྱེད་པ་པོ་གང་གིས་ཀྱང་མ་བྱས་རང་གི་སྣང་བ་ལ་རང་གི་ངོ་བོ་ཤར་བ་ཡིན་ནོ་དྲོད་ཚད་གཏན་ལ་དབབ་པར་བྱ་བ་དང་༔ རིག་པ་མ་གྲོལ་བ་གྲོལ་བར་བྱེད་པའི་གདམས་ངག་གིས་དེ་ལྟར་སྣང་བ་ལ་ཚད་ཟིན་པས་སྐུ་གསུམ་དེ་ཉིད་ལས་གཞན་ན་མེད་དེ་རིག་པའི་སྣང་བ་འོད་དུ་འདུག་པ་དེ༔ སྐུ་གསུམ་གྱི་ཆོས་སྐུ་ཐིག་ལེ་ལོངས་སྐུ་འོད་སྣང་བ་སྤྲུལ་སྐུའོ་ས་ལ་གོམས་པར་བྱ་བའོ༔ ཨྠྀི༔ མི་སྐད་དང་ཁྱི་སྐད་ལ་སོགས་པ་མི་མེད་པའི་སར་གྲོགས་མེད་གཅིག་པུར་གནས་པར་རང་སྣང་བ་ལ་ཚད་བཟུང་དུ་ཡོད་པས་གྲོགས་ཀྱི་མཆོག༔ འགྱུ་བྱེད་འགྲོ་འོང་བཅད་པས་དེ་ནས་རིག་པ་གཟུང་ཐབས་ནི་དབུགས་ནང་དུ་གཟུང་བ་ཐུབ་ཚད་དུ་བསྡམས་ལ་ཕྱིར་ཐུབ་ཚད་གཟུང་ཤེས་པ་རང་སོར་རླུང་འཛིན་ཉེར་གཅིག་ལ་ཚོད་ལྟ་གནས༔ དེ་ནས་ལུས་གཟར་ཏེ་གླང་ཆེན་ལྟ་སྟངས་ལ་སོགས་གང་མོས་བྱ་འདུག་སྟངས་རྣམ་གསུམ་བསྟན་པས་གྲོལ་ས་ཅེར་རིག་པ་ལུས་ལ་གནས་པས་མི་འཆར་བའི་དབང་མེད་ཚད་ཟིན༔ དེ་ཡང་ལུས་ཀྱི་གནད་མིག་ཡིན་པས་གནན་ནས་ལྟ་བ་གཅེས་མིག་དང་ངོ་བོར་འབྲེལ་བས་རྟོག་མེད་ཐུགས་སུ་ཆུད་ཤེས་པ་དྲན་མེད་གསལ་པོར་འགྲོ༔ རིག་པ་རང་ངོར་སྤྲད་པས་རྡོ་རྗེ་ལུ་གུ་རྒྱུད་དང་མིག་གཉིས་འོད་ཟེར་ལ་སོགས་པ་སྣང་བ་ཆོས་ཅན་དུམ་བུར་རྟོགས༔ ལུས་ཀྱི་བཅུད་རྣམས་ཕྱུངས་པས་རང་གི་རིག་པ་དེ་ཉིད་ཡེ་ནས་ཡོད་པས་འབྲས་བུ་ཚད་དང་ལྡན༔ ཨྠྀི༔ ༔ གཟེར་ལྟ་

བུའི་ལུས་མ་འགུལ་བས་མིག་མི་འགུལ་མིག་མ་འགུལ་བས་རིག་པ་མི་འགུལ་བ་མན་ངག་གིས་རིག་པ་དེ་མི་འགྱུར་བར་བྱ་བ་དང་༔ ལྕགས་ཀྱུ་ལྟ་བུའི་མན་ངག་གིས་དེ་ཡང་དབུགས་ནང་དུ་བག་ཙམ་འཐེན་ཤེས་པ་མིག་ལ་བཅུག་མིག་ནམ་མཁར་གཏད་པས་དབྱིངས་ཤར་བས་འབྱུང་བ་ཟད་པའི་རྟགས༔ རིག་པ་ཤར་བས་འཁྲུལ་པ་ཟད་པའི་རྟགས་སོ་ཟིན་པ་མི་འཆོར་བར་བྱ་བ་དང་༔ ཐོག་ལྟ་བུའི་གདམས་ངག་གིས་བརྟན་པ་ཤེས་པ་མིག་ཐོག་ཏུ་དབབ་པས་ལུས་མི་འཕོ་མིག་ནམ་མཁའ་ལ་དབབ་བས་དབྱིངས་མི་འཕོ་དབྱིངས་རིག་པའི་ཀློང་དུ་ཕབ་པས་ངོ་བོ་མི་འཕོ་བའོ་མི་འཕོ་བར་བྱ་བ་དང་༔ སྐར་མདའ་ལྟ་བུའི་གདམས་ངག་གིས་སྟེང་རླུང་འོག་སྒོར་དྲང་རིག་པ་མིག་ལ་བཅུག་མིག་མཁའ་ལ་གཏད་པས་སྣང་བ་མཆེད་པ་ལ་མཁས་པ་རྩྭ་ལ་མེ་ཤོར་བ་ལྟ་བུ་རིག་པ་མཁའ་ལ་ཕྱུངས་ཏེ་སྐྱེས་པ་མི་འགྱུར་བར་བྱ་བ་དང་༔ གླང་པོ་ཆེ་ལྟ་བུའི་མན་ངག་གིས་ཉམས་སུ་ལེན་ཚེ་ཤེས་པ་མིག་ལ་བཅུག་སྟེ་ཧར་པོར་བྱས་ཏེ་གཡས་གཡོན་འོག་ཏུ་མིན་པར་ཐད་ཀར་ལྟའོ་ཤེས་པ་འདྲེས་པར་བྱ་བ་དང་༔ དཔག་ཆེན་གྱི་མདའ་ལྟ་བུའི་མན་ངག་གིས་དེ་ལྟར་སྣང་བ་དང་ཕྲད་པས་ལས་དགེ་སྡིག་གི་སྤྱོད་པ་གང་ཡང་རྒྱུད་ལ་མི་འཆར་རོ་གྲོལ་བ་ཕྱིར་མི་ལྡོག་པར་བསྟན་པའོ༔ རྒྱ་མདུད་ཀྱི་དྲིལ་ལུགས་ཀྱིས་ཤེས་པ་རྒོད་པ་སྙམ་བྱེད་ན་ལུས་ཀྱི་ཡན་ལག་བསྐུམས་ཏེ་དབུགས་སྙིང་ལ་བཅུག་ལ་མིག་བཙུམ་ཤེས་པ་ལྟེ་བར་གཏད་དོ་མི་གནས་པ་གནས་པར་བྱ༔ ཉག་ཐག་གི་འཐེན་ལུགས་ཀྱིས་དེ་ནས་ཡར་ཡར་ཤེས་པ་གཏད་དེ་སྙིང་ཁ་མགྲིན་པ་སྤྱི་བོར་བཟུང་དེ་ནས་ཡང་སྔ་མ་ལྟར་རོ་གནས་པ་དེ་ཟིན་པར་བྱ༔ གླང་ཆེན་གྱི་ཉལ་ལུགས་ཀྱིས་དེ་ནས་བྱིང་བ་སྙམ་བྱེད་ན་མིག་ཧར་པོར་གྱེན་ལ་བཏེག་སྟེ་ཁ་ནས་སྔགས་སོགས་སྣ་ཚོགས་པའི་ཚིག་བརྗོད་པས་སོར་གྱིས་འགྲོ་པ་ཟིན་དེ་བརྟན་པར་བྱ༔ འདབ་ཆགས་ཀྱི་

ལྡིང་ལུགས་ཀྱིས་དེ་ནས་ཁད་ཀྱིས་ཇེ་དལ་ཇེ་དལ་བཞག་ལ་རིག་པ་མིག་ལ་སྔ་མ་བཞིན་ནོ་བརྟན་པ་བསྐྱེད་པར་བྱ༔ མེ་ལོང་གི་ལྟ་ལུགས་ཀྱིས་དེ་ཡང་བྱིང་རྒོད་ཀྱི་དགྲ་ཞི་ནས་དབྱིངས་རིག་ལ་རྟག་ཏུ་གོམས་པས་ཅི་ཡང་བྱ་མི་དགོས་སོ་བསྐྱེད་པ་ངོ་ཤེས་པར་བྱ༔ དུག་སྦྲུལ་གྱི་མདུད་ལུགས་ཀྱིས་དེ་ཡང་དབྱིངས་རིག་གི་སྣང་བ་ལ་མ་ཞེན་པར་རང་སར་གནས་སུ་བཞུགས་པ་ནི་འབྲས་བུ་རྫོགས་པ་ཆེན་པོའོ་ཤེས་པ་དགྲོལ་བར་བྱའོ༔ ཨྠྀི༔ ༔ བསམ་པ་སྟོབས་ཟད་པར་བྱ་བའི་ཐབས་དང་པོའི་དུས་སུ་བྱ་བ་གང་ཡང་མི་བྱེད་པ་གལ་ཆ་ེ ེཀྱིས་ལས་དང་པོ་ལ་བསླབ་པར་བྱ༔ སོ་སོའི་ཞེན་ཡུལ་དགག་པའི་ཐབས་ཀྱིས་དེ་ནས་འབྱུང་བའི་སྣང་བ་དགག་པའི་ཐབས་དབྱིངས་རིག་མ་གཏོགས་གང་ལའང་མི་ལྟོས་པས་འཁྲུལ་པ་སུན་དབྱུང་པའོ་བསླབས་པ་ཆུད་མི་ཟོས་པར་བྱ༔ རང་རང་གི་ཡུལ་བཙལ་བའི་ཐབས་ཀྱིས་མིག་དང་ནམ་མཁའ་རིག་པ་གསུམ་མ་བྲལ་བ་གལ་ཆེ་དེ་ཉིད་དང་དུས་ཐམས་ཅད་དུ་མི་འབྲལ་བར་བྱ༔ སྣང་བ་ཐད་ཀར་གཅད་པའི་ཐབས་ཀྱིས་དེ་ལྟར་བྱས་པས་དང་པོ་འོད་གཉིས་པ་ཐིག་ལེ་གསུམ་པ་སྐུའི་སྣང་བ་སྟེ་མི་འདྲ་བ་ཡང་ཡང་སྐྱེས་ཏེ་དེ་ཡང་རིག་པའི་ཆོ་འཕྲུལ་ཅིར་ཡང་སྟོན་པས་སོ་ཉམས་གོང་ནས་གོང་དུ་འཕེལ་བར་བྱ༔ རིག་པ་དང་དབྱིངས་འབྲེལ་པར་བྱེད་པའི་ཐབས་ཀྱིས་ཅི་ནས་ཀྱང་རིག་པ་དེ་བསྡུས་ཏེ་དབྱིངས་ནང་དུ་ཆུད་པར་བྱས་ཏེ་རང་གི་སྔུན་སྨིན་མཚམས་སུ་བརྟག་པའོ་མཁའ་ལ་མ་བུ་སྤྲད་པར་བྱ༔ རང་གིས་རང་གྲོལ་བར་བྱེད་པའི་ཐབས་ཀྱིས་དེ་ཡང་བྱེད་མཁན་སུ་ཡང་མེད་དེ་ཡེ་ནས་དེ་ལྟར་ཡོད་པའོ་སྐུ་གསུམ་གྱི་ས་ལ་གནས་པར་བྱའོ༔ ཨྠྀི༔ ༔ མཉམ་གཞག་ལ་རྒྱུན་དུ་འགྲོ་བ་གནས་པ་རྣམ་པར་དག་པའི་དགོངས་པས་རྗེས་ཀྱི་ཤེས་པ་ལ་རིག་པ་དབྱིངས་སུ་ཚུད་པ་བུས་མ་

འཚོལ་གྱི་གདམས་ངག༔ སྡོད་པ་ལུས་བསྡད་པས་རིག་པ་བསྡོད་སྟེ་རིག་པ་མི་གཡོ་བས་མི་རྟོག་པ་ལ་རྒྱུན་དུ་གནས་པ་རྣམ་པར་དག་པའི་དགོངས་པས༔ རྗེས་ཀྱི་ཤེས་པ་ཤེས་རབ་ཀྱིས་སྐྱེ་མེད་ཏུ་གྲོལ་བ་མདའ་ཡིས་གཞུ་འཚོལ་གྱི་མན་ངག༔ རིག་པ་ལ་དྲོད་སྐྱེས་པས་སྣང་བ་ལ་ཡིད་མི་འཇུག་པའི་བསམ་གཏན་ལ་རྒྱུན་དུ་གནས་པ་ཐོབ་པ་རྣམ་པར་དག་པའི་དགོངས་པས༔ རྗེས་ཀྱི་ཤེས་པ་ཡུལ་ཐམས་ཅད་རིག་ངོར་དག་པ་འབེན་གྱིས་མདའ་འཚོལ་གྱི་མན་ངག༔ འཇུག་པ་གཞི་ཟད་པའི་ཏིང་ངེ་འཛིན་ལ་གནས་པ་རྣམ་པར་དག་པའི་དགོངས་པས༔ རྗེས་ཀྱི་ཤེས་པ་ལ་འཁོར་འདས་གཉིས་མེད་དུ་འདྲེས་པ་ཆུང་མས་ཁྱོ་འཚོལ་གྱི་མན་ངག་རིག་པ་སྐུ་གསུམ་གཉིས་མེད་དུ་གནས་པ་བསྟན༔ ཡུལ་རིག་གཉིས་མེད་དུ་རྟོགས་པས་སྒོ་ལྔ་རང་གསལ་དུ་གནས་པ་གསལ་བ་རྣམ་པར་དག་པའི་དགོངས་པས༔ རྗེས་ཀྱི་ཤེས་པ་རྟོག་མེད་རང་གྲོལ་བ་བུ་མོས་ཕ་འཚོལ་གྱི་མན་ངག༔ རིག་པ་ཡང་འབྱུང་གཞི་ཟད་པས་འཁྲུལ་པ་གཏིང་དག་གི་དགོངས་པ་ལ་གནས་པ་སྟེ་དག་པ་རྣམ་པར་དག་པའི་དགོངས་པས༔ རྗེས་ཀྱི་ཤེས་པ་རིག་པ་ཉིད་ཡུལ་དུ་གྲོལ་བ་རྗེས་འབངས་འཚོལ་གྱི་མན་ངག་གོཿཨྠྀི༔ ༔ གནས་པ་གཞན་མེད་ཚད་མའི་དགོངས་པ་གང་ལ་མི་འཇུག་༔ ཟིན་པ་རང་ཡིན་དགོངས་པ་ཕྱིར་རྣམ་རྟོག་གི་དབང་དུ་མི་འགྲོ༔ བརྟན་པ་གོམས་པ་ཡིན་ཚད་མའི་དགོངས་པ་ལ་འཁྲུལ་པ་མི་སྲིདཿསྐྱེས་པ་རྟགས་ཚད་གསལ་ཉམས་ཀྱི་དགོངས་པ་གོང་ནས་གོང་དུ་སྣང་བའི་མི་འདྲ་བ་འཆར་ཡིན༔ ཤེས་པ་ཐབས་ཡིན་ཚད་གཅུན་པས་ངོ་སྤྲོད་ཀྱི་དགོངས་པ་རང་ལ་གནས༔ གྲོལ་བ་དགོངས་པའོ་འབྲས་བུ་ཡེ་དག་གི་དགོངས་པ་གཞན་ལ་རག་མ་

ལུས་པའོ༔ གོམ་པ་གནད་ཀྱི་མན་ངག་གི་ཡིད་དཔྱོད་མི་འགྱུར་བའི་དགོངས་པ་ཕྱིི་ནང་དུ་རྣམ་རྟོག་གི་དབང་དུ་མི་འཆོར་མི་རྟོག་པའི་དགོངས་པ་ལ་གནས་ནས་འཁྲུལ་མི་སྲིད༔ ཚད་གཅུན་པས་ངོ་སྤྲོད་ཀྱི་དགོངས་པར་རང་དུ་གནས༔ འབྲས་བུ་ཡེ་དག་གིས་དགོངས་པ་གཞན་ལ་རག་མ་ལུས་པའོ་ཚིག་དྲུག་གི་རྡོ་རྗེ་སེམས་དཔའ་ཞལ་མཐོང་བར་བྱེད་པར་རྫོགས་སོ༔ ལས་ཅན་ཅིག་དང་ཕྲད་པར་ཤོག༔ ཨི་ཏི༔ སརྦ་ཨྯ་པཱ་ཡྱ་མཱུ་ལྤྱ་དྙ་ཐིཾ༔ རིག་པ་མངོན་དུ་བསླབ་པར་བྱ་བ་ནི་ཐབས་ལ་གོམས་པར་བྱ༔ ཕུང་པོའི་བདུད་ལས་གྲོལ་བ་ཟག་མེད་ཐིག་ལེའི་སྐུ་ལ་ཕྱག་འཚལ་ལོ༔ ཕུང་པོ་དང་ཉོན་མོངས་པའི་ཟག་པ་རྣམས་ནི་ཟད་པར་བྱ་བའི་ཕྱིར༔ རྟག་ཆད་ལ་སོགས་གྲུབ་པའི་མཐའ་འདི་ཉིདལས་བློ་ལྡོག་པར་བྱ་བའི་དགོས་པ་རྣམས་ཀུན༔ འདོད་པ་ཅི་ཡོད་ཐམས་ཅད་ཡོད་དང་མེད་པར་བློས་བརྟགས་འཁྲུལ་བས་ན༔ འདི་ཉིད་སྤྲོས་བྲལ་བླ་མའི་གདམས་པ་བདེ་བས་ལུས་སེམས་ཁྱབ༔ རྟག་ཆད་ལ་སོགས་པ་དེ་ཀུན་བཏགས་པ་ཙམ་དེ་དེ་དོན་ལ་གྲུབ་པ་མེད༔ ཉན་ཐོས་ལ་སོགས་པའི་གྲུབ་པའི་མཐའ་སྟེ་ངན་པར་བྱས་ནས་རང་བཟང་པོར་བསྒྲུབས་པ་རྣམས༔ དེ་ཉིད་མུ་སྟེགས་པ་རྣམས་དང་ཁྱད་པར་ཅུང་ཟད་ཡོད་མ་ཡིན༔ ཉན་ཐོས་ལ་སོགས་རིམ་དགུ་འདོད་རྒྱལ་་ཐེག་པ་རྣམས་ཀྱིས་ནི༔ གཟུང་འཛིན་མ་སྤངས་པས་རྟག་ཆད་ཉིད་ལས་རྡུལ་ཆ་ཙམ་མི་སླེབ༔ འདི་ཉིིད་ཐིག་ལེའི་སྐོར་ཕྱི་ནང་གསང་བ་ཀུན་གྱིས་ཀྱང༔ ཡང་དག་དོན་ལ་རྡུལ་ཙམ་རིག་པ་མཐོང་བ་མེད་པས་རེག་པ་མེད༔ གཞུང་དུ་བཀོད་པའི་ཚིག་དང་ཡི་གེ་འོ་ན་རྒྱུད་དེ་ལ་དགོས་པ་མེད་དམ་ཞེ་ན་དེཿ འདི་ཉིད་དུ་དྲང་བའི་ཐབས་ཙམ་སྟེ་ཡང་དག་མཐོང་བ་མིན་ཉམས་ལེན་

དང་བྲལ་བས་རང་གིས་སངས་མི་རྒྱ༔ རྣམ་གྲངས་དེ་ཀུན་སྙིང་པོ་མན་ངག་འདིར་འདུས་སོ༔ ཀྱེ་མ་ཀྱེ་མ་རིགས་ཀྱི་བུ་རྣམས་རིག་པ་མངོན་སུམ་གྱི་དོན་ལ་ཡིད་མ་ཆེས་ཀྱི་དོགས་པས་ཉོན་ཅིག༔ རིག་པ་མངོན་སུམ་གྱི་སྣང་བ་ལ་བློ་མི་ཕེབས་བ་འདི་ལྟར་བསླབས་ལ་གདོད་རིག་པ་ལ་བསླབ་ཤིང་དབང་པོ་དམན་ལ་ཐེག་པ་ཆུང་ངུ་ལ་མོས་པ་སྐལ་བ་ཞན་པའི་མི་རྣམས་ཀྱིས་འདི་ལ་ཡིད་མི་ཆེས་པ་འགའ་ཕྱི་མའི་ཚེ་འབྱུང་སྲིད་པས༔ དེ་དག་རྣམས་རིག་པ་མཐོང་བར་དང་གོམས་པར་བྱ་བའི་ཆེད་དུ་འདུག་པར་བྱ་བའི་ཐབས་འདི་རྣམས་ལ་བསླབ་པར་བྱ་བ་ཡིན་ནོཿདབེན་པའི་ས་རྐྱེན་མེད་པའི་ཕྱོགས་སུ་ཕྱི་ནང་གི་བྱ་བ་ལུས་ཕྱི་ནང་གསང་བ་སོགས་བཏང་སྟེ༔ བསམ་གཏན་གྱི་འཇིགས་པ་ཡིད་མི་བདེ་བ་དང་ཡ་ང་བ་རྣམས་སྤངས་ལ་མེད་པའི་སར་དང་པོ་སེམས་སྦྱང་བར་བྱའོ༔ དེ་ལ་བདུན་ཏེ༔ མི་རྟག་པ་ལ་བསམས་ཏེ་ཞག་བདུན་ཙམ་དུ་འཆི་བ་སྒོམ་སྟེ་ཡུལ་མི་ཉེ་དུ་ལ་སོགས་པ་རྣམས་ཤི་བ་ལ་བསམས་པས་གང་ཡང་མེད་པས་བདག་ཀྱང་དེ་ལྟར་འཆི་ན་སྙམ་མོ་བྱང་ཆུབ་ཀྱི་སེམས་སྦྱང་བ་དང་༔ ཞག་ལྔ་ཙམ་འཕྲལ་གྱི་བདེ་བ་དང་ཡུན་གྱི་བདེ་བ་ལ་བསམས་ཏེ་འཇིག་རྟེན་འདི་ཡི་བདེ་བ་བག་ཙམ་ཡུད་ཙམ་སྐད་ཅིག་ཙམ་ལས་མི་འདུག་ཕྱི་མའི་བདེ་བ་ཐོབ་པར་བྱའོ་སེམས་སྦྱང་བ་དང་༔ རྐྱེན་དུ་མ་ཞག་གསུམ་དུ་སྡུག་བསྔལ་གྱི་རྐྱེན་དུ་མ་སོང་བ་གང་ཡང་མི་འདུག་སྙམ་པར་བྱས་ལ་བསམ་སྟེ་སེམས་སྦྱང་བ་དང་༔ བྱས་པ་ཐམས་ཅད་དོན་མེད་པར་འདུག་པ་ལ་བསམས་ཏེ་ཞག་གསུམ་དུ་ཅི་བསམས་ཀྱང་འཆི་རྐྱེན་དུ་མ་སོང་བ་གཅིག་ཀྱང་མི་འདུག་འཆི་བ་ལ་ཆོས་མ་བྱས་ན་གཞན་གང་གིས་ཀྱང་མི་ཕན་པར་འདུག་སྙམ་དུ་སེམས་སྦྱང་པ་དང་༔ སངས་

རྒྱས་ཀྱི་ཡོན་ཏན་ལ་བསམས་ཏེ་ཆོས་བྱས་ན་སངས་རྒྱས་ཀྱི་ཡོན་ཏན་འདི་ལྟར་ཐོབ་པར་འགྱུར་རོ་སྙམ་དུ་སེམས་སྦྱང་བ་དང་ཞག་གསུམ་བྱའོ༔ བླ་མའི་གདམས་པ་ལ་བསམས་ཏེ་ཞལ་ནས་དེ་ཙུགས་གསུངས་པ་ངས་དེ་ལྟར་ཅི་ལ་མི་བྱེད་སྙམ་དུ་སེམས་སྦྱང་བ་དང་༔ རྣམ་པར་མི་རྟོག་པ་ལ་བསམས་ཏེ་སེམས་དར་ཅིག་གནས་ནའང་བདེ་བ་འདི་ཙམ་པ་སྐྱེ་བ་ལ་སྙམ་དུ་ཞག་གསུམ་དུ་སེམས་སྦྱང་བའོ༔ ཐབའུའ༔ོདེ་དག་ལ་དགོས་པ་ཅི་ཡོད་ཅེ་ན༔ མི་རྟག་པ་ལ་བསམས་པས་འཁོར་བ་ལས་བློ་ལོག་པའི་དགོས་པ་དང་༔ ་ཡུན་གྱི་བདེ་བར་བྱ་བ་བསྒོམས་པས་སྡུག་བསྔལ་ལས་ཡིད་དབྱུང་བའི་དགོས་པ་དང་༔ རྟག་ཏུ་འཆི་བ་བསམ་ཞིང་རྐྱེན་དུ་མ་བསྒོམས་པས་དད་པ་སྔོན་དུ་འགྲོ་བའི་དགོས་པ་དང༔ འཁོར་བའི་ལོངས་སྤྱོད་ཐམས་ཅད་སྡུག་བསྔལ་གྱི་རྒྱུར་བསྒོམས་པས་བླ་མའི་གདམས་ངག་ལ་འཇུག་པར་བྱ་བའི་དགོས་པ་དང་༔ སངས་རྒྱས་ཀྱི་ཡོན་ཏན་བསྒོམས་པས་སྒོམ་པ་ལ་བསྲན་ཐུབ་པར་བྱ་བའི་དགོས་པ་དང་༔ བླ་མའི་གདམས་པ་བསམས་པས་གཞན་གྱི་བྱ་བ་ལ་མི་འཇུག་པར་བྱ་བའི་དགོས་པ་དང་༔ རྣམ་པར་མི་རྟོག་པ་བསྒོམས་པས་བྱང་ཆུབ་ཀྱི་སེམས་གོང་ནས་གོང་དུ་འཕེལ་བར་བྱ་བའི་དགོས་པའོ༔ ཊུདྲུཅ། སྭཏ༔ ༔ གོམས་པའི་ཚད་བསྟན་པ་བྱང་ཆུབ་ཀྱི་སེམས་འབྱོངས་པའི་ཚད་ནི༔ འདུས་བྱས་ཐམས་ཅད་རྟག་ཏུ་མི་རྟག་འཆི་པར་འདུག་ཨང་སྙམ་པ་རྒྱུད་ལ་སྐྱེས་པ་དང་༔ འཇིག་རྟེན་གྱི་བྱས་པ་ཐམས་ཅད་སྡུག་བསྔལ་གྱི་རྒྱུར་དོན་མེད་རྟག་ཏུ་སྡུག་བསྔལ་འདུག་ཨང་སྙམ་པ་རྒྱུད་ལ་སྐྱེས་པ་དང་༔ རིགས་དྲུག་གི་སེམས་ཅན་འཁོར་བར་འཁྱམས་པ་ཐམས་ཅད་ལ་སྙིང་རྗེ་སྐྱེ་ཞིང་ལས་

སུ་དད་པས་ཀུན་ནས་བསླང་ཞིང་དཀོན་མཆོག་དང་བླ་མ་མཆོད་ན་ཅི་མ་རུང་སྙམ་པ་རྒྱུད་ལ་རྟག་ཏུ་སྐྱེས་པ་དང་༔ གཞན་ཅིས་ཀྱང་ཕན་པར་མི་འདུག་བླ་མའི་གདམས་ངག་ཅིག་ཅི་ནས་ཀྱང་རྟོགས་པར་བྱ་ཞིང་ཐབས་གང་གི་སྒོ་ནས་ཐོབ་པར་བྱ་དགོས་སྙམ་པ་རྒྱུད་ལས་སྐྱེས་པ་དང་༔ ཅི་ནས་ཀྱང་གདམས་ངག་ཡོད་ཀྱང་མ་བསྒོམས་ན་སངས་མི་རྒྱ་བར་འདུག་སྙམ་སྟེ་སྒོམ་པ་ལ་བློ་འཇུག་པ་རྒྱུད་ལས་སྐྱེས་པ་དང་༔ འཇིག་རྟེན་གྱི་འཁོར་དང་ཡོ་བྱད་ཀྱིས་ཅི་ཞིག་བྱ་ཤི་བའི་ནངས་པར་ཅིས་ཀྱང་མི་ཕན་སྙམ་དུ་ལོངས་སྤྱོད་ཀྱིས་ཅི་ཞིག་བྱ་དེ་བས་དར་ཅིག་སྒོམས་ཀྱང་མི་རྟོག་པ་སྐྱེ་བའི་གྲོགས་སུ་འདུག་སྙམ་པ་རྟག་ཏུ་རྒྱུད་ལས་སྐྱེས་པ་དང་༔ བསྒོམས་པས་ཉམས་གོང་ནས་གོང་དུ་གནས་པ་ལ་ཡུན་ཇེ་རིང་ཇེ་རིང་སོང་བས་བྲོད་པ་བསྐྱེད་སྟེ་འདི་ལ་རྟག་དུ་གནས་པར་བྱའོ་སྙམ་པ་རྒྱུད་ལས་རྟག་ཏུ་སྐྱེས་པའོ༔ ཨི་ཏི༔ གྭབྲ༔ དེ་ལྟར་སེམས་མ་འབྱོངས་ན་ཡེ་ཤེས་མི་སྐྱེ་འབྱོངས་ནས་སྔགས་ཀྱི་ཐབས་ཁྱད་པར་ཅན་བརྟེན་ནས་ཤེས་པ་གོམས་པའི་ཚད་ལ་འཇུག་པར་བྱ་སྟེ༔ གང་ཟག་ཆགས་མེད་བུད་མེད་སྤངས་པ་ཡིན་ན་རླུང་ལ་བསླབས་ཏེ་སེམས་གནས་པར་བྱ་བ་དང་༔ ཆགས་ཅན་བུད་མེད་བསྟེན་པ་ཡིན་ན་ཡབ་ཡུམ་གྱི་བདེ་བ་ལ་བརྟེན་ནས་སེམས་གནས་པར་བྱ་བའོ༔ རླུང་ནི་རླུང་གི་ཁདོག་དཀར་པོ་ལ་བསླབ་པ་དང་༔ དབྱིབས་ཟླུམ་པོ་རྡོ་རྗེ་ལ་བསླབ་པ་དང་༔ ཕར་འགྲོ་ཚུར་འགྲོ་འགྲོ་འོང་ལ་བསླབ་པ་དང་གྲངས་གཅིག་གཉིས་སོགས་ལ་བསླབ་པའོ༔ དེ་ལ་དང་པོ་གནས་པར་བྱ་བའི་ཐབས་གནས་དབེན་པར་ཕྱི་ནང་གི་བྱ་བ་བཏང་སྟེ༔ སྟན་བདེ་བ་ལ་ལུས་གནད་ནི་རྐང་པ་རྡོ་རྗེའི་སྐྱིིལ་མོ་ཀྲུང་གིས་འདུག་ལ་ལག་པ་མཉམ་པར་བཞག་སྟེ་སྒལ་ཚིག་དྲང་པོར་བྱས༔

མགྲིན་པ་ཡིད་ཙམ་དགུ་བར་བྱས་ཏེ༔ རང་གི་རླུང་སེམས་འདུས་པ་སྨིན་མཚམས་སུ་རླུང་ཐམས་ཅད་འདུས་པའི་ཐིག་ལེ་དཀར་པོ་ཉུང་ཀར་ཙམ་དཀར་ལ་འཚེར་བ་ཞིག་ལ་ཤེས་པ་གཏད་སྟེ་སྒོམ་མོ༔ དེ་ནས་དེ་ལ་ཡུན་རིང་བར་བསླབས་པས་རང་གི་མགོ་བོ་ཡང་དེའི་མདོག་དང་མཚུངས་པར་སྒོམ༔ དེ་ནས་ལུས་ཙམ༔ དེ་ནས་ཐོ་ཕྱི་ཉེ་འཁོར་དེ་ནས་ཡུལ་གྲུ་ཙམ་༔ དེ་ནས་སྟོང་གསུམ་རླུང་གི་རང་བཞིན་དུ་སེམས་ཀྱིས་ཁྱབ་ཚད་དུ་དཀར་མེར་རེ་བ་ལ་ཤེས་པ་བཞག་པ་དང་༔ དཀར་མེར་རེ་བ་ལ་སྐབས་སུ་ཤིག་ཤིག་པ་ལས་ཡང་དང་ཡང་དུ་གོམས་པ་བྱས་པས༔ རྟགས་ནི་ལུས་ལ་སྲིན་བུ་མེད་པ་དང་ལུས་ཡང་བ༔ ངག་རྣོ་ནུས་པ་འབྱུང་བ༔ སེམས་ཏིང་ངེ་འཛིན་ལ་གནས་པའོ༔ དབྱིབས་ནི་ཐིག་ལེ་ཟླུམ་པོ་ཆེ་ཆུང་སྲན་མའམ་མཐེ་བོང་ཙམ་ལ་སྨིན་མཚམས་སུ་ཤེས་པ་གཏད་དེ་སྒོམ་པ་ནི༔ རང་གི་དབུགས་རླུང་ཕར་སོང་ཙ་ན་ཐིག་ལེ་དེ་ཡང་ཕར་ལ་ཕར་ལ་རྒྱངས་ཀྱིས་སོང་༔ ཚུར་རྔུབ་པའི་ཚེ་ཚུར་རང་གི་སྣ་རྩེར་ཡེར་གྱིས་བྱུང་བ་ལ་དེ་ལྟར་ཞག་བཅུའམ༔ ཟླ་བ་ཕྱེད་དུ་བསླབས་པས༔ གོམས་པའི་ཚད་ནི་སྨིན་ཕྲག་ཚ་འུབ་འུབ་བྱེད་བ་འམ༔ མི་བདེ་བ་སྙམ་པ་ནི་གོམས་པའི་ཚད་དོ༔ དེ་གོམས་པ་དང་ལྟེ་བའི་ཐད་ཀར་ཐོད་པ་ཕྱི་དཀར་ལ་ནང་དམར་བ་ཞིག་བསམས་སྟེ༔ དེའི་ནང་དུ་རྡོ་རྗེ་སྔོན་པོ་ནས་ཙམ་ཞིག་བསྒོམ་དེ་རླུང་ཕྱིར་རྒྱངས་ཀྱིས་སོང་ཙམ་ན་ཕར་རྒྱངས་ཀྱིས་སེམས་གྱུར་ཚད་རིང་པོར་སོང་སོང་བ་ལ་ཤེས་པ་གཏད༔ ཚུར་ཐོད་པའི་ནང་དུ་ཡང་ཐིམ་པ་ལ་ཤེས་པ་གཏད་དེས་ལུས་བདེ་ཕྲིལ་གྱིས་འགྲོ་སྟེ་བསྒོམ༔ ཕར་སོང་བ་དེ་ཇེ་ཉེ་ཇེ་ཉེ་ལ་གཏད་སྟེ་དེ་ལྟར་ཕར་འགྲོ་ཚུར་འོང་ལ་ཤེས་པ་ཡུན་རིང་པོར་བསྒོམ་སྟེ༔ ཕར་རྒྱ་ཐུང་ངུ་ཐུང་ངུ་ལ་ཚུར་ཉེ་བར་དུ་ཚད་ནི་གང་གཏད་སར་སྡོད་པར་སོང་ཙ་ན་ནང་

དུ་ཐིམ་གཏང་ལ་བློ་དེ་ལ་གནས་པས་བདེ་བས་ལུས་ཡང་༔ རླུང་ཟིན་པའི་རྟགས་དབུགས་ཕྱི་ནང་དུ་རྒྱུ་བ་མི་ཚོར༔ ཇེ་བདེ་ཇེ་བདེ་ལ་སེམས་འོད་གསལ་སྟོང་པར་སེང་ངེ་གནས་པའོ༔ འགྲོ་འོང་ནི་རླུང་ཕར་ཅི་ནས་ཀྱང་རིང་དུ་བཏང་བས་ཤེས་པ་བདེ་སིང་ངེ་བ་ལ་བསླབ༔ དེ་ལྟར་ཕར་འགྲོ་ཚུར་འོང་རྒྱུན་ཇེ་རིང་ཇེ་རིང་ལ་བསླབས་པས་རླུང་ཡན་ལག་ལ་སོགས་པ་གར་དྲངས་པའི་སར་འདོན་ནུས་པའོ༔ གོང་དུ་གོམས་དུས་གྲངས་ནི་དེ་ལྟར་གཅིག་གཉིས་ལ་ཇེ་མང་ཇེ་མང་ལ་བསླབས་པས་ཞག་དུ་མ་བསམ་གཏན་ལ་གནས་པའོ༔ ཎ་ཉུ་སྲ༔ ཆགས་ཅན་འདོད་ཆགས་ཆེ་བའི་སྒོ་ནས་རྣམས་ནི༔ རྡོ་རྗེ་དང་པད་མའི་རིག་མ་དངོས་ལ་བརྟེན་ནས་བདེ་བ་བསྒོམ་པ་དང་༔ རང་གི་ལུས་ཀྱི་རླུང་སེམས་ཀྱི་བདེ་བ་སྒོམ་པའོ༔ དེ་ལ་རིག་མ་ལ་ནི༔ དང་པོ་ཕྱག་རྒྱ་མོ་མཚན་དང་ལྡན་པ་གང་ན་འདུག་པ་ནས་བཙལ་པ་དང་༔ དེ་ནས་མཚན་ལྡན་དེ་ཁ་དོག་སྔོ་སྐྱ་ལོ་བཅུ་དྲུག་བརྟགས་ཏེ་སྔགས་དང་རྫས་ཀྱིས་དགུག་པ་དང་༔ དེ་ནས་འཁྱུད་པ་དང་འོ་བྱེད་པ་སོགས་ཀྱིས་དགྱེས་པ་བསྐྱེད་པ་དང་༔ རྩ་བཙལ་གཡས་པ་དྲང་བའི་ཐབས་མཛུབ་མོས་ཅི་ནས་ཀྱང་དངོས་སུ་རྡོ་རྗེ་བཏེགས་པ་ཡིན་ཞིང་བསླང་པའི་ཐབས་དང་༔ རྩ་གཟུང་བའི་ཆོ་ག་གུར་གུམ་དང་སྦྲང་རྩི་དང་སྦྱར་བ་དེའི་ཆོ་ག་དང་༔ རིག་མའི་སྒྱིད་པ་གཉིས་ཡབ་ཀྱི་གྲེ་མོང་གིས་སྦྱོར་བ་བྱ་བའི་ཐབས་དང་རིགས་པའི་སྣ་ལ་སེན་མོ་དང་རྩ་བཤིག་པ་དང༔ སེམས་ཀྱིས་དབབ་པ་དང་ལུས་ཀྱིས་བྱང་ཆུབ་ཀྱི་ཐིག་ལེ་དབབ་པར་བྱ་བ་དང་༔ ཐིག་ལེ་ལུས་ཀྱི་གནད་དྲུག་གིས་དང་གཟུང་བའི་སེམས་དངཡིག་གེས་སོ་ཆོ་ག་དང་༔ ཐིག་ལེ་གྱེན་ལ་བཟློག་པའི་ཆོ་ག་རླུང་དང་ལུས་གནད་དྲུག་གིས་དང༔ བདེ་བའི་ཉམས་བརྟག་ཅིང་དེའི་དུས་ཀྱི་བདེ་བ་ཅི་འདྲ་བསྒོམ་པའོ་གོམས་པར་བྱ་བ་དང་༔ ལུས་ཀྱི་གནད་དང་ངག་གིས་རྩ་རྣམས་

སུ་དགྲམ་པ་དང་༔ དབུགས་དགང་སྟེ་དེ་རླུང་དང་བསྲེས་ཏེ་རྒྱས་གདབ་པ་དང་༔ དེ་ནས་རྗེས་ཀྱི་ཤེས་པའི་ཉམས་དེ་ཇི་འདྲ་བར་དུས་ཐམས་ཅད་དུ་རང་གི་རྒྱུད་ལ་འགེལ་བ་དང་༔ ཕྱག་རྒྱ་མོ་དེ་བྱི་ལ་ནག་མོའི་ཤ་མ་ལ་སོགས་པས་རབ་ཏུ་གསང་བར་བྱ་བའི་མན་ངག་བཅོ་ལྔའོ་གོ༔ དངོས་མེད་ནི་རླུང་སེམས་ཀྱི་བདེ་བ་ནི༔ རང་གི་ཐིག་ལེ་སྟོང་པའི་སྒྲོན་མ་ཀླད་པ་དུང་ཁང་ན་ཡོད་པ་ལ་འོད་དེ་ལ་ཡུན་རིང་པོར་ཤེས་པ་གཏད་ནས༔ དེ་ལྷན་གྱིས་ཐིག་ལེ་དེ་ཡི་ངོ་བོར་ཞུ་བསཐིག་ལེ་ཆེ་ཆུང་གི་ཚད་སྲན་ཆུང་ཙམ་ཕྲོམ་ཕྲོམ་བྱུང་བས༔ རང་གི་མགྲིན་པར་སླེབས་པས་རང་གི་ལུས་རིག་མ་དངོས་ལ་བརྟེན་པ་ཙམ་དུ་བདེ་བར་ཕྲིལ་གྱིས་སོང་བ་ལ་བློ་བཞག༔ དེ་ནས་སྙིང་ཁར་བབས་ལུས་བདེ་བ་ཆེན་པོར་འབྱོངཔས་དེ་བས་ཀྱང་བདེ་བ་རྒྱས༔ དེ་ནས་ལྟེ་བར་སླེབ་དེ་བས་ཀྱང་བདེ་བ་རྒྱས༔ གསང་བའི་ཁར་རྡོ་རྗེའི་རྩེ་མོར་སླེབས་པ་བདེ་བ་མཆོག་ཏུ་རྒྱས་པ་ལ་ཤེས་པ་བཞག་པས་ལུས་བདེ་སྟོང་དུ་མེར་གྱིས་འགྲོ་སྟེ༔ གསང་བ་ནས་སྤྱི་བོར་དེ་ཡར་བཟློག་མར་སྤྱི་བོ་ནས་གསང་བར་འབབས་ལ་ཤེས་པ་གཏད་སྟེ་བསྒོམས་པས༔ གོམས་པར་བྱས་པས་དུས་རེ་ཞིག་ཙམ་ན་ལུས་བདེ་བར་ཕྲིལ་གྱིས་འགྲོ༔ ལུས་བདེ་བར་སོང་བས་ངག་ཚིག་འཇམ་དུ་འགྲོ་བརླང་པོ་སྨྲ་སྙིང་མི་འདོད༔ རང་གི་རྒྱུད་ལ་སེམས་བདེ་བ་ལ་མི་རྟོག་པའི་ཉམས་སིང་སིང་ཀྱིས་བདེ་སྟོང་དུ་ཕྲིལ་གྱིས་འགྲོ་དེ་བརྟགས་ན་སྟོང་པར་བས༔ དེ་ལྟར་གོམས་པས་རྡོ་རྗེའི་བུ་གར་ཐིག་ལེ་དངོས་པོ་འབབ་པ་ཡང་འོང་བས་དེ་ནི་གོམས་པའི་ཚད་ཡིན་ནོ༔ ལུགས་གཅིག་ལཿདེ་ལྟར་ཐིག་ལེ་ཡར་བཟློག་མར་འབེབས་མིན་པར་ལྟེ་བར་དེ་ཅི་འདྲ་བ་གཅིག་མགྲིན་པར་གཅིག་གཅིག་ལ་

སྙིང་གར་གཅིག་སྤྱི་བོར་གཅིག་ལས་གཅིག་ཐིམ་པར་བཞག་པས་ཀྱང་བདེ་བ་རྒྱས་པར་འོང་༔ འོད་ཀྱི་ཐིག་ལེ་དེ་ཇེ་ཆུང་ཇེ་ཕྲ་ལ་སོང་བས་རང་གི་ཤེས་པ་ཡང་ཇེ་ཕྲ་ལ་བློ་གནས་པ་མཇུག་ཏུ་དངོས་མེད་སྟོང་པར་ཡང་ཡིན་ནོ༔ དེ་ནི་རིག་པ་མངོན་སུམ་ལ་བླ་མ་ཕེབས་པ་རྣམས་སེམས་དང་པོ་སྦྱང་བའི་ཐབས་མ་སྦྱངས་ན་སྒོམ་མི་ཤེས་ཏེ༔ དེ་ནས་གནས་པའི་ཐབས་ཀྱིས་གནས་པར་མ་བྱས་ན་ཡིད་འགྱུར་བས་གནས་པར་བྱས་ནས༔ ད་རིག་པ་མངོན་སུམ་གྱི་དོན་ལ་ཉིད་ལ་འཇུག་པ་བརྩམ་པར་བྱ་བ་ཡིན་ནོ༔ དེ་ལྟར་ན་རིག་པའི་སྔོན་དུ་འགྲོ་བས་འཚོ་མཁས་པའི་རྫི་འུས་ལུག་སྐྱོང་བ་ལ་དཔེའི་བླངས་ཏེ་དལ་གྱི་ཤེས་པ་བསྐྱང་བར་བསྟན༔ གང་ཞིག་དམུས་ལོང་རིག་པ་མངོན་སུམ་གྱི་སྣང་བ་ལ་ཡེ་ཤེས་རྒྱུན་ཆད་སྟེ་ཡེ་ཤེས་ཀྱི་སྒྲོན་མ་མིག་མེད་པས་མི་མཐོང་བ༔ དེ་ཡང་ཐུགས་རྗེས་བཟུང་བའི་ཕྱིར་རྟོགས་པར་བྱ་ཐབས་ལས་ཀྱི་ཕྱག་རྒྱ་རིག་མའི་བདེ་བ་ལ་གོམས་པར་བྱས་ལ་རླུང་གི་གྲངས་དབུགས་ཁུགས་གཅིག་ནས་གཉིས་སོགས་ལ་བསླབ་པར་བྱའོ༔ དེ་ནས་རྩ་གཅུན་ཏེ་མིག་གི་རྩ་མཐེབ་མོས་མནན་ཏེ་ཐིག་ལེ་བསྟན་ལ་དེ་ལ་བློ་གཏད་ལ་བསྒོམ་དུ་གཞུག་གོ༔ སྣང་བ་དེ་འདྲ་བ་རང་གི་སེམས་ཀྱི་སླེབ་ཚོད་ཙམ་མཆེད་པ་ལ་བློ་གཏད་པ་དང་ཤེས་པ་ལ་ཡང་དེ་ལྟར་འོང་ངོ་༔ མ་ནིང་ལ་ཐིག་ལེ་མི་འབྱུང་བས་ཐུགས་རྗེ་རྒྱུན་ཆད་པ་རྣམས་གཟུང་བར་བྱ་བ་ནི༔ སྔར་གྱི་རླུང་སེམས་ཀྱི་བདེ་བ་ཐིག་ལེ་འབར་འཛག་དེ་ལ་ཤེས་པ་གཏད་ལ་བསྒོམས་པས་ལུས་བདེ་བར་ཕྲིལ་གྱིས་འོང་ངོ་༔ ཐིག་ལེ་ཡང་མཚན་མའི་ཁ་ལས་དངོས་སུ་འོང་ངེས་སོ༔ རིགས་ཆད་རྗེས་སུ་གཟུང་བའི་མན་ངག་རྫོགས་སོ༔ ཨ་ཏི༔ རྒྱ་རྒྱ་རྒྱ༔ རྟྲ་ཉ༔ ༔ རྒྱ་གར་སྐད་དུ༔

ཨ་ཥ་ཏ་མ་ཏི་ཀྲ་མཿབོད་སྐད་དུ༔ དྲན་པ་ལྟ་བ་རིན་པོ་ཆེ་གསང་བའི་མན་ངག །སྒོམ་པ་རིན་པོ་ཆེ་གསལ་བའི་མན་ངག །སྤྱོད་པ་རིན་པོ་ཆེ་གསལ་བའི་མན་ངག །འབྲས་བུ་རིན་པོ་ཆེ་གསལ་བའི་མན་ངག་གོཁྱད་པར་གྱི་གདམས་པའོ་གནད་ཀྱི་གལ་མདོ༔ མ་རིག་པ་བཅོམ་ཡེ་ཤེས་ལྡན་འཁོར་བ་ལས་འདས་རིག་པ་རང་གི་ངོ་བོ་འཕོ་འགྱུར་མེད་པའི་ངང་ལ་རྟོགས་པས་ཕྱག་འཚལ་ལོ༔ པྲ་ཛྙཱ་བྷ་ངྷུ་རང་བཞིན་དང་ཤེས་རབ་ཀྱི་སྒྲས་ཡཱ་སིང་༔ ཋམྲཋཅུ༔ གཞི་གནས་པ་དང་རིག་པ་སྙིང་པོ་ཀུན་གྱི་བཅུད་མན་ངག་ཏུ་ཕྱུངས་པས༔ དྲན་གཞི་སྙིང་གི་དཀྱིལ་དུ་ཉམས་སུ་ལོང་ཞིག་པར་གདམས་པ་གཏེར་ཆེན་སྦོས༔ ངོ་བོ་རྟོག་མེད་མ་རིག་པ་རྟོགས་པས་སྦགས་པའི་རིག་པ་དེ་ལས་ཤར་བའི་མན་ངག་འདི༔ ཕྱི་དང་ནང་གི་ལྟ་སྤྱོད་དུ་མས་དེ་ཉིད་ངོ་བོ་བསྒྲིབས༔ དེ་ཉིད་རང་ལྟ་དང་གཞན་ལྟ་ལ་སོགས་འབྱེད་པའི་ལས་ཀྱི་མཐའ་འདིར་འདུས༔ སྒྲ་ཚིག་རྣམས་ཀྱིས་རིམ་དགུའི་འདོད་པས་རིག་པ་ཉིད་བཙལ་ཡང་༔ དོན་ལ་མ་རེག་རང་གི་ངོ་བོ་མ་མཐོང་བས་ཕྱོགས་ནས་རྒྱ་ཁྱི་རྒྱང་རིང་པོ་ནས་ཁྱི་ཟུག་པ་དང་འདྲ་ཟ༔ ལྟ་སྒོམ་སྤྱོད་པས་ཆོས་ཅན་སྤྱིི་ཡི་ལྟ་སྤྱོད་མིང་དུ་བཏགས་པ་ཡི༔ མིང་དེའི་གྲངས་དང་དབྱེ་བ་དགུ་ལ་སོགས་པ་འདིར་ཤེས་བྱ༔ སྤྱིར་ཐམས་ཅད་འཁྲུལ་པ་ཡིན་པས་འཁྲུལ་པའི་ཚུལ་སྤངས་ཡིན་པའི་ཚུལ་གཏན་ལ་འབེབས་པ་ཙམ་དུ༔ རྣམ་པར་བསྡུས་ཏེ་བཀོད་པ་འདི་དོན་ནོ༔ ལྟ་སྒོམ་སྤྱོད་པ་ལ་སོགས་པའི་ཡི་གེ་མང་པོ་གཞུང་ཅི་ཙམ་དུ་ཡོད་ཀྱང་རྣམས་ཀྱི་དོན་འདིར་ཚིག་ཉུང་ལ་དོན་ཆེ་བར་རྣམ་པར་བསྡུས་ནས་བསྟན་པ་འདི་ཡིན་ནོཿདེ་ལ་བཞི་སྟེ༔ སྤྱི་སྤྱོད་དང་རང་སྤྱོད་ཀྱིས་འཛིན་ཆགས་མེད་པའི་སྤྱོད་པའི་མན་ངག་གིས་འཁྲུལ་པའི་

སྣང་བ་ཟིལ་གྱིས་མནན་པ་དང་༔ སྤྱི་སྒོམ་པ་དང་རང་སྒོམ་པ་དམིགས་གཏད་མེད་པ་བསྒོམ་པའི་མན་ངག་གིས་དྲན་བྱེད་ཀྱི་ཡིད་མི་རྟོག་པར་གནས་པའི་ཐབས་ཟིལ་གྱིས་མནན་པ་དང་༔ གཟའ་གཏད་མེད་པ་ལྟ་བའི་མན་ངག་གིས་སྤྱི་ལྟ་དང་རང་ལྟ་གཉིས་ཀྱིས་སྤྱི་དང་རང་གི་མཚན་ཉིད་གཏན་ལ་ཕབ་པའོ་ཞེན་པའི་གཞི་ཉོན་མོངས་ཕྱིས་སྐྱེ་བར་བྱ་བའི་ཐབས་པ་ཟིལ་གྱིས་མནན་པ་དང༔ སྤྱི་འབྲས་དང་རང་འབྲས་སྤངས་ཐོབ་མེད་པ་འབྲས་བུའི་མན་ངག་གིས་རིག་པ་རྒྱུར་མི་ལྡོག་པ་ཕྱིར་མི་ལྡོག་པར་བསྟན་པའོ༔ སྤྱོད་པ་ནི་གཉིས་སྟེ༔ སྤྱིའི་རིམ་དགུ་ལ་སོགས་སྔགས་སྤྱི་ཡི་སྤྱོད་པ་དང་༔ རང་མན་ངག་རང་གཞུང་གི་སྤྱོད་པའོ༔ སྤྱི་ལ་བཞི་སྟེ༔ སྤྱོད་པ་པའི་གང་ཟག་གིས༔ གང་སྤྱོད་ན་སྣང་བ་ཞེན་པ་མེད་པར་སྤྱོད༔ གང་ལྟར་སྤྱོད་ན་ཆོས་ཐམས་ཅད་རང་བཞིན་མེད་པར༔ གང་ཐོབ་ན་སྣང་བ་རོ་སྙོམས་ཀྱི་འབྲས་བུ་ཐོབ་པའོ༔ རང་གི་མཚན་ཉིད་མན་ངག་འདི་ཉིད་ཀྱི་སྤྱོད་པ་ལ་བཞི་སྟེ༔ གང་གིས་སྤྱོད་ན་སྐལ་ལྡན་ཡོངས་ཀྱིས༔ གང་སྤྱོད་ན་སྣང་བ་འོད་གསལ་དེ་ལ༔ གང་ལྟར་སྤྱོད་ན་རིག་པ་དང་འདུ་འབྲལ་མེད་པར༔ གང་ཐོབ་ན་འཁྲུལ་སྣང་ཞིང་ཁམས་སུ་ཤར་བའོ་པའོ༔ བསྒོམ་པ་ལ་གཉིས་ཏེ༔ ཆོས་ཅན་སྤྱི་ཡི་བསྒོམ་པ་རྫོགས་ཆེན་སྤྱི་དང་༔ ཆོས་ཉིད་རང་གི་མན་ངག་གི་བསྒོམ་པའོ༔ སྤྱི་ལ་བཞི་སྟེ༔ གང་གིས་བསྒོམ་ན་རྟེན་གྱི་གང་ཟག་གིས་སྒོམ༔ གང་བསྒོམ་ན་མི་རྟོག་པ༔ གང་ལྟར་བསྒོམ་ན་བྱིང་རྒོད་སྤངས་ཏེ༔ གང་ཐོབ་ན་སྐྱེ་མེད་ཀྱི་འབྲས་བུ་ཐོབ་པའོ༔ རང་ལ་བཞི་སྟེ༔ གང་ལ་བསྒོམན་དབྱིངས་དང་རིག་པ༔ གང་གིས་བསྒོམ་ན་སྐལ་ལྡན་ཡོ་གིས༔ གང་ལྟར་བསྒོམ་ན་དབྱིངས་རིག་འདུས་འབྲལ་མེད་པའི་ཚུལ་དུ་༔ གང་ཐོབ་ན་རིག་

པ་རྟོག་པ་མེད་པའི་འབྲས་བུ་ཐོབ་པའོ་༔ ལྟ་བ་ལ་གཉིས་ཏེ༔ ཆོས་ཅན་སྤྱིའི་ལྟ་བ་དང་༔ ཆོས་ཉིད་རང་གི་ལྟ་བའོ༔ སྤྱི་ལ་བཞི་སྟེ༔ གང་ལ་རྫོགས་པ་ཆེན་པོའི་ལྟ་བ་རང་བཞིན་གཤིས་ལ་བལྟ༔ གང་གིས་རྟེན་གྱི་གང་ཟག་གིས་ལྟ༔ གང་ལྟར་ན་ཕྱོགས་དང་རིས་མེད་པར་ལྟ༔ གང་སངས་རྒྱས་ཀྱི་འབྲས་བུའོ་ཐོབ་པའོ༔ རང་ལ་བཞི་སྟེ༔ གང་ལ་ན་དབྱིངས་རིགས་ལ་ལྟ༔ གང་གིས་མིག་གིས་ལྟ༔ གང་ལྟར་གླང་ཆེན་ལྟ་བུའི་མིག་གིས་ལྟ༔ གང་སྐུ་གསུམ་ཕྱིར་མི་ལྡོག་པའི་འབྲས་བུ་ཐོབ་པའོ༔ འབྲས་བུ་ལ་གཉིས་ཏེ༔ ཆོས་ཅན་རྫོགས་ཆེན་གྱི་སྤྱིིའི་འབྲས་བུ་དང་༔ ཆོས་ཉིད་འདི་ཡི་གཞུང་༔ རང་གི་འབྲས་བུའོ༔ སྤྱི་ལ་བཞི་སྟེ༔ གང་སྟོང་ཉིདཐོབ༔ གང་གིས་རྟེན་གྱི་གང་ཟག་གིས་ཐོབ༔ གང་ལྟར་རིན་ཆེན་གསེར་གླིང་བྱིན་པ་ལྟ་བུ་ཐོབ༔ ཐོབ་པ་ལ་དགོས་པ་ཅི་ཡོད་སངས་རྒྱས་པའི་དགོས་པ་ཡོད་པའོ༔ རང་གི་ལ་བཞི་སྟེ༔ གང་སྐུ་གསུམ་འདུ་འབྲལ་མེད་པའི་དགོངས་པ་ཐོབ༔ གང་གིས་རང་གིས་རིག་པས་ཐོབ༔ གང་ལྟར་ཐོབ་རྒྱལ་པོ་གདན་ཟིན་པ་ལྟ་བུ་ལས་སམ་བསེ་ཤིང་གི་འབྲས་བུ་ལྟར་ཐོབ༔ ཐོབ་པ་དགོས་པ་ཅི་ཡོད་འབྲས་བུ་རྒྱུན་མི་ལྡོག་པའི་དགོས་པ་ཡོད་པའོ༔ ལྟ་སྒོམ་འབྱེད་པའི་ལྡེ་མིག་ཚིག་ཉུང་དོན་ཆེ་བ་སྦས་པ་མིག་འབྱེད་ཅེས་བྱ་བ་རྫོགས་སོ༔ ཨིཏི༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔ རྒྱ་གར་སྐད་དུ་འགའ་ཞིག་སྤྱོད་པ་ལ་མོས་ན་འདི་ལྟར་བྱ༔ ཙཪྱ་གྲི་དུ་ཀ་ལ་པ༔ བོད་སྐད་དུ༔ སྤྱོད་པ་ཡིག་གེ་མང་པོ་ལས་དོན་བསྡུས་པའི་སྒྲོན་མ༔ ཕྱི་ཡི་སྣང་བ་རང་དབང་སྟོང་པར་བསྒྱུར་ཉིད་ལ་ཕྱག་འཚལ་ལོ༔ འཁོར་བ་སྣང་དང་མི་སྣང་འདས་པ་འདི་ཀུན་འཁྲུལ་བས་ན༔ འཁོར་བའི་སྣང་བ་རྣམས་

མ་བརྟགས་ཉམས་དགའ་བརྟགས་ན་རང་བཞིན་མ་གྲུབ་པས་དཔྱད་མི་བཟོད༔ ཤིན་ཏུ་བརྟགས་ན་རང་བཞིན་གང་ཡང་མེད་པས་གང་ཡང་རྙེད་པ་མེད༔ དེ་ཡི་ཕྱིར་ན་སྤྱོད་པ་ལ་འདི་ལྟར་གོམས་པར་བྱ༔ ཡུལ་འདི་ལྟ་བུ་ཅིག་འདོད་པ་ཤེས་པ་ལ་མ་གྲུབ་པས་གཟའ་གཏད་མེད་པའི་ཤེས་པ་དྲན་མེད་དེ༔ དམིགས་གཏད་མེད་པའི་རིག་པ་མིག་ཏུ་བཅུག་མིག་ཏུ་བཅུག་ནས་ནི༔ གཟའ་གཏད་མེད་པའི་གཞི་ལ་ནམ་མཁའ་ལ་རང་རིག་བསྐྱལ༔ སྤངས་ཐོབ་མེད་པའི་ས་ལ་བཞག་པར་དབྱིངས་རིག་འདྲེས་པ་ལ་བྱའོ༔ སརྦ་བྷ་ཝ་ལྟ་སྒོམ་དུ་ཞེན་པ་ལས་བློ་ལྡོག་པའི་དགོས་པ་ཨ་དྷི་སཱ་མཱ་ཡཱ༔ ཨེ་མ་ཧོ༔ ཕྱིའི་སྤྱོད་པ་འདི་དྲན་པ་དང་དྲན་མེད་སྐྱེ་མེད་བློ་འདས་སོ༔ སྣང་བ་དང་སྣང་བ་ཐམས་ཅད་ཆོས་སྐུ་ངོ་སྤྲད་ཆོས་སྐུ་སྣང་སྟོང་དབྱེར་མེད་དུ་སྣང་སྟོང་རིག་སྟོང་དབྱེར་མེད་དུ་རིག་སྟོང་དྲན་པ་རང་ཡལ་དུ་ཐོག་བབས་འཁྲུལ་བ་རང་དག་ཏུ་ངོ་སྤྲད་དོ་ངོ་སྤྲད་པ་ཡུལ་སྣང་ལ་ཞེན་པ་ལོག་པའི་དགོས་པ་དང་༔ ནང་གི་སྤྱོད་པས་དྲན་པ་གཞི་དྲན་མེད་ལམ་སྐྱེ་མེད་ཐབས་བློ་འདས་གནད་དོ་སེམས་དང་ངོ་སྤྲད་པ་ལྟ་སྒོམ་དུ་ཞེན་པ་ལས་བློ་ལྡོག་པའི་དགོས་པ་དང་༔ གསང་བའི་སྤྱོད་པས་དྲན་པ་སྣང་བ་དྲན་མེད་སྟོང་པ་སྐྱེ་མེད་དབྱེར་མེད་བློ་འདས་རང་སར་དག་པའོ་དབྱིངས་དང་ངོ་སྤྲད་པ་དང་༔ གསང་བ་བླ་ན་མེད་པའི་སྤྱོད་པས་དྲན་པ་གཉིད་སད་པའི་མན་ངག །དྲན་མེད་གཉིད་ཀྱི་གདམས་ངག །སྐྱེ་མེད་གཉིད་ལོག་པའི་གདམས་ངག་བློ་འདས་རྨི་ལམ་གྱི་གདམས་ངག་གོ་རིག་པ་དང་ངོ་སྤྲད་གྲུབ་མཐའ་སྒྲ་ཚིག་ལས་བློ་ལྡོག་པའི་དགོས་པ་པའོ༔ ཕྱི་ལ་བཞི་སྟེ༔ ངོ་སྤྲད་པར་བྱ་བའི་ཡུལ་སྣང་བ་དང་༔ སྣང་བ་ཐམས་ཅད་གཅེར་གྲོལ་དུ་སྤྲད་པའི་ཐབས་དང་༔ ཐབས་དེས་གང་དུ་སྤྲད་པ་དབང་པོ་སྒོ་ལྔ་ལ་དང་༔ འཕྲོད་པའི་ཚད་འཇིག་རྟེན་ཕྱི་རོལ་ཚོང་སོ་ནམས་ལས་གྲོལ་བ་དང་ངོ་ཚ་ལས་གྲོལ་སྨྱོན་པ་དང་ལྐུགས་པ་ལྟ་བུ་ལ་སོགས་པའི་རྟགས་འོང་དོ༔

ནང་ལ་བཞི་སྟེ༔ ངོ་སྤྲད་པར་བྱ་བའི་ཡུལ་སེམས་ལ་དང་ཿསྤྲད་པའི་ཐབས་སྣ་ཚོགས་རང་སར་གྲོལ་བའི་ཉམས་རྨི་ལམ་གྱི་མན་ངག་གིས་དང་༔ གནས་གང་དུ་སྤྲད་པ་གཉིད་དང་རྨི་ལམ་གྱི་དུས་སུ་དང་༔ ཕྲད་པའི་ཚད་དྲན་པ་ཐམས་ཅད་རང་དག་སོང་བ་དང་སྣང་བ་ཐམས་ཅད་རྨི་ལམ་ལྟར་ཤེས་པ་དོ༔ མིག་གིས་སྤྱོད་པ་གསང་བ་ལ་བཞི་སྟེ༔ ངོ་སྤྲད་པར་བྱ་བའི་ཡུལ་ནམ་མཁའ་དང་སྒྲོན་མ་དང་༔ སྤྲད་པའི་ཐབས་ལུས་མ་འགུལ་མིག་མ་འགུལ་རིག་པ་མི་འགུལ་གདམས་ངག་གིས་དང་༔ གནས་གང་དུ་སྤྲད་པ་ནམ་མཁའ་དང་སྒྲོན་མ་རྣམས་པར་དག་པའི་དུས་སུ་དང་༔ འཕྲོད་པའི་ཚད་ལུས་སྒྱུ་མའི་སྐུར་མཐོང་བ་དང་མིག་སྒྲོན་མ་ལ་རྒྱུན་དུ་སྤྱོད་པ་དང་ཤེས་པ་དེ་དང་མི་འབྲལ་བའོ་དོ༔ གསང་བ་བླ་ན་མེད་པ་རིག་སྤྱོད་ལ་བཞི་སྟེ༔ ངོ་སྤྲད་པར་བྱ་བའི་ཡུལ་རིག་པ་དང་༔ སྤྲད་པའི་ཐབས་དབྱིངས་ཀྱི་ནང་དུ་རིག་པའི་གཟེར་གདབ་པ་དང༔ གནས་གང་དུ་སྤྲད་པ་དབྱིངས་རྣམ་དག་དང་རིག་པ་དང༔ ཕྲོད་པའི་ཚད་དོ་དབྱིངས་རྣམ་པར་དག་པ་དང་རིག་པ་སྟོང་པ་མི་འགུལ་བར་སྡོད་པས་སྣང་བ་མི་འགུལ་རིག་པ་མི་གཡོ་བའོ༔ སྤྱོད་པ་བསྡུས་པའི་སྒྲོན་མ་རྫོགས་སོ༔ ཨི་ཏི༔ སྒོམ་པ་ནི་ཡིག་གེ་མང་པོ་ལས་ཉུང་ངུ་བསྡུས་པའི་དོན་དུ་བྱས་པའི་སྒྲོན་མ༔ བདེ་ཆེན་མཉམ་པ་ཉིད་མི་གཡོ་བ་ལ་ཕྱག་འཚལ་ལོ༔ སརྦ་ཏི་འཁྲུལ་པ་ཐམས་ཅད་རང་དག་ཏུ་གྲོལ་བའི་གདམས་ངག་ལོ་ཀི་སུ་པཾ་དུ་ཡཱ༔ གདོས་བཅས་མིན་པས་དངོས་མེད་སྤྲོས་སྒྲ་ཚིག་ཡེ་ནས་མེད་པ་དང་བྲལ་བའི་རིག་པ་དྲན་པ་མིན་ནི༔ དྲན་པའི་རང་ངོ་ལ་ཐག་པ་བཅད་དེ་བཏད་པའི་ཕྱིརཿབསམ་པ་འགྱུར་བྱེད་དང་བྲལ་བའི་རིག་པ་འདུག་པར་གཞུག་པ་འདི་ཉིད་ནི༔ དྲན་པ་རྣམས་ནི་ཟད་པའི་སར་ངོ་བོ་ཀ་དག་ལ་བསྐྱལ་བའོ༔ ཡེ་ཤེས་ཀྱི་སྣང་བ་དག་པས་ཆོས་ཉིད་ཡུལ་ལོ་དྷ་མ་ཏྲི་ཀཱ་དུ་སུ་པཱཾ།

ཨེ་མ་ཧོ༔ ཕྱིའི་དྲན་པ་རྒྱུན་ཟད་ཀྱི་སྒོམ་པས་ལུས་ཀྱི་གནད་ཀྱི་རང་ཡན་ཚོགས་དྲུག་ལྷུག་པའི་མན་ངག་སྒོ་ལྔའི་སྣང་བ་གཏན་ལ་དབབ་པ་དང་༔ ནང་གི་བསམ་པ་རང་དག་པའི་སྒོམ་པས་སེམས་ཀྱི་བསམ་ཡིད་ཀྱི་འགྱུ་ས་ཁོང་སྟོང་གི་མན་ངག་གི་རླུང་གཟེར་བསྟན་ཁུངས་གཅད་པ་དང་༔ གསང་བ་སྐྱེ་མེད་རང་གནས་ཀྱི་སྒོམ་པས་རིག་པས་རང་ལུས་ལྷའི་སྐུར་སྙིང་ན་སྐུ་དང་ཡེ་ཤེས་སུ་ཡེ་ནས་བཞུགས་པས་བསྐྱེད་ཅིང་སྒོམ་མི་དགོས་གཏན་ལ་དབབ་པ་དང་༔ གསང་བ་བླ་ན་མེད་པ་གནས་པ་རང་གྲོལ་གྱི་སྒོམ་པས་དབྱིངས་རིག་ལ་རྒྱུན་དུ་བལྟས་པས་སྣང་བ་ཐམས་ཅད་ཆོས་སྐུར་གཏན་ལ་དབབ་པའོ༔ དྲན་པ་ཕྱི་ལུས་ཀྱི་གནད་ལ་བཞི་སྟེ༔ ཅི་གཏན་ལ་དབབ་པ་སྒོ་ལྔའི་ཤེས་པ་དང་༔ ཇི་ལྟར་གཏན་ལ་དབབ་པ་རང་གྲོལ་ལྷུག་པ་སོ་མར་དང་༔ གནས་གང་དུ་གཏན་ལ་དབབ་པ་ཡུལ་གཟུགས་སྒྲ་ལ་སོགས་པ་ལས་དང་༔ ཕེབས་པའི་ཚད་དམ་གཟུགས་ཅེར་གྲོལ་སྒྲ་གྲག་སྟོང་དྲི་ཚོར་སྟོང་ལ་སོགས་པར་གྲོལ་བའོ་རྟགས་སོ༔ བསམ་པ་ནང་སེམས་ཀྱི་གནད་ལ་བཞི་སྟེ༔ ཅི་གཏན་ལ་དབབ་པ་ཡིད་དམ་སེམས་དང་༔ འགྱུ་བ་རང་དག་པར་སྣང་གི་ཇི་ལྟར་གཏན་ལ་དབབ་པ་སེར་བུ་དང་འདྲ་བ་དེ་དང་༔ གནས་གང་དུ་གཏན་ལ་དབབ་པ་དྲན་པ་སངས་ནས་དྲན་མེད་དུ་སོང་ཚེ་དང་༔ ཕེབས་པའི་ཚད་དམ་རྟགས་སྔར་སྨྲས་པའི་ཚིག་དེ་ཕྱིས་ཟུངས་མེད་པ་སོགས་སོ༔ སྐྱེ་མེད་གསང་བའི་གནད་ལ་བཞི་སྟེ༔ ཅི་གཏན་ལ་དབབ་པ་རང་ལུས་ལྷའི་སྐུ་གསལ་བ་རིག་པའི་བདག་ཉིད་དང་༔ ཇི་ལྟར་དབབ་པ་ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དང༔ གནས་གང་དུ་ཙིཏྟ་རྩ་མིག་ཏུ་དབབ་པ་དང་༔ ཕེབས་པའི་ཚད་དམ་རྟགས་འབྱུང་བ་ལས་གྲོལ་ཏེ་ལུས་སྒྱུ་མའི་སྐུར་གྲོལ་གཟུགས་རང་བཞིན་མ་གྲུབ་པའོ་

སོ༔ གནས་པ་ལ་གསང་བ་བླ་ན་མེད་པ་ཕྱིར་མི་ལྡོག་པ་བཞི་སྟེ༔ ཅི་གཏན་ལ་དབབ་པ་སྣང་བ་ཐམས་ཅད་ཆོས་སྐུར་དང་༔ ཇི་ལྟར་གཏན་ལ་དབབ་པ་རིག་པ་རང་སྣང་དབྱིངས་ཀྱི་ཡུལ་དུ་གཟུགས་ཐམས་ཅད་རང་གཞན་མ་གྲུབ་པ་དང་༔ གནས་གང་དུ་གཏན་ལ་དབབ་པ་ཕྱི་ཡི་ནམ་མཁའ་དང་ནང་གི་ནམ་མཁའ་དང༔ ཕེབས་པའི་དབྱིངས་ལ་གོམས་པས་སྣང་བ་དབང་དུ་འདུས་རིག་པ་ལ་གོམས་པས་དྲན་པ་དབང་དུ་འདུས་པའོ་ཚད་དམ་རྟགས་སོ༔ སྒོམ་པ་བསྡུས་པའི་སྒྲོན་མ་རྫོགས་སོ༔ ཨི་ཏི༔ རྒྱ༔ བོད་སྐད་དུ༔ ལྟ་བ་ཡི་གེ་མང་པོ་ལས་ཉུང་བར་བསྡུས་པའི་སྒྲོན་མ་ཞེས་བྱ་བ༔ རིག་པའི་ངོ་བོ་སྟོང་ཉིད་ཅིར་ཡང་སྟོན་འོད་དང་ཁ་དོག་ལ་སོགས་པ་ལ་ཕྱག་འཚལ་ལོ༔ སཱ་མཱ་ཀཱ་བག་ཡཱཾ་སྐྱེ་ཤི་རྩད་ནས་གཅོད་པའི་མན་ངག་༔ ཕྱོགས་རིས་མེད་པའི་རིག་པ་ངོ་བོ་ཉིད་དེ་ཟང་ཐལ་ནི༔ གང་གིས་མ་བསྒྲིབས་ཉོན་མོངས་པ་རང་ལ་ཐོག་པ་འབྱུང་བ་བཞི་ལ་མེད༔ ཡུལ་ལས་ཁྱབ་གདལ་ཆེན་པོའི་ཕོ་བྲང་རིན་ཆེན་སྙིང་ནང་དུ་༔ འབྱུང་ལྔ་ཟད་པའི་རིག་པ་འཁྲུལ་པ་འགགས་པ་སྐྱོན་དང་བྲལ་བ་ལྷིངས་པོ་ལྟོསཿཨེ་མ་ངོ་མཚར་ཆེ་ཧོ༔ ཕྱི་ཡུལ་ལུས་ཕྱི་ལྟ་བ་ལ་བལྟས་པས་ཡུལ་ལྔ་དང་དབང་པོ་ལྔ་ལ་སོགས་པ་འཁྲུལ་པ་རང་སར་དག་པ་དང་༔ ནང་གི་སེམས་ལ་བལྟས་པས་འཁྲུལ་པ་བཞི་ལ་ལྟ་བས་མ་རིག་པར་རང་སར་དག་པ་དང་༔ མ་འཁྲུལ་པའི་ཡེ་ཤེས་གསང་བ་དངོས་པོ་འདུག་ཚུལ་ལ་བལྟས་པས་ཉོན་མོངས་པར་རང་སར་དག་རྒྱས་གདབ་པ་དང་རང་གྲོལ་བ་ལ་སོགས་པ་དང་༔ དབྱིངས་དང་རིག་པ་གསང་བ་དབང་པོའི་སྤྱོད་ཡུལ་བླ་ན་མེད་པ་རིག་པ་ལ་འབྱུང་བ་དང་དབང་པོའི་བལྟས་པས་ཡུལ་

ཐམས་ཅད་རང་སར་དག་པའོ༔ ཡུལ་རིག་རྣམ་པར་དག་པའི་མན་ངག་གིས་ཕྱི་ལྟ་ལ་བཞི་སྟེ་གང་རྣམ་པར་དག་པ་ལུས་ལ་བརྟེན་པ་རྣམས་དང་༔ ཇི་ལྟར་དག་པ་འཁྲུལ་པ་རྣམས་རང་གྲོལ་དུ་དང་༔ གནས་གང་དུ་དག་པ་རང་བཞིན་ལྷུན་གྲུབ་ལ་དང་༔ དག་པའི་ཚད་ཕྱི་འཁྲུལ་པས་མི་གནོན་པ་དང་ཡུལ་དུ་མ་མཐོང་བ་སོགས་དོ༔ ནང་ལྟ་ལ་གཉིས་སུ་མེད་པར་བསྲེག་པའི་མན་ངག་གིས་བཞི་སྟེ༔ གང་དག་པ་མ་རིག་པ་དང་༔ ཇི་ལྟར་ཚ་ཚྭ་དང་རྐོས་ཕོར་ལྟར་དག་པ་དང་༔ གནས་གང་དུ་རང་གི་དྲན་གཞི་སྙིང་གི་དཀྱིལ་དུ་དག་པ་དང་༔ དག་པའི་སྣང་སྲིད་གཞི་བཞེངས་སུ་ཤར་བ་དང་གཞི་བཞག་ཏུ་གནས་པ་དང་ཡོངས་གྲོལ་དུ་གྲོལ་བ་དང་ཀ་དག་ཏུ་རྟོགས་པའོ༔ ཚད་དོ༔ གསང་བ་ལ་ཤེས་པ་དྲང་ཐད་ཀྱི་མན་ངག་གིས་བཞི་སྟེ༔ གང་དག་པ་ཉོན་མོངས་ལྔ་དང་༔ ཇི་ལྟར་དག་པ་ཆུའི་རྙོག་མ་དྭངས་བ་ལྟར་དང་༔ གནས་གང་དུ་འབྱུང་ལྔ་ཡུལ་གྱི་སྣང་བའི་དུས་ན་དག་པ་དང་༔ དག་པའི་རང་ཆོས་རང་གྲོལ་དུ་ཤེས་པ་དང་ཚད་དོ༔ གསང་བ་བླ་ན་མེད་པ་མི་འགྱུར་བ་རིག་པ་ཆེན་པོའི་མན་ངག་གིས་ལ་བཞི་སྟེ༔ གང་དག་པ་ཡུལ་ཐམས་ཅད་དང་༔ ཇི་ལྟར་དག་པ་མཁའ་ལ་སྤྲིན་དེངས་ལྟར་དང་༔ གནས་གང་དུ་དག་པ་ནམ་མཁའི་ངང་དུ་མིག་རང་བཞིན་རང་མཐོང་བས་དང་༔ དག་པའི་རིག་པ་འགྲོ་འོང་མེད་དབྱིངས་ལ་བསྣན་འཕྲི་མེད་སྒྲོན་མ་ལ་འཕྲིག་མེད་པའོ་ཚད་དོ༔ ལྟ་བ་བསྡུས་པའི་སྒྲོན་མ་རྫོགས་སོ༔ ཨི་ཏི༔ བོད་སྐད་དུཿའབྲས་བུ་ཡི་གེ་མང་པོ་ལ་ཉུང་ངུར་བསྡུས་པའི་སྒྲོན་མ༔ སྟོང་པ་ཡེ་སངས་རྒྱས་དངོས་པོའི་མཐའ་ཟད་པའི་རིག་པ་ལ་ཕྱག་འཚལ་ལོ༔ ས་མཱ་དུ་ལྱ་ཀ་ཧཱུྃ་སྣང་བ་སྐྱེ་མེད་དུ་གྲོལ་བའི་མན་ངག༔ སྟོང་པ་

རང་ལུས་རིག་པ་དང་དེ་མཚོན་པའི་ཕྱག་རྒྱ་ཆེ་གནས་པ༔ འབྲས་བུ་བྱས་བྱུང་མ་ཡིན་ཡེ་ཐོབ་ཁྱབ་པས་གཏན་ཕབ་པས༔ ཤེས་རབ་འཛིན་མེད་བློས་བཏགས་པ་མ་ཡིན་རང་གསལ་ཆེན་པོས་སྤྱོདཿའདི་ནི་རྒྱལ་བ་ཀུན་གྱི་དགོངས་པ་གསང་དོན་ཆེཿཨེ་མ་ཧོཿཕྱི་ཡི་འབྲས་བུ་རང་གི་ལུས་ཡེ་ནས་སྐུ་གསུམ་དུ་འདུག་པ་ལུས་སྐུ་གསུམ་དུ་གྲོལ་ཨིརྱྡྷུ༔ མྐྵྡྨྣྲཱོིུ དྷྑཱུྟྒཱོིུ༔ བ་དང་ཿནང་གི་འབྲས་བུ་གཟུགས་སྣང་སྤྲུལ་སྐུ་འཛིན་ཆ་ལོངས་སྐུ་ངོ་བོ་སྟོང་པ་ཆོས་སྐུ་སྟེ་སྣང་བ་སྐུ་གསུམ་དུ་གྲོལ་བ་དང་༔ གསང་བའི་འབྲས་བུ་འཁྲུལ་པའི་བྱས་ཆོས་ཐམས་ཅད་ཞིང་ཁམས་དབྱིངས་རིག་ཏུ་གསལ་བ་དང་༔ གསང་བ་བླ་ན་མེད་པའི་འབྲས་བུ་རིག་པ་རྡོ་རྗེ་ལུ་གུ་རྒྱུད་ཕྱིར་མི་ལྡོག་པའི་ས་ལ་གཟེར་ཐེབས་པའོ༔ ཕྱི་ལ་ལུས་ཕྱིར་མི་ལྡོག་པའི་མན་ངག་གིས་གསུམ་སྟེ༔ སྤྲུལ་སྐུ་རང་གིས་ལུས་བྱ་བྱེད་དུ་མས་བརྒྱན་པ་ངོ་སྤྲོད་ཀྱི་མན་ངག་གིས་སྐྱེས་པ་གཏན་ལ་མའི་མངལ་ནས་ཐོན་ནས་གནས་ཚད་སྤྲུལ་སྐུ་ཡིན་པ་ཕེབས་པ་དང་༔ མ་ཡི་མངལ་ནས་དྲན་པའི་ལོངས་སྐུ་ངོ་སྤྲོད་ཀྱི་གཞི་ལོངས་སྐུ་མན་ངག་གིས་གནས་པ་གཏན་ལ་མ་ཡི་མངལ་དུ་ཚུད་ནས་ཞག་ཉེར་བརྒྱད་ནས་མ་སྐྱེས་བར་ཕེབས་པ་དང་༔ ཆོས་སྐུ་ངོ་སྤྲོད་ཀྱི་མན་ངག་གིས་བར་དོར་ཤེས་པ་དབང་པོ་ཀུན་ཚང་ཐོགས་མེད་དུ་འབྱུང་བ་ཆོས་སྐུ་ཡིན་བར་ད་ོནས་མའི་མངལ་དུ་ཚུད་པ་མེར་མེར་པོ་བདུན་ནུར་ནུར་པོ་དང་ཞག་བདུན་ལྟར་ལྟར་པོ་གོར་གོར་པོ་བདུན་ཚན་དུ་ཚན་བཞི་ཕན་ཆོད་གཏན་ལ་ཕེབས་པའོ༔ ནང་སེམས་སྤྲོས་པ་དང་བྲལ་བའི་མན་ངག་ལ་གསུམ་སྟེ༔ སྤྲུལ་སྐུ་ངོ་སྤྲོད་ཀྱི་ལུས་གྲུབ་པས་སྤྲུལ་སྐུ་རང་ཆས་སུ་ཡིན་མན་ངག་གིས་རང་གི་ལུས་ཕྱིར་འབྱུང་བ་བཞིར་མི་ལྡོག་པར་སྐྱེ་མེད་བྱ་བ་དང༔ སྒོ་ལྔའི་གསལ་ཆ་ལོངས་སྐུ་མ་འགགས་པ་འདི་

ངོ་སྤྲོད་ཀྱི་མན་ངག་གིས་སྒོ་ལྔའི་གསལ་བ་ལ་མི་གནས་པར་སྣང་བ་སྣ་ཚོགས་ཐམས་ཅད་སྒོ་ལྔ་དང་ཁམས་དང་སྐྱེ་མཆེད་ཕྱིར་མི་ལྡོག་པར་བྱ་བ་དང་༔ ཆོས་སྐུ་ངོ་སྤྲོད་ཀྱི་མན་ངག་གིས་སྤྲོས་མེད་ཐིག་ལེ་ཉག་གཅིག་སེམས་དང་རིག་པ་ཕྱིར་མི་ལྡོག་པར་རྟོག་མེད་དྲན་པ་ལས་འདས་པ་རང་སྣང་རང་དག་ཏུ་བསྟན་པའོ༔ གསང་བ་རིག་པ་རང་གྲོལ་གྱི་མན་ངག་ལ་བཞི་སྟེ༔ དག་པ་དབྱིངས་ཕྱི་དབྱིངས་དང་ནང་དབྱིངས་ཀྱི་མན་ངག་གིས་རྟེན་གཞལ་ཡས་ཁང་བསྐྱེད་པའི་རིམ་པ་རྣམ་པར་དག་པ་ཕྱིར་མི་ལྡོག་པར་བྱ་བ་དང་༔ གནས་རང་ལུས་ལྷའི་སྐུར་གཏན་ལ་དབབ་པ་པ་སྐུ་གསུམ་གྱི་མན་ངག་གིས་བརྟེན་པ་ལྷའི་སྐུ་སྣང་བ་གཏན་ལ་ཕབ་པས་ཕྱིར་མི་ལྡོག་པར་བྱ་བ་དང་༔ ཉམས་ལེན་པ་གོམས་པ་ཐོགས་པ་མེད་པ་ཤེས་རབ་ཀྱི་མན་ངག་གིས་བླ་མའི་གདམས་ངག་རྒྱུད་ལ་འདྲེས་པས་ཕྱིར་མི་ལྡོག་པར་བྱ་བ་དང་༔ ངོ་བོ་འགྱུར་བ་མེད་པ་རིག་པའི་མན་ངག་གིས་རྟོགས་པ་འདི་ཉིད་རྟོགས་དགོས་ལྟ་སྒོམ་སྤྱོད་པ་རྣམས་ཕྱིར་མི་ལྡོག་པར་བསྟན་པའོ༔ གསང་བ་བླ་ན་མེད་པ་རིག་པ་རང་གྲོལ་གྱི་མན་ངག་ལ་ལྔ་སྟེ༔ མིག་དང་ཤེས་པ་སྒྲོན་མ་རང་བཅུད་ཀྱི་མན་ངག་མིང་དུ་བཏགས་པ་གིས་མཚན་ཉིད་འཛིན་པའི་མ་སྨིན་པའི་རིག་པ་རིག་པ་ཐིག་ལེ་ལས་ཕྱིར་མི་ལྡོག་པར་བྱ་བ་དང་༔ ཡེ་ནས་འཁྲུལ་པ་སྦྱོང་བ་ཡེ་ཤེས་གཏིང་བཟློག་གི་མན་ངག་གིས་རང་ལུས་ལ་ཁྱབ་དུས་རང་གསལ་དུ་གཞི་འཛིན་པའི་རིག་པ་འོད་ལས་ཕྱིར་མི་ལྡོག་པར་བྱ་བ་དང་༔ འཁོར་བ་རིག་པ་ཡེ་ནས་བྱུང་མཐའ་མའི་གཏན་ལ་དབབ་པ་རུ་བཟློག་གི་མན་ངག་གིས་ངོ་བོ་ཀ་དག་ཏུ་རང་གནས་པ་གཞི་གནས་ཀྱི་རིག་པ་ནམ་མཁའ་ལ་མིག་ཤེས་རིག་པ་གསུམ་མ་བྲལ་བས་ཕྱིར་མི་ལྡོག་པར་བྱ་བ་དང་༔ ལུས་དང་ཡུལ་དང་རིག་པའི་རིག་པ་

གནད་གསུམ་གྱི་མན་ངག་གིས་ལྷག་མཐོང་གིས་རིག་པ་རྡོ་རྗེ་ལུ་གུ་རྒྱུད་ཉམས་ལེན་དུས་ན་ནང་དབྱིངས་ལས་ཕྱིར་མི་ལྡོག་པར་བྱ་བ་དང་༔ སྣང་བ་དེ་ལྟར་སྣང་བ་ཤར་བ་དེ་ཐམས་ཅད་ལ་མ་ཆགས་མ་ཞེན་པ་ཅེར་གྲོལ་གྱི་མན་ངག་གིས་ཐོད་རྒལ་གྱི་རིག་པ་ལྟ་བ་རྟོགས་པའི་དུས་ན་འབྲས་བུ་སྐུ་གསུམ་གྱི་ངོ་བོ་ལས་ཕྱིར་མི་ལྡོག་པར་འབྲས་བུ་རང་དག་པས་ངོ་བོ་གཅིག་ཏུ་བསྟན་པའོ༔ འདི་ནི་ཕུང་པོ་ཁམས་དང་སྐྱེད་མཆེད་དང་༔ དབང་པོ་ཡུལ་དང་ཁ་དོག་རྣམས་ཡོངས་སུ་མྱ་ངན་ལས་བཟླ་བར་བྱེད་པའི་སྣང་སྲིད་རྣམ་དག་གི་འབྲས་བུ་ཐབས་སོ༔ འབྲས་བུ་རྣམ་པར་བསྡུས་པ་རིན་པོ་ཆེའི་སྒྲོན་མ་རྫོགས་སོ༔ སྔགས་སྲུང་གི་རྒྱལ་མོ་དཔལ་ཨེ་ཀ་ཙ་ཏིས་སྲུངས་ཤིག༔ བུདྡྷུའི་དགོངས་པ་ཅིག་ཅར་དུ་སྟོན་པར་བྱེད་པའི་མན་ངག་གསང་བ་བས་ཀྱང་ཆེས་གསང་བ་སྣོད་མིན་ལ་བྱིན་ན་མཁའ་འགྲོོ་སྡེ་བཅོ་བརྒྱད་ཀྱིས་ཆད་པ་ཆོད་ཅིག༔ ལས་ཅན་ཅིག་དང་ཕྲད་པར་ཤོག༔ རྒྱ་གར་སྐད་དུ༔ མཱ་ལ་སཱ༔ མཱ་ཏཱི་བཱ་ཡྻ༔ སངས་རྒྱས་ཀྱི་དགོངས་པ་ཅིག་ཅར་དུ་སྟོན་པར་བྱེད་པའི་མན་ངག་གསང་བ་ལས་ཀྱང་ཆེས་གསང་བའོ་ཨེ་བྷ་དྷུ༔ མཱ་ཏྤི་མཱ༔ ཀུན་མཱ༔ བོད་སྐད་དུ༔ གསང་བའི་སྙིང་པོ་བསྡུས་པའི་སྒྲོན་མ་ཡིན་ཡང་བཅུད༔ ཉམས་སུ་བླང་བའི་གལ་མན་ངག་གི་བཅུད་ཕུར་མདོ༔ གབ་པའི་གསང་བའི་ཡེ་ཤེས་སོ་གཏེར་༔ སྦས་པའི་མངོན་དུ་འབྱིན་པས་མཆོད༔ གསལ་བའི་ལྟ་བ་དང་འགྲེལ་བསམིག༔ བརྡེག་པའི་མཚོན་ཉོན་མོངས་པ་གཅོད་པ་༔ འབྱེད་པའི་ལྡེ་རྒྱུད་ཀྱི་སྒོམ་ཉམས་བསྡུས་ཏེ་གསལ་བར་བྱེད་པའོ་མིག༔ སྡོམ་པའི་རིག་པ་དྭངས་པས་ལྟ་བ་གཟེར༔ སྦྱོར་པའི་མིག་དང་རིག་པ་རྩི༔ འཕྲབ་པའི་ལྕག་རིག་པ་གཏད་སར་སྐྱེལ་བའོ༔

མཐོན་པོའི་ཐེག་པ་ཀུན་གྱི་སྙིང་པོ་རྩེ༔ ཡངས་པའི་མཐའ་དབུས་མེད་པས་དཀྱིལ༔ བསྒྱུར་བའི་རིག་པ་འཁྲུལ་པ་ལས་ཁ་ཡན་མི་འཇུག་སྲབ༔ གབ་པའི་བཅུད་སྙིང་པོ་ཡིན་པས་གསང་བའི་ཐེག་པ་ཚིག་ཙམ་ཡང་མི་སྨྲ་བ་ཉུང་དུ་འདུས་པ་ཞེས་བྱ་བ༔ མྦྱ༔ ཨཱ་པ་ལུང་ཐམས་ཅད་འདུས་པ་ཡཱ༔ བཅོམ་ལྡན་འདས་མ་རིག་པ་འཁྲུལ་པ་ལས་གབ་པ་མངོན་འབྱིན་ལ་རང་གཞན་གྱི་མཉམ་པ་ཉིད་སྐྱེ་བའི་ཐབས་ཐ་མ་ཟད་སར་སྐྱོལ་བའི་ཡེ་ཤེས་ལ་ཕྱག་འཚལ་ལོ༔ ཨ༔ སྐྱེ་བ་ཐམས་ཅད་རང་བཞིན་གྱི་སྒོ་འགེགས་པ་ཨེ་མ༔ སྣོད་ལྡན་གྱི་མཚན་ཉིད་ནི་དད་དང་སྙིང་རྗེ་གཏོང་ཕོད་ཡངས་པ་སྤྱོད་པས་ཐམས་ཅད་དུ་ཆེ༔ དབང་པོ་ཤིན་ཏུ་རྣོ་ཞིང་ངག་འཇམ་དུལ་ཚིག་ཞིབ་སྨྲ༔ བླ་མ་ལ་གུས་པ་དང་ཚིག་མང་ཡང་གི་སྤྲོས་པ་ཐམས་ཅད་ཆོད༔ སྣོད་མ་བརྟགས་གསང་ཚིག་གཞན་དུ་སྐྱེ་བོ་དང་ཐེག་དམན་ལ་དུས་མིན་རྡུལ་ཙམ་ཡང་༔ བརྗོད་པར་མི་བྱེད་མི་སྨྲ་བར་ཉམས་ལེན་ཉིད་ལ་རྟག་ཏུ་བརྩོན༔ གང་ཟག་འདི་ནི་གསང་སྔགས་གསང་བ་བསྟན་དུ་རུང་བའི་སྣོད་ཡིན་པས༔ ལས་ཅན་གྱི་བུ་མཆོག་དད་ལྡན་འདི་ལྟ་བུ་ནི་དཀོན་པས་ན༔ བདུད་རྩིའི་མན་ངག་ཐིགས་པ་སྙིང་གི་བཅུད་ཚིག་ཉུང་དོན་ཆེ་བ་འདི་ནི༔ བུ་ཡི་བུ་མཆོག་སྣོད་དང་ལྡན་པ་དེ་ལ་བསྟན་པར་བྱ༔ ཨེ་དྷ་སྐྱེ་མེད་དག་པའི་ཀློང་ཡེ༔ ཨེ་མ་ངོ་མཚར་བ་ཧོ༔ ལས་དང་པོ་པས་ཉམས་སུ་ལེན་པའི་གནས་བསྟན་པ་དུར་ཁྲོད་དམ༔ ནགས་ཁྲོད་དམ༔ ལུང་སྟོང་ངམ༔ ཤིན་ཏུ་དབེན་པ་མི་སྐད་དང་ཁྱི་སྐད་ལ་སོགས་པའི་སྒྲ་ཙམ་ཡང་མི་གྲག་ཅིང་རླུང་དང་སེར་བུའི་སྒྲ་ཙམ་ཡང་མེད་པའི་གནས་སུ༔ སྣོད་དང་ལྡན་པའི་བུ་གཉིས་ས་གསུམ་ཚུན་ཆོད་ལས༔ དེ་ལས་མང་ན་མན་ངག་ཤིན་ཏུ་ཟབ་པས་རང་དང་སློབ་མ་གཉིས་ཀ་ལ་མཁའ་འགྲོས་ཆད་པ་འབྱུང་བས་གསུམ་ཚུན་ཆོད་ལས་བསྟན་པར་མི་བྱའོ༔ དེ་ལ་དད་པ་དང་ལྡན་པའི་བུ་ཡིས་དཀོན་མཆོག་ལ་ལུས་ཀྱི་བར་ཆོད་ཞི་བར་བྱ་བའི་

ཕྱིར་མར་མེ་དང་དྲི་ཆབ་དང་ལྷ་བཤོས་སོགས་ཕྱི་ཡི་མཆོད་པ་རྒྱ་ཆེན་པོ་བྱ་བ་དང་༔ ནང་གི་བར་ཆོད་ཞི་བའི་ཐབས་མཁའ་འགྲོ་ཆོས་སྐྱོང་ལ་ཚོགས་དང་གཏོར་མས་མཉེས་པར་བྱས་ཤིང་གདམས་པ་འདི་གསེར་དང་འདྲ་བས་མཆོག་ཏུ་བླ་མ་ལ་ཡོན་གསེར་གྱི་མཎྜལ་དང་བསྙེན་བཀུར་གྱིས་མཉེས་པར་བྱས་ནས༔ ཤིན་ཏུ་ཟབ་པ་གསང་བའི་མན་ངག་ཉམས་སུ་ལེན་པའི་ཐབས་སྔ་མའི་སྡིག་པ་ཅི་བྱས་ཀྱང་མི་གནོད་པར་གྲོལ་བར་བྱེད་པ་འཁོར་བ་ཐོག་མཐའ་གཅོད་པའི་མཚོན་འདི་དད་ལྡན་གྱི་བུས་ཞུ་བར་བྱའོ༔ དེ་ལ་གསང་བའི་ཡི་གེ་འདི་རྒྱུད་ལ་འདྲིས་པར་གོ་བར་བྱ་ཤེས་པར་བྱས་ལ༔ ཡི་གེ་དེ་ཚིག་ཙམ་བརྗོད་ན་ཡང་ཚེའི་བར་ཆད་དུ་འགྱུར་བས་སུས་ཀྱང་མི་མཐོང་བའི་བྲག་གི་ཐེམ་པའམ༔ ཆུ་དང་མེ་ལ་སོགས་འབྱུང་བའི་དགྲས་མི་ཚུགས་པའི་གནས་སུ་བཞུགས་སུ་གསོལ་སྦས་ཏེ་མཁའ་འགྲོ་མ་དང་ཆོས་རྟགས་ཀྱིས་ལ་རྒྱས་གདབ་པར་བྱའོ༔ དང་པོ་འདི་ནས་མར་ལུས་ངག་གི་ཞེན་པ་ལས་གྲོལ་བའི་ཐབས་བསྟན་ནོ་ཉམས་སུ་ལེན་པའི་ལས་དང་པོ་དེས་ལུས་ངག་གི་བྱ་བ་ཕྱི་ནང་གི་བྱ་བ་ཐམས་ཅད་གང་ཡང་མི་བྱ་བར་བཏང་ལ༔ སྐྱེ་བོའམ་ཐེག་པ་དམན་པའི་རིགས་ཀྱི་སྐད་ཙམ་ཡང་མི་ཐོས་པའི་སར་ལུང་སྟོང་ངམ་རྟག་ཏུ་རི་ཁྲོད་དུ་སོང་སྟེ༔ མཁའ་འགྲོ་མ་རྣམས་ལ་ཚོགས་གཏོར་གྱིས་མཉེས་པར་བྱ་བ་ནི་རང་གི་བར་ཆད་ཞི་བར་བྱ་བའི་ཐབས་སོ༔ དེ་ནས་ལུས་ངག་ཡིད་ཀྱིས་བྱ་བ་ཅི་ཡང་མི་བྱ་བར་ལྷ་དང་སྔགས་ལ་སོགས་པ་ལྟ་སྒོམ་གྱི་བྱ་བ་ཡང་མེད་པར་ཐ་མལ་པ་ལྟར་ཤིན་ཏུ་དལ་བར་ཞག་དགུ་ནས་བཅུ་ཙམ་དུ་ཤེས་པ་གར་ཡང་འབྲོས་པར་འདུག་ན་དེ་ལ་ཡུན་རིང་བར་རྣལ་དུ་མ་བཅོས་པའི་བསྡད་པ་ནི་ལུས་ངག་སོར་ཆུད་པར་བྱ་པའི་རིག་པ་འདི་ཡིན་ནོ་བྱ་བའི་བརྡའོ༔ ཐབས་སོ༔ དེ་ནས་ལུས་འགྲོ་སྙིང་འདོད་དམ་ངག་སྨྲ་སྙིང་འདོད་དམ་སེམས་འཕྲོས་ན་འདི་ལྟར་བྱ༔ ཞག་གསུམ་ནས་བཞི་ལྔར་ལུས་ཀྱི་བྱ་བ་རྒྱུག་པ་དང་༔ གར་དང་༔ འགུལ་བ་དང་༔ དཀྲུག་པ་ཡན་ལག་མགོ་སྒྲིལ་བ་ལུས་བསྒུལ་བ་དྲག་ཏུ་བསྐུམ་པ་ཙོག་བུར་འདུག་པ་དང་༔ ཉལ་བ་དང་༔ ལངས་པ་དང་༔ འདུག་པ་སུག་བཞི་སར་བཙུག་ཏེ་འགྲོ་བ་གན་རྐྱལ་ཉལ་བ་རྐང་ལག་བཞི་གནམ་ལ་བསྟན་ཐང་བཅད་དེ་བརྐྱང་པ་གཡབ་

པ༔ ལ་སོགས་སྣ་ཚོགས་བྱེད་པ་ནིཿལུས་ཀྱི་ཞེན་པ་བཟློག་སྟེ་ལུས་རྣལ་དུ་ཕེབས་ལུས་ལ་བར་ཆོད་གྱིས་མི་ཚུགས་པའི་དགོས་པའོ༔ དེ་ནས་ཡང་ཞག་གསུམ་བཞིར་ངག་ཏུ་སྒྲ་དང་སྔགས་སྣ་ཚོགས་དང་སྣ་ཚོགས་འཁྲུལ་པའི་གཏམ་གུ་དང་དུབ་དང་བོན་དང་མཆོད་པ་ཀུ་ཅོ་ཐམས་ཅད་འཁྲུལ་ཚིག་སྣ་ཚོགས་དང་༔ ངོ་ཚ་བའི་གཏམ་མ་དང་སྲིང་མོ་ལ་སྤྱོད་པར་བྱའོ་སོགས་སྣ་ཚོགས་དང་༔ ཟུང་ཞིག་དང་གསོད་པ་དང༔ རྒྱོབ་ཅིག་ལ་སོགས་སྣ་ཚོགས་སྨྲ་བ་ནི་ངག་ཚི་ཆད་དེ་དལ་བས་རྣལ་དུ་འབེབས་པའི་ངག་གི་བར་ཆོད་ཞི་བའི་དགོས་པའོ༔ དེ་ནས་ཡང་ཞག་གསུམ་བཞིར་སེམས་ཀྱི་བསམ་པ་ཅི་འགྱུས་ཚད་བྱས་སེམས་ལ་དྲན་ཚད་ལ་ལྷག་མ་མི་བཞག་ཏེ༔ ཚོང་གི་རྣམ་ཚོང་འདུས་ཀྱི་སེམས་སྔོན་དུ་རུང་བར་བྱ་པའམ༔ གཉེན་བཤེས་ཀྱི་རྣམ་པ་རང་གི་གཉེན་དང་འགྲོགས་པའི་ཡིད་དང་མཐུན་པ་དང་གང་ཕྲད་པ་ཇི་ལྟར་བྱེད་པ་འམ་དད་པས་བཟུང་བ་དང་༔ དགྲའི་རྣམ་པའམ༔ འཁྲུལ་པའི་བསམ་པ་སྣ་ཚོགས་ཅི་འགྱུས་ལ་ལྷག་མ་མི་བཞག་པ་དང་༔ འདོད་ཆགས་ལ་སོགས་ཉོན་མོངས་ཆུང་མ་སོགས་ལ་ཇི་ལྟར་བྱས་པ་དང་འདི་ཡོད་ན་རུང་སྙམ་པ་དང་འདི་གསོད་འདི་ལ་གནོད་པ་བྱའོ་ལ་སོགས་པ་པའི་བསམ་པ་སྣ་ཚོགས་སྤྲོ་བ་དང་༔ ཡི་དམ་གྱི་ལྷ་སྒོམ་དང་དཀྱིལ་འཁོར་བསྐྱེད་པའི་ཡིག་འབྲུ་སྤྲོ་བ་བསམ་པ་སྤྲོ་བ་དང་ཿཆོས་ཀྱི་ཚིག་འདི་ཡི་དོན་འདི་འོང་བར་འདུག་སྙམ་པ་དང་གདམས་ངག་དང་༔ སྣ་ཚོགས་ཀྱི་བསམ་པ་སྤྲོ་བ་དང་ཿའཇིགས་ཤིང་ཡ་ང་བའི་སྔར་དགྲས་དེད་པ་དང་རྨི་ལམ་གང་ཡང་འཇིགས་པ་ལ་སོགས་པ་བསམ་པ་དང་༔ ལས་དང་བྱ་བ་ལ་བྲོད་ཅིང་དགའ་བ་ལ་སོགས་ཆོས་ཀྱི་གཏམ་ལ་སོགས་པའི་བསམ་པས་སྤྲོ་བ་ནི་སེམས་ཆ་ཆད་དེ་དྲན་པ་རྣམ་པར་དག་ནས་རྣལ་དུ་འབེབས་པའི་ཐབས་སེམས་ཀྱི་བར་ཆོད་ཞི་བའི་དགོས་པ་ཡོད་སོཿསྔོན་དུ་འགྲོ་བ་དེ་དག་གི་དུས་སུ་ཐུན་ཚད་དུ་ཉིན་མཚན་དུ་གཉིད་སྤངས་གཉིད་བྲོ་ན་གསེང་བའི་ཐབས་བྱའོ༔ ལ་བྱའོ༔ དེ་ནས་དེ་དག་གི་རྗེས་ཀྱི་ཤེས་པ་ཇི་ལྟར་འདུག་པ་དེ་ཡི་

དུས་སུ་རིག་པའམ་བསམ་པ་ཇི་ལྟར་འདུག་སྙམ་པ་ཡང་རང་གི་རྒྱུད་ལ་བཀལ་ཞིང་ལྟའོཿལས་ཅན་འགའ་ནི་ངོ་སྤྲོད་ནི་སྦྱངས་པའི་སྟོབས་ཡིན་གང་ལ་སྦྱང་དེ་ལྟར་བྱས་པས་སྣང་བ་དང་ལུས་ངག་གི་བྱ་བ་ལ་སྦྱངས་པའོ་དེ་ཉིད་དུ་ཕྲད་རིག་པ་ལ་སྣང་བས་མ་གོས་ཀྱང་དེ་ཉིད་བསྟན་པ་ཙམ་གྱིས་སོ་སྟེ་གྲོལ་བ་ཡང་ཡོད་དོ༔ སྔོན་འགྲོ་གསང་བ་མཆོག་ཏུ་ཟབ་པར་བསྟན་པའི་མན་ངག༔ ཉམས་སུ་ལེན་པའི་གཅུན་ཐག་ལུས་ངག་གི་བྱ་བ་ཐུན་མོང་མ་ཡིན་པ་རྫོགས་སོ༔ ཨྠྀི༔ ༔ རབ་ཏུ་གསང་ངོ་༔ དེ་ལ་ཡེ་ཤེས་ལུས་ལ་གནས་དེ་དངོས་སུ་སྣང་བར་བྱེད་པ་ལ་ལུས་མ་གཅུན་ན་འཆར་དུ་མི་བཏུབ་པས་པས་ལུས་ཀྱི་གནད་གལ་ཆེ་བས་སྟེ་དཔེར་ན་སེམས་ཅན་ཚང་མ་ཚང་སྒོང་འགགས་པ་བསལ་བ་ལྟར་སོ༔ ལུས་ཀྱི་གནད་ལུས་ལ་གཞི་བཅའ་ནམ་མཁའ་འབེན་བྱ་རིག་པ་མིག་ལ་གཏད་ལ་གཞི་བཅའ་བ་ནི༔ རང་ཤེས་པ་དང་འཐད་པའི་སར་རྟག་ཏུ་རི་ཁྲོད་བྱེད་པ་ཡིན་གླང་པོ་ཆེ་ལྟ་བུ་ཞེས་བྱ་བ་ནི༔ ཁ་སྦུབ་ཏུ་ཉལ་ལ་ལག་པ་གཉིས་ཀྱི་གྲུ་མོ་ས་ལ་བཙུགས་ཏེ༔ ལྐོག་མ་ལག་མཐིལ་གྱིས་བཏེག༔ པུས་མོ་བྲང་ལ་སྦྱར༔ མཇིང་པ་བཏེག་སྟེ་ཡིད་ཙམ་ཕྱིར་དགྱེ་བར་བྱས་ནས་མིག་ཧར་པོར་གཡས་གཡོན་དུ་མི་བལྟ་བར་སྨིན་པའི་མཚམས་སུ་གྱེན་ལ་མ་འགུལ་བར་ལྟའོ༔ དེ་ལས་སྐྱོ་ན་དྲང་སྲོང་ལྟ་བུ་ཞེས་བྱ་བ་ནི༔ ལུས་ཙོག་ཙོག་བུར་འདུག་སྟེ་རྐང་པའི་ལོང་བུ་གཉིས་སྦྱར་ཏེ་གཤིབས༔ པུས་མོ་གསུས་པ་ལ་ཤིན་ཏུ་དམ་པར་སྦྱར༔ གསུས་པ་ཡང་ཡིད་ཙམ་སྐུད་དེ་བྱས་སྒལ་པ་ལ་སྦྱར༔ ལག་པ་གཉིས་ཀྱི་གྲུ་མོའི་གདོང་དུ་བཙུགས་ལ༔ མགོ་དང་པུས་མོའི་སོར་གཅིག་གི་སྟེང་དུ་མ་རེག་པར་ཏུན་ནེ་བྱས་ལ་ལག་པའི་མཐིལ་གཉིས་ཀྱིས་འགྲམ་པའི་ཟུར་ནས་མི་འགྱུར་བར་བརྟེན་པས་མིག་གཉིས་མི་འཁྲུལ་བར་ཧར་པོ་རང་གི་སྨིན་མཚམས་སུ་དབྱིངས་ལ་ལྟ་བུའོ༔ དེ་ལ་སྐྱོ་ན་སེང་གེ་ལྟ་བུ་ཞེས་བྱ་བ་ནི༔ ཡང་ཙོག་པུར་འདུག་སྟེ་པུས་མོ་གཉིས་ས་ལ་བཙུག་ཡིད་ཙམ་ཕྱིར་བསྒྲད༔ ལག་པ་གཉིས་ས་ལ་པུས་མོའི་ཕྱི་ལོགས་སུ་བཙུག་སྟེ་ཡིད་ཙམ་ཕྱིར་བསྒྲད་ལ་ལུས་ཀྱི་ལྗིད་ཅུང་

ཟད་བོར༔ འཕོངས་ཡིད་ཙམ་རྒྱབ་ཏུ་ཕྱིར་ཕྱུངས་པ་ལ་སྒལ་ཚིགས་དྲང་པོར་བསྲང་༔ མཇིང་པ་རྒྱབ་ཏུ་དགྱེ་བར་བྱས་ལ་མིག་ཡིད་ཙམ་གྱེན་ལ་བཏེག་སྟེ་སྨིན་ཕྲག་གི་ནམ་མཁའ་ལ་མ་འཁྲུལ་བར་སོར་བཞིའི་སར་ལྟ་བའོ༔ དེ་དག་ཐམས་ཅད་ཀྱི་དུས་སུ་ལུས་མ་འགུལ་བ་དང་༔ མིག་མ་འགུལ་བ་དང་༔ དབུགས་ཕར་འགྲོ་ཚུར་འོང་ཤིན་ཏུ་དལ་བར་བྱ་བ་ཡིད་ཙམ་ཐེན་ན་ནི་མན་ངག་གོ༔ ལུས་བཅོས་པའི་གནད་ཀྱི་མན་ངག་གསང་བ་མཆོག་ཏུ་ཟབ་པ་རྫོགས་སོ༔ ཨྠྀི༔ ༔ གཏེར་ནས་གཏེར་དུ་སྦས་པའོ༔ ལུང་དང་ལྡན་པའི་སྨྱོན་པ་ལྕེ་བཙུན་བདག༔ སངས་རྒྱས་དགོངས་པ་ཉིད་དང་ཞལ་མཇལ་བས༔ རབ་ཏུ་དཀོན་པའི་གསང་བའི་མན་ངག་འདི༔ འོལ་སྒོམ་གླུ་བོས་དམ་ཚིག་གཞུང་བསྲངས་ཀྱང་༔ ཤིན་ཏུ་ཟབ་པས་བདག་གིས་བློས་མ་ཐོངས༔ དེ་བས་སླར་ཡང་གཏེར་དུ་སྦས་ཏེ་བཞག༔ ཕྱི་རབས་སྐལ་ལྡན་ཞིག་དང་ཕྲད་པར་སྨོན༔ ཐིག་ལེ་གསང་སྐོར་གསལ་བའི་རྒྱུད་སྡེ་དང་༔ མན་ངག་ཡིག་ཆུང་གསང་བའི་དེབས་རྣམས་ནི༔ བསེ་ཡི་པོད་བཞི་ཤོག་དྲིལ་ཉིས་བརྒྱ་ལ༔ བཏབ་སྟེ་ཆད་པ་སྟག་འདྲར་སྦས་ནས་ཡོད༔ བཤད་ཅིང་སྤྲོས་ལ་དགའ་ན་དེ་ནས་ལོངས༔ དེ་ཉིད་བསྟན་པ་བསྲུང་བའི་རྒྱུད་རྣམས་དང་༔ གནོད་སྦྱིན་ཕོ་མོ་འཇིག་རྟེན་བདུད་དང་བཙན༔ སྲོག་བདག་དམུ་རྒོད་ཉིད་ཀྱི་སྒྲུབ་པ་དང་༔ གཤིན་རྗེ་དམར་པོ་ཤིན་ཏུ་ཟབ་པ་དང་༔ མགོན་པོ་ལྕམ་དྲལ་ཉིད་ཀྱི་སྒྲུབ་ཐབས་རྣམས༔ ཤོག་དྲིལ་བརྒྱ་དང་དགུ་བཅུ་རྩ་ལྔ་ལ༔ བཏབ་སྟེ་ཐང་པོ་སྟོད་ཀྱི་ཡུལ་དུ་ནི༔ ས་ཡི་ལྟེ་བ་གནུབས་ཀྱི་ཕུང་པོ་རི༔ རྩེ་ལྷའི་འོག་སྦས་རྒྱ་ཡིས་བཏབ་ནས་བཞག༔ སྲོག་ལ་བསྡོ་བ་བྱུང་ན་དེ་ནས་ལོངས༔ ཤིན་ཏུ་གསང་བའི་མུ་སྟེགས་ཟླ་གསང་དང་༔ ངན་ཐབས་མི་འདྲ་བརྒྱ་དང་ཉི་ཤུ་ལྔ༔ ཤོག་དྲིལ་ཉི་ཤུ་རྩ་བཞི་དག་ལ་བཏབ༔ བྱར་གྱི་ཕུ་ཡི་བྲག་དཀར་ལྷོར་ལྟ་ནི༔ ཐེམ་པ་འདྲ་བའི་དཀྱིལ་དུ་སྦས་ཏེ་བཞག༔ མན་ངག་འདི་ནི་རྒྱལ་ཁམས་ཕུང་ངེས་པས༔ བསྟན་པ་ཞིག་ལ་ཉེ་ན་དེ་ནས་ལོངས༔ རང་གར་སྤྱད་ན་

རང་སྲོག་མེ་རུ་འབར༔ རྒྱ་ལ་འདོན་ན་ཐབས་དང་ལྡན་པས་འཚོལ༔ གཞན་ལ་བརྗོད་ན་མཁའ་འགྲོས་སྙིང་ཁྲག་གཞིབ༔ ཨྠྀི༔ ༔ འདི་ནི་རྗེས་འཇུག་ཞེ་སྡང་རྡོ་རྗེས་སྦས་པའོ༔ འདི་ཡི་དཔེ་ཕྱི་མོ་རྣམས་འོ་ཡུག་ལུང་པའི་བྲག་ཕུག་སེང་གེ་འདྲ་བར་སྦས་ ༔གྲབརྒཇཏཾ།ཐཏ།༔ ཏ།ཐརྒ༔ ནས་ཡོད་དོ༔ ༔ དེ་ནས་ཉིད་གསང་བ་རིག་པ་ལྟ་བ་དང་འབྲེལ་བའི་ཐབས་སོ་གྱིས་སྐྱེ་མེད་ཀྱི་དོན་མཐོང་བར་ཚིག་གསུམ་འདི་བྱེད་པའི་ཐབས་མཆོག་ཏུ་གསང་བ་འདི་ལྟར་སྣོད་དང་ལྡན་པ་ལ་བསྟན་པར་བྱའོ༔ ནམ་མཁའ་སྤྲིན་དང་བྲལ་བའི་ཚེ་རྐྱེན་གང་གིས་ཀྱང་མ་བསྒྲིབས་པར་ཤིན་ཏུ་དབེན་པར་སོང་སྟེ་རིག་པ་མིག་ལ་བཅུག་སྟེ་གོང་གི་ལྟ་སྟངས་གསུམ་པོ་གང་རུང་ཀྱིས་བལྟས་པས༔ ནམ་མཁའ་ལ་རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཅེས་བྱ་བ་ཕྲ་བ་ལ་རྟ་རྔ་ལ་མདུད་པ་སྒྲིག་པ་ལྟ་བུ་བར་བར་ན་ཐིག་ལེ་ཡུང་འབྲུ་ཙམ་ཁ་དོག་གསལ་བ༔ དེ་ལ་ཡུན་རིང་དུ་ཉམས་སུ་ལེན་པ་ནི་རབ་ཀྱིས་ཞག་དྲུག་ཅུ་ལ་ཚད་དུ་ཕྱིན་འབྲིང་གིས་ལོ་གཅིག་ཐ་མས་ལོ་གསུམ་ན་བལྟས་ན་ནམ་མཁའ་ལ་ཐིག་ལེ་ཡུང་འབྲུ་ཙམ་རྐྱང་པ་དང་༔ ཉིས་འབྲེལ་དང་སུམ་འབྲེལ་ལ་སོགས་པ་གསལ་བར་འཆར་རོ༔ དེ་ནི་རང་གི་ངོ་བོ་ཡེ་ནས་རང་ལ་ཡོད་པའི་ཆོས་སྐུ་དང་ཐིག་ལེ་ཉག་གཅིག་ཅེས་བྱ་སྟེ་སྐུ་གསུམ་ཐུགས་ཕྲད་ཀྱི་གདམས་པ་ཡེ་ནས་འདུ་འབྲལ་མེད་པ་ཞེས་བྱའོ༔ སངས་རྒྱས་དང་མངོན་སུམ་དུ་ཞལ་མཇལ་བ་ཞེས་བྱའོ༔ རིག་པ་དེ་ཡང་ལྟ་བ་མིག་ལྟ་བ་ལྟ་བ་བྱ་བ་རང་གང་ལ་ཟེར་ཏེ་གཞན་དུ་མ་བསྟན་པས་འདིར་མིག་གིས་བལྟར་ཡོད་པས་ན་ལྟ་བའོ་དང་འབྲེལ་བའི་གནད་ཀས་མིག་གར་འགུལ་བའི་ཕྱོགས་སུ་འགྲོ་བར་བྱེད་ཅིང་གཟུང་བར་དཀའ་བ་སྟེ༔ གཡས་གཡོན་གྱི་གྱེན་ཟུར་དུ་ཐིག་ལེ་ཕྲ་མོ་དེ་དག་ཀྱང་འགྲོ་འོང་དང་བཅས་པའོ༔ དེ་ཉིད་དེ་ཉིད་རང་གི་སྨིན་མཚམས་སུ་བཙན་ཐབས་སུ་གཟུང་བའི་མན་ངག་ལ་ནི་མིག་ཡིད་ཙམ་གྱེན་ལ་བཟློག་པ་གཅེས་ཏེ༔ ནམ་མཁའ་

དང་མིག་གི་དངས་མའི་དྭངས་འཐབས་པ་ལས་སྨིན་མཚམས་སུ་དབྱིངས་རྣམ་པར་དག་པའི་སྒྲོན་མ་ཞེས་བྱ་བ་མཐིང་ཁ་རུ་འཁྱིལ་བ་ཁྱབ་པ་ཆེ་བའི་འོད་ཡི་གེ་ན་རོ་ལྟ་བུའམ་བར་སྣང་གི་འཇའ་ཚོན་ལྟ་བུའམ་མིག་ཡོར་འདྲ་བ་མིག་གི་གདངས་དང་ཤའི་གདངས་གཉིས་ཕྲད་པ་ལ་བརྟེན་ནས་ཇེ་གསལ་ཇེ་གསལ་དུ་འཆར་ཏེ༔ རིག་པ་དེའི་ནང་དུ་བཅུག་ནས་ལྟ་བ་ནི་རྟེན་གཞལ་ཡས་ཁང་ལྟ་བུ་ལ་རིག་པ་ནི་བརྟེན་པ་ལྷ་ལྟ་བུ་སྟེ་འཛིན་པར་བྱེད་པའི་ལྕགས་ཀྱུ་ཞེས་བྱ་སྟེ་མཆོག་ཏུ་གཅེས་པའོ༔ ཨི་ཏི༔ རབ་ཏུ་གསང་ངོ་༔ དེ་ལྟར་བསྟན་ནས་རིགས་ཀྱི་བུས་ཉམས་སུ་ལེན་པ་གོམས་པར་བྱེད་པའི་ཐབས་ནི༔ རྟག་ཏུ་ཁྱིམ་མེད་རི་ཁྲོད་ཤིན་ཏུ་དབེན་པར་འགྲིམ༔ མཚན་དུས་འགྱུ་བྱེད་བཅད་པ་ནི་རང་གི་གནས་ཁང་དུ༔ ཉིན་མོ་བཞིན་དུ་ལྟ་ཞིང་ལས་ད་ང་པོ་ལ་མཚན་མོ་དང་ཁྱིམ་དུ་མི་གསལ་ཏེ་བརྟག༔ ཉིན་པར་རི་ཁྲོད་གཅན་གཟན་འཇིག་པ་མེད་པར་བཞིན༔ དེ་ལྟར་བྱེད་པའི་སྐྱེས་བུ་ནི༔ སངས་རྒྱས་ལོགས་ན་མེད་དེ་ཀུན་ཏུ་བཟང་པོ་དང་༔ རྡོ་རྗེ་སེམས་དཔའ་ཞེས་བྱའོ༔ འདི་ལ་ལྟོས་དང་བྱས་པས་མཐོང་བ་བཞིན་རིག་པ་རྒན་མོ་མཛུབ་ཚུགས་སུ་བསྟན་པའི་མན་ངག་མཆོག་ཏུ་ཟབ་པ་རྫོགས་སོ༔ རབ་ཏུ་གསང་ངོ་༔ རིག་པ་སྤར་འཛིན་ཞེས་བྱ་བ༔ དེ་ལྟར་གནད་ཤེས་པར་བྱས་ནས་རྟག་ཏུ་ལྟ་བའི་གོང་ལས་གོང་དུ་འཕེལ་བའི་ཐབས་སོ་རྣལ་འབྱོར་པའི་མིག་ན་བའམ་མི་བདེ་བ་སྙམ་བྱེད་ན༔ བྱིང་རྒོད་སེལ་བའི་དོན་དུ་གན་རྐྱལ་དུ་ཉལ་ལ་མིག་ཕྱེ་བཙུམ་གང་མོས་སུ་བྱའོ༔ དེ་ཉིད་ལ་རྟག་ཏུ་ཉམས་སུ་བླངས་པས༔ དང་པོ་དབྱིངས་ཀྱི་ཆའི་སྣང་བ་ནི༔ འོད་ལྔའི་དེ་དག་གི་གོམས་པའི་ཚད་རིག་པ་སྲོང་ལ་འདེབས་པ་ཞེས་བྱ་རྣམ་པ་ལིང་ལིང་བ་རེ་ལྡེའི་

རྣམ་པ་ཙམ་དུ་འཆར་བ་སྟེ༔ ཐིག་ལེའི་རྐྱང་མ་དང་གཉིས་སྤྲེལ་གྱིས་རྣམ་པ་དེ་དག་ཀྱང་སྲན་མའི་རྡོག་མ་ཙམ་དུ་འགྲོའོ༔ དེས་ཀྱང་དྲོད་རྟགས་ལ་ཕེབས་པས་ད་རུང་ཉམས་སུ་ལེན་པ་ལ་འགྲུས་པར་བྱའོ༔ དེའི་ཚེ་ལུས་ངག་གཞན་གྱི་བྱ་བ་ལ་མི་འཇུག་ཅིང་༔ འཇུག་སྙིང་མི་འདོད་པ་རིག་སྣང་དང་འབྲལ་མི་ཕོད་དང་༔ སེམས་ཅན་ལ་སྙིང་རྗེ་ཆེན་པོ་རྒྱུད་ལ་སྐྱེ་བ་ཡང་འོང་ངོ་༔ ཐེག་པ་ཆེན་པོའོ་དོན་ཁོང་དུ་ཆུད་པའི་རྟགས་སོ༔ དེ་ལ་གོམས་པས་འོད་གོང་དུ་འཕེལ་བའི་རྟགས་རང་གི་ཐོ་ཕྱི་ཙམ་མམ་རང་གི་མདུན་ཙམ་ཁྱབ་པར་འཆར༔ ཐིག་ལེ་ཡང་མེ་ལོང་ཙམ་དུ་ཤིན་ཏུ་གསལ་བ་འགྲོ༔ རིག་པ་བརྟན་པའི་ཚད་ནི་ཕུག་རོན་འཕུར་བ་ཙམ་དུ་འགྱུར་རོ༔ དེའི་ཚེ་ཡོ་གིའི་ལུས་ངག་གི་རྟགས་འདོད་པས་འབྱུང་བ་མིན་རང་བཞིན་དུ་ཉམས་སུ་བླངས་པས་འབྱུང་ངོ་ལུས་ཡང་ཞིང་འབུ་སྲིན་དང་ཤིག་ལ་སོགས་པའི་སྲོག་ཆགས་ལུས་ལ་མི་འབྱུང་བ་དང་༔ ལྟ་བའི་གདེང་རྙེད་པའི་རྟགས་ལས་དགེ་སྡིག་གང་ལ་ཡང་འཇུག་སྙིང་མི་འདོད་པ་དང་༔ རིག་པའི་དོན་ཤེས་པའི་རྟགས་ལུས་རང་བཞིན་གྱི་གཞོན་ཤ་ཆགས་ཤིང་ཏིང་ངེ་འཛིན་གནས་པའི་རྟགས་སྣུམ་བག་དང་ལྡན་པ་འོང་སྟེ༔ དེ་ཡང་གོམས་པའི་ཚད་མེད་པས་རིག་པ་ཚད་ལ་མ་སྨིན་པས་ཉམས་ལེན་ལས་མི་འབྲལ་བར་བྱའོ༔ དེ་ནས་ཡང་དང་ཡང་དུ་གོམས་པ་ལས༔ འོད་ཐང་ཀའི་ཡུལ་གྲུ་ཙམ་དུ་འགྱུར་ཞིང་༔ ཐིག་ལེ་ཡང་འཁར་ཕོར་འབྲིང་པོ་ཁ་སྦུབས་པ་ཙམ༔ རིག་པ་བརྟན་པའི་ཚད་ནི་རི་དྭགས་ཤ་ར་ཎ་སྤང་རྩིབས་ལ་ཞུགས་པ་ཙམ་དུ་འགྱུར༔ དེའི་ཚེ་ཡོ་གིའི་ལུས་ཀྱི་རྒས་པའི་སྡུག་བསྔལ་ལས་གྲོལ་བའི་རྟགས་ལུས་གཉེར་མ་མེད་ཅིང་དགོངས་པ་ལ་དབང་བསྒྱུར་ནུས་པའི་རྟགས་ཟས་སྐོམ་ཡང་ཡིད་ལ་མི་འོང་བ་དང་༔ རིག་པ་རང་གཟེར་ཐེབས་པའི་རྟགས་

རང་གི་སྣང་བ་དེ་ལ་འབྲལ་མི་ཕོད་པ་དང་༔ ས་རླུང་ལ་དབང་ཐོབ་པའི་རྟགས་བར་སྣང་ལ་འགྲོ་བ་སྙམ་འོང་སྟེ་རང་སྣང་ལ་བྱན་ཚུད་རྟགས་མི་དང་ཕྲད་སྙིང་མི་འདོད་པ་དང་༔ ཆོས་ཉིད་ཀྱི་བདེན་པ་ལ་གནས་པའི་རྟགསའཁྲུལ་པའི་གཏམ་ཅི་ཡང་མི་སྨྲ་ཞིང་རྟག་ཏུ་ལྐུགས་པ་ལྟར་འགྲོ་སྟེ༔ དེ་ཡང་སྨིན་པའི་ཚར་མིན་པས་དེ་ཉིད་ལས་ཀྱང་གོམས་པར་བྱས་ཏེ་བལྟས་པས་གོམས་པའི་ཚད་འོད་ཡུལ་ཁམས་ཙམ་དུ་འཆར༔ ཐིག་ལེ་རྣམས་ཡེ་ཤེས་ལྔ་དང་རིགས་ལྔ་སྐུ་ལྔ་སོགས་རང་ལ་གནས་པའི་རྟགས་སུ་ལྔ་ལྔར་འགྱུར་ཏེ་རིག་པ་ཡང་བུང་བ་བརྟན་པའི་ཚད་མེ་ཏོག་ལ་འཁོར་བ་ཙམ་དུ་ལིང་ལིང་ཡིད་ཙམ་བར་དམིགས་པ་གར་གཏད་དུ་འགྲོ་སྟེ༔ དེའི་ཚེ་རྣལ་འབྱོར་པ་ཡང་གཞན་དྲིང་མི་འཇོག་པའི་རྟགས་རང་ལ་རང་རྒོད་བྲོ་བ་དང་༔ ་སྣང་སྲིད་ཆོས་སྐུར་གྲོལ་བའི་རྟགསསྔར་མི་ཤེས་པའི་ཆོས་མང་པོ་རྒྱུད་ལ་འཆར་བས་ན་སྣང་སྲིད་གཞི་བཞེངས་ཀྱི་དགོངས་པ་ལ་གནས་པའི་རྟགས་ཅི་སྨྲས་ཚད་ཆོས་ཀྱི་ཚིག་མིན་པ་ཅི་ཡང་མི་འོང་བ་དང་༔ སངས་རྒྱས་རང་སེམས་དབྱེར་མེད་དུ་རྟོགས་པའི་རྟགས་རང་གི་བླ་མ་ལ་གདུང་བ་མཆོག་ཏུ་སྐྱེ་བ་དང་གནས་ལུགས་ཀྱི་དོན་རྟོགས་པའི་རྟགས་དགྲ་གཉེན་གྱི་འཁྲུལ་པ་མི་འབྱུང་བའོ༔ དེས་ཀྱང་ཚད་དུ་མ་ཕྱིན་ཏེ་གོམས་པར་ཉམས་སུ་བླངས་པས་འོད་དེས་སྟོང་གསུམ་གར་བལྟས་ཁྱབ༔ ཐིག་ལེ་དེ་དག་རེ་རེའི་ནང་དུ་སྨིན་པས་སྐུ་རེ་རེ་འཆར༔ རིག་པའི་ལུ་གུ་རྒྱུད་ཀྱི་བར་བར་དུ་ཡང་སྐུ་ཕྲ་མོ་རེ་རེ་འབྱུང་༔ རིག་པ་གཏད་པ་ལས་གཞན་དུ་མི་འགྲོ་བར་འགུལ་བ་དང་འཕྲིགས་པ་མེད་པར་གར་གཏད་པར་ཙན་ནེ་སྡོད་པ་བརྟན་པ་མཐར་ཕྱིན་པ་སྟེ༔ དཔེར་ན་དེ་ལྟར་བརྟན་ཙ་ན་

ཉིན་མོ་དང་མཚན་མོ་གསལ་འགྲིབ་མེད་དེ་ལྕེ་སྤྱང་ཀི་མིག་ལ་ཉིན་མོ་མཐོང་མཚན་མོ་མི་མཐོང་བྱ་བ་མེད་པ་བཞིན་དུ༔ ཡོ་གི་དེ་ལ་ཡང་འོད་དང་སྐུ་དེ་དག་ཉིན་མོ་གསལ་རྒྱུ་དང་མཚན་མོ་མི་གསལ་བའི་རྒྱུ་མེད་པར་འགྱུར་རོ༔ རིག་པ་དེ་ནི་གཞི་མི་འགྱུར་བའི་གནད་ཀས་ཐོག་མ་ནས་ཆེར་སོང་བ་ཡང་མེད༔ ཆུང་དུ་སོང་བ་ཡང་མེད་པས་ན་གང་བ་མེད་ཅིང་བྲི་བ་མེད་པ་ཞེས་བྱའོ༔ དེའི་ཚེ་ཡོ་གི་དེ་ལ་ཡང་འབྱུང་བའི་ས་ཆུ་མེ་རླུང་གི་དགྲས་མི་ཚུགས་ཏེ༔ ཤེས་རབ་ཀྱི་རྟགས་མེས་མི་འཚིག༔ སྙིང་རྗེ་རྟགས་ཆུས་མི་འབྱིང་༔ ཡེ་ཤེས་ཀྱི་རླུང་ཚད་ལ་ཕེབས་རྟགས་རླུང་གིས་མི་ཁྱེར་བ་སྟེ༔ ཐེག་པ་སྣ་ཚོགས་ཐུགས་སུ་ཆུད་པའི་རྟགས་ས་ལ་ཐོགས་པ་མེད་པར་འཛུལ་བ་དང་༔ ཐམས་ཅད་སྟོང་ཉིད་དུ་གྲོལ་བ་དང་ནམ་མཁའ་ལ་འཕུར་བ་བྱ་བཞིན་དང་༔ རིག་པ་གཉིས་འཛིན་ལས་གྲོལ་བའི་རྟགས་ངག་གི་ཚིག་ཐམས་ཅད་ཅོལ་འགྲུས་སུ་འོང་བ་དང་༔ འདུག་ཚུལ་སྟེང་ན་གནས་པའི་རྟགསངག་གིས་ཅི་སྨྲས་བརྗེད་ངས་པ་དང་༔ སྣང་བ་ཐད་ཀར་ཆོད་བའི་རྟགས་ཕ་རོལ་གྱིས་སྨྲ་བ་ལ་གཟུང་མེད་པ་དང་༔ ཡིད་ཀྱི་འགྱུ་བ་ཆོད་པའི་རྟགས་དྲན་པ་ཐམས་ཅད་ཝལ་པོ་རྗེས་མེད་དུ་འགྲོ་བ་དང་༔ འོད་དང་སྐུ་ལས་མི་གཡོ་བར་ཉི་མ་དང་ཟླ་བའི་སྣང་བ་ཡང་མེད་པ་དང་༔ འཁྲུལ་སྣང་དུ་དག་པས་འགྲོ་བ་དང་འདུག་པ་ངོ་མི་ཤེས་པ་དང་༔ མདོར་ན་འཁྲུལ་པའི་སྣང་བ་ཐམས་ཅད་ནུབ་པ་སྟེ་དེ་ནི་སྣང་བ་དང་རིག་པ་ལ་འབྱོངས་པའི་ཚད་དོ༔ དེ་ལྟར་གནས་པས་རིག་པ་འཁོར་བར་མི་ལྡོག་ཆོས་སྐུའི་སྣང་བ་དང་༔ འབྲལ་མི་སྲིད་དོ༔ དེའི་ངང་ལ་སྣང་བ་དེ་དག་ཀྱང་རང་ཡལ་དུ་འགྲོ་སྟེ་འོད་དང་ཁ་དོག་ལས་འདས་ནས་འདི་ལྟར་ཡིན་ནོ་བའི་དངོས་པོ་མ་གྲུབ་པ་ནི་སྣང་མི་སྣང་བ་ལས་འདས་པ་ཆོས་སྐུ་རང་དག་གི་

དགོངས་པ་ཆོས་ཐམས་ཅད་ཟད་སར་ཐུག་པ་ཞེས་བྱའོ༔ རང་རིག་པའི་ངོ་བོ་ནི་ཐོག་མ་ལས་གང་དུ་ཡང་མ་སོང་༔ ཆེ་བ་ཆུང་བ་དང་འབྲི་བ་དང་བསྣོན་པ་དང་བཟང་བ་དང་ངན་པའི་རྣམ་པར་རྟོག་པ་ཅི་ཡང་མི་མངའ་བར་འཁྲུལ་གྲོལ་ལས་འདས་པ་བཞུགས་པའོ༔ དེའི་ཚེ་གཞན་གང་དུ་ཡང་མ་གྲུབ་སྟེ་གཞིའི་ཐུགས་རྗེའི་ཆ་ལས་རང་ངོ་གསལ་བ་ཙམ་དུ་གནས་པའོ༔ རྣལ་འབྱོར་པ་ཤུགས་ཀྱི་ཐུགས་རྗེ་མ་འགགས་པས་ཡང་མངོན་པར་ཤེས་པ་སྣ་ཚོགས་འཆར་ཏེ་སེམས་སེམས་བྱུང་ཟད་པས་བསམ་པ་རྣམས་རང་ཡལ་དུ་འགྲོ་བ་དག་འོང་ངོ་༔ ཕུང་པོའི་ཟག་པ་གང་ཡང་ཕྱིར་མི་ལྡོག་པར་སངས་རྒྱས་པར་བྱེད་པའོ༔ གལ་ཏེ་རིགས་ཀྱི་བུས་གོང་གི་སྔོན་དུ་འགྲོ་བ་རྫོགས་ནས་དེའི་ངང་ལ་རིག་པའི་ཡེ་ཤེས་མ་སྨིན་པར་ཚེའི་བར་ཆད་དུ་སོང་ན་བར་དོ་དང་པོ་ལ་འཚང་རྒྱ་བ་ལ་ཐེ་ཚོམ་ཡོད་རེ་སྐན་ནོ༔ དེ་ལྟར་ཚིག་དེ་དག་ཡང་ལས་ཅན་ཅིག་ལ་སྟོན་ན་ཚིག་གསུམ་པོ་འདིས་བྱ་བ་ཡིན་ནོ༔ གདམས་པའི་ཡུལ་ལ་བོད་པ་ཀྱེ་མ་རིགས་ཀྱི་བུ་ལུས་གནད་སེང་གེ་ལྟར་གྱིས་ལ༔ མིག་རྩའི་གནད་དང་རིག་པའི་གནད་རང་གི་སྨིན་མཚམས་ཀྱི་ནམ་མཁའ་ལ་མ་འགྱུར་བར་ལྟོས་དང་༔ རིག་པ་དངོས་རྡོ་རྗེ་ལུ་གུ་རྒྱུད་ཕྲ་ཁྱུག་ཁྱུག་པ་འདི་ལ་ལྟོས་དང་༔ སྣང་བ་འོད་དུ་ཤར་བ་འདི་འབྲས་བུའི་གནད་ཀས་སྐུ་གསུམ་གྱི་སྣང་བ་ཡིན་པས་དེ་རིང་ཕྱིན་ཆད་རྡོ་རྗེ་སེམས་དཔའ་དང་ཁྱོད་ལ་ཁྱད་པར་རྡུལ་ཙམ་ཡང་མེད་དོ༔ ཞེས་བསྟན་པའི་ཚིག་གསུམ་མོ༔ དེ་བསྡུ་ན༔ ལུས་ཀྱི་འདུག་སྟངས་འདི་ལྟར་གྱིས༔ ཡུལ་ནམ་མཁའ་སྤྲིན་བྲལ་ལ༔ རིག་པ་རྡོ་རྗེ་ལུ་གུ་རྒྱུད་ཁྱུག་ཁྱུག་པ་འདི་ལྟོས་བྱས་པས་སངས་རྒྱས་དངོས་ཡིན་ནོ༔ ཨི་ཏ ི༔ འདི་

ནི་གང་ཟག་འཇིག་རྟེན་བློ་ཅན་གྱི་དྲུང་ངམ་ཐེག་དམན་རྣམས་ལ་རྣ་ལམ་དུ་ཚིག་གི་ཟུར་ཙམ་ཡང་སྨྲ་བར་མི་བྱའོ༔ གལ་ཏེ་སྨྲས་ན་ཁ་ནས་ཁྲག་སྐྱུག༔ མིག་ཐང་ལ་བྲུལ༔ ཚེའི་འདུ་བྱེད་བྱས་ནས་རྡོ་རྗེ་དམྱལ་བར་བསྐལ་པ་བརྒྱ་ཡི་བར་དུ་མི་ཐར་བར་ཤོག་ཅིག༔ ཅེས་དགའ་རབ་རྡོ་རྗེ་ཉིད་རྡོ་རྗེ་འཆང་དངོས་ཡིན་པ་དེ་ཉིད་ཀྱིས་གདམས་པ་ལས་མི་འདའ་བར་བྱའོ༔ དེ་བས་ན་ཡི་གེ་འདི་འབྱུང་བའི་དགྲས་མི་འཇིག་པའི་སར་བྲག་གི་ཐེམ་པར་སྦས་ཏེ་བཞག་ལ་སྐབས་སུ་དེར་ཕྱིན་ལ་ཐེ་ཚོམ་སེལ་བའི་ཕྱིར་བལྟའོ་གོ༔ མིན་ཏེ་ཡོ་གིའི་ལུས་ལ་བཅངས་ལ་གླེགས་བམ་ཆུང་ངུ་བྱས་ཏེ་ནམ་འཆི་ཁའི་ཚེ་གཏེར་དུ་སྦས་ཏེ་མཁའ་འགྲོ་དང་སྡེ་བརྒྱད་ལ་གཏད་ལ་བཞག་གོ༔ གང་རུང་རུང་དུ་ཚགས་བྱ་ཞིང་གཟུང་དུ་མི་རུང་སྟེ་མཁའ་འགྲོ་མས་དབང་བྱས་པའོ༔ རིག་པ་སྤར་ཟིན་གྱི་མན་ངག་སྙིང་པོ་བསྡུས་པའི་སྒྲོན་མ་ཞེས་བྱ་བ་རྫོགས་སོ༔ ཨིཏི༔ རྡོ་རྗེའི་མཁའ་འགྲོ་མ་ཁྲོ་གདོང་ཞེས་བྱ་བར་གཏད་ནས་ཡོད་པས་ཁྱོད་ཀྱིས་ཟུངས་ཤིག༔ ལྷ་རྗེ་ལྕེ་བཙུན་གྱི་ཞལ་ནས༔ བསྟན་པའི་སྙིང་པོ་འདི་ང་འདས་པའི་འོག་ཏུ་ནི་ཕྱི་མའི་ཚེ་ས་ལ་གནས་པའི་བྱང་ཆུབ་སེམས་དཔའ་ཞིག་གིས་རྙེད་ནས༔ མིག་ཟླུམ་པོ་ཞིག་གིས་རྙེད་པའི་ཚེ་ཤ་སྣ་ཚོགས་ཀྱིས་བརྒྱན་པའི་གཏོར་མ་རེ་གཏང་ངོ་༔ དེའི་འོག་ཏུ་ལག་ན་རྡོ་རྗེའི་སྤྲུལ་པ་ཞིག་གིས་དར་བར་བྱེད་དོ༔ གསུངས་སོ༔ སཱ་མཱ་དམ་ཚིག་ཆེན་པོ༔ ཡཱ༔ འཇིག་རྟེན་ཅེར་བཞག་ཉིད་ལ་ཕྱག་འཚལ་ལོ༔ གསང་བའི་མན་ངག་ཡེ་ཤེས་ངེས་པའི་ལུང་༔ ཀུན་གྱི་ཡུལ་མིན་ལས་ཅན་འགའ་ཡི་བཅུད༔ སྒྲ་ཚིག་ཚད་མས་འདི་ཉིད་གཏན་དབབ་ཕྱིར༔ ངེས་ཤེས་བསྐྱེད་འཇུག་གསལ་རང་གི་ལྟ་བ་ལ་ཡིད་ཆེས་པར་བྱ་བའི་ཕྱིར་རིག་པའི་རྒྱབ་བརྟེན་འདི༔

ཡིད་ཆེས་པའི་ལམ་རང་གི་དོན་འདི་གསལ་བའི་དོན་ཆེད་དུ༔ རྟགས་སུ་བཀོད་པའི་ཡི་གེ་འདི་བལྟས་པ་ཙམ་གྱིས་ཤེས་པ་ལྟོས་ཤིག༔ རིག་པ་ཐོགས་པ་མེད་པར་བསྟན་པ༔ ཐོག་ལྟ་བུའི་མན་ངག་གིས་སྣང་བ་ལ་དབྱིངས་ལ་ཡིད་ཆེས་པར་བསྟན་པ་དང་༔ རིག་པ་འགྱུར་བ་མེད་པའི་དོན༔ མིག་དང་རིག་པ་མ་བྲལ་བ་གཟེར་ལྟ་བུའི་མན་ངག་གིས་རིག་པའི་འཆར་སྒོ་ལ་ཡིད་ཆེས་པར་བསྟན་པ་དང་༔ རིག་པ་མཁའ་ལ་ལྡིང་པ་ནི༔ སྐར་མདའ་ལྟ་བུའི་མན་ངག་གིས་བརྟེན་པ་ལ་ཡིད་ཆེས་པར་བསྟན་པ་དང་༔ རིག་པ་ཕྱིར་མི་ལྡོག་པ་ནི༔ ཆོས་ཟད་པའི་ཐབས་གྱད་ཀྱི་མདའ་ལྟ་བུའི་མན་ངག་གིས་རིག་པ་རང་གི་ངོ་བོ་ལ་ཡིད་ཆེས་པར་ངོ་བོར་དག་ཏུ་སོང་བར་བསྟན་པའོ༔ ཨེ་མ་སྐྱེ་བ་མེད་པའི་ཆོས་ཉིད་ནུ༔ ག་ཐཐཱཿདེའི་ཕྱིར་ན་དབྱིངས་རིག་ལ་གཏད་པའི་འབེན་བཅའ་བའི་མན་ངག༔ བརྡེག་པའི་དམིགས་རང་གི་སྨིན་མཚམས་སུ་བཙལ་བ་དང་༔ འཕེལ་བའི་ས་བོན་གོམས་པར་བྱ་བ་གདབ་པ་དང་༔ མཐར་ཕྱིན་པའི་ཚད་རྒྱ་ཆེ་བའི་ནམ་མཁའ་སྦར་གྱིས་གཟུང་བའོ༔ རིག་པའི་རྒྱབ་བརྟེན་བཅུད་རྣམས་བསྡུས་པའི་སྙིང་པོ་ཞེས་བྱ་བ་རྫོགས་སོ༔ ལས་ཅན་ཅིག་དང་འཕྲད་པར་ཤོག༔ སརྦ་ཆོས་ཐམས་ཅད་ཀྱི་འདོད་པ་བསྡུས་པའི་སྒྲོན་མ་ཡིན་ཨཱ་པ་ཡཱ༔ རིག་པ་སྣང་བ་དང་སྣང་བ་མ་ཡིན་པ་ཐམས་ཅད་འདུས་ལ་ཕྱག་འཚལ་ལོ༔ རིག་པ་དེ་ཡིན་ན་མ་རིག་པ་ལ་སོགས་པའི་ཉོན་མོངས་པ་གང་ཡིན་པ་ཞེས་ཐ་སྙད་དུ་ཐ་དད་ཏུ་བསྟན་པ་དེ་རྣམས་གཏན་ལ་འབེབས་ན་འདི་ལྟར་ཡིན་ཏེ་རིག་པ་མངོན་སུམ་གྱི་དོན་མ་རྟོགས་ཤིང་༔ རིག་པའི་ངོ་བོ་དེ་ལ་སྒྲིབ་པ་མེད་པ་ལ་ཐེག་པ་གཞན་མན་ངག་མེད་པ་

དག་གི་ཡིན་པ་ལ་མིན་བྱས་མིན་པ་ཡིན་པར་བརྟགས་པའི་མན་ངག་གིས་བསྒྲིབས་པ་རང་གིས་རང་ངོ་ལ་སྒྲིབ་པ་མ་རིག་པའོ༔ རིག་པ་མངོན་སུམ་རང་དུ་མ་མཐོང་བར་དེ་ལ་ཞེས་འདི་འདྲ་བ་འདོད་པའི་ཐབས་ཡོད་དོ་སྙམ་པ་རྣམས་འདོད་ཆགས་སོ༔ དེའི་དོན་རྒྱུད་ཀྱི་ཚིག་ཏུ་བཀོད་པ་ཡོད་ཀྱང་ལོག་པར་བཀྲལ་ནས་གཞུང་ལོག་པར་སྟོན་པ་ནི་ཞེ་སྡང་ངོ་༔ དེའི་དོན་རང་ལ་ཡེ་ནས་རང་ཆས་སུ་ཡོད་པ་དེ་ངོ་མ་ཤེས་པར་གཞན་གྱི་མན་ངག་དང་གྲུབ་མཐའ་ལ་ལྟོས་པ་རྣམས་ནི་གཏི་མུག་གོ༔ དེའི་དོན་རང་ལ་རིམ་གྱིས་ལ་མ་ལྟོས་པར་ཅིག་ཅར་དུ་མཐོང་དུ་ཡོད་པ་ལ་ཡུན་རིང་པོ་བསྐལ་པ་དུ་མར་འབྲས་བུ་ཐོབ་པར་འདོད་པ་ཕྲག་དོག་ཡིན་ནོ༔ དེའི་དོན་ཚིག་ལུས་དང་ཡུལ་དང་རིག་པ་སྟེ་གསུམ་དུ་འདུས་པ་ལ་ཚིག་མང་པོར་སྟོན་པ་ནི་གཏན་ཚིགས་ཀྱིས་གཏན་ལ་མི་ཕེབས་པས་ང་རྒྱལ་ཞེས་བྱའོ༔ དེ་དག་རྣམས་ཐེག་པ་འོག་མའི་རྗེས་སུ་འབྲངས་པས་ནི་ཉོན་མོངས་པའི་རྣམ་པ་དུ་མ་ནས་བསྡུས་ཏེ་བསྟན་པའོ༔ དེའི་ཕྱིར་ན་གྲུབ་པའི་མཐའ་མང་པོ་བཟུང་བས་མགོ་འཁོར་ཚིག་གསུམ་དུ་འདུས་པ་གཅེས༔ དོན་མེད་པར་ཚིག་མང་པོ་བཤད་པ་འཆལ་པ་འདི་ལ་ལྟོས་དང་བྱ་བ་གཉིས་ཕྲ་བ་ངན་ཡིན༔ གནད་མེད་པར་ཡུན་རིང་པོར་བསྒོམ་པ་ཡིད་དགའ་གནད་གཟིར་བ་གཅེས་ཡིན༔ ངོ་བོ་མཐོང་བར་ལྟ་བ་ལ་འདི་རང་ཡིན་སྙམ་དུ་མཐོང་བ་ཡིད་དཔྱོད་ཡིན་ནོ༔ འགལ་བ་བསྡུས་པའི་སྒྲོན་མ་རྫོགས་སོ༔ ཨྠྀི༔ ༔ རྒྱ༔ ༔ པྲ་ཝ་སྤྲོས་པ་གཅོད་པའི་འཁོར་ལོ་ད་ན་ ཏྱཾཡྱ༔ རྙོག་བྲལ་བདེ་བ་ཆེ་ལ་ཕྱག་འཚལ་ལོ༔ ཕྱི་པ་མུ་སྟེགས་རྟག་ཆད་དུ་འདོད་པ་དང་ཉན་ཐོས་ལ་སོགས་རྡུལ་ཕྲན་

དང་ཆ་མེད་དང་སྟོང་པ་ཉི་ཚེ་འདོད་པ་གསང་སྔགས་ཕྱི་ནང་རིམ་དགུའི་རྟེན་གཞལ་ཡས་བརྟེན་པ་ལྷ་སྔགས་འདོད་པ་དང་༔ ཐིག་ལེ་ཕྱི་སྐོར་ནང་སྐོར་འདི་ཉིད་ཕྱོགས་འགའ་འདི་དག་གྲོལ་བ་འདོད་ཀྱང་རིག་པ་མངོན་སུམ་མ་མཐོང་བས་མི་གྲོལ་བའི་ཕྱིར་ན་ཐམས་ཅད་ལ༔ ཁྱད་པར་ཅུང་ཟད་ཙམ་ཡང་ཡོད་མ་ཡིན༔ དེ་ཅིའི་ཕྱིར་ཞེ་ན༔ མུ་སྟེགས་པ་རྣམས་ཀྱིས་རིག་པའི་དོན་ལ་རེག་པ་མེད༔ ཐེག་པ་རིམ་པ་དགུ་ལ་སོགས་པ་འདི་ཡི་མན་ངག་གི་ཕྱོགས་འགས་ཀྱང་རིག་པ་ཉིད་ལ་རྡུལ་ཙམ་ཡང་རང་ངོ་མཐོང་བ་ལ་མ་རེག་པས་སོ༔ དཔེར་ན་གསེར་གྱི་སྒྲོག་གིས་བཅིངས་པ་དང་༔ ཐག་པའི་སྒྲོག་གིས་བཅིངས་པ་གཉིས་འཆིང་བའི་སྒོ་ནས་ཁྱད་པར་རྡུལ་ཙམ་ཡང་མེད་དོ༔ དེའི་ཕྱིར་ན་ཐེག་པ་སྤྱི་ཡི་གཞུང་འདི་དག་གཞུང་དུ་བཀོད་པ་ལ་དགོས་པ་མེད་དམ་ཞེ་ན༔ ཕྱིའི་སྒྲོ་འདོགས་གཅོད་ཙམ་ལ་དགོངས་པ་ཡིན་ཏེ༔ དེ་དག་དཔེར་ན་གསེར་གཏན་ལ་འབེབས་པ་ལ་གསེར་མ་ཡིན་པ་ཐམས་ཅད་ཚིག་གིས་གཏན་ལ་དབབ་ནས་གསེར་དུ་བསྒྲུབ་པ་ལྟ་བུ་སྟེ༔ ཚིག་མཐའ་ཡས་པས་དོན་ཆོད་པ་མ་ཡིན་ནོ༔ འདི་ནི་དཔེར་ན་གསེར་རང་དུ་གཏན་ལ་ཕབ་ཟིན་ཟིན་པ་དེའི་སྒྲོ་འདོགས་ཆོད་པ་ལྟ་བུའོ༔ དེའི་ཕྱིར་ན་འདོད་པ་གསེར་འདོད་པ་ལ་གཞན་དག་གསེར་མ་ཡིན་དུ་སྒྲོ་ས་དང་རྡོ་དང་ར་གན་སོགས་པ་བཤར་ནས་སྣོད་གསེར་འདོགས་གཅོད་ལ་འདི་ནི་གསེར་གྱི་སྒྲོ་འདོགས་གཅོད་པའོ༔ ཨེ་མ་ཧོཿརིགས་ཀྱི་བུ་ཉོན་ཅིག༔ ཕྱི་ནང་གི་ཐེག་པ་གཞན་དག་གི་ལྟ་བ་ནི་ཡིད་དཔྱོད་ཚིག་ཕྱིར་འབྲང་པས་ཡིད་ལྟ་ཞེས་བྱའོ༔ དེ་ཅིའི་ཕྱིར་ཞེ་ན༔ རིག་པ་འདི་ཉིད་མིག་ལ་མངོན་སུམ་དུ་འོད་གསལ་བའི་ངོ་བོ་མ་མཐོང་ཞིང་བལྟར་མེད་པས་ཡིད་འདི་ཁོ་ན་ཡིན་པར་འདུག་སྙམ་པ་ནི་ཡིད་དཔྱོད་དོ༔ དེ་དག་གི་སྒོམ་པ་ནི་ཞེ་འདོད་ཅེས་བྱའོ༔ དེ་ཅིའི་ཕྱིར་

ཞེ་ན༔ རིག་པའི་སྣང་བ་གོང་ནས་གོང་དུ་འཕེལ་བ་ནི་མ་མཐོང་༔ སེམས་གནས་མི་རྟོགས་པ་བག་ཙམ་པ་གཅིག་ལ་ཆགས་ནས་བདེ་བར་འདུག་སྙམ་པ་ཡིན་ཏེ༔ སེམས་གནས་པ་ལ་བདེ་མི་དགོསསེམས་བཙལ་ཞིང་སྒོམ་དུ་མེད་པར་ཐམས་ཅད་དུ་ཡོད་པ༔ སེམས་རྒྱུན་དུ་ཆགས་པ་ཡིན་གྱིས་དེ་དག་གི་སྤྱོད་པ་ནི་ཅ་ཅོ་ཞེས་བྱའོ༔ དེ་ཅིའི་ཕྱིར་ཞེ་ན༔ དེ་དག་སྣང་སྟོང་གཉིས་སུ་མེད་པར་ནི་མ་ཤེས༔ འདི་ལྟར་བྱས་ན་ཤེས་པ་ལ་ཕན་པར་འདུག་བདེ་བ་བག་ཙམ་འདུག་སྙམ་པ་ཙམ་མོ༔ དེ་དག་གི་འབྲས་བུ་ནི་ལ་ལ་མི་ཚེ་བསྐང་ལ་ལ་བསྐལ་པ་འདྲེན་ཏེ་དུས་ཅན་ཞེས་བྱའོ༔ དེ་ཅིའི་ཕྱིར་ན༔ འདི་ཉིད་སྐུ་གསུམ་རང་ཟད་དུ་ཆོས་ཐམས་ཅད་ཟད་པའི་དབྱིངས་སུ་ནི་མ་ཤེས༔ དུས་འདི་ཙམ་ན་ཐོབ་ནས་འོང་སྙམ་པ་དང་བཅས་པའོ༔ དེའི་ཕྱིར་ན་དེ་དག་རྣམས་ཀྱིས་སངས་རྒྱས་པ་ལ་རྡུལ་བརྒྱར་གཤགས་པའི་ཆ་ཙམ་ཡང་མ་རེག་གོ༔ དེའི་ཕྱིར་ན༔ སྟོང་པར་འདོད་ན་ནམ་མཁའ་ཡིན་ནམ༔ ནམ་མཁའ་ལས་སྟོང་པ་ལྷག་པ་ནི་གང་དུ་ཡང་བཙལ་དུ་མི་རྙེད༔ གསལ་བ་འདོད་ན་ཉི་ཟླ་ཡིན་ནམ༔ ཉི་ཟླ་ལས་ལྷག་པའི་གསལ་བ་ནི་གང་ནས་ཀྱང་མི་རྙེད༔ ཤེས་པར་འདོད་ན་ཐ་མལ་འདི་ཉིད་དམ༔ འདི་མིན་པའི་ཤེས་པ་ལ་སོགས་པ་ནི་གང་ན་ཡང་མེད༔ དྲན་མེད་འདོད་ན་བེམས་པོའམ༔ བེམས་པོ་ལས་དྲན་མེད་ལོགས་པ་གང་ནས་ཀྱང་མི་རྙེད་དོ༔ དེའི་ཕྱིར་ན་སངས་རྒྱས་ཀྱིས་འདི་ཡིན་བྱ་བར་གཏན་ལ་མ་ཕེབས་ཤིང་མ་མཐོང་༔ ལྟ་བ་བྱ་བ་འདི་ལ་ཟེར་བྱ་བ་ཡང་གཏན་ལ་མ་ཕེབས་ཤིང་བསྟན་དུ་མེད༔ དེ་བཞིན་དུ་སྒོམ་པ་འདི་ལ་ཟེར་ཡང་མེད༔ སྤྱོད་པ་འདི་ཡིན་ཡང་མེད༔ རིག་པ་རིག་པ་ཟེར་ཡང་འདི་ཡིན་ནི་མེད་དོ་ཡིད་དཔྱོད་ལས་མེད༔ ལས་དགེ་སྡིག་མེད་ཟེར་ཡང་གནད་ཀ་འདི་ཡིན་བྱ་བ་ནི་མེད༔ ཁ་ཚིག་ཙམ་དུ་ཟེར་

བའི་ཕྱིར༔ འདི་དག་ལ་བསྐལ་པ་སྟོང་དུ་བསྒོམ་པ་དང་བསྒྲུབ་པ་བྱས་ཀྱང་སངས་རྒྱས་ཐོབ་རེ་སྐན༔ གལ་ཏེ་འབྲས་བུ་ཐོབ་པའི་ལས་ཅན་འགའ་བྱུང་ན་འདི་ཉིད་ཀྱི་དོན་རང་གྲོལ་དུ་བྱུང་བ་ཡིན་ནོ༔ དེ་ཡང་མི་སྲིད་དོ༔ གང་དག་སངས་རྒྱ་བ་རྣམས་ནི་ཐ་མལ་འདིའི་སྒོ་རྙེད་ནས་འཚང་རྒྱ་བ་མ་གཏོགས་པ་གཞན་དུ་ནི་མ་ཡིན་ནོ༔ གཞན་འདོད་བསྡུས་པའི་གཅུད་ཕུར་ཞེས་བྱ་བ་རྫོགས་སོ༔ ཨྠྀི༔ ༔ རྒྱ་རྒྱ་རྒྱ༔ སྔགས་ཀྱི་རྒྱལ་མོས་སྲུངས་ཤིག༔ གཏད་པ་ཡིན༔ ཅེས་གཏེར་ནས་གཏེར་དུ་བཙས་པའོ༔ ལས་ཅན་ཅིག་དང་ཕྲད་པར་ཤོག༔ ས་མཱ་པ་སྟོང་པ་ཡེ་ཤེས་ཀྱི་དམ་ཚིག་ཐཱ༔ ཐིག་ལེ་ཆིག་རྫོགས་ཆོས་ཐམས་ཅད་གཉིས་སུ་མེད་པའི་ཡེ་ཤེས་ཉིད་ལ་ཕྱག་འཚལ་ལོ༔ ཀྱེ་མ་རིགས་ཀྱི་བུ་སྐལ་བ་དང་ལྡན་པ་ཉོན་ཅིག༔ ངོ་བོ་རང་རིག་པའོ་ཞེས་བྱ་བ་ནི་རྡོ་རྗེ་ལུ་གུ་རྒྱུད་མིག་ནས་འཆར་བ་རང་གི་རིག་པ་འདི་འོ༔ རིག་པ་ཞེས་བྱ་བ་དེ་རང་རང་གིས་མངོན་སུམ་དུ་གཏན་ལ་དབབ་ན་གང་ལགས༔ རིག་པ་ནི་ཤེས་པའི་སྒྲིབ་པ་དང་བཅས་པ་སྟེ་རིག་གེ་སེང་ངེ་བ་སིང་བག་དང་བཅས་པའོ༔ དེ་རང་གང་ལགས༔ དོན་ནི་ནམ་མཁའ་ལ་བསྟན་པའི་རིག་པ་རྡོ་རྗེ་ལུ་གུ་རྒྱུད་འཁྲུལ་པ་མེད་པའི་ཤེས་པ་དེ་ཧྲིག་ཧྲིག་དུ་འདུག་ཀྱང་༔ གཟུང་བ་ཡུལ་གྱི་ཆ་དང་འཛིན་ཆ་ཤེས་པས་རྟག་ཏུ་མེད་དེ་སྣང་བ་རང་སྣང་༔ སྣང་བ་ཤར་བ་རང་ཤར༔ གཞི་ལ་གནས་པ་རང་གནས༔ ཤེས་རབ་ཀྱི་མིག་གིས་མཐོང་བ་རང་མཐོང་༔ གཞན་ལ་མ་ལྟོས་པར་གྲོལ་བ་རང་གྲོལ་དུ་གྲོལ་བ་ཡིན་ནོ༔ འགྱུ་བས་སྒྲིན་པ༔ ཤེས་པ་རང་འོད་ཕྲ་ཞིང་སྣང་བས་རིག་པའོ༔ རིག་ཅིང་གསལ་བས་རིག་པའོ༔ དེ་ཡང་མཚན་ཉིད་འཛིན་པའི་རིག་པ་དང་༔ གཞི་འཛིན་པའི་རིག་

པ་དང་༔ གཞི་གནས་ཀྱི་རིག་པ་དང་༔ ལྷག་མཐོང་གི་རིག་པ་དང་༔ ཐོད་རྒལ་གྱི་རིག་པ་སྟེ་ལྔའོ༔ མཚན་ཉིད་འཛིན་པ་ནི༔ ཆོས་སྤྱི་དང་རང་གི་མིང་ཙམ་དུ་བཏགས་པའི་རིག་པ་ཞེས་བྱ་བ་དེ་ལ་བྱ་སྟེ༔ དེ་རང་ནི་ཤེས་པ་མི་རྟོག་པར་གསལ་བ་ཙམ་ཡིན་ཏེ་ཤེས་པ་དུ་མས་སྦགས་པའོ༔ ཉམས་སུ་ལེན་པ་ཙམ་གྱིས་དུས་གཞི་འཛིན་པ་ནི༔ རང་གི་ལུས་ལ་གནས་པའི་དུས་ན་ཤེས་པ་ཐམས་ཅད་བསྐྱེད་ཅིང་རང་གསལ་ཙམ་དུ་གནས་པ་སྟེ་འོད་དང་ཐིག་ལེའི་ཚེ་མ་སྨིན་པའི་རིག་པ་ཞེས་བྱའོ༔ གཞི་གནས་ཀྱི་རིག་པ་ནི༔ ཐོག་མའི་ངོ་བོ་ཀ་དག་གི་གནས་ལུགས་ཏེ་ངོ་བོ་ཀ་དག་གི་ཡེ་ཤེས་རང་བཞིན་ལྷུན་གྲུབ་ཀྱི་ཡེ་ཤེས་ཐུགས་རྗེ་ཀུན་ཁྱབ་ཀྱི་ཡེ་ཤེས་གསུམ་ལྡན་དུ་ཡོད་སྟེ་ཆ་ཡིས་མ་གོས་པའི་རིག་པ་ཐམས་ཅད་མཁྱེན་པའི་ཡེ་ཤེས་ཀྱི་ངོ་བོར་བཞུགས་པ་སྟེ༔ ཡེ་ཤེས་དེ་ཡང་ཐུགས་རྗེའི་ཆ་ཙམ་དུ་ཕྲ་བའི་ཡེ་ཤེས་སུ་གནས་སོ༔ ཡེ་ཤེས་དེ་མེད་ན་སྟོང་པ་ལས་མི་གྲོལ་ནམ་མཁའ་དང་ཁྱད་མེད༔ ཡང་ན་བེམས་པོ་ལས་མི་གྲོལ་བས་ན་ཕྲ་བར་གནས༔ རགས་པའི་ཡེ་ཤེས་སུ་ཁ་དོག་དང་དབྱིབས་སུ་ཡོད་ན་སྤྲུལ་པའི་སྐུ་དངོས་སུ་ཁྱད་མེད་དོ༔ ལྷག་མཐོང་གི་རིག་པ་གདམས་པ་བསྟན་པའི་དུས་ནི༔ གདམས་པའི་ཚེ་སྣང་བ་དེ་ཡིན་པས་རང་དག་ཐིག་ལེའི་སྙིང་པོ་ཅན་ཞེས་བྱ་སྟེ༔ སྣང་བ་མི་འདྲ་བ་དུ་མ་སྟོན་པས་སྐྱེ་བ་མེད་ལས་ཐམས་ཅད་སྐྱེས་པ་སྟེ༔ ཆོ་འཕྲུལ་ཆེན་པོ་ཅིར་ཡང་སྟོན་ཅེས་བྱའོ༔ ཐོད་རྒལ་གྱི་རིག་པ་ནི༔ ཉམས་སུ་བླངས་པས་སྣང་བ་ཚད་དུ་ཕྱིན་ཏེ༔ གང་གི་ངོ་བོར་ཡང་མ་གྲུབ་པས་ཚིག་ལས་འདས་ཏེ་ཆོས་བོར་བ་ཞེས་བྱ༔ ཉམས་ཐམས་ཅད་སྟོང་པས་ཆོས་ཟད་པ་ཞེས་བྱ༔ བླ་མའི་གདམས་པ་

རང་ཡང་མེད་ཅིང་ཟད་པས་ཆོས་ལས་འདས་པ་ཞེས་བྱ༔ ཆོས་ལས་གྲོལ་བ་ཞེས་བྱ་སྟེ༔ སྐྱེས་ཙམ་ཉིད་ན་སྐྱེ་བ་མེད་ཅེས་བྱའོ༔ རིག་པ་དེ་ཐ་དད་ལགས་སམ༔ ཐ་དད་མ་ཡིན་ཏེ་ངོ་བོ་གཅིག་ལས་གང་དུ་ཡང་འགྱུར་བ་མེད་དོ༔ དེའི་གནད་ཀ་ནི༔ རིག་པ་དེ་ཐོག་མར་ཉམས་སུ་བླངས་པ་ནས་ཐ་མ་ཟད་སར་སྐྱོལ་བ་ཚུད་ཆོད་ལ་ངོ་བོ་དེ་ཆེར་སོང་བ་མེད༔ ཆུང་དུ་སོང་བ་མེད༔ མང་དུ་སོང་བ་མེད༔ ཉུང་དུ་སོང་བ་མེད་པས་སོ༔ དེའི་ཕྱིར་ན༔ ངོ་བོ་ལ་འཕེལ་བ་མེད་ཅིང་འགྲིབ་པ་མེད༔ འགྲོ་བ་མེད་ཅིང་གང་ནས་ཀྱང་འོང་བ་མེད༔ བྲི་བ་མེད་ཅིང་གང་བ་མེད༔ ཅེས་པའི་དོན་ཏེ༔ དེ་དང་པོ་གང་ནས་ཀྱང་མ་འོངས༔ ཐ་མ་གང་དུ་ཡང་མི་འགྲོ་བར་སྐུ་གསུམ་རང་ཆས་སུ་གནས་པ་འདི་ཉིད་རང་ཡིན་པས་སོ༔ འོ་ན་འགྲོ་འོང་གིས་བསྟན་པའི་ཚད་དེ་མེད་ན་ཉམས་སུ་བླང་ཡང་མི་དགོས༔ མཐོང་བ་ཙམ་གྱིས་ཆོག་པར་འགྱུར་བས་ཉམས་སུ་བླངས་པས་བརྟན་པའི་ཚད་འཛིན་པ་ནི༔ འགྲོ་འོང་ཉིད་ན་འགྲོ་འོང་མེད༔ ཅེས་བྱའོ༔ དེའི་ཕྱིར་རང་གི་རིག་པ་འདི༔ ཕྲ་བའི་ངོས་ནས་བལྟས་ན་ཟབ་མོ་ཞེས་བྱ༔ ཐིག་ལེ་དང་འོད་དང་སྐུའི་ངོས་ནས་བལྟས་ན་སྣང་བ་ཞེས་ཀྱང་བྱ༔ འགྱུ་ཞིང་བྲིངས་པའི་ངོས་ནས་བལྟས་ན་ཤེས་རབ་ཅེས་ཀྱང་བྱ༔ སྣང་བ་སྣ་ཚོགས་ཤར་བའི་ངོས་ནས་བལྟས་ན་ཡངས་པ་ཡང་ཡིན༔ བྲེངས་ཆགས་པའི་ངོས་ནས་བལྟས་ན་ཐུགས་རྗེ་ཡང་ཡིན༔ གཏད་ཅིང་བལྟར་ཡོད་པའི་ངོས་ནས་བལྟས་ན་དངོས་པོ་ཡང་ཡིན༔ ཉམས་སུ་ལོངས་ཚད་ཟད་སར་ཕྱིན་པའི་ངོས་ནས་བལྟས་ན་སྟོང་པ་ཡང་ཡིན་ནོ༔ ངོ་བོ་གཅིག་ལས་འཕེལ་འགྲིབ་མེད་པའི་ངོས་ནས་བལྟས་ན་ཉག་གཅིག༔ སྣང་བའི་ཆ་གོང་ནས་

གོང་དུ་འཕེལ་བའི་ངོས་ནས་བལྟས་ན་དུ་མ་ཡིན༔ སྣང་བ་བརྗོད་ཀྱིས་མི་ལངས་པར་ཤར་བས་ཀུན་ཏུ་མཐའ་ཡས་པ་ཡང་ཡིན༔ དོན་རིག་པ་གཅིག་ལས་མེད་པའི་ངོས་ནས་བལྟས་ན་འདུས་པ་ཡང་ཡིན༔ རང་བཞིན་མེད་པའི་ཁ་དོག་གི་ངོས་ནས་བལྟས་ན་སྣང་ཡུལ་ཙམ་ལས་ཞེན་ཡུལ་དུ་མེད་པས་གསལ་བ་ཡང་ཡིན་ནོ༔ དེ་ལྟར་སྣ་ཚོགས་སུ་འདུག་པའི་སྣང་བ་ཐམས་ཅད་དེའི་རིག་པའི་ངོ་བོ་ལས་མ་འདས་པའོ༔ དེའི་ཕྱིར་ན་ཁ་ཅིག་ཚིག་གི་ཕྱིར་འབྲང་སྟེ་དོན་མ་མཐོང་བས་ཚིག་གི་ཡིན་ཚུལ་ལ་ལྟོས་པའོ༔ རང་རིག་པ་གཏན་ལ་ཕབ་པ༔ རིག་པ་བསྡུས་པའི་སྒྲོན་མ་རྫོགས་སོ༔ ཨྠྀི༔ ༔ སརྦ་དྷི་ཆོས་ཐམས་ཅད་སྟོང་པ་ཆེན་པོའི་གླིང་དུ་མྱ་ངན་ལས་འདས་པ་ཏྱ་ཨཱ༔ སྐུ་གསུམ་ཡེ་རྫོགས་ཆེ་ལ་ཕྱག་འཚལ་ལོ༔ ཨེ་མ་ཧོ༔ སྐལ་བ་ལྡན་པའི་རིགས་ཀྱི་བུ་ཉོན་ཅིག༔ སྐུ་གསུམ་ཞེས་པ་ནི་ལོགས་ན་མེད་དེ་རིག་པ་ཉིད་དོ༔ དེ་ཡང་རིང་བ་རྒྱུད་ཀྱི་ངོས་ནས་བལྟས་ན་ཕྲ་བར་འདུག་སྟེ༔ དེའི་ཕྱིར་ན་ཟབ་ཆོས་ཀྱི་སྐུ་ཞེས་བྱ་བ་ཡིན་ཏེ་གཞན་ན་ཡོད་པ་ནི་མ་ཡིན་ན༔ བར་གྱི་ངོས་ནས་བལྟས་ན་ལུ་གུ་རྒྱུད་ཀྱི་ཚིག་ཐིག་ལེར་འདུག་པས་གསལ་བ་ལོངས་སྤྱོད་རྫོགས་པའི་སྐུ་ཡིན་པས་གཞན་ནས་ཡོད་པ་ནི་མ་ཡིན་ནོ༔ མཛད་སྤྱོད་ཀྱི་ངོས་ནས་བལྟས་ན་འགྲོ་ཞིང་གཟུང་བར་དཀའ་ལ༔ ས་གཅིག་ཏུ་ཡུན་ཐུང་བར་འདུག་པས་ཐུགས་རྗེ་སྤྲུལ་པའི་སྐུ་ཡིན་ཏེ་གཞན་ནས་འོངས་པ་ནི་མ་ཡིན་ནོ༔ བར་གྱི་འབྲེལ་ཐག་གི་ངོས་ནས་བལྟས་ན་ཐིག་ལེ་རེ་ལ་སྐུ་རེ་རེ་འཆར་བ་ལུ་གུ་རྒྱུད་དུ་འདུག་པ་སྐུ་གསུམ་འདུ་འབྲལ་མེད་པ་ཞེས་བྱ་བ་ཡིན་པས་རིག་པ་སྐུ་གསུམ་རང་ཆས་ཞེས་བྱའོ༔ རིག་པ་ཡེ་རེ་གནས་པའི་ཚེ་ན་སྐུ་གསུམ་གཞི་བཞག་གི་དགོངས་པ་ཞེས་བྱ༔ རིག་པ་འགྲོ་འོང་ལྟར་སྣང་བ་བཞེངས་པའི་

ཚེ་ན་སྐུ་གསུམ་གཞི་བཞེངས་ཀྱི་དགོངས་པ་ཞེས་བྱ༔ རིག་པ་ཉམས་ལེན་ཚད་དུ་ཕྱིན་པ་གྲོལ་བའི་ཚེ་ན་སྐུ་གསུམ་ཡོངས་གྲོལ་གྱི་དགོངས་པ་ཞེས་བྱ༔ རིག་པ་དག་པའི་ཚེ་ན་ཟད་པའི་ས་ལ་ཕྱིན་པས་སྐུ་གསུམ་ཀ་དག་གི་དགོངས་པ་ཞེས་བྱའོ༔ རིག་པ་སྐུ་གསུམ་དུ་གཏན་ལ་དབབ་པ་སྐུ་གསུམ་བསྡུས་པའི་སྒྲོན་མ་རྫོགས་སོ༔ ཨི་ཏི༔ ལྟ་སྒོམ་སྤྱོད་པ་ཐམས་ཅད་རིག་པ་རང་གི་ངོ་བོར་བསྟན་སརྦ་པ་བྃཿརྡོ་རྗེ་རིག་པ་སྟོང་པ་ཡེ་ཤེས་རང་བཞིན་རྫོགས་ལ་ཕྱག་འཚལ་ལོ༔ ཀྱེ་མ་རིགས་ཀྱི་བུ་ཉོན་ཅིག༔ ལྟ་བ་དང་སྒོམ་པ་སྤྱོད་པ་བྱ་བ་ནི་གཞན་ན་མེད་དེ་རང་གི་རིག་པའོ༔ རིག་པའི་ཡེ་ཤེས་མིག་གིས་བལྟར་ཡོད་པས་ལྟ་བ་ཞེས་བྱའོ༔ དེའི་ཕྱིར་ན་གཞན་གྱི་ཆོས་སྤྱི་ཡི་ལྟ་བ་ནི་ལྟ་བ་མིན་ཞིང་གཏན་ལ་མ་ཕེབས་པའོ༔ དེའི་དོན་ནམ་མཁའི་ངང་དུ་མ་ཡེངས་པར་ཉམས་སུ་བླངས་པས་སྣང་བའི་ཉམས་འོད་ཀྱི་སྣང་བ་དང་ཐིག་ལེ་སོགས་གོང་ནས་གོང་དུ་ཇེ་ཆེར་འཕེལ་བས་མ་སྒོམ་པ་ཞེས་བྱའོ༔ དེའི་ཕྱིར་ན་གཞན་ཐེག་པ་འོག་མའི་གྱི་སྒོམ་པ་ནི་རིག་པ་དངོས་ལ་གོམས་སུ་མེད་པས་ན༔ སྒོམ་པ་མ་ཡིན་ཞིང་གཏན་ལ་མ་ཕེབས་པའོ༔ སྤྱོད་པ་ཞེས་བྱ་བ་ནི༔ སྣང་བ་དེ་ཉིད་ལ་རྒྱུན་དུ་སྤྱོད་པས་ན་སྤྱོད་པ་ཞེས་བྱའོ༔ དེའི་ཕྱིར་གཞན་གྱི་སྤྱོད་པ་ནི་ངོ་བོ་མཐོང་ཞིང་རིག་པ་དང་མ་འབྲེལ་བས་ན་སྤྱོད་པ་གཏན་ལ་མ་ཕེབས་པར་བསྟན་པའོ༔ དེ་ལྟར་རིག་པ་ཉིད་ལ་བལྟར་ཡོད་པ་ལྟ་བ་དང་༔ ཉམས་སུ་བླང་དུ་ཡོད་པ་སྒོམ་པ་དང་༔ དེ་ཉིད་ལ་སྤྱོད་དུ་ཡོད་པའི་ཕྱི་རུ་སྤྱོད་པ་སྟེ་ལྟ་སྒོམ་སྤྱོད་པ་གསུམ་འདུ་འབྲལ་མེད་པ་ཞེས་བྱའོ༔ དེའི་ཕྱིར་ན་རིག་པ་རང་ངོ་ལ་གནས་པའི་ཚེ་ན་ལྟ་སྒོམ་སྤྱོད་པ་གཞི་བཞག་ཅེས་བྱའོ༔ རིག་པ་སྣང་ངོར་ཤར་དུས་བཞེངས་

པའི་ཚེ་ན་ལྟ་སྒོམ་སྤྱོད་པ་གཞི་བཞེངས་ཞེས་བྱའོ༔ རིག་པ་ཕྱི་ནང་གི་འཛིན་པ་ལས་གྲོལ་བའི་ཚེ་ན་ལྟ་སྒོམ་སྤྱོད་པ་ཡོངས་གྲོལ་ཞེས་བྱའོ༔ རིག་པ་ཚད་དུ་ཕྱིན་པ་དག་པའི་ཚེ་ན་ལྟ་སྒོམ་སྤྱོད་པ་ཀ་དག་ཅེས་བྱའོ༔ རིག་པ་ལྟ་སྒོམ་སྤྱོད་པར་གཏན་ལ་ཕབ་པ༔ ལྟ་སྒོམ་སྤྱོད་པ་བསྡུས་པའི་སྒྲོན་མ་རྫོགས་སོ༔ ཨི་ཏི༔ གྷ་ཐིག་ལེ་ཉག་གཅིག་གི་དོན་བསྟན་པས་རིག་པ་ལ་ཡིད་ཆེས་པ་རི་པ་ར་ཐཱ༔ ཐིག་ལེ་འདུས་པའི་སྐུ་མི་འགྱུར་བ་དང་གདལ་བ་ཆེན་པོ་གཅིག་ཡིན་པ་ལ་ཕྱག་འཚལ་ལོ༔ ཀྱེ་མ་རིགས་ཀྱི་བུ་ཉོན་ཅིག༔ ཆོས་སྐུ་ཐིག་ལེ་ལོངས་སྐུ་ཉག་སྤྲུལ་སྐུ་གཅིག་དབྱེར་མེད་ཡིན་ཅེས་བྱ་བ་ནི་རང་གི་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ཡིན་པས་དེའི་དོན་ཉམས་སུ་ལེན་པ་ལ་མ་ཡེངས་པར་གནས་པར་བྱའོ༔ རིག་པའི་ངོ་བོ་ལྟ་བ་ཆོས་སྐུ་དང་འབྲེལ་དེ་མིག་གི་གདངས་གཉིས་དང་མི་འགྱུར་བ་གནས་པས་ཐིག་ཅེས་བྱ་བ་ཡིན་ནོ༔ སྣང་བ་གོང་ནས་གོང་དུ་འཕེལ་བའི་ཕྱོགས་ནས་ལེ་ཞེས་བྱ་སྟེ་ཉམས་སུ་ལོན་དུས་སུ་སྣང་བ་དུ་མ་གདལ་བ་ལོངས་སྐུ་དང་འགྲེལ་བ་འོ༔ ཕྲ་ཞིང་རིང་བའི་ངོས་ནས་བལྟས་ན་ཉག་ཅེས་བྱ་སྟེ་ཟབ་པ་སྤྲུལ་སྐུ་དང་འགྲེལ་པས་སྣང་བ་ཐམས་ཅད་འདྲེན་པར་བྱེད་པའོ༔ སྣང་བ་གང་དང་ཡང་མ་འདྲེས་པར་གནས་པའི་ཕྱོགས་ནས་བལྟས་ན་དུ་མར་སྣང་ཡང་སྐུ་གསུམ་འདུ་འབྲལ་མེད་པས་གཅིག་ཅེས་བྱ་སྟེ་འབྱུང་བ་དུ་མའི་རྐྱེན་དང་བྲལ་བས་སྣང་བ་ཐམས་ཅད་གཅིག་ཏུ་བསྡུས་པའོ༔ དེའི་ཕྱིར་ན་ཐིག་གི་དོན་རིག་པ་མི་འགྱུར་བའི་གདམས་ངག་གིས་རིག་པ་མིག་གི་ལམ་དུ་གཟུང་བ་དང་༔ རིག་པ་ཁྱབ་ཆེ་བའི་ལེའི་དོན་མན་ངག་གིས་རིག་པ་དང་སྣང་བ་དབྱིངས་དང་རིག་པ་ངོ་སྤྲད་པ་དང་༔ རིག་པ་ཟབ་པའི་ཉག་གི་དོན་མན་ངག་གིས་རིག་པ་གསང་བའི་དོན་འཛིན་མེད་དུ་བཞག་པ་

ལ་མཁས་པར་བྱ་བ་དང་༔ རིག་པ་ཟླ་དང་བྲལ་བའི་ཉག་གི་དོན་མན་ངག་གིས་རིག་པ་ཡུལ་གཅིག་ལས་བསྡུས་པར་དབྱིངས་རིག་ཚད་ལ་ཕེབས་པ་བསྟན་པའོ༔ རིག་པ་ཐིག་ལེ་ཉག་གཅིག་ཏུ་གཏན་ལ་ཕབ་པ་ཉག་གཅིག་བསྡུས་པའི་སྒྲོན་མ་རྫོགས་སོ༔ ཨྠྀི༔ ༔ ཨཱི་པཱ་ཡཱ་རིག་པ་དགེ་སྡིག་ལས་འདས་པའི་དོན་ལ་ཡིད་ཆེས་ཤིང་རིག་པ་ཉིད་དུ་བསྟན་པའོ་ཀ་ཡ་ཐྱ་པཱ༔ འབྱུང་བ་དང་ཉོན་མོངས་པ་གང་གིས་ཀྱང་མ་བསྒྲིབས་པ་རིག་པ་རྡོ་རྗེ་ལུ་གུ་རྒྱུད་ཉིད་ལ་ཕྱག་འཚལ་ལོ༔ ཁྱབ་ཆེན་དབྱིངས་རིག་རླུང་གི་སྟོབས་ཀྱིས་བཟུང་བར་དཀའ་བའི་རིག་པ་ནིཿརྣམ་དག་ཡུལ་རྐྱེན་བྲལ་བའི་ནམ་མཁའ་སྤྲིན་བྲལ་ལ༔ རི་དྭགས་རྒྱ་ལ་ཚུད་པ་ཇི་བཞིན་དབྱིངས་ཀྱི་ནང་དུ༔ བཅོས་པ་མེད་པའི་མིག་གིས་བཏགས་ཏེ་མི་གཡོ་བར་བཞག༔ སརྦ་བྷ་དྷུ་རེག་པ་ལ་ཟླ་བའི་ཡི་གེ་ཡེ༔ ཀྱེ་མ་ཞེས་སྐལ་ལྡན་ལ་བོད་པ་རིགས་ཀྱི་བུ་ཉོན་ཅིག །་ཅེས་གདམས་པ་༔ རང་བཞིན་རྫོགས་པ་ཆེན་པོའི་ཐ་སྙད་ལས་དགེ་སྡིག་དང་བྲལ་ལོ་ཞེས་བྱ་བ་དེའི་གནད་བསྟན་པ་ནི་རང་གི་རིག་པའི་དོན་མཐོང་བའི་རྣམ་འབྱོར་པ་འདི་ཡི་མན་ངག་ཡོད་པ་ཡིན་ནོ༔ རིག་པ་དེ་ཉིད་བླ་མའི་མན་ངག་དང་འབྲེལ་པ་སྟེ༔ མ་བསྟན་ན་སྡེ་སྣོད་གསུམ་ལ་བློ་འབྱངས་པའི་མཁས་པ་པཎ་ཌི་ཏས་ཀྱང་དོན་ལ་རྡུལ་ཕྲ་རབ་ལ་འབུམ་དུ་བགོས་པའི་ཆ་ཙམ་ཡང་མ་རེག་སྟེ་ཡིད་དཔྱོད་ཙམ་ལས་མངོན་སུམ་དུ་མ་མཐོང་པས༔ དེའི་ཕྱིར་ན་གསང་སྔགས་ཐབས་ལ་བརྟེན་པ་ཞེས་བྱའོ༔ བསྟན་ན་དབུལ་མོ་བ་གླང་རྫིས་ཀྱང་གནད་ལ་བརྟེན་པས་ཆོས་ཉིད་མངོན་སུམ་དུ་མཐོང་བས༔ དེའི་ཕྱིར་ན་ལས་ལ་བཟང་ངན་མེད་པ་སྟེ་བསག་སྦྱང་ལ་མ་ལྟོས་པ་ཞེས་བྱའོ༔ ཉམས་སུ་མ་བླངས་ན་རྡོ་རྗེ་སེམས་དཔའ་ཡང་མི་གྲོལ་

བས་སྟེ་ཚད་ལ་མི་ཕེབས་པས་དེའི་ཕྱིར་ན་མན་ངག་གོམས་ཚད་ལ་ཐུག་པ་ཞེས་བྱ་རྟགས་ཚད་ལ་ཕེབས་པ་གལ་ཆེ་བའོ༔ ཉམས་སུ་བླངས་ན་མཚམས་མེད་པ་ལྔ་ལ་སོགས་པ་བྱས་པ་ཞིག་ཀྱང་སྣང་བ་འདི་ཉིད་ལས་གྲོལ་བས༔ དེའི་ཕྱིར་ན་དགེ་སྡིག་གང་གིས་ཀྱང་རིག་པ་རང་གི་ངོ་བོ་ལ་ཕན་གནོད་མ་བསྐྱལ་བ་ཞེས་བྱའོ༔ དེ་ལྟར་བསྟན་ན་མཚམས་མེད་པ་ལྔ་བྱས་པ་ཞིག་ཀྱང་མི་གྲོལ་མི་སྲིད་པས་སྡིག་པས་དེ་ཉིད་ལ་གོས་པ་མེད་པར་བསྟན་པ་དང་༔ མ་བསྟན་ན་ཀུན་ཏུ་བཟང་པོ་ཡང་གྲོལ་མི་སྲིད་པས་དགེ་བས་དེ་ཉིད་ལ་སྐྱོབ་པ་མེད་པར་བསྟན་པའོ༔ དེའི་ཕྱིར་ན་མན་ངག་གི་གནད་ཀས་རིག་པ་མཐོང་བའི་ཤན་པ་ལྔ་བརྒྱ་དང་༔ རིག་པ་མཐོང་བའི་རྡོ་རྗེ་སེམས་དཔའ་ཡང་ཐ་སྙད་མཁས་ཀྱང་མན་ངག་དང་བྲལ་བའི་སྐྱོན་གྱིས་ཁྱེད་མེད་པར་བསྟན་པའོཿརིག་པ་རྡོ་རྗེ་ལུ་གུ་རྒྱུད་དེ་ལ་དགེ་བས་བསྒྲུབས་པའི་སྣང་བ་མ་གྲུབ་པའི་གནད་ཀ་ནི༔ ཐོག་མ་ཉམས་སུ་བླངས་པ་ནས་ཐ་མ་ཚད་ལ་ཕེབས་པ་ཚུན་ཆད་དུ་དང་པོ་ལས་འཕེལ་འགྲིབ་མེད་ཅིང་ཆེ་ཆུང་མེད་པས་སོ༔ རིག་པ་རྡོ་རྗེ་ལུ་གུ་རྒྱུད་དེ་ལ་ནི་སྡིག་པས་གནོད་པ་བསྐྱལ་བའི་རྟགས་འདི་ཡིན་བྱ་བ་ཡང་མ་གྲུབཿདེའི་གནད་ཀ་ནི་ཤན་པ་ཉ་བཤོར་བ་རྣམས་ལ་ཡང་བསྟན་ན་གྲོལ་བས་སོ༔ དེ་ཡང་བསྟན་ནས་ཉམས་སུ་བླངས་པའི་ཚེ་རང་བཞིན་གྱིས་བྱིན་རླབས་རྒྱུད་ལ་ཤར་བས་རྣམ་པར་རྟོག་པ་རྒྱུད་ལ་ཡེ་འཆར་མི་སྲིད་པ་དང་༔ ཉམས་གོང་ནས་གོང་དུ་འཕེལ་བའི་ཚེ་རིག་པ་ཉིད་དཀར་པོ་ཕྱོགས་ལ་དབང་བའི་གནད་ཀས་དགེ་བའི་བསམ་པ་ལས་སྡིག་པའི་བསམ་པ་ཡེ་འཆར་མི་སྲིད་པ་དང་༔ ཚད་ལ་ཕེབས་པའི་ཚེ་སྣང་བ་ཅི་ཡི་ངོ་བོར་མ་གྲུབ་པས་དགེ་སྡིག་གང་གིས་ཀྱང་བསམ་པ་ཡེ་མི་འཆར་བས་སོ༔ མཐོང་བའི་ཚེ་རྩོལ་སྒྲུབ་ཀྱི་དགེ་བ་ལྟར་སྣང་བས་རིག་པའི་དོན་གྱི་ཉམས་ལེན་གཡེལ་བས་དགེ་བའི་བྱ་བ་ཅི་བྱས་ཀྱང་སྣང་བ་འཕེལ་བའི་

གྲོགས་ལ་སྤུ་ཙམ་ཞིག་ཀྱང་མ་ཕན་པས་དགེ་བ་བྱར་མེད་པར་བསྟན་པ་དང་༔ ཉམས་སུ་ལེན་པའི་ཚེ་བསད་བཅད་ཀྱི་ལས་ཅི་བྱས་ཀྱང་དེའི་རྟོག་པ་རང་གྲོལ་བས་སྣང་བ་འགྲིབ་པའི་རྒྱུ་སྤུ་ཙམ་ཡང་མེད་པས་སྡིག་པ་བྱས་ཀྱང་མི་འགྲིབ་པས་གཉིས་སུ་འཛིན་པ་ཐམས་ཅད་བསྒྲལ་བར་བསྟན་པ་དང་༔ ཚད་ལ་ཕེབས་པའི་ཚེ་རིག་པ་རང་ཡུལ་རྙེད་པས་དགེ་སྡིག་གང་གིས་ཡང་ངོ་བོར་མ་གྲུབ་པ་ལ་དགེ་སྡིག་ལས་འདས་པར་བསྟན་པའོ༔ དེའི་ཕྱིར་ན་བྱ་བྱེད་དུ་མ་སོང་བར་དགེ་བའི་རྒྱུན་ཐག་བཅད་ན་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་དང་ཉེ་བར་བསྟན་པ་དང་༔ སེམས་ཅན་། མས་ཅད་བསྒྲལ་ན་སྣང་བ་གཉིས་རྟོག་གི་འཛིན་པ་དང་བྲལ་བས་དང་ཕྲད་པར་བསྟན་པ་དང༔ དགེ་སྡིག་གང་ཡང་མེད་ན་ཆོས་ཟད་པའི་གནད་ཀས་སྣང་བ་རང་སོ་ཡིན་པར་བསྟན་པའོ༔ རིག་པ་མཐོང་བའི་ཚེ་སངས་རྒྱས་དེ་ཉིད་རང་ཡིན་པས་གཞན་ནས་འབྲས་བུ་ཐོབ་པར་འདོད་པའི་ཞེན་པ་སངས་རྒྱས་བྱ་བའི་མིང་ཡང་མེད་པས༔ སངས་རྒྱས་སུ་མིང་འདོགས་པའི་སྟོན་པ་འཁྲུལ་པར་བསྟན་པ་དང་༔ རིག་པ་ཉམས་སུ་བླངས་པའི་ཚེ་ན་འཁོར་བ་ཡེ་སངས་རྒྱས་པས་དམྱལ་བ་བྱ་བའི་མིང་ཡང་མེད་པས་དམྱལ་བར་འདོགས་པའི་སྟོན་པ་བདུད་ཀྱིས་ཁྱེར་བར་བསྟན་པ་དང་༔ རིག་པ་ཚད་ལ་ཕེབས་པའི་ཚེ༔ རང་ངོ་རྣམ་པར་དག་པའི་གནད་ཀས་སངས་རྒྱས་དང་དམྱལ་བ་མ་གྲུབ་པར་བསྟན་པའོ༔ དེའི་ཕྱིར་ན་སངས་རྒྱས་ཀུན་ཏུ་བཟང་པོ་དང་དམྱལ་བ་ཆོས་ཀྱི་རྒྱལ་པོ་གཉིས་ལ་ཁྱད་པར་རྡུལ་ཙམ་ཡང་མེད་པར་བསྟན་པའོ༔ རིག་པ་མཐོང་བའི་ཚེ་གདམས་པ་བསྟན་པ་འཁྲུལ་བྱ་བ་རང་གི་ངོ་བོ་ལ་མིང་ཡང་མེད་པར་བསྟན་པས་འཁྲུལ་གཞི་རྩད་ནས་གཅོད་པའི་གང་ཟག་བླུན་པོ་ཡིན་པར་བསྟན་པ་དང་༔ རིག་པ་ཉམས་སུ་ལེན་པའི་ཚེ་ལུས་ངག་གི་བྱ་བ་དགེ་བ་བྱས་པ་ཐམས་ཅད་འཁྲུལ་པ་ཡིན་པར་

བསྟན་པས་དོན་མ་མཐོང་བའི་ངོ་སྤྲོད་མཁན་དཔེ་ལ་ཞེན་པ་སྒྲིབ་ཤིང་ཡིན་པར་བསྟན་པ་དངཿརིག་པ་ཚད་ལ་ཕེབས་པས་ཆོས་ཟད་པའི་ཚེ་འཁྲུལ་མ་འཁྲུལ་གང་གི་ཡང་ངོ་བོར་མ་གྲུབ་པས་རིག་པ་འཁོར་འདས་ལས་འདས་པ་ཞེས་བྱའོཿདེའི་ཕྱིར་ན་ལུང་ལ་འཁྲུལ་པ་མེད་པ་ལ་ཐམས་ཅད་ཚིག་གིས་བསྒྲིབས་པས་མན་ངག་ལ་འཁྲུལ་པ་བྱུང་བ་ཞེས་བྱའོ༔ རིག་པའི་སྣང་བ་མཐོང་བའི་ཚེ་མི་རྟོག་པ་སྒོམ་པ་ལས་བྱུང་བ་མ་ཡིན་པར་མ་རྟོགས་པས་སེམས་གནས་འབའ་ཞིག་རྒྱུད་ལ་བརྟེན་པའི་སྒོམ་ཆེན་ཚི་བ་ཆད་པར་བསྟན་པ་དང་༔ རིག་པ་ཉམས་སུ་ལེན་པའི་ཚེ་རྣམ་པར་རྟོག་པར་འབྱུང་མི་སྲིད་པས་རྣམ་རྟོག་ཉིད་ལས་ཡེ་ཤེས་སྐྱེ་བར་བསྟན་པ་དང་ཿརིག་པ་ཚད་ལ་ཕེབས་པའི་ཚེ་རྟོག་པ་དང་མི་རྟོག་པ་གང་གི་ངོ་བོར་གྲུབ་པས་རིག་པ་བསམ་ངོ་ལས་འདས་པ་ཞེས་བྱའོ༔ དེའི་ཕྱིར་རྡོ་རྗེ་ལུ་གུ་རྒྱུད་ཚིག་ཐ་སྙད་ཀྱི་ཆོས་ཀྱིས་གཏན་ལ་མི་ཕེབས་པ་ཞེས་བྱའོ༔ ཨེ་མ་ཧོ༔ རིགས་ཀྱི་བུ་ཉོན་ཅིག༔ རང་གི་རིག་པ་ཉིད་ལ་ནན་ལྟར་ལྟོས་དང་༔ རིག་པའི་ངོ་བོ་ལ་བརྟགས་ཀྱང་རང་བཞིན་མ་གྲུབ་པས་དགེ་བའི་ཕྱོགས་འདུག་གམ༔ གྲངས་སུ་བཅད་པའི་ཡི་གེ་འབྲི་མཆོད་སོགས་དགེ་བ་བཅུའི་ངོ་བོར་འདུག་གམ༔ བསག་པར་བྱ་བའི་བསོད་ནམས་དང་ཡེ་ཤེས་སུ་བཏགས་པའི་ཚོགས་གཉིས་འདུག་གམ༔ སྤྱད་པར་བྱ་བའི་ལྟ་སྒོམ་སྤྱོད་པ་འདུག་གམ༔ ཐོབ་པར་བྱ་བའི་སྐུ་གསུམ་གྱི་འབྲས་བུ་འདུག་གམ༔ བྱ་བྱེད་མེད་པས་བསྐུར་བར་བྱ་བའི་དབང་འདུག་གམཿཚིག་མེད་པས་བཟླས་པར་བྱ་བའི་སྙིང་པོ་འདུག་གམ༔ སྣང་བ་རང་ཆས་ཡིན་པས་བསྐྱེད་པར་བྱ་བའི་གཞལ་ཡས་ཁང་འདུག་གམ༔ སྐུ་རང་སྣང་ཡིན་པས་བསྒོམ་པར་བྱ་བའི་ལྷ་འདུག་གམ༔ ཐམས་ཅད་རང་ལ་ཤར་བས་མཆོད་ཅིང་བཤགས་པའི་བདག་པོ་འདུག་གམ༔ མིང་ཐམས་ཅད་དང་བྲལ་བས་སྡོམ་པར་བྱ་བའི་དམ་ཚིག་འདུག་གམ༔ སྤྲོས་པ་ཐམས་ཅད་དང་བྲལ་བས་

བཤད་ཅིང་བསྟན་པའི་ཆོས་ཉིད་འདུག་གམ༔ ཀྱེ་མ་རིགས་ཀྱི་བུ་དེ་དག་གི་ངོ་བོར་གང་ཡང་མི་འདུག་པས༔ དགེ་བ་བྱས་པས་རིག་པ་ལ་ཕན་པ་རྡུལ་ཆ་ཙམ་མ་བཏགས་པས་རྟག་ཏུ་ལུས་ངག་གི་བྱ་བ་བཏང་ལ་དགེ་སྦྱོར་རྒྱུན་གཅད་པ་རིག་པ་ངོ་བོ་གཟུང་བར་དཀའ་ཡང་རྩ་དལ་བས་འགྲུབ་པའི་གནད་དཀའོ༔ ཨེ་མ་ཧོཿརང་གི་རིག་པ་ཉིད་ཀྱི་ངོ་བོ་ལ་ལྟོས་དང་༔ རིག་པ་ལ་ཕྱོགས་དང་རིས་སུ་མེད་པས་དམྱལ་བ་ལ་སོགས་རིགས་དྲུག་གྲུབ་ནས་འདུག་གམཿཚ་གྲང་ལ་སོགས་སྡུག་བསྔལ་གྲུབ་ནས་འདུག་གམ༔ མ་རིག་པ་ལ་སོགས་འཁྲུལ་པ་གྲུབ་ནས་འདུག་གམ༔ གཏི་མུག་ལ་སོགས་ཉོན་མོངས་པ་གྲུབ་ནས་འདུག་གམཿཕུང་པོ་ཁམས་དང་སྐྱེ་མཆེད་གྲུབ་ནས་འདུག་གམ༔ དབང་པོ་ཡུལ་དང་ཤེས་པ་གྲུབ་ནས་འདུག་གམཿལུས་ངག་སྡིག་དང་རྣམ་སྨིན་གྲུབ་ནས་འདུག་གམ༔ སྣང་བ་ཉིད་དང་མི་སྣང་གྲུབ་ནས་འདུག་གམ༔ ཀྱེ་མ་རིགས་ཀྱི་བུ་དེ་དག་གང་གི་ངོ་བོར་ཡང་མ་གྲུབ་པས་རིག་པ་ཉིད་ལ་ག །ང་གི་ངོ་བོར་ཡང་མ་གྲུབ་པས་སྡིག་པས་གནོད་པ་མི་སྐྱེལ་ཏེ་བསད་བཅད་ཀྱི་ལས་ཅི་བྱས་ཀྱང་རིག་པ་ལ་ལྟུང་བྱེད་ཀྱི་རྒྱུ་རྡུལ་ཙམ་ཡང་མེད་པར་བསྟན་པའོཿཨེ་མ་ཧོཿརིགས་ཀྱི་བུ༔ རིག་པ་མཐོང་བའི་དུས་ཉམས་སུ་ལེན་པའི་དུས་ཚད་ལ་ཕེབས་པའི་དུས་ཏེ་དུས་གསུམ་གྱི་གནས་པ་ལ་མཁས་པའི་སྐལ་ལྡན་ནིཿབསྐལ་པ་སྟོང་གི་སངས་རྒྱས་པས་རྒན་པ་ཞེས་བྱའོཿདེ་ཅིའི་ཕྱིར་ཞེ་ནཿརིག་པ་མཐོང་བའི་དུས་ན་ཡིད་ཆེས་པ་མཆོག་ལ་གནས་པས་ད་ལྟའི་སངས་རྒྱས་སྟོང་དང་སྐལ་པ་མཉམ་པ་ཞེས་བྱའོཿརིག་པ་ཉམས་སུ་ལེན་པའི་དུས་ན་ངོ་ཤེས་པ་མཆོག་ལ་གནས་པས་སྣང་བ་མི་འདྲ་བ་གོང་ནས་གོང་དུ་འཕེལ་བས་མ་འོངས་པའི་སངས་རྒྱས་སྟོང་དང་སྐལ་པ་མཉམ་པ་ཞེས་བྱའོཿསྣང་བ་ཚད་དུ་ཕྱིན་པའི་ཚེ༔ ཐག་ཆོད་པ་མཆོག་ལ་གནས་པ་སྟེ་སྣང་

བ་རང་དག་ཏུ་སོང་བས་འདས་པའི་སངས་རྒྱས་སྟོང་དང་སྐལ་བ་མཉམ་པ་ཞེས་བྱའོ༔ དེའི་ཕྱིར་ན་རིག་པ་དགེ་སྡིག་འདི་ལྟར་ཞེས་གང་གི་ངོ་བོར་ཡང་མ་གྲུབ་ལ༔ གང་གི་ངོ་བོར་དགེ་སྡིག་སོགས་ཡང་འབྱུང་བས་ཇི་ལྟར་བྱས་ཀྱང་མ་བཀག༔ མི་འགེགས༔ མ་འགགས་པས་སངས་རྒྱས་སུམ་སྟོང་གི་ཞལ་མཐོང་ཞིང་དབང་བསྐུར་བ་ཞེས་བསྟན་པའོ༔ དེའི་ཕྱིར་ན་དང་པོའི་གཞི་ཡིན་པས་སངས་རྒྱས་པས་ཀྱང་རིག་པ་རྡོ་རྗེ་ལུ་གུ་རྒྱུད་སྔར་བྱུང་བ་ཞེས་བསྟན་པའོ༔ རིགས་ཀྱི་བུ་རང་གི་རིག་པ་ལ་འདུག་ཚུལ་གསུམ་གྱི་བདག་ཉིད་པ་ཞེས་བྱའོ༔ ཅིར་ཡང་མ་གྲུབ་པའི་ངོ་བོ་དང་སྣ་ཚོགས་འཆར་བའི་རང་བཞིན་དང་༔ འཛད་པ་མེད་པའི་ཐུགས་རྗེའོ༔ དེ་ལྟར་ཅིར་ཡང་མ་གྲུབ་པའི་ངོ་བོ་ཀ་ནས་དག་པ་གཞི་ཆེ༔ སྣ་ཚོགས་སྣང་བའི་རང་བཞིན་ལྷུན་གྱིས་གྲུབ་པ་ཁྱབ་ཆེ༔ འཛད་པ་མེད་པའི་ཐུགས་རྗེ་ཡུལ་ཡུལ་ཅན་དུ་མེད་པས་འཕྲིན་ལས་འགྲུབ་ཆེ༔ དེ་ཅིའི་ཕྱིར་ཞེ་ནཿགཞི་ཆེ་བས་དུས་ལ་འཕོ་འགྱུར་མེད་པ་དང་༔ ཁྱབ་ཆེ་བས་མཐའ་དབུས་སུ་བསྡུས་པ་དང་༔ འགྲུབ་ཆེ་བས་བྱས་པ་ཆུད་མི་གསོན་པའོ༔ རིག་པ་དགེ་སྡིག་ལས་འདས་པར་གཏན་ལ་ཕབ་པ༔ དགེ་སྡིག་བསྡུས་པའི་སྒྲོན་མ་རྫོགས་སོ༔ ལས་འཕྲོ་ཅན་དང་ཕྲད་པར་ཤོག༔ གསང་སྔགས་ཀྱི་རྒྱལ་མོས་བཀའ་འདི་སྲུངས་ཤིག༔ སཱ་མཱ་ཡཱ༔ རྒྱ་རྒྱ་རྒྱ༔ ༔ རང་གཞན་གྱི་ཤེས་རྒྱུད་སྨིན་གྲོལ་དུ་གྱུར་ཅིག༔ ༔

རིན་པོ་ཆེ་རླུང་གི་པྲ་ཁྲིད།

རིན་པོ་ཆེ་རླུང་གི་པྲ་ཁྲིད་བཞུགས་སོ༔༼ཕྲ་ཡིག༽

རྒྱ་གར་སྐད་དུ༔ རཏྣ་བྷ་ཡུ་ཏི་ཡཱ་ཀཱཿབོད་སྐད་དུ༔ རིན་པོ་ཆེ་རླུང་གི་པྲ་ཁྲིད༔ དཔལ་མི་འགྱུར་བའི་སྐུ་ལ་ཕྱག་འཚལ་ལོ༔ དད་དང་ལྡན་ཞིང་བརྩོན་འགྲུས་དང་ལྡན་པ༔ རྟག་ཏུ་ཐེག་པ་མཆོག་ལ་རབ་ཏུ་དདཿམི་འགྱུར་སྟོང་པའི་འབྲས་བུ་འདོད་པ་རྣམས༔ མཆོག་ཏུ་གསང་བའི་ཐབས་འདིར་སུ་འཇུག་པ༔ དེས་ནི་མཆོག་དང་ཐུན་མོང་དངོས་གྲུབ་ཐོབཿསྟོང་པ་ཉིད་ལ་དབང་བསྒྱུར་ངེས་པ་ཐོབ༔ སྔགས་དང་ཕྱག་རྒྱ་རྣམས་ནི་མ་བསྒྲུབས་འགྲུབ༔ དེས་ན་འདི་ལ་རྟག་ཏུ་གོམས་པར་བྱ༔ གཅིག་དང་རིམ་གྱིས་འབྲས་བུ་བདེ་འདོད་པ༔ འདི་ལྟར་ལུས་ངག་གཅུན་པ་མཆོག་ཡིན་ནོ༔ སརྦ་པ་པཾ༔ ཀྱེ་མ༔ རིགས་ཀྱི་བུ་དད་པ་མཆོག་དང་ལྡན་པ་རྣམས་རིག་པ་མངོན་སུམ་གྱི་དོན་ལ་འཇུག་པའི་ཕྱིར༔ གསང་སྔགས་ཀྱི་ཐབས་འདི་ལྟ་བུ་ལ་བསླབ་པར་བྱའོ༔ དང་པོ་ཐབས་སྣ་ཚོགས་ཀྱི་བླ་མ་མཉེས་པར་བྱས་ལ་གསང་བའི་མན་ངག་རྣམས་ཚུལ་དང་མཐུན་པར་ཞུས་ཏེ༔ རང་གི་བློ་ལ་ལོངས་པར་བྱས་ལ༔ དེ་ལ་ཡང་ནས་ཡང་དུ་སྒྲོ་འདོགས་བཅད་དེཿདེ་ནས་མཆོད་པ་དང་༔ རང་རྐྱེན་མ་ཡིན་པའི་ཡུལ་རབ་དུ་དབེན་ཞིང་ཉམས་དགའ་བར༔ གྲོགས་ལྟ་སྤྱོད་མཐུན་པ་དང་སྡེབས་ཏེ༔ འབྲས་བུ་འདི་ལྟར་བསྒོམ་པར་བྱའོ༔ གནས་ཁང་ཡིད་དང་མཐུན་པར༔ ལུས་ཀྱི་གནད་སྟན་བདེ་བའི་སྟེང་དུ་རྐང་པ་རྡོ་རྗེ་སྐྱིལ་མོ་ཀྲུང་དུ་བཅའ་བ་དང་༔ ལུས་དྲང་པོར་བསྲང་སྟེ༔ ལག་པ་མཉམ་བཞག་གི་ཕྱག་རྒྱ་བྱ་བ་དང་༔ མཇིང་པ་ཡིད་ཙམ་དགྱེ་བར་བྱ་བ་ནི་ལུས་ཀྱི་འདུག་སྟངས་སོ༔ དེ་ལྟར་ལུས་ལ་རླུང་གི་མན་ངག་བཞི་བསྒོམ་པ་ནི་ཕྱིའི་ཐིག་ལེ་ལ་བསླབ་པར་ཞེས་བྱ་བ་སྟེ༔ རྟག་

ཏུ་རླུང་ལ་གོམས་ཤིང་འདྲིས་པས་ཐ་མལ་རླུང་ལ་དབང་བསྒྱུར་བ་ནི༔ རླུང་ནི་གང་ན་གནས་པ་ནི༔ དེ་དང་དེ་ན་སྣང་བ་སྟེ༔ སྣང་བ་རྣམ་པ་གསུམ་དག་གི༔ རྣལ་འབྱོར་པ་ཡིས་ཡེ་ཤེས་བསྒྲིམས༔ གལ་ཏེ་རླུང་ནི་ཟད་པ་ནི༔ སྣང་བ་ཉིད་ནི་ཟད་པར་གྱུར༔ ཅི་སྟེ་སྣང་བ་མ་ཟད་ན༔ གཟུགས་ཅན་རྣམས་ནི་གྲོལ་མི་སྲིད༔ དེས་ན་རླུང་ལ་གོམས་པ་གཅེས༔ རླུང་ནི་ཟད་ཅིང་སྟོང་པའི་ཐབས༔ ཐབས་འདི་ཉིད་ལ་གོམས་པར་བྱ༔ ཞེས་པས་རླུང་ལོག་ནས་ཡེ་ཤེས་སྐྱེ་བའི་མན་ངག་ནི༔ དེ་ཡང་འདི་ལྟར་ངོས་བཟུང་སྟེ་བསྒོམ་པར་བྱའོ༔ རླུང་གི་དབྱིབས་ལ་བསླབ་པ་དང་༔ ཁ་དོག་ལ་བསླབ་པ་དང་༔ གྲངས་ལ་བསླབ་པ་དང་༔ འགྲོ་འོང་ལ་བསླབ་པ་དང་༔ རླུང་བུམ་པར་གཞུག་པའི་མན་ངག་ལ་བསླབ་པའོཿདབྱིབས་ལ་བསླབ་པ་ནི་ལུས་གོང་ལྟར་བྱས་ལ༔ རང་གི་དཔྲལ་བའི་སྨིན་མའི་མཚམས་སུ༔ རླུང་སེམས་འདྲེས་པའི་ཐིག་ལེ་ཟླུམ་པ་ཤིན་ཏུ་གསལ་བ་ཞིག་ལ་ཤེས་པ་གཏད་དེ༔ མིག་ཀྱང་དེར་གཏད་ལ་བསྒོམ་སྟེ༔ དེ་རླུང་ཕར་ལ་སོང་བའི་ཚེ་ཧྲིལ་ལི་ལི་བར་སྣང་ལ་སོང་བར་བསྒོམ་སྟེ༔ དེའི་ཚེ་ལུས་ཀྱང་ཕར་སོང་བར་བསྒོམ༔ ཤེས་པ་སྟོང་སང་སང་བསྒོམ༔ ཚུར་སྡུད་པའི་ཚེ་ཧྲིལ་ལི་ལི་རང་གི་དཔྲལ་བའི་སྟེང་དུ་གྲང་སིང་སིང་འདུག་པར་བསྒོམ༔ དེའི་ཚེ་རྣལ་འབྱོར་པ་གྲང་བ་ཆེ་ན་དེ་ཚ་སིང་སིང་བསྒོམ༔ ཚད་པའི་རོའི་ཚད་པ་ཆེ་ན་གྲང་བར་བསྒོམ༔ དེ་ལ་གནས་པའི་ཚེ་ན་རང་གི་ལུས་སེམས་བདེ་སང་སང་པ་ལ་སྟོང་པའི་རྒྱས་བཏབ་ཅིང་བསྒོམ་མོཿདེ་ལྟ་བུ་ལ་ཡང་ནས་ཡང་དུ་ཡུན་རིང་པོར་བསྒོམས་པས༔ ཕྱིའི་རྟགས་སུ་ལུས་ཡོད་པ་མི་ཚོར་བ་དང་༔ འབུ་

སྲིན་ལ་སོགས་པའི་སྲོག་ཆགས་མི་འབྱུང་བ་དང་༔ སྣང་བ་གཞན་ལ་ཡིད་མི་འཇུག་པའོ༔ ནང་གི་རྟགས་སུ་དེ་ཉིད་གྲང་བར་བསྒོམས་ན་ལུས་ཀྱི་ཚད་པ་ཞི་ནད་དང་བྲལ་བ་དང་༔ ཚ་བར་བསྒོམས་ན་གྲང་རླུང་དང་ཁྲག་དང་མཁྲིས་པའི་ནད་དང་༔ སྙིང་རླུང་ལ་སོགས་པ་འདོན་ནོ༔ གསང་བའི་རྟགས་ནི་དེ་ཉིད་བརྟན་པའི་ཚད་ཡིན་ཏེ༔ ཐིག་ལེ་ཕར་སོང་བའི་དུས་སུ་ལུས་ཀྱང་བར་སྣང་ལ་ཕར་ཡེར་ཡེར་སོང་བར་མངོན་ཏེ་ལུས་དངོས་སུ་བར་སྣང་ལ་འཕགས་པ་དག་ཀྱང་འོང་ངེས་སོ༔ དེ་གནས་པའི་ཚེ་ཚ་བར་བསྒོམས་ན་ལུས་ཐམས་ཅད་ཚ་མེར་གྱིས་འགྲོ་བ་འོང་སྟེ༔ ལུས་ལ་གོས་མི་དགོས་པ་འོང་ངེས་སོ༔ གྲང་བར་བསྒོམས་ན་ལུས་ཐམས་ཅད་གྲང་སིང་སིང་འོང་སྟེ༔ དངོས་སུ་འདར་ཡེངས་པ་འོང་ངོ་༔ དེའི་ཚེ་རླུང་གར་གཏད་པའི་སར་མི་འཕྲོ་བར་སྡོད་པ་རྣམས་ནི་བརྟན་པའི་ཚད་ཡིན་ནོ༔ ཨྠྀི༔ ༔ རབ་ཏུ་གསང་ངོ༔ ༔ དེ་ལྟ་བུ་ལ་བློ་མ་ཚུད་ན་འདི་ལྟ་བུ་ལ་བསླབ་པར་བྱའོ༔ ཁ་དོག་ལ་བསླབ་པ་ནི༔ རང་གི་ལུས་གོང་ལྟར་བྱས་པའི་མགྲིན་པའམ་ལྟེ་བར༔ རླུང་གི་རྡོ་རྗེ་ཁ་དོག་སྔོན་པོ་ནས་ཙམ་ཞིག་བསྒོམ་སྟེ༔ དེ་ལ་ཤེས་པ་གཏད་ལ་རླུང་ཕར་སོང་བའི་ཚེ་དེ་ཡང་སྔོ་རྒྱང་རྒྱང་རིང་པོར་སོང་བར་བསྒོམ༔ ཚུར་ལུས་ཀྱི་ནང་དུ་ཐིམ་ཐིམ་སོང་བར་བསྒོམ་སྟེཿདེའི་ཤེས་པ་བདེ་ཕྲིལ་ཕྲིལ་བ་ལ་རང་རྟག་ཏུ་བསྒོམ་པའོ༔ རྟགས་གོང་གི་རྟགས་ཀྱི་སྟེང་དུ་བརྟན་པའི་ཚད་འདི་ལྟ་བུ་འབྱུང་ངོ་༔ ཕར་སོང་བའི་ཚེ་ཤེས་པ་ནམ་མཁའ་ལ་བྱ་སྒྲོ་རླུང་གིས་ཁྱེར་བ་ལྟར་ཕྱོ་ཕྱོ་སང་སང་བ་སྙམ་བྱེད་པ་དང་༔ ཚུར་རྔུབ་པའི་ཚེ་བདག་གི་ལྟོའི་ནང་ན་རྡོ་རྗེ་དེ་ཡོད་པ་སྙམ་བྱེད་པའམ་ལྟོ་བ་མི་བདེ་བ་འོང་སྟེ༔ བདག་ཉིད་ཀྱིས་དེའི་ཚེ་ཟས་ཀྱི་

འདུ་ཤེས་ཆོད་ཅིང་ཟས་དང་བྲལ་བ་ཡང་ཞག་དུ་མ་འོང་སྟེ༔ དེ་ལས་ཡུན་རིང་དུ་འགྲོ་བ་འོང་མི་སྲིད་དོ༔ དེ་ལྟར་བྱུང་ཙམ་ན་སྣང་བ་ཐམས་ཅད་སྟོང་པར་བསྒོམ་མོ༔ རྒྱ་རྒྱ་རྒྱ༔ ལས་ཅན་ཅིག་དང་ཕྲད་པར་ཤོགཿཨི་ཏི༔ ཁ་དོག་ལ་བསླབ་པ་ཁ་ཅིག་ནི༔ འདི་ལྟར་བསླབ་པར་བྱ་སྟེ༔ རྩ་ནི་འཁོར་ལོ་དང་པོ་ལ་བརྟེན་པ་དང་༔ གཉིས་པ་དང་༔ གསུམ་པ་དང་༔ བཞི་པ་ལ་བརྟེན་པ་སྟེ༔ རྩའི་ནང་ན་རང་གཞན་གྱི་ཡི་གེ་གནས་ཏེཿདེ་དག་ནི་ཁ་དོག་ལ་བསླབ་པ་དང་༔ དེ་ཡང་ཨཱ་ལི་ཀཱ་ལིའི་ཚོགས་ཀྱི་ཁ་དོག་རྩ་དང་མཐུན་པ་ལ་ཤེས་པ་གཏད་དེ་བསྒོམ་པ་དང་༔ ཀཱ་ལི་ལ་བསླབ་པ་དང༔ ཨཱ་ལི་ཀཱ་ལིའི་ཡན་ལག་རྣམས་ལ་དམིགས་པ་གཏད་དེ་བསྒོམ་པའོ༔ དེ་དག་གི་ཡི་གེ་དང་ཁ་དོག་ནི་རྩ་གནས་རིན་པོ་ཆེའི་འཁོར་ལོར་ཤེས་པར་བྱའོ༔ ཡི་གེ་དེ་དག་ཀྱང་ཕར་འགྲོ་ཚུར་འོང་ལ་བསླབ་པ་དང་ཿམི་འགུལ་བ་ལ་ཤེས་པ་གཏད་པ་གཉིས་ཀྱིས་དེའི་མན་ངག་གོ༔ ཨི་ཏི༔ ༔ རླུང་གི་གྲངས་ལ་བསླབ་པ་ནི༔ སྐྱེས་བུ་ན་ཚོད་དར་ལ་བབ་པ་ཞིག་ལ༔ ལུས་ལ་ནད་མེད་པ་ལུས་ངག་སོས་དལ་བ༔ རྒས་པ་རྣམས་ནི་སོས་དལ༔ གཞོན་པ་རྣམས་རླུང་མྱུར་སྟེ་གྲངས་མང་དུ་རྒྱུ༔ དེའི་ཚད་ནི་རྒན་གཞོན་བར་དར་ལ་བབ་པ་ཞིག་ལཿཉིན་ཞག་གཅིག་ལ་རླུང་ཉི་ཁྲི་དང་དྲུག་བརྒྱ་རྒྱུ་སྟེ༔ དེ་ཉིད་ཀྱི་གྲངས་ལ་རྣལ་འབྱོར་པ་རྣམས་ཀྱིས་བསླབ་པར་བྱ་སྟེ༔ དེ་ཉིད་བསྒོམ་པའི་ཚེ་ལུས་གནད་གོང་ལྟར་བཅོས་པའི་སྟེང་དུ༔ མཇིང་པ་ཕྱིར་མི་དགྱེ་བར་བྱ་སྟེ༔ མིག་བར་སྣང་ལ་ཧར་པོར་གཏད༔ ཁ་ཡིད་ཙམ་གདངས་ཏེ༔ ཡིད་གཞན་དུ་མ་འགྱུར་བར་བྱ་སྟེ༔

རྣལ་འབྱོར་པས་ཕྲེང་བ་ལྟ་བུ་ལ་ཕར་སོང་ཕྲེང་བ་གཅིག་བཞག༔ ཚུར་ལོག་གཅིག་བཞག་པས་ཉིན་ཞག་རླུང་གིས་གྲངས་བཟུང་སྟེ༔ ཤེས་པ་དེ་ག་ལ་གཏད་པས༔ རྣམ་རྟོག་གཞན་དུ་མི་འཕྲོ་བའི་ཏིང་ངེ་འཛིན་སྐྱེ་སྟེ༔ དེ་ལ་ཡུན་རིང་དུ་བསྒོམས་པས་རླུང་རྒྱུ་བའི་གྲངས་ཇེ་ཉུང་ཇེ་ཉུང་འགྲོ་སྟེ༔ དེ་ནས་ཉིན་ཞག་གཅིག་ལ་ཁྲི་ཚོ་གཅིག་ལས་གཞན་རྒྱུ་བའི་འགྲོ་འོང་ཆད་པའི་ཚེ་ལུས་ཀྱང་ཤིན་ཏུ་ཡང་བ་ཞིག་འོང་སྟེ༔ དེའི་དུས་སུ་ཕར་སོང་བ་ལ་ཡང་རིང་བར་གཏད༔ ཚུར་རྔུབ་པ་ཡང་རང་གི་ལྟོ་བ་མེར་མེར་གཏད་པས༔ ཉིན་མཚན་གང་རུང་རེ་ལ་རླུང་གི་རྒྱུ་བ་ཕྱེད་དང་བཅུ་གཉིས་བཅུ་གཉིས་ཆད་དོ༔ དེ་ལྟར་ཡང་ནས་ཡང་དུ་བསྒོམས་པས༔ ཐ་མ་རླུང་གི་འགྲོ་འོང་ཆད་ནས་ཤེས་པ་གར་གཏད་སར་གཏོད་པ་ནི་རླུང་ལ་འབྱོངས་པའི་ཚད་ཡིན་ཏེ༔ ལས་ཀྱི་རླུང་ཟད་པས་ན་རྣམ་ཤེས་རྟོག་པ་ཟད༔ དེ་ལྟར་རྣམ་རྟོག་ཟད་པས་སྣང་བ་ཟད་པ་སྟེ༔ སྣང་བ་ཟད་པས་རྣམ་པར་རྟོག་པའི་ཡུལ་ཟད་པས་ན་རྣམ་པར་མི་རྟོག་པའི་ཡེ་ཤེས་འབའ་ཞིག་ལ་གནས་པའོ༔ དེའི་ཕྱིར་ན་སྣང་བ་ཟད་པ་དང་སངས་རྒྱ་བ་དུས་མཉམ་པའོ༔ ཞེས་བསྟན་པའོ༔ དེའི་དུས་ན་རྣལ་འབྱོར་པ་དེ་ཡང་ཆུ་ལ་བྱིང་བ་འོང་མི་སྲིད་དོཿསྐབས་སུ་བར་སྣང་ལ་འགྲོ་བ་དག་ཀྱང་འབྱུང་ངོ་༔ དེའི་ཚེ་གལ་ཏེ་རླུང་འབྱོངས་ནས་ཤེས་པ་ཡེངས་ཡེངས་སུ་སོང་ན༔ སྐབས་སུ་རྩ་གཉིད་ལོག་ལྟེམས་པ་གསལ་ལ་མི་འཕྲོ་བར་འགྲོ་སྟེཿདེ་ལ་བློ་བཞག་ཅིང་བསྒོམས་པས་གྲོལ་བ་ཡིན་ནོ༔ ཨི་ཏི༔ རྒྱ་རྒྱ་རྒྱ༔ ༔ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ གདམས་པ་འདིའི་སྔོན་འགྲོ་ལ༔ རྡོ་རྗེ་སྐྱིལ་ཀྲུང་རྫོགས་སངས་རྒྱས༔ ཞེས་པས་ལུས་སྐྱིལ་ཀྲུང་༔ ངག་གི་ཡི་གེ་

དྲུག་ལ་སྦྱང་པར་བྱ༔ ཡིད་ཤེས་བྱ་གཞི་མེད་དུ་ངོ་སྤྲོད༔ ངོ་བོ་རྟེན་མེད་དུ་ངོ་སྤྲོད༔ རང་བཞིན་འགྱུར་མེད་དུ་ངོ་སྤྲོད༔ ལུས་ལྷུག་པ༔ ངག་ལྷུག༔ ཡིད་ལྷུག༔ དུས་གསུམ་དུ་ཡི་གེ་ཨའི་དོན་དྲན་པར་བྱས་ལ་རང་ལུགས་སུ་བཞག་གོ༔ སྤྱི་བོ༔ མགྲིན་པ༔ སྙིང་གར་བཅང་༔ རིགས་ཀྱི་བུ་དེ་གལ་ཏེ་དེ་ལ་ཤེས་པ་མ་ཚུད་ན་འདི་ལྟ་བུ་ལ་ཡང་བསླབ་པར་བྱའོ༔ རླུང་གི་འགྲོ་འོང་ལ་བསླབ་པ་ནི༔ རང་གི་སྙིང་གི་དཀྱིལ་ན་ཡི་གེ་ཨ་དམར་པོ་མེའི་རང་བཞིན་ཅན་ཅིག་ཡོད་དེ༔ དེ་ལ་ཤེས་པ་གཏད་ལ་བསྒོམ་སྟེ༔ རླུང་ཕར་འགྲོ་ཚུར་འོང་བྱེད་པའི་ཚེ་ངག་ཏུ༔ ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ་ཨཱ་ཨ༔ ཞེས་ཡིད་ཀྱི་བརྗོད་དེ༔ ཤེས་པ་ཨ་ལ་གཏད་པས༔ རང་གི་སྙིང་ནང་ན་རང་བཞིན་གྱི་རྩ་བའི་ཡིག་གེ་ཨ་གནས་པ་དེ་ལས་ཆུ་ལས་ཆུ་བུར་རྡོལ་བའི་ཚུལ་དུ་ཨ་རེ་བརྗོད་པསཿཨ་རེ་ཐོལ་ཐོལ་བྱུང་སྟེ༔ རླུང་ཕར་སོང་བའི་ཚེ་བར་སྣང་ལ་ཕར་གཅིག་སོང་གཉིས་སོང་ལ༔ ཉི་ཤུ་རྩ་གཅིག་རྫོགས་པ་དང་རླུང་དར་གཅིག་བཟུང་ལ་ཨ་དེ་རྣམས་ལ་ཤེས་པ་གཏད་ལ་བསྒོམ༔ དེ་ཡང་ཚུར་ལ་གཅིག་བྱུང་གཉིས་བྱུང་བ་ལ་ཤེས་པ་གཏད་ཅིང་བསྒོམས་པས་ལུས་བདེ་ཕྲིལ་ཕྲིལ་བ་ལ་ཤེས་པ་ཡང་ནས་ཡང་དུ་བསྒོམ་མོ༔ དེ་ནས་སྙིང་ནང་དུ་ཐིམ་པའི་དུས་ན་ཡང་ཨ་མང་པོ་རོང་ངེ་བ་ལ་ཤེས་པ་གཏད་དེ་དར་གཅིག་བསྒོམ༔ དེ་ལྟར་ཁམས་ཀྱིས་ཐུབ་ཚད་དུ་ཉིན་མཚན་དུ་བསྒོམས་པས༔ ལུས་མི་སྐྱེ་བའི་བརྡར་ནམ་མཁའ་ལ་འགྲོ་བ་སྙམ་བྱེད་པ་དང་༔ ངག་མི་སྐྱེ་བའི་བརྡར་གཏམ་ཐམས་ཅད་ཅོལ་ཐུས་སུ་འོང་བ་དང་༔ སེམས་མི་སྐྱེ་བའི་བརྡར་བསམ་པའི་རྒྱུན་འགག་པ་

འོང་སྟེ༔ ཤེས་པ་སྣ་ཚོགས་ཐམས་ཅད་ནི་ཡང་ཞིང་སྲབ་པའོ༔ རྟགས་གཞན་མ་ནི་གོང་དང་མཐུན་ནོ༔ ཨི་ཏི༔ རྒྱ་རྒྱ་རྒྱ༔ ༔ ཡང་རིག་ཀྱི་བུ་དེ་གལ་ཏེ་ཤེས་པ་དེ་ལ་མ་ཚུད་ན༔ འདི་ལྟ་བུ་ལ་ཡང་བསླབ་པར་བྱའོ༔ རླུང་བུམ་པར་གཞུག་པའི་མན་ངག་ནི༔ གཉིད་ཀྱི་དུས་སུ་སྦྱར་བ་དང༔ རྣལ་འབྱོར་པས་ཉིན་མཚན་དུ་བསྒོམ་པའོ༔ གཉིད་ནི་དུས་བཞི་མཉམ་པར་སྦྱོར་བ་བསམ་གཏན་ཉལ་བའི་འཁོར་ལོར་བལྟའོ༔ ཉིན་མཚན་དུ་བསྒོམ་པ་ནི་ལུས་གོང་ལྟར་བཅོས་ལ༔ རླུང་ནང་དུ་བསྟིམས་ལ་ལྟོ་བ་མེར་གྱིས་གཏང་ཞིང་ཤེས་པར་རང་གི་ལྟེ་བ་ན་རྩ་གནས་ཀྱི་ཡི་གེ་ཧ་གནས་ཏེཿདེ་ལ་ཤེས་པ་གཏད་ཅིང་བསྒོམ་མོ༔ རང་གི་ལྟོ་བ་རླུང་གིས་སྔོ་མེར་མེར་སོང་ཙམ་ན་ཡང་ཕར་ཁད་ཀྱིས་སོང་བར་བསྒོམ་ཏེ་བར་སྣང་ལ་ན་བུན་ཡལ་བ་ལྟར་བུན་བུན་སོང་བར་བསྒོམས་པས་ཤེས་པ་ཡང་ཡལ་ཡལ་བུན་བུན་སོང་བར་བསྒོམ་མོ༔ དེ་ལ་ཡུན་ཅི་རིང་དུ་བསྒོམས་ན་ཤེས་པ་བདེ་སྟོང་དུ་གྲོལ་བ་དང་༔ ལུས་དུ༔ ཁ་ལས་གྲོལ་བ་དང་༔ རིག་པ་རྣམ་པར་རྟོག་པ་ལས་གྲོལ་བ་གསུམ་དུས་མཉམ་དུ་འབྱུང་ངོ་༔ རླུང་གི་ཐིག་ལེ་བསྒོམ་པ་ནི་ཟངས་ཡིག་ཅན་གྱི་རྩ་བ་ན་གསལ་ལོ༔ ཨི་ཏི༔ གལ་ཏེ་རླུང་བསྒོམས་པའི་གང་ཟག་དེ༔ བྱིང་རྒོད་དམ་སྒོམ་པའི་སེལ་དུ་གྱུར་པ་ན་བཅོས་ཤིང་བརྟན་པར་བྱ་བའི་ཐབས་ནི༔ གལ་ཏེ་བྱིང་ན་ཧ་ཧ་འམ་ཕཊ་ཕཊ་ཅེས་དྲག་པོའི་སྤྱོད་པ་རྣམས་སོ༔ གལ་ཏེ་རྒོད་ན་རླུང་ཅི་ནས་ཀྱང་ནང་དུ་བསྟིམ་མོ༔ བྱིང་ན་ལུས་ཀྱི་གནད་དུ་བཅོས་པ་དང༔ ཡན་ལག་བསྐྱོད་པའོ༔ རྒོད་ན་ལུས་གནད་ནི་མགོ་ཕུར་བ་དང་༔ ཁྱིམ་མུན་ནང་དུ་འདུག་པའོ༔ གལ་ཏེ་སྤྱི་བོར་སོང་ན་རྣལ་འབྱོར་པ་ཤེས་པ་འགྱུར་བ་དང་སྨྱོ་བ་ལྟ་བུ་འབྱུང་

སྟེ༔ དེའི་ཚེ་ལུས་ལ་ཡང་ཐོར་པ་དང་༔ ཤ་ལ་ཐིག་ལེ་དང་༔ སྐབས་སུ་སེམས་འཐོམས་པ་དང་༔ མཚོགས་མ་བུ་ཆུང་གི་མཚོགས་མ་ལྟར་སློབ་པ་དག་འབྱུང་ངོ་༔ དེ་ལ་ནི་ཁ་ཟས་བུ་རམ་དང་འོ་མ་དང་མི་ཞུན་དུམ་རེ་བསྲེས་ལ་བཀོལ་ལ་བཏུང་༔ སེམས་བར་སྣང་དུ་མདའ་གང་དུ་གཟུང་ལ་མཇིང་པ་ཐུར་ལ་དཀུག་རླུང་ཡར་ལ་བརྡར་ཏེ་ཕག་པའི་སྐད་ལྟ་བུར་ནུས་ཚད་དུ་བཤོར་དྲག་པར་བྱའོ༔ དེ་ནས་ཡང་གོང་ལྟར་བསྒོམ་མོཿདེ་ལྟར་བྱུང་རེ་ཚེ་དེ་བཞིན་དུ་བྱའོ༔ གལ་ཏེ་རླུང་ཤ་མཐོང་བར་དུ་ཤོར་སྲིད་ན་ལུས་སྐྱ་སྦོབས་སམ་ནག་སྦོབས་སམ་དམར་སྦོབས་སུ་སོང་སྟེ༔ ལུས་ལ་སེམས་ཅན་འགུལ་བ་སྙམ་པའམ༔ ཐོར་ཆུང་མང་པོ་ཙེམ་ཙེམ་པ་བྱུང་ན༔ ཁ་ཟས་ནི་མུ་ཟི་དུལ་མ་དང་སྦྲང་རྩི་དུམ་རེ་བསྲེས་ལ་བཟའ༔ ལུས་གན་རྐྱལ་དུ་ཉལ་ཏེ་རླུང་འགྲམ་པ་ལ་བརྡར་ཏེ༔ ཕུ་ཕུ་ཞེས་ནུས་ཚད་དུ་བྱས་པས་དེ་ཉིད་ལས་གྲོལ་ཏེ༔ དེ་ནས་ཡང་གོང་ལྟར་བསྒོམ་མོ༔ གལ་ཏེ་རླུང་དེ་དོན་སྙིང་ལ་ཞུགས་ན་ནི༔ ལུས་འདར་སྐབས་སུ་འབོག་ཅིང་བརྒྱལ་བར་བྱེད་ཡང་ན་ལུས་རེངས་ཤིང་ཡན་ལག་ཏུ་མཉེ་སྐོལ་དུ་མི་རུང་མགོ་འདར་མིག་དཀར་ཁྲུལ་ཁྲུལ་བར་འགྲོ་ལག་པའི་བྱ་བྱེད་མང་ཁ་སྐོམ་སྨིན་མའི་ཚགས་འཁྲུལ༔ རྩ་རྣམས་ཕྱི་ནང་མེད་པར་བཀྲ་ལམ་གྱིིས་འོང་སྟེ༔ དེ་ལ་ཁ་ཟས་བུ་རམ་དང་སྦྲང་རྩི་དང་རུས་པ་བརྡུངས་བའི་ཁུ་བ་རྣམས་རྟག་ཏུ་བརྟེན་པ་དང་༔ ཤ་ཡིབ་མའི་ཁུ་བ་དང་༔ ལོ་མར་གྱི་ཁུ་བ་ཡང་དུམ་རེ་བཏང་༔ ཆང་སྦང་༔ དེའི་ཚེ་རྣལ་འབྱོར་པ༔ ལས་སུ་རུང་༔ གྲེ་བ་ལ་བརྡར་ཏེ་ཁ་ནས་དྲངས་ཏེ་ཨིག་ཨིག་ཅེས་ནུས་ཚད་བགྲངས་པས་གྲོལ་ལོ༔ ཕྱིས་གཏན་འོང་མི་སྲིད་དོ༔ དེ་དག་བསྒོམ་པའི་དུས་སུ་ཤེས་པ་མྱོས་ཤིང་གཉིད་དུ་སོང་ན་ལུས་ཀྱི་

གནད་གཅེར་བུར་བྱས་ལ་ལངས་ལ་ཡན་ལག་བགྲད་དེ་ཁ་དང་མིག་གདངས་ཏེ་བསྒོམ་མོ༔ དེ་དག་ནི་གལ་ཏེ་རླུང་མ་ཆུན་པ་རྣམས་ཀྱི་གདམས་པའོ༔ ཨི་ཏི༔ དེའི་ཚེ་རྣལ་འབྱོར་པ་དེ་ལ་ལུས་གནད་དང་གདོན་གྱིས་འབྱུང་བ་དཀྲུགས་ནས༔ ཚེའི་འདུ་བྱེད་གྱུར་ནས་བར་དོ་འབྱུང་ངམ་མི་འབྱུང༔ རླུང་གིས་དང་༔ ཕྱི་རོལ་གྱི་ལུས་བརྟག་པ་ནི༔ དེའི་ཚེ་རླུང་རབ་ཏུ་རྒོད་ཅིང་འཕྲོ་ན་ཡིན༔ རླུང་འགྱུ་བ་སྐྱེན་ན་ཡིན༔ རླུང་དེ་སྐབས་སུ་དལ་ཞིང་སྐབས་སུ་མྱུར་བར་བརྩེག་མར་འགྱུ་ན་ལུས་ལ་འབྱུང་བའི་ནད་དམ་གདོན་ཞུགས་པས༔ དེའི་ཚེ་ལུས་ཀྱི་གནད་རྣམས་སུ་རླུང་གི་མདངས་ཡལ་ལམ་མ་ཡལ་བརྟག་པ་ནི༔ སྔ་དྲོ་ཉི་མ་རྩེ་ཤར་ལ་ཁ་ཤར་ཕྱོགས་སུ་བལྟས་ལ༔ རང་ངམ་གཞན་ལ་རྟོགས་ཀྱང་རུང་འདི་ལྟར་བརྟག་གོ༔ ཡང་དེའི་ཚེ་དབུགས་ཡང་ཡང་རྣམ་པར་རྒོད་ན༔ ཟླ་བ་དྲུག་ན་འགུམ་པར་འགྱུར་རོ༔ དེའི་རྟགས་སུ་ལུས་གྱི་འགྲམ་པའི་ཚིགས་རྣམས་ཡོན་པོར་འོང་ཿསྣའི་རྩེ་མོ་ལ་རླུང་གི་མདངས་མེད་ན་དེའི་རྟགས་སུ་སྣ་སྔོན་པས་ཡོ་བར་འོང་སྟེཿདེ་ནི་ཞག་བདུན་ན་འགུམ་པ་ལ་ཐེ་ཚོམ་མེད་དོ༔ མིག་ལ་གསལ་བྱེད་རླུང་གི་མདངས་ཡལ་བའི་རྟགས་སུ་མཆི་མ་མི་ཐུབ་པ་སྟེཿདེ་ནི་ཞག་ལྔ་ན་འགུམ་པའོ༔ འགྲམ་པ་གཡས་ནས་ལས་རླུང་མགོན་པོའི་རྒྱུ་བྱེད་ཆད་པ་ནི་འགྲམ་པའི་ཤ་རྣམས་ཤོང་གི་འགྲོ་སྟེ༔ དེ་ནི་ཞག་གཅིག་ལས་མི་འཚོའོ༔ རྣ་བའི་དྲག་པོ་རླུང་གི་སྒྲ་ཡལ་བ་ནི་རྣ་བ་ལེབ་ལེབ་པོར་འགྲོ་སྟེ༔ དེ་ནི་རླུང་སུམ་སྟོང་རྒྱུ་བའི་བར་ལས་མི་ཐུབ་བོ༔ ལྕེ་ལ་དྲན་བྱེད་ཀྱི་རླུང་ཆད་པ་ནི་ལྕེ་ལ་ཐིག་ལེ་ནག་པོ་སྔོན་མེད་པ་འོང་སྟེ༔ དེ་ནི་ཞག་གཅིག་ན་ངེས་པར་འགུམ་མོ༔ རྔུབ་པའི་རླུང་ནི་སྟོབས་ཆད་པའི་རྟགས་ནི་སོ་འཐམས་པ་སྟེ༔ དེ་ནི་

ཞག་དྲུག་ན་འགུམ་མོ༔ མི་རྟོག་པའི་རླུང་རྒྱུད་ལ་ཞི་བའི་རྟགས་ནི་རྩེ་ཆུང་གི་ཕྱི་རོལ་གྱི་རྩ་ཉིད་མི་འགྱུར་ཏེ༔ དེ་ནི་ཟླ་བ་ཕྱེད་ན་འགུམ་མོ༔ ཞི་གནས་ཀྱི་རླུང་བག་ལ་ཞ་བའི་རྟགས་ནི་བྲང་གི་ལྷེན་སྣ་ཞོམ་གྱིས་འགྲོ་བ་སྟེ༔ དེ་ནི་ཞག་བཅུ་དྲུག་ལས་མི་འཚོའོ༔ འབྱུང་བའི་གྲོང་ཁྱེར་རྒྱུན་ཆད་པའི་རྟགས་སུ་སེན་མོའི་བཀྲག་ཤོར་ཏེ༔ དེ་ནི་ཉི་མ་དྲུག་ནའོ༔ དེ་ལྟར་འཆི་བའི་རྟགས་བཅུ་དྲུག་པོ་ཕྱི་རྟགས་ཏེ་གཞན་གྱི་ལུས་ལ་བརྟག་གོ༔ དེ་དག་ལ་བསླུ་བའི་ཐབས་བཅུ་སྟོན་ཏེ༔ གལ་ཏེ་རང་ངམ་གཞན་བསྲུངས་ཀྱང་དབུགས་རྒོད་པ་ལ་ནི༔ འགྲམ་པའི་སྟེང་དུ་ཨ་དཀར་པོ་བསྒོམ་ཞིང་རླུང་སེམས་དེ་ལ་གཏད་དོ༔ བསྲུངས་པའི་རྟགས་འགྲམ་པ་ཡོ་བ་བསྲངས་སོ༔ སྣའི་རྟགས་བྱུང་པ་ལ་སྣའི་རྩེ་ལ་ཧཱུྃ་དཀར་པོ་བསྒོམ་སྟེ་རླུང་སེམས་དེར་གཏད་པས་བཟློག་གོ༔ རྟགས་དེ་དག་མངོན་པར་བཟློག་པའི་ཐབས་ནི་ཐམས་ཅད་ལའོ༔ མིག་གི་རྟགས་བྱུང་བ་ལ་ནི་མིག་གི་སྟེང་དུ་ཧ་དཀར་པོ་བསྒོམས་པའོ༔ འགྲམ་པའི་རྟགས་ལ་ནི་ཨས་བྱའོ༔ རྣ་བའི་རྟགས་ལ་ཕཊ་ཀྱིས་བྱའོ༔ ལྕེའི་རྟགས་ལ་ནི་ཨཱ་ལིའི་ཚོགས་ཀྱིས་བྱའོ༔ སོའི་རྟགས་འདི་ཀཱ་ལིའི་ཚོགས་ཀྱིས་བྱའོ༔ རྩའི་རྟགས་ལ་ནི་ཧྲཱིཿས་བྱའོ༔ བྲང་གི་རྟགས་ལ་ནི་ཨཱོཾ་གྱིས་བྱའོ༔ སེན་མོའི་རྟགས་ལ་ནི་ཀ་ཀཱ་ཀི་ཀཱི་ལ་སོགས་པས་བྱའོ༔ དེ་དག་གི་དུས་སུ་ངག་ཏུ་ཡང་ཡི་གེ་དེ་དག་བཟླས་སོ༔ བཟླས་པའི་གྲངས་ནི་ཉི་ཤུ་རྩ་གཅིག༔ ཤེས་པ་དེ་རླུང་སེམས་ཀྱི་ཐིག་ལེ་ལ་གཏད་དོ༔ སྒོམ་པ་ནི་རླུང་དང་བསྲེས་ལ་བསྒོམ་མོ༔ ཡི་གེ་དང་རླུང་བསྲེས་

པའི་མན་ངག་གལ་ཆེའོཿཨི་ཏི༔ འདི་ནི་རླུང་གི་མན་ངག་མཆོག་ཏུ་གྱུར་པའི་མན་ངག་རབ་ཏུ་ཟབ་པའོ༔ འདི་ལ་རྟག་ཏུ་གོམས་པ་ནི༔ མཆོག་དང་ཐུན་མོང་དངོས་གྲུབ་ཐོབ༔ འབྲས་བུ་སྟོང་པ་ཉིད་ཀྱང་ཐོབ༔ རླུང་གི་པྲ་ཁྲིད་ཅེས་བྱ་བ་ཐིག་ལེ་ཕྱི་མར་བསླབ་པ་ཆགས་བྲལ་གྱི་འབྲས་བུའོ༔ ཨི་ཏི༔ ༔ ལས་ཅན་ཅིག་དང་འཕྲད་པར་ཤོག༔ ཅེས་གཏེར་ནས་གཏེར་དུ་བཙས་པའོ༔ རྫོགས་སོ༔ ༔

གསང་བ་ཡི་གེ་མ་རུའི་ཡང་ཏིག

གསང་བ་ཡི་གེ་མ་རུའི་ཡང་ཏིག་བཞུགས་སོ༔ ༼ཕྲ་ཡིག་༽ ཡང་གབ་སྦས་དུམ་ཟེར།

རྒྱ་གར་སྐད་དུ༔ ས་བྷ་ཀ་ལ་ས་མ་ཡྻཾ་སྱ་ཏུ་ས་མེ་ལཾ་ལཾ་ཏི་ཀ་ནཱ་མ༔ བོད་སྐད་དུ༔ ཉམས་ལེན་བསྡུས་པའི་སྣ་ཁྲིད༔ ཡང་གསང་སྦས་པའི་ཏི་ཀ༔ གསང་བ་ཡི་གེ་དམར་རུའི་ཡང་ཏིག༔ བཅོམ་ལྡན་འདས་གབ་པ་ཐམས་ཅད་མངོན་དུ་འབྱིན་ལ་ཕྱག་འཚལ་ལོ༔ བརྒྱུད་པའི་རྩ་བ་ཤེས་རབ་ཀུན་གྱི་དངོས༔ རྣམ་རྟོག་བཅིངས་པའི་དྲི་མ་འཇོམས་མཛད་རྗེ༔ སངས་རྒྱས་ཀུན་གྱི་དགོངས་པའི་རྒྱུད་འཆང་བ༔ རིམ་བརྒྱུད་དམ་པ་སངས་རྒྱས་རྣམས་ལས་ཀྱང་༔ རྩ་བའི་བླ་མ་ངེས་དོན་སྐལ་བཟང་པ༔ དམ་པ་དྲི་མེད་ཡེ་ཤེས་མདོ་སོགས་ལ༔ བདག་གིས་ལུས་སོགས་རབ་ཏུ་ཤུགས་ཕྱུང་ནས༔ སྦྱང་དཀའ་འཁོར་བའི་བག་ཆགས་སྦྱང་བའི་ཕྱིར༔ ལུསངག་ཡིད་ཀྱིས་རབ་ཏུ་གུས་བྱས་ལ༔ ངེསདོན་བླ་མ་བརྒྱུད་པ་རྣམས་ལ་ཡང༔ བདག་གི་སྤྱི་བོས་རབ་ཏུ་བཏུད་ནས་ནི༔ གསང་བའི་ཡང་བསྡུས་དེས་པའི་ཚད་དབབ་ཕྱིར༔ བཀའ་བརྒྱུད་དག་པའི་མན་ངག་གལ་ཆེན་ལ༔ དད་པས་འཇུག་པའི་སྐལ་ལྡན་ངེས་ལུང་ཅན༔ འཇུག་སྒོ་གསལ་ཞིང་རིག་པའི་ཚད་འཛིན་པའི༔ ལུང་དང་ལྡན་པའི་སྐྱེས་བུ་དེ་ཀུན་གྱི༔ བློ་ཡི་ཐེ་ཚོམ་རབ་ཏུ་བསལ་བའི་ཕྱིར༔ ངེས་པའི་སྙིང་པོ་གནད་ཀྱི་མན་ངག་རྣམས༔ མུན་པའི་ནང་དུ་སྒྲོན་མེ་སྣང་བ་ལྟར༔ བདག་གིས་འདི་ཉིད་དུ་ནི་གསལ་བར་འབྲི༔ སྣོད་མཆོག་ལྡན་པའི་སྐལ་ལྡན་སེམས་ཀྱི་བུ༔ དད་པ་ཡངས་ཤིང་སྙིང་སྟོབས་བརྩོན་འགྲུས་ཅན༔ ཤེས་རབ་ལྡན་ཞིང་འཕགས་པའི་ནོར་གྱིས་ཕྱུག༔ བླ་མ་མཆོད་ཅིང་འཇིག་རྟེན་ཆགས་པ་ཆུངཿ འདི་ནི་སྐལ་ལྡན་སྙིང་

གི་བུ་ཡིན་པས༔ འདི་ལྟར་འབྱུང་བའི་གང་ཟག་གཅིག་དང་གཉིས༔ གསུམ་ལས་མང་ན་མཁའ་འགྲོའི་ཆད་པ་འབྱུང་༔ དེ་ཡི་ཕྱིར་ན་གསང་བའི་མན་ངག་འདི༔ རྣལ་འབྱོར་ལྡན་པས་སེམས་ལ་གནས་པར་བྱ༔ འཇིག་རྟེན་བསྐལ་པ་འཇིག་པའི་དུས་བྱུང་ཡང་༔ སྙིང་པོ་བྱང་ཆུབ་བར་དུ་ཁར་མི་དབྱུང་༔ རང་གི་སེམས་ལ་གནས་པའི་རྒྱས་བཏབ་ལ༔ འདི་ཉིད་བབ་ཅོལ་གང་དགར་བརྗོད་པ་མེད༔ འདི་ལྟར་བརྣགས་པའི་སེམས་ལ་འབུར་བ་ཡིས༔ ནམ་ཞིག་སྐལ་ལྡན་སེམས་ཀྱི་བུ་དང་འཕྲད༔ དེ་ལ་འདི་བྱིན་སྙིང་ལ་རྒྱས་ཐོབ་ཅིག༔ འདི་འདྲའི་གདམས་པ་བླ་མའི་ཁོངགི་སྙིང་༔ བདག་གིས་བསྟན་པ་རིག་པའི་གནད་དུ་ཡང་༔ ཉམས་སུ་ལེན་པ་རྣམས་ཀྱིས་བཅུད་འདི་བཀོད༔ དེ་ཡི་ཕྱིར་ན་ཉམས་སུ་ལེན་པ་རྣམས༔ ཡི་གེ་འདི་ལ་རྟག་ཏུ་འདྲིས་པར་གྱིས༔ འདི་ལ་འདྲིས་ནས་རིན་ཆེན་གཏེར་དུ་སྦོས༔ རིགས་མིན་འཆོལ་བའི་གང་ཟག་སྣོད་མིན་ལ༔ འདི་ཉིད་སུས་བསྟན་དམྱལ་ཁམས་མེ་ཡིས་ཚིག༔ གདོད་ནས་མ་ཐོབ་ཉེས་མེད་མཆོག་ཏུ་དགེ༔ དེས་ན་རང་གི་རང་ལ་རྒྱས་བཏབ་ལ༔ རང་གི་སྙིང་དང་ཕུང་པོ་འབྲལ་མེད་བཞིནཿའབྲལ་བའི་སྐབས་བཟོད་མེད་སེམས་ཀྱིས་ནི༔ གསང་བ་མཆོག་གི་ཡི་གེ་འདི་ཆོངས་ཤིག༔ བརྡ་ཡིག་ཡོད༔ འདིར་གསང་བའི་ཡིག་གེ་དམར་རུའི་དོན་ཉམས་སུ་ལེན་པར་འདོད་པའི་སྐལ་ལྡན་གཉིས་ནས་གསུམ་གྱིས་འདི་ལྟར་བསླབ་པར་བྱའོ༔ སྐལ་པ་དང་ལྡན་པའི་རིགས་ཀྱི་བུས༔ བླ་མ་ལ་འཇིག་རྟེན་གྱི་བདོག་པ་དང་རང་གི་ལུས་ཀྱིས་མཉེས་པར་བྱས་ལ༔ གདམས་

པ་འདི་ཞུ་བའི་ཚེ་གསེར་གྱི་མཎྜལ་བླ་མ་ལ་དབུལ་བར་བྱ་སྟེ༔ མཁའ་འགྲོ་རྣམས་ཀྱང་ཚོགས་དང་གཏོར་མས་མཉེས་པར་བྱས་ལ་གདམས་པ་འདི་ཞུ་བར་བྱའོ༔ བླ་མས་གདམས་པ་འདི་ཀུན་བུར་བསྟན་ཏེ་དཔོན་སློབ་རྣམས་དུས་གཅིག་ལ་སངས་རྒྱ་བར་བྱེད་པའོ༔ དང་པོ་ཉམས་སུ་ལེན་པའི་སྐལ་ལྡན་དཔོན་སློབ་གསུམ་ནས་བཞི་པོ་དེས་ལུས་ངག་གི་བྱ་བ་གཏང་བ་ནི་རབ་ཏུ་གཅེས་སོཿདེ་ནས་དུར་ཁྲོད་དུ་སློབ་མ་དེ་རྣམས་ཁྲིད་ལ༔ ཞག་གསུམ་བཞི་ནས་བཅུ་ཚུན་ཆད་དུ་ལུས་ངག་གི་བྱ་བ་ཅི་ཡང་མི་བྱེད་པར་རབ་ཏུ་དལ་བར་གནས་པ་གལ་ཆེཿདེ་ནས་བླ་མས་སློབ་མ་ལཿསྔོན་དུ་ལུས་ངག་གི་ཞེན་པ་རྣམས་བཟློག་པར་བྱ་བའི་ཕྱིརཿསྔོན་དུ་འགྲོ་བའི་ལམ་རྣམས་བསླབ་པར་བྱའོ༔ དེ་ཡང་དེ་སྤྲོས་པ་ལ་དགའ་ན་འབྱུང་བ་བཞིའི་སྒྲ་ལ་སློབ་ཏུ་གཞུགཿསྤྲོས་པ་ལ་མི་དགའ་ན་འཁོར་འདས་རུ་ཤན་འབྱེད་པའི་མན་ངག་ལ་བསླབ་པར་བྱ་སྟེ༔ དེ་ཡང་ལུས་ཀྱི་སྤྱོད་པའི་མན་ངག་བསྟན་པ༔ དཔོན་སློབ་དེ་ཀུན་དུར་ཁྲོད་རེ་རེར་ཉམས་སུ་ལེན་པར་བྱ་སྟེ༔ དྲོས་སྐད་རེ་རེ་ཙམ་མམ་ཉི་མ་ཕྱེད་སྐད་པའི་དུར་ཁྲོད་རེ་རེར་སོང་ལ་བར་ཆོད་ཞི་བར་བྱ་བའི་ཕྱིར་མཁའ་འགྲོ་མ་ལ་ཚོགས་དང་གཏོར་མ་དང་༔ དགེ་འདུན་ལ་སྟོན་མོ་དང་༔ བླ་མ་ལ་ཡོན་འབུལ་ཞིང་རྟེན་གྱི་བདོག་པ་ཐམས་ཅད་འཁོར་གསུམ་ཡོངས་སུ་དག་པར་གཏང་བར་བྱའོ༔ དེ་ནས་དུར་ཁྲོད་རེ་རེར་ལུས་ཀྱི་ཞེན་པ་བཟློག་ནས་འཁོར་བའི་ལུས་གཉིས་རུ་ཤན་ཕྱེ་ནས༔ ད་འཁོར་བའི་ལུས་ལ་མི་འཇུག་པར་བྱ་བའི་ཕྱིར་ལུས་ཀྱི་སྤྱོད་པ་རྣམས་བླ་མའི་གདམས་པ་ཇི་ལྟར་གསུངས་པ་བཞིན་བྱའོ༔ དེ་ནས་ཞག་བཞི་ལྔ་ནས་བཅུ་ཚུན་ཆད་དུ་བླ་མ་དང་སློབ་མ་གཉིས་རིའི་རྩེ་

མོའམ་ཚལ་ལེགས་པ་ཅིག་ཏུ་འཕྲད་དེ༔ བླ་མས་བུ་ཁྱོད་ཀྱི་ཞེན་པ་ལོག་གམ་ཞེས་ཉམས་ཅི་སྐྱེས་པ་དྲི་བར་བྱའོ༔ དེ་ནས་སློབ་མ་དེས་རང་གི་སེམས་ལ་ཇི་ལྟར་བྱུང་བའི་ཉམས་རྣམས་བླ་མ་ལ་བཤད་པར་བྱའོ༔ དེ་ནས་ལུས་ཀྱི་ཞེན་པ་ལོག་པའི་རྟགས་སུ༔ ལུས་ལ་ཆགས་པ་མེད་པ་དང་༔ ལུས་མེད་པ་སྙམ་པ་དང་༔ གྲང་བ་མེད་པ་དང་༔ ཚ་བ་མེད་པ་དང་༔ བཀྲེས་པ་མེད་པ་དང་༔ སྐོམ་པ་མེད་པ་དང་༔ ན་ཚ་མེད་པར་འབྱུངསྟེ༔ དེའི་བར་དུ་དེ་ལྟ་བུའི་ཉམས་སྐྱེས་ནས་འདུག་ན་ལུས་རྣལ་དུ་འབེབས་པ་ཞེས་བྱ་སྟེ་སོར་ཆུད་པའི་དོན་དུ་ཡང་དུར་ཁྲོད་དེར་གཏང་སྟེ༔ ལུས་དལ་བར་ཞག་བཅུ་ནས་ཟླ་བ་ཕྱེད་དུ་འདུག་ཏུ་གཞུག་གོ༔ གོང་གི་ཉམས་རྟོགས་མེད་ན་ཡང་དལ་བར་ཞག་འགར་འདུག་ཏུ་བཅུག་ལ༔ ཡང་ལུས་ཀྱི་སྤྱོད་པ་རྣམས་བྱའོ༔ དེ་ཡང་བླ་མ་ལ་དྲིས་ཏེ་རྟགས་དང་མི་ལྡན་ན་བསྐྱར་བར་བྱའོ༔ དེ་ལྟར་གལ་ཏེ་མ་བྱུང་ན་ལན་གསུམ་ན་ལུས་ཀྱི་རྟགས་དེ་མི་འབྱུང་མི་སྲིད་དོ༔ དེ་ནས་ལུས་སོར་བཅུག་རྣལ་དུ་དབབ་པའི་ཆོ་ག་བྱའོ༔ རྣལ་དུ་ཕེབས་པའི་རྟགས་སུ་འཇིག་རྟེན་གྱི་བྱ་བ་ལ་གཏན་ནས་བློ་སྐྱེ་མི་སྲིད་དོ༔ དེ་ལྟར་ལུས་ཀྱི་སྤྱོད་པ་མཐར་ཕྱིན་ཅིང་ལུས་རྣལ་དུ་ཕབ་པས་རྣལ་འབྱོར་པའི་ལུས་ཀྱི་བར་ཆོད་ཉེ་བར་ཞི་ཞིང་ཕྱི་ལུས་ཀྱི་ཞེན་པ་ལོག་ནས་ལུས་མི་སྲིད་པའི་དགོས་པ་བསྟན་པའོ༔ དེ་ལྟར་གཏན་ལ་ཕབ་ནས༔ ཡང་སློབ་མ་དེ་ལ་ངག་གི་ཞེན་པའི་བཟློག་པའི་ཕྱིར་ངག་འཁོར་འདས་རུ་ཤན་འབྱེད་པའི་མན་ངག་ལ་བསླབ་པར་བྱའོ༔ ངག་གི་གདམས་པ་ཇི་ལྟ་བ་བཞིན་ཏུ་འདི་ལྟར་བསླབ་པར་གྱིས་ཤིག་ཅེས་བསླབས་ཏེ་དུར་ཁྲོད་དུ་

བཏང་ལ་ཡང་གོང་བཞིན་ཉམས་ལྟའོ༔ ལན་ཅིག་ལ་བྱུང་ན་དབང་པོ་རབ་ཀྱི་ཡང་རབ་ཡིན་ནོཿམ་བྱུང་ན་ཡང་ལན་གསུམ་ཚུན་ལ་མི་ཡོང་མི་སྲིད་དོཿདེ་ལྟར་ཡང་ངག་གི་ལྟས་ནི་བླ་མའི་མན་ངག་གི་གོ་བ་ཇི་ལྟ་བབཞིན་དུ་རྒྱུད་ལ་སྐྱེ་སྟེ་ཁ་ནས་ཀྱང་ཚིག་ཏུ་འབྱུང་བ་ཡིན་ནོ༔ ཆེད་དུ་བྱས་པ་མེད་པར་རང་ཤུགས་སུ་འབྱུང་བ་ཡིན་ནོཿདེ་ལྟར་བྱུང་ནས་ངག་སོར་ཆུད་ཅིང་རྣལ་འབེབས་ཐབས་ཞག་བཅུ་ནས་ཟླ་བ་ཕྱེད་ཚུན་ཆད་དུ་ངག་ཤིན་ཏུ་དལ་བར་གནས་པར་བྱའོ༔ རྣལ་དུ་ཕེབས་པའི་རྟགས་ནི་གཏམ་རྣམས་ཐམས་ཅད་དུ་སྨྲ་སྙིང་མི་འདོད་པ་སྟེ༔ འདི་ལྟར་ངག་གི་སྤྱོད་པ་མཐར་ཕྱིན་པས་ངག་ལ་བར་ཆོད་མི་འཇུག་ཅིང་ངག་གི་བར་ཆོད་ཉེ་བར་ཞི་ནས་ངག་གི་ཞེན་པ་ལོག་སྟེ༔ ངག་འཁོར་བ་དང་རུ་ཤན་ཕྱེ་ནས་ཕྱིས་འཁོར་བའི་ངག་ཏུ་འདུག་མི་སྲིད་པའི་དགོས་པ་ཡོད་པའི་ཕྱིར་རོ༔ ངག་གི་སྤྱོད་པ་ལ་རྟགས་ཐོན་ནས་མཐར་ཕྱིན་པ་རབ་ཏུ་གལ་ཆེའོ༔ དེ་ལྟར་ངག་གི་སྤྱོད་པ་རྫོགས་ནས་ཡིད་ཀྱིས་སྤྱོད་པའི་མན་ངག་པ་བསླབ་སྟེ༔ ཡང་དུར་ཁྲོད་དུ་གཏང་ངོ༔ དེ་ནས་ཡང་གོང་ལྟར་བླ་མ་ལ་དྲིས་ཤིང་སྤྱད་པས༔ དེ་ལྟར་ལན་གསུམ་ལ་མི་འབྱུང་མི་སྲིད་དོ༔ དེའི་རྟགས་སུ་སེམས་གསལ་བ་དང་ཡང་བ་དང་༔ འཁྲུལ་པའི་སྣང་བ་ཡིད་ལ་འབྱུང་མི་སྲིད་པ་དང༔ བྲོད་པ་ཆེན་པོ་སྐྱེད་པ་དང་༔ ཉམས་བདེ་བ་འབྱུང་སྟེ༔ དེ་ལྟར་བྱུང་ཙ་ན་ཡང་ཡིད་སོར་ཆུད་པར་བྱ་ཞིང་རྣལ་དུ་ཕེབས་པའི་ཐབས་ཞག་བཅུ་ནས་ཟླ་བ་ཕྱེད་དུ་ཡིད་དལ་པར་གནས་པར་བྱའོ༔ རྣལ་དུ་ཕེབས་པའི་རྟགས་སུ་འཁོར་བ་ལས་ཡིད་འབྱུང་བ་དང་༔ གཞན་གང་ལ་ཡང་ཡིད་མི་འཇུག་པ་དང་༔ རང་བཞིན་

གྱིས་དལ་བ་སྐྱེའོ༔ དེ་ལྟར་བྱུང་ཙ་ན་ཡིད་ཀྱི་སྤྱོད་པ་མཐར་ཕྱིན་པས་ཡིད་ལ་བར་ཆད་མི་འཇུག་ཅིང་ཿཡིད་ཀྱི་བར་ཆད་ཐམས་ཅད་ཉེ་བར་ཞི་ཞིང་ཡིད་འཁོར་བ་རུ་ཤན་ཕྱེད་ནས་འཁོར་བ་ལ་གཏན་འཇུག་མི་སྲིད་དོ༔ དེའི་ཕྱིར་ན་ཡིད་ཀྱི་སྤྱོད་པ་རྫོགས་པར་བྱ་བ་གཅེས་སོ༔ དེ་ལྟར་ལུས་ངག་ཡིད་ཀྱི་སྤྱོད་པ་སྔོན་དུ་བསྟན་པ་ནིཿཐོག་མ་ནས་ལུས་ངག་ཡིད་དང་བྲལ་མ་མྱོང་བས་ད་ལུས་ངག་གི་རྣམ་པ་དང་དབྲལ་བའི་ཕྱིརཿདེའི་སྔོན་དུ་ཞེན་པ་བཟློག་པའི་ཕྱིར་སྤྱོད་པ་འདི་དག་ལ་བསླབས་པས༔ ལུས་ཀྱི་འབྱུང་བ་རང་སར་དེངསཿངག་གི་ཞེན་པ་རང་ལོག༔ སེམས་ཀྱི་བྱུང་ཚོར་རང་འགགས་ནས་ཟག་མེད་དུ་སངས་རྒྱ་བའི་གནད་དུ་བསྟན་པའོ༔ སྔོན་དུ་འགྲོ་བ་ལུས་ངག་ཡིད་ཀྱི་སྤྱོད་པ་བསྟན་པའི་ཡང་འབྱེད་སྦས་པའི་ཏི་ཀ་རྫོགས་སོ༔ རྒྱ་རྒྱ་རྒྱ༔ བརྡ་ཡིག་ཡོད༔ བྱ་བྲལ་རང་བཞིན་ངང་ལ་ཕྱག་འཚལ་ལོ༔ འདིར་ལུས་ངག་གནད་གསང་བའི་མན་ངག་བསྟན་པར་བྱའོ༔ དེ་ལྟར་སྔོན་དུ་འགྲོ་བ་ལུས་ངག་གི་སྤྱོད་པ་འབྱོངས་པའི་ཚད་ལ་ཕབ་ནས༔ ད་ནི་ལུས་ལ་རིག་པ་གནས་པས་རྣལ་འབྱོར་པ་རྣམས་ལུས་ཀྱི་འདུག་སྟངས་ཀྱི་མན་ངག་གབ་པ་རྣམས་མངོན་དུ་ཕྱུངས་ཏེ་བསྟན་པའོ༔ ༔ དེ་ཡང་གླང་པོ་ཆེ་འདུག་སྟངས་ཀྱིས་གཞི་བཅའ་བ་གཅེས༔ འདུག་སྟངས་འདི་ལ་གཞི་མ་བཅས་ན་ལུས་ངག་རྣལ་དུ་མི་ཕེབས་པས༔ འདི་ལ་གཞི་བཅའ་བ་རབ་ཏུ་གཅེས་སོཿ དྲང་སྲོང་གི་འདུག་སྟངས་ཀྱིས་གནད་མ་གཟིར་ན་ལུས་མི་ཆུན་པས་དྲང་སྲོང་གི་འདུག་སྟངས་ལ་ཤེས་པ་གཟིར་བ་གཅེས༔

སེང་གེའི་འདུག་སྟངས་ལ་རྩལ་མ་སྦྱངས་ན་ནི་རིག་པ་མི་ཆུན་པས་སེང་གེའི་འདུག་སྟངས་ཀྱིས་ཁྱད་པར་དུ་མིག་གཅུན་པ་རབ་ཏུ་གཅེས་སོ༔ དེ་ཀུན་ལ་སྐྱོ་ན་འདུག་སྟངས་དེ་མ་ཡིན་པ་རྣམས་ལ་ཡང་ལུས་སྦྱང་བར་བྱའོཿདེ་ཀུན་གྱིས་ལུས་མ་སྦྱངས་ན་ཡེ་ཤེས་མངོན་དུ་སྣང་བར་མི་ནུས་ཏེ༔ དཔེར་ན་སྦྲུལ་ལ་རྐང་ལག་རྫོགས་ཤིང་མང་བར་ཡོད་པ་ཡིན་ཡང་ལུས་མ་གཅུན་གྱི་བར་ལ་མི་གསལ་བ་དང་འདྲ་བར༔ ལུས་ལ་ཡེ་ཤེས་ཆེན་པོས་གང་ཞིང་རྒྱས་ནས་ཡོད་ཀྱང་ལུས་ཀྱི་གནད་མ་གཅུན་ན་ཡུལ་ལ་སྣང་མི་ནུས་སོ༔ དེའི་ཕྱིར་ན་སྔོན་དུ་འགྲོ་བ་ལུས་ཀྱི་འདུག་སྟངས་འདི་རྣམས་དང་༔ ཞག་དུ་མར་སེམས་སྦྱང་ཞིང་ལུས་གཅུན་པ་ནི་རབ་ཏུ་གཅེས་སོ༔ དེ་ནས་དུས་ཚོད་ཅིག་ནས་ལུས་ལ་གནད་མེད་པར་འགྲོའོ༔ གནས་པ་ལུས་ཀྱི་གནད་ཡིག་ཡང་ཏིག་གསང་བ་རྫོགས་སོ༔ ཨྠྀི༔ ༔ བརྡ་ཡིག་ཡོད༔ བདེ་ཆེན་མངོན་དུ་འབྱིན་པ་ཉིད་ལ་ཕྱག་འཚལ་ལོ༔ ད་ནི་ཉམས་སུ་བླང་པ་དངོས་གཞིའི་གདམས་པ་ཡང་གསང་གབ་པའི་ཏི་ཀ་གནད་ཡིག་ཆེན་པོ་བསྟན་པར་བྱའོ༔ འདིར་ནི་མན་ངག་རིམ་འཇུག་ཕྱིིར༔ ལས་ཅན་སྐྱེས་བུ་གང་ཞིག་གིས༔ འདི་ལྟར་ཉམས་སུ་ལེན་པ་ལཿའདི་ནི་རྣལ་འབྱོར་སྐལ་པ་བཟང་༔ སྐལ་བཟང་བྱང་ཆུབ་སེམས་ཆེན་པོ༔ འདི་ནི་མི་རྟོག་མྱ་ངན་འདས༔ འདི་ཉིད་བརྩོན་པར་སུས་བྱས་པ༔ རིག་པ་ལུ་གུ་རྒྱུད་ཉིད་ལ༔ རྣམ་པར་གནས་པ་ཁོ་ནའོ༔ དབྱིངས་ལ་བརྟན་པར་བྱ་བའི་ཕྱིར༔ སྣང་བ་ཀུན་ལ་རང་གཟེར་གདབ༔ རིག་པ་བརྟན་པར་བྱ་བའི་ཕྱིར༔ ངོ་བོ་ཉིད་ནི་རྣལ་དུ་དབབ༔ ལྟ་བ་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་

གཟིར༔ ཤེས་པ་བརྟན་པར་བྱ་བའི་ཕྱིར༔ རིག་པ་དབྱིངས་སུ་བཙོན་དུ་བཟུང་༔ ལུས་ནི་བརྟན་པར་བྱ་བའི་ཕྱིར༔ འདུག་སྟངས་རྣམས་ལ་རང་ལུས་སྦྱང་༔ ངག་ནི་བརྟན་པར་བྱ་བའི་ཕྱིར༔ རྟག་ཏུ་ལྐུགས་པ་ལྟ་བུར་གནས༔ སེམས་ནི་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་ལྟ༔ སྣང་བ་འཁྲུལ་པ་རྒྱུན་གཅད་ཕྱིརཿསྟོང་པ་ཉིད་ལ་གོམས་པར་བྱ༔ འདི་ལྟར་ཉམས་སུ་ལེན་པའི་མི༔ སངས་རྒྱས་རྣམས་དང་ཉེ་བ་ཡིན༔ དེ་ཕྱིར་འདི་ལ་གོམས་པར་བྱའོ༔ འདི་ལྟར་ཉམས་སུ་ལེན་པ་དངོས་ནི༔ ལས་དང་པོ་པའི་གང་ཟག་གིས་རྐྱེན་འཛོམ་དགོས་ཏེཿརྐྱེན་མ་འཛོམ་ན་རིག་པའི་དྭངས་མི་ཕྱེད་པས་ཐོག་མར་རྐྱེན་གལ་ཆེ་བས་རྐྱེན་གཟུང་བ་ནིཿཡུལ་ནམ་མཁའ་སྟོང་པ་སྟེ་ནམ་མཁའ་སྤྲིན་དང་བྲལ་བ་རབ་ཏུ་གཅེས་པའོ༔ སྤྲིན་དང་ཁུ་རླངས་ཀྱིས་བསྒྲིབས་ན་རིག་པའི་བཀྲག་མི་ཐོན་པས་རྐྱེན་དག་པ་གལ་ཆེ༔ ནམ་མཁའ་སྟོང་པ་ལ་རིག་པ་སྣང་བ་ཡིན་པས༔ འདི་ནི་ཡུལ་སྟོང་པ་ལ་ངོ་བོ་སྟོང་པ་ཉིད་རང་དག་ཅིར་ཡང་གནས་པ་ཞེས་བྱའོཿའདི་ནི་ཐོག་མ་ནས་སྟོང་པ་ཉིད་ཀྱི་སྣང་བ་སྟོང་པ་ཉིད་དུ་གྲོལ་བ་ཅེས་བྱ་བ་ཡུལ་སྟོང་པ་རིག་པ་གསལ་བར་ཤར་བས་གསལ་སྟོང་དབྱེར་མེད་སྣང་བ་རང་དག་པ་ཟུང་འཇུག་གི་དགོངས་པ་ཞེས་བྱའོ༔ རིག་པ་རྡོ་རྗེ་ལུ་གུ་རྒྱུད་ནི་གསལ་བ་རང་ཤེས་ཀྱི་རྒྱལ་པོ་ཞེས་བྱ་བར་ཡེ་ཐོག་མ་ནས་བཞུགས་པ་ཡིན་ཏེ་སངས་རྒྱས་པའི་སྣང་བ་དང་དབྱེར་མི་ཕྱེད་པས༔ བཞུགས་ཚུལ་ལ་ཁྱད་མེད་དེ་སྣང་ཚུལ་ལ་རྒྱུན་གྱི་ཁྱད་པར་གྱིས་ཕྱེའོཿ འདི་ནི་དབང་པོའི་མངོན་སུམ་དུ་

རིག་པ་ཟང་ཐལ་བ་ཅེས་བྱ་སྟེ་རིག་པ་ཉིད་དུ་ཉམས་སུ་མྱོང་དུ་ཡོད་པའོ༔ འདི་ཉམས་སུ་མ་མྱོང་ན་ཡིད་དཔྱོད་དུ་འཛིན་པའི་ལྟ་བ་རྣམས་དང་ཁྱད་ཅུང་ཟད་ཀྱང་མེད་དེ་ཤེས་རབ་ཀྱི་སྤྱོད་ཡུལ་དུ་ནི་མ་ཡིན་ནོ༔ ཤེས་རབ་ཀྱིས་ནི་ཡང་དག་པར་བརྟགས་ན་ཕུང་པོའི་གཏིང་མི་རྙེད་དེ་རིག་པ་ནི་སྨོས་ཅི་དགོསཿརིག་པ་ནི་དབང་པོས་གཏན་ལ་མ་ཕབ་ན་ཤེས་རབ་ཀྱིས་གཏན་ལ་ཕབ་ཀྱང་ཡིད་དཔྱོད་ཀྱི་ལྟ་བ་རྣམས་དང་ཁྱད་པར་ཅི་ཡང་མེད་པའི་ཕྱིར་ན་ཤེས་རབ་ཀྱིས་ནི་མ་ཡིན་ནོ༔ འདི་ཉིད་དུ་ནི་ཕུང་པོ་རྣམས་དང་༔ དབང་པོ་རྣམས་དང་༔ ཁམས་རྣམས་ཟད་པར་མ་བྱས་ན་སངས་མི་རྒྱ་བས༔ འདི་དག་ལ་ཟད་པར་བྱ་རྒྱུ་ལོགས་ན་གཅིག་ཀྱང་ཡོད་པ་མ་ཡིན་ནོ༔ དེའི་ཕྱིར་ན་འདི་ཤེས་རབ་ཀྱིས་ཟད་པར་བྱ་བར་ནུས་པ་མ་ཡིན་པསཿདབང་པོ་དང་རིག་པ་མ་འབྲེལ་ན་ཟད་པར་མི་ནུས་ཏེ་དབང་པོས་བལྟར་ཡོད་པས་དེ་ཀུན་ཟད་པར་ནུས་པ་ཡིན་ནོ༔ དེས་ན་འདི་ནི་ཤིན་ཏུ་ཟབ་པས་ན་ད་ལྟ་ཉིད་དུ་གཏན་ལ་དབབ་ཏུ་ཡོད་པའོ༔ འདི་ལྟར་གཏན་ལ་ཕབ་ནས་ཉམས་སུ་བླངས་པས་རྟགས་ནི་འདོད་པ་མེད་ཀྱང་རང་བཞིན་དུ་འབྱུང་ངེས་སོ༔ འདིའི་དུས་སུ་གནད་དུ་མི་འགུལ་བ་རྣམ་པ་གསུམ་མཆོག་ཏུ་གཅེས་སོ༔ ལུས་མ་འགུལ་བས་མིག་རང་སོར་གཏན་ལ་ཕེབས༔ མིག་མ་འགུལ་བས་རིག་པ་ཉིད་དང་འབྲལ་བ་མེད་པར་གཏན་ལ་ཕེབས༔ རིག་པ་མ་འགུལ་བས་སྣང་བ་དང་གཟེར་ཐེབས་ཏེ་མི་འགུལ་བའོ༔ འདི་ལྟར་མ་འགུལ་བ་གསུམ་དུ་བསྡད་པས་དམིགས་པ་ཐམས་ཅད་རང་སར་དག་ནས་སྣང་བ་རྒྱ་ཡིས་ཐེབས༔ འཁྲུལ་པ་རང་སར་ལོག་ཡེ་ཤེས་མ་བུ་འཕྲད་པའི་ཉམས་ཞེས་བྱ་

བ་ཡིན་ནོ༔ འདི་དག་ནི་རིག་པ་མཐོང་བའི་གནད་ཡིག་ཡང་དག་པའོ༔ ལུ་གུ་རྒྱུད་རླུང་དང་བྲལ་ནས་ཐིག་ལེ་རྣམས་སྨིན་པའི་ཚེ་སྣང་བ་དུམ་བུའི་རྣལ་འབྱོར་པ་ཞེས་བྱ་སྟེ་ཐིག་ལེ་དང་ཐིག་ཕྲན་དུ་འཆར་བས༔ འདི་ནི་དུམ་བུ་ལ་གོམས་པ་ཞེས་བྱའོཿའདི་ལྟར་བརྟན་པ་ཐོབ་ནས་རིག་པ་རང་ངོའི་སྣང་བ་ཟབ་ཅིང་རྒྱ་ཆེ་བ་ལ་དཔྱད་པར་བྱ་སྟེ་དབྱིངས་ཀྱི་སྣང་བ་ལ་གོམས་པར་བྱའོ༔ ད་ནི་ཉམས་གོང་ནས་གོང་དུ་འཕེལ་བར་བྱ་ཞིང་ཤེས་པ་རང་ཐོག་ཏུ་བལྟ་བར་བྱ་བའི་མན་ངག་བསྟན་པ་ཡིན༔ དེ་ཡང་གོང་དུ་མིག་གི་དེ་བཞིན་ཉིད་ཤེས་པས་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་བྱ་བའི་དོན་གྱི་སྐབས་སུ༔ མིག་མ་བདེ་ན་བཅོས་པའི་མན་ངག་གིས་ཇི་ལྟར་བདེ་བའི་ལུས་ཀྱི་གནད་ཀྱིས་བཅོས་པར་བྱའོཿཐིག་ལེ་སྲན་མ་ཙམ་དུ་ཤར་བ་དང་༔ འོད་རེ་ལྡེའི་རྣམ་པ་ཙམ་དུ་སྣང་བའི་ཚེ་ན་ཚད་དུ་ཕྱིན་པ་ཡིན་སྙམ་ནས་ཉམས་ལེན་དང་བྲལ་ནཿའདིའི་སྣང་བ་ལོག་ནས་བར་མ་དོ་གཉིས་པའི་བརྟན་པ་ཡིན་ཏེ༔ དེར་ཤེས་པ་གལ་ཏེ་མ་ཚུད་ན་རང་བཞིན་སྤྲུལ་པ་ལས་མི་མཐོང་བས༔ འདི་ལ་བར་མ་ཆད་པར་རབ་ཏུ་གཅེས་སོ༔ དེ་ལྟར་ཉམས་སུ་བླངས་པ་ལས་ལུས་ཀྱི་རྟགས་འགའ་འབྱུང་བ་ལ་རློམ་པ་བྱས་ལ་གཞག་པར་བྱ་བ་མ་ཡིན་ནོ༔ འདི་ཡང་སྣང་བ་ལྡོག་པས་རྟག་ཏུ་ཉམས་སུ་བླངས་པ་གཅེས་སོ༔ དེ་ལྟར་ལུས་ཀྱི་རྟགས་བྱུང་བའི་དུས་སུ་འཕང་༔ དུར་ཁྲོད་ཅིག་ནས་འོངས་ཏེ་ཐ་མ་ལ་འབུལ་ཞིང་རྫས་ཡོད་པ་རྣམས་ཀྱང་བླ་མ་ལ་དབུལ་བར་བྱའོ༔ བླ་མས་ཉམས་དྲིས་ཏེ་ཡང་དེ་ཉིད་ལ་འདྲིས་སུ་གཞུག་སྟེ༔

དེ་ལྟར་བླ་མས་ནི་གདམས་ངག་ནི་དུས་གཅིག་ལ་མ་ཡིན་ཏེ༔ རིམ་གྱིས་སློབ་མའི་ཤེས་པའི་ཉམས་དང་སྦྱར་ཞིང་གདབ་པར་བྱའོ༔ དེ་ལྟར་དུར་ཁྲོད་སོ་སོར་བཟུང་ནས་སྐབས་སུ་ཉམས་བསྡུར་ཞིང་ཉམས་སུ་བླངས་པས་སློབ་མ་དང་གུ་རུ་བཅས་པ་རྣམས་དུས་གཅིག་ལ་སངས་རྒྱའོ༔ ཡང་འོད་ནི་ཡུལ་གྲུའི་རྣམ་པ་ཙམ་ཐིག་ལེ་ནི་འཁར་ཕོར་ཁ་སྦུབ་པ་ཙམ༔ ལུས་ལ་ཡང་རྟགས་སུ་གཉེར་མ་མེད་ཅིང་ཟས་དང་གོས་ཀྱི་འདུ་ཤེས་བྲལ་བའི་ཚེ་ལུས་གཅེར་བུར་ཕྱུངས་ཏེ་གངས་སམ་རྒྱ་མཚོའི་འགྲམ་དུ་ཉམས་སུ་བླང་ཞིང་༔ ཡང་རྟགས་ཕྲ་མོ་དེ་ཀུན་ལ་རློམ་པ་མི་བྱ་བར་གོང་ལྟར་ཉམས་སུ་བླངས་པ་རབ་ཏུ་གཅེས་སོ༔ དེ་ལྟར་བྱས་པས་ཡང་འོད་ནི་ཡུལ་ཁམས་ཙམ་ཐིག་ལེ་ནི་ལྔ་ལྔའི་སྣང་བར་འགྱུར་ཏེ༔ དེའི་དུས་ན་ངག་དང་སེམས་འདྲེས་པའི་རྟགས་འབྱུང་སྟེཿསྔར་མི་ཤེས་པའི་ཆོས་ཤེས་ལ་དང་༔ རང་གི་བླ་མ་ལ་གདུང་པ་སྐྱེ་བ་ལ་སོགས་པ་འབྱུང་བའི་ཚེ་ན༔ ཡང་ངག་རྣམ་པར་ངེས་པ་ཞེས་བྱས་ཏེ་ཆོས་ཀྱི་གཏམ་རང་གཅིག་པུས་སྐད་ལྷང་ལྷང་བརྗོད་པ་གལ་ཆེའོཿརྟགས་དེ་ཀུན་ལ་ཡང་རློམ་པ་མ་བྱས་པར་ཡང་གོང་ལྟར་ཉམས་སུ་བླང་བར་རབ་ཏུ་གཅེས་སོ༔ འདི་ལྟར་བྱས་ན་ནི་འོད་ནི་སྟོང་གསུམ་ཙམ༔ ཐིག་ལེ་ནི་རེ་རེའི་ནང་དུ་སྐུ་རེ་རེ་འགྱུར་བས༔ དེའི་ཚེ་ན་རང་གི་ལུས་མི་སྣང་བར་འགྱུར་ཏེ༔ སྐབས་སུ་འོད་ཀྱི་དཀྱིལ་ན་རང་གི་སོར་མོ་རྣམས་བཀྲམ་པའི་སྣང་བ་འབྱུང་ཞིང་ལུས་དང་ཡན་ལག་ཀུན་ཀྱང་རང་གིས་རང་མི་མཐོང་སྟེ༔ སྐབས་སུ་ནི་འོད་ཀྱིས་ལུས་མཐོང་བ་ཡང་འབྱུང་པས༔ དེའི་དུས་ན་རང་གི་ལག་སོར་འོད་ཀྱི་སྣང་བ་དེ་ལ་གཏད་ཅིང་ཉམས་སུ་བླངས་པས་མྱུར་དུ་ལུས་ཟད་

པར་འགྱུར་བ་ལ་ཐེ་ཚོམ་མེད་དོ༔ དེ་ནས་ལུས་ཟད་པར་མ་ཐུག་པ་ལ་ལུས་རེས་སྣང་རེས་མི་སྣང་བའི་དུས་ན་ལུས་ངག་ཡིད་གསུམ་དབྱེར་མི་ཕྱེད་པའི་རྟགས་འབྱུང་སྟེ༔ འབྱུང་བ་རྣམས་ལ་ཐོགས་པ་མེད་པར་འབྱུང་བ་ཡིན་ནོཿརྟགས་འདི་ཀུན་ཀྱང་འདོད་ཅིང་བྱས་པ་མ་ཡིན་ཏེ་ཡེ་ནས་ཤེས་བྱ་ཉིད་ལ་བབས་ཀྱིས་གྲུབ་ནས་ཡོད་པས་ན་དེའི་རྩལ་དུ་དེ་སྣང་བ་ཡིན་ནོ༔ དེ་ནས་རང་གི་ལུས་ཟད་ནས་མི་སྣང་བའི་དུས་ན་རྣལ་འབྱོར་པ་དང་ཉམས་ཀྱི་དགོངས་པ་གདིང་དུ་གྱུར་པ་ཡིན་པས་ཉམས་སུ་བླང་བྱའི་ཤེས་པ་དང་བྲལ་བ་ཞེས་བྱའོཿའདི་ལྟར་ཡུན་བག་ཙམ་གནས་པ་ཡིན་ནོ༔ དེ་ལྟར་གནས་པའི་ཚེ་ནི་རིག་པ་སྲང་ལ་ཐེབས་པའི་དུས་ཏེ༔ རིག་པ་སྲང་ལ་ཕབ་ཡེ་ཤེས་ལམ་དུ་དྲངས་འོད་སྣང་ལ་འཕེལ་མེད་པ་ཡིན་པས་མི་འགྱུར་པའི་གདེང་སྐྱེས་པ་ཡིན་ནོ༔ དེ་ལྟར་བྱུང་ནས་སྣང་བ་ཅི་ཡང་མ་ཡིན་པའི་ངོ་བོར་གྱུར་ཏེ་གནས་པས་ཆོས་ཐམས་ཅད་རང་ཟད་ཀྱི་ཐོག་ཏུ་ཕབ་པ་ཞེས་བྱ་སྟེ་གང་གིས་ངོ་བོར་ཡང་མེད༔ འདི་ལྟར་ཡིན་པར་གྲུབ་པ་མེད་པའི་ཚེ་ན་ལུས་ངག་ཡིད་གསུམ་གྱི་ཞེན་པ་ཟད་དེ་རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཆེན་པོར་བཞུགས་སོ༔ འདིར་ནི་སྐུ་གསུམ་ཀྱི་ཞེན་པ་རང་ཟད་སྐུ་ལས་འདས་པའོ༔ འདི་ཀུན་གྱི་དུས་ན་ཡང་འཇུག་པ་ལ་དབང་ཐོབ་པ་དང་༔ སྐྱེ་བ་ལ་དབང་ཐོབ་པ་གཉིས་ཏེཿསེམས་ཅན་གྱི་དོན་ནི་མ་འགགས་པར་རང་བཞིན་གྱིས་བྱར་ཡོད་དོ༔ དེ་ལྟར་ཉམས་སུ་བླངས་པས་ཟག་མེད་དུ་མྱ་ངན་ལས་འདས་པའི་མན་ངག་མཆོག་གི་སྙིང་པོ་ཞེས་བྱ་སྟེ་རབ་ཏུ་ཟབ་པའོ༔ ཨྠྀི༔ ༔ རྒྱ་རྒྱ་རྒྱ༔ ༔ གལ་ཏེ་སྐྱེས་བུ་ཆེན་པོ་དེ་ནི་དེ་ལྟར་ཉམས་སུ་

ལེན་པའི་དུས་ན་བར་ཆོད་ཀྱི་དབང་དུ་གྱུར་ན་ཡང་འདི་ལྟ་སྟེ༔ ལུས་ངག་གི་སྤྱོད་པ་སྔོན་དུ་འགྲོ་བ་འཁོར་འདས་རུ་ཤན་འབྱེད་པའི་དུས་ནས་སོང་ན༔ སྐྱེས་བུ་དེ་ནི་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུངས་ནས་ལོ་ལྔ་བརྒྱ་ན་བར་མ་དོ་མེད་པར་སངས་རྒྱ་བ་ལ་ཐེ་ཚོམ་མེད་དོ༔ ལུས་ཀྱི་གནད་གཅུན་པའི་དུས་སུ་བར་ཆད་ན་བར་དོའི་སྣང་བ་ཐ་མ་ལྷུན་གྲུབ་རིན་པོ་ཆེའི་སྣང་བ་ལ་ཐིམ་ལུགས་བརྒྱད་དང་བཅས་ཏེ་སངས་རྒྱ་བ་ཡིན་ནོ༔ སྣང་བ་གོང་ནས་གོང་དུ་འཕེལ་པའི་ཚེ་བར་ཆོད་ན་བར་དོ་གཉིས་པ་ཡེ་ཤེས་བཞིའི་སྣང་བ་ལ་སངས་རྒྱ་བར་ངེས་སོ༔ རང་རིག་པ་ཉིད་ཚད་ལ་ཕེབས་མ་ཕེབས་ཀྱི་མཚམས་སུ་ཚེའི་དུས་བྱས་ནས་བར་མ་དོ་དང་པོ་ཚོམ་བུ་ལ་ངེས་པ་ཐོབ་སྟེ་ཞག་ལྔ་སྐད་ཅིག་མ་རྣམ་པ་གསུམ་གྱི་ཆའི་གྲོལ་བར་ངེས་སོ༔ འདི་ལྟར་ཉམས་སུ་ལེན་པར་འདོད་ཅིང་ཞུགས་ནས་ཚེའི་བར་ཆད་བྱུང་བ་རྣམས་དེ་ལྟར་ཡིན་གྱིས༔ འདིའི་སྒོར་ཞུགས་པའམ་ཚིག་གི་ཕྱིར་སྤྱོད་པ་ཙམ་ནི་དེ་ལྟར་མ་ཡིན་ནོ༔ ཕྱི་མའི་ལུས་བཟང་ངན་ལེན་ལུགས་ནི་ཐབས་ཐུན་མོང་མ་ཡིན་པའི་སྒོ་མཐོང་བའི་དབང་གིས་ཡོད་དོཿམངལ་གྱི་སྒོ་འགྲིམ་པ་ནི་མ་ཡིན་ནོ༔ དེའི་ཕྱིར་ན་ལུས་ངག་གི་བྱ་བ་གཏན་གྱིས་ཚེར་མར་མི་འགྱུར་བའི་ཡུལ་དུ་ཉམས་སུ་ལེན་པ་ནི་རབ་ཏུ་གཅེས་སོ༔ ཉམས་སུ་མ་བླངས་པར་སངས་མི་རྒྱ་སྟེ༔ དཔེར་ན་མ་སྤྱད་པར་བཞག་པའི་གཏེར་དང་འདྲའོཿའཁྲུལ་པའི་སྣང་བ་འདི་ཉིད་ལ་མ་འགགས་པར་ཚིག་གིས་དགག་ཏུ་རེ་བ་ནི་རྣམ་པ་ཐམས་ཅད་དུ་འབྱུང་མི་སྲིད་དོ༔ ཚིག་གིས་གྲོལ་ན་འཇིག་རྟེན་གྱི་གཏམ་རྒྱུད་ཀྱིས་ཀྱང་གྲོལ་བར་འགྱུར་ཏེ་རྣམ་པ་ལ་གྲོལ་མི་སྲིད་དོཿ དཔེར་ན་ནོར་བུ་རིན་པོ་ཆེ་དེ་ལ་ཡོན་ཏན་རང་རྫོགས་སུ་

ཡོད་ཀྱང་བྱི་དོར་མ་བྱས་པར་དགོས་འདོད་ཕྱིར་འབྱུང་བར་མི་ནུས་སོ༔ དེ་བཞིན་དུ་རིག་པའི་ངོ་བོ་ལ་ཡོན་ཏན་མ་འགག་པར་རང་རྫོགས་སུ་ཡོད་ཀྱང་ཉམས་སུ་མ་བླངས་ན་འདི་ཉིད་ལ་རྩལ་རྫོགས་པར་ནུས་པ་མ་ཡིན་ནོཿརྟག་ཏུ་ཁྱིམ་མེད་རི་ཁྲོད་བྱ༔ ཞེས་པས་རྐྱེན་མ་ཡིན་པའི་ཡུལ་དུ་ཕྱ྄ིན་ཏེ་ཉམས་སུ་བླངས་ན་སྣང་བ་འདི་ཉིད་ལ་ཆོད་ངེས་སོཿཡང་འབྱེད་སྦས་པའི་ཉམས་སུ་ལེན་པ་དངོས་གཞིའི་གནད་ཡིག་ཆེན་མོ་རྫོགས་སོ༔ ཨྠྀི༔ ༔ རྒྱ་རྒྱ་རྒྱ༔ ༔ འདི་མིན་གཞན་ལ་སྤྱོད་པའི་སྒོམ་ཆེན་ཡི་རེ་ཆདཿདེ་ཕྱིར་བླ་མའི་མན་ངག་གསང་མཆོག་ངེས་པ་འདི༔ ནམ་ཞིག་འབྱུང་བའི་དུས་ནི་བྱུང་བའི་ཚེ༔ སྐལ་ལྡན་སྙིང་གི་བུ་དང་འཕྲད་པར་ཤོག༔ དེ་དག་གསང་མཆོག་ངེས་པ་འདི་འཕྲད་ནས༔ འདི་ཡིས་རང་རྒྱུད་གྲོལ་བར་བྱས་ནས་ནི༔ བསྟན་པའི་སྙིང་པོ་འདི་ནི་རྒྱས་བཏབ་ནས༔ ཡུན་གྱི་བཙས་སུ་འདི་ཉིད་སྦེད་པར་ཤོག༔ བདེ་གཤེགས་མཁའ་འགྲོ་རྣམས་ཀྱིས་འདི་ལ་བྱིན་གྱིས་རློབས༔ བདག་གི་སྙིང་པོ་ངེས་པའི་ལྡེ་མིག་ཏུཿགནད་ཀྱི་དོན་ཀུན་བསྡེབས་ནས་འདིར་བཀོད་དེ༔ ཕྱི་རབས་སྐལ་ལྡན་རྣམས་ཀྱི་དོན་དུ་ནི༔ རང་གི་ཉམས་མྱོང་བླ་མའི་མན་ངག་དང་༔ རྒྱུད་ཀྱི་གཞུང་ལ་བརྟེན་ནས་འདི་ལྟར་བྲིས༔ ཨྠྀི༔ ཕྱི་རབས་འཇུག་པའི་སྐལ་ལྡན་ངེས་པ་ཅན༔ འདི་ལ་ཐེ་ཚོམ་མ་བྱེད་ཚད་མ་ཡིན༔ ཡིད་དཔྱོད་དང་ནི་རང་དགར་མ་ཡིན་ཏེ༔ རིམ་གྱིས་སྙན་ཁུང་བརྒྱུད་པའི་མན་ངག་ནི༔ བླ་མས་བདག་ལ་གཏད་དེ་ཉམས་བླངས་པ༔ འདི་ཉིད་སྟེང་དུ་ཡང་ནས་ཡང་ཕབ་པས༔ འདི་དོན་མི་འགྱུར་གནད་ཀྱི་ཡི་གེ་རུ༔

བླ་མས་གསུངས་ཤིང་བདག་གིས་ཉམས་བླངས་པའི༔ རང་བཞིན་དོན་གྱི་གནད་ཀྱི་མན་ངག་འདི༔ གསང་བའི་ཡི་གེ་དམར་རུའི་ཉམས་ལེན་ལ༔ འགྱུར་དབང་མེད་པར་གནད་རྣམས་བསྡུས་ནས་ནི༔ ཕྱི་རབས་འདི་བརྟེན་སྐལ་དང་ལྡན་པ་ཀུན༔ འདི་ལྟར་ཉམས་སུ་ལོངས་ཤིག་ས་མ་ཡ༔ ཞེས་བྱེ་མ་ལ་མུ་ཏྲས་གསུངས་ཏེ༔ མཆིམས་ཕུ་བྲག་དམར་དགེ་གོང་དུ་སྒྲ་རང་འགྱུར་དུ་མཛད་ནས་ཆོས་རྟགས་ཀྱི་རྒྱ་དང་མཁའ་འགྲོ་མའི་རྒྱས་བཏབ་སྟེ་སྦས་སོ༔ ཨྠྀི༔ ༔ ༔ སྔགས་ཀྱི་སྲུང་མས་སྲུངས་ཤིག༔ མན་ངག་འདི་རྣམས་ནི་ཕྱི་མའི་ཚེ་ས་ལ་གནས་པའི་བྱང་ཆུབ་སེམས་དཔའ་ཞིག་གིས་རྙེད་ནསཿདེའི་འོག་ཏུ་ལག་ན་རྡོ་རྗེའི་སྤྲུལ་པ་ཅིག་གིས་དར་ཞིང་རྒྱས་པར་བྱེད་དོ༔ ༔

དམིགས་གཏད་གསལ་བའི་སྒྲོན་མེ།

དམིགས་གཏད་གསལ་བའི་སྒྲོན་མེ་བཞུགས་སོ༔༼ཕྲ་ཡིག༽

རྒྱ་གར་སྐད་དུ༔ བྷང་གྷ་ལང་རྨ་རྨ་གི་དུ་ཡཾ༔ བོད་སྐད་དུ༔ མན་ངག་རིན་པོ་ཆེའི་དེབས་དམིགས་གཏད་གསལ་བར་བྱེད་པའི་སྒྲོན་མེ༔ དཔལ་སྐུ་གསུམ་གྱི་བདག་ཉིད་ལ་ཕྱག་འཚལ་ལོ༔ རྒྱ་ཆད་ཕྱོགས་ལྷུང་མེད་པའི་ལྟ་བ་དང་༔ སྣང་བ་རང་སར་དག་པའི་སྒོམ་པ་དང་༔ ཟིན་པ་བྲལ་བ་མེད་པའི་སྤྱོད་པ་དང་༔ སྒྲུབ་མེད་རྩལ་སྤྲུག་ཟིན་པའི་འབྲས་བུའི་དོན༔ ཉམས་བླངས་ཕྱོགས་གཅིག་དག་ཏུ་བསྡེབས་པ་འདི༔ སྐྱེས་བུ་ཡང་རབ་རྣམས་ཀྱི་དོན་དུ་བསྟན༔ སརྦ་ཏ་ཐཱ་ག་ཏ་ཨ་པ་ཡྻེ༔ ཀྱེ་མ་རིགས་ཀྱི་བུ་རྣམས་ཀྱིས་འདི་ལྟར་ཡིད་ཆེས་པར་གྱིས་ཤིག༔ རང་གི་རིག་པ་ཉིད་ལྷག་མཐོང་དུ་མཐོང་བར་བྱེད་པའི་མན་ངག་གི་ལག་ཁྲིད་རིན་པོ་ཆེའི་རྩར་ཕྲེང་ནི༔ དང་པོ་རིག་པ་གཅེར་མཐོང་ལ་ཡིད་མ་ཆེས་ན༔ གྲུབ་མཐའ་ངན་པ་ལོག་པ་འབྱུང་དོགས་སྲིད་པས༔ སྔོན་དུ་བྱང་ཆུབ་སེམས་སྦྱོང་གི་མན་ངག་ལ་བསླབ་པར་བྱའོ༔ དེ་ནས་སེམས་འབྱོངས་པའི་དྲོད་རྟགས་གཏན་ལ་ཕེབས་པ་དང་༔ གསང་སྔགས་གཞན་དག་གི་མན་ངག་གིས་ལམ་དུ་དྲངས་ཏེ༔ གང་ཟག་ཆགས་པ་ཅན་དང་ཆགས་པ་མེད་པ་གཉིས་སུ་བྱས་ནས༔ རྩ་དང་རླུང་དང་ཐིག་ལེ་ལ་བསླབ་པར་བྱའོ༔ དེ་ལྟར་རྩ་རླུང་གི་དྲོད་རྟགས་གཏན་ལ་ཕེབས་ནས༔ དྲན་པ་རྒྱུན་གཅོད་ཀྱི་མན་ངག་གིས་རིག་པ་ཉིད་འབྱུང་བ་ལས་ལྡོག་པར་བྱའོ༔ དེ་ལྟར་འབྱུང་བ་ལྔ་ལས་བཟློག་ནས༔ སྦས་པ་མིག་འབྱེད་ཀྱི་མན་ངག་གིས་སྤྱོད་པ་སྒོམ་པ་ལྟ་བ་འབྲས་བུའི་འདུག་

ཚུལ་ལྟ༔ དེ་ལྟར་ལྟ་སྒོམ་སྤྱི་དང་རང་གི་འདུག་ཚུལ་བལྟས་ནས༔ སྤྱོད་པ་བསྡུས་པའི་སྒྲོན་མེའི་མན་ངག་གིས༔ རང་གི་སྤྱོད་པ་བཞི་སྐོར་དུ་གཏན་ལ་དབབ་པའོ༔ དེ་ལྟར་སྤྱོད་པའི་དྲོད་ཚད་རྙེད་ནས༔ ད་སེམས་ཉིད་ཏིང་ངེ་འཛིན་ལ་དབང་ཐོབ་པར་བྱ་བའི་ཕྱིར༔ སྒོམ་པ་བསྡུས་པའི་མན་ངག་གིས༔ སྒོམ་པ་བཞི་སྐོར་གྱིས་སེམས་ལ་དབང་ཐོབ་པར་བྱའོ༔ དེ་ལྟར་སེམས་ལ་དབང་ཐོབ་པར་བྱས་ནས༔ ད་རང་གི་འདུག་ཚུལ་གཏན་ལ་དབབ་པའི་ཕྱིར༔ ལྟ་བ་བསྡུས་པའི་སྒྲོན་མེའི་མན་ངག་གིས༔ སེམས་རྒྱལ་སར་འདོན་པར་བྱ་བའི་ཕྱིར༔ རང་གི་ལྟ་བ་བཞི་སྐོར་གྱིས་སེམས་ལྟར་མི་ལྡོག་པར་བསྟན་པའོ༔ དེ་ལྟར་སེམས་ཀྱི་རྒྱལ་ས་ཟིན་པར་བྱས་ནས༔ ད་སེམས་དེ་མི་ལྡོག་པར་བརྟན་པར་བྱེད་པའི་ཐབས་སུ་འབྲས་བུ་བསྡུས་པའི་སྒྲོན་མེའི་མན་ངག་གིས༔ རང་གི་འབྲས་བུ་བཞི་སྐོར་གྱིས་སེམས་དང་རིག་པ་ངོ་སྤྲད་པར་བྱའོ༔ དེ་རྣམས་ནི་སེམས་གཏན་ལ་འབེབས་པའི་ཡི་གེའོ༔ དེ་ལྟར་སེམས་གཏན་ལ་ཕབ་ནས༔ ད་རང་གི་རིག་པ་གཏན་ལ་དབབ་ཅིང་ཉམས་སུ་བླང་བ་ལ་དངོས་གཞིའི་མན་ངག་གིས་རིག་པ་དང་དངོས་པོ་ངོ་སྤྲད་པའི་མན་ངག་ལ་བསླབ་པར་བྱའོ༔ དང་པོ་མན་ངག་གི་ཆེ་བ་བསྟན་ནས༔ གཉིས་པ་སྣོད་དང་ལྡན་པའི་སློབ་མ་ལ་གདམས་ཤིང་སྣོད་བརྟགས་ནས༔ གསུམ་པ་ཉམས་སུ་ལེན་པའི་གནས་དང་༔ དད་པ་དང་ལྡན་པའི་སློབ་བུ་དེས་བླ་མ་མཉེས་པར་བྱ་སྟེ་གདམས་པ་ཞུ་བར་བྱ་བ་དང་༔ དེ་ལྟར་ཞུས་ནས་རང་གི་བློ་ལ་ལོངས་པར་བྱ་སྟེ་ཡི་གེ་འདི་གསང་ཞིང་སྦ་བར་བྱས་ནས༔

བཞི་པ་ཉམས་སུ་ལེན་པའི་དང་པོ་སྔོན་འགྲོ་ལུས་ངག་གི་སྤྱོད་ལམ་ཇི་ལྟར་བྱ་བའི་རིམ་པ་བྱས་ནས༔ ལྔ་པ་ལུས་ཀྱི་གནད་གཟིར་ནས༔ དྲུག་པ་རིག་པ་དངོས་བལྟ་ཞིང་མཐོང་བར་བྱ་བ་དང་༔ བདུན་པ་རིག་པ་མཐོང་པའི་སྐྱེས་བུ་དེ་དཔལ་ཀུན་ཏུ་བཟང་པོ་དང་མཉམ་པར་བསྟན་ནས༔ བརྒྱད་པ་དེ་ཉམས་སུ་བླངས་པ་རིམ་གྱིས་ཤར་བ་ལ་བསླབས་ཏེ་ཉམས་གོང་ནས་གོང་དུ་འཕེལ་བའི་དྲོད་རྟགས་བརྟན་པར་བྱས་ནས༔ དེ་དག་ཀྱང་མན་ངག་ཚིག་གསུམ་དུ་བསྡུས་ནས་གང་ཟག་ལས་ཅན་ཅིག་ལ་བསྟན་པར་བྱ་བར་གསུངས་སོ༔ དེ་ལྟར་ཉམས་སུ་བླངས་ནས་དེའི་དོན་ལ་ཡིད་ཆེས་པར་བྱ་བའི་ཕྱིར༔ རིག་པ་རྒྱབ་བརྟན་གྱི་མན་ངག་གི་གཏན་ལ་ཕབ་ནས་དེ་ལྟར་རིག་པ་དེ་གཏན་ལ་ཕབ་ནས་རང་ངོ་ལ་ཡིད་ཆེས་བསྐྱེད་དེ༔ དེ་ཉོན་མོངས་པའི་དབང་དུ་མི་འགྱུར་བར་བྱ་ཕྱིར༔ ཉོན་མོངས་པ་དང་དངོས་གཞི་བསྟན་པའི་འགལ་བ་བསྡུས་པའི་སྒྲོན་མའི་མན་ངག་གིས་ཉོན་མོངས་པ་དེ་རྣམས་ངོས་བཟུང་ནས༔ དེ་ལྟར་ཉོན་མོངས་པ་དེ་རྣམས་ངོས་བཟུང་ནས་གཞན་དག་གི་འཁྲུལ་བའི་གྲུབ་མཐའ་རྣམས་དང་༔ ཉོན་མོངས་པ་དང་ཕྱི་རོལ་གྱི་འདོད་པ་རྣམས་ཁྱད་མེད་དུ་འདུག་པར་བསྟན་པ་ནི༔ གཞན་འདོད་བསྡུས་པའི་བཅུད་ཕུར་གྱི་མན་ངག་གིས་གཞན་དག་གི་འདོད་པ་ངོ་ཤེས་པར་བྱས་ནས༔ རིག་པ་ཉིད་ལ་ཡིད་ཆེས་པར་བསྟན་ནས༔ དེ་ལྟར་གཞན་གྱི་རིག་པའི་ཡེ་ཤེས་མི་མཐོང་བར་བསྟན་ནས༔ རང་གི་རིག་པ་ལ་ཡིད་ཆེས་པར་བྱ་བའི་ཕྱིར་རིག་པ་བསྡུས་པ་སྒྲོན་མའི་མན་ངག་གིས་རིག་པའི་འདུག་ཚུལ་གཏན་ལ་ཕབ་ནས༔ རང་གི་རིག་པ་དེ་སྐུ་གསུམ་དུ་གཏན་ལ་

འབེབས་པ་ནི༔ སྐུ་གསུམ་བསྡུས་པའི་སྒྲོན་མའི་མན་ངག་གིས་རིག་པ་སྐུ་གསུམ་དུ་ཡིད་ཆེས་པར་བྱས་ནས༔ དེ་ལྟར་རིག་པ་སྐུ་གསུམ་དུ་གཏན་ལ་ཕབ་ནས་རང་གི་རིག་པ་དེ་ལྟ་སྒོམ་སྤྱོད་པར་གཏན་ལ་དབབ་པ་ནི༔ ལྟ་སྒོམ་བསྡུས་པའི་སྒྲོན་མའི་མན་ངག་གིས་རིག་པ་དེ་ཉིད་ལྟ་སྒོམ་སྤྱོད་པ་ཡིན་པར་གཏན་ལ་ཕབ་ནས༔ དེ་ལྟར་ལྟ་སྒོམ་སྤྱོད་པར་གཏན་ལ་ཕབ་པའི་རིག་པ་དེ༔ རང་གི་རིག་པ་ཐིག་ལེ་ཉག་གཅིག་ཏུ་གཏན་ལ་ཕབ་པ་ནི༔ ཉག་གཅིག་བསྡུས་པའི་སྒྲོན་མའི་མན་ངག་གིས་རང་གི་རིག་པ་ཐིག་ལེ་ཉག་གཅིག་ཏུ་གཏན་ལ་ཕབ་ནས༔ དེ་ལྟར་ཐིག་ལེ་ཉག་གཅིག་ཏུ་ཕབ་པའི་རིག་པ་སྟེ༔ རིག་པ་དེ་ཉིད་ལས་དགེ་སྡིག་ཐམས་ཅད་ལས་འདས་པར་གཏན་ལ་འབེབས་པ་ནི༔ དགེ་སྡིག་བསྡུས་པའི་སྒྲོན་མའི་མན་ངག་གིས་རང་གི་རིག་པ་དེ་ཆོས་ཐམས་ཅད་དུ་ལ་བཟླ་བར་བྱའོ༔ དེ་ལྟར་མན་ངག་གིས་དོན་ཐམས་ཅད་རྣམ་པར་བསྡབས་ནས་གང་ཟག་ཅིག་གི་ཆ་རྐྱེན་དུ་བསྟན་པ་ནི༔ རིན་པོ་ཆེ་གསེར་མིག་གཡུ་ཡིས་སྤྲས་པ་ཞེས་བྱ་སྟེ་མཆོག་ཏུ་ཟབ་པར་བསྟན་པའོ༔ དེའི་ཕྱིར་ན་མན་ངག་འདི་དག་རྣམས་ཤིན་ཏུ་ཟབ་པས༔ ཐེག་པ་དམན་པའི་རིགས་ལ་ཚིག་ཟུར་ཙམ་ཡང་བརྗོད་པར་མི་བྱའོ༔ གལ་ཏེ་བརྗོད་ཅིང་བསྟན་ན་སེམས་ཅན་དམྱལ་བ་ལས་འགྲོ་ས་མེད༔ འཇིག་རྟེན་འདིར་ཡང་མིག་ཐད་ལ་འབྲུལ༔ ཁ་ནས་ཁྲག་སྐྱུགས་ནས་འཆི་བར་འགྱུར་རོ༔ དེ་བས་ན་རབ་ཏུ་གསང་ངོ་༔ མན་ངག་འདི་དག་ནི་ཡི་གེ་ཉུང་ལ་དོན་མང་ཞིང་རྒྱས་པར་བསྟན་ལ༔ གདམས་

པ་འདིའི་གནད་ནི་ཤིན་ཏུ་འདུས་པར་བསྟན་པའོ༔ དམིགས་གཏད་རིན་པོ་ཆེ་གསལ་བའི་སྒྲོན་མེ་ཞེས་བྱ་བ༔ ཉམས་སུ་ལེན་པའི་སྒོམ་ཁྲིགས་ཆེན་པོ་རྫོགས་སོ༔ སྔགས་ཀྱི་སྲུང་མས་སྲུངས་ཤིག༔ མན་ངག་འདི་རྣམས་ནི་ཕྱི་མའི་ཚེ༔ ས་ལ་གནས་པའི་བྱང་ཆུབ་སེམས་དཔའ་ཞིག་གིས་རྙེད་ནས༔ དེའི་འོག་ཏུ་ལག་ན་རྡོ་རྗེའི་སྤྲུལ་པ་ཞིག་གིས་དར་ཞིང་རྒྱས་པར་བྱེད་དོ༔ ཨི་ཏི༔ རྒྱ་རྒྱ་རྒྱ༔

གསང་བ་ཆེན་པོའི་རྟགས་ཀྱི་ཡི་གེ།

གསང་བ་ཆེན་པོའི་རྟགས་ཀྱི་ཡི་གེ་བཞུགས་སོ། །༼ཕྲ་ཡིག༽

རྒྱ་གར་སྐད་དུ༔ ཧེ་དུ་ཝཪྞ་གྷུ་ཧྱ་ནཱ་མ༔ བོད་སྐད་དུ༔ རྟགས་ཀྱི་ཡི་གེ་གསང་བ་ཞེས་བྱ་བ༔ བཅོམ་ལྡན་འདས་དུས་ངེས་པའི་རྒྱལ་པོ་ཉིད་ལ་ཕྱག་འཚལ་ལོ༔ སངས་རྒྱས་རྣམས་ཀྱིས་ངེས་པའི་དོན་གསུངས་པ༔ སྙིང་པོ་ངེས་པའི་བཀའ་གསང་མན་ངག་ནི༔ གཞན་དང་མི་འདྲ་མན་ངག་གསེར་གྱི་རྩེ༔ སྙིང་པོ་ཡོངས་བསྡུས་འབྲས་བུའི་བཅུད་ཕྱུངས་པའི༔ ཐབས་ཆེན་གསང་བའི་ཡང་ཞུན་འབྲས་བུ་རྣམས༔ ཉམས་བླངས་ཕྱོགས་གཅིག་བསྡེབས་ནས་འདི་ཕྱུངས་པ༔ མང་པོ་ལས་ནི་ཡི་གེ་ཉུང་བསྡུས་ནས༔ སྙིང་ཕྱུངས་ལག་མཐིལ་དག་ཏུ་བསྟན་ནས་ནི༔ མཆོག་གི་ཡང་མཆོག་ཟངས་ཀྱི་ཡི་གེ་ཅན༔ འདི་དོན་ཉམས་སུ་ལོངས་དང་སྐལ་ལྡན་བུ༔ རང་བཞིན་ཡང་ནས་ཡང་བལྟས་པས༔ དེ་ཡི་འབྲས་བུའི་དུས་ཚོད་ངེས་བཟུང་ནས༔ ཡིད་ཆེས་རྟགས་ནི་འཕྲང་བསྒུགས་དགྲ་དང་འདྲ༔ མི་འགྱུར་བཟུང་བའི་ས་མེད་ལམ་དུ་བྱིན༔ ཡེ་ཤེས་རྣམས་ཀྱི་རང་རྟགས་ལམ་དུ་སྟོན༔ ས་བོན་ལས་ནི་མྱུ་གུ་ལོ་འབྲས་རྣམས༔ རིམ་གྱིས་དུས་ཚོད་ངེས་པར་འབྱུང་བ་བཞིན༔ གོམས་པ་ལས་ནི་རྟགས་རྣམས་འབྱུང་བ་སྟེ༔ རྗེས་འཛིན་དད་ཅན་ཡིད་ཆེས་བསྐྱེད་པའི་ཕྱིར༔ ལམ་གྱི་ཁྲིད་ཀ་དུས་ཚོད་ངེས་པའི་རྟགས༔ ཅི་ལྟར་འབྱུང་བའི་རྟགས་རྣམས་གསལ་བར་ནི༔ ང་ཡིས་འབྲིའོ་འདི་ལ་ཡིད་ཆེས་གྱིས༔ འབྲས་བུའི་རྟགས་ནི་འགྱུར་བ་མ་ཡིན་ནོ༔ རྒྱུ་ཡི་རྟགས་ནི་འགྱུར་ཞིང་བརྟན་པ་མེད༔ ལམ་གྱི་རྟགས་ནི་འདི་ལྟར་ངེས་པ་མེད༔ དེ་ཡི་ཕྱིར་ན་རྟགས་ཀྱི་ཡི་གེ་འདི༔ འགྱུར་མེད་སྲ་བའི་གཟེར་ཆེན་བཏབ་པ་བཞིན༔ འཁྲུལ་མེད་

སྙིང་གི་ཐོག་ཏུ་ཕེབས་པ་འོ༔ ཀྱེ་མ་རྗེས་སུ་འཇུག་པ་རིགས་ཀྱི་བུ་རྣམས་ཀྱིས་འདི་ལྟར་ཡིད་ཆེས་པར་བྱའོ༔ རྒྱུད་ལུང་བསམ་གྱིས་མི་ཁྱབ་པ་གསུངས་ཀྱང་ཉམས་སུ་ལེན་པའི་སྐལ་ལྡན་རྣམས་ཀྱིས་འདི་ལྟར་རིག་པར་བྱའོ༔ འཁྲུལ་པ་རང་གིས་རང་གཟིངས་པར་འགྱུར་བའི་རྟགས་དང་གནད་ཐོག་ཏུ་མ་ཕེབས་པ་ངེས་པ་མེད་པའི་རྟགས་དང་རིག་པ་མངོན་སུམ་དུ་མ་ཟིན་ན་བདུད་ཀྱི་བར་ཆོད་ཀྱི་རྟགས་དང་༔ མངོན་སུམ་རང་ཐོག་ཏུ་ཕེབས་པས་འགྱུར་བའི་ས་མེད་པ་མི་འགྱུར་བའི་རྟགས་དང་བཞིར་རིག་པར་བྱའོ༔ འགྱུར་བའི་རྟགས་ནི་ཉམས་སུ་མ་བླངས་པའི་སྐྱེས་བུ་རྣམས་ལ་ཡང་འབྱུང་བ་ཡོད་པས་འགྱུར་ཏེ་དོན་མི་འབྱུང་༔ བྱ་དང་རི་དགས་དུད་འགྲོ་རྣམས་ལ་ཡང་འབྱུང་བ་ཡོད་དེ༔ འདི་ནི་རྒྱུའི་རྟགས་ཞེས་བྱ་སྟེ་དོན་མི་འབྱུང་ངེས་པ་ཡིན་ནོ༔ ངེས་པ་མེད་པའི་རྟགས་བརྒྱ་དང་བཅུ་དྲུག་ཡོད་དེ༔ སྐུ་གདུང་བར་བ་ལ་སོགས་པའི་རྒྱུད་ཀྱི་ནང་ནས་སྟོན་པ་ཡིན་ཏེ་འདིར་ཡི་གེ་མང་བས་མ་བྲིས་སོ༔ དེ་ནི་ལམ་གྱི་རྟགས་ཡིན་པས་འགྱུར་མི་འགྱུར་ཆ་མེད་པ་ཡིན་ནོ༔ བར་ཆོད་ཀྱི་རྟགས་ནི༔ ལུས་སྣ་ཚོགས་སུ་སྤྲུལ་པ་ལ་སོགས་པ་དང་༔ ལུས་ལ་འོད་ཡོད་པ་ལ་སོགས་པ་དང་༔ དགྲ་དང་གཞན་ལ་ནུས་པ་འཇུག་པ་ལ་སོགས་པ་འཇིག་རྟེན་པའི་ཡིད་དང་མཐུན་པ་རྣམས་ཡིན་ནོ༔ དེ་ཡང་རྟགས་གསུམ་པོ་དེ་གང་ལ་བྱུང་བའི་སྐྱེས་བུ་ལ་གནད་ཀྱི་མན་ངག་གསུམ་པོ་འདི་དང་མི་ལྡན་ན་དོན་མེད་རྐྱང་པ་ཡིན་ནོ༔ འགྱུར་བའི་རྟགས་བྱུང་བའི་སྐྱེས་བུ་དེས༔ སྐབས་སུ་ཆུའི་དཀྱིལ་དུ་བསྡད་ཅིད་མཇིང་པ་གཉིས་ཤིང་གི་བྱང་བུ་སོར་བཅུ་དྲུག་པའི་བར་དུ་ལྟེམས་ཏེ༔ ལུས་ལ་

ཙནྡན་གྱི་མར་ཁུ་རྟག་ཏུ་བྱུགས་ནས་ཕྱི་ནང་ཐམས་ཅད་དངོས་པོ་རགས་པར་བསྒོམས་ན་འབྲས་བུ་ཆུད་མི་ཟོས་པ་ཡིན་ནོ༔ རྟགས་ནི་དེ་དག་ལ་མན་ངག་དེ་ལྟ་བུ་མེད་ན་ངལ་བ་དོན་མེད་ཡིན་ནོ༔ དེ་ལྟ་བུ་བྱུང་བའི་མི་དེ་ལ་ནི་གཞན་གྱི་མན་ངག་དེ་ཉིད་བྱས་ན་ཡང་འབྲས་བུ་ཆུད་མི་ཟའོ༔ འདི་དག་ནི་བྱེ་བྲག་གི་མན་ངག་རྣམས་ནས་བཤད་པ་ཡོད་དོ་འདིར་དགོས་པ་མེད་ཅིང་ཡི་གེ་མང་པས་མ་བྲིས་སོ༔ འདི་ལྟར་འགྱུར་བའི་རྟགས་བརྒྱ་དང་ལྔ་ཡོད་པ་ཡིན་ནོ༔ ངེས་པ་མེད་པའི་རྟགས་བྱུང་བའི་སྐྱེས་བུས་ནི༔ ལུས་ལ་བསིལ་བའི་གོས་གྱོན་ཅིང་ཁ་ཟས་ཀྱང་བསིལ་བར་བཟའ༔ ངག་ཏུ་ཨའི་རྣམ་པ་བཟླས་ཤིང་སེམས་ཀྱིས་ནམ་མཁའ་ལ་སངས་རྒྱས་ཀྱི་སྐུ་མང་པོ་བསྒོམས་པས་ཕལ་ཆེར་ངེས་པ་ཅན་གྱི་རྟགས་སུ་འགྲོ་བ་ཡིན་ནོ༔ བྱེ་བྲག་གི་མན་ངག་བརྒྱ་དང་བཅུ་དྲུག་པོ་ནི་འདིར་དགོས་པ་མེད་པས་མ་བྲིས༔ མན་ངག་འདི་ལྟ་བུ་དང་མི་ལྡན་ན་ངལ་བ་དོན་མེད་ཡིན་པས་དེའི་ཕྱིར་ན་གནད་ཀྱི་མན་ངག་འདི་ལྟ་བུ་གཅེས་སོ༔ བར་ཆོད་ཀྱི་རྟགས་ལ་བྱེ་བྲག་གི་མན་ངག་རབ་ཏུ་གཅེས་པ་ཡིན་ནོ༔ སྐྱེས་བུ་གང་དག་ཉམས་སུ་བླངས་ཀྱང་རུང་ལ་མ་བླངས་ཀྱང་རུང་སྟེ༔ དེའི་ལུས་སྣ་ཚོགས་སུ་སྤྲུལ་ནུས་པ་འབྱུང་ཡང་བདུད་ཀྱིས་བྱིན་གྱིས་བརླབས་པ་ཡིན་ཏེ༔ དེ་ཉིད་རབ་ཏུ་བརྟགས་ན་གཟུགས་བརྙན་གཉིས་པར་སྣང་བས༔ དེ་ལྟར་གཉིས་སུ་མ་མཐོང་ན་ལུས་གུ་གུལ་ནག་པོ་དང་ནིམ་པའི་ཆུས་མགོ་མཇུག་ལ་བྱུག་ཅིང་ཡན་ལག་ལྔ་ལ་ལྡེར་སོ་རྙིང་པའི་ས་འདག་གིས་བྱུགས་ན་དེའི་ལུས་ཁྲ་བོར་རོང་པ་ཡིན་ཏེ༔ དེ་ལྟར་བྱུང་ན་ལུས་ལ་དེ་བཞིན་གཤེགས་པའི་སྐུ་གཟུགས་ཀྱི་ཁྲུས་ཆབ་ཀྱིས་བཀྲུ་ཞིང་ངག་ཏུ་ཕཊ་ཀྱི་རྣམ་པ་བཟླ་ཞིང་སེམས་ཀྱིས་ཕྱི་ནང་ཐམས་ཅད་སྟོང་པ་ཉིད་དུ་བསྒོམ་པ་ནི་མན་ངག་ཡིན་ནོ༔

འདི་ལྟ་བུའི་མན་ངག་དང་མི་ལྡན་ན་ངལ་བ་དོན་མེད་ཡིན༔ གལ་ཏེ་གོང་རྟགས་མེད་ན་ཡང་དག་པ་ཡིན་ནོ༔ འོད་ནི་དཀར་བ་གླེག་གླེག་པོའམ་དམར་བྲེང་བྲང་པའམ༔ སེར་ལྷབ་ལྷབ་རྣམས་བར་ཆད་ཀྱི་རྟགས་ཡིན༔ ཡང་དག་པའི་རྟགས་ནི་ཁ་དོག་ལྔ་རང་གསལ་དུ་ཡོད་པ་ཡིན་ནོ༔ དེ་ལྟར་བྱུང་བའི་སྐྱེས་བུ་ལ་ནི་ལུས་གླང་པོ་ཆེ་ལྟར་བྱ༔ ངག་ཧཱུྃ་གི་རྣམ་པ་རྣམས་བཟླས༔ སེམས་ནི་ནམ་མཁའི་དཀྱིལ་དུ་གཏད་ཅིང་བསྒོམ་མོ༔ མན་ངག་འདི་ལྟ་བུ་དང་མི་ལྡན་ན་དོན་མེད་འཆལ་བ་ཡིན་ནོ༔ སྒྲ་ནི་སྟེང་གི་ཕྱོགས་སུ་བཤད་བའི་སྒྲ་བྱུང་ན་ཡང་དག་པའི་སྒྲ་བྱུང་བ་ཡིན་ལྷག་མ་གང་ཡང་བར་ཆད་ཡིན་པས༔ དེ་ལ་ནི་ལུས་སྐྱེས་བུའི་བརྐྱང་ཐབས་བྱ༔ ངག་ཏུ་ཨིའི་རྣམ་པ་རྣམས་བཟླས་ཤིང་སེམས་ཀྱིས་ལྷའི་སྐུ་དཔག་ཏུ་མེད་པ་རྣམས་བསྒོམ་པར་བྱའོ༔ ཡང་རྟེན་ཅིང་འབྲེལ་པ་ཟབ་མོ་དང་གསང་སྔགས་ལ་མ་བརྟེན་པའི་བྱིན་བརླབས་འབྱུང་བ་ཡང་ཡོད་དོ༔ འདི་ལ་ཆོས་སྣ་ཚོགས་ཀྱི་ཚིག་རྣམས་རང་རྡོལ་དུ་འབྱུང་བ་ཡིན་ཏེ༔ དེ་ཀུན་ལ་ཡང་ལུས་ནི་སྟག་མོ་མཆོངས་པ་ལྟར་བྱ་བ་དང་༔ ༔ ངག་ཏུ་ཨེའི་རྣམ་པ་རྣམས་བཟླས་པ་དང་༔ སེམས་སྙིང་གི་དཀྱིལ་དུ་སྦས་ཏེ་བསྒོམ་པར་བྱའོ༔ ཡང་ན་འབྱུང་བ་བཞིའི་སྒྲ་དོན་ན་མ་བསླབས་པར་མི་མ་ཡིན་པའི་གཟུགས་སྣ་ཚོགས་མཐོང་ཞིང་དེ་དག་གི་བརྡའ་སྐད་གོ་བ་དག་འབྱུང་སྟེ༔ དེ་དག་ལ་ལུས་འདབ་ཆགས་ལྡིང་བ་ལྟར་བྱ་ཞིང་༔ ངག་ཏུ་ཨུའི་རྣམ་པ་རྣམས་བཟླས་པ་དང་༔ སེམས་ཀྱིས་ཕྱི་ནང་ཐམས་ཅད་སྟོང་པ་ཉིད་དུ་བསྒོམ་པར་བྱའོ༔ ཡང་མཁའ་འགྲོ་ལ་སོགས་པའི་ཆ་བྱད་ཀྱིས་ལུང་སྟོན་པ་དང་ཆོས་སྨྲ་བ་དག་སྐབས་སུ་འོང་ཞིང་སྐབས་སུ་མི་སྣང་ལ་གཟུགས་དེ་ཅིག་

ཅར་སྣང་ལ་རྟག་ཏུ་སྤྱོད་ཡུལ་ཐམས་ཅད་དུ་སྣང་བ་མ་ཡིན༔ དེ་ལ་ལུས་ཁྲོ་བོའི་འགྱིངས་ཐབས་སུ་བྱ་ཞིང་ངག་ཏུ་ཧྲཱིཿརྣམས་བཟླས༔ སེམས་ཀྱིས་ལྷའི་སྐུ་བསམ་གྱིས་མི་ཁྱབ་པ་རྣམས་རྟག་ཏུ་བསྒོམ་ཞིང་དེ་ཉིད་སྤྲོ་བསྡུའི་རྣམ་པ་ལྟར་བྱས་ན་མན་ངག་དམ་པར་འགྱུར་བ་ཡིན་ནོ༔ མན་ངག་དེ་ལྟ་བུ་དང་མི་ལྡན་པ་ལ་ནི་བར་དུ་གཅོད་པའམ་བདུད་ཀྱིས་བསླུས་ཏེ༔ ཁྱད་པར་དུ་ཡི་དྭགས་ཀྱི་སྐྱེ་གནས་སུ༔ སེམས་ཀྱི་སྣང་བར་འགྱུར་བ་ཡིན་ནོ༔ དེས་ན་གནད་ཀྱི་མན་ངག་དེ་ལྟ་བུ་རབ་ཏུ་གཅེས་སོ༔ དེ་ཡང་ཐེག་པ་ཐུན་མོང་པ་རྣམས་ལ་རྟགས་འགྱུར་བ་ཡིན་ལ་རིག་པ་མངོན་སུམ་གྱི་དོན་མཐོང་ཞིང་ཉམས་སུ་ལེན་པའི་སྐལ་ལྡན་རྣམས་ལ་དེ་ལྟར་འབྱུང་བ་མ་ཡིན་ནོ༔ དེ་དངོས་པོ་མཐོང་བའི་ཁྱད་པར་གྱིས་རབ་ཏུ་བྱས་པའོ༔ མི་འགྱུར་བའི་རྟགས་ནི་གསུམ་དུ་རིག་པར་བྱ་སྟེ་རང་གིས་མཐོང་ལ་གཞན་གྱིས་མི་མཐོང་བའི་རྟགས་དང་༔ གཞན་གྱིས་མངོན་ལ་རང་གིས་མི་མངོན་པའི་རྟགས་དང་༔ རང་གཞན་གཉིས་ཀས་མཐོང་བའི་རྟགས་དང་གསུམ་དུ་རིག་པར་བྱའོ༔ དེ་ལ་གཞན་གྱིས་མཐོང་བའི་རྟགས་ནི་འདི་རྣམས་ཡིན་ཏེ་འདི་དག་ནི་རིག་པ་མངོན་སུམ་གྱི་རང་གནད་གཟིར་བ་ཙམ་ལས་འབྱུང་བ་མ་ཡིན་ནོ༔ ལུས་སྣུམ་ཞིང་སྐྲ་དཀར་དང་གཉེར་མ་མེད་པ་རྣམས་དང་༔ སྒྲ་དང་སེན་མོ་སྐྱེ་བ་མེད་ཅིང་ལུས་ལ་སྲོག་ཆགས་སྐྱེ་མི་སྲིད་པ་རྣམས་དང་༔ རབ་ཏུ་མགྱོགས་ཤིང་ལུས་ལ་སངས་རྒྱས་ཀྱི་ཕྱག་མཚན་གྱི་རྟགས་ཡོད་པ་དང་༔ ནམ་མཁའ་ལ་འཕུར་ཞིང་ཚུལ་བྱིང་བ་ལ་མེད་པ་དང་༔ རི་བྲག་རྣམས་ལ་ཟང་ཐལ་ཞིང་འབྱུང་བས་མི་ཚུགས་པ་རྣམས་ནི་ལུས་རྟགས་གཞན་གྱིས་མཐོང་བ་ཡིན་ནོ༔ ལུས་རྟགས་རང་གིས་

ཚོར་ལ་གཞན་གྱིས་མི་ཚོར་བ་རྣམས་ནི༔ ལུས་ཤིང་བལ་གྱི་འདབ་མ་ལྟར་ཡང་བ་དང་༔ དེ་ནས་ཞག་ལྔ་ན་དབུགས་འགྱུ་བ་མི་ཚོར་བ་དང་༔ དེ་ནས་ཞག་བཅུ་གཅིག་ན་དངོས་པོ་གང་ལ་བལྟས་པ་འཇུག་ནུས་པ་དང་༔ དེ་ནས་ཞག་ཉི་ཤུ་རྩ་གཅིག་ན་རང་གི་ལུས་ཟང་ཐལ་དུ་མཐོང་བ་དག་འབྱུང་བ་ཡིན་ནོ༔ རང་གཞན་གཉིས་ཀས་མཐོང་བ་ལ་ནི་ཡིད་ལ་ཇི་ལྟར་འབྱུས་པའི་རྟེན་འབྲེལ་གྱིས་ཕན་ཐོག་པ་དང་༔ ལུས་ལ་ཤ་མཚན་ངོ་མཚར་ཅན་འབྱུང་བ་དང་༔ ཆུ་ལ་བྱིང་བ་མེད་པ་རྣམས་ཡིན༔ དེ་ནི་ལུས་ཀྱི་རྟགས་རྣམས་ཏེ་མངོན་སུམ་ལུས་ཀྱི་གནད་གཟིར་བ་ཙམ་ལས་འབྱུང་བ་ཡིན་ནོ༔ ཕྱིིའི་རྟགས་འདི་དག་ཀྱང་མང་དུ་ཡོད་ཀྱང་ཕར་ཆེར་ངེས་པ་མེད་པ་རྣམས་ཡིན་ནོ༔ གལ་ཏེ་ངེས་པ་ཅན་འགའ་ཞིག་ནི་རང་གིས་མི་མངོན་པའི་ཁོངས་སུ་འདུ་བ་ཡིན་ནོ༔ དེ་ནི་ལུས་ཀྱི་རྟགས་སོ༔ གཞན་གྱིས་མཐོང་བའི་ངག་གི་རྟགས་ནི༔ ཚིག་ཅི་སྨྲས་པ་ཐམས་ཅད་གཞན་ལ་ཕན་པ་དང་༔ འཁྲུལ་བའི་ཚིག་མི་འབྱུང་བ་དང་༔ དེ་ནས་ཡུན་འགའ་ན་ལྐུགས་བ་ལྟ་བུར་འགྱུར་བ་དང་༔ དེ་ནས་ཡུན་འགའ་ན་ཆོས་སྣ་ཚོགས་ཀྱི་ཚིག་རང་རྡོལ་བ་འདི་དག་ནི་གཞན་གྱིས་ཚོར་བའི་ངག་རྟགས་སོ༔ རང་གིས་ཚོར་བ་ནི༔ གཏམ་རྒྱུད་སྣ་ཚོགས་ཤེས་པ་དང་༔ དེ་ནས་ཞག་དགུ་ན་སྒྲ་མི་མཐུན་པ་སྣ་ཚོགས་ཤེས་པ་དང་༔ དེ་ནས་ཟླ་བ་ཕྱེད་ན་གྲུབ་མཐའི་ཆོས་སྣ་ཚོགས་ཤེས་པ་དང་༔ དེ་ནས་ཞག་བཅུ་གཅིག་ན་ཡིད་ཆོས་འཛིན་པའི་ལྟ་བ་སྣ་ཚོགས་ཤེས་པ་དང་༔ དེ་ནས་ཞག་ཉི་ཤུ་རྩ་གཅིག་ན་ལྷ་ལ་སོགས་པའི་རིགས་དྲུག་གི་སྐད་ཤེས་པ་དང་༔ དེ་ནས་ཟླ་བ་ཕྱེད་ན་བེམ་པོ་

རྣམས་ཀྱི་སྐད་ཤེས་པ་དང་༔ དེ་ནས་ཞག་བདུན་ནས་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གསུང་ཉི་མ་གསུམ་དུ་རིམ་པ་བཞིན་དུ་ཤེས་པ་ནི་ངག་གི་རྟགས་སོ༔ ད་ནི་རང་གཞན་གཉིས་ཀྱིས་མཐོང་བའི་རྟགས་ནི༔ དེ་ཡང་གཞན་གྱིས་མཐོང་བ་ལ་ཆུ་ལ་བྱིང་པ་མེད་པ་དང་༔ ནམ་མཁའ་ལ་འཕུར་བ་དང་༔ འདི་གཉིས་ནི་སེམས་ཀྱི་རྟགས་ལུས་ལ་ཤར་བ་ཡིན་ནོ༔ རང་གིས་མཐོང་ཞིང་ཚོར་བ་ནི༔ སྙིང་རྗེ་ཆེན་པོ་རྒྱུན་དུ་སྐྱེ་བ་དང་༔ དེ་ནས་ཟླ་བ་གཅིག་ན་གང་དུ་བསམས་པའི་ཡུལ་དེར་ཕྱིན་པ་ནི་སེམས་རྟགས་ལུས་ལ་ཤར་བ་ཡིན་ཏེ༔ དེ་ནས་ཟླ་བ་དྲུག་ན་མངོན་ཤེས་དྲུག་འཆར་བ་ནི་རང་གིས་མཐོང་བའི་སེམས་རྟགས་ཡིན་ནོ༔ དེ་དག་ནི་ཕྱིའི་རྟགས་ཞེས་བྱ་སྟེ་རྒྱུན་དུ་སྣང་བ་མ་ཡིན་པས་གཅིག་ནུབ་ཅིང་གཅིག་ཤར་བ་ཡིན་ནོ༔ གཞན་གྱིས་མཐོང་བའི་རྟགས་སུ་ནི༔ ལུས་ཀྱི་རྟགས་སུ་པད་མ་དང་འཁོར་ལོ་དང་རྡོ་རྗེ་ལ་སོགས་པ་རྣམས་གཞན་གྱིས་མཐོང་བ་དང་༔ སོའུ་སྐྱེ་བ་འོང་པ་དང་༔ སྐྲ་མདོག་དཀར་པོ་ལས་ནག་པོར་འགྱུར་ཞིང་གཉེར་མ་མེད་པ་དང་༔ ལུས་ཀྱི་ཤུན་པ་རྣམས་སྤྲུལ་གྱི་པགས་པ་བརྗེས་པ་ལྟར་འགྱུར་བ་དང་༔ ལུས་པོ་བྱིས་པ་ལོ་བརྒྱད་པའི་རྣམ་པར་ལྟར་འགྱུར་བ་དང་༔ འདི་རྣམས་ལུས་ཀྱི་རྟགས་ཡིན་ནོ༔ ངག་ནི་འཇམ་པ་དང་༔ ལྷང་ལྷང་པོ་དང་༔ གསོང་པོ་དང་༔ དྲང་པོ་དང་༔ རང་བརྟོལ་བ་དེ་དག་ནི་ངག་གི་རྟགས་ཡིན་ནོ༔ སེམས་ནི་ཟས་མི་འདོད་པ་དང་༔ གོས་མི་དགོས་པ་དང་༔ གཉིས་ནི་སེམས་རྟགས་ལུས་ལ་ཤར་བ་ཡིན་ནོ༔ མཉམ་བཞག་ལ་ཞག་དང་ཟླ་བའི་བར་དུ་གནས་པ་དང་རླུང་གར་འདོད་པར་འདྲོངས་པ་ནི་

གཞན་གྱིས་མཐོང་བའི་རྟགས་ཡིན་ནོ༔ འདི་དག་ཀྱང་རིམ་པས་འབྱུང་བ་ཡིན་ནོ༔ དེ་དག་ནི་རྟགས་ཡིན་ཏེ་རིམས་ཀྱིས་སྣང་བ་ཡིན་ནོ༔ རང་གིས་མཐོང་བའི་རྟགས་ནི་རྣམ་པ་གཉིས་སུ་རིག་པར་བྱ་སྟེ༔ སྔོན་དུ་ལུས་ངག་ཡིད་ཀྱིས་སྤྱོད་པ་བྱས་པའི་རྟགས་དང་༔ ཉམས་སུ་བླངས་པ་དངོས་གཞི་ཡིན་ནོ༔ དེ་ལ་སྔོན་དུ་ལུས་ངག་ཡིད་ཀྱི་རྟགས་ནི༔ ལུས་ངག་གི་ཞེན་པ་མ་ལོག་ན་སངས་རྒྱས་ཀྱི་འབྲས་བུ་ཐོབ་པའི་རེ་བ་གཏན་མེད་དོ༔ དེའི་ཕྱིར་ན་ལུས་ངག་ཡིད་གསུམ་གྱི་རུ་ཤན་འབྱེད་པའི་སྤྱོད་པ་བརྩམ་དགོས་ཏེ༔ དེ་ཉིད་དུ་ཤན་ཕྱེད་པའི་རྟགས་ནི༔ ལུས་ཀྱི་རྟགས་སུ་སྤྱོད་པ་བྱས་པའི་འོག་ཏུ་གཞན་གྱིས་གསོད་པའི་གཤེད་མ་བྱུང་ཡང་དེ་ལ་འཇིགས་པའི་སེམས་མི་འབྱུང་བའོ༔ དེ་ནས་ཞག་དགུ་ནས༔ ལུས་ཀྱི་བྱ་བ་དགེ་བ་ལ་སོགས་པ་གང་ལ་ཡང་མི་འཇུག་པ་དང་༔ དེ་ནས་ཞག་བཅུ་གཅིག་ན་འདོད་ཆགས་ཀྱི་ཞེན་པ་སྐྱེ་བ་མེད་པ་ཡང་འབྱུང་ངོ་༔ དེ་ནས་ཞག་ཉི་ཤུ་རྩ་ལྔ་ལ་རང་གི་ལུས་ཡོད་དུ་མི་ཚོར་བ་འོང་ངོ་༔ དེ་རྣམས་ནི་ལུས་ཀྱི་ཞེན་པ་ལོག་པའི་རྟགས་ཡིན་ནོ༔ ངག་གི་ཞེན་པ་ལོག་པའི་རྟགས་ནི༔ གཞན་གྱིས་བརྗོད་པའི་ཚིག་ལ་ཞེན་ཅིང་གཟུང་བ་དང་བྲལ་བ་དང་༔ དེ་ནས་ཞག་ལྔ་ན་རང་གི་འཁྲུལ་བའི་རྟགས་རྣམས་དག་པ་དང་༔ དེ་ནས་ཞག་བཅུ་ནས་སྔར་མ་ཐོས་པའི་ཆོས་ཀྱི་གཏམ་རྣམས་ཀྱི་ཚིག་རང་བྱུང་བ་དང་༔ དེ་ནས་ཞག་བདུན་ན་ངོ་མཚར་ཅན་གྱི་གཏམ་རྣམས་ཤེས་པ་དང་༔ དེ་ནས་ཞག་བཅུ་དགུ་ནས་སྔར་མ་མཐོང་བའི་གཞུང་གི་ཚིག་རྣམས་འབྱུང་བ་དང་༔ དེ་ཀུན་གྱིས་ཡིད་དཔྱོད་ཀྱི་དོན་རྣམས་འཆར་བ་ནི་ངག་གི་

ཞེན་པ་ལོག་པའི་རྟགས་རྣམས་སོ༔ དེ་ནས་སེམས་ཀྱི་སྤྱོད་པ་བརྩམས་པས་སེམས་རུ་ཤན་ཕྱེད་པའི་རྟགས་ནི༔ སྔར་ཞེན་པའི་བྱུང་ཚོར་དང་ཕྱི་མ་དང་ད་ལྟར་གི་བྱུང་ཚོར་རྣམས་འགག་པ་དང་༔ དེ་ནས་ཟླ་བ་ཕྱེད་ན་ཕྱི་ནང་གི་འཁོར་འདས་ཀྱི་ཞེན་པ་རང་ལོག་པ་དང་༔ དེ་ནས་ཞག་དགུ་ན་དབུགས་ཕྱི་ནང་དུ་འགྱུར་མི་ནུས་པ་དང་༔ དེ་ནས་ཞག་གསུམ་ན་གཞན་གྱིས་གནོད་པ་ཅི་བྱས་ཀྱང་སེམས་ཁྲོ་བ་མེད་པ་དང་༔ དེ་ནས་ཉི་མ་གཉིས་ནས་འཁྲུལ་པའི་སེམས་མི་འབྱུང་བ་དང་༔ དེ་རྣམས་ནི་སེམས་ཀྱི་ཞེན་པ་ལོག་པའི་རྟགས་རྣམས་ཡིན་ནོ༔ དེ་རྣམས་ནི་ལུས་ངག་ཡིད་གསུམ་སྔོན་དུ་འབྱུང་བའི་རྟགས་ཡིན་ནོ༔ དེ་དག་ནི་དོན་གྱི་ཐ་མལ་པའི་རྟགས་ཞེས་བྱ་སྟེ་སངས་རྒྱ་བ་ལ་རྡུལ་ཙམ་ཡང་ཕན་པ་མེད་དོ༔ ཡང་དག་པའི་རྟགས་མཆོག་ཏུ་གྱུར་པ་རིན་པོ་ཆེའི་རྟགས་མ་ཡིན་ཞེས་བྱ༔ རིག་པ་མངོན་སུམ་གྱི་རྟགས་རང་ལ་བྱུང་བ་མངོན་སུམ་དུ་སྣང་བའི་རྟགས་བྱ་བ་འདི་དག་ནི་ཉམས་སུ་བླངས་པ་དངོས་གཞིའི་རྟགས་རང་གིས་མཐོང་ཞིང་གཞན་གྱིས་མཐོང་བ་མེད་པའི་རྟགས་འདི་དག་རྣམས་ཡིན་ནོ༔ དེ་ཡང་ཐོག་མར་ལུས་ཀྱི་གནད་མ་གཅུན་ན་སྐུ་གསུམ་སྣང་བ་ལམ་དུ་མི་འཆར་བས་ལུས་ཀྱི་གནད་རབ་ཏུ་གཅེས་སོ༔ དེ་ནས་མིག་གི་གཟིགས་སྟངས་མ་གཟིར་ན་སྣང་བ་གོང་དུ་མི་འཕེལ་བས་མིག་གིས་ལྟ་བ་གལ་ཆེའོ༔ དེ་ལ་དེ་ལྟར་བྱས་པའི་སྐྱེས་བུ་ལ་འདི་དག་རྣམས་ལམ་དུ་སྣང་བ་ཡིན་ཏེ་ཉམས་སུ་བླངས་པ་དངོས་གཞི་ལ་ཞུགས་ནས༔ དབང་པོ་རབ་ཟླ་བ་ཕྱེད༔ འབྲིང་གསུམ༔ ཐ་མ་ཟླ་བ་བཅུ་ན༔ ཐིག་ལེ་སྟོང་པའི་སྒྲོན་མ་ཉིད་སྐྱེས་བུའི་མཐེབ་མཛུབ་ཀྱིས་རྩོལ་བ་མ་བྱས་པར་སྣང་བ་ཡིན་ནོ༔ དེ་ཡང་རེས་སྣང་རེས་མི་སྣང་བ་ཡིན་ནོ༔ དེ་

ཡང་ཟླ་བ་བདུན་དང་༔ བཅུ་གཅིག་ན་དབྱིངས་རྣམ་པར་དག་པའི་སྒྲོན་མ་ཉིད་སྨིན་མཚམས་ནས་བྲལ་ཏེ་སྣང་བ་ཡིན་ཏེ༔ དེ་ཡང་ནམ་མཁའ་དྭངས་པ་ལ་ཉི་མའི་ཕྱོགས་ཙམ་གཏད་དེ་ཉམས་སུ་བླངས་པས་ཐོག་མར་དཀར་པོ་ལང་ལོང་ལས་འོད་ལྔར་སྣང་བ་དུམ་བུར་སྣང་བ་ཡིན་ནོ༔ དེ་ནས་དབང་པོའི་ཁྱད་ཀྱིས་ཞག་གསུམ་མམ་ལྔའམ་བདུན་ན་འོད་ལྔའི་སྣང་བ་གྱེན་ལ་འགྲེང་པ་དང་༔ རྩིབས་ལ་ཤར་བ་དང་༔ མདུང་རྩེའི་རྣམ་པ་ལྟ་བུར་རེ་ལྡེ་ཙམ་དུ་སྣང་བ་ཡིན་ནོ༔ དེ་ནས་ཞག་དགུ་དང་ཟླ་བ་ཕྱེད་དང་ཉི་ཤུ་རྩ་གཅིག་ན་དབྱིངས་དེ་ཉིད་ཀྱང་ཁ་དོག་སྣ་ཚོགས་སུ་སྣང་བ་ཡིན་ནོ༔ དེ་ནས་ཟླ་བ་དགུ་དང་བཅུ་དང་བཅོ་ལྔའམ་བཅོ་བརྒྱད་ན་དབྱིངས་ཀྱི་སྣང་བ་མཐོང་མ་ཐག་ཏུ་དཀར་པོ་ལང་ལོང་དང་བན་བུན་ལས་ཡུལ་གྲུ་ཙམ་དུ་སྣང་བ་ཡིན་ནོ༔ དེ་ནས་ཞག་བཅོ་བརྒྱད་དང་ཉི་ཤུ་རྩ་གཅིག་དང་སུམ་ཅུ་རྩ་གཉིས་ན་དབྱིངས་དང་རིག་པའི་ཉིན་མོ་མཚན་མོ་མེད་པར་སྣང་བ་ཡིན་ནོ༔ དེ་དག་ནི་དབྱིངས་ཀྱི་འཕེལ་ཡིན་ནོ༔ དེ་ནས་ཟླ་བ་གསུམ་དང་དྲུག་དང་བཅུ་གཉིས་ན་སྣང་བ་ཐིག་ལེར་སྣང་བ་ཡིན་ཏེ་ཉུང་འབྲུའམ་སྲན་མའི་འབྲུ་གུ་ཙམ་དུ་སྣང་སྟེ༔ འདི་དག་གི་དུས་ན་འགྲོ་འོང་དུ་སྣང་བ་ཡིན་ནོ༔ དེའི་ཚེ་ཕྱི་ལུས་ངག་ཀྱང་འདི་ལྟ་བུའི་རྟགས་དང་ལྡན་པའི་ཕྱིར་སྣང་བ་ཡིན་ཏེ༔ བྱ་བ་གཞན་གང་ལ་ཡང་འཇུག་མི་འདོད་པ་དང་སེམས་ཅན་རྣམས་ལ་སྙིང་རྗེ་ཆེན་པོ་རང་བཞིན་གྱིས་འཆར་བ་ཡིན་ནོ༔ དེ་ནས་ཡང་དབང་པོའི་ཁྱད་པར་གྱིས་ཟླ་བ་བདུན་དང་ཟླ་བ་དགུ་དང་ཟླ་བ་བཅུ་བདུན་ན་རང་གི་མདུན་ན་མཐོ་ཕྱི་རྣམས་སུ་མེ་ལོང་གི་རྣམ་པ་ལྟ་བུ་འཆར་ཞིང་འོད་ཟེར་ནི་རྩིབས་འཁྱུགས་སུ་འཆར་བ་ཡིན་ནོ༔ དེ་དག་ནི་རིག་པ་ཟིན་པའི་རྟགས་ཡིན་ནོ༔ དེའི་ཚེ་ཕྱི་ལུས་ངག་ལ་ཡང་རྟགས་འདི་རྣམས་ལྟ་བུ་འབྱུང་བ་ཡིན་ནོ༔ ལུས་

ཡང་ཞིང་ལུས་ཀྱི་སྲོག་ཆགས་རྣམས་མི་འབྱུང་བ་དང་ལས་དགེ་སྡིག་གི་རྣམ་པ་གང་ལ་ཡང་འཇུག་སྙིང་མི་འདོད་པ་དང་༔ ལུས་རང་བཞིན་གྱིས་གཞོན་ཤ་ཆགས་ཤིང་སྣུམ་བག་དང་ལྡན་པ་དག་འོང་ངོ་༔ དེ་ནས་ཟླ་བ་གསུམ་དང་ལྔ་དང་དགུ་ན་ཐིག་ལེ་དེ་དག་དབང་པོའི་ཁྱད་ཀྱིས་ཁམ་ཕོར་རམ་འཁར་གཞོང་ངམ་བསེ་ཕུབ་ཀྱི་རྣམ་པ་ཙམ་དུ་སྣང་བ་ཡིན་ནོ༔ འོད་ཀྱང་ཡུལ་གྲུ་ཙམ་དུ་སྣང་ངོ་༔ རིག་པ་ནི་རི་དགས་རྒྱུག་པའི་ལུས་ཀྱི་རང་བཞིན་དུ་འགྱུར་རོ༔ དེའི་ཚེ་ཕྱིའི་རྟགས་འདི་ལྟ་བུ་དག་འབྱུང་བ་ཡིན་ནོ༔ ལུས་ལ་གཉེར་མ་མེད་ཅིང་ཟས་སྐོམ་ཀྱང་ཡིད་ལ་མི་འདོད་པ་དང་༔ རང་གི་སྣང་བ་དེ་ལས་འབྲལ་མི་ཕོད་པ་དང་༔ བར་སྣང་ལ་འགྲོ་བ་སྙམ་བྱེད་ཅིང་མི་དང་འཕྲད་སྙིང་མི་འདོད་པ་དང་༔ འཁྲུལ་པའི་ཉམས་མི་འབྱུང་ཞིང་རྟག་ཏུ་ལྐུགས་པ་ལྟར་འགྲོའོ༔ དེ་ནས་ཡང་ཟླ་བ་གསུམ་དང་ལྔ་དང་བདུན་ན་ཐིག་ལེ་དེ་དག་ཡུལ་ཁམས་ཙམ་དུ་འཆར་ཏེ༔ དེ་ཡང་མུ་ཁྱུད་ལྔ་ཟླུམ་པོར་སྣང་བ་ཡིན་ནོ༔ དེའི་ཚེ་ཕྱི་རྟགས་ཀྱང་འདི་ལྟ་བུ་ཡིན་ནོ༔ རང་ལ་རང་རྒོད་བྲོ་བ་དང་། སྔར་མི་ཤེས་པའི་ཆོས་མང་པོ་རྒྱུད་ལ་འཆར་བ་དང་༔ ཅི་སྨྲས་ཐམས་ཅད་ཆོས་ཀྱི་ཚིག་ཏུ་འགྱུར་བ་དང་༔ རང་གི་བླ་མ་ལ་མཆོག་དུ་དུང་བ་སྐྱེ་བ་དང་༔ དགྲ་གཉེན་གྱི་འཁྲུལ་པ་འབྱུང་མི་སྲིད་དོ༔ དེ་ནས་ཡང་ཟླ་བ་གཅིག་དང་གསུམ་དང་ལྔ་ན་ཐིག་ལེ་དེ་དག་རེ་རེའི་ནང་དུ་ཡང་རྡོ་རྗེ་སེམས་དཔའི་སྐུ་རྐྱང་པ་རེ་རེ་སྣང་བ་ཡིན་ནོ༔ འདི་དུས་ན་ཕྱིའི་སྣང་བ་རྣམས་རང་འགགས་པའི་རྟགས་སུ་འབྱུང་བ་ལྔའི་གནོད་པ་དང་བྲལ་བ་ལ་སོགས་པ་རྟགས་དགུ་འོང་བ་དེ་ཡིན་ནོ༔ དེ་ཉིད་ཀྱི་དུས་ན་རིག་པ་ཡང་འགུལ་བ་མ་ཡིན་ནོ༔ དེ་ནས་ཟླ་བ་གསུམ་དང་ལྔ་དང་དགུ་ན་ཐིག་ལེ་རེ་རེའི་ནང་དུ་སྐུ་ལྔ་ལྔ་སྣང་བ་

ཡིན་ནོ༔ འདིའི་དུས་སྣང་བ་འགུལ་མི་སྲིད་དོ༔ འདིིའི་དུས་ན་འབྱུང་བའི་ཕུང་པོ་སྣང་བ་རང་འགགས་ནས་གདོས་བཅས་ཤ་ཁྲག་གི་ལུས་སུ་སྣང་བ་ཡང་མེད་དེ༔ སྐབས་སུ་རང་གི་ལག་པའི་སོར་མོ་རྣམས་འོད་དུ་སྣང་བ་ཡིན་ནོ༔ འདི་དག་རྣམས་རྫོགས་ནས་རྟགས་རྣམས་ཀྱང་སྐྱེ་མེད་ཀྱི་ཀློང་དུ་མྱ་ངན་ལས་འདས་པ་ཡིན་ཏེ་འདི་ལས་གཞན་དུ་རྟགས་ཟད་པ་ཡིན་ནོ༔ དེ་ལྟར་སྐྱེས་བུ་གཅིག་ལ་རྟགས་དེ་རྣམས་རྫོགས་ནས་སངས་རྒྱ་བ་ལ་ཐེ་ཚོམ་ཡོད་མི་སྲིད་དོ༔ འབྱུང་བ་རྣམས་འདི་ཉིད་ལ་དག་ནས་ཕུང་པོ་ལྷག་མེད་དུ་སངས་རྒྱ་བ་ཡིན་ནོ༔ འདིའི་དུས་ན་སྐྱེ་བ་ལ་རང་དབང་ཐོབ་པ་དང་༔ འཇུག་པ་ལ་རང་དབང་ཐོབ་པར་འདོད་ན༔ རང་གི་ལག་པའི་སོར་མོ་ལ་གཏད་ཅིང་བལྟས་པས་སྣང་བ་དེ་ཀུན་རང་སྲོག་སྟེ་མི་ལུས་ཐོབ་པའི་སེམས་ཅན་སུམ་སྟོང་ལ་རང་གི་རིག་པ་བཅུག་པས་དེ་ཀུན་ཡང་འབྱུང་བ་དག་ནི་འདི་ཉིད་ལ་སངས་རྒྱ་བ་ལ་ཐེ་ཚོམ་མེད་དོ༔ འདིའི་དུས་ན་རིག་པ་ཉིད་བེམ་པོ་རྣམས་ལ་བཅུག་ཀྱང་དེ་ཉིད་འགུལ་བ་དང་སྐད་འབྱིན་ནུས་པ་འོང་བ་ཡིན་ནོ༔ འདི་ལྟར་སུམ་སྟོང་གྲོལ་བ་ནི་རིག་པ་ཉིད་གཅིག་པའི་ཕྱིར་རོ༔ འདིའི་ཚེ་འཕོ་བའི་དུས་ན་རིག་པ་ཉིད་བཅུག་ན་མཚམས་མེད་པ་ལྔའི་ལས་བྱས་པ་ཡང་རང་དང་མཉམ་པ་ཉིད་དུ་འགྱུར་ཏེ་ལས་ལ་བཟང་ངན་མེད་པའི་གནད་ཀྱིས་སོ༔ འདི་ནི་རང་བཞིན་རྣམ་པར་དག་པའི་རྟགས་ཡིན་པས་འགྱུར་བ་མེད་དོ༔ སྐྱེས་བུ་མཆོག་ཏུ་གྱུར་པ་རྣམས་ནི་རྟགས་འདི་ཀུན་མ་རྫོགས་པར་ཆོས་ཉིད་ཟད་པའི་སར་རང་གྲོལ་བ་ཡང་ཡོད་དོ༔ འདིར་ཟླ་བ་བྱེ་བྲག་ཏུ་བྱས་ནས་ལོ་བདུན་དང་ཟླ་བ་བཅུ་གཅིག་པོ་འདི་དག་ནི་ཐ་མལ་པའི་གང་ཟག་རྣམས་ཡིན་ནོ༔ འདི་ལ་མི་གྲོལ་མི་སྲིད་དེ༔ དབང་པོ་འབྲིང་པོ་རྣམས་ནི་འདི་ལྟར་ལོ་བཞི་

ཟླ་བ་ལྔ་ཞག་དྲུག་ན་འབྱུང་བ་རྣམས་རང་སར་ཡལ་ནས་འགྲོ་བ་ལ་ཐེ་ཚོམ་མེད་དོ༔ དབང་པོ་རབ་རྣམས་ནི་ལོ་གསུམ་དང་ཟླ་བ་གསུམ་དང་ཞག་ཉེར་གཅིག་ན་གྲོལ་བ་ཡིན་ནོ༔ འདི་ནི་རྟགས་ངེས་པའི་རྣལ་འབྱོར་པ་ལ་ལམ་དུ་སྣང་བར་བྱེད་པའི་རྟགས་ཡིག་གསང་བ་ཆེན་པོ་སློབ་དཔོན་དགའ་རབ་རྡོ་རྗེས་མཛད་པ༔ ཉམས་སུ་ལེན་པ་རྣམས་ཀྱི་རྟགས་ཡིག་བསྡུས་པ་རྫོགས་སོ༔ རྒྱ་རྒྱ་རྒྱ༔ རྒྱ་གར་གྱི་མཁན་པོ་བི་མ་ལས་སྒྲ་མི་མཐུན་པ་གསུམ་ལས་བསྒྱུར་བ་ལགས་སོ༔ འདི་མེད་གཞན་ལ་སྤྱོད་པའི་སྒོམ་ཆེན་ཡི་རེ་ཆད༔ དེ་ཡི་ཕྱིར་ན་གསང་བ་རྟགས་ཀྱི་ཡི་གེ་ཞེས༔ འདི་ལ་གསང་བའི་མན་ངག་མཆོག་ཏུ་གཅེས་པའི་ཡི་གེ་འདི་ཟུང་ཞིག༔ རབ་ཏུ་གསང་བའི་མན་ངག་ཟངས་ཡིག་ལས༔ རྟགས་ཀྱི་ཡི་གེ་འདི་མེད་ཡུག་པོ་ཡིན༔ ཡི་གེ་གསུམ་དང་འབྲེལ་ན་རྣལ་འབྱོར་དོན་ཆེན་འགྲུབ༔ འདི་གསུམ་མེད་ན་བསྒྲུབས་ཀྱང་དོན་མེད་འགྱངས༔ དེ་ཡི་ཕྱིར་ན་སྐོལ་བའི་ཡི་གེ་གསུམ༔ སེམས་ཀྱི་དཀྱིལ་དུ་ཕུར་ཅིག་ས་མ་ཡཱ༔ ཉམས་སུ་བླངས་པའི་མན་ངག་ཟངས་ཡིག་ཅན༔ རབ་ཏུ་ཟབ་པས་སུ་ལའང་སྟེར་རེ་ཀན༔ དུང་ཡིག་ཅན་གྱིས་སྤྲུལ་པའི་སྐུ་ཡང་འགྲུབ༔ མཁའ་འགྲོ་མཛོད་ཀྱིས་ཐུན་མོང་དངོས་གྲུབ་འགྲུབ༔ བསྟན་པའི་བུ་གཅིག་མེད་ན་བསྒྲུབས་ཀྱང་དོན་མི་འགྲུབ༔ འདི་ཀུན་མེད་པར་རྒྱུད་ལ་བདེན་འཛིན་ན༔ དོན་མེད་འཆལ་བས་རང་དོན་བསླུ་བར་མཆིའོ༔ དེ་ཡི་ཕྱིར་ན་འདི་ཚོ་རབ་ཏུ་གཅེས༔ ཞེས་བི་མ་ལས་གསུངས་སོ༔ སྔགས་ཀྱི་སྲུང་མས་སྲུངས་ཤིག༔ སྐལ་ལྡན་ཅིག་དང་འཕྲད་པར་ཤོག༔ ས་མ་ཡཱ༔

རྒྱ་རྒྱ་རྒྱ༔ བུ་རང་གི་ལག་ངར་གྱེན་དུ་བསླངས་ཏེ༔ བསྒོམས་པས་དེ་ཉིད་ཟང་ཐལ་དུ་སྣང་བ་ཡིན་ནོ༔ འདི་ནི་མངོན་སུམ་དུ་འཆར་བའི་རྟགས་ཡིན་ནོ༔ འབྱུང་བ་འདི་དག་དང་རང་གི་ལུས་འོད་ལྔར་རྟོགས་པའི་རྟགས་སུ༔ མིག་གི་རྩ་རང་གི་མཐེབ་མཛུབ་ཀྱིས་ལྟེམས་པས༔ འོད་ལྔའི་ཐིག་ལེ་འཆར་བ་ཡིན་ནོ༔ དེའི་ཕྱིར་མངོན་སུམ་འཆར་བའི་རྟགས་གསུམ་གྱིས་ཡིད་ཆེས་པར་བསྟན་པའོ། ཨྠྀི༔ ༔ རྒྱ་རྒྱ་རྒྱ༔ དཔལ་སྔགས་ཀྱི་སྲུང་མས་སྲུངས་ཤིག༔

གསང་བ་ཆེན་པོའི་ཚད་ཀྱི་ཡི་གེ།

གསང་བ་ཆེན་པོའི་ཚད་ཀྱི་ཡི་གེ་བཞུགས་སོ༔ ༼ཕྲ་ཡིག༽

རྒྱ་གར་སྐད་དུ༔ གྷུ་ཧྱ་ཨཀྵ་ར་པྲ་མ་ཎ་མ་ཧཱ་ནཱ་མ༔ བོད་སྐད་དུ༔ གསང་བ་ཆེན་པོ་ཚད་ཀྱི་ཡི་གེ་ཞེས་བྱ་བ༔ བཅོམ་ལྡ་འདས་འབྲས་བུའི་མངའ་བདག་གང་ཡིན་པ་དེ་ལ་ཕྱག་འཚལ་ལོ༔ སངས་རྒྱས་རྣམས་ཀྱི་བཀའ་གསང་རྒྱ་ཆེ་ལས༔ སྙིང་པོའི་དོན་ཀུན་ཡང་དང་ཡང་བསྡུས་པ༔ དད་ལྡན་སེམས་ཀྱི་བུ་རྣམས་འཇུག་དོན་དུ༔ ཡང་བཅུད་སྙིང་ཐིག་ཟངས་ཀྱི་ཡི་གེའི་གནད༔ ངེས་པའི་རྟགས་དང་སྨིན་པའི་ཚད་རྣམས་ཀྱིས༔ ཡིད་ཆེས་གདེངས་ཆེན་བློ་ལ་དུས་བཟུང་ཕྱིར༔ ཚད་རྣམས་བསྡུས་ནས་ངེས་པའི་ལུང་མངོན་པར༔ ཡི་གེ་འདི་དག་སྐལ་ལྡན་དོན་དུ་བྲི༔ ས་བོན་ལས་ནི་ལོ་འབྲས་དུས་སྨིན་བཞིན༔ ཉམས་བླངས་དུས་ཚོད་ངེས་པའི་ཚད་འདི་ཉིད༔ བུད་མེད་སྦྲུམ་མ་ཟླ་རྫོགས་ནས་བཙས་ཏེ༔ གསོས་ཏེ་ཕྱི་ནས་ལུས་ཡོངས་རྫོགས་པ་ལྟར༔ བླ་མ་ལ་བརྟེན་མངོན་སུམ་གནད་གཟིར་ནས༔ ཉམས་སུ་བླངས་པས་རིག་པ་ཚད་ལ་ཕེབས༔ དེ་ཉིད་སྲང་ལ་འདེབས་པར་བྱེད་པ་ཡི༔ ཡི་གེ་འདི་ལ་ལྟོས་ཤིག་རིགས་ཀྱི་བུ༔ རིག་པ་མངོན་སུམ་གྱི་དོན་མཐོང་བ་ལས་བྱུང་བའི་སངས་རྒྱས་རྣམས་ཀྱིས་མདོ་རྒྱུད་དཔག་ཏུ་མེད་པ་གསུངས་ཀྱང་༔ ངེས་པའི་དོན་མངོན་སུམ་དུ་གཏན་ལ་ཕབ་སྟེ་བསྟན་ཅིང་གསུངས་པ་ནི་བསྟན་པ་འབུམ་ཕྲག་དྲུག་ཅུ་རྩ་བཞི་པ་ཡིན་ཟེར་ཡང་༔ དེ་དག་ཚིག་གི་ལྟ་བ་འབའ་ཞིག་ཏུ་བསྟན་པ་ཡིན་ཏེ༔ འདི་དག་ལས་རབ་ཏུ་བསྡུས་ན་རྒྱུད་ཀྱི་ཡན་ལག་བཞིར་གསུངས་ཀྱང་ངེས་པའི་འབྲས་བུ་མངོན་སུམ་གྱི་རང་གནད་ལ་ཕྱོགས་ཙམ་རེག་པ་མེད་དོ༔ དེ་བཞི་ལས་ཀྱང་གསང་བ་བླ་ན་མེད་པའི་རྒྱུད་བཅུ་བདུན་པ་ཡིན་ཏེ༔ འདི་རྣམས་ལ་མངོན་སུམ་གྱི་

གནད་རེ་ན་ལུང་སྟོང་གི་རླུང་པོ་དང་འདྲ་སྟེ་དོན་ཁ་གཡེལ༔ དེའི་ཕྱིར་ན་སྙིང་ཐིག་ཟངས་ཀྱི་ཡི་གེ་ཅན་ནི་རབ་ཏུ་ཟབ་པའི་ཡང་ཟབ་ཡིན་པས་འདིའི་དོན་གྱི་མན་ངག་མེད་པའི་རྣལ་འབྱོར་པ་རྣམས་ནི་ངལ་བ་དོན་མེད་ཡིན་པས༔ དེས་ན་རབ་ཏུ་གཅེས་པའི་ཡི་གེ་མ་རུ་ཉམས་སུ་ལེན་པ་ལ་ཚད་ཀྱི་ཡི་གེ་ཤིན་ཏུ་གཅེས་པས་འདི་ལྟོས་ཤིག༔ ས་མཱ་ཡཱ༔ རྟགས་ཀྱི་རྒྱུད་ལ་སོགས་པ་རབ་ཏུ་མང་བར་བཤད་དེ༔ དེའི་དོན་བསྡུས་པ་རྟགས་ཀྱི་ཡིན་ནོ༔ དེའི་དུས་སུ་ཚོད་ངེས་པའི་ཚད་ནི་འདི་དག་རྣམས་ཡིན་ཏེ༔ འདིར་རབ་ཏུ་གསང་བའི་ཡང་གསང་ཡང་བཅུད་གསེར་གྱི་སྙིང་པོ་ཅན་ཞེས་པ་ཡིན་པས་སྐལ་ལྡན་རྣམས་ཀྱི་སྙིང་བཅུད་དོ༔ དེ་ཡང་ལྐལ་ལྡན་རྣམས་ཀྱིས་ཉམས་སུ་ལེན་པ་ལ་རབ་ཏུ་བརྩོན་པར་བྱ་སྟེ༔ དེ་ལྟར་བྱས་པས་ཐིག་ལེ་སྟོང་པའི་སྒྲོན་མ་ཤར་བའི་དུས་ན་རྫོགས་པ་ཆེན་པོ་རྩོལ་སྒྲུབ་དང་བྲལ་བའི་ཚད་ཡིན་ཏེ༔ དེ་ཡང་འདི་ཉིད་རང་གཞན་གྱི་རྩོལ་སྒྲུབ་ལས་མ་བྱུང་བའི་གནད་ཀྱིས་སོ༔ འདིའི་དུས་ན་ཉམས་སུ་ལེན་པ་ལ་བར་ཆད་ནས་ཚེའི་དུས་བྱས་ཀྱང་སྐྱེ་བ་གཉིས་བརྒྱུད་ནས་ཐ་མ་འདི་ཉིད་དང་ཕྲད་ནས་སངས་རྒྱ་བ་ཐེ་ཚོམ་མེད་དོ༔ དབྱིངས་ཀྱི་སྒྲོན་མ་རང་གི་སྨིན་མཚམས་དང་བྲལ་བའི་དུས་ན་འཁོར་འདས་གཉིས་རྒྱབ་གྱེས་པ་ཡིན་པས་ཕྱིས་མངལ་གྱི་གྲོང་ཁྱེར་དུ་མི་འཇུག་པའི་ཚད་ཡིན་ཏེ༔ དེ་ཡང་འདི་ཉིད་དབང་པོ་དངོས་དང་མ་བྲལ་བའི་གནད་ཀྱིས་སོ༔ འདིའི་དུས་ན་ཉམས་ལེན་དང་བྲལ་ཡང་འགྲོ་བ་རིགས་དྲུག་གི་མངལ་དུ་འཇུག་མི་སྲིད་དེ་རང་བཞིན་སྤྲུལ་སྐུའི་ཞིང་ཁམས་སུ་རྫུས་ནས་སྐྱེས་ཏེ་ལོ་ལྔ་བརྒྱ་ན་སངས་རྒྱ་བ་ལ་ཐེ་ཚོམ་མེད་དོ༔ འོད་ལྔའི་སྣང་བ་གྱེན་ལ་འགྲེང་པ་དང་༔

རྩིབས་ལ་ཤར་བ་དང་༔ མདུང་རྩེ་ལྟ་བུ་དང་༔ རེ་ལྡེའི་རྣམ་པ་ཙམ་དུ་གྱུར་པའི་གནས་སྐབས་ན་དབྱིངས་ལ་རིག་པ་འདུས་པའི་ཚད་ཡིན་ཏེ་ཚེ་འདི་ལ་བར་ཆད་ཀྱང་བར་དོ་ལ་སངས་རྒྱ་བ་ལ་ཐེ་ཚོམ་མེད་དོ༔ དེ་ཡང་སྣང་བ་སྣ་ཚོགས་སུ་སྣང་བ་སྟེ་རང་གི་མདུན་ཕྱོགས་ཙམ་གཞལ་ཡས་ཁང་དུ་ཤར་བའི་གནད་ཀྱིས་སོ༔ དེའི་ཕྱིར་ན་འདི་ཉིད་བར་དོ་གསུམ་པ་ལྷུན་གྲུབ་ཀྱིས་སྣང་བ་ལ་སངས་རྒྱ་བ་ལ་ཐེ་ཚོམ་མེད་དོ༔ ཆོས་རྣམས་སྣ་ཚོགས་སུ་ཤར་བའི་ཚད་སུས་ཀྱང་དགག་པར་ནུས་པ་མ་ཡིན་ནོ༔ དབྱིངས་ཀྱི་སྣང་བ་དེ་ལ་རིན་པོ་ཆེའི་དྲ་བ་དང་༔ དྲ་བ་ཕྱེད་པ་དང་༔ མིག་མང་རིས་དང་། མིག་ཚགས་ཀྱི་རྣམ་པ་ལྟ་བུ་དང་༔ ཟ་འོག་གི་གུར་ཁྱིམ་ལྟ་བུ་དང་༔ མཆོད་རྟེན་དང་༔ ལྕགས་ཀྱུ་དང་༔ མདུང་རྩེ་དང་༔ མདའ་དང་༔ ཉ་མིག་གི་རྣམ་པ་ལྟ་བུ་ཤར་བའི་དུས་ན་དབྱིངས་ཀྱི་རྒྱན་རྫོགས་པའི་ཚད་ཡིན་ཏེ༔ ཆོས་ཉིད་ལ་སྲིད་པའི་བར་དོ་རང་ལོག་པ་ཞེས་བྱ་བ་སྟེ༔ འདིའི་ཉམས་ལེན་དང་བྲལ་ཀྱང་སྐྱེ་ཤི་གཉིས་ཀྱི་མཚམས་སུ་འཇུག་མི་སྲིད་པས་འདི་ཉིད་ཀྱི་ཚེ་ཟད་མ་ཐག་ཏུ་བར་དོ་མེད་པར་སངས་རྒྱ་བ་ལ་ཐེ་ཚོམ་མེད་དོ༔ ད་ཡང་དབྱིངས་རྣམ་པར་དག་པའི་སྒྲོན་མ་རང་གནད་ལ་ཕེབས་པའི་གནད་ཀྱིས་སོ༔ དབྱིངས་ཀྱི་སྣང་བ་དཀར་པོ་ལང་ལོང་ལས་དེ་བརྟགས་པས་ཁ་དོག་གསལ་བའི་འོད་ལ་རང་གནས་པའི་ལུང་པ་དེ་ཉིད་མི་སྣང་བར་ཤར་བའི་དུས་ན་རྣམ་རྟོག་ཡུལ་གྱི་ཞེན་པ་དང་བྲལ་བས་བེམས་པོའི་འཁྲུལ་པ་རྣམས་བྲལ་བའི་ཚད་ཡིན་ཏེ༔ དབྱིངས་ཀྱི་སྣང་བས་ཡུལ་གྲོལ་བའི་གནད་ཀྱིས་འདི་ཉིད་ཀྱང་བར་དོ་ལ་མི་འཇུག་པར་སངས་རྒྱ་བ་ལ་ཐེ་ཚོམ་མེད་དོ༔ དབྱིངས་དང་རིག་པ་ཉིད་ལ་ཉིན་མཚན་མེད་པར་སྣང་བའི་དུས་ན་འཁོར་འདས་གཉིས་སུ་མེད་པར་ཞེས་བྱ་བ་འཁོར་བ་ཉིད་མྱང་

འདས་སུ་གྲོལ་བའི་ཚད་ཡིན་ཏེ༔ དེ་ཡང་མཚན་མོ་འཁོར་བའི་ཆ༔ ཉིན་མོ་མྱང་འདས་ཀྱི་ཆ་ཡིན་བས༔ མཚན་མོའི་སྣང་བ་ནུབ་པའི་ཚད་ཀྱིས་སོ༔ ཉམས་སུ་བླངས་པ་ལ་འདི་ཡང་བར་དོ་མི་སྣང་ཞིང་དེ་ལྟར་བྱུང་ན་ལོ་ལྡ་ན་ཕུང་པོ་ལྷག་མ་དང་བཅས་ནས་སངས་རྒྱ་བ་ལ་ཐེ་ཚོམ་མེད་དོ༔ ཐིག་ལེའི་སྣང་བ་ཉུང་འབྲུ་ཙམ་སྲན་རྡོག་ཙམ་སྣང་བའི་དུས་ན་དབྱིངས་ཀྱི་ར་བར་རིག་པ་ཉིད་ཆུད་པ་ཞེས་བྱ་སྟེ་སྙིང་པོའི་བཅུད་དུ་དྲིལ་བའི་ཚད་ཡིན་པས༔ འདི་མན་ཆད་ཀྱི་རྟགས་མ་རྫོགས་པར་ཉམས་ལེན་ལ་བར་ཆད་ན་སྤྲུལ་པ་མི་འབྱུང་༔ ཕུང་པོ་བོར་ནས་ཕྱི་ཡི་རྟགས་རྣམས་སྟོན་ནས་སངས་རྒྱ་བ་ལ་ཐེ་ཚོམ་མེད་དོ༔ ཐིག་ལེ་མེ་ལོང་གི་རྣམ་པ་ཙམ་དུ་སྣང་ཞིང་ཐིག་ལེ་དེ་ཀུན་ཀྱང་རྩིབས་རྒྱུགས་སུ་སྣང་བའི་དུས་ན༔ ཐིག་ལེ་ཉག་གཅིག་བཅུད་དུ་སྨིན་པ་ཞེས་བྱ་སྟེ་འོད་དང་འོད་ཁྱིམ་སྨིན་པའི་ཚད་ཡིན་ནོ༔ དེ་ནས་ཐིག་ལེ་དེ་ཉིད་དབང་པོ་ཐ་མལ་ལ་ཁམ་ཕོར་ཙམ་དུ་སྣང་༔ འབྲིང་ལ་འཁར་གཞོང་ཙམ་དུ་སྣང་༔ རབ་ལ་བསེ་ཕུབ་ཙམ་དུ་སྣང་བའི་དུས་ན་རིག་པ་ཉིད་རླུང་དང་བྲལ་དུ་ཉེ་བ་ཞེས་བྱ་སྟེ༔ ཐིག་ལེ་ཚད་དུ་ཕྱིན་པ་ཡིན་པས༔ འདི་ལས་ཆེར་འགྲོ་བའི་ངེས་པ་མེད་དོ༔ དེ་ནས་ཐིག་ལེ་དེ་དག་རབ་ཏུ་མང་བ་ཆེ་ཆུང་གོང་མ་ཙམ་ལས་ཡུལ་ཁམས་གང་སྟེ༔ དེ་རེ་རེ་འོད་ལྔ་ལྔའི་མུ་ཁྱུད་རབ་ཏུ་བསྐོར་བའི་དུས་ན་ནི་སྣོད་ཉིད་བཅུད་དུ་སྨིན་པ་ཞེས་བྱ་སྟེ༔ ཐིག་ལེའི་ནང་ན་སྐུ་རྐྱང་པ་རེ་རེ་སྣང་བའི་དུས་ན་བཅུད་ཉིད་སྙིང་པོར་དྲིལ་བ་ཞེས་བྱའོ༔ རིག་པ་ཉིད་དབྱིངས་ཀྱི་གཟེར་ཐེབས་པས་ན་ལམ་སྨིན་པའི་ཚད་ཡིན་ཏེ་སྐུ་གསུམ་ལམ་དུ་བྱས་བའི་གནད་ཀྱིས་སོ༔ དེ་ནས་ཐིག་ལེ་རེ་རེའི་ནང་དུ་སྐུ་ལྔ་ལྔ་ཤར་བའི་དུས་ན་སྐུའི་ཞེན་པ་རང་ཆོད་པ་ཞེས་བྱ་སྟེ༔ སྐུ་གསུམ་ལམ་དུ་རྫོགས་པའི་ཚད་ཡིན་པས་རང་

གི་ལུས་འོད་གསལ་དུ་གྲོལ་བའི་གནད་ཀྱིས་འདི་ཉིད་ལ་འབྱུང་བ་རང་དག་ལ་སོང་བ་དེ་ཡིན་ནོ༔ དེ་ཉིད་ཀྱི་ཚད་རང་གི་མཚན་ཉིད་བཅུ་ཅིག་ཏུ་རིགས་པར་བྱ་སྟེ༔ དེ་ཡང་འདི་ལྟར་སྟེ༔ རང་བཞིན་རྫོགས་པ་ཆེན་པོ་རྩོལ་སྒྲུབ་དང་བྲལ་བའི་ཚད་དང་༔ མངལ་གྱི་གྲོང་ཁྱེར་རྒྱུན་གཅོད་པའི་ཚད་དང་༔ ཆོས་རྣམས་སྣ་ཚོགས་སུ་ཤར་བའི་ཚད་དང་༔ སྣང་སྲིད་ཐམས་ཅད་གདམས་ངག་ཏུ་ཤེས་ནས་འཁྲུལ་བ་རང་ཐོག་ཏུ་ངོ་ཤེས་པའི་ཚད་དང་༔ ཡུལ་རྐྱེན་དུ་མ་འགགས་པའི་ཚད་དོ༔ འཁོར་འདས་མཉམ་ཉིད་གནས་པའི་ཚད་དང་༔ རིག་པ་ལས་འགྱུར་བ་མེད་པའི་ཚད་དང་༔ ཉག་གཅིག་གྲལ་དུ་ཚུད་པའི་ཚད་དང་༔ རང་བཞིན་རྫོགས་པ་ཆེན་པོ་ཐིག་ལེ་ཉག་གཅིག་མངོན་སུམ་དུ་གཏན་ལ་ཕེབས་པའི་ཚད་དང་༔ སྐུ་རྣམས་ཀྱི་ཞེན་པ་བཟློག་པས་ཕྱིའི་སྣང་བ་འདི་ཉིད་གྲོལ་བའི་ཚད་དང་༔ གདོས་བཅས་རང་འགགས་ཏེ་འབྱུང་བ་རྣམས་རང་སར་དེངས་པའི་ཚད་དང་བཅུ་གཅིག་གི་རྣལ་འབྱོར་པས་ཆོས་ཐམས་ཅད་ཟད་པའི་སྣང་བ་ཉིད་མཐོང་བ་ཡིན་ནོ༔ དེ་ཡང་ཚད་དེ་དག་གིས་དེ་ལྟར་ཉམས་སུ་ལེན་པ་དང་མ་བྲལ་ན་སུས་ཀྱང་དགག་པར་མི་ནུས་ཀྱི༔ མི་འདོད་ཀྱང་ཤུགས་ཀྱིས་ལམ་དུ་སྣང་ངེས་པ་ཡིན་ནོ༔ དཔེར་ན་བུད་མེད་སྦྲུམ་མ་ཟླ་བ་རྫོགས་ནས་སུས་ཀྱང་དགག་པར་མི་ནུས་ཏེ་ལྟོ་བ་སྟོང་པར་གནས་པ་བཞིན་ནོ༔ དེ་ཡང་ཅིག་ཅར་དུ་སྐྱེ་བ་མ་ཡིན་ཏེ་རིམ་གྱིས་ལུས་ནས་སྐྱེས་ནས་སྐྱེ་བ་དང་མཚུངས་སོ༔ དེ་ཡང་ཞག་བདུན་ཚན་དང་པོ་ལ་མེར་མེར་པོ་དང་ཏར་ཏར་པོ་ལ་སོགས་པ་བཞིན་ཏེ༔ རང་བཞིན་རྫོགས་པ་ཆེན་པོ་རྩོལ་སྒྲུབ་དང་བྲལ་བའི་ཚད་མེད་ན་ཐེག་པ་ཐུན་མོང་པ་དང་ཁྱད་པར་མེད་པས༔ འདིའི་དུས་ན་ལས་དགེ་སྡིག་ཅི་བྱས་ཀྱང་ཕན་

གནོད་དང་བྲལ་བ་དགེ་སྡིག་ཇི་ལྟར་བྱས་ཀྱང་ངན་སོང་དུ་ལྟུང་མི་སྲིད་པའི་གདེང་ཐོབ་པའོ༔ མངལ་གྱི་གྲོང་ཁྱེར་རྒྱུན་གཅོད་པའི་ཚད་མེད་ན་འགྲོ་དྲུག་གི་གཡང་ས་མི་ཆོད་དེ་ཚེ་གཅིག་ལ་སངས་རྒྱ་བ་དང་འགལ་ཏེ༔ འདི་དུས་ན་སྔར་བྱས་པའི་བག་ཆགས་རྣམས་ཀྱིས་རྡུལ་ཙམ་ཡང་མི་གོས་ཏི་དམྱལ་བ་དང་སངས་རྒྱས་ཁྱད་མེད་པའི་གདིང་ཐོབ་པའོ༔ ཆོས་རྣམས་སྣ་ཚོགས་སུ་ཤར་བའི་ཚད་མེད་ན་ཡིན་དཔྱོད་འཛིན་པའི་ལྟ་བ་རྣམས་དང་ཁྱད་པར་ཅུང་ཟད་མེད་པས༔ འདིའི་དུས་ན་ཕྱི་རོལ་གྱི་ཡུལ་རྐྱེན་དུ་མ་བྱུང་ཀྱང་ཕན་གནོད་དང་བྲལ་ཏེ་མངོན་སུམ་གྱིས་སྣང་བ་རྐྱེན་གྱིས་མི་ཤིགས་པའི་གདེང་ཐོབ་པའོ༔ སྣང་སྲིད་ཐམས་ཅད་གདམས་ངག་ཏུ་ཤེས་ནས་འཁྲུལ་པ་རང་ཐོག་ཏུ་ཆོད་པའི་ཚད་མེད་ན་ཚིག་གི་རྗེས་སུ་འབྲངས་པའི་སྐྱེས་བུ་རྣམས་དང་ཁྱད་མེད་པས༔ འདིའི་དུས་ན་བརྗོད་བྱ་ཐམས་ཅད་མཐོང་སྣང་དུ་ཤར་བས་ཚིག་གི་སྤྲོས་པ་ཐམས་ཅད་ཉེ་བར་ཞི་བའི་གདེང་ཐོབ་པའོ༔ ཡུལ་རྐྱེན་དུ་མ་འགགས་པའི་ཚད་མེད་ན་ཐ་མལ་པའི་སྣང་བ་དང་ཁྱད་མེད་པས༔ འདིའི་དུས་ན་བེམ་རིགས་གཉིས་འཛིན་གྱི་ཤེས་པ་དང་བྲལ་ཏེ་རགས་པའི་འབྱུང་བ་རྣམས་ཀྱིས་གནོད་མ་བསྐྱལ་བའི་གདེང་ཐོབ་པའོ༔ འཁོར་འདས་མཉམ་པ་ཉིད་དུ་གནས་པ་ཚད་མེད་ན་གྲུབ་མཐའ་འཛིན་པའི་སྐྱེས་བུ་རྣམས་དང་ཁྱད་མེད་པས༔ འདིའི་དུས་ན་ལྟ་བའི་ཞེན་འདོད་རྣམས་དང་བྲལ་ཏེ་ཉམས་ལེན་ལ་ཡེངས་པ་མེད་པའི་གདེང་ཐོབ་པའོ༔ རིག་པ་ལ་འགྱུར་བ་མེད་པའི་ཚད་མེད་ན་ལས་ཀྱི་རླུང་དང་ཁྱད་མེད་པས༔ འདིའི་དུས་ན་རིག་པ་ཉིད་ཡེ་ཤེས་ཀྱི་རླུང་དང་འདྲེས་པས་འགྱུ་བ་རྣམས་རང་སར་གྲོལ་བའི་གདེངས་ཐོབ་པའོ༔ ཉག་གཅིག་གྲལ་

དུ་ཚུད་པའི་ཚད་མེད་ན་ཐེག་པ་སྣ་ཚོགས་ཀྱི་སྐད་དང་ཁྱད་མེད་པས༔ འདིའི་དུས་ན་ལྟ་སྒོམ་གྱི་སྤྲོས་པ་རང་ཆོད་པའི་གདེང་ཐོབ་པའོ༔ རང་བཞིན་རྫོགས་པ་ཆེན་པོ་ཐིག་ལེ་ཉག་གཅིག་མངོན་སུམ་དུ་གཏན་ལ་ཕེབས་པའི་ཚད་མེད་ན༔ ཆད་པ་མུ་སྟེགས་པ་རྣམས་དང་ཁྱད་མེད་པས༔ འདིའི་དུས་ན་གོལ་ས་ཐམས་ཅད་རང་ཐོག་དུ་ཆོད་པའི་གདེང་རྙེད་པ་ཡིན་ནོ༔ སྐུ་རྣམས་ཀྱི་ཞེན་པའི་སྣང་བ་བཟློག་པས་ཕྱིའི་སྣང་བ་འདི་ཉིད་ལས་གྲོལ་བའི་ཚད་མེད་ན་སྐུ་གསུམ་འབྲས་བུ་རང་འདོད་པ་རྣམས་དང་ཁྱད་མེད་པས༔ འདིའི་དུས་ན་སྣང་བ་དང་ངོ་བོ་ལམ་དུ་བྱས་པས་སྐུ་གསུམ་དུ་འཛིན་པའི་ཞེན་པ་རང་ལོག་པས་གདེང་ཐོབ་པའོ༔ གདོས་བཅས་འགགས་ཏེ་འབྱུང་བ་རང་སར་དེངས་པའི་ཚད་མེད་ན་ཕུང་པོ་བདག་མེད་དུ་འདོད་པ་རྣམས་དང་ཁྱད་མེད་པས༔ འདིའི་དུས་ན་ཕྱི་ནང་གི་འབྱུང་བ་ལྔས་བཅིངས་པ་ལས་རང་ལོག་སྟེ་ཟག་པ་རྣམས་རང་ཟད་པའི་གདེང་ཐོབ་པའོ༔ དེ་ནས་ཟླ་གཅིག་གམ༔ ཟླ་བ་དགུའམ༔ ཟླ་བ་བདུན་ན་ཆོས་ཉིད་ཟད་པའི་སྣང་བ་དང་འདུ་འབྲལ་མེད་པར་འགྱུར་བ་ལ་ཐེ་ཚོམ་མེད་དོ༔ དེའི་ཕྱིར་ན་མའི་མངལ་དུ་ཞུགས་ཏེ་ལུས་རྫོགས་པའི་རིམ་པ་དང་ཞག་རྣམས་མཚུངས་སོ༔ དེ་ལྟར་ཉམས་སུ་ལེན་པ་ལ་ནི་སྔོན་དུ་ལུས་ངག་ཡིད་གསུམ་སྦྱངས་པའི་མན་ངག་རབ་ཏུ་གཅེས་སོ༔ སྔོན་དུ་ལུས་ངག་མ་སྦྱངས་པར་རིག་པ་མངོན་སུམ་གྱི་གནད་གཟིར་ཡང་འདི་ཉིད་དུ་འབྱུང་བ་རང་ཟད་ལ་འགྲོ་མི་སྲིད་དོ༔ དེའི་ཕྱིར་ན་འཁོར་འདས་རུ་ཤན་འབྱེན་པའི་སྤྱོད་པ་རབ་ཏུ་ཟབ་བོ༔ དེ་ནས་ལུས་ཀྱི་འདུག་སྟངས་རྣམས་མ་གཟིར་ན་སྐུ་གསུམ་གྱི་ཞེན་པ་ལམ་དུ་མི་ཆོད་པས་ཆོས་ཉིད་ཟད་པ་ངོ་མི་ཤེས་སོ༔ དེས་ན་རྟག་ཏུ་ངག་མ་

བཅད་ན་བརྗོད་མེད་ཀྱི་དོན་མི་མཐོང་བས་ཐིག་ལེ་ཉག་གཅིག་མངོན་དུ་མི་སྣང་ངོ་༔ མིག་གི་ལྟ་སྟངས་ཀྱིས་རིག་པ་མ་གཅུན་ན་རིག་པ་མངོན་སུམ་དུ་མི་སྣང་བས་སེམས་དང་ཡེ་ཤེས་མི་ཕྱེད་དོ༔ དེའི་ཕྱིར་ན་གདམས་ངག་འདི་རྣམས་རིམ་གྱིས་བྱས་པས་སྣང་བ་རིམ་གྱིས་འཕེལ་བ་ལ་ཐེ་ཚོམ་མེད་དོ༔ དེའི་ཕྱིར་ན་འབྱུང་བ་དངས་སྙིགས་ཕྱེད་པའི་ཚད་ཕྱིའི་འབྱུང་བ་ལྔ་འགགས་ཏེ་འོད་དུ་སྣང་བའི་དུས་ན་ཡིན་ནོ༔ ཆོས་ཅན་དང་ཆོས་ཉིད་ཕྱེད་པའི་ཚང་དབྱིངས་སྨིན་མཚམས་དང་བྲལ་བའི་དུས་ན་ཡིན་ནོ༔ སེམས་དང་ཡེ་ཤེས་ཕྱེད་པའི་ཚད་རིག་པ་ཉིན་མཚན་མེད་པའི་དུས་ན་ཡིན་ནོ༔ ཀུན་གཞི་དང་ཆོས་སྐུ་ཕྱེད་པའི་ཚད་རང་གི་གདོས་བཅས་མི་སྣང་བའི་དུས་ན་ཡིན་ནོ༔ ཡིད་དང་ཤེས་རབ་ཕྱེད་པའི་ཚད་ནི་སྣང་བ་སྣ་ཚོགས་སུ་ཤར་བའི་དུས་ན་ཡིན་ནོ༔ དེའི་ཕྱིར་ན་རིག་པ་ཚད་ལ་མ་ཕབ་ན་འབྲས་བུ་ལ་ཐུག་པ་མེད་དེ་ངལ་བ་དོན་མེད་ཡིན་ནོ༔ ཚད་ལ་ཕབ་པས་དོན་འགྱུར་མི་སྲིད་དོ༔ དེ་ཡང་འདི་ཉིད་སྐུ་གསུམ་ལམ་དུ་བྱེད་པ་ནི༔ ལུས་ངག་ཡིད་ཀྱི་གནང་བསྟན་ནས་སྤྲུལ་པ་སྐུའི་སྒྲ྄ོ་འདོགས་ལམ་དུ་ཆོད་དོ༔ དེ་ནས་ཐིག་ལ་སྟོང་པའི་སྒྲོན་མ་ལམ་དུ་ཤར་ནས་ཐིག་ལེ་ལ་སྐུ་ལྔ་ཤར་བ་ཕན་ཆོད་ནི་ལོངས་སྐུའི་སྒྲོ་འདོགས་ལམ་དུ་ཆོད་པའོ༔ སྟོང་པའི་ཐིག་ལེ་འདིའི་སྣང་བ་མེད་པར་སྣང་བ་གོང་དུ་འཕེལ་བ་ཡང་ཡོད་དེ་རང་གི་ལུས་མི་སྣང་བར་སྐབས་སུ་འོད་ཀྱི་སོར་མོ་སྣང་བའི་དུས་ན་ཆོས་སྐུའི་སྒྲོ་འདོགས་ལམ་དུ་ཆོད་པའོ༔ ཐབས་སྣ་ཚོགས་ལ་བསླབ་པའི་རིག་པ་མང་དུ་བཤད་ནས་ཡོད་ཀྱང་ལས་ཀྱི་ཁ་ཚར་དུ་མ་སྟེ་སེམས་མི་གནས་པ་གནས་པར་བྱེད་པ་ཙམ་ལས་སངས་རྒྱ་བ་ལ་རྡུལ་གྱི་ཆ་ཡང་ཕན་པ་མེད་དོ། དེའི་ཕྱིར་ན་མན་ངག་གི་རྒྱལ་པོ་ཟངས་ཡིག་ཅན་མེད་ན་གཞན་མ་ཀུན་སྟོང་ཡུག་ཡིན་པས་འདི་དང་བྲལ་ན་

རང་གཞན་གཉིས་ཀའི་དོན་འགྲུབ་པ་མ་ཡིན་ནོ༔ མན་ངག་འདི་ཉིད་རྟགས་དང་ཚད་འབྲེལ་བས༔ རིན་ཆེན་གསེར་ལ་གཡུ་ཡི་ཕྲ་བཀོད་འདྲ༔ དེ་ཡི་ཕྱིར་ན་རྟགས་ཀྱི་ཡི་གེ་ལ༔ ཚད་ཀྱི་ཡི་གེ་འདི་མེད་སྟོང་ཡུག་ཡིན༔ དེ་ཡི་ཕྱིར་ན་མན་ངག་ཟངས་ཡིག་ཅན༔ གསུམ་པོ་འབྲེལ་ན་རྣལ་འབྱོར་དོན་ཆེན་འགྲུབ༔ འདི་གསུམ་མེད་ན་བསྒྲུབས་ཀྱང་དོན་མེད་འགྱང་༔ སྤྲུལ་བའི་ས་བོན་བསྟན་པའི་བུ་གཅིག་པོ༔ འདི་མེད་བསྒྲུབས་ཀྱང་འབྲས་བུ་སྨིན་པ་མིན༔ འདི་བཅངས་པ་ཡིས་སྤྲུལ་སྐུའི་ཡོན་ཏན་རྫོགས༔ དེས་ན་བསྟན་པ་ཀུན་གྱི་རང་བཙས་འདི༔ མཁའ་ལས་ཆར་བབས་རྩི་ཐོག་རྒྱས་པ་བཞིན༔ འདི་ཉིད་བཅངས་པ་ཙམ་གྱིས་འབྲས་བུ་སྨིན༔ མན་ངག་སྙིང་པོ་ཡང་གསང་ཐུགས་ཀྱི་བཅུད༔ ཡི་གེ་མ་རུ་སྙིང་གི་སྙིང་ཏིག་ཆོས༔ འདི་ཉིད་ཡོད་ན་རིག་པའི་གཏན་སྲིད་ཡིན༔ ཕུང་པོ་ཉིད་དང་བཅས་ཏེ་སེམས་ལ་སྦོས༔ དེ་ཡི་ཡོན་ཏན་བརྗོད་ཀྱིས་ལངས་པ་མིན༔ དེ་ཡི་གསང་བ་ཡི་གེ་མ་བུ་རྣམས༔ རབ་ཏུ་གཅེས་པས་མཆོག་ཏུ་རྒྱས་བཏབ་བོ༔ གཞན་ལ་སྤེལ་བར་བྱེད་པ་འདི་ཉིད་མིན༔ གསང་སྔགས་ཀུན་གྱི་ཡང་ཞུན་རིག་པའི་གནད༔ འདི་རུ་བསྡུས་ཏེ་སྙིང་པོ་སེམས་ལ་བརླན༔ རིན་ཆེན་གསེར་ལྟར་རྟག་ཏུ་སྤྱད་ན་བྲིན༔ གསང་བའི་ཡི་གེ་དེ་ཡང་དེ་དང་མཚུངས༔ དེ་ཡི་ཕྱིར་ན་དེ་ཡི་མན་ངག་གཟེར༔ རྟགས་ཀྱི་ཡི་གེ་འདི་མེད་འབྲས་བུ་རྣམས༔ བསྐྱལ་བའི་ས་མེད་ཐུག་པ་མེད་པར་འགྱུར༔ དེ་ཕྱིར་ཚད་རྣམས་ངེས་པའི་ཡི་གེ་འདིས༔ དུས་ཚོད་ངེས་པར་རབ་ཏུ་བརྟན་པར་བྱའོ༔ སྙིང་པོ་མཆོག་གི་ཐབས་འདི་ངེས་པར་གསང་༔ ཚད་ལ་སླེབས་པར་ཕབ་ནས་མངོན་དུ་བྱས༔ གསང་བའི་ཡང་གསང་སྙིང་པོའི་བཅུད་དུ་དྲིལ༔ བཅུད་རྣམས་བསྡུས་ནས་སྙིང་པོ་ལམ་དུ་བྱས༔ དེས་ན་ཡི་གེ་འདི་དག་རབ་ཏུ་དཀོན༔

དམ་པའི་དོན་དུ་ངེས་པར་གཟུང་བར་བྱ༔ རབ་ཏུ་བསྡུས་པའི་སྙིང་ཏིག་མཆོག་ཏུ་གཅེས༔ སྤྲོས་བཅས་བློ་ཡི་ཡུལ་དུ་ཚད་འདི་རྣམས༔ སྤྲོས་ཏེ་རྒྱས་པའི་དོན་དུ་གཟུང་བར་བྱ༔ ཆོས་ཉིད་ཚད་ནི་མཉམ་པར་གནས་པ་ཡིན༔ ཤེས་རབ་ཚད་ནི་སྙེམས་བྱེད་མེད་པ་ཡིན༔ ཡེ་ཤེས་ཚད་ནི་རང་གསལ་ཁ་དོག་ལྔ༔ དབྱིངས་ཀྱི་ཚད་ནི་གོང་ལྟར་སྣང་བ་ཡིན༔ རིག་པའི་ཚད་ནི་འཕེལ་འགྲིབ་མེད་པ་ཡིན༔ འོད་ཀྱི་ཚད་ནི་ཕྱི་ནང་འགགས་པ་ཡིན༔ ཐིག་ལེའི་ཚད་ནི་སྐུ་ལྔ་རང་གསལ་ཡིན༔ གཞི་ཡི་ཚད་ནི་འཕེལ་དང་བཅས་པ་ཡིན༔ ལམ་གྱི་ཚད་ནི་གདོས་བཅས་ནུབ་པ་ཡིན༔ འབྲས་བུའི་ཚད་ནི་ཟད་སར་འཁྱོལ་བ་ཡིན༔ སྐུ་ཡི་ཚད་ནི་རང་རྐྱང་སེམས་དཔའ་ཡིན༔ འདི་དག་རྣམས་ཀྱང་སྙིང་པོ་ངེས་པའི་ཚད༔ ཕྱིས་ཀྱི་ཚད་ནི་འདི་ཡིན་སེམས་ཀྱི་བུ༔ འོད་ཀྱི་ཚད་ནི་འོད་དུ་སྣང་བ་ཡིན༔ ཐིག་ལེའི་ཚད་ནི་གདངས་ཀྱི་ཡང་དག་ཡིན༔ རླུང་གི་ཚད་ནི་ཕྱི་ནས་དེ་བཞིན་སྒྲ༔ དབྱིངས་ཀྱི་ཚད་ནི་ས་རྣམས་གཡོ་བ་ཡིན༔ སྐུ་ཡི་ཚད་ནི་ཕྱི་ནས་དེ་བཞིན་སྐུ༔ འདི་རྣམས་ཀྱང་ནི་རིག་པའི་ཡོན་ཏན་ཡིན༔ ཚད་ལ་མ་ཕེབས་དོན་ཉིད་ཤེས་པ་མིན༔ ཚད་དང་ལྡན་པའི་ཉམས་ལེན་ཆུད་མི་ཟ༔ དེས་ན་ཚད་ཀྱི་ཡི་གེ་འདི་གཅེས་སོ༔ ཉམས་སུ་ལེན་པ་རྣམས་ཀྱི་ཚད་ཀྱི་ཡི་གེ་ཞེས་བྱ་བ༔ སྤྲུལ་པ་པོ་དགའ་རབ་རྡོ་རྗེས་མཛད་པ་རྫོགས་སོ༔ རྒྱ་རྒྱ་རྒྱ༔ སྔགས་ཀྱི་སྲུང་མ་རྣམས་ཀྱིས་སྲུངས་ཤིག༔ ཨི་ཏི༔ དགེའོ༔

མངོན་སུམ་སྙིང་ཐིག་གསང་བའི་ཡི་གེ་དམར་རུའི་རྒྱབ་ཡིག

མངོན་སུམ་སྙིང་ཐིག་གསང་བའི་ཡི་གེ་དམར་རུའི་རྒྱབ་ཡིག་བཞུགས་སོ༔༼ཕྲ་ཡིག༽ ཁ་ཐ ཾཿརྒྱབ་ཡིག་གི་སྟོད་ཆ།

དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ མངོན་སུམ་སྙིང་ཐ ིག་གསང་བའི་ཡི་གེ་དམར་རུའི་རྒྱབ་ཡིག༔ འདི་ཉམས་སུ་ལེན་པའི་སྐལ་ལྡན་སློབ་མ་དེས༔ སྔོན་དུ་བླ་མ་ལ་གསེར་རང་ལུས་ཙམ་ཕུལ་ལ་ལོ་གསུམ་གྱི་གོང་ནས་ཞུ་བ་འབུལ༔ ལས་སྦྱོང་པའི་ཐབས་སྣ་ཚོགས་བྱའོ༔ དེ་ནས་དབེན་པའི་གནས་སུ་སྤྲོས་བཅས་གྱི་དབང་དང་༔ སྤྲོས་མེད༔ ཤིན་ཏུ་སྤྲོས་མེད༔ རབ་ཏུ་སྤྲོས་པ་མེད་པ་རྣམས་ཀྱིས་སྨིན་པར་བྱེད་པ་གལ་ཆེའོ༔ དེ་ནས་གྲོལ་བར་བྱེད་པའི་གདམས་ངག༔ ལེ་ལོ་ཅན་མ་བསྒོམས་པར་སངས་རྒྱ་བ་དང་༔ བརྩོན་འགྲུས་ཅན་བསྒོམས་ནས་ཚེ་འདིར་སངས་རྒྱ་བའི་གདམས་ངག་བསྟན་ཏེ༔ དེ་ཡང་ཀུན་ཏུ་བཟང་པོ་གཞི་ཐ ོག་མ་ནས་སངས་རྒྱས༔ སེམས་ཅན་གྱིས་མ་རྟོགས་ཏེ་འཁོར་བར་འཁྱམས༔ དེ་གང་གིས་ལན་ན་མ་རིག་པས་ལན་ཏེ༔ དེ་ལ་རླུང་བཞི༔ འོད་བཞི༔ འབྱུང་བ་བཞི་ལ་སོགས་པར་འཁྲུལ་ཏེ༔ འབྱུང་བ་བཞི་ལས་མིའུ་རིགས་བཞིར་བྱུང་ངོ་༔ དེ་ལྟར་རྟོགས་པ་དང་བྱེད་པའི་ལས་ཀྱང་བྱུང་ངོ་༔ དེ་ལྟར་བློ་ཡི་རྩལ་ལ་ཆེ་ཆུང་བྱུང་བས་དེ་ལ་ཆུའི་མི་ནི་ལུས་ཟླུམ་གྱི་ལེབ་པ་དང་༔ སྐྲ་ཤད་དེ་བ་དང་༔ ངག་དལ་བ༔ ལུས་ཀྱང་མཉེན་པ་དང་༔ ཉལ་བ་དང་༔ དལ་བ་ཤས་ཆེ་བ༔ དེའི་དབང་གིས་འཕྱོར་ཆེ་བ༔ མོ་ལ་སྲེད་པ༔ ཁ་འཇམ་ལ་གཏི་མུག་པ་བྱི་ལའི་སྤྱ ོད་པ་དང་འདྲའོ༔ དེ་ལ་དབང་ཡང་སྤྲོས་བཅས་བསྐུར༔ གདམས་ངག་ཀྱང་སྤྲོས་བཅས་སེམས་འཛིན་གྱི་སྐོར་བསྟན༔ སེམས་ལུང་སྡོམ་ཁྲིགས་ལ་སོགས་པའི་རྒྱུ་འབྲས་གཙོ་ཆེ་བ་ལ་བློ་ཁྲིད་སྤྲོས་མེད་བློས་མི་ཆུན་པའི་ཕྱིར་རོ༔ དེ་མངོན་དུ་བྱུང་པ་དང་གསང་བ་བླ་མེད་བསྟན་ལ་ཉམས་སུ་ལེན་དུ་གཞུག་པས༔ འདི་ལ་སངས་མ་རྒྱས་ཀྱང་ཚེ་འཕོས་པ་དང་མངལ་གྱི་གྲོང་ཁྱེར་མི་འགྲིམ་སྟེ་སྤྲུལ་པ་སྐུའི་ཞིང་ཁམས་སུ་སངས་རྒྱ་

བ་ལ་ཐེ་ཚོམ་མེད་དོ༔ སའི་མི་ནི་ལུས་གྲུ་བཞི་སྒེག་པ༔ སྐྲ་མཚམས་དམའ་བ༔ ཁ་སྤུ་ཡོད་པ༔ གཏམ་ཉུང་ཞིང་བརྡ་མི་གསལ་བ༔ སྡོད་ཚན་ཆེ་བ༔ སྤྲོས་པ་ལ་མི་དགའ་བས་དབང་ཡང་སྤྲོས་མེད་བསྐུར༔ གདམས་ངག་ཀྱང་སྒོམ་བཅས་སྒོམ་མེད་དབྱེར་མེད་དུ་སེམས་སྡེ་དང་མན་ངག་གི་སྡེ་དབྱེར་མེད་དུ་སྤེལ་བ་གདབ། མཇུག་ཏུ་བླ་མེད་བསྟན༔ འདི་ལ་སངས་མ་རྒྱས་ཀྱང་འཆི་ཁ་བར་དོ་ལ་སངས་རྒྱ་བ་ལ་ཐ ེ་ཚོམ་མེད་དོ༔ མེ་ཡི་མི་ནི་ལུས་གྲུ་གསུམ་ལ་དམར་ཞིང་སྣ་རྣོ༔ སྐོམ་དད་ཆེ༔ སྤྲོ་ཐུང་༔ ཞེ་སྡང་དང་ང་རྒྱལ་ཆེ༔ ཤེས་རབ་ཆེ་བས༔ སྤྲོས་མེད་ཤིན་ཏུ་སྤྲོས་མེད་བསྐུར༔ གདམས་ངག་ཀྱང་ཀློང་སྡེ་སྒོམ་མེད་བསྟན་ཏེ༔ དེ་ནས་མཇུག་བླ་མེད་དང་འཕྲད་མ་ཐག་ཏུ༔ རྟགས་ཚད་མཐར་ཕྱིན་ནས་ལོ་ལྔའམ་བདུན་དུ་སངས་རྒྱ་བ་ལ་ཐ ེ་ཚོམ་མེད་དོ༔ རླུང་གི་མི་ནི༔ ལུས་ཡང་ཞིང་མགྱོགས༔ ཁ་ཟླ་གམ་དུ་མངོན་པ་དང་༔ སྡོད་མི་ཚུགས་པ་དང་༔ ཕྲག་དོག་ཆེ༔ རྫུན་ཆེ༔ བློ་ཡངས༔ ཤེས་རབ་ཆེ་བས་དབང་ཡང་རབ་ཏུ་སྤྲོས་པ་མེད་པ་བསྐུར༔ གདམས་པའང་སྤྲོས་མེད་ཟང་ཐལ་དོན་རྒྱུད་རྣམས་བསྟན་ནོ༔ མཇུག་ཏུ་བླ་མེད་བསྟན་པས་ལོ་གསུམ་ན་ཚེ་འདི་རང་ལ་ཟག་བཅས་མི་སྣང་བར་སངས་རྒྱའོ༔ གཡུ་ཡིག་ཅན་དུ་ཤེས་སོ༔ དེ་ལྟར་གང་འཕྲོད་བལྟས་ལ་སྦྱིན་ནོ༔ དེ་ཡང་སེམས་ལུང་སྒོམ་ཁྲིགས་ལས༔ མ་མཐོང་ཡུལ་དེ་བལྟ་འདོད་ན༔ ཡུལ་དེ་ཡིད་ལ་མ་བྱེད་པར༔ ལམ་དེ་ཡིད་ལ་གྱིས་ལ་སོང་༔ ཞེས་པས༔ དད་པ་དང་ལྡན་པའི་སློབ་མ་དེ་དུར་ཁྲོད་དམ་དབེན་པར་སྔོན་དུ་རང་གི་བླ་མ་མཉེས་པར་བྱས་ཏེ་ཚོགས་བསག་པའི་སྦྱོར་བ་བྱ༔ དེ་ནས་བླ་མས་གདམས་པ་གདབ་པར་བྱའོ༔ དེ་ལ་ཤེས་རབ་རྣམ་པ་གསུམ་ལ་བློ་ཐག་བཅད་ནས་ཚེ་འདི་ཉིད་ལ་སངས་རྒྱ་དགོས་ཏེ༔ འདིར་མ་གྲོལ་ན་ཡིད་དཔྱོད་འཛིན་པ་དང་ཁྱད་

པར་མེད་དོ༔ དེ་ལ་སྤྱ ོད་པ་ལ་རྒྱུན་དུ་བྱེད་པ་དང་༔ སྒོམ་པ་ལ་རྒྱུན་དུ་བྱེད་པ་དང་༔ ལྟ་བ་ལ་རྒྱུན་དུ་བྱེད་པ་དང་༔ འབྲས་བུ་ལ་རྒྱུན་དུ་བྱེད་པའོ༔ དེ་ཡང་སྤྱ ོད་པ་ལ་རྒྱུན་དུ་བྱས་ནས་སངས་རྒྱ་བ་ནི༔ འཁོར་འདས་རུ་ཤན་འབྱེད་པའི་སྤྱ ོད་པ་དང་༔ བརྟུལ་ཞུགས་གྲངས་འཛིན་གྱིས་སྤྱ ོད་པ་དང༔ སྣང་བ་རང་སར་གྲོལ་བ་རིག་པ་རྣལ་དུ་འབེབས་པའི་སྤྱ ོད་པ་རྣམས་དབང་དུ་གསལ་ལོ༔ སྒོམ་པ་ལ་རྒྱུན་དུ་བྱེད་པ་ནི༔ དེ་ལ་རང་བཞིན་གྱི་བསམ་གཏན་དང་༔ བཅོས་མའི་བསམ་གཏན་ནོ༔ རང་བཞིན་ནི༔ ལྷ་མི་ཕལ་དང་༔ ཁྲ་ཚང་ན་ཉལ་བ་དང་༔ རི་བོང་གི་མིག་དང་༔ བུ་ཆུང་གི་མིག་དང་༔ མདའ་སྲང་གི་མིག་དང་༔ དེ་རྣམས་ལ་ཡོད་དོ༔ ལུང་དུམ་བསྟན་པའི་ལྷ་དང་མི་ལ་བསམ་གཏན་བཅས་པ་ཡང་ཡོད་དོ༔ བཅོས་མའི་བསམ་གཏན་ནི༔ རྣལ་འབྱོར་པ་ལ་གནོད་པ་གཉིས་ཡོད་དེ༔ འཕྲལ་དུ་ཟས་དང་གོས༔ ཕུགས་སུ་རྨི་ལམ་དང་༔ བག་ཆགས་གཉིས་སོ༔ དེ་ལ་བསམ་གཏན་གྱི་ཐུན་བཞི་ཡིན་ཏེ༔ བཅུད་ལེན་ལ་བརྟེན་ནས་ཟས་ཀྱི་ཞེན་པ་བཅད་པའི་གསམ་གཏན་གྱི་ཐུན་དང་༔ རླུང་དང་རྟེན་འབྲལ་ལ་བརྟེན་ནས་གོས་ཀྱི་ཞེན་པ་བཅད་པའི་བསམ་གཏན་དང་༔ གཉིད་ཀྱི་གདམས་ངག་གིས་རྨི་ལམ་གྱི་ཞེན་བ་བཅད་པའི་བསམ་གཏན་དང་༔ རྩེ་གཅིག་གི་བསམ་གཏན་ལ་བརྟེན་ནས་བག་ཆགས་ཀྱི་ཞེན་པ་བཅད་པའི་བསམ་གཏན་ནོ༔ དེ་ལ་གསུམ་པོ་ལོགས་སུ་ཤེས་སོ༔ འདིར་རྩེ་གཅིག་གི་བསམ་གཏན་ལ་དམིགས་པ་རྒྱུད་ལ་བསླབ་པ་ལོགས་སུ་ཤེས༔ འདིར་རྟེན་མེད་ལ་བསླབ་པ་སྟོན་ནོ༔ སྒོམ་པ་ལ་རྒྱུན་དུ་བྱེད་ན༔ ལྷ་དང་མི་ཡི་སེམས་འཛིན་དང་༔ བྱང་ཆུབ་སེམས་དཔའི་བསམ་གཏན་དང་༔ བདེ་བར་གཤེགས་པའི་དགོངས་པའོ༔ དེ་ལ་ལྷ་དང་མི་ཡི་སེམས་འཛིན་ནི༔ དབེན་པའི་གནས་སུ་བསོད་ནམས་ཀྱི་ཚོགས་སྔོན་དུ་སོང་བས་ལུས་སྐྱིལ་ཀྲུང་དུ་བཅས་ལ་རང་གི་སྣ་རྩེ་ལ་ཨ་དཀར་པོ་གཅིག་བསམ་སྟེ༔ རང་གི་རླུང་ཕར་

ལ་སོང་བའི་དུས་སུ༔ ཨ་དེ་ཕར་ལ་རྒྱངས་རྒྱངས་སོང་པ་ལ་བློ་གནས་པར་བྱ༔ རླུང་ནང་དུ་རྔུབ་པའི་ཚེ་དཀར་ཧྲི་ལི་ལི་ཚུར་སྣ་རྩེ་ལ་གནས་པ་ལ་བྱའོ༔ རང་གི་ལུས་ལ་ཚད་པའི་ནད་ཡོད་ན་ཨ་དེ་གྲང་རེག་དང་ལྡན་པར་བསྒོམས༔ གྲང་བ་ཡོད་ན་ཚ་རེག་དང་ལྡན་པར་བསྒོམ༔ དེ་ལྟར་ཐུན་ཆུང་ལ་གྲངས་མང་པར་ཉིད་མཚན་བར་མ་ཆད་པར་བསྒོམས་པས་སྐྱེ་མེད་བསམ་ངོ་དང་བྲལ་བའི་ཉམས་མྱོང་མི་སྐྱེ་མི་སྲིད་དོ༔ གང་ཟག་གཅིག་གི་ཆ་རྐྱེན་རྫོགས་སོ༔ ༔ དེ་ནས་ཡང་བར་ཆོད་སེལ་བའི་ཡི་གེ་ཕཊ་དྲག་པོ་ལ་སེམས་གཟུང་བ་ནི༔ སྔོན་དུ་བླ་མ་མཉེས་པར་བྱས་ལ་གོང་ལྟར་ལུས་བཅོས་ལ་ལྷོད་ཅིང་རླུང་རང་སོར་བཞག་དེར་སེམས་ཡེངས་སུ་བཅུག་ལ་རབ་ཏུ་དྲག་པོས་ཕཊ་བརྗོད་པས༔ དུས་དེ་ཉིད་དུ་ཤེས་པ་གཏད་མེད་དུ་འོང་སྟེ༔ དེའི་དུས་སུ་སེམས་བཟུང་ཞིང་ཡང་དང་ཡང་དུ་ཕཊ་ཀྱིས་ཤེས་པ་གསལ་གདབ་པར་བྱ་སྟེ༔ དེ་ནས་ཉིན་མཚན་མེད་པར་ཉམས་སུ་བླངས་པས་རང་བཞིན་ཡོངས་སུ་དག་པའི་ཉམས་སུ་མྱོང་བ་མི་སྐྱེ་མི་སྲིད་དོ༔ དེས་གང་ཟག་གཅིག་གི་ཆ་སྐྱེན་ཐལ་ནས༔ ཡང་ཁྲོ་བོ་དགྱེས་པའི་གན་མོ་ལ་སེམས་གཟུང་བ་ནི༔ སྔོན་དུ་བླ་མ་ཡོན་གྱིས་མཉེས་པར་བྱས་ཏེ་ལུས་གནད་གོང་བཞིན་བྱས་ལ༔ ངག་ཏུ་ཧ་ཞེས་དྲག་ལ་ཐུང་བར་བརྗོད༔ ཤེས་པ་ཧ་ལ་གཏད༔ རྣམ་རྟོག་ལ་སོགས་པའི་མི་བདེ་བ་ཅི་བྱུང་དུས་སུ༔ ཧ་དྲག་ཏུ་བརྗོད་ཅིང་རླུང་དང་བསྲེ་བ་གནད་ཡིན་ནོ༔ དེ་ལྟར་དུས་ཐམས་ཅད་དུ་བསྒོམས་པས་ཆོས་ཉིད་ཡང་དག་པ་ངོས་བཟུང་དང་བྲལ་བའི་ཉམས་མྱོང་མི་སྐྱེས་མི་སྲིད་དོ༔ དེས་གང་ཟག་གཅིག་གི་ཆ་རྐྱེན་ཐལ༔ ཡང་ལྷ་མ་ཡིན་རྩོད་པ་འགྱེད་པ་ལ་སེམས་འཛིན་པ་ནི༔ དབེན་པའི་གནས་སུ་བླ་མ་མཉེས་པ་དང་ལུས་གནད་རི་མཐོན་པོའི་ཁར་ཙོག་བུར་འདུག་ལ༔ མགོ་དང་པོ་དལ་གྱིས་བསྒྲིལ༔ ལུས་ཀྱང་དང་པོ་འགུལ་བསྐྱོད་

དལ་བར་བྱ༔ དེ་ལས་བྲེལ་བ་གསུམ་གསུམ་བཞི་བཞི་ཙམ་བྱ༔ དེ་ནས་མགོ་ལ་སོགས་པ་དྲག་ཏུ་བསྒྲིལ་བས༔ དུས་གཅིག་ཙམ་ན་ཕྱི་ཡི་སྣང་བ་དམར་ཁྲུག་ཁྲུག་པ་དང་༔ སེར་བྲེང་བྲེང་པ་དང་༔ སྔོ་ཡལ་ཡུལ་དང་༔ ནག་ཐབས་ཐ ིབས་དང་༔ དེ་ནས་སྐྱ་སང་ངེ་འབྱུང་ངོ་༔ དེ་ལྟར་ཡུན་རིང་དུ་བྱས་པས་ཕྱི་ས་རྡོ་རི་བྲག་གི་སྣང་བ་ཅིའི་ངོ་བོར་ཡང་གྲུབ་པ་མེད་དོ༔ འདིའི་དུས་ན་མཐོང་སྣང་རང་གྲོལ་ནས་སྣང་བ་འོད་གསལ་དུ་མཐོང་བའི་ཉམས་མྱོང་མི་སྐྱེ་མི་སྲིད་དོ༔ འདིའི་དུས་ན་རླུང་ལ་ཤིས་པའི་ཁ་ཟས་བསྟེན་པར་བྱའོ༔ ལྟེ་བར་ཡི་གེ་རམ་ལ་སེམས་གཏད་པ་ནི་གནད་ཡིན་ནོ༔ གང་ཟག་གཅིག་གི་ཆ་རྐྱེན་ཐལ་ལོ༔ ཡང་རྣམ་པར་རྟོག་པ་ཧཱུྃ་གིས་དེད་པ་ལ་སེམས་གཟུང་བ་ནི༔ དེ་ནས་སྔོན་བཞིན་བླ་མ་མཉེས་པར་བྱས་ལ་དབེན་པའི་གནས་སུ་ལུས་ངག་ཁོང་གློད༔ ངག་ཏུ་ཧཱུྃ་ཞེས་རིང་པོར་དབྱངས་དང་བཅས་པས་བརྗོད་དེ༔ རླུང་སེམས་དང་བསྲེ་བ་ནི་གནད་ཡིན་ནོ༔ ཡང་ཧཱུྃ་ཞེས་ནམ་མཁའི་ཁམས་སུ་འཕང་བ་དང་༔ སྡུད་པ་དང་༔ ལུས་ལ་འཇུག་པ་དང་༔ ས་རྡོ་རི་བྲག་ལ་སོགས་པ་ལ་ཟང་ཐལ་ལ་སོགས་པ་བར་མ་ཆད་པར་བྱས་པས་སེམས་ཟིན་ཏེ་གང་དུ་ཡང་སེམས་གཡེང་བ་མེད་པ་འབྱུང་ངོ་༔ རྟོག་པ་ཆོས་ཉིད་དུ་འཆར་བའི་ཉམས་མྱོང་མི་སྐྱེ་མི་སྲིད་དོ༔ ད་ནི་སྐལ་ལྡན་ལམ་དུ་འཇུག་པའི་མན་ངག་ལ༔ བླ་མ་མཉེས་པ་ལ་སོགས་པའི་གོ་རིམ་གོང་ལྟར་བྱས་ལ་རང་སྟན་བདེ་བ་ལ་འདུག་སྟེ༔ སྟོང་པ་ཉིད་རིམ་གྱིས་ལ་སེམས་བཟུང་བ་ནི༔ དང་པོ་ལུས་བྱེ་བྲག་མང་པོར་བསིལ་ལ༔ མགོ་གཅིག་པ་རང་ལ་ཡང་མིང་མང་ངོ་༔ མིག་རྣ་བ༔ སྣ་ལྕེ༔ ལ་སོགས་པ་དཔག་ཏུ་མེད་པར་བསལ་བས༔ མིང་ལ་དོན་བརྟགས་པས་མགོའི་དབང་པོ་གྲུབ་པ་མེད་པར་ཤེས་པ་དང་༔ དེ་ནས་ལུས་སྤྱི་ལ་བརྟགས་ཀྱང་གྲུབ་པ་མ་རྙེད༔ དེ་ནས་ཕྱི་རོལ་གྱི་དངོས་པོ་ཐམས་ཅད་དེ་ལྟར་

མིང་དོན་དུ་མས་བཙལ་བས་ཀྱང་མ་རྙེད༔ དེ་ལྟར་མིང་གིས་བཏགས་པ་ཐམས་ཅད་སྟོང་པར་གོ་བས༔ དངོས་པོ་ཡང་འགྱུར་ཏེ་སྟོང་པར་འགྱུར་བ་འོང་ངོ་༔ དེས་ནི་ཆོས་ཉིད་སྟོང་པ་ཉིད་དུ་མི་གྲོལ་མི་སྲིད་དོ༔ དེ་ནས་མིག་ཏུ་སྣང་ཚད་དང་དྲན་ཚད་ལ་ཤེས་པ་བཅུག་ཅིང་དེ་ཉིད་སྐད་ཅིག་ལ་སྟོང་པར་སོང་བ་ལ་བློ་གནས་པར་བྱས་པས་དུས་ཚོད་ཅིག་ན་གང་ལ་ལྟས་པ་སྟོང་པར་ཁྲོལ་ཁྲོལ་འགྲོ་བ་ངག་འབྱུང་ངོ་༔ དེ་ལྟར་ཡུན་རིང་དུ་བསྒོམས་པས་སྣང་བ་ཐམས་ཅད་མེ་ལོང་ལ་ཧས་བཏབ་པ་ལྟར་སྟོང་སང་གིས་མི་གྲོལ་མི་སྲིད་དོ༔ དེ་ཡང་དང་པོ་སྣང་ལ༔ དེ་ནས་གཉིས་པ་སྟོང་ལ༔ གསུམ་པ་སྣང་སྟོང་གང་དུའང་མ་གྲུབ་པའོ༔ འདི་ཚོའི་སྡོམ་ཡང་དག་ལ་བརྟེན་པའི་བསམ་གཏན་བཞིའི་དུས་སུ༔ ཤེས་པ་རྣ་བར་གཞུག་ཅིང་ངག་གི་བརྗོད་པ་མ་ཉམས་པ་གལ་ཆེ༔ ལུས་ལ་བརྟེན་པའི་བསམ་གཏན་ལྷ་མ་ཡིན་རྩོད་པ་འགྱེད་པའི་དུས་སུ༔ ལུས་ཀྱི་སྒུལ་བསྐྱོད་མ་བཤིག་པ་གནད་ཡིན་ནོ༔ ལྷག་མ་སེམས་ཀྱི་བསམ་གཏན་གཉིས་པོའི་དུས་སུ༔ སེམས་ཀྱི་གཏད་ས་མ་ནོར་ཤིང་མ་ཡེངས་པ་གནད་ཡིན་ནོ༔ དེ་ལ་མིང་དུ་བཏགས་ན་ཉིན་མཚན་ཁ་སྦྱོར་གྱི་སྒོམ་པ་ཞེས་བྱའོ༔ དམིགས་པ་རྟེན་མེད་ལ་བསླབ་པའི་བསམ་གཏན་ནོ༔ ས་ལ་གནས་པའི་བྱང་ཆུབ་སེམས་དཔའི་བསམ་གཏན་ནི༔ ས་དང་པོ་བདེན་པ་མཐོང་བ་ནས་ཡོན་ཏན་བརྒྱ་ཕྲགབཅུ་གཉིས་གཉིས་པ་ལ་ཉི་ཤུ་རྩ་བཞི༔ དེ་ལྟར་རིམ་པ་བཞིན་ས་བཅུ་རྒྱུན་གྱི་ཏིང་ངེ་འཛིན་ཚུན་ཆད་ལའོ༔ བདེ་བར་གཤེགས་པའི་དགོངས་པ་ནི༔ ཐུན་མཚམས་ལས་འདས་ཏེ༔ མ་བཅོས་རང་བཞག་གནས་ལུགས་ཏེ༔ ཇི་ལྟར་དེ་ལ་འགྱུར་མེད་པས༔ སངས་རྒྱས་རྣམས་ཀྱི་དགོངས་པ་ཡིན༔ ཞེས་པས༔ གནད་ཀྱི་རྒྱ་མཚོ་ཅོག་བཞག་སྟེ༔ གང་བསྒོམས་ཀྱང་

མིག་མ་འཁྲུལ་བར་རང་སོར་བཞག་པ་གནད་ཡིན༔ ལྟ་བ་ལ་རྒྱུན་དུ་བྱེད་པ་ལ་ལྔ་སྟེ༔ ལྟ་བ་གྲོང་ཁྱེར་རྒྱུན་གཅོད༔ མན་ངག་རི་བོ་ཅོག་བཞག༔ དགོངས་པ་ཁམས་གསུམ་ཡོངས་གྲོལ༔ ཉོན་མོངས་པ་གནས་དག༔ གང་ཟག་ཟད་པའོ༔ དང་པོ་ནི་གསུམ༔ ཕྱི་ཆོས་ཅན་དུམ་བུ་བ་ལ་རྡོ་རྗེའི་མིག་གིས་ཅོག་བཞག་ཏུ་བལྟས་པས༔ ཕྱི་ཆོས་ཅན་གྱི་རྣམ་པ་སྣང་ལ་རང་བཞིན་མེད་པར་གཟུགས་བརྙན་ནམ་རྨི་ལམ་སྒྱུ་མ་ལྟ་བུར་མཐོང་བས་འཁྲུལ་པ་ལ་ཡང་དག་ཏུ་གྲུབ་པ་མེད་པར་རྟོགས་པས་ཁམས་གསུམ་དུ་ལྡོག་པ་མེད་པས་བློ་བདེ་བའོ་ནང་ཆོས་ཅན་གྱི་བྱེ་བྲག་པ་ལ་རྟོག་པའི་ཚུལ་གྱིས་ཤེས་རབ་ཀྱི་མིག་གིས་རང་བཞིན་ཏུ་བལྟས་པས་ཀུན་རྫོབ་ཀྱི་རྣམ་པ་རྣམས་མེད་པའི་རང་བཞིན་སྒྱུ་མ་ལྟ་བུ་མཐོང་བས་འཁྲུལ་པ་རང་དག་ཏུ་གྲུབ་པ་མེད་པར་རྟོགས་པས་རིག་པ་ལ་བག་ཆགས་མེད་པས་བློ་བདེའོ༔ གསང་བ་བུ་ཆུང་གི་མིག་གིས་རྣམ་པར་དག་པ་ལ་ཅེར་བཞག་ཏུ་བལྟས་ཏེ༔ དེ་ཡང་གནད་གསུམ་དང་མ་བྲལ་བར་བལྟས་པས་དབྱིངས་རིག་འདུ་འཕྲལ་མེད་པར་མངོན་སུམ་དུ་མཐོང་བས་བློ་བདེའོ༔ དེ་ཡང་བརྩོན་འགྲུས་རབ་ཚེ་འདི་ཉིད་ལ་ཟག་བཅས་མི་སྣང་བར་སངས་རྒྱའོ༔ འབྲིང་ངོ་ཕྲད་ནས་དུམ་རེ་ཉམས་སུ་བླངས༔ དེ་ནས་ཐང་ཆད་ཉམས་སུ་བླང་ལོངས་མ་བྱུང་པ་ལ་ནི་བར་དོ་ལ་རང་གི་ཆོས་ཉིད་སྟོབས་སུ་གྱུར་ནས་སངས་རྒྱའོ༔ ཐ་མ་གདམས་ངག་ཞུས་ནས་ཉམས་སུ་བླང་ལོངས་མ་བྱུང་བ་ནི་ཆོས་ཉིད་བདེན་པའི་བྱིན་རླབས་ཀྱིས་སྤྲུལ་སྐུའི་ཞིང་ཁམས་སུ་བརྫུས་ཏེ་སྐྱེས་ནས་མངལ་གྱི་གྲོང་ཁྱེར་རྒྱུད་ཆད་ནས་སངས་རྒྱའོ༔ དེ་ལ་མན་ངག་རི་བོ་ཅོག་བཞག་ནི༔ ཐེག་པ་ཐམས་ཅད་ཀྱི་ལྟ་བ་མཐོང་༔ རང་གི་ཆོས་ཉིད་མི་འགྱུར་བར་གནས་པས་རི་བོ་ཅོག་བཞག་གོ༔ དེ་ལྟར་རྟོགས་པའི་ཚེ་ན་འགྲོ་དྲུག་རང་སར་གྲོལ་བ་ཏེ་འཁྲུལ་པ་མི་གནས་པར་རྟོགས་པའོ༔ ཉོན་མོངས་པ་གནས་དག་ནི༔ ཉོན་མོངས་པ་རྣམས་རང་བྱུང་རང་དག་ཏུ་རྟོགས་པའི་

དུས་སོ༔ ཆོས་ཟད་པ་ནི་ཡིད་ལ་བྱེད་པའི་ཆོས་ཐམས་ཅད་རང་སར་དག་ནས་བྱ་རྒྱུ་མེད་པའོ༔ འབྲས་བུ་ལ་རྒྱུན་དུ་བྱེད་པ་ནི༔ འདིའི་མན་ངག་ཏུ་རི་བོ་ཅོག་བཞག༔ དགོངས་པ་སྲིད་གསུམ་ཀ་དག༔ ཉོན་མོངས་རང་སར་གྲོལ༔ གང་ཟག་ཆོས་ལས་གྲོལ་བའོ༔ དེ་ཡང་ངོ་སྤྲོད་ཀྱི་གནད་ལ་གོམས་པས་ཆོས་ཉིད་མངོན་སུམ་གྱི་སྣང་བ་ནི་ཡུལ་ནམ་མཁའ་སྟོང་པ་འདི་ཉིད་ལ་རྣམ་རྟོག་གང་གིས་ཀྱང་མ་བསླད་པར་མཐོང་བ་དེ་ཉིད་དོ༔ དེ་ཉིད་ལ་རིག་པ་ཅོག་བཞག་ཏུ་བཞག་ནས་ཉམས་སུ་བླངས་པས་དུས་ཚོད་གཅིག་ཙ་ན་ཐ ིག་ལེ་སྟོང་པའི་སྒྲོན་མ་རྩོལ་བ་མེད་པར་ཤར་ནས་འོང་ངོ་༔ དེ་ནས་ཡེ་ཤེས་ཀྱི་ཐ ིག་ལེ་ཕྱེད་སྐུ་དང་བཅས་པ་ཚུན་ཆད་ཉམས་གོང་འཕེལ་གྱི་སྣང་བའོ༔ དེ་ནས་འོད་ལྔ་གྱེན་འགྲེང་དང་༔ རྩིབས་ཤར་དང་༔ མཆོད་རྟེན་བརྩེགས་པ་ལྟ་བུ་དང་༔ དྲ་བ་དང་༔ དྲ་བ་ཕྱེད་པ་དང་༔ མིག་མངས་རིས་དང་ཡུལ་གྲུ་ཙམ་པ་རྣམས་འོང་ངོ་༔ རེ་རེ་ཡང་སྐུ་ལྔར་སྣང་བའི་དུས་ན་རིག་པ་ཚད་ལ་ཕེབས་ཏེ༔ དཔེར་ན་བྲེ་ཚད་དང་༔ སྲང་ཚད་ལ་ཕེབས་པ་ལྟ་བུའོ༔ འདིའི་དུས་ན་ཉམས་སུ་མ་བླངས་ཀྱང་ཆོག་གོ༔ དེ་ནས་དེ་ལས་ཆེར་འཕེལ་བ་མེད་པས་དེ་དག་གི་འཕེལ་ཟད་ནས་ཆོས་ཉིད་ལ་སོགས་པ་སྣང་བའི་ཉམས་དེ་དག་གང་དུའང་སྣང་བའི་ངོ་བོ་མེད་པ་ནི་ཆོས་ཉིད་ཟད་པའི་སྣང་བ་ཞེས་ཐ་སྙད་དུ་བྱས་སོ༔ དེ་ལྟར་དང་པོ་དབང་དང་དམ་ཚིག་དང་སྡོམ་པ་ཞུས་ནས༔ བླ་མས་རིགས་ཀྱི་བུ༔ འདུག་གྱིས་དང་འདི་ལྟར་འོང་གིས་ཞེས་གདམས་པ་བསྟན་ནས་ཉམས་སུ་བླངས་པས༔ དང་པོ་ཆོས་ཉིད་མངོན་སུམ་གྱི་སྣང་བ་འཆར༔ དེ་ནས་ཉམས་གོང་འཕེལ་གྱི་སྣང་བ་འཆར༔ དེ་ནས་རིག་པ་ཚད་ཕེབས་ཀྱི་སྣང་བ་འཆར༔ དེ་ནས་ཆོས་ཉིད་ཟད་བའི་སྣང་བ་འཆར་ཏེ༔ དེ་ལྟར་སྣང་བ་བཞི་མཐར་ཕྱིན་པའི་དུས་ན་སྐལ་ལྡན་དེ་ཟག་པ་དང་བཅས་པའི་ཕུང་པོ་མི་སྣང་བས་སངས་རྒྱའོ༔ ཨྠྀི༔ ༔ གུ་ཧྱ༔

ཟངས་ཡིག་ཅན་གྱི་སྣང་བྱེད་སྒྲོན་མ།

ཟངས་ཡིག་ཅན་གྱི་སྣང་བྱེད་སྒྲོན་མ་བཞུགས་སོ༔ ༼ཕྲ་ཡིག༽རྒྱབ་ཡིག་གི་སྨད་ཆཿ

དཔལ་བདེ་བྱེད་ཆེན་པོའི་སྐུ་ལ་ཕྱག་འཚལ་ལོ༔ གསང་བའི་ཡི་གེ་མ་རུའི་དགོངས་པའི་གནད་རྣམས་ནི༔ སྦས་ཤིང་གབ་པའི་ཚིག་ཀུན་གསལ་བར་ནི༔ སྤྱི་ཡི་དོན་རྣམས་འདི་རུ་སྣང་བར་ཡང་༔ སྣང་བྱེད་སྒྲོན་མའི་ཡི་གེ་འདི་ལ་ལྟོས༔ སྒྲོན་མ་ཡིས་ནི་མུན་པ་སྣང་བ་ལྟར༔ ཡི་གེ་འདི་ཡིས་ཚིག་གི་དོན་རྣམས་ནི༔ རྣམ་པར་སྣང་བར་བདག་གིས་བཀོད་ནས་བསྟན༔ འདི་ཉིད་ཚིག་ལ་ཐེ་ཚོམ་མ་ཟ་བར༔ འདི་དོན་ཉམས་སུ་ལོངས་ཤིག་རིགས་ཀྱི་བུ༔ གལ་ཏེ་གསང་ཆོག་མན་ངག་འདི་རྙེད་ནས༔ ཉམས་སུ་མ་བླངས་འཁོར་བར་གཡེངས་བྱས་ན༔ བསྐལ་བ་བྱེ་བ་དྲུག་འབུམ་ཉིད་དུ་ཡང་༔ སངས་རྒྱས་ཉིད་དང་ཕྲད་པར་འགྱུར་རེ་ཀན༔ དེ་བས་འདི་ལ་གོམས་ཤིང་ཚད་ལ་ཕབ༔ གསང་བའི་ཡི་གེ་མ་རུའི་གཞུང་གི་ཚིག་རྣམས་ཕྱེ་ནས་གནད་ཀྱི་ཡི་གེ་གསལ་བའི་ལྡེ་མིག་འདི་དགོས་པས་འདི་ལ་ནན་ཏན་བྱ༔ སྤྲོས་པ་གཅོད་པའི་སྒྲོན་མ་འབྱུང་བ་ལྔ་རང་དེངས་ཀྱི་མན་ངག་འདི་ལ༔ འབྱུང་བ་ལྔ་ཆམ་ལ་འབེབས་པའི་མན་

ངག་གིས༔ ཡི་གེ་ཨ་རྣམ་པ་ལྔ་དབུགས་གཅིག་ལ་བརྩེགས་མར་བསྒོམས་པས་འབྱུང་བ་ལྔར་གནད་ལ་ཕེབས་པར་ཨ་རྣམ་པ་ལྔའི་དོན་སྐྱེ་མེད་དུ་རྒྱས་བཏབ་ལ༔ རིག་པའི་ངོ་བོ་ཨའི་རང་བཞིན་དུ་ཉམས་སུ་བླང་༔ རླུང་ཆུ་མེའི་ས་བོན་གསུམ་གྱི་ཡི་གེས་ལུས་ཀྱི་འབྱུང་བ་འཁྲུགས་པའི་དུས་ན་གནས་གསུམ་དུ་བཞག་སྟེ་ཤེས་པ་དེར་གཏད་ནས་བསྒོམ་ཞིང་རླུང་ཡང་དེར་གཏད་ནས་བསྒོམས་པས་ནད་རྣམས་དག་པར་བྱེད་པའི་འབྱུང་བའི་གནད་ཡིན༔ ནམ་མཁའ་རྣམ་པར་དག་པར་བྱེད་པ་ཨ་གཉིས་བརྩེག་གི་གདམས་ངག་གིས༔ སེམས་བར་སྣང་ལ་ཨྸ་ལ་གཏད་པས་ཨ་སེམས་ཀྱི་དྲི་མ་རང་ཟད་ལ་གཏོང་བའི་གནད་ཡིན༔ རླུང་རྣམ་པར་དག་པར་བྱེད་པ་ལ་ཨ་སུམ་བརྩེག་གི་གདམས་ངག་གིས༔ དབུགས་ཕྱི་ནང་དུ་རྒྱུ་བའི་ཚེ་དྲན་པ་རྣམས་རང་ཡལ་དུ་གཏོང་བ་ནི༔ སྣང་བ་སྐྱེ་མེད་དུ་གཏད་པ་ནི་ཨྸྸ་ལ་དབུགས་གཏད་པས་དབུགས་ནང་དུ་རྒྱུ་བའི་ཚེ་དྲི་མ་རྣམས་ཟད་ཅིང་སྟོང་པའི་གནད་ཡིན༔ ཆུ་རྣམ་པར་དག་པར་བྱེད་པ་ཨ་བཞི་བརྩེག་གི་མན་ངག་གིས་

འཛིན་པ་རྣམ་པར་དག་པར་བྱེད་པ་ནི་ཡི་གེ་ཨྸྸྸ་ལ་སེམས་གཏད་པས་སྡུད་བྱེད་ཀྱི་དྲི་མ་རྣམ་རང་སར་དག་ནས་མིག་རྣམ་ཤེས་རང་རྒྱུད་དུ་འཛིན་པ་དག་པར་བྱེད་པའི་གནད་ཡིན་ནོ༔ མེ་རྣམ་པར་དག་པར་བྱེད་པ་ཨ་ལྔ་བརྩེག་གི་མན་ངག་གིས་གཟུང་བ་མཆེད་པའི་དྲི་མ་རང་སར་དག་པར་བྱེད་པ༔ མིག་གི་བར་སྣང་ལ་ཡི་གེ་ཨྸྸྸྸ་ལ་སེམས་གཏད་པས་སྒོ་ལྔའི་རང་རྒྱུད་བཟློག་པའི་དགོས་པ་ཡོད་པའི་གནད་ཡིན་ནོ༔ འདིའི་གནད་ཀྱི་མན་ངག་ལ་ནི༔ ཀ་ཁ་ག་ང་ཅ་ནི་འབྱུང་བ་ལྔའི་རྩ་བའི་མན་ངག་ཡིན༔ ཡིག་སྨད་གཅིག་ཏུ་བསྡུས་པས་འབྱུང་བ་གཅིག་དྲིལ་བའི་མན་ངག་ལ་ནི༔ ཀི་ཁི་གི་ངི་ཅི༔ འབྱུང་བ་གོང་མ་འབྱེད་པའི་ལྡེ་མིག་ཡིན༔ ཞབས་ཀྱུས་ལྔ་པོ་དེ་ཡང་འབྱེད་པ་ཡིན༔ དེ་ཚོམ་བུ་སྡེབས་པས་འབྱུང་བ་ལྔའི་ལུས་བཟུང་བ་དེ་ཡང་རྣམ་པར་ཟད་པར་བྱ་བའི་ཡི་གེ་འདི་དགོས་པས༔ དེའི་མན་ངག་གནད་དུ་འདི་ལྟར་འགྲོ༔ དེས་ནི་འབྱུང་བ་ཟད་པར་བྱེད་པའི་གནད་ཡིན་ནོ༔ ཨྠྀི༔ ༔ ༔ སྤྱིར་མན་ངག་སྡེབས་པའི་ཡི་གེ་འདི་ཀུན་ལ༔ རྩ་བ་ཉིད་དང་དེ་འབྱེད་ལྡེ་མིག་དང་༔ ཡང་འབྱེད་དང་ནི་དེ་ཡི་ཊི་ཀ་ལ༔ ཀ་རྐྱང་ཁ་རྐྱང་ལ་སོགས་རྩ་བར་ཤེས་པར་བྱ༔ དེ་རྗེས་གུ་གུ་རྣམས་ནི་འབྱེད་པའི་ལྡེ་མིག་ཡིན༔ དེ་མཐུན་ཞབས་ཀྱུ་རྣམས་ནི་ཡང་འབྱེད་ཡིན་ནོ༔ དེ་བཞིན་དེ་འོག་རྣམས་ནི་ཊི་ཀ་ཡང་ཊིག་ཡིན༔ མདོ་མདུད་དང་ནི་ཡང་རྩའི་གནད་ཡིན་ནོ༔ དེ་ལྟར་ཀ་ཁ་མ་བུའི་སྡེབས་ཀྱིས་ནི༔ འདིའི་འགྲེལ་དང་ཡང་འགྲེལ་འབྱེད་པའི་ལྡེ་མིག་རྣམས་སུ་ཤེས་པར་བྱའོ༔ དེ་ལྟར་གོམས་པའི་གནད་ཀྱི་མན་ངག་ཚིག་དྲུག་ལ༔ ཀ་ཁ་མ་བུ་བསྡེབས་ནས་ནི༔ དྲུག་ཚན་དྲུག་གིས་རྩ་བའི་དོན་རྣམས་གཏན་ལ་ཕབ༔ འདི་ལྟར་ཚིག་ནི་སུམ་ཅུ་སོ་དྲུག་གིས༔ གོམས་པའི་གནད་ཀྱི་མན་ངག་དུ་ནི་འདི་གྱུར་ནས༔ འདིས་ནི་རྡོ་རྗེ་སེམས་དཔའི་ཞལ་ནི་མངོན་དུ་མཐོང་༔

དེའི་གནད་ཀྱི་ཡི་གེར་འདི་བསྟན་པའོ༔ སེམས་སྤྱོད་པ་སྔོན་དུ་འགྲོ་བའི་རིག་པའི་ཐབས་ཀྱི་གནད་ཡིག་གསལ་བ་ནི༔ འདི་ལྟར་སྐལ་ལྡན་རྣམས་ཀྱིས་བྱང་ཆུབ་སེམས་སྦྱོང་པའི་མན་ངག་དུ་བསྟན་པ་ཡིན༔ སྤྲུལ་པའི་སྒོ་ནས་གཞན་གྱི་དོན་བྱ་བར་བསྟན་པའི་ཕྱིར༔ གདམས་པ་རྣམས་ཀྱི་སེམས་སྦྱོང་བའི་མན་ངག་ནི༔ བླ་མས་སློབ་མ་དད་པ་དྲག་པོ་རྒྱུད་ལ་སྐྱེས་པས་འཁོར་བ་ལས་བློ་ལྡོག་པའི་དགོས་པ་ཡོད་པའི་ཕྱིར་གྲོང་ཁྱེར་ཆེན་པོའི་དབུས་སུ་ཁྲིད་དེ༔ སློབ་མ་དེ་ལ་སེམས་སྦྱོང་བའི་མན་ངག་རྣམས་བསླབས་ཏེ་མི་རྟག་རྒྱུད་ལ་གོམས་སུ་གཞུག་གོ༔ དེའི་སྐབས་སུ་སངས་རྒྱས་ཀྱི་ཡོན་ཏན་མདོ་ལོངས་སུ་བཤད་ཅིང་༔ སྐབས་སུ་གྲོང་ཁྱེར་གྱི་མི་དེ་ཡང་མི་རྟག་པར་འདུག་ཨང་སྙམ་པ་རྒྱུད་ལ་འདྲིས་སུ་གཞུག༔ བླ་མས་སྐབས་སུ་འཁོར་བའི་ཉེས་དམིགས་ཀྱང་བཤད་པར་བྱའོ༔ དེ་ལྟར་ཞག་དུ་མ་གོམས་སུ་བཅུག་པས་དད་པ་དྲག་པོ་དེའི་རྒྱུད་ལ་མ་སྐྱེས་ན་གསང་སྔགས་ཀྱི་སྣོད་དུ་མི་རུང་བས་ལས་རྒྱུ་འབྲས་ལ་བློ་སྦྱོང་དུ་གཞུག་པ་གཅེས་སོ༔ དེ་ནས་དད་པ་ནམ་སྐྱེས་པ་ན་རིག་པ་མངོན་སུམ་ལ་ངེས་པ་ཐོབ་པར་བྱ་བའི་ཕྱིར་འཁོར་འདས་རུ་ཤན་འབྱེད་པ་ལ་སོགས་པ་ལ་བློ་དབབ་པར་བྱ་བའམ༔ འཁོར་འདས་རུ་ཤན་ཡང་ན་དེ་ལྟར་ཡང་མ་ཡིན་ཏེ༔ དེ་ལྟར་སྔོན་དུ་བྱང་ཆུབ་ཀྱི་སེམས་འབྱོངས་པ་དེ་ལ༔ དེ་ཉིད་བརྟན་པར་བྱ་བའི་ཕྱིར་རྩ་རླུང་ལ་སེམས་གནས་ཤིང་བརྟན་པར་བྱ་བའི་ཕྱིར་རྩ་རླུང་གི་མན་ངག་རྣམས་བླ་མས་བསྟན་ཏེ་སྒོམ་དུ་གཞུག་གོ༔ རྩ་རླུང་གི་མན་ངག་བསྒོམ་པ་ལ་ནི༔ གནད་ཡིག་མེད་དོ༔ པྲ་ཁྲིད་ནས་གསལ་བས་མི་དགོས་སོ༔ སེམས་སྦྱོང་བ་ལ་སོགས་པའི་མན་ངག་སྣ་མང་པོ་བསྟན་པ་ནི༔ རང་བཞིན་རྫོགས་པ་ཆེན་པོ་འདི་ཐབས་སླ་བ་དང་ཐབས་མྱུར་བ་དང་༔ ཐབས་མང་བ་ཡིན་པའི་ཕྱིར་གསུངས་ཏེ༔ དེའི་ཕྱིར་རྫོགས་པ་ཆེན་

པོ་ནས་ཚོགས་དྲུག་ལྷུག་པ་ཡིན་ནོ་ཞེས་ཚིག་ཙམ་བསྟན་ནས་ཡོད་དེ༔ དེ་ཀུན་ནི་གནད་མེད་པའི་ཚིག་ཡ་བྲལ་བ་ཡིན་ཏེ༔ གནད་དུ་འགྲོ་བའི་མན་ངག་གིས་འདི་ལྟར་ཚོགས་དྲུག་མ་སྤངས་པར་སངས་རྒྱས་པར་བྱེད་པའི་ཐབས་འདི་ནས་སྟོན་པར་བྱེད་པའི་གནད་དུ༔ སྒྲ་ཐམས་ཅད་ལ་བསྟེན་ནས་ཟག་པ་མེད་པའི་ཉམས་མྱོང་སྐྱེ་བར་བསྟན་པ་དང་། དེ་བཞིན་དུ་དྲི་ལ་བརྟེན་ནས་སྐྱེ་བར་བསྟན་པ་དང་༔ དེ་བཞིན་དུ་གཟུགས་དང་༔ རོ་དང་༔ རེག་དང་༔ ཆོས་ལ་བརྟེན་ནས་ཟག་པ་མེད་པའི་ཉམས་སྐྱེ་བ་རབ་བསྟན་པ་དང་༔ སྒྲའི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པའི་གནད་ནི༔ གླིང་བུའི་སྒྲ་ལ་བརྟེན་ཏེ་སེམས་སྦྱང་པ་དང་༔ པི་ཝང་གི་རྒྱུད་ལ་བརྟེན་ཏེ་སེམས་སྦྱོང་བ་དང་༔ སུམ་ལྡིར་གྱི་སྒྲ་ལ་བརྟེན་ཏེ་སེམས་སྦྱོང་པ་དང་༔ རྔ་དྲ་བ་རྒྱུད་མངས་ལ་བརྟེན་པ་དང་༔ རྫ་རྔ་ཁ་མངས་ལ་བརྟེན་པ་དང་༔ དྲག་པོ་རྣམས་ལ་སྦྱོང་པ་ནི་པི་ཝང་གི་རྒྱུད་ལ་བརྟེན་པ་དང་༔ ཆ་ལང་གི་རྒྱུད་ལ་བརྟེན་པ་དང་༔ དྲིལ་བུའི་སིང་ལ་བརྟེན་པ་དང་༔ དུང་གི་ངུར་ལ་བརྟེན་ནས་སེམས་སྦྱོང་པ་ལ་སོགས་པ་གསུངས་ཏེ་སེམས་སྦྱངས་ནས་དག་པར་མ་བྱས་ན་རིག་པ་སྔོན་དུ་གཏན་ལ་མི་ཕེབས་པའི་ཕྱིར་རོ༔ གཟུགས་ལ་བརྟེན་ཏེ་སེམས་སྦྱངས་པས་ཟག་པ་མེད་པའི་ཉམས་སྐྱེ་བ་ནི༔ དཔེ་དུ་མ་ལ་བརྟེན་པ་དང་༔ རྟེན་འབྲེལ་དུ་མ་ལ་བརྟེན་པ་དང་༔ བརྡའ་དུ་མ་ལ་བརྟེན་པ་ལ་སོགས་པ་གསུངས་པས་སོ༔ དྲི་ནི་ཙན་དན་དང་ག་པུར་ལ་སོགས་པ་ཡིད་ལ་མཐུན་པའི་དྲི་རྣམས་ལ་བརྟེན་ནས་སེམས་སྦྱངས་པས་ཟག་པ་མེད་པའི་ཉམས་སྐྱེ་བ་དང་༔ ནིམ་པ་དང་ཙན་དན་དམར་པོ་དང་ཤིང་ཀ་ལ་ཀི་ཏ་ལ་སོགས་པ་ཡིད་དང་མཐུན་པ་རྣམས་ལ་བརྟེན་ནས་སེམས་སྦྱངས་པས་ཟག་པ་མེད་པའི་ཉམས་སྐྱེ་བ་ནི་ཐབས་ཀྱི་ཡན་ལག་ཏུ་བསྟན་པའོ༔ རོ་ལ་བུ་རམ་དྲུག་ལྡན་དང་༔ ཤིང་གི་རྒྱལ་པོ་མར་ཏ་ཅེས་བྱ་བའི་

འབྲས་བུའི་རྡོག་མ་དྲུག་ཆ་ཙམ་སྐྱེས་བུ་གང་གིས་མྱོང་བ་དེ་ནི་ཉི་མ་ལྔའམ་བདུན་ནམ་དགུའི་བར་དུ་དྲན་པ་གཞན་ལ་མི་འཇུག་ཅིང་ལུས་ཀྱིས་གཡོ་བ་མེད་ཅིང་སེམས་རང་གསལ་བ་དང་༔ སེམས་བདེ་ལུགས་སུ་གནས་ཤིང་སངས་རྒྱས་ཀྱི་ཡོན་ཏན་རྗེས་སུ་འཛིན་པར་འགྱུར་བ་ཡོད་དོ༔ རེག་ནི་རྩིའི་རྒྱལ་པོ་མ་ས་ལི་བྱ་བའི་སྡོང་པོའི་ཤིང་ཡོད་དེ༔ དེའི་ལོ་མ་གཡས་སུ་འཁྱིལ་བ་ཅིག་ཡོད་པ་དེ་བླངས་ནས་དེའི་འདབ་མ་སུའི་སྙིང་ཁ་ལ་རེག་པས་ནི་སེམས་རང་བཞིན་གྱིས་བསམ་གཏན་ལ་གནས་ཏེ༔ འདི་ཉིད་ཇི་ལྟར་རེག་པ་ལ་བསམ་གཏན་དུ་འགྱུར་བ་ཡོད་དོ༔ ཆོས་ནི་བླ་མའི་གདམས་ངག་རྣམས་ཡིན་ནོ༔ དེ་བཞིན་དུ་རང་བཞིན་རྫོགས་པ་ཆེན་པོའི་རྣལ་འབྱོར་པས་འདོད་པའི་ཡོན་ཏན་ལྔ་མ་སྤངས་པར་ལོངས་སྤྱད༔ སངས་རྒྱས་ལ་ཡོད་པའི་ཡོན་ཏན་དེ་ལྟར་བསྟན་པ་ནི་རྫོགས་པ་ཆེན་པོ་ཐབས་མང་བ་ཡིན་ནོ༔ དེའི་ཕྱིར་སེམས་ལ་གོམས་ཤིང་འབྱོངས་པས་རིག་པ་ཉིད་མངོན་སུམ་དུ་གཏན་ལ་ཕེབས་པའི་དགོས་པ་ཡོད་པར་བསྟན་པའོ༔ སྦྱང་བར་བྱ་བ་བྱང་ཆུབ་སེམས་ཀྱི་གནད་ཡིག་ཡང་འབྱེད་སྦས་པའི་ལྡེ་མིག་གསང་བའོ༔ ཨྠྀི༔ ༔ མི་འགྱུར་རང་སྣང་གི་ལྟ་བ་ཆེན་པོ་ལ་ཕྱག་འཚལ་ལོ༔ དེ་ལྟར་སེམས་རྩ་རླུང་གིས་ཕབ་སྟེ་ལྟ་སྒོམ་སྤྱོད་པ་རྣམས་ཀྱི་མན་ངག་གིས་རང་བཞིན་གྱི་འཇུག་སྒོ་གསལ་བར་བྱ་བའི་ཕྱིར་འདི་ཀུན་ཚིག་གིས་གཏན་ལ་ཕབ་པས༔ ཚིག་གི་ཞེན་པ་ཆོད་ནས་རིག་པ་མངོན་སུམ་ལ་གདིང་དུ་གནས་པའི་དགོས་པ་ཡོད༔ དེ་ཡང་སྤྱོད་པ་ཐམས་ཅད་ཀྱི་གནད་དུ་ལུས་ཡིན་པས་སྦྱོང་པ་རབ་ཏུ་གཅེས་སོ༔ སྒོམ་པ་ཐམས་ཅད་ཀྱི་གནད་དུ་དལ་བ་ཡིན་པས་ལུས་ངག་སེམས་དལ་བ་གཙོ་ཆེའོ༔ ལྟ་བ་ཐམས་ཅད་ཀྱི་གནད་དུ་མིག་ཡིན་པས༔ མིག་གསལ་བར་བྱ་བའི་རྩ་བསྲོ་ཞིང་བསྐུ་མཉེ་བྱ་བ་དང་༔ འོ་མ༔ བྱ་ནག་མོའི་སྒོ་ངའི་སེར་པོ་དང་༔

སྐྱེེར་བའི་བར་ཤུན་གྱི་ཕྱེ་མ་དང་༔ གཟི་རྙིང་པ་ནག་ཁྲ་བརྡུངས་པའི་ཕྱེ་མ་དང་༔ འདི་རྣམས་སྦྱར་ཏེ་ཚེས་གཅིག་དང་གནམ་སྟོང་ཉའི་ནང་པར་ཐོ་རངས་ལ་སྔོན་དུ་ཆུ་གྲང་མོས་མིག་དང་གདོང་པ་དག་པར་བཀྲུས་ཏེ༔ དེ་ནས་དེ་ཀུན་གྱི་ལྡེ་གུ་མིག་ལ་བཀུས་ནས༔ དེའི་ནང་པར་བཞིན་བ་གསར་པའི་འོ་མ་བཀོལ་བའི་ནང་དུ་ཤིང་མངར་བཏབ་སྟེ་འཐུངས་ན་མིག་འགྲིབ་པར་མི་འགྱུར་རོ༔ དེ་ལྟར་བྱས་པས་རིག་པ་མངོན་སུམ་ལ་ལྟ་བ་དང་མི་འབྲལ་བའི་གནད་དུ་འགྱུར་བ་ཡིན་ནོ༔ འབྲས་བུ་ཐམས་ཅད་ཀྱི་གནད་དུ་དབྱིངས་དང་རིག་པ་ཚད་ལ་ཕབ་པ་གཅེས་པ་ཡིན་ནོ༔ དེ་ཡང་སྤྱོད་པའི་མན་ངག་ནི་སྣང་བ་རང་སར་བཞག་པ་དང་སྣང་བ་ཅི་ནས་བསྒྱུར་བ་གཉིས་ལས་འགྲོ་ས་མེད་དོ༔ སྣང་བ་རང་སར་བཞག་པ་ནི་འཁྲུལ་པ་རང་དག་ཏུ་འགྲོ་བའི་དགོས་པ་ཡོད་པ་ཡིན་ནོ༔ སྣང་བ་བསྒྱུར་བས་ནི་ཉོན་མོངས་པ་ངོས་ཟིན་པའི་དགོས་པ་ཡོད་པ་ཡིན་ནོ༔ བསྒོམ་པའི་མན་ངག་ཐམས་ཅད་དུ་ནི་སེམས་སྦྱོང་བ་དང་༔ རིག་པ་བརྟན་པར་བྱ་བ་ལས་འགྲོ་ས་མེད་དོ༔ སེམས་སྦྱངས་པས་ནི་སེམས་ཀྱི་བྱུང་ཚོར་མི་སྐྱེ་བའི་དགོས་པ་ཡོད་པ་ཡིན་ནོ༔ རིག་པ་བརྟན་པས་ནི་སྣང་བ་ལ་རང་བྱན་ཚུད་པར་བྱ་བའི་དགོས་པ་ཡོད་པ་ཡིན་ནོ༔ ལྟ་བའི་མན་ངག་དུ་ནི་ཁྲེགས་ཆོད་དང་ཐོད་རྒལ་ལས་འགྲོ་ས་མེད་དོ༔ ཁྲེགས་ཆོད་ནི་ཅིག་ཅར་བའི་དོན་ཡིན་ཏེ་འབད་པ་མེད་པར་རང་གིས་རང་གྲོལ་བར་བསྟན་པ་ཡིན་ཏེ༔ འདི་ནི་སྔོན་སྦྱངས་པའི་གང་ཟག་གི་སྤྱོད་ཡུལ་ཡིན་གྱི༔ ད་ལྟ་ནི་ཉམས་སུ་ལེན་དགོས་སོ༔ ཉམས་སུ་མ་བླངས་ན་སྣང་བ་འདི་ཉིད་ལ་རིག་པ་མངོན་དུ་མི་ཕྱིན༔ རིག་པ་མངོན་དུ་མ་ཕྱིན་ན་རིག་པ་ཚད་ལ་མི་ཕེབས༔ རིག་པ་ཉིད་ཚད་ལ་མ་ཕབ་ན་ཆོས་ཉིད་ཟད་སར་མི་སྐྱོལ༔ ཆོས་ཉིད་ཟད་སར་མ་སྐྱོལ་ན་ཕུང་པོ་ཟག་མེད་དུ་སངས་མི་རྒྱ༔ ཟག་མེད་ཀྱི་ཕུང་པོ་དེ་ལྷག་མེད་དུ་སངས་མ་རྒྱས་ན༔

ཐེག་པ་ཐུན་མོང་བ་རྣམས་དང་ཁྱད་པར་ཅི་ཡང་མི་རྙེད་པས་དེའི་གནད་ཀྱིས་ཉམས་སུ་ལེན་དགོས༔ འདི་ལྟར་བསྟན་པ་འདི་ནི་གང་ཟག་ལེ་ལོ་ཅན་རྣམས་ལ་འབད་མི་དགོས་པར་གྲོལ་བ་ཡོད་དོ་བྱས་ནས་འཇུག་པར་བྱ་བའི་ཕྱིར་གསུངས་པ་ཡིན་གྱིས༔ འབྲས་བུ་གཅིག་ཅར་རང་དུ་མིན་ནོ༔ དེའི་ཕྱིར་ན་ཁྲེགས་ཆོད་དུ་བསྟན་པའི་དགོས་པ་ནི་འདི་ལྟར་དོན་དུ་བསྟན་པ་ལ་ཉམས་སུ་མྱོང་བའི་ཤེས་པ་ནི་ག་ལ་སྲིད༔ འདི་མི་སྲིད་པས༔ དེས་ན་སྡོད་ཀྱིས་འདི་ལ་ཉམས་སུ་མྱོང་བས་འདིར་འཇུག་བའི་དོན་དུ་གསུངས་པའོ༔ ཐོད་རྒལ་ནི་རིམ་གྱིས་རིག་པའི་ཡེ་ཤེས་རྣལ་འབྱོར་པས་ཉམས་སུ་མྱོང་ཞིང་ཡིད་དཔྱོད་ནི་མ་ཡིན་དེ་དབང་པོའི་རྣམ་ཤེས་རྣམས་ཀྱི་སྤྱོད་ཡུལ་དུ་མཐོང་བས་སོ༔ དེ་ཡང་ཐོད་རྒལ་ཞེས་བྱ་བ་ནི་འདི་ཉིད་མངོན་སུམ་མཐོང་བས་ཐོད་རྒལ་ཞེས་བསྟན་པའོ༔ དེའི་ཕྱིར་ན་གཞན་དག་གིས་ནི་ལྟ་བའི་དོན་ངོ་ཤེས་རང་མངོན་སུམ་དུ་ཡོད་ཅིང་སྣང་བ་ཡིན་གྱིས༔ དབང་པོ་ལ་ནི་ག་ལ་སྲིད་ཅེས་སྟོན་པ་ཡིན་ཏེ༔ འདིར་ལྟ་བའི་དོན་ལ་ལྟ་བའི་མཐར་ཐུག་པ་མིག་གིས་ལྟ་བ་ཡིན་ཏེ་ལྟ་བ་ཞེས་བྱ༔ ཐིག་ལེའི་སྐོར་ནི༔ ཐིག་ལེ་ནི་སྟོང་པ་ཆོས་ཀྱི་དབྱིངས་སོ༔ ཉག་ཅིག་ནི་ཆ་ཕྲ་སྟེ་གབ་པའོ༔ ཞེས་གསུངས་ཏེ༔ ཐིག་ལེའི་དོན་དེ་གཏན་ལ་ཕབ་ནས་གབ་ཅིང་བསྒྲིབས་ཏེ༔ མིང་བསྟན་ཡང་ངོ་སྤྲོད་མ་བསྟན་ཏེ་འདི་ལྟར་ལྟ་བའི་ཡི་ག་མེད་དོ༔ འདིར་ལྟ་བའི་དོན་དེ་ལ་དབང་པོའི་མངོན་སུམ་དུ་མེད་ན༔ ད་རེས་ཕུང་པོ་དང་ཁམས་དང་སྐྱེ་མཆེད་རྣམས་ཟད་པར་བྱེད་ཅིང་༔ སྣང་བ་འདི་ཟད་པར་བྱེད་ཅིང་ཉོན་མོངས་པ་རྣམས་ཟད་པར་བྱེད་པའི་དོན་དུ་བསྟན་པ་ཡིན་པས༔ ཤེས་རབ་ཀྱིས་ནི་འདི་དག་ཟད་པར་མི་ནུས་པ་མངོན་དུ་གསལ༔ འདི་དག་མ་ཟད་པར་སངས་རྒྱ་ཡི་ཞེ་ན༔ རིགས་དྲུག་སྤྱི་དང་ཁྱད་པར་ཅུང་ཟད་ཀྱང་མི་རྙེད་དོ༔ དེའི་ཕྱིར་ན་སྣང་བ་མངོན་སུམ་པ་འདི་

རིག་པ་མངོན་སུམ་གྱིས་ཟད་པར་མ་བྱས་ན༔ ཤེས་རབ་ཀྱིས་ནི་ཟད་པར་ནུས་པ་ག་ལ་སྲིད༔ འདི་ལྟར་འདོད་པ་ནི་ཡིད་དཔྱོད་ཀྱི་ཤེས་པ་སྟེ༔ འདི་ནི་ཡང་དག་པ་མ་ཡིན་ནོ༔ དེའི་ཕྱིར་ཐོད་རྒལ་གྱི་ལྟ་བས་རིག་པའི་ཡེ་ཤེས་རིམ་གྱིས་རྟོགས་པར་བྱས་ནས༔ འདི་ལྟར་སྣང་བ་རང་ཟད་དུ་གཏོང་བས་ནི༔ ལུས་ངག་གི་སྤྱོད་པས་འཁོར་འདས་རུ་ཤན་འབྱེད་པ་ལ་སོགས་པའི་མན་ངག་རྣམས་ཀྱི་ས་རིམ་གྱིས་ཉམས་སུ་མྱོང་བ་དང་མཐོང་རྟགས་ཀྱི་རིམ་པ་འདི་ལྟར་གཏན་ལ་ཕབ་ནས་ཕུང་པོ་ལྷག་མེད་དུ་སངས་རྒྱས་པའོ༔ ཕུང་པོ་ལྷག་མེད་ཅེས་བྱ་བའི་གོ་བ་ནི༔ འདི་ལྟར་ཉམས་སུ་བླངས་བས་འབྱུང་བ་ལྔ་རང་སར་དངས་ནས༔ ལུས་ཀྱི་འཛིན་པ་རང་འགགས་ཏེ་ཤ་ཁྲག་རང་དགར་མི་སྣང་༔ ཕྱིའི་འབྱུང་བ་ལྔ་འགགས་པས་ས་རྡོའི་སྣང་བ་རགས་པ་མི་སྣང་བ་ལས་ལྷག་མ་མེད་པའོ༔ ཤ་ཁྲག་རང་ག་མའི་གཟུགས་དང་བཅས་ཏེ་སོང་ཞིང་འགྲོ་བའི་ས་ཡོད་པ་མ་ཡིན་ནོ༔ འབྲས་བུའི་མན་ངག་ནི༔ འབྲས་བུ་ཚད་ཅན་དང་༔ ཚད་མེད་གཉིས་ལས་འགྲོས་མེད་དོ༔ ཚད་ཅན་ནི་ཇི་ལྟར་བསྒོམས་ཤིང་གྲུབ་པའི་མཐའ་འབྲས་བུ་སྐུ་གསུམ་དུ་འདོད་པ་སྟེ༔ དེ་ཡང་ཆོས་སྐུའི་སྐབས་སུ་མཐར་ཐུག་གི་འབྲས་བུར་འདོད་དེ༔ འདི་ནི་སངས་རྒྱས་ཀྱི་ཡོན་ཏན་འཆར་ཚུལ་ལམ༔ རྩལ་གྱིས་སངས་རྒྱ་བར་འདོད་པ་ཡིན་ནོ༔ འདི་ལྟར་འབྲས་བུར་འདོད་པ་ནི་སྣང་བ་ལ་སྟོང་པར་ཁས་བླངས་ནས༔ འབྲས་བུ་ལ་མཚན་མར་འདོད་པ་ཡིན་ནོ༔ སྐུ་ཡོད་ཕན་ཆད་ལུས་ཡོད་པས་འབྲས་བུ་མ་ཡིན་ནོ། ཚད་མེད་ནི་འདི་ལྟར་ཉམས་སུ་བླངས་པས༔ སྐུ་གསུམ་གྱི་སྣང་བ་འདི་ཉིད་ལ་གཏན་ལ་ཕབ་ནས་ཆོས་ཉིད་ཟད་པའི་ས་ལ་བསྐྱལ་བས་ལུས་སུ་འཛིན་པའི་ཞེན་པ་ལས་གྲོལ་བའི་དུས་ན༔ འདི་ལྟར་རང་གི་རྣ་བ་ལའང་མི་སྣང་བས་སྐུ་གསུམ་གྱི་ཞེན་པ་རང་སར་དག་

སྟེ་མཐར་ཐུག་ལ་ཆོས་ཀྱི་སྐུའི་སྣང་བ་འཆར་བའམ༔ དེ་ཉིད་དུ་འཛིན་པ་འམ་སྣང་བའི་མངོན་ཞེན་རང་ལོག་པ་ནི་ལུས་མེད་ཅེས་ཆོས་ཀྱི་སྐུའི་ཞེན་པ་ལས་བློ་ལྡོག༔ ལུས་ཏེ་ཞེས་འབྱུང་སྟེ་སྤྲུལ་སྐུའི་ཞེན་པ་ལས་ལྡོག༔ ལུས་ཀྱི་མཆོག་ཅེས་ལོངས་སྐུའི་ཞེན་པ་ལས་ལོགས་པས་ལུས་ཀྱི་མཐའ་རྟོགས་པའི་རྣལ་འབྱོར་པ་ཞེས་བྱ་སྟེ་ལུས་ཀྱི་ཞེན་པ་ཐམས་ཅད་དང་རང་བྲལ་བའོ༔ ལྟ་སྒོམ་སྤྱོད་པ་འབྲས་བུའི་གནད་ཡིག་ཡང་འབྱེད༔ ཨིཏི༔ ཡིད་ཆེས་མི་འགྱུར་བ་དོན་གྱི་ལྷ་ལ་ཕྱག་འཚལ་ལོ༔ ཨྸ་ཡང་འབྱེད་གསལ་བའི་སྒྲོན་མེ་རིག་པའི་རྒྱབ་རྟེན་གྱི་གནད་ཡིག་ཆེན་པོ་ལ༔ སྣང་བ་ལ་རིག་པ་ཉིད་མངོན་སུམ་དུ་སྣང་བའི་ཐབས་ནི༔ ཐོག་ལྟ་བུའི་མན་ངག་ཡིན་ཏེ༔ འདི་ནི་རགས་པའི་འབྱུང་བས་མ་བསྒྲིབས་བར་ཐོགས་པ་མེད་པར་སྣང་བའི་ཚེ༔ དབྱིངས་ཀྱི་སྒྲོན་མ་ལ་ཡིད་ཆེས་མ་སྐྱེས་ན་འབྲས་བུ་གཏན་བརླག་ནས་སངས་རྒྱ་བ་རེ་བ་མེད་དོ༔ དེའི་ཕྱིར་ན་རིག་པ་ཐོགས་པ་མེད་པ་ཐོག་ལྟ་བུའི་དོན་གྱི་མན་ངག་གིས་ཕྱིར་མི་ལྡོག་པར་བྱ་བ་ནི་མཆོག་ཏུ་གཅེས་སོ༔ དེ་ལྟར་ཕྱིར་མི་ལྡོག་པར་བྱས་ནས༔ དབྱིངས་དང་རིག་པ་རང་གི་ངོ་བོར་མི་འགྱུར་བར་བྱ་བ་ནི༔ མི་འགྱུར་བ་གཟེར་ལྟ་བུའི་མན་ངག་གིས་སའི་འཆར་སྒོ་ལ་ཡིད་ཆེས་བར་བྱ་སྟེ༔ རང་གི་མིག་གིས་དེ་བཞིན་ཉིད་ལ་ཡིད་མ་ཆེས་ན་མཐོང་བྱེད་དོན་གྱི་ལྟ་བ་གཏན་བརླག་སྟེ་འཁྲུལ་པའི་སྣང་བ་ཆོད་མི་སྲིད་དོ༔ འཁྲུལ་བའི་སྣང་བ་མ་ཆོད་ན་འབྲས་བུ་སངས་རྒྱས་ལ་རེ་བ་མེད་དོ༔ དེ་ལྟར་རིག་པ་རང་གི་ངོ་བོ་མི་འགྱུར་བར་བྱས་ནས༔ རིག་པ་ཉིད་མཁའ་ལ་མངོན་སུམ་ཏུ་བསྟན་པ་ནི་འཕྲལ་དུ་བཅོས་པ་མ་ཡིན་ཏེ་ཡེ་ནས་དེ་ལྟར་གནས་ཤིང་སྣང་བ་ཡིན་ཏེ༔ མངོན་དུ་སྣང་མི་སྲིད་དོ་སྙམ་པའི་སྙེམ་བྱེད་ཀྱིས་རྟེན་ལ་ཡིད་མ་ཆེས་ན་རིག་པ་ཉིད་ཇི་སྲིད་དུ་གཏན་ལ་ཕེབས་པར་མི་འགྱུར་ཏེ༔

འདི་ཉིད་ལ་མ་ཕེབས་ན་འབྲས་བུ་སངས་རྒྱ་བ་ག་ལ་སྲིད་པས༔ དེའི་ཕྱིར་ན་སྐར་མདའ་ལྟ་བུའི་མན་ངག་གིས་རིག་པ་མཁའ་ལ་དབྱུང་བ་རབ་ཏུ་གཅེས་སོ༔ དེ་ལྟར་རིག་པ་མན་ངག་གསུམ་ལ་ཡིད་ཆེས་པས་རིག་པ་དི་ཉིད་འཁོར་བ་ལ་མི་ལྡོག་པ་ཡིན༔ དེ་ཡང་རིག་པ་རང་གི་ངོ་བོ་ལ་ཡིད་ཆེས་པའི་སྟོབས་ཀྱིས་ཕྱིར་མི་ལྡོག་པ་ནི༔ དེའི་ཕྱིར་ན་རིག་པ་ཕྱིར་མི་ལྡོག་པའི་མན་ངག་དཔག་ཆེན་གྱི་མདའ་ལྟ་བུའི་མན་ངག་གིས་རིག་པ་རང་གི་ངོ་བོ་ལ་ཡིད་ཆེས་པ་རབ་ཏུ་གཅེས་སོ༔ དེས་ན་མན་ངག་འདི་དག་ནི་རང་གི་ངོ་བོ་རང་གིས་གཏན་ལ་འབེབས་པའི་ཕྱིར་ན་ཉམས་སུ་ལེན་པའི་དུས་ན་རིག་པ་དང་དབྱིངས་གཉིས་ལ་གཏད་པའི་འབེན་མ་བཅས་ན་སྣང་བ་མངོན་སུམ་དུ་གཏན་ལ་མི་ཕེབས་པས༔ དབྱིངས་རིག་གི་མན་ངག་བླ་མས་མངོན་དུ་གཏན་ལ་འབེབས་གཅེས་སོ༔ དེ་ལྟ་བུའི་དབྱིངས་དང་རིག་པ་གཉིས་ལས་དང་པོ་པས་རང་གི་སྨིན་དབྲག་ཏུ་གཏད་པ་ནི་རྡེག་པའི་དམིགས་གསལ་བའི་མན་ངག་སྟེ༔ འདི་ཉིད་དུ་ཤེས་པ་མ་གཏད་ན་དབྱིངས་ཀྱི་སྣང་བ་མི་ཟིན་པས༔ འདིར་ཤེས་པ་གཏད་པས་དབྱིངས་ལས་ཡེ་ཤེས་སྐྱེའོ༔ དེ་ལྟར་བླ་མས་བསྟན་པ་དེ་ལ་རབ་ཏུ་གོམས་པར་མ་བྱས་ན་རིག་པའི་རང་སྣང་གཏན་ལ་མི་ཕེབས་པས༔ རྟག་ཏུ་གོམས་པས་ཉམས་གོང་ནས་གོང་དུ་འཕེལ་བས་ན་རིག་པ་འཕེལ་བའི་ས་བོན་གདབ་པ་ཞེས་བྱ་སྟེ༔ སྣང་བ་མི་འདྲ་བ་འཆར་བའི་ཚེ་རང་གི་སྣང་བ་གཅིག་ནས་གཅིག་ཏུ་ཚད་ལ་མ་ཕབ་ན༔ རིག་པ་ཐུག་པ་མེད་པས་དོན་གཅིག་ཏུ་སྐྱེ་མི་སྲིད་པས༔ འདི་ལ་གོམས་པ་ནི་རབ་ཏུ་གཅེས་པ་ཡིན་ནོ༔ དེ་ལྟར་རང་གི་རིག་པ་དེ་ཚད་ལ་ཕབ་པས་ན་མི་འགྱུར་བའི་ལུས་རྙེད་པར་བྱེད་པས༔ སྣང་བའི་འཕེལ་བ་འབའ་ཞིག་ལ་

བལྟས་ནས་བྱེད་པས་བསམ་གཏན་གྱི་ལྷའི་སྐྱེ་གནས་ལས་མི་གྲོལ་བའི་ཕྱིར་ན༔ ཆོས་ཉིད་ཟད་པའི་སྣང་བ་ལ་ཅི་ཡང་མ་ཡིན་པར་གཏན་ལ་མ་ཕབ་ན་དེ་ཉིད་དུ་འགྱུར་བས༔ རྒྱ་ཆེ་བའི་ནམ་མཁའ་ལ་སྤར་གྱིས་བཟུང་བའི་མན་ངག་གིས་སྣང་བ་ཅིའི་ངོ་བོར་ཡང་གྲུབ་རྒྱུ་མེད་པར་སྣང་བ་ནི་འཕྲལ་དུ་སོང་བ་མ་ཡིན་ཏེ་ཡེ་ནས་དེ་ཉིད་ཀྱི་ངོ་བོར་བཞུགས་པའོ༔ དེའི་ཕྱིར་ན་སྔོན་དུ་དབྱིངས་རིག་གི་སྣང་བ་མ་བསྟན་ན་ཉམས་སུ་བླང་བྱའི་དོན་མི་ཤེས༔ དེ་ནས་ཉམས་གོང་ནས་གང་དུ་འཕེལ་བའི་སྣང་བས་རིག་པའི་ཚད་མ་བཟུང་ན་སྐུ་གསུམ་དུ་འཛིན་པའི་ཞེན་ཡུལ་འགག་ཏུ་མི་བཏུབ་པས་དེ་ལ་གོམས་པར་བྱ༔ དེ་ནས་རིག་པ་ཚད་ལ་མ་ཕེབས་ན་ཆོས་སྐུ་ལ་མཐར་འཛིན་གྱི་ཞེན་པ་ལྡོག་ཏུ་མི་བཏུབ་པས་ཚད་ལ་དབབ་པ་གཅེས༔ ཐ་མ་ཆོས་ཉིད་ཟད་སར་མ་བསྐྱལ་ན་སྐུ་གསུམ་རང་རྒྱུད་དུ་མི་གྲོལ་བས་ན༔ ཡེ་ནས་དེ་ལྟར་བཞུགས་པའོ༔ ཨྠྀི༔ ༔ འགལ་བ་བསྡུས་པའི་གནད་ཀྱི་ཡི་གེ༔ ཐུན་མོང་གི་ཐེག་པ་རྣམས་ཀྱིས་རྩོལ་སྒྲུབ་ཅི་བྱས་ཚད་མ་རིག་པ་ལ་སོགས་པའི་ཉོན་མོངས་པར་འགྱུར་བས་ན༔ རང་གི་ལྟ་བ་རིག་པ་མངོན་སུམ་གྱི་མན་ངག་ལ་ཡིད་ཆེས་རང་བཞིན་གྱིས་སྐྱེ་བས་དེ་ཉིད་ལ་བརྩོན་པར་འགྱུར་བའི་དགོས་པ་དང་༔ ཉོན་མོངས་པ་ཞེས་ལོགས་སུ་གདགས་བྱ་གང་ཡང་མེད་པར་ཡིད་ཆེས་ནས་རང་གི་ངོ་བོ་ལ་རང་འཇུག་པའི་དད་པ་བརྟན་པོ་སྔོན་དུ་སྐྱེ་བ་དང་༔ མན་ངག་འདི་ལ་ཡིད་རབ་ཏུ་ཆེས་པས་གཞན་ལ་བློ་མི་འཇུག་པའི་གདེང་ཐོབ་པའོ༔ དེའི་ཕྱིར་ན་གྲུབ་མཐའ་མང་པོའི་སྤྲོས་པ་བཅད་ནས་བླ་མའི་མན་ངག་ཚིག་གསུམ་བློ་ཕེབས་ཏེ་ཉམས་སུ་ལེན་པ་ལ་བརྩོན་པ་དང་༔ ཚིག་གི་སྤྲོས་པ་རང་ཆོད་དེ་རང་གི་དོན་ལ་ཡིད་ཆེས་སྐྱེ་བ་དང་༔ རང་གི་རིག་པའི་གནད་གཟིར་བས་གནས་ལུགས་ཉིད་ཉམས་སུ་མྱོང་བ་དང་༔

རང་གི་རིག་པའི་ངོ་བོ་མཐོང་བས་ཚིག་ཇི་ལྟར་བརྗོད་ཅིང་འདུག་པ་ཐམས་ཅད་རང་གི་ལྟ་བའི་གྲོགས་སུ་མ་སོང་བ་གང་ཡང་མེད་པས༔ ཡེ་ནས་རང་གི་གནས་ལུགས་དང་འབྲེལ་བར་ཤེས་པར་བྱའོ༔ ཨྠྀི༔ ༔ གཞན་འདོད་བསྡུས་པའི་གནད་ཡིག༔ རྫོགས་པ་ཆེན་པོ་ལ་སོགས་ཐེག་པའི་ཆོས་རྣམས་དང་༔ ཐིག་ལེ་སྐོར་གསུམ་གྱི་ལྟ་བ་འདིའི་དོན་ལ་རེག་པ་མེད་པའི་གནད་ནི༔ དངོས་པོ་དབང་པོའི་སྤྱོད་ཡུལ་དུ་ཡོད་པར་མ་ཤེས་ཏེ་ཤེས་རབ་ཀྱི་སྤྱོད་ཡུལ་དུ་འདོད་པས༔ ཤེས་རབ་ཀྱིས་ནི་བརྟགས་ན་ཡང་དག་པར་ན་ཕུང་པོའི་གཏིང་ཡང་མེ་རྙེད་ན་རིག་པ་ནི་ལྟ་ཅི་སྨོས་ཏེ༔ དེའི་ཕྱིར་ན་འཁོར་བར་འཆིང་བའི་སྒོ་ནས་མུ་སྟེགས་རྟག་ཆད་དང་ཐེག་པ་རིམ་དགུའི་ལྟ་བ་ལ་ཁྱད་པར་རྡུལ་ཙམ་ཡང་མེད་དོ༔ བཀའ་དང་བསྟན་བཅོས་གཞུང་དུ་བཀོད་པ་འདི་ཀུན་ཐམས་ཅད་ནི་ཤེས་བྱའི་ཆོས་ཡིན་གྱིས༔ ཉམས་སུ་བླང་དུ་བཏུབ་པ་ནི་རྡུལ་ཙམ་ཡང་མེད་དོ༔ འདི་དག་ནི་འདི་ལྟར་ཚིག་རླབ་པོ་ཆེ་སྨྲ་བ་ཡང་ཡོད་དེ༔ གནས་ལུགས་ལ་ཉམས་སུ་བླང་རྒྱུ་བྱང་ན་གནས་ལུགས་མ་ཡིན་ནོ་ཞེས་སངས་རྒྱས་ཀྱིས་གསུངས་པའི་ཚིག་ཀྱང་ཡོད་དེ༔ དེ་ནི་ཉམས་སུ་བླངས་ནས་རང་གི་སྣང་བ་ཚད་ལ་ཕེབས་བའི་དུས་ན་ཡིན་ཏེ་གཞན་དུ་ནི་མ་ཡིན་ནོ༔ འདིས་ནི་བདག་པོ་མ་ཡིན་པར་གཞན་གྱི་ནོར་གྲངས་སུ་འདེབས་པའི་སྐྱེས་བུ་དང་འདྲ་སྟེ༔ གཞིའམ་གནས་ལུགས་ཀྱི་ཡོད་ཏན་ལ་འབྲས་བུར་འདོད་པ་ཡིན་ཏེ༔ འདི་ནི་གང་ཟག་གཞན་གྱི་ཡོན་ཏན་ལ་ཚིག་གིས་བརྗོད་ཀྱང་༔ དེའི་ཡོན་ཏན་རང་ལ་གོས་སུ་མི་བཏུབ་པ་དང་འདྲའོ༔ འདི་དག་རྣམས་ནི་ཡིད་དཔྱོད་ཀྱི་ཤེས་པ་ལས་ཡང་དག་པའི་ལྟ་བས་ཟིན་པའི་ཆ་གང་དུ་ཡང་མེད་ཅིང་སྣང་ཆ་གང་དུ་ཡང་མ་འགགས་པ་རིག་པ་མངོན་སུམ་དུ་མ་ཤེས་པའི་གནད་ཀྱིས་འདི་ལྟར་འགྱུར་བའོ༔ དེ་ལྟར་བསྒོམས་ཤིང་བསྒྲུབས་པས་

ལུས་ངག་གི་རྟགས་འགའ་འབྱུང་བ་ནི་སྔོན་དུ་སྦྱངས་པའི་བསོད་ནམས་ལས་འབྱུང་བ་ཡིན་གྱིསཿའདི་ཉིད་བསྟན་པ་ལས་འབྱུང་བ་མ་ཡིན་ནོ༔ ལུས་ངག་གི་རྟགས་ནི་མུ་སྟེགས་པ་ལ་ཡང་འབྱུང་བ་ཡིན་ཏེ༔ འདི་ཡང་སྔོན་སྦྱངས་པ་བར་ཆད་པ་ལས་འབྱུང་བ་ཡིན་ནོ༔ གལ་ཏེ་དེས་སངས་རྒྱ་བ་དག་བྱུང་ན༔ ཐ་མ་འབྲས་བུ་འདི་དང་ཕྲད་ནས་སངས་རྒྱ་བ་ཡིན་གཞན་གྱིས་དེ་ཁོ་ན་ལྟར་མ་ཡིན་ནོ༔ བདག་གིས་ཚིག་དེ་ཀུན་འདོད་རྒྱལ་དུ་བཀོད་པ་མ་ཡིན་ནོ༔ ལས་ཅན་ཅིག་དང་ཕྲད་པར་ཤོག༔ ཨི་ཏི༔ རིག་པ་བསྡུས་པའི་སྒྲོན་མའི་གནད་ཡིག་ཡང་འབྱེད་གསང་བའི་རྒྱབ་ཡིག༔ རིག་པའི་ལྟོས་པ་ནམ་མཁའ་སྟོང་པ༔ སྟོས་གཞི་རྡོ་རྗེ་ལུ་གུ་རྒྱུད་ཀྱི་སྐུ་ཆེན་པོ༔ ལྟོས་པ་ལྟོས་གཞི་སྣང་བ་རང་གི་ངོ་བོ་ལ་གྲུབ་པ་གཅིག་ཀྱང་མེད༔ སེམས་ཅན་གྱི་མཚོན་ཚུལ་ལ་གཉིས་སུ་གཏན་ལ་མ་ཕབ་ན་དོན་ཉམས་སུ་མི་ལེན་ཏེ༔ དེའི་ཕྱིར་ན་རྡོ་རྗེ་ལུ་གུ་རྒྱུད་ན་དབུགས་མེད་པའི་འགྱུ་བ་དང་བཅས་པ་སྟེ༔ གཏིང་དུ་ཧྲིག་ཆགས་པ་ལ་ཉམས་སུ་སིང་བག་དང་བཅས་པས་ངོ་བོ་བཟུང་བ་དཀའ་བ་ལྟར་འདུག་ཀྱང་༔ རང་བཞིན་དལ་ཆགས་པ་ཡིན་ཏེ༔ གསལ་བ་རང་གི་ངོ་བོ་ལ་བལྟས་ན་བྲེང་ཆགས་པས་སྣང་བ་རྒྱ་མ་ཆད་པའི་རྟགས་ཡིན༔ དངོས་པོ་འདུག་ཚུལ་ལ་བལྟས་ན་ཐིག་ལེའི་སྣང་བ་བཤད་ཏེ་ཆོས་ཉིད་སྤྲོས་པ་དང་བྲལ་བའི་རྟགས་ཡིན༔ འདུག་སྟངས་འགྲོ་འོང་གི་ངོ་བོ་ལ་བལྟས་ན༔ འགྱུ་བ་རང་སྒྲིན་དང་བཅས་པར་སྣང་སྟེ་ཡིད་དཔྱོད་ཀྱི་ཤེས་རབ་མ་ཡིན་པར༔ གཤིས་ལ་གནས་པའི་ཤེས་རབ་ཁོང་ནས་ཤར་བའི་རྟགས་ཡིན༔ སྣང་བ་རང་གི་ཆ་ལ་བལྟས་ན༔ རང་ཆས་ཀྱི་ཐིག་ལེ་ཕྲ་ཞིང་གྲངས་མང་བར་སྣང་བ་ཡིན་པས་ན་སྣང་བ་རྒྱ་ཆེ་བ་གོང་ནས་གོང་དུ་འཕེལ་བའི་རྟགས་ཡིན༔ དེ་ཉིད་འཆར་ཚུལ་རང་གི་ངོ་བོ་ལ་བལྟས་ན༔ ཕྲ་བའི་

སྣང་བ་གྱེན་འགྲེང་དུ་གནས་པས༔ ལྟ་བ་ཚིག་གིས་གཏན་ལ་མི་ཕབས་ཤིང་༔ ངང་གི་ངོ་བོ་ལྟ་བ་རང་ཡིན་པའི་རྟགས་ཡིན༔ རིག་པའི་སྣང་བ་འགྱུར་བའི་ཆ་ལ་བརྟགས་ན༔ གསལ་བ་འགྲོ་འོང་གི་འོད་འཕྲེད་ཉལ་རང་གསལ་དུ་སྣང་བས༔ རིག་པའི་སྣང་བ་ཅིར་ཡང་འཆར་པའི་རྟགས་ཡིན་ནོ༔ དེ་ལྟར་སྣང་བའི་རྡོ་རྗེ་ལུག་གུ་རྒྱུད་རང་གི་ངོ་བོ་ལ་གཟུང་ཆ་དང་འཛིན་ཆ་གཉིས་སུ་གྲུབ་པ་ནི་ཅང་མེད་དོ༔ སྣང་ཆར་ཡོད་པ་ནི་མངོན་སུམ་དུ་བལྟར་ཡོད་པའི་གནད་ཡིན་ནོ༔ དེ་ཡང་སྣང་ཆར་སྣང་བ་དེ་ཡང་སྣང་བ་རང་ཤར་ཡིན༔ ཤར་བ་རང་ལ་ཤར་བས་ན་སྣང་བ་རང་སྣང་དུ་གྲོལ་བ་ཡིན༔ སྣང་བ་རང་སྣང་དུ་གྲོལ་བའི་དུས་ན་གཞི་རང་སྣང་དུ་སྣང་བར་འོང་སྟེ༔ དེའི་ཕྱིར་ན་རིག་པ་ཚིག་གིས་གཏན་ལ་དབབ་ཏུ་མི་དགོས་པའི་གཏན་ཚིགས་དེ་ལྟར་ཡིན༔ འདི་ལྟར་ཉམས་སུ་བླངས་པས་ཚིག་ཐམས་ཅད་རང་ཤར་རང་བབས་སུ་སྣང་བར་འགྱུར་བ་ཡིན་གྱི༔ ད་ལྟར་ཚིག་གིས་གཏན་ལ་དབབ་ཏུ་ཅི་ཡང་མེད་དེ༔ དེའི་ཕྱིར་རིག་པའི་དབྱེ་བ་ལྔ་ལ་མཁས་པས་རིག་པའི་ཡིན་ཚུལ་གཏན་ལ་ཕེབས་པ་ཡིན་ཏེ༔ མཚན་ཉིད་འཛིན་པའི་རིག་པས་རིག་པའི་མིང་གཏན་ལ་ཕབ༔ གཞི་གནས་ཀྱི་རིག་པས་ནི་རིག་པའི་གནས་གཏན་ལ་ཕབ༔ གཞི་འཛིན་པའི་རིག་པས་ནི་དངོས་པོའི་གནས་ལུགས་གཏན་ལ་ཕབ་ནས་སྟོང་པ་ཉིད་ལས་ལྡོག་པའི་ཡེ་ཤེས་རང་གི་ངོ་བོས་བཟུང་༔ ལྷག་མཐོང་གི་རིག་པས་ནི་སྣང་བ་འདི་ལ་མངོན་སུམ་དུ་རིག་པས་རང་གི་ངོ་བོ་གཏན་ལ་ཕབ་ནས་ལྟ་སྒོམ་སྤྱོད་པ་ཐམས་ཅད་ལ་མི་ལྟོས་པར་རང་ངོ་གཏན་ལ་ཕབ༔ ཐོད་རྒལ་གྱི་རིག་པས་ནི་སྐུ་གསུམ་གྱི་སྣང་བ་ལ་རང་རྒྱུད་དུ་ཞེན་པའི་སྤྲོས་པ་བཅད་ནས་ཆོས་ཉིད་ཟད་པའི་སྣང་བ་ལ་བསྐྱལ་བས༔ འདོད་པར་བྱ་བའི་རྒྱུ་ནི་གང་ཡང་མེད་པར་རང་ཟད་དུ་འགྲོ་བ་ཡིན་གྱིསཿ ཆེད་དུ་འདོད་པ་

ཅི་ཡང་མེད་དོ༔ དེ་ལྟར་རིག་པ་དེ་རྣམས་ཀྱང་ཐ་དད་པ་མ་ཡིན་ཏེ༔ རིག་པ་སྣང་བ་ལ་ནི་འཕེལ་འགྲིབ་ཡོད་ཀྱི༔ རིག་པ་རང་གི་ངོ་བོ་ལ་འཕེལ་བ་དང་འགྲིབ་པ་མེད་པས་ནི་ཐོག་མ་ནས་ཟད་པའི་ས་ལ་ཆེ་ཆུང་དུ་སྣང་བ་ནི་རང་གི་ངོ་བོ་ལ་མེད་དོ༔ དེའི་ཕྱིར་ན་ཐིག་ལེ་ཉག་ཅིག་སྤྲོས་དང་བྲལ་བ་ཞེས་བྱ་བ་དེའི་གནད་ཡིན༔ སྣང་བ་ལ་འཕེལ་འགྲིབ་ཀྱི་ངོས་ནས་ནི་ཡོད་ཐོས་སྣང་གྲགས་ཐམས་ཅད་དུ་རིག་པ་གཏན་ལ་དབབ་ཏུ་བཏུབ་བོ༔ ཚིག་གིས་ནི་འདི་ལ་གཏན་ལ་དབབ་ཏུ་མི་བཏུབ་པས༔ རང་གི་ངོ་བོ་མི་མཐོང་བའི་གནད་ཀྱིས་སོ༔ ཨཏི༔ རིག་པ་སྐུ་གསུམ་གཏན་ལ་དབབ་པའི་གནད་ཡིག༔ ཡང་འབྱེད་གསང་བའི་གནད་བསྟན་པར་བྱའོ༔ དེ་ལྟར་རིག་པ་ཉིད་དངོས་སུ་གཏན་ལ་ཕབ་པ་ལ༔ སྐྱེས་བུ་གླེན་པ་འགའ་ཞིག་ནི་འདི་ལྟར་སྣང་བར་ག་ལ་ནུས་སྙམ་སྟེ་ཐེ་ཚོམ་བཅད་པའི་ཕྱིར༔ རིག་པའི་རྒྱབ་རྟེན་གྱི་མན་ངག་འདི་དག་བསྟན་པ་ཡིན་ཏེ༔ དེ་ཡང་ཕྲ་བ་ཤེས་རབ་ཀྱི་ཆ་ཟབ་མོའི་ཐིག་ལེ་ཉག་ཅིག༔ གསལ་བ་སྣང་བའི་ཆ་ཐིག་ལེ་སྣ་ཚོགས་འཕེལ་བའི་རྒྱུ༔ འགྲོ་འོང་རླུང་གི་ཆ་སྣང་བ་ལ་ཞེན་པ་མེད་པའི་རྐྱེན་དང་གསུམ་གྱིས་སྐུ་གསུམ་རང་རྒྱུད་གཞན་བྱུང་དུ་འདོད་པ་ནི་མ་ཡིན་ཏེ༔ དེ་ཉིད་ལ་དངོས་སུ་གཏན་ལ་ཕབ་ནས་རང་གི་ངོ་བོ་ལ་ཡིད་ཆེས་པར་བསྟན་པའོ༔ རིག་པ་མ་བཅོས་བར་མཁའ་ལ་སྣང་བས་ན་སྐུ་གསུམ་འབྲལ་བ་མེད་པར་བསྟན་པས༔ སྣང་བ་རང་གི་ངོ་བོ་དང་སྐུ་གསུམ་འབྲལ་བ་མེད་པར་བསྟན་པའོ༔ རིག་པ་ཉིད་གནས་པ་དང་བཞེངས་པ་དང་གྲོལ་བའི་དུས་སྐུ་གསུམ་དུས་གསུམ་དུ་གཏན་ལ་ཕབ་ནས༔ དུས་གསུམ་པ་ཉིད་དེ་དག་སྔ་ཕྱི་མེད་པར་བསྟན་པའོ༔ ཨི་ཏི༔ རྒྱ་རྒྱ་རྒྱ༔ ༔ རིག་པ་ལྟ་སྒོམ་སྤྱོད་པ་འབྲས་བུ་བཞིར་གཏན་ལ་དབབ་པའི་གནད་ཡིག་ཡང་འབྱེད་ནི༔

རིག་པ་ཉིད་ཤེས་རབ་ཀྱིས་མ་ཡིན་པར་དབང་པོའི་མངོན་སུམ་གྱིས་བལྟར་ཡོད་པ་དང་༔ དེ་ལ་རྣལ་འབྱོར་པ་རྣམས་ཀྱིས་གོམས་སུ་ཡོད་པས༔ སྣང་བ་གོང་འཕེལ་དུ་ཡོད་པ་དང་༔ དེ་ཉིད་དང་དུས་ཐམས་ཅད་དུ་མི་འབྲལ་ཞིང་འབྲལ་མི་སྲིད་པས་གཡེངས་བ་མེད་པ་དང་༔ དེའི་ཕྱིར་ན་ཆོས་ཉིད་ཟད་པའི་སར་རང་ངོ་དག་པས་ན་འབྲས་བུ་ཤུགས་འབྱུང་གིས་འབྱུང་སྟེ་ཉམ་ང་མེད་པའོ༔ དེ་ལྟར་རིག་པ་རང་ངོ་ལ་གནས་པ་དང་༔ རིག་པ་སྣང་ངོར་བཞེངས་པ་དང་༔ རིག་པ་ཉིད་འཁྲུལ་ངོ་ལས་གྲོལ་བ་དང་༔ རིག་པ་ལ་རགས་པའི་སྣང་བ་རྣམས་རང་དག་པས་ན་དུས་བཞི་མཉམ་པར་སྦྱར་བས་འཁྲུལ་པ་རང་སར་དག་པ་སྟེ༔ རང་སྣང་ལུགས་སུ་བླུགས་ནས་སྐུ་གསུམ་ཅོག་བཞག་ཏུ་སུས་ཀྱང་བྱས་པ་མེད་པར་རང་བྱུང་སྟེ་སྣང་བ་རང་ཟད་ལ་སོང་དུ་ཉེ་བའི་དུས་ན༔ ལྟ་སྤྱོད་གང་དུ་ཡང་མི་འཛིན་པས་ན༔ ལྟ་སྒོམ་སྤྱོད་པ་འབྲས་བུ་བཞིའི་རང་རྒྱུད་དུ་འཛིན་པའི་ཞེན་པ་རང་ལོག་པས་ལྟ་སྒོམ་རྣམས་རང་ལ་གནས་པའོ༔ ཨི་ཏི༔ རྒྱ་རྒྱ་རྒྱ༔ རིག་པ་ཉིད་ཐིག་ལེ་ཉག་ཅིག་ཏུ་གཏན་ལ་འབེབས་པའི་གནད་ཡིག་ཡང་འབྱེད་གསལ་བའི་གནད་ནི༔ རིག་པ་འབྱུང་བའི་གནད་མིག་གི་རྣམ་པར་ཤེས་པ་མི་འགྱུར་བའི་དོན་དང་༔ རིག་པ་གཞིའི་གནད་ཀྱིས་ཤེས་རབ་ཀྱི་རང་རྩལ་རྫོགས་པའི་གནད་རྒྱུན་ཕྲ་བའི་རང་གི་ངོ་བོ་ལྟོས་པ་མེད་ཅིང་རིག་པའི་དོན་དང་༔ རིག་པ་ཉིད་རྡུལ་ཕྲ་རབ་ཀྱིས་མ་བསྒྲིབས་བས་འདུག་པའི་གནས་ཀྱིས་རྐྱེན་གང་གིས་ཀྱང་བཤིག་པར་མི་ནུས་པའི་དོན་གྱིས༔ ངོ་བོ་ཐིག་ལེ་ཉག་ཅིག་ཏུ་གཏན་ལ་ཕབ་ནས་གཞན་སྣང་གི་སྤྲོས་པ་ཆོད་པའི་དགོས་པ་ཡོད་པར་བསྟན་པ་སྟེཿ དེའི་ཕྱིར་ན་རིག་པ་མིག་ནས་དྲང་བ་དང་༔ ནམ་མཁའ་ལ་ལམ་གཏོད་ནས་སྟོང་པ་ལ་དབང་དུ་བསྡུ་བ་དང་༔ ཤེས་པ་གཏིང་དག་གིས་ཟབ་བའི་དོན་ཉམས་སུ་བླངས་པ་དང་༔

རིག་པ་ཉིད་སྨིན་མཚམས་ལས་ཕྲལ་ནས་སྟེང་གི་ནམ་མཁའ་ལ་བཏོན་ནས་བལྟས་པས་ཡུལ་ཐམས་ཅད་གཅིག་ཏུ་བསྡུས་པའི་མན་ངག་གིས་ཐིག་ལེ་ཉག་ཅིག་ཏུ་གཏན་ལ་ཕེབས་པའོ༔ ཨི་ཏི༔ ལས་ཅན་ཅིག་དང་ཕྲད་པར་ཤོག༔ རིག་པ་ཉིད་ལས་དགེ་སྡིག་ལས་འདས་པར་བསྟན་པའི་ཡང་འབྱེད་ཆེན་པོ་གནད་ཀྱི་ཡི་གེ༔ འདི་ལྟར་རིག་པ་མངོན་སུམ་དུ་མཚོན་པའི་སྣང་བ་མཐོང་བའི་སྐྱེས་བུ་ནི༔ འདི་ཉིད་ལ་བརྟེན་པར་ཉམས་སུ་བླངས་པའི་གང་ཟག་གིས་ནི་ལས་དགེ་སྡིག་མེད་དུ་བྱར་བཏུབ་པ་ཡིན་གྱིས་ཚིག་ཙམ་དུ་གོང་རྣམས་ཀྱིས་ནི་མ་ཡིན་ནོ༔ དེའི་ཕྱིར་འདི་ཉིད་ལ་རིག་པ་ཉིད་གཏན་ལ་དབབ་ཏུ་བཏུབ་ཅིང་བལྟར་ཡོད་པས་ན་འདི་ཉིད་གོམས་པར་ཤིན་ཏུ་གཅེས༔ གལ་ཏེ་འདི་ཉིད་ལ་མ་གོམས་པར་དགེ་སྡིག་མེད་པར་ཁས་ལེན་པ་ནི་བདུད་ཀྱིས་བསླུས་པར་རིག་པར་བྱའོ༔ རང་གི་ངོ་བོ་ཉིད་མཐོང་བས་དེའི་དུས་ན་དགེ་སྡིག་ཏུ་སྣང་བ་ཅི་ཡང་མེད་དོ༔ དེའི་ཕྱིར་ན་དགེ་སྡིག་ལས་འདས་པའི་རིག་པ་གཏན་ལ་དབབ་པར་བྱའོ༔ རིག་པ་དེ་བཟུང་ཟེར་ཀྱང་དོན་གྱིས་བཞག་པ་ཡིན་ཏེ༔ དེ་ཡང་རང་བཞག་རང་གནས་པ་ལས་གཟུང་བས་འཛིན་པ་ལྟ་བུ་ནི་མ་ཡིན་ནོ༔ དེས་ན་ཡུལ་ནམ་མཁའ་སྟོང་པ་ལ་རིག་པ་རང་སར་བཞག་པ་ནི་རིག་པ་ཡུལ་དང་ཕྲད་པ་ཡིན་ནོ༔ འོ་ན་འཇོག་པའི་ལུགས་བླ་མའི་མན་ངག་དང་འབྲེལ་བ་སྟེ༔ བླ་མས་མན་ངག་དེ་ཁམ་བསྟན་སྡེ་སྣོད་གསུམ་གྱི་ཤེས་བྱའི་ཆོས་ལ་བློ་འབྱོངས་ཀྱང་གྲོལ་བ་མ་ཡིན་ཏེ༔ གསང་སྔགས་ནི་བླ་མ་ལ་རག་ལས་པས་སོ༔ བླ་མས་མན་ངག་དེ་བསྟན་ན་དབུལ་མོ་བ་གླང་རྫི་ཡང་གྲོལ་བས༔ དེའི་ཕྱིར་ན་རང་བཞིན་རྫོགས་པ་ཆེན་པོ་ནི་ལས་དང་བག་ཆགས་ཀྱི་འབྲེལ་པ་དང་བྲལ་བ་ཡིན་ནོ༔ འོ་ན་བླ་མའི་གདམས་ངག་ཡོད་པའམ་བསྟན་པ་ཙམ་གྱིས་གྲོལ་བར་གྱུར་བ་ནི་མ་ཡིན་ཏེ༔

དེ་ཉིད་ཉམས་སུ་མ་བླངས་ན་མ་སྤྱད་པར་བཞག་པའི་གཏེར་དང་འདྲ་བས་ན༔ མན་ངག་གོམས་ཚད་ཀྱིས་ཉམས་སུ་མ་བླངས་ན་རྡོ་རྗེ་སེམས་དཔའ་ཡང་མི་གྲོལ་ཞེས་པ་ནི༔ ཐབས་འདིའི་སྒོ་མེད་ན་སངས་རྒྱས་ཀྱི་ཡོན་ཏན་ལུས་ལ་རྫོགས་ཀྱང་ཀུན་རྫོབ་ཀྱི་བདེན་པ་ཙམ་དུ་བས་ཏེ་ཡང་དག་དོན་དམ་མ་ཡིན་ནོ༔ དེས་ན་གསང་སྔགས་འདི་ཐབས་ཆེ་བའི་གནད་ཀྱིས་མཚམས་མེད་པ་ལྔ་བྱས་པ་ཡང་འདིའི་སྒོར་ཞུགས་ནས༔ བླ་མས་མན་ངག་ཕྱིན་ཅི་མ་ལོག་པར་བསྟན་ནས་དེ་ཉམས་སུ་བླངས་ན་ནི་ཚེས་འདི་ཉིད་རང་ལ་གྲོལ་ངེས་པས་སོ༔ འདི་ཉིད་ལ་བག་ཆགས་ཀྱིས་འགྲིབ་པར་མི་ནུས་པའི་གནད་ཀྱིས་དགེ་སྡིག་གང་གིས་ཀྱང་ཕན་གནོད་མ་བྱས་པར་ཡེ་ནས་བཞུགས་པ་དེའི་དོན་རྣལ་འབྱོར་པས་མཐོང་བས་སོ༔ ལུས་རྟགས་དང་རྫུ་འཕྲུལ་མང་པོ་ཡོད་ཀྱང་སངས་རྒྱ་མི་ནུས་ཏེ༔ དཔེར་ན་ཉན་ཐོས་ཀྱིས་བཞིན་དུ་སླར་ལྡོག་པ་ནི་འདིའི་མན་ངག་དང་བླ་མ་དང་མ་ཕྲད་པའོ༔ རིག་པ་ཉིད་ལ་ཆེ་ཆུང་དང་འཕེལ་འགྲིབ་མེད་པ་དང་༔ རིག་པའི་ཡིན་ཚུལ་འདི་ལྟར་ཡིན་ནོ་བར་གྲུབ་རྒྱུ་མེད་པ་དང་༔ རིག་པ་རང་གི་ངོ་བོ་ལ་རྣམ་པར་རྟོག་པ་ཡེ་འཆར་མི་སྲིད་པ་དང་༔ དབྱིངས་ལ་དགེ་བ་དང་སྡིག་པ་ཡེ་ནས་མེད་པ་དང་༔ རྡོ་རྗེ་ལུ་གུ་རྒྱུད་རང་གི་ངོ་བོ་ལ་དགེ་སྡིག་གཉིས་ཀའི་བསམ་པ་མེད་པ་དང་༔ དེའི་ངོ་བོ་ལ་ལུས་ངག་གི་བྱ་བ་ཅི་བྱས་ཀྱང་མི་ལྟོ་བ་དང་༔ ངོ་བོ་ལ་སྡིག་པའི་ལས་ཅི་བྱས་ཀྱང་འགྲིབ་པ་མེད་པ་དང་༔ དེ་ཉིད་རང་གི་ངོ་བོ་ཚད་ཟིན་པས་དགེ་སྡིག་གང་གི་ངོ་བོར་ཡང་མ་གྲུབ་པའི་གནད་རྣམས་ཀྱིས༔ རིག་པ་ཉིད་ལ་ལས་དགེ་སྡིག་གིས་ཕན་མ་བཏགས་གནོད་པ་མ་བསྐྱལ་བ་ནི་ཚིག་ཙམ་དུ་མ་ཡིན་ཏེ༔ ངོ་བོ་དེ་ཉིད་མཐོང་ཞིང་ཉམས་སུ་ལོངས་པའི་རྣལ་འབྱོར་པ་དེ་རང་གི་ངོ་བོའི་ཐོག་ཏུ་གཏན་ལ་ཕེབས་པས་དེ་ལྟར་ངེས་པ་ཡིན་ནོ༔ ཁ་ཙམ་ཚིག་ཙམ་དུ་དགེ་སྡིག་མེད་བྱས་པས་

མི་ཕན་ཏེ༔ དེ་ནི་རང་གི་རྒྱུད་ལ་རང་གི་རྣམ་སྨིན་གྱིས་རང་ལ་འཆིང་བའི་གང་ཟག་ཅེས་བྱའོ༔ དེའི་ཕྱིར་ན་རང་གི་རིག་པའི་ཐོག་ན་བལྟས་པས་དགེ་སྡིག་གང་དུ་ཡང་མ་གྲུབ་པས་དགེ་སྡིག་ལས་འདས་པར་བསྟན་པ་ཡིན་ནོ༔ རང་གི་ཐོག་ནས་བལྟས་པས་རིག་པ་རྡོ་རྗེལུ་གུ་རྒྱུད་ཆེན་པོ་དེ་ལ་སངས་རྒྱས་ཀྱི་མིང་ཙམ་ཡང་མ་གྲུབ་པའི་གནད་དང་༔ དེ་ལྟར་སངས་རྒྱས་ཀྱི་མིང་མེད་པའི་གནད་ཀྱིས་དམྱལ་བའི་མིང་ཡང་ཡེ་ནས་མེད་ཅིང་ད་ལྟར་ཡང་ག་ལ་སྲིད་པར་བསྟན་པ་དང་༔ དེའི་ཕྱིར་ན་ཉམས་སུ་ལེན་པའི་རྒྱུད་ལ་སངས་རྒྱས་དང་དམྱལ་བ་གང་གི་ངོ་བོར་ཡང་མ་གྲུབ་པ་བསྟན་པས་ཐམས་ཅད་མཉམ་པ་རིས་མེད་པའི་དལ་ཆེན་པོ་གཉིས་སུ་འདུས་ཤིང་མཉམ་པ་ཆེན་པོར་རྣལ་དུ་ཕབ་པ་ཞེས་བྱའོ༔ ཐོག་མའི་གཞི་ལས་འཁྲུལ་གཞི་ནི་ཡང་དག་པར་རྩིས་གདབ་ལས་འདས་ཏེ༔ འདི་ཀུན་ནི་ཤེས་བྱའི་ཆོས་ཙམ་ཡིན་གྱི་ཉམས་སུ་བླང་དུ་བཏུབ་པ་ནི་མ་ཡིན་ཏེ༔ ཚིག་བརྒྱ་སྟོང་དུ་མས་ནི་འཁྲུལ་པ་གཏན་ནས་ཆོད་པ་མ་ཡིན་ཏེ༔ ཚིག་རང་གིས་རང་ནི་ཆོད་པ་མ་ཡིན༔ ཚིག་གི་དོན་གོ་བས་ཆོད་པ་ཡང་མ་ཡིན་ཏེ༔ དོན་དུ་གོ་བ་སྙམ་བྱེད་པ་དེ༔ གང་ལ་སྙེམ་བྱེད་ཡོད་པ་ནི་འཁྲུལ་པ་དངོས་ཡིན་པས༔ སྙེམ་བྱེད་པས་དོན་རང་དུ་གོ་བ་ནི་མ་མཐོང་བར་དུ་འོང་མི་སྲིད་དོ༔ དེ་ཅིའི་ཕྱིར་ན་ཐིག་ལེ་ཕྱི་ནང་གསང་བའི་སྐོར་རྣམས་ཀྱི་ལྟ་བ་ནི་ཡིད་དཔྱོད་དུ་བསྟན་པ་ཡིན་པས༔ ཐེག་པ་ཐུན་མོང་བ་རྣམས་དང་ཁྱད་པར་རྡུལ་ཙམ་ཡང་མེད་པ་ཡིན་པས༔ འདི་ཉིད་ནི་བདག་གིས་སྙིང་དུ་བསྟན་པ་ཡིན་པས་རབ་ཏུ་ཡང་ཟབ་བོ༔ དེའི་ཕྱིར་ན་དཔེ་ལ་སོགས་པ་བྱས་པ་ཐམས་ཅད་འཁྲུལ་པ་དངོས་ཡིན་ཏེ༔ འཁྲུལ་པ་ཉིད་འཁྲུལ་པས་མཐོང་བར་

ནུས་པ་མ་ཡིན་ཏེ༔ དཔེར་ན་རང་གི་བྱད་བཞིན་མི་མཐོང་བ་བཞིན་ནོ༔ རང་གི་མི་རྟོག་པའི་ཡེ་ཤེས་ནི་མི་རྟོགས་པ་བསྒོམས་པ་ལས་མ་བྱུང་བ་དང་༔ དེའི་ངོ་བོ་ལ་རྣམ་པར་རྟོག་པ་ཡེ་འབྱུང་མི་སྲིད་པ་དང་༔ རྣམ་པར་རྟོག་པ་དང་མི་རྟོག་པ་གང་གི་ངོ་བོར་ཡང་མ་གྲུབ་པས་ན་རྡོ་རྗེ་ལུ་གུ་རྒྱུད་ནི་བསམས་ཤིང་དཔྱད་པས་རྙེད་པ་ནི་མ་ཡིན་ནོ༔ བསམས་ནས་རྙེད་ན་ལྟ་བ་རང་གི་འདུག་ཚུལ་མ་ཡིན་ནོ༔ དེ་ཡང་ཆོས་ལས་འདས་པའི་རིག་པ་ཉིད་དུ་ཡེ་ནས་རང་ཤར་རང་སྣང་རང་གྲོལ་བ་ཡིན་གྱི་གཞན་གྱིས་ནི་མ་ཡིན་པས༔ དེས་ན་ཆོས་ལ་མ་བརྟེན་པས་རིག་པ་རང་གི་ངོ་བོ་ལ་འཆིང་བར་བྱེད་པའི་དྲི་མ་གང་ཡང་མེད་པའོ༔ དེ་ཡང་རིག་པ་རང་གི་ངོ་བོ་དཔྱད་པར་བྱ་བ་ལྟ་སྒོམ་སྤྱོད་པར་མི་གནས་པའི་གནད་དང་༔ ངག་དགེ་བའི་ལས་མ་གྲུབ་པའི་གནད་དང་༔ བསག་ཏུ་མེད་པའི་གནད་དང་༔ ཐོས་སུ་མེད་པའི་གནད་དང་༔ བསྐུར་དུ་མེད་པའི་གནད་དང་༔ བཟླས་སུ་མེད་པའི་གནད་དང་༔ བསྐྱེད་དུ་མེད་པའི་གནད་དང་༔ བསྒོམ་དུ་མེད་པའི་གནད་དང་༔ མཆོད་དུ་མེད་པའི་གནད་དང་༔ བསྡམ་དུ་མེད་པའི་གནད་དང་༔ བཤད་དུ་མེད་པའི་གནད་དང་༔ གནད་ཆེན་པོ་བཅུ་གཉིས་ཀྱིས་རང་བཞིན་རྫོགས་པ་ཆེན་པོའི་དོན་རྩོལ་སྒྲུབ་དང་བྲལ་བར་བསྟན་པས༔ འདི་ལྟར་ཉམས་སུ་ལེན་པའི་སྐྱེས་བུས་བྱ་བ་བཏང་ནས་དགེ་སྡིག་རྒྱུན་ཐག་བཅད་དེ་ཅི་ཡང་བྱར་མེད་པར་གཏོད་པ་ནི༔ རྫོགས་པ་ཆེན་པོ་རྩོལ་སྒྲུབ་དང་བྲལ་ལོ་ཞེས་པའི་དོན་ཏེ་ཚིག་ཙམ་དུ་བྲལ་བ་ནི་མ་ཡིན་ནོ༔ ཉམས་སུ་ལེན་པ་ནི་ཐབས་སུ་བསྟན་པ་ཡིན་ནོ༔ རིག་པ་རང་ངོ་ལ་རིགས་དྲུག་ཏུ་ཡེ་ནས་གྲུབ་པ་མེད་པའི་གནད་ཀྱིས་སྣང་ཚུལ་ལ་སྡུག་བསྔལ་རྣམ་པ་དྲུག་གི་ཞེན་པ་རང་ཆོད༔ རང་ངོ་ལ་མ་རིག་པ་མ་གྲུབ་

པའི་གནད་ཀྱིས་སྣང་ཚུལ་ལ་ཉོན་མོངས་པ་དྲུག་གིས་འཆིང་བ་རང་ཆོད༔ རང་ངོ་ལ་ཡུལ་ཤེས་མ་གྲུབ་པའི་གནད་ཀྱིས་སྣང་ཚུལ་ལ་ལུས་ངག་ཡིད་ཀྱིས་རྣམ་སྨིན་གྱི་ཞེན་པ་རང་ཆོད༔ དེ་ལྟར་དོན་གཉ ིས་མེད་དུ་རང་ཤེས་ནས་རིག་པ་རང་སྣང་སྤྲོས་པ་མེད་པའི་རང་བཞིན་དུ་ཡེ་ནས་གནས་པ་ཡིན་ཏེ༔ དགེ་སྡིག་རྣམ་རྟོག་མེད་པའི་སྣང་བ་རང་རྐྱེན་དབྱིངས་སུ་དག་པའི་ཡེ་ཤེས་ཞེས་རང་གི་ངོ་བོར་གཏན་ལ་དབབ་པའོ༔ དེའི་ཕྱིར་ན་རིག་པའི་ཡེ་ཤེས་དེ་དགེ་སྡིག་གང་གི་ངོ་བོར་ཡང་མ་གྲུབ་སྟེ་རྣམ་པ་ཐམས་ཅད་དུ་རང་རིག་ཏུ་ཟིན་པའི་སྐྱེས་བུའོ༔ དུས་གསུམ་གྱི་གནད་ཀྱི་མན་ངག་གིས་དུས་གསུམ་གྱི་སངས་རྒྱས་ཀྱིས་དགོངས་པ་དུས་གསུམ་མཉམ་པ་ཉིད་དུ་ཤེས་ཏེ༔ འདི་ལྟར་དུས་གསུམ་མཉམ་པ་ཉིད་དུ་སུས་རིག་པའི་སྐྱེས་བུ་ནི༔ སངས་རྒྱས་སུམ་སྟོང་གི་དཀྱིལ་འཁོར་སྐད་ཅིག་མ་སྟོན་ནུས་པ་ལ་ཐེ་ཚོམ་མེད་པས་ལོངས་སྐུའི་སྣང་བ་འདིར་གཏན་ལ་ཕེབས་པའི་རྟགས་ཡིན་ཏེ༔ སྣང་བ་ཉིད་དུས་གཅིག་ལ་སྟོན་པས་དུས་གསུམ་མཉམ་པ་ཉིད་དུ་རིག་པའི་སྐྱེས་བུ་ཞེས་བྱའོ༔ འདི་ནི་ངེས་པ་ཁོ་ནའོ༔ འདི་ལྟར་རིག་པ་དུས་གསུམ་བླངས་ན༔ རང་གི་སྣང་བ་དུས་གསུམ་རིམ་གྱིས་སྣང་བ་དང་༔ ཅིག་ཅར་དུ་གཏན་ལ་འབེབས་པ་གཉིས་ལས༔ རིམ་གྱིིིས་ནི་སྣང་བ་གསུམ་རིམ་གྱིས་ཤར་བས་སྣང་བ་གསུམ་མཐོང་སྟེ༔ རིག་པ་མཐོང་བས་རང་གི་སྣང་བ་ལ་ཡིད་ཆེས་ནས་ད་ལྟའི་སྣང་བ་འདི་སྐུ་གསུམ་དུ་གྲོལ་བར་བྱས་པ་ཡིན་ཏེ༔ དེ་ཡང་རིག་པ་ཉིད་མི་འགྱུར་བ་དང་༔ གསལ་བ་དང་ན༔ སྣ་ཚོགས་སུ་སྣང་བ་དང་གསུམ་གྱིས་རིག་པ་ཉིད་སྐུ་གསུམ་དུ་ཡིད་ཆེས་པར་གཏན་ལ་ཕབ་པའོ༔ ཉམས་སུ་ལེན་པའི་ཚེ་ན་རྣལ་འབྱོར་པ་སྐལ་བ་དང་ལྡན་པ་དེའི་རྒྱུད་ལ་ཉམས་མི་འདྲ་བ་ཉིན་ཞག་ཕྲུགས་རེ་ལ་གསུམ་

གསུམ་སྐྱེ་བས༔ སྐུ་གསུམ་སྣ་ཚོགས་སུ་ཤར་བའི་སྣང་བ་རང་གིས་ངོ་ཤེས་ནས༔ འདི་ནི་སྐུ་གསུམ་རང་ངོ་སྣ་ཚོགས་སུ་སྣང་བར་གཏན་ལ་ཕབ་པའོ༔ རང་གི་སྣང་བ་ཚད་དུ་ཕྱིན་པའི་དུས་ན་ཆོས་ཉིད་རྣམ་པར་དག་པ་རང་གི་སྣང་བའི་སྟོབས་ཀྱིས་ཕྲ་བ་དང་རིགས་པའི་སྣང་བ་ཐམས་ཅད་རང་གིས་རང་ཟད་པ་ནི་དངོས་པོ་གཤིས་ཀྱི་འདུག་ཚུལ་ཏེ༔ འདི་ལ་ཚིག་གིས་གཏན་ལ་དབབ་མི་དགོས་ཏེ༔ ཉམས་སུ་བླངས་པས་རང་སྣང་དུ་འོང་བ་ཡིན་པ་ལས་ཚིག་དུ་མས་གཏན་ལ་ཕབ་ཀྱང་འཆར་མི་སྲིད་དོ༔ སྔོན་དུ་འདི་དག་ཚིག་གིས་གཏན་ལ་ཕབ་ཀྱང་འདི་ཉིད་མ་མཐོང་བས༔ ཕྱོགས་ཙམ་དུ་ཉེ་བའི་ཚིག་ཅིག་ཀྱང་འབྱུང་བ་མ་ཡིན་ནོ༔ འདིའི་དུས་ན་སྐུ་གསུམ་གྱི་ཞེན་པ་རང་ཡུལ་ཟད་པས་ལུས་དང་ཡིད་ཀྱི་སྣང་བ་ནི་ཡེ་ཟད་ཡིན་ཏེ༔ སྐུ་གསུམ་ལུས་སུ་འཛིན་པའི་ཚིག་གི་སྤྲོས་པ་ཙམ་དུ་ཡང་མི་སྣང་སྟེ་ཡེ་ཤེས་རང་ངོ་ལ་ཐག་ཆོད་པས༔ འདས་པ་དང་འཁོར་བའི་ཞེ་འདོད་རང་དང་བྲལ་བའོ༔ དེ་ལྟར་སྣང་བ་གསུམ་རིམ་གྱིས་ཤར་བས་རིག་པ་ཉ ིད་ཐམས་ཅད་དུ་ཡང་འབྱུང་ལ༔ ཇི་ལྟར་ཡང་གཏན་ལ་དབབ་ཏུ་བཏུབ་ལ༔ ཇི་ལྟར་བྱས་ཀྱང་མི་ལྟོ་བར་བསྟན་པ་ཡིན་ནོ༔ ཅིག་ཅར་ནི་རང་དག་ཆེན་པོའི་སྣང་བ་རང་ཤར་བའི་ཚེ༔ ཆོས་ཐམས་ཅད་རང་སར་ཟད་པའི་ངོ་བོ་རང་བཞིན་ཐུགས་རྗེ་གསུམ་མི་སྣང་མི་ཕྱེད་མི་འཛད་པའི་ཚུལ་དུ་གཞི་ཆེ་བ་དང་༔ ཁྱབ་ཆེ་བ་དང་༔ གྲུབ་ཆེ་བའི་ཚུལ་དུ་སྣང་བའི་ཆ་ལ་འབྱུང་སྟེ༔ དེ་ཀུན་རང་དག༔ རང་སྣང་༔ རང་གྲོལ་བས༔ དུས་ལ་འཕོ་འགྱུར་མེད་པ་དང་༔ མཐའ་དབུས་སུ་བསྡུས་པ་དང་༔ བྱས་པ་ཐམས་ཅད་ཆུད་མ་གསན་པར་སྣང་བ་ཉིད་རང་གི་རང་དེངས་པའོ༔ རང་དེངས་ཆེན་པོའི་སྣང་བ་ལ༔ ཅི་ཡང་

ཡོད་པ་མ་ཡིན་ཏེ༔ ཅིར་ཡང་སྣང་བའི་ཚུལ་དུ་འབྱུང་༔ འབྱུང་པ་ཉིད་ལས་རྒྱུ་མེད་པས༔ རང་ཡུལ་རང་གི་རྐྱེན་གྱིས་དག༔ དག་པ་མེད་ཅིང་འགྲོ་བ་མེད༔ དང་པོ་འོངས་པའི་ཁུངས་མེད་པས༔ ཐ་མ་སོང་བའི་རྗེས་མི་ཆོད༔ ནམ་མཁའ་གཅིག་ལ་གཅིག་ཐིམ་བཞིན༔ སྔ་ཕྱི་མེད་པར་གཉིས་མེད་འདྲེས༔ དུས་གསུམ་མཉམ་པ་ཉིད་དུ་འོང་༔ འདི་ལ་ཚིག་གིས་གཟུང་དུ་མེད༔ ཚིག་གིས་ཕྱོགས་ཙམ་མཚོན་མི་ནུས༔ དེའི་ཕྱིར་ཤེས་མིན་ཀློང་གཅིག་པ༔ ཐ་དད་རྣམས་སུ་ཕྱེ་བ་མེད༔ འདི་ཞེས་ཉམས་སུ་མྱོང་དང་བྲལ༔ ལྐུགས་པ་ཡི་ནི་རྨི་ལམ་དང་༔ སྤྲིན་མེད་མཁའ་ལ་ཉི་ཤར་དང་༔ མཁའ་ལ་འཇའ་ཚོན་རང་ཡལ་བཞིན༔ གཞིས་མཚོན་དངོས་གཞི་རྣམས་དང་བྲལ༔ འདི་ཞེས་མཚོན་པ་ཀུན་ལས་འདས༔ བརྗོད་ཅིང་སྒྲ་ཚིག་རྣམས་དང་བྲལ༔ གྲུབ་མེད་རིག་གསལ་སྟོང་པར་བཞུགས༔ ཡི་གེ་མ་རུའི་ཡང་འབྱེད་སྦས་པའི་ལྡེ་མིག་གསལ་བ་ཆེན་པོ་རྫོགས་སོ༔ བྱེ་མ་ལས་སྒྲ་རང་འགྱུར་དུ་བསྒྱུར་བ༔ རྒྱའི་དཔེ་ལས་བོད་ཀྱི་ཡི་གེར་བསྒྱུར་ནས༔ མཆིམས་ཕུ་བྲག་མར་དགེ་གོང་དུ་སྦས་པ་ལགས་སོ༔ འདི་ལ་འདྲ་མིན་གཉིས་བརྟག་གོ༔ རྒྱ་རྒྱ་རྒྱ༔ དཔལ་ལྡན་མགོན་པོ་ནག་པོ་ཆོས་སྐྱོང་སྲུང་མ་ཁྱོད༔ བཀའ་འདི་གཏད་དོ་ཁྱོད་ཀྱིས་ཐུབ་པར་སྲུངས༔ སྨུག་ནག་ཨེ་ཀ་སྔགས་ཀྱི་སྲུང་མས་ཀྱང་༔ འདི་ཉིད་གང་དགར་ཤོར་ར་རེ༔ ཨི་ཏི༔ དམ་པ་རང་སྣང་འདི་ཉིད་རྫོགས་ལ་གུས་པས་འདུད༔ བདག་འདྲ་བྱེ་མ་མུ་ཏྲ་རྒྱལ་རིགས་སྔོན་དུ་སྦྱངས་པའི་ཤེས་རབ་རྒྱ་ཆེ་ཡང་༔ གསང་བ་སྙིང་གི་མན་ངག་འདི་མེད་ན༔ ཚེ་འདི་

སྟོང་ཟད་སླར་ལོག་ཡོང་རེ་བྱས༔ འདི་ནི་གསང་བའི་སྙིང་གི་ཏི་ཀ་བས༔ གཞན་གྱིས་དཔྱད་ཅིང་བསྟན་པའི་གནས་མེད་དེ༔ ཡང་མཛོད་དམར་པོའི་ནང་དུ་རྒྱས་བཏབ་ལ༔ ལུང་དང་མི་ལྡན་རྣམས་ཀྱིས་ཐོས་ས་རུ༔ རླུང་གི་ཕྱོགས་ཙམ་དུ་ཡང་བསྒྲག་པ་མིན༔ སྙིང་པོ་བྱང་ཆུབ་བར་དུ་ཁར་མི་དབྱུང་༔ ཤིན་ཏུ་དཀོན་པའི་སྙིང་རྒྱུད་བཅུ་བདུན་ལས༔ གསང་བའི་མན་ངག་ཡང་སྙིང་བཅུད་བསྡུས་ནས༔ གབ་པའི་སྙིང་དུ་ཡེ་གེ་མ་རུ་ནི༔ ཤིན་ཏུ་ཟབ་པའི་རྩ་ཏིག་སྙིང་གི་ཡང་༔ མན་ངག་སྙིང་པོ་གསང་བ་ཆེན་པོ་ཡི༔ དོན་གྱི་ཡི་གེ་སྙིང་གབ་མངོན་འབྱིན་པའི༔ སྙིང་གི་གནད་མཆོག་ཡི་གེ་མ་རུ་ལ༔ འགྱུར་མེད་སྙིང་དུ་དམིགས་གཏད་རིན་པོ་ཆེ༔ ཡང་འབྱེད་དོན་སྙིང་ངོ་བོ་ཉིད་ཀྱི་དེབས༔ ཡང་ཏིག་སྙིང་དུ་ཕབ་པའི་མདོ་བྱང་བསྡུས་པ་དང་། ཡང་སྙིང་སྦས་པའི་རྒྱབ་ཡིག་ཊི་ཀ་འདིས༔ འདི་བཞིས་སྙིང་ཏིག་གསལ་བྱེད་འགྱུར་བ་མེད་པར་བྱས༔ འདི་ལྟར་སྙིང་ཏིག་མ་བུ་ལྔ་ཡིས་ནི༔ རྣལ་འབྱོར་ཀུན་གྱི་སྙིང་གི་གནད་དུ་ཡང་༔ གསང་བ་སྙིང་ལ་ཕབ་པ་འདིས་འགྲོལ་ལོ༔ ཡང་སྙིང་གསང་བ་འདི་ལ་སྒྲོན་མ་ནི༔ རྣམ་པ་འདི་བཞིས་སྙིང་དུ་གཏན་ལ་ཕབ༔ འདི་ལྟར་སྙིང་གི་དོན་དུ་བཀོད་པ་འོ༔ གསང་བའི་ཡི་གེ་མ་རུ་ལ་སོགས་པོ་ཏི་གསུམ༔ རྒྱ་ཡི་དཔེ་ལས་བོད་ཀྱི་ཡི་གེར་ནི༔ བདག་གི་ཁོང་གི་སྙིང་ཏིག་ཕྱུང་ནས་ནི༔ ཕྱི་རབས་དོན་དུ་རྒྱ་ཡིས་བཏབ་ནས་ནི༔ བསྟན་པའི་བཙས་སུ་བཞག་པ་འདི་ཡིན་ནོ༔ འདི་ནས་བྱང་ན་ཕ་བོང་སྟག་འདྲ་ན༔ ཡི་གེ་ཨ་ཡིས་རྒྱས་བཏབ་ལྕགས་ཀྱིས་ལྟེམས་ནས་ནི༔ ཐིག་ལེ་སྐོར་གྱི་གསང་བའི་ཡི་གེ་

རྣམས༔ ཐོག་མའི་རྒྱ་ཡི་དཔེ་རྣམས་འདི་ན་ཡོད༔ ནམ་ཞིག་འདི་ཡང་བོད་ལ་སྣང་བར་འགྱུར༔ བདག་ནི་སླར་ལོག་རྒྱ་གར་ཡུལ་དུ་ནི༔ གཟུགས་ཕུང་འདི་དང་བཅས་ནས་མི་འགྲོ་སྟེ༔ རྒྱ་ནག་རི་བོའི་རྩེ་ལ་འཇིག་རྟེན་མ་ཞིག་བར༔ སྒྱུ་མའི་ཕུང་པོ་སྣང་བའི་ཆ་བཟུང་སྟེ༔ སྲིད་པ་མ་ཞིག་བར་ལ་འདིར་མཆི་འོ༔ དཔལ་ལྡན་མགོན་པོ་ལེགས་ལྡན་ནག་པོ་ལ༔ བཀའ་འདི་གཏད་དོ་སྲུངས་ཤིག་ས་མ་ཡ༔ སྨུག་ནག་ཁྲོས་པའི་རྒྱལ་མོས་འདི་སྲུངས་ཤིག༔ ནམ་ཞིག་བཀའ་འདི་དབྱུང་བའི་དུས་བྱུང་ན༔ སྐལ་ལྡན་སྙིང་གི་བུ་དང་ཕྲད་པར་ཤོག༔ ལྕེ་བཙུན་གྱིས་མཆིམས་ཕུ་ནས་ཕྱུང་ནས་སྦས་པའོ༔ ས་མ་ཡ༔ ན་རག་ཀན༔ ༔

གསང་བ་བླ་མེད་སྒྲོན་མ་དགུ་སྐོར་གྱི་གདམས་པ།

༼ཕྲ་ཡིག༽གསང་བ་བླ་མེད་སྒྲོན་མ་དགུ་སྐོར་གྱི་གདམས་པ་ཡིན་ནོ༔ ས་མཱ་ཡ་རྒྱ་རྒྱ་རྒྱ༔

དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལ༔ སྐུ་གསུམ་བསྡུས་པའི་སྒྲོན་མ་འདི་ལ་དོན་བཅུས་བསྟན་ཏེ༔ སྐུ་གསུམ་གྱི་ངོ་བོ་དང་༔ ངེས་ཚིག་དང་༔ དབྱེ་བ་དང་༔ སྐུ་གསུམ་གྱི་མཚན་ཉིད་དང་༔ སྐུ་གསུམ་དུ་འཇོག་པའི་འཐད་པ་དང་༔ སྐུ་གསུམ་དང་ངོ་བོ་ཇི་ལྟར་སྤྱད་པ་དང་༔ སྐུ་གསུམ་པོ་དེ་གང་ཟག་གང་གིས་ཇི་ལྟར་ལམ་དུ་འཁྱེར་བ་དང་༔ སྐུ་གསུམ་རྣལ་འབྱོར་ལམ་པ་རྣམས་ལ་ཇི་ལྟར་སྣང་བ་དང་༔ སྐུ་གསུམ་ཇི་ལྟར་ཡིན་ཚུལ་དང་༔ མཐར་ཐུག་འབྲས་བུའི་དུས་སུ་ཇི་ལྟར་འགྱུར་བ་དང་༔ སྐུ་གསུམ་ལམ་དུ་བྱ་སྟེ་མཐར་ཕྱིན་པའི་དུས་སུ་སེམས་ཅན་གྱི་དོན་མཛད་པའི་ཚུལ་དང་བཅུའོ༔ དེ་ཡང་སྐུ་གསུམ་གྱི་ངོ་བོ་ནི༔ ཆོས་སྐུའི་ངོ་བོ་ནི་ཡོན་ཏན་ཐམས་ཅད་ཀྱི་གཞིའམ་འབྱུང་ཁུངས་སུ་བཞུགས་སོ༔ ལོངས་སྐུའི་ངོ་བོ་ནི༔ ཡེ་ཤེས་ཐམས་ཅད་ཀྱི་རྒྱན་ནམ༔ རྩལ་ལམ༔ རོལ་པར་བཞུགས་སོ༔ སྤྲུལ་སྐུའི་ངོ་བོ་ནི༔ འགྲོ་བ་ཐམས་ཅད་ཀྱི་གཙོ་བོར་

བཞུགས་སོ༔ སྐུ་གསུམ་གྱི་ངེས་ཚིག་ནི༔ ཆོས་སྤྱི་དང་རང་གི་མཚན་ཉིད་དུ་བྱེད་པ༔ ཀྱི་ནི་དེ་དང་འབྲེལ་བ་ཡིན་ནོ༔ སྐུ་ནི་རིན་པོ་ཆེ་གསང་བའི་སྦུབས་ཀྱི་སྐུ་ཞེས་བྱའོ༔ ཆོས་སྐུའི་ངེས་ཚིག་ནི༔ ཐམས་ཅད་སྟོང་པའི་རང་བཞིན་ནོ༔ ལོངས་སྐུའི་ངེས་ཚིག་ནི༔ ལོངས་སྐུའི་ཡེ་ཤེས་ལྔ་ལ་སྤྱོད་ལ༔ རྫོགས་པ་ནི་མཚན་དང་དཔེ་བྱད་རྫོགས༔ སྐུ་ནི་ཡེ་ཤེས་སྒྱུ་མའི་སྐུའོ༔ སྤྲུལ་སྐུའི་ངེས་ཚིག་ནི༔ སྐྱེ་བ་རྣམ་བཞིར་གཟུགས་མི་འདྲ་བ་ཐ་དད་པ་སྟེ༔ རིགས་དྲུག་གང་ལ་གང་འདུལ་དུ་སྤྲུལ་ནས༔ སྐུ་ནི་རྣམ་རྟོག་བག་ཆགས་ཀྱི་སྐུའོ༔ སྐུ་གསུམ་གྱི་དབྱེ་བ་ནི་དོན་བདུན་གྱིས་བསྟན་ཏེ༔ སྐུ་གསུམ་གྱི་གནས་དང་༔ སྐུ་གསུམ་གྱི་སྐུ་དང་༔ སྐུ་གསུམ་གྱི་གསུང་དང་༔ སྐུ་གསུམ་གྱི་ཐུགས་དང་༔ སྐུ་གསུམ་གྱི་འཁོར་དང་༔ སྐུ་གསུམ་གྱི་སྣང་བ་བསྟན་པ་དང་༔ སྐུ་ཞེས་བྱ་ལུས་ཞེས་བྱ་བ་འདི་དག་བདག་གིས་མཐར་ཐུག་ཏུ་བཤད་པ་ཡོད་དེ། དེ་ལྟར་ནི་མ་ཡིན་ནོ་སྐུ་གསུམ་གྱི་གདུལ་བྱ་བསྟན་

པའོ༔ དེ་ཡང་སྐུ་གསུམ་གྱི་གནས་ནི༔ ཆོས་སྐུའི་གནས་ནི་ངེས་པ་མེད་གནས་པ་མེད་ན་ཆོས་ཀྱི་དབྱིངས་སོ༔ ལོངས་སྐུའི་གནས་ནི༔ རྣམ་པར་གཏད་པ་ལ་ངེས་པ་ལྔ་ཡོད། འོག་མིན་སྟུག་པོ་བཀོད་པའི་ཞིང་ཁམས་སོ༔ སྤྲུལ་སྐུའི་གནས་ནི་བྱ་རྒོད་ཕུང་པོའི་རི་ལ་སོགས་པའོ༔ སྐུ་གསུམ་གྱི་ངོ་བོ་ནི༔ ཆོས་སྐུའི་ཆོས་སྐུ་ནི་དཔལ་ཀུན་ཏུ་བཟང་པོའོ༔ ཆོས་སྐུའི་ལོངས་སྐུ་ནི་དཔལ་རྡོ་རྗེ་འཆང་༔ ཆོས་སྐུའི་སྤྲུལ་སྐུ་རྡོ་རྗེ་སེམས་དཔའོ༔ ལོངས་སྐུའི་ཆོས་སྐུ་ནིསྐུ་སྟོད་ལ་སངས་རྒྱས་ཀྱི་ཞིང་ཁམས་དུ་མ་གནས་རྣམ་པར་སྣང་མཛད་ཞབས་ཀྱི་སྐྱིལ་ཀྲུང་ལ་སངས་རྒྱས་ཀྱི་ཞིང་ཁམས་བཅུ་དྲུག་གནས་སོ། །དབུའི་ཐོར་ཚུགས་དང་མཉམ་པར་བཞག་པའི་སྟེང་ན་སངས་རྒྱས་ཀྱི་ཞིང་ཁམས་ཉི་ཤུ་རྩ་བརྒྱད་རྒྱ་ཐབས་བརྩེགས་པ་ལྟར་གནས་པ་ཕན་ཚུན་ཟ་འོག་གི་གུར་ཁྱིམ་ཕུབ་པ་ལྟ་བུ་རེ་རེ་ན་སྟོན་པ་ལྔ་ལྔ་ལ་སོགས་པ་ཁྱད་པར་དུ་གནས་སོ། །གང་ཆེན་མཚོའོ༔ ལོངས་སྐུའི་ལོངས་སྐུ་ནི༔ རིགས་ལྔའི་སངས་རྒྱས༔ ལོངས་སྐུའི་སྤྲུལ་སྐུ་ནི༔ ཕྱག་ན་རྡོ་རྗེ་ཡང་ན་འོད་དཔག་མེད་དོ། །སྤྲུལ་སྐུའི་ཆོས་སྐུ་ནི༔ རྡོ་རྗེ་སེམས་དཔའ༔ སྤྲུལ་སྐུའི་ལོངས་སྐུ་ནི༔ རིགས་གསུམ་མགོན་པོ༔ སྤྲུལ་སྐུའི་སྤྲུལ་སྐུ་ནི༔ ཐུབ་པ་དྲུག་གོ༔ སྐུ་གསུམ་གྱི་གསུང་ནི༔ ཆོས་སྐུའི་གསུང་གསུམ་ནི༔ ཨ་ཏི་ཡོ་ག་དང༔ ཨ་ནུ་དང༔ མ་ཧཱ་ཡོ་ག་དང་གསུམ་མོ༔ ལོངས་སྐུའི་གསུང་གསུམ་ནི༔ ཀྲི་ཡ་དང༔ ཨུ་པ་ཡ་དང༔ ཡོ་ག་དང་གསུམ་མོ༔ སྤྲུལ་སྐུའི་གསུང་གསུམ་ནི༔ འདུལ་བ་དང༔ མདོ་སྡེ་དང༔ མངོན་པ་དང་གསུམ་མོ༔ སྐུ་གསུམ་གྱི་ཐུགས་གསུམ་ནི༔ ཆོས་སྐུའི་ཐུགས་ནི༔ མ་སྤངས་ཡོངས་རྫོགས་སྐྱེ་མེད་སྤྲོས་བྲལ་ལོ༔ ལོངས་སྐུའི་ཐུགས་ནི༔ རང་བཞིན་མི་འཛིན་སྣ་ཚོགས་སུ་སྣང་བ་་གསལ་ལ་རྟོག་པ་མེད༔ མི་གཉིས་པ་གསལ་ལ་རྟོག་མེད་གསལ་ལ་འཛིན་པ་མེད་པའོ༔ སྤྲུལ་སྐུའི་ཐུགས་ནི༔ ཐུགས་རྗེས་ཀུན་ལ་ཕྱོགས་མེད་དུ་ཁྱབ་པའོ༔ ཡང་ན་ཆོས་སྐུའི་ཐུགས་ནི༔ ཕྱིའི་གཞི་ལ་དྲི་མ་མེད་པའི་ཏིང་ངེ་འཛིན་དང་༔ སེང་གེ་རྣམ་པར་བསྒྱིངས་པའི་ཏིང་ངེ་འཛིན་དང་༔ དཔའ་བར་འགྲོ་

བ་དང་༔ ཡིད་བཞིན་ནོར་བུ་གློག་གི་དང་༔ རྒྱལ་མཚན་ནང་གི་བཞི་རྩེ་མོ་རྣམ་པར་རོལ་བ་དང་༔ གློག་གི་ཕྲེང་བ་དང་༔ འཁོར་ལོ་ཆེན་པོ་དང་༔ འོད་འབར་པའི་ཏིང་ངེ་འཛིན་ནོ༔ ལོངསས་སྐུའི་ཐུགས་ནི༔ ཕྱག་རྒྱ་གསང་བའི་བཞི་ཟིལ་གྱི་གནོན་པའི་དང་༔ འབར་ཆེན་མཉམ་པའི་དང་༔ ཆོས་ཉིད་སྣ་ཚོགས་པའི་དང་༔ རྣམ་པར་བཀོད་པ་དང༔ མཁྱེན་པ་ལོངས་ཡེ་ཤེས་རྣམ་དག་ས་མ་ཏི་སྐུ་རྫོགས་པའི་དང་༔ ཆོས་ཉིད་མངོན་སྣང་དང༔ ཟག་པ་ཟད་པའི་དང་༔ ཡེ་ཤེས་ལྔ་དང་གསལ་སྟོང་། སྣང་སྟོང་། རིག་སྟོང་ཡུལ་སེམས་དབྱེར་མེད་དོ། །དབྱེར་མེད་པའི་རྣམ་པ་བཞིར་བཞུགས་སོ༔ སྤྲུལ་སྐུའི་ཐུགས་ནི༔ ཏིང་ངེ་འཛིན་དང་༔ སྒོམ་པ་དང་༔ བསམ་གཏན་གསུམ་གང་མོས་སུ་འབྱུང་བའོ༔ སྐུ་གསུམ་གྱི་འཁོར་ལ༔ རྣམ་རོལ་རྫོགས་པར་མཛད། ཆོས་སྐུའི་འཁོར་ནི༔ ཆོས་སྐུའི་རིགས་ལྔའི་སངས་རྒྱས་ལ་སོགས་པ༔ རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་དང་༔ དཔག་ཏུ་རྣམ་སྣང་གང་ཆེན་མཚོ་ལ་རིགས་ལྔའི་སངས་རྒྱས་དཔག་ཏུ་མེད་པས་བསྐོར་བའི་འཁོར་དེ་རྣམས་སོ། །མེད་པ་རྣམས་སོ༔ ལོངས་སྐུའི་འཁོར་ནི་རིགས་ལྔ་དང་ས་བཅུའི་བྱང་ཆུབ་སེམས་དཔའ་གྲངས་མེད་པའོ༔ སྤྲུལ་སྐུའི་འཁོར་ནི༔ བྱང་ཆུབ་སེམས་དཔའ་དང་༔ འཁོར་སྡེ་བཞི་དང་༔ ལྷ་མ་སྲིན་སྡེ་བརྒྱད་དོ༔ སྐུ་གསུམ་གྱི་སྣང་བ་བསྟན་པ་ནི༔ ཆོས་སྐུ་དུས་གསུམ་གྱི་དེ་བཞིན་གཤེགས་པ་དང་༔ གང་ཟག་ཡང་རབ་ལ་སོགས་པ་རྟོགས་ལྡན་ལ་སྣང༔ ལོངས་སྐུ་ས་བཅུའི་བྱང་ཆུབ་བློ་ཆེ་བ་ཤེས་རབ་ཆེ་བ་བྱང་ཆུབ་ཆེ་བའོ། །སེམས་དཔའ་ལ་སོགས་ལ་སྣང་༔ སྤྲུལ་སྐུ་ནི༔ སེམས་ཅན་ལས་དག་པ་ལ་སྣང་ངོ་༔ ཆོས་སྐུའི་ཞིང་ཁམས་འདུལ་བྱ་ནི༔ ཞིང་ཁམས་འཇིག་རྟེན་གྱི་ཁམས་རྒྱ་ཡོངས་སུ་མ་ཆད་པ༔ རྒྱུ་བཀོད་པ་ནམ་མཁས་གར་ཁྱབ་པའི་ཆོས་སྐུའི་གདུལ་བྱའི་ཞིང་ཁམས་ཀྱིས་ཁྱབ་བོ༔ ལོངས་

སྐུའི་ཞིང་ཁམས་གདུལ་བྱ་ནི༔ འོག་མིན་སྟུག་པོ་བཀོད་པའི་ཞིང་ཁམས་གཞི་མེ་ཏོག་གི་སྙིང་པོས་བརྒྱན་པའི་ཞིང་ཁམས་རྣམས་སོ༔ སྤྲུལ་སྐུའི་གདུལ་བྱའི་ཞིང་ཁམས་ནི༔ སྟོང་གསུམ་གྱི་མི་མཇེད་ཀྱི་འཇིག་རྟེན་གྱི་ཁམས་གླིང་བཞི་རི་རབ་དང་བཅས་པ་བྱེ་བ་ཕྲག་བརྒྱ་ན་སྤྲུལ་པ་བྱེ་བ་ཕྲག་བརྒྱ་འགྱེད་ཅིང་འགྲོ་བ་གང་ལ་གང་འདུལ་དུ་སྤྲུལ་ནས་དོན་བྱེད་པའོ༔ དེས་སྐུ་གསུམ་གྱི་དབྱེ་བ་ལ་བདུན་དུ་བསྟན་ནས༔ སྐུ་གསུམ་རང་གི་མཚན་ཉིད་དང་༔ གང་ཟག་ལམ་པ་དང་སྦྱར་བའི་མཚན་ཉིད་དོ༔ སྐུ་གསུམ་རང་གི་མཚན་ཉིད་ནི༔ ཆོས་སྐུའི་མཚན་ཉིད་ནི༔ སྤྲོས་པའི་མཐའ་དང་བྲལ་ཞིང་སྐྱེ་བ་མེད་དོ༔ ལོངས་སྐུའི་མཚན་ཉིད་ནི༔ སྣང་ལ་རང་བཞིན་མེད་པ་དང་༔ འགག་པ་མེད་པའོ༔ སྤྲུལ་སྐུའི་མཚན་ཉིད་ནི༔ སྣ་ཚོགས་མ་ངེས་ཤེས་རབ་ཕྱིན་ཅི་མ་ལོག་ཅིང་ཅིར་ཡང་སྟོན་ལ་གནས་པ་མེད་པའོ༔ ཡང་ན་ཆོས་སྐུའི་མཚན་ཉིད་ནི༔ འཁྲུལ་རྟོག་མི་མངའ་བ་ཡིན༔ ལོངས་སྐུའི་མཚན་ཉིད་ནི༔ གསལ་སྟོང་དབྱེར་མེད་པ་ཡིན༔ སྤྲུལ་སྐུའི་མཚན་ཉིད་ནི༔ མཁྱེན་པ་མ་འགགས་པར་སྤྲུལ་པའོ༔ གང་ཟག་ལམ་པ་དང་སྦྱར་བའི་མཚན་ཉིད་ནི༔ ཆོས་སྐུའི་མཚན་ཉིད་རང་གིས་རྒྱུད་ལ་སྐྱེ་བ་ཡིན་གྲུབ་པའི་མཐའ་ཞིག་པ་ཡིན༔ ལོངས་སྐུའི་མཚན་ཉིད་ནི༔ ཆོས་ཐམས་ཅད་ལ་བཟོད་པ་ཐོབ་པ་ཡིན༔ སྤྲུལ་སྐུའི་དགེ་བའི་ཆོས་ལ་མཚན་ཉིད་ནི༔ རྒྱུད་ལ་མ་སྐྱེས་པའི་ཚིག་ཐམས་ཅད་ལ་སྒྲོ་འདོགས་དང་སྤྲོས་པའི་མཐའ་ཆོད་པ་ཡིན་ནོ༔ སྐུ་གསུམ་དུ་འཇོག་པའི་འཐད་པ་ནི༔ ཆོས་སྐུ་མེད་ན་ཆོས་དང་ཆོས་མ་ཡིན་པའི་མཐའ་མི་ཕྱེད༔ ལོངས་སྐུ་མེད་ན་ཡེ་ཤེས་ལྔ་རང་གི་མཚན་ཉིད་མི་ཤེས༔ སྤྲུལ་སྐུ་མེད་ན་གཞན་དོན་མཐར་མི་ཕྱིན་ནོ༔ དེས་ན་ཆོས་ཉིད་ལས་གྲུབ་པས་ཆོས་གསེར་ལས་གྲུབ་པས་གསེར་སྐུ་ཟེར་བའི་དོན་

སྐུར་འཐད་དེ༔ དཔེར་ན་རྒྱལ་རིགས་ལ་སོགས་པ་མིའམ་སོ་སོའི་རིགས་མ་འཚོལ་ན་ལས་གྲུབ་པ་དང་འདྲའོ༔ ཡེ་ཤེས་ལྔ་ལ་ལོངས་སྤྱོད་རྫོགས་པའི་སྐུར་འཐད་དེ༔ དཔེར་ན་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་ཞིང་ལོངས་སྤྱོད་པ་དང་འདྲའོ༔ འགྲོ་བ་གང་ལ་གང་འདུལ་དུ་སྤྲུལ་ནས་སེམས་ཅན་གྱི་དོན་བྱེད་པས་སྤྲུལ་པའི་སྐུར་འཐད་དེ༔ དཔེར་ན་སྒྱུ་མ་མཁན་གྱི་སྐྱེ་བོ་རྣམས་ལ་རྟ་དང་གླང་པོ་ལ་སོགས་པ་ཡིད་ལ་གང་འདོད་པ་སྤྲུལ་ནས་སྟོན་པ་ལྟ་བུའོ༔ དེ་ལྟར་ན་ཆོས་ཉིད་ལས་ཡེ་ཤེས་རྒྱུན་མ་ཆད་པ་ལས་མ་གྲུབ་པས་ན་ཆོས་སྐུའོ༔ དེ་ཐུགས་རྗེའི་འཆར་གཞིའོ་མཁྱེན་པའི་ཡེ་ཤེས་ཀྱི་ཆ་མ་འགགས་པས་ན་ལོངས་སྤྱོད་རྫོགས༔ སྤྲུལ་སྐུ་དེའི་མཛད་པའི་འཕྲིན་ལས་ཀྱི་ཆ་མ་འགགས་པར་སྤྱོད་པས་ན༔ སྤྲུལ་པའི་སྐུར་སྤྲུལ་ནས་དོན་བྱེད་ཅིང་གཞན་དོན་རྫོགས་པར་བྱེད་པས་ན༔ སྐུ་གསུམ་གྱི་ཐ་མ་སྤྲུལ་པའི་སྐུར་སྤྲུལ་ནས་སེམས་ཅན་གྱི་དོན་བྱེད་པའོ༔ ༔སྐུ་གསུམ་དང་ངོ་ཇི་ལྟར་སྤྲད་པའི་ཐབས་ནི༔ སེམས་དང་ཆོས་སྐུ་ངོ་སྤྲོད་ཀྱི་གདམས་ངག་གིས་གཞི་གནས་ཆེན་པོར་གཏན་ལ་ཕབ་སྟེ་འཁོར་འདས་གཉིས་གཅིག་ཏུ་བསྲེས་ཏེ༔ ཐིག་ལེ་ཉག་ཅིག་ཏུ་མྱ་ངན་ལས་འདའ་བར་བྱེད་པའོ༔ ༔ལོངས་སྐུའི་ངོ་སྤྲོད་ཀྱི་གདམས་ངག་གིས༔ ཆོས་ཐམས་ཅད་འོད་གསལ་ཆེན་པོར་གཏན་ལ་ཕབ་སྟེ༔ སྐྱེ་བ་གཉིས་སྣང་སྟོང་གཉིས་གཅིག་ཏུ་འདྲེས་ཀྱི་བར་དུ་སངས་རྒྱས་པར་བསྟན་པའོ༔ སྤྲུལ་སྐུའི་ངོ་སྤྲོད་ཀྱི་གདམས་ངག་གིས༔ སྣང་བ་ཡེ་ཤེས་ལྔ་སྐྱེ་འགྲོའི་རྣམ་རྟོག་དང་འདི་གཏན་ལ་ཕབ་སྟེ༔ རང་སྣང་འཛིན་མེད་དུ་ཤེས་པས་འབྱུང་གཟུང་འཛིན་གཉིས་གཅིག་ཏུ་འདྲེས་པས་མི་གནོད་པར་བསྟན་པའོ༔ གཞི་གནས་ལུགས་གཞི་ལ་བཞག་པས༔ ཆོས་སྐུར་ངོ་ཤེས༔ ཐབས་ཐུན་མོང་མ་ཡིན་པ་ལ་འདྲིས་པར་བྱས་པས་

ལོངས་སྐུར་ངོ་ཤེས༔ ཤེས་པ་གཏད་མེད་དུ་ཉམས་སུ་བླངས་པས་སྤྲུལ་སྐུར་ངོ་སྤྲོད་པ་དང་ངོ་ཤེས་སོ༔ སྐུ་གསུམ་གང་ཟག་གང་གིས་ཇི་ལྟར་ལམ་དུ་འཁྱེར་བ་ལ་བཞི་སྟེ༔ ཐོས་བསམ་སྒོམ་གསུམ་གྱི་དུས་སུ་སྐུ་གསུམ་ལམ་དུ་འཁྱེར་བ་དང་༔ མི་རྟོག་པ་ཉམས་སུ་ལེན་པའི་དུས་སུ་སྐུ་གསུམ་ལམ་དུ་འཁྱེར་བ་དང་༔ ལྟ་སྒོམ་སྤྱོད་པའི་དུས་སུ་སྐུ་གསུམ་ལམ་དུ་འཁྱེར་བ་དང་༔ ལྷ་བསྐྱེད་རྫོགས་སྒོམ་པའི་དུས་སུ་ལམ་དུ་འཁྱེར་ལུགས་བསྟན་པ་དང་བཞིའོ༔ ༔དེ་ལ་རྣལ་འབྱོར་པས་ཐོག་མར་ཆོས་ལ་སྤྱོད་པའི་ཚེ་ཐོས་བསམ་སྒོམ་གསུམ་གྱི་ཤེས་རབ་ཀྱིས་ཕྱི་ནང་གསང་བ་གསུམ་གྱི་སྒྲོ་འདོགས་བཅད་ནས༔ སྤྲོས་པ་ཆོད་པའི་ཚེ་སྤྲུལ་པའི་སྐུའོ༔ དེ་ནས་གང་ཟག་ཆོས་ལ་གནས་པའི་ཚེ༔ ཚིག་དང་དོན་གཉིས་ཀ་ལ་ལོངས་སྤྱོད་པས་ན་ལོངས་སྤྱོད་རྫོགས་པའི་སྐུའོ༔ ༔དེ་ནས་ཆོས་བོར་བའི་ཚེ༔ རང་སྣང་ཆོས་ཉིད་ལས་མ་འདས་པར་རང་རིག་པའི་ཡེ་ཤེས་དང་འདུ་འབྲལ་མེད་པས་ན་ཆོས་ཀྱི་སྐུའོ༔ མི་རྟོག་ཉམས་སུ་ལེན་པའི་ཚེ༔ རྣལ་འབྱོར་པས་མཉམ་པར་བཞག་པའི་དུས་སུ་དྲན་བསམ་གྱི་རྣམ་པར་རྟོག་པ་རྒྱུན་འགགས་ནས་གནས་པ་དེ་ཆོས་སྐུའོ༔ ༔དེ་ལ་འཛིན་པའི་རྣམ་པར་རྟོག་པ་མ་ཞུགས་པར་གསལ་ལ་འཛིན་མེད་དུ་གནས་པ་དེ་ལོངས་སྐུའོ༔ དེ་ནས་མཉམ་བཞག་ལས་ལངས་ནས་རྗེས་ཐོབ་ལ་རོལ་བ་སྣ་ཚོགས་པར་འཁྱེར་བས་ཏེ༔ དེའི་ངང་ལ་གནས་པ་ནི་སྤྲུལ་སྐུའོ༔ ལྟ་བ་གྲོང་ཁྱེར་རྒྱུན་གཅོད་ལྟ་སྒོམ་སྤྱོད་པའི་དུས་སུ་སྐུ་གསུམ་ལམ་དུ་འཁྱེར་བ་ནི༔ ལྟ་བ་ཆོས་ཐམས་ཅད་སྐྱེ་མེད་སྤྲོས་བྲལ་དུ་རྟོགས་པས་ཆོས་སྐུའོ༔ སྒོམ་པ་ཉིན་མཚན་ཁ་སྦྱར་བའོ་སྒོམ་པས་ཉོན་མོངས་དང་རྟོག་པ་ཐམས་ཅད་རང་སར་གྲོལ་ཏེ༔ ཉམས་དང་དྲོད་དང་རྟགས་ཤུགས་འབྱུང་འགག་མེད་དུ་ཤར་བ་ནི་ལོངས་སྐུའོ༔ སྤྱོད་པའི་དུས་སུ་

འཇིག་རྟེན་པ་དང་ཆ་མཐུན་ཞེན་མེད་རོ་སྙོམས་ཀྱི་སྤྱོད་སྣང་བ་ལ་དབང་བསྒྱུར་བའོ་པས་སེམས་ཅན་གྱི་དོན་བྱེད་པ་དང་༔ བརྟུལ་ཞུགས་རླུང་འཛིན་གྱི་སྤྱོད་པས་བརྟུལ་ཞུགས་ལམ་དུ་སློང་བས་ཉམས་ལ་བོགས་འདོན་པ་དང་༔ ཉམས་ལ་བོགས་འདོན་བྱིང་རྒོད་ཤན་འབྱེད་ཀྱི་སྤྱོད་པས་བར་ཆོད་ཀྱི་བགེགས་ལ་སོགས་པ་སེལ་བ་ནི༔ སྤྲུལ་སྐུའི་ལམ་དུ་འཁྱེར་བའོ༔ ལྷ་བསྐྱེད་རྫོགས་བསྒོམ་པའི་དུས་སུ་ལམ་དུ་འཁྱེར་བ་ནི༔ དང་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས་ཆོས་ཐམས་ཅད་སྟོང་པར་བསྒོམ་ལས་བྱུང་པའམ༔ ཐ་མ་ཡང་རྫོགས་པའི་རིམ་པས་ཆོས་ཐམས་ཅད་ལྷ་དང་གཞལ་ཡས་ཁང་སྟོང་པར་སྟོང་པ་ལ་ཐིམ་ནས་བསྒོམ་པ་ནི་ཆོས་ཀྱི་སྐུའོ༔ འབྱུང་བ་རིམ་བརྩེགས་བསྒོམ་པ་དང་གཞལ་ཡས་ཁང་བསྒོམ་པ་དང༔ གདན་ཁྲི་དང་ཆོ་ག་བསྒོམ་པ་གསུམ་གྱིས་ལྷར་བསྐྱེད་དེ༔ ཞི་བ་ཁྲོ་བོ་གང་མོས་སུ་བསྒོམ་ཞིང་སྐུ་མདོག་དང་ཕྱག་མཚན་རྒྱན་ཐམས་ཅད་རྫོགས་པར་བསྒོམས༔ སྐུ་གསུང་ཐུགས་བྱིན་གྱིས་བརླབ་པ་དང་༔ ཡེ་ཤེས་ལྔས་དབང་བསྐུར་བ་དང་༔ ཡེ་ཤེས་སེམས་དཔའ་སྤྱན་དྲངས་ཏེ༔ འོད་ཟེར་གྱི་སྤྲོ་བསྡུ་འགོད་པ་རྣམས་ནི་ལོངས་སྤྱོད་རྫོགས་པའི་སྐུའོ༔ དེ་ནས་སྙིང་པོའི་སྔགས་བསྙེན་པ་དང་ཉེ་པའི་བསྙེན་པ་དང་༔ སྒྲུབ་པ་དང་སྒྲུབ་པ་ཆེན་པོ་དང་༔ འཕྲིན་ལས་རྣམ་པ་བཞིས་གང་ལ་གང་འདུལ་བདག་གཞན་གྱི་དོན་ཡོངས་སུ་རྫོགས་པར་བྱེད་པ་ནི༔ སྤྲུལ་པའི་སྐུས་ལམ་དུ་འཁྱེར་བའོ༔ སྐུ་གསུམ་རྣལ་འབྱོར་ལམ་པ་རྣམས་ལ་ཇི་ལྟར་སྣང་བ་ནི༔ དེ་ལྟར་ལམ་དུ་འཁྱེར་བས་ཕྱིའི་ཡུལ་འཛིན་མེད་དུ་ཤེས་སོ༔ རྟོག་མེད་དུ་ཤར་བ་ནི་སྤྲུལ་སྐུའི་སྣང་བ་ཤར་བའོ༔ སྣངལུགས་གང་ལ་བདེ་བ་ཆེན་པོ་རང་ལུགས་སུ་ཤར་བ་ནི་ལོངས་སྐུའི་སྣང་བ་ཤར་བའོ༔ སྣང་བ་སེམས་དང་ཆོས་སྐུར་འདྲེས་ནས་

རྣམ་པར་རྟོག་པ་རྒྱུན་ཆད་ནས་ནི་ཆོས་སྐུའི་སྣང་བ་ཤར་བའོ༔ མཐར་ཐུག་འབྲས་བུའི་དུས་སུ་སྐུ་གསུམ་པོ་ཇི་ལྟར་འགྱུར་བ་བསྟན་པ་ནི༔ སྣང་བ་ཐམས་ཅད་རང་སར་དག་སྟེ༔ ཆོས་ཉིད་ཟད་པའི་སྣང་བ་འཆར་བའི་ཚེ༔ ཆོས་སྐུ་མཁྱེན་པའི་ཡེ་ཤེས་འཆར་ཙམ་ཡང་ཐ་སྙད་དུ་གྲུབ་པ་མེད་དེ༔ གནས་ལུགས་མ་བཅོས་པའི་ངང་ཆེན་པོ་ཞེས་བྱའོ༔ ཉམས་སུ་མྱོང་བའི་མཐར་ཐུག་རང་རིག་ཡེ་ཤེས་ཚད་ལ་ཕེབས་ནས༔ ཉམས་གོང་ནས་གོང་དུ་འཕེལ་བ་མེད་པས་ལོངས་སྐུ་ཞེས་བྱ་ཐ་སྙད་དུ་ཡོན་ཏན་གྱི་འབྱུང་ལུང་མ་འགགས་གྲུབ་པ་མེད་དེ༔ རང་སྣང་རང་གསལ་གཞི་མ་འགགས་འཛིན་མེད་ཅེས་བྱའོ༔ ལུས་ངག་གི་བྱས་ཆོས་བྱ་མི་དགོས་པར་དུས་རྒྱུན་དུ་རིག་པ་མངོན་སུམ་གྱི་དོན་ལ་གནས་པས༔ ད་མན་ངག་དང་ཆོས་ཉིད་ཀྱི་ཞེན་པ་ལས་འདས་པས་སྤྲུལ་སྐུ་ཞེས་ངོ་བོ་ལ་གྲུབ་པ་སྐུ་གསུམ་ལམ་དུ་མཛད་ཚུལ་དང་སྐུ་ཡིན་ཚུལ་དང་དོན་བྱེད་པའོ་ཞེས་སེམས་ཅན་གྱི་དོན་ལ་འགགས་པ་མེད་དེ༔ ཅི་ཡང་མི་མཛད་པའི་ཐུགས་རྗེ་ཆེན་པོ་ཞེས་བྱའོ༔ འབྲས་བུ་མཐར་ཕྱིན་པའི་དུས་སུ་འགྲོ་བའི་དོན་མཛད་པའི་ཚུལ་བསྟན་པ་ནི༔ དེ་ཡང་སྐུ་ཞེས་བྱ་བ་མཛད་ཚུལ་གསུམ་ལམ་དུ་འཁྱེར་ཚུལ་ནི༔ ལུས་ལ་ཞེས་བཅུགས་པས༔ སྐུ་གང་ན་ཡོད་པ་ཕན་ཆད་ལུས་ཡིན་ཏེ༔ ལམ་ནི་ལུས་ལ་བརྟེན་ནས་སྦྱོང་དགོས་ཏེ༔ འབྲས་བུ་ནི་ལུས་སུ་གྲུབ་པ་མེད་དོ༔ དེ་ལྟར་ཡིན་ཀྱང་གལ་ཏེ་ལམ་མི་འདོད་པར་འབྲས་བུ་ཅིག་ཆར་དུ་འདོད་པ་ཡང་འཁྲུལ་པའི་སེམས་ཅན་རྣམས་ལ་ཡོད་དེ༔ འདི་ནི་བསོད་ནམས་ཅི་ཡང་བྱ་མི་དགོས་པར་གྲོལ་ཟིན་ཟེར་བ་ཡོད་མ་བྱས་པར་འབྲས་བུ་འདོད་པའམ༔ རྣམ་པར་དག་པའི་ལམ་ཆེན་པོ་ལམ་ལ་མ་བརྟེན་པར་འདོད་པ་དང་འདྲ་སྟེ་མི་སྲིད་དོ༔ དེ་ལྟར་མ་ཡིན་པར་གསང་སྔགས་པ་ནི་རྟོགས་དགོས་སྒྱུ་འཕྲུལ་ལས་འདི་ནི་གསང་ཆེན་ལམ་དུ་འབྲས་བུ་ཡིན་ཅེས་སོ་འབྲས་བུ་ལམ་དུ་ངེས་པར་བྱེད་ཅེས་པ་ནི༔ སྐུ་གསུམ་ལམ་དུ་བྱེད་པ་ལ་དགོངས་པ་གོང་

དུ་བསྟན་པས་ཡིན་ནོ༔ གལ་ཏེ་སྐུ་གསུམ་མ་ཡིན་པའི་ལམ་དུ་བྱ་རྒྱུ་ཞིག་བྱུང་ན་འགལ་ཏེ༔ སྐུ་གསུམ་གྱི་ལམ་དངོས་བཞག་ནས་དངོས་མ་ཡིན་པ་འཚོལ་བའི་གོལ་སར་འགྱུར་རོ༔ དེའི་ཕྱིར་ན་གསང་སྔགས་ཀྱི་རྒྱུད་དང་མན་ངག་ཐམས་ཅད་ནས་སྐུ་གསུམ་དང་ཡེ་ཤེས་ལྔ་འབྲས་བུ་ཡིན་པར་གསུངས་ན༔ འདིར་རྫོགས་ཆེན་འདིའི་གཞུང་གི་ལམ་དུ་བྱེད་པ་སྟེ༔ ལམ་དུ་བྱེད་ལུགས་ནི་གོང་དུ་བསྟན་ནོ༔ དེ་སྐུའི་ཡིན་ཚུལ་ཡང་ལུས་ཡོད་ཀྱང་སྐུར་མི་འགྲོ་བ་ནི༔ རང་གི་མི་དང་ཤ་ཁྲག་བྱོལ་སོང་འབྱུང་བ་ལྔ་སྨིན་པ་སོ་སོའི་ལུས་དང་༔ སྤྲུལ་སྐུ་ནི་ལྷ་ངེས་པ་མེད་པའི་སྐུ་སྟེ་རིག་བྱེད་འོད་ཀྱི་ལུས་དང་༔ བར་དོ་དྲན་གཅོད་ཡིད་ཀྱི་ལུས་དང་༔ ཡི་དྭགས་འདུ་ཤེས་མཉམ་བྱེད་ཀྱི་ལུས་དང་༔ དམྱལ་བ་འཁྲུལ་འཁོར་བསགས་པའི་ལུས་ཞེས་བྱའོ༔ སྐུ་ནི་རིགས་དྲུག་ཐ་དད་ཀྱི་ལུས་ལ་སོགས་པས་སྐུ་ཞེས་བྱ་སྟེ༔ འགྲོ་བ་རིགས་དྲུག་དང་མཐུན་པའི་ཕྱིར་ན༔ རྣམ་རྟོག་བག་ཆགས་ཀྱི་ལུས་ཡོད༔ ལོངས་སྐུ་ལ་ཡེ་ཤེས་སྒྱུ་མའི་ལུས་སྣང་ངོ་ལ་གྲུབ་པར་ཡོད༔ སེམས་ཅན་གྱི་དོན་བྱེད་ཚུལ་ཆོས་སྐུ་ལས་གཟུགས་སྐུ་གཉིས་སྤྲུལ་ནས་དོན་བྱེད་པའི་ཕྱིར་རིན་པོ་ཆེ་གསང་བའི་ལུས་ཡོད༔ དེ་ལྟར་སྐུ་གསུམ་པོ་དེ་ལམ་གྱི་སྣང་བ་ཡིན་པས༔ ཡེ་ཤེས་མཐར་ཐུག་འབྲས་བུའི་དུས་ན་སྐུ་གསུམ་མི་སྲིད་དོ༔ འོ་ན་དེ་ལྟར་སྐུ་གསུམ་མེད་ན་ཡེ་ཤེས་རྒྱུན་ཆད་པ་ལྟ་བུ་ཞིག་ཡིན་ནམ་ཞེ་ན༔ ཡེ་ཤེས་རྒྱུན་ཆད་པ་ཡང་མ་ཡིན་ཏེ༔ མཛད་པ་ཡུལ་ཅན་དུ་གྲུབ་པ་མེད་ཀྱང༔ རང་ཤུགས་འགགས་མེད་ཀྱི་ཐུགས་རྗེ་ནི་ཉི་མའི་འོད་འབྱུང་བ་ལྟར་སེམས་ཅན་རྣམས་ལ་ཐུགས་རྗེས་རྣམ་པ་ཐམས་ཅད་མཁྱེན་པའི་སྤྱན་འགགས་མེད་དུ་ཤར་བས་གཟིགས་སེམས་ཅན་ཐམས་ཅད་ཀྱི་དོན་བྱེད་པས་མ་འགགས་པར་འབྱུང་པས་ཏེ༔ དཔེར་ན་ནམ་

ཟླ་དྲོས་པས་ཤུགས་འབྱུང་དྲོད་ཐམས་ཅད་ཕེབས་ཏེ༔ ཆབ་རོམ་ལ་སོགས་པ་རང་བཞིན་ལྟེམ་གྱིས་འཁྱགས་པ་ཐམས་ཅད་ཞུ་བ་རྩི་ཤིང་ལོ་འདབ་སྨིན་པ་ལྟར་སེམས་ཅན་རྣམས་བདེ་བར་གཤེགས་པའི་རང་བཞིན་གྱི་བྱིན་རླབས་ཆེན་པོ་མཁྱེན་པའི་ཡེ་ཤེས་ཀྱི་འཆར་གཞི་མ་འགགས་པས་རང་ཤར་ཏེ༔ དེས་ན་འགྲོ་བ་ཀུན་གྱི་བདེ་སྐྱིད་ཐམས་ཅད་ནི་དེ་བཞིན་གཤེགས་པའི་ཐུགས་རྗེ་ཡིན་པར་ཤེས་པར་བྱའོ༔ སྐུ་གསུམ་བསྡུས་པའི་སྒྲོན་མ་ཞེས་བྱ་བ༔ རྒྱ་གར་གྱི་སློབ་དཔོན་བི་མ་ལ་མི་ཏྲས་མཛད་པ་རྫོགས་སོ༔ སྐལ་ལྡན་སྙིང་གི་བུ་དང་ཕྲད་པར་ཤོག༔ བཀའ་འཆལ་གྱི་དོགས་པས་རྒྱ་རྒྱ་རྒྱ༔ གཏེར་ནས་གཏེར་དུ་དམ་པར་བཙས་སོ༔ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ སེམས་ཉིད་བསྡུས་པའི་སྒྲོན་མ་ཞེས་བྱ་བ་འདི་ལ་དོན་བཅུས་བསྟན་ཏེ༔ ཀུན་གཞི་བྱང་ཆུབ་སེམས་ཀྱི་རང་བཞིན་བསྟན་པ་དང་༔ འདུ་ཤེས་མི་འཇུག་པ་བྱང་ཆུབ་སེམས་ཀྱི་ཡུལ་བསྟན་པ་དང་༔ བྱང་ཆུབ་སེམས་ཀྱི་རྣམས་ཤེས་མ་བཅོས་པ་ཚོགས་བརྒྱད་བསྟན་པ་དང་༔ བྱང་ཆུབ་སེམས་ཀྱི་བཞག་ཐབས་བསྟན་པ་དང་༔ བྱང་ཆུབ་སེམས་ཀྱི་དེ་ཁོ་ན་ཉིད་བསྟན་པ་དང་༔ བྱང་ཆུབ་སེམས་ཀྱི་རྩལ་མངོན་ཤེས་ལྔ་བསྟན་པ་དང་༔ གཟུང་འཛིན་གཉིས་བྱང་ཆུབ་སེམས་ཀྱི་ཡོན་ཏན་བསྟན་པ་དང་༔ བྱང་ཆུབ་སེམས་ཀྱི་སྐྱོན་བསྟན་པ་དང་༔ བྱང་ཆུབ་སེམས་ཀྱི་གོལ་ས་རྟག་ཆད་གཉིས་བསྟན་པ་དང་༔ བྱང་ཆུབ་སེམས་ཀྱི་འབྲས་བུ་སྐུ་ལྔ་བསྟན་པའོ༔ དེ་ལ་བྱང་ཆུབ་སེམས་ཀྱི་རང་བཞིན་བསྟན་པ་ནི༔ ཀུན་གཞིའི་རྣམ་པར་ཤེས་པ་དེ་ལ་ཀུན་གཞི་ཞེས་བྱའོ༔ ཆོས་ཀུན་གྱི་གཞིར་གྱུར་པས་ན་ཀུན་གཞི་ཞེས་བྱའོ༔ སེམས་ཅན་ཀུན་ལ་ཆོས་སྐུ་ཁྱབ་པར་གནས་པ་ལ་ཀུན་གཞིར་མིང་བཏགས༔ རྣམ་རྟོག་ཡེ་ཤེས་འདྲེས་པ་ལ་མཚན་མ་ཆོས་སྐུ་དང་མ་འདྲེས་པ་ལ་ཡང་ཀུན་གཞིར་མིང་བཏགས༔ ཆོས་སྐུ་དང་རྣམ་རྟོག་ལུང་དུ་མ་བསྟན་པ་

བག་ཆགས་འདྲེས་པ་ལ་ཀུན་གཞི་ཞེས་བྱའོ༔ དེ་ཡང་ཀུན་གཞི་ཀུན་གྱི་གཞི་ཡིན་ཏེ༔ རྣམ་པར་བྱང་བའི་གཞི་མ་ཡིན༔ ཅེས་གསུངས་སོ༔ ཀུན་གཞིའི་རྣམ་པར་ཤེས་པ་དང་ཐ་དད་པས་སོ་ཡོད་པའི་ས་ན་ཆོས་ཡོད་དེ༔ ཆོས་སྐུ་དྲི་མ་མེད་པའི་ས་ན་ཀུན་གཞིའི་རྣམ་པར་ཤེས་པ་སངས་རྒྱས་དང་སེམས་ཅན་གྱི་མིང་ཡང་མེད་དོ༔ རྣམ་དག་དེས་ནི་དེ་བཞིན་གཤེགས་པ་ལ་མ་རིག་པ་སངས་པས་ཀུན་གཞིའི་རྣམ་ཤེས་གཞི་ལ་སངས་ཏེ་མིང་ཡང་མི་སྲིད་ཀུན་གཞིའི་བྱ་བ་དོ༔ དེ་བས་ན་ཀུན་གཞིི་ནི་བག་ཆགས་དང་བཅས་པའོ༔ ཀུན་གཞིའི་ཆོས་སྐུ་ནི་བག་ཆགས་དང་བྲལ་བ་རྣམ་དག་དང་འོ༔ སེམས་ཀྱི་རང་བཞིན་ནི་བག་ཆགས་དང་མ་བྲལ་བ་ལ་སེམས་ཞེས་བྱའོ༔ དེ་ཉིད་ཆོས་སྐུ་སྟོང་པར་རིག་པ་ལ་རིག་པ་ཞེས་བྱའོ༔ དེ་ཡང་སྟོང་གསལ་ཆེན་པོར་ངེས་ཤེས་སྐྱེས་ཏེ༔ དེའི་ངང་ལ་གནས་པ་ནི་ཡེ་ཤེས་ཞེས་བྱའོ༔ བྱིང་རྒོད་ལ་སོགས་པའི་སྐྱོན་དང་བྲལ་ནས་རྟོག་མེད་ལ་གནས་པ་ནི་ཆོས་སྐུ་རིག་པ་རྗེན་པ་ཞེས་བྱའོ༔ བྱང་ཆུབ་ལམ་པ་སེམས་ཀྱི་ཡུལ་བསྟན་པ་ནི༔ ནམ་མཁའ་སྟོང་པ་འདི་ཉིད་ཡིན་ཏེ༔ ནམ་མཁའི་གཞི་བདག་མེད་པ་དང་༔ ནམ་མཁའ་ནི་མཐའ་དང་དབུས་མེད་པ་དང་༔ ནམ་མཁའ་ཡངས་པ་རྒྱ་ཆེ་བ་དང་༔ ནམ་མཁའ་ལ་ཕྱོགས་དང་ཁ་དོག་དང་དབྱིབས་སུ་མ་གྲུབ་པ་དང་༔ ནམ་མཁའ་ནི་སངས་རྒྱས་དང་སེམས་ཅན་འཁོར་འདས་སུ་མ་གྲུབ་པ་དང་༔ ནམ་མཁའི་ཆོ་འཕྲུལ་ཅིར་ཡང་སྣང་བ་བཞིན་ནོ༔ བྱང་ཆུབ་སེམས་ནམ་མཁའ་ལ་གཏད་ཅིང་བསྒོམས་པས་ནམ་མཁའ་དང་ཤེས་པ་འདྲེས་པ་ལ་བྱང་ཆུབ་སེམས་དཔའ་དེ་རྟོག་མེད་དུ་བདག་ཏུ་འཛིན་པ་མི་འཇུག༔ སེམས་ལ་སེམས་ཀྱིས་བལྟས་པའི་ཚེ༔ མཐའ་དབུས་སུ་མ་གྲུབ༔ རྒྱ་ཆེ་བར་འདུག༔ ཡངས་པར་འདུག༔ ཕྱོགས་རིས་དང་བྲལ་བར་འདུག༔ ཁ་དོག་དང་དབྱིབས་སུ་མ་གྲུབ་པར་འདུག༔ འཁོར་འདས་གཉིས་སུ་མ་གྲུབ་པའི་སེམས་དེ་རང་

གསལ་རྟོག་པ་མེད་པའོ༔ དེ་ལྟ་བུའི་སེམས་ཉིད་ལས་འཁོར་འདས་ཀྱི་ཆོ་འཕྲུལ་ཅིར་ཡང་འབྱུང་བས་ཡོན་ཏན་ནོ༔ བྱང་ཆུབ་སེམས་ཀྱི་རྣམ་གྲངས་ནི༔ དེ་ལྟ་བུའི་རང་བྱུང་གི་ཡེ་ཤེས་མ་རྟོགས་པས་རྣམ་པར་ཤེས་པའི་ཚོགས་མིག་གི་རྣམ་པར་ཤེས་པ་དང་། རྣ་བའི་དང་། སྣའི་དང་། ལྕེའི་དང་། ལུས་ཀྱི་དང་། ཡིད་ཀྱི་དང་། ཀུན་གཞི་དང་། ཉོན་མོངས་པའི་ཡིད་ཀྱི་རྣམ་ཤེས་རྣམས་སོ། །བརྒྱད་བྱུང་བའོ༔ བྱང་ཆུབ་སེམས་ཀྱི་བཞག་ཐབས་བསྟན་པ་ནི༔ དང་པོ་ལུས་ངག་དལ་བར་བརྟེན་ཏེ༔ སེམས་མ་བཅོས་པའི་ངང་དུ་ཅི་ལ་ཡང་འདུ་ཤེས་མ་ཞུགས་ཙམ་དུ་བསྒོམ་དུ་མེད་པར་བཞག་གོ༔ དེ་ཡང་ལུང་ལས༔ བརྗོད་པའི་ཐ་སྙད་ལས་འདས་བསྒོམ་དུ་མེད༔ བསྒོམས་པ་ཉིད་ནི་སྒོམ་པའི་རྟོག་པས་ཏེ༔ མ་བསམས་མི་སྒོམ་རང་རིག་ཉིད་ཀྱི་སྐུ༔ དེ་བཞིན་ཉིད་དུ་དེ་བཞིན་གྱིན་འདར་བཞག༔ བཞག་ཏུ་ུའང་བཞག་པ་མེད་པས་ན༔ བཞག་པ་མེད་པའི་བཞག་སར་བཞག་ལ་བཞག༔ བཞག་པའི་དངོས་པོ་རྡོ་རྗེ་སེམས་དཔའི་ཐུགས༔ འདི་ཞེས་བྱ་བ་སངས་རྒྱས་ཉིད་ཀྱིས་མེད༔ ཅེས་གསུངས་པས༔ ཅིར་ཡང་མི་དམིགས་ཅིར་ཡང་མི་རྟོག་པའི་ངང་ལ་ཁོང་སློད་ལ་གྱིན་འདའ་ཙམ་དུ་མ་ཡེངས་པར་བཞག་གོ༔ བྱང་ཆུབ་སེམས་ཀྱི་དེ་ཁོ་ན་ཉིད་ནི༔ དེ་བཞིན་ཉིད་རྣམས་ལ་མ་བཅོས་མ་བསླད་པ་མི་འགྱུར་བ་ཉིད་ཡིན་ནོ༔ དེ་ཡང་ལུང་ལས༔ མ་བཅོས་མ་བསླད་རྣམ་དག་ཆོས་ཀྱི་དབྱིངས༔ རྒྱལ་བ་རྒྱ་མཚོའི་ཐུགས་དང་ཡེ་ནས་མཉམ༔ རྒྱུ་ཉིད་འབྲས་བུ་ཡིན་ཕྱིར་བསྒྲུབ་ཏུ་མེད༔ འབྲས་བུ་གདོད་ནས་དག་པ་སངས་རྒྱས་ཡིན༔ ཞེས་དང་༔ སེམས་མ་བཅོས་པ་དེ་ཆོས་ཀྱི་སྐུ་ཡིན་ནོ༔ ཞེས་གསུངས་སོ༔ བྱང་ཆུབ་སེམས་ཀྱི་རྩལ་བསྟན་པ་ནི༔ མངོན་པར་ཤེས་པ་དྲུག་ཡིན་ཏེ༔ ལྷའི་མིག་གི་མངོན་པར་ཤེས་པ་དང་༔ ལྷའི་རྣ་བའི་མངོན་པར་ཤེས་པ་དང་། ཕ་རོལ་དུག་རྩིར་བསྒྱུར་བ་དང་སྐོམ་ལས་གཤེར་གསེར་ལས་བྱེ་མ་བྱེ་མ་ལས་གསེར་མེའི་ཕུང་པོ་ཞི་བ་ལ་

སོགས་པའོ་གྱི་སེམས་ཤེས་པའི་མངོན་པར་ཤེས་པ་དང་༔ འཆི་འཕོ་དང་སྐྱེ་བ་ཤེས་པའི་མངོན་པར་ཤེས་པ་དང་༔ ལྐོག་འབུག་ཤེས་པའི་མངོན་པར་ཤེས་པ་དང་༔ དབང་པོ་རྣམ་དག་གི་གནས་ཞིང་ཁམས་བརྒྱད་སྦྲུལ་ཞི་ཁྲོ་གང་ལ་གང་འདུལ་དུ་འཁོར་འདས་ཐམས་ཅད་སྔགས་ཀྱི་སྒྲ་ལྟ་བུར་ལྟ་བའི་ཆོས་སྟོན་པའི་ཡི་གེ། ཡི་གེ་སྣ་ཚོགས་སུ་མ་འདྲེས་པ་ལ་ཡོངས་སུ་རྫོགས་པ་གང་ལ་གང་འདུལ་དུ་ཆོས་བསྟན་ནོ་ཡིན་ནོ༔ ཡང་ན་རྫུ་འཕྲུལ་དང་རྗེས་སུ་སྟོན་པའི་ཆོ་འཕྲུལ་དང་༔ ཆོས་སྟོན་པའི་ཆོ་འཕྲུལ་དང་༔ ཡོངས་སུ་བསྟན་པའི་ཆོ་འཕྲུལ་འབྱུང་བ་ནི༔ སེམས་ཀྱི་རྩལ་ཡིན་ནོ༔ བྱང་ཆུབ་སེམས་ཀྱི་ཡོན་ཏན་ནི༔ ཡེ་ཤེས་ལྔ་དང་སྐུ་ལྔར་འབྱུང་སྟེ༔ དེ་ཡང་ཕུང་པོ་ལྔ་དང་༔ ཉོན་མོངས་པ་ལྔ་དང་༔ འབྱུང་བ་ལྔ་དང་༔ ཡུལ་ལྔ་དང་༔ ཁ་དོག་ལྔ་ལ་སོགས་པ་བྱང་ཆུབ་ཀྱི་སེམས་རྟོགས་པས༔ ཆོས་ཀྱི་དབྱིངས་ཐམས་ཅད་སྐྱེ་མེད་དུ་ཤེས་ཀྱི་ཡེ་ཤེས་དང་༔ ཐམས་ཅད་ཤེས་པ་ལས་མེ་ལོང་ལྟ་བུའི་ཡེ་ཤེས་དང་༔ མཉམ་པ་ཐམས་ཅད་གཉིས་མེད་དུ་ཤེས་པ་ཉིད་ཀྱི་ཡེ་ཤེས་དང་༔ སོ་སོའི་རྟོག་པའི་ཆོས་ཉིད་དུ་ཤེས་པ་ཡེ་ཤེས་དང་༔ བྱ་བ་གྲུབ་པའི་དེ་ཉིད་རྩོལ་སྒྲུབ་དང་བྲལ་བར་ཤེས་པ་ཡེ་ཤེས་དང་༔ རྒྱལ་བ་ཉོན་མོངས་པ་ལྔ་རིགས་ལྔ་དང་༔ ཡེ་ཤེས་ལྔ་སྐུ་ལྔར་འཆར་བ་ཆོས་སྐུ་ལོངས་སྐུ་སྤྲུལ་སྐུ་ཡེ་ཤེས་ལྔའི་ནི་སེམས་ཀྱི་ཡོན་ཏན་ནོ༔ བྱང་ཆུབ་སེམས་ཀྱིས་མ་རྟོགས་པའི་སྐྱོན་ནི༔ གཟུང་འཛིན་གཉིས་ཡིན་ཏེ༔ ནང་འཛིན་པ་དང་ངར་འཛིན་པའི་སེམས་ཀྱིས་གང་ཟག་ལ་བདག་ཏུ་བཟུང་བ་ནི༔ ཉོན་མོངས་པའི་སྒྲིབ་པ་འབྱུང་སྟེ་འཛིན་རྟོག་གོ༔ ཕྱི་བཟུང་བར་བྱ་བའི་ཡུལ་ལ་བདག་ཏུ་བཟུང་བ་ནི༔ ཤེས་བྱའི་སྒྲིབ་པ་འབྱུང་སྟེ་གཟུང་རྟོག་གོ༔ གཟུང་འཛིན་གཉིས་ཀྱིས་སྲིད་གསུམ་དུ་འཁྱམས་ཤིང་རིགས་དྲུག་ཏུ་འཁོར་རོ༔ བྱང་ཆུབ་སེམས་ཀྱི་གོལ་ས་ནི༔ རྟག་ཆད་གཉིས་ཡིན་ཏེ༔ དེ་ཡང་རྣམ་པར་

རྟོག་པ་རང་རྒྱུད་དུ་མཐོང་ཞིང་རྟོག་པ་རང་སར་འཇོག་ན་རྟག་པར་འཛིན་པས་སོ་སོའི་སྐྱེ་བོར་ལྟུང་༔ ཉན་ཐོས་ཉོན་མོངས་པ་སྤོང་བ་དང་༔ རང་རྒྱལ་འགོག་པ་དང་༔ བྱང་ཆུབ་སེམས་སྤྱོད་པ་དང་༔ བསྒྱུར་ན་གསང་སྔགས་པ་ཐེག་པ་དམན་པར་ལྟུང་༔ ཉོན་མོངས་པ་མཚན་མའི་དངོས་པོ་དང་༔ སེམས་ཉིད་སྒྱུ་མ་ཙམ་དུ་གསལ་བ་དང་༔ སྟོང་པ་དེ་ལ་ཞེན་པ་དང་བདེ་བ་ཙམ་དུ་ཡོད་པར་འདོད་ན་རྟག་པར་ལྟུང་༔ དེ་དག་ཐམས་ཅད་ཅི་ཡང་མེད་པར་འདོད་ན་ཆད་པར་ལྟུང་ངོ་༔ བྱང་ཆུབ་སེམས་ཀྱི་འབྲས་བུ་ནི༔ དེ་དག་ཐམས་ཅད་སྤང་བླང་ཡོད་མེད་རྟག་ཆད་ལས་འདས་པར་མེད་ཅིང་མཉམ་པ་ཉིད་དུ་ཤེས་པ་ལས་དུས་ཐམས་ཅད་དུ༔ བྱང་ཆུབ་ཀྱི་སེམས་དེ་ཁོ་ན་ཉིད་ཀྱི་དོན་ལ་མ་ཡེངས་པར་ཉམས་སུ་བླངས་པས་སྐུ་གསུམ་གྱི་འབྲས་བུ་ཐོབ་པའོ༔ སེམས་ཉིད་བསྡུས་པའི་སྒྲོན་མ་ཞེས་བྱ་བ༔ སློབ་དཔོན་བྱེ་མ་ལས་མཛད་པ་རྫོགས་སོ༔ ལས་ཅན་ཅིག་དང་ཕྲད་པར་ཤོག༔ རྒྱ་རྒྱ་རྒྱ༔ ༔༄༅༔ ༔དཔལ་རྡོ་རྗེ་འཆང་ལ་ཕྱག་འཚལ་ལོ༔ སྟོང་ཉིད་བསྡུས་པའི་སྒྲོན་མ་འདི་ལ་དོན་བརྒྱད་ཀྱིས་བསྟན་ཏེ༔ སྟོང་པ་ཉིད་ཀྱི་ངེས་ཚིག་དང༔ དབྱེ་བ་བསྟན་པ་དང་༔ སྟོང་ལུགས་བསྟན་པ་དང་༔ དགོས་པ་བསྟན་པ་དང་༔ ལྡོག་བྱ་བསྟན་པ་དང་༔ སྟོང་པ་ཉིད་ཀྱི་མཚམས་བསྟན་པ་དང་༔ ཐེ་ཚོམ་གྱི་སྐྱོན་སྤངས་པ་དང་བརྒྱད་ཀྱིས་བསྟན་ནོ༔ དེ་ལ་དང་པོ་སྟོང་པ་ཉིད་ཀྱི་ངོ་བོ་བསྟན་པ་ནི༔ སྟོང་པ་ཉིད་ཀྱི་ངོ་བོར་ཡོད་མེད་རྟག་ཆད་གཉིས་ལ་སོགས་པའི་མཐར་མ་ལྷུང་ཞིང་ཕྱོགས་རིས་དང་༔ སྔ་ཕྱི་དང་དུས་གསུམ་བར་མཚམས་དང་༔ སྐྱེ་འགག་དང་༔ འཁོར་འདས་དང་༔ འཕེལ་འགྲིབ་དང་གང་ཡང་མེད་པའོ༔ སྟོང་པ་ཉིད་ཀྱི་ངེས་ཚིག་ནི༔ སྟོང་ནི་ཕན་གནོད་གང་ཡང་མ་གྲུབ་ལ༔ སྟོང་པ་ཉིད་པ་ནི་མི་འགྱུར་བ་ཡིན་ལ༔ ཉིད་ནི་དེ་ལས་མ་བཅོས་པར་བཞག་ན་

ཆོས་ཉིད་དེ་ཉིད་ཡིན་པས་སོ༔ སྟོང་པ་ཉིད་ཀྱི་དབྱེ་བ་ནི༔ གོལ་སར་ལོག་པའི་སྟོང་པ་ཉིད་དང་༔ ཡང་དག་པའི་སྟོང་པ་ཉིད་དོ༔ ལོག་པའི་སྟོང་པ་ཉིད་ལ་བརྒྱད་ཡོད་དེ༔ ཀུན་བརྟགས་སྟོང་པ་དང་༔ ལམ་སྟོང་པ་དང་༔ ཉི་ཚེ་བའི་སྟོང་པ་དང་༔ བློས་བྱས་སྟོང་པ་དང་༔ རྒྱུན་ཆད་སྟོང་པ་དང་༔ རྒྱས་འདེབས་སྟོང་པ་དང་༔ གཉེན་པོ་སྟོང་པ་དང་༔ གཞི་ལ་ལས་པའི་སྟོང་པའོ༔ དེ་ལ་ཀུན་བརྟགས་སྟོང་པ་ནི༔ ཟད་ནས་སྟོང་པ་དང་༔ མེད་ནས་སྟོང་པ་དང་༔ བརྟགས་པའི་མིང་སྟོང་པ་རྣམས་ཡིན་ཏེ༔ འཇིག་རྟེན་པའི་རྣམ་གྲངས་སོ༔ ལམ་སྟོང་པ་ནི༔ ཡོད་པའི་དངོས་པོ་རྣམས་ལ་མི་གནས་པའི་སྟོང་པ་ལམ་དུ་བྱེད་དེ༔ མི་དམིགས་པར་བསྔོ་བ་རྣམས་སོ༔ ཉི་ཚེ་བའི་སྟོང་པ་ནི༔ ནམ་མཁའ་སྟོང་པ་རྒྱང་ཆད་པའོ༔ བློས་བྱས་སྟོང་པ་ནི༔ དངོས་པོར་སྣང་བ་ཐམས་ཅད་སེམས་ཀྱིས་མེད་པར་བསྒོམས་ནས་སྟོང་པ་ལ་ཞེན་པའོ༔ རྒྱུན་ཆད་སྟོང་པ་ནི༔ དང་པོ་ཡོད་ལ་ཐ་མ་མེད་པར་འགགས་པར་འདོད་པའོ༔ རྒྱས་འདེབས་སྟོང་པ་ནི༔ དགེ་བ་ཅི་བྱས་པ་ཐམས་ཅད་ལ་སྟོང་པས་རྒྱས་འདེབས་ཏེ༔ སྟོང་སྙམ་པའི་བློ་དང་མ་བྲལ་བའོ༔ གཉེན་པོ་རང་བཞིན་རྣམ་དག་ཏུ་མ་ཤེས་པས་སྟོང་པ་ནི༔ རྣམ་རྟོག་རེ་སྐྱེས་པ་དང་༔ སྟོང་པ་རེ་བསྟན་པའོ༔ གཞི་ཐོག་ཏུ་ལས་པའི་སྟོང་པ་ནི༔ སྟོང་པ་དང་རིག་པ་གཉིས་སུ་མ་འདྲེས་པར་སྟོང་པའི་ཁུངས་དང་ཡོན་ཏན་བརྗོད་ཅིང་དགེ་བ་མི་སྤྱོད་སྡིག་པ་མི་སྤོང་བ་རྣམས་ནི༔ ཆོས་ཉིད་སྟོང་པ་ལས་ལོག་ཅིང་གོལ་བའོ༔ ཡང་དག་པའི་སྟོང་པ་ལ་གཉིས་ཏེ༔ རིམ་གྱི་སྟོང་པ་ཉིད་དང་༔ ཐོད་རྒལ་གྱི་སྟོང་པ་ཉིད་དོ༔ རིམ་སྐྱེས་པའི་སྟོང་པ་ཉིད་ནི༔ དང་པོ་ཕྱིའི་ཡུལ་སྟོང་པར་རྟོགས་པས་ཕྱི་སྟོང་པ་ཉིད་དང་༔ དེ་ནས་ནང་གི་སེམས་སྟོང་པར་རྟོགས་པས་ནང་སྟོང་པ་ཉིད་དང་༔

དེ་ནས་ཕྱི་ནང་གཉིས་ཀ་སྟོང་པ་དང་༔ སྟོང་པ་ཉིད་ཀྱང་མ་གྲུབ་པར་སྟོང་པ་ཉིད་དང་༔ ཆེན་པོ་སྟོང་པ་ཉིད་དང་༔ དོན་དམ་པ་སྟོང་པ་ཉིད་དང་༔ འདུས་བྱས་སྟོང་པ་ཉིད་དང་༔ མཐའ་ལས་འདས་པ་སྟོང་པ་ཉིད་དང་༔ ཐོག་མ་དང་ཐ་མ་མེད་པ་སྟོང་པ་ཉིད་དང་༔ དོར་བ་མེད་པ་སྟོང་པ་ཉིད་དང་༔ རང་བཞིན་སྟོང་པ་ཉིད་དང་༔ ཆོས་ཐམས་ཅད་སྟོང་པ་ཉིད་དང་༔ རང་གི་མཚན་ཉིད་སྟོང་པ་ཉིད་དང་༔ མི་དམིགས་པ་སྟོང་པ་ཉིད་དང་༔ དངོས་པོ་མེད་པ་སྟོང་པ་ཉིད་པ་དང་༔ ངོ་བོ་ཉིད་སྟོང་པ་ཉིད་དང་༔ དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་༔ སྟོང་པ་ཉིད་བཅོ་བརྒྱད་པོ་རིམ་གྱིས་སྟོང་པར་རྟོགས་པས་ཆོས་ཉིད་ཀྱི་དོན་ཡང་དག་པ་སྐྱེ་བ་མེད་པའོ༔ ཐོད་རྒལ་གྱི་སྟོང་པ་ཉིད་ནི༔ གནས་ལུགས་སྟོང་པ་ཉིད་དོ༔ དེ་ལ་ཆོས་ཉིད་སྟོང་པ་ཉིད་ནི༔ རང་སོ་ཆོས་ཉིད་རང་བཞིན་མེད་པར་སྟོང་སྟེ༔ འདི་ལྟར་སྣང་བ་ཐམས་ཅད་སྒྱུ་མའི་དཔེ་བརྒྱད་བཞིན་ཡེ་ནས་མ་གྲུབ་པ་ཡིན༔ སྣང་བདོ་བའི་དུས་ན་ཆོས་ཉིད་སྟོང་པའི་གཞི་དེ་གང་ཡང་མ་གཡོས་ཏེ༔ ཆོས་ཉིད་སྟོང་པ་ལས་མ་འདས་པའོ༔ དེ་ཡང༔ སྐྱེ་བ་མེད་ལས་ཐམས་ཅད་སྐྱེས༔ སྐྱེས་ཙམ་ཉིད་ལས་སྐྱེ་བ་མེད༔ ཅེས་སོ༔ རང་ཐོག་གི་ཆོས་ཉིད་ལ་རྟེན་མེད་པར་སྟོང་སྟེ༔ གཞི་ལམ་འབྲས་བུ་ཐམས་ཅད་སྟོང་པ་ཆེན་པོ་གཅིག་གི་ངོ་བོར་དུས་ཐམས་ཅད་དུ་བཞུགས་ཏེ༔ དེ་ཡང་ཡེ་སྟོང་ཐོག་མ་མེད་པ་ནས་སྟོང་༔ དངོས་སྟོང་ངོ་བོ་ཉིད་ཀྱིས་སྟོང་༔ ཞེས་པས་ཆོས་ཉིད་སྟོང་པ་ཉིད་གཞི་ནས་མ་བཅོས་མ་བསླད་པར་གནས་པ་ལས༔ རྣལ་འབྱོར་པས་ཀྱང་མ་བཅོས་མ་བསླད་པར་རང་བཞིན་གྱིས་བཞག་པས་གྲོལ་ལོ༔ གནས་ལུགས་སྟོང་པ་ཉིད་ནི༔ ཡེ་གདོད་མ་ནས་འཁོར་འདས་གཉིས་སུ་གྲུབ་མ་མྱོང་བ་ཡིན་ཏེ༔ དེ་བཞིན་ཉིད་ཅེས་བྱ༔ རྣམ་དག་ཆེན་པོ་ཞེས་བྱ༔ སྲིད་

གསུམ་ཀ་དག་ཅེས་བྱ༔ ཁམས་གསུམ་ཡོངས་གྲོལ་ཞེས་བྱ༔ དེ་ཉིད་རྟོགས་པའི་དོན་ལས་མ་འགྱུར་བའོ༔ དེ་ཡང་སྟོང་ལུགས་ཇི་ལྟར་སྟོང་ན༔ ཟབ་པའི་སྟོང་པ་ཐོག་མ་ཡོད་ལ༔ ཐ་མ་མེད་པས་མུ་སྟེགས་ཆད་པར་ལྟ་བ་ལྟ་བུ་དེ་ཡང་མིན༔ རྒྱུན་ཆད་སྟོང་པ་སྔ་མ་ཡོད་ལ་ཕྱི་མ་མེད་པ་ཡང་མིན༔ ཉི་ཚེ་བའི་སྟོང་པ་སྔ་མ་ཡོད་ལ་ཕྱི་མ་མེད་པ་ཡང་མིན༔ བློ་སྟོང་པར་བཟུང་བ་དང་༔ གློ་བུར་དུ་སྟོང་པར་བཏང་བ་དང་༔ རིམ་གྱིས་སྟོང་པ་ལ་ལམ་བྱེད་པ་དང་དེ་རྣམས་མིན་ཏེ༔ འདི་ནི་རྒྱུ་སྟོང་པས་ལས་དང་རྣམ་སྨིན་རང་རང་གིས་སྟོང་༔ རྐྱེན་སྟོང་པས་རྣམ་ཤེས་བློའི་ཆོ་འཕྲུལ་ཐམས་ཅད་རང་སར་དག༔ གཞི་སྟོང་པས་ཆོས་ཉིད་ངོ་བོ་ངོས་བཟུང་ལས་འདས༔ ལམ་སྟོང་པས་ལྟ་བ་དང་སྒོམ་པ་དང་སྤྱོད་པ་ལ་འབད་རྩོལ་བྱ་མི་དགོས༔ འབྲས་བུ་སྟོང་པས་འཁོར་འདས་གཉིས་གང་དུ་ཡང་མ་གྲུབ་བོ༔ དེ་ཡང་ཐོག་མ་མེད་པ་ནས་སྟོང་པས་འཁོར་འདས་ཀྱི་ཆོས་སྟོང་པ་ལས་མ་འདས་སོ༔ སྟོང་པ་ཉིད་ཀྱི་དགོངས་པ་བསྟན་པ་ལ་བཞི་སྟེ༔ དུས་ཐམས་ཅད་སྟོང་པར་རྟོགས་པས་བྱ་བྱེད་སྤྱོད་ལམ་གྱིས་མི་སྒྲིབ་པའི་དགོས་པ་ཡོད༔ ཡོད་མེད་ཀྱི་མཐའ་གང་དུ་ཡང་མི་གནས་པས་འབྲས་བུ་རེ་དོགས་དང་བྲལ་བའི་དགོས་པ་ཡོད༔ ཆོས་ཉིད་སྟོང་པར་ཤེས་པས་དགེ་བའི་རྩ་བ་ཐམས་ཅད་གང་གིས་ཀྱང་ཕན་མ་བཏགས་ཤིང་ཡོངས་སུ་རྫོགས་པར་འགྱུར་བའི་དགོས་པ་ཡོད༔ མྱུར་དུ་མངོན་པར་རྫོགས་པར་སངས་རྒྱས་ནས་འབྲས་བུ་རྒྱུར་མི་ལྡོག་པའི་དགོས་པ་ཡོད་དོ༔ སྟོང་པ་ཉིད་ཀྱི་ལྡོག་བྱ་བསྟན་པ་ནི༔ ཡོད་པའི་དངོས་པོ་ལས་ལྡོག་པས་རྒྱུ་མཚན་གཏན་ལ་མི་ཕེབས༔ མེད་པའི་དངོས་པོ་ལས་ལྡོག་པས་ཀུན་དེ་ཉིད་ཀྱི་ངང་ལ་གནས༔ དངོས་པོ་མེད་པ་ལས་ལོགས་པས་ངོ་ཤེས་པའམ༔

ངོ་སྤྲོད་པ་རང་གིས་གྲོལ་ལོ༔ སྟོང་པ་ཉིད་ཀྱི་ས་མཚམས་ནི༔ མེད་པའི་མཐར་མ་ལྷུང་སྟེ༔ སེམས་ཉིད་སྟོང་པ་རང་ཐོག་ནས་གསལ༔ ཡོད་པ་མཐར་མ་ལྷུང་སྟེ༔ ཆོས་ཉིད་སྟོང་པ་ལ་རྒྱུ་མཚན་མེད༔ གོང་འོག་གི་འདེབས་དང་བྲལ་བའོ༔ ཡང་ན་ཡོད་པ་མ་ཡིན་ཏེ་དངོས་པོ་མེད༔ མེད་པ་མ་ཡིན་ཏེ་རིག་ཅིང་གསལ་བའི་ངོ་བོ་དེ་ཉིད་ལས་གཟུང་འཛིན་གྱི་རྟོག་པས་མ་བསླད་པ་དེ་ཉིད་ཅེས་བྱའོ༔ དེ་ཉིད་ལས་ཐེ་ཚོམ་གྱི་སྐྱོན་སྤངས་པ་ནི༔ སྟོང་པ་མ་ནོར་བ་ཡང་དག་པ་ཡིན་ཏེ་ལུང་གིས་ཤེས༔ རིག་པས་འཐད་གཏན་ཚིགས་ཀྱིས་གྲུབ་གོང་དུ་གཏན་ལ་ཕབ་པ་དང་༔ མན་ངག་གི་གནད་དུ་འགྲོ༔ ལུང་གི་རྒྱུད་རང་ཤར་ནས༔ རྒྱུ་རྐྱེན་བྲལ་བས་སྟོང་པར་གནས༔ ཞེས་བྱ༔ མུ་སྟེགས་ཕྲེང་བ་ལས༔ སྟོང་པ་བརྗོད་མེད་ཤེས་རབ་ཡིན༔ སྟོང་ཉིད་བློ་ཡི་སྤྱོད་ཡུལ་མིན༔ ཞེས་པ་དང་༔ སྒྱུ་མ་སྨིག་སྒྱུ་ཆུ་ཟླ་བཞིན༔ མེད་པ་ཡང་ནི་མ་ཡིན་ཏེ༔ ཡོད་པ་ཡང་ནི་མ་ཡིན་ནོ༔ ཡོད་མེད་གཉིས་ལས་འདས་པའི་ཕྱིར༔ སྟོང་པ་ཉིད་ལ་ངོས་བཟུང་བྲལ༔ ཞེས་པ་ལ་སོགས་པས་གསལ་ལོ༔ རིག་པ་ནི་རྒྱུ་འབྲས་རྗེས་མེད་ཀྱི་རིག་པས་འགྲུབ་སྟེ༔ སྔ་མ་སྟོང་པ་ལ་རྒྱུ་མེད་ལ༔ ཕྱི་མ་སྟོང་པ་ལ་འབྲས་བུ་མེད༔ དེ་ལྟར་རྒྱུ་འབྲས་གཉིས་སྟོང་པ་རྗེས་མེད་དེ༔ ལས་དང་རྣམ་སྨིན་ཐོན་མི་སྲིད་དོ༔ དེ་ལ་རྒྱུ་མཚན་གང་དུ་ཡང་མ་གྲུབ་པར་གཏན་ཚིགས་ཀྱིས་ཀྱང་གྲུབ་སྟེ༔ འདི་ལྟར་སྣང་བའི་ཆོས་ཉིད་སྟོང་པ་ཡིན་ཏེ༔ ཅིའི་ཕྱིར་ན་རང་བཞིན་གང་དུ་ཡང་མ་གྲུབ་པར་རྒྱུ་དང་མཚན་ཉིད་གོ་ལོག་པའི་ཕྱིར་རོ༔ མིང་གང་དུ་ཡང་གདགས་སུ་བཏུབ་པ་དཔེར་ན་མེའི་མཚན་ཉིད་ཚ་བ་དང་ཆུའི་མཚན་ཉིད་ནི་རླན་ཞིང་སྡུད་པར་བྱེད་པ་བཞིན༔ ཀུན་རྫོབ་ཙམ་དུ་མིང་ཅིར་ཡང་གདགས་སུ་བཏུབ་པས༔ ཡང་དག་པར་གྲུབ་པ་གང་ཡང་མེད་དོ༔ དེ་ལ་ཡང་འདི་ལྟར་སྣང་བ་འདི་

སོ་སོའི་རྒྱུ་མཚན་བཙལ་བས་མི་རྙེད་དོ༔ མིང་གི་རྣམ་གྲངས་མ་ཡིན་པ་གཞན་མེད་དོ༔ མིང་ལ་ཡང་རྒྱུ་མཚན་དང་རང་བཞིན་གང་ཡང་མ་གྲུབ་པས༔ རྒྱུ་མཚན་གོ་ལོག་གི་གཏན་ཚིགས་ཀྱིས་ཀྱང་མ་གྲུབ་བོ༔ མན་ངག་གི་གནད་དུ་འགྲོ་སྟེ༔ འདི་ལྟར་སྣང་བ་དང་ཤེས་པས་བསྡུས་པ་ཐམས་ཅད་ཆོས་ཉིད་ལས་མ་གཏོགས་པ་གཞན་ཅི་ཡང་མེད་པས༔ ཅིར་སྣང་ཐམས་ཅད་ཆོས་ཉིད་ཀྱི་གནད་མན་ངག་ཡང་དག་པའོ༔ ཆོས་ཉིད་སྟོང་པ་དེ་རྫོང་ལ་གནས་ཤིང་རྫོང་ལ་སྐྱོལ་བ་ནི༔ ནམ་མཁའ་ལ་མདུང་བསྐོར་བ་ལྟ་བུའི་རྫོང་གིས་ཆོས་ཉིད་ལ་ཐོག་མཐའ་མེད་པར་བསྐོར་ཏེ༔ ཡོད་པ་ཆོས་ཉིད༔ མེད་པ་ཆོས་ཉིད༔ གཉིས་ཀ་ཆོས་ཉིད༔ གཉིས་ཀ་མ་ཡིན་པ་ཡང་ཆོས་ཉིད་དོ༔ དེ་ལྟར་གསལ་བ་དང་མི་གསལ་བ་དང་༔ སྟོང་པ་དང་མི་སྟོང་པ་དང་༔ ཡོད་མེད་དང་རྟག་ཆད་ལ་སོགས་པའི་མིང་ཐམས་ཅད་ལ་བསྐོར་བས༔ རྒྱུ་མཚན་མ་རྙེད་པ་དེ་ཉིད་ཆོས་ཉིད་དང་༔ དོན་ལ་ཡང་དེ་ལྟར་ཐམས་ཅད་ཆོས་ཉིད་མ་གཏོགས་པ་གང་ཡང་མེད་དོ༔ དེ་ལྟར་ན་སྟོང་པ་ཉིད་དེ་འོས་སོ་ཙམ་མམ༔ གཡུ་མེད་དམ༔ གཏད་མེད་དམ༔ སྤོམ་ཡོར་ལྟ་བུ་མིན་པར་ལུང་གིས་ཤེས༔ རེག་པས་འཐད༔ གཏན་ཚིགས་ཀྱིས་གྲུབ༔ མན་ངག་གི་གནད་དུ་འགྲོ༔ རྫོང་ལ་སྐྱོལ་བའོ༔ ཆོས་ཉིད་སྟོང་པ་ཡང་དག་པ་མ་ནོར་བ་ཡིན་པར་ཡིད་ཆེས་སོ༔ སྟོང་པ་བསྡུས་པའི་སྒྲོན་མ༔ སློབ་དཔོན་ཆེན་པོ་བྱེ་མ་ལ་མུ་ཏྲས་མཛད་པ་རྫོགས་སོ༔ སྐལ་ལྡན་ལས་ཅན་སྙིང་གི་བུ་དང་ཕྲད་པར་ཤོག༔ རྒྱ་རྒྱ་རྒྱ༔ ༈བཅོམ་ལྡན་འདས་རིག་པ་འཕོ་འགྱུར་མེད་པ་ལ་ཕྱག་འཚལ་ལོ༔ ལྟ་སྒོམ་སྤྱོད་པ་འབྲས་བུ་བསྡུས་པའི་སྒྲོན་མ༔ ཡི་གེ་མང་པོ་རྣམས་ཀྱི་དོན༔ འདི་རུ་རྣམ་པར་བསྡུས་ནས་ནི༔ གསལ་བར་བསྟན་པ་འདི་ཡིན་ནོ༔ དེ་ལ་གསུམ་སྟེ༔

མདོར་བསྡུས་ཏེ་ལྟ་སྒོམ་སྤྱོད་འབྲས་བསྟན་པ་དང་༔ གསལ་བར་ཕྱེ་སྟེ་བསྟན་པ་དང་༔ རབ་ཏུ་གསལ་བར་བསྟན་པའོ༔ དང་པོ་ལ་བཞི་སྟེ༔ གཟའ་གཏད་ཕྱོགས་རིས་མེད་པ་ལྟ་བའི་མན་ངག་གིས་ཞེན་པའི་གཞི་ཉོན་མོངས་པ་ཟིལ་གྱིས་མནན་པ་དང་༔ དམིགས་གཏད་མེད་པ་བསྒོམ་པའི་གསལ་བ་དངོས་མེད་མན་ངག་གིས་དྲན་བྱེད་ཀྱི་ཡིད་ཟིལ་གྱིས་མནན་པ་དང་༔ འཛིན་ཆགས་མེད་པ་རྟེན་མེད་ལྷུག་པ་སྤྱོད་པའི་མན་ངག་གིས་འཁྲུལ་སྣང་ཟིལ་གྱིས་མནན་པ་དང་༔ མ་བྱས་ལྷུན་གྲུབ་སྤང་ཐོབ་མེད་པ་འབྲས་བུའི་མན་ངག་གིས་རིག་པ་ཕྱིར་མི་ལྡོག་པར་བསྟན་པའོ༔ གཉིས་པ་གསལ་བར་ཕྱེ་སྟེ་བསྟན་པ་ལ་བཞི་སྟེ༔ ལྟ་བ་དང་༔ སྒོམ་པ་དང་༔ སྤྱོད་པ་དང་༔ འབྲས་བུའོ༔ དང་པོ་ལྟ་བ་ལ་གཉིས་ཏེ༔ ཕྱི་ཐེག་པ་སྤྱིའི་ལྟ་བ་དང་༔ ནང་ཆོས་ཉིད་རང་གི་ལྟ་བའོ༔ སྤྱིའི་ལྟ་བ་ལ་བཞི་སྟེ༔ གང་ལ་བལྟ༔ གང་གིས་ཕྱོགས་རིས་མེད་བལྟ༔ གང་ལྟར་ལྟ༔ གང་ཐོབ་པའོ༔ ཆོས་ཉིད་རྫོགས་པ་ཆེན་པོ་འདི་ཉིད་ཀྱི་ལྟ་སྟངས་རིག་པའི་ཡེ་ཤེས་ཀྱི་དབྱིངས་སྐུ་གསུམ་ཕྱིར་མི་ལྡོག་པ་ཆོས་ཉིད་རང་གི་ལྟ་བ་ལ་བཞི་སྟེ༔ གང་ལྟར་ལྟ༔ གང་གིས་ལྟ། གང་ལ་ལྟ༔ གང་ཐོབ་པར་ལྟ༔ རྟོགས་པ་ཅན་གྱི་མེད་པར་ཕྱོགས་རིས་མེད་པར་སྐྱེ་མེད་རྣམ་དག་ཐོབ་པར་ལྟ༔ རང་གི་ལྟ་བ་ལ་ཡང་བཞི་སྟེ༔ གང་ལ་བལྟ་དངོས་པོ་གཤིས་ལ༔ གང་གིས་ལྟ་རྟོགས་པ་ཅན་གྱིས༔ གང་ལྟར་ལྟ༔ གང་ཐོབ་པ་སྐྱེ་མེད་རྣམ་དག་འོ༔ སྒོམ་པ་ལ་ཡང་གཉིས་ཏེ༔ ཆོས་སྤྱིའི་སྒོམ་པ་དང་༔ ཆོས་ཉིད་རང་གི་སྒོམ་པའོ༔ སྤྱིའི་སྒོམ་པ་བཞི་སྟེ༔ གང་གིས་སྒོམ་ན༔ དད་པ་ཅན་གྱི་གང་ཟག་གིས་བསྒོམ༔ གང་སྒོམ་ན་རྣམ་པར་མི་རྟོག་པ་བསྒོམ༔ གང་ལྟར་བསྒོམས་ན་བྱིང་རྒོད་གཉིས་སྤངས་ཏེ་བསྒོམ༔ གང་ཐོབ་ན་སྐྱེ་བ་མེད་པའི་འབྲས་བུ་ཐོབ་པའོ༔ ཆོས་ཉིད་རང་གི་ལ་ཡང་བཞི་སྟེ༔ གང་བསྒོམ་ན་

དབྱིངས་དང་རིག་པ་བསྒོམ༔ གང་གིས་སྒོམ་ན༔ སྐལ་པ་དང་ལྡན་པའི་ལས་འཕྲོ་ཅན་གྱིས་སྒོམ༔ གང་ལྟར་བསྒོམ་ན༔ དབྱིངས་དང་རིག་པ་ལས་འདུ་འབྲལ་མེད་པར་བསྒོམ༔ གང་ཐོབ་ན༔ རྟོག་པ་མེད་པའི་སྐུ་ཐོབ་པའོ༔ སྤྱོད་པ་ལ་གཉིས་ཏེ༔ སྤྱིའི་སྤྱོད་པ་དང་༔ རང་གི་སྤྱོད་པའོ༔ སྤྱིའི་སྤྱོད་པ་ལ་བཞི་སྟེ༔ གང་གིས་སྤྱོད་ན་རྟེན་གྱི་གང་ཟག་གིས་སྤྱོད༔ གང་ལ་སྤྱོད་ན་སྣང་བ་ལ་ཞེན་པ་མེད་པར་སྤྱོད༔ གང་ལྟར་སྤྱོད་ན་ཆོས་ཐམས་ཅད་རང་བཞིན་མེད་པར་སྤྱོད༔ གང་ཐོབ་ན་སྣང་བ་རོ་མཉམ་གྱི་འབྲས་བུ་མེད་པར་ཐོབ་པའོ༔ ཆོས་ཉིད་རང་གི་ལ་ཡང་བཞི་སྟེ༔ གང་གིས་སྤྱོད་ན༔ སྐལ་ལྡན་གྱི་རྣལ་འབྱོར་པས་སྤྱོད༔ གང་ལ་སྤྱོད་ན༔ སྣང་བ་སྟོང་གསལ་ཆེན་པོར་སྤྱོད༔ གང་ལྟར་སྤྱོད་ན༔ རིག་པ་དང་འདུ་འབྲལ་མེད་པར་སྤྱོད༔ གང་ཐོབ་ན་འཁྲུལ་སྣང་ཞིང་ཁམས་སུ་འཆར་བའི་དགོངས་པ་ཐོབ་བོ༔ འབྲས་བུ་ལ་ཡང་གཉིས་ཏེ༔ ཆོས་སྤྱིའི་འབྲས་བུ་དང་༔ ཆོས་ཉིད་རང་གི་འབྲས་བུའོ༔ སྤྱི་ལ་བཞི་སྟེ༔ གང་ཐོབ་ན༔ སྟོང་པ་ཉིད་ཐོབ༔ གང་གིས་ཐོབ་ན༔ སྒྲུབ་པ་པོའི་རྟེན་གྱི་གང་ཟག་གིས་ཐོབ༔ གང་ལྟར་ཐོབ་ན༔ རིན་པོ་ཆེ་གསེར་གླིང་དུ་ཕྱིན་པ་ལྟར་ཐོབ༔ ཐོབ་པ་ལ་དགོས་པ་ཅི་ཡོད་ན༔ འབྲས་བུ་རྒྱུར་མི་ལྡོག་པའི་དགོས་པ་ཡོད་དོ༔ རང་གི་ལ་ཡང་བཞི་སྟེ༔ གང་ཐོབ་ན༔ སྐུ་གསུམ་འདུ་འབྲལ་མེད་པར་ཐོབ༔ གང་གིས་ཐོབ་ན༔ རང་གི་རིག་པས་ཐོབ༔ གང་ལྟར་ཐོབ་ན༔ རྒྱལ་པོས་གདན་ས་ཟིན་པ་ལྟར་ཐོབ༔ ཐོབ་པ་ལ་དགོས་པ་ཅི་ཡོད་ན༔ འབྲས་བུ་རྒྱུར་མི་ལྡོག་པའི་མཐའ་བྲལ་ཡོངས་སུ་རྫོགས་པའི་དགོས་པ་ཡོད༔ གང་རྫོགས་ན་སྐལ་ལྡན་དེ་རྫོགས༔ གང་གིས་རྫོགས་ན༔ སྒྲོན་མའི་ཆོས་འདིས་རྫོགས༔

གང་ལྟར་རྫོགས་ན༔ ལྟ་བ་ལ་གཟའ་གཏད་མེད་པར༔ སྒོམ་པ་ལ་དམིགས་གཏད་མེད་པར༔ སྤྱོད་པ་ལ་འཛིན་ཆགས་མེད་པར༔ འབྲས་བུ་ལ་ཡུལ་ལྔ་དང་དབང་པོ་ལྔ་ལ་སོགས་པས་ཡུལ་རྣམ་པར་དག་པས་ཕྱིའི་འཁྲུལ་བས་མི་གནོད་པ་དང་ཡུལ་དུ་མ་ཐོགས་པ་ལ་སོགས་པའོ་སྤང་ཐོབ་མེད་པར༔ མཁྱེན་པའི་ཡེ་ཤེས་ཡོངས་སུ་རྫོགས་སོ༔ ལྟ་སྒོམ་གསལ་བར་ཕྱེ་སྟེ་བསྟན་པ་ནི༔ ལྟ་བ་ལ་བཞི་སྟེ༔ ཕྱིའི་ལྟ་བ་ཡུལ་ལ་བལྟས་པས་འཁྲུལ་པ་རང་སར་དག་པ་འཁྲུལ་གཞི་ལ་བལྟས་པས་འཁྲུལ་མ་འཁྲུལ་གཉིས་མེད་དུ་བསྲེ་བའི་སྒོ་ནས་སྔར་རང་ཡན་གྱི་མན་ངག །ཚོགས་དྲུག་ལྷུག་པའི་མན་ངག་སྒོ་ལྔ་བསྟན་པའི་བསམ་གཏན་རང་གྲོལ་ལྷུག་པས་་གཟུགས་སྒྲ་དྲི་རོ་རེག་བྱ་དྲན་གཞི་སྙིང་གི་དཀྱིལ་དུ་མ་འཁྲུལ་བའི་སེམས་ལ་བལྟས་པས་ཤེས་པ་དྲང་ཐད་ཀྱི་མན་ངག་འབྱུང་བ་ཆུའི་རྙོག་མ་དངས་བ་ལྟར་ཉོན་མོངས་པ་རང་གྲོལ་དུ་རང་དག །དབྱིངས་དང་རིག་པ་ལ་བལྟས་པས་མི་འགྱུར་བ་རིན་པོ་ཆེའི་མན་ངག་གིས་ཡུལ་ཐམས་ཅད་མཁའ་ལ་སྤྲིན་དེངས་པ་ལྟར་རིག་པ་འགྲོའོ། །དབྱིངས་ལ་བསྣན་འཕྲི་མེད་པའོ་དང་༔ ནང་གི་ལྟ་བ་སེམས་ལ་བལྟས་པས་རིག་པ་རང་སར་དག་པ་དང༔ གསང་བའི་ལྟ་བ་དངོས་པོ་གཤིས་ཀྱི་འདུག་ཚུལ་ལ་བལྟས་པས་ཉོན་མོངས་པ་རང་སར་དག་པ་དང༔ གསང་བ་བླ་ན་མེད་པའི་ལྟ་བས་རིག་པ་ལ་བལྟས་པས༔ ཡུལ་དང་ཆོས་ཐམས་ཅད་རང་སར་དག་པའོ༔ སྒོམ་པ་ལ་བཞི་སྟེ༔ ཕྱི་དྲན་པ་རྒྱུན་ཟད་ཀྱི་སྒོམ་པས༔ སྒོ་ལྔའི་ཡུལ་གཏན་ལ་དབབ་པ་དང་༔ ནང་བསམ་པ་རང་དག་གི་རིག་པ་སྒོམ་པའི་གནད་སྙིང་ལ་སྐུ་དང་ཡེ་ཤེས་གནས་པའོ། །འབྱུང་པས་མ་གྲོལ་ཏེ་ལུས་སྒྱུ་མའི་སྐུར་གྲོལ་བའོ། །དབྱིངས་ཀྱི་སྒོམ་སྣང་བ་ཆོས་སྐུར་སྣང་ཡང་རང་རང་དབྱིངས་རང་ཡུལ་གྱི་

དབྱིངས་ལ་གོམས་པས་སྣང་བ་དབང་དུ་འདུས། ལུས་རིག་པ་ལ་གོམས་པས་དྲན་པ་དབང་དུ་འདུས། བློ་འདས་སུ་ངོ་སྤྲོད་པས་དྲན་པ་རང་ཡལ་སྣང་བ་ཟང་ཐལ་ཤེས་པ་ཐོག་བབས་འཁྲུལ་པ་དག་པའོ། །སྣང་བ་ཞེན་པ་ལས་ལོག་པའི་དགོས་པ་ཡོད་དོ། །སྒོམ་པས༔ ཡིད་ཀྱི་འབྱུང་ཁུངས་བཅད་པ་དང༔ གསང་བ་སྐྱེ་མེད་རང་གནས་ཀྱི་སྒོམ་པས༔ རང་ལུས་ལྷའི་སྐུར་གཏན་ལ་དབབ་པ་དང༔ གསང་བ་བླ་ན་མེད་པ་སྣང་བ་རང་གྲོལ་གྱི་སྒོམ་པས༔ སྣང་བ་ཐམས་ཅད་ཆོས་སྐུར་གཏན་ལ་དབབ་པའོ༔ སྤྱོད་པ་ལ་བཞི་སྟེ༔ ཕྱིའི་སྤྱོད་པས་སྣང་བ་འཁྲུལ་པ་རང་དག་ཏུ་ངོ་སྤྲད་པ་དང༔ ནང་གི་སྤྱོད་པས་སེམས་ཉིད་རིག་པ་རང་གྲོལ་དུ་ངོ་སྤྲད་པ་དང༔ གསང་བའི་སྤྱོད་པས་དབྱིངས་རིག་རང་གྲོལ་དུ་ངོ་སྤྲད་པ་དང༔ གསང་བ་བླ་ན་མེད་པའི་སྤྱོད་པས་ཆོས་ཉིད་དང་ཡེ་ཤེས་རང་གྲོལ་དུ་ངོ་སྤྲད་པ་དྲན་པ་གཞི་དྲན་མེད་ལམ། བློ་འགྲུས་པའི་སེམས་ཀྱིས་ཞེན་པ་བློ་ལྡོག་པའི་དགོས་པ་ཡོད། དྲན་པ་སྣང་མེད་རིག་མེད་སྟོང་པ་སྐྱེ་མེད་དབྱེར་མེད་བློ་འདས་རང་སོར་སྒོམ་ཞེན་པ་ལ་བློ་ལྡོག་པའི་དགོས་པ་ཡོད། ལུས་སྒྱུ་མའི་སྐུ་ཐོབ་པའོ། །དྲན་པ་གཉིད་སད་པ། དྲན་མེད་གཉིད་སད་པ། སྐྱེ་མེད་འོད་གསལ་དང་འདྲེས་པ་བློ་འདས་སྐྱེ་མེད་ཀྱི་གདམས་ངག་གོ། དྲན་པ་ཐམས་ཅད་རང་དག་ཏུ་སོང་བས་གྲུབ་མཐའ་ཐམས་ཅད་དང་སྒྲ་ཚིག་ལས་བློ་ལྡོག་པའི་དགོས་པ་ཡོད། འཛིན་ཆགས་ཆོས་སྐུར་ཤེས་པས་རང་ལུས་ཡེ་ནས་སྐུ་གསུམ་དུ་གནས་པས་ལུས་བྱར་མེད་དུ་ལྟ་བས་སྤྲུལ་སྐུ་ཡིན་འོ༔ འབྲས་བུ་ལ་ཡང་བཞི་སྟེ་ཚད་སྣང་བ་དང་རིག་པམི་མགུལ་པའོ༔ ཕྱིའི་འབྲས་བུ་ལུས་སྐུ་གསུམ་དུ་གྲོལ་བ་ཆོས་སྐུར་སྣང་བ་ལོངས་སྐུར་སྣང་བ་སྤྲུལ་སྐུར་སྣང་བའོ་དང༔ འཁྲུལ་པའི་བྱས་ཆོས་ཐམས་ཅད་རིག་པ་རང་གྲོལ་གྱིགདམས་ངག་བསྐྱེད་རིམ་རྣམ་པར་དག་པ་ནང་གི་འབྲས་བུ་སྣང་བ་སྐུ་གསུམ་དུ་གྲོལ་བ་དང༔ གསང་བའི་འབྲས་བུས་ཞིང་ཁམས་དབྱིངས་རིག་ཏུ་རིག་པ་རྡོ་རྗེ་ལུ་གུ་རྒྱུད་ཡེ་ནས་སངས་རྒྱས་པར་གཏན་ལ་ཕེབས། འགྱུར་མེད་ངོ་བོའི་ཀ་དག་ལ་གནས་སོ། །གསལ་བ་དང༔ གསང་བ་བླ་ན་མེད་པའི་འབྲས་བུ་རིག་པ་ཕྱིར་མི་ལྡོག་པའི་ས་ལ་གཟེར་ཐེབས་པའོ༔ ལྟ་སྒོམ་སྤྱོད་པ་འབྲས་བུ་བསྡུས་པའི་སྒྲོན་མ༔ སློབ་དཔོན་བྱེ་མ་ལ་མུ་ཏྲས་མཛད་པ་རྫོགས་སོ༔ ལས་ཅན་ཅིག་དང་འཕྲད་པར་ཤོག༔ ཨྠྀི༔ རྒྱ་རྒྱ་རྒྱ༔ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔

དབྱིངས་དང་ཡེ་ཤེས་ཀྱི་དོན་བསྡུས་པའི་སྒྲོན་མ་འདི་ལ་དོན་བརྒྱད་ཀྱིས་བསྟན་སྟེ༔ དབྱིངས་དང་ཡེ་ཤེས་ཀྱི་ངོ་བོ་བསྟན་པ་དང༔ དེས་ཆོ་ག་དང༔ དགོས་པ་བསྟན་པ་དང༔ དབྱེ་བ་བསྟན་པ་དང༔ ཉམས་སུ་བླངས་པའི་ཐབས་བསྟན་པ་དང༔ དབྱིངས་དང་ཡེ་ཤེས་གཉིས་ཟུང་དུ་འཇུག་པའི་ལུགས་བསྟན་པ་དང༔ ཟུང་དུ་འཇུག་པའི་ལྟ་བ་བསྟན་པ་དང༔ འབྲས་བུ་བསྟན་པའོ༔ དེ་ལ་དང་པོ་དབྱིངས་དང་ཡེ་ཤེས་ཀྱི་ངོ་བོ་ནི༔ སྤྲོས་བྲལ་མཐའ་མི་དམིགས་པའི་ཆོས་ཉིད་སྟོང་པ་ཡིན་ནོ༔ གཉིས་པ་ངེས་ཚིག་ནི༔ སྐྱེ་བ་མེད་པ་ནི་ཆོས་དབྱིངས་ཡིན་ལ༔ འགག་པ་མེད་པགསལ་བའི་ཐུགས་རྗེས་ནི་ཡེ་ཤེས་ཡིན་ནོ༔ གཉིས་སུ་མེད་པ་སྐྱེ་འགག་གང་དུ་ཡང་མ་གྲུབ་པས༔ འདུ་བྲལ་ཅི་ཡང་མ་སྤངས་པའི་དགོངས་པའོ༔ དབྱིངས་གཞིའི་དབྱིངས་དང་བསྲེ་བ་དང་ཡེ་ཤེས་ཀྱི་དགོས་པ་ནི༔ དབྱིངས་ཀྱི་ཡེ་ནས་གནས་པའི་གནས་ལུགས་ཀྱི་དོན་རྟོགས་པ་དང༔ ཡེ་ཤེས་ཀྱིས་མ་རིག་པའི་མུན་པ་གསལ་ནས་ཁམས་གསུམ་མི་འཁོར་བའི་དགོས་པའོ༔ བཞི་པ་དབྱིངས་དང་ཡེ་ཤེས་ཀྱི་དབྱེ་བ་ནི་གསུམ་སྟེ༔ ཡེ་ཤེས་དང༔ ལམ་གྱི་དང་འབྲས་བུའོ༔ དེ་ལ་རྣམ་པར་གྲོལ་བའི་གཞིའི་དབྱིངས་དང་ཡེ་ཤེས་ལ༔ བཅས་བཅོས་དང་རྩོལ་སྒྲུབ་དང་འཕོ་འགྱུར་མེད་པས་སྟོང་པ་ཉིད་བསམ་ངོ་དང་བྲལ་བའི་དབྱིངས་ལ་གཞི་གནས་རང་བྱུང་གི་ཡེ་ཤེས་ཤར་བས༔ ཆོས་ཐམས་ཅད་གཞི་བཞག་རང་གྲོལ་ཆེན་པོར་རྟོགས་པ་ནི༔ འབད་མེད་རང་གྲོལ་གྱི་དབྱིངས་དང་ཡེ་ཤེས་ཞེས་བྱའོ༔ སྣ་ཚོགས་སྣང་བ་ལམ་གྱི་དབྱིངས་དང་ཡེ་ཤེས་ནི༔ སྣ་ཚོགས་སུ་སྣང་བ་ཐམས་ཅད་ཆོས་ཉིད་ཀྱི་རོལ་པ་ཕྱོགས་མེད་དུ་ཤར་བས༔ སྣ་ཚོགས་འབད་མེད་དུ་གྲོལ་བ་ནི༔ ལྷུན་གྲུབ་ཀྱི་ཕྱོགས་ཙམ་མ་ཡིན་པ་དབྱིངས་ལ་སྒྱུ་མ་རྣམ་དག་ཕྱོགས་མེད་ཀྱི་ཡེ་ཤེས་ཤར་བས༔ ཆོས་

ཐམས་ཅད་སྤང་བླང་དང་དགག་སྒྲུབ་དང་འདོད་པ་མེད་པར་རྟོགས་པ་ནི་ལྷུན་གྲུབ་རྟོགས་ཚུལ་གྱི་དབྱིངས་དང་ཡེ་ཤེས་ཞེས་བྱའོ༔ རང་གྲོལ་ཆེན་པོ་བྱ་བ་དང་བྲལ་བའི་དབྱིངས་དང་ཡེ་ཤེས་ནི༔ འཁོར་བ་དང་མྱ་ངན་ལས་འདས་པ་མ་གྲུབ་ཅིང༔ མི་གནས་པས་རྩོལ་བྲལ་ཉག་ཅིག་བསྐྱར་གཞི་དང་བྲལ་བའི་དབྱིངས་ལ་མཐའ་བྲལ་སྟོང་པ་ལྟ་སྒོམ་ལས་འདས་པའི་ཡེ་ཤེས་ཤར་བས༔ ཆོས་ཐམས་ཅད་བདེ་སྡུག་རོ་མཉམ་དུ་རྟོགས་པ་ནི༔ ཆོས་ཉིད་བྱ་བ་ལས་འདས་པའི་དབྱིངས་དང་ཡེ་ཤེས་ཞེས་བྱའོ༔ ལྔ་པ་གང་ཟག་གིས་ཉམས་སུ་བླང་པའི་ཐབས་ནི༔ དབྱིངས་གཞི་ཡིན་ལ༔ ཡེ་ཤེས་ལམ་ཡིན་པས༔ གང་ཟག་བློ་འབྲིང་པོ་ལམ་པ་རྣམས་ཀྱིས་འབད་རྩོལ་གྱིས་གྲོལ་བ་ནི༔ དབྱིངས་སྐྱེ་བ་མེད་པ་སྟོང་པའི་ངང་ལས༔ ཆུ་ལས་ཉ་ལྟ་བུའི་ཚུལ་དུ་སྙིང་པོ་དྲན་པ་ཙམ་ཀྱིས་ལྷའི་ཡེ་ཤེས་ལྷའི་བསྐྱེད་རིམ་སྐུར་གསལ་བ་ནི༔ མཐའ་བྲལ་གྱི་རྣམ་རྟོག་བཟློག་པ་རྒྱལ་བའི་སྐུ་འོ༔ ཡང་དབྱིངས་རྒྱུ་ཡིན་ལ༔ འབྲས་བུ་ཡེ་ཤེས་ཡིན་པས༔ དབང་པོ་རྣོན་པོ་ལས་རྒྱུ་འབྲས་ལ་མ་ལྟོས་འདི་ཉིད་དུ་དབྱིངས་དང་ཡེ་ཤེས་དབྱེར་མེད་དུ་རྟོགས་པས་གྲོལ་ཏེ༔ དེ་ཡང་དབྱིངས་དང་སྟོང་གསལ་ཡེ་ཤེས་ཙམ་དུ་ཡང་དབྱེར་མེད་དུ་མ་གྲུབ་པ་མེད་པར་བློ་བྲལ་རྫོགས་པ་ཆེན་པོའི་ངང་དུ་འགྲོ་ཉལ་འདུག་སྡོད་བཞག་པ་ནི༔ འཁྲུལ་པའི་སྣང་བ་ཐམས་ཅད་བཟློག་པའོ༔ དྲུག་པ་དབྱིངས་དང་ཡེ་ཤེས་ཟུང་དུ་འཇུག་པའི་ལུགས་ནི༔ དབྱིངས་དང་ཡེ་ཤེས་གཉིས་རིམ་གྱིས་ཟུང་དུ་ཞུགས་པས༔ སྣང་བ་དང་སྟོང་པ་གཉིས་བདེན་པ་དབྱེར་མེད་དུ་ཟུང་དུ་འཇུག་པས་སྤང་བླང་མེད་པའི་ཟུང་འཇུག་ཅེས་བྱའོ༔ དབྱིངས་དང་ཡེ་ཤེས་གཉིས་ཅིག་ཅར་དུ་ཞུགས་པས༔ རང་བྱུང་གི་ཡེ་ཤེས་ལྟ་བ་དང་བྲལ་བར་གོ་བ་ནི༔ ཆོས་ཟད་པས་གྲོལ་རྒྱུ་མེད་པ་ཅིག་ཅར་བ་ཞེས་བྱའོ༔ བདུན་པ་དབྱིངས་དང་ཡེ་ཤེས་ཟུང་དུ་ཞུགས་པའི་ལྟ་བ་ནི༔ དེ་ཡང་དབྱིངས་དང་ཡེ་ཤེས་གཉིས་ཐ་དད་མེད་པར་རྟོགས་པ་ནི༔

གཉིས་མེད་རོ་སྙོམས་ཀྱི་ལྟ་བ་ཡིན་ནོ༔ དབྱིངས་དང་ཡེ་ཤེས་འགྲོ་འོང་མེད་པར་རྟོགས་པ་ནི༔ གནས་པ་ལས་གཞན་དུ་འགྱུར་དབང་མེད་པའི་ལྟ་བ་ཡིན་ནོ༔ དབྱིངས་དང་ཡེ་ཤེས་གཉིས་ལ་རྒྱ་ཆད་ཕྱོགས་ལྷུང་མེད་པར་གོ་ཞིང་རྟོགས་པ་ནི༔ ཡེ་གདོད་ནས་གནས་པའི་ལྟ་བ་ཞེས་བྱ་བ་ཡིན་ནོ༔ དབྱིངས་དང་ཡེ་ཤེས་གཉིས་ལ་མཚོན་པའི་ཚིག་ཙམ་ལས་མ་རྟོགས་པར་གཅིག་ལ་གཅིག་བརྟེན་པ་མེད་པས་དཔེ་དང་ལྟོས་གཞི་གང་དུ་ཡང་མ་གྲུབ་པར་རྟོགས་པ་ནི༔ ལྟོས་གཞི་བྲལ་བའི་ལྟ་བ་ཞེས་བྱའོ༔ བརྒྱད་པ་དབྱིངས་དང་ཡེ་ཤེས་གཉིས་རྟོགས་པའི་འབྲས་བུ་དང་ལྟ་བ་ནི༔ དབང་པོ་རབ་ཚེ་འདི་ཉིད་ལ་སངས་རྒྱས་པ་དང༔ འབྲིང་བར་དོ་ནས་སངས་རྒྱས་པ་དང༔ ཐ་མ་ཡང་སྐྱེ་བ་བརྒྱུད་དེ་ཚེ་གསུམ་གྱིས་སངས་རྒྱས་ངེས་པའོ༔ དབྱིངས་དང་ཡེ་ཤེས་གཉིས་བསྡུས་པའི་སྒྲོན་མ༔ སློབ་དཔོན་བྱེ་མ་ལ་མུ་ཏྲས་མཛད་པ་རྫོགས་སོ༔ སྐལ་ལྡན་སྙིང་གི་བུ་དང་འཕྲད་པར་ཤོག༔ རྒྱ་རྒྱ་རྒྱ་༔ ཨྠྀི༔ ༔དཔལ་རྡོ་རྗེ་འཆང་ལ་ཕྱག་འཚལ་ལོ༔ ཕྱག་རྒྱ་བསྡུས་པའི་སྒྲོན་མ་འདི་ལ་དོན་གཉིས་ཀྱིས་བསྟན་ཏེ༔ ཕྱག་རྒྱ་གཏན་ལ་དབབ་པ་དང་༔ ཕྱག་རྒྱ་ཆེན་པོར་གསལ་བར་ཕྱེ་སྟེ་བསྟན་པའོ༔ དང་པོ་ལ་བཞི་སྟེ༔ དེ་ལ་གཞི་དམ་ཚིག་གི་ཕྱག་རྒྱ་དང་༔ དཔེ་ལས་ཀྱི་ཕྱག་རྒྱ་དང་༔ ལམ་ཆོས་ཀྱི་ཕྱག་རྒྱ་དང་༔ འབྲས་བུ་ཕྱག་རྒྱ་ཆེན་པོ་དང་བཞིའོ༔ དེ་ལ་གཞི་དམ་ཚིག་གི་ཕྱག་རྒྱའི་ངོ་བོ་ནི༔ མི་དགེ་བ་ཐམས་ཅད་སྡོམ་པའོ༔ ངེས་ཚིག་ནི༔ དམ་པའི་དོན་རྒྱུད་ཐམས་ཅད་ཚིག་གིས་མཚོན་པ་ན་དམ་ཚིག་གི་ཕྱག་རྒྱའོ༔ དམ་ཚིག་གི་ཕྱག་རྒྱའི་རང་བཞིན་ནི༔ ཆོས་ཉིད་ཀྱི་དོན་ལས་མི་འདའ་བའོ༔ མཚན་ཉིད་ནི་དབང་དང་འབྲེལ་པའོ༔ འགྲོ་ས་ནི་ཆོས་ཀྱི་ཕྱག་རྒྱའོ༔ ལས་ཀྱི་ཕྱག་རྒྱའི་ངོ་བོ་ནི༔ བྱེད་པ་མ་འགགས་པའི་ལས་སོ༔ ངེས་ཚིག་ནི༔ ལས་

རྒྱ་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་རྟོགས་ནས་སངས་རྒྱས་པའོ༔ རང་བཞིན་ནི༔ ཕྱག་རྒྱའི་རྟེན་ལ་ལྷན་ཅིག་སྐྱེས་པའི་ཡེ་ཤེས་སྐྱེ་པའོ༔ མཚན་ཉིད་ནི༔ གཞན་ལ་མི་ལྟོས་པའི་ཆོས་ཡིན་པས་སོ༔ འགྲོ་ས་ནི༔ དམ་ཚིག་གི་ཕྱག་རྒྱ་ཡིན་པའོ༔ ཆོས་ཀྱི་ཕྱག་རྒྱའི་ངོ་བོ་ནི༔ སྤྲོས་པའི་མཐའ་ཐམས་ཅད་དང་བྲལ་བའོ༔ ངེས་ཚིག་ནི༔ ལུས་ངག་ཆོས་པས་ན་ཆོས་ཀྱི་ཕྱག་རྒྱའོ༔ རང་བཞིན་ནི༔ ལྟ་སྒོམ་སྤྱོད་པའོ༔ མཚན་ཉིད་ནི༔ སྒྲོ་འདོགས་ཐམས་ཅད་དང་བྲལ་བའོ༔ འགྲོ་ས་ནི་ཕྱག་རྒྱ་ཆེན་པོའོ༔ ཕྱག་རྒྱ་ཆེན་པོའི་ངོ་བོ་ནི༔ ཆོས་ཉིད་ཟབ་མོའི་དོན་གཞན་གྱིས་དཔག་པར་དཀའ་བའོ༔ ངེས་ཚིག་ནི༔ ཕྱག་རྒྱ་གསུམ་ལས་ཁྱད་པར་དུ་ཆེ་བས་ན་ཆེན་པོའོ༔ ཕྱག་རྒྱ་ཆེན་པོའི་རང་བཞིན་ནི༔ བློ་ལས་འདས་པའོ༔ མཚན་ཉིད་ནི་ཡིད་ལ་མི་བྱེད་པའོ༔ འགྲོ་ས་ནི་གཉུག་མའི་ཕྱག་རྒྱ་ཆེན་པོ་ཉིད་ཡིན་ནོ༔ ཕྱག་རྒྱ་ཆེན་པོ་ཉིད་གསལ་བར་ཕྱེ་སྟེ་བསྟན་པ་ནི༔ དང་པོ་ཕྱག་རྒྱ་ཆེན་པོའི་དབྱེ་བ་བསྟན་པ་ལ་གསུམ་སྟེ༔ རྣམ་གྲངས་ཕྱག་རྒྱ་ཆེན་པོ་དང་༔ རྣ་གྲངས་མ་ཡིན་པའི་ཕྱག་རྒྱ་ཆེན་པོ་དང་༔ སྤྲོས་བྲལ་གཉུག་མའི་ཕྱག་རྒྱ་ཆེན་པོའོ༔ དེ་ལ་རྣམ་གྲངས་ནི༔ སྒྲུབ་སྐོར་དང་༔ ཨ་མ་ན་སི་དང་༔ ཕྱག་རྒྱ་ཆེན་པོ་མཛོད་དང་༔ སྙིང་པོའི་སྐོར་དང་༔ ལམ་གྱི་སྐོར་ལ་སོགས་པའོ༔ རྣམ་གྲངས་མ་ཡིན་པའི་བློ་འདས་ཕྱག་རྒྱ་ཆེན་པ་ནི༔ ལྷན་ཅིག་སྐྱེས་པའི་གཉུག་མ་གཉིས་སུ་མེད་པའི་ཡེ་ཤེས་ཀྱིས་འགྲོ་བ་སེམས་ཅན་ཐམས་ཅད་ལ་མ་ཁྱབ་པ་མེད་པའི་དོན་དེ་ཉིད་དོ༔ སྤྲོས་བྲལ་ཕྱག་རྒྱ་ཆེན་པོ་ནི༔ ཚིག་དང་ཡི་གེ་དང་བསམ་པ་དང་རྟོག་དཔྱོད་ཀྱི་མཐའ་ཐམས་ཅད་ལས་འདས་པའོ༔ ཕྱག་རྒྱ་ཆེན་པོའི་ངོ་བོ་ནི༔ མི་འགྱུར་བ༔ དུས་ཐམས་ཅད་པ༔ འགྲོ་འོང་མེད་པ༔

གཟུགས་ཅན་མ་ཡིན་པ༔ ཀུན་ལ་ཁྱབ་པའོ༔ ཕྱག་རྒྱ་ཆེན་པོའི་ངེས་ཚིག་ནི༔ ཕྱག་རྒྱ་ནི་འཛིན་པར་བྱེད་པས་ཏེ༔ སྤྲོས་མེད་ལྷན་ཅིག་སྐྱེས་པའི་ཡེ་ཤེས་ངོས་བཟུང་ནས་རྒྱས་འདེབས་པ་ལ་ཞེན་པ་མེད་པས༔ སྤྲོས་མེད་གདག་བྲལ་རྒྱས་གདབ་པས༔ བློ་འདས་ངོ་བོ་ཉིད་ཀྱི་ཆེན་པོའི་དོན་ལས་མི་འདས་པ་ནི༔ ཐེག་པ་རྣམས་ལས་ཁྱད་པར་འཕགས་པས་ན༔ ཆེན་པོ་ཞེས་པ་ནི༔ དེའི་གོང་ན་གཞན་མེད་པས་སོ༔ དེའི་ཕྱི་རོལ་པའི་ཐེག་པ་ནས་བཟུང་ནས་བླ་ན་མེད་པའི་རྒྱུད་ཀྱི་ཐེག་པའི་བར་དུ་རིམ་པས་ཆེ༔ དེའི་སྤྱོད་པ་ཕྱག་རྒྱ་ཆེན་པོ་ཡང་སྤང་བླང་དགག་སྒྲུབ་མེད་པས་ཆེ༔ སྒོམ་པ་ཡིད་ལ་བྱེད་པ་མེད་པས་ཆེ༔ ལྟ་བ་གཉུག་མ་འདུས་མ་བྱས་པའི་བརྡའ་ལ་བརྟེན་ནས་ཅིག་ཅར་དུ་རྟོགས་པས་ཆེ༔ དེའི་ཕྱིར་ན་ཕྱག་རྒྱ་ཆེན་པོ་ཞེས་བྱའོ༔ དེ་ཡང་དྲན་པ་དང་༔ དྲན་མེད་དང་༔ སྐྱེ་མེད་དང་༔ བློ་འདས་བཞི་དང་སྦྱོར་ན༔ དང་པོ་དྲན་པ་བཤད་པ་སུས་དྲན་ན༔ སྐལ་བ་དང་ལྡན་པའི་རྣལ་འབྱོར་པས༔ གང་ལྟར་དྲན་ན༔ གཉུག་མ་ལྷན་ཅིག་སྐྱེས་པའི་ཡེ་ཤེས་དེ་ཉིད་དྲན༔ ཚུལ་ཇི་ལྟར་དྲན་ན༔ རང་བཞིན་དམིགས་པ་མེད་པར་སྟོང་པ་ཉིད་ཀྱི་ཚུལ་དུ་དྲན༔ གང་ལྟར་དྲན་ན༔ ཕྱག་རྒྱ་ཆེན་པོ་ཡིད་ལ་མི་བྱེད་པར་དྲན་པའོ༔ དྲན་པའི་འགྲོ་ས་གང་ཡིན་ན༔ དྲན་པ་མེད་པ་དེ་ཉིད་ཡིན་ནོ༔ དེས་ན་ཤེས་པའི་འགྱུ་བ་ཉིད་ལྷན་ཅིག་སྐྱེས་པའི་ཡེ་ཤེས་སུ་གནས་ཏེ༔ གོང་མའི་དྲན་པ་ནུབ་པ་ལ་དྲན་མེད་ཅེས་བྱའོ༔ དེ་ཡང་དྲན་མེད་བཤད་པ་གང་ལ་དྲན་པ་མེད་ན༔ ཕྱག་རྒྱ་ཆེན་པོ་དེ་ཉིད་ལ་དྲན་པ་མེད་པའོ༔ གང་མེད་ན༔ རང་བཞིན་གྱིས་དྲན་པ་མེད་པའོ༔ གང་ལྟར་དྲན་པ་མེད་ན༔ ནམ་མཁའ་ལ་སྤྲིན་དེངས་པ་ལྟར་དྲན་པ་མེད༔ གང་གིས་ཕྱིར་དྲན་པ་མེད་ན༔ སྐྱེ་བ་མེད་པའི་ཆོས་ཉིད་ལ་གནས་པའི་ཕྱིར་

དྲན་པ་མེད་དོ༔ གང་སྐྱེ་བ་མེད་ན༔ བྱང་ཆུབ་ཀྱི་སེམས་ལ་སྐྱེ་བ་མེད་དོ༔ གང་ལྟར་སྐྱེ་བསདྲན་པ་མེད་ན༔ ལྷན་ཅིག་སྐྱེས་པའི་ཡེ་ཤེས་ལ་སྐྱེ་བ་མེད་དོ༔ གང་གི་ཕྱིར་སྐྱེ་བ་མེད་ན༔ བློ་ལས་འདས་པའི་ཆོས་སུ་ནུབ་པའི་ཕྱིར་སྐྱེ་བ་མེད་དོ༔ བློ་འདས་བཤད་པ་དེ་ལྟར་ཐམས་ཅད་རང་གྲོལ་དུ་རྟོགས་པ་ལ་བློ་ལས་འདས་ཞེས་བྱ་སྟེ༔ གང་འདས་ན་སྐྱེ་མེད་དུ་འདས༔ གང་དུ་འདས་ན༔ གཉུག་མ་ཕྱག་རྒྱ་ཆེན་པོའི་ངང་དུ་འདས༔ གང་གིས་འདས་ན༔ བློ་ལས་འདས་པས་འདས༔ གང་ལྟར་འདས་ན༔ སྐྱེས་བུ་རབ་ལ་བརྒལ་བ་ལྟར་འདས༔ གང་གི་ཕྱིར་འདས་ན༔ ཕྱག་རྒྱ་ཆེན་པོའི་དོན་མཐོང་བའི་ཕྱིར་འདས་སོ༔ དེ་ལྟར་ཕྱག་རྒྱ་ཆེན་པོ་རྟོགས་པའི་གང་ཟག་ལ་ཆོས་ཉན་པ་དང་༔ འཆད་པ་དང་༔ སྒོམ་པ་དང་༔ ཁ་ཏོན་ལ་སོགས་པ་མི་དགོས་ཏེ༔ དེ་དག་ཕྱག་རྒྱ་ཆེན་པོ་ལ་སོགས་པ་དང་ཐམས་ཅད་ཀྱི་དོན་གཉུག་མའི་ངང་ལས་མ་འདས་པར་བརྡར་བསྟན་པའི་ཆོས་ཐམས་ཅད་སྤངས་པའོ༔ དེ་ལྟར་བར་དོ་དང་བྲལ་བ་དེ་ཉིད་ཕྱག་རྒྱ་ཆེན་པོ་ཡིན་ཏེ༔ དེ་ལས་ལྷག་པ་གཞན་ལོགས་ནས་མི་རྙེད་དོ༔ དེ་ལྟར་མན་ངག་གིས་བརྡའ་ལྷན་ཅིག་སྐྱེས་པ་དད་པས་ཆོས་ཉིད་གཉུག་མའི་དོན་དང་འཕྲད༔ དེ་ལྟར་འཕྲད་པས་གོང་གི་དྲན་སྣང་འགགས་པས་དྲན་མེད་དོ༔ དེ་ལྟར་བརྡའ་དོན་སྐྱེ་མེད་དུ་རྟོགས་པས་ན་སྐྱེ་མེད༔ བརྡའ་དོན་གྱི་གཉིས་འཛིན་བློ་དང་བྲལ་བས་ན་བློ་འདས་སོ༔ ཡང་ཕྱག་རྒྱ་དང་སྦྱར་ན༔ དྲན་པས་བརྡ་ལ་གནས་པས་ན་ལས་ཀྱི་ཕྱག་རྒྱ༔ བརྡ་སྣང་འགགས་པའི་བློ་འདས་ཆེན་པོ་དེ་ལས་མི་འདའ་བས་ན་དམ་ཚིག་གི་ཕྱག་རྒྱའོ༔ དེ་ལྟར་བརྡའ་དོན་སྐྱེ་མེད་དུ་རྟོགས་པ་དེ་ཆོས་ཉིད་ཡིན་པས་ན་ཆོས་ཀྱི་ཕྱག་རྒྱ༔ དེ་ལྟར་བརྡ་དོན་གཉིས་ཀ་དང་བྲལ་བ་དེ་བློ་འདས་ལས་

འགྲོ་ས་མེད་པས་ན་ཕྱག་རྒྱ་ཆེན་པོ་ཡིན་ནོ༔ དེ་ཡང་དགའ་བ་བཞི་དང་སྦྱར་ན༔ དྲན་པས་ཆོས་ཉིད་ཀྱི་རོ་མྱོང་པ་ནི་དགའ་བ༔ དྲན་མེད་དུ་རོ་གཅིག་པ་ནི་མཆོག་དགའ༔ སྐྱེ་མེད་ཀྱི་ངང་དུ་རྟོགས་པ་ནི་ལྷན་ཅིག་སྐྱེས་པའི་དགའ་བ༔ བློ་འདས་ཆེན་པོ་སྤྲོས་པ་དང་བྲལ་བ་ནི་དགའ་བྲལ་ལོ༔ སྐད་ཅིག་མ་བཞི་དང་སྦྱར་ན༔ དྲན་པ་རྣམ་པ་སྣ་ཚོགས་ཀྱི་སྐད་ཅིག་མ༔ དྲན་མེད་རྣམ་པར་སྨིན་པའི་སྐད་ཅིག་མ༔ སྐྱེ་མེད་མཚན་ཉིད་དང་བྲལ་བའི་སྐད་ཅིག་མ༔ བློ་འདས་རྣམ་པ་མེད་པའི་སྐད་ཅིག་མ༔ དེ་ལྟར་སྡེ་པ་བཞི་དང༔ འབྲས་བུ་བཞི་དང༔ སྐུ་བཞི་དང༔ ཡེ་ཤེས་བཞི་དང་སྦྱར་རོ༔ དེ་དག་ཐམས་ཅད་ཀྱང་ཐ་དད་པ་མ་ཡིན་ཏེ༔ གཉུག་མའི་དོན་ལྷན་ཅིག་སྐྱེས་པའི་ཡེ་ཤེས་གཅིག་གི་རྣམ་འཕྲུལ་ཡིན་པས༔ ཕྱག་རྒྱ་ཆེན་པོའི་དོན་ལ་ཐམས་ཅད་མ་སྤངས་པར་བསྟན་པའོ༔ ཕྱག་རྒྱ་བསྡུས་པའི་སྒྲོན་མ་ཞེས་བྱ་བ༔ སློབ་དཔོན་ཆེན་པོ་བྱེ་མ་ལ་མུ་ཏྲས་མཛད་པ་རྫོགས་སོ༔ སྐལ་ལྡན་ལས་ཅན་ཅིག་དང་ཕྲད་པར་ཤོག༔ རྒྱ་རྒྱ་རྒྱ༔ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ ཤེས་རབ་བསྡུས་པའི་སྒྲོན་མ་འདི་ལ་དོན་བཅུ་གཅིག་གིས་བསྟན་ཏེ༔ ཤེས་རབ་ཀྱི་ངོ་བོ་དང༔ ཤེས་རབ་ཀྱི་ངེས་ཚིག་དང༔ དབྱེ་བ་བསྟན་པ་དང༔ མཚན་ཉིད་བསྟན་པ་དང་༔ ཡུལ་དང་༔ བྱེད་པའི་ལས་དང་༔ འཕྲད་པ་དང་༔ གོལ་ས་དང་༔ ས་མཚམས་དང་༔ ལྡང་ཚད་དང་༔ འབྲས་བུ་དང་བཅུ་གཅིག་གོ༔ དེ་ལ་ཤེས་རབ་ཀྱི་ངོ་བོ་ནི༔ ཆོས་ཉིད་དང་སེམས་ཉིད་གཉིས་སུ་མེད་པར་འདྲེས་པ་ལ་རྣམ་པར་རྟོག་པ་དང་བྲལ་བའི་སྟོང་པ་ཉིད་དེ་ཡིན་ནོ༔ ཤེས་རབ་ཀྱི་ངེས་ཚིག་ནི༔ ཤེས་ནི་ཆོས་སྤྱི་དང་རང་གི་མཚན་ཉིད་སྐྱེ་བ་མེད་པ་སྤྲོས་བྲལ་དུ་ཤེས་པ་ལ༔ རབ་ནི་མཚན་ཉིད་མའི་རྣམ་རྟོག་ཐམས་

ཅད་ཆོས་ཉིད་ཀྱི་ངང་དུ་འགྱུར་བའོ༔ དེ་ཡང་ཤེས་རབ་ཀྱི་དང་ཆོས་ཀྱི་དབྱིངས་ནི་གཉིས་སུ་མེད་དོ་ཞེས་པ་དང་༔ ཤེས་རབ་ཅེས་བ་ནི་སྟོང་པ་ཉིད་ཀྱི་ཚིག་བླ་དག་གོ༔ མཚན་མ་མེད་པ་དང་སྨོན་པ་མེད་པའི་ཚིག་བླ་དག་གོ༔ ཞེས་སོ༔ ཡང་ཕུང་པོ་ཁམས་དང་སྐྱེ་མཆེད་རྣམས༔ སྐྱེ་བ་མེད་པར་རྟོགས་གྱུར་ཅིང་༔ རང་བཞིན་སྟོང་ཉིད་ཤེས་པ་ནི༔ ཤེས་རབ་ཅེས་སུ་བཏགས་པ་ཡིན༔ ཞེས་སོ༔ ཏིང་འཛིན་རྒྱལ་པོ་ལས་གསུངས་སོ༔ ཡང་ན་ཤེས་པ་རྣམས་ཀྱི་ནང་ན་རབ་བམ༔ ཕུལ་དུ་གྱུར་པས་ཤེས་རབ་ཅེས་བྱའོ༔ ཤེས་རབ་ཀྱི་དབྱེ་བ་ལ་གཉིས་ཏེ༔ ལོག་པའི་ཤེས་རབ་དང༔ ཡང་དག་པའི་ཤེས་རབ་བོ༔ ལོག་པའི་ཤེས་རབ་ལ་བཞི་སྟེ༔ ཕྱིན་ཅི་ལོག་གི་ཤེས་རབ་དང་༔ སྒྲོ་བཏགས་ཡིད་དཔྱོད་ཀྱི་ཤེས་རབ་དང་༔ མིང་བསྒྱུར་གྱི་ཤེས་རབ་དང་༔ མ་དག་པའི་ཤེས་རབ་དང་བཞི་པོ་དེ་ནི་ཤེས་རབ་ཏུ་བཏགས་ཀྱང་ཤེས་རབ་མ་ཡིན་ནོ༔ དེ་ལ་མ་དག་པའི་ཤེས་རབ་ནི༔ ཐོས་པ་རྒྱ་ཆུང་ཏེ་མ་དག་པས་ཐེ་ཚོམ་དུ་གྱུར་པ་དང་༔ སྒོམ་པ་ཡུན་ཐུང་ཏེ་མ་དག་པས་ཡིད་གཉིས་སུ་གྱུར་པ་དང་༔ མན་ངག་རྩད་མ་ཆོད་པས་མ་དག་པ་ཆལ་ཆོལ་དུ་གྱུར་པ་དང་༔ གྲུབ་མཐའི་ཕུགས་མ་རྟོགས་པས་མ་དག་སྟེ་ལྟ་སྒོམ་ལ་ས་ཟིན་མེད་པར་གྱུར་པའོ༔ ཤེས་རབ་ཕྱིན་ཅི་ལོག་ནི་བཞི་སྟེ༔ ཐོས་པ་སྤྱི་གཞུང་དང་འགལ་ནས་རྒྱུད་ལུང་དང་འཐད་འཐད་འདྲ་ཡང་ཤེས་རབ་ཆེ་ཡང་བརྒྱུད་པ་ཕྱིན་ཅི་ལོག་གི་ཤེས་རབ་བོ༔ ལས་དང་རྣམ་སྨིན་མི་འཛེམ་ན་ཤེས་རབ་ཆེ་བ་འདྲ་ཡང་ལས་འགལ་ནས་བྱ་བ་སྤྱོད་པས་ཕྱིན་ཅི་ལོག་གི་ཤེས་རབ་ཡིན༔ ལྟ་སྒོམ་ཁྱད་དུ་བསད་ནས་འབྲས་བུ་མི་ཐོབ་པ་ཕྱིན་ཅི་ལོག་གི་ཤེས་རབ་ཡིན༔ གནས་ལུགས་ཀྱི་དགོངས་པ་ལ་དོན་ལ་གཏུགས་རྒྱུ་མེད་ན༔ ཕུགས་ཀྱི་ལྟ་བ་ཕྱིན་ཅི་ལོག་སངས་རྒྱས་ཀྱི་དགོངས་པ་ཁྱད་བསད་ནས་རས་ཆོད་གཟུ་ལུམ་མཁས་འདོད་བྱེད་པའོ། །ཏུ་རྟོགས་

པའི་ཤེས་རབ་ཡིན་པས༔ མིང་ཙམ་གྱི་ཤེས་རབ་ལས་ཡང་དག་པ་མིན་ནོ༔ སྒྲོ་བཏགས་ཀྱི་ཤེས་རབ་ནི༔ ཚིག་རྣམས་ལ་རྟོག་དཔྱོད་ཀྱི་བློ་དང་བཅས་པས་ཏེ༔ ཡང་དག་པའི་ལུང་དང་ངེས་པའི་ཤེས་པ་མེད་པར་མིན་པ་ལ་ཡིན་པར་སྒྲོ་བཏགས༔ དོན་མ་རྟོགས་པར་ཡིན་པ་ལ་མིན་པར་སྒྲོ་བཏགས༔ རྒྱུ་འབྲས་དེ་བཞིན་དུ་ཡོད་པ་ལ་མེད་པ་དང༔ ཆད་པ་ལྟར་སྣང་བ་ལ་སྟོང་པར་སྒྲོ་བཏགས་པ་དང༔ རྟག་པ་ལྟར་སྟོང་པ་ལ་སྣང་བ་ལ་སོགས་པར་སྒྲོ་བཏགས་ནས༔ འདི་ནི་བླ་མ་དང་པོ་ཐོས་པ་རྒྱ་ཆུང་བ་དང་བར་དུ་རྟོགས་པའི་གདིངས་ཀྱིས་མ་ཟིན་ཅིང་ཐ་མ་གོམས་འདྲིས་ཆུང་བ་གསུམ་ལས་སྐྱོན་བྱུང་བའི་མན་ངག་ཚད་མ་མ་ཡིན་པ་དང་༔ ཡང་དག་པའི་ལུང་གིས་མ་ཟིན་པའི་སྐྱོན་ལས་འབྱུང་བས་ཏེ༔ དེ་ལྟར་དྲན་བཟོ་དང་འདི་ཡིན་སྙམ་པ་དང་མིན་སྙམ་པ་དང་པྲ་སེ་ན་འདོད་པའི་ཕྱིར་སོང་བ་ཞེས་བྱའོ་བཀའ་ལ་གཟུ་ལུམས་རས་ཆོད་བྱེད་པར་འགྱུར༔ ངོའི་འབྲས་བུ་ནི་སེམས་ཀྱི་སྣང་བ་རྡོ་རྗེ་དམྱལ་བ་ལས་འགྲོ་ས་མེད་དོ༔ རང་དགེ་དང་ཡུལ་དང་གནས་སུ་ཉོན་མོངས་པ་དགོངས་པ་འདུས་མི་འགྱུར་བའི་དོན་དང་གནས་སྐབས་སུ་ཤེས་རབ་ནི༔ ཡང་ཐོག་མར་ཤེས་རབ་ཆུང་བས༔ རྒྱལ་བས་བཀའ་རྒྱུད་ལྡེམ་དགོངས་སུ་གསུངས་པ་ལ་སོགས་པ་ལ་ཡིད་ཀྱིས་མ་རྟོགས་ནས༔ སོ་སོའི་བཀའ་ལ་རས་ཆོད་དང་འདོད་གཞུང་དུ་ཚིག་རང་དག་རང་གསལ་གིས་ལེགས་བསྒྲིགས་འཐད་པས་ཀྱང་ཡོད་དོ༔ འདི་ནི་བློ་ཐེ་ཚོམ་མ་ཆོད་པ་ཡིན་ཏེ༔ ཆོས་ཀྱི་མི་འགྱུར་བ་ནི་ཡང་དག་པའི་ཤེས་པའི་གདིངས་ཀྱིས་ཟིན་པ་ནི་མེད༔ འདི་ལྟར་ཡིན་ནམ་སེམས་མིན་ནམ་སེམས་པས་སྙེམ་བྱེད་ཀྱི་བློ་ཅན་ཞེས་བྱ་སྟེ༔ ཤེས་རབ་ཏུ་བསྒྱུར་ཡང་ཤེས་རབ་མ་ཡིན༔ འདིས་ནི་འཁོར་བའི་ཤེས་རབ་ཕྱིན་ཅི་ལོག་གི་ས་བོན་འདེབས་པར་བྱེད་པ་ལས༔ ཐར་པ་ལ་རྡུལ་གྱི་ཆ་ཡང་མེད་པའི་སྟེང་དུ་ངན་སོང་དུ་འཕེན་པར་བྱེད་པའི་གྲོགས་ཡིན་ནོ༔ གཉིས་པ་ཡང་དག་པའི་ཤེས་རབ་བསྟན་པ་ལ་གསུམ་སྟེ༔

ཐོས་པའི་ཤེས་རབ་ཀྱིས་ཕྱིའི་སྒྲོ་འདོགས་གཅོད༔ བསམ་པའི་ཤེས་རབ་ཀྱིས་ནང་གི་འཁྲུལ་པ་བཟློག་པ་དང༔ སྒོམ་པའི་ཤེས་རབ་ཀྱིས་གསང་བའི་ཉོན་མོངས་པ་གཅོད་པར་བྱེད་པའོ༔ དེ་ལ་སྒྲོ་འདོགས་གཅོད་པ་ནི་ཚིག་ཡིན་ཏེ༔ ཚིག་གཅིག་མ་བྱུང་ན་མ་བྱུང་༔ བྱུང་ཕན་ཆད་དུ་སྒྲོ་འདོགས་པ་ནི་ཚིག་ཡིན་པས༔ ཆོས་ཉིད་སངས་རྒྱས་ཀྱི་དགོངས་པ་ཚིག་དང་བློ་ལས་འདས་པ་ཡིན་པས་ཤེས་རབ་ཀྱི་ཚིག་གིས་ཞེན་པའི་སྤྲོས་པ་གཅོད་པའི་དུས་ན་སྒྲོ་འདོགས་པ་ཞེས་བྱ་སྟེ༔ ཤེས་རབ་ཡང་དག་པ་ཡིན་ནོ༔ དེ་ལ་བསམ་པའི་ཤེས་རབ་ཀྱིས་ནང་གི་འཁྲུལ་པ་ཟློག་པར་བྱེད་པ་ནི༔ འདི་ལྟར་སྣང་བའི་སེམས་དང་སེམས་ལས་བྱུང་བའི་འཁྲུལ་པའི་མངོན་ཞེན་ཐམས་ཅད་ནམ་ཆོད་ཙ་ན་ཡང་དག་པའི་ཤེས་རབ་ཡིན་ནོ༔ ཉོན་མོངས་པ་སྒོམ་པའི་ཤེས་རབ་ཀྱི་གསང་བ་སོགས་པ་སྟེ་གཅོད་པར་བྱེད་པ་ནི༔ རང་གི་རྒྱུད་ལ་ཉོན་མོངས་པ་སྐྱེས་པའམ༔ སྐྱེ་བར་བྱེད་པ་ཙམ་ཡང་མེད་ཙ་ན་ཡང་དག་པའི་ཤེས་རབ་ཡིན་ནོ༔ དེ་ཡང་ཡང་དག་པའི་ཤེས་རབ་མ་ཡིན་པ་ལ་མ་ཡིན་པ་ནི་ཡིད་ཀྱིས་དཔྱད་པ་མ་ཡིན་ཏེ༔ དེ་ལྟར་ཀ་དག་ཆེན་པོ་རིམ་གྱིས་མ་ཡིན་པར་ཅིས་ཤེས་ན་ཤེས་རབ་ལ་བརྟགས་ཤིང་དཔྱད་མི་དགོས༔ ཤེས་རབ་ཆེན་པོས་སྐད་ཅིག་ལ༔ ཆོས་ཀུན་གནས་ལུགས་ཏེ་ཁོང་དུ་ཆུད་པས་ཐོག་བབས་སུ་ཏེ༔ དེ་ལྟར་ཆུད་པས་མངོན་པར་རྟོག་པ་ཤར་ནས༔ ཚིག་གི་མཐའ་ཐམས་ཅད་ཆོད་པའོ༔ ཐེ་ཚོམ་དང་ཡིད་གཉིས་དང་སོམ་ཉི་དང་སྙེམ་བྱེད་ཀྱི་སྒྲོ་འདོགས་ལ་སོགས་པ་རྣམས་ལ་ལོག་པས་ན་ཤེས་པ་ཐམས་ཅད་ཀྱི་རབ་ཡིན་པས་ན་ཤེས་རབ་ཅེས་བྱའོ༔ ཤེས་རབ་གྱི་རྣམ་གྲངས་ཀུན་གྱི་ནང་ནས་འདི་ནི་ཐོག་མ་མེད་པའི་ཤེས་རབ་བོ༔ དེ་ཡང་ཐམས་ཅད་སྐྱེ་མེད་སྟོང་པ་ཉིད་དུ་རྟོགས་པ་དེ་ཉིད་འདུས་སོ། ཐམས་ཅད་ལ་མཉམ་པ་ཉིད་ཀྱི་ཤེས་རབ་ཀྱིས་འགྲོ་བའི་ལུས་འཛིན་པ་ཞེས་བྱ་བ་ཐམས་ཅད་གཅིག་ཏུ་འདུས་པ་ཡིན་ནོ༔ ཡང་འབྱེད་ན༔ འཇིག་རྟེན་པའི་ཤེས་རབ་དང་༔

འདས་པའི་ཤེས་རབ་བོ༔ འཇིག་རྟེན་པ་ནི༔ བློ་དང་བཅས་པའི་ཤེས་རབ་དང་༔ གཏན་ཚིགས་རྗེས་སུ་སྟོན་པ་རྣམས་དང་༔ ཕྱིན་ཅི་ལོག་ཤེས་པ་འཇུག་པར་བྱེད་པ་རྣམས་སོ༔ འདས་པ་ནི་དེ་དག་རྣམས་ལས་ལོག་པ་ཡིན་ནོ༔ དེ་ཡང་འདས་པའི་ཤེས་རབ་ལ་བསྡུས་ན༔ ཐོས་པ༔ བསམ་པ༔ སྒོམ་པ་གསུམ་ཡིན་ནོ༔ དང་པོ་གང་ཟག་གི་སྒོམ་གྱིས་ལ་ལ་ཐོས་པའི་ཚིག་ལ་ཤེས་རབ་ཆེ་བ་དང་། ལ་ལ་བསམ་པའི་ཚིག་དོན་འགྲེལ་བ་ལ་ཤེས་རབ་ཆེ་བ་དང་། ལ་ལ་སྒོམ་པའི་ཚིག་དོན་ལ་ཤེས་རབ་ཆེ་བ་ཡང་ཡོད་དེ་ཤེས་རབ་ཀྱི་མཚན་ཉིད་ནི༔ ཐོས་པའི་ཤེས་རབ་ཀྱི་མཚན་ཉིད་ནི༔ ཕྱོག་རིས་མེད་པ་མང་དུ་ཐོས་ཤིང་ཚིག་ལ་ཆད་ལྷག་མེད་པར་ཤེས་པས་ཕྱི་ནང་གི་སྤྲོས་པ་ཆོད་པའོ༔ བསམ་པའི་ཤེས་རབ་ཀྱི་མཚན་ཉིད་ནི༔ སེམས་ཀྱི་ཚིག་དང་དོན་དུ་བཅས་པ་ལ་བརྟགས་ཤིང་བཤད་པར་བྱེད་པའོ༔ སྒོམ་པའི་ཤེས་རབ་ཀྱི་དོན་ཕྱིན་ཅི་མ་ལོག་པར་རྒྱུད་ལ་ཤར་པའོ་མཚན་ཉིད་ནི༔ སྒོམ་པས་ཉམས་རྣམས་རྫོགས་ཏེ་དགོངས་པ་རྒྱུད་ལ་ཤར་བའོ་ཉོན་མོངས་པ་རྣམས་ལས་རིང་དུ་སྤང་པའོ༔ ཤེསརབ་ཀྱི་ཡུལ་ནི༔ ཚིག་དོན་ཕྱེད་མ་གཅིག་བསྟན་པ་ནི༔ ཐོས་པའི་ཤེས་རབ་ཀྱི་ཡུལ་ནི་ཚིག་ཡིན༔ བསམ་པའི་ཤེས་རབ་ཀྱི་ཡུལ་ནི་ཚིག་དོན་ཕྱེད་མ་གཙོ་ཆེ་ཡིན༔ སྒོམ་པའི་ཤེས་རབ་ཀྱི་ཡུལ་ནི་ཚིག་དོན་གང་ལ་ཡང་མི་རྟོག་པ་ཡིན་ནོ༔ ཤེས་རབ་ཀྱི་བྱེད་པའི་ལམ་བསྟན་པ་ནི༔ ཐོས་པའི་ཤེས་རབ་ཀྱིས་སྤྲོས་ཚིག་གི་སྤྲོས་པ་གང་ཡིན་པ་དང་ཤེས་པའི་སྤྲོས་པ་དང་ཕྱི་ནང་གི་ཚིག་གོ་པའི་མཐའ་བཅད་པ་ནས་ཐ་མ་བློ་གང་ལ་ཡང་མི་འཇུག་པར་བྱེད་པའོ༔ བསམ་པའི་ཤེས་རབ་ཀྱིས་ཚིག་དོན་ཕྱེ་སྟེ༔ ཚིག་གི་ཞེན་པ་དང་བྲལ་བར་བྱེད་དོ༔ སྒོམ་པའི་ཤེས་རབ་ཀྱིས་འཁྲུལ་པར་རྣམ་པར་རྟོག་པ་དང་༔ ཉོན་མོངས་པའི་རྣམ་པར་རྟོག་པ་བཅད་ནས༔ རྣམ་པར་མི་རྟོག་པའི་ཡེ་ཤེས་ལ་གནས་པར་བྱེད་པ་ཡིན་ནོ༔ ཤེས་རབ་ཏུ་འདོགས་པར་བསྟན་པའོ་ཀྱི་འཐད་པ་ནི༔ ཐོས་པའི་ཤེས་རབ་ཏུ་འདོགས་

པ་འཐད་པ་ནི༔ དཔེར་ན་རབ་ཏུ་སྙན་པའི་གཏམ་རྒྱུད་ངོ་མཚར་ཅན་ཐོས་པས་སྐྱེས་བུའི་སེམས་རངས་པ་དང་འདྲ༔ ཟབ་མོའི་ཆོས་ཐོས་པ་ཙམ་གྱིས་དད་པ་ཁྱད་པར་ཅན་སྐྱེས་པ་དང་སྐྱེས་བུ་དེའི་སེམས་རངས་ཤིང་ང་རྒྱལ་ལ་སོགས་པ་ཞི་ནས་རྒྱ་ཆེ་བའི་བྱང་ཆུབ་ཀྱི་སེམས་སྐྱེ་བ་དང་༔ གྲུབ་མཐའི་མཚན་ཉིད་ཤེས་ཤིང་རྟོགས་པ་ནི་ཐོས་པའི་ཤེས་རབ་བོ༔ བསམ་པའི་ཤེས་རབ་ཏུ་འདོགས་པ་བློ་སྒྲིན་པོས་རྟོགས་པ་འཕེལ་བས་ཚིག་འཕེལ་་བ་ནི༔ དཔེར་ན་སྐྱེས་བུ་འདོད་ཅན་པའི་ཕྱིར་བསམ་ན་འདོད་པ་འཕེལ་བས་བསམ་པ་ལ་ཐུག་པ་མེད་པ་དང་འདྲ་བར༔ ཚིག་མ་བསམ་པས་ཚིག་ལ་ཐུག་པ་མེད་པ་ཕྱི་ནང་གི་ཡིན་ནོ༔ ཡིད་དཔྱོད་ཚིག་གིས་མཐའ་བརྟོལ་བ་ནི༔ ཡང་དག་པའི་བསམ་པའིཤེས་རབ་ཚིག་ཕྱིར་དོན་འབྲེངས་མ་ཡིན་ནོ༔ ཆོས་ཉིད་དེ་བཞིན་ཉིད་གདོད་ནས་བྱས་པ་མེད་པའི་སེམས་ཉིད་ལ་དྲན་རྟོག་བློ་ཡི་དོན་ལ་སྙིང་པོའི་ཆོས་དོན་དམ་མཆོག་དང་བཅས་པ་རང་བདེན་བསླུས་ཀྱི་དོན་ལ་བསམ་པས་དོན་གྱི་ཚད་ཟིན༔ ཚིག་གི་སྤྲོས་པ་ཆོད་ཙམ་ཚིག་གིས་དོན་རྙེད་ཡིད་གཉིས་ཐེ་ཚོམ་ཆོད་ན་ཡང་དག་པ་མ་ཡེངས་པའི་ངང་ལས་བསམ་པའི་ཤེས་རབ་བོ༔ སྒོམ་པའི་ཤེས་རབ་ཏུ་འདོགས་པའི་འཐད་པ་ནི༔ ཐོས་ཤིང་བསམ་པའི་ངོ་བོ་ཡང་དག་པའི་གནས་ལུགས་དེ་ཉིད་ལ་སྒོམ་ཡུན་བསྲིངས་པ་ལས༔ ཐོབ་བྱའི་སྐུ་གསུམ་ཡེ་ཤེས་ལྔའི་ཆོས་ཀྱི་དབྱིངས་འབྲས་བུའི་དོན་ཁོང་དུ་ཆུད་པས༔ མཁྱེན་པའི་ཡེ་ཤེས་ཀྱི་ཤེས་རབ་ནི་སྒོམ་པ་ལས་བྱུང་བའི་ཤེས་རབ་ཏུ་འཐད་དོ་བོ༔ ཤེས་རབ་བསྡུས་པ་བསྟན་པ་ནི༔ གནས་ལུགས་ཤེས་རབ་ཀྱིས་མ་རྟོགས་པས་ཐོས་པའི་དོན་ཁ་ཁྱེར་དུ་སོང་བ་ཡིན༔ ཤེས་རབ་ཀྱིས་གྲུབ་མཐའི་ཕུགས་མ་རྟོགས་པས་དོན་མ་རྙེད་པས་སྤྲོས་པ་མ་ཆོད་པའོ། །བསམ་པའི་གོལ་ས་ཡིད་དཔྱོད་ཚིག་གི་ཕྱིར་འབྲེངས་པ་ཡིན༔ སྒོམ་པའི་ཤེས་རབ་ཀྱི་གོལ་ས་བསྟན་པ་ནི༔ ཉམས་སུ་མྱོང་བས་དྲོད་རྟགས་སོ་ཚིག་གི་

སྡེབ་སྦྱོར་དང་༔ ཉམས་ལེན་མེད་པའི་རྟགས་སོ། །འབྱེད་པ་ལ་མཁས་པ་འཇིག་རྟེན་པའི་ལོ་འདོད་དུ་སོང་བ་ཡིན་ནོ༔ ཤེས་རབ་ཀྱི་ས་མཚམས་བསྟན་པ་ནི༔ ཐོས་པའི་ཤ ེས་རབ་ཀྱི་ས་མཚམས་ནི་དོན་གྱི་རོ་མ་མྱོང་བར་དུ་ཡིན་ནོ་ཡིད་གཉིས་དང་ཐེ་ཚོམ་ཆོད་ཚུན་ཆད་ཡིན༔ ཆོས་མ་རྟོགས་ཀྱི་བར་ལ་ཐོས་དགོས་པ་ཡིན་དེ་ནས་ཐོས་པ་མི་དགོས་བསམ་པས་ཆོག༔ ཚིག་ཏུ་ཟིན་དོན་དུ་གོ་ན་ཐོས་པ་རྫོགས་པ་ཡིན༔ བསམ་པའི་ཤེས་རབ་ཀྱི་ས་མཚམས་ནི༔ ཚིག་དང་དོན་དུ་འདྲེས་ཏེ་ཉམས་སུ་ལེན་ཤེས་ཙ་མ་འདྲེས་བར་དུ་ཡིན་ནོ་ན༔ བསམ་པའི་ཤེས་རབ་རྫོགས་པ་ཡིན༔ སྒོམ་པའི་ཤེས་རབ་ཀྱི་ས་མཚམས་བསྟན་པ་ནི༔ ཉོན་མོངས་པ་རྣམ་རྟོག་ཟད་ནས་བསྒོམ་མི་དགོས་མ་ཟད་ཀྱི་བར་བསྒོམ་དགོས་ཏེ༔ དེ་ནས་བསམ་མི་དགོས་སྒོམ་པས་ཆོག་ཉོན་མོངས་པ་དང་རྣམ་རྟོག་ཟད་ཙམ་ན་སྒོམ་པའི་ཤེས་རབ་རྫོགས་པ་ཆོས་ཟད་པས་ཡིན༔ ཤེས་རབ་ཀྱི་ལྡང་ཚད་བསྟན་པ་ནི༔ ཐོས་པའི་ཚད་ནི་བླ་མའི་གསུང་ལ་ལྷག་ཆད་མེད་པར་ཤེས་ཤིང་མདོ་རྒྱུད་ཀྱི་དགོངས་པ་ཕྱིན་ཅི་མ་ལོག་པས་ལྟ་བ་ཁྲོལ་ཙ་ན༔ ཐོས་པའི་ཤེས་རབ་ལ་ལྡང་བ་ཡིན་ནོ༔ སྔ་མ་བསམ་པའི་ཚད་ནི་བཀའ་ལུང་མཐོང་མ་མཐོང་ལྟ་མ་མྱོང་བའི་ཆོས་ཀུན་ལ་མན་ངག་ཐེག་པ་ཕྱིན་ནང་གི་རྟོག་དཔྱོད་ཚུད་ཅིང་དོན་གོ་ཕྱེད་ཙམ་ན༔ བསམ་པའི་ཤེས་རབ་ལྡང་བ་དགོངས་པ་ཁྲོལ་བ་ཡིན་ནོ༔ སྣང་བ་སྣ་ཚོགས་འདི་ཉིད་ལ་སྒོམ་པའི་ཚད་ནི་ཕྱི་ནང་ཡུལ་གང་ལ་ཡང་བལྟས་ཀྱང་སྐྱེ་བ་མེད་དོ་བསྟན་ཏེ༔ ཆོས་ཉིད་དུ་བྲལ་གྱིས་འཆར་བའམ༔ ཡང་ན་མཉམ་རྗེས་ལ་ཁྱད་མེད་པར་མཉམ་པ་ཉིད་དུ་འཆར་བ་ཙམ་ན༔ སྒོམ་པའི་ཤེས་རབ་ལྡང་པ་ཡིན་ནོ༔ ཤེས་རབ་ཀྱི་འབྲས་བུ་བསྟན་པ་ནི༔ ཐོས་པའི་ཤེས་རབ་ཀྱི་འབྲས་བུ་ནི༔ དོན་གྱི་ངོ་བོ་རྙེད་ཅིང་ཐེ་ཚོམ་དང་ཡིད་གཉིས་དང་བྲལ་བ་ཡིན་ཚིག་གིས་སྤྲོས་པའི་མཐའ་ཆོད་པའོ༔ བསམ་པའི་ཤེས་རབ་ཀྱི་འབྲས་བུ་ནི་ཆོས་དང་ཆོས་མ་ཡིན་པ་ཕྱེད་པའོ༔

སྒོམ་པའི་ཤེས་རབ་ཀྱི་འབྲས་བུ་ནི༔ ཉོན་མོངས་པའི་དབང་དུ་མ་གྱུར་ཅིང་གྲོལ་ནས་ཡེ་ཤེས་ཡང་དག་པའོ། །དང་པོཉམས་དང་བར་དུ་དྲོད་དང༔ ཐ་མ་རྟགས་རྫོགས་ཏེ་ཐམས་ཅད་མཁྱེན་པའི་ཡེ་ཤེས་ཀྱི་འབྲས་བུ་ཐོབ་པའོ༔ དེ་ཡང་ཐོས་པའི་ཤེས་རབ་ཀྱིས༔ ཕྱིའི་ཚིག་དང་ཡི་གེའི་སྒྲོ་འདོགས་ཆོད་པས་སྤྲུལ་སྐུ་ཐོབ་པའོ༔ དོན་ལ་བསམ་པའི་ཤེས་རབ་ཀྱིས་ནང་གི་སྒྲོ་འདོགས་ཆོད་པས་ལོངས་སྤྱོད་རྫོགས་པའི་སྐུ་ཐོབ་པའོ༔ སྒོམ་པའི་ཤེས་རབ་ཀྱིས་གསང་དུ་ཡོད་པས་གཏན་ལ་ཕབས་སྒྲོ་འདོགས་ཆོད་པའི་ཡེ་ཤེས་དང་ཆོས་ཉིད་ཀྱི་སྒྲོ་འདོགས་ཆོད་པས་ཆོས་སྐུ་ཐོབ་པའོ༔ ཤེས་རབ་བསྡུས་པའི་སྒྲོན་མ་ཞེས་བྱ་བ༔ སློབ་དཔོན་ཆེན་པོ་བྱེ་མ་ལ་མུ་ཏྲས་མཛད་པ་རྫོགས་སོ༔ སྐལ་ལྡན་ལས་འཕྲོ་ཅན་དང་འཕྲད་པར་ཤོག༔ རྒྱ་རྒྱ་རྒྱ་༔ གྷུ་ཧྱ༔ བཅོམ་ལྡན་འདས་ཡེ་ཤེས་རང་དག་ཉིད་ལ་ཕྱག་འཚལ་ལོ༔ ཡེ་ཤེས་བསྡུས་པའི་སྒྲོན་མ་འདི་ལ་དོན་བཅུ་གསུམ་གྱིས་བསྟན་ཏེ༔ དང་པོ་ཡེ་ཤེས་ཀྱི་རྒྱུ་གསུམ་ནི༔ སྣང་བས་མ་ཕྲོགས༔ ཤེས་པས་མ་བསྒྱུར༔ དངོས་པོའི་མཐའ་ཟད་པ་དང་གསུམ་མོ༔ ཡེ་ཤེས་ཀྱི་ངོ་བོ་གསུམ་ནི༔ རང་བྱུང་དུ་གནས་པ༔ མི་འགྱུར་བ༔ ཡེ་གདངས་དང་བཅས་པའོ༔ ཡེ་ཤེས་ཀྱི་མཚན་ཉིད་གསུམ་ནི༔ གསལ་བ༔ མ་འདྲེས་པ༔ ཡེ་ནས་སྟོང་ཞིང་རྫོགས་པའོ༔ ཡེ་ཤེས་ཀྱི་གདངས་གསུམ་ནི༔ བསམ་པ་ཟད་པ༔ གསལ་ལ་མི་རྟོག་པ༔ བློའི་མཐའ་ཟད་པའོ༔ ཡེ་ཤེས་ངོས་རང་གསལ་འཛིན་མེད་བཟུང་བ་ལ་གསུམ་སྟེ༔ སྨན་པ་མཁས་པས་ནད་ངོས་བཟུང་ནས་ནད་བྱང་སྟེ་བདེ་བ་ཐོབ་པ་ལྟ་བུའོ༔ ཡེ་ཤེས་དེ་ལ་འདས་པའི་རྗེས་མ་བཅད་མ་འོངས་པའི་སྔོན་མ་བསུ་ད་ལྟར་བར་འཛིན་པ་མེད་དོ་ལམ་དུ་འཁྱེར་བ་ནི༔ ཡེ་ཤེས་སྤྱི་བླུགས་ཀྱི་མཁའ་ལ་ཉི་མ་ཤར་བ་ལྟ་བུར་ལམ་དུ་འཁྱེར༔ ཡེ་ཤེས་གནས་པའི་གདམས་

ངག་རུས་སྦལ་འཁར་གཞོང་དུ་བཅུག་པ་ལྟ་བུར་ལམ་དུ་འཁྱེར་རོ༔ ཡེ་ཤེས་ཀྱི་རྩལ་ནི༔ སྒོ་ལྔ་ལ་འཆར་ཏེ༔ མིག་འཛིན་མེད་དེ་སྣང་སྟོང་༔ རྣ་བས་ཐོས་པས་གྲགས་སྟོང་༔ སྣས་ཚོར་བས་དྲི་སྟོང་༔ ལྕེས་མྱོང་བས་བདེ་སྟོང་༔ ལུས་འཛིན་མེད་རེག་སྟོང་༔ ཡེ་ཤེས་ཀྱི་ཡོན་ཏན་ལྔ་ལ༔ ཐིམ་པ་ལ་མི་རྨུགས་པ༔ གསལ་བ་ལ་མ་ཡེངས་པ༔ སྟོང་པ་ལ་ཕྱང་མ་ཆད་པ༔ གནས་པ་ལ་ཟང་ཐལ་བ༔ དངོས་པོ་ལ་བདག་ཏུ་མ་བཟུང་བའོ༔ ཡང་ན་ཡེ་ཤེས་ཀྱི་ཡོན་ཏན་ནི༔ ཡེ་ཤེས་ལྔར་རྟོགས་པས་ཉོན་མོངས་པ་ལྔ་ཡེ་ཤེས་སུ་གསལ་བའོ༔ ཡེ་ཤེས་གནས་པའི་སའམ་ལམ་ལྔ་ནི༔ རང་གི་སྙིང་གི་དཀྱིལ་ན་ཤེས་རིག་གི་རྒྱལ་པོ་རང་གིས་རང་གསལ་བར་གནས་པའོ༔ རྩ་རོ་མ་ན་ཐིག་ལེའི་དངས་མ་ཉུང་འབྲུ་ཙམ་གནས༔ རྐྱང་མ་ན་རླུང་གི་དངས་མ་ཏིལ་འབྲུ་ཙམ་གནས༔ ཀུན་དྷར་ན་འོད་ཀྱི་དངས་མ་སྲན་མ་ཙམ་གནས༔ ཨ་ཝ་དྷཱུ་ཏི་ན་ཤེས་པའི་དངས་མ་རྟ་རྔའི་སུམ་ཆ་ཙམ་གནས་སོ༔ ཡེ་ཤེས་འཆར་བའི་སྒོ་བཞི་ནི༔ མིག་གཡས་ཡེ་ཤེས་གསལ་བར་བྱེད་པ་ནས་ཐིག་ལེ་སྟོང་པའི་སྒྲོན་མ་དང་བཅས་ཏེ་འཆར༔ མིག་གཡོན་པ་ནས་ཤེས་རབ་རང་བྱུང་གི་སྒྲོན་མ་ཡེ་ཤེས་སྐྱེད་བྱེད་འཆར༔ རྣ་བ་གཡས་ནས་དབྱིངས་རྣམ་པར་དག་པའི་སྒྲོན་མ་འཆར༔ རྣ་བ་གཡོན་པ་ནས་རྒྱང་ཞག་ཆུའི་སྒྲོན་མ་འཆར་ཏེ༔ སྒོ་ལྔའི་ཤེས་པ་བསྐྱེད་པའོ༔ ཡེ་ཤེས་ཀྱི་དབྱེ་བ་ནི་གཉིས་ཏེ༔ གཞི་གནས་ཀྱི་ཡེ་ཤེས་དང་༔ མཚན་འཛིན་པའི་ཡེ་ཤེས་སོ༔ གཞི་གནས་ལ་གསུམ་སྟེ༔ ངོ་བོ་ཀ་དག་གི་ཡེ་ཤེས་དང་༔ རང་བཞིན་ལྷུན་གྲུབ་ཀྱི་ཡེ་ཤེས་དང་༔ ཐུགས་རྗེས་རིག་པ་ཀུན་ལ་ཤར་བས་ཀུན་གྲོལ་གྱི་ཡེ་ཤེས་སོ༔ དེ་ལ་རིག་པ་ཉིད་འཁྲུལ་མ་མྱོང་བས༔ ངོ་བོ་ཡེ་ནས་ཀ་དག་གི་ཡེ་ཤེས་སུ་བཞུགས་པས༔ འཁོར་བ་ལ་ཐོག་མ་མེད་པའི་གནད་དང་༔ རིག་པ་ལ་རང་བཞིན་དེས་ཀུན་ལ་ཁྱབ་

པས༔ རང་བཞིན་ལྷུན་གྲུབ་ཀྱི་ཡེ་ཤེས་སུ་བཞུགས་པས་གནད་ཤེས་པ་རྣམས་སངས་མི་རྒྱ་མི་སྲིད་པ་དང་༔ རིག་པ་དེ་སྣ་ཚོགས་སུ་ཤར་བས༔ ཐུགས་རྗེས་ཀུན་གྲོལ་གྱི་ཡེ་ཤེས་སུ་བཞུགས་པས༔ འབད་རྩོལ་བྱ་མི་དགོས་པར་ཡོངས་སུ་གྲོལ་བའོ༔ མཚན་ཉིད་འཛིན་པའི་ཡེ་ཤེས་ནི་ལྔ་སྟེ༔ ཆོས་ཉིད་ཀྱི་ངང་ལས་གསལ་ལ་མ་འགགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ༔ ངོ་བོ་ཀ་དག་ཏུ་དེ་ལ་འཁོར་འདས་གཟུགས་བརྙན་གསལ་བ་གནས་པ་ནི༔ མེ་ལོང་ལྟ་བུའི་ཡེ་ཤེས་སོ༔ རང་གི་གཞི་ལས་མ་གཡོས་ཤིང་༔ ཆོས་ཐམས་ཅད་མཉམ་པར་ཤེས་པས་ན༔ མཉམ་དེ་ཉིད་མཉམ་པ་རིས་མེད་དུ་ཁྱབ་པས་ན་པ་ཉིད་ཀྱི་ཡེ་ཤེས་སོ༔ ཆགས་པ་མེད་པར་གསལ་བ་ནི༔ ཡེ་ཤེས་ལྔ་པོ་དེ་ཐ་མི་དད་པར་ཆོས་ཉིད་དུ་འདུས་པས་སོ་སོར་རྟོག་པའི་དེ་སྣང་ཚུལ་སོ་སོའི་མཚན་ཉིད་དུ་ཤར་བས་ཡེ་ཤེས་སོ༔ ལུང་ལས་ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀུན་མེད་པར་འགྱུར། །རྩོལ་སྒྲུབ་ཀྱི་མཐའ་དང་བྲལ་བ་རང་བཞིན་གྱིས་གྲུབ་པ་ནི༔ བྱ་བ་ནན་ཏན་གྱི་ཡེ་ཤེས་སོ༔ ངེས་ཚིག་ནི་ཡེ་ཤེས་རྒྱུན་མི་ཆད་པར་བཞུགས་པས་ཏེ་ཡེ་ནས་འཛིན་པའི་སངས་རྒྱས་རྒྱུ་ཡིས་མ་སྐྱེད༔ རྐྱེན་གྱིས་མ་ཤིགས༔ འགྲོ་འོང་མེད་པ་ཞེས་སོ༔ དུས་ཐམས་ཅད་དུ་རྟག་པར་ཡེ་ནས་བཞུགས་ཏེ༔ ཕྱོགས་དང་སྔ་ཕྱི་ལས་མི་ལྟོས་པའོ༔ ཞེས་པ་ནི༔ དེ་ཉིད་ཀྱི་ཤེས་པ་དོན་ཇི་ལྟ་བར་ཤེས་པ་ཡིན་ཏེ༔ རྟོག་པ་མངོན་གྱུར་གྱི་སངས་རྒྱས་དང་ཅོག་བཞག་ཏུ་གཞན་དུ་ཤེས་པ་ལ་རྟོག་པའི་གཟེར་ཐེབས་པས་ཕྱིར་མི་ལྡོག་པའི་ས་ནོན་པའོ༔ ཡེ་ཤེས་བློ་འདས་ཆེན་པོར་ངོ་སྤྲད་ཅིང་ལ་བཟླ་བ་ནི༔ ལམ་ལས་མ་བསྒྲོད་པའི་འབྲས་བུ་གཞི་ཐོག་ཏུ་གྲོལ་བས༔ ལྷུན་གྲུབ་ཀ་དག་ཏུ་རྟོགས་པས་རང་སྣང་འཁྲུལ་པ་ལས་མ་བསྒྱུར་བའི་ཤེས་རབ༔ ཡེ་ནས་རང་ལ་གནས་པས་ལུང་ལས་མ་བྱུང་བའི་ཡེ་ཤེས༔ བྱེད་མཁན་མེད་པས་རྒྱུད་ལ་མ་བརྟེན་

པའི་རྟོགས་པ༔ སངས་རྒྱས་རྒྱུ་ལས་མ་བསྐྱེད་སེམས་ལས་མ་བྱུང་བའི་སངས་རྒྱས༔ བུ་ཐོག་མ་གྲོལ་བས་ཆོས་ལས་མ་བྱུང་བའི་དད་པ༔ མ་ཐོག་ཏུ་བུ་གྲོལ་བས་བསྒོམས་པ་ལས་མ་བྱུང་བའི་ཉམས་མྱོང༔ བལྟས་པས་ལྟ་བྱེད་ལ་འདས་པའི་ཤེས་རབ་མ་མཐོང་བའི་ལྟ་བ༔ རང་གི་འདུག་ཚུལ་གྱི་དོན་བླ་མ་ལས་མ་བྱུང་བའི་གདམས་ངག༔ ང་བདག་ཏུ་བཟུང་བས་སེམས་ཅན་རང་ཐོག་ཏུ་གྲོལ་བས་ལྟ་སྤྱོད་ཡ་མ་བྲལ་བས་ཡེ་ཤེས་རང་སོ་ན་གསལ༔ སེམས་མ་བཅིངས་པས་ཡ་མ་བྲལ་བས་སྒོམ་ཉམས་ཡེངས་བ་མེད་པའི་ཡེ་ཤེས་རང་སྣང་༔ གཉིས་འཛིན་ཡ་བྲལ་བས་རང་བྱུང་ཡེ་ཤེས་ཆེན་པོར་རང་ཤར་བའོ༔ ཡེ་ཤེས་བསྡུས་པའི་སྒྲོན་མ་ཞེས་བྱ་བ༔ སློབ་དཔོན་ཆེན་པོ་བྱེ་མ་ལ་མུ་ཏྲས་མཛད་པ་ཟངས་ཡིག་ཅན་རྫོགས་སོ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ རིག་པ་བསྡུས་པའི་སྒྲོན་མ་འདི་ལ་སྤྱི་དོན་བརྒྱད་ཀྱིས་བསྟན་ཏེ༔ རིག་པ་རང་གི་ངོ་བོ་ངོས་བཟུང་བ་དང་གཅིག༔ རིག་པའི་ངེས་ཚིག་དང་༔ རིག་པའི་དབྱེ་བ་བསྟན་པ་དང་༔ རིག་པ་སྐུ་གསུམ་དུ་གཏན་ལ་དབབ་པ་དང་༔ རིག་པ་ལྟ་སྒོམ་སྤྱོད་གསུམ་གཏན་ལ་དབབ་པ་དང་༔ རིག་པ་ཐིག་ལེ་ཉག་གཅིག་ཏུ་གཏན་ལ་དབབ་པ་དང་༔ རིག་པ་དགེ་སྡིག་ལས་འདས་པར་བསྟན་པ་དང་༔ རིག་པའི་འདུག་ཚུལ་གསུམ་དུ་གཏན་ལ་དབབ་པ་དང་བརྒྱད་དོ༔ དེ་ལ་དང་པོ་རང་རིག་པའི་ཡེ་ཤེས་ཞེས་བྱ་བ་འདི་ནི༔ སེམས་དང་ཡིད་བསམ་པ་ལས་གྲོལ་བ༔ ཤེས་པ་སྒྲིན་པོ་དང་བཅས་པ་རིག་གེ་སིང་ངེ་བ་གཏིང་ནས་ཧྲིག་ཆགས་པ་ཉམས་སིང་བག་དང་བཅས་པ༔ ངོ་བོ་གཟུང་བར་དཀའ་ཡང་རང་བཞིན་དལ་ཆགས་པ༔ རིག་པའི་རྡོ་རྗེ་ལུ་གུ་རྒྱུདཡུལ་ནམ་་མཁའ་དང་སྤྲད་པའི་ཚེ༔ རིག་པ་འཁྲུལ་པ་མེད་པའི་ཤེས་པ་དེ་ཧྲིག་གེ་སང་ངེ་སལ་ལེ་འདུག་ཀྱང་ཡུལ་གཟུང་ཆ་དང་ཤེས་པ་བདག་ཏུ་འཛིན་པ་མེད༔ སྣང་བ་རིག་པའི་རང་སྣང་༔ ཤར་བ་སྣང་བ་རང་ཤར༔ གཞི་གནས་པ་རང་

གནས༔ མཐོང་བ་ཤེས་རབ་ཀྱི་མིག་རང་མཐོང༔ གྲོལ་བ་ལྟ་བ་རང་གི་རང་དུ་གྲོལ་བ་ཡིན་ནོ༔ གཉིས་པ་ངེས་ཚིག་གམ་མཚན་ཉིད་ནི༔ འགྱུ་བས་སྒྲིན་པ༔ ཤེས་པ་དང་འོད་ཕྲ་ཞིང་སྣང་བས་རིག་པ༔ རིག་ཅིང་རང་གི་རིག་པས་བལྟས་པས་གསལ་བ་མི་འགྱུར་བའོ༔ གསུམ་པ་རིག་པའི་དབྱེ་བ་ནི་ལྔ་སྟེ༔ མཚན་ཉིད་སྤྱིའང་འཛིན་པའི་རིག་པ་དང་༔ གཞི་འཛིན་ཤེས་པ་བསྐྱེད་པ་པའི་རིག་པ་དང་༔ གཞི་གནས་ངོ་བོ་ཀྱི་རིག་པ་དང་༔ ལྷག་བླ་མའི་གདམས་པས་ཤེས་མཐོང་གི་རིག་པ་དང་༔ ཐོད་རྒལ་གྱི་རིག་པ་སྣང་བའི་ཚད་དང་ལྔའོ༔ ལས་དང་པོ་པའི་དུས་མཚན་ཉིད་འཛིན་པའི་རིག་པ་ནི༔ ཆོས་སྤྱི་དང་རང་གི་མིང་ཙམ་དུ་བཏགས་པའི་རིག་པ་ཞེས་བྱ་བ་དེ་ལ་ནི༔ དེ་རང་གི་རང་རིག་པ་ཤེས་པ་གསལ་བ་མི་རྟོག་པ་ཙམ་ཡིན་ཏེ༔ ཤེས་པ་དུ་མས་སྤགས་པའི་རིག་པའོ༔ གཞི་འཛིན་པ་ནི༔ རང་གི་ལུས་ལ་གནས་པའི་དུས་ན༔ ཤེས་པ་ཐམས་ཅད་བསྐྱེད་ཅིང་རང་གསལ་ཙམ་དུ་གནས་པ་དེ༔ མ་འོད་ཐིག་ལེའི་ཚད་སྨིན་པའི་རིག་པ་ཞེསས་བྱའོ༔ གཞི་གནས་ཐོག་མའི་ཀྱི་རིག་པ་ནི༔ ངོ་བོ་ཀ་དག་གི་གནས་ལུགས་ཏེ༔ ཡེ་ཤེས་གསུམ་ལྡན་དུ་ཡོད་དོ༔ ཆ་ཡིས་མ་བགོས་པའི་ཐུགས་རྗེས་ཡེ་ཤེས་ཀྱི་བདག་ཉིད་ཅན་རིག་པ་ཐམས་ཅད་མཁྱེན་པའི་ཡེ་ཤེས་ཀྱི་ངོ་བོར་བཞུགས་ཏེ༔ ཡེ་ཤེས་དེ་ཡང་ཕྲ་ཐུགས་རྗེའི་ཆ་ལ་བའི་ཡེ་ཤེས་སུ་གནས་སོ༔ ཡེ་ཤེས་དེ་མེད་ན་ནམ་མཁའ་དང་ཁྱད་མེད་སྟོང་པ་ལས་མི་གྲོལ་ལོ༔ ཡང་ན་སྟོང་པར་མི་འདོད་ན་བེམ་པོ་ལས་མི་གྲོལ་ལོ༔ རིག་པ་ཡེ་ཤེས་ལྔ་ལྡན་དུ་སུ་ཡོད་ན་སྤྲུལ་སྐུ་དངོས་དང་ཁྱད་མེད་དོ༔ ལྷག་མཐོང་གི་རིག་པ་ནི༔ གདམས་པ་བསྟན་པའི་དུས་ན༔ ལྷག་གིས་སྣང་བ་དེ་ཡིན་པས༔ རང་སྣང་ཐིག་ལེའི་སྙིང་པོ་ཅན་ཞེས་བྱ་སྟེ༔ སྣང་བ་མི་འདྲ་བ་དུ་མ་སྟོན་པས༔ སྐྱེ་བ་མེད་ལས་ཐམས་ཅད་སྐྱེས༔ ཆོ་རིག་པའི་འཕྲུལ་ཆེན་པོ་ཅིར་ཡང་སྟོན༔ ཅེས་བྱའོ༔ ཐོད་རྒལ་

གྱི་རིག་པ་ནི༔ ཉམས་སུ་བླངས་པས་སྣང་རང་གི་ངོ་བོ་ཡང་མ་གྲུབ་བ་ཚད་དུ་ཕྱིན༔ ཉམས་ལ་འཕེལ་འགྲིབ་མེད༔ རྟགས་དང་ཡོན་ཏན་རྫོགས་ནས༔ རང་གི་ངོ་བོར་ཡང་མ་གྲུབ་ལ༔ མཁྱེན་པའི་ཡེ་ཤེས་སུ་རང་གསལ་བའི་དུས་ན༔ ཆོས་ཚིག་ལས་འདས་པ་བོར་བ་ཞེས་བྱ༔ ཆོས་རང་བཞིན་མ་རྙེད་ཟད་པ་ཞེས་བྱ༔ ཆོས་གདམས་པ་རྣམས་ཀྱང་མ་རྙེད་འདས་པ་ཞེས་བྱ༔ ཆོས་ལས་གྲོལ་བ་ཞེས་བྱ་སྟེ༔ སྐྱེས་ཙམ་ཉིད་ན་སྐྱེ་བ་མེད༔ ཅེས་བྱའོ༔ རིག་པ་དེ་ལྔ་ཡིན་ཞེ་ན་ཐ་དད་པ་ཡིན་ནམ་མིན་ན༔ ཐ་དད་པ་མ་ཡིན་ཏེ་ངོ་བོ་གཅིག་ལས་གང་དུ་ཡང་འགྱུར་བ་མེད་དོ༔ རིག་པ་འདི་ཕྲ་བའི་ངོས་ནས་ལྟ་བྱེད་བལྟས་ན་ཟབ་མོ་ཞེས་བྱ༔ ཐིག་ལེ་དང་འོད་དང་སྐུའི་ངོས་ནས་བལྟས་ན་སྣང་བ་ཞེས་བྱའོ༔ གསལབའི་ངོས་ནས་ལྟ་བྱེད་བལྟས་ན་ཤེས་རབ་ཅེས་བྱ༔ སྣང་བ་སྣ་ཚོགས་སུ་སྣང་བའི་ངོས་ནས་བལྟས་ན་ཡངས་པ་ཞེས་བྱ༔ བདེ་བའི་ངོས་ནས་བལྟས་ན་ཐུགས་རྗེ་ཞེས་བྱ་བ་ཡིན་ནོ༔ བལྟར་ཡོད་པའི་ངོས་ནས་དངོས་པོ་ཡང་ཡིན༔ ཉམས་སུ་ལོན་པའི་ཚད་ཆོས་ཟད་སར་ཕྱིན་པའི་ཚེ་སྟོང་པའང་ཡིན༔ ངོ་བོ་གཅིག་ལས་མེད་དེ་གསལ་འགྲིབ་མེད་པས་ཉག་ཅིག་ཀྱང་ཡིན༔ སྣང་བའི་སྣང་ཆ་གོང་ནས་གོང་དུ་འཕེལ་བས་དུ་མ་ཡང་ཡིན༔ སྣང་བ་བརྗོད་ཀྱིས་མི་ལངས་ལ་ཅིར་ཡང་འཆར་བས་མཐའ་ཡས་པ་ཡང་ཡིན༔ དོན་རིག་པ་གཅིག་ལས་མེད་པའི་ངོས་ནས་བལྟས་པས་ལོགས་པ་མེད་འདུས་པ་ཡང་ཡིན༔ རང་བཞིན་མེད་པའི་ཁ་དོག་གི་ངོས་ནས་བལྟས་ན་གསལ་བ་ཡིན༔ དེ་ལྟར་སྣང་བ་སྣ་ཚོགས་སུ་སྣང་བ་ཐམས་ཅད་རིག་པ་གཅིག་གི་ངོ་བོ་ལས་མ་འདས་སོ༔ རིག་པ་རིགས་ཀྱི་བུ་རིག་པ་ལ་ལྟོས་དང་སྐུ་གསུམ་དུ་གཏན་ལ་དབབ་པ་ནི༔ རིག་པ་སྟོང་ཞིང་ངོ་བོ་གང་དུ་ཡང་མ་གྲུབ་པ་དེ་ཆོས་སྐུ་ཡང་ཡིན་གཞན་ནས་ཡོད་པ་མ་ཡིན་ནོ༔ གསལ་ཞིང་སྣ་ཚོགས་སུ་སྣང་ཡང་རང་བཞིན་མེད་པ་ནི་ལོངས་སྐུ་ཡང་

ཡིན༔ མཛད་སྤྱོད་སྣ་ཚོགས་ཐུགས་རྗེའི་རོལ་པ་ཉིད་སྤྲུལ་སྐུ་ཡང་ཡིན་གཞན་ནས་ཡོད་པ་མ་ཡིན་ནོ༔ རིག་པ་སྐུ་གསུམ་རང་ཆས་ཞེས་བྱ་བ་ནི༔ རིག་པ་འགྲོ་འོང་གནས་པའི་ཚེ༔ སྐུ་གསུམ་གཞི་དབྱིངས་ཀྱི་དགོངས་པ་ཞེས་བྱ༔ རིག་པ་བཞེངས་པའི་ཚེ༔ སྐུ་གསུམ་གཞི་དབྱིངས་ཀྱི་དགོངས་པ་ཞེས་བྱ༔ རིག་པ་གྲོལ་བའི་ཚེ༔ སྐུ་གསུམ་ཡོངས་གྲོལ་གྱི་དགོངས་པ་ཞེས་བྱ༔ རིག་པ་དག་པའི་ཚེ༔ སྐུ་གསུམ་ཀ་དག་གི་དགོངས་པ་ཞེས་བྱ་ཟད་སར་ཕྱིན་པའོ༔ རིག་པ་ལྟ་སྒོམ་སྤྱོད་པ་འབྲས་བུ་བཞིར་བསྟན་པ་ནི༔ རིགས་ཀྱི་བུ་རིག་པ་ལ་ལྟོས་དང་ནན་ལྟར་ལྟོས་དང་བལྟས་པས་རིག་པའི་ཡེ་ཤེས་ཉིད་ལ་དབང་པོས་བལྟར་ཡོད་པས༔ ལྟ་བ་དེ་ཉིད་མ་ཡེངས་པར་ཉམས་སུ་བླངས་པས༔ ཉམས་གོང་དུ་འཕེལ་བ་ནི་སྒོམ་པ་ཞེས་བྱའོ༔ གཞན་མ་ནི་ཡིད་སྒོམ་པ་ཡིན་ནོ༔ ཆོས་ཉིད་དོན་གྱི་སྣང་བ་དེ་ཉིད་ལ༔ རྒྱུན་དུ་སྤྱོད་བ་ན་སྤྱོད་པ་ཞེས་བྱའོ༔ གཞན་གྱི་ཡིད་དཔྱོད་ཕྱོད་པ་ཡིན་ནོ༔ དེ་ལྟར་ལྟ་བ་དང་སྒོམ་པ་དང་སྤྱོད་པ་དང་གསུམ་དུ་འབྲེལ་བས་འདུ་འབྲལ་མེད་པ་ཞེས་བྱའོ༔ དེའི་ཕྱིར་རིག་པ་གནས་པའི་ཚེ༔ ལྟ་སྒོམ་སྤྱོད་པ་གཞི་བཞག་ཅེས་བྱ༔ རིག་པ་བཞིངས་པའི་ཚེ༔ ལྟ་སྒོམ་སྤྱོད་པ་གཞི་དབྱིངས་ཞེས་བྱ༔ རིག་པ་གྲོལ་བའི་ཚེ་ལྟ་སྒོམ་སྤྱོད་པ་ཡོངས་གྲོལ་ཞེས་བྱའོ༔ རིག་པ་དག་པའི་ཚེ༔ ལྟ་སྒོམ་སྤྱོད་པ་ཀ་དག་ཅེས་བྱའོ༔ རིག་པ་རིག་པ་ལ་ལྟོས་དང་རིག་པ་ཐིག་ལེ་ཉག་ཅིག་ཏུ་གཏན་ལ་དབབ་པ་ནི༔ རིག་པ་མི་འགྱུར་བས་ཐིག་ཡིན༔ ཀུན་ལ་ཁྱབ་པས་ལེ་ཡིན༔ ཟབ་མོའི་ངོས་ནས་ཉག་ཡིན༔ ཐམས་ཅད་འདུས་པས་གཅིག་ཡིན༔ དོན་ལ་ཐིག་ནི་ཆོས་སྐུ༔ ལེ་ནི་ལོངས་སྐུ༔ ཉག་ནི་སྤྲུལ་སྐུ༔ གཅིག་ནི་སྐུ་འདུས་པས་འདུ་འབྲལ་མེད་པའོ༔

རིག་པ་དགེ་སྡིག་དང་བྲལ་བར་བསྟན་པ་ནི༔ ལས་དགེ་སྡིག་དང་བྲལ་ལོ་རྫོགས་པ་ཆེན་པོའི་ཞེས་བྱ་བ་ནི༔ རང་གི་རིག་པ་རིག་པ་ལ་ལྟོས་དང་མཐོང་བའི་རྣལ་འབྱོར་པ་ཡིན་ནོ༔ རིག་པ་འདི་ཉིད་བླ་མའི་གདམས་ངག་དང་འབྲེལ་བས་ཏེ༔ མ་བསྟན་ན་སྡེ་སྣོད་གསུམ་ལ་བློ་འབྱོངས་པའི་མཁས་པ་པཎྜི་ཏས་སྒྲིབ་པ་བྱང་བ་དང་སྡིག་པ་ཅན་ཡང་དོན་ལ་ཁྱད་མེད་དུ་བསྟན་དོན་ལ་རྡུལ་ཙམ་ཡང་མ་རེག་པས༔ དེའི་ཕྱིར་གསང་སྔགས་ཐབས་ལ་བརྟེན་པ་ཞེས་བྱའོ༔ དགེ་བས་མི་མཐོང་བསྟན་ན་དབུལ་པོ་བ་ལང་རྫིས་ཀྱང་མཐོང་བས༔ དེའི་ཕྱིར་ན་ལས་ཚོགས་བསག་ཏུ་མེད་ལ་བཟང་ངན་མེད་པ་ཞེས་བྱའོ༔ ཉམས་སུ་མ་བླང་ན་རྡོ་རྗེ་སེམས་དཔའ་ཡང་མི་གྲོལ་བས༔ དེའི་ཕྱིར་ན་མན་ངག་གོམས་ཚོད་ལ་ཐུག་པ་ཞེས་བྱའོ༔ ཉམས་སུ་བླངས་ན་མཚམས་མེད་པ་ལྔ་བྱས་པ་ཡང་མ་བསྒྲིབས་པར་འདི་ཉིད་ལ་གྲོལ་བས༔ དེའི་ཕྱིར་དགེ་སྡིག་གིས་རིག་པ་རང་གིས་ངོ་བོ་ལ་ཕན་གནོད་མ་བསྐྱལ་བ་ཞེས་བྱའོ༔ རིགས་ཀྱི་བུ་རིག་པ་ལ་ལྟོས་དང་ནན་ལྟར་ལྟོས་དང་རིག་པ་མཐོང་བའི་ཚེ༔ སངས་རྒྱས་དེ་ཉིད་རང་ཡིན་པ་ལས༔ གཞན་ན་མེད་པས་སངས་རྒྱས་མིང་དུ་འདོགས་མཁན་འཁྲུལ་བ་དང་༔ འཁོར་བ་ཡེ་སངས་རྒྱས་པའི་མན་ངག་རིག་པ་ཉམས་སུ་བླངས་པའི་ཚེ་དམྱལ་བ་མེད་པས༔ དམྱལ་བར་འདོགས་མཁན་བདུད་ཀྱིས་འཁྱེར་བ་དང་༔ རིག་པ་ཚད་ལ་ཕེབས་པའི་ཚེ༔ སངས་རྒྱས་དང་དམྱལ་བ་གཉིས་ཀ་ནས་མ་གྲུབ་པར་བསྟན་པའོ༔ དེའི་ཕྱིར་ན་སངས་རྒྱས་ཀུན་ཏུ་བཟང་པོ་དང་དམྱལ་བ་ཆོས་ཀྱི་རྒྱལ་པོ་གཉིས་རང་བཞིན་མེད་པའི་རྟགས་ཁྱད་པར་རྡུལ་ཙམ་ཡང་མེད་པར་བསྟན་པའོ༔ ཡང་རིག་པ་རང་བཞིན་གྱི་བྱིན་རླབས་ཤར་བས་ཉམས་སུ་བླངས་པའི་ཚེ༔ རྣམ་པར་རྟོག་པ་རྒྱུད་ལ་འཆར་

མི་སྲིད༔ ཉམས་གོང་དུ་འཕེལ་བའི་ཚེ༔ དགེ་བའི་བསམ་པ་ལས༔ སྡིག་པའི་བསམ་པ་འཆར་མི་སྲིད་དཀར་པོའི་ཕྱོགས་ལ་དབང་པ་དང་༔ ཉམས་ཚད་ལ་ཕེབས་པའི་ཚེ༔ དགེ་སྡིག་གང་གི་ཡང་བསམ་པ་མི་འཆར་བངོ་བོ་ཡང་མ་གྲུབ་པའོ༔ དེའི་ཕྱིར་ན་དགེ་སྡིག་གང་ཡང་མེད་ན་ཆོས་སྐུ་ཆེན་པོ་ཡིན་པའི་ཕྱིར༔ རང་གི་རིག་པ་ལ་ནན་ཏར་བལྟས་པས༔ རིག་པའི་ངོ་བོ་དེ་དགེ་བའི་ཕྱོགས་སུ་འདུག་གམ༔ གྲངས་སུ་ཆད་པ་ཉན་བཤད་སོགས་དགེ་བ་བཅུར་འདུག་གམ༔ བསག་པར་བྱ་བའི་བསོད་ནམས་ཡེ་ཤེས་ཀྱི་ཚོགས་གཉིས་སུ་འདུག་གམ༔ ངོ་བོ་དེ་ལ་སྤྱད་པར་བྱ་བའི་ལྟ་སྒོམ་སྤྱོད་པ་གསུམ་དུ་འདུག་གམ༔ ཐོབ་པར་བྱ་བའི་འབྲས་བུ་སྐུ་གསུམ་འདུག་གམ༔ ཐབས་རང་ལ་ཤར་བས་བསྐུར་བར་བྱ་བའི་དབང་དུ་འདུག་གམ༔ ཚིག་མེད་པས་བཟླས་པར་བྱ་བའི་སྙིང་པོར་འདུག་གམ༔ བསྐྱེད་པར་བྱ་བའི་སྣང་བ་རང་ཆས་ཡིན་པས་གཞལ་ཡས་ཁང་དུ་འདུག་གམ༔ སྐུ་རང་སྣང་ཡིན་པས་བསྒོམ་པར་བྱ་བའི་ལྷར་འདུག་གམ༔ ཐབས་རང་ལ་ཤར་བས་མཆོད་ཅིང་བཤགས་པའི་བདག་པོར་འདུག་གམ༔ མི་ཐམས་ཅད་དང་བྲལ་བས་སྡོམ་པར་བྱ་བའི་དམ་ཚིག་ཏུ་འདུག་གམ༔ སྤྲོས་པ་དང་བྲལ་བས་བཤད་ཅིང་བསྟན་པའི་ཆོས་སུ་འདུག་གམ༔ དེ་དག་གང་གི་ཡང་ངོ་བོར་མི་འདུག་པས༔ དགེ་བ་བྱས་པས་གཡེང་བའི་རྒྱུ་ལས་རིག་པ་ལ་རྡུལ་ཙམ་ཡང་ཕན་མ་བཏགས་པས༔ རྟག་ཏུ་ལུས་ངག་གི་བྱ་བ་བཏང་ལ༔ དགེ་སྦྱོར་རྒྱུན་བཅད་ལ་དལ་བར་རིག་པའི་ངང་ལ་གནས་པའི་གནད་ཀས་སོ༔ དེའི་ཕྱིར་ན་དགེ་བ་རྒྱུན་ཐག་བཅད་ན་ཆོས་ཀྱི་དབྱིངས་ཀྱི་ཡེ་ཤེས་དང་ཉེ་ཞེས་གསུངས་སོ༔ ཡང་རིག་པ་ཉིད་ལ་ནན་ལྟར་ལྟོས་དང་༔ རིག་པ་ལ་དམྱལ་བ་ལ་སོགས་པ་རིགས་དྲུག་གྲུབ་ནས་འདུག་གམ༔ ཚ་གྲང་ལ་སོགས་པ་སྡུག་བསྔལ་གྲུབ་ནས་འདུག་གམ༔ མ་

རིག་ལ་སོགས་འཁྲུལ་པ་གྲུབ་ནས་འདུག་གམ༔ གཏི་མུག་ལ་སོགས་པ་ཉོན་མོངས་པ་ལྔ་གྲུབ་ནས་འདུག་གམ༔ ཕུང་པོ་ཁམས་དང་སྐྱེ་མཆེད་གྲུབ་ནས་འདུག་གམ༔ དབང་པོ་ཡུལ་དང་ཤེས་རབ་གྲུབ་ནས་འདུག་གམ༔ སྣང་བ་ཉིད་དང་མི་སྣང་བ་ཉིད་གྲུབ་ནས་འདུག་གམ༔ ལུས་ངག་སྡིག་དང་རྣམ་སྨིན་གྲུབ་ནས་འདུག་གམ༔ དེ་དག་གང་གི་ངོ་བོར་མ་གྲུབ་པས༔ ངོ་བོ་ལ་མ་གྲུབ་པས་རིག་པ་ལ་སྡིག་མེད་པས་ལྟུང་བྱེད་ཀྱི་རྒྱུ་རྡུལ་ཙམ་ཡང་མེད་པར་བསྟན་པའོ༔ དེའི་ཕྱིར་ན་སེམས་ཅན་བསྒྲལ་ན་རང་སྣང་མ་དང་འཕྲད༔ ཅེས་གསུངས་སོ༔ དུས་གསུམ་གནད་ཀྱི་མན་ངག་ཅེས་པས་རིག་པ་དུས་གསུམ་གྱི་གནད་ལ་མཁས་ན་བསྐལ་པ་སྟོང་གི་སངས་རྒྱས་པས་རིག་པ་རྒན་པ་ཞེས་བྱའོ༔ རིག་པ་ཉམས་སུ་ལེན་པའི་དུས་ན་ངོ་ཤེས་ན་ཆོ་ག་ལ་གནས་པས་མ་འོངས་པའི་སངས་རྒྱས་སྟོང་དང་སྐལ་པ་མཉམ་པ་ཞེས་བྱའོ༔ དེའི་ཕྱིར་ན་རིག་པ་དེ་དགེ་སྡིག་གི་ངོ་བོར་མ་གྲུབ་ལ༔ གང་གི་ངོ་བོར་ཡང་བྱུང་བས༔ དགེ་སྡིག་དེ་ཇི་ལྟར་བྱས་ཀྱང་མ་བཀག༔ མ་འགགས་མི་འགག་པས༔ དུས་གསུམ་གནད་ཀྱི་མན་ངག་སངས་རྒྱས་སུམ་སྟོང་གི་ཞལ་མཐོང་ཞིང་དབང་བསྐུར་བ་ཞེས་བྱའོ༔ དེའི་ཕྱིར་ན་སངས་རྒྱས་པས་ཀྱང་རིག་པ་རྡོ་རྗེ་ལུ་གུ་རྒྱུད་སྔ་བར་བྱུང་བ་ཞེས་བསྟན་པའོ༔ ཡང་རིག་པ་འདུག་ཚུལ་གསུམ་གྱི་བདག་ཉིད་མ་ཞེས་བྱ་སྟེ༔ རིག་པ་དེ་དག་ཅིར་ཡང་མ་གྲུབ་པའི་ངོ་བོ་དང༔ འོད་དང་ཐིག་ལེ་ལ་སོགས་སྣ་ཚོགས་སུ་འཆར་བའི་རང་བཞིན་དང་༔ ཕྲ་བའི་ཡེ་ཤེས་འཛད་པ་མེད་པའི་ཐུགས་རྗེའོ༔ དེ་ལྟར་ན་ཅིར་ཡང་མ་གྲུབ་པའི་ངོ་བོ་གཞི་ཀ་དག་ཆེ༔ སྣ་ཚོགས་སུ་སྣང་པའི་རང་བཞིན་ཁྱབ་ཆེ༔ མཛད་པ་མེད་པའི་ཐུགས་རྗེ་གྲུབ་གང་ཟག་གི་རྒྱུད་ལ་སྦྱར་བས་ངོ་བོ་ལ་འཁྲུལ་མ་མྱོངས་བའི་རང་བཞིན་ལ་འཁྲུལ་བ་མི་གནས་ཆེའོ༔ དེའི་ཕྱིར་ན་གཞི་ཆེ་བས་འདི་ཉིད་དུ་རྟོགས་པའི་མན་ངག་དེ་ཉིད་ལ་འཁྲུལ་

པ་མི་གནས་པས་ཐུགས་རྗེ་ལ་འཁྲུལ་པ་མི་སྲིད་དོ་དེ་ཡང་རང་བཞིན་འཁྲུལ་མ་མྱོངས་བར་གོ་བས་ལུས་ངག་ཅི་བྱེད་ཀྱང་འཁྲུལ་པ་ལ་མི་གནས་། དུས་གསུམ་ལ་འཕོ་འགྱུར་མེད་པ་དང་འཁྲུལ་མི་སྲིད་པར་གོ་བས་ལུས་ངག་ཁམས་གསུམ་དུ་མི་བཟློག་པའོ༔ ཁྱབ་ཆེ་བས་དབྱིངས་རིག་མཐའ་དབུས་སུ་སྡུད་པ་དང༔ གྲུབ་ཆེ་བས་ཉམས་སུ་བླངས་པས་བྱས་པའི་ལས་ཆུད་མི་གསོན་པའོ༔ རིག་པ་བསྡུས་པའི་སྒྲོན་མ་ཞེས་བྱ་བ༔ མཁས་པ་ཆེན་པོ་བྱེ་མ་ལ་མུ་ཏྲས་མཛད་པ་རྫོགས་པ་ཆེན་པོ་གསང་བ་བླ་ན་མེད་པའི་གདམས་པ་རྫོགས་སོ༔ ལས་ཅན་རྣམས་དང་འཕྲད་པར་ཤོག༔ རྒྱ་རྒྱ་རྒྱ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ ༔ཡང་ངོ་བོ་སྐུ་ཡིན་པས་མི་འགྱུར༔ རང་བཞིན་འོད་ཡིན་པས་ཁ་དོག་རིས་ཅན་དུ་མེད༔ ཐུགས་རྗེ་ཡེ་ཤེས་ཡིན་པས་མཁྱེན་པའི་ཆ་མ་འགགས་པས་སོ་སོར་གསལ་ལོ༔ བྱ་བ་དང་བྱེད་པ་ནི་མེད་དོ༔ དེས་ན་མཁྱེན་པའི་ཆ་ནི་གཞི་གནས་ཀྱི་ཡེ་ཤེས་གསུམ་དུ་བཞུགས་སོ༔ མཁྱེན་པའི་འཆར་གཞི་མེད་ན་ཡང་བེམས་པོར་འགྲོ༔ ཡང་ན་སྟོང་པ་ཕྱང་ཆད་པར་འགྲོ་བས་ན༔ མཁྱེན་པའི་ཡེ་ཤེས་འཆར་གཞི་ནི༔ མ་འགགས་པར་གསལ་ལ༔ ཡང་ངོ་བོ་སྟོང་པ༔ རང་བཞིན་གསལ་བ༔ ཐུགས་རྗེ་ཀུན་ལ་ཁྱབ་པར་བཞུགས་པའོ༔ ས་མ་ཡཱ༔ ༔རྒྱ་རྒྱ་རྒྱ༔ ཨྠྀི༔ ཟངས་ཡིག་ཅན་ནོ༔ ཤུབྷཾ༔ ༔ཚ་རང་བཞིན་གནད་དབབ་དང་། ཛ་ཆགས་ཅན་རླུང་གི་པྲ་ཁྲིད་གཉིས་དཔེ་རྙེད་ན་སླར་འདིར་འཛུད། །

ཡང་སྙིང་བཅུད་ཀྱི་དུམ་བུ།

༼ཕྲ་ཡིག༽ཡང་སྙིང་བཅུད་ཀྱི་དུམ་བུ་བཞུགས་སོ༔

༔ཧྱརྦ།ནརྒལུཟ།༔ རྒྱ་གར་སྐད་དུ༔ པ་ཙི་ཏ་ནན་ཏིང་ཨ་ལ་ཡ་ནཱ་མ༔ བོད་སྐད་དུ༔ ཡང་སྙིང་བཅུད་ཀྱི་དུམ་བུ་ཞེས་བྱ་བ་གསང་བ་སྙིང་གི་དོན་བསྟན་པ༔ བཅོམ་ལྡན་འདས་གབ་པའི་དོན་མངོན་དུ་འབྱིན་པའི་བདག་ཉིད་ཆེན་པོ་ལ་ཕྱག་འཚལ་ལོ༔ གསང་ཆེན་སྙིང་གི་ཏི་ཀ༔ ཡང་ཏིག་ངེས་པའི་དོན༔ རང་སྣང་ངེས་པའི་དོན་རྣམས་ཁོལ་བུར་ཕྱུང༔ ཡང་བཅུད་སྙིང་ཏིག་ཡི་གེ་དཀར་དམར་གཉིས༔ དེ་ཡི་ཡང་ཏིག་གསང་བའི་ལག་ལེན་ཉིད༔ གསང་བའི་བཅུད་ཕྱུང་མན་ངག་ཁྲིགས་སུ་བསྡེབས༔ སྐལ་ལྡན་ཉམས་སུ་ལེན་པའི་ཏི་ཀ་ཉིད༔ གཞན་དུ་མ་བསྟན་འདིར་ནི་གབ་པའི་དོན༔ མངོན་དུ་ཕྱུང་སྟེ་མ་སྦས་མངོན་སུམ་པར༔ དབང་པོའི་ཡུལ་ལ་སྣང་བར་བྱེད་དོན་དུ༔ བསླབ་ཐབས་ཉིད་ལས་རང་རིག་གོམས་པའི་གནད༔ ཚིག་ཉུང་དོན་རྒྱས་རིག་པ་གནད་ཕེབས་པའི༔ བསླབ་པ་བྱ་བའི་རིམ་པ་འདི་ལྟ་བུ༔ ཚེགས་ཆུང་འབྲས་བུ་ཆེ་བའི་རང་གནད་ནི༔ ཇི་ལྟར་འདས་དང་མ་འོངས་ད་ལྟར་གྱི༔ ཉམས་སུ་མྱོང་བའི་ཡང་ཏིག་བསྡུས་པའི་དོན༔ ཡང་དག་པ་གསང་བའི་གནད་ཐམས་ཅད་ངེས་པར་བསྡུས་ནས་ཉམས་སུ་ལེན་པ་དག་གི་བཅུད་ཕུར་ངེས་པ་ནི༔ རབ་ཏུ་དབེན་པའི་ས་ཕྱོགས་དུར་ཁྲོད་ལ་སོགས་པར་སྙིང་ཏིག་གསང་བའི་མན་ངག་དམ་པ་འདི༔ བླ་མ་ལ་ངེས་པར་དད་པས་རྫས་དང་ལོངས་སྤྱོད་ཅི་ཡོད་པས་མཉེས་པར་ཕུལ་ལ༔ མཆོག་ཏུ་རིན་པོ་ཆེ་ལ་སོགས་པའི་མཎྜལ་དབུལ་བ་དང་༔ ཅི་མཉེས་པ་ཡིས་མཉ ེས་པར་བྱས་ལ་མན་ངག་འདི་ཞུ་བར་བྱའོ༔ དེ་ནས་ཡང་དང་ཡང་དུ་ཐག་བཅད་ལ་དུར་ཁྲོད་ལ་སོགས་པར་ཉམས་སུ་བླང་ངོ༔ གསང་བ་མཆོག་གི་མན་ངག་ངེས་པ་ནི༔ སྐལ་ལྡན་སྣོད་ཡོད་ངེས་པ་གཉིས་ནས་གསུམ་ཚུན་ཆད་ལ་བཞི་ལས་མང་ན་མཁའ་འགྲོ་མ་རྣམས་ཀྱི་ཆད་པ་འབྱུང་ངོ༔ དེ་ལྟ་བུའི་སྐལ་ལྡན་ལ་ཚིག་ཉུང་ལ་

དོན་རྒྱས་ཤིང་བསླབས་སླ་བ་འདི་ཉིད་རླུང་སེར་བུའི་སྒྲ་ཙམ་ཡང་མེད་ཅིང་གཞན་གྱིས་མི་མཐོང་བའི་ས་ཕྱོགས་སུ༔ རབ་ཏུ་དབེན་པར་སྐལ་ལྡན་རྣམས་ཁྲིད་ཅིང་སྐད་ཆུང་བས་ལན་གསུམ་མམ་ལྔའམ་བདུན་གྱིས་ཐེབས་པར་གདབ་བོ༔ དེ་ཡང་འདི་དག་གི་སྔོན་དུ་བརྡའི་རྣམ་པ་དག་བསྟན་པར་བྱ་བ་དང་༔ དཔེ་དང་རྟེན་འབྲེལ་ལ་སོགས་པ་བསྟན་པར་བྱས་ནའང་མཆོག་ཏུ་ལེགས་སོ༔ འདི་ནི་བརྗོད་པར་དཀའ་བ་སྙིང་ཏིག་རབ་ཏུ་གསང་བ་སྟེ་སྐལ་ལྡན་གྱི་དོན་དུ་བསྟན་པ་ལས་གཞན་དུ་མ་ཡིན་ནོ༔ མཆོག་ཏུ་གསང་བ་ནི་དེ་ལྟར་དབྱིངས་རིག་འདུ་འབྲལ་མེད་པའི་དོན་གྱི་དགོངས་པ་ཆོས་ཉིད་མངོན་སུམ་གྱི་གནད་དེ་ཡང་ཕྱིའི་ཡུལ་ནམ་མཁའ་སྟོང་པ་སྤྲིན་དང་བྲལ་བ༔ ནང་གི་དབྱིངས་འདི་ཁྱིལ་གྱི་ནང་དུ་རིག་པ་རྡོ་རྗེ་ལུ་གུ་རྒྱུད་དུ་སྣང་ངོ༔ དེ་ཡང་གནད་རྣམ་པ་གསུམ་གྱིས་གཅུན་པས་རིག་པ་རྟེན་དང་དབྲལ་བ་དང་༔ བཞུགས་སྟངས་གསུམ་གྱིས་མ་བཅོས་རྣལ་དུ་དབབ་པ་དང་༔ བཞུགས་སྟངས་ཀྱི་དཔེ་གསུམ་གྱིས་ལུས་གནད་བསྟན་པས་ཡེ་ཤེས་མཁའ་ལ་ཐོན་ཏེ་ཡོ་གི་ཡིད་ཆེས་པར་བསྟན་པ་དང་༔ གཟིགས་སྟངས་གསུམ་གྱིས་དབང་པོ་ཉིད་ངོ་བོ་ཉིད་དང་མི་འབྲལ་བར་བྱ་བ་དང་༔ བསླབ་ཐབས་གསུམ་གྱིས་རིག་པ་མངོན་སུམ་པ་ལ་གོམས་པར་བྱ་བ་དང་༔ གཏད་པའི་འབེན་གསུམ་གྱིས་འཁྲུལ་སྣང་འོད་གསལ་དུ་བསྒྱུར་བ་དང་༔ ཁྲིད་པའི་ཐབས་ཀྱིས་སྣང་བ་ཉིད་ཟད་ས་ལ་བསྐྱལ་བ་དང་༔ དེ་ཉིད་སྐུ་གསུམ་གྱི་ལམ་སྣང་ལས་འདས་པའི་གནད་བསྟན་པའོ༔ ཨྠྀི༔ ཡང་དག་པའི་བཅུད་ཀྱི་ཡང་བཅུད་སྙིང་པོའི་དོན་དུ་དྲིལ་བ༔ ཡང་གསང་སྦས་པའི་ཏི་ཀ༔ སྐལ་ལྡན་ཀུན་གྱི་སྙིང་གི་ནོར༔ འབྲས་བུ་རྣམས་ཀྱི་ཡང་འབྲས་ནི༔ ལུས་ཀྱི་གནད་གཅུན་པས་རིག་པ་ཡུལ་དང་ཕྲད་པ་དང་༔

ངག་གི་གནད་གཅུན་པས་བརྗོད་དུ་མེད་པའི་དོན་ཁོང་དུ་ཆུད་པར་བྱ་བ་དང་༔ ཡིད་ཀྱི་གནད་གཅུན་པས་འགྱུ་བ་ཐམས་ཅད་རང་ཆོད་དེ་གང་བསམས་པ་བསམ་གཏན་དུ་འགྱུར་རོ༔ དེ་ཡང་ལུས་ཉིད་ལུས་ཀྱི་རུ་ཤན་འབྱེད་པའི་སྤྱོད་པས་ལུས་ཀྱི་མངོན་ཞེན་བཟློག་པས༔ ཕྱིས་འཁོར་བའི་ལུས་ལ་འཇུག་མི་སྲིད་དོ༔ ངག་གི་སྤྱོད་པས་ངག་གི་མངོན་ཞེན་བཟློག་སྟེ་ངག་ཕྱིས་འཁོར་བར་འཇུག་མི་སྲིད་དོ༔ ཡིད་ཀྱི་སྤྱོད་པ་བྱས་པས་ཡིད་ཀྱི་མངོན་ཞེན་ལོག་སྟེ་ཡིད་ཕྱིས་འཁོར་བར་འཇུག་མི་སྲིད་དོ༔ བཞུགས་སྟངས་གསུམ་ནི་ཆོས་སྐུའི་བཞུགས་སྟངས་དང་༔ ལོངས་སྐུའི་བཞུགས་སྟངས་དང་༔ སྤྲུལ་སྐུའི་བཞུགས་སྟངས་སོ༔ དཔེ་གསུམ་ནི༔ ཆོས་སྐུའི་བཞུགས་སྟངས་སེང་གེ་ལྟ་བུ་དང་༔ ལོངས་སྐུའི་བཞུགས་སྟངས་གླང་པོ་ཆེ་ལྟ་བུ་དང་༔ སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུར་བྱའོ༔ གཟིགས་སྟངས་གསུམ་ནི༔ ཆོས་སྐུའི་གཟིགས་སྟངས་དངས་མ་འདྲེན་བྱེད་བཟློག་པས་ཐབས་ངོས་བཟུང་བ་དང་༔ ལོངས་སྐུའི་གཟིགས་སྟངས་ཟུར་ལ་ཡིད་ཙམ་དལ་ཞིང་མཉམ་པར་བལྟས་པས༔ རྟེན་གསུམ་སྟོང་པ་ལ་ཡན་པར་བྱ་སྟེ་རང་སྣང་སྤེལ་བ་དང་༔ སྤྲུལ་སྐུའི་གཟིགས་སྟངས་ཕབ་ལ་ཕྱེད་བཙུམ་ཟིམ་ཙམ་བྱས་པས༔ རིག་པའི་སྣང་བ་འཁྲུལ་སྣང་འདྲེས་ཏེ་གཉིས་སུ་མེད་པར་བསྟན་པའོ༔ ཆོས་སྐུ་དྲང་ཐད་ཀྱི་བསླབ་ཐབས་ཀྱིས་རྫོགས་པ་ཆེན་པོ་ལྟ་བས་ཡས་ཁྲིད་དེ་སྣང་སྲིད་འོད་སྣང་དུ་འཆར་བའི་གནད་ནི༔ ས་རྡུལ་ཆར་གྱིས་མནན་པའི་དུས་ན་སྤྲིན་དང་སེར་བུ་ལ་སོགས་པ་མེད་ཅིང་སྒྲིབ་གཡོགས་དང་བྲལ་བའི་ནམ་མཁའ་རྣམ་པར་དག་པའི་དབྱིངས་སུ་རིག་པ་རང་ཡན་ཏེ་ཆོས་སྐུའི་རྟེན་ཉི་མ་ལ་བསླབ་པས༔ དང་པོ་དཀར་པོ་ལང་ལོང་དུ་སྣང་བའོ༔ དཀར་ཟིང་ཟིང་དུ་སྣང་བ༔ དཀར་ཕྲ་ཕྲོར་སྣང་བ་དེ་ལ་དངས་མ་གཏད་དེ་མ་འགུལ་བ་གནད་ཡིན་ནོ༔ དེ་ལས་ལོངས་སྐུའི་

གཟིགས་སྟངས་ཀྱིས་རྟེན་དང་ཕྲལ་ལ་ཕན་ཚུན་ཡན་ལག་ཏུ་བགས་ཀྱིས་ཁྲིད་པས༔ དེ་ཉིད་ཁ་དོག་ལྔ་རང་དངས་ཏེ་རེ་ལྡེ་ཙམ་དུ་གྱུར༔ དེ་ནས་སྤྲུལ་སྐུའི་གཟིགས་སྟངས་ཀྱིས་ཁད་ཀྱི་ཐུར་ལ་ཕབ་པས༔ ལུང་པའི་གྲུ་ཙམ་དབྱིངས་ཀྱི་སྣང་བར་འགྱུར་བས༔ དེ་དག་ལ་དངས་མ་དང་རིག་པ་གཏད་ཅིང་མ་བྲལ་བ་དང་༔ ལུས་བཞུགས་ཚུལ་མ་ཞིག་པ་དང་༔ ངག་སྨྲ་བ་མ་ཤོར་བ་ནི་གནད་དོ༔ དེ་ལྟ་བུ་ལ་རྟག་ཏུ་གནས་པར་བྱས་པས་འཁྲུལ་སྣང་ཐམས་ཅད་དབྱིངས་ཀྱི་སྣང་བར་རང་འགྱུར་བ་ལ་ཐེ་ཚོམ་བྱར་མེད་དོ༔ ཐོག་མ་སཱུཪྱའི་རྟེན་ལས་དངས་མ་ཁྲུ་གང་ངམ་མདའ་གང་གི་ཚོད་ཙམ་དུ་མ་ཡེངས་པར་གཏད་པ་ན་ཡང་དག་པའི་གནད་ཡིན་ནོ༔ དེ་ནས་གཟིགས་སྟངས་གཉིས་རིམ་གྱིས་བྱས་ནས་སྣང་བ་གཞན་དུ་ཁྲིད་ཅིང་ཉམས་སུ་བླང་བ་ནི་མན་ངག་གོ༔ ཨ་ཏི༔ ལོངས་སྐུའི་བསླབ་ཐབས་ནི་ཙནྡྲ་སྟེ༔ གཞན་ཆོས་སྐུའི་རྟེན་ལ་སློབ་པ་དང་མཚུངས་པ་ལས༔ འདི་ལ་དངས་མ་གཞན་དུ་མ་ཡིན་པར་ཙནྡྲ་ཉིད་ཀྱི་དཀྱིལ་དུ་གཏད་པ་གནད་ཡིན་ནོ༔ གཟིགས་སྟངས་ནི་ཆོས་སྐུ་ལ་སོགས་པ་གསུམ་གོ་རིམ་གྱི་བཞུགས་ལུགས་དང་བསྟུན་ལ་བྱའོ༔ སྤྲུལ་པ་སྐུ་ནི་ཨཱ་ལོ་ཀེ་ལ་བསླབ་པ་སྟེ་གོང་དང་མཚུངས་སོ༔ འདི་ལྟར་བསླབ་པས་དབང་པོ་རབ་ལ་ལོ་གཅིག་ན་འཁྲུལ་སྣང་འགགས༔ འབྲིང་གསུམ་ན༔ ཐ་མ་དགུ་ན་འགགས་པར་ངེས་པ་ཡིན་ནོ༔ ཆོས་སྐུའི་བསླབ་ཐབས་ནི་རང་གསལ་ཁ་དོག་མ་འདྲེས་པ་རྒྱ་ཆེ་བ་མྱུར་བར་འཆར་ཏེ་ཉིན་དུས་མྱ་ངན་ལས་འདས་པའི་དུས་ངེས་པ་ཡིན་ནོ༔ གཟུགས་སྐུ་གཉིས་ཀྱིས་མཚན་མོ་འཁོར་བའི་ཆ་སྟེ༔ དམིགས་རྟེན་ངེས་པ་ལ་བསླབ་པས་འཁོར་བ་རང་སྣང་དུ་འཆར་བ་ནི་འགགས༔ སྐུ་མཚན་མོའི་ཆའི་གནད་ཀྱིས་སོ༔ འདི་ནི་

གནད་ཡིག་གསང་བའི་ཡི་གེ་མ་རུའི་གནད་བསྡུས་པ་རབ་ཏུ་བསྟན་ཅིང་བརྗོད་པར་དཀའ་བ༔ སྙན་བརྒྱུད་ཀྱི་མན་ངག་ཡི་གེར་བཀོད་པ་བཟོད་པར་གསོལ༔ ཨ་ཏི༔ གཏད་པའི་འབེན་གསུམ་ནི་མེ་ཤེལ་སྒྲིབ་གཡོགས་དང་བྲལ་བ་ལ་གཏད་པས་ཉིན་པར་རང་སྣང་དང་མི་འབྲལ་བར་བྱས་ནས་འཁྲུལ་པའི་སྣང་བ་ཟད་པར་བྱེད་པའི་གནད་བསྟན་ཏེ༔ འོད་སྣང་གསལ་བ་ལང་ལོང་དུ་སྣང་བ་ལ་བསླབ་ཅིང་གོམས་པར་བྱས་པས་འཁྲུལ་པའི་སྣང་བ་ཟད་པར་འགྱུར་བ་ལ་ཐེ་ཚོམ་མེད་དོ༔ ཆུ་ཤེལ་དྲི་མ་དང་བྲལ་བ་ལ་གཏད་པས་མཚན་མོའི་སྣང་པ་ལོངས་སྐུ་འཆར་ཏེ༔ འོད་ཟང་ཟིང་དང་ལང་ལིང་དུ་འཆར་བ་ལ་བརྟེན་ནས་འཁྲུལ་སྣང་འགག་པར་ངེས་སོ༔ འོད་གསལ་རླུང་དང་བྲལ་བ་ལ་གཏད་པས་ཉིན་མཚན་གཉིས་ཀའི་སྣང་བ་སྤྲུལ་སྐུར་འཆར་བ་སྟེ༔ འོད་རྩེར་རྩེར་དང་ལྷང་ལྷང་དང་ཁྲག་ཁྲུག་ཏུ་འཆར་བ་ལ་བརྟེན་ནས་འཁྲུལ་པའི་སྣང་བ་འགག་པ་ལ་ཐེ་ཚོམ་བྱར་མེད་དོ༔ ཨ་ཏི༔ ཁྲིད་པའི་ཐབས་གསུམ་ནི་མེ་ཤེལ་ལ་བརྟེན་ནས་སློབ་པའི་དུས་ན་དང་པོ་ཤར་ཕྱོགས་སུ་གཏད་དེ་མ་ཡེངས་པར་གནས་པ་དང་༔ དེ་ལས་ལྷོ་ཕྱོགས་སུ་སྣང་བ་དེ་ཡིད་ཙམ་ཁྲིད་པས་དེ་ཉིད་རང་གསལ་དུ་གནས་པ་ལ་མ་ཡེངས་པར་གཏད༔ དེ་ལས་ཀྱང་ཕར་ཕར་བྱས་ཤིང་སྣང་བ་གང་གསལ་བ་ལ་གཏད༔ གལ་ཏེ་མི་གསལ་ན་ཐོག་མའི་རྟེན་ལ་དར་ཅིག་གཏད་ཅིང་ཡང་གོང་མ་ལྟར་བྱའོ༔ དེ་རྣམས་ཀུན་ལ་ལྷོ་ཕྱོགས་སུ་གཏད་ཅིང་འོད་གསལ་དུ་དཀར་པོ་ཉིད་དུ་མ་གྱུར་གྱི་བར་དུའོ༔ དེ་ཉིད་ཁ་དོག་ལྔར་གསལ་བ་ལས་ནུབ་ཏུ་བག་རེ་ཁྲིད་ཅིང་གསལ་བ་གནད་ཡིན་ནོ༔ དེ་ནས་མི་གསལ་ན་གོང་ལྟར་བསླབ་པ་གནད་ཡིན་ནོ༔ ཕྱི་འཕྲེད་ནུབ་ཏུ་གཏད་པ་ལ་འོད་གསལ་དུ་སྣང་བའི་ཚེ༔ ཡང་བྱང་གི་ཕྱོགས་སུ་དལ་གྱིས་ཁྲིད་པ་ནི་གནད་དོ༔ དེ་ཉིད་མི་གསལ་བའི་དུས་ན་ཐོག་མའི་རྟེན་ལ་བསླབ་ཅིང་འོད་གསལ་བ་ལ་བསླབ་པ་ནི་མན་ངག་གོ༔ འདི་དག་གི་དུས་ན་ལུ་གུ་རྒྱུད་དབྱིངས་ཀྱི་སྣང་བ་དེ་ཀུན་གྱི་དཀྱིལ་དུ་བཞུགས་པ་ནི་གནད་ཀྱི་

མན་ངག་ཡང་དག་པ་ཡིན་ནོ༔ དེའི་ཕྱིར་ན་དབྱིངས་རིག་གཉིས་གཟེར་ཐེབས་པར་འགྱུར་བ་དག་ཡིན་ནོ༔ འདི་ནི་རང་གི་རིག་པ་རྟོག་པ་དང་བྲལ་བའི་སྣང་བ་དབྱིངས་སུ་ཚུད་པ་དེ་ལ་གཏད་ཅིང་ཉམས་སུ་བླངས་པས་མེ་ཤེལ་གྱི་རྟེན་དང་བྲལ་བར་བྱེད་པའི་གནད་ཀྱི་མན་ངག་ཡིན་ཏེ༔ འདི་ལྟ་བུ་ལ་ཡུན་རིང་བྱས་པས་རྟེན་ལ་བསླབ་མི་དགོས་པར་འགྱུར་ཏེ༔ དངས་མ་གང་དུ་གཏད་པར་དབྱིངས་རིག་གི་སྣང་བ་བཀྲ་ཤིག་ཤིག་སྣང་བ་ཡིན་ཏེ༔ འདིའི་གནད་ནི་གཟིགས་སྟངས་གསུམ་གྱིས་གཡས་དང་༔ གཡོན་དང་༔ སྟེང་དང་༔ འོག་ལ་སོགས་པར་དར་རེ་བལྟ་ཞིང་སྣང་བ་དང་མ་བྲལ་བ་རབ་ཏུ་གཅེས་སོ༔ དེ་ལྟར་བྱས་པས་གང་དུ་བལྟས་ཚད་ཐམས་ཅད་དག་པར་སྣང་བའི་དུས་ན་བཞུགས་སྟངས་དང་༔ གཟིགས་སྟངས་དང་༔ གཏད་པའི་འབེན་ལས་གྲོལ་བས་སྣང་བ་ཆོས་སྐུར་ཤར་བའི་ཉམས་ཡིན་ཏེ༔ ཉམས་རང་བྱུང་དུ་འཆར་བས་ཉོན་མོངས་པ་ལ་སོགས་པའི་རྐྱེན་གང་གིས་ཀྱང་གནོད་པ་འབྱུང་མི་སྲིད་དོ༔ འདིའི་དུས་ན་ཉིན་མཚན་དུ་སྣང་བ་གང་ཡང་མེད་དོ༔ ཉིན་མེད་མཚན་མེད་དུ་དབྱིངས་རིག་གང་དུ་གཏད་ཀྱང་སྣང་བ་དག་འབྱུང་བ་ཡིན་ནོ༔ གཏད་པའི་ཚེ་སྣང་ལ་མ་གཏད་པའི་ཚེ་འཁྲུལ་སྣང་དུ་སྣང་བ་ནི་ཆོས་སྐུ་རང་ལུགས་ཀྱི་སྣང་བ་མ་ཡིན་ནོ༔ གཏད་ཀྱང་རུང༔ མ་གཏད་ཀྱང་རུང་བར་སྣང་བའི་དུས་ན་རིག་པ་ཚད་ལ་ཕེབས་པའི་སྣང་བའོ༔ འདི་ཚུན་ཆད་ཆོས་སྐུའི་སྣང་བ་སྟེ་ལམ་ཞེས་བྱའོ༔ རང་གི་ལུས་འོད་གསལ་ལས་འདས༔ དེ་སྐབས་སུ་སོར་མོ་ཙམ་སྣང་བ་ཕན་ཆད་ནི་འབྲས་བུའི་སྣང་བར་འགྲོ་བ་ཡིན་ཏེ༔ སྐྱེས་བུ་ཉམས་ལེན་ལས་འདས་ཏེ་གྲོལ་བ་ཞེས་བྱའོ༔ འདི་ལྟ་བུས་སྐལ་ལྡན་གཅིག་སྐྱེ་བ་དང་འཇུག་པ་ལ་དབང་ཐོབ་ནས་སྣང་བ་འདི་ལ་འཁྲུལ་སྣང་ཟད་དེ་ཟག་མེད་དུ་སངས་རྒྱ་བར་ངེས་པ་ཡིན་ནོ༔ དེའི་ཕྱིར་ན་བསླབ་ཐབས་

རྣམས་ལ་ཆོས་སྐུའི་བསླབ་ཐབས་སཱུཪྱ་མེ་ཤེལ་ལ་བརྟེན་པ་འདི་ཟབ་པས་རབ་ཏུ་གསང་ཞིང་རང་འབྲས་བུ་སྨིན་པར་བྱའོ༔ འདི་ལྟར་བྱས་པས་འཕོ་བ་ཆེན་པོས་གཞན་དོན་རབ་ཏུ་རྒྱ་ཆེ་བ་འགྲུབ་པ་ལ་ཐེ་ཚོམ་བྱར་མེད་དོ༔ འདི་ནི་ངེས་པར་དོན་གྱི་བཅུད་བསྡུས་པའོ༔ ཨྠྀི༔ ཆུ་ཤེལ་གྱི་མན་ངག་ཁྲིད་པའི་ཐབས་ནི་གཡས་གཡོན་དང་སྟེང་འོག་ཏུ་བྱའོ༔ ཐོག་མ་རྟེན་ལ་མ་ཡེངས་པར་བལྟ༔ དེ་ནས་ཁྲིད་པའི་གནད་རྣམས་བྱའོ༔ ཐབས་འདི་གཉིས་ནི་སྣང་བ་མ་འགྱུར་པ་ལས་དང་པོའི་དུས་ཡིན་གྱི༔ སྣང་བ་ཉིད་ཟིན་པའི་གང་ཟག་ལ་དགོས་པ་མེད་དོ༔ གལ་ཏེ་དབང་པོའི་བྱེ་བྲག་གི་གནད་ཀྱིས་འདི་ལྟ་བུ་རང་ལ་ཡང་ནས་ཡང་དུ་བསླབས་ཤིང་ཁྲིད་པས་འབྲས་བུ་ལ་ཐུག་པར་ངེས་པའི་སྙིང་པོ་རྙེད་པ་ཡང་ཡོད་དོ༔ ཨྠྀི༔ འོད་གསལ་གྱིས་ཁྲིད་པའི་ཐབས་ནི༔ དང་པོ་གཏད་པའི་འབེན་ལས་མཐོ་གང་ཁྲུ་གང་ལ་གཏད་པ་ནི་གནད་ཡིན་ནོ༔ དེ་ལས་གཡས་དང་གཡོན་དང་སྟེང་དང་འོག་ལ་སོགས་པ་དག་ཏུ་འཁྲིད་པ་ནི་ཡང་དག་པའི་གནད་ཡིན་ནོ༔ འདི་ལྟར་ཁྲིད་པས་འཁྲུལ་སྣང་རགས་པའི་སྣང་བ་འགགས་ཏེ་དག་པ་ཡེ་ཤེས་ཀྱི་སྣང་བ་ཁད་ཀྱིས་ཤར་ནས་ལུ་གུ་རྒྱུད་ལ་གཏོད་པ་དང་༔ ཅར་ལ་ཕེབས་པ་དང་༔ རྣལ་དུ་ཕེབས་པར་ངེས་པ་ཡིན་ནོ༔ འདི་དག་གང་ལ་བསླབ་ཀྱང་ལུ་གུ་རྒྱུད་དང་མ་བྲལ་བ་ནི་ཡང་དག་པའི་གནད་ཡིན་ནོ༔ དེའི་ཕྱིར་ན་དབྱིངས་རིག་གཉིས་སུ་མེད་པར་འདྲེས་པ་འཁོར་འདས་ཀྱི་ཐག་པ་ཆད་པ་ཞེས་བྱའོ༔ རིག་པ་ཚད་ལ་ཕེབས་པའི་བཅུད༔ སྣང་བ་ཅར་ལ་འབེབས་པའི་སྟོབས༔ ལུས་ངག་རྣལ་དུ་འབེབས་པའི་གནད༔ སྐུ་གསུམ་དངོས་སུ་ལྟ་བའི་མིག༔ ལྟ་སྒོམ་ཡུལ་ལས་འདས་པའི་གཞིའོ༔ ཡང་སྙིང་བཅུད་ཀྱི་དུམ་བུ་ཞེས་བྱ་བ་རང་གི་རིག་པ་ཚད་

ལ་ཕབ་པ་ཡང་དག་པའི་སྙིང་པོ༔ ཨྠྀི༔ ༔རབ་ཏུ་གསང་བའི་མན་ངག་བཅུད་བསྡུས་པ༔ ཡི་གེ་མ་རུ་བསྟན་པ་ཀུན་གྱི་བཅུད༔ དེ་ཉིད་མངོན་སུམ་དོན་ལ་བསླབ་པའི་གནད༔ གསང་བའི་ནང་ན་ཡང་ཟབ་སྙིང་པོ་འདི༔ སུ་ལའང་མ་བསྟན་སྙིང་གི་དཀྱིལ་དུ་སྦོས༔ གཞན་ལ་བསྟན་ཅིང་སྐལ་མེད་ཀྱིས་མཐོང་ན༔ མཁའ་འགྲོ་རྣམས་ཀྱིས་ཆད་པ་དྲག་ཏུ་ཕོབ༔ དེ་བས་སྐལ་དང་མི་ལྡན་གང་ཟག་ལ༔ ཆུ་སྲིན་པིར་གྱི་གྲེ་བ་བཞིན་དུ་སྡོམས༔ སྐལ་ལྡན་སྙིང་པོའི་དོན་ལ་ཡིད་ཆེས་ལ༔ འདི་དོན་བཅུད་དུ་དྲིལ་ལ་གཏད་པར་བྱོས༔ ཞེས་བྱེ་མ་ལས་གསུངས་སོ༔ འདི་ལས་ཟབ་པ་འཛམ་བུའི་གླིང་གཞན་ན་མེད་པར་ངེས་སོ༔ གྷུ་ཧྱ༔ ཨ་ཐ་མ༔ རྒྱ་རྒྱ་རྒྱ༔ ས་མ་ཡཱ༔ ༔

ཡང་སྙིང་འཕྲུལ་གྱི་དུམ་བུ།

༼ཕྲ་ཡིག༽ཡང་སྙིང་འཕྲུལ་གྱི་དུམ་བུ་བཞུགས་སོ༔

རྒྱ་གར་སྐད་དུ༔ ང།ཐ།ཨཱཅ།ཊ།ཊཨ༔ བོད་སྐད་དུ༔ ཡང་སྙིང་འཕྲུལ་གྱི་དུམ་བུ་ཞེས་བྱ་བ༔ བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ དངོས་གཞི་ཟག་པ་མེད་པའི་ཡེ་ཤེས་ཀྱི་དོན་ཉམས་སུ་བླངས་པ་ལས་སྣང་བ་བཞིར་ངེས་པ་ནི༔ ཆོས་ཉིད་མངོན་སུམ་གྱི་སྣང་བ་མ་མཐོང་ན་ཆོས་ཉིད་ཡིད་དཔྱོད་དུ་འགྱུར༔ ཉམས་གོང་འཕེལ་གྱི་སྣང་བ་མ་མཐོང་ན་ཐ་མལ་པ་དང་ཁྱད་མེད༔ རིག་པ་ཚད་ཕེབས་ཀྱི་སྣང་བ་མ་མཐོང་ན་བླ་མའི་མན་ངག་གི་བདེན་པས་བསླུས༔ ཆོས་ཉིད་ཟད་པའི་སྣང་བ་མ་མཐོང་ན་ཆོས་ཉིད་མངོན་སུམ་ཉིད་དངོས་པོར་འགྱུར་རོ༔ ཨྠྀི༔ ༔དེ་ལ་མཐའ་རྟེན་གྱི་མན་ངག་གསུམ་དུ་ངེས་པ་ནི༔ མི་འགུལ་བ་གསུམ་ལ་གཞི་མ་བཅས་ན་ཆོས་ཉིད་ཀྱི་དོན་ལ་ཁ་འཁྱལ༔ སྡོད་པ་གསུམ་གྱིས་ཚད་མ་བཟུང་ན་བསྒྲུབས་པའི་འབྲས་བུ་ལ་ཡིད་འབྱུང་༔ ཐོབ་པ་གསུམ་གྱིས་གཟེར་མ་བཏབ་ན་ཕུང་པོའི་རྡོས་པས་འཆིང་བར་འགྱུར་བས་ན༔ དེ་དག་ལས་མང་ན་མི་དགོས་པས་བྱ་རོགས་རྟོག་པའི་བསྟན་བཅོས་དང་འདྲ༔ དེ་ལས་ཉུང་ན་དགོས་པའི་དོན་མ་ཚང་བས་ཕྱུག་པོ་ལ་བུ་མེད་པ་དང་འདྲའོ༔ ཨྠྀི༔ ༔དབྱིངས་ཀྱི་སྐབས་སུ་ནི༔ དང་པོ་ཐིག་ལེའི་སྣང་བ་མ་མཐོང་ན་མིག་གཉིས་མཉམ་པར་ལྟ་བ་གནད་ཡིན༔ རྩིབས་ཤར་དུ་མཐོང་ན་རང་གི་མདུན་དུ་དྲིལ་ནས་ལྟ་བ་གནད་ཡིན༔ གྱེན་འགྲེང་དུ་མཐོང་ན་ཐུར་ལ་དབབ་པ་གནད་ཡིན༔ གྲུ་བཞིར་མཐོང་ན་གཡས་སུ་གཅུད་པ་གནད་ཡིན༔ ཟླུམ་པོ་ལ་གཡོན་དུ་གཅུད་པ་གནད་ཡིན༔ ཟླ་གམ་ལ་སྟེང་དུ་ལྟ་བ་གནད་ཡིན༔

གྲུ་གསུམ་ལ་ཐུར་དུ་མནན་པ་གནད་ཡིན༔ ཡེ་ཤེས་ལྔའི་དབྱིབས་མཁར་ཐབས་ལ་སོགས་པ་ནི༔ དེ་ཉིད་དང་བསྟུན་པ་ནི་ཡང་དག་པའི་གནད་དོ༔ ཨྠྀི༔ འཆར་བ་ཡུལ་གྱི་གནད་ནི་ཕྱིའི་ཡུལ་ནམ་མཁའ་སྟོང་པ་སྤྲིན་མེད་པ་ཉིད་དང་མ་བྲལ་བས་ཆོས་ཉིད་སྟོང་པ་ཉིད་ཐམས་ཅད་ལ་བྱན་ཚུད་པར་བྱེད་པའི་གནད་ཡིན༔ ནང་གི་གནད་དབྱིངས་རྣམ་པར་དག་པའི་སྒྲོན་མ་དང་མ་བྲལ་བས་ཆོས་ཐམས་ཅད་ཚིག་དང་ཡི་གེ་ལས་འདས་པའི་དོན་ཉམས་སུ་མྱོང་བར་བྱེད་པའོ༔ ཨྠྀི༔ ཐིག་ལེ་གནས་པའི་གནད་ནི་ཉིན་མོའི་དུས་ན་སཱུཪྱའི་དཀྱིལ་འཁོར་དུ་རིག་པ་བཅུག་སྟེ་ཐུན་དུ་བཅད་ནས་བསྒོམས་པས་ཡེ་ཤེས་ཀྱི་སྣང་བ་ལྷུག་པར་འཆར་རོ༔ ཤེས་པ་གཏད་པའི་འབེམ་གྱི་གནད་ནི༔ ཡུལ་ནམ་མཁའ་ལ་མ་གཏད་ན་ཆོས་ཉིད་དངོས་པོར་འགྲོ༔ མིག་དེ་ཉིད་ལས་འགུལ་ན་རྟོག་པ་ཐ་དད་པ་མི་ཁེགས༔ རླུང་དལ་བས་མ་འཕངས་ན་ཉོན་མོངས་པ་འདུས་པས་སེམས་འཆིང་བར་འགྱུར་བས་ན་དེ་ལྟར་འབེམ་དེ་དག་དང་མ་བྲལ་བ་གནད་ཡིན་ནོ༔ ཨྠྀི༔ ལུ་གུ་རྒྱུད་ཀྱི་ངོ་བོ་བསྟན་པ་ནི་རིག་པ་རང་གི་ངོ་བོ་དེ་ལུ་གུ་རྒྱུད་དུ་འོང་བ་ཅི་ཞེ་ན༔ རང་བཞིན་དུ་རིག་པ་འོད་ཀྱི་ཡུལ་ཅན་འོད་མཐའ་མེད་པའི་ཡུལ་ཅན་དུ་གནས་པ་ལས༔ དོན་གྱིས་ནམ་མཁས་གར་ཁྱབ་པར་རིག་པས་ཁྱབ་པའོ༔ འདིར་ནི་རིག་པ་ལུས་ཀྱི་དབང་དུ་གྱུར་ནས་རྡོས་པས་བཅིངས་པ་སྟེ༔ དཔེར་ན་སྲིན་བལ་ཉིད་རང་གི་ཁ་ཆུས་ལུས་བཅིངས་པ་ལྟར་གནས་པ་སྟེ༔ ལམ་རྩ་ནས་ཐོན་པས་དེ་ཡང་འགྱུ་བའི་གནས་ཡོད་པས༔ ཆུ་ལས་ཆུ་བུར་

རྡོལ་བས་ཡང་གཅིག་བྱུང་༔ དེ་ལ་ཡང་གཅིག་བྱུང་ནས་བརྩེགས་པ་ལྟར་རིག་པའི་རྩལ་ཐིག་ལེ་གཅིག་རྩ་ལས་ཐོན་ནས་བྱུང་༔ དེའི་སྟེང་དུ་ཡང་གཅིག་བྱུང་༔ དེའི་བར་འོད་ཀྱི་ཟེར་ཐག་ཕྲ་མོས་འབྲེལ་བས་ཐིག་ལེ་ཉིས་འབྲེལ་དུ་བྱུང་བ་དེ་ལས་བྱུང་པའོ༔ དེ་ཉིད་ཀྱི་ངོ་བོ་རང་གི་སྐུར་གནས་པས་རིག་པ་ཚད་ལ་ཕེབས་པའི་དུས་ན་སྐུའི་སྣང་བར་འཆར་བས༔ དེ་མཐོང་བའི་ཚེ་རིག་པ་རྐྱེན་ལས་གྲོལ་བས༔ ད་རྐྱེན་གྱི་དབང་དུ་འགྲོ་མི་སྲིད་པའི་གནད་དོ༔ ཨྠྀི༔ ༔རིག་པ་དབྱིངས་ལ་མ་གཏད་ན་ཡིད་བཞིན་གྱི་ནོར་བུ་རིན་པོ་ཆེ་ལ་མཆོད་པ་མ་ཕུལ་ན༔ དགོས་འདོད་མི་འབྱུང་པ་དང་འདྲ་བར་རིག་པ་ཉིད་ཀྱི་བཀྲག་དང་གཟི་བརྗིད་དབྱིངས་ཀྱིས་འབྱིན་པར་བྱེད་པས་ན༔ དབྱིངས་རིག་འདུ་འབྲལ་མེད་པའི་དགོངས་པ་ལ་གནས་པ་གནད་ཡིན་ནོ༔ ལུས་གནད་ལ་བརྟེན་པའི་ཡེ་ཤེས་མངོན་སུམ་དུ་སྣང་བ་ནི༔ ལུས་ཀྱི་བཞུགས་སྟངས་བསྟུན་པས་རིག་པ་དངོས་སུ་གསལ་བའི་ཕྱིར༔ ལུས་ཐ་མལ་དུ་མི་འདུག་བར་འདུག་སྟངས་གང་རུང་རེ་ལས་མི་འབྲལ་བར་བྱ་བ་གནད་ཡིན་ནོ༔ སྒོའི་གནད་ཀྱི་སྐབས་སུ་རིག་པའི་ཡེ་ཤེས་ངོས་བཟུང་བ་ནི་ཐ་མལ་པར་མ་ཡིན་པར་གཟིགས་སྟངས་གསུམ་ལས་མི་འདའ་པར་གང་ཡང་རུང་བ་ཞིག་ལ་མི་འགྱུར་བར་བལྟས་པས༔ ཁ་དོག་གི་བྱེ་བྲག་ལ་དང་པོ་དམར་པོ་ཤས་ཆེ་བར་མཐོང་ན་མིག་ཐུར་ལ་མནན་པ་གནད་ཡིན༔ དཀར་བ་ཤས་ཆེ་ན་གཡས་སུ་ལྡོག་པ་གནད་ཡིན༔ སེར་བ་ཤས་ཆེ་ན་གྱེན་ལ་ལྡོག་པ་གནད་ཡིན༔ ལྗང་པ་ཤས་ཆེ་ན་གཡོན་དུ་ལྡོག་པ་གནད་ཡིན༔ མཐིང་ག་ཤས་ཆེ་ན་དབུས་སུ་དྲིལ་བ་གནད་ཡིན༔ ཁ་དོག་ལྔ་

གར་གསལ་ན་གཟིགས་སྟངས་གང་ཡིན་པ་ལས་མི་འགྱུར་བ་གནད་ཡིན༔ ཨྠྀི༔ ཁྲིད་ལ་བརྟེན་ནས་གནད་ལ་དབབ་པའི་སྐབས་སུ༔ ཙནྡྲ་ལ་བརྟེན་པ་ནི་ཐབས་གཙོ་བོ་ལ་ཡང་དགོས་པ་ཡིན་ཏེ༔ འདི་དག་གི་དུས་ན་བྱ་ནག་མོའི་སྒོ་ངའི་སེར་པོས་མིག་གི་ཡར་མར་ལ་བྱུག་པ་གནད་ཡིན༔ དེ་ལ་འོད་དུ་སྣང་བའི་དུས་ན་དངོས་པོའི་སྣང་བ་གང་བྱུང་བ་ལ་གཏད་ཅིང་ཉམས་སུ་བླང་བ་གནད་ཡིན་ནོ༔ དེ་ལས་རྐྱེན་མེད་པར་འོད་དུ་སྣང་བའི་དུས་སུ་རླུང་ནང་དུ་བསྡམ་པ་གནད་ཡིིན་ནོ༔ ཡང་སཱུཪྱ་ལ་ཁྲིད་པའི་དུས་ན༔ སྐབས་སུ་རས་ཡུག་ནག་པོ་ལ་བལྟས་པས་མིག་གི་འབྱུང་བ་སྙོམས་པའི་གནད་ཡིན་པ་དེ་ལྟར་བྱ༔ དེ་ལྟར་གཉིས་པོ་གང་ཁྲིད་ཀྱང་སྐྱེས་པས་མིག་གཡས་སུ་ཁྲིད་པར་བྱ་བ་དང་༔ བུད་མེད་ཀྱིས་གཡོན་དུ་ཁྲིད་པར་བྱ་བ་གནད་ཡིན་ནོ༔ དེ་བཞིན་དུ་མེ་ཤེལ་དང་༔ ཆུ་ཤེལ་དང་༔ རིན་པོ་ཆེའི་ཁྲིད་གང་བྱེད་ཀྱང་༔ འདི་དག་གི་དུས་སུ་རླུང་ལ་ཤིས་པའི་ཁ་ཟས་བརྟེན་པ་གནད་ཡིན་ནོ༔ འདི་དག་ལ་སོགས་པ་གནད་གང་བསྟུན་ཡང་༔ བླ་མ་ལ་མོས་པ་ལོག་ན་མི་འགྲུབ་པས་བླ་མ་ལ་དད་པ་གལ་ཆེའོ༔ ཨྠྀི༔ ༔དབྱིངས་ཀྱི་སྒྲོན་མའི་སྐབས་སུ་ནི༔ བུད་མེད་རྣམས་ཀྱིས་ནམ་མཁའ་ལྷིངས་པའི་དུས་ན་སཱུཪྱའི་དལ་ལ་བསླབ་པར་བྱ་སྟེ༔ ཐོག་མ་སཱུཪྱའི་མདངས་ལ་མིག་མ་ཡེངས་པར་བལྟས་པས༔ འོད་ཀྱི་གྲུ་ཆད་ཀྱི་སྣང་བ་འཆར་ཏེ༔ དེ་ལས་ཁད་ཀྱིས་སཱུཪྱའི་མདངས་དང་ཕྲལ་ནས་རིམ་གྱིས་སྣང་བ་གཞན་གྱི་སྟེང་དུ་བཞག་ཅིང་ཉམས་སུ་བླངས་པས་མཇུག་ཏུ་གང་ལ་གཏད་པ་སྣང་བ་འོད་དུ་ཤར་ནས་ས་རྡོའི་སྣང་བ་མི་སྣང་པའི་ཚེ་ན་

རང་གི་ལག་ཏུ་ཤེལ་གྱི་སྐུ་བཟུང་སྟེ་དེ་ཉིད་ལ་གཏད་པས་སྐུའི་སྣང་བ་འཆར་རོ༔ སྐྱེས་པ་རྣམས་ཀྱིས་ཙནྡྲ་རྒྱས་པའི་དུས་སུ་གོང་ལྟར་བལྟས་པས་འཁྲུལ་པའི་སྣང་བ་འགགས་པར་ངེས་སོ༔ ཨྠྀི༔ མིག་མི་བདེ་ན་བཅོས་པའི་ཐབས་ལ༔ ཞིམ་ཐིག་ལེའི་ལྡེ་གུས་བྱུག་གོ༔ སྣང་བ་སྤྲ་ཡས་ན་མིག་ཐུར་ལ་མནན༔ དེ་ཁྲིད་དུ་མ་བཏུབ་ན་རླུང་གྱེན་ལ་དྲངས་པས་འགྲུབ་བོ༔ ཨྠྀི༔ ཡང་གཏད་པ་ཡུལ་གྱི་སྐབས་སུ་ནི་མིག་རང་སོར་འཇོག་པ་ལ༔ ལུས་ཆ་སློད་པ་དང་༔ རླུང་བག་ལ་བཞག་པ་དང་༔ རིག་པ་མིག་ནས་འདོན་པ་གནད་ཡིན་ནོ༔ ཨྠྀི༔ མ་བརྟེན་པའི་སྐྱོན་ནི་ཡུལ་གྱི་གནད་མེད་ན་བསྒོམས་ཀྱང་ཉམས་གོང་དུ་མི་འཕེལ༔ སྒོའི་གནད་མེད་ན་ཆོས་ཉིད་ཡིད་སྨོན་དུ་འགྱུར༔ རླུང་དང་རིག་པའི་གནད་མེད་ན་བསྒྲུབས་ཀྱང་དོན་མེད་པར་འགྱངས་པས་ན་དོན་རང་ཐོག་ཏུ་ཕེབས་པར་བྱེད་པ་ལ་རླུང་རིག་གི་གནད་གལ་ཆེའོ༔ ཨྠྀི༔ དབྱིངས་ཀྱི་གནད་ཀྱི་དུས་ན༔ བྱིང་ན་རླུང་གྱེན་ལ་འཐེན་པ་དང་༔ རྒོད་ན་ཐུར་ལ་མནན་པ་གནད་ཡིན་ནོ༔ སྣང་བའི་གནད་ནི༔ སྣང་བའི་འཕེལ་ཟད་པར་བྱེད་པ་ལ་རླུང་ནང་དུ་མི་བཞག་པར་ཕྱིར་ཕུལ་ལ་ཁ་རབ་ཏུ་གདངས་ཏེ་ཧིག་གི་སྒྲ་འདོན་པ་གནད་ཡིན་ནོ༔ ཨྠྀི༔ ལུས་ཀྱི་འདུག་སྟངས་གཟིར་བས་རྩ་འབྱོངས་ནས་འབྱུང་བ་སྙོམས་པའི་དགོས་པ་ཡོད༔ ཡེ་ཤེས་མངོན་དུ་སྣང་བའི་དགོས་པ་ཡོད༔ གང་ཟག་གཅིག་ཆོས་ཉིད་མངོན་སུམ་གྱི་གནད་གཟིར་བའི་དུས་ན་ཐིག་ལེ་སྟོང་པའི་སྒྲོན་མ་སུམ་སྦྲེལ་དུ་མཐོང་བའི་ཚེ༔ ཡེ་ཤེས་ཀྱི་སྣང་བ་སུམ་ཆ་ལ་དབང་ཐོབ་པ་ཡིན་པས༔ ལས་ཀྱི་ལེན་པོ་རྣམས་འགགས་

ནས་ཁམས་གསུམ་དུ་འཇུག་མི་སྲིད་དོ༔ འདིའི་དུས་ན་ཡིད་ལས་བྱུང་བའི་ཤེས་རབ་ཡིད་དཔྱོད་ལ་གདེང་དུ་བཅས་ནས་ཚིག་འབྲེང་ན་འཁྲུལ་པའི་ཆར་སོང་སྒེ་གཟུང་པའི་ཡུལ་ལ་ལོག་པ་སྟེ༔ གང་ཟག་དེ་འདི་ལ་རྣམ་པར་དག་པའི་ཡེ་ཤེས་ཀྱི་སྣང་བ་ལ་རྒྱབ་ཀྱིས་ཕྱོགས་སོ༔ ཨྠྀི༔ ལས་ཀྱི་རླུང་ཟད་པར་བྱེད་པ་ལ་རླུང་ནང་དུ་འགེངས་པའི་ཚེ་དལ་བ་ལ༔ ཕར་འཕེན་པའི་ཚེ་ན་རབ་ཏུ་བཏུད་ནས་འུར་སྒྲ་དང་བཅས་ནས་འཕེན་པ་ནི་གནད་ཡིན་ནོ༔ ཨྠྀི༔ སྒྲོན་མ་དང་པོ་ངོ་སྤྲད་པའི་སྐབས་སུ་རིག་པ་རྡོ་རྗེ་ལུ་གུ་རྒྱུད་བཙོན་དུ་བཟུང་བའི་གནད་ནི༔ རླུང་ཁ་ནས་དྲང་པ་དང་༔ མིག་ཨར་ལ་གཏད་པ་དང་༔ ལུས་འདུག་སྟངས་དང་བསྟུན་པ་དང་༔ ཤེས་པ་གཡས་སུ་བཅུག་པས་ཟིན་པའི་ཚེ་རྙེད་པའོ༔ ཨྠྀི༔ རྒྱང་ཞགས་སྒྲོན་མའི་གནད་ནི༔ མིག་སྤྲུལ་སྐུའི་གཟིགས་སྟངས་ཀྱིས་བལྟས་པས་འཁྲུལ་པའི་སྣང་བ་ཆོས་ཉིད་དུ་མཐོང་བས་རྟོག་པ་ཐ་དད་པ་རྣམས་འགག་པ་ནི་རིག་པ་གཏད་པའི་འབེམ་དང་མ་བྲལ་བའོ༔ ལོངས་སྐུའི་གཟིགས་སྟངས་ཀྱིས་བལྟས་པས་ཆོས་ཉིད་ཀྱི་སྣང་བ་དངོས་སུ་མཐོང་བས་རྣམ་པར་རྟོག་པ་ལས་ཀྱི་རླུང་རྒྱུན་ཆད་ནས་ཡེ་ཤེས་རང་གི་ངོ་བོ་དེ་ཐིག་ལེ་དང་ཐིག་ཕྲན་དུ་འཆར་བའོ༔ ཆོས་སྐུའི་གཟིགས་སྟངས་ཀྱིས་བལྟས་པས་སྐུ་གསུམ་གྱི་ཚད་མཐོང་སྟེ་རིག་པ་ཉིད་གང་དུ་བཞག་སར་སྡོད་པའོ༔ དེ་དག་གིས་ནི་ངོ་བོ་སྐུ་དང་༔ རང་བཞིན་གསལ་བ་དང་༔ ཐུགས་རྗེ་འགག་པ་མེད་པ་གསུམ་ལ་སྟོང་པ་ཡེ་དག་གི་རྒྱས་ཐེབས་པས་འཁོར་འདས་མ་བུ་མཉམ་པ་ཞེས་བྱའོ༔ ཨྠྀི༔ ༔ཆོས་ཉིད་

རང་ཐོག་ཏུ་གྲོལ་བར་བསྟན་པ་ནི༔ སེམས་ཅན་ལ་ཡང་དག་པའི་ཆོས་ཉིད་ཇི་ལྟ་བུ་ཞིག་གནས་ཞེ་ན༔ སྐུ་ལྔའམ་གསུམ་དང་༔ ཡེ་ཤེས་ལྔ་རང་ལུགས་སུ་གནས་པའི་གནད་ཀྱིས༔ འགྲོ་བའི་དབང་པོ་ལྔ་ཡུལ་ལྔ་ལ་རང་ཡན་པ་ཚོགས་དྲུག་གི་ཡུལ་དེ་ཁོ་ན་མ་བཅོས་པའི་ཆོས་ཉིད་དེ༔ དེ་ལྟར་གནས་པའི་གནད་ལ་རིག་པ་རྣལ་མ་རྡོ་རྗེ་ལུ་གུ་རྒྱུད་ལ༔ ཆོས་ཉིད་སོ་མ་དབྱིངས་རིག་འདུ་འབྲལ་མེད་པའི་རྒྱས་བཏབ་པས༔ དབང་པོའི་ཡུལ་ལ་རང་སྣང་ལྷུག་པར་འཆར་ཏེ༔ དེ་ཉིད་ཤར་བས་འཁྲུལ་པ་ཡོངས་སུ་དག་པའི་ཆོས་ཉིད་མ་ཐོག་ཏུ་བུ་གྲོལ་བ་ཞེས་བྱའོ༔ སྐལ་ལྡན་ཉམས་སུ་ལེན་པའི་རྒྱབ་བརྟེན་ཡང་སྙིང་འཕྲུལ་གྱི་དུམ་བུ་ཞེས་བྱ་བ་ཡང་དག་པའི་གནད་རྫོགས་སོ༔ དཔལ་ལྡན་སྔགས་ཀྱི་སྲུང་མས་སྲུངས་ཤིག༔ ས་མ་ཡཱ༔ ཞེས་སྔགས་སྲུང་ལ་གཏད་དོ༔ འདི་ལ་དུམ་བུ་ཉི་ཤུ་རྩ་བཞི་ཡོད་དོ༔ སྙིང་ཐིག་གི་བཅུད་འདིར་བསྡུས་པའོ༔ རིན་པོ་ཆེ་ཕྲ་མེན་གྱིས་བྲིས་པས༔ ཕྲ་ཡིག་ཅན་ཞེས་བྱའོ༔ སོ་ཕག་ཤི་ཐཾ༔ ས་མ་ཡཱ༔ གཏད་རྒྱ༔ སྦས་རྒྱ༔ གསང་རྒྱ༔ རྒྱ་རྒྱ་རྒྱ༔ ༔

དུང་ཡིག་ཅན་རྒྱུད་ཀྱི་ཁོང་དོན་བསྡུས་པ་སྒྲོན་མ་སྣང་བྱེད།

༼དུང་ཡིག་ཅན༽དུང་ཡིག་ཅན་རྒྱུད་ཀྱི་ཁོང་དོན་བསྡུས་པ་སྒྲོན་མ་སྣང་བྱེད་ཅེས་བྱ་བ་བཞུགས་སོ༔ ཁ་ཐཾ༔ ཨྠྀི༔

རྒྱ་གར་སྐད་དུ༔ ཏྲི་ལ་ཏན་ཏྲ་རྒྱུད་རྣམ་པར་འབྱེད་པའི་ཏི་ཀ་ཞེས་བྱ་བ་བྷ་དུ་ཏི་ཀ༔ བོད་སྐད་དུ༔ མདོ་རྒྱུད་འདི་ཉིད་རང་བཞིན་གྱི་ཀུན་གྱི་དོན་རྟོགས་པར་བྱེད་པས་གསལ་བར་བྱེད་པ༔ གཞིའི་རྟོགས་པ་སྟོང་པ་བདེ་ཆེན་ངང་ལ་ཕྱག་ཉམས་སུ་མྱོང་བས་འཚལ་ལོ༔ སརྦ་ཆོས་ཐམས་ཅད་ཆོས་ཉིད་མཉམ་པ་ཉིད་ཆེན་པོའི་ལུང་དུ་བསྟན་པའོ་པ་པཾ་ཨ་སིཾ་དྷ་ཡ༔ ཆོས་སྐུ་ཉག་གཅིག་སྤྲོས་དང་བྲལ་བ་རྟོགས་པར་བྱེད་པའི་ཐབས་བསྟན་པ་ཡི༔ དོན་རྣམས་རྟོགས་པར་བྱེད་པའི་མན་ངག་ཚིག་གིས་གཏན་ལ་ཕབ་ནས་མཚོན་པར་བྱ་བའི་ཕྱིར༔ དངོས་མེད་རིག་པ་སྟོང་པ་ལ་ཆོས་ཉིད་ཟང་ཐལ་དུ་སྣང་ཤེས་པར་དཀའ་བའི་དོན༔ སྒྲིབ་བྲལ་ཀ་དག་ལྟ་དང་བཅས་པའི་རིག་པ་རྡོ་རྗེ་ལུ་གུ་རྒྱུད་འོད་དང་བཅས་པ་སྟེ༔ དེ་ཡི་གནད་རིག་པའི་གནད་དང་ལུས་ཀྱི་གནད་ཀྱིས་ཉམས་སུ་བླང་བ་བསྟན་དང་དགོངས་དོན་ཤེས་བྱའི་ཕྱིར༔ སྙིང་གི་མུན་བློའི་རྨོངས་པ་སེལ་སྒྲོན་མ་སྣང་བྱེད་འབྱེད་པའི་ལྡེ་མིག་འདི༔ བློ་དམན་པ་མི་ཤེས་པ་རྣམས་ཀྱིས་འཛིན་པའི་བ་ཐག་མདུད་པས་དམ་དུ་བཅིངས་པ་རྣམས་ལས་འགྲོལ༔ མ་རིག་འགྲོ་བ་རྣམས་མ་རིག་པའི་ལྕགས་སུ་བཅུག་པ་ལ་སོགས་མཐར་འཛིན་དམ་འབྱེད་པའི༔ རྒྱུད་དག་པར་བྱེད་པ་ཤེས་རབ་

འཕྲུལ་གྱི་ལྡེ་མིག་མི་ཤེས་པ་ཤེས་པར་བྱེད་པ་གསལ་བ་འདིས༔ ཡེ་ཤེས་མཛོད་ཀྱི་སྣང་བ་བསམ་གྱི་མི་ཁྱབ་པའི་ས་མ་ཏིའི་རོ་རྙེད་པར་བྱེད་པས་རབ་བསྟན་ཏེ༔ ཉམས་གོང་ནས་གོང་དུ་འཕེལ་བར་བྱེད་པ་ལྷག་མཐོང་རིག་པ་གཅེར་མཐོང་དུ་རྟོགས་པར་བྱེད་པ་ཅོག་བཞག་དགོངས་པ་ལྷན་ནེ་ཉིད༔ ནམ་མཁའ་ལ་སྣང་བར་བྱེད་པ་ཟག་མེད་ཐིག་ལེའི་སྣང་བ་སྣ་ཚོགས་སུ་འཆར་བ་རྒྱ་ཆེ་བ༔ ཆ་ཕྲ་མི་འགྱུར་བའི་ཡེ་ཤེས་སྤྲོས་པ་དང་བྲལ་བ་ཉག་གཅིག་གསལ་བའི་ངང་དུ་བསྡུས༔ གསལ་བ་རིག་པའི་ཤེས་རབ་ཀྱིས་སྣང་བ་ཐོགས་པ་མེད་ཚར་གཅོད་པ་པའི་མཚོན་ཆེན་གྱིས༔ སྐྱེ་བའི་བརྒྱུད་པ་ལུས་ཇི་སྙེད་བླངས་པའི་ཉོན་མོངས་པ་འདི་ཉིད་ལ་གཅོད་པའོ་ཉོན་མོངས་དྲ་གཅོད་ཕྱིར༔ སངས་རྒྱས་ཀུན་གྱི་ཞལ་ནས་གསུངས་པའི་རྒྱུད་སྡེ་རྣམས་ཀྱི་བཀའ་གསང་ངེས་པའི་ལུང་༔ འདི་ལ་མོས་པའིི་སྐལ་ལྡན་གང་ཟག་རྣམས་ཀྱི་བློ་ལ་གོ་བྱའི་ཕྱིར༔ དབང་པོའིི་བྱེ་བྲག་རབ་འབྲིང་ཐ་མ་བློ་ཡིས་ཐེག་པ་རིམ་པ་དགུ་རིམ་ཕྱེ་ནས༔ ཡིད་ཆེས་རྒྱུད་ཀྱི་སྡེབས་བི་མ་ལ་བདག་གིས་ཚིག་དོན་གསལ་བར་དབྱེ༔ དམ་པ་དང་པོའི་སངས་རྒྱས་དངོས་འདྲ་མཁས་པ་ཡེ་ཤེས་མདོ་བའི༔ བླ་མ་དམ་པ་ཛྙཱ་ན་སུ་ཏྲའི་ཐུགས་ཀྱི་དགོངས་

པ་བྱེ་མ་ལ་མུ་ཏྲའི་བློ་ལ་བབས་པའི་དོན༔ དེ་ཉིད་གསལ་བའི་གདམས་ངག་རྣམས་བློོ་དང་སྦྱར་ཏེ་མདོ་སྡེ་འདུལ་མངོན་གྱི་རིམ་པའི་སྡེ་སྣོད་རྣམས་ལས༔ བསྡུས་ཏེ་ཁྱད་པར་དུ་འཕགས་པའི་དོན་ཁྱད་པར་ཆེན་པོའི་དོན་རྣམས་ནི༔ གོ་རིམ་གསལ་བར་རྣམ་པར་ཕྱེ་སྟེ་བི་མ་ལ་བདག་གིས་བཤད་པར་བྱ༔ སྡེ་སྣོད་རིན་ཆེན་ལས་ནི་མངོན་པ་སྟེ༔ ཐིག་པ་ཆེ་ཆུང་ལས་ཀྱང་ཆེན་པོ་ཉིད༔ ཕ་རོལ་ཕྱིན་དང་སྔགས་ལས་མན་ཏྲ་འོ༔ དེ་ཉིད་ཕྱི་དང་ནང་ལས་ནང་པ་སྟེ༔ དེ་ཉིད་ལས་ནི་ཐེག་པ་རིམ་དགུ་ཀུན་གྱི་རྩེ་མོ་རྫོགས་ཆེན་༔ ཐེག་རྒྱལ་ཨ་ཏི་གསང་བ་ཆེན་པོའི་གཞུང་རྒྱུད་དང་འགྲེལ་པ༔ དེ་ཉིད་སྡེ་རུ་ཕྱེ་ན་རྣམ་གསུམ་སྟེ༔ སེམས་སྡེ་ཀློང་སྡེ་མན་ངག་སྡེ་གསུམ་ལས༔ འདི་ནི་གསང་བ་མན་ངག་ཉིད་ཡིན་ནོ༔ མན་ངག་ལ་ནི་ཁ་འཐོར་དང་མན་ངག་ཁ་གཏམ་དང་རྒྱུད་རང་གཞུང་གི་མན་ངག་གསུམ་ལས་རྒྱུད་དུམ་བུའི་མན་ངག་ཏུ་བརྗོད་པ་འོ། །རྒྱུད་སྣ་ཚོགས་ཀྱི་ཚིག་ལ་བརྟེན་ནས། ཚིག་གཅིག་ཉམས་སུ་ལེན། རྒྱུད་ལུང་མན་ངག་ཏུ་འབྲེལ་བ། རྒྱུད་ནས་བྱུང་བའི་ཚིག་དེ་ལ་བསམ་གྱིས་མི་ཁྱབ་པ་ཞིག་བཞུགས་ཀྱང་འདི་ཐིག་ལེའི་སྐོར་རོ། །རྣམ་གསུམ་སྟེ༔ ཁ་གཏམ་དང་ནི་ཁ་འཐོར་དང༔ རྒྱུད་ཀྱི་རང་གཞུང་གསུམ་ལས་རྒྱུད༔ དེ་ཉིད་ལས་ནི་ཁྱད་པར་ཐིག་ལེའི་སྐོར༔ དེ་ལ་བཞི་སྟེ་ཕྱི་སྐོར་ནང་སྐོར་གསང་སྐོར་བ་དང་༔ གསང་བ་བླ་ན་མེད་པ་ཡོངས་རྫོགས་པའོ༔ ཕྱི་སྐོར་ལུས་དང་འདྲ་སྟེ་ཐ་སྙད་རྒྱ་ཆེར་སྟོན་ལུས་རྫོགས་པར་ཡོད་ཀྱང་དོན་སྙིང་ལྔ་ལ་སོགས་པ་མེད་ན་རོ་དང་འདྲ༔ ནང་སྐོར་མིག་དང་འདྲ་སྟེ་མིག་གིས་ཕྱིར་མཐོང་ཡང་རང་མི་མཐོང་མཐོང་བ་བརྡའ་ཡི་ཆོས༔ གསང་སྐོར་སྙིང་དང་འདྲ་སྟེ་དྲན་བྱེད་སྙིང་གཅིག་པུས་དོན་བྱེད་མི་ནུས་ཏེ་སྔ་མ་ལས་བག་ཙམ་

ཟབབོ། །གཟུངས་ཀྱི་ཆོས༔ འདི་ནི་ལུས་ཀུན་རྫོགས་ཏེ་ལུས་ལ་ནད་མེད་དབང་པོར་སྐྱོན་མེད་པའི་སྐྱེས་བུ་འདྲ༔ དེ་དག་ཀུན་ཀྱང་བསྡུ་ན་རྣམ་པ་གཉིས༔ བཤད་རྒྱུད་དང་ནི་སྙན་བརྒྱུད་གཉིས་ཡིན་ནོ༔ སྙན་ནས་བརྒྱུད་པ་ལ་ནི་གཉིས་ཡིན་ཏེ༔ ཡི་གེ་ཅན་དང་ཡི་གེ་མེད་པ་གཉིས༔ བཤད་རྒྱུད་གོང་དུ་བརྗོད་ལྟར་བཞི་རྣམས་ལ༔ འདི་ནི་གསང་བ་བླ་མེད་ཡོངས་རྫོགས་པ༔ ཡི་གེ་མེད་པའི་སྙན་བརྒྱུད་འདི་ཉིད་འབྲེལ༔ རང་བཞིན་རྫོགས་པ་ཆེན་པོའི་རྒྱུད༔ འབུམ་ཕྲག་དྲུག་ཅུ་རྩ་བཞི་ལས༔ འདི་ནི་ཉི་ཤུ་རྩ་གཅིག་པའོ༔ ཁྱད་པར་གསང་བ་བླ་མེད་པ༔ དེ་ཡི་རྒྱུད་ཀྱི་མཚན་རྣམས་དང་༔ གོ་དོན་དབྱེ་བ་རྣམས་པར་བཤད༔ དེ་རྒྱུད་གོ་བ་རྣམ་གཉིས་ཏེ༔ ཚིག་གི་རྒྱུད་དང་དོན་གྱི་རྒྱུད༔ དོན་རང་གི་ངོ་བོ་མཆོག་དེ་མཚོན་པར་བྱེད་པའི་ཚིག་རྣམ་པ་གཉིས་སུ་བསྡུས་ཏེ་བསྟན༔ འདི་ལྟ་བའི་དོན་དུ་བསྟན་པ་དོན་གྱི་རྒྱུད་ལ་རྣམ་གཉིས་ཏེ༔ རང་བཞིན་གྱི་རྒྱུད་དང་ནི་ཐབས་ཀྱི་རྒྱུད་ཡིན་ནོ༔ ཐབས་ཀྱི་རྒྱུད་ལ་རྣམས་གཉིས་ཏེ༔ མཚོན་བྱ་ཐབས་ཀྱི་རྒྱུད་དང་མཚོན་བྱེད་ཐབས་ཀྱི་རྒྱུད་གཉིས་སོ༔ མཚོན་བྱ་རང་གི་ངོ་བོ་རིག་པ་རང་ལ་གནས་པའི་དོན་གཅིག༔ མཚོན་བྱེད་རྒྱུད་ནི་རང་ལ་གནས་པའི་རིག་པ་དེ་རྟོགས་པར་བྱེད་པའི་ཚིག་གི་རྒྱུད་རྣམས་སོ་དེ་རྟོགས་བྱེད༔ རྒྱུད་དོན་རྣམ་པ་རེ་རེ་ལ་ཡང་ངོ་བོ་ངེས་ཚིག་དབྱེ་བ་གསུམ་གྱིས་གསུམ་ཡིན་པས༔ ངོ་བོ་ངེས་ཚིག་དབྱེ་བ་འོ༔ མཚོན་བྱའི་ངོ་བོ་རང་གི་ལུས་ལ་ཁྱབ་པ་སྟེ༔ ལུས་ཅན་རྣམས་ལ་རིག་པ་རང་ཆས་སུ་གནས་ཕྱིར་ཁྱབ༔ དབྱེ་བ་རྣམ་པ་གཉིས་སུ་བསྟན༔ སྟོང་པས་རིག་པ་དངོས་མེད་དུ་ཁྱབ་དང་གསལ་བ་རིག་པ་དངོས་སུ་འོད་དང་བཅས་པས་ཁྱབ༔ ངེས་ཚིག་

སྟོང་པས་རིག་པ་དེས་ཐམས་ཅད་ལ་ཁྱབ་ཕྱིར་རྒྱུད༔ མཚོན་བྱེད་ངོ་བོ་རིག་པ་དེ་རྟོགས་བྱེད༔ དབྱེ་བ་རྣམ་པ་གཉིས་ཡིན་ཏེ༔ འབད་པ་མེད་པར་དབང་པོ་རབ་རྩོལ་སྒྲུབ་བྱ་མི་དགོས་པར་བུདྡྷ་བར་བསྟན་རང་གྲོལ་དང་༔ འབད་བཅས་གྲོལ་བ་འབྲིང་མན་ཆད་ཀྱིས་ཚིག་དང་བླ་མའི་གདམས་པ་ལ་བརྟེན་ནས་ཉམས་སུ་བླངས་ཏེ་བུདྡྷཱའོ་གཉིས་ཡིན་ནོ༔ འབད་མེད་དབང་པོ་ཡང་རབ་ཡིན་གདམས་ངག་བསྟན་པ་ཙམ་གྱིས་རྟོགས་པ་རྙེད་ནས་གྲོལ་བའི་ཕྱིར༔ འབད་བཅས་གྲོལ་བ་རྣམ་པ་གཉིས༔ ཚིག་རྒྱུད་མ་བརྟེན་པར་བླ་མའི་གདམས་པས་གྲོལ་བ་དང་༔ ཚིག་གི་རྒྱུད་ཀྱིས་རྒྱུད་རྣམས་ཀྱི་གཞུང་དོན་རྒྱས་པར་བཤད་པས་གྲོལ་བ་འོ༔ ངེས་པའི་ཚིག་ལ་རྣམ་པ་གཉིས༔ གཞ་ི་མཚོན་པར་བྱེད་པ་ཐབས་ཡིན་ཏེ༔ མཚོན་པ་དེ་ཡང་ཚིག་ཙམ་སྟེ་དོན་གཞན་ནས་བཙལ་མི་དགོས་པ་རྒྱུན་དུ་རང་ལ་གནསཔས་རྒྱུད་ཅེས་བྱ༔ རང་བཞིན་རྒྱུད་ལ་རྣམ་གསུམ་སྟེ༔ གཞི་དང་རང་བཞིན་གྱི་རྒྱུད་སྙིང་པོ་རང་བཞིན་གྱི་རྒྱུད་བཅུད་རང་བཞིན་གྱི་རྒྱུད་ཡིན་ནོ༔ གཞི་རྒྱུད་དངོས་པོའི་གནས་ལུགས་ཐོག་མའི་ཀ་དག་ཏེ༔ དེ་གཞི་ཡི་ངོ་བོ་རང་བཞིན་སྟོང་པར་གནས༔ སངས་རྒྱས་ཐམས་ཅད་དེ་ལ་བརྟེན་ནས་འབྱུང་བས་བསྐྱེད་པའི་ཡུམ༔ དབྱེ་བ་རྣམ་པ་གསུམ་ཡིན་ནོ༔ ངོ་བོ་མི་འགྱུར་བ་རང་བཞིན་གསལ་བ་ཐུགས་རྗེ་ཁྱབ་པ་འོ༔ རྒྱུད་ཀྱི་སྙིང་པོ་སྣང་སྲིད་འཁོར་འདས་རྣམས༔ དེ་ཉིད་ངོ་བོར་རིག་པ་ལ་འདུས་པ་འོ༔ དེ་ཉིད་སྙིང་པོ་རང་བཞིན་རྒྱུད་ཀྱི་རྒྱུད་ཀྱི་ངོ་བོ་ནི༔ སྣང་བ་ཆོས་རིག་པ་ཉིད་སྐུར་ཤར་བའོ༔ དབྱེ་བ་རྣམ་པ་གཉིས་སུ་བསྟན༔ སྙིང་པོ་རིག་པ་སྙིང་པོར་གྱུར་

པས་ངེས་པའི་ཡེ་ཤེས་ཏེ༔ སྐུ་དང་ཡེ་ཤེས་སུ་རང་གི་ལུས་ལ་རྫོགས་པ་དང་༔ སྣང་བ་འབྱུང་བས་ཁྱབ་པས་ཡུལ་ལ་རྫོགས་པ་འོ༔ ངེས་ཚིག་ཀུན་གྱི་སྲོག་དང་འདྲ༔ སྙིང་པོའི་རྒྱུད་ཀྱི་དོན་ཅེས་རྣམ་པར་བཤད༔ བཅུད་ཀྱི་དོན་གྱི་ངོ་བོ་དང་ཕ་མ་རྒྱུད་ནི་རྣལ་འབྱོར་པས༔ ངེས་དོན་རིག་པ་རྡོ་རྗེ་ལུ་གུ་རྒྱུད་དང་ཆོས་སྐུའི་སྒྲོན་མའོ་མངོན་སུམ་མཐོང་བ་འོ༔ ངོ་བོ་རིག་པའི་བཅུད་སྙིང་པོའི་དོན་རྣམས་སྒྲོན་མར་བསྡུས༔ དེ་ཉིད་ངོ་བོ་ལ་གསུམ་སྟེ་གསང་བའི་ཚིག་དོན་གསུམ༔ སངས་རྒྱས་ཐམས་ཅད་རང་གི་རིག་པ་གཅིག་བུར་འདུས་པ་གཅིག་བསྡུས་པའི༔ ངོ་བོ་ཐམས་ཅད་དབྱིངས་རིག་མངོན་སུམ་དུ་མཐོང་བས་བཅུད་ཕྱུངས་པས༔ སྙིང་པོ་བསྡུས་པ་རིག་པ་རང་གི་ངོ་བོ་བཅུད་ཅེས་བྱའོ༔ དབྱེ་བ་རྣམས་པ་གསུམ་ཡིན་ཏེ༔ གཞི་ཆོས་སྐུ་ལོངས་སྐུ་སྤྲུལ་སྐུ་གཞི་དང་གཞི་འཛིན་པའི་རིག་པ་སྙིང་པོའི་བཅུད་ཡེ་ཤེས་སུ་གསལ་བ་མེ་ཏོག་གི་བཅུད་སྒྲོན་མ་བཞི་ཅན༔ དེ་ཡང་བཅུད་ཀྱི་རང་བཞིན་དེ་རང་གི་ངོ་བོ་ནི་ནི༔ སྙིང་པོ་གཞི་ལས་བསྡུས་པས་དངས་མ་སྐུ་དང་རིག་པ་སྒྲོན་མ་གསུམ༔ ངེས་ཚིག་ཡེ་ནས་ཡོད་པ་རང་བཞིན་བབས་ཀྱིས་གྲུབ༔ སེམས་ཅན་ཀུན་ལ་ཁྱབ་པས་རང་བཞིན་ཉིད་ཀྱི་རྒྱུད་ཅེས་བྱའོ༔ འོ་ན་དེ་དག་ཐ་དད་པ་ཡིན་ནམ་ཞེ་ན་རྒྱུད་ཀྱི་རང་བཞིན་དེ་དག་རྣམས༔ དོན་རྣམས་ཐ་དད་མ་ཡིན་ངོ་བོ་གཅིག་ཏེ༔ དཔེར་ན་སྐྱེས་བུ་གཅིག་ལ་མིང་མི་འདྲ་བ་མང་པོ་ཡོད་པ་གང་ནས་བོས་ཀྱང་གཅིག་པ་བཞིན་གང་ཞིག་ལ༔ མིང་ནི་མང་པོ་ཡོད་གྱུར་པ༔ རྒྱུ་གཅིག་གང་ནས་

བོས་ཀྱང་འོངས་པ་བཞིན༔ འགྱུར་མེད་དོན་གཞི་གཅིག་ལ་མཚོན་ཚུལ་ཐ་དད་དུ་བྱུང་བ་ཡང་དེ་བཞིན་ནོ༔ དོན་གྱི་རྒྱུད་རིག་པ་གཏན་དབབ་རྣམས་བཤད་པའོ༔ ཚིག་གི་རྒྱུད་ལ་རྣམ་གསུམ་སྟེ༔ ངོ་བོ་ངེས་ཚིག་དབྱེ་བའོ༔ ངོ་བོ་ཚིག་དེ་དང་དོན་ཉམས་སུ་བླང་བ་འབྲེལ་བ་ཡིས༔ གང་ཟག་ཚིག་གཅིག་གིས་རྟོགས་པའང་ཡོད་རྒྱུད་རྣམས་གྲོལ་བར་བྱེད༔ སྐྱེ་བའི་གོ་རིམ་དང་འཇུག་པའི་གོ་རིམ་ཇི་ལྟ་ཞེས་པ་ན༔ ངོ་བོ་ཉིད་དེའི་ངོ་བོ་གོ་རིམ་ཤེས་པ་ལ་བྱ་ཅེས་རྣམ་བཤད་པ༔ གསང་དོན་གོ་རིམ་འདི་ལྟ་སྟེ༔ རྩ་བའི་རྒྱུད་ནི་རྫོགས་པ་རང་བྱུང་དང་ཡི་གེ་མེད་པའི་རྒྱུད་རྣམ་གཉིས་ཀྱིས༔ ཆོས་རྣམས་ངོ་བོ་གཅིག་པར་རྩ་བ་གཅིག་པའི་ཚུལ་དུ་བཤད༔ བཤད་རྒྱུད་རིག་པ་རང་ཤར་དང་མ་བུ་རིག་པ་རང་གྲོལ་གཉིས་ཀྱིས་ནི༔ ལོ་འདབ་རྩ་བ་དེ་ལས་ཡལ་ག་དང་ལོ་མ་གྱེས་པ་ལྟར་རྒྱས་པའི་ཚུལ་དུ་བཤད༔ ཡན་ལག་རྒྱུད་ཆེན་རིན་ཆེན་སྤུངས་པ་དང་སྐུ་གདུང་འབར་བ་རྣམ་གཉིས་ཀྱིས༔ རྒྱལ་མཚོར་གཟའ་སྐར་ཤར་བཞིན་སྣང་ལ་རང་བཞིན་མེད་པར་སྣང་བ་འདི་གཏན་ལ་འབེབས་པར་བཤད༔ ལུང་རིག་གསལ་བའི་རྒྱུད་སྒྲ་ཐལ་འགྱུར་དང་བཀྲ་ཤིས་མཛེས་ལྡན་གཉིས་ཀྱིས༔ མེ་ཏོག་ཁ་བྱེའི་ཚུལ་དུ་གསལ་བ་སྨིན་བྱེད་དང་བཅས་པར་བཤད༔ མན་ངག་རྒྱུད་སྡེ་མེ་ལོང་གཉིས་ངོ་སྤྲོད་སྤྲས་པ་མུ་ཏིག་ཕྲེང་བ་བཞི་ཡིས་ནི༔ དེ་ཉིད་ཚད་དུ་ཕྱིན་པའི་དྲོད་རྟགས་དང་བཅས་ཏེ་འབྲས་བུ་སྨིན་པའི་ཚུལ་དུ་བཤད༔ དགོངས་པ་རང་གནས་རྒྱུད་ཀློང་དྲུག་པ་དང་སྒྲོན་མ་འབར་བ་ཉི་ཟླ་ཁ་སྦྱོར་གསུམ་གྱིས༔ མཐོང་བྱེད་མིག་གི་ཚུལ་དུ་འབྲས་བུ་རྒྱུར་མི་ལྡོག་པར་བསྟན༔ འཇུག་པ་

རང་གྲོལ་རྒྱུད་སེང་གེ་རྩལ་རྫོགས་དང་ནོར་བུ་ཕྲ་བཀོད་གཉིས་ཀྱིས༔ དྲན་གཞི་སྙིང་གི་ཚུལ་དུ་ངེས་དོན་སྣ་ཚོགས་སུ་འཆར་བ་བསྟན༔ མཁས་པ་ཆོ་གའི་རྒྱུད་ནག་མོ་ཁྲོས་མ་ཀྱིས་ནི༔ དེ་དག་གིས་བསྟན་པ་བསྲུང་བའི་དོན་མེལ་ཚེ་བྱེད་པའི་ཚུལ་ཁྱི་ལྟར་བཤད༔ དེ་ལྟར་རྒྱུད་ཀྱི་ངོ་བོ་ནི༔ གོ་རིམ་རྩ་བའི་རྒྱུད་ལ་སོགས་པ་སྡེ་ཚན་རྣམ་པ་བརྒྱད་དག་གིས༔ གང་ཟག་དབང་པོ་འབྲིང་པོ་རྣམས་ཀྱི་གཅིག་གི་ཆ་རྐྱེན་ནོ༔ དབྱེ་བ་རྣམས་པ་བཅོ་བརྒྱད་དེ༔ རྒྱ་མཚོ་ལྟ་བུའི་རྒྱུད་རིག་པ་རང་ཤར་དང་ནི་ཉི་མ་ལྟ་བུའི་རྒྱུད་སྙིང་གི་མེ་ལོང་དང་༔ སེང་གེ་ལྟ་བུའི་རྒྱུད་སེང་གེ་རྩལ་རྫོགས་དང་ནི་རི་རྒྱལ་ལྟ་བུའི་རྒྱུད་ཡི་གེ་མེད་པ་དང་༔ འཁོར་ལོ་ལྟ་བུའི་རྒྱུད་བཀྲ་ཤིས་མཛེས་ལྡན་དང་ནི་ལྡེ་མིག་ལྟ་བུའི་རྒྱུད་སྒྲ་ཐལ་འགྱུར་དང་༔ རལ་གྲི་ལྟ་བུའི་རྒྱུད་ཀུན་ཏུ་བཟང་པོ་ཐུགས་ཀྱི་མེ་ལོང་དང་ནི་གསལ་ཤིང་ལྟ་བུའི་རྒྱུད་སྒྲོན་མ་འབར་བ་དང་༔ གསེར་ཞུན་ལྟ་བུའི་རྒྱུད་ནོར་བུ་ཕྲ་བཀོད་དང་ནི་མ་བུ་ཉི་ཟླ་ཁ་སྦྱོར་འབྲེལ༔ མེ་ལོང་ལྟ་བུའི་རྒྱུད་ངོ་སྤྲོད་སྤྲས་པ་དང་ནི་མུ་ཏིག་བརྒྱུས་པ་ལྟ་བུའི་རྒྱུད་མུ་ཏིག་ཕྲེང་བ་༔ སྦྲུལ་མདུད་ལྟ་བུའི་རྒྱུད་རིག་པ་རང་གྲོལ་དང་ནི་ཁྱུང་ཆེན་ལྟ་བུའི་རྒྱུད་ཀློང་དྲུག་པ་དང་༔ ཆུ་རྒྱུན་ལྟ་བུའི་རྒྱུད་རྫོགས་པ་རང་བྱུང་དང་ནི་སྤུ་གྲི་ལྟ་བུའི་རྒྱུད་ནག་མོ་ཁྲོས་མ་དང་༔ རྒྱལ་པོ་ལྟ་བུའི་རྒྱུད་སྐུ་གདུངས་འབར་བ་དང་ནི་བང་མཛོད་ལྟ་བུའི་རྒྱུད་རིན་ཆེན་སྤུང་བ་དོ༔ ངེས་ཚིག་རེ་རེས་དོན་རེ་མཚོནཚིག་རེ་རེ་ལ་དོན་གྱི་གོ་བ་རེ་སྐྱེ་བའོ༔ ངོ་བོ་ཉིད་ནི་རབ་མཚོན་དེ་རྟོགས་པར་བྱེད་པའོ༔ རྒྱུད་དེ་དག་གི་གོ་བ་རང་གང་ཞེ་ན་དེ་དག་རྣམས་ཀྱི་དོན་གོ་ནི༔ དེ་ལྟར་

རྒྱུད་ཆེན་བཅོ་བརྒྱད་རྣམས༔ དབང་པོ་ཐ་མའི་དོན་རྣམས་སུ་དེ་ཡང་རྒྱུད་སྡེ་ནི་ལྟ་བ་གེགས་སེལ་གྱི་རྒྱུད་དང་། གབ་པ་མངོན་བྱུང་གི་རྒྱུད་དང་། ཐིག་ལེ་སྤྲོས་བྲལ་གྱི་རྒྱུད་དོ་༔ རྣམ་པར་ཕྱེ་སྟེ་བསྟན་པ་འོ༔ དབང་བོ་འབྲིང་པོ་རྣམས་ལ་འདི་ལྟར་ཏེ༔ རྩ་བའི་རྒྱུད་གཉིས་དང་ཡན་ལག་རྒྱུད༔ ཆེན་གཉིས་བཤད་རྒྱུད་མ་བུ་གཉིས་ལུང་རིག་གསལ་བའི་རྒྱུད་གཉིས༔ དགོངས་པ་རང་གནས་ཀྱི་རྒྱུད་གསུམ་མན་ངག་རྒྱུད་ཆེན་རྣམ་པ་བཞི༔ འཇུག་པ་རང་གྲོལ་གྱི་རྒྱུད་གཉིས་ཆོ་གའི་རྒྱུད་གཅིག་རྣམས༔ གང་ཟག་དབང་འབྲིང་གཅིག་གི་ཆ་རྐྱེན་དུ༔ སྤྲོས་པ་མེད་པའི་སྤྲོས་པ་ཉུང་བ་རྣམས་ལ་དག་འ་བའི་དོན་དུ་ཚུལ་དུ་བསྟན༔ ཤིན་ཏུ་སྤྲོས་པ་མེད་པའི་བློ་རབ་ཏུ་གྱུར་པ་རྣམས་ལ་ནི༔ ཐབས་ཀྱི་རྒྱུད༡དང་རང་བཞིན་རྒྱུད༢༔ དེ་ལ་གཞི་དངོས་པོའི་གནས་ལུགས་མཚོན་བྱ་ཐབས་ཀྱི་རྒྱུད༔ མཚོན་བྱེད་དེ་མཚོན་པར་བྱེད་པའི་ཚིག་དང་བླ་མའི་གདམས་པའོ་ཐབས་ཀྱི་རྒྱུད་དང་གཉིས༔ རང་བཞིན་ལ་ནི་དབྱེ་ན་རྣམ་གསུམ་སྟེ༔ གཞི་ཡི་རང་བཞིན་གྱི་རྒྱུད་དང་སྙིང་པོའི་རྒྱུད༔ བཅུད་ཉིད་ཆོས་སྐུ་དང་འདུ་འབྲལ་མེད་པ་རང་བཞིན་རྒྱུད་དང་ལྔ་ཐབས་ཀྱི་རྒྱུད་ལ་གཉིས་རང་བཞིན་རྒྱུད་གསུམ་སྟེ༔ བསྡུས་པ་དག་ལ་དགའ་བ་ཤིན་ཏུ་སྤྲོས་མེད་རྣམས་དོན་དུའོ་ནོ༔ བློ་ཡང་རབ་མཆོག་ཏུ་གྱུར་པ་ལདབྱེ་ན༔ མཚོན་བྱེད་ཚིག་གི་རྒྱུད་དང་གནས་ལུགས་ཀྱི་རིག་པ་དོན་གྱི་རྒྱུད༔ རྣམ་པ་གཉིས་སུ་དེར་མ་འདུས་པ་གང་ཡང་མེད་བསྡུས་ཏེ་བསྟན༔ བཅོ་བརྒྱད་དུ་དབྱེ་བ་དེ་ནི་སྤྲོས་པའི་བློ་ཅན་དང་༔ སྡེ་ཚན་བརྒྱད་དུ་བསྡུས་པ་སྤྲོས་པ་མེད་པའི་བློ་ཅན་དང་༔ ཤིན་ཏུ་སྤྲོས་པ་མེད་པ་རྒྱུད་ལྔར་བསྡུས་ཏེ་དང་༔ གཉིས་སུ་བསྡུས་ཏེ་རབ་ཏུ་སྤྲོས་མེད་རྣམས་ཀྱི་དོན༔ རྣམ་པར་ཕྱེ་སྟེ་བཤད་པར་བྱ༔ ཤིན་ཏུ་ཡང་སྤྲོས་པ་ལ་དགའ་བ་སྤྲོས་པར་གྱུར་

པ་ལ༔ རྒྱུད་རེ་རེ་རང་གཞུང་དུ་འདི་དག་རྣམས་ཀྱང་རྣམ་པར་དབྱེ༔ ཚིག་རྒྱུད་གསལ་བའི་རིམ་པ་ཡིས༔ སྤྱི་ཡི་དོན་དང་གོ་ཡུལ་ནི༔ རྒྱུད་རེ་རེ་ལ་ཡང་བདུན་བདུན་ཏེ༔ ངོ་བོ་ངེས་ཚིག་དབྱེ་བ་དང་༔ དགོས་དོན་དང་ནི་མཚོན་དཔེ་དང་༔ མན་ངག་ཇི་ཙམ་རེ་སྟོན་པ་ཁོང་བཅུད་མན་ངག་ལེའུ་གྲངས་དང་བདུན་ནོ་༔ བདུན་པོ་དག་ཏུ་ཤེས་པར་བྱ༔ དེ་ཉིད་གདམས་ཡུལ་གང་ཟག་གི་བློའི་བྱེ་བྲག་རྣམ་པ་བཞི༔ ཐ་སྙད་ལ་དགའ་བའི་སྤྲོས་པ་ཅན་གྱི་བློ་ཅན་དང་༔ དེ་བཞིན་སྤྲོས་པ་དེ་བས་ཐ་སྙད་ཆུང་བ་མེད་པ་དང་༔ ཤིན་ཏུ་སྤྲོས་པ་མེད་པའི་བློ་ཅན་དང་༔ རབ་ཏུ་སྤྲོས་པ་མེད་པའི་བློ་ཅན་རྣམ་བཞི་ལ༔ རྒྱུད་དོན་ཚིག་རྒྱུད་དང་བསྡུས་རྒྱུད་དང་དོན་རྒྱུད་ལྔ་དང་དོན་གཉིས་སུ་བསྡུས་པ་སྟེ་རྣམ་པ་བཞིར་བསྡུས་ཏེ༔ ངེས་པའི་ལུང་དུ་བཤད་པར་བྱ༔ སྤྲོས་པ་ལ་དགའ་བ་ཅན་གྱི་བློ་རྣམས་ལ༔ ཚིག་རྒྱུད་བཅོ་བརྒྱད་པོའི་དོན་གྱི་རིམ་པ་གསལ་ཕྱེ་ནས༔ རྒྱུད་དོན་བཅོ་བརྒྱདརང་ཤར་ལ་སོགས་པ་རེ་རེའི་དབྱེ་བ་རྣམས༔ རིམ་པ་འདི་ལྟར་ཤེས་པར་བྱ༔ ཨི་ཏི༔ རྒྱ་རྒྱ་རྒྱ༔ བཤད་པའི་རྒྱུད་ཆེན་རིག་པ་རང་ཤར་དེ་ཉིད་རང་གི་གནས་ལུགས་ལ་བྱ་ལ༔ ཚིག་དོན་རྣམ་པ་བདུན་ངོ་བོ་ངེས་ཚིག་དབྱེ་བ་དང་རྒྱུད་དེ་ལ་དགོས་པ་ཇི་ལྟ་བུ་ཡོད་པ་དང་དཔེ་ཇི་ལྟ་བུ་ཡིན་པ་དང་དེའི་ནང་ནས་མན་ངག་གི་དོན་གོ་གང་བསྟན་པ་དང་ལེའུ་དུ་ཡོད་པའོ་གྱིས་བསྟན༔ ངོ་བོ་རིག་པའི་ཡེ་ཤེས་སོ༔ ངེས་ཚིག་དོན་ནི་རྣམ་གསུམ་སྟེ༔ རིག་པ་ཞེས་བྱ་གཞི་གནས་དངོས་པོ་གཤིས་ལ་བྱ་ཏེ༔ ངོ་བོ་དེ་དྲི་མ་དང་བྲལ་བའི་ངོས་ནས་ཀ་དག་ཡེ་ཤེས་སོ༔

རང་ཞེས་བྱ་བ་རང་ངོ་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་སྟེ༔ སྣང་ལ་རང་བཞིན་མེད་དོ་ནས་རང་བཞིན་ལྷུན་གྲུབ་ཡེ་ཤེས་སོ༔ ཤར་ཞེས་བྱ་བ་རིག་པ་ཀུན་ལ་ཁྱབ་པས་སྣང་བ་སྟེ༔ ཐུགས་རྗེ་ཀུན་སྣང་བ་སྣ་ཚོགས་སུ་འཆར་བའི་ངོས་ནས་ཁྱབ་ཡེ་ཤེས་སོ༔ རྒྱུད་དེའི་དབྱེ་བ་རྣམ་པ་བཞི་ཡིན་ཏེ༔ རང་རིག་དེ་ཡང་གློ་བུར་དུ་བྱས་པ་ལྟ་བུ་མ་ཡིན་ཏེ་ཡེ་ནས་གནས་པས་ཡེ་ནས་རང་ཤར་དང་༔ ཉམས་སུ་བླངས་པས་དབྱིངས་དང་རིག་པ་འདུ་འབྲལ་མེད་པའོ་དུས་ན་རང་ཤར་དང་༔ ཡུལ་རྐྱེན་ནམ་མཁའ་བག་རྡུལ་དངས་པ་དང་ཕྲད་པའི་ཚེ་ཕྲད་ཚེ་རང་ཤར་དང་༔ བར་དོའི་ཡུལ་ལུས་བོར་བ་དང་རང་གི་རིག་པའི་སྣང་བ་ལྷུག་པ་ཤར་བའོ། །ལ་རང་ཤར་རོ༔ རིག་པ་རང་ཤར་ཞེས་བྱ་མིང་དུ་བཏགས་པ་ཙམ་པོ་འདི་བའི༔ ཚིག་ཏུ་བཀོད་པའི་རྒྱུད་མཚོན་ཚུལ་ཙམ་ཚིག་ཏུ་བྱུང་བ་དེ་ལ༔ དགོས་དེ་ལ་དགོས་པ་ཇི་ལྟ་བུ་ཞེ་ན་པའི་དོན་ནི་གང་ཞེ་ན༔ དབང་པོ་རྟུལ་བའི་གང་ཟག་ཚིག་ལ་ཡིད་ཆེས་བྱེད་པ་རྣམས༔ བརྗོད་བྱའི་ཚིག་ལ་དཀའ་ལ་རེ་བའི་དུས་ཡིད་ཆེས་པས༔ སྒྲ་དོན་འཇུག་པའི་དགོས་པ་རྟོགས་པར་བྱེད་པའི་རྒྱུ་མཚན་གྱིས་ངོ་བོ་རྟོགས་པར་བྱེད་པའོ༔ དཔེ་ཇི་ལྟ་བུ་ཞེ་ན་མཐུན་ཆོས་རྣམ་པ་གསུམ་ལྡན་རྒྱ་མཚོ་ཆེ་བ་གཏིང་ཟབ་པ་གཟུགས་གསལ་བར་བྱེད་པ་དང་འདྲ་བར་བརྗོད་བྱ་རྒྱ་ཆེ་བ་དང་ཚིག་དོན་མན་ངག་ཟབ་མོ་གཏིང་དཔག་དཀའ་བ་དང་ཐེག་པ་གཞན་གྱི་དོན་འདི་ནས་གསལ་བར་བྱེད་པའོཏེ༔ བརྗོད་བྱ་རྒྱ་མཚོ་ལྟ་བུར་བསྟན༔ ཁོང་བཅུད་མན་ངག་རྣམ་ལྔ་སྟེ༔ སྐུ་ཡི་དོན་གསུམ་གྱསི་བསྟན་ཡེ་ཤེས་གསུམ་བསྟན༔ ལྟ་སྒོམ་སྤྱོད་གསུམ་པའི་མན་ངག་བསྟན༔ རིག་པ་རང་གི་གནད་ཟིན་པ་དེ་ཡུལ་

ནམ་མཁའ་ཆོས་སྐུ་སྤྲོས་མེད་རིག་པའི་གནད༔ རིག་པ་རང་གི་ངོ་བོ་གཟིར་བ་དེ་རྡོ་རྗེ་ལུ་གུ་རྒྱུད་ལོངས་སྐུ་ཟང་ཐལ་རང་གི་གནད༔ རིག་པའི་རྩལ་སྒྲོན་མ་གཟིར་བ་སྟེ་མིག་ནམ་མཁར་སྤྲུལ་སྐུ་ཀུན་ཁྱབ་ཤར་བའི་གནད༔ ཡེ་ཤེས་ངེས་ཚིག་གསུམ་གྱིས་མཚན་ཉིད་སྐབས་སུ་སྟེ༔ གང་ཟག་སྤྲོས་བཅས་སྤྲོས་མེད་ཤིན་ཏུ་སྤྲོས་མེད་རབ་ཏུ་སྤྲོས་མེད་རྣམ་པ་བཞི་དག་ལ༔ སྤྲོས་བཅས་རྣམས་ལ་ཡེ་ཤེས་ནི༔ ཉི་ཤུ་རྩ་ལྔའི་རང་ཤར་ལས་བཤད་པའོ་དབྱེ་བ་རྣམས༔ སྤྲོས་པ་ཅན་གྱི་དོན་དུ་འོ༔ ཁྱད་པར་ཆོས་དབྱིངས་ཡེ་ཤེས་ལ་སོགས་ཡེ་ཤེས་ལྔ་དོན་ནི༔ སྤྲོས་མེད་ཐ་སྙད་སྤངས་པ་རྣམས་ཀྱི་དོན་དུ་འོ༔ གཞི་གནས་ཡེ་ཤེས་རྣམ་གསུམ་ན ི་ངོ་བོ་ཀ་དག་གི་ཡེ་ཤེས་རང་བཞིན་ལྷུན་གྲུབ་ཀྱི་ཡེ་ཤེས་ཐུགས་རྗེ་ཀུན་ཁྱབ་ཀྱི་ཡེ་ཤེས་སོ་༔ ཤིན་ཏུ་སྤྲོས་མེད་རྣམས་ལ་འོ༔ ཉག་གཅིག་གསལ་བའི་ཡེ་ཤེས་ནི་ཐིག་ལེ་ཉག་གཅིག་ནི་རང་གི་སྒྲོན་མ་གསལ་བའོ་༔ རབ་ཏུ་ཚིག་གི་ཞེན་པ་ཆོད་པ་སྤྲོས་མེད་ཉིད་ལ་འོ༔ ལྟ་བ་རྣམ་པ་གཉིས་ཡིན་ཏེ༔ ཆོས་ཅན་ལྟ་བའི་ལྟ་བ་དང་ཆོས་ཉིད་ལྟ་བའི་ལྟ་བའོ་༔ ལྷ་དང་ཐེག་པའི་དང་པོ་མི་སོགས་ལུང་མ་བསྟན༔ མུ་སྟེགས་རྟག་ཆད་དུ་འཛིན་པའི་སྒོ་ནས་ཁྱད་མེད་རྟག་ཆད་མཐར་འཛིན་ཕྱི་པ་དང་༔ ཨ་ནུ་མན་ཆད་རང་འདོད་ཞེ་འདོད་ཞུགས་པས༔ ཆོས་ཅན་ཉིད་ལ་ཕྱིའི་ཡུལ་གཏན་ལ་འབེབས་འབེབས་ནས་ལྟ་ལྟ་ནས༔ ནང་སེམས་ཉིད་མ་མཐོང་བས་ཆོས་ཉིད་དོན་ལ་རྡུལ་རེག་མེད༔ ཨ་ཏི་སེམས་སྡེ་ཀློང་སྡེ་མན་ངག་གི་སྡེ་གཞན་རྣམ་པ་ཁ་ཅིག་གིས༔ འདི་ཉིད་རང་གི་ངོ་བོ་དེ་ཉིད་ཕྱོགས་ཙམ་མཐོང་བ་མེད༔ རྫོགས་པ་ཆེན་པོ་ཐིག་ལེའི་

སྐོར༔ ཕྱི་སྐོར་དང་ནང་སྐོར་དང་གསང་སྐོར་གྱི་རྩ་བའི་རྒྱུད་སྡེ་ལྔ་ཡན་ལག་བཞི་ལུང་སྡེ་དྲུག་སོགས་བས་ཀྱང་༔ འདི་ཉིད་དོན་ལ་རེག་དངོས་གཞིི་དེ་ལ་པ་མེད༔ དེ་ཕྱིར་གསང་ཆེན་བླ་ན་མེད་པའི་མན་ངག་གི༔ ལྟ་འདི་གཞན་གྱིས་མ་རྟོགས་པས་ཤིན་ཏུ་གསང་བ་འོ༔ བྱས་པ་མེད་པའི་ལྟ་བ་ཡེ་ནས་གནས་པའི་རིག་པ་ལ༔ ལྟ་བྱེད་མེད་པའི་ཡུལ་ནམ་མཁའི་ངང་དུ་མིག་གི་རྟེན་སྒྲོན་མ་མིག་གིས་མཐོང་༔ བྱུང་བ་མེད་པའི་གང་ནས་ཀྱང་འོང་བ་མེད་པ་རིག་པ་ཉིད༔ ཐོབ་པའི་རྒྱུ་མེད་ཡེ་ནས་རྟོགས་པར་ཡང་དེ་ཕྲལ་རྙེད་མིན་རང་ཞེས་བྱ༔ ཡུལ་ནམ་མཁའ་ལ་སྣང་བ་རྡོ་རྗེ་ལུ་གུ་རྒྱུད་དེ་ཉིད་ཤར༔ དེ་ཕྱིར་ལྟ་བ་མཐོང་བྱེད་དུ་ཡོད་པས་མིག་དང་འབྲེལ༔ སྒོམ་པ་ཞེས་བྱ་རྣམ་གསུམ་སྒོམ་པ་དང་ཏིང་ངེ་འཛིན་དང་དགོངས་པའོ་སྟེ༔ སྒོམ་པ་དེ་ཉིད་སེམས་འཛིན་ཏིང་འཛིན་མཉམ་རྗེས་དང་༔ བསམ་གཏན་དགོངས་པ་ཞེས་བྱ་གསུམ་དུ་བསྟན༔ སྒོམ་པ་དེ་ཉིད་ལྷ་དང་མི་ཡི་སེམས་འཛིན་ཏེ༔ མཚན་མ་ཨ་དཀར་ལ་སེམས་བཟུང་བ་སོགས་རིམ་རྩོལ་བློ་ཡི་རིམ་པ་ཉིད༔ ཨ་ནུ་མན་ཆད་ཐེག་པ་བརྒྱད་པོའི་གཞུང་༔ དངོས་པོའི་གནས་ལུགས་མི་རྟོག་ཡེ་ཤེས་ཆེན་པོ་ལ༔ བཅུ་དྲུག་ཆར་ཡང་ཉེ་བ་མེདརང་བཞིན་སྤྲུལ་པའི་ཞིང་ཁམས་སུ་ཡང་མི་ཉེ་བྱས་ཆོས་བློའི་ཆོས་ཡིན༔ ཏིང་འཛིན་ཞེས་བྱ་བློོ་བཞག་སེམས་ཀྱི་གནས་པ་ལ་གནས་པར་བྱ་བ་སྟེཿབློས་བྱས་མཉམ་གཞག་རྗེས་འཛིན་པས༔ སེམས་ཉིད་མ་རྟོགས་པ་ཨ་ཏི་སེམས་ཕྱོགས་པ་ཆ་འགའ་ཡི་གཞུང་༔ ཉམས་སུ་ལེན་པ་དེ་ཉིད་བསྒོམ་པའི་སྒོམ་ཆེན་པ༔ རང་བཞིན་རྫོགས་པ་ཆེན་པོའི་གནས་ལུགས་དངོས་པོ་གཤིས་ཀྱི་འདུག་ཚུལ་ལ༔ ལྷུན་གྲུབ་ཀྱི་ཕྱོགས་ཙམ་ཡང་མ་རྟོགས་པས་

རྡུལ་ཕྲན་བརྒྱར་གཤགས་ཆར་མི་ཉེ༔ དགོངས་པ་ཉིད་ནི་ཆུ་རྒྱུན་རྒྱུན་ཆད་མེད་པ་སྐྱེ་དགོས་པ་ཡིན་འདྲ༔ མཉམ་པར་གཞག་པའི་ཚེ་གསལ་དུ་མེད་དང་ལངས་པ་ཡིས་མི་གསལ་བའི་རྒྱུ་མེད༔ ཡེ་ཤེས་ཀྱི་ལམ་ལ་འགྲོ་དང་ཉལ་དང་རྟོག་མེད་ཀྱི་ངང་དུ་འདུག་གནས་ལུགས་ཀྱི་ཐོག་ཏུ་སྤྱོད་པའི་ཅི་བྱེད་ཀྱང་འབྲལ་བ་མེད་པ་དང་༔ ཟ་དང་འཐུང་བདེ་བ་ཉམས་སུ་མྱོང་དང་གདོད་མའི་གཤིས་སུ་འཆགས་པ་དང་༔ གླལ་ངོ་བོའི་རྩལ་སྣང་དང་སྦྲིད་ཡེ་ཤེས་རྒྱུན་དུ་དང་གློ་རང་བྱུང་རྟེན་མེད་ལུ་དང་༔ དུས་ཐབས་ཅད་དུ་འདི་ཉིད་རང་ཡིན་འདི་ཉིད་བྲལ་བ་མ་ཡིན་ཏེ༔ ཉིན་དང་མཚན་མོ་འཁོར་འདས་ཕྱེ་བ་མེད༔ དྲན་གཞི་ངོ་བོ་གཅིག་ཙིཏྟིའི་དཀྱིལ་འཁོར་དུ༔ དཔེར་ན་བུམ་པའི་མར་མེ་རང་གསལ་དུ་བཞིན༔ བསམ་རྒྱུན་གཞི་གནས་པས་ཟད་པས་རིག་པ་ཉིད༔ དྲན་བྱེད་འཛིན་པ་ནུབ་པས་འགགས་པས་རང་ཞེས་བྱ༔ རྒྱུན་དུ་དེའི་ཐོག་ནས་གནས་པས་ཤར་བའོ༔ དེ་ཕྱིར་སྒོམ་པ་སྙིང་དང་ལུས་གནད་སྐུ་དང་ཡེ་ཤེས་འབྲེལ༔ སྤྱོད་པ་རྩོལ་བཅས་དང་རྩོལ་མེད་རྣམ་པ་གཉིས་ཡིན་ཏེ༔ རྩོལ་བྱས་ཐིག་པ་གཞན་གྱི་བློ་ཡིས་སྤྱོད་པ་དང་༔ རྩོལ་མེད་རང་གི་མཚན་ཉིད་སྣང་བ་དབང་བསྒྱུར་རོ༔ རྩོལ་བཅས་རྣམས་ནི་གཞན་རིམ་དགུ་འི་དོན་ནོ༔ རྩོལ་མེད་རང་གྲོལ་དུ་ཤེས་པའི་རྩལ་རང་ཤར་སྤྱོད་པ་ནི༔ འཛིན་པ་རང་གྲོལ་གྱི་སྤྱོད་པ་བུ་ཆུང་ཤེས་པ་ཇི་བཞིན་དུ༔ སྣང་ཡང་ཞེན་པའི་རྟོག་པ་ཆོད་པ་སྣང་བ་ཐད་ཀའི་རྐྱེན་ཞེན་བྲལ༔ ལུ་གུ་རྒྱུད་ངོ་བོར་ཅིར་ཡང་མ་གྲུབ་ཀྱང་རང་བཞིན་འོད་དང་ཐིག་ལེ་དང་སྐུ་དང་ཡེ་ཤེས་སོ་ལ་རྟག་ཏུ་ལྟ༔ དེ་དང་འབྲལ་

བ་མེད་པ་ནི༔ རང་སྣང་སྣང་བ་མཐོང་ཡང་དོན་རང་སྣང་དུ་མཐོང་བས་ཞེན་མེད་སྤྱོད་པ་སྟེ༔ ཤེས་རིག་གསལ་བ་རིག་པའི་ངང་ཤེས་པ་རང་སོར་གནས་པ༔ ཡེ་ནས་དེ་ལྟར་ཡོད་པ་ཡིན་པས་གཞན་ནས་མ་བྱུང་རང་ཞེས་བྱ༔ ཁྱབ་གདལ་འཛིན་མེད་སྣང་བ་སྣ་ཚོགས་སུ་ཤར་ཞིང་སྣ་ཚོགས་སུ་གྲོལ་བའོ་རང་གྲོལ་བས༔ དབྱིངས་དང་རིག་པ་འདུ་འབྲལ་མེད་པ་སྙིང་པོའི་ཡུལ་ལ་ཤར་ཞེས་བྱ༔ ཨ་ནུ་མན་ཆད་རིམ་བློ་ཡིས་འདི་ཉིད་རྟོགས་པ་གང་ཡང་མེད༔ མ་ཆགས་སྣང་བ་སྤང་ལེན་དང་རེས་འཇོག་བྱེད་པ་ཞེན་པའི་སྤྱོད་པ་འོ༔ ཆགས་ལ་སྣང་བ་རང་གྲོལ་པས་ཞེན་མེད་སྤྱོད་པ་ནི༔ འདི་ཉིད་གདམས་པ་ཤེས་པས་མཐོང་བའི་རྣལ་འབྱོར་རོ༔ དེ་ཕྱིར་རྣལ་འབྱོར་སྤྱོད་པ་ནི་གནད་དུ་འགྲོ་མི་འགྲོ་བརྟག༔ ཡན་ལག་ལུས་ཀྱི་གནད་རྣམས་དང་འབྲེལ་བ་འོ༔ དེ་ཡི་ཕྱིར་ན་གདམས་ཡུལ་ནི༔ རྣམ་པ་གསུམ་དུ་འདུས་པ་ཡིན༔ ལུས་གྱི་གནད་འདུག་སྟངས་དང་ཡུལ་གྱི་གནད་སྤྲིན་དང་བྲལ་བ༔ རིག་པ་སྒྲོན་མེའི་གནད་མི་འགུལ་བ་གཉིས་དང་འབྲེལ་ཡིན་ནོ༔ ལེ་འུ་བརྒྱད་ཅུ་རྩ་དྲུག་གིས༔ གཞུང་དོན་ཚིག་རྣམས་རྫོགས་པར་བསྟན་པའོ༔ ཨི་ཏིཿརྒྱ་རྒྱ་རྒྱ༔ རྡོ་རྗེ་སེམས་དཔའ་སྙིང་གི་ཡང་དོན་བདུན་དུ་ཤེས་པར་བྱ༔ མེ་ལོང་ཞེས་བྱའི་རྒྱུད་ལ་ནི༔ ངོ་བོ་སྙིང་པོའི་རིག་པ་རང་གི་ཡེ་ཤེས་བཅུད་རྣམས་འདུས༔ ངེས་ཚིག་བླ་མའི་གདམས་པས་རྣམ་པ་བཞི་ཡིན་ཏེ༔ སྟོང་པ་རིག་པ་དངོས་མེད་ཟང་ཐལ་སྲ་མཁྲེགས་རྡོ་རྗེ་འོ༔ ཚིག་ཐམས་ཅད་འབྱུང་བས་དོན་དུ་མ་མཚོན་བྱེད་པ༔ སེམས་དཔའ་ཞེས་དྲན་བསམ་སྣ་ཚོགས་སུ་ཤར་བ་དེ་ཡང་རང་སར་གྲོལ་བར་བསྟན་

ནི་རྣམ་པར་བཤད༔ སྙིང་ནི་བཅུད་རྣམས་འདུས་པ་འོ༔ ཡུལ་ནམ་མཁའ་ལ་སྣང་བའི་རེག་པ་དེ༔ མིག་གི་དབང་པོ་མ་འགགས་པས་ལྟ་བར་བྱེད་པས་མེ་ལོང་ངོ༔ དབྱེ་ན་དོན་དུ་དང་ལྡན་ན་རྣམ་པ་གསུམ་ཡིན་ནོ༔ མཚོན་གཞི་རིག་པ་གསལ་ཆ་མ་འགགས་པས་པ་གཞི་ཡི་མེ་ལོང་དང་༔ མཚོན་བྱེད་ཚིག་གི་རྡོ་རྗེ་དེ་མཚོན་བླ་མའི་གདམས་པ་དང་༔ རིག་ངོ་སྙིང་དང་རིག་པ་སྣ་ཚོགས་སུ་སྣང་བ་སེམས་སུ་འབྲེལ༔ དགོས་པ་རྒྱུད་རྣམས་གཞན་གྱི་ནི༔ ཁོང་གི་སྙིང་མེད་རོ་དང་འདྲ་བར་སྙིང་དང་འདྲ་བར་བསྟན༔ སྙིང་མེད་ལུས་ཀྱི་སྟོབས་མེད་བཞིན༔ དཔེར་ན་མཁའ་ལ་ཉི་ཤར་བས༔ མཐའ་ཡི་མུན་པ་སེལ་བ་དང་འདྲ་བར་མ་རིག་པའི་མུན་པ་སེལ་བ་བཞིན༔ ཁོང་དོན་མན་ངག་ངོ་སྤྲོད་དང་ཡེ་ཤེས་དབང་པོ་རྣམ་གསུམ་སྟེ༔ ངོ་སྤྲོད་དཔེས་གཏན་ལ་དབབ་པ་བསྟན་ཉི་ཤུའི་དམིགས་བསྟན་དང་༔ དབང་པོའི་ཉི་ཤུ་གཅིག་ལ་བྱེ་བྲག་ཡེ་ཤེས་བཞི་དང་ཉི་ཤུ་རྩ་གཅིགསྒྲོན་མའི་བཞི་སྣང་བ་ཉིད་ཉམས་སུ་ལེན་པའི་གནད་བསྟན་ཏོ༔ ངོ་སྤྲོད་རྣམ་པ་གསུམ་ཡིན་ཏེ༔ འོད་ལ་སྤྲད་པ་རིག་པ་ལ་འོད་ཡོད་ཚུལ་གཏན་འབེབས་རྣམ་པ་བདུན༔ ཡེ་ཤེས་རིག་པ་དེ་ཉིད་ཡེ་ཤེས་སུ་སྣང་ལུགས་གཏན་ལ་འབེབས་བདུན་ཏེ་རིག་པ་བདུན་རིག་པ་རང་གི་ངོ་བོ་གཏན་ལ་འབེབས་༔ དེ་ལྟར་ཉི་ཤུ་རྩ་གཅིག་གིས༔ དོན་གྱི་ངོ་བོ་རིག་པ་གཏན་ལ་དབབ་མཚོན་པའོ༔ དེ་ལྟར་རྣམ་པ་མང་བཤད་སྤྲོས་བཅས་ཡིན་པར་བསྟན་ཀྱང་༔ མདོ་དོན་གསུམ་དུ་འདུས་འདི་དག་ཉིད་ཡིན་ནོ༔ ཆོས་སྐུ་ངོ་སྤྲོད་རང་ལ་ཐོག་མ་ནས་འདི་ལྟར་གནས་ཞེས་པའི་གདམས་ངག་གིས༔ གཞི་ཉིད་ལུ་གུ་རྒྱུད་

ནམ་མཁའ་ལ་མངོན་སུམ་ལམ་དུ་བྱེད༔ ལོངས་སྐུ་ངོ་སྤྲོད་རིག་པ་དེ་ཡང་རྒྱན་སྣ་ཚོགས་དང་ལྡན་པར་བསྟན་པའི་གདམས་ངག་གིས༔ རིག་པའི་འོད་ཁྱིམ་རིག་པའི་སྣང་བ་གཏན་ལ་དབབ་པའོ་མཁའ་ལ་དབྱུང་༔ སྤྲུལ་སྐུ་ངོ་སྤྲོད་སྣང་བ་ཆིག་ཆོད་དུ་ཤེས་པའི་གདམས་ངག་གིས༔ འཁྲུལ་སྣང་རང་གྲོལ་ཞེ་སྡང་ཉིད་ཞེ་སྡང་གིས་གྲོལ་བ་སོགས་ཉིད་དུ་བསྟན༔ དབང་པོར་རབ་བདུན་འབྲིང་བདུན་ཐ་བདུན་མ་ལ༔ བདུན་བདུན་དག་སྟེ་རྩ་གཅིག་གོ༔ ཡེ་ཤེས་སྣང་བ་བཞི་ཡིན་ཏེ༔ གཞི་འཛིན་པའི་ཡེ་ཤེས་གསུམ་རྡོ་རྗེ་སྟེ༔ མཚན་ཉིད་འཛིན་པའི་ཡེ་ཤེས་ལྔ་སེམས་དཔའ་འོ༔ ལམ་སྣང་པའི་ཡེ་ཤེས་ཉི་ཤུ་རྩ་གཅིག་སྒྲོན་མ་ལྔ་སྙིང་༔ སྤྲོས་བྲལ་ཐིག་ལེ་ཡིན་ལུགས་གཏན་ལ་དབབ་པའོ་ཉག་གཅིག་མེ་ལོང་ཡིན༔ དེ་ཕྱིར་གནད་བཞི་དག་གིས་གནད་དུ་འགྲོ་མི་འགྲོ་ལྟ་ནི༔ འདི་ཉིད་མན་ངག་ཉམས་སུ་ལེན༔ རྡོ་རྗེ་རིག་པ་སྐྱེ་འཇིག་དང་བྲལ་བ་རིག་པའི་གནད་དུ་བསྟན༔ སེམས་དཔའ་ཡུལ་ཉིད་འབྱུང་བའི་ཆོ་འཕྲུལ་དུ་མ་ཤར་ཡང་ནམ་མཁའ་ལ་རང་ཞི་བ་ལྟར་རིག་པའི་ངང་དུ་ཀུན་གྲོལ་བའོ་ནམ་མཁའི་གནད༔ ལུས་ཀྱི་སྒྲ་དང་ཡེ་ཤེས་མེད་པའོ་གནད་ནི་སྐུ་དང་ཡེ་ཤེས་ཡོད་པའོ་སྙིང་ཡིན་ནོ༔ མེ་ལོང་ལ་བཞིན་ཤར་བ་དང་འདྲ་བར་ནམ་མཁའ་ལ་སྒྲོན་མ་མཐོང་བའོ་སྒྲོན་མ་མཐོང་བའི་གནད༔ དེ་ལྟར་གནད་བཞི་ཟིན་པ་འདི༔ རིག་པའི་རང་ངོ་ཤེས་པ་འོ༔ ལེའུ་བརྒྱད་ཀྱིས་གཞུང་དོན་རྫོགས༔ ཨི་ཏི༔ རྒྱ་རྒྱ་རྒྱ༔ སེང་གེ་རྩལ་རྫོགས་གནད་ཀྱི་དོན་ལ་ཡང་བདུན་ཏེ༔ ངོ་བོ་ལྟ་བའི་གནད་ལུས་གནད་འདུག་སྟངས་ཡུལ་གནད་ནམ་མཁའ་སྤྲིན་མེད་རིག་པའི་གནད་ཤེས་པ་

མ་འགུལ་བ་གསུམ་རྫོགས༔ ངེས་ཚིག་རྒྱུད་ཀྱི་རྣམ་པ་གསུམ་ཡིན་ཏེ༔ གཞན་གྱིས་འཇིགས་བྲལ་ཐེག་པ་གཞན་དང་རྒྱུད་གཞན་ལས་ཁྱད་པར་དུ་བྱུང་བས་སེང་གེ་སྟེ༔ འཁྲུལ་སྣང་ལྟ་བའི་རང་རྩལ་གྱིས་འཁྲུལ་པ་རང་གྲོལ་དུ་ཟིལ་གནོན་རྩལ་དུ་སྣང་༔ གནད་ལུས་ཀྱི་གནད་མིག་ཡུལ་གྱི་གནད་ནམ་མཁའ་ཡེ་ཤེས་ཀྱི་གནད་སྒྲོན་མ་སྟེ་དེ་ལྟར་ལྟ་བའི་གནད་དང་སྒོམ་པའི་གནད་དང་སྤྱོད་པའི་གནད་གསུམ་རང་ལ་རྫོགས་པའི་ཕྱིར༔ རྫོགས་ཞེས་རྣམ་པར་བཤད་པའོ༔ རྒྱུད་ཀྱི་དབྱེ་བ་རྣམ་པ་གསུམ་ཡིན་ཏེ༔ ལྟ་བྱེད་ཡུལ་གྱི་རྩལ་རྫོགས་དབྱིངས་དང་རིག་པ་འདུ་འབྲལ་མེད་པར་གནས་པ་ལ་བྱ་དང་༔ མཐོང་བྱེད་ངོས་ཟིན་རྩལ་རྫོགས་དབྱིངས་དང་རིག་པ་སྒྲོན་མ་གསུམ་བར་སྣང་དུ་ཟིན་པས་དང་༔ སྙིང་པོའི་བཅུད་མཐོང་བའི་ཚད་དང་གོམས་པའི་ཚད་བརྟན་པའི་ཚད་དང་གསུམ་གསུམ་རྩལ་རྫོགས་སོ༔ དགོས་དོན་དེ་ལ་དགོས་པ་ཅི་ཡོད་ན་རྒྱུད་རྣམས་གཞན་གྱི་ཚིིག་དང་༔ དོན་རྣམས་ལྟ་བར་བྱེད་པས་མིག་དང་འདྲ༔ དཔེ་ནི་དཔེར་ན་རི་རྒྱལ་རྩེར་ཕྱིན་མཐོན་པོའི་ཁ་ནས་བལྟས་ན་ཐམས་ཅད་མཐོང་བ་དང་འདྲ་བས་ན༔ དམའ་བའི་ལུང་རྣམས་མཐོང་བ་བཞིན༔ འོག་མའི་ཐེག་པ་འོག་མ་རྒྱུད་དོན་ཇི་བཞིན་མཐོང་༔ འོག་མས་གོང་མ་མཐོང་བ་མེད་རྒྱུད་གཞན་གྱི་མན་ངག་རྣམས་འདི་ཉིད་ནས་གསལ་བས་གཞན་གྱིས་འདི་ཉིད་རྟོགས་པ་མིན༔ འདི་ནས་མན་ངག་ཇི་ལྟ་བུར་སྟོན་ཞེ་ན་ཁོང་དོན་མན་ངག་རྣམ་གསུམ་སྟེ༔ དགོངས་པའི་གནད་དང་ཐིག་ལེ་མཐོང་བ་ལ་སོགས་ལྔ་ལྟ་བའི་ཕུགས་དབྱིངས་རིག་གཉིས་མེད༔ ཉམས་སུ་བླང་བའི་མཐོང་བ་དང་གོམས་པ་དང་ཚད་བརྟན་པ་ལ་སོགས་རྣམས་

བསྟན༔ དགོངས་དོན་མན་ངག་རྣམ་པ་ལྔ༔ ཐིག་ལེ་མཐོང་སོགས་དགོངས་པ་ནི༔ རྩལ་རྫོགས་རང་གི་ནང་རྒྱུད་ན་གསལ་བས་དེར་ཤེས་བྱ༔ ལྟ་བའི་དོན་ནི་རྣམ་པ་གཉིས་སུ་བསྟན༔ ཕྱི་ལ་ཡུལ་ལྔ་མ་ཡིན་པར་ནང་དུ་ཡུལ་ལ་ལྟ་ཡུལ་ལ་ལྟ་དང་ངོ་བོ་ཉིད་རིག་པའི་གདངས་མ་ཡིན་པར་རིག་པའི་ངོ་བོ་ལ་ལྟ་བའོ་ལ་ལྟ༔ ཡུལ་ལ་ལྟ་བ་ཕྱི་ཡུལ་ནམ་མཁའ་དང་ནས་དབྱིངས་ཀྱི་སྒྲོན་མ་འོ༔ ངོ་བོ་ཉིད་ནི་རིག་པ་རྡོ་རྗེ་ལུ་གུ་རྒྱུད༔ དབྱིངས་རིག་འདུ་འབྲལ་མེད་པར་ནམ་མཁའི་ཁམས་སུ་དེའི་ཕྱིར་བར་སྣང་ཁམས་སུ་བཟུང་བ་དང་མཐོང་ཤེས་ནས༔ འགྱུར་མེད་ཚད་ཆེན་པོ་གསུམ་གྱི་དྲོད་རྟགས་མཐར་ཕྱིན་པས་འཕྲད་ཟིན་པའོ་གཟེར་ཆེན་ཐེབས་པས་འབྲལ་བ་མེད༔ དེ་ཕྱིར་དབྱིངས་ཁང་པ་འདྲ་བའི་ནང་དེའི་བདག་པོ་དང་འདྲ་བའི་རིག་པ་ཉིད་འཕྱོ་བ༔ ཆགས་པ་མེད་པའི་ཡིད་ཀྱིས་གཟེར་བར་སྣང་དུ་ཤེས་པ་གཏད་པས་བཏབ་ནས༔ མཐོང་རིགས་གསལ་རང་གི་ངོ་བོ་མཐོང་བའི་ཡི་གེ་ཞེས་བྱའོ་བ་ཅེར་མཐོང་དགོངས་པ་ལྟ་བའོ༔ ཉམས་བླང་བ་མཐར་ཕྱིན་ཚད་ནི་རྣམ་གསུམ་སྟེ༔ མཐོང་བའི་ཚད་གསུམ་དང་གོམས་པའི་ཚད་གསུམ་བརྟན་པའི་ཚད་ལ་ཡང་དང་གསུམ་དུ་བསྟན༔ རིག་པའི་ཡུལ་ལམ་རང་བཞིན་མཐོང་བའི་ཚད་ནི་འོད་ཡིན་ཏེ༔ མི་འགྱུར་མཐིང་ཁ་དབྱིངས་ཀྱི་ཚད་དབྱིངས་རྣམ་པར་དག་པའི་སྒྲོན་མ་ཡི་གེ་ན་རོ་ལ་བརྟེན་ནས་རིག་པའི་རྟེན་བཅའ༔ ཟླུམ་འཁྱིལ་གསལ་རྨ་བྱའི་མདོངས་ལྟ་བུར་རང་རྩ་ལྟེམས་པས་རང་ཤར་བ་སྒྲོན་མའི་ཚད༔ འཕྲ་དང་འགྱུ་བ་རིག་པའི་རྡོ་རྗེ་ལུ་གུ་རྒྱུད་ཀྱི་ཚད༔ མཐོང་བའི་མིག་གི་དུས་སུ་ཤེས་པར་བྱ༔ གོམས་དེ་ལ་ཉམས་སུ་བླངས་པའི་སྟོབས་

པའི་ཚད་ནི་རྣམ་གསུམ་སྟེ༔ མཐིང་ཁ་དབྱིངས་རྣམ་པར་དག་པའི་སྒྲོན་མ་ལས་རྒྱ་ཆེར་མཆེད་ཁ་དོག་ལྔ༔ མིག་ལས་བར་སྣང་གི་ཐད་ཀར་ཁྲུ་གང་ཙམ་དུ་སྣང་བ་ནི༔ རིག་པ་ཡུལ་ལ་དང་པོ་གོམས་པའི་ཚད་ཡིན་ནོ༔ དེ་ཡང་ཐེར་ཟུག་ཏུ་ཉམས་སུ་བླངས་པས་དེ་ནས་དེ་ལ་རབ་འདྲིས་ནས༔ རེ་ལྡ་ེགྲུ་བཞིའི་རྣམ་པའང་ཡང་ན་ཡུལ་ཇི་ལྟར་ཡོད་པའི་དབྱིབས་ལྟ་བུའི་རྣམ་པ་ཙམ་འཆར་བས༔ དེ་ལ་རབ་ཏུ་གོམས་པའི་ཚད༔ དེ་མ་འགྱུར་བ་ཉམས་སུ་བླངས་པས་དེ་ནས་ཡུལ་ལུང་པ་དེ་ཉིད་ཀྱི་གྲུའམ་མདའ་རྒྱང་གང་ཚུན་ཆོད་ཙམ་དུ་སྟེ༔ དེ་ལ་མཆོག་ཏུ་གོམས་དེ་ཉིད་ལས་མི་འགྱུར་བར་བལྟས་པས་ནི༔ སྣང་བ་མིག་གི་མཐོང་ཚད་ཐམས་ཅད་འོད་སྣང་དུ༔ ཤར་བ་དབྱིངས་ལ་གོམས་པའི་ཚད་ཟིན་པའོ༔ ཟླུམ་འཁྱིལ་ཐིག་ལེ་སྟོང་སྒྲོན་ལས་ནི་ཟ་འོག་རིས༔ རང་གི་སྣ་རྩེ་ལ་མཐོ་གང་གི་སར་ཤར་ན༔ དང་པོ་སྒྲོན་མ་ཉིད་ལ་དང་པོར་བསླབ་པ་གོམས་པའི་ཚད་ཡིན་ནོ༔ དེ་ལས་གྱེན་དུ་སྨིན་མའི་མཚམས༔ མེ་ལོང་ཐིག་ལེ་ཆེ་ཆུང་ཙམ་དུ་གསལ་གྱུར་ན༔ བར་དུ་གོམས་པའི་ཚད་ཡིན་ནོ༔ སྣང་བ་འོད་ཀྱིས་གར་ཁྱབ་པར་ཐམས་ཅད་ཐིག་ལེ་རུ༔ ཤར་ནས་བྱ་དཀར་མོ་གདང་ལ་དཀྱུས་པ་བཞིན་དུ་ཀྲིག་གེར་གནས་པ་ན༔ མཆོག་ཏུ་གོམས་པའི་ཚད་ཡིན་དེ་ལ་བསླབ་པས་གཞན་མེད་དོ་ནོ༔ རིག་པའི་ངོ་བོ་ལུ་གུ་རྒྱུད༔ འདབ་ཆགས་ཕུག་རོན་འཕུར་རྐྱེན་ཙམ་གྱུར་ན༔ དང་པོ་སྣང་བ་ལ་གོམས་པའི་ཚད་ཡིན་ནོ༔ དེ་ནས་དེ་ཉིད་ལ་མ་འགུལ་བ་གསུམ་གྱིས་རབ་ཏུ་ཉམས་བླངས་ན༔ རིག་དྭགས་ཤྭ་བ་སྤང་རྩིབས་ལ་རྒྱུག་བའི་བང་དང་མཉམ་ཙམ་པ་ནི༔ བར་དུ་སྔ་མ་བས་བརྟན་པ་གོམས་པའི་ཚད་ཡིན་ནོ༔

དེ་ཉིད་ཡང་དང་མི་འགུལ་བ་གསུམ་དང་འབྲེལ་བར་ཡང་བལྟས་ན༔ བུང་བ་མེ་ཏོག་གི་བཅུད་ལ་འཁོར་བ་ཙམ་འདི་ནི་བོགས་དབྱུང་པ༔ དེ་ནས་མིག་གིས་བལྟས་པའི་ས་དེར་སྡོད་གྱུར་ན༔ མཆོག་ཏུ་སྣང་བ་དང་གོམས་པའི་དང་འདྲིས་པ་ཚད་ཡིན་ནོ༔ ཤིན་ཏུ་དེ་ལས་ཀྱང་ཉམས་སུ་བླངས་ན་ཡང་དག་གོམས་པའི་ཚད་༔ འགུལ་ནི་རིག་པ་ཡེ་ཤེས་ཀྱི་རླུང་ཆུན་པའི་རྟགས་དང་འཕྲིགས་པ་མེད་པ་དང་༔ ཉིན་གསལ་བ་དང་མཚན་མོ་མི་གསལ་བ་མ་ཡིན་པར་དུས་རྒྱུན་དུ་མེད་སྣང་ན༔ རབ་ཏུ་གོམས་པའི་ཚད་ཐེབས་པ་ཅེས་བྱ་བ་ཡིན་ནོ༔ ལུས་ཀྱི་སྐུར་སྣང་ལུ་གུ་རྒྱུད༔ ཚིགས་དང་འདྲ་བའི་བར་དག་ཏུ༔ ཡེ་ཤེས་ཀྱི་རྩལ་སྨིན་པས་གཟེར་ཐེབས་པ་ཅེས་བྱའོ་ཐིག་ལེ་ཉུང་འབྲུ་ཙམ་ནང་དུ༔ སྐུ་ནི་ཤིན་ཏུ་ཕྲ་ཤར་ཐིག་ལེ་རེ་རེའི་ནང་དུ་སྐུ་རེ་རེ་ཤར་བས་སྨིན་པ་སྟེ་དཔེར་ན་སྒོ་ང་ལ་བྱེའུ་ཕྲུག་བརྡོལ་བ་དང་འདྲའོ་དང་༔ སྣང་བ་ཐམས་ཅད་སྐུར་ཤར་ན༔ རིག་པ་སྐུ་གསུམ་གཉིས་མེད་དུ་འདྲེས་པ་ཞེས་བྱ་བརྟན་པའི་ཚད་ཡིན་ནོ༔ འདི་ལྟར་སྣང་བ་ཐམས་ཅད་སྐུ་དང་ཡེ་ཤེས་སུ་བྱུང་སྟེ་ས་ཆུ་མེ་རླུང་སྣང་བ་དང་༔ འབྱུང་བཞིའི་ས་རྡོ་རི་བྲག་དང་སྐྱེས་པ་བུད་མེད་སོགས་སྣང་བ་འགགས་གྱུར་ནས༔ ཁ་དོག་དབྱིངས་རིགས་འདུ་འབྲལ་མེད་བའི་དགོངས་པ་ལྔ་ཡི་འོད་སྣང་གིས༔ གང་ཡུལ་བལྟས་པ་དེར་སྣང་ན༔ དབྱིངས་ནི་འབྱུང་བ་བཞི་རང་སར་སྟེ་ཆོས་ཉིད་ལ་གཟེར་ཐིབས་པས་བརྟན་པ་ཚད་ཡིན་ནོ༔ རང་ལུས་འོད་ཀྱི་རང་གི་ལུས་ཀྱང་འོད་དུ་སྣང་སྟེ་འདི་ཡི་སྤྱི་བོའི་སྟེང་དུ་སྟེང་དག་ཏུ༔ འཁར་གཞོང་ཁ་སྦུབས་པ་ལྟ་བུ་དགུ་བརྩེགས་སུ་བརྩེགས་པ་ལྟ་བུ་ཡི༔ ཐིག་ལེ་བརྩེགས་མ་གྱེན་ཤར་ན་གཅིག་གི་སྟེང་དུ་གཅིག་བྱུང་ན་སྒྲོན་མ་སྨིན་པའི་ཚད་ཡིན་ནོཿསྒྲོན་

མ་བརྟན་པའི་ཚད་ཡིན་ནོ༔ དེ་ཉིད་མཐོང་བ་ལྟ་དང་མི་འབྲལ་བ་སྒོམ་པ་ཉམས་གོང་ནས་གོང་དུ་འཕེལ་ཏེ་དེ་དང་འདྲེས་པས་སྤྱོད་པ་ཡིན༔ ངག་སྔགས་དང་ཕྱག་རྒྱ་ལུས་ཀྱི་ཉིད་ཀྱང་ངོ་༔ རིམ་གྱིས་འཆར་བར་བསྐྱེད་དང་རྫོགས་པ་ཅེར་མཐོང་དུ་སྣང་བ་དེ་ཉིད་དེ༔ ལེ་འུ་བཅུ་གསུམ་རྒྱུད་ཀྱི་གཞུང་ཆོག་དག་གིས་ནི༔ གཞུང་གི་ཚད་རྣམས་རྫོགས་པའོ༔ ཨ་ཏི༔ རྒྱ༔ གསང་བ་ཡི་གེ་མེད་པའི་རྟགས་ཀྱི་ཡི་གེ་མེད་པ་ལ་ཟེར་རམ་བརྗོད་པའི་ཡི་གེ་མེད་པ་ལ་ཟེར་རམ་དངོས་པོ་གཤིས་ལ་ཡི་གེ་མེད་ཟེར་རམ་བརྗོད་པ་བཟང་ངན་མེད་དུ་བརྗོད་པ་བཟང་ངན་ཤུགས་ལས་བྱུང་བ་ལ་མེད་ཟེར་ན་ཤོག་གུའི་ཡི་གེ་མེད་པ་ལྟ་བུ་ལ་ཟེར་རམ་ཤོག་གུ་ལ་ཡི་གེ་བཀོད་པ་ལྟ་བུ་ལ་ཟེར་རམ་ཨཱ་ལི་དང་ཀ་ལི་མེད་པ་ལ་ཟེར་རྒྱུད་ལའང་བདུན་ལས༔ ཚིག་དོན་རྣམ་པ་བདུན་ཡིན་ཏེ༔ ངོ་བོ་སྤྲོས་མེད་ཐིག་ལེ་འོ༔ ངེས་ཚིག་བརྡ་དང་མིང་ཟད་པས༔ ངོ་བོ་ལ་ཚིག་མི་རྙེད་པས་ཚིག་ལ་རྟགས་སུ་བཀོད་པས་ཡི་གེ་མེད་པ་ཞེས་བྱ་འོ༔ དབྱེ་བ་རྣམ་པ་གཉིས་ཡིན་ཏེ༔ ཀ་དག་ཐོག་མའི་གཞི་ལ་ཚིག་མེད་པའི་གནད་ཀས་སྒྲིབ་ཟད་ཡི་གེ་མེད༔ འབྱུང་རྐྱེན་ཉམས་སུ་བླངས་པའི་ཡི་གེའི་མཐའ་ཟད་པས་འགགས་པས་ཡི་གེ་མེད༔ དེ་ཡི་དགོས་པ་ཅི་ཞེ་ན༔ དངོས་པོ་རིག་པ་རང་གི་ངོ་བོ་གཞི་གཤིས་ཀྱི་འདུག་ཚུལ་དེ་ལ་ཚིག་གིས་གཏན་ལ་ཕེབས་སམ་སྙམ་པ་རྣམས་ལ་ཚིག་གིས་གཏན་ལ་མི་ཕེབས་པར་བསྟན་ལ༔ ཐ་སྙད་དག་ཏུ་འཛིན་པ་རྣམས༔ དེ་ལས་ཞེན་པ་བཟློག་པའི་ཕྱིར༔ ཡི་གེ་མེད་ཅེས་ཐ་སྙད་ཀྱིས་སངས་མི་རྒྱ་བར་བཤད་པའོ༔ དཔེར་ན་རི་རྒྱལ་རྩེར་ཕྱིན་ན༔ ཐམས་ཅད་མཐོང་བཞིན་ཡུལ་རྐྱེན་གྲོལ༔

ཁོང་མན་ངག་དུ་སྟོན་ཞེ་ན་དོན་མན་ངག་རྣམ་གསུམ་སྟེ༔ བཞག་ཐབས་ངོ་བོ་སྣང་བ་ཅེར་བཞག་ལ་སོགས་ཏེ་བཞི་བསྟན་པ་དང་༔ དབྱིངས་ཆོས་སྐུ་རྣམ་པར་དག་པའི་སྒྲོན་མ་དང་རིག་པ་རྡོ་རྗེ་ལུ་གུ་རྒྱུད་ཀྱི་སྐུ་ཁྱད་པར་གསང་དོན་དང་༔ ཞལ་ཆེམས་ཆོས་ཀྱི་ངོ་བོ་གཟུང་བ་དཀའ་ཡང་ཡེ་ཤེས་ཀྱི་རྩལ་གདམ་པས་འགྲུབ་གསང་བའི་མན་ངག་གོ༔ བཞག་ཐབས་རྣམ་པ་བཞི་ཡིན་ཏེ༔ སྣང་བ་ཅོག་བཞག་རང་སོར་སྤྱོད་པའི་ཚད༔ རྒྱ་མཚོ་ཁ་སློབ་པར་གསལ་གཏིང་དངས་པའི་དཔེ་ཅོག་བཞག་བསྒོམ་པའི་ཚད༔ རི་བོ་མི་འགྱུར་བ་གཞི་ཆེ་བ་དཔངས་མཐོ་བའི་དཔེ་ཅོག་བཞག་ལྟ་བའི་ཚད༔ རིག་པ་ཅོག་བཞག་རང་སར་གྲོལ་བ་འབྲས་བུའི་ཚད༔ དེ་ལྟར་ཉམས་སུ་བླངས་པའི་ཚད་བཞི་ལྡན་པའི་རྣལ་འབྱོར་དེ༔ ངེས་པའི་དོན་གནས་ལུགས་དངབློ་འདྲེས་པའོ༔ སྤྱོད་ཡིད་འགྱུར་ནུས་པའི་དཔེ་སྟེ་དེ་ལྟར་བླ་མའི་གདམས་པའོ་པའི་མན་ངག་ཆང་ལྟ་བུ༔ སྣང་བ་དབང་བསྒྱུར་འབྱུང་བའི་དགྲ་དང་བྲལ་བ་ར་རོ་འདྲ༔ སྣང་བའི་ཚད་ནི་དབྱིངས་ཀྱིས་རྒྱ་ཆེ་བར་ཤར་བས་བཟུང་༔ སྒོམ་པའི་མན་ངག་རིམས་ནད་ཀྱི་དངོས་པོ་དེས་ཤེས་པ་བསྒྱུར་བར་ནུས་པ་ལྟ་བུ༔ ཉིན་མཚན་ཁ་སྦྱོར་རིམས་ཀྱིས་བཏབ་པའི་སྐྱེས་བུ་དང་འདྲ་སྟེ་དྲན་མེད་དུ་ཐེབས་བཞིན༔ དགོངས་པའི་ཚད་ནི་ནམ་མཁར་དབྱིངས་རིག་འདུ་འབྲལ་མེད་དུ་བཟུང་༔ ལྟ་བའི་མན་ངག་ཕ་རོལ་དུ་འབིགས་པ་སྟེ་མདའ་ལྟབུ༔ རིག་པའི་རང་ངོ་ཟིན་པ་ནི༔ སྐྱེས་བུའི་སྙིང་ལ་མདའ་ཕོག་པ་དང་ཤི་བ་མཉམ་པས་ཕྱིས་མི་ཐར་པ་བཞིན་རིག་པ་རྟོགས་པས་ཕྱིས་འཁོར་བར་མི་ལྡོག༔ ལྟ་བའི་ཚད་ནི་རང་སྣང་དུ་ཤར་བས་སྒྲོན་མས་

བཟུང་༔ འབྲས་བུའི་མན་ངག་རྩི་དུག་སྦྱར་བ་ལ་ནུས་པ་ཡོད་པས་རྩི་དང་འདྲ༔ གདིང་ལྟ་སྒོམ་སྤྱོད་བའི་གསུམ་ཚད་དུ་ཕྱིན་པ་ནི༔ སྐྱེས་བུའི་ཁོང་དུ་རྩིས་ཐེབས་རྣམས་པ་ཐམས་ཅད་དུ་ཐར་མི་སྲིད་པ་བཞིན༔ འབྲས་བུའི་ཚད་ནི་རིག་པ་ཕྱིར་མི་ལྡོག་པའི་རིག་པ་ཐོག་ལྟ་བུས་བཟུང་༔ དེ་ལྟར་འབྲས་བུའི་རང་གིས་རང་ངོ་མཐོང་བས་ཚད་ཟིན་ན༔ ཆང་ནད་སངས་པའི་སྐྱེས་བུ་རང་སངས་ལ་སོང་བ་བཞིན༔ རིམས་ནད་བྱང་བའི་སྐྱེས་བུ་སླར་མི་ལྡོག་པ་དང་༔ སྙིང་ལ་མདའ་ཕོག་ཤི་བ་སོས་མི་སྲིད་པར་གནད་དུ་སོང་བ་དང་༔ རྩི་ཡིས་ཤི་བའི་སྐྱེས་བུ་བཞིན༔ ཕྱིར་མི་ལྡོག་པའི་རིག་པ་སྐར་མདའ་ལྟ་བུ་ཕྱིར་ལ་ལྡོག་པ་མ་ཡིན་ནོ༔ དབྱིངས་དང་རིག་པའི་ངོ་བོ་ནི༔ དབྱིངས་ལ་རྣམ་པ་གཉིས་ཡོད་ཏེ་གང་ཞེ་ན༔ ཕྱི་ཡི་དབྱིངས་དང་ནང་དབྱིངས་སོ༔ ཕྱི་ཡི་དབྱིངས་ནི་ནམ་རྐྱེན་སྤྲིན་དང་བྲལ་བ་མཁའོ༔ ནང་དབྱིངས་རྣམ་དག་སྒྲོན་མ་སྟེ་ཡི་གེ་ན་རོ་ལྟ་བུའོ༔ རིག་པ་ཉིད་ཀྱང་གཉིས་ཡིན་ཏེ༔ རིག་པའི་ཆ་ཐིག་ལེ་ཤས་གདངས་དང་ནི༔ རིག་པ་རྡོ་རྗེ་ལུ་གུ་རྒྱུད་རང་གི་ངོ་བོ་འོ༔ མདོར་ན་དབྱིངས་རིག་ཁྱིམ་དང་བདག་པོའི་ཚུལ་རྣམ་པ་གཉིས༔ ངོ་བོ་ཉིད་དེ་ཉམས་བླངས་ན་མིག་གི་དབང་པོ་ལ་བལྟས་ན་༔ སྐུ་དང་འོད་དང་ཐིག་ལེ་དང་༔ སྣ་ཚོགས་བྲེང་བྲེང་གཟུང་བར་དཀའ་བ་འགྱུ་བའི་ཟེར་སྣང་བ༔ སྣང་བ་དེ་ཉིད་གཞན་ནས་མ་བྱུང་རང་སྣང་ཡིན༔ ཤར་ཡང་རིག་པ་རང་གི་ངོ་ལས་ཤར༔ གྲོལ་པ་ཉིད་ན་གཞན་དུ་སོང་བ་མེད་དེ་རང་གྲོལ་ལོ༔ དེ་ལྟར་མིག་གི་ཡུལ་དུ་སྣ་ཚོགས་ཤར་བ་དེ༔ བྱས་ཤིང་གོམས་པས་བྱུང་བ་

མིན༔ ཡེ་ཉིད་ནས་ནི་གཞི་སངས་རྒྱས་དང་སེམས་ཅན་ཁྱད་མེད་དུ་གནས་པའི༔ བརྟན་པའི་ཚད་དེ་ལྟར་གདེང་ཚུད་རྣལ་འབྱོར་པས༔ ཤར་བས་ཡེ་ནས་ཡོད་པ་ཡིན་ཏེ་གཅིག་ལ་ཡོད་པ་མ་ཡིན་ཐམས་ཅད་ལ་དེ་ལྟར་གནས་པས་དགའ་བའི་སེམས་མེད་དེ༔ འདུག་ཚུལ་ཤེས་བྱ་ལ་བབས་ཀྱིས་གྲུབ་པ་དེ་ལྟར་ཡེ་ནས་ཡིན༔ རིག་གདང་ལུ་གུ་རྒྱུད་དབྱིངས་སྒྲོན་མའི་སྣང་བ་ལ༔ ས་མི་སུབ་ཆུ་མི་ཁྱེར་མེ་མི་ཚིག་རླུང་མི་འཐོར་འབྱུང་བའི་དགྲ༔ དེ་ཉིད་བཤིག་པར་ནུས་པ་མིན༔ ལུང་དུ་མ་བསྟན་གདམས་ངག་མེད་པའི་གང་ཟག་གིས༔ གསལ་བའི་མེ་ལོང་ཕྱར་ནས་བལྟས་ཀྱང་གནད་མེད་པས་མི་གསལ་དག་གམ་ནི༔ མིག་སྟོང་དག་གིས་བལྟས་པས་ཐམས་ཅད་དུ་བལྟས་ཀྱང་གདམས་པ་མེད་པས་མི་མཐོང་རྒྱ་ལ་ལས་ཅན་བུདྡྷ་བ་རྣམས་ཀྱིས་མཐོང་ན་འཚང་རྒྱ་སྟེ་དེ་ཉིད་མ་མཐོང་བ་རྣམས་བུད་མི་དྷའོ་ཀྱང་༔ དེ་ཉིད་མཐོང་བ་མ་ཡིན་ནོ༔ གྲུབ་པའི་མཐའ་དང་འབྲེལ་བ་མེད་ལྟ་སྒོམ་བྱས་ཆོས་ཀྱིས་མི་རྟོགས་གྱིས༔ དེ་ཉིད་དཔྱད་ཀྱང་རྙེད་པ་མིན༔ ཕྱྭ་དང་དབང་ཕྱུག་གིས་མ་བྱས་ཏེ་ཡེ་ཤེས་ཡོད་པས་ཐ་མ་འཇིག་པ་མེད་པའོ༔ འཇིག་རྟེན་ལྟར་སྣང་ལྟར་འཁྲུལ་བ་ཡང་མིན་ཏེ་ཆོས་གཞན་གྱིས་ཚིག་ཏུ་བརྗོད་ཀྱང་མཐོང་བ་མེད་དོ་འཁྲུལ་པ་མེད༔ འདོད་ཆགས་ཞེ་སྡང་གཏི་མུག་གིས༔ དེ་ཉིད་ཡེ་ནས་བསྒྲིབས་འབྲས་བུ་ལས་ཡིན་པ་མིན༔ རང་སྣང་རང་ལ་ཤར་བ་སྟེ༔ ཤེས་རབ་ཀྱིས་ཀྱང་དཔྱད་དུ་མེད་གཏིང་མི་དཔོགས༔ རྒྱུད་ལུང་མན་ངག་རྣམས་ཀྱིས་ནི༔ དེ་ཉིད་ཚིག་དང་ཡི་གེས་བརྟགས་ཀྱང་མཐོང་བ་མིན་ཏེ་ཚིག་དང་མ་འབྲེལ༔

དམྱལ་བ་བྱོས་སོང་ཡི་དྭགས་དང་༔ རིགས་དྲུག་སྣང་བ་ཡང་རིག་ནང་དུ་ཤར་བས་དེ་རང་ཉིད་༔ ཆེད་དུ་བསྒྲུབས་པ་བྱས་པས་བྱུང་བ་ལྟ་བུ་མ་ཡིན་ཏེ༔ ཐོག་མ་ཡེ་ནས་དེ་ལྟར་ཤར་ནས་ཡོང་༔ སྐྱེས་བུའི་རྩོལ་བས་སྒྲུབ་ལས་བྱུང་བ་མིན༔ མ་བྲིས་པའི་དཀྱིལ་འཁོར་དེ་ཡིན་མ་བསྒོམས་པའི་ལྷ་དེ་རང་༔ མ་བཟླས་པའི་སྔགས་དང་མ་བསྒྱུར་བའི་ཕྱག་རྒྱ་མ་བཤམས་པའི་མཆོད་པ་དེ༔ བསྐྱེད་རིམ་གྱིས་ཤར་བ་དང་སྐུ་དང་ཡེ་ཤེས་རྫོགས་པའི་རིམ་པ་དེ༔ སངས་རྒྱས་དེ་ཉིད་དུ་འདུས་པ་སེམས་ཅན་འཁོར་འདས་ཡིན༔ དབང་རིག་པ་ལ་རང་དབང་ཐོབ་པ་དང་རིམ་པ་རིག་པ་ཉིད་དང་གཟེར་ཐེབས་པས་དམ་ཚིག་ཡིན༔ རང་གི་བླ་མ་ལྷ་ཡང་ངོ་༔ ཞལ་ལེའུ་ཐ་མའི་དོན་ཆེམས་མན་ངག་རྣམ་གསུམ་སྟེ༔ ཕྱི་ནང་ལུས་ངག་ཡིད་ཀྱི་ལུས་གསང་བའི་བྱ་བ་གཏོང་༔ དལ་བ་ངག་དལ་བས་ལོངས་སྐུ་སེམས་དལ་བས་ཆོས་སྐུ་ཐོབ་རྣམ་གསུམ་ཐོབ་མཐོང་འགྱུར༔ ཕྱི་ནི་ལུས་དལ་ན་ཡེ་ཤེས་སྐྱེ་བའི་གྲོགས་ཡིན་ནང་ནི་སེམས་དལ་བས་རིག་པ་རང་བཞིན་གྱི་གནས༔ གསང་བ་དལ་ན་འཁོར་འདས་གཉིས་མེད་དུ་འདྲེས་པ་རིག་པ་ཉིད་ཡིན་ནོ༔ ཕྱི་ལ་ཆ་གསུམ་དག་དུ་སྟེ༔ ལུས་དང་ངག་དང་ཡིད་ཡིན་ནོ༔ ལུས་ཀྱིས་འཇིག་རྟེན་པའི་ཞེན་པ་དབྱུང་སོ་ནམས་རབ་ཏུ་གཏང་༔ རྐྱེན་མེད་གྲོགས་མེད་པར་རི་དྭགས་སྨས་མ་བཞིན་རི་ཁྲོད་དང་དགོན་པར་གནས་པ་འོ༔ སྐོར་བ་ལ་སོགས་ཅི་ཡང་མི་བྱ་ལྷ་ཕྱག་དང་༔ འགྲོ་དང་ཡན་ལག་བསྐྱོད་བྱེད་རྒྱུ་ཅིག་བྱུང་ན་བཟང་བྱས་ངན་བྱས་འདྲ་མི་བྱ༔ གྲོགས་དང་བྲལ་ཏེ་གཅིག་པུར་འདུག༔ ངག་ལ་རྣམ་པ་གསུམ་ཡིན་ཏེ༔

འཇིག་རྟེན་འཁྲུལ་པའི་ལོང་གཏམ་དང་༔ སྔགས་བཟླས་ཁྱད་པར་མེད་ཁ་ཏོན་བརྗོད་མེད་ཀྱི་དོན་ལ་སྒྲིབ་པར་མཚུངས་ལ་སོགས་དང་༔ མདོར་ན་བརྗོད་པའི་ཚིག་རྣམ་སྤངས༔ ལྐུགས་པ་གསོད་པ་བྱུང་ཡང་ཚིག་མི་འཆོར་བར་དག་ནི་ཇི་བཞིན་ནོ༔ ཡིད་ལ་རྣམ་པ་གསུམ་སྤང་ཏེ༔ བསམ་དང་མི་བསམ་ཐམས་ཅད་དང་༔ བཟང་དང་ངན་བའི་བཟང་ངན་གང་ཡང་གསེར་སྒྲོག་གིས་བཅིངས་པ་དང་ཐག་པའི་སྒྲོག་གིས་བཅིངས་པ་འཆིང་བའི་སྒོ་ནས་མཉམ་པར་འདྲའོ་རྟོག་པ་དང་༔ བསམ་པའི་རྒྱུན་རྣམས་བཅད་པ་འོ༔ སེམས་མེད་འདུ་ཤེས་མེད་པའམ་འགུལ་སྐྱོད་མེད་པ་རོ་དང་འདྲ་བར་འདུག༔ ནང་ནི་རྣམ་པ་གསུམ་ཡིན་ཏེ༔ ལུས་ཀྱི་སྤྱོད་པ་སྤྱད་མི་བྱ༔ ངག་གིས་བརྡ་ཙམ་ཉིད་མི་བྱ༔ བསྒོམ་བློས་དེ་མི་མཐོང་བས་ཡིད་ཀྱིས་སྒོམ་པ་སྒོམ་པ་མིན༔ ཤེས་རབ་ཀྱིས་ཀྱང་མིག་གི་དེ་བཞིན་ཉིད་མེད་ན་མི་མཐོང་ལྟ་མི་བྱ༔ གསང་བ་རྣམ་པ་གསུམ་ཡིན་ཏེ༔ མིག་ནི་འགུལ་བར་མི་བྱ་སྟེ༔ གླང་པོ་ལྟ་བུར་གཡས་སུ་མི་འཁྲུལ་གཡོན་དུ་མི་འཁྲུལ་ཧར་པོར་ལྟ་གནས་པར་བྱ༔ ལུས་ནི་འདུག་སྟངས་གཅིག་ལས་འགུལ་བར་མི་བྱ་སྟེ༔ དྲང་སྲོང་ཉིད་དང་འདུག་སྟངས་ཙོག་བུ་དང་གན་རྐྱལ་དང་ཁྱི་ཚུགས་བཞིན༔ སྒྲོན་མ་ལ་གཏད་པའི་ཤེས་པ་འགུལ་བར་མི་བྱ་སྟེ༔ མདའ་བསྲང་མིག་གི་ཟུར་མནན་ཏེ་བཞིན་དུ་མིག་ཏུ་གཞུག༔ ལུས་ཀྱི་གནད་ནི་དལ་བ་རྩ་རང་བཞིན་གྱིས་དལ་བས་ཡིན༔ ངག་གནད་སྨྲ་བ་བཅད་པས་ལས་ཀྱི་རླུང་མི་ལྡང་སྟེ་དེ་མ་ལངས་ན་ཡེ་ཤེས་རང་བཞིན་གྱིས་སྐྱེ་བའོ་པ་ཡིན༔ སེམས་ཀྱི་གནད་ནི་གཏད་པ་དབུགས་ཀྱང་ཡིད་ཙམ་འཐེན་པ་ཡིན༔ ལེ་འུ་རྣམ་པ་དྲུག་དག་གིས༔ གཞུང་གི་ཚད་

རྣམས་རྫོགས་པ་འོ༔ ཨ་ཏི༔ རྒྱ༔ ༔བཀྲ་ཤིས་མཛེས་ལྡན་ཞེས་བྱ་བའི༔ རྒྱུད་ཀྱི་ཚིག་དོན་བདུན་དུ་ཕྱེ་ནས་རྣམ་པར་བཤད༔ ངོ་བོ་འཁྲུལ་པ་རིག་པ་གཞི་ཐོག་ཏུ་རང་སར་གྲོལ༔ ངེས་ཚིག་རྣམ་པ་བཞི་ཡིན་ཏེ༔ སྣང་བ་འབྱུང་བ་ལྔའི་བག་རྡུལ་དང་བྲལ་བས་ཡེ་ཤེས་ལྔའི་རང་འོད་གསལ་བ་མ་འདྲེས་ཡོངས་རྫོགས་པས༔ སོ་སོ་གང་ན་གནས་པར་ཝལ་ལེ་གསལ་བས་བཀྲ་ཞེས་བྱ་བར་རྣམ་པར་བཤད༔ བརྗོད་བཅས་འཁྲུལ་པ་དང་པོ་ཅིས་བྱུང་ཞེ་ན་གཞི་ཁུངས་བཅད་དེ་ཡང་གཞི་དང་དེའི་ཤེས་པའི་ཆ་ལས་ཕྱིར༔ གནས་ལུགས་ངོས་ནས་ཤིས་པ་འོ༔ སྒྲོན་མ་མིག་གི་སྒྲོན་མ་ཡུལ་གྱི་སྒྲོན་མ་ལ་གཉིས་སུ་མེད་པར་ཟུང་འཇུག་རང་གསལ་ཕྱིར༔ འོད་ཀྱི་རྒྱན་དུ་མཛེས་པ་ཐིག་ལེ་ཟེར་དང་མུ་ཁྱུད་ལས་མཚོན་ཆ་ལྟར་འཕྲོ་བ་ཡང་འབྱུང་བའོ༔ ཐམས་ཅད་ཞི་ཁྲོ་ལ་སོགས་པའི་སྐུ་རྫོགས་པས་ལྡན་ཞེས་པའོ༔ དབྱེ་བ་རྣམ་པ་གསུམ་ཡིན་ཏེ༔ འཁྲུལ་པའི་འབྱུང་ཁུངས་ཇི་ལྟར་ཡིན་བཅད་པ་དང་༔ དེ་རང་མ་འཁྲུལ་བའི་ཡེ་ཤེས་སུ་གཏན་ལ་དབབ༔ འཁྲུལ་པ་དེ་ཉིད་གཞི་ལ་ལྡོག་པ་འོ༔ དགོས་པ་འཁྲུལ་པ་བརྩད་བཅད་དེ༔ ཡེ་ཤེས་རང་གི་ངོ་བོ་དང་པོའི་གཞི་ཀ་དག་ལབཟློག་པ་འོ༔ དཔེར་ན་རྒྱུད་རིམ་པ་འཁོར་བ་འཁོར་ལོ་ལྟ་བུ་སྟེ༔ འཁྲུལ་པ་དེ་ཉིད་རྩད་མ་ཆོད་ནས་མ་ཤེས་ན༔ ལུས་གཅིག་ནས་གཅིག་ཏུ་ལེན་ཞིང་ཡུན་རིང་འཁོར༔ འཁོར་ལོ་དེ་མ་བསྐོར་སོར་བཞག་ན༔ དེ་ཉིད་རང་སར་དག་པ་འོ༔ ཁོང་དོན་མན་ངག་བཞི་ཡིན་ཏེ༔ འཁྲུལ་པའི་གཞི་ཉིད་ལྷུན་འགྲུབ་རིན་པོ་ཆེ་གནས་ལུགས་གཏན་དབབ་དང་༔ འཁྲུལ་པའི་འཁྲུལ་ལུགས་དག་པའི་རིག་པ་ལ་ཇི་ལྟར་བྱུང་ལུགས་

བསྟན་པ་དང་༔ མ་འཁྲུལ་ཡེ་ཤེས་ངོ་བོ་ཀ་དག་གི་རིག་པ་ངོས་བཟུང་དང་༔ དེ་ཉིད་ལྡོག་པའི་གཞི་ཉིད་དང་གཞི་ཉིད་དུ་གྲོལ་བའི་མན་ངག་བཟློག་པ་འོ༔ འཁྲུལ་བའི་ཡེ་ཤེས་མ་རིག་པ་ལ་སོགས་པས་སྦག་སྦོག་དེ༔ ཐོག་མ་ཅི་ཡི་ངོ་བོར་ཡང་གྲུབ་པ་མེད་པས་ཀ་དག་འཁྲུལ་མེད་ལས༔ ངེས་པ་མེད་པའི་ཤེས་པའི་ཁ་ཕྱིར་ཤོར་བས་ལྷུན་གྲུབ་ལས༔ སྣ་ཚོགས་དུ་མའི་འཆར་སྒོ་བརྒྱད་ཤར་ཚུལ་ལ༔ སྐུ་དང་ཡེ་ཤེས་ལྟར་འཁོར་བ་ལྟར་འགགས་པ་མེད་པའི་རོལ་པ་ནི༔ ཐུགས་རྗེའི་རྩལ་ལས་ཅིར་ཡང་མཛད་ཅིང་ཅིར་ཡང་འཆར༔ ངེས་མེད་སྣང་བ་དུ་མ་བྱུང་བའོ༔ དེ་ཉིད་མ་དཔྱད་པའི་ཤེས་པ་གཟུ་བོའི་བློ་ཅན་ལ༔ མཐོང་བ་མ་འགགས་ཡེ་ནས་གསལ་བས་ཤེས་པའི་ཆ་བག་ཙམ་ཕྱིར་འགྱུར་ཏེ་ནང་གསལ་ཏེ༔ དེ་ལ་ངེས་པའི་ཆར་བཟུང་བའོ༔ དེ་ལྟར་གནས་པའི་གཞི་དེ་ལས༔ འཁྲུལ་པའི་མ་རིག་པ་རྒྱུ་དང་འཁྲུལ་བའི་ས་བོན་ཤེས་པ་བྲེང་ཙམ་ལས་ནི༔ གསལ་བའི་ཆ་རིག་པ་རང་འགྱུ་བྱེད་དུ་ནི་ཕྱིར་ཤོར་བས༔ ཤེས་པ་གསལ་གསལ་དྲགས་ཏེ་ཆ་ཅན་ཅིག་ལ་བདག་གི་ཤེས་པ་གཅིག་ལ་ཟེར་བ་བརྟག་གསལ་རིག་རིག་སྟེ༔ མ་རིག་པ་ནི་རྒྱུ་བདག་ཉིད་གཅིག་པ་དང་། ལྷན་ཅིག་སྐྱེས་པ་དང་། ཀུན་ཏུ་བརྟགས་པའི་མ་རིག་པ་གསུམ་དག་ལས༔ ཡིད་ཙམ་ཕྱིར་འགྱུས་ཏེ་འཁྲུལ་པ་ལ་བདག་རྟོག་གི་བློ་ཤར་སྣང་ཆ་ལས༔ ཡུལ་དེ་གསལ་ཆ་བདག་ཏུ་བཟུང་བའི་བློས༔ གཞི་དང་གཞི་ཡི་ངོ་བོ་ཀ་དག་སྣང་ཆ་ལྷུན་གྲུབ་ལ༔ གཞི་དང་གཞི་ཞེས་ཁྱད་པར་འཁྲུལ༔ ངོ་བོ་རང་བཞིན་ཐུགས་རྗེ་གསུམ་མ་རིག་པས་འཁྲུལ་པའི་རྒྱུ་ལས་ཡུལ་རྐྱེན་ཕྲད༔ རྐྱེན་རྒྱུའི་རྐྱེན་རིག་པ་དང་དམིགས་པའི་རྐྱེན་ཡུལ་དང་བདག་པོའི་རྐྱེན་དེར་འཛིན་དང་དེ་མ་ཐག་

རྐྱེན་དེ་རྣམས་དུས་མཚུངས་པའོ་བཞིའི་དམིགས་པ་མ་དག་པས༔ སྣ་ཚོགས་སྣང་བའི་གསལ་ཆ་འདྲེས༔ ཡིད་དྲུག་མ་རིག་པ་དང་མཚུངས་ལྡན་གྱི་ཡིད། ཡིད་ཀྱི་རྣམ་ཤེས། གཏན་ལ་འབེབས། ཀུན་དུ་འཚོལ། རྣམ་པར་དག་པ། ངེས་པ་འཇོག་པའི་འཛིན་པ་མ་འགགས་པས༔ ཉོན་མོངས་དྲུག་གི་དུག་ལྔ་མ་རིག་པས་བདག་ཏུ་བཅིངས༔ ཡུལ་དྲུག་གཟུགས་སྒྲ་དྲི་རོ་རེག་ཆོས་སོ་སོའི་སྣང་བ་ཤར༔ དེ་ལྟར་ཡུལ་ལ་བདག་བཟུང་བས༔ དེ་ནས་རིམ་གྱིས་ཕྱི་སྣོད་ནང་བཅུད་ཀྱི༔ སྣང་བ་མི་འདྲ་བ་དུ་མས་ས་ཆུ་སོགས་རིགས་དྲུག་གི་གཟུགས་བསྡུས་པའོ༔ འདི་ཉིད་མི་ཤེས་གདམས་པ་འདི་མེད་པའི་ཐེག་པ་གཞན་བྱིས་པ་རྣམས༔ ཟོ་ཆུན་བཞིན་ཏེ་གཅིག་ནས་གཅིག་ཏུ་བརྒྱུད་མར་གནས༔ སོ་སོའི་ལུས་དང་ཚད་དེ་ཡང་ཁ་དོག་སྣ་ཚོགས་ཤེས་པའི་དུས་ན་རྒོད་པ་ལ་དགག་པའི་ཐབས་མེད་རླུང་དང་ཐིག་ལེ་ཤར་བ་ཙམ་གྱིས་ཐོག་མའི་ལུས་ཀྱི་ལེན་ལུགས་རིགས་དྲུག་སོ་སོའི་གཟུགས་སུ་ལེན་པའོ༔ དེ་ལྟར་འཁྲུལ་པའི་དོན་ཤེས་ནས༔ མ་འཁྲུལ་ཡེ་ཤེས་ཡེ་ནས་གནས་པའི་དོན་འདི་ལྟ་བུ༔ ནམ་མཁའ་འཁྲུལ་སྤྲིན་དང་བྲལ་བ་པ་མེད་པ་ལ༔ རིག་པ་འཁྲུལ་མེད་རྡོ་རྗེ་ལུ་གུ་རྒྱུད་ཕྱུངས་བྱས་ཏེ༔ དབང་པོ་འཁྲུལ་པ་མེད་པར་མིག་མ་འགུལ་བར་བལྟ༔ དེ་ལྟར་གསུམ་ཤེས་ཉམས་སུ་ལེན་པའི་སྐྱེས་བུ་དེ་གནས་གཞན་གྱི་སྒྲ་མི་གྲག་པའི་སར་རྣལ་འབྱོར་པས༔ གཟེར་གསུམ་དག་ནི་གདབ་པར་བྱ༔ ལུས་ཀྱི་གནད་ནི་རྩ་ཨ་བ་དྷཱུ་ཏི་ཡིན་ཏེ༔ སྟེམས་དང་གཅུད་པ་མིག་དང་འབྲེལ་པས་དེ་སྟིམས་པས་སྣང་བ་ཟིན་པའོ་དེ་རྩེ་ཆུང་དང་འབྲེལ་བས་གཡས་གཡོན་གྱི་གཅུད་ཐབས་

མཆོག་ཏུ་གཅེས༔ རིག་པའི་གནད་ནི་ཡེ་ཤེས་རླུང་དང་བཅས་ཏེ་རྒྱུ་བས་རླུང་ཡིན་ཏེ༔ བཟུང་དང་སྟེང་རླུང་བསྐྱིལ་འོག་རླུང་བསྡམ་མཆོག་ཏུ་གཅེས༔ དབྱིངས་ཀྱི་སྒྲོན་མའི་གནད་ནི་འོད་མཐིང་ཀ་ཡིན་ཏེ༔ མཆེད་པའི་དུས་ཚོད་དེ་ལས་ཁ་དོག་སྣ་ཚོགས་སུ་འཆར་བའི་དུས་སུ་རྒོད་པ་མནན་པའི་ཐབས་དེ་ལས་རླུང་དང་ཐིག་ལེ་ཤར་ཙམ་ན་བྱིང་བ་སེང་ཐབས་བཟུང་བ་གཅེས༔ མ་འཁྲུལ་ཡེ་ཤེས་དེ་བཞིན་ནོ༔ གདེང་གསུམ་ཐོབ་པའི་རྣལ་འབྱོར་ལ༔ སྣང་བ་ངོ་བོ་ཀ་དག་ཏུ༔ རང་ཤར་དང་པོ་ནས་རང་གྲོལ་ཡིན་པས་ན༔ ཐ་མ་ཡང་དེ་རིག་པ་ཉིད་ལ་དང་པོ་ཀ་ནས་དག་འཁྲུལ་རྒྱུ་མེད༔ འཁྲུལ་རྒྱུ་མེད་པས་རང་གནས་ཀྱི་ལྟ་བ་གཞི་ལ་བསྐྱལ༔ རིག་པ་ངོ་བོ་དང་སྣང་བ་རྩ་བྲལ་རང་དག་དུ་འགྲོ་སྟེ་དུས་མཚུངས་པས༔ འཁྲུལ་པ་ཉིད་ནི་དེ་ཉིད་ལྡོག་རྒྱུ་མེད་དེ་རང་གི་ངང་དུ་གྲོལ་བའོ་གཞི་ལོག་པའོ༔ ལེ་འུ་བདུན་འདིར་རྒྱུད་ལེའུ་ལྔ་ལས་མི་སྣང་བ་རྒྱུད་ཀྱི་ཞབས་མ་ཚང་ངམ་བརྟག་གྱིས་གཞུང་རྫོགས་སོ༔ ཨི་ཏི༔ རྒྱ་རྒྱ་རྒྱ༔ ཐལ་འགྱུར་ཞེས་བྱ་རྒྱུད་ཀྱི་ནི༔ དེའི་དོན་གསལ་བར་བྱེད་པ་ངེས་ལུང་རྟོགས་པར་བྱེད་པའི་ཚིག༔ འདི་ཉིད་དོན་ནི་རྣམ་པར་དབྱེ༔ ངོ་བོ་རང་གི་འདུག་ཚུལ་རང་རིག་བདེ་ཆེན་ལ༔ གཞན་གྱི་བརྗོད་གཞི་དང་བྲལ་བར་བསྟན་རྩོད་པའི་སྐྱོན་རྣམས་སྤོང་༔ ངེས་ཚིག་རྣམ་པ་གཉིས་ཡིན་ཏེ༔ སྒྲ་འབྱུང་བ་དང་འཇུག་པ་ལྡོག་པའི་གསུམ་དུས་བསྟན་པས༔ གྲག་སྟོང་དབྱེར་མེད་སྒྲ་ཞེས་རྣམ་པར་བཤད་པ་འོ༔ དེ་ཉིད་བློས་བཏགས་རང་གཉེན་པོ་གཞན་ལ་མ་ལུས་པར་གྲོལ་བས༔ ཐལ་འགྱུར་ཞེས་སུ་བཤད་པ་འོ༔ དབྱེ་ན་རྣམ་པ་གསུམ་ཡིན་ཏེ༔

སྒྲ་འབྱུང་བའི་སྒྲ་དང་། བཀོད་པའི་སྒྲ་དང་། གནས་པའི་སྒྲ་དང་། གྲག་པའི་སྒྲའོ་བཞི་གཏན་འབེབས་ཐལ་འགྱུར་དང་༔ གཞི་གནས་ཚད་གཞི་དེ་ཉིད་འཛིན་ཐལ་འགྱུར་དང་༔ སྒྲ་རྒྱུད་དེ་རྣམས་ལ་བརྟགས་པས་འབྱུང་རྐྱེན་གྲོགས་འཆར་ཐལ་འགྱུར་རོ༔ དཔེར་ན་བང་མཛོད་ལྡེ་མིག་གིས་ཕྱེ་བས་རྫས་ལ་ལོངས་སྤྱོད་པ་དང་འདྲ༔ དགོས་པ་གང་ཞེ་ན་རྒྱུད་རྣམས་གཞན་དག་གི༔ སྒྲ་དོན་གཏན་ལ་འབེབས་པའོ༔ ཁོང་དོན་མན་ངག་གང་ཞེ་ན༔ རྣམ་པ་གསུམ་དུ་བསྟན་པ་ཡིན༔ རྟགས་བྲིས་པ་དང་གཟུགས་རྣམས་བཀོད་ཡི་གེའི་སྒྲ་དོན་དང་༔ རིགས་དྲུག་དེ་དག་ཀུན་རང་གིས་ཤེས་པའི་ཚད་གཟུགས་ཀྱི་རང་སྒྲ་དང་༔ འབྱུང་བ་ས་ཆུ་མེ་རླུང་ནམ་མཁའི་ལྔ་ཡི་སྒྲ་དོན་ནོ༔ དེ་དག་ཉམས་སུ་ལེན་པས་གཏན་ལ་ངེས་ཕབ་ནས༔ རྟོག་མེད་རིག་པའི་ལྟ་བའི་ཚད་ཉམས་སུ་བླངས་པ་ཡིས༔ འདི་ལྟར་སྣང་བ་ཐམས་ཅད་རང་གི་གྲོགས་སུ་འགྱུར༔ རྟགས་བཀོད་ཡི་གེའི་སྒྲ་དོན་ནི༔ བརྗོད་པའི་ངག་གི་སྒྲ་དང་ལུས་ལ་གནས་པའི་སྒྲ༔ བྲིས་པ་བཀོད་པའི་སྒྲ་དང་གསུམ་ཡིན་ནོ༔ བརྗོད་པའི་སྒྲ་ནི་མིང་གི་ཚོགས༔ དུ་མ་བརྗོད་པའི་རང་སྒྲ་རྣམས༔ ཐིག་ལེ་ཉག་གཅིག་གི་ངོ་བོ་ལ་ངག་གི་སྒྲ་དང་འབྱུང་བའི་སྒྲ་ལ་སོགས་པའི་སྤྲོས་མེད་པས༔ ཕ་རོལ་སྒྲ་ནི་གྲགས་པ་སྟོང་༔ མེད་སྣང་ཙམ་དུ་བྲག་ཆ་ལྟ་བུར་ཤེས་པ་སྟེ༔ སྣང་བ་ཅེར་གྲོལ་ཡིན་བཞག་ཐབས་དང་འབྲེལ༔ དང་པོ་ཡོ་གིས་ཉམས་སུ་ལེན་དུས་སུ༔ ངག་ནི་བཅད་པས་སུ་ལ་ཡང་གཏམ་མི་བརྗོད་པར་འདུག་པ་ངག་ལ་གནད་ཡིན་པར་རང་བརྗོད་འགགས༔ མི་རྟོག་བསམ་གཏན་ཆེན་པོར་འདུ་ཤེས་གཅིག་པར་གནས༔ གནས་པའི་སྒྲ་ནི་རང་གི་ལུས་ཉིད་ལ༔ ཨཱ་ལི་ཀཱ་ལི་ཕྲེང་གནས་སྙིང་ནང་ཕྲེང་བས་བསྐོར་ནས་གནས་པས་རྩ་ནང་ན་

རྐྱང་པར༔ ངག་ཏུ་ཇི་ལྟར་བརྗོད་པ་ཨཱ་ལི་ཀཱ་ལི་ལས་མི་འདའ་རྣམས༔ ཨཱ་ལི་ཀཱ་ལིའི་བཟླས་སྔགས་ཟློས་མི་དགོས་པའི་གནད་པའོ༔ ཉམས་སུ་ལེན་འདི་ཉིད་ཤེས་པའི་ཡོ་གི་ནི༔ ངག་ཏུ་བརྗོད་པ་སྔགས་ཡིན་པས༔ དམིགས་གཏད་མེད་པའི་སྔགས་ཀྱི་འཕྲེང་བ་འོ༔ དེ་ཕྱིར་གང་བསམས་བསམ་གཏན་ཡིན༔ བཀོད་པའི་སྒྲ་ནི་ཡི་གེ་ཨཱ་ལི་ཀཱ་ལའི་སྟེ་ཚོགས༔ བོས་དང་འབོད་གཟུགས་སུ་འདུག་པ་ཐམས་ཅད་བྲིས་པ་ཡིན་པ་ཉིད་ཡིན་ནོ༔ བོས་པ་རྣམས་ནི་བཏགས་པ་ཚིག་ཡིན་ཏེ༔ གཞི་ལ་གྲུབ་རྒྱུ་མེད་པས་དངོས་པོར་བརྟགས་པ་ཐམས་ཅད་དོ༔ བརྟགས་པ་དེ་ཀུན་རང་གྲོལ་བར་རང་གི་རང་གྲོལ་བ་སྦྲུལ་མདུད་བཞིན་ནོ་༔ ཡོ་གི་དག་གིས་ཤེས་པ་ན༔ ཡི་གེ་ཟད་པས་གྲངས་མཐའ་ཟད༔ དེ་ཕྱིར་ཐིག་ལེ་ཉག་གཅིག་གོ༔ འབོད་པའི་སྒྲ་ནི་ཨཱ་ལི་བཅུ་བཞི་དང་༔ ཀཱི་ལི་སུམ་ཅུ་བཞི་ལ་སོགས༔ གཞི་རྩལ་ལས་སྣ་ཚོགས་སྣང་བས་ན༔ འདི་ཉིད་ཀྱང་ནི་རང་བཞིན་མེད་པ་བརྗོད་པས་སྟོང་༔ སྣང་ལ་རང་བཞིན་མེད་པ་སྟེ༔ དཔེར་ན་ཆུ་ཟླ་ལྟ་བུར་ཤེས་པར་བྱ༔ ལུས་ལ་ཨཱ་ལི་ཀཱ་ལི་གནས་པའི་ཡི་གེ་དེ༔ སྙིང་གི་དཀྱིལ་ན་ཕྲེང་བའི་ཚུལ་དུ་ཀུན་གནས་ཏེ༔ ལྕེ་དང་སོ་བར་དང་མཆུ་རྣམས་གཉིས་ཀྱི་བར་དང་༔ རྐན་ཕུགས་དང་མགྲིན་པར་དག་ནས་འབྱུང་༔ དེ་ཉིད་ཡོ་གིས་རབ་བརྟགས་ན༔ གནས་སྟོང་པ་ཡིན་དེ་གནས་མེད་རང་མི་རྟག་པ་སོ་འོ༔ ཨཱ་ལི་ཀཱ་ལིའི་ཚོགས་རྣམས་ཀྱིས༔ རྩ་རེ་རེ་ན་ཡི་གེ་རེ་གནས་པས་རྩ་རྣམས་སྐྱེད་པར་བྱེད་པས་ན༔ ཁ་དོག་དཀར་དམར་དབྱེ་བ་ཤེས་པར་བྱ༔ དེ་ཉིད་ལ་བརྟགས་ཡི་གེ་དེ་ལ་སེམས་བཞག་ན་ལས་རླུང་ཟད༔ རིག་པ་རང་གྲོལ་ངོ་བོ་ཐིག་ལེ་ཟླ་དང་བྲལ་བ་འོ༔

འབྱུང་བ་ལྔ་ཡི་སྒྲ་དོན་ནི༔ རྣལ་འབྱོར་འདུག་ཚུལ་ལྟ་བ་དེས་དངོས་གཞི་ལ་མཐོང་བར་འདོད་པ༔ ཕྱི་ཡི་འདུ་འཛི་རྣམ་སྤངས་ཏེ༔ དབེན་པའི་གནས་སུ་མི་མེད་པའི་སར་སོང་ནས་ཀྱང་༔ ཐོག་དང་པོའི་སྤྱོད་པ་མ་སྔོན་དུ་འགྲོ་བ་ནི༔ ལུས་ཀྱི་གནད་ཀེ་རེ་ལངས་པས་ལུས་ཀྱི་ཞེན་པ་གཅོད་པ་དུ་ལངས་པ་ལ༔ རྐང་པ་ལག་པ་གཤོག་པ་ལྟར་གདེངས་བྱས་ཏེ༔ མཇིང་པ་ཡིད་ཙམ་ལྟག་པ་བག་ཙམ་དགྱེ་ལ་བརྟག་པ་རྒྱབ་ཏུ་འོ༔ ངག་གི་གནད་དུ་སྒྲ་ཆེན་པོ་བྱུང་བྱུང་འདོན་ཀུ་ཅོ་ཆེ༔ རྩོལ་བ་དྲག་པོས་སྐད་ཆེན་པོ་རྣམས་དབྱུང་ངག་གི་ཞེན་པ་ཆོད༔ སེམས་ཀྱི་གནད་དུ་མིག་དང་རིག་པ་ནམ་མཁའི་མཐོངས་སུ་མཁའ་ལ་སྤུར༔ དེ་ལ་དྲན་པ་རིག་པ་གཟིར་གསལ་བར་བྱ༔ དེ་ནས་ཐང་ཅིག་ཆད་ནས་མྱོས་པར་འགྱུར༔ དེ་ནས་དེ་ཉིད་དྲན་སངས་ངལ་སོས་ནས༔ སྤྱོད་ལམ་ཇི་ལྟར་བདེ་བ་མོས་པ་བྱ༔ དབེན་པའི་གནས་སམ་མི་རྣམ་པ་ཐམས་ཅད་དུ་མི་རྒྱུ་ུབ་ལུང་སྟོང་དུ༔ ཙན་དན་ལ་སོགས་ཤིང་ཤིན་ཏུ་མང་བ་སྐམ་པོ་ཤིང་རྣམས་ཀྱི༔ ཕུང་པོ་ལ་སོགས་རབ་བྱས་ཏེ༔ དེ་ལ་མེ་ཆེན་གཏང་བྱས་ལ༔ མཁའ་འགྲོ་མ་ལ་ཚོགས་དང་གཏོར་མ་སྦྱིན༔ དེ་ནས་མེ་ཡི་དབྱིབས་ལ་ཐུན་མོང་གི་དངོས་གྲུབ་བརྟག༔ མེ་ཏོག་གི་དབྱིབས་དང་ལ་སོགས་མདུང་རྩེ་ལྟ་བུ་ནི༔ དབང་དང་དགུག་པའི་ལས་རྣམས་གང་ཡང་འགྲུབ༔ འཁོར་ལོ་ལྟ་བུ་རལ་གྲི་ལྟ་བུ་དང་གྲུ་གསུམ་ནི༔ གཞན་བསྐྲད་དང་ཚར་གཅོད་དྲག་པོའི་ལས་རྣམས་འགྲུབ༔ དེ་ལ་དེ་དག་ཡང་སྟོང་པར་རང་བཞིན་མེད་ཤེས་ནས༔ རང་ཉིད་ཇི་ལྟར་མོས་པའི་རྣལ་འབྱོར་སྤྱོད་པ་ཉིད་ལ་སྦྱར༔ ཁ་དོག་ཉིད་ཀྱང་མཆོག་གི་དངོས་གྲུབ་

རྣམ་པར་བརྟག༔ དཀར་སེར་མི་རྟོག་ཡེ་ཤེས་སོ་དེ་ཉིད་རང་དུ་སྐྱེ་བ་ཡིན༔ ཤིན་ཏུ་དཀར་ལ་གདངས་པ་གཏིང་གསལ་བ་འདྲ་ན་ནི༔ རྣལ་འབྱོར་བྱང་ཆུབ་སེམས་ཆེན་པོ༔ སྙིང་རྗེས་འགྲོ་བའི་དོན་སྤྲུལ་འབྱིན་བྱེད་རྟགས༔ རབ་ཏུ་དམར་ལ་གསལ་བ་དྭངས་པ་ནི༔ ཅུང་ཞིག་འཇིག་རྟེན་དུ་སྤྱོད་པ་གནས་པའི་རྟགས༔ དབྱིབས་ཀྱང་ལུག་གི་རྭ་དང་མཚུངས༔ སྔོ་ནག་འཇིགས་པའི་ནག་ནར་ནར་འདུག་ན་དབྱིབས་འདྲ་ན༔ དྲག་པོའི་བརྟུལ་ཞུགས་ཀྱི་སྤྱོད་པ་སྣ་ཚོགས་སྤྱོད་པ་སྣ་ཚོགས་ཀྱིས༔ དུར་ཁྲོད་དག་ཏུ་འགྲོར་རུང་བའི་རྟགས་སུའོ་རྒྱུ་བར་བྱ༔ ཆགས་ཆེན་གསལ་ལ་སེར་ལ་རྩི་གནག་པས༔ བདག་ནི་འཇིགས་པ་ཀུན་སྤངས་ཏེ༔ སེང་གེ་ལྟ་བུར་གཞན་གྱིས་གནོད་པའི་འཇིགས་བྲལ་གྱི་རྟགས་རྒྱུ་བར་བྱ༔ དེ་ལྟར་སྤྱོད་པ་མཆོག་བྱས་ནས༔ ཡང་ནི་དབེན་པ་དེ་ཉིད་དུ༔ བུད་ཤིང་ཚོགས་ལ་མེ་སླར་ཡང་མེ་བུས་ལ༔ དེ་ནས་འདོམ་དོའི་ས་ཚོད་དུ༔ བདེ་བའི་སྟན་ལ་འདུག་ནས་ནི༔ ལུས་ཀྱི་གནད་ནི་བྱོས་སོང་ཁ་བུག་ཏུ་ཉལ་ཏེ་མིག་མ་བཙུམ་པར་ལག་པའི་གྲེ་མོ་ས་ལ་བཙུག་ཏེ་མཇིང་པ་གྱེན་ལ་བཏེག་ལ་ལག་པའི་ཐལ་མོ་འགྲམ་པ་ལ་སྦྱར་བཞིན༔ རིག་པ་མེ་ཡི་དཀྱིལ་དུ་འཕང་༔ སེང་གེ་བཞིན་དུ་རྣམ་པར་མིག་ཧ་རེ་ལ་གྱེན་དུ་ལྟ༔ དེ་ནས་འབྱུང་བ་མེ་མ་ཆད་པ་ཡི་སྒྲ༔ འཚག་ཆེན་བཤད་དང་རླབ་ལྷབ་ལྷབ་པ་དང་༔ འུར་དང་སྦྲག་དང་རྩེག་པ་རྣམས༔ རང་གིས་ཤེས་པའི་བདེ་སངས་པ་དང་དགའ་ཡལ་

བ་སོགས་ཉམས་དང་སྦྱར༔ ཟླ་བ་ཕྱེད་ཀྱིས་སྐལ་ལྡན་པར༔ རྣལ་འབྱོར་གཅིག་གིས་མེའི་ལས་བྱས་འགྲུབ་པར་འགྱུར་ལ་དོན་གང་འདོད་ཐེ་ཚོམ་མེད༔ རྣལ་འབྱོར་མངོན་ཤེས་ལྡན་པར་མེ་ཐམས་ཅད་ཀྱི་སྐད་ཤེས་པར་འགྱུར༔ ཆུ་ཡི་སྒྲ་སྤྱོད་རྣལ་འབྱོར་པས༔ སྔོན་འགྲོ་གོང་བཞིན་བྱས་ནས་ནི༔ སྟོན་སེར་སྤང་པོ་ཁ་སེར་གྱི་དུས་ལོ་ཐོག་སྨིན་དུས་སུ༔ ལུང་སྟོང་ཐུར་ཟུགས་ཆུ་དྲག་འབབ༔ རྦ་རླབས་ཤིན་ཏུ་ཤྭ་སྒྲ་ཆེ་བ་དྲག་པ་རུ༔ ལུས་ཀྱི་གནད་ལོང་བུ་གཤིབས་ནི་ཙོག་པུ་ལ༔ རིག་པའི་གནད་ཤེས་པ་ཆུའི་དཀྱིལ་དུ་ནི་ཆུ་དཀྱིལ་གཏད་ལོ༔ གླང་ཆེན་མིག་གིས་མི་འགུལ་བར་གཞུང་ལ་བལྟ༔ ཁམས་ཀྱི་དང་པོ་མགོ་འཐོམ་པ་སོགས་ཚུགས་མ་ཐུབ་ན༔ ཆུའི་སྒྲ་མེད་ས་རུ་གོས་ཀྱིས་མགོ་བསྟུམས་ཏེ༔ ཐང་རེ་ཐང་རེ་བག་ཙམ་ཉལ་བར་བྱའོ༔ ཟླ་བ་གཅིག་ནི་བསྒོམས་བྱས་ན༔ རང་རིག་པའི་གདིང་དང་ལྡན་པའོ་བདེ་ཆེན་འགྲུབ་པ་འོ༔ ཤེས་པ་རིག་པ་རྣ་བར་གཏད་བྱས་ནས༔ སྒྲ་ཆུ་ཡི་ལ་རྟག་ཏུ་ཉན་བྱས་ན༔ སྐྱེ་མེད་འབྲས་བུ་མཆོག་ལ་ཐེ་ཚོམ་མེད༔ རྣལ་འབྱོར་སྣ་ཚོགས་ཆུ་ལ་བརྟེན་ནས་མཁའ་འགྲོ་མ་ཆོས་སྨྲ་བ་ཡང་ཐོས་པར་འགྱུར་རོ་ཆོས་ཤེས་འགྱུར༔ བྱིང་བ་ལར་ཉམས་ལེན་དུ་བྱིང་ན་དེ་ཚུག་བྱའོ་གསེང་བའི་ཆོ་ག་འོ༔ རླུང་གི་སྒྲ་རྣམས་ཤེས་འདོད་པས༔ སྔོན་དུ་འགྲོ་བ་མེ་སྒྲ་དང་གོང་བཞིན་ཏེ༔ ལུང་གསུམ་མདོ་རླུང་ཆེན་ཡོང་སར་འམ་རི་རྩེ་རུ༔ དབེན་ཁང་ཆུང་ངུ་གཅིག་ཕྱོགས་ཀྱི་སྐར་ཁུང་ཅན༔ ཕྱོགས་ཕྱེད་པར་ལེགས་པར་བརྩེགས་ཏེ་རྣལ་འབྱོར་ནི༔ རླུང་གི་ཕྱོགས་དག་གང་ནས་འོང་བའི་ཡིན་པར༔ རྣམ་པར་ཤེས་པ་རྣམ་གཏད་སྟེ༔ རྟག་ཏུ་འམ་དེ་ཉིད་རྒྱུན་དུ་སྤྱོད་པ་ཡིས༔ ཟླ་བ་གཅིག་གིས་སྐལ་ལྡན་པར༔ རིག་པའི་གསལ་འདེབས་འགྲུབ་འགྱུར་འདི་ལ་ཐེ་ཚོམ་མེད༔ རྣལ་འབྱོར་ཉམས་མྱོང་གོང་ནས་གོང་དུ་འཕེལ་བའི་མཆོག་ཐོབ་པའོ༔ ས་ཡི་སྒྲ་ནི་ལྕིད་མཉམ་སྟེ་ས་སྤྱིན་བཟང་པོ་ལ་ངང་པའི་སྒོ་ང་ཙམ་མང་དུ་བྱས་ཏེ་ཁ་དོག་ཀྱང་ཚོན་གྱིས་བསྒྱུར་བ་དེ་ལ་ཤེས་པ་གཏད་ཏེ་རྩེ་བར་བྱ༔

སྒོ་ང་རིམ་པ་མང་བྱས་ལ༔ རྒྱུན་དུ་ལག་གི་འདུ་བྱེད་རྟག་ཏུ་སྒོ་ང་དང་ཤེས་པ་མ་བྲལ་བར་བསྒོམས༔ ཟླ་བ་དྲུག་ཏུ་བསྒོམས་ན་འབྱུང་བ་སའི་གནོད་པས་མི་ཚུགས་ཤིང་འབྱུང་ལ༔ དབང་བསྒྱུར་རིག་པའི་སྣང་བ་ངེས་པའི་འབྲས་བུ་ཐོབ༔ ནམ་མཁའི་སྒྲ་ནི་རི་རྩེ་མཐོན་པོ་ལ་སོང་ལ༔ རྣལ་འབྱོར་སྐལ་ལྡན་ཉིད་ཕྱིན་ཏེ༔ ལུས་ཀྱི་གནད་ནི་གན་རྐྱལ་ཡན་ལག་ཐང་ཐང་བརྒྱངས་ཏེ་ལ༔ རིག་པ་མཁའ་ལྡིང་མཁའ་ལ་ཤིན་ཏུ་མཐོ་བར་འཕང་༔ དབུགས་ནི་ཡང་ཡང་ཧ་ཧ་ཞེས་ཕྱིར་ཕྱུངས་ཏེ༔ རྟག་ཏུ་ནམ་མཁའ་དེ་ཉིད་ལ་གནས་ན༔ ལོ་གསུམ་གྱིས་ནི་བར་དུ་བསྒོམས་ན་ནམ་མཁའ་ལ༔ བྱ་བཞིན་ཐོགས་མེད་དུ་འཕུར་བར་འགྱུར་བར་ཐེ་ཚོམ་མེད༔ རྟག་ཏུ་འདི་དག་ཉིད་བསྒོམས་ན༔ འཇིག་རྟེན་པ་ལ་ཕན་པའི་གྲུབ་པ་དང་མངོན་ཤེས་དང་༔ ཕྱག་རྒྱ་ཆེན་པོའི་རིགས་འཛིན་མཆོག་ནི་དེས་ཐོབ་བོ༔ རིགས་དྲུག་སོ་སོའི་གཟུགས་སྒྲ་ནི༔ དེ་དག་རྟག་ཏུ་བསྒོམས་པ་ཡིས༔ གཟུགས་མཐོང་སྐད་ཇི་ལྟ་བ་ཞེས་པ་སྟེ་ཇི་ལྟར་འདོད་བཞིན་ཤེས་པར་འགྱུར༔ དེ་ཉིད་འབྱུང་བའི་སྒྲ་ལ་རྟག་ཏུ་གོམས་པ་ཡིས༔ སྤྲུལ་པ་སྐུ་ཡི་ཡོན་ཏན་འགྲུབ་པས༔ འདི་ཉིད་ལ་སྤྲུལ་སྐུ་སྒྲུབ་པ་ཞེས་བྱ་འོ༔ ཟས་ཀྱི་འདུ་ཤེས་ཉིད་བྲལ་མི་འདོད་ཏེ༔ མཉམ་གཞག་སྒོམ་ལ་རང་བཞིན་གྱི་བསམ་གཏན་ལ་རྟག་ཏུ་སྤྱོད༔ ལུས་ནི་བཅོ་བརྒྱད་ལོའི་ན་ཚོད་ལྟ་བུ་གཞོན་ཤ་ཆགས་པ་བཞིན་དུ་འགྱུར༔ ནམ་མཁའ་ལ་ནི་བྱ་བཞིན་འཕུར་བར་ནུས་ཏེ༔ རྒྱ་མཚོའི་གཏིང་དམྱལ་བའི་གནས་ཀྱི་བར་འཛུལ་བར་ནུས༔ རི་བྲག་རྣམས་ལ་ཟང་ཐལ་ལོ༔ མདོར་ན་འབྱུང་བའི་སྒྲ་རྣམས་དང་༔ རྒ་ཤིའི་སྡུག་བསྔལ་རྣམས་དང་

བྲལ༔ ལྷ་ཡི་མིག་སོགས་སྤྱན་དང་མངོན་ཤེས་དྲུག་རྣམས་རྒྱུན་དུ་སྐྱེ༔ ཐབས་དེ་རྒྱུད་གཞན་ནས་མི་སྟོན་པས་མཆོག་ཏུ་གསང་བ་འོ༔ ལེའུ་དྲུག་གིས་གཞུང་དོན་རྫོགས༔ ཨི་ཏི༔ རྒྱ་རྒྱ་རྒྱ༔ ཀུན་ཏུ་བཟང་པོ་མེ་ལོང་རྒྱུད༔ ངོ་བོ་ངེས་ཚིག་དབྱེ་བ་མཚོན་དཔེ་དགོས་པ་ཁོང་དོན་གྱི་མན་ངག་ལེའུ་ཡི་གྲངས་དང་ཚིག་དོན་རྣམ་པ་བདུན་གྱིས་བསྟན༔ ངོ་བོ་ཉོན་མོངས་རིག་པ་ཀ་དག་རང་དག་པས༔ ཡེ་ཤེས་སྣང་བ་ཟང་མ་ཉོན་མོངས་པ་མེད་པ་ཡིན༔ བདག་གཞན་ཐེག་པ་ཆེན་པོའི་རིག་དོན་རྣམས་མཐར་འབྱིན་པའོ༔ ངེས་ཚིག་རྣམས་པ་བཞི་ཡིན་ཏེ༔ ཐམས་ཅད་ངོ་བོ་ཉིད་རིག་པ་ལ་འདུས་པས༔ ཡེ་ཤེས་ཉིད་ནི་སེམས་ཅན་ཐམས་ཅད་ལ་ཁྱབ་པས་ཀུན་ཏུ་འོ༔ བདེ་དང་སྡུག་བསྔལ་གཉིས་མེད་རང་གྲོལ་བས༔ མ་རིག་པ་སོགས་ངན་པའི་བློ་མེད་བཟང་པོར་གནས༔ རྣམ་རྟོག་རྒྱུན་ཟད་རིག་པ་ཟླ་དང་འབྲལ་བ་ཀ་དག་པས༔ གཡོས་པ་མེད་པའི་ཐུགས་བསམ་གཏན་ཞེས་བྱ༔ སྣང་བ་ཉིད་ལ་རིག་པ་ཡུལ་རྡོ་རྗེ་ལུ་གུ་རྒྱུད་ཤར༔ དབྱིངས་རྣམས་དག་ཐིག་ལེ་སྟོང་པའི་སྒྲོན་མ་གསལ་བྱེད་མེ་ལོང་ངོ་༔ དབྱེ་བ་རྣམ་པ་གཉིས་ཡིན་ཏེ༔ རང་བཞིན་ལྷུན་གྲུབ་སེམས་ཅན་ཐམས་ཅད་ལ་ཁྱབ་པས་ཀུན་བཟང་དང་༔ རྟོགས་པ་དེ་ལྡོག་པའི་ལྟ་བ་མངོན་གྱུར་ཀུན་བཟང་ངོ་༔ དཔེར་ན་ཐམས་ཅད་གཅོད་པ་རལ་གྲི་ལྟ་བུ་སྟེ༔ ལྟ་བ་རྣམས་ཀྱི་ལ་ཤན་འབྱེད༔ ཁོང་དོན་མན་ངག་རྣམ་གསུམ་སྟེ༔ དངོས་ཏེ་གཞི་མ་ཡིན་པ་ལ་ཡིན་པར་བཟུང་བ་མ་མཐོང་གོལ་ས་དང་༔ བློ་བཏགས་རིམ་པའི་ཐེག་པ་སོ་སོའི་གྲུབ་མཐའ་གོལ་ས་དང་༔ ལམ་གྱི་གནད་མ་ཤེས་པར་ཉམས་བླངས་འཁྲུལ་པའི་

གོལ་ས་འོ༔ དངོས་པོ་རིག་པོའི་ངོ་བོ་ལ་གཤིས་ཀྱི་འདུག་ཚུལ་ལ༔ སྐུ་དང་ཡེ་ཤེས་ཡོད་དང་ཡེ་ཤེས་རྒྱུན་ཆད་མེད་པའི་མཐའ་འདོད་པ་གཉིས་ནི༔ ཡེ་ཤེས་ཉིད་ལ་བཞག་པ་སྟེ༔ ཡེ་ཤེས་དེ་ཉིད་ཡོད་ན་རྟོགས་པ་དང་བཅས་པ་འམ༔ འོན་ཏེ་མེད་ན་བེམས་པ ོ་བཞིན་གཞི་མི་བཏུབ་༔ ཡང་ན་ལུང་མ་བསྟན་བཞིན་ཤེས་པ་མེད་པ་རྣམས་དང་ཁྱད་མེད་འགྱུར༔ ཡང་དག་རྫོགས་པའི་སངས་རྒྱས་འབྲས་བུ་སྐུ་གསུམ་གྱི་གནས་ལུགས་ལ༔ ཡེ་ཤེས་ཆོས་སྐུའི་ཡེ་ཤེས་ལོངས་སྐུའི་ཡེ་ཤེས་སྤྲུལ་སྐུའི་ཡེ་ཤེས་རྣམ་པ་གསུམ་ཡིན་ཏེ༔ ལོངས་སྐུ་ཐམས་ཅད་མཁྱེན་པའི་ཡེ་ཤེས་ཤེས་རབ་ཀྱི་རྩལ་མ་འགགས་པས་བུདྡྷཱ་དང་༔ སྤྲུལ་སྐུ་རྣམ་པ་ལྟ་བྱེད་ཤེས་པའི་རྩལ་ནང་དུ་མཁྱེན་པའི་ཡེ་ཤེས་སེམས་ཅན་ལ་གནས་ལུགས་ཇི་ལྟར་ལྟ་བ་མཁྱེན་པ་དང་༔ ཆོས་སྐུ་གཞི་ལ་ཆོས་སྐུའི་ཆ་དང་བཅས་པའི་ཤེས་རབ་ཀྱི་སྩལ་གནས་པའི་ཡེ་ཤེས་སོ༔ སྤྲུལ་སྐུ་ཡེ་ཤེས་རྣམ་གཉིས་ཏེ༔ དེ་ཡང་ཕྲ་བའི་ཡེ་ཤེས་གཞི་ལ་གནས་པའི་ཡེ་ཤེས་ཀྱི་དངོས་པོའི་གནས་ལུགས་ཇི་ལྟ་མཁྱེན་པས་གནས་ལུགས་ཤེས༔ ཤེས་བྱ་ཇི་སྙེད་པའི་ཡེ་ཤེས་གདུལ་བྱའི་བསམ་པ་མཁྱེན་པས་གཞན་དོན་ཤེས༔ ལོངས་སྐུའི་ཡེ་ཤེས་སྣང་བ་ཐམས་ཅད་ཐད་ཀར་ཤེས་པའོ༔ ཆོས་སྐུའི་ཡེ་ཤེས་རགས་པ་མ་ཡིན་ཕྲ་བའི་ཡེ་ཤེས་གསལ་ཆ་ཙམ་ཐུགས་རྗེའི་རང་བཞིན་ཤུགས་ཀྱིས་བསྔགས་པའོ་གཞི་གནས་ཏེ༔ ཤེས་པའི་ཆ་ནི་གསལ་བྱེད་ལ༔ འཛིན་པ་རགས་པའི་རྟོག་པ་དངོས་འཛིན་མེད༔ ངང་ངམ་ཤུགས་ཀྱི་འབད་པ་མེད་པའི་ཐུགས་རྗེ་འོ༔ བུམ་ནང་གི་མར་མེ་ལྟར་གསལ་ཞིང་ཤེས་པ་རིགས་དང་བཅས༔ ཆ་ལ་འདྲེས་པ་མེད་པར་མི་བསྐྱོད་པའི་ཤེས་རབ་ཀྱི་རྩལ་གསལ་བྱེད་ཙམ་དུ་གནས་ཏེ་མེད་པ་ཡང་མུ་སྟེགས་ཆད་བ་དང་ཁྱད་མེད་

གནས༔ དེ་ལྟར་ཡེ་ཤེས་ཆ་མེད་ན༔ ཕྱི་རོལ་ནམ་མཁའ་སྟོང་པ་ཕྱང་ཆད་པའི་སྐྱོན་དང་༔ ཁྱད་པར་ཉིད་ནི་ཡོད་པ་མིན༔ དེ་ཕྱིར་གཞི་གནས་ཡེ་ཤེས་ཁྱབ༔ ཡེ་ཤེས་མེད་ན་གསལ་ཆ་ཙམ་དུ་མེད་ན་མེད་པ་ད་ལྟ་བ་ཆད་པ་དང་༔ ཁྱད་པར་ཅི་ཡང་ཡོད་མི་འགྱུར༔ རགས་པའི་ཡེ་ཤེས་སྣང་ཆར་ཡོད་འགྱུར་ན༔ འོན་ཏེ་མུ་སྟེགས་རྟག་པ་སྣང་བ་རྡུལ་ཕྲ་རབ་དང་བཅས་པ་འདི་དག་ལུས་འདི་ཡི་གློ་བུར་བ་དང་ཁྱད་ཅིས་འབྱེད་ཉིད་དང་མཉམ༔ དེ་ཕྱིར་ཤེས་བྱ་ཉིད་ལ་ནི༔ བརྟེན་ནས་རགས་པར་ཡོད་པ་མ་ཡིན་ཏེ༔ ཕྲ་བའི་ཡེ་ཤེས་ཉིད་དུ་གནས༔ བློས་བཏགས་རིམ་པའི་ཐེག་པའི་གོལ་ས་ནི་རྒྱུད་གཞན་ན་ཞི་བ༔ ཤེས་བྱ་མེད་ན་མེད་པ་སྟེ༔ ཡོད་པར་གྱུར་པ་ཐམས་ཅད་ལ༔ ཡེ་ཤེས་ཡེ་ཤེས་ཞེས་བྱའི་ཚིག༔ ཚིག་ཏུ་བརྗོད་པ་ཀུན་བརྗོད་དེ༔ དོན་ཀུན་འདི་ཞེས་དོན་ངོ་བོ་རང་འདི་ཡིན་ཞེས་གཞན་གྱིས་གཏན་ལ་མ་ཕེབས་པས་མ་རྟོགས་པས༔ པོ་ཏི་གླེགས་བམ་ཡི་གེ་རྣམས་གཞུང་ཚད་ཇི་ཙམ་ཡོད་ཀྱང་༔ དགོས་མེད་ཚི་ཆད་ངལ་བའི་རྒྱུ་འདི་དག་གིས་སངས་རྒྱས་རྡུལ་ཙམ་ཐོབ་པ་མིན་ནོ༔ འོ་ན་སངས་རྒྱས་ཀྱི་གསུངས་པ་དགོས་པ་མེད་དམ་ཞེ་ན། རེ་ཞིག་མ་ཡིན་པའི་སྒྲོ་འདོགས་གཅོད་པ་ཙམ་ཡིན། དཔེར་ན་གསེར་མ་ཡིན་པའི་སྒྲོ་འདོགས་བཅད་ནས་གསེར་རང་མ་ཤེས་པ་དང་འདྲ་བར་གནས་ལུགས་མ་ཡིན་པའི་སྒྲོ་འདོགས་བཅད་ནས་གནས་ལུགས་རང་ངོ་མ་ཤེས་པའོ༔ འདི་ཉིད་མི་ཤེས་རྨོངས་པ་སྟེ༔ འོག་མ་རྣམས་དང་ཁྱད་མེད་འགྱུར༔ དེས་ན་རྣལ་འབྱོར་ཉམས་ལེན་ལ་གོམས་པ་གཅེས༔ ཉམས་

བླངས་བས་འཁྲུལ་ཏེ་མ་ཤེས་པར་གོལ་བ་ནི༔ རིག་པ་ལུས་ལ་བརྟེན་པས་ལུས་ཀྱི་གནད་ཉིད་གལ་ཆེ་སྟེ་མ་ཤེས་ན༔ དཀོར་མཛོད་ནང་ན་ནོར་ཡོད་ཀྱང་སྒོ་མོ་དམ་དཀྲིགས་འདྲ་སྟེ་ནོར་མི་ལོན་པས༔ ཕྱི་ནས་ནོར་རྙེད་མ་ཡིན་ནོ༔ བསྙེན་སྒྲུབ་ལ་རེ་བའི་ལྷ་སྒོམ་བསྐྱེད་པ་ཡི་ནི་རིམ་པ་དང་༔ དོན་འདི་ཉིད་ནི་ཁྱད་མེད་འགྱུར༔ ཕྱི་ནང་གི་དབྱིངས་ཀྱི་སྒྲོན་མའི་གནད་ཀ་མ་ཤེས་ན༔ བྱ་ལོང་ནམ་མཁའི་མཐའ་འཚོལ་མཐའ་ལ་ཐུག་པ་མེད་པས་མི་རྙེད་པ་དང་འདྲ༔ རིག་པའི་གནད་རྡོ་རྗེ་ལུག་གུ་རྒྱུད་དེ་མ་ཤེས་ན༔ དངོས་མེད་ལ་དངོས་པོར་འཛིན་པ་ནམ་མཁའ་སྤར་གྱིས་འདེབས་པ་དང་འདྲ༔ ལུས་ཡུལ་རིག་པའི་གནད་གསུམ་མན་ངག་མི་ཤེས་པར༔ ཆོས་གཞན་གྱི་སྒོར་ཞུགས་ནས་བསྒོམ་པར་འདོད་པའི་སྒོམ་ཆེན་པ༔ སྤྱད་དབང་མེད་པའི་ནོར་ཕྱུག་པོའི་ཁལ་ཁོལ་དང་བདག་འདྲ་དེ་ཡང་དངོས་པོ་གཤིས་རང་མ་མཐོང་དེའི་ཡོན་ཏན་ལ་གྲངས་སུ་ཤེས་པའོ༔ དེ་ཕྱིར་གསུམ་ཉིད་དུ་འབྲེལ་བའོ༔ རིག་པའི་རྟེན་ས་ལུས་ལ་གནས་པ་ཡིན་ཏེ༔ ལུས་གཅིག་མེད་ན་མེད་པ་བེམས་པོ་མ་ཡིན་པ་ཐམས་ཅད་ལ་སྟེ༔ ཡོད་ན་ཡེ་ཤེས་ཡོད་པར་རིག་པས་ཁྱབ་པར་ངེས༔ དེ་ལྟར་ལུས་ལ་རིག་པ་ཡོད་པ་དེ༔ ཆོས་ཅན་སྤྱི་ཡི་མཚན་ཉིད་གཞན་གྱི་ཀྱིས༔ སྤྱི་བོའི་གཙུག་ནས་རྐང་མཐིལ་བར་ལུས་མགོ་དང་རྐང་ལ་སོགས་པ་ལ༔ བརྟག་དཔྱད་རྣམ་པ་སྣ་ཚོགས་ཀྱིས༔ དཔྱད་པས་དེ་ཉིད་དང་པོའི་གཤིས་དེ་རྙེད་པ་མིན༔ མོ་དང་པྲ་ལ་སོགས་པ་ཡི༔ རྩིས་ནི་རྣམ་པ་སྣ་ཚོགས་ཀྱིས༔ བྱས་པ་མ་ཡིན་ཡེ་ཤེས་ཡིན་པས་བལྟས་ཤིང་དཔྱད་ཀྱང་རྙེད་པ་མིན༔ འོ་ན་ལུས་ལ་བསྟན་མེད་ངེས་

ཞིག་གམ་ན་མེད་ཡིན་ཞེ་ན༔ བསྟན་དུ་མེད་པ་མ་ཡིན་ཏེ༔ ལུས་གནད་སྟེམས་ན་མངོན་དུ་མིག་གི་དེ་ཉིད་རིག་པ་མིག་གི་མངོན་སུམ་དུ་སྣང་༔ དཔེར་ན་ལུས་ལ་ཁྲག་ཁྱབ་སྟེ་སྐྱེས་བུ་ལ་ཁྲག་གིས་གང་ཞིང་རྒྱས་པ་ཡང་༔ སྐྱེས་བུ་གླེན་པ་གནད་མི་ཤེས་པ་འགའ་ཞིག་གིས༔ གང་གང་ལུས་ལ་རྩ་མེད་པའི་སར་གཏར་ཡང་ཁྲག་བཙལ་བས༔ གཅིག་ཀྱང་འབྱུང་བ་མ་ཁྲག་མི་ཡོང་པ་དང་འདྲའོ་ཡིན་ནོ། འོ་ན་ལུས་ལ་ཁྲག་མེད་དམ་སྙམ་ན༔ ལུས་ལ་ཁྲག་མེད་མ་ཡིན་ཏེ༔ ལུས་སྤྱི་བོ་ནས་རྐང་མཐིལ་ཡན་ཆད་ཐམས་ཅད་ཁྱབ་ཅིང་ཁྲག་ལ་བརྟེན༔ སྐྱེས་བུ་ཐབས་དང་ལྡན་པ་སྨན་པ་ལྟ་བུ་ཡིས༔ ཁྲག་རྒྱུ་བའི་རྩ་ལ་གཏར་ན་ཁྲག་འབྱུང་ལྟར༔ ལུས་གནས་ཡེ་ཤེས་དེ་བཞིན་ནོ་ལུས་ཀྱི་གནད་མ་ཤེས་ན་ཡེ་ཤེས་མི་འཆར་ལུས་གནད་ལ་བརྟེན་ནས་འཆར་བའོ༔ ཡུལ་གྱི་གནད་ནི་ནམ་མཁའ་སྟེ་སྤྲིན་བྲལ༔ གདམས་པ་འདི་ཉིད་མི་ཤེས་ཁ་གཅིག་གིས༔ ཉིན་དང་མཚན་མོ་མེད་པ་རུ༔ ནམ་མཁའ་ཉིད་ལ་བཙལ་ཞིང་བལྟས་བྱས་ཀྱང་༔ རིག་པའི་ཡེ་ཤེས་འདི་ཉིད་མཐོང་བ་མ་ཡིན་ནོ༔ བསྟན་འོ་ན་ནམ་མཁའ་ལ་མི་འཆར་རམ་ཞེ་ན་དུ་མེད་པ་མ་ཡིན་ཏེ༔ འདི་ཉིད་ཀྱི་གདམས་པ་ལ་གོམས་པའི་རྣལ་འབྱོར་པས༔ བལྟས་ན་སྐདཅིག་ཉིད་ལ་དོན་ཤེས་འགྱུར༔ རིག་པའི་གནད་ནི་ཉིན་མཚན་དུ༔ རྟག་ཏུ་དབྱིངས་རིག་དེ་ཉིད་ལ་གནས་པ་གལ་ཆེ་བྱ༔ གཞན་པའི་སེམས་ཀྱིས་སྐད་ཅིག་ཀྱང་༔ ཡེངས་ཤིང་བལྟ་བར་མི་བྱ་འོ༔ འོ་ན་གནད་གསུམ་ཡེ་ཤེས་དེ༔ འདི་ཉིད་མ་གཏོགས་གཞན་རྣམས་ཀྱིས༔

མཐོང་བ་དག་ནི་མེད་དམ་ཅི་ཞེན༔ གཞན་ལྟ་སྤྱོད་པའི་རྣལ་འབྱོར་པས༔ འདི་ཉིད་མ་བསྟན་བར་དུ་ནི༔ ཇི་ལྟར་བརྟགས་ཀྱང་ཐབས་དང་གདམས་པ་མེད་པའི་ཕྱིར་མཐོང་བ་མིན༔ དམ་པའི་གདམས་ངག་འདི་བསྟན་ན༔ དཔེར་ན་བ་རྣམས་ལུས་ལ་འོ་མས་ཁྱབ་ཀྱང་རྭ་དང་མཇུག་མ་ནས་འཐེན་ཀྱང་འོ་མ་མི་འབྱུང་༔ མཁས་པས་ནུ་མ་ནས་འཐེན་ན༔ འོ་མ་དག་ནི་འབྱུང་བ་བཞིན༔ དེ་བཞིན་དུ་ལུས་ཀྱི་གནད་ཤེས་ན་མངོན་དུ་གསལ་ཏེ་ལུས་གནད་ཀྱང་༔ རྟག་ཏུ་གོམས་སྒོམ་པ་དང་མ་སྒོམ་པ་དང་ཁྱད་མེད་མཐོང་༔ ལུས་ཡོད་པ་དང་ཤེས་པ་ཡོད་པས་འདི་དགེ་སྡིག་ལས་འདས་པའི་རྟགས་ཤན་པ་སྨད་འཚོང་སྡིག་ཅན་ཡང༔ འདི་ཉིད་བསྟན་པས་གྲོལ་ཐོབ་འགྱུར་དམུས་ལོང་ལ་ནི་ཡེ་ཤེས་རྒྱུན་ཆད་པས་འདི་མི་མཐོང་སྟེ་བསྒོམས་ཏེ་བསླབ་པར་བྱའོ༔ ཉན་ཐོས་རང་སངས་རྒྱས་རྣམས་དང་༔ བྱང་སེམས་ཉོན་མོངས་པའི་སྒྲིབ་པ་བྲལ་བ་སྤྲུལ་བ་སྣ་ཚོགས་འགྱེད་རྫུ་འཕྲུལ་སྟོན་ནུས་བས་ཀྱང་༔ འདི་ཉིད་གནད་གསུམ་གྱི་མན་ངག་གི་གདིང་མེད་ན༔ རྡུལ་ཆ་ཙམ་ཡང་མཐོང་མི་འགྱུར་རྒྱ་ལ་མཐོང་ཡང་རང་སྣང་དུ་མ་ཤེས་པས་མི་གྲོལ༔ གཞན་དག་གིས་ནི་སྨོས་ཅི་དགོས༔ དེས་ན་རྟག་ཏུ་གོམས་དང་ཐབས་ཀྱི་མན་ངག་ཉིད་གཅེས༔ ལེའུ་བདུན་གྱིས་གཞུང་དོན་རྫོགས༔ ཨི་ཏི༔ རྒྱ་རྒྱ་རྒྱ༔ ༔སྒྲོན་མ་འབར་བ་ཞེས་བྱ་བའི༔ རྒྱུད་ཀྱི་ཚིག་དོན་བདུན་དུ་བསྡུས་ཏེབཤད་པར་བྱ༔ ངོ་བོ་གསལ་བྱེད་སྣང་བ་སྟོན་རང་རིག་པའོ༔ ངེས་ཚིག་རྣམ་པ་གསུམ་ཡིན་ཏེ༔ འཁོར་བའི་བག་ཆགས་ཀྱི་མུན་པ་ཐམས་ཅད་སེལ་བས་སྒྲོན༔ ཀུན་གྱི་གཞིར་གྱུར་དངོས་པོའི་འདུག་ཚུལ་མ་ཡིན་ནོ༔

འོད་ཟེར་ཀུན་ཏུ་ཡངས་པའི་ཕྱིར༔ འབར་བ་ཡིན་པས་གསལ་བར་མངོན་སུམ་དུ་བལྟར་ཡོད༔ དབྱེ་ན་རྣམ་པ་བཞི་ཡིན་ནོ༔ རྣམ་དག་དབྱིངས་ཀྱི་སྒྲོན་མ་མཐིང་ཁ་འགྱུར་མེད་ཀྱི་འོད་དང་༔ ཐིག་ལེ་སྟོང་པའི་སྒྲོན་མ་དང་ཆགས་ཆེན་དམར་པོ༔ ཤེས་རབ་རང་བྱུང་སྒྲོན་མ་རིག་རྩལ་གསལ་སྟོང་གཉིས་མེད་དང་༔ རྒྱང་ཞགས་ཆུ་ཡི་སྒྲོན་མ་མིག་གི་དབང་པོ་སྐྱོན་མེད་པ་འོ༔ དགོས་པ་རྒྱུད་རྣམས་གཞན་གྱི་ཚིག༔ འདི་ཉིད་དུ་ནི་གསལ་བར་སྣང་བར་བྱེད༔ དཔེར་ན་གསལ་བྱེད་སྒྲོན་ཤིང་གི་མེ་ཁྱེར་ནས་ཕྱིན་ན་ལམ་སྣང་བ་བཞིན༔ ཁོང་དོན་མན་ངག་རྣམ་པ་ལྔ༔ མིང་ཕར་བཏགས་པ་ཚིག་གི་སྒྲོན་མ་ཡིས༔ འཇིག་རྟེན་མིང་གི་དོན་འབྱེད་པ་ས་བོན་བྱེད༔ རྟན་འབྲེལ་རྫས་ཀྱི་སྒྲོན་མ་མེ་སྒྲོན་དང་གཙུབ་ཤིང་ལ་སོགས་ཡིས༔ བཏགས་པ་གྲངས་ཀྱི་གནས་སྐབས་ཀྱི་ཁྱིམ་གྱི་མུན་པ་སེལ་བ་ལྟ་བུ་༔ སྤྱི་མཐུན་ལས་ཀྱི་སྒྲོན་མ་ཉི་ཟླ་སོགས་ཡིས༔ འགྲོ་བའི་མུན་པ་སེལ་བར་བྱེད༔ མཚོན་པ་དཔེ་ཡི་སྒྲོན་མ་འདི་ལྟ་བུ་ཞེས་མཚོན་ནས་ཡིས༔ ལོག་རྟོག་ཕྱིན་ཅི་ལོག་གི་འགལ་བའི་ཐེ་ཚོམ་སེལ༔ ཡེ་ཤེས་རྟགས་ཀྱི་སྒྲོན་མ་ཆོས་སྐུ་དང་ཐིག་ལེ་སྟོང་སྒྲོན་ཡིས༔ བག་ཆགས་འཐུག་པོའི་མུན་པ་སེལ༔ ཡེ་ཤེས་རྟགས་ཀྱི་སྒྲོན་མ་དེ་ལ་བཞི་ཡིན་ཏེ༔ འོད་ཀྱི་རྟག་སུ་དབྱིངས་ཡི་གེ་ན་རོ་ལྟ་བུ་ཡིན་ནོ༔ ཡེ་ཤེས་རྟགས་སུ་ཐིག་ལེ་རྨ་བྱའི་མདོངས་ལྟ་བུ་སྟེ༔ སྐུ་ཡི་རྟགས་སུ་ལུ་གུ་རྒྱུད་གསེར་གྱི་སྐུད་པ་ལྟ་བུ༔ འདུག་ཚུལ་གནས་ལུགས་རྟགས་སུ་འགྱུ་དག་འཕྲིག༔ དེ་ཡང་གནད་དུ་ཞེ་ན་

གསང་དོན་གསུམ་དུ་བསྟན༔ སྐུ་དང་ཡེ་ཤེས་སུ་སྒྲོན་མའི་གནས་ནི་སྙིང་ཡིན་ཏེ༔ ལམ་ནི་རོ་རྐྱང་དབུ་མ་ཀ་ཏི་ཤེལ་སྦུག་རྩ་ཆེན་བཞི་ཡིན་ནོ༔ སྒོ་ནི་མཐོང་བྱེད་མིག་གི་སྒོ༔ ཉམས་སུ་ལེན་པར་འདོད་པ་རྣལ་འབྱོར་པ་ཡིས༔ འཁྲུལ་པའི་བྱ་བ་ཕྱི་ནང་གི་ཀུན་བཏང་སྟེ༔ དུར་ཁྲོད་གནས་སམ་དབེན་ས་སྐྱེ་བོ་མེད་པ་རུ༔ བདག་ཉིད་གཅིག་པུར་གནས་ཀྱང་རུང་༔ ལྟ་སྤྱོད་མཐུན་པའི་གྲོགས་བཙལ་ཏེ༔ བསམ་གཏན་གནོད་པའི་དགྲ་རྣམ་གཡེང་དང་འདུ་འཛི་མི་སྒྲ་ཁྱི་སྒྲ་སོགས་སྤངས་ལ༔ སྒྲོན་མ་ཉིད་དེ་མཐོང་བར་བྱེད་པའི་ཐབས་ནི་གོམས་བྱེད་ན༔ འཁྲུལ་འཁོར་བཞིན་དུ་གནད་རྣམས་སྟེམས༔ ལུས་ཀྱི་གནད་ནི་སྙིང་ཡིན་པས༔ དང་པོའི་དུས་སུ་བསམ་རྒྱུན་ལས་དང་པོ་པས་དབུགས་ནང་དུ་དུམ་རེ་འཐེན་བཅད༔ སྙིང་གི་གནད་ནི་རྩ་ཡིན་པས་རིག་པའི་གནད་ཡོད་པས་འགྱུ་སྲང་བཅད་པ་གཅེས༔ གཡས་སུ་གཅུད་དང་གྱེན་ལ་བཟློག་དང་ཐུར་དུ་མནན་པ་ནི༔ ཡོ་གི་ཉིད་ཀྱིས་ཤེས་པར་བྱ༔ རྩ་ཡི་གནད་ནི་མིག་ཡིན་རིག་པ་འཆར་བའི་སྒོ་ཡོད་པས་༔ སེང་གེ་གྱེན་ལ་གླང་ཐད་ཀར་དང་རི་བོང་ཧད་པོར་དང་༔ མདའ་ཟུར་གྱིས་མནན་སྲང་ལྟ་བུ་ལྟ་སྟངས་བཞི༔ ཉིན་དུས་རྣལ་འབྱོར་པ་ཡིས་ཤེས་པ་མིག་ཏུ་གཞུག་ལ་ལྟ༔ མཚན་དུས་ཤེས་བྱ་བུམ་པར་གཞུག་མིག་བཙུམ་དབུགས་ནང་དུ་རྔུབ་ལ་༔ ཤེས་པ་ཉིད་ནི་སྙིང་ཁར་འོད་ཀྱི་གོང་བུ་ལ་བསྡུ༔ སྒྲོན་མ་ཙིཏ་ཏའི་དཀྱིལ་དུ་ཤེས་པ་རང་གསལ་དུ་སྟིམས༔ ཐིག་ལེ་རྩ་འོད་ཀྱི་དྲ་བར་ཡི་ནང་དུ་སྦ༔ དེས་ནི་ཡེ་ཤེས་ནང་དུ་བུམ་ནང་གི་མར་མེ་ལྟར་གསལ༔ དེ་ལྟར་ཉིན་དང་མཚན་དུས་སུ༔ ཉམས་ལེན་རྒྱུན་དུ་བྱེད་པའི་

རྣལ་འབྱོར་པས༔ གོམས་པའི་ཚད་ནི་རྩལ་རྫོགས་གྱི་མན་ངག་གོང་དང་མཚུངས༔ དེ་ནས་གོམས་ཏེ་མཐར་ཉམས་སུ་ལོངས་པའི་ཚད་ཕྱིན་པས༔ ཉིན་རྐྱེན་ལ་རག་མ་ལུས་པའི་རྟགས་དང་མཚན་མོ་གཉིས་མེད་པར༔ རྟག་ཏུ་ཉིན་མོ་བཞིན་དུ་ལུས་ལ་ཡང་འོད་ལྟར་འོང་འགྱུར༔ དེ་དུས་རྣལ་འབྱོར་པ་དེ་ཉིད་རིག་པ་རླུང་དང་འདྲེས་པས༔ ལུས་ཀྱི་རྟགས་ཤིང་བལ་ལྟར་ནི་ཡང་བ་དང་འབུ་སྲིན་མི་འོང་༔ རྟ་ལྟར་མགྱོགས་ཤིང་ཡེ་ཤེས་ཀྱི་རླུང་ལ་བྱན་ཚུད་པའི་རྟགས་སུ་གཞན་ལ་མིག་མི་ཆགས་དབུགས་ཕྱི་ནང་དུ་རྒྱུ་བ་མེད༔ ཟས་དང་སྐོམ་གྱི་དྲན་པ་འགགས་རླུང་ལ་འགྲོ་འོང་མེད་པའི་རྟགས་སུའོ༔ རང་ལ་ཆེད་དུ་རྟགས་འདོད་པ་མེད་ཀྱང་དེ་ལྟར་འབྱུང་༔ ཤེས་རབ་རྩལ་མ་འགགས་པ་ལས་རྟགས་ནི་འདི་ལྟ་བུ༔ ཤེས་རབ་དང་རིག་པ་དབྱེར་མེད་པའི་རྟགས་སུ་སྔར་མཐོང་མ་མྱོང་བའི་ཆོས་ཀྱི་ཚིག་རང་གིས་ཤེས་པ་དང་༔ ངག་ཏུ་འཁྲུལ་པ་ཤེས་རབ་ཀྱི་དབང་དུ་འདུས་པའི་རྟགས་སུ་ཅི་བརྗོད་ཆོས་ཀྱི་གཏམ་འབྱུང་༔ བློ་དང་གདམས་པ་འདྲེས་པའི་རྟགས་སུ་ལུང་དང་རྒྱུད་ཀྱི་ཚིག་རྣམས་ཀུན༔ མ་བལྟས་བཞིན་དུ་རང་ལ་འཆར༔ རིག་པའི་རྟག་ནི་ལུ་གུ་རྒྱུད་ཡུལ་ལ་སྣང་བ་ད༔ འགུལ་དང་འཕྲིག་པ་ཉིད་བྲལ་ཏེ༔ སྣང་བ་རང་སར་སྟོང་པ་ཉིད་ཁོང་དུ་ཆུད་པའི་རྟགས་སུ་ཤེས་པ་གར་གཏད་དུ་མི་འགུལ་བར་གནས་པའོ༔ གསང་བ་ཉམས་སུ་མྱོང་བའི་རྟགས་གདིང་བཞི་སྟེ༔ རིགས་དྲུག་གི་འགྲོ་བ་རིག་པར་གྲོལ་བས་དམྱལ་བ་ལ་སོགས་ངན་སོང་ལ༔ དེ་ཉིད་རང་རིག་ཏུ་ཤེས་པ་ཡ་ང་བག་ཚ་ཀུན་དང་བྲལ༔ རིག་པ་ཡེ་

སངས་རྒྱས་པས་སངས་རྒྱས་ལ་ཡང་བྲོད་པ་མེད༔ གཞི་ལ་འཁོར་བ་མ་གྲུབ་པར་ཤེས་པས་འཁོར་བར་ལྟུང་དོགས་སྡུག་བསྔལ་བྲལ༔ མྱ་ངན་འདས་ལ་དེ་ཉིད་རང་རིག་ཡིན་པར་རྟོགས་པས་རེ་བ་མེད། ལེའུ་བཞི་ཡིས་གཞུང་དོན་རྫོགས༔ ཨི་ཏི༔ རྒྱ༔ ནོར་བུ་འཕྲ་བཀོད་ཅེས་བྱ་བའི༔ རྒྱུད་ཀྱི་ཚིག་དོན་བདུན་གྱིས་བསྟན་པར་བྱ༔ ངོ་བོ་རང་རིག་གཞི་ལ་སྣ་ཚོགས་རང་གྲོལ་དུ་སྤྱོད༔ ངེས་ཚིག་རྣམ་པ་གསུམ་ཡིན་ཏེ༔ རྒྱུད་གཞན་གྱི་དགོས་པ་འདིས་སྐོང་ཕྱིར༔ དགོས་འདོད་འབྱིན་པས་མ་ཚང་བ་ཁ་བསྐང་བ་ནོར་བུ་ུའོ༔ རྡོ་རྗེ་ལུག་རྒྱུད་འཕྲ་ཞིང་འགྱུར་བ་བརྟགས་དཀའ་བས༔ ཀུན་གྱིས་མི་མཐོང་གཞི་གཟུང་བར་དཀའ་བ་ཕྲ་བའི་དོན༔ དེ་ལྟར་རྟོགས་དཀའི་ངོ་བོ་ཉིད་ཡེ་ཤེས་དེ༔ ཡུལ་ལ་ཁྱབ་པས་ནམ་མཁའ་ལ་འཆར་བ་བཀོད་པ་འོ༔ དབྱེ་བ་རྣམ་པ་གསུམ་ཡིན་ཏེ༔ རང་ཤར་སྣང་བ་ཐམས་ཅད་རང་གྲོལ་ལོངས་སྤྱོད་པས༔ གཞི་ལ་ལོངས་སྤྱོད་ཀུན་གྱི་ནོར་བུ་དང་འདྲ༔ ཕྲ་རིག་པ་དེ་རླུང་ཤེས་ཀྱི་རྩལ་གྱིས་དང་འཁྱུག་དང་འགྱུ་བའི་ཚེ༔ འདི་ཉིད་ཀྱི་གནད་མེད་པར་གཞན་གྱིས་མི་མཐོང་ཟད་གཏིང་དཔག་དཀའ་བ་ཕྱིར་ཕྲ༔ སྣང་བ་དུམ་བུ་དུམ་བུའི་ཚེ་འོད་དུམ་བུ་དུམ་བུར་ཤར་ཚེ༔ མཆོད་པ་རྟོགས་ཕྱིར་ཇེ་ཆེ་ཇེ་ཆེ་མཐོང་བས་བཀོད་པའི་དོན༔ དགོས་པ་ཇི་ལྟ་བུ་ཞེ་ན་རྒྱུད་གཞན་འདོད་པ་རྣམས༔ རྒྱུད་འདི་ནས་རབ་ཏུ་སྟོན་བྱེད་པས༔ ཕྲ་མོའི་དོན་རྣམས་རྟོགས་བྱེད་པའོ༔ དཔེར་ན་བཞུ་བའི་བཙོ་བསྲེགས་བྱས་པ་དང་གསེར་དང་མཚུངས༔ ཁོང་དོན་མན་ངག་དུ་སྟོན་ཞེ་ན་རྣམ་བཞི་སྟེ༔ སྤྱོད་པ་གཙོ་ལམ་དུ་བྱེད་རྣལ་འབྱོར་དང་༔ སྒོམ་པ་ཉིད་ལམ་དུ་རྒྱུན་དུ་བྱེད་པ་དང་༔ ལྟ་བ་ཉིད་ལ་གཙོར་ལམ་དུ་བྱེད་དང༔ དེ་བཞིན་འབྲས་བུ་

ལམ་བྱེད་པའོ། །སྤྱོད་པ་རྣམ་པ་གསུམ་ཡིན་ཏེ༔ བྱིང་རྒོད་གསེང་བའི་སྤྱོད་པ་ནི༔ ཉམས་ལེན་གྱི་དུས་གལ་ཏེ་བྱིང་བ་ཉིད་ཡིན་ན༔ གནད་ནི་རྣམ་པ་གསུམ་བསྟན་ཏེ༔ ལུས་ཀྱི་གནད་དུ་རྒྱུག་ཅིང་སྤྱོད་པ་སྣ་ཚོགས་བྱེད་པ་དང་༔ ཡན་ལག་གར་ལ་སོགས་པ་མི་འདྲ་བ་མང་པོ་བྱ༔ ངག་གི་གནད་ནི་ཧ་ཧ་དྲག་པོ་ལྷང་ལྷང་པ་དང་༔ ཧི་ཧི་ཧཱུཾ་ཧཱུཾ་དྲག་རིང་ཐུང་བཟླས་ཤིང་༔ ཡང་ན་སྐད་ཉམས་ལ་ཅི་བྱུང་གི་རྣམས་དྲག་པོར་འདོན༔ སེམས་རིག་པ་ལ་རབ་ཕབ་ནས༔ མིག་ནི་གཡས་གཡོན་གྱི་ཟུར་ལ་རིལ་པོར་མནན་ཧྲིག་ཧྲིག་ཕར་ཁྲོལ་ཚུར་ཁྲོལ་བྱ༔ བྱིང་བ་ལ་ནི་མཆོག་དེ་ལྟར་བྱས་ན་རིག་པ་སོས་འདེབས་ཏུ་གསལ༔ རྒོད་པ་གཡེང་བའི་ཉམས་བྱུང་ན༔ སྐར་ཁུང་སོགས་བཀག་ལ་སྣང་བ་མེད་པའི་ཁྱིམ་དག་ཏུ༔ ལུས་ཀྱི་གནད་ནི་སེང་གེ་བཞིན་ཁ་སྦུབ་ཏུ་ཉལ་ལ་ལག་པ་གཉིས་སྔས་ནས་པར་བརྐྱང་རྐང་པ་ཡང་བརྐྱང་བའོ༔ མཇིང་པ་ཚུར་ནང་དུ་ཡིད་ཙམ་ཐུར་ལ་འོ༔ ངག་ནི་ཅི་ཡང་གླེང་བ་མིན༔ རིག་པ་ཙིཏ་ཏའི་དཀྱིལ་དུ་ཕྱིར་གཞན་དུ་མི་འཕྲོ་བར་གཞུག༔ མིག་ནི་དྲག་པོར་བཙུམ་པ་འོ༔ སྣང་བ་དབང་བསྒྱུར་འདི་ལྟར་སྣང་བ་ཐམས་ཅད་ལ་ཐོགས་པ་མེད་པར་སྤྱོད་པ་ནི༔ འབྱུང་བའི་སྒྲ་རྣམས་ལ་ཐུན་མོང་མ་ཡིན་པ་སྒྲ་ཐལ་འགྱུར་གྱི་མན་ངག་སྐབས་ལྟར་གོམས་ན༔ སྣང་བ་དག་ལ་མངོན་ཤེས་ལ་སོགས་གསང་རྟགས་ཅི་དགར་འགྱུར༔ འདུག་ཚུལ་གཞི་ཐོག་མ་ནས་གནས་ལ་སྤྱོད་པ་ནི༔ ནམ་མཁའི་ཁམས་སུ་དབྱིངས་རིག་འདུ་འབྲལ་མེད་པ་ལུ་གུ་རྒྱུད༔ སྐུ་དང་ཐིག་ལེ་རིག་པའི་རང་གདངས་ཤར་བ་རྣམས་ལ་སྤྱོད༔ ལུས་ངག་མི་གཡེང་དེ་དང་མི་འབྲལ་བར་གཏད་

གཟེར་བཏབ་སྟེ༔ རྒྱུན་དུ་འབྲལ་བ་མེད་གནས་པས༔ འཇིག་རྟེན་འཁྲུལ་པའི་སྣང་བ་འབྱུང་མི་འགྱུར༔ འཁྲུལ་སྤྱོད་དག་ནི་བྱུང་སྲིད་ཀྱང་༔ ངོ་བོ་ཉིད་མཐོར་པས་ཇི་ལྟར་བྱས་ཀྱང་མི་ལྟོ་དེ་ནི་རྡུལ་ཆ་ཙམ་མི་འགྲིབ༔ རྟག་ཏུ་ཡང་དང་ཡང་དུ་དེ་ལ་གོམས་པ་ནི༔ རང་རིག་པའི་གནས་ལུགས་གཤིས་དངོས་པོ་མཐོང་པའི་སྤྱོད་པ་འོ༔ སྒོམ་པ་ཉིད་ནི་འདི་རང་ལམ་དུ་བྱེད་ན་རྣམས་གསུམ་སྟེ༔ ལྷ་དང་མི་ཡི་སེམས་འཛིན་གྱིས༔ སྣ་ཚོགས་མཚན་མ་ཨ་དཀར་ལ་སོགས་འཛིན་པ་ནི༔ སྟན་བདེ་བར་ལུས་ཀྱི་གནད་ནི་སྐྱིལ་ཀྲུང་ལ༔ དབུགས་ཀྱི་གནད་ནི་ནང་དུ་རྔུབ་ཁ་སྣའི་དབུགས་བསྡམ༔ རིག་པའི་གནད་ནི་སྣ་རྩེེ་འོ་མིག་ཀྱང་ངོ་༔ བྱང་ཆུབ་སེམས་དཔའི་བསམ་གཏན་ན་ིཤུགས་ལས་སྐྱེ་བར་འདོད་སྟེ་མ་སྐྱེས་ན་འདི་ལྟར༔ བསམ་པའི་ཞེན་པ་འགོག་པ་དྲན་པ་ལ་བརྟག་སྟེ༔ ལུས་ཀྱི་གནད་ནི་སྟན་བདེ་བར་སྐྱིལ་ཀྲུང་ལ༔ རྒལ་པའི་ཚིགས་ནི་དྲང་པོར་བསྲངས་བྱས་ནས༔ ལག་པ་མཉམ་པའི་ཕྱག་རྒྱ་ལྟེ་འོག་ཏུ་བཅའ༔ ཨོག་མ་བྲང་ལ་སོར་བཞིས་མ་རེག་པར་མགྲིན་པ་ཡིད་ཙམ་དགུག་པ་འོ༔ མིག་ནི་སྣ་ཡི་རྩེ་ལ་དབབ་སེམས་དཔའི་མིག་ལྟར་བྱ༔ རིག་པའི་གནད་ནི་སྨིན་ཕྲག་ནས་མདའ་གང་ཙམ་དུ༔ འདི་དག་མིག་གིས་སྣང་བ་ལ་མི་ལྟ་བར༔ དབུགས་ནི་ནང་དུ་ཐུབ་ཐང་འཐེན་པ་ལ༔ ཕར་ཡང་མཆོག་ཏུ་རིངས་པར་གཏང་༔ ཡིད་ནི་སྟེངས་མེར་རེ་བཞིན་ས་ལ་བཞག༔ ལམ་ལམ་དུ་བྱེད་པ་ལྟ་བ་དག་ནི་རྣམ་གསུམ་ལ༔ སྤྱི་དང་རང་གི་མཚན་ཉིད་དང་༔ ཁྱད་པར་ཆེན་

པོའི་ལྟ་བའོ༔ སྤྱི་ནི་ཐེག་པ་བརྒྱད་པོའི་ལམ་རིམ་རྩོལ་བློ་ཡི་རིམ༔ ནང་ནི་ཕྱི་སྐོར་ནང་སྐོར་གསང་སྐོར་བ་འོ༔ ཁྱད་པར་ཆེན་པོའི་ལྟ་བ་ནི་ལུས་གནད་མིག་དང་འབྲེལ༔ ཡུལ་གནད་ནམ་མཁའ་སྤྲིན་བྲལ་ལ༔ རིག་པའི་གནད་ནི་ཕྱུང་མཁའ་ལ་ཕྱུངས་པས་ཟླ་དང་བྲལ་པ་ཞེས་ཀྱང་བྱ་བ་སྟེ༔ ལྟ་བྱེད་མིག་གིས་དབྱིངས་དང་རིག་པ་ལ་ལྟ་བས་ན༔ ཇི་ལྟར་ལྟ་ན་ཐམས་ཅད་ཡེ་ཤེས་ཀྱི་སྣང་བ་དགོས་འདོད་ཡིད་བཞིན་ནོར་ལྟར་བལྟ༔ རིག་པ་ལུ་གུ་རྒྱུད་ནི་འོད་དང་ཐིག་ལེ་སོགས་གྲངས་མང་བས༔ གཞན་གྱིས་མི་ཟིན་རྩེ་གཅིག་ཏུ་ཕྲ་བར་བལྟ༔ དེ་ཉིད་ཡེ་ཤེས་གོམས་པའི་གནད་ཀས་ཁྱབ་གདལ་བས༔ ཅི་ཡང་མ་རིག་པ་ལ་སོགས་འཇིག་རྟེན་གྱི་སྤྱོད་པ་མི་སྤངས་བཀོད་པ་ལྟའོ༔ འབྲས་བུ་ལམ་བྱེད་ཉིད་ཀྱང་སྤྱི་རང་ཁྱད་པར་གསུམ་ཡིན་ཏེ༔ སྤྱི་ཡི་རིམ་དགུས་ཇི་ལྟར་འབད་ཀྱང་ལྷ་མི་འབྲལ་མཐར་ཐུག་ལས་མི་ཐོབ༔ རང་གི་ཕྱི་སྐོར་སོགས་འོད་གསལ་ལྷ་རྣམས་སོ༔ ཁྱད་པར་འདི་ཉིད་ཀྱིས་སྐུ་གསུམ་ཕྱིར་མི་ལྡོག༔ ཅི་ཡི་ཕྱིར་ན་སྣང་བ་འདི་ཉིད་ཐམས་ཅད་དུ༔ རིག་པ་གཏན་ལ་འདིས་ཕེབས་པ་སྐུ་གསུམ་ས་ལ་གོམས་པས་ན༔ འདི་ཉིད་དུ་གཏན་ལ་ཕེབས་པས་ཕྱི་ནས་རེ་དང་དོགས་མེད་པར༔ འདི་ཉིད་རང་ལ་ཆོས་སྐུ་དང་རིག་པ་འདུ་འབྲལ་མེད་པས་འཚང་རྒྱ་འོ༔ དེ་ལ་ཡེ་ནས་སངས་རྒྱས་པའི་ཕྱིར་འཁོར་འདས་གྲུབ་མེད་པས༔ གཞན་རང་ཡིན་པར་འདི་ཉིད་ལ་གཏན་ལ་ཕེབས་པས་རྩོལ་འདོད་དང་བྲལ་བས་ན༔ སྨིན་པས་མ་རིག་པ་ཡེ་ནས་གྲོལ་བས་སྨིན་པ་ལམ་དུ་བྱས༔ མཆོག་ཏུ་སྨིན་པས་ཉམས་སུ་

བླངས་པ་དེ་ཡང་གཞན་དུ་བཙལ་དུ་མེད་པས་འོད་ཅེས་སོ༔ ལེ་འུ་བཅུ་བཞིས་གཞུང་དོན་རྫོགས༔ ཨ་ཏི༔ རྒྱ༔ ཉི་ཟླ་ཁ་སྦྱོར་ཞེས་བྱ་བའི༔ རྒྱུད་ཀྱི་ཚིག་དོན་བདུན་དུ་བསྡུས་ཏེ་གསལ་བར་བྱ༔ ངོ་བོ་མཉམ་པས་ཐབས་དང་དེ་ལ་བལྟས་པས་ཤེས་རབ་ཡིན༔ ངེས་ཚིག་རྣམ་པ་གསུམ་དུ་བསྟན༔ འདི་ལྟར་འཁོར་འདས་སྣང་བའི་ཆོས་རྣམས་ནི༔ ཆོས་ཉིད་མ་ལ་ཐིམ་ཕྱིར་རིག་པ་ཉི་མ་སྟེ༔ བུ་ལ་རིག་པ་མ་འདྲེས་སྣང་བས་ཟླ་བར་བསྟན༔ འཁོར་འདས་འདྲེས་པ་འབྱུང་བ་ལྔ་རང་སར་གྲོལ་བ་ཞེས་ཀྱང་བྱ་ཁ་སྦྱོར་རོ༔ དབྱེ་བ་རྣམ་པ་བཞི་ཡིན་ཏེ༔ ཆགས་ཅན་ཡུལ་གྱི་བདེ་བ་ལམ་དུ་བྱེད་པ་གསང་བ་སྙོམས་འཇུག་ཁ་སྦྱོར་དང་༔ འཁོར་འདས་འཁོར་འདས་གཉིས་མེད་དུ་རྟོག་པ་འདྲེས་པའི་ཁ་སྦྱོར་དང་༔ ལམ་རིག་བར་དོ་ལ་རིག་པ་དང་སྣང་བ་གཉིས་འདྲེས་པའི་ཁ་སྦྱོར་དང་༔ དབྱིངས་རིག་གདོད་ནས་དབྱེར་མེད་པ་ཡེ་ནས་ཁ་སྦྱོར་རོ༔ དགོས་དོན་དབང་པོ་འབྲིང་པོ་ཉིད༔ ཆོས་ཉིད་ཀྱི་བར་དོར་གྲོལ་བར་བསྟན་པ་འོ༔ དཔེར་ན་མ་བུ་ཕྲད་པ་བཞིན༔ ཚོམ་བུ་ལ་སོགས་རང་སྣང་ཡིན་པར་རང་གི་ཡིད་ཆེས་རིམ་གྱིས་གྲོལ༔ ཁོང་དོན་མན་ངག་བཞི་ཡིན་ཏེ༔ རང་བཞིན་གནས་པའི་བར་མ་དོར་འདིར༔ རང་གི་ཤེས་པའི་གྲས་ཐག་མན་ངག་ལ་ནན་ཆགས་སུ་བྱ་བཅད༔ དཔེར་ན་མཐུན་པའི་གྲོགས་དབྱིངས་རིག་ལ་རྟག་ཏུ་མི་འབྲལ་བར་ལྟར་འགྲོགས༔ ལུས་ཀྱི་སྟོབས་ཉམས་ནས་དབུགས་ངར་ངར་དུ་སོང་བའི་ཚེ་འཆི་ཁ་མ་ཡི་བར་མ་དོར༔ མན་ངག་གསང་བའི་གསེར་ཐིག་གསལ་གདབ༔ དཔེར་ན་རྫི་འུའི་གྲངས་རེ་རེ་ལ་རྡོ་བགྲང་ནན་ཏན་བྱ་ལྟར་འགྲོགས༔ ཆོས་ཉིད་མ་ཡི་བར་མ་དོར་འོད་དང་འོད་ཁྱིམ་དུ་ཤར་བས༔ བླ་མའི་

གདམས་ངག་དྲན་པས་བཟུང་རང་ངོ་ཤེས་པར་བྱ༔ དཔེར་ན་གོམས་འདྲིས་མི་སྔར་འདྲིས་ཀྱི་མི་ཕྱིས་ཕྲད་ན་ངོ་ཤེས་པ་ལྟར་ལྟོས༔ སྲིད་པར་འཇུག་པའི་བར་མ་དོར༔ ཟབ་མོའི་གོམས་ནུས་འདི་ཡི་གདམས་པ་མཐོང་བའི་སྟོབས་ཀྱིས་རང་བཞིན་སྤྲུལ་སྐུའི་ཞིང་༔ དཔེར་ན་ལོངས་སྤྱོད་ཆེ་ཞིང་དབང་འབྱོར་བ་རྒྱལ་པོ་ལྟ་བུས་འདུག༔ ལེ་འུ་བཞི་ཡིས་གཞུང་དོན་རྫོགས༔ ཨི་ཏི༔ རྒྱ་རྒྱ་རྒྱ༔ རང་ལ་ཡོད་པའི་སྣང་བ་དེ་གདམས་པ་བསྟན་ནས་ངོ་ཤེས་པར་བྱེད་པས་ངོ་སྤྲོད་སྤྲས་པ་ཞེསབྱ་བའི༔ རྒྱུད་ཀྱི་ཚིག་དོན་བདུན་གྱིས་བཤད་པར་བྱ༔ ངོ་བོ་རང་སྣང་ལ་ཡིད་ཆེས་པའི་ངེས་ཤེས་བརྟན་པར་བྱེད༔ ངེས་ཚིག་རྣམ་པ་གསུམ་ཡིན་ཏེ༔ ངོ་བོ་རང་རིག་ཚུལ་ལ་ཡང་༔ སྤྲོད་པ་བླ་མའི་གདམས་ངག་དཔེ་དོན་རྟགས་གསུམ་ལ་སོགས་གོ༔ སྤྲས་པ་འོད་ལ་བདུན་ཡེ་ཤེས་ལ་བདུན་རིག་པ་ལ་བདུན་ཏེ་ཉི་ཤུ་རྩ་གཅིག་གིས༔ གང་ཟག་དབང་པོ་ཉི་ཤུ་རྩ་གཅིག་གི་དོན་དུ་བློ་ལ་གོ་བར་བྱེད༔ བསྡུས་པའི་དབྱེ་བ་རྣམས་པ་གསུམ་ཡིན་ཏེ༔ སྣང་བའི་ཡུལ་འབྱུང་པ་ཉི་ཤུ་རྩ་གཅིག་ལྔ་ཟེར་བ་ལ་སོགས་ལ་ངོ་སྤྲོད་དང་༔ རིག་པ་དྲན་པ་རང་སངས་ཀྱི་གདམས་ངག་སེམས་ལ་ངོ་སྤྲོད་དང་༔ ངོ་སྤྲོད་ཉེར་གཅིག་སོགས་བློ་དམན་དྲང་བའི་ངོ་སྤྲོད་དོ༔ དགོས་པ་རིག་པ་རང་ལ་གནས་མེད་རང་ངོ་སྤྲོད༔ དཔེར་ན་མེ་ལོང་གཡའ་དག་དུ་བཞིན་གསལ་བ་དང་འདྲ༔ ཁོང་དོན་མན་ངག་རྣམ་བཞི་སྟེ༔ དཔེ་མན་ཤེལ་དོན་རིག་པ་རྟགས་སྒྲོན་མ་གསུམ་ཀྱི་ཡིད་ཆེས་བསྐྱེད༔ རིག་དང་ཡེ་ཤེས་འོད་གསུམ་ལ་བདུན་ཚན་གྱིས༔ ལག་ལེན་མན་ངག་གྲངས་ཉེར་གཅིག་ཤེས་བྱ༔

སྐུ་གསུམ་ལྷག་མཐོང་ངོ་སྤྲོད་ཀྱིས་ཆོས་སྐུ་ངོ་སྤྲོད་ཀྱི་གདམས་ངག་གིས་རིག་པ་ཉིད་ཅེར་མཐོང་དུ་བསྟན་ལོངས་སྐུ་ངོ་སྤྲོད་ཀྱི་གདམས་ངག་གིས་རིག་པ་དབྱིངས་ཀྱི་གོ་རར་གཞུག །སྤྲུལ་སྐུ་ངོ་སྤྲོད་ཀྱི་མན་ངག་གིས་འཁྲུལ་སྣང་ཞིང་ཁམས་སུ་སྦྱང་བའོ༔ དེ་ཡང་ཆོས་སྐུ་རང་རིག་ཡིན་པར་ཡིད་ཆེསལོངས་སྐུ་དེ་ལས་བྱུང་བའི་སྐུའི་སྣང་བ་དང་འོད་ཐིག་ལེ་ཡིན་པར་ཡིད་ཆེས་སྤྲུལ་སྐུ་དེ་ལ་ལྟ་བྱེད་མ་འགགས་པས་རང་སྣང་དུ་ཡིད་ཆེས་པ་སྟེ༔ མཐར་ཕྱིན་འབྲས་བུ་གཏན་ལ་དབབ༔ ལུས་ཀྱི་གནད་སྙིང་གི་ནང་ན་སྐུ་དང་ཡེ་ཤེས་སུ་གནས་པ་སྲོག་གི་གནད་རྩའི་ནང་ན་ཐིག་ལེ་དབང་པོའི་གནད་མིག་གི་སྒྲོན་མའི་ནང་དུ་རྟག་ཏུ་འཆར་བ་གནད་གསུམ་བཞག་པའི་ངོ་སྤྲོད་ཀྱིས༔ རང་གི་འདུག་ཚུལ་ཉམས་སུ་བླང་༔ དེ་ལ་གནད་གསུམ་ངོ་སྤྲོད་ནི༔ དེ་ལྟར་ཡེ་ཤེས་ལུས་ཀྱི་གནད་ལ་བརྟེན་འོད་ཡུལ་གྱི་གནད་རིག་པ་ལྟ་བའི་གནད་ལ་བརྟེན་པས་ཉི་ཤུ་རྩ་གཅིག་ཏུ་ཕྱེ་ཡང་དབང་པོ་སྤྲོས་པ་ལ་དགའ་བའི་དོན་ཡིན་ཏེ་གྲངས་གཞན་ཉེར་གཅིག་དེ་དག་ཀུན༔ འདི་ཉིད་དུ་ནི་རྣམ་པར་བསྡུས་ན༔ ཡེ་ཤེས་ལུས་གནད་སྒྲོན་མ་མིག་ནས་འཆར་བས་མིག་ཏུ་འདུས༔ འོད་ནི་ཡུལ་སྤྲིན་བྲལ་ལ་འཆར་བས་གནད་ནམ་མཁའོ༔ རིག་པ་མཐོང་གནད་མིག་གིས་ལུ་གུ་རྒྱུད༔ སྤྲུལ་སྐུ་ལུས་གནད་དྲན་པ་བསྐྱེད་པའི་གཞི་སྙིང་ཡིན་ཏེ༔ ལོངས་སྐུ་ཡུལ་གནད་ཁ་དོག་གསལ་བའི་ཡུལ་དབྱིངས་སུ་བསྟན༔ ཆོས་སྐུ་རིག་གནད་ལུ་གུ་རྒྱུད་བརྟེན་པ་མངོན་སུམ་དུ༔ དཔེ་ནི་ལུས་གནད་རྩ་དྲན་པ་བསྐྱེད་གཞི་ཡིན་ཏེ༔ རྟགས་ནི་ཡུལ་གཞི་ཡི་སྣང་བ་དང་གནད་སྒྲོན་མ་འོ༔ དོན་ནི་རིག་གནད་དབྱིངས་འདུ་འབྲལ་མེད་པ་རིག་འདྲེས༔ གཞུང་དོན་ལེའུ་གསུམ་གྱིས་རྫོགས༔ ཨི་ཏི༔ རྒྱ་རྒྱ་རྒྱ༔

མུ་ཏིག་ཕྲེང་བ་ཞེས་བྱ་བའ་ིདོན་བདུན་ལས༔ ངོ་བོ་མན་ངག་ཚིག་བཅུ་གཅིག་ཁྲིགས་ཆགས་ཀྱིས༔ འཁྲུལ་བའི་ཡུལ་རྐྱེན་གཞི་ལ་རང་དག་དུ་བཟློག༔ ངེས་ཚིག་རྣམ་པ་གཉིས་ཡིན་ཏེ༔ མུ་ཏིག་མན་ངག་ཁྲིགས་དུམ་བུ་གང་ཟག་བློ་ལ་སྐྱེ་བའོ་དང་འབྲེལ༔ ཕྲེང་བས་གྲངས་རྣམས་གཅིག་དུ་སྡུད༔ དབྱེ་བ་རྣམ་པ་བཞི་ཡིན་ཏེ༔ གཞི་གནས་རང་སར་ཡེ་ནས་རང་ལ་ཡོད་པ་གྲོལ་བས་མུ༔ གནད་གསུམ་ལུས་གནད་སྙིང་སྲོག་གནད་རྩ་དབང་པོའི་གནད་མིག་གོ་སྟེ་མི་འགྱུར་གཟེར་འདེབས་ཏིག༔ དེ་ལྟར་གནད་གསུམ་བསྟན་པས་འདོད་པའི་དོན་སྤྱོད་རིན་པོ་ཆེ༔ དབྱིངས་རིག་འདུ་འབྲལ་མེད་པར་རྒྱུན་ཆགས་གནས་ཕྱིར་ཕྲེང་༔ དགོས་པ་མན་ངག་དུམ་བུར་ཚིག་ཉུང་ལ་དོན་འདུས་པར་སྟོན༔ དཔེར་ན་ཇི་འདྲ་མུ་ཏིག་ཁྲིགས་ཆགས་སུ་བརྒྱུས་ལེགས་འདྲ༔ ཁོང་དོན་མན་ངག་རྣམ་པ་གསུམ༔ འཁྲུལ་པ་རང་དག་རང་གིས་རང་གྲོལ་བར་བསྟན་རྐྱེན་གྲོོལ་མུ༔ གལ་མདོ་བཅུ་གཅིག་སྡུད་བྱེད་གྲོལ་བྱེད་ཏིག༔ ལུས་སོགས་གནད་གསུམ་ཐོབ་ཡུལ་ཉམས་ལེན་ཕྲེང་༔ འཁྲུལ་པ་དུ་མ་རོ་གཅིག་ཏུ་ཤེས་པས་གྲོལ་ཚུལ་དབང་པོ་རྣོ་རྟུལ་གྱིས་གཉིས་ཡིན་ཏེ༔ འབད་མེད་འཁྲུལ་པ་རང་གིས་རང་གྲོལ་པའི་མན་ངག་རང་གིས་རང་གྲོལ་དང་༔ འབད་བཅས་གནད་དང་ཉམས་ལེན་གྱི་དུས་སུ་ལུས་འདུག་སྟངས་ཀྱི་གནད་ཡུལ་རྐྱེན་མེད་ཀྱི་གནད་རིག་པ་མ་རྩལ་བའི་གནད་ད་འབྲེལ་བ་འོ༔ གལ་མདོའི་མན་ངག་བཅུ་གཅིག་སྟེ༔ སྔོན་བྱུང་ཐོག་མ་རྟོག་ཏེ་སངས་རྒྱས་མ་བྱུང་མ་རྟོག་ཏེ་སེམས་ཅན་མ་བྱུང་བའི་གནས་ལུགས་ཀ་དག་གཞི༔ ངོ་བོ་འཁྲུལ་པ་མི་མངའ་བའི་ཡེ་ཤེས་འབྱེད་པ་མེད་པར་ཀ་ནས་དག་པའི་རིག་པ་ལ་བཞུགས་སོ་

རང་བཞིན་ཆ་ཡིས་མ་གོས་པའི་སྣང་བ་ཁ་དོག་ལས་འདས་པའི་གསལ་བ་རང་དུ་བཞུགས་སོ་ཐུགས་རྗེ་ནི༔ ཡེ་ཤེས་ཕྲ་བའི་ཡེ་ཤེས་སུ་འདོད་སྟེ་དེ་མེད་ན་བེམས་པོ་དང་ཁྱད་མེད་རགས་པར་ན་གཟུགས་སྐུ་གཉིས་དང་ཁྱད་མེད་པས་ཕྲ་བར་ཡོད་གསུམ་གྱི་བདག་ཉིད་དོ་དེ་ཡང་རང་གི་འདུག་ཚུལ་གྱི་ཆ་ལ་ངོ་བོ་ཀ་དག་གི་ཡེ་ཤེས་དེ་འཁྲུལ་མ་མྱོང་བས་རང་བཞིན་ལྷུན་གྲུབ་ཀྱི་ཡེ་ཤེས་སོ་གསལ་བྱེད་བག་ལ་ཉལ་ཏེ་ཆ་ཚང་བར་ཡོད་ཐུགས་རྗེ་ཀུན་ཁྱབ་གྱི་ཡེ་ཤེས་རང་བཞིན་ཤུགས་ལ་གསལ་བའོ༔ དེ་ལས་མ་ངེས་ལྷུན་གྲུབ་གཞི་སྣ་ཚོགས་མ་ངེས་པའི་གཞི་ཞེས་བྱ་སྟེ་ལྷུན་གྲུབ་རིན་པོ་ཆེའི་ལུས་ལ་བག་ཆགས་ཀྱི་ས་བོན་ལངས་ཏེ་ཉོན་མོངས་པ་ལྔའི་ས་བོན་བག་ཙམ་བྱུང་༔ མ་རིག་རྒྱུ་བདག་ཉིད་གཅིག་པའི་མ་རིག་པ་ནི་རང་གི་གཞིའི་ཆ་ལས་བྱུང་དེ་ཉིད་རང་བཞིན་ལྷན་ཅིག་པ་སྐྱེས་པའི་མ་རིག་པ་ནི་དུས་མཉམ་པའི་སྐུ་སྟེ་ཤེས་པའི་ཆ་ཀུན་བཏགས་ཀྱི་མ་རིག་པ་ཡུལ་གྱི་ཆའོ་གསུམ་དང་རྐྱེན་བཞི་རྒྱུའི་རྐྱེན་མ་རིག་པ་དངོས་བདག་པོའི་རྐྱེན་ཤེས་པ་རགས་པའི་ཆ་སྟེ་རྟོག་པ་དམིགས་རྐྱེན་ཡུལ་དུ་མར་ཤར་བ་ལ་བདག་པོར་གཟུང་སྟེ་དེ་དུས་མཚུངས་པ་དེ་མ་ཐག་པའི་རྐྱེན་ཞེས་བྱའ་ོདང་༔ ཤེས་པ་སྦགས་པའི་དེ་རང་གཞན་དང་གཞི་ཤེས་པའི་ཁྱད་པར་ལས་འཁྲུལ་པ་འོ༔ འཁྲུལ་ནས་སེམས་ཅན་ལ་ཇི་ལྟར་གནས་ན་ཁམས་གསུམ་སེམས་ཅན་ལ༔ གཞི་གནས་ཡེ་ཤེས་སྤྱན་གསུམ་དག་ཏུ་གནས་ཏེ་རང་གི་ངོ་བོ་དེ་སྙིང་གི་དཀྱིལ་ན་སྐུ་ཉུང་འབྲུ་ཙམ་དེ་འོད་ལྔའི་གོང་བུར་ཚོན་སྣ་ལྔའི་གྲུ་གུ་དྲིལ་བ་ལྟར་གནས་སོ་སྙིང་ན་གནས༔ འགྱུར་མེད་རྩ་ཆེན་རོ་མ་རྐྱང་མ་ཀུན་དྷར་མ་དང་ཀ་ཏི་གསེར་གྱི་རྩ་ཆེན་ཞེས་བྱ་ཤེལ་སྦུག་ཅན་ཞེས་བྱ་ཨ་ཝ་དྡྷུ་ཏེ་ནས་ཡི་གེ་སྲན་མའི་གའུ་སླེབ་པ་ཙམ་དུ་རྒྱུད་རླུང་གི་སྟོབས་ཀྱིས་བཞི་ནས་རྒྱུ༔ འཆར་བྱེད་མིག་སོགས་མིག་གཉིས་རྣ་

བ་གཉིས་ཚངས་བུག་དང་ལྔ་ཟེར་སྒོ་བཞི་འོ༔ ཡུལ་ནི་གང་ལ་ཤར་ན་ནམ་མཁའ་སྤྲིན་མེད་སྟོང་པ་ལ༔ དེ་ཉིད་ཉམས་སུ་བླངས་པ་ནི༔ རྣལ་འབྱོར་སྤྱོད་པ་ལ་རྒྱུན་དུ་བྱེད་པའི་རྣལ་འབྱོར་སྒོམ་པ་དང་ལྟ་བ་འབྲས་བུ་རྒྱུན་དུ་བྱེད་པ་བཞི་དང་བཞག་ཐབས་སྣང་བ་ཅོག་བཞག་རྒྱ་མཚོ་རི་བོ་རིག་པ་ཅོག་བཞག་གོ་བཞི༔ དགོངས་ཆེན་གནས་བསྒྱུར་གནས་དག་རྒྱས་གདབ་རང་གྲོལ་བཞི་དང་དག་ལུགས་བཞི་སྣང་སྲིད་གཞི་བཞེངས་ནི་འཁོར་འདས་རང་གི་བློ་ལ་ཤར་བ་ལ་བྱ་སྣང་སྲིད་གཞི་བཞག་ནི་དེ་ཉིད་བདག་ཏུ་མ་གྲུབ་པར་རང་སར་ཞག་པ་ལ་བྱ་ཁམས་གསུམ་ཡོངས་གྲོལ་ནི་ཐམས་ཅད་རང་སར་རང་གྲོལ་བ་ལ་བྱ་སྲིད་གསུམ་ཀ་དག་གི་དགོངས་པ་ནི་རིག་པ་ཡེ་ནས་སངས་རྒྱས་པར་ཤེས་པ་ལ་བྱའོ༔ ཟིན་ལུགས་བཞི་དམངས་ཆམས་ལ་ཕབ་སྟེ་མི་འགྱུར་བློན་པོ་བཙོན་དུ་ཟིན་ཏེ་རྒྱལ་པོ་གདན་ས་ཟིན་ཏེ་རིགས་པ་རང་ས་ཟིན་ཏེ་མི་འགྱུར་བའོ་དང་བཅུ་དྲུག་གོ༔ ཚད་ནི་གདེང་བཞིའི་རྣལ་འབྱོར་གོང་ལྟར་རོ༔ བར་དོ་འོད་རིག་པ་ལ་འཇུག་རིག་པ་འོད་ལ་འཇུག་རིག་པ་འབྱུང་བ་ལས་གྲོལ་སེམས་འཁྲུལ་བ་ལས་གྲོལ་ལྷུན་གྲུབ་རང་གི་ས་ལ་ངེས་པ་རྙེད་ནས་རང་གི་འདུག་ཚུལ་དུ་ཤེས་པ་ནི་མཐར་ཕྱིན་ནོ༔ གྲོལ་ས་ཐོག་མ་ཀ་དག་གི་ངང་དུ་གྲོལ་བ་གང་ཡིན་པའོ༔ ཉམས་སུ་ལེན་པ་རྣམ་གཉིས་ཏེ༔ འབད་ཆུང་རྩོལ་བ་མེད་པར་ཤེས་རབ་ཀྱིས་རང་གྲོལ་བ་དབང་པོ་རབ་དང་༔ རྩོལ་ཏེ་ལུས་སེམས་ཀྱི་གནད་གཟིར་རང་གྲོལ་བ་བློ་དམན་པ་གཉིས་ལོ༔ ཤེས་པས་གྲོལ་བ་གཉིས་ཡིན་ཏེ༔ སྣང་བ་ཁྲེགས་ཆོད་ལ་གདམས་ཏེ་ཕྱིའི་ཡུལ་སྣང་ཐམས་ཅད་རང་ལས་བྱུང་ཞིང་རང་གི་ངང་དུ་གྲོལ་ཙམ་ན་ཕྱི་རོལ་གྱིས་སྣང་བ་ངན་པའི་བློ་སྐྱེ་མི་སྲིད་དེ་རིག་སྣང་མཐོང་བའི་གནད་ཀས་དཔེར་

ན་ཆུ་འོལ་ཁའི་བསྒྱུར་བ་ལྟ་བུ་དབྱིངས་དང་མ་བྲལ་བ་ཉམས་ལེན་དང་༔ རིག་པ་ཐོད་རྒལ་ལ་གདམས་ཏེ་དེ་ལྟར་སྣང་བ་ལ་གོམས་པས་རིག་པ་ཅིར་མཐོང་སྣང་བ་ཅེར་གྲོལ་ཤེས་པ་རང་ཡན་དུ་བསྒོམས་པས་ཡེ་ཤེས་སྒོམ་དུ་ཤེས་ཏེ་འབད་ཅིང་ལུས་ཀྱི་གནད་གཟིར་བའི་དགོས་པ་དེ་ཉིད་ལ་ཆོད་པའོ་གཉིས་ཡིན་ནོ༔ རྩོལ་བ་ཅན་དེ་རྣམ་པ་གསུམ༔ འདུག་སྟངས་གསུམ་ལ་ཤེས་པ་བྱིང་ན་སྐྱེས་བུའི་རྒྱངས་ཐབས་ཏེ་རྟག་ཏུ་རྒོད་ན་དྲང་སྲོང་གི་འདུག་སྟངས་བྱིང་རྒོད་གང་ཡང་མེད་ཙ་ན་གླང་པོ་ཆེའི་འདུག་སྟངས་བྱའོ་གཞི་བཅའ་སྟེ༔ མི་འགུལ་གསུམ་གྱིས་ལུས་མ་འགུལ་བས་མིག་མི་འགུལ་དེ་མ་འགུལ་བས་རིག་པ་མི་འགུལ་བའོ་དེ་ནས་ཤེས་པ་རང་ཟིན་པའོ་གཏན་ལ་ཕབ༔ སྡོད་པ་གསུམ་གྱིས་དབྱིངས་སྡོད་པས་རིག་པ་སྡོད་དེ་སྡོད་པས་འགྲོ་འོང་ཆད་དེ་ལས་ཀྱི་རླུང་ཟད་ཡེ་ཤེས་ཀྱི་རླུང་ཟིན་པའི་རྟགས་རིག་པ་སྡོད་པས་གཞི་མ་འདེགས་པས་ཆོས་ཉིད་རྐྱེན་བཞི་ལས་གྲོལ་བའི་རྟགས་སོ་ཚད་རྣམས་བཟུང་༔ གྲོལ་བ་གསུམ་དབྱིངས་འབྱུང་བ་ལས་གྲོལ་དེས་ས་རྡོ་ལ་སོགས་འབྱུང་བའི་སྣང་བ་འགག་རིག་པ་རླུང་ལས་གྲོལ་ཏེ་མི་འགྱུར་བར་སྡོད་ལུས་རྐྱེན་ལས་གྲོལ་ཏེ་གནད་གཟུང་མི་དགོས་པར་ཇི་ལྟར་བྱས་ཀྱང་སྣང་བ་ཟིན་པའོ་གྱིས་ཡིད་ཆེས་བྱ༔ སྨིན་པ་གསུམ་གྱིས་དབྱིངས་སྨིན་པས་ཁ་དོག་ལྔ་མ་འདྲེས་པར་འཆར་ཐིག་ལེ་སྨིན་པས་ནང་དུ་སྐུ་རེ་རེ་རིག་པ་སྨིན་པས་གར་གཏད་དུ་སྡོད་པ་ནི་ཕྱིར་མི་ལྡོག་པའོ་བརྟན་པར་བྱ༔ ཐོབ་པ་གསུམ་གྱིས་མཐར་ཕྱིན་དབྱིངས་གཞལ་ཡས་ཁང་དུ་ཐོབ་པ་དང་རིག་པ་གཏན་གྲོལ་དུ་ཐོབ་པ་དང་འཁྲུལ་རྐྱེན་སྣ་ཚོགས་དབྱིངས་རིག་ཏུ་ཐོབ་པ་ནི་དེ་ལས་ཡར་གཤེགས་ཀྱང་ཤུལ་མེད་པ་ཞེས་བྱའོ་པའོ༔ ལེའུ་བརྒྱད་ཀྱིས་གཞུང་དོན་རྫོགས༔ ཨི་ཏི༔ རྒྱ་རྒྱ་རྒྱ༔ ༔རིག་པ་རང་གྲོལ་ཞེས་བྱ་བའི༔ རྒྱུད་དེའི་ཚིག་དོན་བདུན་གྱིས་གསལ་

བར་བྱ༔ ངོ་བོ་རང་གཞན་རང་ཤར་ལ་སོགས་པའི་རྒྱུད་ཚིག་གྲོལ་བར་བྱེད༔ ངེས་ཚིག་མ་རིག་སོགས་འཁྲུལ་པའི་རྟོག་པ་དུ་མས་དམ་དུ་བཅིངས་པ༔ གཞན་ལ་མ་ལྟོས་པ་རང་གིས་གྲོལ་བས་རང་གྲོལ་ཞེས༔ དབྱེ་ན་རྣམ་པ་གསུམ་ཡིན་ཏེ༔ སྣང་བ་རང་སར་གྲོལ་ཕྱིར་རིག༔ གཞན་ལ་ལྟོས་པ་མེད་པས་མཐའ་རྣམས་འགགས་ཕྱིར་རང་༔ སྤྱི་སྣང་བ་རང་སེམས་ཀྱི་མཚན་ཉིད་ཐེ་ཚོམ་གཅོད་པས་གྲོལ༔ དཔེར་ན་སྦྲུལ་མདུད་རང་གྲོལ་བཞིན༔ དགོས་པ་རྣམ་པ་གཉིས་ཡིན་ཏེ༔ རྒྱུད་གཞན་རང་ཤར་གྱི་ཐེ་ཚོམ་གཅོད་པས་རང་༔ རྟོག་མེད་རིག་པ་རང་ཤར་གྲོལ༔ ཁོང་དོན་མན་ངག་དུ་ཞེ་ན་རྣམ་གསུམ་སྟེ༔ གཅིག་པུ་གྲོགས་དང་བྲལ་བར་འདུག་པས་རང་གཅིག་པུར་འདུག་པས་ཐམས་ཅད་གྲོགས་སུ་ཤར་ཏེ་རིག་པ་ཡང་གཅེར་བུ་ཕྱུངས་པ་ཞེས་བྱའོ་རང༔ ལུག་རྒྱུད་རྟེན་མེད་མཁའ་ལ་ཕྱུང་བས་རིག་པ་ལུས་ལ་མི་བཞག་པར་མཁའ་ལ་ཕྱུངས་ཏེ་དེ་ཉིད་ལ་བལྟས་པས་ཡེ་ཤེས་རྩལ་དང་འོད་དུ་འཆར་ཆོས་ཉིད་ཀྱི་རྩལ་ལུ་གུ་རྒྱུད་སྐུའི་རྩལ་ཐིག་ལེ་འཆར་དེ་ཡང་དང་པོ་ཤེས་ལ་ཐབས་ཀྱི་རིག་པས་རིག༔ སྣང་བ་ཅེར་བཞག་དེ་ཡང་འོད་དང་ཐིག་ལེ་དང་རིག་པ་ཉིད་ལ་བདག་ཏུ་འཆིང་བའི་བློས་མི་གཟུང་བར་རང་སྣང་རང་གྲོལ་དུ་སྣང་བ་ཐམས་ཅད་ཐད་ཀར་གཅོད་པའོ་དབྱིངས་སུ་ཤར་བས་གྲོལ༔ ལེའུ་དགུ་ཡིས་རྒྱུད་གཞུང་དོན་རྣམས་རྫོགས༔ ཨི་ཏི༔ རྒྱ༔ རྫོགས་པ་རང་བྱུང་ཞེས་བྱ་བའི་དོན་བདུན་ཏེ༔ ངོ་བོ་རང་བཞིན་འབྲས་བུ་རང་ལ་གནས་པའི་རྫོགས༔ ངེས་ཚིག་གཞན་ནས་བཅུག་པ་ལྟ་བུ་མིན་རང་ལས་བྱུང་ཕྱིར་བསྐུར༔ དབྱེ་བ་རྣམ་པ་གསུམ་ཡིན་ཏེ༔ མ་བསྐུར་གཞི་ལ་གནས་བློ་རབ་ལ་བསྐུར་རྒྱུ་མེད་པར་བསྟན་པས་རྫོགས༔ གཞན་མིན་དེ་ཡེ་ནས་རང་ལ་ཡོད་པའི་གནད་ཀས་

ཉིད་ལས་བྱུང་བས་རང་༔ ཕྱི་རྫས་ལ་བརྟེན་ནས་དམན་པ་རྣམས་གྲོལ་བར་བྱེད་པས་རྫས་བཅས་བསྐུར་དུ་ཡོད་ཕྱིར་བྱུང་༔ བྱིན་རླབས་རྒྱུན་མི་ཆད་པས་དཔེར་ན་ཆུ་བོའི་རྒྱུན་ལྟ་བུ༔ དགོས་པ་རྣམ་པ་གཉིས་ཡིན་ཏེ༔ དབང་པོ་དམན་པ་རྣམས་ལ་རྫས་ཀྱིས་མཚོན་པ་རྫས་ཀྱིས་བརྡ་དོན་རྟོགས༔ རིག་པ་རྩལ་གྱིས་བློ་རབ་ལ་རིག་པའི་རང་ངོ་སྤྲད་པས་རང་བྱུང་རྙེད༔ ཁོང་དོན་མན་ངག་གསུམ་ཡིན་ཏེ༔ ཕྱི་ནང་དབང་རྫས་དང་དཀྱིལ་འཁོར་ལ་བརྟེན་པ་ནི་རྣམ་གཉིས་ཀྱིས༔ དབང་པོ་རྟུལ་པོ་སྔགས་ཀྱི་སྐལ་པ་དང་མི་ལྡན་པ་རྣམས་འཇུག་པའི་དགོས་པ་ཡོད་གཞུག་པར་བྱ༔ རིག་མ་ལ་བརྟེན་པ་གསང་བ་ཤེས་རབ་ཡེ་ཤེས་ཀྱིས༔ སྙོམས་འཇུག་གི་བདེ་བ་ལ་བརྟེན་ནས་རིག་པའི་བདེ་བ་ལ་ལྟ་རུ་གཞུག་པ་ཆགས་པ་ཅན་རྣམས་ལམ་དུ་དྲང་༔ རང་རིག་ཚིག་དབང་ཞེས་བྱ་སྟེ་གདམས་པ་དངོས་ཀྱིས་ཡོངས་རྫོགས་དབང་ཆེན་གྱིས༔ སྐལ་ལྡན་ལ་ལུས་ཡུལ་རིག་པའི་གནད་ཀྱི་མན་ངག་བསྟན༔ དེ་ཉིད་རྣམ་པ་གསུམ་ཡིན་ཏེ༔ ལུས་ནི་ལུས་དྭངས་སྙིགས་འབྱེད་པར་བྱེད་པས་ན་སྐུ་གསུམ་གྱི་གནད་ཡིན་ཏེདང་པོ་མའི་མངལ་དུ་མ་ཚུད་པའི་དུས་ཆོས་སྐུར་གནས་དེ་ནས་མེར་མེར་པོ་སོགས་ན་ཟླ་བཅུའི་བར་ལ་ལོངས་སྐུ་སྟེ་ཤེས་པ་ནང་གསལ་བཙས་ནས་སྤྲུལ་སྐུ་དྲག་པོའི་གཟུགས་བྱེད་པའོ་དལ་བྱེད་སྐུ་གསུམ་རྫོགས༔ རྩ་ནི་འགུལ་བྱེད་གཡས་ན་ཐབས་ཀྱི་རྩ་སྟེ་ཡེ་ཤེས་སྐྱེ་བའི་རྒྱུ་གཡོན་ན་ཤེས་རབ་ཀྱི་རྩ་སྟེ་རྟོགས་པ་འཆར་བྱང་སེམས་རང་༔ མིག་ནི་ལྟ་བྱེད་སྒྲོན་མ་གཡས་ན་ཡེ་ཤེས་ཀྱི་རླུང་གི་ཆ་གསེར་གྱི་རླངས་པ་ཙམ་ལས་འོག་དང་ཐིག་ལེ་སྟོང་པ་གཡོན་ཤེས་པའི་རྩ་རྟ་རྔ་བཅུར་གཤགས་ཙམ་གྱི་ཆ་ལས་ཤེས་རབ་རང་བྱུང་གི་སྒྲོན་མ་དང་རྒྱང་ཞགས་ཆུའི་སྒྲོན་མ་གཉིས་དབུས་རླུང་གི་ཟེར་ཏིལ་འབྲུའི་བདུན་ཆ་ཙམ་ལས་ཚངས་པའི་བུ་གར་རིག་

པ་རྟོག་པ་མེད་པའི་མདངས་རྒྱུའོ་རླུང་གི་ཆ་ལ་རྣ་བ་གཉིས་ནས་རྒྱུ་སྟེ་རྟགས་སུ་མནན་པས་སྒྲ་འོང་ངོ་བྱུང་༔ ལུང་ཆེན་བརྒྱད་ཀྱིས་གཞུང་དོན་རྫོགས༔ ཨ་ཏི༔ རྒྱ༔ ཀུན་ཏུ་བཟང་པོ་ཀློང་དྲུག་གི༔ རྒྱུད་ཀྱི་ཚིག་དོན་བཤད་པར་བྱ༔ ངོ་བོ་ཆོས་ཉིད་རང་གི་རིག་པ་གཅིག་པུར་སྡུད༔ ངེས་ཚིག་རྣམ་པ་གཉིས་ཡིན་ཏེ༔ ཟད་ཅིང་བྲི་བ་མེད་ཕྱིར་ཆོས་དབྱིངས་རྒྱ་ཆེ་བ་ལ་མཐའ་ཡས་པས་ཀློང་༔ འགྲོ་དྲུག་གནས་སུ་དག་ཕྱིར་དྲུག༔ དབྱེ་བ་དག་ནི་བཞི་ཡིན་ཏེ༔ རྣམ་དག་ཤེས་རབ་ཀྱིས་དབྱིངས་སུ་སྐྱེལ་བས་ཀློང་༔ རིགས་དྲུག་གི་སྐྱེ་གནས་དག་པར་བྱེད་པས་གཏན་ནས་སྤྲུག་ཕྱིར་དྲུག༔ ཡུལ་རྐྱེན་རང་སར་གྲོལ་བས་ཀློང་༔ རྣམ་དག་དུ་མ་འཁྲུལ་བ་གློ་བུར་གྱི་ཆོས་དག་ཕྱིར་དྲུག༔ དཔེར་ན་ཁྱུང་ཆེན་ཐད་ཀར་གཅད་དེ་འགྲོ་བ་བཞིན་མཁའ་ལྡིང་འདྲ༔ དགོས་པ་རྣམ་པ་གཉིས་ཡིན་ཏེ༔ འཁོར་བའི་རྦ་ཀློང་ཉོན་མོངས་པ་སྐེམས་པས་ཀློང་༔ འཁྲུལ་པའི་རྒྱུད་པ་རྩད་གཅོད་དྲུག༔ ཁོང་དོན་མན་ངག་རྣམ་གཉིས་ཏེ༔ རིགས་དྲུག་གི་སྐྱེ་གནས་རང་དག་ལ་གཏོང་པའི་ཐབས་འབྲོས་ཁུངས་གཅོད་པས་དྲུག༔ རང་སྣང་ཉམས་སུ་ལེན་པས་དབྱིངས་རིག་འདུ་འབྲལ་མེད་པ་ལྷུག་པར་འདུག་པས་ཀློང་༔ དེ་ཡི་མན་ངག་རྣམ་གསུམ་སྟེ༔ འགྲོ་དྲུག་འབྲོས་ཁུངས་སྐྱེ་བ་བཞི་བཅད་པས་ཡུལ་གཟུགས་སོགས་དྲུག་རྣམ་པར་དག༔ རང་སྣང་ལྷུག་པར་ཤར་བས་འབྱུང་བ་ས་ཆུ་མེ་རླུང་བཞིའི་རྐྱེན་དང་བྲལ༔ ལུས་ཀྱི་གནད་གསུམ་སྙིང་རྩ་མིག་གི་དེ་ཉིད་གཟིར་བས་འཁྲུལ་པ་དག་པར་བྱེད་ཕྱགས་མས་བཏབ༔ རིག་པའི་འབྲོས་ཁུངས་མ་རྟོག་པའི་ཡུལ་ཡུལ་ཅན་གཏིབས་པས་འཁོར་བའི་རྡོས་ཐག་བཅད༔ གནད་གསུམ་མིག་

གཅིག་ཏུ་དྲིལ་བས་གཏད་སའི་འབེན་རྡོ་རྗེ་ལུ་གུ་རྒྱུད་དང་ཕྲད༔ སྐབས་ནི་རྣམ་པ་དྲུག་དག་གིས༔ གཞུང་གི་ཚད་རྣམས་རྫོགས་པའོ༔ ཨི་ཏི༔ རྒྱ༔ སྐུ་གདུང་འབར་བཞེས་བྱ་བའི་དོན་ལ་བདུན༔ ངོ་བོ་མི་འགྱུར་ཡེ་ཤེས་སོ་སྟོང་པ་རྒྱ་ཡན་གྱི་ལྟ་བ༔ ངེས་ཚིག་སངས་རྒྱས་ཐམས་ཅད་ཀྱི༔ བརྒྱུད་པ་རང་ལ་ཡོད་ཚུལ་གཏན་ལ་འབེབས་པའི་ཕྱིར༔ སྐུ་གདུང་འབར་བ་ཞེས་བྱ་སྟེ་རང་གི་རྟགས་བཞི་ཡིན་བྱ་བའོ༔ དབྱེ་བ་རྣམ་པ་གསུམ་ཡིན་ཏེ༔ སྐུ་གསུམ་གཏན་ལ་འབེབས་པས་སྐུ༔ ལྟ་བ་རང་བྱུང་ཡེ་དག་ཆེན་པོའི་དགོངས་པ་འགྱུར་མེད་གདུང་༔ སྒྲོན་མེས་རང་གི་ལུས་རྣམས་ཁྱབ་པས་འབར༔ དཔེར་ན་རིགས་བཙུན་ལ་སྤྱོད་པ་ཆེན་པོ་རྒྱལ་པོ་ལྟ་བུའོ༔ དགོས་པ་རིག་པའི་ཉམས་སུ་བླངས་རྟགས་རྣམས་སྟོན༔ ཁོང་དོན་མན་ངག་རྣམ་གསུམ་སྟེ༔ གནད་གསུམ་གྱིས་ཉམས་སུ་བླངས་པའི་སྟོབས་ཀྱིས་གོམས་ཚད་རྒྱུད་ཉིད་སྨིན་པས་སྐུ༔ དག་པའི་མཁའ་ལ་ནམ་མཁའ་དང་རིག་པ་མིག་གསུམ་མི་འབྲལ་བས་གཟེར་ཆེན་ཐེབས་པས་གདུང་༔ ཉམས་བླངས་རང་ཉམས་གོང་ནས་གོང་དུ་འཕེལ་བ་གོམས་པའི་རྟགས་དང་ལྡན་པས་འབར༔ གནད་གསུམ་མན་ངག་ཉམས་སུ་བླངས་པས་གོམས་ཚད་ལ་ནི༔ ལུས་ནི་སྐུ་གསུམ་རང་ལུས་པས༔ འབྲས་བུ་ཕྱིར་མི་ལྡོག་པར་བསྟན༔ བག་རྡུལ་དེངས་པའི་ནམ་མཁའ་ལ་གཞན་ནས་མ་བཙལ་བར་སངས་རྒྱ་བའི་དགོས་པ་ཡོད༔ རྟེན་དང་བྲལ་བའི་རིག་པ་རྡོ་རྗེ་ལུ་གུ་རྒྱུད་དེ་བསྒོམས་པའི་ཚེ་ཚིག་རྣམས་ལའང་སྐུ་དང་ཐིག་ལེའོ་གཏད༔ ཉམས་བླངས་གོམས་པའི་རྟགས་ནི་རྣམ་གསུམ་སྟེ༔ ཕྱི་ལུས་དང་ནངངག་དང་གསང་བ་སེམས་ཀྱི་

རྟགས་ཡིན་ནོ༔ ལུས་ཀྱི་རྟགས་ནི་རྣམ་པ་གཉིས་ཡིན་ཏེ༔ སྔོན་དུ་ཕུང་པོ་ཡོད་ཀྱི་བར་རྟགས་དང་ཕྱིས་ཀྱི་ཕུང་པོ་བོར་བའི་རྟགས་ཡིན་ནོ༔ སྔོན་དུ་རིག་པའི་གནད་གཟིར་གོམས་པ་ཡིས༔ འདི་དག་རྣམས་ནི་འདོད་པ་མེད་ཀྱང་འབྱུང་༔ ཆོས་ཉིད་སྣུམ་དང་ལྡན་པས་ལུས་ལ་སྣུམ་ཤ་ཆགས༔ སྐྱེ་མེད་རྩ་བ་མཐོང་བས་ལུས་ཀྱི་འབུ་སྲིན་དེངས༔ ཡེ་ཤེས་རླུང་ཚད་ཟིན་པས་གཟུགས་མེད་རླུང་ལྟར་མགྱོགས༔ རྡོས་བཅས་འཁྲུལ་པ་ཞིག་པས་ཕྱི་ནང་གི་འཁྲུལ་པ་རང་སར་དེངས་པས་ཤིང་བལ་འདབ་ལྟར་ཡང་༔ རང་ལུས་སྐུ་རུ་གྲོལ་བས་ཤ་ཁྲག་མི་སྣང་བས་མཁའ་ལ་བྱ་ལྟར་འགྲོ༔ སྔོན་དུ་འདི་དག་འདོད་པ་མེད་ཀྱང་འབྱུང་༔ ཕྱིས་ཀྱི་རྟགས་ནི་རིགས་ཀྱི་བུ་དེ་མྱ་ངན་འདའ་བའི་ཚེ༔ དབྱིངས་ཉིད་སྨིན་པའི་རྟགས་སུ་ཕུང་པོ་ལ་འཇའ་ཟུག་པ་སོགས་འོད་རྣམས་འབྱུང་༔ ཐིག་ལེ་སྨིན་པའི་རྟགས་སུ་རིགས་ལྔའི་གདུང་ཡང་སྟེ༔ སྐུ་གསུམ་ས་ལ་གོམས་པས་ལྷའི་གཟུགས་སྐུ་ཡང་འབྱུང་༔ དེ་ལྟར་རྟགས་ནི་མི་འདོད་བཞིན་དུ་གང་ཟག་འདྲེན་པའི་དོན་དུ་འབྱུང་༔ ངག་གི་སྣང་རྟགས་རྣམ་པ་འདི་དོན་ཉིད་ཡིན་ནོ༔ ཆོས་ཉིད་མ་དང་གོམས་པས་ཅི་སྨྲས་གཞན་ལ་ཕན་གཞན་ལ་ནུས་པ་འཇུག་ཅིང་བྱིན་རླབས་སྐྱེ༔ འཇིག་རྟེན་སྣང་བ་ནུབ་པས་འཁྲུལ་པའི་ཚིག་མི་འབྱུང་རྒྱ་ལ་བྱུང་ཡང་གཞན་དོན་དུ་འགྱུར༔ སྤྲོས་བྲལ་ཆོས་ཉིད་རྟོགས་པས་ལྐུགས་པ་ལྟ་བུར་འགྱུར༔ འདི་དག་རྣམས་ནི་རང་བཞིན་བབས་ཀྱིས་འབྱུང་༔ སེམས་ཀྱི་གསང་བ་ལས་སུ་འདི་ལྟ་བུ་ཡང་འབྱུང༔ ཐིག་ཆེན་དོན་དང་ཕྲད་པས་འགྲོ་ལ་རང་བཞིན་གྱི་སྙིང་རྗེ་སྐྱེ༔

འཁྲུལ་སྣང་ཞེན་པ་འགགས་པས་གང་བསམས་ཡུལ་དེར་ཕྱིན༔ ཤེས་བྱ་རྒྱུད་ལ་ཤར་བས་ཕ་རོལ་གྱི་སེམས་ཤེས་པ་སོགས་མངོན་ཤེས་དྲུག་ཀྱང་འཆར༔ སྣང་སྲིད་སྟོང་པར་ཤེས་པས་དངོས་པོའི་མཐའ་ཟད་པས་ཤེས་པ་གར་གཏད་སར་མེར་གྱིས་འཇུག་ནུས་གང་གཏད་ལྷན་གྱིས་འཇུ༔ སེམས་ཉིད་མཁའ་ལ་ཕྱུངས་པས་ཆུ་ལ་ཉ་ལྟར་བྱིང་བ་མེད༔ ཅིར་སྣང་ཆོས་སྐུར་གྲོལ་བས་རི་ལ་ཐོགས་མེད་དུ་ཟང་ཐལ་ལོ༔ ལེའུ་གསུམ་གྱིས་གཞུང་ཚད་རྫོགས༔ ཨི་ཏི༔ རྒྱ་རྒྱ་རྒྱ༔ རིན་ཆེན་སྤུངས་པ་ཞེས་བྱ་བའི་རྒྱུད་ལ་བདུན་ཏེ༔ ངོ་བོ་རིག་པའི་ཡོན་ཏན་སྐྱེད་པར་བྱེད༔ ངེས་ཚིག་རྣམས་པ་གཉིས་ཡིན་ཏེ༔ དབྱིངས་རིག་ཡོན་ཏན་རྫོགས་པས་རིན་པོ་ཆེ༔ ངོ་བོ་ལ་མི་ཟད་ཡེ་ཤེས་རབ་རྫོགས་སྤུངས་༔ དབྱེ་བ་རྣམ་པ་གསུམ་ཡིན་ཏེ༔ གཞི་ནས་དངོས་པོ་རང་གི་ཡོན་ཏན་དུ་བྱུང་བ་འཁྲུལ་པ་དག་པས་རིན་པོ་ཆེ༔ ཟག་མེད་ཡེ་ཤེས་ཆེན་པོའི་དབྱིངས་རིག་གཉིས་མེད་དོན་སྤུངས་པ༔ འགྱུར་མེད་ལྟ་བ་མ་འགག་པ་རྒྱུན་དུ་གནས་པས་རྒྱུད་དུ་བསྟན༔ དཔེར་ན་ཕྱུག་པོའི་བང་མཛོད་སྒོ་ཕྱེས་བཞིན་ནོར་རྫས་ཅི་འདོད་འབྱུང་བ་དང་འདྲ༔ དགོས་པ་ཡོན་ཏན་ཨ་ནུ་དབྱིངས་དང་རིག་པ་ལྟར་སྣང་བ་དང་སྟོང་ཆ་ལ་བཞག་པ་མ་ཡིན་ཚད་རྣམས་འཛིན༔ ཁོང་དོན་མན་ངག་རྣམ་གཉིས་ཏེ༔ ཡོན་ཏན་དུ་མ་རྫོགས་པའི་རིག་གནད་གཟིར་ཞིང་ཉམས་སུ་བླང་བ་དང་༔ རྒྱ་ཆེ་འཁྲུལ་སྣང་འགགས་ཏེ་རིག་པའི་སྣང་བ་ཟད་པ་མེད་པའི་དབྱིངས་རིག་སྤུངས༔ རིག་པ་ཉིད་ཀྱི་ཆོ་འཕྲུལ་སྣ་ཚོགས་སུ་སྣང་ཞིང་འཆར་བ་རིན་པོ་ཆེ༔ འཁྲུལ་པ་ཉིད་ཀྱང་དེ་ཡི་རྩལ་དུ་སྣང་༔ སངས་རྒྱས་ཉིད་ཀྱི་མཛད་པ་དུ་མ་ཡང་༔ རིག་པའི་རྩལ་ཏེ་དེ་ཉིད་རང་གི་ངང་༔ རིག་པའི་གནས་དེ་སྙིང་ཡིན་པས༔ ཆོས་ཀྱི་སྐུ་ཡང་སྙིང་

ཁར་རིག་པ་རྟོག་མེད་དུ་ཡོད་གནས༔ རིག་པའི་ལམ་ནི་རྩ་ཡིན་པས༔ ཐིག་ལེ་ཉག་ཅིག་རྩ་རྡོ་རྗེ་ལུ་གུ་རྒྱུད་ཕྲ་ལ་བྲེང་ཆགས་པ་ནས་འགྱུ༔ རིག་པའི་སྒོ་ནི་སྐྱོན་མེད་མིག་ཡིན་པས༔ ལྟ་བ་རིག་པ་ཉིད་མིག་གིས་མཐོང་བའི་ལྟ་བ་ཟེར་ཁྱབ་ཆེ་མིག་ནས་འཆར༔ རིག་པའི་ཡུལ་ནི་ནམ་མཁའ་སྤྲིན་མེད་ཡིན་པས༔ གཟུང་དཀའ་ཁྱབ་གདལ་རིག་པ་ནམ་མཁར་ཟིན༔ རིག་པའི་ལྟོས་འདི་ལ་སྣང་བས་ནི་འཁོར་བ་སྟེ༔ ཉག་གཅིག་གཟུང་དཀའ་ཆ་ཕྲ་ཀུན་ཏུ་ཁྱབ༔ རིག་པའི་དགྲ་གྲོགས་ཟེར་བའང་ནི་མྱང་འདས་ཏེ༔ གནད་གཟིར་རིག་ངོ་སྟོང་གསལ་མཐོང་༔ རིག་པའི་གོལ་ས་སྐུ་གསུམ་སྟེ༔ འབྲས་བུ་ལ་ཞེ་འདོད་ཀྱིས་མཐར་ནི་ལྷུང་བར་འགྱུར༔ རིག་པའི་སྒྲིབ་པ་བློས་བྱས་ཀྱིས་ལྟ་སྒོམ་མེད་པ་ལ་བདག་ཏུ་འཛིན་པ་རྣམས་སྟེ༔ བྱས་པ་རྣམས་ནི་འཇིག་པའི་རྒྱུ༔ རིག་པའི་རང་སྣང་དུ་མ་ཤེས་ན་འཁྲུལ་པ་འོད་ཡིན་ཏེ༔ གཞན་འབྱུང་གཉིས་འཛིན་གྱིས་འཁོར་བར་འཁྲུལ་པའི་རྩ་བ་ཅན༔ དབྱིངས་ཀྱི་གནས་ནི་ཙིཏྟ་ཚོན་སྣ་ལྔའི་དྲུ་བུ་བསྡོགས་པ་ལྟར་སྟེ༔ ནམ་མཁའི་ཁམས་ནི་ཟབ་ཅིང་རྒྱལ་ཆེ་བའི་ཡེ་ཤེས་སྙིང་ན་གནས༔ དབྱིངས་ཀྱི་ལམ་འགུལ་བ་དང་བཅས་པ་ནི་རླུང་ཡིན་པས༔ ཤེས་པའི་དངས་མ་ནམ་མཁར་འོད་དུ་གསལ༔ དབྱིངས་ཀྱི་སྒོ་ནི་མཛོད་སྤུ་ནས༔ དང་པོ་མཐིང་ཁ་གོམས་པས་ལྔ་ལྡན་ཁྱབ་ཆེན་ཤེས་པའི་གྲོགས༔ དབྱིངས་ཀྱི་ཡུལ་ནི་མིག་ཡིན་པས༔ མཐོང་བྱེད་མིག་ཟུར་ལ་མནན་པས་རྒྱུན་དུ་གནས༔ དབྱིངས་ཀྱི་ཟད་ས་འབྱུང་རྐྱེན་ནམ་མཁའ་སྟེ༔ རིས་མེད་ཡུལ་ལ་འོད་སྐུ་ཐིག་ལེ་སོགས་ཁྱབ་པར་གདལ༔ དབྱིངས་ཀྱི་འབྲས་བུ་ལུས་ཡིན་པས་འདི་ཉིད་དུ་རྟོག་པ་མེད་པས༔ མཐོང་བྱེད་འཁྲུལ་སྣང་ཕྱིས་རེ་བ་མེད་པར་

འདི་ལ་གཅོད༔ དབྱིངས་ཀྱི་གོལ་ས་འོད་ཡིན་པས་རང་སྣང་དུ་མ་ཤེས་ན༔ གསེར་སྒྲོགས་ཐག་སྒྲོག་འཆིང་བར་མཉམ༔ དབྱིངས་ཀྱི་གྲོགས་ནི་འབྱུང་ལྔ་རྐྱེན་འོད་དུ་གྲོལ་བས༔ འབྱུང་ལྔ་ཟད་པས་འཁྲུལ་པའི་ཞེན་ཡུལ་འགགས༔ དེ་ཕྱིར་ཡོན་ཏན་ཐམས་ཅད་ནི༔ དབྱིངས་ཡུལ་དང་རིགཔར་ཡུལ་ཅན་ལ་སྤུངས་པས་སྤུངས༔ ལེའུ་ལྔ་ཡིས་གཞུང་ཚད་རྫོགས༔ ཨ་ཏི༔ རྒྱ་རྒྱ་རྒྱ༔ ནག་མོ་ཁྲོས་མ་ཞེས་བྱ་བས༔ ངོ་བོ་འདི་བསྟན་པ་བསྲུང་བའི་དོན་དུ་འགལ་བྱེད་ཆམ་ལ་འབེབས༔ ངེས་ཚིག་རྣམ་པ་གཉིས་ཡིན་ཏེ༔ མི་འགྱུར་ཡེ་ཤེས་ནག་མོ་ལ༔ དུག་གི་རྩད་གཅོད་ཁྲོས་མ་ཡིན༔ དབྱེ་བ་རྣམ་པ་ལྔ་ཡིན་ཏེ༔ གཏི་མུག་ཁྲོས་པའི་རྒྱལ་མོས་ཤལ་དབབ་པས་ཨེ་ཀར་གཅིག༔ ང་རྒྱལ་ཁྲོས་པའི་རྒྱལ་མོས་སྲོག་ལ་དབབ་པས་ཙ་ཏིར་བྱུང་༔ འདོད་ཆགས་ཁྲོས་པའི་རྒྱལ་མོས་ཁྲག་ལ་དབབ་པས་བདག་གཞན་དཔལ༔ ཕྲག་དོག་ཁྲོས་པའི་རྒྱལ་མོས་དབུགས་ལ་དབབ་པས་མི་འགྱུར་ནག༔ ཞེ་སྡང་ཁྲོས་པའི་རྒྱལ་མོས་རུས་ལ་དབབ་པས་འབྱུང་ཁུངས་མོ༔ དཔེར་ན་གཅོད་བྱེད་སྤུ་གྲི་ལྟ་བུ་འོ༔ དགོས་པ་སངས་རྒྱས་ཀྱི་བསྟན་པ་དམ་པ་བསྲུང་༔ ཁོང་དོན་མན་ངག་རྣམ་པ་གསུམ༔ ཁྲོས་པའི་དུས་ཚོད་མན་ངག་དང་ཟླ་བས་འབྱེད༔ བསམ་པ་གནག་པའི་མན་ངག་བསམ་ལེ་མས་འགྲུབ་དང་༔ མོ་སྟེ་སྒོང་ཐུན་དུག་ཐུན་མདའ་ཐུན་དྲུག་མན་ངག་གོ༔ དུས་ཚོད་དཔྱིད་ཟླ་སོགས་ར་བཞི་བརྒྱད་དང་དྲུག༔ བཅུ་བཞི་བཅུ་དགུ་གོ་རིམ་བཞིན་ཐུན་དང་སྦྱོར་ཀ་བྱ༔ དཔྱིད་ཟླ་འབྲིང་པོ་བཞིའི་མར་ངོ་ཉི་ཤུ་གཉིས་དང་ལྔ༔ བདུན་དང་གནམ་སྟོང་གོ་རིམ་བཞིན༔ དཔྱིད་ཟླ་སོགས་ཐ་ཆུང་བཞི་དང་བརྒྱད་དང་དགུ༔ བཅུ་གཅིག་བཅས་ཏེ་གོ་རིམ་བཞིན༔

བསམ་པ་རྫས་ཐོད་པ་དང་ཁྲག་སྔགས་བཛྲ་ཏིང་ཏིང་ཉལ་ལུགས་སོ་ཁ་བྱང་དུ་ལྟ་བ༔ ཐུན་དྲུག་རེ་རེ་ཡ་ཕྲལ་གཅིག་ཏུ་དྲིལ་བ་དང་༔ དེའི་ནང་ནས་སྙིང་ཐུན་གཙོ་སྟེ་བསད་སྔགས་མ་མ་ཙ་ཚ་བཅུ༔ མ་མ་ཁྲོམ་བྷྱོ་སོགས་ཁྲོམ་བཅུ་བཏབ་སྟེ་བྷྱོ་ཡིས་འགྲུབ༔ ལེ་འུ་བརྒྱད་དང་བཅུ་གཅིག་གིས༔ གཞུང་གི་ཚད་རྣམས་རྫོགས་པ་འོ༔ དེ་ལྟར་སྤྲོས་ལ་དགའ་བ་ལ་ཏེ་རྒྱུད་ཀྱི་དོན༔ རྣམ་པ་བདུན་དུ་རབ་ཕྱེ་ནས༔ བསྟན་པ་འཛིན་སྐྱོང་བསྲུང་བ་ཡི༔ དོན་དུ་དེ་ཉིད་བསྟན་པ་འོ༔ མཆོག་ཏུ་ཉམས་ལེན་གནད་གསུམ་དུ༔ བསྡུས་ཏེ་དྲིལ་ནས་གང་ཟག་ནི༔ གཅིག་གི་ཆ་རྐྱེན་དག་དུ་བསྟན༔ རྒྱུད་རྣམས་ཀུན་གྱི་སྙིང་དང་འདྲ་སྟེ་ཕྱུངས་པས༔ སྙིང་ཁྲག་མན་ངག་དབྱིངས་དང་རིག་པ་བྱུང་༔ གནད་གསུམ་ལྡན་པའི་མཆུས་གཞིབས་ནས༔ སྔར་མ་མྱོང་བའི་ཉམས་མྱོང་རོ་རྙེད་སྟེ༔ རོ་མྱོང་སྙིང་ལ་མདའ་ཕོག་བཞིན༔ ཕྱི་ཕྱིར་ལྡོག་པ་མ་ཡིན་ནོ༔ གསངབ་བླ་ན་མེད་པ་འདི་དོན་མན་ངག་མི་ཤེས་པར༔ ཕྱི་ནང་གསང་བར་གདིང་འཆའ་བ༔ དབུལ་པོའི་ནང་ན་མེད་པ་ཡོད་ཡོད་ལྟར་བྱས་པ་མཛོད་བུ་སྒོ་བཅད་འདྲ༔ དེ་ཕྱིར་འདི་ནི་སྙིང་ལ་ཕུར༔ རྒྱུད་ཀུན་སྙིང་ནི་འདིར་ཕྱུངས་པས༔ རྒྱུད་ཚིག་རྣམས་ཀྱིས་ཅི་ཞིག་བྱ༔ འདི་ཉིད་ཉམས་སུ་ལེན་པར་གྱིས༔ ཨ་ཏི༔ རྒྱུད་ཐམས་ཅད་ཀྱི་ཁོང་སྙིང་ཕྱུངས་པ་དཀར་པོ་དུང་གིས་བྲིས་པའི་དུང་རིས་མ་ཞེས་ཀྱང་བྱ༔ སྒྲོན་མ་སྣང་བྱེད་ཅེས་བྱ་བ་དུར་ཁྲོད་བྷ་སིང་དུ༔ ཡེ་ཤེས་མདོས་ལུང་བསྟན་ཏེ་མཁས་པ་བི་མ་ལས་རྡོ་རྗེའི་མཁའ་འགྲོ་མ་རྣམས་ཀྱི་དོན་དུ་མཛད་པའོ༔ ལོང་བའི་སྣ་ཁྲིད་དང་འདྲ་བ་རྫོགས་སོ༔ གཏེར་ནས་གཏེར་དུ་བཙས་པ་འདི་སྔགས་ཀྱི་སྲུང་མས་སྲུངས་ཤིག །འདི་ནི་འཛམ་བུ་གླིང་གཞན་ན་མེད་པར་ཡིད་ཆེས་སོ༔ ལས་ཅན་ཅིག་དང་ཕྲད་པར་ཤོག༔ ཨ་ཏི༔ རྒྱ་རྒྱ་རྒྱ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ ཤུ་བྷཾ༔ ༔

དུང་ཡིག་ཅན་གྱི་རྒྱབ་ཡིག་སྟེ་གནད་ཀྱི་ཡི་གེ།

༼དུང་ཡིག་ཅན། ༽དུང་ཡིག་ཅན་གྱི་རྒྱབ་ཡིག་སྟེ་གནད་ཀྱི་ཡི་གེ་བཞུགས༔ རྒྱུད་ཀྱི་གནད་ཡིག་གསང་བ་ཟེར།

རྒྱ་གར་སྐད་དུ༔ ཨ་ཁྱ་ར་ཏན་ཏྲ་ནན་གུ་ཧྱ་ནཱ་མ༔ བོད་སྐད་དུ༔ རྒྱུད་ཀྱི་གནད་ཚིག་གསང་བ་ཞེས་བྱ་བ༔ བཅོམ་ལྡན་གབ་པ་རྣམས་མངོན་དུ་སྟོན་པ་ལ་ཕྱག་འཚལ་ལོ༔ གང་དག་རྒྱུད་ཀྱི་གསང་བའི་ཚིག་རྣམས་ཀྱི༔ དེ་ཡི་དོན་ལ་ཐེ་ཚོམ་གཅད་པའི་ཕྱིར༔ གསང་བ་དུང་གི་ཡི་གེ་ཅན་ལ་ཡང་༔ ཏིག་ལ་འབེབས་པའི་སྙིང་ཏིག་སྒྲོན་མ་འདི༔ མུན་པ་རྣམས་ལ་སྣང་བའི་འོད་བཞིན་དུ༔ རྩ་ཏིག་སྙིང་གི་དཀྱིལ་དུ་ཕབ་ནས་ནི༔ གསང་བའི་ཡང་གསང་ཐུགས་ཀྱི་བཅུད་རྣམས་ནི༔ བླ་མའི་མན་ངག་རིམ་ནས་རིམ་བརྒྱུད་པའི༔ ཐུགས་ཀྱི་བཅུད་རྣམས་བདག་གིས་འདིར་བཀོད་ལ༔ སྙིང་པོའི་ཡང་སྙིང་གསལ་བར་བྱ་བའི་ཕྱིར༔ བཅུད་རྣམས་བསྡུས་ནས་ཉམས་ལེན་ཕྱོགས་གཅིག་ཏུ༔ བསྡེབས་ཏེ་སྐལ་ལྡན་གཅིག་གི་ཆ་རྐྱེན་དུ༔ བཅུ་བདུན་རྒྱུད་ཀྱི་གསང་དོན་གཅིག་ཏུ་བསྟན༔ དེ་ཡི་ཕྱིར་ན་རྒྱུད་ལུང་ཚིག་རྣམས་ལ༔ འགྲུབ་དང་མི་འགྲུབ་མན་ངག་བཅུད་དུ་ནི༔ གསང་བའི་རྒྱབ་ཡིག་མེད་ན་འགྲུབ་མི་སྲིད༔ དེ་ཡི་ཕྱིར་ན་ཡི་གེ་

འདི་ཉིད་གཅེས༔ འདི་མེད་རྒྱུད་ལ་དགོས་པ་ཅི་ཡང་མེད༔ ཚིག་གིས་ངེས་པའི་སྙིང་པོ་མི་མཐོང་སྟེ༔ མཆུ་འགྱུར་སྒྲ་ཡིས་སྣ་ཚོགས་སྨྲ་བྱེད་ཀྱང་༔ དོན་གྱི་ཕྱོགས་སུ་རྡུལ་རྩམ་ཉེ་བ་མེད༔ དེས་ན་གསང་བའི་སྒྲོན་མ་འདི་མེད་ན༔ མུན་ཁུང་ནང་གི་ཕྱག་རྒྱ་བསྒྱུར་བ་འདྲ༔ འདི་ནི་གསང་བ་དུང་གི་ཡི་གེ་ཅན༔ ཏིག་ལ་འབེབས་པའི་མི་འགྱུར་ཐིག་ཡིན་ནོ༔ འདིར་ཚིག་རྒྱུད་རྣམས་ཀྱི་རྒྱབ་ཡིག་གི་མན་ངག་ནི༔ མདོ་རྒྱུད་ཀྱི་དོན་གསལ་བ་ཞེས་བྱ་སྟེ་གསང་བ་དུང་གི་ཡི་གེ་ཅན་ཡིན་ནོ༔ མན་ངག་དེ་ཡི་རྒྱབ་ཏུ་འདི་མེད་ན་རྣལ་འབྱོར་པ་རྣམས་ཀྱི་དོན་མི་འགྲུབ་སྟེ༔ ཚི་ཆད་པ་དོན་མེད་དོ༔ དེའི་ཕྱིར་ན་འདི་རབ་ཏུ་གསང་བར་བྱའོ༔ ཚིག་གི་རྒྱུད་རྣམས་ལ་རེ་རེ་ལ་བདུན་བདུན་གྱིས་བསྟན་པ་ནི༔ ངོ་བོ་དང་༔ ངེས་ཚིག་དང་༔ དབྱེ་བ་དང་༔ དགོས་པའི་དོན་དང་༔ མཚོན་པའི་དཔེ་དང་༔ ཁོང་བཅུད་ཀྱི་མན་ངག་དང་༔ ལེའུའི་གྲངས་དུ་ཡོད་པ་དང་བདུན་གྱིས་རྒྱུད་དེ་དག་གི་རིམ་པ་བསྟན་པ་ཡིན་ཏེ༔ དེ་ཡང་ངོ་བོས་ནི་

རང་གི་རིག་པའི་མཚོན་ཚུལ་སྟོན་པ་ཡིན་གྱི༔ གཞན་སྟོན་པ་མ་ཡིན་ནོ༔ ངེས་ཚིག་གིས་ནི་རྒྱུད་དེ་མི་འགྱུར་བར་བྱ་བའི་ཚིག་ཡིན་གྱི་ཉམས་སུ་ལེན་པའི་ཐབས་སུ་ནི་མ་ཡིན་ནོ༔ དབྱེ་བས་ནི་ཚིག་གི་རིམ་པ་བཤད་པ་ཡིན་གྱི་རིག་པ་གཏན་ལ་འབེབས་པ་ནི་མ་ཡིན་ནོ༔ དགོས་པའི་དོན་ནི་སེམས་ཅན་གྱི་དབང་པོ་ལས་ཕྱེ་བ་ཡིན་གྱི་གནས་ལུགས་ལ་ནི་མ་ཡིན་ནོ༔ མཚོན་པའི་དཔེ་ནི་རྒྱུད་དེ་ཉིད་རང་ཆེ་བསྟན་པ་ཡིན་གྱི་རིག་པ་ལ་ནི་མ་ཡིན་ནོ༔ ཁོང་དོན་གྱི་མན་ངག་གིས་ནི་རྣལ་འབྱོར་པ་རྣམས་ཀྱི་ཉམས་སུ་བླང་བ་ཡིན་གྱི༔ ཚོགས་སུ་བཤད་པ་ནི་མ་ཡིན་ནོ༔ ལེའུའི་གྲངས་དུ་ཡོད་པས་ནི་གང་ཟག་རྣམས་ཀྱི་རྒྱུད་ལ་བསྣན་ཕྲི་མི་འདོད་པའི་དོན་དུ་བསྟན་པ་ཡིན་གྱི་གཞན་གྱི་དགོས་པ་ནི་ཅི་ཡང་མེད་དོ༔ དེའི་ཕྱིར་ན་བདུན་པོ་དེ་དག་གིས་གང་ཟག་གཅིག་འཚང་རྒྱ་བར་བྱེད་པའི་ཐབས་ལ་ནི་བདུན་ཆར་དགོས་པ་མ་ཡིན་ཏེ༔ ཁོང་བཅུད་ཀྱི་མན་ངག་རྣམས་ཀྱི་འདི་ཉིད་དུ་སངས་རྒྱས་པར་བྱེད་པའི་ཐབས་བསྟན་པ་ཡིན་ནོ༔ འཚང་རྒྱ་བར་བྱེད་པའི་གནད་ཀྱི་ཡི་གེ་རྣམས་བསྡུས་ནས་གཅིག་ཏུ་བསྟན་པ་ནི༔ སྔོན་དུ་རྫོགས་པར་རང་བྱུང་གི་རྒྱུད་ཀྱི་མན་ངག་གི་རྟེན་ཁྱད་པར་ཅན་བསྒྲུབ་པ་སྟེ༔ ཕྱི་ནང་གིས་དབང་གིས་སྤྲོས་པ་དང་བཅས་པའི་བློ་ཅན་གྱི་དོན་ཡིན་ཏེ་འདི་ཡིས་དུས་ན་ལུས་སྐུ་གསུམ་དུ་གཏན་ལ་ཕབ་ནས་ལུས་ཀྱི་གནད་ཏུ་རྩ་གཏིམས་པ་ཡིན་ནོ༔ གསང་བ་ཤེས་རབ་ཡེ་ཤེས་ཀྱི་དབང་ནི་གང་ཟག་ཆགས་པ་ཅན་གྱི་དོན་ཡིན་ཏེ༔ དེའི་མན་ངག་ཏུ་ཆགས་ཅན་གྱི་པྲ་ཁྲིད་ཀྱི་སྔོན་དུ་འགྲོ་བའི་མན་ངག་བྱས་ནས་གནས་པ་རྩའི་ཐེམས་ཀྱིས་གཏིམས༔ དེ་མ་གཏིམས་ན་རླུང་མི་ཟིན༔ མིི་འགྱུར་བ་ཡི་གེ་ཐེབས་ཀྱིས་རླུང་གཏིམས༔ དེ་མ་གཏིམས་ན་ལས་རླུང་ལོག་ནས་ལུས་ཀྱི་འབྱུང་བ་འཁྲུགས༔ བཀོད་པ་བྱང་ཆུབ་སེམས་ཀྱི་ཐེམས་ཀྱིས་ལུས་གཏིམས༔ དེ་མ་གཏིམས་ན་ཀུན་རྫོབ་ཀྱི་ཐིག་ལེ་ལ་དབང་མི་ཐོབ་བོ༔ དེ་དག་ཡང་གཞན་དོན་ཐབས་ཡིན་གྱི༔

སངས་རྒྱས་པ་ལ་ནི་དགོས་པ་མ་ཡིན་ནོ༔ རང་རིག་ཡོངས་སུ་རྫོགས་པའི་དབང་གི་མན་ངག་གིས་སྤྲོས་བཅས་ཀྱི་དོན་ཁྱད་པར་ཅན་སྒྲུབ་པར་བྱེད་པའོ༔ རྒྱུད་ཀྱི་ནང་ནས་བསྟན་པའི་དབང་དེ་ཀུན་ནི་དྲང་ཞིང་བཀྲི་བའི་དོན་ཡིན་ནོ༔ རྫོགས་པ་རང་བྱུང་གི་རྒྱབ་ཡིག་གསང་བ་སྙིང་པོ་དུང་ཡིག་ཅན་གྱི་སྙིང་ཐིག༔ རྫོགས་སོ༔ རྒྱ་རྒྱ་རྒྱ༔ སྤྲུལ་སྐུ་སྒྲུབ་པར་བྱེད་པ་སྒྲ་ཐལ་འགྱུར་གྱི་རྒྱུད་ཀྱི་རྒྱབ་ཡིག་གསང་བ་ནི༔ འདི་ནི་འཇིག་རྟེན་དོན་མངོན་ཤེས་ལ་སོགས་པའི་རྟགས་ཕྱུངས་ཏེ་གཞན་འཇུག་པར་བྱ་བའི་ཡན་ལག་དུ་བསྟན་པ་ཡིན་ཏེ༔ འདི་ལ་བརྟེན་ནས་འདོད་པའི་ཡོན་ཏན་ལྔ་ལ་ལམ་དུ་བྱེད་པའི་རྣལ་འབྱོར་པ་ཉིད་ཀྱི་ཉམས་ལེན་བསྟན་པ་ཡིན་གྱི༔ ཉམས་སུ་བླང་བ་དངོས་གཞི་མ་ཡིན་ནོ༔ དེ་ཡང་ཉམས་སུ་ལེན་པའི་དངོས་གཞི་དེ་ཉིད་ཀྱི་གྲོགས་སུ་འགྲོ་བའི་མན་ངག་གཞན་ནི་དཔེའོ༔ དེ་རང་གི་འགྲུབ་པ་ཡིན་ནོ༔ འབྱུང་བ་ལྔའི་སྒྲ་དོན་ཉམས་སུ་ལེན་པའི་དུས་ན་གནད་བསྡུས་པའི་ནི་འདི་ལྟར་ཡིན་ཏེ༔ འདི་ཀུན་གྱི་སྔོན་དུ་ནི་ལུས་ངག་གི་གནད་གཏིམས་པ་གལ་ཆེའོ༔ ལུས་ངག་གི་གནད་གཏིམས་པའི་རྗེས་ལ་གང་མོས་པའི་སྤྱོད་ལམ་རྩོམ་པ་ནི་སེམས་རྣལ་དུ་འབེབས་པའི་དགོས་པ་ཡོད་པས་གལ་ཆེ༔ དེ་ལ་ཐོག་མར་མེའི་དབྱིབས་ལ་བརྟག་པ་ནི༔ མཚན་མོའི་དུས་སུ་རི་ཡི་རྩེ་ལ་ཕྱིན་ལ་བརྟག་པ་ཡིན་གྱིས་གམ་ནས་ནི་མཐོང་བ་མ་ཡིན་ནོ༔ ལྷག་མ་ནི་དཔེ་རང་ན་ཞིབ༔ འདི་ནི་གནད་ཡིན་ནོ༔ ཁ་དོག་ལ་བརྟག་པའི་དུས་ན་རྒྱང་གྲགས་ཕྱེད་ཀྱིས་ནི་ལྐོག་གི་ཕྱོགས་ནས་བལྟ་བར་བྱའོ༔ དེ་ན་སྒྲ་དངོས་གཞི་ལ་ཉམས་སུ་ལེན་པའི་དུས་ན་རླུང་གང་ནས་བྱུང་བའི་མིའི་རྒྱབ་ཏུ་འདུག་པ་ཡིན་ཏེ་འདོམ་དོ་ཙམ་ཟེར་ཡང་སྐྱེས་བུས་རྡོ་བ་འཕངས་པས་སླེབ་པའི་ས་ཡིན་ནོ༔ དེའི་ཚེ་རྣ་བར་ཤེས་པ་བཅུག་སྟེ་མ་ཡེངས་པ་གཙོ་ཆེ༔ དེའི་དུས་ན་ཞག་གསུམ་ལོན་ནས་བདེ་སངས་པ་ཅིག་འོང་༔

བཞི་ལ་དགའ་ཡལ་བ་ཅིག་འོང་༔ བདུན་ན་མི་རྣམས་ཀྱི་ཤེས་པ་ལ་ཅི་ཡོད་པ་སྐད་སྟོན་པས་ཤེས་པའོ༔ བཅུ་ལ་དམྱལ་བའི་སྐད་ཤེས༔ བཅུ་གཅིག་ལ་ཡི་དྭགས་རྣམས་ཀྱི་སྐད་ཤེས༔ བཅུ་གཉིས་ལ་བྱོས་སོང་རྣམས་ཀྱི་སྐད་ཤེས། བཅུ་གསུམ་ལ་ལྷ་མ་ཡིན་གྱི་སྐད་ཤེས༔ བཅུ་བཞི་ལྷ་རྣམས་ཀྱི་སྐད་ཤེས་ཏེ་མངོན་པར་ཤེས་པ་རྣམས་དུས་གཅིག་ཏུ་འཆར་རོ༔ དེ་ནི་དབང་པོ་ཡང་རབ་རྣམས་ཀྱིའོ༔ འབྲིང་གིས་དེ་ལྟར་ལན་བདུན་གྱིས་འགྲུབ་པ་ཡིན་ཏེ་འདི་ནི་ལོ་རེ་ལ་ལན་གྲངས་དེ་སྙེད་དུ་བྱའོ༔ ཐ་མས་ནི་བཅོ་ལྔ་བྱས་པས་འགྲུབ་པ་ལ་ཐེ་ཚོམ་མེད་དོ༔ ཨ་ཏི༔ ༔ཆུའི་སྒྲ་ལ་སྤྱོད་ན༔ དུས་ནི་སྟོན་ཆར་ཆད་དུ་ཉེ་བའི་དུས་ནི་གནད་ཡིན་ནོ༔ དེ་ཡང་མཚན་མོ་ཤིན་ཏུ་ཐག་རིང་བ་ནས་ཤེས་པ་རྣ་བར་གཏད་དེ་མ་ཡེངས་པ་རབ་ཏུ་གཅེས་སོ༔ དེའི་ཚེ་བྱིང་ན་ཆུ་བོ་ཡི་རྩར་འདུག་སྟེ་ཤེས་པ་གཏད༔ རྒོད་ན་མགོ་བསྟུམས་ཏེ་དར་གཅིག་འདུག་གོ༔ ཉིན་མོ་ཆུའི་དཀྱིལ་དུ་ཤེས་པ་གཏད་པ་ནི་མན་ངག་གོ༔ དེ་ལྟར་ལུས་ཀྱི་གནད་དང་བསྟུན་ནས་བྱས་ན་ཟླ་བ་གཅིག་ན་མཁའ་འགྲོ་མ་ཡིས་ཆོས་སྨྲ་བའི་སྐད་སྣ་ཚོགས་པ་འོང་༔ གཉིས་ན་རང་ལ་ཆོས་སྣ་ཚོགས་པའི་ཉམས་སྐྱེ༔ གསུམ་ན་ཆོས་ལས་གྲོལ་བའི་ཉམས་ནི་དབང་པོ་རབ་ལ་འོང་༔ འབྲིང་ལ་དགུ༔ ཐ་མ་བཅོ་བརྒྱད་ན་དེ་ལྟར་མི་འོང་མི་སྲིད་དོ༔ འདི་ནི་ཤེས་རབ་སྣ་ཚོགས་པ་སྒྲུབ་པ་ཞེས་བྱ་བའི་མན་ངག་ཡིན་ནོ༔ ཨི་ཏི༔ རླུང་གི་སྒྲ་ལ་སྤྱོད་པ་ནི༔ སྔོན་དུ་འགྲོ་བ་སྤྱིར་འདྲ༔ ལྷག་མ་དཔེ་ན་ཞིབ༔ རླུང་ཕྱོགས་ཀྱི་ཞུར་ཁུང་ལ་རྣ་བ་གཏད་དེ་ཤེས་པ་རྣ་བར་གཞུག་པ་མན་ངག༔ དེ་ཡང་རེས་མགོ་བསྟུམས་ཤིང་ཉལ་བ་ནི་གནད༔ འདིའི་དུས་སུ་ཁ་ཟས་ནི་ཤ་ཆེན་པོ་དང་༔ མར་བཟང་པོ་དང་༔ བུ་རམ་རྙིང་པ་བརྟེན་ནོ༔ འདི་ལྟར་ཉམས་སུ་བླངས་པས་དབང་པོ་རབ་ཀྱིས་ཟླ་བ་གཅིག་ན་ནམ་མཁའ་ལ་རྒྱུ་ནུས༔

འབྲིང་གི་ཟླ་བ་ལྔ་འམ་བཅུ་གཅིག་ན༔ ཐ་མས་ལོ་གསུམ་ན་ནམ་མཁའ་ལ་རྒྱུ་ནུས་ཏེ༔ འདི་ནི་ཕྱིའི་རླུང་སྦྱོང་བའི་མན་ངག་གོ༔ ཨྠྀི༔ ༔སའི་སྒྲ་ལ་སྤྱོད་པ་ནི༔ སྒོ་ང་ཁ་དོག་ཚོན་གྱིས་ཁ་བསྒྱུར་བ་ལ་སོགས་པའི་ལག་པའི་འདུ་བྱེད་བསྒོམ་པ་སྟེ༔ འདི་ལ་རྟག་ཏུ་སྦྱངས་ན་དབང་པོ་རབ་ཟླ་བ་དྲུག་ནས་འབྱུང་བའི་དགྲས་མི་ཚུགས༔ འབྲིང་བཅོ་བརྒྱད་ན༔ ཐ་མ་ན་ལོ་དྲུག་ན་འབྱུང་བ་རྣམས་ཀྱི་དགྲས་མི་ཚུགས་པ་ཡིན་ནོ༔ ཨྠྀི༔ ༔ནམ་མཁའི་སྒྲ་ལ་སྤྱོད་པའི་རྣལ་འབྱོར་ནི༔ ལུས་བརྒྱངས་པས་རླུང་རང་སོ་ན་གནས་པ་ཡིན་ནོ༔ དབུགས་དྲག་པོ་ཕྱིར་བཏོན་ཏེ་མི་འགྱུར་བ་དྲག་པོའི་ཡི་གེ་ཧ་ཧ་ཉིས་བརྩེགས་ངག་ཏུ་གདོན་ནོ༔ ལུས་ཀྱི་ནང་དུ་དབུགས་ཆགས་སུ་མི་གཞུག་པ་ནི་གནད་ཡིན་ནོ༔ མིག་གིས་མཐོང་ཚད་ཀྱི་ནམ་མཁའི་སྟེང་དུ་འཕང་བ་ནི་རླུང་གི་ཚད་འཛིན་པ་ཡིན༔ དེ་ཡང་དབང་པོ་རབ་ཀྱིས་ལོག་གསུམ་ན་མིག་གི་མཐོང་ཚད་ཀྱི་ནམ་མཁའ་ལ་རྒྱུ་བར་ནུས༔ འབྲིང་གིས་དགུ་ན༔ ཐ་མས་བཅོ་བརྒྱད་ན་རྒྱུ་བར་ནུས་པར་ཐེ་ཚོམ་མེད་དོ༔ འདི་ནི་ངེས་པ་ཁོ་ནའོ༔ འདི་ནི་ནང་གི་རིག་པ་ཕྱིའི་དབྱིངས་ལ་བོར་བའི་མན་ངག་གོ༔ ཨྠྀི༔ ༔དེའི་ཡོན་ཏན་ནི་དཔེ་ན་ཞིབ་བོ༔ སྒྲ་ཐལ་འགྱུར་གྱི་རྒྱུད་ཀྱི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་གཏན་ལ་འབེབས་པ་རྫོགས་སོ༔ ལས་ཅན་ཅིག་དང་ཕྲད་པར་ཤོག༔ ས་མ་ཡཱ༔ ཁ་ཐཾ༔ རྒྱ་རྒྱ་རྒྱ༔ ༔དེ་ལྟར་སྤྲུལ་པའི་སྐུ་བསྒྲུབས་ནས་གཞན་དོན་རྫོགས་པར་བྱས་ཏེ༔ ད་རིག་པའི་གནས་ཚུལ་གཏན་ལ་དབབ་པའི་ཕྱིར་བཀྲ་ཤིས་མཛེས་ལྡན་གྱི་གནད་ཀྱི་མན་ངག་བསྟན་པ་ནི༔ འདི་ནི་ཤེས་པར་བྱ་བའི་ཆོས་ཡིན་པ་ལས་ཉམས་སུ་བླང་དུ་བཏུབ་པ་ནི་མ་ཡིན་ཏེ༔ དེ་ཉིད་ལ་ཁོང་དོན་མན་ངག་བཞིར་བསྟན་པའི་མ་འཁྲུལ་བའི་ཡེ་ཤེས་ཀྱི་མན་ངག་ནི་ཉམས་སུ་བླང་བར་བསྟན་པ་ཡིན་ནོ༔

དེའི་སྔོན་དུ་ཡི་གེ་མ་རུ་ནས་བྱུང་བའི་འཁོར་འདས་རུ་ཤན་འབྱེད་པའི་སྤྱོད་པ་བྱས་ནས་དེ་ལ་རྟགས་བྱུང་བ་དང་༔ རང་གི་རིག་པ་ཉིད་མངོན་དུ་གཏན་མ་ལ་ཕབ་ན༔ སྣང་བའི་དངོས་པོ་འདི་ཟད་པར་བྱེད་པ་ལ་རིག་པ་མངོན་སུམ་གྱི་ཡིན་གྱིས༔ སྟོང་པས་ནི་སྣང་བའི་དངོས་པོ་འདི་ཟད་པར་ནུས་པ་མ་ཡིན་ནོ༔ དེའི་ཕྱིར་ན་དངོས་པོས་དངོས་པོ་ཟད་པར་བྱེད་པ་ཡིན་གྱི༔ སྟོང་པས་ནི་སྟོང་པ་ཟད་པར་ནུས་ལ༔ མངོན་སུམ་གྱིས་མངོན་སུམ་ཟད་པར་ནུས་པས་ན༔ རང་བཞིན་རྫོགས་པ་ཆེན་པོའི་རྣལ་འབྱོར་པ་རང་གིས་རང་གྲོལ་བར་བསྟན་པ་ཡིན་ནོ༔ དེས་གསང་བ་མཆོག་གིས་མན་ངག་འདི་ཡི་ལུགས་ཀྱི༔ ཚིག་གི་རྣམ་པ་ཐམས་ཅད་ཏུ་སངས་རྒྱ་བར་མི་ནུས་པ་དང་༔ རྫོགས་ཆེན་སྤྱི་ལ་སོགས་ཏེ་ཐེག་པ་རིམ་པ་དགུ་ལ་སོགས་པའི་ཚིག་རྣམས་དང་༔ མུ་སྟེགས་རྟག་ཆད་པ་དང་༔ འཇིག་རྟེན་ཐ་མལ་པའི་ཚིག་ལ་འདི་གསུམ་ཁྱད་པར་རྡུལ་ཙམ་ཡང་མེད་པ་ནི་ཚིག་ཏུ་མཉམ་པ་དང་༔ དོན་ནི་ཡིད་དཔྱོད་ཡིན་པར་མཉམ་པའི་ཕྱིར་རོ༔ དེ་ལྟར་ཚིག་ལ་སངས་རྒྱས་མེད་པར་ཡིད་ཆེས་ནས་དོན་གྱི་རིག་པ་མངོན་སུམ་དུ་བསྟན་པར་བྱ་བ་ནི༔ དེ་ལྟར་ལུས་ངག་གི་ཞེན་པ་རང་ལོག་པའི་རྣལ་འབྱོར་པས་ཡུལ་ནམ་མཁའ་སྟོང་པ་འཁྲུལ་པ་མེད་པ་ནི་སྤྲིན་དང་བྲལ་བ་ལ་བྱ༔ རིག་པ་འཁྲུལ་པ་མེད་པ་ནི་རྡོ་རྗེ་ལུ་གུ་རྒྱུད་ཀྱི་སྐུ་ནམ་མཁའ་ལ་གཏད་པ་ཡིན་ཏེ་ཤིན་དུ་དབེན་པའི་གནས་སུ་མི་སྐད་ལ་སོགས་མི་ཐོས་པའི་སར་ཉམས་སུ་བླང་བར་བྱའོ༔ དབང་པོ་འཁྲུལ་པ་མེད་པ་ནི་མིག་མི་འགུལ་བ་གནད་ཡིན་ནོ༔ དེའི་ཕྱིར་མི་འགུལ་བ་རྣམ་པ་གསུམ་ལ་གནད་དུ་བསྟུན་པ་ནི་རབ་ཏུ་ཟབ་བོ༔ གཟེར་རྣམ་པ་གསུམ་གྱིས་མན་ངག་གིས༔ དེའི་རྒྱབ་བརྟེན་གྱི་གནད་ཡིན་ཏེ་དེ་ནི་དཔེ་ན་ཞིབ་པོ༔ བཀྲ་ཤིས་མཛེས་ལྡན་གྱི་རྒྱུད་ཀྱི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་གནད་ལ་འབེབས་པ་རྫོགས་སོ༔ ༔

ཨ་ཏི༔ རྒྱ་རྒྱ་རྒྱ༔ ༔ཀུན་ཏུ་བཟང་པོ་ཐུགས་ཀྱི་མེ་ལོང་གི་གནད་ཀྱི་མན་ངག་གསུམ་ལ༔ དངོས་པོ་མ་ཤེས་པས་གོལ་ས་དང་༔ བློས་བརྟགས་རིམ་པའི་གོལ་སའི་མན་ངག་གཉིས་ནི་ཤེས་པར་བྱ་བའི་ཆོས་ཡིན་གྱི་ཉམས་སུ་བླང་དུ་བཏུབ་པ་ནི་མ་ཡིན་ནོ༔ དེའི་ཕྱིར་ན་ཉམས་སུ་བླང་བའི་མན་ངག་མ་ཤེས་ན་འཁྲུལ་པ་ཡིན་ཏེ་དེ་ཡང་དངོས་པོ་རགས་པའི་སྣང་བ་འདི་མ་ཟད་པར་ནང་གི་ལུས་ཀྱི་འབྱུང་བ་འདི་མི་འཛད༔ ནང་གི་འབྱུང་བ་མ་ཟད་ན་ཉོན་མོངས་པ་ཟད་མི་སྲིད་ཉོན་མོངས་པ་མ་ཟད་ན་སངས་རྒྱ་མི་སྲིད་པས༔ དངོས་པོ་ཟད་པར་བྱེད་པ་ལ་ལུས་ངག་གི་གནད་གཅུན་དགོས་ཏེ༔ དེ་ཡང་དང་པོ་ལུས་ཀྱི་གནད་འདུག་སྟངས་གསུམ་ཡིན་ནོ༔ འདིར་རབ་ཏུ་ཟབ་པས་འདི་མ་བྱས་ན་ཉམས་སུ་བླངས་ཀྱང་ཡེ་ཤེས་སྐྱེ་མི་སྲིད་དོ༔ ཡེ་ཤེས་དེ་ལུས་ལ་གནས་ཤིང་ལུས་ལ་བརྟེན་པའི་ཕྱིར་རོ༔ ལྷག་མ་ནི་དཔེ་ན་ཞིབ་བོ༔ དེས་ན་རིག་པའི་ཡེ་ཤེས་དེ་ཚིག་གིས་གཏན་ལ་མི་ཕེབས་པའི་གནད་ནི་ངག་ཡིན་ཏེ་ཉམས་སུ་ལེན་པའི་རྣལ་འབྱོར་པས་རྟག་ཏུ་ངག་བཅད་པ་གནད་ཡིན༔ ངག་མ་བཅད་ན་བརྗོད་དུ་མེད་པའི་དོན་བློ་ལ་སྐྱེ་མི་སྲིད་དོ༔ དེའི་ཕྱིར་ཡིད་དཔྱོད་འཛིན་པའི་ལྟ་བ་རྣམས་ལ་བརྗོད་དུ་མེད་ཅེས་པ་ནི༔ ངག་འགགས་པས་རང་བརྗོད་འགགས༔ རང་བརྗོད་འགགས་པས་གཞན་བརྗོད་ཀྱི་རྣམ་རྟོག་སྐྱེ་མི་སྲིད༔ དེས་ན་ངག་བཅད་པ་ནི་རབ་ཏུ་ཟབ་བོ༔ དེའི་ཕྱིར་ན་ལུས་ངག་གཉིས་ཀྱི་གནད་ཀྱི་མན་ངག་དངོས་པོ་ཡིན་པས་དངོས་པོ་འདི་ཀུན་རང་ཟད་ལ་འགྲོ་བའི་གནད་ཡིན་ནོ༔ དེ་གཉིས་ཀྱི་གནད་གཅུན་པས་ཡིད་ཀྱི་གནད་ནི་རང་ཤུགས་ལ་འབེབས་པ་ཡིན་པས་འདི་བཅོས་ཤིང་དཔྱད་དུ་མེད་དོ༔ དེ་ལྟར་ལུས་ངག་གི་གནད་ལ་བརྟེན་ནས་དབྱིངས་ནམ་མཁའ་ལ་གཏད་པས་འོད་ལྔའི་སྣང་བ་མི་འཆར་མི་

སྲིད་དོ༔ དེ་ཤར་བའི་དུས་ན་ལུ་གུ་རྒྱུད་ལ་རང་དབང་མི་ཐོབ་མི་སྲིད་དོ༔ དེ་ཐོབ་པས་ཆོས་ཉིད་ཟད་པའི་ས་ལ་རང་སྤྱོད་པས་ན་རྒྱུད་ལུང་གི་ཚིག་ལ་བརྟེན་མི་དགོས་པས་གཞི་ཡི་ཚིག་དང་༔ འཁྲུལ་པ་དང་༔ དེ་ལྡོག་ཚུལ་རྣམས་གཏན་ལ་འབེབས་པ་ནི་བླུན་པོ་ཡིན་ཏེ༔ རང་གི་ངོ་བོ་མཐོང་བ་ལ་ཅི་ཡང་བྱ་མི་དགོས་པའི་གནད་ཡིན་ནོ༔ ཚིག་འདི་ཀུན་གྱིས་ནི་ངོ་བོ་མཐོང་མི་སྲིད་དོ༔ ངོ་བོ་མ་མཐོང་ན་ཚིག་ལ་དགོས་པ་ཡང་མེད་པའི་ཕྱིར་རོ༔ ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་ལ་འབེབས་པའི་གསང་བ་རྫོགས་སོ༔ ཨ་ཏི༔ རྒྱ་རྒྱ་རྒྱ༔ རྒྱུད་ཀྱི་རྒྱལ་པོ་སྒྲོན་མ་འབར་བའི་ཁོང་དོན་གྱི་མན་ངག་ལྔ་ལ༔ ལྷག་མ་ནི་ཤེས་པར་བྱ་བའི་ཆོས་ཡིན་གྱི་ཡེ་ཤེས་རྟགས་ཀྱི་སྒྲོན་མའི་མན་ངག་ནི་ཉམས་སུ་བླང་དུ་བཏུབ་པ་མ་ཡིན་ནོ༔ དེ་ཡང་འཁོར་འདས་རུ་ཤན་འབྱེད་པའི་སྤྱོད་པ་ལ་སོགས་སྔོན་དུ་མ་བྱས་ན་རྣལ་འབྱོར་པའི་ལུས་ངག་གི་ཞེན་པ་མི་བཟློག༔ དེའི་ཞེན་པ་མ་ལོག་ན་འཁོར་འདས་རུ་ཤན་མི་ཕྱེད༔ དེ་མ་ཕྱེད་ན་འཇིག་རྟེན་པ་དང་ཁྱད་མེད་པས་ཉམས་སུ་བླངས་ཀྱང་ངོ་བོ་ཉིད་མཐོང་མི་སྲིད་དོ༔ དེས་ན་འཁོར་འདས་རུ་ཤན་འབྱེད་པའི་གདམས་ངག་ཟབ་བོ༔ དེ་ནས་ལུས་ངག་གི་གནད་གཅུན་པ་གལ་ཆེའོ༔ དེ་ཡང་ལུས་གནད་སྙིང་༔ སྙིང་གནད་རྩ༔ རྩའི་གནད་མིག་ཡིན་པས་ནི་དཔེ་ལྟར་གྱིས་འགྲུབ༔ དེ་ཡང་ཉིན་མོ་ལྟ་སྟངས་བཞིས་བལྟས་པས་ཉམས་གོང་ནས་གོང་དུ་འཕེལ་བ་འབྱུང་༔ མཚན་མོ་ཤེས་བྱ་བུམ་པར་བཅུག་པ་ནི་དུས་བཞིའི་ཡི་གེར་བལྟ༔ ཐིག་ལེ་རྩའི་ནང་དུ་སྦ་བའི་གནད་ནི་དབུགས་ནང་དུ་རྔུབ༔ སྟེང་འོག་དབུགས་ཀྱི་སྐད་གདོན༔ དེ་ནི་སོ་དང་མཆུ་བསྟུན་ཏེ་ལྕེ་ཡང་འགྱུར་ལྡོག་མེད་པར་འབྱུང་བ་ཡིན༔ འདི་ནི་མཚན་མོའི་རིམ་པ་ཡིན་ཏེ་ཨིག་སྐད་ནི་བརྩེགས་མ་དང་རིང་པོ་གཉིས་རེས་འཇོག་ཏུ་བྱའོ༔ འདི་ལྟར་ཉམས་སུ་བླངས་པས་ནི་ཉིན་མཚན་མེད་པའི་

སྣང་བ་མྱུར་དུ་སྐྱེ་བའི་གནད་ཡིན་ནོ༔ དེ་ལྟར་གྱི་ཡེ་ཤེས་ཉམས་སུ་བླངས་པས་ནི་རྟགས་འབྱུང་བ་ཡིན་ཏེ༔ འདི་ཀུན་དགོས་པའི་རྒྱུ་མི་དགོས་པ་ཡང་ཡོད་པ་ཡིན་ཏེ༔ རང་བྱུང་དུ་འབྱུང་བ་ཡིན་ཏེ༔ དེ་ཡང་ལུས་ངག་གི་གནད་གཅུན་པའི་གནད་ཀྱིས་སྔོན་དུ་ལུས་ངག་ལ་རྟགས་རྣམས་འོང་༔ དེ་ནས་རིག་པའི་ཡེ་ཤེས་མངོན་སུམ་དུ་ཉམས་སུ་བླངས་པས་སྐུ་རྣམ་པ་གསུམ་གྱི་ལམ་རྟགས་འབྱུང་ངོ་༔ དེ་ལྟར་རིག་པ་ཚད་ལ་ཕེབས་ནས་རྟགས་ལས་འདས་པའི་སྣང་བྱེད་ཅེས་བྱའོ༔ དེ་ཡང་སྐྱེས་བུ་ཡང་རབ་ལ་ཟླ་བ་བདུན་ན་རྟགས་འབྱུང་༔ འབྲིང་ལོ་བདུན་ན་རྟགས་དེ་ཀུན་འབྱུང་༔ ཐ་མ་ལ་ལོ་བཅུ་བཞི་ལ་འབྱུང་བ་ལ་ཐེ་ཚོམ་མེད་དོ༔ སྐྱེས་བུ་ལ་ལ་ནི་ཉི་མ་བདུན་ན་ཡང་ཡོད་དོ༔ དེའི་ཕྱིར་ན་འདི་ཀུན་ལ་མ་ཡེངས་པ་རབ་ཏུ་གཅེས་སོ༔ ཉམས་སུ་མ་བླངས་ན་ཉམས་སུ་མྱོང་བ་རྒྱུད་ལ་སྐྱེ་མི་སྲིད་དོ༔ ཉམས་སུ་མྱོང་བ་རྒྱུད་ལ་མ་སྐྱེས་ན་ཡིད་དཔྱོད་ཀྱི་ལྟ་བ་ཡིན་ཏེ་ཡིད་དཔྱོད་གྱི་ལྟ་བས་སངས་མི་རྒྱ་བར་ལ་ཆོད་དོ༔ དེའི་ཕྱིར་ན་སྙིང་གི་གདམས་པ་གསང་བའི་ཡི་གེ་མ་རུ་གཅེས་སོ༔ དེ་ནི་སུ་ལ་ཡང་གྲགས་སུ་མི་རུང་ངོ་༔ སྒྲོན་མ་འབར་བའི་རྒྱུད་ཀྱི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ༔ རྒྱ་རྒྱ་རྒྱ༔ ༔

རྡོ་རྗེ་སེམས་དཔའི་སྙིང་གི་མེ་ལོང་གི་ཁོང་དོན་གྱི་མན་ངག་ནི་གསུམ་ལས༔ ལྷག་མ་ནི་ཤེས་པར་བྱ་བའི་ཆོས་ཡིན་གྱིས་ཉམས་སུ་བླང་བྱ་མ་ཡིན་པས༔ སྐུ་གསུམ་གྱི་ངོ་སྤྲོད་ནི༔ ལུས་ངག་ཡིད་གསུམ་གཅུན་པ་ལས་ལམ་དུ་སྐུ་གསུམ་གྱིསྣང་བ་རང་འཆར་བ་ཡིན་ཏེ༔ དེའི་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པ་བསྟན་པ་ནི་ཚིག་གི་སྤྱོད་པ་རྣམས་ལས་རང་ལོག་ནས་སྤྲུལ་པའི་སྐུ་མངོན་དུ་བསྒྲུབ་པའི་མན་ངག་ཡིན༔ དེ་ནས་རིག་པ་དེ་མངོན་སུམ་དུ་བླ་མས་བསྟན་ནས་ཉམས་གོང་ནས་གོང་དུ་འཕེལ་བ་ནི་ལོངས་སྤྱོད་རྫོགས་པའི་སྐུ་བསྒྲུབ་པ་ཡིན་ནོ༔ དེ་ནས་རིག་པ་ཚད་ལ་

ཕེབས་པའི་ངོ་བོ་ནི་ཆོས་སྐུ་ངོ་བོ་ཉིད་བསྒྲུབས་ཏེ་གྲུབ་པ་ཡིན་ནོ༔ དེ་ཀུན་ཡང་གོང་དུ་ལུས་ངག་གི་གནད་ལས་འབྱུང་བ་ཡིན་ཏེ༔ ལུས་ཀྱི་གནད་ཀྱིས་སྤྲུལ་སྐུ་ལམ་དུ་སྣང་༔ ངག་གི་གནད་ཀྱིས་ལོངས་སྐུ་ལམ་དུ་སྣང་༔ ཡིད་ཀྱི་གནད་ཀྱིས་ཆོས་སྐུ་ལམ་དུ་སྣང་བས་ན༔ སྐུ་གསུམ་ནི་ལམ་དུ་ཤར་བ་ཡིན་གྱི་འབྲས་བུ་ནི་མ་ཡིན་ནོ༔ སྐུ་ཞེས་བྱ་བ་ཞིག་བྱུང་ཕན་ཆད་སྣང་བ་ཞིག་ཡོད་དགོས༔ སྣང་བ་ཡོད་པས་སྐུ་ཡོད་དགོས་པས༔ མདོར་ན་སྐུ་ནི་ལུས་ཡིན་པས་སོ༔ དེའི་ཕྱིར་ན༔ ལུས་མེད་ལུས་ཏེ་ལུས་ཀྱི་མཆོག༔ ལུས་ཀྱི་མཐའ་ནི་རྟོགས་པ་པོ༔ ཟེར་བས་ན༔ ཆོས་ཉིད་ཟད་པ་ནི་ལུས་ཀྱི་སྒྲོ་འདོགས་དང་བྲལ་བ་སྟེ༔ འདི་ཉིད་ལས་ཡེ་ཤེས་དང་འོད་དང་སྐུའི་སྣང་བ་མི་སྣང་བས་སོ༔ འདི་ཉིད་ལ་ཡེ་ཤེས་བཞིའི་གྲངས་མཐའ་ཡང་རང་ལོག་པའོ༔ དེའི་ཕྱིར་ན་ལུས་ཀྱི་གནད་དང་༔ དེ་སྣང་བ་ཡུལ་གྱི་གནད་དང་༔ དེ་འཆར་བ་རང་གི་ངོ་བོ་རིག་པའི་གནད་དང་༔ དེ་ལ་ལྟ་བས་ན་སྒྲོན་མའི་གནད་དང་བཞིར་ཉམས་སུ་བླང་བའི་རིམ་པས་ངོ་བོ་དེ་གཏན་ལ་འབེབས་པ་སྟེ་རང་གི་འདུག་ཚུལ་མ་མཐོང་བའི་སྐལ་ལྡན་ཞེས་བྱའོ༔ རྡོ་རྗེ་སེམས་དཔའ་སྙིང་གི་མེ་ལོང་གི་རྒྱབ་ཡིག་གསང་བ་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ༔ ལས་ཅན་དེ་དང་ཕྲད་པར་ཤོག༔ རྒྱ་རྒྱ་རྒྱ༔ ༔དཔལ་ལྡན་སྔགས་ཀྱི་སྲུང་མ་རག་གདོང་མས༔ བཀའ་འདི་སྲུངས་ཤིག་སཱ་མཱ་ཡཱ༔ བྱེ་མ་ལས་སྒྲ་རང་འགྱུར་དུ་བསྒྱུར་བའོ༔ རིག་པ་རང་ཤར་གྱི་ཁོང་དོན་གྱི་མན་ངག་ལ་ལྔས་བསྟན་པའི་ཚིག་འདི་ཀུན་ཡང་ཤེས་པར་བྱ་བའི་ཆོས་ཡིན་གྱི་ངོ་བོ་སྙིང་ཏིག་མ་ཡིན་ནོ༔ འདི་ནི་ཉམས་སུ་ལེན་ན་གནད་གསུམ་གྱིས་ཉམས་སུ་བླང་ཏུ་བཏུབ་པས་འདི་ཉིད་ལ་ཡང་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པ་མ་བྱས་ན་ལུས་ངག་ཡིད་ཀྱི་ཞེན་པ་མི་ལྡོག་ཅིང་༔ དེ་ཉིད་ཀྱི་བར་ཆད་མི་སོལ་བས་འདིར་རབ་ཏུ་གཅེས་སོ༔ དེ་ནས་ཡུལ་གྱི་གནད་མ་གཅུན་ན་ཕྱི་ཡི་འབྱུང་

བ་ལྔ་མི་ཟད་པས་ཡུལ་གྱི་གནད་གལ་ཆེ༔ དེ་ནས་ལུས་ཀྱི་གནད་མ་གཅུན་ན་ནང་གི་འབྱུང་བ་རང་ཟད་ལ་མི་འགྲོ་བས་འདི་གལ་ཆེའོ༔ འདི་ཉིད་མ་ཟད་སྣང་བ་འདི་ཉིད་ལ་ཟག་མེད་དུ་སངས་རྒྱས་མི་རྒྱའོ༔ རིག་པའི་གནད་མ་གཅུན་པ་ལྟ་སྒོམ་སྤྱོད་པའི་གཞི་སྟོངས་པས་འདི་རབ་ཏུ་གཅེས་སོ༔ དེ་དག་གི་གཞི་སྟོངས་ན་སྣང་བ་ཚད་ལ་མི་ཕེབས་སོ༔ སྣང་བ་ཚད་ལ་མ་ཕེབས་ན་ཡིད་དཔྱོད་འཛིན་པའི་ལྟ་བ་རྣམས་དང་ཁྱད་ཅི་ཡང་མེད་དོ༔ དེས་ན་འདི་དག་རབ་ཏུ་ག །ལ་ཆེ་བས་ཉམས་སུ་ལེན་པ་གལ་ཆེ༔ དེ་ཡང་རྣལ་འབྱོར་པ་རབ་ཀྱི་གནས་ནི་རི་ཁྲོད་དུ་རི་དྭགས་ལྟ་བུ་ཡིན༔ འབྲིང་ནི་ཕྱོགས་མེད་དུ་ཐ་མལ་པར་བརྫུས་ནས་ལྡོམ་སྟེ་སྤྲང་པོ་ལྟ་བུ་ཡིན༔ རྣལ་འབྱོར་པ་ཐ་མ་ནི་དགོན་པར་གནས་ཏེ་འཕྱི་བ་ལྟ་བུ་ཡིན་ནོ༔ འདི་གསུམ་དང་མི་ལྡན་པར་སངས་མི་རྒྱའོ༔ རིག་པར་རང་ཤར་གྱི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ཨི་ཏི༔ རྒྱ་རྒྱ་རྒྱ༔ ༔ནོར་བུ་ཕྲ་བཀོད་ཀྱི་རྒྱུད་ཀྱི་ཁོང་དོན་གྱི་མན་ངག་བསྟན་པ་ནི་བཞི་སྟེ༔ སྤྱོད་པའི་མན་ངག་གིས་ཉམས་ལེན་པ་སྤྱི་ལ་བྱིང་རྒོད་ལ་སོགས་པས་ཕན་པའི་གནད་ཡིན་ནོ༔ དེ་ཡང་སྣང་བ་དབང་བསྒྱུར་སྤྱོད་པའི་མན་ངག་ནི་ཉམས་སུ་ལེན་པའི་གནད་ཡིན་ཏེ༔ འདི་ཡི་དུས་སུ་སྒྲ་ཐལ་འགྱུར་གྱི་མན་ངག་བཞིན་དུ་འབྱུང་བ་ལྔའི་སྒྲ་ལ་མངོན་སུམ་དུ་གོམས་པ་རབ་ཏུ་གཅེས་སོ༔ དེ་ནི་ཕྱི་རོལ་གྱི་སྣང་བ་ཟད་པར་བྱ་བའི་དོན་དུ་རབ་ཏུ་ཟབ་བོ༔ དེ་ནས་འདུག་ཚུལ་ལ་གནས་པའི་སྤྱོད་པས་རིག་པ་མངོན་སུམ་གྱི་མན་ངག་ཉམས་སུ་བླངས་པས་སངས་རྒྱ་བ་ལ་ཐེ་ཚོམ་མེད་དོ༔ དེའི་མན་ངག་དཔེ་ན་ཞིབ་པས་དེས་འགྲུབ་པ་ཡིན་ནོ༔ དེའི་ཕྱིར་ན་ཚིག་མ་ཡིན་པར་དོན་གྱིས་ཡེ་ཤེས་དགེ་སྡིག་ལས་འདས་པའི་གནད་བསྟན་པའོ༔ ཁྱད་པར་རང་གི་ལྟ་བ་ནི་ཉམས་སུ་བླང་བའི་གནད་ཡིན༔ དེ་ཡང་མངོན་སུམ་དུ་འཁོར་འདས་རུ་ཤན་འབྱེད་པའི་སྤྱོད་པ་གལ་ཆེ༔

དེ་ནས་གནད་གསུམ་གྱི་མན་ངག་གིས༔ རྟགས་དང་༔ ཚད་དང་༔ ཟད་པ་གསུམ་གཏན་ལ་ཕབ་ནས་རང་གི་རིག་པ་མངོན་སུམ་དུ་མཐོང་བས་གཞན་ལ་ཡིད་མི་འཇུག་པའི་གནད་དོ༔ དེའི་ཕྱིར་ན་ཉམས་སུ་ལེན་པའི་གནད་རྣམ་པ་གསུམ་དུ་བསྡུས་ནས་བསྟན་པ་ཡིན་ནོ༔ འབྲས་བུ་ནི་ཁྱད་པར་གྱི་འབྲས་བུ་སྐུ་གསུམ་རང་ཟད་ལ་སོང་བས་རང་གི་འབྲས་བུ་སྣང་བ་འདི་ཉིད་ལ་གཏན་ལ་ཕབས་པ་ཡིན་ནོ༔ ལྷག་མ་ནི་ཤེས་བྱའི་ཆོས་ཡིན་གྱི་ཉམས་སུ་བླངས་དུ་བཏུབ་པ་དུམ་རེ་ཙམ་ཡོད་ཀྱང་ཁྱད་པར་བ་མ་ཡིན་ནོ༔ དེའི་ཕྱིར་ན་ཉམས་སུ་བླངས་པ་ལ་ཅི་ཡང་དགོས་པ་མ་ཡིན་ཏེ༔ བླ་མའི་མན་ངག་རབ་ཏུ་གཅེས་སོ༔ འདི་ནི་ཉམས་སུ་བླང་བྱའི་རིམ་པས་བསྟན་པ་ཡིན་གྱི་ཚིག་གིས་ནི་འཚང་རྒྱ་བ་ལ་རྡུལ་བརྒྱར་གཤགས་པའི་ཆ་ཙམ་ཡང་ཕན་པ་མེད་དོ༔ དེ་ཡང་ཚིག་གི་ལྟ་བ་ཐམས་ཅད་ཡིད་དཔྱོད་ཡིན་གྱི་དངོས་པོའི་གཤིས་ལ་རྡུལ་ཙམ་ཡང་རེག་པ་མེད་དོ༔ དེའི་ཕྱིར་ན་རིག་པ་མངོན་སུམ་གྱི་གདམས་ངག་འདི་རབ་ཏུ་གསང་ངོ་༔ རྒྱུད་ཀྱི་རྒྱལ་པོ་ནོར་བུ་འཕྲ་བཀོད་ཀྱི་རྒྱབ་ཡིག་གསང་བ་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ༔ བི་མ་ལས་སྒྲ་རང་འགྱུར་དུ་བསྒྱུར་བའོ༔ ཨི་ཏི༔ རྒྱ༔ ངོ་སྤྲོད་སྤྲས་པའི་རྒྱུད་ཀྱི་ཁོང་དོན་གྱི་མན་ངག་ལ་བཞི་ལས༔ གནད་རྣམ་པ་གསུམ་གྱི་ངོ་སྤྲོད་ཀྱི་རིག་པའི་ངོ་བོ་དེ་ཉམས་སུ་ལེན་པར་འདོད་པས་སྔོན་དུ་འཁོར་འདས་རུ་ཤན་འབྱེད་པའི་ལུས་ངག་གི་སྤྱོད་པ་ནི་རབ་ཏུ་གཅེས་སོ༔ དེ་ཡང་སྒྲོན་མ་མིག་ནས་འཆར་བས་ཡེ་ཤེས་ཀྱི་གནད་གལ་ཆེ༔ འོད་ནི་མཁའ་ལ་སྣང་བས་ཡུལ་གནད་ནམ་མཁའ་རབ་ཏུ་ཟབ་སྟེ་སྤྲིན་མེད་པ་གཅེས་སོ༔ རང་གི་མིག་གིས་རིག་པ་ལུ་གུ་རྒྱུད་མཐོང་བས་མིག་མི་བདེ་ན་བཅོས་པའི་ཐབས་རབ་ཏུ་ཟབ་སྟེ༔ འདི་ནི་འབྱུང་བ་ཆ་སྙོམས་པར་བྱེད་པའི་མན་ངག་གོ༔ དེ་ཡང་མིག་མི་བདེ་བའམ་ཚ་བའམ་མཆི་མ་འཛག་པ་སྙམ་བྱེད་ན་མགོ་གོས་

ཀྱིས་གཏུམས་ཏེ་མིག་རབ་ཏུ་བཙུམ་ལ་དར་ཅིག་བསྡད༔ དེ་ནས་ཁད་ཀྱིས་ལངས་ཏེ་དལ་གྱིས་མིག་ཕྱེ་ལ་གཡས་སུ་ཡུལ་གྱིས་བལྟ༔ དེ་ནས་མིག་དལ་གྱིས་གཡོན་དུ་ཡུལ་གྱིས་བལྟ༔ དེ་ནས་སྟེང་དུ་བལྟ༔ དེ་ནས་འོག་ཏུ་ཡུལ་གྱིས་བལྟ་སྟེ་དེ་ནས་ས་རྡོ་འམ་ཤིང་བུའམ་མཚན་མ་ཅན་ཞིག་ལ་ཡུན་བག་ཅིག་ཏུ་མིག་ཧ་རེ་བལྟས་པས་ལུས་ཀྱི་འབྱུང་བ་འཁྲུགས་པར་མི་འགྱུར་ཏེ༔ དེ་ནས་ཡང་དལ་གྱིས་སེང་གེའི་ལྟ་སྟངས་ཀྱིས་བལྟའོ༔ དེས་ནི་འབྱུང་བ་མི་འཁྲུགས་པར་བྱེད་པའི་མན་ངག་ཟབ་བོ༔ དེ་ལྟར་གནད་གསུམ་གཏིམས་པས་སྐུ་གསུམ་གྱི་སྣང་བ་ལམ་དུ་འཆར་བ་ལ་ཐེ་ཚོམ་མེད་དོ༔ ལྷག་མ་ནི་ཤེས་བྱའི་ཆོས་ཡིན་ནོ༔ ངོ་སྤྲོད་སྤྲས་པའི་རྒྱུད་ཀྱི་རྒྱབ་ཡིག་གསང་བ་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ཨི་ཏི༔ རྒྱ༔ ༔ཀུན་ཏུ་བཟང་པོ་ཀློང་དྲུག་ཁོང་དོན་གྱི་མན་ངག་གཉིས་སུ་བསྟན་པ་ཡིན་ཏེ༔ དེའི་མན་ངག་རྣམས་ལ་རང་སྣང་ལྷུག་པར་མཐོང་བའི་མན་ངག་ལས་ལུས་ཀྱི་གནད་གསུམ་གྱི་མན་ངག་འདི་རིག་པ་མངོན་དུ་བྱ་བའི་ཆོས་ཡིན་ཏེ༔ འདི་ལ་ཡང་སྔོན་འགྲོ་དང་དངོས་གཞི་གཉིས་ཡིན༔ སྔོན་འགྲོ་ནི་ལུས་ངག་སེམས་ཀྱི་བྱ་བ་བཏང་བ་ཡིན་ནོ༔ དངོས་གཞི་ནི་འདུག་སྟངས་གསུམ་ཡིན་ནོ༔ དེ་དག་གི་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པའི་མན་ངག་གལ་ཆེའོ༔ དེ་ནས་གནད་གསུམ་གཅིག་ཏུ་དྲིལ་པའི་མན་ངག་གིས་རིག་པ་མངོན་སུམ་དུ་བལྟས་པས་ཏེ༔ མན་ངག་གི་རྒྱལ་པོ་ཉམས་སུ་ལེན་པའི་གནད་ཟངས་ཡིག་ཅན་དང་འབྲེལ་ལོ༔ དེ་ལྟར་རིག་པ་ཉིད་བསྟན་པ་དང་༔ དེ་ཉིད་ཉམས་སུ་བླངས་པས་སྣང་བ་སྐྱེས་པ་དང་༔ རིག་པ་ཚད་ལ་ཕེབས་པ་དང་༔ ཆོས་ཉིད་ཟད་པ་དང་བཞི་རིམ་གྱིས་སྐྱེས་པས་སངས་རྒྱས་པར་བྱེད་པའི་ས་དང་འདི་ཉིད་ལ་ཕྲད་པར་བྱེད་པའི་མན་ངག་རབ་ཏུ་ཟབ་པར་བསྟན་པས་ཐེག་པ་གཞན་ལས་འདི་ཉིད་ཁྱད་པར་

འཕགས་པར་བསྟན་པ་ཡིན་ནོ༔ ལྷག་མ་ནི་ཤེས་པར་བྱ་བའི་ཆོས་ཡིན་ནོ༔ ཀུན་ཏུ་བཟང་པོ་ཀློང་དྲུག་པའི་རྒྱབ་ཡིག་གསང་བ་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ བི་མ་ལས་སྒྲ་རང་འགྱུར་དུ་བསྒྱུར་བའོ༔ སཱ་མཱ་ཡཱ༔ རྒྱ་རྒྱ་རྒྱ༔ ༔གསང་བ་ཡི་གེ་མེད་པའི་ཁོང་དོན་གྱི་མན་ངག་གསུམ་ལས༔ ཞལ་ཆེམས་ཀྱི་མན་ངག་གིས་ཉམས་སུ་ལེན་པ་ཡིན་ཏེ་འདི་ལ་སྔོན་དུ་འཁོར་འདས་རུ་ཤན་འབྱེད་པའི་ལུས་ངག་གི་སྤྱོད་པ་ནི་རབ་ཏུ་གལ་ཆེ༔ དེ་ཡང་རིག་པའི་སྔོན་དུ་བྱ་བའི་ཆོས་དང་༔ དངོས་གཞིའི་ཆོས་དང་༔ ཆོས་ཉིད་ཟད་པ་དང་གསུམ་ཡིན་ནོ༔ སྔོན་དུ་བྱ་བ་ལ་སྔོན་འགྲོ་དང་དངོས་གཞི་གཉིས་ཡིན་པ་ལས་འཁོར་བ་ལས་བློ་ལོག་པའི་སྐལ་ལྡན་འཁོར་བ་ལས་ཐར་བར་འདོད་པ་དེ་བླ་མ་ལ་གདམས་པ་ཞུ་བ་ལ༔ སྔོན་དུ་སློབ་མས་བྱ་བ་གསུམ་བཏང་དགོས་པས་ཐིང་ངམ་ཞེས་དྲིས་ཐིངས་ཟེར་ན་བྱ་བ་གསུམ་བཏང་བ་ནི་སྔོན་འགྲོ་ལགས་སོ༔ དེ་ནས་ནང་གི་བྱ་བ་གསུམ་གཏོང་བ་ནི་ལུས་ངག་ཡིད་གསུམ་སོར་གཞུག་པར་བྱེད་པའི་ཐབས་ཏེ་རབ་ཏུ་ཟབ༔ དེ་ནས་མི་འགུལ་བ་གསུམ་གསང་བའི་གནད་ཡིན་པས་འདི་དག་ལ་སོགས་པ་ནི་དཔེ་ན་ཇི་ལྟར་འདུག་པས་འགྲུབ་པ་ཡིན་ནོ༔ ལྷག་མ་ནི་ཤེས་པར་བྱ་བ་ཡིན་ནོ༔ གནད་འགའ་འདུག་པའི་ནི་མཁས་པས་དཔྱད་པར་བྱའོ༔ དེའི་ཕྱིར་ན་སྐུ་གསུམ་དང་ཡེ་ཤེས་ལྔ་ཞེས་ཚིག་ཏུ་འབྲས་བུ་ཡིན་ཟེར་བ་ནི༔ འབྲས་བུ་ནི་མ་ཡིན་ཏེ་ཉམས་ལེན་པ་གཅིག་གི་ལམ་དུ་སྣང་བ་འདི་དག་འཆར་བ་ཡིན་གྱི་འབྲས་བུ་ནི་མིན་ནོ༔ དེའི་ཕྱིར་ན་ཡིད་དཔྱོད་འཛིན་པའི་ལྟ་བས་སངས་རྒྱ་མི་སྲིད་དོ༔ དེས་ན་གསང་བའི་ཡི་གེའི་འདི་དག་རབ་ཏུ་གཅེས་པར་གཟུང་བར་བྱའོ༔ གསང་བའི་ཡི་གེ་མེད་པའི་རྒྱུད་ཀྱི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ རྒྱ་རྒྱ་རྒྱ༔ སྔགས་ཀྱི་སྲུང་མས་སྲུངས་ཤིག༔

རྒྱུད་ཀྱི་རྒྱལ་པོ་སེང་གེ་རྩལ་རྫོགས་ཀྱི་ཁོང་དོན་གནད་ཀྱི་མན་ངག་གསུམ་ལས༔ ལྟ་བ་ཕུགས་ཀྱི་མན་ངག་ལ་གཉིས་ལས༔ འདི་གཉིས་ཀྱིས་ཉམས་སུ་བླང་བ་དངོས་གཞིའི་མན་ངག་བསྟན་པ་སྟེ༔ འདི་དག་གི་སྔོན་དུ་འཁོར་འདས་རུ་ཤན་འབྱེད་པ་ལ་སོགས་པ་ལུས་ངག་གི་གནད་རྣམས་གཏན་ལ་ཕབ་ནས་དངོས་གཞི་འདི་ལྟར་བྱེད་པ་ཡིན་ནོ༔ ཉམས་སུ་ལོངས་པའི་ཚད་ཀྱི་མན་ངག་ནི་ཉམས་གོང་ནས་གོང་དུ་འཕེལ་བ་ཡིན་གྱི༔ འདི་ལ་ནན་ཏན་བྱ་མི་དགོས་ཏེ་འདི་ལྟར་ཉམས་སུ་བླངས་བས་མི་སྐྱེ་མི་སྲིད་དོ༔ ལྷག་མ་ནི་ཤེས་བྱ་ཡིན་ནོ༔ སེང་གེ་རྩལ་རྫོགས་ཀྱི་རྒྱུད་ཀྱི་རྒྱབ་ཡིག༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ཨི་ཏི༔ རྒྱ༔ ༔མུ་ཏིག་ཕྲེང་བའི་རྒྱུད་ཀྱི་གནད་ཡིག་ཁོང་དོན་གྱི་མན་ངག་རྣམ་པ་གསུམ་ལས༔ གནད་རྣམ་པ་གསུམ་གྱིས་ཐོབ་པར་བྱེད་པའི་མན་ངག་གིས་ཉམས་སུ་བླང་སྟེ༔ དེ་ཡང་འབད་མེད་གྲོལ་བའི་མན་ངག་ནི་གང་ཟག་ལེ་ལོ་ཅན་འཇུག་པར་བྱེད་པ་ཡིན་གྱིས་སངས་རྒྱས་པ་ནི་མ་ཡིན་ནོ༔ དེ་ཅིའི་ཕྱིར་ཞེ་ན་ཡིད་དཔྱོད་འཛིན་པའི་རྫོགས་ཆེན་རྣམས་དང་ཁྱད་པར་ཅི་ཡང་མེད་པའི་ཕྱིར་རོ༔ རྩོལ་བ་གནད་གཟིར་བ་ནི་འབད་བཅས་ཟེར་ཡང་ཐོག་མ་གནད་གཟིར་བའི་དུས་སུ་རྩོལ་བར་མངོན་ཙམ་ལས༔ འདི་ནི་དལ་བས་བསྒྲུབ་པའི་གནད་ཡིག་ཡིན་པས་འདི་ཉམས་སུ་མ་བླངས་ན་འཚང་རྒྱ་མ་ིསྲིད་པས༔ འདི་དག་གི་འཁོར་འདས་རུ་ཤན་འབྱེད་པ་ལ་སོགས་པ་ལུས་ངག་གི་གནད་རྣམས་སྔོན་དུ་བྱས་ཏེ་སྣང་བ་ཁྲེགས་ཆོད་ཀྱི་མན་ངག་གིས་སྣང་བ་འདི་གཏན་ལ་ཕབ་སྟེ་འཁྲུལ་བ་རྣམས་རང་དག་ལ་གཏོང་བའི་གནད་ཡིན་ནོ༔ རིག་པ་ཐོད་རྒལ་ཀྱི་མན་ངག་གི་རིག་པའི་སྣང་བ་གཏན་ལ་འབེབས་པ་སྟེ་འདུག་སྟངས་བཞི་ལ་སོགས་པ་དཔེ་ན་ཞིབ་པས་དེས་འགྲུབ་པ་ཡིན་ནོ༔ ལྷག་མ་ནི་ཤེས་བྱའི་ཆོས་ཡིན་པས་དེའི་ཕྱིར་ན་ཚིག་གིས་སངས་མི་རྒྱ་བའི་གནད་དོ༔ རྒྱུད་ཀྱི་རྒྱལ་པོ་མུ་ཏིག་

ཕྲེང་བའི་གནད་ཡིག་གསང་བ༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ས་མ་ཡཱ༔ རྒྱ་རྒྱ་རྒྱ༔ རིག་པ་རང་གྲོལ་གྱི་རྒྱུད་ཀྱི་མན་ངག་གི་ཁོང་དོན་གྱི་གནད་ཡིག་མན་ངག་གསུམ་ལས༔ གཅིག་པུ་གྲོགས་དང་བྲལ་བའི་མན་ངག་གིས་རིག་པའི་སྔོན་དུ་འགྲོ་བའི་མན་ངག་བསྟན་ཏེ༔ དེ་ཡང་སུ་དང་ཡང་མི་འགྲོགས་པ་ནི་གནད་ཡིན་ནོ༔ འདི་ཡི་སྔོན་དུ་འཁོར་འདས་རུ་ཤན་འབྱེད་པའི་སྦྱོར་བ་ནི་རབ་ཏུ་གལ་ཆེའོ༔ དེ་ནས་ལུ་གུ་རྒྱུད་མཁའ་ལ་འབྱིན་པའི་མན་ངག་ནི༔ རིག་པ་དངོས་གཞིའི་མན་ངག་ཡིན་ཏེ་འདི་ནི་ཤེས་རབ་ཀྱི་སྤྱོད་ཡུལ་མ་ཡིན་པར་དབང་པོའི་སྤྱོད་ཡུལ་དུ་གཏན་ལ་དབབ་ཏུ་ཡོད་པས་ན་ངེས་པ་ཁོ་ནར་ཉམས་སུ་བླངས་བ་གལ་ཆེའོ༔ སྣང་བ་ཅེར་བཞག་དབྱིངས་སུ་གྲོལ་བའི་མན་ངག་གིས་ནི་ཉམས་གོང་ནས་གོང་དུ་འཕེལ་བའི་སྣང་བ་གཏན་ལ་འབེབས་པ་ཡིན་ཏེ་ཚད་ཡིག་ཅེས་བྱའོ༔ དེ་ལྟར་ཉམས་སུ་བླངས་པ་ལས་ཆོས་ཉིད་ཟད་པར་གྲོལ་བ་ནི་རང་ཤུགས་ཀྱིས་འབྱུང་བ་ཡིན་ནོ༔ འདི་ནི་ཉམས་སུ་བླང་བ་ལ་ཐུག་པས་ན་ཉམས་སུ་བླངས་ན་དགེ་སྡིག་གང་གིས་ཀྱང་ཕན་གནོད་དང་བྲལ་བས་རང་བཞིན་རྫོགས་པ་ཆེན་པོ་ཉིད་ཡིན་པར་བསྟན་པའོ༔ མན་ངག་འདི་གསུམ་གྱི་རང་གི་ངོ་བོ་ཉམས་སུ་བླངས་པས་གང་ཟག་གཅིག་སངས་རྒྱ་བར་བྱེད་པའོ༔ རིག་པར་རང་གྲོལ་གྱི་རྒྱུད་ཀྱི་རྒྱབ་ཡིག་གསང་བ༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ རྒྱ༔ རིན་པོ་ཆེ་སྤུངས་པའི་རྒྱུད་ཀྱི་ཁོང་དོན་གྱི་མན་ངག་གི་གནད་ཡིག་ནི༔ མན་ངག་གཉིས་ལས༔ རྒྱ་ཆེ་ཟད་པ་མེད་པའི་དབྱིངས་རིག་གི་མན་ངག་གིས་ཉམས་སུ་བླང་བ་དངོས་གཞི་སྟེ༔ འདི་ལ་ཡང་དང་པོ་རུ་ཤན་འབྱེད་པ་རབ་ཏུ་གལ་ཆེའོ༔ དེ་ནས་དབྱིངས་ཀྱི་གནད་དང་རིག་པའི་གནད་ཀྱི་མན་ངག་ནི་དཔེ་ན་གསལ་བས་དེས་འགྲུབ་ངེས་སོ༔ ལྷག་མ་ནི་ཤེས་པར་བྱ་བའི་ཆོས་ཡིན་གྱི་ཉམས་སུ་བླང་བྱ་ནི་མ་ཡིན་ནོ༔ དེའི་ཕྱིར་ན་གནད་

ཀྱི་རྒྱབ་ཡིག་འདི་རབ་ཏུ་གཅེས་སོ༔ རིན་པོ་ཆེ་སྤུངས་པའི་རྒྱུད་ཀྱི་རྒྱབ་ཡིག༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ༔ ཨི་ཏི༔ རྒྱ༔ ༔སྐུ་གདུང་འབར་བའི་རྒྱུད་ཀྱི་གནད་ཡིག་ཁོང་དོན་གྱི་མན་ངག་ནི་གསུམ་ལས༔ གནད་གསུམ་མན་ངག་གི་ཚད་ཀྱིས་ཉམསསུ་བླངས་པས་ཉམས་སུ་མྱོང་བ་སྐྱེ་སྟེ༔ འདིའི་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པས་ལུས་ངག་སྤྱོད་པར་རབ་ཏུ་གཅེས༔ ལུས་ངག་གི་གནད་ཀྱིས་སྐུ་གསུམ་ལམ་དུ་བླང་བར་བྱ་སྟེ་འདི་ལ་ངོ་སྤྲད་པའི་ཐབས་རབ་ཏུ་གསང་བའོ༔ དེ་ཡང་སྐུ་གསུམ་གྱི་སྣང་བ་ལ་བསླབས་ནས་ཕྱིར་མི་ལྡོག་པ་ཡིན་ནོ༔ དེ་ནས་རིག་པ་སྔོན་དུ་ཡུལ་ལ་གཏད་པ་ནི་བླ་མའི་མན་ངག་སྟེ༔ དེ་ལྟར་གཏད་པས་ཉམས་གོང་ནས་གོང་དུ་འཕེལ་བ་ལ་ཐེ་ཚོམ་མེད་དོ༔ དེའི་གསང་བའི་མན་ངག་འདི་རབ་ཏུ་ཟབ་པས་གཞན་ལ་ཚིག་ཙམ་ཡང་བརྗོད་པར་མི་བྱའོ༔ དེ་ལྟར་ཉམས་སུ་བླངས་པས་ལུས་ངག་ཡིད་ཀྱི་རྟགས་ནི་ངེས་པ་ཁོ་ནར་འོང་སྟེ༔ འདི་ནི་གང་ཟག་ཡིད་ཆེས་པར་བྱ་བའི་དོན་ཡིན་གྱི་ཉམས་སུ་ལེན་པའི་དངོས་གཞི་ལ་དགོས་པ་ཅི་ཡང་མེད་དོ༔ དེ་ཡང་འདི་ལྟར་ཉམས་སུ་བླངས་ན་རྟགས་འདི་ཀུན་ནི་མི་འོང་མི་སྲིད་དོ༔ འདི་ནི་རྟགས་ཡིག་ཅེས་བྱ་སྟེ་དཔེ་ལྟར་འོང་ངེསཔ་ཡིན་ནོ༔ འདི་ལྟར་འབྱུང་བ་ནི་གོམས་ཚད་ལས་བྱུང་བ་དང་བཙན་ཐབས་སུ་འབྱུང་བ་གཉིས་ཡིན་ནོ༔ འོན་ཀྱང་རྟགས་ཡིག་ལ་སོགས་པ་ལྷག་མ་འདི་ཀུན་ཤེས་བྱ་ཡིན་ནོ༔ སྐུ་གདུང་འབར་བའི་རྒྱུད་ཀྱི་རྒྱབ་ཡིག་གསང་བ༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ཨ་ཏི༔ རྒྱ་རྒྱ་རྒྱ༔ ༔ཉི་ཟླ་ཁ་སྦྱོར་གྱི་རྒྱུད་ཀྱི་གནད་ཡིག་ཁོང་དོན་གྱི་མན་ངག་བཞི་ལས༔ རང་བཞིན་གནས་པའི་བར་དོར་ཉམས་སུ་བླང་བ་ནི་གནད་ཡིན་ཏེ་འདིར་ཉམས་སུ་མ་བླངས་ན་བར་དོ་ལ་རེ་བ་རྣམས་ནི་རྣམ་དཔྱོད་

དུས་ལ་ལྟོས་པ་རྣམས་སུ་དུས་དེར་འབྱུང་བར་མི་འགྱུར་རོ༔ ཆོས་ཉིད་ཀྱི་བར་དོ་ལ་སངས་རྒྱ་བར་བྱེད་པ་ལ་འདི་ཉིད་དུ་ཉམས་སུ་བླང་བ་གཅེས་སོ༔ དེ་ཡང་འཁོར་འདས་རུ་ཤན་འབྱེད་པ་ལ་སོགས་ཟངས་ཡིག་ཅན་ལྟར་བྱས་ནས་ཉམས་སུ་བླངས་པའི་ཚེ་སྐྱེས་བུ་དེ་གལ་ཏེ་བར་ཆོད་དུ་མ་སོང་ན་འདི་དག་ཏུ་སངས་རྒྱ་བ་ཡིན་གྱི༔ བསྟན་པ་ཙམ་གྱིས་མ་ཡིན་ནོ༔ དེ་ཡང་རིག་པའི་མན་ངག་བླ་མས་བསྟན་ནས་ཉམས་དུམ་རེ་ཙམ་བླངས་ནས་བར་ཆད་ན་ནི་རང་བཞིན་སྤྲུལ་སྐུའི་ཞིང་ཁམས་སུ་དབུགས་ཕྱུང་ནས་སངས་རྒྱ་བ་ལ་ཐེ་ཚོམ་མེད་དོ༔ ཉམས་གོང་ནས་གོང་དུ་འཕེལ་བའི་སྣང་བ་ཐིག་ལེའི་སྣང་བ་ཚུན་ཆད་ལ་བར་ཆད་ན་ཆོས་ཉིད་ཀྱི་བར་དོ་ལ་སངས་རྒྱ་བ་ལ་ཐེ་ཚོམ་མེད་དོ༔ དེའི་ཕྱིར་ན་འདི་ནི་སྐྱེ་བ་མ་བརྒྱུད་པར་སངས་རྒྱས་བའི་གནད་ཡིན་ནོ༔ དེ་ཕན་ཆད་ལ་ནི་སྐུ་གསུམ་གྱི་སྣང་བ་ལམ་དུ་སྣང་བ་ཞེས་བྱ་སྟེ་ཕྱིར་ལྡོག་པ་ནི་མ་ཡིན་ནོ༔ འདི་ཉིད་ལས་འབྱུང་བ་རང་ཟད་ལས་སངས་རྒྱ་བ་མ་ཡིན་ནོ༔ དེའི་ཕྱིར་ན་ཉམས་སུ་ལེན་པ་ལ་ནི་འདི་ཀུན་ལ་དགོས་པ་མེད་དེ་ཚིག་ཅེས་བྱ་བ་ཡིན་ནོ༔ འདི་ཉིད་ལ་གོམས་པ་བར་མ་ཆད་པའི་སྐྱེས་བུ་རྣམས་ལ་ནི་བཤད་མི་དགོས་པར་ཤུགས་ཀྱིས་སྐྱེ་བ་ཡིན་ནོ༔ ཉི་ཟླ་ཁ་སྦྱོར་གྱི་རྒྱབ་ཀྱི་ཡིག༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཐིག་རྫོགས་སོ༔ ཨ་ཏི༔ རྒྱ་རྒྱ་རྒྱ༔ ༔དེ་དག་གི་བསྟན་པ་དམ་པ་སྲུང་བའི་རྒྱུད་དཔལ་ནག་མོ་ཁྲོས་མའི་རྒྱུད་ཀྱི་གནས་ཡིག་ཁོང་དོན་གྱི་མན་ངག་གསུམ་ལས༔ བསམ་པས་གནག་པའི་མན་ངག་ནི་ཉམས་སུ་ལེན་པའི་དུས་ན་བྱ་བ་ཡིན་གྱི་གཞན་དུ་ནི་འགྲུབ་པ་མ་ཡིན་ནོ༔ དུས་ཚོད་ནི་ཐུན་དང་ཟོར་གྱི་དུས་ན་སྦྱར་བ་ཡིན་གྱི་གཞན་ལ་ནི་མ་ཡིན་ཏེ༔ བསམ་ལེ་མ་གསང་བ་ངན་སྔགས་འདུས་པའི་རྒྱུད་ལེའུ་སྟོང་བཞི་བཅུ་ཡོད་པ་ལས༔ བསམས་པས་འགྲུབ་པའི་ལེའུ་འདི་ཕྱུང་བ་ཡིན་ཏེ༔ འདི་མིན་བསམ་ལེ་མས་ནི་འགྲུབ་པ་མ་ཡིན་ནོ༔ བསམ་

པའི་དུས་སུ་རྣལ་འབྱོར་པའི་མགོ་བོ་ལྟ་ལུགས་ནི་དུས་ཚོད་འདི་ཀུན་དང་བསྟུན་དགོས་སོ༔ འདི་དང་མ་བསྟུན་ན་རྣལ་འབྱོར་པས་ལས་མི་འགྲུབ་སྔགས་པ་ཡི་ཆད་པ་ལས་དོན་མི་འབྱུང་ངོ་༔ ཐུན་དྲུག་ལ་སོགས་པའི་ངན་སྔགས་འདི་དག་ནི་གཅིག་ཏུ་དྲིལ་བའི་མན་ངག་ལ་བྷྱོཿསྔགས་བདུན་བརྟགས་ནས་བསྒྲུབ་པ་ལས་དེ་མིན་དུ་འགྲུབ་མི་སྲིད་དོ༔ ཐུན་ཡ་བྲལ་བ་རྣམས་ནི་ཤེས་བྱ་ཡིན་པ་ལས་ལག་ཏུ་བླང་དུ་མི་བཏུབ་སྟེ༔ བླངས་ཀྱང་ཡི་ཆད་པ་ལས་དོན་མི་འགྲུབ་བོ༔ དེའི་ཕྱིར་ན་གསང་སྔགས་ཀྱི་རྒྱུད་ཀུན་ལ་རྒྱབ་ཡིག་མེད་ན་གཟུངས་ཀྱི་ནང་གི་ལས་ཚོགས་དང་འདྲ་སྟེ་འགྲུབ་མི་སྲིད་པས་ཡི་ཆད་པ་ལས་ཕན་མེད་དོ༔ ཨེ་ཀ་ཙ་ཏི་ནག་མོ་ཁྲོས་མའི་རྒྱུད་ཀྱི་རྒྱབ་ཡིག༔ མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ་རྒྱ༔ དེ་ལྟར་གསང་བའི་རྒྱུད་བཅུ་བདུན་ལ་ཁོང་དོན་གྱི་མན་ངག་དེ་དག་ནི་ཉམས་སུ་ལེན་པའི་སྐྱེས་བུ་ལ་དེ་ལྟར་སྟོན་པ་ཡིན་གྱི་ཚོགས་བཤད་དུ་མ་ཡིན་ནོ༔ དཔེའི་ནང་གི་རྒྱུད་བཅུ་བདུན་གང་ཟག་གཅིག་གི་ཆ་རྐྱེན་དུ་བསྒྲིགས་ནས་ཉམས་སུ་ལེན་པར་བསྟན་ནས་ཡོད་དེ༔ དེ་མ་ཡིན་པས་རྒྱུད་རེ་རེ་ནས་གང་ཟག་རེ་རེས་ཉམས་སུ་བླང་བའི་མན་ངག་ཏུ་བསྒྲིགས་ནས་བསྟན་པ་ཡིན་ནོ༔ བཤད་ཅིང་སྤྲོས་པ་ལ་དགའ་ན་དེ་ལྟར་ཡང་ཉམས་སུ་ལེན་པའི་ལག་ལེན་དུ་བསྒྲིགས་ནས་བསྟན་པ་ཡིན་གྱི༔ ཡང་དག་པར་ན་རྒྱུད་ཀྱི་ཚིག་ཀུན་ལ་དགོས་ཆེད་མེད་དོ༔ དེ་ཡང་ཚིག་གི་རིག་པའི་ཡེ་ཤེས་གཏན་ལ་མི་ཕེབས་པའི་གནད་ཀྱིས་སོ༔ དེའི་ཕྱིར་ན་གསང་བའི་མན་ངག་སྙིང་ཐིག་འདི་ནས་ཐེག་པ་གཞན་ལས་ཁྱད་པར་དུ་འཕགས་པའི་མན་ངག་འདི་རྣམས་སྟོན་པ་ཡིན་ནོ༔ དེ་ཡང་ཚིག་གིས་སངས་རྒྱས་ལ་རྡུལ་ཙམ་ཡང་ཕན་པ་མེད་པར་བསྟན་པ་དང་༔ རིག་པའི་ཡེ་ཤེས་དེ་ཤེས་རབ་ཀྱི་སྤྱོད་ཡུལ་དུ་མ་གྱུར་པ་དང་༔ བླ་མས་གདམས་ངག་

བསྟན་ན་དབང་པོ་ལ་རྣོ་རྟུལ་མེད་པ་དང་༔ ཉམས་སུ་ལེན་ནུས་ན་ལས་ལ་བཟང་ངན་མེད་པ་དང་༔ བླ་མས་རིག་པའི་མན་ངག་བསྟན་པའི་མི་ལ་ལས་དགེ་སྡིག་མེད་པར་བསྟན་པ་དང་༔ སྐུ་གསུམ་དང་ཡེ་ཤེས་ལྔའི་སྣང་བ་རྣམས་འདི་ཉིད་ལ་ལམ་དུ་སྣང་བ་ལས་འབྲས་བུ་མ་ཡིན་པ་དང་དྲུག་གིས་ཐེག་པ་གཞན་ལས་ཁྱད་པར་དུ་འཕགས་པས༔ རིག་པ་ཉིད་ཤེས་རབ་ཀྱི་སྤྱོད་ཡུལ་མ་ཡིན་པར་དབང་པོ་སྤྱོད་ཡུལ་དུ་གཏན་ལ་ཕབ་ནས་འདི་ཉིད་ལ་ཕྱི་ནང་གི་བྱུང་བ་རྣམས་རང་སར་དངས་པས་ཟག་བཅས་ཀྱི་ཕུང་པོ་མི་སྣང་བར་ལྷག་མེད་དུ་འཚང་རྒྱ་བས་ན་མན་ངག་འདི་ཤིན་ཏུ་ཟབ་པར་བསྟན་པའོ༔ མན་ངག་གི་རྒྱལ་པོ་དུང་ཡིག་ཅན་འདི་ནི་མན་ངག་ཡིན་གྱི་ཁ་བྱང་ནི་མ་ཡིན་ནོ༔ འདི་ལ་འདྲ་མིན་གཉིས་ཡོད་པ་ལས་ཡང་དག་པའི་མན་ངག་འདི་ལགས་སོ༔ ཁ་བྱང་ནི་འདི་བས་ཉུང་བ་མི་ཟབ་པ་ཅིག་ཡོད་དོ༔ དེའི་ཕྱིར་ན་འདི་རབ་ཏུ་གཅེས་སོ༔ རང་བཞིན་རྫོགས་པ་ཆེན་པོ་ཐིག་ལེའི་སྐོར་གྱི་རྒྱུད་འདི་རྣམས་ཀྱང་རྒྱུད་རྐྱང་པ་ཡིན་ཏེ༔ སངས་རྒྱས་ཀྱི་ཞལ་ནས་གསུངས་པས་ནང་སྦྲེལ་ཏེ་བཤད་པ་ཡིན་པ་ལས༔ འགྲེལ་པ་བདག་གིས་བྱས་པའི་སྐུའི་རྒྱུད་ཀྱི་དོན་འགྲེལ་ཆུང་བ་གཅིག༔ ཡོན་ཏན་གྱི་རྒྱུད་ཀྱི་དབུ་འགྲེལ་དང་༔ སྙིང་གི་མེ་ལོང་གི་འགྲེལ་ཆུང་དང་༔ དབང་འགྲེལ་དང་བཞི་ལས་མེད་དོ༔ བཤད་ན་རྒྱུད་ནང་སྡེབས་ནས་བཤད་པ་ཡིན་ནོ༔ ཉམས་སུ་ལེན་པའི་གནད་དུ་མན་ངག་གི་ཡི་གེ་རྣམས་ཡིན་ལ་ཡིད་ཆེས་འཇུག་པར་བྱེད་པ་ལ་རྒྱུད་རྣམས་ཡིན་ནོ༔ དེའི་གདམས་པ་སྙིང་ཏིག་ལ་འབེབས་པ་ནི་ཡི་གེ་གསུམ་ཡིན་ཏེ༔ རྒྱབ་ཡིག་དང་༔ ཚད་ཡིག་དང་༔ རྟགས་ཡིག་དང་གསུམ་མེད་ན་ཉམས་སུ་བླངས་ཀྱང་ཚི་ཆད་པ་ལས་དོན་ཅི་ཡང་མེད་དོ༔ མན་ངག་གི་རྒྱལ་པོ་དུང་ཡིག་ཅན་གྱིི་རྒྱབ་ཡིག༔ མཁས་པ་ཆེན་པོ་བི་མ་ལ་མི་ཏྲས་མཛད་པ་རྫོགས་སོ༔ བྱེ་མ་ལས་སྒྲ་རང་འགྱུར་དུ་བསྒྱུར་བའོ༔

དཔལ་ལྡན་མགོན་པོ་ལེགས་ལྡན་ནག་པོས་བཀའ་འདི་སྲུངས་ཤིག༔ སཱ་མཱ་ཡཱ༔ སྨུག་ནག་ཨེ་ཀ་ཙ་ཏིས་བཀའ་འདི་སྲུངས་ཤིག༔ ས་མ་ཡཱ༔ ལྕེ་བཙུན་བདག་གིས་འོ་ཡུག་ཕྱི་གོང་རྫའི་ར་བར་འདི་ཁོ་ན་ལྟར་ཉམས་སུ་བླངས་པས་གྲུབ་པ་མིན་རེ་གོ་མགོ༔ མདོ་རྒྱུད་གསལ་བར་བྱེད་པའི་མན་ངག་དུང་ཡིག་ཅན༔ ཚིགས་བཅད་འདིེ་རྣམས་ལྕེ་བཙུན་གྱི་གསུང་ཡིན་ནམ་བརྟག །འདི་ནི་གསང་བའི་མདོ་རྒྱུད་ཐམས་ཅད་ལས༔ མན་ངག་སྙིང་པོ་བསྡུས་པའི་བཅུད་ཡིན་པས༔ དེ་ཡི་མན་ངག་མི་གྱུར་དོན་བསྟན་པ༔ དམིགས་གཏད་རིན་ཆེན་གསལ་བའི་སྒྲོན་མ་ཡིས༔ འདི་ཡི་མདོ་དོན་འགྱུར་མེད་གསལ་བར་བྱས༔ གསང་བ་ངོ་བོ་ཉིད་ཀྱི་དེབས་ཀྱིས་ནི༔ འདི་ཡི་དོན་གྱི་མན་ངག་གཟབ་པ་ནི༔ འཁྲུལ་མེད་ཡིན་པར་ཤེས་པ་གནད་དུ་ཕབ༔ མདོ་བྱེད་བསྡུས་པའི་སྒྲོན་མས་རང་ངོ་བསྟན༔ རྩ་ཏིག་སྙིང་འབེབས་རྒྱབ་ཡིག་འདི་དང་བཞིས༔ གསང་བའི་ཡང་བཅུད་མན་ངག་དུང་ཡིག་ཅན༔ ལྷག་མ་མེད་པར་ཡོངས་སུ་རྫོགས་པ་འོ༔ ས་མ་ཡཱ༔ རྒྱ་རྒྱ་རྒྱ༔ ཤུ་བྷཾ་མསྟུ་སརྦ་ཛ་ག་ཏཾ༔ མངྒ་ལཾ༔

དུང་ཡིག་ཅན་རྒྱུད་ཀྱི་ཁོང་སྙིང་བསྡེབས་པ།

༼དུང་ཡིག་ཅན༽ དུང་ཡིག་ཅན་རྒྱུད་ཀྱི་ཁོང་སྙིང་བསྡེབས་པ་ཞེས་བྱ་བ་བཞུགས་སོ༔ ཨྠྀི༔

རྒྱ་གར་སྐད་དུ༔ ཏན་ཏྲ་ཙིཏྟ་དྷ་ཏྭཱ་ཡེ༔ བོད་སྐད་དུ༔ རྒྱུད་ཀྱི་ཁོང་སྙིང་བསྡེབས་པ༔ རྡོ་རྗེ་སྟོང་པ་ཆེ་ལ་ཕྱག་འཚལ་ལོ༔ ལུང་དང་རིག་པས་རྒྱུད་དོན་གསལ་ཕྱེ་ནས༔ མན་ངག་ངེས་པའི་དོན་འདི་བསྟན་པར་བགྱི༔ འདི་དག་རྣམས་ཀྱི་སྙིང་ཕྱུང་དོན་བསྡེབས་ཏེ༔ གང་ཟག་གཅིག་གི་རྒྱུད་ལ་གོམས་པར་བྱ༔ ཀྱེ་མ་རིགས་ཀྱི་བུ་རྣམས་འདི་ལྟར་གོམས་ཤིང་བརྟན་པར་གྱིས་ཤིག༔ ཐེག་པ་ཆེན་པོས་རིགས་ལ་གནས་ཤིང་༔ ཐེག་པ་ཆེན་པོས་གཞན་དོན་མཐར་ཕྱིན་པར་བྱས་ནས༔ དེ་ནས་གསང་བའི་མན་ངག་ལ་འཇུག་པར་བྱ་བའི་ཕྱིར་ན༔ སྒྲ་ཐལ་འགྱུར་གྱི་རྒྱུད་ཀྱི་དོན་གྱི་མན་ངག་གིས་སྤྲུལ་པའི་སྐུ་བསྒྲུབ་ཏེ་གཞན་གྱི་དོན་རྫོགས་པར་བྱས་ནས་རང་གི་དགོངས་པ་ལ་གནས་པར་བྱ་བའི་ཕྱིར༔ རྟགས་བཀོད་ཡི་གེའི་སྒྲ་དོན་གྱི་གྲགས་སྟོང་དབྱེར་མེད་དུ༔ ཤེས་པར་བྱས་ལ་འགྲོ་བ་རིགས་དྲུག་གི་རང་སྒྲས་ཕ་རོལ་གྱི་དོན་བྱ་མི་བྱ་དང་མངོན་པར་ཤེས་པ་རྒྱུད་ལ་སྨིན་པར་བྱས་ནས༔ དེ་ནས་འབྱུང་བ་ལྔའི་སྒྲ་དོན་གྱིས་རྫུ་འཕྲུལ་ཡ་མ་ཟུང་བསྒྲུབས་ནས་ཕ་རོལ་གྱི་དོན་བྱེད་པའོ༔ དེ་ནས་རང་གི་རིག་པའི་དོན་ལ་འཇུག་པ་སྟེ༔ བཀྲ་ཤིས་མཛེས་ལྡན་གྱི་རྒྱུད་ཀྱི་མན་ངག་གིས་རིག་པའི་གནས་ཚུལ་གཏན་ལ་དབབ་སྟེ༔ འཁྲུལ་བའི་གཞི་གཏན་ལ་ཕབ་པའི་མན་ངག་གིས་རིག་པའི་རང་ངོ་ཤེས་པར་བྱས་ནས༔ མ་འཁྲུལ་པའི་ཡེ་ཤེས་ངོས་བཟུང་བའི་མན་ངག་གིས་རིག་པ་རང་དུ་གཏན་ལ་ཕབ་ནས༔ འཁྲུལ་པའི་འཁྲུལ་ལུགས་ཀྱི་མན་ངག་གིས་རིག་པའི་ཤན་ཕྱེ་ནས༔ དེ་བཟློག་པའི་མན་ངག་གིས་རིག་པའི་འགྲོ་ས་ངོ་ཤེས་པར་བྱའོ༔ དེ་ལྟར་རིག་པའི་འཁྲུལ་གཞི་གཏན་ལ་ཕབ་ནས༔ ད་རིག་པའི་གོལ་ས་གཅོད་པའི་

ཕྱིར་ཀུན་ཏུ་བཟང་པོ་ཐུགས་ཀྱི་མེ་ལོང་གི་མན་ངག་གིས་གཏན་ལ་འབེབས་དགོས་ཏེ༔ བློས་བཏགས་རིམ་པའི་གོལ་ས་གཅོད་པའི་མན་ངག་གིས་རིག་པ་ཐེག་པ་གཞན་གྱི་གྲུབ་མཐའི་ཕྱོགས་སུ་ལྷུང་ངམ་མ་ལྷུང་གཏན་ལ་ཕབ་ནས་ཉམས་བླང་འཁྲུལ་པའི་གོལ་ས་གཅོད་པའི་མན་ངག་གིས་བླ་མའི་གདམས་ངག་མ་འཁྲུལ་བར་གཏན་ལ་ཕབ་སྟེ༔ དངོས་པོ་གཤིས་ཀྱི་འདུག་ཚུལ་མ་ཡིན་པར་འཛིན་པའི་གོལ་ས་གཅོད་པའི་མན་ངག་གིས་རང་གི་རིག་པའི་འདུག་ཚུལ་གཏན་ལ་དབབ་པའོ༔ དེ་ལྟར་རིག་པའི་གོལ་ས་བཅད་ནས༔ ད་རང་གི་རིག་པ་སྒྲོན་མར་གཏན་ལ་དབབ་པའི་ཕྱིར༔ སྒྲོན་མ་འབར་བའི་རྒྱུད་ཀྱི་མན་ངག་གིས་བསྟན་ཏེ༔ བཏགས་པ་ཚིག་གི་སྒྲོན་མའི་མན་ངག་གིས་མིང་མཚོན་པར་བྱས་ནས་རྟེན་འབྲེལ་རྫས་ཀྱི་སྒྲོན་མའི་མན་ངག་གིས་སྐྱེས་བུའི་རྩོལ་བ་ལས་ཡེ་ཤེས་སྐྱེ་བའི་དཔེ་གཏན་ལ་ཕབ་ནས༔ སྤྱི་མཐུན་ལས་ཀྱི་སྒྲོན་མའི་མན་ངག་གིས་རིག་པ་ཟུང་འཇུག་གི་དཔེ་གཏན་ལ་ཕབས་ནས༔ མཚོན་པ་དཔེའི་སྒྲོན་མའི་མན་ངག་གིས་རང་གི་རིག་པ་ལ་ཕྱིན་ཅི་ལོག་གི་རྟོག་པ་བསལ་ནས༔ ཡེ་ཤེས་རྟགས་ཀྱི་སྒྲོན་མའི་མན་ངག་གིས་ལུས་ཀྱི་གནད་སྐྱེས་བུའི་རྩོལ་བ་ལ་བརྟེན་ནས་ཉམས་སུ་བླང་བར་བསྟན་པའོ༔ དེ་ལྟར་སྒྲོན་མ་གཏན་ལ་ཕབ་ནས༔ ད་རང་གི་རིག་པའི་སྒྲོན་མ་དེ་ཡང་༔ དཔེ་དུ་མའི་སྒོ་ནས་ངོ་སྤྲད་ནས་ཡེ་ཤེས་ངོས་བཟུང་སྟེ་སྒྲོན་མའི་སྣང་བ་རང་སྣང་དུ་གཏན་ལ་དབབ་པ་ནི་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ཀྱི་མན་ངག་རྣམས་བསྟན་ཏེ༔ ངོ་སྤྲོད་ཉི་ཤུ་རྩ་གཅིག་གིས་དབང་པོ་རབ་འབྲིང་ཉི་ཤུ་རྩ་གཅིག་ལ་སྤྲད་པས་ཡེ་ཤེས་སྐྱེ་བར་བྱས་ནས༔ དེ་ཡང་དབང་པོ་གསུམ་གྱི་དོན་དུ་བསྡུས་ནས་བསྟན༔

སྒྲོན་མའི་སྣང་བའི་མན་ངག་གི་གནད་བཞིས་གཏན་ལ་ཕབ་སྟེ་ཉམས་སུ་ལེན་པའི་གནད་བཙལ་ལོ༔ དེ་ལྟར་ངོ་སྤྲད་ནས༔ དེ་ལྟར་ངོ་སྤྲོད་ཀྱི་མན་ངག་དེ་ཉིད་རང་ཡང་ལྟ་སྒོམ་སྤྱོད་པ་གསུམ་དུ་གཏན་ལ་དབབ་པར་བསྟན་པ་ནི༔ རིག་པ་རང་ཤར་གྱི་རྒྱུད་ཀྱི་མན་ངག་གིས་བསྟན་ཏེ༔ སྤྱོད་པའི་མན་ངག་གིས་རང་གཞན་གྱི་སྣང་བ་གཏན་ལ་ཕབ་ནས༔ སྒོམ་པའི་མན་ངག་གིས་རང་གཞན་གྱི་བློ་མི་གནས་པར་གནས་པར་བྱས་ཏེ་རང་གི་རིག་པ་ཉིད་དུ་གཏན་ལ་ཕབ་ནས༔ ལྟ་བའི་མན་ངག་གིས་རིག་པ་སྐུ་གསུམ་དུ་གཏན་ལ་ཕབ་སྟེ༔ གང་ཟག་བཞིའི་དོན་དུ་ཡེ་ཤེས་བཞི་སྐྱེ་བའི་རིམ་པ་བསྟན་པའོ༔ དེ་ལྟར་ལྟ་སྒོམ་དུ་གཏན་ལ་ཕབ་ནས༔ ད་ལྟ་སྒོམ་སྤྱོད་པ་འབྲས་བུ་དེ་དག་གི་སྐྱོན་དང་གོལ་ས་བཅད་ཅིང་བསལ་བའི་ཕྱིར༔ ནོར་བུ་ཕྲ་བཀོད་ཀྱི་རྒྱུད་ཀྱི་མན་ངག་བསྟན་ཏེ༔ སྤྱོད་པ་གཙོ་བོར་བྱེད་པའི་མན་ངག་གིས་སྒོམ་པའི་བྱིང་རྒོད་དང་སྣང་བའི་སྐྱོན་རྣམས་གསལ་བར་བྱས་ནས༔ སྒོམ་པ་ལ་གཙོ་བོར་བྱེད་པའི་མན་ངག་གིས་དབང་པོ་གསུམ་གྱི་སེམས་བཟུང་བའི་ཆོ་ག་དང་གནས་པར་བྱས་ནས༔ ལྟ་བ་གཙོར་བྱེད་པའི་མན་ངག་གིས་སྤྱི་དང་རང་གི་མཚན་ཉིད་གཏན་ལ་ཕབ་ནས༔ འབྲས་བུ་ལ་གཙོར་བྱེད་པའི་མན་ངག་གིས་སྤྱི་དང་རང་གི་འབྲས་བུ་ཇི་ལྟར་ཐོབ་པའི་རིམ་པ་གཏན་ལ་ཕབ་བོ༔ དེ་ལྟར་ལྟ་སྒོམ་སྤྱོད་པ་དང་འབྲས་བུའི་སྐྱོན་དང་གོལ་ས་བཅད་ནས༔ ད་རིག་པའི་ངོ་བོ་དེ་ལག་ལེན་དུ་བསྒྲིག་ན་ཇི་ལྟར་སྒྲིག་བསྟན་པ་ནི༔ ངོ་སྤྲོད་སྤྲས་པའི་རྒྱུད་ཀྱི་མན་ངག་བསྟན་ཏེ༔ དཔེ་དོན་རྟགས་གསུམ་གྱི་མན་ངག་གིས་སྣང་བ་ལ་ཡིད་ཆེས་པར་བྱས་ནས༔ རིག་པ་དང་འོད་ཡེ་ཤེས་གསུམ་གྱི་མན་ངག་གིས་ལག་ཏུ་ལེན་

པའི་གྲངས་ཤེས་པར་བྱས་ནས༔ སྐུ་གསུམ་གྱི་ངོ་སྤྲོད་ཀྱི་གདམས་ངག་གིས་རིག་པ་གཏན་ལ་ཕབ་ནས༔ གནད་གསུམ་དུ་བཞག་པའི་ངོ་སྤྲོད་ཀྱི་མན་ངག་གིས་ཉམས་སུ་བླངས་པས་ལག་ལེན་དུ་གཏན་ལ་ཕབ་པའོ༔ དེ་ལྟར་ལག་ལེན་གཏན་ལ་ཕབས་ནས༔ ད་རིགས་དྲུག་གི་སྐྱེ་བའི་སྒོ་དགག་པའི་ཕྱིར་ཀུན་ཏུ་བཟང་པོ་ཀློང་དྲུག་པའི་རྒྱུད་ཀྱི་མན་ངག་གིས་གཏན་ལ་དབབ་པར་བྱ་སྟེ༔ རིགས་དྲུག་གི་འབྲོས་ཁུངས་གཅོད་པའི་མན་ངག་གིས་ཡུལ་དྲུག་རྣམས་དག་པར་བྱས་ནས༔ རང་སྣང་ལྷུག་པར་ཤར་བའི་མན་ངག་གིས་སྣང་བའི་རྐྱེན་ཐམས་ཅད་དང་བྲལ་བར་བྱའོ༔ དེ་ལྟར་རིགས་དྲུག་གི་སྐྱེ་གནས་བཅད་ནས༔ ད་ཉམས་སུ་བླང་པ་དངོས་ལ་འཇུག་པར་བྱ་སྟེ༔ ཡི་གེ་མེད་པའི་རྒྱུད་ཀྱི་མན་ངག་གིས་ཉམས་སུ་ལེན་པ་དངོས་བསྟན་ཏེ༔ ཞལ་ཆེམས་ཀྱི་མན་ངག་གིས་ཕྱི་ནང་གསང་བའི་བྱ་བ་བཏང་སྟེ་རྐྱེན་མེད་ཀྱི་ཡུལ་དུ་གནས་པར་བྱས་ནས་བཞག་ཐབས་བཞིའི་མན་ངག་གིས༔ རིག་པ་རང་སོར་ཆུད་པར་བྱས་ནས་དབྱིངས་དང་རིག་པའི་མན་ངག་གིས་དངོས་གཞི་རིག་པ་ཟག་པ་མེད་པའི་ཐབས་བསྟན་པའོ༔ དེ་ལྟར་ཉམས་སུ་བླང་བའི་ཐབས་བསྟན་ནས༔ ད་ཉམས་སུ་ལོངས་པའི་ཚད་གཏན་ལ་དབབ་པའི་ཕྱིར༔ སེང་གེ་རྩལ་རྫོགས་ཀྱི་རྒྱུད་ཀྱི་མན་ངག་གིས་བསྟན་ཏེ༔ བསྒོམ་པ་རྣམ་པ་ལྔའི་མན་ངག་གིས་རང་གི་ཤེས་པ་བརྟན་པའི་ཚད་བཟུང་ལ༔ ལྟ་བ་ཞེ་ཕུགས་ཀྱི་མན་ངག་གིས་རིག་པ་མི་འགྱུར་བར་བྱས་ནས༔ ཉམས་སུ་བླངས་པ་དངོས་གཞིའི་མན་ངག་གིས་ཉམས་གོང་ནས་གོང་དུ་འཕེལ་བར་བྱའོ༔ དེ་ལྟར་ཉམས་སུ་བླངས་བའི་ཚད་བསྟན་ནས༔ ད་རིག་པ་དེ་ཕྱིར་མི་ལྡོག་པར་བྱ་བའི་ཕྱིར༔ མུ་ཏིག་ཕྲེང་

བའི་རྒྱུད་ཀྱི་མན་ངག་གིས་རིག་པ་མ་སྨིན་པ་སྨིན་པར་བྱའོ༔ གལ་མདོ་བཅུ་གཅིག་གི་མན་ངག་གིས་རིག་པ་ཁྲིགས་སུ་ཉམས་སུ་བླངས་ནས༔ གནད་རྣམ་པ་གསུམ་མཐོང་བའི་མན་ངག་གིས་གོམས་པའི་གདེང་བཅས་ནས༔ འཁྲུལ་པའི་རང་རྐྱེན་དག་པའི་མན་ངག་གིས་འབད་བཅས་དང་འབད་མེད་དུ་གྲོལ་བར་བསྟན་པའོ༔ དེ་ལྟར་རིག་པ་ཕྱིར་མི་ལྡོག་པར་བྱས་ནས༔ ད་རིག་པ་དེ་བྱས་པ་མ་ཡིན་པར་རང་གིས་རང་གྲོལ་བར་བྱ་བ་ནི༔ རིག་པ་རང་གྲོལ་གྱི་རྒྱུད་ཀྱི་མན་ངག་གིས་བསྟན་ཏེ༔ གཅིག་པུ་གྲོགས་དང་བྲལ་བར་གནས་པའི་མན་ངག་གིས་སྣང་བ་ལ་དབང་བར་བྱས་ནས༔ རིག་པ་མཁའ་ལ་དབྱུང་བའི་མན་ངག་གིས་རྡོ་རྗེ་ལུ་གུ་རྒྱུད་དང་འདྲིས་པར་བྱས་ལ༔ སྣང་བ་ཅེར་བཞག་གིས་མན་ངག་གི་འཁོར་འདས་ཐམས་ཅད་རང་གྲོལ་དུ་བྱའོ༔ དེ་ལྟར་རང་གྲོལ་དུ་བསྟན་ནས༔ ད་ཡོན་ཏན་སྣ་ཚོགས་སུ་ཤར་བ་ཐམས་ཅད་དབྱིངས་རིག་རང་གི་ངོ་བོ་ཡིན་པར་བསྟན་པའི་ཕྱིར༔ རིན་པོ་ཆེ་སྤུངས་པའི་རྒྱུད་ཀྱི་མན་ངག་བསྟན་ཏེ༔ ཡོན་ཏན་དུ་མ་རྫོགས་པའི་རིག་པའི་གནད་ཀྱི་མན་ངག་གིས་ཐམས་ཅད་རང་གི་རིག་པའི་ཆོ་འཕྲུལ་དུ་བལྟས་ནས༔ རྒྱ་ཆེ་བ་དབྱིངས་རིག་གི་མན་ངག་གིས་གནད་དུ་མའི་སྒོ་ནས་རང་གི་དབྱིངས་རིག་ཏུ་རྟོགས་པར་བྱའོ༔ དེ་ལྟར་ཡོན་ཏན་སྣ་ཚོགས་སུ་ཤར་བ་ཐམས་ཅད་རང་གི་དབྱིངས་རིག་ཏུ་གཏན་ལ་ཕབ་ནས༔ ད་གང་ཟག་རྣམས་འཇུག་ཅིང་ཡིད་ཆེས་པར་བྱ་བའི་ཕྱིར་སྔ་རྟགས་ཕྱི་རྟགས་ནི་སྐུ་གདུང་འབར་བའི་རྒྱུད་ཀྱི་གདམས་ངག་བསྟན་ཏེ༔ གནད་རྣམ་པ་གསུམ་གོམས་པའི་ཚད་ཀྱིས་རྒྱུད་སྨིན་པའི་མན་ངག་གིས་ལུས་ལ་སྐུ་གསུམ་འབྱུང་བའི་རྟགས་གཏན་ལ་ཕབ་ནས༔ རྣམ་པར་དག་པའི་

ནམ་མཁའ་ལ་གཟིར་འདེབས་པའི་མན་ངག་གིས་རིག་པ་སྨིན་པའི་རྟགས་བསྟན་ཏེ༔ ཉམས་སུ་བླང་བ་གོམས་པའི་རྟགས་ཀྱི་མན་ངག་གིས་ལུས་ངག་ཡིད་གསུམ་འཚང་རྒྱ་བའི་སྔ་རྟགས་དང་ཕྱི་རྟགས་ཀྱི་གཞན་འཇུག་པའི་དོན་བསྟན་པའོ༔ དེ་ལྟར་རྟགས་དང་ལྡན་པའི་གང་ཟག་དེ་མྱ་ངན་ལས་འདའ་བས༔ ད་ལམ་དུ་བར་དོ་ལ་ཇི་ལྟར་འཆར་བའི་སྣང་བ་བསྟན་པ་ནི༔ ཉི་ཟླ་ཁ་སྦྱོར་གྱི་རྒྱུད་ཀྱི་གདམས་ངག་གིས་གཏན་ལ་དབབ་སྟེ༔ རང་བཞིན་གནས་པའི་བར་དོ་ལ་ཤེས་པ་གྲས་ཐག་བཅད་པའི་གདམས་ངག་གིས་བླ་མའི་མན་ངག་ལ་ཡིད་ཆེས་པར་བྱས་ནས༔ འཆི་ཁ་མའི་བར་དོ་ལ་མི་གསལ་བ་གསལ་གདབ་པའི་མན་ངག་གིས་རང་གི་རིག་པ་བསྟན་པར་བྱས་ནས༔ ཆོས་ཉིས་ཀྱི་བར་དོ་ལ་རང་གི་རིག་པ་ངོས་བཟུང་སྟེ་འཚང་རྒྱ་བར་བསྟན་པའོ༔ གལ་ཏེ་མ་སྨིན་པའི་དབང་པོ་རྣམས་ནི་སྲིད་པའི་བར་དོ་ལ་ལས་ཀྱི་འཕྲོ་འཐུད་པའི་མན་ངག་གིས་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་ཕྱུང་ནས༔ སྐྱེ་བ་གཅིག་གིས་བར་དོ་མེད་པར་ཡང་དག་པར་རྫོགས་པར་འཚང་རྒྱ་བར་བསྟན་པའོ༔ དེ་ལྟར་དེ་དག་གི་སྔོན་དུ་ནི་རྟེན་ཁྱད་པར་ཅན་དུ་བསྒྲུབ་པའི་ཕྱིར༔ རྫོགས་པར་རང་བྱུང་གི་རྒྱུད་ཀྱི་མན་ངག་གིས་དབང་རྣམ་པ་བཞི་བསྟན་ཏེ༔ ཕྱི་ནང་གི་དབང་གི་མན་ངག་གིས་དབང་པོ་རྟུལ་པོ་རྣམས་ཞུགས་པར་བྱས་ནས༔ གསང་བ་ཤེས་རབ་ཡེ་ཤེས་གསལ་བར་བྱེད་པའི་གདམས་ངག་གིས་ཆགས་པ་ཅན་གྱི་གང་ཟག་རྣམས་ཡང་དག་པའི་ལམ་དུ་དྲངས་ནས༔ རང་རིག་པ་ཡོངས་སུ་རྫོགས་པ་ཆེན་པོའི་དབང་གི་མན་ངག་གིས་དེ་དག་རྣམས་ཀྱི་ཞེན་པ་བཟློག་པར་བྱ་བའི་ཕྱིར་རིག་པ་རྩལ་གྱིས་དབང་བསྐུར་དུ་མེད་པར་བསྟན་པའོ༔

གྲོགས་དམ་ཚིག་ནི་རྒྱུད་དེ་དག་རེ་རེ་ལ་ལྡན་པས་གུད་དུ་མ་བཤད་དོ༔ དེ་ལྟར་གང་ཟག་གཅིག་གི་ཆ་རྐྱེན་དུ་རྒྱུད་རྣམས་གཅིག་ཏུ་བསྡུས་ནས་ཉམས་སུ་ལེན་པའི་གང་ཟག་དེ་ལ་གཞན་གྱི་གནོད་པ་བསྲུང་བར་བྱ་བའི་ཕྱིར༔ དཔལ་ཨེ་ཀ་ཙ་ཏཱི་ནག་མོ་ཁྲོས་མའི་རྒྱུད་ཀྱི་མན་ངག་བསྟན་ཏེ༔ ཁྲོས་པའི་དུས་ཚོད་ཀྱི་མན་ངག་གིས༔ ཟླ་བ་གཅིག་ལ་དུས་འདི་ཙམ་ན་མ་མོས་བསད་པའི་ལས་བྱ་བའི་དུས་ཀྱིས་འགལ་བ་ཆམ་ལ་ཕབ་པ་དང་༔ བསམ་པ་འགྲུབ་པའི་ངན་སྔགས་ཀྱི་རྫས་ལ་བརྟེན་ནས་རྣལ་འབྱོར་པའི་ཉལ་ལུགས་ཀྱིས་འགལ་བྱེད་དགུག་པར་བྱས་ནས༔ གནག་པ་ཐུན་དྲུག་གི་ངན་སྔགས་གཅིག་ཏུ་དྲིལ་བ་དང་༔ རྐྱང་པའི་བྱ་ཐབས་ཀྱིས་འགལ་བྱེད་གསོད་པའོ༔ དེ་ལྟར་རྣལ་འབྱོར་པ་གཅིག་གིས་བསྟན་པ་འཛིན་པ་དང་སྐྱོང་བ་དང་༔ བསྲུང་བ་གསུམ་ཚང་བར་བསྟན་པས་ན༔ རྒྱུད་དེ་དག་ཚིག་མཐའ་ཡས་ཀྱང་དོན་རྣལ་འབྱོར་པ་གཅིག་གི་ཆ་རྐྱེན་དུ་བསྟན་པའོ༔ དེའི་ཕྱིར་ན་རྒྱུད་ཐམས་ཅད་ཀྱི་ཙིཏྟ་ཕྱུང་བ་སྟེ༔ དེ་དག་རྣམས་ལ་མན་ངག་གི་གཟེར་འདི་དག་དང་མ་ལྡན་ན་སྙིང་བཏོན་པའི་རོ་དང་འདྲ་བས་དོན་མེད་པའོ༔ དེའི་ཕྱིར་ན་རྣལ་འབྱོར་པ་སྤྲོས་པ་མེད་པའི་བློ་ཅན་རྣམས་ཀྱི་དོན་དུ་རྒྱུད་ཀྱི་ཁོང་སྙིང་ཕྱུང་སྟེ་བསྟན་པའོ༔ འདི་ཡི་མན་ངག་དོན་དང་ལྡན་པའི་རྣལ་འབྱོར་པ་ལ་རྒྱུད་ཚིག་རྣམས་དགོས་པ་མེད་པར་བསྟན་པས༔ ཚིག་གི་སྤྲོས་པ་ཆོད་དེ་དེའི་དོན་གཅིག་ཏུ་གནས་པའི་དགོས་པ་ཡོད་པས༔ དོན་ལ་ཡིད་ཆེས་ཤིང་ཚིག་ལ་མཐར་རྟོགས་པས་ན་རྣལ་འབྱོར་པ་ཆེན་པོ་རྣམས་ཀྱི་སྤྱོད་ཡུལ་ལོ༔ དེའི་ཕྱིར་

ན་མན་ངག་འདི་གཞན་ལ་ཚིག་ཙམ་མམ༔ ཟུར་གཅིག་ཀྱང་བརྗོད་པར་མི་བྱའོ༔ འདི་ནི་ཉམས་སུ་ལེན་པའི་གང་ཟག་གསུམ་ལས་འཕེལ་ན་མཁའ་འགྲོའི་ཆད་པ་འབྱུང་ངོ་༔ དེས་ན་རབ་ཏུ་གསང་བར་བྱའོ༔ བསྟན་པ་ཐམས་ཅད་ཀྱི་སྙིང་པོ༔ ལྟ་བ་ཐམས་ཅད་ཀྱི་ཡང་ཞུན༔ མན་ངག་ཐམས་ཅད་ཀྱི་སྙིང་ཁུ་ཡིན་པས་སོ༔ རྒྱུད་ཀྱི་ཁོང་སྙིང་གང་ཟག་གཅིག་གི་ཆ་རྐྱེན་དུ་བསྡུས་པ་གསལ་བ་མིག་གི་ལྡེ་མིག་ཅེས་བྱ་བ་གསང་བའི་དེབས་རྫོགས་སོ༔ ཨི་ཏི༔ སྔགས་ཀྱི་སྲུང་མས་སྲུངས་ཤིག༔ དམ་ཚིག་དང་མི་ལྡན་ཞིང་སྐལ་མེད་རྣམས་ལ་བྱིན་ན༔ ཞྭའི་མགོན་པོས་ཆད་པ་བཅད་ནས་མིག་ཐང་ལ་བྲུལ་ནས་ཚེའི་དུས་བྱེད་པར་འགྱུར་རོ༔ དེས་ན་རབ་ཏུ་གསང་ངོ་༔ ལས་ཅན་ཅིག་དང་འཕྲད་པར་ཤོག༔ ༔ཤུབྷཾ༔

གཡུ་ཡིག་ཅན་པོ་ཏི་སྨུག་ཆུང་སྐོར་རྣམས།

༼གཡུ་ཡིག༽ གཡུ་ཡིག་ཅན་པོ་ཏི་སྨུག་ཆུང་སྐོར་རྣམས་བཞུགས་སོ། །མ་ཡིག་བུ་ཡིག་བསྡོམས་པས་སྐབས་དོན་བཅུ་གཉིས་དང་ཐོར་བུའི་སྐོར་རྣམས།

༔ཁཾན།ག་ཤྭཏམྭཧ།༔ སཾ་སྐྲྀ་ཏའི་སྐདཨེ་ཝཾ་མ་ཡ་ཤྲུ་ཏ་ཨེ་ཀ་སྨིན༔ ཨོ་རྒྱན་སྐད་བྷ་དུ་ས་ར་དྷཾ་བྷི་ལ་ཀི༔ རྒྱ་ནག་པོའི་སྐད་བཻ་རོ་བྷ་ཞ་ཏི་སག་ཏི་ཀོ༔ མཁའ་འགྲོ་མའི་སྐད་བྷེ་ཏི་བྷྱ་གུ་ལིར་ཏ༔ སིང་གྷ་ལའི་སྐད་པ་བྷྱ་ཞུ་ཏི་རོས་ཏུ༔ སོག་པོའི་སྐད་ཕེ་ཏེ་བྱེ་ལ་པོ་ཏང་ཀེ༔ བོད་སྐད་དུ༔ ལོ་རྒྱུས་རིན་པོ་ཆེའི་མདོ་བྱང་༔ བཅོམ་ལྡན་འདས་བྱ་བྲལ་རྫོགས་པ་ཉིད་ལ་ཕྱག་འཚལ་ལོ༔ གང་ཞིག་རྨོངས་པ་གདུང་བ་སེལ་པའི་དོན་ཚིག་དང་༔ གང་ཞིག་སེམས་ཉིད་རྣལ་དུ་འབེབས་པའི་དོན་ཚིག་དང་༔ གང་ཞིག་རྒྱུད་ལུང་དོན་དུ་འགོད་པའི་དོན་ཚིག་དང་༔ གང་ཞིག་ལྷ་རྣམས་མངོན་དུ་སྣང་བའི་དོན་ཚིག་དང་༔ གང་ཞིག་སྐྱེ་མེད་གདིང་དུ་འཛུད་པའི་དོན་ཚིག་དང་༔ གང་ཞིག་ཆོས་སྐུ་ཅོག་གིས་འཇོག་པའི་

དོན་ཚིག་དང་༔ གང་ཞིག་འཁྲུལ་པ་ཐུར་དུ་གཞུག་པའི་དོན་ཚིག་དང་༔ གང་ཞིག་ཉོན་མོངས་སྔར་གྱི་འཛིན་པའི་དོན་ཚིག་དང་༔ གང་ཞིག་ལྷག་པའི་བསམ་གཏན་རྫོགས་པའི་དོན་ཚིག་དང་༔ གང་ཞིག་ཁམས་གསུམ་གཡུལ་ངོ་བཟློག་པའི་དོན་ཚིག་དང་༔ གང་ཞིག་བྱ་བྱེད་ལམ་དུ་སློང་བའི་དོན་ཚིག་དང་༔ གང་ཞིག་བཀོད་པ་ཡོངས་སུ་རྫོགས་པའི་དམ་ཚིག་རྣམས༔ རྣམ་པར་ཕྱེ་སྟེ་གསལ་བར་འདིར་ནི་བསྟན་པར་བྱའོ༔ ཨྠྀི༔ ཁ་ཁཾ་གར་ཀ་ནཱཿདབཱཊ༔ རྨོངས་པ་གདུང་བ་དག་ནི་བསལ་བའི་ཕྱིར་པོ་ཏི་སྨུག་གུ་ལ་ཟངས་ཀྱི་ཁྱམས་བག་ཏུ་བཅུག་ནས་རྒྱས་གདབ་ནས་སྦས་པའི་མན་ངག་པོ་ཏི་སྨུག་ཆུང་ཞེས་བྱ་སྟེ་འདི་ལ་འདྲ་མིན་གཉིས་ཡོད་དེ། མིན་པ་ལ་ཡིན་པའི་སྐད་བྱས་པ་ཅིག་ཀྱང་ཡོད་དོ། །འདི་ནི་བསེ་རིན་པོ་ཆེའི་བྱང་དམར་ལ་གཡུས་ཡི་གེ་བྲིས་ནསསོག་པོ་གཡུའི་སྨིན་མ་ཅན་གྱིས་

ཡུལ་ནས་བསྒྱུར་བའོ༔ བཀོད་པ་ཆེན་པོའི་དོན་ནི་རྒྱ་ཆེ་ལས་ལོ་རྒྱུས་རྒྱས་འབྲིང་གསུམ་ལས་འདི་ལེགས༔ རིན་ཆེན་ལོ་རྒྱུས་མིག་འབྲས་འདིར་སྤྲོ་འོ༔ དོན་ཉིད་གསང་བ་བསྡུས་པའི་ཡི་གེ་འདི༔ སྒྲ་དང་ཐ་སྙད་བཀོད་པ་ཆེན་པོ་པས༔ སྙིང་པོ་འདི་ནི་ཡོངས་སུ་བསྡུས་པའོ༔ ཤིན་ཏུ་དཀོན་པས་སྔོན་པོའི་གཡུ་ཡིས་བྲིས༔ གསང་སྐོར་སོགས་གཞན་དང་ཐུན་མོང་དག་ཏུ་མ་བྱས་པ༔ འདི་ནི་མཆོག་ཏུ་གསང་བའི་ཡི་གེའོ༔ རྒྱ་རྒྱ་རྒྱ༔ རྒྱ་གར་སྐད་དུ༔ བྷ་དུ་བྷ་ཏྲི་ལ༔ བོད་སྐད་དུ༔ སངས་རྒྱས་དགོངས་པས་རིན་འཛིན་བརྡ་བརྒྱུད་གང་ཟག་སྙན་བརྒྱུད་བརྒྱུད་པ་གསུམ་པ༔ དཔལ་གཉིས་མེད་ཀྱི་རྒྱལ་པོ་སྐྱེ་བ་མེད་པའི་ལུས་ཅན་ལ་ཕྱག་འཚལ་ལོ༔ ཡིད་ཆེས་བསྐྱེད་པ་འཇིག་རྟེན་མུན་པའི་བློ་དང་ཡུལ་ཅན་གྱི༔ མ་རིག་མུན་པའི་དམག་དཔུང་གདམས་པ་ཉམས་ལེན་གྱི་གནད་ཀྱིས་བཟློག་བྱའི་ཕྱིར༔ གསང་བའི་སྐྱེས་བུ་རྣམས་ལ་ཡེ་ཤེས་འོད་ཀྱི་སྣང་བ་འདི་བྱ་རྒོད་ཕུང་པོའི་རི་ལ་བསྟན་ཏོ༔ དེ་ནས་དགེ་སློང་དད་དང་རིག་མཆོག་ལྡན༔ ཞུ་བ་པོ་ཤཱ་རིའི་བུ་སྟེ་སྐར་མ་འོད་བཟང་གིས༔ སྟོན་པ་འོད་སྲུངས་ཉིད་དུ་སྐུ་སྤྲུལ་པ་ལ་འདི་སྐད་ཞུས༔ སྟོན་པའི་མཛད་སྤྱོད་ཇི་ལྟ་བུ་ཞུས་པ་ཀྱེ་ཀྱེ་འཇིག་རྟེན་མུན་པ་སྣང་བྱེད་པ༔ སངས་རྒྱས་ཆོས་རྫོགས་ཆེན་གྱི་དོན་འདི་དག་ཀྱི་བསྟན་པ་འོད་འབར་འདི༔ ལོ་རྒྱུས་རིན་པོ་ཆེའི་མཛོད་བྱང་གིས་འཇིག་རྟེན་རིགས་དྲུག་མུན་པ་སེལ་བའི་ཕྱིར༔ བསྟན་པའི་སྟོན་པ་དང་པོ་ཇི་ལྟར་བྱོན༔ བསྟན་པའི་སྒྲོན་མ་གསང་ཆེན་ངེས་པའི་རྒྱུད་འདི་རྣམས་ཇི་ལྟར་བསྟན་ཞིང་གསུངས༔ སྙིང་པོ་བསྡུས་

པའི་བཀའ་གསང་ངེས་པ་འདི༔ ཚིག་དང་ཡི་གེ་ཤད་བར་དུ་ཡིས་བཅད༔ ལྗགས་ལ་བཀྲམ་པའི་ཐེག་རྒྱལ་ཨ་ཏི་ལ༔ སྡེ་དང་འབུམ་ཚོའི་གྲངས་ནི་ཇི་ཙམ་ཞིག༔ ཤིན་ཏུ་ཐིག་ལེའི་སྐོར་ལ་བཞི་ཡོད་པ་ལས་གསང་བ་བླ་ན་མེད་པ་འདི་ལ་བསྡུས་པའི་སྙིང་པོ་ཡང་གསང་ལ༔ གསལ་བའི་ཚིག་མཚོན་ཚེག་བར་དུ་དང་ལྡན་ན་བདུན་བདུན་བར་བཅད་པའོ༔ ཐིག་ལེའི་སྐོར་ཤིན་ཏུ་དཀོན་པ་གསང་བའི་རྒྱུད་རྒྱལ་གྲངས༔ ཤིན་ཏུ་རྒྱ་ཆེ་རྣམ་པར་བཀོད་པ་ལས༔ བསྡུས་ཏེ་གསང་ཏིག་སྙིང་དང་འདྲ་བ་དུ་བླ་མེད་ཕྱི་རྒྱུད་བཅུ་བདུན་༔ དེ་ལྟར་སྙིང་ཐིག་ཡང་གབ་སྦས་པ་ཡི༔ རྒྱུད་གསང་བ་ཡང་ནས་ཡང་དུ་བསྡུས་པ་མར་གྱི་ཡང་ཞུན་ལྟ་བུའི་སྙིང་པོ་འདི༔ ཕྱི་རབས་གང་དང་གང་གིས་འཛིན་པར་འགྱུར༔ ཐ་མ་སྟོན་པའི་བསྟན་པ་མི་གནས་ནུབ་པའི་ཚེ་ཆོས་གང་གིས་བྱེད༔ བསྟན་པའི་བཙས་སུ་གང་གིས་མེ་རོ་བྱེད༔ ཐིག་ལེ་མཆོག་གསང་བླ་མེད་ཡོངས་རྫོགས་འདིའི༔ བསྟན་པ་ཉིད་ལ་འཕེལ་འགྲིབ་ཇི་ལྟར་འབྱུང་༔ སྐལ་དང་ལྡན་པའི་སྐྱེས་བུ་ལུང་རབ་ཅན༔ འབྱུང་བ་རང་དེངས་བློ་ལྡན་དུ་ཞིག་ཕུང་པོ་ལྷག་མེད་འབྱུང་༔ སྙིགས་མ་རྩོད་ལྡན་ལེ་ལོས་རབ་གཡེངས་པས་༔ འདི་ཉིད་གོམས་པར་མ་གྱུར་གདིང་མེད་པ༔ བར་དོར་འཚང་རྒྱ་བ་རང་ངོ་བསྟན་པ་དུ་ཞིག་འབྱུང་༔ སྐྱེ་མེད་རིག་པའི་སྣང་བམཆོག་དེ་གོམས་པ་མ་གྱུར་ཡང་༔ འདི་ཉིད་མཐོང་བས་གར་སྐྱེ་ཡོན་ངལ་བསོའི་ས་གནས་གང་༔ རྨོངས་པ་རྣམས་ཀྱི་གདུང་བ་བཅད་པའི་ཕྱིར༔ སྟོན་པ་ཐུགས་རྗེ་ཆེན་པོ་ཉིད་

བཞེངས་ལ༔ བདག་ནི་དོན་ལ་ཡིད་ཆེས་འཇུག་ཕྱིར་གསུངས༔ དེ་ནས་སྟོན་པ་དྲུག་པ་རྡོ་རྗེ་འཆང་འོད་སྲུངས་སུ་སྤྲུལ་ནས་ཉིད༔ ཏིང་ངེ་འཛིན་སྣང་བ་རྣམ་པར་དག་པ་ལས་བཞེངས་ནས་ནི༔ ཤཱ་རིའི་བུ་ལ་འདི་སྐད་གསུངས༔ ཀྱེ་མ་ཚེ་དང་ལྡན་པ་ཉོན༔ གདུང་པ་དག་ནི་སེལ་བའི་ཚིག༔ ཁྱོད་ཀྱིས་ཁྱོད་ཐིག་ཆེན་གྱི་རིགས་ཡིན་པ་འདི་དག་གཟུང་བར་དཀའ༔ ཐེག་པ་དམན་ལ་ཞུགས་པ་དང་༔ རྟོག་གེ་བ་དགེ་སྦྱོང་དག་གི་གཟུགས་འཛིན་ལ༔ སྐྲག་བར་འགྱུར་བས་འདི་ནི་རབ་གསང་སྙིང་པོའི་དོན༔ བྱང་ཆུབ་སེམས་དཔའ་ཆེན་པོ་ཡི༔ སྤྱོད་ཡུལ་ཉིད་ལས་གཞན་གྱིས་མིན༔ དེ་ཡི་ཕྱིར་ན་དོན་འདི་ཁྱོད་ཀྱི་ས་གཟུང་བ་དཀའ་འོ༔ དེ་ནས་འོད་བཟང་ཤཱ་རིའི་བུ༔ བདག་སྐལ་བར་རེ་ཆུང་སྙམ་སྟེ་རབ་ཏུ་བརྒྱལ་ནས་འདྲེ་ལྡོག་ཅིང་༔ ཀྱེ་མ་ཀྱེ་ཧུད་ཨེ་ཤ་ཀ༔ བདག་ནི་འཇིག་རྟེན་འཁོར་བའི་ལས་མི་ཐར་སྙམ་ནས་རྒྱུ༔ དད་པས་རབ་ཏུ་མི་སྤོབས་པས༔ སྡུག་བསྔལ་འཆིང་བས་དམ་དུ་བཅིངས༔ ཐེག་ཆེན་གྱི་ཐར་པའི་ས་བོན་ཉིད་དང་བྲལ༔ ད་ནི་འཁོར་བར་ཡུན་རིང་གནས༔ སྟོན་པའི་ཐུགས་རྗེས་མི་སྐྱོབ་པས་དཔྱངས་ཐག་ཆད༔ ཡུན་གྱི་མགོན་སྐྱབས་ཉིད་དང་བྲལ༔ ཀྱེ་མ་འཇིག་རྟེན་ཡུལ་འདི་ན༔ མགོ་རྐང་ལུས་སོགས་ལྷ་ཀླུ་མི་སོགས་སུ་འདོད་པ༔ ཚུར་ཤོག་ཚུར་ཤོག་འདི་ལོངས་ཤིག༔ ཁྲག་དང་ཆུ་སེར་ནང་རོལ་ཡང་༔ སུ་འདོད་སུ་འདོད་འདི་ལོངས་ཤིག༔ དེ་སྐད་བརྗོད་ཅིང་ལུས་སོགས་བཏང་༔ དེ་ལྟར་སྡུག་བསྔལ་ཉིད་ལྡན་པས་སྒྲིབ་པ་ཟད་དེ༔ སྟོན་པའི་

ཐུགས་རྗེས་རབ་བཟུང་སྟེ༔ ཉིད་ཀྱི་མཛོད་སྤུའི་བུ་ག་ནས༔ བདུད་རྩི་སྣང་བར་བྱེད་ཅེས་པའི༔ འོད་ཟེར་རབ་ཏུ་སྤྲོས་ནས་ནི༔ ཤ་རིའི་བུའི་ཉོན་མོངས་བག་ཆགས་སྒྲིབ་སྦྱོངས་ཏེ༔ འདི་སྐད་ཐུགས་རྗེ་ཆེན་པོས་གསུངས༔ ཨེ་མ་རིགས་ཀྱི་བུ་ཉིད་ནི༔ འཁོར་བའི་བག་ཆགས་སྦྱང་དཀའ་བ༔ འདི་ཉིད་དུ་ནི་རབ་སྦྱངས་པས༔ ད་ནི་བསྟན་པའི་སྙིང་པོ་བཟུང་འདི་ཁྱོད་ལ་སྣང་བར་འགྱུར་རོ༔ དེ་སྐད་རབ་ཏུ་གསུངས་པ་ཡིས༔ ཤཱ་རིའི་བུ་ནི་དྲན་སད་ནས༔ མགོ་དང་ཡན་ལག་བྲལ་བ་ཡང་༔ སྔོན་དུ་ཡོད་པ་ཇི་བཞིན་འགྱུར༔ ཡང་ནི་ཐལ་མོ་རབ་སྦྱར་ནས༔ ཀྱེ་ཀྱེ་ཐུགས་རྗེའི་ལྕགས་ཀྱུས་ཟུང་༔ ཐར་པའི་ལམ་ལ་ཡང་དག་འཁོད༔ སྣང་མཛད་ཆེན་པོ་ཨ་ལ་ལ༔ སྤྲོས་མེད་བདེ་ཆེན་ཨ་ལ་ལ༔ ཉག་གཅིག་ཆེན་པོ་ཨ་ལ་ལ༔ ཁྱབ་བརྡལ་འུབ་ཆུབ་ཨ་ལ་ལ༔ ཉིད་ཀྱི་མཐུ་སྟོབས་འོད་ཟེར་གྱིས༔ བདག་གི་ཇི་ལྟར་གོང་ཞུས་པའི༔ བཅུ་གཅིག་པོ་ཚིག་རྣམས་རིམ་པ་ཕྱེ་སྟེ་གསུངས༔ དེ་ནས་ཉིད་ཀྱིས་འདི་སྐད་གསུངས་༔ དགེ་སློང་རྡོ་རྗེ་འཛིན་པ་ཁྱོད༔ འདི་ཉིད་རབ་ཏུ་གཟུང་དཀའ་ཡང་༔ ཁྱོད་ཀྱི་དད་པའི་སྟོབས་ཀྱིས་ཟུང༔ ཞུས་དོན་དང་སྟོན་པའི་བྱོན་ལུགས་ང་ནི་མི་ཤིགས་རྡོ་རྗེ་གཞི་མི་འགྱུར་བ་ལས༔ ཕྱི་རོལ་ས་ཆུ་ལ་སོགསདམིགས་པ་གཅིག་ཀྱང་མེད༔ ནང་དུ་ཡིད་གཡོས་རིག་རིག་མ་རིག་པ་ཆས༔ འབྱེད་མེད་རྒྱུད་ཀ་དག་ལས་ཡིད་ཀྱི་རླུང་གིས་ཕུལ༔ རིག་པ་

མི་རྟོག་རྩེ་གཅིག་ས་བོན་རྒྱུ་ལས༔ འཕེན་པའི་ཡེ་ཤེས་ཉིད་ཀྱིས་བསྐྱོད༔ མུན་འཁོརདང་སྣང་འདསམཚམས་ལྷུམས་སུ་ཞུགས༔ ཕ་ནི་མ་འགགས་པ་ཐབས་ཆ་སྟོང་པ་ཤེས་རབ་མ༔ ལྷུན་གྲུབ་སྟོང་པའི་ཡུལ་ལ་ཤར་སྤྱིའི་གཞི༔ དེ་ཚེ་རྐྱེན་བཞིའི་འཁྲུལ་འཁོར་ལས༔ འཛིན་པའི་རྒྱ་དང་བཅས་པར་གྱུར༔ རླུང་ཆུ་མེ་སའི་དངོས་པོ་ལས༔ རྟེན་དང་ཡུལ་གྱི་ཁྱད་པར་བྱུང་༔ གཟུགས་མེད་རྣམས་དང་འདོད་པ་ཡི༔ གནས་བཅུ་དག་ནི་མཐོ་རིསཐོག་མར་བྱུང་༔ གདུལ་བྱའི་དང་པོ་སྐལ་པ་དགའ་ལྡན་བརྩེགས་པ་ལ༔ སྐྱེ་དགུའི་ཚེ་ལོ་དཔག་མེད་དུས༔ སྐྱེ་བཞི་སེམས་ཅན་རིགས་རྣམས་ཀྱིས༔ ཤེས་པའི་རྟགས་འདི་འཛིན་པ་ལས༔ ས་ཆུ་རྫུས་སྐྱེས་ཀྱི་འབྱུང་བའི་དམིགས་རྟེན་ལས༔ བེམས་པོ་འབྱུང་བ་རང་དྲོད་སྐྱེས་པས་དག་ནི་འདོད་གཡོས་པས༔ ཆུ་ལ་དྲོད་ཕེབས་པའི་དུསམེ་ཡི་བདེ་བ་སྐྱེས༔ མེ་ལ་ཆུ་སྟེ་རླན་གྱིས་ཞདས་ལ་རླུང་གཡོ་བའི་ཆ༔ དེ་བཞིན་རླུང་དལ་གྱི་ལས་ལ་ས་བདེ་ཤར༔ དེའི་ཚེ་ལུས་རྫུས་ཏེ་དང་པོ་བེམས་པོའི་གཟུགས་གཉིས་རྫུས་སྐྱེས་སོ༔ རྫུས་ནས་ཤེད་བུ་དང་ཤེད་གྲོགས་སྒོང་སྐྱེས་ཟེར་ཏེ་མ་ཡིན་པར་རིན་པོ་ཆེའི་ཟིལ་པ་ལས་རྫུས་ཏེ་སྐྱེས་བུ་གདུལ་བྱ་ནི༔ མའི་རྒྱུ་རྐྱེན་ཉི་མ་རབ་ཏུ་སྣང་བྱེད་དང་༔ ཕའི་རྒྱུ་ཟླ་བ་དྲི་མེད་ཅེས་བྱ་འོ༔ ད་ནི་ལྟ་སྟངས་སྟོན་པ་ཡུལ་གསུམ་སྐྱེ་གནས་གདུལ་བྱ་ལ་གཟིགས་དང་བཅས༔ པདྨ་ཆུ་ཡི་སྙིང་པོ་ལས་སྐྱེས༔ དྲོད་ཕེབས་པམེ་ཡིས་བདེ་བ་བཟུང་ནས་འོངས༔ ཡུལ་ཤེས་པ་དྲོད་ཀྱི་འདྲེན་པའི་སྟོབས་ཀྱིས་དེ་དགའ་ལྡན་བརྩེགས་པར་གྲགས༔

ལོ་བརྒྱད་ས་བརྒྱད་ལ་དགོངས་མཛེས་པའི་ཟུར་ཕུད་ཅན་ལྔ་པར་རིགས་ལྔ་མཚོན་པ༔ དྲི་མ་མེད་པའི་བརྡར་ཁ་དོག་དཀར་བའི་ལུས་བླངས་སོ༔ འཁོར་བསྐལ་པ་བཟང་པོ་འདི་ལ་སངས་རྒྱས་སྟོང་འབྱུང་བའི་བརྡར་ནི་སངས་རྒྱས་སྟོང་ཕྲག་གཅིག༔ དེའི་བསྟན་པར་རེ་རེས་འདུལ་བའི་བརྡར་རང་རང་གདུལ་བའི་ཕྱག་རྒྱར་ལྡན༔ འདིས་འདུལ་བའི་གཉེན་པོ་གཉིས་སུ་འབྱུང་བའི་བརྡར་ཡིད་དང་སེམས་དང་འབྱུང་བའི་རྒྱུ༔ འབུམ་ཕྲག་དག་ནི་དྲུག་ཅུ་བཞི༔ འོད་ཐིག་ཡང་ཞུན་བཅུ་བདུན་ནི་རྒྱུད་བཅུ་བདུན༔ ནམ་མཁའ་འོད་སྣང་ཡེ་ཤེས་འབར༔ བསྟན་པའི་བུ་གཅིག་དགྲ་དང་བྲལ༔ ཡང་ཏིག་སྙིང་པོ་རྟགས་སུ་འོ༔ ཡུལ་གྱི་ཡོན་ཏན་མངོན་པར་བརྗོད༔ འདོད་འཇོ་དང་ནི་ཅང་ཤེས་རྟ༔ ཁྲུས་རྫིང་མ་བཏབ་ལོ་ཐོག་དང་༔ ལུས་ལ་གོས་མེད་གཅེར་བུ་ནི༔ རང་རང་འོད་དང་བཅས་པ་འོ༔ དེ་ལྟར་ཚེ་ལོ་དཔག་མེད་ནས༔ བརྒྱད་ཁྲི་དག་གི་བར་དག་ཏུ༔ སྟོང་སྟོང་གཉིས་ལས་ལོ་རེ་བྲི༔ དེ་ལྟར་བསོད་ནམས་རབ་ཟད་པས༔ ལུས་ཀྱི་འོད་སོགས་རིམ་གྱིས་ཡལ༔ ཉོན་མོངས་དག་ཀྱང་བགས་ཀྱིས་སྐྱེ༔ དེ་ནས་ཚེ་ལོ་བྱེ་བ་ལ༔ འབྱུང་བཞིའིསྒོ་ང་ལས་སྐྱེས་གཟུགས་དག་འབྱུང་འགྲོ་ན་ནམ་མཁར་བྱ་ལྟར་འགྲོ༔ འབྱུང་བ་ལྔ་ལས་སྐྱེས་པའི་གཟུགས༔ ས་རྡོ་འདུས་པའི་ཤ་གཟུགས་ས་ཡི་སྒོ་ང་ལས༔ ས་ལས་སྐྱེས་པའི་མི་ཤ་སླ་མགོ་ཆེ་ཁ་དོག་སེར༔ དྲོད་ཤས་མེ་ལས་སྐྱེས་པས་མེ་ལས་ཤ་སྐམ་ལྷུ་གཟུགས་ཕྱེད༔ དམར་པོ་ཡན་ལག་མཆེད་པར་འབྱུང་༔ མང་པོ་འདུས་པ་རླུང་ནི་མགོ་ཆུང་ཤ་མདངས་

གནག༔ ཆུའི་རླངས་འདུས་པའི་ཟིལ་པ་ལས་ཆུ་ནི་སྔོ་སངས་འཇིགས་པའི་གཟུགས༔ ནམ་མཁའ་ཡིད་འདུས་པའི་སྤྲིན་ལས་བྱུང་བ་མགོ་ཆུང་དཀར་པོའི་གཟུགས༔ འབྱུང་བ་ཀུན་ལ་ཡང་ལྔ་ལྔ་ཚང་པ་ལ་ཤས་ཆེ་ཆུང་ཡོད་པའོ་ལྔ་ལས་འབྱུང་བ་ཡི༔ སྒོ་ང་ལས་ནི་སྐྱེས་པ་སྟེ༔ དེ་ཚེ་ང་ནི་ལྟ་སྟངས་ཡུལ་གདུལ་བྱ་རྟེན་གསུམ༔ འབྱུང་ལྔ་འདུས་པའི་འོད་ལྔས་ཁྱབ་པ་སྒོ་ལྔ་ནི༔ ཡིད་འོང་དངས་མ་ཤིང་ཟིལ་ཚུལ་དུ་ཁ་དོག་ལྔ་ལྡན་པ༔ འབྱུང་ལྔ་རང་སྒྲ་མེའི་སྒྲ་བརླབ་པ་ཆུ་སྒྲ་གཤང་བས་སྒྲ་ཏིག་པརླུང་སྒྲ་ཆག་པནམ་མཁའ་སེང་བའོ་འདོད་གཡོས་པས༔ འབྱུང་བ་གྲང་བས་ཕ་ཡི་སྙིགས་མ་རྒྱུ༔ ཚ་བ་ལས་ནི་མ་ཡི་རྐྱེན་དངས་མ་རྒྱུ་རྐྱེན་དངས་མ་ཚ་བ་སྒོ་ངར་དྲིལ་འཛོམས་ནས་བདག་ལུས་རྫོགས༔ ལོ་བཅུ་དྲུག་གཟུགས་དང་ཁ་དོག་མཛེས་པའི་ཚུལ་དུ་འོངས༔ མདའ་གང་འོད་ཀྱིས་རངས་ལུས་བརྒྱན༔ ཆགས་པ་ཆགས་པས་འདུལ་བར་བྱེད་པས་ཤེས་རབ་ཆ་ལས་སྐྱེས་པ་ཡི༔ སངས་རྒྱས་པ་དེ་ཙམ་འབྱུང་བའི་བརྡ་མཁའ་འགྲོའི་ཚོགས་ནི་འབུམ་ཚོ་གཉིས༔ ཡུལ་ནི་འཇིག་རྟེན་མི་མཇེད་ཅེས༔ འབྱུང་བ་བཞི་ཡི་དངས་མ་དག་སའི་དངས་མ་ཞག་སོགས༔ ཟས་སུ་ཟ་ཞིང་ཉོན་མོངས་ཆུང་༔ ཤིང་ལོའི་གོས་ཅན་དབང་པོ་མེད༔ དེ་ནས་ལོ་ཡང་རིམ་གྱིས་བྲིས༔ ཉོན་མོངས་པའི་དབང་གི་འོད་སོགས་དག་ཀྱང་རིམ་གྱིས་ཉམས༔ བརྒྱད་བརྒྱ་ལོན་ཞིང་བརྒྱ་བརྒྱའམ་བརྟག་ཉིད་ལ་ལོ་རེ་བྲི༔ དེ་ནས་ཚེ་ལོ་འབུམ་པ་ལ༔ དེ་ལྟར་འབྱུང་ལྔའི་འདི་དག་ལས་ཀྱི་རླུང་གིས་བཏེག་ནས་འདོམ་གང་གི་སྟེང་དུ་འགྲོ་ལུས་ངག་ལས༔ འབྱུང་ལྔ་ནད་ཚ་གྲང་མ་སྙོམས་པ་སོགས་ཉོན་

མོངས་ཀྱི་རྒྱུ་ལས་བྱུང་༔ དྲོད་དང་གཤེར་ལས་ལུས་གཟུགས་གྲུབ༔ འབྱུང་ལྔའི་ས་བོན་ལངས་མེ་དྲོད་བསྡུས་ཏེ་ཆུས་རླན་རླུང་གིས་བསྐྱོད་ནམ་མཁས་འདྲེས་པ་ལས༔ གཟུགས་ནི་ཐ་དད་དུ་མར་བྱུང་༔ དེ་ཚེ་སྟོན་པ་བདག་ནི་དྲོད་བརླན་ལས༔ ལུས་བོངས་ལྡན་ཞིང་ཁ་དོག་ལྡན༔ ས་བརླན་སྡུད་པ་ཕ་རྒྱུད་རླུང་དྲོད་སྨིན་པ་མ༔ དེ་ལྟར་རྒྱུ་རྐྱེན་ལས་སྐྱེད་དོ༔ ཐབས་ཀྱི་རྒྱུ་ལས་བསྐྱེད་པའི་ཆགས་མེད་ལེ་ལོ་ཅན་འདུལ་ཕྱིར༔ བྱང་ཆུབ་སེམས་དཔའ་འབུམ་ཕྲག་འདི་དག་ཕ་རྒྱུད་ཀྱིས་ཚིམས་པར་བྱས་དྲུག༔ རིགས་ལྡན་འཁོར་གྱི་ཚུལ་དུ་བྱུང་༔ དེ་ཚེ་སེམས་ཅན་དེ་དག་ཀྱང་༔ ལྗོན་ཤིང་དག་ནི་ཟས་སུ་འོ༔ ལུས་འོད་ཆགས་གང་མུན་ཚད་མཐོང་༔ དེ་ནས་ཉོན་མོངས་བགས་སྐྱེས་ནས༔ དྲུག་བརྒྱ་དག་ལ་ལོ་རེ་བཞིན༔ ཚེ་ཡི་ལོ་ནི་ཁྲི་པ་དག༔ ལུས་ཀྱི་འོད་ཟད་ཉི་ཟླ་བྱུང་༔ འདོད་ཆགས་དུག་གི་འདོད་གཡོས་པས༔ ཕོ་མོའི་དབང་པོའི་སྒོ་ཡང་དོད༔ གོང་གི་དྲོད་རླན་རྒྱུ་ལས་ནི༔ ཁུ་དང་ཁྲག་གི་རང་བཞིན་ནི༔ འབྱུང་བ་ལྔ་ཡི་གཟུགས་ཅན་ནོ༔ བལྟས་པས་ཚིམ་པ་ལོ་བརྒྱ་ལ༔ དགོད་པ་དག་ནི་དྲུག་ཅུའི་བར༔ བརྒྱ་ཕྱེད་ལ་ནི་ལག་བཅངས་སོ༔ དེ་ནས་གཉིས་གཉིས་འཁྱུད་པ་འོ༔ དེ་ལས་ཁྱེ་འུ་བུ་མོའི་གཟུགས༔ ཀུན་ནས་རས་སམ་ཤིང་ཤུན་གྱོན༔ ཟས་སུ་ས་ཡི་ཚིལ་ཞག་ཟ༔ སེར་སྣའི་གསོག་འཇོག་དག་གིས་ནི༔ ཞག་རིམ་བླངས་པས་དེ་ཡང་ནུབ༔ དེ་ནས་ས་ལུའི་འབྲས་ཀྱང་སྤྱད༔ དེ་ལ་ང་དང་

བདག་བཟུང་བས༔ ང་རྒྱལ་དག་དང་ཞེ་སྡང་སྟེ༔ དེ་ཡིས་ཟས་ཀྱང་རིམ་གྱིས་ནུབ༔ སྟོང་ཕྱེད་དག་གིས་ལོ་རེ་བྲི༔ བརྒྱད་ཁྲི་དག་གི་དུས་ཀྱི་ཚེ༔ བདག་ནི་མངལ་སྐྱེས་གཟུགས་ཅན་ཏེ༔ ལྷ་དབང་མཆོག་རབ་གཙུག་ཕུད་དང་༔ འདོད་ཡུམ་བརྩེ་ལྡན་རྒྱུ་རྐྱེན་ལས༔ བུས་པ་དག་གི་གཟུགས་སུ་འོངས༔ དེ་ཚེ་སེམས་ཅན་དེ་དག་གི༔ འདོད་ཆགས་བཞི་ལས་བྱུང་བའི་གཟུགས༔ སྐྱེ་བ་བཞི་གཟུགས་ཐ་དད་སྟེ༔ བརྫུས་ནས་སྐྱེས་པ་ས་ཡི་གཟུགས༔ སྒོང་སྐྱེས་དྲོད་སྟེ་མེ་ཡི་གཟུགས༔ དྲོད་རླན་སྡུད་པ་ཆུ་ཡི་གཟུགས༔ མངལ་སྐྱེས་རླུང་གི་གཟུགས་སུ་འོ༔ དེ་ལྟར་སྐྱེ་བཞིའི་ལུས་ལེན་ཡང་༔ འབྱུང་བ་ཉིད་ལས་བསྐྱེད་པ་འོ༔ ཕལ་ཆེར་དྲོད་དང་གཤེར་ལས་སོ༔ ཐོག་མར་འབྱུང་བས་བསྐྱེད་པས་ན༔ ཐ་མ་འབྱུང་བས་འཇིག་པ་འོ༔ སུམ་ཅུ་རྩ་གསུམ་ཞེས་བྱ་བ༔ དགའ་དང་ལྡན་པའི་ཡུལ་དེ་རུ༔ གསོ་བར་བྱེད་པའི་སྨན་གྱི་མཆོག༔ སྐྱེད་པར་བྱེད་པ་སྨན་གྱི་མཆོག༔ སྐྱེད་པར་བྱེད་པས་གཞོན་ནུ་ལ༔ ཁྱད་པར་ཡིད་འོང་ལྡུམ་ར་དེར༔ ང་ནི་དྲུག་པ་རྡོ་རྗེ་འཆང་༔ བྱང་ཆུབ་སེམས་དཔའི་གཟུགས་སུ་འཁྲུངས༔ སངས་རྒྱས་འོད་སྲུངས་ལ་སོགས་ཏེ༔ རབ་ནི་བདུན་པོ་འཁོར་དུ་འོ༔ འབྲས་བུ་གསུམ་གྱི་ཟས་ཟོས་སོ༔ ལྷ་དབང་བརྒྱ་བྱིན་ཁངས་བཟངས་ཀྱི༔ ལྷོ་ཡི་ཕྱོགས་སུ་དེ་ལྟར་རོ༔ ལྷ་དབང་བརྒྱ་བྱིན་བཙུན་མོ་དང་༔ སུམ་ཅུ་རྩ་གཉིས་སྲས་བཅས་པས༔ ཉིད་དང་དྲག་པོ་ཡིད་བཞིན་དང་༔ ལྷ་མོར་བཅས་

པ་དེ་དག་གི༔ ཉོན་མོངས་ཟད་པར་བྱ་ཕྱིར་འོངས༔ དེར་ནི་བདུན་ཅུ་རྩ་ལྔ་ལོན༔ དེ་ནས་དོན་མེད་སྟོང་ཕྲག་བདུན༔ ཡང་ནི་བརྩེ་བའི་སེམས་སྐྱེས་ནས༔ ཉོན་མོངས་གདུག་རྩུབ་མཁའ་འགྲོའི་གནས༔ གསང་ཆེན་རོལ་པའི་དུར་ཁྲོད་དུ༔ གནོད་སྦྱིན་རཀྵ་སེང་གདོང་དང་༔ འདོད་པའི་དབང་མོའིལྷུམས་ནས་སྐྱེས༔ ཡིད་ཁྲོས་འཇིགས་པའི་གཟུགས་སུ་བྱས༔ གཞོན་ནུ་དཔའ་བོའི་སྟོབས་དང་ལྡན༔ འཁོར་ནི་བྱང་ཆུབ་སེམས་དཔའ་བདུན༔ མཁའ་འགྲོ་པུརྣ་ཉེར་ཞི་དང་༔ ཚངས་པ་ཉིད་ནི་དུང་གི་མགྲིན༔ དྲང་སྲོང་ཟླ་འོད་གཞོན་ནུ་དང་༔ སེང་གེའི་གདོང་ཅན་ལ་སོགས་ཏེ༔ འདི་དག་གདུལ་བའི་ཡུལ་དུ་བྱས༔ ཚེ་ལོ་དྲུག་ཁྲིའི་དུས་སུ་འོ༔ དེ་ནས་སྟོང་དུ་བསྟན་པ་བཙུགས༔ དེ་ནས་མྱ་ངན་འདའ་ཚུལ་སྟོན༔ དེ་ལྟར་རིམ་པ་གཉིས་ལྡན་ནོ༔ དེ་འོག་ཏིང་འཛིན་བུམ་ཕྲག་གཅིག༔ ཚེ་ལོ་སྟོང་གི་དུས་དག་ཏུ༔ སྲིན་པོ་པུརྣའི་ཡུལ་དུ་ཡང་༔ སྲིན་པོར་རཀྴ་ཁྲོ་གདོང་དང་༔ སྲིན་མོ་ཤམ་ཤམ་ནག་མོའི་བུར༔ ང་ནི་དྲང་སྲོང་ཁྲོས་པར་འོངས༔ འཁོར་ནི་སྲིན་པོ་བྱེ་བ་གཅིག༔ དེ་དག་ཞི་ལྡན་སེམས་ལ་བཀོད༔ དེ་དོན་སྟོང་ཕྲག་གཉིས་ཀྱི་བར༔ དེ་ནས་མྱ་ངན་འདའ་བའི་ཚུལ༔ སྟག་སྤྱང་ཁྲོས་པའི་རི་ལ་འོ༔ ཏིང་འཛིན་དག་ལ་འབུམ་ཕྲག་ཕྱེད༔ དེ་ནས་ལྷོ་ཕྱོགས་འཛམ་གླིང་རྒྱན༔ ཉན་ཐོས་རྣམས་དང་ཡིད་འདྲེས་ཕྱིར༔ རྒྱལ་པོ་ཛ་རི་ཞེས་བྱ་བའི༔ ཁབ་ཀྱི་

ལྷོ་ནས་རྒྱང་གྲགས་གཅིག༔ བྱ་རྒོད་སྤུངས་པ་ཞེས་བྱ་བའི༔ རི་འདིར་ང་ནི་ད་ལྟ་འོ༔ ཚེ་ལོ་དག་ནི་སྟོང་ཕྱེད་ལ༔ རིགས་ལྡན་རྒྱལ་རིགས་དག་གི་བུ༔ རྒྱལ་པོ་སེང་གེ་བཟང་པོ་དང་༔ མཛེས་མ་འོད་ལྡན་ཡུམ་གྱི་ལྷུམས༔ ང་སྐྱེས་སྐྱེས་བུ་ལུས་ཤེད་ཅན༔ འཕངས་དང་སྒྱུ་རྩལ་ཀུན་ལ་མཁས༔ ཉི་ཤུ་རྩ་ལྔ་དག་ན་ནི༔ ནུབ་ཕྱོགས་བསགས་པའི་མཆོད་རྟེན་རྩར༔ རང་གིས་རང་བྱུང་རབ་ཏུ་བྱུང་༔ ཁ་དོག་ངུར་སྨྲིག་གོས་གྱོན་ཏེ༔ ཉན་ཐོས་རྣམས་ཀྱི་གདུང་བ་བཅད༔ དེ་ནས་འདི་ནས་བྱང་གི་ཕྱོགས༔ འབྲས་བུ་ཡོངས་སུ་རྫོགས་པ་ཡི༔ བྱང་ཆུབ་སྙིང་པོའི་ཤིང་ཅན་དུ༔ ལོ་ནི་བརྒྱ་དང་ཉི་ཤུ་རུ༔ བྱང་ཆུབ་སེམས་དཔའི་གདུང་བ་བཅད༔ དེ་འོག་ད་ལྟ་ཕུང་པོའི་རིར༔ བདུན་ཅུ་རྩ་གཉིས་བར་དུ་ནི༔ ཉན་ཐོས་བྱང་ཆུབ་སེམས་དཔའ་ཡི༔ གདུང་བ་བཅད་ཕྱིར་འདི་ལྟར་རོ༔ བྲམ་ཟེ་དག་ནི་མཚན་བཟང་དང་༔ དགེ་སློང་མ་ནི་པདྨའི་སྤྱན༔ གདུལ་ཡུལ་ཡོན་བདག་འདི་དག་གོ༔ དགྲ་བཅོམ་བདུན་གྱི་འཁོར་སྣང་བ༔ ཐོག་མའི་སངས་རྒྱས་བདུན་ལ་སོགས༔ དཀྱིལ་འཁོར་གཅིག་བསྡུས་འཁོར་ཡིན་ནོ༔ ད་ལྟ་ཚེ་ལོ་སུམ་བརྒྱ་ལ༔ གདུལ་བྱ་ཉོན་མོངས་རྣམས་བཅད་ཕྱིར༔ འོད་སྲུང་བསྒྲེས་པོ་ཞེས་བྱ་བ༔ རྒས་པའི་སྡུག་བསྔལ་ཞི་བྱའི་ཕྱིར༔ དགེ་སློང་རྡོ་རྗེ་འཛིན་པ་འོ༔ ད་ནི་འདི་ནས་ནུབ་བྱང་མཚམས༔ རྡོ་རྗེ་གདན་དྲུང་བྱང་ཆུབ་གནས༔ བྱང་ཆུབ་ཤིང་ལ་རྒྱབ་གཏད་ནས༔ སྲོད་ལ་བདུད་ཀྱི་དཔུང་རྣམས་བཏུལ༔ ནམ་ཕྱེད་ཏིང་

འཛིན་མཉམ་བཞག་ནས༔ སྐྱ་རེངས་དག་ནི་ཤར་བ་ལ། ང་ནི་མྱ་ངན་འདའ་ཚུལ་སྟོན༔ ངས་ནི་ཐོག་མ་དེ་ལྟར་དུ༔ བརྫུས་དང་སྒོ་ང་དྲོད་དང་བརླན༔ མངལ་ལས་སྐྱེས་པའི་གཟུགས་དང་ནི༔ རིམ་པས་སེམས་ཅན་ཉིད་དང་བསྟུན༔ དེ་ལྟར་སྤྲུལ་ནས་དོན་བྱས་སོ༔ བཀོད་པ་ཆེན་པོ་འབུམ་ཚོ་དྲུག་གི་བདག་ཉིད་ལས༔ དུས་གསུམ་སངས་རྒྱས་དགོངས་པས་བརྒྱུད་པའི་དོན་ཚིག་ཅེས་བྱ་བ་རྫོགས་སོ༔ ཨྠྀི༔ རྒྱ་རྒྱ་རྒྱ༔ ༔༈དེ་ནས་ཉིད་ཀྱི་སྐུ་དང་གསུང་དང་ཐུགས་ལས་བྱུང་བའི་ལོ་རྒྱུས་ཞེས་བྱ་བ་རྣམ་པར་སྤྲོས་སོ༔ ཚེ་དང་ལྡན་པ་ཁྱོད་ཉོན་ཅིག༔ ང་ནི་བརྫུས་ནས་སྐྱེས་པའི་ཚེ༔ ཁྱེ་འུ་གཞོན་ནུ་འཁྲུལ་མེད་ལ༔ འཇིགས་རྟེན་ཉི་མས་རབ་དགང་ཕྱིར༔ རྒྱུད་ཀྱི་རྒྱལ་པོ་ཐལ་འགྱུར་ཏེ༔ ནམ་མཁའ་མི་འབྱེད་བར་སྣང་ནས༔ ཀ་ལ་པིང་ཀའི་མཆུས་བསྒྱུར་ནས༔ འགྲོ་བ་འདུལ་ཕྱིར་འདི་དག་བསྟན༔ འདི་ནི་བསྟན་པ་འབྱུང་བའི་འགོ༔ ང་ནི་སྒོ་ང་ལས་སྐྱེས་ཚེ༔ སྐུ་དང་གསུང་དང་ཐུགས་ཀྱི་རྒྱུད༔ ཡོན་ཏན་ཕྲིན་ལས་རྒྱུད་ལྔ་ནི༔ འབྱུང་བ་འགྱུར་བའི་བར་དག་ནས༔ འབྱུང་བའི་རང་སྒྲ་དག་གིས་བསྒྱུར༔ དེས་ནི་སེམས་ཅན་ལུས་སོགས་གྲོལ༔ ང་ནི་དྲོན་བརླན་ལས་སྐྱེས་ཚེ༔ དོང་སྤྲུག་རྨ་བྱ་མཇིང་བསྣོལ་དང་༔ འབྱུང་བ་ཟད་པའི་རྒྱུད་རྣམས་ནི༔ བར་སྣང་གཟུང་དང་བྲལ་བ་ལས༔ རླུང་གི་སྒྲ་ལས་དྲངས་ཏེ་བསྒྱུར༔ འདིས་ནི་འདོད་པའི་ཞེན་ཆགས་གཅོད༔ དེ་ནས་སུམ་ཅུ་རྩ་གསུམ་གྱི༔

རྣམ་པར་རྒྱལ་བའི་ཁང་བཟངས་སུ༔ རིགས་དྲུག་ཉོན་མོངས་གདུང་བཅད་ཕྱིར༔ གདུང་བ་སེལ་བའི་དམ་ཆོས་དྲུག༔ བློ་རིམ་གཉིས་སུ་སྣང་བའི་ཕྱིར༔ རྩོལ་སྒྲུབ་འབད་པས་གྲོལ་བ་དང་༔ འབད་མེད་རང་སར་གྲོལ་བ་གཉིས༔ འབད་བཅས་དག་ནི་ཚིག་གི་དོན༔ འབུམ་ཚོ་གཉིས་སུ་རྣམ་བཤད་དོ༔ དེ་ཡང་རྒྱས་པ་འབུམ་དང་གཅིག༔ བཞི་ཁྲི་སྟོང་ཕྲག་བརྒྱད་དུ་བསྟན༔ འབད་མེད་ཡོངས་སུ་བཤད་པ་དང་༔ ཀུན་གསལ་དང་ནི་རིགས་གསུམ་རྒྱུད༔ རྣམ་པར་ཕྱེ་སྟེ་བསྟན་པ་འོ༔ དེ་ནས་དུར་ཁྲོད་གསང་ཆེན་དུ༔ ཤེས་རབ་ཆགས་པ་ཅན་དག་ལ༔ འདོད་ཆགས་ཉིད་ཀྱིས་འདུལ་བའི་ཕྱིར༔ མ་ཡི་རྒྱུད་ནི་བྱེ་བ་གཉིས༔ ཆགས་པ་ཅན་གྱི་དོན་དུ་བསྟན༔ ཐབས་ཀྱིས་སྐྱེས་པ་འདུལ་བའི་ཕྱིར༔ ཕ་ཡི་རྒྱུད་ནི་བྱེ་བ་དགུ༔ སྐྱེས་པ་རྣམས་ཀྱི་དོན་དུ་གསུངས༔ མ་ཡི་རྒྱུད་ལས་རྣམ་བསྡུས་པ༔ འབུམ་ཚོ་ལྔ་ཡི་བདག་ཉིད་དོ༔ ཕ་ལས་ཁྱད་པར་རྣམ་སྡུད་པ༔ གསང་མཆོག་བླ་ན་མེད་པ་ཡི༔ བཀོད་པ་གསང་བའི་རྒྱུད་རྣམས་བསྟན༔ དེ་ནས་སྲིན་པོའི་ཡུལ་དག་ཏུ༔ རགས་པ་འདུལ་བའི་རྒྱུད་བཅུ་བསྟན༔ སོག་པོའི་ཡུལ་དུ་ཕྲ་རྒྱུད་བདུན༔ འདིར་ནི་མདོ་སྡེ་འབུམ་ཕྲག་ནི༔ ཉི་ཤུ་རྩ་ལྔ་ཉིད་དུ་བསྟན༔ སྔགས་ནི་ཁྲི་ཕྲག་གཉིས་སུ་བསྟན༔ ལུང་ནི་ཁྲི་ཕྲག་ཕྱེད་དང་བརྒྱད༔ དེ་ལྟར་རྣམ་པར་ཕྱེ་བ་འོ༔ ཞེས་བཀོད་པ་ཆེན་པོ་འབུམ་ཚོ་དྲུག་གི་བདག་ཉིད་ལས༔ བསྟན་

པའི་ཆོས་ཇི་ལྟར་གསུངས་པའི་དོན་ཚིག་བསྟན་པ་སྟེ་གཉིས་པའོ༔ རྫོགས་སོ༔ རྒྱ་རྒྱ་རྒྱ༔ ༔དེ་ནས་རྡོ་རྗེ་ཆེན་པོ་རྣམ་པར་རོལ་བ་ཞེས་བྱ་བའི་ཚིག་དག་རྣམ་པར་སྤྲོས་སོ༔ དེ་ལྟར་བསྟན་པའི་ཆོས་རྣམས་ལ༔ ཤད་ནི་བརྒྱད་ཀྱིས་གཅིག་བྱས་པའི༔ བརྒྱད་འགྱུར་བཅུ་ཕྲག་འབུམ་ཕྲག་འགྱུར༔ དེ་རྫོགས་ཚིག་རྣམས་རྣམ་ཕྱེ་བས༔ གསལ་བྱེད་སྒྲོན་མའི་རིམ་པ་འོ༔ སྟོང་པ་ཉིད་ནི་མཚོན་པ་ཡི༔ རིམ་དང་རིམ་མིན་ཕྱེ་ནས་བསྟན༔ འདི་རྫོགས་ཆོས་གྱི་འཁོར་ལོ་འོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ གཅད་པར་བྱ་བ་འབྲས་བུའི་དོན་ཚིག་བསྟན་པ་སྟེ་གསུམ་པ་རྫོགས་སོ༔ ཨྠྀི༔ རྒྱ་རྒྱ་རྒྱ༔ ༔དེ་ནས་ཉིད་ཀྱི་སྐུ་དང་གསུང་དང་ཐུགས་ལས་སྡེ་རྣམ་པར་འབྱེད་པའི་ཞེས་བྱ་བའི་ཚིག་རྣམ་པར་ཕྱུང་ངོ་༔ ཀྱེ་ཀྱེ་ཉོན་ཅིག་དགེ་སྦྱོང་ཁྱོད༔ རིགས་ལྡན་རིགས་བུ་ཤཱ་རིའི་བུ༔ རྫུ་འཕྲུལ་མཆོག་དང་ལྡན་པ་ཉོན༔ ངས་བསྟན་པ་ཡི་ཆོས་རྣམས་ནི༔ སེམས་ཅན་བློ་ཡི་རིམ་པ་ལས༔ ཆེ་དང་ཆུང་བའི་ཁྱད་པར་གྱིས༔ རིམ་པ་གཉིས་ཀྱི་ཚུལ་དུ་བསྟན༔ རང་རང་ལྟ་དང་སོར་གཞག་གོ༔ རང་རང་ཉིད་ནི་རིམ་པ་གཉིས༔ ཕྱིན་ཅི་ལོག་དང་ཡང་དག་ལྟ༔ ལོག་པར་རྟོགས་པས་འཁོར་ལ་གནས༔ ཡང་དག་པ་ནི་རིམ་གསུམ་སྟེ༔ ཆུང་བའི་བློ་དང་ཆེན་པོ་ལ༔ དེ་བཞིན་འབྲིང་པོའི་བློ་ཅན་ལའོ༔ རིམ་པ་གསུམ་གྱི་ཚུལ་དུ་བསྟན༔ ཆུང་བའི་རིམ་པ་རྣམ་གསུམ་སྟེ༔ དེ་ཡི་བློ་དང་མཐུན་པའི་ཆོས༔

རྟོག་པས་སྦགས་ལ་ཉན་ཐོས་ཏེ༔ འདུ་ཤེས་ཅན་ལ་རང་རྒྱལ་ཉིད༔ རྟོག་འཇུག་ཅན་ལ་བྱང་སེམས་སོ༔ འབྲིང་པོ་གསུམ་ལ་བསྟན་པ་ནི༔ རབ་ཏུ་དམན་ལ་བྱ་བ་སྟེ༔ དམན་པ་རྣམས་ལ་སྤྱོད་པ་འོ༔ རྣམ་ཤེས་ཅན་ལ་རྣལ་འབྱོར་ཉིད༔ ཆེན་པོ་རིམ་ལྡན་གསུམ་དག་ལ༔ སེམས་ཡས་པ་ལ་བསྐྱེད་པ་སྟེ༔ སེམས་བཅུད་ཅན་ལ་རྫོགས་པ་འོ༔ མཆོག་གསང་རབ་ལ་རྫོགས་པ་ཆེ༔ དེ་ཡི་རྣམ་པར་དབྱེ་བ་ནི༔ འོན་ཀྱང་དེ་འདས་འོག་དག་ཏུ༔ འདི་ལྟར་རྣམ་པར་སྣང་བར་འགྱུར༔ ཡིད་ཅན་རྣམས་ལ་སེམས་ཀྱི་སྡེ༔ ནམ་མཁའ་ཅན་ལ་ཀློང་གི་སྡེ༔ རིམ་རྩོལ་བྲལ་ལ་མན་ངག་གོ༔ དེ་ལྟར་རྫོགས་ཆེན་ཨ་ཏི་ལ༔ འབུམ་ཕྲག་དྲུག་ཅུ་རྩ་བཞི་ལས༔ སེམས་སྡེ་ཉི་ཤུ་རྩ་གཅིག་སྟེ༔ ཀློང་ནི་ཉི་ཤུ་གཉིས་ཡིན་ནོ༔ མན་ངག་ཉི་ཤུ་རྩ་གཅིག་པ༔ དེ་ལས་རྒྱུད་སྡེ་རིམ་གསུམ་ལ༔ ཕ་དང་མ་དང་མ་ནིང་ངོ་༔ ཨ་ཏི་ཕ་རྒྱུད་ཆེན་པོ་ནི༔ བཀོད་པ་ཆེན་པོ་གསང་བའི་རྒྱུད༔ འབུམ་ཕྲག་དྲུག་པ་འདི་ཉིད་དོ༔ མ་རྒྱུད་འབུམ་ཕྲག་བཅུ་གསུམ་ལ༔ མ་ནིང་དག་ནི་རྣམ་པ་གཉིས༔ འདིར་ནི་ཕ་མ་མ་ནིང་གསུམ༔ རྣམ་པར་བསྡུས་ནས་གཅིག་ཏུ་སྟེ༔ དེ་ཡི་དོན་ཚིག་རྣམ་སྤྲོས་པས༔ སྤྲོས་བཅས་རྣམས་ལ་བཞི་ཉིད་སྟེ༔ སྤྲོས་མེད་རྣམ་གྲངས་བཅུ་བདུན་ནོ༔ ཤིན་ཏུ་སྤྲོས་པ་མེད་པ་ནི༔ རྡོ་རྗེ་བཀོད་པ་ཉིད་ཡིན་ནོ༔ རབ་ཏུ་སྤྲོས་དང་བྲལ་བ་ལ༔ འདས་རྗེས་གསུམ་གྱིས་

གྲོལ་པ་ཡིན༔ གལ་ཏེ་ཚིག་ལ་རབ་འཛིན་ན༔ ཐིག་ལེའི་རྒྱུད་ནི་སུམ་ཅུ་དགུ༔ འདི་དག་རྣམས་ནི་ངས་བསྟན་པས༔ དེ་དག་རྣམས་ལ་ཡིད་ཆེས་བྱ༔ བཅོ་ལྔ་གསུམ་ཕྱེད་མིང་རྒྱུད་ལ༔ ཁྲི་ཕྲག་གཉིས་དང་སྟོང་ཕྲག་ལྔ༔ ཐིག་ལེ་མཆོག་གི་རྒྱུད་རྣམས་སོ༔ ཁྱད་པར་མཆོག་ཏུ་གསང་བའི་རྒྱུད༔ བསྟན་པ་འཛིན་སྐྱོང་བསྲུང་བ་ཡི༔ རིམ་གསལ་སྙིང་དང་འདྲ་བའི་རྒྱུད༔ རྣམ་པ་བཅོ་བརྒྱད་དག་བསྟན་ལ༔ སྟོང་ཕྲག་དག་ནི་བཅུ་བདུན་ཡིན༔ བསྟན་པ་ཀུན་གྱི་བུ་གཅིག་པོ༔ བརྒྱ་ཕྲག་གཉིས་དང་ཕྱེ་དང་བརྒྱད༔ སྡེ་དང་ལུང་རབ་དེ་ལྟར་སྣང་༔ འདི་ནི་མཆོག་ཏུ་གསང་བ་ལས༔ ཀུན་གྱི་སྤྱོད་ཡུལ་མ་ཡིན་པས༔ འབྱུང་བའི་དགྲ་བྲལ་སངས་རྒྱས་འཛིན༔ འདི་ལས་སྡེ་བཞི་དག་ཏུ་འཕྲོ༔ ནམ་མཁའ་ཉིད་ལ་འཕར་བ་དང་༔ ས་རྣམས་ལ་ཡང་ཐོགས་མེད་འགྱུར༔ དེས་ནི་སངས་རྒྱས་གདུང་འཛིན་པའོ༔ དེ་ལྟར་ངས་བསྟན་རྒྱུད་ཆེན་རྣམས༔ བརྫུས་སྐྱེས་དུས་ཀྱི་བྱིན་བརླབསལ༔ སྒོང་སྐྱེས་ཐར་པའི་རྒྱུད་ཙམ་མཚོན༔ དྲོད་སྐྱེས་ལ་ནི་དྲང་བའི་དོན༔ མངལ་སྐྱེས་དགའ་ལྡན་ཡུལ་དག་ཏུ༔ འགའ་ཞིག་སྟོངས་པར་གཏན་ལ་ཕབ༔ ཁ་ཅིག་དེ་བས་ཉེ་བར་བསྟན༔ དུར་ཁྲོད་ཉིད་དུ་རྣམ་བཤད་པ༔ ཕོ་མོ་མ་ནིང་རྣམས་ཀྱི་དོན༔ སྣ་ཚོགས་ཐབས་ཀྱིས་མཚོན་ནས་བསྟན༔ ཁྱད་པར་མཆོག་གསང་ཟབ་པར་བསྟན༔ འདིར་ནི་དྲང་ཞིང་འདུལ་བར་བསྟན༔ ངེས་པའི་སྙིང་པོ་

འགའ་ཙམ་མོ༔ སྲིན་པོའི་ཡུལ་དུ་ཞི་རྒྱས་དབང་༔ ཚར་གཅོད་དོན་དུ་མངོན་སྤྱོད་བསྟན༔ སོག་པོའི་ཡུལ་དུ་སེམས་རྒྱུད་བཅད༔ དེ་ལྟར་རྒྱུད་རྣམས་རབ་ཕྱེ་བ༔ སེམས་ཅན་རྣམས་ཀྱི་དོན་དུ་སྟེ༔ དེ་ཡི་དོན་རྣམས་རྒྱ་ཆེ་བས༔ བསྟན་པའི་ལུགས་ནི་རྣམ་པ་གསུམ༔ ཇི་ལྟར་སྐས་ཀྱི་རིམ་པ་བཞིན༔ དབང་པོའི་དོན་དུ་བསྟན་པ་དང་༔ འོ་མ་ལས་ནི་མར་བཞིན་དུ༔ བསྡུ་བའི་དོན་དུ་བསྟན་པ་དང་༔ ཚ་བའི་ནད་ལ་ག་བུར་བཞིན༔ གཉེན་པོའི་དོན་དུ་བསྟན་པ་འོ༔ དབང་བའི་དོན་དུ་བསྟན་པ་ནི༔ རིམ་དགུ་བློ་དང་བསྟུན་ནས་ནི༔ ཆེ་ལོངས་དང་ནི་ཞིབ་ཚེགས་སོ༔ བསྡུ་བ་བརྒྱད་ཁྲི་བཞི་སྟོང་ལས༔ སྡེ་བཞིར་དག་ཏུ་རྣམ་པར་བསྡུས་༔ གཉེན་པོ་སེམས་ཅན་རང་རྒྱུད་ལ༔ ཉོན་མོངས་བརྒྱད་ཁྲི་བཞི་སྟོང་སྟེ༔ དེ་ཡི་སྙིང་པོར་ཆོས་ཀྱང་ངོ་༔ དེ་ལྟར་བཤད་པའི་སེམས་ཅན་གྱི༔ རང་རྒྱུད་བཅིངས་པ་དག་ལས་གྲོལ༔ ཚིག་གིས་མཚོན་པའི་རྒྱུད་རྣམས་ནི༔ སྡེ་དང་འབུམ་ཚོ་གྲངས་སུ་བཅད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པའི་ཆོས་རྣམས་ཀྱི་སྡེ་དང་གྲངས་གཏན་ལ་ཕབ་པ་སྟེ་བཞི་པ་རྫོགས་སོ༔ ཨྠྀི༔ རྒྱ་རྒྱ་རྒྱ༔ ༔དེ་ནས་དམ་ཚིག་རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ལས་ལངས་ཏེ༔ འདི་སྐད་ཅེས་ཆེད་དུ་བརྗོད་དོ༔ དེ་ལྟར་བསྟན་པ་སྙིང་པོ་བཀོད་པའི་དོན༔ རྒྱ་ཆེ་རབ་ཏུ་སྤྲོས་ཏེ་བསྡུས་པ་དང་༔ མཆོག་ཏུ་བསྡུས་དང་ཤིན་ཏུ་རབ་བསྡུས་པས༔ སེམས་ཅན་

བློ་ཡི་གདུང་བ་ལས་གྲོལ་ཏེ༔ སྟོང་པ་ཆེན་པོའི་ངང་དུ་མཚོན་པའི་ཕྱིར༔ ཚེག་བར་བདུན་གྱི་རྣམ་པར་བཅད་པ་འདི༔ ཤྭ་ལོ་འབུམ་ཚོའི་གྲངས་དང་ཚིག་དུ་བཅད༔ ཉི་ཤུ་བརྒྱད་ལ་ཤ་ལོ་གཅིག་ཏུ་བསྟན༔ དེ་ཉིད་གོང་ནས་གོང་དུ་བགྲངས་པ་ཡིས༔ འབུམ་དང་བྱེ་བ་ས་ཡ་རྒྱ་ཆེར་འགྱུར༔ སྙིགས་མ་དུས་ཀྱི་མཐའ་ལ་དགོས་སྲིད་པས༔ རབས་བདུན་བསྟན་པ་སྨིན་པར་བྱ་བའི་ཕྱིར༔ ཚེག་བར་བདུན་གྱིས་རྣམ་པར་བཅད་ནས་བསྟན༔ རྒྱུད་ཀྱི་གཞུང་ལ་ཕྲི་གཞུག་མི་བྱའི་ཕྱིར༔ འདི་ནི་སྙིང་པོའི་དོན་དུ་བཀོད་པ་འོ༔ ཞེས་བཀོད་པ་ཆེན་པོ་འབུམ་ཚོ་དྲུག་པ་ལས༔ ཚིགས་སུ་བཅད་པའི་དོན་བསྟན་པ་སྟེ་ལྔ་པ་རྫོགས་སོ༔ རྒྱ་རྒྱ་རྒྱ༔ ༔དེ་ནས་ཉིད་ཀྱིས་རྒྱུད་རྣམ་པར་འབྱེད་པ་ཞེས་བྱ་བའི་ཏིང་ངེ་འཛིན་ལས་བཞེངས་ནས༔ ཡང་ཆེད་དུ་བརྗོད་པའི་འདི་བརྗོད་དོ༔ ཨེ་མ་ཧོ༔ བཀའ་གསང་ངེས་པའི་སྙིང་པོ་དོན་རྣམས་ནི༔ ཤིན་ཏུ་རྒྱ་ཆེ་གྲངས་སུ་ཆོད་པ་ལས༔ འབུམ་ཕྲག་ཉིད་ནི་དྲུག་ཅུ་རྩ་བཞི་ལ༔ ལེ་འུ་འབུམ་ཕྲག་གསུམ་དང་ལྡན༔ ཡང་དག་ངེས་པའི་སར་བསྒྲལ་ཕྱིར༔ རྣམ་པར་བཀོད་ནས་ང་ཡིས་བསྟན༔ དེ་ནས་མཆོག་ཏུ་བསྡུས་པ་ནི༔ ཁྲི་ཕྲག་གཉིས་དང་སྟོང་ཕྲག་ལྔའོ༔ དེ་ཉིད་རྣམ་པར་བཤད་པའི་རྒྱུད༔ བསྐྱེད་དང་བསྡུས་དང་གནས་པ་དང་༔ གསལ་དང་བྱམས་དང་ཉིད་དང་ནི༔ གསུམ་བཞི་དྲུག་དང་ཡང་གཉིས་དང་༔ བཤད་དང་རྫོགས་

དང་སྤུངས་པ་འོ༔ དེ་ཉིད་ལས་ནི་ཤིན་དུ་གསང་༔ ཡང་གབ་སྦས་པའི་གསང་ཚིག་ལ༔ སྟོང་ཕྲག་དག་ནི་བཅུ་བདུན་ནོ༔ དེ་དོན་རབ་ཏུ་གསང་བ་ནི༔ བབས་དང་རྟོགས་པར་བྱེད་པའོ༔ དེ་དོན་སྙིང་པོའི་རྒྱུད་རྣམས་ནི༔ གཉིས་དང་གཉིས་འབྲེལ་ཡང་གཉིས་དང་༔ དེ་ཡི་ཡང་གསུམ་དོན་རྣམས་ལ༔ དེ་ནི་བསྡུས་པ་གསུམ་ཡིན་ནོ༔ དེ་ལས་རྣམ་པར་རབ་སྤྲོས་པས༔ རྩ་བ་བརྒྱད་ཀྱི་ཚུལ་ལས་ནི༔ གོ་རིམ་འཇུག་ཕྱིར་རྣམ་བཤད་པ༔ བསྐྱེད་དང་བཤད་པ་ཡན་ལག་དང་༔ ལུང་དང་མན་ངག་དགོངས་པ་དང་༔ འཇུག་དང་མཁས་པ་ཆོ་ག་ཡིས༔ བསྟན་པ་འཛིན་དང་སྐྱོང་དང་བསྲུང་༔ སྤྲོས་པ་བཅོ་བརྒྱད་ཚུལ་དུ་བྱུང་༔ གུ་ཧྱ་བསྟན་པའི་བུ་གཅིག་པོ༔ སྙིང་པོ་ཡང་གསང་རབ་ཏུ་གསང་༔ འདི་དག་རྣམས་ནི་རབ་ཏུ་བསྡུས༔ དེ་ཡི་དོན་རྣམས་རྒྱ་ཆེར་བཀོད་པ་ལས༔ སྙིང་པོ་ངེས་པའི་ལུང་ནི་འདི་དག་གོ༔ འདི་དག་རྟག་ཏུ་གོམས་པར་གང་བྱེད་པ༔ དམ་པ་རྣམས་ཀྱི་གསང་ཆེན་འདི་ཡིས་ཐོབ༔ ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ གསང་བ་སྙིང་དང་འདྲ་བའི་རྒྱུད་རྣམས་བསྡུས་ཏེ་རྣམ་པར་བསྟན་པ་སྟེ་དྲུག་པ་རྫོགས་སོ༔ རྒྱ་རྒྱ་རྒྱ༔ ཨྠྀི༔ ༔དེ་ནས་ལུང་བསྟན་རྗེས་སུ་འཛིན་པ་ཞེས་བྱ་བའི་ཏིང་ངེ་འཛིན་ལས་བཞེངས་ནས་སྐུ་གསུང་ཐུགས་རྡོ་རྗེ་བཀོད་པ་ཆེན་པོ་ལས༔ འདི་སྐད་ཆེད་དུ་བརྗོད་དོ༔ ཀྱེ་ཤཱ་རིའི་བུ་ཉིད་དང་ལྡན་པ༔ འདི་ཉོན་རིགས་ཀྱི་བུ་ཁྱོད་ཟུང་༔

ང་ནི་འདི་ནས་མི་གནས་ཚེ༔ ཕྱི་རབས་ང་ཡི་བསྟན་པ་འདི༔ སྙིང་པོ་ཡང་ནས་ཡང་བསྡུས་པ༔ ངེས་གསང་མཆོག་གི་སྙིང་པོའི་རྒྱུད༔ འདི་དག་རྣམས་ཀྱིས་འཛིན་པར་འགྱུར༔ ང་ནི་འདི་ནས་མི་གནས་ནས༔ སུམ་བརྒྱ་དང་ནི་དྲུག་ཅུ་ན༔ ནུབ་ཕྱོགས་ཨོ་རྒྱན་དག་གི་ཡུམ༔ དྷ་ན་ཀོ་ཤ་ཞེས་བྱ་བར༔ ཐབས་ཀྱི་ཆ་མེད་ཤེས་རབ་ལས༔ ཨུ་པ་རཱ་ཙ་ཞེས་པ་དང་༔ སྣང་བ་གསལ་བའི་འོད་ལྡན་ཡུམ༔ གཉིས་ལས་བསྐྱེད་པ་ཆོས་ཀྱི་སྡེའི༔ ལྷུམས་སུ་ཕ་ཡི་རྒྱུ་མེད་ཞུགས༔ ཆོས་ཀྱི་སྡེ་ཡི་རྨི་ལམ་དུ༔ ཤེལ་ལས་གྲུབ་པའི་མི་དཀར་ནི༔ གཟུགས་དང་ལང་ཚོ་ལྡན་པ་ཞིག༔ ཤེལ་ཀྱི་བུམ་པ་འོད་འབར་བ༔ ཡི་གེ་ལྔ་དང་བཅས་པ་ཐོགས༔ སྤྱི་བོའི་སྟེང་དུ་བཞག་པ་རྨི༔ དེ་ནས་དུས་ཚོད་རྫོགས་པ་ལ༔ ངེས་པའི་སྙིང་པོ་འདི་འཛིན་པའི༔ ཁྱེ་འུ་བདེ་བའི་བག་ལྡན་པ༔ སངས་རྒྱས་ཀུན་གྱི་ཐུགས་ཀྱི་སྲས༔ དེ་མིང་བཛྲ་པྲ་ཧེ་ཞེས༔ མི་ལུས་རྣམ་དག་སེམས་ཅན་འབྱུང་༔ དེས་ནི་བསྟན་པ་འདུལ་བ་ཡི༔ ཐབས་ནི་རྣམ་པ་དུ་མ་ཡི༔ མཛད་པ་དག་ནི་སྤྲོས་བྱས་ནས༔ ལོ་ནི་སུམ་ཅུ་རྩ་གཉིས་ན༔ ང་ཡིས་བསྟན་པའི་ཆོས་རྣམས་ནི༔ མ་ལ་ཡ་ཡི་རྩེ་མོ་ལ༔ རྡོ་རྗེ་དབྱིངས་ཀྱི་མཁའ་འགྲོ་མ༔ འཇིག་རྟེན་བདེ་བའི་རོ་ཅན་དང་༔ བདེ་བྱེད་སེར་མོ་ཞེས་བྱ་བས༔ ཚིག་དང་ཡི་གེར་འགོད་པར་འགྱུར༔ རང་བྱུང་དག་གིས་ཡི་གེ་ནི༔ བསྟན་པ་ཀུན་གྱི་བུ་གཅིག་

གོ༔ དེ་ནས་རྗེས་འཇུག་སྤྲུལ་པ་དེ༔ བསིལ་བ་ཚལ་གྱི་དུར་ཁྲོད་དུ༔ ཤེས་རབ་ཀྱི་ནི་གདུལ་བྱ་ལ༔ བསྟན་པ་དམ་པ་འདི་ཉིད་སྟོན༔ དེ་ཚེ་ནུབ་ཕྱོགས་རིམ་གཉིས་གྲོང་༔ བྲམ་ཟེ་ལེགས་ལྡན་སྟོན་པ་དང་༔ སྣང་བའི་སྒྲོན་མའི་ཡུམ་ལྷུམས་སུ༔ ཞུགས་ཏེ་སྐལ་ལྡན་རྗེས་འཛིན་པ༔ དེ་མིང་མཉྫུ་ཤྲི་པྲ་ཏི༔ རིག་པའི་གནས་རྣམས་ཀུན་སྦྱངས་པ༔ སྐྱེས་བུ་ཉིད་ནི་མཆོག་དེ་ལ༔ འཇམ་དཔལ་གྱི་ནི་ལུང་བསྟན་ནས༔ བསྟན་པ་དམ་པ་འདི་ལ་གཟུད༔ སྤྲུལ་པ་པོ་ནི་ལོ་བརྒྱ་དགུ༔ དེ་ཚེ་རྗེས་འཇུག་དེ་དང་འཕྲད༔ དེ་ཡང་ཤེས་པའི་རྒྱུད་དག་ནས༔ ཤེལ་གྱི་གོང་བུ་བཞིན་དུ་འགྱུར༔ འདི་ལྟར་འབུམ་ཚོའི་དབྱེ་བ་དང་༔ བསྡུས་དང་རྒྱས་དང་རབ་རྒྱས་སུ༔ རྣམ་པར་ཕྱེ་ནས་སྟོན་པའོ༔ དེ་ནས་བདུན་བཅུ་རྩ་ལྔ་ན༔ དེ་ཡང་མྱ་ངན་འདའ་ཚུལ་སྟོན༔ ཆུ་བོ་དན་ཏིག་ཅེས་བྱའི་མགོར༔ ཟག་བཅས་ཕུང་པོ་ཉིད་དང་བྲལ༔ ནམ་མཁའ་འོ་ཕུང་གིས་བཀང་སྟེ༔ གདུང་བ་བཅད་ཀྱི་ཞལ་ཆེམས་སོ༔ དེ་ནས་རྗེས་འཇུག་མཉྫུ་དེས༔ བསྟེན་པ་ཀུན་གྱི་སྙིང་པོ་འདི༔ རྡོ་རྗེ་གདན་དུ་སྦེད་པར་འགྱུར༔ དེ་དུས་མན་ངག་སྡེ་གཉིས་སུ༔ དེ་ཉིད་ཀྱིས་ནི་རྣམ་པར་འབྱེད༔ སོ་ས་གླིང་གི་དུར་ཁྲོད་དུ༔ རྗེས་འཇུག་དེ་ཉིད་ཉམས་སུ་ལེན༔ བསྟན་པའི་སྙིང་པོ་འདི་སྟོན་འགྱུར༔ དེ་ལོ་བརྒྱ་དང་རྩ་དགུ་ན༔ རྒྱ་ནག་ཤོ་ཥའི་གླིང་ཞེས་པར༔ ཁྱིམ་བདག་དགེ་ལྡན་ཡིད་ཅན་དང་༔ སྣང་གསལ་མཁྱེན་མ་བྱ་བའི་

ཡུམ༔ གཉིས་ཀྱི་རྒྱུ་རྐྱེན་ལས་འཁྲ྄ུངས་པའི༔ དེ་མིང་དཔལ་གྱི་སེང་གེ་ཞེས༔ མཁས་པ་སྦྱངས་པའི་དོན་ལྡན་པའི༔ སྐལ་ལྡན་སྐྱེས་བུ་དེ་ཉིད་ལ༔ སྤྱན་རས་གཟིགས་ཀྱིས་ལུང་བསྟན་ནས༔ བརྒྱ་དང་སུམ་ཅུ་རྩ་གཉིས་ན༔ མཉྫུ་ཉིད་དང་འཛོམ་པར་འགྱུར༔ དེ་ཡང་སྔོན་སྦྱངས་སྐལ་ལྡན་པས༔ ཤེལ་གྱི་གོང་བུ་བཞིན་དུ་འགྱུར་༔ དེ་ནས་ཉི་ཤུ་རྩ་ལྔ་ན༔ མཉྫུ་མྱ་ངན་འདའ་ཚུལ་སྟོན༔ འབྱུང་བ་དག་ནི་རང་དེངས་སུ༔ ནམ་མཁའ་འོད་ཀྱི་ཕུང་པོར་འགྱུར༔ གདུང་བ་བཅད་ཕྱིར་ཞལ་ཆེམས་སོ༔ སྒྲ་དང་བཅས་ཏེ་ལུང་བསྟན་ཐོབ༔ དེ་ནས་བསྟན་པའི་སྙིང་པོ་ནི༔ སྐལ་དང་ལྡན་པ་དེས་ཁྱེར་ནས༔ རྒྱ་ནག་ཡུལ་དུ་སྣང་བར་འགྱུར༔ བྱང་ཆུབ་འབྱུང་བའི་ཤིང་དྲུང་དུ༔ དགོངས་པ་རྩེ་གཅིག་དོན་ཆོད་ནས༔ རིགས་བཞི་དག་ཏུ་དེས་འབྱེད་འགྱུར༔ སྡེ་གསུམ་དོན་རྣམས་གཏེར་སྦེད་འགྱུར༔ ཡང་དག་གསང་བ་སྙིང་ཐིག་འདི༔ བཀྲ་ཤིས་ཁྲི་སྒོ་ཞེས་བྱར་སྦེད༔ དེས་ན་ལོ་བརྒྱ་ཉི་ཤུ་ལོན༔ དགོངས་པ་དག་ལ་རབ་ཏུ་གནས༔ དེ་ཚེ་རྒྱ་གར་ནུབ་ཕྱོགས་ཡུལ༔ གླང་པོ་སྒང་ཞེས་རྒྱུད་རིངས་པར༔ ཁྱིམ་བདག་དེ་ནི་དགེ་ལྡན་ལས༔ རབ་ཏུ་རྒྱུ་དང་རྐྱེན་ལས་འཁྲུངས༔ དེ་མིང་ཕྱག་རྒྱ་རྒྱ་ཆེན་དང་༔ ཤར་ཕྱོགས་ཀ་མ་ཤཱི་ལའི་གྲོང་༔ གདོལ་པ་ཤན་ཏིང་ལག་པ་དང་༔ དགེ་བའི་སེམས་ཅན་ཡུམ་གྱི་ལྷུམས༔ རྒྱུ་དང་རྐྱེན་ལས་འཁྲུངས་པ་ཡི༔ དེ་མིང་ཛྙཱ་ན་སུ་ཏྲ་ཞེས༔ དེ་གཉིས་སྦྱངས་པའི་ཡོན་ཏན་

རྫོགས༔ དེ་དུས་རྡོ་རྗེ་གདན་ཉིད་ན༔ པཎ་ཌི་ཏ་ནི་ལྔ་བརྒྱ་བཞུགས༔ དེ་དག་རྣམས་ལས་མཆོག་ཏུ་མཁས༔ ཡེ་ཤེས་མདོ་དང་བྱེ་མ་ལར༔ ནུབ་ཕྱོགས་འདམ་བུའི་ཚལ་ཞེས་པར༔ རྡོ་རྗེ་སེམས་དཔས་ལུང་སྟོན་འགྱུར༔ སེང་ཧ་ཉིད་དང་ཞལ་འཕྲད་སྟེ༔ དེས་ཀྱང་དམ་པའི་དོན་རྙེན་འགྱུར༔ ཡང་གསང་སྙིང་པོའི་བསྟན་པ་འདི༔ ཛྙཱ་ན་སུ་ཏྲ་སྐལ་ལྡན་པར༔ དེ་ཡི་སློབ་མར་དེ་འགྱུར་རོ༔ དེ་ནས་ལོ་ནི་བཅུ་བདུན་ན༔ དེ་ཡང་མྱ་ངན་འདའ་ཚུལ་སྟོན༔ འབྱུང་བ་དག་ནི་རང་དེངས་སུ༔ ནམ་མཁའ་འོད་ཀྱིས་བཀང་སྟེ་འགྲོོ༔ གདུང་བ་དག་ནི་གཅད་པའི་ཕྱིར༔ བསྟན་པའི་བཙས་སུ་ཞལ་ཆེམས་སོ༔ སྐལ་བ་ཉིད་དང་རབ་ལྡན་པའི༔ ཡེ་ཤེས་མདོ་ནི་བྷ་སིང་དུ༔ མཁའ་འགྲོའི་གདུང་བ་གཅོད་པར་འགྱུར༔ མཁའ་འགྲོ་མ་ཡི་ལུང་བསྟན་ནས༔ མུ་དྲ་ཉིད་ཀྱང་སྐལ་ལྡན་འགྱུར༔ གཉིས་ཀྱིས་ལོ་ནི་བརྒྱ་དང་གསུམ༔ དེ་ནས་ལོ་ལྔའི་བར་དུ་གནས༔ སྐལ་ལྡན་མཆོག་དེ་རང་དེངས་སུ༔ ནམ་མཁའ་འོད་སྣང་དེ་བཞིན་ནོ༔ གདུང་བ་བཅད་ཕྱིར་ཞལ་ཆེམས་སོ༔ ཕྱག་རྒྱ་རྒྱ་ཆེན་ཞེས་བྱ་བའི༔ མཁས་པ་མཆོག་དེ་ཀཾ་རུར་གནས༔ དེ་ནས་དུར་ཁྲོད་རབ་སྣང་དུ༔ དགོངས་ལ་གནས་ཤིང་སྤྱོད་པ་སྐྱོང་༔ དེ་དུས་བྷོ་ཊའི་རྒྱལ་ཁམས་སུ༔ རྒྱལ་པོ་བྱང་ཆུབ་སེམས་པའི་རིགས༔ སྤྲུལ་པ་ཕྱག་བརྙན་བཅས་པ་འབྱུང་༔ དེ་ཡི་བསྟན་པའི་སྙིང་པོ་འདི༔ བི་མ་ལ་དང་སྐལ་ལྡན་པར༔ གྱུར་ནས་སྙིང་

པོའི་དོན་འདི་ནི༔ རབ་ཏུ་གསང་ཞིང་འཛིན་པར་འགྱུར༔ མུ་དྲ་ཉིད་ནི་རྒྱ་ནག་ཡུལ༔ བྷེ་ལ་ཤ་ཀྲ་ཞེས་བྱ་བར༔ དེ་ནས་སྣང་སྟེ་སྐྱེ་ཤི་བྲལ༔ འདི་ཉིད་མྱ་ངན་འདའ་བ་མིན༔ དེ་ནས་ལྔ་བཅུ་རྩ་ལྔ་ན༔ དེ་ཡི་ཕྱག་བརྙན་དགེ་སློང་གཟུགས༔ རང་རྒྱུད་རྣམ་པར་དག་ནས་ནི༔ བྷི་ལ་ཀི་ཞེས་བྱ་བ་ཡི༔ གཙུག་ལག་ཁང་དུ་སྦེད་པར་འགྱུར༔ ལོ་བརྒྱའི་བར་དུ་དེར་གནས་ཏེ༔ དེ་འོག་དགེ་སློང་དད་བརྩོན་ལྡན༔ དེ་དང་འཕྲད་ནས་སྐལ་ལྡན་འགྱུར༔ དེ་ནས་ལོ་ནི་བཅོ་ལྔ་ན༔ ཡང་ནི་དགེ་སྦྱོང་གཟུགས་འཛིན་པ༔ སྐལ་ལྡན་དེ་ལ་སྣང་བར་འགྱུར༔ དེས་ནི་ཤིང་ལྡན་རི་རྒྱུད་ལ༔ བསྟན་པ་དམ་པ་འདི་སྦེད་འགྱུར༔ དེ་ནས་ལོ་ནི་སུམ་བཅུ་ན༔ པཎ་ཌི་ཏ་ནི་གནམ་དུམ་ཞེས༔ དེས་ནི་སྡེ་གཉིས་དག་ལ་སྤྲོད༔ དེ་ནས་ལོ་ནི་བརྒྱ་ཕྱེད་ན༔ བསྟན་པ་ཡང་གསང་ངེས་པ་ཡི༔ དོན་རྒྱུ་མན་ངག་གསང་ཏིག་འདི༔ ས་ལ་གནས་པ་གཅིག་གིས་སྤྱོད༔ དེ་ཡི་རྗེས་འཛིན་སློབ་མ་ནི༔ ལག་ན་རྡོ་རྗེ་སྤྲུལ་པ་པོ༔ འདིས་ནི་བསྟན་པ་དར་བར་འགྱུར༔ དེ་ནས་དེ་དག་འདས་འོག་ཏུ༔ དགེ་སྦྱོང་དག་གི་གཟུགས་འཛིན་པ༔ ལུས་ནག་ཡན་ལག་རགས་པ་ཡིས༔ བསྟན་པ་འདི་ནི་བཟུང་བའི་ཚེ༔ དམ་ཆོས་འདི་ནི་ལོ་བརྒྱ་རུ༔ འདི་དག་རྣམས་ནི་ནུབ་པར་འགྱུར༔ དེ་ནས་ཡང་ནི་བོད་ཡུལ་དུ༔ རྒྱལ་པོ་དགེ་བའི་སེམས་ལྡན་པ༔ ཁ་དོག་དམར་པོ་གསེར་གྱི་སྭོ༔ རིགས་ལྡན་འཁོར་གཡོག་ལྡན་པས་ནི༔

བསྟན་པའི་མེ་རོ་སློང་ནས་ནི༔ མཁས་པ་ལྕེ་ཡི་རྫུ་འཕྲུལ་ཅན༔ ཞིག་གི་ཡི་གེའི་བརྡ་བསྒྱུར་ཏེ༔ འདི་ཉིད་མེ་ལྕེ་འབར་བ་བཞིན༔ བསྟན་པའི་སྙིང་པོ་ལོ་སྟོང་དུ༔ ཡི་གེ་ཡོ་གིའི་གཟུགས་དག་གིས༔ རིམ་ལས་རིམ་གྱིས་འཛིན་པར་འགྱུར༔ དེ་ནས་ལོ་ནི་ཉིས་བརྒྱ་ན༔ ཡང་ནི་རྒྱལ་པོ་བོངས་ཆུང་བ༔ མགོ་ལ་རལ་གྲིའི་ཆུན་པོ་འཛིན༔ འདི་དང་འཕྲད་ནས་མུན་པར་འགྱུར༔ དེ་ནས་དགེ་སློང་དཔལ་དང་ལྡན༔ བྲམ་ཟེ་དག་གི་རིགས་མཆོག་གིས༔ ཁ་ཆེའི་ཡུལ་ནས་འདི་རྙེད་ནས༔ དེ་ཉིད་ཡུལ་དུ་བསྟན་པ་འདི༔ སྤང་ལ་མེ་མཆེད་བཞིན་དུ་སྟེ༔ སྙིང་པོ་ལོ་བརྒྱའི་བར་དུ་གནས༔ དེ་ནས་ལོ་ནི་སུམ་ཅུ་རུ༔ ཡབ་ནི་རྒྱལ་པོ་སྙིང་སྟོབས་ཅན༔ དེ་དང་འཕྲད་ནས་མུན་པར་འགྱུར༔ དེ་ནས་ནུབ་ཕྱོགས་ཨོ་རྒྱན་ཡུལ༔ གླིང་དང་ལྡན་པ་ཞེས་བྱ་བར༔ མཁའ་འགྲོ་དཔལ་འཛིན་ཞེས་བྱ་བས༔ རྒྱ་མཚོའི་གླིང་ནས་ཕྱུང་ནས་ནི༔ ཡང་ནི་བསྟན་པ་དར་བར་བྱེད༔ དེ་ནས་རིམ་དང་རིམ་གྱིས་ནི༔ སྐལ་དང་ལྡན་པའི་སྐྱེས་བུ་ནི༔ དོན་རྣམས་རིམ་པ་ཉིད་ལྡན་འགྱུར༔ ཚེ་ལོ་བཅུ་པའི་དུས་དག་ཏུ༔ འདིས་ནི་སྒྲོན་མ་འབར་བར་བྱེད༔ དེ་ནས་བསྟན་པའི་སྙིང་པོ་རྣམས༔ ནམ་མཁའ་དག་ལ་འཕར་བར་འགྱུར༔ བསྟན་པ་ཀུན་གྱི་བུ་གཅིག་པོ༔ འབྱུང་བའི་སྒྲ་དང་བྲལ་བའི་ཕྱིར༔ རྡོ་རྗེ་གདན་ནས་མེ་རོ་བྱེད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་

པ་ལས༔ ཕྱི་རབས་སྐལ་བ་དང་ལྡན་པའི་གང་ཟག་ཇི་ལྟ་བུ་འབྱུང་བ་ལུང་བསྟན་པ་བདུན་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཉིད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་མི་ཟད་པ་རྒྱན་གྱི་འཁོར་ལོ་ལས་འདི་དག་ཕྱུངས་ཏེ་རྣམ་པར་སྤྲོས་སོ༔ ཉོན་ཅིག༔ དགེ་སྦྱོང་རྡོ་རྗེ་ཡང་འཛིན་པ༔ འདི་ནི་སངས་རྒྱས་ཀུན་གྱི་གསང་༔ རྡོ་རྗེ་ཐེག་པ་རབ་གྲགས་པ༔ ཁྱད་པར་ཆེན་པོའི་ཆོས་རྣམས་ནི༔ འཇིག་རྟེན་བཀོད་པའི་ཞིང་ཁམས་འདིར༔ བསྟན་པ་དག་གི་གནས་མི་གནས༔ ཡེ་ཐོག་དང་པོའི་སངས་རྒྱས་དང་༔ དམ་པ་སྟོང་གི་དཀྱིལ་འཁོར་འདུས༔ དེ་ནས་བསྟན་པ་གཉིས་པ་ལ༔ སྤྱི་ཕུད་འཇིག་རྟེན་མགོན་ཞེས་པས༔ དམ་པ་སྟོང་གིས་འདི་ཕྱག་མཛད༔ བསྟན་པ་དག་ནི་གསུམ་པ་ལ༔ ཚངས་པ་སྟོང་གི་སྤྱི་ཕུད་མགོན༔ སངས་རྒྱས་སྟོང་གི་ཐུགས་ཉིད་དྲིལ༔ དེ་ནས་བསྟན་པ་བཞི་པ་ལ༔ ཉི་མ་སྟོང་གི་རྒྱལ་པོ་དང་༔ སངས་རྒྱས་སྟོང་གིས་མངའ་དབང་བསྐུར༔ བསྟན་པ་ཉིད་ནི་ལྔ་པ་ལ༔ འཇིག་རྟེན་དྲ་བ་མགོན་ཞེས་པའི༔ དམ་པ་སྟོང་གི་ཐུགས་ལ་སྦས༔ བསྟན་པ་དྲུག་གི་སངས་རྒྱས་ནི༔ འོད་ཟེར་སྟོང་གི་མུ་ཁྱུད་མགོན༔ རིགས་ཅན་སྟོང་གིས་འདི་ཉིད་སྦས༔ དེ་ནས་བསྟན་པ་བདུན་པ་ལ༔ ཡེ་ཁྱབ་འཁོར་འཇིག་ཚངས་པའི་མགོན༔ བདེ་ཆེན་སྟོང་གི་སྤྱི་བོར་བཟུང་༔ དེ་ལྟར་དེ་ལྟར་བསྟན་པ་ནི༔ འབུམ་ཕྲག་དྲུག་ཅུ་རྩ་བཞི་རུ༔ སངས་རྒྱས་གྲངས་ནི་དེ་ཉིད་ཀྱིས༔ གསང་ཆེན་འདི་ནི་ཡོངས་བཟུང་པའོ༔ བསྟན་པའི་

སངས་རྒྱས་ངེས་པ་ཡི༔ ས་ཡ་ཕྲག་ནི་བཅུ་དགུ་ཡིས༔ འདི་ཉིད་ཕྱག་མཛད་བཅུད་དྲིལ་པའོ༔ དེ་ཕྱིར་བསྟན་པའི་ས་བོན་ནི༔ ངེས་པའི་སྙིང་པོ་ཞེས་བྱ་བ༔ བསྟན་པ་ཀུན་གྱི་བུ་གཅིག་པུ༔ འབྱུང་བ་ལྔ་ཡི་དགྲ་དང་བྲལ༔ རང་བྱུང་ངག་གི་ཡི་གེ་ནི༔ གང་གི་རྐྱེན་གྱིས་འཇིག་པ་མེད༔ ཉི་མ་སྤུངས་པའི་སྒྲོན་མ་འདིས༔ སངས་རྒྱས་ཀུན་གྱི་ས་བོན་འདེབས༔ སྟོན་པ་དག་ནི་རེ་རེ་འོ༔ བསྟན་པ་དག་ནི་ནུབ་པའི་ཚེ༔ འདི་ནི་སྟོན་པ་གང་འབྱུང་བའི༔ སྔོན་དུ་ལོ་བརྒྱའི་དང་པོ་ལ༔ འབྱུང་སྟེ་སྐུ་གསུང་ཐུགས་ཀྱི་རྒྱུད༔ འདི་ཉིད་ལས་ནི་འཕྲོ་བར་འགྱུར༔ འདི་ཉིད་གང་གི་བཟུང་བ་དེ༔ བཟོ་དང་སྒྱུ་རྩལ་ཐམས་ཅད་དང་༔ བསྟན་བཅོས་ཀུན་དང་སྒྲ་རྣམས་ནི༔ ཇི་ལྟར་འདོད་བཞིན་ཤེས་པར་འགྱུར༔ གསང་མཆོག་བླ་ན་མེད་པ་དེ༔ མཆོད་དང་བསྟོད་དབང་བསྐུར་བྱས་ན༔ མཆོག་དང་ཐུན་མོང་དངོས་གྲུབ་རྣམས༔ ཇི་ལྟར་འདོད་པ་བཞིན་དུ་འབྱུང་༔ འདི་ཉིད་བཅངས་པ་ཙམ་གྱིས་ནི༔ ལུང་དང་མན་ངག་འཛིན་པར་འགྱུར༔ འཇིག་རྟེན་མུན་སེལ་ནོར་བུའི་འོད༔ སྣང་བ་བྱེད་པའི་སྒྲོན་མ་འདི༔ གང་ལ་སྣང་བར་འགྱུར་བ་དེ༔ དེ་ནི་འབྱུང་བ་རང་དེངས་སུ༔ སྐལ་ལྡན་འགྱུར་བར་ཐེ་ཚོམ་མེད༔ ཅེས་ཨ་ཏི་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པའི་སྙིང་པོ་འབྱུང་ཁུངས་བསྟན་པ་སྟེ་བརྒྱད་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་ཉིད་ཀྱི་སྐུ་གསུང་ཐུགས་ལས་འདི་དག་བྱུང་ངོ་༔ ཀྱེ་ཀྱེ་ཉོན་ཅིག་རིགས་ལྡན་ཤཱ་རིའི་བུ༔

བསྟན་པའི་དམ་པ་རྒྱ་ཆེ་རབ་བཀོད་ལས༔ མཆོག་ཏུ་སྙིང་པོ་ཡང་ནས་ཡང་བསྡུས་པ༔ གསེར་གྱི་སྙིང་པོ་ཉི་མས་སྣང་བྱེད་འདི༔ ཐུན་མོང་འཚོལ་བར་དར་བ་མ་ཡིན་ཏེ༔ གསང་ཆེན་རིགས་དང་ལྡན་པ་འགའ་ལ་འབྱུང་༔ སྙིགས་མ་རྩོད་ལྡན་ཉོན་མོངས་རགས་པའི་དུས༔ སྡེ་པ་ནང་འཐབ་དབེན་གནས་ཀུན་ཀྱང་འཇིག༔ རྒྱལ་ཁྲིམས་མི་གནས་རང་དགའ་འདོད་རྒྱལ་སྤྱོད༔ ཕ་དང་བུ་འཐབ་མཚོན་གྱིས་ལུས་རྣམས་བསྲུང་༔ བསགས་པའི་ཚོགས་ཡལ་ས་ཡི་བཅུད་རྣམས་ཟད༔ མི་མཐུན་ལྟ་སྤྱོད་དག་ཀྱང་གྲངས་མང་འབྱུང་༔ སྙིགས་མ་ལྔ་བརྒྱ་ཚེ་ལོ་རིམ་གྱིས་བྲི༔ བསོད་ནམས་སྐལ་ཆུང་ཚེ་ལོ་དྲུག་ཅུའི་ཚེ༔ སྙིང་པོ་འདི་ནི་ལོ་ནི་དྲུག་ཅུར་གནས༔ དེ་ནས་འོག་ཏུ་ལོ་བརྒྱའི་བར་དུ་ནི༔ རྟོག་གེ་དཔྱོད་ཅིང་གསང་བ་འདི་མི་གནས༔ དེ་འདས་འོག་ཏུ་ལོ་སྟོང་ཉིད་དུ་ཡང་༔ ཐོས་བསམ་བྲལ་བའི་གང་ཟག་ཡལ་ནས་ནི༔ གསང་བ་མཆོག་འདི་ཉི་མ་བཞིན་དུ་འགྱུར༔ དེ་འདས་འོག་ཏུ་ཉིས་བརྒྱ་མུན་པར་འགྱུར༔ དེ་ནས་ཚེ་ལོ་དག་ནི་བཞི་བཅུ་ན༔ སྙིང་པོ་འདི་ནི་ལོ་བརྒྱའི་བར་དུ་གནས༔ དེ་འདས་སུམ་ཅུའི་བར་དུ་མུན་པ་འགྱུར༔ དེའི་འོག་ལོ་བརྒྱའི་བར་དུ་གནས་པ་ལ༔ དེ་འདས་ཚེ་ལོ་སུམ་ཅུའི་དུས་ན་འདི༔ ནུབ་ནས་རྒྱང་འཕེན་ལོ་བརྒྱའི་བར་དུ་དར༔ དེ་ནས་ཡང་ནི་ལོ་བཅུའི་བར་དུ་གནས༔ ཚེ་ལོ་ཉི་ཤུ་པ་ལ་འདི་མི་འབྱུང་༔ བཅུ་པའི་དུས་སུ་སྙིང་པོ་འདི་

འབྱུང་བས༔ འདི་དང་གང་འཕྲད་འབྱུང་བ་རང་དེངས་འགྱུར༔ དེ་ནས་ཡལ་ཏེ་མི་སྣང་བསྟན་པའི་བཙས༔ ཡང་ནི་བསྟན་པའི་མེ་རོ་བཞིན་དུ་འགྱུར༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ བསྟན་པ་དམ་པའི་འཕེབ་འགྲིབ་ཇི་ལྟར་འབྱུང་བ་སྟེ༔ ཞུས་དོན་དགུ་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་སྐུའི་འོད་ཟེར་རྣམ་པར་སྤྲོས་ཏེ་འདི་སྐད་ཅེས་རྔམས་པར་བསྒྲགས་སོ༔ ཉོན་ཅིག་རིགས་ལྡན་དགེ་སྦྱོང་དཔལ༔ ང་ནི་འདི་ནས་མི་གནས་ནས༔ ཚེ་ལོ་དྲུག་ཅུ་ཡན་ཆད་ལ༔ འབྲས་བུ་གྲོལ་བ་སྟོང་ཕྲག་གཅིག༔ འབྱུང་བར་རང་དེངས་དག་ཏུ་སྟེ༔ དགེ་སྦྱོང་གཟུགས་ནི་དེ་ཡི་ཕྱེད༔ ལྷག་མ་བྱང་ཆུབ་སེམས་དཔའོ༔ དེ་ནས་ལྔ་བཅུ་ལ་ཐུག་པར༔ འབྱུང་བར་རང་སར་དེངས་པ་ནི༔ འབུམ་ཕྲག་གཉིས་ཀྱིས་སྐྱེ་མེད་ཐོབ༔ ཕལ་ཆེར་བུད་མེད་དག་གི་གཟུགས༔ སྐྱེས་པ་དག་ནི་སྟོང་ཕྲག་གཉིས༔ དེ་ནས་ཚེ་ལོ་སུམ་ཅུའི་བར༔ འབུམ་ཕྲག་དག་ནི་དྲུག་པ་སྟེ༔ འདི་དག་ཕལ་ཆེར་སྐྱེས་པ་ལ༔ བུད་མེད་གཟུགས་ནི་འབུམ་གཅིག་ཡིན༔ འབྱུང་བ་དག་ནི་རང་དེངས་སོ༔ དེ་དག་སྔོན་བྱུང་ང་ཡི་འཁོར༔ སྙིགས་མའི་དུས་ན་སངས་རྒྱས་ཐོབ༔ ངེས་གསང་སྙིང་པོ་ཡང་བསྡུས་པའི༔ འབྲས་བུ་ཉིད་ནི་ཐོབ་པ་ལས༔ བསྟན་པ་གཞན་གྱི་འབྲས་བུ་མེད༔ གལ་ཏེ་བསྟན་པ་གཞན་དག་ལ༔ མངོན་པར་སངས་རྒྱས་འབྱུང་འདོད་ན༔ འདི་ཉིད་ཕྲད་དེ་དེ་བཞིན་ནོ༔ དེ་ཕྱིར་འབྲས་བུའི་དུས་

ཀ་རུ༔ འདི་ཉིད་དག་ནི་བསྟན་པ་འོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ ངེས་པའི་འབྲས་བུ་ཐོབ་པ་འབྱུང་བ་རང་དེངས་སུ་སོང་བའི་གྲངས་ལུང་བསྟན་པ་སྟེ་བཅུ་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་ཉིད་ཀྱི་ཐུགས་ཀྱི་དལ་ནས་མགུར་གྱི་བུམ་པར་དྲིལ༔ ལྗགས་ཀྱི་དབང་པོ་ལ་བཀྲམ་ནས་ཆེད་དུ་བརྗོད་པ་འདི་དག་བརྗོད་དོ༔ ཨེ་མ་གསང་བའི་གསང་མཆོག་ངེས་པའི་སྙིང་པོ་འདིས༔ འཁོར་བར་བརྒྱུད་པའི་བག་ཆགས་ཀུན་བཅད་ནས༔ ཡེ་ཤེས་མཛོད་ཀྱི་སྣང་བ་རབ་བསྟན་ཏེ༔ སྙིགས་མའི་ཡང་སྙིགས་ཚེ་ལོ་སུམ་ཅུ་ལ༔ ལེ་ལོས་གཡེངས་ནས་དེ་འདས་འོག་ཏུ་ནི༔ སྐྱེ་གཉིས་བར་དུ་མངོན་པར་སངས་རྒྱས་པ༔ ཚེ་ལོ་བཅུ་པའི་བར་ཆད་འདི་རྣམས་འབྱུང་༔ སྟོང་ཕྲག་བདུན་ནི་སྣང་བ་མ་དང་ཕྲད༔ སྐྱེས་པ་དག་ནི་སྟོང་ཕྲག་དྲུག་ཉིད་ལ༔ བུད་མེད་གཟུགས་ནི་སྟོང་ཕྲག་གཅིག་ཡིན་ནོ༔ དེ་ལྟར་སྐྱེ་དང་བུད་མེད་ཁྱི་དང་མོ༔ ཇི་ལྟར་གྱུར་པའི་གཟུགས་སུ་འདུག་ཀྱང་སླའི༔ འདི་དང་ཕྲད་པར་རྣམ་པར་གྲོལ་བའོ༔ གཞན་གྱི་རིགས་ལས་ཕྲད་ཡང་འདི་ཉིད་དུ༔ དེས་ན་གསང་མཆོག་ངེས་པའི་སྙིང་པོ་འདི༔ གཞན་གྱི་ཡུལ་མིན་སྐལ་ལྡན་ཤུགས་ཀྱིས་ཕྲད༔ བདེ་གསལ་སྙིང་པོའི་དོན་དུ་བཀོད་པའོ༔ ཞེས་བཀོད་པ་ཆེན་པོ་འབུམ་ཕྲག་དྲུག་པ་ལས༔ སྐྱེ་གཉིས་མཚམས་སུ་སངས་རྒྱས་པ་འབྱུང་བར་ལུང་བསྟན་པ་སྟེ་བཅུ་གཅིག་པ་རྫོགས་སོ༔ རྒྱ་རྒྱ་རྒྱ༔ དེ་ནས་ཡང་ཏིང་ངེ་འཛིན་སེང་གེ་རྣམ་པར་རོལ་པ་

ཞེས་བྱ་བ་ལས་བཞེངས་ནས༔ ཡང་ཆེད་དུ་བརྗོད་པ་འདི་གསང་བའི་སྙིང་པོ་རྣམས་མི་ཡུལ་དུ་སྣང་བ་དག་རྣམ་པར་བརྗོད་དོ༔ སྙིགས་མ་ལྔ་བརྒྱ་ཚེ་ལོ་དྲུག་ཅུ་པའི་དུས་ནས་དུས་ཀྱི་ཐ་མ་ལ༔ གསང་བའི་སྙིང་པོ་ཆོས་འདི་ནི་མི་ཡུལ་སྣང་༔ དེ་རྗེས་འཛིན་པའི་གང་ཟག་སྐལ་བ་ཅན༔ སྙིང་པོ་འདི་ནི་སུ་ལ་སྣང་གྱུར་པ༔ དེ་དག་རྣམས་ནི་མི་འགྱུར་ས་ལ་མྱ་ངན་ལས་འདའ༔ གལ་ཏེ་སྙིགས་མར་ཚེ་ཐུང་ནད་མང་བས༔ སྙིང་པོའི་དོན་འདི་གོམས་པ་ཆུང་བསགདིང་དུ་མ་གྱུར་ཀྱང་༔ འདི་ཉིད་ཀྱི་ངོ་སྤྲོད་མཐོང་བས་འཁོར་བ་ལས་དབུགས་ཆེན་ཉིད་འབྱིན་པ༔ བཅུ་གཅིག་ཕ་རོལ་དུ་ཕྱིན་པ་ལྟར་ན་ཀུན་ཏུ་འོད་སྟེ་སྤྲུལ་པའི་ཞིང་༔ བརྫུས་སྐྱེས་དག་པས་མངལ་གྱི་རྒྱ་དང་བྲལ༔ ཤར་ཕྱོགས་མངོན་དགའ་མི་འགྱུར་རྡོ་རྗེའི་ཞིང་༔ མི་བསྐྱོད་སྟོན་པས་འཁོར་གྱི་ཆོས་འདི་བསྟན་པས་རྒྱུད་གྲོལ༔ གདུལ་བྱ་རང་སྣང་ཡོན་ཏན་བསམ་མི་ཁྱབ་སྟེ་ས་བཅུ་གསུམ༔ ལྷོ་དཔལ་ལྡན་དང་ནུབ་པདྨ་བརྩེགས་པ་དང་༔ བྱང་ལས་རབ་ཉིད་ནི་ཡོངས་སུ་རྫོགས་པའི་ཞིང་༔ རིན་ཆེན་འབྱུང་དང་པདྨ་གར་དབང་རྟ༔ སྟོན་པའི་བསྟན་པ་འཁོར་གྱིས་ཤེས་བྱའི་སྒྲིབ་པ་སྦྱོང་༔ ཤར་དཀར་ལྷོ་སེར་ནུབ་དམར་དང་བྱང་ལྗང་ཁུའི་ཁ་དོག་གསལ༔ མཐོ་དམན་མེད་པས་ཁོད་སྙོམས་ཡིད་འོང་རི་སྐེག་སོགས་བྱ་སྐད་སྣ་ཚོགས་སྒྲོགས༔ དྲི་བསུང་ངད་འཇམ་ལྟ་བས་ཆོག་མི་ཤེས༔ དབང་པོ་ཚིམ་བྱེད་ཡོན་ཏན་ཀུན་དང་ལྡན༔ ཁ་དོག་ལུས་རྫོགས་ཟས་གོས་དུས་གཅིག་རྫོགས༔ ལུས་ཀྱི་རྩོལ་བྲལ་ལས་ཀྱི་རླུང་གིས་

བསྐྱོད་ནས་བར་སྣང་ལ་འགྲོ་དང་འདུག༔ རླུང་འབྱུང་བས་མ་བསྐྱེད་པའི་གནད་ཀྱིས་མཁྲིས་བད་ཀན་འདུས་པའི་ནད་རྣམས་མེད༔ ཡན་ལག་བརྒྱད་ལྡན་རོ་བརྒྱ་འདུས་པའི་ཆུ༔ འཐུངས་པས་ལུས་སེམས་ཚིམ་བྱེད་རེག་ན་ལུས་ཀྱང་འཇམ༔ ས་ཆུ་མེ་ལོང་འབྱུང་བས་ཕན་གནོད་བྲལ༔ ཡིད་ལ་འདོད་པའི་བཀྲེས་དང་སྐོམ་དང་ཚ་གྲང་སྡུག་བསྔལ་མེད༔ འདོད་ཆགས་ཞེ་སྡང་གཏི་མུག་ཉོན་མོངས་རྣམས༔ སྐྱེ་བའི་རྒྱུ་མེད་ཤེས་པ་བག་ཡངས་སོ༔ བལྟ་རྒོད་ལག་བཅངས་གཉིས་འཁྱུད་འདོད་ཆགས་མེད༔ ཆོག་ཤེས་སྲེད་བྲལ་རྟག་ཏུ་ཆོས་ལ་ཉན༔ སྒྲིབ་གཉིས་བྲལ་ནས་སྐྱེ་བ་གཅིག་གི་ཐོགས༔ མཆོད་པའི་ལྷ་མོས་ཡིད་འོང་བཀྲ་ཤིས་བརྗོད༔ གཞལ་ཡས་ཁང་མཛེས་སྒོ་བཞི་རྟ་བབས་ལྡན༔ ཤེལ་དཀར་དང་གསེར་སེར་དང་མར་གད་དམར་ལྗང་ཨིཎྜ་ནཱི་ལ་སྔོ༔ བཀྲ་ཤིས་ཕྱོགས་རྣམས་གདུགས་དང་འཁོར་ལོ་རྒྱལ་མཚན་མཛེས༔ དེ་ལྟར་ཕྱོགས་བཅུ་རང་བཞིན་སྤྲུལ་པའི་ཞིང་༔ རང་རང་སྟོན་པས་རང་རང་འཁོར་རྒྱུད་འགྲོལ༔ མདུན་གྱི་ནམ་མཁའ་མི་འབྱེད་རྩེགས་པ་ན༔ འཇིགས་པའི་ཁྲོ་གནས་དུར་ཁྲོད་མེ་རི་འབར༔ འཇིགས་པའི་སྒྲ་ཧཱུྃ་ཕཊ་སོགསདང་ཁྲོ་གཟུགས་ཨ་ལ་ལ༔ འདི་ཉིད་མཐོང་བ་ཙམ་གྱིས་གང་ཟག་དེ་གྲོལ་འགྱུར༔ སྐལ་ལྡན་མ་གོམས་པ་སྟོབས་མེད་སྙིང་པོའི་དོན་འཛིན་པ༔ དེར་རང་བཞིན་སྤྲུལ་པའི་ཞིང་ནི་དབུགས་ཕྱུང་སྐྱེ་བ་གཅིག་པ་སྟེ༔ ལྔ་བརྒྱ་དག་ན་ངེས་པའི་སར་གྲོལ་ལོ༔ ཞེས་བཀོད་པ་ཆེན་པོ་འབུམ་ཚོ་དྲུག་གི་བདག་

ཉིད་ལས་རྨོངས་པའི་གདུང་བ་རྣམ་པར་བསལ་བ་བརྒྱུད་པ་གསུམ་དུ་གཏན་ལ་ཕབ་པ་སྟེ༔ ཤཱ་རིའི་བུ་སྐར་མ་འོད་བཟང་གིས་སྟོན་པ་འོད་སྲུངས་ཉིད་ལ་ཞུས་པའི་ལན་གྱི་ལེའུ་སྟེ་བཅུ་གཉིས་པ་རྫོགས་སོ༔ རྡོ་རྗེ་ལེགས་པ་མགོན་པོ་གྲེས་ཐག་ཅན༔ བཀའ་འདི་གཏད་དོ་ཁྱོད་ཀྱིས་བྱ་ར་གྱིས༔ ས་མ་ཡཱ༔ རྒྱ་རྒྱ་རྒྱ༔ གཞན་ཡང་༔ བཀོད་པ་ཆེན་པོ་འབུམ་ཚོ་དྲུག་པ་ལས༔ ལུས་དང་འདྲ་བའི་ལེ་འུ་སྟོང་ཕྲག་བཞི༔ བརྗོད་བྱ་མཆོག་ཏུ་ཟབ་ཅིང་རྒྱ་ཆེ་ཡང་༔ སུམ་བརྒྱ་གསང་བའི་ལེ་འུ་འདི་མེད་ན༔ གཟུགས་ཀྱི་ཕུང་པོ་སྙིང་མེད་རོ་དང་འདྲ༔ དེས་ན་སྙིང་དང་འདྲ་བའི་ལེ་འུ་འདི༔ འཇམ་དཔལ་བཤེས་གཉེན་བདག་གིས་ཕྱུང་༔ ནམ་ཞིག་སྙིགས་མ་ལྔ་བརྒྱའི་དུས༔ ཚེ་ལོ་ཉིད་ནི་དྲུག་ཅུ་ལ༔ བསྟན་པའི་བཙས་སུ་འདི་ཉིད་ནི༔ སྐལ་ལྡན་དེ་དང་ཕྲད་པར་ཤོག༔ རྒྱ་རྒྱ་རྒྱ༔ རྒྱ་གར་ནུབ་ཕྱོགས་གླང་པོ་སྒང་གི་གྲོང་༔ འབུམ་ཚོའི་གྲངས་ལས་ཁྱད་པར་བདག་གི་བློ་ཉིད་སྦྱངས༔ སྐད་དང་ཡི་གེ་མ་མཐུན་གྲངས་མང་བདག་གི་བློ་ལ་སྣང་༔ དེ་ཡི་ཕྱིར་ན་སྒྲ་དང་བསྟན་བཅོས་ཚད་མ་ཀུན་ལ་མཁས༔ རྒྱུད་ལུང་མན་ངག་མང་པོ་བློ་སྦྱངས་ཀྱང་༔ སྙིང་པོ་ཡང་བསྡུས་གསང་མཆོག་འདི་མེད་ན༔ བདག་བློས་མཐོང་བའི་དོན་མེད་བྲག་ཅའི་སྒྲ་ལ་སྤྱོད༔ དམ་པའི་རྒྱུད་པ་རྣམས་ཀྱི་རྩ་བ་ངེས་ཤེས་ཅན༔ བྷ་སིང་ནགས་སུ་བདག་གི་བློ་ཡི་མུན་པ་ཀུན་བསལ་ནས༔ དེ་ནས་དུར་ཁྲོད་ཆེན་པོ་རབ་ཏུ་སྣང་བྱེད་དུ༔ ཐིག་ལེ་མཆོག་གི་རྒྱུད་ལུང་མན་ངག་རྣམས༔ དཔེ་གསུམ་ཉིད་དུ་བདག་གིས་

བྲིས་པ་ལས༔ དཔེ་གཅིག་ཨོ་རྒྱན་ཡུལ་གྱི་རྒྱ་མཚོའི་གླིང་ལ་སྦས༔ དཔེ་གཅིག་ཁ་ཆེའི་ཡུལ་གྱི་མཐའ་འཁོབ་རིགས་ངན་དག་གི་ཡུལ༔ གསེར་གྱི་གླིང་ཞེས་མཁའ་འགྲོ་འདུ་བའི་གནས༔ ཕྱི་རབས་བསྟན་པའི་བཙས་སུ་དགོས་སྲིད་ནས༔ རང་རྒྱས་བཏབ་སྟེ་མཁའ་འགྲོ་རྣམས་ལ་གཏད༔ དཔེ་གཅིག་བོད་ཀྱི་རྒྱལ་པོའི་བཀའ་ནན་རབ་ཆེ་བས༔ བོད་ཡུལ་དབུས་ཀྱི་བསམ་ཡས་སྒྲ་བསྒྱུར་གླིང་༔ མཚན་མོ་ཐོ་རངས་སྐལ་ལྡན་སྐ་ཅོག་གཉིས༔ སྨྲ་བྱེད་ལྕེ་ལ་དབང་ཐོབ་གཉིས་ཀྱིས་ཕལ་ཆེར་བསྒྱུར༔ རྩ་བའི་རྒྱུད་ལྔ་གཉགས་ཀྱིས་སྔོན་དུ་བསྒྱུར༔ དེ་དག་སྐལ་ལྡན་རྗེ་བློན་གཉིས་ལ་གཏད༔ དེ་ནས་མཆིམས་ཕུ་བྲག་དམར་དགེེ་གོང་དུ༔ རྒྱ་ཡི་དཔེ་ལས་བོད་ཀྱི་ཡི་གེ་རུ༔ གསང་བའི་མན་ངག་འདི་ནི་བདག་གིས་བསྒྱུར༔ ར་གན་སྦྱངས་པའི་བྱང་བུ་ལྔ་བཅུ་ལ༔ དཀར་པོ་དུང་བཞུས་ཡི་གེར་བཏབ་སྟེ་བསྒྱུར༔ ཡང་ནི་ར་གན་སྦྱངས་པའི་བྱང་བུ་དྲུག་ཅུ་ལྔ༔ ཟངས་བཞུས་ཡི་གེར་བཏབ་སྟེ་བསྒྱུར་བའི་པུ་ཏི་གཅིག༔ དམར་པོ་ཟངས་བྱང་བྱང་བུ་བརྒྱ་དང་སུམ་ཅུ་ལ༔ སྔོན་པོ་གཡུ་སྦྱངས་ཡི་གེ་བཏབ་ཏེ་བསྒྱུར་བའི་པོ་ཏི་གཅིག༔ ཆུ་དར་བསྒྲིགས་པའི་ལྡེབ་མ་ཉི་ཤུ་ལ༔ ཕྲ་མེན་ཡི་གེ་སྔོ་དམར་བཏབ་སྟེ་བསྒྱུར་བའི་པོ་ཏི་གཅིག༔ རྒྱ་ཡི་དཔེ་ལས་འདི་དག་བསྒྱུར་ནས་ནི༔ སུ་ལའང་མ་བསྟན་བསྟན་པའི་བཙས་སུ་བཞག༔ རྒྱ་གར་ཡུལ་དུ་སླར་ལོག་བདག་མི་འགྲོ༔ རྒྱ་ནག་རི་བོའི་རྩེ་ལ་སྡོད་སྙམ་ནས༔ བདག་གིས་མ་ཁྱེར་ལམ་ལ་གདུག་

རྩུབ་པས༔ བདག་གི་དོན་སྙིང་ཕྱུང་ནས་འདི་རུ་སྦས༔ དམ་པ་བསྟན་པའི་བདག་པོས་འདི་རྙེད་ཤོག༔ ཡི་གེ་མི་མཐུན་བརྒྱ་དང་དྲུག་ཅུ་ལས༔ གསང་བའི་རྒྱུད་ལུང་མན་ངག་ཡི་གེ་རྣམས༔ ནཱ་ག་ར་ཡི་ཡི་གེར་བཀོད་ནས་ནི༔ འདི་ནས་བྱང་ཤར་འདོམ་ཚད་ཉི་ཤུའི་བར༔ ཕ་འོང་དམར་པོ་སྟག་ཉལ་འདྲ་བའི་འོག༔ ཡི་གེ་ཨ་ཡི་མཚན་མ་བཏབ་ནས་ནི༔ ལྕགས་ཀྱི་སྒྲོམ་བུར་བཅུག་ནས་སྦས་ཏེ་ཡོད༔ སྙིགས་མའམ་དུས་ན་གསང་བའི་རྒྱུད་ལུང་རྣམས༔ ཚོང་འདུས་འོ་མ་བཞིན་དུ་བསླད་ནས་ནི༔ བོད་ཀྱི་རྒྱལ་ཁམས་འདི་ཡིས་ཁེངས་པའི་ཚེ༔ འདི་ཉིད་ལོངས་ལ་རྒྱ་ལ་གོམས་པས་བསྒྱུར༔ ལྷག་དང་ཆད་པ་རྣམས་ནི་འདི་ཡིས་བསྐངས༔ འདི་ལས་ལྷག་པ་གཞན་ལ་གཅིག་ཀྱང་མེད༔ དེས་ནི་བསྟན་པའི་སྒྲོན་མེ་བྱས་ནས་ནི༔ འདི་ཉིད་སྤྱོད་པའི་སྐལ་ལྡན་དུ་མ་འབྱུང་༔ བསྟན་པའི་དམ་པ་ཡང་ནས་ཡང་བསྡུས་སྙིང་པོ་འདི༔ རང་གི་སྙིང་ལ་ཕུར་ལ་གཞན་ལ་བསྟན་པ་མིན༔ འཇིག་རྟེན་ཡིད་དགའ་སྒྱུ་མའི་ནོར་གྱི་ཕྱིར༔ ང་ཡི་དཔྲལ་མིག་ཁོང་སྙིང་འདི་བཏང་ན༔ སྙིང་ཁྲག་འཛག་ཅིང་མི་འབྲས་ཐང་ལ་ལྷུང་༔ དེ་བས་རང་གི་སྙིང་ལ་རྒྱས་གདབ་ལ༔ རིག་པ་གོམས་པས་གནད་དུ་འདི་ཕུར་ཞིག༔ མགོན་པོ་ནག་པོ་ཆོས་སྐྱོང་སྲུང་མ་ཁྱོད༔ བཀའ་འདི་གཏད་དོ་ཁྱོད་ཀྱིས་ཐུབ་པར་སྲུངས༔ སྐལ་ལྡན་མན་ངག་བདག་པོ་བྱུང་བའི་ཚེ༔ ཁྱོད་ཀྱིས་ཞེན་པ་ཐོངས་ལ་འདི་བྱིན་ཅིག༔ བན་དགྲ་དམ་མེད་དག་གིས་འདི་ཁྱེར་ན༔ ཚེ་ལ་བར་ཆོད་གྱིས་

ལ་འགྱུར་བའི་སྲོག་དབུགས་ཆོད༔ རྒྱ་རྒྱ་རྒྱ༔ བདག་གི་བློ་ལ་འཁྲུལ་པའི་སྣང་བ་རང་དག་ཀྱང་༔ མན་ངག་འདི་ལ་བློ་ནི་བྲེང་ཆགས་ནས༔ རྒྱ་ནག་ཡུལ་དུ་ཁྱེར་ཏེ་འགྲོ་སྙམ་པས༔ ལམ་དུ་བསྟན་པའི་སྣོད་མེད་གདུག་ཅོར་མོན་པ་དང་༔ ཚལ་དང་གདུག་པའི་གཅན་གཟན་ཆུ་ཆེན་དང་༔ འཇིགས་པའི་རོང་ཁུང་དམིགས་པའི་ལམ་མ་བྱང་༔ བྲག་དང་ཆུ་འཐབ་འཇིགས་པའི་ཤིང་ནགས་ཁྲོད༔ འདི་དག་རྣམས་སུ་འདི་ཉིད་བརླག་དོགས་ནས༔ རང་རྒྱས་བཏབ་སྟེ་བསྟན་པའི་བཙས་སུ་བཞག༔ དེ་ལྟར་ལམ་ན་གདུག་རྩུབ་གྲངས་མང་ཡང་༔ བདག་རང་གཅིག་པུར་རྫུ་འཕྲུལ་ཐབས་ཀྱིས་འགྲོ༔ སྐལ་ལྡན་སྙིང་གི་བུ་དང་འཕྲད་པར་སྨོན༔ རྒྱ་རྒྱ་རྒྱ༔ དད་ལྡན་རྣམས་ཀྱི་སྙིངགི་དཀྱིལ་དུ་ཞོག༔ འདི་ལས་ལྷག་པའི་བཞག་ཐབས་གཞན་ན་ཡོད་རེ་ཀན༔ བདག་ནི་ཐོས་ཆུང་རྟོག་གེ་མ་ཡིན་པས༔ ཐེག་པ་སྤྱི་ཡི་དོན་རྣམས་བདག་གིས་ཤེས༔ དེ་ཡི་ཕྱིར་ན་ཐབས་འདི་སྙིང་གི་བུ༔ ཡང་མཛོད་དམར་པོའི་ནང་དུ་རྒྱས་ཐོབ་ལ༔ རང་གི་ཡིད་ལ་བརྣག་ཅིང་ཞེ་དགའི་ཡིད་ཀྱིས་འགྲོགས༔ འཕངས་པའི་ནོར་བཞིན་སེར་སྣས་དམ་དུ་ཟུང་༔ དེ་ལྟར་བྱས་ན་དངོས་གྲུབ་ཅིག་ཅར་ཐོབ༔ པཎྜི་ཏ་ཆེན་པོ་བི་མ་ལ་མི་ཏྲས་བསྒྱུར་བ་རྫོགས་སོ༔ ཨྠྀི༔ རྒྱ་རྒྱ་རྒྱ༔ མ་ཡིག་རིན་པོ་ཆེ་གདུང་པ་བཅད་པའོ༔ དགེའོ༔

མན་ངག་ངེས་པའི་ཁ་བྱང་མིང་རྣམ་པར་བཀོད་པ།

མན་ངག་ངེས་པའི་ཁ་བྱང་མིང་རྣམ་པར་བཀོད་པ་ཞེས་བྱ་བ་བཞུགས་སོ། །

ཐམས་ཅད་མཁྱེན་པ་ཉིད་ལ་ཕྱག་འཚལ་ལོ། །སྐུ་གསུམ་ཉིད་ནི་སྣང་བ་འདི་ཉིད་ལས། །མ་ནོར་དབང་པོའི་ཡུལ་དུ་གཏན་དབབ་ཕྱིར། །མན་ངག་ཡིག་ཆུང་གསལ་བ་སྙིང་ནོར་གྲགས། །མེ་ལོང་ཉིད་ལ་བཞིན་བསྟན་ཇི་བཞིན་དུ། །མ་ནོར་འགྱུར་བའི་ས་མེད་གསང་ཆེན་ཉིད། །སྙིགས་མའི་དུས་སུ་གང་ཟག་ལ་ལ་དག །སྙིང་པོའི་ནོར་ལ་རས་ཆོད་གཟུ་ལུམ་གྱིས། །བརྩམས་ཤིང་མུན་པའི་ནང་དུ་ཁབ་གཏོར་ལྟར། །མན་ངག་སྙིང་པོ་དཀྲུགས་ཤིང་ལྷག་ཆད་བྱེད། །དེ་རྣམས་ཀྱིས་ནི་བསྣན་ཕྲི་བྱར་མེད་ཕྱིར། །མིང་ངེས་གསང་བའི་ཁ་བྱང་འདི་ཉིད་ནི། །དམ་པ་རྣམས་ནི་ལུས་ངག་ཡིད་ཀྱིས་ཀྱང་། །རབ་ཏུ་གུས་པས་གསོལ་བ་བཏབ་ནས་ཀྱང་། །མ་འོངས་སྙིགས་མའི་དུས་སུ་དགོས་སྲིད་པས། །འཁྲུལ་པ་མེད་པའི་བློ་ཡིས་འབྲི་བར་བྱ། །གསང་བའི་མན་ངག་ཡི་གེ་འདི་ཉིད་ནི། །གཅིག་ལ་གཅིག་དགོས་མ་བུ་མ་ཡིན་ཏེ། །གནད་ཀྱི་མན་ངག་ངེས་པ་སོ་སོའི་ཐབས། །ངེས་པའི་སྙིང་པོ་མན་ངག་ངེས་པའི་གྲངས། །བླ་མེད་ཡོངས་སུ་རྫོགས་པའི་སྡེ་ཚན་ལ། །འདི་དག་ཡི་གེ་གསང་བའི་གནད་དུ་ཕབ། །འདི་ལྟར་མིང་གི་ཁ་བྱང་ངེས་པ་ལ། །གསང་བའི་མན་ངག་ཁ་བྱང་ཡི་གེ་ནི། །ངེས་པར་གྲངས་སུ་བཅད་ན་འདི་ལྟར་མཆིས། །རྒྱ་ཆེར་བཤད་པའི་ཡི་གེ་གྲངས་མང་ཡང་། །རྣམ་པར་བསྡུས་ན་སྙིང་པོའི་དོན་ཉིད་ནི། །བརྒྱ་དང་བཅུ་དགུ་ཉིད་དུ་བཀོད་པ་ལ། །རེ་རེས་ཀྱང་ནི་གྲོལ་བའི་སྙིང་པོ་འོ། །ལྟ་བའི་སྐོར་བཞིའི་རྩ་ངེས་དུམ་དུམ་ཁྲིགས་༡སུ་ལྟོས། །སྟོན་པའི་ལོ་རྒྱུས་

ལ་སོགས་པོ་ཏི་སྨུག་ཆུང་༢ལྟོས། །འཁྲུལ་གཞི་གསལ་བའི་མེ་ལོང་༣ཉིད་དང་འབྱུང་བཞི་གནད་ཡིག་༤དང་། རིན་ཆེན་གསེར་ཐིགས་༥ཉིད་དང་སྣང་བྱེད་སྒྲོན་མ་༦དང་། །འདོ་གསལ་ལྡེ་མིག་༧ཉིད་དང་ཤེས་བྱ་སྐོར་གསུམ་༨དང་། །གསང་བའི་སྡོམ་བྱང་༩ཉིད་དང་སྒྲ་བརྟགས་འཁོར་ལོ་༡༠ཉིད། །༈སྐུ་གསུམ་ལག་ཁྲིད་༡༡དང་ནི་མཁའ་འགྲོ་པྲ་ཁྲིད་༡༢དང་། །བབས་ལུགས་གསུམ་༡༣སྐོར་དང་ནི་འཁྲུལ་བའི་སྡོམ་ཡིག་༡༤གཉིས། །གསང་༡༥ཐིག་ཆེན་པོ་དང་ནི་གསེར་༡༦བྱང་བཀོལ་བ་ཉིད། །ལམ་ཁྲིགས་༡༧ཆེན་པོ་དང་ནི་ཡེ་ཤེས་༡༨ལག་ཕྲད་གཉིས། །བཀའ་ཁྲོལ་༡༩ཆེན་པོ་དང་ནི་བསམ་གཏན་རང་༢༠གནས་གཉིས། །༈གསལ་བའི་མེ་༢༡ལོང་ཉིད་དང་གསང་བ་ཉིང་༢༢བཀོལ་གཉིས། །སྣང་བ་བསྡུས་པ་༢༣དང་ནི་གནས་པའི་བྱུང་ཁུངས་༢༤གཉིས། ཁྲེགས་ཆོད་བདུན་པ་༢༥དང་ནི་ཐོད་རྒལ་དགུ་༢༦པ་གཉིས། །ལུང་བསྟན་ཆེན་༢༧མོ་དང་ནི་གླང་ཆེན་དྲུག་༢༨པ་གཉིས། །སྤྱོད་ལམ་བསྡུས་༢༩པ་དང་ནི་ལྟ་བའི་གསེར་༣༠བཀོད་གཉིས། །༈པདྨའི་ཀློང་༣༡ཡངས་དང་ནི་ལྷ་ཡི་ཕྱག་༣༢སོར་མ། །གསེར་གྱི་ཨུཏྤལ་༣༣ཉིད་དང་དྲན་པ་རྒྱུན་༣༤གཅོད་གཉིས། །རགས་པ་༣༥ཉམས་བླངས་ཉིད་དང་ཕྲ་རྒྱུན་༣༦དྲིལ་བ་གཉིས། །གསལ་བའི་སྒྲོན་༣༧མ་ཉིད་དང་སེང་གེ་༣༨རྩལ་སྤྲུག་གཉིས། །ཨ་ཏི་རྣལ་དགོངས་༣༩དང་ནི་དགོས་དོན་བཞི་༤༠པ་གཉིས། །༈རྡོ་རྗེ་ལམ་༤༡བསྟན་དང་ནི་རིན་ཆེན་འོད་འབར་༤༢ཉིད། །ལྷག་པའི་འཁོར་ལོ་༤༣དང་ནི་ཁྱུང་ཆེན་མཁའ་༤༤ལྡིང་གཉིས། །ལྟ་བའི་མིག་སེལ་༤༥ཉིད་དང་བླ་མའི་རིམ་པ་༤༦གཉིས། །དྲང་བའི་༤༧ཚིག་རྒྱུད་དང་ནི་འཁྲུལ་གཞི་རྩད་ཆོད་༤༨གཉིས། །སེམས་ཀྱི་དམིགས་དྲུག་༤༩ཉིད་དང་སྒོམ་པའི་

འཁོར་ལོ་༥༠གཉིས། །༈དབང་གི་ལྡེ་༥༡མིག་ཉིད་དང་དབང་གིས་ལས་བྱང་༥༢གཉིས། །སྤྲོས་མེད་དབང་གི་མན་༥༣ངག་དག་དང་དབང་གི་རྩ་བ་༥༤པ་གཉིས། །དབང་གི་རིགས་༥༥འབྱེད་ཉིད་དང་དབང་གི་ཕྲ་ཏིག་༥༦གཉིས། །འཁོར་ལོ་དྲུག་པའི་༥༧དབང་དང་དམ་ཚིག་བར་༥༨འབྱེད་གཉིས། །དབང་བཀོད་ཆེན་པོ་༥༩ཉིད་དང་དབང་སྦྱོར་པྲ་༦༠ཁྲིད་གཉིས། །༈རིག་པའི་༦༡མེ་ཏོག་ཉིད་དང་གསེར་༦༢ལུང་ཆེན་པོ་དང་། །མན་ངག་རྩ་བ་༦༣ཉིད་དང་ལུང་ཏིག་བཅོ་བརྒྱད་༦༤པ། །རིག་པ་དྲུག་༦༥པ་དང་ནི་སེམས་ལུང་སྒོམ་ཁྲིགས་༦༦གཉིས། །ཡང་གསང་༦༧དྲིལ་བ་དང་ནི་སྦས་པའི་ཉི་༦༨མ་དང་། །འཕྲ་བཀོད་བཅུ་༦༩པ་དང་ནི་ལུང་༧༠ཡིག་བསྡུས་པ་ཉིད། །༈བདུད་རྩི་ཡང་༧༡ཞུན་དང་ནི་ལུང་༧༢གསུམ་འདུས་པ་ཉིད། །གསང་ཆེན་གཡུ་༧༣ཡིག་ཅན་དང་མན་ངག་ཕྲ་༧༤ཡིག་ཅན། །གསང་བ་གསེར་༧༥ཡིག་ཅན་དང་སྙིང་གཟེར་༧༦ཆེ་ཆུང་དང་། །བསམ་གཏན་ཉལ་བའི་འཁོར་ལོ་༧༧དང་ནི་འཕྲུལ་ཡིག་༧༨ཆེ་ཆུང་དང་། །མཁའ་འགྲོ་༧༩མཛོད་དང་འཕོ་བ་༨༠ཆེན་མོ་ཉིད། །གསང་བའི་གཟེར་༨༡བུ་དང་ནི་རྩ་གནས་འཁོར་༨༢ལོ་དང་། །བསམ་གཏན་༨༣བབས་ལུང་དང་ནི་རིག་པ་ས་༨༤འབྱེད་གཉིས། །སྣང་བ་རྒྱས་༨༥འདེབས་ཉིད་དང་ཡེ་ཤེས་སྦུབས་༨༦འཇུག་གཉིས། །ལོ་རྒྱུས་༨༧ཆེན་མོ་ཉིད་དང་གསལ་བའི་ཞལ་༨༨ཆེམས་ཉིད། །ཐེག་པའི་བསྡུས་༨༩ཤན་དང་ནི་གསང་བའི་སྒྲ་༩༠ཡིག་གཉིས། །༈ཡི་གེའི་༩༡སྒྲ་བཤད་དང་ནི་སྒྲ་བཞི་མཚམས་སྦྱོར་༩༢གཉིས། །བསྟན་པའི་གོ་༩༣ཆ་མ་དང་འགྱུར་མེད་ཐིག་ལེ་༩༤གཉིས། །དངོས་པོའི་ཁ་༩༥བསྒྱུར་དང་ནི་འབྲས་བུ་མངོན་བྱེད་༩༦གཉིས། །སྟོང་པའི་མཐའ་༩༧འབྱེད་དང་ནི་ནམ་མཁའ་༩༨ལམ་ཁྱེར་གཉིས། །ཐི་བྱ་ཚང་༩༩འཇུག་དང་ནི་གསལ་བར་རིན་༡༠༠ཆེན་འོད། །ཀ་དག་ཆེན་པོའི་དག་༡༠༡ཡིག་དང་

ནི་ལྷུན་གྲུབ་ཡི་གེ་༡༠༢གཉིས། །ཤེས་རབ་འཁོར་ལོ་དང་༡༠༣ནི་སྨྲ་བའི་མཚོན་ཆེན་༡༠༤གཉིས། ཡེ་ཤེས་ལྔ་བསྐོར་༡༠༥དང་ནི་འོད་ཀྱི་ཚུལ་༡༠༦བཤད་གཉིས། །འབྱུང་བའི་གནས་༡༠༧འབྱེད་དག་ནི་སྒྲོན་མའི་ཁུངས་གཅོད་༡༠༨གཉིས། །ཕྱག་རྒྱས་༡༠༩འདུས་པ་དང་ནི་བཀོད་པ་༡༡༠ལྔ་པ་གཉིས། །རྒྱ་མཚོ་ཨར་གཏད་༡༡༡དང་ནི་རླུང་གི་སྡོམ་བྱུང་༡༡༢གཉིས། །ངོ་སྤྲོད་གསུམ་པ་༡༡༣དང་ནི་བབས་ལུགས་༡༡༤བཅུ་གཅིག་པ། །རྩ་ཐིག་༡༡༥ཆེ་ཆུང་དང་ནི་རླུང་གིས་སྟེམས་ཡིག་༡༡༦དང་། །རིག་པ་གནས་ས་༡༡༧དང་ནི་མིག་གི་བསམ་གཏན་༡༡༨ན། །དེ་ལྟར་མན་ངག་ཡིག་ཆུང་བརྒྱ་དང་བཅུ་དགུ་ནི། །གཅིག་ལ་གཅིག་བརྟེན་མ་ཡིན་འབྲེལ་མེད་སོ་སོའི་གནད། །ངེས་པར་གང་ཟག་རེ་ལ་ཕན་པ་དང་། །དགོས་པའི་ཡིག་ཆུང་རྒྱུད་ལ་ཕན་པ་དང་། །སྙིང་པོ་རབ་ཏུ་བསྡུས་པ་ཉི་ཚེ་ལས། །གནད་མེད་ཡི་གེ་གཅིག་ཀྱང་མ་མཆིས་སོ། །གསང་ཆེན་དམ་པའི་ཡི་གེ་འདི་དག་ནི། །མཐར་ཐུག་མན་ངག་ངེས་པའི་གནད་ཡིན་པས། །སྐལ་ལྡན་སེམས་ཀྱི་བུ་ཡིས་ཡིད་ལ་ཆོངས། །སྐུ་གསུམ་ཡེ་ཤེས་ལྔ་ཉིད་ས་ལ་གོམས་པ་ཡི། །ཐབས་ཀྱི་ཡན་ལག་རྣམས་སུ་འདི་དག་འདྲ། །ལྷག་པའི་ཡི་གེ་གསར་བའི་གནད་འདི་ཡིས། །གང་གི་དུག་གསུམ་ནད་རྣམས་འདོན་པར་བྱེད་པ་འོ། །གསང་བའི་མན་ངག་ཡིག་ཆུང་ངེས་པའི་གྲངས། །སྙིགས་མའི་དུས་སུ་འདི་ཉིད་དགོས་སྲིད་པས། །མ་འོངས་སྐལ་ལྡན་འདི་ལ་འཇུག་པ་རྣམས། །སྙིང་པོ་དོན་གྱི་ཡི་གེའི་གྲངས་ཉིད་ལས། །ཐེ་ཚོམ་བློ་ཡིས་སྤྲོས་པ་གཅོད་པའི་ཕྱིར། །མ་ནོར་དམིགས་བསྟན་མན་ངག་ངེས་པའི་གྲངས། །

ཐེ་ཚོམ་བསལ་ཕྱིར་མན་ངག་ངེས་པ་ཡི། །མིང་རྣམས་ངེས་པའི་ཁ་བྱང་འདི་བྲིས་པས། །རང་བཞིན་རྫོགས་པ་ཆེན་པོའི་དོན་འདི་ལ། །མོས་འཇུག་དད་པའི་སྐལ་པ་ལྡན་པ་ལ། །མུན་པའི་ནང་དུ་སྒྲོན་མེ་བཏེགས་པ་ལྟར། །ཇི་ལྟར་སྣང་བའི་འོད་ཀྱིས་ཆོས་རྣམས་ཀུན། །རང་བཞིན་མཉམ་པ་ཉིད་དུ་ཤེས་པར་ཤོག །མན་ངག་ངེས་པའི་ཁ་བྱང་མིང་རྣམ་པར་བཀོད་པ། །སློབ་དཔོན་ཆེན་པོ་བི་མ་ལ་མི་ཏྲས་མཛད་པ་རྫོགས་སོ།། །།ཨྠྀི། རྒྱ་རྒྱ་རྒྱ། ས་མ་ཡཱ། །དགེའོ། །

མན་ངག་དུམ་དུམ་ཁྲིགས་དུམ་བུ་བདུན་ཅུ་རྩ་བཞི་པ།

མན་ངག་དུམ་དུམ་ཁྲིགས་དུམ་བུ་བདུན་ཅུ་རྩ་བཞི་པ་བཞུགས་སོ། །མན་ངག་དང་པོ།

བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ༔ ཡང་གསང་དུམ་དུམ་ཁྲིགས་ཁྲིད་གསང་བའི་ཐིགས་ཡིག་གནད་ཀྱི་གལ་མདོ༔ གབ་པ་རྣམས་མངོན་དུ་གཏན་ལ་འབེབས་པར་བྱེད་པ༔ དང་པོ་གཞི་གཏན་ལ་འབེབས་པར་བྱེད་པ༔ གཞི་ཀ་དག་ཆེན་པོ༔ རང་བཞིན་གར་ཡང་རྒྱ་མ་ཆད་པ༔ ཕྱོགས་གང་དུ་ཡང་མ་ལྷུང་༔ རང་བཞིན་དུ་འོད་གསལ་རྒྱ་མ་ཆད་པ་བུམ་པའི་སྐུ་ལྟ་བུ་འོད་ལྔ་མ་འདྲེས་པར་གསལ་བ༔ ནམ་མཁའི་འཇའ་ལྟ་བུ༔ དེ་ཡང་གསལ་ལ་མ་འགགས་པ༔ གསལ་བྱེད་མ་གྲུབ༔ དེ་ལྟ་བུ་དེ་ལ་འཁོར་འདས་གཉིས་ཇི་ལྟར་བྱུང་ན༔ གཞི་དེ་ཡང་སྐུ་དངོས་འོད་དབྱིངས་རིག་པ་ལུ་གུ་རྒྱུད་གསུམ་དུ་ཡེ་ནས་གྲུབ་པས་ཏེ༔ དཔེར་ན་ཏིལ་ལ་མར་གྱི་གཞི་གྲུབ་པ་ལྟ་བུའོ༔ དེ་ལ་རང་བཞིན་གྱི་དབང་པོ་རྣོན་པོ་དང་༔ རང་བཞིན་གྱི་དབང་པོ་རྟུལ་པོ་གཉིས༔ རང་

བཞིན་གྱི་དབང་པོ་རྟུལ་པོ་ནི༔ དཔེར་ན་མེ་ལོང་དུ་བྱད་ཤར་བ་རང་བྱད་དུ་མ་ཤེས་པའོ༔ དབང་པོ་རྣོན་པོ་ནི༔ མེ་ལོང་དུ་བྱད་ཤར་བ་རང་བྱད་དུ་ཤེས་པ་ལྟ་བུ༔ གཞི་དེ་ལ་ཡེ་ཤེས་ཀྱི་རང་རླུང་ཞེས་བྱ་བ་ཉི་ཚན་ལ་སྤུ་འགུལ་བ་ཙམ་ཞིག་ལས་རིག་པ་གཡོས་སོ༔ གདངས་ཕྱིར་ཤར་བས་རྐྱེན་བཞིས་ཡར་གྲོལ་ཏེ༔ རྒྱུའི་རྐྱེན་གཞི་ལས་འཕགས་བཞི་དངོས་པོའི་གནས་ལུགས༔ བདག་པོའི་རྐྱེན་རང་རིག་པའི་ལུ་གུ་རྒྱུད་ཡེ་ཤེས། །དམིགས་པའི་རྐྱེན་རང་དུ་ཤེས་པ་ཆོས་ཉིད་ཀྱི་ཡིད་ལ་ཤར་བ་སྣང་༔ མཚུངས་པའི་རྐྱེན་སྐད་ཅིག་མ་ལ་ཚོམ་བུ་དང་བཅས་པ་ལོངས་སུ་སྐུ་བཞི་བཅུ་རྩ་གཉིས་སུ་སངས་རྒྱས་པའོ༔ དེ་ནས་བདུད་བཞི་རང་བཞིན་དུ་ཆོམས༔ རང་སྣང་དུ་ཤེས་པས་ལྷའི་བུའི་བདུད་ཆོམས༔ ཡེ་ཤེས་ཀྱིས་རང་ལུས་ཟིན་པས་ཕུང་པོའི་བདུད་ཆོམས༔ ཡེ་ཤེས་ཀྱི་ལུས་ལ་ཉོན་མོངས་པ་མེད་པས་ཉོན་མོངས་པའི་བདུད་

ཆོམས༔ ཡེ་ཤེས་ཀྱི་ལུས་ལ་སྐྱེ་ཤི་མེད་པས༔ འཆི་བདག་གི་བདུད་ཆོམས་ནས་མྱ་ངན་ལས་འདས་པའོ༔ ལོངས་སྐུ་ནས་ལྷུན་གྲུབ་རིན་པོ་ཆེ་གསང་བའི་སྦུབས་སུ་གྲོལ་ཏེ༔ ལེགས་པར་མྱ་ངན་ལས་འདས་པའོ༔ དེས་ཀྱང་གྲོལ་ལུགས་བསྟན་པའོ༔ ཨྠྀི༔ རང་བཞིན་གྱི་དབང་པོ་རྟུལ་པོ་ལས༔ མེ་ལོང་དུ་བྱད་ཤར་བ་དེ་རང་སྣང་དུ་མ་ཤེས་པས༔ དཔེར་ན་གཞན་བྱད་དུ་ཤེས་པ་ལྟ་བུའོ༔ སྐུ་དབྱིངས་རིག་པ་གཞན་སྣང་དུ་མཐོང་བས༔ སྐུ་ལས་ལུས་སུ་འཁྲུལ༔ དབྱིངས་ལས་ཡུལ་དུ་འཁྲུལ༔ རིག་པ་སེམས་སུ་འཁྲུལ༔ མར་འཁྲུལ་པ་ལ་ཡང་རྐྱེན་བཞི་རང་སྣང་དུ་མ་ཤེས་པ་དེ་རྒྱུའི་རྐྱེན༔ གཞན་དུ་ཤེས་པ་བདག་པོའི་རྐྱེན༔ འཁྲུལ་སྣང་དུ་མར་ཤར་བ་དེ་དམིགས་པའི་རྐྱེན༔ དེ་རྣམས་དུས་མཚུངས་པས་མཚུངས་པ་དེ་མ་ཐག་པའི་རྐྱེན༔ རང་སྣང་དུ་མ་ཤེས་པས་ལྷའི་བུའི་བདུད་༔ ཟག་བཅས་ཀྱི་ཕུང་པོ་བླངས་པས་ཕུང་པོའི་བདུད༔ ཟག་བཅས་ཀྱི་ཕུང་པོ་ལ་ཉོན་མོངས་པ་ཡོད་པས་ཉོན་མོངས་པའི་བདུད༔ ཟག་བཅས་ཀྱི་ཕུང་པོ་ལ་སྐྱེ་ཤི་ཡོད་པས་འཆི་བདག་གི་བདུད་བྱུང་བའོ༔ ཨྠྀི༔ དང་པོ་གཞི་དེ་ལས་འཁོར་འདས་བྱུང་ལུགས་བསྟན་ནས༔ ད་ཟག་བཅས་ལ་སྐུ་འོད་རིག་པ་གསུམ་གནས་ལུགས་སྟོན་པའོ༔ དང་པོ་གཞི་ལ་ཇི་ལྟར་གནས་པ་ལྟར་ཟག་བཅས་ལ་གནས་ཏེ༔ སྐུ་འོད་རིག་པ་གསུམ་པར་གྲོལ་བས་སྐུ་གསུངས་ཐུགས༔ མར་འཁྲུལ་བས་ལུས་ངག་ཡིད་གསུམ༔ གནས་གང་ན་གནས་ན་ཀུན་ཏུ་བཟང་པོའི་གའུ་ཁ་སྦྱོར་ཞེས་བྱ་བ༔ ཙིཏྟ་འོད་ཀྱི་གའུ་ན་སྐུ་ཡུངས་འབྲུ་ཙམ༔ ཞི་བའི་སྐུ་ལ་ཁྲོ་བོའི་དབུ་རྒྱན་དུ་བཞུགས་སོ༔ ཡབ་ཡུམ་གྱི་ཚུལ་དུ་བཞུགས་སོ༔

དུང་ཁང་ན་ཁྲོ་བོའི་སྐུ་བཞུགས་སོ༔ ཞི་བའི་སྐུ་ལམ་དར་དཀར་གྱི་སྐུད་པ་ཙམ་ནས་ལམ་བྱུང་ངོ་༔ སྒོ་མིག་གི་དབང་པོ་ནས་ཐོན་ནས་ཡུལ་ཆོས་ཉིད་ཀྱི་ནམ་མཁའ༔ རང་ལངས་པའི་མགོའི་ཁྲུ་གང་ན་གནས་ཏེ༔ ལུ་གུ་རྒྱུད་འཆར་ཏེ་ལུ་གུ་རྒྱུད་ཀྱི་ཚིགས་ལའང་སྐུའི་སྣང་བ་འཆར་ཏེ་རང་གི་ངོ་བོ་རྩ་ནས་ཐིག་ལེ་དང་༔ ཐིག་ལེའི་ནང་དུ་ཞལ་རས་ཀྱི་སྣང་བ་འཆར་བ་སྟེ༔ རང་བཞིན་རྩ་ཕྲན་ནས་འོད་དང་ཐིག་ཕྲན་འཆར་བ་དེ་ཐུགས་རྗེ་ཀུན་ཁྱབ་སྣང་སྲིད་ཞིང་ཁམས་སུ་འཆར་བའོ༔ ཨྠྀི༔ མིག་ནས་སྐུ་འོད་རིག་པ་གསུམ་འཆར་ཏེ༔ གསལ་བ་ཟང་ཐལ་སྒྲིབ་གཡོགས་ཐམས་ཅད་དང་བྲལ་བས་རིན་པོ་ཆེ་མན་ཤེལ༔ སྐུ་འོད་རིག་པ་གསུམ་གཏན་ལ་འབེབས་པས༔ འཁོར་འདས་ཀྱི་འབྲེལ་ཐག༔ མྱང་འདས་ཀྱི་ལམ༔ དེ་ཉམས་སུ་ཇི་ལྟར་བླངས་ན༔ དབྱིངས་ཀྱི་ནང་ན་ལུ་གུ་རྒྱུད་འདུ་འབྲལ་མེད་པར་ཉམས་སུ་བླངས༔ དེ་ཉམས་སུ་ལོངས་པའི་ཚད་ལུས་ངག་གི་ཞེན་པ་རང་ཟད༔ སྐུ་གསུམ་གྱི་ཞེན་པ་ལས་འདས་པའོ༔ ཨྠྀི༔ དེ་ཡང་དབྱིངས་རྣམ་པར་དག་པའི་སྒྲོན་མ་ཨ་ཝ་དྷཱུ་ཏི་ན་གནས་སོ༔ དེ་ཡང་འོད་ལྔ་སྐུ་དང་བཅས་ནས་གནས༔ ཐིག་ལེ་སྟོང་པའི་སྒྲོན་མ་ཆོས་ཉིད་དག་པའི་རྩ་ལ་གནས༔ དཔེར་ན་ཉའི་མིག་ལྟ་བུའོ༔ འོད་ཀྱི་ཐིག་ལེར་གནས༔ ཤེས་རབ་རང་བྱུང་གི་སྒྲོན་མ་སྐྱོན་ཡོན་འབྱེད་པའི་རྩ་ལ་གནས༔ དེ་ཡང་སྟོང་པ་འགྱུར་མེད་དང་བཅས་པར་གནས༔ དཔེར་ན་སྤུ་གྲི་ལྟ་བུའོ༔ རྒྱང་ཞགས་ཆུའི་སྒྲོམ་མ་མིག་ལ་གནས༔ མཐོང་བ་མ་འགགས་པར་གསལ་ལོ༔ སྒྲོན་མ་དེ་རྣམས་ཐམས་ཅད་མིག་ནས་འཆར་ཏེ༔ དབྱིངས་རྣམ་པར་དག་པའི་སྒྲོན་མ་ནི༔

བར་སྣང་གི་འཇའ་གུག་པར་ལྟ་བུར་ནམ་མཁའ་ལ་འཆར་ལ༔ དེ་ཡང་གོམས་པ་ཚད་དུ་ཕྱིན་ན་ཡེ་ཤེས་སྐུ་དང་འོད་ལ་འགག་པ་མེད་པ་འཆར་རོ༔ ཐིག་ལེ་སྟོང་པའི་སྒྲོན་མ་ནི་རྨ་བྱའི་མདོངས་ལྟ་བུར་འཆར་ཏེ༔ དེ་ནི་དབྱིངས་ཀྱི་སྒྲོན་མ་ཉམས་སུ་བླངས་པའི་དུས་ན་གོམས་པ་མཐར་ཕྱིན་པའི་རྟགས་འོད་དང་ཐིག་ལེར་འཆར་བའི་རྟགས་སུ་བསྟན༔ ཤེས་རབ་རང་བྱུང་གི་སྒྲོན་མ་ནི༔ སྐྱོན་དང་ཡོན་ཏན་ཐམས་ཅད་སེལ་ལོ༔ རིག་པ་གཉིས་མེད་ཀྱི་སྐུ་ནི་ཚངས་པའི་བུ་ག་ནས་འབྱུང་བའོ༔ སྐུ་རུ་འཆར་རོ༔ དོན་རང་གི་ལུས་ལ་གནས༔ རྟགས་དངོས་སུ་འཆར་བའི་སྒྲོན་མ་གཉིས༔ དབྱིངས་ཀྱི་སྒྲོན་མ་དང་ཐིག་ལེ་སྟོང་པའི་སྒྲོན་མའོ༔ འབྲས་བུ་ཅིར་སྣང་འོད་ཀྱི་སྐུར་ཤར༔ རྟོགས་པ་ནི་རང་ལས་བྱུང་བར་རྟོགས༔ མཐར་ཕྱིན་པའི་ལམ་སྐྱེ་མེད་ཀྱི༔ སངས་རྒྱས་ཐོབ་པའོ༔ རང་ལ་ཡེ་ཤེས་ཕྱོགས་མེད་དུ་འཆར་བའོ༔ དེ་རང་ལ་གནས་པའོ༔ ཨྠྀི༔ དང་པོ་གཞི་ལས་འཕགས་གཞིའི་སྣང་བ་འགག༔ འཁྲུལ་པའི་སྣང་བ་མ་ཤར་བའི་དུས་ན་གཞོན་ནུ་བུམ་པའི་སྐུ་ཞེས་བྱ་བ་རྒྱ་མ་རལ་དེ་ལས༔ འཛིན་བྱེད་ཀྱི་ཤེས་པས་བློ་དང་བཅས་པའི་རྟའི་རྔ་མ་ཙམ་ཞིག་བྱུང་༔ བར་དེར་སྣང་བ་སེང་མ་སང་མ༔ ཤག་མ་ཤིག་མ༔ ཁྲལ་མ་ཁྲོལ་མ༔ འགྱུ་འཕྲིག༔ འགུལ་འཕྲོ་ཡེད་ཡེད་སྔངས་ལམ་པ་སོགས་འབྱུང་ངོ་༔ དེ་ནི་རྡོ་རྗེ་སེམས་དཔའ་ཡིད་རང་བྱུང་གི་ཡེ་ཤེས་བྱ་བའོ༔ དེ་ལས་འཁྲུལ་པ་དུ་མར་འཁྲུལ་པ་བྱུང་ངོ་༔ ཨྠྀི༔ ད་ནི་ཐིག་ལེའི་གནས་ལུགས་བསྟན་ཏེ༔ རིན་པོ་ཆེ་ཤེལ་དཀར་རྒྱུས་པའི་རྩ་ནང་ན་དབྱིངས་རྣམ་པར་དག་པའི་ཐིག་ལེ་གནས་ཏེ༔ ཆེ་ཆུང་གི་ཚད་ནི་སྲན་མ་

ཙམ་དུ་གནས་ཏེ༔ དེ་ཡང་ཁ་དོག་ལྔའོ༔ འོད་ཟེར་དུ་འཕྲོ༔ སྐུ་དང་བཅས་སོ༔ ཙིཏྟའི་རྩེ་མོ་ན་གནས་སོ༔ རིན་པོ་ཆེ་ཤེལ་གྱི་སྦུ་གུ་ཅན་ན་དབྱིངས་ཀྱི་ཐིག་ལེ་གནས་ཏེ༔ དེ་ཡང་ཆེ་ཆུང་གི་ཚད་སྲན་ཆུང་ཙམ་དུ་གནས་སོ༔ ཁ་དོག་དཀར་པོ་འོད་ཟེར་ཆ་ཙམ་དུ་གནས་སོ༔ ཙིཏྟའི་གཡས་ནས་འབྱུང་ངོ་༔ རིན་པོ་ཆེ་དྲ་བ་འདུས་པའི་ནང་ན༔ ཀུན་ཏུ་བཟང་པོའི་ཐིག་ལེ་གནས་ཏེ༔ ཆེ་ཆུང་ནི་ཡུངས་འབྲུ་ཙམ་དུ་གནས་སོ༔ ཁ་དོག་དམར་པོར་གནས་སོ༔ འགྲོ་འོང་དང་བཅས་པའོ༔ ཙིཏྟའི་སྐེད་པ་ནས་འབྱུང་བའོ༔ ཐིག་ལེ་ལྔའི་ཚོམ་བུ་དང་བཅས་པའོ༔ རིན་པོ་ཆེ་སྟོང་པ་རང་སང་གི་ནང་ན་ཆོས་ཉིད་ཀྱི་ཐིག་ལེ་གནས་ཏེ༔ ཆེ་ཆུང་སྐྲའི་རྩེ་མོ་ཙམ༔ ཁ་དོག་སེར་པོ༔ སྤྲོ་བསྡུ་མེད་པ་ཙིཏྟའི་སྐེད་པ་ནས་འབྱུང་༔ རིན་པོ་ཆེ་ལས་རབ་རྫོགས་པའི་རྩ་ན་ཡེ་ཤེས་ཀྱི་ཐིག་ལེ་གནས་ཏེ༔ ཆེ་ཆུང་ཏིལ་འབྲུ་ཙམ་དུ་ཁ་དོག་དམར་སེར༔ འགྲོ་འོང་མེད་ཅིང་ཙིཏྟའི་རྩ་བ་ནས་འབྱུང་༔ རིན་པོ་ཆེ་དར་དཀར་སྣ་མ་ལྟ་བུའི་རྩལ༔ ཡེ་ཤེས་ཆེན་པོའི་ཐིག་ལེ་གནས་ཏེ༔ ཆེ་ཆུང་རྟ་རྔ་བཅུར་གཤགས་པ་ཙམ༔ ཁ་དོག་སྔོན་པོར་གནས༔ འགྲོ་འོང་ལྟར་སྣང་བའོ༔ ཙིཏྟའི་འདབས་ནས་འབྱུང་ངོ༔ དེ་རྣམས་ཀྱི་ལམ་མིག་ནས་འཆར་རོ༔ ཨྠྀི༔ ད་ནི་རིག་པའི་ཡེ་ཤེས་རང་ལ་ཡོད་ལུགས་བསྟན་ཏེ༔ དེ་ཡང་རིག་པའི་ཡེ་ཤེས་ཆེན་པོ་དེ༔ རང་གི་གཟུགས་ཀྱི་ཕུང་པོ་ལ་བརྟེན་ཏེ༔ གནས་ནི་སྙིང་གི་དཀྱིལ་ན་གནས༔ དེ་ཡང་འདི་ལྟ་སྟེ༔ ཀུན་ཏུ་བཟང་པོ་གའུ་ཁ་སྦྱོར་གྱི་དགོངས་པ་ཞེས་བྱ་སྟེ༔ སྙིང་རིན་པོ་ཆེ་

ཟུར་བརྒྱད་པའི་ནང་ན༔ ཡེ་ཤེས་ཀྱི་འོད་ཚོན་གྱི་དྲུ་བུ་བསྡོགས་པ་ལྟ་བུའི་ནང་ན༔ ཞི་བའི་སྐུ་ཡུངས་འབྲུ་ཙམ་རང་རང་འོད་དང་བཅས་ནས་གནས་སོ༔ དེ་ཡབ་ཡུམ་གྱི་ཚོམ་བུར་གནས་སོ༔ དེ་ཡང་སྐུ་དེ་རྣམས་འགུལ་བའི་དུས་སུ་ཨིག་ཟེར་ནས་ཨིག་གུའི་སྒྲ་འབྱུང་ངོ་༔ དེ་ནི་འོད་དང་སྐུའི་གནས་ལུགས་སོ༔ ཨྠྀི༔ ལུ་གུ་རྒྱུད་ནི་གསལ་བ་རང་ཤེས་ཀྱི་དགོངས་པ་ཡེ་ཐོག་མ་ནས་བཞུགས་སོ༔ ཕྲ་བའི་ཚད་རྟ་རྔ་ལ་མདུད་པ་བྱས་པ་ལྟ་བུའོ༔ གཟུང་བར་དཀའ་ལ་འགྲོ་འོང་དང་བཅས་པར༔ མིག་གར་འགུལ་བའི་ཕྱོགས་སུ་འགྲོ་བའོ༔ དེ་བཟུང་བར་བྱས་ཏེ༔ ཆོས་སྐུའི་སྟ་སྟངས་ཀྱི་གྱེན་ལ་སྨིན་ཕྲག་ཏུ་མིག་དང་ཤེས་པ་རྩེ་གཅིག་ཏུ་དྲིལ་བ་བཟུང་ངོ་༔ ཟིན་པ་དང་དབྱིངས་ཀྱི་སྣང་བར་འཆར་ཏེ༔ དེ་གཉིས་འདུ་འབྲལ་མེད་པ་ལ་དགོངས་པ་གནས་པར་བྱའོ༔ ཨྠྀི༔ ནམ་མཁའ་སྟོང་པ་ལ་རིག་པ་སྟོང་པ་སྣང་བ་ཡིན་པས༔ འདི་ནི་ཡུལ་སྟོང་པ་ལ་ངོ་བོ་ཉིད་རང་དག་ཅིང་གནས་པ་ཞེས་བྱ༔ འདི་ནི་ཐོག་མ་ནས་སྟོང་པ་ཉིད་ཀྱི་སྣང་བ༔ སྟོང་པ་ཉིད་དུ་གྲོལ་བ་ཞེས་བྱ་སྟེ༔ ཡུལ་སྟོང་པ་ལ་རིག་པ་གསལ་བར་ཤར་བས༔ གསལ་སྟོང་དབྱེར་མེད་སྣང་བ་རང་དག་ཡིན་ཏེ༔ དག་པ་ཟུང་འཇུག་གི་དགོངས་པ་ཞེས་བྱ༔ རིག་པ་ལུ་གུ་རྒྱུད་ནི་གསལ་བ་རང་ཤེས་ཀྱི་རྒྱལ་པོ་ཞེས་བྱ་བ་ཡེ་ཐོག་མ་ནས་བཞུགས་པ་ཡིན་ཏེ༔ སངས་རྒྱས་པའི་སྣང་བ་དང་དབྱེར་མི་ཕྱེད་པར་བཞུགས་ཚུལ་ལ་ཁྱད་མེད༔ སྣང་ཚུལ་རྒྱུན་དུ་ཕྱེ་བའོ༔ དེའི་དབང་པོའི་མངོན་སུམ་རིག་པ་ཟང་ཐལ་ཞེས་བྱ་སྟེ༔ རིག་པ་ཉིད་ཉམས་སུ་མྱོང་དུ་ཡོད་པས་སོ༔ ཨྠྀི༔ རང་གི་ངོ་བོ་དང་སྦྱོར་ན༔ ངོ་བོ་

རིག་པས་ཏེ་རང་གིས་རང་རིག་པ་དང་༔ རང་བཞིན་འཆར་ཚུལ་དུ་བཞུགས་པས༔ དེ་ལ་སྐུ་དང་ཡེ་ཤེས་དང་༔ འོད་དང་ཐིག་ལེ་རྣམས་སུ་ཤར་བའོ༔ ཐུགས་རྗེ་འཆར་བྱེད་དུ་བཞུགས་པས༔ དབྱིངས་དང་རིག་པ་ཡུལ་དང་དབང་པོ་རྣམས་རང་སྣང་བའོ༔ ཨྠྀི༔ རང་ལ་གནས་ས་དང་སྦྱར་ན༔ ངོ་བོ་ཙིཏྟ་ན་ཞི་བའི་སྐུ་ལྔ༔ དུང་ཁང་ན་ཁྲོ་བོའི་སྐུ་ལྔ་ཡབ་ཡུམ་གྱི་ཚུལ་དུ་བཞུགས༔ རང་བཞིན་ནི་རྩ་གནས་ན་ཐིག་ལེ་དང་ཐིག་ཕྲན་དུ་གནས༔ ཐུགས་རྗེ་འོད་ལྔ་གསལ་བར་བཞུགས་སོ༔ ངོ་བོ་སྟོང་པ༔ རང་བཞིན་གསལ་བ༔ ཐུགས་རྗེ་མ་འགགས་པའོ༔ ཨྠྀི༔ མིག་དང་ནམ་མཁའ་སྤྲད་པས་ཡུལ་དང་གཟེར་ཐེབས་ཏེ༔ མི་འགྱུར་བའི་གནད་དང་༔ ནམ་མཁའ་དང་རིག་པ་ངོ་སྤྲད་པས་རང་ངོ་ལ་གཟེར་ཐེབས་ཏེ༔ རིག་པ་ཉིད་ལྷག་མཐོང་དུ་ཤེས་པའི་གནད་དང་༔ དེ་ཉིད་འདུ་འབྲལ་མེད་པར་སྐུ་གསུམ་རང་ཟད་ཀྱི་ཉམས་སྐྱེའོ༔ ཨྠྀི༔ འདི་ལྟར་ཉམས་སུ་བླངས་པའི་སྐྱེས་བུ་གོམས་སྟོབས་ཀྱིས་གནད་བསྟན་མི་དགོས་པ་ནི༔ ཆོས་ཉིད་སྤྲོས་པ་དང་བྲལ་བའོ༔ ཨྠྀི༔ བརྗོད་དཔག་གིས་ཀྱང་ཐོག་ཏུ་མི་ཕེབས་པའོ༔ རིག་པ་གནས་པ་ནི་རིག་པ་ལ་རྣམ་པར་རྟོགས་པས་མ་བསླད་པ་སྟེ༔ དངོས་པོ་གང་དུའང་མ་ཆད་པའི་རིག་པ་ཡིན་པས་ན་སྣང་སྟོང་དུ་ཡོད་པའོ༔ ཨྠྀི༔ འདི་ལ་བརྩོན་པར་བྱས་པ་རིག་པའི་ལུ་གུ་རྒྱུད་ཉིད་ལ་རྣམ་པར་གནས་པ་ཁོ་ནའོ༔ དབྱིངས་ལ་བརྟན་པར་བྱ་བའི་ཕྱིར༔ སྣངབ་ཀུན་ལ་རང་གཟེར་གདབ༔ རིག་པ་བརྟན་པར་བྱ་བའི་ཕྱིར༔ ངོ་བོ་ཉིད་ལ་རྣལ་དུ་དབབ༔ ལྟ་བ་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་གཟིར༔

ཤེས་པ་བརྟན་པར་བྱ་བའི་ཕྱིར༔ རིག་པ་དབྱིངས་སུ་བཙོན་དུ་གཟུང་༔ ལུས་ནི་བརྟན་པར་བྱ་བའི་ཕྱིར༔ འདུག་སྟངས་རྣམས་ལ་རབ་ཏུ་སྦྱང་༔ ངག་ནི་བརྟན་པར་བྱ་བའི་ཕྱིར༔ རྟག་ཏུ་ལྐུགས་པ་ལྟ་བུར་གནས༔ སེམས་ནི་བརྟན་པར་བྱ་བའི་ཕྱིར༔ རྟག་ཏུ་ལུ་གུ་རྒྱུད་ལ་བལྟ༔ སྣང་བའི་འཁྲུལ་པ་ཀུན་གཅོད་ཕྱིར༔ སྟོང་པ་ཉིད་ལ་གོམས་པར་བྱ༔ འདི་ལྟར་ཉམས་སུ་ལེན་པའི་མི༔ སངས་རྒྱས་རྣམས་དང་ཉེ་བ་ཡིན༔ དེ་ཕྱིར་འདི་ལ་གོམས་པར་བྱ༔ ཨྠྀི༔ ལུ་གུ་རྒྱུད་ཀྱི་རྩེ་ལ་ཐིག་ལེ་འཁར་ཕོར་ལྟ་བུ་གསུམ་འབྲེལ་དུ་སྣང་བའི་དུས་ན༔ ཆོས་ཉིད་སུམ་ཆ་ལ་དབང་ཐོབ་པས༔ མངལ་དུ་མི་འཇུག་པའི་གནད་དང་༔ ཐིག་ལེའི་ནང་དུ་སྐུ་རྐྱང་པ་རེ་རེ་སྣང་བའི་དུས་ན༔ རིག་པ་དབྱིངས་ཀྱ་ི་གཟེང་ལ་ཐེབས༔ ཐིག་ལེ་རེ་རེའི་ནང་དུ་སྐུ་ལྔ་ལྔ་ཤར་བའི་དུས་ན༔ སྐུ་གསུམ་ཞེན་པ་ཆོད་དོ༔ སྐུ་གསུམ་ལམ་དུ་བྱས་པའི་གནད༔ རིག་པ་རྟོག་མེད་དངོས་པོ་འོད་དང་ཁྱིམ་དང་ཐིག་ལེའི་ནང་དུ་ཕྱེད་སྐུ་འཆར་རོ༔ ཨྠྀི༔ རང་གི་ལུས་མི་སྣང་སྟེ་སྐབས་སུ་འོད་ཀྱི་སོར་མོ་སྣང་བའི་དུས་ན༔ ཆོས་སྐུའི་སྒྲོ་འདོགས་ལམ་དུ་ཆོད༔ ཐིག་ལེ་སྟོང་པའི་སྒྲོན་མ་ལ་སྐུ་ལྔ་ལྔར་ཤར་བའི་དུས་ན་ལོངས་སྐུའི་སྒྲོ་འདོགས་ལམ་དུ་ཆོད༔ ལུས་ངག་ཡིད་གསུམ་གྱི་གནད་གཏན་ནས་གཟིར་བས་སྤྲུལ་སྐུའི་སྒྲོ་འདོགས་ལམ་དུ་ཆོད༔ སྐུ་གསུམ་གྱི་སྒྲོ་འདོགས་ཆོད་པའོ༔ ཨྠྀི༔ འབྱུང་བ་དྭངས་སྙིགས་ཕྱེད་པའི་ཚད༔ ཕྱིའི་སྣང་བ་འགགས་ཏེ་འོད་དུ་སྣང་བ་ཡིན༔ ཆོས་ཅན་དང་ཆོས་ཉིད་ཕྱེད་པའི་ཚད༔ དབྱིངས་སྨིན་མཚམས་ལས་བྲལ་བའི་ཚེ་ཡིན༔ སེམས་དང་ཡེ་ཤེས་ཕྱེད་པ་ནི༔ རིག་པ་ལ་ཉིན་མཚན་མེད་པ་ཡིན༔ ཀུན་གཞི་དང་ཆོས་སྐུ་ཕྱེད་པ་ནི༔

གདོས་བཅས་མི་སྣང་བ་ཡིན༔ ཡིད་དང་ཤེས་རབ་ཕྱེད་པ་ནི་སྣང་བ་སྣ་ཚོགས་སུ་ཤར་བ་ཡིན་ནོ༔ ཨྠྀི༔ དབྱིངས་ཀྱི་སྒྲོན་མ་སྨིན་མཚམས་ལས་བྲལ་བའི་དུས་ན༔ འཁོར་འདས་གཉིས་ཀ་རྒྱབ་གྱེས་པ་ཡིན༔ མངལ་དུ་མི་འཇུག༔ དབྱིངས་དང་རིག་པ་ཉིན་མཚན་མེད་པའི་དུས་ན་འཁོར་འདས་གཉིས་སུ་མེད་པ་ཞེས་བྱ་སྟེ༔ འཁོར་བ་ཉིད་མྱང་འདས་སུ་གྲོལ་བ་ཡིན་ནོ༔ ཨྠྀི༔ ཆོས་ཉིད་མངོན་སུམ་གྱི་སྣང་བ་ནི༔ མིག་ནམ་མཁའ་རིག་པ་གསུམ་འབྲེལ་བ་ལ་བྱ༔ ཉམས་གོང་འཕེལ་གྱི་སྣང་བ་ནི༔ དང་པོ་སྨིན་ཕྲག་ནས་ཁྲུ་གང་ན་འཆར་རོ༔ སྲན་མ་ཙམ་རིལ་མ་ཙམ་འཆར་ཏེ༔ དེ་ལ་ཉམས་སུ་བླངས་པས་ཐིག་ལེ་ཁ་དོག་ལྔར་འགྱུར་ཏེ༔ དེ་ལ་དབྱིངས་ཀྱི་སྣང་བ་འཆར་རོ༔ དེ་ཉམས་སུ་བླངས་པས་སྣང་བ་ཙམ་འོད་དུ་འཆར་རོ༔ རིག་པ་ཚད་ལ་ཕེབས་པ་ནི༔ དེ་ནས་འོད་དེ་རྣམས་ཀྱང་སྐུ་དང་ཐིག་ལེར་འཆར་ཏེ༔ དེ་ནས་སྐུ་དེ་རྣམས་ཀྱང་ལྔ་ལྔར་སྣང་བའི་རིག་པ་ཚད་ཕེབས་ཀྱི་སྣང་བའོ༔ ཆོས་ཉིད་ཟད་པའི་སྣང་བ་ནི༔ གང་གི་ངོ་བོར་ཡང་གྲུབ་པ་མེད་ཅིང་༔ འདི་ལྟར་ཡིན་ནོ་བར་གྲུབ་པ་མེད་པའི་དུས་ན་ལུས་ངག་ཡིད་གསུམ་གྱི་ཞེན་པ་ཟད་དེ༔ རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཆེན་པོ་བཞུགས༔ འདིར་ནི་སྐུ་གསུམ་གྱི་ཞེན་པར་རང་ཟད་སྐུ་ལས་འདས་པའོ༔ ཨྠྀིཿདང་པོ་མི་འགུལ་བ་གསུམ་གྱི་གཞི་བཅའ༔ ལུས་འདུག་སྟངས་ལས་མ་འགུལ༔ རིག་པ་ནམ་མཁའ་ལས་མ་འགུལ༔ མིག་གཟིགས་སྟངས་ལས་མ་འགུལ་བའོ༔ སྡོད་པ་གསུམ་གྱི་ཚད་གཟུང་བ༔ ཕྱི་སྣང་བ་ལ་སྡོད་པ་ནི༔ རླུང་ཟད་པས་འོད་སྣང་བ་གར་གཏད་དུ་སྡོད༔ ནང་ཕུང་པོ་སྡོད་པ་ནི༔ འཇིག་རྟེན་གྱི་བྱ་བ་ལ་མི་

འཇུག༔ གསང་བ་རླུང་སེམས་སྡོད་པ་ནི༔ རླུང་གར་གཏད་དུ་འདྲོངས་སོ༔ ཚད་རྨི་ལམ་གྱིས་གཟུང་བ༔ རབ་རྨི་ལམ་རྒྱུན་ཆད༔ འབྲིང་རྨི་ལམ་ལ་རྨི་ལམ་དུ་ཤེས༔ ཐ་མལ་རྨི་ལམ་འགྱུར་ནས་འོང་ངོ་༔ ཨྠྀི༔ ཉི་མ་དམར་ཐག་ཆད་པ་དབང་པོ་གནས་སྡུད་མ་ཤེས་ན༔ དགོངས་པ་རྩེ་གཅིག་གིས་བག་ཆགས་དང་མཚན་མ་སྡུད་མི་ནུས་སོ༔ སྲོད་འཁོར་ནས་ནམ་གུང་སུམ་ཆ་ཤེས་བྱ་བུམ་འཇུག་མ་ཤེས་ན༔ གཏི་མུག་གི་གཉིད་དོན་གྱི་ངོ་བོ་ལ་སྦྱོར་མི་ཤེས་སོ༔ ཉི་མ་རྩེ་ཤར་ཡེ་ཤེས་རང་དག་མ་ཤེས་ན༔ འབྲས་བུ་ཚད་མི་ཟིན་ནོ༔ སྣང་བ་རྒྱ་ཡིས་མ་ཐེབས་ན༔ མཚན་མ་ཟིལ་གྱིས་མི་ནོན༔ དབང་པོ་གནས་སྡུད་ཀྱི་དུས་སུ༔ ངང་ཀུན་ཏུ་བཟང་མོ་མ་བཅོས་པའི་ངང་དུ་གཞག༔ ཤེས་བྱ་བུམ་འཇུག་གི་དུས་སུ༔ ཤེས་རབ་མ་ཐོབ་ན་གནས༔ རྒྱུ་ལ་རྒྱུ་ཐིམ་པའོ༔ རིག་པའི་རྩལ་མ་འགགས་པར་སྣང་ཡང་༔ བྱེད་པ་པོ་མངོན་དུ་མི་སྣང་ངོ་༔ འབྱེད་མེད་ཀྱི་ཤེས་རབ་ཆེན་པོ་ལ་གནས༔ སྐུ་གསུམ་ཇ་ལོག་གི་ཏིང་ངེ་འཛིན་ཚད་དུ་ཕྱིན་པའོ༔ ཡེ་ཤེས་རང་སྣང་གི་དུས་སུ༔ བདེ་གསལ་ཆེན་པོ་ལ་གཞག་གོ༔ སྣང་བ་རྒྱས་འདེབས་ཀྱི་དུས་སུ༔ རྣལ་འབྱོར་པ་ཡེངས་ན་མཚན་མའི་རྟོག་པ་ལ་སྤྱོད་པས༔ མ་ཡེངས་པར་དབྱིངས་རིག་གི་དགོངས་པ་ལ་གནས་པར་བྱ༔ དེས་མཚན་མ་ཟིལ་གྱིས་ནོན་ནོ༔ རིག་པ་ལ་ཡེ་ཤེས་ཀྱིས་བརྒྱན༔ ཡེ་ཤེས་ལ་ཐུགས་རྗེས་བརྒྱན༔ ཐུགས་རྗེས་སེམས་ཅན་གྱི་དོན་བྱེད་དོ༔ ཨྠྀི༔ ལུས་ངག་ཡིད་གསུམ་འཁོར་བ་ལ་ཞེན་ཆེ་བ༔ འཁོར་འདས་རུ་ཤན་དབྱེ་བའོ༔ ལུས་ཀྱི་བྱ་བྱེད་ནུས་ཚད་དུ་ཞག་གཅིག་བྱས་པས༔ ལུས་ཀྱི་ཞེན་པ་བཟློག༔

དེས་ཆད་ནས་ལུས་རང་བཞིན་མེད་པའི་ཉམས་སྐྱེའོ༔ ངག་གི་ཅ་ཅོ་ཁ་ནས་ཐོན་ཚད་བྱས་པས༔ ངག་གི་ཞེན་པ་ལོག་ནས༔ ངག་དེས་ཆད་ངག་རང་བཞིན་མེད་པའི་ཉམས་སྐྱེའོ༔ ཡིད་བསམ་པ་ཡིད་སྔར་དང་ཕྱིས་ད་ལྟ་ནུས་ཚད་བྱས་པས༔ ཡིད་ཀྱི་ཞེན་པ་ལོག༔ དེས་ཆད་ནས་ཡིད་རང་བཞིན་མེད་པའི་ཉམས་སྐྱེའོ༔ ལུས་ངག་ཡིད་གསུམ་ལ་ཞེན་ཆགས་མེད་པས་འཁོར་བ་ལུས་ངག་ཡིད་གསུམ་ལ་རང་བཞིན་མེད་པར་ཤེས་པས་འདས་པའོ༔ དེ་ལྟར་རུ་ཤན་ཕྱེ་ནས༔ དེ་རྣལ་དུ་འབེབས་པ་ཞེས་བྱ་བ་སྟེ་ཞག་གཅིག་གམ་མ་ཐ་ཉིན་གཅིག་ཏུ་ལུས་དལ་བ་ལུས་རང་བཞིན་མེད་པར་བྱ༔ ངག་སྐུགས་པ་ལྟ་བུ་ལ་ངག་རང་བཞིན་མེད་པར་གནས་པར་བྱའོ༔ ཡིད་དལ་བ་ལ་འཕྲོ་འདུ་མེད་པ་སྤྲོས་དང་བྲལ་བ༔ འབོལ་ཤིག་གེ་གློད་ལ་ཞོག༔ ལུས་དལ་བས་སྤྲུལ་པའི་སྐུ་ལ་རེག་པ་ཡིན་ནོ༔ ངག་དལ་བས་ལོངས་སྤྱོད་རྫོགས་པའི་སྐུ་ལ་རེག་པ་ཡིན་ནོ༔ ཡིད་དལ་བས་ཆོས་ཀྱི་སྐུ་ལ་རེག་པ་ཡིན་ནོ༔ དེ་ལྟར་ཤེས་པ་དང་༔ སྐུ་གསུམ་ལམ་དུ་སློང་བའོ༔ དེ་ནས་དུར་ཁྲོད་དང་རི་ནས་འོངས་ལ་མི་སྐད་ཁྱི་སྐད་མེད་པར་ཕྱིན་པས་ན༔ དེ་ནས་ཤིན་ཏུ་སྤྲོས་པ་མེད་པའི་དབང་བསྐུར་ལ་བརྡ་ལ་བརྟེན་ནས་བསྐུར་བའོ༔ ལས་འཕྲོ་ཅན་འགས་ནི་བརྡ་དེ་རྣམས་ཁྲོལ་ལོ༔ མ་ཁྲོལ་ན་རང་གིས་བཀྲོལ་ལ་ཉམས་སུ་ལོན་དུ་གཞུག༔ གདམས་ངག་དུས་གཅིག་ལ་མིན་པར་སློབ་མའི་ཉམས་དང་སྦྱར་དུམ་བུ་དུམ་བུར་བསྟན་ནོ༔ ཨྠྀི༔ སོར་བཞི་ཚད་ཡར་མཚམས་ལས་བྲལ་བའི་སྐྱེས་བུ་སྐལ་བ་བཟང་༔ རང་གི་སྨིན་མཚམས་ལས་སོར་བཞི༔ དབྱིངས་རིག་ཐིག་ལེ་དང་བྲལ་བའི་

སྐྱེས་བུ་འཁོར་བ་ལ་འཇུག་པར་ག་ལ་སྲིད༔ ཨྠྀི༔ དེ་ཡང་ཉིན་མོ་མྱང་འདས་ཀྱི་ཆ༔ དབྱིངས་རིག་དབང་པོའི་མངོན་སུམ་དུ་གཏན་ལ་ཕེབས་པའོ༔ ནུབ་མོ་འཁོར་བའི་ཆ༔ དབྱིངས་རིག་དང་པོར་གཏན་ལ་མི་ཕེབས་པའོ༔ དེ་ལྟར་གཏན་ལ་མ་ཕེབས་ན༔ ནུབ་མོ་ཉམས་སུ་ཇི་ལྟར་བླང་ན༔ ནུབ་མོ་མར་མེ་ལ་ཉམས་སུ་བླང་སྟེ༔ མར་མེ་ལ་དབྱིངས་རིག་ཤར་བའི་དུས་ན་འཁོར་འདས་འདྲེས་པའོ༔ མར་མེ་མེད་པར་ཉམས་སུ་བླང་ན༔ ཉིན་མོ་དབྱིངས་ཀྱི་སྣང་བ་དང་༔ རིག་པའི་སྣང་བ༔ ཐིག་ལེའི་སྣང་བ་ཇི་ལྟར་ཤར་བ་བཞིན་དུ་ནུབ་མོ་ཡང་དམིགས་པས་ཉམས་སུ་བླང་ངོ་༔ དེ་ནས་གོམས་སྟོབས་ཀྱིས་ཉིན་དང་མཚན་མོ་མེད་པར༔ དབྱིངས་རིག་བཀྲག་ཤིག་གེ་འཆར་རོ༔ དེ་ལྟར་ཤར་ཙམ་ན་འཁོར་འདས་གཉིས་མེད་མཉམ་པ་ཞེས་བྱའོ༔ ཨྠྀི༔ ཐིག་ལེ་སྟོང་པའི་སྒྲོན་མའི་ཡི་གེ༔ ཨ་ཧ་ཥར༔ སྒྲོན་མ་བལྟམས་པའི་དུས་སུ་ཐུན་མཚམས་སུ་འདི་བརྒྱ་ཕྲག་གསུམ་བརྗོད་པས་འཆར་བ་ཡིན་ནོ༔ དབྱིངས་རྣམ་པར་དག་པའི་སྒྲོན་མེ་ཡི་གེ༔ ཊ་ཕམ༔ སྣང་བ་ལ་གཏད་པའི་ཚེ་ན་སྔོན་དུ་བརྒྱ་ཕྲག་གསུམ་བཟླས་ན༔ ངག་གི་ནུས་པ་རྫོགས་པར་བྱེད༔ ཤེས་རབ་རང་བྱུང་གི་ཡི་གེ༔ ཀྵ་ཧི་ཕ༔ འདི་དག་སྐྱེས་བུ་ཐོ་རངས་སྐྱ་རེངས་ཤར་ཙམ་ན༔ བརྒྱ་ཕྲག་གསུམ་མ་ཆག་པར་བརྗོད་ན་ཤེས་རབ་དང་བློ་དང་ལྡན་པར་འགྱུར༔ རྒྱང་ཞགས་ཆུའི་སྒྲོན་མའི་ཡི་གེ༔ པུ་ུཛ་ཧཱུྃ༔ འདི་གསུམ་ཟླ་བ་མཐོང་རེས་ཀྱིས་བརྒྱ་ཕྲག་གསུམ་བརྗོད་ན༔ སྐལ་ལྡན་དེའི་མིག་འགྲིབ་པར་མི་འགྱུར་རོ༔ སྒྲོན་མ་བཞིའི་ཐེམས་ཡིག་གསང་བ༔ ཨྠྀི༔ ཟུག་པའི་དུས་སུ་ཤེས་པ་ནི༔ ཤིན་ཏུ་ཁྱིམ་

པར་འགྱུར་བ་ཡིན༔ འདི་དུས་རྣལ་འབྱོར་གཡེང་བ་བྱ༔ ཡང་ན་ལག་པའི་འདུ་བྱེད་བསྒོམ༔ བྱེར་བའི་དུས་སུ་རྣལ་འབྱོར་པ་ཤེས་པ་ཡས་ཏེ༔ བསྡུ་བའི་མན་ངག་བྱ༔ བྱེར་དང་ཟུག་པ་མཉམ་པའི་ཚེ༔ དུས་བཞི་མཉམ་པར་སྦྱོར་ཞེས་བྱ༔ འདི་དུས་རྣལ་འབྱོར་ལྡན་པ་ཡིས༔ ཤེས་པ་རང་གི་སོར་གནས་ཏེ༔ རང་བཞིན་ཆེན་པོའི་བསམ་གཏན་དུ༔ ཡེ་ཉིད་ནས་ནི་མི་གནས་པས་ཏེ༔ འདི་དུས་རིག་པའི་ལྟ་སྟངས་ཀྱིས༔ ཆོས་སྐུ་མཉམ་པ་ཆེན་པོར་ལྟ༔ འདི་དང་བྲལ་བར་མ་བྱས་ན༔ རྟག་ཏུ་བྱེར་ཟུག་སྙོམས་པའོ༔ དེ་ཕྱིར་དུས་བཞི་མཉམ་སྦྱར་རོ༔ འཁྲུགས་པ་བྱུང་བའི་དུས་ཉིད་ན༔ རྣལ་འབྱོར་པ་ཡིས་ཀྱང་༔ བྱེར་དང་ཟུག་པ་མཉམ་པ་ནི༔ འཁྲུགས་དང་ཆ་མི་ཕྱེད་པར་གནས༔ འདི་དུས་གནས་ཁང་ཡང་ཡང་སྤོ༔ རང་གི་ཉམས་ལ་ཅི་དགའ་བྱའོ༔ བླ་མའི་མན་ངག་ཐེབས་རེ་ཉིད༔ གང་ལ་བློ་ཞུགས་འདི་དུས་བསྒོམ༔ འདི་ལྟར་སུ་ཡིས་བྱས་པའི་མི༔ དུས་བཞི་མཉམ་པ་ཆེན་པོ་འོ༔ ཨྠྀི༔ ཕྱིས་སྙོམས་པར་བྱེད་པ་ལ༔ རྙིང་མའི་རྩ་སྐྱེད་པར་བྱེད་པའི་ཡི་གེ༔ ཨཾ་སྟོང་ཕྲག་དྲུག་དྲུག་ལན་རེ་བརྗོད་པར་ཉེ་བར་འགྲུབ་པ་ཡིན་ནོ༔ སྒྲོན་མ་རྩ་གནས་རང་བཞིན་གྱི་ཡི་གེ་ནི༔ དབྱིངས་རང་བཞིན་གྱིས་རྣམ་པར་དག་པའི་སྒྲོན་མའི་ཡི་གེ་ནི༔ ཨེ་ཡིན༔ ཐིག་ལེ་སྟོང་པའི་སྒྲོན་མའི་ཨ་ཡིན༔ ཤེས་རབ་རང་བྱུང་སྒྲོན་མའི་ས་ཡིན༔ རྒྱངས་ཞགས་ཆུའི་སྒྲོན་མའི་ཨེ་ཡིན༔ འདི་ཀུན་ནི་རླུང་དང་བཅས་ཏེ་སྐབས་སུ་སྤུར་བར་བྱའོ༔ ཡང་རང་གི་སྒྲོན་མ་གང་དུ་གཏོད་པའི་ས་ཉིད་དུ་གནས་པར་བྱས་ཏེ༔ ཤེས་པ་དེ་ལ་གཏད་པས་འགྲུབ་པ་

ཡིན་ནོ༔ སྟེང་འོག་གཉིས་ཀའི་རླུང་བསྡམས་པ་མ་ཡིན་ནོ༔ འོག་རླུང་བསྡམས་ཤིང་གྱེན་ལ་དྲངས༔ སྟེང་རླུང་རབ་ཏུ་དལ་བས་སྤྲོ་བ་དང་བསྡུ་བར་བྱའོ༔ དེ་ལྟར་བྱས་པས་དུས་ནམ་ཞིག་ཙམ་ན༔ སྟེང་ནས་རླུང་འབྱུང་བའི་འཕྲོ་ཆད་པའོ༔ དེ་ཉིད་ཆོད་པའི་ཚེ་ཡོ་གི་ཡང་ཟས་ཀྱི་འདུ་ཤེས་བྲལ་ནས་འགྲོ་བར་ངེས་པ་ཡིན་ནོ༔ དེའི་ཕྱིར་ན་གསང་བའི་གནད༔ ཨྠྀི༔ བསམ་གཏན་ཉལ་བའི་འཁོར་ལོ་དང་སྒོ་བསྟུན་ནས་ཉམས་སུ་ལེན་ན༔ སྲོད་ལ་སྐྱེད་བྱེད་ཀྱི་ཙཀྲ་ལྟེ་བར་ཤེས་པར་བཅུག་ལ༔ དྲན་པའི་རྒྱུན་འགགས་པར་བྱེད་པའི་གནད་དོ༔ ནམ་ཕྱེད་ན་སྙིང་གར་བཅུག་ཅིང་ཉལ་བས་ཤེས་རབ་ཀྱི་དྲན་པ་དང་མི་འབྲལ་བ་ཉིད་དོ༔ དེས་ནི་ཚིག་དོན་གཉིས་སུ་མེད་པར་བྱེད་པའི་གནད་ཡིན་ནོ༔ ཐོ་རངས་རོ་རྣམས་འདུས་པ་མགྲིན་པའི་གནས་སུ་བཅུག་པས་སྟོང་པ་ཉིད་ཀྱི་ཡེ་ཤེས་ཐམས་ཅད་ལ་ལོངས་སྤྱོད་པ་སྟེ༔ གཉིས་མེད་ཀྱི་ཉམས་རྒྱུད་ལ་འཆར་བར་བྱེད་པའི་གནད་ཡང་དག་པའོ༔ ཉིན་མོ་སྤྱི་བོ་རྩེ་མོའི་གནས་སུ་ཤེས་པ་བཅུག་ནས་དར་གཅིག་ཏུ་གནས་པར་བྱས་ན༔ དེ་ནས་མིག་ནས་ཤེས་པ་དྲངས་ནས༔ ཡུལ་ནམ་མཁའ་སྤྲིན་དང་བྲལ་བ་ལ་རིག་པ་གཏད་པས༔ སྣང་བ་རྒྱས་ཐེབས་ཏེ༔ འཁོར་འདས་རུ་བཟློག་པའི་བསམ་གཏན་གྱི་འཁོར་ལོ་ལ་བསྐོར་བ་ཞེས་བྱའོ༔ རྣམ་རྟོག་ཡེ་ཤེས་སུ་གྲོལ་བའི་གནད་ཡིག་གོ༔ ཨྠྀི༔ རིག་པ་རྒྱུ་རྐྱེན་གཉིས་ལ་མ་བརྟེན་པར༔ ཤེས་རབ་ཀྱི་སྤྱོད་ཡུལ་ཡིན་པའི་ཕྱིར༔ དབང་པོ་ཉིད་ལ་རྣོ་རྟུལ་མེད་པར་ཡང་༔ དེ་ཉིད་མཐོང་སྟེ་དེ་དོན་ཉམས་སུ་བླང་ན༔ གསང་སྔགས་རྣམས་ཀྱི་འབྲས་བུ་འདི་ཉིད་ལ༔ ཐོབ་པར་འགྱུར་བ་འདི་ལ་ཐེ་ཚོམ་མེད༔ དེ་ཡི་ཕྱིར་ན་གསང་བའི་གནད༔ བཤད་ཅིང་བསྟན་པ་མི་དགོས་ངོ་མཚར་ཆེ༔ ཡང་དག་ཡེ་ཤེས་ཚིག་གིས་མི་རྟོགས་ཏེ༔ མངོན་སུམ་རང་གནས་ཚད་འདི་ངོ་མཚར་ཆེ༔ རང་བཞིན་རྫོགས་པ་ཆེན་པོའི་

དོན་དེ་ཉིད༔ དགེ་སྡིག་གཉིས་ཀྱིས་ཕན་གནོད་ལས་འདས་ཕྱིར༔ དབང་པོ་ཉིད་དང་འབྲེལ་བར་ངོ་མཚར་ཆེ༔ སྨྲ་བསམ་བརྗོད་དུ་མེད་པའི་དོན་དེ་ཉིད༔ གཞན་གྱིས་བཤད་པས་དོན་དེ་མི་རྙེད་ཕྱིར༔ རང་གི་གནས་ལས་འབྱུང་བ་ངོ་མཚར་ཆེ༔ གསང་བ་ཆེན་པོ་སུས་ཀྱང་མ་རྙེད་པ༔ ཐེག་པ་ཐུན་མོང་རྣམས་ལས་ཁྱད་འཕགས་ཕྱིར༔ ངེས་པའི་དོན་ཉིད་སྤུངས་པར་ངོ་མཚར་ཆེ༔ བླ་མའི་མན་ངག་རྐྱེན་ལ་རག་མ་ལུས༔ རང་སྣང་དབང་པོའི་གནད་དང་བསྟུན་ནས་ནི༔ སྔོན་ཆད་མཐོང་མ་མྱངས་བའི་སྣང་བ་དེ༔ གོམས་ཤིང་སྦྱངས་བ་མི་དགོས་གཅིག་ཆར་དུ༔ སྟོང་པའི་ཡུལ་ལ་ལྷག་མཐོང་ཉིད་དུ་ཡང་༔ ལས་ལ་དག་དང་མ་དག་མེད་པ་ཡི༔ མངོན་སུམ་ཉིད་དུ་མཐོང་བར་འགྱུར་བ་ལ༔ ཐེ་ཚོམ་ཡོད་པ་ཉིད་ནི་མ་ཡིན་ནོ༔ དེ་ཡི་ཕྱིར་ན་གསང་བའི་ཐེག་ཆེན་འདི༔ སངས་རྒྱས་རྣམས་ཀྱིས་རྡོ་རྗེ་འཆང་ལ་དབང་བཞི་རྫོགས་བྱས་ནས༔ གསང་བ་མཆོག་ལ་དབང་བར་མངའ་དབང་བསྐུར༔ ཉིད་ཀྱི་གསང་དོན་འདི་ཉིད་བརྗོད་པ་ལས༔ གཞན་གྱིས་གསུངས་ཤིང་བསྟན་པ་ནུས་མི་སྲིད༔ དེ་ཡི་ཕྱིར་ན་གསང་ཆེན་ཐབས་གཅིག་སྙིང་གི་བཅུད༔ ཨྠྀིརི་བོ་ཅོག་གཞག་གི་ལྟ་བ༔ མི་འགྱུར་བའི་རིག་པ༔ དཔེ་རི་བོ་ལྟར་དཔངས་མཐོ་བ༔ བྱ་བྱེད་མེད་པར་ནམ་མཁའི་ངང་ལས་མ་གཡོས་པར་བཞག་སྟེ༔ རང་གིས་མི་འབྲལ་བར་བྱའོ༔ རང་གསལ་ཙམ་དུ་གཞག་པར་བྱ་སྟེ༔ དེ་ཡང་སྒྲོན་མ་ཉིད་མིག་གིས་མ་ཡེངས་པར་བསྟན་ཏེ༔ དབྱིངས་ཀྱི་སྒྲོན་མ་དང་མ་བྲལ་བར་བྱའོ༔ ཨྠྀི༔ རྒྱ་མཚོ་ཅོག་གཞག་གི་དགོངས་པ༔ གཞན་གྱི་ཕྱོགས་སུ་མི་ལྟ་ཞིང་༔ དེའི་ངང་ལ་རླུང་གིས་མ་བསྐྱོད་པ་བཞིན་དུ༔ རྐྱེན་དབང་དུ་མི་འགྲོ་ཞིང་༔ གནས་པ་ཉིད་ལ་བྱ་ཞིང་དགོངས་པ་ལས་མི་འདའ་བར་གསལ་

བ་མ་ཡེངས་པར་སྣང་བ་ལ་ཀུན་ཏུ་ཁྱབ་པ་ཆེན་པོ་ཡངས་པ་ལ་མཛེས་པར་སྣང་བ༔ སྒྲོན་མ་ལ་མིག་གི་ཟུར་གྱིས་བལྟ་བར་བྱ་སྟེ༔ དབྱིངས་ཀྱི་ངང་དུ་རིག་པ་ཉིད་དོ༔ ། ཨྠྀི༔ རིག་པ་ཅོག་གཞག་གི་མན་ངག༔ རྡོ་རྗེ་ལུ་གུ་རྒྱུད་ཀྱི་སྐུ་ལ་བྱ་སྟེ༔ སྐུ་དེ་ཡང་སྒྲོན་མའི་ནང་དུ་བཟུང་སྟེ༔ བྱ་བྱེད་དང་བྲལ་བར་བྱ༔ དབྱིངས་ཀྱི་སྒྲོན་མ་དེ་ཉིད་ཀྱི་ནང་དུ་ཐབས་ཀྱིས་གསུང་བ་ལ་བྱ་བ་སྟེ༔ མིག་མི་འགུལ་བའོ༔ དེ་ཡང་སྡོད་པ་གསུམ་མི་འགུལ་བ་གསུམ་ལ་བྱའོ༔ ཨྠྀིསྣང་བ་ཅེར་གཞག་གི་ཐབས་བསྟན་པ༔ ཐད་ཀའི་སྣང་བ་ཐམས་ཅད་ཡེ་ཤེས་ཀྱི་ངོ་བོ་སློང་བའོ༔ སྣང་བ་ཉིད་ཅེ་རེ་སྣང་ཡང་ཡིད་མ་ཤོར་ཞིང་དོན་ལ་མ་གྲུབ་པའོ༔ དེ་ཡང་སྣང་བའི་རང་བཞིན་ཇི་སྙེད་པ་ཐམས་ཅད་རྟོག་པ་མེད་ཅིང་རང་གི་སྒྲོན་མ་དེ་ཉིད་དང་མ་བྲལ་བར་གནས་ཏེ༔ ཕྱི་ནང་གི་བྱ་བ་བཏང་ཞིང་༔ རྐྱེན་མེད་པའི་ཡུལ་ཤིན་ཏུ་དབེན་པར་ཅོག་ཞག་རྣམས་ལ་བལྟ་བར་བྱའོ༔ ཨྠྀི༔ དབྱིངས་ཀྱི་རྒྱུ་བསྟན་པ་ནི༔ ཕྱི་དབྱིངས་ནམ་མཁའ་སྟོང་པ༔ ནང་གི་དབྱིངས་འོད་དང་ཁ་དོག་གོ༔ གསང་བའི་དབྱིངས་སྒྲོན་མ༔ ཉོན་མོངས་པའི་དྲི་མ་རྣམ་པར་དག་པས་ན༔ ཡང་དག་པའི་སྒྲོན་མ་དེ་ཉིད་ཀྱང་༔ སེམས་ཅན་ལ་སྔར་ལུས་ལ་མ་བརྟེན་པའི་དུས་ན་སུས་ཀྱང་མ་བྱས་པའོ༔ ཨྠྀི༔ ཐིག་ལེའི་ཕྱེད་སྐུ་དང་བཅས༔ ཕྱེད་ནི་དོན་པའི་རྒྱུ་འབྱུང་བས་བསྐྱེད་པའི་སྒྲོན་མ་བཞི་ཡིན་ལ༔ རྐྱེན་ཉམས་སུ་ལེན་པ་རྒྱུན་མ་ཆད་པ་ལས༔ འབྲས་བུ་སྐུ་རྣམས་སུ་སྨིན་ལ༔ ཕྱེད་ཀུན་རྫོབ་ཀྱི་ཐིག་ལེའི་རྒྱུ་འབྱུང་བ་འདུས་པའི་མའི་ཐིག་ལེས་ལུས་བསྐྱེད་ལ༔ རྐྱེན་སྐྱེ་བ་བཞིས་འབྱུང་བ་ལ་གཟུགས་ཐ་དད་པར་སྨིན་ལ༔ ཕའི་རྒྱུ་བྱང་ཆུབ་ཀྱི་སེམས་ཀྱི་སྙིགས་མ་འདུས་པས་དྲན་བསམ་དུ་མ་བསྐྱེད་ལ༔ རྐྱེན་བཞིས་བསྡུས་པའི་སེམས་ཐ་དད་པར་

སྨིན་པས་ན་ཕྱེད་སྐུ་སྟེ༔ དོན་དམ་གྱི་སྐུར་སྨིན༔ ཀུན་རྫོབ་ཀྱི་ལུས་སུ་སྨིན་པའོ༔ ཉམས་ལེན་གྱི་དུས་སུ་འོད་ཀྱི་ཐིག་ལེ་དབུས་སུ༔ སྐུ་ལྟེ་བ་མན་ཆད་རེས་སྣང་བས་ན༔ ཐིག་ལེའི་ཕྱེད་སྐུ་ཞེས་བྱའོ༔ ཨྠྀི༔ ཆོས་ཉིད་ཟད་པའི་སྣང་བ་གང་དུའང་མ་གྲུབ་པ་ནི༔ ས་སྲ་བ་མེད་པའི་འོད་སེར་པོ༔ ཆུ་གཤེར་བ་མེད་པའི་སྡུད་པ་དཀར་པོ༔ མེ་ཚ་བ་མེད་པའི་འོད་དམར་པོ་དང་༔ རླུང་གཡོ་བ་མེད་པའི་འོད་ལྗང་གུ་དང་༔ ནམ་མཁར་ཁྱབ་པ་མེད་པའི་མདངས་ཅན་མཐིང་ག་ཆེན་པོ་དང་ལྔ༔ ཆོས་ཉིད་ཟད་པའི་དབྱིངས་སུ་རང་དག་པའི་སྣང་བའི་ངོ་བོ་གང་དུ་ཡང་གྲུབ་པ་མེད་པས༔ དེ་ཉིད་ལ་འཇིགས་པ་མེད་པས༔ ཕྱིས་ཀྱང་མི་འཇིགས་པ༔ དེ་ལ་རྐྱེན་གྱིས་མི་ཤིགས་པས༔ ཡུལ་སྣང་མེད་པ་ལ༔ རྐྱེན་བླ་མའི་མན་ངག་ཆེན་པོ་ལ་བརྟེན་ནས་དེ་ལྟར་གྲོལ་བ་ཡིན་ནོ༔ ཨྠྀི༔ ཆོས་ཉིད་མ་བཀོད་པ་ནི་དངོས་པོའི་གནས་ལུགས་སོ༔ རིག་པ་རང་སྣང་ནི་དབྱིངས་སོ༔ ཡེ་ཤེས་ཇི་བཞིན་གྱི་སྣང་བ་ནི་ཆོས་ཉིད་ཟད་པའོ༔ ཡེ་ཤེས་ཕྱོགས་དག་གི་སྣང་བ་ནི༔ སྐུ་ཡེ་ཤེས་ཐིག་ལེའོ༔ རིག་པ་རང་གྲོལ་གྱི་སྣང་བ་ནི་ལུ་གུ་རྒྱུད་དོ༔ འགྲོ་དྲུག་འཁྲུལ་པའི་སྣང་བ་ནི༔ ཡུལ་གཅིག་ལ་ཐ་དད་པར་མཐོང་བའོ༔ ཨྠྀི༔ རིག་པའི་མཚན་ཉིད་གང་ཞེ་ན༔ མདོག་མེད་པའི་གནག་པ་ཆེན་པོ༔ དབུགས་མེད་པའི་འགྱུ་བ་ཆེན་པོ༔ གཤོག་པ་མེད་པའི་འཕུར་བ༔ རྐང་པ་མེད་པའི་འགྲོ་འོང་དང་བཅས་པ༔ རང་གིས་རང་རིག་པས་ན་རིག་པའོ༔ ཨྠྀི༔ ཐིག་ལེ་གང་ཞེ་ན་མ་བྲིས་པའི་མུ་ཁྱུད་འོད་ལྔ་དང་བཅས་པ་ཉམས་སུ་བླངས་ན་མུ་ཁྱུད་བཅུ་རུ་སྣང་༔

དེ་ནས་འཁར་གཞོང་ཙམ༔ དེ་ནས་བསེ་ཕུབ་ཙམ་དུ་སྣང་བའོ༔ དེ་ནས་ཞལ་རས་སུ་སྣང་༔ དེ་ནས་ཕྱེད་སྐུ་རུ་སྣང་༔ ཐིག་ལེར་ནང་དུ་སྐུ་ལྔ་ལྔ་སྣང་བ་ནི་ཐིག་ལེ་སྨིན་པའོ༔ ཨྠྀི༔ དེ་ནས་འོད་སྣང་གྱེན་འགྲེང་དང་༔ རྩིབས་ཤར་དང་༔ དྲ་བ་དང་༔ དྲ་བ་ཕྱེད་པ་དང་༔ མིག་མངས་རིས་དང་༔ ཟ་འོག་གི་རྣམ་པ་དང་༔ མདུང་རྩེ་དང་༔ ཉ་མིག་དང་༔ རེ་ལྡེ་ཙམ་དང་༔ ཡུངས་འབྲུ་ཙམ་སྣང་བ་ཐམས་ཅད་གཞལ་ཡས་ཁང་དུ་སྣང་ངོ་༔ དབྱིངས་ཚད་དུ་ཕྱིན་པའོ༔ ཨྠྀི༔ རིག་པའི་ངོ་བོ་ལ་རིགས་དྲུག་ཡེ་ནས་གྲུབ་པ་མེད་པའི་གནད་ཀྱིས༔ སྣང་ཚུལ་ལ་སྡུག་བསྔལ་རྣམ་པ་དྲུག་གི་ཞེན་པ་རང་ཆོད༔ རང་ངོ་ལ་མ་རིག་པ་གྲུབ་པ་མེད་པའི་གནད་ཀྱིས༔ སྣང་ཚུལ་ཉོན་མོངས་པ་དྲུག་གིས་འཆིང་བར་རང་ཆོད༔ རང་ངོ་ལ་ཡུལ་ཤེས་མ་གྲུབ་པས་གནད་ཀྱིས༔ སྣང་ཚུལ་ལ་ལུས་ངག་ཡིད་ཀྱི་རྣམ་སྨིན་གྱི་ཞེན་པ་རང་ཆོད༔ དེ་ལྟར་དོན་གཉིས་མེད་དུ་ཤེས་ནས་རིག་པ་རང་སྣང་སྤྲོས་པ་མེད་པའི་རང་བཞིན་ཡེ་ནས་གནས་པ་ཡིན་ཏེ༔ དགེ་སྡིག་རྣམ་རྟོག་མེད་པའི་སྣང་བ་རང་རྐྱེན་དབྱིངས་སུ་དག་པའི་ཡེ་ཤེས༔ ཞེས་རང་གི་ངོ་བོ་གཏན་ལ་ཕབ་པའོ༔ ཨྠྀི༔ ཆོས་སྐུ་ངོ་སྤྲོད་གདམས་ངག་གིས༔ རིག་པ་དེ་ཉིད་ཅེར་མཐོང་བསྟན༔ ལོངས་སྐུ་ངོ་སྤྲོད་གདམས་ངག་གིས༔ རིག་པ་དབྱིངས་ཀྱི་གོ་རར་གཞུག་པ་དང་༔ སྤྲུལ་སྐུ་ངོ་སྤྲོད་གདམས་ངག་གིས༔ འཁྲུལ་སྣང་ཞིང་ཁམས་སུ་སྦྱར་བའོ༔ དེ་ཡང་ཆོས་སྐུ་རང་གི་རིག་པ་ཡིན་པར་ཡིད་ཆེས༔ ལོངས་སྐུ་དེ་ལས་བྱུང་བ་སྐུའི་སྣང་བ་དང་ཐིག་ལེ་རྣམས་ཡིན་པར་ཡིད་ཆེས༔ སྤྲུལ་སྐུ་དེ་ལས་ལྟ་བྱེད་མ་འགགས་པས་རང་སྣང་དུ་ཤེས་པ་དེ་

ཡིན་པར་ཡིད་ཆེས་སོ༔ ཨྠྀི༔ ལུས་ཀྱི་གནད་སྙིང་གི་ནང་ན་སྐུ་དང་ཡེ་ཤེས་སུ་གནས༔ སྲོག་གི་གནད་རྩའི་ནང་ན་ཐིག་ལེར་གནས༔ དབང་པོའི་གནད་མིག་གི་ནང་ནས་སྒྲོན་མ་བཞི་དུས་མེད་དུ་འཆར་བའོ༔ ཨྠྀི༔ ཡེ་ཤེས་ལུས་ཀྱི་གནད་ལ་བརྟེན༔ འོད་ཡུལ་གྱི་གནད་ལ་བརྟེན༔ རིག་པ་ལྟ་བའི་གནད་ལ་བརྟེན་པའོ༔ ཨྠྀི༔ འགྱུར་མེད་རྩ་ཆེན་བཞི་ནས་རྒྱུ༔ རོ་མ་རྐྱང་མ་ཀུན་དྷརྨ༔ ཀ་ཏི་གསེར་གྱི་རྩ་ཆེན་ཞེས་ཀྱང་བྱ༔ ཤེལ་གྱི་སྦུ་གུ་ཅན་ཞེས་ཀྱང་ཟེར༔ ཨ་ཝ་དྷཱུ་ཏི་ནས་ཐིག་ལེ་སྲན་མའི་གའུ་གླེབས་པ་ཙམ་དུ་བྱུང་༔ རླུང་གི་སྟོབས་ཀྱིས་འགྱུར་བའོ༔ ཨྠྀི༔ སྣང་བ་ཐམས་ཅད་ཆོས་སྐུར་ངོ་སྤྲད༔ ཆོས་སྐུ་སྣང་སྟོང་དབྱེར་མེད་དུ་ངོ་སྤྲད༔ སྣང་སྟོང་རིག་སྟོང་དབྱེར་མེད་དུ་ངོ་སྤྲད༔ རིག་སྟོང་དྲན་པ་རང་ཡལ་དུ་ངོ་སྤྲད༔ སྣང་བ་ཐོག་བབས་འཁྲུལ་པ་རང་དག་ཏུ་ངོ་སྤྲད༔ འོད་དྲན་པ་དང་དྲན་མེད་སྐྱེ་མེད་བློ་འདས་སུ་ངོ་སྤྲད༔ དེས་ཡུལ་སྣང་གི་ཞེན་པ་ལས་ལོག་པའི་དགོས་པའོ༔ ཨྠྀི༔ དྲན་པ་གཞི༔ དྲན་མེད་ལམ༔ སྐྱེ་མེད་ཐབས༔ བློ་འདས་སྤྲོས་བྲལ༔ གནད་སེམས་ཀྱི་ཞེན་པ་ལས་བློ་བཟློག་པའི་དགོས་པ་ཡོད༔ ཨྠྀི༔ དྲན་པ་སྣང་བ༔ དྲན་མེད་སྟོང་པ༔ སྐྱེ་མེད་གཉིས་མེད༔ བློ་འདས་རང་སོ༔ ལྟ་སྒོམ་གྱི་ཞེན་པ་ལས་བློ་བཟློག་པའི་དགོས་པའོ༔ ཨྠྀི༔ དྲན་པ་གཉིད་སད་པའི་གདམས་ངག༔ དྲན་མེད་གཉིད་ཀྱི་གདམས་ངག༔ སྐྱེ་མེད་གཉིད་ལོག་པའི་གདམས་ངག༔ བློ་འདས་རྨི་ལམ་གྱི་གདམས་ངག༔ གྲུབ་མཐའ་ཚིག་ལས་བློ་བཟློག་པའི་དགོས་པའོ༔ ཨྠྀི༔

ལུས་ལ་གཞི་བཅའ༔ ནམ་མཁའ་ལ་འབམ་བཅའ༔ རིག་པ་ལ་མིག་གཏད༔ ཨྠྀི༔ དང་པོ་འོད༔ གཉིས་པ་ཐིག་ལེ༔ གསུམ་པ་སྐུའི་སྣང་བ་སྟེ༔ མི་འདྲ་བ་ཡང་ཡང་སྐྱེས་ཏེ༔ དེ་ཡང་རིག་པའི་ཆོ་འཕྲུལ་ཅིར་ཡང་སྟོན་པའོ༔ ཨྠྀི༔ ཅི་ནས་ཀྱང་རིག་པ་དེ་བསྡུས་ཏེ༔ དབྱིངས་ཀྱི་ནང་དུ་ཚུད་པར་བྱས་ཏེ༔ རང་གི་སྔུན་སྨིན་མཚམས་སུ་གཏད་པའོ༔ དེ་ཡང་བྱེད་མཁན་སུ་ཡང་མེད༔ དེ་ཡང་བྱེད་པ་མེད་པར་གནས་པའོ༔ ཨྠྀི༔ ལུས་སྡོད་པས་རིག་པ་སྡོད་དེ༔ རིག་པ་སྡོད་པས་མི་རྟོག་པ་ལ་རྒྱུན་དུ་གནས་ཏེ༔ རྗེས་ཀྱི་ཤེས་པ་ཤེས་རབ་ཀྱིས་སྐྱེ་མེད་དུ་གྲོལ༔ ཨྠྀི༔ རིག་པ་ལས་དྲོད་སྐྱེས་པས༔ སྣང་བ་ལ་ཡིད་མི་འཇུག་པར་བརྟན་པ་ལ་རྒྱུན་དུ་གནས་ཏེ༔ རྗེས་ཀྱི་ཤེས་པ་ལ་ཡུལ་ཐམས་ཅད་རིག་ངོར་དག་པའོ༔ ཨྠྀི༔ རིག་པ་སྐུ་གསུམ་གཉིས་མེད་གནས་པ༔ གཞི་ཟད་པའི་ཏིང་ངེ་འཛིན་ལ་གནས་པ༔ རྗེས་ཀྱི་ཤེས་པ་འཁོར་འདས་གཉིས་མེད་དུ་འདྲེས་པའོ༔ ཨྠྀི༔ དབྱིངས་ནས་ནམ་མཁའ་རིག་པ་གསུམ་མི་འབྲལ་བས༔ རྗེས་ཀྱི་ཤེས་པ་ལ་རིག་པ་དབྱིངས་སུ་ཚུད་པའོ༔ ཨྠྀིཡུལ་རིག་པ་གཉིས་མེད་དུ་རྟོགས་པས༔ སྒོ་ལྔ་རང་གསལ་དུ་གནས་ཏེ༔ རྗེས་ཀྱི་ཤེས་པ་རྟོག་མེད་རང་གྲོལ་དུའོ༔ ཨྠྀི༔ རིག་པ་འབྱུང་བ་བཞི་ཟད་པས་འཁྲུལ་བ་གཏིང་དག་གི་དགོངས་པ་ལ་གནས་ཏེ༔ རྗེས་ཀྱི་ཤེས་པ་ལ་རིག་པ་ཉིད་ཡུལ་དུ་འགྲོལ་བའོ༔ ཨྠྀི༔ རིག་མེད་ཀྱི་སྣང་བ་ལ་ཕྱོགས་མེད་ཀྱི་རིག་པ་ཤར་བས༔ ཡུལ་མེད་ཀྱི་ཡུལ་དུ་སོང་སྟེ༔ བལྟར་མེད་པའི་སྐུ་ལ་བལྟས་པས༔ རྟོག་མེད་ཀྱི་རིག་པ་མཐོང་སྟེ༔ གཏད་མེད་ཀྱི་ཤེས་པ་སྤྱོད་པ་ཞེས་བྱའོ༔ ཨྠྀི༔ སྒྲོན་མ་བཞིའི་

སྣང་བ་རང་གི་མཐོང་བས་འབྱུང་བ་བཞི་ཟད་པར་བསྐྱལ་ལོ༔ ཨྠྀི༔ ཆོས་སྤྱིའི་ལྟ་བ་དང་ཆོས་ཉིད་རང་གི་ལྟ་བས་ཏེ༔ ལྟ་བ་བཞི་སྐོར་དུ་བསྟན༔ སྤྱི་ལ་བཞི་སྟེ༔ གང་ལ་བལྟ་ན་དངོས་པོའི་གཤིས་ལ་ལྟ༔ གང་གིས་བལྟ་ན་རྟེན་གྱི་གང་ཟག་གིས༔ གང་ལྟར་བལྟ་ན་ཕྱོགས་རིས་མེད་པར་བལྟའོ༔ བལྟས་པས་གང་ཐོབ་ན༔ ཆོས་སྐུ་ཕྱི་ནང་མེད་པ་ཐོབ་པའོ༔ ཨྠྀི༔ རང་གི་ལྟ་བ་བཞིས་ཏེ༔ གང་ལ་བལྟ་ན་དབྱིངས་རིག་ལ་བལྟ༔ གང་གིས་ལྟ་ན་མིག་གིས་ལྟ༔ གང་ལྟར་བལྟ་ན་གླང་པོ་ཆེ་ལྟ་བུའི་མིག་གིས་ལྟ༔ བལྟས་པས་གང་ཐོབ་ན་སྐུ་གསུམ་ཐོབ་པའོ༔ ཨྠྀི༔ ཐོག་ལྟ་བུའི་མན་ངག་གིས་རིག་པ་ཐོགས་པ་མེད་པར་བསྟན་པས༔ སྣང་བ་ཡིད་ཆེས་པར་བསྟན་པ་དང་༔ ཨྠྀི༔ རིག་པར་འགྱུར་བ་མེད་པའི་གཟེར་ལྟ་བུའི་མན་ངག་གིས༔ རིག་པའི་འཆར་སྒོ་ལ་ཡིད་ཆེས་པར་བསྟན་པ་དང་༔ ཨྠྀི༔ རིག་པ་མཁའ་ལ་ལྡིང་བ་ནི༔ སྐར་མདའ་ལྟ་བུའི་མན་ངག་གི་རྟེན་པ་ལ་ཡིད་ཆེས་པར་བསྟན་པ་དང་༔ ཨྠྀི༔ རིག་པ་ཕྱིར་མི་ལྡོག་པ་ནི་གྱད་ཀྱི་མདའ་ལྟ་བུའི་མན་ངག་གིས་རིག་པ་རང་གི་ངོ་བོ་ལ་ཡིད་ཆེས་པར་བསྟན་པའོ༔ ཨྠྀི༔ དེའི་ཕྱིར་གཏད་པའི་འབེམ་གཟུག་པའི་མན་ངག་ནི༔ དབྱིངས་རིག་གཉིས་ལ་གཏད༔ བརྡེག་པའི་དམིགས་བཙལ་བ་ནི༔ རང་གི་སྨིན་མཚམས་སུ་འཕེལ་བའི་ས་བོན་གདབ་པ་དང་༔ དེ་ལ་གོམས་པ་རབ་ཏུ་གཅེས༔ རྒྱ་ཆེ་བའི་ནམ་མཁའ་སྦར་གྱིས་བཟུང་བའོ༔ ཨྠྀི༔ ཐིག་ལེ་ཉག་གཅིག་ཅེས་བྱ་བ་ནི༔ རང་གི་རིག་པ་ལུ་གུ་རྒྱུད་ཀྱི་སྐུ་ཡིན་པས༔ དེའི་དོན་ལ་མ་ཡེངས་པར་བྱ༔

ཐིག་ལེ་ནི་ཆོས་སྐུ༔ ཉག་ནི་ལོངས་སྐུ༔ གཅིག་ནི་སྤྲུལ་སྐུ༔ ཞེས་བྱ་བ་ནི་སྐུ་གསུམ་འདུ་འབྲལ་མེད་པའོ༔ ཨྠྀི༔ ཆོས་སྐུའི་གནད་སྙིང་དུ་བསྟན་པས༔ ལུས་ཡོངས་སུ་མྱ་ངན་ལས་འདས་པའི་མན་ངག༔ ལོངས་སྐུའི་གནད་རྩར་བསྟན་པས༔ ངག་ཡོངས་སུ་མྱ་ངན་ལས་འདའ་བའི་མན་ངག༔ སྤྲུལ་སྐུའི་གནད་མིག་ཏུ་བསྟན་པས༔ སེམས་ཡོངས་སུ་མྱ་ངན་ལས་འདའ་བར་བསྟན་པའོ༔ ཨྠྀི༔ སེམས་ཀྱི་སྤྲོས་པ་ལྟ་བས་བཅད༔ ཚིག་གི་སྤྲོས་པ་ཉམས་ལེན་གྱིས་བཅད༔ མཚན་མའི་སྤྲོས་པ་རིག་པས་བཅད༔ བློའི་སྤྲོས་པ་གདམས་པས་བཅད༔ ཉམས་མྱོང་གི་སྤྲོས་པ་གོམས་པས་བཅད༔ གྲུབ་མཐའི་སྤྲོས་པ་ཤེས་རབ་ཀྱིས་བཅད་པའི་མན་ངག༔ ཨྠྀི༔ ཡིད་ཀྱི་རྣམ་པར་ཤེས་པ་དང་༔ རིག་པའི་ཁྱེའུ་ཆུང་གཉིས་སྟོབས་བྱེད་པས་ཡིད་ཀྱི་རྣམ་པར་ཤེས་པ་ལ་སྲོག་གཅོད་པ་དང་༔ མ་བྱིན་པར་ལེན་པ་དང་༔ མི་ཚངས་པར་སྤྱོད་པ་དང་༔ ངག་འཁྱལ་བ་དང་༔ ཚིག་རྩུབ་པ་དང་༔ རྔམ་སེམས་དང་༔ རློམ་སེམས་དང་༔ ལོག་པར་ལྟ་བ་ལ་སོགས་པ་དེ་རྣམས་སྤངས་ནས༔ སྟོང་པ་ཉིད་དུ་བསྒོམས་པས༔ རིག་པའི་ཁྱེའུ་ཆུང་ན་རེ༔ ཁྱོད་ཀྱིས་བསྒོམ་པ་དེ་ནི་རྫ་བེའུ་དང་འདྲ་སྟེ་འཇིག་པའི་ཆོས་ཅན་ཡིན་ནོ༔ རིག་པའི་ཁྱེའུ་ཆུང་ཁྱོད་ཇུག་བསྒོམས་བྱས་པས༔ ཡིད་ཀྱི་རྣམ་པར་ཤེས་པ་ཁྱོད་ཉོན་ཅིག༔ ཁྱོད་ནང་དུ་ལྟོས་ལ་ཕྲ་མོའི་སྐུ་ལུ་གུ་རྒྱུད་དེ་

ངོ་ཤེས༔ ཕྱིར་བལྟས་པས༔ རང་སྣང་གི་ནམ་མཁའ་ལ་ཕྲ་མོའི་སྐུ་ཤར་བ་དེ་ངོ་ཤེས་ན་ལུ་གུ་རྒྱུད༔ ཁམས་གསུམ་གྱི་སྲོག་དུས་གཅིག་ལ་འཆད་དོ༔ སྐྱི་སེར་གྱི་རླུང་རྫུ་འཕྲུལ་གྱི་ལྷ་མོ་ལ་ཞོན་ནས༔ དྲང་སྲོང་གི་བུ་མོ་བདེ་བ་ཟག་པ་མེད་པའི་གནས་སུ་སྐྱེའོ༔ ཉི་མའི་འོད་ཟེར་སྟོང་གིས་བསྐོར་རོ༔ ཉིན་མོ་དང་མཚན་མོ་མེད་པར་བསྐོར་རོ༔ ཏི་མ་རའི་བུ་སེང་གེ་དཀར་མོ་ལྕགས་ཐག་ལ་འདོགས་སོ༔ རང་སྣང་གི་ནམ་མཁའ་ལ་ཕྲ་མོའི་སྐུ་དེ་ཤེས་ན༔ སེང་གེ་དཀར་མོ་ལྕགས་ཐག་ལུ་གུ་རྒྱུད་ལ་ཐོགས་པ་ཡིན་ནོ༔ ཨྠྀི༔ དཔེར་ན་རིག་པའི་ཡེ་ཤེས་དེ་ནམ་མཁའི་གླིང་དང་འདྲ་སྟེ༔ མ་བྲིས་པའི་དཀྱིལ་འཁོར་ན༔ སྲོག་མེད་པའི་སྐུ་བཞུགས་སོ༔ ཤེས་བྱ་མ་རྨོངས་པ༔ དབུགས་མེད་པའི་འགྱུ་བ་ཤེས་བྱ་མ་རྨོངས་པ༔ ཨྠྀི༔ སྙིང་གི་ནང་དུ་མ་རིག་པ་དང་༔ རིག་པའི་ཁྱེའུ་ཆུང་གཉིས་རིག་པའི་ཁྱེའུ་ཆུང་གིས༔ མ་རིག་པ་ལ་ཁྱོད་ཉོན་ཅིག༔ ཁྱོད་འཁོར་བ་ལ་མ་དགའ༔ དུག་ལྔ་ལ་མ་དགའ་ཞིག༔ ངའི་ཟེར་དཀར་པོ་གཅིག་ཡར་ལ་འགྲོ་བ་ལས་ཞེ་སྡང་གི་ཆུ་འབབ་སྟེ་ཁྱོད་ཀྱིས་ཚོར་རམ༔ ངའི་ཐུར་ལ་རྒྱུག་པའི་ཟེར་དམར་པོ་ལས་འདོད་ཆགས་ཀྱི་ཆུ་ཆེན་པོ་ཞིག་རྒྱུག་སྟེ་ཁྱོད་ཀྱིས་ཚོར་རམ༔ ངའི་ཐུར་ལ་ཟེར་ནག་པོ་ལས༔ གཏི་མུག་གི་ཆུ་ཆེན་པོ་འབབ་སྟེ༔ ངའི་གཞོགས་གཡས་ནས་ཡར་ལ་ཟེར་ཁམ་སེར་གྱི༔ ང་རྒྱལ་གྱི་

ཆུ་ཆེན་པོ་འབབ་པ་ཁྱོད་ཀྱིས་ཚོར་རམ༔ ངའི་གཞོག་གཡས་ནས་རྩ་ཁ་ལྗང་གཅིག་གི་ནང་ན་ཡར་མར་ལ་ཕྲག་དོག་གི་ཆུ་འབབ་སྟེ་ཁྱོད་ཀྱིས་ཚོར་རམ༔ དེ་ཚོར་ན་ངས་མི་འགྱུར་རྡོ་རྗེ་ལུ་གུ་རྒྱུད་ཀྱི་སྐུ་ཤེས་པས༔ དེ་ཁྱོད་ཀྱི་ཚོར་རམ༔ ངས་མི་འགྱུར་རྡོ་རྗེ་ལུ་གུ་རྒྱུད་ཀྱི་སྐུ་ཤེས་པས་ཞེ་སྡང་གི་གྲོང་ཁྱེར་ཞིག་སྟེ༔ མེ་ལོང་ལྟ་བུའི་ཡེ་ཤེས་ཤར༔ ང་རྒྱལ་གྱི་གྲོང་ཁྱེར་ཞིག་སྟེ༔ མཉམ་པ་ཉིད་ཀྱི་ཡེ་ཤེས་ཤར༔ འདོད་ཆགས་ཀྱི་གྲོང་ཁྱེར་ཞིག་སྟེ༔ སོ་སོར་རྟོགས་པའི་ཡེ་ཤེས་ཤར༔ ཕྲག་དོག་གི་གྲོང་ཁྱེར་ཞིག་སྟེ༔ བྱ་བ་ནན་ཏན་གྱི་ཡེ་ཤེས་ཤར༔ གཏི་མུག་གི་གྲོང་ཁྱེར་ཞིག་ནས༔ ཆོས་ཀྱི་དབྱིངས་ཀྱི་ཡེ་ཤེས་ཤར༔ སངས་རྒྱས་ཀྱི་དགོངས་པ་ཨྠྀི༔ ༔རང་སྣང་གི་ནམ་མཁའ་ལ་གསེར་གྱི་བྱ་ཁྱུང་རྒྱུའོ༔ དབང་པོ་སྒོ་ལྔ་ལ་རྒྱུའོ༔ གསེར་གྱི་བྱ་ཁྱུང་དེ་གཟུགས་སྟོང་པའོ༔ སྟོང་པ་ཉིད་གཟུགས་སོ༔ ལྷུན་པོའི་རྩེ་ལ་རིན་པོ་ཆེའི་འོད་ཟེར་སྟོང་འཆར་རོ༔ ཨྠྀི༔ ངོ་བོ་སྟོང་པར་རང་བཞིན་གསལ་བ༔ ཐུགས་རྗེ་མ་འགགས་པའོ༔ ངོ་བོ་སྟོང་པ་དེ་ངོ་བོ༔ གསལ་བ་དེ་རང་སྣང་༔ རང་སྣང་དེ་གསལ་བ༔ གོ་མ་འགགས་པ་དེ་ཐུགས་རྗེའོ༔ ངོ་བོ་དབང་པོས་གཏན་ལ་མ་ཕེབས་ན༔ ཐེག་པ་ཐུན་མོངས་བ་དང་ཁྱད་པར་མེད་པས༔ རང་གི་ངོ་བོ་རང་གིས་མི་ཤེས་པའོ༔ ངོ་བོ་དེ་དབང་པོའི་མངོན་སུམ་དུ་གསལ་བ་དང་རང་བཞིན་དེ་སྣང་བ་ཕྱོགས་མེད་ཇི་ལྟ་བུར་ཡང་འཆར་རོ༔ ཐུགས་རྗེ་ཀུན་ལ་ཁྱབ་བོ༔

ཨྠྀི༔ དཔལ་བེའུའི་ནང་ནས་ཡར་ལ༔ རྩ་གསེབ་ཀྱི་སྤུ་ཐག་ཙམ་ནི་ཡར་ལ་རྒྱུའོ༔ ཆུ་སྟེང་གི་ཉ་ཆུང་ལྟ་བུ༔ ཆུ་ལས་ཡར་མ་ཐོན༔ ས་ལས་མར་མ་རེག༔ དེ་བཞིན་དུ་མིག་ནས་ལམ་བྱུང་ནས་རང་སྣང་གི་ནམ་མཁའ་ལ༔ གནམ་ལ་མ་རེག་ས་ལ་མ་རེག་བར་སྣང་ལ་འགྱུ་བ་དང་༔ འཕྲིག་པ་དང་༔ དེ་ལས་ཟེར་ཕྲ་མོ་རེ་ལ་ལྔ་ཚང་བའི་དུས་ན༔ རང་སྣང་ལྷུག་པར་ཤར་བས༔ བར་དོ་ལ་ཡང་དེ་ལས་ལྷག་པ་སྣང་བ་མེད་དོ༔ གསང་བ་ཡང་གསང་དུམ་དུམ་ཁྲིགས༔ དུམ་བུ་བདུན་ཅུ་རྩ་བཞི་པ་རྫོགས་སོ༔ དགེའོ༔

ཁྱུང་ཆེན་མཁའ་ལྡིང་།

ཁྱུང་ཆེན་མཁའ་ལྡིང་ཞེས་བྱ་བ་བཞུགས་སོ༔ ཁྲིགས་ཆོད་ཀྱི་ཡི་གེ་ཡིན༔ མན་ངག་ཞེ་བཞི་པ།

རྒྱ་གར་སྐད་དུ༔ མཧཱ་གྷ་རུ་བྷེ་ལ་ག་ཤ་ནཱ་མ༔ བོད་སྐད་དུ༔ ཁྱུང་ཆེན་མཁའ་ལྡིང་ཞེས་བྱ་བ༔ བཅོམ་ལྡན་འདས་ཆོས་ཉིད་འདུས་མ་བྱས་པའི་དཔལ་ལ་ཕྱག་འཚལ་ལོ༔ ཁམས་གསུམ་ཉིད་ལས་རྣམ་པར་རྒྱལ་བའི་དཔལ༔ འགྲོ་རྣམས་སྙིང་གི་མུན་པ་སེལ་བར་བྱེད་པ་ཡི༔ སྟོན་པའི་བཀའ་ཉིད་སྟོན་པར་ཞལ་འཆེས་པ༔ དེ་རྗེས་འབྲེང་བའི་བླ་མ་དཔའ་བོ་ཉིད་ལ་འདུད༔ བདག་གི་ནུས་པ་ཚིག་ལ་དབང་མིན་ཡང་༔ གོང་མའི་གོང་མ་རྣམས་དང་དྲིན་ཅན་བླ་མ་དང་༔ རྒྱུད་ལུང་མན་ངག་དགོངས་དོན་ཚིག་ཉིད་ཀྱི༔ སོ་སོའི་འདོད་པའི་རིམ་པས་རྗེས་འབྲངས་ཏེ༔ ཚིག་ལ་བརྟེན་ནས་ཟབ་མོ་ཉིད་ཀྱི་དོན༔ གང་དང་མི་འགལ་ཀུན་གྱིས་མ་རྟོགས་པའི༔ སོ་སོའི་འདོད་གཞུང་རྣམས་ཀྱི་བཅུད་བསྡུས་ནས༔ འཁོར་བའི་ཡིད་དང་བྲལ་བ་རྣམས་ཀྱི་དོན་དུ་སྤྲོ༔ རང་བཞིན་གནས་པའི་ཐབས་ནི་ལྔ་ལས་ཀྱང་༔ མ་བསྒོམས་ཡེ་ཤེས་ལྷུག་པ་བཅོས་པ་མེད་པའི་གནད༔ རྒྱུ་མེད་རྐྱེན་དང་བྲལ་བའི་རང་སྣང་སྒྲིབ་མེད་ཉིད༔ རྩོལ་བྲལ་ཉག་གཅིག་སུས་ཀྱང་མ་བྱས་པའི༔ ཡེ་རྫོགས་སྙིང་པོ་ལྷུན་གྲུབ་ཡུལ་ལ་རོལ༔ སྒྱུ་མའི་ཆུ་དེ་གཟུགས་ལས་བྱུང་བ་ཡི༔ སྙིང་པོ་བརྒྱ་དང་བརྟག་དཔྱད་ཡིད་ཟད་དེ༔ སྒྲིབ་བྲལ་ཅོག་བཞག་བསླད་པ་མེད་པའི་ལམ༔ མཐོང་མེད་མཚུངས་པ་མེད་ཅིང་ཡེ་ཤེས་ཀུན་གྱི་དངོས༔ འཁྲུལ་བའི་ཡུལ་ལ་གཟུང་བས་ལྟོས་བྲལ་ཉིད༔ རང་བཞིན་ཡུལ་ལ་འགག་མེད་སྙིང་པོའི་རྗེས༔ སྟོང་ཡུལ་མ་དཔྱད་རང་སར་བཞག་སྟེ་གྲོལ༔ མཐའ་བྲལ་དེ་ཉིད་གོང་མའི་སྐྱེ་

གནས་དག༔ འཇུག་ནུས་གདིང་ནི་འོག་མས་མ་སླེབ་པར༔ གནས་ཤིང་མི་གཡོ་ཡེ་ནས་སྐྱོན་མིན་ཡུལ༔ ཐོབ་མཐོང་གྲོལ་གསུམ་གྱིས་ནི་རང་བཞིན་བདེན་གནས་པའོ༔ རང་བཞིན་སུ་ཡིན་གང་ལ་སུས་བསྟན་པ༔ མ་བསྒོམ་བཞག་པའི་ས་སྟེ་དེ་ཉིད་རང་རིག་པ༔ སྒྲ་དང་བློ་བྲལ་ཀུན་གྱི་ཕ་རོལ་ཞིང་༔ དམིགས་བཅས་རང་བཟོ་ཉིད་དེ་བཅོས་མི་དགོས༔ གནས་པས་འགག་ལ་འགྱུས་པས་རང་སར་དག༔ མེད་མཐོང་མ་སྤངས་ངོ་ལ་སངས་མེད་པས༔ ས་མེད་འདི་ཉིད་གནས་ཏེ་གང་དགའི་ཡུལ༔ འཇུག་སྟེ་གང་གི་ཕ་རོལ་སོང་བ་མེད་པའོ༔ རང་བཞིན་ཡོད་མེད་བརྟག་དཀའི་སེམས་ལ་རེག་ནུས་ཤིང་༔ མ་བསམས་འཁྲུལ་པ་མེད་པའི་ཡེ་ཤེས་ཉིད༔ བྱ་བྲལ་གླེན་པའི་ཤུགས་འཆང་བློ་བདེ་བ༔ སྤྲོས་མེད་ནམ་མཁའི་ཡིད་ཅན་རྣམས་ཀྱིས་བྱོས༔ སྣང་མེད་སྟོང་དང་བྲལ་བའི་ཡེ་ཤེས་དེ༔ མ་བཟུང་མ་གཏང་མ་བསླད་རང་སོ་སྟེ༔ གཅིག་གིས་གསུམ་ལ་སུ་ཡིས་ཕོག་པ་ཉིད༔ རྫུན་མིན་བདེན་མིན་གནས་ཐབས་ལྷང་ངེ་བའོ༔ རང་བཞིན་གཅིག་སྟེ་རྣམ་པ་ཉིད་དང་བྲལ༔ དངོས་དེ་ཉིད་ལ་ཚིག་དང་བརྗོད་མེད་པ༔ ཡེ་དག་རང་སྟོང་མཚན་ཉིད་བྲལ་བའི་ངང་དུ་ལྟོས༔ གཞི་མེད་རྩ་བ་གང་ལ་ལྟོས་མེད་པ༔ མཐོ་དམའ་ཡོད་དང་མེད་སྣང་སྟོང་པ་ལ་འཇུག་ཁྱབ༔ དེ་ལས་རང་བཞིན་བློ་ཡི་མཐའ་འགག་ངང་གཅིག་པ༔ ཆོས་མིན་ལྷན་ཅིག་སྐྱེས་ཞེས་ཡེ་ཟླ་མེད༔ གང་ལས་དེ་བྱུང་སུ་ཡིས་མྱོང་སྟེ་རྒྱལ༔

རང་སྣང་དོན་དེ་གང་ལ་བཞིན་གསལ་བ༔ བསྒྱུར་བ་མེད་ཅིང་མ་རྙོག་སུས་མ་ཕྲོགས༔ ཡེ་ཤེས་གཉིས་ཏེ་གཅིག་དང་ཐ་མི་དད༔ གཞི་མེད་ལམ་ཟད་འབྲས་བུ་ཡོད་མ་མྱོང་༔ མཐོང་ཐོས་བརྡར་སྣང་གཅིག་གིས་གང་གྲོལ་བ༔ མ་བཙལ་སུ་མི་རྙེད་པ་ཀུན་གྱི་སྙིང་ལ་གནས༔ ཡེ་ནས་ཡོད་ཅིང་བལྟས་ཤིང་མཐོང་ལས་འདས༔ དེ་ཉིད་རང་དེ་མ་བཅོས་ཐོག་མའི་ངང་༔ རྒྱུ་སྟོང་རྐྱེན་གསལ་ངོ་བོ་འདུས་པས་གནས༔ བྱ་བྱེད་དཔྱོད་དང་འཛིན་པའི་མཐའ་གཉིས་རང་༔ རིག་པས་བྱུང་དང་སོ་སོས་གང་བསྒྱུར་བ༔ གནས་ཐབས་དེ་ཉིད་དེ་ལ་སྨོས་ཅི་དགོས༔ རྩོལ་མེད་བཙལ་མི་དགོས་ཏེ་བྱུང་ཁུངས་ཀུན་གྱི་དངོས༔ རང་དག་དྲི་མའི་ཆོས་ནི་བཅོས་ཤིང་བྱེད༔ འབད་འགགས་གྲོལ་བར་ངས་རེག་སྟེ༔ ལྷག་པར་གྲོལ་དང་གྲོལ་བས་འདུག་གམ་ཅི༔ གང་ལ་སྲིད་དེ་ཡེ་ཤེས་ཁྱབ་བརྡལ་བའོ༔ སྟོང་པ་ཉིད་ལས་ལམ་བྱས་ཆོས་ཉིད་དངོས༔ སྟོང་པས་འབད་པ་མེད་པ་ལམ་གྱི་ཡང་༔ རླུང་བཀག་མིག་བཙུམ་པས་ནི་རང་སེམས་འཆིང་༔ བཅོས་མེད་ལྟོས་དང་བྲལ་བའི་གཞི་མེད་པར༔ ལུས་བཅོས་གསལ་བས་ངལ་སོས་སྣང་བ་འཆིང་༔ ཕྱོགས་མེད་རིས་སུ་མ་བཅད་སེམས་མེད་པར༔ ཡིད་དཔྱོད་སྤྲོོས་དང་བཅས་པས་གནས་ལུགས་འཆིང་༔ ཡེ་གྲོལ་བྱ་བྲལ་སོར་བཞག་གདིང་མེད་པར༔ ཞེ་འདོད་ཉམས་དང་བཅས་པ་རྟོག་པས་འཆིང་༔ མ་བཙལ་རང་སར་བཞག་པའི་གནས་

མེད་པར༔ རྒྱུ་འབྲས་ལུང་ལ་ལྟོས་པས་རིག་པ་ཉིད༔ ཆོས་ཀུན་སྤྲོས་དང་བྲལ་ཞིང་རྙོག་མེད་པས༔ བྱས་མེད་རང་སར་གྲོལ་བའི་གནད་ནི་རབ་ཏུ་ཆེ༔ རྒྱུ་འགག་རྐྱེན་ཡལ་འབྲས་བུ་ཟད་པའི་གནད༔ གང་ལ་མ་བརྟེན་གཅིག་གིས་གྲོལ་བའི་ཀློང་ཉིད་དོ༔ སྤྱོད་བྲལ་སྒོམ་དག་ལྟ་རུ་མེད་པའི་དོན༔ སུ་ཡིས་མ་བཅོས་སྣང་བ་རང་སར་བཞག་པས་གྲོལ༔ འཇུག་ཤེས་བརྡའ་དང་ཐ་སྙད་ལས་འདས་དགོངས་པ་ནི༔ འདི་ཞེས་ཚིག་དང་བྲལ་ན་དེ་ཉིད་ཡིན་ཏེ་སུ་ཞིག་འཆོས༔ བཅོས་མེད་གཟེག་དང་བྲལ་བའི་ལམ་ལ་ཅི་ཞིག་བྱ༔ གང་གིས་མ་བསླད་རང་རིག་གྲོལ་བའི་གནས༔ ལུས་དང་སེམས་ལ་ཉོན་མོངས་རང་གི་ཆོས༔ མིག་ཤེས་བྱིས་པ་རྣམས་ཀྱིས་རྒྱར་སྣང་ཡང་༔ རང་བཞག་མ་བཅོས་རྣལ་མའི་རང་རིག་པ༔ ཡེ་ནས་རང་གྲོལ་སུས་ཀྱང་བཤིག་པ་མེད༔ མ་བཀྲོལ་རང་སར་གྲོལ་བས་འབད་ཅི་དགོས༔ ཡེ་ནས་རང་གྲོལ་གྲོལ་བའི་རྒྱུ་མེད་ཉིད༔ སྡིག་སྤྱད་མི་དགེ་རྣམ་སྨིན་བདེ་བའི་གྲོགས་ཆེ་བ༔ རང་ཤུགས་མ་བཙལ་འབད་པ་མེད་པའི་གནད༔ འདི་ཉིད་རྟེན་འབྲེལ་དགེ་བས་སུ་ལ་ཕན༔ སངས་རྒྱས་མེད་ཅིང་སུ་ཡིས་བཅིངས་པའི་རྒྱ༔ འཁྲུལ་དང་མ་རིག་སེམས་ཅན་སུ་ལ་སྲིད་མིང་མེད༔ དེ་ཕྱིར་ཡེ་ནས་མ་བཀྲོལ་ཕྱིས་གྲོལ་མེད་སྣང་བའོ༔ གཞི་མེད་ལམ་ཞེས་འབྲས་བུ་སུ་འདོད་པ༔ འདོད་ཕྱིར་ཐར་པའི་གནས་ལ་འདི་ཡིས་བསྒྲིབས༔ སྟོང་མུ་གསལ་དང་ཡོད་དང་མེད་པ་གཉིས༔ རྟག་ཆད་རྒྱུ་འབྲས་བཞི་སྟེ་བརྒྱད་རྣམས་ལ༔

མཐའ་མེད་ནམ་མཁའི་མཐའ་དང་མཚུངས་པ་ཉིད༔ མུ་མཐའ་འཚོལ་བར་འདོད་པ་གང་ཡིན་པ༔ བྱ་ལོང་ནམ་མཁའི་མཐའ་ཚོལ་འདྲ་སྟེ་རྙེད་པ་མིན༔ མི་རྙེད་དོན་དེ་ཉིད་ལ་སུས་ཀྱང་བཅོས་མི་སྲིད༔ ཤེས་བྱ་སྤྲོས་མེད་འདི་ལ་མཐའ་མ་མི་སྲིད་དོ༔ གཞི་གནས་འདོད་པ་མི་སྲིད་སེམས་འདི་ལ༔ རྣམ་སྨིན་བག་ཆགས་གཞི་མེད་སུ་ལ་བརྟེན༔ ནམ་མཁར་མེ་ཏོག་སྐྱེ་བའི་གནས་མེད་རྟེན་འབྲེལ་ལྟར༔ ལུས་ལ་སེམས་ཀྱི་གནས་མེད་བག་ཆགས་རྟེན་མི་སྲིད༔ དེ་ཕྱིས་ཅི་བྱས་སེམས་ཀྱི་གྲོགས་ཏེ་གང་གིས་ཕན་གནོད་བྲལ༔ བར་སྣང་རྫས་སོགས་བརྟེན་པར་མི་ནུས་བཞིན༔ ཡེ་ནས་ཕྱོགས་སུ་ལྷུང་བ་མེད་པའི་སེམས༔ འཁོར་དང་ངན་སོང་སུ་ལ་གྲུབ་སྣང་བ༔ མི་བདེན་རྨི་ལམ་སྒྱུ་མ་དྲི་ཟའི་གྲོང་ཁྱེར་བཞིན༔ རྫུན་སྣང་བདེན་པའི་ནུས་པ་འདི་ལ་མི་སྲིད་དོ༔ སྐུ་དང་ཡེ་ཤེས་མེད་ཕྱིར་མ་རིག་ལ་སོགས་ཉོན་མོངས་སུ་ལ་སྲིད༔ དེས་ན་ཉིད་ཀྱིས་ཉིད་གྲོལ་གཉེན་པོ་ཡོད་མ་མྱོང་༔ འདོད་ཆགས་ལ་སོགས་ཉོན་མོངས་གྲངས་འདི་རྣམས༔ གཅིག་ཉིད་ཡིན་ཏེ་ཐ་དད་ག་ལ་སྲིད༔ གཅིག་གིས་གཅིག་གྲོལ་གཉིས་སོགས་རང་མིན་པར༔ ལྷག་པར་གྲོལ་མོད་སྦྲུལ་གྱི་མདུད་པ་བཞིན༔ མ་བཅོས་ལྷུག་པ་གང་ལ་རྟེན་མེད་པའི༔ ཡེ་ནས་གྲོལ་ཕྱིར་ཕྱིས་ནས་གཉེན་པོས་མིན༔ སྡུད་ཅིང་ལྡན་མིན་ལྷག་མཐོང་འདི་ཉིད་དོ༔ འགྲོ་བ་དྲུག་ཅེས་མིང་ཙམ་ཡང་དག་བརྟགས་པས་སྟོང་༔ སྟོང་པ་ཡེ་གྲོལ་གནས་གྱི་བྱར་མེད་དེ་ཉིད་རང་༔ གར་ཕྱིན་ས་མེད་ཡེ་ནས་

བཅོས་མེད་དང་༔ ལྷུན་འབྱམས་སྙིང་པོ་ཡེ་ནས་ཡུལ་སྣང་བས༔ སྔགས་བཟླས་དཀའ་ཐུབ་བསམ་གཏན་ངོ་བོ་ཉིད་ལ་སྒྲིབ༔ ཡིག་འབྲུ་སྒྱུར་བྱེད་ལུས་ངག་དགེ་བ་རྣམས༔ ཡེ་གྲོལ་རང་དག་གནོད་པར་བྱེད་པ་འོ༔ ཅིར་གྲོལ་རང་དག་མཐའ་བྲལ་ཡོངས་སུ་རྫོགས༔ གང་གིས་མཐའ་བྲལ་གགས་གཉིས་རང་བསལ་བས༔ བྱ་བྲལ་ཀློང་ཆེན་མ་བཙལ་ཆེན་པོ་འགག༔ ལུས་ངག་བྱ་བྲལ་སྣང་སྟོང་བར་དུ་གཏམས༔ མཚན་མ་ཡེ་དག་ཡོངས་སུ་གྲོལ་བའི་གཞི༔ འབད་མེད་བྱ་བྲལ་བློ་ཡི་གེགས་བསལ་ཏེ༔ ཐུག་ཕྲད་རྣམ་གསུམ་ཡུལ་ལ་རོལ་པའི་གེགས༔ གང་ཤར་མ་ཡེངས་ཡུལ་སེམས་བར་དུ་བསྡམས༔ རྒྱུ་མེད་རང་གྲོལ་རྐྱེན་ལ་མ་བརྟེན་འདི༔ ཕྱོགས་མེད་རང་དག་འདི་ཞེས་ལྟ་བ་མེད༔ ཞེ་འདོད་མཐའ་དང་བཅས་པ་གེགས་གསུམ་གསལ༔ སྣང་ཤེས་ཐོག་བབས་རང་བྱུང་ཆེན་པོའི་གེགས༔ རང་ཤར་སྤྲོས་བྲལ་རྒྱུ་རྐྱེན་བར་དུ་གཏམས༔ ལས་དང་དབང་པོ་ཚིག་དང་བློ་ཟད་པའི༔ བསླད་བཅོས་ཐབས་དང་ཤེས་རབ་གེགས་གཉིས་བསལ༔ ཆོས་མེད་དེ་ལ་བརྟེན་པའི་འབྲས་བུ་འདོད་པ་ཉིད༔ དགོས་པ་མེད་ཅིང་སླར་འདོད་འཆིང་བ་ལས༔ ལྷུག་པ་སོ་གཉུག་རྣལ་མ་དྲོད་ཀྱི་འགག༔ རང་སོར་འགྱུར་ཏེ་འཁོར་འདས་བར་དུ་གཏམས༔ བདེ་འདོད་སེམས་ལ་གནོད་པའི་ཆོས་སྤངས་ཏེ༔ རང་བཞག་ལྟོས་དང་འཁོར་འདས་བྱ་བ་བྲལ༔ རང་མིན་གཞན་མིན་སྣང་ཤེས་ཆོ་འཕྲུལ་ཀྱང་༔ འགྱུས་མཐོང་འཛིན་དང་ཞན་པའི་གེགས་བསལ་བས༔ ཅོག་

བཞག་ཚིག་ཏུ་སྤྲོས་པའི་མཐའ་འགག་སྟེ༔ ཡིད་དང་སེམས་ཀྱི་ཆོ་འཕྲུལ་ཅིར་ཡང་འགག༔ ཆོས་བྲལ་ཡིད་དང་བྱེད་པའི་བར་དུ་གཏམས༔ རང་གིས་མ་དཔྱད་སེམས་ཀྱིས་བསྒྱུར་བ་མིན༔ བློ་ཡིས་དཔྱད་ཅིང་སེམས་ཀྱིས་གར་བསྒྱུར་བ༔ འཁྲུལ་པ་རང་མདུད་བཅིངས་པའི་འགྲོ་བ་དང་༔ འདི་ཉིད་ཁྱད་པར་ཅུང་ཟད་ང་ཡིས་མ་མཐོང་ངོ་༔ ལུས་བཅོས་ངག་བསྡམས་ཡིད་ལ་བྱེད་རྣམས་དང་༔ དྲན་རྟོག་ཕུང་པོ་ཡུལ་ལ་ངན་ཤར་དང་༔ འདི་ལ་ཁྱད་པར་མེད་དེ་སླར་འཆིང་བྱེད༔ སྟོང་པའི་ལམ་ལ་སེམས་ཀྱི་དཀྱིལ་འཕྱོ་བ༔ ཡུལ་དང་དབང་པོའི་བྱེད་སྤྱོད་མྱ་ངན་འདས༔ གང་ལ་ཐེག་པ་ཡོད་ཅིང་ཆོས་ཡོད་པས༔ ངན་སོང་ཉིད་དེ་ལོག་པ་ཡོད་དམ་ཅི༔ དེས་ན་སངས་རྒྱས་མིང་དུ་འདོགས་པའི་སྟོན་པ་འཁྲུལ༔ མིང་མེད་འདོགས་པ་ཡིད་བློ་བདེན་པ་མེད༔ འགག་སྡོམ་བྱ་བཙལ་མེད་པའི་གདིང་ཉིད་ནི༔ འཕྱུགས་ཤིང་འགྲོ་དང་བྲལ་བའི་ས་མེད་པར༔ འདི་ཉིད་རང་སྟེ་སྔོན་མེད་ཕྱིས་ནས་མེད༔ རང་བྱུང་སྙིང་པོའི་དོན་ཞེས་འདོད་དང་བྲལ༔ འབྲལ་མེད་དོན་དེངས་སུ་ལ་གདམས་དང་བྲལ༔ སྣང་དང་ཤེས་རྐྱེན་ལྟར་ཤར་འདི་ཉིད་དོ༔ གདོད་ནས་བྱས་པ་མེད་པའི་སེམས་ཉིད་ལ༔ དྲན་རྟོག་བློ་ཡིས་དོན་དམ་སྙིང་པོའི་དོན༔ ཤེས་རབ་ཚིག་དང་བཅས་པས་རང་བདེན་བསྲུང་༔ ཚིག་ལ་མཁས་ཤིང་རྒྱུ་འབྲས་གཙོར་ལེན་པ༔ མནར་མེད་དེ་ཉིད་དེ་ལས་གཞན་པ་སུ༔ ལུས་ངག་བཅོས་ཤིང་ཡིད་ཀྱི་གཏད་འཛིན་པ༔ ཆོས་ཉིད་བདེན་པ་སྒྲིབ་པ་མེད་པར་བྱེད་པ་ལ༔ འདི་ལས་ལྷག་པའི་གཉེན་པོ་གཞན་པ་ཅི༔ དེ་ཕྱིར་མ་བཅོས་འཁོར་འདས་བྱ་བྱེད་

ནམ་བྲལ་ན༔ རྫོགས་ཆེན་ཉིད་དང་གཞན་པ་ཅི་ཞིག་ཡོད༔ སེམས་ལ་བལྟར་མེད་རྒྱུ་འབྲས་སུ་མཐོང་མེད༔ དེ་ཕྱིར་སྡིག་བྲལ་དགེ་བས་འདི་ལ་ཅི༔ རང་ལུགས་འབྱུང་ཁུངས་ཐོག་མ་ཉིད་དང་སྦྱར༔ སྒྲིན་པོའི་སེམས་ལ་གཟེག་སྐུར་ཁམས་གསུམ་ལས་མི་འདའ༔ མ་བཅོས་གླེན་སྣང་སུ་ལ་ལྷོད་ཡོད་པ༔ འདི་ནི་འཁོར་འདས་གཉིས་ལ་མི་གནས་སོ༔ རྫོགས་ཆེན་གསང་བའི་དངོས་པོའི་གནད་བསྡུས་ཏེ༔ མ་འོངས་ངེས་པའི་བློ་ཅན་དོན་ཆེད་དུ༔ འབད་མེད་རང་སར་གྲོལ་བའི་ཡི་གེ་འདིས༔ འདི་ལ་མོས་པའི་འགྲོ་རྣམས་རྩོལ་མེད་དོན་ལྡན་ཤོག༔ ཁྱུང་ཆེན་མཁའ་ལྡིང་ཞེས་བྱ་བ༔ རྒྱ་ནག་པོའི་སློབ་དཔོན་ཤྲཱི་སིདྷས་མཛད་པ་རྫོགས་སོ༔ ཟབ་རྒྱ༔ སྦས་རྒྱ༔ གཏེར་རྒྱ༔ སྔགས་སྲུང་རྒྱལ་མོས་སྲུངས་ཤིག༔ ཨྠྀི༔ དགེའོ༔ སརྦ་མངྒལཾ༔ ༔

སེམས་ཀྱི་དམིགས་དྲུག་གི་རྣམ་པར་བཤད་པ།

སེམས་ཀྱི་དམིགས་དྲུག་གི་རྣམ་པར་བཤད་པ་ཞེས་བྱ་བ་བཞུགས་སོ༔ མན་ངག་ཞེ་དགུ་པ༔

རྒྱ་གར་སྐད་དུ། ཨ་བ་ལོ་ཤ་ནཱ་མ། བོད་སྐད་དུ། རྣམ་པར་བཤད་པ་ཞེས་བྱ་བ། བཅོམ་ལྡན་འདས་དཔལ་གཉིས་མེད་རང་གྲོལ་བ་ཉིད་ལ་ཕྱག་འཚལ་ལོ། ཁམས་གསུམ་རང་རྒྱུད་བཅིངས་ལས་བརྒལ་བའི་དཔལ། །འགྲོ་བའི་བླ་མ་རྡོ་རྗེ་འཆང་བ་ཉིད། །དེ་ལས་ཁྱད་གྱུར་སངས་རྒྱས་གཉིས་པའི་ལུང་། །དགའ་རབ་རྡོ་རྗེ་གཉིས་མེད་བདེ་ལྡན་པས། །རྫོགས་ཆེན་གནད་བཏུས་ངེས་པའི་སྙིང་པོ་ཉིད། །གཞན་དུ་བསྟན་པ་མེད་པའི་སེམས་ཉིད་གནད། །དམིགས་ཆེན་དྲུག་བསྟན་ཁམས་གསུམ་དོང་སྤྲུག་པའི། །གསང་བ་ཁྱད་པར་གནས་ཀྱི་ཡི་གེ་ཉིད། །སྙིང་གི་ཏི་ཀ་ཀུན་དང་མི་མཉམ་པ། །དེ་དོན་གསལ་བར་བདག་གི་བླ་མ་ལ། །གསོལ་བ་བཏབ་ནས་བདག་གིས་ལེགས་བཤད་བྱ། །དེ་ལ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཐབས་མཁས་ལ་ཐུགས་རྗེ་ཆེ་བ་ཉིད་ཀྱིས། སེམས་ཅན་རྣམས་ཀྱི་མོས་པའམ་དབང་

པོའི་བྱེ་བྲག་ལ་དགོངས་ནས། དམ་པའི་ཆོས་ཀྱི་སྒོ་དཔག་ཏུ་མེད་པར་གསུངས་པ་ལས། དེ་དག་གི་སྙིང་པོའི་དོན་བཅུད་དུ་དྲིལ་ནས། སློབ་དཔོན་ཆེན་པོ་དགའ་རབ་རྡོ་རྗེས། མ་བསྒོམས་པར་སངས་རྒྱ་བར་བྱེད་པའི་སེམས་ཀྱི་དམིགས་དྲུག་ལ་བརྟེན་ནས། འགྲོ་བ་རྣམས་ཆོས་ཉིད་གནད་ཤེས་པ་ཙམ་གྱིས་གྲོལ་བར་བསྟན་པ་འདི། གང་ཟག་གཅིག་གི་ཆ་རྐྱེན་དུ་སློང་བའི་གནད་ལ་འདིའི་དོན་དྲིལ་ནས་བཤད་ན། ཆེ་བ་ལྔས་ཐེག་པ་ཐུན་མོངས་པ་ལས་ཁྱད་པར་དུ་བསྟན་ཏེ། སློབ་དཔོན་ལོ་རྒྱུས་ཀྱི་ཆེ་བས་མཛད་པའི་སློབ་དཔོན་གྱི་ཡོན་ཏན་བསྟན་པ་དང་། འཇུག་སྒོ་ཐེག་པའི་ཆེ་བས་རྒྱུད་གང་ལ་བརྟེན་ཅིང་མན་ངག་གི་ཁུངས་གསལ་བར་བསྟན་པ་དང་། དགོས་ཆེད་གང་ཟག་གི་ཆེ་བས་དོན་ཆེད་གང་ཡིན་པ་གསང་སྔགས་སྣོད་ཀྱི་ཁྱད་པར་བསྟན་པ་དང་། བསྡུས་དོན་མན་ངག་གི་ཆེ་བས་ས་བཅད་ཀྱི་དམིགས་གསལ་བར་བསྟན་པ་དང་། ཟབ་པ་མཚན་གྱི་ཆེ་བས་མན་ངག་གི་གཞུང་བདེ་བླག་ཏུ་

རྟོགས་པར་བསྟན་པ་དང་ལྔས་བསྟན་ཏོ། །དེ་དག་ཀྱང་འདུས་གཞི་གང་ཟག་གཅིག་གི་རྒྱུད་ལ་ཉོན་མོངས་པ་ལྔ་གནས་པ་ལ་དགོངས་པའོ། །དེ་དག་ཀྱང་གཙོ་ཆེ་ཆུང་གི་དབང་དུ་བྱས་ན། ཉོན་མོངས་པ་གཏི་མུག་ཅན་འཇུག་ཅིང་། དམིགས་གཏད་མེད་པའི་དགོངས་པ་གཙོ་ཆེ་བ་ལ་དགོངས་པ་དང་། ཞེ་སྡང་ཅན་འཇུག་ཅིང་གཟའ་གཏད་མེད་པའི་ལྟ་བ་གཙོ་ཆེ་བ་ལ་དགོངས་པ་དང་། འདོད་ཆགས་ཅན་འཇུག་ཅིང་ཕྱོགས་གཏད་མེད་པའི་སྤྱོད་པ་གཙོ་ཆེ་བ་ལ་དགོངས་པ་དང་། ང་རྒྱལ་ཅན་འཇུག་ཅིང་སྨྲ་གཏད་མེད་པའི་གཞི་ལམ་གཙོ་ཆེ་བ་ལ་དགོངས་པ་དང་། ཕྲག་དོག་ཅན་འཇུག་ཅིང་འདོད་གཏད་མེད་པའི་འབྲས་བུ་གཙོ་ཆེ་བ་ལ་དགོངས་པའི་འདུལ་བྱེད་དུ་བྱུང་བའོ། །དེ་ལ་དང་པོ་སློབ་དཔོན་ལོ་རྒྱུས་ཀྱི་ཆེ་བ་ནི། སློབ་དཔོན་ཆེན་པོ་དགའ་རབ་རྡོ་རྗེས་མཛད་དེ། དེའི་སྐུ་ཆེ་བའི་ཡོན་ཏན་ནི། སྟོན་པ་ཉིད་ལས་སྤྲུལ་པས་སྟོན་པ་སངས་རྒྱས་བཅོམ་ལྡན་འདས་སྐྱེ་བ་བཞིས་བསྡུས་པའི་འགྲོ་བ་རྣམས་འདུལ་བའི་གཟུགས་སུ་བྱོན་པའི་དུས་སུ་འཁོར་འདུས་པ་དང་པོར་བཞུགས་པ་དང་། སྟོན་པས་མཛད་པ་སུམ་ཅུ་སོ་དྲུག་མཛད་པའི་དུས་ཐམས་ཅད་དུའང་བཞུགས་པ་དང་། དེ་དག་གི་ལོ་རྒྱུས་ནི་རྒྱུད་ཀྱི་སྐབས་སུ་ཞིབ་པར་སྟོན་པས་འདིར་མ་སྤྲོས་སོ། །སློབ་དཔོན་དགའ་རབ་རྡོ་རྗེའི་ལོ་རྒྱུས་བཤད་དོ། །དེ་ཡང་གསང་བ་ཉེ་བརྒྱུད་ཀྱི་དབང་དུ་བྱས་ནས་སྟོན་པས་དགའ་རབ་རྡོ་རྗེ་དངོས་ལ་བསྟན། སློབ་དཔོན་དགའ་རབ་རྡོ་རྗེས་བྱེ་མ་ལ་ལ་བསྟན། བྱེ་མ་ལས་ལྷ་རྗེ་ལྕེ་བཙུན་སེང་གེ་དབང་ཕྱུག་ལ་ལོ་བདུན་གྱི་བར་ལ་རེས་མཇལ་རེས་མི་མཇལ་བར་དེ་དག་གི་བར་ལ་གདམས་ངག་རྣམས་གནང་ངོ་། འཇུག་སྒོ་ཐེག་པའི་ཆེ་བ་ནི། སྤྱིར་སངས་རྒྱས་ཀྱིས་ཆོས་བསམ་གྱིས་མི་ཁྱབ་པ་ཞིག་གསུངས་ཀྱང་བཀའ་སྩལ་ལུགས་གསུམ་ལས་མི་འདའ་སྟེ། དབང་པོ་

ལ་དགོངས་ཏེ་སྩལ་བ་དང་། བསྡུ་བ་ལ་དགོངས་ཏེ་སྩལ་བ་དང་། གཉེན་པོ་ལ་དགོངས་ཏེ་བཀའ་སྩལ་ཏོ། །དེ་ཡང་དབང་པོ་རབ་འབྲིང་ཐ་མ་གསུམ་ལ་དགོངས་པའོ། །རབ་རྣམས་ལ་འོ་མ་ལས་མར་ལྟར་བསྡུས་པ་ལ་དགོངས་ཏེ་གསུངས་པ་ནི། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་རྣམས་རྩ་བ་བྱང་ཆུབ་ཀྱི་སེམས་ལ་བསྡུས་ཏེ་བསྟན་པའོ། །འབྲིང་པོ་རྣམས་གཉེན་པོ་ལ་དགོངས་ཏེ་བཀའ་སྩལ་བ་སྟེ། ཉོན་མོངས་པ་བརྒྱད་ཁྲི་དང་བཞི་སྟོང་སྟེ། འདོད་ཆགས་ལས་འགྱུར་བ་ཉི་ཁྲི་དང་ཆིག་སྟོང་གི་གཉེན་པོར། ཆོས་ཀྱི་སྒོ་འདུལ་བ་ལས་གྱུར་པ་ཉི་ཁྲི་དང་ཆིག་སྟོང་། ཞེ་སྡང་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར། མངོན་པ་ལས་གྱུར་པ་ཉི་ཁྲི་དང་ཆིག་སྟོང་། གཏི་མུག་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར། མདོ་སྡེ་ལས་གྱུར་པ་ཉི་ཁྲི་དང་ཆིག་སྟོང་། དུག་གསུམ་ཆ་མཉམ་ལས་གྱུར་པ་ཉི་ཁྲི་དང་ཆིག་སྟོང་གི་གཉེན་པོར་སྡེ་སྣོད་གསུམ་ཆ་མཉམ་པ་ལས་གྱུར་པ་ཉི་ཁྲི་དང་ཆིག་སྟོང་སྟེ། བརྒྱད་ཁྲི་བཞི་སྟོང་གསུངས་པ་ཡང་། རྡོ་རྗེ་སེམས་དཔའ་སྒྱུ་འཕྲུལ་དྲ་བ་ལས། ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་སྟོང་ཕྲག་བརྒྱད་ཅུ་རྩ་བཞི་གསུངས་སོ། །གསུང་ངོ་། གསུང་པར་འགྱུར་རོ། །ཞེས་པའོ། །ཐ་མ་རྣམས་ལ་དབང་པོ་ཆེ་ལོངས་ལ་དགོངས་ཏེ་བཀའ་སྩལ་པ་ལ། བློ་ཅིག་ཅར་པ་དང་རིམ་གྱིས་པ་གཉིས་སུ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་ཐེག་པ་གཉིས་སུ་བསྡུས་ཏེ། དེ་ལ་འཇིག་རྟེན་པ་ལ་གཉིས་ཏེ། སོར་བཞག་གི་ཐེག་པ་ལྷ་དང་མི་ལུང་དུ་མ་བསྟན་པ་རྣམས་སོ། །ཕྱིན་ཅི་ལོག་ལ་ལྟ་ངན་སུམ་བརྒྱ་དང་དྲུག་ཅུ་ལ་ཡང་རྟག་ཆད་གཉིས་སུ་བསྡུས་སོ། །དེ་ལྟར་ཡང་ཕ་རོལ་

ཕྱིན་པ་ལས། འཇིག་ཚོགས་ལྟ་བར་ལྟ་བ་དྲུག་ཅུ་གཉིས་འདུས་ལྟར། ཞེས་པས་སོ། དབང་པོ་ཞིབ་རྩེགས་ལ་དགོངས་པ་ལ་རབ་ཀྱི་རབ་དང་། འབྲིང་དང་། ཐ་མ་ལ་སོགས་པ་དགུ་ལ་འཇིག་རྟེན་ལས་འདས་པའི་ཐེག་པ་སྟེ། འདི་དག་གི་ཁྱད་ལ་སོགས་པ་རྒྱུད་ཀྱི་སྐབས་སུ་སྟོན་ནོ། །འདས་པ་ལ། རྒྱུ་ལ་ལམ་དུ་བྱེད་པ་དང་། རྒྱུའི་ཐེག་པ་གསུམ་ནི་དབང་པོ་ཐ་མ་གསུམ་ལ་དགོངས་ཏེ། ཉན་ཐོས་དང་། རང་རྒྱལ་དང་། བྱང་ཆུབ་སེམས་པའོ། །འདི་དག་ལ་བྱེ་བྲག་ཏུ་བཤད་པ་མང་ཡང་འདིར་མ་སྤྲོས་སོ། །འབྲས་བུ་ལམ་དུ་བྱེད་པ་ལ་ཡང་གཉིས་ཏེ། ཕྱི་ཐུབ་པ་རྒྱུད་ཀྱི་ཐེག་པ་དང་། ནང་པ་ཐབས་ཀྱི་རྒྱུད་ཀྱི་ཐེག་པའོ། །ཕྱི་པ་གསུམ་ནི། དབང་པོ་འབྲིང་པོ་གསུམ་ལ་དགོངས་པ་སྟེ། ཀྲྀ་ཡ་དང་། ཨུ་པ་ཡ་དང་། རྣལ་འབྱོར་ཡོ་གའི་ཐེག་པ་དང་གསུམ་མོ། །ནང་པ་གསུམ་ནི་རབ་གསུམ་སྟེ། མ་ཧཱ་མ་ནུ་ཨ་ཏི་ཡོ་གའོ། །དེ་དག་གི་ཁྱད་པར་ལ་སོགས་པ་འདིར་མ་སྤྲོས་སོ། །དེ་ལ་དེར་འཇིག་རྟེན་པ་མ་ཡིན་ཏེ་འདས་པའོ། །འདས་པ་ལ་གཉིས་ལས་རྒྱུ་མ་ཡིན་ཏེ་འབྲས་བུ་ལ་ལམ་དུ་བྱེད་པའོ། །དེ་ཡང་རྡོ་རྗེ་སེམས་དཔའ་སྒྱུ་འཕྲུལ་ལས། འདི་ནི་གསང་ཆེན་ངེས་པ་ཡི། འབྲས་བུ་ལམ་དུ་གྱུར་པའོ། །ཞེས་པས་སོ། །དེ་ལ་གཉིས་ལས། ཕྱི་མ་མ་ཡིན་ཏེ་ནང་པའོ། །ནང་པ་ལ་མ་ཧཱ། ཨ་ནུ་ཨ་ཏི་གསུམ་ལས་རྫོགས་པ་ཆེན་པོ་ཨ་ཏི་ཡོ་གའོ། །རྫོགས་པ་ཆེན་པོ་ལ། ཡང་དག་དོན་གྱི་རྫོགས་པ་ཆེན་པོ་དང་། མཚན་མ་ཚིག་གི་རྫོགས་པ་ཆེན་པོའོ། ཡང་དག་དོན་ལ་གཉིས་ཏེ། སྨྲ་བྱེད་གཞི་ལམ་འབྲས་བུའི་དང་། གནས་པ་རང་སྣང་གི་རྫོགས་པའོ། །སྨྲ་བྱེད་གཞི་ལམ་གྱི་རྫོགས་པ་ཆེན་པོ་

ལ་གསུམ་སྟེ། གཞི་མདུང་གྱུར་སྨྲ་བའི་རྫོགས་པ་ཆེན་པོ་དང་། ལམ་དྲང་ཐད་དུ་སྨྲ་བའི་རྫོགས་པ་ཆེན་པོ་དང་། འབྲས་བུ་ཡེ་གྲོལ་སྨྲ་བའི་རྫོགས་པ་ཆེན་པོའོ། གཞི་ལ་གསུམ་སྟེ། སྣང་བ་གཞི་གནས་རང་ཤར་དུ་སྨྲ་བའི་དང་། འཁྲུལ་པ་གཞི་ལྡོག་ཏུ་སྨྲ་བའི་དང་། ངོ་བོ་གཞི་ཁྱབ་ཏུ་སྨྲ་བའི་རྫོགས་པ་ཆེན་པོའོ། ལམ་ལ་གསུམ་སྟེ། གནད་ལ་བརྟེན་པར་སྨྲ་བའི་དང་། སེམས་སྟོབས་ལ་བརྟེན་པར་སྨྲ་བའི་རྫོགས་པར་སྨྲ་བའི་རྫོགས་པ་ཆེན་པོ་དང་། འགྱུ་བ་གཏད་ཡལ་དུ་སྨྲ་བའི་རྫོགས་པ་ཆེན་པོའོ། །དེ་ལས་ནི་འགྱུ་བ་གཏད་ཡལ་དུ་སྨྲ་བའི་རྫོགས་པ་ཆེན་པོའོ། །དེ་དག་ལའང་ཞིབ་པར་གཞན་དུ་བསྟན་པས་འདིར་མ་སྨོས་སོ། །གནས་པ་རང་སྣང་གི་རྫོགས་པ་ཆེན་པོ་ལ་གསུམ་སྟེ། ལུས་གནས་རྩ་ཡི་རྫོགས་ཆེན་དང་། སེམས་གནས་རླུང་གི་རྫོགས་ཆེན་དང་། ཡུལ་གནས་གཞི་བཞག་གི་རྫོགས་པ་ཆེན་པོའོ། །མཚན་མ་ཚིག་གི་རྫོགས་པ་ཆེན་པོ་ནི་ཤློ་ཀ་འབུམ་ཕྲག་དྲུག་ཅུ་རྩ་བཞི། བམ་པོ་ཉི་ཁྲི་དང་ཆིག་སྟོང་། དེ་དག་ཀྱང་ཀློང་ནི་དགུར་བསྡུས་ལེའུ་ནི་ཁྲི་ཕྲག་གསུམ་དང་། སྟོང་ཕྲག་ལྔ། བརྗོད་པ་ནི་ནམ་མཁའི་མཐའ་དང་མཉམ་པ་ཞིག་གསུངས་པ་ཡང་སྡེ་གསུམ་དུ་བསྡུས་ཏེ། སེམས་ཀྱི་སྡེ་དང་། ཀློང་གི་སྡེ་དང་། མན་ངག་གི་སྡེ་དང་གསུམ་དུ་བསྡུས་པ་ནི་འགྲོ་བ་རྣམས་ལ་ལུས་ངག་ཡིད་གསུམ་དུ་གནས་ཏེ། དེ་རྣམས་དག་པར་བྱེད་པའི་དག་བྱེད་ལ་དགོངས་པའོ། །སེམས་ཀྱི་སྡེ་ལ་ལུགས་གཉིས་ཏེ། གཞི་གནས་རང་གྲོལ་གྱི་རྫོགས་ཆེན་དང་། འདོད་པ་རང་ཤར་གཉིས་སོ། །ཀློང་སྡེ་ལ་གསུམ་སྟེ། ཀློང་དཀར་པོ་མུ་བཞི་ལམ་ཁྱེར་དུ་སྨྲ་བ་དང་། ཁྲ་བོ་རབ་འབྱམས་སུ་སྨྲ་བ་དང་། ནག་པོ་རང་གྲོལ་དུ་སྨྲ་བའོ། དེ་ལ་འདི་ནི་

མན་ངག་གི་སྡེ་སྟེ། འདི་ལ་ཡང་གསུམ་སྟེ། སྟོན་པས་ཁ་འཐོར་བའི་ཚུལ་དུ་གསུངས་པ་དང་། ཁ་གཏམ་གྱི་ཚུལ་དུ་བཀའ་སྩལ་པ་དང་། རྒྱུད་རང་གཞུང་གི་ཚུལ་དུ་བཀའ་སྩལ་པའོ། །དེ་ལ་འདི་རྒྱུད་རང་གཞུང་ངོ་། །དེ་ལ་ཡང་བཞི་སྟེ། གཏར་ཀ་གེགས་སེལ་གྱི་ཚུལ་དུ་བཀའ་སྩལ་པ་དང་། གབ་པ་མངོན་བྱུང་གི་ཚུལ་དུ་བཀའ་སྩལ་པ་དང་། ལྟ་བ་སྒང་དྲིལ་ཏེ་བཀའ་སྩལ་པ་དང་། བཤད་པ་རང་གསལ་གྱི་ཚུལ་དུ་བཀའ་སྩལ་པ་བཞི་ལས། འདི་ནི་བཤད་པ་རང་གསལ་ལོ། །འདི་ལ་ཡང་ལུགས་གསུམ་སྟེ། འཁྲུལ་གཞི་གཞི་ལ་ལྡོག་པའི་ཚུལ་དུ་བཀའ་སྩལ་པ་དང་། འཁྲུལ་པ་བ་འདེད་ཀྱི་ཚུལ་དང་། ཐིག་ལེ་རང་གནད་ལ་ཕབ་སྟེ་བཀའ་སྩལ་པའོ། །དེ་ལ་འདི་ཐིག་ལེ་རང་གནད་ལ་ཕབ་སྟེ་བཀའ་སྩལ་པའོ། །འདི་ལ་གཉིས་ཏེ། སྙན་ནས་སྙན་དུ་བརྒྱུད་པ་སྙན་བརྒྱུད་དང་། རྒྱུད་ལུང་དཀྱུས་ལ་བརྟེན་ནས་བཤད་པའི་བརྒྱུད་པ་གཉིས་སོ། །འདི་བཤད་རྒྱུད་དོ། །དེ་ལ་བཞི་ཡོད་པ་ལས། ཕྱི་སྐོར་ལུས་དང་འདྲ་བ་དང་། ནང་སྐོར་མིག་དང་འདྲ་བ་དང་། གསང་སྐོར་སྙིང་དང་འདྲ་བ་དང་། གསང་བ་བླ་ན་མེད་པ་ཡོངས་སུ་རྫོགས་པ་ལུས་དང་དབང་པོ་ཡན་ལག་རྫོགས་པའི་སྐྱེས་བུ་དང་འདྲ་བ་སྟེ། འདི་ནི་གསང་བ་བླ་ན་མེད་པའོ། །ཆོས་དེ་དག་ཀྱང་སྡེ་སྣོད་གསུམ་དུ་འདུས་པ་ལས། མདོ་སྡེ་དང་། འདུལ་བ་དང་མངོན་པར་གསུམ་སྟེ་སྡེ་སྣོད་ཀྱིས་དབྱེ་བའོ། །མདོ་སྡེ་ལ་དྲང་པ་དང་། ངེས་པའི་མདོའི་སྡེའོ། །འདུལ་བ་ལ་རྩ་བའི་སྡེ་པ་བཞི་སྟེ། ཕལ་ཆེར་སྡེ་པ་སྡུག་བསྔལ་གྱི་བདེན་པའི་གཉེན་པོ་གཙོར་བྱེད། མང་པོས་བཀུར་བའི་སྡེ་པ་ཀུན་འབྱུང་གི་

བདེན་པའི་གཉེན་པོས་སྤོང་བ་ལ་གཙོར་བྱེད་པ་དང་། གནས་བརྟན་པའི་སྡེ་པས་འགོག་པའི་བདེན་པ་ལ་གཙོར་བྱེད་པ་དང་། ཐམས་ཅད་ཡོད་པར་སྨྲ་བའི་སྡེ་པ་ལམ་གྱི་བདེན་པ་ཡན་ལག་དང་བཅས་པ་ལ་གཙོར་བྱེད་པའོ། །མངོན་པ་ལ་གཉིས་ཏེ། ལུང་གི་ཆོས་དང་། རྟོགས་པའི་བདག་ཉིད་ཀྱི་ཆོས་གཉིས་ལས། འདི་མངོན་པ། དེ་ལས་ཀྱང་ལུང་གི་ཆོས་སོ། །ལུང་ལ་གཉིས་ཏེ། བསྟན་པའི་ལུང་དང་། ངེས་པ་བརྗོད་པའི་ལུང་ལས། འདི་ནི་ངེས་པར་བརྗོད་པའོ། །དེ་དག་ཀྱང་བསྡུ་ན། བཀའ་དང་བསྟན་བཅོས་གཉིས་ཏེ། བཀའ་ལ་གཉིས་ཏེ། རྒྱུད་སྡེ་དང་། མདོ་སྡེའོ། །དེ་དག་རེ་རེ་ལ་བཀའ་དངོས་དང་། བྱིན་གྱིས་བརླབས་པ་དང་། རྗེས་སུ་གནང་བ་དང་གསུམ་མོ། །དེ་ལ་འདི་བསྟན་བཅོས་ཏེ། བསྟན་བཅོས་ལ་མང་ཡང་། རྫོགས་པ་ཆེན་པོ་མན་ངག་གི་བསྟན་བཅོས་སོ། །དེ་ཡང་ཤན་འབྱེད་བྲམ་ཟེའི་སྨྲེང་འདོན་པ་ལྟ་བུའི་བསྟན་བཅོས་དང་། ལ་བཟླ་བའི་བསྟན་བཅོས་རྒྱལ་པོའི་བཀའ་བབས་ལྟ་བུའི་བསྟན་བཅོས་གཉིས་ལས། འདི་ལ་བཟླ་བའི་བསྟན་བཅོས་སོ། །འདི་ལའང་མང་ན་ཡང་སྣང་བ་ཡུལ་གྱི་ལ་བཟླ་བའི་མན་ངག་གི་བསྟན་བཅོས་སོ། །གསང་བ་བླ་ན་མེད་པ་ལ། གསང་ཆེན་ངེས་པའི་རྒྱུད་བཅུ་བདུན། མན་ངག་གི་ཡི་གེ་བརྒྱ་དང་བཅུ་དགུ་བཞུགས་པ་ལས། མན་ངག་གི་ཡི་གེ་ཡང་སྐོར་བདུན་དུ་བཞུགས་པ་ལས། འདི་ནི་མངོན་སུམ་སྙིང་ཐིག་སྟེ། འདི་ལ་གཉིས་ཏེ། སྒོམ་པ་མངོན་སུམ་མཐོང་བ་གནད་ཀྱི་གྲོལ་བའི་བསྟན་བཅོས་དང་། ཡལ་དུས་གནད་ཀྱིས་གྲོལ་བའི་མན་ངག་གཉིས་

ལས། འདི་ཡལ་དུས་སོ། འདི་ལ་ཡང་སེམས་ཀྱི་དམིགས་དྲུག་ལ་བརྟེན་ནས་ཆོས་ཉིད་ཀྱི་གནད་ཤེས་པས་གྲོལ་བའོ། །གསུམ་པ་དགོས་ཆེད་གང་ཟག་གི་ཆེ་བ་ནི། དེ་ཡང་གནས་ཀྱི་གྲོལ་བའི་མན་ངག་འདི་བླ་མ་མཚན་ཉིད་དང་ལྡན་པ་གཅིག་ལ། སློབ་མ་དད་པ་དང་ལྡན་པས་དུས་གཅིག་ལ་གྲོལ་བ་སྟེ། སློབ་མ་ནི་རང་བཞིན་རྫོགས་པ་ཆེན་པོའི་སྣོད་དུ་རུང་བ་དང་། སྔོན་སྦྱངས་པས་ལས་འཕྲོས་རུང་བའོ། །རང་བཞིན་ནི་རྣམ་རྟོག་བགས་ཀྱིས་ཆུང་བ་དང་། འཛིན་པ་ཆུང་བ་དང་། གཏོང་ཕོད་ཆེ་བའོ། །སྦྱངས་པའི་ཡོན་ཏན་བཅུ་གཅིག་སྟེ། དད་ལྡན་འཁོར་བའི་ཡིད་བྲལ་བ། །བརྩོན་འགྲུས་ལྡན་ཞིང་གཏང་བར་ནུས། །བླ་མར་གུས་ཤིང་དམ་ཚིག་ལྡན། ཁ་གསག་གཡོ་སྒྱུ་རྣམ་པར་སྤངས། །དྲིན་གཙོ་ང་རྒྱལ་དྲེགས་མེད་ཅིང་། །ཆོས་མིན་བྱ་བ་སྤངས་པ་ནི། །སྦྱངས་པས་སློབ་མའི་མཚན་ཉིད་དེ། །བཅུ་གཅིག་པོས་ནི་བྱང་ཆུབ་ཀྱི། །ས་བོན་ངེས་པར་འབྱིན་པའོ། །ཞེས་བཀོད་པ་ཆེན་པོ་ལས་གསུངས་སོ། །དེ་ལྟ་བུའི་སྦྱངས་པའི་མཚན་ཉིད་བཅུ་གཅིག་གམ། །རང་བཞིན་མཚན་ཉིད་དང་ལྡན་པ་ལ། གནད་ཀྱིས་གྲོལ་བའི་མན་ངག་འད ི་བསྟན་པར་བྱའོ། །ཟབ་མོ་མཚན་གྱི་ཆེ་བ་ནི་མཚན་སྐབས་སུ་བསྟན་ཏེ། སེམས་ཀྱི་ངོ་བོ་ངེས་ཚིགས་ཡལ་ས་དང་། ཡལ་དུས་ལ་སོགས་པ་བསྟན་པའོ། །བསྡུས་དོན་མན་ངག་གི་ཆེ་བས་ས་གཅོད་ཀྱི་དམིགས་བསྟན་པ་ནི། སློབ་དཔོན་ཆེན་པོ་དགའ་རབ་རྡོ་རྗེ་སངས་རྒྱས་དངོས་དང་འདྲ་བས་མཛད་པའི་སེམས་ཀྱི་དམིགས་དྲུག་ཏུ་བསྟན་པའི་མན་ངག་འདི་ལ་གཉིས་ཏེ་དབང་པོ་ཅིག་ཅར་བ་རྣམས་ཀྱིས། ཅིག་ཅར་དུ་རྟོགས་པར་བསྟན་པའི་ཕྱིར་ན། མཚན་

བསྟན་པ་དང་དབང་པོ་རིམ་གྱིས་པ་རྣམས་ཀྱིས་རིམ་གྱིས་རྟོགས་པར་སྟོན་པའི་ཕྱིར་མན་ངག་གི་གཞུང་སྟེ། གཞུང་ལ་དུམ་བུ་དྲུག་ཏུ་བསྟན་པ་སྟེ། དང་པོ་བསྡུས་པའི་ཚིག་དྲུག་གིས་བསམ་པ་ངོས་བཟུང་བར་བསྟན་པ་དང་། གཉིས་པ་རྣམ་རྟོག་གཅོད་པའི་སྤུ་གྲིས་བྱུང་ཚོར་གྱི་སྒོ་དགག་པར་བསྟན་པ་དང་། གསུམ་པ་ཤེས་པའི་གཏད་པ་བཅུ་པས་སེམས་དང་ཡེ་ཤེས་ཀྱི་དབྱེ་བ་བསྟན་པ་དང་། བཞི་པ་འགྱུར་བྱེད་རང་ལ་གནས་པའི་འཁོར་ལོས་འཁོར་བའི་བྱུང་རྩལ་བསྟན་པ་དང་། ལྔ་པ་རིམ་པ་རྣམ་པ་དྲུག་གིས་སེམས་ཀྱི་རང་སྐྱོན་དབྱེ་བར་བསྟན་པ་དང་། དྲུག་པ་རྒྱུན་དུ་འཁོར་ལུགས་དྲུག་གིས་སེམས་ཀྱི་རང་བཞིན་བསྟན་པའོ། །དེ་ལ་མཚན་བསྟན་པ་ནི། གང་ཟག་གི་བློའི་རིམ་པ་གསུམ་ལ་དགོངས་པ་གསུམ་སྟེ། སྒྲ་དོན་ཚིག་ཙམ་ལ་བརྟེན་ནས་དབང་པོ་རབ་རྣམས་ཀྱིས་རྟོགས་པར་བསྟན་པར་བྱ་བའི་ཕྱིར། མཚན་སྒྲ་འགྱུར་གནས་ལུགས་དང་བཅས་པར་བསྟན་པ་དང་། འཁོར་འདས་བརྡའ་ཙམ་ལ་བརྟེན་ནས་དབང་པོ་འབྲིང་པོས་རྟོགས་པར་བྱ་བའི་ཕྱིར། མཚན་བརྡའ་འགྱུར་དུ་བསྟན་པ་དང་། དོན་རང་ངོ་ལ་བརྟེན་ནས་དབང་པོ་ཐ་མ་རྣམས་ཀྱིས་རྟོགས་པར་བྱ་བའི་ཕྱིར། མཚན་དོན་འགྱུར་མན་ངག་དང་སྦྱང་བར་བསྟན་པའོ། །དེ་ལ་དངོས་པོ་གཤིས་ཀྱི་སེམས་ཉིད་དེ་ལ་མ་རིག་པ་མེད་པས་སྔར་སྐྱེ་མ་མྱོང་བའི་གནད་ཀྱི་འཁྲུལ་བའི་མིང་མེད་ལ། ད་ལྟ་འཁྲུལ་པ་མི་བདེན་པའི་གནད་ཀྱིས་ད་ལྟ་སྐྱེས་བ་ལ་མི་གནས་པས། རྣམ་རྟོག་ཐ་དད་པ་ཉིད་རངས་སར་ཡལ་ལ། ཕྱིས་སྐྱེ་མི་སྲིད་པའི་གནས་ཀྱིས་འཁོར་བ་ཉིད་ཡེ་ནས་གྲོལ་བའི་ཕྱིར་ནི་ཡི་གེ་སྭ་ཞེས་བྱའོ། །

དེའི་ཕྱིར་ན་འགྱུར་བ་རང་སར་ཡལ་བས། ཆོས་རྣམས་ཟད་སར་ཟད་པ་ཞེས་བྱའོ། །དེ་ལྟ་བུའི་གནས་ལུགས་དངོས་པོའི་འདུག་ཚུལ། ལྟ་བ་གཏུགས་ཐུབ་པ་ལ་རག་ལུས་པ་སྟེ། ལྟ་བ་སྟོང་པས་ཟད་པའི་ལུགས་ལ་མཁས་པ་དང་། ལྟ་བ་གྲོལ་བས་ཟད་པའི་དུས་ལ་མཁས་པ་དང་། ལྟ་བ་དང་བྲལ་བས་ཟད་པའི་ཚད་ལ་མཁས་པས་ན་རྟོག་པ་རང་ལོག་པས་དེ་དུས་གསུམ་ཡང་ཆོས་ཀྱི་དབྱིངས་སྟོང་ཉིད་གཅིག་གི་འཁོར་ལོ་ལས་མ་འདས་པའི་ཕྱིར་ན། ཚ་ཞེས་རང་ཟད་དུ་བྱུང་བའོ། །དེ་ཉིད་མ་རིག་པ་རང་གནས་རང་ཤར་རངགྲོལ་དུ་ཞེས་འདས་པའོ། །མ་རིག་པ་ལ་སོགས་པའི་ཉོན་མོངས་པ་ཐམས་ཅད་རང་གྲོལ་གཅིག་གི་འཁོར་ལོ་ལས་མ་འདས་པའི། །དེ་ཡང་གཞི་གནས་རང་ལས་བྱུང་བའི་ཤེས་རབ་ལ་བརྟེན་ནས་རྟོགས་པའི་ཕྱིར་ན་ཡི་གེ་པེ་སྟེ། ཤེས་རབ་སྟོང་པས་མཚན་པའི་རྟོག་པ་རྣམས་རང་ཟད། ཤེས་རབ་ཉིད་གསལ་བའི་ཆ་ནས་སྣང་གྲགས་ཀྱི་ཆོས་ཐམས་ཅད་རང་གྲོལ། ཤེས་རབ་གནས་པའི་ཆ་ནས་རང་བྱུང་རང་ཤར་དུ་རྟོགས་པའོ། །དེ་ཡང་སྟོང་ཉིད་ཟད་པའི་ངང་དུ་ལ་བཟླས་པས་ན་ལ་ཞེས་མི་གནས་པས་དངོས་མིན་ལ། ཐམས་ཅད་དུ་ཤར་བས་ཚད་ཡིན་པའོ། །དེ་ལྟ་བུའི་དོན་དེ་འགྲོ་བ་རྣམས་ཀྱི་ལུས་ལ་བརྟེན་ནས་རྟོགས་པའི་ཕྱིར་ན་ཡི་གེ་ན་ཞེས་བྱའོ། །དེ་ཡང་སེམས་ཉིད་གཉུག་མ་ལ་ལས་དང་བག་ཆགས་ཀྱིས་གོས་པ་མེད་པའི་གནད་ཀྱིས་རྣམ་རྟོག་བག་ཆགས་ཀྱིས་ལུས་ཀྱི་གདར་ཤ་ཆོད། སེམས་ཉིད་སྟོང་པ་ལ་མཚན་མ་རིས་ཅན་གྱི་ཁ་དོག་ཏུ་གྲུབ་པ་མེད་པས། ཡེ་ཤེས་སྒྱུ་མའི་ལུས་ཀྱི་གདར་ཤ་ཆོད། སེམས་ཉིད་ལྷུག་པ་སྐྱོན་དང་ཡོན་ཏན་ལས་འདས་པས་རིན་པོ་ཆེ།

གསང་བའི་ལུས་ཀྱི་གདར་ཤ་ཆོད་པས་ན། ཐ་མ་ལུས་ལ་མི་གནས་པའི་ཕྱིར། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །དེ་ཡང་སེམས་ཉིད་མ་བཅོས་པའི་གཞི་ཡིན་པས་བྱ་བྱེད་དང་འབད་རྩོལ་ལས་འདས་པ་མ་བསྒྱུར་བའི་ལམ་ཡིན་པས་བསྒྲོད་ཅིང་སྦྱངས་པ་ལས་འདས། མ་བསླད་པའི་འབྲས་བུ་ཡིན་པས་རེ་དོགས་དང་དགག་སྒྲུབ་ལས་འདས་པས་ན། མ་ཞེས་ཐོག་མའི་གཞི་ལ་སེམས་ཉིད་ཐིམ་པས་འཁོར་འདས་དུས་གཅིག་ལ་འགགས་པས་ཁམས་གསུམ་མིང་མེད་པའོ། །མཚན་བརྡ་འགྱུར་དུ་བསྟན་པ་ནི། སྤྱིར་ཡང་ཆོས་ཐམས་ཅད་བརྡས་བརྟགས་པ་ལས་མ་གཏོགས་པའི་ཆོས་ལ་སོགས་པ་ཡོད་མི་སྲིད་པས། རང་བཞིན་གྱི་བརྡས་འཁོར་བ་དུས་གཅིག་ལ་ཆོས་ཉིད་དུ་འཆར་བ་དང་། བརྗོད་པའི་བརྡས་ཆོས་རྣམས་ཀྱི་མིང་དོན་གཏན་ལ་ཕེབས་པའོ། །བྱས་ཤིང་བསྟན་པའི་བརྡས་རྟོགས་པ་རྒྱུད་ལ་སྐྱེད་པའོ། །དེའི་ཕྱིར་ན་སྣང་གྲགས་ཀྱི་ཆོས་ཐམས་ཅད་ཀྱང་བརྡས་བརྟགས་ལ། བོད་སྐད་དུ་ཞེས་བྱ་བ་ཡང་བརྡས་བརྟགས་པས་ན། ཐམས་ཅད་བརྡའ་དོན་གྱི་མན་ངག་ཏུ་གྲོལ་བའོ། །དོན་འགྱུར་མན་ངག་སྦྱར་བ་ནི། སེམས་ཀྱི་ཞེས་བྱ་བ་ནི། ངོ་བོ་དང་། ངེས་ཚིགས་དང་། དབྱེ་བ་དང་། ཡལ་ལུགས་དང་། ཡལ་དུས་དང་། ཡལ་ས་དང་། ཟད་པའི་མཚན་ཉིད་བདུན་དུ་ཤེས་པར་བྱའོ། །དེ་ལ་སེམས་ཀྱི་ངོ་བོ་གནས་པ་ལས་འཇུག་ལ་འཇུག་པས་ཁྱབ་ལ། ཁྱབ་པ་ཟད་པའོ། །ངེས་ཚིགས་ནི་གང་ལ་སེམས་ན་འཁོར་འདས་ལ་སེམས་པས་ན་སེམས་

ཞེས་བྱ་ལ། གང་སེམས་ན་འགྱུ་བ་ཐ་དད་པ་དང་། རྟོག་པ་སྣ་ཚོགས་ལ་སེམས་པས་སོ། །གང་གི་ཕྱིར་སེམས་ན་འཁོར་འདས་ཀྱི་འཇུག་པའི་ཕྱིར་སེམས་སོ། །དཔེ་ཇི་ལྟར་སེམས་ན་བརྒྱ་བྱིན་གྱི་བུ་ལག་བཟང་ནོར་ལ་སེམས་པ་ལྟར་སེམས་པས་ན་སེམས་སོ། །དབྱེ་བ་ནི་འོག་ཏུ་བསྟན་པར་བྱའོ། །ཡལ་ལུགས་ནི་རྟོག་པ་ཐ་དད་པ་གློ་བུར་ཡིན་པས། དེ་གློ་བུར་དུ་ཡལ་བས་ལས་དང་བག་ཆགས་ཀྱིས་མི་གོས་ཏེ། སེམས་ཉིད་སྟོང་པ་ངོ་བོ་ཉིད་ངོས་བཟུང་ལས་འདས་པའི་ཕྱིར་རོ། །དེ་ཡང་ནམ་མཁའ་ལས་སྤྲིན་ལ་སོགས་པ་གློ་བུར་བྱུང་ཞིང་གློ་བུར་དུ་ཡལ་བས། ཕྱོགས་དང་རིས་མེད་ཅིང་རྗེས་མེད་པས་གོས་པ་མེད་པ་དང་འདྲའོ། །ཡལ་དུས་ནི་བློ་སྔ་ཕྱིའི་བར་དུ་ངོ་སྤྲད་པའི་དུས་ན་ཡལ་བས། སྔར་ཞེན་པའི་བག་ཆགས་ལ་མི་གནས་པས། ལུས་སེམས་ལ་འབྲེལ་པ་མེད་པའི་གནད། ད་ལྟའི་བག་ཆགས་རང་སར་ཡལ་བས་ལས་དང་རྣམ་སྨིན་དང་བྲལ་བའི་གནད་དང་། ཕྱིས་འབྱུང་བའི་བག་ཆགས་ཟད་སར་ཟད་པས་ཁམས་གསུམ་དུ་མི་ལྡོག་པའི་གནད་དོ། །དཔེར་ན་རྒྱ་མཚོའི་རླབས་ཡལ་བའི་རྣམ་པ་དང་འདྲ་བར་ཡལ་ལོ། །ཡལ་ས་ནི་སྣང་བ་སྔ་ཕྱིའི་བར་དུ་ཡལ་བས་བེམས་རིག་གི་ཤན་ཕྱེད། ཤེས་པ་སྔ་ཕྱིའི་བར་དུ་ཡལ་བས་བློ་མ་བུའི་འབྲེལ་ཟད། བློའི་འགྱུ་བ་སྔ་ཕྱིའི་བར་དུ་ཡལ་བས་ལས་དང་རྣམ་སྨིན་གྱིས་གོས་མི་སྲིད། ཆོས་ཉིད་སྔ་ཕྱིའི་བར་དུ་ཡལ་བས། སྔ་ཕྱི་ལུས་སེམས་ཀྱི་ཉིང་མཚམས་སྦྱོར་བ་ཡང་མི་སྲིད་དོ། །སྔ་མའི་སེམས་ཀྱི་འགྱུ་བ་གཞི་ལ་ཡལ་བས་སྣང་སར་སྣང་བས་སྟོང་སར་སྟོང་པའོ། །ད་ལྟའི་དྲན་རྟོག་ནམ་མཁའ་ལ་ཡལ་བས།

ཉོན་མོངས་པ་ཆོས་ཉིད་དུ་གྲོལ་ལ། མ་འོངས་པའི་སེམས་ཀྱི་དྲན་རྟོག་ཆོས་ཀྱི་དབྱིངས་སུ་ཡལ་བས། སྐྱེ་བ་སྔ་ཕྱི་ལ་མི་གནས་པའོ། །ཆོས་ཉིད་རང་ངམ་སེམས་ཉིད་རང་གི་ཟད་པའི་མཚན་ཉིད་ནི། སྣང་རྟགས་སྔ་ཕྱིའི་འཁོར་ལོ་ལ་མི་གནས་པས་ཆོས་ཟད་པས་རང་གི་གྲུབ་མཐའ་ཞིག་བློ་སྔ་ཕྱིའི་འཁོར་ལོ་མི་གནས་པས་དྲན་རྟོག་ཟད་པས་རྒྱུ་མཚན་གོང་འོག་སྡེབ་ཞིག་གོ། སྐྱེ་བ་སྔ་ཕྱིའི་འཁོར་ལོ་ལ་མི་གནས་པ་ལུས་སེམས་ཀྱི་འབྲེལ་པ་ཞིག་པའོ། །དེ་ཡང་འཁོར་འདས་ཟད་པས་ཅིར་སྣང་ཆོས་ཉིད་དྲན་གསལ་གྱི་འཁོར་ལོ་ཟད་པས་འགྱུ་བ་རང་སར་གྲོལ། ལྟ་སྒོམ་ཟད་པས་ཡིད་ལ་བྱེད་པ་མ་འདས་པའོ། །རྒྱུ་ཟད་པས་རྟོག་པ་སྔ་ཕྱིའི་འཕེལ་བ་མེད་ལ། ཆོས་ཟད་པས་སྒོམ་སྒྲུབ་ལས་འདས་པ་དང་། ཉམས་ཟད་པས་རྟོགས་པ་སྔ་ཕྱིའི་སྡེབས་མེད་པ་དང་། སེམས་མེད་པས་འཇུག་པ་སྔ་ཕྱིའི་ཡུལ་སྟོང་པ་དང་། སེམས་ཅན་ཟད་པས་འཁོར་བ་སྤྱིར་ཕྱིན་པ་དང་། སངས་རྒྱས་ཟད་པས་རེ་དོགས་ཕྱོགས་ལྷུང་མེད་པ་དང་། འཁོར་བ་ཟད་པས་ཆོས་ཉིད་སྔ་ཕྱིའི་ལྟོས་པ་མེད་པ་དང་། དེའི་ཕྱིར་ན་ཟད་པས་སྟོངས་པ་དང་། སྟོངས་པས་ལྡོག་པ་མེད་པའོ། །དམིགས་ཞེས་པ་ནི། དེ་ཡང་སེལ་བའི་གནད་ཀྱིས་འཁོར་འདས་ཀྱི་དམིགས་གསལ་བ་ནི། མེད་པའི་དམིགས་བསལ་བས་ཟད་པའི་དུས་ཚོད་ལ་མཁས་ཏེ། བློ་ཟད་པས་ཡལ་བའི་ཚོད་ཟིན་པས་རྟོག་པ་ཐ་དད་པ་ཆོས་ཉིད་གཅིག་གི་འཁོར་ལོ་ལས་མ་འདས་པའོ། །ཡོད་པའི་དམིགས་བསལ་བས་སྣང་ཤེས་ཆོས་ཉིད་ལས་འགྲོ་ས་མེད་པའོ། །གཉིས་ཀའི་

དམིགས་བསལ་བས། སེམས་ཉིད་མཐའ་གཉིས་ལ་མི་གནས་ཏེ། སྔ་མཐའ་ལས་མི་གནས་པས་སྐྱེ་བ་རང་རྒྱུད་དུ་འཛིན་པ་ལས་འདས། ཕྱི་མཐའ་ལ་མི་གནས་པས་ལྡོག་རྒྱུ་དང་ལྡོག་རྐྱེན་གང་ལའང་མི་གནས་པའོ། །དམིགས་དེ་གནས་པའི་དབང་དུ་བྱས་ན། གཞི་ལ་གནས་པས་སེམས་ལ་བཅོས་མི་དགོས། ལམ་ལ་གནས་པས་སེམས་ལ་བསྒྱུར་མི་དགོས། འབྲས་བུ་ལ་གནས་པས་དུས་གསུམ་ཐ་དད་པ་ལས་མ་འདས་པའོ། །དམིགས་དེ་གཏད་པའི་དབང་དུ་བྱས་ན། ཕྱི་ཡུལ་ལ་དམིགས་པ་གཏད་པས་སྣང་རྐྱེན་ཆོས་ཉིད་དུ་གྲོལ་བའི་གནད་དང་། ནང་ཕུང་པོ་ལ་གཏད་པས་སྡུག་བསྔལ་ཐམས་ཅད་ཆོས་ཉིད་དུ་གྲོལ་བའི་གནད་དང་། གསང་བ་སེམས་ལ་གཏད་པས་སེམས་ཉིད་དེ་སྐྱེ་བ་མེད་པའི་གནད་དང་གསུམ་གྱིས། ཆོས་སྐུ་རང་སྟོང་པའི་ངང་དུ་གྲོལ་བས་སེམས་ལ་རྒྱུ་མེད། ལོངས་སྐུ་གསལ་བའི་ངང་དུ་གྲོལ་བས་སེམས་ལ་རྐྱེན་མེད། སྤྲུལ་སྐུ་བདག་འཛིན་མེད་པའི་ངང་དུ་གྲོལ་བས་སེམས་ལ་འབྲས་བུ་མེད་པ་སྟེ། རྒྱུ་མེད་པས་བཟློག་པའི་གཞི་སྟོང་ལ། རྐྱེན་མེད་པས་ལུས་སེམས་ལ་འབྲེལ་བ་མེད་པའི་གནད་དང་། འབྲས་བུ་མེད་པས་སེམས་རང་ཡལ་བའི་གནད་ཀྱི་གང་གིས་ཀྱང་དགོས་པ་མེད་པའོ། །དྲུག་ཅེས་པ་དུམ་བུ་ངེས་པའི་གྲངས་ཏེ། དང་པོ་བསྡུས་པའི་ཚིག་གིས་བསམ་པ་ངོས་བཟུང་བས་ཡལ་བའི་དུས་ཚོད་ངོ་ཤེས་པའི་དགོས་པ་ཡོད། གཉིས་པ་རྣམ་རྟོག་གཅོད་པའི་སྤུ་གྲིས་བྱུང་ཚོར་སྒོ་བཀག་པས་རྣམ་རྟོག་གློ་བུར་བ་རྣམས་རང་སར་གྲོལ་བའི་དགོས་པ་ཡོད།

གསུམ་པ་ཤེས་པའི་གཏད་ས་བཅུ་པས་སེམས་དང་ཡེ་ཤེས་དབྱེ་བས། རང་ངོ་ཆོས་ཉིད་དུ་གྲོལ་བའི་དགོས་པ་ཡོད། བཞི་པ་འགྱུ་བྱེད་རང་ལ་གནས་པའི་འཁོར་ལོས་འཁོར་བའི་བྱུང་ཁམས་བཙལ་བས་འཁོར་འདས་མིང་མེད་པའི་དགོས་པ་ཡོད། ལྔ་པ་རིམ་འབྱེད་དྲུག་གི་སེམས་ཀྱི་དབྱེ་བ་བསྟན་པས་རང་སེམས་ལ་བྱན་ཚུད་པའི་དགོས་པ་ཡོད། དྲུག་པ་རྒྱུན་དུ་འཁོར་ལུགས་དྲུག་གིས་སེམས་རང་སྐྱོན་བསྟན་པས། སེམས་སྟོང་པའི་མཚན་ཉིད་ཤེས་པའི་དགོས་པ་ཡོད་པས་དེ་ལྟར་དྲུག་ཏུ་ངེས་པས་འགྲོ་བ་དྲུག་རང་སར་གྲོལ་བར་བྱེད་པའི་གནད་ལ། དེ་ལས་མང་ན་དགོས་པ་མེད་ལ། ཉུང་ན་དགོས་པའི་དོན་མ་ཚང་བས་དྲུག་ཁོ་ནར་ངེས་པའོ། །དེ་ཡང་དམིགས་དང་པོས་བསྡུས་པའི་དོན་དྲུག་ཏུ་བསྟན་པ་ནི། རིགས་དྲུག་གི་རྟོག་པ་གཅོད་པ་ལ་དགོངས་ལ། གཉིས་པ་བསྡུས་པའི་དོན་ལྔས་བསྟན་པ་ནི་དུག་ལྔ་རང་གྲོལ་ལ་དགོངས་པའོ། །གསུམ་པ་ལ་གཉིས་ཀྱིས་བསྟན་པ་ནི་ཐབས་ཤེས་རབ་འདུ་འབྲལ་མེད་པ་ལ་དགོངས་པའོ། །བཞི་པ་ལ་བཞིས་བསྟན་པ་ནི། སྐྱེ་གནས་བཞི་དག་པར་བྱེད་པ་ལ་དགོངས་པའོ། །ལྔ་པ་ལ་ལྔས་བསྟན་པས་ཡེ་ཤེས་ལྔ་མངོན་དུ་གསལ་བར་བྱེད་པ་ལ་དགོངས་པའོ། །དྲུག་པ་ལ་གསུམ་གྱིས་བསྟན་པ་ནི། ལུས་ངག་ཡིད་གསུམ་ཁམས་གསུམ་དུ་མི་ལྡོག་པ་ལ་དགོངས་པའོ། །ཞེས་པ་ནི་གཞུང་དུམ་བུ་དྲུག་ལ་བསྡུས་པའི་དོན་ཉེར་ལྔར་བསྟན་པར་བྱ་བཤད་པར་བྱ་ཞེས་པའོ། །ད་ནི་

གཞུང་གི་དོན་བསྟན་པ་ལ་གཉིས་ཏེ། ཕྱག་བཙལ་བས་མདོར་བསྟན་པ་དང་། དུམ་བུ་ངེས་པས་རྒྱས་པར་བཤད་པའོ། །དེ་ལ་ཕྱག་འཚལ་བ་བསྟན་པ་ནི། བཅོམ་ཞེས་པ་རྟོག་པ་ཡལ་བའི་རྒྱུ་ངོ་ཤེས་པས་ཆོས་ཉིད་སྤང་བླང་དང་བྲལ་བར་ངོ་སྤྲད་པས། འགྱུ་བ་ཐ་དད་པས་བཅོམ་ལ། ཡུལ་དུས་ངོ་ཤེས་པས་ཆོས་ཉིད་ལ་འཕོ་འགྱུར་མེད་པར་ངོ་སྤྲད་པས་རྟོག་པ་བདག་ཏུ་བཅིངས་པ་བཅོམ་ལ། ཡལ་ས་ངོ་ཤེས་པས་ཆོས་ཉིད་རྒྱུ་རྐྱེན་ལས་འདས་པར་ངོ་སྤྲད་པས། དྲན་བསམ་གྱི་འཁོར་ལོ་ཐམས་ཅད་ཆོས་ཉིད་ཀྱི་ངང་དུ་ནུབ་པས་ན་བཅོམ་ཞེས་བྱའོ། །དེ་ལྟར་བཅོམ་པས་གནད་ཤེས་པ་ཙམ་གྱིས་ཆོས་ཉིད་མ་ཐོག་ཏུ་གྲོལ་བས། ལུས་ངག་ཡིད་གསུམ་དང་གདངས་རང་བཞིན་བདག་ཉིད་ཆེན་པོ་གསུམ་དང་ལྡན་པས་ན་ལྡན་ཞེས་བྱའོ། །དེ་ལྟར་ལྡན་པའི་འགྲོ་བའི་ལུས་ངག་ཡིད་གསུམ་ལས་འདས་པས་ན་འདས་ཞེས་བྱའོ། །རང་ནི་གཞན་གྱི་སྤྲོས་པ་བཅད་པས་ཆོས་ཉིད་རང་ཐོག་ནས་གྲོལ་བས་ཡིད་ཆེས་པའོ། །གྲོལ་ཞེས་པ་གནད་ཤེས་པས་གྲོལ་བ་ནི། ཏི་པ་རའི་བུ་ལག་བཟང་གི་ལས་ཀྱི་མཐའ་ལས་གྲོལ་བ་ལྟར་གྲོལ་བ་དང་། གནད་དེ་མཐོང་བ་ཙམ་གྱིས་གྲོལ་བ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ངོ་ཤེས་པས་ཐག་ཆོད་པ་ལྟ་བུའོ། །གནད་དེ་རང་ཐོག་ཏུ་གྲོལ་བ་ནི་སྦྲུལ་གྱི་མདུད་པ་མ་བཤིགས་པར་རང་གྲོལ་བ་ལྟ་བུའོ། །དེ་ལྟ་བུའི་དོན་དེའི་གོང་ན་གཞན་གང་གིས་ཐབས་གདའ་བ་མེད་པས་ཆེན་པོ་ཞེས་བྱའོ། །བདེ་བ་ནི་ཕྱི་སྣང་བའི་བདེ་བས་རྐྱེན་ངན་ཐམས་ཅད་གྲོགས་སུ་ཤར་ལ། ནང་ལུས་ཀྱི་བདེ་བས་སྡུག་བསྔལ་ཐམས་ཅད་ཆོས་ཉིད་དུ་ཤེས་པའོ། །གསང་བ་སེམས་

ཀྱི་བདེ་བས་སེམས་རང་དག་རང་གྲོལ་བས་འགྱུ་བ་རང་སར་གྲོལ་བས་རྣམ་རྟོག་ཡེ་ཤེས་སུ་ལྡང་བའོ། །དཔལ་ནི་སྟོང་པ་ཆོས་དབྱིངས་སུ་ཤར་བས་དྲན་བསམ་སེམས་ཀྱི་དཔལ་དུ་བྱུང་བ་དང་། སྣང་ཤེས་རྒྱན་དང་ཁ་དོག་ཏུ་ཤར་བས་སྣང་རྟགས་སེམས་ཀྱི་དཔལ་དུ་བྱུང་བའོ། །དེ་ལྟ་བུའི་ངང་ལས་མ་གཡོས་པས། ཕྱག་སྐྱེ་མེད་རབ་གྲོལ་བ་ཉིད་ལ་ཉིད་བཙལ་བས། སྣང་ཤེས་ཀྱི་བདག་ཏུ་འཛིན་པ་ལས་གྲོལ་བ་དེའི་ཕྱིར་ན་ཕྱག་འཚལ་ལོ་ཞེས་ཆོས་ཉིད་དོན་ལ་བྱས་པའོ། །ད་ནི་གཞུང་དངོས་ལ་དུམ་བུ་དྲུག་ལས། དུམ་བུ་དང་པོ་བསྡུས་པའི་ཚིག་དྲུག་ལ་བརྟེན་ནས་བསམ་པ་ངོས་བཟུང་བར་བསྟན་པ་ལ་བསྡུས་པའི་དོན་དྲུག་སྟེ། ཀླད་དུ་མཆོད་པར་བརྗོད་ཅིང་བཤད་པར་དམ་བཅའ་བ་བསྟན་པ་དང་། གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་དང་། གསུམ་པ་ལུས་སེམས་ཀྱི་འབྲེལ་པ་བརྟགས་པས་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་དང་། བཞི་པ་ཡེ་ཤེས་ལ་སོགས་པ་གཏད་པའི་མཚན་ཉིད་ལ་བརྟེན་ནས་འཁོར་འདས་འགོག་པའི་ལུགས་བསྟན་པ་དང་། ལྔ་པ་ཐབས་ཀྱི་འཇུག་པ་ཁྱད་པར་ཅན་བླ་མ་དྲིན་ལྡན་ལ་བརྟེན་ནས་བསྡུ་བར་བསྟན་པ་དང་། དྲུག་པ་ཡལ་ས་དུས་ཀྱི་གནད་ལ་བརྟེན་ནས་ཆོས་ཉིད་ལྟ་སྒོམ་ཡིད་ལ་བྱེད་པ་ལས་སྟོན་པར་འདས་པར་བསྟན་པའོ། །དེ་ཡང་ཀླད་དོན་མཆོད་པར་བརྗོད་ཅིང་བཤད་པར་དམ་བཅའ་བར་བསྟན་པ་ལ་ནང་དོན་གཉིས་ཏེ། མི་འགལ་བའི་ཁུངས་གསལ་བར་བསྟན་པས་སྟོན་པ་ལ་ཁྱད་པར་གྱིས་མཆོད་པར་བརྗོད་པ་བསྟན་པ་ནི། འགྲོ་རྣམས་མ་རིག་ཚོགས་བཅོམ་རང་བྱུང་དཔལ། །ཅེས་པ་ལ་

སོགས་པས་བསྟན་ཏེ། དེ་ཡང་འགྲོ་བ་ནི། དང་པོ་ཁམས་གསུམ་དུ་འཇུག་པ་འཕེན་པ་ལས་ཀྱི་རླུང་མ་དག་པ་ལས་བྱུང་བས་ན། ད་ལྟ་ལུས་ཇི་སྲིད་གནས་ཀྱི་བར་ལ་རླུང་གིས་བཏེག་ནས་འགྲོ་ལ། ཕྱིས་ཀྱང་རླུང་སེམས་ལས་ཀྱི་འབྲེལ་གྱི་འགྲོ་བས་ན། འགྲོ་ཞེས་བྱ་ལ། རྣམས་ནི་ལྷ་ལ་སོགས་པའོ། །དེ་ཡང་ལྷ་རྣམས་མ་རིག་པ་ང་རྒྱལ་དང་བཅས་པས་འཁྲུལ་ལ། ལྷ་མིན་མ་རིག་པའི་ཕྲག་དོག་དང་བཅས་པས་འཁྲུལ་ལ། མི་རྣམས་ཁོང་ཁྲོ་རྒྱུ་རྐྱེན་དང་བཅས་པས་འཁྲུལ་ལ། བྱོལ་སོང་རྣམས་གཏི་མུག་གིས་མ་རིག་པའི་རྐྱེན་བྱས་ནས་འཁྲུལ། ཡི་དྭགས་རྣམས་འདོད་ཆགས་ཀྱིས་མ་རིག་པའི་རྐྱེན་བྱས་ནས་འཁྲུལ་ལ། དམྱལ་བ་ཞེ་སྡང་གིས་རྐྱེན་བྱས་ནས་འཁྲུལ་ལོ། །དེ་ལྟར་ན་འགྲོ་བ་དྲུག་གི་མ་རིག་པ་རྐྱེན་དང་བཅས་པའི་ཚོགས། ཕྱི་གདུལ་བྱ་ལ་དགོངས་ནས་བཅོམ་པས་རང་བྱུང་གི་ཡེ་ཤེས་རང་ཤར་དུ་ཤར་བས། ཕྱི་ནང་འཁོར་འདས་ཡོངས་ལ་མི་གནས་པས་དཔལ་ལོ། རྒྱུད་ནི་གསང་བ་ཆེན་པོའི་རྒྱུད་བཅུ་བདུན་གྱི་སྟོང་པ་དྲུག་པ་རྡོ་རྗེ་འཆང་ཆེན་པོ་དེས། འགྲོ་བ་གོང་མ་རྣམས་ཀྱི་བླ་མ་ཡིན་ལ། ཁྱད་པར་དུ་སློབ་དཔོན་དགའ་རབ་རྡོ་རྗེ་ཉིད་ཀྱི་བླ་མ་ཡིན་པས་ན། སྐྱེ་བ་བཞིའི་ལུས་སུ་བླངས་ཏེ། རྗེས་སུ་འབྲངས་པའི་དགོངས་པའི་དོན་བསྡུས་པ་དང་། དུས་གསུམ་གྱི་སངས་རྒྱས་རྣམས་ཀྱི་བཀའ་སྡེ་སྣོད་རིན་པོ་ཆེ་གསུམ་དང་ཡང་མི་འགལ་བར་དོན་གནད་ཤེས་པའམ་མཐོང་བ་ཙམ་གྱིས་གྲོལ་བ་ཉིད་ཀྱི་དེབས། རྟོག་པ་རང་གྲོལ་བའི་ཆོས་ཉིད་ཀྱི་གཞི། སེམས་ནི་ཡོད་པ་དང་། མེད་པ་དང་། སྣང་བ་དང་། མི་སྣང་

བ་དང་། སྟོང་པ་དང་། ཟད་པ་དང་། ཡལ་བའི་གནད་ཤེས་པས་གྲོལ་བ་ནི། གོམས་མི་དགོས་པར་རང་ཐོག་ཏུ་གྲོལ་བ་དང་། བསླབ་མི་དགོས་པས་བསྟན་པ་ཙམ་གྱིས་གྲོལ། རང་གི་གནད་ནི། ཆོས་ཉིད་སྔ་མ་ལ་གཞི་བཅས་པ་དང་། ཕྱི་མ་ལ་འབེམ་བྱས་པ་དང་། ད་ལྟ་ཡུལ་བཙལ་བས་ཤེས་པའོ། །ཞེས་དང་པོ་མི་འགལ་བའི་ཁུངས་གསལ་བར་བྱས་ནས་སྟོན་པ་ལ་ཁྱད་པར་གྱིས་མཆོད་པར་བརྗོད་པ་བསྟན་ནས། ད་ནི་གཉིས་པར་བཤད་པར་དམ་བཅའ་བ་དངོས་མན་ངག་དང་བཅས་པར་བསྟན་པ་ནི། ཁམས་གསུམ་དོང་ནས་སྤྲུག་སྟེ་ལ་སོགས་པས་བསྟན་ཏེ། དེ་ཡང་མན་ངག་གི་སྐབས་སུ་དང་པོ་ལུས་ངག་ཡིད་ཀྱི་རྒྱུ་རྐྱེན་བརྟགས་པས། ཁམས་གསུམ་གྱི་རྩ་བ་སྟོངས་པར་བྱེད་པ་སྟེ། དེ་ཡང་ལུས་ཀྱི་འཕེན་པ་མ་དག་པ་ལས་གཟུགས་ཁམས་སུ་འཁྲིད་པ་དང་། ངག་གིས་འདོད་ཁམས་དང་། སེམས་ཀྱིས་གཟུགས་མེད་ཁམས་སུ་འཁྲིད་པར་བྱེད་པ་ནི། ཐོག་མར་ལུས་སེམས་ཀྱི་རྒྱུ་རྐྱེན་ལ་བརྟགས་པས་མེད་པར་ཤེས་པས་དོང་སྤྲུག་སྟེ་མི་ལྡོག་པའི་གནད་དོ། །དེ་ལྟར་ལུས་སེམས་ཀྱི་འབྲེལ་བ་མེད་པར་ཤེས་པས། ད་འགྱུ་བ་རྟོག་པ་དང་ཐ་དད་པ་རྣམས་གློ་བུར་གྱི་རྟོག་པ་ཡིན་པས། དེ་ཉིད་ཡལ་བའི་གནད། རྒྱུད་ཀྱི་སྟོན་པའི་གསུང་ཚིག་དང་ཡི་གེར་བཀོད་པ་ལ་བརྟེན་ནས་འཁོར་བའི་ཆོས་ལ་མི་གནས་པའི་སྐྱེས་བུ་ལ་བཤད་པར་བྱའོ། །ཞེས་ཞལ་གྱིས་བཞེས་པའོ། །དེ་ཡང་མཚོན་པ་ཙམ་ལས་ཡང་དག་པའི་ཚིག་གི་སྤྲོས་པ་ལ་མ་བརྟེན་པར་ཁམས་གསུམ་དུ་ཕྱིས་ལོག་པ་མེད་པའི་རང་སྟོབས་ཀྱིས་སངས་རྒྱ་བར་བྱེད་པའོ། །ཐེག་པ་ཐུན་མོང་

བ་ཀུན་གྱིས་གནད་དེ་མ་རྟོགས་པས་ཡིད་དཔྱོད་ཀྱི་ལྟ་བ་ནི། གནད་དེ་མཐོང་བ་ཉིད་ཀྱི་དོན་འདིར། དཔེར་ན་མུན་པའི་ནང་དུ་སྒྲོན་མེ་བཏེག་པས་དངོས་པོ་ཇི་ལྟར་ཡོད་པ་མཐོང་བ་བཞིན་དུ། གནད་དེ་ཤེས་པའམ། མཐོང་བ་ཙམ་གྱིས་གྲོལ་བའི་གནད་འདི་ནི། སེམས་ཀྱི་དམིགས་དྲུག་ལ་བརྟེན་ནས་བདག་གིས་བཤད་པར་བྱའོ། །ཞེས་དམ་བཅས་པའོ། །ཞེས་དེ་དག་གི་སྤྱི་དོན་དང་པོ་ཀླད་དོན་མཆོད་པར་བརྗོད་ཅིང་བཤད་པར་དམ་བཅའ་ལ་གཉིས་སུ་བྱས་ནས་བསྟན་ཏོ།། །།ད་ནི་བསྡུས་པའི་དོན་གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ་དངོས་པོ་ལུས་ཀྱི་འབྲེལ་བ་བཅད་པས་གཟུགས་ཀྱི་ཁམས་ལས་གྲོལ་བར་བསྟན་པ་ནི། །ལུས་ངག་ཡིད་ཀྱི་གཞི་བཅས་པས། ཞེས་པ་ལ་སོགས་པས་བསྟན་ཏེ། ལུས་ཞེས་པ་འབྱུང་བ་ཕྲ་བ། རྡུལ་ཕྲ་རབ་ལས་གྲུབ་པས་རགས་པ་གཟུགས་ཀྱི་ཕུང་པོ། འབྲུའི་ཕུང་པོ་སྤུངས་པ་ལྟ་བུ་སྣ་ཚོགས་པར་གྲུབ་པས། དེའི་མཚན་ཉིད་སྟོངས་པར་བྱེད་པ་ལ་ལུས་དང་སེམས་ཀྱི་འབྲེལ་ཤིག་པའི་ཆོ་ག་ལ་བརྟེན་ནས་ཆོས་ཉིད་ཀྱི་བྱུང་ས་བཙལ་ལོ། །ངག་ནི་སྒྲའི་འཇུག་པ་ལ་བརྟེན་ནས་ཨཱ་ལི་ཀཱ་ལིའི་འགྲེལ་སྣ་ཚོགས་པར་བསྒྱུར་བས། ཚིག་གི་སྤྲོས་པ་ཐ་དད་པ་ལ་འཇུག་ཅིང་། དེ་ཉིད་རྟོགས་པས་འགྲེལ་པར་སྦྱོར་བ་སྟེ། དེ་ཉིད་སྟོང་པར་བྱེད་པ་ལ་སྨྲ་བ་བཅད་པས་བརྗོད་པའི་འཁྲུལ་འཁོར་གྱི་ཁང་བུ་གཞིག་པའི་ཆོ་ག་ལ་བརྟེན་ནས། བརྗོད་མེད་ཀྱི་དོན་རྒྱུད་ལ་སྐྱེ་བའི་ཐབས་དང་། ཡིད་ཀྱིས་ནི་རྣམ་པ་མེད་པ་ལ་འཇུག་པ་ཀུན་ལ་འཇུག་པ་ལ། རྒྱུ་མཚན་བརྟགས་ན་མ་རྙེད་པ།

འགྱུ་བ་དྲན་བསམ་གྱི་འཁོར་ལོ་གློ་བུར་གྱི་རྟོག་པ་བྱེ་བྲག་པ་རྣམས་སུ་བྱུང་བ་སྟེ། དེའི་མཚན་ཉིད་སྟོངས་པར་བྱེད་པ་ལ། ཡལ་ས་ཆོས་ཉིད་ཀྱི་གནས་ས་འགྱུས་ས་ཐ་དད་པ་གློ་བུར་གྱི་ཁང་བུ་གཞིག་པའི་ཆོ་ག་ལ་བརྟེན་ནས་རྣམ་རྟོག་གི་གཞི་སྟོངས་པར་བྱེད་པའོ། །གཞི་བཅས་པས་ཞེས་པ་ནི། དེ་དག་གི་ཁང་བུ་གཞིག་པའི་ཆོ་ག་ལ་བརྟེན་པས་ཁམས་གསུམ་གྱི་ཁུངས་སྟོར་བར་བྱེད་པའོ། །ཁམས་ནི་འདུས་ཤིང་ཚོགས་པ་དད་པ་ལ། གསུམ་ནི་གྲངས་ཏེ། འདོད་པ་འདོད་ཆགས་རང་རྒྱུད་པ་ལས་བྱུང་བ་དང་། གཟུགས་ནི་ཞེ་སྡང་རང་རྒྱུད་དུ་འཛིན་པ་ལས་བྱུང་པ་དང་། གཟུགས་མེད་ནི་གཏི་མུག་རང་རྒྱུད་དུ་འཛིན་པ་གསུམ་ནི། ལུས་ངག་ཡིད་ཀྱིས་ཁྲིས་པས་སོ། །གཏིང་ནི་ལས་དང་བག་ཆགས་ལས་གྲུབ་པ། ཟློག་པར་འདོད་པའི་གང་ཟག་དད་པ་ཅན། རང་བཞིན་རྫོགས་པ་ཆེན་པོའི་སྐལ་བ་ཡོད་པ། བརྩོན་འགྲུས་དང་ལྡན་པ་ཞིག་གིས། ལུས་འབྱུང་བའི་ཟག་པ་སྟོངས་པར་འདོད་པ་ཡིས། རང་བཞིན་དུ་གནས་པའི་སེམས་མ་བཅོས་པ་ལས་འབྱུང་བ་ལུས་ཀྱི་ལྟོས་གཞི་རྡུལ་ཕྲ་རབ་ལ་རང་རྒྱུད་དུ་འཛིན་པ་དང་བྲལ་བས། འབྲེལ་བ་རྐྱེན་གྱི་དངོས་པོ་སྟོངས་པས། དེ་ཡང་དང་པོ་རྒྱུ་ཡིས་བསྐྱེད་པའི་གནད་རིག་པས་ཐ་མལ་རྐྱེན་གྱིས་མི་ཤིགས་ཏེ། དེ་ཉིད་སྟོང་པའི་རང་བཞིན་དུ་གོ་བས། དང་པོ་རྒྱུ་ལས་མ་བྱུང་བས་འབྲས་བུ་ལ་ལྡོག་པ་མེད། ཐ་མལ་རྐྱེན་གྱིས་མི་ཤིགས་པས་ཆོས་ཉིད་ལ་སྐྱེ་བ་མེད་པའི་གནད། དེ་ལྟར་རྒྱུ་རྐྱེན་མེད་པའི་ལུས་སུ་བརྟག་པས་དེ་ཉིད་དུ་ཤེས་པའི། དེའི་འདུ་བ་རྟོག་པ་

ནི་ཁང་བུ་བཤིག་པས། གཟུགས་ཁ་དོག་གི་བྱེ་བྲག་དང་། དབྱིབས་སྣ་ཚོགས་པ་དང་། ལུས་ཀྱི་བྱེ་བྲག་གི་རྣམ་པ་མང་པོ་འདུས་པ་ལས་ཁམས་ཏེ། དེ་ཉིད་དུ་སུ་ཞིག་འགྲོ་བར་མི་འདོད་པས། ལུས་ཀྱི་རྒྱུ་རྐྱེན་ལ་བརྟགས་པས་འཇུག་པ་ཡིན་ནོ། །དེ་ཅིའི་ཕྱིར་ན། གཞི་མེད་པས་ལྡོག་པ་མེད་ལ། རྩ་བ་མེད་པའི་གནད་ཀྱིས་འཁོར་མི་སྲིད་པས་ན། མ་སྤངས་རང་བྱུང་གི་ཡེ་ཤེས་ཀྱི་རོལ་པ་ཕྱོགས་མེད་དུ་ཤར་བ་ཞེས་བྱའོ། །ཞེས་ཡན་ལག་གི་དོན་དང་པོ་དངོས་པོ་ལུས་ཀྱི་འབྲེལ་བ་བཅད་པས་གཟུགས་ཀྱི་ཁམས་ལས་གྲོལ་བར་བསྟན་ནས། ད་ནི་གཉིས་པ་གྲགས་པ་ངག་གི་འབྲེལ་བ་བཅད་པའི་གནད་ལ་བརྟེན་ནས་འདོད་པའི་ཁམས་ལས་གྲོལ་བར་བསྟན་པ་ནི། ངག་ནི་དང་པོ་བརྗོད་པའི་རྒྱུ། །ཡིད་ལས་ཚིག་གི་གཞི་སྟོངས་པས། །བརྗོད་པ་སྒོས་འབྲེལ་གྱི་བརྟེན་པ་རང་འགགས། ཞེ་འདོད་ཚིག་གི་ཞེན་པ་ལས་གྲོལ་བར་འདོད་པས། རང་རྒྱུད་ལ་མི་གནས་པའི་ཆོས་ཉིད་ཀྱི་བཞིན་སྣང་རྐྱེན་སྣ་ཚོགས་ལ་ཤར་བས། བརྗོད་བྱ་སེམས་ཀྱི་གཞི་ལ་ཐིམ་པས། ལས་དང་བག་ཆགས་ཀྱི་སྡེབས་ཟད་པས་སོ། །ད་ལྟར་ན་ངག་མེད་པའི་མཚན་རྟོགས་པས་བརྗོད་པ་ཚིག་ཙམ་དུ་མི་རྟོགས་ལ། དེའི་རང་བཞིན་ལ་རྒྱུ་མེད་པས་ལྡོག་པའི་རྟེན་ཉམས། རྐྱེན་ཟློག་བྱེད་བློའི་འགྱུ་བ་ཡལ་བའོ། །དེའི་ཕྱིར་ན་ངག་བརྗོད་པའི་འབྲས་བུ་ཚིག་གི་མཚན་ཉིད་བརྗོད་བྱ་དང་རྗོད་བྱེད་གང་གིས་ཀྱང་མི་ཤེས་པས་ན་སྐྱེས་བུ་འདིས་ནི་འདོད་པའི་ཚིག་གི་སྒྲོ་འདོགས་རྟོག་དཔྱོད་བློ་དང་བཅས་པ། ཁམས་ཚོགས་པ་རྣམས་ཡེ་ནས་སྟོངས་པས། ལྡོག་

པ་མེད་པ་ནམ་མཁའ་ལ་རྫས་དོར་བ་ལྟ་བུ་དང་། དེ་ལྟ་བུའི་ཡེ་ཤེས་ཀྱི་ངང་མ་བཅོས་པ་ལས་གནས་པ་ནི། དཔེར་ན་ཆུ་བོའི་རྒྱུན་སྔ་མའི་སར་ཕྱི་མ་མི་ལྡོག་པ་དང་འདྲའོ། །དེ་གང་ལས་བྱུང་ན་ངག་གི་རྒྱུ་རྐྱེན་ཡེ་ནས་མེད་པའི་མཚན་ཉིད་ཤེས་པ་ལས་བྱུང་བའོ། །ཞེས་གཉིས་པ་གྲགས་པ་ངག་གི་འབྲེལ་བ་བཅད་པའི་གནད་ལ་བརྟེན་ནས་འདོད་པའི་ཁམས་ལས་གྲོལ་བར་བསྟན་ནས། ད་ནི་གསུམ་པ་ཡིད་ཀྱི་འགྱུ་བ་དྲན་བསམ་གྱི་འཁོར་ལོ་སྣ་ཚོགས་པའི་འབྲེལ་བ་བཅད་པའི་གནད་ལ་བརྟེན་ནས་གཟུགས་མེད་པའི་ཁམས་ལས་གྲོལ་བར་བསྟན་པ་ནི། ཡིད་སྟོངས་པར་བྱེད་པའི་གནས་སྐབས་ཞེས་པ་ལ་སོགས་པས་བསྟན་ཏེ། ཡིད་ནི་འཇུག་པ་ཡན་ལག་དང་བཅས་པས། མེད་པ་ལ་འཇུག་ཅིང་ཡོད་པའི་མཚན་ཉིད་གཏན་ལ་མི་ཕེབས་པས་ཏེ། དེ་སྟོངས་པར་འདོད་པའི་དད་པ་ཅན་གྱིས་ནི། རབ་ཏུ་དབེན་པའི་ས་ཕྱོགས་སུ་ཕྱིན་ལ། གནས་སྐབས་ཀྱི་སེམས་ལས་མ་གཏོགས་པའི་དྲན་རིག་ཡོད་མི་སྲིད་པས། དེ་ཡང་འགྱུ་བ་སྔ་མ་ཕྱི་མ་ལྡོག་པ་དང་། ཕྱི་མ་སྔ་མ་ལ་ལྡོག་པའི་དུས་སུ་རྒྱུ་འགག་རྐྱེན་རང་ཡལ་བའི་མཚམས་སུ་ཤེས་པར་བྱའོ། །དེ་ལ་འབྲས་བུ་རྟོག་པ་གློ་བུར་བ་བྱུང་བའི་ས་མ་རྙེད་པས། དེ་ལ་བརྟགས་པས་གནས་པའི་ས་སྟོང་པ་ནི་ཆོས་ཉིད་རྙེད་པའོ། །དེ་ལས་རླུང་ཕྱི་ནང་དུ་འགྲོ་བའི་རང་བཞིན་མེད་པར་ཤེས་པས། གཟུགས་མེད་པའི་ཁམས་ཀྱི་གཞི་རྣམ་པར་ཤེས་ཙམ་ལ་ཡང་བདག་ཏུ་འཛིན་པ་སྟོངས་པས་རྒྱུ་རྐྱེན་གང་ལ་ཡང་ལྡོག་པ་མེད་པའི་ཡེ་ཤེས་ནི། རྒྱུ་དང་མཚན་ཉིད་འདི་འདྲ་ཞེས་བྲལ་བ་མེད་པའི་སྣང་བ་ཉིད་ལ་གཞན་མེད་དོ། །

དེ་ཡང་གནད་ཤེས་པ་ཙམ་ལས་བྱུང་བའོ། །དེ་ལྟར་ལུས་ངག་ཡིད་ཀྱི་གཞི་མ་རྙེད་པས། ཁམས་གསུམ་ལ་རྒྱུན་དུ་གཞི་འཛིན་པ་ལ་རྩལ་མེད་པའི་ཕྱིར་གནད་ཁྱད་པར་དང་ལྡན་པའི་འགྲོ་བ་དེ་ཉིད། །རྟོགས་པ་ཡིན་པས་ན་ཁམས་གསུམ་དུ་སྣང་བའི་གཞི་སྟོངས་པས་འགྲོ་བ་དྲུག་གི་གཟུགས་བརྙན་རྒྱུན་ཆད་པའོ། །དེ་ཡང་གང་ལས་བྱུང་ཞེ་ན། དེ་ཡང་དང་པོ་ལུས་ངག་བཅོས་པའི་བསླབ་བྱ་ལ་བརྟེན་ནས་སེམས་ཉིད་དུ་གཞུག་པའི་དཔེ་སྲིན་མོ་བུ་སྟོར་བ་ལྟ་བུའི་བསླབ་བྱ་སྟེ། དེ་ལ་སྲིན་མོ་གཡོ་བར་བྱེད་པ་ཞེས་བྱ་བའི་བུ་ཕས་བསད་པས། ཕ་སྲིན་པོ་ལངྐ་ཁ་དགུ་ཞེས་བྱ་བས། བུ་སྟོར་བ་ཡིན་བྱས་པས། མས་སྟོར་བ་ཚོར་ནས། གླིང་བཞིའི་རི་རབ་དང་བཅས་པ་ལན་གསུམ་དུ་བསྐོར་ཞིང་བཙལ་བས་མ་རྙེད་པས་ཁོ་ཐག་ཆོད་ཅིང་བློ་བདེ་བ་དང་འདྲ་བར། ལུས་ངག་ཡིད་རྒྱུ་རྐྱེན་ནས་འདས་པར་ངོ་ཤེས་པས། ཁམས་གསུམ་དུ་མི་ལྡོག་པར་ཁོ་ཐག་ཆོད་པས་བློ་བདེ་བའོ། །དཔེ་དང་བཅས་པས་ལུས་ངག་ཡིད་ཀྱི་རྒྱུ་རང་འགགས་པས་རྐྱེན་རང་ཡལ་བས་ཁམས་གསུམ་འགག་པར་ཤེས་པ་ནི། སེམས་ཉིད་མེད་པའི་དོན་རང་ལ་སྣང་བ་ཟད་པས་རྟོག་པ་ལས་འདས་པ་གོ་བ་ལས་བྱུང་བའོ། །ཞེས་བསྡུས་པའི་དོན་གཉིས་པ་ལུས་ངག་ཡིད་ཀྱི་རྒྱུ་རྐྱེན་བརྟགས་པས་ཁམས་གསུམ་གྱི་གཞི་སྟོངས་པར་བསྟན་པ་ལ་ནང་དོན་གསུམ་དུ་བཅས་ནས་བསྟན་ནོ། །ད་ནི་བསྡུས་པའི་དོན་གསུམ་པ་ལུས་སེམས་གྱི་འབྲེལ་པ་བརྟགས་པས་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ་ལུས་ངག་ཡིད་རང་གྲོལ་དུ་འགྲོ་བའི་གནད་ཆོས་ཉིད་ལ་

འཕྱུགས་པ་མེད་པས་བསྟན་པ་ནི། གཉིད་ལས་འགག་པ་དང་ཞེས་པ་ལ་སོགས་པས་བསྟན་ཏོ། །དེ་ཉིད་ནི་ལུས་ངག་ཡིད་ཀྱི་གཞི་མ་རྙེད་པ་ལ། འགག་པ་དང་ཞེས་དབུགས་ཕྱི་ནང་དུ་འགྱུ་བའི་ལམ་ཟད་པའོ། །གནས་པ་དང་ཞེས་པ་དེ་ཟད་པས་སེམས་རང་བཞིན་གྱིས་གནས་པའོ། །དེ་གནས་པས་འགྱུ་བ་རྣམས་རང་སར་ཡལ་བ་དང་། དེ་ཡལ་བས་དྲན་པའི་ཁུངས་འགགས་པ་དང་། དེ་འགགས་པར་བྱུང་ཚོར་གྱི་རྟོག་པ་བསད་པ་དང་། དེ་བསད་པས་དྲན་བསམ་གྱི་འཁོར་ལོ་དུས་གཅིག་ལ་སོད་པའོ། །དེ་སོད་པས་ཆོས་ཉིད་རང་ལ་སྐྱེ་བ་དང་། དེ་སྐྱེས་པས་འཁོར་འདས་དུས་གཅིག་ལ་སྟོངས་པ་དང་། དེ་གཉིས་སྟོངས་པས་སྣང་བ་འཆར་བའི་དུས་ངོ་ཤེས་པ་དང་། དེ་ཤེས་པ་དང་འཁྲུལ་པ་འགག་པ་དུས་མཉམ་མོ། །དེ་ཡང་རྒྱུ་འགགས་པ་དང་རྐྱེན་ཡལ་བ་ལ་མཁས་པ་ནི། དྲན་བསམ་གྱི་འགྱུ་བ་གློ་བུར་བར་ཤེས་པ་ལས། ནང་བདེ་བའི་བདག་ཏུ་མ་བཅིངས། ཕྱི་སྡུག་པས་ཉམས་སུ་མ་མྱངས་བར་ཆ་རང་ངོ་སྟོང་པར་སྙོམས་པས། ལུས་ཀྱི་རྩ་བ་རྡུལ་ཕྲ་རབ་ཀྱི་རྩ་བ་ཆད། ངག་གི་རྩ་བ་གྲགས་པ་སྒྲ་ཙམ་དུ་འཛིན་པར་རང་ཟད། ཡིད་ཀྱི་རྩ་བ་འགྱུ་བ་ཐོད་རྒལ་བ་རྣམས་རང་ཡལ་བས་ན། ཕྲ་སར་ཕྲ་ལ། ཟད་སར་ཟད་ལ། ཡལ་སར་ཡལ་བས། དེ་ལས་གྲོལ་བའི་རྣལ་འབྱོར་པ་ཞེས་བྱའོ། །ཞེས་ནང་དོན་དང་པོ་ལུས་ངག་ཡིད་རང་གྲོལ་ལ་འགྲོ་བའི་གནད་ཆོས་ཉིད་ལ་འཕྱུགས་པ་མེད་པར་བསྟན་ནས། ད་ནི་ནང་དོན་གཉིས་པ་རླུང་གི་འཕེན་པ་ལ་བརྟེན་ནས་དྲན་རིག་གི་ཡལ་ས་ངོས་བཟུང་

བར་བསྟན་པ་ནི། དེ་ཡང་ལུས་སེམས་ལ་བརྟགས་པས་དེ་ལ་དཔྱད་པར་བྱ་བའི་གཞི་མ་རྙེད་པའི་རྒྱུ་སྟོང་པ། རྐྱེན་ཡལ་བ། བརྗོད་པར་མིང་གི་རྣམ་གྲངས་ལས་མ་རྟོགས་པའི་རྣམ་པ་མི་རྙེད་པ་ན། བཏགས་པ་ནི་ང་ཡིན་གྱི་གཏན་ཚིག་ཀྱིས་གཞིག་པས། གང་དུ་ཡང་མ་གྲུབ་པས་སོ། དེ་ཡང་ལུས་བདེ་ལུགས་སུ་བཞག་ནས། རླུང་དལ་བའི་འཕེན་པ་ཕྱིར་ལ་དལ་གྱིས་ཕུལ་བ་ལས་ཤེས་པ་རང་སར་ཡལ་བ་དེ་ཀ་ན་ཆོས་ཉིད་དོ། །དེ་ཡང་ཡལ་བ་དེ་ཀ་ན་ཆོས་ཉིད་དོ། །དེ་ཡང་ཡལ་བའི་དུས་ནི་ཕྱིར་འཕངས་པ་ཙམ་གྱིས་ཡལ་བའོ། །དེ་ཡང་དཔེར་ན་རྒྱ་མཚོ་ཆེན་པོའི་རླང་ཡལ་བ་ལྟ་བུ་ལ་ཤེས་པ་བཞག་པས། རྣམ་རྟོག་རྣམས་ལས་གྲོལ་བ་ནི། དཔལ་རྡོ་རྗེ་འཆང་ཐུགས་རྗེ་ཆེན་པོ་དང་ལྡན་པ་དགའ་རབ་རྡོ་རྗེའི་མགོན་པོ་ཡིན་པས་ན་གང་གིས་ཀྱང་མ་བསླད་པའི་ཆོས་ཉིད་མཁྱེན་པ་ཡེ་ཤེས་སུ་ཤར་བའི་དོན་དེ་ལས་ཀྱང་ཁྱད་པར་དུ་སོང་སར་སོང་བས་ཡལ་སར་ཡལ་བ་ཞེས་པའི་དོན། ངས་དགའ་རབ་རྡོ་རྗེས་རིག་གོ་ཞེས་འགྲོ་བ་སྣོད་དང་ལྡན་པ་ལ་གདམས་པའོ། ཞེས་ནང་དོན་གཉིས་པ་རླུང་གི་འཕེན་པ་ལ་བརྟེན་ནས་དྲན་རིག་ཡལ་ས་ངོར་བཟུང་བར་བསྟན་ནས། ད་ནི་སེམས་ཀྱི་དམིགས་དང་པོའི་བསྡུས་དོན་གསུམ་པའི་ནང་དོན་གསུམ་པ་གཞི་ལམ་སྟོངས་པས་འཁོར་འདས་ལ་བཟླ་བར་བསྟན་པ་ནི། འདས་པའི་འགྱུ་བ་དང་ཞེས་པ་ལ་སོགས་པས་བསྟན་ཏེ། འདས་པའི་ཞེས་པ་ནི་དུས་འདས་པ་མ་ཡིན་གྱི་གེགས་བསལ་བ་ལ། འདིར་གང་ཟག་གཅིག་གི་རླུང་སྔ་མའི་འགྱུ་བ་ལ་ཆོས་ཉིད་ཀྱི་རྗེས་བཅད་པས་བསམ་པའི་ཁོག་སྟོངས་པར་ཤེས་པས། སྔ་མ་སྐྱེས་མ་མྱོང་བའི་གནད་དང་། འགྱུ་

བ་དང་ཞེས་པ་ནི་རླུང་ཟད་པས་རྟོག་པའི་ཁུངས་འགགས་ལ། དེ་ཉིད་ཝལ་པོ་རྗེས་མེད་དུ་ཤེས་པ་ཆུ་ལ་རི་མོ་བྲིས་པ་ལྟ་བུའོ། །མ་འོངས་པ་ཞེས་པ་ནི་དེ་ལྟ་བུའི་ཆོས་ཉིད་དེ་གང་ནས་ཀྱང་མ་འོངས་ལ། གར་ཡང་གནས་པ་ལས་འགྱུར་བ་མེད་དོ། །དེ་ཡང་རླུང་འོག་མའི་སྣ་སྟེབས་པས། དྲན་པ་རྒྱུན་ཆད། ཡེ་ཤེས་མཁའ་ལ་གསལ་བའོ། །ད་ལྟ་ཞེས་པར་རང་ངོ་རང་ཐོག་ཏུ་སྤྲད་པ་སྟེ། རླུང་དལ་བུས་བདས་པས་འགྱུས་པའི་ལྟོས་ཟད་ནས། རྟོག་པ་གློ་བུར་བ་སྟོངས་ཏེ། དེ་ཉིད་སྟོངས་པས་ལྡོག་པའི་རྒྱུ་རང་འགགས། ལྡོག་བྱེད་ཀྱི་རྐྱེན་དྲན་པ་རང་ཡལ་བའོ། །དེའི་ཕྱིར་ན་གཞི་སྟོངས་པས་ད་བཟློག་ས་མེད་པ་དང་། ལམ་ཟད་པས་འགྲོ་ས་མེད་པ་དང་། འབྲས་བུ་རྡུགས་པས་འཁོར་ས་མེད་པའི་ཕྱིར་ན། འཁོར་བ་སྣང་ཤེས་དང་། འདས་པ་སྐུ་དང་ཡེ་ཤེས་ཀྱི་མིང་མེད་པས། རང་གནས་ཅོག་བཞག་ཡིན་པས་བློ་བདེ་བའོ། །གཏན་ཚིགས་དེའི་ཕྱིར་རྒྱུ་མེད་པས་ལྡོག་ས་འཁོར་བ་ལ། སེམས་མེད་པར་ལ་བཟླ་བས་སེམས་ཀྱི་བྱུང་སའི་ཁུངས་ཡལ་བར་སྟོར་བས། ཡིད་ཀྱི་འགྲོ་སའི་གཏད་ཡལ་བ་ལ་ཆོས་ཉིད་ཅེས་བྱའོ། །ཞེས་དེ་དག་གིས་ནི་བསྡུས་དོན་གསུམ་པ་ལས་ཀྱི་འབྲེལ་པ་བརྟག་པ་སྐྱེ་བ་སྔ་ཕྱི་ལ་མི་ལྟོས་པར་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ། །ད་ནི་སེམས་ཀྱི་དམིགས་དང་པོའི་བསྡུས་པའི་དོན་བཞི་པ་ཡེ་ཤེས་ལོག་པའི་མཚན་ཉིད་ལ་བརྟེན་ནས་འཁོར་འདས་ལ་སོགས་པའི་ལོག་ལུགས་བསྟན་པ་ལ། མན་ངག་གི་དོན་གཉིས་ཀྱི་བསྟན་པའི་དང་པོ་ཆོས་

ཉིད་ཀྱི་ཡལ་ས་མེད་པའི་མཚན་ཉིད་འབྲེལ་བ་མེད་པ་དཔེ་དང་བཅས་པ་བསྟན་པ་ནི། ལོག་པའི་བར་ལས་ཡེ་ཤེས་ལམ་ཞེས་པ་ལ་སོགས་པས་བསྟན་ཏེ། ལོག་པའི་ཞེས་པས་འགྱུ་བ་ལོག་པས་དྲན་རིག་འགག་པ་དང་ལས་རླུང་ལོག་པས་གཟུང་འཛིན་འགགས་པའོ། །དེ་གཉིས་བར་ལས་ཡེ་ཤེས་ཀྱི་ལམ་རྩ་ནས་འབྱུང་བའི་དུས་དང་། ཚད་ཤེས་པར་བྱའོ། །ཞེས་པའོ། །དེ་ཡང་རླུང་ཕར་སོང་བ་དང་དེ་ལས་གཏད་མེད་པ་དང་། རླུང་ནང་དུ་གནས་པ་དང་འགྱུ་བ་བག་ལ་ཉལ་བ་དང་། རླུང་ཕྱིར་འབྱུང་བ་ལས་གློ་བུར་གྱི་འགྲོ་ས་ངོ་ཤེས་པའོ། འདིའི་དུས་ན་བདག་ཏུ་འཛིན་པའི་སྟོང་པ་དང་། འགྱུར་བ་གཞན་ལ་འཇུག་པའི་འཁོར་ལོ་རྒྱུན་ཆད་པ་དང་། དེ་གཉིས་ཀ་ཆོས་ཉིད་དུ་གྲོལ་བར་ངོ་ཤེས་པ་ནི། ལུས་སེམས་བྲལ་བའི་དུས་ལ་མཁས་པས་ཏེ། དེ་ཤེས་པ་ཙམ་གྱིས་ཁམས་གསུམ་དུ་མི་ལྡོག་པའོ། །དེ་ལྟར་ན་སེམས་ཀྱི་དམིགས་དྲུག་ལ་བརྟེན་པའི་གནད་འདི་ཤེས་པའི་ཆོས་ཉིད་རྣལ་མ་ལ། རང་རིག་གནད་ཐོག་ཏུ་འབྱོར་པ་ནི། ལུས་ཀྱི་འཛིན་པ་དང་བྲལ་བས་རྡོས་བཅས་རང་དག་པ་དང་། ནང་ངག་གི་འཛིན་པ་དང་བྲལ་བས་འཁྲུལ་གཏམ་ཟུངས་ཟད་པ་དང་། གསང་བས་སེམས་ཀྱི་ཡིད་འཛིན་པ་དང་བྲལ་བས་འགྱུ་བ་རང་སར་ཡལ་བས། ད་ལུས་སེམས་ཀྱི་འབྲེལ་ཆད་པ་ནི། དཔེར་ན་ཨརྫ་ཀའི་དོག་པ་ལྟར། ཕྱིས་གཅིག་ཏུ་མིག་གནས་ཏེ། འབྲས་བུ་རྒྱུ་མེད་པས་རྐྱེན་གཅིག་ཏུ་མི་གནས་ཏེ་ལུས་སེམས་གཉིས་མཚན་ཉིད་མིག་གཅིག་པའི་ཕྱིར་རོ། །ཞེས་དང་པོ་ཆོས་ཉིད་ཀྱི་ཡལ་ས་མེད་པའི་མཚན་ཉིད་འབྲེལ་པ་

མེད་པ་དཔེ་དང་བཅས་པ་བསྟན་ནས། ད་ནི་ནང་དོན་གཉིས་པ་རྒྱུ་རྐྱེན་ལ་མི་གནས་པའི་སེམས་ཉིད་འཁོར་འདས་གང་དུ་ཡང་མ་གྲུབ་པར་བསྟན་པ་ནི། སྟོང་པ་རྒྱུ་ལ་ཡལ་བས་རྐྱེན་ཞེས་པ་ལ་སོགས་པས་བསྟན་ཏེ། དེ་ཡང་སེམས་ཀྱི་མཚན་ཉིད་སྟོང་པས། རྒྱུ་མེད་པ་ངོ་ཤེས་པ་ནི་ཐག་སྣང་བ་ལ་ཆོད་པའོ། །དེའི་དྲན་རྟོག་ཡལ་བས་སྣང་རྐྱེན་ཐམས་ཅད་ཆོས་ཉིད་དུ་ཤར་བའོ། །དེ་ལྟར་རྒྱུ་རྐྱེན་གཉིས་ཀ་དང་བྲལ་བ་ནི་སེམས་ཉིད་ལྡོག་པ་མེད་པའི་འབྲས་བུ་ཞེས་མིང་དུ་གདགས་སུ་བཏུབ་པའོ། །དེ་འཁྲུལ་པས་བཅིངས་པ་ལས་ཐར་བ་ནི། དཔེར་ན་གྱི་ལིང་སྒྲོག་གྲོལ་བ་ལྟ་བུའོ། །དེས་སྣང་རྟགས་ཀྱི་ཆོས་འགོག་པ་ནི། དཔེར་ན་ཀ་ལིའི་རྒྱལ་པོ་སིདྷའི་ཡུལ་འགོག་པ་ལྟ་བུའོ། །གོགས་པ་དང་ཞེས་པ་ནི་སེམས་ཀྱི་ཟླ་ལུས་གོགས་པས། འཁོར་འདས་འབྲེལ་ཆོད་པ་ནི། དཔེར་ན་དགོངས་མལ་གཅིག་པའི་འགྲོན་པོ་ནང་པར་སོ་སོར་གྱེས་པ་ལྟ་བུར། ལུས་སེམས་ཀྱི་འབྲེལ་རང་སར་དག་པའོ། །དེ་ལྟར་ལུས་སེམས་ཀྱི་འབྲེལ་པ་བྲལ་བ་ནི། ནམ་མཁའ་ལ་འཕུར་བའི་བྱ་ལ་རྗེས་མེད་པ་ལྟ་བུའོ། །གཞི་སེམས་སྟོང་པ་བདག་ཏུ་མེད་པས། ལམ་དམིགས་པ་རྒྱུད་ལ་བརྟེན་པ་རྣམས་དྲན་པ་ཡལ་སར་སད་པས། སྣང་བ་མ་བུ་འཕྲད་པའོ། །དཔེར་ན་བུ་གཅིག་པའི་མ་ལྟ་བུའོ། །ལམ་ནི་གོམས་པ་གནད་ཀྱི་མན་ངག་གིས་འབྲས་བུ་གཅིག་ཅར་དུ་སྐྱེ་བ་ཆོས་ཉིད་བཟུང་བས། རྒྱུ་འབྲས་གོ་བཟློག་པས་རང་གནད་གཤིས་ལ་ཕེབས་

པས་སོ། །རྒྱུ་ཡོད་པ་ནི་བཏགས་པ་མིང་ཡིན་གྱི་གཞིག་པས། འབྲས་བུ་རང་རྐྱེན་གནས་པ་དང་བྲལ་བ་ནི། གང་ལ་ཡོད་ལ་བྱེད་པ་མི་གནས་སོ། །དེ་ཡང་རྒྱུ་བདག་དང་། རྐྱེན་བླ་མའི་གདམས་ངག་སྟོངས་པས་འབྱེད་པ་མེད་པའི་བར་དུ་ཡལ་བ། རང་གྲོལ་ཏུ་སེམས་འཛིན་མེད་རང་གསལ་དུ་སྟོར་བས། འཁོར་འདས་ཀྱི་འབྲས་བུ་རང་དྲོད་ལ་ཕེབས་པ་ནི། འཁོར་རྐྱེན་ཆོས་ཉིད་ལས་འགྲོ་ས་མེད་པ་དང་། འདས་པ་ལམ་དུ་གསལ་བས། སྤང་བླང་དང་དགག་སྒྲུབ་མེད་པ་དང་། དེ་གཉིས་ལ་འབྲེལ་མེད་པས་འཁོར་འདས་གཉིས་སུ་འཛིན་པ་དུས་གཅིག་ལ་འགགས་པ་ཞེས་བྱའོ། །ཞེས་དེ་དག་གིས་ནི་སེམས་ཀྱི་དམིགས་དང་པོའི་བསྡུས་པའི་དོན་བཞི་པ་ཡེ་ཤེས་ལོག་པའི་མཚན་ཉིད་ལ་བརྟེན་ནས་འཁོར་འདས་འགག་པའི་ལུགས་བསྟན་པ་ལ་གཉིས་སུ་བྱས་ནས་བསྟན་ཏོ། །ད་ནི་བསྡུས་པའི་དོན་ལྔ་པ་ཐབས་ཀྱི་འཇུག་པ་ཁྱད་པར་ཅན་བླ་མ་དྲིན་ཅན་ལ་བརྟེན་ནས་འབྱུང་བར་བསྟན་པ་ལ། ནང་དོན་གསུམ་གྱིས་བསྟན་པའི་དང་པོ་ཐབས་ཀྱི་གནད་བླ་མའི་ཞལ་ནས་འབྱུང་བར་བསྟན་པ་ནི། ཐབས་ནི་གང་ལ་འགགས་པ་མེད་ཅེས་ལ་སོགས་པས་བསྟན་ཏེ། ཐབས་ཞེས་པ་ཐོག་མ་མིན་པ་ལས་བསྐོར་ནས་ཐ་མ་གང་ཡིན་གྱི་སྟེང་དུ་ཕེབས་པས་ན། ཐབས་ཆེ་བ་ཞེས་བྱའོ། །ཕྱོགས་སྣ་ཚོགས་ནས་གང་ལ་ཡང་འགགས་པ་མེད་པ་ནས་མཚོན་ནས། ཐ་མ་ཆོས་ཉིད་ཀྱི་བབས་ཐོག་ཏུ་འབེབས་པར་བྱེད་པའོ། །དེ་ལྟར་བསྟན་པ་དེའི་རྗེས་སུ་དད་པ་ཅན་གང་འཛིན་པ་ནི། སངས་རྒྱས་ཐམས་

ཅད་དང་གཉིས་སུ་མེད་པའི་རྡོ་རྗེ་ཞེས་བྱ་བར་བཤད་པ་ནི། དུས་གསུམ་གྱི་སངས་རྒྱས་ཀྱིས་དགའ་རབ་རྡོ་རྗེ་ལ་བསྟན་པས་སོ། །དེ་ཡང་དཔལ་ལྡན་ནི་རྒྱུད་ཀྱི་སྟོན་པ་རྡོ་རྗེ་འཆང་ལ། སྔོན་བྱུང་གི་དུས་ན་སློབ་དཔོན་དགའ་རབ་རྡོ་རྗེ་བླ་མ་ཡིན་པས་ཉིད་ལ་གདམས་པའི་དོན་འདིར་བསྟན་པར་བྱའོ། །ཞེས་པས་སོ། །ཞེས་དང་པོའི་བསྡུས་པའི་དོན་ལྔ་པའི་ནང་དོན་དང་པོ་ཐབས་ཀྱི་གནད་བླ་མའི་ཞལ་ལས་བྱུང་བར་བསྟན་ནས། ད་ནི་ནང་དོན་གཉིས་པ་བླ་མ་མཚན་ཉིད་དང་ལྡན་པ་བརྟེན་པས་འགྲོ་བ་དེ་ཁམས་གསུམ་དུ་མི་ལྡོག་པར་བསྟན་པ་ནི། མཚན་ཉིད་རྫོགས་པའི་བླ་མ་ཡིས། ཞེས་པ་ལ་སོགས་པས་བསྟན་ཏེ། དེ་ཡང་མཚན་ཉིད་ཅེས་པས་མ་འོངས་པའི་དུས་ཀྱི་རྗེས་སུ་འཇུག་པས་བླ་མ་རྒྱུད་ལ་མཁས་པས་ཚིག་ལྷད་མེད་པ་དང་། དོན་ལ་འགྲུས་མེད་པར་སྟོན་ཤེས་པ་དང་། དོན་ལ་མཁས་པས་ཡལ་བའི་ཚད་ལས་མཁས་པ་དང་། བརྡའ་དོན་དབྱེར་མེད་ལ་མཁས་པས་དོན་རང་ཐོག་ཏུ་ཕེབས་པའོ། །དེ་ཡང་འདི་ནས་ཡངས་ཤིང་རྒྱུད་ལ་མཁས་པ་དང་། གོམས་ཤིང་སྒྲུབ་ཐབས་ལ་མཁས་པ་དང་། རྟོགས་ཤིང་ལྟ་བ་ལ་མཁས་པ་དང་། ཉམས་སུ་བླང་ཤིང་ཉམས་མྱོང་ལ་མཁས་པའོ། །དེ་བཞིན་དང་ལྡན་པ་ལ་བླ་མའི་མཚན་ཉིད་རྫོགས་པ་ཞེས་བྱའོ། །བླ་མ་ནི་རྩ་བ་དང་། ཡན་ལག་གཉིས་སོ། །གནད་ལ་ནི་དད་པ་དང་ལྡན་པའི་སྐལ་ལྡན་བརྟེན་ནས་གྲོལ་བ་ལ་གསུམ་སྟེ། དབང་པོ་རབ་བླ་མས་བསྟན་པའི་ཚེ་མཐོང་བ་ཙམ་གྱིས་སྐད་ཅིག་མ་དང་པོ་ལ་གྲོལ་ལ། འབྲིང་པོས་བསྟན་པ་དེ་ཤེས་ཏེ།

ཤེས་པ་ཙམ་གྱི་སྐད་ཅིག་མ་གཉིས་པ་ལ་གྲོལ་ལ། ཐ་མས་བསྟན་པ་གོ་བ་ལ་བརྟེན་ནས། གོ་བ་ཙམ་གྱིས་སྐད་ཅིག་མ་གསུམ་པ་ལ་གྲོལ་བའོ། །དེ་ལྟར་ཡང་འཇམ་དཔལ་སྒྱུ་འཕྲུལ་དྲ་བ་ལས། སྐད་ཅིག་གཅིག་གིས་བྱེ་བྲག་ཕྱེད། །ཅེས་པ་དང་། སྐད་ཅིག་གཅིག་གིས་རྫོགས་སངས་རྒྱས། །ཞེས་པས་སོ། །དེ་ཡང་དབང་པོའི་འགྱུར་དག་གིས་གང་ཟག་སུ་ཡང་རུང་བའི་སྙིང་ལ་བླ་མས་གནད་འདི་བཅུག་ནས་བསྟན་པ་ཙམ་གྱིས་མཐོང་ལ་མཐོང་བས་ཤེས་ལ། ཤེས་པས་གོ་བས་ན། གང་ཟག་དེ་གསུམ་ཀ་ཡང་དག་པར་ངེས་པ་རྙེད་ལ། དཔེར་ན་བརྒྱལ་ནད་ཅན་གྱི་ནད་ལངས་པས་སྐད་ཅིག་མར་དྲན་མེད་འགྱུར་བ་ལྟར་དབང་པོར་རབ་གྲོལ། །ཡང་དཔེར་ན་དྷ་སེང་གི་ཁུ་བ་འཐུང་པས་སྐད་ཅིག་མ་གཉིས་པ་ལ་དྲན་པ་མེད་པར་འགྱུར་བ་ལྟར། འབྲིང་པོ་རྣམས་སྐད་ཅིག་མ་གཉིས་པ་ལ་གྲོལ་ལ། དཔེར་ན་སྨྱོ་བའི་དུག་འཐུངས་པས་སྐད་ཅིག་མ་གསུམ་པ་ལ་དྲན་པ་མེད་པར་འགྱུར་བ་ལྟར། ཐ་མ་རྣམས་སྐད་ཅིག་མ་གསུམ་པ་ལ་གྲོལ་བར་ངེས་སོ། །དེས་ན་གནད་བསྟན་པ་ཙམ་ལ་བརྟེན་ནས་གོམས་མི་དགོས་པར་གྲོལ་བས་ན། ཁམས་གསུམ་དུ་མི་ལྡོག་པ་ནི། དཔེར་ན་འཆི་བར་ངེས་པ་སླར་ལྡོག་པ་མེད་པ་ལ་བཞག་པའོ། །ཞེས་ནང་དོན་གཉིས་པ་བླ་མ་མཚན་ཉིད་དང་ལྡན་པ་བརྟེན་པས་འགྲོ་བ་དེ་ཁམས་གསུམ་དུ་མི་ལྡོག་པར་བསྟན་ནས། ད་ནི་ནང་དོན་གསུམ་པ་ཡང་དག་པའི་གནད་ཀྱིས་གྲོལ་ཞེས་ཐ་སྙད་དུ་བསྟན་པ་ནི། གང་མ་ཤེས་པ་དང་ཞེས་པ་ལ་སོགས་པས་བསྟན་ཏེ། གང་ཞེས་སྣང་བ་རང་སར་བཞག་ནས་མ་ཤེས་པ་སྟེ་བློས་མ་བསྒྱུར་

བ་ཉིད། དེ་ཉིད་དབང་པོས་ཚུར་མ་བཅད་པར་རང་སར་བཞག་པ་དང་དེ་ལས་འགྲོ་ས་གཞན་མེད་དོ། །ཐ་མལ་ལྟ་བུ་འགྲོ་བའི་རྟོག་པ་ལ་མ་གྲོལ་བ་ལྟར་སྣང་ཡང་སེམས་མེད་པ་ལྟར་ཞེས་པས་སོ། །མ་བལྟས་པ་ནི་ཞེས་པ་དེ་ཉིད་ལ་ཕྱོགས་དང་གཏད་མེད་པས་ནི། བླ་མའི་གདམས་པའི་མཆོག་སྟེ། དེ་ལ་མིང་དུ་བཏགས་ལ་གཏད་མེད་ཀྱི་སེམས་ཉིད་གཏོད་མེད་དུ་གྲོལ་ཞེས་བྱའོ། །དེ་ལྟ་བུའི་གནད་དེ་ལ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ཤེས་པ་དང་འདྲ་སྟེ། ད་བསྐྱར་ནས་འདྲིས་པ་ཅི་ཞིག་བྱ་སྟེ། ཡེ་གྲོལ་ལ་བསྐྱར་གཞི་མེད་པའི་གནད་དེ། དེ་ལ་མིང་དུ་བཏགས་ན། རྟོན་མེད་ཀྱི་རིག་པ་ཙེན་མེན་དུ་གྲོལ་བ་ཞེས་བྱའོ། །དེ་ཤེས་པ་ཙམ་ལས་དེ་གྲོལ་མི་དགོས་པའི་གནད་ཡིན་པས་ནི། དེ་ཉིད་ལ་གོམས་པས་ནི་མཐོང་བས་བདེ་ལ་ཤེས་པས་སྟོང་པས་སྟོང་པ་ན། དེ་ཉིད་ལ་མིང་དུ་བཏགས་ན་གདིང་དང་ལྡན་ཞིང་ཁམས་གསུམ་དུ་མ་ལྡོག་པའི་རྣལ་འབྱོར་པ་ཞེས་བྱའོ། །དེ་ལ་གོམས་མི་དགོས་པས། སེམས་ཉིད་མེད་པས་མཐོང་བ་ཙམ་གྱིས་རང་གི་རིག་པ་ལས་གྲོལ་ས་མེད་དོ། །ཞེས་དེ་དག་གིས་བསྡུས་པའི་དོན་ལྔ་པ་ཐབས་ཀྱིས་འཇུག་པ་ཁྱད་པར་ཅན་བླ་མ་དྲིན་ཅན་ལ་བརྟེན་ནས་འབྱུང་བར་བསྟན་པ་ལ་ནང་དོན་གསུམ་དུ་བྱས་ནས་བསྟན་ནས། ད་ནི་སེམས་ཀྱི་དམིགས་དང་པོའི་སྤྱི་དོན་དྲུག་པ་ཡལ་ས། དུས་གནད་ལ་བརྟེན་ནས་ལྷ་སྒོམ་ཡིད་ལ་བྱེད་པ་ལས་འདས་པར་བསྟན་པ་ལ་ནང་དོན་གཉིས་ཀྱིས་བསྟན་པའི་དང་པོ་གནད་མཐོང་བའི་འགྲོ་བ་རྣམས་སླར་ཁམས་གསུམ་དུ་

མི་ལྡོག་པའི་དཔེ་དང་བཅས་པ་ནི། གང་ལས་བྱུང་བ་གང་བྱུང་ནུབ། ཅེས་པ་ལ་སོགས་པས་བསྟན་ཏེ། གང་ལས་བྱུང་ན་གནད་ཤེས་པ་ལས་བྱུང་པས། རྣམ་པར་རྟོག་པ་གློ་བུར་བ་གང་བྱུང་བ་ཆོས་ཉིད་ཀྱི་ཀློང་དུ་ནུབ་པའོ། །དེ་ཡང་ཆོས་ཉིད་དེ་གང་ལས་སྐྱེས་པ་རྟོག་པ་ཐ་དད་པ་འགགས་པས་མི་ཤེས་སོ། །དེ་ཅིས་མི་ཤེས་ཞེ་ན། དུས་ཕྱིས་རྟོག་པ་གློ་བུར་བ་རྣམས་འགགས་པ་ནི་རྒྱུ་རང་དག །ཡལ་རྐྱེན་རང་འགགས། ཡལ་ས་ལ་ལྟོས་ཟད་པ་དམིགས་མེད་གཞི་མེད་པའི་སེམས་ངེས་རིག་པ་ནི་རྩ་མེད་རིས་མེད་པའི་སེམས་རྣམ་པར་དག་གོ། དེ་ལྟར་ཤེས་པས་ཁམས་གསུམ་དུ་ལྡོག་པ་མེད་ཅིང་དམིགས་གཏད་རྗེས་མེད་པའི་སེམས་ཉིད་རང་སར་ཡལ་བ་ནི། དཔེར་ན་སྐྱེས་བུ་སྒྱུ་རྩལ་མཆོག་དང་ལྡན་པ་ཞིག་གིས་གནམ་དུ་མདའ་འཕངས་པས་སླར་ལྡོག་པ་མེད་ཅིང་། དམིགས་པའི་འབེན་མེད་ལ། རྗེས་དང་གཏད་ས་མེད་པ་དང་། ཡུལ་མེད་པར་ཟང་ཐལ་བ་བཞིན་དུ་རིག་པ་ཉིད་གཞི་ལ་ཐིམ་པས་འཕྲལ་རྐྱེན་གློ་བུར་གྱི་རྟོག་པ་རྣམས་འདིར་སོང་གི་གཏད་མེད་ལ། སེམས་ཉིད་ཕྱོགས་དང་རིས་མེད་པར་ཡལ་བའོ། །དེ་ཡང་དངོས་པོ་ལ་ལྡོག་པ་མེད་པས་སྟོང་པ་རིས་མེད། དེ་ཉིད་གནས་སྐབས་སུ་ནམ་མཁའ་ལས་གར་ཡང་སོང་བ་མེད་པས་དངོས་མེད་ཟང་ཐལ། དེ་ཉིད་ནམ་མཁའ་ལ་ཡང་གནས་པ་མེད་ལ་ས་ལ་ཡང་ལྟུང་བ་མེད། སིངྒ་ལའི་མདའ་བར་སྣང་ལ་རླུང་གིས་བཏེག་ནས་འབབ་པ་མེད་པ་བཞིན་ནོ། །གྲོལ་བ་ཡལ་བའི་ཚད་ཤེས་པའི་སེམས་འདི་དེ་ལའང་ནི་སྐྱེས་བུ་སྒྱུ་རྩལ་དང་ལྡན་པས་སིངྒ་ལའི་མདའ་གནམ་དུ་འཕངས་པ་

དེ་དང་མཚུངས་སོ། །ཞེ་ནང་དོན་དང་པོ་གནད་མཐོང་བའི་འགྲོ་བ་རྣམས་ཁམས་གསུམ་དུ་མི་ལྡོག་པའི་དཔེ་དང་བཅས་པ་བསྟན་ནས། ད་ནི་ནང་དོན་གཉིས་པ་དེ་ལྟར་གནད་མཐོང་ཞིང་ཤེས་པ་ཙམ་གྱིས་ལྟ་བསྒོམ་འབད་པ་ལ་མ་བརྟེན་པར་རང་གྲོལ་བར་བསྟན་པ་ནི། དེ་ཡང་སེམས་ཀྱི་རྒྱུ་ཡེ་ནས་སྟོང་པར་གནས་པའི་གང་ཤར་ཅིར་སྣང་ཡང་རང་གནས་བདེ་བ་ཆེན་པོ་ལས་མ་འདས་པའོ། །སེམས་ཀྱི་རྒྱུ་མེད་པའི་ཕྱིར། ཕྱི་སྣང་རྐྱེན་ཐ་དད་པ་དེ་ཉིད་ལ་གཏད་པ་ཙམ་གྱིས་རང་སར་ཡལ་བས། འགག་པའི་ཆོས་ཉིད་ལ་ཡིད་ཆེས་པའོ། །དེའི་ཕྱིར་ན་སེམས་ཀྱི་འབྲས་བུ་འཁོར་འདས་གཉིས་རང་སར་གྲོལ་བས་མཐོང་སྣང་དུས་གཅིག་ལ་འགག་པའོ། །དེ་ལ་མིང་དུ་བཏགས་ན་འཁོར་འདས་གཉིས་དུས་གཅིག་ལ་ཁྱེར་བས་འཁྲུལ་བའི་སྣང་བ་དུས་གཅིག་ལ་ཆོད་པའི་ལྟ་བ་ཞེས་བྱའོ། །དེ་ལ་གོམས་པ་མི་དགོས་པས། གནད་དེ་མཐོང་བ་ཙམ་གྱིས་ཤེས་ལ། ཤེས་པ་ཙམ་གྱིས་གྲོལ་བས་ན། སྒོམ་པ་བཞག་སར་གནས་ལ། གནས་སར་སྟོངས་པ་ཞེས་བྱའོ། །དེ་གང་ལས་བྱུང་ན་ཐོག་མ་ལུས་ངག་ཡིད་ཀྱི་རྒྱུ་རྐྱེན་ལ་བརྟགས་པས། སེམས་ཀྱི་འཇུག་པ་ཁྱད་པར་ཅན་སྐྱེ་བ་ནས། དེ་ལ་རྒྱུན་དུ་སྤྱོད་པས་ན་སྤྱོད་པའོ། །དེ་དག་གིས་ནི་སྤྱི་དོན་ཐ་མ་ལ་གཉིས་སུ་བྱས་ནས་བསྟན་ཏོ། །སེམས་ཀྱི་ངོ་བོས་ངེས་ཚིག་དབྱེ་བ་གོང་དུ་བསྟན་ཏོ། །དམིགས་ནི་བསལ་བར་བྱེད་པའོ། །དང་པོ་ནི་གྲངས་ཀྱི་གནས་ཏེ་ཐོག་མའོ། །བསྡུས་པ་ནི་སྤྱིད་དོན་དྲུག་གིས་བསྟན་པའོ། །བསམ་པ་ནི་འདས་

མ་འོངས་ད་ལྟའིའོ། །གང་ནས་བྱུང་རྒྱུ་མེད་པས་སྟོང་དག །འབྲས་བུ་མེད་པས་བསྐྱར་མེད་ཡེ་གྲོལ་ལོ། །དེ་ཡང་སྣང་ཤེས་སྔ་ཕྱིའི་བར་དུ་ངོས་བཟུང་བས་བློ་མ་བུའི་སྟོབས་མེད་ལ། རྟོག་པ་སྔ་ཕྱིའི་བར་དུ་ངོས་བཟུང་བས་ལས་དང་བག་ཆགས་ཀྱི་གཞི་སྟོངས། ཆོས་ཉིད་སྔ་ཕྱིའི་བར་དུ་ངོས་བཟུང་བས། འཁོར་འདས་གཉིས་ཀྱི་ལྟོས་ཟད། རྒྱུ་རྐྱེན་གཉིས་ཀྱི་བར་དུ་ངོས་བཟུང་བས། ལྟ་སྒོམ་སྤྱོད་པ་འབྲས་བུ་ལ་རག་མ་ལུས། བློ་སྔ་ཕྱིའི་བར་དུ་ངོས་བཟུང་བས་བྱ་བྲལ་སོ་མའི་ལམ་བསལ། འཁྲུལ་པ་སྔ་ཕྱིའི་བར་དུ་ངོས་བཟུང་བས་སྣང་རྐྱེན་ཐ་དད་པ་ཆོས་ཉིད་ལས་འགྲོ་ས་མེད་པའོ། །དེ་ལྟར་རང་བཞིན་སྟོང་པ་ལ་བལྟས་པས་འཁོར་འདས་གཉིས་དུས་གཅིག་ལ་མཐོང་ལ་སྣང་བ་སྟོང་པ་ལ་བལྟས་པས་ཆོས་དང་ཆོས་མིན་གྱི་རྩ་བ་མཐོང་ལ། ངོ་བོ་སྟོང་པ་ལ་བལྟས་པས་ལྟ་སྒོམ་རྣམས་ཀྱི་སྲོག་དུས་གཅིག་ལ་ཆོད་པའོ། །བསྟན་པ་སྟེ་ཞེས་པ་ནི། སེམས་ཀྱི་དམིགས་པ་དང་པོ་ལ་བསྡུས་པའི་དོན་དྲུག་བསྟན་པ་ནི་འགྲོ་བ་དྲུག་གི་ལམ་བསམ་པ་ནས། ཡེ་ཤེས་དྲུག་རང་ལུགས་སུ་འཆར་བ་ལ་དགོངས་པའོ། །དེ་ཡང་དེ་དག་རིམ་གྱིས་བསྒོམས་པས་བསླབ་བྱ་དང་པོ་སྲིན་མོ་བུ་སྟོར་བ་ལྟ་བུའི་བསླབ་བྱས། ལུས་ངག་ཡིད་ཀྱི་གཞི་སྦྱངས་ནས་ཆོས་ཉིད་ཀྱི་བྱུང་ཁུངས་བཙལ་བ་སྟེ། དོན་གྱི་ལུགས་གཉིས་སུ་བསྟན་ཏེ། བསླབ་བྱ་ལམ་དུ་ཁྱེར་བས་ཤེས་པ་རྒྱུད་ལ་འཆར་གནད་ཤེས་པས་ཁམས་གསུམ་གྱི་གཞི་སྟོངས་པས། འཁོར་འདས་གཉིས་དུས་གཅིག་ལ་འགག་པའི་

ལུགས་དང་གཉིས་སུ་བྱས་པས་ནི། འདི་ནས་གང་ཟག་གཉིས་དུས་གཅིག་ལ་གྲོལ་བར་བསྟན་པའོ། །དེ་ལ་དགའ་བའི་ལུས་ངག་ཡིག་ལ་བདེ་བ་ཁྱད་པར་ཅན་སྐྱེས་པས་རྟོགས་པས་བདག་བསྒྲལ། དེ་ཉིད་ལ་ཤེས་རབ་ཁྱད་པར་ཅན་གྱིས་སྤྱི་དང་རང་གི་མཚན་ཉིད་ལ་དབང་ཐོབ་པས། ཐུགས་རྗེས་གཞན་བསྒྲལ་བའོ། །རྡོ་རྗེ་ནི་དེ་ལྟར་རྟོགས་པས་དུས་གསུམ་སྐྱེ་ཤི་མེད་པའི་དོན་ལ་མི་འདའ་བའོ། །དགོངས་པ་ནི་ཐུགས་ཀྱི་བཞེད་པ་དང་། རྟོག་པ་དམ་པ་ཉིད་འདིར་ངེས་པར་གནད་དུ་ཕབ་པའོ། །རྣམ་པར་བཤད་པ་སློབ་དཔོན་དགའ་རབ་རྡོ་རྗེ་དགོངས་པ་ཉིད་ཀྱི་དོན་བྱེ་མ་ལ་མུ་ཏྲས་རྣམ་པར་བཤད་པ་སྟེ། སེམས་ཀྱི་དམིགས་དང་པོ་བསྟན་པའོ། །ཨྠྀི། རྒྱ་རྒྱ་རྒྱ། ས་མ་ཡ་གཏེར་ནས་གཏེར་དམ་པ་ཉིད་དུ་བཙས་པའོ། །དཔལ་སྔགས་སྲུང་གི་རྒྱལ་མོ་ལ་གཏད་དོ། །ད་ནི་སེམས་ཀྱི་དམིགས་གཉིས་པ་རྣམ་པར་བཤད་པར་བྱའོ། །དུམ་བུ་གཉིས་པ་རྣམ་རྟོག་གཅོད་པའི་སྤུ་གྲི་ལ་དོན་དྲུག་སྟེ། སྤྱི་དོན་དང་པོ་མེད་སྣང་རང་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་དང་། སྤྱི་དོན་གཉིས་པ་སེམས་ཀྱི་བྱུང་ས་བཙལ་བ་འཁོར་བའི་གཞི་སྟོངས་པར་བསྟན་པ་དང་། གསུམ་པ་ལུས་སེམས་ཀྱི་འབྲེལ་བར་བརྟག་པ་ཁྱད་པར་ཆོས་ཉིད་ཀྱི་སྐྱོན་ཡོན་རིག་པས་སྒྲུབ་པར་བསྟན་པ་དང་། བཞི་པ་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པར་བསྟན་པ་དང་། སྤྱི་དོན་ལྔ་པར་ལུས་ངག་ཡིད་གློད་པ་ལས་སེམས་ཀྱི་ཡལ་ས་ངོ་ཤེས་པར་

བསྟན་པ་དང་། དྲུག་པ་གློད་པའི་གནད་དམ་ཚད་བསྟན་པའོ། །དེ་ལ་སྤྱི་དོན་དང་པོ་མེད་སྣང་རང་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ། ལུས་སེམས་ཀྱི་འབྲེལ་པ་བརྟག་པས་གཏན་ཚིགས་ཀྱི་གྲུབ་པར་བསྟན་པ་ནི། གང་གི་ལུས་ཀྱི་དངོས་པོ་དག་ཅེས་པ་ལ་སོགས་པས་བསྟན་ཏེ། དངོས་པོ་གང་གིས་ན་སེམས་དང་འབྲེལ་བ་ཡོད་ཅེ་ན། ལུས་ཀྱི་ངོ་བོ་ཕུང་པོ་ཁམས་དངསྐྱེ་མཆེད་དུ་མ་ཚོགས་པའོ། །ངེས་ཚིག་ནི་འཁོར་བའམ། འཇོག་པའམ། ལས་པའམ། གཅིག་ཏུ་མི་གནས་པའི་ཕྱིར་ན་ལུས་ཞེས་བྱའོ། །དེ་གང་ལུས་ལ་སྔར་གྱི་ལུས་ལ་འབྱུང་བ་བཞི་རྡུལ་ཕྲ་རབ་དང་བཅས་པ་ལ་ལུས་ནས་ད་ལྟའི་ལུས་འདི་སྔར་ཀྱི་ལུས་མིན་པར་ངོ་ཤེས་པ་དང་། ཕྱིས་ཀྱང་གནད་མ་ཤེས་ན་ལུས་འདི་མིན་པ་ལེན་པས། ད་ལྟའི་འདི་ལུས་ནས་འགྲོ་བས་ན་ལུས་ཞེས་བྱའོ། །དབྱེ་བ་ནི་བཞི་སྟེ། རིན་པོ་ཆེ་གསང་བའི་ལུས་ཆོས་སྐུ་ལོངས་སྐུ་སྤྲུལ་སྐུ་འདུས་པ། ཡེ་ཤེས་སྒྱུ་མའི་ལུས་ལོངས་སྐུ་ལ་ཡོད་ལ། ཡང་ན་རིན་པོ་ཆེ་ཆོས་སྐུ་ཡིན་ཏེ། ཡེ་ཤེས་སྒྱུ་མ་གཟུགས་སྐུ་ཉིད་དོ། །རྣམ་རྟོག་བག་ཆགས་ཀྱི་ལུས་ནི་འགྲོ་བ་རྣམས་ལ་ཡོད་པའོ། །རྣམ་པར་རིག་ཙམ་གྱི་ལུས་ནི་འགོག་པ་དང་། གཟུགས་མེད་པ་ཁ་ཅིག་ལ་ཡོད་དོ། རྣམ་རྟོག་བག་ཆགས་ལ་རིག་བྱེད་འོད་ཀྱི་ལུས་འོད་གསལ་གྱི་ལྷ་རྣམས་ལ་ཡོད། ཤ་ཁྲག་རང་ག་མ་རྡོས་བཅས་ཀྱི་ལུས་འགྲོ་བ་མི་དང་བྱོལ་སོང་རྣམས་ལ་ཡོད་ལ། དྲན་པ་རྗེས་འབྲང་གི་ལུས་ཡི་དྭགས་ཕལ་པ་རྣམས་

ལ་ཡོད་ལ། རྣམ་པར་ཤེས་པ་ཙམ་གྱི་ལུས་གཟུགས་མེད་པའི་ལྷ་རྣམས་ལ་ཡོད་དོ། །སྡུག་བསྔལ་ཉེར་ལེན་གྱི་ལུས་དམྱལ་བ་རྣམས་ལ་ཡོད། འགྱུ་བ་ཡིད་ཀྱི་ལུས་སྲིད་པ་བར་མ་དོའི་འགྲོ་བ་མཁའ་ལ་རྒྱུ་བའི་ཡི་དྭགས་ཕལ་ལ་ཡོད། དེ་དག་གི་མཚན་ཉིད་དང་ཚད་ལ་སོགས་པ་ནི་འདིར་མ་སྤྲོས་སོ། །དེ་དག་གི་དངོས་པོ་ནི་སོ་སོ་ལ་རེ་རེ་གནས་ཏེ་འདིར་མ་སྤྲོས་ལ། འདི་ཤ་ཁྲག་རང་ག་མའི་ལུས་འབྱུང་བ་ཕྲ་རགས་ཀྱི་དངོས་པོ་རྡུལ་ཕྲ་རབ་ཡན་ལག་དང་བཅས་པ་རྣམས་ཏེ། ས་ཆུ་མེ་རླུང་གིས་བསྡུས་པ་དག་ཡིན་པས་ན། དེའི་རྒྱུ་ཕ་མའི་བྱང་སེམས་ཏེ། ཕས་རྒྱུ་བྱས་པས་སྲིད་པའི་གཞི་སོང་ལ། མས་རྐྱེན་བྱས་པས་འབྱུང་བ་བཞི་གཅིག་ཏུ་འདུས་སོ། །དེ་ཡང་འགྲོ་བའི་ལུས་མི་འདྲ་བ་ཐ་དད་པ་ནི་རྒྱུ་མི་གཅིག་སྟེ། ཕ་མི་འདྲ་བས་བསྐྱེད་པ་དང་། རྐྱེན་མི་འདྲ་བས་གཅིག་པ་མེད་པ་ནི། ཁ་དོག་དང་དབྱིབས་ལ་སོགས་པ་མི་འདྲ་བའི་ཕྱིར་རོ། །ལུས་མི་གཅིག་པ་བཞིན་སེམས་མི་གཅིག་པ་ནི་མ་ཡིན་ཏེ། དཔེར་ན་རྫ་མཁན་གྱི་འཁོར་ལོས་རྫའི་བྱེ་བྲག་དཔག་ཏུ་མེད་པ་བྱས་པས་རྫ་ཙམ་དུ་གཅིག་ཀྱང་དབྱིབས་དང་ཁ་དོག་མི་གཅིག་པ་བཞིན་དུ། ལུས་ཀྱང་ལུས་ཙམ་དུ་གཅིག་ཀྱང་། ཡང་དག་པར་བརྟགས་ན་མི་འདྲའོ། །རྫ་མི་འདྲ་ཡང་ནང་གི་ནམ་མཁའ་ནི་མཚན་ཉིད་གཅིག་ཅིང་ཁྱད་པར་མེད་པས་ན། སེམས་གཅིག་ངོ་བོ་ལས་འདས་པ་མེད་པས་ན། ལུས་སེམས་ཉིད་རྒྱུ་མི་གཅིག་པས་རྒྱུ་བདག་ཉིད་གཅིག་པའི་འབྲེལ་པ་ཡང་མེད་དོ། །འོ་ན་སེམས་ཅན་ལ་བསམ་པ་ཐ་དད་པར་འོང་བ་ཅི་ཞེ་ན། རྫའི་དབྱིབས་དང་ཆེ་ཆུང་གིས་ཕྱེ་བ་དང་འདྲ་ལ། དེ་

ཡང་སྣོད་ཀྱིས་བཅུད་ལ་སྐྱབས་པས་དེ་ལྟར་བྱུང་བ་ཡིན་ལ། དེའི་གནད་ཀྱིས་དྲན་བསམ་གྱི་འཁོར་ལོ་གློ་བུར་གྱི་རྟོག་པ་ཡིན་པས་སོ། །དེའི་ཕྱིར་ན་སེམས་ལས་ལུས་མ་བྱུང་སྟེ། ལུས་དངོས་པོ་ཡོད་པས་སོ། །སེམས་སྟོང་པའི་མཚན་ཉིད་གང་དུ་ཡང་མ་གྲུབ་པས་སོ། །དེ་བཞིན་དུ་སེམས་སྟོང་པ་གཞི་མེད་པས་སྔ་པར་ལྡོག་པའི་རྟེན་མེད་ལ། རྩ་བ་མེད་པས་འབྱུང་བས་བཅིངས་པའི་ལུས་ལ་ཆགས་པའི་རྟེན་མེད་པའི་ཕྱིར་ན། ལུས་ལས་སེམས་མ་བྱུང་ལ། སེམས་ལས་ལུས་བྱུང་བ་མིན་ཏེ། དེ་ལྟར་ལུས་སེམས་ཀྱི་འབྲེལ་བ་མེད་པ་དེའི་ཕྱིར་དང་ད་སྔ་བར་མི་ལྡོག་ལ། ཕྱི་མ་རང་ཡལ་བ་དང་། ད་ལྟ་སྟོངས་སར་སྟོངས་པས། འགག་སར་འགག་པའོ། །གཏན་ཚིགས་དེའི་ཕྱིར་ན་ལུས་ལས་ཀྱང་སེམས་དེ་ཉིད་ཅི་སྟེ་འབྱུང་། སེམས་རྒྱུ་མེད། སྟོང་པ་ཡེ་ནས་དག་པའི་ཕྱིར་ན། བསྒྲུབ་བྱ་འདི་ཡིན་ཞེས་པ་དང་། སྤང་བྱའི་འདི་ཡིན་ཞེས་པ་གྲུབ་མཐས་བཅིངས་པ་ལས་མ་རྟོགས་པ་གང་ཡང་མེད་པར། ངེས་ན་ལུས་སེམས་འབྲེལ་པ་མེད་པར་དེ་ནི་ཆོས་ཉིད་ཞེ་འདོད་དང་བྲལ་བར་ངས་རིག་པས། འཁོར་བའི་གཞི་སྟོངས་པས་མྱ་ངན་འདས་པའི་ཁུངས་འགགས་པའོ། །ཞེས་དམིགས་གཉིས་པའི་བསྡུས་དོན་དང་པོའི་ནང་དོན་དང་པོ་ལུས་སེམས་ཀྱི་འབྲེལ་པ་བརྟག་པ་གཏན་ཚིགས་དང་བཅས་ཏེ་བསྟན་ནས། ད་ནི་ནང་དོན་གཉིས་པ་བསླབ་བྱ་དཔེ་དང་བཅས་པ་ལ་བརྟེན་ནས་ལམ་ལ་ཟད་པས་བགྲོད་སྦྱང་གི་གཞི་སྟོངས་པར་བསྟན་པ་ནི། བསླབ་བྱ་དཔེ་དང་བཅས་པ་ལས། ཞེས་པ་ལ་སོགས་པས་བསྟན་ཏེ། བསླབ་བྱ་ཞེས་པ་ནི་གཉིས་པ་དྲན་པ་ཁུངས་གཅོད་ཀྱི་བསླབ་བྱ་ལ་

བརྟེན་ནས་ཆོས་ཉིད་ཀྱི་བབས་བལྟས་པས། དོན་རང་ངོ་ལ་འབེབས་པ་ནི། དཔེར་ན་ཁྱུང་གཤོག་པ་རྫོགས་པ་ལྟ་བུའི་བསླབ་བྱས་བྱ་བྱེད་འབད་རྩོལ་མེད་པར་བསྟན་ཏེ། དེ་ཡང་གྲོལ་བའི་དཔེ་ནི་རྒྱལ་པོའི་གཉའ་ལས་གྲོལ་བ་ལྟ་བུའོ། །དེ་ཉིད་དང་བཅས་པས་སེམས་ཀྱི་བབས་བལྟས་པས། ངོ་བོ་གཅེར་མཐོང་བས་གནད་དང་བྲལ་བའི་རྣལ་འབྱོར་པ་ཞེས་བྱའོ། །འདིའི་དུས་ན་སྐྱོན་ཐམས་ཅད་ཆོས་ཉིད་ཀློང་དུ་ཐིམ་ལ་ཡོན་ཏན་ཐམས་ཅད་གཞི་རྫོགས་སུ་ཤར་བ། ལུས་རང་གྲོལ་བས། རྡུལ་དང་། རྡུལ་ཕྲན་གྱི་ལྟོས་ཟད་པ་དང་། ངག་རང་གྲོལ་བས་བརྗོད་པ་ཚིག་གི་གཞི་སྟོངས་པ་དང་། སེམས་རང་གྲོལ་བས་མཚན་ཉིད་རྩ་མེད་གཞི་མེད་དུ་རིག་པས། སྐུ་གསུམ་བཅིངས་པ་ལས་གྲོལ་བ་སྟེ། འདི་ལྟ་བུའི་གནད་ཤེས་པས་ནི་ལུས་དང་སེམས་ཀྱི་ལྡོག་མཚམས་འབྲེལ་བ་མ་བརྟགས་པ་སྟེ། དེ་ཉིད་སྔོན་དུ་འབྲེལ་བརྟགས་པའི་གནད་ཀྱིས་དྲན་པའི་ཁུངས་རང་འགགས་པས་སྟོར་བས། ཕྱིས་རྙེད་པའི་གནད་མེད་དོ། །དེས་ན་དམིགས་པ་རང་ཆོད་པས་འགྲོ་བའི་ལམ་རྡུགས་སླར་ལྡོག་པའི་གཞི་མ་རྙེད་དེ། ཕྱིས་སེམས་འགྲོ་བའི་ལམ་ཟད་པས། འགྲོ་བྱ་དང་འགྲོ་བྱེད་མེད་པ་ལྟ་བུ་སྟེ། དེས་ན་གང་ཤར་ཆོས་ཉིད་ལས་མ་གཏོགས་པ་གཞན་མེད་པས་སོ། །དེའི་ཕྱིར་ན་འགྲོ་བའི་ལམ་མེད་པས་གྲོང་ཁྱེར་ཀྱི་མཐའ་ཡང་དག་པར་སུས་ཀྱང་མི་ཤེས་པ་ལྟར། རྟོགས་པས་བདག་བསྒྲལ་བས་འདས་པ་ལ་ཡང་དག་ཏུ་འཛིན་པ་ལས་བློ་ལོག་པའོ། །གཏན་ཚིགས་དེའི་ཕྱིར་ན་བསྒྲོད་པ་བློ་རིམ་གྱི་ལམ་

མེད་པའི་ཕྱིར། སྦྱང་བྱའི་བློའི་གེགས་བསལ་བས་ཡེ་ཤེས་ཙམ་དུ་འཛིན་པ་ཡང་མེད་དོ། །ཞེས་ནང་དོན་གཉིས་པ་བསླབ་བྱ་དཔེ་དང་བཅས་པ་ལ་བརྟེན་ནས་ལམ་ཟད་པས་བསྒྲོད་སྦྱང་གི་གཞི་སྟོངས་པར་བསྟན་ནས། ད་ནི་གསུམ་པ་སེམས་མེད་པའི་མཚན་ཉིད་ཤེས་པས་འཁོར་འདས་དུས་གཅིག་ལ་འགག་པར་བསྟན་པ་ནི། རྣལ་འབྱོར་པ་གང་གི་སེམས་མེད་པའི་དོན་ལ་གནས་ན། འཁྲུལ་པའི་ཡུལ་དུས་གཅིག་འགགས་པས་ན། དེའི་ཕྱིར་སེམས་མེད་པའི་གནས་གྱི་སངས་རྒྱས་དང་སེམས་ཅན་མེད་པའི་ཕྱིར་སྣང་བ་ཡང་མེད་པར་མཁས་པ་སྟེ་བརྡ་ལ་མཁས་པས་ཚིག་གི་རྟོགས་དཔྱོད་ལས་འདས་དོན་ལ་མཁས་པས་གཞི་དང་རྩ་བ་རང་གྲོལ་བར་གང་ཟག་སུས་ཤེས་པ་ནི། འདི་ལྟར་སྣང་གྲགས་ཀྱི་ཆོས་ཡོད་པར་རྟོག་པའི་མཐའ་ལྟ་བ་དང་སྒོམ་པ་ལ་སོགས་པ་རང་རྒྱུད་དུ་འཛིན་པ་འགགས་པས། ད་འཁོར་བ་ཡོད་མེད་དུ་རྟོག་པ་དང་། འདས་པ་ལ་ཡོད་མེད་དུ་རྣམ་པར་རྟོག་པར་འཛིན་པ་ཙམ་ཡང་མེད་པའི་ཕྱིར་ན། དེ་གཉིས་མེད་པའི་ཕྱིར་ན་དག་བྱ་དག་བྱེད་ཀྱི་གཞི་སྟོངས་པའི་གནད། སྐུ་དང་ཡེ་ཤེས་ཙམ་དུ་འཛིན་པ་མེད་པས་སངས་རྒྱ་བར་བྱ་བའི་རྟེན་ནམ་གཞི་མེད་ཅིང་། དེ་ལ་ལྟོས་པའི་སེམས་འགྱུ་བ་སྣ་ཚོགས་པ་ལ་རྟེན་ལུས་ཀྱི་བསླད་པ་ཡང་མེད་པས་ན། ད་ལྡོག་ས་དང་། འགྲོ་ས་མེད་པའི་གནད་དོ། །དེའི་ཕྱིར་ན་སེམས་ཉིད་སྟོང་པ་ངོས་བཟུང་ལས་འདས་པ་ཉིད་ལ། ལས་བཟང་པོས་ཕན་མ་བཏགས་ལ། ངན་པས་གནོད་པ་སྐྱེལ་བ་མེད་པའི་ཕྱིར། རྣམ་པར་སྨིན་པ་ཡང་ཡོད་མི་སྲིད་དོ། །དེ་ལྟ་བུའི་སེམས་

ཉིད་དེ་ལ་བག་སྣོད་དང་འདྲ་བ་ལ་ཆགས་པ་རྡུལ་དང་འདྲ་བའི་རྟེན་མེད་པས། སྔ་མཐའ་ལྡོག་པའི་གཞི་མེད་པ་དང་། ཕྱི་མཐར་འགྲོ་བའི་ལམ་འདས་པའི་ཕྱིར། ཅི་བྱས་པ་ཐམས་ཅད་ཆོས་ཉིད་ལས་འགོས་མེད་དོ་དེའི་ཕྱིར་ན་གང་ཟག་འདིས་ནི་རྣམ་པར་རྟོག་པ་གློ་བུར་དུ་ཐམས་ཅད་དུས་གཅིག་ལ་གཅོད་པ་ཡིན་པས་ན། དེ་ཡང་ལུས་སེམས་སོ་སོའི་དམིགས་བཙལ་བས། རྟོག་པ་ཐ་དད་པའི་ཡུལ་ལས་འདས་པ་ནི། མེད་པའི་དོན་མེད་པར་ཤེས་པ་ཙམ་ལས་བྱུང་བའོ། །ཞེས་དེ་དག་གིས་ནི་སེམས་གྱི་དམིགས་གཉིས་པའི་སྤྱི་དོན་དང་པོ་མེད་པའི་སྣང་བར་རངས་སར་དག་པས་འཁོར་འདས་ཀྱི་ལམ་ཟད་པ་གཏན་ཚིགས་དང་བཅས་ཏེ་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་སེམས་ཀྱི་བྱུང་ས་བཙལ་བས་འཁོར་བའི་གཞི་སྟོངས་པར་བསྟན་པ་ལ་ནང་དོན་བཞིས་བསྟན་པའི་དང་པོ། །རྟོག་པ་ཡལ་བའི་དུས་ལ་བརྟེན་ནས་ཆོས་ཉིད་དངོས་གཟུང་བར་བསྟན་པ་ནི། གསང་བ་རང་གཞུང་གི་སྤུ་གྲི་ནི་ཞེས་པ་ལ་སོགས་པས་བསྟན་ཏེ། གསང་བ་ནི་སོ་སོའི་སྐྱེ་བོ་ལ་རང་བཞིན་གྱིས་གསང་བ། ཉན་ཐོས་ལ་སོགས་པའི་ཐེག་པ་དམན་པ་རྣམས་ལ་གབ་པའི་ཚུལ་གྱིས་གསང་ལ། སྣོད་མེད་པའི་འགྲོ་བ་རྣམས་པ་འདི་ཉིད་སྦས་པའི་ཚུལ་གྱིས་གསང་ངོ་རང་གཞུང་གི་ཡལ་ས་དང་། ཡལ་དུས་དང་། ཡལ་རྐྱེན་ངོས་ཟིན་པས། རྣམ་པར་རྟོག་པ་ཐམས་ཅད་དུས་གཅིག་ལ་གཅོད་པས་ན་སྤུ་གྲི་ཞེས་བྱའོ། །སེམས་དེ་ཕྱི་རོལ་ཀྱི་ཡུལ་ཐམས་ཅད་ལ་འཇུག་ཅིང་ཁྱབ་པ་ནི། ཐ་དད་པ་ཡང་མ་ཡིན་

ཡུལ་དེ་དག་ལས་སེམས་མ་བྱུང་། སེམས་ཀྱི་སྣ་ཚོགས་པའི་འགྱུར་སུས་ཀྱང་མི་ཤེས་པའི་ཕྱིར་ན། སེམས་ལས་ཀྱང་ཡུལ་མ་བྱུང་བས། ཡུལ་སེམས་གཉིས་རྒྱུ་མི་གཅིག་པའི་གནད་ཀྱིས། ཡུལ་ལ་སེམས་ཀྱི་རྟོག་པ་ཐ་དད་པ་ལྟར་སྣང་ཡང་འགྱུ་བ་གློ་བུར་གྱི་རྟོག་པ་ཡིན་པས་དེ་ཉིད་རང་སར་ཡལ་བས་སྔར་གྱི་སྟེང་ན་མི་གནས་ལ། ཕྱིས་ཀྱང་དེའི་དབང་དུ་མི་འགྱུར་བའི་ཕྱིར་རོ། །དེས་ན་ཡུལ་སེམས་གཉིས་སུ་མེད་པས་ན། འགྱུ་བའི་རྟ་རླུང་རང་སོ་ནམ་མཁའ་ལ་ཐིམ་པས། རྟོག་པ་ཕྲ་རགས་ལ་གནས་མི་སྲིད་པ་ནི། རླུང་སེམས་ཀྱི་འགྱུ་བ་སྟོང་པར་ཤེས་པས། རྟོག་པ་ཐམས་ཅད་དུས་གཅིག་ལ་དག་གོ། དེ་དག་ཀྱང་སེམས་ཀྱི་གནས་ས་རང་བཞིན་གྱིས་བྱུང་བས། རྟོག་པ་ཐ་དད་པ་རྣམས་རང་གིས་རང་སྟོངས་པས་ན་གཉེན་པོས་བཅོས་པ་མ་ཡིན་ནོ། །དེའི་ཕྱིར་རླུང་ཕྱིར་འགྲོ་བའི་ཡུལ་མེད་པས། འགྱུ་བ་རང་གྲོལ་བ་ཞེས་བྱའོ། རླུང་ནང་དུ་ཕྱིན་པས་ཆགས་པའི་གནས་མེད་པ་ནི། རླུང་སེམས་ཀྱི་གཞི་སྟོངས་པས་སོ། །ཞེས་སྤྱི་དོན་གཉིས་པའི་ནང་དོན་དང་པོ་རྟོག་པ་ཡལ་བའི་དུས་ལ་བརྟེན་ནས་ཆོས་ཉིད་ངོས་བཟུང་བར་བསྟན་ནས། ད་ནི་གཉིས་པ་ཡུལ་སེམས་བྲལ་བའི་གནད་ཀྱིས་སེམས་ཀྱི་བབས་བྱུང་ས་ལ་ལྟ་བར་བསྟན་པ་ནི། བསླབ་བྱ་དཔེ་དང་བཅས་པ་ཡིས། །ཞེས་པ་ལ་སོགས་པ་གོང་དུ་བསྟན་པ་ལ་བརྟེན་ནས། ཁམས་གསུམ་འཁོར་བ་དོང་ནས་སྤྲུག་སྟེ། སྲིད་པ་གསུམ་རང་གྲོལ་བའི་གནད་བསྟན་པའོ། །དེའི་ཕྱིར་ན་སེམས་རང་བཞིན་གྱིས་མ་བཅོས་ན་གསལ་ལ། ཆུ་མ་རྙོག་ན་དངས་པས་སོ། །དེ་ལྟར་ན་ཀློད་པ་ཙམ་

གྱིས་གྲོལ་བ་ལས། རང་སོར་བཞག་པས་གནས་པས་ཏེ། རང་ལུགས་སུ་བཞག་པ་ཙམ་གྱི་གྲོལ་བ་ལས་མ་གཏོགས་གཞན་མེད་དོ། །དེ་ལྟར་ཀློད་པ་དེ་ཡང་སྔར་ལུས་དང་སེམས་བྲལ་གྱིན་བསླབ་པའི་གནད་ལས་བྱུང་བའོ། །དེའི་ཕྱིར་གནད་རྟོགས་པའི་གང་ཟག་ལ་ལུས་ཀྱི་གཞི་སྟོངས་པ་དེ་ལ་སེམས་མི་གནས་པ་ནི། ལུས་སེམས་ཀློད་པ་ཙམ་གྱིས་གནད་ལས་བྱུང་བའོ། །ཞེས་ནང་དོན་གཉིས་པ་ལུས་སེམས་གཉིས་འབྲེལ་བའི་གནད་ཀྱིས་སེམས་ཀྱི་བབས་བྱུང་ས་ལ་བཟླ་བར་བསྟན་ནས། ད་ནི་ནང་དོན་གསུམ་པ་སྐྱེས་པ་སྔ་ཕྱི་ལ་མི་གནས་པའི་གནད་ཀྱི་སེམས་ཀྱི་གོམས་སྟོབས་ལ་མི་གནས་པར་བསྟན་པར་བསྟན་པ་ནི། ལུས་རྗེས་སུ་སྤྱོད་པས་སེམས་སྟོང་པའི་རྟེན་བྱེད་ལ། དེ་གཉིས་ཀྱི་འབྲེལ་བ་རླུང་གི་འགྲོ་འོང་གཞི་ཟད་ནས་མེད་པའི་གནད་ནི་སྔར་རླུང་མཁའ་ལ་སྤུར་བ་ལས་བྱུང་བའོ། །དེས་ན་སྐྱེས་པ་སྔ་མ་རང་འགགས་ལ། དེ་ཉིད་ཐོག་ན་ད་ལྟ་མི་གནས། སྐྱེ་བ་ཕྱི་མའི་ལས་སུ་རྟོག་པ་ལ་མི་གནས་པས་ལྡོག་པའི་ས་དང་ཁུངས་འཛོལ་བས་གཞི་མེད་རྩ་བ་ཆད་པ་ཞེས་བྱའོ། །དེས་ན་རྟོག་པ་ཐ་དད་པ་འདི་བདེན་པ་མིན་པ་ཐམས་ཅད་མེད་པར་ཤེས་པས་རྫུན་གྱི་སྣང་བ་ཡིན་པར་གང་ཟག་གང་གིས་ཤེས་པ་ནི། ཁམས་གསུམ་ལ་མི་གནས་པ་ཞེས་བྱའོ། །དེས་ན་གནད་འདི་ཤེས་པ་ཙམ་གྱིས་གྲོལ་བ་ལས། གོམས་པ་རྒྱུད་ལ་བརྟེན་མི་དགོས་ཏེ། དེ་ཡང་གཞན་སྟོབས་མ་ཡིན་པ། རང་སྟོབས་ལ་བརྟེན་ནས་སྐད་ཅིག་མ་ལ་གཅིག་ཅར་དུ་ཁམས་གསུམ་ལས་གྲོལ་བར་འགྱུར་རོ། །ཞེས་ནང་དོན་གསུམ་པ་སྐྱེ་བ་སྔ་ཕྱིར་ལ་མི་གནས་

པའི་གནས་ཀྱི་སེམས་ཀྱི་གོམས་སྟོབས་ལ་མ་བརྟེན་པར་གྲོལ་བར་བསྟན་ནས། ད་ནི་ཡན་ལག་གི་དོན་བཞི་པ་ཁམས་གསུམ་དུ་ལྡོག་པའི་གཞི་སྟོངས་པར་ཕྱེད་པ་རླུང་གི་གནད་ཀྱིས་ཡལ་བའི་དུས་བསྟན་པ་ནི། དེ་ཡང་གཞི་ཟད་པས་འཁོར་བའི་རྟེན་སྟོངས་ལ་རྟོག་པ་གློ་བུར་བ་རང་ཡལ་བས་འགྱུ་བ་རྣམ་པར་དག་པས། འགྱུ་ཤེས་དྲན་པ་གཅོད་པས་ན་སྤུ་གྲིའོ། །དེ་ཡང་འགྱུ་བ་སྔ་ཕྱི་བར་རླུང་ཁ་ནས་ཕུལ་ཏེ་དེད་པས། སྟོང་སར་སྟོངས་ལ། ཡལ་སར་ཡལ་བས་རྟོག་པ་དང་བྲལ་བ་གང་གིས་འཁོར་འདས་ཀྱི་མཚམས་ངོ་མི་ཤེས་པ་ནི། དྲན་པ་ཁུངས་སུ་ཡལ་བས་སྐྱེ་མེད་ཀྱི་གདེང་འཆོས་པའི་རྣལ་འབྱོར་པ་ཞེས་བྱའོ། །དེ་ཡང་ངོ་གར་སྤྲད་ན་སྣང་ཤེས་སྔ་ཕྱིའི་བར་དུ་ངོ་སྤྲད་པས། དེ་གཉིས་ཀྱི་བར་དུ་སེམས་ཉིད་མེད་པ་དང་བཅས་པའི་ཆོས་ཉིད་མཐོང་བས། རྒྱུ་ཁམས་གསུམ་དུ་ལྡོག་བྱའི་ལས་དང་ཉོན་མོངས་པ་སྟོང་ལ། དེ་ཉིད་སྟོངས་པས་འཁོར་བའི་རྒྱུ་ལས་དང་བག་ཆགས་འབྲས་བུ་སྡུག་བསྔལ་སྣ་ཚོགས་པའི་འབྲེལ་ཡེ་གྲོལ་མཐའ་ལ་མི་གནས་པར་ཆད་པས། བཞི་སྣང་འཁྲུལ་པ་ཡོད་ཅེས་པ་དང་། མེད་ཅེས་པའི་ལམ་རྒྱུ་རྐྱེན་རང་འགག་པའི་བར་དུ་སྟོར་པས་འཁོར་འདས་ཀྱི་འབྲེལ་ཆད་པའོ། །ཞེས་དེ་དག་གིས་ནི་སེམས་ཀྱི་དམིགས་གཉིས་སྤྱི་དོན་གཉིས་པ་སེམས་ཀྱི་བྱུང་ས་བཙལ་བས་འཁོར་བའི་གཞི་སྟོངས་པར་བསྟན་པ་ལ་ནང་དོན་བཞིར་བྱས་ནས་བསྟན་ཏོ། །ད་ནི་སྤྱི་དོན་གསུམ་པ་ལུས་སེམས་ཀྱི་འབྲེལ་བ་བརྟག་པ་ཁྱད་པར་དུ་ཆོས་ཉིད་སྐྱོན་ཡོན་རིག་པས་གྲུབ་པར་བསྟན་པ་ལ། ཡན་ལག་གི་དོན་གསུམ་གྱིས་བསྟན་

པའི་དང་པོ་ས་ལམ་གྱི་གོལ་ས་བཅད་པ་སེམས་ཀྱི་གཞི་རྩ་གཏན་ལ་དབབ་པར་བསྟན་པ་ནི། གལ་ཏེ་ཕྱིན་པར་འདོད་པ་ཡིས། །ཞེས་པ་ལ་སོགས་པས་བསྟན་ཏེ། གལ་ཏེ་ས་ལམ་ལ་བརྟེན་ནས་ཕ་རོལ་ཏུ་ཕྱིན་པར་འདོད་པའི་ཐིག་པ་ནི་སླར་དེ་ཉིད་ཀྱིས་བཅིངས་ནས། སླར་འཁོར་ཏེ་སྔ་མའི་ས་འཁོར་བའི་ལས་རྒྱུ་འབྲས་ཀྱི་ལས་ཀྱི་འབྲེལ་གྱིས་ཡང་དང་ཡང་དུ་དེ་ཉིད་འཁོར་བ་ལས་མ་གཏོགས་པ་མེད་པས་ས་དང་ལམ་གཙོ་བོར་བྱེད་པའི་ཐེག་པས་དགོས་པ་ཅི་ཡང་མེད་པས་ན། དེ་ཡང་སྔ་མའི་ས་ལ་གནས་པས་གཞན་ལ་འཇུག་པ་མེད་པའི་ཕྱིར་རོ། །དེའི་ཕྱིར་ན་ཞེ་འདོད་དང་བཅས་པའི་ཆོས་ཀྱི་སེམས་རྟོག་པ་སྣ་ཚོགས་སུ་ཁྲིད་ནས་ལུས་དང་། ངག་དང་། ཡིད་ཀྱི་གནས་ངན་ལེན་དུ་བྱེད་པའི་འགྲོ་བ་མ་དག་པ་ནི། ཁམས་གསུམ་འཁོར་བའི་གཞི་འཛིན་པ་ལས་འགྲོ་ས་གཞན་མེད་དོ། །དེ་གཏན་ཚིགས་གང་གིས་འཛིན་ན། རང་གི་སེམས་ཡོད་པ་དང་། མེད་པ་དང་། སྣང་བ་དང་། སྟོང་པ་ལ་རྟོག་པ་ཉིད་ཀྱིས་བཅིངས་པའི་ཕྱིར་ན། ཐེག་པ་ཐུན་མོང་བའི་གྲུབ་པའི་མཐའ་འཛིན་པའི་འགྲོ་བ་རྣམས་ཁམས་གསུམ་གྱི་སར་ཡང་ནས་ཡང་དུ་འཁོར་བ་ལས་འགྲོ་ས་གཞན་མེད་པས་སོ། །དེའི་ཕྱིར་ན་སེམས་ནི་དྲན་བསམ་རྟོག་པ་སྣ་ཚོགས་འདུས་པའི་ཕྱིར། འགྲོ་བ་ཐ་དད་པའི་གཟུགས་ཅན་དུ་འཁོར་བ་ལས་མེད་པའི་ཕྱིར་རོ། དེ་ལྟར་ཁམས་གསུམ་གྱི་ཁ་ཡང་ནས་ཡང་དུ་འཁོར་བ་ལས་མེད་པའི་ཕྱིར་ན། འཁོར་བ་ཁམས་གསུམ་པའི་སྤྱོད་ཡུལ་ལས་མ་རྟོག་པ། འདས་པ་རྣམ་པར་ཐམས་ཅད་

མཁྱེན་པའི་རང་བཞིན་ཅན་གཉིས་སུ་ཅིས་ཏེ་འབྱུང་བར་རིགས་ཏེ། གལ་ཏེ་རིགས་ན་འཁོར་བའི་མཚན་ཉིད་སྟོང་པས། འདས་པའི་མཚན་ཉིད་ཀྱང་མཐོང་བར་རིགས་ལ། འདས་པའི་མཚན་ཉིད་མཐོང་ན་འཁོར་བ་གྲུབ་པ་ཅིས་རིགས་ཏེ། གཉིས་ཕན་ཚུན་འགལ་བར་ཚ་རེག་དང་གྲང་རེག་བཞིན་ནོ། །གལ་ཏེ་སེམས་ལ་ལྟོས་པས་འགྲོ་བ་དྲུག་གི་གཟུགས་ཐ་དད་པ་ལ་མི་གནས་ན་རང་གི་འདོད་པའི་ལས་དང་བག་ཆགས་མི་བདེན་པའི་སྐྱོན་སྤང་བར་མི་ནུས་ཏེ། བག་ཆགས་ཀྱི་འབྲེལ་མ་ཆོད་པར་འདུག་པར་ལུང་རིག་གིས་ཤེས་སོ། །ས་ལམ་ལ་སོགས་པས་ཡང་བག་ཆགས་ཀྱི་སྡེབ་བསོག་པ་ལ་བརྟེན་པས་སོ། །རིག་པ་ནི་རྒྱུ་འབྲས་རྗེས་མེད་ཀྱི་རིག་པས་འགྲུབ་སྟེ། རྒྱུས་ལམ་ལ་སོགས་པ་སྦྱོར་བ་ཡོད་དོ་རེ་ཤེ་ཡང་། འབྲས་བུ་དེའི་ཐོག་ཏུ་མི་གནས་ཏེ་རྗེས་མེད་པའི་ཕྱིར། དཔེར་ན་ཆུ་ལ་བྲིས་པ་བཞིན་ནོ། །དེ་ཡང་སེམས་སྟོང་པ་དང་། ལུས་དངོས་པོ་གཉིས་ལ་འབྲེལ་བ་མེད་པར་མ་ཤེས་ན། ཁམས་གསུམ་གྱི་གཞི་སྟོངས་མི་སྲིད་པ་ནི། འབྲེལ་བར་གཅོད་གཞི་མེད་ཀྱི་གཏན་ཚིགས་ཀྱིས་འགྲུབ་སྟེ། ལུས་དངོས་པོ་རྫས་སུ་གྲུབ་པ་གཅིག་དང་སེམས། སྟོང་པ་དང་རྩ་བ་གཉིས་དང་པོ་རྒྱུ་མི་གཅིག་པས་རྒྱུ་བདག་ཉིད་གཅིག་པའི་འབྲེལ་པ་ཡང་མེེད་ལ། རྒྱུ་གཅིག་ན་ལུས་སེམས་བྲལ་བའི་ཚེ་ལུས་དངོས་པོ་འདི་བོར་ནས་རོ་འོང་བ་བཞིན་དུ། སེམས་ལ་ཡང་དངོས་པོ་ཡོད་ན་རོ་འོང་བར་འགྱུར་ཏེ། སེམས་ལ་དངོས་པོའི་རོ་མེད་པས་སོ། །དེ་ལས་བྱུང་བའི་འབྲེལ་བ་ཡང་མེད་དོ། །ལུས་ལས་སེམས་མ་བྱུང་བས་སེམས་དངོས་སུ་མི་སྣང་ལ།

སེམས་ལས་ལུས་མ་བྱུང་བས་ན་ལུས་དངོས་པོར་གསལ་བའོ། །དེ་ཡང་གལ་ཏེ་ལུས་ལས་སེམས་བྱུང་ན་སེམས་དངོས་པོར་ཐལ་བའི་སྐྱོན་སྤང་བར་མི་ནུས། སེམས་ལས་ལུས་བྱུང་ན་སེམས་སྟོང་པ་རྒྱུ་མཚན་དང་བཅས་པ་སུས་ཀྱང་མཐོང་བ་མེད་པ་བཞིན་དུ། ལུས་ཀྱང་རྒྱུ་མཚན་སུས་ཀྱང་མཐོང་བ་མེད་པར་རིགས་ཏེ། མངོན་སུམ་གྱིས་གསལ་ལོ། །དོན་དམ་པ་ལ་གྲུབ་པ་མེད་དོ་ཞེ་ན། དོན་དམ་པར་ཆོས་དང་གང་ཟག་ལ་སོགས་པ་གང་ལ་ཡང་གྲུབ་པ་མེད་པར་འདོད་རྟོག་གོ། དེས་ན་ལུས་འབྱུང་བ་ཕྲ་རགས་ལས་གྲུབ་པ་དང་། སེམས་སྟོང་པ་ངོ་བོ། །ངོས་བཟུང་ལས་འདས་པ་གཉིས་ལ་འབྲེལ་པ་ཡོད་ན་གཏན་ཚིགས་གང་གི་ཕྱིར་འབྲེལ་པ་ཡོད་དེ། །དེ་རིག་པས་ཀྱང་མི་འཐད་དོ། །དངོས་པོ་དང་དངོས་པོ་མ་ཡིན་པ་ཁྱད་པར་མི་རྙེད་དོ། །ནམ་མཁའ་ཡང་རྫས་སུ་ཐལ་བའི་སྐྱོན་སྤང་བར་མི་ནུས་སོ། །དེའི་ཕྱིར་ན་སེམས་ཀྱང་བརྡའ་ཙམ། ལུས་ཀྱང་བརྡའ་ཙམ་ལས་དོན་གཉིས་སུ་འབྲེལ་བ་ཤེས་བྱ་མི་སྣང་བའི་ཕྱིར། དཔེར་ན་ནམ་མཁའ་དང་གཟུགས་བརྙན་བཞིན་ནོ། །དེའི་ཕྱིར་ན་རྟོག་པའི་མཐའ་ཉེ་བར་དྲན་པ་དང་ལྡན་པ་ལ་འཁྲུལ་པ་དང་མ་འཁྲུལ་པར་འཛིན་པ་ཅི་ཞེས་བློའི་རིམ་པས་རྟོགས་པས་སོ། །ཞེས་ནང་དོན་དང་པོ་ས་ལམ་ཀྱི་གོལ་ས་བཅད་པ་སེམས་ཀྱི་གཞི་རྩ་གཏན་ལ་དབབ་པར་བསྟན་ནས། ད་ནི་ནང་དོན་གཉིས་པ་ལྟ་སྒོམ་ལ་མ་བརྟེན་པས་གྲོལ་བའི་མཚན་ཉིད་གཏན་ལ་དབབ་པར་བསྟན་པ་ནི། བཀོད་ཅིང་དབྱེ་བ་རྟོགས་པ་ལ་

ཞེས་པ་ལ་སོགས་པས་བསྟན་དེ། ཕྱི་ནང་བའི་བཀོད་པས་གཟུགས་ཆོས་ཉིད་དུ་འཆར་བ་དང་། ནང་གཟུགས་ཀྱི་བཀོད་པས་ཕུང་པོ་ཡེ་སངས་རྒྱས་པ་དང་། གསང་བ་སེམས་ཀྱི་བཀོད་པས་སྟོང་པ་ཉིད་རྒྱུ་རྐྱེན་དང་བྲལ་བར་རྟོག་པ་དང་། དེ་ཁོ་ན་ཉིད་ཚིག་གི་བཀོད་པ་ལ་བརྟེན་ནས་བརྗོད་དུ་མེད་པའི་དོན་རྟོགས་པའོ། །དེ་ལྟར་བཀོད་པའི་དབྱེ་བ་བཞིས་མངོན་སུམ་དུ་རྟོགས་པ་ལ། ཐ་སྙད་བཏགས་པ་རྣམ་གྲངས་ཀྱི་ཆོས་དགོངས་པས་ཅི་ཞིག་བྱ་སྟེ། ཕྱི་སྣང་བ་ལ་སོགས་པའི་མ་རྟོགས་པའི་ཆོས་ལ་སོགས་པ་མེད་དོ། །སེམས་ལས་བྱུང་བ་དང་། དེའི་དྲན་པས་ཚོར་བ་རང་སར་ཡལ་ལ། སེམས་འཛིན་དང་ཞེ་འདོད་ཀྱི་ལྟ་བ་དང་། དམིགས་གཏད་དང་བཅས་པའི་སྒོམ་པ་ཅི་ལ་དགོས་ཏེ། གནད་ཤེས་པའམ་མཐོང་བ་ཙམ་གྱིས་གྲོལ་བས་སོ། །བརྟགས་པ་རྣམ་གྲངས་ཀྱི་ཆོས་ཀྱིས་རང་གིས་སེམས་བཅིངས་པ་ལས་ཕན་པ་གང་དུ་མ་གྲུབ་སྟེ། དེ་ཅིའི་ཕྱིར་ཞེ་ན། བྱ་བ་དང་བྱེད་པ་ལ་ཡིད་བརྟགས་པས་སླར་དེ་ཉིད་ཀྱིས་ཁམས་གསུམ་དུ་འཆིང་བར་བྱེད་དེ། དཔེར་ན་ཐག་པའི་སྒྲོག་གིས་འཆིང་བ་དང་། གསེར་གྱི་སྒྲོག་གིས་འཆིང་བ་ལས་འཆིང་བྱེད་ལ་ཁྱད་མེད་པར་དང་འདྲའོ། །ཆོས་ཀྱིས་སེམས་ཆིང་པས་ན་དེ་ལས་མ་གཏོགས་པའི་གྲོལ་བར་བྱེད་པ་སུ་ཞིག་ཡིན་ཞེ་ན། ལུས་དང་སེམས་འབྲེལ་བ་མེད་པར་རྟོགས་ན། རྣལ་འབྱོར་པ་ལ་དམིགས་གཏད་བློ་དང་བཅས་པའི་སྒོམས་པས་ཆོས་ཉིད་གནད་གྲོལ་བར་འདོད་པར་ཅི་ཞིག་ཡོད་དེ། མ་བསྒོམས་ལྷུག་པར་གནས་པའི་ཆོས་ཉིད་ལ་བསྐྱར་མི་དགོས་སོ། །ཞེས་

ནང་དོན་གཉིས་པ་ལྟ་བསྒོམ་ལ་མ་བརྟེན་པར་གྲོལ་བའི་མཚན་ཉིད་གཏན་ལ་དབབ་པ་བསྟན་ནས། ད་ནི་ནང་དོན་གསུམ་པ་ཆོས་ལས་གྲོལ་བ་རང་ཡལ་བའི་མཚན་ཉིད་དཔེ་ལ་བརྟེན་ནས་རྟོགས་པར་བསྟན་པ་ནི། རང་ཡལ་དཔེ་དང་བཅས་པ་ལ། ཞེས་པ་ལ་སོགས་པས་བསྟན་ཏེ། གཞན་རྣམ་པར་བཅད་པས་རང་ལས་མ་རྟོགས་པའི་ལོགས་པའི་ཆོས་མེད། དེ་ཡང་གཞན་གྱིས་བྱས་པའམ། བཅོས་པ་མ་ཡིན་པར་དེ་ཉིས་སྟོང་སར་སྟོང་བས། ཡལ་བ་ནི་དཔེ་ཞེས་པ། དཔེར་ན་ནམ་མཁའ་ལ་སྤྲིན་ཡལ་བས་སྒྲིབ་བྱེད་གང་གིས་ཀྱང་ཕན་གནོད་མེད་ལ། རྒྱ་མཚོའི་རླབ་རང་ཡལ་བས་འདིར་སོང་གི་གཏད་མེད་ལ། སྨྱོན་པའི་ཤེས་པ་རང་ཡལ་བས་དྲན་པའི་སྟོབས་ཉམས་ལ། སེམས་ལ་རྣམ་རྟོག་གློ་བུར་བ་རང་ཡལ་བས་དྲན་བསམགྱི་ཁུངས་འགག་པའོ། །དེ་ཡང་གནད་དེ་མཐོང་བས་གྲོལ་ལ། གང་མཐོང་གི་དམིགས་གང་སྔས་རྟོག་པ་ཆོད་པ་ལྟ་བུ་དང་། ཤེས་པས་གྲོལ་བ་སྔར་འདྲིས་ཀྱི་མི་ཕྱིས་མཐོང་བ་ཙམ་གྱི་ངོ་ཤེས་པ་ལྟ་བུ་དང་། གནད་དེ་གོམས་པས་གྲོལ་བ་བྲམ་ཟེའི་ཕྲུག་གུ་རིག་བྱེད་ཀྱི་རྨིང་འབྱོངས་བ་ལྟ་བུའོ། །དེ་ཡང་དཔེ་ངོ་སྤྲོད་དང་བཅས་པས་གྲོལ་བའོ། །དེའི་ཕྱིར་ན་བསྟན་པས་མཐོང་ལ་མཐོང་བས་ཤེས་ལ། ཤེས་པས་གྲོལ་བས་ན་དེ་ཉིད་དུ་རྟོགས་པས་བྱ་བ་ཅུང་ཟད་ཙམ་ཡང་མེད་པའི་ཕྱིར། དེར་གང་གིས་ཤེས་ན་དང་པོ་དྲན་བསམ་བྱུང་བའི་ལམ་རླུང་གི་འགྱུ་བ་ཐ་དད་པ་དྲན་མེད་ཀྱི་ངང་དུ་གཏོང་བས། མཐོང་བ་དང་ཚོར་བའི་རྐྱེན།

འགྱུ་བྱེད་སྣ་ཚོགས་པ་རྐྱེན་མེད་ཀྱི་ཀློང་དུ་འགགས་པས་གང་ཟག་འདི་ནི་བརྟགས་པ་རྣམ་གྲངས་ཀྱི་ཆོས་ཞེ་འདོད་དང་བཅས་པ་ལས་གྲོལ་བའོ། །ཞེས་དེ་དག་གིས་ནི་སྤྱི་དོན་གསུམ་པ་ལུས་སེམས་ཀྱི་འབྲེལ་བ་བརྟག་པ་ཁྱད་པར་ཆོས་ཉིད་ཀྱི་སྐྱོན་ཡོན་རིག་པས་འགྲུབ་པར་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ནས། ད་ནི་སྤྱི་དོན་བཞི་པ་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པར་བསྟན་པ་ལ། ཡན་ལག་གི་དོན་གཉིས་ཀྱིས་བསྟན་པའི་དང་པོ་ཆོས་དང་རྟགས་ངེས་པ་རྟོགས་པར་བསྟན་པ་ནི། དེ་ལ་ཕྱི་སྣང་བ་ལ་རྟོག་པ་ནི་ཀུན་བརྟགས་འགེགས་པའི་གཞི། ནང་དབང་པོ་ལ་རྟོག་པ་དངོས་པོ་འགེགས་པའི་ལམ། གསང་བ་འགྱུ་བ་རྟོག་པ་དང་དྲན་རིག་འགེགས་པའི་འབྲས་བུའོ། །དེ་ཡང་ཕྱི་ཡུལ་ལ་གནས་པས་འབྱུང་རྐྱེན་རང་གྲོལ། ནང་སེམས་ལ་གནས་པས་བྱུང་ཚོར་རང་ཡལ་བ་དང་། དྲན་རིག་སེམས་སུ་ཆོད་པས་འཁྲུལ་པ་རང་དག །སེམས་ཉིད་རྩ་མེད་ཆོད་པ་ནི་འཁོར་བ་གཏིང་ནས་བཟློག་པའོ། །དེ་ཡང་ཡུལ་དམིགས་པ་དྲན་པ་གློ་བུར་བ་དང་། དེ་ལུས་ལས་སྐྱེས་པའི་ཕྱིར་ན། ལུས་བོར་བ་དང་། དྲན་པ་ཁུངས་སུ་ཡལ་བའི་གནད་དོ། །དེ་ཉིད་སྟོང་ཉིད་བརྗོད་གཞི་དང་བྲལ་བའི་ངང་དུ་འགག་པ་ནི་འདུས་མ་བྱས་པའི་ཆོས་སོ། །ཕྲ་བ་ཤེས་པ་དང་། ཡང་བ་རླུང་དང་། འགྱུ་བ་བློ་སྟེ། ཤེས་པར་རང་ཡལ་བས་བྱུང་ཚོར་གྱི་སྒོ་འགགས། རླུང་གིས་ལས་རྫོགས་པས་རྣམ་རྟོག་གི་གཞི་སྟོངས་ལ། བློ་ཆོས་ཉིད་འགྱུར་བ་ནི་སྐྱེ་མེད་དྲོད་ལ་ཕེབས་པའི་རྟགས་སོ། །ཞེས་

ནང་དོན་དང་པོ་ཆོས་དང་རྟགས་ངེས་པར་རྟོགས་པར་བསྟན་ནས། ད་ནི་ནང་དོན་གཉིས་པ་སེམས་ཀྱི་རྒྱུ་རྐྱེན་འབྲས་བུ་མེད་པའི་གནད་བསྟན་པ་ནི། དེ་ཡང་དང་པོ་སེམས་ལ་རྒྱུ་མེད་པས་ཁམས་གསུམ་འཁོར་བའི་འཕེལ་བ་མེད་པ་ནི་གཞི་མེད་རྩ་མེད་དུ་རྟོགས་པ་ལས་བྱུང་ལ། སེམས་ལས་རྐྱེན་མེད་པས་སྣང་བ་ཀུན་སྤངས་པ་ནི་ཅིར་སྣང་ཆོས་ཉིད་དུ་ཤེས་པ་ལས་བྱུང་བའི། སེམས་ལ་འབྲས་བུ་འཁོར་འདས་སུ་གྲུབ་པ་མེད་པར་སྣང་བ་དང་། ཤེས་པ་དང་། སྐུ་དང་ཡེ་ཤེས་ཀྱི་ས་བོན་འཁོར་འདས་གོ་ལྡོག་པའི་བར་དུ་སྟོར་བ་ནི། ཆོས་ཉིད་ཀྱི་འགྱུར་བ་ཤེས་པ་ལས་བྱུང་བའོ། །ཞེས་དེ་དག་གིས་ནི་སྤྱི་དོན་བཞི་པའི་ཡིན་ཚུལ་སྟོང་པ་ངོས་བཟུང་བ་གོལ་ས་དགག་པ་བསྟན་པ་ལ་ནང་དོན་གཉིས་སུ་བྱས་ནས་བསྟན་ཏོ། །ད་ནི་དམིགས་གཉིས་པའི་སྤྱི་དོན་ལྔ་པ་ལུས་ངག་ཡིད་གསུམ་གློད་པས་སེམས་ཀྱི་མལ་ས་ངོ་ཤེས་པར་བསྟན་པ་ལ། ཡན་ལག་གི་དོན་བཞིས་བསྟན་པའི་དང་པོ་བསྒྲུབ་བྱ་ཁྱད་པར་གྱི་མཚན་ཉིད་གཏན་ཚིགས་དང་བཅས་ཏེ་བསྟན་པ་ནི། སྟོང་པ་སྤྱོད་པ་མེད་པའི་ཡེ་ཤེས་གང་། ཞེས་པ་ལ་སོགས་པས་བསྟན་ཏེ། སྟོང་པ་སེམས་ལས་མ་བྱུང་པའི་ཡིད་དཔྱོད་བློའི་འགྱུར་བ་མེད་པའི་ཕྱིར་ད་ལྟའི་ཡིད་ཀྱི་རྟོག་པ་གློ་བུར་བར་ཤེས་པ་ཐ་དད་པ་འདི་གང་ལས་བྱུང་ཞེ་ན། ཐོག་མ་འཕེན་པ་ལས་ཀྱི་རླང་མ་དག་པ་ལས་བྱུང་སྟེ། དེའི་གནད་དུ་རླུང་གི་འགྱུ་བ་ཕྱིར་འཕང་བ་གནད་ཡིན་ནོ། །འགྲོ་ཀུན་སེམས་ཀྱི་ཁང་བུ་བཤིག་པས་གྲོལ་བའི་གནད་ནི་རླུང་ལ་བརྟེན་པས་འགྱུ་བ་མེད་པའི་འགྲོ་འོང་ཞེས་བྱ་སྟེ། དེ་ནི་དྲན་རིག་

སྣ་ཚོགས་སུ་སྣང་བའི་སེམས་དེ་གང་ཡིན་ཞེ་ན། ཐོག་མ་གཞི་མེད་རྩ་མེད་དུ་ཤེས་པ་ལས་བྱུང་སྟེ། དེའི་གནད་དུ་རླུང་ཡིད་ཙམ་ནང་དུ་རྡུབ་པའོ། །སེམས་ལ་རྒྱུ་རྐྱེན་གང་དུ་ཡང་མ་གྲུབ་པས་ལས་མེད་པས། ཉོན་མོངས་བདག་ཏུ་རྟོག་པའི་སྒྲིབ་པ་ཟད་པའི་ཕྱིར། ལུང་ལས་མ་བྱུང་བའི་གྲུབ་མཐའ་ཞེས་བྱ་སྟེ། གཞི་དངོས་པོའི་གཤིས་ཞེས་བྱ་བ་དེ་ཅི་ཡིན་ཞེ་ན། སེམས་ཉིད་དྲན་བསམ་གློ་བུར་བ་འདུས་པའི་འཁོར་ལོར་མ་ཤེས་པ་ལས་བྱུང་བའོ། །དེའི་གནད་དུ་གློ་བུར་གྱི་ཤེས་པ་ནམ་མཁའ་ལ་འཕངས་པ་གནད་ཡིན་ནོ། །སེམས་ནི་ཐོག་མ་གང་ནས་ཀྱང་མ་འོངས་ད་འགྲོ་བའི་ས་མེད་པའི་ཕྱིར། སེམས་ལས་རྟོག་པ་སྣ་ཚོགས་སུ་འཇུག་པའི་ཡུལ་དེས་སུ་ཡིན་ཤེས་ན། སྣང་རྟགས་རང་གྲོལ་བའི་ཆོས་ཉིད་དུ་མ་ཤེས་པ་ལས་བྱུང་བ་སྟེ། དེའི་གནད་དུ་གང་སྣང་གི་སྟེང་དུ་གང་འགྱུས་བཞག་པ་ཡིན་ནོ། །དེའི་ཕྱིར་ན་ཀུན་གཞི་ལས་མ་བྱུང་བའི་ཆོས་སྐུ་ཞེས་བྱའོ། །སེམས་ཀྱི་རྟོག་པ་རྣམས་རང་ཡལ་བས་གང་དུ་ཡང་འཁོར་ས་མེད་པའི་ཕྱིར། གདམས་ངག་ལས་མ་བྱུང་བའི་ལྟ་སྒོམ་ཞེས་བྱ་སྟེ། དེའི་ཕྱིར་ན་འགྲོ་བ་དྲུག་གི་གནས་སྟོངས་པས་རླུང་གི་འགྲོ་བའི་ལམ་ཟད་པའི་ཕྱིར། དོན་དམ་པ་དང་ཀུན་རྫོབ་ཀྱི་བདེན་པ་ཅི་ཡིན་ཞེ་ན། གཉིས་མེད་གཞི་གྲོལ་དུ་ཤེས་པ་ལས་བྱུང་སྟེ། དེའི་གནད་དུ་སྒྱུ་མ་དང་རྨི་ལམ་གྱི་རྗེས་ལྟ་བ་གནད་ཡིན་ནོ། །དེའི་ཕྱིར་ན་གོམས་པ་ལས་མ་བྱུང་བའི་ཉམས་མྱོང་ཞེས་བྱའོ། །ཞེས་ནང་དོན་དང་པོ་བསྒྲུབ་བྱ་ཁྱད་པར་གྱི་མཚན་ཉིད་གཏན་ཚིགས་དང་བཅས་ཏེ་བསྟན་ནས། ད་ནི་དམིགས་གཉིས་པའི་བསྡུས་དོན་བཞི་པའི་ནང་དོན་གཉིས་པ་སྐྱེ་ཤི་ལ་བཟླ་བ་འཁྲུལ་གཞི་རང་སྟོངས་པར་བསྟན་པ་ནི། སྐྱེ་བས་ནི་དྲན་པ་གློ་བུར་བ། ཤི་ལ་ནི་དེ་ཉིད་ཡལ་སར་ཡལ་བར་རྗེས་མེད་པའོ། །ཤི་བས་ནི་དེའི་རྗེས་

མ་བཅད་པར་རང་སར་བཞག་ནས་ཤེས་བཞིན་གྱི་རྩིས་ཐེབས་པའོ། །ཤི་བས་ནི་དྲན་རྟོག་ཟད་སར་ཟད་པས་ལས་དང་ཉོན་མོངས་པ་ཡལ་བའོ། །ཡལ་བས་དྲན་པར་དབྱིངས་སུ་ཐིམ་པས་མཐའི་རྟོག་པ་འགགས་ལ། དངོས་པོ་རང་རྒྱུད་དུ་འཛིན་པ་སྟོངས་ལ། རྟོག་པ་རགས་པ་རྣམས་མཐར་གྱིས་སྟོངས་པས་འཁྲུལ་པ་ལོག་པའི་ཤེས་པར་སྣང་བ་མེད་པའོ། །ཞེས་ནང་དོན་གཉིས་པ་སྐྱེ་ཤི་ལ་ལྟ་བས་འཁྲུལ་གཞི་རང་སྟོངས་པར་བསྟན་ནས། ད་ནི་ནང་དོན་གསུམ་པ་རླུང་གི་གནད་ལ་བརྟེན་ནས་རྟོག་པ་ཡལ་བར་བྱེད་པའི་ཐབས་བསྟན་པ་ནི། རླུང་ཤེས་ནམ་མཁའ་ལ་འཕངས་པས་འཁྲུལ་པ་ལོག་པའི་ཤེས་པ་སྣང་བ། སྣང་བ་ཕྱི་རོལ་གྱི་ཡུལ་ལ་སྣང་བ་ནི། ཆོས་ཉིད་མངོན་སུམ་དུ་སྣང་བ་སྟེ། དེ་ལས་མ་འདས་པས་སྒྲོ་འདོགས་པའི་ཚིག་གི་མཐའ་ཆོད་པའོ། །ཡེ་ཤེས་ཀྱི་སྣང་བས་རང་བྱུང་གི་ཡེ་ཤེས་ཉིད་གཉེན་པོ་ལས་འདས་པའོ། །ལུས་ངག་སོ་གློད་པས་རླུང་གྱེད་ལ་དབང་ཐོབ་པའོ། །སེམས་སོ་གློོད་པས་རླུང་གི་དལ་བ་རྙེད་པས། འཁྲུལ་པ་དུས་གཅིག་ལ་འགགས་པས། ཆོས་ཉིད་ཀྱི་གཞི་ཡངས་ལ། དེའི་ཕྱིར་ན་སེམས་མ་བཅོས་ན་གསལ་བ་སྟེ། དཔེར་ན་ཆུ་མ་རྙོག་ན་རང་དྭངས་པ་ལྟ་བུའོ། །ཆོས་ཉིད་ཇི་ལྟར་ཚད་དུ་ཤར་བས་ཡངས་པ་སྟེ་གང་ལ་བརྟེན་ནས་ཀྱང་གྲོལ་བས་ན། རྟོག་པ་རགས་པ་རྣམས་འཆིང་བ་ནི་རླུང་སེམས་ཕྱིར་ཁ་ནས་གཏོན་ནས་འཕངས་པ་ལས་བྱུང་བའོ། །དེ་ཡང་ཕྱི་རོལ་གྱི་ཡུལ་ལ་ཆོས་ཉིད་གསལ་བས་རྣམ་པར་རྟོག་པ་ཐམས་ཅད་དུས་

གཅིག་ལ་ནུབ་པ་ནི། ཆོས་ཉིད་རང་ངོ་ལ་ཐིམ་པ་ཞེས་བྱའོ། །དེ་ལྟར་རྣམ་རྟོག་ནུབ་པས་དྲན་པ་རང་ཡལ་བ་ནི་ཆོས་ཉིད་མ་ཐོག་ཏུ་ཐིམ་པ་སྟེ། དྲན་པ་རླུང་གིས་འགྲོ་འོང་གིས་བཅད་པ་ཞེས་བྱའོ། །ཞེས་ནང་དོན་གསུམ་པ་རླུང་གི་གནད་ལ་བརྟེན་ནས་རྟོག་པ་ཡལ་བའི་ཐབས་བསྟན་ནས། ད་ནི་ནང་དོན་བཞི་པ་སེམས་ལ་གནོད་པ་གྲུབ་མཐའི་བློས་བཏགས་ཀྱིས་ཆོས་ཀྱི་གོལ་ས་རྣམ་པར་བཅད་པ་བསྟན་པ་ནི། ལུས་སེམས་བདེ་བར་འདོད་པའི་སེམས་ཀྱི་འགྲོ་འོང་ལ་རྟོག་པའི་ཆོས་ཀྱིས་འཆིང་བ་ལས། ཆོས་ཉིད་རྟོག་པ་ལ་ཕན་པ་ཅི་ཡང་མེད་པས་ན། དེ་ནི་རྟོག་པ་འདུས་པ་འབའ་ཞིག་ཡིན་པས་ན། བྱ་བ་དང་བྲལ་བའི་ཆོས་མ་ཡིན་ནོ། །ཚིག་གིས་རང་གི་ཚིག་སྐྱོབ་པ་ལ་གཞན་གྱི་ཆོས་ཚིག་ལ་གནོད་པའི་རིག་པ་སྟོང་པའི་གྲུབ་མཐས་བློ་སྤྲོས་པ་དང་བཅས་པས་གཞན་པ་ལས་ཕན་པ་ཅི་ཡང་མེད་པའོ། །དེའི་ཕྱིར་ན་ཆོས་ཉིད་གནད་ཐོག་ཏུ་གྲོལ་བའི་མན་ངག་ནི་ཤེས་པ་ཙམ་གྱིས་གྲོལ་བས་སོ། །ཡང་ཁ་ཅིག་བློ་དང་བཅས་པས་བསྒོམ་པས་སེམས་མ་ཤེས་པ་གཟེངས་བསྟོད་ནས། ལུས་ཀྱང་བཅོས་ནས། ཤེས་པ་ལ་སྒྲིན་བསྐུར་ནས། སེམས་རང་གསལ་ཙམ་ལ་ངལ་སོས་ནས། རང་རིག་གསལ་བ་མྱོང་བ་ལ་བདེ་བར་འདོད་པས་ནི། སླར་འཁོར་བའི་ནང་གནས་ཀྱི་གཟུགས་མེད་པ་རྣམ་ཤེས་མཐའ་ཡས་ཀྱི་སྐྱེ་མཆེད་དུ་འཇུག་པར་བྱེད་པ་ལས། ཁམས་གསུམ་ལས་འཆོས་པའི་ཆོས་མ་ཡིན་ནོ། །དེའི་ཕྱིར་ན་མ་བཅོས་རང་བཞག་ཆེན་པོའི་གནད་གཟིར་བས་འཁྲུལ་སྣང་འཁོར་བ་རྒྱུན་ཆད་པའོ། །ཡང་རྩོལ་བས་ཡུལ་འཚོལ་བའི་སྒོམ་པ་

ལུས་སྐྱིལ་ཀྲུང་དུ་བཅས་ནས། རླུང་ཕྱིར་འགྲོ་བ་བཀག་ནས་ལུས་ཀྱི་ནང་དུ་སྡིགས་ནས་བསྒོམས་ལ། སེམས་ཀྱི་འགྱུ་བ་ལ་རྟོག་པས་རང་གི་སེམས་ཀྱི་མཚན་ཉིད་སྟོང་པ་ངོས་བཟུང་དང་བྲལ་བ་མི་ཤེས་ཏེ། དེའི་ཕྱིར་ན་སེམས་ཀྱི་སེམས་ལ་བལྟས་པས་རྗེས་མེད། སྣང་བ་སྣང་ཐོག་ནས་གྲོལ་བས་འཁོར་རྐྱེན་ཆོས་ཉིད་དུ་ཤར་བ་དང་། ཤེས་པ་དང་། ཤེས་པ་འགྱུ་ཐོག་ནས་གྲོལ་བས། དྲན་བསམ་རང་ངོ་ལ་ཡལ་བའི་གནད་སེམས་ཀྱིས་ཟད་ས་མི་ཤེས་པས་དེ་དག་གིས་སླར་ཁམས་གསུམ་དུ་འཆིང་བ་ལས་མ་གཏོགས་པ་གཞན་ཅི་ཡང་མེད་དོ། །ཡང་ལུས་ཀྱི་བྱ་བ་རྒྱན་ཆ་སྣ་ཚོགས་པས་བརྒྱན་ནས། དུར་ཁྲོད་ལ་སོགས་པར་ཡན་ལག་གི་བྱེད་པ་སྣ་ཚོགས་པས་ལམ་དུ་སློང་བར་བྱེད་པའི་སྤྱོད་པས་བཅིངས་པ་ནི་ཐར་པ་དང་ཐམས་ཅད་མཁྱེན་པའི་གེགས་སུ་བྱེད་པ་ལས་མ་གཏོགས་པ། ཆོས་ཉིད་རང་ཐོག་ཏུ་ཕེབས་པ་མ་ཡིན་ནོ། །དེའི་ཕྱིར་སྣང་བས་རྟོག་པ་དུ་མའི་ཞེན་པ་གཅོད་པའི་གནད་མེད་པར། དྲན་བསམ་ཡུལ་གྱི་རྟོག་པ་སྡུད་པས་ཁམས་གསུམ་དུ་འཁྲིད་པར་བྱེད་པའོ། །ཡང་དཀྱིལ་འཁོར་དང་རྫས་ལ་བརྟེན་ནས་ལུས་ལ་དབང་བསྐུར་བ་ལ་བརྟེན་ནས། སེམས་ལ་བྱིན་རླབས་འཆར་བ་འདོད་པས་ནི། སླར་ཡང་ཁམས་གསུམ་དུ་འཆིང་བར་བྱེད་པའོ། །དེའི་ཕྱིར་རང་བཞིན་མ་བཅོས་རྣལ་མའི་རྒྱ་མེད་པར། ཀུན་བརྟགས་ཡུལ་ལ་གཙོར་བྱེད་པས་རང་རིག་གི་གནད་མི་མཐོང་བའོ། །དེ་དག་གིས་བསྡུས་པའི་དོན་ལྔ་པ་ལུས་ངག་ཡིད་གློད་པ་ཙམ་གྱིས་སེམས་ཀྱི་ཡལ་ས་ངོ་ཤེས་པར་བསྟན་པ་ལ་ཡན་ལག་གི་དོན་བཞིར་བྱས་

ནས་བསྟན་ཏོ།། །།ད་ནི་སྤྱི་དོན་དྲུག་པར་ཆོས་ཉིད་དེ་གློད་པ་རང་གི་གནད་དང་ཚད་བསྟན་པ་ལ་ཡན་ལག་གི་དོན་དྲུག་གིས་བསྟན་པའི་དང་པོ། སེམས་གློད་པའི་གནད་ཀྱིས་བཅོས་གོལ་བར་བསྟན་པ་ནི། གང་གིས་མ་བཅིངས་སེམས་འདི་ཉིད་ཅེས་པ་ལ་སོགས་པས་བསྟན་ཏེ། དྲན་པ་དང་རྟོག་པ་གང་གིས་ཀྱང་མ་བཅིངས་པར་རང་སོ་ན་གནས་པ་སེམས་འདི་ཉིད་ནི། གང་སྣང་གི་སྟེང་དུ་བཞག་པས་ཤེས་པ་གཅོད་བྱེད་ཕྱིར་མ་བལྟས། ཡིན་པ་ལ་བདག་ཏུ་མེད་པ་ཞེས་བྱའོ། །དེ་ཡང་རང་སྣང་གི་སྟེང་དུ་གློད་པ་ཙམ་གྱིས་གྲོལ་བ་ལ། སེམས་ལ་གསལ་བའམ་སྟོང་པར་གཟེག་བསྐུར་ནས་བསྒོམ་པ་ནི། སླར་འཆིང་སྟེ། གཏན་ཚིགས་ཅིའི་ཕྱིར་ན། ངོ་བོ་སྟོང་པས་མཚན་ཉིད་ལ་བཅོས་སུ་མེད་པས། བཅོས་ན་སླར་འཆིང་བའི་ཕྱིར་རོ། །ཞེས་ནང་དོན་དང་པོའོ། །ད་ནི་ནང་དོན་གཉིས་པ་དྲན་རྟོག་རང་ཡལ་བས་ཆོས་ཉིད་ལས་འཁྱེར་ས་མེད་པར་བསྟན་པ་ནི། འཇུག་ནས་ཞེས་པ་སོགས་པས་བསྟན་ཏེ། དེ་ཡང་ཡུལ་ཀུན་ལ་འཇུག་ནུས་ཤིང་རང་གི་སེམས་གཞི་རྩ་མེད་པ་ལ་འཆིང་བའི་དྲན་པ་ཆོས་ཉིད་ཀྱི་ཀློང་དུ་ཐིམ་པ་ནི། དྲན་བསམ་གྱི་འཁོར་ལོ་ལ་མི་གནས་པ་ཉིད་དོ། །དེ་ཡང་དྲན་པ་གང་ལ་སྣང་བ་སྣང་ཐོག་སོ་སོའི་རང་སར་ཡལ་བ་ལ། སྔ་ཕྱིའི་སྡེབས་དང་འགྲོ་ས་མེད་པས། རྟོག་མེད་ཀྱི་བསམ་གཏན་སེམས་བཟུང་ན་བསྒོམ་པ་སླར་དྲན་པ་རྒྱུད་ལ་བརྟེན་པར་འགྲོ་བས། དེ་ཡང་ཅིའི་ཕྱིར་དྲན་པ་བརྟེན་ཞེ་ན། རྟོག་དཔྱོད་ཡུལ་གྱི་ཤེས་པ་ནང་དུ་བཟུང་བས། སྣང་བ་ཕྲ་བའི་ཞེན་པ་རང་རྒྱུད་དུ་བཟུང་བས་དྲན་པ་སླར་རགས་སུ་སོང་བའོ། །ཞེས་

ནང་དོན་གཉིས་པ་དྲན་རྟོག་རང་སར་ཡལ་བའི་ཆོས་ཉིད་ལས་འཁྱེར་ས་མེད་པར་བསྟན་ནས། ད་ནི་ནང་དོན་གསུམ་པ་དྲན་པ་རང་ཡལ་བའི་གནད་ལ་བརྟེན་ནས་གཏན་ཚིགས་དང་བཅས་པ་བསྟན་པ་ནི། དེ་ཡང་རང་ལུས་དངོས་པོར་རང་རྒྱུད་པ་འབྱུང་བ་བཞིའི་བྱེད་པོ་དང་བཅས་པ་དང་། སེམས་དངོས་མེད་སྟོང་པ་རྒྱུ་རྐྱེན་དུ་མ་གྲུབ་པ་གཉིས་འདྲེས་ཤིང་དུས་མཚུངས་པ་ལ། གནད་དུ་ལུས་སེམས་ཀྱི་འབྲེལ་པ་བཅད་པའི་མན་ངག་རླུང་སེམས་ཡ་བྲལ་ནས་བསླབ་པ་ཙམ་གྱིས་དྲན་པ་སྟོངས་པ་ལ་ཆོས་ཉིད་ཡིན་ལ། ཨ་དང་ཧཱུྃ་ལ་སོགས་པས་ལུས་ཁྲོ་བའི་སྐུར་བདག་ཏུ་གཟུགས་སུ་སློང་བ་ཅིའི་ཕྱིར་ཏེ། དངོས་པོ་གཅིག་ལ་གཟུགས་བརྙན་ཐ་དད་པ་མི་རུང་ངོ་། །ཞེས་ནང་དོན་གསུམ་པ་དྲན་པ་རང་ཡལ་བའི་གནད་ལ་བརྟེན་ནས་གཏན་ཚིགས་དང་བཅས་པ་བསྟན་ནས། ད་ནི་ནང་དོན་བཞི་པ་གཅིག་ཤེས་ཀུན་གྲོལ་བའི་གནད་ཀྱིས་ཐ་སྙད་རྣམས་རང་འགགས་པར་བསྟན་པ་ནི། གཅིག་ཆོས་ཉིད་དུ་ཤེས་པས་ཐ་སྙད་ཀུན་ལས་གྲོལ་བའི་རང་བཞིན་ལ་བྱ་བ་བྱེད་པས་གནོད་པ་ནི། ལུས་ངག་གི་བྱ་བ་དང་བྲལ་བ་ལ་ཤེས་པ་གླེན་ལྷོད་ཀྱིས་སོང་ན་སྤྱོད་པ་ཤུགས་ཀྱིས་ཡངས་པས་རྟོག་པ་ལས་གྲུབ་མཐའི་ཐ་སྙད་བརྗོད་པའི་ཚིག་གི་མཐའ་ལ་མཇལ་བ་ཅིའི་ཕྱིར་ཞེས་ནང་དོན་བཞི་པའོ། །ད་ནི་ནང་དོན་ལྔ་པ་དེ་ཡང་རང་གྲོལ་གཅིག་གི་འཁོར་ལོས་མ་འདས་པར་བསྟན་པ་ནི། ཉོན་མོངས་པ་ལྔ་པོ་བྱང་ཆུབ་ཐོབ་པར་བྱེད་པའི་ས་བོན་ཡིན་པ་ལ། རང་གྲོལ་གཉེན་པོ་གཞན་ལ་མ་ལྟོས་པར་བཞག་པ་ཙམ་གྱིས་གྲོལ་བ་ལས། ལམ་ལྔ་འདོད་པ་དང་སའི་གྲངས་དང་

གཉེན་པོ་འདོད་པ་ཅིའི་ཕྱིར་ཞེས་ནང་དོན་ལྔ་པའོ། །ད་ནི་ནང་དོན་དྲུག་པ་དེ་གཉིས་ཀྱི་གྲོལ་ས་བསྟན་པ་ནི། གང་ལས་ཀྱང་མ་བྱུང་བས་བྱ་བ་ལས་གྲོལ་བ་ནི། གང་དུ་ཡང་མ་སོང་བས་སྤང་བླང་དུ་ཡང་མེད་པས་སོ། །དེས་གང་ཡང་གནས་ཤིང་འགྱུར་བ་མེད་པ་ཉིད་དོ། །དེ་ཡང་རང་ངོ་སྤྲད་པ་ཙམ་ལས་ཅི་ཞིག་བྱ་སྟེ་འབད་པ་བྱ་མི་དགོས་སོ། །ཞེས་རྣམ་པ་ཡུལ་རྟོག་པ་དྲན་པ་གཅོད་པའི་གནད་སྤུ་གྲི་ལྟ་བུ་ལ་སེམས་ཀྱི་ཡུལ་བསྟན། དམིགས་བསླབ་བྱ་གཉིས་པ་ལ་བསྡུས་པའི་དོན་དྲུག་ཏུ་བྱས་ནས་བསྟན་ཏོ། །མཁས་པ་བྱེ་མ་ལས་རྣམ་པར་བཤད་པའོ། །ཨྠྀི། རྒྱ་རྒྱ་རྒྱ། །ས་མ་ཡཱ།། །། ༈ སེམས་ཀྱི་དམིགས་གསུམ་པའི་རྣམ་པར་བཤད་པ་ནི། འདི་ལ་བསྡུས་པའི་དོན་གཉིས་ཏེ། དེ་ལ་སྤྱི་དོན་དང་པོ་གནད་ལ་བརྟེན་ནས་ཁྱད་པར་ཡེ་ཤེས་ཀྱི་བབས་ལྟ་བ་དང་། སྤྱི་དོན་གཉིས་པ་སེམས་དང་ཡེ་ཤེས་ཀྱི་དབྱེ་བ་གཏན་ཚིགས་དང་བཅས་ཏེ་བསྟན་པའོ། །དེ་ལ་སྤྱི་དོན་དང་པོ་གནད་ལ་བསྟན་ནས་ཁྱད་པར་ཡེ་ཤེས་ཀྱི་སྣང་བ་བསྟན་པ་ལ། ཡན་ལག་གི་དོན་དགུས་བསྟན་པའི་དང་པོ་རླུང་གནས་རིན་པོ་ཆེ་ལ་བརྟེན་ནས་སངས་རྒྱས་ཀྱི་ཞིང་ཁམས་རང་ལ་རྫོགས་པ་བསྟན་པ་ནི། གང་གིས་རླུང་ལ་གོམས་པ་ཡིས། །ཞེས་པ་ལ་སོགས་པས་བསྟན་ཏེ། གང་གིས་ཞེས་འགྲོ་བ་གང་ཟག་སྨོས་པ་སྟེ། རླུང་ཕར་འཕེན་པ་ལ་གོམས་པར་བྱས་པ་ཡིས། བཏགས་པ་རྣམ་གྲངས་ཀྱི་ཆོས་རྣམས་ཐམས་ཅད་འཇིག་པར་བྱེད་པ་ནི། ཚད་རང་ལ་ཟིན་པས་སོ། །སེམས་ཀྱི་དམིགས་ནི་བསླབ་བྱའི་རིམ་པ་དྲུག་དཔེ་དང་བཅས་པ་ལ་མཁས་པ་ནི་

ལག་ལེན་ཁྲིག་ཆགས་སུ་སྟོན་ཤེས་པས་འགྲོ་བ་ལྷ་ལ་སོགས་པ་དྲུག་གིས་འབྲོས་པའི་ཁུངས་སྲིད་པའི་བར་དོ་ལམ་བྱུང་ནས་སོ་སོའི་མངལ་གྱི་སྒོར་འཛུད་པ་ནི། རླུང་གི་བྱེད་པའི་ལས་བྱེད་པ་སྟེ། དེ་གཅོད་པར་བྱེད་པ་སེམས་ཀྱི་ཁང་བུ་ཞིག་པར་བྱེད་པ་སྔོན་འགྲོ་དང་། དངོས་གཞིའི་ལག་ལེན་ནོ། །དེ་ཡང་སློབ་པའི་གང་ཟག་གིས་སྔར་འགྱུ་བ་ཡལ་ལ། ཕྱི་མའི་འགྱུ་བ་སྣ་སྟེབས་པའི་བར་དུ་ཡལ་བའི་མཚམས་དྲན་རིག་གང་གིས་ཀྱང་མ་བཟུང་བའི་དུས་སུ་ཤེས་པ་གཏད་པས། དྲན་རེག་དབྱིངས་ལ་ཐིམ་ནས། འགྱུ་བ་ཁོག་སངས་པ་ཞེས་བྱ་བའི་ཉམས་སུ་མྱོང་བ་རྒྱུད་ལ་འཆར་རོ། །་དེ་ལྟར་ན་ཡུལ་གྱི་རྐྱེན་གང་སྣང་གི་སྟེང་དུ་བཞག་པས་རྣམ་ཤེས་གཅིག་ཏུ་སྡུད་པའི་ཐབས་ནི་རླུང་འགྲོ་བ་ལ་བརྟེན་ནས། ནང་དུ་མེར་གྱིས་གང་བའི་ཚེ། རྣམ་པར་རྟོག་པར་རང་སོར་སངས་ནས། ཡེ་ཤེས་རང་ངོ་ལ་རྒྱས་ཏེ། ཆོས་ཉིད་ཀྱི་ཞིང་ཁམས་སུ་མི་ལྡོག་པས་རང་རྫོགས་པའོ། །ཞེས་ནང་དོན་དང་པོ་རླུང་གནད་རིན་པོ་ཆེ་ལ་བརྟེན་ནས་བུ་ཐུ་བོའི་ཞིང་ཁམས་རྫོགས་པར་བསྟན་ནས། ད་ནི་ནང་དོན་གཉིས་པ་ཡལ་བའི་དུས་ངེས་པ་ཁྱད་པར་ཀྱི་མཆོད་བྱ་ལས་བྱུང་བ་བསྟན་པ་ནི། དེ་ཡང་མཆོད་པ་ཞེས་པ་གཏོར་བ་ཁྱད་པར་གྱི་བྱེ་བྲག་སྟེ། དེ་མཆོད་པར་བྱེད་པའི་གནད་དུ་མ་ཆགས་མི་གཡོ་བའི་རླུང་ལ་གཏད་པས་ཁམས་གསུམ་དུས་གཅིག་ལ་གྲོལ་བའོ། །དེ་ལྟར་སེམས་སྡེ་ལས། བླ་མ་མཆོད་དང་གཏོང་བ་དང་། །དེ་བཞིན་བསོད་ནམས་ཐམས་ཅད་ལས། །མ་ཆགས་མི་གཡོའི་སྟོབས་མེད་ན། །བྱས་ན་འཆིང་བ་ཆེན་པོར་འགྱུར། །ཞེས་པས་སོ། །དེ་ལ་འགྲོ་བ་

ནི་རླུང་རྣམས་ཀྱིས་ནི་ཕྱིར་འགྲོ་ནང་དུ་འགེངས་པའོ། །དམིགས་ནི་ཉམས་དང་རྟོགས་པ་གསལ་བར་བྱེད་པའོ། །སེམས་ཀྱི་ཡལ་དུས་ནི་སྣང་སྟོང་གང་དུའང་མ་ཕྱེ་བའི་དུས་སོ། །དེ་རང་གི་རླུང་ལ་མངོན་པར་འགྲོ་འོང་མེད་པ་ཉིད་དུ་རྟོགས་པ་ནི། རླུང་སྔ་མ་འདས་པ་དང་ཕྱི་མ་མ་འོངས་པའི་མཚམས་དྲན་རྟོག་རང་ཡལ་ལ་མཁས་པའོ། །ཞེས་པ་ནང་དོན་གཉིས་པའོ།། །།ད་ནི་ནང་དོན་གསུམ་པ་བསླབ་པར་བྱ་བ་ཐུན་མོང་མ་ཡིན་པའི་གནད་བསྟན་པ་ནི། རིག་པའི་ངོ་བོ་སྟོང་པ་རང་བཞིན་གྱིས་གསལ་བའོ། །ཡེ་ཤེས་ནི་གཞི་གནས་དང་ཀ་དག་ལྷུན་གྲུབ་ཐུགས་རྗེ་ཀུན་ཁྱབ་གྱི་ཡེ་ཤེས་སོ། །མཚན་ཉིདའཛིན་པ་ཡེ་ཤེས་རྣམ་པ་ལྔའོ་དང་། ཤེས་བྱས་བསྡུས་པའི་ཡེ་ཤེས་ཇི་ལྟ་བ་དང་ཇི་སྙེད་པའི་ཡེ་ཤེས་སོ། ལོགས་པ་ནི་སློབ་པའི་གང་ཟག་གིས་གྱང་ངམ་རྩིག་ལོགས་ལ་རང་གི་སྙིང་གར་ཤིང་གཏད་ནས། དེ་ལ་རླུང་ཤེས་བཅུག་ནས་ཡུན་རིང་བསླབས་པས་གང་ལ་ཡང་ཟང་ཐལ་བར་རྒྱུ་ནུས་པ་དག་ཏུ་འགྱུར་ལ། མི་སློབ་པས་དེ་ཉིད་གཏད་པ་ཙམ་གྱིས་གནད་དེ་ཤེས་པ་ཙམ་གྱིས་གྲོལ་བའོ། །དེ་ནི་སློབ་པ་དང་མི་སློབ་པ་གཉིས་ཀས་ལུས་འབྱུང་བ་ས་ཆུ་མེ་རླུང་བཞིས་སེམས་བཅིངས་པ་ལས་གྲོལ་ནས། ལུས་འབྱུང་བ་བཞིའི་ཆར་པ་ལ་ཐོགས་པ་མེད་པ་རྒྱུ་བར་ནུས་པ་དག་འབྱུང་ངོ་། །དེ་ལ་ལུས་འབྱུང་བ་རྡུལ་ཕྲ་རབ་ཀྱི་རྟོག་པ་སངས་པས་ལུས་ཀྱང་སངས་སེང་དུ་མཐོང་ལ། ནང་སེམས་ཉིད་ཟད་པའི་མཐར་གྲོལ་བས། རང་ངོ་ཡེ་ཤེས་སུ་རྒྱས་པའི་དྲི་མ་འབྱུང་བ་ཕྲ་རགས་ལ་བདག་ཏུ་བཅིངས་པ་ངོ་ཤེས་པའི་རྣལ་འབྱོར་དེས་ནི་རི་བྲག་རྣམས་ལ་ཟང་ཐལ་བར་རྒྱུ་བར་ནུས་སོ། །ཞེས་ནང་

དོན་གསུམ་པ་བསྟན་ནས། ད་ནི་ནང་དོན་བཞི་པ་གནས་པ་རྩའི་གནད་ལ་བརྟེན་ནས་བཙན་ཐབས་སུ་སངས་རྒྱ་བར་བསྟན་པ་ནི། ད་རེས་རིག་པ་ནི་འགྱུ་བའི་ཆ་ནས་བཞག་ལ། ཡེ་ཤེས་ནི་གསལ་ཙམ་ལ་བཞག་ལ། སྦུར་བ་ནི་སློབ་པ་རང་གི་ལུས་དཀྱིལ་ན་རྩ་ཕྱི་དཀར་བ། ནང་དམར་བ། ཁ་ཆེ་ལ་རྩ་བ་ཕྲ་བ་སྙིང་གི་དཀྱིལ་ནས་ལམ་བྱུང་སྟེ་མིག་ལ་ཟུག་ནས་ཡོད་དེ། དེའི་ནང་ནས་རླུང་སེམས་དྲངས་ལ་མཁའ་ལ་བཏོན་པས་རླུང་སེམས་ཆོས་ཉིད་དུ་འགྱུར་བའོ། །གཉིད་དང་རྨི་ལམ་གྱི་རྣལ་འབྱོར་བྱེད་པ་དྲན་པ་རྩ་ནང་དུ་བསྟིམས་ལ། ཁ་ལ་ཡི་གེའི་རྒྱས་ཨ་དཀར་པོས་བཏབ་ནས་གཉིས་ཀྱི་རྣལ་འབྱོར་དུ་བྱས་ནས། གཉིད་འོད་གསལ་གྱི་གནད་ཀྱིས་གཉིད་འོད་གསལ་རྟོག་པ་མེད་པ་དང་རྨི་ལམ་ཆོས་ཉིད་དུ་འགྱུར་བའི་རྣལ་འབྱོར་དམ་པའོ། །ཞེས་ནང་དོན་བཞི་པའོ།། །།ད་ནི་ནང་དོན་ལྔ་པ་རླུང་། སྤུར་བའི་གནས་ཀྱིས་ལུས་སེམས་ཀྱི་འབྲེལ་བ་བཅད་པར་བསྟན་པ་ནི། རིག་པའི་འཕེན་པ། ཡེ་ཤེས་ནི་ཕྱིར་གསལ་བ། མཁའ་ནི་སློབ་པས་ལུས་ཀྱི་གནད་ལ་བརྟེན་ནས། ཕྱིར་འཕངས་པས། རང་བཞིན་གྱིས་འབྲེལ་བ་དག །འབྱུང་བའི་གནད་ཀྱིས་རླུང་ཕྱིར་ཕུལ་བས་རིག་པ་རང་སར་དྭངས་ཏེ། ཡུལ་དམིགས་ལ་སོགས་པ་གཟུགས་ལ་རྟོག་པ། སེམས་ཀྱིས་དེའི་རྒྱུད་བཟུང་བ་དང་འཛིན་པར་བྱེད་པའི་དེ་གཉིས་ཀྱི་འབྲེལ་རླུང་། དེ་མ་སྐྱེས་མི་སྐྱེ་བའི་དགོངས་པ་ལ་དཔྱད་ན། འཁྲུལ་རྐྱེན་དུ་མ་ཆོས་ཉིད་དུ་འཆར་བའོ། །ཞེས་ནང་དོན་ལྔ་པའོ། །ད་ནི་ནང་དོན་དྲུག་པ་ཁྱད་པར་ཆེན་པོ་མཆོག་གིས་རང་ངོ་གཅེར་

མཐོང་དུ་བསྟན་པ་ནི། ངོ་གཞན་མ་ཡིན་པའི་ཆོས་ཉིད། སྤྲད་པ་གཉིས་འདུས་པ་གནད་དེ་དེ་ཉིད་ངོ་ཤེས་པས་རིག་པ་རང་ཐོག་ཏུ་གྲོལ་ཡེ་ཤེས་ཀྱི་རང་ངོ་བློ་ཡིས་དཔྱད་པས། སྣང་བས་མ་བསྒྱུར་བའོ། །དེ་བསྟན་པ་ཙམ་གྱིས་ཤེས་པས་གྲོལ་བའོ། །རྫོགས་པས་བཅོས་སུ་མེད་ལ། ཆེན་པོ་ཡིན་པས་དེ་ལས་འདས་པ་མེད་པའོ། །བྱ་བ་དང་བྲལ་བས་འབད་མི་དགོས། ཀློང་ནི་དེ་ལས་འཕྱུགས་པ་མེད་པ། ལྟ་བ་ནི་མཐོང་བ་རྣམ་པར་དག་པ། ངོས་རླུང་སེམས་ཀྱི་བར་དུ་བཟུང་བའོ། །ཞེས་ནང་དོན་དྲུག་པའོ།། །།ད་ནི་ནང་དོན་བདུན་པ་བྱ་བ་དང་བྲལ་བའི་གནད་ཀྱིས་མ་བྱས་པའི་ཆོས་ཉིད་གཏན་ལ་དབབ་པ་བསྟན་པ་ནི། ཐག་སེམས་ཉིད་མ་བཅོས་པ་རྣལ་མ་ལ། འཁོར་འདས་དུས་གཅིག་བཅད་པའི་གནད་ལ་བརྟེན་པས་ནི། དྲན་རིག་གི་ཡལ་ས་ཤེས་པས་སོ། །རྫོགས་པ་ནི་སྤང་བླང་དགག་སྒྲུབ་ལས་འདས་ཤིང་། བྱ་བཙལ་དང་བྲལ་བའི་དོན་ནོ། ཆེན་པོ་ནི་ཐབས་ཀྱི་ཁྱད་པར་ལ་དགོངས་པའོ། །བྱ་བྲལ་ཞེས་པས་རྣལ་འབྱོར་པས་ཕྱི་ལུས་ཀྱི་དལ་བ་བརྟེན་པ་དང་། ནང་ངག་གི་དལ་བ་བརྟེན་པ་དང་། གསང་བ་སེམས་ཀྱི་དལ་བ་བརྟེན་པའོ། །དེ་ལྟར་བྱས་པས་ལུས་དལ་བས་རྩ་དལ་ལ། རྩ་དལ་བས་རླུང་དལ། རླུང་དལ་བས་རྣམ་རྟོག་རྒྱུན་ཆད་པས་གནད་ཆེའོ། །དེ་ལྟར་བྱས་པས་ལུས་ཆོས་ཉིད་ཀྱི་ཀློང་དུ་ཚུད་པས་ལུས་ཀྱི་དངོས་པོ་རང་ཞིག་ནས་ལུས་ཀྱི་བདེ་བ་རྙེད། ངག་ཆོས་ཉིད་ཀྱི་ཀློང་དུ་ཚུད་པས་ངག་གི་དངོས་པོ་ཞིག་པས། ངག་བརྗོད་དུ་མེད་པ་ལ་ལོངས་སྤྱོད་དོ། །སེམས་ཆོས་ཉིད་ཀྱི་ཀློང་དུ་ཚུད་པས།

སེམས་ཀྱི་ཁང་བུ་ཞིག་ནས། སེམས་ཀྱི་ཡལ་ས་ངོ་ཤེས་པའོ། །དེ་ལྟར་ཆེན་པོ་ཉིད་ཀྱི་ལྟ་བ་དངོས་བསྟན་པ་ནི། ཡལ་ངོ་ཤེས་པས་ལུས་ཀྱི་ཞེན་པ་སེམས་དང་འབྲེལ་བས་ལུས་ཀྱི་བརྡའ་ཐབས་ལ་གནས་པས། ལྡོག་པའི་གཞི་སྟོངས་པ་དང་། ཡལ་རྐྱེན་ངོ་ཤེས་པས་ངག་གི་ཞེན་པ་ཚིག་གི་རྟོག་དཔྱོད་དང་འབྲེལ་བ་ཆོད་དེ་ངག་གྱིན་བརྡའི་ཐབས་གཙོ་བས། ལྡོག་པའི་ལམ་མ་རྙེད་པའོ། ཡང་ཡལ་བའི་དུས་ངོ་ཤེས་པས་སེམས་ཀྱི་ཞེན་པ་ཡུལ་ཐ་དད་པ་ལ་རྟོག་པའི་འབྲེལ་བ་ཆོད་པས་སེམས་གྱིན་བརྡར་གནས་པས་བསྟན་པས་ལྡོག་པའི་འབྲས་བུ་ཟད་པའོ། །ཞེས་ནང་དོན་བདུན་པ་བསྟན་ཏོ། །ད་ནི་ནང་དོན་བརྒྱད་པ་ཉམས་དང་རྟོག་པ་ལ་བརྟེན་ནས་ཁམས་གསུམ་གྱི་གཞི་སྟོངས་པར་བསྟན་པ་ནི། དེ་ཡང་གདིང་གྲོལ་བ་བཞིའི་སྟེང་དུ་བཅའ་བའི་གནད་ཡེ་གྲོལ་བསྐྱར་གཞི་མེད་ལ། རང་གྲོལ་ལ་གཉེན་པོ་མེད་པ་དང་༔ ཡོངས་སུ་གྲོལ་བ་ལ་རྣམ་སྨིན་མེད་པ་དང་༔ ཅེར་གྲོལ་མཐོང་བ་ཙམ་གྱིས་ཡལ་བའི་གནད་ལ་བརྟེན་པས་ནི་འཁོར་བ་སྣང་ཤེས་ཐ་དད་པ་དང་། འདས་པ་སྐུ་དང་ཡེ་ཤེས་ཀྱི་འབྱུང་གནས་དང་། དེ་གཉིས་ཀྱི་འབྲེལ་པ་ཆོས་ལ་བདག་ཏུ་ལྟ་བ་རྣམས་བཅད་ནས། སེམས་ཅན་གྱི་ཁམས་གསུམ་གྱི་དོང་ཐར་བར་དཀའ་བའི་ཡལ་བའི་མཚན་ཉིད་ཤེས་པ་ལ་བརྟེན་ནས་དུས་ཅིག་ལ་སྤྲུག་ནས། དེ་ནས་ཕྱི་ལུས་དང་། ནང་ངག་དང་། གསང་བ་སེམས་ཀྱི་སྲིད་པ་དང་གསུམ་ཀྱི་གདར་ཤ་རྟོག་པ་རྣམས་རང་འགགས་པས་གཅོད་པའོ། །ཞེས་ནང་དོན་བརྒྱད་པ་བསྟན་ནས། ད་ནི་ཡན་ལག་གི་དོན་

དགུ་པ་གནད་གསུམ་གྱི་ཁྱད་པར་གྱི་ཆོས་བསྟན་པ་ནི། དེ་ཡང་ཞེས་པ་སྐྱར་བའམ་བསྣན་པའི་ཚིག་གོ། ངོ་ནི་རང་ངོ་རིག་པ། གཞན་ངོ་སྣང་བ། རང་ནི་རང་གི་རིག་པས་རྒྱུ་མེད་གཞན་ལ་མ་ལྟོས། རང་སྣང་བས་རྐྱེན་མེད་ཡུལ་ལ་མི་གནས་པའོ། །ཐོག་ཏུ་ནི་འགྲོ་ས་མེད་པས་འཆར་བ་དང་འཆུག་པ་མེད་པའོ། །དེ་ལྟར་སྣང་བ་དང་རིག་པ་གཉིས་སྤྲད་པས་ཕྱི་སྣང་བ་ལ་བརྟེན་ནས་འཁོར་བའི་གཟིབས་ལྡོག་པའི་ཁུངས་འགགས་པས་ཕྱིན་ལ། ནང་རིག་པ་ལ་བརྟེན་ནས་འདས་པའི་གཟིབས་འོང་མེད་འགྲོ་ས་མེད་པས་ཕྱིན་པའོ། །ཐག་གཉིས་སྣང་མེད་པར་རིག་པ་གཅིག་པའི་ཐོག་ཏུ་འཁོར་འདས་གཉིས་མེད་དུ་བཅད་པས། སེམས་འགྱུ་བ་སྣ་ཚོགས་ལ་རྟོགས་པའི་འཁོར་ཏེ། སེམས་འགྱུ་བ་རང་དག་པ། སྟོང་པ་ངོ་བོ་རང་ཐོག་ན་གསལ་བ་གཉིས་གཞི་མི་གཅིག་པས་སོ་སོར་ཕྱེ་བས། གཅིག་ཡལ་གཅིག་སྣང་བས་རང་ངོ་འབྲེལ་མེད་ཕྱེད་པའོ། །དེ་ལྟར་ཕྱེད་པས་གདིང་གྲོལ་བ་བཞིའི་ཐོག་ཏུ་བཅད་ཅིང་བཙལ་དུ་མེད་པར་བཅས་པས། ད་འཁོར་བ་རང་ཐོག་ཏུ་ལྡོག་པ་མེད་པའི་རྩད་རང་སེམས་ཡལ་བའི་དུས་སུ་ཆོས་པས། ད་ཁམས་གསུམ་དུ་ལྡོག་པའི་རྟེན་མེད་པའོ། །ཞེས་དེ་དག་གིས་སེམས་ཀྱི་དམིགས་གསུམ་པའི་བསྡུས་པའི་དོན་དང་པོ་ལ་བརྟེན་ནས་དཔྱད་པར་ཡེ་ཤེས་ཀྱི་སྣང་བར་བསྟན་པ་ལ་ཡན་ལག་གི་དོན་དགུར་བྱས་ནས་བསྟན་ཏོ། །ད་ནི་སྤྱི་དོན་ཐ་མ་སེམས་དང་ཡེ་ཤེས་ཀྱི་དབྱེ་བ་ཚིག་དང་བཅས་ཏེ་བསྟན་པ་ལ། ཡན་ལག་གི་དོན་གཉིས་ཀྱི་བསྟན་པའི་དང་པོ་དབྱེ་བ་ལ་བསྟན་ནས་ཡེ་ཤེས་རང་གི་མཚན་

ཉིད་བསྟན་པ་ནི། ཨེ་མ་ཧོ་ཞེས་ངོ་མཚར་ཆེ་བའི་ཚིག་ཁྱད་པར་ཡེ་ཤེས་དངོས་བསྟན་ཞེས་པའི། དེ་ཡང་སེམས་ཞེས་ངོ་བོ་མེད་པས་མཚན་ཉིད་གང་དུ་ཡང་མ་གྲུབ། དེ་ལྟར་མ་གྲུབ་ཀྱང་འགྱུ་བ་སྣ་ཚོགས་པ་ལ་རྟོག་པས། དེ་ཡང་ཡལ་སར་ཡལ་བས་རྒྱུ་རྐྱེན་གང་གིས་ཀྱང་མ་བསྐྱེད། ཟད་སར་ཟད་པས་འབྲས་བུ་ངེས་པ་གང་དུ་ཡང་གྲུབ་པ་མེད་པས་ན། སྟོང་པ་རྒྱུ་རྐྱེན་གྱིས་མ་བསྐྱེད་པ་དང་། ངོ་བོ་རྒྱུ་དང་མཚན་ཉིད་གང་ནས་ཀྱང་བཙལ་དུ་མི་རྙེད་པ་དང་། ངོ་བོ་དེ་ལ་གཞི་མེད་པས་རྟོག་པའི་ཁུངས་སྒོ་འགགས་པ་དང་། རྩ་བ་མེད་པས་ལྡོག་པའི་རྐྱེན་གང་ལ་ཡང་རག་མ་ལུས་པའོ། །དེ་རྣམས་ལ་མཁས་པས་ནི། ཐོག་མ་བྱུང་ས་མེད་པས་དངོས་པོ་སྟོང་པར་ཤེས་པ་དང་། བར་དུ་གནས་ས་མེད་པས་ཡལ་བའི་དུས་ཚོད་ཟིན་པ་དང་། ཐ་མ་འགྲོ་ས་མེད་པས་ལྡོག་པའི་གཞི་སྟོངས་པ་ནི། ཡེ་ཤེས་ཀྱི་འགྱུར་རྟོག་པ་གློ་བུར་བར་ཆད་ཟིན་པས། །ཅིར་སྣང་ཤེས་བཞིན་གྱི་བྱ་རས་ངོ་ཤེས་པས། རྟོག་པ་ཅི་བྱུང་ཡེ་ཤེས་སུ་གྲོལ་བས། སེམས་ཀྱི་རྟོག་ཚོགས་ཀྱི་མིང་མེད་པའོ། །དེ་ལྟར་ཡང་ནམ་མཁའ་རྟོག་པ་སྐྱེ་མེད་ཅིང་། །རྟོག་པ་དེ་ཉིད་ནམ་མཁའ་འདྲ། ཞེས་པས་སོ། སེམས་ཀྱི་རང་བཞིན་ནི་དྲན་པ་སྣ་ཚོགས་པས་ཡུལ་ཐམས་ཅད་ལ་འཇུག་པར་བྱེད་པ་སྟེ། དེ་ཡང་གནས་པས་སྟོང་ལ། སྟོང་པས་ཡལ་བ་ནི་མཁས་པས་ཏེ། དེ་ལྟར་ན་འགྱུ་བ་སྟོང་དག །དྲན་པར་རང་ཡལ། འགྱུ་བས་རྗེས་མེད་པ་ནི་ཡེ་ཤེས་ཀྱི་ཡུལ་ཏེ། དེའི་ཚད་ནི་དྲན་རྟོག་སྣ་ཚོགས་སུ་

ཤར་བ། ཤར་སར་ནུབ་པ། ནུབ་ས་ནས་སྟོངས་པའོ། །དེ་བྱར་མེད་རང་དག་ཏུ་ཟིན་པ་ནི། སྐྱེ་བ་སྔ་ཕྱི་ལ་མི་གནས་པས། ལུས་སེམས་ལ་འབྲེལ་མེད་པར་ངོ་ཤེས་པའོ། །ཡང་སེམས་ཀྱི་འགྱུ་དུས་ནི་རྟོག་པ་ཕྲ་རགས་བར་པ་ལས། འཇུག་པ་ལས་ཀྱི་རླུང་གིས་བྱས། དྲན་པ་ཡུལ་ཐ་དད་པས་བླང་། ཤར་བ་གཏད་མེད་རང་གྲོལ་བར་ཤར། གནས་པ་བསམ་ངོ་རང་དག་པར་གནས་པ་ལ་མཁས་པས་ཡེ་ཤེས་ཀྱི་རྐྱེན་ནི། དྲན་བསམ་ཡལ་བའི་ཚད་ཟིན་པས་རླུང་སེམས་ལ་དབང་ཐོབ་པས། འཁོར་འདས་འབྲེལ་ཆད་པས། སྣང་རྟོགས་ཀྱི་ཆོས་ཐམས་ཅད་རང་གྲོལ་བར་གཏན་ལ་ཕེབས་པ་ནི། ཕྱི་སྣང་བའི་དམིགས་པ་དག་པས་རྐྱེན་མེད་ན་ཡེ་ཤེས་འཆར་བའི་ཡུལ་སྟོངས་ལ། ལས་དང་ཉོན་མོངས་པ་མེད་ན་ཡེ་ཤེས་རང་ཡིན་པར་གཏན་ལ་མི་ཕེབས་པས་སོ། །ཡང་སེམས་ཀྱི་ཡལ་ས་ནི་བློ་སྔ་ཕྱིའི་བར་ཡལ་བས། རྒྱུ་མཚན་གོང་འོག་གི་སྡེབས་མེད་ལ། དྲན་པ་སྔ་ཕྱིའི་བར་དུ་ཡལ་བས། བློ་མ་བུའི་འཆུག་མེད། སྣང་ཤེས་སྔ་ཕྱིའི་བར་དུ་ཡལ་བས་འཇུག་པ་ཐ་དད་པ་ལྟོས་མི་འཆའོ། །དེ་དག་འགྱུ་མེད་རང་དག་ལ་མཁས་པས་ཡེ་ཤེས་ཀྱི་རང་ངོ་སྟོང་པ་མཚན་ཉིད་གང་དུ་ཡང་མ་གྲུབ་པས་གནས་པ་ལ་མི་འཕྲོ་བས་རང་སར་བརྟན་པར་བྱས་པའོ། །སེམས་ཀྱི་མེད་པ་ནི། ཐོག་མ་རྒྱུ་ཡིས་མ་བསྐྱེད་པས་རང་ངོ་ལ་མ་རིག་པ་མེད། ཐ་མ་རྐྱེན་གྱིས་མ་བཤིགས་པས་དྲན་བསམ་ལ་སྐྱེ་བ་མེད་པའི་ས་ནི་ཕྱི་སྣང་བ་ཡིན་པས། རྐྱེན་ཆོས་ཉིད་དུ་གྲོལ། ནང་འགྱུ་བ་ཡིན་པས་རྣམ་རྟོག་ཉིད་ལས་

ཡེ་ཤེས་སོ། །ཡེ་ཤེས་རྣམས་ཀྱི་ཚད་ནི། དྲན་པ་བློས་མ་དཔྱད། དྲན་མེད་དུ་ཡིད་ཀྱིས་མ་བརྟག །སྐྱེ་མེད་དུ་ཤེས་བྱས་མ་ཕྱེ། བློ་འདས་སུ་ལུང་གིས་མ་བསལ་བ་ནི། རང་གསལ་དངོས་མེད་ལ་མཁས་པ་ནི་རྣལ་འབྱོར་པ་ཞེས་བྱའོ། །ཞེས་ནང་དོན་དང་པོ་དབྱེ་བ་ལ་བརྟེན་ནས་ཡེ་ཤེས་རང་གི་མཚན་ཉིད་བསྟན་ནས། ད་ནི་ནང་དོན་གཉིས་པ་དེ་ལྟ་བུའི་གནད་དེ་ཡང་ལུས་རིག་གིས་འབད་པས་གྲུབ་པར་བསྟན་པ་ནི། སྟོང་པའི་སེམས་ནི་མི་སྣང་ཕྱིར། ཞེས་པ་ལ་སོགས་པས་བསྟན་ཏེ། དེ་ཡང་སེམས་ངོ་བོས་སྟོང་པས་རྒྱུ་མཚན་དུ་མ་གྲུབ་པས། སེམས་ནི་དངོས་པོ་གཟུགས་ཅན་དུ་མི་སྣང་བས། སྐྱེ་བ་སྔ་ཕྱི་མི་བདེན་ཏེ། སེམས་ཀྱི་ལས་ཀྱིས་ཉེ་བར་ལེན་ན། ལུས་མཐོང་བ་བཞིན་དུ་སེམས་མིག་གིས་མཐོང་བར་འགྱུར་ཏེ། ལུས་ལས་དང་འབྲེལ་བ་ཡོད་པའི་ཕྱིར་རོ། །ལུས་ཀྱིས་ཉེ་བར་ལེན་ན། ལུས་བོར་ནས་འགྲོ་བས་སེམས་ལ་ལྟོས་པ་མེད་དོ། །དེའི་ཕྱིར་ན་གང་ཟག་སུ་ཡིས་སྐྱེ་བ་སྔ་ཕྱི་ཡོད་པར་འཛིན་ན། སྔ་མ་འགག་ནས་ད་ལྟའི་ལུས་མེད་པར་ཡིད་ཆེས་ཏེ། ཡིན་ནོ་རེ་ཤེ་ན་ལུས་གཞན་སྐྱེ་བ་བཞིན་དུ་ལུས་གཞན་པ་ལས་སེམས་ཀྱང་གཞན་སྐྱེ་བར་འགྱུར་ཏེ། སྔ་མ་ལ་སྐྱེ་བོ་ཡོད་མི་སྲིད་ལ། གལ་ཏེ་ཡོད་ན་སྔ་མའི་ལུས་འདི་ཡིན་པར་ཅིས་ཤེས། སེམས་གཅིག་གི་ལུས་ཐ་དད་པ་གཞན་ལེན་ནོ་ཞེ་ན། ཤེས་བྱེད་དུ་གང་སྟོང་སྟེ་ཤེས་མི་སྲིད་དོ། །ལུས་ཐ་དད་པ་བཞིན་དུ་སེམས་ཀྱང་ཐ་དད་པ་གཞན་ཡིན་ནོ་ཞེ་ན། གཞན་ལས་གཞན་སྐྱེ་བ་མི་

འཐད་དེ། མེ་ལས་ཀྱང་ཆུ་སྐྱེ་བར་འགྱུར། སྐྱེ་མི་སྲིད་པར་མངོན་སུམ་གྱིས་གསལ་ལོ། །སྔ་མའི་ལུས་སེམས་གཉིས་གཅིག་པ་ཡིན་ན། ལས་དང་རྣམ་པར་སྨིན་པ་མི་བདེན་ཏེ། དགེ་བ་ལ་སོགས་པར་འབད་པ་བྱས་པ་ལ་དགོས་པ་མེད་དོ། །དེས་ན་སྐྱེ་བ་སྔ་མའི་ལུས་འདི་མིན་པར་ལུང་རིག་གིས་ཤེས་ཏེ། གསེར་གྱི་སྙིང་པོ་ལས། ལུས་ལ་མི་གནས་སེམས་ནི་ཀུན་ལ་འཇུག །སྔ་ཕྱི་འདྲེས་པའི་གནས་མེད་སེམས་ལ་རྟེན་མེད་ཕྱིར། །ཞེས་དང་། ཡང་བཀོད་པ་ཆེན་པོ་ལས། སེམས་ཀྱི་འཇུག་པའི་གནད་ཀྱིས་མ་གྲོལ་ན། སྔ་མ་མི་བདེན་ལུས་འདི་ད་ལྟར་མིན། །ཞེས་པས་སོ། །རིག་པ་སྐྱེ་བའི་མིང་མེད་པས་ད་ལྟའི་ལུས་སྔ་མ་མིན་པར་ཡིད་ཆེས་ལ། ཕྱི་མ་མི་བདེན་པས་གནད་ཤེས་པ་ཙམ་གྱིས་གྲོལ་བའི་ཕྱིར་རོ། །གལ་ཏེ་སྐྱེ་བ་སྔ་མའི་ལུས་ད་ལྟ་ཡིན་པས་སྔ་ཕྱི་ཡོད་ན་སྐྱེ་བ་གཅིག་པར་འགྱུར་ཏེ། མ་འོངས་པའི་དུས་སུ་ཡང་ལུས་སེམས་ད་ལྟའི་འདི་ཡིན་པས་སོ། །དེ་ཡང་སེམས་མི་འཆི་བ་བཞིན་དུ་ལུས་ཀྱང་མི་འཆི་བར་འགྲོགས་ནས་འགྲོ་བར་འགྱུར་ཏེ། དེ་མི་འཐད་དེ། ལུས་སེམས་བྲལ་ནས་ལུས་དངོས་པོར་འཇོག་པའི་ཕྱིར་ཤེས་སོ། །དེས་ན་ཡལ་བའི་གནད་ཤེས་པས་ཕྱི་མ་ལུས་ལ་འཇུག་མི་སྲིད་པས། ཕྱི་མ་མི་བདེན་ནོ། །དེའི་ཕྱིར་ན་སྣང་བ་སྣང་ཐོག་ནས་གྲོལ་བས། རང་སྣང་ལ་བཅོས་མི་དགོས་ལ། ཤེས་པ་འགྱུས་ཐོག་ནས་གྲོལ་བས། དྲན་བསམ་འགྱུ་བ་གློ་བུར་བ་གཉེན་པོ་མི་དགོས་པ་རྣམས་ནི། རྩ་བ་ལུས་སེམས་གཉིས་ཡང་ནས་ཡང་དུ་འབྲེལ་ན་འཁོར་

བའི་རྩ་བ་སྟོངས་པར་ལུས་ཀྱང་ཤེས་པ་མིན་པའི་ཕྱིར། ལྟ་སྒོམ་འབད་པས་དགོས་པ་མེད་དོ། །དེས་ན་འདི་ཉིད་ལས་མ་གཏོགས་པ་ལུས་སེམས་གཅིག་ཏུ་འཁོར་བས་མྱ་ངན་ལས་འདའ་བར་མི་རིགས་སོ། གཏན་ཚིགས་དེའི་ཕྱིར་སེམས་དྲན་བསམ་གྱི་འཁོར་ལོ་གློ་བུར་བ་ཡིན་པས་དེ་ཡལ་བའི་མཚན་ཉིད་ཤེས་པས། འགྱུ་བ་གཞན་ལ་འཇུག་མི་སྲིད་པས་ན་དེ་རང་ཡེ་ཤེས་ཏེ། དེའི་དབྱེ་བ་སྐྱེ་བ་སྔ་ཕྱིར་ལུས་མི་བདེན་པས་ཤེས་སོ། །དེའི་གནད་ནི་བླ་མ་མཚན་ཉིད་དང་ལྡན་པས་སྔ་མའི་ལུས་འདི་མིན་པས་ལུས་སེམས་འབྲེལ་མེད་ལ། ད་ལྟའི་དྲན་རིག་གློ་བུར་བ་ཡིན་པས་དེ་ཉིད་ཀྱིས་གྲོལ་བ་ནི། བྱུང་ཡང་རང་བྱུང་དུ་བྱུང་བས་ད་དེ་ལ་བྱས་ཤིང་བཅོས་པས་མི་གྲོལ་ལོ། །ཞེས་བློའི་འགྱུར་ལས་ཤེས་པའི་ཕྱིར་རོ། །དེས་ན་ལུང་ལས་ཀྱང་། རྡོ་རྗེ་ཉི་མ་སྲ་བ་འབྱུང་བ་ལས། །དྲན་རྟོག་གློ་བུར་རང་ཡལ་གྲོལ་བ་ལས། །རང་བྱུང་ཡེ་ཤེས་བཅོས་པས་གྲོལ་བ་མིན། །ཞེས་པ་དང་། གསེར་གྱི་སྙིང་པོ་ལས་ཀྱང་། བླ་མ་ལས་འབྱུང་འབྲེལ་པ་མེད། །ལུས་སེམས་གཅིག་མི་གནས་པའི་ཕྱིར། །འདི་ལ་དྲན་རྟོག་རང་འགགས་ན། །དེ་ལས་བྱས་པ་ག་ལ་ཡོད། །ཅེས་པས་སོ། །བསླབ་པའི་ཐབས་ནི་སེངྒེ་ཡན་ལག་རྫོགས་པའི་བསླབ་བྱས་རྩལ་རང་རྫོགས་སུ་བསྟན་པ་ནི། དེ་ཡང་ཁྱད་པར་ཡུལ་དང་ཡུལ་མ་ཡིན་པ་བསླབ་པས། འགྱུ་བ་དུས་གཅིག་ལ་ཆོད་པ་དག་འབྱུང་སྟེ། དེ་ཡང་གནད་བསྟུན་པ་གནས་ལུགས་ཚད་ལ་འབེབས་པའི་བསླབ་བྱ་ལ་བསླབས་པས། ཐ་སྙད་བཏགས་པ་རྣམ་གྲངས་ཀྱི་ཆོས་ལས་གྲོལ་

བ་ནི། དཔེ་ཇི་ལྟར་གྲོལ་ན་ལི་གར་ཏའི་རྒྱལ་པོ་བྲམ་ཟེའི་དམོད་པ་ལས་གྲོལ་བ་ལྟར་གྲོལ་བས། འཇིགས་ཤིང་ཡ་ང་བ་དང་བག་ཚ་བ་མེད་པས་བློ་བདེ་བའོ། །ད་ལྟ་གནད་དང་བཅས་པ་ཡིས། ལུས་སེམས་ལ་འབྲེལ་བ་མེད་པའི་གནད་ཀྱི་སྐྱེ་བ་སྔ་ཕྱིའི་ལུས་མི་བདེན་པའི་གནས། དེའི་རྩ་བ་འདིར་དྲན་རྟོག་རང་ཡལ་བའི་མཚམས་སུ་རིག་པར་བྱའོ། །དེ་ཡང་གང་ལས་བྱུང་ཞེ་ན། སེམས་ཀྱི་ཁང་བུ་གཞིག་པའི་ཐབས་ཀྱིས་རྒྱུ་རྐྱེན་ཁོག་སྟོངས་པས་སྐྱེ་ཤི་གཉིས་ཀྱི་མཐའ་ལ་མི་གནས་པ་ནི། ཤེས་བྱ་ལ་མཐའ་མེད་པའི་གནད་དེ། དེ་ཡང་གཞིག་པས་མེད་ལ་མེད་པས་སྣང་བ་ནི་ཡལ་ས་ངོ་ཤེས་པ་མེད་ན། སངས་རྒྱས་པ་ཀུན་ཀྱང་སྡུག་བསྔལ་གྱི་ལམ་དུ་ཞུགས་པ་ལས་མ་གཏོགས་པ་མེད་པས་ན། གསེར་གྱི་མཁའ་ལྡིང་ལས། སྡུག་བསྔལ་ལམ་དུ་ཁྱེར་ན་བདེ་བ་ཤུགས་ལས་བྱུང་། ཞེས་པས་སོ། །དེས་ན་སེམས་ཀྱི་བྱུང་ས་ལ་མཁས་པས་འཁོར་བའི་གཟིབས་ཕྱིན་པ། གནས་ས་ལ་མཁས་པས་དྲན་བསམ་གྱི་རྒྱུ་སྟོངས་ལ། འགྲོ་ས་ལ་མཁས་པས་འཁོར་འདས་ཀྱི་འབྲེལ་ཆོད་པའོ། །དེའི་གནད་སེམས་མེད་པར་ཤེས་པས་འཁོར་འདས་ཀྱི་རྩ་བ་སྟོངས། ཡལ་ས་ཤེས་པས་རྐྱེན་གང་གིས་ཀྱང་ཕན་གནོད་དང་བྲལ། སྟོངས་པར་ཤེས་པས་འཁོར་འདས་གཉིས་དུས་གཅིག་ལ་འགགས་པའོ། །ཤེས་པའི་ཡལ་རྒྱུ་གློ་བུར་དུ་བྱུང་ལ། གློ་བུར་དུ་ཡལ་བས་གང་གིས་ཀྱང་གོས་པ་མེད། ཡལ་རྐྱེན་རང་དག་པས་ཡུལ་བདག་ཏུ་འཛིན་པ་ལས་གྲོལ། ཡལ་བའི་དུས་ལ་མི་གནས་པའི་ངེས་མེད་ཕྱོགས་དག་ལ་

ཡལ་བ་ཉིད་རང་གྲོལ་བས་གཉེན་པོ་གཞན་ལ་རག་མ་ལུས་པའོ། །གཏད་ས་ནི་གནད་དྲུག་དང་། གྲོལ་ལུགས་བཞི་སྟེ་བཅུས་གང་ཟག་གཅིག་ཡོངས་སུ་སྨིན་ཅིང་གྲོལ་བར་བྱས་པས་ནི། སེམས་འགྱུ་བ་ཐ་དད་པ་དང་། ཡེ་ཤེས་སྟོང་ཉིད་སྨྲ་བསམ་ལས་འདས་པ་གཉིས་ཀྱི་དབྱེ་བ་བསྟན་པའི་དམིགས་ཏེ་གསུམ་པ་ལས་བསྡུས་པའི་དོན་གཉིས་སུ་བྱས་ནས་བསྟན་པའོ། །མཁས་པ་བྱེ་མ་ལ་མུ་ཏྲས་རྣམ་པར་བཤད་པ་སྟེ་གསུམ་པའོ། །ཨྠྀི། རྒྱ་རྒྱ་རྒྱ། ས་མ་ཡཱ། ད་ནི་སེམས་ཀྱི་དམིགས་བཞི་པས་རྣམ་པར་བཤད་པ་ནི། འདི་ལ་སྤྱི་དོན་བཞི་སྟེ། དང་པོ་རླུང་གི་གནད་ཡལ་བའི་ལས་ཀྱི་རྒྱུ་མ་ཤེས་པ་ལས། འཁྲུལ་ཅིང་ལས་ཀྱི་འཇུག་པ་བསྟན་པ་དང་། གཉིས་པ་ལྟོོས་པ་རང་ཟད་པའི་ཆོས་ཉིད་ལ་འབད་རྩོལ་མེད་པར་བསྟན་པ་དང་། གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕགས་ལུགས་བསྟན་པ་དང་། བཞི་པ་ལྟ་སྒོམ་རང་ཤེས་ཀྱི་རྟོག་པ་ལས་གྲོལ་ནས་བསྒོམ་དུ་མེད་པའི་དོན་བསྟན་པའོ། །དེ་ལ་སྤྱི་དོན་དང་པོ་རླུང་གི་གནད་ཡལ་བའི་རྒྱུ་མ་ཤེས་པ་ལས་འཁྲུལ་ཅིང་ལས་ཀྱི་འཇུག་པ་བསྟན་ནས། ཡན་ལག་གི་དོན་གསུམ་གྱིས་བསྟན་པའི་དང་པོ་འགྱུ་བ་རླུང་གི་ཆ་ལས་འཁྲུལ་པའི་གཞི་བསྟན་པ་ནི། རླུང་གི་ལས་ནི་སོ་སོ་ལས། ཞེས་པ་ལ་སོགས་པས་བསྟན་ཏེ། རླུང་གི་ངོ་བོ་དང་། ངེས་ཚིགས་དང་། དབྱེ་བ་དང་། འགྱུ་ཚད་དང་། བྱེད་པའི་ལས་དང་ལྔར་ཤེས་པར་བྱའོ། །ངོ་བོ་ཡང་ཞིང་སྣ་ཚོགས་སྟོན་པར་བྱ་ལ། ངེས་ཚིགས་འགྲོ་བས་ན་རླུང་། བསྐྱོད་ཅིང་

གཅིག་ཏུ་མི་གནས་པས་ན་རླུང་ལ། དབྱེ་ན་ལས་ཀྱི་རླུང་དང་། ཡེ་ཤེས་ཀྱི་རླུང་གཉིས་སོ། ལས་ཀྱི་རླུང་ལས་འབྱུང་བའི་རླུང་དང་། ག་ནས་འབྱེད་ཀྱིའོ། །འབྱུང་བ་ནི་ས་ཆུ་མེ་རླུང་བཞི་ལ། སའི་ཆུ་དང་། མེ་དང་། རླུང་དང་། སའི་རླུང་དང་བཞི་སྟེ། ལྷག་མ་གསུམ་ལ་ཡང་བཞི་བཞི་སྟེ་བཅུ་དྲུག་གོ། གནས་འབྱེད་ནི་ཕོ་རླུང་མོ་རླུང་མ་ནིང་གི་རླུང་དང་གསུམ་མོ། །ཡེ་ཤེས་ལ་དངོས་དང་། བྱེ་བྲག་པ་གཉིས་སོ། །འགྱུ་ཚད་ནི་སྐྱེས་བུ་ན་ཚོད་དར་ལ་བབས་པ། ལུས་ལ་འབྱུང་བའི་ནད་དམ་པོས་མ་ཟིན་པ་རྣམས་ལ་ཉིན་ཞག་ཕྲུགས་ཅིག་ལ། རླུང་ཕར་འགྲོ་ཚུར་འོང་བ་ཉི་ཁྲི་དང་ཆིག་སྟོང་དྲུག་བརྒྱ་རྒྱུ་བའོ། །བྱེད་པ་ལས་ནི་ལས་ཀྱི་རླུང་གིས་གྱེན་ལ་རྒྱུ་བ་དང་། ཐུར་དུ་སེལ་བར་བྱེད་ལ། ཡེ་ཤེས་ཀྱིས་ནི་རིག་པ་སྟོན་པ་དང་། དབྱིངས་ཀྱི་སྣང་བ་སྟོན་པར་བྱེད་པས་ན་ལས་སོ་སོ་ལས་ཞེས་པས་སོ། །དེ་ཡང་གྱེན་ལ་རྒྱུ་བས་ནི་འཕེན་པ་དང་སྤེལ་བའི་ལས་བྱེད་ལ། ཐུར་དུ་སེལ་བས་ནི་དྭངས་སྙིགས་འབྱེད་པའི་ལས་བྱེད་པ་སྟེ། སྙིགས་མ་དྲི་ཆེན་དང་། དྲི་ཆུ་ཕྱིར་འདོར་བར་བྱེད། དངས་མས་ལས་བསྐྱེད་ཅིང་བཀྲག་དང་གཟི་མདངས་རྣམས་སྐྱེད་པར་བྱེད་པའོ། །ཡེ་ཤེས་ནི་རིག་པ་ལུ་གུ་རྒྱུད་མངོན་སུམ་བསྟན་ནས། ཡིད་དཔྱོད་ཚིག་གི་གཞི་ཉམས་པར་བྱེད་ལ། དབྱིངས་ཀྱི་སྣང་བ་བསྟན་པས་ནི། སྣང་བ་བཞི་མཐར་ཕྱུང་ནས། ཁམས་གསུམ་གྱི་མངལ་གྱི་གྲོང་ཁྱེར་རྒྱུན་གཅོད་པར་བྱེད་པའོ། །དེ་ཡང་ཐོག་མ་འཕེན་པ་ལས་ཀྱི་རླུང་མ་དག་པ་ལས། ཡུལ་བདག་ཏུ་འཛིན་པའི་ཆ་ཡིན་སྙམ་

པ་དང་། མིན་སྙམ་པ་ལ་སོགས་པ་ཤར་བས། དེའི་ཕྱིར་འཕེན་པའི་ལས་ལ་མ་དག་པ་ལས། མ་རིག་པའི་ངོ་བོ་སྒྲིབ་པར་བྱེད་པ། ངེས་ཚིགས་ལ་གཞི་ལ་མ་རིག་པར་སོང་བས་ནི། འཆོར་བའི་གཞི་མ་སྡུད་པའོ། །རླུང་དེའི་ནང་དུ་འགྱུ་བ་མ་དག་པ་འགེངས་པའི་ལས། རྣམ་པར་རྟོག་པ་ཚོགས་དགའ་བ་དང་། མི་དགའ་བ་དང་། བདེ་བ་དང་། སྡུག་བསྔལ་བ་རྣམས་ཀྱི་གཞི་མར་སེམས་མེད་པ་ལ་འཇུག་པ་ཐ་དད་པ་དང་། འབྱུང་བ་དང་ཤར་བའི་ཡུལ་ཐ་དད་པར་འགྱུ་བ་ན། ཐོག་མ་ཕྱིར་འཕེན་པའི་རླུང་སྣང་བ་སྣ་ཚོགས་པར་ཤར་བས་ལས་ཀྱི་རླུང་གི་འཁོར་རྒྱུ་དང་། འཁོར་རྐྱེན་དུ་མ་ལ་བརྟེན་ནས་འཁོར་བའི་འབྲས་བུ་འགྲོ་བ་དྲུག་གི་གཟུགས་སུ་བྱུང་བ་ནི། དེ་དག་ཀྱང་འགྲོ་བར་བྱེད་པ་རླུང་གི་སྟོབས་ལ་བརྟེན་ནས་འགྲོ་བར་བྱེད་པའོ། །དེ་དག་ནི་མ་སྨིན་པ་ལས་འཁོར་བའི་རླུང་ཞེས་བྱའོ། །ཞེས་ནང་དོན་དང་པོ་འགྱུ་བ་རླུང་གི་ཆ་ལས་འཁྲུལ་བའི་གཞི་བསྟན་ནས། ད་ནི་ནང་དོན་གཉིས་པ་རླུང་གི་འགྱུ་བ་བླ་མའི་ཞལ་ལ་རག་ལུས་པས། གནད་ཤེས་ན་འགྲོ་བ་ཀུན་གྲོལ་བར་བསྟན་པ་ནི། འགྱུར་བ་ནི་ཕྱིར་འགྱུས་པས་དྲན་རྟོག་ཐ་དད་པ། ནང་དུ་འགྱུས་པས་སེམས་ཉིད་མེད་པ་ལས་གཟུགས་བརྙན་སྣ་ཚོགས་པར་གསལ་བ། དེ་ལྟར་ལས་གཉིས་ནི་ཁྱད་པར་དུ་ཐབས་ལ་བརྟེན་པས། འགྱུ་བ་རང་སོར་གྲོལ་བའི་གནད་ནི། དཔལ་ལྡན་རྡོ་རྗེ་འཆང་ལས་ལྷག་པའི་རང་གི་རྩ་བའི་བླ་མའི་ཞལ་ལས་ཤེས་པར་བྱའོ། །དེ་ཡང་ཤེས་ལུགས་ནི། རླུང་བཟུང་བས་རྟོག་པ་བཙོན་

དུ་ཟིན་པས། འགྱུ་བ་རྣམ་པར་དག་པ་ནི། སྐྱེས་པ་ཡིན་ན་སྣ་བུག་གཡས་པ་ནས་བཟུང་། བུད་མེད་ཡིན་ན་གཡོན་པ་ནས་ནར་གྱིས་དྲངས་ལ། ནང་དུ་བཟུང་བས་ཕོ་ཁ་ཚ་མེར་གྱིས་བྱུང་བ་ནི་ཕྱིར་བག་རེ་འཕངས། སྐབས་སུ་སྤྱི་བོ་ནས་ཕུལ་ལོ། །རླུང་གནན་པ་ནི་སྐྱེས་པའི་ཕོ་ཁ་གཡས་སུ་མནན་ལ་བུད་མེད་ཀྱིས་གཡོན་དུ་མནན་པས། ལྗིད་ཏིག་གིས་བྱུང་ཙ་ན་ཁ་བསྡམས་ཏེ་སྣ་བུག་ནས་བསང་ངོ་། །དེ་ཡང་གཞན་གྱི་ཐབས་ནི་རླུང་འགྱུ་ན། ཡི་གེ་གང་མོས་པ་དང་། ཁ་དོག་དཀར་དམར་སེར་པོ་ལྗང་མཐིང་ལ་སོགས་པར་བསྒྱུར་བ་དང་། དབྱིབས་ཆོས་འབྱུང་དང་། རྒྱ་གྲམ་དང་། ཟླ་གམ་ལ་སོགས་པ་གང་མོས་པར་བསྒྱུར་བས་ལས་ཀྱི་རླུང་སྤྱི་བོར་བསྡུས་པས་ལུས་དྲོད་ཕེབས། མགྲིན་པར་བསྡུས་པས་ངག་ལ་ནུས་པ་འབྱུང་། སྙིང་གར་བསྡུས་པས་སེམས་ལ་དྲོད་ཕེབས། ལྟེ་བར་ཁ་དོག་གང་མོས་དང་བཅས་པས་གཉིད་དང་རྨི་ལམ་ལ་རྒྱས་ཐེབས་པའོ། །ཡང་ཡེ་ཤེས་ཀྱི་རླུང་མིིག་ནས་འཐེན་པའི་ཚུལ་དུ་དྲངས་པས། རྟོག་པ་དུམ་བུ་བ་འགག །སྣ་ནས་འཐེན་པས་སྣང་བ་ལ་དྲོད་རྙེད། ཁ་ནས་འཐེན་པ་དང་འགྱུ་བ་རྣམས་ཀྱི་ཁོག་ཟད་པའོ། །དེ་ཡང་ཧཱུྃ་སྒྲས་འཐེན་པ་དང་། ཕཊ་དང་། ཨ་དང་། ཧས་འཐེན་པའོ། །འཇུག་པ་ཞེས་པ་རླུང་ཡུལ་ལ་བཅུག་པས་སྣང་རྐྱེན་ཆོས་ཉིད་དུ་འཆར་ལ། ནང་ཕུང་པོ་ལ་བཅུག་པས་ལུས་ཀྱི་ནད་དང་སྡུག་བསྔལ་ཞི། གསང་བ་སེམས་ལ་བཅུག་པས་སེམས་ཀྱི་རྟོག་པ་ལས་རང་གྲོལ་བའོ། །དེ་ལྟར་རླུང་ཕར་འགྲོ་བའི་

དུས་ན་ལུས་སེམས་དལ་བའི་ཆོ་ག་བྱ། ཚུར་འགེངས་པའི་དུས་ན་ཕུང་པོ་སྦྱང་བའི་རྟེན་བྱའོ། །དེ་ལྟར་གཉིས་ཀྱི་ཆ་ལས་འཁོར་འདས་གཉིས་སུ་ངེས་པ་ནི། རླུང་ཕྱིར་འཕངས་པས་འདས་པའི་ལམ་སྣ་འདྲེན་ལ། ནང་དུ་རྔུབས་པས་འཁོར་བའི་ལས་བསོག་པས་སོ། དེ་ཡང་འཁོར་བའི་ས་བོན་ལས་ཀྱི་རླུང་གིས་འཕེན་པ་ལས་ལྷ། འཐེན་པ་ལས་ལྷ་མིན། འཇུག་པ་ལས་མི། འགྱུར་བ་ལས་བྱོལ་སོང་། ཁྲོས་པ་ལས་ཡི་དྭགས། རྣམ་པར་རྒོད་པ་ལས་དམྱལ་བ་དང་དྲུག་ཏུ་འགྱུར་བའོ། དང་པོ་འཕེན་པའི་རྒྱུ་མ་དག་པ་ལས་བྱུང་བའོ། །དེ་ལྟར་རླུང་འདི་ནི་སྣ་བུག་གཡས་ཀྱི་རླུང་དལ་བ་དང་། འཇིལ་བ་དང་། ཡང་བ་དང་། བསྐྱོད་པ་དང་། ཞར་བ་དང་། སྟོང་པའི་ལམ་ལས་བརྟག་པ་དང་། ཡང་རྣ་བའི་བུ་ག་གཡས་གཡོན་གྱི་མདུན་གྱི་གཤོང་བུའི་རྩ་མཐེབ་མཛུབ་ཀྱིས་གཏེམས་པས་སྒྲ་འཚེགས་པ་དང་། བཤང་བ་དང་། སིང་བ་དང་། ཕྲ་བ་དང་། རིང་བ་ལ་ངེས་པར་བརྟགས་ཏེ། དེའི་ལས་ཀྱི་འགྱུར་གྱིས་ཕྱེ་ན། རང་གི་སྐྱེ་བ་སྔ་ཕྱིའི་ལས་ཀྱི་བྱེ་བྲག་རྣམས་ཤེས་པར་འགྱུར་ཏེ། མཆོག་དང་ཐུན་མོང་གིས་དངོས་གྲུབ་ཀྱི་བྱེ་བྲག་རྣམས་ཀྱང་ཤེས་སོ། །ཡེ་ཤེས་ཀྱི་རླུང་གི་འབྲས་བུའི་འགྱུར་ཡེ་ཤེས་འཆར་བའི་ཚད་དང་། སེམས་གནས་པའི་དུས་དང་། རྣམ་རྟོག་འགགས་པའི་དུས་དང་། ཚད་དང་གྲངས་རྣམས་ཤེས་པའོ། །དེ་ལྟར་ན་ལས་དང་ཡེ་ཤེས་ཀྱི་རླུང་གི་དེ་ཁོ་ན་ཉིད་ཤེས་ན་འཁོར་འདས་གཉིས་ཀྱི་མཚན་ཉིད་

རྟོགས་པའོ། །ཞེས་ནང་དོན་གཉིས་པ་རླུང་གིས་འགྱུ་བ་བླ་མའི་ཞལ་ལ་རག་ལུས་པས་གནད་ཤེས་ན་འགྲོ་བ་ཀུན་གྲོལ་བར་བསྟན་ནས། ད་ནི་ནང་དོན་གསུམ་པ་རླུང་སེམས་ཀྱི་འཇུག་པ་ཁྱད་པར་གྱི་ཐབས་བསྟན་པ་ནི། ཟུང་དུ་ནི་ལས་ཀྱི་རླུང་དང་ཡེ་ཤེས་གཉིས་ཏེ། ལས་ཀྱིས་འཁོར་བ་ལ་འཇུག་པས་ལས་གཉིས་བྱེད་དེ། འཁོར་བའི་རྒྱུ་ཀུན་རྫོབ་བདག་ཏུ་འཛིན་པའི་ཡུལ་ལ་ཞུགས་ནས་འབྲས་བུ་ཁམས་གསུམ་དུ་སྨིན་པར་བྱེད་དོ། །ཡེ་ཤེས་ཀྱིས་བཟླས་པ་ལ་འཇུག་པའི་ལས་གཉིས་ལས་ནི། དོན་དམ་པ་ཆོས་ཉིད་ལ་ཞུགས་ནས། འབྲས་བུ་མྱ་ངན་ལས་འདས་པའི་སྐུ་དང་། ཡེ་ཤེས་སུ་སྨིན་པར་བྱེད་པའོ། །དེ་ལྟར་རླུང་དེ་གཉིས་ཀྱི་ཟླ་ནི་ལུས་ངག་ཡིད་གསུམ་ལས། ལུས་ཀྱི་དངོས་པོ་རླུང་གི་གནད་ཀྱིས་རྡུལ་ཕྲ་རབ་ཀྱི་གཞི་སྟོངས་པས་རྡོས་བཅས་མེད་ལ། སེམས་ཀྱི་དྲན་རྟོག་ཡལ་སར་ཡལ་བས་སེམས་ཀྱིས་ཕྱེད་པས། དེའི་ལུས་ངག་ལ་སྣང་བ་ནི། གནས་པས་སྟོང་ལ། བརྗོད་པས་གསལ་ལ་གསལ་བས་ཟད་ཅིང་མེད་པར་ཤེས་པའོ། །དེ་ཡང་སྐྱེད་བྱེད་དང་པོའི་འཁོར་ལོ་ན་སའི་རླུང་ཤས་ཆེར་གནས་པས་ལུས་ཤའི་མདངས་སྟོན་ལ། ཡེ་ཤེས་ཀྱི་ས་བོན་དུ་བྱེད། སྙིང་སྟེ་དྲན་པ་འདུས་པའི་འཁོར་ལོ་ན་ཆུའི་རླུང་གནས་ཏེ། ལུས་ཀྱི་ཁྲག་གི་མདངས་སྟོན་ཅིང་། ཡེ་ཤེས་ཀྱི་རྩ་ལ་འཆར་བ་བྱེད། རོ་རྣམས་འདུས་པའི་འཁོར་ལོ་ན་མེའི་རླུང་ཤས་ཆེར་གནས་ཤིང་ལུས་ཀྱི་དྲོད་ཀྱི་འཕེལ་སྟོན་ལ། ཡེ་ཤེས་ཀྱི་སྣང་བ་རྫོགས་པར་བྱེད། རྩེ་མོ་རྣམ་པར་བཀོད་

པའི་འཁོར་ལོ་ན་རླུང་གི་རླུང་ཤས་ཆེར་གནས་ཤིང་ལུས་ཀྱི་དབུགས་ཀྱི་བསྐྱོད་བྱེད་ལ་ཡེ་ཤེས་དངོས་སུ་འཆར་བའི་སྒོ་འདོད་པར་བྱེད་པ་ཅན་ཏེ། རླུང་གཉིས་ལ་ལས་ཀྱི་རླུང་ལ་འབྱོངས་ན། ཐུན་མོང་གི་རྟགས་སྣ་ཚོགས་སྟོན་པར་ནུས་ཤིང་། ལས་དང་ལས་ཀྱི་བྱེ་བྲག་ལ་མཁས་སོ། །ཡེ་ཤེས་ཀྱི་རླུང་ལ་འབྱོངས་ན། མཆོག་གི་ཡོན་ཏན་སྟོན་ཅིང་ཕྱི་རོལ་གྱི་སྣང་བ་རྣམས་ཟད་པར་བྱེད་པའོ། །དེ་ཡང་སློབ་པར་འདོད་པའི་གང་ཟག་གིས་དྲན་བསམ་གྱི་འགྱུ་བའི་ཞེན་པ་ཡལ་བར་བྱ་བའི་གནད་དུ། རླུང་ཅི་ནས་ཀྱང་དལ་བར་མཁའ་ལ་འཕང་ཞིང་། ཁ་ནས་ཕྱིར་སྤུར་ལ་ལུས་ལ་མི་གནས་རྟག་ཏུ་བྱས་ན་གོང་གི་ཡོན་ཏན་དེ་དག་ཤེས་པར་ངེས་སོ། །དེ་ཡང་རླུང་གི་འཕེན་པས་རང་གི་ཁ་ནས་ཕྱིར་དབུལ་བ་ནི་གནད་ཡིན་ལ། འདིའི་དུས་ན་སྣ་བུག་གཉིས་དར་གྱི་མདོས་དགག་པར་བྱའོ། །དེ་ལྟར་ཡུན་རིང་དུ་བསླབས་པས་རིམ་གྱིས་ལུས་ཀྱི་བདེ་བ་ཐོབ་ལ། དེ་ནས་ངག་གི་དེ་ནས་སེམས་ཀྱི་བདེ་བ་འབྱུང་བ་ནི་བཞག་སར་སྡོད་པ་དང་། གཏང་སར་འགྲོ་བ་དང་། ངོ་ཤེས་པ་རྣམས་འབྱུང་ངོ་། །འདིའི་དུས་ན་འཁོར་བའི་མཚན་ཉིད་ཤེས་པ་དང་། འདས་པའི་མཚན་ཉིད་ཤེས་པ་གཉིས་ལས། རང་གིས་དེ་གཉིས་ཀྱི་རྒྱུ་རྐྱེན་འབྲས་བུ་བརྟགས་པས་སོ་ན་གནས་པའི་ཡེ་ཤེས་ཀྱི་རྩལ་འབྱོངས་པ་ལ་ཐེ་ཚོམ་མེད་དོ། །ཞེས་དེ་དག་གིས་ནི་སྤྱི་དོན་དང་པོ་རླུང་གི་གནད་ཡལ་བའི་རྒྱུ་མ་ཤེས་པ་འཁྲུལ་ཅིང་ལས་ཀྱི་འཇུག་པ་བསྟན་པ་ལ་ནང་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་བསྟན་

པ་ལ། ཡན་ལག་གི་དོན་གཉིས་ཀྱིས་བསྟན་པའི་དང་པོ་མེད་པའི་ཆོས་ཉིད་ལ་རྩལ་སྦྱངས་པས་འགྱུ་བའི་ཁོག་སྟོངས་པར་བསྟན་པ་ནི། གང་གི་ལམ་མེད་ན་འགྲོ་བའི་ཕུགས་གཏིབས་ཞེས་པ་ལ་སོགས་པས་བསྟན་ཏེ། གང་གི་གནད་ཤེས་པའི་འགྲོ་བ་ཡི། །དེ་ཡང་སེམས་འགྲོ་བར་བྱེད་པའི་ལམ་དྲན་བསམ་གློ་བུར་བ། དེས་གློ་བུར་བར་ཤེས་པ་ཙམ་གྱིས་དྲན་པ་ལ་སྐྱེ་བའི་སྟོབས་མེད་པ་ནི། སེམས་ཀྱིས་ཕྱི་རོལ་ཡུལ་དང་། ནང་ལུས་ལ་འགྲོ་བའི་ཕུགས་འཁྲུལ་བའི་ཡུལ་ཐ་དད་པ་རྣམས་གཏིབས་པས། འཁོར་བའི་གཞི་སྟོངས་པས་ལྡོག་པའི་ས་མེད་པས། ལུས་སེམས་ཀྱི་འབྲེལ་ཆོད་པའོ། །དེ་ལྟར་ཤེས་པ་ད་ལྟ་སྒོམ་གྱི་གཏད་པའི་ས་དང་ཤེས་པ་གུད་དུ་བཅད་པ་མེད་པ་ནི་བྱ་བ་དང་རྩོལ་སྒྲུབ་ཀྱི་གཞི་བློའི་དམིགས་པ་ཡུལ་དང་བཅས་པས་སྟོངས་པས་འབད་མི་དགོས་པར་རང་དོན་གསལ་བའོ། །དེ་ཉིད་ལ་བློའི་འགྱུ་བ་སྣ་ཚོགས་སུ་འཕོ་བ་མེད་ན་འཁྲུལ་པའི་རྩལ་ལོག་པའི་ཤེས་པ་རྣམས་ཟད་དེ། སེམས་ཉིད་མེད་པའི་དོན་མངོན་དུ་སྣང་བའོ། །དེ་ལ་བར་མཚམས་མེད་པར་གནས་ན་སངས་རྒྱས་ཀྱི་དགོངས་པའི་གཞི་འབྲེལ་མེད་ཡེངས་ས་མེད་པའི་གདང་རྙེད་པ་ཡིན་ནོ། །དེ་ལ་བཅོས་མའི་ཆོས་དམིགས་གཏད་དང་བཅས་པ་མེད་ན་བློ་བདེ་ན་སེམས་ཉིད་བདེ་གསལ་ཁོང་དུ་ཆུད་པའོ། །ཞེས་དང་པོ་མེད་པའི་ཆོས་ཉིད་ལ་རྩལ་སྦྱངས་པས་འགྱུ་བ་ཁོག་སྟོང་པར་བསྟན་ནས། ད་ནི་ནང་དོན་གཉིས་པ་བདེ་འདོད་ལྟོས་པའི་ཆོས་ཀྱི་བར་ཆད་བསལ་བར་བསྟན་པ་ན།

དེ་ལྟར་རྟོགས་པ་དེ་ཡང་གང་ལས་བྱུང་ཞེ་ན། ལྟོས་པ་རྣམས་རང་ཟད་ལས་བྱུང་སྟེ། སངས་རྒྱ་ཞེས་བྱ་བར་བཏགས་པ་མེད་པའི་སྔོན་རོལ་ན། སེམས་ཅན་ཞེས་པ་ཡང་དེ་ལས་ལྟོས་པས་ག་ལ་སྲིད་མིང་མེད་དོ། །དེའི་ཕྱིར་ན་བཏགས་པ་མིང་ཡིན་གྱི་གཏན་ཚིགས་ཀྱིས་གཞིགས་པས་གང་ཡང་མ་གྲུབ་པར་གཏན་ལ་ཕེབས་སོ། །གྲུབ་པའི་མཐས་བདེ་བར་བརྟགས་པ་སེམས་ལ་མི་སྣང་ན། ཕྱི་ལུས་དང་ནང་སེམས་ཀྱི་སྡུག་བསྔལ་བཙལ་བས་རྙེད་པར་སུ་ལ་ཡང་མི་སྲིད་དོ། །དེའི་ཕྱིར་ན་བདེ་སྡུག་རོ་སྙོམས་ཀྱི་གཏན་ཚིགས་ལས་མ་གཏོགས་པ། བླ་མས་མིང་དུ་བཏགས་པའི་འདི་ལྟར་བསྒོམས་དང་ཞེས་སེམས་བདེ་བར་འདོད་པའི་ཆོས་ནི། བསྒོམ་དུ་མེད་པའི་ཆོས་ཉིད་འཁྲུལ་པ་རྩ་བ་ཉིད་ལས་བྱུང་སྟེ། དེ་ཡང་གོང་མའི་འགྱུར་རམ་ལྟོས་པ་ལས་འོག་མ་སྣང་བ་ནི་ལྟོས་པ་ལས་བྱུང་བ་སྟེ། ཆོས་ཉིད་ལ་རྒྱུ་མཚན་གོང་འོག་གི་ལྟོས་མེད་པའོ། །ཞེས་སྤྱི་དོན་གཉིས་པ་བདེ་འདོད་ལྟོས་པའི་ཆོས་ཀྱི་བར་ཆད་གསལ་བར་བསྟན་ནས། དེ་གཉིས་ཀྱི་སྤྲོས་པ་རང་ཟད་པ་ཆོས་ཉིད་ལ་འབད་རྩོལ་མེད་པར་བསྟན་པ་ལ་ཡན་ལག་གི་དོན་གཉིས་སུ་བྱས་ནས་བསྟན་ཏོ།། །།ད་ནི་སྤྱི་དོན་གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕགས་ལུགས་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ། ཁྱད་པར་གྱི་ཚིག་བདུན་གྱིས་ཐེག་པ་གཞན་ལ་གཡངས་ས་བསྐུར་བར་བསྟན་པ་ནི། དེ་ཡང་ཁྱད་

པར་ཆེན་པོ་མཆོག་གི་ལྟ་བས་ཕྱེ་ན། ཞེས་པ་ལ་སོགས་པས་བསྟན་ཏེ། དེ་ཡང་དག་པར་གཞན་ལ་ཁྱད་པར་འཕགས་པ་རྫོགས་པ་ཆེན་པོ་མཆོག་གི་ཁམས་གསུམ་དུ་མི་བརྒྱུད་པའི་ལྟ་བ་ལྡོག་མེད་ཡོངས་སུ་གྲོལ་བས་ཕྱེ་ན། དབུ་མ་དང་སེམས་ཙམ་ལ་སོགས་པའི་གྲུབ་མཐའ་མཁན་པོ་རྣམས་ཀྱི་ཚིག་གིས་སངས་རྒྱ་བ་ལ་ཕན་མ་བཏགས་པ་ནི་ཁ་ཚིག་ཏུ་སོང་བས་ཞེན་པ་མ་གྲོལ་བས་ཕན་པ་མེད། དེ་ལ་གནོད་པ་བསྐྱལ་བ་ཡང་མེད་དེ། ཚིག་དེ་མིང་ཙམ་ལས་ཡང་དག་ཏུ་མ་གྲུབ་པས་སོ། །དེ་ཡང་ཚིག་དེ་ཤེས་པས་གྲོལ་བ་ཡིན་ན་བྱིས་པ་བརྡའ་སྨྲ་ཤེས་ལ་བསླབ་ན་གྲོལ་ཏེ། མི་གྲོལ་ལ། བཅངས་པས་གྲོལ་ན་བྱོལ་སོང་ལ་སོགས་པའི་མགུལ་དུ་བཏགས་ན་ཡང་གྲོལ་བར་རིགས་ཏེ། མི་གྲོལ་ངེས་པ་དང་། བདག་ཉིད་ཀྱིས་བདག་ཉིད་གྲོལ་ན། བུ་ཏོ་གྲོལ་བ་སྟེ་གང་ཟག་ལ་ཕན་པ་མེད་དོ། །བརྗོད་པས་གྲོལ་ན་སྨན་དཔྱད་ཀྱི་བུ་ཏི་ནད་པའི་དྲུང་དུ་བཀླག་པ་ཙམ་གྱིས་གྲོལ་བར་འགྱུར་ཏེ། ནད་པ་ལ་ཕན་པ་མེད་དོ། །དེ་ཡང་དཔེར་ན་མི་གསེར་གྱི་ནད་ཀྱིས་ཟིན་པའི་མི་ལ། དུང་དཀར་པོ་ལ་སེར་པོར་མཐོང་བ་དེ་ལ་ཁྱོད་ཀྱི་མིག་འཁྲུལ་ནས་འདུག་གོ། དུང་དཀར་པོ་ལ་སེར་པོ་མཐོང་བས་སོ་བྱས་ཀྱང་། འཁྲུལ་ནས་འདུག་སྙམ་པ་ཙམ་ལས་སེར་པོར་མཐོང་བའི་བདེན་པའི་མངོན་ཞེན་ནི་ལྡོག་པ་མ་ཡིན་ནོ། །དེ་ལྟར་གྲུབ་མཐས་གཏན་ཚིགས་དང་རིག་པས་བཤིག་ཀྱང་འཁྲུལ་པ་ལས་ལྡོག་མི་སྲིད་དོ། །དཔེར་ན་མིག་སེར་ཅན་སྨན་པ་མཁས་པས་ཚིག་གིས་བརྗོད་མི་དགོས་པར། མིག་

ཐུར་གྱི་ཕྱེ་ནས་མི་སྨན་བཏབ་པས། དུང་དཀར་ལམ་གྱིས་མཐོང་བ་དང་འདྲ་བར། བླ་མ་མཚན་ཉིད་དང་ལྡན་པ་གཅིག་གིས་ཚིག་སྤྲོ་མི་དགོས་པར་གནད་བསྟན་པ་ཙམ་གྱིས་དབང་པོ་རབ་སྐད་ཅི་མ་དང་པོ་ལ་གྲོལ་ལ། འབྲིང་པོ་གནད་དེས་བསྟན་པས་ཤེས་པ་ལ་བརྟེན་ནས་སྐད་ཅིག་མ་གཉིས་པ་གྲོལ་ལ། ཐ་མས་ཀྱང་དེ་ཤེས་པ་སྟེ་གོ་བ་ལ་བརྟེན་ནས་སྐད་ཅིག་མ་གསུམ་པ་ལ་གྲོལ་བར་ངེས་པས་ན། ཁམས་གསུམ་དུ་མི་བརྒྱུད་པའོ། །ཡང་དེ་ལྟ་བུའི་གནད་དེ་ལ་དབང་པོ་རྣོ་བ་ཤེས་རབ་ཅན་ལ་ཡང་ཚིག་གི་། སྙད་མང་པོ་མེད་པས་ཤེས་མི་དགོས་པས་ཕན་པ་མེད་ལ། དབང་པོ་རྟུལ་པོས་ཀྱང་གནད་དེ་བསྟན་ན་མི་ཤེས་མི་སྲིད་པས། དེ་ཡང་ཚིག་གི་རྟོག་དཔྱོད་མེད་པའི་གནད་ཀྱིས། ཐོས་པ་བྱས་ནས་དེ་ཉིད་རང་རྒྱུད་ལ་མ་སྐྱེས་པའམ། དེ་ལྟར་མི་བྱེད་པས། དེ་བཞིན་དུ་བསམ་པས་དོན་དང་མ་སྦྱར་བ་དང་། བསྒོམས་པས་ཆོས་ཉིད་ཀྱི་ཉམས་མྱོང་རྒྱུད་ལ་མ་སྐྱེས་པས་ཏེ། དེ་དག་ཤེས་བཞིན་དུ་དེ་རྣམས་དང་མ་འབྱར་བར་འཇིག་རྟེན་གྱི་ཆོས་ལ་སྤྱོད་པས་སླར་ངན་སོང་དུ་ལྟུང་བའི་གྲོགས་བྱེད་པས་ཕན་པ་མེད་དོ། །ཡང་གནད་འདི་བསྟན་ན་མཚམས་མེད་ལྔ་སྤྱད་པ་ཞིག་ཀྱང་མི་གྲོལ་མི་སྲིད་ལ། མ་བསྟན་ན་ཕ་རོལ་ཏུ་ཕྱིན་པ་དྲུག་ལ་རྒྱུན་དུ་སྤྱོད་པ་ཞིག་ཀྱང་ཁམས་གསུམ་ལས་མི་གྲོལ་བས། ལས་བཟང་པོ་བསགས་པས་ཕན་པ་མེད་ལ། བླ་མས་འདི་ཉིད་བསྟན་ནས་དེ་ལས་མི་གྲོལ་མི་སྲིད་པས། ངན་པས་གནོད་པ་མེད་གནད་ཀྱིས། དགེ་བའི་སྦྱོར་བ་ཅི་

བྱས་ཀྱང་རང་གི་སེམས་འཆིང་བ་ལས་མ་གཏོགས་པ་ཅི་ཡང་མེད་དོ། །ཡང་ཐེག་པ་རིམ་པ་དགུའི་ཆོས་རྣམས་ཀྱི་སངས་རྒྱ་བ་ལ་ཕན་གནོད་གང་ཡང་མེད་དོ། །དེ་དག་ནི་གནད་མེད་པས་ཡིད་ཀྱིས་དཔྱོད་ཅིང་དེའི་རྗེས་འཛིན་པའི་ལྟ་བ་དང་སྒོམ་པ་ཡིན་པའི་གནད་ཀྱིས། ཕན་པ་མེད་པའི་སྟེང་དུ་སླར་སངས་རྒྱས་རྣམས་ཀྱི་ཡོན་ཏན་དང་ཐབས་དང་ཤེས་རབ་ལ་སྒྲིབ་པར་བྱེད་པ་དང་། འོ་ན་གཞུང་པུ་ཏི་དང་གླེགས་བམ་འདི་དག་ལ་དགོས་པ་མེད་དོ། །ཞེ་ན་འདི་ཉིད་ཀྱི་དཀྱིལ་འཁོར་དུ་འཇུག་པར་བྱེད་པ་ལམ་གྱི་སྟེགས་ཡིན་ཙམ་ལས་གཞན་དུ་ཕན་པ་མེད་དོ། །ཡང་རིག་པའི་ཡེ་ཤེས་ཉིད་ཤེས་རབ་ཀྱི་སྤྱོད་ཡུལ་མ་ཡིན་ན། ཡིད་རྟོག་པ་ཐ་དད་པ་དང་འདྲེས་པའི་ཕྱིར་རོ། །དེ་ལྟར་ན་ལུང་ལས་ཀྱང་ཤེས་རབ་ཀྱིས་ནི་བརྟགས་ན་ཕུང་པོ་གཏིང་མི་རྙེད། །ཅེས་པས་སོ། །གནད་དེ་དབང་པོ་མིག་གིས་མཐོང་བ་ཙམ་གྱིས་གཏན་ལ་ཕེབས་པའི་གནད་ནི། དཔེར་ན་སྔར་འདྲིས་པའི་མི་ཕྱིས་མཐོང་བ་ཙམ་གྱིས་ངོ་ཤེས་ཏེ། མཚན་ཉིད་གཏན་ལ་དབབ་མི་དགོས་པ་དང་འདྲའོ། །དེས་ན་གྲུབ་མཐའ་འདོད་རྒྱལ་དུ་སྨྲ་བའི་ཆོས་ཡིད་ཀྱིས་དཔྱོད་པ་ན། སླར་ཁམས་གསུམ་དུ་འཆིང་བར་བྱེད་པ་མ་གཏོགས་པ་ལས་ཕན་པ་མེད་དོ། །དེ་ཡང་གནད་དེ་མ་བསྟན་ན་ཁམས་གསུམ་ལས་གྲོལ་བར་བྱེད་པ་ལ་དགེ་བས་ཕན་མ་བཏགས་ལ། གནད་དེ་ཤེས་པ་ལ་སྡིག་པས་གནོད་པ་གང་དུ་ཡང་མ་གྲུབ་པའི་གནད་ཀྱིས། ལུས་ངག་ཡིད་ཀྱིས་རྩོལ་བ་ཅི་བྱས་པ་ཐམས་ཅད་སྡུག་བསྔལ་དུ་འགྱུར་བ་ལས་ཁམས་

གསུམ་ནས་གྲོལ་བས་ཕན་པ་གང་ཡང་མེད་དོ། །ཡང་སྔགས་ཀྱི་སྐུ་གསུམ་ཡེ་ཤེས་ལྔ་པོ་འདི་འབྲས་བུར་འདོད་པ་ལ་འདི་ལམ་དུ་ཉམས་གོང་འཕེལ་གྱི་སྣང་བ་ཡིན་པའི་གནད་ཀྱིས། དེ་ཡང་ཆོས་སྐུ་ལོངས་སྐུ་སྤྲུལ་སྐུ་གསུམ་ཐོབ་ཏུ་རེ་བའི་རང་རྒྱུད་ཀྱི་བཅིངས་པས་ཁམས་གསུམ་ལས་མི་འདའ་བ་ཉིད་དེ། ཞེས་ཡན་ལག་གི་དོན་དང་པོ་ཁྱད་པར་ཀྱི་ཚིག་བདུན་ལ་བརྟེན་ནས་ཐེག་པ་གཞན་ལ་གཡངས་ས་བསྐུར་བར་བསྟན་ནས། ད་ནི་ནང་དོན་གཉིས་པ་རྫོགས་པ་ཆེན་པོའི་བྱ་བ་དང་བྲལ་བའི་གནད་ཀྱིས་ཅི་ཡང་སྤང་དུ་མེད་པར་བསྟན་པ་ནི། བདེ་བ་དང་སྡུག་བསྔལ་གཉིས་རང་ངོ་མཉམ་ངོས་ནས་རྒྱུད་དབྱེར་མེད་པར་མཐུན་པས། བདེ་བ་སྒྲུབ་ཏུ་མེད་ལ་སྡུག་བསྔལ་སྤང་དུ་མེད་པར་རྒྱུད་ཀྱི་སྟོན་པ་དཔལ་ལྡན་རྡོ་རྗེ་འཆང་བས་གསུངས། ཞེས་སློབ་དཔོན་ཉིད་སྟོན་པའི་ངག་གསུང་ལ་བརྟེན་པའོ། །འདོད་ཆགས་ལ་སོགས་པའི་ཚིག་དྲུག་གཞུང་གསལ་ལོ། །དེ་ལྟ་བུའི་ལྟ་བ་འདིས་ནི་དགེ་བས་ལུས་ངག་ཚི་ཆད་པའི་སྡུག་བསྔལ་བསལ་བས་སྡིག་པ་རྣམ་སྨིན་གྱི་རྒྱུ་གཉིས་ཀ་སེལ་ཏེ། སེལ་ལུགས་ཇི་ལྟར་སེལ་ན། དགེ་བྱ་བློ་ཡི་ཞེ་འདོད་མེད་པས། །སྡིག་པ་ཡང་ཤུགས་ལས་སེལ་བས་སོ། །འཁོར་འདས་གཉིས་ཀ་ཟད་པར་བྱེད་པའི་རྒྱུ། །རང་སེམས་གཞི་ཐོག་ཏུ་གློད་པ་དེའི་རང་བཞིན་མ་བཅོས་པ་རྣལ་མའི་རྒྱས་ཐེབས་པ་རྐྱེན་གང་སྣང་གི་སྟེང་དུ་བཞག་པས། ཡུལ་ལ་ཡུལ་གྱི་རྟོག་པ་བཅོམ་དེས་སྣང་ཤེས་ཆོས་ཉིད་དུ་ལྡན། དེ་ལ་ལྟ་སྒོམ་བདག་དང་བཅས་པ་སངས་པས། སྣང་བ་སྣང་ཐོག་ཏུ་ཆོས་ཉིད་རྒྱས་ཏེ།

ཤེས་པའམ་འགྱུ་བའམ་འགྱུས་ཐོག་ཏུ་འཇིག་པའི་གྲོགས་སུ་འདི་ལས་ལྷག་པ་མེད་དོ། །དེ་ཉིད་ཀྱིས་སེམས་ཀྱི་རྩ་བ་དྲན་བསམ་གློ་བུར་བར་ཤེས་པར་བརྟུལ་བར་ནི་ཕྱིས་མི་སྐྱེ་བར་བྱེད་པའོ། །དེ་ལྟར་ཤེས་པས་ཡིད་ལ་བྱེད་པའི་ཆོས་རྣམས་བསྣུབས་པས་སྲོག་ཡལ་ས་ངོ་ཤེས་ལ། དེ་ཉིད་རྟོགས་ཤིང་ངོ་ཤེས་པས་ཁམས་གསུམ་དུ་སླར་ལྡོག་པ་མེད་པའོ། །ཞེས་ནང་དོན་གཉིས་པ་རྫོགས་པ་ཆེན་པོ་བྱ་བ་དང་བྲལ་བ་ལ་སྤང་བླང་གང་ཡང་མེད་པར་བསྟན་ནས། ད་ནི་ནང་དོན་གསུམ་པ་སེམས་ཀྱི་རྟོག་པ་གདར་ཤ་བཅད་པ་གཏན་ཚིག་རིགས་པས་གྲུབ་པ་སུན་དབྱུང་བར་བསྟན་པ་ནི། གྲུབ་པས་ནི་དྲན་རིག་སྣ་ཚོགས་པར་སྣང་བའི་ཕྱིར་ན། དྲན་རིག་ནི་འཁྲུལ་བའི་སེམས་སུ་འདུག་པས་བརྟགས་པ་རྣམ་གྲངས་ཀྱི་ཆོས་ཀྱིས་དེ་ལས་བདེ་བར་འབྱུང་བར་འདོད་པ་ཅིའི་ཕྱིར་ཏེ། སེམས་ནི་དྲན་རྟོག་འཁྲུལ་པར་བྱུང་བས་གལ་ཏེ་དྲན་རྟོག་གློ་བུར་བ་བཞིན་དུ་སེམས་ཀྱང་ཡོད་ན་དྲན་རྟོག་ཀྱང་ཆོས་ཉིད་དང་བདེ་བར་འདོད་པར་རིགས་ཏེ། དེ་མི་འཐད་དེ། དྲན་རྟོག་གི་འགྱུ་བ་རང་ཡལ་བ་བཞིན་དུ་སེམས་ཡལ་ན། སེམས་ལས་བྱུང་བའི་བདེ་བ་ཡང་ཡལ་ནས་འགྲོ་ལ་དྲན་རྟོག་མི་ཡལ་ན་སེམས་ལས་བདེ་བ་འབྱུང་བར་མི་རིགས་སོ། །དྲན་རྟོག་མ་ཡིན་པའི་སེམས་ལོག་ནས་མི་རྙེད་ལ། རྙེད་ན་སེམས་དངོས་པོར་ཐལ་བའི་སྐྱོན་སྤང་བར་མི་ནུས་སོ། །སེམས་ལ་སྐྱེ་བ་མེད་དོ་ཞེ་ན། སྐྱེ་བ་མེད་པ་ལས་བདེ་བ་སྐྱེ་བ་མི་འཐད་ལ་སེམས་རང་ཆོས་ཉིད་ཡིན་ནོ་ཞེ་ན། དྲན་རིག་ཡལ་བས་སེམས་ཀྱི་མཚན་ཉིད་སྟོངས་པས་

སེམས་ཀྱི་མིང་ཙམ་དུ་ཡང་ཤེས་བྱ་ལ་གྲུབ་པ་མེད་པས། སེམས་ཆོས་ཉིད་ཡིན་ཞེས་ཅི་ལ་བྱ། དེ་ལྟར་ན་ཐེག་པ་སོ་སོའི་འདོད་པ་སེམས་ཆོས་ཉིད་ཡིན་ན། སེམས་ཡུལ་ཐ་དད་པ་ལ་འཇུག་པ་བཞིན་དུ་ཆོས་ཉིད་ཀྱང་འཇུག་པར་འགྱུར་ཏེ། འཇུག་ན་ཆོས་ཉིད་ཡིན་པ་ལ་གོང་མེད་དེ། མི་འཇུག་ན་སེམས་ཆོས་ཉིད་ཡིན་ཞེས་རང་གི་ཚིག་གི་དམ་བཅའ་ཉམས་སོ། གལ་ཏེ་སེམས་ལ་སྐྱེ་བ་མེད་པས་ཆོས་ཉིད་དུ་འགྲོ་ཞེ་ན། སེམས་ཡུལ་ཐ་དད་པ་ལ་འཕྲོ་ཞིང་སྒོ་ལྔ་ལ་སོགས་པའི་ཡུལ་ཀུན་ལ་མཆོད་པ་བཞིན་དུ་ཆོས་ཉིད་ཀྱང་མཆེད་པར་འགྱུར་ཏེ། ཡུལ་དེ་རང་ཆོས་ཉིད་ཡིན་ཞེ་ན་ཅིའི་ཕྱིར། ཡུལ་ལ་རང་བཞིན་མེད་པས་ཞེ་ན། མངོན་སུམ་དུ་གསལ་བས་སོ། དེ་ལྟར་ན་ཆོས་ཉིད་དང་ཡུལ་གང་དུ་སེམས་དང་ཆོས་ཉིད་གཉིས་སུ་འདུ་བར་འོས་པ་མིན་ཏེ། དེ་ལྟར་གཉིས་སུ་བྱུང་ན་རང་གི་སེམས་ཀྱང་གཞན་ལས་འབྱུང་བར་འགྱུར་ཏེ། གཞན་ལས་གཞན་འབྱུང་བ་ཐུག་མེད་དུ་འགྱུར་བའི་ཕྱིར་རོ། དེ་ལྟར་མིན་ཏེ་རླུང་ལས་སེམས་བྱུང་ལ་སེམས་ལས་རྟོག་པ་བྱུང་། རྟོག་པས་འཁོར་བའི་འབྲས་བུ་དང་བཅས་པར་བྱུང་བ་ཅིས་ཏེ་མི་རིགས་ཏེ། ཐོག་མའི་ཡང་རླུང་གི་འཕེན་པའི་ལས་མ་དག་པ་ལས་ཁམས་གསུམ་དུ་འཕངས་ལ། ད་ལྟར་ཡང་ལུས་སེམས་ཀྱི་འབྲེལ་རླུང་གིས་བྱེད་ལ་ཐ་མ་ཡང་ངན་སོང་ལ་སོགས་པར་རླུང་ལ་རྟོག་པ་ཞོན་ནས་འགྱུས་པས་འཁོར་བའི་ལས་སྣ་ཚོགས་བྱེད་ལ། རླུང་ཟད་པས་འདས་པའི་ལས་གང་ཡིན་ཡང་ཆོས་ཉིད་དུ་བྱེད་པའོ། དྲན་པ་རང་དག་པར་

ཤེས་པ་དེས་ན་རླུང་གི་འགྱུ་བ་ཙམ་ལ་མ་གཏོགས་པ་ཆོས་ཉིད་དུ་གྲོལ་བའོ། དེ་ཉིད་འགྱུ་བ་རང་ཡལ་དུ་མ་ཤེས་པ་ལས། གནད་མེད་པའི་ཕྱིར་འཁྲུལ་བའི་བདག་ཉིད་ལས་མ་གཏོགས་པ་མེད་དོ། ཞེས་སྒྱི་དོན་གསུམ་པ་ཁྱད་པར་མཆོག་གི་ཚིག་ལ་བརྟེན་ནས་ཐེག་པ་གཞན་ལས་ཁྱད་པར་འཕགས་ལུགས་བསྟན་པ་ལ་ནང་དོན་གསུམ་དུ་བྱས་ནས་བསྟན་ཏོ། ད་ནི་སྤྱི་དོན་བཞི་པ་ལྟ་སྒོམ་ཀྱིས་བདག་ཏུ་བཅེངས་པ་ལས་གྲོལ་བར་བསྟན་པ་ལ་ཡན་ལག་གི་དོན་བཞིས་བསྟན་པའི་དང་པོ་ལྟ་སྒོམ་འབད་པ་མེད་པའི་ཚད་བསྟན་པ་ནི། བལྟས་པས་ཕྱི་ནང་གང་ལ་ཡང་གནད་མཐོང་བའི་གཞི་རང་གི་སེམས་ཀྱིས་རྙེད་པ་ནི། ལྟ་བ་ལས་འདས་པའི་ཆོས་ཉིད་དོ། འཁོར་བ་རིང་དུ་ལ་སོགས་པ་གཞུང་ན་གསལ་ལོ། ནང་དོན་དང་བོའོ། ད་ནི་ནང་དོན་གཉིས་པ་བསྒོམ་དུ་མེད་པའི་སེམས་ཉིད་གློད་པས་གྲོལ་བར་བསྟན་པ་ནི། བློའི་བྱ་བ་དང་བྱེད་པས་བློས་བརྟགས་སུ་མ་བསྒོམས་པར་བཞག་ན་དེ་ཉིད་གྲོལ་བ་སེམས་ཡིན་ལ། རང་གི་ལྟ་སྒོམ་གྱི་འདོད་པས་སེམས་དེ་འཆིང་བ་ཅིའི་ཕྱིར་ཞེ་ན། ཆོས་གྱི་བྱ་བས་ཀྱང་ཁམས་གསུམ་དུ་འཁྲིད་པར་བྱེད་ལ། འཁོར་བའི་བྱ་བས་ཀྱང་ཀྱམས་གསུམ་དུ་འཁྲིད་པ་ལས་མི་བྱེད་དེ། དཔེར་ན་ཐག་སྒྲོག་དང་གསེར་སྒྲོབ་གཉིས་འཆིང་བྱེད་དུ་ངོ་མཉམ་པ་དང་འདྲ་བས་སོ། དེས་ན་སེམས་ལ་བྱ་བ་དང་བྱེད་པའི་མཐའ་དང་བྲལ་ས་བྱས་བཅོས་གང་བྱུང་ཡང་འཆིང་བས་ན། ཉག་གཅིག་དུ་མའི་སྤྲོས་པ་དང་བྲལ་བའི་སེམས་ཉིད་ནི། གློད་ན་ལ་སོགས་པ་གཞུང་ན་གསལ་བོ། ནང་དོན་གཉིས་པའོ། ད་ནི་ནང་དོན་གསུམ་པ་

གཅིག་ཤེས་པས་ཐམས་ཅད་གྲོལ་བར་ལྡོག་པ་དང་བཅས་པར་བསྟན་པ་ནི། གཅིག་དྲན་བསམ་གློ་བུར་དུ་ཡལ་བར་ཤེས་པས་འཁོར་འདས་ཀུན་ཆོས་ཉིད་དུ་གྲོལ་བ་ནི། བླ་མ་དམ་པའི་གསུང་གི་གནད་ཆ་བྱད་བཟང་པོས་གྲོལ་བའོ། །དེ་ཡང་ཐེག་པ་ཐུན་མོང་བས་འཁོར་འདས་ཀུན་དེད་པས་གཅིག་དྲན་པ་གློ་བུར་དུ་ཡལ་ས་ངོ་མ་ཤེས་པས་འཁོར་འདས་གང་ཡང་མ་ཟིན་པའོ། །སེམས་ཀྱི་གང་མཐོང་འགག་པ་ལ་སོགས་པ་ཚིག་བཞི་གཞུང་ན་གསལ་ལོ། །ནང་དོན་གསུམ་པའོ། །ད་ནི་ནང་དོན་བཞི་པ་མེད་པའི་ཆོས་ཉིད་ལ་བཟླ་བ་དང་བཅས་པར་བསྟན་པ་ནི། ལྟ་བ་མེད་ཅིང་ཞེས་པའི་ཚིག་བཞི་གཞུང་གསལ་ཡིད་རང་ནི། ཁམས་གསུམ་དུ་འཇུག་པའི་གཞི། དེའི་འདུ་བ་དྲན་པ་དང་། སེམས་དང་། བསམ་པ་དང་། རྟོག་པ་ཡིད་ཀྱི་ཁོངས་སུ་འདུས་པ་ལས་ཉོན་མོངས་པ་སྟེ། དེའི་ཡལ་ས་ངོ་ཤེས་པས་ཟད་པ་ནི། སྟོངས་པ་རང་སྟོངས་ནས་གྲོལ་སར་གྲོལ་བའོ། །དེས་ན་འཁོར་འདས་ཀྱི་ཆོས་ཐམས་ཅད་རང་ལས་མ་བྱུང་བ་མེད་པས་གཞན་ལ་བརྟེན་པ་སུའི་རིག་པ་ཡིན་ཏེ། དེ་ལྟར་རང་བྱུང་ཆེན་པོ་བཅོམ་ལྡན་འདས་ཞེས་པས་སོ། །དེའི་ཕྱིར་ད་རང་བྱུང་ཡེ་ཤེས་ལས་མ་བྱུང་བའི་ཁྱོད་ཅི་ཡིན་ཏེ། །དེ་ལྟར་ན་ཕྱི་རོལ་སྣང་རྟོག་ཀུན་ཀྱང་རང་གྲོལ་བས་སོ། །དེས་ན་གཞན་ལ་བྱུང་བ་མེད་པའི་ཆོས་ནི་མངོན་སུམ་མཐོང་བར་རང་གི་གནད་དོ། །ངོ་མཚར་རྨད་དུ་བྱུང་བ་བྱང་བ་སེམས། ཆུབ་པ་སྣང་བ། དེ་གཉིས་ས་བོན་འགྱུ་བ་སྣ་ཚོགས་པ་ཉིད་ཡིན་པས། དེ་ཡལ་བ་གློ་བུར་གྱི་རྩིས་

ཐེབས་པ་ནི་གཏན་ནས་བཅད་པ་སྟེ། དེ་ཡང་ཁ་ནས་རླུང་ཕྱིར་ཕུལ་བས་བྱུང་ཚོར་གྱི་རྣམ་རྟོག་གི་སྒོ་འགག་པའོ། ཡིད་ལས་རླུང་བྱུང་བ་དང་། རླུང་ལས་རྟོག་པ། རྟོག་པ་ལས་ཕྱི་ཡུལ་གྱི་སྣང་བ་རྣམས་སུ་བྱུང་བ་གསུམ་པོ་ཡང་དག་པ་ནི། ཡང་སྣང་བ་དང་བཅས་པ་དྲན་རྟོག་ཅི་བྱུང་བ་ཕྱི་ནས་ནང་དུ་རླུང་གིས་དྲངས་ཏེ། མགྲིན་པའི་འོག་ཏུ་སྦས་པ་ནི། དེ་དག་སྣུབ་པས་ཕྱི་ཡུལ་གྱི་སྣང་བའི་འབྲེལ་བ་ཆོད། དེ་ཁ་ནས་རང་གིས་ཟོས་ན་འཆིང་སྟེ། ཁམས་གསུམ་ལས་མི་ལྡོག་པར་ངེས་སོ། །དེ་ལྟར་ཡང་རང་ཤར་ལས། སྣང་སྲིད་ལྟོ་རུ་མིད་ཀྱང་ང་མ་བཤོས། ཞེས་སོ། །ཕྱི་ནང་གི་རྟོག་པ་མིན་པ་ནི། དཔེར་ན་བརྒྱལ་ནད་ཅན་ནད་ལངས་པས་དྲན་མེད་དུ་སོང་བས་བདེ་བ་རྙེད་དེ་ཅིའི་ངོ་བོར་ཡང་མ་གྲུབ་པ་ལྟར། རྣམ་རྟོག་གློ་བུར་བ་ཡིན་པར་ཤེས་པས་དྲན་པ་ནམ་མཁའ་ལ་ཡལ་བ་ལ་རྗེས་མེད་པས་ཆོས་སྐུ་སྟོང་པ་ཉིད་ཐོབ་པ་ནི། ཡལ་ས་ངོ་ཤེས་པ་ལས་བྱུང་བའོ། །དེས་ན་སེམས་སམ་རིག་པ་ལ་རྩ་བ་མེད་པ་སྔོན་ཆད་སུས་ཀྱང་མ་མཐོང་བས་སེམས་འགྱུ་བ་སྣ་ཚོགས་པའི་ཕྱིར་འབྲེངས་པས། ལུས་སེམས་ཀྱི་འབྲལ་བྱས་པས་ཏེ། སེམས་ཀྱི་རྩ་བ་མེད་པར་ཤེས་པས་དྲན་རྟོག་རང་འགགས་པ་དང་། ཕྱི་སྣང་བ་འགགས་པ་དང་། ནང་བྱ་བ་འགགས་པ་དང་། གསང་བ་རླུང་སེམས་འགགས་པ་རྣམས་ཀྱིས་འགྲོ་བ་དྲུག་གི་སོ་སོའི་སྐྱེ་གནས་རང་དག་པས། ད་དེར་སྐྱེ་མི་སྲིད་པའི་གནད་དོ། །དེ་ཡང་དངོས་པོ་རགས་པ་རྣམས་སྟོང་པ་ལ་ལྟོས་ནས་བརྟགས་པས་དངོས་པོ་སོང་བས། དེ་

ཉིད་རང་ཡང་སྟོངས་པས་སོ། །ཕྱི་ནང་རང་བཞིན་གྱི་ཆོས་ཉིད་ལས་མ་གཏོགས་པ་མེད་པས། ཇི་ལྟར་སྣང་བ་བདེ་བའི་ལུགས་སུ་བླུགས་པ་ཡིན་པས་འཁོར་བའི་ཆོས་ལ་སོགས་པ་ཅི་ཡང་མེད་དོ། །དཔེ་ལས་བྱུང་བ་ནི་གཞི་རྒྱལ་མཚན་གྱི་རྩེ་ལ་བཏགས་པའི་ནོར་བུ་རིན་པོ་ཆེ་ལྟ་བུའི་བསླབ་བྱ་ལ་བརྟེན་ནས་བསླབས་པས། སེམས་ཉིད་ཚིག་དང་། ཐ་སྙད་ལས་གྲོལ་བའི་དགོས་པ་ཡོད་དོ། །དེ་ཡང་འཁོར་བའི་རྟོག་པ་བདག་ཏུ་འཛིན་པ་ལས་གྲོལ་བ་ནི། མཁའ་ལྡིང་གི་བུ་གསེར་འགྱུར་གྱི་ལས་ལས་གྲོལ་བ་ལྟར་གྲོལ་བས། འཁོར་འདས་ཀྱི་བྱ་བ་རང་ལོག་པའོ། །དེ་ལྟར་འཁོར་བ་སྣང་ཤེས་ཀྱིས་སྡུས་པའི་ཆོས། སྣང་བ་སྣང་ཐོག་ཏུ་གྲོལ་བས་བཤིག་ལ་ཤེས་པ་འགྱུ་ཐོག་ཏུ་གྲོལ་བས་འགྱུ་བ་གློ་བུར་དུ་བཤིག་ལ། ཡེ་ཤེས་གཞི་ནས་རང་བཞག་ཏུ་ཤེས་པས་གསལ་སྟོང་གཉིས་དུས་གཅིག་འཇིག་པའི་ལས་ཀྱི་མཐའ་འཁོར་འདས་གང་དུ་ཡང་མ་དམིགས་པའོ། །སེམས་ཀྱི་མཚན་དུ་བསྟན་པ། དམིགས་ནི་བསླབ་བྱ་དང་ཤེས་བྱའོ། །དྲུག་པ་གྲངས་སོ། །འགྱུ་བ་རླུང་བྱེད་པ་ཡིད། རང་ལ་བཅང་བ། གནས་པ་སེམས། འཁོར་ལོ་གཅོད་པ། འཁོར་བའི་བྱུང་ཁུངས་རླུང་ལ་བཙལ་བས་འགྱུ་བ་ལས་ཀྱི་དམིགས་འགགས་ཏེ། འགྲོ་ས་མེད་པའོ། །ཞེས་བཞི་པ་ནི་གནད་དོ། །སེམས་ཀྱི་དམིགས་བཞི་པའི་རྣམ་པར་བཤད་པའོ། །ཨྠྀི། རྒྱ་རྒྱ་རྒྱ། ས་མ་ཡཱ། སེམས་ཀྱི་དམིགས་པ་ལྔ་པ་རྣམ་པར་བཤད་པ། དེ་ལ་སེམས་ཀྱི་དམིགས་ལྔ་པ་རིམ་འབྱེད་དྲུག་གིས་སེམས་

ཀྱི་དབྱེ་བ་བསྟན་ཏེ། འདི་ལ་སྤྱི་དོན་ལྔས་བསྟན་ཏེ། ཁྱད་པར་ལྟ་སྒོམ་གྱི་གཟེར་བསྟན་པ་དང་། གཉིས་པ་ཁྱབ་བརྡལ་དོན་གྱི་མན་ངག་ལ་བརྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་དང་། གསུམ་པ་རང་གྲོལ་གྱི་གནད་བྱས་བཅོས་ཅི་བྱས་ཀྱང་ཆོས་ཉིད་ལས་འདའ་ས་མེད་པར་བསྟན་པ་དང་། བཞི་པ་མི་རིགས་པར་སྦྱར་བ་ལ་འཁོར་འདས་ལྟོ་བཟློག་པར་བསྟན་པ་དང་། ལྔ་པ་ཁྱད་པར་སྟོབས་ཀྱིས་འཁོར་འདས་དུས་གཅིག་ལ་བསྒྲལ་བར་བསྟན་པའོ། །དེ་ཡང་བསྡུས་པའི་དོན་དང་པོ་ཁྱད་པར་ལྟ་སྒོམ་གྱི་གཟེར་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ་འཁྲུལ་བར་རང་བཞིན་གྱིས་གཞི་བསྟན་པ་ནི། དེ་ཡང་ཐོག་མ་ཆོས་ཉིད་སྟོང་པ་ཉིད་ཀྱི་ཁྱབ་བྱེད་ཀྱི་སྣང་བ་རང་ཤར་བ་ལས། ཁ་དོག་རྣམ་པར་མཛེས་པ་ཞེས་བྱ་བའི་རླུང་གི་འཕེན་པ་ཁ་ཕྱིར་འཁྱལ་བ་ལས། སྣ་ཚོགས་སྡུད་པ་དྲན་རྟོག་གི་རླུང་ཞེས་བྱ་བར་འགྱུས་པ་ལས། གཟུགས་མེད་པའི་ཁམས་ཀྱི་སེམས་ཅན་ཐམས་ཅད་རླུང་དེ་ལས་སྐྱེས་པ་ནི། དྲན་རྟོག་གི་ལས་བློ་ནང་དུ་བསགས་པ་ལས་བྱུང་བའོ། །དེ་ཡང་དང་པོ་གཟུགས་འབྱུང་བ་ཕྲ་རགས་ལས་བྱུང་བ་མེད་པའི་ལུས་ནི། རྣམ་ཤེས་ཡས་པ་ལས་ལུས་སུ་སོང་བའོ། །དེ་ལས་གཟུགས་སུ་བྱུང་བ་འདི་ཡང་དང་པོ་མེད་པ་སྟོང་པ་ལས་གཟུགས་མེད་པའི་ལུས་སུ་བྱུང་བའི་གནད་ཀྱིས། ད་ལྟའི་ལུས་འབྱུང་བ་ཕྲ་རགས་ལས་གྲུབ་པ་འདི་ལ་ཡང་དང་པོ་རྒྱུ་མེད་པས་རྟོག་པའི་རྟེན་མེད་ལ། བར་དུ་རྐྱེན་མེད་པས་སེམས་ཆགས་པའི་གནས་མེད་པའི་ཕྱིར་རང་བཞིན་གྱི་རྣམ་པར་དག་གོ། དེའི་ཕྱིར་ན་ཕུང་པོ་ལྔ་འབྱུང་

བ་བཅུད་པའི་གནད་ལ་བོར་ལ་ཁམས་བཅོ་བརྒྱད་མ་བྱུང་མ་སྐྱེས་པའི་ངང་ལ་བཞག །སྐྱེ་མཆེད་བཅུ་གཉིས་གཅིག་སྐྱེ་གཅིག་འགགས་པ་ཡིན་པ་མེད་པའི་ངང་ལས་བཞག་པས་གྲོལ་བ་སྟེ། དེ་ཡང་ཁྱད་པར་དུ་ལུས་ངག་ཡིད་མ་བཅོས་སེམས་རྣལ་མའི་ངང་རྒྱུན་རིང་བ་ལ་ཞོག་ཅེས་མངོན་འབྱུང་དུ་སློབ་དཔོན་གྱིས་གདམས་ལ། དེ་ཡང་སུ་ལ་གདམས་ན་འཇམ་དཔལ་བཤེས་གཉེན་ལ་གདམས་སོ། རྗེས་འཇུག་ཏུ་བླ་མས་སློབ་མ་ལ་གདམས་པའོ། །དེ་ཡང་བཞག་ལུགས་ཇི་ལྟར་བཞག་ཅེ་ན། ལུས་ངག་ཡིད་ཀྱི་བྱ་བ་དང་བྲལ་བ་ལ་བརྟེན་པས་སེམས་གཞི་ལ་བཞག་པས་གྲོལ་བའོ། །ཞེས་ནང་དོན་དང་པོ་བསྟན་ཏོ། །ད་ནི་ནང་དོན་གཉིས་པ་སྤྱོད་པའི་མཚན་ཉིད་ཉེ་བར་བསྡུས་པ་དཔེ་དང་བཅས་པར་བསྟན་པ་ནི། སྤྱོད་པས་ཞེས་པ་འཇིག་རྟེན་གྱི་བྱ་བ་ལ་སོགས་པ་མ་ཡིན་པར། ཆོས་ཀྱི་སྤྱོད་པས་བསྡུས་པས་མཚོན་པའི་ཚིག་ནི། གང་ཟག་དམ་པ་གང་གིས་གྲོལ་བར་ནི་འཁོར་བ་ལས་གྲོལ་བར་འདོད་པའི་རྫོགས་པ་ཆེན་པོའི་སྣོད་ཡོད་པའི་རིགས་ཀྱི་སྣང་བ་ལ་མ་ཆགས་པ་དང་། ཞེན་པ་མེད་པར་སྤྱད་དེ། དཔེར་ན་སྨྱོན་པས་འབྲེལ་བ་མེད་པའི་སྤྱོད་པ་སྣ་ཚོགས་བྱེད་པ་ལྟར། འགྲོ་བ་དང་འདུག་པ་ལ་ཐོགས་པ་མེད་ཅིང་དངོས་པོའི་རྫས་ལ་སོགས་པ་ལ་ཞེན་པ་སྤུ་ཙམ་མེད་པར་རྣལ་འབྱོར་པ་རྣམས་ཀྱིས་ཀྱང་བྱ་སྟེ། འགྲོའམ་སྙམ་ཙ་ན་འགྲོ་ལ། །འདུག་གམ་སྙམ་ཙ་ན་འདུག་སྟེ། འགྲོ་འདུག་སུས་ཀྱང་ངོ་མི་ཤེས་པར་བྱའོ། །ཤུགས་ལས་འབྱུང་སྟེ། གལ་ཏེ་བྱུང་ཡང་ཆེད་དུ་བྱའོ། །

དེ་ལྟར་བྱས་པས་རྣལ་འབྱོར་པའི་ལུས་ནི་གྱི་བརྡའ་རྩོལ་བ་དང་བྲལ་བར་འགྱུར་རོ། །དེ་ལྟར་སོང་བས་རྣལ་འབྱོར་པ་དེའི་དབང་པོ་ལྔ་རང་ཡན་དུ་འགྲོ་བས་ཚོགས་དྲུག་དགག་ཏུ་མེད་པ་ཡིན་ནོ། །ཞེས་ནང་དོན་གཉིས་པ་བསྟན་ཏོ། །ད་ནི་ནང་དོན་གསུམ་པ་དཔེ་བརྡའ་ཐབས་དང་གསུམ་གྱིས་གྲོལ་བ་བསྟན་པ་ནི། གང་ཞིག་ཚིག་ལ་གདིང་འཆའ་ན། ཞེས་པ་ལ་སོགས་པ་ཚིག་རྐང་བརྒྱད་ཀྱིས་བསྟན་པ་གཞུང་ན་གསལ་ལོ། །དེ་དག་གིས་བསྡུས་པའི་དོན་དང་པོ་ཁྱད་པར་ལྟ་སྒོམ་གྱི་གཟེར་ལས་གསུམ་དུ་བྱས་ནས་བསྟན་ཏོ། །ད་ནི་བསྡུས་པའི་དོན་གཉིས་པ་ཁྱབ་པ་བརྡའ་དོན་གྱི་མན་ངག་ལ་བརྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་ལ། ཡན་ལག་གི་དོན་གསུམ་གྱིས་བསྟན་པའི་དང་པོ་དཔེ་ལ་བརྟེན་ནས་དངོས་པོ་གཤིས་དེ་གཏན་ལ་དབབ་པར་བསྟན་པ་ནི། བྱ་བ་དང་བྲལ་བ་ཞེས་པ་ལ་སོགས་པས་བསྟན་ཏེ། བྱ་བ་ནི་ལས་དང་། རྟོག་པ་དང་། ལུས་ངག་གི་སྟེ། དེ་དག་དང་བྲལ་བ་ནི། དཔེར་ན་འོག་མིན་གྱི་ལྷའི་བུ་བདུད་རྩི་མ་གིང་གས་མྱོས་ཙམ་ན། ལུས་ངག་གི་བྱ་བ་དང་བྲལ་ནས་འདུག་ས་གཅིག་ནས་མི་འགུལ་བ་སྟེ། དེ་ལྟར་རྣལ་འབྱོར་པས་ཀྱང་བྱ་བ་བཏང་ནས། རི་ཁྲོད་བརྟེན་ན་ལུས་སེམས་གཡེང་བ་དང་བྲལ་ནས་འཁོར་འདས་གང་དུའང་རྟོག་པ་གང་ཡང་མི་སྐྱེའོ། །སེམས་ཅན་ལ་མཉམ་པར་ཤེས་པ་གནོད་སྦྱིན་ལག་ན་བེ་ཅོན་ཞེས་བྱ་བ་ལ་བུ་རབ་ཏུ་ཡིད་སྦྱིན་ཞེས་བྱ་བ་ཡོད་དེ། དེས་ལྷའི་ཡིད་བཞིན་གྱི་ནོར་བུ་ལྷུང་བ་རྙེད་པས་སེམས་རབ་ཏུ་རངས་

པས། སེམས་ཅན་ཐམས་ཅད་ལ་བདག་གིས་ཕན་པ་སྙམ་སྙོམས་སུ་བྱའོ་སྙམ་པའི་བློ་སྐྱེས་ནས། དགྲ་གཉེན་དང་ཉེ་རིང་མེད་པར་ཀུན་ལ་ཕན་པར་བྱས་པས། དེའི་སྟོབས་ཀྱིས་ལུས་ངག་ཡིད་ལ་བདེ་བ་ཁྱད་པར་ཅན་སྐྱེས་པ་ལྟ་བུར། རྣལ་འབྱོར་པས་ཀྱང་སྙིང་རྗེ་ཆེན་པོས་ཀུན་ནས་བསླངས་ནས་སེམས་ཅན་ཐམས་ཅད་ལ། དགྲ་དང་བུ་ངོ་མཉམ་སྟེ་ཉེ་རིང་མེད་པར་བྱམས་པ་དང་སྙིང་རྗེས་ཀུན་ནས་བསླངས་ནས། སྦྱིན་པ་ལ་སོགས་པ་བཏང་ནས། །སེམས་ཀྱི་གནད་གཏེམས་ན་ལུས་ངག་ཡིད་ལ་བདེ་བ་ཁྱད་པར་ཅན་སྐྱེ་བར་ངེས་སོ། །དེ་ལྟར་བྱས་པས་བློ་ལས་གྲོལ་བར་གནས་པ་ནི། དཔེར་ན་ཚངས་པའི་རྒྱལ་པོས་ཤར་ཕྱོགས་ཀྱི་ནམ་མཁའ་ཟད་པའི་མཐའ་མ་རྙེད་པས་ད་འགྲོ་བའི་ལམ་སྟོར་བ་ལྟ་བུར། རྣལ་འབྱོར་པ་གློ་བུར་གྱི་རྣམ་རྟོག་ལས་གྲོལ་བ་ཡང་ཆོས་ཉིད་སྟོང་པ་ཉིད་མཐའ་རྟོག་པས་ད་བགྲོད་པར་བྱ་བ་འཁོར་འདས་ཀྱིི་གཞི་སྟོངས་པའོ། །སེམས་ཀྱི་ཁྱད་པར་ནི་ཀླུ་དགའ་བོའི་བུ་མོ་འབྲས་ལྡན་ཞེས་བྱ་བ། ནམ་མཁའ་ལྡིང་གིས་འཇིགས་པའི་ལས་ལ་རྟོག་པའི་གཞི་སྐྱེས་ནས། ནམ་མཁའ་རིན་པོ་ཆེའི་གུར་ཕུབ་པར་བློས་བསམ་ཞིང་དམིགས་པས། ནམ་མཁའ་ལ་རིན་པོ་ཆེ་སྣ་ཚོགས་པའི་ཁང་པ་ཡིད་དུ་འོང་བ་སྟེང་གི་ཕྱོགས་རྡོ་རྗེ་འབར་བའི་གུར་གྱིས་གཏམས་པ་ཀུན་གྱི་ཡིད་དུ་འོང་བ་ཞིག་བྱུང་ངོ་། དེ་བྱུང་བས་ནམ་མཁའ་ལྡིང་གིས་ཀླུ་ཀུན་ལ་འཇིགས་པ་དང་བྲལ་བ་ལྟ་བུར། རྣལ་འབྱོར་པས་རླུང་སྦྱངས་པའི་ཏིང་ངེ་འཛིན་ལ་བརྟེན་ནས་ལུས་ཀྱི་ལས་ཀྱིས་ཉེ་བར་བསྒྲུབས་པས།

འགྲོ་བའི་མོས་པ་བསྒྱུར་བའི་སྟོབས་ཀྱིས་འགྲོ་བ་རྣམས་འཁོར་བའི་འཇིགས་པ་ལས་སྒྲོལ་བའོ། །ཡང་རྣལ་འབྱོར་པས་དངོས་པོ་གཤིས་མཐོང་བས་འཁོར་འདས་གང་ལ་ཡང་ཐོགས་པ་མེད་དོ། རྣལ་འབྱོར་པ་གྲུབ་ཚུལ་ལ་སེམས་ཀྱི་གནས་པ་སྐྱེས་པས་རང་སེམས་ལ་བྱན་ཚུད་པ། དཔེར་ན་དྲང་སྲོང་གིས་དམོད་པ་དོར་བས་ཀུན་བརླག་པར་བྱས། ལྷག་མ་རང་དབང་དུ་འདུས་པ་ལྟ་བུར། གྲུབ་མཐའ་རང་རྒྱུད་དུ་འཛིན་པ་ལས་བློ་ལོག་པའོ། །སེམས་ཀྱི་དམིགས་ལྔ་པའི་བསྡུས་དོན་གཉིས་པའི་ནང་དོན་དང་པོ་བསྟན་ཏོ། །ད་ནི་ནང་དོན་གཉིས་པ་སེམས་ཀྱི་བསླབ་བྱ་ཤེས་པའི་འགྱུར་རྩིས་པའི་གནད་བསྟན་པ་ནི། དེ་ལ་རྣལ་འབྱོར་པ་དད་པ་ལྡན་པ་ཞིག་གིས་སེམས་བཅོས་པའི་ཐབས་ལ་སློབ་ན། དཔའ་ན་ཞེས་སེམས་དྲན་ཅིང་འཕོ་ན་གོ་ཆ་བགོ་གོས་ཀྱིས་ཕུར་ལ་རླུང་ནང་དུ་ཡིད་ཙམ་བཟུང་། མཚོན་ནི་བླ་མའི་མན་ངག་དྲན་པར་བྱས་ལ། དེ་དང་ལྡན་པར་བྱས། དེ་དང་མི་འབྲལ་བ་གཅེས་སོ། །མགྱོགས་ན་རླུང་གི་འགྲོ་འོང་འུར་ཞིང་སེམས་གཅིག་ཏུ་མི་ཕེབས་ན། གཅིག་སེམས་སྙིང་གི་ནང་དུ་བཅུག་པ། མགོའི་ཚོགས་མར་ཆུ་ལྕག་གིས་བྲབ་པ་གཅེས་སོ། །ཡང་མནོན་ནི་ཤེས་པ་དྲན་པ་སྣ་ཚོགས་སུ་འགྱུར་ན་དང་གར་འགྲོ་བར་བཏང་། སླར་དེ་ཉིད་ཀྱི་སྟེང་དུ་སེམས་ཡང་དང་ཡང་དུ་ཕབ་ཅིང་བཞག་ལ་རྟེན་འབྲེལ་སྐུ་ལ་མུ་ཏིག་མིག་མ་ཕུག་པ་གདགས་པ་ཅེས་སོ། །ཡང་གུལ་ན་ནི་སེམས་རབ་ཏུ་རྨུགས་ན། གཏོད་པ་རང་གི་སྨིན་མཚམས་སུ་རླུང་སེམས་ཀྱི་ཐིག་ལེའི་ནང་དུ་སེམས་བཅུག་ལ། རླུང་ཡིད་

ཙམ་བཟུང་ལ་ཕོ་ཁར་རླུང་དེ་མནན་པ་གཅེས་སོ། །མཐོན་ཞེས་པ་སེམས་ཕེབས་སུ་མ་བཏུབ་ན། འོབས་ནི་སེམས་གར་སོང་གི་རྗེས་བཅད་པས། ཐ་མ་རང་ལ་བསྐོར་གྱིས་ལོག་ནས་དེ་ལ་རང་ངོ་ཤེས་པ་གཅེས་སོ། ལོ་ན་ཞེས་པ་སེམས་རབ་ཏུ་རྨུགས་ན། མིག་འབྲས་ནི་ཐིག་ལེ་སྟོང་པའི་སྒྲོན་མ་རང་མཐེབ་འཛུབ་ཀྱིས་གཏེམ་ཞིང་དེ་ལས་ཕྱིར་ནམ་མཁའ་ལ་འདོན་པ་གཅེས་སོ། །ཡང་རྟོག་ན་ནི་སེམས་རྟོག་པ་མང་པོས་ཀུན་ནས་སློང་སྒོམ་མ་ཕེབས་ན། དྲན་པ་གང་བྱུང་བའི་ཕྱིར་ན་ཕར་དེད་པས་ཤེས་པ་ཅི་མི་སྙམ་པའི་ཉམས་རྒྱུད་ལ་འཆར་ཏེ། དེ་ལ་ཡུན་རིང་བ་གཅེས་སོ། །ལྐུགས་ན་ཞེས་པ་སེམས་གང་དུ་ཡང་མི་འཕྲོ་ན་རང་བཞིན་རྟོག་མཐའ་ཕྱོགས་གཅིག་ཏུ་གོལ་བ་ཡིན་པས། བརྗོད་བྱ་ངག་སྨྲ་བཅད། སྣ་བུགས་གཡས་པ་དར་གྱི་ལྟོས་དགག་པ་གཅེས་སོ། །སྨྲ་ན་ཞེས་པ་འདིའི་ལུས་སེམས་ཀྱི་རྗེས་སུ་འབྲངས་པ་ཡིན་ཏེ། ངག་ཏུ་སྨྲ་སྙིང་འདོད་ན་སྒྲའི་གནས་སུ་ཏྲིང་ཞེས་པ་དང་། ས་ཨེ་ལི་ཞེས་པ་དང་། དྷ་ཀ་ཨུར་རྣ་ཞེས་པ་བསྒྱུར་བ་གཅེས་སོ། ཡེངས་ན་ཞེས་ཤེས་བཞིན་གྱིས་མ་ཟིན་ན་བག་ལ་ལུས་ཀྱི་ནང་དུ་སེམས་བཞག་པ་གཅེས་སོ། །འཁོར་ན་གཅིག་ལས་བསྐྱེད་པས་ན་རྒྱ་ཡིས་བཟུང་བ་ནི། རླུང་ནང་དུ་བཟུང་ལ་རིག་པ་མིག་ནས་ཕྱིར་ཕུལ་བ་གཅེས་སོ། །ལོག་ན་ཞེས་སེམས་ལ་ཆགས་ཤིང་ཕྱིར་འགྲོར་མ་བཏུབ་ན་རང་སར་བཏང་བ་ནི། རླུང་སེམས་ནམ་མཁར་རྒྱང་རིང་པོར་འཕང་བ་གཅེས་སོ། །འགྲོ་ན་ཞེས་སེམས་

མ་ཟིན་ན་ཉལ་བའི་མལ་འཚོལ་བ་ནི་དམིགས་པའི་རྟེན་ལ་གཏད་ཅིང་བསླབ་པ་གཅེས་སོ། །འདུག་ན་ཞེས་གང་གཏད་པས་ས་ལས་བོགས་མེད་ན། ཡན་ལག་བསྐྱོད་པ་ནི་དམིགས་རྟེན་ཡང་ནས་ཡང་དུ་སྤོ་བ་གཅེས་སོ། །ཞེས་ནང་དོན་གཉིས་པ་སེམས་ཀྱི་བསླབ་བྱ་ཤེས་པའི་འགྱུར་རྩིས་པའི་གནད་བསྟན་ནས། ད་ནི་ནང་དོན་གསུམ་པ་ལྟ་སྒོམ་གྱི་གཅེས་པའི་གཟེར་བསྟན་པ་ནི། གལ་ཏེ་ནི་རང་བཞིན་ཆོས་ཉིད་ལ་གནས་པར་འདོད་པས་རང་གི་སེམས་དལ་བ་འཚོལ་བའི་མིས་ནི། སྤྱོད་པ་བྱེད་པའི་ཚེ་ན་སེམས་ཡེངས་ལ་བོར་བ་གཅེས་སོ། །བསྒོམ་ན་ལ་སོགས་པ་ཚིག་རྐང་གསུམ་གཞུང་ན་གསལ་ལོ། །དེ་དག་གིས་བསྡུས་པའི་དོན་གཉིས་པ་ཁྱབ་པ་བརྡའ་དོན་གྱི་མན་ངག་ལ་བསྟེན་ནས་ཁམས་གསུམ་དུས་གཅིག་ལ་གྲོལ་བར་བསྟན་པ་ལ་ནང་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གསུམ་པར་རང་གྲོལ་བརྡའི་གནད་བྱ་སྤྱོད་ཅི་བྱས་ཀྱང་ཆོས་ཉིད་འདས་པ་མེད་པར་བསྟན་པ་ལ་ཡན་ལག་གི་དོན་ལྔས་བསྟན་པའི་དང་པོ་སེམས་ཀྱི་དབྱེ་བ་ལ་བརྟེན་ནས་ཆོས་ཉིད་རྟོགས་པར་བསྟན་པ་ནི། བྱུང་ས་མེད་པའི་སེམས་ནི་ཞེས་པ་ལ་སོགས་པས་བསྟན། བྱུང་ས་མེད་པའི་སེམས་ནི། དབྱེ་བ་ནི། བྱུང་ས་ལ་བརྟགས་པས་བྱུང་ས་མ་རྙེད་པ་དང་། དེ་ཉིད་བྱས་པ་ཡིན་ནམ་བྱས་པས་བྱས་པ་མིན་པས་སེམས་ཕན་ཚུན་འདུས་མ་བྱས་པ་དང་། དེ་སུས་ཀྱང་མཐོང་བ་མེད་པས་བལྟར་མེད་པ་དང་། ཕན་ཚུན་ལྟོས་པ་གང་ཡང་མེད་པས་གཅིག་ཡིན་པ་དང་། དེ་ལྟར་ན་སྣ་ཚོགས་སུ་

རྟོག་པས་སྤང་བླང་མེད་པའོ། །དེ་ལྟར་སེམས་ལྔ་པོ་དེ་ཡང་ཉོན་མོངས་པ་ལྔ་རང་སར་དག་པར་བྱེད་པ་དགོངས་པའོ། །གཞི་ཇི་ལྟར་བཟུང་ཞེ་ན། གནད་ཤེས་པར་བྱེད་པ་ནི་སེམས་ལ། དེ་ཤེས་པས་འདས་པའི་གཞི་ལྡོག་མེད་སོ་མར་ཟིན་པ་དང་། དེ་བསླབས་པས་སེམས་དེ་འགྲོ་མེད་དུ་ཟིན་པས་ན་རླུང་གི་འགྱུ་བ་རྒྱུན་ཆད་དོ། །ལམ་ཇི་ལྟར་གསལ་ཞེ་ན། སེམས་མཁའ་ལ་ཕྱུང་བ་ལུས་ཀྱི་འབྲེལ་བ་བཅད་པས་སྣང་བ་དུས་གཅིག་ལ་འགགས་པས་ཆོས་ཉིད་མངོན་སུམ་དུ་མཐོང་ལ། ཡེ་ཤེས་རྩ་ནང་ནས་དྲངས་པས་ལས་ཀྱི་རླུང་གི་བསལ་བས་ཡེ་ཤེས་རང་ངོ་ལ་མཐོང་བས་སོ། །ཕུག་ཇི་ལྟར་བཀྲུ་ན་དྲན་བསམ་གྱི་འཁོར་ལོ་ཡང་དག་པར་བཏགས་པས། དྲན་བསམ་ཐུན་མོང་བ་རྣམས་གློ་བུར་དུ་ཡལ་བ་སེམས་ཀྱི་མཚན་ཉིད་ཡེ་ནས་མ་གྲུབ་པས། སེམས་བྱ་བ་ཡང་ཐ་སྙད་བཏགས་པ་ཙམ་ལས་གྲུབ་པ་གང་ཡང་མེད་པས་ཅི་ཡང་མེད་པར་རྟོགས་པས་དེ་ལས་འགྲོ་ས་གཞན་མེད་པའོ། །རླུང་གི་འཕེན་སྡུད་ལ་ཇི་ལྟར་གཏད་ཅེ་ན། རླུང་ཕྱིར་འཕེན་པས་ལུས་སེམས་ཀྱི་འབྲེལ་བཅད་ནས་སེམས་ཀྱི་དངོས་པོ་སྟོངས་པར་བྱས། ནང་དུ་བསྡུས་པས་ཆོས་ཉིད་ཀྱི་གཞི་ལ་བཙལ་ལུས་ཀྱི་དངོས་པོ་བཤིག་པས་སོ། །གནད་ཇི་ལྟར་སྒེར་ཞེ་ན། རླུངགནད་ལ་སྒེར་བས་རྣམ་རྟོག་ཁོག་སྟོངས། ལུས་གནད་ལ་སྒེར་བས་ཡེ་ཤེས་དངོས་སུ་སྣང་། ངག་གནད་ལ་སྒེར་བས་བརྗོད་དུ་མེད་པའི་དོན་རྟོགས། སེམས་

གནད་ལ་སྒེར་བས་སེམས་ཀྱི་ཁར་བུ་གཞིག་སྟེ་མེད་པའི་དོན་མེད་པར་ཤེས་པའོ། །དེས་ནང་དོན་དང་པོ་བསྟན་ཏོ། །ད་ནི་སྤྱི་དོན་གསུམ་པའི་ནང་དོན་གཉིས་པ་བརྗོད་པ་བརྡའི་གནད་ལ་བརྟེན་ནས་བརྗོད་དུ་མེད་པའི་ཆོས་ཉིད་རྟོགས་པར་བསྟན་པ་ནི། ཡང་པ་ནི་རླུང་སྟེ་རླུང་གཅུད་པས་དབང་པོ་རང་དངས་པ་སྟེ། ལྕིད་ནི་དྲོད་སྐྱེ་བར་འདོད་ན་ཕོ་ཁར་ཚ་མེར་གྱི་མནན་ནོ། ཁམས་གསུམ་དུ་མི་ལྡོག་པར་འདོད་ན་ཕྱིར་ཅི་ནས་ཀྱང་འཕང་། ཟས་ཀྱི་རྣལ་འབྱོར་བྱེད་པར་འདོད་ན་ལྕེའི་སྟེང་དུ་བཞག །རྐང་མགྱོགས་ཐོབ་པར་འདོད་ན་རྐང་མཐིལ་དུ་བོར་བས་འགྲུབ་ལ། ལུས་བདེ་བར་འདོད་ན་ཤམ་ཐང་བར་དུ་གཞུག །ངག་ལ་ནུས་པ་རྫོགས་པར་འདོད་ན་སྟོང་མགོའི་ཨིག་སྐད་དང་བཅས་ཏེ་མགྲིན་པར་སྦས། སེམས་འོད་གསལ་དུ་གྲོལ་བར་འདོད་ན་རླུང་འོད་ཀྱི་དྲ་བའི་སྙིང་ནང་དུ་གཞུག་གོ། དེ་ལྟར་བྱས་པས་གོས་ལ་ཞེན་པའི་མཐའ་དང་། ཁམས་གསུམ་གྱིས་བཅིངས་པའི་དང་། ལས་ལ་ཞེན་པའི་དང་། གནས་གཅིག་ལ་ཞེན་པའི་དང་། ལུས་ལ་མངོན་པར་ཞེན་པ་དང་། ངག་དང་། སེམས་ཀྱིས་བཅིངས་པའི་མཐའ་དང་བདུན་རང་བཞིན་གྱིས་སངས་སོ། །ལྕི་བ་ནི་སའི་རླུང་སྟེ། ཉི་མ་གཡོན་ནས་རྒྱུ་བ། ཟླ་བ་གཡས་ན་རྒྱུ་བ། བར་ཁ་ནས་བཅུག་པས་དུས་རླུང་གི་འགྱུ་ཚད་ཤེས། དྲོད་ཕྱི་ལུས་ལ་ཕེབས་པའི་རྟགས་སུ་ལུས་ཡང་ཞིང་འབུ་སྲིན་ལ་སོགས་པ་མེད། ནང་སེམས་ལ་ཕེབས་པའི་རྟགས་སུ་གང་དུ་བཞག་

སར་སྡོད། གསང་བ་ཆོས་ཉིད་ལ་ཕེབས་པའི་རྟགས་སུ་ཅི་བསམ་ཆོས་ལས་འགྲོ་ས་མེད་པའོ། །དེ་ལྟར་བྱས་པ་ལ་གལ་ཏེ་ལུས་ངག་ལ་བདེ་བ་ཐུན་མོང་མ་ཡིན་པ་སྐྱེས་ན། ཐུན་ཡང་ནས་ཡང་དུ་སྤོ་བ་ནི། སྡུག་པའི་དོང་སྟེ། དེ་ཡང་བློ་ཆོས་ལ་བོར་བས་འཁོར་འདས་ཀྱི་ཚད་དུས་འདི་ཙམ་ན་ལུས་སེམས་འབྲལ་བར་ངོས་ཟིན་པར་ངེས་སོ། །སྟོང་ཉིད་ནི་སེམས་དངོས་པོ་ནི་སྣང་བ་གང་བ། ར་བར་བཅུག་པས་ནི་གང་གི་སྟེང་དུ་བཞག་པ། ཕ་ནི་འཁོར་བ། འཆི་བ་ནི་དེ་ཉིད་དུ་མི་ལྡོག་པ། དངོས་པོ་སྒོ་ལྔའི་ཞེན་པ་འཕྲ་བའི་ནི་གདམས་ངག་ཟབ་མོ། རླུང་ནི་ཉམས་དང་དྲོད་ཚད་བསྐུར་བས་ནི་ཡང་ན་གནད་ཤེས་པས་ཡལ་སར་ཐིམ་ལ། ཐིམ་སར་ཡལ་བའོ། །ཡུལ་ནི་སྣང་བ་ཙམ་ཆོས་ཉིད་དུ་ཤེས་པ། རྙེད་པ་རྟོགས་པའི་གདིང་ངོ་། །བདེ་འདོད་ན་ཡིད་ལ་བྱེད་པའི་ཆོས། སེམས་ཀྱི་གནོད་པ་ནི་རང་ལུས་སུ་འཇོག་པ་ལ་གནོད། བཤིགས་པས་ནི་ཡིད་ལ་མི་བྱེད་པ། མ་ནི་ཆོས་ཉིད། བསད་པ་ནི་ཆོས་ཉིད་ལ་རང་རྒྱུད་དུ་འཛིན་པ་ལས་གྲོལ་བའོ། །བྱར་མེད་པ་གནས་ལུགས། བྱ་བའི་ནི་བསླབ་བྱ། སྲབ་ཀྱིས་བཅུག་པས་ནི་ཤེས་བཞིན་གྱིས་ཟིན་པ། བུ་ནི་རིག་པ་སྐྱེ་བ་ནི་ཆོས་ཉིད་མཐོང་བ་རྣམ་པར་དག་པས་མངོན་སུམ་དུ་རིག་པ་མཐོང་བའོ། །ཆོས་རྣམས་ནི་གྲུབ་མཐའ་འདོད་རྒྱལ་དུ་འཛིན་པ། རྒྱ་མཚོ་ནི་མཉམ་བཞག་གཏིང་དུ་ནི་ཆོས་ཉིད་མ་བཅོས་པ། །

སྦས་པས་ནི་དེ་དང་བྲལ་བ་མེད་པ། དགྲ་ནི་ཉོན་མོངས་པ། སོད་པ་ནི་ཉོན་མོངས་པ་ཉིད་ཡེ་ཤེས་སུ་ཤར་བ། རང་ནི་ཤེས་པ་ལྟ་སྒོམ་ནི་གྲུབ་མཐའ་ཞེ་འདོད། །རླུང་ལ་ནི་ཤེས་རབ་བསྐུར་བས་ནི་བྱར་མེད་ཆེན་པོའི་དོན། གདིང་ཆེ་བ་ནི་ཁམས་གསུམ་དུ་མི་ལྡོག་པར་ངོ་ཤེས་པའོ། །ཞེས་ནང་དོན་གཉིས་པ་བརྗོད་པ་བརྡ་གནད་ལ་བརྟེན་ནས་བརྗོད་དུ་མེད་པའི་ཆོས་ཉིད་རྟོགས་པར་བསྟན་ནས། ད་ནི་ནང་དོན་གསུམ་པ་རང་གྲོལ་ལ་གཉེན་པོ་མེད་པའི་གནད་ལ་བརྟེན་ནས་རིགས་མཐུན་ནང་གིས་གྲོལ་བར་བསྟན་པ་ནི། དཔེར་ན་དུག་ལ་སོགས་པ་ཚིག་རྐང་པ་བདུན་གཞུང་ན་གསལ་ལོ། །ད་ནི་ནང་དོན་བཞི་པ་རང་བཞིན་དག་པའི་ཆོས་ཉིད་ཀྱི་ལམ་ལས་འཁྱར་ས་མེད་པར་བསྟན་པ་ནི། བྱར་མེད་ཅེས་པ་དངོས་པོའི་གཤིས། ཆོས་ནི་དེ་ལ་སྤྱོད་པ། བྱ་བ་ནི་ཡིད་ལ་བྱེད་པ། འཆིང་བ་ནི་མངོན་སུམ་དུ་སྣང་བ་ལ་སྒྲིབ་ལ། བྱུང་བར་འདོད་པས་ནི་ཚོགས་བསགས་པའི་བྱེ་བྲག་དཔག་ཏུ་མེད་པ་བྱས་པའི་མཐའ་ཁོང་ཁྲོ་སྐྱེས་པས་སླར་དྲི་མར་གྱུར་པ་ནི། ལུས་ངག་གི་སྡིག་པ་འཕེལ་བའོ། །དཔེར་ན་ཆུའི་རྙོག་མ་སངས་པར་འདོད་པས་བསལ་ན་སླར་རྙོག་མར་འགྱུར་བ་ལྟར། ལྟ་སྒོམ་ཡིད་ལ་བྱས་པས་སླར་སེམས་ཀྱི་རྟོག་པར་འགྱུར་བ་ནི། ཆུ་མ་རྙོགས་ན་དྭངས་ལ། སེམས་མ་བཅོས་ན་གསལ་བ་ཞེས་བྱའོ། །ཤེས་རབ་ལྡན་པ་ནི་ཆོས་ཀྱི་རློམ་པ་སྐྱེས་པས་དྲེགས་སེམས་དང་ལྡན་པ་ངའོ་སྙམ་པའི་ང་རྒྱལ་སྐྱེས་པས་སླར་ངན་སོང་གསུམ་དུ་སྐྱེ་

བའི་རྒྱུ་བྱེད་པས། ཆོས་སེམས་ཐོག་ཏུ་བཞག་པ་གནད་དོ། །ཆོས་ཀྱིས་ནི་མངོན་སུམ་གནད་ཀྱིས་ཆོས་ཀྱི་བཏགས་པ་རྣམ་གྲངས་ཀྱི་ཆོས་རྣམས་ཐ་དད་དུ་ཤེས་པས་ན་ཕྱགས་མས་འདེབས་ཏེ། །ཐ་སྙད་ལ་བློ་མི་གནས་པའོ། །ལྟ་དང་སྒོམ་པས་ནི་ཡང་དག་པའི་གནད་ཀྱི་ལྟ་སྒོམ་གྱིས་རང་གི་སེམས་སྟོང་པ་ངོས་བཟུང་དང་བྲལ་བས། མཚན་ཉིད་གང་དུ་ཡང་མ་གྲུབ་པར་ཤེས་པས་བསད་པ་སྟེ་སླར་མི་ལྡོག་པར་བྱེད་པའོ། །ཡང་རང་གི་མན་ངག་ལྡན་པས་ནི། དེ་ཉིད་ལ་མངོན་པར་ཞེན་པས་སླར་འཁོར་བར་འཆིང་བར་བྱེད་དོ། །གཏན་ཚིགས་དེའི་ཕྱིར་ན་ལམ་བདག་ཏུ་བཟུང་བ་མེད་པར་ཆོས་ཉིད་རྫོགས་པའོ། །ཞེས་དེ་དག་གི་སྤྱི་དོན་གསུམ་པ་རང་གྲོལ་བརྡའི་གནད་ཀྱིས་ཆོས་ཉིད་ལ་ཅི་བྱས་ཀྱང་ཆོས་ཉིད་ལས་འདའ་ས་མེད་པར་བསྟན་པ་ལ་ཡན་ལག་གི་དོན་བཞིར་བྱས་ནས་བསྟན་ཏོ། །ད་ནི་སྤྱི་དོན་བཞི་པ་མ་རིག་རིགས་པར་སྦྱར་བས་འཁོར་འདས་ལྟོ་ལྡོག་པར་བསྟན་པ་ལ། ཡན་ལག་གི་དོན་བཅུ་གཉིས་ཀྱིས་བསྟན་པའི་དང་པོ། ཆོས་ཉིད་ལྟོས་གཞི་དང་བྲལ་བའི་བརྡས། སྣང་རྐྱེན་རང་འགགས་པར་བསྟན་པ་ནི། ཡང་བརྗོད་པའི་ཚིག་ཙམ་ལ་བརྟེན་ནས་ཞེས་པ་ལ་སོགས་པས་བསྟན་ཏེ། ཡང་བྱ་བ་གནན་པའི་ཚིག་ཡིན་ཏེ། བརྡ་ལ་རང་བཞིན་གྱི་བརྡ་དང་། བྱས་ཤིང་བསྟན་པ་དང་། བརྗོད་པའི་བརྡ་དང་གསུམ་ལས་མི་འདའོ། །དེ་ལ་འདིར་བརྗོད་པ་ཚིག་ཙམ་ལ་བརྟེན་ནས། འཁོར་འདས་ཀྱི་ཆོས་ཐམས་ཅད་

བརྗོད་དུ་མེད་པར་ལ་བཟླ་བ་ནི། ཨེ་མ་ནི་ངོ་མཚར་ཤིན་ཏུ་ཆེ་བའོ། །ཡིད་ནི་རླུང་། བུ་ནི་དེ་ལ་རྟོག་པ་སྣ་ཚོགས་པ་ཞོན་ནས་འགྱུ་བ། སེམས་ཀྱིས་ནི་རླུང་ཕྱིར་ལ་འཕངས་པས་དྲན་བསམ་རང་ཡལ་བ། བཙོན་དུ་བཟུང་བས་ནི་དྲན་བསམ་ལས་འཕྲོས་པའི་ཡུལ་མེད་པའོ། །སྐྱེ་བ་ནི་ཡུལ་རྐྱེན་ལས་བྱུང་བའི་དྲན་རྟོག་རྒྱུན་ཆད་པར་ཡིན་ནོ། །དེ་ཉིད་ནམ་མཁའ་ལ་ཡལ་བ། ཚ་ནི་ཡལ་བའི་དུས་རྟོག་པ་ལྔ་རང་དེངས་པས། ང་བདག་གི་སྣང་བ་རྣམས་དུས་གཅིག་འགག་གོ། ཞེས་ནང་དོན་དང་པོའོ། །ད་ནི་ནང་དོན་གཉིས་པ་དྲན་རྟོག་སྤུར་བའི་ཐབས་བསྟན་པ་ནི། སེམས་ཀྱིས་མ་བཅོས་པའི་ཆོས་ཉིད། རྟོག་པ་ནི་དེ་ལ་རྟོག་དཔྱོད་བློ་དང་བཅས་པ། དེ་ཡང་རླུང་དང་བཅས་ཏེ་ཧ་ཞེས་བར་སྣང་ལ་འཕངས་པས། ནམ་མཁར་རྒྱང་རིང་པོར་འཕངས་པས་འགྱུ་བ་ལྔའི་ལྟོས་ཟད་པའི་ཚེ། ཕྲོགས་པ་ནི་གསལ་བའོ། །དྲན་པ་ནི་འགྱུ་བ་སྣ་ཚོགས་པ། ཁུངས་ནི་དང་པོ་འདི་ནས་འོངས་ཀྱིས་མེད་པ། འགགས་པ་ནི་དྲན་བསམ་གློ་བུར་བ་ཡིན་པར་ཤེས་པ་སྔར་མ་ཤེས་པ་ཡ་ཆ། ཞེས་ནང་དོན་གཉིས་པའོ། །ད་ནི་ནང་དོན་གསུམ་པ་ཆོས་ཉིད་བདེ་བ་ཆེན་པོ་ཤར་ལུགས་བསྟན་པ་ནི། སེམས་ཀྱི་རང་བཞིན་མ་བཅོས་པ། བུ་ནི་ཡུལ་ལ་ཤར་བའི་ཆོས་ཉིད། ཡིད་ཀྱི་རྟོག་པ་གློ་བུར་བའི་དབང་དུ་སོང་བ། བསད་པ་ནི་ཆོས་ཉིད་དམ། རྟོག་པ་འཆར་བ་ལ་གནོད་པ། ཕ་ནི་ཐབས། མ་ནི་ཤེས་རབ། དུས་གཅིག་ནི་དེ་ལྟར་ཐབས་ཤེས་རབ་གཉིས་ལ་

ཞན་པའི་མཐའ་མེད་པའོ། །ཤི་བ་ནི་སླར་མི་ལྡོག་པ་སྟེ། དེ་ཐབས་ཤེས་རབ་ལ་མི་ལྟོས་པའོ། །ཡ་དང་མི་སྐྱེ་བ། ལ་འདས་པ། ལ་མི་ལྡོག་པའི་རྒྱས་ཐེབས་པའོ། །ཞེས་ནང་དོན་གསུམ་པའོ། །ད་ནི་ནང་དོན་བཞི་པ་བློ་ལས་འདས་པའི་ཆོས་ཉིད་གཏན་ལ་དབབ་པ་བསྟན་པ་ནི། སྐྱེ་བའི་ནི་དྲན་བསམ་གྱི་ཁུངས་དེད་པ། བུ་ནི་དྲན་པ་སྐྱེ་བའི་རྐྱེན་ཤི་བས་ནི་དྲན་བསམ་རྐྱེན་ཐོག་རང་དུ་ཡལ་བས། བློ་དང་བཅས་པས་རླུང་དང་བཅས་ཏེ་ནམ་མཁའ་ལ་འཕངས་པའི་གཞི་མེད་པ་ནི། རབས་ཆད་པ་ནི་དྲན་རྟོག་སྐྱེ་བའི་རྒྱུ་འགགས་པའོ། །དེ་བློ་ཐོག་ཏུ་ལྡོག་པ་ལ་གཞི་ལུས་སེམས་སྟོངས་པ་ནི་དེ་གཉིས་ཀྱི་འབྲེལ་བ་ཆད་པའོ། །དེ་ད་ལྟ་ཤེས་པ་ངོ་མཚར་ཆེ་བའོ། །ཞེས་ནང་དོན་བཞི་པའོ།། །།ད་ནི་ནང་དོན་ལྔ་པ་ཡིད་ཚར་བཅད་པས་སེམས་ཉིད་རང་དོན་གསལ་བར་བསྟན་པ་ནི། མགྱོགས་པོ་ནི་ཡིད་གང་ལ་ཡང་ཐོགས་པ་མེད་པ། ལྕག་གིས་ནི་གར་སོང་གི་རྗེས་བཅད་པ། བྲབས་པས་ནི་ཡང་ནས་ཡང་དུ་ཡིད་ཀྱི་འགྱུ་བ་ལ་བརྟགས་པས་འཆི་བ་ཡལ་རྒྱུ། རྒྱུན་ཆད་པ་ནི་དེ་ཉིད་མ་རྙེད་པའོ། །དོན་དེ་ཆོས་ཉིད་ཡིན་པ་ཧ་ཅང་ཆེས་སོ། །ཞེས་ནང་དོན་ལྔ་པའོ། །ད་ནི་དྲུག་པ་རླུང་གནད་ཐབས་ཀྱི་མན་ངག་གིས་གཟུང་འཛིན་གྱི་ཡུལ་གདོན་པར་བསྟན་པ་ནི། གུལ་བོ་རླུང་དལ་བ་བརྟེན་པ། གཏོད་པ་ནི་ཡིད་ཙམ་ནང་དུ་འཐེན་པ། མནན་པ་ནི་ཕོ་ཁ་གཡས་སུ་མནན་པའོ། །གཉིས་ནི་གཟུང་བ་ཡུལ་དང་། འཛིན་པ་སེམས་བཙོན་

དུ་བཟུང་བ་གོང་མ་གཉིས་ཀྱི་གཞི་འགྱུ་བ་མེད་པ་ནི། མན་ངག་ཟབ་པའི་གནད་ཆེན་པོ་ལས་བྱུང་བའོ། །ནང་དོན་དྲུག་པའོ། །ད་ནི་ནང་དོན་བདུན་པ་འཁྲུལ་པ་གཞི་ལ་ལྡོག་པའི་ཐབས་བསྟན་པ་ནི། གཅིག་ནི་མ་རིག་པ། མཐར་སྔར་འཁྲུལ་མ་མྱོང་པའི་གནད། །སྤྱུགས་པ་ནི། ད་ལྟར་འཁྲུལ་པ་ལ་མི་གནས་པའི་རྩིས་ཐེབས་པ། བརྒྱ་ནི་འཁོར་བའི་འཇུག་སྒོ་བརྒྱ་དང་བཞི། ཡུལ་ཟིན་པ་ནི་ད་འཁྲུལ་མི་སྲིད་པར་ཐག་ཆོད་པས། དེ་ཡང་མ་རིག་པ་རིག་པར་ཤེས་པ་ཁྱབ་ཆེ་བའོ། །ནང་དོན་བདུན་པའོ། །ད་ནི་ནང་དོན་བརྒྱད་པ་ནི་སྐུ་གསུམ་གྱིས་བཅིངས་པ་ལས་གྲོལ་བའི་གནད་བསྟན་པ་ནི། སྟོང་ནི་འགྱུ་བ་ཐ་དད་པ། ལྕགས་སུ་བཅུག་པས་ནི་རླུང་གིས་བཟུང་ནས་མཁའ་ལ་སྦུར་བ། གསུམ་ནི་སྐུ་གསུམ་ལ་རང་རྒྱུད་དུ་བཟུང་བ། བཙོན་ལས་ཐར་བ་ནི་ལུས་ངག་ཡིད་ཀྱིས་བཅིངས་པ་ལས་ཐར་བས་སྐུ་གསུམ་རང་ཆས་པ་ལྟོས་པ་ཆེ་བའོ། །ནང་དོན་བརྒྱད་པའོ། །ད་ནི་ནང་དོན་དགུ་པ་འཁོར་འདས་ལ་བཟླ་བ་ཆོས་ཉིད་ལ་གང་ཡང་མེད་པར་བསྟན་པ་ནི། རྒྱབ་པ་ནི་གནད་ཤེས་པ། གཅིག་ནི་འཁོར་བ། རྒྱབ་པས་ནི་ནང་དེ་ཡལ་བར་ཤེས་པས། བོག་ཀུན་ལ་ཕོག་པ་ནི་འཁོར་འདས་གཉིས་མེད་འདྲེས་པས་གཉིས་སྣང་གི་ཤེས་པ་རང་ཡལ་བ་རྒོད་རང་སེམས་ལ་བྲོ་བའོ། །ནང་དོན་དགུ་པའོ། །ད་ནི་ནང་དོན་བཅུ་པ་ཐུན་མོང་གི་གོལ་ས་རྣམ་པར་བཅད་པ་བསྟན་པ་ནི། རྒྱབ་ཀུན་ལ་ནི་ཐིག་པ་ཐུན་མོང་པའི་ཚིག་གིས་སྤྲོས་པས་རྒྱབ་པས་ནི་ཀུན་རིག་པ་དང་གཏན་

ཚིགས་ཀྱིས་བཤིགས་ཀྱང་། ཕོག་པ་ནི་གནད། གཅིག་ནི་ཆོས་ཅན་གཅིག་ལ་ཡང་གནད་དུ་མ་སོང་བས་ཁམས་གསུམ་དུ་འཁྲིད་པར་བྱེད་པ་ནི་ཨེ་ཤ་ཞེས་བྱ་བ་ལ་གོད་པ་མེད་པའོ། །ཞེས་བཅུ་པའོ། །ད་ནི་བཅུ་གཅིག་པ་སེམས་ཉིད་གཉུག་མ་ལ་ལས་དང་བག་ཆགས་ཀྱིས་མི་གོས་པར་བསྟན་པ་ནི། གཅིག་ནི་མ་བཅོས་པའི་སེམས། དོང་ནས་ནི་ཁམས་གསུམ་འཁོར་བ་བཏོན་པས་མ་བཅོས་རང་སོར་བཞག་པ། མི་བརྒྱ་ནི་འཁོར་བའི་རྟོག་པ་སྣ་ཚོགས་པ། བཙོན་ནས་ཐར་བ་ནི་འཁོར་བ་ཉིད་དུ་གྲོལ་བས། ལས་དང་ཉོན་མོང་པ་ཐམས་ཅད་རང་དག་པ་ཧ་ཧ་ཞེས་པ་བཅུ་གཅིག་པའོ། །ད་ནི་ནང་དོན་བཅུ་གཉིས་པ་སེམས་ཉིད་ལ་ཐེག་པའི་ཆོས་འདུས་པར་བསྟན་པ་ནི། སྡོང་པོ་ནི་སེམས་ཉིད་ལ་འཁོར་འདས་གཉིས་གཅིག་ཏུ་བསྡོམས་པ་བཅད་པས་ནི་སེམས་ཀྱི་རྩ་བ་མེད་པར་ཆོད་པས་རྩ་བ་དགུ་ཆོད་པ་ནི་ཐེག་པ་རིམ་པ་དགུའོ། །ཞེ་འདོད་དང་བཅས་པའི་ལྟ་བ་དུས་གཅིག་ལ་ཤེས་པས། ཆོས་ལས་འདས་པ་ཨེ་ཆོས་ཨ་སྐྱེ་མེད་དུ་ལ་བཟླ་བའོ། །ཞེས་བསྡུས་པའི་དོན་བཞི་པ་མ་རིག་རིག་པ་སྦྱར་བས་འཁོར་འདས་ལྟོ་བཟློག་པར་བསྟན་པ་ལ་ཡན་ལག་གི་དོན་བཅུ་གཉིས་སུ་བྱས་ནས་བསྟན་ཏོ། །ད་ནི་སྤྱི་དོན་ལྔ་པ་ཁྱད་པར་སྟོབས་ཚིག་གིས་འཁོར་འདས་དུས་གཅིག་ལ་བསྒྲལ་བར་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ། མངོན་སུམ་རང་གནད་ཀྱིས་འཁོར་འདས་ལྟོ་སྦྱར་བར་བསྟན་པ་ནི། གཅིག་རྒྱབ་ཀུན་ཤི་བས་རང་ཡལ་ཞེས་པ་ལ་སོགས་

པས་བསྟན་ཏེ། གཅིག་རྒྱབ་འཁྲུལ་བའི་རྩ་བ་མ་རིག་པ་ངོ་ཤེས་པས་ཀུན་ཤི་བ་ནི་འཁྲུལ་པ་རང་ངོ་སངས་པས། དྲན་བསམ་རང་ཡལ་བའོ། །དེ་ལྟར་འཁྲུལ་པ་ཀུན་ཤི་བ་ནི་སླར་ལྡོག་པའི་ས་སྟོངས་པ། གཅིག་མ་སོད་པ་ནི་སེམས་ཉིད་ལ་སྐྱེ་ཤི་མེད་པ་འཕེལ་བ་ཆོས་ཀྱི་དབྱིངས་སོ། །ལས་ནི་བསླབ་བྱ་དང་མ་བྲལ་བ། སྲོག་ནི་འཁོར་བའི་བདག་ཏུ་ལྟ་བ། བདག་མེད་དུ་བཅད་པས་འདས་པའི་བདེ་བ་རང་གི་སེམས་ལ་རྙེད་པའོ། །བསྟན་པ་ལ་གནོད་པ་ལ་སོགས་པ་སྲོག་ཆགས་མ་རུངས་པ་རྣམས་ལ་དངོས་སུ་སྡིག་པ་སྤྱད་པར་བྱས་ན་ཕ་རོལ་ཕྱིན་པ་དྲུག་གི་དགེ་བ་བས་འདི་རྣལ་འབྱོར་པའི་གྲོགས་སུ་ཆེའོ། །གཞན་ནི་སྣང་བ་བསད་པ་ནི་སྣང་ཐོག་ཏུ་བཞག་པའི་དང་པོའི་རོ་ཤི་བས་བསད་ལ། རང་ནི་ཤེས་པ་གང་སྣང་གི་སྟེང་དུ་བཞག་པས་ཤི་བ་ནི་ཡལ་ས་ངོ་ཤེས་པས་འཁོར་བར་ལྡོག་པའི་རྐྱེན་ལས་རྣམ་སྨིན་ཟད་པའོ། །རང་ང་བདག །ཤི་བ་བདག་མེད་ཀྱི་དོན་རྟོགས་པ། གཞན་སྣང་བ་ཡེ་ཤེས་སུ་འཕེལ་བས་ཤེས་རབ་ཀྱི་སྟོབས་ཆེ་བའོ། །ཞེས་ནང་དོན་དང་པོའོ། །ད་ནི་གཉིས་པ་ཡི་གེ་བརྡའ་སྦྱོར་གྱི་སྣང་བ་རང་ལུས་སུ་བསླབ་པ་བསྟན་པ་ནི། རི་བོ་ནི་ཕྱི་རོལ་གྱི་སྣང་བ་དངོས་པོ་རགས་པ་རྣམས། ཏིལ་འབྲུའི་མིག་ཏུ་དྲངས་པའི་གནད་བཙུད་པས་ནི་རླུང་གིས་ལྟོ་འདི་སེམས་སྟོངས་པ་མ་ཁེངས་པ་ནི་དང་པོ་ཧ་ཧ་ཞེས་ཁར་མིད་དོ། །རི་རབ་ནི་ལུས། སྲང་ལ་གཞལ་བ་ནི་ལུས་ཀྱི་རྡུལ་ཕྲ་རབ་ཀྱི་ཚད་ཤེས་པས། ཕྱེད་ནི་འཁོར་འདས་ཀྱི་མཚམས་ཤེས་པའོ། །མེད་པ་ནི་སྟོང་པར། ངོས་ཟིན་པ་ནི། ཐེག་པ་ཧོ་ཧཱ་

ཞེས་དྲག་ཏུ་བརྗོད་པ་ལས་བྱུང་པས་སོ། །དེ་ཡང་རང་གི་ལུས་བདེ་ལུགས་སུ་འདུག་ནས་ཨྸཱ་ཞེས་དབང་པོ་སྤྱོད་ཡུལ་སྟོང་གསུམ་ཙམ་སྣང་ཡང་རང་རང་ལྟོང་འོག་ཁུགས་ལ་མིད་པས་སྐྲེས་མ་ཡལ་བ་ནི་སྟོང་པ་ལ་སྟོང་པ་ཐིམ་པའི་འོག་ཏུ་ཧྲཱི༔ ཞེས་པ་ལས་བྱུང་བའོ། །ནང་དོན་གཉིས་པའོ། །ད་ནི་གསུམ་པ་སྤྱོད་པའི་ཁྱབ་བྱེད་བསྟན་པ་ནི། རྣལ་འབྱོར་པ་ལམ་དུ་འགྲོ་བའི་དུས་ན་རྐང་པ་གཡས་པ་ལ་ཟླ་བ་བསྒོམ། གཡོན་པར་ཉི་མ་བསྒོམ་འགྲོ་བ་ནི་གདན་དུ་བཏིང་བའོ། །དེ་ལྟར་ཕྱིན་པས་འགྲོ་བ་གཞན་གྱི་མུན་སྲོས་པ་ནི་མཐོང་བའི་ནུས་པ་མི་འབྱུང་ངོ་། །སྤྱོད་པ་བྱེད་པའི་ཚེ་ལག་ཏུ་ཁ་ཊྭཱཾ་ཀ་རྩེ་གསུམ་པ་ཐོགས་པས་རང་ང་བདག་བསད་པས་སྤྱོད་པའི་ཚད། ཡང་སྤྱོད་པའི་ཚེ་ལུས་ལ་གོས་ནག་པོ་མུན་པ་དང་འདྲ་བའི་གོས་གྱོན་ལ་མཐོང་མིག་གསུམ་ཧུར་ཐོན་ལ་འབྲུ་ཚུགས་སུ་བལྟས་པས་ནི་ནང་དུ་རིག་པ་གསལ་བར་འགྱུར་རོ། །ལྟེ་བར་རཾ་བསྒོམ་སྟེ་རང་གི་ལུས་གཅེར་བུར་ཕྱུང་བས་དམ་པའི་དོན་ལ་དམིགས་ལ་གཞན་གྱི་ལུས་ལ་ཧས་བཏབ་ན་གྲང་བའི་རེག་པ་ཉམས་སུ་མྱོང་བ་ནི། དེ་ལ་བརྟེན་ནས་བྱིན་བརླབས་ཀྱི་རྐྱེན་དུ་འགྱུར་རོ། །གཅིག་ནི་སེམས་གངས་ནི་ཆོས་ཉིད། བསྐྱལ་བས་ནི་སྤྱོད་པའི་དུས་སུ་ལམ་དུ་ཁྱེར་བ། རང་ལུས་ལ་དྲོདསླེབས་པ་ནི་དེ་ལྟར་སྤྱོད་པས་བླང་བས་ནང་དུ་རྟོགས་པ་འཆར་ལ། ཕྱིར་ལུས་ཀྱི་འཇིགས་པ་དང་བྲལ་བ་དག་འབྱུང་ངོ་། །བསླབས་ཐབས་ནི་བྱ་ཚང་འཇུག་གི་བསླབ་པས་རང་སེམས་ཁུངས་

སུ་བཅུག་པས། དཔེ་ཡིས་སྦྱར་བས་ནི། ཀླུའི་བུ་ནི་མཁའ་ལྡིང་གི་འཇིགས་པ་ལས་གྲོལ་བ་ལྟར་གྲོལ་བས། ཡ་ང་བ་དང་བག་ཚ་བ་མེད་པའོ། །དེ་ལྟར་ཡལ་བའི་གནད་སུ་ཡིས་ཤེས་པ་དེ་ཉིད་ལ་བཅོས་སུ་མེད་ཉིད་དོ། །ཞེས་གདམས་པ་ནི་སྤྱི་དོན་ལྔས་སེམས་ཀྱི་དམིགས་ནི་བསླབ་བྱ། དྲུག་ནི་གྲངས་ཏེ། དེ་ལས་ལྔ་པ། དེ་ཡང་རིམ་གྱིས་འབྱེད་པའི་གནད་གོང་དུ་སེམས་ཀྱི་དབྱེ་བ་དྲུག་ལ་བརྟེན་ནས། སེམས་ཀྱི་དབྱེ་བ་ཡང་ལྔར་བསྡུས་ནས་བསྟན་པའོ། །རྣམ་པར་བཤད་པ་ཞེས་བྱ་བ། །མཁས་པ་བྱེ་མ་ལ་མུ་ཏྲས་མཛད་པ་རྫོགས་སོ། །རྒྱ་རྒྱ་རྒྱ། ཨྠྀི། ས་མ་ཡཱ།། །།༈ད་ནི་སེམས་ཀྱི་དམིགས་དྲུག་པ་རྒྱུན་དུ་འཁོར་ལུགས་དྲུག་གི་རྣམ་པར་བཤད་པ་ནི། འདི་མ་བསྡུས་པའི་དོན་གསུམ་སྟེ། དང་པོ་ཆོས་ཉིད་གནད་ཐོག་ཏུ་གྲོལ་བ་རང་གི་ཁྱད་པར་གྱི་གཞི་བསྟན་པ་དང་། གཉིས་པ་ཆོས་ཉིད་ཡལ་བའི་ཁྱད་པར་གྱིས་མ་གྲོལ་བ་གང་ཡང་མེད་པར་བསྟན་པ་དང་། གསུམ་པ་བསླབ་བྱ་རང་གི་མཚན་ཉིད་དཔེ་དང་བཅས་པས་གཞི་ལྡོག་མེད་དུ་བསྟན་པའོ། །དེ་ལ་སྤྱི་དོན་དང་པོ་ཆོས་ཉིད་གནད་ཐོག་ཏུ་གྲོལ་བ་ཁྱད་པར་རང་གི་གཞི་བསྟན་པ་ལ་ཡན་ལག་གི་དོན་གསུམ་གྱིས་བསྟན་པའི་དང་པོ་མན་ངག་ཁྱད་པར་ཆེས་གདམས་པ་དང་བཅས་པ་བསྟན་པ་ནི། དེ་ལྟར་བབས་ལུགས་བསྟན་པ་ནི་ཞེས་པ་ལ་སོགས་པས་བསྟན་ཏེ། དེ་ལྟར་བླ་མས་ཆོས་ཀྱི་བབས་ལུགས་རྟོགས་པར་བྱས་ལ་དེ་ངོ་སྤྲད་པར་

བྱ་སྟེ། ངོ་སྤྲད་པ་ལུགས་མང་ན་ཡང་། འདིར་ནི་བསྒོམ་དུ་མེད་པའི་དོན་དྲན་རྟོག་ཡལ་མཚམས་ཀྱི་གནད་ལ་བརྟེན་ནས་ངོ་སྤྲད་པ་བསྟན་པར་བྱ་སྟེ། དེ་ཡང་འདིར་ལག་ལེན་དུ་སྒྲིག་ན་རྒྱབ་ཡིག་སྣང་བའི་སྒྲོན་མ་དང་སྦྱར་རོ། །ད་ནི་དམ་པའི་དོན་ལ་འཇུག་པ་ཞེས་པ་ཚིག་རྐང་བཅུ་གཞུང་གིས་ཤེས་སོ། །ད་ནི་གཉིས་པ་སེམས་གློད་པས་གྲོལ་བ་བཞག་ཐབས་དང་བཅས་ཏེ་བསྟན་པ་ནི། དེ་ལ་དུས་གསུམ་སངས་རྒྱས་ཀྱི་རིགས་སྐལ་བ་ཡོད་པའོ། །ཀྱི་འབྲེལ་པ་མཚོན་པ་སྟེ། བླ་མ་དང་འབྲེལ་བས་སྐལ་ལྡན་སེམས་ཀྱི་བུ་ཞེས་བྱའོ། །ལུས་ཀྱི་ཆ་ས་ལ་ཕབ་ནས་ཇི་ལྟར་བདེ་ལུགས་སུ་བཅོས་ནས་གློད་པ་དང་། ཤེས་པ་ཡེངས་ལ་བོར་བའི་གནད་ཡང་དག་པ་ཡིན་པས། རང་སོ་ཞེས་སེམས་བཅོས་པ་མེད་པར་ཡེངས་ལ་བོར་ནས་བཞག་པས་དྲན་བསམ་གྱི་སྒོ་རྟོག་པ་སྣ་ཚོགས་སུ་འགྱུ་བ་བླ་མའི་བྱིན་བརླབས་ཀྱིས་འགག་གོ། གཉིས་པའོ། །ད་ནི་གསུམ་པ་བླ་མའི་མན་ངག་གནད་ལ་བོར་བ་བླ་མའི་གསུང་བརྗོད་པ་དང་བཅས་པར་བསྟན་པ་ནི། སེམས་རྟོག་པ་སྣ་ཚོགས་སུ་ཤོར་ན་གཤིས་གང་སྣང་བཅོས་པ་མེད་པའི་སྟེང་དུ་དབང་པོ་རང་ཡན་དུ་བཞག་པས་ནི། དྲན་པས་ཟུངས། རིག་པ་གཅོད་གཉིས་ལས་བྱུང་བའི་ཡིད་དང་། བློ་དང་། བསམ་པ་ལ་སོགས་པ་ཐམས་ཅད་ཡལ་བས་དུས་གཅིག་ལ་འགག་གོ། །ཞེས་བརྡས་བསྐུལ་བས། ཆོས་ཉིད་

བསམ་པ་ལས་འདས་པའི་གཞི་རྙེད་པ་ནི། ངག་ཏུ་ཨ་ཞེས་བརྗོད་པས་དྲག་པ་བླ་མ་བྱིན་རླབས་དང་ལྡན་པའི་ངག་ཏུ་གསལ་བས་གདབ་བོ། །དེ་ལ་བརྟེན་ནས་སྐལ་ལྡན་ལ་ངེས་པར་དེ་ཁོ་ན་ཡིན་ནོ་བའི་ཤེས་པ་སྐྱེ་བ་ནི་སེམས་ཉིད་མེད་པའི་དོན་རང་ཡལ་དུ་མཚོན་པ་ལས། དྲན་མེད་དང་སྨྲ་བ་དང་། འཕར་བ་ལ་སོགས་པ་འབྱུང་བ་ནི། གཤིས་ཀྱི་རྩལ་ཡིན་པས། སྐལ་ལྡན་གྱི་སེམས་གནས་པའི་སྟེང་ནས་ཤེས་པ་ཧད་པོ་དྲན་པ་ཡལ་བ་ལ་གནས་པ་ནི་བརྡ་དོན་གཉིས་མེད་དུ་འདྲེས་པའོ། །དེ་ལ་བླ་མས་དེ་ནི་གློ་བུར་བའི་དྲན་པ་དང་རིག་པའི་འགྱུ་བ་ཟད་པ་ལས་བྱུང་བ་ཡིན་པས། ཕྱིས་ཀྱང་དེའི་སྟེང་ལས་མ་འདའ་ཞིག །ཅེས་མཚོན་པའོ། །ཤེས་པ་དེ་ལྟར་སོང་ནི། འདི་ནི་དུས་ཀྱི་ཡལ་ས་ནམ་མཁར་སྦྱིན་པར་གྱིས་ཞེས་པས་སོ། སེམས་མེད་པ་ལས་དྲན་རིག་མེད་པར་མཚོན་པའི། དེས་ན་སེམས་ཀྱི་རྩ་བར་རང་ལས་རྟོགས་པ་ཁྱད་པར་ཅན་སྐྱེས་པས་བཟུང་ངོ་། །དེའི་ཕྱིར་ན་སེམས་མེད་པ་ལས་འདི་ལྟར་འཁྲུལ་པ་འོང་བར་ཅི་ལ་རིགས་ཏེ། འཁྲུལ་པ་ཉིད་འཁྲུལ་ཐོག་ཏུ་གྲོལ་བས་ན། དེས་ན་འདི་སེམས། དེ་ཡུལ། དེ་ལྟར་ཡུལ་སེམས་གཉིས་རང་གྲོལ་བ་ལས་མ་གཏོགས་པ་གཞན་མེད་དོ། །ཞེས་དེ་དག་གིས་ནི་སྤྱི་དོན་དང་པོ་ཆོས་ཉིད་གནད་ཐོག་ཏུ་གྲོལ་བ་ཁྱད་པར་རང་གི་གཞི་བསྟན་པ་ལ་ཡན་ལག་གི་དོན་གསུམ་དུ་བྱས་ནས་བསྟན་ཏོ། །ད་ནི་སྤྱི་དོན་གཉིས་པ་ཆོས་ཉིད་ཡལ་བའི་ཁྱད་པར་གྱིས་མ་གྲོལ་བ་གང་ཡང་མེད་པར་བསྟན་

པ་ལ་ཡན་ལག་གི་དོན་བདུན་གྱིས་བསྟན་པའི་དང་པོ། བློ་རིམ་གྱིས་པ་རྣམས་ཀྱིས་བསླབ་པ་ཐུན་མོང་མ་ཡིན་པ་ལ་བརྟེན་ནས་ཆོས་ཉིད་ལས་འཁྱེར་ས་མེད་པར་བསྟན་པ་ནི། གལ་ཏེ་སློབ་པར་འདོད་པའི་མིས་ཞེས་པ་ལ་སོགས་པས་བསྟན་ཏེ། གལ་ཏེ་བློ་རིམ་གྱིས་པ་རྣམས་ཀྱིས་ཆོས་ཉིད་ཀྱི་དོན་དེ་སློབ་པར་འདོད་པའི་མིས། རླུང་ཁ་ནས་ནམ་མཁའ་ལ་ཕྱིར་འཕངས་པས་དྲན་པ་ཡལ་བའི་མཚམས་ཤེས་བཞིན་དུ་གནས་པ་ནས་ངོས་བཟུང་བས་རྟོག་པ་གློ་བུར་བ་ཐམས་ཅད་རྒྱུན་ཆད་དོ། །དེ་ལ་དུས་ཐམས་ཅད་དུ་བཞག་པས་རང་གི་ཤེས་པ་ཅི་མི་སྙམ་པའི་ཉམས་འདི་ཡིན་འདི་མིན་གྱི་ཚད་བཟུང་བ་མེད་པ་རང་གི་རྒྱུད་ལ་འཆར་རོ། །དེ་ལ་རྒྱུན་དུ་གནས་པས་སེམས་ཀྱི་འཇུག་པ་ཐ་དད་པའི་རྒྱུན་རླུང་དང་བཅས་འགག་པ་ནི། དེ་ཚོ་གང་ལས་འབྱུང་ཞེ་ན། དེ་ནི་དང་པོ་ལུས་ཀྱི་གནད་ལུས་སྐྱིལ་ཀྲུང་ངམ་གང་བདེ་བར་བྱའམ། སེང་གེ་ལྟར་བྱས་པ་ལས་བྱུང་བའོ། །དེ་ལྟར་བྱས་པས་སེམས་ཀྱི་གནད་དུ་དྲན་རྟོག་རང་ཡལ་བས་བདག་གཞན་གྱི་འབྲེལ་བ་ཆོད་པ་ནི། རང་ལས་བྱུང་བས་སོ། །དེའི་ཕྱིར་ན་ཐ་མ་གང་དུ་ཡང་འགྲོ་བའི་ས་མེད་པས་ལྡོག་པའི་ཉིན་མེད་པའོ། །དང་པོའོ། །ད་ནི་གཉིས་པ་དྲན་རྟོག་གློ་བུར་དུ་ངོས་བཟུང་བ་དཔེ་དང་བཅས་ཏེ་བསྟན་པ་ནི། དཔེར་ན་ནམ་མཁའ་ལ་སྤྲིན་དེ་བྱུང་ཡང་གློ་བུར་དུ་བྱུང་ལ་ཡལ་ཡང་གློ་བུར་དུ་ཡལ་བ་བཞིན་དུ། དྲན་རྟོག་སྣ་ཚོགས་པ་གློ་བུར་རྐྱེན་གྱིས་སུ་ལ་ཡང་གནོད་པ་

མེད་དོ། །ནམ་མཁའ་ལ་སྤྲིན་གྱིས་གོས་པ་མེད་པ་དང་འདྲ། སེམས་རྟོག་པ་སྣ་ཚོགས་སུ་འགྱུ་བ་འདི་ཡང་དཔེར་ན་སྣོད་ལ་དྲི་མའམ་རྡུལ་ཆགས་པ་དང་འདྲ་སྟེ། སྣོད་ལ་དྲི་མ་དེས་གནོད་པ་དང་ཕན་པ་མེད་པ་ལྟར། ཆོས་ཉིད་ལ་ཕན་གནོད་དུ་མ་གྲུབ་པའོ། །དེ་ཡང་གློ་བུར་བར་ཤེས་པ་ལས་བྱུང་བའོ། །དེ་བཞིན་དུ་དྲན་པ་དང་རིག་པ་རྣམས་ནི་གློ་བུར་དུ་ལུས་ལ་ཆགས་པས་ཕན་གནོད་མེད་དོ། །སྣོད་ལ་དྲི་མས་གནོད་པར་ནུས་པ་མེད་པ་ལྟར་ཆོས་ཉིད་ལ་གནོད་པ་མེད་པ་དྲན་རིག་སེམས་ཀྱང་དེ་བཞིན་ནོ། །ཞེས་ནང་དོན་གཉིས་པའོ། །ད་ནི་ནང་དོན་གསུམ་པ་ཡལ་བའི་མཚན་ཉིད་ལུས་སེམས་ཀྱི་འབྲེལ་བ་བཅད་པ་བསྟན་པ་ནི། རྣམ་རྟོག་རང་ཡལ་བ་ནི། དཔེར་ན་འཇའ་ཚོན་བར་སྣང་ལ་བཀྲ་ལམ་མེ་ཡོད་པ་དེ་གར་སོང་ཆ་མེད་པར་ནམ་མཁར་རང་ཡལ་གྱིས་སོང་བ་ལྟར། དྲན་རྟོག་སྣང་བ་གློ་བུར་བ་ཡིན་པས་གར་སོང་ཆ་མེད་པར་ཡལ་ལ། དེ་ཉིད་གློ་བུར་བར་ཤེས་པ་ཙམ་ཀྱིས་རྒྱ་མཚོ་ཆེན་པོ་ལས་རླང་པ་བུན་གྱིས་བྱུང་ནས། ཐ་མ་ཡལ་གྱིས་སོང་ནས་དངོས་པོ་མེད་པ་ལྟར་དྲན་པ་སྣ་ཚོགས་སུ་ཤར་བ་བྲིང་གིས་བྱུང་ཡང་། དེ་ཉིད་བུན་གྱིས་རང་ཡལ་བས་དང་པོ་གང་ནས་བྱུང་གི་རྒྱུ་མེད། ཐ་མ་གང་དུ་འགྲོ་བའི་ལམ་མེད། བར་དུ་གང་དུ་གནས་པའི་རྟེན་མེད་པས་སོ། །དེའི་ཕྱིར་ན་རེས་ཡོད་པ་ལྟར་སྣང་ལ་རེས་མེད་པར་ལྟར་སྣང་བའི་སེམས་ཀྱང་དེ་དང་མཚུངས་ཏེ། དང་པོ་བྱུང་ས་མེད་པས་གཞི་དང་། རྩ་བ་མེད་པ་དང་།

ད་ལྟ་གནས་ས་མེད་པས་རྒྱུ་དང་མཚན་ཉིད་གང་དུ་ཡང་མ་གྲུབ་པ་དང་། ཐ་མ་འགྲོ་ས་མེད་པས་སྐྱེ་མེད་ངོས་བཟུང་དུ་མེད་པའི་སེམས་ཞེས་བྱའོ། །དེ་ཡང་ཕྱི་རོལ་རིག་པ་ཅན་ལྟར་དུས་ཀྱིས་ཡལ་བ་ཡིན་ཏེ། སེམས་ཀྱི་རྩ་བ་མེད་པར་ཤེས་པ་ཙམ་ལས་རྫུ་འཕྲུལ་ལམ། རྨི་ལམ་ལྟ་བུ་མ་ཡིན་པར་ངེས་པར་ཡལ་བས། རྟོག་པས་ཕན་གནོད་དུ་གྲུབ་པ་གང་ཡང་མེད་དོ། །དེའི་ཕྱིར་ལུས་འབྱུང་བའི་བྱེད་ལས་ཅན་ལས་སེམས་མ་བྱུང་བས་སེམས་ལ་ལྟར་མེད་ཅིང་བལྟས་པས་ཀྱང་མཐོང་བ་མེད་ལ། སེམས་སྟོང་པ་ངོས་བཟུང་དང་དང་བྲལ་བ་ལས་ལུས་མ་བྱུང་བས། འབྲེལ་བ་མེད་དེ་ལུས་བཞག་ནས་འགྲོ་བའི་ཕྱིར་རོ། །དེ་ལྟར་མེད་པའི་དོན་སྣང་བས་སྒྱུ་མའི་སེམས་ཏེ། མེད་པའི་འཇུག་པ་ཅན་ལས་སྒྱུ་མ་ལྟ་བུའི་ལུས་ཀྱང་མི་རྟག་པས། སྒྱུ་མ་ལྟ་བུའོ། །དེས་ན་སྒྱུ་མས་སྒྱུ་མ་བསླུས་པ་ལྟར། སེམས་མེད་པའི་ཡུལ་མེད་པ་བཟུང་བའོ། །ཞེས་ནང་དོན་གསུམ་པ་ཡལ་བའི་མཚན་ཉིད་ལུས་སེམས་ཀྱི་འབྲེལ་བ་བསྟན་ནས། ད་ནི་བཞི་པ་སྟོང་པའི་ཆོས་རང་ཤེས་པ་དཔེ་དང་བཅས་པ་བསྟན་པ་ནི། དཔེར་ན་ནམ་མ་རིག་པ་མཁའ་ཡེ་ཤེས་ལས་ནི་སྤྲིན་ཉོན་མོངས་པ་གློ་བུར་བ་བཞིན་དུ། སྣང་ཡང་དེ་ཉིད་ལ་གོས་པ་མེད་པ་སྟེ། རྣམ་རྟོག་ཅི་བྱུང་ཡང་འདི་ནི་རྣལ་འབྱོར་དག་པའི་ལམ་ཡིན་ཏེ། དཔེར་ན་ནམ་མཁའ་ལ་རྟོག་པ་སྐྱེ་བའི་གནས་མེད་ཅིང་མི་གནས། དེ་བཞིན་དུ་ཆོས་ཉིད་

སྟོང་པ་ཉིད་ལ་དྲན་བསམ་བློའི་རྟོག་པ་སྐྱེ་བའི་གནས་མེད་དོ། །གལ་ཏེ་དྲན་བསམ་གྱི་རྟོག་པ་དེ་ཉིད་ནམ་མཁའ་འདྲ་སྟེ། སྐྱེ་བྱ་སྐྱེད་བྱེད་གང་དུ་ཡང་མ་གྲུབ་བོ། །དཔེར་ན་ཡོད་པ་ལྟར་སྣང་བ་དང་མེད་པ་ལྟར་སྣང་བའི་ནམ་མཁའ་ལ་སྤྲིན་དང་། ཆར་དང་། ཁུ་རླངས་དང་། གཟའ་དང་། སྐར་མ་ལ་སོགས་པའི་ཆོ་འཕྲུལ་ཆེན་པོའི་དཀའ་བ་མིན་པ་ལྟར། སེམས་ལས་ཀྱང་དྲན་པ་དང་། རྟོགས་པ་དང་། འགྱུར་བ་སྣ་ཚོགས་པར་ཤར་བ་ནི། བཟང་བ་དང་ངན་པ་སུ་ལ་ཡང་དམིགས་ཏེ། ཕན་གནོད་གང་དུ་ཡང་མ་གྲུབ་བོ། །དེའི་ཕྱིར་ན་མ་རིག་པ་ལས་རྟོགས་པའི་ཡེ་ཤེས་ལོག་ན་མེད་པས། མེད་པར་མགོ་མཉམ་ལ། སེམས་ཅན་ལས་མ་གཏོགས་སངས་རྒྱས་ཞེས་བྱ་བར་མེད་དོ། །དེ་བཞིན་དུ་འཁོར་བ་དང་མྱ་ངན་ལས་འདས་པའི་འབྲེལ་གྱིས་དེ་ལྟར་སྣང་ངོ་། །ཞེས་ནང་དོན་བཞི་པའོ། །ད་ནི་ལྔ་པ་སྤང་བླང་མེད་པའི་དོན་ངོ་སྤྲད་པ་དང་བཅས་པ་བསྟན་པ་ནི། ཡལ་བའི་གནད་ནི་དང་པོ་མེད་པ་ལས་བྱུང་ལ། ཐ་མ་མེད་པར་མ་ཤེས་ན་མ་མཁས་པ་སྟེ། རྟོག་ཚོགས་གང་གིས་ཀྱང་སྤངས་པས་མི་སྤོང་བས། མེད་པའི་དོན་ཤེས་པས། སྤང་རྒྱུ་གང་ཡང་མེད་ལ་བླང་རྒྱུ་གང་ཡང་མེད་པའི་རྫོགས་པ་ཆེན་པོའི་དོན་ཞེས་བྱའོ། །གལ་ཏེ་གང་ཟག་ཆོས་ཉིད་བབས་ལས་ཤེས་པ་ཡོད་པ་ལ། སྣང་བ་སྔ་ཕྱིའི་བར་དང་། ཤེས་པ་སྔ་ཕྱིའི་བར་དུ་བཅས་པའི་ཞེས་

པའི་ཆོས་ཉིད་སྔ་ཕྱིར་དང་། རྟོག་པ་སྔ་ཕྱི་ལ་སོགས་པའི་བར་དུ་རང་སེམས་ལ་ངོ་སྤྲད་ན། དེར་ངོས་ཟིན་ནས་དྲན་རྟོག་རང་ཡལ་བས་བབས་ལས་ཡལ་བའི་མི་དེའང་ནི་དེ་བཞིན་དུ་སངས་རྒྱའོ། །ཞེས་ནང་དོན་ལྔའོ། །ད་ནི་དྲུག་པ་ཁམས་གསུམ་དུ་མི་ལྡོག་པ་དཔེ་དང་བཅས་པར་བསྟན་པ་ནི། ལུས་དང་སེམས་འབྲེལ་བའི་ཆོས་ལ་མི་ལྟོས་པས། རྟོག་པ་སྔ་ཕྱི་མ་འདྲེས་པ་དཔེར་ནམ་མཁའི་སྤྲིན་དང་མཚུངས་པ་ནི། ནམ་མཁའ་དང་སྤྲིན་སྔ་མ་དང་ཕྱི་ནས་འབྲེལ་བ་ཡོད་མི་སྲིད་པ་ལྟར། སྤྲིན་རང་ཡལ་ནས་ཕྱིས་ལྡོག་པ་མིན་ལ། དེ་བཞིན་དུ་ཡལ་བའི་གནད་ཡོད་མེད་གང་དུ་ཡང་མ་གྲུབ་ལ་མཁས་པ་ཡིས། ད་ཁམས་གསུམ་དུ་ལྡོག་པའི་རྒྱུ་མེད་པས་རྐྱེན་རང་སར་ཡལ། ལུས་སེམས་ཀྱི་འབྲེལ་མེད་པས་ལོག་པ་ཟད་པས་འཁོར་འདས་འབྲེལ་མེད་པར་རྟོགས་པའོ། །གལ་ཏེ་ལྡོག་པ་ཡོད་ན་དངོས་པོ་འདི་ལྟར་སྣང་བས་གསལ་ཏེ། སྔ་མའི་ད་ལྟ་འདི་མིན་པར་ཡིད་ཆེས་སོ། །དེ་ཡང་གང་ལས་བྱུང་ཞེ་ན། སེམས་ཉིད་ཐོག་མ་སྐྱེ་མ་མྱོང་བའི་གནད་ཀྱིས། ད་ལྟའི་དྲན་བསམ་གློ་བུར་བ་ཡིན་པས་དེང་བ་ཙམ་གྱིས་རང་སར་ཡལ་བའོ། །ཕྱིས་ན་སྔར་ཡལ་བའི་གནད་ཀྱིས་ཡང་གློ་བུར་བ་མ་ཡིན་པ་མེད་པས། གང་ཡལ་བ་ལ་རྗེས་མེད་པས་ན་ཕན་གནོད་གང་དུ་ཡང་མ་གྲུབ་པའོ། །དེ་ལྟར་ཤེས་པས་ཁམས་གསུམ་དུས་གཅིག་

ལས་འདའ་འོ། །ཞེས་ནང་དོན་དྲུག་པའོ། །ད་ནི་ནང་དོན་བདུན་པ་གཞི་རྩ་མེད་པའི་སེམས་ཉིད་བྱས་པ་ལས་འདས་པར་བསྟན་པ་ནི། དེ་ཡང་སེམས་ལ་གཞི་མེད་པས་ལྡོག་བྱ་བློའི་རྟེན་ཉམས་ལ། རྩ་བ་མེད་པའི་སེམས་ལ་སྐྱེ་བའི་གནས་མེད་པའི་འདི་ནི། དེ་ཡང་དྲན་པ་དང་བསམ་པ་གཞི་ལ་ཡལ་བས་ད་བསྐྱར་ནས་གཞི་ལ་རྫོགས་པ་མེད་དོ། །སེམས་ཉིད་ཐིག་ལེ་ཉག་གཅིག་ཡིན་པས་རྩ་བ་ཆད་པས་འཕེལ་མེད་པའོ། །གཏན་ཚིགས་དེས་ན་གཞི་དང་ལམ་དུ་འདོད་པའི་ཐེག་པ་འཁྲུལ་ལོ་ས་ལམ་ལ་སོགས་པའི་ཚིག་རྐང་བཅུ་བཞི་གཞུང་གིས་ཤེས་སོ། །དེ་དག་གིས་ནི་བསྡུས་པའི་དོན་གཉིས་པ་ལ་ཡན་ལག་གི་དོན་བདུན་དུ་བྱས་ནས་བསྟན་ཏོ། །ད་ནི་བསྡུས་པའི་དོན་གསུམ་པ་ལ་ཡན་ལག་གི་དོན་བཞིས་བསྟན་པའི་དང་པོ། ཆོས་ཉིད་ཀྱི་དོན་ཏེ་བསླབ་བྱ་དཔེ་དང་བཅས་པ་ལ་བརྟེན་ནས་ཡིད་ཆེས་པར་བསྟན་པ་ནི། དེ་ཡང་དཔེར་ན་སྲིན་མོ་གཡོ་བར་བྱེད་པ་ཞེས་པའི། བུ་རབ་ཏུ་བརྟན་པ་བྱ་བ་ཡིད་དུ་འོང་བ་ཞིག་ཕ་སྲིན་པོ་བསོད་དགའ་ཞེས་བྱ་བས་བསད་པས། མས་ངའི་བུ་གར་སོང་བྱས་པས། ཕ་ན་རེ་སྟོར་ཟེར་ནས་མོས་གླིང་བཞི་རི་རབ་དང་བཅས་པ་ལན་གསུམ་དུ་བསྐོར་ནས་བཙལ་བས་མ་རྙེད་པས། ཁོ་ཐག་ཆོད་ནས་ཞེན་པ་དང་བྲལ་བའོ། །དེ་ལྟར་དྲན་པས་རིག་པ་བསད་པས་དྲན་རིག་གི་ཁུངས་བཅད་པས་མཆོད་པས། རྟོག་པའང་ཡལ་བའི་ཚད་མེད་སྣང་དངོས་དག་པ་ལ་མཁས་པར་འགྱུར་རོ། །

གཉིས་པ་ཁྱུང་ཆེན་གཤོག་པ་རྫོགས་པ་ལྟ་བུའི་བསླབ་བྱ་ནི། ཁྱུང་སྒོ་ང་ནས་ཐོན་པ་དང་གཤོག་པ་རྫོགས་ཏེ། ནམ་མཁའ་ལ་ཐོགས་པ་མེད་པར་འགྲོ་བ་དང་འདྲ་བར། དྲན་ཤེས་པའི་རྟོག་པ་ཐ་དད་པ་གཞི་དངོས་པོའི་འདུག་ཚུལ་མ་བཅོས་པ་ལ། རང་ཐིམ་པའི་ཚུལ་གྱི་སྦས་པ་ནི། རླུང་དང་བཅས་ཏེ་མགྲིན་པའི་འོག་ཏུ་སྦས་པས་འཁོར་བའི་རྟོག་པ་ཐོགས་པ་མེད་པར་གཅོད་པའོ། །དེ་ལྟར་བྱས་པ་འདི་ནི་རང་གི་ཚད་ཡེ་ཤེས་སུ་འགྱུར་བ་ཤེས་པར་འགྱུར་རོ། །གསུམ་པ་སེང་གེ་ཡན་ལག་རྫོགས་པ་ལྟ་བུའི་བསླབ་བྱ་ནི། དཔེར་ན་སེང་ཕྲུག་མའི་མངལ་ནས་ཐོན་ནས་ཞག་དྲུག་ལ་ཡན་ལག་རྣམས་རྫོགས་ཏེ་གང་ལ་ཡང་ཐོགས་པ་མེད་པ་ལྟ་བུས། སེམས་སྔ་ཕྱི་ཟད་པས་རྟོག་པ་ཡལ་བའི་མཚམས་བཙལ་ནས། སྣང་བ་ལ་ཐོགས་པ་མེད་པར་སྤྱད་པས་སྣང་བ་དང་། ཤེས་པའི་གནད་ཟད་པ་དང་། ཡལ་ས་ལ་མཁས་པར་འགྱུར་རོ། །བཞི་པ་དཔག་བསམ་ཤིང་གི་རྩེ་ལ་ནོར་བུ་བཏགས་པ་ལྟ་བུའི་བསླབ་བྱ་ནི། དཔེར་ན་མི་དབུལ་པོ་ཞིག་གིས་ཉི་མ་དང་ཟླ་བ་གཟས་ཟིན་པའི་དུས་སུ་ཡིད་བཞིན་གྱི་ནོར་བུ་དཔག་བསམ་ཤིང་གི་རྩེ་མོ་ལ་བཏགས་ནས་མཆོད་པ་བྱས་ན་དགོས་འདོད་ཇི་ལྟར་བསམ་པ་འོང་བ་ལྟར། ཐབས་ཀྱི་རང་གནད་ཟིན་པ་ཡིས་ཅི་བྱས་ཐམས་ཅད་ཆོས་སུ་འགྲོ་བའོ། །དེ་ལྟར་ཐབས་ཀྱི་སེམས་ཀྱི་ཁྱད་ཡོད་མེད་

མཐའི་བྱེ་བྲག་ཕྱེད་པ་ལ་མཁས་པར་འགྱུར་རོ། །ལྔ་པ་ཐི་བྱ་ཚང་དུ་འཇུག་པ་ལྟ་བུའི་བསླབ་བྱ་ནི། ཐོག་མར་རྒྱ་བཅད་ནས་དེ་ནས་གང་ལ་ཡང་མི་འཛེམ་པར་འོང་བ་ལྟར། བརྡའ་རྗོད་པའི་ཚིག་ཙམ་ལ་བརྟེན་ནས་ནི། ཆོས་ཉིད་བརྗོད་དུ་མེད་པ་ལ་མཁས་པར་འགྱུར་རོ། །དྲུག་པ་སྟག་མོ་ཚང་ན་ཉལ་བ་ལྟ་བུའི་བསླབ་བྱ་ནི། སྟག་གྲུས་མ་ཚང་ན་ཉལ་བའི་དྲུང་ན་གང་གིས་ཀྱང་རྒྱུ་བར་དཀའོ། །གནད་ཤེས་པས་རང་ངོ་མཚང་ལ་ཕབས་ནས་དོན་རང་ཐོག་ཏུ་བཞག་པས་ཉོན་མོངས་པའི་དབང་དུ་མི་འགྲོ། དེ་ཡང་ལུས་སེམས་འབྲེལ་མེད་པར་ཤེས་པས། སེམས་ཉིད་ཡལ་བའི་རྗེས་ཆོད་པར་འགྱུར་རོ། །ཞེས་ནང་དོན་དང་པོའོ། །ད་ནི་ནང་དོན་གཉིས་པ་མ་བསླབ་པའི་སྐྱོན་ངོ་ཤེས་པས་མཐོང་བ་ཙམ་གྱིས་གྲོལ་བ་སྟོན་པ་ནི། མ་བསླབས་པའི་སྐྱོན་ནི། དེ་ཡང་དང་པོ་ལུས་ངག་བཅོས་པའི་བསླབ་བྱ་ལ་མ་བསླབས་ན། ཁམས་གསུམ་གྱི་གཞི་མི་སྟོངས་ཏེ། དེ་ལ་བསླབས་པས་ཁམས་གསུམ་ལས་གྲོལ་བའི་དགོས་པ་ཡོད། དཔེར་ན་བཙོན་ལྕགས་ལས་གྲོལ་བ་ལྟར་གྲོལ། གཉིས་པ་ལ་མ་བསླབས་ན། རྣམ་རྟོག་ཆོས་ཉིད་དུ་མི་འགྱུར་བས། བསླབས་པས་ཉོན་མོངས་པ་ལས་གྲོལ་བའི་དགོས་པ་ཡོད། འདི་རྒྱལ་པོའི་གཉའ་ལས་གྲོལ་བ་ལྟར་གྲོལ། གསུམ་པ་གནད་བཏུབ་པ་གནས་ལུགས་ཚད་ལ་འབེབས་པའི་བསླབ་བྱ་མ་

བསླབས་ན། སེམས་ཀྱི་གཞི་རྩ་མི་སྟོངས་པས། དེའི་ཕྱིར་ན་སེམས་ཀྱི་འཇུག་པ་རྒྱུ་རྐྱེན་ལས་གྲོལ་བའི་དགོས་པ་ཡོད། དཔེར་ན་ལི་གར་ཏའི་རྒྱལ་པོ་བྲམ་ཟེའི་དམོད་པ་ལས་གྲོལ་བ་ལྟར་གྲོལ་ལོ། །བཞི་པ་མ་བསླབས་ན་ཐེག་པ་ཐུན་མོང་བ་དང་ཁྱད་པར་མི་རྙེད་པས། སེམས་ཉིད་ཚིག་དང་ཐ་སྙད་ལས་གྲོལ་བའི་དགོས་པ་ཡོད། དཔེར་ན་མཁའ་ལྡིང་གི་བུ་གསེར་འགྱུར་གྱི་ལས་ལས་གྲོལ་བ་ལྟར་གྲོལ། ལྔ་པ་མ་བསླབས་ན་སྣང་རྟགས་ཀྱི་ཆོས་ཡིད་སྣང་དུ་འཆོར་བས། དྲན་བསམ་འགྱུ་བ་ཐ་སྙད་པ་ལས་གྲོལ་བའི་དགོས་པ་ཡོད། དཔེར་ན་ཀླུའི་བུ་མཁའ་ལྡིང་གི་འཇིགས་པ་ལས་གྲོལ་བ་ལྟར་གྲོལ། དྲུག་པ་ལུས་སེམས་འབྲེལ་བ་བཅད་པའི་བསླབ་བྱ་མ་བསླབས་ན་སྐྱོན་ནི་རྟོག་པ་། དད་པའི་དབང་དུ་འགྱུར་བས། དེའི་དགོས་པ་ནི་ལྟ་སྒོམ་ཡིད་ལ་བྱེད་པ་ལས་གྲོལ་བའི་དགོས་པ་ཡོད་དོ། །དེའི་དཔེས་ཀྱང་ནི་ནམ་མཁའ་དང་འཕྲད་པས་རིས་མེད་མེད་སྣང་དུ་གྲོལ་བའི་རང་ཐོག་ཏུ་ཕེབས་པ་སྟེ། དེ་ཡང་དཔེར་ན་སྔར་འདྲིས་ཀྱི་མི་ཕྱིས་མཐོང་བ་ཙམ་གྱིས་ངོ་ཤེས་པ་བཞིན་ནོ། །དེ་ལྟར་ཆོས་དྲུག་གསུམ་པོ་ངོ་ཤེས་པས་ཐེ་ཚོམ་དང་ཡིད་གཉིས་མེད་པར་སངས་རྒྱས་པ་ཁོ་ནའོ། །གལ་ཏེ་གནད་དེ་མཐོང་བ་ཙམ་གྱིས་གྲོལ་བར་འདོད་ན་ཡང་། འདི་ལྟར་སྣང་བ་མངོན་སུམ་གྱི་གནད་དུ་བསྟན་པ་ཡིས། དབང་པོ་ལྔའི་ཡུལ་དུ་མཐོང་ཚད་དག་པའི་སྣང་བར་གྲོལ་ལོ། །ཞེས་ནང་དོན་གཉིས་པའོ། །ད་ནི་

ནང་དོན་གསུམ་པ་དབང་པོ་ཡུལ་གྱི་གནས་ལ་གཏན་ཚིགས་ཀྱིས་གཟེར་བཏབ་པས་རང་དབང་མེད་པར་གྲོལ་བར་བསྟན་པ་ནི། དེས་ན་དབང་པོ་ནི་ལྔ། ཡུལ་ནི་གཟུགས་ལ་སོགས་པ་ལྔ། གནད་ནི་དེ་ཉིད་ཤེས་བཞིན་གྱིས་ཟིན་པ་བསྟན་པའི་ཚིག་ནི་བླ་མའི་གསུང་གཟེར་བཏབ་པས་ནི། བསྟན་པ་ཙམ་གྱིས་མཐོང་ལ་མཐོང་བ་ཙམ་གྱིས་རྟོགས། རྟོགས་པ་ཙམ་གྱིས་འབྲས་བུ་ཐོབ་པ་གསུམ་དུས་མཉམ་པས་ན། གནད་ལ་ཕབ་པ་ཞེས་བྱའོ། །དེ་ཡང་ཤེས་པའི་དུས་ནི་མཐོང་བ་ཙམ་ལས་ངེས་པ་ཅིག་ཅར་དུ་སྐྱེ་བའོ། །དེ་ལྟར་སྐྱེས་པས་རང་གི་གཞི་དང་ཕྲད་པར་ངེས་སོ། །དེ་ལྟར་ཆོས་ནི་ཡོད་པ་ཙམ་ལས་ནི། རང་ངོ་ཤེས་པ་ལ་བརྟེན་ནས་ཡིད་ཆེས། དེ་ལ་བརྟེན་ནས་ཐག་ཆོད་པ་དང་། གསུམ་ལ་བརྟེན་ནས་བློ་བདེ་བའོ། །དེའི་གནས་བླ་མའི་ཞལ་ལས་ཕྱུང་བའོ། །ཞེས་ནང་དོན་གསུམ་པའོ། །ད་ནི་ནང་དོན་བཞི་པ་འབྲས་བུ་ངེས་པས་གྲོལ་བའི་མཚན་ཉིད་བསྟན་པ་ནི། སེམས་ཀྱི་བསླད་པ་མེད་པའི་ལུས་ཀྱི་མཐའ། གནད་མཐོང་བས་ད་ནི་ཟད་པས་ལྡོག་པ་མེད་པའོ། །སེམས་ལ་རྒྱུ་མེད་པས་གློ་བུར་གྱི་རྐྱེན་ཅིས་ཏེ་ཡོད་པས་ན། དེའི་ཕྱིར་ན་སེམས་ལ་རྒྱུ་མེད་པའི་སྐད་ཅིག་ལས་གྲོལ་བ་ནི་དབང་པོའི་ཁྱད་དོ། །རང་གི་སེམས་ཉིད་ཡལ་བས་ཟད་པ་ནི་ཅིའི་ངོ་བོར་ཡང་མ་གྲུབ་པའོ། །དེ་ལྟར་ན་ཆོས་ཉིད་ཟད་པ་འདི་ལ་རྣལ་འབྱོར་པ་གང་སྤྱོད་པ། ཁམས་གསུམ་དུ་ལྡོག་པ་མ་ཡིན་ནོ། །སེམས་ཀྱི་ལ་སོགས་པ་མཚན་སྐབས་སུ་བསྟན་ལ། དེ་ལ་དགོས་པ་ཅི་ཡོད་ན། སེམས་ཀྱི་དམིགས་དྲུག་

ལ་བརྟེན་ན། འགྲོ་བ་རིགས་ལྷ་ལ་སོགས་པ་དྲུག་གི་སྐྱེ་བའི་གནས་སུ་མི་སྐྱེ་བས་སྟོངས་པར་བྱེད་པའི་གནད་ནི་བསླབ་བྱ་དྲུག་ལ་བརྟེན་པས་སོ། །སློབ་དཔོན་ཡོན་ཏན་རྫོགས་པ། ཆེན་པོ་དེ་ལས་ལྷག་པ་མེད་པ། སངས་རྒྱས་གཉིས་པ་ནི། ལུས་མིའི་ལུས་སུ་ཡོད་ཀྱང་དགོངས་པ་སངས་རྒྱས་དང་མཉམ་པའོ། །སངས་རྒྱས་ཀྱི་སྤྲུལ་པ་དགའ་རབ་རྡོ་རྗེ་ནི་མཚན་ནོ། །མཛད་པ་ནི་གང་ཟག་བློ་ཅིག་ཅར་བ་རྣམས་མ་བསྒོམས་པར་སངས་རྒྱ་བའི་དོན་དུ་མཛད་པའོ། །རྫོགས་སོ་ཞེས་དམིགས་དྲུག་ཏུ་གཏན་ལ་ཕབ་པ་རྫོགས་པ་ལ། ཡལ་བའི་དུས་ངོས་ཟིན་པའི་གནད་དང་བཅས་པའོ། །རྫོགས་པས་སོ། །སེམས་ཀྱི་དམིགས་དྲུག་གི་རྣམ་པར་བཤད་པ་ཞེས་བྱ་བ། རྒྱ་གར་ཀྱི་མཁས་པ་བི་མ་ལ་མི་ཏྲས་མཛད་པ་རྫོགས་སོ། །ལེགས་པའི་དཔེ། ཨྠྀི། རྒྱ་རྒྱ་རྒྱ། སྔགས་ཀྱི་སྲུང་མས་སྲུངས་ཤིག །ས་མ་ཡཱ། རྒྱ་རྒྱ་རྒྱ། ལས་ཅན་ཞིག་དང་འཕྲད་པར་ཤོག།། །།

སྤྲོས་མེད་དབང་གི་ཏི་ཀ

སྤྲོས་མེད་དབང་གི་ཏི་ཀ་བཞུགས་སོ། །གུ་ཧྱ་ཁ་ཐཾ༔ ང་བཞི་པ།

བཅོམ་ལྡན་འདས་དཔལ་ རྡོ་རྗེ་འཆང་ལ་ཕྱག་འཚལ་ལོ༔ དེ་ལ་འདིར་སྤྲོས་པ་མེད་པའི་དབང་གསལ་བར་བྱེད་པའི་ཏི་ཀ་སྟོན་ཏེ༔ དེ་ཡང་བླ་མ་དང་སློབ་མའི་མཚན་ཉིད་ངེས་པར་བསྟན་པ་ནི༔ བླ་མ་ནི་ཤེས་པ་ཁོང་ཁྲོལ་བ༔ འཁོར་བའི་ཆོས་རྒྱབ་ཏུ་དོར་བ༔ འདོད་པ་ཆུང་ཞིང་ཆོག་ཤེས་པ༔ ལག་ལེན་མཁས་ཤིང་ཉམས་མྱོང་ཡོད་པ༔ རྒྱུད་དོན་ལ་མཁས་ཤིང ་སྒྲུབ་པ་ལ་བརྩོན་པ༔ ལྟ་སྒོམ་གྱི་དོན་ལ་མཁས་ཤིང་ནུས་པ་རྫོགས་པ༔ སྙིང་རྗེ་ཆེ་ཞིང་གཏོང་བ་ལ་དགའ་བས༔ སློབ་མ་ལ་སྤྲོས་མེད་ཀྱི་དབང་བསྐུར་བ་ནི༔ སློབ་མ་དད་པ་དང་ལྡན་པ༔ སངས་རྒྱས་ཐོབ་པར་འདོད་པ༔ བློ་ཉུང་ཞིང་བརྟན་པ༔ དབང་པོ་དུལ་བ་ཤེས་རབ་དག་པ༔ དབང་པོ་གསལ་བ༔ ཚིག་དོན་ཕྱེད་པ༔ དམ་ཚིག་ཕོག་པ་ལས་མི་འདའ་བ༔ སྡོམ་པ་གསུམ་ལ་གནས་པ༔ སྙིང་རྗེ་ཆེ་བ་བླ་མ་ལ་གུས་པ༔ གཙང་སྦྲ་ཆུང་བ་བརྟུལ་ཞུགས་ཆེ་བ༔ འབྱོར་པ་ཐམས་ཅད་གཏོང་བར་ནུས་པ་ནི༔ སྔ་མ་ལ་སྔགས་ལ་སྦྱངས་པའི་རྟགས་ཡིན་པས་ནི༔ དེ་ལ་བླ་མས་གཟེངས་བསྟོད་པ་དང་གནང་བ་སྦྱིན་པར་བྱའོ༔ དེ་ནས་སློབ་མས་བླ་མ་ལ་གུས་པ་དང་ལྡན་པའི་སེམས་ཀྱིས་བརྟེན་ལ༔ འཁོར་བའི་ཆོས་ཀྱི་རྣམ་གྲངས་ཐམས་ཅད་སྤང་ལ༔ དམ་པའི་གོ་འཕང་ལ་དམིགས་པར་བྱའོ༔ དེ་ཡང་དབང་གི་གནས་ནི༔ ཆུའི་ལུས་ཀྱིས་ཆུ་གླིང་ལ་སོགས་པར་སོ་སོའི་ལོ་དང་ཟླ་བ་དང་༔ ཚེས་དང་ལོ་དུས་དང་ངེས་པ་ལ་ཞུགས་ན༔ སྨིན་པ་དབང་གི་འབྲས་བུ་ངེས་པར་འབྱིན་ནོ༔ མེའི་ལུས་ཀྱིས་ནགས་དང་རྩྭ་དང་རི་དྭགས་སྣ་ཚོགས་ཡོད་པ་ལ་སོགས་པར༔ མེའི་མི་གསུམ་གསུམ་གྱིས་སོ་སོའི་ལོ་དང་ཟླ་བ་དང་ཞག་དུས་ངེས་པར་འགྲུབ་བོ༔ སའི་ལུས་ཐང་ཆེ་བ་སྔ་མ་དང་འདྲའོ༔ རླུང་

གི་ཡུལ་དྲང་ཞིང་རླུང་འཚུབ་པ་རང་རང་སྔར་དང་འདྲའོ༔ དེ་ལྟར་ལུས་དང་ཡུལ་ངེས་པ་ལ་སྦྱར་བས་འབྲས་བུ་ངེས་པར་འབྱིན་པའོ༔ དེ་ལ་འདི་བསྙེན་པ་དང་༔ སྒྲུབ་པ་དང་༔ འཇུག་པ་ཁྱད་པར་ཅན་གྱི་སྦྱོར་བ་དང་༔ བསྙེན་རྫས་ཀྱི་བསྔགས་པ་དང་༔ བསམ་བྱ་སེམས་ཀྱི་གདུལ་བྱའོ༔ བསྙེན་པ་ནི་སྐུའི་འགྱུར་བྱེད་ཀྱི་ཡི་གེ་ལ་སྟོང་ཕྲག་བདུན༔ གསུང་ལ་འབུམ་ཕྲག་གཅིག༔ ཐུགས་ལ་ཁྲི་ཕྲག་གཅིག་བསྐྱལ༔ བྱིན་རླབས་ཀྱིས་འཕོ་བའི་རྒྱུན་ངེས་པར་འབྱེད་པའོ༔ དེ་ནས་སྒྲུབ་པ་ལ༔ སྐྱེ་མཆེད་རང་བྱུང་གི་ཡི་གེ་ལ་འབུམ་ཕྲག་བདུན་བྱས་པས༔ ངག་དང་སེམས་ཀྱི་སྐྱེ་བ་རྣམ་པར་དག་པར་བསམ་གཏན་ཐེབ་པའོ༔ དེ་ནས་འཇུག་པར་ཁྱད་པར་གྱི་སྦྱོར་བ་ནི༔ དུས་ཀྱི་འཇུག་པ་ནི༔ ས་བོན་གྱི་དུས་སུ་ཞུགས་པས༔ འདི་དང་ཕ་རོལ་གྱི་དོན་རྫོགས་པར་བྱེད་པའོ༔ འབྲས་བུའི་དུས་སུ་ཞུགས་པས༔ སྙིང་པོའི་དོན་བཅུད་དུ་དྲིལ་བར་བྱེད་དོ༔ དད་པས་ཞུགས་པས༔ སྦྱོར་བ་ཁྱད་པར་ཅན་ངེས་པར་འགྲུབ་བོ༔ མཁའ་འགྲོ་མ་བཞིས་འཁོར་ལོ་བསྐོར་བའི་དུས་སུ་ཞུགས་པས་དངོས་གྲུབ་ཉེ་ཞིང་མཐུ་རྩལ་འབྱུང་བ་ཡིན༔ རྟེན་འབྲེལ་རྫས་ཀྱི་བསྔགས་པ་ནི༔ ཕྱི་ནང་གི་མཆོད་པའི་བྱེ་བྲག་ནི་ཚོགས་བསགས་པ་ལ་དམ་ཅན་གྱིས་གྲོགས་བྱེད༔ ཚོགས་དང་གཏོར་མའི་ཡོ་བྱད་དཔག་ཏུ་མེད་པས་འཁོར་འདུ་ལོངས་སྤྱོད་འཕེལ་བར་བྱེད་དོ༔ དམ་རྫས་དུ་མ་བསགས་པས་དམ་ཅན་འདུ༔ འཇིག་རྟེན་གྱི་དབང་ཕྱུག་ཕུན་སུམ་ཚོགས་པ་ཐོབ་བོ༔ མཎྜལ་དང་༔ བུམ་པ་དང་༔ མེ་ལོང་དང་༔ རྨ་བྱ་ལ་སོགས་པ་དབང་བསྐུར་བའི་རྫས་བསགས་པས་བྱིན་རླབས་འབྱུང་ཞིང་རང་གི་རྒྱུད་སྨིན་པར་བྱེད་དོ༔ བསམ་བྱ་སེམས་ཀྱི་འདུལ་བ་ནི༔ དཔོན་སློབ་གཉིས་

བསམ་པ་མཐུན་པས་ཅི་ནས་འཁོར་བ་ལས་ཐར་བར་བྱ་བའི་བློས་མོས་པར་བྱ་བ་དང་༔ སེམས་ཅན་ཐམས་ཅད་འཁོར་བ་ལས་བསྒྲལ་བར་བྱ་བའི་བསམ་པ་ཐག་པས་བྱའོ༔ དེ་དག་ནི་སྔོན་དུ་འགྲོ་བའོ༔ དེ་ལ་སྐུའི་ཡི་གེ་ཨཱོཾ་གྱི་བསྙེན་པ་བསྐྱལ་བས༔ སངས་རྒྱས་ཀྱི་སྐུ་སྐལ་ལྡན་གྱི་ལུས་ཀྱིས་ཐོབ་ནས༔ སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད༔ གསུང་ཨཱཿལ་བསྙེན་པ་བསྐྱལ་བས༔ སངས་རྒྱས་ཀྱི་གསུང་དྲི་མ་མེད་པ་དང་༔ བརྗོད་དུ་མེད་པ་དང་༔ སྒྲ་ཚིག་དང་བྲལ་ནས༔ སངས་རྒྱས་ཐམས་ཅད་ཀྱི་གསུང་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད་ད༔ ཐུགས་ཀྱི་བསྙེན་པ་ཧཱུྃ་ལ་བསྐྱལ་བས༔ སྐལ་ལྡན་གྱི་ཡིད་སངས་རྒྱས་ཐམས་ཅད་ཀྱི་ཐུགས་མི་སྐྱེ་བ་དང་མི་འགག་པ་དང་༔ ཅི་ཡང་ས་ལེར་མཁྱེན་པ་དང གསུམ་ཐོབ་ནས༔ དུས་གསུམ་གྱི་སངས་རྒྱས་ཐམས་ཅད་ཀྱི་ཐུགས་དང་གཉིས་སུ་མེད་པར་མྱ་ངན་ལས་བཟླ་བའི་དགོས་པ་ཡོད་དོ༔ དེ་ལྟ་བུའི་བསྙེན་པས་བྱིན་རླབས་འོང་པ་ནི་ཚོགས་གཏོར་དང་༔ དབང་གི་ཆོ་ག་ཞིབ་མོས་སློབ་མའི་ལུས་ངག་ཡིད་གསུམ་སྦྱང་བར་བྱའོ༔ དེ་ནས་བླ་མའི་བྱ་བ་ནི༔ ས་བོན་ཀྱི་དོན་དུ་སློབ་མ་ལ་ཐིག་ལེ་གདབ་པ་དང་༔ བུམ་པའི་བྱེ་བྲག་རྣམས་དབང་བསྐུར་བའི་ཐུན་མོང་གི་ཆོ་ག་ནས་བཤད་པ་དང་བསྟུན་པར་བྱའོ༔ དེ་ལ་ཁྱད་པར་དུ་བོགས་འདོན་པ་སློབ་མ་ལྷག་པར་གནས་པའི་ཆོ་ག་ནི༔ གནས་གསུམ་དུ་དྲིའི་ཐིག་ལེ་གསུམ་གདབ༔ བུམ་པ་རིན་པོ་ཆེ་ལ་སོགས་པའི་ཚད་དང་ལྡན་པ༔ ཕྱི་ནང་ལེགས་པར་བཀྲུས་པ༔ ནང ་དུ་རྫས་རྣམས་བླུགས་ལ་ཕྱོགས་བཞིར་རྡོ་རྒྱུས་པས་ཨཱ༔དཀར་པོ་བཞི་བྲིས་ལ༔ ཁ་རས་དམར་པོ་ཁ་ཚར་མ་ཉམས་པར་མགུལ་དུ་བཅིངས་ལ༔ ཤིང་

དྲི་ཞིམ་པོའི་མེ་ཏོག་དང་འབྲས་བུ་དང་བཅས་པས་ཁ་རྒྱན་དང་བཅས་ལ་ཨཱ༔བརྒྱ་རྩ་བརྒྱད་ཀྱི་རྒྱས་བཏབ་ལ་བཞག་གོ༔ དེ་ལ་ཡེ་ཤེས་མཚོན་པའི་མེ་ལོང་ལ་ཐིག་ལེ་གདབ་པ་དང་༔ འོད་དང་ཐིག་ལེ་མཚོན་པའི་རྨ་བྱ་ལ་གསེར་གྱི་ཐུར་མས་མཐོངས་གསལ་བ་དང་༔ དེ་ནས་མཎྜལ་ཟླུམ་པོ་ཁྱད་པར་དུ་ཡིད་དུ་འོང་བ་ནི༔ བླ་མའི་ལུང་གིས་ཕྱེ་ལ་བྱའོ༔ བུམ་པ་བྲི་བ་དང་དགྲམ་པ་ནི༔ ཆོས་ཉིད་སྟོང་པ་ཉིད་མཚོན་ནས་གཞན་དོན་དུ་བུམ་པའི་སྐུ་རུ་སངས་རྒྱ་བར་བྱེད་པའོ༔ འོད་ལྔ་རང་ལུས་སྐུ་གསུམ་མོ༔ ཡེ་ཤེས་ལྔ་རུ་སངས་རྒྱ་བར་བྱེད་པའོ༔ མེ་ལོང་གི་ཆོས་སྤྱི་དང་རང་གི་མཚན་ཉིད་གཟུགས་ཅན་དུ་གསལ་བར་བྱེད་ལ༔ ཨཱ༔བརྒྱ་རྩ་བརྒྱད་རླུང་གཅིག་གི་ཁོངས་སུ་བརྗོད་པར་བྱའོ༔ དེ་ནས་ཐེ་ཚོམ་སྤངས་ལ༔ བྱ་བ་ལ་མཁས་པའི་བླ་མས༔ སྔར་ཆོས་ཉིད་མངོན་སུམ་གྱི་གནད་ལ་གོམས་པར་བྱས་ལ༔ འདིའི་དུས་སུ་སློབ་མ་ལ་སེམས་རང་ཐོག་ཏུ་ངོ་སྤྲད་པར་བྱས་པས༔ དཔོན་སློབ་དུས་གཅིག་ཏུ་སངས་རྒྱ་བར་བྱེད་དོ༔ དེ་ཡང་བླ་མས་མི་ཤེས་པ༔ ནང་གི་ལག་ལེན་མ་མཐོང་བར་ཡིད་ལ་བྱུང་བ་ཙམ་གྱི་བྱ་བ་ནི་མ་ཡིན་ནོ༔ འདིར་གོམས་ཤིང་མཁས་པས་བྱའོ༔ དེ་ནས་དབང་བསྐུར་བའི་མཎྜལ་ཟླུམ་པོ་ཞེས་པ་ནི༔ དབང་གི་གནས་པ་ཡོད་པ་དེས་ཐོབ་ལ༔ བསྐུར་བ་ནི་ཐོབ་པར་འོས་པའོ༔ མཎ་ནི་གཞི་ཡིན་ལ་ཌལ་ནི་སྙིང་པོ་བཅུད་དུ་ལེན་པར་བྱེད་པའོ༔ ཟླུམ་པོ་ནི་ཟུག་རྔུ་མེད་པ་ཆོས་ཉིད་ཐམས་ཅད་ལ་ཁྱབ་པའོ༔ མཉམ་ཞིང་ཟླུམ་པའི་མཎྜལ་ནང་དུ་སློབ་མ་བཅུག་པས་ཁམས་གསུམ་དུ་མི་འཁོར་བའོ༔ དེ་ལ་མེ་ཏོག་ཁ་དོག་མང་པོ་བཀྲམ་པ་ནི༔ སློབ་མའི་ཕུང་པོ་དང་ཁམས་རྒྱས་པར་བྱེད་པའོ༔ འདིའི་དུས་ན་བླ་མ་ལ་འབུལ་བའི་མཎྜལ་རང་གི་མདུན་

དུ་བཞག་ལ༔ ཅི་འབྱོར་པའི་ཡོན་དང་བཅས་པས་ཕུལ་ན་རྡོ་རྗེ་འཆང་གི་ཡོན་ཏན་ཐོབ་པའོ༔ འདིའི་དུས་སུ་མཆོད་པའི་ཡོ་བྱད་དཔག་ཏུ་མེད་པ་བཤམས་པས༔ འདི་དང་ཕ་རོལ་གྱི་འདོད་པའི་དོན་རབ་ཏུ་ཉེ་བར་ཐོབ་པའོ༔ ལས་དང་ཡེ་ཤེས་ཀྱི་མཁའ་འགྲོ་མ་རྣམས་མཆོད་པའི་ཕྱིར་གཏོར་མ་དང་ཚོགས་བྱས་པས་འདི་ལ་བདེ་སྐྱིད་དང་༔ མ་འོངས་པའི་དུས་སུ་ཐར་པའི་འབྲས་བུ་ཐོབ་པའོ༔ ངན་པ་བཟང་པོར་འགྱུར་ཞིང་ཕྲིན་ལས་བཞི་ཇི་ལྟར་འདོད་པ་འགྲུབ་པའོ༔ ལས་ཀྱི་བྱེ་བྲག་གང་ལ་འཇུག་ཀྱང་༔ ཁྱད་པར་གྱི་མཆོད་པ་བདུད་རྩི་ལྔ་དང་༔ ཤ་ལྔ་དང་༔ རྨད་དུ་བྱུང་བའི་གཏོར་མ་ལ་བརྟེན་ནས་ལས་གང་ཡང་འགྲུབ་པར་འགྱུར་རོ༔ དབང་བསྐུར་བའི་སྦྱོར་བ་ཁྱད་པར་ཅན་ཐོབ༔ འབྲུ་སྣ་ཚོགས་དང་ཤིང་ཐོག་དང་༔ སྤྱན་གཟིགས་ཁུར་བ་ལ་སོགས་པ་དང་༔ བཏུང་བ་དང་༔ དཀར་གསུམ་དང་༔ དྲི་ཆུ་དང་༔ བཟའ་བཏུང་སྣ་ཚོགས་དང་༔ ཁྲོ་བོ་ཁྲོ་མོ་མ་མོ་མཁའ་འགྲོ་དང་༔ ལྷ་དང་ཀླུ་དང་དཔའ་བོ་དཔའ་མོ་དང་འགྲོ་བ་ཐམས་ཅད་མཆོད་ན༔ འདི་དང་ཕ་རོལ་གྱི་འདོད་པའི་བྱེ་བྲག་སྣ་ཚོགས་པ་ལ་ལོངས་སྤྱོད་པར་ངེས་སོ༔ འདིའི་དུས་ན་རང་གི་བླ་མ་དང་༔ སློབ་མ་ལ་སོགས་པ་ལ་བཟའ་བཏུང་བྱིན་གྱིས་བརླབས་ནས་ཕྱིན་ན་འདི་དང་ཕ་རོལ་གྱི་སྐྱེ་བ་རྣམས་སུ་མུ་གེའི་འཇིགས་པ་དང་བྲལ་བར་འགྱུར་རོ༔ དེ་ལྟར་འགྲོ་བ་དེ་དམིགས་པ་རྣམ་པར་དག་པར་སྟོན་མོའི་ཚུལ་གྱིས་ལོངས་སྤྱོད་བྱའོ༔ དེ་ཡང་རང་གི་སེམས་སྐྱེ་མེད་དུ་རྟོགས་པར་བྱ་བའི་ཕྱིར་ཀུན་གྱིས་ཡང་ནས་ཡང་དུ་ཨཱ༔དཀར་པོའི་འཕྲེང་བར་དཀར་ཀྲིག་གེ་འཁོར་བ་ལ་སེམས་བཞག་ལ་བཟླས་པ་ཨཱ༔རྗོད་དོ༔ དེ་ཡང་སེམས་འདོད་པའི་ཡོན་ཏན་ལ་མ་ཤོར་བར་བྱ་བ་ནི་གནད་ཡིན་ནོ༔ ཕྱིར་ཨཱཿལ་བཟླས་

པ་གཙོ་ལ་བར་བར་དུ་རང་གི་གསང་མཚན་བརྗོད་དེ༔ སྐྱེ་མེད་དུ་སྦ་བར་གསལ་ཞེས་ལེགས་པར་སྦྱར་ལ་བཟླའོ༔ དེ་རང་གི་མགྲིན་པ་ནས་དབྱངས་དང་བཅས་པས༔ རླུང་ལས་དྲངས་པ་དང་གོང་མའི་མིང་དང་སྦྱར་ཏེ༔ འཕྲོ་གཅོད་པའི་དུས་སུ༔ རང་གི་ལུས་ཀྱི་འཁོར་ལོ་བཞིའི་མདུད་པར་ཡི་གེ་དང་བཅས་པར་གཞུག་པ་ནི་གནད་ཡིན་ནོ༔ དེ་ནས་འོད་གསལ་དུ་བཅུག་སྟེ་དེ་ཉིད་དུ་གནས་པར་བྱའོ༔ དེ་ཉིད་འོད་གསལ་དུ་ཤེས་ན་ཀ་ལིའི་སྦྱོར་བ་ཐུགས་ཀྱི་དགོངས་པ་དང་སྦྱར་བ་བསྒྱུར་ཞིང་ངག་ཏུ་བརྗོད་པ་མཉམ་པ་སློབ་མས་བྱའོ༔ དེ་ཡང་ངག་ཏུ་བརྗོད་པ་ལས་ཨཱ༔སྐྱེ་མེད་གཟུང་ཞེན་ལས་བཟླས་པས་སྙིང་པོ་ལེན་པར་བྱེད་པའོ༔ རིག་པའི་མེ་ཏོག་བརྗོད་དུ་མེད་པའི་དོན་རིག་པའི་མེ་ཏོག་བླ་མའི་ཐུགས་ཀྱི་དཀྱིལ་ལ་གཏོར་བས་གཉིས་སུ་མེད་པར་འདྲིས་པ་ལས༔ བླ་མའི་བྱིན་རླབས་དངོས་སུ་འབྱུང་བའོ༔ དེའི་རྟགས་སུ་སྙིང་བདེ་སངས་པ་ཞིག་ཁྱད་པར་དུ་བྱུང་བ་ནི་བྱིན་རླབས་བྱུང་བའོ༔ དེ་ནས་ཤར་ཕྱོགས་སུ་སྐུའི་དམ་ཚིག་སྲུང་བར་བྱེད་པའི་གནང་བ་སྦྱིན༔ ལྷོར་གསུང་གི་དམ་ཚིག་སྲུང་བར་བྱེད་པའི་གནང་བ་སྦྱིན༔ ནུབ་ཏུ་ཐུགས་ཀྱི་དམ་ཚིག་སྲུང་བར་བྱེད་པའི་གནང་བ་སྦྱིན༔ བྱང་ཕྱོགས་སུ་སྐུ་གསུང་ཐུགས་དབྱེར་མི་ཕྱེད་པའི་དམ་ཚིག་གི་གནང་བ་སྦྱིན་ནོ༔ དམ་ཉམས་ན་འཆིང་བར་བྱེད་ལ༔ མ་ཉམས་པར་ལེགས་པར་བསྲུངས་ཤིང་ཐུབ་པས་དམ་པའི་དོན་ངེས་པར་སྟེར་བར་བྱེད་དོ༔ ཡང་དྲིའི་རྣམ་པ་ལྔ་རྣམས་བྱེ་བྲག་འོ་མ་དང་བསྲེས་ཏེ༔ མེ་ལོང་གི་ནང་དུ་ཐིག་པ་ལེགས་པར་སྦྱར་བ་དཔྲལ་བ་དང་༔ མགྲིན་པ་དང་༔ སྙིང་ག་གསུམ་དུ་ཐིག་ལེ་བྱས་པ་ནི༔ ཉི་མ་ཟླ་བར་དམིགས་ལ༔ བདེ་བར་གཤེགས་པའི་སྐུ་གསུང་ཐུགས་ལྷའི་གཟུགས་བརྙན་དུ་

བསྐྱེད་ལ་ལུས་ངག་ཡིད་གསུམ་སྦྱང་པར་བྱའོ༔ དེ་ནས་འོད་ཀྱིས་གོང་བུ་ཞུ་ནས་སློབ་མའི་སྙིང་ལ་བཅུག་ལ༔ དེ་འོད་དུ་ཞུ་བ་ལས་རང་སེམས་བདེ་བར་གཟུང་བས་ལུས་ངག་ཡིད་གསུམ་ལ་གཡོ་བའི་ཉམས་ཤར་བ་ནི་ཐབས་ཀྱི་ཁྱད་པར་ལས་བྱུང་བའོ༔ དེ་ལས་དང་པོ་ནི་མི་རྟག་བསྒོམ་པ་ནི༔ སློབ་མའི་སེམས་སྦྱང་པ་ནི༔ འཁོར་བ་ལས་བློ་ལྡོག་པའོ༔ དེ་ལྟར་འཁོར་བའི་ཉེས་དམིགས་བཤད་པས༔ དམ་པའི་ཆོས་ལ་གཟུད་པའི་དགོས་པ་ཡོད་དོ༔ བླ་མ་ལ་གསོལ་བ་བཏབ་པས་བྱིན་བརླབས་འཇུག་པ་དང་༔ སངས་རྒྱས་ཀྱི་ཆེེ་བའི་ཡོན་ཏན་ཕུན་སུམ་ཚོགས་པ་དང་༔ ཞིང་ཁམས་དང་ཡོན་ཏན་ལ་སོགས་པས་དཀོན་ཅོག་ལ་ཡིད་ཆེས་པའི་དགོས་པ་ཡོད༔ དེ་ནས་གནས་ཡིད་དུ་འོང་བར་འབྲས་བུ་མེ་ཏོག་ལ་སོགས་པས་བརྒྱན་པས་ཉམས་སྐྱེ་བའི་གནས༔ མི་མེད་པའི་ལུང ་སྟོང་ངམ༔ དུར་ཁྲོད་ལ་སོགས་པར་ཁྲུས་བྱ་བ་ནི༔ ལུས་ངག་གི་དག་བྱེད་དོ༔ གནས་དེར་མཎྜལ་ཟླུམ་པོ་བྱ་བ་ནི་ཆོས་ཀྱི་དབྱིངས་ཀྱི་རང་བཞིན་མཚོན་པའོ༔ ཁྲུ་དོ་བ་ནི་ཐབས་དང་ཤེས་རབ་ཀྱི་ཁྱད་པར་འཇུག་པའོ༔ རབ་ཏུ་མཉམ་པ་ནི་མུ་མཐའ་དང་བྲལ་བའི་རྟགས་སོ༔ དེར་འབྲས་བུ་དང་མེ་ཏོག་སྣ་ཚོགས་དང་༔ རྡུལ་ཚོན་ལྔ་ཡིས་ལེགས་པར་བསྐོར་བ་ནི༔ ཡེ་ཤེས་ལྔའི་མདངས་སྟོན་པའོ༔ དྲི་ལྔའི་ཚོམ་བུ་ནི༔ ཉམས་ཁྱད་པར་ཅན་སྟོན་པའི་བྱེ་བྲག་གོ༔ བུམ་པ་དམར་པོ་ཁ་རྒྱན་མགུལ་ཆིངས་དང་བཅས་པ་ནི་དབྱིངས་ཡེ་ཤེས་གཉིས་སུ་མེད་པར་དུས་རྟག་ཏུ་མི་འབྲལ་བར་སྐུ་གསུམ་གྱི་རྒྱན་འཆར་བའོ༔ རིན་པོ་ཆེ་བུམ་པ་ཚད་དང་ལྡན་པ་ནི་སྟོང་པ་ཉིད་དབྱིངས་དང་གཅིག་པའོ༔ ནང་དུ་དྲི་ལྔ་དང་འབྲུ་ལྔ་རིན་ཆེན་ལྔ་དང་སྙིང་པོ་ལྔས་སྤྲས་པ་ནི༔ འདོད་པའི་དོན་ཐམས་ཅད་རབ་ཏུ་སྐོང་བར་བྱེད་པའོ༔

གྲངས་གསུམ་ནི་ལུས་ངག་ཡིད་གསུམ་གྱི་སྒྲིབ་པ་སྦྱོང་བའོ༔ བུམ་པ་ལ་མེ་ལོང་བཞག་པ་ནི༔ ཡེ་ཤེས་རྣམ་པར་དག་པའི་ཐིག་ལེ་ལ་ལོངས་སྤྱོད་པའོ༔ རྨ་བྱས་བརྒྱན་པ་ནི༔ ཐིག་ལེའི་སྒྲོན་མེ་གདངས་སུ་འཆར་བར་བྱེད་དོ༔ མན་ཤེལ་བཞག་པ་ནི་མཁས་པའི་ཡོན་ཏན་དྲི་མ་མེད་པའི་ཆོས་ཉིད་དོ༔ དེ་ནས་སློབ་མས་ཁྲུས་བྱས་ལ་གོས་གསར་པ་དྲི་མ་མེད་པ་གྱོན་པ་ནི༔ མཚན་མའི་དྲི་མ་དང་བྲལ་བར་བྱེད་དོ༔ བླ་མ་ལ་གསོལ་བ་བཏབ་པས་བྱིན་རླབས་འཇུག་པའི་དགོས་པ་ཡོད་པའོ་དེ་ནས་མཎྜལ་ཕུལ་བས༔ འདོད་པའི་དོན་ཕུན་སུམ་ཚོགས་པར་བྱེད་པའི༔ ཡིད་ཀྱིས་སྟོང་གསུམ་རིན་པོ་ཆེ་དང་འདོད་ཡོན་ལྔར་སྤྲུལ་ནས་འབུལ་བ་ནི་སངས་རྒྱས་ཀྱི་ཡོན་ཏན་ངེས་པར་སྟེར་བའོ༔ སློབ་མས་ཐལ་མོ་སྙིང་ཁར་སྦྱར་ནས་འགྲེངས་ཚུགས་སུ་འདུག་པ་ནི༔ ཆོས་ཀྱི་ས་བོན་འདེབས་པར་བྱེད་པའོ༔ བླ་མའི་ཐུགས་ཀྱི་དལ་དུ་འཇུག་པའི་ཕྱིར༔ མདུན་ནས་ཚིགས་སུ་བཅད་པས༔ བླ་མའི་ནུས་པ་བདག་ལ་འཇོག་པར་བྱེད་པའོ༔ ཨེ་མ་ཞེས་པ་ཁྱད་པར་གྱི་གསུང་གིས་སྙིང་ལ་བསྐྱེད་པའི་བུ་ཞེས་འབོད་པའོ༔ རྫོགས་པ་ཆེན་པོའི་སྐལ་པ་བཟང་པོའི་རིགས་སུ་ངེས་པར་བྱའོ་ཞེས་སོ༔ གསང ་སྔགས་ཀྱི་སྐལ་པ་བཟང་པོར་བཅུག་པས་ལུས་ངག་ཡིད་གསུམ་སྡིག་པ་བྱང་ནས་སྐུ་གསུང་ཐུགས་ཡོན་ཏན་ཕྲིན་ལས་སུ་ཆུབ་པར་བྱ་སྟེ་བདག་གཞན་གྱི་དོན་སེམས་དཔའ་ཆེན་པོ་ཞེས་བྱ་བར་འགྱུར་རོ་ཞེས་པ་ལ་སོགས་པའོ༔ དེ་ལྟར་ལུས་དངོས་པོའི་བདེ་བ་དང་༔ ངག་གསལ་བའི་བདེ་བ་དང་༔ སེམས་སྟོང་པའི་བདེ་བ་ནི་རྟེན་བྱང་ཆུབ་སེམས་དཔའ་ཡིན་པས༔ འདི་ནས་བརྩམས་ཏེ་ཁྱོད་སླར་མ་ལྡོག་ཅིག་པར་གནང་བ་སྦྱིན་ནོ༔

ད་ནི་བསྲེ་མནན་བྱ་བ་ནི༔ བླ་མའི་ཐུགས་ལ་གཏད་པ་དང་༔ སེམས་ཨ་ལི་ཀ་ལིའི་ཕྲེང་བས་ཡོངས་སུ་བསྐོར་བ་བསྒོམ་དུ་གཞུག་གོ༔ འདིའི་དུས་སུ་བླ་མས་ཀྱང་༔ ཨ་ལི་དང་ཀ་ལི་བརྗོད་པར་བྱའོ༔ བླ་མས་མིག་ཕུགས་ཀྱི་རྩ་ལྟེམས་པ་དང་༔ རྣ་བ་གཡས་པའི་མདུན་གྱི་ཤོང་བུ་ཐེབ་མོས་མནན་པས༔ རྣ་བའི་རླུང་གི་རང་སྒྲ་འགགས་པ་ནི༔ བདེ་བའི་སྣ་འདྲེན་པར་བྱེད་པའོ༔ དེའི་དུས་སུ་སེམས་དགའ་བའི་གླུ་དང་གར་ཡང་བྱའོ༔ དེ་ནས་དབང་བསྐུར་བ་དངོས་གཞི་ནི༔ སྔོན་དུ་སློབ་དཔོན་གྱི་བྱ་བ་རྫོགས་ནས༔ གཉིས་པ་སེམས་དབང་བསྐུར་བ་ནི༔ ལུས་ངག་ཡིད་གསུམ་ལས་ཀྱང་ཁྱད་པར་དུ་ངག་ལ་བསྐུར་བར་བྱའོ༔ ཆས་ནི་གོས་དང་བྲལ་བ༔ གཅེར་བུ་ནི་རིག་པའི་མཚན་མ་དང་བྲལ་བའི་རྟགས་སོ༔ ཁ་ནུབ་ཏུ་གཏད་པ་ནི་ཉོན་མོངས་པ་ཟད་པའི་རྟགས་སོ༔ བླ་མས་ཙནྡན་དང་ག་བུར་དང་བྱང་སེམས་བསྲེས་པའི་ཐིག་ལེ་སྤྱི་གཙུག་ཏུ་བཏབ་པས་སྐུ་རྡོ་རྗེས་སངས་རྒྱས་སུ་བྱས་པའོ༔ ངག་ཏུ་ༀ་དྲག་ཤུལ་དང་བཅས་པ་བཟླས་པས༔ ལུས་ལ་ནུས་པ་འཇོག་པའོ༔ ངག་ལ་དེ་ཉིད་ཀྱི་ཐིག་ལེ་བཏབ་པ་ནི༔ གསུང་རྡོ་རྗེ་སངས་རྒྱས་སུ་བྱས་པའོ༔ གསུང་གི་ཡི་གེ་ཨཱཿབཟླས་པས༔ གསུང་གི་ནུས་པ་འཇོག་པའོ༔ སྙིང་ཁར་ཐིག་ལེ་བྱས་པས༔ ཐུགས་རྡོ་རྗེར་སངས་རྒྱས་སུ་བྱས་པའོ༔ ཐུགས་ཀྱི་ཡི་གེ་ཧཱུྃ་བཟླས་པས་སེམས་ལ་ནུས་པ་འཇོག་པའི་གནད་དོ༔ བླ་མ་དང་སློབ་མས་གསུམ་པོ་དྲག་ཏུ་བཟླས་པས་སློབ་མ་གཉིད་ལོག་རྩ་གཏེམས་པ་ནི༔ མཉམ་པའི་དོན་ལ་གནས་པར་བྱེད་པའོ༔ འདིའི་དུས་སུ་སློབ་མའི་ལུས་འཕར་བ་དང་༔ གཡོ་བ་དང་སེམས་གསལ་བའི་རྟགས་ཀྱིས་དབྱེའོ༔ དེ་ནས་ནུ་མའི་རྩ་གཏེམས་པས༔ བདེ་བའི་ཉམས་རང་བཞིན་དུ་གནས་པའོ༔ འདིའི་དུས་སུ་སྟོང་པའི་

རྒྱས་གདབ་ལ་བསྒོམ་མོ༔ དེ་ནས་བུམ་པ་ལ་བརྟེན་ནས་སྟོང་ཉིད་བསམ་ངོ་དང་བྲལ་བའི་དབང་བསྟན་པ་ནི༔ བུམ་པ་ནི་སྟོང་པ་ཉིད་ཀྱི་དབྱིངས་ཡིན་ཏེ༔ སློབ་མའི་ལུས་སྟོང་པ་ཉིད་དུ་དམིགས་པའོ༔ དེ་ནི་ཐུན་མོང་དང་ཁྱད་པར་གྱི་འདོད་པ་བསྐང་པའོ༔ བླ་མས་ཆོས་ཐམས་ཅད་དུ་བརྗོད་དུ་མེད་པའི༔ ཞེས་ཚིགས་སུ་བཅད་པ་བསྟིམ་ཞིང་བརྗོད་པས༔ སློབ་མའི་སེམས་ཀྱིས་གསལ་གདབ་བོ༔ སློབ་མའི་ངག་ལ་ནུས་པ་བཞག་པའི་ཕྱིར༔ བླ་མས་རྡོ་རྗེའི་གླུ་ལན་གསུམ་བླངས་པས༔ ཁམས་གསུམ་འཁོར་བའི་ཞེན་པ་གཅོད་པའོ༔ གཞན་ཡང ་རྔ་དང་༔ དུང་དང་༔ ཆ་ལང་དང་༔ དྲིལ་བུ་དང་སྒྲ་དང་སྒྲའི་ཁྱད་པར་ཅི་ཡོད་པ་རྣམས་ཀྱིས་ལས་མ་དག་པ་རྣམས་སྦྱོང་བའི་རྣ་བའི་བུ་གར་སྒྲ་བསྒྲག་པར་བྱའོ༔ དེས་ནི་སངས་རྒྱས་ཀྱི་དབྱངས་སུ་ངེས་པར་འགྱུར་བའོ༔ དེ་ནས་དབང་ཐོབ་པར་བྱེད་པའི་རྐྱེན་ཚིགས་སུ་བཅད་པས་བསྐུར་བར་བསྟན་པ་ནི༔ ངེས་པ་ཁོ་ན་བརྗོད་པའི་ཚིག་འདི་དག་གི་དོན་སྐད་ཅིག་ལ་སྐྱེ་བའི་ཕྱིར་བརྗོད་པར་བྱའོ༔ ཨེ་ཞེས་པ་ནི་དྲག་པོ་སྐུ་གསུམ་རྫོགས་པའི་གཞི༔ མ་ཞེས་བཅོས་མ་ལས་གྲོལ་བའི་དོན༔ ཧོ་ནི་དག་པ་དབྱིངས་གཅིག་ཏུ་སྡུད་པའི་དོན་ནོ༔ ཚིག་འདི་རྣམས་ཀྱིས་ཡོད་མེད་རྟག་ཆད་སྣང་སྟོང་ཀུན་མཉམ་ཉིད་དུ་གཅིག་པས༔ སྤང་བླང་ལས་འདས་པའི་ཚིག་དང་ཡི་གེ་སྤྲོས་པ་མེད་པའི་དོན་ཆོས་ཉིད་མངོན་སུམ་ལ་བརྟེན་ནས༔ ལུས་ངག་ཡིད་གསུམ་གྱི་བདེ་བ་ཁྱད་པར་ཅན་སྐྱེ་བར་བྱེད་པས་ཡིད་དཔྱོད་ཚིག་གིས་བལྟར་མེད་པས༔ ཀུན་གྱིས་རྟོགས་པར་དཀའ་ཞིང་བསམ་ཡུལ་མ་རྙེད་པས་དྲན་བསམ་ལས་འདས་པ་དེ ཉིད་རྟོག་པ་ཐ་དད་པ་ལས་འདས་པས་བརྗོད་དུ་མེད་པའི་ཆོས་དེ་ངོ་མཚར་བས་ན༔ རང་གི་ཆེ་བ་ཅན་གྱི་བྱའོ༔ དེ་ལྟར་ངོ་

མཚར་ཚིག་བརྒྱད་ཀྱིས་རྣམ་པར་ཤེས་པའི་ཚོགས་བརྒྱད་ཀྱི་རྟེན་དང་སྒོ་དག་པར་བྱ་སྟེ༔ ཆོས་ཉིད་ལ་བརྒྱད་སྦྱོར་བའོ༔ དེ་ལ་ངེས་ཤེས་སྐྱེས་ན་ཆོས་རྣམས་ལ་སྤྲོས་པ་མེད་པའི་དབང་ཐོབ་པར་འགྱུར་རོ༔ དེ་ནས་འཁོར་བའི་གཡངས་བཀུར་བས༔ འཇུག་པར་བྱེད་པའི་ཚིག་གི་བརྡའ་ངེས་པར་བསྟན་པ་ནི༔ གོང་གི་ངོ་མཚར་བརྒྱད་ཀྱི་ཚིག་གིས༔ སེམས་ཀྱི་སྤྲོས་པ་མེད་པའི་དབང་༔ བླ་མའི་གསུང་གསལ་ཞིང་སྙན་པས་སྨིན་པར་བྱས་པས་སློབ་མ་ལ་ངེས་ཤིང་འཇོག་པར་བྱེད་པའོ༔ དེ་ལ་ཤེས་པ་རྙེད་ན་དཔེ་ཡིས་ངོ་སྤྲད་པས་མཚོན་ཏེ༔ ངོ་སྤྲད་པའི་ཆོས་ཀྱང་དེ་བཞིན་དུ་བསྟན་ནོ༔ འཇིག་རྟེན་གྱི་འདོད་པ་ལས་བློ་ལྡོག་པའི་ཕྱིར་ན་འཁོར་བ་མི་རྟག་པ་དང་༔ སྡུག་བསྔལ་བ་དང་༔ རྐྱེན་སྣ་ཚོགས་པ་འཁོར་བའི་ལས་དང་༔ འབྲས་བུར་གྱུར་པའི་དཔེ་ནམ་ཟླ་དུས་ཚོད་དང་སྣང་བ་འགྱུར་བ་དང་འཆི་བ་མི་རྟག་པ་བསམ་པ་དང་༔ ཕྱིའི་རྩི་ཤིང་ནགས་ཚལ་གྱིས་ཀྱང་མཚོན་པར་བྱེད་པའོ༔ དེ་ལྟར་དཔེ་དུ་མས་མཚོན་ལ་འཇིགས་པའི་གཡང་ས་བཀུར་ཏེ༔ དེ་ནས་ཆོས་ཉིད་ཀྱི་ཚིག་དང་ཡི་གེས་སྒྲོ་མ་བཏགས་མིང་གི་རྣམ་གྲངས་སུ་མ་སོང་བར༔ བློ་ཡིས་འགྱུར་བས་མ་སྤྲོས་པས༔ བརྗོད་པའི་སྒྲ་ལ་མ་བརྟེན་པ༔ ཐམས་ཅད་ཡིན་ཐོག་ཏུ་གནས་པའི་དོན་ལ་སེམས་སྐྱེ་བ་མེད་པ་ལས་འགག་པ་མེད་པའི་འགག་མེད་དུ་གྲོལ་བའི་གནད་ལ་མཁས་པས་སློབ་མ་གཞུག་པ་ནི་ཐབས་ཀྱི་འཇུག་པ༔ ཁྱད་པར་ཅན་ཉིད་དོ༔ དེས་ན་དོན་ཅིག་ཅར་འཇུག་པ་ནི༔ གནད་ལུས་དང་བསྟུན་པས༔ འཁོར་བ་ལས་གྲོལ་བའི་བརྡའ་ཡིས༔ ལུས་ངག་ཡིད་གསུམ་གྱི་བདེ་བ་བཙན་ཐབས་བསྐྱེད་པས་སེམས་བསྐུལ་བ་ནི༔ ཀྱེ་བུ་གཅིག་ཆོས་འཁོར་བ་དང་འདས་པའི་སྤྱི་དང་༔

རང་གི་དང་གཉིས་རྣམས་སྟོང་པ་ཉིད་ཡིན་པས་འདི་ལ་སྒྲོས་གདགས་སུ་མེད་དོ༔ དེ་ལ་རང་གནས་ཤིང་གཞན་ཡང་བརྟེན་པ་ཡིན་ནོ༔ སངས་རྒྱས་གཞན་ནས་མ་འཚོལ་ཅིག་བུ༔ དེ་ལ་གང་ཟག་དང་ཆོས་ཀྱི་བདག་མེད་ཤེས་ནས༔ ལས་དང་བག་ཆགས་ཅི་རུང་ཡང་དག་པར་འགྱུར་རོ༔ ཕྱི་ས་ཆུ་མེ་རླུང་གི་དངོས་པོ་དང་༔ ནང་ཕུང་ཁམས་དང་༔ སྐྱེ་མཆེད་ཀྱི་དངོས་པོ་རང་རྒྱུད་དུ་བཟུང་ནས༔ འཁོར་བའི་ཁ་བརྒྱུད་པས༔ དངོས་མེད་ཡེ་ཤེས་ཟང་ཟང་ཤེས་པར་གྱིས་ཤིག༔ དེ་ལྟར་མ་ཤེས་ན་ཚིག་དང་མཚན་མར་འཛིན་པ་ནི་འཁྲུལ་བ་ཡིན་ནོ་ཞེས་པ་ལ་སོགས་པས་བསྟན་པར་བྱའོ༔ ཡང་རྣལ་འབྱོར་པས་ཡེ་ནས་ལས་དང་ཉོན་མོངས་པ་སངས་ནས་མཁྱེན་པའི་ཡེ་ཤེས་སུ་རྒྱས་པ་ཡིན་ལ༔ ངན་སོང་ལ་སོགས་པ་འཇིགས་པའི་བློ་བྱུང་བ་ནོར་བ་ཁྱོད་རེ་འཁྲུལ༔ དོན་གྱི་མ་འཁྲུལ་པའི་ཡེ་ཤེས་ངོས་ཟིན་པར་གྱིས ་ཤིག་པའོ༔ དེ་ནས་གཞན་ལས་གྲོལ་ཆོས་འདི་ལ་ལོངས་སྤྱོད་ཅིག་པ་ལ་སོགས་པའོ༔ ཡང་ཐེག་པར་རིམ་པ་དགུ་ཡང་༔ རང་ལས་ཤར་ཞིང་རང་སྣང་བར་འདོད་པའི་བྱེ་བྲག་ལ་ཡང་དག་པར་ཆོས་ཉིད་ལ་འདུས་པ་ལས༔ ཉན་ཐོས་ལ་སོགས་པ་སོ་སོའི་ལྟ་བ་འདོད་པའི་གཞུང་འཛིན་པ་ཡོངས་རེ་འཁྲུལ༔ ཞེས་ངེས་པར་ཁྱད་པར་དུ་འཇུག་པའི་ཐབས་སོ༔ དེ་ལྟར་ཚིག་གིས་སློབ་མའི་སྤྲོ་བ་བསྐྱེད་པར་བྱའོ༔ དེ་ནས་བར་ཆད་ཞི་བ་དང་༔ སློབ་མའི་ཚོགས་བསྐྱེད་པར་བྱ་བའི་ཕྱིར༔ མཁའ་འགྲོ་མ་རྣམས་ལ་ཚོགས་དང་གཏོར་མས་མཉེས་པར་བྱ་བ་ནི༔ དེ་ཡང་མཁའ་དབྱིངས༔ འགྲོ་བ་ཡེ་ཤེས༔ མ་ཆོས་ཉིད་རྣམས་ནི་རིགས་བཞི་དང་༔ འཇིག་རྟེན་པ་དང་༔ འདས་པ་དང་༔ དབང་བསྐུར་བའི་མཁའ་འགྲོ་མ་རྣམས་མཉེས་པར་བྱས་ན༔ ཐམས་

ཅད་མཁྱེན་པ་ཐོབ་པ་དང་༔ བསམ་པ་རྫོགས་པ་དང་༔ ཕྱི་མ་ལ་སངས་རྒྱས་ཀྱི་ཞིང་ཡོངས་སུ་དག་པར་འཇུག་པར་འགྱུར་རོ༔ དེ་ནས་བླ་མ་ལ་ཡོན་དབུལ་བ་ནི༔ ཟང་ཟིང་གིས་མཉེས་ན་ལོངས་སྤྱོད་ཕུན་སུམ་ཚོགས་པ་ཐོབ༔ རིན་པོ་ཆེ་ཕུལ་ན་འདི་ཉིད་ལ་ལོངས་སྤྱོད་དང་བྱང་ཆུབ་ཀྱི་ལམ་ཉེ༔ བུ་དང་ཆུང་མ་དང་རང་གི་ལུས་ཕུལ་ན་ཆོས་ལ་མཁས་པ་དང་༔ མཁའ་འགྲོ་འདུ་ཞིང་མཐུ་རྩལ་ལྡན་ནོ༔ དབང་རྫོགས་པ་དང་དགའ་སྟོན་བྱས་ན༔ ཕ་རོལ་ཏུ་བརྙེས་པ་དང་༔ བསོད་ནམས་ནམ་མཁའ་དང་མཉམ་མོ༔ སྤྲོས་མེད་དབང་གི་ཏི་ཀ༔ མཁས་པ་བི་མ་ལས་མཛད་པ་རྫོགས་སོ༔ རྒྱ་རྒྱ་རྒྱ༔ དགེའོ༔