ཀུན་མཁྱེན་ཀློང་ཆེན་རབ་འབྱམས་པའི་གསུང་འབུམ། ཏ༽

བི་མ་སྙིང་ཐིག་གི་མིང་ཐོ།

དབང་བསྐུར་རིམ་པར་འཇུག་པའི་དུས་བཤད་པ། ཤིན་ཏུ་སྤྲོས་མེད་ཀྱི་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད། ཤིན་ཏུ་སྤྲོས་པ་མེད་པའི་དབང་གི་ཕྲ་ཏིག རབ་ཏུ་སྤྲོས་པ་མེད་པའི་དབང་། ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད་རྣམས། སྤྲོས་མེད་ཀྱི་དབང་ཆོག དམ་ཚིག་རབ་འབྱེད། རྫོགས་པ་ཆེན་པོ་སྙིང་ཏིག་གི་ལོ་རྒྱུས་ཆེན་མོ། གནས་འབྱེད་བདུན་པ། སངས་རྒྱས་ཀྱི་འདས་རྗེས་གསུམ་གྱི་རྒྱུད། རང་གནས་ཆེན་པོ་རྒྱ་མཚོ་ཨར་ལ་གཏད་པ། རྒྱ་མཚོ་ཨར་ལ་གཏད་པའི་མན་ངག་སྣང་བ་འདུས་པའི་གལ་མདོ། བདུད་རྩི་སྙིང་གི་ཐིགས་པ། རིག་པའི་གནད་དོན་ལྟ་བ། ཐོད་རྒལ་གྱི་བོགས་འདོན་ཨར་གཏད་ཀྱི་གདམས་པ་སྙིང་གི་ཡང་ཞུན། སྨུག་ནག་ཁྲོས་མ་རག་གདོང་མའི་དུས་གནད་ངེས་པ། ཟབ་པ་པོད་བཞིའི་ངོ་བོ་ཉིད་ཀྱི་དེབ། མན་ངག་བརྒྱ་བཅུ་དགུའི་ཐེམ་བྱང་། སྤྲོས་བཅས་དབང་གི་ཕྱག་བཞེས་དང་པོའི་དཔེ་ལས་ལག་ལེན་ཁྲིགས་སུ་སྡེེབས་པ་ལྕེ་བཙུན་སེང་གེ་དབང་ཕྱུག་གིས་མཛད་པ། སྤྲོས་པ་མེད་པའི་དབང་བསྐུར་བ་རིན་པོ་ཆེའི་བཀོད་པ། སྤྲོས་མེད་དབང་བསྐུར་རིན་ཆེན་བཀོད་པའི་གནད་ཀྱི་ཡི་གེ་དམ་པ། སྤྲོས་མེད་དབང་གི་བུམ་ཐིག་དང་དག་པར་སྦྱར་བ། ཤིན་ཏུ་སྤྲོས་པ་མེད་པའི་སྐལ་ལྡན་གྱི་དབང་། སྤྲོས་མེད་དབང་གི་ཏི་ཀ། རྫོགས་པ་ཆེན་པོ་སྙིང་ཐིག་སྤྲོས་བཅས་ཀྱི་དབང་ལྕེ་བཙུན་གྱིས་མཛད་པ། དབང་བཞིའི་དུས་དང་མཚན་མ་བསྟན་པའི་ཕྲ་ཊིག ཉམས་ལེན་ལག་ཁྲིགས་མའི་ཁྲིད་ངོ་མཚར་ཅན། གཅུད་ཕུར་གསུམ་གྱི་རྒྱབ་ཡིག་གསང་བའི་མན་ངག གཅུད་ཕུར་གསུམ་གྱི་རྒྱབ་ཡིག་གནད་བསྡུས་སྒྲོན་མེ་བི་མས་མཛད་པ། བསམ་གཏན་མིག་གི་སྒྲོན་མ། ལྕེ་བཙུན་གྱི་མགུར། ཚིག་དོན་བཅུ་གཅིག་པ། བླ་མའི་རིམ་པ་ཚིག་དོན་བཅུ་པ། ཆོས་ཀྱི་རྗེ་མཚུངས་མེད་གྲགས་པ་རྒྱ་མཚོའི་རྣམ་ཐར་མེ་ཏོག་གི་ཕྲེང་བ། བླ་མ་རྒྱལ་བ་ཞང་ཆེན་པོའི་རྣམ་པར་ཐར་པ། འཁྲུལ་ཞིག་སེང་གེ་རྒྱབ་པའི་རྣམ་ཐར། འཁྲུལ་ཞིག་སངས་རྒྱས་དབོན་པོའི་རྣམ་ཐར་ཉིད་ཀྱིས་མཛད་པ་ནོར་བུའི་གསལ་བྱེད། བི་མ་སྙིང་ཐིག་གི་སྤྲོས་མེད་དབང་དཀྱིལ། གྲུབ་ཐོབ་མེ་ལོང་རྡོ་རྗེའི་རྣམ་ཐར་དྲི་ལོག་མ། རིན་པོ་ཆེ་འོད་གསལ་རང་གྲོལ་གྱི་རྣམ་པར་ཐར་པ། རིག་འཛིན་ཆེན་པོ་ཀུ་མ་རཱ་ཛའི་རྣམ་ཐར་ལོ་རྒྱུས་དང་བཅས་པ། ཀུན་མཁྱེན་དྲི་མེད་འོད་ཟེར་གྱི་རྣམ་ཐར་མཐོང་བ་དོན་ལྡན། རྫོགས་པ་ཆེན་པོ་བི་མ་སྙིང་ཏིག་མ་བུའི་སྔོན་འགྲོ་ཚོགས་བསགས་ཀྱི་དམིགས་རིམ་ངག་འདོན་མདོར་བསྡུས་པ་གདོད་མའི་གསེང་ལམ། རྫོགས་པ་ཆེན་པོ་བི་མ་སྙིང་ཐིག་གི་དཔེ་ཐོ་མཐོང་བར་རབ་གསལ། བི་མ་སྙིང་ཐིག་གི་དཀར་ཆག་ཉིན་མོར་བྱེད་པ།

དབང་བསྐུར་རིམ་པར་འཇུག་པའི་དུས་བཤད་པ།

དབང་བསྐུར་རིམ་པར་འཇུག་པའི་དུས་བཤད་པ་བཞུགས་སོ༔ ཁ་ཐཾ༔ མན་ངག་དྲུག་པ།

ད་ནི་དབང་བསྐུར་འཇུག་དུས་བཤད༔ སྤྲོས་བཅས་དག་གི་དབང་བསྐུར་ནི༔ བྱི་བ་འབྲུག་དང་རྟ་དང་ཕག༔ ཁྱད་པར་ལོ་ནི་བཞི་དག་ལ༔ དབང་བསྐུར་ཆོ་ག་འགྲུབ་པ་ཡིན༔ ཟླ་བ་ར་བ་བཞི་དག་ལ༔ དུས་རྫོགས་འབྲས་བུ་འབྱིན་ཕྱིར་འགྲུབ༔ ཚེས་གྲངས་ཡར་གྱི་གཅིག་ནས་ནི༔ ཟླ་བ་ཟད་པའི་མཚམས་སུ་གདོན༔ བསྐུར་དུས་ཉིན་ཕྱེད་ནམ་གུང་ངོ་༔ རྣལ་འབྱོར་ལུས་ཀྱི་བྱེ་བྲག་གིས༔ སོ་སོའི་འབྱུང་བའི་ལོ་ལ་སྦྱར༔ དབང་བསྐུར་ཆོ་ག་ཤེས་པར་འགྱུར༔ འདི་དུས་སློབ་མ་དམ་ཚིག་ཅན༔ འབྱུང་བའི་ལུས་རྣམས་མཐུན་པར་ནི༔ གྲལ་ལ་ཚད་དུ་གཟུང་དུ་མེད༔ བརྒྱ་འམ་ལྔ་བཅུ་ལ་སོགས་པའི༔ འབྱུང་ལས་མཐུན་ན་འགལ་བ་མེད༔ གལ་ཏེ་ཆོ་ག་ལ་ཞུགས་ཚེ༔ མར་མེ་མདངས་དང་མི་ལྡན་ན༔ དམ་ཚིག་བསྐང་བའི་ཆོ་ག་བྱ༔ སྨེ་བ་མེད་ན་དངོས་གྲུབ་ནི༔ ཡང་ནས་ཡང་དུ་བླང་བར་བྱའོ༔ དོན་མེད་ཤི་ན་བར་ཆད་འབྱུང་༔ དབང་ཆོག་ཛབ་ལ་དྲག་ཏུ་འབད༔ དེ་ཚེ་འདུས་པའི་མཆེད་ལྕམ་ལ༔ ལུས་ལ་ནད་ནི་བྱུང་བ་ན༔ ཕྱག་དང་སྐོར་བ་དག་བྱ་འོ༔ ངག་ལ་བསླབ་ཅོལ་སུ་ལ་བྱུང་༔ བསམ་སྟེ་ཡི་གེ་བརྒྱ་པ་འདོན༔ སེམས་ནི་རྟོག་གམ་དྲན་ཉམས་ན༔ བསྐྱེད་དང་རྫོགས་པའི་རིམ་ལ་འཇུག༔ གལ་ཏེ་བྱང་བའི་རྟགས་བྱུང་ན༔ གདོད་ཀྱིས་དབང་བསྐུར་ཆོ་ག་འབད༔ གལ་ཏེ་སྒྲུབ་པའི་རྫས་འཕེལ་ན༔ དངོས་གྲུབ་རབ་མཆོག་ཐོབ་པས་ན༔ མཉམ་པའི་དོན་ལ་མོས་པར་བྱ༔ དབང་བསྐུར་ཆོ་ག་ལ་ཞུགས་ནས༔ རྟག་ཏུ་མཚན་མ་བཟང་མཐོང་ན༔ ཐུན་མོང་དངོས་གྲུབ་དེ་ཡིས་འགྲུབ༔ ཉམས་དང་ཤེས་པར་ལྡན་ན་ཡང་༔ འདིས་ཀྱང་དགའ་བདེ་ཉིད་ལ་སྤྱོད༔ བླ་མ་ཉིད་ལ་མཆོག་ཏུ་ཡང་༔ མོས་པ་བཟང་པོ་སུས་སྐྱེས་པ༔ འདིས་ཀྱང་ཕྱག་རྒྱ་མཆོག་ལ་སྦྱོར༔ བདག་ཉིད་ལུས་ངག་བདེ་མཐོང་ན༔

འདིས་ནི་སངས་རྒྱས་ཞིང་དག་གོ༔ སྤྲོས་བཅས་དབང་གི་དུས་དང་ཡང་། །མཚན་མ་དག་ནི་ལེགས་བཤད་དོ། །ད་ནི་སྤྲོས་པ་མེད་པ་ཡི། །དུས་དང་མཚན་མ་ཉེར་བསྟན་བྱ། །འདི་ལ་ལོ་ཡི་བྱེ་བྲག་མེད། །གང་ལ་ཡང་ནི་ཤེས་པ་འོ། །ཕྱི་དུས་དབྱར་དང་དགུན་ལ་བཟང་། །ཚེས་གྲངས་ཡར་གྱི་ངོ་ལ་འོ། །བསྐུར་དུས་ཐོ་རངས་སྒྲ་སྤངས་པའོ། །འདི་ལ་དད་ལྡན་ལྔ་དང་དྲུག །བདུན་ལས་མང་ན་དོན་མི་འགྲུབ། །དེ་ལྟར་དད་དང་ལྡན་པའི་བུ། །སེམས་ཀྱི་ལས་སུ་དགེ་ལྡན་ལ། །ངག་གི་བླ་མའི་བསྟོད་ལྡན་པ། །དེ་ལྟ་བུ་ལ་དབང་བསྐུར་ཚེ། །ལུས་ནི་བདེ་བ་མ་ཡིན་ན། །ལུས་སྡིག་ཕྱི་ནས་བཤགས་པ་བྱ། །དེ་བཞིན་ངག་དང་སེམས་ལ་ཡང་། །སྡིག་པ་བཤགས་པའི་ལས་བརྩམ་མོ། །སྤྲོས་པ་མེད་པའི་དབང་བསྐུར་གྱི། །དུས་དང་མཚན་མ་བཤད་པ་འོ། །ད་ནི་ཤིན་ཏུ་སྤྲོས་པ་མེད། །མཆོག་ཏུ་གསང་བའི་དབང་བསྐུར་གྱི། །དུས་དང་མཚན་མ་བཤད་པར་བྱའོ། །དེང་སང་ལོ་ཡི་བྱེ་བྲག་མིན། །རང་འབད་ཉིད་དུ་བྱས་པས་འགྲུབ། །ཕྱིས་དུས་ས་བོན་འཇུག་པའི་དུས། །བྱང་ཆུབ་ས་བོན་བརྟག་པའི་ཕྱིར། །འདི་ཡི་དུས་སུ་དབང་བསྐུར་ན། །རང་བྱུང་ས་བོན་འཕེལ་བར་བཤད། །འབྲུ་དང་འབྲས་བུ་སྡུད་དུས་སུ། །ཤིན་ཏུ་སྤྲོས་མེད་དབང་བསྐུར་ན། །ཡེ་ཤེས་འབྲས་བུ་རྫོགས་པའི་ཕྱིར། །སྐུ་གསུམ་ས་ལ་ངེས་པར་འགྲོ། །ནང་དུས་ཡར་ངོའི་འཕེལ་དུས་ལ། །ཚེས་གྲངས་མར་འགྲིབ་སྤངས་པ་ཡིས། །ཉམས་མྱོང་བརྟན་པར་བྱ་བའི་ཕྱིར། །ཉམས་དང་བྱིན་རླབས་གོང་དུ་འཕེལ། །བསྐུར་དུས་ཉི་མ་རྩེ་ཤར་ལ། །རང་བྱུང་ཡེ་ཤེས་ཤར་དོན་དུའོ། །ཡང་ན་མར་གྱི་ཟད་མཚམས་སུ། །རྟོག་པ་ཟད་པའི་དོན་དུ་བྱའོ། །སྐལ་

ལྡན་གཅིག་གམ་ཡང་ན་གཉིས། །གསུམ་ལས་མང་ན་དོན་མི་འགྲུབ། །འདི་དུས་སོ་སོའི་ཕྱོགས་བཟུང་སྟེ། །ལུས་ཀྱི་དུས་ན་ནམ་མཁའ་ལ། །སྤྲིན་དང་ཁུ་རླངས་ཁ་ཆར་དང་། །རླུང་ལ་སོགས་པའི་སྒྲ་དག་དང་། །གཡུལ་ཉེས་དགྲ་དང་ཆོམ་རྐུན་དང་། །མི་སྡུག་པ་ཡི་གཟུགས་བྱུང་ན། །ལུས་ཀྱི་རྟོག་པ་ཆེ་བས་ན། །ཕྱི་ནས་དབང་བསྐུར་བྱས་ན་ནི། །བླ་མའི་གདམས་པ་མ་བསྟན་པར། །བདེ་བར་གཤེགས་པའི་སྐུ་གཟུགས་སམ། །རང་གི་བླ་མའི་གཟིམས་ཁང་ལ། །བསྐོར་བ་འབུམ་ཕྲག་དྲུག་དག་གམ། །ཕྱག་ཀྱང་འབུམ་ཕྲག་གཅིག་ཏུ་བྱ། །དེ་དུས་མཚན་མའི་ཁྱད་པར་ནི། །ཐོག་མར་ཡོད་ལ་ཐ་མ་བར། །ངེས་པའི་མཚན་མའི་གཟུགས་དག་ནས། །ལུས་ཀྱི་སྤྱོད་པ་འབྱོངས་པས་ན། །ཕྱིས་ན་འབད་པ་བྱ་མི་དགོས། །གལ་ཏེ་ཐ་མ་དག་བྱུང་ན། །ལུས་ཀྱི་ཡོངས་སུ་ཚར་མ་གཅོད། །ཕྱི་ནས་བསྐྱར་ལ་སྤྱོད་པ་བརྩམ། །བསྐྱར་ཀྱང་སྡིག་པ་མ་དག་ན། །ལྷ་ཡི་སྐུ་ནི་སྟོང་ཕྲག་བསྒོམ། །དེ་ནས་བླ་མའི་མན་ངག་ནི། །རིམ་པ་དག་ལ་བསླབ་པར་བྱའོ། །ངག་གི་དུས་ནའང་དེ་བཞིན་དུ། །རྣལ་འབྱོར་ལྡན་པས་ཤེས་པར་བྱའོ། །འདི་དག་ཐོག་མ་མེད་ལ་རབ་བྱུང་ནས། །བཤགས་པའི་ལས་ནི་ཡིག་བརྒྱ་འབུམ་ཕྲག་གཅིག །འབད་དང་བཅས་ཏེ་བཟླས་པར་བྱའོ། །གལ་ཏེ་ཐ་མར་བྱུང་བ་ན། །གསང་སྔགས་རྒྱུད་ནི་རང་ལོའི་གྲངས། །བརྒྱ་ནི་རྩ་བརྒྱད་བརྗོད་པར་བྱའོ། །ཐོག་མཐའ་བར་མེད་དུས་རྣམས་སུ། །གལ་ཏེ་མཚན་མའི་རྟགས་ངན་ན། །རྒྱུད་ཀློག་པ་དང་སྔགས་བཟླས་དང་། །བླ་མ་ཡི་དམ་ལྷ་དག་གི། །བསྟོད་ཚིག་སྣ་ཚོགས་བརྗོད་པ་དང་། །ཨ་ལི་ཀ་ལིའི་ཡི་གེའི་སྒྲ། །སོ་སོ་རྐྱང་པར་བརྗོད་པ་དང་། །ཧཱུྃ་དང་ཕཊཿདང་ༀ་དང་ནི། །སྦྲེལ་བ་སྣ་ཚོགས་བརྗོད་པ་ལ། །

ཟླ་བ་བདུན་དུ་འབད་པར་བྱའོ། །དེ་ནས་གདམས་པའི་གནས་སུ་བྱའོ། །སེམས་ལ་ཐོག་མར་གང་བྱུང་ན། །ཡི་དམ་ལྷ་ཡི་ཏིང་ངེ་འཛིན། །ཉི་མ་གསུམ་དུ་བསྒོམ་པར་བྱའོ། །གལ་ཏེ་བར་དུ་བྱུང་བ་ན། །སྔགས་ཀྱི་འོད་ཟེར་འཕྲོ་འདུ་ལ། །ཉི་མ་བདུན་དུ་འབད་པར་བྱའོ། །ཐ་མར་བྱུང་ན་ཡི་གེ་ཡི། །འཕྲོ་འདུ་དག་ནི་བསྒོམ་པ་ལ། །ཉི་མ་བཅུ་ཡི་བར་དུ་འབད། །ཐོག་མ་བར་མཐའ་ཀུན་བྱུང་ན། །རྫོགས་པའི་རིམ་པ་བསྒོམ་པ་འམ། །ངག་ལས་བྱུང་བའི་བསམ་གཏན་ལ། །བསྒོམ་པ་ཟླ་བ་དྲུག་ཏུ་འབད་པར་བྱའོ། །གལ་ཏེ་ལུས་ངག་སེམས་ཀྱིས་ཀྱང་། །སྤྱོད་པ་སོ་སོའི་དུས་རྣམས་སུ་འོང་། །ནམ་མཁའ་སྔོ་སངས་སྤྲིན་དང་བྲལ། །རླུང་དང་སེར་བུའི་སྒྲ་མེད་པ། །འཇམ་ཞིང་འཇམ་པ་དག་བྱུང་ན། །སྡིག་པ་དག་ནི་སྦྱང་མི་དགོས། །གལ་ཏེ་ཐོག་མ་ཡོད་པ་ལ། །སོ་སོའི་ཐ་མར་དག་ན་ཡང་། །འདིས་ནི་སྡིག་པ་སྦྱངས་པས་ན། །བཤགས་པའི་ཆོ་ག་མི་དགོས་སོ། །དེ་བཞིན་ལུས་ངག་སེམས་དག་གི །སོ་སོའི་ངོས་བཟུང་མཁས་པས་བརྟག །དེས་ནི་ཤིན་ཏུ་སྤྲོས་པ་མེད། །དབང་བསྐུར་བ་ཡི་དུས་དང་ཡང་། །མཚན་མ་བརྟག་པ་བཤད་པའོ། །རེ་ཞིག་དབང་ཐོབ་མཚན་མ་ནི། །རིག་པའི་མེ་ཏོག་གཏོར་དུས་སུ། །ལུས་ནི་གཡོ་དང་དྲག་དུ་འཕར། །ལུས་ལ་བྱུང་ན་ལུས་ཀྱིས་ཐོབ། །ངག་ནི་སྒྲ་སྐད་སྣ་ཚོགས་པས། །འབྱིན་ཅིང་ཆོས་རྣམས་སྨྲ་བ་དང་། །ངོ་མཚར་ཚིག་རྣམས་བརྗོད་པ་ནི། །དེ་བཞིན་དུ་ུའང་ངག་གིས་ཐོབ། །སེམས་ལ་ཏིང་འཛིན་འབབ་པ་དང་། །ཡེངས་ཤིང་དྲན་པ་ཉམས་པ་ན། །སེམས་ཀྱིས་དབང་བསྐུར་ཐོབ་པ་འོ། །གལ་ཏེ་ལུས་ཀྱིས་ཐོབ་ན་ནི། །སྤྲུལ་པའི་སྐུ་ཉིད་འདི་ཡིས་ཐོབ། །

དེ་བཞིན་ངག་ལ་ལོངས་སྐུ་འོ། །སེམས་ནི་ཆོས་སྐུའི་ཞིང་དུ་འགྲོ། །ཤིན་ཏུ་སྤྲོས་མེད་དུས་མཚན་བཤད། །རབ་ཏུ་སྤྲོས་པ་མེད་པ་ཡི། །དུས་དང་མཚན་མ་ངེས་བསྟན་བྱའོ། །ཕྱི་དུས་འབྲས་བུ་སྨིན་པ་འམ། །འབྲུ་རྣམས་བསྡུ་བའི་དུས་ལ་གཏད། །རང་སྣང་འབྲས་བུ་གྲོལ་ཕྱིར་རོ། །ནང་དུས་ཡར་ངོའི་ཚེས་གཅིག་གམ། །ཡང་ན་ཟད་པའི་ཚེས་ལ་གཏད། །ཐིག་ལེ་ཉག་གཅིག་རྟོགས་ནས་ནི། །ལས་དང་བག་ཆགས་ཟད་ཕྱིར་རོ། །སྐལ་ལྡན་གཅིག་ལས་མང་ན་ཡང་། །རྣལ་འབྱོར་ང་ཡིས་དོན་མི་འགྲུབ། །དད་ལྡན་ཡིད་དུ་འོང་བའི་བུ། །སྐལ་པ་ཡོད་པ་གཅིག་ལ་བསྐུར། །གཉིས་ཀ་རྫོགས་པའི་སངས་རྒྱས་ལ། །གདོན་མི་ཟ་བར་འགྱུར་བར་ངེས། །བསྐུར་དུས་ཉི་མ་རྩེ་ཤར་ལ། །སོ་སོའི་ཚིག་གིས་ངེས་གསལ་བས། །རང་བཞིན་དག་པའི་གཞི་མཐོང་བའོ། །འདི་ལ་མཚན་མ་ཅི་བྱུང་ཡང་། །སྡིག་པ་སྦྱོང་བའི་ཆོ་ག་མེད། །གོང་དུ་ཐད་ཀར་སྦྱང་བའི་ཕྱིར། །གལ་ཏེ་སྤྲིན་མེད་ནམ་དངས་ན། །ཆོས་ཀྱི་སྐུ་ཡི་ཞིང་ལ་སྤྱོད། །སྣ་ཚོགས་འོད་ཀྱི་གདངས་ཤར་ན། །འདི་ནི་ལོངས་སྐུའི་ཞིང་དུ་འོ། །སྣ་ཚོགས་སྒྲ་རྣམས་གྲགས་པ་ན། །སྤྲུལ་སྐུའི་ཞིང་དུ་དབུགས་འབྱིན་ནོ། །གལ་ཏེ་སྐལ་དང་ལྡན་པ་ཞིག །འདི་དུས་ལུས་གནད་མཁས་པ་དང་། །དེ་ལས་གཡོ་བ་མེད་པ་ན། །ལོ་བདུན་གྱིས་ནི་ཟད་སར་ཕྱིན། །ངག་གི་བརྗོད་པ་སྟོང་གྱུར་ན། །འདིས་ནི་ཟླ་བ་ཉེར་གཅིག་ནས། །ཆོས་ཉིད་ཟད་པའི་ས་ལ་ཕྱིན། །སེམས་ལ་མཁས་ཤིང་རླུང་སྟོངས་ན། །ཟླ་བ་བདུན་ན་སྐལ་ལྡན་འདི། །སྣང་བ་ཐམས་ཅད་ཟད་པར་འགྱུར། །གལ་ཏེ་བློ་རྩལ་རབ་རྣམས་ལ། །

དང་པོ་སྤྲོས་བཅས་བརྩམས་ནས་ནི། །བར་མ་ཆད་པར་རིམ་གྱིས་ཀྱང་། །དབང་དག་རྫོགས་པར་བྱེད་པའི་ལུགས། །མཆོག་ཏུ་གྱུར་པ་རྣམས་ལ་སྟེ། །འདི་ནི་རབ་ཏུ་དཀོན་པས་ན། །ཞག་དང་ཟླ་བ་ལོ་ཡི་བར། །རང་གི་ཉམས་དང་སྦྱར་ལ་ནི། །དབང་བཞི་དག་ནི་རྫོགས་པར་བསྐུར། །གལ་ཏེ་དབང་བཞི་མ་རྫོགས་ན། །ཤིན་ཏུ་སྤྲོས་པ་མེད་པའི་དབང་། །ཟབ་མོའི་ཆ་ཤས་རྟོགས་ཡུལ་ཉིད། །འདི་ཉིད་བསྐུར་བས་དབང་ཐོབ་བོ། །སློབ་མའི་མཚན་ཉིད་རབ་བརྟགས་ལ། །གཉིས་དང་གསུམ་ལ་སོགས་པ་ནི། །སློབ་མའི་འབྱོར་པའི་ཚོད་དང་སྦྱར། །བླ་མ་རང་གི་ཉམས་མྱོང་གིས། ཁྱད་པར་དུས་ན་མཆོག་ངེས་བཤད། །བུ་ལ་ནུས་པ་འཇུག་དོན་དུའོ། །ཞེས་དབང་རྣམ་པར་བཀོད་པའི་ཕྲ་ཏིག །དབང་གི་རིམ་པ་རྣམ་པར་ཕྱེ་བ་ལས། རྣམ་པར་དག་པ་གསལ་བའི་དུམ་བུ། རིམ་པར་འཇུག་པའི་ཐབས་བསྟན་པ་སྟེ་གཉིས་པ་རྫོགས་སོ།། །།

ཤིན་ཏུ་སྤྲོས་མེད་ཀྱི་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད།

ཤིན་ཏུ་སྤྲོས་མེད་ཀྱི་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད་བཞུགས་སོ༔ མན་ངག་དྲུག་པ།

བླ་མ་དམ་པ་རྣམས་ལ་ཕྱག་འཚལ་ལོ༔ ཤིན་ཏུ་སྤྲོས་པ་མེད་པའི་དབང་འཁོར་འདས་རུ་ཤན་འབྱེད་པའི་སྤྱོད་པའི་ལག་ལེན་བསྟན་པར་བྱའོ༔ སློབ་མ་དེ་དུར་ཁྲོད་དུ་སྤྱོད་པ་ལ་འགྲོ་བའི་དུས་སུ༔ སློབ་མ་ལུས་གཅེར་བུར་འགྲེང་ཚུགས་སུ་ལངས་ལ༔ ཐལ་མོ་སྙིང་ཁར་སྦྱར་ལ༔ བླ་མས་ཡི་གེ་བརྒྱད་ཀྱི་གོ་བ གོ་བ་ནི༔ བླ་མས་སྤྲོད་ལ་སློབ་མའི་ལུས་ལ་འདི་ཚོ་བསྒོམ་དུ་གཞུག་གོ༔ དང་པོ་སྙིང་ཁར་ཧཱུྃ་སྔོ་སྐྱ་གཅིག་བསྒོམ་དུ་གཞུག་གོ༔ སྤྱི་བོར་ལཾ་སེར་པོ༔ རྐང་མཐིལ་དུ་ཡཾ་ལྗང་གུ༔ ལྟེ་བར་རཾ་དམར་པོ༔ མགྲིན་པར་ཁཾ་དུད་ཁ༔ དཔྲལ་བར་ཨེ་མཐིང་ག༔ ལྐོག་མར་སུ་སེར་པོ༔ ནུ་མ་གཉིས་ལ་ཧ་དཀར་པོ༔ སྙིང་གར་ཕཊ་ནག་པོ་རྣམས་བསྒོམས༔ དེ་ནས་གཏོར་མ་གཅིག་ཁྱེར་ལ་ངག་ཏུ་ཕཊ་དྲག་པོ་བརྗོད་ཅིང་༔ རང་གི་གནས་དེར་དེ་ན་གནས་པའི་ལྷ་དང་ཀླུ་དང་གནོད་སྦྱིན་དང་མཁའ་འགྲོ་མ་དང་ཆོས་སྐྱོང་ལ་གཏོར་མ་བྱིན་ལ༔ བདག་ལུང་པ་འདི་རུ་འཁོར་འདས་རུ་ཤན་འབྱེད་པའི་སྤྱོད་པ་ཞག་གསུམ་བྱེད་པས༔ དེ་མ་ཐོན་གྱི་བར་དུ་བར་དུ་གཅོད་པ་མ་བཏང་ཞིག༔ ཅེས་མཁའ་འགྲོ་ཆོས་སྐྱོང་ལ་བཀའ་བསྒོ་བར་བྱའོ༔ དེ་ནས་ལུས་ཀྱི་སྤྱོད་པ་བརྩམ་པར་བྱའོ༔ དེའི་དུས་སུ་རྟག་ཏུ་བླ་མ་ལ་གུས་པར་བྱའོ༔ འགྲོ་བ་དང་རྒྱུག་པ་དང་ཉལ་བ་དང་བསྒྱུར་ནས་འགྲོ་བ་དང་༔ མཆོངས་པ་དང་༔ ལུས་བསིག་པ་དང་༔ བྲོ་འཁྲབ་པ་དང་༔ རྐང་པ་གཅིག་དང་ལག་པ་གཅིག་ས་ལ་བཙུགས་ཏེ་འགྲོ་བ་དང་༔ འབུ་སྲིན་གྱི་འགྲོས་སུ་བྱ་བ་དང་༔ སྤྱི་འགྲེང་བྱ་བ་དང་༔ ལུས་ཀྱི་རྒྱ་འདྲེས་བྱ་བ་དང་༔ ལྷ་ཕྱག་མང་པོ་བྱ་བ་ལ་སོགས་པ་ལུས་ཀྱི་སྤྱོད་པ་དྲན་ཚད་ཉིན་ཞག་གཅིག་ཏུ་བྱའོ༔ དེ་ནས་ལུས་ཀྱི་སྤྱོད་པ་ཚར་ནས་ངག་གི་སྤྱོད་པ་བརྩམ་པར་བྱ་སྟེ༔ འདིའི་དུས་སུ་ཡང་བླ་མ་ལ་གདུང་བ་

བསྐྱེད་པ་གལ་ཆེའོ༔ ངག་ནི་སྐད་རྣམ་པ་སྣ་ཚོགས་བརྗོད་དོ༔ ཁྱིའི་སྐད་དུ་སྨྲ་བ་དང་༔ བོང་བུའི་སྐད་འདོན་པ་དང་༔ ཝའི་སྐད་དང་༔ རྟའི་སྐད་དང་༔ ཕྱུགས་ཀྱི་སྐད་འདོན་པ་དང་༔ སྤྱང་ཀིའི་སྐད་འདོན་པ་དང་༔ ཕོ་རོག་གི་སྐད་འདོན་པ་དང་༔ སྐྱ་གའི་སྐད་འདོན་པ་དང་༔ ཕཊ་མང་པོ་བརྗོད་པ་དང་༔ ཧུ་མང་པོ་བརྗོད་པ་དང་༔ ཨ་མང་པོ་བརྗོད་པ་དང་༔ ངུ་བའི་སྐད་འདོན་པ་དང་༔ རྒོད་པའི་སྐད་འདོན་པ་དང་༔ ཧ་མང་པོ་འདོན་པ་དང་༔ འུས་མང་པོ་གདབ་པ་དང་༔ སྲིན་བྱའི་སྐད་འདོན་པ་དང་༔ འུག་པའི་སྐད་འདོན་པ་དང་༔ ར་ལུག་གི་སྐད་འདོན་པ་དང་༔ དེ་ལ་སོགས་པ་རྣམ་པ་སྣ་ཚོགས་པའི་སྐད་འདོན་པ་ཉིན་ཞག་གཉིས་བྱའོ༔ དེ་ལྟར་ངག་གི་སྤྱོད་པ་ཚར་ནས་སུ༔ སེམས་ཀྱི་དྲན་བསམ་འཁོར་ལོ་སྣ་ཚོགས་པ་བྱ་སྟེ༔ ཡི་དམ་ལྷ་སྒོམ་པ་དང་༔ སེམས་ནམ་མཁའི་དཀྱིལ་དུ་འཕངས་པ་དང་༔ རྒྱ་མཚོའི་གཏིང་དུ་འཕངས་པ་དང་༔ རི་བྲག་རྣམས་ལ་ཟང་ཐལ་དུ་བྱ་བ་དང་༔ བཀྲེས་པའི་སྡུག་བསྔལ་མང་པོ་ཡིད་ལ་བྱ་བ་དང་༔ སྐོམ་པའི་སྡུག་བསྔལ་མང་པོ་ཡིད་ལ་བྱ་བ་དང་༔ ན་བའི་སྡུག་བསྔལ་མང་པོ་ཡིད་ལ་བྱ་བ་དང་༔ ཕྱིན་མ་མྱོང་བའི་ཡུལ་དུ་སེམས་འགྲོ་བར་གཞུག་པ་དང་༔ སེམས་ནམ་མཁའ་ལ་འཕུར་དུ་གཞུག་པ་དང་༔ རི་ཐམས་ཅད་ཀྱི་ལམ་ལ་སེམས་འགྲིམ་དུ་གཞུག་པ་དང་༔ སྟོང་གསུམ་ཐམས་ཅད་བླ་མར་བསྒོམ་པ་དང་༔ སྟོང་གསུམ་ཐམས་ཅད་ཡི་དམ་དུ་བསྒོམ་པ་དང་༔ དུད་འགྲོའི་ཚོགས་མང་པོ་བསྒོམ་པ་དང་༔ སྐྱེས་པའི་ཚོགས་མང་པོ་བསྒོམ་པ་དང་༔ རང་གི་ལུས་སྟོང་ཁྲི་འབུམ་ལ་སོགས་མང་པོར་བསྒོམ་པ་དང་༔ དེ་ལ་སོགས་ཏེ་སེམས་དར་གཅིག་ཀྱང་མི་བཞག་པར་ཞག་གཉིས་སུ་དྲག་པར་བྱའོ༔ ཉིན་ཞག་དྲུག་ཏུ་གཉིད་རྣམ་པ་

ཐམས་ཅད་དུ་སྤང་བར་བྱའོ༔ དེ་ལྟར་ལུས་ངག་ཡིད་གསུམ་གྱི་སྤྱོད་པ་ཚར་ནས༔ བླ་མའི་མདུན་དུ་མཎྜལ་དང་༔ ཚོགས་ཀྱི་ཡོ་བྱད་ལ་སོགས་པ་ཚགས་བྱས་ལ་བླ་མས་དབང་བསྐུར་བར་བྱ་སྟེ༔ སློབ་མས་བླ་མ་ལ་མཎྜལ་འབུལ་བར་བྱ་སྟེ༔ གསེར་ལ་སོགས་པ་རིན་པོ་ཆེ་སྣ་ཚོགས་པའི་མཎྜལ་ཡིད་ཀྱིས་སྟོང་གསུམ་ཁེངས་པར་དབུལ༔ དེ་ནས་ཙནྡན་ལ་སོགས་པ་དྲི་རྣམ་པ་སྣ་ཚོགས་པའི་མཎྜལ་དབུལ༔ དེ་ནས་སྨན་རྣམ་པ་སྣ་ཚོགས་པའི་མཎྜལ་ཡིད་ཀྱིས་དབུལ༔ དེ་ནས་མེ་ཏོག་གི་རིགས་མི་འདྲ་བ་རྣམ་པ་སྣ་ཚོགས་བར་འདིར་གསོལ་བ་གདབ་བོ་ཡིད་ཀྱིས་དབུལ་བར་བྱའོ༔ ནས་ལ་སོགས་པ་འབྲུ་རྣམ་པ་སྣ་ཚོགས་པ་ཡིད་ཀྱིས་བསམས་ལ་དབུལ༔ དངོས་སུ་འབྱོར་ན་ཡང་གསེར་དངུལ་དང་༔ མེ་ཏོག་དང་དྲི་དང་སྨན་དང་འབྲུ་དང་༔ དེ་ལ་སོགས་པ་རྟེན་འབྲེལ་འཛོམས་པར་བྱ་བའི་ཕྱིར་ཅི་འབྱོར་བ་དབུལ་བར་བྱའོ༔ དེ་ལྟར་མཎྜལ་ཕུལ་ནས༔ ད་ནི་བླ་མས་སློབ་མ་ལ་ཡེ་ཤེས་བཙན་ཐབས་སུ་བསྐྱེད་པའི་ཕྱིར་སྣ་ཚོགས་བརྗོད་པའི་བརྡས་སློབ་མ་རྗེས་སུ་གཟུང་བར་བྱ་སྟེ་བླ་མའི་མདུན་དུ་འདུག་ལ༔ བླ་མས་བུ་ཁྱོད་སུ་ཡིན་ཞེས་ལན་གསུམ་བརྗོད་དོ༔ སློབ་མས་སྐལ་ལྡན་སེམས་ཀྱི་བུ་གཅིག་པུ་ལགས་བྱ་བའི་ལན་བརྗོད༔ བླ་མས་དེ་ལྟར་ཡིན་ཕན་ཆོད་རང་བཞིན་རྫོགས་པ་ཆེན་པོའི་དལ་འདིར་འདུག་ཅིག་ཅེས་བརྗོད་དོ༔ བླ་མས་སློབ་མའི་ལུས་གཅེར་བུར་ཕྱུང་ལ་ཐལ་མོ་སྙིང་ཁར་སྦྱར་ཏེ༔ རྐང་པའི་ལོང་བུ་ག ཤིབས་ལ་སེམས་བླ་མའི་ཐུགས་ཁར་མ་ཡེངས་པར་བྱའོ༔ དེའི་དུས་སུ་བླ་མས་ཨཱཿ ཞེས་དྲག་ལ་ཆེ་ཞིང་ཐུང་བར་བརྗོད༔ དེའི་དུས་ན་ལུས་འཕར་བ་དང་༔ ངག་སྨྲ་བ་དང་༔ སེམས་གཡོ་བའི་རྟགས་བྱུང་ན་ནི་ལུས་དང་ངག་དང་སེམས་ལ་བྱིན་རླབས་རང་གི་ཉམས་དང་སྦྱར་བས་ཤེས་པར་བྱའོ༔ དེ་ནས་བླ་མས་སློབ་མ་དེ་ཁ་ཤར་དུ་བལྟར་བཅུག་ལ༔

ཨེ་མ་སྐལ་ལྡན་ཤར་གྱི་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་བ་དང་༔ ཞེས་ལན་གསུམ་བརྗོད་པའི་རྗེས་ལ་འགྲོ་ན་འགྲོ་ས་འདུག་གམ༔ འགྲོ་བའི་མཁན་པོ་འདུག་གམ་ཞེས་ཕྱོགས་བཞི་ཀར་བྱའོ༔ དེ་ནས་སློབ་མ་དེ་ཁ་ལྷོར་བལྟར་བཅུག་ལ༔ ཨེ་མ་སྐལ་ལྡན་ལྷོ་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད༔ དེ་ནས་ནུབ་ཏུ་བལྟར་བཅུག་ལ༔ ཨེ་མ་སྐལ་ལྡན་ནུབ་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད་དོ༔ དེ་ནས་བྱང་དུ་ཁ་བལྟར་བཅུག་ལ༔ ཨེ་མ་སྐལ་ལྡན་བྱང་གི་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་ཞེས་ལན་གསུམ་བརྗོད་དོ༔ དེ་ནས་ལྷ་ངོ་བསྟན་པར་བྱ་བའི་ཕྱིར་སློབ་མ་སྐྱིལ་ཀྲུང་དུ་འདུག་ཏུ་བཅུག་ལ༔ ཨེ་མ་སྐལ་ལྡན་ནམ་མཁའི་དཀྱིལ་ཡ་གི་ན་ཉི་མའི་དཀྱིལ་འཁོར་འོད་འཕྲོ་བ་ལྔ་པོ་ཡ་གི་ལ་ཤེས་པ་གཏོད་ལ་ཤེས་པ་ཇེ་མཐོ་ཇེ་མཐོར་སོང་ཞིག་ཅེས་ལན་གསུམ་བརྗོད་དོ༔ བླ་མས་སླར་མ་ལྡོག་ཅིག་ཅེས་ལན་གསུམ་བརྗོད་དོ༔ བླ་མའི་ཕྱག་གིས་ནམ་མཁའ་ལ་ཡུག་ཡུག་ལན་གསུམ་ལ་བྱའོ༔ དེ་ནས་བླ་མས་ལངས་ཏེ་ཞབས་གཡོན་བསྐུམ་གཡས་བརྐྱང་པར་བྱ༔ དེ་ནས་མིག་གཉིས་ལ་མཛུབ་མོ་བཙུགས་ལ་ངག་ཏུ་ཨ་ཞེས་བརྗོད་དེ༔ དེ་ནས་མཛུབ་མོ་ནམ་མཁའ་ལ་བསྒྲེང་༔ དེ་ནས་མིག་ནམ་མཁའ་ལ་གཏད་ལ་ཧུར་འདོན༔ ནམ་མཁའ་ནི་ཤིན་ཏུ་རྒྱ་ཆེའོ་ཞེས་ལན་གསུམ་བརྗོད་པར་བྱའོ༔ དེ་ནས་དབང་བསྐུར་ཟིན་ནས༔ ཚོགས་ཕུད་བཅད་ལ་ཚོགས་ལ་རོལ་བར་བྱའོ༔ ལུས་ངག་ཡིད་གསུམ་སྤྱོད་པ་བྱེད་པའི་དུས་ན་སྡིག་པ་ཤས་ཆེ་ཆུང་བླ་མས་ཤེས་པར་བྱས་ལ༔ སྡིག་པ་ཤས་ཆེ་ན་སླར་བསྐྱར་ལ་

བྱེད་དུ་གཞུག༔ དེ་ལྟར་ལུས་ངག་ཡིད་ཀྱི་སྒྲིབ་པ་དག་ནས༔ དངོས་གཞི་ཟག་པ་མེད་པའི་རྣལ་འབྱོར་པ་རྣམས་ལ་གདབ་པར་བྱའོ༔ ཤིན་ཏུ་སྤྲོས་པ་མེད་པའི་འཁོར་འདས་རུ་ཤན་འབྱེད་པའི་སྤྱོད་པ་ལག་ལེན་པྲ་ཁྲིད་ཅེས་བྱ་བ༔ བྱེ་མ་ལ་མུ་ཏྲས་མཛད་པ་རྫོགས་སོ༔ ༔ ཀུན་ལ་མེད་དེ་སྔགས་ཀྱི་སྲུང་མས་སྲུངས་ཤིག༔ ས་མ་ཡ༔ རྒྱ་རྒྱ་རྒྱ༔ ལས་ཀྱི་མཐའ་རབ་ཏུ་ཟབ༔ དེ་བས་རབ་ཏུ་གསང་ངོ་༔ ༔དགེའོ༔

ཤིན་ཏུ་སྤྲོས་པ་མེད་པའི་དབང་གི་ཕྲ་ཏིག

ཤིན་ཏུ་སྤྲོས་པ་མེད་པའི་དབང་གི་ཕྲ་ཏིག་བཞུགས་སོ། །འདི་ན་སྣང་བྱེད་དུ་མ་ལས་གསུམ་པ། བཞི་པ། མཇུག་ཏུ་རབ་ཏུ་སྤྲོས་མེད་ཀྱི་དབང་འགྲེལ་ཡང་ཡོད། མན་ངག་ང་དྲུག་པ།

༔ཏྱཏྲབྷཌྷགཱཏྱཱབྷཊཱཏྱམཱ྅༔ རྒྱ་གར་སྐད་དུ། སརྦ་དུ་ན་ཡོ་གི་ཨ་བི་ཤེ་ཀེ་ཨ་ལོ་ཀ་ཡ་མི༔ བོད་སྐད་དུ། ཤིན་ཏུ་སྤྲོས་པ་མེད་པའི་རྣལ་འབྱོར་གྱི་དབང་བསྐུར་བའི་སྒྲོན་མ་སྣང་བྱེད། བཅོམ་ལྡན་དབང་ལྡན་ཐབས་ཀྱི་ཡབ།། བྱ་བྲལ་ཀ་ནས་དག་པའི་ཆོས། །འདུས་མ་བྱས་ལ་ཕྱག་འཚལ་ལོ། །བྱ་རྩོལ་འདས་པ་དབང་གི་ལུགས། །གང་འདིར་འབྲས་བུ་སྨིན་བྱེད་པའིི། །རང་བཞིན་མཆོག་གི་གནས་ལུགས་ཉིད། །མཚོན་པར་བྱ་ཕྱིར་རིག་པ་ཡི། །ཡེ་ཤེས་རྩོལ་སྒྲུབ་བྲལ་བའི་དོན། །སྙིང་པོ་བླ་མེད་སངས་རྒྱས་སར། །ད་ལྟ་ཉིད་དུ་ཐོབ་བྱའི་ཕྱིར། །གསང་སྔགས་ཐབས་ཀྱིས་མཚོན་ཚུལ་ལས། །སྣ་ཚོགས་དཔག་མེད་གསུང་པ་ལས། གསང་བ་མཆོག་གི་དབང་བསྐུར་བཤད། །ལུས་ཅན་རྩོལ་དང་སྒྲུབ་མེད་པའི། །མ་བསྐུར་ཡེ་ནས་རྫོགས་པའི་དོན། །མ་བྱས་བཞག་པའི་རང་བཞིན་ལས། །གསང་ཐོབ་འབྲས་བུ་སྐྱེ་བའི་གནས། །གཞི་ལ་བབས་ཀྱིས་གྲུབ་པའི་ཕྱིར། །རང་བཞིན་རྣམ་པར་དག་པ་ལས། །སྲིད་གསུམ་ཡོངས་སུ་གྲོལ་བའི་གཏེར། །སྟོང་གསུམ་ཡེ་རྒྱས་གདབ་པའི་དབང་། །རིམ་མིན་

ཅིག་ཅར་འཇུག་པའི་ཚུལ། །རང་གནས་བབས་ལུགས་ཆེན་པོའི་དབང་།། དབང་པོ་རབ་ཀྱི་ཡང་རབ་ཀྱི། །དོན་དུ་ཡི་གེ་འདི་ཉིད་བཀོད། །ཐོག་མ་དངོས་པོ་གཤིས་ཀྱི་ཡང་། །གཞི་ནས་བབས་ཀྱི་གྲུབ་པའི་ཕྱིར། །གློ་བུར་བཙན་ཐབས་མ་ཡིིན་པར། །རང་ལ་གནས་ལ་རང་རིག་ཉིད། །དབང་པོའི་སྔོན་དུ་ལྟ་དོན་དུ། །གསང་བ་ངེས་པའི་དབང་དོན་འདིས། །ཅིག་ཆར་ཡེ་ཤེས་འཇུག་དོན་དུ། །ལྷ་སྔགས་དལ་དང་རྫས་མེད་པར། །རང་བཞིན་གནས་ལུགས་ཉིད་ཀྱི་ཚིག །དངོས་པོའི་འདུག་ཚུལ་མཚོན་པ་ཡི། །རིག་པ་རྩལ་དབང་བསྐུར་བའི་ཕྱིར། །དད་ལྡན་ཤེས་རབ་བརྩོན་འགྲུས་ལྡན། །སྐལ་ལྡན་ཡིད་ཀྱི་བུ་གཅིག་པོ། །རང་བཞིན་མ་བཅོས་ད་ལ་ལ། །བརྟེན་ནས་ཉམས་སུ་མྱོང་བའི་གནད། །ཤིན་ཏུ་སྤྲོས་མེད་ལ་བརྟེན་ནས། །སྐུ་གསུམ་ཅིག་ཆར་ཐོབ་དོན་དུ། །ཤིན་ཏུ་སྤྲོས་མེད་སྤྱོད་ཅིག་ས་མ་ཡཿ། །འདི་ཉིད་གསང་སྔགས་རྣམས་ཀྱི་བཅུད། །མ་བཙལ་ཡེ་ནས་གནས་པའི་དོན། །རང་ལ་ཡོད་པའི་དོན་ཉིད་ནི། །བརྡ་ལ་བརྟེན་

ནས་མིག་ལ་བསྐུར། །ཤེས་རབ་ཀྱིས་ནི་བརྟག་དཔྱད་མིན། །དབང་པོའི་སྒོ་ལ་མངོན་སུམ་དུ། །སྣང་བའི་ཡེ་ཤེས་གཏན་དབབ་ཕྱིར། །འདི་ཉིད་ད་ལ་ནང་དུ་གཞུག །ད་ལ་འཇུག་འདོད་ཡིད་ཀྱི་བུ། །བླ་མ་ལུང་དང་ལྡན་པ་གཅེས། །སྣང་སྣང་བྱས་ན་དངོས་གྲུབ་མེད། །གལ་ཏེ་བླ་མ་ལུང་མི་ལྡན། །དམ་ཚིག་མེད་ཅིང་སྡོམ་པ་མེད། །འཇིག་རྟེན་ནོར་ལ་སེམས་པ་དང་། །གསང་སྔགས་ལུགས་བཞིན་མི་འཛིན་དང་། །རྒྱུད་ལ་དགོངས་པ་མི་གནས་དང་། །རིག་པ་མངོན་སུམ་མ་མཐོང་དང་། །ཚུལ་ཁྲིམས་ཉམས་ཤིང་ངང་ཚུལ་མེད། །རྣམ་སྨིན་བྲལ་བའི་བླ་མ་ཡིས། །སྤྲོས་མེད་དབང་འདི་བསྐུར་བྱས་ན། །ན་རག་ཐུར་བལྟས་དམྱལ་བར་འགྲོ། །ལོག་པར་འདྲེན་པ་ཞེས་བྱ་འོ། །དེས་ན་ལུང་ལྡན་བླ་མ་གཅེས། །སློབ་མའི་མཚན་ཉིད་སྔར་བཤད་ཀྱང་། །རེ་ཞིག་འདིར་ནི་མདོ་ཙམ་ཞིག །ནན་ཏན་དུ་ནི་འདི་བཤད་བྱའོ། །འཁོར་ལས་ཡིད་དབྱུང་དད་པ་བརྟན། །སྐྱོ་ངས་མེད་པར་གྱུར་པ་དང་། །འཇིག་རྟེན་བདོག་པ་གཏོང་པར་ནུས། །ཤེས་རབ་བློ ་ཆེན་རྒྱས་པ་དང་། །གསང་སྔགས་སྲི་ཞུ་ཁྱད་པར་ཅན། །བླ་མར་གུས་ཤིང་དམ་ཚིག་ལྡན། །ང་རྒྱལ་བྲལ་ཞིང་ཆོག་ཤེས་པ། །སྐྱེ་ཤི་གཉིས་ལ་འཇིགས་པ་དང་། །རྣམ་སྨིན་འཛེམ་ཞིང་ཁྲེལ་ཡོད་པ། །འདི་རྣམས་མི་ལྡན་སློབ་མ་ལ། །གལ་ཏེ་ཟང་ཟིང་བལྟས་ནས་ནི། །དབང་བསྐུར་འདི་ནི་སུས་བྱས་པ། །གཉིས་ཀ་ས་སྤྱོད་མེ་ཡིས་བསྲེག །གདོད་ནས་མ་བཙལ་ཉེས་མེད་དགེ །གཞི་རྣམས་སྨིན་པར་བྱེད་པ་ལ། །བླ་མ་སློབ་མའི་སྣོད་བཅུད་གཅེས། །དེས་ན་ཐོག་མར་མཁས་པས་བྱའོ། །འདི་གཉིས་སྣོད་དུ་བཅུད་འཛོམ་ན། །གདོན་མི་ཟ་བར་སངས་རྒྱས་འཐོབ། །གལ་ཏེ་བླ་མ་ལུང་ལྡན་ལ། །ཤིན་ཏུ་སྤྲོས་མེད་དབང་ཞུས་ན། །རང་གི་བླ་མ་སྔར་ཡོད་ན། །ཐུན་མོང་དབང་བསྐུར་བསྐྱར་ལ་ཞུ། །བླ་མ་མཉེས་པའི་ཐབས་དག་ནི། །ཇི་ལྟར་བཞེད་པས་བསྙེན་པ་མཉེས་པར་བྱའོ། སྔ་མའི་བླ་མ་མེད་ན་ཡང་། །དབང་བསྐུར་ཞུ་བའི་བླ་མ་ཡི། །སྐུ་

གསུང་ཐུགས་ལ་ཤེས་པ་གཏད། །ཞག་ནི་བདུན་ནམ་བཅུ་གཅིག་ཏུ། །སྤྱི་བོའི་གཙུག་ཏུ་བསྒོམ་པར་བྱ། །རྨི་ལམ་བླ་མ་བྱོན་ནས་ནི། །ཆོས་རྣམས་སྟོན་པ་དག་དང་ནི། །གཞན་གྱིས་སྟོན་པའི་གཟུགས་དག་གིས། །ཆོས་ནི་སྟོན་པར་གྱུར་ན་ཡང་། །རབ་ཏུ་དངོས་གྲུབ་འབྱུང་བར་བཤད། །དེ་ནས་ཉེ་བསྙེན་བླ་མར་དབང་བསྐུར་ཞུ། །གལ་ཏེ་དབང་བསྐུར་བླ་མ་ཉིད། །འདི་ལ་ཉམས་སུ་མི་ལེན་ན། །སློབ་མས་དབང་བསྐུར་ཞུ་ཕུལ་ནས། །དུས་ལ་ཕེབས་པའི་སྔོན་དུ་ཡང་། །རང་ལུས་ཁྲུས་ནས་བཏོན་ནས་ནི། །བླ་མ་ལ་ཡང་དབང་བསྐྱར་ཞུ། །འོན་ཏེ་བླ་མ་མི་བཞུགས་ན།། སློབ་མའི་བྱ་བ་ཇི་བཞིན་ན། །དེ་ནས་སྒྲུབ་པ་དུ ར་ཁྲོད་དག་སོང་ནས། །སྤྱོད་པ་ཞག་གསུམ་དག་ཏུ་བརྩམ། །དེ་ནས་ལོག་སྟེ་སྒྲུབ་པ་ཆེན་པོ་རི་ཕུག་ཏུ། །ཆོས་ཉིད་མངོན་སུམ་རང་གནད་ལ། །ཞག་ནི་བདུན་ནམ་བཅུ་གཅིག་གམ། །ཉེར་གཅིག་དག་ཏུ་ཉམས་སུ་བླང་། །ཉམས་སུ་བླངས་སམ་ལེན་པ་ན། །སྦྱོར་བ་དེ་ཉིད་དགོས་པ་མིན། །དེ་ནས་དབང་སྐུར་རང་གི་གནས་ཁང་ངམ། །རི་ཕུག་དབེན་པའི་གནས་དག་ཏུ། །སློབ་མ་གཉིས་དང་གསུམ་ལ་ཡང་། །འབྱུང་བའི་ཁྲུས་ནས་བཏོན་ནས་ནི། །གོས་ནི་གསར་པ་བརྗེས་བྱས་ལ། །དེ་ནས་སློབ་མས་བླ་མ་ཡི། །མདུན་དུ་འདུག་སྟེ་འགྲེང་ཆུགས་ལངས། །ཐལ་མོ་སྙིང་ཁར་སྦྱར་ལ་བྱའོ། །བླ་མས་སློབ་མའི་བགེགས་བསྐྲད་ཕྱིར། །སྟོད་གཡོགས་དག་ནི་ཕུད་ནས་ནི། །ཤར་དུ་ཁ་བལྟས་སྟངས་སྟབས་བྱ། །རྣམ་ཤེས་བརྒྱད་ཀྱི་སྒོ་བསྲུང་ཕྱིར། །ཡི་གེ་བརྒྱད་ཀྱིས་རྒྱས་གདབ་བྱའོ། །སློབ་མའི་སྤྱི་བོའི་གཙུག་ཏུ་ཡང་། །ཧཱུྃ་གཅིག་སྒོམས་ཞེས་ཚིག་བརྗོད་ལ། །བླ་མས་ཏིང་འཛིན་གསལ་བ་ཡིས། །སློབ་མའི་སྙིང་གི་རྩེ་མོ་ན། །དྲ་བ་ཅན་གྱི་རྩ་ནང་དུ། །ཧཱུྃ་དང་ཤེས་པ་བཅས་པ་གཞུག །བུ་ལུས་སྔོ་སྐྱའི་ཧཱུྃ་དུ་བསྒོམ། །རྐང་མཐིལ་ཡཾ་ལས་ལྗང་ཁུ་ཆེ། །བུ་ལུས་ཡེ་ཤེས་ཆེན་པོར་བསྒོམ། །ལྟེ་བར་རཾ་དམར་སྔར་དང་མཚུངས། །མགྲིན་པར་ཁཾ་

ནི་དུད་ཁའོ། །དཔྲལ་བར་ཨེ་ནི་མཐིང་ཁ་བསྒོམ། །ལྐོག་མར་སུ་ཉིད་སེར་པོ་འོ། །ཧ་དཀར་པོ་ཞེས་པུས་མོ་ཟེར་ཡང་ནུ་མ་གཉིས་གཡས་གཡོན་ལ། །རང་ལུས་གཅེར་བུ་དག་ཏུ་ཕྱུང་། །ཧ་ཧ་ཞེས་ནི་དྲག་ཏུ་བརྗོད། །ཡང་ནི་སྙིང་ཁ་ཟེར་ཡང་རྐང་མཐིལ་ཕཊ་ཡིག་ནི། །སྔོ་ནག་འཇིགས་པའི་གཟུགས་སུ་བསྒོམ། །དེ་ནས་སློབ་མ་དེ་དག་ཀུན། །ཟས་དང་སྦྱོར་བ་ཁྱེར་ནས་ནི། །དུར་ཁྲོད་རེ་རེར་བཏང་བའི་ཕྱིར། །རུ་ཤན་འབྱེད་པའི་སྤྱོད་པ་ཡིས། །བསླབ་བྱ་དག་ནི་ལེགས་པར་བྱའོ། །ལུས་དང་ངག་དང་ཡིད་དང་ནི། །སྤྱོད་པའི་རིམ་པ་བསླབ་ནས་ནི། །སོ་སོའི་གནས་སུ་མ་ཕྱིན་པར། །ཕཊ་ཅེས་བཟླས་ཤིང་གཏོར་མ་ཁྱེར། །དེ་ནས་སོ་སོའི་དུར་ཁྲོད་དུ། །ཕྱིན་ནས་གཏོར་མ་རེ་བཏང་སྟེ། །མཁའ་འགྲོ་མ་ལ་གསོལ་བ་གདབ། །བར་ཆད་ཞི་ཞིང་དངོས་གྲུབ་གསོལ། །ཞེས་ནི་གསོལ་བཏབ་ལུས་སྤྱོད་བརྩམ། །སྤྱོད་པ་དེ་ཉིད་ཚར་དུས་སུ། །བག་ཆགས་ཕལ་པ་བཞག་པའི་ཕྱིར། །ཕྱག་དང་བསྐོར་བ་ཕྱག་རྒྱ་དང་། །ཆོས་སུ་འགྲོ་བའི་ལུས་སྤྱོད་བྱའོ། །འདི་དུས་གཉིད་ནི་སྤང་བར་བྱའོ། །དེ་བཞིན་སེམས་སུའང་སྒོམ་སྣ་ཚོགས། །བག་ཆགས་ཕལ་པ་ལ་དགོངས་པའོ། །བླ་མས་ཀྱང་ནི་རི་ཕུག་ཏུ། །ཆོས་ཉིད་མངོན་སུམ་དོན་ལ་བཞག །འདི་ཡི་དུས་སུ་འགྲོ་བ་གཞན། །སུས་ཀྱང་མཐོང་བར་མི་བྱ་ལ། །ངག་ཀྱང་རབ་ཏུ་གཅད་པར་བྱའོ། །དེ་ལྟར་ཞག་གསུམ་རྫོགས་པ་ཡི། །ཉི་མ་རི་བོའི་རྩེར་ཤར་ཚེ། །རང་རང་དག་ཀྱང་མི་འདྲེ་བར། །བླ་མས་ཚོགས་དང་གཏོར་མ་དང་། །མཆོད་པའི་བྱེ་བྲག་སྣ་ཚོགས་བཤམ། །རྟེན་གྱི་མཎྜལ་ཆེན་པོ་ནི། །གྲུ་བཞིའམ་ནི་ཟླུམ་པོ་ལ། །སྣ་ཚོགས་དྲི་ཡིས་ལེགས་བྱུགས་ནས། །མེ་ཏོག་རྣམ་ལྔའི་ཚོམ་བུ་དགྲམ། །མཎྜལ་ལེགས་པར་བཤམས་ནས་སུ། །བླ་མའི་མདུན་དུ་ཕྱག་བྱས་ནས། །ལེགས་པར་ཐལ་སྦྱར་མདུན་དུ་འདུག །བླ་མས་ཚིག་ནི་འདི་སྐད་བརྗོད། །བུ་ཁྱོད་སུ་ཡིན་ཞེས་པ་ནི། །ལན་གསུམ་བར་དུ་བརྗོད་པར་བྱའོ། །སློབ་མས་ཀྱང་ནི་འདི་སྐད་དུ། །ལན་གསུམ་

བར་དུ་ལན་ཡང་གདབ། །བདག་སྐལ་ལྡན་སེམས་ཀྱི་བུ་གཅིག་པོ་ལགས། ཞེས་ནི་ཚིག་གིས་གསལ་ཡང་གདབ། དེ་ནས་བླ་མས་ལན་འདི་འོ། །དེ་ལྟར་ཡིན་ཕན་ཆད་རང་བཞིན་རྫོགས་པ་ཆེན་པོའི་དལ་བཟང་ཞིང་ཉམས་དགའ་བ་འདིར་ཞུགས་ཤིག །ཅེས་བརྗོད་དོ། །དེ་ནས་སློབ་དཔོན་བདག་ཉིད་ཀྱིས། །རང་གི་བླ་མར་གསོལ་གདབ་དང་། །རྒྱུད་པའི་བླ་མ་ལ་ཡང་གདབ། །སློབ་མ་དད་པ་བསྐྱེད་པ་ལ། །འཁོར་བའི་ཉེས་དམིགས་ཆར་བཤད་ཅིང་། །སྐུ་གསུམ་འབྲས་བུ་མ་ཐོབ་པར། །གཞན་གྱིས་དགོས་པ་མེད་པར་ནི། །སློབ་མའི་རྒྱུད་ལ་བརྟེན་དུ་གཞུག །དེ་ནས་བླ་མའི་རྗེས་བརྗོད་དེ། །བླ་མའི་རིམ་པ་ལས་གསུངས་པའི། བླ་མས་གསོལ་བ་གདབ་པར་བྱ། །དེ་ནས་སློབ་མས་མཎྜལ་དབུལ། །སྟོང་གསུམ་འཇིག་རྟེན་ཐམས་ཅད་ཀུན། །གསེར་ལ་སོགས་ཏེ་རིན་ཆེན་ལྔས། །ཡོངས་སུ་གང་བར་དམིགས་ནས་ནི། །བླ་མ་རྡོ་རྗེ་ཅན་ལ་དབུལ། །དེ་ནས་འབྲུ་རྣམས་དེ་བཞིན་ནོ། །དེ་ནས་དྲི་ནི་སྣ་ཚོགས་པ། །དེ་ནས་སྨན་རྣམས་སྣ་ཚོགས་དབུལ། །དེ་ནས་སྟོང་གསུམ་འཇིག་རྟེན་ཀུན། །མེ་ཏོག་སྣ་ཚོགས་དག་ཏུ་དམིགས། །བླ་མ་མཆོད་ཕྱིར་དབུལ་བར་བྱའོ། །དེ་ནས་ནོར་ལ་སོགས་པ་ཡིས། །དབང་བསྐུར་འདོད་ཕྱིར་ཡོན་དབུལ་ལོ། །དེ་ནས་ཡིད་ཀྱི་བུ་གཅིག་པོས། །ལུས་ཀྱི་ཆས་རབ་ཕྱུང་ནས་ནི། །མདུན་དུ་ལངས་ཏེ་འགྲེང་ཚུགས་བསྲང་། །ཐལ་མོ་སྙིང་ཁར་སྦྱར་བྱས་ནས། །ཤེས་པ་ཡེངས་ལ་བོར་ནས་ནི། །བླ་མའི་ཐུགས་དཀྱིལ་སེམས་གཏད་ལ། །གཞན་དུ་ཡེངས་པ་མེད་པར་ནི། །གནད་ཀྱི་མན་ངག་དམ་པ་འོ། །རིག་པའི་མེ་ཏོག་དབུལ་བར་བྱའོ། །བླ་མས་བུ་སེམས་བཟུང་བའི་ཕྱིར། །ཨ་ཨཱ་ཞེས་ནི་དྲུག་བརྩེག་ཏུ། །རབ་ཏུ་དྲག་པོར་བརྗོད་པར་བྱའོ། །ཡེངས་ལ་བོར་བའི་མཚམས་སུ་བརྗོད། །དེ་ནས་ཡིད་ཀྱི་བུ་གཅིག་པོའི། །ལུས་ནི་གཡོ་འཕར་ཉ་བ་དང་། །ངག་ནི་སྨྲ་ཞིང་འཕར་བ་དང་། །སེམས་ནི་བདེ་བས་མྱོས་ན་ནི། །རིག་པ་ཚུད་པའི་རྟགས་སུ་བཤད། །དེ་ནས་སྟོང་ཉིད་

ད་ལ་རུ། །སློབ་མ་དག་ནི་གཞུག་པར་བྱའོ། །ཤར་གྱི་ཕྱོགས་སུ་ཁ་བལྟས་ཏེ། །ནམ་མཁར་འགྲོ་བར་བསྒོམ་དུ་གཞུག །ངག་ཏུ་ཚིག་ཀྱང་འདི་སྐད་དུ། །དྲག་ཏུ་རྒྱུན་རིང་དྲག་ཏུ་བརྗོད། །ཨེ་མ་སྐལ་ལྡན་ཤར་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་། ཞེས་ནི་བརྗོད་པའི་མཚམས་དག་ཏུ་འགྲོ་ན་འགྲོ་ས་འདུག་གམ། སླར་ལྡོག་ས་འདུག་གམ། ཞེས་ནི་ལན་གྲངས་གསུམ་གསུམ་བརྗོད། དེ་བཞིན་ལྷོ་དང་ནུབ་དང་བྱང་། །ཀུན་ཏུ་བརྗོད་ཅིང་དཀྱིལ་འཁོར་གཞུག །དེ་ནས་བླ་མ་ལ་ཕྱག་བྱ། །བླ་མའི་ལག་པས་ནམ་མཁའ་ལ། །ལན་གསུམ་དག་ཏུ་གཡུགས་པར་བྱ། །དེ་ནས་སྐལ་དང་ལྡན་པ་ལ། །ལྷ་ཡི་ངོ་བོ་བསྟན་པའི་ཕྱིར། །གོས་གྱོན་སྐྱིལ་ཀྲུང་འདུག་པ་ལ། །ནམ་མཁའི་དཀྱིལ་ན་ཉི་མ་ལྔ། །རང་བཞིན་འོད་ནི་སྣ་ཚོགས་འཕྲོ། །འདུག་པ་ཉིད་ལ་སེམས་གཏད་གཞུག །བླ་མས་ཀྱང་ནི་ཚིག་འདི་བརྗོད། །ཨེ་མ་བུ་ཁྱོད་སྐལ་དང་ལྡན། །ནམ་མཁའི་སྟེང་དུ་ཡར་ལྟོས་དང་། །ཉི་མའི་དཀྱིལ་འཁོར་འོད་འཕྲོ་བ་དེ་ལ་ཤེས་པ་གཏོད་ལ་ཇེ་མཐོ་ཇེ་མཐོར་སོང་ཞིག ། ཅེས་ནི་ལན་གསུམ་བརྗོད། འོག་ཏུ་སླར་མ་ལྡོག་ཅིག །སླར་མ་ལྡོག་ཅིག ། ཅེས་ནི་བླ་མས་བརྗོད་བྱས་ལ། །ལངས་ཏེ་གྱད་ཀྱི་དོར་སྟབས་འདུག །མཛུབ་མོ་བསྒྲེང་སྟེ་མིག་བཙུགས་ལ། །ཨ་ཨཱ་ཞེས་བརྗོད་ཕྱོགས་བཞིར་བལྟ། །ཡང་ནི་མཛུབ་མོ་ནམ་མཁར་བསྒྲེང་། །མིག་ནི་ཧར་པོ་དག་ཏུ་ལྟ། །ནམ་མཁའ་འདི་ནི་རྒྱ་ཆེ་ཞེས། །ལན་གསུམ་བར་དུ་བརྗོད་པར་བྱ། །དེ་ལྟར་བརྡ་དབང་བསྐུར་དུས་སུ། །ཉམས་སུ་མྱོང་བ་རྟག་ཏུ་སྐྱེ། །གལ་ཏེ་མ་སྐྱེས་སྲིད་ན་ཡང་། །དེ་དག་བརྡ་ནི་བླ་མས་དགྲོལ། །སོ་སོའི་ཉམས་དང་མཐུན་པར་བཤད། །འདི་དུས་བསོད་ནམས་ཚོགས་བསགས་ཕྱིར། །རྡོ་རྗེ་སྤུན་ནམ་སྲིང་མོ་འམ། །བླ་མའི་གཟུངས་མ་གྲོགས་མོ་དང་། །འཁོར་དང་ཉེ་འཁོར་སྲས་རྣམས་དང་། །གཞན་ཡང་རྣལ་འབྱོར་ཕ་དང་མ། །དགེ་སློང་དགེ་ཚུལ་དགེ་བསྙེན་ལ། །དགའ་སྟོན་ཆེན་པོ་དེ་བཞིན་ལ། །

འབྱོར་པ་ཡོད་ན་ཡོན་དང་བཅས། །འདི་ལྟར་བྱས་པའི་སྐལ་ལྡན་དེ། །མངོན་སུམ་ལམ་ལ་རབ་གོམས་པས། །དཀའ་བ་མེད་པར་འདིས་འགྱུར་རོ། །བླ་མ་ལ་ཡོན་མ་ཕུལ་ཞིང་། །སྙིང་རྗེ་དགའ་སྟོན་མ་བྱས་ན། །དབང་རྣམས་ཐོབ་པར་མ་བཤད་དོ། །དེས་ན་དགའ་བའི་སྟོན་མོ་ཡིས། །ལྷག་མ་སྙིང་རྗེའི་མགྲོན་ལ་དམིགས། །བྱ་དང་བྱོལ་སོང་སྣ་ཚོགས་དང་། །དུད་འགྲོའི་སྐྱེ་གནས་རྣམས་ལ་ཡང་། །ཇི་ལྟར་དམིགས་པ་མ་ལོག་པས། །དགའ་སྟོན་ཆེན་པོའང་དེ་བཞིན་བྱའོ། །དེ་ནས་རྣལ་དུ་འབབས་པ་ཡི། །ཆོ་ག་མཁས་པས་ཞག་གསུམ་བྱའོ། །དེ་ནས་སེམས་ཀྱི་སྣ་ཁྲིད་པའི། །སྔོན་འགྲོ་རྣམས་ལའང་སྦྱང་བར་བྱའོ། །འདིས་ནི་ཤིན་ཏུ་སྤྲོས་པ་མེད། །དབང་བསྐུར་ཆོ་ག་རྣམས་ཕྱེ་བའོ། །ཞེས་དབང་བཀོད་རིན་པོ་ཆེ་ཕྲ་ཏིག ། དབང་རྣམ་པར་ཕྱེ་བའི་རིམ་པ་ལས། ཤིན་ཏུ་སྤྲོས་པ་མེད་པ་རྣལ་འབྱོར་གྱི་དབང་བསྐུར་བའི་ཆོ་ག་བསྟན་པའི་དུམ་བུ་སྟེ་གསུམ་པ་རྫོགས་སོ། །རྒྱ་རྒྱ་རྒྱ། །

སྟོན་པ་སངས་རྒྱས་བཅོམ་ལྡན་འདས། །སྤྲོས་དང་བྲལ་བའི་བདག་ཉིད་ལ། །ལུས ་ངག་ཡིད་ཀྱིས་ཕྱག་འཚལ་ལོ། །སངས་རྒྱས་མེད་པའི་སངས་རྒྱས་ཀྱིས། །འཇིག་རྟེན་སྣང་བའི་ཕྱོགས་དག་ནས། །མཚོན་པའི་ཚིག་ནི་མཐའ་ཡས་སུ། །གསུངས་པའི་དོན་ནི་འདི་དོན་དུ། །རྣམ་པར་བསྡུས་ནས་གང་ཟག་ནི། །དབང་པོ་རབ་ཀྱི་ཡང་རབ་ལ། །འདི་ལྟར་རྣམ་པར་གསལ་བ་ནི། །གསང་སྔགས་ཐབས་ཀྱི་རང་བཞིན་ལ། །ཇི་ལྟར་གཞི་ལ་གནས་པའི་ཚིག །འདི་ལྟར་རྣལ་འབྱོར་རང་རྒྱུད་ལ། །རྣམ་པར་མཚོན་པའི་ཚིག་ཏུ་ཡང་། །རིམ་པ་ཇི་ལྟར་གསལ་བར་བྱེད། །སྣང་དང་མུན་པའི་སྒྲ་ཉིད་ནི། །འདི་ལྟར་དབང་གི་རྣམ་པར་སྤོང་། །རྗེས་སུ་གཟུང་བར་བྱ་བའིི་ཕྱིར། །རིགས་ལྡན་དད་མཆོག་ལྡན་པའི་བུ། །སྐལ་པ་མཆོག་དང་ལྡན་པ་ཡི། །སྙིང་དང་འདྲ་

བ་གཅིག་དང་གཉིས། །གསུམ་ལས་མང་ན་མཁའ་འགྲོ་མས། །ལུས་ངག་ཡིད་ལ་འཚེ་བར་འགྱུར། །གཉིས་སམ་གསུམ་གྱི་དོན་དུ་ནི། །འདི་ཉིད་རྣམ་པར་བཀོད་པ་འོ། །འདིར་ནི་ཤིན་ཏུ་སྤྲོས་པ་མེད་པའི་རྣལ་འབྱོར་པ་རྣམས་ཀྱི་དབང་གི་དོན་རྣམ་པར་བཤད་པར་བྱའོ། །དེའང་སློབ་དཔོན་དང་སློབ་མའི་མཚན་ཉིད་ནི་གཞུང་ནས་བཤད། ལུང་དང་མི་ལྡན་པ་གང་རུང་གིས་ནི་བྱ་བ་མ་ཡིན་ནོ། །དེའི་ཕྱིར་ན་སློབ་མ་དད་པ་དང་ལྡན་པ་དེས་ཀྱང་རབ་ཏུ་བརྟགས་ལ་དབང་ལ་འཇུག་པར་བྱའོ། །འདི་ནི་ཐེག་པ་ཐུན་མོང་པ་རྣམས་ཀྱི་དབང་དང་མི་འདྲ་སྟེ། ཐེག་པ་ཐུན་མོང་པ་རྣམས་ནི་སྣང་བ་འདི་ཉིད་ཀྱི་དོན་དུ་ཡིན་གྱི། རིག་པ་ཡེ་ཤེས་མངོན་སུམ་དུ་ག ་ལ་སྲིད་དེ། ཤེས་རབ་ཀྱི་ནི་སྤྱོད་ཡུལ་དུ་ཡང་གཏན་ལ་མི་ཕེབས་པའི་ཕྱིར་རོ། །འདིའི་སློབ་དཔོན་སླའི་དེ་ཅིའི་ཕྱིར་ཞེ་ན་འཇིག་རྟེན་འདིའི་དོན་ལས་སྟོན་མི་ནུས་པས་འཇིག་རྟེན་འདིའི་བློ་ཅན་རྣམས་ཀྱིས་བྱས་ཀྱང་ཉེས་དམིགས་ཆུང་། འདི་ཉིད་རང་གི་སྤྲོས་བཅས་ཀྱི་དབང་ཡང་ཉེས་དམིགས་ཆུང་ངོ་། །འདིས་ཀྱང་རིག་པ་མངོན་སུམ་དུ་གཏན་ལ་ཕེབས་པ་མ་ཡིན་པས་སོ། །དེས་ན་བླ་མ་མཚན་ཉིད་དང་ལྡན་པ་རབ་ཏུ་གཅེས་སོ། །དེ་ནི་སྔོན་དུ་སློབ་མའི་བློའི་འཕེན་པ་ཉིད་རིག་པར་བྱའོ། །དེ་ལྟར་མཚན་ཉིད་དང་ལྡན་པའི་སློབ་དཔོན་གྱིས། གཉིས་པ་སློབ་མའི་མཚན་ཉིད་བརྟག་པའི་ཕྱིར། དབང་བསྐུར་བའི་ཞུ་བ་ཕུལ་ནས་ལོ་གསུམ་གྱི་བར་དུ་མཚན་ཉིད་བརྟག་ཅིང་དད་པ་སྐྱེ་བའི་ཚིག་དང་། འཁོར་བ་ལས་བློ་ལྡོག་པའི་ཆོས་ཀྱི་ཚིག་དུམ་རེ་བཤད་ཅིང་བརྟག་གོ །དེ་ཉིད་སྣོད་དང་མི་ལྡན་ན་སྤྲོས་མེད་མན་ཆད་ཀྱི་དབང་ལས་རྣམ་པ་ཐམས་ཅད་དུ་མི་བསྐུར་རོ། །འདི་ནི་ཟག་པ་རྣམས་ཟད་པར་བྱེད་པའི་དོན་ཡིན་པས་གང་ཞིག་ཟག་པ་ལ་མངོན་པར་དགའ་བ་རྣམས་ཀྱི་སྤྱོད་ཡུལ་ནི་མ་ཡིན་ནོ། །དེ་ལས་ལོ་གསུམ་གྱིས་སློབ་མའི་མཚན་ཉིད་བརྟགས་ནས། ད་ནི་དམ་ཚིག་དང་ལྡན་པའི་སྐལ་ལྡན་ལ་དབང་བསྐུར་སྔོན་དུ་བླ་མའི་བྱ་བ་བསྟན་པ་ནི།

དོན་གསུམ་པ་རྩོལ་བ་དང་བྲལ་བའི་བསྙེན་པའི་མན་ངག་ནི། རང་གི་བླ་མ་མཉེས་པར་བྱ་ཞིང་། དེ་ཉིད་ཀྱི་རྟགས་ལ་ཕེབས་པར་བྱེད་པ་བསྙེན་པ་བསྐྱལ་བའི་མན་ངག་ཏུ་གསུངས་པ་ཡིན། འདི་ལ་ལྷ་དང་སྔགས་མེད་ཅིང་སྤྲོས་པ་མེད་ཀྱི། ཐུན་མོང་པ་འདི་ཀུན་གྱི་བསྙེན་པ་ནི་བྱ་བྱེད་བཅས་པ་སྟེ། བྱས་པ་གང་ཡིན་པ་འཇིགས་པས་ན། བྱ་མེད་འཇིགས་བྲལ་གྱི་བསྙེན་པས་སྟོང་གསུམ་ཐམས་ཅད་གཞི་བཞེངས་སུ་བྱས་ནས་རང་གི་ངག་དག་པར་བྱེད་པའི་ཡན་ལག་ཏུ་བསྟན་པ་ཡིན་པས་ངག་མ་དག་ན། སེམས་ཅན་གྱི་དོན་བྱ་བར་ནུས་པ་མ་ཡིན་ནོ། །འདིས་ངག་དག་པར་བྱེད་པའོ། །དེ་ལྟར་ངག་དག་པར་བྱས་ནས་ནི་སེམས་འཇུག་པར་བྱེད་པའི་ཡན་ལག་ཏུ་བསྟན་པ་ཡིན་གྱི་ད་ནི་སེམས་ཅན་དེ་དག་ཞུགས་ནས། ལུས་ངག་ཡིད་གསུམ་གྱི་སྤྱོད་པས་ལུས་ངག་ཡིད་གསུམ་གྱི་ཞེན་པ་བཟློག་པར་བྱས་ནས། སློབ་མའི་ནུས་པ་བསྐྱེད་པའི་རྩོལ་བ་དང་བྲལ་བའི་ཉེ་བར་བསྙེན་པ་སྟེ། དོན་བཞི་པ་སྒྲུབ་པ་ནི་གསང་བ་ཡི་གེ་མ་རུའི་སྤྱོད་པ་རྣམས་སྤྲོས་པ་ཉེ་བར་ཞི་བའི་དོན་དུ་བསྟན་པའོ། །འདི་ནི་ཚིག་ལ་སོགས་པའི་སྤྲོས་པ་དང་རབ་ཏུ་བྲལ་བས་ན་ལུས་ངག་ཐ་དད་དུ་འཛིན་པའི་ཞེན་པ་རང་ལོག་ནས། ཕྱིས་སྐྱེ་བའི་ལུས་ངག་ཡིད་ཀྱི་རྒྱུ་རྐྱེན་འགག་པར་བྱེད་པའི་མན་ངག་ཏུ་བསྟན་པའོ། །འདིར་ནི་དེ་ལྟར་ལུས་ངག་ངོ་བོར་ཡོད་པས་དངོས་པོ་ནི་དངོས་པོ་ཉིད་ཀྱིས་དག་པས་ན་སྟོང་པས་ནི་མ་ཡིན་ནོ། །དངོས་པོའི་སྤྱོད་པ་འདི་དག་ནི་ལུས་ངག་རྣམས་རང་ཟད་ལ་བཏང་བའི་ཕྱིར་ལུས་ངག་ཡིད་ཀྱི་དྲི་མ་དག་པར་བྱས་པའི་སློབ་མ་ལ་ནུས་པ་འཇུག་པར་བྱེད་པའོ། །དྲི་མ་རྣམས་དག་པར་བྱེད་པའི་དག་བྱེད་ནི་སློབ་དཔོན་གྱིས་གོང་དུ་བསྟན་ཟིན་ཏོ། །དེ་ལྟར་རྟགས་བྱུང་ནས་སློབ་མ་ངེས་པའི་དོན་ལ་འཇུག་པའི་དགོས་པ་ཡོད་དོ། །དེ་ནས་དོན་ལྔ་པ་སྒྲུབ་པ་ཆེན་པོ་སྤྲོས་པ་མེད་པའི་མན་ངག་ཏུ་བསྟན་པ་ནི། ཡང་སྤྱོད་པའི་གནས་ལས་འཕོས་ནས། གསང་བ་ཡི་གེ་

མ་རུའི་དངོས་གཞིའི་མན་ངག་རྣམས་ལ་ཉམས་སུ་བླང་བ་ནི། དབང་པོ་རབ་འབྲིང་རྣམས་ཞག་གི་གྲངས་ཞག་བདུན་ནམ། བཅུ་གཅིག་གམ། ཉེར་གཅིག་གིས་རང་གི་རིག་པ་མངོན་སུམ་ལ་གོམས་པར་བྱེད་པ་ནི། སློབ་མའི་རིག་པ་ཉིད་བརྟན་པར་བྱ་བའི་དོན་ཡིན་ཏེ། འདི་ལྟར་དགོངས་པ་དང་མི་ལྡན་ན། སྐལ་ལྡན་ལ་ངེས་ཤེས་མི་སྐྱེ་བའི་ཕྱིར་རང་གི་རིག་པ་ཉིད་དགོངས་པ་ལ་གནས་ནས། སློབ་མའི་རིག་པ་ཉིད་ཟིན་ཏུ་སྟོན་པའི་ཕྱིར་ན་ཤིན་ཏུ་སྤྲོས་པ་མེད་པའི་སྒྲུབ་པ་ཆེན་པོ་ཞེས་བྱ་སྟེ། འདི་ཉིད་ལ་བསྐྱེད་པའི་རིམ་པ་མེད། ལྷའི་སྐུ་ཡང་གསལ་བར་བྱར་མེད། དེ་ཉིད་ལ་མཆོད་པ་འབུལ་དུ་མེད། དེ་ཉིད་ལ་བརྟེན་པའི་སྔགས་དང་། བསྒྲུབ་པའི་སྔགས་དང་། རྩ་བའི་སྔགས་མེད། དལ་མེད་པས་དལ་གྱི་ལྷ་ལས་དབང་བསྐུར་བླང་དུ་མེད་པ་དང་། བུམ་པའི་རྫས་མེད་པའི་ཕྱིར་རྫོགས་པ་ཆེན་པོ་རང་བཞིན་གྱི་དབང་བསྐུར་བ་ཤིན་ཏུ་སྤྲོས་པ་དང་བྲལ་བའི་གནད་ཡིན་པས་ན། སྒྲུབ་པ་ཆེན་པོ་དེ་དག་ཀུན། བླ་མའི་བྱ་བར་བསྟན་པའོ། །ད་ནི་དྲུག་པ་དབང་བསྐུར་དངོས་གཞི་ལ་འཇུག་པའི་ཕྱིར་ན་སློབ་མའི་བྱ་བའི་མན་ངག་བསྟན་པར་བྱའོ། །དེ་ཡང་འདི་ལྟ་སྟེ། སློབ་མ་ཀུན་དྲི་སྣ་ཚོགས་དང་། མེ་ཏོག་སྣ་ཚོགས་བའི་སིལ་མ་དང་། ཆུ་དང་། འོ་མ་དང་། མར་དཀར་པོ་བསྲེགས་པའི་ཆུའི་ཁྲུས་ནས་ཨ་ཨ་ཞེས་བརྗོད་ཅིང་བཏོན་ལ། ཆུ་དེ་ལ་ཡང་དབུགས་རེ་ལ་ཨ་ཉེར་གཅིག་གི་རྒྱས་བཏབ་ལ་འཕྲལ་བྱུང་གི་དྲི་མ་དག་པར་བྱེད་པའོ། །དེ་ནས་གོས་གསར་པ་བརྗེས་ཏེ་གྱོན་ལ། འཇིག་རྟེན་གྱི་བར་ཆད་བསྲུང་བའི་འཁོར་ལོ་གདགས་པ་ནི། ཡི་གེ་བརྒྱད་ཀྱིས་རྣམ་ཤེས་བརྒྱད་ཀྱི་གནས་བརྒྱད་དུ་རྒྱས་གདབ་པ་ནི། འདི་ནི་འཇིག་རྟེན་གྱི་བགེགས་རྣམས་ཀྱི་ནུས་པ་མི་སྐྱེ་བར་བྱ་བའི་ཕྱིར་དང་། སློབ་མ་རང་གི་རྣམ་པར་ཤེས་པ་ཚོགས་བརྒྱད་ཀྱི་ཡུལ་ལ་མི་སྐྱེ་བར་བྱ་བའི་དོན་ཡིན་ནོ། །དེ་ནས་ཡི་གེ་བརྒྱད་ཀྱི་ཐ་མ་ཕཊ་ཡིག་ངག་ཏུ་ཡང་བཟླས་སུ་གཞུག་གོ །དབུགས་རེ་ལ་ཉེར་གཅིག་རེ་བཟླས་ཤིང་དུར་ཁྲོད་

དུ་བཏང་ངོ་། །དེ་ནས་སློབ་མས་དུར་ཁྲོད་དུ་ཕྱིན་པ་དང་། ཤ་སྣ་ཚོགས་པའི་གཏོར་མ་དང་། མེ་ཏོག་སྣ་ཚོགས་པའི་གཏོར་མ་གཉིས་ཀྱིས་མཁའ་འགྲོ་མ་ལ་མཆོད་ལ། བདག་གི་བར་ཆད་ཉེ་བར་ཞི་བར་གྱིས་ཤིག་པར་གསོལ་བ་བཏབ་ལ། ལུས་རུ་ཤན་འབྱེད་པའི་སྤྱོད་པ་ལ་ཞག་གཅིག་ཏུ་བྱ། འཇོག་པའི་མཚམས་སུ་ལུས་ཀྱི་དགེ་སྦྱོར་དུ་འགྲོ་བའི་སྤྱོད་པ་བྱའོ། །དེ་ནི་བག་ཆགས་འཇོག་པའམ་ལས་ཀྱི་འཕྲོ་འཐུད་པའོ། །དེ་ལ་ནི་དགོས་པ་གཉིས་ཡོད་དེ་ཐུན་མོང་དང་མཆོག་གི་དགོས་པའོ། །ཐུན་མོང་གི་ལས་གསུམ་སྟེ། ལུས་ཀྱི་བར་ཆད་ཉེ་བར་ཞི་བས་ལུས་ཀྱི་ལས་ཐམས་ཅད་འགྲུབ་པའི་དགོས་པ་དང་། དེ་ལྟར་བྱས་པས་ལུས་ཀྱི་ཞེན་པ་ལྡོག་པའི་དགོས་པ་དང་། དེ་གཉིས་ཀྱི་ཐུན་མོང་དུ་གསང་སྔགས་ཀྱི་ཐབས་ཁྱད་པར་ཅན་ལ་བརྟེན་ནས་ལུས་ཀྱི་སྡིག་པ་མ་ལུས་པར་འདག་པའི་དགོས་པ་ཡོད་དོ། །མཆོག་གི་དགོས་པ་ནི། དེ་ལྟར་ལུས་ཀྱི་ཞེན་པ་ལ་བརྟེན་ནས་ལུས་འཁོར་བའི་ལུས་རུ་ཤན་བྱེད་པས་ལུས་ཁམས་གསུམ་གྱི་ལུས་ལ་མི་འཇུག་པའི་དགོས་པ་དང་། དེ་ཉིད་ཁམས་གསུམ་དུ་མ་ཞུགས་ནས་གང་དུ་སོང་ཞེ་ན། ལུས་སྤྲུལ་པའི་སྐུར་འགྲོ་བའི་དགོས་པ་དང་། དེ་གཉིས་ཀྱི་ཐུན་མོང་དུ་སངས་རྒྱས་ཐམས་ཅད་ཀྱི་སྐུ་དང་གཉིས་སུ་མེད་པར་ཡོངས་སུ་མྱ་ངན་ལས་འདའ་བར་འགྱུར་བའི་དགོས་པ་ཡོད་དོ། །དེ་ནས་ངག་རུ་ཤན་འབྱེད་པའི་སྤྱོད་པ་ཞག་གཅིག་ཏུ་བྱ། ཐ་མ་ལ་ངག་གི་དགེ་སྦྱོར་དུ་འགྲོ་བའི་སྤྱོད་པའོ། །དེ་ལ་དགོས་པ་དྲུག་པོ་རྩིའོ། །དེ་ནས་སེམས་རུ་ཤན་འབྱེད་པའི་སྤྱོད་པ་ལ་ཞག་གཅིག་བྱ། ཐ་མ་སེམས་ཀྱི་དགེ་སྦྱོར་དུ་འགྲོ་བའི་སྤྱོད་པ་བྱའོ། །འདི་ལ་དགོས་པ་དྲུག་སྟེ། དེས་ལུས་ངག་ཡིད་གསུམ་སྐུ་གསུམ་དུ་གྲོལ་བས་ན་རབ་ཏུ་ཟབ་བོ། །དེ་ནི་ཕྱིས་སློབ་མའི་ལུས་ངག་ཡིད་གསུམ་འཁོར་བར་ལྡོག་མི་སྲིད་པའི་དོན་དུ་བསྟན་པའོ། །དེ་ནི་ཐུན་མོང་དང་སྦྱར་ན་སློབ་མ་སྟ་གོན་ལ་གནས་པའི་ཆོ་ག་ཞེས་བྱའོ། །དེ་ཉིད་ཀྱང་ཕྱིས་

གཞན་ལ་རགས་ལས་པའི་འབད་བཅས་མ་ཡིན་པར་རྣལ་འབྱོར་པའི་རང་གི་སྤྱོད་ཡུལ་དུ་བསྟན་པ་ཡིན་གྱི་གཞན་གྱི་རྩོལ་སྒྲུབ་ཏུ་མ་ཡིན་ནོ། །དེ་ནས་སློབ་མ་རང་གི་བྱ་བ་རྫོགས་པར་བྱས་ནས། བླ་མ་ལ་ཤིན་ཏུ་སྤྲོས་པ་མེད་པ་རང་བཞིན་རྫོགས་པ་ཆེན་པའི་དབང་ཞུ་བའི་དོན་དུ་འཕངས་པའི་ནོར་གྱིས་གཅེས་པའི་མན་ངག་ཐོབ་པར་བྱ་བའི་ཕྱིར་རང་གི་ཡིད་དུ་འོང་བ་བླ་མ་ལ་བཞེད་པ་མེད་ཀྱང་དབུལ་བར་བྱ་བ་ནི། འཇིག་རྟེན་ལས་འདས་པའི་དངོས་གྲུབ་ཐུན་མོང་མ་ཡིན་པ་ཐོབ་པར་བྱ་བའི་དགོས་པ་ཡོད་པ་ཡིན་ནོ། །གསེར་ལ་སོགས་པ་རིན་པོ་ཆེའི་མཎྜལ་ཕུལ་བས་ནི་ཡེ་ཤེས་ལྔའི་ངོ་བོ་ལ་ལོངས་སྤྱོད་པར་བྱ་བའི་དགོས་པའམ་བརྡའ་ཡིན་ནོ། །འབྲུ་རྣམ་པ་ལྔའི་མཎྜལ་ནི་དེ་ལྟར་ཡེ་ཤེས་ལྔ་ལ་ལོངས་སྤྱོད་པས་འབྲས་བུ་ལྔར་དོན་གཅིག་པའི་བརྡ་ཡིན་ནོ། །དྲི་ལྔའི་མཎྜལ་ཕུལ་བས་ནི་ཆོས་ཉིད་སྟོང་པ་ཉིད་ཀྱི་ཡེ་ཤེས་ལྔའི་དྲིས་ལུས་སེམས་ཚིམས་པར་མཛོད་ཅིག་པའི་བརྡའ་ཡིན་ནོ། །སྨན་སྣ་ཚོགས་པའི་མཎྜལ་ཕུལ་བས་ནི་བདག་གི་ལུས་ལ་ཕྱི་ནང་གི་སྡུག་བསྔལ་རྣམས་དང་བྲལ་བར་མཛོད་ཅིག་པའི་བརྡའ་ཡིན་ནོ། །མེ་ཏོག་སྣ་ཚོགས་པའི་མཎྜལ་ཕུལ་བས་ནི་སྣང་བ་ཐམས་ཅད་འོད་ལྔའི་མེ་ཏོག་གིས་གང་ཞིག་རྒྱས་པར་མཛོད་ཅིག་པའི་བརྡའ་ཡིན་ནོ། །དེ་ནས་སློབ་མ་ལ་བླ་མས་བརྡའ་བསྟན་ནས། བླ་མས་ཀྱང་བརྡའ་དེ་རྣམས་ཀྱི་དོན་བཤད་པར་བྱའོ། །དེ་ནི་མཆོག་གི་དངོས་གྲུབ་ཐོབ་པའི་དོན་དུ་ཡིན་གྱི། ཐུན་མོང་གི་དངོས་གྲུབ་ཚེ་གཅིག་ལ་རང་གི་ནོར་འཕེལ་བའི་དོན་དུ་ནོར་དང་། དེ་ཉིད་ཟད་མི་ཤེས་པའི་ཕྱིར་ན་རིན་པོ་ཆེ་དང་། མུ་གེའི་རིགས་དང་བྲལ་བའི་ཕྱིར་ན་འབྲུ་དང་། དབང་པོ་གསལ་བའི་ཕྱིར་ན་དྲི་དང་། ནད་ཀྱི་སྡུག་བསྔལ་ལས་གྲོལ་བའི་ཕྱིར་ན་སྨན་དང་། ཤེས་རབ་དང་དད་པ་ཕུན་སུམ་ཚོགས་པའི་ཕྱིར་ན་མེ་ཏོག་དང་། དེ་དག་གི་ཐུན་མོང་དུ་ཐོབ་པར་བྱ་བའི་ཕྱིར་བླ་མ་ལ་དབུལ་ལོ། །དེ་ནས་བླ་མའི་མན་ངག་གིས་སློབ་མ་ལ་ངེས་ཤེས་

བཙན་ཐབས་སུ་བསྐྱེད་པའི་ཕྱིར་བླ་མས་སློབ་མ་རྗེས་སུ་བཟུང་བ་ནི་འཁོར་བ་ལས་བཟུང་ནས་མྱ་ངན་ལས་འདས་པའི་སར་སྒྲོལ་བའི་ཕྱིར་དབང་བསྐུར་དངོས་གཞིའི་གདམས་ངག་བསྟན་པ་ནི། རྗེས་སུ་འཇུག་པའི་སློབ་མ་ལ་ལུས་ངག་ཐ་དད་དུ་འཛིན་པའི་ཉོན་མོངས་པ་ཡོད་པའི་ཕྱིར་རེ་ཞིག་བརྟེན་པའི་ཚུལ་ཙམ་ཞིག་དགོས་ཏེ། གནས་པའི་རྟེན་གཞི་མཚོན་པར་བྱེད་པའི་ཕྱིར། དྲི་སྣ་ཚོགས་པའི་མཎྜལ་ཟླུམ་པོ་ཤིན་ཏུ་ཡིད་དུ་འོང་བ་ཞིག་བྱ། དེ་ལ་མེ་ཏོག་ལྔའི་ཚོམ་བུ་ཁ་དོག་རེས་གཙོ་བྱས་པའི་ལྔ་ཚན་ལྔ་བཀྲམ་པ་ནི། སྣང་བ་འདི་ལ་རིགས་ལྔའི་དལ་དང་དབྱེར་མེད་པར་གྱུར་ཅིག་པའི་བརྡའ་ཡིན་ནོ། །དེ་ལྟར་སྣང་བ་འདི་ཉིད་ལ་ལོངས་སྤྱོད་པའི་སྐུ་ཐོབ་པར་འདུག་པ་ལ་འདུད་སྡིག་ཅན་འཁོར་བ་ལ་ཞེན་ཅིང་དགའ་བ་རྣམས་ཀྱིས་བར་དུ་གཅོད་པ་ཉེ་བར་ཞི་བར་བྱ་བའི་ཕྱིར་འཕགས་པ་རྣམས་ལ་མཆོད་པའི་བྱེ་བྲག་རྣམས་དང་། མཁའ་འགྲོ་མ་རྣམས་དང་ཆོས་སྐྱོང་རྣམས་ལ་གཏོར་ཚོགས་ཀྱང་ཤིན་ཏུ་བཟང་བར་བཤམས་པ་ནི་རྣལ་འབྱོར་པའི་བར་ཆད་ཞི་བར་བྱ་བའི་དོན་དུའོ། །དེ་ལྟར་བྱས་ལ་རང་བླ་མའི་ལུས་ངག་ཡིད་ལ་གསོལ་བ་གདབ་པ་ནི། འདི་ནི་བླ་མའི་ནུས་པ་བསྡུ་བར་བྱ་བའི་དོན་ཡིན་ནོ། །དེ་ཡང་། བླ་མ་རྡོ་རྗེ་འཛིན་པ་རྣམས་དགོངས་སུ་གསོལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ་རྡོ་རྗེ་དང་རིན་པོ་ཆེ་དང་པདྨ་དང་ལས་དང་བདེ་བར་གཤེགས་པའི་རིགས་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ། བླ་མ་རྡོ་རྗེ་འཛིན་པ་ཆེན་པོས་བདག་གི་ལུས་བྱིན་གྱིས་བརླབ་ཏུ་གསོལ། བདག་གི་ངག་བྱིན་གྱིས་བརླབ་ཏུ་གསོལ། བདག་གི་ཡིད་བྱིན་གྱིས་བརླབ་ཏུ་གསོལ། བདག་གི་སྣང་བ་བྱིན་གྱིས་བརླབ་ཏུ་གསོལ། སྨིན་པར་མཛད་དུ་གསོལ། གྲོལ་བར་མཛད་དུ་གསོལ། གང་བར་རྒྱས་པར་

ཆེར་འཕེལ་བར་མཛད་དུ་གསོལ་ལོ། ཞེས་གསོལ་བ་གདབ། བརྒྱུད་པའི་བླ་མ་ལ་གསོལ་བ་གདབ་པ་ནི། ཀྱཻ་སངས་རྒྱས་ཀུན་གྱི་སྐུ་གསུང་ཐུགས་ལྡན་པ། །ཟག་པ་རང་ཟད་དབྱིངས་ནས་སྐུ་གཤེགས་པའི། །དྲི་མ་རང་དག་དབྱིངས་ནས་སྤྱན་གཟིགས་ནས། །ཐུགས་རྗེ་རང་ཤུགས་ཆེན་པོས་འགྲོ་བའི་དོན་མཛད་པའི། །བདེ་གཤེགས་འཇིག་རྟེན་མཁྱེན་པའི་ཐུགས་མངའ་བ། །དགོངས་པ་ཉག་ཅིག་མི་གཡོ་དབྱེར་མེད་ཀྱང་། །སྔོན་བཞུགས་དུར་ཁྲོད་གནས་ནས་རྗེས་དགོངས་ལ། །རང་བཞིན་མཛད་པ་གང་ཡང་མི་མངའ་ ཡང་། །བདག་བློ་མོས་པའི་དོན་ཕྱིར་འདིར་གཤེགས་ཤིག །ཨེ་མ་ཧོ། བྱིན་རླབས་བརྒྱུད་པའི་རྩ་བ་བླ་མ་བརྒྱུད་པ་ཡི། །རིམ་པ་གཉིས་ཀྱིས་རིམ་ནས་རིམ་ཞུགས་པའི། །བདག་ཉིད་ཆེན་པོ་རོ་ལངས་བདེ་བ་དང་། །མཁྱེན་པའི་ཐུགས་ནི་རབ་ཏུ་སྦྱངས་དང་ལྡན། །མཁྱེན་རབ་སྤྲུལ་པ་མཛྙུ་ཤྲཱི་མི་ཏྲ་དང་། ཐུགས་རྗེ་ཆེན་པོས་འགྲོ་བའི་སྡུག་བསྔལ་གཅོད། །རྗེ་བཙུན་ཐུགས་རྗེ་མཆོག་ལྡན་ཤྲཱི་སིདྷ་དང་། །མཁས་པ་ཐེག་པ་ཡོངས་ཀྱི་སྒྲོ་འདོགས་རབ་ཆོད་པ། །འཇིག་རྟེན་མུན་པ་སེལ་མཛད་ཛྙཱ་ན་སུ་ཏྲ་དང་། །སྐྱེ་ཤི་ཀུན་བྲལ་ཚེ་ལ་དབང་ཐོབ་པའི། །མཁས་པ་ཆེན་པོ་བྷི་མ་མི་ཏྲ་དང་། །མཉམ་བཞག་རྗེས་ལ་དབྱེར་མེད་པའི། །སེམས་ལ་དབང་ཐོབ་ཏིང་འཛིན་བཟང་པོ་དང་། །རང་རྒྱུད་འཁྲུལ་པ་བློ་ལ་མི་གནས་པའི། །བདུད་རྩིའི་བཅུད་སྟོན་ལྡང་མ་ལྷུན་རྒྱལ་དང་། །མཁའ་འགྲོས་ལུང་བསྟན་རྗེས་སུ་བཟུང་བ་ཡི། །གྲུབ་ཐོབ་འཁྲུལ་པ་ཞིག་པའི་ལྕེ་བཙུན་སེང་དབང་དང་། །བྱང་ཆུབ་སེམས་དཔའི་སྤྲུལ་པས་འགྲོ་བའི་འདྲེན་མཛད་པའི། །བླ་མ་རྗེ་བཙུན་སྤྲུལ་སྐུ་ཞང་ཉིད་དང་། །རང་རྒྱུད་བཅིངས་པ་ཉིད་ལས་བརྒལ་མཛད་པའི། །བླ་མ་མཁས་པ་ཉི་འབུམ་དང་། །ཐེག་ཆེན་རྫོགས་ཆེན་སྙིང་པོ་དར་མཛད་པའི། །སངས་རྒྱས་བརྒྱུད་འཛིན་གུ་རུ་ཇོ་

འབེར་དང་། །བྱང་ཆུབ་སེམས་འབྱོངས་འགྲོ་བའི་དཔལ་གྱུར་པའི། །འཁྲུལ་ཞིག་ཆེན་པོ་དྲིན་ཆེན་བླ་མ་དང་། །གསལ་སྟོང་དབྱེར་མེད་བདེ་བའི་དོན་རྟོགས་པའི། །ཟླ་བ་མུན་སེལ་མཁས་པའི་རྣལ་འབྱོར་དང་། །སྐུ་གསུམ་ཀློང་དུ་འཁྲུལ་བ་རང་ཞིག་པའི། །ཀུ་མ་རཱ་ཛ་མགོན་པོ་ཐུགས་རྗེ་ཅན། །མཁས་པ་དགོངས་པ་མི་འགྱུར་ཐུགས་ལ་གཡོ་མེད་རྣམས། །འབྱུང་བ་རང་དངས་ཟག་མེད་དབྱིངས་བཞུགས་ཀྱང་། །སྔོན་གྱི་ཐུགས་རྗེ་ཆེན་པོ་ཉིད་གཡོས་ལ།།ཐུགས་རྗེ་མཆོག་གིས་བདག་ལ་དགོངས་ཤིག་བྱིན་གྱིས་རློབས། །ༀ་ཨཱཿཧཱུྃ་གུ་རུ་སིདྡྷི་ཧཱུྃ༔ ཨྠྀི༔ ༀ་ཨཱཿཧཱུྃཿ དམ་པ་སངས་རྒྱས་ཀུན་གྱི་ཞལ་མཐོང་བདུད་རྩིའི་རོ་ལྡན་པའི། །རོ་ལངས་བདེ་བ་ལྷ་ཡི་ལྷ་མཆོག་ཉིད། །སངས་རྒྱས་སྤྲུལ་པ་འགྲོ་བའི་གདུང་བ་སེལ་མཛད་པ། །དམ་པ་བདུད་རྩི་ཉེ་བ་ཉིད་ལ་ཕྱག་འཚལ་བསྟོད། །དམ་པ་དེ་ཡི་རྗེས་འཛིན་འཇམ་དཔལ་སྐུར་སྤྲུལ་པའི། །ཉོན་མོངས་རང་དག་མཁྱེན་པའི་ཐུགས་དང་ལྡན། །གསུང་གི་འོད་ལྡན་འགྲོ་བའི་སྡུག་བསྔལ་གཅོད། །དམ་པ་ཡིད་བཞིན་མྱུ་གུ་དེ་ལ་ཕྱག་འཚལ་ལོ། །སྤྲུལ་པ་དེ་ཡི་གདུང་འཛིན་མཁས་པ་སྡེ་སྣོད་རྣམས་ཀྱི་བདག །ཐུགས་རྗེ་ཆེན་པོའི་སྤྲུལ་པ་འཛམ་གླིང་ཀུན་གྱི་རྒྱན། །དྲི་མེད་གསུང་མངའ་འགྲོ་བ་ངལ་གསོའི་གནས། །དམ་པ་ཤེས་རབ་མྱུ་གུ་དེ་ལ་ཕྱག་འཚལ་བསྟོད། །དེ་རྗེས་འཛིན་པ་མཁས་པ་འཇིག་རྟེན་གསུམ་གྱི་མགོན། །རྡོ་རྗེ་སེམས་དཔའི་སྤྲུལ་པས་བདག་བློའི་འཆིང་གཅོད་པ། །ཚངས་པའི་གསུང་མངའ་འགྲོ་བ་ཀུན་ཡིད་འཕྲོག །དམ་པ་བདེ་བའི་མྱུ་གུ་མགོན་ལ་ཕྱག་འཚལ་བསྟོད། །དེ་ཡི་གདུང་འཛིན་མཁས་བློ་སྐྱེ་བ་གྲངས་མང་སྦྱངས། །མཁྱེན་པ་རབ་ལྡན་སྡེ་སྣོད་ཀུན་ལ་རྨོངས་པ་མེད། །སྐྱེ་ཤི་གཉིས་མེད་སྤྲུལ་པས་འགྲོ་དོན་མཛད། །དམ་པ་བདེ་གསལ་མྱུ་གུ་ཉིད་ལ་ཕྱག་འཚལ་

བསྟོད། །དམ་པ་དེ་ཡིས་རྗེས་འཛིན་གསང་སྔགས་ཤཱཀྱའི་སྤྱན་མངའ་བ། །མི་རྟོག་བཟང་པོས་ཐུགས་ཀྱི་གནད་སྤོས་ནས། །འཛམ་གླིང་འགྲོ་རྣམས་བསམ་པའི་རྒྱུད་མཁྱེན་པའི། །དམ་པ་རྟོག་མེད་མྱུ་གུ་མགོན་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་སྐལ་ལྡན་ཆོས་ཀྱི་མཛོད་མངའ་བ། །བསྟན་པའི་སྲོག་འཛིན་འགྲོ་བའི་མུན་པ་སེལ། །བདེ་གཤེགས་བཀའ་དང་བླ་མའི་སྙིང་བཅུད་དྲིལ། །དམ་པ་པདྨའི་མྱུ་གུ་མགོན་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་གསང་སྔགས་གདམས་ངག་ཀུན་གྱི་མཛོད་མངའ་བ། །གྲུབ་པ་མཐར་ཕྱིན་གྲུབ་ཐོབ་ཀུན་གྱི་རྗེ། །དམ་པ་བདེ་གཤེགས་ལམ་དུ་སློང་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་རྗེ་བཙུན་འགྲོ་བ་རྣམས་ཀྱི་མགོན། །གསང་སྔགས་རྣམས་ལ་དབང་བསྒྱུར་ལུང་བསྟན་རྗེས་སུ་འཛིན། །མངོན་སུམ་དོན་སྟོན་མ་རིག་མུན་པ་སེལ། །ཞེ་སྡང་རྡོ་རྗེ་ཉིད་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་འཁོར་བའི་སྐྱབས་གནས་དཔའ་བོ་ཉིད། །འགྲོ་བ་རྣམས་ཀྱི་མགོན་པོ་དྲི་མ་མེད་པ་ཡི། །རྫོགས་ཆེན་གནད་བསྡུས་ངེས་པའི་སྙིང་པོ་སྟོན། །དམ་པ་སྐུ་གསུམ་ལམ་དུ་སློང་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་འཁོར་བའི་ཉེས་སྐྱོན་རང་སར་དག །མན་ངག་སྙིང་པོའི་བཅུད་ཕྱུང་མངོན་སུམ་དོན་སྟོན་པ། །འགྲོ་རྣམས་བླ་མེད་སངས་རྒྱས་མཆོག་ལ་འགོད་མཛད་པའི། །དམ་པ་ངེས་དོན་བརྒྱུད་འཛིན་རྣམས་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་བྱང་སེམས་སྒྲུབ་པའི་རྒྱལ་པོ་ཉིད། །ཡེ་ཤེས་ཉི་མའི་འོད་ཀྱིས་ཕྱོགས་བཅུ་ཀུན་ཏུ་ཁྱབ། །མ་རིག་མུན་སེལ་རྟོག་བྲལ་དྲིན་ཅན་བླ་མ་རྗེ། །དམ་པ་ཐུགས་མངའ་བདག་ཉིད་དེ་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་ཐེག་པའི་བློ་གྲོས་ཅན། །འཕྱུགས་མེད་གདམས་པའི་གནད་ཀྱིས་འཁྲུལ་མེད་བཙན་ས་ཟིན། །ཟང་ཐལ་དོན་རིག་ལྔ་ལྡན་འོད་དུ་འབར། །དམ་པ་སྐྱེ་བ་རང་

སར་དག་ལ་ཕྱག་འཚལ་བསྟོད། །དམ་པ་དེ་ཡིས་རྗེས་འཛིན་གདམས་པ་མ་ལུས་མཁྱེན། །ཆོས་ཉིད་ཡངས་པའི་ངང་ནས་རང་གྲོལ་ལམ་དུ་སློང་། །ཐུགས་རྗེའི་འོད་མངའ་དྲིན་ཆེན་ཆོས་ཀྱི་རྗེ། །དམ་པ་རིག་སྟོང་རང་སར་གྲོལ་ལ་ཕྱག་འཚལ་བསྟོད། །གུས་པས་གསོལ་འདེབས་ཐུགས་རྗེས་བྱིན་གྱིས་བརླབ་ཏུ་གསོལ། ཨྠྀི། ༀ་ཨཱ༔ཧཱུྃཿ གུ་རུ་ན་མོ། དྷརྨ་ཀ་ཡ་ས་མན་ཏ་བྷ་དྲཿ བཛྲ་བྷ་གི་ཤུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ སཾ་བྷོ་ཀ་ཡ་བཛྲ་དྷ་རི་ན ་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ ནརྨ་ཀ་ཡ་བཛྲ་ས་ཏྭ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ བཛྲ་པ་ནི་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ པྲ་ཛྙཱ ་བྷ་བཱ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ བཛྲ་ཤྲི་ཤི་མི་ཏྲ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ ཤྲཱི་སིདྷ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ ཛྙཱ་ན་སུ་ཏྲ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ བྷི་མ་ལ་མི་ཏྲ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ས་མ་ཏྲི་བྷ་ཏྲ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ བྷ་ཧྲཱིཿར་ཧེ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ སྭ་ཏི་བཛྲ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ སིང་ཧཱ་ཤྭ་གུ་རུ་ན་མོ༔ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ སཱུཪྱ་ལ་ཀྵ་གུ་རུ་ན་མོཿ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡ༔ གུ་རུ་ཇོ་འབེར་གུ་རུ་ན་མོ༔ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ཡོ་གི་གཉའ་ན་གུ་རུ་ན་མོ༔ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ དྷེ་ཀེ་བཛྲ་གུ་རུ་ན་མོ༔ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱ༔ ཀུ་མ་ར་ཙ་གུ་རུ་ན་མོ༔ ས་རྨཱ་ར་ཐ་ཡ་སིང་མ་ཧཱ་སིད་ཏི་ས་མ་ཡཱཿ ༀ་ཨཱཿཧཱུྃཿ ཨེ་མ། དམ་པ་སངས་རྒྱས་ཐམས་ཅད་སྐྱེད་མཛད་ངོ་བོ་ཉིད་ཀྱི་རྗེ། །

སངས་རྒྱས་སྟོང་གི་དཀྱིལ་འཁོར་ཉིད་ལ་དབང་སྒྱུར་བླ་མ་ ཉིད། །བཛྲ་བྷ་བྷ་ལྷ་རྗེ་དཔའ་བོ་ཉིད་ཀྱི་ཞལ། །བདག་བློའི་གཏི་མུག་འཇོམས་ཕྱིར་བསྟན་དུ་གསོལ། །འཇིག་རྟེན་དྲི་མའི་སྐྱོན་མེད་ཉེས་པ་ཀུན་ལས་གྲོལ། །རང་གི་རྒྱུད་དག་སངས་རྒྱས་སུམ་སྟོང་གི །ཐུགས་ལ་མངའ་མཛད་མཉྫུ་ཤྲཱི་མི་ཏྲའི་ཞལ། །བདག་བློའི་ཞེ་སྡང་འཇོམས་ཕྱིར་བསྟན་དུ་གསོལ། །སངས་རྒྱས་ཐུགས་རྗེ་ཆེན་པོའི་གསུང་གི་འོད་ཟེར་ཅན། །འཇིག་རྟེན་ཚངས་པའི་གསུང་གིས་འགྲོ་བ་འདམ་ནས་འདྲེན། །ཤྲཱི་སིང་ཧ་རྡོ་རྗེ་མི་འགྱུར་མཉམ་པ་ཉིད་ཀྱི་ཞལ། །བདག་བློའི་ང་རྒྱལ་ཟད་མཛད་བསྟན་དུ་གསོལ། །ཐེག་པའི་དོན་རྣམས་ཉིད་ཀྱི་ཐུགས་ལ་ཇི་བཞིན་སྣང་སྟོན་པ། །མི་བསྐྱོད་ཡེ་ཤེས་འགྲོ་བའི་དོན་ལ་བརྩོན་པ་དམ་པ་རྗེ་ཡི་སྐུ། །ཛྙཱ་ན་སུ་ཏྲ་འཇིག་རྟེན་རྨོངས་པ་མེད་པའི་ཞལ། །བདག་བློའི་འདོད་ཆགས་ཟད་མཛད་བསྟན་དུ་གསོལ། །ཐུགས་རྗེ་མི་མཐུན་སྒྲ་ཚིག་མང་པོ་ཡིས། །འགྲོ་མགོན་ཡེ་ཤེས་ཉི་མའི་འོད་ཀྱིས་འཛམ་གླིང་ཀུན་ཏུ་སྣང་། །བི་མ་མིི་ཏྲ་སྐྱེ་ཤི་ཀུན་བྲལ་ཞལ། །བདག་བློའི་ཕྲག་དོག་ཟད་མཛད་བསྟན་དུ་གསོལ། །དགོས་པ་བར་མཚམས་མེད་པས་རླུང་གི་འགྲོ་འོང་ཟད། །གཉིས་མེད་དག་པས་གང་ཡང་གྲོགས་སུ་སྣང་། །ཏིང་འཛིན་བཟང་པོ་གཟུང་འཛིན་བྲལ་བའི་ཞལ། །བདག་བློའི་ཁོང་ཁྲོ་ཟད་མཛད་བསྟན་དུ་གསོལ། །ཆོས་ཀུན་མཉམ་པ་ཉིད་དུ་རབ་རྟོགས་པའི། །བདག་གཞན་གཉིས་ཀྱི་ཞེན་པ་རྒྱུན་གཅོད་པའི། །ལྷན་གྱི་རྒྱལ་མཚན་གཟི་བརྗིད་ཆེན་པོའི་ཞལ། །བདག་བློའི་དུག་ལྔ་ཞི་མཛད་བསྟན་དུ་གསོལ། །ལུས་ངག་ཡིད་ཀྱི་ཞེན་པ་རང་ལོག་སྟེ། །ཉམས་ལེན་མཐར་ཕྱིན་སྣང་བ་ཟད་སར་སྐྱོལ། །སེང་གེ་དབང་ཕྱུག་འཁྲུལ་སྣང་དག་པའི་ཞལ། །བདག་བློའི་འཁྲུལ་སྣང་འཇོམས་ཕྱིར་བསྟན་དུ་གསོལ། །རྡོ་རྗེ་ཐེག་པའི་སྙིང་པོ་གསང་སྔགས་སྡོང་པོར་གྲགས། །

སྐྱེ་མེད་དོན་རྟོགས་སྣང་བ་ལམ་དུ་སློང་། །བཀྲ་ཤིས་མི་འགྱུར་རྡོ་རྗེ་འཆང་གི་ཞལ། །བདག་བློའི་ཉོན་མོངས་བར་ཆད་བཟློག་ཏུ་གསོལ། །རྫོགས་ཆེན་འདོད་པ་བློ་ཡིས་ངེས་རྟོགས་པའི། །འཁོར་བའི་ཉེས་སྐྱོན་མ་ལུས་ཀུན་གསལ་བའི། །རྗེ་བཙུན་སྤྲུལ་སྐུ་དོན་ཡོད་རྡོ་རྗེའི་ཞལ། །བདག་བློ་འཁོར་བའི་ཉེས་སྐྱོན་གསལ་དུ་གསོལ། །འཁོར་བ་མུ་མཐའ་མེད་པའི་ཀློང་དཀྱིལ་ནས། །ཆོས་ཉིད་དག་པས་ཀུན་གསལ་གཅིག་ཏུ་རྟོགས། །བྱར་མེད་རྩོལ་སྒྲུབ་ལྷུག་པར་སྟོན་པའི་ཞལ། །བསྒོམ་བློའི་བཟང་རྟོགས་ཟད་མཛད་བསྟན་དུ་གསོལ། །རྫོགས་ཆེན་དོན་སྒོམ་མཛད་པས་ཞིང་ཁམས་མཐའ་རུ་རྒྱས། །སྐུ་ལྔ་རང་ལ་རྫོགས་པས་སངས་རྒྱས་འདོད་པ་སྟོར། །གཞི་མེད་རྩ་བྲལ་ཀུན་ཏུ་བཟང་པོའི་ཞལ། །འཛིན་རྟོག་ཟད་སར་སྐྱོལ་མཛད་བསྟན་དུ་གསོལ། །མྱུར་བབ་གདམས་པ་ཀུན་ཐོབ་སངས་རྒྱས་རང་ལས་རྙེད། །བྱར་མེད་ལྷུག་པར་བཞག་པས་སྤང་བྱ་ཀུན་དང་བྲལ། །ཚོགས་བསགས་རྒྱལ་པོ་རང་རིག་དྲི་མེད་ཞལ། །སྙིང་པོ་འོད་འབར་གསལ་མཛད་བསྟན་དུ་གསོལ། །ཀུན་བཟང་ཀློང་ལས་རྟོགས་པའི་འོད་འབར་ཞིང་། །འཛིན་མེད་རང་གྲོལ་ཟང་ཐལ་ཆོས་ཀྱི་རྗེ། །ཀུ་མ་རཱ་ཛ་འགྲོ་བའི་མགོན་པོ་པདྨའི་ཞལ། །བདག་བློའི་སྒྲིབ་གཉིས་མུན་པ་བསལ་ཕྱིར་བསྟན་དུ་གསོལ། །ༀ་ཨཱཿཧཱུྃཿསྭཱཧཱ། དེ་ལྟར་ཚིག་གིས་ཀྱང་གསོལ་བ་བཏབ་ནས། དོན་གྱིས་ཀྱང་ལུས་ངག་ཡིད་གསུམ་ཤིན་ཏུ་གདུང་བའི་སྒོ་ནས་གསོལ་བ་གདབ་པ་ནི། བླ་མ་བརྒྱུད་པའི་རང་ཤུགས་ཀྱིས་བྱིན་རླབས་འཇུག་པའི་སྒོ་ནས་བསྟན་པ་ཡིན་ནོ། །སྐབས་འདིར་རྡོ་རྗེའི་གླུ་བླངས་ཀྱང་ལེགས་པ་ཡིན་ནོ། །དེ་ལྟར་བརྒྱུད་པའི་གསོལ་ཚིག་སློབ་མ་ལ་ལན་གསུམ་བརྗོད་དུ་གཞུག དེ་ལྟར་གསོལ་བ་ལན་གསུམ་གདབ་པ་ནི། དེ་ལ་སྤྲོས་

པ་མེད་པའི་ནང་དུ་གཞུག་པའི་ཚིག་ཏུ་བསྟན་པ་ཡིན་གྱིས། དེ་ནས་བླ་མས་སློབ་མ་ལ་ཆོས་སྐུའི་ངོ་བོ་མ་མཐོང་བར་དུ་གཞན་ཅིས་ཀྱང་དགོས་པ་མེད་སྙམ་པ་རྒྱུད་ལ་བརྟན་དུ་གཞུག་པ་ནི་འཁོར་བའི་བྱ་བ་ལས་བློ་ལྡོག་པའི་དགོས་པའོ། །དེ་ནས་བླ་མས་སློབ་མ་རེ་རེ་ལ་དབང་བསྐུར་བ་ནི། གཅིག་པུར་བསྡད་ན་ཡེ་ཤེས་འཕེལ་བའི་གྲོགས་ཡིན་ནོ་བའི་བརྡའོ། །བུ་ཁྱོད་སུ་ཡིན་ཞེས་པ་ནི་འཁོར་བ་རང་རྒྱུད་དུ་འཛིན་པའི་མིང་སྤོངས་ཞེས་པའི་བརྡའ་ཡིན། སློབ་མས་བླ་མ་ལ་མཎྜལ་ཕུལ་བ་ནི་གུས་པའི་ཚུལ་ཡིན། རིག་པའི་མེ་ཏོག་ཕུལ་བ་ནི། ཁྱད་པར་གྱི་དོན་ཏེ་བླ་མའི་རིག་པ་དང་གཉིས་མི་ཕྱེད་པར་མཉམ་པའི་དོན་ཡིན་ནོ། །གཅེར་བུར་ཕྱུང་བ་ནི་རིག་པ་ལ་འཁོར་བའི་ཉེས་པ་མེད་དོ་བའི་བརྡའ་ཡིན་ནོ། །ལུས་འགྲེང་ཚུགས་སུ་འདུག་པ་ནི། རྟག་ཏུ་ནམ་མཁའ་དང་འབྲལ་བར་མ་བྱེད་པའི་བརྡའ་ཡིན། རྐང་པ་གཉིས་གཤིབས་པ་ནི་ལུས་ཐབས་ཤེས་རབ་མིག་ཡིན་པས་མིག་ལ་ཤེས་པ་མ་འགྱུར་བར་ལྟོས་ཤིག་པའི་བརྡའ་ཡིན་ནོ། །ཐལ་མོ་སྙིང་ཁར་སྦྱར་བ་ནི་རིག་པ་ཡེ་ཤེས་སྙིང་ན་གནས་པའི་བརྡའ་ཡིན། བླ་མའི་སྙིང་གི་དཀྱིལ་དུ་ཤེས་པ་གཏོད་པ་ནི་བླ་མའི་ཐུགས་དང་གཉིས་སུ་མེད་པའི་བརྡའ་ཡིན། སེམས་གཞན་དུ་མ་ཡེངས་པར་གྱིས་ཤིག་ཅེས་པ་ནི་རིག་པ་རྡོ་རྗེ་ལུ་གུ་རྒྱུད་ལ་མ་ཡེངས་པར་ལྟོས་ཤིག་ཅེས་པའི་བརྡའ་ཡིན་ནོ། །བླ་མས་བུའི་ཤེས་པ་མི་བཏང་བའི་ཕྱིར། ཨ་ཨ་ཞེས་རླུང་དང་བཅས་ཏེ་བཅུག་པས་མ་བྱས་པའི་ཡེ་ཤེས་རང་བབས་སུ་སྐྱེ་བའི་བརྡའ་ཡིན་ནོ། །སློབ་མའི་ལུས་ངག་ལ་རྟགས་གཡོ་བ་འཕར་བ་ནི་ཡེ་ཤེས་རང་ལུགས་སུ་འབབ་པའི་རྟགས་ཡིན་ནོ། །དེ་ནས་བླ་མས་རང་བཞིན་རྫོགས་པ་ཆེན་པོའི་དབང་གིས་བུའི་ངེས་ཤེས་བསྐྱེད་པའི་དོན་དུ་དབང་བསྐུར་བ་ནི། རང་གི་མདུན་དྲང་པོར་ལུས་གོང་ལྟར་བྱེད་དུ་བཅུག་སྟེ་འདུག་པ་ནི། ལུས་ཀྱི་གནད་མ་གཅུན་ན་ཡེ་ཤེས་མངོན་དུ་མི་སྣང་ངོ་ཞེས་པའི་

བརྡའོ། །བླ་མའི་ཁ་ཤར་དུ་སློབ་མའི་ཁ་ནུབ་ཏུ་བལྟས་ཏེ་ཨེ་མ་ལ་སོགས་པའི་ཚིག་ང་རོ་དང་ལྡན་པར་བརྗོད་ནས་ཤར་དུ་སོང་དང་ཞེས་པས་སློབ་མ་ཉིད་དལ་དུ་འཇུག་པའི་བརྡའ་ཡིན་ནོ། །དེའི་རྗེས་ལ་འགྲོ་ན་འགྲོ་ས་འདུག་གམ་ཞེས་པའི་བརྡས་བསྟན་པ་ཡིན། དེ་ལྟར་ཕྱོགས་བཞིར་བྱེད་པ་ནི་དལ་གྱི་སྒོ་བཞི་ནས་འཇུག་པའོ། །བླ་མའི་ཕྱག་ནམ་མཁའ་ལ་ལན་གསུམ་གཡུགས་པ་ནི་རང་བཞིན་གྱི་དལ་སྐུ་གསུམ་སྟོང་པར་གཅིག་པའི་བརྡའ་ཡིན་ནོ། །ཚིག་ཏུ་ནམ་མཁའ་ལ་ལྟོས་དང་ཞེས་པ་ནི་མ་བྱས་པའི་རིག་པ་ཡེ་ཤེས་ཀྱི་ལྷ་ངོ་བསྟན་པ་ཡིན་ནོ། །ཡང་ནམ་མཁའ་ལ་ཡར་ཉི་མ་དེ་ལ་ཤེས་པ་གཏོད་ཅེས་པའི་ཚིག་ནི་དེ་ཉིད་ཡེ་ཤེས་ལྔའི་སྣང་བ་ཡིན་པས་དེ་ལས་ཕྱིར་མི་ལྡོག་ཅིག་ཅེས་པའི་བརྡའ་ཡིན་ནོ། །བླ་མས་གཡས་བརྐྱངས་པ་ནི་འཁོར་བའི་སྤྲོས་པའོ། །གཡོན་བསྐུམས་པ་ནི་འདས་པའི་སྣང་བ་ལ་བག་ཡངས་སུ་སྤྱོད་ཅིག་པའི་བརྡའོ། །མིག་ལ་མཛུབ་མོ་བཙུགས་པ་ནི་ཡེ་ཤེས་མིག་ནས་འཆར་བའི་བརྡའོ། །ངག་ཏུ་ཨ་བརྗོད་པ་ནི་འདི་ལ་ཉམས་སུ་བླངས་ན་སྐྱེ་མེད་མྱུར་དུ་ཐོབ་པའི་བརྡའོ། ཁ་ཕྱོགས་བཞིར་བལྟ་བ་ནི་སྣང་བཞིའི་རིམ་པ་འཆར་བའི་ བརྡའོ། །མཛུབ་མོ་ནམ་མཁའ་ལ་བསྒྲེང་པ་ནི་ལུ་གུ་རྒྱུད་ནམ་མཁའ་ལ་སྣང་བའི་བརྡའོ། །མིག་ཧར་པོར་བལྟ་བ་ནི་འདི་ལྟར་ཡིན་ནོ་བའི་བརྡའོ། །ངག་ཏུ་ནམ་མཁའ་རྒྱ་ཆེའོ་ཞེས་པ་ནི་འདི་ལྟར་བྱས་ན་སྣང་བ་འདི་རང་ཟད་ལ་འགགས་ནས་ཡེ་ཤེས་ཀྱི་སྣང་བ་སྐྱེ་བའི་བརྡའོ། །དེ་ལྟར་དབང་བསྐུར་བའི་དུས་ནི་གོང་དུ་བླ་མས་བསྟན། དེ་ལྟར་དབང་བསྐུར་ནས་རིག་པ་མངོན་སུམ་གྱི་གདམས་པ་ཉམས་སུ་ལེན་དུ་གཞུག་གོ །འདི་ལྟར་བྱས་ནས་བླ་མ་དང་། སློབ་མ་གཉིས་ཀ་སངས་རྒྱ་བ་ལ་ཐེ་ཚོམ་མེད་དོ། །ཞེས་དབང་རྣམ་པར་ཕྱེ་བ་དབང་གི་འཕྲ་ཏིག་རྣམ་པར་བཀོད་པ་ལས། སྣང་བྱེད་སྒྲོན་མ་ཞེས་བྱ་བའི་དུམ་བུ། སློབ་དཔོན་བྱེ་མ་ལས་མཛད་པ་སྟེ། དུམ་བུ་བཞི་པ་རྫོགས་སོ།། །།ན་མ་ཋ་ཆཿ

དཔལ་མཆོག་དྲི་མེད་སྟོན་པ་རྡོ་རྗེ་འཆང་། །སྐྱེ་བ་བཞི་ཡིས་བསྡུས་པའི་སེམས་ཅན་ཀུན། །མ་སྨིན་སྨིན་བྱས་ཐར་ལམ་མཆོག་ལ་བཀོད། །དབང་མཛད་ཐུགས་རྗེ་ཅན་ལ་ཕྱག་འཚལ་ལོ། །དེ་ལ་གང་ཟག་དད་པ་ཅན་ཆོས་ཉིད་སྟོང་ཉིད་དང་དབྱེར་མི་ཕྱེད་པར་བྱ་བའི་ཕྱིར། དབང་བཞི་པོ་འདི་དག་ཀྱང་སོ་སོའི་དུམ་བུ་གོ་རིམ་གྱི་ཞག་དང་ཟླ་བ་དང་ལོ་ལ་སོགས་པ་རྣམས་ཀྱིས་བར་དུ་བཅད་ལ། སོ་སོའི་ཆོ་ག་རྫོགས་པར་བྱས་ལ་དབང་བསྐུར་བར་བྱའོ། །འདིར་ནི་རབ་ཏུ་སྤྲོས་པ་མེད་པའི་རིགས་འབྱེད་སྣང་བ་ཐམས་ཅད་ཁ་བསྒྱུར་ནས་ཡེ་ཤེས་དག་པའི་ལམ་དུ་སློང་བའི་ཆོས་ཉིད་ཀྱི་ཚད་འཁྲུལ་པ་ཡེ་ཤེས་སུ་འཆར་བའི་གནད་ནི། དེ་ཡང་། བྱ་བྲལ་ལྷུན་རྫོགས་ངང་ལ་ཕྱག་འཚལ་ལོ། །ལ་སོགས་པ་ནི། རྫོགས་པ་ཆེན་པོའི་གནད་རྫོགས་པས་རང་སྣང་ལ་ཐོབ་པས་གཞན་གྲོལ་བའི་གནད་དོ། །དེ་ཡང་ལུས་ཀྱི་འདུག་སྟངས་ལ་བརྟེན་ལ་ལུས་ཕྱིའི་བྱ་བ་དང་བྲལ་བས་ཕྱིའི་ཡུལ་ལ་མི་ལྟ། སེམས་སྐྱེ་མེད་ཀྱི་གནད་ལ་གཏད་དེ་སེམས་རྟོག་པ་ཐ་དད་དང་བྲལ་བས་ཕྱིའི་སེམས་ལ་མི་ལྟའོ། །འདིའི་དུས་ན་ཚོགས་དང་གཏོར་མ་ལ་སོགས་པའི་སྤྱོད་པ་ནི་ཁྱད་པར་གྱི་འདུ་བ་ཞེས་བྱ་སྟེ། རང་ལ་འབྱོར་པ་ཅི་ཡོད་པས་བླ་མ་དང་འཕགས་པ་མཁའ་འགྲོ་མ་དང་རྣལ་འབྱོར་ཕ་དང་མའི་ཚོགས་རྣམས་མཆོད་ནས་འདས་པ་དང་མ་འོངས་པ་དང་ད་ལྟའི་ཉེས་པ་རྣམས་སྐོང་ཞིང་ལེགས་པ་རྣམས་ཐོབ་ཅིང་བསོད་ནམས་དང་། ཡེ་ཤེས་ཀྱི་ཚོགས་གཉིས་འཕེལ་ལ། ཐུན་མོང་གི་དགེ་བ་ལ་བརྟེན་ནས་ཁྱད་པར་གྱི་འབྲས་བུ་ཉིད་དུ་རྫོགས་པར་ངེས་པས་ན་མཆོག་ཏུ་བཟང་ངོ་། །གཞན་ཡང་འགྲོ་བ་ཕལ་པ་རྣམས་ལ་བཟའ་བ་དང་བཏུང་བ་རྣམས་ཀྱིས་མགུ་བར་བྱས་པ་ནི་དུས་མ་ཡིན་པར་གཞན་དུ་གསེར་དངུལ་ལ་སོགས་པ་རིན་པོ་ཆེའི་ཕུང་པོ་དཔག་ཏུ་མེད་པ་སྦྱིན་པ་བྱིན་པ་བས་འདིའི་

དུས་ན་འབྲས་ཀྱི་ཟེག་བདུན་བདུན་བྱིན་པ་ཚོགས་རྫོགས་པར་འགྱུར་རོ། །སོ་སོའི་སྐྱེ་བོ་ལ་སོགས་པ་མི་མེད་པའི་རི་བོའི་སུལ་ལ་སོགས་པར་དབང་བསྐུར་བ་ནི་གསང་སྔགས་ཀྱི་དོན་གསང་པས་འགྲུབ་པ་ཉིད་དོ་མཆོག་གི་དངོས་གྲུབ་ལ་དགོངས་པའོ། །གཏོར་མ་ཆེན་པོ་ལ་སོགས་པས་མཁའ་འགྲོ་མ་ལ་སོགས་པ་མགུ་བར་བྱེད་པ་ནི་ཐུན་མོང་གི་དངོས་གྲུབ་འབྱུང་ཞིང་ལུང་སྟོན་པར་འགྱུར་བ་ལ་དགོངས་པའོ། །བླ་མ་ལ་གསེར་གྱི་མཎྜལ་འབུལ་བ་ནི་བསྟན་པའི་བདག་པོའི་ཁ་དོག་ཅི་འདྲ་བའི་སངས་རྒྱས་ཀྱི་ཚོགས་རྣམས་དང་ལྷན་ཅིག་ཏུ་སྤྱོད་པའི་དོན་ནོ། །བླ་མས་ཁ་ཤར་དུ་ལྟ་བ་ནི་ཉམས་ཀྱི་སྣང་བ་འཆར་བར་བྱེད་པའོ། །སློབ་མ་ཁ་ནུབ་ཏུ་ལྟ་བ་ནི་ཉོན་མོངས་པ་འགག་ཅིང་ནུབ་པའི་ལྟས་སོ། །སློབ་མ་བདེ་ལུགས་སུ་འདུག་པ་ལ་སོགས་པ་ནི་ལུས་ངག་བདེ་བའི་འཁོར་ལོར་འཇུག་པར་བྱེད་པའི་གནད་དོ། །བུ་ཁྱོད་སུ་ཡིན་ཞེས་པ་ནི་སྟོང་པ་ཆེན་པོའི་སྣང་བས་མཚོན་པར་བྱེད་པའོ། །སྐལ་ལྡན་སེམས་ཀྱི་བུ་ལགས་ཞེས་པ་ནི། སྤྲོས་བཅས་ཀྱི་དུས་ན་ལུས་ལས་བསྐྱེད་ལ་སྤྲོས་མེད་ཀྱི་དུས་ན་བླ་མའི་ངག་ལས་བསྐྱེད་ལ། ཤིན་ཏུ་སྤྲོས་པ་མེད་པའི་དུས་ན་ཡིད་ལས་བསྐྱེད་ལ། འདིར་སེམས་ཉིད་སྟོང་པ་ངོས་གཟུང་བྲལ་བ་ལས་བསྐྱེད་ནས། སེམས་ཉིད་མཚན་ཉིད་ཇི་ལྟར་རྟོགས་ཏེ་སངས་རྒྱ་བའི་གནད་དོ། །དེ་ཡང་འདུག་སྟངས་ཤེས་པས་ལྟ་སྟངས་ཤེས། དེ་ཤེས་པས་ཆོས་ཉིད་མངོན་དུ་མཐོང་པས་སོ། །བླ་མས་རྗེས་གནང་བྱིན་པ་ནི་སེམས་ཀྱི་མཚན་ཉིད་ཀྱི་གོ་ཕྱེ་བའོ། །བླ་མ་ལ་སེམས་ཀྱི་དལ་དུ་འཇུག་པར་གསོལ་བ་འདེབས་པ་ལ་སོགས་པ་ནི། བླ་མ་དམ་པ་སྐུ་དྲིན་ཅན་གྱིས་སྤྲོས་བཅས་ཀྱི་དུས་ན་བདག་ལ་རྡུལ་ཚོན་གྱི་དལ་བསྟན། སྤྲོས་མེད་ཀྱི་དུས་ན་ལུས་ཀྱི་དལ་བསྟན། ཤིན་ཏུ་སྤྲོས་པ་མེད་པའི་དུས་ན་བདག་རང་གི་ངག་གི་དལ་བསྟན། འདིར་བདག་

རང་གི་སེམས་ཀྱི་དལ་སྟོན་ཅིག་ཅེས་པའི་དོན་ཏོ། །བླ་མས་རྗེས་གནང་གི་སྐབས་སུ་བུའི་ཤེས་པ་ཡེངས་ལ་བོར་ནས་སྐད་ཅིག་ལ། སེམས་གང་ཡིན་ཞེས་པའི་དུས་སུ་སེམས་ཀྱི་མཚན་ཉིད་ཅེར་མཐོང་དུ་མཐོང་བའི་ཉམས་མྱོང་བསྐྱེད་པའོ། །སེང་གེ་ལྟ་བུའི་འདུག་སྟངས་ནི་རྐང་པའི་མཐིལ་གཉིས་ས་ལ་ཕབ་པས་གཡོ་བར་བྱེད་པའི་རླུང་ནོན། ལུས་ཀྱི་ཆ་བསྲངས་པས་རླུང་བདེ་ལུགས་སུ་འབྱུང་བའི་དགོས་པ་ཡོད། མགོའི་རྩལ་མཇིང་པ་ལ་བསྐུར་བས་རྩའི་ནང་ནས་རྒྱུ་བའི་རྣམ་པར་རྟོག་པ་འགག །ལག་པ་ཁྱི་ཚུགས་སུ་འདུག་པས་བར་གཅོད་འཇིགས་པ་མི་འབྱུང་ངོ་། །གླང་པོ་ཆེའི་ལྟ་སྟངས་ལ་སོགས་པའི་བརྡས་མཚོན་པའོ། །དེ་ཡང་སེམས་ཀྱི་དལ་སྒོ་བཞི་ནས་བཅུག་པས་འདི་ལ་ཉམས་སུ་བླངས་པའི་ལོངས་མ་བྱུང་ཡང་རང་བཞིན་སྤྲུལ་པའི་སྐུའི་ཞིང་ཁམས་སུ་དབུགས་འབྱིན་པར་འགྱུར་བའི་དགོས་པ་ཡོད་དོ། །འདི་ནི་ཁམས་ཀྱི་མངལ་གྱི་གྲོང་ཁྱེར་དུ་མི་འཇུག་པའི་གནད་དམ་པའོ། །ཨ་གསུམ་ནི་སྤྲུལ་པའི་སྐུའི་སྐྱེ་བ་མེད་པས་འདུལ་བ་ལ་ལོངས་སྤྱོད་ཅིག་ཅེས་པ་དང་། ལོངས་སྐུ་སྐྱེ་བ་མེད་པས་སྣང་བ་དང་། ཆོས་སྐུ་སྐྱེ་བ་མེད་པས་རང་རིག་ལ་ལོངས་སྤྱོད་ཅིག་ཅེས་པའོ། །ཡང་གླང་ཆེན་གྱི་ཉལ་སྟངས་ནི། ཁ་ནུབ་ཏུ་ཉལ་བས་སྲིད་པ་དྲུངས་ནས་འབྱིན། པུས་བྲང་སྦྱར་བས་རླུང་ཡེ་ཤེས་སུ་ལྡང་། མཐེ་བོང་ཕྱིར་ཕུལ་བས་འགྱུ་བྱེད་ཀྱི་རླུང་འཛིན། ལག་མཐིལ་ས་ལ་ཐུག་པས་རླུང་ཕོ་མོའི་ལས་སྙོམས། མཇིང་པ་ཡིད་ཙམ་བཏེག་པས་རྩའི་ལས་སྟོང་པར་བྱེད། ལྐོག་མ་ལ་ལག་བཏེག་པ་བཙུགས་པས་ལུས་ཀྱི་འབྱུང་བ་ཆ་སྙོམས་པར་བྱེད་པའོ། །ལྷག་མ་སྔར་དང་འདྲའོ། །ཡང་དྲང་སྲོང་གི་འདུག་སྟངས་ནི་ལུས་ཙོག་བུར་འདུག་པས་འབྱུང་བ་མེའི་དྲོད་འབེབས་པར་བྱེད། རྐང་པའི་མཐིལ་ས་ལ་བཅར་བས་འབྱུང་བ་ཆུའི་རྩལ་གནོན་པར་བྱེད། ལུས་སྤྱི་དྲང་པོར་བསྲངས་པས་རླུང་ལུགས་སུ་འབྱུང་བར་བྱེད། པུས་བྲང་གཉིས་བསྒྲིལ་བས་ལུས་ཀྱི་མེ་

རླུང་རྩལ་འཇོམས་པར་བྱེད། རྒྱུ་མ་ཡིད་ཙམ་གྱེན་ལ་འཐེན་ནས་རྒལ་པ་ལ་བཅར་བ་ནི་ལུས་ལ་རྣམ་པར་རྟོག་པ་མི་གནས་པར་བྱེད། ལག་པ་གཉིས་བསྣོལ་ནས་པུས་མོ་གཉིས་ཀྱི་སྟེང་དུ་བཞག་ན་ཚ་བའི་ནད་ཀྱི་དབལ་སོད་པར་བྱེད། གལ་ཏེ་བསྣོལ་ནས་མཆན་ཁུང་གཉིས་སུ་རེག་ན་གྲང་བའི་ནད་ཀྱི་སྟོབས་ཉམས་པར་བྱེད། གལ་ཏེ་གྲུ་མོ་གཉིས་པུས་མོའི་སྟེང་དུ་བཞག་སྟེ། ལྐོག་མ་ནས་བཏེག་ན་འབྱུང་བ་ཚ་གྲང་སྙོམས་པའི་གསོས་བྱེད་དོ། །དེ་ཡང་གོང་གི་སེང་གེ་ནི་འཇིགས་པ་ཐམས་ཅད་ཟིལ་གྱིས་གནོན་པ་ལ་དགོངས་ལ། གླང་པོས་ནི་ཁམས་གསུམ་གྱི་དྲི་མ་ལྡོག་པ་ལ་དགོངས་ལ། འདིས་ནི་དྲི་མ་ལས་ཀྱི་འགྱུར་དག་པར་བྱེད་པ་ལ་དགོངས་པའོ། །བྱ་རྒོད་ཀྱི་འདུག་སྟངས་ནི་ལུས་ཀྱི་དགོངས་པས་གཟུགས་ཀྱི་ཕུང་པོའི་སྡུག་བསྔལ་ལ། རྐང་མཐིལ་གཉིས་ས་ལ་བཅར་བས་འཕྲོ་བ་ལས་ཀྱི་རླུང་གནོན། བཙོས་པོ་ཆེ་ས་ལ་མ་རེག་པས་བག་ཆགས་ལས་ཀྱི་མཐའ་སྟོངས་པར་བྱེད། སྟོད་མདུན་དུ་བཅུམ་པས་རྩ་ནང་གི་ཡེ་ཤེས་འཆར་བར་བྱེད་དོ། །ལག་པ་གཉིས་ཟུར་དུ་བཏང་སྟེ་སྨད་བསྡམས་པ་ནི་འབྱུང་བ་བཞིའི་ལས་ཀྱི་རླུང་ལྡོག་པར་བྱེད་དོ། །འདིས་ནི་རེག་པའི་རྩལ་སྤྱོང་པ་ལ་དགོངས་པའོ། །ལུས་རྡོ་རྗེ་སྐྱིལ་ཀྲུང་དུ་འདུག་པ་ལ་རྐང་པའི་མཐིལ་གཉིས་སྦྱར་བ་ནི། རླུང་ཕོ་མོ་ཁ་སྦྱར་བས་ལས་དང་ཡེ་ཤེས་འདྲེས་ཏེ་ཆོས་ཉིད་ཀྱི་གཞི་ཟིན་པར་བྱེད། རྟིང་པ་གཉིས་གསང་བ་ལ་གཏད་པ་ནི་འདོད་ཆགས་ལས་ཀྱི་གཞི་སྟོངས་པར་བྱེད། ལུས་སྤྱི་དྲང་པོར་བསྲངས་པ་ནི་འགྱུ་བྱེད་སྣ་ཚོགས་པའི་རླུང་སྟོངས་པར་བྱེད། སྤྱི་བོར་ཐལ་མོ་སྦྱར་བ་ནི་ལུས་ཀྱི་གནད་སྦྱོང་བར་བྱེད་པའོ། །དེ་དག་ཐམས་ཅད་འདས་པའི་ཕ་རོལ་ནི་ཆོས་སྐུ་དང་། ལོངས་སྐུ་དང་། རྒྱན་ནི་སྐུ་དང་། སངས་རྒྱས་ཀྱི་ཞིང་གི་རྣམ་དག་སྡུག་པོ་བཀོད་པ། ཡེ་ཤེས་ལྔ་ནི་ལོངས་སྐུའི་གཞི། རབ་ཏུ་མཉམ་ལ་མི་གཡོ་བ་ནི་ཆོས་སྐུའི་གཞི། བདེ་བར་གཤེགས་པ་རིགས་ལྔ། འཇིག་རྟེན་མཁྱེན་པ་མངོན་པར་

ཤེས་པ་དྲུག་མངའ་བ། སྐྱེས་བུ་འདུལ་བ་ཉན་ཐོས་ལ་དགོངས་པ། ཁ་ལོ་བསྒྱུར་བ་ཕྱི་རོལ་རྣམས་ལ་དགོངས་པ། ལྷ་དང་མི་རྣམས་ཀྱི་སྟོན་པ་ནི་གཟུགས་སྐུ་གཉིས། དགྲ་བཅོམ་པ་ནི་རང་རྒྱལ་ལ་དགོངས་པ། ཟག་པ་ཟད་པ་ནི་བྱང་སེམས་ལ་དགོངས་པ། རིག་པ་དང་ཞབས་ནི་མཁྱེན་པ་ཡེ་ཤེས་ཀྱི་ཆ་ཡིས་གདུལ་བྱ་མོས་འགྱུར་དུ་རྩི་བའོ། །ཡང་དག་པ་ལ་སོགས་པ་ཆོས་ཀྱི་སྐུའི་སྐབས་འདི་ནི་སྣང་བའི་ཆ། དཔག་ཏུ་མེད་པ་ནི་སྤྲུལ་པ། འཁོར་བ་ལ་སོགས་པ་ནི་སྐལ་ལྡན་གྱིས་ཡིད་ཆེས་པར་གྱིས་ཤིག་ཤེས་པའི་དོན་ཏོ། །གླང་པོ་ཆེའི་ལྟ་སྟངས་ནི་ཟླུམ་པོར་བལྟས་པས་དབྱིངས་མཐོང་། སེང་གེའི་མཆོངས་སྟངས་ནི་ཐད་ཀར་བལྟས་པས་རིག་པ་མཐོང་། ཁྱུང་ནི་གྱེན་ལ་བལྟས་པས་སྐུ་མཐོང་། །དྲང་སྲོང་ནི་མདུན་དུ་བལྟས་པས་འོད་མཐོང་། གླང་ཆེན་གྱིས་ཐུར་ལ་བལྟས་པས་ཐིག་ལེ་མཐོང་། ལྕགས་སྒྲོག་ནི་གཉིས་མཉམ་པོར་དྲིལ་ནས་བལྟས་པས་མུ་ཁྱུད་མཐོང་། སྐྱེས་བུ་ནི་གྱེན་དུ་བལྟས་པས་ཡི་དམ་མཐོང་། ཝ་ནི་ཐུར་ལ་བལྟས་པས་དབྱིངས་རིག་མཐོང་། བྱ་རྒོད་ནི་ཟུར་ལ་བལྟས་པས་ཞིང་ཁམས་མཐོང་། གྱད་ནི་གཡོན་དུ་བལྟས་པས་ཉན་ཐོས་མཐོང་། འབུ་སྲིན་ནི་གཡས་སུ་བལྟས་པས་རང་རྒྱལ་མཐོང་། སྟག་མོ་ནི་འཕྲེད་ལ་བལྟས་པས་བྱང་སེམས་མཐོང་། དེ་ལྟར་མཐོང་བས་གནས་པས་གཞི་ཟུང་ཞིག་ལ་སོགས་པ་ནི་དེ་དག་གི་ཉམས་སུ་མྱོང་བ་སྐྱེ་བའི་རིམ་པ་ལ་དགོངས་པའོ། །སླར་མ་ལྡོག་པ་དང་པོས་ཆོས་སྐུ་ལ་གདམས་པས་རང་སེམས་སྐྱེ་བ་མེད་པ་ལ་དབང་ཐོབ། གཉིས་པ་ལོངས་སྐུ་ལ་གདམས་པས་རང་སེམས་འགག་པ་མེད་པ་ལ་དབང་ཐོབ། གསུམ་པས་སྤྲུལ་སྐུ་ལ་གདམས་པས་རང་སེམས་འགྲོ་འོང་མེད་པ་ལ་དབང་ཐོབ། དེ་ལྟར་གསུམ་ལ་དབང་ཐོབ་པས་ལུས་འདོད་པའི་ཁམས་ལས་གྲོལ་བས་ཟས་འདོད་མེད་ཡོངས་སུ་དག་པའི་གཞི་ཚུགས། ངག་གཟུགས་ཀྱི་ཁམས་ལས་གྲོལ་བས་གཟུགས་མེད་ཡོངས་སུ་གྲོལ་བའི་ལམ་རྙེད། སེམས་གཟུགས་མེད་པའི་ཁམས་ལས་གྲོལ་བས་འགྱུར་མེད་རྣམ་པར་དག་པའི་སར་ཕྱིན་པའོ། །དེ་ལྟར་གསུམ་ལས་གྲོལ་བས་བརྟན་པ་སྐུའི་རྡོ་རྗེ་རྙེད། སྣང་བས་གསུང་གི་

རྡོ་རྗེ་རྙེད། གནས་པས་ཐུགས་ཀྱི་རྡོ་རྗེ་རྙེད་དོ། །དེ་རྙེད་པས་རྡོ་རྗེ་ལྟ་བུའི་སྐུ་ལས་སྐུའི་ཞིང་སྣ་ཚོགས་སུ་ཤར། པདྨ་ལྟ་བུའི་གསུང་ལས་གསུང་ཡིག་འབྲུ་སྣ་ཚོགས་སུ་བྱུ ང་། འཁོར་ལོ་ལྟ་བུའི་ཐུགས་ལས་ཏིང་ངེ་འཛིན་དཔག་ཏུ་མེད་པ་རྣམས་སུ་བྱུང་ངོ་། །དེས་སྐུ་གསུམ་ནི་རྫོགས་པས་སངས་རྒྱས་ཞེས་བྱ་ལ། །གསུང་གསུམ་ནི་འབར་བས་རྟོག་ཚོགས་ཞེས་བྱ་ལ། ཐུགས་གསུམ་ནི་མཛད་པས་དགོངས་པ་ཞེས་བྱའོ། །དེ་ཡང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡོངས་སུ་དག་པའི་གཞི་ཞེས་བྱའོ། །གནས་དང་ཁྱད་པར་འཇུག་པ་དང་། །ལམ་དང་དེ་ཡི་འཁྲུལ་པ་གཅོད། །དེ་ལྟར་སྣང་བ་ཁ་བསྒྱུར་ཏེ། །དགའ་སྟོན་ཆེན་པོའི་མཆོད་པ་ཡིས། །བླ་མ་དང་ནི་བླ་མའི་འཁོར། །ཡུམ་དང་བཅས་པ་ཐམས་ཅད་ལ། །སུ་ཡིས་སྟོན་མོ་བྱས་ན་ནི། །བསྐལ་པ་འབུམ་ཕྲག་བསམ་ཡས་སུ། །སངས་རྒྱས་ཐམས་ཅད་མཉེས་བྱས་ཀྱང་། །བསོད་ནམས་འདི་ཡི་ཆར་མི་ཕོད། །གལ་ཏེ་བླ་མའི་བ་སྤུའི་ཁུང་། །ཙན་དན་གྱིས་ནི་རེག་སྤྱོད་ན། །འདི་ལ་བསོད་ནམས་ཕ་མཐའ་ཡས། །དེ་བཞིན་རང་གི་རྡོ་རྗེའི་སྤུན། །གཅིག་དང་གཉིས་དང་གསུམ་ཡང་རུང་། །ཡང་ན་བརྒྱ་སྟོང་གྲངས་མེད་ལ། །ཚོགས་ཀྱི་དགའ་སྟོན་སུས་བྱས་པ། །གལ་ཏེ་དབང་བསྐུར་དུས་མིན་པར། །རང་གི་བླ་མ་མཆོད་པ་ནི། །བརྒྱ་ཕྲག་གྲངས་མེད་བྱས་པ་བས། །འདི་ལ་གཅིག་བྱས་བསོད་ནམས་ནི། །བློ་ཡིས་དཔག་པར་ནུས་པ་མིན། །འབྲས་ཆེན་བཟའ་བཏུང་སྟོན་མོ་ ཡིས། །རྣལ་འབྱོར་ཕ་རྣམས་མགུ་བྱས་ན། །ལེགས་པ་ཐམས་ཅད་འགྲུབ་པ་དང་། །ཉེས་པ་ཀུན་ལས་གྲོལ་བར་འགྱུར། །གལ་ཏེ་རྡོ་རྗེའི་སྲིང་མོ་འམ། །འོན་ཏེ་བླ་མའི་སློབ་མ་ནི། །རྣལ་འབྱོར་མ་ཡི་ཚོགས་རྣམས་ལ། །ཚོགས་ཀྱི་སྟོན་

མོས་མགུ་བྱས་ན། །མ་མོ་བརྒྱད་དམ་ཕག་མོ་ལ། །ཚོགས་ཀྱི་མཆོད་པ་བརྒྱ་ཕྲག་དགུ། །དུས་མ་ཡིན་པར་བྱས་པས་ནི། །འདི་དུས་རྣལ་འབྱོར་མ་གཅིག་ལ། །བཟའ་བ་ཡང་ན་བཏུང་བ་འམ། །གལ་ཏེ་སྐོམ་ཡང་ཉུང་བྱིན་ན། །བསོད་ནམས་འདི་ནི་མཉམ་པ་མིན། །དེས་ན་མ་མོའི་གྲོང་ཁྱེར་དུ། །ཕྱིན་ཏེ་རྣལ་འབྱོར་མ་མཉེས་བྱའོ། །རྣལ་འབྱོར་ཕ་དང་མ་གཉིས་ནི། །མཉམ་ཉིད་འདྲེས་པ་མཆོད་བྱས་ན། །འདི་ལ་དངོས་གྲུབ་འདི་ལྟ་བུ། །ཡ་མཚན་མཆོག་དང་ལྡན་པ་འབྱུང་། །འཇིག་རྟེན་འདི་ལ་འདོད་དོན་དང་། །ཕྱི་མ་ཡེ་ཤེས་དབྱིངས་སྤྱོད་ཕྱིར། །མཁའ་སྤྱོད་དག་གི་དངོས་གྲུབ་ནི། །སྣ་ཚོགས་བདག་པོ་སུས་བྱས་པ། །འཁོར་དང་བཅས་ཏེ་ནམ་མཁའ་དང་། །སྤྱོད་པ་དག་ཏུ་ནུས་པ་ཡིན། །ཨི་ཐཱི།། །།

རབ་ཏུ་སྤྲོས་པ་མེད་པའི་དབང་།

རབ་ཏུ་སྤྲོས་པ་མེད་པའི་དབང་བཞུགས་སོ༔ མན་ངག་ང་དྲུག་པ༔

བྱ་བྲལ་ལྷུན་རྫོགས་ངང་ལ་ཕྱག་འཚལ་ལོ༔ རབ་ཏུ་སྤྲོས་པ་མེད་པའི་དབང་བསྐུར་བར་འདོད་པ་ཡིས༔ རི་བོའི་སུལ་དབེན་པ་རུ་ཚོགས་ཡོ་བྱད་ལ་སོགས་པ་བཤམས༔ བྱེ་བྲག་ཏུ་མཎྜལ་ལྔ་བཤམས་ལ༔ སྔོན་དུ་འབྲུ་སྣ་ཚོགས་པའི་མཎྜལ་ཕུལ་བས༔ བསོད་ནམས་དང་བདེ་བ་རྒྱས་པར་བྱེད༔ དེ་ནས་མེ་ཏོག་སྣ་ཚོགས་པའི་མཎྜལ་ཕུལ་བས་མཁྱེན་པའི་ཤེས་རབ་ལྔ་ལ་ལོངས་སྤྱོད༔ རིན་པོ་ཆེའི་མཎྜལ་ཕུལ་བས་ཡོན་ཏན་གྱི་ཆོས་ཟད་མི་ཤེས་པ་ལ་ལོངས་སྤྱོད༔ དྲི་སྣ་ཚོགས་པའི་མཎྜལ་ཕུལ་བས་ཆོས་ཉིད་རྣམ་པར་དག་པའི་གསུང་དབྱངས་དང་ལྡན་པར་འགྱུར༔ སྨན་སྣ་ཚོགས་པའི་མཎྜལ་ཕུལ་བས་ཕྱི་ནང་གི་སྡུག་བསྔལ་ལས་གྲོལ་བར་ངེས་སོ༔ དེ་ནས་བླ་མས་ཁ་ཤར་དུ་ལྟ༔ སློབ་མས་ཁ་ནུབ་ཏུ་བལྟས་ལ༔ སློབ་མ་ལ་དབང་བསྐུར་བར་བྱ་སྟེ༔ བླ་མའི་མདུན་དུ་སློབ་བུ་དེ་ལུས་བདེ་ལུགས་སུ་འདུག་ཤེས་པ་གཞན་དུ་མ་ཡེངས་པར་རྩེ་གཅིག་ཏུ་གདུང་བའི་སེམས་ཀྱིས་འདུག་ལ༔ བླ་མས་བུ་ཁྱོད་སུ་ཡིན་ཞེས་དྲིས་པས༔ སློབ་མས༔ བདག་སྐལ་ལྡན་སེམས་ཀྱི་བུ་གཅིག་ལགས༔ ཞེས་ལན་གསུམ་བརྗོད་པར་བྱའོ༔ དེ་ནས་བླ་མས་དེའི་ལན་དུ༔ དེ་ལྟར་ཡིན་ཕན་ཆད་སེམས་ཉིད་གདོད་མ་ནས་སྐྱེ་མ་མྱོང་བའི་དལ་འདི་ཉིད་དུ་ཞུགས་ཤིག༔ ཅེས་བརྗོད་པར་བྱའོ༔ དེ་ནས་བླ་མ་ལ་རབ་ཏུ་སྤྲོས་པ་མེད་པའི་དབང་ཞུ་བའི་གསོལབ་འདི་ལྟར་གདབ་པར་བྱའོ༔ ཀྱེ་བླ་མ་རྡོ་རྗེ་འཛིན་པ་ཉིད༔ བདག་ལ་རབ་ཏུ་དགོངས་སུ་གསོལ༔ བདག་ནི་ཁམས་གསུམ་འཁོར་གནས་སུ༔ ཡུན་རིང་གནས་པས་དྲན་ཉམས་ཏེ༔ འཁོར་བ་ཉིད་ལས་བརྒལ་དོན་དུ༔ བླ་མ་ལ་ཡང་ཞུ་བར་བགྱིད༔ བསྐལ་པ་བརྒྱ་ཕྲག་དུ་མར་ནི༔ བདག་ནི་ཡང་ནས་ཡང་འཁོར་བས༔ རྡོ་རྗེ་སེམས་དཔའི་ཡེ་ཤེས་རང་བྱུང་ཉིད༔ སྨད་དང་རྩ་བ་བཅད་པས་སངས་རྒྱས་

སེམས་ལས་བྱུང་༔ སེམས་ཀྱི་དམ་པ་བདག་ལ་བསྟན་དུ་གསོལ༔ ཞེས་ལན་གསུམ་བརྗོད་དོ༔ དེ་ནས་ལུས་ཀྱི་ཆ་བསྲུངས་ལ་ཐལ་མོ་སྦྱར་ལ་ཤེས་པ་མ་ཡེངས་པར་བླ་མའི་སེམས་ལ་གཏད༔ དེ་ནས་གློ་བུར་དུ་དྲག་ཤུལ་དང་བཅས་པས་སེམས་གང་ཡིན༔ ཞེས་ལན་གསུམ་བརྗོད་པས་སློབ་མའི་རྒྱུད་ལ་ཤེས་པའི་ཉམས་འདི་ཡིན་ཁས་ལེན་དང་བྲལ་བ་ཚད་མེད་པ་སྐྱེ་བར་འགྱུར་རོ། །དེ་ནས་སྤྲུལ་པ་སྐུའི་དལ་དུ་ཞུགས་ཏེ༔ སློབ་མས་སེང་གེ་ལྟ་བུའི་འདུག་སྟངས་བྱ་སྟེ༔ ཤར་གྱི་ཕྱོགས་སུ་ཁ་བལྟས་ཏེ་ཡིད་ལ་ཆོས་ཉིད་སྐྱེ་བ་མེད་པ་བསམ་ཞིང་༔ བླ་མས་འདི་སྐད་བརྗོད༔ ཨེ་མ་སྐལ་ལྡན་སེམས་ཀྱི་བུ་ཁྱོད༔ ཤར་ཕྱོགས་མངོན་པར་དགའ་བའི་ཞིང་ཁམས་ཤིན་ཏུ་མཛེས་ཤིང་ཉམས་དགའ་བ་ཡིད་དུ་འོང་བ་ན༔ ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་མི་འཁྲུགས་པ་ཞེས་བྱ་བ་སྐུ་མདོག་མཐིང་ཁ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གིས་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ༔ བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ་སེང་གེའི་མཆོངས་སྟབས་ཀྱིས་མཆོངས་ཤིག༔ ཨ་ཨ་ཨ་ཞེས་རྒྱས་བཏབ་ལ༔ ཡང་ཁ་ལྷོར་བལྟས་ལ་གླང་ཆེན་གྱི་འདུག་སྟངས་དང་བསྟུན་ལ་བླ་མས་འདི་སྐད་བརྗོད་དོ༔ ཨེ་མ་སྐལ་ལྡན་སེམས་ཀྱི་བུ་ཁྱོད༔ ལྷོ་ཕྱོགས་ན་དཔལ་དང་ལྡན་པ༔ ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ན༔ ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རིན་ཆེན་འབྱུང་ལྡན་ཞེས་བྱ་བ་སྐུ་མདོག་སེར་པོ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་

རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་དེར་སེང་གེའི་སྟངས་སྟབས་ཀྱིས་ལྟོས་ལ་སྟག་མོའི་མཆོང་སྟབས་ཀྱིས་མཆོངས་ཤིག །ཨ་ཨ་ཨ་ཞེས་བརྗོད་པར་བྱའོ། །ཡང་ནུབ་ཏུ་བལྟས་ལ་དྲང་སྲོང་གི་འདུག་སྟངས་དང་བསྟུན་ནས་བླ་མས་འདི་སྐད་བརྗོད་དོ། །ཨེ་མ་རིགས་ཀྱི་བུ་ཁྱོད་ནུབ་ཕྱོགས་པདྨ་བརྩེགས་པ་ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ཉམས་དགའ་བ་ན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་སྣང་བ་མཐའ་ཡས་ཞེས་བྱ་བ་སྐུ་མདོག་དམར་པོ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉོན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་པ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་ཁྱོད་དཔལ་ཆེན་གྱི་རྔམ་སྟབས་ཀྱིས་ལྟོས་ལ་ཁྱུང་ནམ་མཁའ་ལ་ལྡིང་བའི་འགྲོས་ཀྱིས་སོང་ཞིག །ཨ་ཨ་ཨ་ཞེས་བརྗོད་དོ། །ཡང་བྱང་དུ་ཁ་བལྟས་ལ་བྱ་རྒོད་ཀྱི་དཔུངས་སྟངས་དང་བསྟུན་ནས། བླ་མས་འདི་སྐད་བརྗོད་དོ། །ཨེ་མ་སྐལ་ལྡན་སེམས་ཀྱི་བུ་གཅིག་ཁྱོད་འདི་ནས་བྱང་ཕྱོགས་ན་ལས་རབ་ཡོངས་སུ་རྫོགས་པ་ཞེས་བྱ་བའི་ཞིང་ཁམས་མཛེས་ཤིང་ཡིད་དུ་འོང་བ་ན་ཡང་དག་པར་རྫོགས་པའི་སངས་རྒྱས་གདོན་མི་ཟ་བའི་རྒྱལ་པོ་ཞེས་བྱ་བ་སྐུ་མདོག་ལྗང་ཁུ་རིན་པོ་ཆེའི་རྒྱན་གྱིས་བརྒྱན་པ་ཡབ་ཡུམ་གཉིས་སུ་མེད་པ་འཁོར་རྡུལ་གཅིག་གི་སྟེང་ན་རྡུལ་སྙེད་ཀྱི་སངས་རྒྱས་ཇི་སྙེད་ཅིག་བཞུགས་ཤིང་རང་རང་གི་སྟོན་པ་ལས་ཆོས་ཉན་ཅིང་རང་རང་གི་འཁོར་ལ་ཆོས་སྟོན་ཅིང་རང་རང་གི་སེམས་ཀྱི་དམ་པ་འོད་གསལ་བ་གསང་སྔགས་ཀྱི་དེ་ཁོ་ན་ཉིད་སྟོན་ཏོ། །བུ་

ཁྱོད་དེར་རྡོ་རྗེ་འཆང་གི་ལྟ་སྟངས་གྱི ས་ལ་གློག་དམར་གྱི་འགྱུ་སྟངས་ཀྱིས་སོང་ཞིག །ཨ་ཨ་ཨ་ཞེས་བརྗོད་པར་བྱའོ། །སྤྲུལ་སྐུའི་དལ་དུ་འཇུག་གོ །ཡང་སློབ་མ་རྡོ་རྗེ་སྐྱིལ་ཀྲུང་དུ་འདུག་ལ། ལོངས་སྐུའི་དལ་དུ་ཞུགས་པ་སྟེ། བླ་མས་འདི་ལྟར་བརྗོད་པར་བྱའོ། །ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག །དེ་དག་ཐམས་ཅད་ལས་འདས་པའི་ཕ་རོལ་ན་རྒྱན་ཡོངས་སུ་བཀོད་པ་ཞེས་བྱ་བའི་ཞིང་ཁམས་ཡེ་ཤེས་ལྔས་ཁྱབ་ཅིང་གསལ་བར་རབ་ཏུ་མཉམ་ཞིང་མི་གཡོ་བ་ཉིད་ན། དེ་བཞིན་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བ། ཡེ་ཤེས་སྣང་བ་ལ་ཁ་ལོ་བསྒྱུར་བ་ལྷ་དང་མི་རྣམས་ཀྱི་སྟོན་པ། དགྲ་བཅོམ་པ་ཟག་པ་ཟད་པ་རིག་པ་དང་ཞབས་སུ་ལྡན་པ། ཡང་དག་པའི་སངས་རྒྱས་འོད་དཔག་ཏུ་མེད་པ་ཞེས་བྱ་བ། འཁོར་ཡང་དག་པར་རྫོགས་པའི་སངས་རྒྱས་བརྒྱ་སྟོང་བྱེ་བ་དཔག་ཏུ་མེད་པས་བསྐོར་བ། སེམས་ཉིད་མངོན་པར་འདུས་མ་བྱས་པ་མངོན་པར་རོལ་བ་ཞིག་ཡོད་ཀྱིས། བུ་ཁྱོད་དེར་གླང་པོ་ཆེའི་ལྟ་སྟངས་ཀྱིས་ལྟོས་ལ་སེང་གེའི་མཆོང་སྟངས་ཀྱིས་སོང་ཞིག །ཨ་ཨ་ཨ་ཞེས་བརྗོད། ལོངས་སྐུའི་དལ་དུ་འཇུག་པའ།ོ །དེ་ནས་ཡང་ཆོས་སྐུའི་དལ་དུ་འཇུག་སྟེ། སེང་གེའི་གནད་བསྣུན་དུ་བཅུག་ལ། བླ་མས་འདི་སྐད་བརྗོད་པར་བྱའོ། །ཨེ་མ་སྐལ་ལྡན་སེམས་ཀྱི་བུ་གཅིག་པོ་ཉོན་ཅིག །དེ་ནས་འདས་པའི་ཕ་རོལ་ན་རང་གི་སེམས་ཉིད་བསམ་ངོ་དང་བྲལ་ཞིང་ཚད་མེད་དཔག་ཏུ་མེད་པ། དམིགས་སུ་མེད་པ་སྟོང་པ་ཉིད་གང་དུ་ཡང་མ་ཕྱེ་བའི་ཆོས་ཉིད་བྱ་བ་བཞུགས་པས། དེར་བུ་ཁྱོད་རིག་པ་ཁྱུང་ནམ་མཁའ་ལ་ལྡིང་བའི་འགྲོས་ཀྱིས་མཐོ་ས་རུ་སྡོད་ཅིག །དྲང་སྲོང་གི་འདུག་སྟངས་ཀྱིས་དྲང་པོར་གནས་པར་གྱིས་ཤིག ། གླང་ཆེན་གྱི་ཉལ་ཐབས་ཀྱིས་སྙོམས་པར་ཉོལ་ཅིག །ལྕགས་སྡོང་གི་འདྲིལ་སྟངས་ཀྱིས་ཁ་བུབ་ལ་མཐའ་དྲིལ་ཅིག །སྐྱེས་བུའི་རྒྱངས་ཐབས་ཀྱིས་གན་རྐྱལ་དུ་རྒྱོངས་ཤིག །

ཝ་མོའི་ཟུར་འགྲོས་ཀྱིས་ཀློག་ལ་སོང་ཞིག །བྱ་རྒོད་ཀྱི་དཔུངས་སྟངས་ཀྱིས་སྒུར་ཟློག་གིས་སྤུངས་ཤིག །གྱད་ཀྱི་དོར་སྟབས་ཀྱིས་ངལ་གསོས་ལ་ས་ནོན་ཅིག །འབུ་སྲིན་གྱི་ནུར་འགྲོས་ཀྱིས་དབྱིངས་རིག་ལ་ཆགས་པར་གྱིས་ཤིག །སྟག་མོའི་མཆོངས་སྟངས་ཀྱིས་ཉམས་སྣང་ལ་རྩལ་སྦྱོངས་ཤིག །གཡང་མོའི་སྤྲུག་སྟངས་ཀྱིས་གཟུང་འཛིན་བག་ཆགས་ཐམས་ཅད་དུས་ཅིག་ལ་ངོ་བོ་རུ་སྤྲུགས་ཤིག །སེང་གེའི་འགྲེངས་ཚུགས་ཀྱི་དབྱིངས་རིག་ལ་ས་ཟུངས་ཤིག །སེམས་ཀྱིི་བུ་སེམས་ཉིད་སྟོང་པར་གནས་པས་གཞི་ཟུངས་ཤིག །སེམས་ཉིད་རིག་སྟོང་དུ་བསྟན་པས་གནད་ཚུགས་ཤིག །སེམས་ཉིད་མ་འགགས་པར་འགྱུ་བ་རྩལ་སྦྱོངས་ཤིག །སེམས་ཉིད་ཡེ་ཤེས་སུ་གསལ་བས་ལམ་སྦྱོངས་ཤིག །སེམས་ཉིད་ཀུན་ལ་ཁྱབ་པས་རྟོགས་པ་ཚོལ་ཅིག །སེམས་ཉིད་ཅིག་ཅར་དུ་མྱུར་པས་ལ་ཟློས་ཤིག །སེམས་ཉིད་སྣ་ཚོགས་མ་འདྲེས་པས་ཤན་ཕྱེས་ཤིག །སེམས་ཉིད་སྣ་ཚོགས་པར་འཕེལ་བས་ཡེ་ཤེས་ལས་སླར་མ་ལྡོག་ཅིག །ཐིག་ལེ་ལས་སླར་མ་ལྡོག་ཅིག །སྐུ་ལས་སླར་མ་ལྡོག་ཅིག །དེ་དག་གིས་ཆོས་སྐུའི་དལ་དུ་འཇུག་པའོ། །དལ་གསུམ་དུ་བཅུག་ནས། །ད་ག སེར་གྱི་མཎྜལ་ཕུལ་ལ། སེམས་ཉིད་ཀྱི་ངོ་བོར་ལྷ་ངོ་བསྟན་པའི་སེམས་སྟོང་པ་དང་། རིག་པ་ལུ་གུ་རྒྱུད་དུ་ངོ་སྤྲད་པ་ནི། སྐུ་གསུམ་གྱི་བཞུགས་སྟངས་གཟིགས་སྟངས་རིམ་པས་བསྟུན་ཏུ་བཅུག་ལ། བླ་མས་འདི་སྐད་བརྗོད་པར་བྱའོ། །ཨེ་མ་སྐལ་ལྡན་དགེ་བའི་སེམས་ཀྱི་བུ་གཅིག་པོ། །འགྱུ་བ་སེམས་ཉིད་ངོ་བོ་སྟོང་ལ་རང་བཞིན་ཡེ་ཤེས་ལྷག་མཐོང་གི་དོན་ཉོན་ཅིག །སེམས་ཉིད་བདེ་སྟོང་འགྱུ་བ་ཟུང་འཇུག་ཕྱག་རྒྱ་སྟོང་པ་ཆེན་པོའི་གཞི་ཡེ་ཤེས་རིག་ལ་ལྔར་བསྒྱུར་ཅིག །སེམས་ཉིད་སྟོང་པ་ཡེ་ཤེས་མ་འདྲེས་ཟང་ཐལ་གྱིས་མ་རིག་པ་སྣོད་བཅུད་སོལ་ཅིག །སེམས་བླན་ཉིད་བློ་

རིམ་དང་འཇུག་པ། ཐེག་པ་ཐ་དད་ཀྱི་མཐའ་ཉག་གཅིག་ཏུ་ཐིག་ལེ་སྡུས་ཤིག །སེམས་ཉིད་སྟོང་པ་མཐའ་དང་བྲལ་བ་ཐིག་ལེ་ཡོངས་རྫོགས་ལ་ཕུགས་གཏོད་ཅིག སེམས་ཉིད་ཟུང་འཇུག་དབྱེར་མེད་རང་སྣང་ལྷུག་པས་དོན་གྱི་གནད་ཁྲོལ་ཅིག །སེམས་ཉིད་དབྱིངས་རིག་རྣམ་དག་སྨིན་མཚམས་འོད་གསལ་ལ་རླུང་རིག་གཅུད་ལ་བོར་ཅིག ། གང་ཞེ་ན་མགྲིན་པ་ཨན་ཙམ་དགུག །མིག་གྱེན་ལ་བཟློག །རླུང་རང་སོར་བཅད། ཡང་ལག་པ་གཡས་པས་མིག་མནན་ལ། མིག་གཡོན་པ་ནམ་མཁའ་ལ་བལྟས་པས་ཡེ་ཤེས་ཀྱི་སྣང་བ་འཕེལ་ལོ། །སེམས་ཉིད་ཆོས་སྐུ་མ་བཅོས་རང་བྱུང་རྣལ་མ་ལ་ཕྱི་ནང་གཅིག་ཏུ་གཞི་ཕོབ་ཅིག །སེམས་ཉིད་མ་འདྲེས་ཡོངས་རྫོགས་ཉག་གཅིག་ཕྱོགས་བྲལ་གཅིག་པ་ལས་སླར་མ་ལྡོག་ཅིག །ཡང་སྤྲུལ་སྐུར་སོང་ཞིག །ལོངས་སྐུར་སོང་ཞིག །ཆོས་སྐུར་སོང་ཞིག །སླར་མ་ལྡོག་ཅིག །ཆོས་སྐུ་ལ་མ་འཛིན་ཅིག །སླར་མ་ལྡོག་ཅིག །ལོངས་སྐུ་ལ་མ་འཛིན་ཅིག །སླར་མ་ལྡོག་ཅིག །ཅེས་ངོ་སྤྲད་དོ། ཨྠྀི། རྒྱ་རྒྱ་རྒྱ། སྐུ་གསུམ་དལ་འཇུག་བླ་མས་གནང་། དེ་ནས་གཏོར་མ་གཏོང་། ཚོགས་ལ་ལོངས་སྤྱོད་དོ། །དཔལ་སྔགས་སྲུང་གི་རྒྱལ་མོས་སྲུངས་ཤིག །སོ་ཕག་ཤི་ཐཾ། ཁ་ཐཾ། ས་མ་ཡ། རྒྱ་རྒྱ་རྒྱ། ཁིདབང་གི་ཕྲ་ཏིག་མ་དཔེ་མ་ཚང་བ་སླར་མངོན་ན་འདིར་འཇུག །

ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད་རྣམས།

ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད་རྣམས་བཞུགས་སོ༔ ལུང་མེད།

བཐཐེ།གྭིཊཀྭན༔ བཅོམ་ལྡན་འདས་བདེ་བ་མངོན་དུ་འབྱིན་པ་ལ་ཕྱག་འཚལ་ལོ༔ སྐལ་དང་ལྡན་པ་འཇུག་དོན་དུ༔ བཅོམ་ལྡན་རྡོ་རྗེ་སེམས་དཔའ་དང་༔ དགའ་རབ་ལ་སོགས་སྤྲུལ་པ་པོས༔ དབང་གི་རིམ་པ་བསྟན་པ་འོ༔ དེ་ལ་དང་པོ་སྐལ་པ་དང་ལྡན་པའི་སློབ་མས་བླ་མ་མཉེས་པར་བྱས་ལ༔ དེ་ནས་ལོ་གསུམ་གྱི་གོང་ནས་རིན་པོ་ཆེ་ལ་སོགས་པའི་མཎྜལ་འབུལ་བ་ཕུལ་ལ་བདག་ལོ་གསུམ་ནས་དབང་ཞུ་བས་གནང་བར་ཞུ་ཞེས་ཞུ༔ དེར་ལོ་ཐེམ་པ་དང་དབང་རྫས་ཚོགས་པར་བྱས་ལ་ཞུ་སྟེ༔ དེའང་དང་པོ་སྤྲོས་བཅས་ཀྱི་དབང་ཞུ་བ་ལ་ཉན་ཐོས་ནས་ཨ་ཏི་མན་ཆད་ཀྱི་ཐེག་པ་རིམ་པ་དགུ་ཡི་དབང་ཞག་བཅོ་བརྒྱད་དུ་བསྐུར་ཏེ་རྒྱུད་རྫོགས་པ་རང་བྱུང་ལས་ཤེས་པར་བྱའོ༔ དེ་ནས་སྤྲོས་མེད་ཀྱི་དབང་ཇི་ལྟར་བསྐུར་བའི་རིམ་པ་བསྟན་པ་ནི༔ སྤྲོས་མེད་ནི་རབ་ཏུ་ཡིད་འབྱུང་བའི་བློ་ཅན་ཞེས་བྱའོ༔ ངེས་པར་འབྱུང་བའི་དད་པ་དང་ལྡན་པའི་སློབ་མ་རྣམས་འཇུག་ཅིང་ལུས་ངག་ཡིད་གསུམ་སྨིན་པར་བྱ་བའི་ཕྱིར་བསྟན་པའོ༔ དེ་ལ་བློ་སྤྲོས་པ་མེད་པའི་དོན་དུ་དབང་གནང་བས་མཆོག་གི་དངོས་གྲུབ་ཐོབ་པས༔ དང་པོ་གནས་རབ་ཏུ་དབེན་པར་སོང་སྟེ༔ ཁྲུ་དོ་དཔངས་སོར་དྲུག་ལ་མཎྜལ་རབ་ཏུ་སྙོམས་ཤིང་མཛེས་པ་ལ་བའི་རྣམ་ལྔ་དང་ཙནྡན་ལ་སོགས་པས་ལེགས་པར་བྱུགས་ལ༔ བུམ་པ་བསྣོལ་མ་དམར་པོས་མཐའ་མ་བསྐོར༔ མེ་ཏོག་སྣ་ཚོགས་པའི་ཚོམ་བུ་དགྲམ༔ མཎྜལ་གྱི་དབུས་སུ་བུམ་པ་མཚན་ཉིད་དང་ལྡན་པ་གསུམ་དུ་བུམ་རྫས་ཉི་ཤུ་རྩ་ལྔ་ཚང་བར་བླུག་འབྲས་བུ་ཅན་གྱི་ཤིང་གི་ཁ་རྒྱན་གྱི་གསེབ་ཏུ་རྨ་བྱའི་མདོངས་དང་མེ་ལོང་ལ་སོགས་གཟུགས༔ དེ་ནས་ཞག་གསུམ་དུ་ༀ་ཨཱཿཧཱུྃ་ཞེས་པ་དཔག་ཏུ་མེད་པ་སྟེ་ཛབ་དབྱངས་དང་བཅས་པ་བརྗོད་པར་བྱའོ༔ དེ་ནས་ཞག་གསུམ་གྱི་ཐོ་རངས་དབང་བསྐུར་རོ༔ དེའང་འོག་ནས་འབྱུང་

བའི་ཚིགས་སུ་བཅད་པས་དེ་དག་གིས་སྐལ་ལྡན་སྦྱིན་པར་བྱའོ༔ སྤྲོས་པ་མེད་པའི་དབང་བསྐུར་བའོ༔ ད་ནི་ཤིན་ཏུ་སྤྲོས་པ་མེད་པའི་དབང་བསྐུར་བ་ནི༔ དེ་ལ་ནི་ཤིན་ཏུ་ཟབ་ཅིང་གནད་དུ་འགྲོ་བ་ཡིན་ལ༔ སྤྲོས་མེད་ལ་ནི་བློ་བྱ་བ་དང་བཅས་པ་ལ་མི་དགའ་བའི་དོན་དུའོ༔ དེ་ཡང་དབང་བསྐུར་རྒྱུ་ཐུན་མོང་པ་རྣམས་ལ་སྔོན་དུ་བསྙེན་པ་བྱེད་པ་ལ་དགོངས་པའོ༔ དེ་ཡང་འཁོར་བ་སྣང་བ་དང་ཤེས་པས་བསྡུས་པས༔ འདས་པ་སྐུ་དང་ཡེ་ཤེས་ཀྱིས་བསྡུས་པ་རུ་ཤན་འབྱེད་པའི་སྤྱོད་པ་ནི༔ དུར་ཁྲོད་ལ་སོགས་པར་སོང་སྟེ་ལུས་ལ་ཞག་གཅིག༔ ངག་ལ་ཞག་གཅིག༔ སེམས་ལ་ཞག་གཅིག་ཏུ་བྱའོ༔ དེ་ཡང་སློབ་མ་གསུམ་ལ་དབང་བསྐུར་ཏེ་དུར་ཁྲོད་དུ་ཁྲིད་ལ་ལུས་ལ་ཧཱུྃ་གིས་རྒྱས་གདབ་ལ་ཞག་གསུམ་དུ་ཧཱུྃ་དང་ནམ་མཁའ་རླུང་དང་གསུམ་འདྲེས་ལ༔ ཧཱུྃ་ཧཱུྃ༔ ཁོང་གློད་པ་ནི་གནད་ཡིན་པས་དབུགས་བ སྲིང་བར་བྱའོ༔ དེ་ནས་ངག་སྦྱོང་བ་ལ་ཕཊ་ཅེས་པ་ཞག་གསུམ་དུ་བྱའོ༔ ཡིད་སྦྱོང་བ་ལ་གསལ་བྱེད་དབྱངས་ཡིག་ཞག་གསུམ་དུ་བརྗོད༔ དེ་ནས་རང་གར་མོས་པར་མཁའ་འགྲོ་མ་ལ་གཏོར་མ་རེ་རེ་ཕྱོགས་སུ་གཏང་༔ དེ་ལྟར་ཞག་གསུམ་དུ་མཁའ་འགྲོ་མ་ལ་གསོལ་བ་བཏབ་ནས་སྤྱོད་པ་བྱེད་དུ་འཇུག་པའི་དུས་སུ་ལུས་ངག་ཡིད་གསུམ་སོ་སོའི་ཕྱོགས་སུ་བཟུང་སྟེ༔ དེའི་ནམ་མཁའི་མཚན་ཉིད་ནི༔ སྤྲིན་ནག་པོ་འཇིགས་སུ་རུང་བ་དང་རླུང་ནག༔ ཁ་ཆར་བུ་ཡུག་སྒྲ་ལ་སོགས་པ་འབྱུང་བ་ལ༔ ལུས་རུ་ཤན་འབྱེད་པའི་དུས་སུ་བྱུང་ན༔ ལུས་ལ་སྒྲིབ་པ་ཡོད་པའི་རྟགས་ཡིན༔ ངག་གི་དུས་སུ་བྱུང་ན་ངག་ལ་སྒྲིབ་པ་ཡོད་པའི་རྟགས༔ སེམས་རུ་ཤན་འབྱེད་པའི་དུས་སུ་བྱུང་ན་སེམས་ལ་སྒྲིབ་པ་ཡོད་པའི་རྟགས༔ གང་ཟག་གསུམ་པོའི་ཕྱོགས་ཕྱོགས་ཀྱང་གཟུང་ངོ་༔ ཕྱོགས་ལ་ལར་བྱུང་༔ ལ་ལར་མ་བྱུང་ན༔ གང་ཟག་

གཅིག་གམ་གཉིས་ལ་ཡོད་པའི་རྟགས་ཏེ་ཞིབ་པར་བརྟག་གོ༔ ལུས་ངག་ཡིད་གསུམ་གྱི་སྒྲིབ་པ་ཡང་མཚན་ཉིད་ཀྱིས་ངེས་པར་འདག་པར་འགྱུར་ཏེ༔ དེ་ཡང་སྔོན་དུ་བྱུང་ལ་ཕྱིས་ནམ་མཁའ་སྟོང་པ་སྤྲིན་དང་བྲལ་བ་བྱུང་ན་སྤྱོད་པ་དག་པའི་རྟགས་སོ༔ གལ་ཏེ་སྔར་མེད་པ་ཞབས་སུ་བྱུང་ན་སྤྱོད་པ་མ་དག་པས་ན་རང་དང་མཐུན་པའི་དགེ་བས་ནི༔ ལུས་རུ་ཤན་འབྱེད་པའི་དུས་སུ་བྱུང་ན་སཙྪཱ་འབུམ་ཕྲག་གཅིག་གདབ་པ་དང་༔ ངག་གི་དུས་སུ་བྱུང་ན་ཡི་གེ་བརྒྱ་པ་འབུམ་ཕྲག་གཅིག་བཟླས་པ་དང་༔ སེམས་ཀྱི་དུས་སུ་བྱུང་ན་ཨཱ་ལི་ཀ་ལི་འབུམ་ཕྲག་གཅིག་བཟླ་བར་བྱ་བ་ནི་ཤིན་ཏུ་སྡིག་པ་ཚན་ཆེ་བ་ལ་བྱའོ༔ འབྲིང་ལ་དེ་ཡི་ཕྱེད་ཀྱིས་འགྲུབ་བོ༔ དེ་བས་ཆུང་བ་ལ་དེའི་སུམ་ཆས་འདག་ངེས་སོ༔ སྒྲིབ་པ་ཡེ་རང་མེད་ན་སོ་སོའི་ཕྱོགས་སུ་ནམ་མཁའ་སྔོ་སངས་སུ་འོང་ངོ ༔ སྤྱོད་པ་དག་ནས་ཕྱིས་དེ་ལྟར་འགྲོའོ༔ ལུས་ངག་སེམས་སོ་སོའི་དག་པ་དང་མ་དག་པ་ཡང་བརྩིའོ༔ གང་མ་དག་པ་ལ་ནི་དགེ་སྦྱོར་སྔ་མ་དང་འདྲ་བར་བྱའོ༔ གལ་ཏེ་ལུས་ཀྱི་ལས་དག་ནས་ཕྱིས་ཁམས་གསུམ་དུ་མི་འཇུག་པ་ནི་ལུས་ཀྱི་དུས་ན་ཁྱད་པར་གཟུགས་བརྙན་ནམ་མཁའི་འཇའ་ཚོན་དང་མཆོག་ཏུ་གྱུར་པའི་གཟུགས་བརྙན་མཐོང་བའོ༔ ངག་གི་དུས་ན་ཁྱད་པར་གྱི་སྒྲ་རྣམས་ཐོས་པ་དང་༔ སེམས་ཀྱི་དུས་ན་ལྷག་པའི་བསམ་པ་དང་ངོ་མཚར་བའི་བྱ་བ་རྣམས་དྲན་པ་ནི་བུའི་སྡིག་པ་རྣམས་བྱང་བའི་རྟགས་སོ༔ དེ་ལྟར་སྐལ་ལྡན་ཡིད་ཀྱི་རུ་ཤན་འབྱེད་པའི་དུས་སུ་བླ་མས་ངག་བཅད་དེ་རིག་པ་མངོན་སུམ་གྱི་སྣང་བ་ལ་གནས་པར་བྱའོ༔ དེ་ནས་ཞག་གསུམ་རྫོགས་པའི་ནང་བར་དུར་ཁྲོད་དུ༔ བླ་མས་མཎྜལ་ལྔ་བཤམས་ཏེ༔ དང་པོ་འབྲུ་སྣ་ཚོགས༔ གཉིས་པ་མེ་ཏོག་སྣ་ཚོགས༔ གསུམ་པ་དྲི༔ བཞི་པ་སྨན༔ ལྔ་པ་གསེར་ལ་སོགས་པ་རིན་པོ་ཆེ་སྣ་ཚོགས་པ་སློབ་མ་

འབྱོར་པའི་ཚོགས་དང་སྦྱར་ལ་བཤམ་མོ༔ དེང་མཁའ་འགྲོ་མ་རྣམས་ཇི་ལྟར་མགུ་བའི་ཚོགས་ཀྱི་མཆོད་པ་ཇི་ལྟར་འབྱོར་པ་དང་༔ ཕྱི་ནང་གསང་བའི་མཆོད་པའི་བྱེ་བྲག་རྣམས་ཇི་ལྟར་འབྱོར་པ་བཤམས་ལ༔ དེ་ནས་སློབ་མ་གཅིག་ལ་བརྡའ་བྱས་ལ་བོས་ལ༔ སློབ་མའི་དབང་མ་རྫོགས་ཀྱི་བར་ལ་བླ་མ འ ང་ངག་མི་གདང་ངོ་༔ དེ་ནས་སློབ་མས་ཕྱག་བྱས་ཏེ༔ བླ་མས་བུ་ཁྱོད་སུ་ཡིན་དྲིས་པས༔ སློབ་མས་བདག་སྐལ་ལྡན་ཡིད་ཀྱི་བུ་གཅིག་ལགས་ཞེས་ལན་གསུམ་བརྗོད་པར་བྱའོ༔ དེ་ནས་བླ་མས་དེ་ལྟར་ཡིན་ཕན་ཆད་རང་བཞིན་རྫོགས་པ་ཆེན་པོ་ཤིན་ཏུ་སྤྲོས་པ་མེད་པ་འདི་ལ་ཞུགས་ཤིག་ཅེས་བརྗོད་ལ༔ སློབ་མས་མཎྜལ་རྣམས་བླ་མ་ལ་རིམ་པ་བཞིན་དུ་འབུལ་ལོ༔ དེ་ནས་སློབ་མས་ལུས་ལངས་ལ་འགྲེང་ཚུགས་སུ་བསྡད་དེ༔ ཐལ་མོ་སྙིང་ཀར་སྦྱར་གཅེར་བུར་ཐོན་ལ་བླ་མའི་ཐུགས་ཀྱི་དཀྱིལ་དུ་རིག་པ་འཕངས་ཏེ་མ་ཡེངས་པ་གནད་དོ༔ བླ་མས་ངག་ཏུ་ཨ་ཨ་ཞེས་དྲག་ཤུལ་དང་བཅས་པ་བརྗོད་པས༔ ལུས་འཕར་ཞིང་གཡོ་བ་དང་༔ ངག་སྨྲ་ཞིང་དངངས་པ་དང་༔ སེམས་སྤྲོ་ཞིང་ཕྱད་པ་ལ་སོགས་འབྱུང་བ་ནི་ཡེ་ཤེས་ཀྱི་བདེ་བ་ཕེབས་པའི་རྟགས་སོ༔ དེ་ནས་བླ་མའི་ཞལ་ནས་ཤར་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་དང་༔ ཞེས་སླར་མ་ལྡོག་ཅེས་དྲག་ཏུ་བྱའོ༔ འགྲོ་ན་འགྲོ་ས་འདུག་གམ༔ སྡད་ན་སྡད་ས་འདུག་གམ༔ དེ་བཞིན་དུ༔ ལྷོ་དང་༔ ནུབ་དང་༔ བྱང་དང་༔ སྟེང་འོག་རྣམས་སུ་གོམ་པ་གམ་གམ་སོང་དང་བྱས་ལ༔ སླར་མ་ལྡོག་ཅེས་ལན་གསུམ་ཤུགས་དྲག་དང་དྲག་ཤུལ་དང་བཅས་པས་བྱའོ༔ དེ་ནི་བླ་མས་བརྡ་བསྐུལ་ཏེ་དལ་དུ་

གཞུག་པའོ༔ དེ་བཞིན་རིག་པའི་ལྷ་ངོ་བསྟན་པ་དང་༔ ནམ་མཁའ་རྒྱ་ཆེ་ལ་སོགས་པ་ནི་བརྡ་ལ་བརྟེན་པ་ཡིན་ཏེ་སྔོན་ཆད་མཐོང་མ་མྱོང་བའི་རང་སྣང་གི་རིག་པ་གཞན་གྱི་འོད་སྤྲོས་པ་ཡིན་ནོ༔ དེ་ནས་གོང་དུ་བརྗོད་པའི་བརྡ་དེ་དག་འགྲོལ་བ་ལས༔ བླ་མ་མཁས་པས་བསྐོས་སོ༔ དེ་ལྟར་དབང་བསྐུར་ནས་རང་གི་གནས་ཁང་དུ་ཕྱིན་ཏེ་འབྱོར་པ་དང་སྦྱར་ལ་དགའ་བའི་སྟོན་མོ་བྱའོ༔ དཔའ་བོ་དང་དཔའ་མོ་ལ་སྟོན་མོ་རྒྱས་པར་བྱ༔ བླ་མ་ལ་ཡོན་གྲུབ་ན་གསེར་རང་ལུས་ཙམ་འབུལ་ལོ༔ དེས་ནི་ཚོགས་ལྷག་མ་ལུས་པར་རྫོགས་པའི་དགོས་པ་ཡོད་དོ༔ དེ་ནི་ཤིན་ཏུ་སྤྲོས་པ་མེད་པའི་དབང་བསྟན་པའོ༔ གུ་ཧྱ༔ ད་ནི་རབ་ཏུ་སྤྲོས་པ་མེད་པའི་དབང་བསྐུར་བ་ནི༔ དེ་ནི་རབ་ཏུ་མཆོག་ཏུ་ཟབ་པ་ལ་དགོངས་པའོ༔ སྤྲོས་པ་མེད་ཅེས་པ་ནི་བྱ་བ་དང་འཁྲུལ་པ་ལས་བློ་ལོག་པ་སེམས་ཀྱི་རང་བཞིན་ལ་སྔོན་དུ་སྦྱངས་པའོ༔ དེ་ཡང་འདི་ནི་སྐད་ཅིག་གམ་ཐུན་གཅིག་གི་ཁོངས་སུ་དབང་རྫོགས་པར་བྱ་སྟེ༔ དེ་ཡང་ཚོགས་བསག་པའི་བྱེ་བྲག་དཔག་ཏུ་མེད་པ་བསགས་པ་དང་༔ ཕྱི་ནང་གི་མཆོད་པའི་བྱེ་བྲག་དཔག་ཏུ་མེད་པ་བཤམ་པ་དང་༔ བླ་མ་ལ་ཡོན་འབུལ་བ་ལ་སོགས་པ་འབྱོར་ཚད་བྱས་ལ༔ བླ་མས༔ སློབ་བུ་ལ༔ བུ་ཁྱོད་སུ་ཡིན་ཞེས་དྲིས་པ་དང་༔ བདག་སྐལ་ལྡན་སེམས་ཀྱི་བུ་གཅིག་པུ་ལགས༔ ཞེས་ལན་གསུམ་དུ་བརྗོད་པར་བྱའོ༔ དེ་ནས་བླ་མས༔ དེ་ལྟར་ཡིན་ཕན་ཆད་དུ་རང་བཞིན་རྫོགས་པ་ཆེན་པོ་སེམས་ཉིད་མ་བཅོས་པའི་དལ་དུ་ཞུགས་ཤིག༔ ཅེས་པ་གནང་བ་བྱིན་ཏེ། དེ་ནས་སློབ་མས་རིན་པོ་ཆེ་ལ་སོགས་པའི་མཎྜལ་འབུལ་ཏེ་གསོལ་བ་གདབ་ལ༔ འདི་སྐད་

དུ་སེམས་ཀྱི་དལ་བརྟག་པ་ནི༔ ཨེ་མ་དཔལ་ལྡན་རྡོ་རྗེ་འཛིན༔ དཔལ་ལྡན་དལ་ཉི་མ་སྟོང་གི་འོད་ཟེར་ནི༔ རྨང་དང་རྩ་བ་བཅད་པས་སངས་རྒྱས་སེམས་ལས་བྱུང་༔ སེམས་ཀྱི་དམ་པ་བདག་ལ་གསལ་བར་བསྟན་དུ་གསོལ༔ ཞེས་ལན་གསུམ་དུ་གདབ༔ དེ་ནས་བླ་མས༔ སློབ་མ་ལ༔ ལུས་ཀྱི་འདུག་སྟངས་སུ་སྤྲུལ་པ་སྐུའི་འདུག་སྟངས་དང་༔ ལོངས་སྐུ་དང་ཆོས་སྐུ་ལ་སོགས་པའི་འདུག་སྟངས་ཐ་དད་བསླབས་ལ་བྱེད་དུ་གཞུག་གོ༔ ཆོས་སྐུ་ལོངས་སྐུ་སྤྲུལ་སྐུ་ལ་སོགས་པའི་གཟིགས་སྟངས་བསླབ་བོ༔ དེ་ནས་སྤྲུལ་སྐུ༔ ལོངས་སྐུ༔ ཆོས་སྐུའི་ཞིང་ཁམས་སུ་ལུང་བསྟན་པ་ནི་འདི་སྐད་དུ༔ ཨེ་མ༔ སྐལ་ལྡན་ཤར་ཕྱོགས་མངོན་པར་དགའ་བའི་ཞིང་ཁམས་ཡོད་ཀྱི༔ དེར་གླང་པོ་ཆེའི་ལྟ་སྟངས་ཀྱིས་ལྟོས་ལ༔ སེང་གེའི་མཆོངས་སྟབས་ཀྱིས་མཆོངས་ལ༔ ཁྱུང་ནམ་མཁའ་ལ་ལྡིང་བའི་འགྲོས་ཀྱིས་སོང་ཞིག༔ ཅེས་པ་ལ་སོགས་པ་ཡང་ལུང་བསྟན་ལ༔ དེ་ནས་གོང་དུ་བསྟན་པའི་དབང་བཞི་རྫོགས་པ་དང་གདམས་པ་ཡང་རྫོགས་པར་གདབ་སྤྱོད་པ་ཡང་རྫོགས་པར་བྱ་སྟེ༔ སྔོན་འགྲོ་ལ་ལུས་ངག་ཡིད་གསུམ་སྦྱོང་པ་ལ་ཞག་དགུ༔ དངོས་གཞི་ལུས་ངག་ཡིད་ཀྱི་སྤྱོད་པ་འདས་རྗེས་ལྟར་བྱའོ༔ དེ་ནས་རྣལ་དུ་དབབ་སྟེ༔ སྒོ་གསུམ་ལ་མིག་དལ་བ་དང་༔ ཡུལ་ནམ་མཁའ་སྟོང་པ་སྤྲིན་དང་བྲལ་བ་དང་༔ རིག་པ་དེ་དང་མི་འབྲལ་བ་གསུམ་ལུང་གིས་བརྡའ་སྤྲད་དོ༔ སྒྲ་ཐལ་འགྱུར་ལས༔ གནད་གསུམ་མན་ངག་འབྲལ་མི་བྱ༔ ཞེས་པས་ན༔ དེ་ལ་ཡེ་ཤེས་འཆར་བར་བྱེད་པའི་སྒོ་མིག་ཡིན་པས་མིག་གི་ཡུལ་དུ་གཟིགས་སྟངས་གསུམ་ལས་མི་འབྲལ་བར་བྱ༔ རིག་པ་འཆར་བར་

བྱེད་པའི་ཡུལ་ནམ་མཁའ་སྟོང་པ་སྤྲིན་དང་བྲལ་བ་གནད་ཡིན༔ རླུང་རིག་གི་གནད་དུ་དལ་བ་བརྟེན་པ་གནད་ཡིན་པས་ལུས་དལ་བར་བསྡད༔ ངག་ལྐུགས་པ་བཞིན་དུ་བསྡད་༔ སེམས་སྤྲོས་པ་དང་བྲལ་བའམ་ཆུ་ཆད་པའི་རང་ཐག་བཞིན་དུ་བསྡད༔ དེ་ལྟར་གསུམ་པས་དུས་ཐམས་ཅད་དུ་མ་བྲལ་བ་ནི་ཆོས་ཉིད་མངོན་སུམ་གྱི་གནད་ཅེས་བྱའོ༔ དེ་ལྟར་ཉམས་སུ་བླངས་པས་སྣང་བ་བཞི་ཇི་ལྟར་འཆར་བ་ནི༔ དེ་ལྟར་ངོ་སྤྲོད་བསྟན་པ་ནི་རིག་པ་མངོན་སུམ་གྱི་སྣང་བ་ཞེས་བྱའོ༔ ཉམས་སུ་བླང་བ་དེ་ལས་མ་འདས་པས་ཉམས་གོང་འཕེལ་གྱི་སྣང་བ་ཐིག་ལེ་ལ་སོགས་པ་འཆར་རོ༔ དེ་ལས་རིག་པ་ཚད་ཕེབས་ཀྱི་སྣང་བ༔ ཐིག་ལེ་ལ་སོགས་པ་སྐུར་འགྱུར་རོ༔ དེ་ལས་ཆོས་ཉིད་ཟད་པའི་སྣང་བ་ཅིའི་ངོ་བོར་ཡང་མ་གྲུབ་པས་གྲུབ་མཐའ་ཐམས་ཅད་དང་བྲལ་བའོ༔ དེ་ནས་གོང་དུ་འཕེལ་བའི་ཆོས་ཉིད་མངོན་སུམ་ཞེས་པ་སྒོ་དང་ཡུལ་དང་རིག་པ་གསུམ་མི་འབྲལ་བའི་གནད་ལ་རྟག་ཏུ་དབྱིངས་རིག་གེར་རོ༔ དེ་ལྟར་སྐལ་ལྡན་ཅིག་གིས་འཇིག་རྟེན་གྱི་བྱ་བ་རྣམས་སྤངས་ནས་ཉམས་སུ་བླངས་ན་སྣང་བ་བཞི་རྫོགས་ནས་འདི་ཉིད་དུ་ཟག་བཅས་མི་སྣང་བར་སངས་རྒྱའོ༔ འབྲི ང་པོ་གཅིག་གིས་བག་རེ་ཉམས་སུ་བླངས་པས་ཐང་ཆད་ནས་བླང་ལོངས་མ་བྱུང་ཀྱང་ཆོས་ཉིད་བར་དོ་ལ་རང་གི་ཆོས་ཉིད་སྟོབས་སུ་གྱུར་ནས་སངས་རྒྱའོ༔ ཐ་མ་ཅིག་གིས་བླ་མ་མཚན་ཉིད་དང་ལྡན་པ་ཞིག་ལས་དབང་བཞི་རྫོགས་པར་བྱས་ནས་མངོན་སུམ་གནད་ཀྱི་མན་ངག་ནི་ཞུས༔ ཉམས་སུ་མ་བླངས་ཀྱང་ཆོས་ཉིད་ཟབ་མོའི་སྒོ་མཐོང་ཞིང་ཞུགས་པའི་བདེན་པའི་བྱིན་རླབས་ལ་བརྟེན་ནས་རང་བཞིན་སྤྲུལ་པ་སྐུའི་ཞིང་ཁམས་སུ་ཞུགས་ནས་མངལ་གྱི་གྲོང་ཁྱེར་དུ་མི་འཇུག་སྟེ༔ འདོད་ཁམས་དང་༔ གཟུགས་

ཁམས༔ གཟུགས་མེད་པའི་ཁམས་སུ་འཇུག་པ་མིན་ནོ༔ དེའི་ཕྱིར་ན་སོ་སོའི་སྐྱེ་བོ་དང་ཉན་ཐོས་ལ་སོགས་པ་ལ་རབ་ཏུ་གསང་སྟེ་ཆོས་ཉིད་མངོན་སུམ་གྱི་གནད་དུས་ཐམས་ཅད་དུ་སྟེམས་པར་བྱའོ། །ཞེས་འཁོར་འདས་རུ་ཤན་འབྱེད་པའི་སྤྱོད་པ་ཡང་སྔར་བྱས་ནས་ལུས་དོན་རྒྱས་པར་བསྟན་ནོ། །དེ་ལ་དང་པོར་ལུས་ཀྱི་འདུག་སྟངས་ཀྱི་གནད་ལ་བརྟེན་ནས་རང་སེམས་རྣལ་དུ་གཞུག་པ་ནི༔ ལུས་དང་ཤེས་པ་ཀློད་པ་དང་༔ རླུང་སོར་བཞག་པ་གནད་ཡིན་ནོ༔ དེ་ནས་གཉིས་པ་སེམས་ཀྱི་གནས་ལུགས་ལ་བརྟེན་ནས་རྣལ་འབྱོར་ལུས་སེམས་དང་དབྲལ་བ་ནི༔ སེམས་སོ་སོའི་གཏད་ལུགས་དང་སྦྱར་ཏེ་རླུང་སེམསས་ཅི་ནས་ཀྱང་རྒྱང་རིང་པོར་འཕངས་པ་གནད་ཡིན་ནོ༔ དེ་ལ་ཆོས་ཉིད་ནི་མ་བཅོས་པ༔ མངོན་པ་ནི་དབང་པོའི་ཡུལ་དུ༔ གསུམ་ནི་གྲངས་ཏེ༔ སྒོ་དང་༔ ཡུལ་དང་རིག་པ་གསུམ་དུས་གཅིག་ལ་ཚོགས་པའོ༔ གནད་ནི་སྙིང་ལ་མདའ་འམ་མཚོན་གྱིས་ཟིན་པའམ་ནད་ཞུགས་ནས་འཆི་ངེས་པ་དང་འདྲའོ༔ གནད་གཟིར་བའི་དུས་ན་རླུང་ཕྱིར་འཕང་༔ རྒོད་ན་རླུང་ནང་དུ་དགུག་པ་དང་རིག་པ་སྒྲོན་མ་ལ་གཏད་དེ། ཕུང་པོ་དང་ཁམས་བྱེར་ནས་རྩིག་ཁུང་སོང་སྙམ་པའམ་ཐམས་ཅད་ལ་འཇུག་སྙམ་ན་རིག་པ་སྟེང་དུ་འཕང་༔ རླུང་ནང་དུ་བཟུང་༔ རིག་པ་ཡས་ནས་ནང་དུ་མ་ཕེབས་ན་རིག་པ་སྨིན་མཚམས་སུ་གཏད༔ རླུང་དལ་བ་བསྟན༔ དབྱིངས་དང་རིག་པ་གཉིས་སྦྱར་རོ༔ ད་ནི་རིག་པའི་སྒྲོན་མའི་གནད་བསྟན་པ་ནི༔ ཐིག་གཞི་ཡིན་པས་འགྱུར་བ་མེད༔ ལེ་སྣང་བ་ཡིན་པས་ཀུན་ལ་ཁྱབ༔ སྒྲོན་མས་འོད་ཀྱི་སྣང་བ་སྟོན་པར་བྱེད་དོ༔ འདི་ཡིས་དུས་ན་སྒྲོན་མ་གཏིམས་པ་གནད་དོ༔ དེ་ཡང་དད་

པ་དང་ལྡན་པ་ཞིག་གིས་བླ་མ་མཉེས་པར་བྱས་ལ་མི་མི་རྒྱུ་བའི་གནས་སུ་སོང་སྟེ༔ མིག་གི་ཕུགས་ཀྱི་རྩ་རང་གི་མཐེབ་མོ་དང་མཛུབ་མོ་གཉིས་མ་བྲལ་བར་རྟག་ཏུ་གཏིམས་ན་ཡེ་ཤེས་ཀྱི་སྣང་བ་གོང་དུ་འཕེལ་ལོ༔ ཞེས་ཐིག་ལེའི་སྒྲོན་མའི་གནད་བསྟན་པ་ཡིན་ནོ༔ ད་ནི་དབང་པོའི་མངོན་སུམ་གནད་ལ་བརྟེན་ནས་ཅིག་ཅར་གྲོལ་བའི་དགོངས་པ་བསྟན་པ་ནི༔ དེ་ལ་དམ་པ་ནི་སངས་རྒྱས་ཀྱི་དགོངས་པ་སྟེ༔ དེའི་དོན་ཆོས་ཉིད་མངོན་སུམ་དུ་སྐྱེ་བ་ཉིད་ལས་ཡིད་དཔྱོད་ཚིག་གི་བློ་དང་བྲལ་ནས་གང་ཟག་དབང་པོ་ཅིག་ཅར་བ་རྣམས་བླ་མའི་གདམས་ངག་དེ་བསྟན་པ་ཙམ་གྱིས་རང་གྲོལ་དུ་འགྲོ་བས་ན༔ དེ་ཡང་གང་ལས་བྱུང་ཞེ་ན་ཆོས་ཉིད་མངོན་པར་དབང་པོ་ལ་སྣང་བའོ༔ དེ་ཡང་སྒོའི་གནད་གཟིགས་སྟངས་གསུམ་ལས་མི་འབྲལ་བ་དང་༔ ཡུལ་གྱི་གནད་ནམ་མཁའ་སྤྲིན་དང་བྲལ་བ་ལ་རིག་པ་བཞག་པ་དང་༔ རླུང་རིག་གི་གནད་རིགས་པ་ནམ་མཁའ་ལ་འཕང་བ་སྟེ༔ རླུང་དལ་བ་བརྟེན་པས་རིག་པ་རང་ངོ་ལ་གསལ་བ་དང་གསུམ་དབང་པོའི་ཡུལ་དུ་མཐོང་བའི་གནད་ཀྱིས་ནི༔ ཚིག་ཏུ་འཛིན་པའི་རང་གི་གྲུབ་པའི་མཐའ་ཡིད་དཔྱོད་དུ་འཛིན་པ་ཉིད་ཞིག་ནས་ཚིག་ཏུ་འཛིན་པ་ལས་བློ་ལོག་པའོ༔ དེ་ལྟར་ཆོས་ཉིད་མངོན་སུམ་གྱི་དོན་ལ་གནས་པས༔ དངོས་སྟོང་གང་དུ་འཛིན་པའི་ཤེས་པ་དང་བྲལ་ནས་སྣང་བ་དང་ཤེས་པ་གང་དུ་ཡང་ཞེན་པ་དང་འཛིན་པ་མེད་པ་རང་རིག་རང་སར་ཤེས་པས་གྲོལ་བར་བསྟན་པ་ནི། བྱ་བ་མེད་པས་གྲོལ་བ་གྲོལ༔ ཞེས་སོ༔ དེ་ཡང་མངོན་སུམ་གནད་ཀྱི་མན་ངག་གིས་ཡང་དག་པའི་དོན་ཆོས་ཉིད་བདེ་བ་ཆེན་པོའི་རོ་མངོན་སུམ་བྱེར་དང་བྲལ་བར་མྱོང་ནས༔ ཁམས་ནི་ཚོགས་ཤིང་འདུས་ལ༔ འདུས་ཤིང་འཛིན་པ་ལས༔ འདོད་ཆགས་ལས་འདོད་ཁམས་སུ་ཆགས་པ་དང་༔

གཏི་མུག་ལས་གཟུགས་མེད་དུ་ཆགས་པ་གསུམ་དུ་བཟློག་པའི་རྟེན་དང་༔ འདོད་ཆགས་མ་བྱུང་མ་སྐྱེས་རང་བྱུང་གི་ཡེ་ཤེས༔ དེ་བཞིན་དུ༔ ཞེ་སྡང་མ་བྱུང་མ་སྐྱེས་རང་བྱུང་གི་ཡེ་ཤེས་ཉིད་ལ༔ དེ་བཞིན་དུ༔ གཏི་མུག་རང་བྱུང་གི་ཡེ་ཤེས་སུ་སོང་བས༔ དེ་ཉིད་མེད་པར་རང་སྟོང་རང་གྲོལ་དུ་སོང་བ་ནི༔ གྲོལ་བ་རང་བྱུང་གཞན་ལས་མིན༔ ཞེས་པའོ༔ དཔེར་ན་ནམ་མཁའ་ལ་ནམ་མཁའ་ཐིམ་པ་ལྟར་རིས་མེད་མཉམ་ཉིད་ཆེན་པོའི་དོན་ལས་མ་ག ཡོས་པར་ཟག་བཅས་མི་སྣང་བར་སངས་རྒྱ་བ་ནི་རྣལ་འབྱོར་མཆོག་ཅེས་བྱ་སྟེ་འབྱུང་བའི་ཟག་པ་ཟད་ནས་དེ་ཉིད་ཀྱང་དེ་བཞིན་དུ་ཟག་པ་མི་སྣང་བ་ཡིན་ནོ༔ ཞེས་གྲུབ་མཐའི་དགོངས་པ་བསྟན་པའོ༔ ད་ནི་གནད་རྣམ་པ་གསུམ་ལ་བརྟེན་ནས་མངོན་སུམ་རང་ཐོག་ཏུ་གཏན་ལ་དབབ་པར་བསྟན་པ་ནི༔ གནད་གསུམ་མན་ངག་འབྲལ་མི་བྱའོ༔ ཞེས་པས་ན༔ དེ་ཡང་ཡེ་ཤེས་འཆར་བར་བྱེད་པའི་སྒོ་མིག་ཡིན་པས་མིག་གི་གནད་དུ་གཟིགས་སྟངས་གསུམ་ལས་མི་འབྲལ་བར་བྱ༔ རིག་པ་འཆར་བར་བྱེད་པའི་ཡུལ་ནམ་མཁའ་སྟོང་པ་སྤྲིན་དང་བྲལ་བ་གནད་ཡིན༔ རླུང་རིག་གི་གནད་དུ་རླུང་དལ་བ་བསྟེན་པ་གནད་ཡིན་ནོ༔ དེ་ལྟར་གསུམ་ལས་དུས་ཐམས་ཅད་དུ་མི་འབྲལ་བ་ནིི་ཆོས་ཉིད་མངོན་སུམ་གྱིི་གནད་ཅེས་བྱའོ༔ དེ་ཡང་མི་འགུལ་བ་གསུམ་ལ་གཞི་བཅའ་བ་ནི༔ ལུས་མ་འགུལ་བས་རྩ་མི་འགུལ༔ མིག་མ་འགུལ་བས་དབྱིངས་མི་འགུལ༔ རླུང་མ་འགུལ་བས་རིག་པ་མི་འགུལ་བར་ངེས་སོ༔ སྡོད་པ་གསུམ་གྱིས་ཚད་བཟུང་བ་ནི༔ ཕྱི་སྣང་བ་སྡོད་པས་འོད་སྣང་ལ་བྱན་ཚུད༔ ནང་ཕུང་པོ་སྡོད་པས་བྱ་རྩོལ་དང་བྲལ༔ གསང་བ་རླུང་སེམས་སྡོད་པས་ཁམས་གསུམ་དུ་ལྡོག་པ་མ་ཡིན་ནོ༔ དུས་རྟག་ཏུ་ངག་བཅད་པས་ཆོས་བརྗོད་པ་མེད་པའི་དོན་རྟོགས་པའོ༔ སྨུག་ནག་ཁྲོས་མ་ནག་

མོ་མཐུ་མོ་ཆེས་བཀའ་འདི་སྲུངས༔ ཡི་གེ་མ་རུ་ལ་མངོན་སུམ་སྙིང་ཐིག་གི་སྐོར༔ བེ་མ་ལ་མི་ཏྲས་སྒྲ་རང་འགྱུར་དུ་མཛད་པའོ༔ ཨྠྀི༔ ད་ནི་གང་ཟག་འཇུག་དོན་དང་༔ འཁོར་བའི་འདམ་ནས་བརྒལ་དོན་དང་༔ སྐལ་ལྡན་སྣང་བ་སྤེལ་དོན་དུ༔ ཡི་གེ་མ་རུའི་སྐོར་དག་ལས༔ རབ་ཏུ་ཟབ་པས་འདིར་དགོད་བྱ༔ ཕྱི་སྐོར་ནང་སྐོར་གསང་སྐོར་དང་༔ གསང་བ་བླ་ན་མེད་པའི་སྐོར༔ དེ་ལས་མངོན་སུམ་སྙིང་ཐིག་གི༔ བླ་ན་མེད་པའི་སྤྱོད་པའི་སྐོར༔ དེ་ལ་སྐལ་བ་དང་ལྡན་པ་འཁོར་བ་བློས་དོར་བ་དེས༔ བླ་མ་མཁས་པ་ལ་གདམས་པ་དང་བྱིན་རླབས་དབང་དང་བཅས་པ་ཞུས་ལ༔ མཁའ་འགྲོ་ལ་ཚོགས་ཀྱི་འཁོར་ལོ་དང་དཔའ་བོ་དང་དཔའ་མོ་ལ་དགའ་སྟོན་ཆེན་པོ་བྱས་ལ༔ དེ་ནས་གོང་དུ་བསྟན་པའི་དབང་གི་རིམ་པ་རྫོགས་པ་དང་སྤྱོད་པ་བྱ་སྟེ༔ ལུས་ནི་རྒྱུག་དང་ཉལ་བ་དང་༔ ཞེས་པ་གསེར་ཡིག་ཅན་ལས་ཤེས་པར་བྱའོ༔ སྔགས་དང་ཁ་ཏོན་ཆོས་ཀྱི་སྒྲ༔ ཞེས་པ་ངག་གི་སྤྱོད་པའང་གསེར་ཡིག་ཅན་ལས་འབྱུང་བ་བཞིན་བྱའོ༔ དགའ་དང་མི་དགའ་བདེ་སྡུག་ཅེས་པ་ཡིད་རུ་ཤན་འབྱེད་པ་ཡང་གསེར་ཡིག་ཅན་ལས་ཤེས་པར་བྱའོ༔ དེ་ལྟར་ལུས་བྱ་བྱེད༔ སེམས་དྲན་བསམ། དེའི་རིམ་པ་འདས་རྗེས་ལྟར་བྱས་ལ༔ དེ་ལ་དགོས་པ་ཅི་ཡོད་ཅེ་ན༔ ལུས་རུ་ཤན་ཕྱེ་བས་ཕྱིས་འཁོར་བར་འཇུག་མི་སྲིད་དོ༔ ངག་ཡང་དེ་ལྟར་རོ༔ དེ་ནས་སེམས་རུ་ཤན་ཕྱེ་བས་སེམས་ཕྱིས་འཁོར་བར་འཇུག་མི་སྲིད་པས་ན་རུ་ཤན་འབྱེད་པའི་སྤྱོད་པ་མཆོག་ཏུ་ཟབ་པས་འདི་ལ་ཡིད་ཆེས་རྒྱབ་བརྟེན་བྱའོ༔ དེ་ནས་བླ་མས་རྣལ་དུ་འབེབས་པའི་མན་ངག་བསྟན་པར་བྱ་སྟེ༔ ཁྱོད་འཁྲུལ་པ་སྤངས་པའི་ཡིད་ཀྱིས་ཉོན༔ ཞེས་བཀའ་སྩལ་ནས༔ དེ་ཡང་དད་པ་དང་

ལྡན་པ་དེས་ཡུལ་ནམ་མཁའ་སྟོང་པ་སྤྲིན་དང་བྲལ་བ་དང་༔ རིག་པ་རྡོ་རྗེ་ལུ་གུ་རྒྱུད་བཙོན་དུ་བཟུང་བ་དང་༔ རླུང་དྲག་ཏུ་དལ་བ་བསྟེན་པ་དང་༔ གསུམ་པོ་དེ་ལས་མ་བྲལ་བར་ཉམས་སུ་བླངས་ན་དེ་དག་གིས་ནི་ཆོས་ཉིད་ཀྱི་ལམ་མངོན་སུམ་དུ་འཇུག་པའི་ཕྱིར༔ རྣལ་འབྱོར་པས་བྱ་བ་གཞན་སྤངས་ལ་ཉིན་མཚན་དུ་མི་འབྲལ་བར་ཉམས་སུ་བླངས་པས་ཡེ་ཤེས་ལྔ་རྫོགས་པའི་ཐིག་ལེའི་ནང་དུ་སྐུའི་ཆོས་ཉིད་དག་པ་མཐོང་བ་ལ་ཐེ་ཚོམ་བྱར་མེད་དེ༔ འདི་ཡང་དབྱིངས་རྣམ་པར་དག་པའི་སྒྲོན་མའི་གནད་ཡིན་ནོ༔ ཨྠྀི༔ སྐྱེས་བུ་རྡོ་རྗེ་ལེགས་པ་ཆོས་སྐྱོང་མཐུ་བོ་ཆེ ས་བཀའ་འདི་སྲུངས་ཤིག༔ ས་མ་ཡཱ༔ ན་ར་ཀ ན་ཕག་གི་སོ་ཐཾ༔ གསང་ངོ་༔ རྒྱ་རྒྱ་རྒྱ༔

སྤྲོས་མེད་ཀྱི་དབང་ཆོག

སྤྲོས་མེད་ཀྱི་དབང་ཆོག་བཞུགས་སོ༔ རིན་ཆེན་བཀོད་པ༔

བཅོམ་ལྡན་འདས་སྤྲོས་པ་ཐམས་ཅད་ཉེ་བར་ཞི་བའི་དཔལ་རྡོ་རྗེ་འཆང་ལ་ཕྱག་འཚལ་ལོ༔ དད་དང་ལྡན་པའི་སྐལ་ལྡན་ལུས་ཅན་གྱིས༔ རང་བཞིན་རྫོགས་པ་ཆེན་པོའི་དོན་ལ་ཡང་༔ རྨོངས་པ་མེད་ཕྱིར་འཇུག་སྒོ་གསལ་བྱའི་ཕྱིར༔ ཕྲ་ཐིག་རིན་ཆེན་དབྱིབས་ཀྱི་རྒྱན་སྤྲས་པའི༔ དབང་བཞི་རྫོགས་པར་བྱེད་པའི་དོན་ཉིད་དུ༔ སྤྲོས་ལ་དགའ་བའི་དོན་དུ་དེ་བསྟན་ནས༔ ད་ནི་སྤྲོས་དང་བྲལ་བའི་དོན་དུ་ཡང་༔ སྤྲོས་མེད་དབང་གི་བསྐུར་བའི་གནས་ཉིད་ནི༔ འདི་ལྟར་དམ་ཚིག་ལྡན་པས་ངེས་པར་ཟུང་༔ གལ་ཏེ་སྐལ་བ་དང་ལྡན་པ་དབང་བཞི་རྫོགས་པར་བྱེད་པའམ༔ ཡང་ན་སྤྲོས་པ་ལ་མི་དགའ་བ་རྣམས་ལ༔ འདི་ལྟར་སྤྲོས་པ་མེད་པའི་དབང་རང་བཞིན་རྫོགས་པ་ཆེན་པོའི་དབང་བསྐུར་འདི་ནི་སྣོད་དང་ལྡན་པའི་སྐལ་ལྡན་གཉིས་སམ་གསུམ་ཚུན་ཆད་ལས༔ དེ་ལས་མང་ན་དམ་ཚིག་གི་ཆད་པ་འབབས་པས༔ འདི་ལྟ་བུའི་དད་པ་ཅན་འཁོར་བ་ལ་བློ་ལོག་པ་རང་ཤུགས་ཀྱི་ངང་ཚུལ་བཟང་ཞིང་སོས་དལ་བ༔ རྣམ་པར་རྟོག་པ་བག་ཀྱིས་ཆུང་བ༔ འདོད་པ་ཆུང་ཞིང་ཆོག་ཤེས་པ་ནི་རང་བཞིན་རྫོགས་པ་ཆེན་པོའི་སྣོད་ཡིན་པས༔ དེ་ལྟ་བུའི་སློབ་མ་གཅིག་ནས་གཉིས་

གསུམ་ཚུན་ཆད་ལ་དབང་བསྐུར་རོ༔ དེ་ལ་སློབ་དཔོན་གྱིས་སྔོན་དུ་བྱ་བའི་རིམ་པ་དང་༔ སློབ་མས་སྔོན་དུ་བྱ་བའི་རིམ་པའོ༔ དེ་ལ་བླ་མ་ཉིད་ལ་སློབ་མས་དབང་གི་ཞུ་བ་ཕུལ་ནས་དེ་ལ་ནུས་པ་འཇུག་པའི་དོན་དུ་རང་གི་བླ་མ་ལས་དབང་བསྐྱར་ལ་ཞུ༔ གལ་ཏེ་མི་བཞུགས་ན་རང་གི་བླ་མ་ཉིད་ནམ་མཁར་བཞུགས་པ་ལས་སྤྲོས་པ་མེད་པའི་དབང་རྣམས་བླང་བ་དང་༔ བརྒྱུད་པའི་བླ་མ་རྣམས་ལ་གསོལ་བ་གདབ་པར་བྱ་བ་དང་༔ དྲི་མ་དག་པར་བྱ་བའི་ཕྱིར་ཡི་གེ་གསུམ་ལ་ངག་འབྱོངས་པར་བྱ་བ་དང་༔ གཉིས་སུ་མེད་པའི་དོན་བློ་ལ་བསྐྱེད་པའི་ཕྱིར་ཡེ་ཤེས་ལྔའི་དམ་ཚིག་བསྒོམ་པ་དང་༔ འཁོར་བ་ལས་ཡིད་དབྱུང་བར་བྱ་བའི་ཕྱིར་མི་རྟག་པ་རྒྱུད་ལ་བསྒོམ་པ་དང་༔ སྤྱོད་ལམ་གྱི་རྗེས་སུ་བཟུང་བའི་ཕྱིར་བྱ་བྱེད་ཀྱི་སྤྱོད་པ་ཉི་ཤུ་རྩ་གཅིག་བརྩམ་པར་བྱ་བ་དང་༔ ལྟ་བའི་དོན་དྲན་པར་བྱ་བའི་ཕྱིར་སྟོང་པ་ཉིད་ཀྱི་རྒྱས་བཏབ་པ་ལ་སོགས་ནི་སློབ་དཔོན་གྱི་སྔོན་དུ་འགྲོ་བའི་ལས་སོ༔ དེ་ལྟར་སློབ་དཔོན་གྱིས་སྔོན་དུ་འགྲོ་བའི་རིམ་པ་བསྙེན་པ་རྫོགས་པར་བྱས་ལ༔ སློབ་མ་དད་པ་དང་ལྡན་པ་དེ་ཡང་འཁོར་བ་ལས་དབྱུང་བར་བྱ་བའི་ཕྱིར་གནས་དབེན་པར་མི་རྟག་པ་བསྒོམ་

པའི་མན་ངག་རྣམས་བསླབས་ལ་སྒོམ་དུ་བཅུག་སྟེ༔ ཞག་ལྔའམཿ བདུན་ནམཿ བཅུ་གཅིག་གི་བར་ལ་སྒོམ་དུ་གཞུག་གོ༔ དེ་ལྟར་བསྒོམས་པས་དད་པ་དྲག་པོ་སྐྱེ་བ་དང་འཁོར་བ་ལས་ཡིད་དབྱུང་སྒྱིད་ལུག་པ་དག་འབྱུང་བར་ངེས་སོ༔ དེ་ནས་རྡོ་རྗེ་སློབ་དཔོན་གྱིས་འཁོར་བའི་ཉེས་དམིགས་སངས་རྒྱས་ཀྱི་ཡོན་ཏན་རྣམས་བཤད་ལ་སྤྲོས་པ་མེད་པའི་དབང་བསྐུར་བའི་གནས་རབ་ཏུ་དབེན་པར་དཔོན་སློབ་རྣམས་ཕྱིན་ཏེ༔ གནས་ཁང་གི་ནང་ཐམས་ཅད་དུ་དྲི་ཞིམ་པོ་སྣ་ཚོགས་པས་ཆག་ཆག་བཏབ་པ་དང་མཎྜལ་ཟླུམ་པོ་མེ་ལོང་གི་ངོས་ལྟར་མཉམ་པར་བྱས་ལ༔ དེ་ཉིད་དབུས་སུ་རྡུལ་ཚོན་གྱི་བུམ་པ་བསྣོལ་མར་རབ་ཏུ་ལེགས་པ་དམར་པོ་ཁ་རྒྱན་དང་མགུལ་ཆིངས་དང་བཅས་པ་བྲིས་ལ༔ ཟླུམ་པོའི་ཐ་མ་ཚོན་སྣ་ལྔའི་ར་བས་བསྐོར༔ དེའི་ཤར་ཕྱོགས་སུ་ཤིང་གི་ཁྲིའི་སྟེང་དུ་རིན་པོ་ཆེའི་བུམ་པ་གས་པ་དང་ཆག་པ་དང་ཞོམ་པ་མེད་པ་གསུམ་གྱི་ནང་དུ་སྨན་སྣ་ཚོགས་པ་དང་༔ འབྲུ་སྣ་ཚོགས་པ་དང་༔ རིན་པོ་ཆེ་སྣ་ཚོགས་པ་དང་༔ འོ་མ་དང་༔ མར་ལ་སོགས་པས་ལེགས་པར་བཀང་ལ༔ མེ་ཏོག་དང་འབྲས་བུ་ཅན་གྱི་ཤིང་གིས་ཁ་རྒྱན་བྱས་པར་རས་དཀར་པོ་དྲི་མ་མེད་ཅིང་ཁ་ཚར་མ་ཉམས་པ་གསུམ་གྱིས་མ གུལ་པ་བཅིང་ངོ་༔ དེ་ལྟར་བུམ་པ་རེ་རེའི་སྟེང་དུ༔ མེ་ལོང་གསུམ་དང་༔ རྨ་བྱའི་མདོངས་གསུམ་དང་༔ མན་ཤེལ་གསུམ་གཞག་པར་བྱའོ༔ དེ་ནས་སློབ་མ་དེ་ཀུན་ཕྱི་རོལ་དུ་ཁྲུས་ཆུ་ནས་བཏོན་ལ་གོས་གསར་པ་གྱོན་པ་ལ་སོགས་པའི་རྒྱན་དག་གིས་བརྒྱན་པ་ཐལ་མོ་སྦྱར་ནས་གྲལ་ལ་ལེགས་པར་འཁོད་དེ༔ བགེགས་ཀྱི་བར་ཆད་ཞི་བར་བྱ་བའི་ཕྱིར་ལས་ཀྱི་སློབ་དཔོན་གྱིས་གུ་གུལ་གྱི་དུད་པས་བདུག༔ དེ་ནས་སྤྲོས་པ་མེད་པའི་དབང་བསྐུར་བའི་ཆེད་དུ་ནོར་བུ་གསེར་གྱི་མཎྜལ་དབུལ་ཞིང་ཐལ་མོ་སྦྱར་ནས་གུས་པས་འདུག་པར་བྱའོ༔ འཁོར་བའི་མཚན་ཉིད་རྣམས་བསྟན་པར་བྱའོ༔ དེ་ལ་སློབ་དཔོན་གྱིས་གླིང་ལ་ཁྱད་པར་དུ་འཕགས་པ་འཛམ་བུ་གླིང་དུ་སྐྱེ༔ ཐོབ་པར་དཀའ་བའི་མི་ལུས་

རིན་པོ་ཆེ་ཐོབ༔ ཚང་བར་དཀའ་བའི་དབང་པོ་ལྔ་ཚང་༔ འདུག་པར་དཀའ་བའི་ཤཱཀྱ་ཐུབ་པའི་བསྟན་པ་ལ་གནས༔ འཕྲད་པར་དཀའ་བའི་དམ་པའི་ཆོས་རིན་པོ་ཆེ་དང་འཕྲད་ནས༔ ཆོས་མ་བྱས་ན་མི་ཚེ་སྟོང་ལོག་ཡིན་པས༔ ད་རེས་ཚེ་འདི་ལ་རྫོགས་པའི་སངས་རྒྱས་རིན་པོ་ཆེ་ཐོབ་པར་བྱས་ལ་སེམས་ཅན་ཐམས་ཅད་ཐུགས་རྗེའི་སྒོ་ནས་འདྲེན་དགོས་པས༔ ད་རེས་ཚེ་འདི་ལ་ཐོབ་པར་བྱའོ་སྙམ་པའི་བློ་བསྐྱེད་ནས་སྨིན་པའི་ལམ་ལ་འཇུག་དགོས༔ དེ་གྲོལ་བར་བྱེད་པའི་ཐབས་ལ་གནས་པར་བྱས་ནས་མཐར་སངས་རྒྱས་བསྒྲུབ་པར་འདོད་པས་ན༔ དང་པོ་མ་སྨིན་པ་སྨིན་པར་བྱེད་པ་ལ་དབང་བཞི་རྫོགས་པར་ཐོབ་དགོས་པས་འདི་ཞུའོ༔ དེས་མ་འགྲུབ་ན་སྤྲོས་མེད་མན་ཆད་ཐོབ་པར་བྱས་ནས་ཉམས་སུ་ལེན་དགོས༔ དེ་ནས་འཁོར་བའི་མཚན་ཉིད་ཡིད་ལ་དྲན་པར་བྱས་ནས་བཟླས་པ་ལ་ཞུགས་ཏེ༔ དེ་ཡང་འཁོར་བའི་མཚན་ཉིད་དེ་ལས་བཟློག་པར་བྱ་བའི་ཕྱིར་དུ་འཁོར་བའི་ཞེན་པ་དང་བྲལ་བར་བྱས་ཏེ། ཆོས་ཐམས་ཅད་རྨི་ལམ་ལྟ་བུ༔ སྒྱུ་མ་ལྟ་བུ༔ སྤྲུལ་པ་ལྟ་བུ༔ དྲི་ཟའི་གྲོང་ཁྱེར་ལྟ་བུ༔ བར་སྣང་གི་གློག་ལྟ་བུ༔ མྱུར་བྱེད་ཀྱི་འཁོར་ལོ་ལྟ་བུ༔ དཔེ་དུ་མས་མཚོན་པར་བྱའོ༔ དེ་ཉིད་ཀྱི་དོན་གྱིས་འཁོར་བའི་ཞེན་པ་དང་བྲལ་བས་གོང་མའི་དོན་ལ་གནས་པའི་དགོས་པ་ཡོད་དོ༔ ཡང་འཁོར་བ་ལ་སྐྱོ་བ་བསྐྱེད་པ་ལས༔ འཁོར་བའི་མཚན་ཉིད་ནི་འདོད་པ་དང་བྲལ་བའི་ཕྱིར་འཁོར་བ་ལ་ཞེན་པའི་སྐྱོན་དེ་སྤང་བར་བྱའོ༔ འཁོར་བ་ནི་དཔེ་ཟོ་ཆུའི་ཁྱུད་མོའི་རྣམ་པ་དང་མཚུངས༔ མེ་ཆེན་པོ་འབར་བའི་ནང་དུ་སྦྲང་བུ་ཚུད་པ་ལྟ་བུ་དང་༔ འདབ་ཆགས་རྙི་ལ་ཚུད་པ་ལྟ་བུ་དང་༔ རི་དྭགས་རྒྱ་ལ་ཚུད་པ་ལྟ་བུ་དང་༔ ཕྱིའི་

རྒྱ་མཚོ་ལ་གཟེངས་ཐག་ཆད་པ་ལྟ་བུ་དང་༔ རབ་ཏུ་བརྒལ་དཀའ་བའི་འདམ་རྫབ་ཆེན་པོར་ཚུད་པ་ལྟ་བུ་དང་༔ འཇིགས་པ་དང་བཅས་པའི་འཕྲང་ལ་ལམ་ནོར་བ་ལྟ་བུ་དང་༔ གསོད་པའི་གཤེད་མའི་དཀྱིལ་དུ་ཚུད་པ་ལྟ་བུ་དེ་ལ་སོགས་པས་བསྟན་ནོ༔ ཡང་འདོད་ཡོན་ལ་སྐྱོ་བ་བསྐྱེད་པའི་ཕྱིར༔ འདོད་ཡོན་ནི་སྐོམ་གྱིས་གདུངས་པ་ལ་ཚྭ་ཆུ་བླུད་པ་ལྟ་བུ་དང་༔ དུག་གི་ལོ་མ་ལྟ་བུ༔ དུག་སྦྲུལ་གྱིས་ཟིན་པ་ལྟ་བུ༔ སྤུ་གྲིའི་སོ་ལྟ་བུ། བུད་མེད་ཀྱི་འདོད་ཆགས་ལྟ་བུ་ལ་སོགས་པ་འཁོར་བའི་མཚན་ཉིད་བསྟན་ནོ༔ འདི་རྣམས་ལས་དང་པོ་པ་དབང་ལ་འཇུག་པའི་སྔོན་དུ་བསྟན་པར་བྱའོ༔ འཁོར་བའི་མཚན་ཉིད་སངས་རྒྱས་ཀྱི་ཡོན་ཏན་ལ་སོགས་པ་སྔོན་དུ་བཤད་དོ༔ སྤྲོས་པ་མེད་པའི་དབང་བསྐུར་བ་ལ་སྔོན་དུ་འཇུག་པའི་ཆོ་ག་དང་དངོས་གཞི་གཉིས་ཡིན་ཏེ༔ ཐུན་མོང་གི་འཇུག་པ་དང་༔ ཐུན་མོང་མ་ཡིན་པའི་འཇུག་པ་དང་གཉིས་ལས༔ ཐུན་མོང་གི་འཇུག་པ་ལ་སྔོན་དུ་བླ་མ་ལ་གསོལ་བ་གདབ་པ་ནི༔ བླ་མ་རྡོ་རྗེ་འཛིན་པ་རྣམས་བདག་ལ་དགོངས་སུ་གསོལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ནི༔ རྡོ་རྗེ་དང་༔ རིན་ཆེན་དང་༔ པདྨ་དང་༔ ལས་དང་༔ བདེ་བར་གཤེགས་པའི་རིགས་ཐམས་ཅད་བདག་ལ་དགོངས་སུ་གསོལ༔ བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ་བླ་མ་རྡོ་རྗེ་འཛིན་པ་ཆེན་པོས་བདག་གི་ལུས་བྱིན་གྱིས་བརླབ་ཏུ་གསོལ༔ ངག་བྱིན་གྱིས་བརླབ་ཏུ་གསོལ༔ ཡིད་བྱིན་གྱིས་བརླབ་ཏུ་གསོལ༔ སྨིན་པར་བྱིན་གྱིས་བརླབ་ཏུ་གསོལ༔ གང་བར་མཛད་དུ་གསོལ༔ རྒྱས་པར་བྱིན་གྱིས་བརླབ་ཏུ་གསོལ༔ ཆེར་འཕེལ་བར་མཛད་དུ་གསོལ༔ ཞེས་གསོལ་བ་གདབ་བོ༔ ཡང་བླ་མ་ལ་གསོལ་བ་བཏབ་ལ༔ དམ་བཅའ་བའི་ཚིག་རྣམས་

ཁས་བླང་བར་བྱའོ༔ བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ༔ ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ་རྡོ་རྗེ་དང་༔ རིན་པོ་ཆེ་དང་༔ པདྨ་དང་༔ ལས་དང་༔ དེ་བཞིན་གཤེགས་པའི་རིགས་རྣམས་དགོངས་སུ་གསོལ༔ དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པའི་དཀོན་མཆོག་གསུམ༔ བླ་མ་ལ་ཡང་ཕྱག་འཚལ་ལོ༔ བླ་མ་རྡོ་རྗེ་འཛིན་པ་དང་༔ དཀོན་མཆོག་གསུམ་ལ་སྐྱབས་སུ་མཆི༔ སྡིག་པ་ཐམས་ཅད་སོ་སོར་བཤགས༔ བྱང་ཆུབ་སེམས་ནི་བླ་ན་མེད༔ དམ་པ་བདག་གིས་བསྐྱེད་པར་བགྱི༔ རིགས་ལྔའི་དམ་ཚིག་རྗེས་བཟུང་སྟེ༔ རྡོ་རྗེ་དྲིལ་བུ་ལ་སོགས་པ༔ དམ་ཚིག་རྫས་རྣམས་གཟུང་བར་བགྱི༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པ་དཀོན་མཆོག་གསུམ༔ ནམ་དུ་ཡང་ནི་མི་གཏོང་ངོ༔ རྡོ་རྗེ་སློབ་དཔོན་མི་གཏོང་ངོ༔ རྡོ་རྗེ་སྤུན་སྲིང་རྣམས་ལ་ཡ ང་༔ ནམ་ཡང་སྨད་པར་མི་བྱའོ༔ སེམས་ཅན་རྣམས་ལ་འཚེ་བ་སྤང་༔ འཕགས་པ་རྣམས་ལ་སྨད་མི་བགྱི༔ ཉན་ཐོས་རང་སངས་རྒྱས་རྣམས་ལ༔ ཅུང་ཟད་བརྙས་པར་མི་བྱ་ཞིང་༔ གསང་སྔགས་སྤང་བར་མི་བྱ་ཞིང་༔ བསྙེན་སྒྲུབ་ལས་ཀྱི་མཐའ་རྣམས་ཀྱང་༔ དུས་འདི་ཉིད་ནས་གཟུང་བར་བྱ༔ དམ་ཚིག་སྡོམ་པ་ལ་གནས་ཤིང་༔ སྐུ་གསུང་ཐུགས་ལས་མི་འདའ་འོ༔ སྲོག་ཆགས་གསད་པར་མི་བྱ་ཞིང་༔ དམ་ཆོས་ནམ་ཡང་མི་གཏང་ངོ་༔ བླ་མའི་བྱ་བ་མི་གཏང་ཞིང་༔ འཁྲུལ་པའི་བྱ་བ་མི་བགྱི་འོ༔ སེམས་ཅན་སྨིན་པ་ཉིད་དུ་བགྱི༔ མ་གྲོལ་མ་རྣམས་དགྲོལ་བ་དང་༔ མ་བསྒྲལ་མ་རྣམས་བསྒྲལ་བ་དང་༔ དབུགས་མ་དབྱུང་རྣམས་དབུགས་དབྱུང་སྟེ༔ སེམས་ཅན་མྱ་ངན་འདས་ལ་འགོད༔ བསྟན་

པ་སྨད་པར་མི་བྱ་ཞིང་༔ བླ་མ་ལ་ཡང་ཡོན་དབུལ་ལོ༔ འཁོར་བ་རིང་དུ་སྤང་བྱ་ཞིང་༔ མྱང་འདས་དང་དུ་བླང་བར་བགྱི༔ དགེ་སློང་སེམས་སུན་མི་དབྱུང་ཞིང་༔ བསམ་གཏན་སྒོམ་པ་དཀྲུགས་མི་བྱ༔ ཆོས་དང་གང་ཟག་ལ་མི་སྨད༔ ཁྱད་པར་དཀྱིལ་འཁོར་བསྒོམ་པར་བགྱི༔ རྫོགས་རིམ་སྒོམ་ལས་མི་འདའོ༔ ཇི་ལྟར་བླ་མས་གསུངས་པ་ལ༔ བདག་ནི་ནམ་ཡང་མི་འདའོ༔ ཞེས་པས་བླ་མའི་མདུན་དག་ཏུ༔ དམ་བཅའི་ཚིག་དང་གསོལ་གདབ་སོངས༔ དེ་ནས་སློབ་དཔོན་བདག་ཉིད་ཀྱི༔ ཐོད་པ་ཚལ་བུའི་ནང་དག་ཏུ༔ བདུད་རྩི་ལྔ་ཡི་ཆུ་བླུགས་ལ༔ ལག་ཏུ་བཟུང་སྟེ་འདི་སྐད་བརྗོད༔ ཧཱུྃ་འདི་ནི་དམ་ཚིག་དམྱལ་བའི་ཆུ༔ དམ་ཚིག་འདས་ན་འཚིག་པར་འགྱུར༔ དེ་བས་དམ་ཚིག་སྲོག་གི་ཆུ༔ སྙིང་ལ་བཞག་པས་འཐུང་བར་གྱིས༔ གལ་ཏེ་ཉམས་པར་མ་གྱུར་ན༔ འདི་ནི་དམ་ཚིག་དངོས་གྲུབ་ཆུ༔ མཆོག་དང་ཐུན་མོང་ལོངས་སྤྱོད་ཅིང་༔ རྫོགས་པའི་སངས་རྒྱས་འབྲས་བུ་ཐོབ༔ དེ་བས་འདི་ཉིད་ཐུབ་པར་གྱིས༔ ཞེས་བརྗོད་དམ་ཚིག་མནའ་ཆུ་བླུད༔ རྡོ་རྗེ་ཆེན་པོའི་དམ་ཚིག་ནི༔ སློབ་མས་འདི་སྐད་བརྗོད་པར་བྱ༔ བདག་ནི་འདི་ནས་བཟུང་ནས་སུ༔ བྱང་ཆུབ་མ་ཐོབ་བར་དག་ཏུ༔ འཁྲུལ་བའི་བྱ་བ་བྱེད་རེ་ཀན༔ དམ་ཆོས་བླ་མ་སྤོང་རེ་ཀན༔ ཆོས་མིན་བྱ་བ་བྱེད་རེ་ཀན༔ བླ་མས་ཅི་གསུང་མི་ཉན་རེ༔ སེམས་ཅན་ཀུན་ལ་འཚེ་རེ་ཀན༔ བདེ་ཆེན་ལམ་དུ་མི་སློང་རེ༔ འཇིག་རྟེན་འདོད་ཕྱིར་འབྲངས་རེ་ཀན༔ ལྟ་དང་སྒོམ་དང་སྤྱོད་པ་ནི༔ སྲོག་གི་ཕྱིར་ཡང་གཏོང་རེ་ཀན༔ དུར་ཁྲོད་ལ་སོགས་དབེན་པའི་གནས༔ འདི་ནས་བཟུང་སྟེ་མི་བསྟེན་རེ༔ མདོར་ན་འཇིག་རྟེན་བྱ་

བ་གཏོང་༔ འདས་པའི་བྱ་བ་གཏང་རེ་ཀན༔ ཞེས་ནི་སློབ་མས་རིམ་པ་བཞིན༔ རྡོ་རྗེའི་དམ་ཚིག་མནའ་བསྐྱལ་ལོ༔ བླ་མ་དཔལ་ལྡན་རྡོ་རྗེ་འཆང་༔ མནའ་ཡི་ཉེས་དམིགས་ལེགས་པར་བཤད༔ ཐུབ་པའི་ཡོན་ཏན་ལེགས་བཤད་དོ༔ དེ་ནས་བླ་མས་གདམས་པ་འབོག་ཅིང་དམ་བཅའ་བའི་ཚིག་རྣམས་བརྗོད་པར་བྱའོ༔ ཀྱཻ་སྐལ་ལྡན་སེམས་ཀྱི་བུ་གཅིག་པོ༔ ཕྱི་ནང་གསང་བའི་ཐེག་པ་དང་༔ དམ་ཆོས་བསྒྲུབ་པར་དམ་ཆོས་ཤིག༔ སེམས་ཅན་ཀུན་ལ་བྱམས་པའི་སེམས༔ དུས་འདི་ཉིད་ནས་མ་སྤང་ཞིག༔ དཀྱིལ་འཁོར་འཁོར་ལོ་སྒོམ་པ་དང་༔ བླ་མ་ནམ་ཡང་མ་གཏང་ཞིག༔ རྡོ་རྗེ་མཆེད་ལ་མི་ཁྲོ་ཞིང་༔ སངས་རྒྱས་ཆོས་དང་དགེ་འདུན་ཏེ༔ དཀོན་མཆོག་གསུམ་པོ་བསྐུལ་བ་དང་༔ ཇི་ལྟར་སྔགས་ཀྱི་དམ་ཚིག་དང་༔ སྡོམ་པ་ཐམས་ཅད་གཟུང་བར་བགྱི༔ བསྟན་པ་ཀུན་ལ་གནོད་པ་སྤང་༔ ཐར་བའི་ལམ་དུ་འགྲོ་བར་བགྱི༔ ཀྱཻ་སྐལ་ལྡན་རྫོགས་པའི་རང་བཞིན་ཅན༔ དབང་བསྐུར་ཆོ་ག་ཇི་ལྟ་བ༔ གཞན་ལ་རྗོད་པར་མ་བྱེད་ཅིག༔ དབང་རྫས་རྣམས་དང་སྔགས་ཀྱི་ཚིག༔ དབང་བསྐུར་མ་ཐོབ་མི་རྣམས་ལ༔ ནམ་ཡང་བཤད་པར་མ་བྱེད་ཀྭའི༔ འཁོར་བ་རིང་དུ་སྤང་བར་གྱིས༔ གང་གི་རྡོ་རྗེ་འཛིན་པ་ཡི༔ དངོས་གྲུབ་རྣམས་ནི་མ་གཏང་ཞིག༔ ཅེས་བརྗོད་ལ་སྡོམ་པ་འབོག་པར་བྱའོ༔ མི་དགེ་བའི་ལས་སོགས་སྤང་བའི་ཆོས་ནི་བྱ་བའི་རིམ་པ་བཤད༔ དེ་ཡན་ཆད་ཀྱིས་ཐུན་མོང་གི་འཇུག་རྫོགས་ནས༔ ད་ཐུན་མོང་མ་ཡིན་པའི་འཇུག་པ་ནི་རས་སམ་དར་གྱིས་གདོང་གཡོགས་ཤིང་༔ སྤྲོས་པ་ལ་དགའ་ན་རིགས་ལྔའི་གདམས་པ་འབོག༔ དེ་ནས་བླ་མ་ལ་

གསོལ་བ་གདབ་པར་བྱ་སྟེ༔ བླ་མ་རྡོ་རྗེ་འཛིན་པ་ལ༔ བདག་ནི་སྐལ་ལྡན་སྙིང་གི་བུ༔ དད་པས་རབ་ཏུ་ཉན་པར་འཚལ༔ རང་བཞིན་རྫོགས་པ་ཆེན་པོ་ཡི༔ དབང་བསྐུར་ནང་དུ་འཇུག་ལགས་པས༔ དཔའ་བོ་རྡོ་རྗེ་བླ་མ་ཡིས༔ རང་གི་སེམས་ཀྱི་གནས་ལུགས་ཀྱི༔ ཨ་ཏིའི་དཀྱིལ་འཁོར་བསྟན་དུ་གསོལ༔ བདག་ནི་ཡང་དག་འདིར་ཞུགས་ནས༔ སླར་ཡང་ལྡོག་པར་མི་བགྱིད་དོ༔ ཞེས་གསོལ་བ་གདབ༔ དེ་ནས་བླ་མས་རྗེས་སུ་གནང་བ་སྦྱིན་ཏེ༔ ཨེ་མ་བུ་ཁྱོད་སྐལ་བ་བཟང་༔ སྐལ་ལྡན་བྱང་ཆུབ་སེམས་ཆེན་པོ༔ སྔོན་ཆད་རང་བཞིན་རྫོགས་ཆེན་གྱི༔ དབང་བསྐུར་ནང་དུ་མ་ཞུགས་པས༔ དོ་ནུབ་སྐལ་ལྡན་བུ་ཁྱོད་ལ༔ རྫོགས་ཆེན་དཀྱིལ་འཁོར་བསྟན་པར་བྱ༔ སེམས་ཀྱི་རྟོག་པ་ཀུན་སོལ་ལ༔ འཇིག་རྟེན་བཅིངས་པ་ཀུན་གྲོལ་གྱིས༔ འདི་ལ་སྤང་བླང་ཐ་སྙད་བྲལ༔ རིགས་དང་རྒྱུད་རྣམས་སྦྱོང་པ་ཡི༔ ལུས་ངག་བདེ་བའི་རྟེན་ཡིན་པས༔ དེང་ནས་བརྩམས་ཏེ་སླར་མ་ལྡོག༔ ཅེས་རྗེས་སུ་གནང་བ་བྱིན་ནས༔ མཎྜལ་གྱི་ཤར་ཕྱོགས་སུ་ལུས་གནད་ཙོག་པུ་ཐལ་མོ་སྦྱར་ནས་སེམས་མ་ཡེངས་པར་བླ་མ་ལ་གཏད་ནས་གདོང་གཡོགས་བཀྲོལ་བྱིན་དབབ་བོ་སྒོམ་དུ་གཞུག༔ དེ་ནི་བསྲེ་བ་ཐུན་མོང་མ་ཡིན་པ་རྫོགས་པ་ཆེན་པོ་མཉམ་པའི་རྒྱས་གདབ་པ་ཞེས་བྱའོ༔ དེ་ནས་མཎྜལ་དེའིི་ཐོ་ཕྱི་རྣམས་སུ་ལྷ་བཤོས་དང་མར་མེ་དང་༔ སྤོས་ལ་སོགས་པའི་མཆོད་པ་ཅི་འབྱོར་བའི་ཡོ་བྱད༔ མཁའ་འགྲོ་མ་རྣམས་མཉེས་པར་བྱ་བ་དང་༔ བར་ཆད་བསལ་བར་བྱ་བའི་ཕྱིར་ཚོགས་དང་གཏོར་མ་རབ་ཏུ་བཟང་བ་བཤམ་པར་བྱའོ༔ དེ་ནས་སྤྲོས་པ་མེད་པའི་དབང་བསྐུར་བ་ནི༔ ངག་གི་ནུས་པ་གཞུག་པ་དང་༔ ངག་རང་དག་ལ་འགྲོ་བའི་དོན་

ཡིན་ཏེ་དཔོན་སློབ་ཀུན་སོ་སོའི་ལུས་བདེ་བར་བཅོས་ལ༔ ངག་ཏུ་སྒྲ་ཆེ་བ་ཡང་མ་ཡིན༔ ཆུང་བ་ཡང་མ་ཡིན་པར༔ ཨ་ཨ་ཨཱ་ཞེས་བརྗོད་ཅིང་ཡིད་ཨ་ལ་གཏད་པ་ཞག་གཅིག་བརྗོད་པར་བྱ༔ དེ་ནས་ནུབ་གཉིས་པ་ལ་ཨ་ལིའི་ཚོགས་ཚང་བར་བརྗོད་དོ༔ ཨ་ཨཱ༔ ཨི་ཨཱི༔ ཨུ་ཨཱུ༔ རྀ་རཱྀ༔ ལྀ་ལཱྀ༔ ཨེ་ཨཻ༔ ཨོ་ཨཽ༔ ཨཾ་ཨཱ༔ དེ་ནས་ནུབ་གསུམ་པ་ལ་ཀ་ལིའི་ཚོགས་ཚང་བར་བརྗོད་པར་བྱ༔ ཀ་ཁ་ག་གྷ་ང་༔ ཙ་ཚ་ཛ་ཛྙ་ཉ༔ ཊ་ཋ་ཌ་ཌྷ་ཎ༔ ཏ་ཐ་ད་དྷ་ན༔ པ་ཕ་བ་བྷ་མ༔ ཡ་ར་ལ་ཝ་ཤ་ཥ་ས་ཧ་ཀྵ༔ འདིའི་དུས་ན་སློབ་དཔོན་གྱིས་ཨ་རྐྱང་པའི་དུས་ན་བུ་ཡིས་ཨ་བརྗོད་པས་རྩ་རྣམས་ཁ་བྱེ་སྟེ་ཨ་ཐོལ་ཐོལ་རང་འབྱུང་ངོ་༔ དེ་ལས་འོད་ཀྱི་གོང་བུ་རྣམས་ལས་འོད་འཕྲོས་པས་རང་བཞིན་ཀུན་ཏུ་བཟང་པོ་ཡབ་ཡུམ་སྦྱོར་མཚམས་ནས་བྱང་ཆུབ་ཀྱི་སེམས་འོད་ལྔའི་གོང་བུས་རང་གི་མགོ་མཇུག་ཁྱབ་པ་ལ་བློ་བཞག༔ འདིའི་དུས་ན་རྣ་བའི་སྒྲ་འབྱུང་བའི་རྩ་བཙིར་རོ༔ དེ་ལྟར་སློབ་མ་ཡང་ཡང་སྒོམ་དུ་གཞུག་གོ༔ བཅུག་པས་ཉམས་སུ་མྱོང་བ་ཁྱད་པར་ཅན་སྐྱེ་བར་ངེས་སོ༔ དེ་ནས་ཨ་ལིའི་ཚོགས་བརྗོད་པའི་རྗེས་སུ་ཨ་དེ་ཉིད་བརྗོད་པ་ཙམ་གྱིས་རྩ་རྣམས་ཀྱི་ནང་ནས་རང་བཞིན་རྫོགས་པའི་ཡི་གེ་རྣམས་རང་བྱུང་བས༔ རང་གི་ངག་ནས་ཀྱང་ཆོས་ཐམས་ཅད་ཀྱི་སྒྲ་སི་ལི་ལི་བྱུང་བ་ལ་བློ་བཞག༔ ཀ་ལིའི་དུས་སུ་བརྗོད་པའི་ཚེ་ཡི་གེ་དེ་དག་ཕྱིར་མངོན་པར་རང་གི་ཁོག་པའི་ནང་ཡི་གེ་མེར་གྱིས་ཁེངས་པ་ལ་བློ་གཞག་པར་བྱའོ༔ དེ་ནས་སྐལ་ལྡན་ལ་དབང་བསྐུར་བར་བྱ་སྟེ༔ ལུས་ངག་ཡིད་གསུམ་ཅིག་ཅར་བྱིན་གྱིས་བརླབས་པའི་དོན་དུ་དབང་བསྐུར་བ་ནི༔ ལུས་གཅེར་བུར་ཕྱུང་ལ་བུམ་པའི་ཆུ་དང་སིནྡྷུ་ར་ཡི་ཐིག་ལེ་ཞིག་སྤྱི་བོའི་

གཙུག་ཏུ་བྱས་ལ་ངག་ཏུ་ཨཱོཾ་ཨཱོཾ་ཞེས་དྲག་ཏུ་བརྗོད་དུ་གཞུག༔ སློབ་དཔོན་གྱིས་བུའི་མགྲིན་པའི་རྩ་གཉིད་ལོག་གཏེམས༔ འདིའི་དུས་སུ་ལུས་འདར་ཞིང་གཡོ་བ་དང་༔ ངག་རང་རྡོལ་བ་དང་༔ སེམས་བག་ཡངས་སུ་འགྱུར་བ་ཉིད་འབྱུང་༔ སློབ་དཔོན་གྱིས་སློབ་མའི་ལུས་ཐམས་ཅད་ཨཱོཾ་དཀར་པོ་ཞིག་ཏུ་དམིགས་ལ་དེ་འོད་དུ་ཞུ་བ་ལས་ཆོས་ཉིད་སྟོང་པའི་རྒྱས་གདབ༔ སློབ་དཔོན་གྱིས་བུམ་པའི་ཆུ་ཐིགས་པ་གཅིག་དང་སིནྡྷུ་ར་ཡི་ཐིག་ལེ་གཅིག་མགྲིན་པར་བྱས་ལ༔ སློབ་མའི་ངག་ཏུ་དྲག་ཤུལ་དང་བཅས་པས་ཨ་ཨཱ་བརྗོད་དོ༔ སློབ་དཔོན་གྱིས་སློབ་མའི་མཆན་ཁུང་གི་རྩ་གཏེམས༔ སློབ་མའི་ཤེས་པ་ནམ་མཁར་གཏོད་དུ་གཞུག༔ འདིའི་དུས་སུ་ལུས་རབ་ཏུ་འདར་བ་དང་༔ ངག་རབ་ཏུ་འདར་བ་དང་༔ སེམས་རབ་ཏུ་གསལ་བ་དག་འོང་ངོ་༔ སློབ་མའི་ལུས་ཨཱ་དམར་པོ་ཆེན་པོ་ཞིག་ཏུ་དམིགས་ལ་ཆོས་ཉིད་སྟོང་པ་ཉིད་ཀྱི་རྒྱས་གདབ་བོ༔ ཡང་སློབ་དཔོན་གྱིས་བུམ་པའི་ཆུ་ཐིགས་པ་གཅིག་དང་སིནྡྷུ་ར་ཡི་ཐིག་ལེ་སྙིང་ཁར་བྱས་ལ་ངག་ཏུ་ཧཱུྃ་ཧཱུྃ་ཞེས་དྲག་ཏུ་བརྗོད་དུ་གཞུག༔ བླ་མས་བུའི་མིག་གི་རྩ་གཏེམས༔ ཤེས་པ་འབྱུང་བཞི་ལ་གཏད་སློབ་མའི་ལུས་ཧཱུྃ་མཐིང་ནག་ཅིག་ཏུ་དམིགས་ལ་ཆོས་ཉིད་སྟོང་པ་ཉིད་ཀྱི་རྒྱས་གདབ་བོ༔ གཞན་དེའང་རྩ་གཏེམས་པ་གསུམ་ཇི་ལྟ་བ་བཞིན་དུ་བྱའོ༔ དེ་ནས་ཙན་དན་དཀར་པོའི་ཐིག་ལེ་གཅིག་སྨིན་མཚམས་སུ་བྱུག༔ དེའི་སྟེང་དུ་དམར་པོའི་ཐིག་ལེ་བྱ༔ དེའི་རྗེས་སྟོང་ཉིད་དར་ཅིག་བསྒོམ༔ དེ་ནས་བུམ་པ་ཡི་གེའི་རང་བཞིན་དུ་དམིགས་པ་ལ་སློབ་མའི་མགྲིན་པའི་གནས་སུ་ངག་ལ་བསྟིམ༔ ཆུ་དང་སྨན་ལ་སོགས་པ་རྣམས་རང་བཞིན་རྫོགས་པ་ཆེན་པོའི་མཚན་ཉིད་ཀྱི་སྒྲ་རང་བྱུང་སྟེ༔ བུམ་པ་མགོ་ཐོག་ཏུ་བཞག་ལ༔ ཆོས་

ཐམས་ཅད་བརྗོད་དུ་མེད་པའོ༔ བསམ་དུ་མེད་པའོ༔ བལྟར་མེད་པའོ༔ གཉིས་སུ་མེད་པའོ༔ མཚན་མ་མེད་པའོ༔ སྨོན་པ་མེད་པའོ༔ སྤྲོས་པ་མེད་པའོ༔ སྤྲོས་པའི་མཐའ་བརྒྱད་དང་བྲལ་བའོ༔ ཞེས་པའི་སྒྲ་རང་བྱུང་བས་སློབ་མ་ཡང་དེ་ཉིད་ཀྱི་རང་ཞིན་དུ་གྱུར་པར་དམིགས་ལ༔ དེ་ནས་སློབ་དཔོན་གྱིས་བུམ་པ་སློབ་མའི་སྤྱི་བོར་བཞག་ལ་དམིགས་པ་དང་ཚིག་རྣམས་ངག་ཏུ་བརྗོད་ཅིང་བྱའོ༔ དེ་ནས་ངག་གི་ལས་སྒྲིབ་རྫོགས་པར་བྱ་བའི་ཕྱིར་ཉི་ཟླ་ཁ་སྦྱོར་རམ་གཞན་གྱིས་ཤེས་ཀྱང་བཏུབ༔ རྡོ་རྗེའི་གླུ་ལན་གསུམ་བརྗོད༔ གཞན་ཡང་དུང་དང་ཆ་ལང་དང་འཁར་རྔ་དང་༔ ཤིང་རྔ་དང་དྲིལ་བུ་དང་༔ ཌཱ་མ་ལ་རུ་སོགས་དུས་གཅིག་ལ་བསྒྲག་ཅིང་ཡི་གེ་བརྒྱ་པ་བཟླས་སོ༔ དེ་ནས་ཚིག་བརྒྱད་ཀྱི་དོན་བཤད་དོ༔ དེ་ནས་སློབ་མའི་ངག་དང་སེམས་ལ་ཚིགས་སུ་བཅད་པའི་དབང་བསྐུར་བར་བྱ་སྟེ༔ རང་བཞིན་རྫོགས་པ་ཆེན་པོ་དང་མཉམ་པའི་རྒྱས་གདབ་པའི་ཕྱིར༔ ཚིག་གི་རྒྱལ་པོ་འདི་དག་ངར་བསྐྱེད་ལ་བརྗོད་པར་བྱའོ༔ ཨེ་མ་ཧོ༔ ཆོས་ཉིད་སྤྲོས་དང་བྲལ་བའི་བདེ་ཆེན་འདི༔ བལྟར་མེད་བསམ་ཡུལ་ཀུན་ལས་འདས་པ་ངོ་མཚར་ཆེ༔ གཉིས་མེད་རང་སྣང་ཀུན་ཁྱབ་ཡེ་ཤེས་ནི༔ རང་རིག་མངོན་དུ་སྣང་བ་ངོ་མཚར་ཆེ༔ བྱ་བྲལ་རང་བཞིན་རྫོགས་ཆེན་གནས་ལུགས་ཉིད༔ མ་བཙལ་རང་ལས་བྱུང་བ་ངོ་མཚར་ཆེ༔ ངོ་བོ་སྤྲོས་བྲལ་རང་བཞིན་རྣམ་དག་ལ༔ དགེ་སྡིག་མཐའ་ལས་འདས་པ་ངོ་མཚར་ཆེ༔ རང་སྣང་སྤྲོས་པ་མེད་པའི་རིག་པ་འདི༔ ལྟ་སྒོམ་སྤྱོད་པ་མཐོང་བ་ངོ་མཚར་ཆེ༔ རང་ལས་བྱུང་བའི་འོད་ཀྱི་སྒྲོན་མེ་འདི༔ མངོན་སུམ་ཡུལ་དུ་སྣང་བ་ངོ་མཚར་ཆེ༔ ངོ་བོ་རང་བཞིན་ཐུགས་རྗེ་ཕྱོགས་མེད་པའི༔ ཆོས་སྐུ་ལོངས་སྐུ་

སྤྲུལ་སྐུར་ཤར་བ་ངོ་མཚར་ཆེ༔ བརྗོད་མེད་རྣམ་པར་དག་པའི་ཡེ་ཤེས་ཉིད༔ སྟོང་པ་རང་སར་དག་པའི་ཡུལ་ལ་སྣང་བ་ངོ་མཚར་ཆེ༔ མ་རིག་མུན་སེལ་ཐིག་ལེ་སྟོང་པ་ཉིད༔ དབང་པོའི་ཡུལ་ལ་སྣང་བ་ངོ་མཚར་ཆེ༔ ཞེས་བརྗོད་ལ་དེ་དག་གི་དོན་ཡང་བཤད་དོ༔ དེ་ནས་རྫོགས་པ་ཆེན་པོ་བརྗོད་པ་ལས་འདས་པའི་དོན་དེ་སྐལ་ལྡན་གྱི་བློ་ལ་གནས་པར་བྱ་བའི་ཕྱིར་འདི་སྐད་དོ༔ དངོས་པོ་གང་ལ་ཡང་རང་བཞིན་མེད་པ་ཡིན་ནོ༔ བལྟར་མེད་པ་དང་༔ སྲོག་མེད་པ་དང་༔ སྙིང་པོ་མེད་པ་དང་༔ ཡ་མ་བརླ་ཡིན་པ་དང་༔ ཚིག་མེད་པ་དང་༔ ཡི་གེ་མེད་པ་དང་༔ སྒྲ་མེད་པ་དང་༔ ཐ་སྙད་མེད་པ་དང་༔ བརྗོད་དུ་མེད་པའོ༔ ༔ཞེས་དངོས་པོའི་འདུག་ཚུལ་བརྗོད་མེད་དུ་གཏན་ལ་ཕེབས་པའོ༔ ༔དེ་ནས་ལུས་ངག་ཡིད་གསུམ་རྫོགས་པ་ཆེན་པོའི་དོན་སྟོང་ཉིད་ཀྱི་གོ་རར་གཞུག་པའི་ཕྱིར༔ སྟོང་པ་ཉིད་བདེ་བ་ཆེན་པོའི་ངང་དུ་དར་ཅིག་བསྒོམ༔ དེ་ཉིད་ཀྱི་དོན་བརྡས་བསྐུལ་བའི་ཕྱིར་ཚིག་ཏུ་འདི་སྐད་བརྗོད་པར་བྱའོ༔ ཆོས་རྣམས་ཐམས་ཅད་སྟོང་ཞིང་བདག་མེད་ལ༔ དངོས་པོ་མཚན་མར་འཛིན་པ་ཡང་རེ་འཁྲུལ༔ རང་རིག་ཡེ་ཤེས་དེ་ཉིད་ཆགས་མེད་ལ༔ འདོད་ཅིང་ཞེན་པའི་བློ་ནི་ཡང་རེ་འཁྲུལ༔ ཆོས་ཀྱི་དབྱིངས་ཉིད་སྤྲོས་དང་བྲལ་བ་ལ༔ མཚན་མ་ཚིག་ཕྱིར་འབྲེང་བ་ཡང་རེ་འཁྲུལ༔ སྙིང་པོའི་དོན་གྱི་ཡེ་ཤེས་རང་ཤར་ལ༔ གཞན་བྱུང་རྩོལ་སྒྲུབ་བྱེད་པ་ཡང་རེ་འཁྲུལ༔ སེམས་ཉིད་སྐྱེ་ཤི་གཉིས་ལས་འདས་པ་ལ༔ སྐྱེ་འགག་གཉིས་སུ་འཛིན་པ་ཉོན་རེ་མོངས༔ འབྲས་བུ་རང་རྫོགས་སྨོན་ལམ་བྲལ་བ་ལ༔ རྣམ་དཔྱོད་དུས་ལ་ལྟོས་པ་ཡང་རེ་འཁྲུལ༔ བདེ་སྡུག་ཐམས་ཅད་རིག་པའི་ཆོ་འཕྲུལ་ལ༔

བདེ་སྡུག་གཉིས་སུ་འཛིན་པ་ཉོན་རེ་མོངས༔ ཀུན་ཏུ་བཟང་པོ་རང་ལ་གནས་པ་ལ༔ ཡི་དམ་གཞན་ནས་འཚོལ་བ་ཡང་རེ་འཁྲུལ༔ བདག་ཉིད་ཡེ་སངས་རྒྱས་པ་ཡིན་པ་ལ༔ ངན་སོང་གསུམ་དུ་འཛིན་པ་ཡང་རེ་འཁྲུལ༔ འཁོར་བ་ངན་སོང་རོལ་བར་ཡེ་ཤར་ལ༔ ཡང་དག་སངས་རྒྱས་འདོད་པ་ཡང་རེ་འཁྲུལ༔ དུག་ལྔ་མ་སྤངས་ཡེ་ཤེས་ལྔ་པོ་ལ༔ ཉོན་མོངས་ལྔ་རུ་འཛིན་པ་ཡང་རེ་འཁྲུལ༔ འཁྲུལ་པའི་སྣང་བ་ཆོས་སྐུར་རང་སྣང་ལ༔ དངོས་པོ་བདག་དུ་འཛིན་པ་ཡང་རེ་འཁྲུལ༔ ཐེག་པ་རིམ་དགུ་རང་སར་ཤར་བ་ལ༔ སོ་སོའི་འདོད་གཞུང་འཛིན་པ་ཡང་རེ་འཁྲུལ༔ ཞེས་ཚིག་གིས་སྤྲོས་པ་བསྐྱེད་ཅིང་དོན་བསྟན་པར་བྱའོ༔ དེའི་རྗེས་ལ་ལུང་བསྟན་པའི་དབང་ནི༔ སྤྲོས་པ་མེད་པའི་དབང་ལ་ཞུགས་པས་ངག་གི་སྒྲིབ་པ་ཡོངས་སུ་དག་ནས༔ མ་འོངས་པའི་དུས་ན་ལོངས་སྤྱོད་རྫོགས་པའི་ཞིང་ཁམས་སུ་སྐྱེ་བར་འགྱུར་རོ༔ ཞེས་བརྗོད་དོ༔ ཞེས་ལུང་བསྟན་ནོ༔ རྗེས་གནང་ནི་སྤྲོས་པ་མེད་པའི་དབང་བསྐུར་ནས་སྔགས་བཟླས་པ་དང་རྫོགས་རིམ་དང་རྩ་རླུང་དང་ཐིག་ལེ་རྣམས་སྒོམ་དུ་རུང་བ་དང་༔ ཐིག་ལེ་སྟོང་པའི་སྒྲོན་མ་ཉིད་སྒོམ་དུ་རུང་བའི་རྗེས་གནང་ཐོབ་བོ༔ དབུགས་དབྱུང་བ་ནི་ཁམས་གསུམ་འཁོར་བར་མི་འཇུག་པར་བྱེད་དོ༔ གཟེངས་བསྟོད་པ་ནི༔ དེ་ལྟར་གྱུར་པས་སེམས་ལ་སྤོབས་པ་བསྐྱེད་པའོ༔ འཇུག་ཅིང་དབང་བསྐུར་བའི་རིམ་པའོ༔ ལས་ཀྱི་མཐའ་བསྡུ་བ་ནི་རོལ་མོའི་སྒྲ་དང་བཅས་པས་གཏོར་མ་འབུལ་ཞིང་ཆོས་སྐྱོང་རྣམས་ལ་གཏང་རག་གཏོང་༔ ཕྱི་མའི་ཁས་ལེན་བྱས་ལ་རྦད་བསྐུལ་བྱ༔ དཀོན་མཆོག་གི་གཏོར་མ་དང་༔ ཡི་དམ་གྱི་གཏོར་མ་དང་༔ མཁའ་འགྲོ་ཆོས་སྐྱོང་གི་གཏོར་མ་དང་༔ འབྱུང་པོའི་གཏོར་མ་རྣམས་རིམ་པ་བཞིན་དུ་འབུལ་དེ་ནས་རོལ་མོའི་སྒྲ་གོང་མ་རྣམས་དང་

ལྡན་པས་གཏོར་མ་གཤེགས་སུ་གསོལ༔ དེ་ནས་བདག་ཉིད་བསྐྱེད་རིམ་སྔར་བཞིན་དུ་བསྒོམས་པས་དེའི་དཀྱིལ་འཁོར་བསྡུ་བ་དང་༔ རྡོ་རྗེའི་གླུ་བླང་བ་དང་༔ བཀྲ་ཤིས་བརྗོད་པ་དང་༔ སྨོན་ལམ་བཏབ་སྟེ་རྡོ་རྗེ་སློབ་དཔོན་དང་རྣལ་འབྱོར་དབང་ཕྱུག་ཕོ་མོ་རྣམས་ཀྱིས་སྨོན་ལམ་འདི་ལྟར་བྱ་སྟེ༔ འདས་དང་མ་འོངས་ད་ལྟར་གྱི༔ རྫོགས་སངས་རྒྱས་པའི་ལེགས་པ་ཡིས༔ བཅོམ་ལྡན་རྡོ་རྗེ་འཆང་ཆེན་དང་༔ སྐལ་བ་མཉམ་པར་འགྱུར་བར་ཤོག༔ ངན་སོང་ཐམས་ཅད་རྒྱུན་ཆད་ཤོག༔ སངས་རྒྱས་བསྟན་པ་འཕེལ་བ་དང་༔ རྫོགས་སངས་རྒྱས་པའི་ཡོན་ཏན་རྣམས༔ བདག་ལ་དེང་འདིར་གསལ་བ་དང་༔ ཞིང་ཁམས་བཟང་ཞིང་ཉམས་དགའ་བར༔ བདག་ཀྱང་སྐྱེ་འགྱུར་སྐྱེ་བར་ཤོག༔ སྐྱེས་པས་སེམས་ཅན་དོན་བྱེད་སྟེ༔ འཁོར་བ་དོང་ནས་སྤྲུག་པར་ཤོག༔ དོང་སྤྲུག་སངས་རྒྱས་ཆེན་པོ་ཉིད༔ རྒྱས་པར་བདག་ལ་སེམས་སྦྱངས་ཤིང་༔ བདེ་བར་མགོན་པོ་རྣམས་མཉམ་ཤོག༔ ཇི་ལྟར་དམ་ཚིག་སྡོམ་པ་ཉིད༔ འདི་ཉིད་དུ་འང་རྫོགས་པར་ཤོག༔ ཅེས་སྨོན་ལམ་དྲིལ་བུའི་སྒྲ་དང་བཅས་པས་གདབ༔ ཆོ་ག་ལྷག་ཆད་བསྐང་བའི་ཡི་གེ་བརྒྱ་པ་བཟླས༔ བུམ་ཆུས་ཁྲུས་བྱེད་ན་བྱ༔ མི་བྱེད་ན་རིའམ་ས་གཙང་སར་བསྐྱལ༔ མཎྜལ་ཕྱགས་ལ་དྲི་བཟང་པོའི་ཆུས་བྱུགས་ལ་མེ་ཏོག་ཅིག་ཙམ་བཞག༔ ནང་མཆོད་བྱས་པའི་སྣོད་རྫས་བཀྲུས་ལ་སོ་སོའི་གནས་སུ་བཞག༔ དབང་བསྐུར་བའི་ཁང་པ་དེ་ལྷ་ཁང་ངམ་མཆོད་ཁང་ཡིན་ན་མཆོད་པ་བཤམས་ལ་བཞག༔ གསར་དུ་བརྒྱན་པ་ཡིན་ན་རྒྱན་རྣམས་བསྡུ༔ རྟེན་རྣམས་བསྡུས་ལ་གནས་ཁང་ཕྱགས་ལ་མེ་ཏོག་གཏོར་ལ་བཞག༔ སྣོད་མ་ཡིན་པ་ལ་གསང་བའི་དོན་དུ་དབང་བསྐུར་བའི་རྗེས་མི་མངོན་པར་

བྱའོ༔ དེ་ནས་ཡོན་དབུལ་ཞིང་དགའ་སྟོན་བྱ་བའི་རིམ་པ་ནི༔ སློབ་དཔོན་ལ་ནི་ཅི་འབྱོར་པའི་ཡོན་དབུལ༔ མཆེད་ལྕམ་རྣལ་འབྱོར་ཕོ་མོ་རྣམས་ལ་དགའ་སྟོན་ཅི་རིགས་པ་བྱ༔ གཞན་དགེ་འདུན་པ་དང་མགྲོན་རྣམས་ལ་འབྱོར་པ་དང་སྦྱར་ལ་སྤྱན་དྲངས༔ དེ་ལྟར་བྱས་པས་ཡོན་ཏན་ནི་རྒྱས་པར་འཁོར་ལོ་དྲུག་པ་དང་ཕྲ་ཐིག་ནས་བསྟན་པར་བྱའོ༔ བཀྲ་ཤིས་པའི་ཡན་ལག་ཡིན་པས་སློབ་དཔོན་གྱིས་དབུ་བཟུང་ནས་མཆེད་ལྕམ་རྣལ་འབྱོར་ཕོ་མོ་རྣམས་ཀྱིས་གླུ་གར་ལ་སོགས་པ་བྱ༔ དགེ་འདུན་གཞན་ནས་བཀྲ་ཤིས་བྱེད་དུ་གཞུག༔ གཞན་ཡང་ཁྱེའུ་དང་བུ་མོ་ལ་སོགས་པས་ཀྱང་གླུ་གར་དང་རོལ་མོ་ལ་སོགས་པ་ཤེས་ཚད་བྱེད་དུ་གཞུག༔ འཐབ་པ་དང་རྩོད་པ་དང་༔ ཁེ་གྲགས་ཀྱི་གཏམ་རྣམས་སྤང་བར་བྱ༔ ཆོས་གཏམ་ཡང་ཚོགས་ཀྱི་འཁོར་ལོ་རྩོད་པར་འགྲོ་བས་མི་བྱ༔ གཞན་ཅི་དགར་བྱའོ༔ རིན་པོ་ཆེ་དབང་གི་ཕྱག་ལེན་ཇི་ལྟ་བ་བཞིན་བཀོད་པ་རྫོགས་སོ༔ ༈ བླ་མ་རྡོ་རྗེ་འཆང་བའི་ལྷ༔ ལྷ་ཡི་ལྷ་ཁྱོད་ཕྱག་འཚལ་བསྟོད༔ བདག་ནི་བསྐལ་པ་ཐོག་མེད་ནས༔ འབྱུང་བཞིའི་ལུས་ཀྱིས་བཅིངས་པ་བདག༔ འབྱུང་བཞིའི་གདོན་དང་བྲལ་གྱུར་ནས༔ དྲི་མེད་འོད་གསལ་ལུས་ལྡན་ཤོག༔ སྨྲ་མང་ངག་གིས་བཅིངས་པ་བདག༔ འཁྲུལ་པའི་གཏམ་རྒྱུད་ཟུངས་ཟད་ནས༔ བརྗོད་དུ་མེད་པའི་དོན་ལྡན་ཤོག༔ འགྱུར་མེད་རྟོག་པས་བཅིངས་པ་བདག༔ མི་རྟོག་གསལ་བའི་སྣང་མཐོངས་ནས༔ བསམ་པའི་འཕྲོ་འདུ་ཆད་པར་ཤོག༔ དེ་ལྟར་ལུས་ངག་ཡིད་གསུམ་ལ༔ སྐུ་གསུང་ཐུགས་ཀྱིས་བྱིན་བརླབས་པའི༔ འབྲས་བུ་སྐུ་གསུམ་ཚད་ཕེབས་ཤོག༔ ཅེས་ལན་གསུམ་བརྗོད་དོ༔ ༀ་ཨཱཿཧཱུྃ༔ མངྒ་ལཾ༔ བྷ་ཝནྟུ༔

དམ་ཚིག་རབ་འབྱེད།

དམ་ཚིག་རབ་འབྱེད་ཅེས་བྱ་བ་བཞུགས་སོ༔ མན་ངག་ང་བརྒྱད་པ།

པཱཏྱ།ཐཏྱཐཏྱ།྅ཐུཧཱ༔ རྒྱ་གར་སྐད་དུ༔ ས་མ་ཡཱ་པྲ་ཀ་རི་ནཱ་མ༔ བོད་སྐད་དུ། དམ་ཚིག་རབ་ཏུ་འབྱེད་པ་ཞེས་བྱ་བ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །གསང་སྔགས་རྣམས་ཀྱི་རྒྱུད་ལས་ངེས་ཕྱེ་བའི། །དེ་ཡི་སྒྲ་དོན་འཁྲུལ་པ་མེད་པའི་བློས། །ངེས་པ ར་བརྟགས་ཏེ་འགལ་བ་མེད་པར་ཡང་། །སྔགས་ལ་དད་པའི་འགྲོ་ལ་ཕན་གདགས་ཕྱིར། །བླ་མ་མཆོག་ལ་གསོལ་བཏབ་ལེགས་སྤྱད་པའི། །དབང་མཆོག་བརྟན་ཕྱིར་དམ་ཚིག་དམ་པ་བཤད། ། དབང་བསྐུར་སྔོན་དུ་སོང་བའི་སྔགས་པས། གསང་བ་སྔགས་ཀྱི་གཞུང་ལས་བྱུང་བའི། དམ་ཚིག་དང་སྡོམ་པ་ལ་གནས་པར་བྱ་སྟེ། དེ་ཡང་དམ་ཚིག་རྣམ་པར་བཀོད་པ་སྡོམ་པ་འཇུག་པའི་འཁོར་ལོ་ལས། འགྲོ་བའི་སྨིན་པོ་གསུམ་དག་ལས། །སྔགས་ཀྱི་དམ་ཚིག་གསུམ་དུ་བཤད། །དེ་ལ་ཁྱད་པར་ངེས་ཕྱེ་བ། །རེ་རེ་ལ་ཡང་བཞི་བཞི་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་པ་དང་། བརྟན་པའི་ཁྱད་པར་ལ་

བརྟེན་ནས། དམ་ཚིག་གནས་པ་སྐྱེ་བཞིན་ཏེ། །ཞེས་གསུང་པས། དེ་ཡང་འགྲོ་བའི་ལུས་ཀྱི་ཚོགས་པ་ལ་བརྟེན་ནས་སངས་རྒྱས་ཐམས་ཅད་ཀྱི་སྐུའི་དམ་ཚིག་ལ་གནས་པ་དང་། བརྟེན་པ་དང་། ཐོབ་པའི་རྒྱུད་དང་། ཉམས་པའི་སྐྱོན་ལ་སོགས་པ་རྣམས་སུ་ཤེས་པར་བྱའོ། ཁྱད་པར་དུ་ལུས་དམ་ཚིག་ལ་གནས་པས། སངས་རྒྱས་ཐམས་ཅད་ཀྱི་སྐུ་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་དང་། དེ་བཞིན་དུ་ངག་གི་དམ་ཚིག་ལ་གནས་པས་སངས་རྒྱས་ཐམས་ཅད་ཀྱི་གསུང་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་དང་། སེམས་དམ་ཚིག་ལ་གནས་པས། སངས་རྒྱས་ཐམས་ཅད་ཀྱི་ཐུགས་རྡོ་རྗེ་མི་འགྱུར་བ་ཐོབ་པ་ལ་དཀའ་བ་མེད་པ་སྟེ། དེ་ལ་འདིར་ལུས་ཀྱི་རྟེན་མེད་ན་སྐུའི་དམ་ཚིག་གི་རྟེན་མེད་པས། ཁྱད་པར་དུ་ལུས་སྔགས་ཀྱི་ལམ་དུ་འགྲོ་བར་བྱེད་པ་ནིི་གནད་དོ། །དེ་གནས་པར་བྱེད་པའི་ཡན་ལག་ཏུ། ལུས་འཇིག་རྟེན་གྱི་བྱ་བ་ལ་འཇུག་པ་རྣམས་སྤངས་ལ།

ལུས་ཀྱི་དམ་ཚིག་བསྟན་པ་ནི། དལ་བར་གནས་ཤིང་རང་གཅིག་པུར་འདུག་པ་གནད་ཡིན་ནོ། །དེ་ཐོབ་པའི་ཉེ་བརྒྱུད་ནི། ལུས་ཀྱི་སྡིག་པ་རྣམས་སྤངས་ཏེ། ལུས་ཀྱིས་དགེ་སྦྱོར་ལས་མི་འདའ་བར་བྱེད་པའོ། །དེ་ཉམས་པའི་སྐྱོན་ནི། ལུས་འཇིག་རྟེན་གྱི་བྱ་བ་ལ་ཞུགས་པས་རང་བཞིན་གྱི་མི་དགེ་བ་དང་། ལུང་དུ་མ་བསྟན་པའི་མི་དགེ་བ་སྣ་ཚོགས་པས་རྐྱེན་སློང་བྱས་ནས་སངས་རྒྱས་ཐམས་ཅད་ཀྱི་སྐུའི་ཕྱིའི་དམ་ཚིག་ཉམས་ཏེ། ཁྱད་པར་དུ་སེམས་ཅན་དམྱལ་བའི་གནས་སུ་ལུས་ཀྱི་གཤགས་གཏུབས་ལ་སོགས་པའི་སྡུག་བསྔལ་རྣམས་མྱོང་བར་འགྱུར་ཏེ། དེ་ཡང་ལུས་ཀྱི་གཡངས་སའི་འཁྲུལ་འཁོར་མ་ཆོད་པ་ལས་བྱུང་བའོ། །དེ་ལྟར་ཡང་གསེར་གྱི་སྙིང་པོ་རྣམ་པར་བརྩེགས་པའི་རྒྱུད་ལས། ངག་གི་སྐྱེས་བུ་རྩོལ་བ་ཅན། །ལུས་ཀྱི་གཡངས་ས་མ་སྤངས་པས། །སྐུ་ལས་གྱུར་པའི་དམ་ཚིག་ནི། །འདི་ཡིས་ཉམས་ནས་མནར་མེད་འགྱུར། །དེ་བས་དལ་རྟེན་གཡང་ས་རབ་སྤངས་ལ། །སྔགས་པས་དགོན་པ་བསྟེན་པར་བྱ། །ཞེས་པས། དེ་ཡང་སྐུའི་དམ་ཚིག་གི་རྟེན་དུ། སྤྱིར་ལུས་ཀྱི་ལས་སུ་མ་བྱིན་པར་བླང་བ་དང་། མི་ཚངས་པར་སྤྱད་པ་དང་། སྲོག་གཅོད་པ་རྣམས་སྤང་ངོ་། །དེ་ཡང་རྡོ་རྗེ་ནམ་མཁའ་དང་མཉམ་པའི་རྒྱུད་ལས། མ་བྱིན་བླངས་པའི་སྡུག་བསྔལ་ནི། །སངས་རྒྱས་ན་བཟའ་ཆོས་གོས་དང་། །བརྒྱ་ཕྲག་ཕྱེད་དང་བདུན་བརྒྱ་ཉིད། །བསྲེགས་ཤིང་ཆུ་ལ་བོར་བ་དང་། །སྡིག་པ་འདི་ནི་མཉམ་པའི་ཕྱིར། །འདི་ནས་སྐྱེ་བ་མི་འདྲ་བ། །ལྔ་བརྒྱ་དག་གི་འོག་ཏུ་ཡང་། །ཡི་དྭགས་དྲག་པོའི་གནས་སུ་སྐྱེ། །དེ་ནས་ཡི་དྭགས་ཕལ་པའི་ལུས། །སྟོང་ཕྲག་དྲུག་ཅུ་བླངས་ནས་ནི། །སེམས་ཅན་དམྱལ་བའི་ལུས་སུ་འོ། །ཞེས་པ་དང་། ཡང་རྡོ་རྗེ་སྙིང་པོ་ཁང་བུ་བརྩེགས་པ་ལས། །གལ་ཏེ་མི་ཚངས་སྤྱད་པ་ཡིས། །སངས་རྒྱས་ཞིང་ཁམས་སྟོང་ཕྲག་ལྔར། །དུག་གི་སྐྱུགས་པས་བཀང་བ་དང་། །སྡིག་པ་འདི་ནི་མཉམ་པའི་ཕྱིར། །

ཤུ་བ་ཅན་གྱི་ལུས་ངན་བརྒྱ། །དེ་འོག་འཁྲིག་པའི་ལུས་ནི་སྟོང་། །དེ་ལས་ཚ་བའི་དམྱལ་བར་འགྱུར། །ཞེས་དང་། ཡང་རིན་པོ་ཆེ་རྣམ་པར་སྤུང་པ་ལས། སྲོག་གཅད་པ་ཡི་སྡིག་པ་ནི། །སངས་རྒྱས་དཀྱིལ་འཁོར་འབུམ་ཕྲག་བདུན། །སླད་ཅིང་གཏན་པ་སྤངས་པ་དང་། །འདི་ཡི་སྡིག་པའི་དམ་ཚིག་མཉམ། །དེ་ནས་ཤི་འཕོས་འོག་རྣམས་ སུ། །སྨེ་ཤ་ཅན་གྱི་ལུས་ཉིས་བརྒྱ། །དེ་ནས་གྲང་བའི་དམྱལ་བར་འགྱུར། །ཞེས་པ་དང་། ཡང་དེ་ཉིད་ལས། སྐུ་ཡི་ཕྱི་ཡི་དམ་ཚིག་ལ། །རྣམ་པ་གསུམ་དུ་ཕྱེ་བ་སྟེ། །མ་བྱིན་བླངས་པས་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །དེ་ཡི་རྟགས་སུ་ཡན་ལག་ནད། །མི་ཟད་སྣ་ཚོགས་ལུས་ལ་འབྱུང་། །མི་ཚངས་སྤྱད་པ་ནང་ཡིན་ཏེ། །རྟགས་སུ་དབང་པོའི་ནད་རྣམས་སོ། །སྲོག་བཅད་པ་ནི་གསང་བ་སྟེ། །དེ་ཡི་རྟགས་སུ་དོན་སྣོད་ནད། །རྣལ་འབྱོར་པ་ཡིས་མྱོང་བས་སོ། །ཞེས་པས་སོ། །དེ་དག་ལས་སྐོང་བར་བྱེད་པའི་ཆོ་ག་ནི། དམ་ཚིག་མཆོག་གི་རྒྱུད་ལས། རྟགས་དང་སྦྱར་བའི་རྣལ་འབྱོར་པས། །ཕྱི་ཡི་ཕྱི་ལ་ལྡེར་ཚོ་དང་། །རི་མོའི་ལས་ནི་ལན་བདུན་གྱིས། །དེ་ཡིས་སྡིག་ལས་གྲོལ་བ་འོ། །ཞེས་པས་སྔགས་ཕྱིའི་ལྷ་རྣམས་ཀྱི་ལྡེར་ཚོ་རང་གི་ལོ་གྲངས་ཙམ་མོ། །ཡང་ཕྱིའི་ལྷ་རྣམས་ཀྱི་བྲིས་སྐུ་བདུན་ནམ་བཅུ་གཅིག་བྱས་པས་བསྐངས་སོ། །ཡང་དེ་ཉིད་ལས། ཕྱི་ཡི་ནང་ལ་ལུགས་སྐུ་བདུན། །རབ་ཏུ་གནས་པ་རྩོལ་བས་བཞེངས། །བླ་མ་མཆོག་ལ་དབུལ་བར་བྱ། །ཞེས་པ་ནི། སྔགས་ནང་གི་ལྷ་ཚོགས་ཀྱི་ལུགས་མ་བདུན་བཞེངས་ནས་རང་གི་བླ་མ་ལ་ཕུལ་ན་ངེས་པར་བསྐངས་སོ། །ཡང་དེ་ཉིིད་ལས། ཕྱི་ཡི་གསང་བའི་རྟགས་བྱུང་ན། །རྡོ་རྗེ་དང་ནི་དྲིལ་བུ་ཉིད། །དགུ་འམ་བཅུ་གཅིག་བླ་མ་ལའོ། །དེས་ནི་ནད་ལས་གྲོལ་བ་དང་། །འདོད་པ་ཕུན་སུམ་ཚོགས་པ་དང་། །དེ་དག་ཞི་བས་འགྲུབ་པ་དང་། །འགྲོ་བ་རྣམས་ནི་བྱམས་པར་འགྱུར། །ཞེས་པས་སོ། །དེ་ལྟར་སྐུའི་ཕྱིའི་དམ་ཚིག་

ཏུ་སྡིག་པ་མི་དགེ་བའི་ལས་རྣམས་བསྲུང་ངོ་། །དེ་ཡང་རང་བཞིན་གྱི་ལུས་ཐམས་ཅད་ལྷའི་སྐུར་དམིགས་པ་མ་ལོག་ན། སྐུའི་དམ་ཚིག་ལས་འདའ་མི་སྲིད་དོ། །དེ་ལྟར་ཡང་རྡོ་རྗེ་ནམ་མཁའ་ལྡིང་འཇིགས་པའི་རྒྱུད་ལས། ཡི་དམ་ལྷར་གསལ་སྔགས་པ་ཡིས། །གཟུགས་རྣམས་བཟློག་པར་མི་སྤངས་ཕྱིར། །སྐུར་གསལ་བས་ནི་མི་འདའོ། །ཞེས་པའོ། །སྐུའི་ནང་གི་དམ་ཚིག་ནི་གསུམ་སྟེ། ཕྱི་ནང་གསང་བ་གསུམ་མོ། །དེ་ཡང་གསེར་གྱི་ཁང་བུ་བརྩེགས་པ་ལས། ནང་གི་ཕྱི་ནི་སྤུན་དང་ཡང་། །གང་གི་ཕ་དང་མ་ཉིད་དང་། །རང་གི་ལུས་ལ་མི་དམོད་དེ། །ནང་གི་ནང་ཉིད་སྤྱིར་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །སྨད་ཅིང་མཐོ་བཙམས་རྒྱན་སྨད་ན། །སངས་རྒྱས་སྐུ་ནི་བརྒྱ་ཕྲག་བསླུས། །ནང་གི་གསང་བ་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨན་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱིས་བཏབ་ན་ཡང་། །ཟག་པའི་ལམ་མེད་ལུས་བརྒྱ་བླངས། །དེ་འོག་ཚ་བའི་དམྱལ་བ་མྱོང་། །དེ་བས་ཙམ་མེད་མདོག་པས་ལེགས། །ཞེས་པས་ལུས་ཀྱི་བྱེད་པའི་ལས་རྣམས་ཐམས་ཅད་ཉེ་བར་སྤང་བར་བྱའོ། །སྐུའི་གསང་བའི་གསུམ་ནི། རྡོ་རྗེའི་སྤུན་ནམ་སྲིང་མོ་ཡི། །ལུས་ཀྱི་རྒྱན་ལ་དཔྱས་པ་དང་། །མཐོ་འཚམ་ལ་སོགས་བརྡེག་པའི་ཚུལ། །གལ་ཏེ་གཞན་གྱིས་བྱེད་བཅུག་ན། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲེས་པའི་མཆེད། །ཀུ་རེ་རྩེད་མོའི་ཚུལ་དུ་ཡང་། །བརྡེག་གམ་བརྡེག་པར་བརྩམས་པའམ། རྨི་ལམ་ན་ཡང་ཡུམ་ལ་རྩེས། །དེ་མ་ཐག་ཏུ་མ་བཤགས་ན། །འདི་ཡང་སྔར་དང་སྡིག་པ་མཉམ། །གསང་བའི་གསང་བ་བླ་མ་ཡི། །སྐུ་ཡི་གྲིབ་མ་མི་འགོམ་ལ། །བླ་མའི་སྤྱན་ལམ་དག་ཏུ་ཡང་། །མཚོན་ཆ་གཟུང་བར་མི་བྱའོ། །རྐང་ལག་

བརྐྱངས་དང་ཉལ་མི་བྱ། །སྐྱིལ་ཀྲུང་འདུག་དང་རྒྱབ་མི་བསྟན། །ལྷམ་དང་སྟན་དང་བཞོན་པ་དང་། །གདུགས་ལ་སོགས་པའི་རྒྱན་རྣམས་སྤངས། །བླ་མའི་གཟིམས་ཁང་དག་ལ་ཡང་། །ལག་པས་མཚོན་དང་རྡོ་མི་རྡེག །བརྩམས་པར་བྱ་བ་མ་ཡིན་ནོ། །དེ་དག་ལས་ནི་འབུམ་འགྱུར་དུ། །བླ་མའི་གནས་ཁང་བཤིག་པ་དང་། །སྐུ་ལ་བརྩམས་ཤིང་སྡིག་བྱས་པས། །འདི་ཡི་སྡིག་པ་ཕ་མཐའ་ཡས། །གལ་ཏེ་བླ་མ་བག་མེད་པས། །མ་དཔྱད་སྡང་ནའང་ཕ་མཐའ་ཡས། །མཆེད་སྤུན་སྐུ་ལ་བརྙས་བྱས་ན། །འདི་ཡི་རྣམ་སྨིན་བརྗོད་མི་ནུས། །ཞེས་གསུངས་པས། བླ་མའི་སྐུའི་གྲིབ་མ་ལ་འགོམ་ན་རབ་གནས་དང་ལྡན་པའི་མཆོད་རྟེན་བཤིག་པ་དང་མཉམ་མོ། །མི་སྡུག་པའི་མཚོན་ཆ་བཟུང་ན་རབ་གནས་དང་ལྡན་པའི་ལྷ་ཁང་བཤིག་པ་དང་མཉམ་མོ། །རྐང་ལག་བརྐྱངས་ནས་བླ་མའི་སྤྱན་སྔར་ཉལ་ན་དུད་འགྲོ་བརྒྱའི་སྲོག་བཅད་པ་དང་མཉམ་མོ། །བླ་མའི་སྤྱན་སྔར་གྱི་སྐྱིལ་ཀྲུང་འདུག་པ་དང་རྒྱབ་བསྟེན་ན་གསུང་རབ་མེ་ཡིས་བསྲེགས་པ་དང་མཉམ་མོ། །བླ་མ་ལ་བྱིན་རླབས་ཞུ་བའི་དུས་སུ་ལྷམ་སྔོན་ལ་གྱོན་པ་དང་། སྟན་བཏིང་བ་དང་། རྟ་དང་གླང་པོ་ལ་སོགས་པ་ཞོན་ན་གྲོང་ཁྱེར་ཆེན་པོ་སུམ་ཅུ་རྩ་གཉིས་བཅོམ་པ་དང་མཉམ་མོ། །གདུགས་དང་རྒྱན་ཆ་བླ་མ་གཤེགས་པའི་ཚེ་བཟུང་ན་རྔ་མོ་ལྔ་བརྒྱའི་སྲོག་བཅད་པ་དང་མཉམ་མོ། །དེ་དག་ནི་ཐུན་མོང་ཙམ་དུ་བསྟན་པའོ། །གལ་ཏེ་བླ་མའི་གཟིམས་ཁང་ལ་ལག་པས་རྡེག་པའམ་རྡོ་འཕངས་པའམ་མཚོན་གྱིས་བསྣུན་པའི་ཚུལ་བསྟན་ན་ཡང་། དེ་མ་ཐག་ཏུ་མ་བཤགས་ན་ཉེས་པ་གོང་མ་རྣམས་དང་མཉམ་མོ། །འདི་མན་ཆད་རྣམས་ནི་གོང་མ་རྣམས་དྲིལ་བ་ལས་འབུམ་འགྱུར་གྱི་སྡིག་པ་ཆེ་བར་རིག་པར་བྱའོ། །དེ་ལས་ལྡོག་པའི་ལུས་ཀྱི་བྱ་བ་བརྟེན་ན་དངོས་གྲུབ་ཀྱི་རྒྱུ་དང་རྐྱེན་འགྲོ་བ་ཡང་དེ་སྙེད་དུ་འགྱུར་རོ། །གོང་གི་སྤྱོད་པ་འདི་དག་རྨི་ལམ་དུ་ཡང་སྤངས་ན་མཆོག་དང་

ཐུན་མོང་གི་དངོས་གྲུབ་ཐོབ་པ་ལ་དཀའ་བ་མེད་དོ། །དེ་ཡང་རྡོ་རྗེ་སྙིང་པོ་སྲ་བ་འབྱུང་གནས་ཀྱི་རྒྱུད་ལས། །མཆོད་པའི་རྟེན་དང་གཟུགས་བརྙན་དག །སུ་ཡིས་བཤིག་པའི་རྣམ་སྨིན་ནི། །མཛེ་འབྲས་ཕོལ་གྱིས་ཟིན་ནས་ནི། །གླིང་བར་མུན་པའི་སྲོག་ཆགས་ལུས། །བརྒྱ་ཕྲག་ཕྱེད་དང་གཉིས་བླངས་ནས། །ཡི་དྭགས་དྲག་པོའི་སྐྱེ་གནས་སོ། །ལྷ་ཁང་གང་གིས་སྒྱེལ་ན་ཡང་། །སྲིན་མོའི་ལུས་ཀྱི་སྐྱེ་གནས་ནི། །བྱོལ་སོང་ཕལ་པའི་ལུས་ནི་སྟོང་། །རྟག་ཏུ་མཚོན་གྱིས་འདེབས་པར་འགྱུར། །དེ་ནས་ཁ་འཐོར་དམྱལ་བའོ། །ཞེས་གསུངས་སོ། །གཞན་དག་གི་རྣམ་སྨིན་ནི་མདོ་དང་རྒྱུད་ལས་རབ་ཏུ་མང་བར་བཤད་དོ། །སྐུའི་རྣམ་གྲངས་ཀྱི་དམ་ཚིག་ལས་འདས་ན། ལན་བདུན་ལས་འདས་ན་བཤགས་པའི་རྟེན་ཉམས་མཆོག་རྣམས་ལ་གཉིས་ལས་འདས་ན་བཤགས་པའི་རྟེན་ཉམས་སོ། །དམ་ཚིག་རབ་ཏུ་འབྱེད་པ་ལས། གནས་པ་དྲུག་པ་ཞེས་བྱ་བ། སྐུའི་དམ་ཚིག་བསྟན་པའི་དུམ་བུ་སྟེ་དང་པོའོ། །རྫོགས་སོ།། །། ཐ།རྗ།རྒ།བཱ༔ མཆོག་ཏུ་གསང་བའི་དཔལ་ལ་ཕྱག་འཚལ་ལོ། །གསང་སྔགས་དབང་གི་རྒྱུད་ལས་གསུངས་པ་ཡི། །ཁྱད་པར་མཆོག་གི་དམ་ཚིག་རབ་བཤད་པ། །གཉིས་མེད་ཐབས་ལས་ཁྱད་པར་ཉེས་པའི་སྐྱོན། །འགལ་བ་མེད་པར་མཆོག་གི་འབུང་བར་བྱའོ། །རྣལ་འབྱོར་གྱི་ལམ་དུ་འགྲོ་བ་རྣམས་ཀྱིས་འདི་ལྟར་ཡིད་ཆེས་པར་བྱས་ལ་དང་དུ་བླང་བར་བྱའོ། །བཀྲ་ཤིས་ཉི་མ་འབུམ་གྱིས་བརྒྱན་པའི་རྒྱུད་ལས། གསུང་གི་དམ་ཚིག་ཁྱད་པར་ངེས་ཕྱེ་ནས། སྐྱོབ་པ་ལྔ་ཡི་རྣལ་འབྱོར་ལམ་བཟུང་ཕྱིར། །རྣམས་གྲངས་ཕྱེ་ནས་བཀོད་པ་བསམ་ཡས་ཀྱང་། །ངེས་པར་བསྡུས་ན་བསྲུང་མཚམས་བཅུ་གཉིས་སོ། །ཕྱི་དང་ནང་དང་གསང་བ་གསུམ་དག་ལས། །གསུམ་གསུམ་དག་ལས་དབྱེ་ན་དགུར་འགྱུར་རོ། །རྩ་བ་གསུམ་སྟེ་བཅུ་གཉིས་ཁོ་ནའོ། །ཞེས་པས་གནས་བརྟེན་པ་དང་། ཐོབ་པ་དང་

ཉམས་པའི་སྐྱོན་རྣམས་ཀྱིས་སྐུའི་སྐབས་ཀྱི་ཤེས་པར་བྱའོ། །གསུང་གི་དམ་ཚིག་ཏུ། ངག་གི་སྡིག་པ་མི་དགེ་བ་རྣམས་སྤང་པར་བྱའོ། །དེ་ལ་ངག་གི་ཕྱིའི་དམ་ཚིག་ཏུ་རྫུན་མི་སྨྲ་སྟེ། དེ་ལྟར་ཡང་འཁོར་ལོ་རྣམ་དག་བརྩེགས་པ་ལས། །སྔགས་ལ་མོས་པའི་སྤྱོད་པ་ཡིས། །འགྲོ་བ་ཕལ་པ་དག་ལ་ཡང་། །རྫུན་པའི་ཚིག་ནི་རང་འདོད་ཀྱིས། །སྨྲ་ལ་རྟག་ཏུ་དགའ་བ་ལ། །སྔགས་བཟླས་ནུས་པ་མི་འབྱུང་ཞིང་། །གཞན་ལ་སྨྲས་པ་བཙུན་པ་མིན། །རང་གི་རང་ཉིད་ཉམས་པ་ཡིས། །འགྲོ་བ་གཞན་གྱིས་ལྕེ་འབབ་འགྱུར། །མ་འོངས་དུས་ནི་སྨེ་ཤའི་ལུས། །བྱང་གི་ཕྱོགས་སུ་མྱོང་བར་འགྱུར། །དེ་འོག་ངན་སོང་སྡུག་བསྔལ་ཡང་། །རྣམ་པ་སྣ་ཚོགས་མྱོང་བར་འགྱུར། །ཞེས་པའོ། །དེའི་ནང་གི་དམ་ཚིག་ཏུ་ཕྲ་མ་མི་སྨྲ་བ་སྟེ། ཡང་དེ་ཉིད་ལས། སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེན་འཇུག་ཕྲ་མ་སྨྲ། །ཆོས་སྨྲས་འཁོར་རྣམས་མི་འདུ་དང་། །ཅི་བྱས་ལོག་པར་འགྱུར་པ་དང་། །མ་དཔྱད་པ་རྣམས་དགྲར་འགྱུར་དང་། །ལུས་ལ་མཚོན་གྱིས་འདེབས་པ་དང་། །ཤི་འཕོས་ནས་ནི་སྡེར་ཅན་ལུས། །དེ་ནས་ངན་སོང་རིམ་གྱིས་མྱོང་། །ཞེས་པ་དང་། དེ་ཡང་འདིའི་གསང་བའི་དམ་ཚིག་ཏུ་གཞན་གྱི་ཞེ་གཅོད་པའི་ཚིག་རྣམས་སྨྲ་བར་མི་བྱའོ། །ཡང་དེ་ཉིད་ལས། རྟག་ཏུ་ཞེ་གཅོད་ཚིག་སྨྲ་བ། །སྔ་མའི་ལས་དང་ཕྱི་མའི་རྟགས། །འགྲོ་བ་བྱམས་བྲལ་བཤེས་ཀྱང་སྡང་། །ཆོས་ཀྱི་ཚིག་ཀྱང་འཆོལ་བར་འགྱུར། །ཤི་འཕོས་རབ་ཏུ་གྲགས་པའི་ལུས། །དེ་ནས་ངན་སོང་གསུམ་དུ་འཁོར། །ཞེས་པས། དེ་ལྟར་ཡང་ངག་གི་སྡིག་པ་དེ་དག་ཆོས་འདྲེས་པའི་སྒོ་ནས་སྨྲས་ན་རྣམ་པར་སྨིན་པ་བདུན་འགྱུར་འགྲོ། རང་ཉིད་འདོད་པ་རླབས་པོ་ཆེས་སྨྲས་ན་གོང་མ་རྣམས་ལས་ཉིས་འགྱུར་རོ། །རང་བཞིན་གྱིས་བསྲུངས་ཀྱང་སྨྲ་འདོད་ཅིང་། ཤེས་

བཞིན་གྱིས་མ་ཟིན་ན་ནི་སྔ་མ་བྱས་པའི་རྣམ་པར་སྨིན་པར་ཤེས་པར་བྱའོ། །དེ་ཡང་སྔགས་ཀྱི་སྒོར་ཞུགས་པ་རྣམས་ལ་རང་བཞིན་ཙམ། དབང་བསྐུར་བ་རྣམས་ཀྱིས་སྨྲས་ན་ནི་ཉིས་འགྱུར། ལྟ་སྒོམ་ལ་ཞུགས་པ་རྣམས་ཀྱིས་ནི་ལྔ་འགྱུར་རོ། །ཆོས་སྨྲ་བའི་གང་ཟག་གིས་སྨྲས་ན་ནི་བདུན་འགྱུར་རོ། །གསུང་གི་ནང་གི་དམ་ཚིག་གསུམ་ནི་དམ་ཚིག་རྣམ་པར་བཀོད་པའི་རྒྱུད་ལས། སྔགས་པ་སྡོམ་པ་གནས་པ་ཡིས། །ཆོས་སྨྲས་རྣམས་དང་ཆོས་སྒྲུབས་དང་། ཆོས་ནི་བསྒོམས་པའི་གང་ཟག་ལ། །སྒྲོ་ཞིང་སྐུར་བ་བཏབ་པ་དང་། །གཤེ་ཞིང་སྨད་པའི་ཚིག་སྨྲས་ན། །གཞན་པའི་མོས་པ་ཉམས་པ་དང་། །རང་གི་སྡོམ་པ་ཉམས་པ་དང་། །རང་གི་ཆོས་རྣམས་བརྗེད་ངས་ཆེ། །ཡིད་དཔྱོད་འདྲ་མིན་འཚོལ་བར་འགྱུར། །ཡང་དེ་ཉིད་ལས། ས་ཞེས་བྱ་བ་བསྐྱེད་པ་ལ། །མ་ཞེས་བྱ་བ་མ་ཉམས་ན། །དངོས་གྲུབ་ཐམས་ཅད་སྟེར་བ་ཉིད། །ཡ་ཞེས་ཉམས་ན་ཡས་པར་འགྱུར། །ཞེས་པ་དང་། ཡང་དེ་ཉིད་ལས། དམ་ཞེས་བྱ་བ་བཅིངས་པ་སྟེ། །དེ་ཉིད་གྲོལ་ན་ཉམས་པ་སྟེ། །དེ་ལས་འདས་ན་གསོར་མི་རུང་། །ཚིག་ཅེས་བྱ་བ་དེ་འདས་ན། །མེ་ཡི་སྡུག་བསྔལ་མྱོང་བ་འོ། །ཡང་ན་དམ་པ་བསྲུང་བ་ཉིད། །སྐུ་དང་གསུང་དང་ཐུགས་དག་ལས། །སུ་ཡིས་འདས་པས་འཚིག་པར་བྱེད། །ཀལྤ་བརྒྱ་ཕྲག་དག་ཏུ་ུའོ། །ཞེས་པས་ཤེས་སོ། །གསང་བའི་གསུམ་ནི། གསུང་གི་གསང་བའི་ཕྱིར་ནི། རྡོ་རྗེ་སྤུན་དང་སྲིང་མོ་ལ་ཚིག་གིས་སྨད་པ་དང་། གཤེ་སྐུར་མི་བྱ། ཇི་སྐད་གསུངས་པའི་ཚིག་ཉན་པར་བྱའོ། །གསང་བའི་ནང་གི་ལ། བླ་མའི་ཕྱག་རྒྱ་མ་དང་ཉེ་འཁོར། གསང་བའི་གསང་བ་བླ་མའོ། །དེ་ལྟར་ཡང་ཕྱག་རྒྱ་གཉིས་སྦྱོར་གྱི་རྒྱུད་ལས། རྡོ་རྗེའི་མཆེད་དང་ལྕམ་དྲལ་ལ། །ཚིག་གིས་སྨྲས་དང་ངག་བཅག་ན། །ཀལྤ་བརྒྱ་ཕྲག་བྱེ་བ་ནི། ཁྱད་པར་ངན་སོང་གསུམ་པོ་ཡི། །སྡུག་བསྔལ་

མི་བཟད་དྲག་པོ་མྱོང་། །གང་ཟག་དེ་ཡིས་མྱོང་བ་དང་། །སྔར་དང་ཕྱི་མ་ད་ལྟའི་བར། །རིམ་པར་མྱོང་བར་འགྱུར་བ་ནི། །སྔ་མ་བྱས་པས་ཚེ་འདི་ལ། །བར་ནས་ཐ་མར་མྱོང་འགྱུར་ལ། །ཡང་སྔ་ཚེའི་སྟོད་ལ་བྱ་སྟེ། །སྐྱེས་མ་ཐག་ཏུ་མྱོང་བར་འགྱུར། །འདི་ལ་བྱས་པའི་ལས་མཐའ་ནི། །ཚེ་ཡི་ཞབས་ལ་ངག་གི་ལས། །འཁོར་དང་གཞན་གྱི་ལྕེ་འབབ་དང་། །གློ་བུར་དག་ཏུ་སྨྲ་རྒྱུན་འགག །བླ་མའི་བུ་དང་ཆུང་མ་དང་། །གང་དག་ཉེ་གནས་དག་ཀྱང་རུང་། །བཀའ་ལས་འདས་ཤིང་ངག་འདས་ན། །སྔ་མ་ལས་ནི་ཉིས་འགྱུར་རོ། །ཡང་ན་བླ་མའི་བྱེ་བྲག་གི །རྩ་བ་དང་ནི་ཡན་ལག་གི །ངག་བཟླས་ངག་ཏུ་སྨྲས་པ་དང་། །སྒྲོ་སྐུར་འདོད་ཚིག་སྨྲས་བྱས་ན། །སྔ་མ་ལས་ནི་སྟོང་ཕྲག་དགུ །རྣམ་པར་སྨིན་པ་མི་ཟད་པ། །རིམ་པས་བླ་མའི་ཁྱད་གྱིས་སྤང་། །དེ་མ་ཐག་ཏུ་མྱོང་བར་འགྱུར། །ཞེས་པས། རྡོ་རྗེ་མཆེད་དང་ལྕམ་སྲིང་ལ་ཚིག་གིས་སྨད་པར་མི་བྱ་བ་དང་། །གཞན་ཡང་ཆོས་དང་གང་ཟག་ལ་སྨད་པར་བྱ་བ་མ་ཡིན་ནོ། །བླ་མའི་ཉེ་འཁོར་རྣམས་དང་ཡང་སྔར་དང་འདྲའོ། །བླ་མའི་བཀའ་བཅག་ན་སངས་རྒྱས་ཀྱི་གསུང་རྣམས་རྒྱབ་ཀྱིས་ཕྱོགས་པ་དང་མཉམ། བླ་མའི་བཀའ་ཉམས་པར་བྱས་ན་དེའི་ཆ་གཉིས་སོ། །གསུང་ལས་འདས་ན་སྟོང་ཕྲག་ཉིས་འགྱུར་གྱི་རྣམ་པར་སྨིན་པ་འོང་ངོ་། །དེ་ལྟར་ཡང་རྡོ་རྗེ་ཉི་མ་དམ་ཚིག་ལས་བཀོད་པའི་རྒྱུད་ལས། །སྤྱིར་ན་དམ་ཚིག་ཁྱད་པར་ལས། །དུས་ལ་ཁྱད་པར་ངེས་ཕྱེ་བ། །དམ་ལས་འདས་ཤིང་ཉེས་བྱས་གང་། །ཞག་གིས་བར་མ་ཆོད་པ་ནི། །དམིགས་པའི་ཡུལ་ལ་བཤགས་བྱས་ནས། །དེས་ནི་སོར་ཡང་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པས་སོ། །དམ་ལས་འདས་ན་ལོ་དག་གི །བར་དུ་མ་ཆོད་བཤགས་པས་སོ། །ལོ་ནི་གཉིས་དང་གསུམ་དག་ལས། །དམ་ཚིག་རལ་བ་ཞེས་བྱ་བ། །མཆོག་ཏུ་དྲག་ན་གསོ་རུ་རུང་། །ལོ་གསུམ་དག་ལས་འདས་པ་ནི། །

དེ་ནི་གསོར་ཡང་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་སྤྱོད་པ་སྡུག་བསྔལ་ལ། །རྒྱུན་དུ་སྤྱོད་པ་ཁོ་ན་འོ། །འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་རྟོགས་པས་བསད། །འདས་པ་བུ་དང་ཆུང་མ་དང་། །ཉེ་འཁོར་ལུས་དང་ངག་དང་ནི། །ཡིད་དང་བདོག་པར་བཅས་པས་བསྐང་། །རལ་བ་རང་གི་སྲོག་གིས་བསྐང་། །དེ་ལས་ཕྱིར་ཡང་གྱུར་པ་ན། །དམ་ཚིག་ཉམས་པ་ཞེས་བྱ་སྟེ། །གསོ་བར་རུང་བ་མ་ཡིན་ནོ། །ཞེས་པས་སོ། །རྣམ་གྲངས་ཀྱི་དམ་ཚིག་ལ་བསམ་གྱིས་མི་ཁྱབ་བོ། །དེ་ཡང་བཀོད་པ་ཆེན་པོ་ལས། བླ་མ་དང་ནི་ཉི་བའི་འཁོར། །རྡོ་རྗེའི་སྤུན་དང་སྲིང་མོ་ལ། །ངན་སྨྲས་ཚིག་གི་ཟུར་ཙམ་ཡང་། །བརྡ་འམ་དངོས་པོར་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །མཐུར་དུ་བལྟས་ཏེ་དམྱལ་བར་འགྲོ། །ཞེས་པས་སོ། །དེ་དག་ལ་སོགས་ཏེ་གཞན་གྱི་ཟླ་དང་ཞོར་དང་ལྡེབས་པ་དང་། གཞན་ལ་བརྟེན་ནས་ཀྱང་བྱ་བ་མ་ཡིན་ནོ། །ཡང་འཁོར་ལོ་རིན་པོ་ཆེ་རྣམ་པར་བརྩེགས་པའི་རྒྱུད་ལས། སྐུ་ཡི་དམ་ཚིག་ལས་འདས་ན། །སངས་རྒྱས་སྐུ་ཞེས་ཚིག་དང་བྲལ། །འདི་ལྟར་ཁམས་གསུམ་སེམས་ཅན་རྣམས། །སྲོག་ནི་དུས་གཅིག་བཅད་པ་བས། །ཕས་ཕམ་པ་ནི་སྡིག་མཐའ་ཡས། །དེ་བཞིན་གསུང་གི་ཞིག་པ་ན། །སངས་རྒྱས་གསུང་གི་ཚིག་མི་གནས། ཁམས་གསུམ་སེམས་ཅན་ཐམས་ཅད་ཀྱི། །ལྕེ་ཡི་དབང་པོ་དུས་གཅིག་ལ། །བཅད་པའི་སྡིག་པས་འདི་མཐར་ཡས། །གལ་ཏེ་ཐུགས་ཉམས་གྱུར་པ་ཡང་། ཁམས་གསུམ་གང་བའི་བསམ་གཏན་པའི། །དགེ་ལ་གནས་པའི་དགེ་སློང་རྣམས། །དུས་གཅིག་སེམས་དཀྲུགས་སེམས་སུན་བྱུང་། །འདི་རྣམས་སྡིག་པ་ཆེར་འཕེལ་འགྱུར། །སྡིག་པ་འདི་ཀུན་རྣམ་གྲངས་ནི། །བརྗོད་པར་

ནུས་པ་མ་ཡིན་ནོ། །ཞེས་པས། གལ་ཏེ་བག་མེད་པ་དང་། དྲན་པས་མ་ཟིན་པ་དང་། ནད་ཀྱིས་དཀྲུགས་པ་དང་། གདོན་གྱི་དབང་དུ་གྱུར་པ་དང་། རྨི་ལམ་ན་ཡང་བླ་མ་ལ་སྐུ་གསུང་ཐུགས་ཀྱི་ཉེས་པ་བྱས་པ་བྱུང་ན། དེ་ཉིད་ཀྱི་རྗེས་ལ་མ་བཤགས་ན། ཉེས་པ་ཆེན་པོར་འགྱུར་རོ། །དེ་ལྟར་ཡང་དཔལ་ནམ་མཁའ་ཟད་པའི་རྒྱུད་ལས། གལ་ཏེ་ངན་པའི་སེམས་མེད་པར། །དྲན་པ་ཉམས་པའི་རྨི་ལམ་མམ། །བག་མེད་གྱུར་པའི་མི་དགེ་རྣམས། །བླ་མ་ལ་དམིགས་བཤགས་པར་བྱ། །ལུས་ཀྱི་ཞེས་པ་ལུས་ཀྱིས་ཏེ། །དེ་ཉིད་ངག་དང་སེམས་ཀྱང་ངོ་། །འདིས་ཀྱང་མནར་མེད་སྡུག་བསྔལ་མྱོང་། །ཞེས་པས་སོ། །དམ་ཚིག་རབ་འབྱེད་ལས། སྦྱོར་བ་ལྔར་གཏན་ལ་ཕབ་པ་སྟེ། གསུང་གི་དམ་ཚིག་རྣམ་པར་བཞག་པ་གཉིས་པ་རྫོགས་སོ།། །།རབ་ཏུ་གནས་པའི་མགོན་ལ་ཕྱག་འཚལ་ལོ། །ཇི་ལྟར་སྔགས་ཀྱི་རྒྱུད་རྣམས་ལས། །དམ་ཚིག་རྣམ་པར་མང་བཤད་ཀྱང་། །རྣམ་པར་བསྡུས་ཏེ་འབྱེད་ངེས་པའི། །མདོ་དོན་རྣམ་པར་བཤད་པར་བྱའོ། །གང་ཞུགས་དུས་ལ་ཞུགས་པ་ཡི། །དངོས་གྲུབ་མཆོག་ཏུ་འདོད་པའི་མིས། །འདི་ལྟར་ཉེས་པའི་སྐྱོན་སྤངས་ཏེ། །ལེགས་པའི་ཡོན་ཏན་བསྒྲུབ་པར་བྱའོ། །བླ་མ་མཆོག་གིས་བཀའ་སྩལ་པ། །གལ་ཏེ་ཉེས་པའི་སྐྱོན་རིག་ཀྱང་། །ཇི་སྐད་སྨྲས་པ་དེ་བཞིན་བྱ། །དེ་བཞིན་བླ་མའི་བྱ་བ་ལ། །ལུས་ཀྱི་སྡུག་བསྔལ་མཆོག་གྱུར་ཀྱང་། །རང་གི་ནུས་པས་འབད་དེ་བྱ། །བླ་མའི་ཐུགས་ནི་སྐད་ཅིག་ཀྱང་། །དཀྲུག་པར་བྱ་བ་མ་ཡིན་ནོ། །བླ་མའི་ཟས་དང་ནོར་རྣམས་ལ། །རང་གི་སྲོག་པས་ཕངས་པ་བཞིན། །རྣལ་འབྱོར་པས་ཉི་རྟག་ཏུ་བྱའོ། །གལ་ཏེ་བླ་མའི་ཞིང་ཁམས་སུ། །ཆོས་བཤད་དབང་བསྐུར་རབ་གནས་དང་། །བསམ་གཏན་བསྒོམ་པར་བྱ་བ་རྣམས། །རྗེས་མ་གནང་བར་མི་བྱའོ། །

མདོར་ན་ལུས་ངག་ཡིད་གསུམ་གྱི། །བྱ་བའི་རྣམ་པ་གང་བྱེད་ཀྱང་། །བླ་མ་ལ་ཞུས་མ་གནང་བར། །ཅུང་ཟད་ཙམ་ཡང་མི་བྱའོ། །གཞན་ཡང་དགེ་བའི་ལས་གང་ཡང་། །བླ་མ་ལ་ཞུས་བརྩམ་པར་བྱ། །རྣལ་འབྱོར་སྤྱོད་ལམ་ཐམས་ཅད་དུ། །བླ་མ་མཆོག་དང་འབྲལ་མི་བྱ། །དུས་གསུམ་ཟས་ནི་ནམ་ཟ་ཡང་། །སུམ་ཆ་བཅད་པའི་ཕུད་རྣམས་ཀྱིས། །བླ་མ་མཆོག་ལ་དབུལ་བར་བྱ། །ནོར་དང་དཀོན་པའི་རིན་པོ་ཆེས། །བླ་མ་རྡོ་རྗེ་འཛིན་པ་ལ། །འདོད་པ་མེད་ཀྱང་ཕྱོགས་སུ་དབུལ། །ཅི་དང་ཅི་ཡི་ཕུད་རྣམས་ཀྱིས། །བླ་ལ་མཆོག་ལ་བསྡོས་ཏེ་དབུལ། །མདོར་ན་བདག་གི་བསམ་པ་ཡིས། །རྣམ་པར་དག་པས་ཟོལ་ཆུང་བར། །བླ་མའི་ཕྱོགས་སུ་དམིགས་པར་བྱའོ། །རྣམ་དག་མཆོག་དང་དགེ་བས་ནི། །ལེགས་པའི་ཡོན་ཏན་ཐོབ་པར་ངེས། །དེས་ནི་འདི་ལ་འབད་པར་བྱ། །དེ་ལྟར་ཐུགས་ཀྱི་དམ་ཚིག་རྣམ་པར་ཕྱེ་སྟེ། ངེས་པར་བསྡུས་ན་ནི་ཕྱི་ནང་གསང་བ་གསུམ་མོ། །དང་པོ་ཕྱིའི་གསུམ་ནི། སེམས་ཀྱི་ལས་སུ་བདག་དང་གཞན་ལ་གནོད་པའི་སེམས་རྣམས་སྤང་བར་བྱའོ། །དེ་ལྟར་ཡང་སྙིང་པོའི་དོན་རྣམ་པར་ལེན་པའི་རྒྱུད་ལས། གང་དག་སྔགས་པ་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །གནོད་པར་བྱེད་པའི་ལས་འཆད་ན། །འདི་ནི་ཤུ་བ་ཅན་གྱི་ལུས། །གྲང་པའི་རེག་པར་ལྡན་པ་ཡི། །ལུས་ནི་སྟོང་ཕྲག་ལྔ་བླངས་ནས། །གྲང་བའི་དམྱལ་བར་ངེས་པ་འགྱུར། །ཞེས་པ་དང་། ཡང་དེ་ཉིད་ལས། །མཆོག་ཏུ་སྔགས་ལ་ཞུགས་པ་ལ། །གནོད་པ་བྱ་བའི་སེམས་བྱས་ན། །གོང་མའི་སྡུག་བསྔལ་མྱོང་བར་འགྱུར། །འགྲོ་བ་གཞན་ལ་ངེས་པ་མེད། །ཅེས་སོ། །ཕྱིའི་ནང་དུ། ལུས་དང་བྱས་པའི་གནོད་པའི་སེམས་སྤང་བར་བྱའོ། །འདིར་འགྲོ་བ་ཕལ་པ་དང་། ཆོས་ཀྱི་སྒོར་ཞུགས་སོ་ཅོག་དང་། མཆོག་ཏུ་སྔགས་ཀྱི་སྒོར་

ཞུགས་པ་རྣམས། ཤིན་ཏུ་རྡོ་རྗེའི་སྤུན་སྲིང་དང་། བརྒྱུད་པའི་བླ་མ་དང་རབ་ཏུ་རང་གི་བླ་མ་ལ་སྐྱེས་ན་རྣམ་པར་སྨིན་པ་བརྒྱད་འགྱུར་རོ། །དེ་ལྟར་ཡང་གནམ་ལྕགས་མེ་འབར་བའི་རྒྱུད་ལས། །གལ་ཏེ་སེམས་ཅན་ཕལ་པ་ལ། །ཡུལ་འགྱུར་གནོད་པའི་སེམས་སྐྱེས་ན། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་བཅད་པས། །འདི་ཡིས་སྡིག་པའི་ཆ་དང་མཉམ། །གལ་ཏེ་བསྟན་པའི་རྟགས་འཛིན་པའི། །ཤུགས་ཅན་རྣམས་ལ་ལོག་འགྱུར་རོ། །སྔགས་མ་ཞུགས་པ་ཕྲག་འགྱུར་རོ། །རྡོ་རྗེའི་སྤུན་སྲིང་བདུན་འགྱུར་རོ། །བརྒྱུད་པའི་བླ་མ་བརྒྱ་ཕྲག་གོ །རང་གིི་བླ་མ་དེ་བས་བརྒྱད། །སྔགས་ཀྱི་སྒོར་ཞུགས་དབང་ཐོབ་པས། །མཆོག་ཏུ་རྣམ་སྨིན་དེ་ལྟར་རོ། །དེ་བས་ཐོས་པ་ཐོབ་པའི་ཆོས། །རབ་ཏུ་ཉེས་པ་སྤངས་ནས་ནི། །ཉེས་པ་མེད་པའིི་ཆོས་སྤྱོད་བྱ། །ཞེས་སོ། །ཕྱིའི་གསང་བ་གསུམ་ནི། སྔགས་པས་རང་ངམ་གཞན་གྱི་གྲུབ་པའི་མཐའ་ལ་ལྟ་སྐྱེས་པ་ནི། འདི་ནས་ཤི་འཕོས་མ་ཐག་ཏུ་སེམས་ཅན་དམྱལ་བའི་སྡུག་བསྔལ་ཉམས་སུ་མྱོང་བར་འགྱུར་རོ། །དེ་ཡང་གཞན་གྱི་གྲུབ་པའི་མཐའ་ལ་ཞེ་ཡིས་སྨད་ན་སེམས་ལ་སྡུག་བསྔལ་ཉམས་སུ་མྱོང་། ལུས་ཀྱིས་སྨད་ན་ལུས་ལ་མྱོང་། ངག་གིས་བརྗོད་ཅིང་སྨད་ན་ངག་ཉམས་སུ་སྨིན་པ་དང་བཅས་པའི་སྡུག་བསྔལ་ཆེན་པོ་སྨིན་པའོ། །རང་གི་གྲུབ་པའི་མཐའ་ལ་ལོག་ལྟ་སྐྱེས་ན་ཚ་བའི་དམྱལ་བ་ནས་དམྱལ་བ་ཉེར་གཅིག་གནས་རྣམས་སུ་རིམ་པར་གྱུར་ནས། སྡུག་བསྔལ་མི་བཟོད་པ་སྨིན་པར་ངེས་སོ། །དེ་ལྟར་ཡང་བཀོད་པ་ཆེན་པོ་ལས། །རང་ངམ་གཞན་གྱིས་གྲུབ་པ་ཡི། །ཆོས་ལ་སྨོད་པ་ལོག་པའི་ལམ། །རྩ་བའི་དམ་ཚིག་ལ་འདུས་ན། །ས་སྤྱོད་མེ་ཡི་སྡུག་བསྔལ་ལ། །ཡུན་རིང་བར་དུ་གནས་པ་འོ། །རང་གི་གྲུབ་མཐའ་

ལོག་པ་ཡི། །དམྱལ་བ་ཉིད་ལས་ཐར་སྐབས་མེད། །སྔར་དང་ད་ལྟའི་ཁྱད་པར་མེད། །དེ་མ་ཐག་ཏུ་སྡུག་བསྔལ་ལོ། །ཞེས་སོ། །ཐུགས་ཀྱི་ནང་གི་གསུམ་ལས། དང་པོ་ཕྱིའི་ནི། སྤྱོད་པ་ལོག་པ་ལྷ་མིན་ལས། དམྱལ་བའི་སྡུག་བསྔལ་སྤྱོད་དོ། །སྒོམ་པ་ལོག་པ་ལན་ཅིག་གཟུགས་མེད་པ་ལས་སེམས་ཅན་དམྱལ་བའི་སྡུག་བསྔལ་མྱོང་། ལྟ་བ་ལོག་པ་ལས་དེ་མ་ཐག་ཏུ་རྡོ་རྗེའི་དམྱལ་བར་འགྱུར་རོ། །དེ་ལྟར་ཡང་ཤེལ་གྱི་ཁང་བུ་བརྩེགས་པའི་རྒྱུད་ལས། ལྟ་དང་སྒོམ་དང་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །འདི་ཡི་སེམས་ལ་སྨིན་པར་ངེས། །ཞེས་སོ། །གསང་བའི་གསང་བ་གསུམ་ནི། ལྟ་དང་སྒོམ་དང་སྤྱོད་པ་དང་དུ་མ་བླངས་ཤིང་། སྙོམས་ལས་སུ་ལུས་ཤིང་ཡིད་ལ་མ་བྱས་པ་དང་། ཡི་དམ་གྱིི་ལྷ་ཡིད་ལ་མ་བྱས་པ་དང་། བླ་མ་རྡོ་རྗེ་སྤུན་སྲིང་ཡིད་ལ་མ་བྱས་པ་རྣམས་སོ། །དེ་ལྟར་ཡང་པདྨ་ཀློང་ཡངས་ལས། སུ་ཡི་ཡིད་ཀྱི་ལས་འཆལ་ཏེ། །ཡིད་ལ་བྱ་ཡི་ཆོས་རྣམས་ལ། །ཡིད་ལ་བྱས་པ་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །མནར་མེད་སྡུག་བསྔལ་མྱོང་བར་འགྱུར། །ཞེས་པའོ། །ཡང་སྙིང་པོ་ལྷན་ཅིག་སྐྱེས་པ་ཉེ་བར་ལེན་པའི་རྒྱུད་ལས། དངོས་གྲུབ་མཆོག་ནི་འདོད་པ་ཡི། །ཡི་དམ་སྤང་བར་མི་བྱ་ཞིང་། །བླ་མ་སྤངས་ན་དངོས་གྲུབ་བརླག །གཞན་དུ་བསྒྲུབས་ཀྱང་མི་རྙེད་དོ། །དེ་བཞིན་ཆོས་ཕྱིར་ཁས་བླངས་དང་། །བླ་མའི་མདུན་དུ་དམ་བཅས་པ། །ཡིད་ལ་བསམ་པའི་དགེ་བ་ཡི། །དེ་ཉིད་སྤངས་ན་དངོས་གྲུབ་ཉམས། ཞེས་པ་དང་། ཡང་དམ་ཚིག་རྣམ་པར་བཀོད་པ་མཆོག་སྟོང་པའི་རྒྱུད་ལས། དམ་བཅའ་འདའ་བར་མི་བྱ་ཞིང་། །བླ་མའི་ཁས་བླངས་མ་བཅག་ཅིང་། །བླ་མའི་བྱ་བ་མ་ལོག་དང་། །རང་གི་ལུས་ངག་སེམས་རྣམས་ཀུན། །ཆོས་ལས་གཞན་པ་མི་བྱ་འོ། །སེམས་ཅན་ཀུན་གྱི་དོན་བྱ་ཞིང་། །

རྟག་ཏུ་བླ་མ་ལ་གུས་དང་། །དམ་ཚིག་མཆོག་ལས་འདའ་མི་བྱ། །རྡོ་རྗེ་དྲིལ་བུ་བཟུང་བ་དང་། །སྔགས་ལས་འོས་པའི་རྫས་རྣམས་བཟུང་། །སྤྱིར་ཡང་རྩ་བའི་དམ་ཚིག་ལས། །གསང་བར་འོས་དང་གཉེར་གཏད་དང་། །ནང་པར་ཁས་བླངས་བསྟན་པ་དང་། སྨྲས་དང་ཡིད་ཀྱིས་ལོག་སྤྱད་ན། །འདི་ཡང་མནར་མེད་རྒྱུར་འགྱུར་རོ། །དབང་ལས་བྱུང་བའི་ཁྱད་པར་ཆོས། །གཞན་ལ་མི་བསྒྲགས་སེམས་ལ་སྦྱར། །བླ་མའི་ཐུགས་ལ་གནོད་པ་ཡི། །ལུས་སམ་ངག་གམ་ཡིད་དག་གིས། །བྱ་བ་ལོག་པར་མི་བྱ་འོ། །དེ་བཞིན་རྡོ་རྗེའི་སྤུན་ཟླ་ལ། །གཞན་ལས་ཁྱད་པར་མན་ངག་རྣམས། །གཞན་ལ་གསང་ལ་སེམས་བཞག་ན། ཁྱད་པར་དངོས་གྲུབ་མཆོག་ཏུ་འགྱུར། །དེས་ན་དམ་ལས་མི་འདའ་འོ། །ཞེས་པས་སོ། །དེ་ལྟར་བླ་མའི་བྱ་བ་ལ་མཁས་པར་བྱ་ཞིང་། སྔགས་ཀྱི་དམ་ཚིག་ལ་འཛེམ་པར་བྱས་ན་དངོས་གྲུབ་གང་འདོད་པ་ལ་ཐོགས་པ་མེད་པར་འགྱུར་རོ། །གང་ཡང་ཡི་དམ་དུ་བྱས་པ་ལས་མ་འགལ་བར་རྗེས་སུ་བཟུང་ན། འདི་དང་ཕ་རོལ་འདོད་པའི་དོན་རྣམས་ངེས་པར་འགྲུབ་བོ། །གང་གིས་དམ་བཅས་པ་ལས་མ་འདས་ན། བླ་མ་དང་མཁའ་འགྲོའི་བྱིན་རླབས་འཇུག་ཅིང་། གང་ལ་ཡང་ཐོགས་པ་མེད་པར་འགྱུར་རོ། །བླ་མ་ལ་དུས་རྟག་ཏུ་མོས་པ་དང་གུས་པ་མ་ལོག་ཅིང་དུས་གསུམ་དུ་གསོལ་བ་བཏབ་ན་ལུས་ངག་ལ་བདེ་བ་ཁྱད་པར་ཅན་སྐྱེ་བར་ངེས་སོ། །གལ་ཏེ་ལུས་ངག་ཡིད་ཀྱིས་བླ་མ་ལ་མོས་གུས་ལོག་པ་དག་སྐད་ཅིག་ཙམ་མམ་ཐང་གཅིག་གམ་ཉིན་ཅིག་གམ་རྨི་ལམ་དུ་བྱུང་ན་ཡང་དྲན་པའི་རྗེས་ལ་བླ་མ་དངོས་མེད་ན་ཡང་ཡིད་ཀྱི་ཡུལ་དུ་བྱས་ལ་དེ་མ་ཐག་ཏུ་བཤགས་ན་སངས་རྒྱས་ཀྱི་ཡོན་ཏན་མང་པོ་མངོན་པར་མཐོང་བར་འགྱུར་རོ། །དེའི་ཕྱིར་དངོས་གྲུབ་ཀྱི་རྩ་བ་བླ་མ་ཡིན་པར་ཤེས་པར་བྱའོ། །དམ་ཚིག་གི་རྩ་བ་རྡོ་རྗེའི་སྤུན་སྲིང་ཡིན་པར་ཤེས་པར་བྱའོ། །སྒྲུབ་པའི་

རྩ་བ་བཟླས་པ་ཡིན་པར་ཤེས་པར་བྱའོ། །ལོངས་སྤྱོད་ཀྱི་རྩ་བ་བླ་མ་མཆོད་པ། འཁོར་འདུ་བའི་རྩ་བ་རང་གཅིག་པུར་འདུག་པ་ཡིན། མན་ངག་གི་རྩ་བ་དྲག་ལ་ཡུན་རིང་བ་ཡིན། སངས་རྒྱས་ཀྱི་རྩ་བ་རང་སེམས་ཡིན་པར། ཉམས་ལེན་གྱི་རྩ་བ་འདུག་ཐུབ་པ་ཡིན་པར། ཆོས་སྤྱོད་ཀྱི་རྩ་བ་ངག་བཅད་པ་ཡིན། བཟང་པོའི་རྩ་བ་རང་གི་ཡུལ་སྤངས་པ། ཆོས་ཀྱི་རྩ་བ་རྟག་ཏུ་གྲོགས་སྤངས་ཏེ་རྟག་ཏུ་དགོན་པ་བརྟེན་པ། སྤྱོད་པའི་རྩ་བ་གང་ལ་ཡང་ཞེན་ཅིང་ཆགས་པ་མེད་པ། སྒོམ་པའི་རྩ་བ་ཉོན་མོངས་པ་རང་སར་གྲོལ་བ། ལྟ་བའི་རྩ་བ་འཁོར་བའི་འབྲེལ་བ་ཆོད་པ། གྲུབ་པའི་རྩ་བ་སྣང་བ་ཐམས་ཅད་དབང་དུ་འདུས་པ། ཏིང་ངེ་འཛིན་གྱི་རྩ་བ་འགྱུ་བའི་རླུང་ཟད་པ་ཡིན་པར་ཤེས་པར་བྱའོ། །སྙིང་པོའི་དོན་རྒྱུད་ལས་སྐྱེ་བར་འདོད་ན་བླ་མ་དང་རྡོ་རྗེའི་སྤུན་ལ་བརྩེ་གདུང་རྒྱུན་མི་བཅད། མཁའ་འགྲོ་འདུ་བར་འདོད་ན་ཚོགས་དང་གཏོར་མ་ལ་འབད་པར་བྱའོ། །སྐྱེ་བོའི་ཚོགས་འདུ་ཞིང་བྱམས་པར་འདོད་ན་རྣལ་འབྱོར་མའི་ཚོགས་ལ་རྟག་ཏུ་མཆོད་པར་བྱའོ། །བླ་མ་མཉེས་པར་འདོད་ན་རང་སེམས་ལ་ཟོལ་ཟོག་མེད་ཅིང་། བླ་མའི་ཡོན་ཏན་ལ་ནན་ཏན་དུ་བྱ། ལུས་ཀྱི་ནད་དབྱུང་བར་འདོད་ན། ལུས་ངག་གི་གནད་དང་། དུས་ལ་བབས་པའི་རྩ་གནས་ཀྱི་ཡི་གེ་བརྗོད་པར་བྱ། འཁྲུལ་པའི་སྣང་བ་ནུབ་པར་འདོད་ན། རིག་པ་མངོན་སུམ་གྱི་སྣང་བ་ལ་འདྲིས་པར་བྱས། རང་གི་རྒྱུད་ཕྱི་ན་མ་ལོག་ཅིང་སྨིན་པར་འདོད་ན་ཡང་ནས་ཡང་དུ་བསྐུར་བར་བྱའོ། །དེ་ཉིད་སེམས་དང་མི་འབྲལ་བར་འདོད་ན་སྔགས་ཕྱི་ནང་སོ་སོའི་དམ་ཚིག་ལས་མི་འདའ་བར་བྱ། ལུས་ངག་ལ་རྟགས་འབྱུང་བར་འདོད་ན། རྟག་ཏུ་སྒྲུབ་པ་ལ་བརྩོན་པར་བྱ། སེམས་ཀྱི་རྟོག་པ་ཟད་པར་འདོད་ན་རླུང་འགྲོ་འོང་དུས་ཤེས་པར་བྱའོ། །ཡང་དམ་ཚིག་ཆེན་པོའི་མཆོག་གི་རྒྱུད་ལས། སྤྱིར་

༼འདི་ན་མ་ལྷག་མོ་ཡོད༽

༼འདི་ན་མ་ལྷག་མོ་ཡོད༽

ན་དམ་ཚིག་ཅེས་བྱ་བ། རང་སེམས་ཚིག་པ་མེད་པ་ལས། གཡོ་སྒྱུ་དག་དང་བྲལ་བ་འོ། །ཞེས་པ་དང་། ས་མ་ཡ་དམ་ཚིག་གི་རྒྱུད་ལས། སྔགས་ཀྱི་དམ་ཚིག་རྣམ་ཕྱེ་བ། །རྣམ་གྲངས་དམ་ཚིག་དཔག་ཏུ་མེད། །ཀྲི་ལ་རྣམས་ལ་ཁྱད་པར་དུ། །ལུང་གཅིག་ཆུ་ལ་མི་བཏུང་དང་། །སྔགས་དང་ལྷ་ཡི་ངེས་ཕྱེ་བའོ། །ཡོ་ག་རྣམས་ཀྱི་དམ་ཚིག་ཏུ། །ཡིད་ཀྱི་འགྱུ་བས་ལྡོག་པ་དང་། །དྲན་པའི་སེམས་ཀྱིས་མཁྱེན་པར་བྱ། །མ་ཧཱ་རྣམས་ནི་ཉམས་པ་དང་། སྐད་ཅིག་ཙམ་ཡང་འཕྲད་མི་བྱ། །ཨ་ནུ་རྣམས་ནི་ཉམས་པ་དང་། །སེམས་ཀྱི་དྲན་པས་མི་བསླད་དང་། །འགྱུར་ཤེས་པ་ཡིས་དགག་པར་བྱ། །ཨ་ཏི་རྣམས་ནི་ཉམས་པ་དང་། །ཚིག་བརྗོད་རིམ་པ་སྤང་བར་བྱ། །སེམས་ཀྱི་སྤྱོད་པ་མི་འགྱུར་བའོ། །དེ་དག་རྣམས་ལས་བསྡུས་པ་ནི། །ཡན་ལག་དང་ནི་རྩ་བའོ། །ཡན་ལག་ནང་པའི་ལུང་གི་ནི། །ཤེས་པར་བྱ་དང་མི་སྤང་དང་། །སྤྱད་པར་བྱ་དང་དང་དུ་བླངས། །བསྒྲུབ་པར་བྱ་བ་རྟོགས་པ་ལས། །རྣམ་གྲངས་བརྗོད་ཀྱིས་མི་ལང་བ འོ། །རྩ་བ་གསུམ་ལས་ངེས་ཕྱེ་བ། །དགུ་ཡི་རྣམ་པར་ཕྱེ་བ་ལས། །ཉི་ཤུ་རྩ་བདུན་དབྱེ་བ་ཡིས། །སྔགས་ལས་ཁྱད་པར་ནང་པ་ཡི། །དམ་ཚིག་རྣམ་པར་བསྡུས་ཏེ་ཕྱེ། །འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །དེ་ནས་སྔགས་པས་འབད་པར་བྱ། །ཤེས་བཞིན་གྱིས་ནི་ཟིན་པར་བྱ། །མཆོག་ཏུ་དངོས་གྲུབ་འདོད་པས་ནི། །བླ་མ་བསླུ་བར་མི་བྱ་ཞིང་། །མཆེད་ལ་བརྩེ་གདུང་རྒྱུན་མི་གཅོད། །ཅེས་པས་སོ། །འཁོར་བའི་ཉེས་དམིགས་མ་དྲན་ན་ཐར་པ་དང་ཐམས་ཅད་མཁྱེན་པའི་རྩ་བ་ཉམས། ངན་སོང་གསུམ་གྱི་སྡུག་བསྔལ་ཡིད་ལ་མ་བྱས་ན་བྱང་ཆུབ་ཀྱི་ས་བོན་ཉམས། ལས་རྒྱུ་འབྲས་ཀྱི་འབྲེལ་བ་ལ་མ་བརྟགས་ན་སྙིང་རྗེའི་རིན་དང་བྲལ། འཇིག་རྟེན་གྱི་བྱ་བ་མ་བཏང་ན་ཡེ་ཤེས་ཀྱི་འཕེལ་སྒོ་ཉམས། ཚོགས་གཉིས་

དང་དུ་མ་བླངས་ན་ལོངས་སྤྱོད་དང་ཐར་བའི་འབྲས་བུ་ཉམས། རྟག་ཏུ་རང་སེམས་ལ་མ་བསྒོམས་ན་ཚོགས་གཉིས་ཀྱི་རྩ་བ་ཉམས། རི་ཁྲོད་དགོན་པ་མ་བརྟེན་ན་སེམས་ཀྱི་མཐོང་བ་ཉམས་སོ། །ལྟ་བས་མ་ཟིན་པས་སྒོམ་པ་རྣམ་རྟོག་གི་གྲོགས་ཡིན་པར་ཤེས་པར་བྱའོ། །སྒོམ་པས་མ་ཟིན་པའི་སྤྱོད་པ་བཅོས་མ་ཡིན་པར་ཤེས་པར་བྱའོ། །སྤྱོད་པས་མ་ཟིན་པའི་དགེ་སྦྱོར་ཚུལ་འཆོས་ཡིན་པར་ཤེས་པར་བྱའོ། །དད་པས་མ་ཟིན་པའི་དམ་ཚིག་ཁ་ཚོན་ཡིན་པར་ཤེས་པར་བྱའོ། །སྙིང་རྗེས་མ་ཟིན་པའི་སྦྱིན་པ་ཁ་གྲགས་སུ་ཤེས་པར་བྱའོ། །དམ་ཚིག་གིས་མ་ཟིན་པའི་དབང་བསྐུར་གོལ་སར་ཤེས་པར་བྱའོ། །དྲན་པས་མ་ཟིན་པའི་བྱ་བ་དོན་མེད་དུ་ཤེས་པར་བྱའོ། །བླ་མས་མ་ཟིན་པའི་ལྟ་བ་ཡིད་དཔྱོད་དུ་ཤེས་པར་བྱའོ། །བླ་མ་ལ་མ་གུས་པའི་བྱིན་རླབས་བར་ཆོད་དུ་ཤེས་པར་བྱའོ། །དམ་ཚིག་མི་བསྲུང་བའི་སྒྲུབ་པ་ཚི་ཆད་པ་ལ་དོན་མེད་དུ་ཤེས་པར་བྱའོ། །གདམས་ངག་མེད་པའི་ཉམས་ལེན་ཏོམ་ཏོམ་དུ་ཤེས་པར་བྱའོ། །བླ་མ་ལས་མ་བྱུང་བའི་བཤད་པ་ངག་འཁྱལ་དུ་ཤེས་པར་བྱའོ། །ཆོས་ལས་མ་བྱུང་བའི་འབྲས་བུ་ཡི་ཆད་པར་ཤེས་པར་བྱའོ། །རྒྱུད་ལས། དམ་ཚིག་སྡོམ་པ་རྣམས་བཤད་པ། ཀུན་ཀྱང་རང་གི་སེམས་ལས་སོ། །དེ་ཡི་འཕེལ་བ་བླ་མས་ཤེས། །དེ་ཕྱིར་སེམས་ལ་འདྲེས་པའི་མིས། །སངས་རྒྱས་ཞིང་ཁམས་མཐོང་བ་དང་། །སྐུ་གསུམ་ཚད་དུ་འབྱོངས་པ་དང་། །སངས་རྒྱས་ཡོན་ཏན་མངོན་པར་འགྲུབ། །བླ་མ་རྟག་ཏུ་བརྟེན་པའི་མིས། །མཁའ་འགྲོའི་གཟུགས་རྣམས་མཐོང་བ་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། སྐྱེ་ཤི་གཉིས་ལ་དབང་ཐོབ་འགྱུར། །གྲོགས་ལ་བརྩེ་གདུང་ལྡན་པའི་མིས། །འགྲོ་བ་ཐམས་ཅད་འདུལ་བ་དང་། །ཀུན་གྱིས་སྙན་པར་གྲགས་པ་དང་། །གཟུགས་ཅན་ཀུན་ཀྱང་

བྱམས་པ་དང་། །རྟག་ཏུ་དམ་ཚིག་ལ་གནས་དང་། །མཁའ་འགྲོ་མ་རྣམས་འདུ་བ་དང་། །མ་བསྒྲུབས་དངོས་གྲུབ་འབྱུང་བ་དང་། །ངག་གི་ནུས་པ་འབར་བ་དང་། །དེ་བཞིན་མཆོག་དང་ཐུན་མོང་གི །བྱ་བ་ཐམས་ཅད་རྫོགས་པར་འགྱུར། །རྟག་ཏུ་དགོན་པར་གནས་པ་ཡིས། །རླུང་སེམས་ཚད་རྣམས་ཟིན་པ་དང་། །སྣང་བ་གྲོགས་སུ་འཆར་བ་དང་། །རང་གི་སེམས་ལ་དབང་ཐོབ་འགྱུར། །བླ་མར་བསྙེན་བསྐུར་བྱས་པའི་མིིར་། །ལོངས་སྤྱོད་མཆོག་ཏུ་ལྡན་པ་དང་། །འཁོར་འདབ་རྒྱས་ཤིང་བསོད་ནམས་ལྡན། །འགྲོ་བ་ཡོངས་ལས་རྒྱལ་བར་འགྱུར། །རྟག་ཏུ་དབང་རྫོགས་བྱས་པའི་མི། །འགྲོ་བའི་གཙོ་བོར་འགྱུར་བ་དང་། །ཀུན་གྱིས་མཐོང་ན་དགའ་བ་དང་། །ཡེ་ཤེས་མངོན་དུ་འབྱོངས་པ་དང་། །སངས་རྒྱས་རྣམས་ཀྱིས་བྱིན་བརླབ་འགྱུར། །རྟག་ཏུ་གཏོར་མའི་ལས་བྱེད་པས། །བསོད་ནམས་ཚོགས་རྣམས་རྫོགས་པ་དང་། །བར་ཆོད་མེད་ཅིང་ལས་རྣམས་འགྲུབ། །འདོད་པ་ཕུན་སུམ་ཚོགས་པ་དང་། །མཁའ་འགྲོ་བྲན་བཞིན་འཁོར་བར་འགྱུར། །ཞེས་གསུངས། དམ་ཚིག་རབ་ཏུ་འབྱེད་པ་ལས། བཀོད་པ་གསུམ་དུ་གཏན་ལ་ཕབ་པའོ། །བྲམ་ཟེའི་སློབ་དཔོན་འཇམ་དཔལ་བཤེས་གཉེན་གྱིས་མཛད་པ། དམ་ཚིག་རབ་ཏུ་འབྱེད་པ་ཞེས་བྱ་བ་རྫོགས་སོ།། །།ས་མ་ཡཱ། གཏད་རྒྱ། སྦས་རྒྱ།། །།རྒ།ཧ།ཧཱམཱཅ།༔ སམཱཧྱ།ཅ།ཐ྄ཐཾ༔ སམཧྱ།མཧྱཾ།ཁྱ།༔ རྒྱ་རྒྱ་རྒྱ༔ རྒྱ་རྒྱ་རྒྱ༔ བཀྲ་ཤིས།། །།

རྫོགས་པ་ཆེན་པོ་སྙིང་ཏིག་གི་ལོ་རྒྱུས་ཆེན་མོ།

རྫོགས་པ་ཆེན་པོ་སྙིང་ཏིག་གི་ལོ་རྒྱུས་ཆེན་མོ་བཞུགས་སོ༔ མན་ངག་བརྒྱ་བཅུ་དགུའི་ནང་ཚན་དགུ་བཅུ་པ།

༔གཐཱ།མརྣ།རྒཏྱཏྱ།༔ རྒྱ་གར་སྐད་དུ༔ བྷ་པ་མི་ཕེབས་དྷ་ནཱ་མ༔ བོད་སྐད་དུ༔ ལོ་རྒྱུས་རིན་པོ་ཆེ་ཞེས་བྱ་བ་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ གང་གི་རྒྱུད་རྒྱལ་ངེས་པའི་ཚིག༔ རྨོངས་པ་མེད་པར་གཏན་ལ་དབབ༔ ཕྱི་ལྟར་བཤད་པ་སྤྲོས་པ་ལ༔ ནང་ལྟར་དེ་བཞིན་སྤྲོས་པ་མེད༔ གསང་བ་ཤིན་ཏུ་སྤྲོས་མེད་དོ༔ བླ་ན་མེད་པ་རབ་སྤྲོས་མེད༔ འདིར་ནི་ནང་ལྟར་བཤད་པ་ལས༔ གང་ཟག་ཉོན་མོངས་ལྔས་གཟིར་བས༔ གཏི་མུག་ཅན་རྣམས་འཇུག་པའི་ཕྱིར༔ དམིགས་གཏད་མེད་པའི་སྒོམ་པ་ཉིད༔ ལམ་དུ་སློང་བར་འདོད་པ་ལ༔ ལོ་རྒྱུས་དོན་གྱིས་བཤད་པར་བྱ༔ འདོད་ཆགས་ཅན་རྣམས་འཇུག་དོན་དུ༔ བླང་དོར་མེད་པའི་སྤྱོད་པ་ཉིད༔ ལམ་དུ་སློང་བར་འདོད་པ་ལ༔ རྩ་བའི་དོན་ཉིད་བཤད་པར་བྱ༔ ཞེ་སྡང་ཅན་རྣམས་

འཇུག་དོན་དུ༔ གཟའ་གཏད་མེད་པའི་ལྟ་བ་ཉིད༔ ལམ་དུ་སློང་བར་འདོད་པ་ལ༔ ཡོ་གའི་དོན་རྣམས་བཤད་པར་བྱ༔ ང་རྒྱལ་ཅན་རྣམས་འཇུག་དོན་དུ༔ བླང་དོར་མེད་པའི་འབྲས་བུ་ཉིད༔ ལམ་དུ་སློང་བར་འདོད་པ་ལ༔ དགོས་ཆེད་དོན་ཉིད་བཤད་པར་བྱ༔ ཕྲག་དོག་ཅན་རྣམས་འཇུག་དོན་དུ༔ གོ ལ་སྒྲིབ་མེད་པའི་གཞི་བསྟན་ཕྱིར༔ ཚིག་གི་དོན་ཉིད་བཤད་པར་བྱའོ༔ དེ་ལ་ལོ་རྒྱུས་དོན་གྱིས་བཤད༔ འདི་ལ་རྣམ་པ་གཉིས་ཡིན་ཏེ༔ སངས་རྒྱས་ཉིད་ཀྱི་ལོ་རྒྱུས་ནི༔ ཚིག་དོན་བཅུ་གཅིག་གོང་དུ་བསྟན༔ དེ་ལ་གཅེས་པའི་ལོ་རྒྱུས་བཤད༔ དུས་གསུམ་འདུལ་ཕྱིར་བྱས་པའི་ཕྱིར༔ བརྒྱུད་པ་གསུམ་དུ་གཏན་ལ་དབབ༔ དེ་ལས་བབས་ལུགས་ཆེན་པོ་བཤད༔ དེ་ལ་ཡང་དག་པར་རྫོགས་པའི་སངས་རྒྱས་སྟོན་པ་ཐུགས་

རྗེ་ཆེ་ལ་ཐབས་མཁས་པ་ཉིད་ཀྱིས༔ དང་པོ་བསྐལ་པ་དཔག་ཏུ་མེད་པའི་སྔོན་རོལ་དུ༔ ཞིང་ཁམས་རང་བཞིན་རྣམ་པར་བཀོད་པ་ཞེས་བྱ་བར༔ སངས་རྒྱས་མེ་ཏོག་མཛེས་པ་ཆེན་པོ་ལ༔ གསེར་གྱི་རྡོ་རྗེ་གཅིག་ཕུལ་ནས་ཐུགས་བྱང་ཆུབ་མཆོག་ཏུ་སེམས་བསྐྱེད་དོ༔ དེ་ནས་སྐྱེ་བ་གཉིས་ན༔ བྱང་ཕྱོགས་རླུང་གི་གཡོ་བ་བཀོད་པ་ཞེས་བྱ་བ་རུ༔ ཁྱིམ་བདག་ལེགས་སྦྱིན་ཞེས་བྱ་བའི་སྲས་སུ་སྐྱེས་ཏེ༔ དེའི་ཚེ་ཕ་ནི་ལེགས་སྦྱིན་ཞེས་བྱའོ༔ མ་ནི་དགེ་བའི་མཆོག་སྦྱིན་ཞེས་བྱའོ༔ གྲོང་ཁྱེར་ནི་རྔ་ཡབ་ཅན་ཞེས་བྱའོ༔ དེ་ཉིད་ནོར་བུའི་འཕྲེང་བ་ཞེས་བྱའོ༔ དེ་ནས་ཉེར་ལྔ་ན༔ གླིང་དེའི་ཤར་ཕྱོགས་ན་མཁའ་འགྲོ་མ་རྣམས་འདུས་པའི་ཕུག་ཅེས་བྱ་བ་ན༔ ཡང་དག་པར་རྫོགས་པའི་སངས་རྒྱས་འཁོར་ལོ་ལེགས་པར་སྤྱོད་པ་ཞེས་བྱ་བའི་དྲུང་དུ་འཁོད་དེ༔ མདུན་དུ་བདར་ཞིང་ཕྱག་བྱས་ནས་རབ་ཏུ་ཆོས་ཉན་ཏོ༔ དེ་ནས་ཤི་འཕོས་ཏེ༔ ཡང་བདེ་བས་མྱོས་པའི་གླིང་ཞེས་བྱ་བར་ཕ་ནི་ཀློག་གི་འོད་ཅེས་བྱའོ༔ མ་ནི་རྣམ་པར་མཛེས་ཞེས་བྱའོ༔ གྲོང་ཁྱེར་ནི་ནམ་མཁའ་འཛིན་ཞེས་བྱའོ༔ ཉིད་ནི་ལག་སྦྱིིན་ཞེས་བྱའོ༔ དེའི་ཚེ་ན་དཔལ་དགེ་བའི་བློ་གྲོས་ཞེས་བྱ་བ་ལས༔ ལོ་ལྔའི་བར་ལ་ཆོས་ཉན༔ དེ་ནས་བདུན་གྱི་བར་ཏིང་ངེ་འཛིན་མཉམ་པར་བཞག་གོ༔ སྤྱིར་དགུང་ལོ་ཉི་ཤུ་རྩ་ལྔ་ན༔ ནོར་བུ་རིན་པོ་ཆེའི་ཕུང་པོ་རྣམ་པར་བཀོད་པ་ཞེས་བྱ་བའི་རིའི་རྩེ་ལ་མངོན་པར་རྫོགས་པར་སངས་རྒྱས་སོ༔ དེ་ནས་བསྐལ་པ་གཅིག་ན༔ ཆོས་ཀྱི་སྤྲོས་གཞི་མཐའ་གང་དུའང་མ་ལྷུང་པ་ལས་ཐུགས་རང་བྱུང་གི་ཡེ་ཤེས་ཆེན་པོ་ཉིད་རྣམ་པར་གཡོས་པ་ལས༔ ལོངས་སྤྱོད་རྫོགས་པ་སྐུའི་རྒྱན་དང་༔ ཁ་དོག་གི་འཁོར་ལོ་རང་བྱུང་དུ་བྱོན༔ འདིའི་དུས་ན་ཡིད་རང་བྱུང་གི་ཡེ་ཤེས་རང་བྱུང་བས༔ འོད་ཟེར་འཕྲོ་འདུ་ལས༔ མཛད་པ་སུམ་ཅུ་རྩ་དྲུག་གི་

བརྒྱུད་པ་མཛད༔ གནས་པ་འོད་ཀྱི་ཐིག་ལེ་ལས༔ གནས་ཕུན་སུམ་ཚོགས་པ་དྲུག་ཅུ་ཐམ་པར་གནས་པར་བྱས༔ དེ་ཉིད་ཀྱི་རང་བཞིན་བྱིན་གྱིས་རླབས་ལས༔ སངས་རྒྱས་ཀྱི་སྐུ་འབུམ་ཕྲག་ཁྲིག་དཔག་ཏུ་མེད་པ་བརྗོད་ཀྱིས་མི་ལང་བ་རྣམས་མཐོང་བ་རྣམ་པར་དག་པའི་སྤྱན་གྱི་དཀྱིལ་འཁོར་ལ་མངོན་པར་སྣང་༔ དེ་དག་ཐམས་ཅད་ཀྱང་༔ ཉིད་ཀྱི་འོད་ཀྱི་ཁ་དོག་ལས༔ རིགས་ལྔའི་སངས་རྒྱས་སུ་འདུས་ཤིང་༔ རིགས་ལས་མངོན་པར་འབྱུང་ངོ་༔ དེའི་ཚེ་ཉིད་ཀྱི་ལྗགས་ཀྱི་དབང་པོ་ལས༔ འོད་ཟེར་དཔག་ཏུ་མེད་པ་འཕྲོས་པ་ལས༔ རང་བྱུང་གི་ཡི་གེ་དྲུག་གི་སྒྲ་རང་བྱུང་དུ་བྱུང་སྟེ༔ སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་དོ༔ ཞེས་བྱ་བ་ལན་གསུམ་བྱུང་བས༔ ཉིད་ཀྱི་ཐུགས་ཡེ་ཤེས་རྣམ་པར་དག་པ་ལས༔ རང་བྱུང་གི་ཡེ་ཤེས་རང་ཤེས་རིག་གི་རྒྱལ་པོ༔ ཆོས་ཉིད་ཀུན་ཏུ བཟང་པོ་ཉིད་དུ་རང་བྱུང་ནས༔ རང་བཞིན་མཛད་པ་མེད་པའི་ཐུགས་རྗེ་ཕྱོགས་བཅུར་འཕྲོས་སོ༔ དེ་ཉིད་ཀྱི་ངང་ལས་སངས་རྒྱས་རྣམ་པར་སྣང་མཛད་ཆེན་པོ་སྐུ་གཙོ་འཁོར་དང་བཅས་པ་གྲངས་མེད་པ༔ ཉིད་ཀྱི་ལོངས་སྤྱོད་དུ་འདུས་པ་དང་༔ རྫོགས་པ་ཆེན་པོ་སྐུའི་འོད་འབར་རོ༔ དེ་བཞིན་དུ་མི་བསྐྱོད་པ་དང་༔ རིན་ཆེན་འབྱུང་ལྡན་དང་༔ སྣང་བ་མཐའ་ཡས་དང་༔ དོན་ཡོད་གྲུབ་པ་ལ་སོགས་པའི་སངས་རྒྱས་གྲངས་མེད་པ༔ སོ་སོའི་དལ་དང་བཅས་པ༔ ཉིད་ཀྱི་ལོངས་སྤྱོད་དུ་འདུན་ཅིང་༔ རྫོགས་པ་ཆེན་པོའི་སྐུར་འབར་རོ༔ དེ་ལྟར་ཡན་ལག་བཅུ་གཉིས་སུ་བྱུང་བས༔ ཆོས་ཐམས་ཅད་ཀྱི་ལོངས་སྤྱོད་རྣམ་པར་དག་པ་ཉིད་ལ་རྣམ་པར་སྤྱོད་ཅིང་རྣམ་པར་རྫོགས་སོ༔ འདིའི་ཚེ་ན་ཆོས་ཐམས་ཅད་ཀྱི་མིག་དྲི་མ་མེད་ཅིང་རྡུལ་དང་བྲལ་བ་རྙེད་དོ༔ དེ་ནས་ཐུགས་ཡིད་དུ་རང་བྱུང་བས་ཐུགས་ཡིད་ཅེས་བྱ་སྟེ༔ ཡུལ་གཅིག་དང་དུ་

མ་ལ་དགོངས་པ་རང་བྱུང་རང་ཤར་དུ་བྱུང་ངོ་༔ དེའི་ཚེ་ན་འོད་ཁྱིམ་རྣམ་པར་དག་པ་ཤིན་ཏུ་བཀོད་པ་ལེགས་པའི་གནས༔ རྣམ་པར་ལེགས་པའི་ཁང་བུ་བརྩེགས་པ་ན༔ སྟོན་པ་རྣམ་པ་རང་ཤེས་རིག་གི་རྒྱལ་པོ༔ རྣམ་པར་སྣང་མཛད་གང་ཆེན་མཚོ་ཞེས་བྱ་བ༔ དལ་ཐམས་ཅད་ཀྱི་མངའ་བདག་ཏུ་རང་བྱུང་སྟེ༔ འདིའི་དུས་ན་སྐུ་གསུང་ཐུགས་རང་བྱུང་༔ བྱས་པ་མེད་པའི་བསྟན་པ་རིན་པོ་ཆེའི་ངང་ལས༔ མི་གཡོ་མི་འབྱུང་༔ མི་གནས་མི་ལེན་མི་འདོར༔ མི་བསྐྱོད་པ་ཆེན་པོ་གཅིག་ཏུ་འབྱུང་ངོ་༔ དེའི་ཚེ་གདུལ་བྱ་མ་ཡིན༔ འདུལ་བྱེད་རིན་པོ་ཆེ་མཛེས་པའི་འཁོར༔ ཚོམ་བུ་འབུམ་ཕྲག་གྲངས་མེད་པ༔ ཉིད་ཀྱི་སྐུ་གསུང་ཐུགས་དང་ཡོན་ཏན་འཕྲིན་ལས་ཉིད་ལས་རྣམ་པར་འཕྲོས་ཤིང་འདུས་སོ༔ དེ་ལྟར་སྟེང་དང་འོག་དང་ཕྱོགས་བཅུའི་འཇིག་རྟེན་མ་ཡིན་ཅིང་༔ བདེ་བའི་ཞིང་ཐམས་ཅད་ཀྱང་༔ རྣམ་པར་སྟུག་པོ་བཀོད་པ༔ སངས་རྒྱས་དཔག་ཏུ་མེད་པ༔ བརྗོད་ཀྱིས་མི་ལངས་པ་དག་ཏུ༔ རང་བྱུང་གི་ཡེ་ཤེས་ཀྱི་ངང་ལས་རང་རིག་རང་གསལ་དུ་བཞུགས་སོ༔ དེ་ལྟར་ཡང་སྐུའི་འོད་ལ་བཞུགས་ཤིང་༔ གསུང་གི་ཟེར་ལ་རོལ་པ་ཉིད༔ ཐུགས་ཀྱི་དགོངས་པ་ལ་བཞུགས་སོ༔ དེ་ནས་རང་བྱུང་ཡེ་ཤེས་འབྱེད་པ་མེད་པ་ཉིད༔ རང་གཡོས་པ་ལས་སྤྲུལ་པའི་སྐུ་ཉིད་དུ་རྣམ་པར་སྤྲུལ་ཏེ༔ འདི་ནས་བསྐལ་པ་ཆེན་པོ་བདུན་གྱི་འོག་ཏུ༔ མ་རིག་པ་དག་ཏུ་འཁྲུལ་འཛིན་གྱི་ཤེས་པ་ལས༔ རྒྱུ་འཁོར་བའི་ཡིད་ཀྱིས༔ ཆོས་འདི་མ་དག་པའི་རྐྱེན་བྱས༔ ཆ་མེད་པའི་ཉོན་མོངས་པས་གཞི་བྱས༔ ཡུལ་འདི་དང་འདིའི་རྣམ་རྟོག་གི་ཆ་ཕྲ་མོ་ཁ་ཕྱིར་བལྟས་པ་ལས༔ བདག་པོའི་རྐྱེན་ཞེས་དུས་དེར་གཡོ་བས་རྐྱེན་བྱས༔ ཡུན་ལྷུན་གྲུབ་ཀྱི་སྐྱོན་ཡོན་ཏན་དུ་མ་ཤེས་ཏེ༔ ཡོན་ཏན་སྐྱོན་དུ་སོང་བ་ལས༔ དམིགས་པའི་རང་བཞིན་སྐུ་དང་

ཡེ་ཤེས་ལ༔ བདག་ཏུ་གཅོད་པའི་རྒྱུའི་ཆ་ཙམ་ལས༔ དམིགས་པ་སོ་སོའི་ཁ་དོག་གི་རྐྱེན་བྱས་སོ༔ དེ་ལྟར་ཆོས་དང་སྤྲུལ་སྐུ་གཉིས༔ ལོངས་སྐུ་ལ་དུས་མཚུངས་པས༔ ཆོས་སྐུ་སྤྲོས་པ་མེད་པའི་གནས་སུ༔ རང་ལས་རང་བྱུང་གི་ཡེ་ཤེས་ཁ་ཕྱིར་བསྐྱལ་བ་ལས༔ དེ་ཉིད་ལས་མ་དག་པ་ལས༔ མཚུངས་པ་དེ་མ་ཐག་པའི་རྐྱེན་ཞེས་བྱའོ༔ འདི་དག་དུས་སུ་གཞི་མེད་པས༔ རང་གིས་རང་དུ་རྐྱེན་དུ་འཇུག་པ༔ ཉིད་ལས་རྐྱེན་ཞེས་བྱའོ༔ འདིའི་དུས་ན་རྣམ་པ་ཐམས་ཅད་མཁྱེན་པའི་ཡེ་ཤེས་ཉིད་ཡོན་ཏན་གྱི་རྩལ་དུ་མར་སྣང་བ་ལས༔ ཐབས་ཞེས་རྟོགས་པ་རང་ཤར་དུ་ཤར་བའི༔ ཕའི་རྒྱུ་ཟླས་མཚན་ཉིད་འཛིན་པའི་ཡེ་ཤེས་ལྔའི་རྩལ་ཡོན་ཏན་སྐྱོན་དུ་སོང་བ་ལས༔ ཤེས་རབ་ཅེས་ཤེས་རིག་ཕྱོགས་མེད་དུ་གསལ་བ་ཉིད་ལས༔ མའི་རྐྱེན་བྱས་སོ༔ རྒྱུ་རྐྱེན་འཛོམ་པ་ལས་ཆོས་ཉིད་ཀུན་ཏུ་བཟང་པོ་ཆོས་ཐམས་ཅད་ཀྱི་གཞི་མ༔ སྟོན་པ་སངས་རྒྱས་བཅོམ་ལྡན་འདས་ཀྱི་སྐུ་ཡོན་ཏན་སྣ་ཚོགས་པ་ཉིད་དུ་ཤར་རོ༔ དེ་ལྟར་ཡང་སྟོན་པ་སངས་རྒྱས་བཅོམ་ལྡན་འདས་ཡོན་ཏན་རྫོགས་པའི་སྐུས་ཐུགས་གཡོས་པ་ནི༔ སྔོན་བྱང་ཆུབ་མཆོག་ཏུ་སེམས་བསྐྱེད་པ་ཉིད་ལས༔ སྔོན་གྱི་སྨོན་ལམ་གྱི་མཐུས༔ སྐུ་མཚན་ཉིད་རྫོགས་པ་རྡོ་རྗེ་འཆང་གི་སྐུར་མངོན་པར་གསལ་བ་ནི༔ སེམས་བསྐྱེད་པའི་ཚེ་ག སེར་གྱི་རྡོ་རྗེ་ཕྲ་མོ་སེམས་བསྐྱེད་པའི་རྟེན་དུ་ཕུལ་བ་ལས་བྱུང་བའོ༔ དེ་ཉིད་ཀྱི་སྣང་ཆ་ལས་དཔེ་བྱད་ཕུན་སུམ་ཚོགས་པ་རྡོ་རྗེ་འཆང་ཡོན་ཏན་རྫོགས་པའི་ཁྱད་པར་དུ་བྱུང་བའོ༔ འདུ་བ་ཁྱད་པར་ཅན་གྱི་རྟེན་མངོན་པར་སྒྲུབ་པ་ལས་བྱུང་བ་སྟེ༔ འདི་དག་བསོད་ནམས་རྣམ་པར་དག་པས༔ སྐུ་སྣང་ལ་རང་བཞིན་མེད་པ༔ ལས་ཀྱིི་མ་རིག་པ་རྣམ་པར་དག་པས༔ ཐུགས་ཀྱི་ཤེས་རབ་ཆེན་པོ་ཀློང་རྡོལ་ནས་རྣམ་པ་ཐམས་ཅད་

མཁྱེན་པ་ལ་ལོངས་སྤྱོད་པའོ༔ དེ་ལྟར་སྣང་མཛད་རྡོ་རྗེ་འཆང་ཆེན་པོ་རང་བཞིན་ཡོན་ཏན་རྫོགས་པའི་སྐུར་བྱུང་བ་ནི༔ འགྲོ་དང་འགྲོ་བའི་མཐུ་དང་༔ འཇུག་པ་རྣམ་པར་དག་པ་ལས་བྱུང་བའོ༔ དེ་ཡང་ཆོས་སྐུའི་དུས་ན༔ གནས་ཆོས་ཀྱི་དབྱིངས་རྣམ་པར་དག་པ་དཔག་ཏུ་མེད་པ༔ དམིགས་སུ་མི་ཚུད་དག་ཏུ་གནས་པ་ནི༔ སྟོན་པ་ཀུན་ཏུ་བཟང་པོ་རང་བཞིན་གྱི་མཛད་པ་མ་ལུས་པར་རྫོགས་པར་མཛད་ཅིང་༔ ཁྱད་པར་ཆེན་པོ་ཉིད་དུ་བཞུགས་སོ༔ འཁོར་རྡུལ་གཅིག་གི་སྟེང་ན་རྡུལ་རྙེད་ཀྱི་སངས་རྒྱས་དཔག་ཏུ་མེད་པ་རྣམས་དང་ལྷན་ཅིག་ཏུ་བསྟན་པ་རང་བཞིན་ཆོས་ཉིད་ཀྱི་རྡོ་རྗེ་སུས་ཀྱང་འདུས་མ་བྱས་པ་ཉིད་དོ༔ དུས་ནི་ཆོས་ཉིད་མཐོང་བ་རྣམ་པར་དག་པ་ཉིད་དོ༔ འདིའི་དུས་ན་སྐུའི་ཕྱིའི་མཛད་པ་བཞི་ནི༔ མི་འགྱུར་བ་དང་༔ མི་འགྲོ་བ་དང་༔ མི་འོང་བ་དང་༔ མི་གནས་པ་ཉིད་དོ༔ ནང་གི་བཞི་ནི༔ མི་སྣང་བ་དང་༔ མི་མཛད་པ་དང་༔ མི་འཕྲོ་བ་དང་༔ མི་འདུ་བའོ༔ གསང་བའི་གཞི་ནི༔ ལྷང་ངེ་བ་དང་༔ ལྷན་ནེ་བ་དང་༔ ལྷག་གེ་བ་དང་༔ ཐལ་ལེ་བའོ༔ གསུང་གི་ཕྱིའི་མཛད་པ་བཞི་ནི༔ བརྗོད་དུ་མེད་པ་དང་༔ བསྟན་དུ་མེད་པ་དང་༔ བལྟར་མེད་པ་དང་༔ ཅུང་ཟད་མེད་པའོ༔ ནང་གི་བཞི་ནི༔ རང་བཞིན་དུ་དང་༔ གྱིན་འདར་ར་དང་༔ ཡུལ་ཅན་ཡིན་པ་དང་༔ དུ་མ་མེད་པའོ༔ གསང་བའི་བཞི་ནི༔ སོ་མ་དང་༔ གཉུག་མ་དང་༔ རྣལ་མ་དང་༔ མ་བཅོས་པའོ༔ ཐུགས་ཀྱི་ཕྱིའི་མཛད་པ་བཞི་ནི༔ དྲི་མ་མེད་པའི་ཏིང་ངེ་འཛིན་དང་༔ སེང་གེ་རྣམ་པར་བསྒྱིངས་པའི་ཏིང་ངེ་འཛིན་དང་༔ དཔའ་བར་འགྲོ་བའི་ཏིང་ངེ་འཛིན་དང་༔ ཡིད་བཞིན་ནོར་བུ་ཏོག་གི་ཏིང་ངེ་འཛིན་ཏོ༔ ནང་གི་བཞི་ནི༔ རྒྱལ་མཚན་རྩེ་མོ་རྣམ་པར་རོལ་པ་དང་༔ གློག་གི་འཕྲེང་བ་དང་༔ འཁོར་ལོ་ཆེན་པོ་དང་༔ འོད་འབར་བའི་ཏིང་ངེ་འཛིན་ཏོ༔

༼༡༠༣་་་་་༡༠༤་་མ་འདི་རེད་འདུག༽ གསང་བའི་བཞི་ནི༔ ཕྱག་རྒྱ་ཟིལ་གྱིས་གནོན་པ་ཞེས་བྱ་བའི་ཏིང་ངེ་འཛིན་དང་༔ འབར་ཆེན་སྙམ་པའི་ཏིང་ངེ་འཛིན་ཞེས་བྱ་བ་དང་༔ ཆོས་ཉིད་སྣ་ཚོགས་ཞེས་བྱ་བའི་ཏིང་ངེ་འཛིན་དང་༔ རྣམ་པར་བཀོད་པ་རང་སྣང་རོལ་པ་ཞེས་བྱ་བའི་ཏིང་ངེ་འཛིན་ཏོ༔ དེ་དག་རྣམས་ཀྱང་མཛད་པར་ཅི་འགྲོ་ཞེ་ན༔ ངོ་བོའི་གནས་པ་ཙམ་ལས༔ སྐུའི་མཛད་པ་བཅུ་གཉིས་སུ་བྱུང་བས༔ ཆོས་ཀྱི་སྐུ་ཙམ་གྱིས་མཛད་པ་མ་ལུས་པར་མཛད་དོ༔ རང་བཞིན་གྱི་ཆ་ལ་གནས་པ་ཙམ་ལ༔ གསུང་གི་མཛད་པ་བཅུ་གཉིས་སུ་བྱུང་བས་ལོངས་སྐུ་འགག་པ་མེད་པའི་ཆ་ཙམ་དུ་བྱུང་བའོ༔ དེ་ལྟར་བཅུ་གཉིས་ཀྱིས་ལོངས་སྤྱོད་རྫོགས་པའི་མཚན་ཉིད་རྫོགས་པར་མཛད་དོ༔ ཐུགས་རྗེ་རྩལ་འགག་མེད་དུ་གནས་པ་ལས༔ ཐུགས་ཀྱི་མཛད་པ་ཏིང་འཛིན་བཅུ་གཉིས༔ མཉམ་གཞག་གི་དུས་ན་མ་ཕྱེ་བའི་མི་འབྱེད་པའོ༔ རྗེས་ལ་སྣང་བ་རང་སྣང་དང་༔ གསལ་ལ་རྟོག་པ་མེད་པ་དང་༔ ཡིན་པ་ལ་བདག་ཏུ་མེད་པར་མཛད་དོ༔ དེ་ནས་ལོངས་སྐུར་བྱོན་ཏེ༔ གནས་རྣམ་དག་སྟུག་པོ་བཀོད་པར༔ སྟོན་པ་རྣམ་པར་སྣང་མཛད་གང་ཆེན་མཚོའི་མཉམ་པར་བཞག་པའི་ཕྱག་གི་མཐིལ་ན༔ སངས་རྒྱས་ཀྱི་ཞིང་ཁམས་ཉི་ཤུ་རྩ་གཅིག༔ ཡས་མན་དུ་རྒྱ་ཐབ་བརྩིགས་པ་ལྟ་བུ་དང་༔ ཕན་ཚུན་དུ་ཟ་འོག་གི་གུར་ཁྱིམ་བཀྲམ་པ་ལྟ་བུ་དང་༔ དེ་རེ་རེ་ལ་སྟོན་པ་ལ་སོགས་པ་ལྔ་ལྔའི་ཁྱད་པར་དུ་གནས་སོ༔ ཞབས་སྐྱིལ་ཀྲུང་དུ་བཞུགས་པ་མན་ཆད་ལ་ཞིང་ཁམས་བཅུ་དྲུག་གནས་སོ༔ དེ་ཡང་ཡན་ལག་རིན་པོ་ཆེའི་གདུགས་རྣམ་པར་བརྩེགས་པ་ལྟ་བུ་དང་༔ ཕན་ཚུན་དུ་འབྲུའི་ཕུང་པོ་དཔག་ཏུ་མེད་པ་བཀྲམ་པ་ལྟ་བུའོ༔ འཁོར་ནི་རིགས་ལྔའི་སངས་རྒྱས་དཔག་ཏུ་མེད་པ་རྣམས་སོ༔ བསྟན་པ་ནི་གསུང་གི་ཡི་གེ་སུས་ཀྱང་

བྱས་པ་མེད་པ༔ བསྟན་པ་ཐམས་ཅད་ཀྱི་བུ་དང་ལྷན་ཅིག་ཏུ་གནས་སོ༔ དུས་ནི་ཆོས་ཉིད་ལས་འགྱུར་བ་མེད་པའོ༔ དེའང་ལོངས་སྐུའི་དུས་ན༔ སྐུའི་ཕྱིའི་མཛད་པ་བཞི་ནི༔ སྐུ་སྣང་བ་རང་བཞིན་མེད་པས་རྡོས་བཅས་རྣམ་པར་དག་པར་མཛད༔ ཡེ་ཤེས་ཀྱི་ཞལ་ཕྱག་ཏུ་རྫོགས་པས་སྐུ་རང་གི་ངོ་བོའི་མཛད་པ་མ་ལུས་པར་རྫོགས་པར་མཛད༔ འོད་ཀྱི་ཞལ་ཕྱག་ཏུ་གསལ་བས་རང་སྣང་རང་དགྲོལ་བར་མཛད་དོ༔ ཤེས་རབ་ཀྱི་ཞལ་གྱི་ཕྱག་གི་རྣམ་པར་སྣང་བས༔ མཁྱེན་པ་ཡོངས་སུ་རྫོགས་པའི་མཛད་པ་མ་ལུས་པར་མཛད་དོ༔ ནང་གི་བཞི་ནི༔ མཚན་བཟང་པོ་སུམ་ཅུ་རྩ་གཉིས་འོད་ཟེར་གྱི་རྣམ་པར་བྱུང་པས། སྐུའི་ཡོན་ཏན་མ་ལུས་པར་རྫོགས་པར་མཛད༔ དཔེ་བྱད་བཟང་པོ་བརྒྱད་ཅུས་བརྒྱན་པས༔ རྣམ་པར་དག་པ་ཆོས་ཀྱི་མཛད་པ་མ་ལུས་པ་རྫོགས་པར་མཛད་དོ༔ སྐུ་ལས་འོད་ཟེར་གྱི་ཚོགས་དཔག་ཏུ་མེད་པ་བྱུང་བས༔ སངས་རྒྱས་ཀྱི་ཁྱད་པར་གྱི་ཡོན་ཏན་མ་ལུས་པ་རྫོགས་པར་མཛད༔ ཞལ་ཀུན་ཏུ་ཐལ་ལེར་བཞུགས་པས༔ ལོངས་སྤྱོད་རྫོགས་པའི་མཛད་པ་ཉིད་མ་ལུས་པར་རྫོགས་པར་མཛད་དོ༔ སྐུའི་གསང་བའི་བཞི་ནི༔ མདུན་དང་རྒྱབ་ཏུ་མེད་པར་བཞུགས་པས༔ ཕྱོགས་གང་དུའང་མི་དམིགས་པར་མཛད༔ ཕྱི་ནས་བལྟས་པས་ནང་གསལ་བར་བཞུགས་པས་སྣང་ཆ་མ་ལུས་པ་རྫོགས་པར་མཛད་དོ༔ ནང་ནས་བལྟས་པས་ཕྱི་གསལ་བ་ཉིད་དུ་བཞུགས་པས༔ ལྟོས་ཆའི་འཛིན་པ་མ་ལུས་པར་མཛད་དོ༔ རྩེ་མོ་ཕྱོགས་ཀུན་ཏུ་ཟང་ཐལ་ལེར་བཞུགས་པས༔ མི་གནས་འགག་པ་མེད་པའི་མཛད་པ་རྫོགས་པར་མཛད་དོ༔ ལོངས་སྐུའི་དུས་ན༔ གསུང་གི་ཕྱིའི་མཛད་པ་བཞི་རང་བྱུང་གི་ཡི་གེ་དྲུག་ལྗགས་ཀྱིི་དབང་པོ་ལ་འཕྲོས་ནས༔ བདག་ཏུ་མེད་པའི་ཆོས་ཉིད་ཀྱི་མཛད་པ་མ་ལུས་པ་རྫོགས་པར་མཛད༔

དེ་ཡབ་ཀྱི་ཞལ་དུ་ཞུགས་པས་མཚན་མ་མེད་པའི་ཆོས་ལ་ལོངས་སྤྱོད༔ དེ་ཉིད་ཡུམ་གྱི་མཁའ་ལ་ཐོན་པས༔ གཉིས་སུ་མེད་པའི་ཆོས་ཉིད་ལ་ལོངས་སྤྱོད༔ དེ་རབ་ཏུ་འཕྲོས་ཤིང་འདུས་པ་ལས༔ ཆོས་ཐམས་ཅད་རང་བཞིན་མེད་པའི་མཛད་པ་རྫོགས་པར་མཛད་དོ༔ ནང་གི་བཞི་ནི༔ རང་གི་ངོ་བོས་བཤད་པས༔ ཆོས་ཐམས་ཅད་བརྗོད་དུ་མེད་པའི་རང་སྒྲ་ལ་རང་དབང་བསྒྱུར༔ ཆོ་ག་ཙམ་མ་ཡིན་པ་གོ་བས༔ སྨྲ་བསམ་ལས་འདས་པའི་ཆོས་ཉིད་ལ་ལོངས་སྤྱོད༔ སྒྲ་ཐམས་ཅད་རང་དག་པས་ན་མངོན་པར་འདུ་མི་བྱེད་པའི་ཆོས་ཉིད་ལ་ལོངས་སྤྱོད་དོ༔ ཁ་དོག་དཔག་ཏུ་མེད་པའི་འོད༔ ཞལ་གྱི་དལ་ལས་འཕྲོས་པས༔ གདུལ་བྱ་འདུལ་བྱེད་ཀྱི་ཆོས་ཉིད་ལ་ལོངས་སྤྱོད་དོ༔ གསང་བའི་བཞི་ནི༔ སྐུའི་སྦྱོར་བ་རྣམ་པར་དག་པས་རང་བྱུང་གི་ཆོས་ལ་ལོངས་སྤྱོད༔ གསུང་གི་རྣམ་པར་དག་པས་ཟག་པ་མེད་པའི་ཆོས་ལ་ལོངས་སྤྱོད༔ ཐུགས་ཀྱི་རྣམ་པར་དག་པས་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ལ་ལོངས་སྤྱོད༔ ཞལ་གྱི་སྦྱོར་བ་རྣམ་པར་དག་པས་ཐམས་ཅད་མཁྱེན་པའི་ཡེ་ཤེས་ལ་ལོངས་སྤྱོད༔ དེས་ནི་ཆོས་ཉིད་སྐྱེ་མེད་ཀྱི་རང་སྒྲར་བྱུང་བའོ༔ ལོངས་སྐུའི་དུས་ཀྱི་ཐུགས་ཀྱི་བཞི་ནི༔ མངོན་པར་འདུ་མི་བྱེད་པའི་ཏིང་ངེ་འཛིན་ལ་མཉམ་པར་བཞག་པས༔ མཁྱེན་པ་ཡོངས་སུ་རྫོགས་པའི་མཛད་པ་རྫོགས་པར་བྱའོ༔ ཆོས་ཉིད་མངོན་པར་སྣང་བའི་ཏིང་ངེ་འཛིན་ལ་མཉམ་པར་བཞག་པས༔ ཆོས་ཉིད་རང་གི་གཞི་ཉིད་དུ་མཛད༔ ཟག་པ་ཟད་པའི་ཏིང་ངེ་འཛིན་ལ་མཉམ་པར་བཞག་པས༔ རྣམ་པར་དག་པའི་རོལ་པ་མ་ལུས་པར་རྫོགས་པར་མཛད་དོ༔ དེ་ནི་གནས་པའི་ཆ་ལ་བྱུང་བའོ༔ ནང་གི་བཞི་ནི༔ མེ་ལོང་ལྟ་བུའི་ཡེ་ཤེས་ཀྱི་མཁྱེན་པ་ནང་དུ་གསལ་བས་དེས་ཐམས་ཅད་ལ་ལོངས་སྤྱོད༔ མཉམ་ཉིད་ཀྱི་ཡེ་ཤེས་ཀྱིི་མཁྱེན་པ་ནང་དུ་གསལ་བས་དོན་ཐམས་ཅད་ལ་ལོངས་སྤྱོད༔ སོ་སོར་རྟོགས་པའི་ཡེ་ཤེས་ཀྱི་མཁྱེན་པ་ནང་དུ་གསལ་བས་

དབང་པོ་རྣམས་ལ་ལོངས་སྤྱོད༔ བྱ་བ་གྲུབ་པའི་ཡེ་ཤེས་ཀྱི་མཁྱེན་པ་ནང་དུ་གསལ་བས་ཆོས་ཐམས་ཅད་ལ་བྱ་རྩོལ་དང་བྲལ་བ་ལ་ལོངས་སྤྱོད༔ དེ་དག་ནི་གསལ་བའི་ཁ་དོག་ལས་བྱུང་བའོ༔ གསང་བའི་བཞི་ནི༔ གསལ་སྟོང་དབྱེར་མེད་དུ་བཞུགས་པས་འཁོར་འདས་གཉིས་མེད་དུ་གསལ༔ སྣང་སྟོང་དབྱེར་མེད་པས་ཡུལ་སེམས་གཉིས་མེད་དུ་གསལ༔ རིག་སྟོང་དབྱེར་མེད་དུ་བཞུགས་པས་གཟུང་འཛིན་རང་སྣང་དུ་གསལ༔ ཡུལ་སེམས་དབྱེར་མེད་དུ་བཞུགས་པས༔ འཛིན་པའི་སེམས་ཡུལ་དང་སྣང་བའི་ཡུལ་གྱི་རྟོག་མཐའ་ཆོད་པའོ༔ དེ་ལྟར་བཅུ་གཉིས་ཀྱི་དྲན་གསལ་རང་རྒྱུད་དུ་འཛིན་པའི་ཞེན་པ་ལས་གྲོལ་བའོ༔ འདི་དག་ཀྱང་གཟུང་ཡུལ་ནི་མ་ཡིན༔ མཁྱེན་པའི་ཡེ་ཤེས་ཀྱི་ཆ་ཙམ་ལ་དགོངས་པའོ༔ དེ་ལྟར་ལོངས་སྐུ་ལས་རྒྱལ་བ་སྤྲུལ་པའི་སྐུར་བྱོན་པ་ནི༔ ཡིད་རང་བྱུང་གི་ཡེ་ཤེས་སྤྱོད་བྱེད་ཁ་ཕྱིར་བལྟས་པ་ལས༔ སངས་རྒྱས་ཐམས་ཅད་ཀྱི་བསྟན་པའི་མངའ་བདག་ཏུ་བྱུང་བ་སྟེ༔ བསྟན་པ་ནི་དངོས་དང་༔ གཟུགས་བརྙན་གྱི་བསྟན་པའོ༔ དངོས་ནི་ཆོས་ཀྱི་སྐུའི་བསྟན་པ་དངོས་རང་བཞིན་ཆོས་ཀྱི་རྡོ་རྗེ་ནི༔ ཆོས་སྐུའི་དུས་ན་བསྟན་པ་བཞུགས་པས༔ ལུས་ཀྱང་བྱས་པ་མེད་པར་བྱུང་ཡང་རང་བྱུང་བས༔ འདི་དང་འདི་ཙམ་ན་བྱུང་གི་དུས་མེད༔ དེ་ཡང་རིན་པོ་ཆེ་སྣ་མི་འདྲ་བ་སྟོང་ཕྲག་བརྒྱད་ཅུ་རྩ་ལྔ་ལས་གྲུབ་པ་ནི༔ ཡང་དག་པར་རྫོགས་པའི་སངས་རྒྱས་སྟོང་ཕྲག་བརྒྱད་ཅུ་རྩ་ལྔས་ཕྱག་མཛད་ཅིང་དེ་ཉིད་ཀྱི་བསྟན་པ་འཕེལ་བར་མཛད་པའོ༔ དེ་ཡང་སངས་རྒྱས་ཐམས་ཅད་ཀྱི་ཐུགས་ཀྱི་བསྟན་པ་དངོས་ཡིན་ནོ༔ དེ་ཉིད་ནི་འཇིག་རྟེན་གྱི་ཁམས་སུ་སངས་རྒྱས་ཀྱི་སྤྲུལ་པ་རྣམས་ནམ་བྱུང་བའི་དུས་ན༔ འདི་ཉིད་དང་འཕྲད་ནས་བསྟན་པ་རྣམས་འཕེལ་བ་ཡིན་ནོ༔ ཡང་ལོངས་སྐུའི་དུས་ན་ལོངས་སྤྱོད་རྫོགས་པའི་སྐུ་དངོས་ནི༔ རང་བྱུང་གི་ཡི་གེ་ཆེན་པོ་དུས་མེད་པས་བྱས་པ་མེད༔

འཇིག་རྟེན་པ་མ་ཡིན་པས་གང་གིས་ཀྱང་འཇིགས་པ་མེད༔ འདུས་བྱས་མ་ཡིན་པས་རྐྱེན་གྱིས་འཇིགས་པ་མེད་པའོ༔ རིན་པོ་ཆེ་བརྒྱ་རྩ་གཅིག་གི་རྒྱུ་ལས་རང་བྱུང་བ་ནི༔ བསྐལ་པ་རེ་རེ་ལ་སྤྲུལ་པའི་སྐུ་བརྒྱ་ཕྲག་གཅིག་གིས་ཕྱག་མཛད་ཅིང་༔ དེ་ཉིད་བསྟན་པ་འཕེལ་བར་བྱེད་པའོ༔ འདི་ཡང་དུས་གསུམ་གྱི་སངས་རྒྱས་ཐམས་ཅད་ཀྱི་གསུང་གི་སྤྲུལ་པ༔ སྐད་རིགས་མི་མཐུན་པ་གང་གིས་བལྟས་ཀྱང་༔ རང་རང་གི་ཡི་གེ་དང་མཐུན་པར་སྣང་བའོ༔ གསུང་གི་བསྟན་པ་རྣམས་འཕེལ་བར་བྱེད་པའི་རྟགས་སོ༔ འདི་ནི་ལོངས་སྐུའི་དུས་ན༔ བསྟན་པ་རང་གི་ངོ་བོར་བཞུགས་པས༔ ལོངས་སྐུ་དངོས་སོ༔ ཡང་སྤྲུལ་པའི་སྐུའི་དུས་ན་སངས་རྒྱས་ཀྱི་སྐུ་དངོས༔ དུས་མེད་པས་བྱུང་ས་མི་ཤེས༔ སུས་ཀྱང་མ་བྱས་པས་རྐྱེན་གྱིས་མི་ཤིགས་ཏེ༔ རིན་པོ་ཆེ་སྣ་མི་འདྲ་བ་དགུ་བརྒྱ་དགུ་བཅུ་རྩ་ལྔའི་རྒྱུ་ལས་རང་བྱུང་བ་ནི༔ སངས་རྒྱས་ཀྱི་བསྟན་པ་བསྐལ་པ་རེ་རེ་ལ་འཕེལ་བར་བྱེད་པའི་རྟགས་སོ༔ དེའང་སྤྲུལ་སྐུའི་ཡོན་ཏན་འཕེལ་བར་བྱེད་པའོ༔ འདི་གསུམ་མེད་ན་ནིི་སྤྲུལ་པ་སྐུའི་སྐུ་གསུང་ཐུགས་ཀྱི་ཡོན་ཏན་འཕེལ་མི་སྲིད་དོ༔ དེའི་ཕྱིར་ན་བསྟན་པ་དངོས་སོ༔ དེ་ཡང་ཐུགས་ཀྱི་རྡོ་རྗེ་དེ་ཉིད་ནི༔ ཡོན་ཏན་གྱི་ཚོགས་བརྗོད་ཀྱིས་མི་ལང་སྟེ། གང་དག་ནད་ཞི་བར་འདོད་པ་རྣམས་ཀྱི་ནད་ཞི་བ་ལ་སོགས་ཏེ་འཇིག་རྟེན་གྱི་འདོད་པ་རྣམས་ཡོངས་སུ་སྐོང་བ་དང་༔ དེ་བཞིན་དུ་ཐར་པ་དང་ཐམས་ཅད་མཁྱེན་པ་ལ་སོགས་པ་ཡིད་ལ་ཅི་བསམས་པ་ཐམས་ཅད་ངེས་པར་འགྲུབ་པར་ངེས་སོ༔ དེ་ཡང་འདི་གསུམ་སུ་ལ་བབས་པ་ནི༔ མཆོད་ཅིང་བསྟོད་པ་ཙམ་ལ་བརྟེན་ནས་འབད་པ་མེད་པར་དོན་གཉིས་འབྱུང་བར་ངེས་སོ༔ ཆེ་ཆུང་གི་ཚད་སྐྱེས་བུ་གང་ཕྲད་པ་རྣམས་ཀྱི་ཕྱག་གང་དུ་འབྱུང་༔ དེ་ཉིད་བབས་པའི་མི་དེ་སངས་རྒྱས་པར་ངེས་སོ༔ རྟགས་སོ༔

སྐུའི་སྐུ་དེ་ཡང་ཡོན་ཏན་གོང་མ་དང་འདྲའོ༔ བསྟན་པ་གང་འདུལ་བའི་སྐྱེས་བུའི༔ ལུས་པོ་དང་མཉམ་པ་ནི་ཟག་པ་རྣམས་རང་ཟད་ལ་འགྲོ་བའི་རྟགས་སོ༔ རང་བྱུང་བྱིན་རླབས་ཀྱི་ཡི་གེ་དེ་ཡང་༔ ཡོན་ཏན་དཔག་ཏུ་མེད་པ་སྟེ༔ འདི་ཉིད་ལན་གཅིག་བཀླགས་པ་ཙམ་གྱིས་ཀྱང་སྐྱེ་བ་བརྒྱུད་པའི་བག་ཆགས་ཐམས་ཅད་ཟད་པར་འགྱུར་རོ༔ གཞུང་ཚིགས་སུ་བཅད་པ་བརྒྱ་ཕྲག་གཉིས་དང་ཕྱེད་དང་བརྒྱད་དུ་བྱུང་བ་ནི༔ གང་གི་མགུལ་ལམ་སྤྱི་གཙུག་ཏུ་རས་དྲི་མ་མེད་པ་ལ་གྲིལ་ནས་བཟུང་བའི་ཡོན་ཏན་གྱིས༔ བྱོལ་སོང་ལ་སོགས་པ་དབུགས་དང་བྲལ་བའི་འདིའི་ཡི་གེ་གཅིག་གིས་དེ་ཙམ་ཞིག་གྲོལ་བར་ངེས་སོ༔ ཁྱད་པར་འདི་ཉིད་དང་འཕྲད་པའི་སྐལ་ལྡན་ནི༔ རང་བཞིན་བྱས་པ་མེད་པར་སངས་རྒྱ་བའོ༔ དེ་དག་བྱ་བ་བསྟན་པ་ཙམ་དང་ལྷན་ཅིག་གནས་པ་མ་ཡིན་ནོ༔ ཆོས་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པའི་གསང་ཆེན་ངེས་པའི་བཀའ་བཅུ་བདུན་དང་ལྷན་ཅིག་ཕྱེད་པ་ཡིན་ནོ༔ དེས་ན་འདི་དག་བསྟན་པའི་སྙིང་པོ་ཡིན་པར་ངེས་པའི་རྟགས་སོ༔ འདི་རང་གི་གླེགས་བམ་ནིི་སྐུའི་བསྟན་པ་རྒྱས་པའི་དུས་ན༔ རྡོ་རྗེ་གདན་གྱི་དཔག་ཚད་ལྔ་བརྒྱའི་སྟེང་གི་ནམ་མཁའ་ལ་མཁའ་འགྲོ་མ་རྣམས་ཀྱིས་བཟུང་ནས་གནས་པས༔ གསུང་གི་དུས་ན་འདི་ཉིད་དང་ལྷན་ཅིག་ཏུ་གནས་སོ༔ ཐུགས་ཀྱི་དུས་ན་རབ་ཏུ་འཕྲོས་པ་དྲང་སྲོང་གི་ཕུག་བྱ་བར་འགྱུར་རོ༔ རྡོ་རྗེ་དེ་ཉིད་ནི་སྐུའི་དུས་ན་ཨོ་རྒྱན་གྱི་ཡུལ་དུ་རྒྱ་མཚོ་ལན་ཚའི་རོ་དང་ལྡན་པའི་གླིང་བྱ་བར་བཞུགས་ཤིང་༔ དེ་ཉིད་ལས་སྐབས་སུ་འོད་དང་༔ སྒྲ་དང་༔ དགེ་སློང་རྫུ་འཕྲུལ་དང་ལྡན་པའི་སྤྲུལ་པ་གྲངས་མེད་པར་བྱེད་དོ༔ གསུང་གི་དུས་ན་རི་མ་ལ་ཡ་ལག་ན་རྡོ་རྗེའི་གནས་ན་གནོད་སྦྱིན་གྱི་རྒྱལ་པོ་ཆེན་པོ་རྣམས་ཀྱིས་ཕྱག་བྱེད་དོ༔ དེ་ལས་ཀྱང་ཁྱད་པར་དུ་ཆོ་འཕྲུལ་གྱི་ཟླ་བ་ལ༔ སྤྲུལ་པའི་

ཚོགས་དཔག་ཏུ་མེད་པ་མངོན་པར་སྣང་བར་བྱེད༔ ཐུགས་རང་གི་དུས་ན་ནི་འདི་ཉིད་དང་ལྷན་ཅིག་གོ༔ སངས་རྒྱས་ཀུན་གྱི་སྐུ་དེ་ཉིད་ནི༔ གསུང་གིས་འདུལ་བར་བསྟན་པའི་དུས་ན༔ འདི་དང་འདི་ན་ཡོད་ཀྱི་ངེས་པ་མེད་དེ༔ འཛམ་བུའི་གླིང་ཀུན་ཏུ་འཁོར་བར་གནས་ཏེ༔ འདི་ཉིད་ལ་ལྷ་དང་མིའི་འདུ་བ་ཁྱད་པར་ཅན་རྣམས༔ ཀུན་གྱིས་མཆོད་པའི་ཞིང་དུ་འགྱུར་ཞིང་སྐབས་སུ་བསྟན་པ་ལ་གནོད་པ་དག་བྱུང་བའི་ཚེ་སྐུ་ལས་འོད་བྱུང་༔ ཞལ་ནས་ཧཱུྃ་བྱུང་༔ སྤྱན་ནས་ཡེ་ཤེས་ཀྱི་མེ་ཆུ་བྱུང་ཟེར་བའང་ཡོད་དོ་བྱུང་ངོ་༔ ཐུགས་ཀྱིས་འདུལ་བར་བསྟན་པའི་དུས་ན་ནི༔ སུམ་ཅུ་རྩ་གསུམ་པའི་ལྷ་རྣམས་ཀྱིས་གཞལ་མེད་ཁང་ལག་ན་རྡོ་རྗེ་ཁང་པ་བརྩེགས་པ་ཞེས་བྱ་བའི་ཡང་སྟེང་ཁང་པ་ན༔ མཉམ་པའི་རང་བཞིན་དཔལ་ཆེན་པོ་བྱ་བས་ཕྱག་མཛད་ཅིང་མདུན་གྱིས་བལྟས་ཏེ་དམ་པར་མཛད་དོ༔ མཉམ་དུས་ཀྱི་ཟླ་བའི་ཡར་ངོའམ༔ མཉམ་པར་རང་གིས་དུས་ངེས་པའི་དུས་ན་རབ་ཏུ་སྣང་བ་དང་༔ མཆོག་ཏུ་ངོ་མཚར་བའི་གཏམ་རྒྱུད་འབྱུང་བར་བྱེད་པ་དང་༔ ཟླ་བ་ཉ་གང་བ་དང་༔ ཟད་པའི་དུས་ན༔ ཉི་མ་དང་ཟླ་བ་གཟས་ཟིན་པར་བྱེད་པའམ༔ ས་གཡོ་བ་ལ་སོགས་པའི་ཆོ་འཕྲུལ་རྣམ་པར་སྤྲུལ་བར་བྱེད་དོ༔ སྐུའི་བསྟན་པའི་དུས་ན་འདི་ཉིད་དང་ལྷན་ཅིག་གོ༔ དེ་ཡང་སྐུས་འདུལ་བའི་བསྟན་པ་ལ་གནས་པའི་ཚེ་ན༔ འདི་ཉིད་ཀྱིས་བྱིན་གྱིས་རླབས་ཀྱིས་སངས་རྒྱས་ཀྱི་སྐུ་དངོས་དང་༔ དེ་ཉིད་ཀྱི་སྤྲུལ་པ་དང་༔ ཡང་སྤྲུལ་རྣམས་དང་ལྷན་ཅིག་ཏུ་གནས་ཤིང་༔ དེ་དག་གིས་ཞལ་གྱི་དལ་དངོས་སུ་སྤྱོད་པའོ༔ འདིའི་དུས་འགྲོ་བ་རྣམས་ཀྱིས་ལུས་ཀྱི་སྡིག་པ་རང་བཞིན་གྱིས་འདགས་པས་ན་འབད་པ་ཆེར་བྱ་དགོས་པ་མ་ཡིན་ནོ༔ གསུང་གིས་འདུལ་བར་བསྟན་པའི་དུས་ནི༔ འདི་ཉིད་ཀྱི་བསྟན་པའི་རྩལ་གསུང་གི་ཡི་གེའི་བྱིན་གྱིས་རླབས་ཀྱིས་བཀའ་བརྒྱུད་དང་ལུང་བརྒྱུད་མན་ངག་གིས་ཡིད་ཆེས་ཤིང་༔ འདི་དག་

ཉན་འཆད་ལ་གཏན་ཚིགས་སུ་བྱེད་པའོ༔ འདིའི་དུས་སུ་ན་འགྲོ་བའི་ངག་སྡིག་པ་རང་བཞིན་གྱིས་དག་པར་བྱེད་དོ༔ ཐུགས་ཀྱི་དུས་ན་རྡོ་རྗེ་དེ་ཉིད་བྱིན་གྱིས་རླབས་ལས༔ རང་གི་སེམས་ཉིད་མཐོང་བ་དང་༔ ཏིང་ངེ་འཛིན་གྱིས་གསད་གསོ་བ་ལ་སོགས་པ་གང་ཡང་འགྲུབ་པའོ༔ དེ་ཡང་སྐུའི་དུས་ན་བྲིས་སྐུ་བྲིས་པ་དང་ལུགས་སུ་བླུགས་པ་རྣམས་ལ་བསྙེན་བསྐུར་བ་དང་༔ མཆོད་པ་དང་༔ བསྟོད་པ་ལ་སོགས་པས་མངོན་པར་སངས་རྒྱའོ༔ འདིའི་དུས་ན་སྤྱོད་པའི་གནས་མཆོག་ཏུ་གཅེས་སོ༔ གསུང་གི་དུས་ན་བཟླས་བརྗོད་ལ་སོགས་པ་ལ་བརྟེན་པའོ༔ འདིའི་དུས་ན་ལྟ་བའི་མན་ངག་གཅེས་སོ༔ ཐུགས་ཀྱི་དུས་ན་ཏིང་ངེ་འཛིན་མཆོག་ཏུ་གཙོའོ༔ སྒོམ་པ་གཅེས་པའོ༔ དེ་ཡང་སྐུ་ཡིས་འདུལ་བའི་བསྟན་པ་ནིིིི་ཚེ་ལོ་དཔག་ཏུ་མེད་པ་ནས༔ སྟོངས་པའིི་དུས་ཚུན་ཆོད་ལ༔ ལོ་ལྔ་སྟོང་ལྔ་བརྒྱ་ཕྲག་གསུམ་དུ་གནས་སོ༔ དེ་ནས་སངས་རྒྱས་ཀྱི་སྐུ་ཞེས་དངོས་སུ་བྱོན་པའི་མིང་མེད་དོ༔ དེ་ནས་ཚེ་ལོ་བདུན་ཅུ་པ་ལ་ཐུག་པ་ལ༔ གསུང་གི་བསྟན་པའོ༔ ལྔ་བརྒྱ་ལྔ་སྟོང་ཕྲག་གཉིས་སུ་གནས་པའོ༔ དེ་ནས་ཚེ་ལོ་བཅུ་པ་ལ་ཐུག་པ་ལ༔ ཐུགས་ཀྱི་དགོངས་པ་བརྒྱ་ཕྲག་གཅིག་ཏུ་གནས་པའོ༔ སྔགས་བ ཟླས་ནུས་པ་མི་འབྱུང་བྲག་ཆ་འདྲའོ༔ དེ་ཡང་སྐུའི་དུས་ན་ཏིང་ངེ་འཛིན་བསྒོམས་ཀྱང་སེམས་འགས་སྡུག་བསྔལ་འགྱུར༔ གསུང་གི་དུས་ན་ཏིང་ངེ་འཛིན་ཡིད་སྨོན་ཉིད་ལ༔ སྐུ་ལ་དམིགས་པ་ཙམ༔ ཐུགས་ཀྱི་དུས་ན་སྔགས་བཟླས་ནུས་པ་མི་འབྱུང་བྲག་ཆ་འདྲའོ༔ དེ་དག་ནི་བསྟན་པ་དངོས་ཏེ་གླིང་གཞན་ན་ཡོད་པ་མ་ཡིན་ནོ༔ འཛམ་བུའི་གླིང་ན་གནས་པས༔ འདི་ནི་གླིང་ཀུན་ལས་ཁྱད་པར་དུ་འཕགས་ཏེ་ལས་ཁྱད་པར་ཅན་བསགས་པའི་ས་ཞེས་བྱའོ༔ དེ་དག་ནི་འོག་ཏུ་བསྟན་པའི་ཙབས་བཙས་སུ་ཟེར་བའང་འདུག་གསུམ་པོ་དེ༔ འགྲོ་བ་གཅིག་གི་ལག་ཏུ་འདུས་ནས༔ དེ་ཡང་ཟག་བཅས་མི་སྣང་བར་མངོན་པར་རྫོགས་པར་སངས་རྒྱའོ༔ དེ་ནས་ལོ་ཉེར་ལྔ་ན་གསུམ་པོ་དེ་དག་གཞན་དུ་འཕར་ནས༔ བསྟན་པ་གཞན་གྱིས་རྩབས་བྱེད་པར་འགྱུར་རོ༔ གཟུགས་བརྙན་གྱི་བསྟན་པ་ནི༔ སངས་རྒྱས་ཀྱི་སྐུ་ཞི་བ་དང་ཁྲོ་བོ་རུ་སྣང་བ་དང་༔ གང་ལ་གང་མོས་སུ་བྱུང་བའོ༔ གསུང་གིས་མདོ་སྡེ་

འདུལ་བ་མངོན་པ་གསུམ༔ གང་གིས་གང་གྲོལ་དུ་བྱུང་བའོ༔ ཐུགས་ཀྱིས་ཏིང་ངེ་འཛིན་དང་སྒོམ་པ་དང་བསམ་གཏན་གསུམ་ལ་གང་ལ་གང་མོས་སུ་བྱུང་བའོ༔ དེ་དག་ཀྱང་སངས་རྒྱས་དགོངས་པས་བརྒྱུད་པ་ནི༔ འདས་མ་འོངས་ད་ལྟའི་སྐུ་གསུང་ཐུགས་ཀྱི་བྱེ་བྲག་དང་༔ ཡོན་ཏན་དང་འཕྲིན་ལས་རྣམ་པར་སྣང་བ་ཡིན་ནོ༔ འདི་དག་དོན་གྱིས་བྱིན་རླབས་ཀྱི་བརྒྱུད་པའོ༔ དེ་ཡང་སངས་རྒྱས་ཀྱི་སྐུའི་དགོངས་པ་མི་གཡོ་བ་དང་༔ གསུང་གི་དགོངས་པ་སྒྲ་ཚིག་དང་བྲལ་བ་དང་༔ ཐུགས་ཀྱི་དགོངས་པ་དམིགས་པ་མི་མངའ་བ་དང་༔ དེ་ཡང་སྔོན་བྱུང་གི་དུས་ན༔ སངས་རྒྱས་ཐམས་ཅད་སྐུ་མི་ཟད་པ་རྒྱན་གྱི་འཁོར་ལོ་དུས་གསུམ་དུ་གསལ་འགྲིབ་མེད་པས༔ འགྲོ་བ་རྣམས་ཀྱིས་ཆོས་ཐམས་ཅད་རང་བཞིན་འོད་གསལ་དུ་རྟོགས་པ་དང་༔ གསུང་མི་ཟད་པ་དུས་གསུམ་དུ་བར་མཚམས་མེད་པས༔ ཆོས་ཐམས་ཅད་མངོན་པར་འདུ་མི་བྱེད་པར་རྟོགས༔ ཐུགས་མི་ཟད་པ་རྒྱན་གྱི་འཁོར་ལོ་དུས་གསུམ་རྒྱུན་ཆད་མེད་པས༔ འགྲོ་བ་རྣམས་ཀྱིས་ཆོས་ཐམས་ཅད་ཐུན་མཚམས་མེད་པར་རྟོགས་པ་ནི་སྟོན་པ་དང་༔ འཁོར་གྱི་རང་བཞིན་རྣམ་དག་གི་གོ་བ་ཡིན་ནོ༔ དེ་ཡང་སྤྲུལ་པའི་སྐུ་དགོངས་པ་མི་མཛད་པར་སྣ་ཚོགས་སུ་སྣང་བས་ཚིག་ལ་མཁས་པར་འགྱུར་རོ༔ ལོངས་སྐུའི་དགོངས་པ་སྣ་ཚོགས་སུ་མི་དམིགས་པར་གོ་བས༔ འགྲོ་བས་སངས་རྒྱས་ཀྱི་མན་ངག་རྣམས་ལ་མཁས་པར་འགྱུར་བ་དང ༔ ཆོས་སྐུའི་དགོངས་པ་མ་སྤངས་ཡོངས་རྫོགས་སུ་གོ་བས༔ བླ་མའི་མན་ངག་གི་བརྒྱུད་པ་ལ་མཁས་པར་འགྱུར་རོ༔ རྗེས་འཇུག་གི་དུས་ན༔ སངས་རྒྱས་ཀྱི་སྐུའི་དགོངས་པའི་བརྒྱུད་པ་མེད་ན༔ ཐ་མལ་པའི་ལུས་འཁོར་བ་ལས་མི་གྲོལ་ལོ༔ གསུང་གི་དགོངས་པའི་བརྒྱུད་པ་མེད་ན་ངག་འཁོར་བ་ལས་མི་གྲོལ༔ ཐུགས་ཀྱི་དགོངས་པའི་བརྒྱུད་པ་མེད་ན་ཡིད་འཁོར་བ་ལས་མི་གྲོལ་ལོ༔ དེ་ཡང་སངས་རྒྱས་ཐམས་

ཅད་ཀྱི་སྐུ་གསུང་ཐུགས་ཀྱི་བརྒྱུད་པ༔ སྐུ་དངོས་སུ་བརྒྱུད་པ་དེ་སུ་ལ་བརྒྱུད་ཅིང་བབས་ན༔ གོང་གི་ཆོས་སྐུ་ལས་ལོངས་སྐུ་བྱོན་ཏེ༔ དེ་ཉིད་ལས་སྤྲུལ་པའི་སྐུ་རྡོ་རྗེ་འཆང་ཞེས་བྱ་བ་དེ༔ ལོངས་སྐུའི་སྣང་ཆ་ལས༔ རང་བཞིན་ཤུགས་ཀྱི་ཐུགས་རྗེ་རང་གཡོས་པས༔ འཛད་པ་མེད་པ་ཉིད་བཞུགས་པ་ལས་ཡེ་ཤེས་ཀྱི་རླུང་གིས་འབྱུང་བ་ཉིད་དུ་ཕུལ་པས༔ དེ་ལས་འཕན་པའི་ཡེ་ཤེས་སུ་སློངས་པའི་རླུང་གིས་བསྐྱོད་ནས་འཁོར་འདས་གཉིས་སུ་བྱུང་སྟེ༔ དེ་ལ་འཁོར་བ་དེ་གདུལ་བའི་འདུལ་བྱེད་དུ་ཐབས་ཕའི་རང་བཞིན་དུ་དམིགས༔ འཁོར་བ་དེ་སྒྲོལ་བའི་ཤེས་རབ་མར་དམིགས་ནས༔ དེ་གཉིས་འདུས་པ་ལས་རྒྱུའི་རྐྱེན་གྱིས་འཁོར་བ་ཉེ་བར་མཚོན་ནོ༔ དམིགས་པ་ཡུལ་བཅད་པས༔ བདག་པོའི་རྐྱེན་གྱིས་མཐའ་སྡུས༔ དེ་མ་ཐག་པའི་རྐྱེན་གྱིས་འཁོར་བ་སྨིན་པར་བྱས་པ་ལས༔ འབྱུང་བ་བཞིའི་སྣོད་དངོས་འཛིན་ཞེས་བྱ་བ་གཅིག་ཤར་བ་ཙམ་ལས༔ གདུལ་བྱའི་སེམས་ཅན་འབྱུང་བ་དངོས་པོར་མེད་པ་ལས༔ འབྱུང་བ་ས་བོན་གྱི་ཆ་ལས༔ ཐོག་མ་གཟུགས་མེད་པའི་ཁམས་ཞེས་བྱ་བ་ལས༔ སེམས་སྟོང་ཉིད་ཀྱི་བག་ལ་ཉལ་ལངས༔ ནམ་མཁའ་མཐའ་ཡས་སྐྱེ་མཆེད་དུ་བྱུང་༔ དེ་ཉིད་ཙམ་དུའང་མ་དམིགས་པ་ལས་གཅིག་ཀྱང་མེད་པའི་སྐྱེ་མཆེད་དུ་བྱུང་སྟེ༔ ཡིད་མཆེད་པའི་རྣམ་པ་ལས་དབང་པོའི་ཡིད་ཙམ་དུ་བྱུང་བའོ༔ དེ་ཡང་ཅུང་ཟད་ཙམ་རྣམ་པར་མི་རྟོག་པ་ལས༔ ཅུང་ཟད་ཙམ་དུའང་མི་མཛད་མི་འཛིན་པ་ལས༔ ཅུང་ཟད་མེད་པའི་སྐྱེ་མཆེད་འབྱུང་བའོ༔ དེ་དག་རྣམས་ཀྱང་རྣམ་པར་ཤེས་པ་ཙམ་ལས་མ་གཏོགས་པ་གཞན་ཕྱི་རོལ་གྱི་ཡུལ་མེད་པ་ལས༔ རྣམ་ཤེས་མཐའ་ཡས་པའི་སྐྱེ་མཆེད་དུ་བྱུང་བས༔ ཡིད་དང་ཡིད་ཀྱི་དབང་པོ་རྟག་ཏུ་བྱུང་བའོ༔ དེ་ཡང་ནམ་མཁའ་ལྟར་སྟོང་པ་ཁ་དོག་གིས་རྒྱ་ཙམ་དུ་བཟུང་བ་ལས༔ དབང་པོ་ཡིད་ཅན་དུ་སྨིན་པར་བྱས༔ དེས་གསལ་བ་

རིགས་ལ་ཆེད་དུ་བྱེད་པ་ལས༔ གཟུགས་ཀྱི་ཁམས་ཀྱི་བྱེ་བྲག་ཏུ་བྱུང་སྟེ༔ འབྱུང་བ་རྡོས་བཅས་ཀྱི་ལུས་སུ་ནི་མེད་ལ༔ སྣང་བྱེད་འོད་ཀྱི་ལུས་སུ་ཆུའི་ཟླ་བ་དག་ཏུ་བྱུང་ངོ་༔ དེ་ལས་ཁྱད་པར་གྱི་ལུས་མངོན་པར་འདུ་བྱེད་པ་ལས༔ འདོད་པ་ཡིད་ཀྱི་སྦྱོར་བ་དང་༔ རྣམ་པ་གཟུགས་ཀྱི་སྦྱོར་བ་གཉིས་སུ་འདུས་པ་ལས༔ འདོད་པའི་ཁམས་སུ་སྨིན་པ་ནི༔ འདིའི་དུས་ན་ལྷ་དང་མིའི་བྱེ་བྲག་ཏུ་དབྱེར་མི་ཕྱེད་པར་འབྱུང་སྟེ༔ སྤྲུལ་པའི་སྐུ་གདུལ་བྱའི་བསྐལ་པ་དང་པོ་ལ༔ དགའ་ལྡན་བརྩེགས་པ་ཞེས་བྱ་བ༔ དེར་སྐྱེས་པའི་འགྲོ་བ་དེ་དག་ཀྱང་ཚེ་ལོ་དཔག་ཏུ་མེད་པ་ཐུབ་པའི་དུས་ན༔ འབྱུང་བ་བཞི་དངོས་སུ་ནི་མེད༔ དེ་ཉིད་དམིགས་པའི་རྟེན་ལས༔ གདུལ་བྱའི་སེམས་ནིིི་བེམས་པོའི་འབྱུང་བ་ལས༔ རང་བཞིན་གྱི་འདོད་པ་གཡོས་པས༔ འབྱུང་བ་བག་ལ་ཉལ་བ་ལངས༔ མེ་བག་ལ་ཉལ་བའི་བདེ་བ་སྐྱེས༔ རླུང་བག་ལ་ཉལ་བ་ལངས་པའི་བདེ་བ་འདོད་པ་གཡོས་པས༔ འབྱུང་བ་བག་ལ་ཉལ་གྱི་རང་དྲོད་དང་༔ གཤེར་བ་གཉིས་སུ་འཛོམ་པ་ལས༔ འབྱུང་བའི་དངས་མ་འོད་ཀྱི་རང་བཞིན་རིན་པོ་ཆེའི་ཤིང་གི་ཟིལ་པ་ལྟ་བུ་ལས༔ ལྷའི་བུ་ཉི་མ་རབ་ཏུ་སྣང་བྱེད་དང་༔ ཟླ་བ་དྲི་མ་མེད་པ་གཉིས་སུ་རྫུས་ནས་སྐྱེས་ཏེ༔ གཟུགས་དང་དབང་པོ་དང་བཅས་པ་ལ་འབྱུང་བ་དངོས་སུ་ནི་མེད་དོ༔ འདུལ་བྱའི་སེམས་ཅན་དེ་དག་འདུལ་བའི་འདུལ་བྱེད་དུ༔ སྤྲུལ་པའི་སྐུ་དེ་གཟིགས་སྟངས་གསུམ་དང་བཅས་པ་ནི༔ ཡུལ་དགའ་ལྡན་བརྩེགས་པ་ལ༔ སྣང་བ་འདུལ་བྱེད་ཀྱི་སྤྱན་གྱིས་གཟིགས་པས༔ སྔོན་གྱི་སེམས་བསྐྱེད་པའི་སྨོན་ལམ་རྗེས་སུ་དྲན༔ སྐྱེ་གནས་མེ་ཏོག་པདྨ་སྟོང་དང་ལྡན་པ་ལ༔ རྣམ་པ་ཐམས་ཅད་མཁྱེན་པའི་སྤྱན་གྱིས་གཟིགས་པས༔ སྔོན་གྱི་ཕ་དང་མའི་འདུན་པ་རྣམ་པར་དག་པའི་སྨོན་ལམ་གྱི་མཐུ་རྗེས་སུ་

དྲན་ནོ༔ གདུལ་བྱ་ལྷའི་བུ་གཉིས་ལ༔ འགྲོ་བ་འདུལ་བའི་སྤྱན་གྱིས་གཟིགས་པས༔ སྔོན་གྱི་གནས་དང་རང་གི་སྟོན་པའི་སྨོན་ལམ་གྱི་མཐུ་རྗེས་སུ་དྲན་ནོ༔ པདྨ་ཆུའིི་སྙིང་པོའི་གཤེར་ལ༔ འབྱུང་བ་མེའི་དྲོད་ཀྱིས་བཟུང་ནས༔ སྟོན་པ་རྡོ་རྗེ་འཆང་ཉིད་མེ་ཏོག་པདྨ་ཁ་སྟོང་དང་ལྡན་པའི་སྦུབས་ན་ཡང་ལ༔ བྱིས་པ་ལོ་བརྒྱད་པ་རབ་ཏུ་མཛེས་པ༔ ཁ་དོག་དཀར་བ༔ རང་བཞིན་འོད་འབར་བ༔ ཉོན་མོངས་པའི་དྲི་མེད་པའི་རྟགས་སུ་ཁ་དོག་དཀར་ཞིང་འོད་དང་ལྡན་པར་སྤྲུལ་ནས་བྱོན་ནོ༔ དེའི་ཚེ་འཁོར་ནི་པད་མ་འདབ་མ་རེ་རེའི་སྟེང་ན༔ སངས་རྒྱས་ཉིད་ཀྱི་རྒྱུ་བདག་དང་མཐུན་པ་རེ་རེ་བྱོན་ཏེ༔ སྟོང་ཕྲག་གཅིག་དང་སྟོན་པ་ཉིད་དང་སྟོང་རྩ་གཅིག་བྱོན་པ་ནི༔ བསྐལ་པ་འདི་ཉིད་ལ་སངས་རྒྱས་སྟོང་རྩ་གཅིག༔ ཁྱད་པར་ལས་ཀྱི་སྟོན་པ་དང་སྟོང་རྩ་གཉིས་འབྱུང་བའི་སྔ་ལྟས་སོ༔ དེའི་བསྟན་པ་ནི་ཡིད་དམ་སེམས་ཀྱི་གདུང་བ་བཅད་པའི་ཕྱིར༔ རང་བཞིན་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞིི་འབྱུང་བའི་སྔ་ལྟས་སོ༔ ནམ་མཁའ་ལ་འོད་ཀྱི་སྐར་མ་འབུམ་ཕྲག་དྲུག་ཅུ་རྩ་བཞི་རུ་བྱུང་༔ དེའི་ཚེ་བསྟན་པ་ཐམས་ཅད་ཀྱི་ཡང་བཅུད་འདུས་པ༔ སྙིང་པོ་གསང་བའི་རྒྱུད་རྣམས་དེ་དག་ལས་བསྡུས་པའི་རྟགས་སུ་སྐར་མའི་ཚོགས་དེ་དག་གི་ནང་ནས༔ འོད་ལྔའི་ཐིགས་པ་རབ་ཏུ་གསལ་བ་ཡང་ཞུན་བཅུ་བདུན་དུ་བྱུང་ངོ་༔ སངས་རྒྱས་ཐམས་ཅད་ཀྱི་གསུང་གིི་སྤྲུལ་པ་བསྟན་པའི་འཕེལ་དང་བཅས་པ་འབྱུང་བ་ནི༔ ཆོས་ཐམས་ཅད་ཀྱི་ཡང་སྙིང་བསྡུས་པའི་རྟགས་སུ་བྱུང་བས་སོ༔ དེ་ལྟ་བུའི་ཡོན་ཏན་ཐམས་ཅད་མངོན་པར་འབྱུང་བའི་གནས་ཁྱད་པར་ཅན་དེ་ན༔ བསོད་ནམས་ལས་ཀྱི་ཁྱད་པར་ལས་བྱུང་བའི༔ རང་བཞིན་གྱི་ཡོན་ཏན་ནམ་འདོད་པ་ཙམ༔ ནང་བཅུད་སྣ་ཚོགས་འབྱུང་བའི་འདོད་འཇོའི་བ་དང་༔ བཞོན་པ་འབྱུང་བའི་ཡོན་ཏན་གྱི་ཅང་ཤེས་ཀྱི་རྟ་གང་མནོ་བར༔ མ་འོངས་པར་ཡི་

ཀྱིས་ཕྱིན་པར་བྱེད་པ་དང་༔ ཟས་སུ་ནི་དགའ་བ་དང་བདེ་བ་ཟའོ༔ སྣང་བ་འོད་ཀྱི་ཁྲུས་ཀྱི་རྫིང་བུ༔ བསམས་པ་ཙམ་གྱིས་ལུས་ཀྱི་དྲི་མ་དག་པར་བྱེད་པ་དང་༔ འདིའི་དུས་ན་ཉི་མ་དང་ཟླ་བའི་སྣང་བ་མེད་ཅིང་༔ ལུས་ལ་རང་འོད་དང་བཅས་པའོ༔ འདིའི་དུས་ན་ཚེ་ལོ་དཔག་ཏུ་མེད་པ་ཐུབ༔ དེ་ཡང་ལོ་སྟོང་སྟོང་རེ་རེ་བྲི་ནས་ཚེ་ལོ་ཡང་ཐུར་དུ་སོང་༔ བསོད་ནམས་ཀྱང་རིམ་གྱིས་བྲི་ནས་ཉོན་མོངས་པའི་བག་ཆགས་ཀྱིས་སྐྱེས་ཏེ༔ འདིའི་དུས་ན་སྟོན་པ་སངས་རྒྱས་བཅོམ་ལྡན་འདས༔ ཁྱད་པར་ཡོན་ཏན་སུམ་ཅུ་རྩ་གཉིས་དང་ལྡན་པ༔ གཉིས་མེད་རྫོགས་པའི་སྐུར་བྱུང་བའོ༔ དེ་ནས་གོང་མའི་ཡུལ་གྱི་ཡོན་ཏན་ལ་སོགས་པ་ཡང་ནུབ་སྟེ༔ འགྲོ་བ་དེ་དག་མང་དུ་འཕེལ་ནས༔ གདུལ་བྱའི་སེམས་ཅན་དཔག་ཏུ་མེད་པར་བྱུང་སྟེ༔ ཚེ་ལོ་ཡང་བྱེ་བ་གཅིག་ཐུབ་པར་བྲིའོ༔ འགྲོ་བ་དང་སྟོན་པ་ཉིད་ཀྱང་སྒོ་ང་ལས་སྐྱེས་པའི་གཟུགས་ཅན༔ དེ་ཡང་འབྱུང་བ་ལྔ་སྒོ་ང་ཁ་དོག་ལྔ་དང་ལྡན་པ༔ རབ་ཏུ་ཡིད་དུ་འོང་བ་ཉིད་ལ༔ སྟོན་པ་རྣམ་པ་ཐམས་ཅད་མཁྱེན་པའི་ཡོན་ཏན་ཡེ་ཤེས་ཀྱི་སྤྱན་དང་ལྡན་པ་དང་༔ ལྟ་སྟངས་གསུམ་མཛད་དེ༔ ཉིད་ལས་འབྱུང་བའི་རང་སྒྲ་འདོད་པ་གཡོས་ཏེ༔ མེ་སྒྲ་བརླབ་པ་དང་༔ ཆུ་སྒྲ་གཤང་བ་དང་ས་སྒྲ་ལྡིག་པ་དང་། རླུང་སྒྲ་འཆགས་པ་དང་༔ ནམ་མཁའི་སྒྲ་གསེང་བ་དང་༔ འབྱུང་བ་ལྔའི་སྙིགས་མ་འདུས་པ་ལས༔ འབྱུང་བ་གྲང་བར་གྱུར་ཏེ༔ ཕའི་རྒྱུ་ལྟ་བུ་བྱས་པས་ནི༔ ལུས་ལ་བདེ་བ་བསྐྱེད༔ འབྱུང་བ་ལྔའི་དངས་མ་འདུས་པས༔ ཚ་བར་སོང་ནས་མའི་རྐྱེན་བྱས་པས༔ སྒོ་ལྔ་ལས་ལུས་འཐོན་པའི་ཚུལ་དུ་བྱས༔ དེ་ལྟར་འབྱུང་བ་ཚ་གྲང་གི་རྒྱུ་རྐྱེན་འཛོམ་པ་ལས༔ འགྲོ་བ་རྣམས་ཀྱི་ལུས་དང་༔ སྟོན་པའི་སྐུ་དབང་པོ་རང་གསལ་བ་དང་༔ སྣང་བའི་ཡན་ལག་རྣམས་སུ་རྫོགས་པར་བྱས་སོ༔ ཀུན་ཀྱང་ལོ་བཅུ་དྲུག་ལོན་པ་ཙམ༔ དབང་པོ་གསལ་ཞིང་རབ་ཏུ་

གཞོན་ཤ་ཆགས་པ༔ འོད་འདོམ་གང་གིས་སོ་སོའི་ལུས་བརྒྱན་པ༔ ལུས་ནི་མར་མེའི་གྲིབ་མ་ལྟར་ཟང་ཐལ་དུ་སྣང་བ༔ ཁྱད་པར་མཆོག་གི་ཡོན་ཏན་དཔག་ཏུ་མེད་པའི་འགྲོ་བ་རྣམས་ཀྱི་འདུལ་བྱེད་ནི༔ དྲུག་པ་རྡོ་རྗེ་འཆང་ཆེན་པོ་ཉིད་བྱོན་ནོ༔ འདིའི་དུས་ན་ཁྱད་པར་དུ་ཤེས་རབ་ཀྱི་བསྟན་པ་འདུལ་བ༔ མཁའ་འགྲོ་མ་ཡིད་བཟུང་རྡོ་རྗེ་མ་ལ་སོགས་པའི་འཁོར་རྡོ་རྗེ་རིགས་ཀྱི་མཁར་འགྲོ་མ་སྐུ་མདོག་དཀར་མོ་འབའ་ཞིག་ལ་ཁྲི་ཕྲག་གསུམ༔ སེར་མོ་རིན་པོ་ཆེའི་རིགས་ཀྱི་ཡོན་ཏན་གྱི་རྣལ་འབྱོར་མ་ལ་ཁྲི་ཕྲག་གསུམ་དང་༔ དམར་མོ་པདྨའི་རིགས་ཀྱི་གསུང་གི་རྣལ་འབྱོར་མ་ལ་ཁྲི་ཕྲག་བཞི༔ ལྗང་ཁུ་ལས་ཀྱི་རིགས་ཀྱི་འཕྲིན་ལས་ཀྱི་རྣལ་འབྱོར་མ་ལ་ཁྲི་ཕྲག་ལྔ་དང་༔ མཐིང་ཁ་ནག་པོ་བདེ་གཤེགས་རིགས་ཀྱི་ཐུགས་ཀྱི་རྣལ་འབྱོར་མ་ལ་ཁྲི་ཕྲག་ལྔ་དང་༔ འབུམ་ཕྲག་གཉིས་འདུས་པ་ནི༔ བསྟན་པ་འདི་ཉིད་ལ་དལ་དམ་པའི་ཆོས་འདི་ལ་བརྟེན་ནས༔ བུད་མེད་ཀྱི་གཟུགས་བསྟན་པ་ལ་དབང་བ༔ སངས་རྒྱ་བ་དེ་ཙམ་ཞིག་འབྱུང་བའི་སྔ་ལྟས་སོ༔ ནམ་མཁའ་ཆེ་ལས་ཀྱང་༔ དེའི་ཕྱིར་ན་དེ་ལ་སྐྱེས་པ་བུད་མེད་ཅེས་བྱའོ༔ ཡུར་ནི་འཇིག་རྟེན་མི་མཇེད་ཅེས་བྱ་སྟེ༔ འདིའི་དུས་ན་གླིང་བཞིའི་མི་རྒྱལ་ཆེན་རིགས་བཞིའི་ལྷ་ལས་མཆེད་ནས༔ གཟུགས་དང་ལོངས་སྤྱོད་ལྡན་པ་ལ༔ འབྱུང་བའི་ལུས་རྡོས་པ་ལས་གྲུབ་པར་བྱུང་ངོ་༔ འདོད་པའི་ཁམས་ཀྱི་བྱེ་བྲག་ཡིན་པའི་ཕྱིར༔ ཟས་དང་སྐོམ་ཡང་དངོས་སུ་འདོད་པ་དག་བྱུང་ངོ་༔ འདིའི་དུས་ན་ཟས་སུ་འབྱུང་བའི་དངས་མ་ས་ཟ་བ་དག་འབྱུང་སྟེ༔ སའི་དངས་མ་ས་ཞག་སྤྲིས་མ་ལྟ་བུ་ཆགས༔ བདུད་རྩིའི་རོ་ལྟ་བུ་ཟ་ཞིང་འདུག་གོ༔ ལ་ལ་ཆུའི་དངས་མ་པདྨའི་འབྲས་བུ༔ རྒྱ་མཚོའི་མེ་ཏོག་ལྟ་བུ་ལ་ཟ་ཞིང་འདུག༔ ལ་ལ་མེའི་དངས་མ་སྐྱེ་ཤིང་གི་འབྲས་བུ་ལྟ་བུ་ལ་ཟ་ཞིང་འདུག༔ ལ་ལ་རླུང་གི་དངས་མ་ག་བུར་གྱི་

སྙིང་པོ་ལྟ་བུ་ལ་ཟ་ཞིང་འདུག༔ གོས་ནི་འདིའི་དུས་ན་འབྱུང་བ་སོ་སོའི་སྟོབས་དངོས་སུ་གྲུབ་པ་ལས༔ ཐམས་ཅད་ཤིང་གི་ནགས་ལོ་འབྲས་དང་ལྡན་པར་གྱུར་ཏེ༔ རླུང་གིས་ལུས་ལ་གྲང་པས༔ གོས་ཤིང་ལོ་ལྡེབ་མོ་གྱོན༔ ཕོ་མོའི་དབང་པོའི་སྒོ་ནི་མ་དོད༔ ལས་ཀྱི་དབང་གིས་བསགས་པ་གྲངས་ཉུང་བའི་ཕྱིར༔ ཆ་མ་དོད་པར་གནས་པ་ལས༔ དེ་ནས་ཉོན་མོངས་པ་བག་ལ་ཉལ་རིམ་གྱིས་ལངས་པ་ནི༔ བསགས་པ་ལས་ཀྱི་རྣམ་སྨིན་གྲངས་མངས་པ་ལས༔ ལོ་ཡང་བརྒྱ་བརྒྱ་ལོན་ཅིང་ལོ་རེ་རེ་བྲི་ནས༔ བསོད་ནམས་ཀྱང་རིམ་གྱིས་བྲི༔ ལུས་ཀྱི་ཁ་དོག་དང་གཟི་མདངས་ཀྱང་བྲི་ནས༔ ཚེ་ལོ་ཡང་འབུམ་ལ་ཐུག༔ འགྲོ་བ་ལས་ཀྱི་རླུང་གིས་བཏེག་ནས་འདམ་གང་གིས་ས་ལ་མ་རེག་པར་འགྲོ་ཞིང་༔ ནམ་མཁའ་ལ་འཁོད་ཅིང་འདུག་གོ༔ འདིའི་དུས་ན་ཉོན་མོངས་པ་ཉེ་བ་དང་རིང་བའི་བསགས་པ་ལས༔ འབྱུང་བ་ལྔའི་ས་བོན་ལངས་ཏེ༔ མེས་དྲོད་གཡོས་པས་བཟུང་༔ ཆུས་བསྡུས༔ རླུང་གིས་བསྐྱོད༔ ནམ་མཁས་འདྲེས་པས༔ འབྱུང་བའི་དྲོད་དང་གཤེར་ལས་ལུས་སུ་གྲུབ་སྟེ༔ འགྲོ་བ་ཐམས་ཅད་ཀྱང་དྲོད་གཤེར་ལས་སྐྱེས་པ་དེ་དག་ནི༔ ཁྲུ་བཅུ་དྲུག་ཐ་དད་པར་བྱུང་ངོ་༔ དེ་ཡང་སའི་རླན་གྱིས་ཕའི་རྒྱུ་བྱས༔ རླུང་གིས་དྲོད་སྐྱེས་པས་མའི་རྐྱེན་བྱས་ནས༔ དེ་ལྟར་དྲོད་གཤེར་གྱི་རྒྱུ་རྐྱེན་འཛོམ་པ་ལས༔ འགྲོ་བའི་ལུས་དང་སྟོན་པའི་སྐུ་བྱུང་བའོ༔ དེའི་ཚེ་གདུལ་བྱའི་འཁོར་ནི༔ ཐབས་ཀྱི་རྒྱུ་ལས་བསྐྱེད་པ༔ རང་བཞིན་གྱི་བྱང་ཆུབ་སེམས་དཔའ་འབུམ་ཕྲག་གཅིག༔ ལམ་ལ་གནས་པ་ལ་འབུམ་ཕྲག་གཅིག་དང་༔ སེམས་རྣམ་པར་སྦྱོང་བའི་རིགས་ལ་འབུམ་ཕྲག་གཅིག་དང་༔ སེམས་འདུལ་བ་ལ་འབུམ་ཕྲག་གཅིག་དང་༔

ས་ལ་གནས་པ་རྣམས་ལ་འབུམ་ཕྲག་གཅིག་དང་༔ ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་འབུམ་ཕྲག་གཅིག་སྟེ༔ འབུམ་ཕྲག་དྲུག་གི་གྲངས་བྱུང་བ་ནི༔ འདི་ལ་དམ་པའི་ཆོས་འདིས་སྐྱེས་སངས་རྒྱས་ཐོབ་པ༔ བསྟན་པ་འདི་ལ་དབང་བ་ཙམ་ཞིག་འབྱུང་བའི་སྔ་ལྟས་སོ༔ དྲོད་གཤེར་ལས་བྱུང་བའི་སེམས་ཅན་དེ་དག་ནི༔ ལྗོན་ཤིང་ཟས་སུ་ཟ་སྟེ༔ མི་རེ་སྐྱེས་པ་དང་ཤིང་རེ་སྐྱེ་བ་ཡིན་ནོ༔ དེའི་འབྲས་བུ་ཟས་སུ་ཟ༔ པགས་པ་གོས་སུ་གྱོན༔ མི་དེ་ཤི་བ་དང་ཤིང་དེ་ཡང་སྐམ་པ་ཡིན་ནོ༔ འདིའི་དུས་ན་འགྲོ་བ་འདི་དག་ལ་འོད་ཆག་གང་པ་མི་བདུན་བདུན་གསལ་བ་ཡོད༔ དེ་ནས་ཀྱང་ཉོན་མོངས་པ་བགས་ཀྱིས་སྐྱེས༔ བསོད་ནམས་བགས་ཀྱིས་བྲི་ནས༔ ལོ་ཡང་དྲུག་བརྒྱ་ལ་རེ་རེ་བྲི་ནས་༔ ཚེ་ལོ་ཡང་བརྒྱད་ཁྲི་ལ་ཐུག་སྟེ༔ སོ་སོའི་ལུས་ཀྱི་འོད་རྣམས་ཀྱང་ཡལ༔ མུན་པར་མ་སོང་བར་རང་བཞིན་གྱི་བསོད་ནམས་ཀྱིས་ཉི་མ་བྱུང་བས་ཉིན་མོ་ཞེས་བྱ༔ དེའི་ཟླ་ལས་ཟླ་བའི་སྣང་བ་ཡང་བྱུང་པས་མཚན་མོ་ཞེས་ཉིན་མཚན་དུ་བྱུང་བའོ༔ ཉོན་མོངས་བག་ལ་ཉལ་བ་ལངས་ནས༔ སྔོན་དུ་རྒྱུ་ལངས་པའི་སྟོབས་ཀྱིས༔ ཕྱི་ས་ཆུ་མེ་རླུང་གི་འབྱུང་བ་རྣམས་ཀྱང་མཚན་ཉིད་གསལ་བར་བྱུང་༔ འདོད་ཁམས་སུ་འདོད་ཆགས་ཀྱི་རང་བཞིན་གྱི་རྒྱུ་ལངས༔ ཐོག་མར་བལྟས་པས་ཚིམ་པའི་འདོད་ཆགས་སྔོན་དུ་བྱུང་བས༔ གཅིག་ལ་གཅིག་བལྟས་པ་དང་༔ དེ་ལ་དགའ་བ་དང་བདེ་བ་སྐྱེ་བ་བྱུང་༔ དེ་ནས་བགད་པས་ཚིམ་པའི་འདོད་ཆགས་བྱུང་བས༔ སྐད་ཆེ་བའི་གད་མོ་གཅིག་ལ་གཅིག་བལྟས་ཤིང་བགད་པས༔ དགའ་བ་བདེ་བ་ཉམས་སུ་མྱོང་བ་བྱུང་༔ དེ་ནས་ལག་བཅངས་ཀྱི་འདོད་ཆགས་བྱུང་སྟེ༔ གཅིག་ལ་གཅིག་ལག་པས་འཁྱུད་ཅིང་སྦར་འཛིངས་དང་༔ འཆངས་པ་ལ་སོགས་པས༔

ལག་པ་འཇུས་པ་ཙམ་གྱིས་ཚིམ་པ་ལ་སོགས་པ་བྱུང་༔ དེ་ནས་རྩ་དང་ཆུ་རྒྱུས་ཐམས་ཅད་གཡོས་པས༔ ཕོ་མོའི་དབང་པོའི་སྒོ་རྣམས་ཀྱང་དོད་ནས༔ འཁྱུད་ཅིང་དབང་པོའི་སྒོ་སྦྱོར་བའི་འདོད་ཆགས་བྱུང་བས༔ འདོད་ཆགས་དངོས་སུ་སྤྱོད་པ་བྱུང་ངོ་༔ དེའི་གྲོགས་ཕྲག་དོག་སྐྱེས་པས༔ གཅིག་ལ་གཅིག་འདོད་ཆགས་སྤྱོད་པ་ལ་བལྟས་པས༔ ངོ་ཚ་བའི་སེམས་སྐྱེ་ནས༔ ཕས་སྐྱོར་ཚུར་སྐྱོར་བས་ངོ་ཚའི་ཁང་པ་ཞེས་བྱ་བ་བྱུང་ངོ་༔ དེ་ནས་ནམ་མཁའ་ནས་བདུད་རྩིའི་ཆར་བབས་པས༔ དེ་ལ་འཇགས་མ་རྒལ་བས་ཁྱིམ་ལ་སྔ་བ་འཇགས་ཁྱིམ་སྤྱིལ་བུ་ཞེས་བྱ་བ་བྱུང་ངོ་༔ གོང་གི་འབྱུང་པའི་དྲོད་དང་རླན་གྱི་རྒྱུ་ལས༔ ཁུ་བ་དང་ཁྲག་ཏུ་སྨིན་ཏེ༔ དེ་ལྟར་ཕའི་རྒྱུ་རྐྱེན་གྱིས་རང་བཞིན་འབྱུང་བ་བཞི་འདུས་པ་ནི༔ འདོད་ཆགས་བཞི་ལས་འབྱུང་བ་བཞི་འདུས་པ་ནི༔ བལྟས་པ་ལས་འབྱུང་བ་ཆུའི་ནང་དུ་གཟུགས་བརྙན་གསལ་བས་ཆུ༔ སེམས་བརླན་པས་ཆུ་རྫུས་སྐྱེས་ཆུར་སྨིན༔ རྒོད་པ་ལས་སྒྲ་གྲགས་པ་རླུང་༔ བྱང་སེམས་འཕེན་པའི་སྟོབས་ཀྱང་རླུང་༔ གཉིས་ཀྱིས་བསྐྱོད་པའི་སྦྱོར་བ་མངལ་སྐྱེས༔ ལག་བཅངས་འཛིན་པས༔ བྱང་སེམས་ཀྱི་གཟུགས་འཛིན་པས་སའི་གཟུགས་སྒོ་ང་ལས་སྐྱེས༔ གཉིས་གཉིས་འཁྱུད་པས་དྲོད་ལས་སྐྱེས་པས་འབྱུང་བ་མེ༔ བྱང་སེམས་བསྐྱོད་པས་དྲོད་རླན་ལས་འདུས་པས་ཆུ༔ དེ་ལྟར་དྲོད་ཀྱིས་ལུས་བསྐྱེད༔ རླན་གྱིས་སེམས་བཟུང་བས་ན༔ དྲོད་རླན་ལས་སྐྱེས་པའོ༔ དེ་ཡང་འདོད་ཆགས་བཞི་ནི༔ བལྟས་པས་ཚིམ་པ་ལོ་བརྒྱའི་བར་ལ་བྱུང་༔ བགད་པ་ལོ་དྲུག་ཅུའི་བར་ལ་བྱུང་༔ ལག་བཅངས་ལྔ་བཅུའི་བར་ལ་བྱུང་༔ དེ་དག་གི་འོག་ཏུ་གཉིས་གཉིས་འཁྱུད་པ་བྱུང་སྟེ༔ དེ་ཡང་འཁྱུད་པ་ལ་འདོད་ཆགས་བཞི་ཆར་ཚང་སྟེ༔ ཐོག་མར་འདོད་ཆགས་གཡོ་བས་བལྟས་པས་ན་བལྟས་པ༔ དེ་རྒོད་ཅིང་

འཛུམ་པས་ལན་གདབ་པ༔ དེ་ནས་ལག་པ་འཇུ་བས་ན་ལག་བཅངས༔ དེ་ལྟར་འཛོམ་པ་ལས་དབང་པོའི་སྒོ་སྦྱོར་བས༔ འདོད་ཆགས་ཞེས་བྱའོ༔ དེ་ལྟར་འཁྱུད་པ་ལས་ཁྱེའུ་དང་བུ་མོའི་གཟུགས་སུ་བཙས་པའོ༔ དེ་ནས་ངན་སོང་གི་གནས་གསུམ་པོ་ཡང་བྱུང་ངོ་༔ འདིའི་དུས་ན་འགྲོ་བ་ཡང་གོས་སུ་རས་བལ་དང་ཤིང་ཤུན་གྱོན་པ༔ ཟས་སུ་ནི་སའི་ཞག་ཟའོ༔ སྦྲང་རྩིའི་རོ་འདྲ་བ་ཞིག་བྱུང་སྟེ༔ དེ་ཟ་ཞིང་འདུག་པ་ལས༔ སྐྱེས་བུ་ལེ་ལོ་ཅན་གཅིག་གིས་ནང་མ་འགའ་ཙམ་གྱིས་བླངས་ཏེ༔ ནམ་འདོད་པ་ན་ཁུང་བུ་དེར་ཟ་བ་དེ་མེད་པར༔ དེ་ཞག་དང་༔ ཟླ་བ་དང་༔ ལོ་ཙམ་གྱིས་བླངས་ནས་བྱས་པས༔ གཞན་རྣམས་ཀྱིས་ཀྱང་༔ ཁོའི་དེ་འཐད་པར་འདུག་ཟེར་ནས་བླངས་པས༔ དེ་ཡང་ལེ་ལོ་གསོག་འཇོག་གི་དབང་གིས༔ ལོ་ལྔ་ཙམ་ལོན་ནས་ནུབ་བོ༔ དེ་ནས་བར་དེར་མུ་གེའི་བསྐལ་པ་ཟས་ཀྱིས་གདུངས་པ་བྱུང་ངོ་༔ དེ་ནས་ཡང་བསོད་ནམས་དང་ལས་ཀྱི་སྟོབས་ཀྱིས༔ འབྲས་ས་ལུ་བཟང་པོ་གཅིག་སྐྱེས་ཏེ༔ དེ་ཡང་ནང་རྔས་ན་ནང་སྐྱེས༔ ནུབ་རྔས་ན་ནུབ་སྐྱེ་བ་གཅིག་བྱུང་༔ དེ་ཟ་ཞིང་འདུག་པ་ལས༔ ཡང་འདོད་པ་ཅན་གཅིག་གིས་འདི་ཚུན་ཆད་ང་དབང་བྱས་ཏེ༔ དེ་ནས་ཀུན་གྱིས་སོ་སོར་བགོས་བྱས་ཏེ་ང་བདག་ཏུ་བཟུང་བས༔ དེ་ནས་ལོ་བཅུ་ན་སྔོན་གྱི་ལས་བཟང་བ་རྣམས་ཀྱི་བཟང་དུ་སྐྱེས༔ ངན་པ་རྣམས་ཀྱི་ངན་དུ་སྐྱེས་པས༔ ངན་པའི་བདག་པོ་མ་འཚོན་ནས༔ བཟང་པོ་ལ་བརྐུས་པས༔ དེ་ཡང་ཕྲག་དོག་དང་ང་རྒྱལ་གྱི་དབང་གིས་ནུབ་བོ༔ དེ་ལྟར་ན་སྟོན་པ་དང་༔ འགྲོ་བའི་ལུས་ཐམས་ཅད་མངལ་ནས་སྐྱེ་བར་བྱུང་བའོ༔ དེ་ནས་ཉོན་མོངས་པ་སྔོན་དུ་རྒྱུ་ལངས་པས༔ གཏི་མུག་གིས་ལས་དགེ་སྡིག་ངོ་མ་ཤེས་པར་བྱས༔ མི་དགེ་བ་བཅུ་ཡང་མངོན་དུ་སྤྱད་དོ༔ འདོད་ཆགས་ཀྱིས་རང་བཞིན་ལ་ཞེན་པར་བྱས༔ ཞེ་སྡང་གིས་སྲོག་གཅོད་པའི་རགས་པའི་ལས་སྣ་ཚོགས་བྱས༔ དེ་ལྟར་གསུམ་ལས༔ ལུས་

དང་ངག་དང་ཡིད་ཀྱིས་མི་དགེ་སྣ་ཚོགས་སྤྱད་པའི་དབང་གིས༔ ངན་སོང་གསུམ་གྱི་གནས་སུ་སྐྱེ་བའི་རྒྱུ་དང་༔ རྐྱེན་ཉེ་བར་ལེན་པ་བྱས་སོ༔ འདིའི་དུས་ན་ཡུལ་གྱི་མིང་ནི་དགའ་ལྡན་བརྩེགས་པ་ཞེས་བྱའོ༔ རི་ལ་རྨོ་བ་དང་རྐོ་བའི་ལས༔ མཐུན་གཉིས་ཟུང་དུ་བསྡེབས་ནས༔ ས་ཐང་ཞིང་དུ་རློག་པ་དག་བྱུང་༔ ར་ལ་ཁྱིམ་བྱས་ནས་འདུག་པ་དག་བྱུང་༔ ནས་ལ་སོགས་འབྲུ་སྣ་ཚོགས་ལ་ལོངས་སྤྱོད་དོ༔ དེའི་ཚེ་ལྷའི་དབང་པོ་མཆོག་དགའ་ཙུག་ཕུད་ཅེས་བྱ་བ་དང་༔ ཡུམ་རབ་ཏུ་རྩེ་བ་དང་ལྡན་མ་ཞེས་བྱ་བའི་ལྷུམས་སུ་ཞུགས་པའི་ཚུལ་བསྟན་ཏེ༔ སྟོན་པ་ཉིད་ཡུམ་དེའི་མངལ་ནས་བསྐྱེད་དེ༔ བྱིས་པ་ལོ་བཅུ་པའི་ཚུལ་དུ་བྱོན་ནོ༔ གདུལ་བྱའི་སེམས་ཅན་སྐྱེ་བ་བཞི་ཀ་རོ་གཅིག་ཏུ་གྱུར་པའི་མངལ་ནས་སྐྱེས་པའི་ལུས་སུ་བྱུང་བའོ༔ སྟོན་པའི་མཚན་ནི་གཞོན་ནུ་རོལ་པ་རྣམ་པར་རྩེ་བ་ཞེས་བྱ་བར་གྲགས་སོ༔ ཉོན་མོངས་པའི་དབང་གིས་ཚེ་ལོ་ཡང་བྲི་ནས༔ ལྔ་བརྒྱ་ལོན་ཞིང་རེ་རེ་བྲི་བས༔ ཚེ་ལོ་ཡང་བདུན་ཁྲི་ལ་ཐུག་སྟེ༔ ཟས་དང་གོས་ལ་སོགས་པ་དངོས་སུ་སྤྱོད༔ རང་རྒྱུད་དུ་འཛིན་པ་དག་བྱུང་ངོ་༔ དུས་དེའི་ཚེ་ལྷའི་ཡུལ་འདོད་པ་ཁམས་ཀྱི་བྱེ་བྲག༔ སུམ་ཅུ་རྩ་གསུམ་གྱི་གནས་རྣམ་པར་རྒྱལ་བའི་ཁང་བཟངས་ཞེས་བྱ་བ་ན༔ འགྲོ་བ་ལྷའི་དབང་པོ་བརྒྱ་བྱིན་ལ་སོགས་པའི་འདོད་པ་ན་སྤྱོད་པ་ལྷའི་བུ་རྣམས་འདུལ་བའི་འདུལ་བྱེད་དུ༔ ཁང་བ ཟངས་དེའི་ལྷོ་ཕྱོགས་རྒྱང་གྲགས་གཅིག་ན༔ ཁྱད་པར་དུ་ཡིད་དུ་འོང་བ་སྨན་འཚོ་བྱེད་གཞོན་ནུའི་ལྡུམ་ར་ཞེས་བྱ་བར༔ སྨན་སྣ་ཚོགས་འཁྲུངས་པ་དེར༔ པདྨའི་སྡོང་པོ་ལ་སྟོན་པ་ཉིད་བྱང་ཆུབ་སེམས་དཔའི་ལུས་སུ་སྤྲུལ་ནས༔ དྲུག་པ་རྡོ་རྗེ་འཆང་ཆེན་པོ་ཞེས་བྱ་བར་བྱོན་ཏེ༔ དེའང་ཕྱི་འགྲོ་བ་རིགས་དྲུག་ལ་གཟིགས༔ ནང་ཐུབ་པ་དྲུག་ལ་གཟིགས༔ གསང་བ་ཕ་རོལ་དུ་ཕྱིན་པ་དྲུག་ལ་གཟིགས་པས་ན༔ དྲུག་པ་རྡོ་རྗེ་འཆང་ཆེན་པོ་ཞེས་བྱའོ༔ ཡོན་བདག་ནི་

ལྷའི་དབང་པོ་བརྒྱ་བྱིན་གྱིས་མཛད་དོ༔ བརྒྱ་བྱིན་ལ་བཙུན་མོ་བཞི་ཡོད་དེ༔ ཤ་མཚམས་མ་ཞེས་བྱ་བ༔ ཤའི་མཚམས་ཐམས་ཅད་ནས་འོད་འབྱུང་བ་ཞིག་ལ༔ ཡིད་བཞིན་གྱི་ནོར་བུ་བཅུ་གཉིས་ཡོད་དོ༔ ཟླ་མཚམས་མ་ཞེས་བྱ་བ་གཅིག་ལ༔ སྨིན་མཚམས་ནས་ཉི་མ་དང་ཟླ་བའི་འོད་འབྱུང་བ་ཞིག་ལ༔ ཉི་ཟླའི་བུ་བདུན་ཡོད་པས༔ དེ་རྣམས་ཀྱིས་ལྷ་རྣམས་ཀྱི་སྣང་བ་སྟོན་པར་བྱེད་དོ༔ ཤ་ཙི་ཀ་བྱ་བ་གཅིག་ལ༔ ནང་ལྷའི་རོལ་མོ་ལྔ་བརྒྱ་སྤྲུལ་པ་དང་༔ དེ་བཞིན་དུ་ནུབ་ཀྱང་དེ་ཙམ་ཞིག་ཏུ་སྤྲུལ་པ་ཞིག་ལ༔ དྲག་པོའི་བུ་བདུན་ཡོད་པ་ནི༔ ལྷའི་གཡུལ་རྣམས་རྒྱལ་བར་བྱེད་དོ༔ བཙུན་མོ་ཡ་སྲིང་མ་བྱ་བ་གཅིག་ལ༔ ལྷའི་སིལ་སྙན་མི་འདྲ་བ་ལྔ་སྟོང་ལྔ་སྟོང་གི་ཆར་པ་འབེབས་པ་ཞིག་ལ༔ སྟོབས་ལྡན་གྱི་བུ་དྲུག་ཡོད་པས༔ གླིང་བཞི་རི་རབ་རྣམས་སྲང་ལ་འཇལ་བའི་སྟོབས་བྱེད་དོ༔ དེ་ལྟར་ན་སྲས་སུམ་ཅུ་རྩ་གཉིས་གླང་པོ་ཆེ་རབ་ཏུ་བརྟན་པ་ཞེས་བྱ་བ ༔ མགོ་བོ་སུམ་ཅུ་རྩ་གཉིས་གསེར་ལས་བྱུང་བ༔ གཡུའི་མགོ་དང་སུམ་ཅུ་རྩ་གསུམ་ཡོད་པ་ལ༔ སྲས་རྣམས་དང་བརྒྱ་བྱིན་དུ་བཅས་པ་གནས་ཏེ༔ མགོ་རེ་རེའི་སྟེང་ན་ལྷའི་གཞལ་མེད་ཁང་རེ་རེ་ཡོད་པའི་ནང་ནས༔ ལྷའི་བུ་ལྔ་བརྒྱ་ལྔ་སྟོང་འདུན་པར་བྱེད་དོ༔ དེ་ལ་ཞོན་ནས་འདོད་པ་ཁམས་ཀྱི་ལྷ་རྣམས་གནས་སུ་བསྐོར་ཞིང་ཆོས་ཉན་པ་དག་ཡོད་དོ༔ འདི་རྣམས་ཀྱིས་ཡོན་བདག་མཛད་དོ༔ དཔེ་ལ་ལར༔ སྟོན་པ་ཉིད་ལས་མི་གཞན་པའི་འཁོར་འོད་སྲུངས་དང་༔ གསེར་ཐུབ་དང་༔ ལོག་པར་དད་སེལ་དང་༔ མར་མེ་མཛད༔ ཐམས་ཅད་སྐྱོབ༔ འཁོར་བ་འཇིག༔ ཤཱཀ་ཐུབ་བྱམས་པ་ཞེས་བྱ་བ་ལ་སོགས་པ་དང་༔ ཞེས་པའང་ཡོད༔ འཁོར་ནི་སངས་རྒྱས་རབས་བདུན་པ་ཞེས་བྱ་བ་དང་༔ ཐུབ་པ་དྲུག་དང་༔ ལྷའི་དབང་པོ་སྲེད་མཐོང་དགའ་རབ་རྡོ་རྗེ་ཞེས་བྱ་བའི་བུ་ནོར་བཟང་ཞེས་བྱ་བ་དང་བདུན་གྱིས་བསྐོར་ཞིང་ཆོས་ཉན་ཏོ༔ སྡུད་པ་པོ་ནི་ལྷའི་བུ་བེ་ཅོན་འཛིན་ཞེས་བྱ་བས་མཛད་དོ༔ ཆོས་གདུང་བ་སེལ་བར་བྱེད་པའི་

ཆོས་དྲུག་ཅེས་བྱ་སྟེ༔ ཕ་རོལ་ཏུ་ཕྱིན་པ་དྲུག་ལ་འབད་པ་དང་བཅས་པ་དང་༔ འབད་པ་མེད་པ་གཉིས་ལ༔ སྦྱིན་པ་ལ་སོགས་ཏེ༔ ཕྱི་ཕ་རོལ་དུ་ཕྱིན་པ་བཅོ་བརྒྱད༔ ནང་དུ་ལུང་སྦགས་མ་བཅོ་བརྒྱད་ཀྱི་ཆོས་ཀྱི་འཁོར་ལོ་བསྐོར༔ འབད་པ་མེད་པ་ལ༔ ཕྱི་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་གཟིགས་པས༔ ཕྱག་ན་རྡོ་རྗེ་མེ་ལྕེ་ཕྲེང་བའི་རྒྱུད་ལེའུ་དགུ་པ་དང་༔ ནང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་གཟིགས་པས༔ སྤྱན་རས་གཟིགས་སེང་གེ་སྒྲའི་རྒྱུད་ལེའུ་བཅུ་གསུམ་པ་དང་༔ གསང་བ་འཇམ་དཔལ་ལ་གཟིགས་པས༔ འཇམ་དཔལ་ཡེ་ཤེས་རྒྱན་གྱི་རྒྱུད་ལེའུ་བདུན་པ་དང་༔ ཁྱད་པར་གྱི་འཁོར་སངས་རྒྱས་རབས་བདུན་ལ་གཟིགས་པས༔ ཡོངས་སུ་བཤད་པའི་རྒྱུད་ཆོས་ལེའུ་ལྔ་བཅུ་པ་དང་༔ ཐིག་ལེ་མཆོག་གི་རྒྱུད་ཡེ་ཤེས་ཀུན་ཏུ་གསལ་བའི་རྒྱུད་ལེའུ་བཅུ་བདུན་པ་ལ་སོགས་པ་རྫོགས་པ་ཆེན་པོ་བྱ་བ་དང་བྲལ་བའི་རྒྱུད་རྣམས་གསུངས་སོ༔ དུས་ཕུན་སུམ་ཚོགས་པ་ཚེ་ལོ་བདུན་ཁྲིའི་དུས་སོ༔ འབྲས་བུ་སྐུ་གསུམ་གྲོལ་བའི་རྟགས་སུ༔ འབྲས་བུ་གསུམ་གྱི་སྨན་གསོལ་ལོ༔ དེར་དགུང་ལོ་བདུན་ཅུ་རྩ་ལྔ་བཞུགས་ནས༔ སྐྱ་རེངས་དང་པོ་ཤར་བའི་དུས་སུ་ཡོངས་སུ་མྱ་ངན་ལས་འདའ་བའི་ཚུལ་བསྟན་ཏེ༔ ཉེ་བའི་འཁོར་ལྷའི་བུ་སྲེད་མཐོང་ཞེས་བྱ་བའི་ཕྱག་གི་མཐིལ་དུ་འདས་རྗེས་དང་པོ་བབས་སོ༔ དེ་ནས་དེ་དག་གི་འོག་ཏུ་སེང་གེ་རྣམ་པར་རྩེ་བ་ཞེས་བྱ་བའི་ཏིང་ངེ་འཛིན་ལ་ལོ་སྟོང་ཕྲག་བདུན་དུ་མི་གཡོ་བར་བཞུགས་སོ༔ དེ་ནས་ཡང་སེམས་ཅན་ལ་སླར་བརྩེ་བའི་ཐུགས་གཡོས་ནས༔ ཉོན་མོངས་པ་དྲག་ཅིང་རྩུབ་པའི་གནས༔ རི་རབ་ཀྱི་བྱང་ཤར་གྱི་བང་རིམ་གྱི་སྟེང་ན་ལག་ན་རྡོ་རྗེ་གསང་བ་ཆེན་པོ་རོལ་པ༔ སྤྲུལ་པའི་དུར་ཁྲོད་དཔག་ཏུ་མེད་པ༔ མཚན་མོ་མེ་རི་སྣ་ཚོགས་པ་འབར་བ༔ ཉིན་བཞིན་རླུང་ནག་ལ་སོགས་པ་དཔག་ཏུ་

མེད་པ་འཚུབ་པ༔ དེའི་བྱང་ཕྱོགས་ན་གནོད་སྦྱིན་གྱི་རྫོང་ཡོད་པ༔ ལྷོ་ན་ཡིད་བཞིན་གྱི་སྡོང་པོ་ཞེས་བྱ་བ༔ ཤིང་ལོ་མ་འདབ་མ་སྣ་ཚོགས་སུ་རྒྱས་པ་ལ༔ ཀླུའི་བུ་མོ་དཔག་ཏུ་མེད་པ་གནས་པ༔ ཤར་ན་རླུང་ལྡན་གྱི་རྒྱ་མཚོ་བྱ་བ་ཡོད་པ༔ དེ་ན་ཀླུའི་རྒྱལ་པོ་རྣམས་ཁྲུས་བྱེད༔ དེའི་དབུས་ན་གསང་ཆེན་རོལ་པའི་དུར་ཁྲོད་མེ་རི་འབར་བ་ཞེས་བྱ་བ༔ གནོད་སྦྱིན་གྱི་ཁང་པ་བརྩེེགས་པ་འཁོར་ལོ་ཅན་ཞེས་བྱ་བ་དང་༔ གནོད་སྦྱིན་གྱི་རྒྱལ་པོ་རག་ཤ་སེང་གདོང་ཞེས་བྱ་བ༔ ཉིང་ལག་རྣམས་ལྕགས་ཀྱུས་རྣམ་པར་བསྡམས་པ༔ མིག་ཉི་ཟླ་དང་འདྲ་བ༔ གདོང་སེང་གེའི་འགྲམ་པ་ལྟ་བུ་ལ༔ སྤུ་གྲི་ངར་མ་ལྟ་བུའི་མཆེ་བས་གཏམས་པ་གཅིག་དང་༔ དེའི་ཡུལ་འདོད་པའི་དབང་མོ་ཆེ་ཞེས་བྱ་བ༔ མཁའ་འགྲོ་མའི་གཟུགས་ལ༔ གནོད་སྦྱིན་གྱི་འཁོར་འབུམ་ཕྲག་དུ་མས་བསྐོར་བ༔ དེ་གཉིས་འདུས་པའི་ལྷུམས་སུ་ཞུགས་པའི་ཚུལ་བསྟན་ཏེ༔ དེ་ནས་ལྷུམས་ནས་འཐོན་པའི་དུས་ན་ཟླ་བ་བཅུ་གཅིག་དུས་གཅིག་ལ་ཤར༔ ས་ལན་བདུན་དུ་གཡོས༔ ཕྱོགས་བཅུ་ནས་ཆོས་ཀྱི་རྔ་ཆེན་པོ་དང་༔ དུང་གི་སྒྲ་གྲགས་སོ༔ སྟོན་པ་ཉིད་གཞོན་ནུ་དཔའ་བོ་སྟོབས་དང་ལྡན་པ་ཞེས་བྱ་བ༔ མིའུ་ཐུང་བྱིས་པའི་ལུས་དང་འདྲ་བ༔ ཞལ་གསུམ་ནས་ཆོས་སྡེ་སྣོད་གསུམ་སྒྲོག་པ༔ ཕྱག་དྲུག་གི་མཐིལ་ན་འགྲོ་བ་དྲུག་གི་གྲོང་ཁྱེར་གསལ་བར་འཛིན་པ༔ ཞབས་བཞིས་བདུད་བཞི་མནན་པ་གཅིག་གི་ཆ་ལུགས་སུ་སྤྲུལ་ནས་བྱོན་ཏོ༔ གནས་དེ་ན་ཁྱད་པར་དུ་མཁའ་འགྲོ་མ་འབུམ་ཕྲག་གྲངས་མེད་པ་གནས་པའོ༔ དེའི་ཚེ་འཁོར་ནི་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་ཞེས་བྱ་བ༔ གོང་གི་ཐུབ་པ་དྲུག་དང་༔ གོང་གི་ལྷའི་བུ་ནོར་བུ་བཟང་པོ་ཞེས་བྱ་བ་དང་༔ མཁའ་འགྲོ་མ་མགོན་འབྱིན་མ་ཞེས་བྱ་བའི་ལྷུམས་ནས་འཐོན་པའི༔ གནོད་སྦྱིན་གྱི་བུ་ལེགས་སྤྱོད་བྱ་བ་དང་བདུན་ནི༔ མདུན་གྱི་ནམ་མཁའ་ལ་རང་བཞིན་

གྱིས་འགྲོ་བའི་སྤྲིན་གྱི་ཕུང་པོ་འཁྲིགས་པའི་དབུས་ན༔ ལྟེ་བ་ཡན་ཆོད་འཐོན་ཞིང་༔ ཐལ་མོ་སྦྱར་ནས་ཆོས་ཉན་ཏོ༔ །སྡུད་པ་པོ་ནི་ཉིད་ཀྱི་ཤངས་ཀྱི་རླུང་སྒོམ་ནས་ལག་ན་རྡོ་རྗེ་བཏོན་ནས་མཛད་དོ༔ ཡོན་བདག་ནི་མཁའ་འགྲོ་མ་ཁ་ནས་མེ་འབར་ཞིང་༔ མིག་ནས་མེ་འཕྲོས་པས་སྲིན་པོ་པུརྣའི་གཡུལ་ཟློག་པར་བྱེད་པ༔ པུརྣ་ཉེ་བར་ཞི་བ་ཞེས་བྱ་བ་དང་༔ མཁའ་འགྲོ་མ་ལྷ་ཚངས་པའི་བུ་མགྲིན་པ་དུང་གཡས་སུ་འཁྱིལ་བ་ལས་བྱུང་བ༔ གདོང་མ་ཧེ་རུ་ཡོད་པ༔ ལུས་ལ་རྨ་བྱའི་ཐུལ་པ་གྱོན་པ༔ ཚངས་པ་དུང་མགྲིན་ཅན་ཞེས་བྱ་བ་དང་༔ ཡང་ཚོགས་བདག་གི་བུ་མོ་ལུས་མི་ལ་གདོང་སེང་གེར་ཡོད་པ༔ རལ་པ་འབར་བ་རབ་ཏུ་བསྙིལ་བ༔ སེང་གེའི་གདོང་པ་ཅན་ཞེས་བྱ་བ་དང་༔ སྲེད་མེད་ཀྱི་བུའི་བུ་མོ་ལུས་སེང་གེ་འགྱིང་བ་ལྟ་བུ་ལ༔ མགྲིན་པ་དང་གདོང་རྨ་བྱར་བྱུང་བ། ལུས་ལ་ཆུ་སྲིན་གྱི་སློག་པ་གྱོན་པ༔ རྨ་བྱའི་མགྲིན་པ་ཅན་ཞེས་བྱ་བ་དང་༔ ལག་བཟང་གི་བུ་མོ་ལུས་མི་ལ་གདོང་པ་མེ་ལོང་དུ་འདུག་པ༔ ལག་ན་སྟག་གི་རྒྱལ་མཚན་གཉིས་བཟུང་བ༔ མེ་ལོང་གདོང་ཞེས་བྱ་བ་དང་༔ དྲང་སྲོང་འཕགས་འཛིན་གྱི་བུ༔ དྲང་སྲོང་ཟླ་འོད་གཞོན་ནུ་ཞེས་བྱ་བ༔ རྐང་ལག་གི་སྦར་མོ་འདུས་པ་ལ་ཁྱུང་གི་སྡེར་མོ་ཡོད་པ༔ གདོང་པ་དྲེད་དུ་ཡོད་པ༔ རྣ་བ་ལ་ཟླ་བའི་འོད་འབྱུང་བ༔ ལུས་ལ་སྟག་ལྤགས་གྱོན་པ༔ ལག་ན་གདུགས་འཛིན་པ་དང་༔ དེ་རྣམས་ཀྱིས་ཡོན་བདག་མཛད་དོ༔ ཆོས་ནི་ཕྱི་བྱང་ཆུབ་སེམས་དཔའ་བྱམས་པ་ལ་གཟིགས་ནས་གསང་སྔགས་ཕའི་རྒྱུད་རྣམས་གསུངས༔ ནང་ལག་ན་རྡོ་རྗེ་ལ་གཟིགས་ནས་མའི་གསང་སྔགས་རྒྱུད་རྣམས་གསུངས༔ གསང་བ་ཁྲོ་བོ་བདུད་རྩི་འཁྱིལ་པ་ལ་གཟིགས་ནས༔ རིག་པ་རང་ཤར་གྱི་རྒྱུད་ལེའུ་བརྒྱད་ཅུ་རྩ་དྲུག་ལ་སོགས་པ་རྣམས་གསུངས་སོ༔ དེར་ལོ་སྟོང་བཞུགས་ནས༔ འཇམ་དཔལ་མཁའ་འགྲོ་མ་རྣམས་ལ་ཆོས་སྟོན་ཏོ༔ བསོད་

ནམས་ལས་ཀྱི་སྟོབས་ཉམས་པས་ལོ་བཞི་བརྒྱ་ལ་རེ་རེ་བྲི་བས༔ ཚེ་ལོ་ཡང་དྲུག་ཁྲི་ལ་ཐུག་གོ༔ དེར་ཡང་ཉི་མ་རི་རྩེ་ལ་ཤར་བའིི་དུས་ན༔ སྟག་དང་སེང་གེ་རྣམ་པར་རོལ་པ་ཞེས་བྱ་བའི་རི་ལ་མྱ་ངན་ལས་འདའ་ཚུལ་བསྟན་ཏོ༔ འདས་རྗེས་གཉིས་པ་གནོད་སྦྱིན་གྱི་བུ་ལེགས་སྤྱོད་ཀྱི་ཕྱག་གཡས་པའི་མཐིལ་དུ་བབས་སོ༔ དེ་ནས་སེང་གེ་རྣམ་པར་འགྱིང་བ་ཞེས་བྱ་བའི་ཏིང་ངེ་འཛིན་ལ༔ ལོ་འབུམ་ཕྲག་གཅིག་ཏུ་སྙོམས་པར་བཞུགས་སོ༔ སློབ་དཔོན་དགའ་རབ་རྡོ་རྗེའི་སྙིང་པོ་གསང་བའི་རྒྱུད་ངེས་པ་རྣམས་ས་བརྒྱད་པའི་བྱང་ཆུབ་སེམས་དཔའ་རྣམས་ལ་བསྟན་ནས༔ ལྷོ་ཕྱོགས་ཀྱི་ཤིང་དྲུང་གི་ཀླུའི་བུ་མོ་རྣམས་ཀྱི་མདུན་དུ་བྱས་ཏེ༔ ཁྱུང་ནམ་མཁའ་ལ་ལྡིང་བའི་འགྲོས་ཀྱིས་མྱ་ངན་ལས་འདས་པའི་ཚུལ་བསྟན་ཏེ༔ སེང་གེ་རིན་པོ་ཆེ་འབར་བའི་ཁྲི་རྐང་དང་བཅས་ནས་རྣམ་པར་དག་གོ༔ འདི་ཡན་ཆད་ཀྱིས་ལྷའི་ཡུལ་དུ་སྟོན་པ་བྱོན་ཚུལ་བསྟན་ནས༔ ད་ནི་མིའི་དེ་ཡུལ་དུ་ཇི་ལྟར་བྱོན་ལུགས་ནི༔ སྟོན་པ་ཉིད་དེ་ནས་སེམས་ཅན་རྣམས་ལ་གཡོ་བ་བྱང་ཆུབ་ཀྱི་སེམས་བསྐྱེད་ནས༔ ཏིང་ངེ་འཛིན་ལས་བཞེངས་ཏེ༔ ཚེ་ལོ་ཁྲི་བའི་དུས་ན༔ འཛམ་བུ་གླིང་གི་ནུབ་ཕྱོགས་རྒྱ་མཚོའི་གླིང་ན༔ སྲིན་པོ་པུརྣ་ཞེས་བྱ་བའི་ཡུལ་མཐའ་མ་རྣམས་གསེར་གྱི་འཁོར་ལོ་བརྩེགས་པའི་བྲག་གིས་བསྐོར་བ༔ དེ་དག་གི་རྩེ་ལ་གསེར་བྱ་ལྡིང་ཞིང་འབབ་མཁས་པ་རྣམས་ཀྱིས་བསྐོར་ཞིང་འཕུངས་པ༔ རིན་པོ་ཆེ་ལས་གྲུབ་པའི་སྲོག་ཆགས་རིགས་མི་འདྲ་བ་རྣམས་ཀྱིས་རབ་ཏུ་རྩེ་བ་དང་ལྡན་པ༔ ཤར་ན་སྤྱན་རས་གཟིགས་འཁོར་དགྲ་བཅོམ་པ་སྟོང་ཕྲག་མང་པོས་བསྐོར་བ༔ ལྷོ་ན་ལྷ་མོ་སྒྲོལ་མ་ལྷ་མོ་རབ་ཏུ་ལྡེམ་བག་དང་ལྡན་པ་དཔག་ཏུ་མེད་པས་བསྐོར་བ༔ ནུབ་ཀྱི་བྲག་གསེབ་ན་ལག་ན་རྡོ་རྗེ་གྲོགས་ལྔ་བརྒྱ་དང་བཅས་པ༔ བྱང་ན་འཕགས་པ་འཇམ་དཔལ་ལ་སོགས་པ་འཁོར་བྱང་ཆུབ་སེམས་དཔའ་དཔག་ཏུ་མེད་པས་བསྐོར་བ༔ དེ་དག་གི་དབུས་ན་སྲིན་པོ་

རུ་ལུའི་སྒྲ་དང་ལྡན་པ་ཞེས་བྱ་བ༔ ཕྱོགས་བཞི་ན་གདུགས་དང་རྒྱལ་མཚན་རབ་ཏུ་བསྒྲེང་བ་ན༔ སྲིན་པོ་རཀྵ་སེང་གདོང་ཞེས་བྱ་བ༔ པགས་པ་ལ་སྤུ་གྲིའི་ཚལ་འཕྲོ་བ༔ ལག་པ་ལྕགས་ཀྱུ་དྲིལ་བའི་རྣམ་པ་དང་འདྲ་བ༔ གདོང་སེང་གེ་ལ་མཆེ་བ་རལ་གྲིས་གཏམས་པ༔ ཡུམ་སྲིན་མོ་ཤམ་ཤམ་ནག་མོ་ཞེས་བྱ་བ་ལ༔ སྟོན་པ་ཉིད་ལྷུམས་སུ་ཞུགས་ཏེ༔ དེ་ནས་འཐོན་པའི་ཚེ༔ བཅོམ་ལྡན་འདས་ཁྲོས་པའི་རྒྱལ་པོ་ཞེས་བྱ་བ༔ སྤྱན་གསུམ་སྐལ་ལྡན་ལ་གཟིགས་པ༔ ཕྱག་གཉིས་འདབ་བཟང་གི་བུ་འཛིན་པ༔ ཞབས་ཚོགས་བདག་གི་གདན་ལ་བཞུགས་པ་ཞིག་ཏུ་འཁྲུངས་པའི་ཚེ༔ ནམ་མཁའ་ལས་འོད་ལྔའི་སྣང་བ་ཤར་བ་དང་༔ ལྷའི་དབང་པོ་རྣམས་ཀྱིས་གདུགས་གསེར་གྱི་འཁོར་ལོས་སྤྲས་པའི་ཆར་ཕབ་ཅིང་༔ ལྷ་མོ་མཆོད་པའི་སྤྲིན་ཐོགས་པ་རྣམས་ཀྱིས་རབ་ཏུ་མཆོད་དེ༔ འཁོར་ནི་སྲིན་པོ་བྱེ་བ་གཅིག་དང་གོང་མའི་འདུས་པ་རྣམས་སོ༔ འདིའི་དུས་སུ་སྡུད་པ་པོ་ནི་སྲིན་པོ་ལངྐའི་བདག་པོ་མགྲིན་བཅུ་ཞེས་བྱ་བ༔ ལུས་གཅིག་ལ་མགྲིན་པ་བཅུ་པ༔ མགོ་བོ་རྒོད་དང་༔ ཀང་ཀ་དང་༔ ལིང་དུ་དང་༔ བྱ་རོག་དང་༔ སེང་གེ་དང་༔ གླང་པོ་དང་༔ མ་ཧེ་དང་༔ ལྕེ་སྤྱང་དང་༔ སྟག་དང་༔ ཆུ་སྲིན་གྱི་མགོ་ཡོད་པ༔ ལག་པ་ཉི་ཤུ་ན་གསེར་གྱི་མེ་ཏོག་འཐོར་བས་སྡུད་པ་པོ་བྱས་སོ༔ ཡོན་བདག་ནི་སྲིན་པོའི་བུ་མོ་ལག་ན་གནོད་སྦྱིན་གྱི་བུམ་པ་ནོར་གྱིས་བཀང་བ་ཐོགས་པ་གཉིས་དང་༔ ལང་ཀའི་བདག་པོ་གསེར་གྱི་གདུགས་འཛིན་པ་བཞི་དང་༔ སྲིན་མོ་རལ་པ་སྙིགས་པ༔ སྟག་དང་སེང་གེ་ལ་ཞོན་པ༔ ལག་ན་བ་དན་འཕྱར་བ་བཞིས་ཡོན་བདག་བྱས་སོ༔ ཆོས་ཕུར་བུ་རྡོ་རྗེ་རྩེ་མོ་རྣམ་པར་བཀོད་པ་ལེའུ་དྲུག་ཅུ་པ་དང་༔ ཕུར་བུ་ཕུན་སུམ་ཚོགས་པ་ལེའུ་བཅོ་ལྔ་པ་དང་༔ གཤིན་རྗེ་ལས་བརྒྱད་ཅུ་པའི་ལེའུ་བརྒྱད་ཅུ་པ་དང་༔

འཁྲུལ་འཁོར་ཉི་མ་གསང་བའི་ལེའུ་དྲུག་ཅུ་པ་དང་༔ གཤིན་རྗེ་ལས་ཀྱི་སྐྱེ་བ་རྒྱུན་གཅོད་པའི་ལེའུ་སུམ་ཅུ་རྩ་བརྒྱད་པ་དང་༔ མ་མོ་ཀུན་ཏུ་བཟང་མོ་པ་ལ་པ་ཏྲ་ལེའུ་ཉེར་ལྔ་པ་དང་༔ ནག་མོ་ཐུགས་གསང་བ་སྲིད་པའི་བེམས་ལེའུ་བཞི་བཅུ་རྩ་བརྒྱད་པ་དང་༔ སྲིན་མོ་གསོད་བྱེད་ཀྱི་རྒྱུད་ལེའུ་ཉིས་བརྒྱ་སུམ་ཅུ་སོ་གཉིས་པ་དང་བཅུ་ནི༔ རགས་པ་འདུལ་བ་ལ་དགོངས་པའོ༔ ལྷག་མ་ཤོ་ལོ་ཀ་སྟོང་ཕྲག་གཉིས་གསུང་པ་ནི༔ ཞིང་ཚུལ་མཉམ་པ་ལ་དགོངས་པའོ༔ དེ་དག་གི་དོན་ལོ་སྟོང་ཕྲག་གཉིས་ཀྱི་བར་ལ་བྱས་ནས༔ དེ་ནས་དེའི་བྱང་ཤར་ན་སྟག་དང་སེང་གེ་རྣམ་པར་རོལ་པ་ཞེས་བྱ་བའི་རི་ལ༔ གླང་པོ་ཆེ་སེར་པོ་རིན་པོ་ཆེས་སྤྲས་པ་ལ་ཞོན་ཏེ༔ རྐང་ལག་རྣམས་ནས་ནམ་མཁའ་ལྡིང་གི་བུ་སྟོབས་དང་ལྡན་པ་བཞིས་བཏེག་ནས་མྱ་ངན་ལས་འདའ་བའི་ཚུལ་བསྟན་ཏོ༔ འདས་རྗེས་ནི་མ་གནང་ངོ་༔ དེའི་འོག་ཏུ་སེང་གེ་རྣམ་པ་ཞེས་བྱ་བའི་ཏིང་ངེ་འཛིན་ལ་ལོ་ལྔ་སྟོང་དུ་གནས་པའོ༔ དེ་ནས་བསོད་ནམས་ཀྱི་སྟོབས་བགས་ཀྱིས་བྲི་ནས་ཚེ་ལོ་ལྔ་སྟོང་ཐུབ་པའི་དུས་ན༔ དབུས་ཕྱོགས་འཛམ་བུའི་གླིང་གི་རྒྱན༔ བྱ་རྒོད་སྤུངས་པའི་རི་ཟླུམ་ཞིང་འཕང་དང་སྲིད་དུ་མཉམ་པ༔ འཕགས་པ་ཉན་ཐོས་ད ང་༔ རང་སངས་རྒྱས་དང་༔ དགྲ་བཅོམ་པ་དང་༔ ཡང་དག་པར་རྫོགས་པའི་སངས་རྒྱས་འབྱུང་བའི་གནས༔ རང་བཞིན་གྱི་ཡོན་ཏན་དཔག་ཏུ་མེད་པ༔ ཕྱོགས་ཀུན་ནས་ཤིང་ལྗོན་པ་མང་པོས་བསྐོར་བ༔ དེ་ནས་བྱང་ན་རྒྱང་གྲགས་གཅིག་ན༔ རྒྱལ་པོ་ཛ་བ་རི་ཞེས་བྱ་བའི་ཁབ༔ ལྷའི་ཁང་པ་རྣམ་པར་བརྩེགས་པ༔ ཕྱོགས་བཞི་ན་མཆོད་རྟེན་ཆེན་པོ་རེ་ལ༔ ཤིང་ལྗོན་པ་ལོ་འདབ་རྣམས་ཀྱིས་སྤྲས་པ་རེ་རེ་ལ༔ བྱ་ཡིད་དུ་འོང་བས་སྐད་སྙན་པོ་མང་པོ་སྐད་སྒྲོག་པ༔ སངས་རྒྱས་ཀྱི་རྟེན་ཁྱད་པར་ཅན་མང་པོ་བཞུགས་པ་ན༔ རྒྱལ་པོ་སེང་གེ་བཟང་པོ་ཞེས་བྱ་བ༔ རྒྱལ་པོའི་རིགས་ལ་སེམས་རྣམ་པར་དུལ་བ༔ ཡུམ་མཛེས་མ་འོད་ལྡན་མ་ཞེས་བྱ་བ༔

སོ་དུང་སོ་འཁོར་བར་ཡོད་པ༔ སྨིན་མཚམས་ནས་འོད་འཕྲོ་བ༔ མཛེས་ཤིང་མཚན་རྫོགས་པའི་ལྷུམས་སུ༔ སྟོན་པ་སངས་རྒྱས་བཅོམ་ལྡན་འདས་ཞུགས་ཏེ༔ ལྷུམས་ནས་ཐོན་པའི་ཚེ༔ ནམ་མཁའ་ནས་མཁའ་འགྲོ་མས་བདུད་རྩི་དང་མེ་ཏོག་སིལ་མའི་ཆར་ཕབ་བོ༔ ལྷ་རྣམས་ཀྱིས་བཀྲ་ཤིས་ཚིགས་སུ་བཅད་པ་མང་པོ་བརྗོད་པ་དང་༔ སངས་རྒྱས་ཀྱི་བསྟན་པ་ལ་དད་པའི་ལྷ་དང་༔ ཀླུ་དང་༔ གནོད་སྦྱིན་དང་༔ ནམ་མཁའ་ལྡིང་ལ་སོགས་པས་ཤིང་ལྗོན་པ་ལོ་འདབ་རྒྱས་ཤིང་འབྲས་བུ་སྨིན་པའི་ཆར་ཕབ་བོ༔ ཀླུའི་རྒྱལ་པོ་རྣམས་ཀྱིས་གསེར་གྱི་མེ་ཏོག་རྣམ་པར་མཛེས་པའི་གདུགས་སྤྲིན་ཕུང་འཐིབས་པ་ལྟ་བུ་རྣམ་པར་གཏིབས་སོ༔ དེ་ནས་ལོ་གསུམ་ལོན་པའི་ཚེ༔ ལུས་ཤེད་རྫོགས་ཤིང་བཟོ་དང་སྒྱུ་རྩལ་ཀུན་ལ་མཁས་པ་གཅིག་བྱུང་ངོ་༔ དེར་ལོ་ཉེར་ལྔ་ལོན་ཙ་ན༔ ཁབ་དེའི་ནུབ་ཕྱོགས་ན༔ བསོད་ནམས་བསགས་པ་ལས་ཀྱི་མཆོད་རྟེན་ཞེས་བྱ་བའི་རྩར་སོང་སྟེ༔ ཉིད་ཀྱིས་ཉིད་རབ་ཏུ་བྱུང་སྟེ༔ དབུ་སྐྲ་རང་གི་རལ་གྲིས་བཞར་ནས༔ ཁ་དོག་ངུར་སྨྲིག་གི་སྟོད་གཡོགས་དང་སྨད་གཡོགས་གྱོན་ནོ༔ སྟོན་པའི་མཚན་དགྲ་བཅོམ་པ་གསེར་འོད་དམ་པ་ཞེས་བྱ་བར་གྲགས་སོ༔ འཁོར་ནི་ཉན་ཐོས་རྫུ་འཕྲུལ་དང་ལྡན་པ་རྣམས་ཀྱིས་བསྐོར༔ སྡུད་པ་པོ་ནི་འཕགས་པ་ཀུན་དགའ་བོས་བྱས་སོ༔ ཡོན་བདག་ནི་རྒྱལ་པོ་ཛ་བ་རི་དང་༔ བྲམ་ཟེ་མོ་དཔུང་བཟང་ཞེས་བྱ་བས་བྱས་སོ༔ ཆོས་ནི་དམ་པའི་ཆོས་འདུལ་བའི་ལུང་བམ་པོ་ལྔ་བརྒྱ་པ་དང་༔ དམ་ཆོས་ཤོ་ལོ་ཀ་སྟོང་ཕྲག་བདུན་བརྒྱ་པ་རྣམས་གསུངས་སོ༔ དེར་ལོ་བདུན་དུ་གདུལ་བྱ་ཉན་ཐོས་རྣམས་ཀྱི་གདུང་བ་བཅད་དོ༔ དེ་ནས་སྐྱེས་བུའི་ཚེ་ལོ་སྟོང་གི་དུས་ན༔ དེ་ནས་བྱང་གི་ཕྱོགས་ན༔ སོག་པོ་གཡུའི་སྨིན་མ་ཅན་གྱི་ཡུལ༔ ཆུའི་འོབས་ཀྱིས་བསྐོར་བ་དེ་དག་གི་ཁ་ཁྱེར་ན་ཤིང་ལྗོན་པས་བསྐོར་བ༔ ཕྱོགས་བཞི་ན་ཆོས་ཀྱི་རྒྱལ་

མཚན་ཆེན་པོ་བཞི་བསླང་བ༔ དེའི་དབུས་ན་རང་བྱུང་མཆོག་གི་མཆོད་རྟེན་བདེ་བྱེད་བརྩེགས་པ་ཞེས་བྱ་བ༔ དེའི་གཡས་ན་བྱང་ཆུབ་ཀྱི་ཤིང་ལོ་མ་དང་འབྲས་བུར་བཅས་པའི་འགྲམ་དུ༔ སྟོན་པའི་མཚན་རྩེ་བས་རོལ་པའི་བློ་གྲོས་ཞེས་བྱ་བར་གྲགས་སོ༔ འཁོར་ནི་ས་བརྒྱད་པའི་བྱང་ཆུབ་སེམས་དཔའ་གློག་གི་འོད་ཟེར་འབྱུང་བ་དང་༔ བློ་གྲོས་བཟང་པོ་ལ་སོགས་པས་བསྐོར༔ སྡུད་པ་པོ་ནི་བྱང་ཆུབ་སེམས་དཔའ་ནམ་མཁའི་སྙིང་པོས་མཛད་དོ༔ ཡོན་བདག་ནི་སོག་པོ་སེང་གེའི་གདོང་ཞེས་བྱ་བ་གདོང་སེང་གེ་ལ་སྨིན་མ་གཡུའི་སྨིན་མ་ཡོད་པ༔ ལག་ན་རྨ་བྱའི་རྒྱལ་མཚན་ཐོགས་པ་དང་༔ ལྷའི་བུ་མོ་སྣང་བྱེད་མས་བྱས་སོ༔ ཆོས་ནི་ཀུན་བྱེད་རྒྱལ་པོ་ལེའུ་བདུན་ཅུ་རྩ་ལྔ་པ་དང་༔ དུར་ཁྲོད་ཁུ་བྱུག་རོལ་པ་ལེའུ་ལྔ་བཅུ་པ་དང་༔ སེམས་ལུང་ཆེན་མོ་ལེའུ་བཞི་བཅུ་རྩ་བརྒྱད་པ་དང་༔ཀུན་ཏུ་བཟང་པོ་ཆེ་བ་རང་ལ་ག ནས་པ་ལེའུ་བཅོ་ལྔ་པ་དང་༔ ནམ་མཁའ་ཆེ་ཁ་ས་མུན་ཏནྟྲ་ལེའུ་ཉིས་བརྒྱ་ལྔ་བཅུ་རྩ་དགུ་པ་དང་༔ ཆུབ་པ་རོལ་པ་ལེའུ་བརྒྱ་རྩ་བརྒྱད་པ་དང་༔ ཡེ་ཤེས་མཆོག་གི་རྒྱུད་ལེའུ་དྲུག་པ་ནི༔ བྱང་ཆུབ་སེམས་དཔའ་སའི་སྙིང་པོ་ལ་དགོངས་པའོ༔ འཁོར་ལོ་གཅོད་པ་དང་༔ ཐིག་ལེ་ཕྲ་རྒྱུད་དང་༔ འབར་བ་ཆེན་པོ་དང་༔ ནོར་བུ་བཀོད་པ་ལ་སོགས་པ་ནི་བྱང་ཆུབ་སེམས་དཔའ་བྱམས་པ་ལ་དགོངས་པའོ༔ དེར་ལོ་བརྒྱ་དང་ཉི་ཤུའི་བར་ལ་བཞུགས་སོ༔ དེ་ནས་སླར་ཚེ་ལོ་ལྔ་བརྒྱའི་དུས་ན༔ ལྷོ་ཕྱོགས་བདེ་ལྡན་ཡིད་འདྲེས་པའི་ཚལ་བྱ་རྒོད་སྤུངས་པའི་རི་ལ་སུམ་ཅུ་རྩ་གསུམ་གྱི་གནས་ནས༔ སངས་རྒྱས་མི་ཕམ་མགོན་པོ་ལ༔ སྐུ་གསུང་ཐུགས་ཀྱི་བརྒྱུད་པ་དངོས་ཀྱིས་དབང་བསྐུར་ནས༔ ནམ་མཁའ་ལ་གླང་པོ་ཆེ་ཐལ་ཀར་གསེར་གྱི་མཆེ་བ་དྲུག་དང་ལྡན་པ་ཞིག་ཏུ་སྤྲུལ་ནས༔ དེ་ཉིད་བྱ་རྒོད་སྤུངས་པའི་རིའི་རྩེ་མོ་ལ་འོད་ཀྱི་ཕུང་པོ་ཞིག་ཏུ་གྱུར༔ དེ་ནས་རྒས་པའི་

སྡུག་བསྔལ་ལ་དགོངས་ནས༔ འོད་སྲུངས་བསྒྲེས་པོ་ཞེས་བྱ་བ་ཞིག་ཏུ་སྤྲུལ་ལོ༔ འཁོར་ནི་གོང་གི་ཐུབ་པ་དྲུག་དང་༔ བྲམ་ཟེའི་བུ་མགོན་སེམས་བྱམས་པ་དང་བདུན༔ དགྲ་བཅོམ་པའི་གཟུགས་སུ་སྤྲུལ་ཞིང་ཆོས་ཉན་ཏོ༔ སྡུད་པ་པོ་ནི་ཤཱ་རིའི་བུ་སྐར་མ་འོད་བཟང་པོས་མཛད་དོ༔ ཡོན་བདག་ནི་བྲམ་ཟེ་མཚན་བཟང་པོ་བྱ་བ༔ ལུས་ལ་དར་དཀར་པོའི་ལ་འུ་གྱོན་པ༔ ལག་ན་ཁྱུང་དང་ཁྲ་ཐོགས་པ་དང་༔ དགེ་སློང་མ་པདྨའི་སྤྱན་ཞེས་བྱ་བ༔ མིག་པདྨ་རྒྱས་པ་འདྲ་བས་ཡོན་བདག་བྱས་སོ༔ ཆོས་ནི་འཕགས་པ་འོད་སྲུངས་པ་ལ་དགོངས་ཏེ༔ མདོ་སྡེ་ཤོ་ལོ་ཀ་འབུམ་ཕྲག་ཉེར་ལྔ་གསུངས༔ ཤཱ་རིའི་བུ་ལ་དགོངས་ཏེ༔ ཨ་ཏི་བཀོད་པ་ཆེན་པོ་འབུམ་ཕྲག་དྲུག་ཅུ་པ་གསུངས་ཏེ༔ དེར་ལོ་བདུན་ཅུ་རྩ་ལྔ་བཞུགས་ནས༔ ཆུ་བོ་ནི་རཉྫ་ནའི་འགྲམ་དུ་དཀའ་ཐུབ་ལོ་བདུན་མཛད༔ དེ་ནས་བྱ་རྒོད་སྤུངས་པའི་བྱང་ཤར་གྱི་མཚམས་ན༔ རྡོ་རྗེ་གདན་དྲུང་བྱང་ཆུབ་ཀྱི་ཤིང་གནས་པ་ཞེས་བྱ་བ༔ བྱང་ཆུབ་ཀྱི་ཤིང་ལོ་མ་དང་འདབ་མ་དང་འབྲས་བུར་བཅས་པ་ལ་སྐུའི་རྒྱབ་གཏད༔ རྡོ་རྗེའི་སྐྱིལ་ཀྲུང་དུ་བཞུགས༔ ཕྱག་མཉམ་པར་བཞག༔ སྤྱན་ཤངས་ཀྱི་རྩེ་མོ་ལ་གཏད༔ ཞལ་ཤར་དུ་གཟིགས༔ སྲོད་ལ་དཔའ་བར་འགྲོ་བའི་ཏིང་ངེ་འཛིན་ལ་མཉམ་པར་བཞག་ནས༔ བདུད་དཔུང་དང་བཅས་པ་བཏུལ༔ ནམ་ཕྱེད་ན་རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་བཞག༔ ཐོ་རངས་སྐྱ་རེངས་དང་པོ་ཤར་བ་ལ༔ སྟོན་པ་ཉིད་མྱ་ངན་ལས་འདའ་བའི་ཚུལ་བསྟན་ཏེ༔ ནམ་ལངས་པ་ལ་ཟག་བཅས་མི་སྣང་བར་ནམ་མཁའ་འོད་ཕུང་ལ་ལམ་ཕྱུང་སྟེ་གཤེགས་སོ༔ དེ་ནས་བྲམ་ཟེ་བརྒྱལ་ཞིང་ས་ལ་འགྱེལ་ཏེ་བརྒྱལ་སངས་པ་ན་གདུང་བའི་སྨྲེ་སྔགས་ཕྱུང་བ༔ ཀྱེ་མ་ཀྱེ་ཧུད་ཀྱེ་མ༔ སྟོན་པ་རྡོ་རྗེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་ལན་གསུམ་བརྗོད་པས༔

ནམ་མཁའ་འོད་ཕུང་གི་དཀྱིལ་ནས༔ ཕྱག་གཡས་པ་གསེར་གྱི་མདོག་ཅན་བརྐྱང་སྟེ༔ སྒྲ་ཆེན་པོ་རབ་ཏུ་འུར་འུར་དང་༔ ཆེམ་ཆེམ་དང་༔ ཐུག་ཐུག་དང་༔ རབ་ཏུ་གསེང་བ་རྣམས་བྱུང་བ་དང་༔ ས་གཡོ་བ་ལ་སོགས་པ་རྣམས་ཀྱང་བྱུང་ངོ་༔ དེ་ནས་ལག་པའི་མཐིལ་དུ༔ བདེ་བར་གཤེགས་པའི་གསུང་གི་སྤྲུལ་པ་བསྟན་པའི་བཙས་སམ་ས་བོན་བྱིན་བརླབས་ལས་བྱུང་བའི་ཡི་གེ་དང་༔ འདས་རྗེས་ཐ་མ་བབས་པས༔ དེ་ཉིད་ཀྱང་དགའ་རབ་རྡོ་རྗེ་ཞེས་བྱ་སྟེ༔ བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟར་གྱུར་ཏེ༔ སྟོན་པ་སངས་རྒྱས་བཅོམ་ལྡན་འདས་ཉིད་དང་དབྱེར་མི་ཕྱེད་པར་གྱུར་ཏོ༔ དེ་ནས་ཚེ་ལོ་སུམ་བརྒྱ་བའི་དུས་ན༔ སླར་འཛམ་བུའི་གླིང་གི་དབུས་ན༔ རྡོ་རྗེ་གདན་ཞེས་བྱ་བ༔ ཕྱོགས་ཀུན་ནས་རིན་པོ་ཆེའི་ལྗོན་ཤིང་མཛེས་པས་བསྐོར་བ༔ རང་བྱུང་གི་མཆོད་རྟེན་ཆེན་པོ༔ ནམ་མཁའི་སྤྲིན་འཁྲིགས་པ་ལྟ་བུས་རྣམ་པར་གཏིབས་པ༔ ཟུར་རྣམས་ན་ཤིང་ལྗོན་པ་ཡོངས་སུ་རྒྱས་པ༔ སྒོ་བཞིར་རིན་པོ་ཆེའི་ཁྲི་རྐང་བཞིས་བརྒྱན་པ་ན༔ མཁས་བཙུན་རྣམས་འབྱུང་བའི་གནས་དེ་ན༔ རིག་བྱེད་མཐའ་དག་ལ་མཁས་པ་བྲམ་ཟེ་དགེ་བའི་ལེགས་ལྡན་ཞེས་བྱ་བ་དང་༔ མཁའ་འགྲོ་མ་དཔལ་བྱིན་ཞེས་བྱ་བའི་བུར་སྐྱེས་ནས༔ སྟོན་པ་ཡབ་མངོན་རྫོགས་ཀྱི་རྒྱལ་པོ་ཞེས་བྱ་བར་སྤྲུལ་ནས་བྱོན༔ འཁོར་ནི་རིགས་གསུམ་གྱི་མགོན་པོས་བསྐོར༔ སྡུད་པ་པོ་ནི་ལྷ་སྦྱིན་ལག་བཟང་གིས་བྱས༔ ཡོན་བདག་ནི་ཚོང་དཔོན་གྱི་བུ་ནོར་བཟང་གིས་བྱས༔ ཆོས་ནི་ངེས་དོན་གྱི་བཀའ་ཤོ་ལོ་ཀ་སྟོང་ཕྲག་ལྔ་གསུངས༔ དེར་ལོ་ཉེར་ལྔ་བཞུགས་ནས༔ གདུལ་བྱ་ལས་མ་དག་པ་རྣམས་ལ་དགོངས་པའི་ཕྱིར༔ སྐྱེ་རྒ་ན་འཆིའི་ཆུ་བོ་བཞི་ཚུལ་བསྟན་ནོ༔ དེ་ནས་ཚེ་ལོ་བརྒྱ་བའི་དུས་ན༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན༔ མགོན་མེད་ཟས་སྦྱིན་གྱི་ཀུན་དགའ་ར་བ་ཞེས་བྱ་བ༔ ཟས་ཀྱི་ལོངས་སྤྱོད་

རབ་ཏུ་ཆེ་བ༔ འོད་ཀྱི་བྱིན་བརླབས་འབྱུང་པ་ན༔ སྨད་འཚོང་མའི་བུར་སྐུ་འཁྲུངས་ཏེ༔ ང་ནི་བསྟན་པའི་གཙོ་བོ་ཤཱཀྱ་ཐུབ་པའོ་ཞེས་བརྗོད་པས༔ ཤཱཀྱ་ཐུབ་པ་ཞེས་མཚན༔ འཁོར་ནི་དགེ་སློང་ཕ་མ་དང་༔ དགེ་བསྙེན་ཕ་མ་གཉིས་རྣམས་ཀྱིས་བསྐོར༔ ཆོས་ནི་བདེན་པ་བཞིའོ་ཆོས་ཀྱི་འཁོར་ལོ་ལན་བཅུ་གཉིས་སུ་བསྐོར་རོ༔ དེ་ནས་གདུལ་བྱ་སེམས་ཅན་རྣམས་ལ་སྐུ་མི་སྣང་བར་མཛད་དེ༔ སངས་རྒྱས་ཀྱི་སྐུའི་བསྟན་པ་ཡོངས་སུ་རྫོགས་པར་མཛད་དོ༔ དེ་ལྟར་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྡོ་རྗེ་འཆང་ཆེན་པོ་དེས༔ གདུལ་བྱ་བསམ་གྱིས་མི་ཁྱབ་པའི་དོན་དུ༔ འདུལ་བྱེད་ཀྱི་སྐུ་ཡང་དེ་སྙེད་དུ་སྤྲུལ་པ་ནི༔ འཁོར་རྣམས་ཀྱི་ཕུང་པོ་ལྔ་དག་པར་བྱེད་པའི་དོན་དུ༔ ཕུན་སུམ་ཚོགས་པ་ལྔ་དང་ལྡན་པ་ཉིད་ཡིན་ན༔ དེ་ཡང་སྟོན་པ་ཕུན་སུམ་ཚོགས་པ་རྡོ་རྗེ་འཆང་ཆེན་པོ་དེས༔ ཡུལ་དགའ་ལྡན་བརྩེགས་པར༔ གནས་ཕུན་སུམ་ཚོགས་པ་མེ་ཏོག་པདྨའི་སྟེང་དུ༔ སྟོན་པའི་ཁྱེའུ་སྣང་བ་བསམ་གྱིས་མི་ཁྱབ་པས༔ འཁོར་སངས་རྒྱས་སྟོང་རྩ་གཉིས་ལ༔ བསྟན་པ་རྒྱུད་ཐམས་ཅད་སྔ་བ༔ བསྟན་པ་ཀུན་གྱི་རྩ་བ་སྒྲ་ཐལ་འགྱུར་གསུངས༔ རྒྱུད་ཀྱི་སྡུད་པ་པོ་ནི་ལྷའི་བུ་དགའ་བྱེད་དབང་ཕྱུག་གིས་མཛད༔ གྲོགས་ནི་ལྷའི་བུ་ཉི་མ་རབ་ཏུ་སྣང་བྱེད་ལ་སོགས་པ༔ དུས་ཚེ་ལོ་དཔག་ཏུ་མེད་པའི་དུས་ནའོ༔ གཉིས་པ་གནས་མི་མཇེད་འཇིག་རྟེན་དུ༔ སྟོན་པ་ཁྱེའུ་འོད་མི་འཁྲུགས་པ་འཁོར་མཁའ་འགྲོ་མ་འབུམ་ཕྲག་གཉིས༔ བསྟན་པ་སྐུ་གསུམ་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ༔ ཚུལ་ལམ་ཐབས་འབྱུང་བ་ཚ་གྲང་གི་རང་སྒྲ་ལས༔ ཁྱབ་འཇུག་ཟུར་ཕུད་ལྔ་པའི་སྐད་ཀྱིས་གསུངས༔ དུས་ཚེ་ལོ་བྱེ་བ་གཅིག་ཐུབ་པའི་དུས་ནའོ༔

ཡང་གསུམ་པ་གནས་དྲོད་གཤེར་འདུས་པ་འོད་ཀྱི་ཕུང་པོར༔ སྟོན་པ་འཇམ་དཔལ་འཇིགས་པ་སྐྱོབ་པ༔ འཁོར་བྱང་ཆུབ་སེམས་དཔའ་འབུམ་ཕྲག་དྲུག༔ བསྟན་པ་འཁོར་བ་དོང་སྤྲུག་དང་༔ རྨ་བྱ་མཇིང་བསྣོལ་དང་༔ དཔལ་འབྱུང་བཞི་ཟད་པའི་རྒྱུད༔ བར་སྣང་གི་ཁམས་སུ་བབས་ནས༔ རླུང་གི་སྒྲ་མར་ཤ་ཤུ་ལས་དྲངས་ཏེ༔ མཁའ་ལྡིང་ཟུར་ཕུད་གསུམ་པའི་སྐད་ལ་བསྒྱུར་ཏེ་གསུངས་སོ༔ དུས་ཚེ་ལོ་འབུམ་པའི་དུས་ནའོ༔ ཡང་བཞི་པ་གནས་འདོད་ཆགས་འབྱུང་བ་མངལ་སྣང་བར༔ སྟོན་པ་གཞོན་ནུ་རོལ་པ་རྣམ་པར་རྩེ་བ༔ འཁོར་གནོད་སྦྱིན་དང་༔ བྲག་སྲིན་སྟོང་ཕྲག་ལྔ་ལ༔ བསྟན་པ་སེམས་སྡེའི་རྒྱུད་ལྔ་དང་༔ ཡན་ལག་གི་རྒྱུད་དྲུག་སྟེ་བཅུ་གཅིག་གསུངས༔ དུས་ཚེ་ལོ་བརྒྱད་ཁྲིའི་དུས་ནའོ༔ ཡང་ལྔ་པ་གནས་སྨན་འཚོ་བྱེད་གཞོན་ནུའི་ལྡུམ་རར༔ སྟོན་པ་དྲུག་པ་རྡོ་རྗེ་འཆང་གིས༔ འཁོར་སངས་རྒྱས་རབས་བདུན་ལ༔ བསྟན་པ་ཕ་རོལ་དུ་ཕྱིན་པ་དྲུག་ལ་སོགས་པ་དཔག་ཏུ་མེད་པ་གསུངས༔ དུས་ཚེ་ལོ་བདུན་ཁྲིའི་དུས་ནའོ༔ ཡང་དྲུག་པ་གནས་གསང་ཆེན་རོལ་པའི་དུར་ཁྲོད་མེ་རི་འབར་བར༔ སྟོན་པ་གཞོན་ནུ་དཔའ་བོ་སྟོབས་ལྡན་ཆེན་པོས་འཁོར་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་ལ༔ ཆོས་ཕའི་རྒྱུད་དང་མའི་རྒྱུད་ལ་སོགས་པའི་རྒྱུད་སྡེ་དུ་མ་གསུངས་སོ༔ དུས་ཚེ་ལོ་དྲུག་ཁྲིའི་དུས་ནའོ༔ ཡང་བདུན་པ་གནས་སྲིན་པོ་རུ་ལུའི་སྒྲ་དང་ལྡན་པར༔ སྟོན་པ་དྲང་སྲོང་ཁྲོས་པའི་རྒྱལ་པོས༔ འཁོར་སྲིན་པོ་བྱེ་བ་གཅིག་ལ༔ ཆོས་རགས་པ་འདུལ་བའི་རྒྱུད་བཅུ་ལ་སོགས་པ་བསྟན་ཏེ༔ དུས་ཚེ་ལོ་ཁྲི་པའི་དུས་ནའོ༔ ཡང་བརྒྱད་པ་གནས་བྱ་རྒོད་ཕུང་པོའི་ཁབ་ཏུ༔ སྟོན་པ་དགྲ་བཅོམ་པ་གསེར་འོད་དམ་པས༔ འཁོར་འཕགས་པ་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་

ལ༔ ཆོས་དམ་པའི་ཆོས་འདུལ་བ་ཁྲི་ཕྲག་དཔག་ཏུ་མེད་པ་གསུངས་སོ༔ དུས་ཚེ་ལོ་ལྔ་སྟོང་པའི་དུས་ནའོ༔ ཡང་དགུ་པ་གནས་སོག་པོ་གཡུའི་སྨིན་མ་ཅན་བྱང་ཆུབ་ཀྱི་ཤིང་རྣམ་པར་རྒྱལ་བའི་ཁང་པར༔ སྟོན་པ་རྩེ་བས་རོལ་པའི་བློ་གྲོས་ཀྱིས༔ འཁོར་ས་བརྒྱད་པའི་བྱང་ཆུབ་སེམས་དཔའ་རྣམས་ལ༔ ཆོས་ཕྲ་རྒྱུད་བདུན་ལ་སོགས་པ་གསུངས་སོ༔ དུས་ཚེ་ལོ་སྟོང་པའི་དུས་ནའོ༔ ཡང་བཅུ་པ་གནས་སླར་བྱ་རྒོད་སྤུངས་པར༔ སྟོན་པ་འོད་སྲུངས་བསྒྲེས་པོས༔ འཁོར་ཚེ་དང་ལྡན་པ་དགྲ་བཅོམ་པ་བདུན་ལ༔ དམ་པའི་ཆོས་མདོ་སྡེ་དང་༔ སྔགས་ཀྲི་ཡ་དང་༔ ལུང་ཨ་ནུ་ཡོ་གའི་ཆོས་ཁྲི་ཕྲག་ཕྱེད་དང་བརྒྱད་ལ་སོགས་པ་གསུངས་སོ༔ དུས་ཚེ་ལོ་ལྔ་བརྒྱའི་དུས་ནའོ༔ ཡང་བཅུ་གཅིག་པ་གནས་གདན་བྱང་ཆུབ་འབྱུང་བར༔ སྟོན་པ་ཡབ་མངོན་རྫོགས་རྒྱལ་པོས༔ འཁོར་རིགས་གསུམ་མགོན་པོ་ལ༔ ཆོས་ངེས་པའི་དོན་འབའ་ཞིག་ཏུ་གསུངས་སོ༔ དུས་ཚེ་ལོ་སུམ་བརྒྱ་པའི་དུས་ནའོ༔ ཡང་བཅུ་གཉིས་པ་གནས་ཕུན་སུམ་ཚོགས་པ་མགོན་མེད་ཟས་སྦྱིན་གྱི་ཀུན་དགའ་ར་བར༔ སྟོན་པ་ཕུན་སུམ་ཚོགས་པ་ཤཱཀྱ་ཐུབ་པས༔ འཁོར་རྣམ་པ་བཞི་ལ༔ ཆོས་ཕུན་སུམ་ཚོགས་པ་བདེན་པ་བཞིའི་ཆོས་ཀྱི་འཁོར་ལོ་ལན་བཅུ་གཉིས་སུ་བསྐོར་ཏེ༔ དེ་ཡང་མི་རྟག་པ་དང་༔ སྡུག་བསྔལ་བ་དང་༔ སྟོང་པ་དང་༔ བདག་མེད་པ་དང་༔ ཀུན་འབྱུང་དང་༔ རྒྱུ་རྐྱེན་གྱི་རྣམ་པ༔ ལམ༔ རིག་པ༔ འགོག་པ༔ ཞི་བ༔ གྱ་ནོམ་པ་སྟེ༔ བཅུ་གཉིས་སུ་བསྐོར་རོ༔ དུས་ཚེ་ལོ་བརྒྱ་པའི་དུས་ནའོ༔ དེ་ལྟར་གནས་བཅུ་གཉིས་སུ་བྱོན་པས་ན༔ ཕུན་སུམ་ཚོགས་པ་ཆ་ལྔར་བསྟན་པས༔ བགྲངས་ན་ཆོས་ཀྱི་རྣམ་གྲངས་དྲུག་ཅུ་ཐེམ་པར་ཡོད་པ་ནི༔ བསྐལ་པའི་ཡར་འཕེལ༔ མར་འཕེལ་དྲུག་ཅུ་དག་པར་བྱེད་པ་ལ་དགོངས་པའོ༔ དེ་ཡང་བསྟན་པའི་གཙོ་བོའམ༔ བསྟན་པ་ངེས་པར་སྤྲུལ་པའི་སྐུ་གཅིག་ལ༔ ཆོས་ཀྱི་

རྣམ་པ་དགུ་ཅུ་རྩ་དྲུག་ཚོགས་དགོས་སོ༔ དེ་དག་དང་ལྡན་པ་ནི་བདག་ཅེས་བྱའོ༔ གལ་ཏེ་མི་ལྡན་པའི༔ སངས་རྒྱས་འཇིག་རྟེན་དུ་བྱུང་ན་ཁོལ་བུའི་བསྟན་པ་ཞེས་བྱའོ༔ དེ་དག་ཀྱང་སྔོན་དུ་སེམས་བསྐྱེད་རྫོགས་པར་བྱས་པ་ལས་བྱུང་བའོ༔ མཛད་པའི་འཕྲིན་ལས་ཀྱི་སྒོ་ནས་སངས་རྒྱས་པ་ནི༔ སྐུའི་མཛད་པ་བཅུ་གཉིས་ནི༔ གནས་མི་འདྲ་བ་བཅུ་གཉིས་སུ༔ སྟོན་པ་ཉིད་ཀྱི་སྐུ་མདོག་དང་ཕྱག་མཚན་མི་འདྲ་བར་སྤྲུལ་ནས་བྱོན་པས༔ གདུལ་བྱའི་རིགས་མི་འདྲ་བ་བཅུ་གཉིས་ཀྱི་ཚོགས་རྣམས་ཀྱི་དོན་མཛད་པས་ན༔ མཛད་པ་ཞེས་སྐུའི་གཟི་མདངས་ལ་བརྟེན་ནས༔ ཉིད་ཀྱི་སྐུའི་བསྟན་པ་འཕེལ་བའི་དོན་དུ་བྱུང་བའོ༔ ཡང་སྐུ་དེ་དག་གི་དུས་སུ་གསུང་ཆོས་ཀྱི་འཁོར་ལོ་མི་འདྲ་བ་བཅུ་གཉིས་སུ་གསུངས་པས༔ འགྲོ་བའི་ངག་གི་བཅིངས་པ་མི་འདྲ་བ་བཅུ་གཉིས་གྲོལ་བར་བྱེད་པས་ན༔ མཛད་པ་ཞེས་གསུང་གི་བསྟན་པ་འཕེལ་བར་བྱེད་པའི་དོན་དུ་བྱུང་བའོ༔ གསུང་དེ་ཙམ་ཞིག་གི་ཚེ་ན་ཐུགས་ཀྱི་དགོངས་པ་མི་འདྲ་བ་བཅུ་གཉིས་ཀྱིས༔ འགྲོ་བའི་རིགས་མི་འདྲ་བ་རྣམས་ཀྱི་སེམས་ཀྱི་རྟོག་པ་བཅུ་གཉིས་ལས་གྲོལ་བར་མཛད་པས་ན༔ མཛད་པ་ཞེས་ཐུགས་ཀྱི་བསྟན་པ་འཕེལ་བའི་དོན་དུ་བྱུང་བའོ༔ དེ་ལྟར་བྱུང་བས་འགྲོ་བའི་ལུས་ངག་ཡིད་གསུམ་གྱི་སྡིག་པ་དག་བྱེད་དུ་ཡང་བྱུང་བའོ༔ དེ་ཡང་སྐུའི་མཛད་པ་མཛད་ན༔ སངས་རྒྱས་ཀྱི་སྐུ་གདུལ་ལ་བྱ་མི་སྣང་ལ༔ གསུང་མདོ་སྡེ་ཡན་ལག་ཏུ་བསྟན་པ་ལ་ཡིད་ཆེས་པ་མི་འབྱུང་༔ གསུང་གི་མཛད་པ་མ་མཛད་ན༔ སྒོམ་སྒྲུབ་བཟླས་པའི་ཡོན་ཏན་མཐར་མི་ཕྱིན༔ ཐུགས་ཀྱི་མཛད་པ་མ་མཛད་ན༔ ཏིང་ངེ་འཛིན་བསྒོམས་པས་འབྲས་བུ་འགྲུབ་པར་མི་འགྱུར་རོ༔ དེ་ལྟར་མཛད་པ་དངོས་སྐུའི་མཛད་པ་བཅུ་གཉིས་ནི༔ ཐུན་མོང་མི་ཕམ་མགོན་ལ་རྒྱལ་སྲས་དམ་པར་དབང་བསྐུར་ནས༔ ཐ་མ་མངོན་པར་རྫོགས་པར་སངས་རྒྱས་པའི་ཚུལ་བསྟན་པ༔

ཡན་ཆད་གཞན་དང་མཐུན༔ གསུང་གི་གནས་བཅུ་གཉིས་སུ་གསུང་རབ་ཡན་ལག་བཅུ་གཉིས་སུ་བྱུང་བའོ༔ ཐུགས་ནི་དཔའ་བར་འགྲོ་བའི་ལ་སོགས་པ་ཏིང་ངེ་འཛིན་བཅུ་གཉིས་སུ་བྱུང་བའོ༔ དེའི་ཕྱིར་ན་ངོ་བོ་སྐུར་རྒྱས་པ་ནི་སྐུའི་མཛད་པར་བྱུང་བ༔ མཁྱེན་པའི་ཡེ་ཤེས་སུ་རྒྱས་པ་ནི་གསུང་གི་མཛད་པར་བྱུང་༔ གནས་པ་ཏིང་ངེ་འཛིན་དུ་རྒྱས་པས་ཐུགས་ཀྱི་མཛད་པར་བྱུང་ངོ་༔ དེ་ཡང་བཀོད་པ་ཆེན་པོ་ལས༔ ཕྱི་ལ་སོགས་པ་དགུ་ཡིས་ནི༔ མཛད་པའི་བྱེ་བྲག་དགོངས་པར་འགྱུར་རོ༔ ཞེས་པ་ནས༔ མཛད་པའི་དགོངས་པ་ནི༔ སྐུའི་ཕྱི་ནང་གསང་བ་གསུམ༔ གསུང་ལ་ཕྱི་ནང་གསང་བ་གསུམ༔ ཐུགས་ལ་ཕྱི་ནང་གསང་བ་གསུམ་སྟེ་དགུར་བྱས་པས༔ སྐུའི་ཕྱིའི་མཛད་པ་བཞི་ནི༔ སྐྱེ་རྒ་ན་འཆིའི་སྡུག་བསྔལ་མཐོང་བ་ལ་བརྟེན་ནས༔ ཁྱིམ་ནས་ཁྱིམ་མེད་པར་རབ་ཏུ་བྱུང་༔ ཟས་བསོད་སྙོམས་གསོལ་བ་དང་༔ འཕང་དང་སྒྱུ་རྩལ་འགྲན་པ་རྣམས་སོ༔ ནང་གི་འཁོར་དང་ལོངས་སྤྱོད་ལ་དགོངས་ནས༔ བདུད་བཞི་ཕམ་པར་མཛད་པ་དང་༔ ཉིད་ཀྱི་སྐུ་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དྲུག་ཅུ་བྱུང་བ་དང་༔ བདུད་ཀྱི་ཚོགས་ཀྱིས་མཚོན་ཆའི་ཆར་ཕབ་པས་མེ་ཏོག་གི་གདུགས་སུ་གྱུར་པ་དང་༔ རྟ་མཆོག་དང་ཤིང་རྟ་ལ་སོགས་སླར་དོར་བ་རྣམས་སོ༔ གསང་བའི་བཞི་ནི༔ བྱ་བའི་ཏིང་ངེ་འཛིན་གྲོལ་བ་ལ་དགོངས་ནས༔ ཆུ་བོ་ན་རཻཉྫ་ནའི་འགྲམ་དུ་དཀའ་ཐུབ་ལོ་བདུན་མཛད་པ་དང་༔ རི་བོ་ཆེན་པོ་གསེར་ལྡན་དུ་ཏིང་ངེ་འཛིན་འབུམ་ཕྲག་བརྒྱ་ཉི་ཤུ་སྐད་ཅིག་ལ་སྐྱེས་པ་དང་༔ ཁྱད་པར་དུ་རིན་པོ་ཆེ་ཟ་མ་ཏོག་ཅེས་བྱ་བའི་ཏིང་ངེ་འཛིན་ལ་དུས་ཐམས་ཅད་དུ་སྙོམས་པར་བཞུགས་པ་དང་༔ སྐུ་མངོན་པར་མི་སྣང་བའི་དུས་ན༔

ནམ་ཕྱེད་ན་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་སོ༔ དེ་དག་ནི་སངས་རྒྱས་ཀྱི་སྐུའི་ཡོན་ཏན་ནོ༔ གསུང་གི་ཕྱིའི་མཛད་པ་བཞི་ནི༔ ལུང་དུ་བསྟན་པ་ལ་སོགས་པ་བཞི༔ ནང་གི་བཞི་ནི༔ སྐྱེས་རབས་ཀྱིས་ལ་སོགས་པ་བཞི༔ གསང་བའི་བཞི་ནི༔ ཆེད་དུ་བརྗོད་པ་ལ་སོགས་པ་བཞིའོ༔ དེ་དག་ནི་གསུང་གི་ཁྱད་པར་གྱི་འདུས་པའི་ཁྱད་པར་ལས་བྱུང་བའོ༔ ཐུགས་ཀྱི་ཕྱིའི་བཞི་ནི༔ དཔའ་བར་འགྲོ་བའི་དང་༔ རིན་པོ་ཆེ་རྒྱལ་མཚན་ཏོག་གི་དང་༔ རྣམ་པར་རོལ་པའི་སྙོམས་པར་ཞུགས་པ་དང་༔ སངས་རྒྱས་ཟ་མ་ཏོག་གི་ཏིང་ངེ་འཛིན་ཏོ༔ ནང་གི་བཞི་ནི༔ ཡུལ་ཀུན་ལ་འཇུག་པའི་དང་༔ ཁྱད་པར་མངོན་པར་སྣང་བའི་དང་༔ གཙུག་གི་ནོར་བུའི་དང་༔ རྒྱལ་མཚན་རྩེ་མོ་ཡོངས་སུ་བཀོད་པའི་ཏིང་ངེ་འཛིན་ཏོ༔ གསང་བའི་བཞི་ནི༔ འགྱུ་བ་རྣམ་པར་དག་པའི་དང་༔ ཟབ་མོ་སྣང་བའི་དང་༔ རིན་པོ་ཆེ་སྒྲོན་མའི་དང་༔ མཆོག་ཏུ་ལེགས་པ་བརྗོད་པའི་ཏིང་ངེ་འཛིན་ཏོ༔ དེ་དག་གི་དགོས་པ་ནི༔ སྐུའི་མཛད་པ་བཅུ་གཉིས་མེད་ན༔ སྐུ་མཚན་བཟང་པོ་སུམ་ཅུ་རྩ་གཉིས་དང་༔ དཔེ་བྱད་བཟང་པོ་བརྒྱད་ཅུར་མི་སྨིན་ལ༔ གསུང་གི་མེད་ན༔ མཚན་མ་མེད་པའི་ཆོས་ལ་ལོངས་སྤྱོད་མི་ནུས༔ ཐུགས་ཀྱི་མེད་ན༔ ཏིང་ངེ་འཛིན་རྣམས་ལ་དབང་མི་ཐོབ་བོ༔ དེ་ཡང་གནས་པའི་ཏིང་ངེ་འཛིན་མེད་ན་ནམ་ཡང་མཁྱེན་པའི་ཡེ་ཤེས་སུ་རྒྱས་མི་སྲིད་དོ༔ དེ་ལྟར་བཅུ་གཉིས་སུ་ངེས་པ་ནི༔ ཕྱིའི་སྐུའི་དགོས་པ་ནི༔ འབྱུང་པ་སས་བཅིངས་ནུས་པ་རང་རྒྱུད་དུ་འཛིན་པ་ལས་མི་གྲོལ་བས་ནའོ༔ དེ་བཞིན་དུ་ཆུས་དང་༔ མེས་དང་༔ རླུང་གིས་བཅིངས་པ་དབུགས་རང་རྒྱུད་དུ་འཛིན་པ་ལས་མི་གྲོལ་བས་ནའོ༔ ནང་གི་བཞི་ནི༔ འབྱུང་བ་སའི་

བསྟན་པ་འཇིག་པ་དང་༔ སའི་བྱེར་བ་ཁུངས་སུ་འཇུག་པ་དང་༔ སའི་སྙོམས་པས་འགྲོ་བ་བསྐྱེད་པ༔ དེ་བཞིན་དུ་ལྷག་མ་གསུམ་ཡང་ཤེས་སོ༔ གསང་བའི་བཞི་ནི༔ ལུས་ཀྱི་རྡོས་པ་ཟད་པ་དང་༔ ངག་གི་བརྗོད་པ་དག་པ་དང་༔ ཡིད་ཀྱི་འགྱུ་བ་དག་པ་དང་༔ སེམས་ཀྱི་རྟོག་པ་དག་པའོ༔ གསུང་གི་ཕྱིའི་བཞི་ནི༔ ཕུང་པོའི་བདུད་གཟུགས་ཅན་མ་ཡིན་པས་དག་པ་དང་༔ ཉོན་མོངས་པའི་བདུད་འདོད་པ་དང་ངར་འཛིན་མེད་པས་དག་པ་དང་༔ ལྷའི་བུའི་བདུད་ཞེན་ཆགས་མེད་པས་དག་པ་དང་༔ འཆི་བདག་གི་བདུད་ཆོས་ཉིད་སྐྱེ་བ་མེད་པས་དག་པའོ༔ ནང་གི་བཞི་ནི༔ ལུས་ངག་ཡིད་མ་བཅོས་པས་འདུལ་བ་རྣམ་པར་དག་པ་བརྗོད་མེད་པས་མདོ་སྡེ་རྣམ་པར་དག་པ༔ སེམས་རང་ས་ན་གསལ་བས་མངོན་པར་དག་པ༔ ཕྱོགས་ཀུན་ཏུ་ཤར་བས་རིགས་འཛིན་གྱི་སྡེ་སྣོད་རྣམ་པར་དག་པའོ༔ གསང་བའི་བཞི་ནི༔ མུར་ཐུག་པ་རྣམ་པར་དག་པས་འཇིག་རྟེན་ལས་གྲོལ༔ མུ་སྟེགས་རྣམ་པར་དག་པས་བདག་མེད་ཀྱི་དོན་ལ་གནས༔ ཕྱལ་བ་རྣམ་པར་དག་པས་འབྲས་བུ་མངོན་པར་འབྱིན༔ རྒྱང་འཕེན་པ་རྣམ་པར་དག་པས་ལས་རྒྱུ་འབྲས་ལ་ཡིད་ཆེས༔ གསང་བའི་ནི༔ ལྟ་བ་ལོག་པ་དག་པས་སྐུ་གསུམ་ཚད་དུ་ཕྱིན༔ སྒོམ་པ་ལོག་པ་དག་པས་མཉམ་རྗེས་སུ་ཟུང་དུ་འབྲེལ༔ སྤྱོད་པ་ལོག་པ་དག་པ ས་ལམ་ཡང་དག་པ་དང་ལྡན༔ འབྲས་བུ་ལོག་པ་དག་པས་སྐུ་གསུམ་ལམ་དུ་སྣང་བའོ༔ ཐུགས་ཀྱི་ཕྱིའི་བཞི་ནི༔ གཞི་ལ་ཕྱིན་ཅི་ལོག་ཏུ་འཛིན་པའི་གཅེར་བུ་བ་རྣམ་པར་དག་པས༔ གཞི་གནས་ཡེ་གྲོལ༔ ལམ་ལ་ཕྱིན་ཅི་ལོག་ཏུ་ལྟ་བའི་རྒྱང་འཕེན་པ་རྣམ་པར་དག་པས༔ མ་བཅོས་རང་གྲོལ༔ སྣང་བ་ལ་ཕྱིན་ཅི་ལོག་ཏུ་ལྟ་བའི་

སེར་སྐྱ་བ་རྣམ་པར་དག་པས༔ གཅེར་བཞག་གཅེར་གྲོལ༔ འབྲས་བུ་ལ་ཕྱིན་ཅི་ལོག་ཏུ་ལྟ་བའི་རིགས་བྱེད་གསང་བ་དག་པས༔ རང་སྣང་ཡོངས་གྲོལ་ལོ༔ ནང་གི་ནི༔ ཟས་ལ་ཞེན་པ་ཆོད་པས༔ ཁམ་གྱི་ཟས་བདག་ཏུ་མེད༔ གོས་ཀྱི་ཞེན་པ་ཆོད་པས༔ གཅེར་བུ་བསམ་གཏན་གྱི་ཐུན་ལ་སྤྱོད༔ རྨི་ལམ་གྱི་ཞེན་པ་ཆོད་པས༔ བག་ཆགས་ཀྱི་མཐའ་སྟོངས་པའི་ཐུན་ལ་སྤྱོད༔ བག་ཆགས་ཀྱི་ཞེན་པ་ཆོད་པས༔ ལས་དང་རྣམ་པར་སྨིན་པའི་མཐའ་སྟོངས་སོ༔ གསང་བའི་ནི༔ སྣང་བ་རང་སྣང་རང་གྲོལ་དུ་ཤེས་པས༔ སྤྲུལ་པ་སྐུའི་འབྲས་བུ་ཐོབ༔ འགྱུ་བ་རང་སྣང་རང་གྲོལ་བས༔ ལོངས་སྐུའི་མཁྱེན་པ་ཡེ་ཤེས་རྫོགས༔ གནས་པ་རང་ཐོག་ཏུ་གྲོལ་བས༔ ཆོས་སྐུའི་མཁྱེན་པ་མ་ལུས་པར་རྫོགས༔ སྣང་སྟོང་གཉིས་མེད་དུ་གྲོལ་བས༔ ངོ་བོ་ཉིད་ཀྱི་སྐུའི་མཁྱེན་པ་ཡོངས་སུ་རྫོགས་པ་སྟེ༔ དེས་ན་ཕྱི་རོལ་པ་དང་༔ ནང་པའི་སྟོན་པའི་ཁྱད་པར་རོ༔ དེ་ལྟར་དུས་གསུམ་སངས་རྒྱས་དགོངས་པས་བརྒྱུད་པ་ནི༔ བྱིན་གྱིས་བརླབས་ཀྱིས་བརྒྱུད་པ་ཞེས་བྱ་སྟེ༔ འདས་པ་དང་༔ མ་འོངས་པ་དང་༔ ད་ལྟར་བཞུགས་པའི་སངས་རྒྱས་ཐམས་ཅད་ཀྱི་རང་བཞིན་རྣམ་དག་གི་བྱིན་རླབས་སོ༔ དེ་ཡང་རྗོད་བྱེད་ཚིག་ལ་མ་བརྟེན་པར༔ ཆོས་ཉིད་ཀྱི་རང་སྒྲ་ལ་བརྟེན་ནས་རྟོགས་ཤིང་ཁོང་དུ་ཆུད་པའོ༔ དེ་ཡང་དུག་ནི་མི་འགྱུར་བ་ལ་བྱ༔ གསུམ་ནི་གྲངས༔ སངས་པ་ནི་ལས་དང་ཉོན་མོངས་པ་དང་༔ ཤེས་བྱའི་སྒྲིབ་པ་མེད་པ་ལ༔ རྒྱས་པ་ནི་ངོ་བོ་སྐུར་རྒྱས་པས་སྐུ་གསུམ་འདུ་འབྲལ་མེད༔ མཁྱེན་པ་ཡེ་ཤེས་གསུམ་ལས་མི་འདའ༔ གནས་པ་ཏིང་ངེ་འཛིན་དུ་རྒྱས་པས༔ དུས་ཐམས་ཅད་རྡོ་རྗེ་ལྟ་བུའི་ཏིང་ངེ་འཛིན་ལས་མི་ཕྱེད༔ མཛད་པ་ཕྲིན་ལས་སུ་རྒྱས་པས༔ མཛད་པ་སུམ་

ཅུ་རྩ་དྲུག་མཐར་ཕྱུང་༔ དགོངས་པ་ནི༔ ཆོས་ཀྱི་སྐུ་ལ་དགོངས་པ་དམིགས་པ་མི་མངའ་བས་ཡེ་ནས་ཡེ་གྲོལ་དུ་གནས༔ ལོངས་སྐུ་ལ་གསལ་ལ་རྟོག་པ་མེད་པས་རང་སྣང་རང་གྲོལ་ལ་གནས༔ སྤྲུལ་པའི་སྐུ་ལ་ཞེན་ཆགས་དང་བྲལ་བས༔ གཅིག་སྐྱེ་གཅིག་འགག་ལ་གནས་པ་འོ༔ བརྒྱུད་པ་ནི་ལྷག་པ་དང་ཆད་པ་མེད་པའི་དོན་ཏེ༔ བསྐལ་པ་ཐོག་མ་མེད་པ་ནས༔ ད་ལྟའི་རྣལ་འབྱོར་པ་ཡན་ཆད་ལ༔ ཚིག་ལ་ལྷག་ཆད་མེད་ཅིང་དོན་ལ་འཁྲུལ་པ་མེད་པ་སྟེ༔ དཔེར་ན་རིན་པོ་ཆེའི་སྣོད་ལ་རྒྱས་བཏབ་པ་ལྟ་བུ་དང་༔ རྒྱལ་པོའི་བཀའ་རྟགས་ལྟ་བུའོ༔ ལོ་དུ་མ་ལོན་ཀྱང་རྒྱུས་ད་ལྟའི་མི་ལྟར་ཡོད་པ་ལས་ལོ་རྒྱུས་ཞེས་བྱའོ༔ དེའི་ཕྱིར་ན༔ ལོ་རྒྱུས་དོན་གྱིས་མ་བཤད་ན༔ གསང་ཆེན་རྒྱལ་བའི་བཀའ་འདི་ལ༔ ཡིད་མི་ཆེས་པའི་སྐྱོན་དུ་འགྱུར༔ ཞེས་པའོ༔ བླ་མ་གོང་མའི་གསུང་འགྲོས་ལས༔ ལྷག་པ་དང་ཆད་པ་མེད་པར་བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟ་བུར་སོང་བ་ནི་བརྒྱུད་པ་ཞེས་བྱའོ༔ དེ་ཡང་འདི་དག་རྣམས་ཤེས་ཤིང་ཁོང་དུ་ཆུད་པ་རྣམས་ལ༔ སངས་རྒྱས་ཀྱི་བྱིན་རླབས་ངེས་པར་འབྱུང་བར་འགྱུར་རོ༔ དེས་ན་བརྒྱུད་པའི་མན་ངག་གཙོ་བོའོ༔ དེ་དག་ནི་རྒྱལ་བ་དགོངས་པའི་བརྒྱུད་པའོ༔ ཨྠྀི༔

གནས་འབྱེད་བདུན་པ།

༼ལོ་རྒྱུས་ཆེན་མོའི་སྨད་ཆ༽གནས་འབྱེད་བདུན་པ་བཞུགས་སོ། །

རྒྱ་གར་སྐད་དུ༔ བྷ་དུ་བ་ཏྲི་ས་ཀ་རི་ནཱ་མ༔ བོད་སྐད་དུ༔ གནས་འབྱེད་བདུན་པ་ཞེས་བྱ་བ༔ ལོ་རྒྱུས་ཆེན་མོ་གཏན་ལ་དབབ་པའོ༔ རྡོ་རྗེ་འཆང་ཆེན་འགྲོ་བ་ཡོངས་ཀྱི་བླ༔ བླ་མ་སངས་རྒྱས་རྣམས་ཀྱི་དགོངས་པ་འཆར་བ་དང་༔ ཡེ་ཤེས་ལས་ལས་གྲུབ་པའི་མཁའ་འགྲོ་མ༔ སྐྱབས་མཛད་མཆོད་འོས་རྣམས་ལ་ཕྱག་འཚལ་ལོ༔ གང་ཞིག་ལོ་རྒྱུས་དོན་ཉིད་ཚད་མ་བློར་བཞག་ནས༔ མ་འོངས་དུས་ཀྱི་གང་ཟག་ཐེ་ཚོམ་ཅན༔ ངེས་ཤེས་འཇུག་པར་བྱ་ཕྱིར་མིག་གི་རྒྱན་སོགས་སྤྲོ༔ བླ་མ་གྲུབ་ཐོབ་ཕུང་པོ་མི་སྣང་བར༔ ཟག་པ་རང་ཟད་དབྱིངས་སུ་སྐུ་གཤེགས་པའི༔ རིགས་འཛིན་གོང་མ་རྣམས་ཀྱི་ལོ་རྒྱུས་ཉིད༔ གསང་བ་སྒྲ་ཡི་རྒྱུད་དང་བཀོད་པ་ཆེན་པོ་ལས༔ ཇི་ལྟར་གསུང་པ་ཉིད་ལས་ལྷག་དང་ཆད་པ་མེད༔ མ་ནོར་ངེས་པ་ཚིག་སྡེབས་ཡི་གེ་ཡང་༔ འདི་ལ་འཇུག་འདོད་སྐལ་ལྡན་སྙིང་གི་བུ༔ མངོན་སུམ་གནད་ལ་འཕེབས་པའི་དོན་ཆེད་དུ༔

ལོ་རྒྱུས་དོན་ཉིད་ཚིག་གིས་རྒྱས་བཤད་དོ༔ དེ་ལ་རིགས་ནི་རྡོ་རྗེ་འཆང་ཆེན་པོ་ཁྱད་པར་གྱི་ཡོན་ཏན་དགུ་བཅུ་རྩ་དྲུག་དང་ལྡན་པའི་འདི་འོ༔ འཛིན་པ་བ་ནི་གནད་ལ་བརྟེན་ནས་ཉམས་སུ་བླངས་པས༔ དེ་ཉིད་ཅི་འདྲ་བར་བྱེད་པའོ༔ དེ་ཡང་སུས་འཛིན་ན༔ སློབ་དཔོན་ཆེན་པོ་དགའ་རབ་རྡོ་རྗེ་ལ་སོགས་པ༔ སྤྲུལ་པའི་སྐུ་དེ་དག་རྣམས་ལ་བྱའོ༔ བརྡ་ནི་ངོ་བོ་དང་༔ ངེས་ཚིག་དང་༔ དབྱེ་བའོ༔ ངོ་བོ་ནི་གནད་ཐོག་ཏུ་ཕེབས་པར་བྱེད་པའོ༔ གནད་ཐོག་ནི་མེ་བཙའ་ལྟ་བུའོ༔ ངེས་ཚིག་ནི་ཚིག་ཙམ་མོ༔ སྒྲ་ཙམ་གྱི་ན་བརྡའ་ཙམ་ལ་བརྟེན་ནས་ཆོས་ཉིད་གཏན་ལ་འབེབས་པར་བྱེད་པས་ན་བརྡ་ཞེས་བྱའོ༔ དབྱེ་ན་བརྡའི་གནད་གཞན་དཔག་ཏུ་མེད་པ་ཅིག་ཡོད་ཀྱང་༔ རང་བཞིན་གྱི་བརྡ་དང་༔ བྱས་ཤིང་བསྟན་པའི་བརྡ་དང་༔ བརྗོད་པའི་བརྡ་ལས་མི་འདའོ༔ རང་བཞིན་གནས་པ་དང་༔ རྟགས་སུ་བཀོད་པ་གཉིས་སོ༔ གནས་པ་ནི་ཕྱི་ཡུལ་གྱི་སྣང་བ་

ལ་བརྟེན་ནས་བརྡ་དོན་གྱི་མན་ངག་ཏུ་འགྱུར་བས༔ ཕྱི་ཡི་སྣང་བ་མ་སྤངས་པར་སངས་རྒྱ་བ་དང་༔ ནང་སེམས་ཀྱི་རྟོག་པ་མ་ལུས་པར་བརྡ་དོན་གྱི་མན་ངག་ཏུ་འགྱུར་བའོ༔ རྟགས་སུ་བཀོད་པ་ནི༔ དེ་བཞིན་གཤེགས་པའི་སྐུའི་རྟེན་དང་༔ གསུང་དང་ཐུགས་ཀྱི་རྟེན་ལ་སོགས་པའོ༔ དེ་དག་ལ་བརྟེན་ནས༔ བརྡ་དོན་གྱི་མན་ངག་ལ་བརྟེན་ནས་སངས་རྒྱའོ༔ བྱས་ཤིང་བརྟེན་པའི་བརྡ་ལ་གཉིས་ཏེ༔ ལུས་ཀྱི་བརྡ་དང་༔ ཡིད་ཀྱི་བརྡའོ༔ ལུས་ལ་གསུམ་སྟེ༔ ལག་གི་འདུ་བྱེད་ཀྱི་བརྡ་དང་༔ བྲིས་པ་ཡི་གེའི་བརྡ་དང་༔ བྱས་པ་གཟུགས་བརྙན་གྱི་བརྡའོ༔ ལག་གི་འདུ་བྱེད་ནི་རང་གི་སྡེ་བས་གོ་ལ༔ གཞན་གྱིས་མི་གོ་བས༔ དངོས་གྲུབ་ཀྱི་རྒྱུར་འགྲོ་བ་ནི༔ སྔགས་ཀྱི་རྒྱུད་སོ་སོའི་སྐབས་ན༔ ཇི་ལྟར་བྱས་པའི་རིམ་པ་རྣམས་བཤད་པ་དེ་རྣམས་སོ༔ བྲིས་པ་ཡི་གེའི་བརྡ་ནི་འགྱུ་བྱེད་ཀྱི་ཡི་གེ་ལ་བརྟེན་ནས་སྣང་སྲིད་རང་གྲོལ་དུ་གྲོལ་བའི་གནད་དང་༔ དག་བྱེད་ཡི་གེ་ལ་བརྟེན་ནས་སྲིད་གསུམ་རང་དག་ལ་གྲོལ་བའི་གནད་དོ༔ སྒྱུར་བྱེད་ཡི་གེ་ལ་བརྟེན་ནས༔ གསང་བའི་དོན་ཀུན་མངོན་དུ་བསྟན་པ་ཡང་༔ ཀུན་གྱི་མི་གོ་བར་བསྟན་པ་ནི༔ ལྷའི་ཡི་གེ་དང་༔ མཁའ་འགྲོ་མ་སྨྲ་བྱེད་ཀྱི་ཡི་གེ་དང་༔ ཀླུའི་ཡི་གེ་དང་༔ ཚངས་པ་དང་ནམ་མཁའ་ལྡིང་གི་ཡི་གེ་ལ་སོགས་པ་རྣམས་ལ་སྦྱངས་པས༔ བདག་ཉིད་ཀྱིས་ཤེས་ཤིང་གོ་བས་གཞན་གྱིས་མི་གོ་བའི་གནད་དོ༔ སྤྲོས་པ་ཡི་གེའི་སྦྲེལ་པ་ལ་བརྟེན་ནས༔ གསང་སྔགས་ཀྱི་བཟླས་པའི་གནད་ལ་མཁས་པར་འགྱུར་བའོ༔ བྱས་པ་གཟུགས་བརྙན་གྱི་བརྡ་ནི༔ ཁམ་སའི་མི་མོ་དང་༔ མར་མེའི་ཀོང་བུ་ལ་སོགས་པ་བྱས་པའི་རྣམ་པ་ལ་བརྟེན་ནས་ཁྱད་པར་དུ་ངེས་ཤེས་སྐྱེད་པར་བྱེད་པའོ༔ ཡིད་

ཀྱི་བརྡ་ནི་བྱིན་གྱིས་བརླབས༔ ཚོགས་དང་གཏོར་མ་ལ་བརྟེན་ནས་བླ་མའི་དགོངས་པ་ཚད་དང་ལྡན་པར་གྱུར་པ་དང་༔ ཡིད་ཀྱི་དད་པས་རིག་པ་གཉིས་མེད་དུ་གྲོལ་བ་དང་༔ ཡིད་སེམས་འདྲེས་པར་བྱེད་པའི་གནད་དོ༔ འདི་དག་ནི་བླ་མའི་དགོངས་པའི་གནད་ལས་བྱུང་བའོ༔ མི་སྣང་བ་ལ་སོགས་པ་ཡིད་ཀྱི་བརྡ་ཞེས་པའི་དོན་ཏོ༔ བརྗོད་པའི་བརྡ་ལ་གསུམ་སྟེ༔ ལུང་ལས་བྱུང་བའི་བརྡ༔ རྣལ་འབྱོར་ཤེས་པའི་ཉམས་ལས་བྱུང་བའི་བརྡ༔ དུས་ངེས་པ་ལ་ཆེད་དུ་བརྗོད་པའི་བརྡའོ༔ ལུང་ལས་བྱུང་བ་ནི༔ རང་གི་དམ་ཚིག་ཉེ་བར་མཚོན་པ༔ གསང་སྔགས་རྒྱུད་སོ་སོ་ལས་བྱུང་བ་རྣམས་ཏེ་འགྲོ་བ་གཞན་གྱིས་མི་གོ་བ༔ དཔེར་ན་ཀླ་ཀློའི་སྐད་ལྟ་བུའོ༔ རྣལ་འབྱོར་ཤེས་པའི་ཉམས་ལས་བྱུང་བའི་བརྡ༔ འགྲོ་བ་གཞན་གྱི་སྡུག་བསྔལ་ལས་གྲོལ་བར་བྱེད་པ༔ རྟེན་ཅིང་འབྲེལ་པར་འབྱུང་བ་དང་༔ སེམས་ཆོས་དང་འདྲེས་པར་བྱེད་པ་ལ་སོགས་པ་ཉམས་དང་སྦྱར་ཞིང་སྤྱོད་པ་ཉིད༔ གྲུབ་པ་ཐོབ་པ་རྣམས་ཀྱི་སྤྱོད་ཡུལ་ལོ༔ དུས་ངེས་པ་ལ་ཆེད་དུ་བརྗོད་པ་ནི༔ ཚོགས་ཀྱི་འཁོར་ལོ་ནི་དུས་དང་༔ དབང་བསྐུར་བའི་དུས་སམ༔ དཔའ་བོ་དང་དཔའ་མོའི་སྟོན་མོ་བྱེད་པའི་དུས་སུ་བརྗོད་པ་སྟེ༔ དེ་དག་ལ་བརྟེན་ནས་ཕྱིའི་སྤྲོས་པ་གཅོད་པ་དང་༔ ནང་དུ་ཆོས་ཉིད་ཀྱི་དོན་མངོན་སུམ་དུ་སྐྱེའོ༔ བརྡ་དེ་དག་ལ་བརྟེན་ནས་ཉམས་སུ་མྱོང་བ་ཐོད་རྒལ་དུ་སྐྱེ་བར་བྱེད་པའི་གནད་ཡིན་ནོ༔ དེ་ལྟར་བརྡའི་རང་བཞིན་ཁོང་དུ་ཆུད་པར་བྱེད་དོ༔ དེ་ཉིད་ཆུད་པས་ཚིག་དང་ཡི་གེའི་སྤྲོས་པ་གཅོད་པའོ༔ དེ་ལྟ་བུའི་དོན་དེ་སུ་ལ་བརྒྱུད་ན༔ སྤྲུལ་པ་པོ་དགའ་རབ་རྡོ་རྗེ་ལ་བརྒྱུད༔ སུས་བརྒྱུད་ན་དཔལ་རྡོ་རྗེ་འཆང་གིས་

བརྒྱུད༔ བརྒྱུད་ཚུལ་ལམ་ཐབས་ཇི་ལྟར་བརྒྱུད་ན༔ གསང་སྔགས་ཐམས་ཅད་བརྡ་དུ་མ་ལ་བརྟེན་ནས་བརྒྱུད་དེ་དཔེ་ཇི་ལྟར་བརྒྱུད་ན༔ བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟར༔ ལྷག་པ་མེད་ཅིང་མ་གང་བ་མེད་པ་ལྟར་བརྒྱུད་དོ༔ ཅིའི་ཕྱིར་བརྒྱུད་ན༔ མ་འོངས་པའི་དུས་ཀྱི་སྐལ་ལྡན་རྣམས་ལ་ངེས་པའི་དོན་ཅིག་ཅར་དུ་བསྐྱེད་པའི་ཕྱིར་བརྒྱུད། དེ་ལྟར་བརྒྱུད་པ་ལ༔ དགོས་པ་ཅི་ཡོད་ན༔ འབྲས་བུ་སངས་རྒྱས་པའི་དགོས་པ་མ་འཁྲུལ་བ་དང་༔ རྣམ་པར་རྟོག་པ་མཐའ་དག་པའི་བློས་སྒྲོ་གདགས་སུ་མེད་པའོ༔ དེ་ལ་སངས་རྒྱས་མྱ་ངན་ལས་འདས་ནས་ལོ་སུམ་བརྒྱ་དང་དྲུག་ཅུ་ཐམ་པ་ན༔ རྒྱ་གར་རྡོ་རྗེ་གདན་གྱི་ནུབ་ཕྱོགས་ཨོ་རྒྱན་ཐོར་ཅོག་ཅན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བ་ན༔ ཙནྡན་གྱི་ཤིང་ལྗོན་པ་རྣམས་ཀྱིས་བསྐོར་བ༔ ཀོ་ཤ་ན་ཞེས་བྱ་བའི་སྲོག་ཆགས༔ ལུས་མི་ལ་གདོང་དྲེད༔ སྡེར་མོ་རྣམས་ལྕགས་ཀྱི་སྤར་ཤད་ཀྱིས་གཏམས་པ༔ རྒྱུ་རྣམས་རིན་པོ་ཆེ་ཕྲ་མོས་གཏམས་པ་དཔག་ཏུ་མེད་པས་གང་བ༔ དྷ་ན་ཀོ་ཤའི་གླིང་ཞེས་བྱའོ༔ དྷ་ནི་ཙནྡན་གྱི་གླིང་རྣམས་ལ་བྱའོ༔ དེ་ནས་བཀྲ་ཤིས་བདེ་བྱེད་བརྩེགས་པ་ཞེས་བྱ་བའི་གཙུག་ལག་ཁང་ཆེན་པོ་ཞིག་ན༔ གཙུག་ལག་ཁང་ཕྲ་མོ་སྟོང་དྲུག་བརྒྱ་དང་བརྒྱད་ཀྱིས་ཕྱོགས་མཚམས་རྣམས་ཡོངས་སུ་བསྐོར་བ་དེ་དག་གི་བར་གསེར་གྱི་དྲིལ་བུ་གཡེར་ཁའི་དྲ་བའི་ཐག་པས་རབ་ཏུ་སྦྲེལ་བ༔ ཤིན་ཏུ་མཛེས་ཤིང་ཉམས་དགའ་བ་དང་ལྡན་པ་ན༔ མི་རྣམས་ཀྱང་གཟུགས་བཟང་ཞིང་ཡན་ལག་རགས་པ་ལ༔ སྤྱི་བོར་རལ་པའི་ཐོར་ཚུགས་བཅིངས་པ༔ གསེར་དང་༔ དངུལ་དང་༔ མུ་མེན་ལ་སོགས་པས་བརྒྱན་པ༔ རས་དཀར་དམར་སྣ་ཚོགས་གོན་པ་ཤ་སྟག་གོ༔ བུད་མེད་རྣམས་སྐྲའི་མདུད་པ་མདུན་རྒྱབ་

གཉིས་སུ་འཆིང་བའོ༔ དེ་དག་ལ་དུང་དང་རུས་པའི་རྒྱན་སྣ་ཚོགས་པས་བརྒྱན་པའོ༔ ཡུལ་དེ་ན་ཡབ་རྒྱལ་པོ་ཨུ་པ་རཱ་ཛ་ཞེས་བྱ་བ་ལ༔ ཡུམ་སྣང་བ་གསལ་བའི་འོད་ལྡན་མ་ཞེས་བྱ་བ་ཞིག་ཡོད་དེ༔ དེ་གཉིས་ལ་སྲས་མོ་སུ་དྷ་ར་མ་ཞེས་བྱ་བ༔ རབ་ཏུ་བྱུང་ནས་ཡུན་རིང་པོ་མ་ལོན་པ༔ བསྙེན་པར་རྫོགས་ནས་ཡུན་རིང་པོ་མ་ལོན་པའི་དགེ་སློང་མ་གཅིག༔ དེ་ནས་དཔག་ཚད་གཅིག་འདས་པའི་ནུབ་ན༔ གསེར་གྱི་བྱེ་མ་བརྡལ་བའི་རྒྱ་མཚོའི་གླིང་ན་འཇག་མའི་སྤྱིལ་པོ་ཕུབ་ནས༔ གཡོག་མོ་བདེ་བའི་སྙིང་རྗེ་ལྡན་ཞེས་བྱ་བ་མཁའ་འགྲོ་མ་གཅིག་གིས་བྱེད་ཅིང་༔ དགེ་སྦྱོར་སྐྱོང་གིན་བཞུགས་པའི་ལྷ་ལྕམ་གྱི་མཚན་མོ་རྨི་ལམ་ན༔ མི་དཀར་པོ་རིན་པོ་ཆེ་ཤེལ་ལས་གྲུབ་པ་རིང་བ་མདུང་ཙམ་པ་གཅིག་གིས་སྤྱི་བོའི་གཙུག་ཏུ་རིན་པོ་ཆེ་ཤེལ་གྱི་བུམ་པ་ལ་ཡི་གེ་ༀ་ཨཱཿཧཱུྃ་སྭཱ་ཧཱ༔ ཞེས་རིགས་ལྔའི་དབང་བསྐུར་བའི་རྟགས་སུ༔ དེ་དག་གིས་རྒྱས་བཏབ་པ་གཅིག་སྤྱི་བོའི་སྟེང་དུ་ལན་གསུམ་བཞག་པས༔ བུམ་པ་དེ་ལས་འོད་འཕྲོས་པས་ཁམས་གསུམ་དུས་ཅིག་གསལ་བར་མཐོང་བ་ཞིག་རྨིས༔ དེ་ནས་ནང་པར་རྨི་ལམ་དེ་ལ་ངོ་མཚར་ཆེ་ནས༔ ཚ་བའི་དུས་སུ་གཡོག་མོ་ལ་བཤད་པས༔ གཡོག་མོ་དེས་ན་རེ༔ ལྷ་ལྕམ་ཉིད་ལ་སྤྲུལ་པའི་སྐུ་གཅིག་འཁྲུངས་པའི་ལྟས་ཡིན་ཟེར་རོ༔ གཡོག་མོ་དེ་ནི་མཁའ་འགྲོ་མ་པུར་རྣ་ཉེ་བར་ཞི་བ་ཞེས་བྱ་བ་ཡིན་ནོ༔ ལྷ་ལྕམ་གྱི་བསམ་པ་ལ༔ དེ་ཅི་ལ་ཟེར་སྙམ་པ་ཅིག་བྱུང་ངོ་༔ དེ་ནས་ལྷ་ལྕམ་དེ་ལུས་མ་བདེ་ནས་རབ་ཏུ་སྡུག་བསྔལ་དང་ལྡན་པར་གྱུར་ཏོ༔ དེ་ནས་ཟླ་བ་དགུ་ངོ་བཅུ་ལོན་པ་ན་ལྷ་ལྕམ་དེ་ལ་ཕ་མེད་པའི་བུ་གཅིག་རྩིབས་ལོགས་གཡས་པའི་གོ་བར་ནས་འཁྲུངས་སོ༔ དེ་འཁྲུངས་པ་དང་དགེ་

སློང་མ་དེ་ཉིད་རབ་ཏུ་བྲེད་དོ༔ ཁ་ནས༔ ཕ་མེད་བུ་འདི་འཇིག་རྟེན་འདྲེ་ལས་མིན་པ་སུ༔ འཇིག་རྟེན་བདུད་དམ་ཚང་པ་ལ་སོགས་སམ༔ རྒྱལ་པོ་བཙན་དང་དམུ་ལ་སོགས་པའི་རིགས༔ ཁམས་གསུམ་དག་ན་འདོད་ལྡན་སུ་ཞིག་ཡིན༔ གལ་ཏེ་ལྷའམ་ལྷ་མིན་སྣ་ཚོགས་གཟུགས༔ འདི་ལྟར་བྱུང་བའི་དཔེ་ན་སུ་ཡང་མཐོང་བ་མེད༔ རྒྱལ་ཁམས་ཆོས་མེད་འདི་ནི་སུ་ལ་སྲིད༔ ཀྱེ་མ༔ བདག་ནི་རབ་ཏུ་ཁྲིམས་གཙང་འགྲོ་ལས་རྒྱལ་འདོད་པས༔ འདི་ནི་ལོག་སྲེད་འགྲོ་བས་དཔྱས་གྱུར་སྡིག་རེ་ཆེ༔ ཞེས་ཚིགས་བཅད་མང་པོ་བརྗོད་ཅིང་རབ་ཏུ་སྡུག་བསྔལ་བས༔ གཡོག་མོ་དེས་ནི༔ འདི་སངས་རྒྱས་ཀྱི་སྲས་གཅིག་ཡིན་བྱས་ཀྱང་མ་ཉན་ནས༔ འདི་ཐལ་བའི་དོང་དུ་སྦོས་ཏེ་བསྲུབས་ལ་ཞོག་ཅེས་ཐལ་བའི་དོང་དུ་བོར་བས༔ འོད་དང་སྒྲ་ལ་སོགས་པ་བྱུང་ངོ་༔ དེ་ནས་ཞག་གསུམ་ལོན་ནས་བལྟས་པས་སྐད་ལྷག་ལྷག་བྱས་ནས་ཅི་ཡང་མ་ཉེས་པར་འདུག་ནས༔ སླར་དར་དཀར་པོ་དྲི་མ་མེད་པ་ཞིག་གིས་སླེ་ལ་བླངས་ཏེ་སྤོས་ཆུ་དང་འོ་མ་ལ་སོགས་པའི་ཁྲུས་ཆབ་ནས་བཏོན་ཏེ༔ འདི་མི་འཆི་བའི་ལུགས་སམ༔ སྤྲུལ་པར་འདུག་སྙམ་ནས་བླངས་པས༔ བར་སྣང་ནས་ལྷ་རྣམས་ཀྱིས་བཀྲ་ཤིས་ཚིགས་སུ་བཅད་པ༔ མགོན་པོ་སྟོན་པ་བཅོམ་ལྡན་འདས༔ རང་བཞིན་སྣང་མཛད་འཇིག་རྟེན་མགོན༔ བདག་ཀྱང་རབ་ཏུ་བསྐྱབ་པ་དང་༔ ནམ་མཁའི་རྡོ་རྗེ་བདག་ལ་གསོལ༔ ཞེས་བརྗོད་དོ༔ མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས་པ་དང་༔ ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་གུར་གུམ་གྱི་ཆར་ཕབ་པ་དང་༔ ཕྱོགས་ཀུན་ནས་འཇིག་རྟེན་གྱི་ཁམས་སྐྱོང་བ་རྣམས་ཀྱིས༔ ཆོས་ཀྱི་རྔ་ཆེན་

པོ་བརྡུང་བ་དང་༔ དུང་འབུད་པ་དང་༔ རྒྱལ་མཚན་འཛུགས་པ་དང་༔ བ་དན་སློང་བ་ལ་སོགས་པ་དང་༔ དྲང་སྲོང་གི་རྒྱལ་པོ་ཆེན་པོ་རྣམས་ཀྱིས་ཀྱང་སྨན་གྱི་ཚོགས་དཔག་ཏུ་མེད་པའི་སྤྲིན་གྱིས་གཏིབས་སོ༔ ༔དེ་ནས་བྱིས་པ་དེ་གསོས་པས༔ གཞན་གྱི་ཞག་གསོས་པ་བས་དེའི་ཟ་མ་གསོས་པ་སྐྱེད་ཆེ་བ་གཅིག་བྱུང་ངོ་༔ གཞན་གྱི་ལོ་དང་དེའི་ཟླ་བ་གཉིས་དེའི་ཟླ་བ་སྐྱེད་ཆེ་བ་གཅིག་བྱུང་ངོ་༔ དེ་ནས་ལོ་བདུན་ལོན་ཙ་ན༔ ཁྱེའུ་དེའི་ཞལ་ནས་ཡུམ་ལ༔ ཀྱེ་མ་གཅིག་ལགས༔ པཎྜི་ཏ་མཁས་པ་རྣམས་ལ་ཞེ་ས་ན་མ་གཅིག་ཙམ་ཡང་འབུལ༔ ཆོས་གཏམ་མ་བདེ་བ་འགའ་ཙམ་ཡང་ཞུ་བས༔ ཡུམ་གྱིས་བདག་ལ་གནང་བར་ཞུ༔ ཞེས་ཞུ་བ་ཕུལ་བས༔ ཡུམ་དེ་ཡི་ཞལ་ནས༔ བུ་ཁ་ནས་སོ་རུ་མ་བརྗེས་པར་ཆོས་གཏམ་ཅི་ལ་འོང་ཟེར་བས༔ ཁྱེའུ་དེའི་ཞལ་ནས་ཅི་ནས་ཀྱང་གནང་བར་ཞུ་ཟེར་ཏེ་ཞུ་བ་དྲག་ཏུ་ཕུལ་བས༔ ཡུམ་གྱི་ཞལ་ནས་འདི་ནས་ཤར་གྱི་ཕྱོགས་ན་དཔག་ཚག་གཅིག་འདས་པ་ན༔ དྷ་ན་ཀོ་ཤ་རབ་ཏུ་སྣང་བའི་གླིང་ཞེས་བྱ་བ་ན༔ བུ་རང་གི་མེས་པོ་རྒྱལ་པོ་ཨུ་པ་རཱ་ཛ་ཞེས་བྱ་བ་ལ༔ མཆོད་གནས་པཎྜི་ཏ་ལྔ་བརྒྱ་ཡོད་པས་དེར་སོང་ལ་ཞུས་ཤིག་ཟེར་ནས་ཡུམ་གྱིས་གནང་ངོ་༔ དེ་ནས་ཁྱེའུ་རབ་ཏུ་དགའ་ནས་ཡུལ་དེ་ཉིད་དུ་ཕྱིན་ཏེ༔ རྒྱལ་པོ་དང་མཇལ་ཏེ་རྒྱལ་པོ་ལ་ཕྱག་བྱས་ནས༔ བདག་ནི་ཁྱེད་ཀྱི་དཔོན་པོ་ལགས་ཏེ༔ རྒྱལ་པོ་ཆེན་པོ་ལགས༔ ཁྱེད་ལ་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས༔ བདག་པཎྜི་ཏ་དེ་རྣམས་ལ་ཞེ་ས་ན་མ་གཅིག་ཙམ་ཡང་འབུལ༔ ཆོས་གཏམ་ཞིག་མ་བདེ་བ་བཀའ་ཙམ་ཡང་ཞུ་བས༔ རྒྱལ་པོ་ཆེན་

པོ་ལགས་བདག་ལ་གནང་བར་ཞུ་བ་ཕུལ་བས༔ རྒྱལ་པོ་དེས་སྤྱན་གྱིས་བལྟས་ཏེ༔ བྱིས་པ་ཁ་ནས་སོ་འུ་མ་བརྗེས་པ་གཅིག་གི ས་ཆོས་གཏམ་དང་ཅི་ལ་ཡོང་སྟེ༔ ཞེས་ཡང་ཅི་ལ་ཡོང་ཟེར་ཏེ༔ དེ་ནས་ཁྱེའུ་དེའི་ཞལ་ནས༔ རྒྱལ་པོ་ལགས་བདག་ལ་ཅི་ནས་ཀྱང་གནང་བར་ཞུ་ཞེས་གླེངས་སོ༔ རྒྱལ་པོའི་ཞལ་ནས་ཁྱོད་ལོ་ནི་བྱིས་པར་འདུག་སྟེ༔ སངས་རྒྱས་ཀྱི་མཚན་རྟགས་མང་པོས་ལུས་ལ་སྤྲས་འདུག་པས༔ གལ་ཏེ་སྤྲུལ་པ་གཅིག་ཡིན་སྲིད་པས་པཎྜི་ཏ་རྣམས་དང་མཇལ་དུ་གཞུག་གི་གསུངས་ནས་ནང་དུ་གཤེགས་སོ༔ དེ་ནས་པཎྜི་ཏ་རྣམས་གྲོ་གསོལ་བའི་དུས་སུ༔ རྒྱལ་པོས་གོང་གི་ཁྱེའུ་དེའི་གཏམ་དེ་དག་པཎྜི་ཏ་རྣམས་ལ་བསྙད་དོ༔ པཎྜི་ཏལ་ལའི་ཟེར་འི་ཞལ་ནས་སྨྱོན་ཚིག་དགའ་དགའ་བྱེད་པ་མིན་ནམ་ནང་དུ་མ་གཏང་གསུངས༔ ལ་ལ་ཅི་ཟེར༔ དེ་དག་གི་ནང་ནས་མཁྱེན་པ་ཆེ་བ་གཅིག་གི་ཞལ་ནས༔ དེ་ཡར་ཐོང་དང་གལ་ཏེ་སྤྲུལ་པ་འདྲ་ཡོང་བ་ཡང་མ་ངེས༔ མདང་སུམ་གྱི་རྨི་ལམ་ན་ལྟས་བཟང་བ་གཅིག་ཀྱང་བྱུང་གསུངས་ནས༔ ནང་དུ་ཐོང་དང་གསུངས་ནས་ནང་དུ་བཏང་བས༔ ཁྱེའུ་དེས་ཕྱག་མཛད་ནས༔ དེ་རྣམས་ལ་ཁྱེའུ་དེས་རིམ་པ་བཞིན་ཁ་ནས་བགྲོ་གླེང་བཏང་བས༔ གང་གིས་ཀྱང་མ་ཐུབ་ཚུར་ཆོས་གང་དྲིས་ཀྱང་ཐོགས་པ་དང་རྡུགས་པ་མེད་པར་བྱུང་ནས༔ པཎྜི་ཏ་རྣམས་ཀྱིས་ཚུར་ལ་ཕྱག་མཛད་ནས༔ ཞབས་སྤྱི་གཙུག་ཏུ་བླངས་ནས་རབ་ཏུ་བསྟོད་དོ༔ མཚན་ཡང་ཤེས་རབ་རྒྱ་ཆེ་བ་ལ་དགོངས་ནས་པྲཉྫཱ་བྷ་ཝ་ཞེས་བྱ་བར་བཏགས་སོ༔ རྒྱལ་པོ་དགྱེས་ནས་སློབ་དཔོན་དགའ་རབ་རྡོ་རྗེ་བྱ་བར་བཏགས་སོ༔ ཡུམ་གྱིས་ཐལ་བའི་ཁུང་པོར་སྦས་ནས་མ་ཤི་བས་སློབ་

དཔོན་ཆེན་པོ་རོ་ལངས་ཐལ་མདོག་ཅེས་བྱ་བར་བཏགས་སོ༔ ཡུལ་དེའི་མི་ཀུན་གྱི་གཞོན་ནུ་ཤིན་ཏུ་ཡིད་དུ་འོང་བ་གཅིག་རབ་ཏུ་བདེ་བར་འདུག་ནས༔ སློབ་དཔོན་རོ་ལངས་བདེ་བ་ཅེས་བྱ་བར་ཐོགས་ཤིག་ཅེས་གྲགས་སོ༔ དེ་ལྟར་མཚན་བཞིར་གྲགས་པ་ནི་སྐྱེ་བ་བཞིའི་སེམས་ཅན་རྣམས་ཀྱི་ལུས་སུ་ཉིད་ཀྱིས་སངས་རྒྱས་བཅོམ་ལྡན་འདས་ཀྱི་གསུང་ཉན་ཅིང་ཉེ་འཁོར་དུ་འཁོར་བས༔ དེ་ཉིད་ཀྱི་བསོད་ནམས་ཀྱི་སྟོབས་ལས་གྲུབ་པའོ༔ ༔དེ་ནས་བྱང་གི་ཕྱོགས་ན་རི་བོ་ཉི་མ་རབ་ཏུ་སྣང་བར་བྱེད་པ་ཞེས་བྱ་བར༔ བྲག་རབ་ཏུ་འཇིགས་པའི་ཚོགས་ལ༔ ཡི་དྭགས་དྲག་པོ་གནས་པའི་སྟེང་དུ་འཇག་མའི་སྤྱིལ་པོ་ཕུབ་སྟེ༔ ལོ་སུམ་ཅུ་རྩ་གཉིས་ཀྱི་བར་ལ་ཏིང་ངེ་འཛིན་ལ་སྙོམས་པར་བཞུགས་པའི་ཚུལ་བསྟན་པས༔ ས་གཡོ་བ་ལན་བདུན་བྱུང་༔ ནམ་མཁའ་ལས་ཀྱང་སྒྲའི་བྱེ་བྲག་དཔག་ཏུ་མེད་པ་བྱུང་༔ མེ་ཏོག་སྣ་ཚོགས་པའི་ཆར་ཡང་བབས༔ མུ་སྟེགས་ཀྱི་བསྟན་པ་ཡང་ཉམས་པར་བྱས་སོ་ཞེས་བྱ་བའི་སྒྲ་ཡང་སྐབས་སུ་བྱུང་བས༔ ཡུལ་དེའི་མདའ་ན་མུ་སྟེགས་སྡིག་སྐྱོང་བའི་རྒྱལ་པོ་གཅིག་ཡོད་པས་དེ་ཕྱུགས་འཚོ་བའི་བྱིས་པ་རྣམས་ཀྱིས་མཐོང་སྟེ༔ རྣ་བ་ལ་ར་དུང་བུས་ཀྱང་མ་ལངས༔ སྨྱུག་མའི་ཨུ་བྷི་བཙུགས་པས་ཀྱང་མ་ལངས༔ ཅི་ཡང་མི་སྙེམ་པ་གཅིག་འདུག་པ་མཐོང་སྟེ༔ རྒྱལ་པོ་ལ་བསྙད་པས་རྒྱལ་པོ་ན་རེ༔ འདི་ནི་སངས་རྒྱས་ཀྱི་བསྟན་པ་འཕེལ་བ༔ མུ་སྟེགས་ཀྱི་བསྟན་པ་ཉམས་སྨད་པར་བྱེད་པ་ཡིན་པས་གཤེད་མ་གཉིས་ཀྱིས་སོང་ལ་གསོད་ཅིག༔ ཅེས་དེ་གཉིས་ལ་གྲི་གུ་གཉིས་གཏད་ནས་བཏང་ངོ་༔ གཤེད་མས་གསད་པར་བྱས་པས་ཅི་བྱས་ཀྱང་གླགས་མ་

སྙེད་དོ༔ སློབ་དཔོན་ནམ་མཁའ་ལ་སྤྲིན་གྱི་གསེབ་ནས་ལམ་ཕྱུངས་ཏེ་གཤེགས་པས༔ མུ་སྟེགས་རྒྱལ་པོ་འཁོར་དང་བཅས་པ་ངོ་མཚར་སྐྱེས་ཏེ་ཕྱག་བྱས་ནས་རབ་ཏུ་བསྟོད་དོ༔ སངས་རྒྱས་ཀྱི་བསྟན་པ་ལ་ཞུགས་སོ༔ དེ་ལྟར་དགུང་ལོ་སུམ་ཅུ་རྩ་གཉིས་ལོན་ནས ༔ སྔར་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པའི་སྡེ་སྣོད་རིན་པོ་ཆེ་མ་ལུས་པ་དང་༔ ཁྱད་པར་དུ་རང་བཞིན་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི༔ ཐུགས་ལ་གསུངས་པ་རྣམས་རི་མ་ལ་ཡའི་རིན་པོ་ཆེ་རྣམས་སྤུངས་པ་བསྟན་པའི་ལས་རྒྱས་པའི་རྩེ་མོ་ལ༔ རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་ཞེས་བྱ་བ༔ གདོང་གསུམ་པ་སྟག་གི་པགས་པ་གྱོན་པ༔ ཕྱག་བཞི་རྨ་བྱའི་གདུགས་འཛིན་པ༔ ལས་སུ་སྟག་དང་སེང་གེ་ལ་ཞོན་པ༔ བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་ཞེས་བྱ་བ༔ འབྲུག་ལ་ཞོན་ཅིང་གློག་གི་ག་ཤ་ཐོགས་པ་རབ་ཏུ་ཁྲོས་པ་ཡིད་བདེ་བ་དང་༔ སློབ་དཔོན་ཉིད་དང་སངས་རྒྱས་ཀྱིས་གསུངས༔ ལོ་གསུམ་གྱི་བར་དུ་ཚིག་དང་ཡི་གེ་དཀར་ཆག་ལ་མནན༔ རང་བྱུང་རང་བབས་ཀྱིི་ཡི་གེ་སྤྲུལ་པའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་ཡི་གེ་ལ་བཀོད་དོ༔ དེ་ལྟར་བཀོད་ནས་མཁའ་འགྲོ་མ་མངོན་པར་བྱུང་བའི་བྲག་ཕུག་ཏུ་མཁའ་འགྲོ་མ་སེམས་དང་ལྡན་པ་ལ༔ མཆོད་པ་གྱིས་ཤིག་ཅེས་རྗེས་གནང་སྦྱིན་ནས་དེ་ཉིད་དུ་བཞུགས་སུ་གསོལ་ལོ༔ དེ་དག་ནི་སྤྲུལ་པ་འབྱུང་བ་དངོས་ཀྱིས་བསྟན་པ་གནས་པར་བྱེད་པ༔ བསྟན་པ་ཡུན་རིང་བར་གནས་པར་བྱེད་པའི་ཉེ་བརྒྱུད་བསྟན་པའོ༔ དེ་ནས་ཁྱད་པར་འབྱུང་བའི་གནས༔ སངས་

རྒྱས་རྣམས་ཀྱི་འབྱུང་བྱེད་གནས༔ འདི་ཉིད་དུའང་བསྟན་པ་ལ༔ ཕན་པ་ཉིད་ཀྱི་དོན་དུ་ནི༔ བདག་གིས་རེ་ཞིག་བཤད་པར་བྱ༔ དེ་ནས་རྡོ་རྗེ་གདན་ནས་བྱང་ཤར་མཚམས་སུ་དཔག་ཚད་ལྔ་འདས་པ་ན༔ དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་མཐའ་བསྐོར་དཔག་ཚད་ཕྱེད་དང་གཉིས་ཡོད་པ༔ རི་སའི་ལྟེ་བ་ལྟ་བུ་ལ་ཁོད་སྙོམས་ཤིང་༔ ལག་མཐིལ་ལྟ་བུ་ལ༔ མཐའ་དང་དབུས་དང་མཐོ་དམའ་མེད་པ་དེ་ཉིད་ཀྱི་དབུས་དྲང་པོ་ན༔ དཔལ་ལྷ་ལས་བབས་པའི་མཆོད་རྟེན་ཟངས་ལས་བྱས་ཤིང་གསེར་གྱིས་བྱུགས་པའི་འཁོར་ལོ་གདུགས་དང་བཅས་པ༔ དྲིལ་བུ་གཡེར་ཁའི་སྒྲ་སྣ་ཚོགས་འབྱུང་བ༔ ཕྱོགས་བཞི་ནས་སྟོན་པའི་སྐུའི་མཆོད་རྟེན་རེ་རེ་ལ་རིན་པོ་ཆེ་སྣ་ཚོགས་ཀྱི་རྒྱུ་ལས་བྱུང་བའོ༔ ༔དུར་ཁྲོད་དེའི་བྱང་ཤར་མཚམས་ན་འཇིག་རྟེན་པའི་ལྷ་རྟེན་དཔག་བསམ་གྱིས་ཤིང་བྷི་ས་ལ་ཞེས་བྱ་བ་ལ༔ དུར་བྱའི་ཚོགས་དཔག་ཏུ་མེད་པ་འབབ་ཅིང་གནས་པ༔ འཇིག་རྟེན་གྱི་ལྷ་ནི་དགའ་བྱེད་དབང་ཕྱུག་ཅེས་བྱ་བ༔ སེང་གེ་ནག་པོ་ལ་ཞོན་པ༔ ལག་ན་མདུང་རྩེ་གསུམ་ཐོགས་པ༔ དར་དམར་པོའི་འཇོལ་བེར་གྱོན་པ༔ འགྲོ་བའི་སྲོག་ལེན་པ་ལ་ཐོགས་པ་མེད་པ༔ འཁོར་བྱེ་བ་དང་བཅས་པ་གནས་སོ༔ ༔དེ་ན་མཁའ་འགྲོ་མ་དཔག་ཏུ་མེད་པ་གནས་ཏེ༔ ལ་ལ་ནི་མིག་ནས་ཉི་མའི་འོད་ཟེར་འབྱུང་བ༔ ལ་ལ་ནི་ཁ་ནས་འབྲུག་སྒྲ་སྒྲོག་ཅིང་མ་ཧེ་ལ་ཞོན་པ༔ ལ་ལ་ནི་ལག་ན་གྲི་ཐོགས་ཤིང་མིག་འབྲུ་ཚུགས་སུ་ལྟ་བ༔ ལ་ལ་ནི་ལག་ན་ཐོད་པ་བརྩེགས་པ་ཐོགས་ཤིང་སྟག་ལ་ཞོན་པ༔ ལ་ལ་ནི་ལག་

ན་མི་རོ་ཐོགས་ཤིང་སེང་གེ་ལ་ཞོན་པ༔ ལ་ལ་ནི་རྒྱུ་མ་ཟ་ཞིང་ཁྱུང་ལ་ཞོན་པ༔ ལ་ལ་ནི་མདུང་རྩེ་ལ་མི་རོ་བཀལ་ཞིང་ལྕེ་སྤྱང་ལ་ཞོན་པ༔ ལ་ལ་ནི་ཁྲག་གི་རྒྱ་མཚོ་བརླབས་ཤིང་གདོང་བཅུའམ་ལྔ་ལ་སོགས་པ་ཡོད་པ༔ ལ་ལ་ནི་ལག་པ་དཔག་ཏུ་མེད་པ་ན་སེམས་ཅན་གྱི་རྣམ་པ་མང་པོ་ཐོགས་པ་དང་༔ དེ་བཞིན་དུ་ལ་ལ་ནི་རང་རང་གི་མགོ་བོ་བཅད་ནས་ལག་ཏུ་ཐོགས་པ་དང་༔ ལ་ལ་ནི་རང་གི་སྙིང་བཏོན་ནས་ལག་ཏུ་བཟུང་བ་དང་༔ ལ་ལ་ནི་རང་གི་ཁོག་པ་ཕྱི་ནས་རྒྱུ་མ་བཟུང་ཞིང་ཟ་བ་དང་༔ ལ་ལ་ནི་རྟ་དང་༔ གླང་པོ་ཆེ་དང་༔ བ་གླང་ལ་ཞོན་པ་དཔག་ཏུ་མེད་པ་གནས་པའི་དབུས་ན་དགའ་བྱེད་ཀྱི་མཚོ་ཡོད་པ༔ དུར་ཁྲོད་ན་གནས་པའི་སྲོག་ཆགས་དཔག་ཏུ་མེད་པ་གནས་ཤིང་༔ འགྲོ་བ་རྣམས་ཀྱིས་སྐད་ཅིག་འགྱུར་བར་མི་ནུས་པ༔ སྲོག་དངོས་སུ་ལེན་ཅིང་ཟ་བར་བྱེད་པའི་གནས་སུ༔ ཤེས་རབ་ཀྱི་གདུལ་བྱ་ལ་ཕྱིན་ཅི་ལོག་པར་བྱེད་པ་ལ་དགོངས་ནས༔ སློབ་དཔོན་དགའ་རབ་རྡོ་རྗེ་ཉིད་ཀྱིས་དེར་བྱོན་ཏེ༔ ཁྱབ་འཇུག་གི་བུ་མོ་སྐྲ་གྲོལ་པ་གཅེར་བུར་ཕྱུང་བ་ལ་ཞོན་ནས་བྱོན་ནོ༔ དེ་ནས་དུར་ཁྲོད་དེ་ན་གནས་པའི་སྲོག་ཆགས་རབ་ཏུ་འཇིགས་པ་དེ་དག་གིས་ཀྱང་༔ ཤིང་ཐོག་ངོ་མཚར་ཅན་མང་པོ་ལྷགས་ཤིང་ཕུལ་རབ་ཏུ་འདུད་དོ༔ དེ་ནས་དབུས་ཀྱི་མཆོད་རྟེན་ལ་སྐུའི་རྒྱབ་གཏད་ནས༔ མཁའ་འགྲོ་མ་ཉི་མའི་འོད་ཟེར་ལ་སོགས་པ་དཔག་ཏུ་མེད་པ་ལ་ཆོས་སྟོན་ཏོ༔ དུས་དེ་ཙ་ན་རྡོ་རྗེ་གདན་གྱི་ནུབ་ཕྱོགས་ན༔ རིམ་པ་གཉིས་པ་ཞེས་བྱ་བའི་གྲོང་ཁྱེར་ན་བྲམ་ཟེ་ལེགས་ལྡན་སྟོན་པ་ཞེས་བྱ་བ་དང་༔ ཡུམ་སྣང་བའི་སྒྲོན་མེ་ཞེས་བྱ་བའི་བུ༔ བསྟན་པ་དམ་པ་འཛིན་པའི་བདག་པོ༔

འཇམ་དཔལ་བཤེས་གཉེན་བྱ་བ་རིག་པའི་གནས་ལྔ་ལ་ཁྱད་པར་དུ་སྦྱངས་བ་གཅིག་ཡོད་དེ༔ དེ་ལ་ནམ་མཁའ་ནས་འཇམ་དཔལ་རྣོན་པོས་ལུང་བསྟན་པ༔ དུར་ཁྲོད་ཆེན་པོ་བཟང་ལུང་དུ་ལུང་བསྟན་པ༔ ཀྱེ་རིགས་ཀྱི་བུ༔ འབྲས་བུ་ཚེ་གཅིག་ལུས་གཅིག་ལ་སངས་རྒྱ་བར་འདོད་ན༔ དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག༔ ཅེས་ལུང་བསྟན་ནོ༔ དེ་ནས་འཇམ་དཔལ་བཤེས་གཉེན་གྱིས་དུར་ཁྲོད་བསིལ་བའི་ཚལ་དུ་བྱོན་ནས་དགའ་རབ་རྡོ་རྗེ་དང་ཞལ་མཇལ་བའི་ཞུ་བ་ཕུལ་བས༔ ལོ་བདུན་ཅུ་རྩ་ལྔའི་བར་དུ་སྤྲུལ་པའི་སྐུ་དང་ལྷན་ཅིག་ཏུ་ཆོས་ཉན་ཏོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་ལྔ་བརྒྱ་དང་བཞི་བཅུ་རྩ་བཞི་ལོན་པའི་དུས་ན༔ དེའི་བྱང་ཤར་ན་ཆུ་བོ་དན་ཏིག་བྱ་བའི་མགོར༔ དགའ་རབ་རྡོ་རྗེ་ཉིད་ཟག་པ་དང་བཅས་པའི་ཕུང་པོ་མི་སྣང་བར་བྱས་ནས་ཡོངས་སུ་མྱ་ངན་ལས་འདའ་བའི་ཚུལ་བསྟན་ནས༔ དེའི་ཚེ་ས་རྣམ་པ་དྲུག་ཏུ་གཡོས་པ་དང་༔ འོད་ཟེར་གྱི་ཕུང་པོ་དཔག་ཏུ་མེད་པ་དང་༔ སྒྲ་ཆེན་པོ་བྱུང་བས་འཇམ་དཔལ་བཤེས་གཉེན་བརྒྱལ་ཞིང་ས་ལ་འགྱེལ་དོ༔ བརྒྱལ་སངས་ནས་བལྟས་པས་ནམ་མཁའ་ལ་འོད་ཕུང་གི་དཀྱིལ་ན་བླ་མ་བཞུགས་པ་མཐོང་ནས༔ འཇམ་དཔལ་བཤེས་གཉེན་གྱིས་སྨྲེ་སྔགས་མང་པོ་ཕྱུང་པ༔ ཀྱེ་མ་ཀྱེ་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་ལན་གསུམ་གྱི་བར་དུ་བརྗོད་པ་དང་༔ ནམ་མཁའ་འོད་ཕུང་གི་དཀྱིལ་འཁོར་ནས་ཕྱག་གཡས་པའི་གྲུ་མོ་མན་ཆད་ཕྱུང་སྟེ༔ རིན་པོ་ཆེ་གསེར་གྱི་ཟ་མ་ཏོག་སེན་གང་བ་ཅིག་རབ་ཏུ་འཇིགས་པའི་སྒྲ་དང་བཅས་ཏེ༔ འཇམ་དཔལ་བཤེས་

ལ་བསྐོར་བ་ལན་གསུམ་དུ་བྱས་ཏེ༔ ཕྱག་གཡས་པའི་མཐིལ་དུ་བབས་སོ༔ དེ་ཁ་ཕྱེ་ནས་བལྟས་པས་དགའ་རབ་རྡོ་རྗེའི་ཚིག་གསུམ་གནད་དུ་བརྡེག་པ་རིན་པོ་ཆེ་ལྔའི་གཞི་ལ༔ བཻཌཱུཪྱ་ཞུན་མའི་ཡི་གེ་རང་ནན་གྱི་རྒྱ་དང་བཅས་པ་ཅིག་འདུག་གོ༔ དེ་བལྟས་པ་ཙམ་གྱིས་འཇམ་དཔལ་བཤེས་གཉེན་བུམ་པ་ཚད་ལྡན་ནས་ཚད་ལྡན་དུ་བཀང་བ་ལྟ་བུར་གྱུར་ཏོ༔ དེ་ཡང་དགའ་རབ་རྡོ་རྗེ་ཆོས་ཟད་པའི་དུས་དང་༔ འཇམ་དཔལ་བཤེས་གཉེན་ཉམས་འཕེལ་བའི་དུས་ཉིད་འཛོམ་པའོ༔ སྤྲུལ་པ་པོ་རང་གྲོལ་བའི་རང་སྣང་སྟེ༔ བསྟན་པ་ཡུན་རིང་དུ་གནས་པར་བྱེད་པ༔ སྤྲུལ་པ་རང་བཞིན་གྱིས་གནས་འབྱེད་དོ༔ ཨྠྀི༔ འཁོར་ལོ་ལྟ་བུ་སྤྲུལ་པའི་སྐུ་ལ་འདུད༔ དེ་ནས་སློབ་དཔོན་འཇམ་དཔལ་བཤེས་གཉེན་གྱིས་འབུམ་ཚོ་དཔག་ཏུ་མེད་པའི་གྲངས་ལས༔ རང་བཞིན་རྫོགས་པ་ཆེན་པོ་རྣམས་ལ་སྡེ་གསུམ་དུ་ཕྱེ་སྟེ༔ སེམས་གནས་པ་རྣམས་ལ་སེམས་ཀྱི་སྡེ༔ བྱ་བྲལ་རྣམས་ལ་ཀློང་གི་སྡེ༔ གནད་གཙོ་བ་རྣམས་ལ་མན་ངག་གི་སྡེ༔ དེ་ལས་ཀྱང་ཁྱད་པར་དུ་བསྡུས་པ༔ ཐིག་ལེ་རང་གནད་དུ་ཕབ་པ་འདི་ལ༔ སྙན་རྒྱུད་དང་བཤད་རྒྱུད་གཉིས་སུ་ཕྱེ་ནས༔ སྙན་རྒྱུད་གཉིས་ཆེད་དུ་གཏད་ནས༔ བཤད་རྒྱུད་སྙིང་གི་ཏི་ཀ་རྣམས༔ གཏད་པའི་གནས་མ་རྙེད་ནས༔ རྡོ་རྗེ་གདན་གྱི་བྱང་ཤར་མཚམས་ནས༔ ཕ་བོང་རྡོ་རྗེ་རྒྱ་གྲམ་གྱིས་བཏབ་པའི་འོག་ཏུ་སྦས་ཏེ༔ མཁའ་འགྲོ་མའི་རྒྱ་དང་བཅས་ཆོས་བདག་གིས་རྒྱས་བཏབ་སྟེ་མི་སྣང་བར་བྱས་སོ༔ ༔དེ་ནས་རྡོ་རྗེ་གདན་ནས༔ ནུབ་ནས་རྒྱང་གྲགས་གཅིག་ན༔ དུར་ཁྲོད་ཆེན་པོ་སོ་སའི་གླིང་ཞེས་བྱ་བ་ན༔

མཐའ་བསྐོར་དུ་དཔག་ཚད་གཅིག་ཡོད་དེ༔ དེའི་དབུས་ན་རང་བྱུང་གི་མཆོད་རྟེན་རྒྱ་ཆེ་ལ་སྲིད་དུ་རིང་བ༔ འཁོར་ལོ་གདུགས་དང་བྱ་རུ་ར་བཅས་པ་རིན་པོ་ཆེ་དངུལ་ལས་བྱས་པ༔ དྲིལ་བུ་གཡེར་ཁའི་དྲ་བས་རབ་ཏུ་མཛེས་པར་སྤྲས་པ༔ ཉི་མ་དང་ཟླ་བའི་རྒྱན་ཡོད་པ༔ དེའི་ལོག་རྣམས་ལ་ཀེའུ་རི་མ་མོ་བརྒྱད་ཀྱི་གཟུགས་རང་བྱུང་དུ་ཡོད་པའོ༔ དེའིི་བྱང་ཤར་ན་སྤུ་གྲི་མུན་ཞེས་བྱ་བའི་མཚོ་ཡོད་པ༔ དེའི་ནང་ན་ཆུ་སྲིན་ལ་སོགས་པའི་གདུག་པ་ཅན་སྣ་ཚོགས་གནས་པ༔ མཐའ་མ་ན་སྣ་ཚོགས་འདུས་པའི་བྲག་གིས་ཀུན་བསྐོར་བ༔ དེའི་ལྷོ་ནུབ་མཚམས་ན་འཇིག་རྟེན་ལྷ་འདྲེ་ངོ་མཚར་ཅན་ནི༔ ཤིང་ལྷ་ནག་པོ་ནྱ་གྲོ་ཏ་ཆེན་པོ་ཞིག་ལ༔ རྩེ་ལ་དུར་བྱའི་ཚང་ཡོད་པ༔ སྐེད་པ་ན་དུག་སྦྲུལ་ནག་པོའི་ཚང་ཡོད་པ༔ རྩ་བ་ན་དུར་ཕག་ནག་པོའི་ཚང་ཡོད་པ༔ འཇིག་རྟེན་གྱི་ལྷ་རྟེན་ནི༔ ཀུན་དགའ་གཞོན་ནུ་ཞེས་བྱ་བ༔ གདོང་པ་སེང་གེ་ལ་ལག་པ་བཞི་ན་རལ་གྲི་དང་༔ མི་མགོ་དང་༔ མདུང་ཤིང་དང་༔ མདུང་རྩེ་གསུམ་པ་ལ་མི་རོ་བཀལ་བ་འཛིན་པ༔ ཐོད་པའི་ཕྲེང་བས་ཀུན་ཏུ་བརྒྱན་པ་དང་༔ ལུས་ལ་དར་ནག་པོའི་བེར་གྱོན་པ་དང་༔ འཁོར་གསོད་བྱེད་མ་མོ་འབུམ་གྱིས་བསྐོར་བ་གླང་པོ་ལ་ཞོན་པ་རབ་ཏུ་ཤ་དང་ཁྲག་ལ་དད་པ་ཞིག་ཡོད་དོ༔ དེར་མཁའ་འགྲོ་མའི་ཚོགས་དཔག་ཏུ་མེད་པ་ཡོད་དེ༔ ༔ལ་ལ་ནི་སེང་གེ་ལ་ཞོན་ཅིང་སྐྲ་གྲོལ་བ༔ ཐོད་པ་དགུ་བརྩེགས་ཀྱི་རྒྱལ་མཚན་འཕྱར་བ༔ ལ་ལ་ནི་བྱའི་ཚོགས་ལ་ཞོན་ཅིང་སེང་གེའི་རྒྱལ་མཚན་འཕྱར་བ༔ ལ་ལ་ནི་ལུས་གཅིག་ལ་གདོང་བཅུ་

གཅིག་ཡོད་ཅིང་རྒྱུ་མ་དང་སྙིང་ལ་སོགས་པ་ཟ་བ་དང་༔ ལ་ལ་ནི་བུད་མེད་ནག་མོ་རལ་པ་གསིག་ཅིང་ཁ་ནས་སྤྱང་ཁྱི་འབྱུང་བར་བྱེད་པ་དང་༔ ལ་ལ་ནི་མིའི་ལུས་ལ་གཤོག་པ་ནམ་མཁའི་མཐའ་དང་མཉམ་པའི་གསེབ་ནས་གནམ་ལྕགས་ཀྱི་ཐོག་ཆར་འབེབས་པར་བྱེད་པའོ༔ ལག་ན་སྟག་གི་རྒྱལ་མཚན་ཐོགས་པ༔ ལ་ལ་ནི་རང་གི་ལུས་སྟོད་སྨད་འབྲལ་ཞིང་གློ་སྙིང་འདོན་པ་དང་༔ ལ་ལ་ནི་རང་གི་ཡན་ལག་བཅད་ནས་ཕྱོགས་ཐམས་ཅད་དུ་དོར་བ་དག་ཡོད་དོ༔ དེ་ལྟར་རྫུ་འཕྲུལ་སྣ་ཚོགས་སྟོན་པར་བྱེད་པ་དཔག་ཏུ་མེད་པ་དག་ཡོད་དོ༔ དེ་ན་དུར་བྱ་དང་༔ ངུར་ཕག་དང་༔ དུག་སྤྲུལ་དང་༔ ཅེ་སྤྱང་མདོག་མི་འདྲ་བ་མང་པོ་དང་༔ སྤྱང་ཀི་དང་༔ ཀི་ལི་ཀ་དང་ལ་སོགས་པའོ༔ རབ་ཏུ་འཇིགས་པའི་བུང་བ་དང་༔ རོ་གསར་རྙིང་གི་ཚོགས་དཔག་ཏུ་མེད་པ་མང་པོ་དང་༔ རུས་པ་དང་༔ ཁྲག་གི་རྒྱ་མཚོ་དང་༔ མི་མགོའི་ཁང་པ་དང་༔ ཐོད་པ་སྐམ་པོའི་ཁང་བུ་རྣམ་པར་བརྩེགས་པ་ན༔ ལ་ལ་འབྲད༔ ལ་ལ་ཟ༔ ལ་ལ་རྒྱུག༔ ལ་ལ་ངུ་༔ ལ་ལ་མིག་འབྱིན༔ ལ་ལ་རྐང་འཆའ་རུས་པ་མུར༔ རྒྱུ་མ་ལ་སོགས་ཟ་བའི་དབུས་དེ་ན༔ རྣལ་འབྱོར་གྱི་དབང་ཕྱུག་རྣམས་གནས་ཏེ༔ རྣལ་འབྱོར་པ་བརྟུལ་ཞུགས་ཀྱི་སྤྱོད་པ་སྣ་ཚོགས་བྱེད་པའི་རྣལ་འབྱོར་ཕོ་མོ་ཡང་མང་དུ་རྒྱུ་བ་ན༔ སློབ་དཔོན་ཆེན་པོ་འཇམ་དཔལ་བཤེས་གཉེན་སེང་གེ་བསྣོལ་བའི་ཁྲི་སྟེང་ན་རྡོ་རྗེ་སྐྱིལ་མོ་ཀྲུང་དུ་བཞུགས་ཏེ༔ གསེར་དང་༔ དངུལ་དང་༔ རྨ་བྱ་ལ་སོགས་པའི་གདུགས་ཕུབ་པའི་རྒྱལ་མཚན་སྣ་ཚོགས་བསླང་ཞིང་༔ དུར་ཁྲོད་ཁང་བུ་བརྩེགས་པ་ན་བཞུགས་ཤིང་མཁའ་འགྲོ་མའི་ཚོགས་ཀྱིས་ཡོངས་སུ་

བསྐོར་ནས་ཏིང་ངེ་འཛིན་སྐྱོང་བ་ལ་ལོ་བརྒྱ་དང་རྩ་དགུའི་བར་དུ་སྙོམས་པར་བཞུགས་སོ༔ དུས་དེ་ཙ་ན་རྒྱ་ནག་པོའི་ཡུལ་སོ་ཤའི་གླིང་ཞེས་བྱ་བ་ན༔ ཡབ་ཁྱིམ་བདག་དགེ་བ་ལྡན་པའི་མིང་ཅན་ཅེས་བྱ་བ་དང་༔ ཡུམ་སྣང་བ་གསལ་བ་རབ་ཏུ་མཁྱེན་པ་ཞེས་བྱ་བའི་བུ༔ ཤྲཱི་སིང་ཧ་ཞེས་བྱ་བ་སྦྱངས་བའི་ཡོན་ཏན་དང་ལྡན་པ་ཞིག་ཡོད་དེ༔ གྲོང་ཁྱེར་ཤོའང་འཇོམས་ནག་པོ་ཞེས་བྱ་བར་སྐྱེས་ནས༔ ལོ་བཅོ་ལྔ་ལོན་པའི་ཚེ་ན༔ རྒྱ་ནག་པོའི་བྱང་ཆུབ་ཤིང་དྲུང་དུ༔ རྒྱ་ནག་པོའི་སློབ་དཔོན་ཧ་ཏི་བྷ་ལ་ཞེས་བྱ་བ་ལས་ཡི་གེའི་འགྱུར་དང་༔ རྩིས་དང་༔ སྒྲ་དང་༔ ཚད་མ་དང་༔ བསྟན་བཅོས་དང་༔ རིག་པའི་གནས་རྣམ་པ་ལྔ་རྣམས་ལོ་གསུམ་བསླབས་མཁས་པ་རྩོད་པ་མེད་པ་ཅིག་བྱུང་༔ དེ་ནས་བྱང་ཆུབ་ཤིང་དྲུང་གི་ནུབ་ཕྱོགས༔ གྲོང་ཁྱེར་གསེར་གླིང་བྱ་བར་འགྲོ་སྙམས་ནས་རྔ་མོང་ནག་མོ་ཤིན་ཏུ་སྟོབས་ཆེ་བ་གཅིག་ལ་ཞོན་ནས་ཁ་ནུབ་ཏུ་བལྟས་ཏེ་ཕྱིན་པས༔ དེ་ཉིད་ཀྱི་བར་གྱི་མཐའ་ཁབ་ཀྱི་ནམ་མཁའ་ལ༔ ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་མངོན་སུམ་དུ་ཞལ་འཛུམ་པ་མཛད་ནས་བདེན་པ་བྱིན་པའི་ཕྱག་རྒྱ་དང་ལྡན་པས་ཉིད་ལ་ལུང་བསྟན་པ༔ ཀྱེ་སྐལ་ལྡན་རིགས་ཀྱི་བུ༔ འབྲས་བུ་ངེས་པར་འདོད་ན་ནི༔ རྒྱ་གར་གྱི་ཡུལ་གྲོང་ཁྱེར་སོ་སའི་གླིང་ཞེས་བྱ་བ་ཡོད་པས༔ རིགས་ཀྱི་བུ་དེར་སོང་ཞིག་ཅེས་བྱ་བར་ལུང་བསྟན་པས༔ ཤྲཱི་སིང་ཧ་ཉིད་རབ་ཏུ་ཚིམ་ནས་བསམ་པ་ཅིག་སྐྱེས་ཏེ༔ བདག་ནི་ད་རུང་ན་སོ་གཞོན་པས༔ འབྲས་བུ་གསང་སྔགས་དེ་ཉིད་རབ་ཏུ་གོ་སླ་བར་བྱ་བའི་ཕྱིར༔

ལོ་བདུན་གྱི་བར་དུ་གསང་སྔགས་ཕྱི་ནང་མཐའ་དག་ལ་གོམས་པར་བྱ་སྙམ་ནས༔ དེ་ནས་སླར་རྒྱ་ནག་ཤར་ཕྱོགས་རི་བོ་རྩེ་ལྔར་ཕྱིན་ནས་གདོལ་པའི་སློབ་དཔོན་མི་ལེ་ཀི་ཏི་ཞེས་བྱ་བ་ལ༔ གསང་སྔགས་ཀྱི་ཕྱི་ནང་དུ་གྲགས་པའི་རྒྱུད་དང་༔ ལུང་དང་༔ མན་ངག་དང་༔ སྒྲུབ་ཐབས་སུ་གྲགས་པ་རྣམས་ལོ་བདུན་གྱི་བར་དུ་ཤེས་པར་བསླབས་སོ༔ ༔དེ་ནས་ལོ་བདུན་ཅུ་རྩ་གཉིས་བར་ལ༔ དོན་མེད་སྟོང་པར་འདུག༔ དེ་ནས་རྒྱ་ནག་པོ་སོ་ཡར་ཐ་ཞེས་བྱ་བར་རབ་ཏུ་བྱུང་ནས་ལོ་སུམ་ཅུར་ཁྲིམས་སྲུང་༔ དེ་ནས་ཡང་སྔ་དྲོའི་དུས་སུ་རི་བོ་རྩེ་ལྔའི་ཤར་ན་ཁྲུས་ཀྱི་རྫིང་བུ་དལ་ཞིང་འཇམ་པའི་ནང་ན་ཁྲུས་བྱེད་ཀྱིན་འདུག་པ་ལ༔ ཤྲཱི་སིང་ཧ་ཉིད་རབ་ཏུ་འགྱུར་སྐད་ཅིག་ཙམ་དྲན་པའམ་ཤེས་པའི་ཉམས་འགག༔ དེ་ནས་དྲན་པ་སད་ནས་ཡར་ལངས་པས༔ ནམ་མཁའ་ལ་འོད་ཀྱི་ཕུང་པོའི་དཀྱིལ་ན་ཐུགས་རྗེ་ཆེན་པོ་ཉིད་སྣང་བར་གྱུར་ཏེ་ཡང་ལུང་བསྟན་ཏོ༔ ༔དེ་ནས་ཤྲཱི་སིང་ཧའི་བསམ་པ་ལ༔ འདི་ནས་རྒྱ་གར་ཡུལ་དུ་འགྲོ་བ་ལ༔ ལམ་ལ་བར་ཆད་ཀྱི་ས་མང་པོ་ཡོད་སྙམ་ནས༔ རྫུ་འཕྲུལ་གཅིག་སྒྲུབ་ནས་འགྲོ་དགོས་སྙམ་པས༔ བར་དེར་ལེ་ལོ་གཡེང་བས་ལོ་བཅུ་ཙམ་འགྱངས༔ དེ་ནས་ལོ་གསུམ་གྱི་བར་ལ་བསྒྲུབས་པས་གྲུབ་པ་ཐོབ་སྟེ༔ ཁྱད་པར་དུ་ཚེ་ལ་དབང་བའི་རིགས་འཛིན་གྲུབ་བོ༔ དེ་ནས་རིགས་འཛིན་གྱི་རྟེན་ཚོགས་པ་ལ་ལོ་བཅུ་དགུ་ལོན༔ དེ་ནས་རྒྱ་གར་གྱི་ཡུལ་ན་ལོ་བཅུ་དགུ་ཙ་ན༔ སོ་ས་གླིང་དུ་རྫུ་འཕྲུལ་ལ་བརྟེན་ནས་ས་ལ་ཁྲུ་གང་གིས་མ་རེག་པར་རླུང་གིས་བསྐྱོད་པ་བཞིན་དུ་ཕྱིན་ནས་འཇམ་དཔལ་བཤེས་གཉེན་དང་མཇལ་ཏེ་ཕྱག་དང་༔ བསྐོར་བ་དང་༔

མཎྜལ་འབུལ་བ་དང་༔ བླ་མའི་བྱ་བ་རྣམས་བྱས་ཤིང་༔ བདག་རྗེས་སུ་གཟུང་བར་ཞུ་བ་ཕུལ་བས་གནང་ངོ་༔ དེ་ནས་ལོ་ཉི་ཤུ་རྩ་ལྔའི་བར་ལ་གདམས་པ་རྣམས་ཞུས་ཤིང་དེ་ཉིད་ཉམས་སུ་བླངས་སོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་བརྒྱད་བརྒྱ་དང་སུམ་ཅུ་ལོན་པའོ༔ དེ་དག་ཀྱང་དུར་ཁྲོད་དེ་ཉིད་ཀྱི་དབུས་ཀྱི་མཆོད་རྟེན་གྱི་རྩེ་ལ་འཇམ་དཔལ་བཤེས་གཉེན་ཀྱང་ཟག་པ་དང་བཅས་པའི་ཕུང་པོ་མི་སྣང་བར་ནམ་མཁའ་འོད་དང་སྒྲས་གང་བར་སྣང་༔ ས་གཞི་སིལ་སྙན་གྱིས་གང་ཞིང་མྱ་ངན་ལས་འདའ་བའི་ཚུལ་བསྟན་ཏེ༔ དེར་ཤྲཱི་སིང་ཧ་ཉིད་བརྒྱལ་ཞིང་ས་ལ་འགྱེལ་བར་གྱུར་ཏོ༔ བརྒྱལ་སངས་ནས་བལྟས་པས་དམ་པ་ཉིད་འོད་ཕུང་གི་དཀྱིལ་ན་བཞུགས་པ་མཐོང་ནས་གདུང་བའི་སྨྲེ་སྔགས་བཏོན་པ༔ ཀྱེ་མ་ཀྱེ་ཧུད་ཀྱེ་མ་ཀློང་༔ སྟོན་པ་རྡོ་རྗེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པས༔ ཕྱག་གཡས་པ་བརྐྱང་སྟེ༔ ཤྲཱི་སིང་ཧ་ཉིད་ཀྱི་ཕྱག་གཡས་པའི་མཐིལ་དུ༔ འཇམ་དཔལ་བཤེས་གཉེན་གྱི་སྒོམ་ཉམས་དྲུག་གི་ཞལ་ཆེམས་རིན་པོ་ཆེའི་ཟ་མ་ཏོག་སེན་གང་བ་ཅིག་བབས་སོ༔ དེ་ཞལ་ཕྱེ་ནས་བལྟས་པས༔ རིན་པོ་ཆེ་སྣ་ལྔའི་ཤོག་བུ་ལ༔ རིན་པོ་ཆེ་བརྒྱ་རྩ་གཅིག་གིས་ཡི་གེ་བྲིས་པ་ཅིག་འདུག་སྟེ༔ དེ་བབས་པ་ཙམ་གྱིས་ཤྲཱི་སིང་ཧ་ཉིད་རྟོགས་པ་གདིང་དང་ལྡན་པར་གྱུར་ཏེ༔ བུམ་པ་ཚད་ལྡན་ནས་ཚད་ལྡན་དུ་བྱོ་བ་བཞིན་དུ༔ ཚིག་ལྷག་པ་དང་ཆད་པ་མེད་ཅིང་༔ དོན་ལ་འཁྲུལ་བ་མེད་པར་གྱུར་ཏོ༔ དེའི་འོག་ཏུ་འཇམ་དཔལ་བཤེས་གཉེན་ཉིད་དེ་ནས་ལོ་སུམ་བརྒྱ་ཉེར་ལྔ་ན༔ རྒྱ་གར་གྱི་ནུབ་ཕྱོགས་གསེར་གྱི་མེ་ཏོག་གིས་བརྒྱན་པའི་གླིང་

ཞེས་བྱ་བར་བརྫུས་ནས་སྐྱེས་ཏེ༔ འཇམ་དཔལ་བཤེས་གཉེན་ཕྱི་མ་ཞེས་བྱ་བར་གྲགས་སོ༔ དེ་ནས་ཨོ་རྒྱན་གྱི་སློབ་དཔོན་པདྨ་འབྱུང་གནས་ལ་གསང་སྔགས་ཀྱི་སྒྲུབ་སྡེ་མཐའ་དག་གནང་བ་བསྟན་ཏོ༔ དེའི་འོག་ཏུ་བསྟན་པ་གསེར་གྱི་སྙིང་པོ་རབ་ཏུ་སྣང་བྱེད་འདི༔ རྣལ་འབྱོར་སྒྲུབ་པ་ལ་བརྩོན་པའི་ཨཪྱ་དེ་བ་ལ་བསྟན་ཏོ༔ དེ་ཉིད་ཀྱང་དུར་ཁྲོད་འཇག་མའི་གླིང་ཞེས་བྱ་བར༔ སྤ་མོ་སྤུང་པའི་རི་ལ་ཟག་བཅས་མི་སྣང་བར་ཡང་དག་པར་རྫོགས་པར་སངས་རྒྱས་སོ༔ མཆོག་ཏུ་བདེ་བ་འཕེལ་བར་བྱེད་པ་དུར་ཁྲོད་ཀྱི་གནས་འབྱེད་དོ༔ ཨྠྀི ༔དཔལ་ལྡན་ཡེ་ཤེས་རྫོགས་པའི་འཁོར་ལོ་ཅན༔ འཇིག་རྟེན་དྲུག་གི་ཕྱོགས་བཅུ་གང་ནས་ཀྱང་༔ རྙེད་པར་དཀའ་བའི་དམ་པ་རྗེ་ལ་འདུད༔ དེ་ལྟར་འཇམ་དཔལ་བཤེས་གཉེན་འདས་ནས༔ ཤྲཱི་སིང་ཧས་རྡོ་རྗེ་གདན་གྱི་འོག་ནས༔ གསང་བའི་གནད་བསྡུས་པའི་གསང་སྔགས་རྣམས་ཕྱུང་ནས༔ རྒྱ་ནག་པོའི་བྱང་ཆུབ་ཤིང་དྲུང་དུ་སངས་རྒྱས་འབྱུང་བའི་གནས་སུ་ཁྱེར་ནས་ཕྱིན་ཏེ༔ བསྟན་པ་འབྱུང་བ་ཡང་དག་པའི་ཡི་གེ་རྣམས༔ བྱང་ཆུབ་ཤིང་དྲུང་དུ་ལྷ་ཁང་གི་ཡང་སྟེང་བྲང་ཁང་སྦྲེལ་མར༔ ཤྲཱི་སིང་ཧ་ཉིད་ཀྱིས་རྫོགས་པ་ཆེན་པོ་ཐིག་ལེའི་སྐོར་ལ༔ ཕྱི་སྐོར་དང་༔ ནང་སྐོར་དང་༔ གསང་བའི་སྐོར་དང་༔ གསང་བ་བླ་ན་མེད་པའི་སྐོར་དང་བཞིར་ཕྱེ་ནས༔ སྐོར་གསུམ་ནི་སྤྲོས་བཅས་ཀྱི་དོན་དུ་བསྡེབས་ནས༔ ལྷ་ཁང་གི་བྱ་འདབ་ཀྱི་འོག་ཀ་བ་བཞི་སྒྲིལ་གྱི་བར་དུ་ཟངས་ཀྱི་སྒྲོམ་བུའི་ནང་དུ་བཅུག་ཏེ་ཕྱི་རབས་ཀྱི་དོན་དུ་སྦས་ཏེ་མཁའ་འགྲོ་མའི་རྒྱ་དང་༔ ཆོས་བདག་གི་རྒྱས་བཏབ་ནས་བར་དེར་མི་སྣང་བར་བྱས་སོ༔ དེ་ནས་ཁྱད་པར་

ཟབ་མོའི་གནད༔ གསང་བ་བླ་ན་མེད་པ་ཡོངས་སུ་རྫོགས་པ་ཆེན་པོའི་སྐོར་ནི༔ ཤྲཱི་སིང་ཧ་ཉིད་སྙིང་དང་གཟུགས་ཀྱི་ཕུང་པོ་གཉིས་འབྲལ་བ་མེད་པ་དེ་བཞིན་དུ༔ ཉིད་ཀྱིས་ལུས་ལ་རྟག་ཏུ་བཅངས་ཤིང་ཡོད་པ་ལས༔ ནམ་མཁའི་གནས་ལ་འཐུག་པོ་ཞིག་ཏུ་གུ་རུ་ཤྲཱི་སིང་ཧ་ཉིད་ཀྱིས་གསང་བའི་ཉམས་སྐྱོང་ཞིང་ལུས་ཀྱི་སྤྱོད་པ་སྐྱོང་ཞིང་ཡོད་པའི་མཚན་མོའི་རྨི་ལམ་ན་ཤྲཱི་སིང་ཧའི་མ་རུ་བྱས་པ༔ བུད་མེད་རྒྱན་ཀུན་གྱིས་བརྒྱན་པ་གཅིག་ན་རེ༔ ཨེ་མ་བུ་གཅིག་ལོངས་དང་ཨེ་ཤ་ཀྱེ༔ གསང་བ་ཡང་གསང་བསྡུས་པ་སྙིང་ཐིག་སྙིང་པོ་རྣམས༔ བཀྲ་ཤིས་ཁྲི་སྒོའི་ལྷ་ཁང་གི་དཀྱིལ་དུ་སྦོས་ལ་རང་རྒྱས་ཐོབ༔ ཕྱི་རབས་བསྟན་པའི་བཙས་སུ་འགྱུར་རོ༔ ༔ཞེས་ཟེར་བ་ནི་མཁའ་འགྲོ་མ་རྣམ་པར་རོལ་པའི་རྒྱན་ཅེས་བྱ་བས་ལུང་བསྟན་པས༔ དེ་ནས་ཞག་གསུམ་ན༔ རྒྱ་ནག་པོ་བཀྲ་ཤིས་ཁྲི་སྒོའི་ལྷ་ཁང་གི་ཀ་བའི་གསེང་དུ་སྦས་ཏེ༔ མཁའ་འགྲོ་མ་དང་ཆོས་བདག་གིས་རྒྱ་རིམ་པ་གཉིས་ཀྱིས་བཏབ་ཅིང་བར་དེར་མི་སྣང་བར་བྱས་སོ༔ དེ་ཡང་ཁྱད་པར་དུ་སྔགས་ཀྱི་སྲུང་མ་ཨེ་ཀ་ཙ་ཏི་ལ་གཏད་དེ་སྐལ་ལྡན་སྙིང་གི་བུ་དང་འཕྲད་པར་ཤོག༔ ཅེས་སྨོན་ལམ་བཏབ་ནས་མི་སྣང་བ་ཉིད་དུ་མཛད་དོ༔ ཡང་རྩིས་ཀྱི་ཡི་གེ་གཏོར་སྦྱོར་གནད་ཀྱི་རྒྱ་ཆེན་པོ་དང་༔ དངོས་པོ་སྒྱུར་བྱེད་གཏོའི་ཡི་གེ་དང་༔ བརྟག་པ་དཔྱད་ཀྱི་ཡི་གེ་དང་༔ འཕྲོག་བྱེད་ཁྲམ་གྱི་ཡི་གེ་ལ་སོགས་ཏེ་ངན་ཐབས་ཀྱི་ཡི་གེ་དཔག་ཏུ་མེད་པ་ནི༔ རྩིས་ཀྱང་ལྔ་ལ་གཏད་པས༔ རྒྱ་ནག་རི་བོ་རྩེ་ལྔའི་ཕྱོགས་སུ་སྤྲབ་ཐ་བའི་ལྷ་ཁང་དུ་སྦས་ནས་མི་སྣང་བར་བྱས་སོ༔ དེ་ནས་ཤྲཱི་སིང་ཧ་ཉིད་རྒྱ་ནག་པོ་བསིལ་བྱེད་བྱ་བའི་དུར་ཁྲོད་ཤིང་ལྗོན་

པ་མང་པོས་ཡོངས་སུ་བསྐོར་བ༔ དེའི་ནང་རིམ་ན་ཤིང་ཀ་ར་བཱི་རས་བསྐོར་བ༔ དེའི་ནང་ན་སྨྱུག་མ་དང་འདམ་བུའི་ཚལ་ཡོད་པ༔ དེའི་དབུས་ན་རོ་གསར་རྙིང་གི་ཚོགས་དཔག་ཏུ་མེད་པ་ཡོད་པ་ན་མཁའ་འགྲོ་མ་དངོས་སུ་སྒྲ་མང་པོ་འདོན་པ་དང་༔ ཤ་ཟ་ཞིང་ཁྲག་འཐུང་བ་རུས་པའི་ཚོགས་མང་པོ་འཆའ་ཞིང་ལྡིང་བ་དང་༔ གཟུགས་མི་འདྲ་བ་རྣམ་པ་སྣ་ཚོགས་དང་༔ ཁ་དོག་མི་འདྲ་བ་རྣམ་པ་སྣ་ཚོགས་པ་དང་༔ དེ་བཞིན་དུ་དུང་འབུད་པ་ལ་སོགས་པའི་སྒྲ་རྣམ་པ་སྣ་ཚོགས་འབྱིན་པའི་དབུས་ན༔ ཐོད་པའི་ཁང་བུ་བརྩེགས་པ་རྩེ་ལ་མེ་འབར་ཞིང་དུ་བ་ན་ཚོགས་འཐུལ་བ༔ སྐེད་པ་ན་ཞག་འཛིན་ཅིང་རྩ་བ་ན་ཀླུའི་བུ་མོ་དག་ཁྲུས་བྱེད་ཅིང་ཡོད་པ་ན༔ ཤྲཱི་སིང་ཧ་ཉིད་དགོངས་པ་ལ་གནས་ཏེ༔ གླང་པོ་ཆེ་རབ་ཏུ་བསྣོལ་བའི་ཁྲི་སྟེང་ན༔ ཁྱབ་འཇུག་གཅེར་བུ་བསྒྱུར་བའི་སྟེང་ན་རྡོ་རྗེ་སྐྱིལ་ཀྲུང་དུ་བཞུགས་ཏེ༔ དེའི་ཚེ་ལྷ་དང་༔ ལྷ་མིན་ལ་སོགས་པས་གདུགས་དང་༔ རྒྱལ་མཚན་དང་༔ བ་དན་དང་༔ དར་གྱི་ལྡ་ལྡི་ལ་སོགས་པ་བླངས་ཤིང་རབ་ཏུ་འདུད་དོ༔ དུས་དེའི་ཚེ་ན་རྒྱ་གར་གྱི་ནུབ་ཕྱོགས་གླང་པོའི་ཚལ་ཞེས་བྱ་བ༔ གྲོང་ཁྱེར་འབུམ་ཚོ་རྩ་དགུ་ཡོད་པ་ན༔ ཡབ་ཁྱིམ་བདག་བདེ་ལྡན་འཁོར་ལོ་ཞེས་བྱ་བ་དང་༔ ཡུམ་བདག་ཉིད་གསལ་མ་ཞེས་བྱ་བའི་བུ་བི་མ་ལ་མི་ཏྲ་ཞེས་བྱ་བ་དང་༔ ཡང་རྒྱ་གར་གྱི་ཤར་ཕྱོགས་ཀ་མ་ལ་ཤཱི་ལའི་ཤར་གྱི་གྲོང་ཁྱེར་ན༔ ཡབ་གདོལ་པ་ཤན་ཏི་ལག་པ་ཞེས་བྱ་བ་དང་༔ ཡུམ་དགེ་བའི་སེམས་མ་ཞེས་བྱ་བའི་བུ་ཡེ་ཤེས་མདོ་བྱ་བ་དང་གཉིས་བཞུགས་སོ༔ དེའི་དུས་ན་རྒྱ་གར་རྡོ་རྗེ་གདན་ན་པཎྜི་ལྔ་བརྒྱ་བཞུགས་ཏེ༔ དེ་རྣམས་ཀྱི་ནང་ནས་དེ་གཉིས་མཁས་པ་ཐུགས་ཤེས་རབ་ལེགས་

པར་སྦྱངས་པ༔ སྐྱེ་བ་སྔོན་མ་ལ་བྲམ་ཟེ་སྭ་ཏ་ཞེས་བྱ་བའི་སྲས་སུ་སྐུ་འཁྲུངས་པ༔ དེའི་ཚེ་ཡང་སྐྱེ་བ་སྔ་མའི་ལས་ཀྱི་འབྲེལ་པ་ཡོད་པས་རབ་ཏུ་མཐུན་པ་གཉིས་བཞུགས་ཏེ༔ དེའི་ཚེ་རྡོ་རྗེ་གདན་ནས་ནུབ་ཀྱི་རྒྱང་གྲགས་ན་འདམ་བུའི་ཚལ་རབ་ཏུ་འཐུག་ཅིང་༔ མེ་ཏོག་རབ་ཏུ་དྲི་ཞིམ་པ་རྣམས་ཀྱིས་སྤྲས་པ་ཡོད་པར༔ དྲི་ཐོན་ནས་སྐྱོ་ཤས་སྐྱེས་ཏེ་ས་འཆག་ཏུ་བྱོན་པས་ནམ་མཁའ་ལ་སྒྲ་གཅིག་གྲགས་ཏེ༔ སྟེང་དུ་དུས་གཅིག་ལ་བལྟས་པས་དཔལ་རྡོ་རྗེ་སེམས་དཔའ་དངོས་སུ་འཇའ་ཚོན་ལྟ་བུར་སྐུ་བཞུགས་ཏེ་ལུང་བསྟན་པ༔ ཀྱེ་རིགས་ཀྱི་བུ་གཉིས་ཁྱེད་གཉིས་ཀྱིས་སྐྱེ་བ་ལྔ་བརྒྱའི་བར་དུ་པཎྜི་ཏའི་ལུས་བླངས་ནས་དམ་པའི་ཆོས་སྤྱད་ཀྱང་འབྲས་བུ་གསང་སྔགས་ཡང་མ་ཐོབ་པས༔ ད་སངས་རྒྱས་ཀྱི་འབྲས་བུ་ཐོབ་པར་འདོད་ཅིང་༔ ཚེ་འདི་ཉིད་ལ་ཟག་པ་དང་བཅས་པའི་ཕུང་པོ་མི་སྣང་བར་འདོད་ན༔ རྒྱ་ནག་པོའི་ཡུལ་བྱང་ཆུབ་ཤིང་དྲུང་གི་ལྷ་ཁང་དུ་སོང་དང་༔ ཞེས་ལུང་བསྟན་ནོ༔ དེ་ལྟར་ལུང་བསྟན་པ་ཙམ་གྱིས་བི་མ་ལ་མི་ཏྲ་བརྩོན་འགྲུས་ཆེ་བས༔ དེ་ཀ་ལྟར་ལོག་ནས་གྲོང་ཁང་ནས་ལྷུང་བཟེད་བླངས་ནས་གཤེགས་སོ༔ དེ་ནས་རྒྱ་ནག་པོའི་ཡུལ་བྱང་ཆུབ་ཤིང་དྲུང་དུ་བྱོན་པས་མཁས་པ་ཤྲཱི་སིང་ཧ་དང་མཇལ་ལོ༔ རྗེ་དམ་པ་རབ་ཏུ་མཉེས་ཏེ༔ ལོ་ཉི་ཤུའི་བར་ལ་སྙན་བརྒྱུད་ཀྱི་མན་ངག་དང་༔ རྒྱུད་ཕྱི་ནང་གསང་གསུམ་གྱི་གདམས་པ་ནི་གནང་སྟེ༔ དཔེ་ནི་མ་གནང་ངོ་༔ དེ་ནས་བི་མ་ལ་ཐུགས་ཚིམ་ནས་སླར་རྒྱ་གར་དུ་བྱོན༔ དེའི་དུས་ན་རྒྱ་གར་གྱིི་ཡུལ༔ དགའ་བྱེད་ཀྱི་ཚལ་ཞེས་བྱ་བའི་གྲོང་ཁྱེར་གྱི་མཐར་མཁས་པ་ཡེ་ཤེས་མདོ་དང་མཇལ་བས༔ ཡེ་ཤེས་མདོ་དྲན་པ་རྙེད་ནས༔ བི་མ་ལ་

དེ་བཞིན་གཤེགས་པའི་སྤྲུལ་པ་བཞུགས་ཀྱིན་གདའ་འམ་ཞེས་བསྙད་པས༔ བི་མ་ལའི་ཞལ་ནས་བཞུགས་ཀྱི་གདའ་འོ་ཞེས་གསུངས་སོ༔ ཡེ་ཤེས་མདོའི་ཐུགས་ལ་བདག་ནི་བརྩོན་འགྲུས་རེ་ཆུང་སྙམ་ནས༔ དེ་ཉིད་རང་ལ་རྒྱ་ནག་པོའི་ཡུལ་དུ་བྱོན་ནས༔ རང་བཞིན་གྱི་བྱིན་བརླབས་ཀྱིས་ཟླ་བ་དགུའི་ལམ་ལ་ཉིན་གཅིག་གིས་ཆོད་པར་ཕྱིན་ཏེ༔ བྱང་ཆུབ་ཤིང་དྲུང་གི་མདུན་དུ་བྱོན་ནས༔ བླ་མ་མི་བཞུགས་པས་ཡེ་ཤེས་མདོ་ཡིད་འཁྲུགས་ཏེ༔ ཕྱོགས་ཀུན་ཏུ་བལྟས་ཀྱང་གང་ནའང་མི་འདུག་པས་ཐུགས་དགོངས་ལ༔ སྔར་བི་མ་ལར་གང་ན་བཞུགས་མ་དྲིས་སྙམ་ནས་བཞུགས་པ་ལས༔ གཞན་གང་ཡང་མ་མཐོང་བར་བུད་མེད་ནག་མོ་ཤིན་ཏུ་ལྡེམ་བག་ཆགས་པ༔ ཆུའི་བན་རྒྱབ་ན་ཁུར་བ༔ སོ་དུང་སོ་འཁོར་མར་འདུག་པ༔ སྨིན་མ་གཡུའི་སྨིན་མ་བར་མ་ཆད་པར་འདུག་པ༔ དཔྲལ་བའི་དཀྱིལ་ན་གཉེར་མ་རྡོ་རྗེ་གྱེན་ལ་ལངས་པ་གཅིག་ཡོད་པ༔ ཤིན་ཏུ་མདངས་དང་ལྡན་པ༔ ལག་ན་གཡུའི་ནེ་ཚོ་ཐོགས་པ་གཅིག་ན་རེ༔ ཀྱཻ༔ སྐལ་པ་དང་ལྡན་པ༔ དམ་པ་ངེས་པའི་ལུང་འདོན་ན༔ བཀྲ་ཤིས་ཁྲི་སྒོར་ཁྱོད་རང་ལ་སྣང་བར་འགྱུར་རོ༔ ཞེས་མཁའ་འགྲོ་མ་མགོན་སེམས་བྱམས་མ་ཞེས་བྱ་བས་ལུང་བསྟན་ཏོ༔ དེ་ནས་ཡེ་ཤེས་མདོ་ཉིད་ཀྱིས་རྒྱ་ནག་པོའི་དབུས༔ བཀྲ་ཤིས་ཁྲི་སྒོ་ཞེས་བྱ་བའི་གྲོང་ཁྱེར་ཆེན་པོ་གཅིག་ལ༔ སྒོ་ཤར་སྒོ་རུ་བལྟས་པས་སྟོང་ཕྲག་ཕྱེད་དང་གསུམ༔ ལྷོ་སྒོར་བལྟས་པས་ཕྱེད་དང་གསུམ༔ ནུབ་དང་༔ བྱང་དུ་བལྟས་པས་དེ་ཙམ་རེ་རེ༔ ཁྲི་ཕྲག་གཅིག་ཡོད་པའི་དབུས་ན་ལྷ་ཁང་གཅིག་ཡོད་པ༔ ལྷ་ཁང་དེ་ལ་ཡང་ལྷའི་ཁང་པ་བརྩེགས་པ༔ ལྷའི་གཙོ་འཁོར་

མི་འདྲ་བ་ཁྲི་ཕྲག་གཅིག་ཡོད་པ༔ དེ་ན་དགེ་སློང་གི་དགེ་འདུན་ཁྲི་ཕྲག་རེ་རེ་ཡོད་པ༔ རྟ་དང་གླང་པོ་ལ་སོགས་པའི་ཁྲི་ཕྲག་རེ་རེ་ཡོད་པ༔ བྱ་དང་རོལ་མོ་བ་རྣམས་ཀྱང་དེ་སྙེད་ཅིག་ཡོད་པ་ཁྲི་སྒོ་ཞེས་བྱ་བ་དེར་བྱོན་ནས༔ ཡང་བླ་མ་དང་མ་མཇལ་ཏེ༔ ཐུགས་རབ་ཏུ་འགྱུར་ཏེ༔ བདག་ནི་བསོད་ནམས་རེ་ཆུང་སྐལ་པ་རང་མེད་པ་ཅིག་ཡིན་སྙམ་སྟེ༔ ཡང་བླ་མ་དང་མ་མཇལ་སྙམ་པ་ལ༔ ལྷ་ཁང་དེའི་བྱང་ཤར་གྱི་མཚམས་ཀྱི་བྱ་འདབ་ཀྱི་སྟེང་ན་ལུས་སེང་གེ་ལ་མགྲིན་པ་རྨ་བྱ་རུ་འདུག་པ༔ གདོང་སྡིག་གདོང་དུ་ཡོད་པ༔ ལུས་ལ་ཐིག་ལེ་སྣ་ཚོགས་པས་བརྒྱན་པ༔ ལག་ན་ཐོད་པ་སུམ་བརྩེགས་ཀྱི་དབྱུག་པ་ཐོགས་པ་གཅིག་ན་རེ༔ ཨེ་མ་བུ་ཁྱོད་སྐལ་ལྡན་པས༔ བླ་མ་ད་ཅིའི་བར་ལ་དན་ཏིའི་ཡུལ་དུ་གཤེགས༔ ཁྱོད་ནི་རབ་ལྡན་སྐལ་ཆེ་བས༔ ད་ནི་བྱང་ཕྱོགས་དྲང་པོ་ན༔ བསིལ་བྱེད་ཅེས་བྱའི་དུར་ཁྲོད་ཡོད༔ དེ་ནས་མཁའ་འགྲོ་བརྩེ་བར་ལྡན༔ ལས་ཅན་འདུ་བའི་ཁྱད་པར་ཡོད༔ བུ་ཁྱོད་སོང་ཞིག་དེར་སོང་ལ༔ ཅི་བདེ་བ་ནི་གསང་སྔགས་མནོས༔ ཞེས་གསུངས་སོ༔ དེ་ནི་མཁའ་འགྲོ་མ་སྤྱོད་མ་ཞེས་བྱ་བས་ལུང་བསྟན་ནས༔ དེ་ཉིད་དུ་བྱོན་པས༔ ཤྲཱི་སིང་ཧ་དང་ཞལ་མཇལ་ནས་རིན་པོ་ཆེའི་མཎྜལ་ཕུལ་ནས་ཕྱག་དང་བསྐོར་བ་བྱས་ནས་བདག་རྗེས་སུ་གཟུང་དུ་གསོལ་ཞེས་ཞུས་པས༔ ཐོད་པའི་ཁང་བུ་བརྩེགས་པའི་ནང་ནས་ཁྱབ་འཇུག་གཅེར་བུའི་གདན་ལས་བཞེངས་ཏེ༔ ཅིའང་མི་གསུང་བར་ཕྱག་གི་སོར་མོ་གསུམ་གྱེན་ལ་བསླངས་ནས་སྤྱན་ནམ་མཁའ་ལ་གཟིགས་སོ༔ དེའི་ཚེ་ཡེ་ཤེས་མདོའི་ཐུགས་དགོངས་ལ་

ལོ་གསུམ་ནས་གནང་བ་ཡིན་ནམ་སྙམ་པ་ལ༔ ཤྲཱི་སིང་ཧ་ཉིད་ཀྱིས་མཁྱེན་ནས༔ དབུ་དགུག་པ་ལན་གསུམ་མཛད་ནས༔ དེ་ནས་ཡེ་ཤེས་མདོས་ལོ་གསུམ་བར་ལ་མཎྜལ་ཕུལ་བ་དང་༔ བཀུ་མཉེ་དང་༔ དྲིལ་ཕྱིས་ད ང་༔ ཕྱག་རྟེན་ལ་སོགས་པ་བླ་མའི་བྱ་བ་ཅི་རིགས་པ་བྱེད་ཀྱི་ན་བཞུགས་སོ༔ དེ་ནས་ལོ་གསུམ་ལོན་པའི་ཚེ་ན༔ ཡང་ཡེ་ཤེས་མདོས་ཤྲཱི་སིང་ཧ་ལ་ཕྱག་དང་བསྐོར་བ་བྱེད་ཅིང་༔ གསེར་ཕྱེ་མ་སྲང་སུམ་ཅུ་སོ་བརྒྱད་ཕུལ་ནས༔ བླ་མས་བདག་རྗེས་སུ་གཟུང་བར་ཞུ་ཞེས་ཞུས་པས་གནང་ངོ་༔ ལོ་དགུའི་བར་ལ་སྙན་བརྒྱུད་ལས་མ་གནང་ངོ་༔ དེའི་ཚེ་ཡེ་ཤེས་མདོ་བསམ་པ་གཅིག་སྐྱེས་ཏེ༔ གདམས་ངག་འདིའི་འགྲོ་སོ་འདི་ལ་དཔེ་གཅིག་ཡོད་དུ་ཐང་སྙམ་པ་ལ༔ ཡང་ཞུས་པས༔ བྱང་ཆུབ་ཤིང་དྲུང་ནས་དཔེ་རྣམས་བཏོན་ནས་གནང་ངོ་༔ བཤད་རྒྱུད་དེ་དག་གི་གདམས་པ་ཡང་ལོ་བཅུ་གཅིག་གི་བར་ལ་གཅོད༔ དེ་ནས་ཡེ་ཤེས་མདོ་ཉིད་ཐུགས་ཚིམ་སྟེ་ཡིད་རངས་པར་གྱུར་པའི་ཚེ༔ ཤྲཱི་སིང་ཧའི་ཞལ་ནས༔ ཁྱོད་ཡིད་རང་རབ་ཏུ་ཚིམ་མམ་གསུངས་པས༔ ཡེ་ཤེས་མདོས་བདག་ནི་ཡིད་རབ་ཏུ་ཚིམ་ཤེས་ཞུས་པས༔ བླ་མའི་ཞལ་ནས༔ གཏད་པ་མེད་གསུངས་པས༔ ཡེ་ཤེས་མདོ་རྟོག་པ་གཅིག་སྐྱེས་ཏེ༔ ད་གདམས་ངག་འདི་ལམ་ཁྱེར་རབ་ཏུ་ཟབ་པའི་གདམས་ངག་ཅིག་ཡོད་འདུག་ཨང་སྙམ་ནས་ཡང་ཞུས་པས༔ བླ་མའི་ཞལ་ནས་འདི་ལ་དབང་བསྐུར་ཅིག་ཐོབ་དགོས་གསུངས་ནས༔ བཀྲ་ཤིས་ཁྲི་སྒོའི་ལྷ་ཁང་གི་ནང་དུ་ཕྱི་སྤྲོས་བཅས་ཀྱི་དབང་རྫོགས་པར་གནང་ནས༔ དེ་ནས་གསང་བ་བླ་ན་མེད་པའི་མན་ངག་རྣམས་ལོ་གསུམ་གྱི་བར་ལ་གནང་ངོ་༔

བླ་མའི་ཞལ་ནས༔ འདི་རྣམས་ལ་དཔེ་ཚན་གཅིག་ཡོད་དེ༔ ཁྱོད་རང་དུས་ལ་བབས་ཙ་ན་གནང་བར་གྱུར་གྱི་གསུངས་ནས་གདམས་པའི་སྣ་ཁ་ཕལ་ཆེར་རྫོགས་པར་མཛད་དོ༔ དེ་ནས་ཡེ་ཤེས་མདོའི་ཐུགས་དགོངས་ལ་གདམས་ངག་ནི་ཞུས་ཐག་ཆོད༔ རྒྱ་གར་དུ་འགྲོའམ་སྙམ་པ་ལ༔ བསམ་པ་ཕྱིས་སྐྱེས་ཏེ༔ ཡུལ་དུ་འགྲོ་བས་དོན་མེད་སངས་རྒྱས་པའི་གདམས་ངག་ནི་ཡོད༔ འདི་རང་དུ་ཉམས་སུ་ལེན་ཅིང་༔ བླ་མའི་ཞབས་ཏོག་བྱ་སྙམ་སྟེ་བླ་མ་ལ་ཞུ་ཕུལ་བས༔ བདག་ནི་ཉམས་སུ་ལེན་པར་ཞུ་ཞེས་ཞུས་པས༔ བླ་མའི་ཞལ་ནས་ཁྱོད་ཉམས་སུ་ལེན་པ་ལ་དབང་རྫོགས་པར་བྱེད་དགོས་པས༔ འདི་དུམ་བུའི་ལུགས་བྱ་བ་ཡིན་གསུང་ནས༔ གྲོང་ཁྱེར་སྟོང་པ་ཞིག་ཏུ་སྤྲོས་མེད་ཀྱི་དབང་རྫོགས་པར་གནང་༔ དེ་ནས་ལོ་གཅིག་ན་རི་བོ་ཆེན་པོ་ཀོ་ས་ལི་ཞེས་བྱ་བའི་རྩེ་མོ་ལ་འཁོར་འདས་རུ་ཤན་འབྱེད་པའི་སྤྱོད་པ་ཚང་བར་བྱས་ཏེ༔ ཤིན་ཏུ་སྤྲོས་པ་མེད་པའི་དབང་རྫོགས་པར་མཛད་ནས༔ ཡང་ངེས་ཤེས་ཐུན་མོང་མ་ཡིན་པའི་སྐྱེས་སོ༔ དེ་ནས་ཟླ་བ་གཅིག་ལོན་པའི་དུས་ན་རབ་ཏུ་སྤྲོས་པ་མེད་པའི་དབང་རྫོགས་པར་མཛད་ནས་རང་སེམས་ལ་དབང་ཐོབ་བོ༔ དེ་ནས་ལོ་བཅུ་དྲུག་ཏུ་བླ་མའི་མཛད་སྤྱོད་ལྟ་ཞིང་ཉམས་སུ་བླངས་སོ༔ དེ་དག་གི་དུས་སུ་ཤྲཱི་སིང་ཧ་ཉིད་སྐབས་སུ་བརྟུལ་ཞུགས་རླུང་འཛིན་གྱི་སྤྱོད་པ་མཛད༔ སྐབས་སུ་ཁྱད་པར་གྱི་སྤྱོད་པ་སྟག་དང་མ་ཧེ་ལ་ཞོན་ཅིང་༔ སྐུ་ལུས་གཅེར་བུ་ལ་ཁྲག་དང་ཞག་གིས་བྱུགས་པ༔ དབུ་ལ་རལ་པའི་ཐོར་ཚུགས་ཆེན་པོ་ལ་སྒྲོ་སྣ་ཚོགས་པ་བཙུགས་ཏེ༔ ཕྱག་གཡས་པ་ན་རལ་གྲི་བཟུང་༔

གཡོན་པ་ན་ཐོད་པ་ཁྲག་གི་བཀང་བ་ཞལ་དུ་གསོལ་ཞིང་དུར་ཁྲོད་རྣམས་སུ་རྒྱུ་བ་དང་༔ རེས་གླང་པོ་ཆེ་ལ་ཞོན་ནས་ལུས་ལ་སྟག་གི་པགས་པ་གྱོན་པ་དང་༔ ཕྱག་ན་ཌཱ་མ་རུ་དཀྲོལ་ཞིང་སྲིད་པ་སྤྱི་ལུགས་ཀྱི་ཞྭ་གྱོན་པ༔ དུར་ཁྲོད་དུ་རྒྱུ་བ་ལ་སོགས་པའི་སྤྱོད་པ་སྣ་ཚོགས་པ་མཛད་དོ༔ རེས་འགའ་ས་ཆུ་མེ་རླུང་གི་རྟེན་འབྲེལ་དུ་མ་ཡང་འགྲོ་བ་རྣམས་ལ་ཕན་པའི་དོན་དུ་མཛད་དོ༔ དེ་ནས་དུས་དེའི་ཚེ་ཤྲཱི་སིང་ཧ་ཉིད་ལིའི་རྒྱལ་པོ་དཔལ་སྦྱིན་ཅེས་བྱ་བས་སྤྱན་དྲངས་ཏེ༔ སེང་གེ་དཀར་མོ་ཡན་ལག་དྲུག་དང་ལྡན་པ་ལ༔ དར་གྱི་ཁང་བུ་ཕུབ་སྟེ་དེའི་སྟེང་དུ་དར་གྱི་གདུགས་སུམ་བརྩེགས་ཕུབ་སྟེ༔ གནོད་སྦྱིན་གྱི་བུ་སྟོབས་དང་ལྡན་པ་དྲུག་གིས་རྐང་པ་བཏེག་སྟེ་གཤེགས་སོ༔ དེ་ལྟར་གཤེགས་ནས་ཞག་བདུན་ལོན་པའི་ནང་པར་སྒྲ་ཆེན་པོ་ཞིག་གྲགས་ཏེ༔ ཡེ་ཤེས་མདོས་བལྟས་པས༔ ནམ་མཁའ་འོད་ཕུང་གི་དཀྱིལ་ན་དམ་པ་ཉིད་བཞུགས་པ་མཐོང་སྟེ་བརྒྱལ་ཞིང་ས་ལ་འགྱེལ་ཏོ༔ བརྒྱལ་སངས་ཙ་ན་ནམ་མཁའ་འོང་ཕུང་གི་དཀྱིལ་ན་སྣང་བར་གྱུར་པ་ལ༔ བར་སྣང་ཐམས་ཅད་ལ་སྒྲའི་ཚོགས་སྙན་པར་དཀའ་བ་དཔག་ཏུ་མེད་པ་གྲགས་པ་དང་༔ ས་གཞི་ཐམས་ཅད་རབ་ཏུ་ལྡེག་པ་དང་༔ འགུལ་བ་དང་༔ འཁྱོམ་པའི་སྟེངས་ན་གསེར་དང་དངུལ་ལ་སོགས་པའི་མེ་ཏོག་སིལ་མ་དཔག་ཏུ་མེད་པ་སྤུངས་པ་དག་མཐོང་སྟེ༔ བདག་གི་བླ་མ་མྱ་ངན་ལས་འདའ་བའི་ཚུལ་བསྟན་སྙམ་ནས་གདུང་བའི་སྨྲེ་སྔགས་ཕྱུང་པ༔ ཀྱེ་མ་ཀྱེ་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པ་དང་༔ ཤྲཱི་སིང་ཧ་ཉིད་ཀྱི་ཞལ་ཆེམས་

གཟེར་བུ་བདུན་པ་ཕྱག་གི་མཐིལ་དུ་བབས་པ་དང་༔ སྒྲ་ཡང་༔ སྙིང་ཐིག་གསང་བའི་མན་ངག་རྣམས༔ བཀྲ་ཤིས་ཁྲི་སྒོའི་ཀ་བའི་བསམ་ལེའི་ནང་ན་ཡོད་ཀྱི་ལོངས་ལ༔ དུར་ཁྲོད་བྷ་སིང་གི་གནས་ལ་སོང་ཞིག་ཅེས་ལུང་བསྟན་ཏོ༔ འདིའི་དུས་སུ་སངས་རྒྱས་མྱ་ངན་ལས་འདས་ནས་ལོ་དགུ་རྒྱ་དང་བརྒྱད་ཅུ་རྩ་བཞི་ལོན༔ མཆོག་ཏུ་སེམས་བསྐྱེད་པར་བྱེད་པ་དུར་ཁྲོད་ཀྱི་གནས་འབྱེད་དོ༔ སྐུ་གསུམ་ཡེ་ཤེས་ལྔ་ལྡན་པའི༔ མཁྱེན་བདག་ཡེ་ཤེས་ཅན་ལ་འདུད༔ དེ་ནས་ཡེ་ཤེས་མདོའི་དགོངས་པ་ལ༔ བླ་མའི་ལུང་བཞིན་བྱའོ་སྙམ་ནས་གསང་བའི་དཔེ་རྣམས་བཏོན་ནས༔ དཔེ་རྣམས་ཐམས་ཅད་ཆུ་དར་གྱི་ལྡེབས་ལ་གྲིལ་ནས༔ རྒྱ་ནག་པོའི་མི་ལྕེ་སྨིན་ཚོགས་བདག་བྱ་བ་དང་༔ སེམས་བཟང་དཔལ་གྲོས་བྱ་བ་གཉིས་ལ་བསྐུར་ཏེ་རྒྱ་གར་གྱི་ཡུལ་དུར་ཁྲོད་བྷ་སིང་ཞེས་བྱ་བར་བྱོན་ནོ༔ དུར་ཁྲོད་དེ་ནི་རྡོ་རྗེ་གདན་ནས་ཤར་ཕྱོགས་ཐག་ཤིན་ཏུ་རིང་བ་ན་ཡོད་དེ༔ དེའི་བྱང་གི་ཕྱོགས་ན་རི་ནག་པོ་གླང་པོ་ཆེ་ཉལ་བ་ལྟ་བུའི་ཁ་ནས་ཆུ་འབབ་པ་དང་༔ ལྷོ་ནས་སྟག་སེར་པོ་ལངས་པ་ལྟ་བུའི་རི་ལས་ཙན་དན་གོར་ཤི་ཤའི་དྲི་འཐུལ་བ་དང་༔ ནུབ་ནས་སེང་གེ་གནམ་ལ་མཆོངས་པ་ལྟ་བུའི་རི་བྲག་ལ་བྱ་ཁྱུང་གི་ཚང་ཡོད་པ༔ ཤར་ན་ཚངས་པ་ལྷའི་ཞལ་ལྟ་བུའི་ལི་ཤིང་ལ༔ དགོས་འདོད་གང་ཡང་འབྱུང་བའི་དབུས་ན༔ བསོད་ནམས་རྫོགས་པའི་མཆོད་རྟེན་ཅེས་བྱ་བ༔ རྒྱུ་རིན་པོ་ཆེ་ཟངས་དང་ལྕགས་ལས་བྱས་པ༔ སྲོག་ཤིང་ཙནྡན་སྤྲུལ་གྱི་སྙིང་པོ་ཅན་ལ༔ རྩེ་མོ་ཤིང་འདབ་སྣ་ཚོགས་པདྨ་བཀྲམ་པ་ལྟ་བུའི་

གདུགས་སུ་གྱུར་པ༔ སྐེད་པར་རིན་པོ་ཆེ་མཐོན་མཐིང་གི་འཁོར་ལོ་བརྩེགས་པ་ལྟ་བུའི་འཁོར་ལོ་བྲིས་པ༔ རྩ་བར་པདྨའི་སྙིང་པོ་ཁ་སྦྱར་བ་ལྟ་བུའི་བང་རིམ་གྱི་ངོས་ལ་ཡོད་པ༔ བང་རིམ་ཐ་མའི་སྟེང་ན་ཤིང་གི་རྒྱལ་པོ་སེང་དྷ་ཞེས་བྱ་བ་ཕྱོགས་ཀུན་ནས་ཡོད་དེ༔ ཤིང་དེའི་ཡལ་ག་ཐམས་ཅད་གཅིག་ལ་གཅིག་འབྲེལ་ཏེ་གཡུ་ཐག་འབྲེལ་བ་ལྟ་བུའི་དྲ་བ་དང་༔ དྲྭ་བ་ཕྱེད་པ་ལྟ་བུར་གྱུར་པ༔ བང་རིམ་འོག་མ་རྣམས་ན་དུར་ཁྲོད་ན་གནས་པའི་སྲོག་ཆགས་དུ་མ་ཡོད་པ༔ དེའི་སྟེངས་ན་ལྷའི་བུ་མོ་མང་པོས་བསྐོར་བ་བྱེད་པ༔ དེའི་སྟེང་མ་ན་བསིལ་བྱེད་ཐོགས་པའི་དགེ་བསྙེན་མ་མང་པོས་བསྐོར་བ་བྱེད་པ༔ དེའི་སྟེང་ན་སྤྲུལ་པའི་བྱ་རིགས་མང་པོས་བསྐོར་བ་བྱེད་པའོ༔ དེ་ཉིད་ནས་ལྷོ་དྲང་པོའི་རྒྱང་གྲགས་ཕྱེད་ན་འཇིག་རྟེན་པའི་ལྷ་རྟེན་ཤེལ་གྱི་ཁང་པ་སྒོ་ཡོད་པའི་ནང་ན༔ གཤིན་རྗེ་དུས་མཚམས་བྱ་བ་མདོག་ནག་ལ་སྐྲ་གཡེངས་ཤིང་མཆེ་བ་གཙིགས་པ༔ གསུས་པ་ཆེ་ལ་མིག་གྱེན་དུ་ལྡོག་པ༔ འཇིག་རྟེན་གྱི་མ་མོ་སྟོང་གིས་བསྐོར་བ་གནས་སོ༔ དེའི་སྟེང་དུ་འཛམ་བུའི་གླིང་བསྐྱོད་པར་བྱེད་པའི་ལྷ་བཙུན་དྷ་རི་ཞེས་བྱ་གནས་ཏེ༔ དེ་ཡང་མདོག་དམར་པོ་གཅེར་བུ་བོང་བུ་ཞོན་པ༔ ཁྲག་གི་རལ་པས་ས་གཞི་ཁེངས་པ༔ མིག་ནས་དུ་བ་འཐུལ་བ༔ ཁ་ནས་མེ་འབར་བ༔ ལག་པ་གཡས་པ་ན་མདུང་རྩེ་གསུམ་པ་ལ་མི་རོ་རྒྱང་ཐབས་སུ་བཀལ་བ༔ ལག་པ་གཡོན་པ་ན་བུམ་པ་འཛིན་པ༔ དེ་ལ་བདུད་ཀྱི་འཁོར་བརྒྱད་བརྒྱས་བསྐོར་བ༔ ལས་སུ་གསོན་ཁྲག་འཇིབས་པ༔ དམ་ཚིག་ཉམས་པའི་གཤེད་མ་ཞིག་ཡོད་དེ༔ དུར་ཁྲོད་དེ་ན་རོ་གསར་རྙིང་གི་ཚོགས་དཔག་ཏུ་མེད་པ་

གཅིག་གི་སྟེང་ན་གཅིག་ཆགས་པ་དཔག་ཏུ་མེད་པ་ཡོད་པ༔ དུར་ཁྲོད་དེ་ན་གནས་པའི་སྲོག་ཆགས་དེ་དག་ནི༔ ཤིང་གི་འབྲས་བུ་སྣ་ཚོགས་དཔག་ཏུ་མེད་པ་ལ་ལོངས་སྤྱོད་པ་ཤ་ཁྲག་ལ་མི་དད་པའོ༔ དེའི་ཕྱོགས་མཚམས་ན་མི་མགོ་རློན་པའི་ཁང་པ་ན༔ ཤར་ན་མཁས་པ་དཔལ་གྱི་བློ་གྲོས་ཞེས་བྱ་བ་ཁྱུང་ལ་ཞོན་ཅིང་ཁམས་གསུམ་ཀུན་ཏུ་འགྲོ་བར་བྱེད་པ༔ མདོག་སྨུག་ནག་ལ་གདོང་ལྔ་པ༔ རལ་པའི་ཐོར་ཚུགས་གྱེན་དུ་འཁྱིལ་པའི་གསེབ་ན༔ ཐོད་པའི་ཕྲེང་བས་ཡོངས་སུ་སྐོར་བ༔ ཕྱག་བཅུ་ན་འཁོར་ལོ་དང་༔ པདྨ་དང་༔ མདུང་ཤིང་༔ ཞིང་ཆུང་༔ མདའ་གཞུ་ཐོགས་པའོ༔གཡོན་ན་དགེ་སློང་དང་༔ སེང་གེ་དང་༔ སྤྱང་ཁྱི་དང་༔ བ་དན་དང་༔ གཞུ་ལ་སོགས་པའི་ལུས་ལ་དུར་ཁྲོད་ཀྱིས་བརྒྱན་པ་ལ༔ འཁོར་ཞིང་བའི་རིགས་ཀྱི་མཁའ་འགྲོ་མ་སྟོང་གནས་སོ༔ ལྷོ་ནས་མཁའ་འགྲོ་མ་མགོན་སེམས་མ་མདོག་སེར་མོ་ཞལ་གཅིག་ཕྱག་གཉིས་པ་ཚོགས་བདག་ལ་ཞོན་པ༔ གཅེར་བུ་འཇིགས་པའི་གཟུགས་ཅན༔ གཡུ་དང་མུ་མེན་གྱི་གཤོགས་པ་ཡོད་པ༔ གཡས་ན་ཐོད་པའི་ནང་ན་ཕག་མོའི་ཆང་གིས་བཀང་བ༔ གཡོན་དངོས་གྲུབ་ཀྱི་གཟུགས་བསྣམས་པ༔ མིག་འབྲུ་ཚུགས་སུ་ལྟ་ཞིང་ཞལ་བགྲད་པ༔ རྒྱས་པའི་མཁའ་འགྲོ་མ་སྟོང་གིས་བསྐོར་བ་ཡོད་དོ༔ ཡང་ནུབ་ན་འབར་མ་ཆེན་པོ་མདོག་དམར་མོ་སྐྲ་བརྫེས་པ་གཅེར་བུ་ལ༔ གཡས་རྡོ་རྗེ༔ གཡོན་ཞགས་པ་རྐྱོང་བ་རི་དགས་ལ་ཞོན་པ་འཁོར་དབང་གི་རིགས་ཀྱི་མཁའ་འགྲོ་མ་སྟོང་གིས་བསྐོར་བ་ཡོད་དོ༔ བྱང་ན་ཀུན་ཏུ་བཟང་མོ་མདོག་ལྗང་གུ༔ གཅེར་བུ་སྐྲ་

གྲོལ་བ༔ གཡས་འུག་པ༔ གཡོན་ཁྲ་ཐོགས་པ༔ སྤྱང་ཀི་ལ་ཞོན་པ༔ འཁོར་ལས་ཀྱི་མཁའ་འགྲོ་མ་སྟོང་གིས་བསྐོར་བའོ༔ བྱང་ཤར་ན་མེ་ཁྱེར་གློག་གི་འཕྲེང་བ་འཛིན་པ་ཞེས་བྱ་བ༔ སྐུ་མདོག་ལྗང་པ༔ གཅེར་བུ་སྐྲ་བརྫེས་པ༔ གཡས་པ་ན་རལ་གྲིའི་ཕྲེང་བ༔ གཡོན་ན་སྡིགས་མཛུབ༔ མ་ཧེ་ལ་ཞོན་པ་ལ་གསོད་པའི་མ་མོ་བདུན་གྱིས་བསྐོར་བ༔ ཤར་ལྷོ་ན་ཤ་བ་རི་སྔོ་སངས་གཅེར་བུ་སྐྲ་གྲོལ་བ༔ ལག་པ་གཉིས་ཀྱིས་བམ་ཆེན་བཟུང་སྟེ༔ ཟ་བར་བྱེད་པ་གླང་པོ་ལ་ཞོན་པ༔ སྒྲོལ་བར་བྱེད་པའི་གིང་མོ་བདུན་གྱིས་བསྐོར་བ༔ ལྷོ་ནུབ་ན་གྲགས་སྦྱིན་མོ་སྔོ་སྐྱ་གཅེར་བུ་སྐྲའི་མདུད་པ་རྒྱབ་དུ་བཅིངས་པ༔ ལག་པ་ན་སེང་གེའི་རྒྱལ་མཚན་འཛིན་པ༔ ཁ་ནས་ཧཱུྃ་ཞེས་སྒྲོག་པ༔ རོ་ལ་ཞོན་པ་ཟླ་བའི་འོད་ཡོད་པ༔ ཤ་ཟ་མ་མོ་བདུན་གྱིས་བསྐོར་བའོ༔ ནུབ་བྱང་ན་ཆགས་མེད་མ་མདོག་སྨུག་ནག་སྐྲ་གཅིག་གཡས་ནས་གཡོན་དུ་འཁྱིལ་བ༔ མིག་གཅིག་གིས་སྟོང་གསུམ་དུས་ག ཅིག་ལ་མཐོང་བ༔ སོ་གཅིག་གིས་དམ་ཉམས་ཀྱི་སྲོག་རྩ་གཅོད་པ༔ ལག་པ་གཅིག་གིས་ནད་ཀྱི་རྐྱལ་པ་དུས་ཅིག་ལ་འཛིན་པ༔ ནུ་མ་གཅིག་གིས་འགྲོ་བ་རྣམས་དུས་ཅིག་ལ་གསོས་པ༔ རྐང་པ་གཅིག་གིས་འཁོར་འདས་རྣམས་དུས་ཅིག་ལ་འཁོར་བ་དང་༔ ཤ་དང་ཁྲག་ལ་དུང་པ་དང་༔ འཆི་བདག་གི་མ་མོ་བདུན་གྱིས་བསྐོར་བ་གནས་སོ༔ དེ་ལ་བྱོལ་སོང་གིི་རིགས་དཔག་ཏུ་མེད་པ་དང་༔ སྤྲུལ་པའི་མ་མོ་དཔག་ཏུ་མེད་པ་གནས་སོ༔ ༔དེ་དག་གི་ལྷོ་ན་ལྟེ་བ་རིན་པོ་ཆེ་ལ༔ ཁྲི་རྐང་བརྩེགས་པའི་སྟེང་ན་སྟག་གྲུས་མ་ལ་ཆིབས་ནས༔ དེ་ཡང་དེ་ཉིད་ཀྱི་སྟེང་ན་

སྐྱིལ་ཀྲུང་དུ་བཞུགས་ནས་ཕྱག་མཆོག་སྦྱིན་མཛད་པ༔ རྨ་བྱའི་གདུགས་ཕུབ་ནས༔ ཕྱོགས་ཀུན་ནས་བ་དན་དང་༔ བསིལ་གཡབ་ལ་སོགས་པ་བསླངས་བའི་དབུས་ན་ཡེ་ཤེས་མདོ་ཉིད་བཞུགས་ཏེ༔ མཁའ་འགྲོ་མ་རྣམས་ལ་གསང་བ་སྙིང་ཐིག་བཀའ་གསང་ངེས་པ་རྣམས་སྟོན་ཏོ༔ དེའི་ཚེ་ན་བི་མ་ལ་མི་ཏྲ་ཉིད་དུར་ཁྲོད་ཐ་ཆུང་ཞེས་བྱ་བར་གླང་སྔོན་པོ་ཞིག་ལ་ནི་ཞོན༔ ལག་ཏུ་བསིལ་གཡབ་ཀྱི་གདུགས་གཅིག་ བཟུང་༔ བླ་གོས་ཕྲག་པ་གཡས་ལ་གཟར་ནས་སྤྱོད་པ་ལ་བྱོན་པའི་ཚེ༔ ནམ་མཁའ་ལས་མཁའ་འགྲོ་མ་དཔལ་གྱི་བློ་གྲོས་ཞེས་བྱ་བས་ལུང་བསྟན་པ༔ ཀྱེ་སྐལ་ལྡན་སྔ་མ་བས་ཟབ་སྙིང་ཐིག་གི་གདམས་པ་བཞེད་ན༔ དུར་ཁྲོད་ཆེན་པོ་བྷ་སིང་གི་ནགས་ལ་སོང་ཞིག་ཅེས་བྱ་བ་ལུང་བསྟན་པས༔ བི་མ་ལ་རབ་ཏུ་བརྩོན་འགྲུས་ཆེ་བས༔ དེ་ཉིད་རང་དུ་དུར་ཁྲོད་བྷ་སིང་དུ་བྱོན་པས་སྔར་གྱི་མཁས་པ་ཡེ་ཤེས་མདོ་བཞུགས་ཀྱིན་འདུག་པས༔ མོས་པ་ཐུན་མོང་མ་ཡིན་པ་སྐྱེས་ཏེ༔ སྔར་གྱི་མཉམ་པོ་ལ༔ བླ་མའི་སློབ་མ་སྔོན་ཡིན་ཀྱང་ཆེ་ཆུང་མ་བརྩིས་པར་ཕྱག་དང་༔ བསྐོར་བ་བྱས་ནས༔ ཀྱེ་དམ་པ་ལགས༔ སྔོན་ཆད་དང་མི་འདྲ་བའི་གདམས་པ་མངའ་བར་གདའ་བས་བདག་རྗེས་སུ་གཟུང་དུ་གསོལ༔ ཞེས་ཞུ་བ་ཕུལ་བས༔ དབུ་གུག་མཛད་པས་མཛོད་སྤུའི་བུ་ག་ནས་འོད་ཟེར་འདམ་དགུ་བརྒྱ་དང་དགུ་བཅུ་རྩ་ལྔ་སྤྲོས་སོ༔ ༔དེ་ལ་ཡང་ངོ་མཚར་སྐྱེས་སོ༔ དམ་པའི་ཞལ་ནས་དེ་ལྟ་བུ་ལ་ངོ་མཚར་རྒྱུ་མེད་གསུང་ནས་སྤྱན་ནམ་མཁའ་ལ་ལྡོག་པས༔ ལོངས་སྤྱོད་རྫོགས་པ་སྐུའི་ཞིང་ཁམས་ཀྱིས་ནམ་མཁའ་ཁེངས་པ་ཙམ་སྤྲུལ་ནས༔ དམ་པ་སངས་རྒྱས་སྤྲུལ་པ་དེ་ལ་ནི༔

གདམས་པའི་རིགས་མི་འདྲ་བ་དཔག་ཏུ་མེད་པ་བཞུགས་ཀྱིན་འདུག༔ ཁོང་ཟག་བཅས་ཀྱི་ཕུང་པོ་མི་སྣང་བར་ཡོངས་སུ་མྱ་ངན་ལས་འདས༔ སྔོན་ཆད་མ་ཡིན་པའི་མན་ངག་ངོ་མཚར་ཅན་འབའ་ཞིག་ཡོད་པས༔ རིགས་ཀྱི་བུ་དད་པས་རབ་ཏུ་འདུན་པའི་སྒོ་ནས་དབང་བཞི་རབ་ཏུ་རྫོགས་པར་གྱི་ཞིག་གསུངས་ནས༔ དེ་ཉིད་དུ་སྤྲོས་བཅས་ཀྱི་དབང་རྫོགས་པར་མཛད༔ དེ་ཉིད་ཐོབ་པའི་རྟགས་སུ་མཛོད་སྤུའི་བུ་གར་རབ་ཏུ་གསལ་བར་གྱུར་ཏོ༔ དེ་ནས་ལོ་གཅིག་ལྷའི་ཁང་པ་ཞིག་ཏུ་སྤྲོས་མེད་ཀྱི་དབང་བསྐུར༔ དེ་ཉིད་ཐོབ་པའི་རྟགས་སུ་བ་སྤུའི་བུ་ག་རྣམས་རླངས་པ་དུ་བ་ལྟ་བུར་བྱུང་༔ དེ་ནས་ཟླ་བ་དྲུག་གི་བར་ལ་རི་བོ་སྲོང་བྱེད་ཀྱི་རྩེ་མོ་ལ་འཁོར་འདས་རུ་ཤན་འབྱེད་པའི་སྤྱོད་པ་ཚང་བར་སྤྱད་དོ༔ ཤིན་ཏུ་སྤྲོས་མེད་ཀྱི་དབང་རྫོགས་པར་བསྐུར༔ དེ་ཉིད་དུ་ཉམས་སུ་མྱོང་བ་ཐུན་མོང་མ་ཡིན་པ་བསྐྱེད་དོ༔ དེ་ཉིད་ཐོབ་པའི་རྟགས་སུ་ཤངས་ཀྱི་རྩེ་མོ་ལ་ཡི་གེ་ཨ་དཀར་པོ་ཐིགས་ལ་ཁད་པ་ཅིག་བྱུང་༔ དེ་ནས་ཟླ་བ་དྲུག་ན་རབ་ཏུ་སྤྲོས་མེད་ཀྱི་དབང་རྫོགས་པར་བསྐུར་བས༔ སེམས་ཉིད་ངོ་བོ་ཟང་ཐལ་དུ་མཐོང་ངོ་༔ ༔དེའི་དུས་ན་མཁས་པ་ཆེན་པོ་དེ་གཉིས་ཀྱི་ས་ལོ་བརྒྱ་བརྒྱ་དང་གསུམ་གསུམ་ལོན་ཏེ༔ དབང་དང་པོ་བསྐུར་བའི་དུས་སྐོར་གསུམ་གྱི་གདམས་ངག་དཔེ་དང་བཅས་པ་གནང་ངོ་༔ ༔གཉིས་པ་གསང་བ་བླ་ན་མེད་པའི་དཔེ་རྒྱུད་གནང་༔ གསུམ་པ་དེ་དག་གི་ཞལ་གདམས་རྣམས་གནང་༔ བཞི་པ་སྙིང་ཏིག་གསུངས་པའི་གནད་བསྡུས་པ་མཐའ་དག་མ་ལུས་པར་གནང་ངོ་༔ ལོ་བཅུ་བཞིའི་བར་ལ་གདམས་པ་ཞུན་ཐར་བཅད་དོ༔ དེའི་དུས་སུ་སངས་

རྒྱས་མྱ་ངན་ལས་འདས་ནས་ལོ་དགུ་བརྒྱ་དང་དགུ་བཅུ་རྩ་བཞི་ལོན་ནོ༔ དེའི་དུས་སུ་ཡེ་ཤེས་མདོ་ཉིད་ཀྱང་ཟག་བཅས་མི་སྣང་བར་ཡོངས་སུ་མྱ་ངན་ལས་འདའ་བའི་ཚུལ་བསྟན་ཏེ༔ ལྷག་མ་མེད་པར་ནམ་མཁའ་འོད་ཀྱིས་བཀང་སྟེ་གཤེགས་པས༔ བི་མ་ལ་མི་ཏྲ་བ རྒྱལ་ཞིང་ས་ལ་འགྱེལ་ལོ༔ ༔བརྒྱལ་སངས་ནས་བལྟས་པས་ནམ་མཁའ་འོད་ཕུང་གི་དཀྱིལ་ན་བླ་མ་བཞུགས་ནས༔ བར་སྣང་ཐམས་ཅད་ལྷ་རྫས་ཀྱི་གདུགས་དང་༔ རྒྱལ་མཚན་དང་༔ བ་དན་ལ་ལ་སོགས་པས་གང་བ༔ ས་གཞི་ཐམས་ཅད་ལྷ་དང་མིའི་བྱེ་བྲག་གིས་ཁེངས་པ་དག་མཐོང་སྟེ༔ གདུང་བའི་སྨྲེ་སྔགས་ཕྱུང་བ༔ ཀྱེ་མ་ཀྱི་ཧུད་ཀྱེ་མ་ཀློང་༔ སྟོན་པ་སྒྲོན་མེའི་འོད་ནུབ་ན༔ འཇིག་རྟེན་མུན་པ་གང་གིས་སེལ༔ ཞེས་བརྗོད་པས༔ ཕྱག་གཡས་པའི་གྲུ་མོ་མན་ཆད་ཕྱུང་སྟེ༔ བི་མ་ལའི་ཕྱག་གཡས་པའི་མཐིལ་དུ་རིན་པོ་ཆེའི་ཟ་མ་ཏོག་གི་ནང་དུ༔ རིན་པོ་ཆེ་སྣ་ལྔས་རྒྱས་བཏབ་སྟེ༔ དེ་བབས་པ་ཙམ་གྱིས་ཀྱང་བི་མ་ལ་ཉིད་ཀྱང་༔ བུམ་པ་ཚད་ལྡན་ནས་ཚད་ལྡན་དུ་བྱོོ་བ་ལྟར་ཚིག་ལ་ལྷག་ཆད་མེད༔ དོན་ལ་འཁྲུལ་བ་མེད་པར་གྱུར་ཏོ༔ མ་སྨིན་པ་སྨིན་པར་བྱེད་པ་དུར་ཁྲོད་ཀྱི་གནས་འབྱེད་དོ༔ ཨྠྀི༔ སྱ་མྱ་སྱ་སཾ༔ མཁའ་འགྲོ་མ་ཡི་ཚོགས་ཀྱིས་བསྐོར༔ ཡང་དག་ལམ་དུ་འགྲོ་འཛུད་པ༔ འཇིགས་པ་རྣམས་ལས་རྒྱ་ཆེར་སྒྲོལ༔ དམ་པ་སངས་རྒྱས་གཤེགས་ལ་འདུད༔ དེ་ནས་མཁས་པ་བི་མ་མི་ཏྲས་རྒྱ་གར་ཤར་ཕྱོགས་ཀ་མ་རུའི་གྲོང་ཁྱེར་ན༔ རྒྱལ་པོ་སེང་གེ་བཟང་པོ་ཞེས་བྱ་བའི་མཆོད་

གནས་ལོ་ཉི་ཤུ་མཛད་དོ༔ དེའི་དུས་ན་སྨྱུག་མའི་བསིལ་ཁང་དུ་བཞུགས་ཤིང་༔ ཟས་གོས་དང་བྲལ་ཡང་རྒྱལ་པོ་དེའི་ཚོགས་གསོག་པའི་ཕྱིར་བཞུགས་སོ༔ རྒྱལ་པོ་དེ་ཡང་སློབ་དཔོན་མཁས་པ་དེའི་བྱིན་རླབས་ཀྱིས༔ རང་བཞིན་གྱིས་བསམ་གཏན་ཕེབས་པའམ༔ འཁོར་དང་ལོངས་སྤྱོད་ཕུན་སུམ་ཚོགས་པའམ༔ ཡུལ་ཁམས་ཙམ་དུ་ཡང་བཀྲ་ཤིས་པའི་ཡན་ལག་དང་ལྡན་པར་གྱུར་ཏེ༔ དེ་ནས་རྒྱ་གར་གྱི་ནུབ་ཕྱོགས་གྲོང་ཁྱེར་བི་རྒྱལ་ཞེས་བྱ་བར་རྒྱལ་པོ་དྷརྨཱ་པ་ལ་ཞེས་བྱ་བའི་ཆོས་སྟོན་གསོལ་ཞིང་༔ ནང་ནུབ་རྒྱལ་པོའི་ཚོགས་གསོག་པའི་ཕྱིར་ཆོས་སྟོན་ལ་སྙག་གོ༔ དེ་ནས་དཔག་ཚད་ལྔ་བརྒྱ་ཡོད་པ་འདས་པའི་བྱང་ཕྱོགས་ན༔ དུར་ཁྲོད་རབ་ཏུ་སྣང་བྱེད་ཅེས་བྱ་བ་ཡོད་དེ༔ ཤིན་ཏུ་ནགས་འཐུག་པ་ཞིག་གི་དཀྱིལ་ན་སྤང་གཤོངས་དཔག་ཚད་གཅིག་ཡོད་དེ༔ དེའི་དབུས་ན་རྣམ་པར་རྒྱལ་བ་འཁོར་བ་འཇིག་ཅེས་བྱ་བའི་མཆོད་རྟེན་ཁྲི་ལྕགས་ལས་བྱས་པ༔ བང་རིམ་ནི་ཟངས་དང་༔ མུ་མན་དང་༔ གསེར་ལས་བྱས་པ༔ པདྨ་རིན་པོ་ཆེའི་ཟེལ་སྨྱུག་ལས་བྱས་པ༔ བུམ་པ་རིན་པོ་ཆེ་མཐོན་མཐིང་ལས་བྱས་པ༔ བྲེ་རིན་པོ་ཆེ་ཕྲ་མེན་ལས་བྱས་པ༔ འཁོར་ལོ་རྣམས་རིན་པོ་ཆེ་སྣ་མི་འདྲ་བ་བཅུ་གསུམ་ལས་བྱས་པ༔ གདུགས་རིན་པོ་སྣ་ཚོགས་འདུས་པའི་འཁྲིགས་པ་ལས་གྱུར་པ༔ ཉི་ཟླ་དང་བྱ་རུ་ལ་སོགས་པ་རང་བཞིན་གྱི་རྣམ་དག་ཆེན་པོ་ལས་རབ་ཏུ་བྱུང་བའོ༔ དེའི་ཐ་མ་ན་ཆུའི་འོབས་ཡོད་པ༔ ཆུ་དེ་དག་གི་ནང་ན་ཀླུའི་ཕྲུ་གུ་རྣམས་དག་བྱེད་ཀྱི་ཁྲུས་བྱེད་པ༔ དེའི་ལྷོ་ནུབ་ན་འཇིག་རྟེན་པའི་ལྷ་རྟེན་ནི༔ སྨྱུག་མའི་ཕུང་པོ་འདྲ་བའི་རྣམ་པ་དང་༔ དྲ་

བས་ཡོངས་སུ་བསྐོར་བའི་ནང་ན་མཚེའུ་གཡུའི་མཎྜལ་ལྟ་བུའི་སྟེང་ན༔ གསེར་གྱི་བྱེ་མ་བརྡལ་བ་ལྟ་བུའི་ཁ་དོག་སེར་པོ་སྤྲིན་གྱི་ཐོག་ན་མཐིང་ཤུན་གྱི་གུར་ཕུབ་པའི་ནང་ན༔ ཀླུའི་རྒྱལ་པོ་ས་སྲུང་ཞེས་བྱ་བ་མདོག་སེར་པོ་མགོ་ལ་སྦྲུལ་མགོ་བདུན་པ་གདེངས་པའི་དབུས་ན་ཡིད་བཞིན་གྱི་ནོར་བུ་རིན་པོ་ཆེད་ཡོད་པ༔ ལག་པ་གཉིས་ན་བུམ་པ་དང་སྦྲུལ་ཞགས་ཐོགས་པ༔ ཆུ་སྲིན་སྔོན་པོ་ལ་ཞོན་པ༔ འཁོར་ཀླུའི་རིགས་བརྒྱད་ཀྱིས་བསྐོར་བ༔ རྟག་ཏུ་སེམས་ཅན་ལ་རྣམ་པར་འཚེ་བར་བྱེད་པ་ཞིག་ཡོད་དེ༔ དུར་ཁྲོད་དེ་ན་ནི་མཁའ་འགྲོ་མ་ལ་ལ་ནི་དམར་མོ་ཁྲག་གི་རལ་པ་གསིག་ཅིང་རྭ་དུང་འབུད་པ༔ ལ་ལ་ནི་ལི་དུང་ཞོན་ནས་སྔོན་མོ་གཡུའི་གོ་ཅོག་གྱོན་ཅིང་༔ ལག་ན་མི་རོ་འཛིན་པ༔ ལ་ལ་ནི་སྟག་ལ་ཞོན་ཅིང་གདོང་དཀར་མོ་ལ་ཁྱུང་གི་གཤོག་པ་ཡོད་ཅིང་༔ ལག་ན་རིན་པོ་ཆེའི་བུམ་པ་ནོར་གྱིས་བཀང་བ་ཐོགས་པ༔ ལ་ལ་ནི་སྲིན་མོ་རལ་པ་སྙིགས་པ༔ གཅེར་བུ་མོ་མཚན་ནས་བུ་སྐྱེས་པ་ལ་ཞོན་པ༔ མདོག་དམར་སྐྱ་དུང་གི་གདུགས་འཛིན་ཅིང་ཁ་ནས་ཀུས་འདེབས་པ་ལ་སོགས་པའི་མཁའ་འགྲོ་མ་དངོས་སུ་དཔག་ཏུ་མེད་དོ༔ འདིར་ཡང་མཁའ་འགྲོ་མ་རང་བཞིན་གྱི་སྟོབས་ཀྱིས་གླིང་གཞན་གྱི་རོ་རྣམས་ཀྱང་རང་བཞིན་གྱི་འདིར་འདུ་བའི༔ ཤ་ཟ་བ་དང་༔ ཁྲག་འཐུང་བ་དང་༔ རུས་པ་མུར་བ་དང་༔ བློ་སྙིང་དང་ནང་ཁྲོལ་ཟ་བ་ལ་སོགས་པ་དཔག་ཏུ་མེད་པའོ༔ སྟག་དང་སེང་གེ་ལ་སོགས་པའི་གཅན་གཟན་དཔག་ཏུ་མེད་པ་རྣམས་དང་༔ ཀམ་ཀ་དང་ལི་དུ་ལ་སོགས་པ་འདབ་ཆགས་དཔག་ཏུ་མེད་པ་རྣམས་ཀྱང་ཤ་དང་༔

ཁྲག་ལ་དད་ཅིང་འདུན་པ་ཤ་སྟག་གོ༔ དུར་ཁྲོད་དེར་ཉིན་མོ་དང་མཚན་མོ་བརྟུལ་བཞུགས་ལམ་དུ་སློང་བའི་སྤྱོད་པ་རྩེ་གཅིག་ཏུ་མཛད་དོ༔ སྟག་ལ་ཞོན་ནས་མདུང་རྩེ་གསུམ་པ་བསྣམས་ནས་སྤྱོད་པ་མཛད་དོ༔ རེས་མ་ཧེ་ལ་ཞོན་ནས་རོའི་རྒྱལ་མཚན་འཕྱར་བ་དང་༔ རེས་གླང་པོ་ཆེ་ལ་ཞོན་ནས་བ་དན་དམར་པོ་འཕྱར་བ་དང་༔ རེས་ཅེ་སྤྱང་ལ་ཞོན་ནས་ཕྱག་གཉིས་ན་རལ་གྲི་འཛིན་པ་དང་༔ རེས་ལིང་དུ་དང་འུག་པའི་ཚོགས་ལ་ཞོན་ནས་ཕྱག་གཉིས་ན་གདུགས་གཉིས་བཟུང་ནས་སྤྱོད་པ་མཛད་པའོ༔ དེ་དག་གིས་དུས་ན་སྐུ་མདོག་དང་ཆ་ལུགས་བསྒྱུར་བ་ནི༔ མཁའ་འགྲོ་མ་དབང་དུ་སྡུད་པ་ལ་དགོངས་པའོ༔ སྐབས་སུ་དེ་ལྟ་བུའི་སྤྱོད་པ་མཛད་ཅིང་སྙིང་ཐིག་གདམས་པ་འདི་ལ་ལོ་བདུན་ཉམས་སུ་བླངས་པས་རིག་པ་ཉིད་ཚད་ལ་ཕེབས་ཏེ༔ སླར་འཕོ་བ་ཆེན་མོའི་སྐུར་བཞེངས་ནས༔ གང་ཟག་སུམ་སྟོང་རིམ་གྱིས་སངས་རྒྱ་བའི་ཐབས་ལ་གཙོ་བོར་མཛད་དོ༔ དེའི་འོག་ཏུ་རྒྱལ་པོ་དེའི་དོན་ཆོས་སྟོན་ཅིང་དུར་ཁྲོད་དེར་སེང་གེ་ལ་ཞོན་ནས་དབུ་དྲུག་ལ་ཕྱག་བཅུ་གཉིས་སུ་སྤྲུལ་ནས་ཕྱག་རྣམས་ན་གདུགས་བཟུང་བ་དང་༔ ཁྱུང་ལ་ཞོན་ཅིང་ལུས་སེང་གེར་སྤྲུལ་པའི་སྤྱོད་པ་ཡང་ལོ་བཅུ་གསུམ་དུ་མཛད་དོ༔ དེ་དག་གི་འོག་ཏུ་དུར་ཁྲོད་སྣང་བྱེད་དུ་གསང་བ་མཆོག་གི་དཔེ་འདི་རྣམས་ཚར་གསུམ་དུ་བྲིས་ནས༔ དཔེ་ཚར་གཅིག་ནུབ་ཕྱོགས་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་ཀླུའི་རྒྱལ་པོ་རྣམས་ལ་གཏད་ནས༔ ཕྱི་རབས་ཀྱི་སྐལ་ལྡན་རྣམས་ཀྱི་དོན་དུ་སྨོན་ལམ་བཏབ་ནས་སྔས་ཏེ་བར་དེར་མི་སྣང་བར་བྱས་སོ༔ དཔེ་ཚར་གཅིག་ཁ་ཆེའི་ཡུལ་གྱི་མཐའ་

འཁོབ་རིག་ལྡན་ཅེས་བྱ་བར༔ གྲོང་ཁྱེར་གྱི་མཐའ་མ་ན་གསེར་གྱི་གླིང་ཞེས་བྱ་བའི་བྲག་གི་སྐྱིབས་ལ་མཁའ་འགྲོ་མ་འདུ་བའི་གནས་སུ༔ ཕྱི་རབས་ཀྱི་སྐལ་ལྡན་རྣམས་ཀྱི་དོན་དུ་མཁའ་འགྲོ་མ་རྣམས་ལ་གཏད་ནས་ཆོས་བདག་གི་རྒྱ་དང་༔ བཀའ་རྟགས་དང་གཉིས་བཏབ་ནས་བང་དེར་མི་སྣང་བར་བྱས་སོ༔ དཔེ་ཚར་གཅིག་དུར་ཁྲོད་དེ་ཉིད་ན་སྨྱུག་མའི་བསིལ་ཁང་ན་བཞུགས་ཤིང་བཤགས་པའི་རྟེན་མཛད་པ་དང་༔ དུར་ཁྲོད་དེ་ན་གནས་པའི་མཁའ་འགྲོ་མ་རྣམས་ཀྱི་སྒྲིབ་པ་དག་པར་བྱེད་པའི་དོན་དུ་བཞུགས་ཏེ༔ དེ་ཉིད་དུ་བཞུགས་པས་དུས་དུས་སུ་ལྷའི་བུ་རྣམས་ཀྱིས་མཆོད་པའི་སྤྲིན་གཏིབས་པ་དང་༔ སིལ་སྙན་གྱི་སྒྲ་སྒྲོག་པ་དང་༔ མེ་ཏོག་གི་རིགས་མི་འདྲ་བའི་ཆར་འབེབས་པ་དང་༔ བར་སྣང་ལ་བཀྲ་ཤིས་ཀྱི་ཚིགས་སུ་བཅད་པ་མི་འདྲ་བ་མང་པོ་སྒྲོག་པ་དང་༔ དེ་བཞིན་དུ་ཀླུའི་རྒྱལ་པོ་དང་གནོད་སྦྱིན་དང་ནམ་མཁའི་ལྡིང་ལ་སོགས་པས༔ མེ་ཏོག་དང་༔ འབྲས་བུ་དང་༔ འདབ་མ་ཡིས་བརྒྱན་པའི་ཤིང་རྣམས་དང་༔ རིན་པོ་ཆེ་སྣ་ཚོགས་ཆར་འབེབས་པར་བྱེད༔ དེ་ལྟར་ཡང་དག་པའི་བཀའ་ཕྱིན་ཅི་མ་ལོག་པ་དེའི་རང་བཞིན་གྱིས་བྱིན་གྱིས་རླབས་ཀྱིས་ཡུལ་ཕྱོགས་དེ་ཙམ་དུའང་ནད་དང་མུ་གེ་ལ་སོགས་པ་མི་མཐུན་པའི་ཕྱོགས་ཐམས་ཅད་རྒྱུན་ཆད་དོ༔ ༔འདོད་ཅིང་འདུན་པ་དུར་ཁྲོད་ཀྱི་གནས་འབྱེད་དོ༔ ཨྠྀི༔ ས་མ་ཡཱ༔ རྒྱ་རྒྱ་རྒྱ༔ མཁའ་འགྲོ་མི་ཟད་འབར་བའི་སྤྲིན་འཕྲོ་ཞིང་༔ དཔའ་བོ་བརྟུལ་ཞུགས་སྤྱོད་པའི་ཐབས་ལ་མཁས༔ གདུལ་བྱའི་རྒྱུད་སྦྱོང་མཁའ་འགྲོ་ཀུན་འདུལ་བ༔ དཔལ་ལྡན་སྤྱོད་པ་མཛད་པའི་སྐུ་ལ་འདུད༔

དེ་ལྟར་ཡང་སྤྱིར་འཛམ་བུ་གླིང་ན་མཁའ་འགྲོ་མ་འདུ་བར་ངེས་པའི་དུར་ཁྲོད་ཆེན་པོ་བརྒྱ་དང་བཅུ་གསུམ་ཡོད་པ་ལ༔ རྒྱ་གར་ཡུལ་ན་སུམ་ཅུ་རྩ་གཉིས་ཡོད་པ་ལ་བྱེད་པའི་གནས་དྲུག་དང་༔ ཉམས་སྐྱོང་བའི་གནས་བཅུ་བཞི་དང་༔ དམ་ཚིག་སྐྱོང་བའི་གནས་བརྒྱད་དང་༔ འདོད་ཅིང་འདུན་པ་དྲག་པོ་བསྐྱེད་པའི་གནས་བཞི་སྟེ༔ སུམ་ཅུ་རྩ་གཉིས་ཡོད་པ་ལ༔ རང་བཞིན་གྱིས་མཁའ་འགྲོ་མའི་གཙོ་མོ་གནས་པའི་གནས་བརྒྱད་ལས་མེད་དོ༔ དེ་ལྟར་བརྒྱད་ན་མཆོད་རྟེན་རེ༔ ཆུ་རེ༔ འཇིག་རྟེན་པའི་ལྷ་དྲག་པོ་རེ༔ སློབ་དཔོན་རེ༔ འདོད་པའི་རི་རེ་ཡོད༔ འཇིག་རྟེན་པའི་ལྷ་དེ་དག་ལ་སྒྲུབ་ཐབས་རེ་ཡོད་པ་དང་༔ མ་མོ་རེ་ལ་སྒྲུབ་ཐབས་རེ་ཡོད་པ་ནི་ཤིན་ཏུ་ཟབ་པ་ཡིན་ནོ༔ ཨོ་རྒྱན་གྱི་ཡུལ་ན་བརྒྱད་ཡོད་དོ༔ ཁ་ཆེའི་ཡུལ་ན་བཅུ་ཡོད་དོ༔ ལི་དང་ཧོར་ན་ལྔ༔ ཚ་བ་དམར་ཐག་དང་དུང་གི་ཡུལ་ན་ལྔ༔ མི་ཉག་དང་ཟ་ཧོར་གྱི་ཡུལ་ན་བཅུ༔ འཐོན་མི་དང་གར་བསམ་གྱི་ཡུལ་ན་བཅུ༔ རྒྱ་གར་གྱི་ཡུལ་ན་སུམ་ཅུ་རྩ་གཉིས་ཡོད་དོ༔ བོད་ན་མཁའ་འགྲོ་མ་འདུ་བར་ངེས་པའི་གནས་གཉིས་ལས་མེད་དེ༔ དབུ་རུ་གཞོའི་ཏི་སྒྲོའི་བྲག་དཀར་པོ་ལ་ལས་ཀྱི་མཁའ་འགྲོ་མ་རེས་འདུ་རེས་མི་འདུ་བའི་མ་མོ་བདུན་གནས་སོ༔ ཀོང་པོའི་ལྷོ་ནུབ་མཚམས་ན་ཀློ་དང་རྡོའི་བར་ན༔ བྱར་པོ་ནས་ཉི་མ་བདུན་ན་ཙཱ་རི་ཙཱ་གོང་ཞེས་བྱ་བ་ཡེ་ཤེས་ཀྱི་མཁའ་འགྲོ་མ་འདུ་བར་ངེས་པ༔ ལ་བཅུ་གཅིག་བརྒལ་བའི་མགོ་ན་མཁའ་འགྲོ་མ་ཁྲུས་བྱེད་པའི་མཚོ་ཞེས་བྱ་བ༔ འོ་མའི་རྣམ་པ་ལྟ་བུ་དཀར་བ་སྔོ་དམར་གྱི་རི་མོ་ཡོད་པ༔ དེའི་དབུས་ན་རིན་པོ་ཆེ་ལས་བྱས་པའི་མཆོད་རྟེན་བཀྲ་ཤིས་སྒོ་མངས་ཀྱི་སྒོ་བདུན་ཅུ་རྩ་བདུན་ན་དཔལ་མགོན་བདུན་

ཅུ་རྩ་བདུན་གྱི་སྐུ་ཤེལ་ལས་གྲུབ་པ་ཡོད༔ པདྨའི་ཕྲེང་བ་ལ་ཞི་བའི་ལྷ་བཞི་བཅུ་རྩ་གཉིས་ཡོད་པ༔ བང་རིམ་འོག་མ་ལ་དཔལ་ཁྲག་འཐུང་ལྷ་དགུའི་དལ་ཡོད་པ༔ སྟེང་མ་ལ་འཕགས་པ་འཇམ་དཔལ་གྱི་ལྷ་སུམ་བརྒྱའི་དཀྱིལ་འཁོར་ཡོད་པ༔ དེའི་སྟེང་མ་ན་མ་རྒྱུད་ཀྱི་ལྷ་རྣམས་ཡོད་པ༔ བང་རིམ་དགུ་ལ་དོན་གྱི་གསང་སྔགས་ཀྱི་ནང་དུ་གྲགས་པའི་ལྷ་རྣམས་ཡོད་པ༔ བུམ་པ་ན་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཡོད་པ༔ བྲེ་ལ་གསང་འདུས་ཀྱི་ལྷ་རྣམས་ཡོད་པ༔ འཁོར་ལོ་དང་གདུགས་དང་བྱ་རུ་ལ་སོགས་པས་རབ་ཏུ་བརྒྱན་པའོ༔ དེར་ནི་དུས་གཉན་གྱི་དུས་སུ༔ མཁའ་འགྲོ་མ་རྣམས་ཀྱིས་ཙནྡན་དཀར་པོའི་ཆར་འབེབས་པ་དག་ཡིན་ནོ༔ དེ་མ་ཡིན་པ་མཁའ་འགྲོ་མའི་གཟུགས་དང་༔ གནས་ས་དང་༔ བྱ་བའི་རིམ་པ་དང་༔ དངོས་གྲུབ་ཇི་ལྟར་ཐོབ་པའི་བཤད་པ༔ སའི་ལམ་ཡིག་གི་རིམ་པ་ནི་ཡོད་དོ༔ ལ་རེ་བརྒལ་བའི་བར་ན་ཡང་མཁའ་འགྲོ་མའི་གནས་ཕྲ་མོ་རེ་ཡོད་དོ༔ དེ་དག་ལ་གཟུགས་སྟོན་པ་དང་༔ སྒྲ་སྒྲོག་པ་དང་༔ ཧཱུྃ་ཧཱུྃ་ཞེས་ཟེར་བ་ཡོད་དོ༔ འདིར་ནི་དད་པ་ཅན་ལུས་དང་སྲོག་མི་ལྟ་བའི་ཚེ་ཕྱི་མ་དང་དུ་ལེན་པའི་གང་ཟག་སྐྱེས་བུ་ཞིག་གིས་ཕྱིན་ནས༔ མཚོའི་ཟམ་པ་ལེགས་པར་རྙེད་པར་བྱས་ནས༔ བསྐོར་བ་ལན་གསུམ་བྱས་པ་ཙམ་གྱིས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་ལ་ཐེ་ཚོམ་མེད་དོ༔ རྒྱ་གར་གྱི་དུར་ཁྲོད་དངོས་དེ་རྣམས་རྙེད་ན་ཡང་དེ་བཞིན་ནོ༔ རྒྱ་གར་གྱི་དུར་ཁྲོད་ན་མི་མ་ཡིན་མང་པོ་ཡོད་དོ༔ དུར་ཁྲོད་དངོས་དེ་རྣམས་ནི་ཤིན་ཏུ་རྙེད་པར་དཀའ་བས་ལམ་གྱི་ཡི་གེ་དམ་པས་ཤེས་སོ༔

མིང་མི་འདྲ་བ་ནི་དཔག་ཏུ་མེད་པ་ཡོད༔ དུར་ཁྲོད་དངོས་དེ་དག་ཏུ་རོའི་ཚོགས་སུས་ཀྱང་མ་བསྐྱལ་བར་འདུའོ༔ རོ་སྐྱེལ་བའི་དུར་ཁྲོད་དེ་རྣམས་ན་མི་མ་ཡིན་དྲག་པོ་ཚོགས་ཏེ་ཕལ་ཆེར་བར་ཆོད་འབྱུང་ངོ་༔ དངོས་ཀྱི་དུར་ཁྲོད་དེ་རྣམས་སུ་ཕྱིན་པ་ཙམ་གྱིས་མཆོག་གི་དངོས་གྲུབ་ཐོབ་པར་ངེས་སོ༔ དེ་དག་ནི་སློབ་དཔོན་གྲུབ་པ་ཐོབ་པ་རྒྱུན་མ་ཆད་པར་བཞུགས་ངེས་སོ༔ དུར་ཁྲོད་ཀྱི་གྲངས་ངེས་ཀྱི་གནས་འབྱེད་དོ༔ པཎྜི་ཏ་ཆེན་པོ་བི་མ་ལའི་ཞལ་སྔ་ནས་དང་༔ ལོ་ཙཱ་བ་ཀ་ཅོག་གཉིས་ཀྱིས་བསམ་ཡས་དབུ་རྩེ་རིགས་གསུམ་གྱི་བར་ཁང་དུ་བསྒྱུར་ཅིང་ཞུས་ཏེ་གཏན་ལ་ཕབ་པ༔ ཨྠྀི༔ ཞེས་ལོ་རྒྱུས་དང་པོ་ལས་གནས་འབྱེད་བདུན་པ་རིགས་འཛིན་བརྡའི་བརྒྱུད་པ་གཏན་ལ་ཕབ་པའོ༔ གང་ཟག་སྙན་བརྒྱུད་པ་ལ་འགྱུར་བ་མེད་དོ༔ རྫོགས་སོ༔ ཚིག་བརྒྱུད་སྤྲོས་པ་གཅོད་པའི་ལྷ་ལ་ཕྱག་འཚལ་ལོ༔ ད་ནི་གང་ཟག་སྙན་ཁུང་བརྒྱུད་པའི་གཏམ་རྒྱུད་ངོ་མཚར་ཅན་སྟོན་ཏེ༔ དེ་ལ་གང་ཟག་ནི་གསུམ་སྟེ༔ སྤྲུལ་པའི་གང་ཟག་དང་༔ ལམ་ལ་དབང་བའི་གང་ཟག་དང་༔ མོས་པས་སྤྱོད་པའི་གང་ཟག་གོ༔ སྤྲུལ་པའི་གང་ཟག་ནི༔ རྗེ་བློན་རིན་པོ་ཆེ་ལ་སོགས་པའོ༔ གང་ཟག་གི་ལུས་ལྟར་སེམས་ཅན་གྱི་ལུས་སུ་སྤྲུལ་པ་ཙམ་དུ་ཟད་པ་ལས་ཡང་དག་པར་སངས་རྒྱས་པ་ཡིན་པའོ༔ ལམ་ལ་དབང་བའི་གང་ཟག་ནི༔ གྲུབ་པ་ཐོབ་ཟིན་པ་རྣམས་སོ༔ མོས་པས་སྤྱོད་པ་ནི་སྒྲུབ་པར་འདོད་པ་རྣམས་སོ༔ གང་ཟག་ཅེས་བྱ་བ་ནི་ཟག་པ་དང་བཅས་པའི་ཕུང་པོ་ལ་རྣམ་པར་དག་པའི་ཡེ་ཤེས་གང་ཞིག་རྒྱས་ནས་ཡོད་པ་སྟེ༔

དེ་ཉིད་ཚིག་རྒྱུད་འཁྲུལ་པ་མེད་པ་ལ་བརྟེན་ནས་འདི་ཉིད་ལ་ཟག་པ་མི་སྣང་བར་སངས་རྒྱས་བར་བྱེད་དོ༔ དེ་ལྟར་བྱས་པས་ཉོན་མོངས་པའི་ཟག་པ་ལ་སོགས་པ་རྣམས་ཟད་པར་བྱེད་པའོ༔ སྙན་ནི་སྣ་བའི་དབང་པོ་ཕྱིན་ཅི་མ་ལོག་པས་ཚིག་གི་སྒྲོས་ལྷག་མ་དང་ཆད་པ་མེད་པར་ཚིག་ཏུ་ཤེས་པ་དང་༔ དོན་རང་གི་རྒྱུད་ལ་བརྟེན་ནས་ཐ་མ་ཚིག་གི་སྒྲོ་འདོགས་ཆོད་པར་བྱེད་པའོ༔ བརྒྱུད་པའི་དགོངས་པ་ལ་ཡང་དག་པར་རྫོགས་པའི་སངས་རྒྱས༔ སྟོན་པ་ཆོས་ཀྱི་སྐུ་ནས་ད་ལྟར་གྱི་རྣལ་འབྱོར་པ་བདག་ཡན་ཆད་དུ༔ ཚིག་ལ་ལྷག་ཆད་མེད་ཅིང་སྒྲོས་མ་ནོར་བ་དང་༔ གང་ཟག་མིའི་ཚིག་གིས་བསྣན་ཕྲི་མ་བྱས་པར་ཐོག་མ་ལས༔ མང་ཉུང་མེད་པར་གཅིག་ནས་གཅིག་ཏུ་བརྒྱུད་པ་ནི༔ དཔེར་ན༔ མི་མང་པོའི་ལག་ཏུ་གསེར་གྱི་པ་ཏྲ་ཤིན་ཏུ་ལེགས་པ་གཅིག་བརྒྱུད་ཀྱང་༔ དེ་ཉིད་བསྣན་ཕྲི་མེད་པར་ཐ་མ་གཅིག་གི་ལག་ཏུ་རྡོལ་བ་དང་འདྲ་བར་ཚིག་རྒྱུད་ལ་ལྷད་མ་ཞུགས་པས༔ བུམ་པ་ཚད་ལྡན་ནས་ཚད་ལྡན་དུ་བྱོ་བ་ལྟར་ལྷག་ཆད་མེད་པར་ཁེངས་པ་དང་འདྲ་བར་བྷུདྡྷ་ནས་རིགས་འཛིན་དང་ད་ལྟའི་ཡོ་གི་ཡན་ཆོད་དགོངས་པ་མཉམ་ཞིང་༔ ལྷག་ཆད་མེད་པར་བསྡུར་ཐུབ་པས་ན༔ མན་ངག་རབ་ཏུ་ཟབ་པའི་རྟགས་ཡིན་ནོ༔ དེ་ལྟ་བུའི་མན་ངག་གསང་ཆེན་ངེས་པ་དེ་སུ་ལ་བརྒྱུད་ན༔ དུས་དེ་ཙམ་ན་རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་དྷི་ཆུང་བ་ཅེས་བྱ་བ་ཆོས་སྐྱོང་མགོན་པོ་བྱམས་པའི་སྤྲུལ་པ་གཅིག་ལ་མཆོད་གནས་པཎྜི་ཏ་ལྔ་བརྒྱ་བཞུགས་ཏེ༔ དེ་དག་གི་ནང་ནས་མཁས་ཤིང་གྲུབ་པ་ཐོབ་པ༔ བི་མ་ལ་མི་ཏྲ་འཇོ་བའི་

སྐུར་བཞེངས་པ་གཅིག་ཁྱད་པར་དུ་མཆོད་གནས་ལོ་དྲུག་ཅུའི་བར་ལ་མཛད་པ་ཞིག་བཞུགས་སོ༔ དེ་ཙམ་ན་བོད་ཀྱི་ཡུལ་ན་རྒྱལ་པོ་བྱང་ཆུབ་སེམས་དཔའ་འཇམ་དཔལ་དབྱངས་ཀྱི་སྤྲུལ་པ་ཁྲི་སྲོང་ལྡེའུ་བཙན་ཞེས་བྱ་བས་དཔལ་བསམ་ཡས་ལྷུན་གྱིས་གྲུབ་པའི་གཞལ་ཡས་ཁང་བཞེངས་ཤིང་དམ་པའི་ཆོས་དར་ཞིང་རྒྱས་པར་མཛད་པ་ཞིག་དང་༔ དེའི་མཆོད་གནས་མྱང་ཏིང་འཛིན་བཟང་པོ་ཞེས་བྱ་བ་ལོ་བདུན་དང་ཟླ་བདུན་གྱི་བར་ལ་ཞི་གནས་རྩེ་གཅིག་ཏུ་གནས་པ༔ ཤའི་སྤྱན་རྣམ་པར་དག་པས་གླིང་བཞི་དུས་ཅིག་ལ་གཟིགས་པ་ཞིག་བཞུགས་ཏེ༔ མྱང་བན་ཆེན་པོ་དེའི་ཞལ་ནས་རྗེ་ལ་འདི་སྐད་བགྲོས་ཏེ༔ ཀྱེ་རྒྱལ་པོ་ལགས༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས༔ དེ་དག་གི་ནང་ནས་འབྲས་བུ་གསང་སྔགས་ལ་མཁས་པ་གཅིག་སྤྱན་དྲངས་ནས་བོད་ཀྱི་རྒྱལ་ཁམས་སུ་གསང་སྔགས་ཀྱི་བསྟན་པ་དར་ཞིང་རྒྱས་པར་བགྱིའོ་ཞེས་བསྙད་པས༔ རྒྱལ་པོ་ཡང་རབ་ཏུ་མཉེས་ནས་དེ་ལྟར་བགྱི་གསུངས་ནས༔ དེ་ཙམ་ན་བོད་ཀྱི་རྒྱལ་ཁམས་ན་བློ་རྣོ་བ་དབུ་རུ་འཕན་ཡུལ་གྱི་ཀ་བ་ན༔ ཀ་བ་བློ་བརྟན་དང་༔ འབྲོ་བཟའ་རྡོ་རྗེ་ལྕམ་གྱི་བུ་ཀ་བ་དཔལ་བརྩེགས་ཞེས་བྱ་བ་དང་༔ རུ་ལག་ཤབ་ཀྱི་དར་སྒོང་ནས་ལྕོག་རོ་རྒྱལ་འབྱུང་དང་༔ འབྲོ་བཟའ་མཛེས་མའི་བུ་ལྕོག་རོ་ཀླུའི་རྒྱལ་མཚན་ཞེས་བྱ་བ་གཉིས་གཅིག་ཏུ་བསགས་ནས་ལི་གར་དའི་སྐྱེམས་དྲངས༔ དབུ་ལ་རིན་པོ་ཆེའི་པྲོག་ཞུ་བ་བཀོན་ནས་རྒྱལ་པོས་བཀའ་བསྒོ་བ༔ ཀྱེ་རིགས་ཀྱི་བུ་རྫུ་འཕྲུལ་ལྕེ་ལ་དབང་ཐོབ་པ་

༼༢༡༡་་༢༡༢གཉིས་འདི་ནས་མ་རེད་འདུག་༽གཉིས་འོ་སྐོལ་བོད་ཀྱི་རྒྱལ་ཁམས་སུ་འབྲས་བུ་གསང་སྔགས་རབ་ཏུ་ཟབ་པའི་བསྟན་པ་དར་བར་བྱ་བའི་ཕྱིར༔ རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ༔ མཆོད་གནས་པཎྜི་ཏ་ལྔ་བརྒྱ་བཞུགས་པར་འདུག་པས༔ དེའི་སྤྱན་སྔར་སོང་ལ་གསེར་གྱི་པ་ཏྲ་བདུན་པོ་འདི་ཕུལ༔ གསེར་ཕྱེ་བྲེ་དགུ་པོ་འདི་ཕུལ་ལ༔ འདི་བོད་ཀྱིི་རྒྱལ་པོས་སྐྱེས་སུ་བསྐུར་བས༔ སྐྱེས་ལན་དུ་པཎྜི་ཏ་མཁས་པ་མཆོག་ཏུ་འབྲས་བུ་གསང་སྔགས་ཀྱི་ཆོས་ལ་མཁས་པ་ཞིག་རྫོངས་བར་ཞུ་ཞེས་བརྗོད་ལ༔ སོང་ཞིག་ཅེས་རྒྱལ་པོས་བཀའ་བསྒོ་བས༔ ལོ་ཙཱ་བ་གཉིས་པོས་རྒྱལ་པོའི་བཀའ་བྱུང་བས༔ རྒྱ་གར་ཡུལ་དུ་ཕྱིན་ཏེ༔ རྒྱལ་པོ་ཨིནྡྲ་བྷུ་ཏི་ལ་ཕྱག་མཛད་ནས༔ སྔར་རྒྱལ་པོའི་གསེར་གྱི་པ་ཏྲ་དང་གསེར་ཕྱེ་རྣམས་ཕུལ་ཏེ་སྔར་གྱི་འཕྲིན་བྱས་པས༔ རྒྱལ་པོ་རབ་ཏུ་དགྱེས་ནས་བོད་བྱང་ཆུབ་སེམས་དཔའ་གཉིས་བསིལ་ཁང་འདིར་བཞུགས་ཞིག་ཟེར་ནས༔ པཎྜི་ཏ་རྣམས་ཐོ་ལ་བྱོན་པའི་དུས་སུ་བྲོ་གསོལ་བའི་གྲལ་ལ༔ རྒྱལ་པོ་དེས་ཀྱེ་མཁས་པ་ཆེན་པོ་རྣམས་བདག་ལ་བོད་ཀྱི་རྒྱལ་པོས་སྐྱེས་ཤིན་ཏུ་བཟང་བ་གཅིག་བསྐུར་བྱུང་བས༔ དེའི་སྐྱེས་ལན་དུ་པཎྜི་ཏ་མཁས་པ་མཆོག་ཏུ་འབྲས་བུ་གསང་སྔགས་ཀྱི་ཆོས་ལ་མཁས་པ་ཞིག་ཐོང་ཟེར་གཏང་འཚལ་ཞེས་བསྒོ་བས༔ སློབ་དཔོན་བྷུདྡྷ་གུ་ཧྱའི་ཞལ་ནས༔ ད་སྐེད་ཟེར་བའི་སྐྱེས་སྐྱེལ་བ་དེ་གང་ན་གདའ༔ འདིར་ཁྲིད་ལ་ཤོག་དང་གསུངས་ནས༔ རྒྱལ་པོས་ཁྲིད་ནས་འོངས་པས༔

ལོ་ཙཱ་བ་གཉིས་ཀྱི་བི་མ་ལའི་སྐུའི་མཚན་རྟགས་རྣམས་མཐོང་བས་མོས་པ་རབ་ཏུ་སྐྱེས་ཏེ༔ ཡར་གྱི་ཚོ་ཡང་སྤྱན་དུས་ཅིག་ལ་བི་མ་ལ་གཟིགས༔ མར་གྱི་ཚོ་ཡང་ཡར་གཟིགས་པ་བྱེ་མ་ལས་མཁྱེན་ནས་བཞེངས་པས༔ གྷ་གྷ་པ་རི་ཞེས་པའི་སྒྲ་བརྗོད་པས༔ ལོ་ཙཱ་བ་གཉིས་ལ་ཚིག་གོ་ལུགས་གཉིས་བྱུང་སྟེ༔ ལྕོག་རོས༔ གཞུ་མོ་དག་ལ་བརྟེན་པའི་མདའ༔ སྐྱེས་བུའི་མཐེབ་མོས་རྩོལ་ཕོད་ན༔ མདའ་ཡིས་ཕ་རོལ་སྐྱེལ་བར་འགྱུར༔ ཞེས་བྱ་བར་གོ༔ ཀ་བས༔ གྲུ་བོ་དག་ལ་བརྟེན་པའི་མིས༔ མཉན་པའི་སྐྱ་བས་རྩོལ་ཕོད་ན༔ མི་ཡིས་རྒྱ་མཚོའི་ཕ་རོལ་སྒྲོལ༔ ཞེས་ཚིག་ཐ་དད་ལ་དོན་གཅིག་ཏུ་གོ་ནས༔ བི་མ་ལ་ལ་ཞུས་པས༔ བྱེ་མ་ལ་ལ་བསྟེན་པ་ཡི༔ རྒྱལ་པོ་ཁྱོད་ཀྱིས་གཏོང་ཕོད་ན༔ ངས་བོད་ལ་ཕན་ཐོགས་ཏེ་འོང་གསུངས་ནས༔ རབ་ཏུ་ཟབ་པ་གསང་བ་སྙིང་ཐིག་གི་དཔེ་ཚར་གཅིག་དང་བཅས་ཏེ༔ ཨཱ་ཙཪྱ་སེའི་སྙིང པོ་བྱ་བ་གཡོག་པོར་ཁྲིད་ནས་བྱོན་པས་དེའི་མཚན་མོ་རྨི་ལམ་ཐམས་ཅད་ཀྱང་འཁྲུགས༔ རྒྱ་གར་ཡུལ་ཙམ་གྱི་མེ་ཏོག་དང་འབྲས་བུ་དང་ཤིང་དང་ལོ་ཏོག་ཐམས་ཅད་བོད་དུ་སོང་བ་རྨི་བ་དང་༔ ཉི་ཟླ་བོད་ཀྱི་ཕྱོགས་སུ་སོང་བ་རྨི་བ་དང་༔ དེའི་ཚེ་དུར་ཁྲོད་བསིལ་བ་ཚལ་གྱིས་མཁའ་འགྲོ་མ་རྣམས་ཚོད་འདེབས་པར་འདུག་པ་དང་༔ རྒྱལ་པོའི་ཆུ་ཚོད་དང་དབྱུག་གུའི་རྩིས་ཐམས་ཅད་འཁྲུགས་ཏེ༔ ནང་པར་གྱི་དུས་སུ་རྒྱལ་པོའི་ཕོ་བྲང་གི་སྒོ་མདུན་དུ་རྒྱ་གར་གྱི་མི་ཐམས་ཅད་འདུས་ནས་རྨི་ལམ་བསྡུ་བས་ཀུན་མཐུན་ཏེ་འདི་ཅིས་

ལེན་གླེངས་པས༔ ལ་ལ་ན་རེ་ཅི་ཟེར༔ ལ་ལ་ན་རེ་ཅི་ཟེར་བས༔ བུད་མེད་ཅིག་ན་རེ༔ རྒྱལ་པོ་མདུན་དུ་སྤྱན་དྲོངས་དང་༔ རྒྱལ་པོའི་མཆོད་གནས་བོད་ལ་ཤོར་རམ༔ སྔ་ལྟས་ནི་པཎྜི་ཏ་མཁས་པ་གཅིག་གིས་འབྲས་བུ་གསང་སྔགས་ཀྱི་ཆོས་བརྩམས་ནས་དཔེ་ཙམ་མེད་པ་ཡིན་པས༔ རྒྱལ་པོ་ལ་དྲིས་པས་ཁ་རྩང་བྱེ་མ་ལ་བོད་དུ་ཤོར་ཟེར་བས༔ རྒྱ་གར་གྱི་མི་རྣམས་ཀྱིས་རྐང་མགྱོགས་བརྫངས་ནས༔ བོད་ཀྱི་ལུང་མདོ་དང་སྲང་མདོ་ཐམས་ཅད་དུ་མདོ་བྱང་བཏགས་ཏེ༔ བོད་ཀྱི་བནྡེ་གཉིས་ཀྱིས་མཐའི་མོན་བུ་ཕྲ་མེན་གྱི་ངན་སྔགས་ཁྱེར་ནས་སོང་བས་བོད་ཀྱི་རྒྱལ་ཁམས་རྣམས་ཕུང་ངོ་ཞེས་མདོ་བྱང་མང་པོ་བཏགས་པས༔ དུས་དེ་ཙམ་ན་བྱེ་མ་ལ་མུ་ཏྲ་སྤྱན་དྲངས་ནས༔ དཔལ་བསམ་ཡས་སུ་བྱོན་ཏེ༔ ལོ་ཙཱ་བ་གཉིས་ཀྱིས་ངོ་སོ་བཅས་པས་རྒྱལ་པོ་ལ༔ པཎྜི་ཏ་ནི་གྲུབ་པ་ཐོབ་ཅིང་འཕོ་བའི་སྐུར་སླར་སེམས་ཅན་དོན་དུ་བཞེངས་པ་སྤྱིར་སྡེ་སྣོད་མ་ལུས་པ་མཁྱེན་ཅིང་༔ མཆོག་ཏུ་འབྲས་བུ་གསང་སྔགས་ལ་ཐུགས་ཀྱི་དགོངས་པ་འབྱོངས་པ༔ རྒྱ་གར་དུ་དཔེ་ཙམ་ཡང་མ་བཞག་པར་བོད་དུ་བསྣམས་ནས་བྱོན་ནས་མཆིས་སོ་ཞེས་བསྙད་པས༔ རྒྱལ་པོའི་ཞལ་ནས་དོ་ནུབ་དབུ་ཚལ་གསེར་ཁང་དུ་བཞུགས་དང་༔ ནང་པར་དྲོ་གང་དུ་མོས་པ་དང་སྤྲོ་བ་བྱའོ་གསུངས་ནས༔ དབུ་ཚལ་དུ་བཞུགས་སོ༔ དུས་དེ་ཙམ་ན་བོད་ཀྱི་བློན་པོ་གདུག་པ་ཅན་རྣམས་ཀྱིས་མདོ་བྱང་བཀླག་པ་དང་༔ བསམ་ཡས་སུ་པཎྜི་ཏ་བྱོན་ནོ་ཞེས་ཐོས་ནས༔ བློན་པོ་རྣམས་ཀྱིས་སྤྱན་སྔར་འདུག་ནས་འོ་སྐོལ་གྱི་འདི་

ན་མཐའི་མོན་བུ་ཕྲ་མེན་གྱི་ངན་སྔགས་སྣ་ཚོགས་པ་ཁྱེར་བ་ཡོད་གདའ༔ རྒྱལ་པོས་བཀའ་ཆད་གསོལ་བ་འདིར་མ་བཞག་པར་ཞུ་བ་ཕུལ་ཏེ༔ ནང་པར་ལོ་ཙཱ་བ་གཉིས་ཀྱིས་རྒྱལ་པོའི་སྐུ་མདུན་ཕྱིན་ཏེ༔ ཞལ་མཇལ་བར་ཞུ་ཞེས་བསྙད་པས༔ རྒྱལ་པོའི་ཞལ་ནས་ཁྱེད་གཉིས་ཀྱི་དེ་པཎྜི་ཏ་གཤའ་མ་མིན་པར་འདུག༔ ཕྲ་མེན་གྱི་ངན་ཐབས་སྣ་ཚོགས་ཁྱེར་བ་ཡིན་པར་འདུག་པས་ཞག་འགའ་མཚན་བརྟག་གོ་གསུངས་ནས་མ་གནང་ངོ་༔ དེ་ནས་ལོ་ཙཱ་བ་གཉིས་རབ་ཏུ་སྡུག་བསྔལ་ཞིང་༔ ཞག་གསུམ་དབུ་ཚལ་དུ་ཉལ་བའི་ནང་མ་གཅིག་བི་མ་བཞེངས་ནས༔ རྣམ་པར་སྣང་མཛད་གཟུགས་ཀྱི་ལྷ༔ གཟུགས་ཀྱི་ལྷ་ཡེ ་ཤེས་ལྷ་ཡིས་ཕྱག་བགྱིའོ༔ ཞེས་ཕྱག་མཛད་པས༔ དེར་ལྡེར་བཟོ་རྣམས་ཐལ་བར་ཕུང་གིས་སོང་བས་ལོ་ཙཱ་བ་གཉིས་ངོ་མཚར་སྐྱེས་ནས་རྒྱལ་པོ་ལ་བསྙད་པས༔ འོ་དེ་ཀུན་ཕྲ་མེན་གྱི་ངན་ཐབས་ཡིན་གསུངས་ནས༔ ཡང་ལོ་ཙཱ་གཉིས་སེམས་རབ་ཏུ་མ་བདེ་སྟེ༔ བདག་ཅག་གཉིས་རྒྱ་གར་ཙམ་ནས་དཀའ་ལས་སྤྱད་ནས༔ མཁས་པ་ངོ་མཚར་འདི་ལྟར་བུ་སྤྱན་དྲངས་པ་ལ༔ རྒྱལ་པོ་འདི་ཅི་ཡིན་སྙམ་ནས་ཐུགས་མུག་གོ༔ དེ་ནས་ཡང་ཞག་གསུམ་གྱི་ནང་པར་བཞེངས་ནས༔ རྣམ་པར་སྣང་མཛད་གཟུགས་ཀྱི་ལྷ༔ གཟུགས་ཀྱི་ལྷ་ལ་ཡེ་ཤེས་ལྷ་ཡིས་དབང་བསྐུར་རོ༔ ས་ཕུང་དབུ་ཞྭ་ཕུད་ནས་བསྐོན་པས༔ སྐུ་གཟུགས་སྔོན་མ་བས་རབ་ཏུ་ལེགས་པ༔ རྒྱ་གར་གྱི་ལུགས་སུ་བྱུང་སྟེ༔ གཟི་མདངས་དང་ལྡན་པར་གྱུར་ནས་ཡང་ལོ་ཙཱ་བ་གཉིས་ཀྱིས་རྒྱལ་པོ་

ལ་བསྙད་པས༔ དེ་ནས་རྒྱལ་པོ་ཐུགས་ཆེས་ཏེ༔ འོ་ན་བོད་ཀྱི་རྒྱལ་ཁམས་སུ་རྐང་མགྱོགས་བརྫངས་ནས་ཟླ་བ་གཅིག་གི་ཚེས་གསུམ་གྱི་ཉིན་པར་འདུས་ཤིག་པར་བཏང་ནས༔ དེ་ནས་ཟླ་གཅིག་གི་ནང་པར་དབུ་རྩེ་རིགས་གསུམ་སྒོ་མདུན་དུ་གཡས་སུ་རྒྱལ་པོ་ལ་གཡུ་ཁྲི་རབ་ཏུ་འཕང་མཐོ་བ་བརྩེགས༔ གཡོན་དུ་གསེར་སྦྲམ་གྱི་ཁྲི་རབ་ཏུ་འཕངས་མཐོ་བ་བརྩེགས་བོད་ཀུན་འདུས་ནས་རྒྱལ་པོས་པཎྜི་ཏ་ལ་ཕྱག་འཚལ་མཛད་པས༔ རྒྱལ་པོའི་ཐུགས་ཀར་དར་མེན་གྱི་དཀྱིལ་ན་རིགས་གསུམ་མགོན་པོའི་ལྷ་བཀྲ་ཡལ་ལེ་འདུག་པ་ཀུན་གྱིས་མཐོང་སྟེ་དེ་ལྟར་འདུག་པས༔ བི་མ་ལས་དབུའི་རིན་པོ་ཆེ་པྲོག་ཞུ་ལ་ༀ་ཨཱཿཧཱུྃ་ཞེས་སེ་གོལ་བརྡབས་པས་རིགས་ལྔའི་སངས་རྒྱས་སུ་ཀུན་གྱིས་བཀྲ་ཡལ་ལེ་མཐོང་བས་བོད་ཀྱི་རྒྱལ་ཁམས་ཀྱི་མི་ཙམ་གྱིས་བསྟོད་པ་ལེགས་སོ༔ འདིའི་དུས་ན་བི་མ་ལས་ལོ་སུམ་བརྒྱ་བཞེས་པ་ལགས༔ རྗེ་བློན་རིན་པོ་ཆེ་ལ་དེ་ལྟར་མི་མངའ་ཡང་གདུལ་བྱ་ལ་དགོངས་པའོ༔ དེ་ལྟར་བི་མ་ལ་དང་སྤྲུལ་པའི་རྗེ་བློན་གཉིས་མཇལ་བའི་ཚེ༔ སངས་རྒྱས་མྱ་ངན་ལས་འདས་ནས་ལོ་སྟོང་དང་བརྒྱད་ཅུ་ཐམ་པ་ལོན་པ་ལགས་སོ༔དུས་དེ་ཙམ་ན་བི་མ་ལ་མཆོད་གནས་དམ་པར་མི་བཟུང་༔ ཕ་རོལ་ཏུ་ཕྱིན་པ་དང་དབུ་མའི་ཆོས་གསུང་ཞིང་བཞུགས་ཏེ་བི་མ་ལ་དྲོ་ལ་བཞུད་པའི་བར་དུ༔ སྡུད་པ་གསུང་བའི་ཁྲིའི་རྩར་སྤྲང་པོ་གཅིག་བྱུང་སྟེ༔ དེས་གཞན་གྱིས་མ་ཚོར་བའི་ཡི་གེ༔ ཉན་ཐོས་བྱིས་པའི་ཆོས་ཀྱི་སངས་མི་རྒྱ༔ ཕོ་རོག་རྡོ་རྗེ་འགྲོས་ཀྱིས་ས་གཞིའི་དལ་མི་སྙོམས༔ བྱ་

བའི་ཚིག་གཉིས་པ་གཅིག་བྲིས་པ་འདུག་ནས༔ དེ་ནས་བི་མ་ལས་ཁྲི་ཁར་བྱོན་ནས་ཀ་བ་ལི་ཞལ་ཕྱེ་བས་ཡི་གེ་མཐོང་བས༔ བི་མ་ལའི་ཞལ་ནས་འདིར་སུ་འོངས་གསུངས་སོ༔ ཆོས་ཉན་པའི་གྲྭ་པ་དེ་དག་རྣམས་ན་རེ་སུ་ཡང་མ་བྱུང་ཟེར་རོ༔ ཁྱེའུ་གཅིག་ན་མེད་ཅི་རྩ་ན་སྤྲང་པོ་རྒད་པོ་གཅིག་ཀོར་ཀོར་འདུག་པ་ཡིན་ཟེར་བས༔ བི་མ་ལའི་ཞལ་ནས་སྤྲང་པོ་དེ་ཚོལ་དང་གསུངས་ནས་འཁོར་རྣམས་ཀྱིས་བཙལ་བས་གླིང་གསེབ་ཀྱི་ཉོས་ཆང་པ་གཅིག་གི་ཁྱིམ་ན་འཇུག་ནས་ཁྲིད་ནས་འོངས་ཏེ༔ བི་མ་ལས་དྲིས་པས༔ བདག་ནི་པ་གོར་བཻ་རོ་ཙ་ནའི་སློབ་མ་གཡུ་སྒྲ་སྙིང་པོ་བྱ་བ་ལགས་སོ་ཟེར་ནས་སེམས་སྨད་ལྔ་ལ་མཁས་པ་གཅིག་འདུག་གོ༔ དེའི་ཚེ་བི་མ་ལས་ཁོང་ལ་དྲན་པ་སེམས་སྡེ་བཅུ་གསུམ་བསྟན་པ་དང་༔ གཡུའི་སྒྲ་དང་ལྟ་བ་མཉམ་སྒོམ་པ་མཉམ་སྤྱོད་པ་མཉམ་སྟེ་བྱ་མ་བུ་མཉམ་པ་ལྟ་བུ་གྱུར་ནས༔ སྔ་འགྱུར་དང་ཕྱི་འགྱུར་ཞེས་བྱ་བ་ཡང་དེ་ཙམ་ན་ཐོས་པ་ལགས་སོ༔ དེ་ནས་རྗེ་བློན་གྱིས་ཞུས་ཏེ༔ ལི་གར་ཏིའི་སྐྱེ་མས་ཕྲ་མེན་གྱི་ཡོལ་གོ་གང་དང་༔ རྟ་སྔོན་པོ་གཡུ་བྱ་བྱ་བ་ལ་གསེར་གྱི་སྒ་སྲབ་དང་ཟབ་ཆེན་གྱི་སྟན་དང་༔ གཡུའི་ཐུར་དང་ཁ་གསེར་ཁ་གཡུ་དང་བཅས་པ་ཕུལ་ནས་ཆོས་འགའ་བསྒྱུར་བར་ཞུ་བ་ཕུལ་བས༔ བི་མ་ལའི་ཞལ་ནས་རྟ་དང་གསེར་གྱིས་དགོས་པ་མེད༔ ཆོས་ནི་སེམས་ཅན་གྱི་དོན་དུ་བསྒྱུར་ན་བདག་གིས་ཅི་རིགས་པར་བསྒྱུར་བར་བྱའོ༔ གསུངས་ནས༔ དབུ་རྩེ་རིགས་གསུམ་གྱི་ལྷོ་ནུབ་ཀྱི་མཚམས༔ སྒྲ་བསྒྱུར་རྒྱ་གར་གྱི་གླིང་ཕ་རོལ་ཕྱིན་པ་དང༔ རྡོ་རྗེ་སེམས་

དཔའ་སྒྱུ་ཕྲུལ་དྲ་བ་དང་༔ དཔལ་ཡང་དག་དང་༔ ཕུར་པ་དང་༔ མ་མོ་དང་༔ གཤིན་རྗེ་རྣམས་ནི་ཕལ་ཆེར་གཉགས་ཛྙཱ་ན་ཀུ་མ་རས་བསྒྱུར་རོ༔ སེམས་སྡེ་དང་ཀློང་གི་མན་ངག་འགའ་ཙམ་ཡང་བསྒྱུར་རོ༔ སྐོར་གསུམ་གྱི་རྩ་བའི་རྒྱུད་ལྔ་ཡང་གཉགས་ཀྱིས་བསྒྱུར་རོ༔ གསང་བ་བླ་ན་མེད་པའི་རྒྱུད་ལུང་རྣམས་ནི༔ གཞན་སུ་ལ་ཡང་ཆ་མེད་པར་རྗེ་བློན་གསུམ་གྱི་ཐུགས་དམ་གྱི་མནོགས་ཆོས་སུ་མཛད་ནས་རིགས་གསུམ་བར་ཁང་དུ་སྲོད་དང་ཐོ་རངས་བསྒྱུར་རོ༔ སྐོར་གསུམ་གྱི་རྒྱུད་ལྷག་མན་ངག་རྣམས་ཀྱང་བསྒྱུར་རོ༔ དེ་ལྟར་ལོ་བཅུའི་བར་ལ་འབྲས་བུ་གསང་སྔགས་ཀྱི་རྒྱུད་མང་པོ་བསྒྱུར་ཅིང་བཞུགས་སོ༔ དེ་ནས་རྗེ་བློན་གྱིས་བཀའ་བགྲོས་ནས་ཆོས་འདི་ལྟར་ཟབ་པ་ནི་སྔོན་ཆད་ཀྱང་མ་བྱུང་༔ ཕྱིས་ཀྱང་བོད་ཡུལ་དུ་མི་འབྱུང་བས༔ འདི་ལ་ཚུལ་བཞིན་དུ་སྤྱོད་པ་མི་འབྱུང་བས་ཕྱི་རབས་ཀྱི་དོན་དུ་སྦ་བར་བཀས་བཅད་དོ༔ དེ་ནས་བི་མ་ལས་མཆིམས་བུའི་བྲག་དམར་དགེ་གོང་དུ་གསང་བ་བླ་ན་མེད་པའི་གསང་བ་སྙིང་ཐིག་གི་པོ་ཏི་རྣམས་རྒྱའི་དཔེ་ལས་བོད་ཀྱི་ཡི་གེར་བསྒྱུར་ནས༔ རྒྱ་ནག་པོའི་ཡུལ་དུ་འགྲོ་བར་ཐུགས་ཀྱིས་དགོངས་ནས༔ རྗེ་བློན་གཉིས་ལ་ཡང་མ་གནང་བར་ཕྱི་རབས་ཀྱི་བསྟན་པའི་བཙས་སུ་སྦས་སོ༔ ཐིག་སྐོར་གསུམ་གྱི་རྒྱུད་མན་ངག་ལྷག་ཆད་མེད་པར་རྒྱའི་དཔེ་རྣམས་ནི་ཕྱི་མའི་དུས་སུ་ཆོས་འདིའི་སྐོར་གྱི་ཡི་གེ་རྣམས་ཚོང་འདུས་ཀྱི་འོ་མ་བཞིན་བསླད་པའི་གང་ཟག་འགའ་འབྱུང་བས༔ དེ་དག་གི་གཞུང་དང་མན་ངག་རྣམས་མི་ཉམས་

པར་བྱ་བ་ལ་དགོངས་ནས༔ རྒྱ་དཔེ་རྣམས་སྦས་ནས་བཞུགས་སོ༔ དེ་ཡང་རྗེ་བློན་གྱི་ཐུགས་ཀྱི་རྟོག་པ་ལོ་གསུམ་གྱི་བར་ལ་བཅད་ནས་རྒྱ་ནག་པོའི་ཡུལ༔ ལྕི་བ་ཐུབ་པའི་རི་ཞེས་བྱ་བ་ལ་གཤེགས་ཏེ༔ འདིའི་དུས་ན་བི་མ་ལས་ལོ་སུམ་བརྒྱ་དང་བཅུ་གསུམ་བཞེས་པ་ལགས་སོ༔ མཁས་པ་དེ་ནི་སངས་རྒྱས་ཀྱི་བསྟན་པ་ཇི་སྲིད་གནས་པའི་བར་ལ་འགྲོ་བ་མིའི་ལུས་སུ་བཞུགས་པ་ལགས་སོ༔ ལོ་བརྒྱ་བརྒྱ་ལ་སྤྲུལ་པ་རེ་རེ་བོད་དུ་སྣང་བར་བྱེད་དོ༔ མཁས་པ་དེ་ནི་སྤྲུལ་པའི་སྐུ་དགའ་རབ་རྡོ་རྗེ་དང་ཞལ་ལན་བདུན་མཇལ་ཞིང་མན་ངག་རྣམས་ཀྱི་ཞུ་ཏིག་མཛད་དོ༔ དེ་ཡང་རྒྱ་གར་གྱི་ཡུལ་ཝཱ་རཱ་ཎ་སཱིའི་ལྷོ་ནུབ་ན་རི་བྱ་རྐང་ཞེས་བྱ་བ་ལ་ལན་ལྔ་མཇལ་ལོ༔ རྡོ་རྗེ་གདན་དུ་གཉིས་ཏེ་ལན་བདུན་མཇལ་བས་ཐིག་ལེ་མཆོག་གི་རྒྱུད་ལུང་མན་ངག་རྣམས་ལ་ཡིད་ཆེས་སོ༔ མཁས་པ་དེ་ནི་བསྟན་པ་མི་གནས་པའི་དུས་ན་རྡོ་རྗེ་གདན་དུ་ལྷག་མ་མི་སྣང་བར་འགྱུར་བ་ཡིན་ནོ༔ ཨཱ་ཙཪྱ་སའི་སྙིང་པོ་ནི་མཆིམས་ཕུར་གྲོངས་པས་ལྟས་བཟང་པོ་བྱུང་སྟེ༔ བི་མ་ལ་གྲོངས་བྱ་བའི་ཐ་སྙད་བྱུང་བ་ཡང་དེ་ལས་བྱུང་བ་ལགས་སོ༔ དེས་གང་ལ་བརྒྱུད་ན་ཉང་ཏིང་འཛིན་བཟང་པོ་ལ་བརྒྱུད༔ བི་མ་ལ་རྒྱ་ནག་ཏུ་བཞུད་ནས་ལོ་ལྔ་བཅུ་རྩ་ལྔ་ནས་ཉང་ཏིང་འཛིན་བཟང་པོ་དེ་ཡང་རང་རྒྱུད་རྣམ་པར་དག་ནས༔ རྡོ་རྗེ་ལེགས་པས་ཁམས་སུ་སེར་བ་ཕབ་ནས་རྔ་མོའི་ཁ་ལ་ལྔ་བརྒྱ་བྱུང་བ་ལ༔ ཉང་ཏིང་འཛིན་བཟང་པོས༔ གསེར་གྱི་རྡོ་རྗེ་རྩེ་དགུ་པ་གཅིག་བར་སྣང་ལ་འཕངས་ནས་སྔོན་གྱི་དམ་ཚིག་གིས་རྗེས་སུ་བསྐུལ་ཏེ་ཉང་ལ་ཕུལ་ནས༔ དེའི་རྫས་ཀྱིས་ཞའི་ལྷ་ཁང་

ཞེས་བྱ་བ་བཞེངས་སུ་གསོལ་བ་ཆོས་སྐྱོང་ལ་གཉེར་དུ་གཏད་དོ༔ དེ་ལྟ་བུའི་མི་མ་ཡིན་གྱི་རྫས་དང་ལོངས་སྤྱོད་ལས་བཞེངས་པའི་ལྷ་ཁང་དེའི་ནང་ན༔ བཤད་རྒྱུད་སྙིང་ཐིག་གི་བཀའ་རྒྱུད་དག་ནི་སྐོར་གསུམ་ཀེའུ་ཚང་རིམ་གསུམ་དུ་སྦས་སོ༔ སྙན་རྒྱུད་ཡི་གེ་རིགས་ཀྱི་དཔེ་རྣམས་ནི་སྒོ་ཁང་གི་སྟེང་དུ་ཤོག་དྲིལ་རྫ་མ་གང་སྦས་སོ༔ གསང་བ་བླ་ན་མེད་པའི་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པ་ཀ་བའི་བསམ་ལེའུ་གསུམ་གྱི་ཁོང་སེང་ལ་སྦས་ཏེ༔ ཕྱི་རབས་ཀྱི་སྐལ་ལྡན་གྱི་དོན་དུ་རྒྱས་བཏབ་ནས་བར་དེར་མི་སྣང་བར་མཛད་དོ༔ སྙན་བརྒྱུད་ཚིག་གི་རིམ་པ་མཆན་དུ་བཏབ་པ་ནི་འབྲོམ་རིན་ཆེན་འབར་བ་ལ་རྒྱུད་པ་ནི་བཀའ་སྲོལ་མི་ཉམས་པར་བྱ་བའི་ཕྱིར་བརྒྱུད་པའོ༔ བཤད་རྒྱུད་གསང་བའི་མན་ངག་རྣམས་གཙུག་ལག་ཁང་དེར་ལོ་བརྒྱར་གནས་པའི་རྟིང་ལ་འབྲོམ་རིན་ཆེན་འབར་བའི་སློབ་མ་སྦས་བློ་གྲོས་དབང་ཕྱུག༔ དེའི་སློབ་མ་དབུ་རུ་ཞྭའི་ལྡང་མ་དགེ་མཆོག་གི་བུ་གནས་བརྟན་ལྡང་མ་ལྷུན་གྱིས་རྒྱལ་མཚན་ཞེས་བྱ་བ་ལ༔ ཞྭའི་མགོན་པོ་ཉིད་ཀྱིས་ལུང་བསྟན་ནས་གསང་བའི་རྒྱུད་ལུང་མན་ངག་འདི་ཡོད་པར་ཤེས་ནས༔ གཙུག་ལག་ཁང་དེའི་གཉེར་ཉང་དྷརྨཱ་ར་ཛ་ཞེས་བྱ་བས་བྱེད་པ་ལ༔ གསེར་གྱི་ཆགས་པ་མང་པོར་འོང་བའི་དོད་པོར་གཏེར་རྣམས་འབྱིན་དུ་བཅུག་ནས་ལྡང་མས་ཕྱུང་ངོ་༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་སྟོང་སུམ་བརྒྱ་ལྔ་བཅུ་རྩ་བརྒྱད་ལོན་པ་ལགས་སོ༔ ལྡང་མ་ལྷུན་གྱིས་རྒྱལ་མཚན་གྱིས་གཏེར་འདི་བཏོན་ནས་ལོ་བཅོ་ལྔ་ལོན་པའི་དུས་ན༔ མྱང་རོའི་ཡུལ་མྱང་མཚོ་བྱ་བ་ན༔ ལྕེ་ཐུབ་བའི་དབང་པོ་དང་

ཁྱུང་མོ་བཟའ་ལགས་པའི་བུ་ལྕེ་བཙུན་སེང་གེ་དབང་ཕྱུག་བྱ་བ་གཅིག་ཡོད་དེ༔ འདིའི་དུས་ན་སྣང་ཁུ་ཡུལ་སྙན་བརྒྱུད་ཀྱི་གདམས་ངག་རིགས་མི་འདྲ་བ་བདུན་སྣང་ངོ་༔ དེ་ནས་ལོ་གསུམ་ལོན་ཙམ་ན་ལྡང་མ་ལྷུན་གྱི་རྒྱལ་མཚན་གྱིས་བཤད་རྒྱུག་ཡང་དག་པ་སྙིང་ཐིག་མན་ངག་འདི་བསྟན་ཅིང་བཞག་པའི་གནས་མ་རྙེད་དེ༔ ལྕེ་བཙུན་མང་ཡུལ་དུ་བཞུད་པ་དང་༔ ལྡང་མ་མན་ངག་གི་སྣོད་འཚོལ་གཉིས་གཙང་གི་རི་གཟར་རྒོད་པོ་ལུང་དུ་མཇལ་ནས༔ སྔར་ནས་སློབ་མ་ཡིན་པས་གཅིག་ལ་གཅིག་རབ་ཏུ་དགྱེས་ནས་ལྡང་མས་ཀྱང་མན་ངག་བཞག་པའི་སྣོད་ལྕེ་བཙུན་བཟང་བར་གཟིགས་ནས༔ ལྡང་མའི་ཞལ་ནས་སྔ་མ་དང་མི་འདྲ་བའི་སྙིང་ཐིག་གསང་བའི་མན་ངག་རྣམས་ཁྱོད་ལ་སྦྱིན་གྱིས་འོ་སྐོལ་གཉིས་འགྲོགས་ལ་འདེངས་ཟེར་བས༔ ལྕེ་བཙུན་གྱི་ཞལ་ནས་བདག་བླ་མ་གཅིག་གི་ཚོད་ལ་མཆིས་པས་དེ་ནས་ལོག་པ་དང་ཞུ་འཚལ་གསུངས་པ་དང་༔ ལྡང་མའི་ཞལ་ནས་འོ་ན་དུས་ནམ་ཙམ་བྱ་གསུངས་པས༔ ལྕེ་བཙུན་གྱི་ཞལ་ནས་ཉ་དྲུག་གི་ཟླ་བའི་ཉའི་ཉི་མ་ལ་ཁ་རག་རྩར་བལ་པོ་སྒོམ་ཆུང་བྱ་བ་བསྒོམ་ཆེན་ཤིན་ཏུ་བཟང་བ་གཅིག་ཡོད་པར་འདུག་པས་དེའི་སར་དུས་བགྱིའོ་གསུངས་པས༔ གཉིས་མཐུན་ནས་དུས་བྱས་སོ༔ དེ་ནས་ལྕེ་བཙུན་གྱིས་མང་ཡུལ་ནས་ལོག་ནས་འགྲོ་བར་བརྩམས་ཏེ༔ ལྡང་མས་ཉའི་ཉི་མ་རང་ལ་བྱོན༔ བལ་པོ་སྒོམ་ཆུང་ན་སོ་གཞོན་པ་གཅིག་གིས་སྒོམ་གྱིན་འདུག་པས༔ ལྡང་མས་ཇོ་བོ་དེ་ལྟར་བྱས་པས་སངས་མི་རྒྱ་བྱས་པས༔ བལ་པོ་ན་རེ་ཇོ་བོ་ཐབས་ཇི་ལྟ་བུ་ཡོད་གསུངས་སོ༔ ལྡང་མའི་ཞལ་ནས་དཔེ་འདི་ལ་གཟིགས་དང་ཞེས༔ ལྕེ་བཙུན་ཞག་གསུམ་དུ་མ་བྱུང་བས་ལྟ་རྟོགས་བྱས་པས་བལ་པོ་ཡང་དེ་ཀས་གྲོལ་བ་ལགས་སོ༔ དེ་

ནས་ཚེས་བཅོ་བརྒྱད་ཀྱི་ཉིན་མོ་ལྕེ་བཙུན་གྱིས་སླེབས་ནས་བྱུང་བས་ལྡང་མའི་ཞལ་ནས་ངའི་དཔེ་འདི་དག་ལེགས་པར་བྲིས་ལ་ཆ་བསྐྱེད་མ་བུའི་ཡི་གེ་རྣམས་ལྷག་མ་མ་ལུས་པར་བྲིས་ལ་བཤུས་ནས་ཁྲའི་ཟླ་བ་ལ་སྐྱོལ་ཅིག༔ མན་ངག་འདི་རང་གིས་ཤེས་པ་ལ་གཞན་མེད་གསུངས་ནས་དེ་ལྟར་བྱས་སོ༔ དེ་ནས་ལྡང་མ་དབུ་རུར་བཞུད༔ ལྡང་མ་དང་ལྕེ་བཙུན་མཇལ་བའི་ཚེ༔ སངས་རྒྱས་མྱ་ངན་ལས་འདས་ནས་ལོ་སྟོང་སུམ་བརྒྱ་དང་བརྒྱད་ཅུ་རྩ་བརྒྱད་ལོན་ཏོ༔ ལྕེ་བཙུན་གྱིས་གནུབས་ཡུལ་རོང་གི་ལང་གྲོ་ཤུག་པ་ཅན་དུ༔ ལང་གྲོ་སྨ་ར་ཅན་གྱིས་དཔེ་རྣམས་བྲིས་སོ༔ གསང་བ་བླ་ན་མེད་པའི་རྒྱུད་ལུང་མན་ངག་གི་ཡི་གེ་རྣམས་གཡས་བན་སྐྱབས་སེས་བྲིས༔ ལྷག་མ་འོ་ཡུག་ལུ་མར་དབྱར་ཆོས་ཀྱི་ཤེས་རབ་ཀྱིས་བྲིས༔ སྐོར་གསུམ་གྱི་ལྷག་མ་རྣམས་ཚུར་ལེགས་པ་དང་༔ སོ་དཔའ་ལེགས་ཀྱིས་བྲིས་སོ༔ དེ་ནས་དཔེ་རྣམས་ཚར་ནས་ཞུ་ཏིག་ལན་དྲུག་ཏུ་ཉང་དཔལ་གྱི་འབྱུང་གནས་དང་གཉིས་ཀྱིས་མཛད་ནས༔ ཁྲའི་ཟླ་བའི་དུས་སུ་འབུམ་བཅུ་གཉིས་གདུ མ་ཅིག་དང་༔ ལྟང་ཚེ་སུམ་ཅུ་རྩ་ལྔ༔ རྟ་གསུམ༔ ཁྲ བ་དགུ་ཁྱེར་ནས་དཔེ་རྣམས་སྐྱེལ་དུ་བྱོན་པས༔ དབུ་རུ་སྙེ་ཐང་དུ་སླེབ་ཙ་ན༔ བཙུན་པ་ལྡོམ་བ་བུ་གཅིག་ན་རེ༔ ཇོ་བོ་རྗེས་ཆེ་གར་འགྲོ་ཟེར༔ ལྕེ་བཙུན་གྱིས་བདག་ལྡང་མ་ལྷུན་གྱི་རྒྱལ་མཚན་བྱ་བ་སྐུ་དྲིན་ཅན་ཅིག་ལ་ཞབས་ཏོག་སྐྱེལ་བ་ལགས་བྱས་པས༔ བཙུན་པ་དེ་ན་རེ༔ ལྡང་མ་ཁ་སང་བར་གྱི་ཟླ་བ་སྔ་མ་དེའི་ཉ་ལ་སྐུ་གཤེགས་ནས༔ གཞན་རྣམས་ཆོས་པ་བཟང་པོ་ཙམ་དུ་མི་བྱེད་པར་འདུག༔ གནས་བརྟན་ཡིན་ཟེར་བ་ལས༔ རྟགས་བཟང་པོ་ངོ་མཚར་ཅན་མང་པོ་ཡང་བྱོན༔ འཆི་བའི་དུས་ཀྱང་ཟིན་པར་གདའ་ཁྱེད་ལ་ཁོང་

གི་གདམས་ངག་བདོག་གམ་ཟེར་རོ༔ ལྕེ་བཙུན་སྙམ་པ་བླ་མ་གྲོངས་ཀྱང་རྫས་འདི་རྣམས་འདིར་གནས་གཞི་ཡང་འདུག་པས་འདིར་ཚོགས་གསོག་བྱ་དགོས་བླ་མ་ལ་བསྡོས་པ་ཡིན་པས༔ བླ་མའི་དོན་དུ་གཏང་བར་བྱ་སྙམ་ནས་དེར་གཞི་ཕབ་བོ༔ དེར་བཙུན་པ་དེ་ན་རེ་བདག་མལ་གྲོ་བའི་མྱང་བཀའ་གདམས་བྱ་བ་ཡིན་པས༔ ལྡང་མ་དེ་གདམས་པ་ཆེ་བའི་རྟགས་སུ་འདུག་པས༔ ཁྱེད་ལ་ཁོང་གི་གདམས་པ་ཚང་བར་བཞུགས་ཀྱིན་གདའ་བས༔ བདག་ལ་ཐུགས་ལ་གདགས་པར་ཞུ་ཞེས་ཞུ་བ་ཕུལ་བས༔ ལྕེ་བཙུན་གྱིས་ཀྱང་མན་ངག་བསྟན་དུ་རུང་བའི་སྣོད་དུ་གཟིགས་ནས༔ གསང་བའི་མན་ངག་སེམས་ལུང་སྒོམ་ཁྲིད་གནང་ངོ་༔ དེ་རྣམས་ཀྱི་རྫས་དང་ཡོ་བྱད་རྣམས་དགེ་འདུན་སྙེ་ཐང་པ་དང་༔ དུས་དེ་ཙམ་ན་ཐོད་པ་ལོ་ཙཱ་བ་དང་༔ ཇོ་བོ་འབྲོག་མི་ལོ་ཙཱ་བ་གཉིས་བཞུགས་པ་ལ་ཞབས་ཏོག་མཛད་དོ༔ དེ་ནས་ལྕེ་བཙུན་གྱི་གནུབས་ཡུལ་རོང་དུ་བྱོན༔ མྱང་བཀའ་གདམས་པ་བྱ་བ་དེ་ཏི་སྒྲོའི་བྲག་དཀར་པོ་བྱ་བ་ལ་སྒོམ་པར་དམ་བཅས་ནས་སྒོམ་དུ་སོང་ངོ་༔ དཔོན་སློབ་གཉིས་ཀྱིས་སངས་རྒྱས་ཀྱི་འབྲས་བུ་སྔོན་ལ་སུས་ཐོབ་འགྲན་པར་བྱས་ནས་གྱེས་སོ༔ དེ་ནས་ལྕེ་བཙུན་གྱིས་དཔའ་གོར་རྩར་ལུང་དབེན་རྩར་བྱོན་ནོ༔ ལྕེ་བཙུན་གྱིས་མན་ངག་གསང་བའི་སྐོར་བཞི་པོ་འདི་དག་བཞག་པའི་གནས་འཚོལ་བ་ལ༔ ལོ་བཅུ་ལོན་པའི་བར་དུ་བཙལ་བས་མ་རྙེད་དེ༔ དེ་ནས་སྐོར་གསུམ་གྱི་མན་ངག་རྒྱུད་དང་བཅས་པ༔ ལང་གྲོ་མཆད་པ་སྟག་འདྲའི་མཆད་པའི་གོང་ཆུ་མིག་འོག་ཏུ་སྦས་ནས༔ ཀླུ་བཙན་རྡོ་རྗེ་བདེ་འབར་ལ་གཏད་ནས་ཕྱི་རབས་ཀྱི་སྐལ་ལྡན་རྣམས་ཀྱིས་རྙེད་པར་ཤོག་ཅེས་སྨོན་ལམ་བཏབ་ནས༔ བྱི་བ་ལོའི་དཔྱིད་ཟླ་ར་བའི་ཉའི་ཉིན་མོ་སྦས་ཏེ་མི་སྣང་བར་བྱས་སོ༔ དེ་ནས་

གསང་བ་བླ་ན་མེད་པ་སྙིང་ཐིག་གི་མན་ངག་རྣམས་ལུས་ལ་བཅངས་ནས་ཡོད་དེ༔ འུ་ཡུག་གི་ནུབ་མའི་ཤུགས་གསེབ་ན་ཡོད་པའི་ཚེ༔ མཚན་མོའི་རྨི་ལམ་ན་རྒྱ་གར་བ་སྔོ་སངས་ཤིན་ཏུ་འཇིགས་པ་གཅིག་བྱུང་སྟེ༔ བདག་ནི་བི་མ་ལ་མི་ཏྲ་མཁས་པ་སྟེ༔ སྐལ་ལྡན་སྙིང་པོའི་ཡང་བཅུད་དོན་འདོད་ན༔ མཆིམས་ཕུ་བྲག་དམར་དགེ་གོང་ཡང་ལྡེབས་ལ༔ གསང་བ་སྙིང་ཐིག་སྙིང་དང་འདྲ་བ་ཡོད་ཀྱིས་ལོངས༔ དེ་དག་ཁྱེར་ལ་འུ་ཡུག་ཕྱི་གོང་རྫ་ཡི་ར་བ་རུ༔ སུས་ཀྱང་མཐོང་བ་མེད་པར་ལོ་བདུན་སྒོམས༔ དེས་ནི་ཟག་བཅས་ཕུང་པོ་མི་སྣང་བ་ཡིན་ནོ༔ ཞེས་ལུང་བསྟན་ནས་བདག་མཆིམས་ཕུར་འགྲོ་བའི་བདོགས་བྱས་ནས་ཞག་གསུམ་ལོན་པའི་ཉི་མ་འཆར་ཀར༔ འུ་ཡུག་ཕུག་སྟེང་གི་གྲོག་པོར་མཇལ་ནས༔ ཕྱག་དང་བསྐོར་བ་བྱས་ནས་འུ་ཡུག་ལུང་པའི་ནགས་ཀྱི་དཀྱིལ་དུ་ཟླ་བ་ཕྱེད་རྗེ་ལ་གདམས་པ་ཞུས་ནས་ཞུན་ཐར་བཅད་དོ༔ དམ་པའི་ཞལ་ནས་ང་ཧོར་གྱི་ཡུལ་དུ་འགྲོ་བས་ཧོར་གྱི་རྒྱལ་པོ་ལྡེ་མི་ཙན་ཏྲ་བྱ་བ་ཞིག་སེམས་ཅན་དམྱལ་བའི་གནས་སུ་འགྲོ་བ་ཞིག་ཡོད་པས༔ དེ་འཁོར་བ་ལས་སྒྲོལ་བར་བྱེད་པས་དེའི་བར་ཁྱོད་ནུབ་ཀྱི་རི་ལ་སྡོད་ལ་མཆིམས་ཕུར་མ་འགྲོ་གསུངས་ནས་རྗེ་བཙུན་རྫུ་འཕྲུལ་གྱིས་གཤེགས་སོ༔ དེ་ནས་བདག་གིས་ནུབ་ཏུ་ལོ་གསུམ་འདུག་པའི་དུས་སུ་ཡང་རྗེ་བྱོན་ནས༔ ཡང་མན་ངག་རྣམས་ལ་ཞུ་ཏིག་བྱས་ནས་ལྷག་མ་མ་ལུས་པར་གནང་ངོ་༔ དེ་ལྟར་རེས་མཇལ་རེས་མི་མཇལ་བར་ལོ་བདུན་ལྷན་ཅིག་མོས་གུས་བྱས་སོ༔ དེ་ནས་དམ་པ་དེ་ལིའི་ཡུལ་དུ་མཁའ་འགྲོ་མ་བརྩེ་བའི་རོལ་པ་ཞེས་བྱ་བས་སྤྱན་དྲངས་ནས་གཤེགས་སོ༔ དེ་ནས་ལྕེ་བཙུན་གྱིས་མཆིམས་ཕུར་བྱོན་ནས་སྙིང་ཏིག་མན་ངག་བཙལ་བས་མ་རྙེད་དེ༔

དེ་ནས་ཞག་གསུམ་གྱི་ཉི་མ་ཕྱེད་ཙམ་ན་བུད་མེད་སོ་དུང་སོ་འཁོར་མ་ཡོད་པ་སྨིན་མ་ཟངས་སུ་འདུག་པ༔ དཔྲལ་བའི་དཀྱིལ་ན་གསེར་གྱིི་ཟླ་ཕྱེད་རྡོ་རྗེས་མཚན་པ༔ ལག་པ་དང་རྐང་པ་རྣམས་བྱ་ཆུ་བྱའི་སྡེར་མོ་ལྟར་འབྲེལ་བ༔ ནུ་མ་ལས་སེང་གེའི་ཕྲུ་གུ་འཕྱང་བ་ཞིག་བྱུང་ནས༔ འོ་སྔོན་གྱི་སྐལ་ལྡན་མན་ངག་གི་བདག་པོ་བྱུང་ཟེར་ནས༔ བྲག་མེ་ལོང་འདྲ་བའི་དཀྱིལ་ནས་པོ་ཏི་སྨུག་ཆུང་བཏོན་ནས་བདག་ལ་གཏད་ནས་འོ་ཡུག་ཕྱི་གོང་རྫའི་ར་བར་སོང་ཞིག་གསུངས་ནས་གཏད་དོ༔ དེ་ནས་ལོག་ནས་གནུབས་ཀྱི་གསེག་མ་ལུང་དུ་འོངས་ནས་ལྕེ་བཙུན་གྱི་དགོངས་པ་ལ་བཀའ་བརྒྱུད་ཟབ་མོ་འདི་ཀུན་ལ་བཞག་པའི་གནས་མི་འདུག་པས༔ འོ་ཡུག་ནུབ་མའི་བྲག་སེང་གེ་དང་འདྲ་བ་ལ་སྦའོ་སྙམ་ནས་འབྲུག་ལོའི་དགུན་ཟླ་ར་བའི་དུས་ཚོད་སྟོད་སེར་ཁ་ཉི་མ་བྱི་བའི་ཉི་མ་སྐར་མ་རྒྱལ་གྱི་དུས་ཚོད་ཉི་མ་ཤར་བའི་ཚེ༔ གནམ་སྟོང་གི་ཉིན་པར་རྡོ་རྗེ་ལེགས་པ་དང་༔ དཔལ་སྔགས་སྲུང་གི་བདག་མོ་ནག་མོ་ཁྲོས་མ་སྨུག་ནག་རག་གདོང་མ་རྣམས་ལ་གཏད་ནས༔ ཕྱི་རབས་ཀྱི་དོན་དུ་སྨོན་ལམ་བཏབ་ནས་མི་སྣང་བར་མཛོད་དོ༔ དེ་ནས་འུ་ཡུག་གི་ཕྱི་གོང་དུ་སྙིང་ཐིག་གསང་བའི་མན་ངག་གི་པོ་ཏི་ཆུང་བ་རྣམས་ཁྱེར་ནས་སུས་ཀྱང་མཐོང་བ་མེད་པར་ལོ་བདུན་ཉམས་སུ་བླངས་པས་རིག་པ་ཚད་ལ་ཕེབས་ནས་ཆོས་ཉིད་ཟད་པའི་སྣང་བ་མཐོང་ངོ་༔ དེ་ནས་སྙིང་ཐིག་གསང་བའི་པོ་ཏི་རྣམས་བྱར་གྱི་ཕུའི་བྲག་དཀར་པོ་ཐེམ་པ་དང་འདྲ་བར་སྦས་སོ༔ སྔོན་གྱི་སྐོར་གསུམ་གྱི་ཕྱི་མོ་རྣམས་སླེ་ཚན་གསུམ་གྱི་རི་ལ་སྦས་སོ༔ ཡང་དམ་པ་དང་བྱར་གྱི་ལུང་ལན་ཅིག་མཇལ་ནས་རྒྱ་ནག་པོའི་ཡུལ་དུ་གཤེགས་པ་ལ་བདག་གིས༔ མཆིམས་ཕུར་བསྐྱལ་ནས་དམ་པ་རྫུ་འཕྲུལ་གྱིས་གཤེགས་སོ༔ དེ་ནས་

ལྕེ་བཙུན་གྱིས་ལོག་ནས་ངར་བཞིན་དུ་མི་ཡུལ་དུ་ལོ་མང་བཞུགས་ནས༔ ཤངས་དང་རྟ་ནག་གི་བར་གྱི་སྤོ་མཐོན་རི་ནས༔ སློབ་དཔོན་པདྨའི་ཆོས་དང་སྒྲུབ་ཡིག་བཏོན་ནས་གཙང་ལུང་དབེན་རྩར་སྦས་སོ༔ ཆ་ལུང་གི་ཁྱི་རྟགས་དབེན་རྩ་ནས་སངས་རྒྱས་ཡེ་ཤེས་རིན་པོ་ཆེས་སྦས་མ་ཐག་པའི་གནུབས་ཀྱི་ངན་སྔགས་བརྒྱ་དང་བཅུ་བཏོན་ནས་གནུབས་ཀྱི་ཕུང་པོ་རི་བོ་ཆེ་ལ་སླར་སྦས་སོ༔ དེ་ལྟར་དམ་པ་དང་ལན་གསུམ་མཇལ་སྙན་བརྒྱུད་མན་ངག་རིགས་མི་འདྲ་བ་བདུན་མཆན་དུ་བཏབ་བོ་༔ བཀའི་སྲོལ་མི་ཉམས་པའི་ཕྱིར་རོ༔ དེ་ལྟར་གྲུབ་པ་ཐོབ་ནས་ཀྱང་ལོ་ལྔ་བཅུ་ཐམ་པ་རོང་དང་བྱར་ཕྱི་གོང་དུ་བཞུགས་སོ༔ གྲུབ་པ་མ་ཐོབ་པའི་གོང་དུ་ལོ་བདུན་ཅུ་རྩ་ལྔ་སྟེ་བརྒྱ་དང་ཉེར་ལྔ་ན་ཟག་བཅས་མི་སྣང་བར་སྐུ་གཤེགས་སོ༔ ཞལ་ཆེམས་གསང་བའི་གནད་གསུམ་བྱ་བ་བབས་ཏེ༔ དེ་ནི་མཁའ་འགྲོ་མ་རྣམས་ཀྱིས་ཨོ་རྒྱན་གྱི་ཡུལ་དུ་སྤྱན་དྲངས་ཏེ་བསྣམས་སོ༔ གོང་གི་ཏི་སྒྲོ་ལ་བསྒོམས་པའི་མྱང་བཀའ་གདམས་པ་བྱ་བ་དེ་ཡང་བསྒོམས་ནས་ལོ་བཅོ་ལྔ་ན་རང་རྒྱུད་རྣམ་པར་དག་ནས་ཟག་པ་ཟད་པ་དང་མངོན་པར་ཤེས་པ་ལ་སོགས་ཏེ་ཡོན་ཏན་མང་པོ་བྱུང་ནས༔ དེ་ནས་ལོ་སུམ་ཅུ་རྩ་གཉིས་ན་གྲོངས་ནས༔ ནམ་མཁའ་འོད་དང་སྒྲ་དང་སིལ་སྙན་མང་པོ་གྲགས་པ་ལ་སོགས་པ་དང་༔ ཡུམ་མི་དེ་ཀུན་གྱི་སྣང་བ་འགྱུར་ནས་རང་བཞིན་གྱིས་བསམ་གཏན་ལ་གནས་པ་ཡང་བྱུང་ངོ་༔ རང་གི་སྙན་བརྒྱུད་གྱི་གདམས་པ་གནང་བའི་སྒོམ་ཆེན་པ་འགའ་ཡང་བསྒོམས་པས་མཛེ་གསོས་པ་ལ་སོགས་པའི་རྟགས་བཟང་པོ་བྱུང་ངོ་༔ དེ་ལྟར་ལྕེ་བཙུན་མི་སྣང་བའི་སར་གཤེགས་ནས་ལོ་སུམ་ཅུ་ན་རོང་གི་

མནར་མདའི་ལྕེ་སྒོམ་ནག་པོས་ཕྱི་ནང་གསང་བ་གསུམ་གྱི་བཀའ་བརྒྱུད་རྣམས་བཏོན་ནས་རང་ལས་གཞན་ལ་མ་སྤེལ་བར་གདམས་པའོ༔ དབུས་གཙང་དུ་དར་ཞིང་རྒྱས་པར་མཛད་དོ༔ ལྕེ་སྒོམ་གྱིས་ཐོན་ནས་ལོ་ལྔ་བཅུ་ན་བདག་གིས་གསང་བ་བླ་ན་མེད་པའི་སྐོར་འདི་རྣམས་བཏོན་ནས་རང་ལས་གཞན་ལ་མ་སྤེལ་བར་གདམས་པའོ༔ འདིའི་དུས་ན་སངས་རྒྱས་མྱ་ངན་ལས་འདས་ནས་ལོ་སྟོང་ལྔ་བརྒྱ་དང་དྲུག་ཅུ་རྩ་བརྒྱད་ལོན་པ་ལགས་སོ༔ དེ་ལྟར་བསྟན་པ་སོ་སོའི་དར་ནུབ་དང་འཕེལ་འགྲིབ་ཇི་ལྟར་འབྱུང་བ༔ བདག་པོ་གང་གིས་བྱེད་པར་འགྱུར་བ་ལ་སོགས་པ་ཚེ་ལོ་བཅུ་པ་ཡན་ཆད་ཀྱི་བབས་སོ་རྣམས་ཡོད་དེ་འདིར་ཡི་གེ་མང་གིས་དོགས་ནས་མ་བྲིས་སོ༔ ལོ་རྒྱུས་ཞེས་བྱ་བ་ལོ་དུ་མ་ལོན་པའི་རྒྱུས༔ ད་ལྟ་མཐོང་བ་དང་འདྲ་བར་གཏན་ལ་ཕེབས་པས་ན་ལོ་རྒྱུས་ཞེས་བྱའོ༔ དེ་ཡང་ཡང་དག་པར་རྫོགས་པའི་སངས་རྒྱས་བསྡུས་ནས་སྐྱེས་པ་ནས་ལོ་དཔག་ཏུ་མེད་པ་ནས༔ དེ་ལྟར་གྱི་ཡོ་གིའི་ལོ་རྒྱུས་ཡོད་པས་ན་ལོ་རྒྱུས་ཀྱི་དོན་ཏོ༔ བརྒྱུད་པའི་དགོངས་པ་ནི་རས་ཆོད་དང་༔ གཟུ་ལུམས་དང་༔ བསྣན་འཕྲི་མེད་པ་དང་༔ མན་ངག་ཁ་མི་གཅིག་གི་སྒྲོ་བཏགས་ཀྱིས་བསླད་དུ་མི་བཏུབ་པས་ན་ཡིད་ཆེས་པའི་དགོས་པ་ཡོད་དོ༔ ཡང་དག་པར་རྫོགས་པའི་སངས་རྒྱས་ནས༔ ད་ལྟ་ཡན་ཆད་དུ་ཚིག་གིས་མ་བ སླད་ཅིང་གཅིག་ཐོག་ཏུ་གཅིག་བབས་པས་ན་བརྒྱུད་པའོ༔ དཔེར་ན་དངོས་པོའི་རྫས་ལག་ཏུ་བརྒྱུད་པའམ༔ རྒྱལ་པོའི་བཀའ་རྟགས་ལྟ་བུའམ༔ རྒྱས་

བཏབ་པའི་རིན་པོ་ཆེ་ལ་སྐྱེ་འབྲི་མི་བཏུབ་པ་ལྟ་བུའོ༔ དེ་ཡང་འདི་ལ་བྱིན་རླབས་ཀྱི་བརྒྱུད་པ་འདས་རྗེས་རྒྱུན་མ་ཆད་པ་དང་༔ ཚིག་གིས་བརྒྱུད་པ་བཀའ་བརྒྱུད་ཟམ་མ་ཆད་པ་དང་༔ དོན་གྱི་བརྒྱུད་པ་ལ་མངོན་སུམ་གྱི་གནད་ལ་ཡིད་དཔྱོད་ཀྱིས་དཔྱད་དུ་མི་རྙེད་པས་འགྱུར་མེད་གསང་ཆེན་གྱི་རབས་མ་ཆད་པ་དང་༔ བསོད་ནམས་བསགས་པའི་བརྒྱུད་པ་གཏེར་ལ་ལོངས་སྤྱོད་པའི་གང་ཟག་བར་མ་ཆད་པ་མི་ཡུལ་དུ་སྣང་བར་བྱས་པའོ༔ དེའི་ཕྱིར་ན་རབ་ཏུ་ཡིད་ཆེས་པའི་གནད་དོ༔ ལོ་རྒྱུས་ཆེན་པོ་ཞེས་བྱ་བ་སྐལ་ལྡན་གྱི་ཡིད་ཆེས་པའི་གནད་བསྟན་པ་རྫོགས་སོ༔

སངས་རྒྱས་ཀྱི་འདས་རྗེས་གསུམ་གྱི་རྒྱུད།

སངས་རྒྱས་ཀྱི་འདས་རྗེས་གསུམ་གྱི་རྒྱུད་ཅེས་བྱ་བ་བཞུགས་སོ༔ མན་ངག་གོ་གཅིག་པ༔

རྒྱ་གར་སྐད་དུ༔ སུ་ཀ་མ་ཏ་ཨ་ལ་ཡ་དེ་ཀ་ར་ཨ་ཏི་ཏ་བུདྡྷ་ཏནྟྲ ་ནཱ་མ༔ བོད་སྐད་དུ༔ དགའ་ལྡན་གནས་སུ་སངས་རྒྱས་ཀྱི་ཞལ་ཆེམས་དང་པོའི་རྒྱུད་ཅེས་བྱ་བ༔ བཅོམ་ལྡན་འདས་ཀུན་རིག་དཔལ་གྱི་དཔལ་རྣམ་པར་སྣང་མཛད་ལ་ཕྱག་འཚལ་ལོ༔ བཅོམ་ལྡན་འདས་དྲུག་པ་རྡོ་རྗེ་འཆང་ཆེན་པོ་དགའ་ལྡན་ལྷའི་གནས་བཀོད་པ་ཚད་མེད་པའི་གཞལ་ཡས་ཁང་ན༔ བྱང་ཆུབ་སེམས་དཔའ་འཇམ་དཔལ་དབྱངས་དང་༔ སྤྱན་རས་གཟིགས་དབང་ཕྱུག་དང་༔ ཕྱག་ན་རྡོ་རྗེ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་དང་བཅས་པ་སེངྒེ་ལྟ་བུའི་གཟིགས་སྟངས་ཀྱིས་བཞུགས་སོ༔ གཞན་ཡང་ཤར་ཕྱོགས་མངོན་པར་དགའ་བ་དང་༔ ལྷོ་དཔལ་དང་ལྡན་པའི་ཞིང་ཁམས་དང་༔ ནུབ་བདེ་བ་ཅན་གྱི་ཞིང་ཁམས་དང་༔ བྱང་ལས་རབ་གྲུབ་པའི་ཞིང་ཁམས་ཀྱི་བྱང་ཆུབ་སེམས་དཔའ་བྱེ་བ་ཁྲག་ཁྲིག་རྣམས་ཀྱང་དེེར་མཆོད་པའི་ཚོགས་དཔག་ཏུ་མེད་པས་མཆོད་ནས༔ སེང་གེ་ལྟ་བུའི་གཟིགས་སྟངས་ཀྱིས་བཞུགས་སོ༔ གཞན་ཡང་རྡོ་རྗེ་མཁའ་འགྲོ༔ རིན་ཆེན་མཁའ་འགྲོ༔ པདྨ་མཁའ་འགྲོ༔ ལས་ཀྱི་མཁའ་འགྲོ་རྣམས་ཀྱིས་མཆོད་པའི་ཚོགས་དཔག་ཏུ་མེད་པས་མཆོད་ནས་སེང་གེ་ལྟ་བུའི་གཟིགས་སྟངས་ཀྱིས་འཁོད་དོ༔ དེ་ནས་བཅོམ་ལྡན་འདས་ཆོས་ཉིད་མངོན་སུམ་དུ་སྣང་བ་ཞེས་བྱ་བའི་ཏིང་འཛིན་ལ་སྙོམས་པར་བཞུགས་སོ༔ སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱིས་སྤྱན་གཉིས་ནས་འོད་ཁ་དོག་སྣ་ཚོགས་ཀྱི་རྡོ་རྗེ་ལུ་གུ་རྒྱུད་ཀྱི་ཐིག་ལེ་དང་༔ ཐིག་ཕྲན་དང་༔ ཕྲ་བ་དང་༔ རབ་ཏུ་

ཕྲ་བ་དང་༔ ཤིན་ཏུ་ཕྲ་བ་དང་༔ རབ་ཏུ་འགྱུར་བ་ཉིད་དང་༔ ཡང་བ་དང་༔ རྣམ་པར་འཕྲིག་པ་དང་༔ འཁྱུག་པ་དང་༔ ཚོམ་བུ་དང་༔ མུ་ཁྱུད་དང་༔ དེ་ལ་སོགས་པའི་འོད་ཀྱིས་སྟེང་འོག་གང་བ་དང་༔ ཕྱོགས་མཚམས་ཐམས་ཅད་དང་༔ འཇིག་རྟེན་གྱི་ཁམས་ཐམས་ཅད་ཁྱབ་པར་གྱུར་པ་དང་༔ དེ་ནས་བཅོམ་ལྡན་འདས་ལ་འཇམ་དཔལ་དང་༔ སྤྱན་རས་གཟིགས་དང་༔ ཕྱག་ན་རྡོ་རྗེ་དང་༔ བྱམས་པ་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་དཔག་ཏུ་མེད་པ་རྣམས་མགྲིན་གཅིག་ཏུ༔ བཅོམ་ལྡན་འདས་ལ་ཐོག་མའི་སངས་རྒྱས་རྣམས་དང་༔ ད་ལྟར་གྱི་སངས་རྒྱས་རྣམས་དང་༔ མ་འོངས་པའི་སངས་རྒྱས་རྣམས་དང་༔ སངས་རྒྱས་ཐམས་ཅད་མ་ལུས་ཤིང་ལུས་པ་མེད་པ་རྣམས་དང་༔ རྡོ་རྗེ་ལུ་གུ་རྒྱུད་ལ་བརྟེན་ནས་སངས་ཇི་ལྟར་རྒྱ་བ་ལགས༔ བྱང་ཆུབ་སེམས་དཔའ་རྣམས་དང་༔ ཡེ་ཤེས་ཀྱི་མཁའ་འགྲོ་མ་རྣམས་ཀྱིས་རྡོ་རྗེ་ལུ་གུ་རྒྱུད་ལ་ཇི་ལྟར་བསླབ་པར་བགྱི༔ བཅོམ་ལྡན་འདས་ཀྱིས་བཀའ་སྩལ་པ༔ འདས་པའི་སངས་རྒྱས་རྣམས་ཀྱིས་ཀྱང་རྡོ་རྗེ་ལུ་གུ་རྒྱུད་ལ་བརྟེན་ནས་སངས་རྒྱས༔ མ་འོངས་པའི་སངས་རྒྱས་རྣམས་ཀྱང་རྡོ་རྗེ་ལུ་གུ་རྒྱུད་ལ་བརྟེན་ནས་སངས་རྒྱ་བར་འགྱུར༔ ད་ལྟར་གྱི་སངས་རྒྱས་རྣམས་ཀྱང་རྡོ་རྗེ་ལུ་གུ་རྒྱུད་ལ་མ་བརྟེན་པར་སངས་རྒྱས་མི་ཐོབ་བོ༔ ཞེས་གསུངས་པས༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་འབྲས་ཀྱི་ཞིང་ཏིལ་གྱི་གོང་བུ་ལྟ་བུར་སྐུ་མངོན་སུམ་དུ་གསལ་ནས༔ དེ་དེ་བཞིན་ནོ་ཞེས་མགྲིན་ཅིག་ཏུ་གསུངས་སོ༔ དེ་ནས་བཅོམ་ལྡན་

འདས་ཀྱིས་བཀའ་སྩལ་པ༔ བྱང་ཆུབ་སེམས་དཔའ་རྣམས་དང་༔ ཁྱེའུ་དང་བུ་མོའི་གཟུགས་སུ་འདུག་པ་རྣམས་དང་༔ རིགས་ལྔའི་མཁའ་འགྲོ་མ་རྣམས་ཉོན་ཅིག༔ སྐྱེ་བ་གཅིག་གིས་སངས་རྒྱ་བར་འདོད་ན༔ ལུས་ངག་ཡིད་གསུམ་གྱིས་སྐུ་གསུམ་གྱི་གཟིགས་སྟངས་དང་མ་བྲལ་བར་གྱིས་ཤིག༔ འཁོར་བའི་ཆོས་ལས་འདས་ནས་ཆོས་སྐུ་མངོན་སུམ་དུ་གྱུར་པར་འདོད་ན༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ ཡང་དག་པར་རིག་པའི་སྤྱན་དང་ལྡན་པར་འདོད་ན་རྡོ་རྗེ་ལུ་གུ་རྒྱུད་ལ་ལྟོས་ཤིག༔ དམིགས་པ་མེད་པ་ནམ་མཁའ་ལྟ་བུའི་དོན་མཐོང་བར་འདོད་ན༔ རྡོ་རྗེ་ལུ་གུ་རྒྱུད་ཀྱི་སྐུ་དང་ཟེར་ལ་ལྟོས་ཤིག༔ འབད་རྩོལ་མེད་པར་འགྲོ་བའི་དོན་བྱེད་པར་འདོད་ན༔ རྡོ་རྗེ་ལུ་གུ་རྒྱུད་ལ་ལྟོས་ཤིག༔ སྐྱེ་འཆི་མེད་པ་རྡོ་རྗེའི་ལུས་ཐོབ་པར་འདོད་ན༔ རྡོ་རྗེ་ལུ་གུ་རྒྱུད་ལ་ལྟོས་ཤིག༔ ཆོས་ཐམས་ཅད་ཀྱི་དེ་ཁོ་ན་ཉིད་ཤེས་པར་འདོད་ན༔ རྡོ་རྗེ་ལུ་གུ་རྒྱུད་ལ་ལྟོས་ཤིག༔ ཆོས་ཐམས་ཅད་ཀྱི་ལྟ་བར་སྒོམ་པ་དང་༔ སྤྱོད་པ་འབྲས་བུ་དབྱེར་མེད་པར་འདོད་ན༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ སྣང་བ་ཐམས་ཅད་སྣང་མེད་འོད་གསལ་ཏུ་འཆར་བར་འདོད་ན་ཡང་༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ ཆོས་ཐམས་ཅད་དེ་བཞིན་ཉིད་ཀྱི་ཡེ་ཤེས་རྟོགས་པར་འདོད་ན་ཡང་༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ སྤྱན་ལྔ་ཐོབ་པར་འདོད་ན་ཡང་༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ དུ་མ་མེད་པའི་ཆོས་ཀྱི་སྐུ་ཐིག་ལེ་ཉག་གཅིག་ཐོབ་པར་འདོད་ན་ཡང་༔ རྡོ་རྗེ་ལུ་གུ་རྒྱུད་ཀྱི་ཡེ་ཤེས་ཀྱི་སྐུ་ལ་ལྟོས་ཤིག༔ དབྱིངས་དང་རིག་པའི་ཡེ་ཤེས་ཀྱི་དོན་ཁོང་དུ་ཆུད་པར་

འདོད་པ་ན་ཡང་༔ རྡོ་རྗེ་ལུ་གུ་རྒྱུད་ཀྱི་སྐུ་ལ་ལྟོས་ཤིག༔ ཡང་དག་པའི་སྐུ་དང་ཞིང་ཁམས་ཡོངས་སུ་རྫོགས་པར་འདོད་ན་ཡང་༔ རྡོ་རྗེ་ལུ་གུ་ཀྱི་སྐུ་ལ་ལྟོས་ཤིག༔ འཕྲིག་པ་དང་༔ འགུལ་བ་དང་༔ འཁྱུག་པ་དང་༔ གཡོ་བ་དང་༔ རང་ཤར་བ་དང་༔ གསལ་བའི་ཟེར་ལ་ལྟོས་ཤིག༔ རྡོ་རྗེ་ལུ་གུ་རྒྱུད་རང་ཡིན་ཏེ༔ གཞན་དུ་འཛིན་པ་མེད་པར་ལྟོས་ཤིག༔ གསང་བ་སྔགས་ཀྱི་དཀྱིལ་འཁོར་ལྟ་བར་འདོད་ན༔ རྡོ་རྗེ་ལུ་གུ་རྒྱུད་ལ་ལྟོས་ཤིག༔ དཀྱིལ་འཁོར་གྱི་ལྷ་ཚོགས་རྣམས་ལྟ་བར་འདོད་ན༔ རྡོ་རྗེ་ལུ་གུ་རྒྱུད་ཀྱི་ཟེར་ཐག་རྣམས་ལ་ལྟོས་ཤིག༔ ཀྱེ་རིགས་ཀྱི་བུ་རྣམས་སངས་རྒྱས་ཀྱི་གཟིགས་སྟངས་ཀྱིས་མི་གཡོ་བར་གཟིགས་ཤིག༔ རང་སངས་རྒྱས་ཀྱིི་གཟིགས་སྟངས་ཀྱིས་སྟེང་འོག་ཏུ་གཟིགས་ཤིག༔ ཉན་ཐོས་ཀྱི་གཟིགས་སྟངས་ཀྱིས་ཟུར་ལ་གཟིགས་ཤིག༔ དྲང་སྲོང་གི་གཟིགས་སྟངས་ཀྱིས་མཚམས་སུ་གཟིགས་ཤིག༔ དེ་ལྟར་རྡོ་རྗེ་ལུ་གུ་རྒྱུད་ལ་ཕྱོགས་བཞི་མཚམས་རྣམས་སུ༔ རྒྱ་མཚོ་ཅོག་བཞག་གི་དགོངས་པས་རྣམ་རྟོག་མི་གཡོ་བར་གཟིགས་ཤིག༔ ནམ་མཁའ་ཅོག་བཞག་གིས་ཡིད་རྟོག་པས་མི་གཡོ་བར་གཟིགས་ཤིག༔ རི་བོ་ཅོག་བཞག་གིས་གཟིགས་སྟངས་གསུམ་དང་མི་འབྲལ་བར་གཟིགས་ཤིག༔ དེ་སྐད་ཅེས་གསུངས་ནས༔ སངས་རྒྱས་ཀྱི་ཞིང་ཁམས་ཐམས་ཅད་འཇའ་དང་འོད་དུ་གྱུར༔ ཀུན་ཏུ་བཟང་པོའི་འོད་ལྔའི་ཚོམ་བུ་བྱེ་བ་ཁྲག་ཁྲིག་གིས་ཞིང་ཁམས་ཐམས་ཅད་གང་བར་གྱུར་ཏོ༔ དེ་ནས་རྡོ་རྗེ་སེམས་དཔས་གདུང་བའི་སྨྲེ་སྔགས་ཆེན་པོ་བཏོན་ནས༔ འཇིག་རྟེན་སྟོན་པ་སྒྲོན་མེ་མ་བཞུགས་ན༔ འཇིག་རྟེན་འཁྲུལ་

པའི་མུན་པ་གང་གིས་སེལ༔ ཞེས་གསུངས་པས༔ རང་བྱུང་གི་ཡི་གེ་ཤེལ་གྱི་ཟ་མ་ཏོག་དང་བཅས་པ་འོད་ཀྱི་ནང་ནས་ཕྱག་གཡས་པས་སྡམས་པ་གཟིགས་པས༔ ཞིང་ཁམས་ཐམས་ཅད་ཀྱི་སངས་རྒྱས་རྣམས་ཀྱང་༔ ཆོས་ཉིད་མངོན་སུམ་ལུ་གུ་རྒྱུད་འདི་ལ་བརྟེན་ནས་སངས་རྒྱས་པར་གཟིགས་པས་གདུང་བ་སེལ་བར་གྱུར་ཏོ༔ རང་བྱུང་གི་ཡི་གེ་འདི་རིགས་པའི་ཡེ་ཤེས་སྟོན་པའི་སྟོན་པ་སྟེ༔ རྟོགས་པས་སངས་རྒྱས་སུ་འགྱུར་རོ༔ བསྟན་པའི་ཁ་དོག་ཏུ་བྲིས་ནས་གང་གི་ལུས་ལ་བཏགས་པ་དེ༔ བར་མ་དོར་རང་གི་ལུས་འཇའ་འོད་དུ་འགྱུར་ཏེ༔ ཚོམ་བུ་ལ་ཐིམ་ནས་སྐྱེ་བ་གཅིག་གིས་ལོངས་སྤྱོད་རྫོགས་པའིི་སྐུ་མངོན་དུ་འབྱུང་ངོ་༔ རང་བྱུང་གི་ཡི་གེ་སངས་རྒྱས་བསྟན་པ་ལ་བུ་གཅིག་པར་གྱུར་པ༔ དཔལ་ཀུན་ཏུ་བཟང་པོའི་ཕྱག་ནས༔ དཔལ་རྡོ་རྗེ་སེམས་དཔའི་ཕྱག་ཏུ་བབས་པ༔ དགའ་ལྡན་གནས་ཀྱི་འདས་རྗེས་དང་པོའོ༔ ༈ ༔རྒྱ་གར་སྐད་དུ༔ བུདྡྷ་སུ་ཁ་མ་ཏ་ཨ་ལ་ཡེ་ཏེ་ཀ་ར་ཏནྟྲ་དྷུ་ཡི་ནཱ་མ༔ བོད་སྐད་དུ༔ དགའ་ལྡན་གྱི་གནས་སངས་རྒྱས་ཀྱི་ཞལ་ཆེམས་གཉིས་པའི་རྒྱུད་ཅེས་བྱ་བ༔ དཔལ་གྱི་དཔལ་རྣམ་པར་སྣང་མཛད་ལ་ཕྱག་འཚལ་ལོ༔ བཅོམ་ལྡན་འདས་དགའ་ལྡན་གྱི་གནས་ན༔ ཕྱོགས་བཅུའི་སངས་རྒྱས་ཀྱི་ཞིང་གི་བྱང་ཆུབ་སེམས་དཔའ་བྱེ་བ་ཁྲག་ཁྲིག་རྣམས་དང་༔ རྡོ་རྗེའི་རིགས་དང་༔ རིན་པོ་ཆེའི་རིགས་དང་༔ པདྨའི་རིགས་དང་༔ ལས་ཀྱི་རིགས་ཀྱི་མཁའ་འགྲོ་མ་བྱེ་བ་དང་བཅས་པ་རྣམས༔ སྤྲུལ་པའི་མཆོད་པ་དཔག་ཏུ་མེད་པ་རྣམས་ཀྱིས་མཆོད་ནས་བཞུགས་སོ༔ དེ་ནས་བཅོམ་ལྡན་འདས་གླང་པོ་ཆེའི་གཟིགས་སྟངས་ཀྱིས༔ ཆོས་ཉིད་མངོན་སུམ་

དུ་སྣང་བའི་ཏིང་ངེ་འཛིན་ལ་སྙོམས་པར་ཞུགས་སོ༔ དེ་ནས་རྡོ་རྗེ་སེམས་དཔའ་སྟན་ལས་ལངས་ཏེ༔ ཀྱེ་ཀྱེ་སྟོན་པ་ཀུན་ཏུ་བཟང་༔ འཁོར་འདས་རུ་ཤན་ཇི་ལྟར་དབྱེ༔ སྐུ་གསུམ་གཟིགས་སྟངས་ཇི་ལྟར་བྱ༔ ཆོས་ཉིད་མངོན་སུམ་ཇི་ལྟར་གསལ༔ སྐྱེ་འཆི་བར་དོ་ཇི་ལྟར་བཟུང་༔ བདག་ཅག་ཀུན་ལ་བཤད་དུ་གསོལ༔ ལེགས་སོ་རྡོ་རྗེ་སེམས་དཔའ་ཁྱོདཿ ཀྱེ་ཀྱེ་ཀྱེ་ཧོ་རིགས་ཀྱི་བུ༔ འཁོར་འདས་རུ་ཤན་འདི་ལྟར་དབྱེ༔ འགྲོ་དྲུག་ལུས་ཀྱི་སྤྱོད་པ་བརྩམ༔ ལུས་ཀྱི་འཛིན་པ་དག་པ་ན༔ ལུས་ཀྱི་རུ་ཤན་ཕྱེད་པ་ཡིན༔ འགྲོ་དྲུག་ངག་གི་སྐད་རྣམས་བརྩམ༔ བརྗོད་མེད་དག་ལ་གནས་པ་ན༔ ངག་གི་རུ་ཤན་ཕྱེད་པ་ཡིན༔ འགྲོ་དྲུག་ཡིད་ཀྱིས་བསམ་པ་བརྩམ༔ ཨ་བསམ་དུ་མེད་པ་རྟོགས་པ་ན༔ ཡིད་ཀྱི་རུ་ཤན་བྱེད་པ་ཡིན༔ ཀྱེ་ཀྱེ་ཀྱེ་ཧོ་རིགས་ཀྱི་བུ༔ མྱ་ངན་འདས་པའི་རྗེས་སུ་ཆོས་ཀྱི་སྐུ་སེང་གེ་ལྟ་བུའི་གཟིགས་སྟངས་ལ་མཁས་པར་གྱིས་ཤིག༔ ཚོམ་བུ་ལྔ་ལྔ་བྱེ་བ་ཁྲག་ཁྲིག་གི་དགོངས་པ་མངོན་དུ་གསལ་བར་འགྱུར་རོ༔ ཚོམ་བུ་ལྔ་ལྔ་ཉི་ཤུ་རྩ་ལྔའི་དགོངས་པ་མངོན་དུ་གསལ་ལོ༔ ལོངས་སྐུ་གླང་པོ་ཆེའི་གཟིགས་སྟངས་ལ་མཁས་པར་གྱིས་ཤིག༔ ཚོམ་བུ་ལྔ་ལྔ་བྱེ་བ་ཁྲག་གི་དགོངས་པ་མངོན་དུ་གསོལ་བར་འགྱུར་རོ༔ སྤྲུལ་པའི་སྐུ་དྲང་སྲོང་གི་གཟིགས་སྟངས་ལ་མཁས་པར་གྱིས་ཤིག༔ འབད་རྩོལ་མེད་པའི་སྙིང་རྗེས་འགྲོ་བ་རྣམས་དང་མི་ཕྱེད་པ་ཅིག་འཆར་བར་འགྱུར་རོ༔ ཀྱེ་ཀྱེ་རིགས་ཀྱི་བུ༔ ང་མྱ་ངན་ལས་འདས་པའི་རྗེས་སུ༔ མི་མེད་པའི་གནས་སུ་སངས་རྒྱས་ཀྱི་དགོངས་པ་རང་གི་སེམས་ལ་འཆར་བས༔ ཆོས་ཉིད་མངོན་སུམ་

དུ་འོད་དང་༔ འོད་ཀྱི་ཛ་དུ་དང་༔ ཐིག་ལེ་མུ་ཁྱུད་དང་༔ ཚོམ་བུ་གཅིག་པའི་མུ་ཁྱུད་དང་༔ ཚོམ་བུ་གཉིས་པའི་མུ་ཁྱུད་དང་༔ ཚོམ་བུ་གསུམ་པའི་མུ་ཁྱུད་དང་༔ ཚོམ་བུ་བཞི་པའི་མུ་ཁྱུད་དང་༔ ཚོམ་བུ་ལྔ་པའི་མུ་ཁྱུད་དང་༔ ཚོམ་བུའི་ནང་དུ་དེ་བཞིན་གཤེགས་པའི་ཞལ་དང་༔ ཕྱེད་སྐུ་དང་༔ སྐུ་ཡོངས་སུ་རྫོགས་པ་དང་༔ གདན་ཁྲི་དང་ཚོམ་བུ་འཆར་བ་ལྟར་གསལ་བར་འགྱུར་རོ༔ ཀྱེ་ཀྱེ་རིགས་ཀྱི་བུ༔ ང་མྱ་ངན་ལས་འདས་པའི་རྗེས་སུ༔ རིགས་ཀྱི་བུས་ལུས་དབེན་སེམས་དབེན་པ༔ ངག་མི་སྨྲ་བ༔ ཆོས་ཉིད་མངོན་སུམ་རྡོ་རྗེ་ལུ་གུ་རྒྱུད་ལ་སྐྱོང་བས༔ འོད་ཀྱི་ཛ་དུའི་ནང་དུ་ཚོམ་བུ་གཅིག་པ་དང་༔ ཚོམ་བུ་གཉིས་པ་དང་༔ ཚོམ་བུ་གསུམ་པ་དང་༔ ཚོམ་བུ་བཞི་པ་དང་༔ ཚོམ་བུ་གང་མངོན་དུ་གྱུར་པའི་འཕྲོ་ལ་འཆི་བའི་དུས་བྱས་ན༔ བར་དོ་དང་པོ་ལ་སྐྱེ་ཤི་བར་དོར་གང་གསལ་བའི་ཚོམ་བུ་ནམ་མཁའི་དཀྱིལ་དུ་མཐོང་བར་འགྱུར་རོ༔ ཚོམ་བུ་རང་གི་སྙིང་གར་ཟུག་པ་སྙམ་བྱེད་པའི་དུས་སུ༔ ལུས་མེད་ཀྱང་ཡོད་པར་འཛིན་པ་དང་༔ དེའི་དུས་སུ་ནམ་མཁའི་ཚོམ་བུ་ལ་ལུས་གནས་པར་གྱིས་ལ༔ ལུས་ཡིད་ལ་མ་བྱེད་ཅིག༔ དེ་བཞིན་དུ་ཚོམ་བུ་གཉིས་པ་དང་༔ གསུམ་པ་དང་༔ བཞི་པ་དང་༔ ལྔ་པ་དང་༔ དྲུག་པ་གང་ནམ་མཁའ་ལ་ཤར་བའི་དུས་སུ་སེམས་ལ་ཞོག་ཅིག་༔ དེ་བཞིན་དུ་ལུས་ཡིད་ལ་མ་བྱེད་ཅིག༔ ཚོམ་བུ་ཞག་གྲངས་སུ་གནས་ཏེ༔ བཅུ་ཚན་ལྔའི་ཞལ་ལ་ལོངས་སྤྱོད་རྫོགས་པའི་སྐུ་ཐོབ་པར་འགྱུར་རོ༔ ཞེས་གསུངས་ནས༔ དཔལ་ཀུན་ཏུ་བཟང་པོའི་སྐུ་མི་སྣང་བར་འོད་དུ་གྱུར་ནས༔ རྡོ་རྗེ་སེམས་དཔས་གདུང་བའི་སྨྲེ་སྔགས་བཏོན་པས༔

ཕྱག་གཡས་པ་འོད་ཀྱི་ནང་ནས་ཤེལ་གྱི་ཟ་མ་ཏོག་གི་ནང་དུ་རང་བྱུང་གི་ཡི་གེ་འདི་རྡོ་རྗེ་སེམས་དཔའི་ཕྱག་ཏུ་བབས་སོ༔ སངས་རྒྱས་བསྟན་པའི་མི་ལ་རང་བྱུང་གི་ཡི་གེ་བསྟན་པས༔ བསྟན་པའི་བུ་གཅིག་ཏུ་གྱུར་ཏོ༔ དགའ་ལྡན་གྱི་གནས་ཀྱི་སངས་རྒྱས་ཀྱི་འདས་རྗེས་གཉིས་པའོ༔ ༈ ༔རྒྱ་གར་སྐད་དུ༔ སུ་ཁ་བཱ་ཏི་བུདྡྷ་དེ་ཀ་ར་ཏཱི་ནི་ཏནྟྲ་ནཱ་མ༔ བོད་སྐད་དུ༔ དགའ་ལྡན་གནས་སུ་སངས་རྒྱས་ཀྱི་ཞལ་ཆེམས་གསུམ་པའི་རྒྱུད་ཅེས་བྱ་བ༔ དཔལ་གྱི་དཔལ་རྣམ་པར་སྣང་མཛད་ལ་ཕྱག་འཚལ་ལོ༔ བཅོམ་ལྡན་འདས་དགའ་ལྡན་ལྷའི་གནས་ན༔ སངས་རྒྱས་ཀྱི་ཞིང་ཁམས་ལུས་པ་མེད་པའི་ཞིང་གི་བྱང་ཆུབ་སེམས་དཔའ་བྱེ་བ་ཁྲག་ཁྲིག་མེ་ཏོག་དང་མཆོད་པའི་ཚོགས་དཔག་ཏུ་མེད་པས༔ བཅོམ་ལྡན་འདས་ལ་མཆོད་ཅིང་༔ དྲང་སྲོང་ལྟ་བུའི་གཟིགས་སྟངས་ཀྱིས་བཞུགས་སོ༔ གཞན་ཡང་མཁའ་འགྲོ་མ་བྱེ་བ་ཁྲག་ཁྲིག་དཔག་ཏུ་མེད་པས༔ བཅོམ་ལྡན་འདས་ལ་མཆོད་ནས༔ དྲང་སྲོང་ལྟ་བུའི་གཟིགས་སྟངས་ཀྱིས་འཁོད་དོ༔ དེ་ནས་བཅོམ་ལྡན་འདས་དྲང་སྲོང་ལྟ་བུའི་གཟིགས་སྟངས་ཀྱིས༔ ཆོས་ཉིད་མངོན་སུམ་དུ་སྣང་བའི་ཏིང་ངེ་འཛིན་ལ་སྙོམ་པར་ཞུགས་སོ༔ དེ་ནས་རྡོ་རྗེ་སེམས་དཔའ་སྟན་ལས་ལངས་ཏེ༔ ཀྱེ་ཀྱེ༔ སྟོན་པ་ཀུན་ཏུ་བཟང་༔ ཆོས་ཉིད་རྡོ་རྗེ་ལུ་གུ་རྒྱུད་སྐྱོང་བའི་གནས་ཇི་ལྟ་བུ༔ ལུས་ངག་ཇི་ལྟ་བུ༔ སྨིན་པའི་ཚད་ཇི་ལྟར་ལགས༔ སྨིན་ཚད་འབྲས་བུ་ཇི་ལྟར་ཐོབ༔ བདག་ཅག་རྣམས་ལ་བསྟན་དུ་གསོལ༔ ལེགས་སོ་རྡོ་རྗེ་སེམས་དཔའ་ཉོན༔ རབ་ནི་མཁའ་འགྲོ་འདུ་བའི་གནས༔ འབྲིང་ནི་རི་བོའི་སྤོ་མཐོན་དབུས༔ ཐ་མ་སྒྲོན་མ་ཤར་

སྣའི་གནས༔ དེར་ནི་མངོན་སུམ་བསྐྱང་བར་བྱ༔ ལུས་ནི་མིས་མི་མཐོང་བར་བྱ༔ ངག་ནི་མི་སྨྲ་གཅད་པར་བྱ༔ ཡིད་ནི་རྣམ་རྟོག་འགྱུ་སྒོ་བཀག༔ ཀྱེ་ཀྱེ་ནམ་མཁའི་སྤྲིན་བྲལ་ལ༔ གཟིགས་སྟངས་གསུམ་པོ་གང་རུང་གིས༔ སྨིན་མཚམས་ཡ་ཕིབས་སོར་བཞི་ལ ༔ འོད་དང་འོད་ཀྱི་འཕྲོ་འདུ་ལྟ༔ མུ་ཁྱུད་ཚོམ་བུ་གཅིག་པ་དང་༔ མུ་ཁྱུད་ཚོམ་བུ་གཉིས་པ་དང་༔ མུ་ཁྱུད་ཚོམ་བུ་གསུམ་པ་དང་༔ མུ་ཁྱུད་ཚོམ་བུ་བཞི་པ་དང་༔ མུ་ཁྱུད་ཚོམ་བུ་ལྔ་པ་ནི༔ དང་པོ་སྨིན་པའི་ཚད་དུ་བྱ༔ ཀྱེ་ཀྱེ་སྨིན་ཚད་གཉིས་པ་ནི༔ མུ་ཁྱུད་དང་པོ་ལྔ་པ་ལ༔ ཞལ་ནི་གཙུག་ཏོར་ལྡན་པ་འཆར༔ མུ་ཁྱུད་ཐིག་ལེ་ལྔ་པ་ལ༔ གཙུག་ཏོར་ཞལ་ནི་ཕྱེད་པར་འཆར༔ ཀྱེ་ཀྱེ་སྨིན་ཚད་གསུམ་པ་ནི༔ མུ་ཁྱུད་ཐིག་ལེ་ལྔ་པ་ལ༔ བདེ་གཤེགས་སྤྲུལ་པའི་རིགས་ལྔ་ནི༔ ངུར་སྨྲིག་ཆོས་གོས་ཕྱག་རྒྱས་མཛེས༔ རང་ཉིད་རིགས་ལྔའི་ཞིང་ཁམས་སུ༔ གོང་དུ་ལོངས་སྐུ་ཐོབ་གྱུར་པ༔ དེ་ཡི་ཁ་དོག་རིགས་གཅིག་པས༔ སྤྲུལ་པའི་རིགས་ལྔའི་ཁ་དོག་གསལ༔ དེ་ནི་སྨིན་པའི་ཚད་ཡིན་ནོ༔ ཀྱེ་ཀྱེ་སྨིན་ཚད་འབྲས་བུ་ཐོབ་པ་ནི༔ སྐུ་ལུས་ཕུང་པོ་སྙིལ་དུས་སུ༔ དེ་དུས་བར་དོ་དང་པོ་ལ༔ ནམ་མཁའ་དག་ལ་ཚོམ་བུ་ལྔ༔ བདེ་གཤེགས་སྤྲུལ་པ་ལྔ་རུ་གསལ༔ འདི་ཡི་འོད་དང་བདག་སྙིང་འབྲེལ༔ དེ་དུས་ཚོམ་བུ་བདེ་གཤེགས་ལ༔ མ་པང་བུ་ལྟར་རིག་པ་བཞག༔ ཞག་གསུམ་ཚོམ་བུ་ཉིད་ལ་གནས༔ འཇའ་ལུས་རིགས་ལྔར་བདག་གྱུར་ནས༔ བྱང་ཆུབ་སེམས་དཔའི་འཁོར་རྣམས་ལ༔ སྐུ་དང་མཛད་པ་ཆོས་གསུང་ངོ་༔ ཞེས་གསུངས་ནས༔ སྐུ་འོད་ཕུང་དུ་གྱུར་ནས་མི་སྣང་བར་གྱུར་པའིི་དུས་སུ༔ རྡོ་རྗེ་སེམས་དཔས་གདུང་པའི་སྨྲེ་སྔགས་བཏོན་པས༔ བཅོམ་ལྡན་འདས་ཀྱི་ཕྱག་གཡས་པའི་འོད་ཀྱི་ནང་ནས་ཤེལ་གྱི་ཟ་མ་ཏོག་གི་ནང་དུ་རང་བྱུང་གི་ཡི་གེ་འདི་རྡོ་རྗེ་སེམས་དཔའི་ཕྱག་ཏུ་བབས་སོ༔ རང་བྱུང་གི་ཡི་གེ་འདི་བསྟན་པའི་ཁ་དོག་ཏུ་བཻཌཱུཪྱ་ཞུན་མ་

ལ་བྲིས་ཏེ༔ རིགས་ཀྱི་བུ་གང་གིས་བཏགས་པ་དེ་སངས་རྒྱས་པར་འགྱུར་རོ༔ རིགས་ཀྱི་བུ་གང་གིས་ཐོས་པ་དེ་སངས་རྒྱས་ལ་ཉེ་བར་འགྱུར་རོ༔ རིགས་ཀྱི་བུ་གང་གིས་མཐོང་བ་དེ་དད་པར་འགྱུར་རོ༔ རིགས་ཀྱི་བུ༔ གང་དང་གང་གིས་བྲིས་པ་དང་༔ བཀླགས་པ་དང་༔ བཅངས་པས་གང་དང་ཕྲད་པར་གྱུར་པའི་སེམས་ཅན་ཐམས་ཅད་ངན་སོང་གི་སྡུག་བསྔལ་ཐམས་ཅད་ལས་གྲོལ་ནས་སངས་རྒྱ་བར་འགྱུར་རོ༔ དགའ་ལྡན་གནས་ཀྱི་སངས་རྒྱས་ཀྱི་འདས་རྗེས་གསུམ་པའི་རྒྱུད༔ རྡོ་རྗེ་སེམས་དཔའི་ཕྱག་ཏུ་བབས་པ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ མངྒ་ལཾ༔

རང་གནས་ཆེན་པོ་རྒྱ་མཚོ་ཨར་ལ་གཏད་པ།

རང་གནས་ཆེན་པོ་རྒྱ་མཚོ་ཨར་ལ་གཏད་པ་ཞེས་བྱ་བ་བཞུགས་སོ༔ མན་ངག་བརྒྱ་བཅུ་བཞི་པ༔

རྒྱ་གར་སྐད་དུ༔ མ་ཧཱ་གྷཱུ་པ་ས་ཀ་རི་པ་ཏཾ་ནཱ་མ། བོད་སྐད་དུ། རང་གནས་ཆེན་པོ་རྒྱ་མཚོ་ཨར་ལ་གཏད་པ་ཞེས་བྱ་བ། བཅོམ་ལྡན་འདས་སྒྲོན་མ་འདུས་པའི་དཔལ་ལ་ཕྱག་འཚལ་ལོ། །སངས་རྒྱས་རྣམས་ཀྱི་ངེས་པའི་དོན་སྤུངས་པའི། །མན་ངག་ངེས་པའི་རྒྱུད་སྡེ་གྲངས་མང་ལས། །ཕྱི་ནང་གསང་བ་ཡོངས་རྫོགས་བླ་ན་མེད། །ངེས་པའི་སྙིང་པོ་ཡང་དག་གསལ་བཀོད་པའི། །ལུས་འདྲ་མིག་འདྲ་སྙིང་འདྲའི་སྐོར་གསུམ་གནད་རྣམས་ཀྱི། །གགས་དང་བསྟུན་པ་གསང་བའི་ཡི་གེ་འདི་ཉིད་རྣམ་པར་བཀོད། །གསང་བའི་གསང་མཆོག་བླ་ན་མེད་པ་ནི། །ལུས་དང་དབང་པོ་ཡན་ལག་རྫོགས་པའི་སྐྱེས་བུ་འདྲ། །དེ་ཉིད་གནད་དུ་བསྣུན་པ་མ་ཡིན་ཏེ། །སྟོང་གསུམ་ཀུན་གྱི་གནད་རྣམས་ངེས་བསྡུས་ནས། །སྐལ་ལྡན་ཡིད་ཆེས་འཇུག་སྟེ་གསང་བའི་གནད། །རྒྱ་མཚོ་ཉི་མ་ཅན་ལ་བརྟེན་པ་ནི། །ཆོས་ཉིད་རྒྱ་ཆེ་རང་སྣང་རང་གསལ་དུ། །ཉི་མའི་འོད་དང་འདྲ་བ་བསྟན་པའི་ཕྱིར། །ལུས་གནད་རྩ་ཡི་རྒྱ་ལ་མདུད་འདྲིལ་བ། །རིག་པའི་སྒྲོན་མ་སྣང་བ་འོད་པོ་ཆེ། །འདི་ལ་བརྟགས་ནས་ཉམས་སུ་བླང་བའི་ཐབས། །སྐྱེས་བུ་རྩོལ་བ་འབད་མེད་ཡེ་ཤེས་སྐྱེ། །བྱང་ཆུབ་ལམ་གྱི་སྒྲོན་མའི་སྣ་ཁྲིད་དེ། །སྐྱེས་བུའི་ལུས་གནད་དབང་པོའི་རང་གནད་དང་། །སྲིད་པ་ཆགས་བྱེད་སྐྱེད་བྱེད་དང་པོ་ལས། །ཆུ་ཡི་རང་བཞིན་འཁོར་འདས་མཚོན་པའི་ཕྱིར། །དཀར་ནག་ཕྱེད་མ་འབྲེལ་ཞིང་གསལ་བའི་མདངས། །ནང་ལུས་བསྐྱེད་པ་སྲིད་པའི་ཐོག་མར་བྱུང་། །འདྲ་བ་འདུལ་བ་རླུང་གི་གནད་བཅས་པས། །འདི་ལ་རྟེན་འབྱུང་བཞི་ཡི་རྣམ་པ་ཅན། །དྲན་འདུལ་ལ་སོགས་འཁོར་གསུམ་གྱིས་བསྐྱོད་ནས། །ལུས་དང་དབང་པོའི་ཡན་ལག་རྫོགས་ནས་ནི། །སྲིད་པ་ལས་བསྐྱེད་དང་པོའི་ལས་

འབྲས་བརྟགས། །ཕྲ་ཞིང་གདངས་མ་ལྕགས་ཀྱི་རྣམ་པ་ཅན། །འཕྲ་འགྱུར་ཟླུམ་པོ་གཡུ་དྲུང་དཀར་ནག་སྤྱོད། །བཞི་འདུས་ལྔ་ཡི་ངོ་བོར་འབྲེལ་བ་ནི། །ཏིལ་འབྲུར་རི་བོ་ནང་དུ་འཛུད་པར་སྣང་། །དྲན་བྱེད་དགུས་ནི་སྣང་བ་ལྟ་བུ་ལ། ཁ་དོག་གསལ་རྫོགས་རོ་རྣམས་འདུས་པའི་རྟགས། །དབུ་མའི་ཆ་ལ་སྐུ་ཡི་རྣམ་པ་ཅན། །འདི་དང་འབྲེལ་ནས་རྩེ་མོ་རྣམ་པར་བཀོད། །བདེ་བའི་གནས་ཏེ་ཐིག་ལེའི་རྣམ་པ་ནི། །འཁོར་འདས་དབྱེ་བས་ཉིས་འགྱུར་རྣམ་པ་ཅན། །ཀུན་རྫོབ་གཟུགས་ཅན་དོན་དམ་ཐིག་ལེ་ནི། །སྒྲོན་མའི་སྣང་བ་སྟོང་པ་ཉིད་འདུས་ལ། །དོན་དམ་གཉིས་མེད་དོན་རྣམས་འབྱུང་བའི་ཕྱིར། །དབང་པོ་ཡུལ་ལ་འཆར་བར་བྱེད་པ་ཡི། །རྩེ་མོ་ཉིད་དེ་མེ་མར་མདངས་དང་མཚུངས། །ཨ་འབྲས་དངས་མ་དཀར་ནག་ཕྱེད་པ་ལ། ཁ་དོག་རྣམས་ཀྱི་ས་བོན་ངེས་མཚོན་ཕྱིར། །དམར་དང་མཐིང་ག་དཀར་དང་ལྗང་གུའི་སྤྲིས། །མ་འདྲེས་སོ་སོར་གསལ་ཞིང་ཡུལ་རྣམས་བསྡུས། །ཆུ་ཡི་རྣམ་པ་ཅན་དེ་ཐམས་ཅད་རྒྱངས་ནས་འཆིང་། །གཉིས་ཀྱི་རང་བཞིན་དོན་དམ་ཀུན་རྫོབ་ཉིད། །རྣམ་པའི་གཟུགས་སུ་སྨིན་ཏེ་རྒྱལ་མཚན་ལྟ་བུའི་དབྱིབས། །སྲིད་པའི་གཞི་མ་ལས་འབྲེལ་འཁོར་ལོ་བཞི་དང་ལྡན། །ཡུལ་འཛིན་རང་སྣང་སྟོང་པའི་རྗེས་རྣམས་དཔྱོད། །ཆ་ཡི་རྣམ་པར་དབྱེ་བའི་རང་བཞིན་འགྱུར་དག་ལས། །སྐྱེད་བརྟན་སྡུད་ཁྱབ་འཛིན་དང་འཆད་པ་དང་། །སྐྱོད་བྱེད་ཡང་ཞིང་སྟོང་པའི་ཆོས་ཅན་ཉིད། །དེ་ཡི་ཕྱིར་ན་ལྔ་ཡི་མཚན་ཉིད་ཅན་དེ་དེ་ལས་ནི། །སྣ་ཚོགས་སྣང་སྟེ་ཀུན་རྫོབ་གཟུགས་སུ་ཤར། །འོད་དང་ཐིག་ལེ་ཁ་དོག་སོ་སོར་མ་འདྲེས་གསལ་རྫོགས་པས། །དོན་དམ་ཉིད་ལས་བརྗོད་བྱའི་གཞིར་གྱུར་པའི། །ཀུན་གྱི་ཡིད་དཔྱོད་འཇུག་པའི་གནས་དེ་ངོ་བོ་སུས་མཐོང་མེད། །སྐྱེ་བྱེད་ལ་སོགས་བཞི་ཡི་རིམ་པ་ཉིད་ལས་ནི། །སྣང་བྱེད་བཞི་

སྟེ་འཁོར་དང་མྱ་ངན་འདས་པ་སྡུད། །དེ་ཡི་ཕྱིར་ན་ཆུ་སྟེ་རྒྱ་མཚོའི་རང་གཟུགས་ལས། །རྣམ་བཞི་འབྱུང་བཞི་འཆར་བར་བྱེད་པའི་ཉི་མ་ཅན། །འགྲོ་རྣམས་མ་རིག་ལ་སོགས་མུན་པ་སེལ་ཕྱིར་རོ། །འདི་ལ་མ་བརྟེན་ལྟ་སྤྱོད་སྒོམ་འབྲལ་མེད། །དེ་ཡི་ཕྱིར་ན་ཀུན་གྱི་འབྱུང་ཁུངས་ཡིན་པས་དྲི་མ་དང་། །སྒྲིབ་བྱེད་མེད་པའི་རྣམ་པ་སྒོ་གཉིས་དག་པ་ནི། །རླུང་གཉིས་མེ་ཡི་རྣམ་པའི་འགྱུ་བྱེད་ཆ་ཡིས་རབ་དབྱེ་བས། །འགྱུ་བྱེད་ཆ་ལས་ཕྱེ་བཙུམ་རྣམ་པར་སྣང་བ་ནི། །རླུང་སྟེ་ལས་དང་ཡེ་ཤེས་གཉིས་སུ་གྱུར་པ་ཡང་། །སྒོ་གཉིས་སྐྱེད་པར་བྱེད་པའི་སྲིད་ཤེས་ནས། །རགས་དང་ཕྲ་རྣམས་འཛིན་པར་བྱེད་པའི་ལས་གཉིས་འགྲུབ། །འཆད་པ་ལ་སོགས་འཕེལ་རྣམས་འགྲུབ་པར་བྱེད་པའི་གནད། །འདི་ལ་བརྟེན་ནས་ཡུལ་རྣམས་སོ་སོའི་བྱེ་བྲག་ལ་འཇུག་ཕྱིར། །ཀུན་གྱི་གནད་ཡིན་དྲི་མ་གང་མི་ཤོངས་བས་ན། །འདི་ལ་བརྟེན་ནས་ཡང་དག་ཡེ་ཤེས་མངོན་པར་འགྲུབ། །སངས་རྒྱས་ཉིད་ཀྱང་མངོན་སུམ་ཡུལ་དུ་སྣང་། །དེ་ཡི་ཕྱིར་ན་གསང་བའི་གནད་འདི་མན་ངག་ཀུན་གྱི་གཞི། །ལུས་ཀྱི་བཅུད་ཕུར་རྩ་གནད་འཁོར་ལོའི་བཅུད། །དེ་དང་འབྲེལ་བྱེད་སྤྱན་གཉིས་འགག་བྱེད་རང་གསལ་བ། །རྩ་ཡི་བཅུད་ཕུར་སྟེམས་དང་དཀྲུགས་དང་བཙིར་བའི་གནད་ཉིད་ནི། །ཡོ་གིའི་མངོན་སུམ་ཡུལ་དུ་རང་རིག་གཏན་ལ་དབབ་པའི་ཕྱིར། །འདི་ཉིད་ཀྱང་ནི་མཁས་པས་ཡང་ནས་ཡང་དུ་ུའམ། །བཅུད་དེ་གནད་ལ་བོར་བ་ཡང་གསང་ངེས་པའི་བཅུད་ཡིན་ནོ། །སྣང་བའི་གཅུད་པ་རྣམ་པ་གཉིས་ལས་འདི་ནི་ཡང་། །རྗེས་མི་བཅད་ཕྱིར་རང་སོར་བཞག་ཅིང་རྒྱ་མཚོ་མ་བསྐྱོད་པ། །དེ་ཡི་དབང་གིས་ལུས་ངག་གཡོ་ཕྱིར་མེད་ཕྱིར་ཡང་། །བཞག་པའི་ས་དག་རང་བཟོ་མཁས་པས་ཤེས་པར་བྱ་སྟེ་འདི་ཉིད་དང་། །ངེས་པའི་དོན་མ་རྟོགས་པར་བྱེད་ན་

འཛིན་རྗེས་གཅུད་པའི་གནད། །ནན་ཏན་མཆོག་ཏུ་འདི་ལྟར་ངེས་བསྒྲུབ་གཡོ་ཞིང་བསྐྱོད་པ་ཡང་། །དལ་རྟེན་འགྲོགས་ཀྱང་ལོངས་སྤྱོད་མི་བསྟེན་པར། །རབ་ཏུ་དབེན་པའི་ས་ཕྱོགས་ཡིད་འོང་ཕུན་སུམ་ཚོགས། །མི་ཡིས་རྒྱུ་བར་དཀའ་བའི་གཅན་གཟན་གདུག་པའི་གནས་སུ་ནི། །བྱ་བྱེད་འབྲེལ་པ་རང་སར་བཅད་ནས་རྒྱ་མཚོ་རྟག་ཏུ་སྟེམས། །འདི་ཡི་རྣལ་འབྱོར་ཀུན་གྱིས་གསང་ཆེན་དོན་རབ་འགྲུབ། །རྒྱ་མཚོ་ཨར་གཏད་ལས་བཅུད་ཕུར་གསུམ་གྱིས་མིག་གི་མཚན་ཉིད་གཏན་ལ་ཕབ་པའོ། །བྲམ་ཟེའི་སློབ་དཔོན་འཇམ་དཔལ་བཤེས་གཉེན་གྱིས་མཛད་པ། རྒྱ་གར་གྱི་མཁན་པོ་བི་མ་ལའི་ཞལ་སྔ་ནས། བོད་ཀྱི་ལོ་ཙཱ་བ་ཀ་བ་དཔལ་བརྩེགས་ཀྱིས་བསྒྱུར་ཞིང་ཞུས་སོ།། །། ཨྠྀི།

ཤོག་ཏོང་།

རྒྱ་མཚོ་ཨར་ལ་གཏད་པའི་མན་ངག་སྣང་བ་འདུས་པའི་གལ་མདོ།

རྒྱ་མཚོ་ཨར་ལ་གཏད་པའི་མན་ངག་སྣང་བ་འདུས་པའི་གལ་མདོ་བཞུགས། མན་ངག་བརྒྱ་བཅུ་བཞི་པའི་ནང་ཚན།

བཅོམ་ལྡན་འདས་སྣང་བ་རང་དག་རྫོགས་པ་ལ་ཕྱག་འཚལ་ལོ། །རང་རིག་ཡེ་ཤེས་ད པེ་མཚོན་ཟླ་བྲལ་ཡང་། །རྟོགས་དཀའི་སྙིང་པོ་བསྡུས་པའི་རང་གནད་ནི། །དཔེ་དོན་རྟགས་ལ་བརྟེན་ནས་རྟོགས་བྱའི་ཕྱིར། །སྒྲོན་མ་རང་སྣང་འདི་ལ་ཡིད་ཆེས་པའི། །དོན་དུ་གསང་བའི་ཡི་གེ་འདི་ནི་རབ་བཀོད་དོ། །སྙིང་པོའི་དོན་ལ་ཉམས་སུ་ལེན་དོན་དུ། །སྒྲོན་མ་བཞི་ལ་ཁྱད་པར་ངེས་པ་འདི། །ཐིག་ལེ་སྟོང་པའི་སྒྲོན་མ་རང་གནད་ཀྱིས། །ཡང་དག་ངེས་པའི་ས་ལ་ད་ལྟར་ཉིད། །མངོན་སུམ་ལམ་དང་བཅས་ནས་ཡིད་ཆེས་པའི། །ད་ལྟ་ཉིད་དུ་དབང་པོའི་སྒོ་ནས་ཀྱང་། །རབ་ཏུ་རྟོགས་དཀའི་སྙིང་པོའི་དོན་འདི་ཉིད། །རང་སའི་ཐབས་ཀྱིས་ཡེ་ཤེས་སྒོ་ཕྱེ་སྟེ། །ཕྲ་རགས་སྒྲིབ་བྱེད་བྲལ་བའི་ནམ་མཁའ་ལ། །དམར་གསལ་སྐྱོན་དང་བྲལ་བའི་སྒྲོན་མ་ཉིད། །རྣམ་རྟོག་འགྱུ་བ་དྭངས་པའི་རླུང་གིས་དྲངས། །སྒྲིབ་བྲལ་རང་རྐྱེན་མེད་པའི་སྒོ་ཡིས་ནི། །ཆགས་བྲལ་རང་སར་དག་པའི་ཡེ་ཤེས་དེ། །མ་ཡེངས་རྟོག་པ་ཟད་པའི་བློ་དང་ནི། །འཁྲུལ་བྲལ་བྱ་བྱེད་མེད་པའི་འཁྲུལ་ཚུགས་ཀྱིས། །ཆགས་ཅན་དམར་གསལ་བདེ་བའི་ངོ་བོ་དེའི། །ཆད་མེད་རང་དག་ཆེན་པོ་གསུམ་གྱིས་ནི། །སྤྱོད་བྲལ་ལྟ་བ་མ་ཡེངས་གདིང་བྲལ་གྱིས། །གོམས་ཏེ་སྐྱེས་བུའི་རྩོལ་བའི་གནད་ཉིད་དང་། །སྟོང་ལམ་འཁྲང་ཞིང་འཁྲིལ་བའི་དུས་ཤེས་པ། །དེ་ཡི་གནད་དང་ཐབས་ཀྱི་རང་སྣང་དང་། །བཅོས་པ་མེད་པའི་མཁའ་ལ་གདོན་པའི་ཕྱིར། །གནས་དང་ལས་དང་བྱེད་པའི་རྒྱུ་དག་ལས། །མཐོང་ལམ་མེད་དང་དངོས་ཟད་འདྲ་བའི་གནས། །སུས་མི་ཤེས་པ་སྐལ་ལྡན་ལ་བསྟན་ ཕྱིར། །སྔོན་ཆད་མ་བསྟན་གང་ཡང་ཡོད་མ་ཡིན། །འདི་ནི་སླ་དཀའ་ཀུན་གྱིས་སྤྱོད་མིན་པའི། །རྒྱུ་དང་རྐྱེན་དང་རང་ངོ་དབང་པོའི་གནད། །

གཅིག་དང་གཉིས་དང་ལྔ་དང་གསུམ་ལས་ཀྱང་། །རང་དེངས་འགྱུར་བའི་ས་མེད་འཕྲང་དུ་དགུགས་། །གཏད་ས་འབྱིན་པར་བྱེད་པའི་རང་ས་ནི། །སྤྲོས་བྲལ་བློ་ཡི་སྐྱོན་རྣམས་དག་པར་བྱ། །འཇུག་དཀའ་ཕྱིན་པ་མེད་པའི་གནས་དེར་ནི། །ཅོག་བཞག་སྣང་དང་བྲལ་བའི་རང་རིག་ཉིད། །བསྒྲུབ་མེད་རྩལ་སྤྲུག་སྨོན་པ་མེད་པ་ཡི། །བྱ་བ་མེད་ཕྱིར་ཡུལ་ཅན་སོ་སོ་ལ། །ལྟ་བ་རང་སར་འཇོག་པའི་གདིང་ཆེན་ནི། །དྲང་བའི་ཐབས་ལ་བརྟེན་ནས་མངོན་སུམ་དུ། །སྐལ་ལྡན་རྣམས་ཀྱིས་རྟོགས་ཤིང་མཐོང་བྱའི་ཕྱིར། །དབང་རྫོགས་སྔགས་ཀྱི་ཐུག་ས་ཡིན་པའི་གནད། །དམར་པོའི་ཐིག་ལེ་དཀྱིལ་འཁོར་རྫོགས་པའི་གནད། །མུ་ཁྱུད་དང་བཅས་རྭ་བས་མཛེས་བསྐོར་བས། །ཀུན་གྱི་ལམ་སྟེ་སུས་ཀྱང་མཐོང་མེད་པའི། །གསང་སྔགས་གསང་བའི་ཡང་མཛོད་སྒོ་ཕྱེའི་ཕྱིར། །རྒྱ་མཚོ་ཉི་མ་རྟོད་ལ་མནན་པ་ནི། །ཆོས་ལས་མ་བྱུང་སེམས་ལས་སངས་རྒྱས་མེད། །ཀུན་གཞི་ལ་འང་རྟེན་ཅིང་མཚོན་པ་མིན། །ཤེས་རབ་ཀྱིས་ནི་བརྟགས་ཀྱང་འདི་མི་རྙེད། །རང་ལ་སྣང་ཞིང་གཞན་ལ་འཇུག་པར་བྱེད། །དེ་ལྟ་བུ་ཡི་རིག་པའི་སྒྲོན་མེ་ནི། །དབྱེ་བ་ལྔ་ཡིས་རབ་ཏུ་ཕྱེ་བའི་ས། །རྟགས་དང་དུས་ཚོད་ཉིད་དང་མཚོན་ཚིག་བཅས། །ངེས་པར་སྙིང་པོའི་དོན་རྣམས་བཅུད་དུ་དྲིལ་བ་ཡི། །ཐིག་ལེ་ཟླུམ་པོ་སྟོང་པ་ཉིད་ཀྱི་བདག །ཡུལ་ལ་སྣང་སྟོང་ངོས་བཟུང་ཀུན་དང་བྲལ། །བྱང་ཆུབ་ལམ་རྣམས་འཛིན་ཅིང་བརྟེན་པའི་ཕྱིར། །ཁྱབ་བརྡལ་འུབ་ཆུབ་ཀུན་གྱི་ཡངས་པ་ཆེ། །ཕྲ་ཞིང་ཤེས་དཀའ་ཀུན་གྱི་སྙིང་པོའི་དོན། །ཨ་ཏི་རང་རྫོགས་གཡོ་ཞིང་སྣང་བའི་གནད། །འདི་ལྟར་རང་རིག་སྒྲོན་མེའི་འོད་པོ་ཆེ། །ཀུན་བྲལ་རྟགས་གཅིག་ཀུན་གྱི་རྟགས་སུ་སྟོན། །ཡང་དག་རང་རྫོགས་བཅོས་པའི་ཚིག་མེད་པ། །

མེད་པ་ཉིད་ལས་བརྗོད་བྱའི་གཞི་མ་ཆེ། །དེ་ལྟར་ཐིག་ལེ་སྟོང་པའི་སྒྲོན་མ་ནི། །ཀུན་གྱི་གཞི་ཡིན་དེ་བཞིན་ལམ་ཡང་ལམ་ཡིན་ཏེ། །འབྲས་བུ་ཉིད་དེ་ཀུན་གྱི་རྟགས་ཀྱང་ངོ་། །སྤྱོད་པ་ཉིད་དང་སྒོམ་དང་ལྟ་བ་ཡང་། །འདི་ནི་ལྷ་མིན་དཀྱིལ་འཁོར་ཀུན་གྱི་རྩ། །སྔགས་ཡིན་བསྐྱེད་པའི་རིམ་པ་འདི་རང་དངོས། །སངས་རྒྱས་དེ་ཡིན་དམྱལ་བ་དེ་རང་དངོས། །དེ་བཞིན་འདོད་ཆགས་ཞེ་སྡང་གཏི་མུག་ཡིན། །འདི་ནི་སྲོག་ཡིན་གཅོད་དོ་རྣམ་སྨིན་ནོ། །འདི་ནི་ཐབས་ཡིན་ཤེས་རབ་དག་ཀྱང་ཡིན། །སྟོང་པ་ཀུན་ཁྱབ་ཡེ་ཤེས་སྒྲོན་མ་འདི། །འཁོར་དང་མྱང་འདས་ཐམས་ཅད་ཡིན་པ་ལ། །འདི་ལ་གཅིག་དང་གཉིས་སོགས་དུ་མའི་སྒྲ་ཚིག་བྲལ། །ཅི་ཡང་མ་ཡིན་ངོ་བོ་གང་ཡང་མེད། །ཆོས་མེད་སེམས་མེད་འཁྲུལ་དང་མ་འཁྲུལ་མེད། །ཐ་སྙད་བརྗོད་པའི་གཞི་ལས་འདས་པའོ། །དེ་ལྟར་རང་རིག་སྒྲོན་མའི་ཆ་དང་བཟུང་། །སོ་སོའི་རྒྱུ་དང་འབྲས་བུའོ། །དེ་ལྟ་བུ་ཡི་བྱང་ཆུབ་ལམ་བགྲོད་དེ། །སྟེམས་ཤིང་རྒྱ་མཚོ་ཨར་ལ་གཏད་པ་ནི། །སྐྱེས་བུ་དད་པ་རབ་དང་ལྡན་པའི་སྐལ་པ་ཅན། །རང་བཞིན་རྫོགས་ཆེན་དོན་ལ་མོས་པ་དེས། །རང་གི་བླ་མ་མཉེས་པའི་རྫས་ཀྱིས་མཆོད། །དབེན་ཞིང་ཉམས་དགའ་རི་ཁྲོད་ནགས་ཁྲོད་དུ། །རབ་ཏུ་དབེན་པའི་ཕྱོགས་སུ་སོང་ནས་ནི། །དྲི་མ་གསུམ་པོ་དག་པར་བསལ་བྱས་ལ། །བཅིངས་པ་བརྒྱད་དང་བྲལ་བའི་སྒོ་ཕྱེ་སྟེ། །སྣང་བའི་སྒྲིབ་བྱེད་གཉིས་པོ་ཕར་བསལ་ལ། །འཇིག་རྟེན་ཞེན་པའི་བློ་རྣམས་དོར་བ་ཡང་། །རབ་བདེ་བརྟེན་ཞིང་སྣང་བའི་ལུས་ཉིད་ནི། །ཆ་ལ་ཕབ་སྟེ་དྲང་པོ་མདའ་སྨྱུག་ལྟར། །དོན་དམ་གསང་བའི་ལས་འདི་བརྩམ་པར་བྱའོ། །དམར་པོའི་དཀྱིལ་འཁོར་རྫོགས་པའི་རང་བཞིན་དེ། །རྒྱ་མཚོ་མཐར་ཏེ་འགྲམ་གཉིས་ཨར་ལ་གཏད། །སྐྱེས་བུ་རང་གི་རྩོལ་བཅས་ལེགས་པ་ཡང་། །

ཉིན་དང་མཚན་མེད་ཐུན་དུ་བཅད་པ་ཡང་། །རབ་ཏུ་འདོད་ཅིང་ཤེས་པ་ཨར་ལ་གཏད། །ལན་གཅིག་གཉིས་དང་གསུམ་གྱི་བར་དུ་ཡང་། །གཉིས་མེད་བདེ་བའི་རང་གནད་མ་རྙེད་པར། །རང་ལ་རྩོལ་བ་ཉིད་དང་མི་འབྲལ་ལོ། །གལ་ཏེ་ཐུགས་ཀྱི་བར་དང་རྒྱ་མཚོ་མ་རྙེད་ན། །གོང་སྟེམས་སྣང་བ་ཉིད་ལ་གཏད་དེ་བསྒོམ། །འདི་ལྟར་བྱས་པས་སྙིང་པོའི་དོན་ལ་རེག །རང་བཞིན་བརྟགས་དཀའ་འཁྲུལ་སྣང་འདི། །དག་པ་ཡེ་ཤེས་ཉིད་དུ་མ་གྱུར་པར། །བྱ་བ་སྤངས་ཏེ་འདི་ལ་ནན་ཏན་བྱ། །འཁྲུལ་བའི་བྱ་བྱེད་ཕྱོགས་དང་མ་བྲལ་ན། །ཡང་དག་རྫོགས་པའི་ས་བོན་འདི་ཡིས་བསུ། །དེ་ཕྱིར་འཇིག་རྟེན་ལོངས་སྤྱོད་ཞེན་ལས་གྲོལ་བྱས་ཏེ། །བླ་མའི་ལུང་བཞིན་སྙིང་པོའི་ཡང་བཅུད་འདི། །སུ་དང་ཕྲད་པ་མེད་པར་ཉམས་སུ་བླངས། །དེ་ལྟར་རབ་ཏུ་དད་གུས་བརྩོན་འགྲུས་ཀྱིས། །ཡང་དག་བདེ་བ་ཉིད་ལ་ལྟ་བྱས་ན། །རང་བཞིན་བྱས་པ་མེད་པའི་སྣང་བ་འདི། །རྨ་བྱའི་མདོངས་ཀྱི་རྣམ་པ་ལྟ་བུར་སྣང་། །འདི་ཉིད་ཉམས་དང་རྣལ་འབྱོར་མ་བྲལ་ན། །འདི་ལྟར་སྣང་བའི་རྣམ་པ་རང་བཞིན་དག་པར་འགྱུར། །འདི་དུས་ཞེན་བྲལ་ལྟ་ལས་མ་འདས་ན། །སྤྲིན་པའི་མཐོངས་ནས་མཐོང་བའི་ཉི་མ་བཞིན། །རྒྱ་མཚོ་ལས་ནི་ཉི་མ་རབ་ཐོན་ཏེ། །རྣལ་འབྱོར་རྣམས་ཀྱི་ལམ་སྟེ་ནམ་མཁའ་ལ། །བྱ་རྣམས་དབང་བསྒྱུར་ཐོགས་པ་མེད་པ་བཞིན། །སྐལ་ལྡན་གྱིས་ཀྱང་ནམ་མཁའི་ལམ་ཉིད་ལ། །རབ་ཏུ་གནས་པའི་ཆོ་འཕྲུལ་ཅི་ཡང་སྟོན། །ཡིད་བཞིན་ནོར་བུ་ངེས་པར་འཆང་བའི་རིགས། །རྒྱ་མཚོ་ཉིད་ལ་མ་བརྟེན་སྣང་བ་སྣ་ཚོགས་འགྲུབ། །རང་གསལ་རིག་པ་བྲལ་བའི་རིག་པ་དེ། །རི་སོགས་རྣམས་ཀྱིས་མ་བསྒྲིབས་ཟང་ཐལ་བར། །མཚན་མོའི་དབང་དུ་མ་གྱུར་དུས་ནི་ཐམས་ཅད་དུ། །ངེས་པར་སྣང་དུ་

ཡིན་ནོ་སྐལ་དང་ལྡན། །འདི་ལྟར་གདིང་དུ་ཚུད་པ་རབ་ཏུ་གཅེས། །གདིང་མེད་རྣལ་འབྱོར་ཉམ་ཆུང་དྲོད་ཡལ་བས། །སྙིང་པོ་འདི་ནི་མཐོང་བ་མ་ཡིན་ནོ། །དེ་བས་འཁྲུལ་པའི་བྱ་བ་དོན་མེད་ཀུན་སྤངས་ནས། །ནགས་ཀྱི་རི་དྭགས་བཞིན་དུ་གྲོགས་སྤངས་ལ། །རྟག་ཏུ་རང་སྣང་བཅུད་ཀྱི་སྙིང་པོ་སྟེམས། །དྲང་ཐབས་གསུམ་གྱི་མན་ངག་གིས། །སྒྲེན་མོ་རང་གི་ངོ་བོ་བསྟན་པའོ། །རྒྱ་མཚོ་ཨར་ལ་གཏད་པའི་མན་ངག །སྣང་བ་འདུས་པའི་གལ་མདོ། བྲམ་ཟེའི་སློབ་དཔོན་འཇམ་དཔལ་བཤེས་གཉེན་གྱིས་མཛད་པ། སྐོར་གཉིིས་ཀྱི་མན་ངག་ཐུགས་ཀྱི་གཏེམས་པའོ། །རྒྱ་གར་གྱི་མཁས་པ་བྱེ་མ་ལའི་ཞལ་སྔ་ནས། བོད་ཀྱི་ལོ་ཙཱ་བ་ཀ་བ་དཔལ་བརྩེགས་ཀྱིས་བསྒྱུར་ཅིང་ཞུས་སོ།། །།ཨྠྀི།། ཤུ་བྷཾ་མསྟུ་སརྦ་ཛ་ག་རྟཾ།། །།བཀྲ་ཤིས་སོ།། །།

བདུད་རྩི་སྙིང་གི་ཐིགས་པ།

བདུད་རྩི་སྙིང་གི་ཐིགས་པ་ཞེས་བྱ་བ་བཞུགས་པ་ལགས་སོ། །མན་ངག་བརྒྱ་བཅུ་བཞིའི་ནང་ཚན།

དཔལ་རྡོ་རྗེ་འཆང་ལ་ཕྱག་འཚལ་ལོ། །འགྲོ་རྣམས་སྙིང་ལ་དུག་གསུམ་ནད་ཞུགས་པས། །དེ་ཉིད་སེལ་བའི་བདུད་རྩིའི་ཐིགས་པ་འདིས། །གང་གིས་དུག་གསུམ་ནད་རྣམས་མ་ལུས་དག་བྱེད་པའི། །འདི་ནི་སྐལ་དང་ལྡན་པའི་སྐྱེས་བུ་སྙིང་སྟོབས་ཅན། །དད་པ་རབ་དང་ལྡན་པའི་སྤྱོད་ཡུལ་བ། །ཀུན་དང་ཕལ་གྱིས་འདི་ཉིད་རྙེད་པ་མིན། །རབ་གསང་བ་ཡིས་དངོས་གྲུབ་འདི་འགྲུབ་པས། །གཞན་ལ་རབ་ཏུ་བསྟན་པའི་དངོས་གྲུབ་མིན། །སྙིང་པོ་ངེས་པའི་བཅུད་རྣམས་བདུད་རྩིར་དྲིལ། །གསང་བ་གསང་མཆོག་བླ་ན་མེད་པ་ཡི། །ཕྱི་ནང་གསང་བ་གསུམ་གྱི་བཅུད་ཀྱིས་འདི། །གཉིས་མེད་རང་རིག་ངེས་པར་ཚོད་ལ་འབེབས་པ་ཡི། །རང་བཞིན་དག་པའི་ཡི་གེ་འདི་ལོངས་ཤིག །ཆོས་རྣམས་ཀུན་གྱི་རྟགས་བསྟན་པའོ། །རྟགས་ཀྱི་སྒྲོན་མ་རང་སྣང་འོད་པོ་ཆེ། །ཀུན་ལ་མེད་དེ་རང་གསང་ཐབས་ཀྱིས་ཆོད། །འདི་ཉིད་ལ་འཇུག་སྐྱེས་བུ་སྐལ་པ་ཅན། །ཚད་ལྡན་རྟགས་ཀྱི་ཡེ་ཤེས་འདི་ཉིད་ལ། །རབ་ཏུ་གཏེམས་ཤིང་ཉམས་སུ་བླངས་པ་ཡིས། །དཔེ་མེད་ཟླ་དང་བྲལ་བའི་སྣང་བ་འཆར། །དུ་མ་བརྟེན་པ་མེད་པའི་ནམ་མཁའ་ལ། །བྱ་བྱེད་བཏང་བཞག་མེད་པའི་སྒྲོན་མ་ཉིད། །སུས་ཀྱང་བྱས་ཤིང་བཅས་བཅོས་མི་རྙེད་པས། །སྒྲིབ་བྲལ་ལྟ་བྱེད་མ་འགགས་རྒྱ་མཚོའི་ནང་། །ཆགས་བྲལ་དམར་གསལ་དབང་རྣམས་རྫོགས་པའི་རྟགས། །འཆར་བྱེད་མ་འགགས་ཁ་དོག་ཡོངས་རྫོགས་པའི། །རིགས་ཉིད་ཡིན་ཏེ་སྐུ་རྣམས་རང་བཞུགས་ཏེ། །ཐིག་ལེ་ཉག་ཅིག་སྤྲོས་དང་བྲལ་ཕྱིར་ཟླུམ། །ཕྱི་ནང་དཀྱིལ་འཁོར་རྫོགས་པའི་མུ་ཁྱུད་ཅན། །རྒྱན་རྣམས་ཡོངས་རྫོགས་བཀོད་པ་ཆེན་པོ་ཡི། །རང་སྣང་གསལ་དང་བཅས་པའི་རིགས་པ་ཉིད། །ཐིག་ལེ་སྟོང་པའི་འོད་ཀྱིས་ཡིད་ཆེས་ཕྱིར། །འདི་ཉིད་སྐྱེས་བུས་སྟེམས་ཏེ་ཉམས་སུ་བླངས། །སྣང་བ་རང་གསལ་

འོད་ཀྱི་འཕེལ་དང་བཅས། །རྒྱ་ཆེ་ཞིང་ཁམས་རྣམ་པར་དག་པ་ཉིད། །མ་ནོར་དབང་པོའི་ཡུལ་དུ་གཏན་དབབ་ཕྱིར། །གསང་བ་ངེས་པའི་སྐལ་ལྡན་གྱིས། །རབ་ཏུ་བརྩོན་འགྲུས་ལྡན་ཞིང་སྐྱོང་ངལ་མེད་པ་ཡིས། །འདི་དོན་བསྒྲུབས་པས་འབྲས་བུ་མངོན་དུ་འབྱིན། །རབ་ཏུ་གསང་བའི་ཐབས་ནི་སུས་ཤེས་པ། །སངས་རྒྱས་རྣམས་ཀྱི་དགོངས་པ་འདི་ལ་ཡོད། །རིགས་དྲུག་འཁོར་བའི་མངལ་གྱི་གྲོང་ཁྱེར་ཉིད། །རྒྱུན་ཆད་པའང་ངེས་པའི་ས་ཐོབ་སྟེ། །ཐུགས་རྗེས་འགྲོ་བ་གཞན་རྣམས་འདྲེན་པ་ཡི། །ལྗགས་ཀྱི་དབང་པོ་ཉིད་ལས་རང་བྱུང་གི །ཡི་གེ་དྲུག་ནིི་རབ་སྤྲོས་ནས། །འགྲོ་བ་དྲུག་གི་ཁ་ལོ་གྱེན་ལ་བསྒྱུར། །རང་སྣང་ཤུགས་ལས་བྱུང་བ་དེ་དག་གོ །དེ་ལྟར་རང་བྱུང་ཡེ་ཤེས་སྒྲོན་མ་འོད་འབར་དེ། །རང་སྣང་ལྷ་དང་བཅས་པས་ཉམས་བླང་ཕྱིར། །སྣང་བ་རང་འཕེལ་ཡེ་ཤེས་འབྱོངས་པ་ཡི། །ཐབས་འདི་རབ་ཏུ་གསང་སྟེ་སྤྱད་པར་བྱ། །མངོན་སུམ་རང་གིས་བླ་མ་མཉེས་པ་ཡི། །ལུས་ངག་ཡིད་ཀྱིས་ཇི་ལྟར་འཐད་རྣམས་ཀྱིས། །བླ་མ་རྡོ་རྗེ་འཛིན་པ་མཉེས་པར་བྱ། །དེ་ནས་ལུས་ངག་བར་ཆོད་ཞེན་པ་བཟློག་བྱའི་ཕྱིར། །རྡོ་རྗེ་མ་རྣམས་མཉེས་པའི་རྫས་ཀྱིས་མཆོད། །གལ་ཏེ་ལོངས་སྤྱོད་ལྷགས་པར་འདོད་ན། །རྣལ་འབྱོར་པ་དང་རྣལ་འབྱོར་མ། །རང་དང་ལྟ་སྤྱོད་མཐུན་པའི་སྤུན་དང་སྲིང་། །མང་པོའི་ཚོགས་ལ་ཚོགས་མཆོད་བྱ། །གལ་ཏེ་སྤུན་དང་སྲིང་མེད་ན། །གཞན་གྱི་བཟང་པོ་རྟགས་ལྡན་པའི། །ཕ་དང་མ་ནི་མཉམ་པའི་ཚོགས། །འདུས་པ་རྣམས་ལ་སྟོན་མོ་བྱ། །འདི་ལྟར་སུ་ཡིས་བྱས་པ་ལ། །རྫས་སོགས་ལོངས་སྤྱོད་ཅི་དགར་རོལ། །དེ་ནས་རང་གི་ཡུལ་རྐྱེན་གྱིས། །གནོད་དང་བྲལ་བའི་དགོན་པར་ནི། །རང་གི་བླ་མ་ལས་བྱུང་བའི། །ཐབས་ནི་ངེས་པར་གཏེམས་པའི་གནད། །འདི་ལྟར་སུ་ཡིས་བརྩམ་

པར་བྱ། །ལུས་ཀྱི་གནད་དུ་འདུག་པ་དང་། །འགྲོ་དང་སྤྱད་པར་མི་བྱའོ། །ངག་ནི་རང་བཞིན་བརྗོད་པ་སྤང་། །གལ་ཏེ་ལུས་ཀྱི་འབྱུང་བ་ཉིད། །འཁྲུགས་པར་གྱུར་ན་རྩ་གནས་ཀྱི། །ཇི་ལྟར་ཕན་པའི་ཡི་གེ་ཉིད། །ཞག་དང་ཞེན་པའི་བྱེ་བྲག་གིས། །རླུང་དང་སྦྱར་ལ་བརྗོད་པར་བྱ། །སྐབས་སུ་གསང་མཆོག་ལས་བྱུང་བའི། །རྟེན་འབྲེལ་གྱི་ཡང་འཁོར་ལོ་བསྐོར། །ཡིད་ནི་འཕྲོ་འདུའི་སྦྱོར་བ་ཡང་། །སྒྲོན་མ་ཉིད་དང་བསྲེས་ལ་ཡང་། །རྣམ་པར་དག་པའི་ནམ་མཁའ་ལ། །ཕྲ་དང་རགས་པའི་སྒྲིབ་པ་གཉིས། །རྣམ་པར་སྤངས་པའི་ཕྱོགས་སུ་གཏད། །མཚན་མོ་རང་གི་གནས་ཁང་དུ། །བདེ་བའི་སྟན་གྱི་སྟེང་འདུག་ལ། །གཉ ིས་སྤངས་རྒྱ་མཚོའི་འགྲམ་གཉིས་གཏེམས། །འདི་ལ་རྟག་ཏུ་འདྲིས་པར་བྱ། །འདི་འདྲའི་སྣང་བའི་འཕེལ་དག་གིས། །ཡིད་བཞིན་གྱི་ནི་ནོར་བུ་ལྟར། །ཟད་མེད་འཕེལ་ལ་རྣམ་པར་སྤྱོད། །ཡེ་ཤེས་གཉིས་ཀྱི་བདག་ཉིད་འདི། །རྣལ་འབྱོར་ཉིན་དང་མཚན་མོས་དབྱེ། །ཉིན་དུས་མཚན་ཉིད་འཛིན་པ་ལྔ། །མཚན་དུས་བཞི་ནས་ཡེ་ཤེས་ནི། །རབ་ཕྱེ་གསུམ་གྱི་ཚུལ་དུ་སྣང་། །མཚན་ཉིད་འཛིན་པ་ལྔ་རྣམས་ནི། །མེ་ལོང་ཡེ་ཤེས་གཡས་པའི་ཆ། །དེ་བཞིན་གཡོན་ནས་ཆོས་ཀྱི་དབྱིངས། །དབུ་མ་ལས་ནི་མཉམ་ཉིད་དོ། །ཡང་ནི་གཡས་ནས་སོ་སོར་རྟགས། །གཡོན་པ་ཉིད་ལས་བྱ་བ་གྲུབ། །མེ་ལོང་ཡེ་ཤེས་ཟླུམ་པོ་སྟེ། །ཆོས་ཀྱི་དབྱིངས་ནི་དྲ་བའི་ཚུལ། །མཉམ་ཉིད་རིན་ཆེན་འོད་འབར་མཚུངས། །སོ་སོར་རྟོགས་པ་ཟུར་ལྔ་པ། བྱ་གྲུབ་ཡེ་ཤེས་གཞུ་ཡི་དབྱིབས། །མེ་ལོང་ཡེ་ཤེས་དཀར་གསལ་རྫོགས། །ཆོས་ཀྱི་དབྱིངས་ནི་མཐིང་ག་ཁྱབ། །མཉམ་

པ་ཉིད་ནི་ཡོན་ཏན་སེར། །སོ་སོར་རྟོགས་པ་ཆགས་ཆེན་དམར། །བྱ་བ་གྲུབ་པ་ལྗང་གུ་མཛེས། །ཡང་ན་མེ་ལོང་བན་བུན་ཡིན། །ཆོས་ཀྱི་དབྱིངས་ནི་སང་མ་སིང་། །མཉམ་པ་ཉིད་ནི་ལང་ལོང་བ། །སོ་སོར་རྟོགས་པ་སྣ་ཚོགས་ཡིན། །བྱ་བ་གྲུབ་པ་ཁྲལ་ཁྲོལ་ཉིད། །ཡང་ན་མེ་ལོང་གྱེན་འགྲེང་དང་། །ཆོས་དབྱིངས་དེ་བཞིན་རྩིབས་ལ་འཆར། །མཉམ་པ་ཉིད་ནི་དུམ་བུ་ལ། །སོ་སོར་རྟོགས་པ་གྲུ་ཆད་དོ། །བྱ་བ་གྲུབ་པ་སྣམ་བུར་སྣང་། །ཡང་ན་མེ་ལོང་མཆོད་རྟེན་བརྩེགས། །ཆོས་ཀྱི་དབྱིངས་ནི་དྲ་བ་ཕྱེད། །མཉམ་པ་ཉིད་ནི་པདྨར་སྣང་། །སོ་སོར་རྟོགས་པ་མིག་མངས་རིས། །བྱ་གྲུབ་ཟ་འོག་གུར་དང་མཚུངས། །ཡང་ན་མེ་ལོང་གཡས་ཀྱི་ཕྱོགས། །དེ་བཞིན་ཆོས་དབྱིངས་དབུས་སུ་འོ། །མཉམ་པ་ཉིད་ནི་གཡོན་དུ་ུའོ། །སོ་སོར་རྟོགས་པ་འོག་ཏུ་ུའོ། །བྱ་གྲུབ་ཡེ་ཤེས་སྟེང་གི་ཕྱོགས། །དེ་ལྟར་ལྔ་ཡི་དབྱེ་བ་ཡིས། །རྣལ་འབྱོར་པ་ཡི་ཉིན་དུས་ཀྱི། །སྣང་བ་རང་འཕེལ་རྫོགས་པ་འོ། །ཡང་ནི་གཞི་གནས་ཡེ་ཤེས་གསུམ། །ངོ་བོ་ཀ་དག་ཡེ་ཤེས་དང་། །ཐུགས་རྗེའི་ཡེ་ཤེས་ཀུན་ལ་ཁྱབ། །ངོ་བོ་ཡེ་ཤེས་དབུས་ཀྱི་ཆ། །ཨ་ཝ་དྷཱུ་ཏི་ཞེས་བྱ་བ། །ཁྱད་པར་ཡེ་ཤེས་གནས་ཡིན་ནོ། །ཕྱིན་འགྱུར་ཚངས་པའི་བུ་ག་ལ། །རིག་པ་རྟོག་མེད་སྐུ་དང་བཅས། །ལྷུན་གྲུབ་ཡེ་ཤེས་གཡས་པས་ཏེ། །ཤེལ་གྱི་སྦུ་གུ་ཁོག་པ་སྟོང་། །ཕྱིར་གྱུར་ཡལ་ག་གཉིས་གྱེས་ཏེ། །རྒྱ་མཚོའི་ནང་དང་ཉན་བྱེད་ཀྱི། །གཡས་ཀྱི་སྒོ་ལ་དེ་བཞིན་ཏེ། །དབྱིངས་དང་ཤེས་རབ་རང་བྱུང་གི །སྒྲོན་མའི་ངོ་བོ་སྣང་བ་ཡིན། །ཐུགས་རྗེ་ཡེ་ཤེས་གཡོན་རྩ་ནས། །དར་དཀར་སྣལ་མ་ཕྲ་ལ་འཁྲིལ། །ཕྱིར་གྱུར་གཉིས་གྱེས་རྒྱ་མཚོ་དང་། །མཉན་ཡོད་སྒོ་ལ་སྣང་བ་ནི། །རྒྱང་ཞགས་དང་ནི་ཐིག་ལེ་སྟེ། །སྒྲོན་མ་གཉིས་ཀྱི་རང་བཞིན་དུ། །སྣང་ཞིང་རང་སྣང་བདེ་བ་སྟེར། །འདི་ནི་མཚན་མོའི་ཡེ་ཤེས་གསུམ། །གཞི་ལ་གནས་པ་ཁོ་ན་ཏེ། །རྣལ་འབྱོར་གང་ཞིག་སྐལ་ཆེ་བས། །

གསང་བ་མཆོག་ལས་བྱུང་བ་ཡི། །རྩ་རྣམས་གཏེམས་པའི་སྦྱོར་བ་བྱ། །ཡང་ན་རྒྱ་མཚོ་འགྲམ་གཉིས་སྟེམས། །འདི་ལྟར་འབྲལ་བ་མེད་པར་ནི། །རྣལ་འབྱོར་པ་ཡིས་བྱས་པ་ན། །མཚན་མོའི་ཡེ་ཤེས་མངོན་དུ་འབྱིན། །ཡང་ནི་ཡེ་ཤེས་ཁྱད་པར་ལས། །ངོ་བོའི་ཡེ་ཤེས་ཀུན་ནས་ཟླུམ། །ལྔ་ཡི་ཆ་ནི་བྱེད་མེད་རྫོགས། །ལྷུན་གྲུབ་ཉིད་ནི་གྲུ་བཞི་ལ། །འཆར་བྱེད་བརྒྱད་དང་བཅས་པ་ནི། །ཡང་ན་རིན་པོ་ཆེ་དང་མཚུངས། །ཐུགས་རྗེའི་ཡེ་ཤེས་རྩིབས་བརྒྱད་འབར། །ཡང་ན་ངོ་བོའི་ཡེ་ཤེས་ལྔ། །འབྱེད་པ་མེད་པའི་འོད་ལྔ་ནི། །གཏིང་གསལ་རྫོགས་པའི་ཚུལ་དུ་འོ། །ལྷུན་གྲུབ་ལ་ནི་ཁ་དོག་ལྔ། །སོ་སོའི་མཚན་ཉིད་འཛིན་པའི་ཚུལ། །ཐུགས་རྗེའི་འོད་ཟེར་དཔག་ཏུ་མེད། །འཕོ་དང་མཆེད་པའི་རང་བཞིན་ལས། །ཁྱད་པར་ཁ་དོག་ཉི་ཤུ་ལྔ། །མ་འདྲེས་སོ་སོ་རང་རྫོགས་པའི། །ངོ་བོའི་ཡེ་ཤེས་དག་པ་ལ། །ལྷུན་གྲུབ་ཀྱིས་ནི་སྣ་ཚོགས་སྟོན། །ཐུགས་རྗེས་རང་གཞན་དོན་གཉིས་བྱེད། །ཡང་ན་ངོ་བོ་རྫོགས་པ་ལ། །ལྷུན་གྲུབ་ཀྱིས་ནི་མཆེད་པར་བྱེད། །ཐུགས་རྗེ་ཉིད་ཀྱིས་འཛིན་པ་འོ། །ཡང་ན་ངོ་བོ་ཁྱབ་ཅིང་གསལ། །ལྷུན་གྲུབ་སྣང་བ་སྟོན་པར་བྱེད། །ཐུགས་རྗེ་ཐ་དད་ཀུན་ཏུ་སྟོན། །ངོ་བོ་ཉིད་ནི་འགྱུར་བ་མེད། །ལྷུན་གྲུབ་འགྱུར་བ་ཆ་ཉིད་དོ། །ཐུགས་རྗེའི་ཡེ་ཤེས་ཕྱོགས་མེད་པའི། །དེ་ལྟར་གཞི་གནས་ཡེ་ཤེས་ཀྱིས། །རྣལ་འབྱོར་གང་ཞིག་སྐལ་བ་ཆེའོ། །མཚན་མོའི་སྣང་བ་རྫོགས་པའོ། །དེ་ལྟར་རྒྱ་མཚོ་ཉ་མ་ཅན། །ཨར་ལ་གཏོད་པ་སུས་ནུས་པ། །སངས་རྒྱས་རྣམས་ཀྱི་བདེན་པ་ཉིད། །འདི་ཉིད་རང་ལ་སྣང་བ་འོ། །ཐིག་ལེ་སྟོང་པའི་སྒྲོན་མ་ལས། །རང་མཆེད་འོད་དང་ཡོན་ཏན་ནི། །དེ་ལྟར་དཔག་ཏུ་མེད་པ་ལས། །དབྱིངས་ཀྱི་འཕེལ་དང་བཅས་པ་འོ། །སྒྲོན་མ་རང་བྱུང་

ཡེ་ཤེས་རྣམས། །གཅིག་ལ་འདུས་པ་སྟོན་པར་བྱེད། །ཐམས་ཅད་འདུས་པའི་ཐིག་ལེ་སྟེ། །སྟོང་པས་མཚན་མར་སྣང་དང་བྲལ། །འདི་དུས་རྣལ་འབྱོར་སྐལ་ལྡན་ཏེ། །སངས་རྒྱས་རྣམས་ཀྱི་ཞལ་ཉིད་ཀྱང་། །མ་བསྒྲིབས་ཡོངས་སུ་གསལ་བར་མཐོང་། །དགོངས་པ་རྟགས་གཅིག་རྣལ་དུ་ཕབ། །གཉིས་མེད་ཡེ་ཤེས་རང་སྣང་མཐོང་། །འཁྲུལ་པའི་སྣང་བར་རང་ལོག་སྟེ། །མ་འཁྲུལ་ཡེ་ཤེས་སྣང་བ་ཉིད། །འདི་ལྟར་ངེས་པར་རྫོགས་པ་འོ། །ཆོས་ཀྱི་སྐུ་དང་ཆོས་ཀྱི་དབྱིངས། །རང་བཞིན་གཅིག་པའི་ཚུལ་དུ་རྟོགས། །བྱ་རྩོལ་ཉིད་ན་བྱར་མེད་པར། །རང་བཞིན་རྫོགས་པ་ཆེན་པོ་ཡི། །ལྟ་བ་མཐར་ཕྱིན་དེ་ཉིད་ལ། །སྐལ་ལྡན་དེ་ཡིས་དེ་ལྟར་རྟོགས། །སྐུ་གསུམ་དག་པའི་ཞིང་ཁམས་ཉིད། །འདི་ལྟར་སྣང་བ་དག་ཏུ་གཟིགས། །དེ་ཡི་ཕྱིན་ན་ཡོན་ཏན་ཉིད། །ཟད་མེད་འཕེལ་ལ་སྤྱོད་པ་འོ། །བདུད་རྩི་སྙིང་གི་ཐིགས་པ་ཞེས་བྱ་བ། བྲམ་ཟེའི་སློབ་དཔོན་འཇམ་དཔལ་བཤེས་གཉེན་གྱིས་མཛད་པ། རྒྱ་གར་གྱི་མཁས་པ་བི་མ་ལའི་ཞལ་སྔ་ནས། བོད་ཀྱི་ལོ་ཙཱ་བ་ཀ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །རྫོགས་སོ།། །། ཨྠྀི།།

རིག་པའི་གནད་དོན་ལྟ་བ།

རིག་པའི་གནད་དོན་ལྟ་བ་ཞེས་བྱ་བཞུགས་སོ། །མན་ངག་བརྒྱ་བཅུ་བཞིའི་ནང་ཚན།

བཅོམ་ལྡན་འདས་རང་སྣང་ཡེ་ཤེས་རྫོགས་ལ་ཕྱག་འཚལ་ལོ། །འཇིག་རྟེན་རྣམས་ཀྱིས་བཅིངས་པའི་ཆོས་ལས་གྲོལ། །གང་ལའང་ཆགས་པ་ཞེན་པ་རབ་གཅད་པའི། །སྙིང་པོ་ངེས་པའི་གསང་ཆེན་བཅུད་དུ་དྲིལ། །ཐོགས་མེད་ལམ་དུ་འཇུག་པའི་གནད་བསྡུས་པ། །ཡང་དག་སྙིང་པོ་དཔལ་ལྡན་བླ་མའི་གསུང་། །ཆགས་བྲལ་དྲི་མ་དག་པའི་ནམ་མཁའ་ལ། །སྣ་ཚོགས་མ་ཕྱེ་སོ་སོར་གསལ་བ་ཡི། །ཡེ་ཤེས་ལྔ་ལ་བསྟན་པའི་སྣང་བ་ཉིད། །གང་ཞིག་སྐལ་ལྡན་སྙིང་པོའི་དོན་རྙེད་པའི། །དབང་པོ་ལྔ་ཡི་ཞེན་པ་རང་ལོག་པའི། །ཞེན་པ་བཞི་བྲལ་ཚད་དང་ལྡན་པའི་དབང་པོ་ཡིས། །རང་དག་སྣ་ཚོགས་སྣང་བའི་སྒོ་ཕྱེ་ལ། །ཆགས་དང་ཞེན་པ་མེད་པའི་གནད་གཅུན་ལ། །འདི་ལྟར་ངེས་པའི་དོན་ལ་བལྟ་བར་བྱ། །འདི་ལྟར་ཉམས་སུ་ལེན་པའི་སྐལ་ལྡན་རང་བཞིན་རྫོགས་པ་ཆེན་པོའི་དོན་ལ་ཐེ་ཚོམ་མེད་པས་ཐི་བྱ་ཚང་དུ་འཇུག་པ་དང་འདྲ་བའི་བློ་གྲོས་ཅན་རྣམས་ཀྱིས། ཐོག་མར་ཐབས་སྣ་ཚོགས་ཀྱིས་བླ་མ་མཉེས་པར་བྱས་ལ། འཇིག་རྟེན་འཁྲུལ་པའི་བྱ ་བ་ཐམས་ཅད་སྤངས་ལ། ཡུལ་རྐྱེན་དང་བྲལ་བའི་དགོན་པར། བླ་མའི་མན་ངག་རྩོལ་བས་འདི་ཉིད་ལ་ཡང་ནས་ཡང་དུ་ནན་ཏན་དུ་བསྒྲུབ་པར་བྱའོ། །དེ་ལྟ་བུ་ལ་ནི་རང་བཞིན་དག་པའི་སྣང་བ་སྣ་ཚོགས་པར་རང་སྣང་ངེས་པ་ཡིན་ཏེ། དེའི་དུས་ན་འདི་དག་སྐྱེས་བུ་ཆེན་པོ་དེས་ངོ་ཤེས་པ་རབ་ཏུ་གལ་ཆེའོ། །ཡེ་ཤེས་ཕྱོགས་དག་གི་སྣང་བ་ནི། སྔོན་དུ་སྒྲོན་མ་ཨར་ལ་གཏད་པའི་སྟོབས་ཀྱིས་འོད་སྣ་ཚོགས་པའི་སྣང་བ་ནི། དཀར་པོ་དང་། དམར་པོ་དང་། སེར་པོ་དང་། ལྗང་གུ་དང་། མཐིང་ག་དག་གི་སྣང་བ་དང་། དེ་ལྟར་ཡང་ཁ་དོག་མི་འདྲ་བ་ཉི་ཤུ་རྩ་ལྔ་དག་ཏུ་ཡང་སྣང་བར་བྱེད་དོ། །དབྱིབས་ནི་བདུད་

རྩིའི་རྣམ་པ་དང་། མཆོད་རྟེན་དང་། པདྨ་དང་། མིག་མངས་དང་། མིག་ཚགས་དང་། ཟ་འོག་གུར་ཁྱིམ་དང་། རྒྱ་དང་། ཁྲ་བོའི་རྣམ་པ་དང་། དྲ་བ་དང་། དྲ་བ་ཕྱེད་པའི་དབྱིབས་ལྟ་བུའོ། །སྣང་ལུགས་ནི་གྱེན་འགྲེང་དང་། ཐུར་ཚུགས་དང་། དུམ་བུ་དང་། གྲུ་ཆད་དང་། རྩིབས་ཤར་དང་། མུ་ཁྱུད་ཀྱི་རང་བཞིན་དུའོ། །ཐིག་ལེའི་སྣང་བ་ནི། ཕྲ་བའི་ཐིག་ལེ་ཡུངས་འབྲུ་ལ་བཅུར་གཤགས་པའི་ཆ་ཙམ་དང་། ཟླུམ་པ་དང་། རབ་ཏུ་ཟླུམ་པ་དང་། འཁྲིལ་བ་དང་། རབ་ཏུ་འཁྲིལ་བ་དང། མུ་ཁྱུད་དང་། མུ་ཁྱུད་ཀྱི་ར་བའི་དབྱིབས་སུ་སྣང་བའོ། །གྲངས་ནི་ཉིས་སྦྲེལ་དང་། གསུམ་སྦྲེལ་དང་། བརྒྱ་སྟོང་དང་། བགྲང་དུ་མི་ལངས་པ་དག་ཏུའོ། །སྣང་ལུགས་ནི། ཁྲིགས་ཆགས་སུ་སྣང་བའོ། ཁ་འཐོར་དུ་སྣང་བ་དང་། ཕན་ཚུན་དུ་སྣང་བ་དང་། ཡན་ལག་ཏུ་སྣང་བ་དང་། རེ་རེའི་དབུས་སུ་ཐིག་ལེ་ལྔ་ལྔ་ཆུད་པར་སྣང་བའོ། །སྐུ་སྣ་ཚོགས་པའི་སྣང་བ་ནི། རེ་རེ་རྐྱང་བ་དང་། ཡབ་ཡུམ་གྱི་ཆ་དང་། ལྔ་ལྔས་ཁྱབ་པ་དང་། ཆུང་བ་དང་། རགས་པ་དང་། ཤིན་ཏུ་ཆུང་བ་དང་། ཤིན་ཏུ་རགས་པའོ། །ཞི་བའི་སྐུ་དང་ཁྲོ་བོའི་སྐུ་སྣ་ཚོགས་སོ། །སྣང་བ་དེ་བསྡུས་ན་དག་པའི་སྣང་བ་དང་། མ་དག་པའི་སྣང་བ་ཡིན་ཏེ། དག་པའི་གནས་ལུགས་མཐོང་བའི་ཚེ། དངོས་པོའི་འདུག་ཚུལ་གྱིས་རྟོག་པ་ཐམས་ཅད་རང་ཆོད་ནས། འབྲས་བུ་གཉིས་མེད་དུ་མཐོང་བ་ཡིན་ལ། མ་དག་པའི་སྣང་བ་མཐོང་བས་ཕྱིན་ཅི་ལོག་དང་། མ་ལོག་པའི་མཚན་ཉིད་ཐམས་ཅད་རང་ཤེས་ནས། རང་བཞིན་གྱི་གྲུབ་པའི་ཐམས་ཅད་ཇི་ལྟ་བ་བཞིན་དུ། མ་འཁྲུལ་བར་རྟོགས་ཤིང་ཁོང་དུ་ཆུད་པའོ། །དེ་ལྟར་སྣང་བ་གཉིས་ལ་མཁས་པས་ཆོས་ཐམས་ཅད་ཚིག་དང་ཡི་གེ་

ལ་མཁས་ཡིན་ནོ། །དེ་ལྟར་ན་རང་གཞན་ཐམས་ཅད་ལ་མཁས་པས་གྲུབ་མཐའ་འཛིན་པའི་དཔའ་བོ་ཞེས་བྱ་བར་འགྱུར་རོ། །རིག་པའི་གནད་དོན་ལྟ་བ་ཞེས་བྱ་བ་སློབ་དཔོན་བྲམ་ཟེ་འཇམ་དཔལ་བཤེས་གཉེན་གྱིས་མཛད་པ། རྒྱ་གར་གྱི་མཁས་པ་བི་མ་ལའི་ཞལ་སྔ་ནས། བོད་ཀྱི་ལོ་ཙཱ་བ་དགེ་སློང་ཀ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།ཨྠྀི།།

ཐོད་རྒལ་གྱི་བོགས་འདོན་ཨར་གཏད་ཀྱི་གདམས་པ་སྙིང་གི་ཡང་ཞུན།

ཐོད་རྒལ་གྱི་བོགས་འདོན་ཨར་གཏད་ཀྱི་གདམས་པ་སྙིང་གི་ཡང་ཞུན་ཞེས་བྱ་བ་བཞུགས། མན་ངག་བརྒྱ་བཅུ་བཞི་པའི་དགོངས་འགྲེལ་གྱི་ནང་ཚན།

དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐོད་རྒལ་གྱི་བོགས་འདོན། རྒྱ་མཚོ་ཨར་གཏད་ཀྱི་མུན་ཁྲིད་ཀྱི་མན་ངག་ལ་གསུམ་སྟེ། སྔོན་དུ་འགྲོ་བ་དང་། དངོས་གཞི་ཉམས་སུ་བླང་བ་དང་། རྗེས་ཉམས་དང་རྟགས་ཀྱི་རིམ་པའོ། །དང་པོ་སྔོན་དུ་འགྲོ་བ་ནི། བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ། མཎྜལ་དབུལ། བླ་མ་ལ་གསོལ་བ་དྲག་པོ་གདབ་བོ། ། གཉིས་པ་དངོས་གཞི་ནི། གནས་ཁང་མུན་པ་ནག་པོར། སྟན་བདེ་བ་ལ་སྤྲུལ་པའི་སྐུའི་བཞུགས་སྟངས་བྱ་སྟེ། རྒྱ་མཚོ་ཨར་ལ་གཏད་པ་དང་། དྭངས་སུ་གཞུག་པ་གཉིས་སོ། །ཨར་ལ་གཏད་པ་ནི། གྲུ་མོ་པུས་མོའི་སྟེང་དུ་བཞག་ལ། ལག་པ་གཡས་གཡོན་གཉིས་ཀྱི་མཐེབ་འཛུབ་གསུམ་ལ། ༀ་དཀར་པོ། ཨཱཿདམར་པོ། ཧཱུྃ་མཐིང་ནག་གསུམ་བསྒོམས་ལ། མིག་གི་འབྲས་བུ་གཉིས་ཚིར་མནན་པས། དང་པོ་ཡེ་ཤེས་ཀྱི་རང་མདངས་འོད་དང་ཐིག་ལེ་ཙེམ་ཙེམ་པ་བྱུང་བ་དང་། ལག་པ་གཉིས་ཕྱིར་བཏང་ལ་མིག་འབྲས་གཉིས་མ་འགུལ་བར་བལྟས་པས། གོང་གི་རིགས་ལྔ་ཞི་ཁྲོ་ཡེ་ཤེས་ལྔའི་རང་མདངས་སྣང་ཡུལ་དུ་གསལ་ལ། གཟུང་ཡུལ་དུ་མ་གྲུབ་པའི་ཟག་མེད་ཀྱི་ཐིག་ལེ། བསམ་གྱིས་མི་ཁྱབ་བརྗོད་ཀྱིས་མི་ལང་བ་མངོན་སུམ་དུ་གསལ་ལོ། །གསལ་ནས་འདུག་ཀྱང་ཆོས་སྐུའི་ངང་། །སྟོང་ནས་འདུག་ཀྱང་ཆོས་སྐུའི་ངང་། །སྟོང་གསལ་གཉིས་མེད་ཆོས་སྐུའི་ངང་། །ཆོས་སྐུའི་ངང་ལས་འདའ་མི་སྲིད། །རྣམ་པར་རྟོག་མེད་ལྷུན་གྱིས་གྲུབ། །ཡང་དག་བདག་མེད་དེ་བཞིན་ཉིད། །ཡང་དག་དོན་ལ་གཉིས་མེད་གཅིག་མ་གྲུབ། །སྐུ་དང་ཡེ་ཤེས་ཀྱི་འདུག་ཚུལ་དེ། །ངོ་བོ་ཀ་དག་བརྗོད་པའི་ཚིག་དང་བྲལ། །རང་བཞིན་ལྷུན་གྲུབ་རྒྱ་ཆད་ཕྱོགས་ལྷུང་མེད། །རིག་

པ་ཡེ་ཤེས་ཀྱི་ངོ་བོ་ནི། །ཕྱོགས་རིས་མེད་པའི་རིག་གདངས་ཕྱི་རུ་རང་གསལ། འགྱུ་བ་དངོས་མེད་ཀྱི་འདུས་ཆ་ལ་ལྟོས་དང་། ཡེ་ཤེས་ལྔའི་གསལ་ཆ་ལ་ལྟོས་དང་། རྒྱང་ཞགས་ཆུའི་སྒྲོན་མ། ཐིག་ལེ་སྟོང་པའི་སྒྲོན་མ། དཔེར་ན་རྨ་བྱའི་མདོངས་བཞིན། ཡེ་ཤེས་ཟང་ཐལ་ཆེན་པོར་འཆར་རོ། །ཡུལ་གང་ལ་འཆར་བ་ལ་གསུམ་སྟེ། དབང་པོ་འཁྲུལ་སྣང་གི་ཡུལ་དང་། སྒྲོན་མ་ཡེ་ཤེས་རང་མདངས་ཀྱི་ཡུལ་དང་། ཡང་དག་ཆོས་ཉིད་ཀ་དག་གི་ཡུལ་ལོ། །དང་པོ་འཁྲུལ་སྣང་གི་ཡུལ་ནི། མིག་གི་ཡུལ་དུ་གཟུགས་སྣ་ཚོགས། རང་ག་མར་མཐོང་བ་ལ་བྱ་སྟེ། སྡུག་མི་སྡུག་ལེགས་མི་ལེགས། འདོད་ཡོན་ལ་སྤྱོད་པས་ན་ཡུལ་ལོ། །གཉིས་པ་སྒྲོན་མ་རང་མདངས་ཀྱིི་ཡུལ་ནི། འོད་དང་ཐིག་ལེ་དང་སྐུ་དང་ཡེ་ཤེས་ཀྱིི་ཚོགས་ཁྲ་ཆེམས་ཀྱིས་སྟོང་གསལ་དུ་གསལ་ལོ། །གསུམ་པ་གསང་བ་ཆོས་དབྱིངས་ཀ་དག་གི་ཡུལ་ནི། ཆོས་ཉིད་ཐམས་ཅད་འདུས་མ་བྱས་པ། བདག་མེད་པ། སྟོང་པ་རང་བཞིན་གྱིས་འོད་གསལ་བ། བརྗོད་བྱའི་ཡུལ་ལས་འདས་པ། སྒྲ་དང་ཚད་མ་གཏན་ཚིགས་གང་གིས་ཀྱང་གཏན་ལ་མི་ཕེབས་པ། མདོར་ན་རིག་པ་ཀ་དག་གི་ཡེ་ཤེས་ཉིད་ཡིན་ཏེ། སྐུ་དང་ཡེ་ཤེས་ལ་སོགས་པའི་འབྱུང་གནས་ཆེན་པོ་ཡིན་ནོ། །ཐིག་ལེ་སྟོང་པའི་སྒྲོན་མ་དེ་ལ་བརྟེན་ནས། དོན་དམ་པར་གཉིས་སུ་མེད་པའི་དོན་ཏོ། །ངེས་པར་དེ་ལས་འབྱུང་བའོ། །དེའི་སྒོ་གང་ཞེ་ན་དབང་པོའི་ཡུལ་ལ་འཆར་བར་བྱེད་པ་ཡེ་ཤེས་ཀྱི་རྩ་ལ་འཆར། ཐོག་མ་འོད་ཀྱི་ཐིག་ལེ་ནི་ཀུན་ནས་ཟླུམ་པ་ཁ་དོག་ནི་ལྔ་སྟེ། འོད་ལྔའི་མཚན་ཉིད་དུ་གསལ་བ། འོད་ལྔ་ཡེ་ཤེས་ལྔའི་ངོ་བོར་སྣང་བ།

ཉམས་དང་དྲོད་རྟགས་འདོད་པ་མེད་པར་ཤར་བ་ནི། དཔེར་ན་ནོར་བུ་རིན་པོ་ཆེ་དང་འདྲ་བར་ཡོན་ཏན་བཙལ་མི་དགོས་པར། རྣམ་པར་རྟོག་མེད་ལྷུན་གྱིས་གྲུབ་བོ། །སྐྱོན་སྤང་མི་དགོས་པར་རང་རྟགས་སྒྲོན་མའི་ཉམས་དེས་ཉོན་མོངས་པ་སྤང་མི་དགོས་པར་རང་དག་སྟེ། གཉིས་མེད་གཉིས་སུ་མེད་པར་སྟོན། ངོ་བོ་ཀ་དག་ལ་ལོངས་སྤྱོད་པའི་གནད་ཡིན་པས། ཉམས་རྟོགས་ཡོན་ཏན་འདོད་པ་མེད་ཀྱང་འབྱུང་བ་ནི། ནམ་མཁའི་ཆོ་འཕྲུལ་ལྟ་བུར། བཀག་པས་མི་ཁེགས་པ་རང་འབྱུང་ངོ་། །དེ་ངོ་མུན་ནག་ཏུ་སྤྲད་པས་གསལ་སྣང་ལོངས་སྐུའི་ཞིང་ཁམས་སུ་རྒྱས། དེ་ལྟར་ཉིན་མཚན་མེད་པར་ཉམས་སུ་བླངས་པས། སྐུ་རྣམ་པ་གསུམ་རང་རྫོགས་སུ་སྣང་བ། ཡེ་ཤེས་ལྔ་རང་དག་ཏུ་གསལ། ངོ་བོ་རང་བཞིན་ཐུགས་རྗེ་གསུམ་དབྱེར་མི་ཕྱེད་པར་ཚེ་འདི་ཉིད་ལ་སངས་རྒྱས། དེ་ཡང་ཐད་ཀ་དྲང་པོར་ལྟ་ཞིང་། མཐེབ་འཛུབ་གཉིས་པོས་སྒྲོན་མའི་སྟེང་འོག་གཉིས། གཡས་གཡོན་གཉིས། ཡང་ན་སྟེང་ནས་གཏིམས་ནས། རྗེས་ལ་མ་ཡེངས་པར་བལྟས་པས། རྣལ་འབྱོར་བདག་གཞན་རིག་པའི་ཡེ་ཤེས། དེ་ཉིད་ཉམས་སུ་མྱོང་བས། དཔག་པར་དཀའ་བ་དོན་སྐུ་དང་ཡེ་ཤེས་ཀྱི་དགོངས་པ། རབ་ཏུ་འདི་ཉིད་ལ་འགྲུབ་པར་ཐེ་ཚོམ་མེད་དོ། །ཐུན་བཞིའམ་དྲུག་ཏུ་ཉམས་སུ་བླང་ངོ་། །དེ་ནི་རྒྱ་མཚོ་ཨར་ལ་གཏད་པའི་ལག་ལེན་ནོ། །རྒྱ་མཚོ་ལ་གསུམ་སྟེ། བརྡར་བཏགས་སྒོའི་རྒྱ་མཚོ་དང་། མཚོན་པ་དཔེའི་རྒྱ་མཚོ་དང་། ཆོས་ཉིད་དོན་གྱི་རྒྱ་མཚོ་རྒྱས་པར་བཤད་པའོ། །གཉིས་པ་རྒྱ་མཚོ་དྭངས་སུ་གཞུག་པ་ནི། སྟན་

བདེ་བ་ལ་རྡོ་རྗེ་སྐྱིལ་ཀྲུང་བསམ་གཏན་གྱི་ཆོས་བདུན་བྱ། སྐེད་པ་དྲང་བས་རྩ་དྲང་། རྩ་དྲང་བས་རླུང་དྲང་། རླུང་དྲང་བས་ཐིག་ལེ་དྲང་། ཐིག་ལེ་དྲང་བས་ཡེ་ཤེས་ཟང་ཐལ་དུ་འཆར་རོ། །མིག་གི་ལྟ་སྟངས་གསུམ་གང་མོས་ལ་གཏད་པས། སྣང་བ་ལོངས་སྐུའི་ཞིང་ཁམས་སུ་རྒྱས་པར་འཆར་རོ། །ཡེ་ཤེས་ཀྱི་ཆོས་ལྔ་ནི། སྐུ་ལས་འདས་པའི་ཡེ་ཤེས། སེམས་ལས་འདས་པའི་སངས་རྒྱས། ཀུན་གཞི་ལས་འདས་པའི་ཆོས་སྐུ། ཡིད་ལས་འདས་པའི་ཤེས་རབ། འབྱུང་བ་ལས་འདས་པའི་རང་མདངས། ཚིག་ལས་འདས་པའི་རང་སྣང་ངོ་། །ཞིག་ནས་མེ་ཏོག་དངོས་པོ་མཁའ་ཁྱབ་འདྲ། །ལྷག་མཐོང་མ་རྨོངས་མཁའ་ལ་གཟའ་སྐར་བཀྲ། །འོད་གསལ་མི་རྟོག་མཁའ་ལ་ཉི་ལྟར་གསལ། །ཟུང་འཇུག་གཉིས་མེད་ཉི་མའི་འོད་ཀྱི་ཚུལ། །རང་རིག་ཡེ་ཤེས་ཟང་ཐལ་ཤར་བ་དེ། ནམ་མཁའི་ཁམས་སུ་ཕྱིན་ཀྱང་གཡངས་ཟ་བ་དང་། ལྟུང་བའི་སྡུག་བསྔལ་རིག་པ་ང་ལ་མེད། རི་རབ་ཀྱི་རྩེ་ལ་ཕྱིན་ཀྱང་ཉམ་ང་བ་དང་བག་ཚ་བ་མེད། རྒྱ་མཚོའི་གཏིང་དུ་ཕྱིན་ཀྱང་གཤེར་བ་དང་སུབས་པ་མེད། མེ་དཔུང་གི་ནང་དུ་ཕྱིན་ཀྱང་ཚ་བ་དང་ཚིག་པ་མེད། རིག་པ་ལྷུན་གྲུབ་མངོན་སུམ་སྐྱེ་ཤིའི་སྐྱོན་གྱིས་མ་གོས་པ། འཁོར་བའི་ལས་དགེ་སྡིག་གིས་མ་གོས་པ་སྟེ། སྐྱོན་མེད་རང་གྲོལ་ཆེན་པོར་རང་ཤར་བས། ཕྱོགས་རིས་གཟའ་གཏད་མེད་པའི་ལྟ་བ་ཞེས་བྱའོ། །ངོ་བོ་ཆོས་སྐུ་རྣམ་དག་སྤྲོས་བྲལ་ངང་གིས་སྟོང་། །རང་བཞིན་ལོངས་སྐུ་མཚན་དང་དཔེ་བྱད་སྐུ་རུ་གསལ། །སྤྲུལ་སྐུ་སྣ་ཚོགས་འགྲོ་བ་ཐུགས་རྗེས་འདུལ། །སྟོང་ཉིད་མདངས་ཅན་ཡེ་ཤེས་ཁ་དོག་ནི། །མཐིང་

ག་དམར་སེར་དམར་ལྗང་ལྔ་རུ་གསལ། །ཆོས་དབྱིངས་ཡེ་ཤེས་ནམ་མཁའི་ངོ་བོ་ཉིད། །མེ་ལོང་ཡེ་ཤེས་མི་སྐྱེ་མི་འགག་གསལ། །མཉམ་ཉིད་ཡེ་ཤེས་དབྱེར་མེད་ཐམས་ཅད་མཁྱེན། །སོ་སོར་ཀུན་རྟོག་མི་ཕྱེད་སོ་སོར་གསལ། །བྱ་བ་གྲུབ་པས་འབྲས་བུ་མངོན་དུ་གྱུར། །སྐུ་ལྔ་ལྡན་པས་དགོངས་སྤྱོད་མཁའ་ལ་འགྲོ། །མཚན་མ་སྤྲོས་བྲལ་ཐ་སྙད་ཚིག་གིས་སྟོང་། །ཉིན་ནུབ་མི་འོང་ཉིན་མཚན་གཉིས་སུ་མེད། །འཁོར་འདས་གཉིས་འཛིན་བསམ་པ་སྐྱེ་མི་སྲིད། ཁྲེགས་ཆོད་ལྟ་བའི་རྩི་ཡིས་ཟིན་པ་གཅེས། །སངས་རྒྱས་བསྟན་པ་འཇིག་རྟེན་སྒྲོན་མེའི་མཆོག །མི་གཡོ་རྒྱ་མཚོ་དྭངས་སུ་འཇུག་པའི་ཁྲིད། །ཉིན་མཚན་གཉིས་ན་རྟགས་འཆར་ཐེ་ཚོམ་མེད། །རིག་པ་སྔོན་དུ་མ་སྦྱངས་ ན། །བར་དོ་ཡེ་ཤེས་བདུད་དུ་ལྡང་། །རིག་པ་སྒྱུ་ལུས་སེམས་འཛིན་ གྱིས། །རང་ལ་རང་གི་ལུས་ངན་ལེན། །དགོངས་སྤྱོད་མངོན་དུ་གྱུར་བ་ན། །སྒྱུ་ལུས་འོད་གསལ་ལོངས་སྐུ་ལྟར། །རིག་པའིི་དོན་ནི་དེ་བཞིན་ཉིད། །རྟག་པར་ནམ་མཁའི་མཐའ་ལ་ལྟ། །ཆོས་ཉིད་མཁའ་ལ་ཉི་ཤར་འདྲ། །དགོངས་པ་ཆུ་བོ་གངྒའི་རྒྱུན། །ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་མཐའ་ནི་ཆོས་སྐུར་རྟོགས། །སེམས་མེད་སེམས་སྤངས་སེམས་ཀྱི་མཆོག །རིག་པ་རང་གསལ་ཐམས་ཅད་མཁྱེན། །ངག་མེད་སྨྲ་བརྗོད་ཡུལ་ལས་གྲོལ། །བརྗོད་མེད་སྟོང་པ་ཆོས་ཀྱི་སྒྲ། །གདུལ་བྱ་རྣམ་དག་ཆོས་དབྱིངས་ཞིང་ཁམས་ན། །ཐམས་ཅད་མཁྱེན་པའི་ཚུལ་གནས་པས། །མ་རིག་སེམས་ཅན་གདུལ་དཀའ་འདུལ། །ཐུགས་རྗེའི་ལྕགས་ཀྱུས་འགྲོ་བ་འདུལ། །འཁོར་བའི་སེམས་ཅན་ཆོས་སྐུར་གྲོལ། །ཡིད་བཞིན་རིན་ཆེན་རང་སར་བསྐྱལ། །ཅེས་གསུངས་སོ། །ཡང་ཞུན་ལས། ཨེ་མ་

རྒྱ་མཚོ་ཨར་གཏད་དྭངས་སུ་གཞུག་པའི་གནད། །གསང་བའི་གསང་མཆོག་བླ་ན་མེད་པ་ལས། །ཕྱི་ནང་གསང་བ་གསུམ་གྱི་བཅུད་སྐུ་འོད། །གཉིས་མེད་ངང་གིས་ངེས་པར་ཚད་ཕེབས་པའི། །རིན་ཆེན་དག་པ་ཡི་གེ་འདི་ལོངས་ཤིག །ཆོས་རྣམས་ཀུན་གྱི་ཚད་རྟགས་བསྟན་པ་ཡི། །རྟགས་ཀྱི་སྒྲོན་མ་རང་སྣང་འོད་པོ་ཆེ། །ཀུན་ལ་ཡོད་དེ་རང་གསང་ཐབས་ཀྱི་མཆོག །འདི་ཉིད་ལ་འཇུག་སྐྱེས་བུ་སྐལ་བ་ཅན། །ཚད་ལྡན་རྟགས་ཀྱི་ཡི་གེ་འདི་ཉིད་ལ། །རབ་ཏུ་གཏེམས་ཤིང་ཉམས་སུ་བླངས་པ་ཡིས། །དཔེ་མེད་ཟླ་དང་བྲལ་བའི་སྣང་བ་འཆར། །དུ་མ་བ རྟེན་པ་མེད་པའི་ནམ་མཁའ་ལ། །བྱ་བྱེད་རང་བཞག་མེད་པའི་སྒྲོན་མ་ཉིད། །སུས་ཀྱང་བྱས་ཤིང་བཅས་བཅོས་མི་རྙེད་པས། །སྒྲིབ་བྲལ་ལྟ་བྱེད་མ་འགགས་རྒྱ་མཚོ་ལས། །འཆར་བྱེད་མ་འགགས་ཁ་དོག་ཡོངས་རྫོགས་པའི། །རིག་པ་ཉིད་ཡིན་སྐུ་རྣམས་རང་བཞུགས་ཏེ། །རང་སྣང་གསལ་དངས་བཅས་པའི་རིག་པ་ཉིད། །ཐིག་ལེ་སྟོང་པའི་འོད་ཀྱིས་ཡིད་ཆེས་ཕྱིར། །འདི་ཉིད་གོང་བཞིན་སྐྱེས་བུས་གཏེམས་ཏེ་ཉམས་བླངས་ན། །རབ་ཏུ་བརྩོན་ལྡན་སྐྱོ་ངལ་མེད་པ་ཡིས། །དོན་ཆེན་སྒྲུབ་པས་འབྲས་བུ་མངོན་དུ་འབྱིན། །རབ་ཏུ་གསང་བའི་ཐབས་ནི་སུས་ཤེས་པ། །སངས་རྒྱས་རྣམས་ཀྱི་དགོངས་པ་འདི་ལ་ཡོད། །རིགས་དྲུག་འཁོར་བའི་མངལ་གྱི་གྲོང་ཁྱེར་འདི། །རྒྱུན་ཆད་ཡང་དག་ངེས་པའི་ས་ཐོབ་སྟེ། །ཐུགས་རྗེས་འགྲོ་བ་གཞན་རྣམས་འདྲེན་པ་ཡི། །ལྗགས་ཀྱི་དབང་པོ་ཉིད་ལས་རང་བྱུང་གི །ཡི་གེ་དྲུག་གི་སྒྲ་ནི་རབ་འཕྲོས་ནས། །འགྲོ་བ་དྲུག་གི་ཁ་ལོ་གྱེན་ལ་བསྒྱུར། །རང་སྣང་གོམས་པའི་ཤུགས་ལས་དེ་དག་གོ །དེ་ལྟར་རང་བྱུང་ཡེ་ཤེས་སྒྲོན་མ་འོད་འབར་ཏེ། །

ཐབས་འདི་རབ་ཏུ་གནས་ཏེ་སྤྱད་པར་བྱ། །སྔོན་དུ་རང་གི་བླ་མ་མཉེས་པ་ཡིས། །ལུས་ངག་ཡིད་ཀྱིས་ཇི་ལྟར་འཐད་རྣམས་ཀྱིས། །བླ་མ་རྡོ་རྗེ་འཛིན་པ་མཉེས་པར་བྱ། །དེ་ནས་རང་གི་ཡུལ་རྐྱེན་གྱིས། །གནོད་པ་བྲལ་བའི་དགོན་པར་ནི། །རང་གི་བླ་མ་ལས་བྱུང་བའི། །ཐབས་ནི་ངེས་པར་བརྟེན་པའི་གནད། །འདི་ལྟ་བུ་ཡང་བརྩམས་པར་བྱ། །ལུས་ཀྱི་གནད་དུ་འདུག་པ་ལ། །འགྲོ་དང་སྤྱོད་པར་མི་བྱའོ། །ངག་གི་རང་བཞིན་བརྗོད་པ་ཡང་། །གལ་ཏེ་ལུས་ཀྱི་འབྱུང་བ་ཉིད། །རྟེན་འབྲེལ་དུས་བཞི་མཉམ་སྦྱོར་གྱིས། །འཁྲུགས་པར་གྱུར་ན་རྩ་གནས་ཀྱི། །ཇི་ལྟར་རྩ་གནས་ཡི་གེ་སྒྲོག་པ་ལ་སོགས་ན་ཡོད་ཕན་པའི་ཡི་གེ་ཉིད། །དྲག་ཞན་བྱེ་བྲག་བརྗོད་པར་བྱ། །སྐབས་སུ་གསང་མཆོག་ལས་བྱུང་བའི། །རྟེན་འབྲེལ་འདི་ཡི་འཁོར་ལོ་བསྐོར། །ཡིད་ནི་འཕྲོ་འདུའི་སྦྱོར་བ་སྤངས། །སྒྲོན་མ་ཉིད་དང་བསྲེ་བ་ཡང་། །རྣམ་པར་དག་པའི་ནམ་མཁའ་ལ། །ཕྲ་དང་རགས་པའི་སྒྲིབ་པ་གཉིས། །རྣམ་པར་སྤངས་པའི་ཕྱོགས་སུ་གཏད། །མཚན་མོ་རང་གི་གནས་ཁང་དུ། །བདེ་བའི་སྟན་གྱི་དཀྱིལ་འདུག་ལ། །གཉིད་སྤངས་རྒྱ་མཚོའི་འགྲམ་གཉིས་སྟེམས། །འདི་ལ་རྟག་ཏུ་འདྲེས་པར་བྱ། །འདི་འདྲའི་སྣང་བའི་འཕེལ་དག་ནི། །ཡིད་བཞིན་གྱི་ནི་ནོར་བུ་ལྟར། །ཟད་མེད་འཕེལ་བ་རྣམ་པར་སྤྱོད། །ཡེ་ཤེས་ཉིད་ཀྱི་བདག་ཉིད་ཀྱིས། །རྣལ་འབྱོར་ཉིད་དང་མཚན་མོ་དབྱེ། །ཉིན་དུས་མཚན་ཉིད་འཛིན་པ་ལྔ། །མེ་ལོང་ཡེ་ཤེས་དཀར་གསལ་རྫོགས། །ཆོས་ཀྱི་དབྱིངས་ནི་མཐིང་གས་ཁྱབ། །མཉམ་པ་ཉིད་ནི་ཡོན་ཏན་སེར། །སོ་སོར་རྟོགས་པ་ཆགས་ཞེན་དམར། །བྱ་བ་གྲུབ་པ་ལྗང་གུར་མཛེས། །ཡང་ན་མེ་ལོང་བན་བུན་ཡིན། །ཆོས་

ཀྱི་དབྱིངས་ནི་སང་མ་སེང་། །མཉམ་པ་ཉིད་ནི་ལང་ལོང་བ། །སོ་སོར་རྟོགས་པ་སྣ་ཚོགས་ཡིན། །ཡང་ན་མེ་ལོང་གྱེན་འགྲེང་དང་། །ཆོས་དབྱིངས་དེ་བཞིན་རྩིབས་ལ་ཤར། །མཉམ་པ་ཉིད་ནི་དུམ་བུ་ལ། །སོ་སོར་རྟོགས་པ་མིག་མངས་རིས། །བྱ་གྲུབ་ཟ་འོག་གུར་དང་མཚུངས། །ཡང་ན་མེ་ལོང་གཡས་ཀྱི་ཕྱོགས། །དེ་བཞིན་ཆོས་དབྱིངས་དབུས་སུ་ུའོ། །མཉམ་པ་ཉིད་ནི་གཡོན་ཕྱོགས་སུ། །སོ་སོར་རྟོགས་པ་འོག་ཏུ་སྟེ། །བྱ་བ་གྲུབ་པ་སྟེང་ཕྱོགས་སུ། །དེ་ལྟར་བཞི་ཡི་དབྱེ་བ་ཡིས། །རྣལ་འབྱོར་པ་ཡི་ཉིན་དུས་ཀྱི། །སྣང་བ་རང་འཕེལ་རྫོགས་པ་འོ། །ཡང་ན་ཞི་གནས་ཡེ་ཤེས་གསུམ། །ངོ་བོ་ཀ་དག་ཡེ་ཤེས་དང་། །རང་བཞིན་ལྷུན་གྲུབ་ཡེ་ཤེས་ལ། །ཐུགས་རྗེའི་ཡེ་ཤེས་ཀུན་ལ་ཁྱབ། །ངོ་བོའི་ཡེ་ཤེས་དབུས་ཀྱི་ཆ། །ཨ་ཝ་དྷཱུ་ཏི་ཞེས་བྱ་བ། ཁྱད་པར་ཡེ་ཤེས་གནས་ཡིན་ནོ། །ཕྱི་སྒོ་ཚངས་པའི་བུ་ག་ལ། །རིག་པ་རྟོག་མེད་སྐུ་དང་བཅས། །གསང་བ་མཆོག་ལས་བྱུང་བ་ཡི། །རྩ་རྣམས་སྟེམས་པའི་སྦྱོར་བ་ བྱ། །ཡང་ན་རྒྱ་མཚོའི་འགྲམ་གཉིས་སྟེམས། །འདི་ལྟར་འབྲལ་བ་མེད་པ་ནི། །རྣལ་འབྱོར་པ་ཡིས་བྱས་པ་ན། །མཚན་མའི་ཡེ་ཤེས་མངོན་དུ་འབྱིན། །ཡང་ན་ཡེ་ཤེས་ཁྱད་པར་ལས། །ངོ་བོའི་ཡེ་ཤེས་ཀུན་ནས་ཟླུམ། །ལྔ་ཡི་ཆ་ནི་འབྱེད་མེད་རྫོགས། །ལྷུན་གྲུབ་ཉིད་ནི་གྲུ་བཞི་ལས། །འཆར་བྱེད་བརྒྱད་དང་བཅས་པ་ནི། །ཡང་ན་རིན་པོ་ཆེ་ད ང་མཚུངས། །ཐུགས་རྗེའི་ཡེ་ཤེས་རྩིབས་བརྒྱད་འབར། །ཡང་ན་ངོ་བོའི་ཡེ་ཤེས་ལ། །འབྱེད་པ་མེད་པའི་འོད་ལ་ནི། །བྲེང་གསལ་རྫོགས་པའི་ཚུལ་དུ་འོ། །ལྷུན་གྲུབ་ལ་ནི་ཁ་དོག་ལྔ། །སོ་སོའི་མཚན་ཉིད་

འཛིན་ཚུལ་ལོ། །ཐུགས་རྗེའི་འོད་ཟེར་དཔག་ཏུ་མེད། །འཕོ་དང་མཆེད་པའི་རང་བཞིན་ཅན། ཁྱད་པར་ཁ་དོག་ཉི་ཤུ་ལྔ། །མ་འདྲེས་སོ་སོར་རྫོགས་པ་འོ། །ངོ་བོ་ཡེ་ཤེས་དག་པ་ལ། །ལྷུན་གྲུབ་ཀྱིས་ནི་སྣ་ཚོགས་སྟོན། །ཐུགས་རྗེས་རང་གཞན་དོན་གཉིས་བྱེད། །ཡང་ན་ངོ་བོ་རྫོགས་པ་ལ། །ལྷུན་གྲུབ་ཀྱིས་ནི་མཆེད་པར་བྱེད། །ཐུགས་རྗེ་ཉིད་ཀྱིས་འཛིན་པ་འོ། །ཡང་ན་ངོ་བོ་ཁྱབ་ཅིང་གསལ། །ལྷུན་གྲུབ་སྣང་བ་སྟོན་པར་བྱེད། །ཐུགས་རྗེ་ཐ་དད་ཀུན་ཏུ་བསྟན། །ངོ་བོ་ཉིད་ནི་འགྱུར་བ་མེད། །ལྷུན་གྲུབ་གྱུར་པའི་ཆ་ཉིད་དོ། །ཐུགས་རྗེའི་ཡེ་ཤེས་ཕྱོགས་མེད་པའོ། །དེ་ལྟར་གཞན་ནས་ཡེ་ཤེས་ཀྱིས། །རྣལ་འབྱོར་གང་ཞིག་སྐལ་ཆེ་བའི། །མཚན་མོའི་སྣང་བ་རྫོགས་པ་འོ། །དེ་ལྟར་རྒྱ་མཚོ་ཉི་མ་ཅན། །ཨར་ལ་གཏད་པར་སུས་ནུས་པ། །སངས་རྒྱས་རྣམས་ཀྱི་བདེན་པ་ཉིད། །འདི་ཉིད་རང་ལ་སྣང་བར་འགྱུར་རོ། །ཐིག་ལེ་སྟོང་པའི་སྒྲོན་མ་ལས། །རང་གི་ཆོས་ཉིད་འདི་དང་ཡོན་ཏན་ནི། །དེ་ལྟར་དཔག་ཏུ་མེད་པ་ལས། །དབྱིངས་ཀྱི་འཕེལ་དང་བཅས་པ་འོ། །སྒྲོན་མས་རང་བྱུང་ཡེ་ཤེས་རྣམས། །གཅིག་ཏུ་མ་ལུས་སྟོན་པར་བྱེད། །ཐམས་ཅད་འདུས་ཕྱིར་ཐིག་ལེ་སྟེ། །སྟོང་པ་མཚན་མ་རང་དང་བྲལ། །འདི་དུས་རྣལ་འབྱོར་སྐལ་ལྡན་ཀུན། །སངས་རྒྱས་རྣམས་ཀྱི་ཞལ་ཉིད་ཀྱང་། །མ་བསྒྲིབས་ཡོངས་སུ་གསལ་བར་མཐོང་། །དགོངས་པ་ཉག་གཅིག་གནད་དུ་ཕབ། །གཉིས་མེད་ཡེ་ཤེས་རང་སྣང་མཐོང་། །འཁྲུལ་པའི་སྣང་བར་རང་ལོག་སྟེ། །མ་འཁྲུལ་ཡེ་ཤེས་སྣང་བ་ཉིད། །

འདི་ལྟར་ངེས་པར་རྫོགས་པ་འོ། །ཆོས་ཀྱི་སྐུ་དང་ཆོས་ཀྱི་ དབྱིངས་། །རང་བཞིན་གཅིག་པའི་ཚུལ་དུ་རྟོགས། །བྱ་བཙལ་ཉིད་དང་བྱར་མེད་པ། །རང་བཞིན་རྫོགས་པ་ཆེན་པོ་ཡི། །ལྟ་བ་མཐར་ཕྱིན་འདི་ཉིད་ལ། །སྐལ་ལྡན་དེ་ཡིས་དེ་ལྟར་རྟོགས། །ཐོད་རྒལ་གྱི་བོགས་འདོན། ཨར་གཏད་གྱི་གདམས་པ། སྙིང་གི་ཡར་ཞུན། རྩི་ཞིང་པས་བཀོད་པའོ། །བླ་མ་ལ་བརྒྱུད་པ་བཞིའི་བཀའ་བབས་ཡོད་དོ།། །།

སྨུག་ནག་ཁྲོས་མ་རག་གདོང་མའི་དུས་གནད་ངེས་པ།

སྨུག་ནག་ཁྲོས་མ་རག་གདོང་མའི་དུས་གནད་ངེས་པ་བཞུགས་སོ༔

རྒྱ་གར་སྐད་དུ། བྱརྔྶ།ཧ།ནཱ།ཎྔ།ནྤ།མྱརྠ༔ བོད་སྐད་དུ། སྨུག་ནག་ཁྲོས་མ་ཞེས་བྱ་བ༔ མངོན་རྫོགས་ཡབ་ལ་ཕྱག་འཚལ་ལོ༔ སངས་རྒྱས་བསྟན་པ་བསྲུང་དོན་དུ༔ སྨུག་ནག་ཁྲོས་མ་རག་གདོང་མའི༔ ནག་མོ་ཁྲོས་མ་གསང་བའི་རྒྱུད༔ ལེའུ་བརྒྱ་དང་རྩ་བརྒྱད་ལས༔ ཤན་པ་གསོད་པར་བྱེད་པ་ཡི༔ ལས་མཐའ་བསམ་གྱིས་མི་ཁྱབ་ཀྱང་༔ འདིར་ནི་གསང་ཆེན་དྲིལ་བ་ཡི༔ ངེས་པར་གནད་དུ་བསྡུས་པ་ལ༔ སྲོག་ལ་ངེས་པར་བབ་པ་ཡི༔ མ་མོ་ངེས་པར་རྒྱུ་བ་ཡི༔ དུས་ལ་བརྟེན་ནས་ལས་ཀྱི་མཐའ༔ རྣམ་པ་གཉིས་སུ་གསུངས་པ་ལ༔ མ་མོ་ཉིད་ཀྱི་རང་གཤེད་དང་༔ དགྲ་རྣམས་སྲོག་ལ་ཟ་བ་ཡི༔ སྦྱོར་བ་ངེས་པར་བསྟན་པ་ལ༔ འདིར་ནི་གཉིས་ཀྱིས་ངེས་པའི་གནད༔ འཁྲུལ་པ་མེད་པར་རྣལ་འབྱོར་ལས༔ ངེས་པར་འགྲུབ་པའི་སྔགས་ཀྱི་གནད༔ ལས་ཀྱི་ཐུན་ཀ་བསྟན་པ་ནི༔ ངེས་པར་ལོ་གཅིག་ཟླ་བ་ཡང་༔ བཅུ་གཉིས་རིམ་པར་མི་ནོར་བས༔ ངེས་པར་གཏན་ལ་ཕབ་བྱས་ཏེ༔ དགུན་དབྱར་སྟོན་དཔྱིད་ཟླ་བ་ལ། གསུམ་གསུམ་ཁེ་ན་ངེས་བརྩིས་པས༔ དགུན་ཟླ་དང་པོའི་ཉ་དང་སྟོང་༔ འབྲིང་པོ་བརྒྱད་དང་ཉི་ཤུ་གཉིས༔ ཐ་མ་བཅུ་གཅིག་ཉི་ཤུ་ལྔ༔ དཔྱིད་ཀྱི་དང་པོ་བཞི་དང་དགུ༔ འབྲིང་པོ་བཅུ་དང་ཉི་ཤུ་དགུ༔ ཐ་མ་ཚེས་གསུམ་ཉི་ཤུ་བརྒྱད༔ དབྱར་གྱིི་དང་པོ་བཅུ་བདུན་ལ༔ ཉི་ཤུ་དག་ཀྱང་དེ་བཞིན་བདུན༔ འབྲིང་པོ་བཅུ་དང་ཉི་ཤུ་གཅིག༔ ཐ་མ་བཅུ་དྲུག་ཉེར་བདུན་ཡིན༔ སྟོན་གྱི་དང་པོ་ཚེས་དྲུག་དང་༔ ཉི་ཤུ་གསུམ་ལ་ངེས་པར་རོ༔ འབྲིང་པོ་བཅུ་དགུ་ཉི་ཤུ་གཅིག༔ ཐ་མ་གཉིས་དང་ཉི་ཤུ་བརྒྱད༔ དེ་ལྟར་ཟླ་བ་བཅུ་གཉིས་ལ༔ རྒྱུ་བའི་ཞག་ནི་ཉི་ཤུ་བཞི༔ ལྷག་མ་དག་ལས་རྡུགས་པར་འགྱུར༔ དེ་ལྟར་ཉི་ཤུ་རྩ་བཞི་

ལ༔ ངེས་པར་བྱས་ན་འགྲུབ་པར་ངེས༔ དེ་ལ་ངེས་པའི་གནད་ཕྱེ་ན༔ ཉིན་མོ་རྒྱུ་བ་གསུམ་ལས་མེད༔ ལྷག་མ་མཚན་མོ་རྒྱུ་བ་ཡིན༔ དགུན་འབྲིང་དང་པོ་སྲོད་དང་འཛིང་༔ གཉིས་པ་ཉི་ཤུ་རྡེ་འུ་ནག༔ གསུམ་པ་ཕྱེད་གོང་ཕྱེད་ཚད་དོ༔ དཔྱིད་ཟླ་དང་པོ་ཕྱེད་ཡོལ་དང་༔ དེ་ཡི་ཆ་ལས་རླུང་ནི་ཡང་༔ སུམ་ཅུ་རྩ་གཉིས་དག་ལ་འོ༔ འབྲིང་པོ་དེ་ནས་དྲུག་ཅུ་བཞི༔ ཐ་ཆུང་དེ་ནས་རླུང་ཉེར་གཉིས་སོ༔ དབྱར་ནི་དང པོ་རླུང་བཅུ་ཡིན༔ ཕྱེད་དང་བདུན་དང་ཉི་ཤུ་སྟེ༔ འབྲིང་པོ་ལ་ནི་ནག་སྒམ་ཐ་ཆུང་དེ་བཞིན་དྲུག་གི་ཆ༔ སྟོན་གྱི་དང་པོ་རླུང་བཞི་ཆ༔ འབྲིང་པོ་ནམ་མཁའི་མཐའ་ལ་འོ༔ དེ་ཡི་འོག་མ་ཉི་ཤུར་དུས༔ ཐ་ཆུང་དེ་ནས་ཉིན་ཕྱེད་དང་༔ དེ་ནས་མཚན་མོ་བར་དག་ཡིན༔ དེ་ནི་དུས་ངེས་པའི་ཕྱོགས་བརྟག་པའོ༔ སྨུག་ནག་འཇིགས་པའི་མ་མོ་ཉིད༔ ངེས་པར་རྒྱུ་བའི་དུས་ནི་འདི་དག་གོ༔ ཟླ་བ་དང་པོ་བཞི་ལ་གསོད་པའི་དུས་བཞི་ཡོད་དོ༔ དགུན་གྱི་དང་པོ་ཉ་ལ་ཤར་ནས་ནུབ་ཏུ་ངེས་པར་འགྱུ་བས༔ དགྲ་བོའི་ལིང་ག་རྒྱ་ཤོག་ལ་བྲིས་ལ༔ དུར་ཁྲོད་ཀྱི་ཤིང་བུ་ལ་བསྐྱོན་ལ་ཁ་ཤར་དུ་བསྟན་ལ༔ དེའི་མདུན་དུ་བོང་བའི་རྫས་ཀྱིས་བདུག་པའི་ཚུལ་དུ་བཏང་ལ༔ རང་གཤིན་རྗེ་གཤེད་ཀྱི་ཏིང་ངེ་འཛིན་ལ་ཞུགས་ལ༔ ལིང་གའི་རྒྱབ་ནས་ཉུང་ནག་དང་བཙན་དུག་ལ་སྔགས་འདི་བྲབ་བོ༔ ༀ་མ་མཱ་སྲོག་སྡུག་སྡུག་ལམ་སོད་རག་མོ་སྙིང་ས་མ་ཡཱ་བྷྱོ་བྷྱོ༔ ཞེས་བརྒྱ་རྩ་བརྒྱད་ཀྱིས་ངེས་པར་འགྲུབ་བོ༔ དཔྱིད་ཀྱི་དང་པོའི་ཚེས་དགུ་ལ་ནུབ་ནས་ཤར་དུ་འགྱུ་སྟེ༔ ཡང་ལིང་ག་ཡང་ནུབ་ནས་ཤར་དུ་ཁ་བསྟན་ལ༔ བདག་ཉིད་ཀྱི་གདོང་ལ་དུར་ཁྲོད་ཀྱིས་སོལ་བ་བྱུགས་ལ༔ སྐྲ་སྤྱི་བོའི་གཙུག་ཏུ་བཅིངས་ལ༔ ཁྲག་སྣ་ཚོགས་ལ་སྔགས་འདིས་བྲབ་བོ༔ ཙ་ཙཱ་ཤ་ཤཱ་ཁྲག་སྙིང་འདིར་ཤག༔ ལུའུ་ཙ་ཙཱ་ཡ་མ་ཧ༔ སྙིང་དར་སྙིང་ཐུཾ་ཤ ག༔ མ་མཱ་ཨེ་ཀ་ཛ་ཏི་སྲོག་ཐུན་རྦད༔

ཅེས་སྟོང་ཕྲག་གཅིག་བཟླས་པས་འགྲུབ་བོ༔ དབྱར་གྱི་དང་པོ་ཉེར་བཞི་ལ༔ ལྷོ་ནས་བྱང་དུ་ངེས་པར་འགྱུར་བས༔ ཡང་ལིང་ག་ལ་སོགས་པ་གོང་ལྟར་བཅས་ལ༔ བདག་ཉིད་གཅེར་བུར་བྱུང་ལ༔ ཐལ་ཆེན་ལ་སྔགས་འདི་བཟླས་ལ་བྲབ་བོ༔ རག་མོ་རག་མོ་སྙིང་ཤ་ཀུ་རུ་ཛ་ཛཿསྙིང་ཤག་ཁོས༔ ཞེས་བརྒྱས་ངེས་པར་འགྲུབ་བོ༔ སྟོན་ཟླ་དང་པོའི་ཤུ་གསུམ་ལ་བྱང་ནས་ལྷོར་འགྱུ་སྟེ༔ ཡང་ལིང་ག་ཡང་ཁ་བྱང་དུ་བསྟན་ལ༔ བདག་ཉིད་ཤོག་གུའི་འབག་གྱོན་ལ༔ བྱ་མོ་ནག་མོའི་སྒོ་ང་ལ་སྔགས་འདི་སྟོང་བཟླས་བསྲེག་གོ༔ མ་མཱ་ཨེ་ཀ་ཛ་ཏི་སྙིང་ཐུམ་ཛ༔ ཞེས་བརྗོད་པས་ངེས་པར་འགྲུབ་བོ༔ དེ་དག་ནི་ཁྱད་པར་དུ་མ་མོ་སྲོག་ལ་འཇུག་པའི་དུས་ངེས་པའོ༔ འདིའི་དུས་ན་མ་ནོར་བར་ལས་ལ་སྦྱར་ན༔ དགྲ་གང་ཡིན་པའི་སྲོག་ངེས་པར་ཆད་དོ༔ དེ་མ་ཡིན་ལྷག་མའི་དུས་ཉི་ཤུའི་དུས་རྣམས་སུ་ཡང་དཔལ་ནག་མོ་ཁྲོས་མ་ལ་གཏོར་མ་དབུལ་ཞིང་ལས་བཅོལ་ལ༔ མ་མོའི་ལས་བཟློག་ཅིང་རང་གཤེད་ལ་འབེབས་པར་འདོད་ན༔ དུར་ཁྲོད་ཀྱི་རས་ལ་འཁོར་ལོ་རྩིབས་བཞི་པ་ཞིག་བྲིས་ལ༔ སྔགས་གོང་མ་བཞི་པོ་ཕྱོགས་མ་ལོག་པར་བྲིས་ལ༔ ལྟེ་བ་ལ་དགྲ་གང་ཡིན་པའི་མིང་རུས་ར་ཁྲག་གིས་བྲིས་ལ༔ མ་མོའི་བསད་པའི་ཐུན་སྔགས་རྣམས་བཟློག་ལ༔ ལན་ཉི་ཤུ་རྩ་གཅིག་ཏུ་བཟླས་ལ༔ ཟངས་ཕྱེ་དང་ལྕགས་ཕྱེ་ལ་སྔགས་འདི་བཟླས་ཤིང་བྲབས་ལ༔ དེ་ནས་དགྲ་བོའི་གཟུགས་བག་ཅན་དང་༔ རྐང་རྗེས་ཀྱི་ས་ལ་སོགས་པ་ལ༔ སྙིང་ཁར་འཁོར་ལོ་དེ་དྲིལ་ལ་བཅུག་ལ༔ དེ་ལ་ཚེར་མ་སྣ་ཚོགས་བཙུགས་ལ་མ་མོ་ག་ནས་རྒྱུ་བའི་ངོས་སུ་ཁ་བསྟན་པ༔ དཔལ་ཨེ་ཀ་ཛ་ཏིའི་ཙཀླི་སྐུ་མདོག་སྨུག་ནག་སྐྲ་གྲོལ་བ༔ ཞལ་བསྒྲད་མཆེ་བ་གཙིགས་པ༔ སྤྱི་བོའི་གཙུག་ན་རལ་པ་ཁམ་ནག་གཅིག་གྱེན་ལ་འཁྱིལ་བ༔

དབུ་ལ་ཐོད་པའི་འཕྲེང་བས་བརྒྱན་པ༔ དཔྲལ་བའི་དཀྱིལ་ན་སྤྱན་གཅིག་ཁྲག་མིག་ཏུ་ཁོལ་བ༔ མཆེ་བ་གཅིག་གསོད་པའི་ཕྱིར་རབ་ཏུ་བརྡར་བ༔ གཡས་ན་ཙིཏྟ་དམར་པོ་བསྣམས་ནས་ཞལ་དུ་གསོལ་བ༔ གཡོན་པ་ཞིང་ཆུང་གི་རྒྱལ་མཚན་བསྣམས་པ་ཞིག་བྲིས་ལ༔ གང་ནས་འགྱུ་བའི་ངོས་སུ་ལིང་ག་བསྟན་ལ༔ དེའི་བར་དུ་གུ་གུལ་སྦྱར་མ་དང་༔ ཁྱི་ལུད་དང་ཡུགས་ས་མོའི་དོར་རྟ་དང་༔ ལ་སོགས་པ་མི་གཙང་བའི་རྫས་ཀྱིས་བདུག་གོ༔ བདག་ཉིད་མ་མོའི་རྒྱབ་ཀྱི་ངོས་ནས༔ འཁར་བའི་ཕྱེ་མ་སྔགས་འདིས་བྲབ་བོ༔ ༀ་རོ་རུ་ཨེ་ཀ་ཛ ་ཏི་སྙིང་ཁ་རག་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་རྟག་ཏུ་བཟླས་ཤིང་གཏོར་མ་བཏང་༔ བཀའ་བསྒོ་ཞིང་གཟིར་ན་མ་མོ་ཉིད་རབ་ཏུ་ཁྲོས་ནས་དགྲ་བོ་གང་ཡིན་པ་དེའི་སྲོག་གཅོད་ངེས་སོ༔ འདི་ནི་གོང་མའི་ལས་མ་འགྲུབ་ན་བྱ་བ་ཡིན་གྱིས༔ གང་ལྟར་སྣང་སྣང་དུ་བྱ་བ་ནི་མ་ཡིན་ནོ༔ དེ་ལྟར་བྱས་ལ་མ་མོ་དབུགས་འབྱིན་པའི་ཆོ་ག་བྱའོ༔ ཨ་མྲྀ་ཏ་དང་གཏོར་མས་མཆོད་ཅིང་བསྐང་ངོ་༔ དེ་ནས་ཡང་དགྲ་ལ་བསྐུལ་ཞིང་འབོད་རྦད་ཀྱི་ལས་བྱའོ༔ གོང་མ་བོད་པའོ༔ རྦད་པ་ནི༔ ༀ་མ་མ་ཏྲག་རག་ཤ་སྙིང་ཐུམས་རྦད་མྱོགས་ཐུཾ་ཐུཾ་རྦད་མྱོགས་ཐུཾ་ཐུཾ་རྦད༔ སྙིང་གཟེར་སྲོག་འདར་ཡེད་ཆུཾ༔ སྲོག་པྲིག་པྲིག་ཤཾ་ཁྱེར་བྷྱོ༔ ཞེས་རྒྱུ་བའི་དུས་རྣམས་སུ་རྦད་དོ༔ བསད་པ་ནི་གོང་མའི་སྔགས་ཚན་བཞི་པོ་ཡིན་ནོ༔ སྙིང་སྣ་ཚོགས་པའི་གཏོར་མ་འདིས་དབུལ་ལོ༔ བོད་པའི་སྔགས་འཇུག་ལ༔ མ་མོ་རག་མོ་ཨེ་ཀ་ཛ་ཏི་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཞེས་པ་ལན་བདུན་དུ་དབུལ་ལོ༔ མ་མོ་ངེས་པའི་དུས་བཞི་ལ༔ ལྕགས་བྱེ་དང་ཉུང་ཀར་ཉུང་ནག་དང་༔ དུག་སྣ་ཚོགས་ལ་རྦད་པའི་སྔགས་བཟླས་ལ༔ སྐྱེས་པ་གྲིར་ཤི་བའམ༔ རབས་ཆད་ཀྱི་སྙིང་གི་ནང་དུ་བཅུག་ལ༔

དེའི་ཕྱི་ནས་ནག་མོའི་ཟན་དྲོན་གྱིས་གྲིལ་ལ༔ སྒུལ་ཐོག་གི་ནང་དུ་བཅུག་ཅིང་དགྲའི་ཕྱོགས་སུ་འཕང་ངོ་༔ དེ་ལྟར་དུས་ལ་འཁྲུལ་པ་མེད་ཅིང་༔ སྦྱོར་བ་མ་ལོག་པར་བྱས་ན༔ འགྲུབ་པ་ལ་ཐེ་ཚོམ་མེད་དོ༔ ཟླ་བ་བཞི་པོའི་ལས་སྦྱོར་རྫོགས་ཙ་ན་དགྲ་བོ་འགུམ་པ་ལ་ཐེ་ཚོམ་མེད་དོ༔ གལ་ཏེ་ཕ་རོལ་པོ་མ་མོ་འདི་ཉིད་ཀྱི་སྦྱོར་བ་ཤེས་པ་ཡིན་ནོ༔ འོག་མ་ལས་ལྡོག་པར་བྱས་ན༔ དེ་ལྟར་ལན་བདུན་བྱས་ན༔ ཁོ་རང་གི་སྲོག་ཁྲག་ཏུ་སྐྱུགས་ནས་སྲོག་ཆད་པ་ལ་ཐེ་ཚོམ་བྱར་མེད་དོ༔ དེ་དག་གི་དུས་ན་མ་མོ་ལས་ལ་བསྐུལ་ཞིང་རྦད་པ་འདི་སྐད་དོ༔ ཧཱུྃ༔ བསྐལ་པ་མེ་ལྟར་འབར་བའི་དུར་ཁྲོད་ནས༔ ཤིན་ཏུ་གསོད་པའི་སྨུག་ནག་ཁྲོ་མོ་ནི༔ ནམ་མཁའི་གཟུགས་ཅན་ལྷོ་སྤྲིན་གོ་ཟུ་ཅན༔ ཙིཏྟ་ཟ་ཞིང་དམ་ཉམས་སྙིང་ཁྲག་འདྲེན༔ ཞིང་ཆུང་དབྱུག་པས་དགྲ་སྙིང་ཚལ་པར་འགེམས༔ འཇིགས་བྱེད་ཆེན་པོ་རལ་པའི་ཐོར་ཚུགས་ཅན༔ དཔྲལ་ན་མིག་གཅིག་སྲིད་གསུམ་ཁུངས་ནས་འབྱིན༔ ཞལ་ནས་ཚེམས་གཅིག་དགྲ་བོའི་སྲོག་གཅོད་མ༔ ཙིཏྟ་འདི་གསོལ་དམ་ཚིག་སྲོག་ལ་རྔམས༔ ཤ་ཁྲག་ལོངས་སྤྱོད་དམར་གཏོར་འདི་བཞེངས་ལ༔ དམ་ཚིག་དབང་གིས་དམ་ཉམས་གཤེད་མ་མཛོད༔ མ་མོ་ཁྲག་ལ་དགྱེས་ཕྱིར་འདི་གསོལ་ལ༔ བདག་གིས་ལས་ཀུན་ཐོག་མེད་སྒྲུབས་མཛོད་ཅིག༔ ཤ་ཁྲག་དམར་གྱི་གཏོར་མ་འདི་གསོལ་ལ༔ དམ་ཚིག་དུས་ལ་བབ་བོ་ས་མ་ཡཱ༔ ཞེས་རྦད་དོ༔ མ་མོ་སྙིང་ཏིག་གསང་བའི་ལས༔ གང་དང་ཡང་མི་འདྲ་བ་རིན་པོ་ཆེའི་ཡི་གེ་བཞི་ལ་སོགས་པའི་བཀའ་སྲུང་སྨུག་ནག་ཁྲོས་མ་རག་གདོང་མ་ཞེས་བྱ་བ་རྫོགས་སོ༔ རྒྱ་རྒྱ་རྒྱ༔ ༔

ཟབ་པ་པོད་བཞིའི་ངོ་བོ་ཉིད་ཀྱི་དེབ།

ཟབ་པ་པོད་བཞིའི་ངོ་བོ་ཉིད་ཀྱི་དེབ་བཞུགས་སོ༔ ལུང་མེད།

རྒྱ་གར་སྐད་དུ༔ ཛཱ་ཡ་ཨ་ཁྲ་རླུ༔ བོད་སྐད་དུ༔ གྲོལ་བར་བྱེད་པའི་ཡི་གེ་བསྡུས་པ་ཞེས་བྱ་བ༔ རྟོགས་པ་ཡེ་ཤེས་ངང་ལ་ཕྱག་འཚལ་ལོ༔ སྟོན་པའི་སྙིང་པོ་རྡོ་རྗེ་འཆང་ཆེན་གྱིས༔ བསྟན་པ་བསྡུས་པའི་སྙིང་པོ་རྒྱུད་རྒྱལ་ནི༔ བཅུ་བདུན་ཉིད་དུ་ཐམས་ཅད་དྲིལ་ནས་བསྟན༔ དེ་ལས་ཁྱད་པར་མན་ངག་ངོ་མཚར་ཅན༔ ཤིན་ཏུ་གསང་བའི་ཡི་གེ་རྣམས་ལས་ནི༔ གདམས་པའི་སྙིང་པོ་བསྡུས་ཏེ་བཅུད་ཕྱུང་བ༔ ལས་དང་སྐལ་བར་ལྡན་པ་རྣམས་ཀྱི་དོན༔ ཚིག་ཉུང་ཡི་གེ་བསྡུས་པའི་དོན་རྣམས་ཀུན༔ སྒོམ་ཁྲིམས་ལག་ལེན་ཉིད་དང་བསྡུས་ནས་ནི༔ བླ་མ་རྣམས་ཀྱི་ཐུགས་ཀྱི་གསང་བཅུད་འདི༔ སྐལ་ལྡན་སྐྱེས་མཆོག་སྙིང་དང་འདྲ་བ་ལས༔ བློ་དམན་ཐེག་པ་དམན་པའི་རིགས་ཅན་ལ༔ རླུང་ཕྱོགས་ཙམ་དུ་འདི་ཉིད་བརྗོད་པ་མེད༔ རང་གི་རྒྱུད་ལ་རྟག་ཏུ་གོམས་པར་གྱིས༔ འདི་ལས་གོང་ན་ཐབས་གཞན་ཡོད་རེ་ཀན༔ འདི་ནི་དུས་གསུམ་སངས་རྒྱས་ཐམས་ཅད་ཀྱི་སྙིང་ཕྱུང་བའོ༔ འདིར་བསྡུས་པའི་ཡི་གེ་མང་དུ་ཡོད་ན་ཡང་ངོ་མཚར་ཅན་གྱིི་གདམས་ངག་བཞི་བྱུང་༔ ངོ་མཚར་ཅན་གྱི་གདམས་ངག་བཞི་ལས་ཡ་མཚན་ཅན་གྱི་ཚིག་བཞི་བྱུང་༔ ཡ་མཚན་ཅན་གྱི་ཚིག་བཞི་ལས་མཐར་ཐུག་པའི་དོན་བཞི་འབྱུང་བའོ༔ ངོ་མཚར་ཅན་གྱི་མན་ངག་བཞི་ནི༔ ཁ་བྱང་དུང་རིས་མ་ནི་བལྟས་པ་ཙམ་གྱིས་ཤེས༔ མན་ངག་ཡི་གེ་མ་རུ་མཐོང་བ་ཙམ་གྱིས་རྟོགས༔ གདམས་པ་དུམ་དུམ་ཁྲིགས་ནི་བཀླགས་པ་ཙམ་གྱིས་གོ༔ ངན་སྔགས་བསམ་ལེ་མ་ནི་བསམས་པ་ཙམ་གྱིས་འགྲུབ༔ ཡ་མཚན་གྱི་ཚིག་བཞི་ནི༔ རྒྱུད་ཀྱི་ཁོང་སྙིང་ཕྱུངས་ནས་སྐལ་ལྡན་མིག་ཏུ་བཅུག༔ རིག་པ་སྤར་ཟིན་བྱས་ནས་ནམ་མཁའི་ཁམས་སུ་བཞག༔

ཤེས་བྱ་དུམ་བུར་བཅད་ནས་ཡིད་ཀྱིས་གོམས་པར་བྱ༔ རྣལ་འབྱོར་སྔགས་མི་སྨྲ་བར་མཁའ་འགྲོ་བྲན་ལྟར་འཁོལ༔ མཐར་ཐུག་གསང་བའི་དོན་བཞི་ནི༔ མཐོང་མ་མྱོང་བར་རྒྱུད་བཅུ་བདུན་གྱི་དོན་དང་ཚིག་སྐད་ཅིག་ལ་ཤེས་ཤིང་གོ་བས་གང་ཟག་གཅིག་གདན་ཐོག་གཅིག་ཏུ་སངས་རྒྱ་བའི་དོན་དང་༔ རིག་པ་མངོན་སུམ་དུ་བསྟན་ནས་སྣང་བ་ཐམས་ཅད་དུས་གཅིག་ལ་ཆོད་པས་ཟག་པ་དང་བཅས་པའི་ཕུང་པོ་ལྷག་མ་མེད་པར་འཚང་རྒྱ་བའི་དོན་དང་༔ སྒྲོ་འདོགས་ཐམས་ཅད་དུས་གཅིག་ལ་བཅད་ནས་ཤེས་བྱ་རང་གི་འདུག་ཚུལ་དེ་ཉིད་ཐམས་ཅད་གཏན་ལ་འབེབས་པའི་དོན་དང་༔ སྔགས་དང་གཏོར་མ་ལ་མ་བརྟེན་པར་རྣལ་འབྱོར་པ་བསམ་པ་དང་ལྡན་པས་འགལ་བྱེད་ཟླ་བ་བདུན་ན་ཁྲག་ཏུ་སྐྱུགས་ནས་འཆི་བར་བྱེད་པའི་དོན་ནོ༔ དེ་ནས་འདི་དག་ནི་རབ་ཏུ་ཟབ་པར་ཡང་བསྟན་པས༔ གསང་བའི་ཐིགས་པ་ཡང་དག་པ་སྦས་པའི་དུམ་བུ་ཞེས་བྱ་བའོ༔ གསང་བ་ངོ་བོ་ཉིད་ཀྱི་དེབས་རྫོགས་སོ༔ ལས་ཅན་ཅིག་དང་འཕྲད་པར་ཤོག༔ གཏེར་ནས་གཏེར་དུ་བཙས་པའོ༔ ༔

མན་ངག་བརྒྱ་བཅུ་དགུའི་ཐེམ་བྱང་།

མན་ངག་བརྒྱ་བཅུ་དགུའི་ཐེམ་བྱང་བཞུགས་སོ།། ལུང་མེད།

རྒྱུད་ཀྱི་དགོངས་པ་མ་ཡིག་མན་ངག་སྙིང་པོའི་དོན་བརྒྱ་དང་བཅུ་དགུ་དག་ཏུ་གྲངས་བཅད་པས༔ གསང་བའི་མན་ངག་༡དུམ་དུམ་ཁྲིགས་དང་། པོ་ཏི་༢སྨུག་ཆུང་། འཁྲུལ་གཞི་༣གསལ་བའི་མེ་ལོང་དང་། འབྱུང་བཞིའི་༤གནད་ཡིག་དང་། རིན་ཆེན་༥ གསེར་ཐིག་དང་། སྣང་བྱེད་༦ སྒྲོན་མ་དང་། འོད་༧གསལ་ལྡེ་མིག་དང་། ཤེས་བྱ་སྐོར་༨གསུམ་དང་། གསང་༩བའི་སྡོམ་བྱང་དང་། སྒྲ་རྟགས་༡༠འཁོར་ལོ་དང་བཅུ། སྐུ་གསུམ་༡༡ལག་ཁྲིད་དང་། མཁའ་འགྲོ་༡༢པྲ་ཁྲིད་དང་། བབས་ལུགས་༡༣གསུམ་སྐོར་དང་། འཁྲུལ་པའི་སྡེབས་༡༤ཡིག་དང་། གསང་༡༥ཏིག་ཆེན་པོ་དང་། གསེར་༡༦བྱང་བཀོལ་བ་དང་། ལམ་ཁྲིད་༡༧ཆེན་པོ་དང་། ཡེ་ཤེས་༡༨ལག་ཕྲད་དང་། བཀའ་སྒྲོམ་༡༩ཆེན་པོ་དང་། བསམ་གཏན་རང་༢༠ གཏད་དང་ཉི་ཤུའོ། །གསལ་༢༡བའི་མེ་ལོང་དང་། གསང་བའི་༢༢སྙིང་ཁོལ་དང་། སྣང་བ་༢༣བསྡུས་པ་དང་། གནས་པའི་༢༤བྱུང་ཁུངས་དང་། ཁྲིགས་ཆོད་༢༥བདུན་པ་དང་། ཐོད་རྒལ་༢༦དགུ་པ་དང་། ལུང་བསྟན་༢༧ཆེན་མོ་དང་། གླང་ཆེན་༢༨དྲུག་པ་དང་། སྤྱོད་ལམ་༢༩ བསྡུས་པ་དང་། ལྟ་བའི་གསེར་༣༠བཀོད་དང་སུམ་ཅུ། ༣༡པདྨ་ཀློང་ཡངས་དང་། ལྷའི་༣༢ཕྱག་གསོར་མ་དང་། གསེར་གྱི་༣༣ཨུཏྤལ་དང་། དྲན་པའི་༣༤རྒྱུན་གཅོད་དང་། རིག་༣༥པ་ལམ་སློང་དང་། འཕྲ་རྒྱུད་༣༦དྲིལ་བ་དང་། གསལ་བའི་༣༧སྒྲོན་མེ་དང་། སེང་གེ་རྩལ་༣༨སྤྲུགས་དང་། ཨ་ཏི་༣༩གནས་དགོངས་དང་། དགོངས་དོན་༤༠ བཞི་པ་དང་བཞི་བཅུ། རྡོ་རྗེ་ལམ་༤༡ བསྟན་དང་། རིན་ཆེན་འོད་༤༢ འབར་དང་། ལྷག་པའི་འཁོར་༤༣ལོ་དང་། ཁྱུང་ཆེན་༤༤མཁའ་ལྡིང་དང་། ལྟ་བའི་༤༥དམིགས་སེལ་དང་། བླ་མའི་༤༦རིམ་པ་དང་། དྲང་བའི་ཚིག་༤༧རྒྱུད་དང་། འཁྲུལ་གཞི་༤༨ རྩད་གཅོད་དང་། སེམས་ཀྱི་༤༩ དམིགས་དྲུག་དང་། བསྒོམ་

པའི་༥༠འཁོར་ལོ་དང་ལྔ་བཅུ། དབང་གི་༥༡ལྡེ་མིག་དང་། དབང་གི་༥༢ལས་བྱང་དང་། སྤྲོས་མེད་༥༣ དབང་གི་མན་ངག་དང་། དབང་གི་༥༤རྩ་བ་དང་། དབང་གི་༥༥རིག་བྱེད་དང་། དབང་གི་༥༦ཕྲ་ཏིག་དང་། འཁོར་ལོ་༥༧དྲུག་པའི་དབང་དང་། དམ་ཚིག་༥༨རབ་འབྱེད་དང་། དབང་བཀོད་༥༩ཆེན་མོ་དང་། དབང་སྦྱོར་༦༠ཕྲ་ཁྲིད་དང་དྲུག་ཅུ། རིག་པའི་༦༡ མེ་ཏོག་དང་། གསེར་ལུང་༦༢ཆེན་མོ་དང་། མན་ངག་༦༣རྩ་བ་དང་། ལུང་ཏིག་༦༤བཅོ་བརྒྱད་དང་། རིམ་པ་༦༥དྲུག་པ་དང་། སེམས་ལུང་༦༦བསྒོམ་ཁྲིགས་དང་། ཡང་༦༧གསང་དྲིལ་བ་དང་། སྦས་པའི་༦༨ཉི་མ་དང་། འཕྲ་༦༩བཀོད་བཅུ་པ་དང་། ལུང་ཡིག་༧༠བསྡུས་པ་དང བདུན་ཅུ། བདུད་རྩི་ཡང་༧༡ཞུན་དང་། ལུང་གསུམ་༧༢འདུས་པ་དང་། གཡུ་ཡིག་༧༣ ཅན་དང་། འཕྲ་ཡི་༧༤གཅན་དང་། གསེར་ཡིག་༧༥ཅན་དང་། སྙིང་༧༦གཟེར་ཆེན་པོ་དང་། ཆུང་༧༧ ངུ་དང་། བསམ་༧༨གཏན་ཉལ་བའི་འཁོར་ལོ་དང་། ༧༩འཕྲུལ་ཡིག་ཅན་དང་། ཆུང་བ་༨༠ དང་བརྒྱད་ཅུའོ། །མཁའ་༨༡འགྲོའི་མཛོད་དང་། འཕྲོ་བ་༨༢ཆེན་མོ་དང་། གསང་བའི་༨༣གཟེར་བུ་དང་། རྩ་གནས་༨༤འཁོར་ལོ་དང་། བསམ་གཏན་༨༥བབས་ལུགས་དང་། རིག་པའི་ས་༨༦འབྱེད་དང། སྣང་བ་༨༧རྒྱས་འདེབས་དང་། ཡེ་ཤེས་༨༨སྦུབས་འཇུག་དང་། ལོ་རྒྱུས་༨༩ཆེན་མོ་དང་དགུ་བཅུ། གསང་བའི་༩༡ ཞལ་ཆེམས་དང་། ཐིག་པའི་༩༢རུ་ཤན་དང་། གསང་༩༣བའི་སྒྲ་ཡིག་དང་། ཡི་གེའི་སྦྱོར་༩༤བཤད་དང་། སྒྲ་བཞིའི་༩༥མཚམས་སྦྱོར་དང་། བརྟན་པའི་༩༦གོ་ཆ་དང་། འགྱུར་༩༧མེད་ཐིག་ལེ་དང་། དངོས་པོའི་༩༨ ཁ་བསྒྱུར་དང་། འབྲས་བུའི་༩༩དངོས་འབྱེད་དང་། སྟོང་པའི་༡༠༠མཐའ་འབྱེད་དང་བརྒྱ་ཐམ་པ། ནམ་༡༠༡མཁའ་ལམ་ཁྱེར་དང་། ཐི་བྱ་༡༠༢ ཚང་འཇུག་དང་། གསལ་བའི་༡༠༣རིན་ཆེན་འོད་དང་། ཀ་དག་ཆེན་པོའི་༡༠༤དག་ཡིག་དང་། ལྷུན་གྲུབ་

༡༠༥ ཡི་གེ་དང་། ཤེས་༡༠༦རབ་འཁོར་ལོ་དང་། སྨྲ་བའི་༡༠༧མཚོན་ཆེན་དང་། ཡེ་ཤེས་༡༠༨ལྔ་བསྐོར་དང་། འོད་ཀྱི་༡༠༩ཚུལ་བཤད་དང་། འབྱུང་བའི་༡༡༠གནས་འབྱེད་དང་བཅུ། སྒྲོན་མའི་༡༡༡ ཁུངས་གཅོད་དང་། ཕྱག་རྒྱ་༡༡༢བསྡུས་པ་དང་། བཀོད་པ་༡༡༣ལྔ་པ་དང་། རྒྱ་མཚོ་༡༡༤ཨར་གཏད་དང་། རླུང་གི་༡༡༥སྡོམ་བྱང་དང་། ངོ་སྤྲོད་༡༡༦གསུམ་པ་དང་། བབས་ལུགས་༡༡༧བཅུ་གཅིག་དང་། རྩ་ཏིག་༡༡༨ཆེན་པོ་དང་། རླུང་གི་ཐེམ་༡༡༩ཡིག་དང་། རིག་པའི་༡༢༠གནས་ས་ཉིད་དང་། མིག་གི་བསམ་༡༢༡གཏན་དང་བཅུ་དགུའོ། །རྩ་བ་རྩ་བའི་རྒྱུད་གཉིས་ལ་སོགས་པ་རྫོགས་པ་རང་བྱུང་དང་ཡི་གེ་མེད་པ་བརྒྱད་ཀྱི་ཚུལ་ལས་ནི། །གོ་རིམ་འཇུག་ཅིང་ངེས་པར་བསྟན་ན་རྣམ་བཤད་པ། རྩ་རྒྱུད་ནི་བསྐྱེད་དང་བཤད་བཤད་རྒྱུད་ནི་རང་ཤར་དང་རང་གྲོལ་དང་་ཡན་ལག་རིན་ཆེན་སྤུང་པ་སྐུ་གདུང་འབར་བ་དང་། །ལུང་ཐལ་འགྱུར་བཀྲ་ཤིས་མཛེས་ལྡན་རིག་པ་གསལ་བའི་རྒྱུད་དེ་རྒྱུད་སྡེ་བཞི་དང་མན་ངག་མེ་ལོང་གཉིས་ངོ་སྤྲོད་སྤྲས་པ་མུ་ཏིག་འཕྲེང་བ་དགོངས་པ་ཀློང་དྲུག་སྒྲོན་མ་འབར་བ་ཉི་ཟླ་ཁ་སྦྱོར་དང་།།འཇུག་རང་གྲོལ་གཉིས་སེང་གེ་རྩལ་རྫོགས་ནོར་བུ་ཕྲ་བཀོད་དང་ནག་མོ་ཁྲོས་མཁས་པ་མཆོག་གིས་བསྟན་པ་འཛིན་པ་གང་ཟག་གཅིག་གི་རྐྱེན་དུ་བསྟན་པ་དང་། །སྐྱོང་བ་དང་རྫོགས་པ་རང་བྱུང་ལ་སོགས་པ་བསྲུང་བ་དང་བཅོ་བརྒྱད་དུ་བྱུང་། ཨྠྀི། རྣལ་འབྱོར་རྣམ་པ་གསུམ་ལ། རྣལ་འབྱོར་ཆེན་པོ་ནི་རང་ཡི་དམ་ལྷའི་སྐུ་གསུང་ཐུགས་རྣལ་མ་ལ། རང་གི་ལུས་ངག་ཡིད་གསུམ་འབྱོར་པས་ན་རྣལ་འབྱོར་རོ། །ཤིན་ཏུ་རྣལ་འབྱོར་ནི། ཆོས་ཀྱི་དབྱིངས་མ་བཅོས་པའི་རྣལ་མ་ལ། རང་རིག་པ་ཡེ་ཤེས་སུ་འབྱོར་བས་ན་རྣལ་འབྱོར་རོ། །རྫོགས་པ་ཆེན་པོའི་རྣལ་འབྱོར་ནི། ཆོས་ཐམས་ཅད་དེ་བཞིན་ཉིད་རྣལ་མ་ལ། རིག་པ་ཡེ་ཤེས་སུ་འབྱོར་པས་ན་རྫོགས་པ་ཆེན་པོའི་

རྣལ་འབྱོར་ཞེས་བྱའོ། །དེ་ཡང་བཀའ་ལས་ཀྱང་། བདེ་བར་གཤེགས་པའི་སྐུ་གསུང་ཐུགས་དང་། རང་གི་ལུས་ངག་ཡིད་དང་གསུམ་འབྱོར་པས་ན། རྣལ་འབྱོར་ཆེན་པོ་ཞེས་ནི་དེ་ལ་བྱའོ། །ཆོས་དབྱིངས་མ་བཅོས་རྣལ་མ་ལ། །རང་རིག་ཡེ་ཤེས་བློས་འབྱོར་པས། །ཤིན་ཏུ་རྣལ་འབྱོར་ཞེས་ནི་དེ་ལ་བྱའོ། །ཆོས་ཉིད་མ་བཅོས་རྣམ་མ་ལ། །རང་རིག་ཡེ་ཤེས་བློས་འབྱོར་པས། །རྫོགས་ཆེན་རྣལ་འབྱོར་ཞེས་ནི་དེ་ལ་བྱའོ། །སྐུ་འཇམ་གསུང་འཇམ་ཐུགས་འཇམ་འགྲོ་བ་ཡོངས་ཀྱི་དཔལ། །རྣལ་འབྱོར་རྣམ་པ་གསུམ་ཡང་དོན་ལ་གཅིག་གོ །། ཨྠྀི།། །།

སྤྲོས་བཅས་དབང་གི་ཕྱག་བཞེས་དང་པོའི་དཔེ་ལས་ལག་ལེན་ཁྲིགས་སུ་སྡེེབས་པ་ལྕེ་བཙུན་སེང་གེ་དབང་ཕྱུག་གིས་མཛད་པ།

སྤྲོས་བཅས་དབང་གི་ཕྱག་བཞེས་དང་པོའི་དཔེ་ལས་ལག་ལེན་ཁྲིགས་སུ་སྡེེབས་པ་ལྕེ་བཙུན་སེང་གེ་དབང་ཕྱུག་གིས་མཛད་པ་བཞུགས་སོ༔ མན་ངག་ང་གཉིས་པའི་ནང་ཚན་གྱི་དགོངས་འགྲེལ༔

དབང་ཐམས་ཅད་ཀྱི་མངའ་བདག་རྡོ་རྗེ་འཆང་ལ་ཕྱག་འཚལ་ལོ༔ ངེས་པའི་ལུང་ལ་དད་པའི་གདེང་རྙེད་སྐལ་ལྡན་བུ༔ ཕངས་པའི་སྲོག་ནོར་དམ་པའི་དོན་ལ་གཏོང་ཕོད་ཅན༔ སྦྱངས་པའི་འཕྲོ་ཅན་བློ་ཡིས་རྩེ་མོར་འཇུག་པའི་དོན༔ དབང་རྣམས་ཀུན་གྱི་གནད་བསྡུས་ངེས་པ་བདག་གིས་བཀྲོལ༔ ཚིག་གི་དབང་ལ་བྱེ་བྲག་བསམ་ཡས་ཀྱང་༔ གནད་ཀྱི་མན་ངག་སྙིང་པོར་ཕྱུང་བ་ནི༔ སྤྲོས་བཅས་དབང་གི་ཚིག་དོན་མཐོང་བའི་དོན༔ ངེས་པར་བསྡུས་ལ་ལག་ལེན་ཁྲིགས་སུ་སྡེབ༔ དེ་ལ་སྐལ་པ་མཆོག་དང་ལྡན་པའི་སློབ་མ་དམ་ཚིག་རང་གི་སྲོག་ལྟར་གཅེས་པ་གཉིས་ནས་བདུན་ཚུན་ཆོད་ལས༔ དེ་བས་མང་ན་དྷཱ་ཀིའི་བཀའ་ཆད་འོང་ངེས་པས་བུ་མཆོག་དེ་རྣམས་ལ་བསྟན་པར་བྱའོ༔ དེ་ལ་སྤྲོས་པ ་ལ་དགའ་བ་རྣམས་ཀྱིས་དབང་ངེས་པར་འབྱེད་པའི་ཚིག་དོན་འདི་ལ་གཞན་རྣམས་ནས་རྒྱ་ཆེ་བར་བསྟན་ཀྱང་༔ དེ་རྣམས་ཀྱིས་དོན་གྱི་གནད་གཏན་ལ་མི་ཕེབས་ཏེ༔ དཔེར་ན་ལུང་པ་སྟོང་པའི་རླུང་སྒྲ་དང་འདྲ་སྟེ་དོན་ལ་ཁ་གཡེལ་བས༔ དབང་དངོས་ཀྱི་ལག་ཁྲིགས་བླ་མའི་ཕྱག་ལེན་ཉམས་ཀྱི་མན་ངག་དངོས་ཡིན་པའི་ཕྱིར་སེམས་ལ་གབ་པར་བྱའོ༔ དེའི་དོན་ངེས་པའི་དབང་མཆོག་ལེན་པར་བྱེད་འདོད་པའི་སྐལ་ལྡན་གྱིས་གནད་ངེས་པའི་ཚིག་གསུམ་དུ་རིག་པར་བྱའོ༔ དེ་ལ་ངེས་པ་དོན་གྱི་དབང་གི་སྔོན་དུ་འགྲོ་བ་སློབ་དཔོན་གྱི་འབྲེལ་བ་བརྟག་པ་དང་གཅིག༔ དངོས་གཞི་དབང་ངེས་པའི་བྱ་བ་ལག་ཁྲིགས་ཀྱི་གོ་རིམ་བསྟན་པ་དང་གཉིས༔ རྗེས་ཀྱི་བྱ་བ་རྣལ་འབྱོར་པའི་སྤྱོད་ལམ་གྱི་ཚུལ་བསྟན་པས་ངེས་པར་བྱའོ༔ དེ་ལ་ཡང་དང་པོ༔ སློབ་དཔོན་སློབ་མའི་འབྲེལ་པ་བརྟག་པ་ལ༔ དང་པོ་བླ་མའི་མཚན་ཉིད་བསྟན་པ་ནི༔ མཚན་ཉིད་མི་ལྡན་ན་ངེས་པའི་འབྲས་བུ་འབྱིན་མི་ནུས་པས༔ དེའི་མཚན་ཉིད་མདོ་རྒྱུད་ལ་སོགས་

ཚིག་གི་དོན་ལ་ངེས་པར་སྦྱོང་བ་དང་གཅིག༔ མངོན་སུམ་དོན་གྱི་གནས་ལུགས་ལ་རྟོགས་པའི་ལམ་སྦྱོང་བ་དང་གཉིས༔ ཚོགས་གཉིས་ལ་སོགས་བསགས་པ་མཐར་ཕྱིན་པས་རང་གི་རྒྱུད་ཐོག་ཏུ་སྨིན་ཅིང་སྒོ་གསུམ་གྱིས་གཞན་གྱི་རྒྱུད་སྨིན་ནུས་པའོ༔ སློབ་མའི་མཚན་ཉིད་ངེས་པའི་གདམས་པའི་སྣོད་བརྟག་པ་ནི༔ དོན་དམ་པའི་བླ་མ་ལ་སྟོན་པའི་འདུ་ཤེས་སྐྱེད་པ་དང་གཅིག༔ དད་པའི་ཞིང་ས་བཟང་པས་མི་དགེ་བའི་ཕྱོགས་སུ་དུག་སྦྲུལ་ལྟར་སྤོང་བ་དང་གཉིས༔ འཁྲུལ་པའི་དོན་རིག་པས་འཇིག་རྟེན་གྱི་རྟོག་པ་ལ་མི་ཆགས་ཤིང་གཏོང་ནུས་པ་དང་གསུམ༔ མདོར་ན་ལུས་དང་སྲོག་ཐམས་ཅད་དམ་པའི་དོན་ལ་བློ་བསྒྱུར་ནུས་པ་དང་བཞིའོ། །དངོས་གཞི་དབང་ངེས་པའི་ལག་ཁྲིགས་ལ་གཉིས། བཤམ་པ་རྫས་ཀྱི་རིམ་པ་ཆས་སུ་གཞུག་པ་དང་གཅིག༔ སྨིན་བྱ་སློབ་མའི་ཆོ་ག་ངེས་པ་དངོས་སོ༔ དང་པོ་ལ་གཉིས་ཏེ༔ གནས་ཁྱད་པར་ཅན་དུ་དལ་བཤམ་པ་དང་གཅིག༔ དེར་བསགས་པའི་རྫས་ཀྱི་རིམ་པ་འགོད་པའོ༔ དང་པོ་དལ་བྲི་བ་ནི༔ དུར་ཁྲོད་ལ་སོགས་དབེན་པའི་གནས་སུ༔ ལ་འདོམ་གང་གྲུ་བཞི་ལ་བའི་རྣམ་ལྔ་དང་བདུད་རྩི་ལྔའི་ཆག་ཆག་འཐོར་བར་བྱས་ལ༔ ཐིག་དང་རྡུལ་ཚོན་བྱིན་གྱིས་བརླབས་པ་སྤྱི་དང་མཐུན༔ དབུས་མཐིང་ག་ཟླུམ་པོ་ལ་པད་མ་འདབ་མ་བརྒྱད་ཕྱོགས་ཚོན་དང་མཚམས་མཛེས་ཚོན་དུ་བྱའོ༔ གྲུ་ཆད་སྒོ་དང་སྒོ་རྒྱན་རྟ་བབས་རྡོ་རྗེའི་ར་བ་མེ་རིའི་ཕྲེང་བ་འོད་ཟེར་གྱིས་བསྐོར་བ་བྲིའོ༔ གཉིས་པ་བསག་པའི་རྫས་ཀྱི་བྱ་བ་ནི༔ ཕྱོགས་བཞི་དབུས་དང་ལྔར་རིན་པོ་ཆེའི་བུམ་པ་ཁ་དོག་ཕྱོགས་ཚོན་ལ་རིགས་ལྔའི་ས་བོན་ༀཿཨཱཿཧཱུྃ་སྭཱཧཱ༔ ཞེས་པ་བྲིས་ལ་འགོད་དོ༔ ཁ་རྒྱན་མགུལ་རྒྱན་དང་བཅས་པའི་ནང་དུ་རིན་ཆེན་ལྔ༔ འབྲུ་ལྔ༔ སྨན་ལྔ༔ སྤོས་ལྔ༔ སྙིང་པོ་ལྔ༔ གཙང་མའི་ཆུ་དང་འོ་མ་ལ་སོགས་དཀར་གསུམ་དང་༔

བུ་རམ་ལ་སོགས་མངར་གསུམ་གྱིས་བཀང་ངོ་༔ བུམ་པ་ལྔའི་སྟེང་དུ་མདའ་ལྔ༔ མེ་ལོང་ལྔ༔ ཤེལ་ལྔ༔ དར་སྣ་ལྔ༔ རིགས་ལྔའི་ཙ ཀླི་ལྔ་དགོད༔ གསང་དབང་གི་རྫས་ཐོད་པ་བདུད་རྩིས་བཀང་བ་དགོད༔ དབང་གསུམ་པའི་རྫས་རིག་མ་མཚན་ལྡན་ཡང་བཞག་གོ༔ གཞན་ཡང་སྒོ་བཞིར་ཕུར་པ་བཞི༔ མཚམས་བཞིར་རལ་གྲི་བཞི་དགོད་དོ༔ གཞན་ཡང་ཕྱིའི་མཆོད་པ་ལྔ༔ འདོད་པའི་ཡོན་ཏན་ལྔ༔ རྒྱལ་སྲིད་སྣ་བདུན༔ ཚོགས་ཀྱི་མཆོད་པ་རྒྱ་ཆེན་པོ་དང་༔ མཁའ་འགྲོ་དང་ཆོས་སྐྱོང་གི་གཏོར་མ་རྒྱ་ཆེན་པོ་བཤམ་མོ༔ བླ་བྲེ་དང་ཐང་སྐུ་ལ་སོགས་པ་ཅི་རིགས་པས་གནས་བརྒྱན་པར་བྱའོ༔ གཉིས་པ་སློབ་མའི་བྱ་བ་ལ་གཉིས༔ འཇུག་པར་བྱེད་པ་སློབ་མའི་སྔོན་འགྲོ་དང་། བྱིན་བརླབ་ཀྱི་བྱེད་པ་སློབ་དཔོན་གྱི་ལས་སོ༔ དང་པོ་ལ་ལྔ་སྟེ༔ དབང་གི་གསོལ་བ་གདབ་པ་དང་གཅིག༔ བླ་མས་གནང་བ་བྱིན་ཞིང་སྐྱབས་འགྲོ་སེམས་བསྐྱེད་དབོག་པ་དང་གཉིས༔ བསྲུང་བ་གདགས་ཤིང་ཡེ་ཤེས་དབབ་པ་དང་གསུམ༔ མེ་ཏོག་གཏོར་ཞིང་མིང་གདགས་པ་དང་བཞི༔ མིག་དབྱེ་ཞིང་མཐོང་བ་བསྟན་པ་དང་ལྔའོ༔ དང་པོ་གསོལ་བ་གདབ་པ་ནི༔ ཨེ་མ་ཧོ༔ སྐྱེས་ཆེན་འགྲོ་མགོན་བླ་མ་རྗེ༔ བདག་ནི་ལས་ཅན་ཤེས་རབ་བུ༔ གསང་བར་ངེས་པའི་ལུང་འདི་ལ༔ རྟག་པར་བདག་ནི་གཟུང་དུ་གསོལ༔ ཞེས་ལན་གསུམ་ཞུ་བ་དབུལ་ལོ༔ གཉིས་པ་བླ་མས་རྗེས་གནང་སྦྱིན་ཞིང་སྐྱབས་འགྲོ་སེམས་བསྐྱེད་དབོག་པ ལ་གསུམ༔ རྗེས་གནང་དང་༔ སྐྱབས་འགྲོ་དང་༔ སེམས་བསྐྱེད་དོ༔ དང་པོ་ནི༔ ཨེ་མ་ཧོ༔ སྐལ་ལྡན་སེམས་ཀྱི་བུ༔ མཆོག་ཏུ་གསང་བའི་ཐེག་པ་འདིར༔ རྡོ་རྗེ་འཛིན་པ་བདག་གི་ལུང་༔ ཞུགས་ནས་འབྲས་བུ་ངེས་ཐོབ་འགྱུར༔ བདག་ཉིད་ཆེན་པོ་ཁྱེད་ཀྱིས་ནི༔ བློ་ཡི་ཐེ་ཚོམ་རབ་གསལ་ནས༔ ནོར་བུའི་ཡོན་ཏན་མཐོང་བ་

བཞིན༔ བདག་ལ་བླ་མར་སྤྲོ་ལགས་སམ༔ ཞེས་དྲི༔ སློབ་མས་སྤྲོ་ལགས་ཞེས་བརྗོད་དོ༔ གཉིས་པ་སྐྱབས་འགྲོ་ནི༔ རང་ལུས་འཁོར་ལོ་བཞི་རྩ་རླུང་ཐིག་ལེའི་གནས་ལུགས་དྲན་པར་བྱས་ལ༔ རླུང་ལྔ་རྣམ་དག་དངས་མའིི་སྐུ༔ ཉོན་མོངས་རྣམ་དག་ཡེ་ཤེས་ལྔ༔ སྐུ་གསུམ་མཛད་པ་མཐར་ཕྱིན་པ༔ དཀོན་མཆོག་གསུམ་ལ་རྟོགས་པས་འདུད༔ ཅེས་ལན་གསུམ་གྱི་རྗེས་ལ་དེའི་དོན་བཤད་དོ༔ གསུམ་པ་སེམས་བསྐྱེད་པ་ནི༔ ལམ་གྱི་སྣང་བཞིའི་དོན་དྲན་པར་བྱས་ལ་འདི་སྐད་དུ༔ ཀྱེ་མ་ཧོ༔ མ་རིག་འཇིག་རྟེན་མུན་པའི་ཀློང་༔ རང་རིག་ཐབས་ཤེས་སྒྲོན་མ་ཡིས༔ རང་ལ་གནས་པའི་ཡེ་ཤེས་དེ༔ བླ་མའི་དྲིན་གྱིས་རྟོགས་པར་བྱའོ༔ ཞེས་ལན་གསུམ་གྱི་རྗེས་ལ་སྨོན་པའི་དོན་བཤད་དོ༔ འཇུག་པ་ནི༔ ཨེ་མ་ཧོ༔ སངས་རྒྱས་མཐར་ཐུག་དབྱིངས་རིག་གཉིས༔ སྐུ་གསུམ་ངོ་བོ་མཐའ་བྲལ་བཞི༔ ཚིག་ལས་འདས་པའི་རང་བྱུང་སྟེ༔ ད་ལྟ་ཉིད་དུ་རྟོགས་པར་བྱའོ༔ ཞེས་ལན་གསུམ་བརྗོད་པའི་རྗེས་ལ་འཇུག་པའི་དོན་བཤད་དོ༔ བསྲུང་བ་གདགས་ཤིང་ཡེ་ཤེས་དབབ་པ་ལ་གཉིས༔ བསྲུང་བ་གདགས་པ་དང་ཡེ་ཤེས་དབབ་པའོ༔ དང་པོ་ཚོན་སྣ་ལྔའི་སྐུ་ད་པ་ལ་གནས་པ་རྩའི་ཡི་གེ་ལས༔ ཡང་ན༔ ༀ་ཨཱཿཧཱུྃ་སྭཱཧཱ༔ ༀ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷ་ཤུདྡྷོ྅ཧཾ་ཞེས་པས་སྔགས་མདུད་བྱས་ལ་ཕོའི་དཔུང་པ་གཡས་མོའི་དཔུང་པ་གཡོན་པ་ལ་གདགས་སོ༔ གཉིས་པ་ཡེ་ཤེས་དབབ་པ་ནི༔ སློབ་མ་ལུས་གནད་རྡོ་རྗེ་སྐྱིལ་ཀྲུང་བཅའ་རུ་བཅུག་ལ༔ འཁོར་ལོ་བཞི་རྩ་ཡིག་དང་ཀུན་བཟང་ཡབ་ཡུམ་གསལ་གདབ་ལ་སྟེང་འོག་གི་རླུང་ཁ་སྦྱར་ལ་ཤེས་པ་མ་ཡེངས་ཤིག་བྱས་ལ་དམིགས་པ་ནི༔ ཚིག་གི་དོན་བསམ་ཞིང་བླ་མས་ཌཱ་མ་རུ་དཀྲོལ་ཞིང་འདི་སྐད་དོ༔ ཨེ་མ་སྐལ་ལྡན་རིགས་ཀྱི་བུ༔ ལྟེ་བ་

སྤྲུལ་པའི་འཁོར་ལོ་འདི༔ སྤྲུལ་པ་སྐུ་ཡི་ཞུགས་གནས་ཡིན༔ རླུང་ལྔ་གཡོ་རྩོལ་ལས་འདས་པ༔ ཐིག་ལེ་འོད་སྐུར་ཤིག་སེ་ཤིག༔ ཨེ་མ་སྐལ་ལྡན་རིགས་ཀྱི་བུ༔ སྙིང་ག་ཆོས་ཀྱི་འཁོར་ལོ་ནི༔ ཆོས་ཀྱི་སྐུ་ཡི་བཞུགས་གནས་ཡིན༔ སངས་རྒྱས་རིགས་ལྔ་མེ་རེ་རེ༔ ཨེ་མ་སྐལ་ལྡན་རིགས་ཀྱི་བུ༔ མགྲིན་པ་ལོངས་སྤྱོད་འཁོར་ལོ་ནི༔ ལོངས་སྤྱོད་རྫོགས་སྐུའི་བཞུགས་གནས་ཡིན༔ འབྲས་བུ་འདུས་པའི་རྩེ་མོ་ཅན༔ ཁྲོ་རྒྱལ་གད་རྒྱང་ཡ་ལ་ལ༔ ཞེས་པ་དེ་དག་གི་དམིགས་པ་རེས་མོས་ཀྱིས་གདབ་བོ༔ བཞི་པ་མེ་ཏོག་དོར་ཞིང་མིང་གདགས་པ་ལ་གཉིས༔ མེ་ཏོག་དོར་བ་དང་མིང་གདགས་པའོ༔ དང་པོ་ནི་དར་སྣ་ལྔའི་འཕན་དར་བྱས་ལ༔ ཐལ་མོའི་བར་དུ་བཟུང་ནས༔ མིག་དར་ནག་པོས་བཀབ་ལ་འདི་སྐད་དོ༔ ཨེ་མ་ཧོ༔ ཐོག་མ་འོད་གསལ་སྙིང་པོ་ནས༔ ད་ལྟ་ཐེག་མཆོག་འདི་ཕྲད་པར༔ གཞི་ལ་སྦྱངས་པའི་ལས་འབྲས་ཀྱིས༔ རིགས་མཆོག་དེ་ལ་འབབ་པར་ཤོག༔ ཅེས་པས་ཕོ་བྲང་དབུས་སུ་དོར་རོ༔ གཉིས་པ་མིང་གདགས་པ་ནི༔ དབུས་སུ་བབས་ན༔ སྣ་ཚོགས་རང་གྲོལ༔ ཤར་དུ་རྡོ་རྗེ་སྙིང་པོ༔ ལྷོར་དོན་ཡོད་རང་ཤར༔ ནུབ་ཏུ་བདེ་ཆེན་རྒྱལ་པོ༔ བྱང་དུ་སྒོ་ལྔ་བྱ་བྲལ་དུ་མིང་གདགས་སོ༔ དེ་ནས་མིག་དབྱེ་ཞིང་མཐོང་བ་བསྟན་པ་ལ་གཉིས་ཏེ༔ མིག་དབྱེ་བ་དང་མཐོང་བ་བསྟན་པའོ༔ དང་པོ་ནི༔ ཀྱེ་མ་རྡོ་རྗེ་འཛིན་མགོན་རྗེ༔ བདག་ནི་ཁམས་གསུམ་འཁོར་བར་ལྡོངས༔ རྗེ་ཡིས་ཡེ་ཤེས་ཐུར་མ་ཡིས༔ བདག་གི་མ་རིག་བསལ་དུ་གསོལ༔ ཞེས་སོ༔ བླ་མས་འདི་སྐད་དོ༔ ཀྱེ་མ་སྐལ་ལྡན་རིགས་ཀྱི་བུ༔ སྔོན་ཆད་གཟུང་འཛིན་འཁྲུལ་པས་བཟུང་༔ རང་ལ་བཞག་ནས་གཞན་དུ་བཙལ༔ ཐུར་མས་ཡིད་བཞིན་ནོར་བུ་མཚོན༔ ཞེས་གསེར་གྱི་ཐུར་མས་མིག་དར་

བསལ་ལ༔ དེ་དག་གི་དོན་དུ་བཤད་དོ༔ གཉིས་པ་མཐོང་བ་བསྟན་པ་ལ་བཞི་སྟེ༔ དང་པོ་བླ་མའི༔ དེ་ནས་ད་ལའི༔ དེ་ནས་རྫས་ཀྱི༔ དེ་ནས་མཆེད་ལྕམ་གྱི་མཐོང་བ་བསྟན་པའོ༔ དང་པོ་ནི༔ ལྟོས་ཤིག་ལྟོས་ཤིག་རིགས་ཀྱི་བུ༔ མ་ཡེངས་སེམས་ཀྱི་ངང་ལ་ལྟོས༔ ང་ལ་མཐོང་བ་སྣ་ཚོགས་པའོ༔ བུ་ཁྱོད་ཀྱིས་ནི་ཅིར་མཐོང་སྨྲོས༔ ཞེས་བརྗོད་པས༔ བུ་ཡིས་བླ་མ་སངས་རྒྱས་སུ་མཐོང་བ་ལགས༔ ཞེས་བརྗོད་དོ༔ གཉིས་པ་ད་ལའི་མཐོང་བ་བསྟན་པ་ནི༔ ལྟོས་ཤིག་མིག་ཅན་སྐལ་ལྡན་བུ༔ ད་ལ་བཟང་པོའི་གནས་འདི་ལྟོས༔ དད་པའི་མཆོག་ནི་སྐྱེ་རེ་རན༔ ཁྱོད་ཀྱིས་ད་ལ་ཅི་རུ་མཐོང་༔ ཞེས་པས་ལ་ལས་དཀར་པོ་ཤས་ཆེར་མཐོང་༔ ལ་ལས་དམར་པོ་ལ་སོགས་པ་མཐོང་བ་འབྱུང་བས་ད་ལའི་དེ་ཉིད་བཤད་དོ༔ གསུམ་པ་ནི༔ ཨེ་མ་བརྡ་ཤེས་སྐལ་ལྡན་བུ༔ བརྡ་དང་དམ་རྫས་བཀོད་པའི་ཚོགས༔ གནས་ལུགས་མཚོན་པའི་རྫས་འདི་ལྟོས༔ མཐོང་བའི་དོན་ནི་བདག་ལ་སྨྲོས༔ ཞེས་པ་སྐལ་བ་དང་ལྡན་པ་དེ་རྣམས་ཀྱིས༔ ཇི་བཞིན་ཉིད་དུ་དོན་ཤེས་སོ༔ དེ་ནས་རྫས་ཀྱི་དེ་བཞིན་ཉིད་བཤད་དོ༔ བཞི་པ་ནི༔ ཨེ་མ་ངོ་མཚར་རིགས་ཀྱི་བུ༔ གྲོགས་ཀྱི་དམ་པ་གང་ཡིན་པ༔ འཇུག་སྒོ་བཞི་པའི་སྤུན་གྲོགས་ལ༔ ཁྱོད་ཀྱིས་ཅིར་མཐོང་བདག་ལ་སྨྲོས༔ དག་པའི་སྣང་བ་མཐོང་རེ་རན༔ ཞེས་པས་དེ་ཉིད་ཀྱིས་མཐོང་བའི་དོན་དྲིའོ༔ དེ་ལ་ད་ལའི་དེ་ཉིད་བཤད་པ་ནི༔ དབུས་ཟླུམ་པོ་མཐིང་གར་བྱུང་པ་ནི་ཆོས་ཉིད་ཀྱི་དོན་ལ་གཉེན་པོ་དང་བྲལ་བའི་བརྡའོ༔ པདྨ་འདབ་བརྒྱད་མཛེས་ཚོན་དུ་བྱུང་བ་ནི་གཞི་ལ་རླུང་ལྔའི་དངས་མ་དང་ལྡན་པའི་བརྡའོ༔ གྲུ་ཆད་བཞི་རུ་བྱུང་བ་ནི་འབྱུང་བཞིའི་འོད་བཞི་དང་ལྡན་པའི་བརྡའོ༔ ཁྱམས་བཞི་སྒོ་དང་བཅས་པ་ནི་འཕྲིན་ལས་

རྣམ་བཞི་རང་ལ་ཚང་བའི་བརྡའོ༔ པན་རག་གི་རྩིག་པ་ནི་ཡེ་ཤེས་ལྔའི་ར་བ་དང་ལྡན་པའི་བརྡའོ༔ རྟ་བབས་བཞི་ནི་གཞི་ལ་ཚད་མེད་པ་བཞི་ལྷུན་གྱིས་གྲུབ་པའི་བརྡའོ༔ འདོད་ཡོན་གྱི་ལྷ་མོ་ནི་འདོད་ཡོན་མ་སྤངས་རྒྱན་དུ་ཤར་བའི་བརྡའོ༔ དྲ་བ་དང་དྲ་ཕྱེད་ནི་གཞིའི་ཡོན་ཏན་རྫོགས་པའི་བརྡའ༔ ཕ་གུ་སེར་པོ་ནི་འདོད་དགུ་རང་ལ་འབྱུང་བའི་བརྡའོ༔ འོད་ཟེར་འཕྲེང་བས་བསྐོར་བ་ནི་སྐུ་ལྔ་ཡེ་ཤེས་ལྔ་དང་ལྡན་པའི་བརྡའ༔ གཉིས་པ་རྫས་ཀྱི་དེ་ཉིད་བཤད་པ་ནི༔ བུམ་པ་ལྔ་རུ་བྱུང་བ་ནི༔ རིག་པ་ལྔ་རང་ལ་རྫོགས་པའི་བརྡའོ༔ ཤེལ་ལྔ་ནི་གཞི་ཀ་ནས་དག་པའི་བརྡའོ༔ རྨ་བྱའི་མདོངས་ལྔ་ནི་སྒྲོན་མ་ལྔ་རང་ལ་གསལ་བའི་བརྡའོ༔ མདའ་ལྔ་ནི་ཤེས་རབ་ལྔ་མཚོན་པའི་བརྡའོ༔ མེ་ལོང་ལྔ་ནི་ཡེ་ཤེས་ལྔ་མཚོན་པའི་བརྡའོ༔ དར་སྣ་ལྔ་ནི་རླུང་ལྔ་མཚོན་པའི་བརྡའོ༔ ཕུར་པ་ལྔ་ནི་དབྱིངས་རྣམ་པར་དག་པ་འགྱུར་བ་མེད་པའི་བརྡའོ༔ གྲི་ལྔ་ནི་མངལ་གྱི་གྲོང་ཁྱེར་འཛམས་པའི་བརྡའོ༔ ཚོགས་གཏོར་དང་མཆོད་པ་ནི་འདོད་ཡོན་རང་སྤྲུལ་དུ་ཤར་བའི་བརྡའོ༔ གཉིས་པ་བྱིན་བརླབས་སློབ་དཔོན་གྱི་བྱ་བ་བཞི་ལས༔ དང་པོ་བུམ་པའི་དང་༔ གཉིས་པ་གསང་བའི་དབང་དང་༔ གསུམ་པ་ཤེས་རབ་ཡེ་ཤེས་ཀྱི་དབང་༔ བཞི་པ་ངེས་པའི་ཚིག་དོན་ངོ་སྤྲོད་ཀྱི་དབང་ངོ་༔ དེ་ལ་དང་པོ་ནི༔ སློབ་མ་ལུས་གནད་རྡོ་རྗེའི་སྐྱིལ་ཀྲུང་བཅའ་རུ་གཞུག༔ བླ་མས་དབུས་ཀྱི་བུམ་པ་བླངས་ལ་སློབ་མའི་སྤྱི་བོར་བཞག་ལ༔ ཧཱུྃ་ཆོས་ཉིད་དབྱིངས་ཀྱི་བུམ་པ་རུ༔ སྟོང་གསལ་རང་བྱུང་ཆུ་ཡིས་བཀང་༔ སྐལ་ལྡན་བུ་ལ་དབང་བསྐུར་བས༔ དབྱིངས་ཀྱི་གནས་ལུགས་རྟོགས་པར་ཤོག༔ ཀ་ལིའི་ཡི་གེའི་ཚོགས་བརྗོད་པའི་རྗེས་ལ་སྤྱི་བོའི་རྩ་གནས་ཀྱི་ཡི་གེ་རྣམས་བརྗོད་ལ་དབང་བསྐུར་ལ༔ ཕ་ཕཱ༔ ཕ་ཕཱི༔ མ་མཱ༔ མ་མཱི༔ བ་བཱ༔ བ་བཱི༔ ཉ་ཉཱ༔

ཉ་ཉཱི༔ ཀ་ཁ་ག་གྷ༔ ཙ་ཙཱ༔ ཚ་ཚཱ༔ ཊ་ཊཱ༔ ཐ་ཐཱ༔ པ་པཱ་ན༔ ཞེས་པས་ཁྲུས་བྱ༔ སྤྱི་བོར་ཆུ་ཐིགས་པ་བླུག་གོ༔ དེ་ནས་ཤར་གྱི་བུམ་པ་བླངས་ལ་སྙིང་གར་བཞག་ལ༔ ཧཱུྃ་མ་སྐྱེས་སྙིང་པོའི་བུམ་པ་རུ༔ འགག་མེད་རང་བྱུང་རྫས་ཀྱིས་བཀང་༔ སྐལ་ལྡན་བུ་ལ་དབང་བསྐུར་བས༔ འཇིགས་བྲལ་བཞི་ཡི་དོན་རྟོགས་ཤོག༔ ཅེས་པའི་ཨ་ལིའི་རྗེས་ལ་དྲན་པ་འདུས་པའི་རྩ་ཡིག་རྣམས་བརྗོད་ལ་དབང་བསྐུར་རོ༔ ཁ་ཚ་ཌ་ཏ་ཕ་ཡ་སྭཱཧཱ༔ ཀ་གྷ་བྷ་བཱ༔ ཞེས་པས་སྙིང་ཁར་ཆུའི་ཐིག་ལེ་བྱའོ༔ དེ་ནས་ལྷོའི་བུམ་པ་བཏེག་ལ་མགྲིན་པར་གཏད་ལ༔ ཧཱུྃ་རང་བྱུང་ཡེ་ཤེས་བུམ་པ་རུ༔ འདོད་ཡོན་རང་སྤྲུལ་རྫས་ཀྱིས་བཀང་༔ སྐལ་ལྡན་བུ་ལ་དབང་བསྐུར་བས༔ བསམ་པ་ལྷུན་གྲུབ་དབང་ཐོབ་ཤོག༔ ཅེས་པ་དང་༔ ཨ་ལིའི་རྗེས་ལ་རོ་རྣམས་འདུས་པའི་རྩ་ཡིག་རྣམས་བརྗོད་ལ་དབང་བསྐུར་ཏེ༔ ར་རཱ༔ ལི་ལཱི༔ ཨ་ཨཱ་ཨཱེ༔ ཞེས་པས་ཆུ་ཐིག་གཅིག་བླུད་དོ༔ དེ་ནས་ནུབ་ཀྱི་བུམ་པ་བཏེག་ལ་ལྟེ་བར་གཏད་དོ༔ ཨཱོཾ་མ་སྐྱེས་ཆགས་བྲལ་བུམ་པ་རུ༔ བདེ་ཆེན་རྒྱུན་སྤྲོའི་རྫས་ཀྱི་བཀང་༔ སྐལ་ལྡན་ཁྱེད་ལ་དབང་བསྐུར་བས༔ ཆགས་པ་འཛིན་མེད་དབང་ཐོབ་ཤོག༔ ཨ་ལིའི་རྗེས་ལ་སྐྱེད་བྱེད་ཀྱི་རྩ་ཡིག་རྣམས་བརྗོད་ལ་དབང་བསྐུར་ལ༔ ཨ་ཨ་ཏ་ལི་ཧ་ཨུ་ཉ་རཾ་ཡཾ་ཎཾ་ན་ཛ་ཏྲ་ས་ཁཾ་རཾ་ཡཾ༔ ཞེས་པས་ལྟེ་བར་ཆུའི་ཐིག་ལེ་བྱའོ༔ དེ་ནས་བྱང་གི་བུམ་པ་བཏེག་ལ་གནས་བཞི་ཀར་གཏུགས་ཤིང་༔ ཨ་ལི་ཀ་ལིའི་རྗེས་ལ་འཁོར་ལོ་བཞི་ཀའི་རྩ་ཡིག་བརྗོད་ཅིང་༔ ཧ་ཧེ་ཧོ༔ ཡེ་ཤེས་ཟང་ཐལ་བུམ་པ་རུ༔ འགག་མེད་རླུང་ལྔའི་རྫས་ཀྱིས་བཀང་༔ སྐལ་ལྡན་ཁྱོད་ལ་དབང་བསྐུར་བས༔ རྩལ་ཆེན་རྫོགས་པའི་དབང་ཐོབ་ཤོག༔ དེ་ནས་དེ་རྣམས་ཀྱིས་ཚིག་དོན་ཡང་བཤད་པར་བྱའོ༔

གཉིས་པ་གསང་བའི་དབང་བསྐུར་བ་ནི༔ ཀ་པཱ་ལ་བདུད་རྩི་ཆང་གིས་བཀང་ལ་གནས་བཞིར་བཞག་ཅིང་སློབ་མ་རྣམས་གོང་བཞིན་ལུས་གནད་བཅས་ལ༔ གནས་བཞིའི་རང་བཞིན་གྱིས་ཀུན་བཟང་ཡབ་ཡུམ་ལ་སྦྱོར་བའི་བརྡས་བསྐུལ་ལ༔ དེ་དག་གིས་བྱང་སེམས་ཀྱི་རྩ་གནས་ལུས་ཀུན་གང་བས་བདེ་བ་ཆེན་པོའི་ངང་ལ་གནས་པར་བྱས་ལ༔ ཧཱུྃ༔ བདེ་ཆེན་བརྡལ་བ་རང་བྱུང་ཀ་པཱ་ལ༔ ཆགས་པ་དངོས་དག་ཀུན་བཟང་ཐིག་ལེས་གང་༔ རིགས་ཆེན་སྐལ་ལྡན་བུ་ལ་དབང་བསྐུར་བས༔ རྩ་རླུང་བྱང་སེམས་དག་ལ་དབང་ཐོབ་ཤོག༔ ཅེས་ཨཱ་ལི་ཀཱ་ལིའི་སྔགས་ཀྱིས་རྗེས་ལ༔ ཧཾ་ༀ་ཧཱུྃ་ཨཱཿ ཞེས་འཁོར་ལོ་བཞིའི་ཡི་གེ་བརྗོད་ལ་ཚིག་དོན་ཡང་བཤད་དོ༔ གསུམ་པ་ཤེས་རབ་ཡེ་ཤེས་ཀྱི་དབང་ནི་ལས་རྒྱ་དམ་ཚིག་དང་ལྡན་པ་ལ་འཁྱུད་ལ་ཚིག་འདིས་སྐུལ་ལོ༔ ཧཱུྃ་སྣང་སྲིད་བདེ་ཆེན་བརྡལ་བའི་ཞིང་ཁམས་ལ༔ རོལ་པའི་ཡེ་ཤེས་བདེ་བ་ཆེན་པོར་ཤར༔ ཐབས་ཤེས་འདོད་པ་སྤྱད་པས་གྲོལ་འགྱུར་ཏེ༔ མ་འགགས་རོལ་པས་སྤྱོད་ཅིག་བདེ་བ་ཆེ༔ ཞེས་པས་དངོས་སུ་སྦྱར་བས་ཆགས་པའི་པྲ་ཁྲིད་ལྟར་བདེ་བ་བསྐྱེད་དོ༔ བཞི་པ་ཚིག་དོན་ངོ་སྤྲོད་ཀྱི་དབང་ནི༔ བརྡའི་དོན་འདི་ཉིད་ཀྱིས་བསྟན་པར་བྱ་སྟེ༔ སྐལ་བ་དང་ལྡན་པའི་བུ་ཁྱོད་ཉོན་ཅིག༔ ནམ་མཁའི་དབྱིངས་ན་ཡིད་བཞིན་གྱི་ནོར་བུ་རིན་པོ་ཆེ་ལ་ཉི་ཟླ་གཉིས་ཤར་ནས་འདུག་པ་མཐོང་ངམ༔ ཞེས་པ་དང་༔ བར་སྣང་གི་འཇའ་ཚོན་ལ་རླུང་གི་ཞགས་པས་བཏབ་ནས་འདུག་པ་མཐོང་ངམ༔ རྒྱ་མཚོའི་ནོར་བུ་ལ་ཤེལ་གྱི་རྟ་ཕོ་ཞོན་ནས་ཉི་ཟླའི་སྟེང་དུ་དཀྱུས་ཐག་གཅོད་པ་དེ་མཐོང་ངམ༔ འབྱུང་ལྔའི་གྲོང་ཁྱེར་དུ་རིགས་དྲུག་གི་དམག་མི་བཅུག་ནས་རི་རབ་ཀྱི་སྟེང་དུ་སོང་བའི་མི་དང་༔ ཁམས་གསུམ་གྱི་འཕྲང་ལ་ཤེལ་གྱི་མི་ཕོ་བཙོན་དུ་བཟུང་པ་དེ་མཐོང་ངམ༔ ཁམས་གསུམ་

སྐད་ཅིག་ལ་བསྐོར་ནས་ནང་ཁྱིམ་དུ་གཉིད་དུ་སོང་བ་དེ་མཐོང་ངམ༔ ཞེས་བརྡའི་དོན་བཞི་བཀྲོལ་ནས་ཚིག་འདི་བསྟན་པར་བྱ་སྟེ༔ ཨེ་མ་ཧོ༔ མ་ཡེངས་གསོན་ཅིག་རིགས་ཀྱི་བུ༔ གཞི་ལ་འཁོར་འདས་གྲུབ་མེད་ཀྱང་༔ རྟེན་འབྲེལ་གྱི་འཆར་སྒོ་ངོ་མཚར་ཆེ༔ དོན་དམ་ཚིག་གིས་མི་རྟོགས་ཀྱང་༔ མངོན་སུམ་གདིང་ཐོབ་ངོ་མཚར་ཆེ༔ རིག་པ་སྐྱེ་འབྲི་མེད་མོད་ཀྱང་༔ ལམ་སྣང་གི་འཆར་ཚུལ་ངོ་མཚར་ཆེ༔ ཀ་དག་གྲོལ་རྒྱུ་མ་མཆིས་ཀྱང་༔ རླུང་གི་དག་ཚུལ་ངོ་མཚར་ཆེ༔ ཐེག་པའི་འཇུག་སྒོ་མང་མོད་ཀྱང་༔ གཅིག་ཅར་དུ་ཐོབ་པ་ངོ་མཚར་ཆེ༔ འཆར་ཚུལ་གྱི་སྣང་བ་རྒྱ་ཆེ་ཡང་༔ ངོ་བོ་ལ་གདེང་ཐོབ་ངོ་མཚར་ཆེ༔ ཚིག་མཐའ་ལ་སྤྲོས་པ་མེད་མོད་ཀྱང་༔ བརྡ་གཅིག་གིས་དོན་མཐོང་ངོ་མཚར་ཆེ༔ ཞེས་པ་རྡོ་རྗེའི་གླུས་བསྐུལ་ལོ༔ དེ་ནས་དཔའ་བོའི་ཚོགས་དང་དཔའ་མོའི་ཚོགས་ལ་དགའ་སྟོན་ཆེན་པོས་མཆོད༔ མཁའ་འགྲོ་དང་ཆོས་སྐྱོང་ལ་གཏོར་མས་མཆོད་དོ༔ རྗེས་འོད་གསལ་སྒྱུ་མ་ལྟ་བུ་ལ་གནས་པར་བྱའོ༔ སྤྲོས་བཅས་དབང་ལ་ཚིག་དོན་རྒྱ་ཆེ་བ༔ ཚིག་ཏུ་ཉུང་ལ་དོན་ལ་ཆད་མེད་དུ༔ ལག་ལེན་དམ་པའི་ཕྱག་བཞེས་མདོར་བཀོད་པ༔ འདིར་འཇུག་སྨིན་དང་གྲོལ་བའི་བདེ་ཐོབ་ཤོག༔ སྤྲོས་བཅས་དབང་གི་ཕྱག་བཞེས་དང་པོའི་དཔེ་ལས༔ ལག་ལེན་ཁྲིགས་སུ་བསྡེབས་པ་ལྕེ་བཙུན་སེང་གེ་དབང་ཕྱུག་གིས་མཛད་པ་རྫོགས་སོ༔ སྔགས་ཀྱི་སྲུང་མས་སྲུངས་ཤིག༔ སྐལ་ལྡན་ཅིག་དང་ཕྲད་པར་ཤོག༔ དགེའོ༔

ཤོག་ཏོང་།

སྤྲོས་པ་མེད་པའི་དབང་བསྐུར་བ་རིན་པོ་ཆེའི་བཀོད་པ།

སྤྲོས་པ་མེད་པའི་དབང་བསྐུར་བ་རིན་པོ་ཆེའི་བཀོད་པ་ཞེས་བྱ་བ་བཞུགས་སོ༔
བླ་མ་རྡོ་རྗེ་འཛིན་པ་ལ་གསོལ་བ་གདབ་ཅིང་དྲི་མ་དག་པར་བྱེད་པའི་ཚིག་འདི་དག་བརྗོད་པར་བྱའོ༔ ཀྱེ་བླ་མ་རྡོ་རྗེ་འཛིན་ལྷ་ལ༔ བདག་ནི་སྐལ་ལྡན་སྙིང་གི་བུ༔ དད་པས་རབ་ཏུ་ཞུགས་པར་འཚལ༔ རང་བཞིན་རྫོགས་པ་ཆེན་པོ་ཡི༔ དབང་བསྐུར་ནང་དུ་ཞུགས་ལགས་པས༔ དཔའ་བོ་རྡོ་རྗེ་བླ་མ་ཡིས༔ རང་གི་སེམས་ཀྱི་གནས་ལུགས་ཀྱི༔ ཨ་ཏིའི་ད་ལ་བསྟན་དུ་གསོལ༔ བདག་ནི་ཡང་དག་འ དིར་ཞུགས་ཏེ༔ སླར་ཡང་ལྡོག་པར་མི་བགྱིིད་དོ༔ ཞེས་རང་བཞིན་རྫོགས་པ་ཆེན་པོའི་དལ་དུ་འཇུག་པའི་གསོལ་བ་བཏབ་ནས་སློབ་དཔོན་གྱིས་རྗེས་སུ་གནང་བ་སྦྱིན་པ་ནི༔ ཨེ་མ་བུ་ཁྱོད་སྐལ་པ་བཟང་༔ སྐལ་བཟང་བྱང་ཆུབ་སེམས་ཆེན་པོ༔ སྔོན་ཆད་རང་བཞིན་རྫོགས་པ་ཡི༔ ད་ལ་ཉིད་དུ་མ་ཞུགས་པ༔ དོ་ནུབ་སྐལ་ལྡན་བུ་ཁྱོད་ལ༔ རྫོགས་ཆེན་ད་ལ་བསྟན་པར་བྱ༔ སེམས་ཀྱི་རྟོག་པ་ཀུན་གསོལ་ལ༔ འཇིག་རྟེན་བཅིངས་པ་ལས་གྲོལ་གྱིས༔ འདི་ལ་སྤང་བླང་ཐ་སྙད་བྲལ༔ རིགས་དང་རྒྱུད་རྣམས་སྦྱོང་བ་ཡི༔ ལུས་ངག་བདེ་བའི་རྟེན་ཡིན་པས༔ དེང་ནས་བརྩམས་ཏེ་སླར་མ་ལྡོག༔ ཅེས་རྗེས་སུ་གནང་བ་སྦྱིན་ནས༔ མཎྜལ་ཤར་གྱི་ཕྱོགས་སུ་ལུས་ཀྱི་གནད་ཙོག་པུ་ཐལ་མོ་སྦྱར་ལ་སེམས་མ་ཡེངས་པར་བླ་མ་ལ་དད་པས་སྒོམ་དུ་གཞུག༔ དེ་ནི་བསྲེ་བ་ཐུན་མོང་མ་ཡིན་པ་སྟེ་རྫོགས་པ་ཆེན་པོ་མཉམ་པའི་རྒྱས་བཏབ་པ་ཞེས་བྱའོ༔ དེ་ནས་དལ་དེའི་ཐོ་ཕྱི་རྣམས་སུ་ལྷ་བཤོས་དང་སྤོས་དང་མར་མེ་ལ་སོགས་པ་མཆོད་པའི་ཡོ་བྱད་ཅི་འབྱོར་པ་དང་༔ མཁའ་འགྲོ་མ་རྣམས་མཉེས་པར་བྱས་ལ་བར་ཆད་བསལ་བའི་ཕྱིར་ཚོགས་དང་གཏོར་མ་རབ་ཏུ་བཟང་བ་བཤམ་པར་བྱའོ༔ དེ་ནས་སྤྲོས་པ་མེད་པའི་དབང་བསྐུར་བ་ནི་ངག་གི་ནུས་པ་

འཇོག་པ་དང་ངག་རང་དག་ལ་འགྲོ་བའི་དོན་ཡིན་ཏེ༔ སློབ་མ་ཀུན་སོ་སོའི་ལུས་བདེ་བར་བཅོས་ལ་ངག་ཏུ་སྒྲ་ཆེ་བ་མ་ཡིན་ཆུང་བ་མ་ཡིན་པར༔ ཨ་ཨ༔ ཞེས་ཨ་ལ་ཡིད་གཏད་པ་ཞག་གཅིག་ཏུ་བརྗོད་པར་བྱའོ༔ དེ་ནས་ནུབ་གཉིས་པ་ལ་ཨཱ་ལིའི་ཚོགས་ཚང་བར་བརྗོད་ལ་གསུམ་པ་ལ་ཀ་ལའི་ཚོགས་ཚང་བར་བརྗོད་པར་བྱའོ༔ འདིའི་དུས་ན་སློབ་དཔོན་གྱི་ཨ་རྐྱང་པའི་དུས་ན་བུ་ཡིས་ཨ་བརྗོད་པས་རྩ་ཐམས་ཅད་ཁ་བྱེ་སྟེ་ཨ་ཐོལ་ཐོལ་རང་བྱུང་༔ དེ་ལས་འོད་ཀྱི་གོང་བུ་རྣམས་ལ་འོད་འཕྲོས་པས་རང་བཞིན་གྱི་ཀུན་ཏུ་བཟང་པོ་ཡབ་ཡུམ་སྦྱོར་བའི་བརྡས་བསྐུལ༔ ཀུན་བཟང་ཡབ་ཡུམ་སྦྱོར་བའི་བྱང་སེམས་འོད་ལྔའི་རྣམ་པ་ལུས་མགོ་མཇུག་རྒྱས་པར་གྱུར་པ་ལ་བློ་བཞག༔ འདིའི་དུས་ན་སྣང་བའི་རླུང་སྒྲ་བྱུང་བའི་རྩ་བ་བཙིར་རོ༔ དེ་ལྟར་སློབ་མ་རང་ཡང་བསྒོམ་དུ་གཞུག་གོ༔ དེ་ལྟར་བཅུག་པས་ཉམས་སུ་མྱོང་བ་ཁྱད་པར་ཅན་སྐྱེ་བར་འགྱུར་ངེས་སོ༔ དེ་ནས་ཨ་ལིའི་ཚོགས་བརྗོད་པའི་དུས་ན་དེ་ཉིད་བརྗོད་པ་ཙམ་གྱིས་རྩ་རྣམས་ཀྱི་ནང་ནས་རང་བཞིན་གྱི་ཡི་གེ་རྣམས་རང་བྱུང་བས་རང་གི་ངག་ནས་ཀྱང་ཆོས་ཐམས་ཅད་སྒྲ་སི་ལི་ལི་འབྱུང་བ་ལ་བློ་བཞག༔ ཀ་ལིའི་དུས་ན་བརྗོད་པའི་ཡི་གེ་འདི་དག་ཕྱིར་མི་སྟོན་པ་རང་གི་ཕུང་པོའི་ནང་ན་ཡི་གེས་མེར་གྱིས་ཁེངས་པ་ལ་བློ་བཞག་གོ༔ དེ་ནས་སྐལ་ལྡན་དབང་བསྐུར་བར་བྱ་སྟེ༔ ལུས་གཅེར་བུར་ཕྱུངས་ལ༔ བུམ་པའི་ཆུ་དང་སིན་དྷཱུ་རའི་ཐིག་ལེ་སྤྱི་བོར་བྱས་ལ༔ ངག་ཏུ་ༀ་ཞེས་དྲག་པོར་བརྗོད་དུ་གཞུག༔ སློབ་དཔོན་གྱིས་བུའི་མགྲིན་པའི་རྩ་གཏིམས༔ འདིའི་དུས་ན་ལུས་འདར་ཞིང་གཡོ་བ་དང་ངག་རང་འགྲོལ་བ་དང་༔ སེམས་བག་ཡངས་སུ་འགྱུར་བ་ཉིད་འབྱུང་བ་ཡིན་ནོ༔ དེ་ནས་སློབ་མའི་ལུས་ༀ་དཀར་པོ་ཆེན་པོ་ཞིག་ཏུ་གྱུར་པར་དམིགས་ལ་དེ་འོད་དུ་ཞུ་བ་ལས་ཆོས་ཉིད་ཀྱིས་རྒྱས་གདབ༔

དེ་ནས་བུམ་པའི་ཆུའི་ཐིགས་པ་དང་སི་དྷུ་རའི་ཐིག་ལེ་མགྲིན་པར་བྱས་ལ༔ ངག་ཏུ་ཨ་ཨ་ཞེས་པ་དྲག་ཤུལ་དང་བཅས་པ་བརྗོད་དུ་གཞུག༔ སློབ་དཔོན་གྱི ས་མཆན་ཁུང་གི་རྩ་གཏིམས༔ བུའི་ཤེས་པ་ནམ་མཁར་དྲང་༔ འདི་ལྟར་བྱས་པས་ལུས་རབ་ཏུ་འདར་བ་དང་༔ ངག་རབ་ཏུ་འབར་བ་དང་༔ སེམས་རབ་ཏུ་གསལ་བ་དག་འབྱུང་༔ དེ་ནས་བླ་མས་བུའི་ལུས་ཨ་དམར་པོ་ཤིན་ཏུ་ཆེ་བ་ཞིག་ཏུ་དམིགས་ལ་ཆོས་ཉིད་ཀྱི་རྒྱས་གདབ༔ དེ་ནས་བུམ་པ་གཅིག་གི་ཆུ་དང་སིན་དྷུ་རའི་ཐིག་ལེ་སྙིང་གར་བྱས་ཏེ༔ ངག་ཏུ་ཧཱུྃ་ཧཱུྃ་ཞེས་ཤིན་ཏུ་རིང་བར་བརྗོད་དུ་གཞུག༔ བླ་མས་ནུ་མའི་རྩ་སྟེམས༔ ཤེས་པ་འབྱུང་བ་ལ་གཏད༔ དེ་ནས་བུའི་ལུས་ཧཱུྃ་སྔོན་པོ་ཞིག་ཏུ་དམིགས་ལ་ཐ་མ་ཆོས་ཉིད་ཀྱི་རྒྱས་གདབ༔ དེ་ཡང་རྩ་སྟེམས་པ་རྣམས་ཀྱི་ཇི་ལྟ་བ་བཞིན་བྱའོ༔ །དེ་ལྟར་ཙན་དན་དཀར་པོའི་ཐིག་ལེ་གཅིག་སྨིན་མཚམས་སུ་བྱུག༔ དེའི་སྟེང་དུ་དམར་པོའི་ཐིག་ལེ་བྱའོ༔ དེའི་རྗེས་ལ་སྟོང་ཉིད་དར་ཅིག་བསྒོམ༔ དེ་ནས་བུམ་པ་རྣམས་ཡི་གེའི་རང་བཞིན་དུ་དམིགས་ལ་བུའི་ངག་ལ་བསྟིམ༔ ཆུ་དང་སྨན་ལ་སོགས་པ་རྣམས་ལས་རང་བཞིན་གྱི་རྫོགས་པ་ཆེན་པོའི་ཆོས་ཉིད་ཀྱི་རང་སྒྲ་བྱུང་སྟེ༔ ཆོས་ཐམས་ཅད་བརྗོད་དུ་མེད་པའོ༔ བསམ་དུ་མེད་པའོ༔ བལྟར་མེད་པའོ༔ གཉིས་སུ་མེད་པའོ༔ མཚན་མ་མེད་པའོ༔ སྨོན་པ་མེད་པའོ༔ སྤྲོས་པ་མེད་པའོ༔ སྤྲོས་པའི་མཐའ་བརྒྱད་དང་བྲལ་བའོ༔ ཞེས་པའི་སྒྲ་ཡང་འབྱུང་བས་བུ་དེ་ཉིད་ཀྱི་རང་བཞིན་དུ་བྱུང་བ་དམིགས་ལ་བདག་གི་ངག་ཏུ་ཡང་གོང་གི་ཚིག་དེ་རྣམས་བརྗོད་པར་བྱའོ༔ དེ་ནས་ངག་གི་ལས་རྫོགས་པར་བྱ་བའི་ཕྱིར་གླུ་ལན་གསུམ་བླངས༔ གླིང་བུ་ལ་སོགས་པའི་སྒྲའི་བྱེ་བྲག་རྣམས་བསྒྲག་ཅིང་དེ་ཉིད་ཀྱི་མན་ངག་བསྟན་པར་བྱའོ༔ དེ་ནས་བདག་གི་རྫོགས་པ་ཆེན་པོ་རང་སྣང་མཉམ་པའི་རྒྱས་བཏབ་པའི་ཕྱིར་ཚིག་གི་རྒྱལ་པོ་འདི་དག་ངག་

གི་ངར་བསྐྱེད་ལ་བརྗོད་པར་བྱའོ༔ ཨེ་མ་ཧོ༔ མཉམ་ཉིད་སྤྲོས་པ་མེད་པའི་བདེ་ཆེན་དེ༔ བལྟར་མེད་བསམ་ཡུལ་འདས་ལ་ངོ་མཚར་ཆེ༔ གཉིས་མེད་ཡེ་ཤེས་རང་སྣང་ཀུན་ཁྱབ་ནི༔ རང་རིག་ཀུན་ཏུ་སྣང་བ་ངོ་མཚར་ཆེ༔ བྱ་བྲལ་རང་བཞིན་རྫོགས་ཆེན་གནས་ལུགས་ཉིད༔ མ་བཙལ་རང་ལས་བྱུང་བ་ངོ་མཚར་ཆེ༔ སྤྲོས་བྲལ་ངོ་བོ་རང་བཞིན་རྣམ་དག་ལ༔ དགེ་སྡིག་མཐའ་ཡས་འདས་པ་ངོ་མཚར་ཆེ༔ རང་སྣང་བཅོས་པ་མེད་པའི་རིག་པ་ཉིད༔ ལྟ་སྒོམ་སྤྱོད་པར་སྣང་བ་ངམ་མཚར་ཆེ༔ རང་ལས་བྱུང་བའི་རང་འོད་སྒྲོན་མ་ཉིད༔ མངོན་སུམ་ཡུལ་དུ་སྣང་བ་ངོ་མཚར་ཆེ༔ ངོ་བོ་རང་བཞིན་ཐུགས་རྗེ་ཕྱོགས་མེད་ལས༔ ཆོས་སྐུ་ལོངས་སྐུ་སྤྲུལ་སྐུ་ཤར་བ་ངོ་མཚར་ཆེ༔ བརྗོད་མེད་རྣམ་པར་དག་པའི་ཡེ་ཤེས་ཉིད༔ སྟོང་པའི་ཡུལ་ལ་སྣང་བ་ངོ་མཚར་ཆེ༔ མ་རིག་མུན་སེལ་ཐིག་ལེ་སྟོང་པ་ཉིད༔ དབང་པོའི་ཡུལ་ལ་སྣང་བ་ངོ་མཚར་ཆེ༔ ཞེས་ཚིག་དེ་དག་བརྗོད་ལ་དེ་དག་གི་དོན་ཡང་བཤད་དོ༔ དེ་ནས་རྫོགས་པ་ཆེན་པོ་བརྗོད་པ་ལས་འདས་པའི་དོན་དེ་སྐལ་ལྡན་གྱི་བློ་ལ་གནས་པར་བྱ་བའི་ཕྱིར༔ དངོས་པོ་གང་ལ་ཡང་རང་བཞིན་མེད་པ་ཡིན་ནོ༔ བལྟར་མེད་པ༔ སྲོག་མེད་པ༔ སྙིང་པོ་མེད་པ་དང་༔ ཡ་མ་བརླ་ཡིན་པ་དང་༔ ཚིག་མེད་པ་དང་༔ ཡི གེ་མེད་པ་དང་༔ སྒྲ་མེད་པ་དང་༔ ཐ་སྙད་མེད་པའོ༔ ཞེས་དངོས་པོའི་འདུག་ཚུལ་བརྗོད་མེད་གཏན་ལ་དབབ་པའོ༔ ཚིག་རྣམས་ཀྱི་དོན་བརྗོད་དུ་མེད་པའི་དོན་བློ་ལ་སྐྱེས་པར་བྱའོ༔ དེ་ལ་ངེས་ཤེས་ཙམ་མ་སྐྱེས་ན༔ འཁོར་བའི་ཞེན་པ་དང་བྲལ་བའི་ཕྱིར་ཆོས་ཐམས་ཅད་རྨི་ལམ་ལྟ་བུ་དང་༔ སྤྲུལ་པ་ལྟ་བུ་དང་༔ དྲི་ཟའི་གྲོང་ཁྱེར་ལྟ་བུ་དང་༔ བར་སྣང་གི་གློག་ལྟ་བུ་དང་༔ མྱུར་བྱེད་ཀྱི་འཁོར་ལོ་ལྟ་བུ་ལ་སོགས་ཏེ་དཔེ་དུ་མས་མཚོན་ནས་བསྟན་པར་བྱའོ༔ དེ་ཉིད་ཀྱི་

དོན་གྱིས་འཁོར་བའི་ཞེན་པ་བྲལ་ནས་གོང་མའི་དོན་ལ་འཇུག་པའི་དགོས་པ་ཡོད་དོ༔ ཡང་གོང་མའི་ཆོས་རྣམས་ལ་ངེས་ཤེས་བསྐྱེད་པའི་ཕྱིར་དང་འདོད་པ་རྣམས་དང་བྲལ་བར་བྱ་བའི་ཕྱིར་འཁོར་བ་ལ་ཞེན་པའི་སྐྱོན་འདི་ལྟ་བུ་ཡང་བསྟན་པར་བྱ་སྟེ༔ འཁོར་བ་ནི་དཔེར་ན་ཟོ་ཆུའི་རྣམ་པ་དང་མཚུངས་པ་དང་༔ སྦྲུལ་སྨྱུག་དོང་དུ་ཚུད་པ་ལྟ་བུ་དང་༔ འདབ་ཆགས་རྙི་ལ་ཟིན་པ་ལྟ་བུ་དང་༔ རི་དྭགས་རྒྱར་ཚུད་པ་ལྟ་བུ་དང་༔ ཕྱིའི་རྒྱ་མཚོར་རྫིངས་ཐག་ཆད་པ་ལྟ་བུ༔ རབ་ཏུ་བརྒལ་བ་དཀའ་བའི་འདམ་རྫབ་ཆེན་པོར་བྱིང་བ་ལྟ་བུ༔ མེ་དཔུང་འབར་བའི་ནང་དུ་སྦྲང་བུ་ཚུད་པ་ལྟ་བུ་དང་༔ འཇིགས་པ་དང་བཅས་པའི་འཕྲང་དུ་ལམ་ནོར་བ་ལྟ་བུ༔ སྐྱེས་བུ་གསོད་པའི་གཤེད་མའི་དཀྱིལ་དུ་ཆུད་པ་ལ་སོགས་པའི་དཔེ་དུ་མས་བསྟན་ནོ༔ དེ་ལྟར་དྲན་པར་བྱས་ལ་འདོད་པ་དང་བྲལ་བར་བྱ་བའི་ཕྱིར་འདི་དག་ཀྱང་བསྟན་པར་བྱའོ༔ འདོད་པ་ནི་དཔེར་ན་སྐྱེས་པ་སྐོམ་གྱིས་གདུངས་པ་ཞིག་ལ་ཚ་ཆུ་བླུད་པ་ལྟ་བུ་དང་༔ དུག་གི་ལོ་མ་ལྟ་བུ་དང་༔ དུག་སྦྲུལ་གྱིས་ཟིན་པ་ལྟ་བུ་དང་། སྤུ་གྲིའི་སོ་ལྟ་བུ་དང་༔ བུད་མེད་ཀྱི་འདོད་ཆགས་ལ་སོགས་པ་སྒོ་དུ་མ་ནས་མཚོན་ལ་བསྟན་པར་བྱའོ༔ དེ་ནས་ལུས་ངག་ཡིད་གསུམ་རྫོགས་པ་ཆེན་པོའི་སྟོང་པ་ཉིད་དར་ཅིག་སྒོམ་དུ་གཞུག༔ དེ་ཉིད་ཀྱི་དོན་བརྡས་བསྐུལ་བའི་ཕྱིར་ཚིག་ཏུ་ཡང་འདི་སྐད་བརྗོད་པར་བྱའོ༔ ཆོས་རྣམས་ཐམས་ཅད་སྟོང་ཞིང་བདག་མེད་ལ༔ དངོས་པོ་མཚན་མར་འཛིན་པ་ཡོང་རེ་འཁྲུལ༔ ཆོས་ཀྱི་དབྱིངས་ཉིད་སྤྲོས་དང་བྲལ་བ་ལ༔ སྤྲོས་པ་ཚིག་ཕྱིར་འབྲངས་པ་ཡོང་རེ་འཁྲུལ༔ རང་རིག་ཡེ་ཤེས་འདོད་ཆགས་བྲལ་བ་ལ༔ ཕྱོགས་འཛིན་འདོད་པའི་བློ་འདི་ཡོང་རེ་འཁྲུལ༔ སྙིང་པོ་དོན་གྱི་ཡེ་ཤེས་རང་ཤར་ལ༔ གཞན་བྱུང་རྩོལ་ཞིང་སྒྲུབ་པ་ཡོང་རེ་འཁྲུལ༔ སེམས་ཉིད་སྐྱེ་ཤི་གཉིས་ལས་འདས་

པ་ལས༔ སྐྱེ་འགག་གཉིས་སུ་འཛིན་པ་ཡོང་རེ་འཁྲུལ༔ འབྲས་བུ་རང་རྫོགས་སྨོན་པ་བྲལ་བ་ལས༔ རྣམ་དཔྱོད་དུས་ལ་ལྟོས་པ་ཡོང་རེ་འཁྲུལ༔ བདེ་སྡུག་ཐམས་ཅད་མཉམ་པའི་ཆོ་འཕྲུལ་ལ༔ བདེ་སྡུག་གཉིས་སུ་ལྟ་བ་ཡོང་རེ་འཁྲུལ༔ ཀུན་ཏུ་བཟང་པོ་རང་ལ་གནས་པ་ལ༔ གཞན་དུ་ཡི་དམ་འཚོལ་བ་ཡོང་རེ་འཁྲུལ༔ བདག་ཉིད་ཡེ་སངས་རྒྱས་པ་ཡིན་པ་ལ༔ ངན་སོང་གསུམ་དུ་འཛིན་པ་ཡོང་རེ་འཁྲུལ༔ འཁོར་བ་ངན་སོང་རོལ་པ་ཡེ་ཤར་ལ༔ ཡང་དག་སངས་རྒྱས་འདོད་པ་ཡོང་རེ་འཁྲུལ༔ དུག་ལྔ་མ་སྤངས་རང་བྱུང་ཆེན་པོ་ལ༔ ཉོན་མོངས་ལྔ་རུ་འཛིན་པ་ཡོང་རེ་འཁྲུལ༔ འཁྲུལ་བའི་སྣང་བ་ཆོས་སྐུ་རང་བཞག་ལ༔ དངོས་པོ་བདག་ཏུ་འཛིན་པ་ཡོང་རེ་འཁྲུལ༔ ཐེག་པ་རིམ་དགུ་རང་བཞིན་གང་བ་ལ༔ སོ་སོའི་འདོད་གཞུང་འཛིན་པ་ཡོང་རེ་འཁྲུལ༔ ཞེས་པའི་ཚིག་གིས་སྤྲོ་བ་བསྐྱེད་ཅིང་བསྟན་པར་བྱའོ༔ དེ་ནས་སྒྲའི་བྱེ་བྲག་སྣ་ཚོགས་པས་གཏོར་མ་ཉིད་མཁའ་འགྲོ་མའི་ཚོགས་ལ་དབུལ་བར་བྱའོ༔ ལོངས་སྤྱོད་སྤེལ་བའི་ཕྱིར་ཚོགས་ཀྱི་སྟོན་མོ་ཡང་བྱའོ༔ སློབ་མས་རབ་ཏུ་གཅེས་པའི་ནོར་བླ་མ་ལ་ཕུལ་ནས་མཉེས་པར་བྱའོ༔ དེ་ནས་སློབ་དཔོན་གྱིས་སྐྱེ་བ་མེད་པའི་གདམས་པ་བསྟན་ལ་རང་སེམས་ངོ་ཤེས་པར་བྱ༔ ངག་ལ་བརྟེན་པའི་བསམ་གཏན་རྣམས་བསླབས་ལ་སྒོམ་དུ་གཞུག་གོ༔ སྤྲོས་པ་མེད་པའི་དབང་བསྐུར་བ་རིན་པོ་ཆེའི་བཀོད་པ་ཞེས་བྱ་བ༔ སློབ་དཔོན་ཆེན་པོ་སྤྲུལ་པ་པོ་དགའ་རབ་རྡོ་རྗེས་མཛད་པ་རྫོགས་སོ༔ རྒྱ་རྒྱ་རྒྱ༔

སྤྲོས་མེད་དབང་བསྐུར་རིན་ཆེན་བཀོད་པའི་གནད་ཀྱི་ཡི་གེ་དམ་པ།

སྤྲོས་མེད་དབང་བསྐུར་རིན་ཆེན་བཀོད་པའི་གནད་ཀྱི་ཡི་གེ་དམ་པ་བཞུགས་སོ༔ མན་ངག་ང་བཞི་པའི་གྲས༔

བཅོམ་ལྡན་འདས་གབ་པ་མངོན་དུ་འབྱིན་པའི་རྡོ་རྗེ་འཆང་ཆེན་པོ་ལ་ཕྱག་འཚལ་ལོ༔ ཡང་ཏིག་སྦས་པ་གབ་པའི་ཡི་གེ་ཉིད༔ སྤྲོས་མེད་དབང་བསྐུར་རིན་ཆེན་བཀོད་པ་ལ༔ གབ་ཅིང་སྦས་དང་འཁྲུགས་ཤིང་གཅུས་པའི་ཚིག༔ གབ་པ་མཆོག་གསལ་ཡི་གེ་ནག་པོ་འདིས༔ འགྲུབ་ཅིང་འབྲས་བུ་མྱུར་དུ་འབྱིན་པ་ཡི༔ རང་བཞིན་གནད་ལ་འབེབས་པའི་ཡི་གེ་ནི༔ སྐལ་དང་ལྡན་པ་རྣམས་གྱིས་སྤྱད་པར་བྱའོ༔ སྐལ་བ་དང་ལྡན་པ་རྣམས་ཀྱིས་དབང་བཞི་རྫོགས་པར་བྱེད་པར་འདོད་པས་ནི༔ སྔོན་དུ་སྤྲོས་བཅས་ཀྱི་དབང་གིས་ཐེག་པ་རིམ་པ་དགུའི་ལྟ་བའི་དོན་དུས་གཅིག་ལ་རྟོགས་པའི་ཐབས་ལ་བརྟེན་ནས་སྐལ་ལྡན་གྱི་ལུས་ལ་ནུས་པ་འཇོག་པར་བྱེད་ལ༔ ལུས་ཀྱི་དྲི་མ་དང་ཞེན་པའི་མཐའ་ཐམས་ཅད་དག་པར་བྱས་ནས་དེ་ནས་སྤྲོས་པ་མེད་པའི་དབང་བསྐུར་རིན་པོ་ཆེ་བཀོད་པས་ངག་གི་རྣམ་པར་རྟོག་པ་དང་ཞེན་པའི་མཐའ་དང་དྲི་མ་ཐམས་ཅད་དག་པར་བྱེད་པ་དང་ངག་ལ་ནུས་པ་བཞག་པའི་ཐབས་ཡིན་ནོ༔ ཤིན་ཏུ་སྤྲོས་མེད་ཀྱིས་ཡིད་ལ་ནུས་པ་འཇོག་པ་དང་ཡིད་ཀྱི་ཞེན་པའི་མཐའ་དང་དྲི་མ་དག་པར་བྱེད་པ་ཡིན་ལ༔ རབ་ཏུ་སྤྲོས་པ་མེད་པས་ནི་སེམས་ཀྱི་དྲི་མ་དང་ཞེན་པའི་མཐའ་དང་རྟོག་པ་ཐམས་ཅད་དག་པར་བྱེད་པ་དང་སེམས་ལ་ནུས་པ་འཇོག་པ་ཡིན་ནོ༔ དེ་དག་ཀྱང་སྤྲོས་བཅས་ཀྱི་རང་གི་སྙིང་གའི་སྐུ་རྣམས་ལ་དབང་བ་དང་སྐུ་ཐམས་ཅད་ཀྱི་དབང་ཐོབ་པའོ༔ སྤྲོས་མེད་ཀྱིས་ནི་རྩ་རྣམས་ཀྱི་ནང་ན་གནས་པའི་ཐིག་ལེ་ལ་དབང་བས་ཐིག་ལེ་ཐབས་ཀྱི་དབང་ཐོབ༔ ཤིན་ཏུ་སྤྲོས་པ་མེད་པའི་དབང་བསྐུར་གྱིས་ནི་བནྡྷ་འབར་བའི་གཞལ་ཡས་ནས་ཁྲོ་བོའི་སྐུ་ལ་དབང་བས་ཏེ་ཁྲོ་བོ་བདེ་བར་གཤེགས་པ་ཐམས་ཅད་ཀྱི་དབང་ཐོབ༔ རབ་ཏུ་སྤྲོས་པ་མེད་པས་ནི་མིག་ནས་སྒྲོན་མ་འཆར་བ་ལ་དབང་བས་སྒྲོན་མ་དང་རིག་པ་འདུ་འབྲལ་མེད་པའི་དབང་ཐོབ་པའོ༔ འདི་ནི་སྤྲོས་པ་མེད་པའི་དབང་གི་རྒྱབ་བརྟེན་གྱི་ཡི་གེ་དམ་པ་སྤྲོས་པ་

ཐམས་ཅད་ཉེ་བར་ཞི་བར་བྱེད་པའི་གནད་ཀྱི་མན་ངག་ཡང་དག་པ་ནི༔ སྔོན་དུ་རྡོ་རྗེ་སློབ་དཔོན་རབ་ཏུ་བརྟག་པ་གཅེས། རང་མ་དག་ན་ཉེས་པའི་སྐྱོན་ཆེ་བས་ལྟ་སྒོམ་གྱི་དོན་ལ་བརྩོན་པ་གནད་ཆེ་བ་ཡིན་ནོ༔ གལ་ཏེ་འཇིག་རྟེན་འདིའི་སྤྱོད་ཡུལ་ཅན་གྱིས་བྱས་ན་གཉིས་ཀ་རྡོ་རྗེ་དམྱལ་བའི་གནས་སུ་སེམས་ཀྱི་སྣང་བ་འཕང་བར་འགྱུར་བ་ཡིན་ནོ༔ དེའི་ཕྱིར་ན་རང་བཞིན་རྫོགས་པ་ཆེན་པོའི་དོན་ལ་གནས་ཤིང་འཇིག་རྟེན་གྱི་བྱ་བས་མ་ཡེངས་པ་མདོར་ན་འཁོར་བའི་བྱ་བ་སྤངས་པ་ཞིག་གིས་བྱའོ༔ སློབ་མ་ཡང་འཇིག་རྟེན་འདི་ལ་མངོན་ཞེན་ལོགས༔ འཆི་བ་མི་རྟག་པ་རྒྱུད་ལ་སྐྱེས་པ༔ གཏོང་ཕོད་ཆེ་ཞིང་སྤྱོད་ལམ་ཡངས་པ༔ རང་བཞིན་རྫོགས་པ་ཆེན་པོའི་དོན་ལ་མོས་པ༔ ཕྱི་འཁོར་བའི་བྱ་བ་ལ་མི་འཇུག་པར་ངེས་པ༔ འདི་ཉིད་ཀྱི་དོན་ཉམས་སུ་ལེན་ངེས་པ་ཞིག་གིས་བྱ་བ་ལས་གཞན་གང་རུང་རུང་གིས་མ་ཡིན་ནོ༔ འཇིག་རྟེན་འདིའི་བློ་དང་མ་བྲལ་བར་བྱས་ན་རྡོ་རྗེའི་དམྱལ་བར་སེམས་ཀྱི་སྣང་བ་འཆར་བར་འགྱུར་རོ༔ དེས་ན་སློབ་དཔོན་སློབ་མ་གཉིས་ཀ་དག་པ་གལ་ཆེའོ༔ འདིར་གབ་པ་རྣམས་ཀྱི་དོན་མངོན་དུ་ཕྱུངས་ཏེ་བསྟན་པར་བྱའོ༔ རྡུལ་ཚོན་གྱི་བུམ་པ་དམར་པོ་བསྣོལ་མ་བྲི་བ་ནི་མཁའ་དབྱིངས་མཚོན་པའི་དོན་ཡིན་ནོ༔ རིན་པོ་ཆེའི་བུམ་པ་ནི་ཤར་ཕྱོགས་སུ་ཟེར་ཡང་དེར་མི་བཞག་སྟེ༔ ཤར་ཕྱོགས་སུ་སླར་མི་འདུག་པའི་ས་ཡིན་པས་རིན་པོ་ཆེའི་བུམ་པ་དེ་ནུབ་ཏུ་བཞག་གོ༔ མེ་ལོང་གསུམ་གྱིས་དབྱིངས་མཚོན་པ་སྟེ༔ མེ་ལོང་གསུམ་པོའི་ནང་དུ་རྨ་བྱའི་མདོངས་གསུམ་གྱི་མདོངས་བསྟན་ལ་བཞག༔ དེ་ནས་དབང་རྫོགས་པའི་དུས་སུ་སློབ་མ་ལ་མེན་ཤེལ་རེ་གཏད་དེ་རེས་མོས་ཀྱིས་གསུམ་གསུམ་ལ་རིམ་གྱིས་ངོ་སྤྲད་པ་ཡིན་ཏེ༔ དང་པོ་སྤྲུལ་པ་སྐུའི་དབྱིངས་དང་རེག་པ་ལ་ངོ་སྤྲོད་པ༔ གཉིས་པ་ལོངས་སྐུ༔ གསུམ་པ་ཆོས་སྐུའི་དབྱིངས་དང་རིག་པ་ལ་ངོ་སྤྲད་དོ༔ ཀྱེ་མ་བླ་མ་རྡོ་རྗེ་འཛིན་པ་ལ་སོགས་པ་ནི་

མངོན་འབྱུང་དུ་སློབ་དཔོན་གྱིས་ལན་ཅིག་བརྗོད་པས་ལམ་བསྟན་པ་ཡིན་གྱི༔ དེ་ནས་ལན་གསུམ་བདག་ཉིད་ཀྱིས་སྣ་དྲངས་ལ་བརྗོད་པར་བྱའོ༔ སློབ་དཔོན་གྱིས་རྗེས་གནང་ལན་ཅིག་གིས་ཆོག༔ བསྲེ་བའི་དུས་ན་མཉམ་པའི་རྒྱས་གདབ་པ་ནི་སྨིན་མཚམས་སུ་ཙན་དན་གྱི་ལྡེ་གུས་བྱུགས་པས་ལུས་གྲང་བསིལ་བ་ལ་བརྟེན་ནས་མཉམ་པ་ཉིད་སྐྱེ་བའོ༔ ཨ་བརྗོད་པ་ནི༔ རླུང་དང་བསྲེས་ལ་ཅི་ནས་ཀྱང་རིང་བར་བྱའོ༔ འདི་ལྟར་བྱས་པས་འདི་ཉིད་ཀྱི་དུས་སུ་རང་དྲན་པ་ཉམས་ཏེ་རྟོག་མེད་དུ་གྲོལ་བ་ཡང་ཡོད༔ ལ་ལ་ངག་ཏུ་སྨྲ་བ་དང་ལུས་འཕར་བ་དག་ཏུ་འོང་བ་ཡིན་ནོ༔ ཨ་ལི་དང་ཀ་ལི་ནི་ཐུང་བར་བྱའོ༔ སྐབས་སུ་དྲག་པར་བྱའོ༔ མགྲིན་པའི་རྩ་ནི་གཉིད་ལོག་གཡོན་ཡིན༔ མཆན་ཁུང་གི་རྩ་ནི་མ་ཡིན་ཏེ་གསང་བའི་རྩ་ཡིན་ནོ༔ ནུ་མ་ནི་བུད་མེད་ཡིན་ནོ༔ སྐྱེས་པ་ལ་རྩིབ་མ་གཡས་པའི་རྩ་མཉེའོ༔ དེ་ལྟར་བྱས་པས་རང་བཞིན་རྫོགས་པ་ཆེན་པོ་ཉམས་སུ་མྱོང་བ་རྒྱུད་ལ་འཇོག་པ་ཡིན་ནོ༔ དེ་ནས་ཚིག་ཏུ་བརྗོད་པ་དེ་དག་ནི་ལན་གསུམ་གསུམ་དུ་བསྐྱར་ལ་བྱའོ༔ འདིའི་དུས་སུ་དཔེ་དུ་མ་ལ་བརྟེན་ནས་གྲོལ་བ་ཡིན་ཏེ་ངོ་སྤྲོད་ཉི་ཤུ་རྩ་གཅིག་པོ་རྫོགས་པར་བྱ༔ དེ་ནས་འཆི་བ་རྣམས་བརྟག༔ གལ་ཏེ་འཆི་བའི་རྟགས་བྱུང་ན་དེ་བསླུ་བའི་ཆོ་ག་རྣམས་བྱའོ༔ དབང་བསྐུར་རིན་པོ་ཆེ་བཀོད་པའི་གནད་ཀྱི་ཡི་གེ་དམ་པ་རྫོགས་སོ༔ ཨྠྀི༔

སྤྲོས་མེད་དབང་གི་བུམ་ཐིག་དང་དག་པར་སྦྱར་བ།

སྤྲོས་མེད་དབང་གི་བུམ་ཐིག་དང་དག་པར་སྦྱར་བ་བཞུགས་སོ། །གུ་ཧྱ། ལུང་མེད།

རང་བཞིན་གདོད་ནས་དག་པའི་ནམ་མཁའ་ལ། །སེམས་ཉིད་རྒྱལ་པོ་འགྱུར་མེད་ལྷུན་གྱིས་གྲུབ། །རང་གསལ་རིགས་ལྔའི་ཕོ་བྲང་རང་ཤར་བའི། །ཐུགས་རྗེ་ཕྱོགས་བཅུར་འཕྲོ་ལ་ཕྱག་འཚལ་ལོ། །གང་འདིར་སྙིང་གི་འོད་ཀྱི་ཕུང་པོ་ཡི། །རང་བཞིན་དེ་གནས་སྒྲིབ་བྲལ་གདོད་མའི་ངང་། །འགྲོ་རྣམས་ཡིད་ལ་སྣང་བར་བྱེད་དོན་དུ། །དབང་གི་ཆུ་བོ་བཞི་ལས་སྤྲོས་མེད་བརྗོད། །དག་པའི་སེམས་ལ་རང་གསལ་བུམ་པའི་སྐུ། །གཞི་དང་ལམ་དང་འབྲས་བུ་རྣམ་པ་གསུམ། །རང་ཕག་གནས་པ་བརྡའ་ཡིས་འདིར་བསྟན་ཕྱིར། །བུམ་པ་བསྣོལ་མའི་ཐིག་འདི་གསལ་བར་བྱ། །གྲུ་བཞི་པ་ནི་ཆ་བཞིར་བགོད། །ནང་གི་ཆ་གཉིས་བུམ་པའི་ལྟོ། །གསུམ་པ་ཕྱེད་བགོ་ཕྱི་ཐིག་གི །གཡས་གཡོན་ལྟོ་བའི་བཞི་ཆ་རེར། །མཚན་མ་བྱས་ལ་གྱེན་ཐུར་གདབ། །དེ་ཡང་ཕྱེད་དུ་བགོས་པ་ཡིས། །ཤར་དང་ལྷོ་གཉིས་བུམ་པའི་གཤམ། །ནུབ་དང་བྱང་གཉིས་མ་ཡིན་ཏེ། །ལོགས་ཟུར་གང་རུང་རྩེ་ནས་བསྐོར། །ལོགས་ནས་བསྐོར་ན་བཞི་པ་ཡི། །ཤར་ལྷོའི་ཕྱེད་ལ་བུམ་གདན་བྱ། །ནུབ་བྱང་སྒང་པོ་ཁ་རྒྱན་བྲིས། །ཟུར་ནས་བསྐོར་ན་ཤར་དང་ལྷོའི། །བཞི་པ་རིལ་པོ་བུམ་པའི་གདན། །ནུབ་དང་བྱང་གི་བཞི་པ་ནས། །ཟླུམ་སྐོར་བར་དུ་དཔག་བསམ་ཤིང་། །ལོ་འདབ་ལྗང་ལ་སྙིང་པོ་དམར། །འབྲས་བུ་སེར་པོར་བྲི་བར་བྱ། །བུམ་པ་དམར་པོ་འོད་ལྔས་བསྐོར། །བུམ་གདན་སྣ་ཚོགས་པདྨ་སྟེ། །བར་ཁྱམས་སྟོང་གསལ་ནམ་མཁའི་མདོག །ཕྱི་རིམ་འོད་ལྔའི་རྭ་བས་བསྐོར། །དེ་ཡང་ནང་ནས་རིམ་པ་བཞིན། །དཀར་དམར་མཐིང་སེར་ལྗང་ཁུ་འོ། །དེ་ཀུན་སྐུ་གསུང་ཐུགས་དང་ནི། །ཡོན་ཏན་འཕྲིན་ལས་རྣམ་ལྔའི་བརྡའ། །དེ་ཡི་དག་པ་དྲན་པ་ནི། །ཕྱོགས་རིས་རྒྱ་ཆད་མེད་པས་ན། །ཡུད་ཙམ་ཟླུམ་ལ་བརྟགས་ན་མིན། །རང་གསལ་

མདངས་ལྔར་གནས་པས་ན། ཁ་དོག་ལྔ་ཡི་དྲ་བས་བསྐོར། །སྣང་སྟོང་ཆོས་སྐུ་གཟུགས་སྐུའི་བརྡར། །ལྟ་ལུགས་གཉིས་ཀྱི་བུམ་པ་གཉིས། །དེ་ལས་འདོད་དགུ་ལྷུན་གྲུབ་ཕྱིར། །དཔག་བསམ་ཤིང་གི་ཁ་རྒྱན་ཅན། །སྟོང་གསལ་སྣ་ཚོགས་ཉིད་ཀྱི་ཕྱིར། །བུམ་གདན་སྣ་ཚོགས་པདྨའི་ཚུལ། །དེ་ཀུན་འོད་ལྔས་ཡོངས་བསྐོར་བ། །ཀུན་ཀྱང་གདོད་ནས་རིགས་ལྔའི་ངང་། །རང་བཞིན་གནས་པའི་བརྡའ་ཡིན་ནོ། །དེ་འདྲའི་རང་བཞིན་བུམ་པ་དེ། །འགྲོ་བ་ཀུན་ལ་ཡེ་ནས་གནས། །རང་སེམས་འོད་མཐའ་མེད་པ་ནི། །སེམས་ཉིད་ཀ་དག་ཆོས་སྐུའི་ངང་། །འོད་གསལ་གཟུགས་སྐུའི་རང་བཞིན་ཤར། །དེ་ལ་སྐུ་ལྔ་ཡེ་ཤེས་ལྔ། །རང་མདངས་ཁ་དོག་རྣམ་ལྔ་ཤར། །དེ་ཕྱིར་ཆོས་སྐུ་གཟུགས་སྐུ་གཉིས། །གཞི་ནས་རྫོགས་ཕྱིར་སྣང་སྟོང་ཕྱིར། །གཞི་ཡང་བུམ་པའི་བརྡས་བསྟན་ནོ། །ལམ་ཡང་ཀ་དག་ལྷུན་གྲུབ་གཉིས། །གནས་ཕྱིར་དེ་ཡིི་རྩལ་ཀྱང་གཉིས། །འགྱུ་བའི་སེམས་དང་འབྱུང་བཞིའི་ལུས། །རྡོས་བཅས་ཡུལ་དང་བཅས་པའོ། །དེ་ལྟར་རྩལ་གཉིས་སྦྱང་བའི་ཕྱིར། །ཉམས་ལེན་ཁྲེགས་ཆོད་ཐོད་རྒལ་གཉིས། ཁྲེགས་ཚོད་ཅོག་བཞག་རང་གྲོལ་གྱིས། །སྟོང་པའི་རྩ་ལས་འཕྲོས་པ་ཡིས། །འགྱུ་བའི་རིག་པ་ཟད་སར་སྐྱེལ། །ཐོད་རྒལ་རང་འོད་དབྱིངས་ཤར་ལ། །མི་འགྱུར་མཉམ་པའི་གཟེར་བཏབ་པས། །ལུས་དང་ཡུལ་གྱི་རྡོས་བཅས་ནུབ། །རང་གསལ་ཐོག་མའི་འོད་ལྔར་གྲོལ། །ཟད་པའི་ས་ལ་གྲོལ་བར་བྱེད། །དེ་ཕྱིར་ཐོད་རྒལ་ཁྲེགས་ཆོད་གཉིས། །སྣང་སྟོང་ཆོས་སྐུ་གཟུགས་སྐུ་གཉིས། །ཉམས་སུ་ལེན་ཕྱིར་ལམ་ཉིད་ནི། །བུམ་པའི་བརྡའ་ཡིས་མཛད་པའོ། །འབྲས་བུ་ཀ་དག་ལྷུན་གྲུབ་གཉིས། །དེ་ཡང་ཟད་སར་གྲོལ་བའི་ངང་། །རིག་པ་སྔོན་ཐོག་ཉིད་ཀྱི་གཞི། །རང་

འོད་ལྔ་ཡི་གདངས་དང་བཅས། །རིགས་ལྔའི་ཚུལ་དུ་ལྷུན་གྱིས་གྲུབ། །དེ་ཡི་ངོ་བོ་སྣང་ཙམ་ན། །བརྗོད་བྲལ་ཀ་དག་ཆེན་པོར་གནས། །དེ་ཡང་རང་རིག་འོག་མིན་གནས། །ཕྱོགས་བཅུ་ན་མེད་དབུས་མཐའ་མེད། །སྟོང་ཁམས་རིག་པའི་ཞིང་ཁམས་ན། །སེམས་དེའི་འོད་དང་འོད་ཁྱིམ་དང་། །གཙོ་འཁོར་ཡོངས་རྫོགས་ཚུལ་དུ་སྣང་། །ལྷུན་འབྱམས་སྙིང་པོ རྒྱལ་བའི་ཞིང་། །རྣམ་དག་སྟུག་པོ་བཀོད་པ་འོ། །ཞིང་དེའི་རྒྱལ་བ་རྒྱ་མཚོ་ཡང་། །མི་གསུང་མི་གཡོ་སྤྲོས་དང་བྲལ། །བྱིན་གྱིས་བརླབས་ཀྱིས་རང་བྱུང་བའི། །བསྟན་པ་གསང་བ་ཅོད་པན་ཡང་། །རང་བབས་ཕྱོགས་བཅུར་རབ་སྣང་ངོ་། །དེ་ལྟར་སྐུ་གསུང་ཐུགས་ཆེན་པོ། །རང་བཞིན་ལྷུན་རྫོགས་ངང་ཉིད་ལས། །གདུལ་བྱའི་འཇིག་རྟེན་གང་ཡོད་དེར། །སྤྲུལ་པ་གང་འདུལ་དེར་སྣང་བས། །འགྲོ་བའི་དོན་ཀུན་ལྷུན་གྱིས་གྲུབ། །བརྗོད་བྲལ་ཀུན་གྱི ་ངོ་བོ་ནི། །ཆོས་སྐུ་རང་བཞིན་གཟུགས་ཀྱི་སྐུ། །ཐུགས་རྗེ་དེ་ལས་འཕྲོས་པ་ཡི། །སྒྲུབ་པ་རྣམས་ཏེ་དེ་ལྟར་ན། །འབྲས་བུའང་ཆོས་སྐུ་གཟུགས་སྐུ་གཉིས། །བུམ་པའི་བརྡའ་ཡིས་བསྟན་པ་འོ། །འདི་ནི་བྱར་མེད་ཀློང་ཡངས་ཀྱིས། །མཆིམས་ཕུ་དཔལ་གྱི་རི་ལ་སྦྱར། །དགེའོ།། །།

ཤིན་ཏུ་སྤྲོས་པ་མེད་པའི་སྐལ་ལྡན་གྱི་དབང་།

ཤིན་ཏུ་སྤྲོས་པ་མེད་པའི་སྐལ་ལྡན་གྱི་དབང་བཞུགས་སོ༔ ལུང་མེད།

རྒྱ་གར་སྐད་དུ། མ་ཧཱ་སནྟི་ཨ་བྷི་ཥེ་ན་ཀ་རུ་ར་ནཱ་མོ༔ བོད་སྐད་དུ༔ རང་བཞིན་རྫོགས་པ་ཆེན་པོའི་དབང་བསྐུར་བ་བྱ་རྩོལ་ལས་འདས་པའི་ལུགས༔ བཅོམ་ལྡན་འདས་བྱ་རྩོལ་ཀ་དག་ཉིད་ལ་ཕྱག་འཚལ་ལོ༔ གང་འདིར་འབྲས་བུ་སྨིན་བྱེད་པའི༔ རང་བཞིན་གནས་ལུགས་མཚོན་པའི་ཕྱིར༔ ཡེ་ཤེས་རྩོལ་སྒྲུབ་བྲལ་བའི་དོན༔ སྙིང་པོ་བླ་མེད་དོན་མཆོག་གིས༔ ད་ལྟ་ཉིད་དུ་ཐོབ་བྱའི་ཕྱིར༔ གསང་སྔགས་ཐབས་ཀྱི་མཚོན་ཚུལ་ལས༔ འདིར་ནི་བྱ་རྩོལ་བྲལ་བའི་ཆོས༔ གསང་མཆོག་དབང་རྣམས་བསྐུར་འདོད་པའི༔ དོན་གྱི་དབང་བསྐུར་བཤད་པར་བྱ༔ ལུས་བཅས་རྩོལ་སྒྲུབ་མེད་པ་ཡིས། མ་བསྐུར་ཡེ་རྫོགས་དོན་དེ་ཉིད༔ མ་བྱས་བཞག་པའི་རང་གཞན་དུ༔ ཐོག་མར་བབས་ཀྱིས་གྲུབ་པའི་ལུགས༔ རྣམ་དག་སྲིད་གསུམ་ཡོངས་གྲོལ་ཞིང་༔ སྟོང་གསུམ་ཡེ་རྒྱས་བཏབ་པའི་དབང་༔ རིམ་མིན་ཅིག་ཅར་འཇུག་པའི་ཚུལ༔ རང་གནས་བབས་ལུགས་ཆེན་པོའི་དབང་༔ དབང་པོ་རབ་ཀྱི་ཡང་རབ་ཀྱི་དོན་དུ་ཡི་གེ་འདི་བརྩམས་བཀོད༔ དེ་ཡང་གཞི་ནས་གྲུབ་པའི་ཕྱིར༔ གློ་བུར་བཙན་ཐབས་ཡང་མིན་ཏེ༔ རང་ལ་གནས་པའི་ཡེ་ཤེས་ཉིད༔ དབང་པོས་དངོས་སུ་བལྟ་དོན་དུ༔ ངེས་པའི་དབང་འདིས་རྡུལ་ཚོན་ནས༔ ཡེ་ཤེས་ཅིག་ཅར་འཇུག་པའི་ཕྱིར༔ ལྷ་སྔགས་དམ་རྫས་མ་བརྟེན་པར༔ གནས་ལུགས་ཚིག་གིས་མཚོན་བྱས་ནས༔ རྩལ་དབང་མ་བསྐུར་རྫོགས་པའི་དོན༔ དད་བརྩོན་ཤེས་རབ་ལྡན་པ་ཡིས༔ སྐལ་ལྡན་སྙིང་གི་བུ་གཅིག་ལ༔ གཅིག་དང་གཉིས་དང་གསུམ་ལ་ནི༔ ངེས་པར་ཉམས་སུ་མྱོང་བའི་གནད༔ བསྐུར་ལུགས་འདི་ལ་བརྟེན་ནས་ནི༔ ཅིག་ཅར་དོན་དུ་འདི་བསྟན་པས༔ འདི་ལྟར་སྤྱོད་ཅིག་ས་མ་ཡཱ༔ འདི་ཉིད་གསང་སྔགས་ཀུན་གྱི་བཅུད༔ མ་བཙལ་བཞག་པའི་དོན་དེ་ནི༔ བདག་གིས་བརྡའ་ལ་བརྟེན་ནས་ཀྱང་༔ ཤེས་རབ་ཀྱིས་ནི་དཔྱད་མེད་པར༔

དབང་པོའི་སྒོ་ལ་མངོན་སུམ་དུ༔ སྣང་བ་ཡེ་ཤེས་གཏན་དབབ་ཕྱིར༔ འདི་ལྟར་ངེས་པའི་དོན་འཇུག་བགྱི༔ འདིར་གསང་བ་ངོ་བོ་ཉིད་ཀྱི་དབང་བསྐུར་ཐོབ་པར་འདོད་པ་རྣམས་ཀྱིས་འདི་ལྟར་འཇུག་པར་བྱའོ༔ དེ་ཡང་བླ་མ་ལུང་དང་ལྡན་པ་རབ་ཏུ་གཅེས་ཏེ༔ ལུང་དང་མི་ལྡན་པའམ༔ དམ་ཚིག་མེད་པའམ༔ འཇིག་རྟེན་གྱི་རྙེད་བཀུར་ལ་སེམས་པའམ༔ གསང་སྔགས་ལུང་བཞིན་མི་འཛིན་པའམ༔ རྒྱུད་ལ་དགོངས་པ་མི་གནས་པ་འམ༔ རིག་པ་མངོན་སུམ་དུ་མ་མཐོང་བས་ནི་དབང་བསྐུར་དུ་རུང་བ་མ་ཡིན་ཏེ༔ འདི་ལྟ་བུའི་བླ་མས་དབང་བསྐུར་ན་ལམ་ལོག་པར་འདྲེན་པས་ན་ལོག་འདྲེན་ཞེས་བྱའོ༔ འདིས་དབང་བསྐུར་ན་ལུས་སེམས་ཆུད་ཟོས་པའི་སྟེང་དུ་རྡོ་རྗེའི་དམྱལ་བར་མདའ་འཕངས་པ་བཞིན་དུ་དཔོན་སློབ་གཉིས་ཀ་སེམས་ཀྱི་སྣང་བར་འགྱུར་རོ༔ དེའི་ཕྱིར་ན་མཚན་ཉིད་དང་ལྡན་པའི་བླ་མ་རབ་ཏུ་གཅེས་སོ༔ སློབ་མ་ཡང་སུ་རུང་རུང་ལ་བྱ་བ་མ་ཡིན་ཏེ༔ རྩོལ་བྲལ་གྱི་དབང་ལ་འཇུག་པའི་དད་པ་ཅན༔ འཁོར་བ་ལ་ཡིད་དབྱུང་དད་པ་ལ་སྐྱོ་ངས་མེད་པ་དང་༔ འཇིག་རྟེན་གྱི་ནོར་ལ་ཆགས་པ་མེད་ཅིང་གཏོང་ནུས་པ་དང་༔ ཤེས་རབ་ཆེན་པོ་མཆོག་གི་བློ་རྒྱས་པ་དང་༔ གསང་སྔགས་ལ་སྲི་ཞུ་ཁྱད་པར་ཅན་གྱིས་རབ་ཏུ་ཞུ་བ་དང་༔ བླ་མ་ལ་གུས་ཤིང་དབང་པོ་དུལ་བ་དང་༔ ང་རྒྱལ་དང་བྲལ་ཞིང་ཆོ་ག་ཤེས་པ་དང་༔ སྐྱེ་ཤི་གཉིས་ལ་བྲེད་པའི་གང་ཟག་གིས་འཇུག་པར་བྱ་བ་ཡིན་གྱིས༔ འདི་ལྟ་བུ་དང་མི་ལྡན་པས་དབང་བསྐུར་ཞུས་ན་དཔོན་སློབ་གཉིས་ཀ་སེམས་ཀྱི་སྣང་བ་རྡོ་རྗེ་དམྱལ་བར་སེམས་པར་འགྱུར་རོ༔ དེས་ན་ཐོག་མ་ནས་བརྩམས་པོ་མཆོག་ཡིན་ནོ༔ འདི་ནི་དཔེར་ན་རྩིག་པའི་རྨང་ལེགས་པ་དང་འདྲ་སྟེ༔ རྨང་ལེགས་ན་རྩེ་ལ་བླང་ཀྱང་ཉེས་པའི་སྐྱོན་མི་འོང་སྟེ༔ དེའི་ཕྱིར་ན་བླ་མ་ལུང་དང་ལྡན་ཞིང་སློབ་མ་དད་བརྩོན་ཤེས་རབ་དང་

ལྡན་པ་གལ་ཆེའོ༔ ད་ནི་བླ་མའི་བྱ་བ་བསྟན་པ་ནི༔ དེ་ནས་སྐལ་ལྡན་ལ་དབང་བསྐུར་བའི་དོན་དུ་བླ་མས་རང་གི་ལུས་བཀྲུས་ནས་རང་གི་བླ་མ་ལ་ཡོན་འབུལ་བ་དང་གསོལ་བ་བཏབ་ནས་དབང་བསྐྱར་མ་ཞུས་ལ་བླ་མ་མཉེས་པར་བྱ༔ གལ་ཏེ་བླ་མ་མི་བཞུགས་ན་བླ་མའི་སྐུ་གསུང་ཐུགས་ལ་ཤེས་པ་གཏད་དེ་ཞག་བདུན་ནམ་བཅུ་གཅིག་ཚུན་དུ་གསོལ་བ་གདབ་ཅིང་བསྒོམ་པར་བྱའོ༔ དེ་ལྟར་བྱས་པས་དངོས་སམ་རྨི་ལམ་གྱི་ལྟས་སུ་རང་གི་བླ་མ་བྱོན་ནས་ཆོས་སྟོན་པ་ལ་སོགས་པའི་རྟགས་འབྱུང་བ༔ གལ་ཏེ་བླ་མ་རང་དུ་མ་བྱུང་ཡང་གཞན་གྱིས་སྟོན་པ་ལ་སོགས་པ་དང་ཆོས་ཀྱི་གཏམ་བྱེད་པ་ལ་སོགས་པ་འབྱུང་ངོ་༔ དེ་ནས་དུར་ཁྲོད་དུ་ཞག་གསུམ་མམ་ལྔའི་བར་དུ་སྤྱོད་པ་བརྩམས་ཏེ་འཁོར་འདས་རུ་ཤན་འབྱེད་པའི་སྤྱོད་པ་བྱ༔ དེ་ལྟར་སྤྱོད་པ་བྱས་པས་ལུས་ངག་གི་རྟགས་འབྱུང་སྟེ༔ དེ་ནས་ཡང་རི་ཁྲོད་དམ་ཤིན་ཏུ་དབེན་པའི་སར་ཕྱིན་ཏེ་རིག་པ་རྡོ་རྗེ་ལུ་གུ་རྒྱུད་ལ་ཉམས་སུ་བླངས་ཏེ་ཞག་བདུན་ནམ་བཅུ་གཅིག་གམ་ཉི་ཤུ་རྩ་གཅིག་ཉམས་སུ་བླང་བར་བྱའོ༔ དེ་ནས་སློབ་མ་ལ་དབང་བསྐུར་བའི་གནས་ཁང་དུ་འོངས་ཏེ༔ སློབ་མ་དད་པ་ཅན་གཉིས་དང་གསུམ་ཚུན་ཆད་ལས་མང་དུ་མི་རུང་སྟེ་ཤིན་ཏུ་བརྟགས་ལ་བྱའོ༔ དེ་ནས་སློབ་མའི་བྱ་བ་བླ་མས་བསླབ༔ སློབ་མ་ཀུན་ཁྲུས་ནས་བཏོན་གོས་བརྗེས་ལ་དད་མོས་དང་ལྡན་པར་གནས་སོ༔ བླ་མས་བགེགས་བསྲུང་བའི་ཕྱིར་ཡི་གེ་བརྒྱད་ཀྱི་རྒྱས་གདབ་པར་བྱ་སྟེ༔ ཐོག་མར་ཧཱུྃ་གི་རྒྱས་གདབ་པ་ནི༔ བླ་མའི་སྟོད་གཡོགས་རྣམས་ཕུད་དེ་ལུས་སྟངས་སྟབས་ཀྱི་ཚུལ་དུ་བྱ་སྟེ༔ ཧཱུྃ་ཞེས་ངར་དང་བཅས་ཏེ་བརྗོད་ནས་སློབ་མའི་རྩ་གསུམ་པ་ཅན་བྱ་བ་སྙིང་གི་རྩེ་ན་མངོན་ཡོད་པ་དེའི་ནང་དུ་འཕང་ངོ་༔ སློབ་མ་རང་གི་ལུས་ཧཱུྃ་སྔོ་སྐྱ་བ་ཆེན་པོ་ཞིག་ཏུ་བསྒོམ་དུ་གཞུག་གོ༔ དེའི་རྗེས་ལ་ཡི་གེ་ཡཾ་གཅིག་ཐོན་ཏེ༔ སློབ་མའི་སྤྱིི་བོ་ནས་རྐང་

མཐིལ་གྱི་བར་དུ་རྩ་རིག་བྱེད་བྱ་བ་ཡོད་དོ༔ དེར་ཞུགས་པར་བསམ་ཞིང་སློབ་མ་ལུས་ཡི་གེ་ཡཾ་ལྗང་གུ་ཆེན་པོ་ཞིག་ཏུ་བྱས་ཏེ་བསྒོམ་དུ་གཞུག་གོ༔ དེ་བཞིན་དུ་ཡི་གེ་རཾ་ལྟེ་བར་བྱ་སྟེ་གོ་རིམ་བཞིན་དུ་བྱའོ༔ མགྲིན་པར་ཁཾ༔ དཔྲལ་བར་ཨེ༔ ལྐོག་མར་སུ་དེ་ལྟར་བྱས་ནས་རང་གི་ལུས་གཅེར་བུར་ཕྱུངས་ཏེ་རིག་པ་ཡི་གེ་ཧ་དང་བཅས་པ་བསྒོམས་ལ༔ ངག་ཏུ་ཧ་ཧ་དྷ་དྷ་ཞེས་དྲག་པར་བསྒྲགས་པས་སློབ་མའི་ལུས་ངག་ཡིད་གསུམ་འཛིན་པའི་དྲི་མ་དག་པར་བྱས་ནས་ལུས་ཧ་ཆེན་པོ་ཞིག་ཏུ་སྒོམ་དུ་གཞུག་གོ༔ ཡང་ཕཊ་ཅེས་ཤིན་ཏུ་དྲག་པར་བརྗོད་ནས་སློབ་མའི་སྙིང་ལ་བཅུག་པས༔ སློབ་མས་ཀྱང་ཕཊ་ཅེས་དྲག་ཏུ་ཤུགས་དང་བཅས་པས་དྲག་ལ་ཐུང་བར་ཟློས་སུ་བཅུག་ལ༔ བགེགས་རྣམས་མི་རྟོག་པའི་ཡི་གེ་བརྒྱད་ཀྱིས་རང་གནས་རྩ་བའི་རང་སྐད་དང་བཅས་པས་བསྲུངས་ལ༔ སློབ་མ་ཀུན་དུར་ཁྲོད་དུ་མ་ཕྱིན་གྱི་བར་ལ་ཕཊ་དྲག་ཏུ་བཟླས་ལ༔ དེ་ནས་དུར་ཁྲོད་དུ་ཕྱིན་པ་དང་གཏོར་མ་ཞིག་བཏང་ལ༔ ལུས་ཀྱི་སྤྱོད་པ་ཞག་གཅིག་ཏུ་བྱ་སྟེ༔ དེ་ནས་ངག་རུ་ཤན་འབྱེད་པའི་སྤྱོད་པ་བྱ༔ དེ་ནས་སེམས་ཀྱི་སྤྱོད་པའི་མན་ངག་ལ་བསླབས་ཏེ་ཞག་གཅིག་ཏུ་བྱའོ༔ དེ་ལྟར་ཞག་གསུམ་དུ་ལུས་ངག་ཡིད་གསུམ་ཞེན་པ་བཟློག་པའི་སྤྱོད་པ་བྱས་པས་ལུས་ངག་སེམས་ལ་བགེགས་མི་འཇུག་པར་བྱ་བ་དང་༔ དེ་ལྟར་བྱས་པས་ལུས་ངག་གི་ཞེན་པ་རང་ལོག་པའི་དགོས་པ་ཡོད་པའོ༔ དེ་ནས་གནས་ཁང་དུ་འོང་སྟེ་བླ་མ་ལ་བྱ་རྩོལ་དང་བྲལ་བའི་རང་བཞིན་རྫོགས་པ་ཆེན་པོའི་དབང་ཞུ་བར་བྱ་སྟེ༔ རང་ལ་ཡིད་དུ་འོང་བའི་རྫས་ཤིན་ཏུ་གཅེས་པ་བླ་མ་ལ་བཞེད་པ་མེད་ཀྱང་ཕུལ་ཏེ་མཉེས་པར་བྱས་ལ་གསེར་ལ་སོགས་པའི་མཎྜལ་ཕུལ༔ དེ་བཞིན་དུ་འབྲུ་དང་༔ དྲི་བཟང་སྣ་ཚོགས་དང་༔ མེ་ཏོག་ལ་སོགས་པའི་མཎྜལ་རྣམས་བླ་མ་ལ་ཕུལ་དབང་ཞུའོ༔

དེ་ནས་བླ་མས་སློབ་མ་རྗེས་སུ་བཟུང་བའི་ཕྱིར་དབང་བསྐུར་དངོས་གཞིའི་གདམས་ངག་འདི་ལྟ་སྟེ༔ གནས་དེར་དམིགས་པའི་རྟེན་ལ་བརྟེན་ནས་གཞི་མཚོན་པའི་ཕྱིར་དྲི་སྣ་ཚོགས་པའི་མཎྜལ་མདའ་གང་གྲུ་བཞི་པའམ༔ ཡང་ན་ཟླུམ་པོ་ཤིན་དུ་མཉམ་པར་བྱས་ཏེ༔ དེའི་སྟེང་དུ་ཁ་དོག་རེ་རེས་གཙོ་བྱས་པའི་མེ་ཏོག་ཚོམ་བུ་ལྔ་ལྔ་སྟེ་ལྔ་ཚན་ལྔ་དགྲམ༔ འཕགས་པ་རྣམས་མཆོད་པའི་ཕྱིར་མེ་ཏོག་དང་མར་མེ་ལ་སོགས་པ་ཡང་འབྱོར་ཚད་བཤམ༔ འཇིག་རྟེན་པའི་བར་ཆད་ཞི་བར་བྱ་བའི་ཕྱིར་ན་མཁའ་འགྲོ་མ་དང་ཆོས་སྐྱོང་རྣམས་ལ་གཏོར་ཚོགས་ཀྱང་ཤིན་དུ་བཟང་བར་བཤམ་མོ༔ བླ་མ་བཀའ་བརྒྱུད་རྣམས་ལ་གསོལ་བ་འདེབས་པ་ལ་སོགས་གོང་ལྟར་བྱས་ལ༔ དེ་ནས་སློབ་མ་འཁོར་བ་ལ་བློ་དོར་བར་བྱ་བའི་ཕྱིར་ཉེས་དམིགས་དང་དད་པ་བསྐྱེད་པ་ལ་སོགས་པའི་ཆོས་རྣམས་བཤད་དོ༔ གཞན་ཡང་ཆོས་ཀྱི་སྐུའི་སྣང་བ་མ་མཐོང་གི་བར་དུ་ཅིས་ཀྱང་དགོས་པ་མེད་སྙམ་དུ་གཞུག་གོ༔ དེ་ནས་སློབ་མ་རེ་རེ་ནས་དབང་བསྐུར་བ་ནི༔ མཎྜལ་དབུལ་བ་ལ་སོགས་པ་བྱས་ལ་མེ་ཏོག་འབུལ་བ་ནི་ལུས་གཅེར་བུར་ཕྱུང་ལ་འགྲེང་ཚུགས་སུ་ལངས་ཏེ་རྐང་པའི་ལོང་བུ་གཉིས་གཤིབས་ལ་ལུས་བསྲངས་ཐལ་མོ་སྙིང་གར་སྦྱར་ལ༔ སྐལ་ལྡན་གྱི་ཤེས་པ་བླ་མའི་ཐུགས་ཀྱི་དཀྱིལ་དུ་གཏད་ནས་སེམས་གཞན་དུ་སྐད་ཅིག་ཀྱང་མ་ཡེངས་པར་ཤེས་པ་བླ་མའི་ཐུགས་ལ་བཅུག་ལ་བསྒོམ་དུ་གཞུག་གོ༔ བླ་མས་ཁོའི་ཤེས་པ་མི་བཏང་བའི་ཕྱིར་ཡི་གེ་ཨ་དྲུག་བརྩེགས་ཀྱི་རྒྱས་གདབ་བོ༔ དེ་ཡང་སློབ་མའི་རིག་པ་ལ་དམིགས་ཏེ་ངག་ཏུ་ཡང་ཨ་དྲུག་བརྗོད་ཅིང་བུའི་རིག་པ་བཟུང་བས་སྐལ་ལྡན་གྱི་ལུས་ཀྱང་ཇི་ཉེ་ཇི་ཉེ་ལ་རྩ་རུ་ཡོད་པར་འགྱུར་རོ༔ ལུས་གཡོ་བ་དང་༔ ངག་སྨྲ་བ་དང་༔ སེམས་འཕར་བ་དང་༔ དེ་ལྟར་བྱུང་ན་རབ་ཏུ་བཟང་བ་ཡིན་ནོ༔ དེ་ནས་རིག་པའི་མེ་ཏོག་སྔོན་དུ་བླ་མ་ལ་དབུལ་བར་བྱའོ༔ དེ་ནས་བླ་མས་རང་བཞིན་རྫོགས་པ་ཆེན་པོའི་དབང་བསྐུར་བ་ནི༔ སྐལ་ལྡན་དེའི་ལུས་ཀྱི་

གནད་གོང་ལྟར་བྱེད་དུ་བཅུག་སྟེ་ཤར་ཕྱོགས་སུ་ཁ་བལྟས་ལ༔ བླ་མས་འདི་སྐད་བརྗོད་དོ༔ ཨེ་མ་སྐལ་བ་དང་ལྡན་པ་ཁྱོད་ཤར་ཕྱོགས་ཀྱི་ནམ་མཁའི་ཁམས་ན་ཕར་གམ་གམ་སོང་ཞིག་དང་༔ ཞེས་བརྗོད་ཅིང་སྐལ་ལྡན་དེས་ཀྱང་གོམ་པ་འབོར་བར་བསྒོམ་དུ་གཞུག་གོ༔ དེ་བཞིན་དུ་ལྷོ་དང་༔ ནུབ་དང་༔ བྱང་རྣམས་སུ་ཡང་དེ་ལྟར་བྱའོ༔ ཉམས་ཀྱི་རྟགས་མ་བྱུང་ན་བརྡའ་དེས་བཀྲོལ་ལོ༔ དེ་ནས་བླ་མས་ནམ་མཁའ་ལ་ཕྱག་ཡུག་ཡུག་པ་ལན་གསུམ་བྱས་ལ་ངག་ཏུ་འདི་སྐད་བརྗོད་དོ༔ ཨེ་མ་སྐལ་བ་དང་ལྡན་པ་ཁྱོད་ནམ་མཁའི་དཀྱིལ་དུ་ཡར་ལྟོས་དང་སྟེང་ན་ཉི་མ་ལྔ་ཤར་ནས་འདུག་པ་ལ་མིག་གིས་ལྟོས་དང་ཉི་མའི་འོད་ཟེར་འཕྲོ་བ་འདི་ལ་མིག་གིས་ཚུགས་སམ༔ ཞེས་པ་དང་༔ འོ་ཉི་མ་དེ་ལ་ཤེས་པ་གཏོད་ལ་ནམ་མཁའི་སྟེང་ན་ཡར་ལ་ཇེ་མཐོ་ཇེ་མཐོ་སོང་ལ་སླར་མ་ལོག་ཅིག་ཅེས་པ་དང་༔ ཡང་བླ་མས་ལངས་ཏེ་གཡས་བརྐྱང་བའི་འདུག་སྟངས་ཀྱིས་རང་གི་མིག་གཉིས་ལ་མཛུབ་མོ་བཙུགས་ལ༔ ཨ་ཨ་ཞེས་བརྗོད་ཅིང་ཕྱོགས་བཞིར་བལྟའོ༔ ད་མཛུབ་མོ་ནམ་མཁའ་ལ་བསྒྲེངས་ཏེ་མིག་ནམ་མཁའ་ལ་བགྲད་ནས་ཧར་རེ་བལྟ་བ་དང་ངག་ཏུ་ནི་ནམ་མཁའ་འདི་ནི་རྒྱ་ཆེའོ༔ ཞེས་ལན་གསུམ་བྱའོ༔ དེ་ལྟར་དབང་དེ་རྣམས་རྫོགས་ནས་ཀུན་གྱི་ཉམས་དྲིའོ༔ སྐལ་བ་དང་ལྡན་ན་ཇི་ལྟ་བ་བཞིན་དུ་གོ་བས་ཏེ༔ གལ་ཏེ་མ་གོ་ན་བརྡ་བཀྲོལ་བས་བླ་མའི་མན་ངག་དམ་པར་འགྱུར་བས་སོ༔ དེ་ནས་རིག་པ་མངོན་སུམ་གྱི་མན་ངག་བཏབ་པ་ཉམས་སུ་ལེན་དུ་གཞུག་ག༔ོ ཤིན་ཏུ་སྤྲོས་པ་མེད་པའི་སྐལ་ལྡན་གྱི་དབང་རྫོགས་སོ༔ རྒྱ་གར་གྱི་མཁན་པོ་བི་མ་མི་ཏྲས་སྒྲ་རང་འགྱུར་དུ་བསྒྱུར་བའོ༔ སྤྲོས་པ་ལ་དགའ་བ་རྣམས་ཀྱིས་ནི་དབང་གི་འཕྲ་ཏིག་ཆེ་བར་སྙེགས་པར་བྱའོ༔ ས་མ་ཡ༔ རྒྱ་རྒྱ་རྒྱ༔

སྤྲོས་མེད་དབང་གི་ཏི་ཀ།

སྤྲོས་མེད་དབང་གི་ཏི་ཀ་བཞུགས་སོ༔ ལུང་མེད།

བཅོམ་ལྡན་འདས་སྤྲོས་པ་ཐམས་ཅད་ཉེ་བར་ཞི་བའི་དཔལ་རྡོ་རྗེ་འཆང་ལ་ཕྱག་འཚལ་ལོ༔ དད་པ་རབ་དང་ལྡན་པའི་སྐལ་ལྡན་ངེས་པའི་ལུས་ཅན་ཉིད༔ རང་བཞིན་རྫོགས་པ་ཆེན་པོའི་དོན་ལ་ཡང་༔ རྨོངས་པ་མེད་ཅིང་འཇུག་སྒོ་གསལ་བྱའི་ཕྱིར༔ འཕྲ་ཏིག་མིག་གི་རིན་ཆེན་རྒྱན་སྤྲས་པའི༔ དབང་བཞི་རྫོགས་པར་བྱེད་པའི་དོན་ཉིད་དུ༔ སྤྲོས་ལ་དགའ་བའི་དོན་དུ་དེ་བསྟན་ནས༔ ད་ནི་སྤྲོས་པ་དག་དང་བྲལ་བའི་དོན་དུ་ཡང་༔ སྤྲོས་མེད་དབང་གི་མན་ངག་གནད་ཉིད་ནི༔ འདི་ལྟར་དམ་ཚིག་ལྡན་པས་ངེས་པར་གཟུང་བར་བྱ༔ གལ་ཏེ་སྐལ་བ་དང་ལྡན་པའི་སྐྱེས་བུས་དབང་བཞི་རྫོགས་པར་བྱེད་པའམ༔ ཡང་ན་སྤྲོས་པ་ལ་མི་དགའ་བ་རྣམས་ལ་འདི་ལྟར་སྤྲོས་པ་མེད་པའི་དབང་བསྐུར་བས་རང་བཞིན་རྫོགས་པ་ཆེན་པོའི་དབང་བསྐུར་འདི༔ སྣོད་དང་ལྡན་པའི་སྐལ་ལྡན་གཉིས་སམ་གསུམ་ལས་མང་ན་དམ་ཚིག་གི་ཆད་པ་འབབ་བོ༔ འདི་ལྟ་བུའི་དད་པ་ཅན་འཁོར་བ་ལས་བློ་ལྡོག་པ་རང་བཞིན་གྱིས་སོས་དལ་ཞིང་རང་ཤུགས་བཟང་བ༔

རྣམ་པར་རྟོག་པ་བག་ཀྱིས་ཆུང་བའི་དད་པ་ཆུང་ཞིང་ཆོག་ཤེས་པ་ཅན་རང་བཞིན་རྫོགས་པ་ཆེན་པོའི་སྣོད་ཡིན་པས༔ འདི་ལྟ་བུའི་སློབ་མ་གཅིག་གམ་གཉིས་ནས་གསུམ་མན་ཆད་ལ་བསྐུར་བའོ༔ དེ་ལ་སྔོན་དུ་བྱ་བའི་སྡོམ་པ་དང་༔ དངོས་གཞིའི་བྱ་བའི་རིམ་པའོ༔ དེ་ནས་བླ་མ་ཉིད་ལ་སློབ་མས་དབང་གི་ཞུ་བ་ཕུལ་ནས་དེ་ཉིད་ལ་གུས་པ་འཇོག་པའི་ཕྱིར་དུ་རང་གི་བླ་མ་ལ་དབང་བསྐྱར་ལ་ཞུ་བ་དང་༔ གལ་ཏེ་མི་བཞུགས་ན་བླ་མ་ཉིད་ནམ་མཁར་དམིགས་ཏེ་སྤྲོས་པ་མེད་པའི་དབང་རྣམས་ཡིད་ཀྱིས་བླང་ངོ་༔ བརྒྱུད་པའི་བླ་མ་རྣམས་ལ་གསོལ་བ་གདབ་པར་བྱ་བ་དང་༔ ངག་གི་དྲི་མ་དག་པར་བྱ་བའི་ཕྱིར༔ ཡི་གེ་གསུམ་ལ་ངག་འབྱོངས་བར་བྱ་བ་དང་༔ གཉིས་སུ་མེད་པའི་དོན་ལ་བློ་བསྐྱེད་པར་བྱ་བའི་ཕྱིར་ཡེ་ཤེས་ལྔའི་མཚན་ཉིད་བསྒོམ་པ་དང་༔ འཁོར་བ་ལ་ཡིད་དབྱུང་བར་བྱ་བའི་ཕྱིར་མི་རྟག་པ་བསྒོམ་པ་དང་༔ སྤྱོད་ལམ་གྱིས་རྗེས་སུ་གཟུང་བའི་ཕྱིར་བྱ་བྱེད་ཀྱི་སྤྱོད་པ་ཉེར་གཅིག་བརྩམ་པར་བྱ་བ་དང་༔ ལྟ་བའི་དོན་དྲན་པར་བྱ་བའི་ཕྱིར་

སྟོང་པ་ཉིད་བསྒོམ་པ་ལ་སོགས་པ་ནི་སློབ་དཔོན་གྱི་སྔོན་དུ་འགྲོ་བའི་ལས་སོ༔ དེ་ལྟར་རྡོ་རྗེ་སློབ་དཔོན་གྱིས་སྔོན་དུ་འགྲོ་བའི་ལས་རྣམས་བྱས་ནས༔ སློབ་མ་དད་པ་དང་ལྡན་པ་དེ་ཡང་འཁོར་བ་ལས་ཡིད་དབྱུང་བར་བྱ་བའི་ཕྱིར་མི་རྟག་པ་བསྒོམ་པའི་ལས་རྣམས་བསླབས་ཏེ་བསྒོམ་དུ་གཞུག་གོ༔ དེ་ཡང་ཞག་ལྔའམ་དགུའམ་བཅུ་གཅིག་གི་བར་དུ་བསྒོམ་དུ་གཞུག་གོ༔ དེ་ལྟར་བསྒོམས་པས་དད་པ་དྲག་པོ་སྐྱེ་བ་དང་༔ འཁོར་བ་ལས་ཡིད་དབྱུང་༔ སྒྱིད་ལུག་པ་དང་ངེས་པར་འབྱུང་བར་ངེས་སོ༔ དེ་ནས་སློབ་དཔོན་གྱིས་འཁོར་བའི་ཉེས་དམིགས་རྣམས་དང་སངས་རྒྱས་ཀྱི་ཡོན་ཏན་རྣམས་བཤད་ལ༔ སྤྲོས་པ་མེད་པའི་དབང་བསྐུར་བའི་གནས་རབ་ཏུ་དབེན་པར་དཔོན་སློབ་རྣམས་ཕྱིན་ཏེ་གནས་ཁང་གི་ནང་ཐམས་ཅད་དྲི་སྣ་ཚོགས་ཀྱིས་ཆག་ཆག་གདབ་པ་དང་༔ མཎྜལ་ཟླུམ་པོ་མེ་ལོང་གི་ངོས་ལྟར་མཉམ་པར་བྱས་ལ༔ དེ་ཉིད་ཀྱི་དབུས་སུ་རྡུལ་ཚོན་གྱིས་བུམ་པ་དམར་པོ་ཁ་རྒྱན་དང་མགུལ་ཆིངས་དང་བཅས་པ་དག་བྲེས་ལ༔ ཟླུམ་ཞིང་མཉམ་པ་ཚོན་སྣ་ལྔའི་ར་བས་བསྐོར༔ དེའི་ཤར་ཕྱོགས་སུ་ཤིང་ཁྲིའི་སྟེང་དུ་རིན་པོ་ཆེའི་བུམ་པ་གས་པ་དང་ཆག་པ་དང་ཞོམ་པ་མེད་པ་གསུམ་གྱི་ནང་དུ་སྨན་སྣ་ཚོགས་པ་དང་༔ དྲི་སྣ་ཚོགས་པ་དང་༔ མར་དང་འོ་མ་ལ་སོགས་པས་བཀང་ལ༔ འབྲས་བུ་དང་མེ་ཏོག་ཅན་གྱི་ཤིང་གི་ཁ་རྒྱན་བྱས་ལ༔ རས་དམར་པོ་དྲི་མ་མེད་པ་གསུམ་གྱིས་མགུལ་བ་བཅིང་ངོ་༔ དེ་ལྟར་བུམ་པ་རེ་རེའི་སྟེང་དུ་རྨ་བྱའི་མདོངས་གསུམ་གསུམ་དང་༔ མེ་ལོང་དང་མན་ཤེལ་གསུམ་གསུམ་གཞག་པར་བྱའོ༔ མར་མེ་དང་ལྷ་བཤོས་ལ་སོགས་པ་བདུན་ལས་མི་ཉུང་བར་བྱས་ལ༔ དེ་ནས་སློབ་མ་རྣམས་ཕྱི་རོལ་ནས་ལས་བུམ་གྱི་ཁྲུས་ཆུ་ནས་བཏོན་ལ༔ གོས་གསར་པ་གྱོན་པ་ལ་སོགས་པ་རྒྱན་དག་གིས་ལེགས་པར་བརྒྱན་ཅིང་གྲལ་ལ་ལེགས་པར་འཁོད་དེ་བགེགས་ཀྱི་བར་ཆད་ཞི་བར་བྱ་བའི་ཕྱིར་ལས་ཀྱི་སློབ་

དཔོན་གྱིས་གུ་གུལ་གྱི་དུད་པས་བདུག༔ དེ་ནས་སྤྲོས་པ་མེད་པའི་དབང་བསྐུར་བའི་དོན་དུ་གསེར་གྱི་མཎྜལ་དབུལ་ཞིང་ཐལ་མོ་སྦྱར་ནས༔ བླ་མ་རྡོ་རྗེ་འཛིན་པ་ནི༔ ཁམས་གསུམ་འཁོར་བའི་གཉེན་གཅིག་བུ༔ འགྲོ་བ་མགོན་མེད་རྣམས་ཀྱི་སྐྱབས༔ ཐར་བའི་ལམ་སྐས་ཆེན་པོ་སྟེ༔ མ་རིག་སེལ་བའི་སྒྲོན་མེ་ལ༔ མུན་པའི་ཚོགས་བདག་སྐྱབས་སུ་མཆི༔ འཁོར་བ་འདམ་གྱི་ཚོགས་ནང་དུ༔ བྱིང་བ་སྐྱབས་མེད་བདག་ལ་སྐྱོབས༔ དུག་གསུམ་ཉི་མས་རླན་བྲལ་བས༔ ཐུགས་རྗེའི་ཆུ་རྒྱུན་བདག་ལ་ཕོབ༔ རྩུབ་འགྱུར་མེ་ཆེན་འབར་བ་ལ༔ རང་བྱུང་རླན་གྱིས་བསིལ་བར་མཛོད༔ ཅེས་བརྗོད་དུ་གཞུག་སྟེ༔ ལས་ཀྱི་སློབ་དཔོན་གྱིས་རྡོ་རྗེས་དྲངས་ཏེ་གྲལ་ལ་འཁོད་དུ་གཞུག༔ གུས་པས་འདུག་པར་བྱའོ༔ ཕྱག་ལེན་ནི་ཉམས་སུ་ལེན་པའི་གང་ཟག༔ སློབ་དཔོན་དང་སློབ་མའི་མཚན་ཉིད་སྐྱོན་ཡོན་རྣམས་བསྟན་ནས་ཉམས་སུ་བླང་བྱའི་གདམས་པ་ལ༔ བླ་མ་བརྒྱུད་པའི་ལོ་རྒྱུས་བཤད་དེ་སློབ་མས་ཕྱག་དང་བཤགས་པ་བྱས་ནས་མཁའ་འགྲོ་མ་དམར་མོ་བསྒོམས་ལ་རིག་འཛིན་དང་རིགས་ལྔའི་བྱིན་འབེབས་བྱས་ནས་མཎྜལ་ཕུལ་ནས་གསོལ་བ་བཏབ་སྟེ་སློབ་དཔོན་གྱིས་ཆོས་བཤད་པ་ནི༔ དེ་ནས་འཁོར་བའི་མཚན་ཉིད་རྣམས་བསྟན་པར་བྱ་སྟེ༔ དེའང་སློབ་དཔོན་གྱིས༔ གླིང་ལས་ཁྱད་པར་འཕགས་ཏེ་འཛམ་བུའི་གླིང་དུ་སྐྱེས༔ ཐོབ་པར་དཀའ་བའི་མི་ལུས་རིན་པོ་ཆེ་ཐོབ༔ འདུག་པར་དཀའ་བའི་ཤཱཀྱ་ཐུབ་པའི་བསྟན་པ་ལ་གནས༔ འཕྲད་པར་དཀའ་བའི་དམ་ཆོས་རིན་པོ་ཆེ་དང་ཕྲད་ནས༔ ཆོས་མ་བྱས་ན་མི་ཚེ་སྟོང་ལོག་ཡིན་པས༔ ད་རེས་ཚེ་འདི་ལ་རྫོགས་པའི་སངས་རྒྱས་རིན་པོ་ཆེ་ཐོབ་པར་བྱས་ལ་སེམས་ཅན་ཐམས་ཅད་ཐུགས་རྗེའི་སྒོ་ནས་འདྲེན་དགོས་པས་ད་རེས་ཚེ་འདི་ལ་ཐོབ་པར་བྱའོ་སྙམ་པའི་བློ་བསྐྱེད་ནས་སྨོན་པའི་ལམ་ལ་འཇུག་དགོས༔ དེ་གྲོལ་བར་བྱེད་པའི་ཐབས་ཁོ་ན་ལ་གནས་པར་བྱས་ནས་མཐར་སངས་རྒྱས་སྒྲུབ་པར་འདོད་པས་ན༔ དང་པོ་

གཞི་མ་སྨིན་པ་སྨིན་པར་བྱེད་པ་ལ་དབང་གཞི་རྫོགས་པར་ཐོབ་དགོས་པས་འདི་ཞུའོ༔ དེས་མ་གྲུབ་ན་སྤྲོས་མེད་མན་ཆད་ཐོབ་པར་བྱས་ནས་ཉམས་སུ་བླང་དགོས༔ དེ་ནས་འཁོར་བའི་མཚན་ཉིད་ཡིད་ལ་དྲན་པར་བྱས་ནས་འདས་པ་ལ་ཞུགས་ཏེ༔ དེ་ཡང་འཁོར་བའི་མཚན་ཉིད་དེ་ལས་ལྡོག་པར་བྱ་བའི་ཕྱིར་དུ་འཁོར་བའི་ཞེན་པ་དང་བྲལ་བར་བྱ་སྟེ༔ ཆོས་ཐམས་ཅད་རྨི་ལམ་ལྟ་བུ༔ སྒྱུ་མ་ལྟ་བུ༔ སྤྲུལ་པ་ལྟ་བུ༔ དྲི་ཟའི་གྲོང་ཁྱེར་ལྟ་བུ་བར་སྣང་གི་གློག་ལྟ་བུ་མྱུར་བྱེད་ཀྱི་འཁོར་ལོ་ལྟ་བུ་དཔེ་དུ་མས་མཚོན་པར་བྱའོ༔ དེ་ཉིད་ཀྱི་དོན་གྱིས་འཁོར་བའི་ཞེན་པ་དང་བྲལ་བས་གོང་མའི་དོན་ལ་གནས་པའི་དགོས་པ་ཡོད་དོ༔ ད་འཁོར་བ་ལས་སྐྱོ་བ་སྐྱེད་པ་ལས་འཁོར་བའི་མཚན་ཉིད་ནི་འདོད་པ་དང་བྲལ་བར་བྱ་བའི་ཕྱིར་འཁོར་བ་ལ་ཞེན་པའི་སྐྱོན་དེ་ཡང་སྤང་བར་བྱའོ༔ འཁོར་བ་ནི་དཔེ་ཟོ་ཆུའི་ཁྱུད་མོའི་རྣམ་པ་དང་མཚུངས་མེ་ཆེན་འབར་བའི་ནང་དུ་སྦྲང་བུ་ཚུད་པ་ལྟ་བུའོ༔ འདབ་ཆགས་རྙི་ལ་ཚུད་པ་ལྟ་བུ་དང་རི་དྭགས་རྒྱ་ལ་ཚུད་པ་ལྟ་བུ་དང་༔ ཕྱིའི་རྒྱ་མཚོ་ལ་གཟིངས་ཐག་ཆད་པ་ལྟ་བུ་དང་༔ རབ་ཏུ་བརྒལ་དཀའ་བའི་འདབ་རྫས་ཆེན་པོར་ཚུད་པ་ལྟ་བུ་དང་༔ འཇིགས་པ་དང་བཅས་པའི་འཕྲང་ལ་ལམ་ནོར་བ་ལྟ་བུ་དང་༔ གསོད་པའི་གཤེད་མའི་དཀྱིལ་དུ་ཚུད་པ་ལྟ་བུ་དང་༔ དེ་ལ་སོགས་པ་བསྟན་ནོ༔ ཡང་འདོད་ཡོན་ལ་སྐྱོ་བ་བསྐྱེད་པའི་ཕྱིར༔ འདོད་ཡོན་ནི་སྐོམ་གྱིས་གདུངས་པ་ལ་ཚྭ་ཆུ་བླུད་པ་ལྟ་བུ་དུག་གི་ལོ་མ་ལྟ་བུ་སྦྲུལ་གྱིས་ཟིན་པ་ལྟ་བུ༔ སྤུ་གྲིའི་སོ་ལྟ་བུ༔ བུད་མེད་ཀྱི་འདོད་ཆགས་ལྟ་བུ་ལ་སོགས་པས་འཁོར་བའི་མཚན་ཉིད་བསྟན་ཏོ༔ འདི་རྣམས་ལས་དང་པོ་པ་དབང་ལ་འཇུག་པའི་སྔོན་དུ་བསྟན་པར་བྱ༔ འཁོར་བའི་མཚན་ཉིད༔ སངས་རྒྱས་ཀྱི་ཡོན་ཏན་ལ་སོགས་པ་སྔོན་དུ་བཤད་དོ༔ སྤྲོས་པ་མེད་

པའི་དབང་བསྐུར་བ་ལ་སྔོན་དུ་འཇུག་པའི་ཆོ་ག་དང་༔ དངོས་གཞི་གཉིས་ཡིན་ཏེ༔ ཐུན་མོང་གི་འཇུག་པ་དང་༔ ཐུན་མོང་མ་ཡིན་པའི་འཇུག་པའོ༔ ཐུན་མོང་གི་འཇུག་པ་ལ་སྔོན་དུ་བླ་མ་ལ་གསོལ་བ་གདབ་པ་ནི༔ བླ་མ་རྡོ་རྗེ་འཛིན་པ་རྣམས་དགོངས་སུ་གསོལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ༔ རྡོ་རྗེ་དང་༔ རིན་པོ་ཆེ་དང་༔ པདྨ་དང༔ ལས་དང་༔ བདེ་བར་གཤེགས་པའི་རིགས་ཐམས་ཅད་བདག་ལ་དགོངས་སུ་གསོལ༔ བདག་མིང་འདི་ཞེས་པ་བགྱི་བ༔ དུས་འདི་ནས་བཟུང་སྟེ་སྙིང་པོ་བྱང་ཆུབ་ལ་མཆིས་ཀྱི་བར་དུ༔ བླ་མ་རྡོ་རྗེ་འཛིན་པ་ཆེན་པོས་བདག་གི་ལུས་བྱིན་གྱིས་བརླབ་ཏུ་གསོལ༔ གང་བར་མཛད་དུ་གསོལ༔ རྒྱས་པར་བྱིན་གྱིས་བརླབ་ཏུ་གསོལ༔ སྨིན་པར་བྱིན་གྱིས་བརླབ་ཏུ་གསོལ༔ གང་བར་བྱིན་གྱིས་བརླབ་ཏུ་གསོལ༔ རྒྱས་པར་བྱིན་གྱིས་བརླབ་ཏུ་གསོལ༔ ཆེར་འཕེལ་བར་མཛད་དུ་གསོལ༔ ཞེས་གསོལ་བ་གདབ་བོ༔ ཡང་བླ་མ་ལ་གསོལ་བ་བཏབ་ལ༔ དམ་བཅའ་བའི་ཚིག་འདི་རྣམས་ཁས་བླང་བར་བྱའོ༔ བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ༔ ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ༔ རྡོ་རྗེ་དང་༔ རིན་པོ་ཆེ་དང་༔ པདྨ་དང་༔ ལས་དང་༔ དེ་བཞིན་གཤེགས་པའི་རིགས་རྣམས་དགོངས་སུ་གསོལ༔ དུས་འདི་ནས་བཟུང་ནས་སྙིང་པོ་བྱང་ཆུབ་ལ་མཆིས་ཀྱི་བར་དུ༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པའི་དཀོན་མཆོག་གསུམ༔ བླ་མ་ལ་ཡང་ཕྱག་འཚལ་ལོ༔ བླ་མ་རྡོ་རྗེ་འཛིན་པ་དང་༔ དཀོན་མཆོག་གསུམ་ལ་སྐྱབས་སུ་མཆི༔ སྡིག་པ་ཐམས་ཅད་སོ་སོར་བཤགས༔ བྱང་ཆུབ་སེམས་ནི་བླ་ན་མེད༔ དམ་པ་བདག་གིས་བསྐྱེད་པར་བགྱི༔

རིགས་ལྔའི་དམ་ཚིག་རྗེས་བཟུང་སྟེ༔ རྡོ་རྗེ་དྲིལ་བུ་ལ་སོགས་པ༔ དམ་ཚིག་རྫས་རྣམས་གཟུང་བར་བགྱི༔ སངས་རྒྱས་ཆོས་དང་དགེ་འདུན་ཏེ༔ བླ་ན་མེད་པའི་དཀོན་མཆོག་གསུམ༔ ནམ་དུ་ཡང་ནི་མི་གཏང་ངོ་༔ རྡོ་རྗེ་སློབ་དཔོན་མི་གཏང་ངོ་༔ རྡོ་རྗེ་སྤུན་སྲིད་རྣམས་ལ་ཡང་༔ ནམ་ཡང་སྨད་པར་མི་བྱའོ༔ སེམས་ཅན་རྣམས་ལ་འཚེ་བ་སྤང་༔ འཕགས་པ་རྣམས་ལ་སྨད་མི་བགྱི༔ ཉན་ཐོས་རང་སངས་རྒྱས་རྣམས་ལ༔ ཅུང་ཟད་བརྙས་པར་མི་བྱ་ཞིང་༔ སྔགས་འཆང་སྤང་བར་མི་བྱའོ༔ བསྙེན་སྒྲུབ་ལས་ཀྱི་མཐའ་རྣམས་ཀྱང་༔ འདི་དུས་ཉིད་ནས་གཟུང་བར་བྱ༔ དམ་ཚིག་སྡོམ་པ་ལ་གནས་ཤིང་༔ སྐུ་གསུང་ཐུགས་ལས་མི་འདའོ༔ སྲོག་ཆགས་གསད་པར་མི་བྱ་ཞིང་༔ དམ་ཆོས་ནམ་ཡང་མི་གཏང་ངོ་༔ བླ་མའི་བྱ་བ་མི་གཏང་་ཞིང་༔ འཁྲུལ་པའི་བྱ་བ་མི་བགྱིའོ༔ སེམས་ཅན་སྨིན་པ་ཉིད་དུ་བགྱི༔ མ་གྲོལ་བ་རྣམས་དགྲོལ་བ་དང་༔ མ་བསྒྲལ་བ་རྣམས་བསྒྲལ་བར་བགྱི༔ དབུགས་མ་ཕྱུང་རྣམས་དབུགས་དབྱུང་སྟེ༔ སེམས་ཅན་མྱ་ངན་འདས་ལ་འགོད༔ བསྟན་པ་སྨད་པར་མི་བྱ་ཞིང་༔ བླ་མ་ལ་ཡང་ཡོན་དབུལ་ལོ༔ འཁོར་བ་རིང་དུ་སྤང་བྱ་ཞིང་༔ མྱང་འདས་དང་དུ་བླང་བར་བགྱི༔ དགེ་སློང་སེམས་སུན་མི་དབྱུང་ཞིང་༔ བསམ་གཏན་སྒོམ་པ་དཀྲུག་མི་བྱ༔ ཆོས་དང་གང་ཟག་ལ་མི་སྨོད༔ ཁྱད་པར་དེ་ལ་བསྒོམ་པར་བགྱི༔ རྫོགས་རིམ་བསྒོམས་ལས་མི་འདའོ༔ ཇི་ལྟར་བླ་མས་གསུངས་པ་ལ༔ བདག་ནི་ནམ་ཡང་མི་འདའོ༔ ཞེས་པ་བླ་མའི་མདུན་དག་ཏུ༔ དམ་བཅའ་ཚིག་དང་གསོལ་གདབ་བརྗོད༔ དེ་ནས་སློབ་དཔོན་བདག་ཉིད་ཀྱིས༔ ཐོད་པ་ཚལ་བུའི་ནང་དག་ཏུ༔ བདུད་རྩི་ལྔ་ཡི་ཆུ་བླུགས་ལ༔ ལག་ཏུ་བཟུང་སྟེ་འདི་སྐད་བརྗོད༔

ཧཱུྃ་འདི་ནི་དམ་ཚིག་དམྱལ་བའི་ཆུ༔ དམ་ཚིག་འདས་ན་འཚིག་པར་འགྱུར༔ ཐུར་བལྟས་དམྱལ་ཁམས་མེ་ཡིས་བསྲེག ༔བསྐལ་པ་བགྲང་གིས་མི་ལངས་པར༔ སྡུག་བསྔལ་ཆེན་པོ་མྱོང་བར་འགྱུར༔ དེ་བས་དམ་ཚིག་སྲོག་གི་ཆུ༔ སྙིང་ལ་བཞག་པས་ཐུབ་པར་གྱིས༔ གལ་ཏེ་ཉམས་པར་མ་གྱུར་ན༔ འདི་ནི་དམ་ཚིག་དངོས་གྲུབ་ཆུ༔ མཆོག་དང་ཐུན་མོང་ལོངས་སྤྱོད་ཅིང་༔ རྫོགས་པའི་སངས་རྒྱས་འབྲས་བུ་ཐོབ༔ དེས་ན་འདི་ཉིད་ཐུབ་པར་གྱིས༔ ཞེས་བརྗོད་དམ་ཚིག་མནའ་བགག་མནའ་ཆུ་བླུག་གོ༔ རྡོ་རྗེ་ཆེན་པོའི་གསང་ཚིག་ནི༔ སློབ་མས་འདི་སྐད་བརྗོད་པར་བྱ༔ བདག་ནི་འདི་ནས་བཟུང་ནས་སུ༔ བྱང་ཆུབ་མ་ཐོབ་བར་དག་ཏུ༔ འཁྲུལ་པའི་བྱ་བ་བྱེད་རེ་ཀན༔ བླ་མས་ཅི་གསུང་མི་ཉན་རེ༔ སེམས་ཅན་ཀུན་ལ་འཚེ་རེ་ཀན༔ བདེ་ཆེན་ལམ་དུ་མི་སློང་རེ༔ འཇིག་རྟེན་འདོད་ཕྱིར་འབྲེང་རེ་ཀན༔ ལྟ་བ་སྒོམ་དང་སྤྱོད་པ་ནི༔ སྲོག་གི་ཕྱིར་ཡང་གཏོང་རེ་ཀན༔ དུར་ཁྲོད་ལ་སོགས་དབེན་པའི་གནས༔ འདི་ནས་བཟུང་ནས་མི་བསྟེན་རེ༔ མདོར་ན་འཇིག་རྟེན་བྱ་བ་གཏང་༔ འདས་པའི་བྱ་བ་གཏོང་རེ་ཀན༔ ཞེས་ནི་སློབ་པའི་རིམ་པ་བཞིན༔ རྡོ་རྗེའི་དམ་ཚིག་མནའ་བསྐྱལ་ལོ༔ བླ་མ་དཔལ་ལྡན་རྡོ་རྗེ་འཆང་༔ མནའ་ཡི་ཉེས་དམིགས་བཤད་དུ་གསོལ༔ ཐུབ་པའི་ཡོན་ཏན་ལེགས་བཤད་དེ༔ དེ་ནས་བླ་མས་སྡོམ་པ་དབོག་ཅིང་དམ་བཅའ་བའི་ཚིག་རྣམས་བརྗོད་པར་བྱའོ༔ ཀྱཻ༔ སྐལ་ལྡན་སེམས་ཀྱི་བུ་ཅིག་ཉོན༔ ཕྱི་ནང་གསང་བའི་ཐེག་པ་དང་༔ དམ་ཆོས་བསྒྲུབ་པར་དམ་ཆོས་ཤིག༔ སེམས་ཅན་ཀུན་ལ་བྱམས་པའི་སེམས༔ དུས་འདི་ཉིད་ནས་མ་སྤང་ཞིག༔ དཀྱིལ་འཁོར་ལོ་བསྒོམ་པ་དང་༔ བླ་མ་ནམ་ཡང་མ་བཏང་ཞིག༔ རྡོ་རྗེ་མཆེད་ལ་མི་ཁྲོ་ཞིང་༔ སངས་རྒྱས་ཆོས་དང་

དགེ་འདུན་ཏེ༔ དཀོན་མཆོག་གསུམ་པོ་བཀུར་བ་དང་༔ ཇི་ལྟར་སྔགས་ཀྱི་དམ་ཚིག་དང་༔ སྡོམ་པ་ཐམས་ཅད་གཟུང་བར་གྱིས༔ བསྟན་པ་ཀུན་ལ་གནོད་པ་སྤོངས༔ ཐར་པའི་ལམ་དུ་འགྲོ་བར་གྱིས༔ ཀྱཻ༔ སྐལ་ལྡན་རྫོགས་པའི་རང་བཞིན་ཅན༔ དབང་བསྐུར་ཆོ་ག་ཇི་ལྟ་བར༔ གཞན་ལ་བརྗོད་པར་མ་བྱེད་ཅིག ༔ དམ་རྫས་རྣམས་དང་སྔགས་ཀྱི་ཚིག༔ དབང་བསྐུར་མ་ཐོབ་མི་རྣམས་ལ༔ ནམ་ཡང་བཤད་པར་མ་བྱེད་ཀྭ༔ འཁོར་བ་རིང་དུ་སྤང་བར་གྱིས༔ གང་གི་རྡོ་རྗེ་འཛིན་པ་ཡིས༔ དངོས་གྲུབ་རྣམས་ནི་མ་བཏང་ཞིག༔ ཅེས་བརྗོད་ལ་སྡོམ་པ་དབོག་པར་བྱའོ༔ མི་དགེ་བ་ལ་སོགས་པ་སྤོང་བའི་ཆོས་ནི་བྱ་བའི་རིམ་པ་བཤད༔ དེ་ཡན་ཆད་ཐུན་མོང་གི་འཇུག་པ་རྫོགས་ནས༔ ད་ཐུན་མོང་མ་ཡིན་པའི་འཇུག་པ་ནི༔ སྤྲོས་པ་ལ་དགའ་ན་རིགས་ལྔའི་སྡོམ་པ་དབོག༔ དེ་ནས་བླ་མ་ལ་གསོལ་བ་གདབ་པར་བྱ་སྟེ༔ རས་སམ་དར་གྱིས་གདོང་གཡོགས་ཤིང་༔ བླ་མ་རྡོ་རྗེ་འཛིན་པ་ལ༔ བདག་ནི་སྐལ་ལྡན་སྙིང་གི་བུ༔ དད་པས་རབ་ཏུ་ཉན་པར་འཚལ༔ རང་བཞིན་རྫོགས་པ་ཆེན་པོ་ཡི༔ དབང་བསྐུར་ནང་དུ་འཇུག་པ་ནི༔ དཔའ་བོ་རྡོ་རྗེ་བླ་མ་ཡིས༔ རང་གི་སེམས་ཀྱི་གནས་ལུགས་ཀྱི༔ ཨ་ཏིའི་ད་ལ་བསྟན་དུ་གསོལ༔ བདག་ནི་ཡང་དག་འདིར་ཞུགས་ནས༔ སླར་ཡང་ལྡོག་པར་མི་བགྱིད་དོ༔ ཞེས་གསོལ་བ་གདབ༔ དེ་ནས་བླ་མས་རྗེས་སུ་གནང་བ་སྦྱིན་ཏེ༔ ཨེ་མ་བུ་ཁྱོད་སྐལ་བ་བཟང་༔ སྐལ་ལྡན་བྱང་ཆུབ་སེམས་ཆེན་པོ༔ སྔོན་ཆད་རང་བཞིན་རྫོགས་ཆེན་གྱི༔ དབང་བསྐུར་ནང་དུ་མ་ཞུགས་པས༔ དོ་ནུབ་སྐལ་ལྡན་བུ་ཁྱོད་ལ༔ རྫོགས་ཆེན་དཀྱིལ་འཁོར་བསྟན་པར་བྱ༔ སེམས་ཀྱི་རྟོག་པ་ཀུན་སེལ་ལ༔ འཇིག་རྟེན་བཅིངས་པ་ཀུན་གྲོལ་གྱིས༔ འདི་ལ་སྤང་བླང་སྙད་དང་བྲལ༔

རིགས་དང་རྒྱུད་རྣམས་སྦྱོང་བ་ཡི༔ ལུས་ངག་བདེ་བའི་རྟེན་ཡིན་པས༔ དེང་ནས་བརྩམས་ཏེ་སླར་མ་ལྡོག༔ ཅེས་རྗེས་སུ་གནང་བ་བྱིན་ནས་མཎྜལ་གྱི་ཤར་ཕྱོགས་སུ་ལུས་གནད་ཙོག་པུ་ཐལ་མོ་སྦྱར་ནས་སེམས་མ་ཡེངས་པར་བླ་མ་ལ་གཏད་ནས་བསྒོམ་དུ་གཞུག༔ དེ་ནི་བསྲེ་བ་ཐུན་མོང་མ་ཡིན་པ་སྟེ་རྫོགས་པ་ཆེན་པོ་མཉམ་པའི་རྒྱས་གདབ་པ་ཅེས་སོ༔ བཀོད་པ་ཡིད་བཞིན་ནོར་བུ་རིན་པོ་ཆེ་འབྱུང་བའི་རྒྱུད་ལས༔ བླ་མ་རྡོ་རྗེ་འཛིན་པ་ནི༔ ཁམས་གསུམ་འཁོར་བའི་གཉེན་གཅིག་པུ༔ འགྲོ་བ་མགོན་མེད་རྣམས་ཀྱི་སྐྱབས༔ ཐར་པའི་ལམ་སྐས་ཆེན་པོ་སྟེ༔ མ་རིག་སེལ་བའི་སྒྲོན་མེ་ལ༔ མུན་པའི་ཚོགས་བདག་སྐྱབས་སུ་མཆི༔ འཁོར་བ་འདམ་གྱི་ཚོགས་ནང་དུ༔ བྱིང་བ་སྐྱབས་མེད་བདག་ལ་སྐྱོབས༔ དུག་གསུམ་མེ་ཡིས་རླན་བྲལ་བའི༔ སྡུག་བསྔལ་སྐམ་ལ་གནས་པ་ལ༔ ཐུགས་རྗེའི་ཆུ་རྒྱུན་བདག་ལ་ཕོབ༔ རྩུབ་འགྱུར་དམྱལ་བའི་མེ་ཆེན་འབར༔ རང་བྱུང་རྒྱུན་གྱིས་བསིལ་བར་མཛོད༔ དེ་ནས་གདོང་གཡོགས་བཀྲོལ་བྱིན་དབབ༔ མཎྜལ་དེའི་ཐོ་ཕྱི་རྣམས་ལྷ་བཤོས་དང་༔ མར་མེ་དང་༔ སྤོས་ལ་སོགས་པ་ཅི་འབྱོར་བའི་ཡོ་བྱད་དང་༔ མཁའ་འགྲོ་མ་རྣམས་མཉེས་པར་བྱ་བ་དང་༔ བར་ཆད་བསལ་བར་བྱ་བའི་ཕྱིར༔ ཚོགས་དང་གཏོར་མ་རབ་ཏུ་བཟང་བར་བཤམ་པར་བྱའོ༔ དེ་ནས་སྤྲོས་པ་མེད་པའི་དབང་བསྐུར་བ་ནི༔ ངག་གི་ནུས་པ་གཞུག་པ་དང་༔ ངག་རང་དག་ལ་འགྲོ་བའི་དོན་ཡིན་ཏེ་དཔོན་སློབ་ཀུན་སོ་སོའི་ལུས་བདེ་བར་བཅོས་ལ༔ ངག་ཏུ་སྒྲ་ཆེ་བ་ཡང་མ་ཡིན༔ ཆུང་བ་ཡང་མ་ཡིན་པར་ཨ་ཨ་ཞེས་བརྗོད་ཅིང་ཡིད་ཨ་ལ་གཏད་པས་ཞག་གཅིག་བརྗོད་པར་བྱ༔ དེ་ནས་ནུབ་གཉིས་པ་ལ་ཨ་ལིའི་ཚོགས་ཚང་བར་བརྗོད༔ དེ་ནས་ནུབ་གསུམ་པ་ལ་ཀ་ལིའི་ཚོགས་ཚང་བར་

བརྗོད་པར་བྱའོ༔ འདིའི་དུས་ན་སློབ་དཔོན་གྱིས་ཨ་རྐྱང་བའི་དུས་ན་བུ་ཡིས་ཨ་བརྗོད་པས་རྩ་རྣམས་ཁ་ཕྱེ་སྟེ་ཨ་ཐོལ་ཐོལ་རང་འབྱུང་༔ དེ་ལས་འོད་ཀྱི་གོང་བུ་རྣམས་ལས་འོད་འཕྲོས་པས་རང་བཞིན་གྱི་ཀུན་ཏུ་བཟང་པོའི་སྦྱོར་བའི་བརྡས་བསྐུལ༔ ཀུན་བཟང་ཡབ་ཡུམ་སྦྱོར་མཚམས་ནས་བྱང་ཆུབ་ཀྱི་སེམས་འོད་ལྔའི་གོང་བུས་རང་གི་མགོ་མཇུག་ཁྱབ་པ་ལ་བློ་བཞག༔ འདིའི་དུས་ན་རྣ་བའི་སྒྲ་འབྱུང་བའི་འོད་བཙིར་རོ༔ དེ་ལྟར་སློབ་མ་རང་ཡང་བསྒོམ་དུ་གཞུག་གོ༔ བཅུག་པས་ཉམས་སུ་མྱོང་བ་ཁྱད་པར་ཅན་སྐྱེ་བར་ངེས་སོ༔ དེ་ནས་ཨ་ལིའི་ཚོགས་བརྗོད་པའི་དུས་ན་འདི་ཉིད་བརྗོད་པ་ཙམ་གྱིས་རྩ་རྣམས་ཀྱི་ནང་ནས་རང་བཞིན་གྱི་ཡི་གེ་རྣམས་རང་བྱུང་༔ རང་གི་ངག་ནས་ཀྱང་ཆོས་ཐམས་ཅད་ཀྱི་སྒྲ་སི་ལི་ལི་བྱུང་བ་ལ་བློ་བཞག༔ ཀ་ལིའི་དུས་སུ་བརྗོད་པའི་ཡི་གེ་དེ་དག་ཕྱིར་མ་དོན་པར་རང་གི་ཁོག་པའི་ནང་ཡི་གེས་མེར་གྱིས་ཁེངས་པ་ལ་བློ་བཞག་པར་བྱའོ༔ དེ་ནས་སྐལ་ལྡན་ལ་དབང་བསྐུར་བར་བྱ་སྟེ༔ ལུས་ངག་ཡིད་གསུམ་ཀ་བྱིན་གྱིས་བརླབ་པའི་དོན་དུ་དབང་བསྐུར་བ་ནི༔ ལུས་གཅེར་བུར་ཕྱུང་ལ་བུམ་པའི་ཆུ་དང་སིནྡྷུ་རའི་ཐིག་ལེ་ཞིག་སྤྱི་བོའི་གཙུག་ཏུ་བྱས་ལ་ངག་ཏུ༔ ཨཱོཾ་ཨཱོཾ་ཞེས་དྲག་ཏུ་བརྗོད་དུ་གཞུག༔ སློབ་དཔོན་གྱིས་མགྲིན་པའི་རྩ་སྟེམས༔ འདིའི་དུས་སུ་ལུས་འདར་ཞིང་གཡོ་བ་དང་༔ ངག་རང་རྡོལ་བ་དང་༔ སེམས་བག་ཡངས་སུ་འགྱུར་བ་ཉིད་འབྱུང་༔ སློབ་དཔོན་གྱིས་སློབ་མའི་ལུས་ཨཱོཾ་དཀར་པོ་ཆེན་པོ་ཞིག་ཏུ་དམིགས་ལ་དེ་འོད་དུ་ཞུ་བ་ལས་ཆོས་ཉིད་སྟོང་པའི་རྒྱས་གདབ༔ སློབ་དཔོན་གྱིས་བུམ་པའི་ཆུ་ཐིགས་པ་དང་སིནྡྷུ་རའི་ཐིག་ལེ་ཞིག་མགྲིན་པར་བྱས་ལ༔ སློབ་མའི་ངག་ཏུ་དྲག་ཤུལ་དང་བཅས་པས་ཨཱཿ་ཨཱ༔བརྗོད་དོ༔ སློབ་དཔོན་གྱིས་སློབ་མའི་མཆན་ཁུང་གི་རྩ་གཏིམས༔ སློབ་མའི་ཤེས་པ་ནམ་མཁར་གཏོད་དུ་གཞུག༔ འདིའི་དུས་སུ་ལུས་རབ་ཏུ་འདར་བ་དང་༔ ངག་རབ་ཏུ

༼ཇེ་གི་བདུན་པ་མ་ནོག་འདུག༽འདར་བ་དང་༔ སེམས་རབ་ཏུ་གསལ་བ་དག་འོང་ངོ་༔ སློབ་མའི་ལུས་ལ་ཨ་དམར་པོ་ཆེན་པོ་ཅིག་ཏུ་དམིགས་ལ་ཆོས་ཉིད་སྟོང་པ་ཉིད་ཀྱི་རྒྱས་གདབ༔ ཡང་སློབ་དཔོན་གྱིས་བུམ་པའི་ཆུ་ཐིགས་གཅིག་དང་༔ སིནྡྷུ་རའི་ཐིག་ལེ་སྙིང་ཁར་བྱས་ལ་ངག་ཏུ་ཧཱུྃ་ཞེས་དྲག་ཏུ་བརྗོད་དུ་གཞུག༔ བླ་མས་བུའི་ནུ་མའི་རྩ་གཏིམས༔ ཤེས་པ་འབྱུང་བ་བཞི་ལ་གཏད༔ སློབ་མས་ཧཱུྃ་ཞིག་ཏུ་དམིགས་ལ་ཆོས་ཉིད་ཀྱི་རྒྱས་གདབ་བོ༔ དེ་ཡང་རྩ་གཏིམས་པ་གསུམ་ལ་མགྲིན་པའི་རྩ་ལག་ལེན་དུ་གཏིམས༔ གཞན་གཉིས་མི་འདུག་པས་མི་སྟེམས༔ གཞན་རྣམས་ཇི་ལྟ་བ་བཞིན་དུ་བྱའོ༔ དེ་ནས་ཙན་དན་ཀར་པོའི་ཐིག་ལེ་སྨིན་མཚམས་སུ་བྱུག༔ དེའི་སྟེང་དུ་དམར་པོའི་ཐིག་ལེ་བྱ༔ དེའི་རྗེས་ལ་སྟོང་ཉིད་དར་ཅིག་བསྒོམ༔ དེ་ནས་བུམ་པ་ཡི་གེའི་རང་བཞིན་དུ་དམིགས་པ་ལ་སློབ་མའི་མགྲིན་པའི་གནས་སུ་ངག་ལ་བསྟིམ༔ ཆུ་དང་སྨན་ལ་སོགས་པ་རྣམས་ལས་རང་བཞིན་རྫོགས་པ་ཆེན་པོའི་མཚན་ཉིད་ཀྱི་རང་སྒྲ་བྱུང་སྟེ༔ ཆོས་ཐམས་ཅད་བརྗོད་དུ་མེད་པའོ༔ བསམ་དུ་མེད་པའོ༔ བལྟར་མེད་པའོ༔ མཚན་མ་མེད་པའོ༔ སྨོན་པ་མེད་པའོ༔ སྤྲོས་པ་མེད་པའོ༔ སྤྲོས་པའི་མཐའ་བརྒྱད་དང་བྲལ་བའོ༔ ཞེས་པའི་སྒྲ་རང་བྱུང་བས་སློབ་མས་ཡང་དེ་ཉིད་ཀྱི་རང་བཞིན་དུ་གྱུར་པར་དམིགས་ལ༔ དེ་ནས་སློབ་དཔོན་གྱིས་བུམ་པ་སློབ་མའི་སྤྱི་བོར་བཞག་ལ་དམིགས་པ་དང་ཚིག་རྣམས་ངག་ཏུ་བརྗོད་ཅིང་བྱའོ༔ དེ་ནས་ངག་གི་ལས་སྒྲིབ་རྫོགས་པར་བྱ་བའི་ཕྱིར་ཉི་ཟླ་ཁ་སྦྱོར་རམ་གཞན་གྱིས་ཤེས་ཀྱང་བཏུད༔ རྡོ་རྗེའི་གླུ་ལན་གསུམ་བརྗོད༔ གཞན་ཡང་དུང་དང་༔ ཆ་ལང་དང་༔ འཁར་རྔ་དང་༔ ཤིང་རྔ་དང་༔ དྲིལ་བུ་དང་༔ ཌ་མ་རུ་ལ་སོགས་པ་དུས་གཅིག་ལ་བསྒྲག་ཅིང་ཡི་གེ་བརྒྱ་པ་བཟླས་སོ༔ དེ་ནས་ཚིག་བརྒྱད་ཀྱི་དོན་བཤད་དོ༔ དེ་ནས་སློབ་མའི་ངག་ལ་ཚིགས་སུ་བཅད་པའི་དབང་བསྐུར་བར་བྱ་སྟེ༔ རང་བཞིན་རྫོགས་པ་ཆེན་པོས་མཉམ་པའི་

རྒྱས་གདབ་པའི་ཕྱིར༔ ཚིག་གི་རྒྱལ་པོ་འདི་དག་ངར་བསྐྱེད་ལ་བརྗོད་པར་བྱའོ༔ ཨེ་མ་ཧོཿ ཆོས་ཉིད་སྤྲོས་དང་བྲལ་བའིི་བདེ་ཆེན་དེ༔ བལྟས་མེད་བསམ་ཡུལ་འདས་པ་ངོ་མཚར་ཆེ༔ གཉིས་མེད་རང་སྣང་ཀུན་ཁྱབ་ཡེ་ཤེས་ནི༔ རང་རིག་མངོན་དུ་འོང་བ་ངོ་མཚར་ཆེ༔ བྱ་བྲལ་རང་བཞིན་རྫོགས་ཆེན་གནས་ལུགས་ཉིད༔ མ་བཙལ་རང་ལས་བྱུང་བ་ངོ་མཚར་ཆེ༔ ངོ་བོ་སྤྲོས་བྲལ་རང་བཞིན་རྣམ་དག་ལ༔ དགེ་སྡིག་མཐའ་ལས་འདས་པ་ངོ་མཚར་ཆེ༔ རང་སྣང་སྤྲོས་པ་མེད་པའི་རིག་པ་ཉིད༔ ལྟ་སྒོམ་སྤྱོད་པར་སྣང་བ་ངོ་མཚར་ཆེ༔ རང་ལས་བྱུང་བ་འོད་ཀྱི་སྒྲོན་མེ་འདི༔ མངོན་སུམ་ཡུལ་དུ་སྣང་བ་ངོ་མཚར་ཆེ༔ ངོ་བོ་རང་བཞིན་ཐུགས་རྗེ་ཕྱོགས་མེད་པས༔ ཆོས་སྐུ་ལོངས་སྐུ་སྤྲུལ་སྐུར་ཤར་བ་ངོ་མཚར་ཆེ༔ བརྗོད་མེད་རྣམ་པར་དག་པའི་ཡེ་ཤེས་ཉིད༔ སྟོང་པ་རང་སར་དག་པའི་ཡུལ་ལ་སྣང་བ་ངོ་མཚར་ཆེ༔ མ་རིག་མུན་སེལ་ཐིག་ལེ་སྟོང་པ་ཉིད༔ དབང་པོའི་ཡུལ་ལ་སྣང་བ་ངོ་མཚར་ཆེ༔ ཞེས་བརྗོད་ལ་དེ་དག་གི་དོན་ཡང་བཤད་དོ༔ དེ་ནས་རྫོགས་པ་ཆེན་པོ་བརྗོད་པ་ལས་འདས་པའི་དོན་དེ་སྐལ་ལྡན་གྱི་བློ་ལ་གནས་པར་བྱ་བའི་ཕྱིར་འདི་སྐད་དོ༔ དངོས་པོ་གང་ལ་ཡང་རང་བཞིན་མེད་པ་ཡིན་ནོ༔ བལྟར་མེད་པ་དང་ཿ སྲོག་མེད་པ་དང་༔ སྙིང་པོ་མེད་པ་དང་༔ ཡ་མ་བརླ་ཡིན་པ་དང་༔ ཚིག་མེད་པ་དང་༔ ཡི་གེ་མེད་པ་དང་༔ སྒྲ་མེད་པ་དང་ཿ ཐ་སྙད་མེད་པ་དང་༔ བརྗོད་དུ་མེད་པའོ༔ ཞེས་དངོས་པོའི་འདུག་ཚུལ་བརྗོད་མེད་དུ་གཏན་ལ་ཕེབས་པའོ༔ དེ་ནས་ལུས་ངག་ཡིད་གསུམ་རྫོགས་པ་ཆེན་པོའི་དོན་སྟོང་ཉིད་ཀྱི་གོ་རར་གཞུག་པའི་ཕྱིར༔ སྟོང་པ་ཉིད་བདེ་བ་ཆེན་པོའི་ངང་དུ་དར་ཅིག་བསྒོམ༔ དེ་ཉིད་ཀྱི་དོན་བརྡས་བསྐུལ་བའི་ཕྱིར་ཚིག་ཏུ་འདི་སྐད་བརྗོད་པར་བྱའོ༔ ཆོས་རྣམས་ཐམས་ཅད་སྟོང་ཞིང་བདག་མེད་ལ༔ འདོད་ཅིང་ཞེན་པའི་བློ་ནི་ཡོང་རེ་འཁྲུལ༔ ཆོས་ཀྱི་དབྱིངས་ཉིད་སྤྲོས་དང་བྲལ་བ་ལ༔ མཚན་མ་ཚིག་ཕྱིར་འབྲངས་པ་ཡོང་རེ་འཁྲུལ༔ སྙིང་པོ་དོན་གྱི་ཡེ་ཤེས་རང་ཤར་ལ༔ གཞན་བྱུང་

རྩོལ་སྒྲུབ་བྱེད་པ་ཡོང་རེ་འཁྲུལ༔ སེམས་ཉིད་སྐྱེ་ཤི་གཉིས་ལས་འདས་པ་ལ༔ སྐྱེ་འགག་གཉིས་སུ་འཛིན་པ་ཡོང་རེ་འཁྲུལ༔ འབྲས་བུ་རང་རྫོགས་སྨོན་ལམ་གླལ་བ་ལ༔ རྣམ་དཔྱོད་དུས་ལས་ལྟོས་པ་ཡོང་རེ་འཁྲུལ༔ བདེ་སྡུག་ཐམས་ཅད་རིག་པའི་ཆོ་འཕྲུལ་ལ༔ བླང་དོར་གཉིས་སུ་འཛིན་པ་ཡོང་རེ་འཁྲུལ༔ ཀུན་ཏུ་བཟང་པོ་རང་ལ་གནས་པ་ལ༔ ཡི་དམ་གཞན་ནས་འཚོལ་བ་ཡོང་རེ་འཁྲུལ༔ བདག་ཉིད་ཡེ་སངས་རྒྱས་པ་ཡིན་པ་ལ༔ ངན་སོང་གསུམ་དུ་འཇོག་པ་ཡོང་རེ་འཁྲུལ༔ འཁོར་བ་ངན་སོང་རོལ་བར་ཡེ་ཤར་ལ༔ ཡང་དག་སངས་རྒྱས་འདོད་པ་ཡོང་རེ་འཁྲུལ༔ དུག་ལྔ་མ་སྤངས་རང་བྱུང་ཆེན་པོ་ལ༔ ཉོན་མོངས་སྤང་བྱར་འཛིན་པ་ཡོང་རེ་འཁྲུལ༔ འཁྲུལ་བའི་སྣང་བ་ཆོས་སྐུ་རང་སྣང་ལ༔ དངོས་པོ་བདག་ཏུ་འཛིན་པ་ཡོང་རེ་འཁྲུལ༔ ཐེག་པ་རིམ་དགུ་རང་ལ་ཤར་བ་ལ༔ སོ་སོའི་འདོད་གཞུང་འཛིན་པ་ཡོང་རེ་འཁྲུལ༔ ཞེས་ཚིག་གིས་སྤྲོ་བ་བསྐྱེད་ཅིང་དོན་བསྟན་པར་བྱའོ༔ དེའི་རྗེས་ལ་ལུང་བསྟན་པའི་དབང་ནི༔ སྤྲོས་པ་མེད་པའི་དབང་ལ་ཞུགས་པས་ངག་གི་སྒྲིབ་པ་ཡོངས་སུ་དག་ནས་མ་འོངས་པའི་དུས་ན་ལོངས་སྤྱོད་རྫོགས་པའི་ཞིང་ཁམས་སུ་སྐྱེ་བར་འགྱུར་རོ༔ ཞེས་བརྗོད་དོ༔ རྗེས་གནང་ནི༔ སྤྲོས་མེད་ཀྱི་དབང་བསྐུར་ནས་སྔགས་བཟླས་པ་དང་༔ རྫོགས་རིམ་རྩ་དང་རླུང་དང་ཐིག་ལེ་རྣམས་བསྒོམ་དུ་རུང་བ་དང་༔ ཐིག་ལེ་སྟོང་པའི་སྒྲོན་མ་ཉིད་བསྒོམ་དུ་རུང་བའི་རྗེས་གནང་ཐོབ་བོ༔ དབུགས་དབྱུང་བ་ནིི་ཁམས་གསུམ་འཁོར་བར་མི་འཇུག་པར་བྱེད་པའོ༔ གཟེངས་བསྟོད་པ་ནི་དེ་ལྟར་བྱུང་བས་སེམས་ལ་སྤྲོ་བ་བསྐྱེད་པའོ༔ འཇུག་ཅིང་དབང་བསྐུར་བའི་རིམ་པའོ༔ ལས་ཀྱི་མཐའ་བསྡུ་བ་ནི་རོལ་མོའི་སྒྲ་དང་བཅས་པས་གཏོར་མ་དབུལ་ཞིང་ཆོས་སྐྱོང་རྣམས་ལ་སྔར་བྱས་ཀྱི་གཏང་རག་ཕྱི་མའི་ཁས་ལེན་དུ་བྱས་ལ་རྦད་བསྐུལ་བྱ༔ དཀོན་མཆོག་གི་

གཏོར་མ་དང་༔ ཡི་དམ་གྱི་གཏོར་མ་དང་༔ མཁའ་འགྲོ་དང་ཆོས་སྐྱོང་གི་གཏོར་མ་དང་༔ འབྱུང་པོའི་གཏོར་མ་རྣམས་རིམ་པ་བཞིན་དུ་དབུལ༔ དེ་ནས་རོལ་མོའི་སྒྲ་གོང་མ་རྣམས་དང་ལྡན་པས་གཏོར་མ་རྣམས་གཤེགས་སུ་གསོལ༔ དེ་ནས་བདག་གི་བསྐྱེད་རིམ་སྔར་བཞིན་དུ་བསྒོམ་པས་དེའི་དལ་བསྡུ་བ་དང་༔ རྡོ་རྗེའི་གླུ་བླངས་པ་དང་༔ བཀྲ་ཤིས་བརྗོད་པ་དང་༔ སྨོན་ལམ་བཏབ་ཏེ་རྡོ་རྗེ་སློབ་དཔོན་དང་རྣལ་འབྱོར་དབང་ཕྱུག་ཕོ་མོ་རྣམས་ཀྱིས་འདི་ལྟར་བྱ་སྟེ༔ འདས་དང་མ་འདས་ད་ལྟར་གྱི༔ རྫོགས་སངས་རྒྱས་པའི་ལེགས་པ་ཡིས༔ བཅོམ་ལྡན་རྡོ་རྗེ་འཆང་ཆེན་དང་༔ སྐལ་བ་མཉམ་པར་འགྱུར་བར་ཤོག༔ ངན་སོང་ཐམས་ཅད་རྒྱུན་ཆད་དང་༔ སངས་རྒྱས་བསྟན་པ་འཕེལ་བ་དང་༔ རྫོགས་སངས་རྒྱས་པའི་ཡོན་ཏན་རྣམས༔ བདག་ལ་དེང་འདིར་སྩལ་བ་དང་༔ ཞིང་ཁམས་བཟང་ཞིང་ཉམས་དགའ་བར༔ བདག་ཀྱང་སྐྱེ་འགྱུར་སྐྱེ་བར་ཤོག༔ སྐྱེས་པས་སེམས་ཅན་དོན་བྱས་ཏེ༔ འཁོར་བ་དོང་ནས་སྤྲུག་པར་ཤོག༔ དོང་སྤྲུགས་སངས་རྒྱས་ཆེན་པོ་ཉིད༔ རྒྱས་པར་བདག་ལ་སེམས་སྦྱོང་ཞིང་༔ བདེ་བར་མགོན་པོ་རྣམས་མཉམ་ཤོག༔ ཇི་ལྟར་དམ་ཚིག་སྡོམ་པ་ཉིད༔ འདི་ཉིད་དུ་ཡང་རྫོགས་པར་ཤོག༔ ཅེས་སྨོན་ལམ་གྱི་དྲིལ་བུའི་སྒྲ་དང་བཅས་པར་གདབ་ཆོ་ག་ལྷག་ཆད་བསྐང་བའི་ཡི་གེ་བརྒྱ་པ་བཟླས༔ བུམ་ཆུས་འཁྲུས་བྱེད་ན་བྱ༔ མི་བྱེད་ན་རིའམ་གཙང་སར་བསྐྱལཿ མཎྜལ་ཕྱགས་ལ་དྲི་བཟང་པོའི་ཆུས་བྱུགས་ལ་མེ་ཏོག་གཅིག་ཙམ་བཞག༔ ནང་མཆོད་བྱས་པའི་སྣོད་དང་རྫས་ཐམས་ཅད་བཀྲུས་ལ་སོ་སོའི་གནས་སུ་བཞག༔ དབང་བསྐུར་བའི་ཁང་པ་དེ་ལྷ་ཁང་ངམ་མཆོད་ཁང་ཡིན་ན་མཆོད་པ་བཤམས་ལ་བཞག༔ གསར་དུ་བརྒྱན་པ་ཡིན་ན་རྒྱན་རྣམས་བསྡུ༔ རྟེན་རྣམས་བསྡུས་ལ་གནས་ཁང་ཕྱགས་ལ་མེ་ཏོག་གཏོར་ལ་བཞག༔ སྣོད་མ་ཡིན་པ་ལ་གསང་བའི་དོན་དུ་དབང་བསྐུར་བའི་རྗེས་མི་མངོན་པར་བྱའོ༔ དེ་ནས་ཡོན་དབུལ་ཞིང་དགའ་སྟོན་བྱ་བའི་རིམ་པ་ནི་སློབ་དཔོན་ལ་ཅི་འབྱོར་བའི་

ཡོན་དབུལ༔ མཆེད་གྲོགས་རྣལ་འབྱོར་ཕོ་མོ་རྣམས་ལ་དགའ་སྟོན་ཅི་རིགས་པར་བྱ༔ གཞན་དགེ་འདུན་པ་དང་མགྲོན་པོ་རྣམས་ལ་འབྱོར་པ་དང་སྦྱར་ལ་སྤྱན་དྲངས༔ དེ་ལྟར་བྱས་པའི་ཡོན་ཏན་ནི་རྒྱས་པར་འཁོར་ལོ་དྲུག་པ་དང་འཕྲ་ཏིག་ནས་བསྟན་པར་བྱ་བའོ༔ བཀྲ་ཤིས་པའི་ཡན་ལག་ཡིན་པས་སློབ་དཔོན་གྱིས་དབུ་བཟུང་ནས་མཆེད་རྣལ་འབྱོར་ཕོ་མོ་ལ་སོགས་པ་རྣམས་ཀྱིས་གླུ་གར་ལ་སོགས་པ་བྱ༔ དགེ་འདུན་བཞུགས་ན་བཀྲ་ཤིས་བྱེད་དུ་གཞུག༔ གཞན་ཁྱེའུ་བུ་མོ་ལ་སོགས་པས་ཀྱང་གླུ་གར་དང་རོལ་མོ་ལ་སོགས་པ་ཤེས་ཚད་བྱེད་དུ་གཞུག༔ འཐབ་པ་དང་༔ རྩོད་པ་དང་༔ ཁེ་གྲགས་ཀྱི་གཏམ་རྣམས་སྤང་བར་བྱ༔ ཆོས་གཏམ་ཡང་ཚོགས་ཀྱི་འཁོར་ལོར་རྩོད་པར་འགྲོ་བས་མི་བྱ༔ གཞན་ཅི་དགའ་བྱའོ༔ རིན་པོ་ཆེ་དབང་གི་ཕྱག་ལེན་ཇི་ལྟ་བཞིན་བཀོད་པ་རྫོགས་སོ༔ བླ་མ་རྡོ་རྗེ་འཆང་བའི་ལྷ༔ ལྷ་ཡི་ལྷ་ཁྱེད་ཕྱག་འཚལ་བསྟོད༔ བདག་ནི་བསྐལ་བ་ཐོགས་མེད་ནས༔ འབྱུང་བཞིའི་ལུས་ཀྱིས་བཅིངས་པ་བདག༔ འབྱུང་བཞིའི་གནོད་དང་བྲལ་གྱུར་ནས༔ དྲི་མེད་འོད་གསལ་ལུས་ལྡན་ཤོག༔ སྨྲ་མང་ངག་གིས་བཅིངས་པ་བདག༔ འཁྲུལ་པའི་གཏམ་རྒྱུད་ཟུངས་ཟད་ནས༔ བརྗོད་དུ་མེད་པའི་དོན་ལྡན་ཤོག༔ འགྱུ་བྱེད་རྟོག་པས་བཅིངས་པ་བདག༔ མི་རྟོག་གསལ་བའི་སྣང་མཐོང་ནས༔ བསམ་པའི་འཕྲོ་འདུ་ཆད་པར་ཤོག༔ དེ་ལྟར་ལུས་ངག་ཡིད་གསུམ་ལ༔ སྐུ་གསུང་ཐུགས་ཀྱིས་བྱིན་བརླབས་པའི༔ འབྲས་བུ་སྐུ་གསུམ་ཚད་ཕེབས་ཤོག༔ ཅེས་ལན་གསུམ་བརྗོད་དོ༔ ༀ་ཨཱཿཧཱུྃ༔ དགེའོ༔ མན་ཏྲ་གུ་ཧྱ༔

རྫོགས་པ་ཆེན་པོ་སྙིང་ཐིག་སྤྲོས་བཅས་ཀྱི་དབང་ལྕེ་བཙུན་གྱིས་མཛད་པ།

རྫོགས་པ་ཆེན་པོ་སྙིང་ཐིག་སྤྲོས་བཅས་ཀྱི་དབང་ལྕེ་བཙུན་གྱིས་མཛད་པ་བཞུགས་སོ། །

དབང་ཐམས་ཅད་ཀྱི་མངའ་བདག་རྡོ་རྗེ་འཆང་ལ་ཕྱག་འཚལ་ལོ། །ངེས་པའི་ལུང་ལ་དད་པའི་གདིང་རྙེད་སྐལ་ལྡན་བུ། །འཕངས་པའི་སྲོག་ནོར་དམ་པའི་ཆོས་ལ་གཏོང་ཕོད་ཅན། །སྦྱངས་པའི་འཕྲོ་ཅན་བློ་ཡི་རྩེ་མོར་རབ་ཏུ་འཇུག་པའི་དོན། །དབང་རྣམས་ཀུན་གྱི་གནད་བསྡུས་ངེས་པའི་དོན་དུ་བདག་གིས་དགྲོལ། །ཚིག་གི་དབང་ལ་བྱེ་བྲག་བསམ་ཡས་ཀྱང་། །གནད་ཀྱི་མན་ངག་སྙིང་པོ་ཕྱུང་པ་ནི། །སྤྲོས་བཅས་དབང་གི་ཚིག་དོན་མཐོང་བའི་དོན། །ངེས་པར་བསྡུས་ལ་ལག་ལེན་ཁྲིགས་སུ་བསྡེབ། །དེ་ལ་སྐལ་བ་མཆོག་དང་ལྡན་པའི་སློབ་མ་དམ་ཚིག་རང་གི་སྲོག་བས་གཅེས་པར་འཛིན་པ་གཉིས་ནས་བདུན་ཚུན་ཆད་ལས་དེ་བས་མང་ན་མཁའ་འགྲོ་མའི་ཆད་པ་འོང་ངེས་པས་བུ་མཆོག་དེ་རྣམས་ལ་བསྟན་པར་བྱའོ། །དེ་ལ་སྤྲོས་པ་ལ་དགའ་བ་རྣམས་ཀྱི་དབང་ངེས་པར་བྱ་བའི་ཚིག་གི་དོན་འདི་ལ་གཞན་ནས་རྒྱ་ཆེར་བསྟན་ཀྱང་། དེ་རྣམས་ཀྱིས་དོན་གྱི་གནད་གཏན་ལ་མི་ཕེབས་ཏེ།

དཔེར་ན་ལུང་པ་སྟོང་པའི་རླུང་སྒྲ་དང་འདྲ་སྟེ་དོན་ལ་ཝ་གཡལ་བས། དབང་དངོས་ཀྱི་ལག་ཁྲིགས་བླ་མའི་ཕྱག་ལེན་ཉམས་ཀྱི་མན་ངག་དངོས་མིན་པའི་ཕྱིར་སེམས་ལ་གབ་པར་བྱའོ། །དེའི་དོན་ངེས་པའི་དབང་ཆོག་ལེན་པར་འདོད་པའི་སྐལ་ལྡན་གྱིས་གནད་ངེས་པ་ཚིགས་གསུམ་དུ་རིག་པར་བྱའོ། །དེ་ལ་ངེས་པའི་དོན་གྱི་དབང་ནི་སྔོན་དུ་འགྲོ་བ་སློབ་དཔོན་གྱི་འབྲེལ་བརྟག་པ་དང་གཅིག །དངོས་གཞི་དབང་ངེས་པའི་བྱ་བ་ལག་ཁྲིགས་ཀྱི་གོ་རིམ་བསྟན་པ་དང་གཉིས། རྗེས་ཀྱི་བྱ་བ་རྣལ་འབྱོར་པའི་སྤྱོད་ལམ་གྱི་ཚུལ་བསྟན་པས་ངེས་པར་བྱ་བའོ། །དེ་ལ་དང་པོ་སློབ་དཔོན་དང་སློབ་མའི་འབྲེལ་བ་བརྟག་པ་ལ། དང་པོ་བླ་མའི་མཚན་ཉིད་བསྟན་པ་ནི་མཚན་ཉིད་དང་མི་ལྡན་ན་དབང་ངེས་པའི་འབྲས་བུ་འབྱིན་མི་ནུས་པས་དེའི་མཚན་ཉིད་མདོ་རྒྱུད་ལ་སོགས་ཚིག་གི་དོན་ལ་ངེས་པར་སྦྱངས་པ་དང་གཅིག །མངོན་སུམ་དོན་གྱི་གནས་ལུགས་ལ་རྟོགས་པའི་ལམ་སྦྱོར་བ་དང་གཉིས། ཚོགས་གཉིས་ལ་སོགས་པ་

བསགས་པས་མཐར་ཕྱིན་པ་དང་རང་གི་རྒྱུད་ཐོག་ཏུ་སྨིན་ཅིང་སྒོ་གསུམ་གྱིས་གཞན་གྱི་རྒྱུད་སྨིན་ནུས་པའོ། །སློབ་མའི་མཚན་ཉིད་ངེས་པས་གདམས་པའི་སྣོད་བརྟག་པ་ནི། དོན་དམ་པའི་བླ་མ་ལ་སྟོན་པའི་འདུ་ཤེས་བསྐྱེད་པ་དང་གཅིག །དད་པའི་ཞིང་ས་བཟང་མི་དགེ་བའི་ཕྱོགས་དུག་སྦྲུལ་ལྟར་སྤོང་བ་དང་གཉིས། འཁྲུལ་པའི་དོན་རིག་པས་འཇིག་རྟེན་གྱི་བདོག་པ་ལ་མི་ཆགས་ཤིང་གཏོང་ནུས་པ་དང་གསུམ། མདོར་ན་ལུས་དང་སྲོག་ཐམས་ཅད་ཀྱང་དམ་པའི་དོན་ལ་བློ་བསྐྱུར་ནུས་པ་དང་བཞིའོ། །དངོས་གཞི་དབང་ངེས་པའི་ལག་ཁྲིགས་ལ་གཉིས། བཤམ་པ་རྫས་ཀྱི་རིམ་པ་ཆས་སུ་གཞུག་པར་དང་གཅིག །སྨིན་བྱ་སློབ་མའི་ཆོ་ག་ངེས་པ་དངོས་སོ། །དང་པོ་ལ་གཉིས་ཏེ། གནས་ཁྱད་པར་ཅན་དུ་དཀྱིལ་འཁོར་བཤམ་པ་དང་གཅིག །དེར་བསགས་པའི་རྫས་ཀྱི་རིམ་པ་དགོད་པའོ། །དེ་ལ་དཀྱིལ་འཁོར་བཤམ་པ་ནི། དུར་ཁྲོད་ལ་སོགས་པ་དབེན་པའི་གནས་སུ་དཀྱིལ་འཁོར་འདོམ་གང་གྲུ་བཞི་པ་བའི་རྣམ་ལྔ་དང་བདུད་རྩི་ལྔ་ཡིས་ཆག་ཆག་འཐོར་བར་བྱས་ལ། ཐིག་དང་རྡུལ་ཚོན་བྱིན་གྱིས་བརླབ་པ་སྤྱི་དང་འདྲ། དབུས་སུ་མཐིང་ཀ་ཟླུམ་པོ་པདྨ་འདབ་བརྒྱད་ཕྱོགས་ཚོན་དང་མཚམས་མཛེས་ཚོན་དུ་བྱ། གྲུ་ཆད་སྒོ་དང་སྒོ་རྒྱན་རྟ་བབ་རྡོ་རྗེའི་རྭ་བ་མེ་རིའི་ཕྲེང་བ་འོད་ཟེར་གྱིས་བསྐོར་བ་བྲིའོ། །གཉིས་པ་བསག་པ་རྫས་ཀྱི་བྱ་བ་ནི། ཕྱོགས་བཞི་དབུས་དང་ལྔར་རིན་པོ་ཆེའི་བུམ་པ་ཁ་དོག་ཕྱོགས་ཚོན་ལ་རིགས་ལྔའི་ས་བོན་ༀ་ཨཱཿཧཱུྃ་སྭཱཧཱ། ཞེས་པ་བྲིས་ལ་དགོད། ཁ་རྒྱན་མགུལ་རྒྱན་དང་བཅས་པའི་ནང་དུ་རིན་པོ་ཆེ་ལྔ་འབྲུ་ལྔ་སྨན་ལྔ་སྤོས་ལྔ་གཙང་མའི་ཆུ་དང་འོ་མ་ལ་སོགས་དཀར་གསུམ་དང་། བུ་རམ་ལ་སོགས་པའི་མངར་གསུམ་གྱིས་དགང་ངོ་། །བུམ་པ་ལྔའི་སྟེང་དུ་མདའ་ལྔ། མེ་ལོང་ལྔ། ཤེལ་ལྔ། དར་སྣ་ལྔ། རྨ་བྱའི་མདོངས་ལྔ། རིགས་ལྔའི་ཙཀ་ལི་ལྔ་དགོད། གསང་

དབང་གི་རྫས་ཐོད་པ་བདུད་རྩིས་བཀང་པ་ཡང་དགོད། དབང་གསུམ་པའི་རྫས་རིགས་མ་མཚན་ལྡན་ཡང་བཞག་གོ །གཞན་ཡང་སྒོ་བཞིར་ཕུར་པ་བཞི། མཚམས་བཞིར་རལ་གྲི་བཞི་དགོད་དོ། །གཞན་ཡང་ཕྱིའི་མཆོད་པ་ལྔ་དང་། འདོད་པའི་ཡོན་ཏན་ལྔ། རྒྱལ་སྲིད་སྣ་བདུན། ཚོགས་ཀྱི་མཆོད་པ་རྒྱ་ཆེན་པོ་དང་། མཁའ་འགྲོ་དང་ཆོས་སྐྱོང་གི་གཏོར་མ་རྒྱ་ཆེན་པོ་ཡང་བཤམ་མོ། །བླ་བྲེས་དང་ཐང་སྐུ་ལ་སོགས་པ་ཅི་རིགས་པས་གནས་བརྒྱན་པར་བྱའོ། །སྨིན་བྱ་སློབ་མའི་བྱ་བ་ལ་གཉིས། འཇུག་པར་བྱེད་པ་སློབ་མའི་སྔོན་འགྲོ་དང་། བྱིན་བརླབས་ཀྱི་བྱེད་པ་སློབ་དཔོན་གྱི་ལས་སོ། །དང་པོ་ལ་ལྔ་སྟེ། དབང་གི་གསོལ་བ་གདབ་པ་དང་། བླ་མས་གནང་བ་སྦྱིན་ཞིང་། སྐྱབས་འགྲོ་སེམས་བསྐྱེད་འབོགས་པ་དང་གཉིས། བསྲུང་བ་གདགས་ཤིང་ཡེ་ཤེས་དབབ་པ་དང་གསུམ། མེ་ཏོག་དོར་ཞིང་མིང་གདགས་པ་དང་བཞི། མིག་དབྱེ་ཞིང་མཐོང་བ་བསྟན་པ་དང་ལྔའོ། །དང་པོ་གསོལ་བ་གདབ་པ་ནི། ཨེ་མ་ཧོ། །སྐྱེས་ཆེན་འགྲོ་མགོན་བླ་མ་རྗེ། །བདག་ནི་ལས་ཅན་ཤེས་རབ་བུ། །གསང་བར་ངེས་པའི་ལུང་འདི་ལ། །རྟོགས་པས་བདག་ནི་གཟུང་དུ་གསོལ། །ཞེས་ལན་གསུམ་ཞུ་བ་དབུལ། གཉིས་པ་བླ་མས་རྗེས་གནང་སྦྱིན་ཞིང་སྐྱབས་འགྲོ་སེམས་བསྐྱེད་འབོགས་པ་ལ་གསུམ་རྗེས་གནང་དང་། སྐྱབས་འགྲོ་དང་། སེམས་བསྐྱེད་དོ། །དང་པོ་ནི། ཨེ་མ་ཧོ། སྐལ་ལྡན་བུ། མཆོག་ཏུ་གསང་བའི་ཐེག་པ་འདིར། །རྡོ་རྗེ་འཛིན་པ་བདག་གི་ལུང་། །ཞུགས་ནས་འབྲས་བུ་ངེས་ཐོབ་འགྱུར། །བདག་ཉིད་ཆེན་པོ་ཁྱེད་དག་གི །བློ་ཡི་ཐེ་ཚོམ་རབ་བསལ་ནས། །ནོར་བུའི་ཡོན་ཏན་མཐོང་བ་བཞིན། །བདག་ལ་བླ་མར་སྤྲོ་ལགས་སམ། །ཞེས་དྲི། སློབ་མས་སྤྲོ་

ལགས་ཤེས་བརྗོད་དེ། གཉིས་པ་སྐྱབས་འགྲོ་ནི། རང་ལུས་འཁོར་ལོ་བཞི་རྩ་རླུང་ཐིག་ལེའི་གནས་ལུགས་དྲན་པར་བྱས་ལ། རླུང་ལྔ་རྣམ་དག་དངས་མའི་སྐུ། །ཉོན་མོངས་རྣམ་དག་ཡེ་ཤེས་ལྔ། །སྐུ་གསུམ་མཛད་པ་མཐར་ཕྱིན་པ། །དཀོན་མཆོག་གསུམ་ལ་རྟོགས་པས་འདུད། །ཅེས་ལན་གསུམ་གྱི་རྗེས་ལ། དེའི་དོན་བཤད་དོ། །གསུམ་པ་སེམས་བསྐྱེད་པ་ནི། ལམ་གྱི་སྣང་བ་བཞིའི་དོན་དྲན་པར་བྱས་ལ། འདི་སྐད་དོ། །ཨེ་མ་ཧོ། མ་རིག་མུན་པའི་ཀློང་། །རང་རིག་ཐབས་ཤེས་སྒྲོན་མ་ཡི། །རང་ལ་གནས་པའི་ཡེ་ཤེས་དེ། །བླ་མའི་དྲིན་གྱིས་རྟོགས་པར་བྱའོ། །ཞེས་ལན་གསུམ་གྱི་རྗེས་ལ། སྨོན་པའི་དོན་བཤད་པར་བྱའོ། །འཇུག་པ་ནི། ཨེ་མ་ཧོ། སངས་རྒྱས་མཐར་ཐུག་དབྱིངས་རིག་གཉིས། །སྐུ་གསུམ་ངོ་བོ་མཐའ་བྲལ་གཞི། །ཚིག་ལས་འདས་པའི་རང་བྱུང་དེ། །ད་ལྟ་ཉིད་དུ་རྟོགས་པར་བྱའོ། །ཞེས་ལན་གསུམ་བརྗོད་པའི་རྗེས་ལ། འཇུག་པའི་དོན་ཤད་དོ། །བསྲུང་བ་གདགས་ཤིང་ཡེ་ཤེས་དབབ་པ་ལ་གཉིས། བསྲུང་བ་གདགས་པ་དང་ཡེ་ཤེས་དབབ་པའོ། །དང་པོ་ཚོན་སྣ་ལྔའི་སྐུད་པ་ལ། གནས་པ་རྩའི་ཡི་གེ་འམ། ཡང་ན་ༀ་ཨཱཿཧཱུྃ་སྭཱཧཱ། ༀ་སྭཱ་བྷཱ་ཝ་ཤུདྡྷ༔ སརྦ་དྷརྨཱ་སྭ་བྷཱ་ཤུདྡྷོ྅ཧཾ། ཞེས་པས་སྔགས་མདུད་བྱས་ལ། ཕོའི་དཔུང་པ་གཡས་པ་མོའི་གཡོན་པ་ལ་གདགས་སོ། །གཉིས་པ་ཡེ་ཤེས་དབབ་པ་ནི། སློབ་མ་ལུས་གནད་རྡོ་རྗེ་སྐྱིལ་ཀྲུང་བཅའ་རུ་བཅུག་ལ། འཁོར་ལོ་བཞིའི་རྩ་ཡི་གེའི་ཐིག་ལེ་དང་། ཀུན་བཟང་ཡབ་ཡུམ་གསལ་གདབ་ལ། སྟེང་འོག་གི་རླུང་ཁ་སྦྱར་ལ་ཤེས་པ་མ་ཡེངས་ཤིག་བྱས། དམིགས་པ་ནི་ཚིག་དོན་བསམ་ཞིང་། བླ་མས་ཌ་མ་རུ་དཀྲོལ་ཞིང་འདི་སྐད་དོ། །ཨེ་མ་སྐལ་ལྡན་རིགས་ཀྱི་བུ། །ལྟེ་བ་སྤྲུལ་པའི་འཁོར་ལོ་ནི། །སྤྲུལ་པའི་སྐུ་ཡི་བཞུགས་གནས་ཡིན། །

རླུང་ལྔ་གཡོ་བཅོས་ལས་འདས་པ། །ཐིག་ལེ་འོད་སྐུར་ཤིགས་སེ་ཤིག །ཨེ་མ་སྐལ་ལྡན་རིགས་ཀྱི་བུ། །སྙིང་ཁ་ཆོས་ཀྱི་འཁོར་ལོ་ནི། །ཆོས་ཀྱི་སྐུ་ཡི་བཞུགས་གནས་ཡིན། །སངས་རྒྱས་རིགས་ལྔ་མེ་རེ་རེ། །ཨེ་མ་སྐལ་ལྡན་རིགས་ཀྱི་བུ། །མགྲིན་པ་ལོངས་སྤྱོད་འཁོར་ལོ་ན། །ལོངས་སྤྱོད་རྫོགས་སྐུའི་བཞུགས་གནས་ཡོད། །མཚན་དང་དཔེ་བྱད་འཁྲུགས་པ་ཡི། །ཐིག་ལེ་འོད་སྐུར་ཡ་ལ་ལ། །ཨེ་མ་སྐལ་ལྡན་རིགས་ཀྱི་བུ། །སྤྱི་བོ་བདེ་བའི་འཁོར་ལོ་ནི། །སྐུ་གསུམ་འདུས་པའི་བཞུགས་གནས་ཡིན། །འབྲས་བུ་འདུས་པའི་རྩེ་མོ་ཅན། ཁྲོ་རྒྱལ་གད་རྒྱངས་ཡ་ལ་ལ། ཞེས་པ་དེ་དག་གི་དམིགས་པ་རེས་མོས་ཀྱིས་དབབ་བོ། །བཞི་པ་མེ་ཏོག་དོར་ཞིང་མིང་གདགས་པ་ལ་གཉིས། མེ་ཏོག་དོར་བ་དང་། མིང་གདགས་པའོ། །དང་པོ་ནི་དར་སྣ་ལྔའི་སྤྱན་དར་བྱས་ལ། ཐལ་མོའི་བར་དུ་བཟུང་སྟེ། མིག་དར་ནག་པོས་བཀབ་ལ། འདི་སྐད་དོ། །ཨེ་མ་ཧོ། ཐོག་མའི་འོད་གསལ་སྙིང་པོ་ནས། །ད་ལྟ་ཐེག་མཆོག་འདི་འཕྲད་པར། །གཞི་ལ་སྦྱངས་པའི་ལས་འབྲས་ཀྱིས། །རིགས་མཆོག་དེ་ལ་འབབ་པར་ཤོག །ཅེས་པས་ཕོ་བྲང་གི་དབུས་སུ་དོར་རོ། །གཉིས་པ་མིང་གདགས་པ་ནི། །དབུས་སུ་བབས་ན་སྣ་ཚོགས་རང་གྲོལ། ཤར་དུ་རྡོ་རྗེ་སྙིང་པོ། །ལྷོར་འདོད་ཡོན་རང་ཤར། །ནུབ་ཏུ་བདེ་ཆེན་རྒྱལ་པོ། །བྱང་དུ་སྒོ་ལྔ་བྱ་བྲལ་དུ་གདགས་སོ། །དེ་ནས་མིག་དབྱེ་ཞིང་མཐོང་བར་བསྟན་པ་ལ་གཉིས། མིག་དབྱེ་བ་དང་། མཐོང་བ་བསྟན་པའོ། །དང་པོ་ནི། ཀྱེ་མ་རྡོ་རྗེ་འཛིན་མགོན་རྗེ། །བདག་ནི་ཁམས་གསུམ་འཁོར་བར་ལོང་། །རྗེ་ཡི་ཡེ་ཤེས་ཐུར་མ་ཡིས། །བདག་གིས་མ་རིག་གསལ་དུ་གསོལ། །ཞེས་སོ། །བླ་མས་འདི་སྐད་དོ། །ཨེ་མ་སྐལ་ལྡན་རིགས་ཀྱི་བུ། །

སྔོན་ཆད་གཟུང་འཛིན་འཁྲུལ་བས་བཟུང་། །རང་ལ་བཞག་ནས་གཞན་དུ་བཙལ། །ཐུར་མ་ཡིད་བཞིན་ནོར་བུར་མཚོན། །ཞེས་གསེར་གྱི་ཐུར་མས་མིག་དར་བསལ་ལ། །དེ་དག་གི་དོན་བཤད་དོ། །གཉིས་པ་མཐོང་བ་བསྟན་པ་ལ་བཞི་སྟེ། དང་པོ་བླ་མའི། དེ་ནས་དཀྱིལ་འཁོར་གྱི། དེ་ནས་རྫས་ཀྱི། དེ་ནས་མཆེད་ལྕམ་གྱི་མཐོང་བ་བསྟན་པའོ། །དེ་ལ་དང་པོ་བླ་མའི་མཐོང་བ་བསྟན་པ་ནི། ལྟོས་ཤིག་ལྟོས་ཤིག་རིགས་ཀྱི་བུ། །མ་ཡེངས་སེམས་ཀྱིས་ང་ལ་ལྟོས། །ང་ལ་མཐོང་བ་སྣ་ཚོགས་པའོ། །བུ་ཁྱོད་ཀྱིས་ནི་ཅིར་མཐོང་སྨྲོས། །ཤེས་བརྗོད་པས། བུ་ཡིས་བླ་མ་ལ་སངས་རྒྱས་སུ་མཐོང་ལགས། ཤེས་བརྗོད་དོ། །གཉིས་པ་དཀྱིལ་འཁོར་གྱི་མཐོང་བ་བསྟན་པ་ནི། །ལྟོས་ཤིག་མིག་ཅན་སྐལ་ལྡན་བུ། །དཀྱིལ་འཁོར་བཟང་པོའི་གནས་འདི་ལྟོས། །དད་པའི་མཆོག་འདི་བསྐྱེད་རེ་རན། ཁྱོད་ཀྱིས་དཀྱིལ་འཁོར་ཅི་རུ་མཐོང་། །ཞེས་དྲིས་པས། ལ་ལས་དཀར་པོ་ཤས་ཆེ་བར་མཐོང་། ལ་ལས་དམར་པོ་ལ་སོགས་པ་མཐོང་བ་འབྱུང་བས། དཀྱིལ་འཁོར་གྱི་དེ་ཉིད་བཤད་དོ། །དེ་ནས་རྫས་ཀྱི་མཐོང་བ་བསྟན་པ་ནི། །ཨེ་མ་ལྟ་ཤེས་སྐལ་ལྡན་བུ། །བརྡ་དང་དམ་རྫས་བཀོད་པའི་ཚོགས། །གནས་ལུགས་མཚོན་པའི་རྫས་འདི་ལྟོས། །མཐོང་བའི་དོན་དེ་བདག་ལ་སྨྲོས། །ཞེས་པའི་སྐལ་བ་དང་ལྡན་པས་དེ་རྣམས་ཀྱིི་དོན་ཇི་བཞིན་ཉིད་དུ་ཤེས་སོ། །དེ་ནས་རྫས་ཀྱི་དེ་ཉིད་བཤད་དོ། །དེ་ནས་མཆེད་ལྕམ་གྱི་མཐོང་བ་བསྟན་པ་ནི། །ཨེ་མ་ཧོ། ངོ་མཚར་རིགས་ཀྱི་བུ། །གྲོགས་ཀྱི་དམ་པ་གང་ཡིན་པ། །འཇུག་སྒོ་གཅིག་པའི་སྤུན་གྲོགས་ལ། ཁྱོད་ཀྱི་ཅེར་མཐོང་བདག་ལ་སྨྲོས། །དག་པའི་སྣང་བ་མཐོང་རེ་རན། ཅེས་པས་དེ་ཉིད་ཀྱིས་མཐོང་བའམ་དོན་དྲིའོ། །དེ་ལ་དཀྱིལ་འཁོར་གྱི་དེ་ཉིད་བཤད་

པ་ནི། དབུས་ཟླུམ་པོ་མཐིང་ཁར་བྱུང་པ་ནི་གཞི་ཆོས་ཉིད་ཀྱི་དོན་ལ་གཉེན་པོ་དང་བྲལ་བའི་བརྡའོ། །པདྨ་འདབ་མ་བརྒྱད་མཛེས་ཚོན་དུ་བྱུང་བ་ནི་གཞི་ལ་རླུང་ལྔའི་དངས་མ་དང་ལྡན་པའི་བརྡའོ། །གྲུ་ཆད་བཞིར་བྱུང་བ་ནི་འབྱུང་བཞི་འོད་དང་ལྡན་པའི་བརྡའོ། ཁྱམས་སྒོ་བཞི་དང་བཅས་པ་ནི་འཕྲིན་ལས་བཞི་པོ་རང་ལ་ཚང་པའི་བརྡའོ། །པད་རག་གི་རྩིག་པ་ནི་ཡེ་ཤེས་ལྔའི་རྭ་བ་དང་ལྡན་པའི་བརྡའོ། །རྟ་བབས་བཞི་ནི་གཞི་ལ་ཚད་མེད་བཞི་ལྷུན་གྱིས་གྲུབ་པའི་བརྡའོ། །འདོད་ཡོན་གྱི་ལྷ་མོ་ནི་འདོད་ཡོན་མ་སྤངས་རྒྱན་དུ་ཤར་བའི་བརྡའོ། །དྲ་བ་དྲ་ཕྱེད་ནི་གཞིའི་ཡོན་ཏན་རྫོགས་པའི་བརྡའོ། །ཕ་གུ་སེར་པོ་ནི་འདོད་དགུ་རང་ལས་བྱུང་བའི་བརྡའོ། །རྡོ་རྗེའི་རྭ་བ་ནི་དོན་ལ་འགྱུར་བ་མེད་པའི་བརྡའོ། །འོད་ཟེར་ཕྲེང་བས་བསྐོར་བ་ནིི་སྐུ་ལྔ་ཡེ་ཤེས་ལྔ་དང་ལྡན་པའི་བརྡའོ། །གཉིས་པ་རྫས་ཀྱི་དེ་ཉིད་བསྟན་པ་ནི། བུམ་པ་ལྔ་རུ་བྱུང་བ་ནི་རིགས་ལྔ་རང་ལ་རྫོགས་པའི་བརྡའོ། །ཤེལ་ལྔ་ནི་གཞི་དཀར་ལ་དངས་པའི་བརྡའོ། །རྨ་བྱའི་མདོངས་ལྔ་ནི་སྒྲོན་མ་ལྔར་རང་ལ་གསལ་བའི་བརྡའོ། །མདའ་ལྔ་ནི་ཤེས་རབ་ལྔ་མཚོན་པའི་བརྡའོ། །མེ་ལོང་ལྔ་ནི་ཡེ་ཤེས་ལྔ་མཚོན་པའི་བརྡའོ། །དར་སྣ་ལྔ་ནི་རླུང་ལྔ་མཚོན་པའི་བརྡའོ། །ཕུར་པ་ལྔ་ནི་དབྱིངས་རྣམ་པར་དག་པ་ལ་འགྱུར་བ་མེད་པའི་བརྡའོ། །རལ་གྲི་ལྔ་ནི་མངལ་གྱི་གྲོང་ཁྱེར་འཇོམས་པའི་བརྡའོ། །ཚོག་གཏོར་དང་མཆོད་པ་ནི་འདོད་ཡོན་རང་སྤྲུལ་དུ་ཤར་བའི་བརྡའོ། །གཉིས་པ་བྱིན་རླབས་སློབ་དཔོན་གྱི་བྱ་བ་ལ་བཞི་ལས། དང་པོ་བུམ་པའི་དབང་དང་གཅིག །གཉིས་པ་གསང་བའི་དབང་། གསུམ་པ་ཤེས་རབ་ཡེ་ཤེས་ཀྱི་དབང་། བཞི་པ་ངེས་པ་ཚིག་དོན་ངོ་སྤྲོད་ཀྱི་དབང་། དེ་ལ་དང་པོ་ནི་སློབ་མ་རྣམས་ལུས་གནད་རྡོ་རྗེ་སྐྱིལ་

ཀྲུང་འཆར་བཅུག་བླ་མས་དབུས་ཀྱི་བུམ་པ་བླངས་ལ། སློབ་བུའི་སྤྱིི་བོར་བཞག་ནས། ཧཱུྃ་ཆོས་ཉིད་དབྱིངས་ཀྱི་བུམ་པ་རུ། །སྟོང་གསལ་རང་བྱུང་ཆུ་ཡིས་བཀང་། །སྐལ་ལྡན་བུ་ལ་དབང་བསྐུར་བས། །དབྱིངས་ཀྱི་གནས་ལུགས་རྟོགས་པར་ཤོག །ཀ་ལིའི་ཡི་གེའི་ཚོགས་བརྗོད་པའི་རྗེས་ལ། སྤྱི་བོའི་རྩ་གནས་ཀྱི་ཡི་གེ་རྣམས་བརྗོད་ལ་དབང་བསྐུར་ཏེ། ཕ་ཕཱི། ཕི་ཕཱི། མ་མཱ། མ་མཱི། བཱ་བཱ། ཉ་ཉ་ཉཱི། ཀ་ཁ་ག་གྷ་ང་། ཙ་ཙཱ། ཚ་ཚཱ། ཊ་ཊཱ། ཐ་ཐཱ། པ་པཱ་ན་ཞེས་པས་ཁྲུས་བྱ། སྤྱི་བོར་ཆུ་ཐིགས་པ་བླུག་གོ །དེ་ནས་ཤར་གྱི་བུམ་པ་བླངས་ལ་སྙིང་ཀར་བཞག་སྟེ། ཧཱུྃ་མ་སྐྱེས་སྙིང་པོའི་བུམ་པ་རུ། །འགག་མེད་རང་བྱུང་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །འཇིགས་བྲལ་བཞི་ཡི་དོན་རྟོགས་ཤོག །ཅེས་པས་ཨཱ་ལིའི་རྗེས་ལ་དྲན་པ་འདུས་པའི་རྩ་ཡིག་རྣམས་བརྗོད་ལ་དབང་བསྐུར་རོ། ཁ་ཙ་ཊ་ཏ་ཕ་ལ་ཡ་སྭཱཧཱ། ཀ་གྷ་བྷཱ་བྫ་ཞེས་པས་སྙིང་གར་ཆུའི་ཐིག་ལེ་བྱའོ། །དེ་ནས་ལྷོའི་བུམ་པ་བརྟེག་ལ་མགྲིན་པར་གཏད་ལ། ཧཱུྃ་རང་བྱུང་ཡེ་ཤེས་བུམ་པ་རུ། །འདོད་ཡོན་རང་སྤྲུལ་རྫས་ཀྱིས་བཀང་། །སྐལ་ལྡན་བུ་ལ་དབང་བསྐུར་བས། །བསམ་པ་ལྷུན་གྲུབ་དབང་ཐོབ་ཤོག །ཅེས་པ་དང་། ཨཱ་ལིའི་རྗེས་ལ་དེ་རྣམས་འདུས་པའི་རྩ་ཡིག་རྣམས་བརྗོད་ལ་དབང་བསྐུར་ཏེ། རི་རཱྀ། ལི་ལཱྀ། ཨཾ་ཨེ། ཨཱ་ཨ་ཨེ། །ཞེས་བརྗོད་ལ་ཆུ་ཐིགས་གཅིག་བླུད་དོ། །དེ་ནས་ནུབ་ཀྱི་བུམ་པ་བཏེག་སྟེ། ལྟེ་བར་གཏད་ལ། །ༀ་མ་སྐྱེས་ཆགས་བྲལ་བུམ་པ་རུ། །བདེ་ཆེན་རྒྱུན་སྤྲོའི་རྫས་ཀྱིས་བཀང་། །སྐལ་ལྡན་ཁྱེད་ལ་དབང་བསྐུར་བས། །ཆགས་པ་འཛིན་མེད་དབང་ཐོབ་ཤོག ཨ་ལིའི་རྗེས་ལ་སྐྱེད་བྱེད་ཀྱི་རྩ་ཡིག་རྣམས་བརྗོད་དེ་དབང་བསྐུར་ལ། ཨ་ཨ་

ཏ་ལི་ཧ་ཨུ་ཉ་རཾ་ཡཾ་ཎཾ་ན་ཛི་ཊ་པ་ཁཾ་ཡཾ་རཾ། ཞེས་ལྟེ་བར་ཆུའི་ཐིག་ལེ་བྱའོ། །དེ་ནས་བྱང་གི་བུམ་པ་བཏེགས་ལ་གནས་བཞིར་བྱུག་ཅིང་། ཨ་ལི་ཀ་ལིའི་རྗེས་ལ་འཁོར་ལོ་སོགས་བཞི་ཀའི་རྩ་ཡིག་བརྗོད་དེ་ཧ་ཧེ་ཧོ། ཡེ་ཤེས་ཟང་ཐལ་བུམ་པ་རུ། །འགགས་མེད་རླུང་ལྔའི་རྫས་ཀྱིས་བཀང་། །སྐལ་ལྡན་ཁྱེད་ལ་དབང་བསྐུར་བས། །རང་བྱུང་རྩལ་ཆེན་རྫོགས་པའི་དབང་ཐོབ་ཤོག །དེ་ནས་དེ་རྣམས་ཀྱི་ཚིག་གི་དོན་རྣམས་ཡང་བཤད་པར་བྱའོ། །གཉིས་པ་གསང་བའི་དབང་བསྐུར་བ་ནི། ཀ་པཱ་ལ་བདུད་རྩི་ཆང་གིས་བཀང་བ་དེ་བཏེག་ལ། གནས་བཞིར་བཞག་ཅིང་སློབ་མ་རྣམས་གོང་བཞིན་ལུས་གནད་བ་བཅས་ལ། གནས་བཞིའི་རང་བཞིན་གྱི་ཀུན་བཟང་ཡབ་ཡུམ་སྦྱོར་བའི་བརྡས་བསྐུལ་ནས། དེ་དག་གིས་བྱང་སེམས་ཀྱིས་རྩ་གནས་དང་ལུས་གང་བས་བདེ་བ་ཆེན་པོའི་ངང་ལ་གནས་པར་བྱས་ཏེ། །ཧཱུྃ་བདེ་ཆེན་བརྡལ་བ་རང་བྱུང་ཀ་པཱ་ལ། །ཆགས་པ་དངོས་དག་ཀུན་བཟང་ཐིག་ལེས་བཀང་། །རིགས་ཆེན་སྐལ་ལྡན་བུ་ལ་དབང་བསྐུར་བས། །རྩ་རླུང་བྱང་སེམས་མཆོག་ལ་དབང་ཐོབ་ཤོག །ཅེས་པ་དང་ཨ་ལིའི་རྗེས་ལ་འཁོར་ལོ་བཞིའི་ཡི་གེ་བརྗོད་ལ་ཚིག་དོན་ཡང་བཤད་དོ། །གསུམ་པ་ཤེས་རབ་ཡེ་ཤེས་ཀྱི་དབང་ནི། །ལས་རྒྱ་མཚན་ཉིད་དང་ལྡན་པ་ལ་འཁྱུད་ལ། ཚིག་འདིས་བསྐུལ་ལོ། །ཧཱུྃ་སྣང་སྲིད་བདེ་ཆེན་བརྡལ་བའི་ཞིང་ཁམས་ལ། །རོལ་པའི་ཡེ་ཤེས་བདེ་བ་ཆེན་པོར་ཤར། །ཐབས་ཤེས་འདོད་པ་སྤྱོད་པས་གྲོལ་གྱུར་ཏེ། །མ་འགགས་རོལ་པ་སྤྱོད་ཅིང་བདེ་བ་ཆེ། །ཞེས་པས་དངོས་སུ་སྦྱར་བས་ཆགས་པའི་སྤྲ་ཁྲིད་ལྟར་བདེ་བ་བསྐྱེད་དོ། །བཞི་པ་ཚིག་དོན་ངོ་སྤྲོད་ཀྱི་དབང་ནི། བརྡའི་དོན་ཉིད་ཀྱིས་བསྟན་པར་

བྱ་སྟེ། སྐལ་བ་དང་ལྡན་པའི་སློབ་བུ་ཁྱོད་ཉོན་ཅིག །ནམ་མཁའི་དབྱིངས་ན་ཡིད་བཞིན་གྱི་ནོར་བུ་རིན་པོ་ཆེ་ལ། ཉི་ཟླ་གཉིས་ཤར་ནས་འདུག་པ་མཐོང་ངམ། ཞེས་པ་དང་། བར་སྣང་གི་འཇའ་ཚོན་ལ་རླུང་གི་ཞགས་པས་བཏབ་ནས་འདུག་པ་མཐོང་ངམ། རྒྱ་མཚོའི་ནོར་བུ་ཤེལ་གྱི་རྟ་ཕོ་ལ་ཞོན་ནས་ཉི་ཟླའི་དཀྱིལ་འཁོར་དུ་དཀྱུས་ཐོག་གཅོད་པ་དེ་མཐོང་ངམ། འབྱུང་ལྔའི་གྲོང་ཁྱེར་དུ་རིགས་དྲུག་གི་དམག་མི་བཅུག་ནས་རི་རབ་ཀྱི་སྟེང་དུ་སོང་བའི་མི་དང་ཁམས་གསུམ་གྱི་འཕྲང་ལ་ཤེལ་གྱི་མི་ཕོ་བརྩོན་དུ་བཟུང་བ་དེ་མཐོང་ངམ། ཁམས་གསུམ་སྐད་ཅིག་ལ་བསྐོར་ནས་རང་གི་ཁྱིམ་དུ་གཉིད་དུ་སོང་བ་དེ་མཐོང་ངམ། ཞེས་བརྡའི་དོན་བཞི་བཀྲོལ་ནས་ཚིག་འདིས་བསྟན་པར་བྱ་སྟེ། ཨེ་མ་ཧོ། མ་ཡེངས་གསོན་ཅིག་རིགས་ཀྱི་བུ། །གཞི་ལ་འཁོར་འདས་གྲུབ་མེད་ཀྱང་། །རྟེན་འབྲེལ་གྱི་འཆར་སྒོ་ངོ་མཚར་ཆེ། །དོན་དམ་ཚིག་གིས་མི་རྟོགས་ཀྱང་། །མངོན་སུམ་ལ་གདེང་ཐོབ་ངོ་མཚར་ཆེ། །རིག་པ་སྐྱེ་འབྲི་མེད་མོད་ཀྱང་། །ལམ་སྣང་གི་འཆར་ཚུལ་ངོ་མཚར་ཆེ། །ཀ་དག་ལ་གྲོལ་རྒྱུ་མ་མཆིས་ཀྱང་། །རླུང་རིག་གི་དག་ཚུལ་ངོ་མཚར་ཆེ། །ཐེག་པའི་འཇུག་སྒོ་མང་མོད་ཀྱང་། །གཅིག་ཅར་དུ་ཐོབ་པ་ངོ་མཚར་ཆེ། །ཤེས་ཚུལ་གྱི་སྣང་བ་རྒྱ་ཆེ་ཡང་། །ངོ་བོ་ལ་གདེངས་ཐོབ་ངོ་མཚར་ཆེ། །ཚིག་མཐའ་སྤྲོས་པ་མང་མོད་ཀྱང་། །བརྡའ་གཅིག་གིས་དོན་མཐོང་ངོ་མཚར་ཆེ། །ཞེས་པའི་རྡོ་རྗེའི་གླུ་ཡིས་བསྐུལ་ལོ། །དེ་ནས་དཔའ་བོ་ཕོ་ཚོགས་དང་མོ་ཚོགས་དགའ་སྟོན་ཆེན་པོས་མཆོད། མཁའ་འགྲོ་དང་ཆོས་སྐྱོང་གཏོར་མས་མཆོད་དོ། །རྗེས་འོད་གསལ་སྒྱུ་མ་ལྟ་བུ་ལ་གནས་པར་བྱའོ། །

སྤྲོས་བཅས་དབང་ལ་ཚིག་དོན་རྒྱ་ཆེ་བ། །ཚིག་ལ་ཉུང་ཞིང་དོན་ལ་ཚད་མེད་པ། །ལག་ལེན་དམ་པའི་ཕྱག་བཞེད་འདིར་བཀོད་པས། །འདིར་འཇུག་སྨིན་པས་འགྲོ་བས་བདེ་ཐོབ་ཤོག །སྤྲོས་བཅས་དབང་གི་ཕྱག་བཞེས། །དང་པོའི་དཔེ་ལས་ལག་ལེན་ཁྲིགས་སུ་བསྡེབས་པ། །ལྕེ་བཙུན་སེང་གེ་དབང་ཕྱུག་གིས་མཛད་པ་རྫོགས་སོ། །སྔགས་ཀྱི་སྲུང་མས་སྲུངས་ཤིག །སྐལ་ལྡན་ཅིག་དང་ཕྲད་པར་ཤོག །ཆོས་འདིའི་བརྒྱུད་པ་ནི། ཞང་མོན་པ། ལྷ་རྗེ་རང་རི་བ། ལྷ་རྗེ་དཔལ་འབར། ལྷ་རྗེ་ཡེ་ཤེས་མགོན། བླ་མ་ཁྱུང་ཚང་བ། རྫོང་ཁ་བ་རྒྱ ལ་བ་བློ་གྲོས། བླ་མ་ཀུན་དགའ་དོན་གྲུབ། རྗེ་རིན་པོ་ཆེ་རང་བྱུང་རྡོ་རྗེའོ།། །།

དབང་བཞིའི་དུས་དང་མཚན་མ་བསྟན་པའི་ཕྲ་ཊིག

དབང་བཞིའི་དུས་དང་མཚན་མ་བསྟན་པའི་ཕྲ་ཊིག
དབང་ཆེན་ཐབས་ཀྱི་སྐུ་ལ་ཕྱག་འཚལ་ལོ། །དབང་གི་ཕྲ་ཊིག་རྣམ་པར་ཕྱེ་བ། རྣམ་པར་དག་པ་གསལ་བ་ཡི། །རྣལ་འབྱོར་པ་ཡི་འཇུག་ཚུལ་གྱིས། །རིག་པ་གསལ་བའི་རང་བཞིན་ཉིད། །དེ་ལ་སློབ་དཔོན་སློབ་མ་ཡི། །འབྲེལ་བ་རྣམ་དག་གསལ་བའི་ཕྱིར། །སློབ་དཔོན་དག་གི་མཚན་ཉིད་བཤད། །དག་ཅིང་དབང་པོ་མ་ཉམས་དང་། །མང་དུ་ཐོས་ཤིང་ང་རྒྱལ་ཞི། །ཚུལ་འཆོས་སྤངས་ཤིང་ཆོག་ཤེས་དང་། །རྒྱུད་ལ་གོམས་ཤིང་ཉམས་སུ་ལེན། །ལྟ་བ་རྟོགས་ཤིང་འཛིན་ཆགས་ཆུང་། །བྱ་བ་ཉུང་ཞིང་བརྩོན་འགྲུས་ལྡན། །རྨོངས་པ་མེད་ཅིང་ཆོག་ཤེས་དང་། །ཡང་ན་སྡོམ་པ་གསུམ་ལ་གནས། །དཀའ་ཐུབ་ལྡན་ཞིང་མཆོག་ལ་སྦྱོར། །ནགས་ཁྲོད་བརྟེན་པའི་བླ་མ་ལ། །ནོར་ནི་གསེར་དངུལ་རང་ལུས་ཙམ། །གྱུར་ལྟས་ཡང་ནས་ཡང་དུ་འབུལ། །དེ་ལྟར་མཚན་ཉིད་རྫོགས་པ་ཡི། །བླ་མ་དབང་བསྐུར་ཆོ་ག་ནི། །ལོ་བདུན་ལྔ་དང་གསུམ་སྔོན་དུ། །ཇི་ལྟར་བཞེད་པའི་ཡོན་ཕུལ་ལ། །ཞུ་བ་དག་ནི་ལན་གསུམ་དབུལ། །རྟ་དང་གླང་པོ་རིན་ཆེན་གཡུ། །འབྲུ་དང་སྨན་ལ་སོགས་པ་ཡི། །འདོད་པའི་ཡོན་ཏན་སྣ་ཚོགས་པ། །བླ་མ་མཉེས་ཕྱིར་ཕུལ་ལ་ཞུ། །བླ་མས་སློབ་མའི་སྣོད་ཡང་བརྟག །དད་ལྡན་གཏོང་ཕོད་ཆེ་བ་དང་། །འབྱོར་ལྡན་ཡོ་བྱད་གཏོང་བར་ནུས། །ཐབས་ལྡན་བླ་མའི་བྱ་བ་མཁས། །སྡོམ་ལྡན་དམ་ཚིག་སྦྱར་བར་ནུས། །ཁྲོ་མེད་དྲེགས་ཚིག་སྤངས་པ་དང་། །འཇམ་ཞིང་ངང་ཚུལ་དེས་པ་དང་། །ཡིད་དལ་སྤྱོད་པ་མཁས་པ་ནི། །སློབ་མའི་མཚན་ཉིད་ཡིན་པར་འདོད། །འདི་ལྟ་བུ་ཡི་སློབ་མ་ལ། །དབང་བསྐུར་ནས་ནི་གདམས་པར་སྦྱིན། །གལ་ཏེ་སྒྲུབ་ལ་བརྩོན་པ་ནི། །རང་གི་ཟས་དང་གོས་སྦྱར་ལ། །

བསྒྲུབ་པ་ཉམས་སུ་ལེན་དུ་གཞུག །འདི་ལྟར་སུ་ཡིས་བྱས་པ་ནི། །རྒྱལ་བའི་གསུང་ལས་མ་འདས་སོ། །འདི་ལྟ་བུ་ཡི་དཔོན་སློབ་གཉིས། །འཛོམ་པ་ཙམ་ལས་དངོས་གྲུབ་ནི། །གང་འདོད་འབྱུང་བར་ཐེ་ཚོམ་མེད། །སྐུ་གསུམ་ས་ལ་མཉམ་སྦྱར་རོ། །དེས་ནིི་བླ་མ་སློབ་མ་ཡི། །མཚན་ཉིད་གསལ་བར་བཤད་པའོ། །ད་ནི་དབང་བསྐུར་འཇུག་དུས་བཤད། །སྤྲོས་བཅས་དབང་གི་དབང་བསྐུར་ནི། །བྱི་བ་འབྲུག་དང་རྟ་དང་ཕག །ཁྱད་པར་ལོ་ནི་བཞི་དག་ལ། །དབང་བསྐུར་ཆོ་ག་འགྲུབ་པ་ཡིན། །ཟླ་བ་ར་བ་བཞི་དག་ལ། །དུས་ཚོགས་འབྲས་བུ་འབྱིན་ཕྱིར་འགྲུབ། །ཚེས་གྲངས་ཡར་གྱི་གཅིག་ནས་ནི། །ཟླ་བ་ཚེས་ཀྱི་མཚམས་སུ་གདོན། །བསྐུར་དུས་ཉིན་ཕྱེད་ནམ་གུང་ངོ་། །རྣལ་འབྱོར་ལུས་ཀྱི་བྱེ་བྲག་གིས། །སོ་སོའི་འབྱུང་བའི་ལོ་ལ་སྦྱར། །དབང་བསྐུར་ཆོ་ག་ཤིས་པར་འགྱུར། །འདི་དུས་སློབ་མ་དམ་ཚིག་ཅན། །འབྱུང་བའི་ལུས་རྣམས་མཐུན་པ་ནི། །གྲངས་ལ་དཔག་ཚད་གཟུང་དུ་མེད། །བརྒྱའམ་བཅུ་བདུན་ལ་སོགས་པའི། །འབྱུང་བ་ལས་མཐུན་འགལ་བ་མེད། །གལ་ཏེ་ཆོ་ག་ལ་ཞུགས་ཚེ། །མར་མེ་མདངས་དང་མི་ལྡན་ན། །དམ་ཚིག་བསྐང་བའི་ཆོ་ག་བྱ། །སྨེ་བ་མེད་ན་དངོས་གྲུབ་ནི། །ཡང་ནས་ཡང་དུ་བླང་བར་བྱ། །དོན་མེད་ཤི་ན་བར་ཆད་འབྱུང་། །དབང་ཆོག་འཛབ་ལ་དྲག་ཏུ་འབད། །དེ་ཚེ་འདུས་པའི་མཆེད་ལྕམ་ཀུན། །ལུས་ལ་ནད་ཉིད་བྱུང་བ་ན། །ཕྱག་དང་བསྐོར་བ་དག་བྱ་འོ། །ངག་ལ་བསླབ་འཆོལ་སུ་ལ་བྱུང་། །བསམ་ཏེ་ཡི་གེ་བརྒྱ་པ་བཟླས། །སེམས་ནི་ཉོག་གམ་དྲན་ཉམས་ན། །བསྐྱེད་དང་རྫོགས་པའི་རིམ་ལ་འཇུག །གལ་ཏེ་བྱང་བའི་རྟགས་བྱུང་ནས། །གདོད་ཀྱིས་དབང་བསྐུར་ཆོ་ག་འབད། །གལ་ཏེ་བསྒྲུབ་པའི་རྫས་འཕེལ་ན། །དངོས་གྲུབ་རབ་མཆོག་

ཐོབ་པས་ན། །མཉམ་པའི་དོན་ལ་མོས་པར་བྱ། །དབང་བསྐུར་ཆོ་ག་ལ་ཞུགས་ནས། །རྟག་ཏུ་མཚན་མ་མཐོང་གྱུར་ན། །ཐུན་མོང་དངོས་གྲུབ་དེ་ཡིས་འགྲུབ། །ཉམས་དང་ཤེས་པར་ལྡན་ན་ཡང་། །འདིས་ཀྱང་དགའ་བདེ་ཉིད་ལ་སྤྱོད། །བླ་མ་ཉིད་ལ་མཆོག་ཏུ་ཡང་། །མོས་པ་བཟང་པོ་སུ་བསྐྱེད་པ། །འདིས་ཀྱང་ཕྱག་རྒྱ་མཆོག་ལ་སྦྱོར། །བདག་ཉིད་ལུས་ངག་བདེ་མཐོང་ན། །འདིས་ནི་སངས་རྒྱས་ཞིང་དག་གོ། སྤྲོས་བཅས་དབང་གི་དུས་དང་ཡང་། །མཚན་མ་དག་ནི་ལེགས་བཤད་དོ། །ད་ནི་སྤྲོས་པ་མེད་པ་ཡི། །དུས་དང་མཚན་མ་ཉེར་བསྟན་བྱ། །འདི་ལ་ལོ་ཡི་བྱེ་བྲག་མེད། །གང་ལ་ཡང་ནི་ཤིས་པ་འོ། །ཕྱི་དུས་དབྱར་དང་དགུན་ལ་བཟང་། །ཚེས་གྲངས་ཡར་གྱི་ངོ་ལ་འོ། །བསྐུར་དུས་ཐོ་རངས་སྒྲ་སྤངས་པའོ། །འདི་ལ་དད་ལྡན་ལྔ་དང་དྲུག །བདུན་ལས་མང་ན་དོན་མི་འགྲུབ། །དེ་ལྟར་དད་དང་ལྡན་པའི་བུ། །སེམས་ཀྱི་ལས་སུ་དགེ་ལྡན་པ། །ངག་གི་སྔ་མའི་བསྟོད་ལྡན་པ། །དེ་ལྟ་བུ་ལ་དབང་བསྐུར་ཚེ། །ལུས་ནི་བདེ་བ་མ་ཡིན་ན། །ལུས་ཀྱིས་ཕྱི་ནས་བཤགས་པ་བྱ། །དེ་བཞིན་ངག་དང་སེམས་ལ་ཡང་། །སྡིག་པ་བཤགས་པའི་ལས་བརྩམ་མོ། །སྤྲོས་པ་མེད་པའི་དབང་བསྐུར་གྱི། །དུས་དང་མཚན་མ་བཤད་པ་འོ། །ད་ནི་ཤིན་ཏུ་སྤྲོས་པ་མེད། །མཆོག་ཏུ་གསང་བའི་དབང་བསྐུར་གྱི། །དུས་དང་མཚན་མ་བཤད་པར་བྱ། །འདི་ཡང་ལོ་ཡི་བྱེ་བྲག་མིན། །རང་ཐད་ཉིད་དུ་བྱས་པས་འགྲུབ། །ཕྱི་དུས་ས་བོན་འཇུག་པའི་དུས། །བྱང་ཆུབ་ས་བོན་བསྟན་པའི་ཕྱིར། །འདི་ཡི་དུས་སུ་དབང་བསྐུར་ན། །ས་བོན་གང་ཞིག་འཕེལ་བར་བཤད། །འབྲུ་དང་འབྲས་བུ་སྡུད་དུས་སུ། །ཤིན་ཏུ་སྤྲོས་མེད་དབང་བསྐུར་ན། །

ཡེ་ཤེས་འབྲས་བུ་རྫོགས་པའི་ཕྱིར། །སྐུ་གསུམ་ས་ལ་ངེས་པར་འགྲོ། །ནང་དུས་ཡར་ངོའི་འཕེལ་དུས་ལ། །ཚེས་གྲངས་མར་ངོ་འགྲིབ་སྤངས་པའི། །ཉམས་མྱོང་བརྟན་པར་བྱ་བའི་ཕྱིར། །ཉམས་དང་བྱིན་རླབས་གོང་དུ་འཕེལ། །བསྐུར་དུས་ཉི་མ་རྩེ་ཤར་ལ། །རང་བྱུང་ཡེ་ཤེས་ཤར་དོན་དུའོ། །ཡང་ན་མར་གྱི་ཟད་མཚམས་སུ། །རྟོག་པ་ཟད་པའི་དོན་དུའོ། །སྐལ་ལྡན་གཅིག་གམ་ཡང་ན་གཉིས། །གསུམ་ལས་མང་ན་དོན་མི་འགྲུབ། །འདི་དུས་སོ་སོའི་ཕྱོགས་བཟུང་སྟེ། །ལུས་ཀྱི་དུས་ན་ནམ་མཁའ་ལ། །སྤྲིན་དང་ཁུ་རླངས་ཁ་ཆར་དང་། །རླུང་ལ་སོགས་པའི་སྒྲ་དག་དང་། །གཡུལ་ཉེས་དགྲ་དང་ཆོམ་རྐུན་དང་། །མི་སྡུག་པ་ཡི་གཟུགས་བྱུང་ན། །ལུས་ཀྱི་སྡིག་པ་ཆེ་བས་ན། །ཕྱི་ནང་དབང་བསྐུར་བྱས་ནས་ནི། །སྔ་མས་གདམས་པ་མ་བསྟན་པར། །བདེ་བར་གཤེགས་པའི་སྐུ་གཟུགས་སམ། །རང་གི་སྔ་མའི་གཟིམས་ཁང་ལ། །བསྐོར་བ་འབུམ་ཕྲག་དྲུག་དག་གམ། །ཕྱག་ཀྱང་འབུམ་ཕྲག་གཅིག་ཏུ་བྱ། །དེ་དུས་མཚན་མའི་ཁྱད་པར་ནི། །ཐོག་མ་ཡོད་ལ་ཐ་མ་བར། །ངེས་པའི་མཚན་མ་གཟུགས་དག་ནས། །ལུས་ཀྱི་སྤྱོད་པ་འབྱོངས་པས་ན། །ཕྱི་ནས་འབད་པ་བྱ་མི་དགོས། །གལ་ཏེ་ཐ་མ་དག་བྱུང་ན། །ལྷ་ཡི་སྐུ་ནི་སྟོང་ཕྲག་སྒོམ། །དེ་ནས་སྔ་མའི་མན་ངག་ནི། །རིམ་པ་དག་ལ་བསླབ་པར་བྱ། །ངག་གིི་དུས་ནའང་དེ་བཞིན་ནོ། །རྣལ་འབྱོར་ལྡན་པས་ཤེས་པར་བྱ། །འདི་ཡང་ཐོག་མ་མེད་ལ་བར་དུ་བྱུང་བས་ན། །བཤགས་པའི་ལས་ནི་ཡི་གེ་བརྒྱ་པ་འབུམ་ཕྲག་གཅིག །འབད་དང་བཅས་པས་བཟླས་པར་བྱའོ། །གལ་ཏེ་ཐ་མ་བྱུང་བ་ན། །གསང་སྔགས་རྒྱུད་སྡེ་རང་ལོའི་གྲངས། །བརྒྱ་ནི་རྩ་བརྒྱད་ཀློག་པར་བྱའོ། །ཐོག་མཐའ་བར་མེད་དུས་རྣམས་སུ། །རྒྱུད་ཀློག་པ་དང་སྔགས་བཟླ་དང་། །

བླ་མ་ཡི་དམ་ལྷ་དག་གི། བསྟོད་ཚིག་སྣ་ཚོགས་བརྗོད་པ་དང་། །ཨ་ལི་ཀ་ལིའི་ཡི་གེ་བགྲང་། །སོ་སོར་རྐྱང་པ་བརྗོད་པ་དང་། །ཧཱུྃ་དང་ཕཊ་དང་ༀ་དང་ནི། །སྦྲེལ་མ་སྣ་ཚོགས་བརྗོད་པ་ལ། །ཟླ་བ་བདུན་དུ་འབད་པར་བྱ། །དེ་ནས་གདམས་པའི་གནས་སུ་བྱ། །སེམས་ལ་ཐོག་མར་གང་བྱུང་ན། །ཡི་དམ་ལྷ་ཡི་ཏིང་ངེ་འཛིན། །ཉི་མ་གསུམ་དུ་བསྒོམ་པར་བྱ། །གལ་ཏེ་བར་དུ་བྱུང་བ་ན། །སྔགས་ཀྱི་འོད་ཟེར་འཕྲོ་འདུ་ལས། །ཉི་མ་བདུན་དུ་འབད་པར་བྱ། །ཐ་མར་བྱུང་ན་ཡི་གེ་ཡི། །འཕྲོ་འདུ་དག་ནི་བསྒོམ་པ་ལ། །ཉི་མ་བཅུ་ཡི་བར་དུ་འབད། །ཐོག་མ་བར་མཐའ་ཀུན་བྱུང་ན། །རྫོགས་པའི་རིམ་པ་བསྒོམ་པ་འམ། །ངག་ལས་བྱུང་བའི་བསམ་གཏན་ལ། །བསྒོམ་པ་ཟླ་བ་དྲུག་ཏུ་འབད། །གལ་ཏེ་ལུས་ངག་སེམས་ཀྱི་ནི། །སྤྱོད་པ་སོ་སོའི་དུས་སུ་ཡང་། །ནམ་མཁའ་སྔོ་སངས་སྤྲིན་དང་བྲལ། །རླུང་དང་སེར་བུ་སྒྲ་མེད་པར། །འཇམ་ཞིང་འཇམ་པ་དག་བྱུང་ན། །སྡིག་པ་དག་ནི་སྦྱང་མི་དགོས། །གལ་ཏེ་ཐོག་མར་ཡོད་པ་ལ། །སོ་སོའི་མཐའ་མར་དག་སྣང་ན། །འདི་ནི་སྡིག་པ་འབྱོངས་པས་ན། །བཤགས་པའི་ཆོ་ག་མི་དགོས་སོ། །དེ་བཞིན་ལུས་ངག་སེམས་དག་ནི། །སོ་སོའི་ངོས་བཟུང་མཁས་པས་བརྟག །དེ་ནི་ཤིན་ཏུ་སྤྲོས་པ་མེད། །བང་བསྐུར་ཆོ་གའི་དུས་དང་ཡང་། །མཚན་མ་བརྟག་པ་བཤད་པའོ། །རེ་ཞིག་དབང་ཐོབ་མཚན་མ་ནི། །རིག་པའི་མེ་ཏོག་གཏོར་དུས་སུ། །ལུས་ནི་གཡོ་དང་དྲག་ཏུ་འཕར། །ལུས་ལ་བྱུང་ན་ལུས་ཀྱིས་ཐོབ། །ངག་གི་སྒྲ་སྐད་སྣ་ཚོགས་པ། །འབྱིན་ཞིང་ཆོས་རྣམས་སྨྲ་བ་དང་། །ངོ་མཚར་ཆོས་རྣམས་བརྗོད་པས་ན། །དེ་བཞིན་དུ་ཡང་ངག་གིས་ཐོབ། །སེམས་ལ་ཏིང་འཛིན་བབས་པ་དང་། །གཡེངས་ཤིང་དྲན་པ་ཉམས་པ་དང་། །སེམས་ཀྱི་དབང་བསྐུར་ཐོབ་པ་འོ། །གལ་ཏེ་ལུས་ཀྱིས་ཐོབ་ནས་ནི། །སྤྲུལ་པའི་སྐུ་ཉིད་འདི་ཡིས་ཐོབ། །དེ་བཞིན་ངག་ལ་ལོངས་སྐུ་འོ། །སེམས་ནི་ཆོས་སྐུའི་

ཞིང་དུ་འགྲོ། །ཤིན་ཏུ་སྤྲོས་མེད་དུས་མཚན་བཤད། །རབ་ཏུ་སྤྲོས་པ་མེད་པ་ཡི། །དུས་དང་མཚན་མ་ངེས་བསྟན་བྱ། །ཕྱི་དུས་འབྲས་བུ་སྨིན་པའམ། །འབྲུ་རྣམས་བསྡུ་བའི་དུས་ལ་གཏད། །རང་སྣང་འབྲས་བུར་གྲོལ་ཕྱིར་རོ། །ནང་དུས་ཡར་ངོའི་ཚེས་གཅིག་གམ། །ཡང་ན་ཟད་པའི་མཚམས་ལ་གཏད། །ཐིག་ལེ་ཉལ་གཅིག་རྟོགས་ནས་ནི། །ལས་དང་བག་ཆགས་རང་ཟད་ཕྱིར། །སྐལ་ལྡན་གཅིག་ལས་མང་ན་ཡང་། །རྣལ་འབྱོར་པ་ཡིས་དོན་མི་འགྲུབ། །དད་ལྡན་ཡིད་དུ་འོང་བའི་བུ། །སྐལ་བ་ལྡན་པ་གཅིག་ལ་བསྐུར། །གཉིས་ཀར་རྫོགས་པའི་སངས་རྒྱས་ལ། །གདོན་མི་ཟ་བར་འགྱུར་བར་ངེས། །བསྐུར་དུས་ཉི་མ་རྩེ་ཤར་ལ། །སོ་སོའི་ཚིག་གིས་ངེས་གསལ་བས། །རང་བཞིན་དག་པའི་གཞི་མཐོང་བའོ། །འདི་ལ་མཚན་མ་ཅི་བྱུང་ཡང་། །སྡིག་པ་སྦྱོང་བའི་ཆོ་ག་མེད། །གོང་དུ་ཐད་ཀར་སྦྱང་བའི་ཕྱིར། །གལ་ཏེ་སྤྲིན་མེད་ནམ་དངས་ན། །ཆོས་ཀྱི་སྐུ་ཡི་ཞིང་ལ་སྤྱོད། །སྣ་ཚོགས་འོད་ཀྱིས་མདངས་ཤར་ན། །འདི་ནི་ལོངས་སྐུའི་ཞིང་དུ་འོ། །སྣ་ཚོགས་སྒྲ་རྣམས་གྲགས་པས་ན། །སྤྲུལ་སྐུའི་ཞིང་དུ་དབུགས་འབྱིན་ནོ། །གལ་ཏེ་སྐལ་དང་ལྡན་པ་ཞིག །འདི་དུས་ལུས་གནད་མཁས་པ་དང་། །དེ་ལས་གཡོ་བ་མེད་པས་ན། །ལོ་བདུན་གྱིས་ནི་ཟད་སར་ཕྱིར། །ངག་གིས་བརྗོད་པ་སྟོར་གྱུར་ན། །འདིས་ནི་ཟླ་བ་ཉེར་གཅིག་ན། །ཆོས་ཉིད་ཟད་པའི་ས་ལ་ཕྱིན། །སེམས་ལ་མཁས་ཤིང་རླུང་སྟོངས་ན། །ཟླ་བ་བདུན་ན་སྐལ་ལྡན་འདི། །སྣང་བ་ཐམས་ཅད་ཟད་པར་འགྱུར། །གལ་ཏེ་བློ་རྩལ་རབ་རྣམས་ལ། །དང་པོ་སྒྲོས་བཅས་བརྩམས་ནས་ནི། །བར་མ་ཆད་པས་རིམ་གྱིས་ཀྱང་། །ཡང་དག་རྫོགས་པར་བྱེད་པའི་ལུགས། །མཆོག་ཏུ་གྱུར་པ་རྣམས་ལ་ཏེ། །འདི་ནི་ཤིན་ཏུ་དཀོན་པས་ན། །ཞག་དང་ཟླ་བ་ལོ་ཡི་བར། །རང་གི་ཉམས་དང་སྦྱར་ལ་ནི། །དབང་བཞི་དག་ནི་རྫོགས་པར་བསྐུར། །གལ་ཏེ་དབང་བཞི་མ་རྫོགས་ན། །ཤིན་ཏུ་སྤྲོས་པ་

མེད་པའི་དབང་། །ཟབ་མོའི་ཆོས་བཤད་རྟོགས་ཡུལ་ཉིད། །འདི་ཉིད་བསྐུར་བས་དབང་ཐོབ་བོ། །སློབ་མའི་མཚན་ཉིད་རབ་བརྟགས་ལ། །གཉིས་དང་གསུམ་ལ་སོགས་པས་ནི། །སློབ་མའི་འབྱོར་པའི་ཚད་དང་སྦྱར། །བླ་མ་རང་གི་ཉམས་མྱོང་གིས། ཁྱད་པར་དུས་ནི་མཆོག་ངེས་བཤད། །བུ་ལ་ནུས་པ་འཇུག་དོན་དུའོ། །ཞེས་དབང་རྣམ་པར་བཀོད་པའི་ཕྲ་ཊིཀ། དབང་གི་རིམ་པ་རྣམ་པར་ཕྱེ་བ་ལས། རྣམ་པར་དག་པ་གསལ་བའི་དུམ་བུ་རིམ་པར་འཇུག་པའི་ཐབས་བསྟན་པ་སྟེ་གཉིས་པ་རྫོགས་སོ།། །།སྤྲོས་བཅས་ཀྱི་དབང་བསྡུས་པ་ནི་ལྕེ་བཙུན་གྱིས་མཛད་དོ། །སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་གསུམ་ལ། སྤྲུལ་པ་པོ་དགའ་རབ་རྡོ་རྗེའི་རྩ་བ་དང་། བི་མ་ལའི་དེ་གསལ་བྱེད་ལ་སོགས་དུམ་བུ་དྲུག་ཡོད་པ་རྣམས་བསྡུས་ནས། ལག་ལེན་བདེ་བར་རང་བྱུང་རྡོ་རྗེས་བྱས་སོ། །དབང་བཞིའི་དུས་དང་མཚན་མ་འདི་ནི། བི་མ་ལས་མཛད་པའོ། །རྫོགས་ཆེན་སྙིང་ཏིག་ལ་དབང་གི་རྣམ་གྲང་མང་ཡང་འདི་རྣམས་སུ་མ་འདུས་པ་མེད་དོ། །ཀྱེ་མ་རྒྱལ་བའི་བསྟན་པའི་སྙིགས་མར་ཕྱིན། །ཐབས་མཁས་ཟབ་པའི་གདམས་པ་དཔག་མེད་ཀྱང་། །ཤེས་པས་མི་ཆོག་གཏེར་གྱི་ཁ་བྱང་འདྲ། །དེས་ན་བརྩོན་བསྐྱེད་འཇིག་རྟེན་བྱ་བ་ཐོང་། །རང་རིག་ཡེ་ཤེས་གཏེར་དང་མ་ཕྲད་པར། །ལུས་ངག་ཡིད་གསུམ་མ་ཡེངས་ཉམས་སུ་ལོངས། །མངྒ་ལཾ།། །།

ཉམས་ལེན་ལག་ཁྲིགས་མའི་ཁྲིད་ངོ་མཚར་ཅན།

ཉམས་ལེན་ལག་ཁྲིགས་མའི་ཁྲིད་ངོ་མཚར་ཅན་བཞུགས་སོ། །

རང་བཞིན་སྟོན་པ་ཀུན་ཏུ་བཟང་པོ་དང་། །ལོངས་སྤྱོད་རྫོགས་སྐུ་དཔལ་ལྡན་རྡོ་རྗེ་འཆང་། །ཐུབ་པ་སྤྲུལ་སྐུ་རྡོ་རྗེ་སེམས་དཔའ་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །རྒྱལ་བ་ཉིད་ཚུལ་དགའ་རབ་རྡོ་རྗེ་དང་། །འཇམ་དཔལ་བཤེས་གཉེན་ཤྲཱི་སིང་ཧ་དང་། །ཛྙཱ་ན་སུ་ཏྲ་བི་མ་མི་ཏྲ་སོགས། །མཁས་གྲུབ་བླ་མ་རྣམས་ལ་ཕྱག་འཚལ་ལོ། །རྒྱལ་བས་གསུངས་པའི་ཐེག་པ་ཀུན་གྱི་རྩེ། །བཅུ་བདུན་རྒྱུད་དང་དཔེ་རྒྱུད་དུམ་བུ་དང་། །མན་ངག་བརྒྱ་དང་བཅུ་དགུ་ཀུན་གྱི་སྙིང་། །ཟངས་ཡིག་ཅན་གྱི་ལག་ཁྲིད་ཉམས་ལེན་བཤད། །ཡང་དག་པར་རྫོགས་པའི་སངས་རྒྱས་ཀྱིས་ཐབས་མཁས་ལ་ཐུགས་རྗེ་ཕུན་སུམ་ཚོགས་པས། ཐེག་པ་རིམ་པ་དགུ་དང་སྡེ་སྣོད་གསུམ་གསུངས་ཤིང་། དེ་ཐམས་ཅད་ཀྱི་ཡང་རྩེ་རྣལ་འབྱོར་བླ་ན་མེད་པ་ལ་བསྐྱེད་པ་དང་། བསྐྱེད་རྫོགས་མཚམས་སྦྱོར་བ་དང་། རྫོགས་རིམ་ལས་འདིར་རྫོགས་པའི་རིམ་པ། དེ་ལས་

ཀྱང་སེམས་སྡེེ་དང་། ཀློང་སྡེ་དང་། ཆོས་ཐམས་ཅད་སེམས་དང་། རང་བཞིན་སྤྲོས་བྲལ་དུ་སྟོན་པ་ལས་ཀྱང་ཆེས་རྨད་དུ་བྱུང་བ། ཕྱིི་སྐོར་ཐ་སྙད་དང་། ནང་དྲན་པ་ལྟར་ངོ་བོ་སྟོན་པ་དང་། གསང་སྐོར་སྙིང་ལྟར་དཔེ་རྟགས་སུ་དོན་ངོ་སྤྲོད་པར་བྱེད་པ་ལས་དེ་ཐམས་ཅད་ཀྱི་སྤྲོས་པ་བཅད་ནས་ཡང་གསང་བླ་ན་མེད་པའི་རྒྱུད་བཅུ་བདུན་དང་། མན་ངག་བརྒྱ་དང་བཅུ་དགུ་ཐམས་ཅད་ཀྱང་དོན་ཡི་གེ་མ་རུ་མ་བུ་ལྔར་འདུས་པ་ལས། འདི་ལ་གསུམ། གདམས་པ་སྟོན་བྱེད་བླ་མ་དང་། གདམས་ཡུལ་སློབ་མ་དང་། གདམས་ངག་དངོས་སོ། །དང་པོ་ནི། རྒྱུད་གདམས་ངག་ཐམས་ཅད་ནས་མང་དུ་གསུངས་ཀྱང་མདོར་བརྗོད་ན། ཕྲ་ཊིག་ལས། །དག་ཅིང་དབང་པོ་མ་ཉམས་དང་། །མང་དུ་ཐོས་ཤིང་ང་རྒྱལ་ཞི། །ཚུལ་ཆོས་སྤངས་ཤིང་ཆོག་ཤེས་པ། །རྒྱུད་ལ་གོམས་ཤིང་ཉམས་སུ་ལེན། །ལྟ་བ་རྟོགས་ཤིང་འཛིན་ཆགས་ཆུང་། །བྱ་བ་ཉུང་ཞིང་བརྩོན་འགྲུས་ལྡན། །རྨོངས་པ་མེད་ཅིང་

ཆོག་ཤེས་པ། །ཡང་ན་སྡོམ་པ་གསུམ་ལ་གནས། །དཀའ་ཐུབ་ལྡན་ཞིང་མཆོག་ལ་སྦྱོར། །ནགས་ཁྲོད་བརྟེན་པ་བླ་མའོ། །ཞེས་གསུངས་སོ། །གདམས་ཡུལ་སློབ་མ་ནི། གཞུང་ལས། །ཨེ་མ་དད་དང་སྙིང་རྗེ་གཏོང་ཕོད་ཡངས་བ་ཆེ། །དབང་པོ་རྣོ་ཞིང་ངག་འཇམ་དུལ་ཚིག་སྨྲ། །བླ་མ་ལ་གུས་ཚིག་གི་སྤྲོས་པ་ཆོད། །མ་བརྟགས་གསང་ཚིག་གཞན་དུ་རྡུལ་ཙམ་ཡང་། །བརྗོད་པར་མི་བྱེད་ཉམས་ལེན་འདི་ལ་བརྩོན། །འདི་ནི་གསང་སྔགས་གསང་བའི་སྣོད་ཡིན་པས། །ཞེས་གསུངས་པས། དེ་ལྟར་དཔོན་སློབ་མཚན་ཉིད་བརྟག་པ་གལ་ཆེའོ། །གདམས་ངག་ལ་ཁྲིད་དང་ངོ་སྤྲོད་དང་ཚངས་སྤྲུགས་གདབ་པ་གསུངས་ཀྱང་། དོན་གྱི་དབང་བཞི་དང་འབྲེལ་བ་དང་། ཉམས་ལེན་ལག་ཁྲིགས་བཅུ་དྲུག་གི་ཁྲིད་གཉིས་ཡིན་ནོ། །གཞན་ཡང་ལག་ཁྲིད་ཀྱི་རིམ་པ་དུ་མ་ཡོད་ཀྱང་འདིར་འདུས་པས། མན་ངག་གི་དེབས་ནས་འདི་ལྟར་བྱ་བར་གསུངས་སོ། །དང་པོ་སྔོན་འགྲོ་དང་། དངོས་གཞི་སེམས་གཏན་ལ་དབབ་པ་དང་། རིམ་པ་མངོན་སུམ་རྟོགས་པར་བྱ་བ་དང་། རྗེས་ཡིད་ཆེས་བསྐྱེད་པའི་རྒྱབ་བརྟེན་བཤད་ཅིང་ཉམས་སུ་ལེན་པའི་རྟགས་ཚད་འབྲས་བུ་དང་བཅས་པའོ། །དང་པོ་ཉམས་སུ་ལེན་པ་དེས་སྤྲོས་བཅས་ཀྱི་དབང་ངམ། ཡང་ན་རྒྱུད་སྡེ་གཞན་གྱིས་ཀྱང་རུང་སྟེ། དབང་ལེགས་པར་ཐོབ་པར་བྱས་ལ་བླ་མ་བསྟེན་ཏེ་ངེས་ཤེས་སྐྱེ་ཞིང་བྱིན་བརླབས་འཇུག་པར་བྱ་བའི་ཕྱིར་བླ་མའི་རྣལ་འབྱོར་ནི། འདི་ཉིད་ཀྱི་རྡོ་རྗེ་ལམ་བསྟན་ནས། ཐུན་མཚམས་ཐམས་ཅད་དུ་བྱིན་བརླབས་ཀྱི་རྩ་བ་ཡིན་པས། དེས་ན་རང་གི་སྤྱི་བོའི་གཙུག་ཏུ་ཉི་མ་དང་ཟླ་བའི་གདན་ལ། བླ་མ་དང་སངས་རྒྱས་ཐམས་ཅད་དབྱེར་མེད་དུ་རྡོ་རྗེ་སེམས་དཔའ་གང་ཡང་རུང་

བར་བསྒོམས་ལ། དེའི་མཐེ་བོང་ལས་བྱང་ཆུབ་ཀྱི་སེམས་ཀྱི་ཆུ་རྒྱུན་བདག་གི་སྤྱི་བོ་ཚངས་པའི་བུ་གར་ཐིམ་ནས། དེ་ལ་གསོལ་བ་བཏབ་པས། ལུས་ཀྱི་འཁོར་ལོ་བཞི་རིམ་གྱིས་གང་ཞིང་། ལུས་སེམས་ཟག་པ་མེད་པའི་བདེ་བས་མྱོས་པ་ལ་སེམས་གཞག་ན། ལུས་བདེ་བ་དང་ལྡན་ཞིང་སེམས་ལ་ཆོས་ཉིད་ཀྱི་དོན་འཆར་རོ། །ཞེས་བྱུང་བས་ད་ལྟར་ཉམས་སུ་བླང་བར་བྱའོ། །དེའི་ཐུན་མཚམས་སུ་ལུས་རྡོ་རྗེ་རྩེ་གསུམ་པའི་འཁྲུལ་འཁོར། རྐང་མཐིལ་མཉམ་པར་སྦྱར། ལག་པས་སྤྱི་བོར་ཐལ་མོ་སྦྱར་ལུས་རྡོ་རྗེ་སྔོན་པོར་བསྒོམས་ཏེ། བཞག་ན་བསྲུང་བར་འགྱུར། ཞེས་བཤད་པས་ཐུན་རེ་ཙམ་བྱའོ། །སྔོན་འགྲོའི་དུམ་བུ་སྟེ་དང་པོའོ།། །།དེ་ནས་སེམས་སྦྱང་བར་བྱའོ། །དེ་ལ་བདུན་ཏེ། གཞུང་ལས་སྦྱར་བ་བདུན། སྦྱར་བའི་དགོས་པ་བདུན། འབྱོངས་པའི་ཚད་བདུན། དུམ་བུར་བསྟན་ཀྱང་འདིར་ཉམས་ལེན་དུ་བསྟན་པ་ནི། དང་པོ་དཔོན་སློབ་གཉིས་ཀ་ལུས་བདེ་བར་བྱས་ཏེ། བླ་མ་ལ་མཎྜལ་ཕུལ་ལ་བླ་མས་བསྟན་པར་བྱའོ། །ཐོག་མར་མི་རྟག་པ་ལ་བསམས་ཏེ། བྱང་ཆུབ་ཀྱི་སེམས་སྦྱོང་བ་ནི། འོ་སྐོལ་རྣམས་སྔར་འཁོར་བ་འདིར་ཐོག་མ་མེད་པ་ནས། ཡུལ་སྣང་འཁྲུལ་པ་ལ་བདེན་ཅིང་རྟག་པར་བཟུང་བས་འཁོར་བར་འཁྱམས་པའི་རྒྱུར་གྱུར་པ་ཡིན་པས། མི་རྟག་པ་དྲན་པར་བྱའོ། །དེ་ཡང་རང་ཉིད་སྐྱེས་ནས་རིམ་པས་འཆི་བ་དང་ཉེ་བར་གྱུར་ཏེ་ངེས་པར་འཆི་ལ། ཕ་མ་དང་། གཉེན་བཤེས་ཤི་བ་དང་བྲལ་བ་རྣམས་ཡིད་ལ་བྱས་ཏེ། དེ་ལྟར་ཤི་བ་དང་འཆི་བར་འགྱུར་བ་རྣམས་ལ་གང་ཕན་པ་གདག་པར་བྱའོ། །གཞན་ཡང་ད་ལྟར་ཉིད་ཀྱང་སྐད་ཅིག་མ་དུ་མ་འདས་ཏེ་འཆི་བ་ལ་ཉེ་བར་གྱུར་ཏོ། །

སེམས་ཅན་ཀུན་གྱི་དེ་ལྟར་མི་རྟག་པར་མ་ཤེས་པས་རྟག་པར་རེ་ཞིང་སྡོད་པའི་ཚིས་དུ་མ་བྱས་ཀྱང་ཐམས་ཅད་བོར་ཏེ། ངན་འགྲོ་རྣམས་སུ་ལྟུང་ཞིང་སྡུག་བསྔལ་བར་འགྱུར་བས་དེ་ལྟར་ཤེས་ནས་ངེས་འབྱུང་བསྒོམ་པར་བྱའོ། །དེ་ལྟར་འཁོར་བ་ལ་བློ་ལྡོག་ཅིང་ངེས་པར་མི་རྟག་པ་རྒྱུད་ལ་སྐྱེས་པ་ན་བརྟན་པའི་ཚད་ཡིན་ནོ། །གཉིས་པ་ནི་འཕྲལ་གྱི་བདེ་བ་དང་ཡུན་གྱི་བདེ་བ་ལ་བསམས་ལ་བྱང་ཆུབ་ཀྱི་སེམས་སྦྱོང་བ་ནི། ཀྱེ་མ་ངན་འགྲོ་དམྱལ་བ་དང་ཡི་དྭགས་དང་། དུད་འགྲོ་རྣམས་ལ་བདེ་བ་ཅུང་ཟད་མེད་ལ། ལྷ་དང་མི་རྣམས་ཀྱི་གནས་སྐབས་ཀྱི་བདེ་བ་འདི་ཡང་། རྒྱུ་སྦྱིན་པ་བཏང་ཡང་ཚུལ་ཁྲིམས་ལས་བྱུང་བ་ཡང་རྟག་པ་མེད་པར་འགྱུར་ཏེ། མྱ་ངན་གྱི་གནས་སུ་འགྱུར་བར་བཀའ་མདོ་རྒྱུད་ཐམས་ཅད་དུ་གསུངས་པ་མངོན་དུ་འགྱུར་རོ། །གང་གིས་ཀྱང་སྔར་དགའ་བ་དང་། བདེ་བ་མྱོང་བ་རྣམས་འགྱུར་བ་དང་། གཞན་སྐྱིད་པ་མི་རྟག །ལང་ཚོ་མི་རྟག །དབང་ཆེ་བ་མི་རྟག །ཟས་གོས་ནོར་ཐམས་ཅད་འགྱུར་བར་ཡིད་ཆེས་སོ། །ཞེས་ངེས་པར་བྱའོ། །དེ་དག་ཐམས་ཅད་ལས་མཐར་ཐུག་ཡུན་གྱི་བདེ་བ་ཅིག་ཐོབ་དགོས་ཏེ། དེ་ནི་སངས་རྒྱས་རྣམས་ཀྱི་ངེས་པའི་དོན་གྱི་གདམས་པ་ཞི་གནས་དང་ལྷག་མཐོང་བསྒོམ་ཞིང་། འཁྲུལ་པའི་སེམས་ཅན་ཐམས་ཅད་ལ་སྙིང་རྗེ་བསྒོམ་པ་ཡིན་ནོ་སྙམ་དུ་བསྒོམས་པས་སྡུག་བསྔལ་ལ་ཡིད་འབྱུང་བའི་དགོས་པ་ཡོད་ཅིང་། འདུས་བྱས་སྡུག་བསྔལ་དུ་མཐོང་བའི་ཚད་ཡིན་ནོ། །གསུམ་པ་རྐྱེན་དུ་མ་ལས་བསམས་ཏེ་བྱང་ཆུབ་ཀྱི་སེམས་སྦྱོང་བ་ནི། ད་ལྟར་སེམས་ཅན་ཐམས་ཅད་བདེ་བ་འདོད་ཀྱང་བདེ་བའི་རྐྱེན་ཉུང་། སྡུག་བསྔལ་གྱི་རྐྱེན་མང་། འཆི་བའི་རྐྱེན་ནི་མང་། གསོན་པའི་རྐྱེན་ནི་ཉུང་། མདོར་ན་འཁོར་བ་འདི་ན་བྱས་པའི་ལས་ལ་ལུས་ངག་ཡིད་གསུམ་སྐད་

ཅིག་ཀྱང་མི་དལ་བར་རྐྱེན་དུ་མ་ལ་སྦྱོར་མོད་ཀྱི། ཡང་དག་པའི་ལམ་དང་མ་འཕྲད་ཅིང་ཉམས་སུ་མ་བླངས་ན་རྣམ་རྟོག་གི་རྐྱེན་གྱིས་འཁོར་བ་ནས་སེམས་ཅན་འདི་རྣམས་ཐོན་པའི་དུས་མི་འདུག་པ། རང་ཡང་སྔར་འཁྲུལ་ཅིང་སེམས་ཅན་གཞན་ཡང་སྙིང་རེ་རྗེ། ཞེས་སྦྱངས་པས་དད་པ་སྔོན་དུ་འགྲོ་ཞིང་འཁོར་བ་ལས་ཡིད་འབྱུང་བའི་དགོས་པ་ཡོད་ཅིང་། རིགས་དྲུག་གི་སེམས་ཅན་ལ་སྙིང་རྗེ་སྐྱེ་ཞིང་ལས་སུ་དཀོན་མཆོག་མཆོད་ན་ཅི་མ་རུང་སྙམ་པ་ནི་བརྟན་པའི་ཚད་དོ། །བཞི་པ་བྱས་པ་ཐམས་ཅད་དོན་མེད་པར་འདུག་པ་ལ་བསམས་ཏེ་བྱང་ཆུབ་ཀྱི་སེམས་སྦྱོང་བ་ནི། ད་ལྟ་རང་ལུས་ངག་ཡིད་གསུམ་གྱིས་རང་བདེ་རུ་རེ། ལོངས་སྤྱོད་ཕུན་སུམ་ཚོགས་སུ་རེ། གཞན་པས་ལྷག་ཏུ་རེ། དེ་རྣམས་མ་བྱུང་གི་དོགས་ནས་བྱ་བའི་རྣམ་པ་མི་དགེ་བ་སྣ་ཚོགས་ལ་མི་འཛེམ་པར་ཚོང་དང་ཞིང་ལས་དང་། ཁུར་གླ་དང་། གསོག་འཇོག་དུ་མ་བྱེད་པ་དང་། རང་ཉིད་སང་འཆི་ཡང་མི་ཤེས་པས་ཟས་དང་གོས་ལ་སོགས་པས་འཚོ་བའི་ཚིས་དུ་མ་བྱེད་པ་རེ་འཁྲུལ། དོན་ཅུང་ཟད་ཀྱང་མེད་དེ་སྡིག་དང་སྡུག་པས་ལོངས་སྤྱོད་དུ་མ་བསགས་ཀྱང་། དབང་མེད་པར་འཁོར་དང་ཉེ་དུ་ཐམས་ཅད་དང་། ཐ་ན་ལུས་ཀྱང་དོར་ནས་རང་ངན་འགྲོར་བགྲོད་དགོས་པ་འདིས་ཅི་ཞིག་བྱ། ཞེས་ངེས་པར་བསམ་པར་བྱའོ། །དེས་བླ་མའི་མན་ངག་ལ་འཇུག་པར་བྱ་བའི་དགོས་པ་ཡོད་ཅིང་། བླ་མའི་གདམས་ངག་གཅིག་ཅི་ནས་ཀྱང་ཐོབ་པར་བྱའོ་སྙམ་པ་སྐྱེས་པ་ནི་ཚད་ཡིན་ནོ། །

ལྔ་པ་སངས་རྒྱས་ཀྱི་ཡོན་ཏན་ལ་བསམས་ཏེ་བྱང་ཆུབ་ཀྱི་སེམས་སྦྱོང་པ་ནི། ད་ལྟའི་སྡུག་བསྔལ་ཐམས་ཅད་དང་ནི་བྲལ། ཡོན་ཏན་ཐམས་ཅད་ནི་ཐོབ། རང་གཞན་གྱི་དོན་ཐམས་ཅད་ནི་གྲུབ། ས་དང་། ལམ་དང་

ཕ་རོལ་དུ་ཕྱིན་པ་ནི་བརྙེས། དེ་ལྟ་བུའི་སངས་རྒྱས་དེ་ད་རེས་མི་ལུས་འདིའི་ཐོག་ནས་མ་ཐོབ་ན། ཤིན་ཏུ་དཀའ་བར་འདུག་པས་ད་རེས་ནས་བླ་ན་མེད་པའི་བྱང་ཆུབ་ཐོབ་པའི་ཐབས་ལ་བརྩོན་འགྲུས་བསྐྱེད་པར་བྱའོ་སྙམ་པར་བྱའོ། །དེས་བསྒོམ་པ་སྲན་ཐུབ་པའི་དགོས་པ་ཡོད་ཅིང་། ཅི་ནས་ཀྱང་མ་བསྒོམས་ན་སངས་མི་རྒྱ་བར་འདུག་པས་བརྩོན་འགྲུས་མི་གཏང་དགོས་སྙམ་པ་ནི་འབྱོངས་པའི་ཚད་དོ། །དྲུག་པ་བླ་མའི་གདམ་ངག་ལ་བསམས་ཏེ་བྱང་ཆུབ་ཀྱི་སེམས་སྦྱོང་བ་ནི། འཁོར་བ་ཐོག་མེད་ཀྱི་སྒྲིབ་པ་ལོ་ཟླས་དག་ནུས་ཤིང་། སངས་རྒྱས་ཀྱི་ཡོན་ཏན་ལོ་ཟླས་བསྐྱེད་ནུས་ལ། བླ་མའི་གདམས་ངག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་མངོན་དུ་མཛད་པ་འདི་འདྲ་དང་ཕྲད་པ་ལ་བྱ་བ་གཞན་གྱིས་ནིི་ཅི་ཞིག་བྱ། སྒྲུབ་པ་ལ་བརྩོན་འགྲུས་བྱ་བསྐྱེེད་པར་བྱའོ་སྙམ་དུ་བྱའོ། །དེས་བྱ་བ་གཞན་ལ་མི་འཇུག་པའི་དགོས་པ་ཡོད་ཅིང་། འཇིག་རྟེན་གྱི་ལོངས་སྤྱོད་ཀྱིས་ཅི་ཞིག་བྱ་དར་ཅིག་བསྒོམས་ཀྱང་མི་རྟོག་པ་སྐྱེ་བའི་གྲོགས་སུ་འདུག་སྙམ་པ་ནི་འབྱོངས་པའི་ཚད་དོ། །བདུན་པ་རྣམ་པར་མི་རྟོག་པ་ལ་བསམ་ཏེ་བྱང་ཆུབ་ཀྱི་སེམས་སྦྱོང་བ་ནི། དེ་ལྟར་བླ་ན་མེད་པའི་བྱང་ཆུབ་ཐོབ་པ་ལ་ཐབས་ཁྱད་པར་ཅན་རྣམ་རྟོག་གཡོ་བ་བཟུང་ནས་རྣམ་པར་མི་རྟོག་པ་ལ་བསླབ་པར་བྱའོ་སྙམ་དུ་བྱས་ལ་རྟོག་པ་བཟུང་ཞིང་། སེམས་སྐད་ཅིག་ཀྱང་མི་གནས་པ་རྣམས་སྙིང་རེ་རྗེ་ཞེས་བསྒོམ་པར་བྱའོ། །དེས་བྱང་ཆུབ་ཀྱི་སེམས་གོང་ནས་གོང་དུ་འཕེལ་བའི་དགོས་པ་ཡོད་ཅིང་། གནས་པ་ཡུན་རིང་དུ་སོང་ནས་འདི་ལ་རྟག་ཏུ་གོམས་པར་བྱའོ་སྙམ་པ་ནི་བརྟན་པའི་ཚད་དོ། །དེ་ལྟར་སེམས་སྦྱོང་བདུན་པ་འདི་གལ་ཆེ་སྟེ། རྒྱབ་ཡིག་ནས་སྤྲུལ་སྐུའི་ས་བོན་བཞག་པའི་ཕྱིར། སྔོན་དུ་འདི་སྦྱང་བ་གལ་ཆེ་བར་བཤད་ཅིང་། དད་པ་དྲག་པོ་དང་སྙིང་རྗེ་མ་སྐྱེས་ན། གསང་སྔགས་ཀྱི་སྣོད་དུ་མི་རུང་

བས་འདི་ཉིད་སྦྱོང་དུ་གཞུག་གོ། བྱང་ཆུབ་ཀྱི་སེམས་སྦྱོང་བ་བདུན་པའི་ཁྲིད་ཀྱི་རིམ་པ་སྟེ་གཉིས་པའོ།། །།དེ་ལྟར་སེམས་འབྱོངས་པ་དེ་སྔགས་ཀྱི་ཐབས་ལམ་ལ་འཇུག་པར་བྱ་སྟེ། བསྐྱེད་པའི་རིམ་པ་ནི་སྔར་རྒྱུད་སྨིན་པ་དང་གནས་སྐབས་ཀྱི་འབྲས་བུའི་དོན་དུ་ཡིན་ལ། འདིར་ཆགས་མེད་རླུང་ལ་བསླབ་པ་དང་། ཆགས་ཅན་ཐིག་ལེ་བསླབ་པ་གཉིས་གསུངས་ཏེ། དང་པོ་ལ་ཡང་ཤེས་པར་བྱ་བའི་རྩ་རླུང་གི་བཤད་པ་ནི་འདི་ཉིད་ཀྱི་རྩ་གནས་འཁོར་ལོ་དང་། རླུང་གི་སྡོམ་བྱང་ནས་གསུངས་ཏེ་རྒྱ་ཆེའོ། །འདིར་ནི་གཞུང་འདི་དང་རླུང་གི་པྲ་ཁྲིད་མཆོག་བསྒྲུབ་པའི་ཡན་ལག་ཏུ་དགོངས་པ་དེ་བསྡུས་ནས་སྟོན་ཏོ། །དང་པོ་ནི། ལྟེ་བ་སྐྱེད་བྱེད་ཀྱི་འཁོར་ལོ་དང་། སྙིང་གར་དྲན་པ་འདུས་པའི་འཁོར་ལོ་དང་། མགྲིན་པར་རོ་རྣམས་འདུས་པའི་འཁོར་ལོ་དང་། སྤྱི་བོ་རྩེ་མོ་རྣམ་པར་བཀོད་པའི་འཁོར་ལོ་བཞི་དག་པར་བྱ་བའི་ཕྱིར། ལུས་དལ་བ་བརྟེན་ཅིང་། ཁྲུས་དང་བཀུ་མཉེ་ལ་སོགས་པ་བྱས་ནས། དབེན་པར་སྟན་བདེ་བ་ལ་འདུག་ནས་ལུས་རྡོ་རྗེ་སྐྱིལ་ཀྲུང་བཅའ། ལག་པ་མཉམ་གཞག་གི་ཕྱག་རྒྱ་བཅའ། རྐེད་པ་བསྲང་མགྲིན་པ་སྒུར་བར་བྱས་ལ། དེ་ནས་དམིགས་པ་ནི་ལྔ་སྟེ། རླུང་གི་ཁ་དོག་ལ་བསླབ་པ་དང་། དབྱིབས་དང་། གྲངས་དང་། འགྲོ་འོང་དང་། བུམ་པའི་སྦྱོར་བ་ལ་བསླབ་པའོ། །དང་པོ་ནི་རླུང་རོ་བུས་ལ་དེ་ནས་རང་གི་སྨིན་མཚམས་སུ་རླུང་ཐམས་ཅད་འདུས་པའི་ངོ་བོ་ཐིག་ལེ་ཟླུམ་ལ་དཀར་བ་ཡུངས་ཀར་ཙམ་ཞིག་ལ་ཤེས་པ་གཏད་ལ་ཡུན་རིང་དུ་བསྒོམ། དེ་ནས་རང་གི་ངོ་བོ་ཡང་དེའི་མདོག་དང་མཚུངས་པར་བསྒོམ། དེ་ནས་ལུས་ཐམས་ཅད། དེ་ནས་ཐོ་ཕྱི་ཉེ་འཁོར། དེ་ནས་སྟོང་གསུམ་ཙམ་སྣང་བ་ཐམས་ཅད་དཀར་མེར་མེར་བ་ལ་བློ་བཞག་སྟེ་ཡང་ནས་ཡང་དུ་གོམས་

པར་བྱས་པས། གོམས་པའི་རྟགས་ལུས་ཡང་། ངག་གསལ། སེམས་གནས་པའོ། །གཉིས་པ་དབྱིབས་ནི། དེ་ནས་རླུང་གི་ཐིག་ལེ་དཀར་ལ་སྔོ་བ་སྲན་མ་ཙམ་གཅིག་སྨིན་མཚམས་ནས་སྣ་རྩེར་བསྒོམས་ལ་མིག་ཀྱང་ལྟ་སྟངས་དེར་གཏད་དེ། རླུང་དལ་ལ་རི་རབ་ཕྱིར་བཏང་བས་ཐིག་ལེ་དེ་ཧྲིལ་ལི་ལི་ཕར་སོང་ཞིང་ལུས་སེམས་སྟོང་སིང་སིང་སོང་བར་བསམ། ཚུར་བྱུང་ཙམ་ན་རྔུབ་པ་དང་བསྟུན་ནས་ཐིག་ལེ་སྨིན་མཚམས་སུ་བྱུང་བས་བསིལ་སིང་བ་ལ་བློ་བཞག །གྲང་བ་ཆེའམ་ལུས་གྲང་ཞིང་འདར་ན་ཐིག་ལེ་ཚ་ལྷང་ལྷང་བ་ལྟར་བསྒོམ། དེས་སེམས་ཟིན་ཅིང་དམིགས་པ་གང་གཏད་པར་དེ་ལྟར་སྣང་ན་འབྱོངས་པའོ། །དེས་ཀྱང་རྣམ་རྟོག་མ་ཟིན་ན། གསུམ་པ་གྲངས་ལ་བསླབ་པ་ནི། ལུས་སྔར་ལྟར་བྱས་ལ་ཤེས་པ་རླུང་དང་འགྲོ་ལྡོག་གཅིག་ཏུ་བསླབ་པར་བྱ་སྟེ། རླུང་ཕར་འགྲོ་ཙ་ན་ཤེས་པ་དང་དུས་ཅིག་ཏུ་གཏད་ལ་བསྒོམ། ཚུར་འོང་ཙ་ན་ཡང་དེ་བཞིན་དུ་བྱ། དེ་ལྟར་འགྲོ་འོང་གཉིས་གཅིག་ཏུ་བགྲངས་པས་གཅིག་ནས་གཉིས་དང་། དེ་བཞིན་དུ་གྲངས་བཟུང་བས་ཞག་གཅིག་ལ་རླུང་ཉི་ཁྲི་ཆིག་སྟོང་དྲུག་བརྒྱ་ཡོད་ཀྱང་། ཐུན་དུ་བཅད་ཅིང་སྟོང་བརྒྱད་བརྒྱའི་བར་ཙམ་དུ་ཤེས་པ་མ་ཡེངས་པ་གལ་ཆེ། དེ་ནས་རྣམ་རྟོག་གནས་པ་དང་། རླུང་དབྱུང་བ་དང་རྔུབ་པ་ཕར་ཚུར་དལ་གྱིས་ཇེ་རིང་ལ་བཏང་བས་ཐ་མར་ཡུན་རིང་དུ་གནས་ཤིང་སྡོད་ན་འབྱོངས་པ་ཡིན་ནོ། །དེ་ནས་བཞི་པ་འགྲོ་འོང་ལ་བསླབ་པ་ནི། རང་གི་ལྟེ་བར་ཐོད་པ་ཕྱི་དཀར་ལ་ནང་དམར་སེང་ངེ་བ་གཅིག་གི་ནང་དུ་རླུང་གི་རྡོ་རྗེ་སྔོན་པོ་ནས་ཙམ་ཞིག་བསྒོམས་ཏེ། རླུང་ཕྱིར་གཏོང་ཙ་ན་རྒྱང་རིང་པོར་སྣ་ནས་སོང་བར་བསྒོམ། ཚུར་རྔུབ་ཙ་ན་ཐོད་པའི་ནང་དུ་སྔོ་མེར་གྱིས་བྱུང་བར་བསྒོམ་ཞིང། ལུས་བདེ་ཕྲིལ་ཕྲིལ་བ་ལ་བློ་བཞག །དེ་

ནས་རྣམ་རྟོག་གནས་པ་ན་ཚུར་ལ་རྒྱང་ཐུང་ངུ་ཐུང་ངུ་སོང་ནས་མཐར་སྣའི་རྩེར་སོར་བཅུ་དྲུག་ཙམ་དང་། ནང་གི་འགྲོ་འོངས་ལ་སྦྱར་ཞིང་ཕར་གཏོང་བ་དང་། ཚུར་རྔུབ་པ་རྒྱུན་རིང་བ་གལ་ཆེའོ། །དེ་ནས་ལྔ་པ་བུམ་པའི་སྦྱོར་བ་ལ་བསླབ་པ་ནི། རླུང་སྔར་ལྟར་ལན་འགའ་སྔོན་དུ་སྦྱངས་པ་ལ། རྡོ་རྗེ་དེ་ནང་དུ་ཐོད་པ་ལ་ཐིམ་ནས་ཐམས་ཅད་ཞུ་ཞིང་ལྟེ་བར་ཡི་གེ་རང་བཞིན་གྱིས་ཧ་གཅིག་གནས་པ་དེར་གྱུར་པར་བསམ་ལ་ལྟོ་བ་རླུང་གིས་མེར་གྱིས་དགང་ཞིང་འོག་སྒོ་དྲག་ཏུ་བསྡམས་ལ། རླུང་དང་ལུས་ཐམས་ཅད་ན་བུན་ལྟར་བསམ་ཞིང་། ཕར་གཏོང་ཙ་ན་རླུང་སེམས་ནམ་མཁའ་དང་འདྲེས་པ་ལྟར་སྟོང་སངས་སངས་སོང་ནས་རྣམ་པར་མི་རྟོག་པ་དང་བསྲེས་ལ་བསྒོམ། འབྱོངས་པའི་རྟགས་སུ་ལུས་ཡོད་པ་མ་ཚོར་བ་དང་། རླུང་གར་དྲངས་པའི་སར་འབྱུང་བ་དང་། ཟས་དང་གོས་ཡིད་ལ་མི་འབྱུང་བ་དང་། རྟོག་པའི་འགྱུ་བ་རང་འགགས་པའོ། །དེ་དག་ནི་རླུང་གི་རྣལ་འབྱོར་ལ་བསླབ་པའོ། །དེའི་ཡན་ལག་རྣམས་གྲངས་མང་ཡང་ལས་ཁ་ཚར་དུ་བབས་སོ། །རླུང་ལ་བསླབ་པའི་ཁྲིད་ཀྱི་རིམ་པ་བསྟན་པའི་དུམ་བུ་སྟེ་གསུམ་པའོ།། །།དེ་ལྟར་རླུང་ལ་འབྱོངས་ནས་ཐིག་ལེ་ལ་བསླབ་པ་ལ་གཉིས་ལས། ཆགས་ཅན་ཡབ་ཡུམ་གྱི་བདེ་བ་ལ་བསླབ་པ་ནི་ཆིངས་བཅོ་ལྔས་བསྟན་ཏེ། པྲ་ཁྲིད་ནས་གསལ་བས་འདིར་མ་བྲིས་སོ། །ཆགས་བྲལ་རླུང་སེམས་ཀྱི་བདེ་བ་རང་ལ་བསྒོམ་པ་ནི། ལུས་གནད་སྔར་དང་འདྲ་བ་ལ། དམིགས་པ་ནི། རང་གི་ལུས་སྟོང་སང་ངེ་བར་བསྒོམས་པའི་སྤྱི་བོ་རྩེ་མོ་རྣམ་པར་བཀོད་པ་རུ། ཐིག་ལེ་སྟོང་པའི་སྒྲོན་མ་དཀར་ཞིང་སྣུམ་པ་སྲན་མ་ཙམ་གཅིག་བསམ་ཏེ། རླུང་བུམ་པའི་སྦྱོར་བ་སྔར་ལྟར་བྱས་པས་ཐིག་ལེ་སྲན་

ཆུང་ཙམ་ཕྲོམ་ཕྲོམ་བྱུང་ནས་མགྲིན་པར་སླེབས་པས་ལུས་བདེ་ཕྲིལ་གྱིས་སོང་བ་ལ་སེམས་བཞག་ལ། དེ་ནས་སྙིང་གར་སླེབས་པས་དེ་བས་བདེ་བ་རྒྱས། དེ་ནས་ལྟེ་བར་སླེབས་པས། དེ་བས་ཀྱང་བདེ་བ་རྒྱས། གསང་བར་སླེབས་པས་བདེ་བ་མཆོག་ཏུ་རྒྱས་པ་ལ་ཤེས་པ་བཞག་པས་ལུས་བདེ་སྟོང་དུ་ཕྲིལ་གྱིས་འགྲོ་སྟེ། བདེ་བ་རྒྱས་ཤིང་མི་ཐུབ་པ་སྙམ་བྱེད་ན། ཡང་ཕར་ལ་ཟློག་ལ་ཐིམ་ཞིང་སྤྱིི་བོར་ཤེས་པ་གཏད་དོ། །ཡང་ལུགས་གཅིག་ལ་སྔར་བཞིན་ལྟེ་བར་ཧ་དམར་པོ་དེ་བསྒོམས་ལ། ཐིག་ལེ་སྲན་ཆུང་ཙམ་བབས་པ་གཅིག་ནས་གཅིག་ཏུ་ཐིམ་ནས་ཧ་དེ་ལ་ཐིམ། དེ་ནས་བདེ་ཕྲིལ་གྱིས་སོང་བ་དང་། ཐིག་ལེ་ཧ་དང་བཅས་པ་ཇེ་ཆུང་ཇེ་ཕྲལ་སྟོང་སངས་ཀྱིས་སོང་ནས་མི་རྟོག་པ་ལ་བཞག་གོ། དེས་ནི་ལུས་ཐམས་ཅད་བདེ་སྟོང་དུ་འགྲོ་བ་དང་། རིག་པ་རྩེ་གཅིག་ཏུ་གནས་པ་དང་། རླུང་དང་ཐིག་ལེ་འབྱོངས་པ་དེ་རིག་པ་མངོན་སུམ་ཉམས་སུ་ལེན་པའི་ཚེ། འབྱུང་བ་དག་པ་ལ་ཚེགས་མེད་པ་དང་། ཟས་དང་གོས་ལ་སྲེད་པ་གཅོད་པ་དང་། མཚན་ཉིད་འཛིན་པའི་རིག་པ་ལ་རང་དབང་ཐོབ་པར་བྱེད་པ་ལ་ཤིན་ཏུ་གལ་ཆེའོ། །མདོར་བསྡུས་ན་གཟུགས་སྒྲ་དྲི་རོ་རེག་བྱ་ཐམས་ཅད་ལ་བརྟེན་ནས་སེམས་ལ་རང་དབང་ཐོབ་པར་བྱེད་པ་གལ་ཆེ་བར་མདོ་རྒྱུད་ཐམས་ཅད་དུ་གསུངས་ཤིང་། ཁྱད་པར་དུ་རྣམ་རྟོག་ཤས་ཆེ་བ་ལ་རང་བཞིན་རྫོགས་པ་ཆེན་པོ་འདིར་བསམ་གཏན་གྱི་རིམ་པ་དཔག་ཏུ་མེད་པ་གསུངས་སོ། །ལས་ཅན་སྔར་སྦྱངས་པ་ཅན་སེམས་ལ་དབང་ཐོབ་པ་ནི་འདི་རྣམས་སྔོན་དུ་སོང་ཟིན་པས་འདིར་བཤད་པའི་རིམ་པ་མ་བྱས་ཀྱང་ཆོག་པ་ཉིད་དོ། །ཐིག་ལེ་སྦྱོང་བའི་ཁྲིད་ཀྱི་རིམ་པ་སྟེ་དུམ་བུ་བཞིི་པའོ། །དེ་ནས་སྤྲོས་པ་གཅོད་པའི་རིམ་པ་འབྱུང་བ་ལྔ་རང་སར་དག་པར་བྱེད་པའི་གནད་ནི་འབྱུང་བཞི་ཟད་པའི་རྒྱུད་ནམ་མཁའ་ལ། འཁྲུལ་གཞི་ཟད་པའི་རིག་

༼འདི་༢༩་་་༣༠གཉིས་འདི་ན་མ་ནོག་འདུག།༽པ་རྒོད་ཡན་དེ། །སྣ་ཚོགས་ཁྱབ་བརྡལ་ཆེན་པོའི་ཁང་བཟངས་སུ། །འཛིན་བྱེད་དྲན་པ་ཟད་པའི་ལྕགས་ཀྱུ་ཡིས། །གསལ་བྱེད་སྟེང་འོག་མེད་པའི་སྙིང་ནས་ནི། །མ་ཡེངས་བསམ་པ་ཟད་པའི་ཚུལ་གྱིས་གཟུང་བར་བྱའོ། །ཞེས་འབྱུང་བ་ཨ་ལྔའི་དོན་སྐྱེ་མེད་དུ་ཉམས་སུ་ལེན་པ་སྟེ། གོང་མ་རླུང་དང་ཐིག་ལེ་འབྱོངས་ནས་འབྱུང་བ་ལྔ་ཟད་པར་བྱེད་པ་ཡིན་པས། དང་པོ་ནི་ལུས་གནད་སྔར་ལྟར་བྱ། དམིགས་པ་ནི་རང་གི་སྙིང་ཨ་སྔོན་པོ་ཚོན་གང་བ་གཅིག་ཏུ་བསམས་ཏེ། རླུང་དང་སེམས་ཀྱི་འདུ་བྱེད་ཐམས་ཅད་ཨ་དེ་ལ་བསྟིམས་ལ། དེ་བཞིན་གཤེགས་པ་ཐམས་ཅད་ཀྱི་དགོངས་པའི་དོན་ཆོས་ཐམས་ཅད་སྤྲོས་པ་དང་བྲལ་བ་ལ་མཉམ་པར་བཞག་ཅིང་། རིག་པའི་ངོ་བོ་ཨའི་རང་བཞིན་དུ་ཉམས་སུ་བླང་། དེ་ནས་རྣམ་པར་མི་རྟོག་པ་དང་ཐམས་ཅད་ནམ་མཁའ་ལྟར་རོ། །འདིའི་དུས་ན་ཡིད་ཀྱི་སེང་གེ་ནི་རྣམ་རྟོག་གི་མིང་ཡིན་ལ་ཡིད་ཀྱི་བུ་ནི་ཡུལ་ཨ་ལ་བསྡུ་བ་ཡིན་པས་རྩེ་གཅིག་ཏུ་མ་ཡེངས་པར་བྱའོ། །ནམ་མཁའ་དག་པར་བྱེད་པའོ། །གཉིས་པ་ནི། སྤྱི་བོའམ། མདུན་གྱི་ནམ་མཁའ་སྣ་རྩེའི་ཐད་ཙམ་དུ་ཨྸ་ལྗང་ནག་ལ་ཤེས་པ་གཏད་ལ་རླུང་དང་རྣམ་རྟོག་གཡོ་བ་ཐམས་ཅད་དེ་ལ་བསྟིམས་ལ་མི་རྟོག་པ་བསྒོམ་མོ། །ནམ་མཁའི་བུ་མོ་ནི་རླུང་འདུ་བྱེད་དང་བཅས་པ་ཡིན་ལ། ནམ་མཁའི་བུ་ནི་ཐབས་ཀྱི་ཆ་ཡུལ་དུ་བསྒོམ་པའི་ཨྸཨ་དེ་ཉིད་ཡིན་པས་བཟུང་བ་སྟེ། དེས་ནི་རླུང་གི་ཁམས་རྣམ་པར་དག་པར་བྱེད་པའོ། །གསུམ་པ་ནི། ཡང་སྣ་རྩེའམ་སྙིང་གར་ཨྸཨ་དཀར་པོ་ལ་སེམས་གཏད་ཅིང་འདུ་ཤེས་དང་། རླུང་ཐམས་ཅད་དྲན་པ་རང་ཡུལ་དུ་བཏང་ནས་དབུགས་ཕྱི་ནང་དུ་རྒྱུ་བ་དགག་ཅིང་བཞག་པ་ནི། རླུང་གི་ཞགས་པ་ནི་འདུ་ཤེས་ཀྱི་ཡུལ་འཛིན་པ་ལ་

ཟེར་ལ། དེ་འཛིན་པའི་ཨ་སུམ་བརྩེགས་བསྒོམས་པ་ནི། ལྕགས་ཀྱུ་ཡིན་པས་ཆུ་རྣམ་པར་དག་པར་བྱེད་པའོ། །བཞི་པ་ནི་ཡང་མགྲིན་པའི་ནམ་མཁའ་ཨཨཨཨ་དམར་པོ་ལ་རིག་པ་གཏད། དེ་འཛིན་པའི་ཡུལ་ཚེར་མ་ལ་སོགས་སྡུད་བྱེད་ཀྱི་དངས་མ་མིག་གི་རྣམ་ཤེས་རང་དག་ལ་སེམས་གཟུང་བ་ནི། མེའི་མི་བོ་ཆེ་ཞེས་བྱ་བ། ཚོར་བ་ཡིན་ལ་མེའི་གསལ་ཤིང་ནི་རླུང་དེར་སྡུད་པ་ཡིན་པས་ཨ་བཞི་བརྩེགས་བསྒོམས་ནས། ཚོར་བ་རང་རྒྱུད་དུ་འཛིན་པ་མེ་དག་པར་བྱེད་པ་ཡིན་ནོ། །ལྔ་པ་ནི་ལྟེ་བའམ་བར་སྣང་ལ་ཡིིིི་གེ་ཨཨཨཨཨ་སེར་པོ་ལ་ཤེས་པ་གཏད་ལ་གཟུང་ཡུལ་མཆེད་པ་ཐམས་ཅད་ཐིམ་ཞིང་། སྒོ་ལྔ་རང་རྒྱུད་དུ་འཛིན་པ་དག་ནས་རྣམ་པར་མི་རྟོག་པ་བཞག་ལ་བསྒོམས་པ་ནི། སའི་གྲོང་ཁྱེར་གྱི་ནི་ལུས་སྒོ་ལྔ་དང་བཅས་པ་ཡིན་ལ་ཆུ་ནི་འདུ་ཤེས་ཀྱི་ཨ་ལྔ་བརྩེགས་བསྒོམས་པ་ཡིན་པས་ལུས་ཀྱི་འཛིན་པ་འཇིག་པར་བྱེད་པས་གཞུང་ནས་བརྡའ་སྐད་དུ་གསུངས་པ་ཡིན་ནོ། །ས་རྣམ་པར་དག་པར་བྱེད་པའོ། །འདིར་བསྟན་པའི་ཨ་ལྔ་ལ་བསྒོམས་པས་འབྱུང་བ་རང་དངས་སུ་འགྲོ་བ་ཡིན་ལ། རྩ་གནས་འཁོར་ལོ་དང་སྒྲ་གནད་ཀྱི་རྒྱུ་མཚན་གྱིས། འཁོར་ལོ་བཞིར་བསྒོམ་ཞིང་དེར་རླུང་དང་སེམས་བསྡུས་ཏེ་བསྒོམས་པ་དང་། དེ་ཡང་སྐྱེ་མེད་སྤྲོས་བྲལ་དུ་བཞག་པར་བྱ་བ་ཡིན་པར་མངོན་ནོ། །སྐབས་འདི་ཡི་རྃ་ཡྃ་ཁྃ་གསུམ་པོ་ནི། རླུང་མེ་ཆུའི་ས་བོན་ཡིན་པས་དེ་ལྟར་བསྒོམ་དུས་སུ་འབྱུང་བ་འཁྲུགས་ནས་མ་བདེ་ན། གནས་གསུམ་དུ་བཞག་ཅེས་པ་ནི། ལུས་ལྕི་ཞིང་བྱིང་ལ་འཐིབས་པ་བྱུང་ན་རྩེ་མོའི་འཁོར་ལོ་ཡྃ་ལྗང་ནག་བསམ་སྟེ། རླུང་དང་རྣམ་རྟོག་དེར་བཅུག་ལ་ནམ་མཁར་ཕྱུར་ཕྱུར་སོང་བར་བསྒོམས་ན་དེ་མ་ཐག་ཏུ་ཤེས་པ་ཡེར་ཞིང་འགྲོའོ། །ལུས་ཆུ་ཤས་ཆེར་འཁྲུགས་ནས་གྲང་

ཞིང་འདར་ན་རོ་རྣམས་འདུས་པའི་འཁོར་ལོ་རྃ་དམར་པོ་འབར་བ་དང་བཅས་པ་བསྒོམས་ལ་རླུང་དྲག་ཏུ་བཅུག་པས། སུམ་མདོའི་ཧ་ལས་མེ་བྱུང་ནས་ལུས་ཐམས་ཅད་ཁྱབ་པར་བསྒོམས་ན་གྲངས་བ་སེལ་ལོ། །མེའི་སྐྱོན་གྱིས་ཚ་ཞིང་རྩེད་པ་དང་མཁྲིས་པ་རྒྱས་ན་སྙིང་ཀའམ་ཕོ་བར་ཁྃ་དཀར་ཞིང་བསིལ་བ་ཆུ་འཁྱགས་ལྟར་བསམ་ནས་རླུང་སིད་ཀྱི་སྒྲས་དྲངས་ལ་དབྱུང་། དེས་ཚད་པ་ཞི་བར་འགྱུར་རོ། །འདིར་མ་གསུངས་ཀྱང་རླུང་གིས་ཤེས་པ་འཕྱོས་པ་དང་། གྱེན་དུ་འཚང་བ་དང་། སྙིང་རླུང་ལྟ་བུ་བྱུང་ན་ལྟེ་བར་ལྃ་གསེར་གྱི་ཁ་དོག་ཅན་ཤིན་ཏུ་ལྕི་བ་བསྒོམས་ལ་འོག་སྒོ་དྲག་ཏུ་བསྡམས་ནས་ཐུར་ལ་རླུང་སེམས་གཏད་ན་ཐེ་ཚོམ་མེད་པར་ཕན་པར་འགྱུར་རོ། །འདིར་གེགས་སེལ་གཙོ་བོ་བརྗོད་པའོ། །ཡན་ལག་མང་པོ་དུམ་དུམ་ཁྲིགས་ལ་སོགས་རྣམས་ན་ཡོད་དོ། །སྤྲོས་པ་གཅོད་པའི་སྒྲོན་མ་འབྱུང་བ་ལྔ་རང་དངས་ཀྱི་མན་ངག་གི་དུམ་བུ་སྟེ་ལྔ་པའོ།། །།དེ་ནས་ཆོས་སྤྱི་དང་རང་བཞིན་རྫོགས་པ་ཆེན་པོའི་ལྟ་སྒོམ་སྤྱོད་པའི་བྱེ་བྲག་ཤེས་པར་བྱའོ། །སྦས་པ་མིག་འབྱེད་ལྟར་བསྟན་པར་བྱ་སྟེ། དང་པོ་ཆོས་སྤྱི་བསྟན་པར་བྱའོ། །དང་པོ་འཛིན་ཆགས་མེད་པ་སྤྱོད་པའི་མན་ངག་གིས་སྣང་བ་ཟིལ་གྱིས་མནན་པ་ནི། ཆོས་སྤྱི་ནས། གང་ཟག་གང་གིས་གང་ལྟར་སྤྱོད་ན་ལུས་ངག་ཡིད་ཀྱི་མི་དགེ་བ་བཅུ་སྤངས་ཏེ་ཚུལ་ཁྲིམས་དང་དམ་ཚིག་ལས་མི་འགལ་བར་སྤྱོད་པ་དང་། ཐམས་ཅད་ལ་མ་ཞེན་པའི་ཚུལ་གྱིས་གང་བྱེད་པ་ཐམས་ཅད་ཆོས་སུ་འགྲོ་བར་སྤྱོད་པ་སྟེ། དེས་གནས་སྐབས་ལྷ་མིའི་གོ་འཕང་དང་མཐར་ཐུག་བྱང་ཆུབ་ཐོབ་པར་བྱེད་པའོ། །གཉིས་པ། དམིགས་གཏད་མེད་པར་བསྒོམ་པའི་མན་ངག་གིས་དྲན་བྱེད་ཀྱི་ཡིད་ཟིལ་གྱིས་མནན་པ་ནི། འདིར་ཆོས་སྤྱི་དང་མཐུན་

པའི་བསྒོམ་པ་ནི་གང་ཟག་ཉམས་སུ་ལེན་པར་འདོད་པ་དེས། གནས་དབེན་པར་འཇིག་རྟེན་གྱི་བྱ་བ་ཐམས་ཅད་སྤངས་ལ་བླ་མའི་གདམ་ངག་ཉམས་སུ་ལེན་པ་སྟེ། དེ་ཡང་སྔར་བསྟན་པ་རྣམས་ཀྱང་ཡིན་མོད་ཀྱི་འདིར་ཡིད་ངོས་བཟུང་ལ་བསྒོམ་པར་བྱ་སྟེ། དང་པོ་ལུས་གནད་སྔར་ལྟར་བྱས་ལ། ཡིད་ཀྱིས་རྣམ་རྟོག་འགྱུ་བ་འདི་ངོས་བཟུང་སྟེ། ལྟ་སྟངས་སྣ་རྩེར་གཏད་ལ། དང་པོར་རྣམ་རྟོག་མི་འབྲེལ་བར་བྱ། གནས་སུ་ཉན་ན་ཧཱུྃ་གཅིག་ལུས་ཀྱི་ནང་དུ་བསྒོམས་ལ་ལུས་ཀྱི་སྤྱི་བོ་ནས་རྐང་མཐིལ་རྣམས་དང་གནས་ཐམས་ཅད་དུ་བཏོན་ལ་ལུས་སང་སེང་ཁྲལ་ཁྲོལ་ལ་སེམས་བཟུང་། དེ་ནས་ཕྱི་རོལ་གྱི་ས་རྡོ་རི་བྲག་ཐོགས་ཤིང་རྡུགས་པའི་དངོས་པོ་ཐམས་ཅད་སང་སེང་ཁྲལ་ཁྲོལ་དུ་ཕུག་ལ་བཏང་། དེ་ནས་སྣང་བ་ཐམས་ཅད་ཧཱུྃ་གི་རྣམ་པ་དཔག་ཏུ་མེད་པར་སོང་ནས་ལུས་ཀྱི་ནང་དང་ཕྱི་རོལ་ཀུན་མེར་མེར་སྨིག་རྒྱུ་ལྟ་བུ་ལ་སེམས་བཟུང་ངོ་། །དེ་ནས་གཉེན་བཙལ་ཞིང་ལམ་དུ་གཞུག་པ་བཞིན་དུ། མདུན་དུ་ཤིང་བུ་རྡེའུ་ལ་ཧཱུྃ་ལ་གཏད་ཅིང་ཡང་ཚུར་བསྡུའོ། །དེ་ལ་བརྟེན་ནས་རི་མོ་ཀྱོག་པོ་ལྟ་བུ་དང་། ཆུའི་རྒྱུད་དང་ལུང་པའི་སྲོལ་ཐམས་ཅད་དུ་སྦྱངས་པས་རྣམ་རྟོག་ཁ་ལ་ཉན་ཙ་ན་རྟོག་པ་དེའི་སྐྱེ་ས་གནས་ས་འགྲོ་ས་བལྟས་ལ་མ་རྙེད་པ་དང་། རྟོག་པ་རང་གསལ་འགག་མེད་དུ་མཉམ་པར་བཞག་ལ་བསྒོམ། རྗེས་ཤེས་ཀྱི་ཡིད་ཐམས་ཅད་སྒྱུ་མའམ་སྨིག་རྒྱུ་ལྟ་བུར་བལྟ། ཡུལ་སྣང་རྨི་ལམ་བཞིན་དུ་ཤེས་པ་ཁོ་རང་ཡིན་པར་ངོས་བཟུང་ནས་བསྒོམས་པས་བསམ་གཏན་ཞི་གནས་དང་འབྲེལ་བ་དང་། ལྷག་མཐོང་གི་རྒྱུ་ཐོབ་པར་འགྱུར་བ་ཡིན་ནོ། །དེ་ལྟར་གོམས་ནས། གསུམ་པ་གཟའ་གཏད་མེད་པ་ལྟ་བའི་མན་ངག་གིས་ཉོན་མོངས་པ་ཟིལ་གྱིས་མནན་པ་ནི། ངོ་སྤྲོད་པ་སྟེ་

སྤྱིར་ཡུལ་སྣང་ཐམས་ཅད་སེམས་ཀྱི་ཆོ་འཕྲུལ་ཡིན་ཏེ་རྣམ་རྟོག་འགྱུ་བྱེད་ངོ་མ་ཤེས་པས་གཟུང་ཡུལ་གཟུགས་སྒྲ་དྲི་རོ་རེག་བྱ་ཆོས་རྣམས་ཕྱི་རོལ་དུ་སྣང་ཡང་དེ་ནས་བདེན་པ་ཡང་མེད། བྱེད་མཁན་བདག་དང་ཕྱྭ་དང་དབང་ཕྱུག་ལ་སོགས་པ་ཡང་མེད་ཀྱང་སྔར་ཡོད་ཡོད་པོར་བཟུང་བ་འཁྲུལ་བ་ཡིན་པས། ད་ནིི་ཕྱི་གཟུང་ཡུང་རང་སེམས་ཀྱི་ཆོ་འཕྲུལ་དུ་ཐག་ཆོད། ནང་དེར་འཛིན་གྱི་རྟོག་པ་ཆོས་སྤྱི་དང་རང་གི་མཚན་ཉིད་འཛིན་པའི་རིག་པ། ཚོགས་དྲུག་གི་ཤེས་པ་རིག་རིག་གྱུ་གྱུ་བ་འདི་སྐད་ཅིག་གཅིག་ལ་སྐྱེ་འགག་ཅིང་རང་ངོས་སྟོང་སྟེ། སྤྱི་བོ་ནས་རྐང་པའི་བར་བཙལ་ཀྱང་མ་དམིགས། འདས་པ་ནི་འགགས། མ་འོངས་པ་མ་སྐྱེས། ད་ལྟའི་ཤེས་པ་ཏོལ་གྱིས་སྐྱེས་པ་ནི་སྣང་སྟོང་དབྱེར་མེད་དུ་ངོས་བཟུང་། དེ་ལ་མཐར་འཛིན་མེད་ན་ལྟ་བ་དེ་ཉིད་སངས་རྒྱས་ཀྱི་དགོངས་པ་ཡིན། རྫོགས་ཆེན་སེམས་སྡེ་དང་། ཀློང་སྡེ་མན་ངག་ཐམས་ཅད་ནས་ཀྱང་དེ་ལས་བསྟན་པ་གཞན་མེད་པས་རང་སེམས་སངས་རྒྱས་སུ་རྟོག་པར་བྱའོ། །སྣང་སྟོང་དབྱེར་མེད་དུ་དེ་ཉིད་གནས་ལུགས་ཀྱི་གཤིས་ཡིན་ཏེ། འདི་ཉིད་ནས། འདི་ལ་ཚིག་གིས་གཟུང་དུ་མེད། །ཚིག་གིས་ཕྱོགས་ཙམ་མཚོན་མིི་ནུས། །དེ་ཕྱིར་ཤེས་མིན་ཀློང་གཅིག་པ། །ཐ་དད་རྣམས་སུ་ཕྱེ་བ་མེད། །འདི་ཞེས་ཉམས་སུ་མྱོང་དང་བྲལ། །ལྐུགས་པ་ཡི་ནི་རྨི་ལམ་དང་། །སྤྲིན་མེད་མཁའ་ལ་ཉི་ཤར་དང་། །མཁའ་ལ་འཇའ་ཚོན་རང་ཡལ་བཞིན། །གཞི་མཚོན་དངོས་གཞི་རྣམས་དང་བྲལ། །འདི་ཞེས་མཚོན་པ་ཀུན་ལས་འདས། །ཤེས་བྱ་བ་གསུངས་ཤིང་དེ་ཉིད་ལ་བལྟས་ཤིང་རྟོགས་པར་བྱས་པས་འབྲས་བུ་བདེན་གཉིས་དབྱེར་མེད་ཐོབ་པའོ། །བཞི་

པ་སྤངས་ཐོབ་མེད་པ་འབྲས་བུའི་མན་ངག་གིས་རང་རིག་ཕྱིར་མི་ལྡོག་པར་བྱ་བ་ནི། དེ་ལྟར་ཉམས་སུ་བླངས་ཤིང་རྟོགས་པས་གང་ཐོབ་ན་ཆོས་ཐམས་ཅད་སྟོང་ཞིང་བདག་མེད་པའི་དོན་ཐོབ་པ། གང་ལྟར་ཐོབ་ན་ཡིད་དྲན་པ་སྤྲོས་བྲལ་དུ་ཐོབ་ཅིང་། གང་གིས་ཐོབ་ན་སྒོམ་པ་པོ་དེས་ཐོབ་བོ། །ཐོབ་པའི་དགོས་པ་ནི་སྲིད་ཞི་མཉམ་པ་ཉིད་སྐུ་གསུམ་གྱི་འབྲས་བུ་ཐོབ་པས་དོན་གཉིས་ཕུན་སུམ་ཚོགས་པ་སྟེ། དེ་རྣམས་ནི་ཆོས་སྤྱི་དང་མཐུན་པའོ། །བྱེ་བྲག་ཏུ་འདི་ཉིད་ཀྱི་སྤྱོད་པ་དང་། བསྒོམ་པ་དང་། ལྟ་བ་དང་འབྲས་བུ་ནི་ད་གཟོད་རིམ་གྱིས་རྟོགས་པར་འགྱུར་མོད་ཀྱང་། དེ་ལྟར་གོང་དུ་བསྟན་པ་རྣམས་དང་། ཁྱད་པར་ཡོད་པར་རྟོགས་པར་བྱ་སྟེ། ཐོག་མར་སྤྱོད་པ་ནི། འདི་ཉིད་ནས། སྣང་དང་མི་སྣང་འདི་ཀུན་འཁྲུལ་པས་ན། །མ་བརྟགས་ཉམས་དགར་བརྟགས་ཤིང་དཔྱད་མི་བཟོད། །ཤིན་ཏུ་བརྟགས་ན་གང་ཡང་རྙེད་པ་མེད། །དེ་ཡི་ཕྱིར་ན་འདི་ལྟར་གོམས་པར་བྱ། །གཟའ་གཏད་མེད་པའི་ཤེས་པ་དྲན་མེད་དེ། །དམིགས་གཏད་མེད་པའི་མིག་ཏུ་བཅུག་ནས་ནི། །གཟའ་གཏད་མེད་པའི་གཞི་ལ་རང་རིག་བསྐྱལ། །སྤངས་ཐོབ་མེད་པའི་ས་ལ་བཞག་པར་བྱའོ། །ཞེས་འབྱུང་བས་ཕྱི་ནང་གསང་བ་བཞིར་གཞུང་དུ་གསུངས་ཀྱང་། ད་ལྟ་ནི་སྤྱོད་པ་ཐམས་ཅད་ལུས་ཡིན་པས་ལུས་སྦྱོང་བ་དང་། སྣང་བ་རང་སར་བཞག་པ་དང་། བསྒྱུར་བ་གཉིས་ཡོད་དེ། གཟོད་མངོན་དུ་འགྱུར་རོ། །འདི་བསྒོམ་པ་ཡང་། །དངོས་མེད་སྤྲོས་དང་བྲལ་བའི་རིག་པ་ནི། །དྲན་པའི་ཐག་པ་བཅད་དེ་བཏང་བའི་ཕྱིར། །བསམ་མེད་ལྷུག་པར་གཞུག་པ་འདི་ཉིད་ནི། །དྲན་པ་རྣམས་ནི་ཟད་པའི་སར་བསྐྱལ་ལོ། །ཞེས་འབྱུང་བས་སེམས་བྱུང་བ། །

སེམས་སྦྱང་པ་དང་རིག་པ་གཏད་པ་བྱ་བ་གཉིས་ལས། འགྲོ་ས་མེད་ཀྱང་། ལུས་དང་མིག་དང་དབྱིངས་རིག་ལ་བརྟེན་པའི་གནད་ད་གཟོད་སྟོན་ཅིང་མངོན་དུ་འགྱུར་རོ། །འདི་ཉིད་ཀྱི་ལྟ་བ་ནི། ཕྱོགས་རིས་མེད་པའི་རིག་པ་ཟང་ཐལ་ནི། །གང་གིས་མ་བསྒྲིབས་རང་ལས་ཐོགས་པ་མེད། །ཁྱབ་བརྡལ་ཆེན་པོའི་ཕོ་བྲང་རིན་ཆེན་དུ། །འབྱུང་ལྔ་ཟད་པའི་རིག་པ་ལྷིངས་པ་ལྟོས། ཞེས་བྱུང་བས་ཁྲེགས་ཆོད་སྤྲོས་བྲལ་གྱི་ལྟ་བ་དང་། ཐོད་རྒལ་མངོན་སུམ་གྱི་ལྟ་བ་གཉིས་ལས། འདིར་རྣལ་འབྱོར་པ་དབྱིངས་རིག་པ་ལྟ་བ་སྟེ། དེ་ལ་ཐོད་རྒལ་གྱི་སྣང་བ་མིག་གིས་ལྟ་བ་ཡིན་པས་མིག་གསལ་བའི་ཐབས་བསྟེན་པར་བྱ་སྟེ། ལྟ་བ་དངོས་ད་ཟོད་མཐོང་བར་འགྱུར་རོ། །ཞེས་བརྡའ་སྤྲད་པའོ། །འདི་ཉིད་ཀྱི་འབྲས་བུ་ནི། །སྟོང་པ་རང་ལུས་མཚོན་པའི་ཕྱག་རྒྱ་ཆ། །འབྲས་བུ་ཡི་ཐོག་ཁྱབ་པར་གཏན་ལ་ཕབ། །ཤེས་རབ་འཛིན་མེད་རང་གསལ་ཆེན་པོར་སྤྱོད། །འདི་ནི་རྒྱལ་བ་ཀུན་གྱི་གསང་དོན་ཆེ། །ཞེས་པས་འབྲས་བུ་ཚད་ཅན་སྐུ་གསུམ་ཐོབ་པར་འདོད་པ་དང་། ཚད་མེད་སྐུ་གསུམ་ལམ་དུ་བྱས་ནས། ལུས་མེད་ལུས་ཏེ་ལུས་ཀྱི་མཆོག །ལུས་ཀྱི་མཐའ་ནི་རྟོགས་པ་འོ། །ཞེས་ཆོས་ཐམས་ཅད་ཟད་པ་ཉིད་མཐར་ཐུག་ཏུ་འདོད་པ་གཉིས་ཡོད་ཀྱང་མངོན་དུ་འགྱུར་རོ། །འདི་རྣམས་ནི་རང་དང་སྤྱིའི་ཁྱད་ཤེས་པར་བྱ་བའི་ཕྱིར་གཞུང་ནས་ཕྱི་ནང་གསང་བ་དེ་ཁོ་ན་ཉིད་བཞི་བཞིར་གསུངས་པ་དེ་འདིར་གོ་བ་ཙམ་དུ་ཕྱེ་བ་ཡིན་ཏེ། འདི་རྣམས་རིམ་གྱིས་གོ་བར་འགྱུར་རོ། །རང་དང་སྤྱིའི་ལྟ་སྒོམས་སྤྱོད་པ་རྣམ་པར་དབྱེ་བའི་དུམ་བུ་སྟེ་དྲུག་པའོ།། །།དེ་ནས་དབང་དང་ཁྲིད་བསྲེས་ནས་བྱེད་ན། གནས་སྐབས་འདིར་སྤྲོས་མེད་ཀྱི་དབང་སྦྱིན་པར་བྱའོ། །དེ་ནས་རིག་པ་སྔོན་དུ་འགྲོ་བ་འཁོར་

འདས་རུ་ཤན་འབྱེད་པ་ལ་བསླབ་པར་བྱའོ། །འདི་ཡང་སྔར་བསྟན་པ་རྣམས་དང་མི་འདྲ་བས་སྐལ་བ་དང་ལྡན་པ་གསུམ་ཙམ་ལ་བྱ་སྟེ། དབང་དང་བཅས་པར་བྱེད་པ་ན་ནི། ཤིན་ཏུ་སྤྲོས་མེད་ཀྱི་དབང་གི་སྔོན་འགྲོ་ཡིན་པས་སྔོན་དུ་ཞག་གསུམ་ཙམ་བྱ་བར་བཤད་དོ། །ཉམས་སུ་ལེན་པ་དངོས་གཞིའི་དུས་སུ་ནི་རྟགས་མ་རྫོགས་ཀྱིས་བར་དུ་བྱའོ། །གང་ལྟར་ཀྱང་མངོན་དུ་སྤྱོད་པ་ལ་བར་ཆོད་ཀྱི་བགེགས་མི་འཇུག་པ་དང་། རྣམ་ཤེས་ཚོགས་བརྒྱད་ཡུལ་ལ་མི་འཕྲོ་བར་བྱ་བའི་དོན་དུ་ཡི་གེ་བརྒྱད་ཀྱིས་རྒྱས་གདབ་པར་བྱ་སྟེ། སློབ་མ་བླ་མའི་མདུན་དུ་ལངས་ལ་ཐལ་མོ་སྙིང་གར་སྦྱར་ཏེ། བླ་མས་ཁ་ཤར་དུ་བལྟས་ལ་སྡིག་འཛུབ་དང་བཅས་པའི་ལྟ་སྟངས་ཀྱིས་བགེགས་སྐྲོད་ལ་མཁའ་འགྲོ་ལ་གཏོར་མ་བྱིན་ནས། སློབ་མའི་སྤྱི་གཙུག་ཏུ་ཧཱུྃ་སྔོན་པོ་གཅིག་བསྒོམས་ནས། དྲྭ་བ་ཅན་གྱི་རྩ་ལས་བྱུང་སྟེ་ལུས་ཐམས་ཅད་ཧཱུྃ་དུ་གྱུར་པར་བསྒོམ་མོ། །རྐང་མཐིལ་དུ་ཡྃ་ལྗང་ཁུ། ལྟེ་བར་རྃ་དམར་ལྗང་། མགྲིན་པར་ཁྃ་དུད་ཁ། དཔྲལ་བར་ཨེ་མཐིང་ཁ། ལྐོག་མར་སུྃ་སེར་པོ། པུས་མོ་གཡས་ཧྃ་དཀར་བསྒོམ་མོ། །ཡང་རྐང་མཐིལ་དུ་ཕཊཿསྔོ་ནག་བསམས་ལ། ངག་ཏུ་ཡང་དབུགས་རེ་ལ་ཉེར་གཅིག་རེ་བཟླས་ཏེ་བསྲུང་བར་བྱའོ། །དེ་ནས་ལུས་ངག་ཡིད་ཀྱི་རུ་ཤན་འབྱེད་པར་བསྟན་པ་ནི། ཉམས་སུ་ལེན་པ་རྣམས་ལུས་ངག་གི་འཇིག་རྟེན་གྱི་བྱ་བ་ཐམས་ཅད་བོར་ལ་དང་པོར་ཞག་ཁ་ཡར་དུ། ཤིན་ཏུ་དབེན་པ་མི་སྐད་ཁྱི་སྐད་ལ་སོགས་པ་མེད་པ། སྐྱེ་བོ་ཐེག་པ་དམན་པའི་སྐད་ཙམ་ཡང་མི་ཐོས་པ་ཤིན་ཏུ་དལ་བར་བསྡད་ལ། དེ་ནས་མཁའ་འགྲོ་རྣམས་ལ་བཟའ་བ་དང་མེ་ཏོག་སྣ་ཚོགས་ཀྱི་གཏོར་མ་བྱིན་ལ་བར་ཆོད་མེད་པའི་གསོལ་བ་བཏབ་ལ་ལུས་ཀྱི་སྤྱོད་པ་རྩོལ་བ་བྱ་སྟེ། ལུས་ཀྱི་བྱ་བ་རྒྱུག་པ་དང་གར་དང་འགུལ་བ་དང་། སྤྲུག་པ་དང་

ཉལ་བ་དང་ལངས་པ་དང་། འདུག་པ་ལ་སོགས་པ་རྣམ་པ་སྣ་ཚོགས་པ་དང་། ངག་དང་ཡིད་ཀྱང་བསྲེས་ལ་ཅི་དྲན་པ་འཇིག་རྟེན་ན་ཡོད་པ་རྣམས་བྱ་བ་ནི། ཉིན་མཚན་དུ་གཉིད་སྤངས་ལ་བྱ་བར་གསུངས་སོ། །དེ་རྣམས་ནི་འཁོར་བའི་ལུས་ཀྱི་རྣམ་པ་སྟེ། དེ་རྣམས་ལ་ཐང་ཆད་ཅིང་སྒྱིད་ལུག་པ་དང་། འཇིག་རྟེན་གྱི་ལུས་དང་སྤྱོད་པས་ཅི་ཞིག་བྱ་སྙམ་པ་དང་། ཡང་མྱ་ངན་ལས་འདས་པའི་ལུས་གཡོ་བ་མེད་པ་རྣལ་དུ་དབབ་པའོ། །དེ་དག་ཅི་ཙམ་བྱ་བ་ནི་གང་ཟག་ལ་རག་སྟེ། སོ་སོའི་ཚད་ལ་མ་ཕེབས་ཀྱི་བར་དུ་བྱའོ། །ཚད་ནི་ལུས་ཀྱི་སྤྱོད་པའི་འོག་ཏུ་གསོད་པའི་གཤེད་མ་བྱུང་ཡང་ལུས་ཆགས་པ་མེད་ཅིང་སེམས་ལ་སྐྲག་པ་མེད་པ་བྱུང་ན་ཡིན་ནོ། །དེ་ཡང་རབ་ཀྱི་ཡང་རབ་ལ་ཞག་གསུམ་དང་དྲུག་དང་དགུའོ། །འབྲིང་དེ་ལ་ལན་གཉིས་པ་བསྐྱར་བའོ། །ཐ་མ་ནི་དེ་ལན་གསུམ་པའི་རྗེས་སུ་འབྱུང་བས་རྣལ་དུ་དབབ་པ་ཡང་དེས་འགྲེ་བར་ཤེས་པར་བྱའོ། །དེ་ལ་དགོས་པ་ནི། ལུས་ཀྱི་ཞེན་པ་ལོག་པ་དང་། སྒྲིབ་པ་དག་པ་དང་། བར་ཆོད་ཞི་ནས་ལས་གྲུབ་པ་དང་། མཆོག་གི་ལུས་རུ་ཤན་ཕྱེད་ནས། མྱ་ངན་འདའ་བ་ལ་ཉེ་བ་ན། ཁམས་གསུམ་དུ་མི་འཇུག་པ་དང་། ལུས་སྤྲུལ་སྐུར་གྲོལ་བའི་དགོས་པ་ཡོད་དོ། །དེ་ནས་གཉིས་པ་ངག་རུ་ཤན་འབྱེད་པ་ནི། ཡང་ཞག་འགའ་ཡར་དུ་ངག་ཏུ་སྒྲ་སྣ་ཚོགས་དང་། སྔགས་སྣ་ཚོགས་དང་། འཁྲུལ་པའི་གཏམ་སྣ་ཚོགས་དང་། ངོ་ཚ་བའི་གཏམ་དང་། ཟུངས་ཤིག་དང་། སོད་ཅིག་དང་། རྒྱོབ་ཅིག་ལ་སོགས་པ་དང་། དུད་འགྲོ་དུ་མའི་སྒྲ་དང་། མདོར་ན་ངག་གི་རྣམ་པ་འཁོར་བ་ན་གནས་པ་ཐམས་ཅད་དེ། དེ་ཡང་གཉིད་སྤངས་ནས་བྱས་པས། ཡང་

དག་བྲག་ཆ་ལྟར་གོ་ནས་ཚིག་ཐམས་ཅད་བདེན་མེད་དུ་འགྲོ་བ་དང་། གཞན་གྱིས་གང་ཟེར་ཡང་དགའ་མི་དགའ་གཏན་མ་བྱུང་ན་རུ་ཤན་ཕྱེད་པ་ཡིན་པས། ཡང་དག་མི་སྨྲ་བར་ལྐུགས་པ་ལྟར་གནས་པར་བྱའོ། །ཡུན་ཅི་ཙམ་བསླབ་པ་ནི་སྔ་མ་དང་མཚུངས་སོ། །དེ་ལ་དགོས་པ་ནི། ངག་གི་ཞེན་པ་ལོག །སྒྲིབ་པ་དག །ལས་གྲུབ། མྱང་འདས་དང་ཉ། ངག་འཁྲུལ་པ་ལ་མི་འཇུག །ངག་ལོངས་སྐུར་གྲོལ་བའོ། །དེ་ནས་ཡང་ཡིད་རུ་ཤན་འབྱེད་པ་ནི་སེམས་ཀྱི་རྣམ་རྟོག་ཅི་འགྱུ་ཚད་བྱ་སྟེ། ཚོང་གི་རྣམ་པའམ། གཉེན་བཤེས་ཀྱི་རྣམ་པའམ། དད་པའམ། དགྲའི་རྣམ་པའམ། འཁྲུལ་པའི་བསམ་པའམ། འདོད་ཆགས་ལ་སོགས་པའི་ཉོན་མོངས་པའམ། ལྷ་བསྒོམ་པའམ། དཀྱིལ་འཁོར་བསྐྱེད་པ་དང་། ཆོས་སྣ་ཚོགས་ཀྱི་བསམ་པའམ། འཇིགས་ཤིང་ཡ་ང་བའམ། བྲོད་ཅིང་དགའ་བ་ལ་སོགས་པའི་བསམ་པ་སྤྲོ་བ་ནི་ཉིན་མཚན་དུ་བྱའོ། །དེས་རྣམ་རྟོག་ལ་སྐྱུགས་ལོག་ནས་དོན་མེད་པའི་རྟོག་པས་ཅི་ཞིག་བྱ་སྙམ་པ་དང་། ཡིད་འགྱུ་བ་བཅད་ལ་མི་རྟོག་པ་ཉིད་དུ་གནས་པར་བྱའོ། །དེས་འཁོར་བའི་ཡིད་ལ་རྣམ་པ་ཐམས་ཅད་དུ་སྐྱུགས་ལོག་ནས་མི་རྟོག་པ་ལ་དབང་ཐོབ་ན་ཕྱེད་པའི་ཚད་དོ། །ཡུན་ནི་སྔར་དང་མཚུངས་སོ། །དགོས་པ་ནི་ཡིད་ཞེན་པ་ལོག །སྡིག་པ་དག །ཡིད་ཀྱི་ལས་གྲུབ། མྱང་འདས་དང་ཉེ། འཁྲུལ་བ་མི་སྐྱེ། ཡིད་ཆོས་སྐུར་དག་པའི་དགོས་པ་ཡོད་དོ། །དེ་ལྟར་ལུས་ངག་ཡིད་ཀྱི་སྤྱོད་པས་འཁོར་བའི་ལུས་ངག་ཡིད་གསུམ་དང་བྲལ་ན། མྱ་ངན་ལས་འདས་པའི་ལུས་མི་འགུལ་བ་དང་། ངག་བརྗོད་དུ་མེད་པ་དང་། ཡིད་རྟོག་མེད་དང་ཕྲད་ནས། ཐུན་བར་

ཉསས་ལེན་གྱི་མཚམས་སུ་ཇི་ལྟར་བྱ་བ་ནི། ཤིན་ཏུ་སྤྲོས་མེད་ལས། སྤྱོད་པ་ཉིད་ནི་ཚར་དུས་སུ། བག་ཆགས་ཕལ་པ་བཞག་པའི་ཕྱིར། །ཕྱག་དང་སྐོར་བ་ཕྱག་རྒྱ་དང་། ཆོས་སུ་འགྲོ་བའི་ལུས་སྤྱོད་བྱ། ངག་གིས་མཚམས་སུའང་སྔགས་རྣམས་དང་། །ཡི་གེའི་ཚོགས་དང་མཆོད་བསྟོད་བྱ། །དེ་བཞིན་སེམས་ལ་བསྒོམ་སྣ་ཚོགས། །བག་ཆགས་ཕལ་པ་སྦྱོང་བའོ། །ཞེས་འབྱུང་བས། འཁོར་བ་དང་ཕྲལ། མྱང་འདས་མཐོང་། གཉིས་ཀ་རོ་མཉམ་དུ་སྦྱར་བར་བྱ་བ་ཡིན་ནོ། །ལས་ཅན་འགའ་ཞིག་དེ་ཉིད་དུ་ཟད་པའི་སྣང་བ་དང་ཕྲད་ནས་གྲོལ་བ་ཡང་ཡོད་དོ། །དེས་ན་སྔོན་འགྲོ་འདི་ནི་ཤིན་ཏུ་ཟབ་བོ། །འདི་ནི་རིག་པ་མངོན་སུམ་ཉམས་སུ་ལེན་པའི་དུས་ན་ཡང་འཁོར་བའི་ལུས་ངག་ཡིད་གསུམ་གྱི་ཞེན་པ་དང་རྟོག་པ་བྱུང་ན་བྱ་བར་གསུངས་སོ། །ད་ལྟ་ཉམས་ལེན་དངོས་གཞི་ལ་འཇུག་མི་ནུས་པའི་དད་པ་ཅན་རྣམས་ལ་ནི། རྣལ་དུ་འབེབས་པ་ཙམ་བསྟན། རུ་ཤན་འབྱེད་པའི་དོན་གོ་བ་ཙམ་བྱ་ཞིང་བསྟན་པར་བྱའོ། །གང་ཟག་འཁོར་བའི་ལུས་ངག་ལས་སོགས་པའི་སྐྱེས་བུ་དམ་པ་རྣམས་ནི་སྤྱོད་པ་མ་བྱས་ཀྱང་ཆོག་པ་ཉིད་དོ། །རུ་ཤན་འབྱེད་པ་བསྟན་པའི་དུམ་བུ་སྟེ་བདུན་པའོ།། །།དེ་ནས་ཤིན་ཏུ་སྤྲོས་མེད་ཀྱི་དབང་སྦྱིན་པར་བྱ་བར་བཤད་དོ། །དེ་ནས་རྣལ་དུ་འབེབས་པ་ཡི། །ཆོ་ག་མཁས་པས་ཞག་གསུམ་བྱ། །གལ་ཏེ་སྔོན་དུ་མ་སྦྱངས་ན། །དེ་ནས་སེམས་ཀྱི་སྣ་ཁྲིད་པའི། །སྔོན་འགྲོ་རྣམས་ལ་སྦྱང་བར་བྱའོ། །ཞེས་གསུངས་པས་སྔར་མ་བསྟན་ན་སྐབས་འདིར་ཐམས་ཅད་སེམས་ཉིད་ཡིན་པ་དང་། དེ་ཡང་སྤྲོས་བྲལ་ཆེན་པོར་རྟོགས་པར་བྱ་བའི་ཕྱིར་སེམས་སྦྱང་བར་བྱའོ། །དེ་ནས་ཤིན་ཏུ་སྤྲོས་མེད་ཀྱི་དབང་གིས་སྟོང་པ་ཉིད་ཀྱི་དཀྱིལ་འཁོར་དུ་བཅུག་ལ་དབང་སྦྱིན་ཅིང་ལུང་

བསྟན་པར་བྱའོ། །དེ་ནས་ལུས་གནད་གཟིར་བར་བྱ་སྟེ། དང་པོ་གླང་པོ་ཆེའི་འདུག་སྟངས་ལ་གཞིི་བཅའ་བ་གཅེས་ཏེ། དེ་ལ་གླང་པོ་ཆེ་ལྟ་བུ་ནི་ཁ་སྦུབ་ཏུ་ཉལ་ལ་ལག་པ་གཉིས་གྲུ་མོ་ས་ལ་བཙུགས་ཏེ། ལྐོག་མ་ལག་མཐིལ་གྱིས་བཏེག་ལ་པུས་མོ་བྲང་ལ་སྦྱར་ཏེ། མཇིང་པ་བཏེག་ཡིད་ཙམ་ཕྱིར་དགྱེ་བར་བྱས་ལ། ལྟ་སྟངས་ནི་མིག་གྱེན་ལ་ཧར་པོར་མ་འགུལ་བར་ལྟའོ། །དྲང་སྲོང་གི་འདུག་སྟངས་ཀྱིས་གནད་མ་གཟིར་ན་ལུས་མི་ཆུན་པས། དྲང་སྲོང་ལྟ་བུ་ནི་ལུས་ཙོག་པུར་འདུག་སྟེ། རྐང་པའི་ལོང་བུ་གཉིས་གཤིབས། པུས་མོ་གསུས་པ་ལ་སྦྱར། གསུས་པ་ཡང་སྒལ་པ་ལ་ཡིད་ཙམ་སྦྱར། ལག་པ་གཉིས་ཀྱི་གྲུ་མོ་པུས་མོའི་སྟེང་དུ་བཙུགས་ལ། མགོ་པུས་མོའི་སྟེང་དུ་དུན་ནེ་བྱས་ལ། ལག་པའི་མཐིལ་གཉིས་ཀྱིས་འགྲམ་པའི་ཟུར་ནས་མི་འགྱུར་བར་བཏེག་པ་ནི། ལྟ་སྟངས་མིག་གཉིས་མི་འགུལ་བར་ཧར་པོར་རང་གི་སྨིན་མཚམས་སུ་ཐད་ཀར་ལྟའོ། །སེང་གེའི་འདུག་སྟངས་ལ་རྩལ་མ་སྦྱངས་ན་རིག་པ་མི་ཆུན་པས་སེང་གེ་ལྟ་བུ་ནི། ཙོག་པུའི་པུས་མོ་གཉིས་ས་ལ་བཙུགས་ལ་ཡིད་ཙམ་ཕྱིར་བསྒྲད། ལག་པ་གཉིས་པུས་མོའི་ཕྱི་ལོགས་སུ་ས་ལ་བཙུགས་ཏེ། ཡིད་ཙམ་ཕྱིར་བསྒྲད་ལ་ལུས་ཀྱི་ལྗིད་ཅུང་ཟད་བོར། །འཕོངས་ཡིད་ཙམ་ཕྱིར་ཕྱུང་ལ་རྒལ་ཚིགས་དྲང་པོར་བསྲངས་ལ་མཇིང་པ་རྒྱབ་ཏུ་དགྱེ་བར་བྱས་ཏེ། ལྟ་སྟངས་མིག་ཡིད་ཙམ་མདུན་དུ་བལྟས་ལ་སོར་བཞི་པར་གཏད་དོ། །དེ་དག་དུས་སུ་ལུས་མ་འགུལ་བ་དང་། དབུགས་ཕར་འགྲོ་ཚུར་འོང་ཤིན་ཏུ་དལ་བར་བྱའོ། །དེ་རྣམས་ནི་ལུས་ཀྱི་འདུག་སྟངས་གསུམ་ལ་སྦྱང་བ་དང་། མིག་ལྟ་སྟངས་གསུམ་དུ་གཏད་པ་དང་། མི་འགུལ་བ་གསུམ་གྱིས་གཟེར་གདབ་པ་ཞེས་བྱའོ། །དེ་ལ་སྐྱོན་དེ་རྣམས་མ་ཡིན་པ་བྱ་རྒོད་ཀྱི་སྤུངས་སྟངས་དང་། རྡོ་

རྗེ་སྐྱིལ་ཀྲུང་དང་། གཞན་ཡང་གང་བདེ་བར་བྱའོ། །ལྟ་སྟངས་ཀྱང་། སེང་གེ་གླང་ཆེན་རི་བོང་དང་། །མདའ་སྲོང་ལྟ་བུའི་ལྟ་སྟངས་བཞི། །ཞེས་དུང་ཡིག་ཅན་དུ་གསུངས་སོ། །མདོར་བསྡུས་ན་རྣམ་པར་མི་རྟོག་པར་ལྟ་སྟངས་བྱ་བ་གལ་ཆེའོ། །དེ་ལྟར་ཉི་མ་མང་དུ་སྦྱངས་ན། ངོ་སྤྲོད་མི་དགོས་པར་མངོན་སུམ་དུ་རྟོགས་པའང་སྲིད་དོ། །ལུས་གནད་དང་ལྟ་སྟངས་བསྟན་པ་སྟེ་དུམ་བུ་བརྒྱད་པའོ།། །།དེ་ནས་ཚིག་གསུམ་གྱིས་སྐྱེ་བ་མེད་པའི་དོན་མཐོང་བར་བྱེད་པའི་ཐབས་ངོ་སྤྲད་པར་བྱ་སྟེ། ནམ་མཁའ་སྤྲིན་དང་བྲལ་བའི་ཚེ་ཤིན་ཏུ་དབེན་པར་སོང་ལ་རིག་པ་མིག་ལ་གཅུན་ལ་ཉི་མའི་རྒྱུན་ཕྱོགས་སུ་གོང་གི་ལྟ་སྟངས་ཀྱིས་བལྟས་པས་ནམ་མཁའ་ལ་རིག་པ་རང་གི་ངོ་བོ་རྡོ་རྗེ་ལུ་གུ་རྒྱུད་ཅེས་བྱ་བ། ཕྲ་བ་རྟ་ལྔ་ལ་མདུད་པ་བསྒྲིགས་པ་ལྟ་བུ། བར་བར་ན་ཐིག་ལེ་ཡུང་འབྲུ་ཙམ་ཁ་དོག་གསལ་བ། དེ་ལ་ཡུན་རིང་དུ་བལྟས་པས་ནམ་མཁའ་གང་བ་ཙམ་གྱི་ཐིག་ལེ་རྐྱང་བ་དང་། གཉིས་སྦྲེལ་ལ་སོགས་པ་དཔག་ཏུ་མེད་པ་འཆར་རོ། །དེ་ནི་ཆོས་སྐུ་དང་ཐིག་ལེ་ཉག་གཅིག་ཅེས་བྱ་སྟེ། སྐུ་གསུང་ཐུགས་ཐུག་སྤྲད་ཀྱི་མན་ངག་ཅེས་བྱའོ། །སངས་རྒྱས་དང་ཞལ་མངོན་སུམ་དུ་མཇལ་བ་ཅེས་བྱའོ། །རིག་པ་དེ་ཡང་ལྟ་བ་མིག་དང་འབྲེལ་བའི་གནད་ཀྱིས་མིག་གར་འགུལ་བའི་ཕྱོགས་སུ་འགྲོ་ཞིང་གཟུང་བར་དཀའ་བ་སྟེ། ཐིག་ལེ་ཕྲ་མོ་དེ་དག་ཀྱང་འགྲོ་འོང་དང་བཅས་པའོ། །དེ་ཉིད་བཟུང་བའི་མན་ངག་ནི་མིག་གྱེན་ལ་ཡིད་ཙམ་བཟློག་པ་གཅེས་ཏེ། སྨིན་མཚམས་སུ་དབྱིངས་རྣམ་པར་དག་པའི་སྒྲོན་མ་ཞེས་བྱ་བ། མཐིང་ཁ་ཁྱབ་པ་ཆེན་པོའི་འོད། དབྱིབས་ཡི་གེའི་ན་རོ་ལྟ་བུ། ཁ་དོག་འཇའ་ཚོན་ལྟ་བུར་འཆར་ཏེ། དེ་ནི་མིག་དང་ཤའི་མདངས་འཕྲད་

པ་ལ་བརྟེན་ནས་འཆར་བ་སྟེ། རིག་པ་དེར་གཏད་ནས་ལྟ་བ་ནི་འཛིན་པར་བྱེད་པའི་ལྕགས་ཀྱུ་ཞེས་བྱ་སྟེ་མཆོག་ཏུ་གཅེས་པའོ། །དེ་ནི་ལུས་འདི་ལྟར་གྱིས་ལ། ཡུལ་ནམ་མཁའ་ལ་རིག་པ་འདི་ལྟོས་ཞེས་བྱ་བ་ཚིག་གསུམ་གྱིས་ངོ་སྤྲད་པ་ཡིན་ནོ། །དེ་རྣམས་དང་པོ་ངོ་སྤྲད་པས་རིག་པ་མངོན་སུམ་ཞེས་བྱ་བ། ལྷག་མཐོང་གི་རིག་པ་ཞེས་པར་བསྟན་ཏོ། །ད་ནི་དེ་མཐོང་བས་རྒྱུ་མཚན་གོ་བར་བྱེད་པ་གལ་ཆེ་སྟེ། འདི་ཉིད་ཀྱི་རིག་པའི་རྒྱབ་བརྟེན་ནས་ཀྱང་གསུངས་ལ། དུང་ཡིག་ཅན་དང་གཞན་ཡང་རྒྱུད་འགྲེལ་ཐམས་ཅད་ནས་མང་དུ་གསུངས་ཀྱང་འདིར་གལ་ཆེ་བ་ཅུང་ཟད་གཅིག་བསྟན་པར་བྱ་སྟེ། དེ་ལ་དབྱིངས་རིག་འཆར་བའི་རྒྱུ་རྐྱེན། འཁྲུལ་མ་འཁྲུལ་གྱི་དོན། དེ་ཉམས་ལེན་དུ་འགྲོ་བའི་རྒྱུ་མཚན་འབྲས་བུར་བསྟན་པའོ། །དང་པོ་ནི་རྒྱུ་རྣམ་པ་གཉིས་ཏེ། རིག་པའི་དབྱེ་བ་ལྔའི་ནང་ནས། གཞིར་གནས་ཀྱི་ངོ་བོ་རིག་པ། ངོ་བོ་ཀ་དག་གི་གནས་ལུགས་ཡེ་ཤེས་གསུམ་ལྡན། ངོ་བོར་རང་བཞིན་ཐུགས་རྗེ་གསུམ་སྟོང་པ་དང་གསལ་བ་དང་འགག་པ་མེད་པའི་གནས་ལུགས་སུ་བཞུགས་པ་ལ། གཞན་ནས་དེ་བཞིན་གཤེགས་པའི་སྙིང་པོ་ཞེས་བཤད་དོ། །དེ་ཉིད་ལ་གཉིས་འཛིན་གྱི་རྟོག་པ་མེད་ཀྱང་། རང་སྟོང་། རང་གསལ། རང་འགག་པ་མེད་པ་ལ། རྒྱ་མཚོ་ལ་རྦ་རླབས་ལྟར་འགྱུ་བ་འགག་པ་མེད་པར་གཡོ་བ་ལས་ཡེ་ཤེས་ཀྱི་ཆ་གསལ་སྣང་གི་རྣམ་པར་འབྱུང་བ་ལ་སེམས་པ་ཡིད་དྲུག་ཏུ་འགྱུར་ཏེ། ངོ་བོ་མི་རྟོག་པ་ཡིན་ཀྱང་། གཉིས་སུ་སྣང་བ་ལ་རྟོག་ཅིང་དཔྱོད་པའི་ཤེས་པ་སྐྱེས་ཏེ། དེ་ནི་ཆོས་སྤྱིའི་སྐད་ལ་མ་རིག་པའི་རྐྱེན་གྱིས་འདུ་བྱེད། དེའི་རྐྱེན་གྱིས་རྣམ་པར་ཤེས་པ་ཞེས་བྱ། འདི་ཉིད་ལས། འཁྲུལ་

པའི་ཡེ་ཤེས་སྦག་སྦོག་དེ། །ཐོག་མ་ཀ་དག་འཁྲུལ་མེད་ལས། །ངེས་པ་མེད་པའི་ལྷུན་གྲུབ་ལ། །སྣ་ཚོགས་དུ་མར་ཤར་ཚུལ་ལ། །འགག་པ་མེད་པའི་རོལ་བ་ནི། །ཅིར་ཡང་མཛད་ཅིང་ཅིར་ཡང་འཆར། །ངེས་མེད་སྣང་བ་དུ་མ་འོ། །དེ་ཉིད་གཟུ་བོའི་བློ་ཅན་ལ། །མཐོང་བ་མ་འགགས་ནང་གསལ་ཏེ། །དེ་ལ་ངེས་པའི་ཆར་གཟུང་ངོ་། །ཞེས་ཚིག་བཞིས་རྒྱུ་མཚན་བསྟན་ནས། །དེ་ལྟར་གནས་པའི་གཞི་དེ་ལ། །རྒྱུ་དང་འཁྲུལ་པའི་ས་བོན་ནི། །གསལ་བའི་ཆ་ན་ཕྱིར་ཤོལ་བས། །ཤེས་པ་གསལ་གསལ་རིག་རིག་དེ། །མ་རིག་པ་ནི་གསུམ་དག་ལས། །ཡིད་ཙམ་ཕྱིར་འགྱུས་སྣང་ཆ་ལ། །ཡུལ་དེ་བདག་ཏུ་བཟུང་བའི་བློས། །ཞེས་འབྱུང་སྟེ། དེ་ལ་མ་རིག་པ་གསུམ་ནི། ལྷན་ཅིག་སྐྱེས་པའི་མ་རིག་པ་ནི་ཡོངས་གྲུབ་ཀ་ནས་དག་པ་ལ་དག་པར་མ་ཤེས་པ་ཡིན་ལ། གཞན་དབང་འགྱུ་བྱེད་སྣང་བའི་འོད་དང་བཅས་པ་ལ་སྣང་སྟོང་གཉིས་དབྱེར་མེད་དུ་མ་ཤེས་པ་ནི་འདུ་བྱེད་རྐྱེན་གྱི་མ་རིག་པ་ཞེས་བྱ། ཡུལ་ཡུལ་ཅན་གཉིས་ཐ་དད་དུ་ཕྱི་རོལ་དོན་དང་དེ་ལ་བརྡར་བཏགས་པའི་མིང་དང་དོན་གྱི་བག་ཆགས་བདེན་མེད་དུ་མ་ཤེས་པས་བླང་དོར་བྱས་ཏེ། སྲེད་ལེན་སྲིད་པའི་རྒྱུར་གྱུར་པ་ནི། ཀུན་བརྟགས་འཁྲུལ་པའི་མ་རིག་པ་ཞེས་བྱའོ། །དེ་ལྟར་རྒྱུད་དང་པོ་ཡེ་ཤེས་མ་རིག་པ་དང་འདྲེས་པ་ལས། གཉིས་པ་ད་ལྟ་བྱེ་བྲག་ཏུ་དབྱིངས་རིག་མིག་ཏུ་གསལ་བའི་རྒྱུ་ནི། རྐྱེན་འདུས་པའི་ཚུལ་གོ་བར་བྱས་པས་མངོན་དུ་ཤེས་པར་འགྱུར་ཏེ། སྔར་གྱི་ལུས་སྣང་གཟུགས་སྒྲ་དྲི་རོ་རེག་བྱ་ཆོས་འདུས་བྱས་དང་འདུས་མ་བྱས་རྣམ་པ་དྲུག་ལ་དེར་འཛིན་གྱི་ཡིད་ཤེས་ཀྱི་བར་དྲུག་གིས་བར་དུ་དབང་པོ་དང་སྦྱོར་ཞིང་དེ་རྣམས་བྱེད་པ་པོ་མེད་ལ་རང་གི་མཚན་ཉིད་འཛིན་པས་ཁམས་བཅོ་བརྒྱད་དུ་

འགྱུར་ཏེ། གཞི་འཛིན་པའི་རིག་པ་ཞེས་བྱ་བ་ཆོས་སྤྱིའི་སྐད་དུ། ཀུན་གཞི་སེམས་ཕུང་པོ་ཁམས་དང་སྐྱེ་མཆེད་ཀྱི་བག་ཆགས་ཐམས་ཅད་བགོས་པས་ས་བོན་ཐམས་ཅད་པ་ཞེས་བྱ་བ། དེ་རྒྱུ་རྐྱེན་དུ་གྱུར་ལ། བདག་པོའི་རྐྱེན་འཛིན་པའི་རྣམ་ཤེས་དྲུག་གིས་བྱས་ནས། དམིགས་པའི་རྐྱེན་ཡུལ་དྲུག་གིས་བྱས་ཏེ། དེ་མ་ཐག་པའི་རྐྱེན་ཡིད་དེ་མ་ཐག་པ་གོང་མ་གསུམ་ཚོགས་པའི་སྐད་ཅིག་དེས་བྱས་པས། རྐྱེན་བཞི་དོན་ལྟར་སྣང་བ་བར་མ་ཆད་པས་འདོད་པ་བླང་བྱ་དང་མི་འདོད་པ་དོར་བྱ་དང་། བར་མ་བཏང་སྙོམས་དུག་གསུམ་དུ་སོང་སྟེ། དེའི་རྟོག་པ་དང་སྣང་བ་བལྟས་པས་ཕྱི་འཇིག་རྟེན་དང་ནང་ལུས་ཀྱི་རྣམ་པ་ཁམས་གསུམ་གང་རུང་གི་སྲེད་ལེན་གྱི་དབང་གིས་སྲིད་པར་གྲུབ་སྟེ། སྤྱི་སྐད་དུ། མིང་དང་། གཟུགས། སྐྱེ་མཆེད་དྲུག །རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། ཞེས་འབྱུང་ངོ་། །འདི་ཉིད་ནས། གཞི་དང་བཞི་ཡི་སྣང་ཆ་ལས། །གཞི་དང་གཞི་ཞེས་ཁྱབ་པར་ལས། །འཁྲུལ་པའི་རྒྱུ་ལ་ཡུལ་རྐྱེན་འཕྲད། །རྐྱེན་བཞི་དམིགས་པ་མ་དག་པས། །ཉོན་མོངས་དྲུག་གིས་བདག་ཏུ་བཅིངས། །ཡུལ་དྲུག་སོ་སོའི་རྣམ་པ་ཤར། །དེར་ལྟས་ཡུལ་ལ་བདག་བཟུང་བའོ། །དེ་ནས་རིམ་གྱིས་སྣོད་བཅུད་ཀྱི། །སྣང་བ་དུ་མའི་གཟུག་བསྡུས་པའོ། །འདི་ཉིད་མི་ཤེས་བྱིས་པ་རྣམས། །ཟོ་ཆུ་བཞིན་དུ་བརྒྱུད་མར་གནས། །སོ་སོའི་ཡུལ་དང་ཚད་ལེན་པའོ། །ཞེས་གསུངས་པས། དེ་ལྟར་མ་རིག་པས་ལུས་སུ་གྲུབ་ཀྱང་འཛིན་པའི་རྣམ་ཤེས་དེ་ནི་མཚན་ཉིད་འཛིན་པའི་རིག་པ་ཞེས་བྱ་སྟེ། ཆོས་སྤྱི་དང་རང་གི་མཚན་ཉིད་འཛིན་པའི་ཕྱིར་རོ། །ཡེ་ཤེས་ཀྱི་སྣང་ཆ་ཡུལ་དུ་སྣང་བ་དེ་ནི། གཞན་དག་ཏུ་

རྣམ་པར་མི་གསལ་ལ། མིག་ཏུ་གཟུགས་ཀྱི་རྣམ་པ་སྣང་ལ་རང་བཞིན་མེད་པ་རང་དག་ཐིག་ལེའི་སྙིང་པོ་ཅན་དུ་གསལ་བ་ལ། ལྷག་མཐོང་གི་རིག་པ་ལུ་གུ་རྒྱུད་ཅེས་བྱའོ། །དེ་ཡང་སྒྲོན་མའི་གནས་ནི་སྙིང་ཡིན་ཏེ། །ལམ་ནི་རྩ་ཆེན་བཞི་ཡིན་ནོ། །སྒོ་ནི་མཐོང་བྱེད་མིག་གི་སྒོ། །ཞེས་བྱུང་ངོ་། །འདི་ལ་ཡང་དངོས་དང་ཆ་ཤས་གཉིས་ཡོད་དེ། དངོས་ནི་རྡོ་རྗེ་ལུ་གུ་རྒྱུད་ཉིད་ཡིན་ལ། ད་ལྟ་ནི་དབུ་མ་སྙིང་དང་འབྲེལ་བ་ལ་སྲོག་གི་རླུང་དང་བཅས་པ་དེར་བརྟེན་ཅིང་། མིག་དང་འབྲེལ་བའི་རྩལ། ཁ་དོག་མེད་པའི་ཁ་དོག་ཅན། དབྱིབས་མེད་པའི་དབྱིབས་ཅན། མིག་རྒྱང་ཞག་ཆུའི་སྒྲོན་མའི་ནང་དུ་འཆར་བར་སྣང་སྟེ། ཕྱིར་སྣང་ཡང་ཕྱི་རོལ་ན་ཡོད་པ་མ་ཡིན་ནོ། །འདི་ནི་དུས་འཁོར་དུ་རེ་ཁ་ཅེས་བཤད་དོ། །བརྟན་གཡོ་ཐམས་ཅད་གསལ་བ་ནི་བརྟན་པ་རི་གླིང་ལ་སོགས་པ་ནས་སངས་རྒྱས་ཀྱི་སྐུའི་རྣམ་པའི་བར་འདི་ཡི་ནང་དུ་སྣང་བ་དེ་མི་འགྱུར་བར་གསལ་ཞིང་། གཡོ་བ་ནི་རྟོག་པ་ཅུང་འགྱུ་ཡང་འདིས་ཚོར་གྱི་གཡོ་བར་འགྱུར་གྱི་དབྱིངས་ཀྱི་སྟོང་གཟུགས་ཀྱིས་དེ་གཉིས་ཀའི་མཚན་ཉིད་མི་ཤེས་ཏེ། དེའི་ཕྱིར་རྟགས་བཅུ་ནི་རྣམ་པ་ཀུན་ལྡན་ཡིན་ལ། རེ་ཁ་ནི་བཅུ་མ་ཡིན་ནོ། །འདིར་དབྱིངས་ལ་རིགས་གསུམ་སྟེ། རྣམ་དག་སྒྲོན་མ་ནི་འོད་ལྔ་ལྡན་ནོ། །དང་པོ་ནི་མཐིང་ཁ་ཁྱབ་པའོ། །དེའང་མཐིང་ཁ་ལས་མཆེད་ཁ་དོག་ལྔ་ཞེས་སོ། །གཉིས་པ་ནི། ཐིག་ལེ་སྟོང་པའི་སྒྲོན་མ་ནི། དམར་ལ་གསལ་བའི་ཐིག་ལེ་ཆེན་མོ་རྩ་གཏིམས་ནས་སྣང་བ་སྟེ། དེ་ནི་དུས་འཁོར་ནས་ཀྱང་། ཐིག་ལེ་ཆེན་པོའི་སྣང་བ་འབྱུང་། །ཞེས་བཤད་དོ། །གསུམ་པ་ནི། ཕྱིའི་དབྱིངས་ནམ་མཁའ་ཡིན་ཏེ། དེ་ཉམས་ལ་ཡང་ནམ་མཁའ་སྣང་། དེ་ཐམས་ཅད་སྟོང་པར་

མཐོང་བའོ། །དེ་ལྟར་ཕྱི་དབྱིངས་ནམ་མཁའ་སྟོང་པའོ། །ཞེས་སོ། །དེ་ལྟར་གསུམ་ག་ཡང་རིག་པའི་ཆ་ཤས་ཡིན་ཅིང་། ད་ལྟ་ནི་མིག་གི་དངས་མ་ཆུ་ཡོད་པ་དང་། དེའི་མཐའ་ན་འོད་ལྔའི་རིས་ཡོད་པ་དང་། རྩ་སྟོང་པ་ནས་རྣམ་པར་ཤེས་པ་འགྱུ་བ་རྣམས་ཀྱི་རྒྱུ་ལས་བྱུང་སྟེ། དབྱིངས་འདི་རྣམས་མིག་མེད་ན་མི་འབྱུང་སྟེ། འདི་རྣམས་རིག་པ་ལ་བརྟེན་ནས་སྣང་བས་གཞལ་ཡས་ཁང་དུའང་བཤད་དོ། །རིག་པ་དང་འདི་གཉིས་ངོ་མ་ཤེས་ན། གདམས་ངག་གི་ཁྱད་མི་ཤེས་ཏེ་གསང་སྐོར་མན་ཆད་རིག་པའི་སྐད་ཡོད་ཀྱང་། དབྱིངས་མེད་པ་ངོ་སྤྲོད་མི་ཤེས་སོ། །རིག་པའི་བཤད་པ་རྣམས་དབྱིངས་ཀྱི་སྟོང་གཟུགས་ལ་སྦྱོར་སྟེ། འདི་ནི་འཁྲུལ་ཏེ་ནོར་བུ་བཻཌཱུཪྱའི་ཡོན་ཏན་འཆིང་བུ་ལ་སྦྱར་བ་དང་མཚུངས་སོ། །དབྱིངས་ཀྱི་སྣང་བ་འཕེལ་བ་རྐྱང་ལ་གཏད་ཅིང་སྒོམས་ཀྱང་། རིག་པ་དང་ཤེས་རབ་རང་བྱུང་གི་སྒྲོན་མ་མེད་ན་ཁམས་གསུམ་ལས་གཏན་མི་ཐར་རོ། །འདི་ནས་འབྲས་བུའི་སྐབས་ན། ཕྱི་ལྷ་མིའི་འབྲས་བུ་མཐར་ཐུག །ནང་གི་འོད་གསལ་ལྷ་རྣམས་སོ། །ཞེས་པ་དང་། ཡང་འགྲེལ་པ་ནས་མི་འགྱུར་བའི་ལུས་རྙེད་པ་བྱེད་པ་ལ། སྣང་བ་འཕེལ་བ་འབའ་ཞིག་ལ་བལྟས་ན་བསམ་གཏན་གྱི་ལྷའི་སྐྱེ་གནས་ལས་མི་གྲོལ་བའི་ཕྱིར་ན་ཆོས་ཉིད་ཟད་པའི་སྣང་བ་ལ་ཅི་ཡང་མ་གྲུབ་པར་གཏན་ལ་དབབ་བོ། །ཞེས་གསུངས་སོ། །སྦྱོར་དྲུག་བས་ཀྱང་རེ་ཁ་འདི་མ་ཤེས་པས། །སྟོང་གཟུགས་ཀྱི་ལྷ་མཐོང་བ་ལ་མཆོག་འཛིན་བྱེད་པ་འཁྲུལ་ཏེ། འདི་རྣམས་ཀྱི་དབྱེ་བ་དང་བཤད་པ་རྒྱུད་བཅུ་བདུན་དང་དུས་འཁོར་ལས་གསུངས་པ་མང་ཡང་འཕྲོས་པ་ཆོག་གོ། མདོར་ན་རིག་པ་ནི་ཡུལ་ཡེ་ཤེས་རང་བྱུང་གི་སྒྲོན་མ་ནི་ཡུལ་ཅན་གྱི་ཡེ་ཤེས་ཏེ།

དེ་གཉིས་རྣམ་པར་དག་པར་ངོ་སྤྲོད་ཅིང་། ཉམས་སུ་ལེན་པ་ནི་གནད་ཡིན་ནོ། །འདི་ལ་རྒྱུ་རྐྱེན་མེད་དོ་ཞེས་བཤད་པ་ནི། དེ་གཉིས་ཀྱི་ངོ་བོ་ཡིན་གྱི་དབྱིངས་ཀྱི་སྣང་བ་དང་། འཁྲུལ་བའི་རྟོག་པ་མཚན་ཉིད་འཛིན་པ་ལ་རྒྱུ་རྐྱེན་མཐོང་བཞིན་དུ་མེད་པར་བྱས་ན་ནོར་བར་འགྱུར་རོ། །དབྱིངས་ཀྱི་སྣང་བ་འབྱུང་བའི་རྒྱུ་རྐྱེན་སྣང་ལུགས་ཡེ་ཤེས་ལྔ་ལ་སྦྱར་བ་ནི། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་རྒྱ་མཚོ་ཨར་གཏད་དུ་རྒྱ་ཆེར་གསུངས་སོ། །གཉིས་པ་འཁྲུལ་མ་འཁྲུལ་སྔར་ཞོར་ལ་བཤད་ཀྱང་འདིར་ཡང་ཅུང་ཟད་བསྟན་པར་བྱས་ཏེ། མཚན་ཉིད་འཛིན་པའི་རིག་པ་ལ། མཚན་ཉིད་ཡོད་ཕྱིར་འདོད་པ་དང་། ཡུལ་ཅན་དུ་བདེན་རྟོག་གིས་བཅིངས་པ་དེ་འཁྲུལ་བ་ཡིན་ཏེ། དེ་ལྟར་མེད་པའི་ཕྱིར་རོ། །མཚན་ཉིད་འཛིན་པ་ཤེས་རབ་རང་བྱུང་གིིི་སྒྲོན་མ་ནི་ཡུལ་ཐམས་ཅད་དབྱིངས་དང་རིག་པ་སྣང་ལ་རང་བཞིན་མེད་པ་ཉིད་དང་། ཡུལ་ཅན་གཉིས་འཛིན་གྱི་རྟོག་པ་རང་སར་དག་པས། ཟུང་འཇུག་དག་པའི་རང་བཞིན་དུ་སོང་བ་ནི་མ་འཁྲུལ་བ་ཡིན་ཏེ། འདི་ཉིད་ནས། སྤྲུལ་སྐུའི་ཡེ་ཤེས་རྣམ་པ་གཉིས། །ཤེས་བྱ་ཅི་ལྟའི་གནས་ལུགས་ཤེས། །ཇི་སྙེད་ཅིག་ཅེས་དོན་རྣམས་ཤེས། །ཞེས་འབྱུང་བའི་དོན་ཡིན་ནོ། །གཞི་འཛིན་པའི་རིག་པ་ནི། རྟོག་པ་ཉོན་མོངས་དང་བཅས་པའི་དུས་ན་འཁྲུལ་པ་ཡིན་ལ། དེ་རྣམས་ཀྱི་འཁྲུལ་རྐྱེན་བྲལ་བ་ནི་མ་འཁྲུལ་པ་ཡིན་ནོ། །དོན་ལ་འདི་ཀུན་གཞི་ཞེས་བྱའོ། །དེ་ཡང་རང་གི་ལུས་ལ་གནས་པའི་དུས་ན་ཤེས་པ་ཐམས་ཅད་བསྐྱེད་ཅིང་རང་གསལ་ཙམ་དུ་གནས་པའོ། །ཞེས་སོ། །གཞིར་གནས་ནི། སྒྲིབ་བྱེད་ཀྱི་རྐྱེན་དང་མ་བྲལ་བའི་དུས་ན་

འཁྲུལ་པ་ཡིན་ལ། དེའི་ངོ་བོ་ནི་མ་འཁྲུལ་བའི་རང་བཞིན་དུ་གནས་སོ། །དེ་ནས་ངོ་བོ་ཀ་དག་གི་གནས་ལུགས་ཏེ་ཡེ་ཤེས་གསུམ་ལྡན་དུ་ཡོད་དེ། ཆ་ཡིས་མ་བསྐོས་པའི་རིག་པ་ཐམས་ཅད་མཁྱེན་པའི་ཡེ་ཤེས་ཀྱི་ངོ་བོར་བཞུགས་པ་སྟེ། ཡེ་ཤེས་དེ་ཡང་ཕྲ་བའི་ཡེ་ཤེས་སུ་གནས་སོ། །ཞེས་སོ། །ལྷག་མཐོང་གི་རིག་པ་ལུ་གུ་རྒྱུད་ནི། རང་གི་རིག་པ་ཉིད་ཀྱིས་རང་ངོ་ཡེ་ཤེས་ཀྱི་སྐུར་མ་ཤེས་ནས་ཕྱི་རུ་རྟོག་པ་དང་། འོད་ཟེར་དབྱིབས་དང་ཁ་དོག་ལ་སོགས་པ་ལ་དོན་མེད་པའི་འགྲོ་བ་རིགས་དྲུག་གི་ཡུལ་དང་། ཡུལ་ཅན་དུ་བཟུང་ནས་བླང་དོར་བྱ་རྒྱུ་དང་། བྱས་པར་འདོད་པ་འཁྲུལ་ལ། དེ་ཉིད་རང་གིི་རིག་པ་རང་སྣང་རང་གྲོལ་དུ་གོམས་པ་ནི་མ་འཁྲུལ་པ་ཞེས་བྱའོ། །ཐོད་རྒལ་གྱི་རིག་པ་ལ། ཉམས་སུ་བླངས་ནས་ཚད་དུ་ཕྱིན་པའི་མིང་ཡིན་པས་འཁྲུལ་བ་ཟད་པ་འབྲས་བུའི་གནས་ལུགས་མ་འཁྲུལ་བ་ཡིན་ཏེ། དེ་ཡང་ཆོས་བོར་བ་ཅེས་བྱ། ཆོས་ཟད་པ་ཞེས་བྱ། ཆོས་ལས་འདས་པ་ཞེས་བྱ། ཆོས་ལས་གྲོལ་བ་ཅེས་བྱ། །ཞེས་བྱུང་ངོ་། །འོན་ཀྱང་ཡུལ་དང་ཡུལ་ཅན་གཉིས་ཀ་བདེན་པར་ཡོད་པའི་རྟོག་པ་དང་མི་བདེན་པ་གཉིས་ཀའི་རྟོག་པ་བྱུང་ན་ད་ལྟ་འཁྲུལ་པའི་རིག་པས་བསླད་པ་ཡིན་ནོ། །གསུམ་པ་ཉམས་ལེན་དུ་འགྲོ་བའི་དོན་ནི། དབྱིངས་རིག་མཐོང་བའི་རིག་པ་མངོན་སུམ་གྱིི་དུས་ན་སྣང་སྟོང་དབྱེར་མེད་ངོ་བོའི་འདུག་ཚུལ་དེ་ལ་མཚན་ཉིད་འཛིན་པའི་རིག་པས་བརྟགས་ཀྱང་། ཐམས་ཅད་དང་མཐུན་ལ་ཐམས་ཅད་མ་ཡིན་པར་སྣང་ཞིང་། སེམས་དང་ཡེ་ཤེས་རང་བཞིན་གཅིག་པ་དང་ཐ་དད་དུ་བསྟན་དུ་མེད་པ་ནི་དོན་དམ་དང་ཀུན་རྫོབ་ཀྱི་གནས་ལུགས་ཐམས་ཅད་འདུས་པར་ཐག་ཆོད་པས་

ལྟ་བ། དེ་ལ་ཉམས་ལེན་སྐད་ཅིག་ཀྱང་མ་བྲལ་བ་དགོས། བྲལ་ན་སྐྱེད་མེད་པར་དབང་པོའི་མངོན་སུམ་དུ་མཐོང་བས་བརྩོན་འགྲུས་ཤུགས་ལ་འབྱུང་བ་བསྒོམ་ལ། དེ་ལ་འདུ་འབྲལ་མེད་པར་སྤྱོད་ན་སྐུ་དང་ཞིང་ཁམས་རྡུལ་ཕྲ་རབ་ཀྱི་གྲངས་སྣང་ཞིང་། ཐེག་ཆེན་གྱི་ཆོས་སྒྲ་ཐོས་ལ་སྒོ་ལྔ་མ་འགགས་ཀྱང་འདོད་པའི་རྟོག་པ་མེད་ཅིང་། ཡིད་ལ་དེ་རྣམས་ཀྱི་རྣམ་པ་དང་འདོད་པ་དང་གཟུགས་མེད་ཀྱི་རྟོག་པ་འཁྲུལ་བར་ཤེས་ནས་རྒྱུ་འབྲས་མཁྱེན་པའི་ཤེས་རབ་སྐྱེ་ཞིང་མི་དགེ་བ་བཅུའི་སེམས་སྐད་ཅིག་ཀྱང་མི་འགྱུ་བས་ན་སྤྱོད་པ་ཞེས་བྱ་ལ། འབྲས་བུ་རང་སེམས་ཡེ་ཤེས་དང་འབྲེལ་བར་མངོན་དུ་འགྱུར་བའི་ཕྱིར། ཉམས་གོང་འཕེལ་ཞེས་བཤད་ལ། །རིག་པ་ཚད་ལ་ཕེབས་པའི་ཚེ། གསལ་སྣང་གི་ཆ་སྟོང་གསུམ་གང་བ་བལྟས་ཀྱང་ཁྱབ་པ་གཉིས་འཛིན་གྱི་འཁྲུལ་པ་ནུབ་ཅིང་། གང་འདོད་པའི་དབང་འབྱོར་ཐོབ་ནས་སེམས་ཅན་ཐམས་ཅད་ཀྱི་དོན་ནུས་ཤིང་། ཆོས་ཐམས་ཅད་ཟད་པའི་དུས་ན་གཉིས་འཛིན་གྱི་བག་ཆགས་ཐམས་ཅད་དང་བྲལ་བ་ནི། དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་དགོངས་པ་ཡིན་ན་ཉམས་ལེན་དེ་ལས་མཆོག་མེད་དོ། །དེའི་རྒྱུ་མཚན་གྱིས། རྣམ་པ་འདི་ཉམས་སུ་ལེན་པའི་ལུས་གནད་ལྟ་སྟངས་རྣམས་ནི་དང་པོའི་རྐྱེན་ཙམ་ཡིན་ནོ། །ངོ་བོ་གནད་དུ་བསྣུན་པ་ནི། འདི་ལྟར་གསུངས་ཏེ། དབྱིངས་ལ་བསྟན་པའི་ཕྱིར། སྣང་བ་ཀུན་ལ་རང་གཟེར་བཏབ། ཞེས་བྱ་བ་དབྱིངས་ནི་སྔར་བསྟན་པ་ལྟར་ནང་གི་རྒྱུ་རྐྱེན་ལས་སྣང་བ་ཡིན་པས། གཟུགས་སོགས་སྣང་བ་ཐམས་ཅད་དེ་དང་བསྲེས་ལ་ཐ་དད་མེད་པར་ཉམས་སུ་བླང་ངོ་། །སྣང་བ་ལོགས་སུ་བཞག་དབྱིངས་ཀྱི་འབར་བ་ཟླ་ཉི་འོད་འཇའ་

ཚོན་ཐིག་ལེ་སྐུ་སྣང་། ལོགས་གཅིག་ཏུ་བཞག་པས་མི་ཡོང་ངོ་། །རིག་པ་བརྟན་པར་བྱ་བའི་ཕྱིར། །ངོ་བོ་ཉིད་ནི་རྣལ་དུ་དབབ། །ཅེས་པ་ནི། རིག་པའི་དབྱེ་བ་ལྔ་ལ་མཁས་ཤིང་རྡོ་རྗེ་ལུ་གུ་རྒྱུད་ད་ལྟ་དབྱིངས་དང་འབྲེལ་བ་དང་རྩ་ནང་ནས་བརྒྱུད་དེ་ཤར་བ་དང་། ཤར་བ་དང་པོ་རྒྱང་ཞགས་མིག་གི་ཆུ་ལ་ཤར་ཞིང་། དེ་ནས་ཕྱི་ནམ་མཁར་སྣང་བས་དབྱིབས་དང་ཁ་དོག་དུ་མར་སྣང་བར་ཟད་ཀྱི། ཁོ་རང་ནི་དང་པོ་ནས་ཐ་མའི་བར་དུ་མི་འགྱུར་ཞིང་ཐམས་ཅད་འགྲེ་ཡང་ཐམས་ཅད་ཀྱིས་མ་གོས་པ་ཡིན་པ་དེ་གོ་བར་བྱའོ། །ལྟ་བ་བསྟན་པར་བྱ་བའི་ཕྱིར། དྲག་ཏུ་ལུ་གུ་རྒྱུད་ལ་གཟིར། །ཞེས་པ་ནི། སྣང་སྟོང་དབྱེར་མེད་ལ་མིག་ལ་སོགས་པའི་དབང་པོ་ཡུལ་དང་ཡུལ་ཅན། ཤེས་པ་ཐམས་ཅད་བཞག་པ་ནི། གང་གི་ཡང་མཐར་མ་ལྷུང་བ་ཉིད་ཡིན་ཏེ། གཞན་དང་ལུ་གུ་རྒྱུད་ཀྱི་ལྟ་བ་གཉིས་གཅིག་པོ་མ་ཡོར་སོ་སོར་བཞག །གཅིག་ཟུང་འཇུག་དུ་བྱེད་པ་ནི་མ་ཡིན་ནོ། །ཤེས་པ་བརྟན་པར་བྱ་བའི་ཕྱིར། །རིག་པ་དབྱིངས་སུ་བཙོན་དུ་གཟུང་། །ཞེས་པ་ནི་སྔར་བསྒོམས་པའི་གནད་བསྟན་པ་དེ་ཡིན་ནོ། །ལུས་ནི་བརྟན་པར་བྱ་བའི་ཕྱིར། །འདུག་སྟངས་རྣམས་ལ་རང་ལུས་སྦྱང་། །ངག་ནི་བརྟན་པར་བྱ་བའི་ཕྱིར། །རྟག་ཏུ་ལྐུགས་པ་ལྟ་བུར་གནས། །སེམས་ནི་བརྟན་པར་བྱ་བའི་ཕྱིར། །རྟག་ཏུ་ལུ་གུ་རྒྱུད་ལ་ལྟ། །ཞེས་པ་ནི། ལུས་ངག་ཡིད་ཀྱིས་འཇིག་རྟེན་གྱིས་བྱ་བ་གཞན་རྒྱབ་ཏུ་ལིངས་ཀྱིས་བསྐྱུར་ལ་ཉམས་སུ་བླང་བར་བསྟན་པ་ཡིན་གྱི། དགེ་བ་བཅས་ནས་མི་དགེ་བའི་ལུས་ངག་ཡིད་གསུམ་རང་དགར་འཇོག་པ་ནི་མ་ཡིན་ནོ། །སྣང་བའི་འཁྲུལ་པ་རྒྱུན་བཅད་ཕྱིར། །སྟོང་པ་ཉིད་ལ་གོམས་པར་བྱ་

ཞེས་པ་ནི། སྟོང་གཟུགས་དབྱིངས་རིག་གི་སྣང་བ་ནས་ཆོས་དང་ཆོས་ཉིད་ཡིད་ལ་སྣང་བའི་བར་ཐམས་ཅད་སྤྲོས་བྲལ་སྟོང་ཞིང་མ་འགགས་པར་སྤྱད་དགོས་ཀྱིས། སྟོང་གཟུགས་འདི་བདེན་གྱིས་སངས་རྒྱས་འདི་རང་ཡིན་ལ་སྣང་བ་འདི་ཡང་ཡེ་ཤེས་ཡིན་པས་འདི་ལ་ཞེན་པ་གྱིས་བྱས་ཀྱང་མི་ཕན་པའི་དོན་ནོ། །མདོར་བསྡུས་ན་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་མངོན་དུ་བྱ་བའི་ཕྱིར་འདི་ཐམས་ཅད་བརྗོད་པ་ཡིན་ནོ། །དེའི་ལམ་གྱི་དྲོད་ཚད་འཛིན་པ་ལ་རྟགས་དང་ཚད་བཤད་པ་ནི་གལ་ཆེའོ། །དེ་ཡང་ཕྱི་རུ་རྣལ་འབྱོར་པ་ལ་གཞན་གྱིས་མཐོང་བ་དང་། རང་གིས་ནང་ནས་རྟོགས་པ་ལ་དབང་ཐོབ་མ་ཐོབ་ཀྱི་ཚད་དང་། དབྱིངས་རིག་གི་སྣང་ཆའི་རྟགས་གསུམ་འཛོམ་མ་འཛོམ་ལྟ་བ་གལ་ཆེའོ། །དེ་གསུམ་མ་འཛོམ་ན་སྟོང་གཟུགས་ཀྱི་ལྷ་མང་ཡང་མི་ཕན། ཤེས་རབ་ཆེ་ཡང་མི་ཕན། ལུས་ལ་རྫུ་འཕྲུལ་བྱུང་ཡང་མི་ཕན་ནོ། །རྒྱ་ཆེ་བར་རྒྱུད་གདམས་ངག་ལས་གསུངས་ཀྱང་མ་སྤྲོས་སོ། །འདི་ལྟར་ཉམས་སུ་ལེན་པའི་གནད་མ་གོ་བར། ལ་ལ་རྫོགས་ཆེན་བྱར་མེད་དུ་བཤད་ཟེར་ནས་ལུས་ངག་ཉོན་མོངས་རང་དགར་འཇོག་པ་དང་། ལ་ལ་དགེ་སྡིག་ལ་ཕན་གནོད་མེད་ཟེར་ནས་སྡིག་སྤྱོད་དགེ་བ་སྐྱུར་བ་དང་། ལ་ལ་སྟོང་གཟུགས་དབྱིངས་རིག་མཐོང་བས་སངས་རྒྱས་ཡིན་ཟེར་ནས་ཐམས་ཅད་མཁྱེན་པའི་ཤེས་རབ་ལ་དམོད་པ་དང་། གཞན་ཡང་སྟོང་པ་ཉིད་བསམ་དུ་མེད་ཟེར་ནས་གཏི་མུག་ཏུ་འཇོག་པ་དང་། ལ་ལ་སངས་རྒྱས་ཀྱི་རྒྱུད་རིག་བྱ་དང་རྟོག་གེ་ཡང་ཡིན་ཟེར་ནས་སྟོང་པ་ཉིད་ལ་གཤེ་བ་དང་། ལ་ལ་སྟོང་རྐྱང་གིས་སངས་རྒྱས་ཐོབ་ཟེར་

ནས་རང་འཇིག་རྟེན་གྱི་དངོས་པོ་ལ་སྤྱོད་པ་དང་། མདོར་ན་ཕྱོགས་རེ་ལ་ཞེན་པ་དཔག་ཏུ་མེད་པ་ཡོད་ཀྱང་། དེ་ཐམས་ཅད་ལོག་ལྟ་དང་འཇིག་ཚོགས་དང་མཐར་འཛིན་དང་། མ་རིག་པའི་སྐོར་བཟློག་རྐྱང་པ་ཡིན་པས་བདུད་ཀྱིས་ཟིན་པ་ཡིན་ནོ། །བར་སྐབས་ཀྱི་ཚིགས་སུ་བཅད་པ་རྩ་བ་དྲུག་པ་ནི། འདི་བརྗོད་ཐབས་དང་ཤེས་རབ་དབྱེར་མེད་བརྩོན་འགྲུས་ལྡན། །སྤངས་ཐོབ་བྲལ་གང་རྣམ་ཀུན་མཆོག་ལྡན་དེ་ཐོབ་བྱ། །གཞན་ལ་ཚིག་ངན་བརྗོད་མིན་ལོག་པར་མཐོང་གྱུར་ནས། །ངེད་ལ་ཟེར་ཅིང་ལྟ་ངན་ཞུགས་ཏེ་ལེན་པ་བྱུང་སྲིད་ན། །བཟོད་པར་མཛོད་ཅིག་དེས་ཀྱང་སེམས་མ་ཞི་ན་དམྱལ་བར་སོང་། །མཐའ་བྲལ་ཐབས་ཀྱིས་བརྒྱན་པ་རང་བྱུང་རྣམས་ཀྱི་དགོངས་པ་ཡིན། །བཞི་པ་འབྲས་བུ་ནི་སྐུ་གསུམ་གཞི་ལ་བཞུགས་པ། ངོ་བོ་རང་བཞིན་ཐུགས་རྗེ་གསུམ། དེས་ལམ་དུ་བྱས་པ་དེ་གསུམ་གྱི་བྱ་བ་ཅི་ཡོད་གྱི་བར་ཡིན་ལ། དེ་འབྲས་བུར་གྱུར་པ་ཐམས་ཅད་ཀྱི་འཁྲུལ་བ་དག་པ་ཡིན་པས་གཞུང་རྣམས་ནས་རྒྱ་ཆེར་གསུངས་པ་འདིར་མ་སྤྲོས་སོ། །དེ་རྣམས་འདིར་འཕྲོས་པ་བཤད་པ་ཡིན་ནོ། །དེ་ལྟར་བསྟན་ཅིང་ཤེས་ནས་ཉམས་སུ་ལེན་པ་ནི། རྟག་ཏུ་ཁྱིམ་མེད་རི་ཁྲོད་འགྲིམ། །ཞེས་བྱ་བ་ནི་བྱ་བ་བཏང་ནས་དབེན་པ་བརྟེན་པའོ། །མཚན་དུས་རང་གི་གནས་ཁང་དུ། །ཉིན་མོ་བཞིན་དུ་ལྟ་ཞིང་བརྟག །ཅེས་པ་ནི་མུན་པའི་རྣལ་འབྱོར་ཏེ། རྒྱ་མཚོ་ཨར་གཏད་ཀྱི་གནད་ཤེས་པར་བྱས་ལ་བསྒོམ་མོ། །ཉིན་པར་རི་ཁྲོད་གཅན་གཟན་བཞིན། །ཞེས་པ་ནི། གང་ལའང་མི་འཇིགས་པའོ། །དེ་ལྟར་བྱེད་པའི་སྐྱེས་བུ་ནི། །སངས་རྒྱས་ཀུན་ཏུ་བཟང་པོ་དང་།

རྡོ་རྗེ་སེམས་དཔའ་ཞེས་བྱའོ། །ཞེས་པས་ཉམས་སུ་བླང་བ་གལ་ཆེའོ། །དེ་ནས་སྣང་བ་གོང་འཕེལ་རིམ་པས་འབྱུང་བའི་གཞུང་དང་རྟགས་ཚད་རྣམས་རིམ་པས་སྦྱར་ལ་ལྟའོ། །རིག་པ་མངོན་སུམ་གྱི་དོན་བསྟན་པ་སྟེ་དགུ་པའོ།། །།དེ་མན་ཆོད་ནི་རིག་པའི་རྒྱབ་བརྟེན་དང་འགལ་བ་བསྡུས་པ་དང་། གཞན་དོན་བསྡུས་པ་དང་། རིག་པ་བསྡུས་པ་དང་། སྐུ་གསུམ་བསྡུས་པ་དང་། ལྟ་སྤྱོད་བསྡུས་པ་དང་། ཉག་གཅིག་བསྡུས་པ་དང་། དགེ་སྡིག་བསྡུས་པ་རྣམས་ནིི་རིག་པ་རྡོ་རྗེ་ལུ་གུ་རྒྱུད་ལ་ངེས་ཤེས་བསྐྱེད་པའི་རྒྱབ་བརྟེན་ཡིན་པས། རྩ་བ་དང་། བི་མ་ལའི་འབྲེལ་པ་གཉིས་སྦྱར་ལ་བཤད་དོ། །སྤྱིའི་དོན་གོ་བར་བྱེད་པ་ལ་དུང་ཡིག་ཅན་གལ་ཆེའོ། །བསྟན་པའི་བུ་གཅིག་ནི་བཅངས་པས་ཡོན་ཏན་འབྱུང་བའོ། །མདོར་ན་རྒྱུད་བཅུ་བདུན་འགྲེལ་པ་གདམས་ངག་དང་བཅས་པ་དང་། མན་ངག་བརྒྱ་དང་བཅུ་དགུ་པོ་རྣམ་ལ་ལྟའོ། །སྤྲོས་པ་མེད་པ་རྣམས་ལ་ཁྲིད་ཡིག་འདི་དང་། ཟངས་ཡིག་ཅན་རྩ་བ་དང་། འགྲེལ་པ་དུམ་བུ་གཉིས་པ་དེ་དང་། རྟགས་དང་ཚད་རྣམས་ཀྱིས་ཆོག་གོ། གཞན་ལ་སྟོན་ན་དབང་རྣམས་དགོས་སོ། །ཡན་ལག་ཁྲེགས་ཆོད་བདུན་པ་དང་། ཁྱུང་ཆེན་དང་། པྲ་ཁྲིད་ཡོད་ན་བཟང་། དུས་གཅིག་མཉམ་སྦྱོར་དང་། རྣམ་རྟོག་ཐོག་བརྫིས་གཉིས་ཀྱང་ཉམས་ལེན་གྱི་གྲོགས་སུ་འགྲོའོ། །ཟངས་ཡིག་ཅན་མའི་ཁྲིད་ཀྱི་རིམ་པ་དུམ་བུ་བཅུ་པ་རྫོགས་སོ། །རྒྱལ་བས་གསུངས་པའི་དམ་ཆོས་ཀུན་གྱི་བཅུད། །ལུང་དང་རྟོགས་པར་འབྲེལ་བ་གསང་སྔགས་

དོན། །རྫོགས་རིམ་སྙིང་ཕྱུང་མངོན་སུམ་ལྟ་བའི་གནད། །མན་ངག་དེ་དང་མཐུན་པར་བདག་གིས་བསྡེབས། །ཡི་གེ་རྣམས་ལ་བལྟས་པའི་རྟོག་དཔྱོད་མིན། །བདག་ནི་བི་མ་ལ་ཡིས་བྱིན་གྱིས་བརླབས། །ཀརྨའི་ཡང་དགོན་དབེན་པར་འདུག་པའི་ཚེ། །ནམ་ལངས་དུས་མཐར་ཤར་གྱི་ཕྱོགས་རོལ་ནས། །ལྟ་བས་མི་ངོམས་འོད་ཀྱིས་མཛེས་པ་ན། །མངོན་སུམ་ལྟར་སྣང་བདག་གི་མཛོད་སྤུར་ཐིམ། །དེ་ནས་འབད་མེད་གནད་འདི་ཐམས་ཅད་གོ། འདི་ནི་ཆོས་ཀུན་མཐུན་ཞིང་ཁྱད་པར་དུ། །མངོན་སུམ་རིག་པའི་ཁྱད་ཀྱིས་འཕགས་པ་ཡིན། །དེ་ལྟར་ཡི་གེར་བཀོད་པ་མི་འོས་ཀྱང་། །ཉམས་སུ་ལེན་དང་གཞན་ལ་ཕན་བྱེད་པའི། །སྐྱེས་ཆེན་དུ་མས་བསྐུལ་ནས་སྦྱར་བ་ཡིན། །དགེ་བས་ཆོས་ཀུན་ཟད་སར་ཕྱིན་གྱུར་ཅིག །རང་བྱུང་རྡོ་རྗེས་རང་བྱུང་གི། ཡེ་ཤེས་མངོན་སྟོན་ཡི་གེ་སྦྱར། །ལུང་དོན་བཤད་ན་ཟད་པ་མེད། །སྤྲོས་པ་ཆོད་ན་ཉམས་སུ་ལོངས། །བྱ་ལོ་ཟླ་བ་དྲུག་པ་ལ་སྦྱར་བའོ། །གདམས་ངག་འདི་ཤེས་མིན་མི་ཤེས་མིན་རྣམས་ལ་སྦ་བར་བྱས་ལ། སྐལ་ལྡན་ཉམས་ལེན་བྱེད་པ་རྣམས་ལ་བསྟན་པར་བྱའོ། །དམ་ཚིག་དང་ལྡན་པ་རྣམས་ལ་བཀའ་སྲུང་རྣམས་ཀྱིས་བཀའ་ཁྲོལ་ལ་སྟོང་གྲོགས་མཛོད་ཅིག །དམ་མེད་ལོག་པར་ལྟ་བ་རྣམས་ལ་ཆད་པ་འབབ་བོ། །བཀྲ་ཤིས་དཔལ་འབར་ཡེ་ཤེས་རྒྱས་འབར་འཛམ་གླིང་མཛེས་པའི་རྒྱན་དུ་ཤོག །ན་མོ་བི་མ་ལ་མི་མཆོད་བརྗོད་ཏྲ་བྷྱཿསྡོམ་ལྡན་དབང་ཐོབ་དབང་བཞི་རྒྱུད་སྨིན་ཅིང་། །ངེས་འབྱུང་སྙིང་རྗེ་ཆེ་བྱང་ཆུབ་སེམས་སྦྱོང་ལྡན་པ། །རྩ་རླུང་ཐིག་ལེ་གནད་དུ་པྲ་ཁྲིད་རྣམས་བསྣུན། །ཆོས་ཀུན་སྤྲོས་བྲལ་ཁྲེགས་ཆོད་ཀྱི་ཁྲིད་དོན་རིག་གནས། སྣང་བ་

སེམས་ཤེས་སྣང་སྲིད་གཉིས་རུ་ཤན་ཕྱེད། །དབེན་པར་སེང་གེ་འདུག་སྟངས་གསུམ་གླང་ཆེན་དང་། །དྲང་སྲོང་ལྟ་བུ་ལུས་ཀྱི་གནད། །སྟེང་འོག་ཟུར་ལ་ལྟ་སྟངས་གསུམ་མ་འགྱུར་ལྟ། །མཁའ་ལ་དབྱིངས་དང་ངོ་སྤྲོད་རིག་པ་གསུམ་རིག་པ་ཚར། །སྣང་དང་མཆེད་ཉམས་གོང་འཕེལ་རིག་དང་ཚད་དུ་ཕྱིན། །ཤེས་རབ་རང་བྱུང་སྒྲོན་ཕྱི་ནང་རིག་པ་མ་ཡིས། །ཀུན་མཐོང་ཆོས་ཟད་མཐར་འབྲས་བུ་ཐུག་ཐོབ། །སངས་རྒྱས་ཀུན་གྱི་མཇུག་སྡུད་རྟོགས་པའི་གནད། །ཚིགས་གསུམ་གནད་དྲིལ་སྙིང་ཐིག་ལ། །རྒྱུད་ལུང་ཀུན་ན་འདི་ལས་མེད། །རང་བྱུང་གིས་བསྟན་ཉམས་ལེན་མཛོད། །རྫོགས་པ་ཆེན་པོ་ཚིག་བཞི་བི་མ་ལ་ཡིས་བྱིན་གྱིས་བརླབས་པ། རང་བྱུང་རྡོ་རྗེས་བསྟན་པ་འདི། སྐལ་ལྡན་རྣམས་ཀྱིས་འཇིག་རྟེན་གྱི་བྱ་བ་སྤོངས་ལ་ཉམས་སུ་ལོངས་ཤིག །བཀའ་སྲུང་རྣམས་ཀྱིས་གཉེར་མཛོད་ཅིག། །།སརྦ་མངྒ་ལཾ། །ཛ་ཡནྟུ།། །།

གཅུད་ཕུར་གསུམ་གྱི་རྒྱབ་ཡིག་གསང་བའི་མན་ངག

གཅུད་ཕུར་གསུམ་གྱི་རྒྱབ་ཡིག་གསང་བའི་མན་ངག་བཞུགས་སོ༔

༔ མྭ་ཐཏྲྀནརྦ྄ག༔ ༔ད་ནི་རྒྱ་མཚོ་ཨར་ལ་གཏད་པའི་དུམ་བུ་འོག་མའི་གབ་པ་རྣམས་མངོན་དུ་འབྱིན་པར་བྱེད་པའི་གནད་ཀྱི་ཡི་གེ་གསང་བ༔ རྒྱབ་བརྟེན་གསང་བར་བྱེད་པའི་གནད་བསྟན་པ་ནི༔ འདི་ལ་ནི་སློབ་དཔོན་གྱིས་ཡང་དག་པའི་གནད་གཉིས་ལས་གསུངས་ཏེ༔ དྲང་བའི་གནད་དང་ཐིག་ལེ་སྟོང་པའི་སྒྲོན་མ་རང་གི་ངོ་བོའི་གནད་གཉིས་ལས་མ་གསུངས་པས༔ འདིར་ཡང་གནད་ཀྱིས་མན་ངག་གསང་བ་གཉིས་ལས༔ དྲང་བའི་ཐབས་ཀྱི་གནད་ནི་གསུམ་སྟེ་ལུས་གནད་དངོས་ཀྱི་སྒྲོན་མ་གཏེམ་ཏེ་ཡང་དག་པའི་གནད༔ ད་ལྟ་ཉིད་དུ་སྣང་བར་བསྟན་པ་དང་༔ གནད་རྩའི་གནད་ཀྱིས་སྒྲོན་མ་ཉིད་ཡུར་བར་དྲང་བ་དང་༔ ཡུལ་དང་དབང་པོའི་གནད་ཀྱིས་སྒྲོན་མ་ནམ་མཁའ་ལ་དབྱུང་བར་བྱ་བ་ཡིན་ནོ༔ དེ་ལ་སྐྱེས་བུ་དད་པ་དང་ལྡན་ཞིང་རང་བཞིན་རྫོགས་པ་ཆེན་པོའི་དོན་ལ་མོས་པ་ཞིག་གིས་སྔོན་དུ་རང་གི་བླ་མ་མཉེས་པར་བྱས་ནས༔ སྒྲོན་མ་ཨར་ལ་གཏད་པའི་གསང་ཆེན་གྱིས་མན་ངག་འདི་ནི་ཡང་ནས་ཡང་དུ་གྲས་ཐག་བཅད་ལ༔ འཇིག་རྟེན་འདིའི་ཞེན་པའི་བློ་ཐམས་ཅད་དོར་ལ་རང་བཞིན་གཉིས་སུ་མེད་པའི་དགོངས་པ་ལ་གནས་པར་བྱ་བའི་ཕྱིར༔ རང་གི་ཡུལ་རྐྱེན་གྱིས་མི་གནོད་པའི་དགོན་པར་སོང་ལ༔ གྲོགས་སྤངས་ལ་རང་གཅིག་པུར་གནས་པར་བྱའོ༔ དེ་ནས་དུམ་བུ་གོང་མའི་གནད་ཀྱི་ཡི་གེ་བསྟན་པ་ལྟར༔ ལུས་ངག་ཡིད་གསུམ་གྱི་གནད་རྣམས་བསྟུན་ལ༔ སྒྲོན་མ་བརྟེན་པའི་གནད་བྱ་སྟེ༔ གོང་ལྟར་ལུས་དལ་བར་གནས་པ་གནད་ཡིན་པས༔ ད་ནི་ལུས་འདུག་སྟངས་རིན་པོ་ཆེ་གནད་ཀྱི་མན་ངག་ཡིན་ཏེ༔ སྟན་བདེ་བའི་སྟེང་དུ་ལུས་དྲང་སྲོང་ལྟ་བུའི་འདུག་སྟངས་བྱ་བས་ཏེ༔ གྲུ་མོ་གཉིས་པུས་མོའི་སྟེང་དུ་བཞག་ལ༔ ལུས་ཀྱི་ཆ་བསྲངས་ལ་རང་གི་ལག་པ་གཡས་གཡོན་མཐེབ་མཛུབ་བཞི་ཡིས་མིག་གཉིས་ཀྱི་ཐ་མ་གཉིས་

གཙིར་བས་སྒྲོན་མའི་སྣང་བ་འོད་ཀྱི་ཐིག་ལེ་རྨ་བྱའི་མདོངས་ཀྱི་རྣམ་པ་ལྟ་བུ་ཞིག་འཆར་ཏེ༔ དེ་ལ་རང་གི་ཤེས་པ་གཏད་ཅིང་ཉམས་སུ་བླངས་བ་ནི་ཉིན་མཚན་ཐུབ་བཞིའམ༔ དྲུག་ཏུ་བཅད་ལ་བསྒོམ་པར་བྱའོ༔ དེ་ལྟར་དུ་བྱས་པས་སྒྲོན་མ་ཉིད་ལ་སྣང་བར༔ སྣང་བ་འདི་ཀུན་ཀྱང་སེར་ལམ་ལམ་པའམ༔ དམར་ལམ་ལམ་པའམ༔ དཀར་ལམ་ལམ་པའམ། སྔོ་ལམ་ལམ་བའམ༔ རྩེར་རྩེར་དང་༔ ལྷང་ལྷང་པོར་སྣང་བ་དག་འབྱུང་བས་ཏེ༔ དེ་ནས་རང་གི་མཐེབ་མཛུབ་ཀྱི་རྩོལ་བ་གཏད་ཀྱང་༔ ཕྱི་རོལ་གྱི་ས་རྡོ་རི་བྲག་གི་སྣང་བ་འདི་ཉིད་མི་སྣང་བར་གོང་མའི་སྣང་བའི་རྣམ་པར་གྱུར་ནས་ཡུན་རིང་བར་སྣང་བ་དག་པ་འབྱུང་བ་ཡིན་ནོ༔ དེ་ཡང་༔ བདེ་དང་སྡུག་བསྔལ་རྒྱུ་མཐུན་ཞེས༔ འགྲོ་བའི་མགོན་པོ་སེམས་དཔས་གསུངས༔ ཞེས་པས༔ སྡུག་བསྔལ་མེད་པར་བདེ་བ་མི་འབྱུང་བས་བདེ་བའི་སྣ་སྡུག་བསྔལ་གྱིས་འཁྲིད་པར་བྱེད་པ་ཡིན༔ དེའི་ཕྱིར་ན་དང་པོ་མིག་མི་བདེ་བ་ལ་སོགས་པ་སྡུག་བསྔལ་བ་ཡིན་ལ༔ དེ་ལ་བརྟེན་ནས་བདེ་བ་ཉིད་རང་ལུགས་སུ་འཆར་བར་བྱེད་པ་ཡིན་ནོ༔ དེ་ནས་ལུས་ཀྱི་འདུག་སྟངས་གལ་ཆེ་སྟེ༔ རྒྱ་མདུད་ཀྱི་འདྲིལ་ལུགས་ནི་མིག་རབ་ཏུ་དྲིལ་ནས་ལྟ་བ་ཉིད་ཡིན་ནོ༔ མདའ་སྨྱུག་གི་སྲོང་ལུགས་ནི༔ ལུས་ཀྱི་ཆ་བསྲངས་བས་རྩ་མི་འཁྱོག་པར་དྲང་པོར་གནས༔ རྩ་མ་འཆུས་པས་ཡེ་ཤེས་ཟང་ཐལ་དུ་ཤར་བས་དགོངས་པ་ལ་སྐྱེ་འབྲི་མེད་པར་གནས་པའོ༔ དེའི་ཕྱིར་ན་ལུས་ཀྱི་དངོས་པོའི་གནད་འདི་གལ་ཆེ་ཞེས་ཏེ༔ ལུས་ལ་རིག་པའི་སྒྲོན་མ་བརྟེན་ནས་ཡོད་པའི་གནད་ཀྱིས༔ རིག་པའི་ཁྱིམ་གཞོམ་ཞེས་བྱ་སྟེ༔ སའི་གནད་ཀྱི་དྲང་པོའི་ཐབས་ཀྱིས་སྒྲོན་མ་ཉིད་ཡུར་བར་དྲོང་བ་ནི༔ ཕུག་གཏིབ་པའི་གནད་དང་༔ ལམ་བསྒྱུར་བའི་གནད་དང་༔ སྲང་དགག་པའི་གནད་དང་༔

འཕྲང་སྒུག་པའི་གནད་རྣམས་ཀྱིས་བསྟན་པ་ཡིན་ནོ༔ ཕུག་གཏིབས་པའི་གནད་ནི་མིག་སྟེང་འོག་གཉིས་གཏིམས་པའི་ཐབས་ཀྱིས་སྣང་བ་མ་དག་པ་རྣམས་དག་པར་བྱེད་པ་ཡིན༔ ལམ་བསྒྱུར་བ་ནི་ཁ་སྣའི་རླུང་བསྡམས་ཏེ༔ ལུས་དྲག་ཏུ་གཅུད་པས་འོད་དམར་པོ་མེ་སྟག་གི་རྣམ་པ་ལྟ་བུར་སྤྲོས་ཏེ༔ འདིས་ནི་ཤེས་རབ་ཀྱི་རྩལ་འབྱིན་པར་བྱེད་པའོ༔ སྲང་དགག་པའི་གནད་ནི་རླུང་བཏེག་པ་སྒོར་སྦས་ཏེ་མགྲིན་པ་ཅུང་ཙམ་དགུག་ལ༔ མཐེ་བོང་ཤིན་ཏུ་དྲག་བསྒྲིམ༔ སྣར་སུག་པའི་རླངས་སམ་བྱེ་མ་བཏབ་ན༔ སྣང་བ་ཐམས་ཅད་ཡེ་ཤེས་ཀྱི་སྐར་མའི་རྣམ་པར་ཤར་ནས༔ ས་རྡོའི་སྣང་བ་འདི་དགག་པར་ངེས་པ་ཡིན་ནོ༔ དེའི་ཕྱིར༔ ཡེ་ཤེས་སྐར་མ་ལམ་མེ་བ༔ ཅེས་གསུངས་སོ༔ འཕྲང་སྒུག་པ་ནི་མིག་གི་ཐ་མ་གཉིས༔ མཐེབ་མཛུབ་ཀྱིས་གཏིམས་པས་སྒྲོན་མ་དངོས་སུ་འཆར་བར་བྱེད་པ་ཡིན་ནོ༔ འདི་ལྟར་དུ་ནི་ཉིན་མཚན་དུ་བསྒོམས་པས་འདི་ཉིད་དང་མ་བྲལ་བར་ཉམས་སུ་བླངས་པས༔ སྣང་ཆ་སྣ་ཚོགས་པར་འཆར་བས་ངེས་སོ༔ མིག་མ་བདེ་བ་དང་ཐུན་གྱི་མཚམས་རྣམས་སུ་གོང་དུ་གཏིམས་པའི་དུས་ཀྱི་སྒྲོན་མ་ལ་ཡིད་གཏད་ཅིང་ཉམས་སུ་བླངས་པས་དོན་འགྲུབ་པ་ཡིན་ནོ༔ ཡུལ་དང་དབང་པོའི་གནད་ཀྱིས་དྲང་བའི་ཐབས་ནི༔ གོང་ལྟར་ལུས་ཀྱི་འདུག་སྟངས་ཀྱིས་གནད་དྲངས་ལ༔ ནམ་མཁའ་སྤྲིན་དང་བྲལ་བའི་དུས་སུ་ཁ་ལྷོ་ཕྱོགས་སུ་བལྟས་ལ༔ གཏད་པའི་འབེན་ཅི་ཡང་རུང་བ་ཞིག་ལ་གཏད་ལ༔ མིག་གི་མཐའ་གཉིས་གཏིམས་ལ༔ དབུས་ཀྱི་འབེན་ལ་ལྟ༔ སྒྲོན་མ་ཉིད་ལ་མི་གཏད་པར་སྣང་བ་ཉིད་ལ་ལྟའོ༔ དེ་ནས་སྣང་བ་ཤར་བའམ༔ སེར་བ་ལ་སོགས་པར་གྱུར་ནས་ས་རྡོ་མི་སྣང་བ་དག་འོང་༔ དེ་ནས་མིག་སྟེམས་པ་དང་བྲལ་ཀྱང་འོང་སྟེ༔ དེ་ལ་གཏད་ཅིང་ལྟ་ཡང་༔ ལྟ་ཙ་ན་

གཏིམས༔ དེ་ཉིད་ལ་བལྟས་པས༔ རབ་འབྲིང་ཐ་མའི་བྱེ་བྲག་གིས༔ ཉི་མ་བཅུ་གཅིག་དང་༔ ཉེར་གཅིག་དང་༔ སུམ་ཅུ་རྩ་ལྔས་བར་མ་ཆད་པར་བྱས་ནས་ས་རྡོ་ལ་སོགས་དངོས་པོའི་སྣང་བ་འགགས་ཏེ༔ སྲིད་པའི་བར་དོའི་སྣང་བ་ལྟ་བུ་ལ་སྤྱོད་པར་ངེས་པ་ཡིན་ནོ༔ དྲང་ཐབས་གསུམ་གྱི་གནད་བསྟན་པའོ༔ སྒྲོན་མའི་ཐིག་ལེ་སྟོང་པའི་གནད་ནི༔ དེ་ལྟར་སྣང་བ་འགགས་པའི་དུས་ཀྱི་ཚེ༔ སྒྲོན་མ་ཉིད་ལ་གཏད་ཅིང་ཉམས་སུ་བླངས་པས༔ ལོ་ལྔ་དང་༔ བདུན་དང་༔ བཅུ་གཅིག་ན་ཡེ་ཤེས་ལྔའི་སྣང་བ་རྣམ་པར་དག་པ་འབྱུང་བར་ངེས་ཏེ༔ རང་བཞིན་རྣམ་པར་དག་པའི་ཆོས་ཉིད་ཀྱི་བར་དོ་ལྟ་བུའི་སྣང་བ་ལ་ལོངས་སྤྱོད་པར་ངེས་སོ༔ གནད་ཀྱི་མན་ངག་དེ་ལྟ་བུ་དང་བསྟུན་པས་རྣལ་འབྱོར་པའི་དོན་འགྲུབ་པ་ཡིན་ནོ༔ རྒྱ་མཚོ་ཨར་ལ་གཏད་པའི་རྒྱབ་བརྟེན་གྱི་ཡི་གེ་དམ་པ༔ གསང་བའི་གབ་ཡིག་ནག་པོ༔ གནད་རྣམས་བསྡུས་པའི་སྒྲོན་མ༔ མཁས་པ་བྱེ་མ་ལ་མུ་དྲས་མཛད་པ་རྫོགས་སོ༔ ཨྠྀི༔ རྒྱ་རྒྱ་རྒྱ༔ འདི་མེད་གཞན་ལ་སྤྱོད་པའི་སྒོམ་ཆེན་ཡི་རེ་ཆད༔ དེ་ཡི་ཕྱིར་ན་གསང་བའི་རྒྱབ་ཡིག་གཅེས༔ ལས་ཅན་དེ་དང་འཕྲད་པར་ཤོག༔ ས་མ་ཡཱ༔ སྔགས་ཀྱི་སྲུང་མས་སྲུངས་ཤིག༔ བཀའ་འདིའི་བྱ་ར་གྱིས་ཤིག༔ སརྦ་མངྒ་ལཾ༔

གཅུད་ཕུར་གསུམ་གྱི་རྒྱབ་ཡིག་གནད་བསྡུས་སྒྲོན་མེ་བི་མས་མཛད་པ།

གཅུད་ཕུར་གསུམ་གྱི་རྒྱབ་ཡིག་གནད་བསྡུས་སྒྲོན་མེ་བི་མས་མཛད་པ་བཞུགས་སོ༔

དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ ཐོད་རྒལ་གྱི་བོགས་འདོན་རྒྱ་མཚོ་ཨར་གཏད་ཀྱི་མུན་ཁྲིད་ལ་གསུམ༔ སྔོན་དུ་འགྲོ་བ་དང་༔ དངོས་གཞི་ཉམས་སུ་བླངས་པ་དང་༔ རྗེས་སུ་ཉམས་དང་རྟགས་ཀྱི་རིམ་པའོ༔ དང་པོ་ནི་བྱམས་པ་དང་སྙིང་རྗེ་བྱང་ཆུབ་ཀྱི་སེམས་བསྒོམ༔ མཎྜལ་འབུལ༔ བླ་མ་ལ་གསོལ་བ་དྲག་པོ་གདབ་བོ༔ དངོས་གཞི་གནས་ཁང་མུན་པ་ནག་པོར་སྟན་བདེ་བར་སྤྲུལ་སྐུའི་བཞུགས་སྟངས་བྱས་ཏེ༔ རྒྱ་མཚོ་ཨར་ལ་གཏད་པ་དང་༔ དངོས་སུ་གཞུག་པ་གཉིས་སོ༔ དང་པོ་ནི་གྲུ་མོ་གཉིས་པུས་མོའི་སྟེང་དུ་བཞག་ལ༔ ལག་པ་གཡས་གཡོན་གཉིས་ཀྱི་མཐེབ་མཛུབ་གསུམ་ལ༔ ༀ་ཨཱཿཧཱུྃ་དཀར་དམར་མཐིང་གསུམ་བསྒོམ༔ མིག་གི་འབྲས་བུ་གཉིས་ཆིར་མནན་པས༔ དང་པོ་ཡེ་ཤེས་ཀྱི་རང་མདངས་འོད་དང་ཐིག་ལེ་ཙེམ་ཙེམ་པ་འབྱུང་བ་དང་༔ ལག་པ་གཉིས་ཀྱིས་བཏང་བ་དང་༔ མིག་འབྲས་གཉིས་མ་འགུལ་བར་བལྟས་པས༔ ནང་གི་རིགས་ལྔ་ཞི་ཁྲོ་ཡེ་ཤེས་ལྔའི་རང་མདངས་སྣང་ཡུལ་དུ་གསལ༔ གཟུང་ཡུལ་དུ་འགྲུབ་པའི་ཟག་མེད་ཐིག་ལེ༔ བསམ་གྱིས་མི་ཁྱབ་བརྗོད་ཀྱིས་མི་ལངས་བ་མངོན་སུམ་དུ་གསོལ༔ ཡེ་ཤེས་ཀྱི་འདུག་ཚུལ་དེ་གསལ་ནས་འདུག་ཀྱང་ཆོས་སྐུའི་ངང་༔ སྟོང་ནས་འདུག་ཀྱང་ཆོས་སྐུའི་ངང་༔ སྟོང་གསལ་གཉིས་མེད་ཆོས་སྐུའི་ངང་༔ ཆོས་སྐུའི་ངང་ནས་འདའ་མི་སྲིད༔ རྣམ་པར་རྟོག་མེད་ལྷུན་གྱིས་གྲུབ༔ ཡང་དག་བདག་མེད་དེ་བཞིན་ཉིད༔ ཡང་དག་དོན་ལ་གཉིས་མེད་གཅིག་མ་གྲུབ༔ སྐུ་དང་ཡེ་ཤེས་ཀྱི་འདུག་ཚུལ་དེ༔ ངོ་བོ་ཀ་དག་བརྗོད་པའི་ཚིག་དང་བྲལ༔ རང་བཞིན་ལྷུན་གྲུབ་རྒྱ་ཆད་ཕྱོགས་ལྷུང་བྲལ༔ རིག་པ་ཡེ་ཤེས་ཀྱི་ངོ་བོ་ནི་ཕྱོགས་རིས་མེད་པའི་རིག་མདངས་ཕྱི་རུ་རང་གསལ༔ རྒྱང་ཞགས་ཆུ་ཡི་སྒྲོན་མ་ལ༔ ཐིག་ལེ་སྟོང་པའི་སྒྲོན་

མ༔ དཔེར་ན་རྨ་བྱའི་མདངས་བཞིན༔ ཡེ་ཤེས་ཟང་ཐལ་ཆེན་པོ་ཤར་རོ༔ ཡུལ་གང་ལ་ཤར་བ་ལ་གསུམ༔ དབང་པོ་འཁྲུལ་སྣང་གི་ཡུལ་དང་༔ སྒྲོན་མ་ཡེ་ཤེས་རང་མདངས་ཀྱི་ཡུལ་དང་༔ ཡང་དག་ཆོས་ཉིད་ཀ་དག་གི་ཡུལ་ལོ༔ དང་པོ་ནི༔ མིག་གི་ཡུལ་དུ་གཟུགས་སྣ་ཚོགས་རང་ཁ་མར་མཐོང་བ་ལ་བྱ་སྟེ༔ སྡུག་མི་སྡུག༔ ལེགས་མི་ལེགས༔ ཕྱི་འདོད་ཡོན་ལ་སྤྱོད་པས་ན་ཡུལ་ལོ༔ གཉིས་པ་ནི་འོད་ཐིག་ལེ་དང་༔ སྐུ་དང་ཡེ་ཤེས་སྣ་ཚོགས་རང་ཁ་མར་མཐོང་བ་ལ་བྱ་སྟེཿསྐུ་དང་ཡེ་ཤེས་ཀྱིི་ཚོགས་སུ་ཁྲ་ཅེམ་གྱིས་སྟོང་གསལ་དུ་གསལ་ལོ༔ གསང་བ་ཆོས་ཉིད་ཀ་དག་གི་ཡུན་ནི༔ ཆོས་ཐམས་ཅད་འདུས་མ་བྱས་པ༔ བདག་མེད་པ༔ སྟོང་པ༔ རང་བཞིན་གྱིས་འོད་གསལ་བ༔ བརྗོད་བྱའི་ཡུལ་ལས་འདས་པ༔ སྒྲ་དང་ཚད་མ་གཏན་ཚིགས་གང་གིས་ཀྱང་གཏན་ལ་མ་ཕེབས་པ༔ མདོར་ན་རིག་པ་ཀ་དག་གི་ཡེ་ཤེས་ཉིད་ཡིན་ཏེ༔ སྐུ་དང་ཡེ་ཤེས་ལ་སོགས་པའི་འབྱུང་གནས་ཆེན་པོ་ཡིན་ནོ༔ ཐེག་ལེ་སྟོང་པའི་སྒྲོན་མ་དེ་ལ་བརྟེན་ནས་དོན་དམ་པ་གཉིས་སུ་མེད་པའི་དོན་ངེས་པར་དེ་ལས་བྱུང་བའོ༔ ༔དེའི་སྒོ་གང་ཞེ་ན༔ དབང་པོའི་ཡུལ་ལ་འཆར་བར་བྱེད་པའི་ཡེ་ཤེས་ཀྱི་རྩ་འཆར༔ ཐོག་མ་འོད་ཀྱི་ཐིག་ལེ་ནི༔ ཀུན་ནས་ཟླུམ་པ༔ ཁ་དོག་ལྔ་སྟེ༔ འོད་ལྔའི་མཚན་ཉིད་དུ་གསལ་བ༔ འོད་ལྔ་ཡེ་ཤེས་ལྔའི་ངོ་བོར་སྣང་བ༔ ཉམས་དང་༔ དྲོད་རྟགས་དང་༔ འདོད་པ་མེད་པར་ཤར་བ་ནི་ནོར་བུ་རིན་པོ་ཆེ་དང་འདྲ་བ༔ ཡོན་ཏན་བཙལ་མི་དགོས་པར༔ རྣམ་པར་རྟོག་མེད་ལྷུན་གྱིས་གྲུབ་པའོ༔ སྐྱོན་སྤང་མི་དགོས་པར་རང་དག་སྒྲོན་མའི་ཉམས་དེའང་ཉོན་མོངས་པ་སྤང་མི་དགོས་པར་རང་དག་སྟེ༔ གཉིས་མེད་གཉིས་སུ་མེད་པར་སྟོན༔ ངོ་བོ་ཀ་དག་ལ་ལོངས་སྤྱོད་པའི་གནད་ཡིན་པས་ཉམས་རྟོགས་ཡོན་ཏན་

འདོད་པ་མེད་པར་འབྱུང་བ་ནི༔ ནམ་མཁའི་ཆོ་འཕྲུལ་ལྟ་བུར་བཀག་པས་མི་ཁེགས་པར་འབྱུང་ངོ་༔ དེ་ལྟར་ངོ་མུན་ནག་ཏུ་སྤྲད་པས༔ གསལ་སྟོང་ལོངས་སྐུའི་ཞིང་ཁམས་སུ་རྒྱས༔ དེ་ལྟར་ཉིན་མཚན་དུ་ཉམས་སུ་བླངས་པས༔ སྐུ་རྣམ་པ་ལྔ་རང་རྫོགས་སུ་སྣང་༔ ཡེ་ཤེས་ལྔ་རང་དག་ཏུ་གསལ༔ ངོ་བོ་རང་བཞིན་ཐུགས་རྗེ་གསུམ༔ དབྱེར་མི་ཕྱེད་པས་ཚེ་འདི་ཉིད་ལ་སངས་རྒྱས༔ དེ་ཡང་ཐད་ལ་དྲང་པོར་ལྟ་ཞིང་མཐེབ་མཛུབ་གཉིས་པོས་སྒྲོན་མའི་སྟེང་འོག་གཉིས་གཡས་གཡོན་གཉིས༔ ཡང་ན་སྟེང་ནས་གཏིམས་པས༔ རྗེས་ལ་མ་ཡེངས་པར་བལྟས་པས༔ རྣལ་འབྱོར་བདག་གཞན་རིག་པའི་ཡེ་ཤེས་དེ་ཉིད་ཉམས་སུ་མྱོང་བ་དཔག་པར་དཀའ་བ་དོན་སྐུ་དང་ཡེ་ཤེས་ཀྱི་དགོངས་པ༔ རབ་ཏུ་འདི་ཉིད་ལ་འགྲུབ་པར་ཐེ་ཚོམ་མེད་དོ༔ ཐུན་བཞིའམ་དྲུག་ཏུ་ཉམས་སུ་བླང་ངོ་༔ འདི་ནི་རྒྱ་མཚོ་ཨར་ལ་གཏད་པའི་མན་ངག་གོ༔ རྒྱ་མཚོ་ལ་གསུམ༔ བརྡ་རྟགས་སྒོའི་རྒྱ་མཚོ༔ མཚོན་པ་དཔེའི་རྒྱ་མཚོ༔ ཆོས་ཉིད་དོན་གྱི་རྒྱ་མཚོ་བར་བཤད་དོ༔ གཉིས་པ་རྒྱ་མཚོ་དངས་སུ་གཞུག་པ་ནི༔ སྟན་བདེ་བ་ལ་རྡོ་རྗེ་སྐྱིལ་ཀྲུང་བྱ༔ བསམ་གཏན་གྱི་ཆོས་བྱ༔ སྐེད་པ་དྲང་བས་རྩ་དྲང་༔ རྩ་དྲང་བས་རླུང་དྲང་༔ རླུང་དྲང་པས་ཐིག་ལེ་དྲང་༔ ཐིག་ལེ་དྲང་པས་ཡེ་ཤེས་ཟང་ཐལ་དུ་འཆར་རོ༔ མིག་གིས་ལྟ་སྟངས་གསུམ་གང་མོས་གཅིག་ལ་བལྟས་པས༔ སྣང་བ་ཆོས་སྐུའི་ཞིང་ཁམས་སུ་རྒྱས་པར་འཆར་རོ༔ ཡེ་ཤེས་ཀྱི་ཆོས་ལྔ་ནི༔ སྐུ་ལས་འདས་པའི་ཡེ་ཤེས༔ སེམས་ལ་འདས་པའི་སངས་རྒྱས༔ ཀུན་གཞི་ལས་འདས་པའི་ཆོས་སྐུ༔ ཡིད་ལས་འདས་པའི་ཤེས་རབ༔ འབྱུང་བ་ལས་འདས་པའི་རང་གདངས༔ ཚིག་ལས་འདས་པའི་རང་སྣང་ངོ་༔ ཞི་གནས་མི་རྟོག་དངོས་པོ་མཁའ་ཁྱབ་འདྲ༔ ལྷག་མཐོང་མ་རྨོངས་མཁའ་ལ་གཟའ་སྐར་བཀྲམ༔ བདེ་

གསལ་མི་རྟོག་མཁའ་ལ་ཉི་ལྟར་གསལ༔ ཟུང་འཇུག་གཉིས་མེད་ཉི་མ་འོད་ཀྱི་ཚུལ༔ རང་རིག་ཡེ་ཤེས་ཟང་ཐལ་ཤར་བ་དེ༔ ནམ་མཁའི་ཁམས་སུ་ཕྱིན་ཡང་གཡང་ཟ་བ་དང་ལྟུང་བའི་སྡུག་བསྔལ་རིག་པ་ང་ལ་མེད༔ རི་རབ་ཀྱི་རྩེ་ལ་ཕྱིན་ཡང་ཉམ་ང་བ་དང་བྱིང་བ་མེད༔ རྒྱ་མཚོའི་གཏིང་དུ་ཕྱིན་ཡང་གཤེར་བ་དང་སུབ་པ་མེད༔ མེ་དཔུང་གི་ནང་དུ་ཕྱིན་ཡང་ཚ་བ་དང་ཚིག་པ་མེད༔ རིག་པ་ལྷུན་གྲུབ་དངོས་སམ་སྐྱེ་ཤིའི་སྐྱོན་གྱིས་མ་གོས༔ འཁོར་བའི་དགེ་སྡིག་གིས་མ་གོས༔ སྐྱོན་མེད་རང་གྲོལ་ཆེན་པོར་ཤར་ནས༔ ཕྱོགས་རིས་གཟའ་གཏད་མེད་པའི་ལྟ་བ་ཞེས་བྱའོ༔ ངོ་བོ་ཆོས་སྐུ་རྣམ་དག་སྤྲོས་བྲལ་ངང་གིས་སྟོང་༔ རང་བཞིན་ལོངས་སྐུ་མཚན་དང་དཔེ་བྱད་འཇའ་ཚོན་སྐུ་རུ་གསལ༔ སྤྲུལ་སྐུ་སྣ་ཚོགས་འགྲོ་བ་ཐུགས་རྗེས་འདུལ༔ ཆོས་ཉིད་མདངས་ཅན་ཡེ་ཤེས་ཁ་དོག་ནི༔ མཐིང་ག་དཀར་སེར་དམར་ལྗང་ལྔ་རུ་གསལ༔ ཆོས་དབྱིངས་ཡེ་ཤེས་ནམ་མཁའི་ངོ་བོ་ཉིད༔ མེ་ལོང་ཡེ་ཤེས་མ་སྐྱེ་མི་འགག་གསལ༔ མཉམ་ཉིད་ཡེ་ཤེས་དབྱེར་མེད་ཐམས་ཅད་མཁྱེན༔ སོ་སོར་ཀུན་རྟོག་མི་ཕྱེད་སོ་སོར་གསལ༔ བྱ་བ་གྲུབ་པས་འབྲས་བུ་མངོན་དུ་གྱུར༔ སྐུ་ལྔ་བསྟན་པས་དགོངས་སྤྱོད་མཁའ་ལ་གྲོལ༔ མཚན་མ་སྤྲོས་བྲལ་ཐ་སྙད་ཚིག་ལས་འདས༔ ཉིན་ནུབ་མི་འོང་ཉིན་མཚན་གཉིས་སུ་མེད༔ འཁོར་འདས་གཉིས་འཛིན་བསམ་པ་སྐྱེ་མི་སྲིད༔ ཁྲེགས་ཆོད་ལྟ་བའི་རྩི་ཡིས་ཟིན་པར་གཅེས༔ སངས་རྒྱས་བསྟན་འཛིན་འཇིག་རྟེན་སྒྲོན་མའི་མཆོག༔ མི་གཡོ་རྒྱ་མཚོ་དངས་སུ་འཇུག་པའི་ཁྲིད༔ ཉིན་མཚན་གསུམ་ན་རྟགས་འབྱུང་ཐེ་ཚོམ་མེད༔ རྒྱ་མཚོ་ཨར་གཏད་ཀྱི་མུན་ཁྲིད༔ ཆོས་ཉིད་ཟད་པའི་ས་ལ་ཕྱིན་པའི་རྣལ་འབྱོར་གྱི་

དབང་ཕྱུག་ལྕེ་བཙུན་སེང་གེ་དབང་ཕྱུག་གིས་མཛད་པ་རྫོགས་སོ༔ རིག་པ་མངོན་སུམ་མ་སྦྱངས་ན༔ བར་དོའི་ཡེ་ཤེས་བདུད་དུ་ལྡང་༔ རིག་པ་སྒྱུ་ལུས་སེམས་འཛིན་གྱིས༔ རང་ལ་རང་འཇིགས་ལུས་ངན་ལེན༔ དགོངས་སྤྱོད་མངོན་དུ་གྱུར་པ་ན༔ སྒྱུ་མའི་ལུས་འདི་འོད་གསལ་ལྷ༔ རིག་པའི་དོན་ནི་དེ་བཞིན་ཉིད༔ རྟག་པར་ནམ་མཁའི་མཐའ་ལ་ལྟ༔ ཆོས་ཉིད་མཁའ་ལ་ཉི་ཤར་འདྲ༔ དགོངས་པ་ཆུ་བོ་གང་གཱའི་རྒྱུན༔ ལུས་མེད་ལུས་དེ་ལུས་ཀྱི་མཆོག༔ ལུས་ཀྱི་མཐའ་ནི་ཆོས་སྐུར་རྟོགས༔ བསམ་མེད་སེམས་སྤངས་སེམས་ཀྱི་མཆོག༔ ངག་མེད་སྨྲ་བརྗོད་ཡུལ་ལས་གྲོལ༔ བརྗོད་མེད་སྟོང་པ་ཆོས་ཀྱི་སྒྲ༔ གདུལ་བྱ་རྣམ་དག་ཆོས་ཉིད་ཞིང་ཁམས་ན༔ ཐམས་ཅད་མཁྱེན་པའི་ཚུལ་གནས་པ༔ མ་རིག་སེམས་ཅན་གདུལ་དཀའ་འདུལ༔ ཐུགས་རྗེའི་ལྕགས་ཀྱུས་འགྲོ་བ་འདུལ༔ འཁོར་བའི་སེམས་ཅན་ཆོས་སྐུར་གྲོལ༔ ཡིད་བཞིན་རིན་ཆེན་རང་སར་གྲོལ༔ ཞེས་གསུངས་སོ༔ དགེའོ༔

བསམ་གཏན་མིག་གི་སྒྲོན་མ།

བསམ་གཏན་མིག་གི་སྒྲོན་མ་བཞུགས་སོ༔

ཧཱུྃ༔ རང་རིག་རྡོ་རྗེ་སེམས་དཔའ་ལུ་གུ་རྒྱུད་ཀྱི་སྐུ་ལ་ཕྱག་འཚལ་ལོ༔ ཨེ་མ་སངས་རྒྱས་འབྲས་བུ་ཚེ་འདིར་བསྒྲུབ་པ་ཡིས༔ སྐལ་ལྡན་སྙིང་པོ་དོན་དུ་གཉེར་བ་དེས༔ ཆོས་ཉིད་མངོན་སུམ་གནད་ལ་ཕེབས་པའི་ཕྱིར༔ སྤྱོད་པ་གནད་དུ་འཁོར་འདས་རུ་ཤན་དབྱེ༔ དུར་ཁྲོད་ལུང་སྟོང་དག་ཏུ་རྒྱུ་བར་བྱ༔ བསྒོམ་པའི་གནད་དུ་འདུག་སྟངས་རྣམ་གསུམ་བསྟུན༔ ལུས་ངག་ཡིད་གསུམ་དལ་བ་རབ་ཏུ་གཅེས༔ ལྟ་བའི་གནད་དུ་མི་འགུལ་གཟེར་གསུམ་གདབ༔ ལུ་གུ་རྒྱུད་ལ་རྟག་ཏུ་འདྲིས་པར་བྱ༔ མིག་གི་གསལ་བྱེད་སྨན་སྦྱར་བུ་ཛ་ཧཱུྃ་སྔགས་ཉིད་བསྒྲང་༔ ཆོས་ཉག་གཅིག་ཀྱི་སྐུ་དང་དབང་པོ་མིག་ཞལ་མཇལ་བས༔ རིག་པ་ཚད་ཕེབས་འཁྲུལ་སྣང་སངས་རྒྱས་ཏེ༔ ཕུང་པོ་ལྷག་མེད་སྟོང་གསུམ་འཇས་བཀང་ནས༔ མཐོང་ཐོས་ཐམས་ཅད་འཁོར་བ་ཕྱིར་བསྙིལ་ཞིང་༔ ལྷུན་གྲུབ་ས་ལ་ཀུན་ཏུ་བཟང་པོར་གྱུར༔ བདག་འདྲ་བྱེ་མ་མུ་ཏྲ་ཉིད་ཀྱིས་ཀྱང་༔ ཕྱི་ནང་གསང་བ་བླ་མེད་མཆོག་ཉིད་ཀྱི༔ ཡང་གསང་སྙིང་གི་ཐབས་མཆོག་རྣམས་ལ་འབད༔ རིག་འཛིན་ཆེན་པོར་འགྱུར་རོ་ཕྱི་རབས་སྙིང་བུ་རྣམས༔ དེ་ལ་དང་པོ་ནས་ཡོ་གའི་མིག་གསལ་བར་བྱ་བའི་ཕྱིར༔ མིག་བསྲོ་ཞིང་བཀུ་མཉེ་བྱ༔ མིག་ཤེད་བསྐྱེེད་ཅིང་གསལ་བ་ལ༔ ཨ་རུ་ར་རྒྱ་གར་མ་གོ་སྙོད་རྩྭ་ཨ་ཝ་དང་༔ སྔོ་རྟག་ཏུ་ངུ་༔ སྦྲུལ་ཤ་རྣམས་རྩི་བཞིན་བཏགས་ཏེ༔ སྦྲང་རྩི་དང་སྦྱར་ནས་ལྟོ་སྟོང་ལ་དུམ་རེ་ཟོས་ན༔ མིག་ཤེད་ཆེ་ཞིང་རིག་པ་ལུ་གུ་རྒྱུད་གསལ་བར་འགྱུར་རོ༔ ཡང་འོ་མ་དང་སྐྱེར་པའི་བར་ཤུན་གྱི་ཁཎྜ་དང་༔ གཟི་ནག་ཁྲ་རྙིང་བ་བརྡུངས་པའི་ཕྱེ་མ་དང་བྱ་ནག་མོའི་སྒོ་ངའི་སེར་པོ་དང་བཞི་སྦྱར་ཏེ༔ ཚེས་གཅིག་དང་གནམ་སྟོང་དང་ཉའི་ཉིན་པར་ཐོ་རངས་ཁ་སྔོན་དུ་ཆུ་གྲང་མོས་མིག་དང་གདོང་དག་པར་བཀྲུས་ཏེ༔ དེ་ནས་དེ་ཀུན་ལྡེ་གུས་མིག་ལ་བཀུས་ནས༔

དེ་ནང་པར་བཞིན་བ་སེར་མོའི་འོ་མ་བཀོལ་བའི་ནང་དུ་ཤིང་མངར་བཏབ་སྟེ་འཐུང་ན༔ མིག་འགྲིབ་པར་མི་འགྱུར་ཞིང་རིག་པ་ལུ་གུ་རྒྱུད་གསལ་ལོ༔ རྡོ་སྦུར་ལེན་རྩི་བཞིན་བཏགས་ལ༔ སྦྲང་དཀར་དང་སྦྱར་ནས་མིག་ལ་བྱུགས་ན་སྐྱ་རིབ་སེལ་བར་འགྱུར་རོ༔ ཡང་ཤེལ་དང་༔ ཐོད་ལེ་ཀོར་དང་༔ ག་པུར་དང་༔ གླ་རྩི་རྣམས་རྩི་བཞིན་སྦྱངས་ལ༔ བུ་ཁྱེའུས་འཐུང་བའི་འོ་མ་དང་སྦྱར་ལ་མིག་ལ་བྱུགས་ན་རིག་པ་ལུ་གུ་རྒྱུད་གསལ་བར་འགྱུར་རོ༔ ཡང་སྨན་སྨུག་པོ་སྦལ་རྒྱབ་དང་༔ རམ་རྩ་སྐམ་པོ་དང་༔ ཞུན་ཐིག་ལེ་དང་༔ ས་རམ་ཙ་དང་དེ་རྣམས་རྩི་བཞིན་བཏགས་ཏེ་བུ་འཐུང་བའི་འོ་མ་དང་སྦྱར་ལ༔ མིག་ལ་ཡང་ཡང་བྱུགས་ན༔ ཞག་བདུན་ན་མིག་འགྲིབ་པ་ཕྱེད་དེ་རིག་པ་རྡོ་རྗེ་ལུ་གུ་རྒྱུད་གསལ་ལོ༔ ཡང་རག་ཐལ་དང་༔ ཐོད་ལེ་ཀོར་དང་གཉིས་ཞིབ་པར་བྱས་ཏེ༔ འོ་སྤྲིས་དང་སྦྱར་ཏེ་མིག་ལ་བྱུགས་ན༔ སྐམ་ཚག་དང་༔ དམར་ཚགས་དང་སྐྱ་རིབ་སོས་ཏེ་རིག་པ་གསལ་ལོ༔ དགོང་མོ་ལྟེ་ཁུང་དུ་མར་བྱུག་ཀྱིན་མཉེས་ན༔ མིག་སྐམ་ཚག་དང་མཆུ་རེངས་པ་སོས་སོ༔ ཡང་གོ་སྙོད་དང་༔ གླ་རྩིའི་ཆུས་དགོངས་མོ་ལྟེ་ཁུང་དུ་བྱུགས་ན་མིག་གསལ་ཞིང་གངས་ལ་ཕྱིན་ཀྱང་ཕྱིད་པར་མི་འགྱུར་རོ༔ དུས་རྒྱུན་དུ་ཞོགས་པར་རླུང་བཟུང་སྟེ༔ ལག་མཐིལ་གཉིས་ཀྱིས་མིག་གཉིས་དྲག་པར་འཕུར་ནས༔ ཆུ་གཙང་མས་འཁྲུས་བྱས་ན༔ མིག་གི་སྒྲིབ་ཤ་བཅད་ཅིང་༔ བཀྲུས་པ་ཞེས་བྱ་སྟེ༔ སྐྱ་རིབ་མི་འབྱུང་ཞིང་གསལ་བར་འགྱུར་རོ༔ ཡང་མིག་ལ་ཤ་འཛེར་བྱུང་ན༔ ལྟོ་སྟོང་ལ་ཟན་དྲོན་མོ་དུམ་གཅིག་གི་ནང་དུ་མར་དུམ་གཅིག་བཅུག་སྟེ༔ དེའི་རླངས་པ་མིག་ན་བ་ལ་བདུག་ལ༔ ངག་ཏུ༔ ཨོཾ་སྲིན་ལོང་༔ བྱ་བ་ཉི་ཤུ་རྩ་གཅིག་བྱས་ཏེ་ཁར་བཅུག་ན་སོས་པར་འགྱུར་རོ༔ ཡང་མིག་ལ་ལིང་ཐོག་བྱུང་ན༔ གླ་རྩི༔ ཀ་ར༔ ཅུ་གང་༔ ཞུན་ཐིག་ལེ་རྣམས་རྩི་བཞིན་བྱས་ཏེ༔

མིག་ལ་ཟི་ཙམ་རེ་གདབ་སྔགས་འདི་ཅི་མང་དུ་བཟླས་ཏེ་ཕུག་རོན་གྱི་དང་རུའི་རྩེ་མོས་ལྕེ་རྩེ་ནས་བླངས་ལ་མིག་ལ་བླན་པས་སོས་པར་འགྱུར་རོ༔ ཨོཾ་ལྷིིང་ལྷིང་ཐོག་ཐོག་ཨ་ཙི་ལི་སྭཱ་ཧཱ༔ ཡང་མིག་ཏུ་རྡུལ་དང་གྲ་མ་སོང་ན༔ སྔགས་འདིས་ཕྱིན་པར་འགྱུར་རོ༔ ཨོཾ་ཡ་མ་ད་ན་ཏིང་སྭཱ་ཧཱ༔ ཡང་དུས་གཉེན་པོའི་དུས་སུ་མིག་ལ་ཟན་བསྒྲེས་ལ་བརྒྱ་རྩ་གཅིག་བཏང་ན་མིག་ལོང་བར་མི་འགྱུར་རོ༔ ཡང་རྩ་ཨ་བ་དང་༔ ཅོང་ཞི་དང་༔ བྲག་ཞུན་དང་༔ སྦྲུལ་སྔོན་པོའི་ཤ་དང་༔ འབྲས་བུ་གསུམ་དང་༔ དོམ་མཁྲིས་དང་༔ ཁྱི་ནག་པོའི་མཁྲིས་པ༔ སྤྲེའུའི་མཁྲིས་པ༔ རྟ་ནག་པོའི་མཁྲིས་པ༔ མིའི་མཁྲིས་པ༔ འུག་པའི་མཁྲིས་པ༔ སྔོ་རྟག་ཏུ་ངུ་༔ དེ་རྣམས་སྦྲང་རྩི་དང་སྦྱར་ཏེ༔ ལྟོ་སྟོང་ལ་ཟླ་བ་གསུམ་ཟོས་ན་ཤའི་སྤྱན་དང་ལྡན་ཅིང་རིག་པ་རྡོ་རྗེ་ལུ་གུ་རྒྱུད་གསལ་བར་འགྱུར་རོ༔ ཡང་སྲིན་བུ་མེ་ཁྱེར་དང་༔ ལྷང་མ་ལྷང་ཚེར་དང་༔ དེ་མོ་ནག་མོའི་སྒོ་ང་དང་སྦྱར་ལ༔ མིག་གི་སྟེང་དུ་བླན་ཅིང་ཕྱིན་ན་འོད་སྣ་ཚོགས་པ་འཆར་པར་འགྱུར་ངེས་སོ༔ སྔགས་འདི་ཡང་འབུམ་ཚོའམ་ཅི་མང་དུ་ཡི་དམ་བྱས་ཏེ་བཟླས་ན༔ འོད་ཀོར་ཕོར་པ་ཙམ་དུ་འཕེལ་བར་འགྱུར་རོ༔ ཨོཾ་ཆེན་ཀོང་ཆེན་བྷ་ཧན་ཞུན་ཆེན་ཞུ་ཧ་ན་གྷ་མི་སྟོན་ཡཾ༔ དེས་ནི་ཡེ་ཤེས་ཀྱི་སྤྱན་གསལ་ཞིང་རྒྱས་པར་འགྱུར་རོ༔ རྩ་ལམ་ཐམས་ཅད་བྱང་ཞིང་རིག་པ་འཕེལ་བར་འགྱུར་རོ༔ ལར་མིག་ལ་ཕན་པའི་སྨན་རྣམས་སྦྱང་ཞིང་༔ སྔགས་ལ་ཡང་འབད་པར་བྱའོ༔ མན་ཤེལ་དང་༔ རིན་ཆེན་དང་༔ སུཪྱ་དང་༔ ཙནྡྲ་དང་༔ ཨཱ་ལོ་ཀེ་ཐབས་སྣ་ཚོགས་ལ་བསླབ་ཅིང་༔ རིག་པ་དངོས་ཀྱི་འཕེལ་རྩི་བར་བྱའོ༔ ཀྱེ་མ་རིག་པ་དངོས་ཉིད་ལྷ་བའི་སྐྱེས་བུ་རྣམས༔ སྒྲོན་གསལ་མན་ངག་འདི་ལ་ནན་ཏན་མཛོད༔ དངོས་པོ་གཤིས་ཀྱི་གནས་ལུགས་ལུ་གུ་རྒྱུད༔ འདི་ལས་

ཆོས་གཞན་ཡོད་རེ་ན་ར་ཀན༔ བྱས་ཆོས་ཚེ་འདིར་ཤོར་བའི་གང་ཟག་རྣམས༔ བྱར་མེད་གནས་ལུགས་བལྟས་ན་མི་ལེགས་སམ༔ འདི་མེད་ཆོས་ལ་འབུངས་ཀྱང་སངས་རྒྱས་རིང་༔ དེ་ཕྱིར་ཉག་གཅིག་བསྒོམས་ན་མི་ལེགས་སམ༔ རིག་འཛིན་ལྷག་མེད་འགྲུབ་པ་རྣམས་དང་ནི༔ དབྱེར་མེད་གཅིག་ཏུ་བསྲེས་ན་མི་ལེགས་སམ༔ དུས་གསུམ་སངས་རྒྱས་འདི་དང་ཞལ་མཇལ་ནས༔ འབྲས་བུ་ཕྱི་དུས་རེ་བས་ག་ནས་འོང་༔ ཟག་བཅས་སྒྱུ་ལུས་ཁོལ་པོ་གཏན་མི་ནུས༔ རྡོས་བཅས་ད་རེས་ཆོད་ཅིག་སྲིན་བུ་ཚོ༔ བསམ་གཏན་མིག་གི་སྒྲོན་མ་ཞེས་བྱ་བ༔ པཎྜི་ཏ་ཆེན་པོ་བི་མ་ལ་མི་ཏྲས་མཛད་པ་རྫོགས་སོ༔ རྒྱ་རྒྱ་རྒྱཿཁ་ཐཾ༔ བླ་མ་དམ་པ་ཀུ་མ་རཱ་ཛའི་གདམས་པ༔ བྱར་མེད་ཀློང་ཡངས་ཀྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས་ནན་ཏན་དུ་ཞུས་པ་ཨྠྀི༔ རྒྱ་རྒྱ་རྒྱ༔ དགེའོ༔ ༔ཉེ་རྟེན་འབྲེལ་བསྡུས་པའི་སྒྲོན་མ་དང་། ཉོ་རྡོར་སེམས་དམིགས་དྲུག་རྩ་བ་བཅས་དཔེ་མངོན་ན་སླར་འདིར་འཇུག །

ལྕེ་བཙུན་གྱི་མགུར།

སངས་རྒྱས་ལ་ཡིད་ཆེས་སྐྱེས་ཙ་ན༔ བརྒྱུད་པའི་བྱིན་རླབས་འབྱུང་བར་ངེས༔ གོང་མ་ལ་མོས་པ་སྐྱེས་ཙ་ན༔ ཐུགས་རྗེའི་བྱིན་རླབས་འབྱུང་བར་ངེས༔ བླ་མ་ལ་གདུང་བ་སྐྱེས་ཙ་ན༔ ཉམས་དང་བྱིན་རླབས་སྐྱེ་བར་ངེས༔ སྣང་སྲིད་ཆོས་སྐུར་ཤེས་ཙ་ན༔ ཉོན་མོངས་རང་སར་གྲོལ་བར་ངེས༔ ཡེ་གྲོལ་གཅེར་བཞག་གིས་རྒྱས་ཐེབས་ན༔ སངས་རྒྱས་དགོངས་པ་ཡིན་པར་ངེས༔ ལུས་ངག་བདེ་བ་རྙེད་ཙ་ན༔ བླ་མའི་བྱིན་རླབས་ཡིན་པར་ངེས༔ འཁྲུལ་པ་ཕྱི་རོལ་གྱི་སྣང་བ་འགགས་ཙ་ན༔ རང་གི་རྩོལ་བ་ཡིན་པར་ངེས༔ དེ་ལྟར་རྟོགས་པའི་རྣལ་འབྱོར་བདག༔ འཁོར་འདས་རུ་ཤན་ཕྱེད་པས་བདེ༔ ཞེས་ལྕེ་བཙུན་གྱི་མགུར་རོ༔ ཨྠྀི༔ ཛ་ཡནྟུ༔ འདི་མན་དཀར་ཆག་ན་མི་སྣང་༔

ཚིག་དོན་བཅུ་གཅིག་པ།

ཚིག་དོན་བཅུ་གཅིག་པ་ཞེས་བྱ་བ་བཞུགས་པ་ལགས་སོ༔

དཔལ་ལྡན་རྡོ་རྗེ་འཆང་ཆེན་དང་༔ བླ་མ་དང་ནི་ཡི་དམ་ལྷ༔ མཁའ་འགྲོ་བདེ་བ་འབྱིན་པ་ལ༔ ལུས་ངག་ཡིད་ཀྱིས་ཕྱག་འཚལ་ལོ༔ དེ་ལ་ཡང་དག་པར་རྫོགས་པའི་སངས་རྒྱས་ཐུགས་རྗེ་ཆེ་ལ་ཐབས་མཁས་པའི༔ སྟོན་པ་ཀུན་ཏུ་བཟང་པོས༔ ཆོས་ཀྱི་སྐུ་འོད་གསལ་བའི་ངང་ལས༔ ལོངས་སྤྱོད་རྫོགས་པའི་སྐུ་མཚན་དང་དཔེ་བྱད་ཀྱིས་བརྒྱན་པའི་སྐུར་བྱོན་ཏེ༔ གདུལ་བྱ་འགྲོ་བའི་རྒྱུད་ཐ་དད་ཀྱང་༔ འདིར་སྐལ་ལྡན་གང་ཟག་གཅིག་སངས་རྒྱ་བར་བྱེད་པ་ལ་ཚིག་དོན་བཅུ་གཅིག་སྟེ༔ དང་པོ་རྟོགས་ཏེ་སངས་རྒྱས་མ་བྱུང་༔ མ་རྟོགས་ཏེ་སེམས་ཅན་མ་བྱུང་བའི་སྔོན་རོལ་ན༔ གཞི་དངོས་པོ་གཤིས་ཀྱི་གནས་ལུགས་ཇི་ལྟར་གནས་པ་དང་གཅིག༔ དེ་ལྟར་གནས་པ་དེ་ལ་འཁྲུལ་པ་ཇི་ལྟར་བྱུང་བའི་ཚུལ་གཏན་ལ་དབབ་པ་དང་གཉིས༔ འཁྲུལ་ཀྱང་སེམས་ཅན་ལ་ཡང་དག་པར་རྫོགས་པའི་སངས་རྒྱས་ཀྱི་སྙིང་པོ

འམ་ས་བོན་ཇི་ལྟར་གནས་པ་དང་གསུམ༔ དེ་ཉིད་གནས་པ་རང་གང་ན་གནས་བསྟན་པ་དང་བཞི༔ དེ་ལྟར་གནས་པའི་ཡེ་ཤེས་ལམ་གང་ནས་བྱུང་བསྟན་པ་དང་ལྔ༔ དེ་ཉིད་སྒོ་གང་ནས་འཆར་བསྟན་པ་དང་དྲུག༔ དེ་ཡུལ་གང་ན་སྣང་བ་དང་བདུན༔ དེ་ལྟར་ཉམས་སུ་བླང་བ་དང་བརྒྱད༔ ཉམས་སུ་མྱོང་བའི་ཚད་བཟུང་བ་དང་དགུ༔ གལ་ཏེ་ཉམས་སུ་མ་ལོན་པར་ཚེའི་དུས་བྱས་པ་ན་ཆོས་ཉིད་བར་དོ་ཇི་ལྟར་འཆར་བ་དང་བཅུ༔ ཐ་མ་གྲོལ་བ་ཆེན་པོ་དང་བཅུ་གཅིག་གོ༔ ༈དེ་ལ་དང་པོ་ནི་སྤྱིར་རྫོགས་པ་ཆེན་པོའི་ལུགས་ཀྱི་ཀ་དག་ལྷུན་གྲུབ་འདོད་ན་བདུན་ནོ་གྲུབ་མཐའི་རྗེས་སུ་འབྲངས་པ་དང་༔ ལམ་རྗེས་སུ་འཛིན་པའི་གང་ཟག་དེ་དགག་པའི་གཞུང་ངོ་གཉིས་ལས༔ འདིར་ལམ་རྗེས་སུ་འཛིན་པའི་སྟེ༔ དེ་ཡང་རེ་ཞིག་ཚིག་གིས་གཏན་ལ་དབབ་འཁོར་འདས་གཉིས་ཀྱི་དེ་དགག་པའི་གཞུང་ངོ་པ་ནི༔ ཐོག་མའི་གཞི་དེ་ངོ་བོ་རང་བཞིན་ཐུགས་རྗེ་གསུམ་དུ་

གནས་ཏེ༔ དེ་ཡང་ངོ་བོ་སྟོང་ལ་རང་བཞིན་གསལ་བ༔ ཐུགས་རྗེ་འགག་པ་མེད་པའོ༔ དེ་ཡང་ངོ་བོ་སྐུ་གཞིའི་དུས་ན་རུ་གནས༔ རང་བཞིན་གསུང་དུ་གནས་༔ ཐུགས་རྗེ་ཐུགས་སུ་གནས་པའོ༔ དེ་ཡང་ངོ་བོ་རྒྱན་དག་གདན་ཁྲི་མེད་པའི་སྐུ་རུ་འབྲས་བུའི་དུས་ན་ཡོད་གཞིའི་དུས་ན་མེད་གནས༔ རང་བཞིན་ཁ་དོག་སྣ་ཚོགས་སུ་འབར༔ ཐུགས་རྗེ་འཆར་གཞི་འགག་མེད་དུ་གནས་པས་ཀུན་ལ་ཁྱབ་བོ༔ དེ་ཡང་ངོ་བོ་སྟོང་པས་རྟག་པའི་ཕྱོགས་སུ་མ་ལྷུང་༔ རང་བཞིན་གསལ་བས་ཆད་པའི་ཕྱོགས་སུ་མ་ལྷུང་༔ དེ་ཀུན་ལ་ཁྱབ་པའི་ངོས་ནས་བེམ་པོའི་ཕྱོགས་སུ་མ་ལྷུང་བའོ༔ ཡང་ངོ་བོ་འཁྲུལ་པར་མི་གནས༔ ཐུགས་རྗེ་ངོ་བོ་ཀ་དག་ལྷུན་གྲུབ་འཁྲུལ་པར་རང་བཞིན་ལྷུན་གྲུབ་མི་སྲིད་པའོ་ཐུགས་རྗེ་ཀུན་ཁྱབ་བོ༔ དེ་ཡང་ངོ་བོ་སྐུ་ཡིན་པས་མི་འགྱུར༔ རང་བཞིན་འོད་ཡིན་པས་རང་གསལ༔ ཐུགས་རྗེ་ཡེ་ཤེས་ཡིན་པས་མཁྱེན་པའི་ཆ་མ་འགགས་པར་སོ་སོར་གསལ་ལོ༔ དེ་ཡང་མཁྱེན་པའི་ཆ་གཞི་གནས་པའི་ཡེ་ཤེས་གསུམ་དུ་བཞུགས་སོ༔ དེ་ནི་ཐོག་མ་ཇི་ལྟ་བའི་གནས་ལུགས་སོ༔ ༈ད་ནི་གཉིས་པ་དེ་ལས་འཁྲུལ་པ་ཇི་ལྟར་བྱུང་བའི་ཚུལ་བསྟན་པ་ནི༔ ངོ་བོ་རིག་པ་ཡེ་ཤེས་ཀྱིས་འཁྲུལ་གཞིའི་རྒྱུ་བྱས་ནས་བདག་ཉིད་གཅིག་པའི་མ་རིག་པར་གྱུར༔ རང་བཞིན་གྱིས་འཁྲུལ་པའི་རྐྱེན་བྱས་པས་འཕེན་པའི་ལས་ཀྱི་རླུང་ལངས་ཏེ་དེ་ལ་ཁ་དོག་ཏུ་གསལ་བས་ལྷན་ཅིག་སྐྱེས་པའི་མ་རིག་པར་སོང་༔ ཐུགས་རྗེ་འཁྲུལ་བའི་འབྲས་བུ་བྱས་ཏེ་ཞིག་གནས་ཀྱི་ཡེ་ཤེས་ལས་ཀུན་ཏུ་བརྟགས་པའི་མ་རིག་པར་གྱུར༔ ད་ལྟ་རིག་མ་རིག་ལག་པའི་ལྟོ་རྒྱབ་རྟོགས་པ་ལྟར་མ་ཤེས་པས་རིག་པ་ལ་ལྟོས་པའམ་རིག་པ་འཁྲུལ་པ་ལ་ལྟོས་པའི་འཁྲུལ་པ༔ དེ་ལ་བརྟགས་པས་

མིང་གི་ཚོགས་སུ་ཤར་ཏེ༔ འདི་ནི་རིག་པ་ཡེ་ཤེས་སོ༔ འདི་ནི་མ་རིག་པའམ་འཁྲུལ་པའོ༔ ཞེས་མིང་དུ་མ་བཏགས་པས་ཀུན་ཏུ་བརྟགས་པའི་མ་རིག་པར་གྱུར༔ དེ་ལ་ཡུལ་དང་ཡུལ་ཅན་དུ་འཛིན་པ་དཔེར་ན་སྐྱེས་བུའི་བྱད་དང་འདྲ་བས༔ འཁྲུལ་བའི་རྒྱུ་བྱས་པས་རྒྱུའི་རྐྱེན་ཞེས་པ་མ་རིག་པ་གསུམ་མོ༔ དེ་ལ་དམིགས་པའི་རྐྱེན་ཞེས་པ་ཡུལ་ལ་དམིགས་པ་སོ་སོར་ཤར་བས་མེ་ལོང་ལྟ་བུའོ༔ ང་བདག་དང་གཟུང་འཛིན་སྣ་ཚོགས་པ་བདག་པོའི་རྐྱེན་དུ་གསུམ་དུས་མཚུངས་པས་མཚུངས་པའི་རྐྱེན་ཞེས་པ་མ་དག་པ་དངོས་སུ་སོང་བ་ནི་དཔེར་ན་མིང་མེད་པ་མིང་དུ་སོང་བ་དང་འདྲའོ༔ དེ་ལྟར་ངོ་མ་ཤེས་ཤིང་འཁྲུལ་པས་འགྲོ་བའི་ཡུལ་དང་ལས་དང་༔ དབང་པོ་དང་༔ ཉོན་མོངས་པ་དཔག་ཏུ་མེད་པ་འབྱུང་བའོ༔ ༈ད་ནི་གསུམ་པ་ད་ལྟར་འཁྲུལ་ཀྱང་སེམས་ཅན་རྣམས་སངས་རྒྱས་སྙིང་པོས་ཇི་ལྟར་ཁྱབ་ཚུལ་ནི༔ འགྲོ་བ་གཅིག་གི་ལུས་ལ༔ སྐུ་ལྔ༔ རིགས་ལྔ༔ ཡེ་ཤེས་ལྔ༔ རླུང་ལྔ༔ ཤེས་རབ་ལྔ༔ འོད་ལྔ་སྟེ༔ རིག་པའི་ཡེ་ཤེས་ལྔ་ཚན་དུ་གནས་པས༔ བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ༔ ཅེས་པ་དང་༔ རང་ལུས་རྡོ་རྗེ་སངས་རྒྱས་ཉིད༔ རང་གི་ལུས་ལ་སངས་རྒྱས་བཞུགས༔ གཞན་ནས་སངས་རྒྱས་བསྟན་དུ་མེད༔ ཅེས་པའོ༔ དེ་ཡང་རིག་པའི་ཡེ་ཤེས་ཉིད༔ རྣམ་པ་ཡུལ་དེ་ཉིད་ལ་རིག་པའི་ཡེ་ཤེས་སྣང་བས༔ རྣམ་པར་སྣང་མཛད་སྐུ་རང་བྱུང་བས་དེ་ཉིད་གཞན་ནས་བཙལ་མ་དགོས་པའོ༔ རྡོ་རྗེ་ནི་རིག་པའི་ངོ་བོ་མི་འགྱུར་པ་དེ་ལ་རྣམ་རྟོག་གིས་མི་བསྐྱོད་པས༔ རིག་པ་ཉིད་རྡོ་རྗེ་མི་འགྱུར་བའི་སྐུར་བྱུང་བའོ༔ ཡང་རིག་པའི་ཡེ་ཤེས་དེ་ཉིད་ལས་ཉམས་གོང་འཕེལ་གྱི་སྣང་བ་ལ་སོགས་ཏེ༔ ཡོན་ཏན་གྱི་འཕེལ་སྒོ་དཔག་

མེད་བྱུང་བས༔ རིན་ཆེན་འབྱུང་ལྡན་དུ་རང་བྱུང་བའོ༔ ཡང་རིག་པའི་གསལ་ཆ་འོད་ཟེར་མཐའ་ཡས་པར་སྣང་བས༔ སྣང་བ་མཐའ་ཡས་འོད་དཔག་མེད་དུ་རང་ཤར་བའོ༔ ཡང་རིག་པ་ཡེ་ཤེས་ཉིད་ཡེ་ཤེས་ཀྱི་ངོ་བོར་ཡོད་ལ༔ དེ་ཉམས་སུ་བླངས་པས་འགྲུབ་ངེས་ན༔ དོན་ཡོད་གྲུབ་པར་རང་བྱུང་བའོ༔ དེ་ལྟར་རྫོགས་པ་ཆེན་པོའི་རྣལ་འབྱོར་པས་ཡི་དམ་གྱི་ལྷ་གཞན་ནས་བཙལ་ཞིང་བསྒོམ་དུ་མེད་དེ༔ ཚི་ཆད་པའི་ནད་དང་བྲལ་བའོ༔ ཡང་རང་གི་སེམས་ཉིད་རིགས་ལྔར་འབྱུང་སྟེ༔ རིག་པ་སྐྱེ་མེད་ཀྱི་དབྱིངས་སུ་རྩལ་འགག་མེད་གཤེགས་ཤིང་ཐིམ་པས་ན༔ དེ་བཞིན་གཤེགས་པའི་རིགས་ཡིན་ལ༔ དེའི་ངོ་བོ་རྐྱེན་གྱིས་མི་འགྱུར་བས་རྡོ་རྗེའི་རིགས་སོ༔ དེ་ལ་ཡོན་ཏན་ཐམས་ཅད་རང་རྫོགས་སུ་གནས་པས་རིན་པོ་ཆེའི་རིགས་ཡིན་ལ༔ དེའི་ངོ་བོ་སྐྱོན་གྱིས་མ་གོས་པས་པདྨའི་རིགས་སོ༔ ཐམས་ཅད་རིག་པའི་ཆོ་འཕྲུལ་གྱི་ལས་སུ་འདུག་པས་ལས་ཀྱི་རིགས་ཞེས་བྱའོ༔ དེ་ཡང་རིག་པ་ཉིད་ཡེ་ཤེས་ལྔར་ཡང་གནས་ཏེ་ཆོས་སྤྱི་དང་རང་གི་མཚན་ཉིད་དམ༔ གཟུགས་ཅན་ཐམས་ཅད་རིག་པའི་ངང་ལས་གསལ་བས་མེ་ལོང་ལྟ་བུའི་ཡེ་ཤེས་སོ༔ ཆོས་ཅན་སྣ་ཚོགས་ཆོས་ཉིད་སྐྱེ་བ་མེད་པའི་ཀློང་དུ་མཉམ་པས་མཉམ་པ་ཉིད་ཀྱི་ཡེ་ཤེས་སོ༔ དེ་ཉིད་ཀྱི་ངང་ལས་ཡོན་ཏན་ཀྱི་ཆ་མ་འདྲེས་པར་སོ་སོར་གསལ་བས་སོ་སོར་ཀུན་ཏུ་རྟོགས་པའི་ཡེ་ཤེས་སོ༔ དེ་ཡང་འབད་རྩོལ་གྱིས་བསྒྲུབ་མི་དགོས་ཏེ༔ ཡེ་ནས་རང་གསལ་ལྷུན་གྲུབ་ཏུ་གནས་པས་བྱ་བ་གྲུབ་པའི་ཡེ་ཤེས་སོ༔ དེ་ཐམས་ཅད་ཀྱང་ཐ་དད་མ་ཡིན་ཏེ༔ ཆོས་ཉིད་སྟོང་ཉིད་དུ་རོ་གཅིག་པས་ཆོས་ཀྱི་དབྱིངས་ཀྱི་ཡེ་ཤེས་སོ༔ རང་རིག་པ་ཉིད་འོད་ལྔར་

ཡང་བྱུང་ཏེ༔ རིག་པ་ཉིད་ལ་ལས་དང་ཉོན་མོངས་ཀྱི་མ་གོས་པས་དཀར་པོ་ལྟར་ཡང་སྣང་ངོ་༔ ཡོན་ཏན་རྫོགས་པའི་ཕྱིར་སེར་པོ་ལྟར་ཡང་སྣང་ངོ་༔ ཐམས་ཅད་རིག་པ་དབང་དུ་འདུས་པས་དམར་པོ་ལྟར་ཡང་སྣང་ངོ་༔ རྩོལ་བ་ལས་འདས་པས་ལྗང་གུའོ༔ སྣ་ཚོགས་སུ་ཤར་ཡང་ངོ་བོ་ལ་འགྱུར་བ་མེད་པས་མཐིང་ག་ལྟར་ཤར་བའོ༔ རིག་པ་ཉིད་རླུང་ལྟར་ཡང་འབྱུང་སྟེ༔ རིག་པ་ཡེ་ཤེས་ཀྱི་དྲོད་འབེབས་པའི་ཕྱིར་མེ་དང་མཉམ་པའི་རླུང་ཞེས་བྱ༔ འཁོར་འདས་ཀུན་གྱི་སྲོག་འཛིན་པས་སྲོག་འཛིན་གྱི་རླུང་ངོ་༔ དབང་པོ་དང་ཡུལ་དང་ཁ་དོག་ལ་སོགས་པར་འབྱེད་པས་ན་དངས་སྙིགས་འབྱེད་པའི་རླུང་ངོ་༔ འཁོར་འདས་ཀུན་ལ་ཁྱབ་པས་ཁྱབ་བྱེད་ཀྱི་རླུང་༔ འཁོར་བའི་སྲོག་བཅད་ནས་མྱ་ངན་ལས་འདས་པའི་སར་འཕེན་པས་ན་སྙིང་རྗེ་མེད་པ་ལས་ཀྱི་རླུང་ཞེས་བྱའོ༔ རིག་པ་ཉིད་ཤེས་རབ་ལྔར་ཡང་གནས་ཏེ༔ འཁོར་འདས་ཐམས་ཅད་ཀྱི་འབྱུང་གཞིར་གྱུར་པ་འབྱེད་པ་མེད་པའི་ཤེས་རབ་བོ༔ རང་རིག་པའི་ངང་ལས་མ་འདས་པས་སྡུད་པར་བྱེད་པའི་ཤེས་རབ་བོ༔ དེ་ཐམས་ཅད་ཀྱི་ངོ་བོར་བྱུང་བས་ཁྱབ་པར་བྱེད་པའི་ཤེས་རབ་བོ༔ དེ་ཉིད་ཡེ་ཤེས་ཀྱི་རླུང་ལ་བརྟེན་ནས་རིག་པ་མཁའ་ལ་སྤྱོད་པས་ན་སྐྱེད་པའི་ཤེས་རབ་བོ༔ འཁོར་འདས་གཉིས་ཀའི་སྒྲོ་འདོག་གཅོད་པས་ན་སྒྲོ་འདོགས་གཅོད་པའི་ཤེས་རབ་ཏུ་གནས་པའོ༔ དེ་ལྟར་རིག་པ་ཉིད་ལས་གཞན་མེད་པས་ན་རང་བྱུང་གི་ཡེ་ཤེས་ཞེས་བྱ༔ དེ་ཡང་ངོ་བོའི་ཆ་ལ་སྐུར་གནས་པ་མཉམ་གཞག་གི་དུས་ན་ཆོས་སྐུ་ཉིད་ལ༔ མཉམ་རྗེས་གཉིས་མེད་དུས་ན་ལོངས་སྐུའོ༔ རྗེས་ཀྱི་དུས་ན་སྤྲུལ་པའི་སྐུའོ༔ རང་བཞིན་འོད་དུ་གསལ་བས་གཞི་ལ་རང་

གསལ་དུ་གནས་ཏེ༔ རྟགས་སྒྲོན་མ་ལགས་པའོ༔ ཐུགས་རྗེའི་ཆ་ཡེ་ཤེས་སུ་གནས་པའོ༔ དེ་ལྟར་ཐམས་ཅད་ཀྱི་གཞིར་གནས་པས་སངས་རྒྱས་བཙལ་མི་དགོས་ཏེ༔ རང་སེམས་ཡེ་ནས་སངས་རྒྱས་ཡིན་པའི་གཏན་ཚིགས་སོ༔ ༈ད་ནི་བཞི་པ་རིག་པའི་ཡེ་ཤེས་དེ་གནས་པ་གང་ན་གནས་བསྟན་པ་ནི༔ དེ་ཡང་ལུས་ཀྱི་དཀྱིལ་ན་ཙིཏྟ་རིན་པོ་ཆེའི་གཞལ་ཡས་ཁང་ན་གནས་ཏེ༔ ཞི་བའི་སྐུ་ཡུངས་འབྲུ་ཙམ་ལ་སྤྱན་ཕུལ་ཐག་ཙམ་དུ་གནས་སོ༔ དེ་ཡང་སྐུ་ཡུངས་འབྲུ་ཙམ་ཞེས་པ་ནི༔ ཕྲ་ཞིང་རྟོགས་པར་དཀའ་བའི་ཆ་ནས་བཞག་ལ༔ སྤྱན་ཕུལ་ཐག་ཙམ་ལ་ཞེས་པ་ཉམས་ལེན་ཕྲ་མོ་ལ་བརྟེན་ནས་ཡེ་ཤེས་ཀྱི་སྣང་བ་རྒྱ་ཆེན་པོ་ལ་དགོངས་པའོ༔ དེ་ཡང་ངོ་བོ་སྐུ་རུ་གནས་པ་བུམ་སྐུ་ལྟ་བུའོ༔ རང་བཞིན་འོད་དུ་གནས་པ་ནི་བུམ་ནང་གི་མར་མེ་ལྟ་བུའོ༔ ཐུགས་རྗེ་ཟེར་དུ་གནས་པས་སྒྲོན་མའི་གོ་མ་འགགས་པར་གསལ་བའོ༔ དེའི་ཞར་ལ་མ་རིག་པ་དང་༔ ཉོན་མོངས་པ་དང་༔ ལས་དང་བག་ཆགས་དང་རྣམ་པར་རྟོག་པ་ལ་སོགས་ཀྱང་ལས་ཀྱི་རླུང་གིས་སྟོབས་བྱས་ནས་གློ་བ་ན་གནས་པའོ༔ ༈ད་ནི་ལྔ་པ་དེ་ལྟར་གནས་པའི་རིག་པའི་ཡེ་ཤེས་དེ་ལམ་གང་ནས་བྱུང་བསྟན་པ་ནི༔ རྩ་རྣམས་ནས་འབྱུང་བ་སྟེ༔ དེ་ཡང་རྩའི་མཚན་ཉིད་ཤེས་པར་བྱེད་པ་ལ་ལུས་ཀྱི་མཚན་ཉིད་ཤེས་དགོས་ཏེ༔ དེ་ཡང་ལུས་ཆགས་པའི་མཚན་ཉིད་མ་ཤེས་ན༔ དེ་ན་གནས་པའི་མཚན་ཉིད་མི་ཤེས༔ དེ་མ་ཤེས་ན་ཐ་མ་ལུས་འཇིགས་པའི་མཚན་ཉིད་མི་ཤེས༔ དེ་ལྟར་མ་ཤེས་ན་རྩ་ཡི་གནས་ལུགས་མི་ཤེས་སོ༔ དེ་ཡང་ལུས་ཆགས་པའི་མཚན་ཉིད་སྐྱེ་བ་སྔ་མ་འདས་ནས་བར་མ་

དོ་ཡིད་ཀྱི་ལུས་ཅན་དེ་ཤེས་པ་ཕྱ་ཕྱོ་ཡད་ཡད་དུ་གནས་པ་ལས༔ ཕོ་མོ་འཁྲིག་པ་སྤྱོད་པའི་དྲུང་དུ་སྔོན་གྱི་ལས་ཀྱིས་བདས་པ་ཤ་གསར་ལ་སྦྲང་བུ་འདུ་བ་ལྟར་འཕུང་སྟེ༔ ལ་ལའི་སྲོག་ཀྱང་འཆད་པའོ༔ དེས་ན་ལས་བཟང་ངན་གྱིས་སྐྱབས་གནས་སུ་མཐོང་ནས༔ བཤང་པའི་ལམ་ནས་ཞུགས་ཏེ༔ མའི་མངལ་གྱི་རྒྱས་འཐུམས་ནས༔ རླུང་སེམས་གཉིས་དང་ཁུ་ཁྲག་འདྲེས་ཏེ༔ དེ་ལྟར་རྒྱུ་རྐྱེན་ཁུ་ཁྲག་གཉིས་ལས་ཀུན་རྫོབ་ཀྱི་འབྱུང་བ་བཞིའི་ལས་ཀྱིས་བྱེད་པ་རྐྱེན་དུ་འགྱུར༔ རླུང་སེམས་གཉིས་ལས་དོན་དམ་གྱི་འབྱུང་བ་བཞིའི་བྱེད་པ་ཅན་དུ་སོང་བས༔ ཞག་དང་པོ་ལ་ཆུའི་བྱེད་པའི་ལས་ཀྱིས་བཞི་པོ་དེ་དག་གཅིག་ཏུ་བསྡུས་པ་ལས༔ མེར་མེར་པོའི་གཞི་ཡུངས་འབྲུ་ལ་བརྒྱར་གཤེགས་པའི་ཆ་ཙམ་དུ་བྱས༔ ཞག་གཉིས་པ་ལ་སའི་བྱེད་པའི་ལས་ཀྱིས་དེ་དག་གཅིག་ཏུ་གནས་ཤིང་བརྟན་པར་བྱས་ཏེ་ཉུང་འབྲུའི་བཅུ་ཆ་ཙམ་དུ་བྱས༔ གསུམ་པ་ལ་མེའི་བྱེད་པའི་ལས་ཀྱིས་མེར་མེར་གྱུ་གྱུ་བ་དངུལ་ཆུའི་རྣམ་པ་ལྟ་བུར་འཕར་ཞིང་གཞན་དང་མ་འདྲེས་པར་ཉུང་འབྲུ་སུམ་ཆ་ཙམ་དུ་བྱས༔ བཞི་པ་ལ་རླུང་གི་བྱེད་པའི་ལས་ཀྱིས་ཐིག་ལེ་ཕྲ་མོ་དེ་དག་ཀྱང་བརྒྱ་སྟོང་དུ་འཐོར་ནས༔ སླར་དངུལ་ཆུ་བཞིན་བསྡུས་ནས་ཉུང་འབྲུ་ཕྱེད་ཚལ་ཙམ་དུ་གནས་པར་བྱས་སོ༔ དེ་ནས་ལྔ་པ་ལ་ཆུས་དངས་སྙིགས་བསྡུས་པས་འདུས་ཤིང་བརྟན་པར་བྱས་པས་ཉུང་འབྲུ་ཙམ་དུ་སྨིན་ནོ༔ དེ་ནས་དྲུག་པ་ལ་མེ་དང་རླུང་གིས་སྨིན་ཅིང་སོ་སོར་གསལ་བའི་ལས་བྱས་པས་ཉུང་འབྲུ་ཉིས་འགྱུར་དུ་འགྱུར་ཏེ༔ བདུན་པ་ལས་ཉུང་འབྲུ་ཉིས་འགྱུར་ཙམ་པའི་ཐིག་ལེ་མེར་མེར་པོའི་ནང་དུ་མིག་ཆུང་ཤིན་དུ་ཕྲ་བ་གཉིས་ཆགས༔ འདིའིི་དུས་ན་

འབྱུང་བ་བཞིའི་བྱེད་པའི་ལས་འཁྲུགས་ཏེ༔ ཆུའི་བརླན་གྱིས་གཤིགས༔ སའི་ལྗིད་ཀྱིས་མནན༔ མེའི་དྲོད་ཀྱིས་བསྲེགས༔ རླུང་གིས་སྒྲོན་མ་སྐྱེད་པར་བྱེད་དོ༔ དེ་ཡང་ཙིཏྟར་སྐུར་སྨིན་པར་བྱེད༔ རྩ་རྣམས་སུ་ཐིག་ལེར་སྨིན་པར་བྱེད་དོ༔ མིག་ཏུ་རྒྱང་ཞགས་ཆུའི་སྒྲོན་མ་དང་༔ ཤེས་རབ་རང་བྱུང་གི་སྒྲོན་མ་དང་༔ དབྱིངས་རྣམ་པར་དག་པའི་སྒྲོན་མ་རྣམས་སྨིན་པར་བྱེད་དོ༔ འབྲས་བུ་དབྱིངས་ཡེ་ཤེས་སུ་འདུ་འབྲལ་མེད་དོ༔ རང་བཞིན་གྱི་ཐིག་ལེ་ནི་མཉམ་གཞག་གི་དུས་ན་གནས༔ ཆོས་ཉིད་ཀྱི་ཐིག་ལེ་ནི་དེ་ལས་ཉམས་སྐྱེས་པའི་དུས་ན་གནས༔ དེ་ཉིད་བརྟན་པའི་དུས་ན་ཆོས་ཉིད་རྣམ་པར་དག་པའི་ཐིག་ལེ་དང་༔ སྣང་བའི་དུས་ན་དབྱིངས་ཀྱི་ཐིག་ལེ༔ དེ་ལས་འཕེལ་བའི་དུས་ན་དབྱིངས་རྣམ་པར་དག་པའི་ཐིག་ལེ༔ དེ་ཉིད་རྫོགས་པའི་དུས་ན་ཀུན་ཏུ་བཟང་པོའི་ཐིག་ལེ༔ ཕྱིར་ཤར་བའི་དུས་ན་ཡེ་ཤེས་ཆེན་པོའི་ཐིག་ལེའོ༔ དེས་ལམ་གང་ནས་བྱུང་བསྟན་པའོ༔ ༈དྲུག་པ་སྒོ་གང་ནས་འཆར་བསྟན་པ་ནི༔ སྒོ་ནི་མིག་ལ་འཆར༔ དེ་ཡང་ལྟེ་བ་དང་སྙིང་ཁར་འབྲེལ༔ སྙིང་ཁ་ནས་མགྲིན་པར་འབྲེལ༔ དེ་ནས་ཀླད་པ་དུད་ཁང་དུ་གཡས་སུ་འཁྱིལ་བའི་རྩ་འདབ་བཞི་ལས་དབང་པོའི་ཡུལ་ལ་འཆར་བར་བྱེད་པའི་རྩ་གཅིག་རྩེ་མོ་ལྔར་གྱེས་ནས་སྒོ་ལྔ་པོའི་རྟེན་བྱེད༔ དེ་ལ་སྐྱོན་ཡོན་དབང་པོ་དང་འབྱེད་རྩ་ཞེས་བྱ༔ ཁ་ཆེ་ལ་རྩ་བ་ཕྲ་བ་བ་མན་གྱི་རྭ་ལྟ་བུའི་ཡལ་ག་གཉིས་མིག་གི་ཨ་འབྲས་ཀྱི་དངས་མ་ལ་བརྟེན་ནས༔ འཁོར་བ་དང་མྱ་ངན་ལས་འདས་པ་གཉིས་ཀ་འཛིན་པས་ན༔ དཀར་ནག་ཕྱེད་མ་ཆུའི་རང་བཞིན་དུ་བྱུང་༔ རྒྱང་ཞགས་ཆུའི་སྒྲོན་མ་ཞེས་དངོས་མིག་ལ་བྱའོ༔ དེ་ལ་བརྟེན་ནས་ཐིག་ལེ་སྟོང་པའི་སྒྲོན་མ་

རྨ་བྱའི་མདོངས་ལྟ་བུ་འཆར་རོ༔ དེའི་གདང་དབྱིངས་རྣམ་པར་དག་པའི་སྒྲོན་མ་ཡི་གེ་ན་རོ་ལྟ་བུར་འཆར་རོ༔ དེའི་རྩལ་ཤེས་རབ་རང་བྱུང་གི་སྒྲོན་མ་ཤེས་པའི་རྩལ་དུ་མར་འཆར་རོ༔ སྤྱི་བོ་ཚངས་པའི་བུ་ག་ནས་རིག་པ་རྟོག་པ་མེད་པའི་སྐུ་དངོས་སུ་འཆར་རོ༔ དེ་ལ་བརྟེན་ནས་ཆོས་ཉིད་མངོན་སུམ་གྱི་སྣང་བ་ད་ལྟ་ཉིད་དུ་གཏན་ལ་དབབ་ཏུ་བཏུབ་པའོ༔ དེ་བས་ན་ཡིད་དཔྱོད་ཚིག་གི་སྒྲོ་འདོགས་མི་དགོས་ཏེ༔ ཡིད་དཔྱོད་འཛིན་པའི་ལྟ་བ་ལས་འདས་པ་ཆོས་ཉིད་མངོན་སུམ་གྱི་གནད་དོ༔ ༈བདུན་པ་དེ་ཉིད་ཡུལ་གང་ལ་སྣང་བ་བསྟན་པ་ནི༔ ཡུལ་ཕྱིའི་དབྱིངས་ནམ་མཁའ་སྟོང་པ་སྤྲིན་དང་བྲལ་བ་ལ་སྣང་སྟེ༔ དེ་ཡང་ཡུལ་སྟོང་པ་ལ་རིག་པ་སྟོང་པ་འཆར་བའི་གཞི་ཡིན་པས་སོ༔ དེ་ལྟར་ཡང་སྡུད་པ་ལས༔ དོན་འདི་གང་ཡིན་ནམ་མཁའ་དག་ལ་བརྟག་པར་གྱིས༔ ཞེས་པ་དང་༔ ནམ་མཁའ་ཆེ་ལས༔ ནམ་མཁའ་སྟོང་པ་སྐྱེ་མེད་ཅིང་༔ རྣལ་འབྱོར་ནམ་མཁའི་བྱ་ལམ་གནས༔ ཞེས་པ་ལ་སོགས་པ་མདོ་རྒྱུད་དུ་མ་ནས་གསུངས་སོ༔ ནང་གི་དབྱིངས་ནི་རྣམ་པར་དག་པའི་སྒྲོན་མེའི་ནང་དུ་འཆར་བའོ༔ དེ་ལྟར་ཡང་༔ ཕྱི་དང་ནང་ཀུན་ཆོས་ཀྱི་དབྱིངས༔ རྣམ་པར་དག་པའི་སྤྱོད་ཡུལ་ལ༔ སངས་རྒྱས་སེམས་ཅན་གཉིས་མེད་དེ༔ ལམ་གྱིས་བཅོས་སུ་ག་ལ་ཡོད༔ ཅེས་པ་ལ་སོགས་པ་དུ་མ་བཤད་དོ༔ དེ་ཡང་སྣང་ལུགས་ཇི་ལྟར་སྣང་ན༔ དབྱིངས་རིག་འདུ་འབྲལ་མེད་པར་སྣང་བས་ཟུང་འཇུག་དབྱེར་མེད༔ གསལ་སྟོང་དབྱེར་མེད༔ ཡུལ་སེམས་གཉིས་མེད༔ དོན་གཉིས་མུ་མཐའ་དང་བྲལ་བའི་ལྟ་བ་ཞེས་བྱའོ༔ དེ་ཡང་རྡོ་རྗེ་ལུ་གུ་རྒྱུད་ཀྱི་སྐུ་འདབ་འབྱོར་དུ་

སྣང་བ་དང་༔ དབྱིངས་གསལ་དག་པའི་སྒྲོན་མ་གཉིས་མིག་གིས་མངོན་དུ་སྣང་ལ༔ ཤེས་རབ་ཀྱིས་སྤྱོད་ཡུལ་མ་ཡིན་པས་ན༔ ཆོས་ཉིད་འདི་ནི་མངོན་པར་ཤེས་པ་དང་༔ མངོན་སུམ་པ་དང་རྒྱབ་ནས་འབྱུང་༔ ཞེས་པ་ལ་སོགས་དཔག་ཏུ་མེད་པ་གསུངས་སོ༔ ༈དོན་བརྒྱད་པ་ཉམས་སུ་ཇི་ལྟར་བླང་པ་ནི༔ འདི་ཉམས་སུ་ལེན་དོན་དུ་རྟེན་ཁྱད་པར་ཅན་བསྒྲུབ་པ་སྟོན་ཏེ༔ དེ་ལ་དང་པོ་གསང་སྔགས་ཀྱི་ལུགས་ཀྱིས་མ་སྨིན་པ་སྨིན་པར་བྱེད་པ་ལ་དབང་བསྐུར་དགོས་ཏེ༔ དབང་བསྐུར་བ་ལ་བླ་མ་མཚན་ཉིད་དང་ལྡན་པ་དགོས༔ དེ་ཡང་བླ་མ་ལྟ་བ་ཡངས་ཤིང་རྒྱུད་ལ་མཁས་པ༔ སྤྱིར་གསང་སྔགས་རྒྱུད་སྡེ་མང་དུ་ཤེས་ཤིང་ཁྱད་པར་དུ་རྒྱུད་ཀྱི་ཕུར་པ་འདོན་ཅིང་རྒྱུད་ཚིག་ལག་ལེན་དུ་སྟོན་ཤེས་པ༔ གོམས་ཤིང་སྒྲུབ་པ་ལ་མཁས་ཏེ་བསྙེན་སྒྲུབ་ཡན་ལག་བཞི་ལ་ལག་ལེན་དུ་སྟོན་པ༔ འབོད་རྦད་བསད་པའི་སྔགས་ཀྱི་སྲུང་བཟློག་མཁས་ཤིང་ནུས་པ་ཐོན་པ༔ རྟོགས་ཤིང་ལྟ་བ་ལ་མཁས་པ་སྟེེ༔ ཕྱིའི་ལྟ་བ་ཐེག་པ་རིམ་པ་དགུའི་དོན་རྟོགས་པ༔ ནང་གི་ལྟ་བ་ལ་མཁས་པས་ཆོས་ཉིད་མངོན་སུམ་དུ་མཐོང་བ༔ བསྒོམ་ཞིང་ཉམས་མྱོང་ལ་མཁས་པ་སྟེ་འཇིག་རྟེན་གྱི་བྱ་བ་བཏང་ནས་ཉམས་སུ་ལོན་ཅིང་གཡེང་བ་སྤངས་ནས་རི་ཕུག་དང་དགོན་པ་བསྟེན་པ༔ རང་ཡང་ཉམས་སུ་ལེན་ཞིང་གཞན་ལ་ཡང་ཉམས་སུ་ལེན་དུ་འཇུག་པ༔ དེ་ཉམས་སུ་མྱངས་བས་ཐུན་མོང་མ་ཡིན་པ་སྐྱེས་ཤིང་སྙིང་རྗེ་བྱང་སེམས་དང་ལྡན་པའོ༔ སློབ་མ་ཡང་དད་པ་ཆེ་བ༔ འཁོར་བའི་བྱ་བ་སྤངས་ནས་ཆོས་མིན་ཡིད་ལ་མི་བྱེད་པ༔ གཏོང་ཕོད་ཆེ་སྟེ་བདོག་པ་ཐམས་ཅད་ཀྱིས་བླ་མ་མཆོད་པ༔ ཤེས་རབ་ཆེ་སྟེ་ཐེག་པ་ཆེན་པོ་ལ་མོས་པ༔ མོས་གིས་ཆེ་སྟེ་བླ་མ་དང་རྟག་ཏུ་མི་འབྲལ་བ༔ འཁོར་བ་ལ་

ཞེན་པ་ལོག་སྟེ་བློ་མི་འཇུག་པ༔ བརྩོན་འགྲུས་ཆེ་སྟེ་ཉམས་ལེན་ལ་བརྩོན་པ༔ སྔོན་སྦྱངས་བ་ཆེ་བས་རྫོགས་པ་ཆེན་པོའི་སྣོད་དུ་རུང་བའོ༔ རང་བཞིན་རྫོགས་པ་ཆེན་པོའི་སྣོད་དུ་རུང་བ་ནི༔ རྣམ་རྟོག་བག་ཆགས་ཤས་ཀྱིས་ཆུང་བ༔ སྤྱོད་པ་ཡངས་པ༔ གཟུང་འཛིན་བག་ཀྱིས་ཆུང་བ༔ ལུས་ངག་ལ་དལ་ཆགས་ཤིང་ལྷོད་ཡོད་པ༔ དཀའ་སྤྱད་ལ་སྡུག་བསྔལ་དུ་མི་ལྟ་བ༔ ཁྱད་པར་དུ་ཆོས་ཉིད་དང་བླ་མ་ལ་མོས་པ་ནི་སྣོད་དུ་རུང་བས་དེ་ལྟར་སློབ་མ་སྣོད་ལྡན་དེས༔ བླ་མ་མཚན་ལྡན་དེ་ལ་བདག་ལོ་གསུམ་མམ་བདུན་ནམ་གཅིག་ལ་དབང་བསྐུར་བར་ཞུའོ༔ ཞེས་རིན་པོ་ཆེ་གསེར་ལ་སོགས་པའི་མཎྜལ་ཕུལ་ལ་གསོལ་བ་གདབ་བོ༔ དེ་ནས་བླ་མས་གནང་ན་དེའི་དུས་སུ་རང་གི་ཆ་རྐྱེན་སྟ་གོན་དུ་བྱས་ལ༔ དེ་ནས་དང་པོ་བླ་མས་སྤྲོས་བཅས་ཀྱི་དབང་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐུར་བའོ༔ དེའི་དམ་ཚིག་དང་སྡོམ་པ་འབོགས༔ དེ་ནས་སྤྲོས་མེད་ཀྱི་དབང་མཎྜལ་དང་བུམ་པ་ལ་བརྟེན་ནས་དབང་བསྐུར༔ དེའི་དུས་སུ་ལུང་འབོགས༔ དེ་ནས་ཤིན་ཏུ་སྤྲོས་མེད་ཀྱི་བརྡ་ལ་བརྟེན་ནས་དབང་བསྐུར༔ དེའི་དུས་སུ་ལུས་ཀྱི་གནད་བསྟན་པའོ༔ དེ་དག་གི་དུས་ན་བླ་མ་ལ་ཡོན་དབུལ་ཞིང་དགའ་སྟོན་ཆེན་པོ་བྱས་ཏེ༔ དེ་ལྟར་ཡང་༔ མན་ངག་ལུང་གི་སློབ་དཔོན་ལ་ཁུ་བོ་ཕ་དང་མ་དང་མིང་༔ བུ་དང་ཆུང་མ་ནོར་གྱི༔ དབྱིག་རབ་ཏུ་གཅེས་དང་ཡིད་འཐད་དབུལ༔ ཞེས་པ་དང་༔ འདིའི་དུས་ན་སྟོན་མོ་ཡང་གལ་ཆེ་སྟེ༔ སྙིང་རྗེ་ཆེན་པོ་དགའ་སྟོན་ཆེ༔ ཞེས་གསུངས་པའོ༔ དེ་ལྟ་བུའི་དབང་བཞི་པོ་ལོ་ཟླས་བར་དུ་ཆོད་ཀྱང་མི་འགལ༔ དུས་གཅིག་ལ་བསྐུར་ཡང་འགལ་བ་མེད་

དོ༔ དེ་ནས་དབང་ལ་བརྟེན་པའི་དམ་ཚིག་བསྲུང་དགོས་ཏེ༔ སྤྱིར་གསང་སྔགས་གྱི་རྒྱུད་ནས་བཤད་པ་ཐམས་ཅད་བསྲུང་ཞིང་༔ ཁྱད་པར་དུ་འདིའི་དམ་ཚིག་རབ་འབྱེད་བཞིན་བསྲུང་ངོ་༔ དེ་ལྟར་བླ་མ་དམ་ཚིག་དང་ལྡན་པས་སློབ་མ་དམ་ཚིག་དང་ལྡན་པ་ལ་དབང་བསྐུར་བྱིན་རླབས་དང་ལྡན་པ་གསུམ་ཚོགས་པས་སངས་རྒྱས་ཀྱི་འབྲས་བུ་ཐོགས་པ་མེད་པར་འབྱུང་ངོ་༔ དེས་ན་བླ་མ་མཚན་ཉིད་དང་ལྡན་པ་ཁོ་ན་གལ་ཆེ་སྟེ༔ ཡོན་ཏན་ཆུང་ལ་རང་བཞིན་ངན་པའི་བླ་མས་ནི་འབྲས་བུ་མི་འབྱུང་སྟེ་ངན་སོང་དུ་འཁྲིད་པར་བྱེད་དོ༔ ཡེ་ཤེས་གསང་བའི་རྒྱུད་ལས༔ དམ་ཚིག་མི་ལྡན་རྡོ་རྗེ་ནི༔ བེའུ་སྦྲེལ་གཡངས་ལ་ལྷུང་བ་བཞིན༔ བདག་གཞན་རྡོ་རྗེའི་ཁབ་ཏུ་འགྲོ༔ ཞེས་གསུངས༔ རང་ཤར་ལས༔ སློབ་དཔོན་མ་བརྟགས་སློབ་མའི་བདུད༔ ཅེས་པས་དང་པོ་བརྟགས་པ་གལ་ཆེའོ༔ སློབ་མ་མ་བརྟགས་སློབ་དཔོན་དགྲ༔ ཞེས་པས་བླ་མའི་ཡོན་ཏན་མ་མཐོང་བར་སྐྱོན་ལ་རྟོག་པ་ནི་སྤང་བར་བྱའོ༔ དེས་རྟེན་ཁྱད་པར་ཅན་དུ་སྒྲུབ་པ༔ གཞི་མ་སྨིན་པ་སྨིན་པར་བྱེད་པའོ༔ ད་ནི་སྨིན་པ་གྲོལ་པར་བྱེད་པ་ལ༔ བླ་མའི་མན་ངག་འབོགས་ཏེ༔ དཔེར་ན་ཞིང་ས་གཤིན་པོ་སོ་ནམ་ལེགས་པར་བྱས་ན་འབྲས་བུ་སྨིན་པ་དང་འདྲ་བ་དང་༔ རང་རྒྱུད་རྣམ་པར་དག་པ་ལ་དབང་བསྐུར་ཞིང་དམ་ཚིགས་མ་ཉམས་པ་ལ་བརྟེན་ན་འབྲས་བུ་འབྱུང་བའོ༔ དེ་ཡང་འབྲས་བུ་ནས་ལ་སོགས་པ་དེ་བཞག་པས་ཆོག་པ་མ་ཡིན་ཏེ༔ བཙས་མ་བརྔས་ནས་འབྲུ་བརྡུངས་བ་དང་༔ རྔོས་པ་དང་༔ བཏགས་པ་ལ་སོགས་པ་བྱས་པས་བཟའ་རྒྱུ་རུང་བ་དང་འདྲ་བར་བླ་མའི་གདམས་ངག་དེ་རྐྱེན་མེད་པའི་གནས་སུ་ཉམས་སུ་བླངས་ནས་ཉམས་ཐུན་མོང་མ་ཡིན་པར་

སངས་རྒྱས་ནས་འབྲས་བུ་སངས་རྒྱས་བའོ༔ དེ་ཡང་ཉམས་སུ་བླང་སྟེ༔ སྤྲང་པོའི་ཚུལ་དུ་བསྒྲུབ་པ་དང་༔ རི་དྭགས་ཀྱི་ཚུལ་དུ་བསྒྲུབ་པ་པོ༔ དང་པོ་ནི་ངོ་མི་ཤེས་པའི་ཡུལ་དུ་ཐ་མལ་པར་བརྫུས་ནས་ཅི་ཤེས་ཆ་མེད་པར་བསྒྲུབ་ཅིང་བསྡམ་སྟེ༔ རང་གི་ཡོན་ཏན་གཞན་ལ་མི་ངོམ་པ་ནི་ཞེ་འདོད་དང་རློམ་སེམས་མེད་པའི་རྟགས་ཡིན༔ གཞན་གྱི་གྲུབ་མཐའ་ལ་སོགས་པའི་དྲི་བརྡ་མི་བྱེད་པ་ནི་རང་གི་མན་ངག་ལ་ཐེ་ཚོམ་མེད་པའི་རྟགས་ཡིན་ནོ༔ རི་དྭགས་ཀྱི་ཚུལ་དུ་བསྒྲུབ་པ་ནི༔ རི་ཁྲོད་དམ་དུར་ཁྲོད་ལ་སོགས་པ་ཡུལ་རྐྱེན་གྱིས་མི་གནོད་པའི་སར་ཕྱིན་ལ་བྱ་བ་གསུམ་བཏང་ལ་བསྒྲུབ་བོ༔ དེ་ཡང་ཕྱི་ལུས་ཀྱི་བྱ་བ་ལས་དང་སོ་ནམ་ལ་སོགས་པ་བཏང་བའོ༔ དེས་ལུས་དལ་བས་རྩ་དལ༔ རྩ་དལ་བས་རླུང་རང་ལུགས་སུ་འབྱུང་༔ དེས་རྣམས་པར་རྟོག་པ་མི་རྒྱུའོ༔ ངག་གི་བྱ་བ་སྨྲ་བ་མང་པོ་རྣམས་བཏང་སྟེ༔ སྨྲ་བ་བཅད་པས་བརྗོད་དུ་མེད་པའི་དོན་རང་གི་རྒྱུད་ལས་སྐྱེའོ༔ སེམས་ཀྱི་བྱ་བ་རྣམ་པར་རྟོག་པ་མཐའ་དག་སྤང་སྟེ༔ དབྱིངས་རིག་ལ་གཏད་པས་ཆོས་ཉིད་མངོན་སུམ་དུ་མཐོང་བའོ༔ དེ་ཡང་ཇི་ལྟར་ཉམས་སུ་བླངས་ན་བློ་རིག་གཉིས་ཏེ༔ དམིགས་པ་ཡུལ་གྱི་བློ་ཅན་གྱིས་ཉམས་སུ་བླང་བ་དང་༔ རིག་པར་རང་སྣང་གི་བློ་ཅན་གྱིས་ཉམས་སུ་བླང་བའོ༔ དང་པོ་ནི་རྣམ་གྲངས་དང་གོ་རིམ་ལ་བསྟན་པ་ནི༔ དེ་ལ་སྤྱོད་པའི་རྣལ་འབྱོར་དང་༔ སྒོམ་པ་དང་༔ ལྟ་བ་དང་༔ འབྲས་བུ་ལ་རྒྱུན་དུ་སྤྱོད་པའི་རྣལ་འབྱོར་རོ༔ དང་པོ་སྤྱོད་པ་ལ་རྒྱུན་དུ་བྱེད་པའི་རྣལ་འབྱོར་ནི༔ སྣང་བ་དབང་སྡུད་ཀྱི་སྤྱོད་པ༔ དེའི་མན་ངག་ཏུ་སྣང་བ་གཅེར་བཞག་གི་ཐབས་ཏེ༔ དེ་ལ་དགོངས་པ་ཇི་ལྟ་བུ་ཞིག་སྐྱེ་ན་སྣང་སྲིད་གཞི་བཞེངས་

ཀྱི་དགོངས་པའོ༔ དེས་ཉོན་མོངས་གནས་འགྱུར་བའོ༔ དེ་ལྟ་བུའི་སྤྱོད་པ་ལ་གསུམ་སྟེ༔ ལས་དང་པོའི་སྤྱོད་པ་མི་དགེ་བ་བཅུ་ལ་འཛེམ་ཞིང་ཆོས་སྤྱོད་བཅུའི་རིམ་པ་ཉམས་སུ་ལེན་པའོ༔ དེ་ནས་འཁོར་འདས་རུ་ཤན་འབྱེད་པའི་སྤྱོད་པས་ལུས་ངག་ཡིད་གསུམ་ཚད་ལ་འབེབས་པའོ༔ བརྟུལ་ཞུགས་རླུང་འཛིན་གྱི་སྤྱོད་པ་ཉེར་གཅིག་ཡོད་ཀྱང་འདིར་བདུན་དུ་འདུས་ཏེ༔ དེ་ཡང་དང་པོ་སྒོ་མོ་ཀུན་ནས་བསྡུར་བ་བུང་བ་ཚང་འཚོལ་བ་ལྟ་བུའི་སྤྱོད་པས་ཐོས་པའི་ཆོས་དང་ཆོས་མ་ཡིན་པ་རྣམས་འབྱེད་ཅིང་སྤང་བྱ་དང་གཉེན་པོ་ངོས་འཛིན༔ དེ་ནས་བསམ་པས་ཉོན་མོངས་པ་མགོ་གནོན༔ བསྒོམས་པས་ཉོན་མོངས་པ་རྩ་བ་དྲུངས་ནས་འབྱིན་པའོ༔ དེའི་གྲོགས་སུ་ཐེ་ཚོམ་མེད་པ་བྱ་ཐི་བ་ཚང་ནང་དུ་འཇུག་པ་ལྟ་བུ་ནི༔ བྱ་ཐི་བ་དེ་ཚང་དུ་འཇུག་པའི་དུས་སུ༔ སྔོན་དུ་མིའི་སྒྲོ་འདོགས་བཅད་ནས་དེ་ནས་འཛལ་འཛོལ་མེད་པར་ཞུགས་པ་ལྟར༔ སྔོན་དུ་ཐོས་པས་སྒྲོ་འདོགས་བཅད་ནས༔ དེ་ནས་རང་ཡིད་ཆེས་པའི་གདམས་ངག་ཅིག་ཡི་དམ་དུ་བཟུང་ནས་ཉམས་སུ་ལེན་པའོ༔ དེའི་གྲོགས་སུ་ཀུན་གྱིས་སྤྱོད་ཡུལ་མ་ཡིན་པ་རི་དྭགས་སྨས་མ་ལྟ་བུའི་སྤྱོད་པ་ནི་རི་དྭགས་སྨས་མ་དེ་རྨ་ཡི་གནོང་གིས་རི་ལ་འབྲོས་ཏེ་ཅི་ནས་ཀྱང་ལུང་ཕུག་གམ་རི་རྩིབས་ལ་རང་གཅིག་པུར་གནས་པར་བྱེད༔ རྣལ་འབྱོར་པ་དེ་ཡང་འཁོར་བ་ལ་འཇིགས་པའི་དབང་གིས་ཅི་ནས་ཀྱང་མི་མི་རྒྱུ་བའི་གནས་དུར་ཁྲོད་ལ་སོགས་པར་གཅིག་པུར་གནས་པར་བྱའོ༔ དེའི་དུས་སུ་སྨྲ་བརྗོད་བྲལ་བ་ལྐུགས་པ་ལྟ་བུའི་སྤྱོད་པ་ནི༔ ལྐུགས་པ་སྨྲ་བ་མེད་པ་ལྟར་སྨྲ་བ་བཅད་དེ་ཅི་ཡང་མི་སྨྲ་བར་བྱའོ༔ དེ་ལྟར་བྱས་པས་

ངེས་མེད་སྨྱོན་པ་ལྟ་བུའི་སྤྱོད་པ་འབྱུང་སྟེ༔ སྨྱོན་པའི་ཚིག་བཞིན་འབྲེལ་མེད་འཛིན་པ་ཞིག་པའི་གཏམ་རང་རྡོལ་དུ་འབྱུང་བའོ༔ དེའི་དུས་སུ་གཙང་སྨེ་མེད་པར་ཁྱི་ཕག་ལྟ་བུའི་སྤྱོད་པ་འབྱུང་སྟེ༔ ཟས་དང་བཟང་ངན་མེད་པ་འབྱོལ་ཉོལ་དུ་སྤྱོད་པ་འབྱུང་ངོ་༔ དེ་གྲུབ་རྫོགས་པ་ལ་ཟིལ་གྱིས་མི་གནོན་པ་སེངྒེ་ལྟ་བུའི་སྤྱོད་པ་འབྱུང་སྟེ༔ སེངྒེ་གང་ལའང་འཇིགས་པ་དང་བག་ཚ་བ་མེད་པ་དང་འདྲ་བ་རྣལ་འབྱོར་བ་ལ་ཡང་སྣང་བ་ལ་སོགས་པའི་རྣམ་པ་དང་བྲལ་ནས་སྣང་བ་ལ་དབང་བསྒྱུར་ནུས་པ་འབྱུང་ངོ་༔ སྤྱོད་པ་དེ་དག་ལ་མིང་སུ་བཏགས་ན་ནང་སྣང་བ་དབང་སྒྱུར་གྱི་སྤྱོད་པ་ཞེས་བྱ་བ་གཞན་གྱི་མི་དད་པ་སྒྱུར་ནུས་པ་དང་༔ བསད་པ་གསོ་ནུས་པ་དང་རྫུ་འཕྲུལ་དང་འབྱུང་བཞི་དབང་དུ་འདུ་བ་ལ་སོགས་པ་འབྱུང་ངོ་༔ དེའི་མན་ངག་ཏུ་སྣང་བ་གཅེར་བཞག་གི་ཐབས་ནི་ཆོས་ཅན་ཅིའི་སྣང་བ་བསླབས་པས་རང་བཞིན་ཡོངས་སུ་དག༔ ཆོས་ཅན་དུམ་བུ་ལ་བསླབས་པས་གཟུགས་བརྙན་ཡོངས་སུ་དག་པའོ༔ དང་པོ་ནི་གང་སྣང་ཚད་ཀྱི་སྟེང་དུ་ནི་ཅེར་བཞག་པ་ལས་བྱུང་བའོ༔ འདིའི་དུས་སུ་དགོངས་པ་ནི་སྣང་སྲིད་གཞི་བཞེངས་ཞེས་བྱ་སྟེ༔ འཁོར་འདས་ཀྱི་ཆོས་ཐམས་ཅད་བསླབས་པ་མེད་ཀྱང་བློ་ཐོག་ཏུ་དུངས་ཀྱིས་འབྱུང་བའོ༔ དེ་ལྟར་བྱུང་བའི་དུས་ན་ཉོན་མོངས་པ་ལྔ་ཡེ་ཤེས་ལྔར་འགྱུར་པ་དང་༔ ཕུང་པོ་ལྔ་རིགས་ལྔར་གནས་པར་འགྱུར་ཏེ༔ དཔེར་ན་སྣམ་བུ་ཁ་དོག་བསྒྱུར་བ་དང་འདྲའོ༔ དེས་གང་ཟག་གི་ཆ་རྐྱེན་དུ་བསྟན་པའོ༔ སྒོམ་པ་ལ་རྒྱུན་དུ་བྱེད་པ་ལ་གསུམ་སྟེ༔ སྒོམ་པ་ཉིན་མཚན་ཁ་སྦྱོར་དང་༔ དེའི་མན་ངག་ཏུ་རྒྱ་མཚོ་ཅོག་གཞག་གི་ཐབས་དང་༔ དེའི་དུས་ན་སྣང་སྲིད་གཞི་བཞེངས་ཀྱི་དགོངས་པ

འོ༔ དེའི་ཚེ་ཉོན་མོངས་པ་ནི་རྒྱས་གདབ་པའོ༔ དེ་དག་ཉམས་སུ་བླང་པ་ལ་གསུམ་སྟེ༔ ལྷ་དང་མིའི་སེམས་འཛིན་པ་དང་༔ བྱང་ཆུབ་སེམས་དཔའི་བསམ་གཏན་དང་༔ བདེ་བར་གཤེགས་པའི་དགོངས་པའོ༔ བྱང་ཆུབ་སེམས་དཔའ་བསམ་གཏན་ལ་གསུམ་སྟེ༔ རང་བཞིན་གྱི་བསམ་གཏན་ལུང་མ་བསྟན་ཕལ་པ་རྣམས་ལ་ཡང་སྐྱེ་སྟེ༔ མདའ་སྲོང་གི་མིག་ལ་ཡོད་པ་དང་༔ རི་བོང་དང་ཁྲ་ཚང་ལ་ཉལ་བའི་མིག་ལ་ཡོད་པ་དང་༔ སེམས་རྣམ་ཤེས་བག་ལ་ཞ་སྟེ་ཡེངས་པའི་དུས་སུའོ༔ ས་ལ་གནས་པའི་བསམ་གཏན་ནི་ས་དང་པོའི་བདེན་པ་མཐོང་ན་ས་བཅུ་བདུན་གྱི་ཏིང་འཛིན་ཚུན་ཆད་སོ་སོའི་བསམ་གཏན་རེ་རེ་ཡོད་པའོ༔ བཅོས་པའི་བསམ་གཏན་ནི༔ ཉལ་བའི་རྣལ་འབྱོར་པའོ༔ རྣལ་འབྱོལ་པ་དེ་ལ་གནོད་པའི་རྐྱེན་གཉིས་ཏེ༔ འཕྲལ་དུ་ཟས་གོས་གཉིས་ཀྱིས་གནོད་ལ༔ ཕུགས་སུ་རྨི་ལམ་དང་བག་ཆགས་ལ་བརྟེན་ནས་ཁམས་གསུམ་དུ་འཇུག་པས་གནོད་པའོ༔ དེའི་གཉེན་པོ་བསམ་གཏན་གྱི་ཐུན་བཞི་ལ་བསླབ་སྟེ༔ ཟས་ཀྱི་ཞེན་པ་བཅད་པ་བསམ་གཏན་གྱི་ཐུན་དང་༔ གོས་ཀྱི་ཞེན་པ་བཅད་པ་བསམ་གཏན་གྱི་ཐུན་དང་༔ རྨི་ལམ་གྱི་ཞེན་པ་བཅད་པ་བསམ་གཏན་གྱི་ཐུན་དང་༔ བག་ཆགས་ཀྱི་ཞེན་པ་བཅད་པ་བསམ་གཏན་གྱི་ཐུན་ནོ༔ དེ་ཡང་དང་པོ་ཟས་ཀྱི་ཞེན་པ་བཅད་པ་ནི༔ བཅུད་ལེན་སྣ་ཚོགས་ལ་བརྟེན་པ་དང་༔ རྟེན་འབྲེལ་ཟབ་མོ་ལ་བརྟེན་པ་དང་༔ དང་པོ་ནི་འབྱུང་བ་རྒྱུན་གཅོད་རླུང་ཟས་སུ་ཟ་བ་སྟེ་སྟེང་འོག་གི་ནད་དང་༔ འབྱུང་བ་རོ་སྙོམས་པ་ས་ཆུ་མེ་རླུང་ནམ་མཁའི་བཅུད་ལེན་དང་༔ བདུད་རྩི་དང་རིན་པོ་ཆེའི་བཅུད་ལེན་ལ་སོགས་པའོ༔ གཉིས་པ་རྟེན་འབྲེལ་ནི༔ ཤ་སྦྱོར་དང་༔ རྡོ་སྦྱོར་དང་༔ རྩི་སྦྱོར་དང་༔

སྔོོ་སྦྱོར་ལ་སོགས་པའོ༔ དེ་དག་གི་ཡོན་ཏན་སོ་སོའི་སྐབས་ན་གསལ་ལོ༔ གོས་ཀྱི་ཞེན་པ་བཅད་པ་ལ་གཉིས་ཏེ་རྟེན་འབྲེལ་རྫས་དང་ཏིང་འཛིན་རླུང་ངོ་༔ དང་པོ་ཚ་བ་གསུམ་དང་༔ གཡག་རོག་མཁྲིས་པ༔ བུ་རམ་བསྐོལ་བ་བཏབ་ནས་བཏུང་ན་དྲོད་སྐྱེའོ༔ གཉིས་པ་ནི་ལུས་ཙོག་པུར་འདུག་ནས་རླུང་ནང་དུ་དྲངས་ཏེ་ཕོ་བ་ཚ་མེར་གྱིས་དགང་ཞིང་མེ་ལ་དམིགས༔ དེ་ནས་ཕྱིར་སྣ་ནས་དལ་བུས་བཏང་བའོ༔ དེས་དྲོད་སྐྱེས་པས་མི་རྟོག་པ་སྐྱེ་བ་དང་༔ སྲོགས་ཆགས་མི་འབྱུང་བའོ༔ རྨི་ལམ་གྱི་ཞེན་པ་གཅད་པ་ནི༔ བརྟག་པའི་གནད་དང་༔ བསྒོམ་པའི་གཉིས་ལས༔ བརྟག་པ་ནི་ཉི་མ་འགའ་དལ་བར་བྱས་ལ་ལུས་བསྐུ་མཉེ་བག་ཙམ་བྱའོ༔ དེ་ནུབ་འགའ་ཙམ་དུ་རྨི་ལམ་བརྟག་པར་བྱའོ༔ དེ་ཡང་སྔར་ཞེན་གྱི་བག་ཆགས་ཤས་ཆེར་རྨིས་ན༔ སྔར་ཞེན་ཆགས་ཚན་ཆེ་བ་ཡིན་ཏེ་འབྲིང་པོ་ཡིན༔ ད་ལྟ་ཅི་བྱས་ཤས་ཆེ་བ་རྨི་ན་ཤིན་ཏུ་སླ༔ སྔར་མ་ཕྱིན་པའི་ཡུལ་དང་ངོ་མི་ཤེས་པ་དང་༔ འཕྲད་པ་ལ་སོགས་པ་ནི་གཅད་དཀའ་འོ༔ གསུམ་ཀ་ཆལ་ཆོལ་དུ་རྨིས་ན་བག་ཆགས་གསུམ་འདུས་ཤིན་ཏུ་ཡང་དཀའ་འོ༔ དེ་ནས་སྒོམ་པ་ནི་གཟུང་ཞིང་སྦྱོང་བ་དང་༔ བསྒྱུར་བ་དང་གཅད་པའོ༔ དང་པོ་ནི་འདུན་པ་སྔོན་དུ་བཏང་ནས༔ ཅི་རྨིས་རྨིས་རྨི་ལམ་དུ་ངོ་ཤེས་པར་བྱ་ཞིང་༔ སྣང་གྲགས་ཐམས་ཅད་རྨི་ལམ་སྒྱུ་མ་ཙམ་དུ་བསྒོམ༔ དེ་ལ་སྟོང་པ་ཉིད་ཀྱི་རྒྱས་གདབ་བོ༔ བསྒྱུར་བ་ནི་སྣང་བ་ཐམས་ཅད་ཡི་དམ་ལྷར་བསྒྱུར་ཞིང་བསྒོམ༔ གཅད་པ་ནི་རིག་པའི་གནད་བསྒོམས་པས་རྨི་ལམ་ཆད་པ་ནི༔ དེ་ཡང་རབ་རྨི་ལམ་རྒྱུན་བཅད༔ འབྲིང་རྨི་ལམ་ཟིན་ཅིང་༔ ཐ་མ་དགེ་བའི་བག་ཆགས་རྨིས་པ་ནི་འབྱོངས་བའི་ཚད་དོ༔ གཞི་བག་ཆགས་ཀྱི་ཞེན་པ་

གཅད་པ་ནི༔ ཡོད་པ་ཆེད་དུ་མི་སྤང་༔ མེད་པ་ཆེད་དུ་མི་བཙལ༔ ཡོད་པ་ལ་མངོན་པར་མི་ཞེན༔ དེ་ཡང་འདས་པའི་རྗེས་མི་གཅད༔ མ་འོངས་པའི་སྔོན་མི་བསུ༔ ད་ལྟར་གྱི་བག་ཆགས་གཉེན་པོ་དང་བཅས་པ་ཐམས་ཅད་རྒྱུད་ལ་མི་བརྟེན་པས༔ སྣང་བ་སྣང་བར་གྲོལ་བས་དངོས་པོ་འཛིན་པ་རང་སར་དག །དེ་ཡང་སྣང་བ་ཉིད་སྣང་ཐོག་ཏུ་གྲོལ་བར་བྱེད་པ་བྱེའུ་ཁྲས་ཁྱེར་བ་ལྟ་བུའོ༔ འགྱུ་བ་འགྱུ་ཐོག་ཏུ་གྲོལ་བ་བར་སྣང་གི་བསེར་བུ་ལྟ་བུའོ༔ སྣང་ཤེས་གཉིས་མེད་དུ་ཐིམ་པ་ཆུ་ལ་ཆུ་ཐིམ་པ་ལྟ་བུའོ༔ དེས་ནི་བག་ཆགས་འཁྲུལ་བའི་ཡུལ་ལས་འདས་པ་བདག་ཏུ་ལྟ་བའི་ཞེན་པ་ཆོད་པའོ༔ བདེ་བར་གཤེགས་པའི་དགོངས་པ་ནི༔ ཐུན་མཚམས་ལས་འདས་པས་ཉིན་མཚན་དང་མཉམ་རྗེས་མེད་པའོ༔ ལྷ་དང་མིའི་སེམས་འཛིན་བསྒོམ་པ་ནི༔ སྙིང་གཟེར་ནས་ཉེར་གཅིག་བསྟན་ཀྱང་༔ འདིར་བདུན་བསྒོམ་སྟེ༔ དེ་ཡང་བརྩོན་འགྲུས་དང་ལྡན་པའི་གང་ཟག་གིས་སྔོན་དུ་བླ་མ་མཉེས་པ་ལ་སོགས་པའི་སྒོ་ནས་ཚོགས་བསགས་ལ༔ དེ་ནས་དགོངས་པ་ཡིད་ལ་མཐུན་པར་སྟན་བདེ་བ་ལ་སྐྱིལ་ཀྲུང་དུ་འདུག་སྟེ༔ མཚན་མ་ཨ་དཀར་ལ་སེམས་གཏད་པ་ནི༔ རང་གི་སྣ་ཡི་རྩེ་མོ་ལ་ཡི་གེ་ཨ་དཀར་པོ་གཅིག་བསྒོམ༔ རླུང་ཕར་འགྲོ་བའི་དུས་ཨ་དེ་རྒྱངས་ཀྱིས་སོང་བ་ལ་གནས་པར་བྱའོ༔ ནང་དུ་བསྡུ་བའི་དུས་ན་ཨ་དཀར་ཧྲིལ་གྱི་སྣ་ཡི་རྩེ་མོ་ལ་གནས་པ་ལ་སེམས་གཏད༔ དེ་ཡང་བདག་གིས་ལུས་ལ་ཚད་པའི་ནད་ཡོད་ན་གྲངས་རེག་དང་ལྡན་པར་བསྒོམ༔ གྲང་བའི་ནད་ཡོད་ན་ཚ་རེག་དང་ལྡན་པར་བསྒོམ༔ དེ་ལྟར་ཐུན་ཆུང་ཞིང་གྲངས་མང་བ་ལ་བསླབ༔ དེ་ནས་ཉིན་མཚན་ཕྱེད་མར་བསྒོམས་པས༔ སྐྱེ་མེད་བསམ་ངོ་དང་བྲལ་བས་ཉམས་སུ་

མྱོང་བ་མི་སྐྱེ་མི་སྲིད་དོ༔ བར་གཅོད་སེལ་བའི་ཡི་གེ་ཕཊ༔ དྲག་པོ་ལ་སེམས་གཟུང་བ་ནི༔ ལུས་གོང་ལྟར་སོ་སོ་གློད་ལ་ཤེས་པ་དར་ཅིག་རང་སར་བཞག་ལ༔ དེ་ནས་རབ་ཏུ་དྲག་པོས་ཕཊ་ཅེས་བརྗོད་པས་དེ་ཉིད་ལས་ཤེས་པ་ཧད་པ་ཞིག་འོང་སྟེ༔ དེའི་དུས་ན་ཡེ་ཤེས་ངོས་གཟུང་ཞིང་༔ ཡང་ནས་ཡང་དུ་ཕཊ་ཀྱིས་ཤེས་པ་གསལ་གདབ་པར་བྱའོ༔ དེ་ཉིན་མཚན་ཕྱེད་མར་ཉམས་སུ་བླངས་པས༔ རང་བཞིན་ཡོངས་སུ་དག་པའི་ཉམས་སུ་མྱོང་བ་མི་འཆར་མི་སྲིད་དོ༔ དེ་ལ་མ་མོས་ན་ཁྲོ་བོ་འགྱེད་པའི་གད་མོ་ལ་སེམས་གཟུང་བ་ནི༔ ཡང་ལུས་ལ་སོགས་པ་གོང་ལྟར་བྱས་ལ་ངག་དུ་ཧ་ཧ་ཞེས་དྲག་ལ་ཐུང་པར་བརྗོད་ཤེས་པ་ཧ་ལ་གཏད༔ རྣམ་རྟོག་ལ་སོགས་པ་སེམས་ལ་མི་བདེ་བ་གང་བྱུང་ངག་དག་ཏུ་ཧ་དྲག་ཏུ་བརྗོད་ཅིང་ངག་དང་ཤེས་པ་རླུང་གསུམ་བསྲེ་བ་ནི་གནད་དོ༔ དེ་ལྟར་དུས་ཐམས་ཅད་དུ་བསྒོམ་པས་ཆོས་ཉིད་དག་པ་ངོས་གཟུང་དང་བྲལ་བའི་ཉམས་སྐྱེ་བ་ལ་ཐེ་ཚོམ་མེད་དོ༔ དེ་ལྟར་ངག་ལ་རྟེན་པའི་དུས་ན༔ ཤེས་པ་སྣ་མི་བསྐྱིལ་མི་ལྟེབ་ཅིང་ངག་གིས་བརྗོད་པ་མ་ཉམས་པར་གལ་ཆེ་གསུངས་སོ༔ ཡང་དེ་ལ་མ་མོས་ན་ལྷ་མ་ཡིན་རྩོད་པ་འགྱེད་པ་ལ་སེམས་གཟུང་བ་ནི༔ ཡང་ལུས་ལ་སོགས་པ་གོང་ལྟར་བྱས་ལ༔ རི་མཐོན་པོའི་བྲག་གི་སྟེང་ལ་སོགས་པར་འདུག་ལ༔ མགོ་དང་ལུས་པོ་དལ་གྱིས་བསྒྲིལ་ལུས་ཀྱང་དང་པོ་བསྐྱོད་དལ་གྱིས་བསྒྲིལ༔ ལུས་ཀྱང་ཉི་མ་གསུམ་བཞི་ཙམ་དུ་བྱའོ༔ དེ་ནས་དྲག་ཏུ་བསྒྲིལ་དེ་ནས་ཁམས་གྱིས་ཐུབ་ཐང་དུ་བསྒྲིལ་ལོ༔ དེ་ལྟར་བསྒུལ་བསྐྱོད་ཕྱག་རྒྱ་ལས་མ་འདས་པར་བྱས་ལ་ཕྱིའི་སྣང་བ་འགགས་ནས་ཅིའི་ངོ་བོར་ཡང་གྲུབ་པ་མེད་པ་འབྱུང་ངོ་༔ དེ་ལ་མཐོང་སྣང་རང་གྲོལ་བའི་ཉམས་སུ་

མྱོང་བ་མི་སྐྱེ་མི་སྲིད་དོ༔ དེའི་དུས་སུ་རླུང་ལ་ཤིས་པའི་ཁ་ཟས་བརྟེན་པར་བྱའོ༔ ལྟེ་བར་ཡི་གེ་རཾ་ལ་སེམས་གཏད་པ་ནི་གནད་དོ༔ དེ་ལ་མ་མོས་ན་རྣམ་པར་རྟོག་པ་ཧཱུྃ་གིས་དེད་པ་དེ་ལ་སེམས་གཟུང་བ་ནི༔ ངག་ཏུ་ཧཱུྃ་ཞེས་རབ་ཏུ་རིང་བར་དབྱངས་དང་ལྡན་པར་བརྗོད་དོ༔ རླུང་དང་བསྲེ་བ་ནི་གནོད་དོ༔ དེ་ཡང་ཧཱུྃ་ཞེས་སྐབས་སུ་ཐུང་བར་ཡང་བརྗོད་དོ༔ དེ་ལྟར་མི་དལ་བར་ཡུན་རིང་བར་བྱས་ན་རྣམ་པར་རྟོག་པ་ཆོས་ཉིད་ལ་འཆར་བའི་ཉམས་སུ་མྱོང་བ་མི་སྐྱེ་མི་སྲིད་དོ༔ དེ་ལ་མ་མོས་ན་སྟོང་པ་ཉིད་རིམ་གྱིས་པ་ལ་སེམས་གཟུང་བ་ནི༔ ཡང་ལུས་གནད་ལ་སོགས་གོང་ལྟར་བྱས་ལ༔ དང་པོ་ལུས་ཀྱི་བྱེ་བྲག་མང་པོར་བསིལ་ལ་མིང་དུ་མ་ལ་སོགས་པར་གཞིག་སྟེ༔ མིང་དོན་སོ་སོར་བཏགས་པས་ལུས་དངོས་པོར་གྲུབ་པ་མེད་པར་ཤེས་པར་བྱའོ༔ དེ་ནས་ཕྱི་རོལ་གྱི་སྣང་བ་ཐམས་ཅད་ལ་དེ་ལྟར་མིང་དོན་དུ་མ་བཙལ་ཞིང་བཏགས་པས་གང་དུ་ཡང་གྲུབ་པ་མི་རྙེད་དེ༔ དེ་ལྟར་མིང་གིས་བཏགས་པ་ཐམས་ཅད་སྟོང་པར་གོ་བ་དང་༔ དངོས་པོ་ཡང་སྟོང་པར་འགྱུར་བའོ༔ དེ་ནས་རིམ་གྱིས་ཆོས་ཉིད་སྟོང་པ་ཉིད་དུ་མི་འགྲོ་མི་སྲིད་དོ༔ ཡང་དེ་ལ་མ་མོས་ན་སྣང་བའི་གཟུགས་གང་འདུག་པ་ལ་ཤེས་པ་བཅུག་ཅིང་༔ དེ་ཉིད་སྐད་ཅིག་གིས་སྟོང་སང་སང་ལ་བློ་གནས་པར་བྱས་ལ༔ དུས་དེ་ཙམ་ན་གང་ལ་བལྟས་བལྟས་སྟོང་པར་ཁྲོལ་གྱིས་འགྲོ་བ་འབྱུང་ངོ་༔ དེ་ལྟར་ཡུན་དུ་བསྒོམས་པས་སྣང་བ་ཐམས་ཅད་མེ་ལོང་ལ་ཧས་བཏབ་པ་ལྟར་སྟོང་ཧད་ཀྱི་མི་འགྲོ་མི་སྲིད་དོ༔ དེ་ཡང་དང་པོ་སྣང་༔ གཉིས་པ་སྟོང་༔ གསུམ་པ་དངོས་པོ་གང་ལ་ཡང་མ་གྲུབ་པའོ༔ དེ་ལྟ་བུ་བསྒོམ་དེ་ལ་མིང་དུ་བཏགས་ན་ཉིན་མཚན་ཁ་སྦྱོར་གྱི་སྒོམ་པ་ཞེས་བྱ་སྟེ༔ ཉིན་མོ་

འདས་པའི་ཆ་མཚན་མོའི་འཁོར་བའི་ཆ་ཡིན་པས༔ འདིའི་དུས་སུ་འཁོར་འདས་ཁ་སྦྱར་བས་ཡུལ་དངོས་པོ་གང་དུ་ཡང་མ་གྲུབ་པའི་ཆོས་ཉིད་ཅེས་བྱ་སྟེ༔ དེ་ཙ་ན་ཉིན་མོ་སྒོམ་གསལ་རྒྱུ་མེད༔ མཚན་མོ་མི་གསལ་བའི་རྒྱུ་མེད་པར་སྦྲེལ་སོང་བ་ལ་བྱའོ༔ དེའི་མན་ངག་ཏུ་རྒྱ་མཚོའི་ཅོག་བཞག་ནི༔ མིག་ཆུའི་རང་བཞིན་ཡིན་པས་རྒྱ་མཚོའི་ཞེས་བྱ་སྟེ༔ གང་བསྒོམས་ཀྱང་མིག་རང་སོར་ཅོག་གིས་འཇོག་པ་གནད་ཡིན་ནོ༔ མི་བསྒོམས་ན་མི་སྒོམ༔ སྒོམ་ཞིག་བྱེད་ཕན་ཆད་མིག་མི་འཛུམ་པ་གནད་ཡིན་ནོ༔ དེ་ལྟར་བྱས་པས་དཔེར་ན་རྒྱ་མཚོ་ཆེན་པོའི་ནང་དུ་གཟའ་དང་རྒྱུ་སྐར་ལ་སོགས་པའི་གཟུགས་བརྙན་ཐམས་ཅད་བཀྲ་སལ་ལེ་སྣང་ཡང་རྒྱ་མཚོ་ལ་གོས་པ་མེད་ཅིང་སྣང་ཡུལ་དུ་ཡོད་ལ་གཟུང་ཡུལ་དུ་གྲུབ་པ་མེད་པར་སྣང་བ་ལྟར༔ འདི་ལྟར་བསྒོམས་པའི་དུས་ན་ཕྱིའི་སྣང་བ་ཉམས་སྣང་ངོར་ཤར་ལ༔ བདེན་ངོར་མ་གྲུབ་པས་ཤེས་པ་ཕྱིར་སྣང་ཐོག་ཏུ་མ་ཤོར༔ སྣང་བ་ཤེས་པས་གང་དུ་ཡང་མ་བཅད་པར་རང་སར་འདུག་པ་ལ་སྒོམ་པ་ཞེས་བྱའོ༔ གལ་ཏེ་བསྒོམས་པའི་དུས་སུ་ཚོགས་དྲུག་འགགས་ནས་དྲན་མེད་དུ་སོང་ན་ཞི་གནས་ཕྱོགས་གཅིག་དུ་ལྷུང་བ་ཞེས་བྱ་བ་སྟེ་སྒོམ་པའི་གོལ་སར་འདུག་པའོ༔ དེ་ལྟར་ཤེས་པ་ལ་སྣང་བས་མ་གོས་སྣང་བ་ལ་ཤེས་པས་མ་དཔྱད་པར་རང་ས་ལ་གསལ་བའོ༔ དེས་དགོངས་པ་སྣང་སྲིད་གཞི་བཞག་ལ་གནས་པ་ཞེས་བྱ་སྟེ༔ དེ་གོང་དུ་གཞི་བཞེངས་ཞེས་ཚིག་མཐའ་ལ་རྟོག་བརྗོད་སྐྱེས་པ་དེ༔ འདིར་ཚིག་གི་སྤྲོས་པ་ཆོད་པ་དེ་ཚོགས་ཐམས་ཅད་གཞི་ལ་བཞག་ནས་རང་སར་གྲོལ་བ་ནི་སྣང་ཞིང་སྲིད་པའི་ཆོས་དང་མིང་དང་ཡི་གེའི་ཚོགས་སུ་ཤར་བ་རྣམས་རང་སར་བཞག་པས་ཚིག་ལ་མི་གནས་པར་རང་སར་གྲོལ་བ་ལ༔

གཞི་དངོས་པོའི་གནས་ལུགས་ལ་བཞག་པ་ཞེས་བྱའོ༔ དེའི་དུས་ན་ཉོན་མོངས་པ་ཉིད་རྒྱས་གདབ་པས་དེའི་སྙིང་པོ་ཡེ་ཤེས་སུ་ཤར་ཏེ༔ དཔེར་ན་འཇིམ་པ་ལ་བརྐོས་ཕོར་བཏབས་པས་ཚྭ་ཚྭར་ཀྲོང་གིས་འོངས་བ་དང་འདྲ་བར༔ སྣང་བཏགས་ཀྱི་ཆོས་སྣ་ཚོགས་པ་ཆོས་སྐུར་ཀྲོང་གིས་འཆར་བར་ངེས་སོ༔ དེའི་དུས་ན་གང་ཟག་དེ་ལ་མིང་དུ་བཏགས་ནས་ཆོས་ལ་གནས་པའི་དུས་ཞེས་བྱའོ༔ འཁོར་འདས་ཀྱི་ཆོས་ཐམས་ཅད་རང་གིས་བློ་ཐོག་ན་གནས་པས་དེ་ཉིད་མ་ཕྱེ་མི་འབྱེད་རང་སར་གནས་པ་ལ་སྒོམ་པ་ཞེས་བྱའོ༔ འདི་དག་ནི་ཉི་ཟླ་ཁ་སྦྱོར་ཀྱི་རྒྱུད་ནས་བཤད་པའོ༔ ལྟ་བ་ལ་རྒྱུན་དུ་བྱེད་པའི་རྣལ་འབྱོར་ནི་དེ་ལ་སྤྱིའི་ལྟ་བ་དང་༔ རང་གི་ལྟ་བ་གཉིས་སོ༔ སྤྱིའི་ལྟ་བ་ནི་ཐེག་པ་རིམ་པ་དགུ་སོ་སོར་འདོད་ལུགས་མི་འདྲ་བ་རྣམས་སོ༔ འདི་དག་ནི་ཚིག་གི་ལྟ་བ་ཡིད་དཔྱོད་འཛིན་པ་ཡིན་ནོ༔ རང་གི་ལྟ་བ་རྫོགས་པ་ཆེན་པོ་བྱ་བྲལ་ལྷུན་གྲུབ་ཀྱི་ལྟ་བ་སྟེ་ཕྱིའི་ཆོས་ཅན་ལ་བལྟས་པས་རང་བཞིན་མེད་པར་མཐོང་༔ ནང་ཆོས་ཉིད་ལ་བལྟས་པས་སྐྱེ་བ་མེད་པར་མཐོང་༔ གསང་བ་རང་རིག་ལ་བལྟས་པས་རིག་པ་མངོན་སུམ་དུ་མཐོང་བའོ༔ དེ་ཡང་མཐོང་ལུགས་ཇི་ལྟར་མཐོང་ན༔ ཆོས་ཅན་དུམ་བུ་བ་ལ་རྡོ་རྗེའི་མིག་གིས་བལྟས་པས་མཐོང་ལུགས་ཆོས་ཅན་གྱི་སྣང་སྒྱུ་མའམ༔ མདང་སུམ་རྨིས་པའི་རྨི་ལམ་ལྟར་མཐོང་བས༔ འཁྲུལ་བ་ཡང་དག་ཏུ་གྲུབ་པ་མེད་པར་རྟོགས་ཏེ༔ དེ་ཁམས་གསུམ་དུ་བཟློག་པ་མེད་པས་བློ་བདེའོ༔ ཆོས་ཅན་བྱེ་བྲག་ལ་ཤེས་རབ་ཀྱི་མིག་གིས་བལྟས་པས༔ ཀུན་རྫོབ་ཀྱི་དོན་རྣམ་པར་སྣང་ལ་རང་བཞིན་མེད་པར་སྒྱུ་མ་ལྟ་བུར་མཐོང་བས་ཆོས་ཉིད་ལ་ངོས་བཟུང་མེད་པར་རྟོགས་པས་རིག་པ་ལས་དང་བག་ཆགས་ཀྱི་རྟེན་མེད་པས་བློ་བདེ་བའོ༔

ནང་ཆོས་ཉིད་ལ་ཡེ་ཤེས་ཀྱི་མིག་གིས་བལྟས་པས་རིག་མཉམ་ཐ་དད་མེད་པར་མཐོང་བས་ཆོས་ཉིད་རང་ལ་ཡང་བདེན་པ་རང་རྒྱུད་དུ་འཛིན་པ་མེད་དེ༔ སྤྲོས་བྲལ་རྣམ་དག་ཏུ་རྟོགས་པས་ཆོས་ཉིད་རང་བཞིན་མེད་པར་ཤེས་པ་སྟེ༔ རང་གིས་གྲུབ་མཐའ་ཞིག་ནས་ཆོས་ཟད་པས༔ ད་ཆོས་སུ་འཛིན་པའི་ཞེན་པ་དང་བྲལ་ནས་བློ་བདེ་བའོ༔ གསང་བ་རང་རིག་ལ་ཆོས་ཉིད་རྣམ་པར་དག་པའི་མིག་གིས་གཅེར་བཞག་ཏུ་བལྟས་པས་མཐོང་ལུགས་རང་གི་རིག་པ་ཉིད་དབྱིངས་དང་རིག་པ་འདུ་འབྲལ་མེད་པར་མངོན་སུམ་དུ་མཐོང་བས་ཡིད་དཔྱོད་ཚིག་གིས་སངས་མི་རྒྱ་བར་རྟོགས་ཏེ་ཡིད་དཔྱོད་ཚིག་ལ་གདེང་དུ་མི་འཛིན་པས་བློ་བདེ་བ་ནི་ཆོས་ཉིད་དབང་པོའི་སྤྱོད་ཡུལ་དུ་མཐོང་པའི་གནད་ཀྱིས་སོ༔ དེ་དག་རྣམས་ལ་མིང་དུ་བཏགས་ན་གྲོང་ཁྱེར་རྒྱུན་གཅོད་ཀྱི་ལྟ་བ་ཞེས་བྱ་སྟེ༔ མངལ་གྱི་གྲོང་ཁྱེར་རྒྱུན་གཅོད་ནས་ཁམས་གསུམ་དུ་མི་ལྡོག་པའི་ལྟ་བས་ཏེ༔ དེ་ནས་བརྩོན་འགྲུས་ཅན་རབ་ཚེ་འདི་ཉིད་ལ་ཟག་བཅས་མི་སྣང་བར་སངས་རྒྱ༔ འབྲིང་གིས་བླ་མའི་གདམས་ངག་ཡོད་པས་དུམ་རེ་ཉམས་སུ་བླངས་ཀྱང་ཐང་ཆད་ནས་ཉམས་སུ་བླང་ལོངས་མ་བྱུང་བ་ནི་ཆོས་ཉིད་བར་དོ་ལ་རང་གི་ཆོས་ཉིད་སྟོབས་སུ་གྱུར་ནས་སངས་རྒྱ༔ ཐ་མས་རྒྱུའི་གདམས་ངག་ནི་ཞུས༔ འདི་ལ་ལེ་ལོས་ཉམས་སུ་བླང་ལོངས་མ་བྱུང་བ་ནི་ཆོས་ཉིད་བདེན་པའི་བྱིན་རླབས་ལ་བརྟེན་ནས༔ རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་ཕྱུང་སྟེ་བརྫུས་ཏེ་སྐྱེས་ནས་དེ་ཉིད་ལ་སངས་རྒྱས་བར་ངེས་པས་གྲོང་ཁྱེར་རྒྱུན་གཅོད་ཅེས་བྱའོ༔ དེའི་མན་ངག་རི་བོ་ཅོག་བཞག་གི་ལྟ་བ་སྟེ༔ དཔེར་ན་དབུས་ཀྱི་རི་བོ་མཆོག་རབ་ཀྱི་སྟེང་དུ་ཕྱིན་ན༔ གླིང་བཞི་དུས་གཅིག་ལ་མཐོང་བ་ལྟར་རྫོགས་པ་ཆེན་པོའི་སྟེང་ནས་བལྟས་པས་

ཐེག་པ་རིམ་པ་དགུའི་འདོད་པ་རང་ལུགས་རྟོགས་པའོ༔ ཐེག་པ་གཞན་གྱིས་ནི་རྫོགས་པ་ཆེན་པོའི་འདོད་པ་མི་མཐོང་ངོ་༔ དེ་ཉིད་མི་འགྱུར་བའི་ངོས་ནས་ཀྱང་རི་བོ་ཅོག་བཞག་གོ༔ དེ་ལ་དགོངས་པ་ནི་ཁམས་གསུམ་ཡོངས་སུ་གྲོལ་བའི་དགོངས་པ་སྟེ༔ དེ་ལྟར་རྫོགས་ཆེན་རྟོགས་པའི་རྣལ་འབྱོར་པས་བལྟས་ན་མ་གྲོལ་བ་གཅིག་ཀྱང་མེད་དོ༔ དེ་ལྟར་རྟོགས་པའི་ཚེ་ན་འགྲོ་དྲུག་རང་སར་གྲོལ་བ་ཞེས་བྱའོ༔ དེའི་ཚེ་ཉོན་མོངས་པ་ནི་གནས་སུ་དག་སྟེ༔ མཁའ་ལ་སྤྲིན་དེངས་པའི་རྣམ་པའམ༔ ཆུའི་རྙོག་མ་དངས་བ་ལྟ་བུར་རང་སར་དེངས་པ་ནི་དང་པོ་འཁྲུལ་མ་མྱོང་༔ ད་ལྟ་འཁྲུལ་བ་ལ་མི་གནས༔ ཐ་མ་འཁྲུལ་མི་སྲིད་པའི་གནད་ལས་བྱུང་བའོ༔ དེའི་དུས་ན་ཆོས་བོར་བའི་གང་ཟག་ཅེས་མིང་དུ་བཏགས་པ་ནི་ཡོངས་ལ་བྱེད་པའི་ཆོས་མེད་པའོ༔ འབྲས་བུ་ལམ་དུ་བྱེད་པ་ནི་དོན་གྱི་འབྲས་བུ་རྒྱུར་མི་ལྡོག་པ་བསེ་ཤིང་གི་འབྲས་བུ་ལྟ་བུའོ༔ དེ་ཡང་འདི་དུས་ན་རྒྱལ་པོས་གདན་ས་ཟིན་ཏེ་མི་འགྱུར་བ་ནི་དཔེར་ན་རྒྱལ་རིགས་ཀྱི་ཕྲུག་གུ་སྤྱི་བོ་ནས་དབང་བསྐུར་ནས་རྒྱལ་ས་ཟིན་ཏེ་མི་འགྱུར་བ་བཞིན་རིག་པ་ཉིད་རང་སར་ཟིན་པའོ༔ འབངས་ཆམ་ལ་འབེབས་ཏེ་མི་འགྱུར་བ་ནི་རྒྱལ་པོ་གཅིག་གིས་འབངས་ཆམ་ལ་ཕབ་པ་དེ་རྒྱལ་སྲིད་དུ་གནས་པ་བཞིན་དུ་སྒོ་ལྔའི་རྣམ་ཤེས་འཆར་བའི་གཞི་སྟོང་པས་འཁོར་བའི་མིང་མེད་པའོ༔ བློན་པོ་བཙོན་དུ་བཟུང་སྟེ་མི་འགྱུར་བ་ནི༔ དཔེར་ན་རྒྱལ་པོའི་བཀའ་བློན་བཙོན་དུ་བཟུང་ན་རྒྱལ་པོ་ཡང་ཉེན་པ་བཞིན༔ ཡིད་ཀྱི་རྣམ་པར་རྟོག་པ་འགྱུ་བ་ཆད་པས་རིག་པ་རང་དབང་ཐོབ་པའོ༔ འབྲས་བུ་དེ་ལ་མིང་དུ་བཏགས་ན༔ རང་བཞིན་རྣམ་དག་གི་འབྲས་བུ་ཞེས་བྱའོ༔ བྱས་པའི་རྩོལ་བ་ལས་བྱུང་བ་མ་ཡིན་ཏེ༔

ཡེ་ནས་དག་པའི་དོན་རྒྱུད་ལ་སྐྱེས་པས་འབྲས་བུ་ཞེས་ཐ་སྙད་དུ་བྱའོ༔ དེ་ཡི་མན་ངག་ནི་རིག་པ་ཅོག་བཞག་གིས་དེ་ལྟར་འབྲས་བུ་དེ་གང་ལང་བྱུང་ན༔ རིག་པ་ཉིད་གང་སྣང་གང་ཤར་གྱི་སྟེང་དུ་བཞག་པ་ལས་བྱུང་བའོ༔ དེའི་དགོངས་པ་ནི་སྲིད་གསུམ་ཀ་དག་ཅེས་བྱ་བ་རང་གི་ལུས་ངག་ཡིད་གསུམ་ལ་ལས་དང་བག་ཆག་དང་རྟོག་པ་གང་ཡང་མི་གནས་པས་སྲིད་གསུམ་ཀ་དག་གོ༔ འདིའི་དུས་ན་ཉོན་མོངས་པ་ནི་རང་གྲོལ་དུ་སོང་སྟེ་དཔེར་ན་སྦྲུལ་གྱི་བདུད་པ་ཉིད་བྱ་ལོངས་མེད་པར་གྲོལ་བ་དང་འདྲའོ༔ དེ་བཞིན་དུ་ཉོན་མོངས་པ་སྐྱེ་ལོངས་མེད་པར་ཆོས་ཉིད་དུ་རང་གྲོལ་བའོ༔ དེའི་དུས་ན་གང་ཟག་དེ་ཆོས་ལས་འདས་པ་ཞེས་བྱའོ༔ འཁོར་འདས་གང་དུ་འཛིན་པའི་ཤེས་པ་དང་བྲལ་བའོ༔ དེ་དག་གིས་ནི་དམིགས་པའི་ཡུལ་ཅན་གྱི་བློ་ཅན་རྣམས་ཀྱིས་ཉམས་སུ་བླང་བྱ་སྟེ༔ དོན་གྱི་སྤྲོས་པ་ལ་དགའ་བ་རྣམས་ཀྱི་དོན་དུའོ༔ ད་ནི་རིག་པ་རང་སྣང་གི་བློ་ཅན་རྣམས་ཀྱིས་ཉམས་སུ་བླང་བ་སྟོན་ཏེ་དེ་ལ་གཉིས༔ ཁྲེགས་ཆོད་དང་༔ ཐོད་རྒལ་ལོ༔ ཁྲེགས་ཆོད་ནི་སྣང་བ་དང་མ་འབྲེལ་བ་འདི་ཉིད་ལ་རྟོགས་པ་མངོན་སུམ་དུ་སྐད་ཅིག་གིས་གྱུར་པའི༔ ཐོད་རྒལ་ཉམས་སུ་བླང་བ་ནི་སྔོན་དུ་དབང་བཞི་ཡོངས་སུ་རྫོགས་པར་བྱས་ལ༔ དེ་ནས་གོང་གི་བསྒྲུབ་ལུགས་གཉིས་པོ་གང་ཡང་རུང་བས་མན་ངག་ལ་སྔོན་འགྲོ་དངོས་གཞི་གཉིས་འཁོར་འདས་རུ་ཤན་དབྱེ་བའི་སྤྱོད་པ་གསུམ་བྱ་བ་ནི༔ དང་པོ་ལུས་རུ་ཤན་དབྱེ་བའི་སྤྱོད་པ་བྱ༔ དེའི་ངགས་ཚད་ལ་ཕེབས༔ ངག་རུ་ཤན་དབྱེ་བའི་སྤྱོད་པ་བྱ༔ དེའི་རྟགས་ཚད་ལ་ཕེབས་ནས་སེམས་རུ་ཤན་དབྱེ་བའི་སྤྱོད་པ་བྱའོ༔ དེ་དག་ལ་མཆོག་གི་དགོས་པ་དང་༔ ཐུན་མོང་གི་དགོས་པ་གཉིས་གཉིས་ཏེ་དྲུག་གོ༔ དེ་ནས་རྣལ་དུ་དབབ་པ་

གསུམ་བྱ་སྟེ༔ ལུས་རྣལ་དུ་ཕེབས་པས་ཕུང་པོ་ཁམས་དང་སྐྱེ་མཆེད་དང་བྱང་སེམས་རྒྱས་པའི་དགོས་པ་ཡོད་དོ༔ དེ་ནས་ངག་རྣལ་དུ་ཕེབས་པས་བརྗོད་པ་མ་བཅོས་པའི་དོན་དུ་འགྱུར་ཞིང་ཚིག་གི་རྟོག་དཔྱོད་ཟད་པར་འགྱུར་བའི་དགོས་པ་ཡོད་དོ༔ དེ་ནས་སེམས་རྣལ་དུ་ཕེབས་པས་བསམ་པའི་ཞེན་ཡུལ་ལས་གྲོལ་བའི་དགོས་པ་ཡོད་དོ༔ དེ་ནས་དངོས་གཞི་ཟག་པ་མེད་པའི་དོན་རྣལ་འབྱོར་པའི་རྒྱུད་ལ་ཇི་ལྟར་བརྟེན་པ་ལ་བཞི་སྟེ༔ སྔོན་དུ་ལུས་ངག་ཡིད་ཀྱི་གནད་གཟིར་བ་དང་༔ དེ་ནས་གནད་རྣམ་པ་གསུམ་ལ་བརྟེན་ནས་ཆོས་ཉིད་མངོན་སུམ་གྱི་དོན་རྣལ་འབྱོར་པའི་རྒྱུད་ལ་ཇི་ལྟར་བརྟེན་པ་དང་༔ དེས་སྣང་བ་ཇི་ལྟར་འཆར་བ་དང་༔ མཐའ་རྟེན་གྱི་མན་ངག་གོ༔ དང་པོ་ལུས་ཀྱི་གནད་བཞུགས་སྟངས་གསུམ་ལས་མི་འདའ་བར་བྱའོ༔ དེ་ཡང་ལུས་ལ་རིག་པའི་ཡེ་ཤེས་གནས་ཏེ༔ ལུས་ཀྱི་གནད་མ་གཟིར་ན་མངོན་དུ་མི་སྣང་སྟེ༔ དཔེར་ན་སྦྲུལ་གྱི་རྐང་ལག་ཡོད་པ་དེ་མ་གཅུན་པས་མི་མཐོང་བ་བཞིན་ནོ༔ དེ་ནས་ངག་སྨྲ་བ་བཅད་དེ༔ དེ་ཡང་ངག་བསླབ་པར་བྱ་བའི་རིམ་པ་དང་པོ་ཐུན་ཆུང་བ་ལ་བསླབ་དེ་ནས་ཐུན་རིང་བ་ལ་བསླབ༔ སྐབས་སུ་སྨྲ་རྒྱུ་མེད་ཀྱང་སྨྲ་བའོ༔ དེ་ནས་ངག་གནས་པ་ནི༔ རང་གི་ངག་སྔགས་དང་མཆོད་བསྟོད་མདོ་ལ་སོགས་པ་མི་དགག༔ གཞན་ལ་ཚིག་ཟུར་ཙམ་ཡང་མི་བརྗོད་དོ༔ དེའི་དུས་ན་ལུས་ཀྱིས་བརྡའ་ཙམ་ཡང་མི་བྱའོ༔ དེ་ལྟར་བྱས་པས་བརྗོད་དུ་མེད་པའི་དོན་རྒྱུད་ལ་སྐྱེ་བར་ངེས་སོ༔ མཁས་པ་བི་མ་ལ་ཡི་ཞལ་ནས༔ རྣལ་འབྱོར་པས་ངག་གཅོད་ནུས་ན༔ ཆོས་བྱེད་ནུས་པ་ཡིན་གསུངས་སོ༔ སེམས་ཀྱི་གནད་དུས་ཐམས་ཅད་དུ་གནད་གསུམ་དང་མི་འབྲལ་བར་བྱའོ༔ དེ་ཡང་

སྒོའི་གནད་དུ་གཟིགས་སྟངས་གསུམ་དང་མི་འབྲལ་བར་བྱའོ༔ ཡུལ་གྱི་གནད་དུ་ཕྱིའི་དབྱིབས་ནམ་མཁའ་དང་མི་འབྲལ་བར་བྱའོ༔ ནང་གི་དབྱིབས་རྣམ་པར་དག་པའི་སྒྲོན་མ་ལ་རིག་པ་གཏད༔ རླུང་གི་གནད་དུ་ཅི་ནས་ཀྱང་དལ་བར་བརྟེན་ཅིང་ཕྱིར་རྒྱང་རིང་པོར་འཕེན་པ་གནད་ཡིན་ནོ༔ རིག་པའི་གནད་དུ་ལུ་གུ་རྒྱུད་བཙོན་དུ་བཟུང་བའོ༔ དེ་ཡང་ལུགས་གསུམ་སྟེ༔ དང་པོ་བླ་མས་སློབ་མ་ལ་འདེབས་པའི་དུས་ན༔ ངོ་འཆི་ཀ་མ་ལ་སྤྲོད་པའི་ལུགས་དང་༔ ཁྲིད་དུ་བྱ་བ་དང་༔ ཚད་ཕུགས་སུ་གདབ་པའོ༔ དེ་ལ་ཁྲིད་དུ་བྱས་པས་ཟླ་བ་ཕྱེད་དང་གཉིས་ན་འབྱོངས་པ་ལ་ཐེ་ཚོམ་མེད་དོ༔ དེ་ཡང་དང་པོ་ཐུན་ཆུང་ལ་གྲངས་མང་དུ་བྱ༔ གཉིས་པ་ཐུན་བསྐྱེད་པ་ལ་རྒྱུན་བསྲིད༔ དེ་ནས་ཉིན་མཚན་ཕྱེད་མར་ཉམས་སུ་བླངས་པས་སྣང་བ་བཞི་འཆར་ཏེ༔ དེའི་རྟགས་ཚང་གཞན་དུ་ཤེས་སོ༔ དེ་ཡང་ཆོས་ཉིད་མངོན་སུམ་གྱི་སྣང་བ་ནི༔ བླ་མས་ལུས་ཀྱི་གནད་འདི་གྱིས་ལ༔ ངག་གནད་འདི་ལྟར་གྱིས་ཤིག༔ སེམས་གནད་འདི་ལ་གཏོད་ཅིག༔ ཅེས་ཚིག་གསུམ་བསྡུས་ནས་བསྟན་ནས༔ དེ་ཉིད་མངོན་སུམ་དུ་མཐོང་བས་ཡིད་དཔྱོད་ཚིག་གི་སྤྲོས་པ་དང་བྲལ་བའོ༔ ཡུལ་ནམ་མཁའི་སྟོང་པ་ལ་ཆོས་ཉིད་མངོན་སུམ་དུ་རྣམ་རྟོག་གང་གིས་ཀྱང་མ་བསླད་པར་མཐོང་བ་དེ་ཉིད་དོ༔ དེ་ལྟར་ཉམས་སུ་བླངས་པས་དུས་ཚོད་ཅི་ཙམ་ཞིག་ན༔ ཐེག་ལེ་སྟོང་པའི་སྒྲོན་མ་རྩོལ་བ་མེད་པར་ཤར་ནས་འོང་ངོ་༔ དེ་ནས་ཡེ་ཤེས་ལྔའི་མདོག་དང་དབྱེ་བ་ལས་ཐིག་ལེ་སྐུ་དང་བཅས་པ་ཚུན་ཆད་ཉམས་གོང་འཕེལ་གྱི་སྣང་བའོ༔ དེ་ཡང་ཁ་དོག་ལྔ་གྱེན་ལ་འགྲེང་བ་དང་༔

རྩིབས་ལ་ཤར་བ་དང་༔ རེ་ལྡེ་དང་༔ གྲུ་ཆད་དང་༔ ཡུལ་གྲུ་ཙམ་ལ་སོགས་པའོ༔ དབྱིབས་ནི་མཆོད་རྟེན་བརྩེགས་པ་དང་༔ པདྨ་སྟོང་ལྡན་དང་༔ གུར་ཁྱིམ་དང་༔ མིག་མངས་རིས་དང་༔ མིག་ཚགས་དང་༔ དྲྭ་བ་དང་༔ དྲྭ་བ་ཕྱེད་པ་ལ་སོགས་པ་རྣམས་སོ༔ དེ་ནས་སྐུ་ལྔ་ལྔར་སྣང་བའི་དུས་ན་རིག་པ་ཚད་ལ་ཕེབས་པའོ༔ དེ་ནས་དེ་དག་གིས་འཕེལ་ཟད་ནས་འཛིན་པའི་བློ་རང་སར་གྲོལ་བ་ནི་ཆོས་ཉིད་ཟད་པའི་སྣང་བའོ༔ དེ་ལྟར་སྣང་བ་བཞི་མཐར་ཕྱིན་པའི་དུས་ན་སྐལ་ལྡན་དེ་ཟག་པའི་ཕུང་པོ་མི་སྣང་བར་སངས་རྒྱ་ངེས་སོ༔ བཞི་པ་མཐའ་བརྟེན་གྱི་མན་ངག་ནི༔ མི་འགུལ་བ་གསུམ་ལ་བཞི་བཅའ་བ་དང་༔ སྡོད་པ་གསུམ་གྱིས་ཚད་གཟུང་བ་དང་༔ ཐོབ་པ་གསུམ་གྱིས་གཟེར་གདབ་པའོ༔ དེ་དག་ནི་གོང་མའི་རྒྱ་བརྟེན་དུ་འབྱུང་བའོ༔ དེ་དག་གིས་ནི་ཉམས་སུ་བླང་བའི་ཐབས་བསྟན་པའོ༔ ༈ད་ནི་དགུ་པ་ཉམས་སུ་བླང་པའི་ཚད་བསྟན་པ་ནི༔ སེམས་ཀྱི་ཚད་དམྱལ་བ་ཚ་གྲང་གི་སྡུག་བསྔལ་མྱངས་ཀྱང་བག་ཚ་བ་མེད་པ་སྟེ༔ ཡེ་ནས་འཁྲུལ་མ་མྱོངས་རིག་པ་ལ་དམྱལ་བའི་སྡུག་བསྔལ་གྲུབ་མི་སྲིད་པར་རྟོགས་པའོ༔ མྱ་ངན་ལས་འདས་པ་ལ་རེ་བ་མེད་པ་ནི༔ རང་སེམས་སངས་རྒྱས་སུ་འདུག་པས་ལོགས་ནས་བཙལ་དུ་མེད་པའོ༔ སངས་རྒྱས་ལ་བྲོད་པ་བསྐྱེད་དུ་མེད་དེ༔ རིག་པ་ཡེ་སངས་རྒྱས་པ་ལ༔ ད་བསྐྱར་ནས་སངས་རྒྱས་རྒྱུ་མེད་པའི་དོན་རྟོགས་པའོ༔ ལུས་ངག་གི་ཚད་ནི༔ ལུས་གླེན་པ་ལྟོ་བ་འགྲངས་པ་བཞིན་དུ་སོང་བ་དང་༔ ངག་འབྲེལ་མེད་ཀྱི་གཏམ་ཆལ་ཆོལ་དུ་བྱུང་བ་དང་༔ སེམས་གང་གཏད་དུ་གནས་པ་ལ་

སོགས་པའོ༔ རིག་པ་རང་སྣང་གི་ཚད་ནི༔ ཕྱིའི་འཁྲུལ་སྣང་འགགས་ནས་དག་སྣང་དུ་ཤར་བ་དང་༔ གསང་བ་རིག་པའི་ཚད་རང་སྣང་དང་ཤར་དང་གྲོལ་དུ་ཤེས་པའོ༔ ༈ད་ནི་བཅུ་པ་སྐྱེས་བུ་དེ་ཉིད་ལ་བླ་མའི་གདམས་ངག་ཡོད་ཀྱང་ལེ་ལོས་གཡེང་ནས་ཉམས་སུ་བླངས་པ་རྩལ་རྫོགས་པར་བླང་ལོགས་མ་བྱུང་བ་རྣམས་ལ༔ ཆོས་ཉིད་བར་དོ་ལ་ཇི་ལྟར་གྲོལ་ལུགས་བསྟན་པ་ནི༔ དེ་ལ་བར་དོའི་དབྱེ་བ་དང་༔ ཆོས་ཉིད་དང་༔ ས་མཚམས་དང་༔ སྣང་ལུགས་སོ༔ དབྱེ་བ་ནི་བཞི་སྟེ༔ རང་བཞིན་གནས་པའི་བར་དོ་དང་༔ འཆི་ཀའི་བར་དོ་དང་༔ ཆོས་ཉིད་བར་དོ་དང་༔ སྲིད་པའི་བར་དོའོ༔ ཆོས་ཉིད་ལ༔ རང་བཞིན་གནས་པའི་བར་དོའི་ཆོས་ཉིད་ནི༔ ཕུང་པོ་ལྔས་བཅིངས་པས་སྐུའི་སྣང་བ་རང་འགགས་པ་དང་༔ ཁམས་དང་སྐྱེ་མཆེད་ཀྱིས་བཅིངས་པས༔ འོད་ཁ་དོག་གི་སྣང་བ་རང་འགགས་པ་དང་༔ ལས་དང་ཉོན་མོངས་པས༔ ཡེ་ཤེས་དང་ཆོས་ཉིད་ཀྱི་སྣང་བ་རང་འགགས་པའོ༔ འཆི་ཁ་མའི་བར་དོའི་ཆོས་ཉིད་ནི༔ ལུས་ཀྱི་འབྱུང་བ་འཁྲུགས་པས་ཕྱི་ལུས་ཀྱི་སྡུག་བསྔལ་ཉམས་སུ་མྱོང་ལ་སེམས་བྱུང་ཚོར་གྱི་ལམ་གཏོར་ནས་ནང་སེམས་ཀྱི་སྡུག་བསྔལ་ཉམས་སུ་མྱོང་བ་དང་༔ འཛིན་ཆགས་མེད་པའི་མཚོ་རྡོལ་བས་ལུས་འབྲེལ་པ་རྟེན་བྲལ་གྱི་དོགས་པས་སྡུག་བསྔལ་ཏེ་དོན་ཤི་ཡི་དོགས་པའི་འདུ་ཤེས་ལ་གནས་པའོ༔ ཆོས་ཉིད་བར་དོའི་ཆོས་ཉིད་ནི༔ ཕུང་པོ་བདག་འཛིན་གྱི་རྟེན་བོར་ནས་སྐུ་དང་ཡེ་ཤེས་ཀྱི་དོན་ཉིད་མངོན་དུ་སྣང་༔ ལས་དང་བག་ཆགས་ཀྱི་འབྲེལ་བ་ཆད་པས༔ རང་བཞིན་གྱིས་ཆོས་ཉིད་ཀྱི་བསམ་གཏན་ལ་སྤྱོད༔ དངོས་

པོ་འཛིན་བྱེད་ཀྱི་ཡུལ་སྟོང་པས་རང་སྣང་རྣམ་པར་དག་པའི་ཆོས་ཉིད་ལ་སྤྱོད་པའོ༔ སྲིད་པ་བར་དོའི་ཆོས་ཉིད་ནི༔ ཕྱིའི་ལུས་ཀྱི་སྲིད་པ་ཡིད་ཀྱི་ཡུལ་ཅན༔ དབང་པོ་ཀུན་ཚང་ཐོགས་མེད་ལྡན༔ ནང་སེམས་ཀྱིས་སྲིད་པ་ཆོས་ཅན་དུ་མ་ལ་སྙམ་སེམས་འདུན་ཅིང་རྟོག༔ ལུས་སེམས་གཉིས་འདུས་པས་སྲིད་པ་ཐོགས་པ་མེད་པར་འགྲོ་ཞིང་ཐམས་ཅད་ལ་རྟོག་ཅིང་འཇུག་པའོ༔ དེ་དག་གི་སྣང་ལུགས་ནི༔ རང་བཞིན་གནས་པའི་བར་དོ་ནི་སྣང་ལུགས་ལ༔ གང་ཟག་དགོས་བཙན་དང་༔ ཁམས་གསུམ་སྤྱི་བཙན་ལ་སོགས་པའི་སྣང་ལུགས་ཐ་དད་དུ་མར་སྣང་སྟེ༔ དེ་ཡང་གང་ཟག་དགོས་བཙན་ནི༔ མིག་སེར་གྱི་ནད་ཀྱིས་བཏབ་པ་ལ་དུང་སེར་པོར་སྣང་བའོ༔ འདུས་པའི་ནད་ཀྱིས་བཏབ་པ་ལ་རི་དང་ཁང་ཁྱིམ་འཁོར་ལ་སོགས་པའོ༔ སྤྱི་ཚན་འགྲོ་དྲུག་སོ་སོ་ལ་ཆུ་ལ་བདུད་རྩི་སྣང་བ་བཅུ་བདུན་དུ་སྣང་བའོ༔ འཆི་ཀ་མ་ཡི་སྣང་ལུགས་ནི༔ ཞེས་འཚིག་ཅིང་འདུ་ཤེས་ནང་དུ་འཁུམས་ཏེ༔ སྤང་བ་མ་ཡིན་པར་སྣང་བ་ཟ་ཟི་ཡམ་ཡམ་ལ་སོགས་པར་སྣང་བའོ༔ ཆོས་ཉིད་བར་དོའི་སྣང་ལུགས་ནི༔ ཞེས་འཚིག་ཅིང་སྒྲ་དང་གཟུགས་སུ་སྣང་བ་དང་༔ སྐུ་དང་ཡེ་ཤེས་སུ་སྣང་བའོ༔ སྲིད་པ་བར་དོའི་སྣང་ལུགས་ནི༔ འབྱུང་བའི་ལྔའི་སྣང་ཚུལ་དང་ཡད་ཡུད་ཕྱད་ཕྱོད་དུ་སྣང་བའོ༔ ས་མཚམས་ནི༔ རང་བཞིན་གནས་པའི་བར་དོ་ནི་མའི་མངལ་ནས་འཆི་རྐྱེན་བཏབ་པ་ཚུན་ཆད་ཆོས་ཉིད་ཀྱི་བར་དོའོ༔ དེ་ནས་དབུགས་ཁྲོག་གི་ཆད་ཚུན་ཆད་འཆི་ཁའི་བར་དོའོ༔ དེ་ནས་ནང་དབུགས་ཆད་ནས་ལྷུན་གྲུབ་ཚུན་ཆད་ཤར་བདེ་ཡང་མངལ་གྱི་གྲོང་ཁྱེར་ལ་སླེབས་པ་ཚུན་ཆད་སྲིད་པ་བར་དོའོ༔ དེ་བཞིའི་གདམས་ངག་ནི་

རང་བཞིན་གནས་པའི་བར་དོ་ལ་ཤེས་པའི་གྲས་ཐག་བཅད་དེ༔ དང་པོ་ཐོས་པས་བློ་སྦྱང་བ་དང་༔ བར་དུ་བསམས་པས་ཐག་གཅད་པ་དང་༔ ཐ་མ་བསྒོམས་པས་ལ་ཟླ་བ་རྣམས་བྱ་སྟེ༔ དེ་གསུམ་ལ་བློ་སྦྱངས་པས༔ ཕྱི་ཤེས་བྱ་ཡུལ་གྱི་གྲས་ཐག་ཆོད་པས༔ སྣང་བ་སྒྱུ་མ་རྨི་ལམ་ལྟར་ཤེས་ཏེ་འཁོར་བ་ལ་བློ་ལྡོག་པའི་དགོས་པ་ཡོད༔ ནང་འདུ་བའི་སེམས་ལ་གྲས་ཐག་ཆོས་པས་རང་སེམས་དངོས་མེད་དངོས་གཟུང་དང་བྲལ་བར་རྟོགས་པས་འབྲས་བུ་སངས་རྒྱས་པའོ༔ སྣང་སེམས་གཉིས་མེད་ལ་ཤེས་བྱའི་གྲས་ཐག་ཆོད་པས་འབྲས་བུ་སྐུ་གསུམ་དབྱེར་མེད་དུ་སངས་རྒྱས་ནས༔ མཛད་པའི་འཕྲིན་ལས་ཕྱོགས་མེད་དུ་ཤར་བའོ༔ དེ་ཡང་བླ་མ་མཚན་ཉིད་ལྟ་བ་དང་ལྡན་པ་དང་འཕྲད་པ་གལ་ཆེའོ༔ འཆི་ཁའི་བར་དོ་ལ་མི་གསལ་བ་གསལ་གདབ་པ་སྒེག་མོ་མེ་ལོང་ལ་ལྟ་བ་ལྟ་བུའི་མན་ངག་ལ་ཟེར་ཐིག་གདབ་པར་བྱའོ༔ དེ་ཡང་རྣལ་འབྱོར་པ་དེ་རྐྱེན་གྱི་ནད་ཀྱིས་བཏབ་ནས་འཆི་རྟགས་ཉེར་གཅིག་བརྟགས་པས༔ བཟློག་པའི་ཆོ་ག་ཡང་ནས་ཡང་དུ་བྱས་ཏེ༔ དེས་མ་བཟློག་པའི་རྟགས་བྱུང་བའི་ཚེ༔ དེ་ཡང་ལུས་ཉིད་ཐོག་མ་ཡང་འབྱུང་བཞི་ལས་གྲུབ་པ་ཐ་མ་ཡང་འབྱུང་བ་བཞིའི་བྱེར་ཟུག་གིས་ཚེའི་དུས་བྱེད་པའོ༔ དེ་ཡང་ས་ས་ལ་ཐིམ་པའི་དུས་ན༔ ལུས་ལྕི་ཞིང་ལྡང་མི་ནུས༔ ཆུ་ཆུ་ལ་ཐིམ་པའི་རྟགས་སུ་ཁ་སྣ་ནས་ཆུ་བོར་བ་གཅིག་ཕྱིར་ཐོན་ནས་དེ་ནས་སྐམ༔ མེ་མེ་ལ་ཐིམ་པའི་རྟགས་སུ་ལུས་ཀྱི་བ་བཞི་རྐང་ལག་བཞིན་དྲོད་འཆོར་ཏེ༔ དེའི་དུས་སུ་ལུས་ཀྱི་བཀྲག་དང་གཟི་མདངས་ཀྱང་འཆོར་རོ༔ དེ་ནས་རླུང་རླུང་ལ་ཐིམ་པའི་དུས་སུ་དབུགས་བརྩེགས་མ་འབྱུང་ཞིང་ལུས་ཀྱི་སྟོབས་འཆོར་རོ༔ འདིའི་དུས་སུ་གདམས་ངག་གསལ་གདབ་པ་ནི༔ རང་ལ་

ཆོས་ཉིད་བར་དོ་ལ་སྣང་བ་འདི་ལྟ་བུ་འཆར་བས༔ འདིའི་དུས་ན་རང་གི་སྣང་བ་ཡིན་པར་ངོ་ཤེས་པར་བྱའོ༔ སྙམ་པའི་དྲན་པ་བརྟེན་ན་དེས་ཆོག༔ དེ་ལྟར་མི་གསལ་ན་རང་གི་བླ་མ་ཡོད་ན་བཟང་སྟེ༔ ཚོགས་བསགས་པའི་ཡན་ལག་ཅི་རིགས་པ་ཞིག་བྱས་ཏེ༔ དེ་ནས་བླ་མས་ནད་པ་དེའི་རྣ་བུག་གཡོན་པ་ནས་སྨྱུག་མའི་སྦུབས་སམ་ཤོག་གུའི་དབྱིབས་ཀྱི་ནང་ནས་མར་ལན་གསུམ་བཏབ་པས་ཆོས་ཉིད་བར་དོ་ལ་མི་ཐེབས་པ་མི་སྲིད་དོ༔ དཔེར་ན་མི་བརྟན་པོ་གཅིག་ལ་ཐན་བརྡ་བས་ཡུལ་རྟ་འགོ་གང་དུ་སོང་ཡང་ངེས་པར་ཐན་འཇལ་བ་དང་འདྲ་སྟེ་ཆོས་ཉིད་བར་དོ་ལ་ངེས་པར་རྙེད་པར་འགྱུར་རོ༔ གལ་ཏེ་བླ་མ་མི་བཞུགས་ན་རང་གི་རྡོ་རྗེ་སྤུན་སྲིང་དམ་ཚིག་ལ་སི་མེད་པ་ལྟ་སྤྱོད་མཐུན་པ་ཞིག་གིས་གདབ་བོ༔ གལ་ཏེ་ནང་པ་དེ་བརྟེན་པ་ཉམས་པས་དབུགས་ཆད་ན་ནི་རླུང་སྦྱང་བྱ་ཞིང་ལུས་ངག་གསོ་བའི་གནད་འདི་ལྟར་བྱ་སྟེ༔ ནད་པ་དང་རང་གི་སྒོ་གསུམ་སྤྲད་དེ༔ རང་གི་རླུང་ཕྱི་ནས་ཕུལ་ཏེ༔ དེ་ལ་བསྟིམས་པས་འཕངས་ལན་གསུམ་བྱའོ༔ དེ་ལྟར་བྱས་པས་ཁོའི་ལུས་ཚ་མེར་གྱི་དྲོས་ཏེ་ཧཱུྃ་ཞེས་པས་རང་ཁའི་ནང་ན་དྲོང༔ ཨོཾ་ཞེས་པས་སྣ་བུག་གཡས་སུ་དྲོང༔ ཨ་ཞེས་པས་སྣ་བུག་གཡོན་དུ་དྲོང་༔ དེ་ལྟར་བྱས་པས༔ མིག་རྩ་ཧྲིག་ཡོང་སྟེ༔ དེ་ལྟར་བྱུང་ཙ་ན་སྔར་བཞིན་གདམས་ངག་བཏབ་པས་ཐེབ་ངེས་སོ༔ དེ་ནས་རླུང་རྣམ་ཤེས་ལ་ཐིམ་པས་ཤེས་པ་བུན་གྱིས་འགྲོ་ཏེ༔ ནང་དབུགས་ཆད་རྣམ་ཤེས་ནམ་མཁའ་ལ་ཐིམ་པས་ལུས་སེམས་གཉིས་ཀྱི་འབྲེལ་ཐག་ཆད་དེ༔ དབུགས་བར་སྣང་ལ་བུན་གྱི་ཡལ་ལུས་གདོས་པ་ཅན་བེམ་པོར་ལིངས་ཀྱིས་སོང་༔ རིག་པ་མེ་སྟག་ཡལ་བའི་རྣམ་པ་ལྟར་ཆོས་ཉིད་བར་དོ་ལ་

སོང་བའི་གནས་སྐབས་ན༔ ནམ་མཁའ་འོད་གསལ་ལ་ཐིམ་པ་ཞེས་བྱ་སྟེ༔ ཕྱི་ས་རྡོ་རི་བྲག་གི་རྣམ་པ་ནི་འགགས༔ ནང་འོད་གསལ་ཆོས་ཉིད་ཀྱི་སྣང་བ་ནི་ཤར་ནས༔ སྣང་བ་ཐམས་ཅད་འོད་ཁ་དོག་ལྔའི་སྣང་བ་མནན་ན་ནེམ་པ་སྙམ་པ༔ བཏེག་ན་འཕང་བ་སྙམ་པའི་སྣང་བ་འཆར་ཏེ༔ འདི་དུས་ཀྱི་གནད་དེ་འཇུག་པ་ཞེས་བྱ་བའི་གནད་དང་༔ གྲོལ་བ་ལུས་ཀྱི་གནད༔ མཐར་ཕྱིན་པ་ངོ་ཤེས་པའི་གནད་དོ༔ འཇུག་པ་ཤེས་པའི་གནད་ལ་གཉིས་ཏེ༔ འོད་རིག་པ་ལ་འཇུག་པ་དང་༔ རིག་པ་འོད་ལ་འཇུག་པའོ༔ འོད་རིག་པ་ལ་འཇུག་པ་ནི༔ འོད་སྣང་དེ་དག་སྐུ་ལྔ་ལྔའི་སྣང་བ་སྟེ༔ དེ་དག་གི་ཐུགས་ཀ་ནས་འོད་ཤིན་ཏུ་ཕྲ་བ་ཟེར་ཐག་སྒྲིལ་བ་ལྟ་བུ་རེ་རེ་རང་གི་སྙིང་ཁར་ཟུག་པ་རྣམས་འཆར་ཏེ༔ འདིའི་དུས་སུ་རང་བཞིན་གྱི་བསམ་གཏན་ལ་གནས་པར་གྱུར་ཏོ༔ གྲོལ་བའི་ལུགས་ནི༔ འདིའི་དུས་ན་ཕུང་པོ་ལྔའི་བདག་ཏུ་འཛིན་པ་རང་དེངས་པས་ལུས་འོད༔ སྐུར་གྲོལ་བས་ཆོས་ཉིད་སང་ངེ་ལ་གནས་པས་འབྱུང་བ་ཕྲ་རགས་ཀྱིས་གདོས་བཅས་གྲོལ་བས་སྣང་བ་འོད་གསལ་བདེ་བ་ཆེན་པོར་གྲོལ་ལོ༔ ཉོན་མོངས་པ་ཕྲ་རགས་ལས་གྲོལ་བས་རིག་པ་ཉིད་མ་ལ་བུ་ཐིམ་དུ་གྲོལ་ལོ༔ མཐར་ཕྱིན་པའི་དུས་ན༔ ཡིད་ཆེས་པའི་གནད་གསུམ་སྐྱེ་སྟེ༔ ཡིད་ཆེས་པ་མ་དུ་བུ་འཇུག་པ་ལྟ་བུ་དྲན་པས༔ སྡང་འདྲིས་པའི་མི་ཕྱིས་མཐོང་བ་ཙམ་གྱིས་ངོ་ཤེས་ཏེ༔ སྒྲོ་འདོགས་ཆོད་པ་ལྟ་བུར་རང་སྣང་དུ་ངོ་ཤེས་པའོ༔ མི་འགྱུར་བ་གསེར་གྱི་ཐུར་མ་ལྟ་བུའི་གདམས་ངག་དྲན་པ་སྟེ༔ དཔེར་ན་མི་གཅིག་ལ་སྙིང་རླུང་ཞུགས་པ་ན་སྨན་པ་མཁས་པས་ཐུར་མང་གིས་ལམ་དུ་འདྲེན་པ་ལྟར་ཆོས་ཉིད་རྣམ་དག་གི་ལམ་འགྱུར་མེད་དུ་ཡིད་ཆེས་པས་ཏིང་ངེ་འཛིན་སྐྱེའོ༔ དེ་ཡང་འདིའི་དུས་ན་ཡེ་ཤེས་བཞི་སྦྱོར་རང་གི་

སྙིང་ཁར་འཆར་བ་ནི༔ སྔོན་དུ་འོད་དཀར་པོའི་སྣམ་བུ་དཀར་པོའི་དེའི་སྟེང་དུ་སེར་པོ༔ དེའི་སྟེང་དུ་དམར་པོ༔ དེའི་སྟེང་དུ་མཐིང་ཀ༔ དེའི་སྟེང་དུ་ཐིག་ལེ་མེ་ལོང་ཁ་སྦུབས་པ་ལྟ་བུ་དགུ་བརྩེགས་སམ་ལྔ་བརྩེགས་སུ་འཆར་རོ༔ འདི་ནི་རྡོ་རྗེ་སེམས་དཔའི་ཁོང་གསེང་གི་ལམ་ཞེས་བྱའོ༔ དེ་ནས་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་དྲན་པ་ནི༔ མདའ་དེ་ཉིད་དྲག་པོའི་ཤུགས་དང་བཅས་པས་དངོས་པོ་ཐམས་ཅད་ལ་འབིག་པར་ལྟར༔ རིག་པ་ཉིད་ལྷུན་གྲུབ་རིན་པོ་ཆེའི་ལུས་ལ་ཐིམ་པའི་ཚེ༔ སྐད་ཅིག་མ་དང་པོ་ལ་མངོན་པར་ཤེས་པ་དྲུག་ཕྲག་དྲུག་འཆར་རོ༔ གཉིས་པ་ལ་ཐད་དཀར་རིགས་ལྔའི་གཙོ་འཁོར་ཚོམ་བུར་གསལ་བ་ལ༔ མར་འགྲོ་བ་རིགས་དྲུག་གི་སྐྱེ་གནས་དང་ལས་དང་སྡུག་བསྔལ་དང་ཚེ་ཚད་ལ་སོགས་གསལ༔ ཡར་མང་པོའི་འདུག་ཚུལ་གསལ་ཏེ༔ རྗེས་སུ་དྲན་པ་དྲུག་ལས་འབྱུང་བའོ༔ སྐད་ཅིག་མ་གསུམ་པ་ལ་སྐུ་དང་ཡེ་ཤེས་ཀྱི་སྣང་བ་འཆར་སྟེ༔ རང་སྣང་དུ་ངོ་ཤེས་པས་ལྷུན་གྲུབ་རིན་པོ་ཆེ་ལ་ངེས་པ་རྙེད་དེ༔ ཐིམ་ལུགས་བརྒྱད་དུས་གཅིག་ལ་འབྱུང་བའོ༔ དེ་ཡང་ཐུགས་རྗེ་ཐུགས་རྗེ་ལ་ཐིམ་པ༔ དཔེར་ན་ཉི་མ་རྒས་པའི་དུས་ན་ཟེར་འདུས་པ་ལྟར༔ རིགས་དྲུག་གི་སྣང་ཆ་རང་ལ་འདུས་པས༔ མ་དག་པ་འཁྲུལ་བའི་མིང་མེད་དེ་གཟུགས་སྣང་ལས་འདས་པའོ༔ འོད་ལ་འོད་ཐིམ་པ་ནི༔ ནམ་མཁའ་ལ་འཇའ་ཡལ་བ་ལྟར་འོད་ཁ་དོག་མཚན་མའི་རིས་མེད་དེ་སྟོང་པ་ངོས་གཟུང་དང་བྲལ་བའི་དབྱིངས་སུ་རོ་གཅིག༔ སྐུ་ལ་སྐུ་ཐིམ་པ་བུམ་པའི་སྐུ་ལྟར་ཤེས་བྱ་ནང་དུ་གསལ་བ༔ མཚན་མ་ཞལ་ཕྱག་གི་རིགས་ཅན་དུ་མེད་པར་རང་སྣང་རྣམ་པར་དག༔ ཡེ་ཤེས་ལ་ཡེ་ཤེས་ཐིམ་པ་མ་པང་དུ་བུ་ཞུགས་པ་ལྟ་བུ་སྟེ༔ ཆོས་ཉིད་མ་དང་རིག་

པ་བུ་གཉིས་ཉམས་སུ་འདྲེས་པའོ༔ གཉིས་མེད་གཉིས་མེད་ལ་ཐིམ་པ་ཆུ་ཆུ་ལ་ཐིམ་པ་ལྟར་ངོ་བོ་མཉམ་པ་རིས་མེད་དུ་གྱུར་པའོ༔ མཐའ་གྲོལ་མཐའ་གྲོལ་ལ་ཐིམ་པ་ནམ་མཁའ་ནམ་མཁའ་ལ་ཐིམ་པ་ལྟར་སྟོང་པ་སྣང་བའི་ཡུལ་མེད་པའོ༔ དག་པ་ཡེ་ཤེས་ཀྱི་སྒོ་ངོ་བོ་ལ་ཐིམ་པ་སེང་གེས་གངས་ཟིན་པ་ལྟ་བུ་ཉམ་དཔག་ཚ་དང་བྲལ་བའོ༔ མ་དག་པ་འཁོར་བའི་སྒོ་དག་པ་ཡེ་ཤེས་ཀྱི་སྒོ་ལ་ཐིམ་པ་སྦྲའི་ཆོན་ཐག་བསྡུས་པ་ལྟར་ཐིག་ལེ་ཉག་གཅིག་ཏུ་འདུས་པའོ༔ འདི་དུས་ན་སངས་རྒྱས་ཀྱི་ཡོན་ཏན་དང་འཕྲིན་ལས་དཔག་ཏུ་མེད་པ་འབྱུང་ཞིང་འཆར་བ་ཉི་ཟླ་ཁ་སྦྱོར་གྱི་རྒྱུད་ནས་བཤད་པའོ༔ འདིའི་བརྩོན་འགྲུས་ཐ་མ་གཅིག་གིས་དབང་པོའི་ཁ་འཆལ་ནས་སྲིད་པ་བར་དོའི་ཆ་ཙམ་དུ་སྣང་བ་ལས་རང་བཞིན་སྤྲུལ་པ་སྐུའི་ཞིང་ཁམས་སུ་དབུགས་བྱུང་ནས་མངལ་གྱི་གྲོང་ཁྱེར་དུ་མི་འཇུག་སྟེ༔ ཤར་ཕྱོགས་མངོན་པར་དགའ་བ་ལ་སོགས་པའི་ཞིང་ཁམས་སུ་བརྫུས་ཏེ་སྐྱེས་ནས་ལོ་ལྔ་བརྒྱར་ཐེག་པ་ཆེན་པོའི་ཆོས་ལ་ལོངས་སྤྱོད་ནས་ཆོས་ཉིད་བར་དོ་མེད་པར་ཡང་དག་པར་རྫོགས་པར་སངས་རྒྱའོ༔ དེ་ཡང་ཤར་ཕྱོགས་མངོན་པར་དགའ་བའི་ཞིང་ཁམས་སུ༔ རྡོ་རྗེའི་རིགས་ཀྱི་སྤྲུལ་པའི་ཞལ་མཐོང་༔ ལྷོ་ཕྱོགས་དཔལ་དང་ལྡན་པའི་ཞིང་ཁམས་སུ༔ རིན་ཆེན་རིགས་ཀྱི་སྤྲུལ་པས་དབང་བསྐུར༔ ནུབ་པདྨ་བརྩེགས་པའི་ཞིང་ཁམས་སུ་པདྨ་རིགས་ཀྱི་སྤྲུལ་པ་འོད་དཔག་མེད་ཀྱིས་ལུང་སྟོན༔ བྱང་ལས་རབ་རྫོགས་པའི་ཞིང་ཁམས་སུ་ལས་ཀྱི་རིགས་ཀྱི་སྤྲུལ་པ་དོན་གྲུབ་ཀྱིས་ལས་དང་བག་ཆགས་ཀྱི་མཐའ་ཟད་པར་བྱས་པས༔ དེ་ཉིད་དུ་གྲོལ་ནས་སངས་རྒྱའོ༔

ཆོས་འདི་ཉིད་ཀྱི་སྒོ་མ་མཐོང་བའི་འགྲོ་བ་ཕལ་པ་རྣམས་ནི་དེ་ལས་སྲིད་པ་ལས་ཀྱིས་ཁ་འཆལ་ཏེ༔ སྲིད་པའི་བར་དོ་ལས་མཐའ་བོར་ནས༔ དེ་ཡིད་ཀྱི་ལུས་ཅན་དབང་པོ་ཀུན་ཚང་བ་ལ༔ གང་ལ་ཡང་ཐོགས་པ་མེད་པའི་ལུས་དང་ལྡན་པས༔ ནམ་མཁའ་ལ་བྱ་སྒྲོ་རླུང་གིས་དེད་པ་ལྟར་ཕྱད་ཕྱོད་ཡལ་ཡོལ་དུ་ཀུན་ལ་རྟོག་ཅིང་འཇུག་པར་བྱེད༔ འདི་ཡི་དུས་ན་རང་གིས་གཟུགས་མི་མཐོང་སྟེ༔ དཔེར་ན་རྨི་ལམ་གྱི་ལུས་ལྟ་བུའོ༔ གཟུགས་ཀྱིས་གཟུགས་མི་མཐོང་སྟེ༔ དཔེར་ན་སྐར་ཁུང་གི་ཉི་ཟེར་གྱི་རྡུལ་ལྟར་སྣང་ངོ་༔ འདིར་ལས་ཀྱི་འཕྲོ་མཐུད་པ་ཡུར་བ་རྐང་ཆག་པ་ལ་ཝ་འཛུགས་པ་ལྟ་བུ་བག་ཆགས་ཀྱི་མཚམས་སྦྱོར་བ་ནི༔ ལས་བཟང་པོ་བསགས་པ་རྣམས་ནི་གནས་མཐོ་བར་སྐྱེ་ལ༔ ངན་པ་རྣམས་ནི་ངན་སོང་གསུམ་ལ་སོགས་པའི་ལུས་ལེན་ནོ༔ དེ་ལྟ་བུའི་བར་དོ་དེ་ལ་དོན་ཉི་ཤུས་སྟོན་པ་ལ༔ དང་པོ་གཟུགས་ཀྱི་ཁྱད་པར་ནི༔ བར་དོར་ཇི་ཙམ་གནས་པའི་ཕྱེད་སྔ་མའི་གཟུགས་ལ༔ ཕྱེད་ཕྱི་མའི་གཟུགས་ཏེ༔ དེ་ཡང་ཤ་ཁྲག་གདོས་པ་མེད་དེ་རྨི་ལམ་འདྲའོ༔ གཉིས་པ་སྐྱེ་མཆེད་ནི༔ ཡིད་ཀྱིས་ལུས་གཟུང་བར་དཀའ་བ་གང་ཡང་ཐོགས་པ་མེད་པའོ༔ གསུམ་པ་འོད་ཀྱི་ཁྱད་པར་ནི༔ ལས་དག་པ་རྣམས་དཀར་པོ་དཔག་ཚད་གཅིག་ཏུ་གསལ་ལ༔ མ་དག་པ་རྣམས་ལ་འོད་མོག་མོག་པོ་འདམ་གང་དུ་གསལ་ལོ༔ བཞི་པ་སྐྱེ་གནས་ཀྱི་ཁྱད་པར་ནི༔ སྐྱེ་གནས་བཞི་ལས་བརྫུས་སྐྱེས་སོ༔ ལྔ་པ་མགོ་ལྟ་ཕྱོགས་ཀྱི་ཁྱད་པར་ནི༔ ལྷ་མི་གཉིས་གྱེན་ལ་ཡོད་པ་སྙམ་བྱེད༔ ལྷ་མིན་བྱོལ་སོང་ཕྲེད་ལ༔ དམྱལ་བ་ཡི་དྭགས་ཐུར་ལའོ༔ དྲུག་པ་ཚེ་ཚད་ནི༔ ཞག་བདུན་གྱི་སྐད་ཅིག་མ་དང་ཤི་ནས་གཉིས་པ་ལ་སྐྱེ་སྟེ༔ བདུན་ཕྲག་བདུན་དུ་དེ་

ལྟར་བྱེད་དོ༔ བདུན་པ་མངོན་ཤེས་ཀྱི་ཁྱད་པར་ནི༔ སྐད་ཅིག་ཙམ་ལ་སྟོང་གསུམ་གཅིག་གམ་གཉིས་ལ་སོགས་པ་མཐོང་སྟེ༔ ཟག་བཅས་ཀྱི་མངོན་ཤེས་དེ་བག་ཆགས་ཚན་ཆེ་བའི་སྟོབས་ཀྱིས་དེ་ནས་ནུབ་བོ༔ བརྒྱད་པ་ལུས་ཚད་ནི་བྱིས་པ་ལོ་བརྒྱད་དམ་བཅུ་དྲུག་པའི་ཚད་ཀུན་ལ་ལྟ་ཞིང་འཇུག་སྙིང་འདོད་པའོ༔ དགུ་པ་སྤྱོད་ལམ་ནི༔ སྔར་གྱི་ཆོས་ཉིད་བདེན་པའི་སྟོབས་ནུབ་ནས༔ སྔ་མའི་བག་ཆགས་ལངས་པས་སྔར་གང་ལ་ཞེན་པ་དེ་གཙོར་བྱེད་དོ༔ བཅུ་པ་མིང་གི་ཁྱད་པར་ནི༔ འབྱུང་བ་བཞིའི་ས་བོན་གྱི་བག་ཆགས་ལས༔ སྔོན་གཟུགས་སྲིད་པའི་ཤ་གཟུགས་ཅན་དུ་འབྱུང་བའོ༔ བཅུ་གཅིག་པ་རྫུ་འཕྲུལ་གྱི་ཁྱད་པར་ནི༔ དབང་པོ་མཆོག་ཏུ་གསལ་བ་དང་༔ ཡན་ལག་ཚང་ཞིང་རགས་པ་དང་༔ ཤེས་པ་གང་དུ་གཏད་སར་ཚུགས་པ་དང་༔ ཀུན་ལ་ཐོགས་ཆགས་མེད་དེ་གང་དུ་བསམ་སར་བརྟོལ་བའོ༔ བཅུ་གཉིས་པ་ལས་སོགས་མི་སོགས་ཀྱི་ཁྱད་པར་ནི༔ སྔར་གྱི་ལས་དཀར་ནག་གི་ཚན་ཆེ་ཆུང་གིས་འདིར་ཡང་ཕྱི་མ་ལས་ཐམས་ཅད་དེ་ལྟར་སོགས་པའོ༔ བཅུ་གསུམ་པ་ཁ་དོག་གི་ཁྱད་པར་ནི༔ ལྷ་མིར་སྐྱེས་ན་དཀར་པོ་དང་༔ ལྷ་མིན་བྱོལ་སོང་སེར་པོ་དང་༔ ཡི་དྭགས་དམྱལ་བ་ནག་པོ་འོ༔ བཅུ་བཞི་པ་ངེས་ཚིག་ནི༔ སྔར་ལོངས་སྐུའི་སྣང་བ་དང་རིགས་དྲུག་གི་བར་ཡིན་པས་བར་ཞེས་བྱ༔ མ་ནི་གང་ཉིད་ཀྱི་བདེན་པའི་སྟོབས་མ་ཤེས་པས༔ དེའི་ངང་ནས་ཕྱིས་སྲིད་པ་ཆགས་པས་སོ༔ དོ་ཞེས་པ་དེ་གཉིས་ཀྱི་བར་དུ་མ་རིག་པ་གནས་པས་སོ༔ བཅོ་ལྔ་པ་དགེ་སྡིག་གི་ཁྱད་པར་སྔར་དགེ་བ་བྱས་པའི་ཤེས་པ་ནི་གསལ༔ མི་དགེ་བ་བྱས་པ་ནི་མི་གསལ་རྨུགས་པར་གནས་པའོ༔ བཅུ་དྲུག་པ་ཁམས་

གསུམ་ལས་གང་དུ་གཏོགས་ན༔ གཟུགས་མེད་ཁམས་སུ་གཏོགས་པའོ༔ བཅུ་བདུན་པ་ཕྱི་མའི་ལུས་དང་འབྲེལ་བ་ནི༔ བར་དོའི་ལས་རྫོགས་པའི་དུས་ན༔ མངལ་གྱི་སྐྱེ་གནས་སུ་འཇུག་ཏེ༔ ། ཚུད་པའི་རྟགས་ནི༔ ལྷ་ཁང་གི་ཡང་སྟེང་ངམ་ཁང་བུ་བརྩེགས་པའི་ནང་ན་འདུག་སྙམ་བྱེད་ན་ལྷ་རུའོ༔ མགལ་མེའི་འཁོར་ལོ་བསྐོར་བ་ལྟར་འདུག་ན་ལྷ་མིན་དུའོ༔ གྲོང་པ་སྙམ་བྱེད་ན་མི་ལུས་ཙམ་པོའོ༔ ནམ་རྨུགས་པའི་ནང་དུ་འདུག་ན་མི་ལུས་གཙང་མའོ༔ སྐྱེ་བོ་མང་པོའི་ནང་དུ་འདུག་པ་སྙམ་བྱེད་ན་མི་ལུས་རིན་པོ་ཆེའི་ནང་དུ་ཚུད་པའོ༔ བྱ་སྐྱིབས་སམ་ན་བུན་ལང་ལིང་གི་གསེབ་ན་འདུག་པ་སྙམ་བྱེད་ན་བྱོལ་སོང་༔ གྲོག་པོ་ཕུགས་རྡུག་ལ་སོགས་པའི་ནང་དུ་འདུག་པ་སྙམ་བྱེད་ན་ཡི་དྭགས་སོ༔ དམྱལ་བ་ནི་སྲིད་པ་བར་དོར་མི་གནས་སོ༔ བཅོ་བརྒྱད་པ་ཕྱི་མའི་ལུས་དང་ཉོན་མོངས་ཀྱི་འབྲེལ་པ་བསྟན་པ་ནི༔ འདིར་ཞེ་སྡང་སྐྱེས་པའི་རྐྱེན་གྱིས་གཟུགས་ཁམས་སུ་སྐྱེའོ༔ འདོད་ཆགས་ཀྱིས་འདོད་ཁམས་སུ་སྐྱེའོ༔ གཏི་མུག་གིས་གཟུགས་མེད་ཁམས་སུ་སྐྱེའོ༔ བཅུ་དགུ་པ་འཁོར་ཚུལ་ནི༔ འགྲོ་བ་རིགས་དྲུག་གཅིག་ཏུ་བརྒྱུད་པ་ཤིང་རྟའི་འཕང་ལོ་འམ་ཟོ་ཆུའི་འཁོར་མོ་དང་འདྲའོ༔ ཉི་ཤུ་དཔེ་ཉེ་བར་མཚོན་པ་ནི༔ དཔེ་ནི་ལས་འཕེན་པ་གཞུ་མོའི་སྲད་བུ་དང་འདྲ༔ ལེན་པ་རྡོ་ཁབ་ལེན་དང་འདྲ༔ དེར་བག་ཆགས་ཀྱི་དབང་གིས་མངལ་གྱིས་ཡིད་འཛིན་པའོ༔ དེ་ནས་ལས་ཀྱི་དབང་གིས་དགའ་ལྡན་དང་༔ རྩོད་ལྡན་དང་༔ ཆ་མཉམ་དང་༔ མྱོས་ལྡན་དང་༔ བྲོས་ལྡན་དང་༔ སྡུག་བསྔལ་ཆེན་པོ་དང་ལྡན་པའི་གནས་སུ་སྐྱེའོ༔ སྲིད་པ་བར་དོའི་ལུས་དེ་ཡང་ཡི་དམ་ལྷའི་སྒྱུ་ལུས་བཟུང་བའོ༔ གདམས་ངག་གནད་རབ་ཏུ་ཆེའོ༔ དེ་དག་

གིས་བར་དོའི་མཚན་ཉིད་འཕྲོས་པ་དང་བཅས་པ་བསྟན་པའོ༔ ༈ད་ནི་ཚིག་དོན་བཅུ་གཅིག་པ་གྲོལ་ས་ཆེན་པོ་གང་ཡིན་པ་བསྟན་པ་ནི༔ དེ་ལྟར་བར་དོའམ་དེ་ཉིད་ལས་གྲོལ་བའི་དུས་ན་གྲོལ་ལུགས་ཇི་ལྟར་གྲོལ༔ ཡང་དག་པར་སངས་རྒྱ་བའི་དུས་ན་ཇི་ལྟར་འགྱུར༔ སྔ་རབས་འདས་པའི་སངས་རྒྱས་དང་༔ ཕྱིས་སངས་རྒྱ་བ་གཉིས་ལ་ཁྱད་པར་ཅི་ཡོད༔ སྙམ་ན༔ དེ་དག་རྣམས་ནི་གཉིས་མེད་རིས་དང་བྲལ་བས་ངོ་མཉམ་པ་རང་རྫོགས་ཆེན་པོར་བཞུགས་ཏེ༔ ཁྱད་པར་གང་ཡང་མེད་པས་འཛིན་མེད་ཕྱོགས་བྲལ་དུ་བཞུགས་སོ༔ དཔེར་ན་ནམ་མཁའ་ནམ་མཁའ་ལ་ཐིམ་པ་ལྟ་བུའོ༔ དེ་ཡང་དཔེར་ན་བུམ་པའི་ནང་གི་ནམ་མཁའ་ལྟར་ཁྱབ་བྱེད་སེམས་ལ་རང་བཞིན་གྱིས་གནས༔ བར་གྱི་འབྲེལ་ཐག་ནི་ནམ་མཁའ་ལྟ་བུར་སྒྲོན་མ་བཞིའི་མཚམས་སྦྱར་ཕྱི་རོལ་གྱི་ནམ་མཁའ་ལྟ་བུར་ཆོས་ཀྱི་དབྱིངས་སྟོང་ཉིད་སྤྲོས་དང་བྲལ་བའོ༔ དེ་ཡང་བུམ་པ་ཆག་པས་ནམ་མཁའི་ཕྱི་ནང་བར་གསུམ་ལ་དབྱེ་བ་མེད་པ་བཞིན་དུ༔ རིག་པ་ཕྱི་ནང་མེད་པར་འདྲེས་ཤིང་རྫོགས་པའོ༔ དེ་ཡང་འབྲས་བུ་རེ་ཞིག་ཚིག་ཏུ་བརྗོད་ན་བློ་འདས་ངོ་བོ་ཉིད་ཀྱི་ཆོས་སུ་གནས་པས་ཆོས་སྐུ་ཞེས་བྱ༔ ཟག་མེད་ཀྱི་བདེ་བ་ཆེན་པོ་ལ་ལོངས་སྤྱོད་པས་ལོངས་སྐུ༔ གང་ལ་གང་འདུལ་དུ་སྤྲུལ་པས་ན་སྤྲུལ་སྐུ་ཞེས་བྱ༔ དེ་ཡང་ངོ་བོ་ཐ་དད་མེད་པས་སྐུ་གསུམ་རོ་གཅིག་ཏུ་གནས་པའོ༔ དེ་དག་སྟོང་པ་ངོས་གཟུང་མེད་པས་མཐའ་དང་བྲལ་བའི་ཆོས་ཉིད་ཅེས་བྱ༔ འདི་ཡིན་དང་འདི་མིན་གྱི་རིས་མེད་པས་དབྱེར་མེད་ཡོངས་སུ་རྫོགས་པ་ཞེས་བྱ༔ ཆོས་ཉིད་རྣམ་པ་དང་ཡུལ་ལས་འདས་པ་གཟུང་འཛིན་མཐའ་སྟོང་སྟེ༔ མཐའ་བྲལ་ཡོངས་རྫོགས་

ཀྱི་སྐུ་ཞེས་བྱ༔ དེ་ཡང་བྱས་པ་དང་བྱུང་བ་མེད་པའི་ཆོས་ཉིད་ཡིན་ལ་ལྟོས་པ་དང་བྲལ་བས༔ རིས་མེད་མཉམ་པའི་བདག་ཉིད་ཆེན་པོ་ཞེས་ཀྱང་བྱའོ༔ དེ་ལྟ་བུའི་སངས་རྒྱས་དེ་ལ་ཆོས་ཀྱི་སྐུའི་གནས་སྐབས་ན་ཡེ་ཤེས་གསུམ་གཞི་ལ་ཚང་བ་སྟེ༔ ངོ་བོ་ཀ་དག་གི་ཡེ་ཤེས༔ རང་བྱུང་ལྷུན་གྲུབ་ཀྱི་ཡེ་ཤེས༔ ཐུགས་རྗེ་ཀུན་ཁྱབ་ཀྱི་ཡེ་ཤེས༔ དེ་ཡང་དེ་དག་མཚན་ཉིད་རིས་ཅན་དུ་མ་ཡིན་ནོ༔ ལོངས་སྐུའི་གནས་སྐབས་ན་སོ་སོའི་མཚན་ཉིད་འཛིན་པ་ཡེ་ཤེས་ལྔ་སོ་སོར་གསལ་ཏེ༔ དེ་ཡང་ཆོས་ཀྱི་དབྱིངས་ཀྱི་ཡེ་ཤེས༔ མེ་ལོང་ལྟ་བུའི་ཡེ་ཤེས༔ མཉམ་པ་ཉིད་ཀྱི་ཡེ་ཤེས༔ སོ་སོར་རྟོགས་པའི་ཡེ་ཤེས༔ བྱ་བ་གྲུབ་པའི་ཡེ་ཤེས་སོ༔ དེ་དག་ཀྱང་ཡུལ་དང་ཡུལ་ཅན་དུ་ནི་མ་ཡིན་ནོ༔ སྤྲུལ་སྐུའི་དུས་ན་མཁྱེན་པའི་ཡེ་ཤེས་གཉིས་སུ་གནས་ཏེ༔ ཇི་ལྟ་བ་མཁྱེན་པའི་ཡེ་ཤེས་དང་༔ ཇི་སྙེད་པ་མཁྱེན་པའི་ཡེ་ཤེས་གཉིས་སོ༔ དེ་དག་ཀྱང་བྱ་བ་དང་བྱེད་པ་དང་བཅས་པ་ནི་མ་ཡིན་ནོ༔ དེ་ལྟ་བུ་སྐུ་ལྔ་པོ་དེ་ལ་སྟོབས་བཅུ་དང་༔ མི་འཇིགས་པ་བཞི་དང་༔ ཚད་མ་མེད་པ་དང་༔ དྲན་པ་དང་ཉེ་བར་གཞག་པ་ལ་སོགས་པ་ཡོན་ཏན་གྱི་རྣམ་གྲངས་དཔག་ཏུ་མེད་ཅིང་བརྗོད་ལས་འདས་པའོ༔ གསང་བ་བླ་ན་མེད་པ་ཡོངས་སུ་རྫོགས་པ་ཆེན་པོ་ཉི་མ་སྣང་བྱེད་ལས༔ རིན་པོ་ཆེ་ཟངས་ཀྱི་ཡི་གེ་ཅན་གྱི་ཕྱི་མོ༔ མན་ངག་གི་རྒྱལ་པོ་ཚིག་དོན་བཅུ་གཅིག་པ་ཞེས་བྱ་བ་རྫོགས་སོ༔ འདི་བཀོད་དགེ་བ་གང་བསགས་དེས༔ མཐའ་ཡས་སེམས་ཅན་མ་ལུས་ཀུན༔ རང་སྣང་དག་པའི་ཡེ་ཤེས་ལ༔ ཆོས་ཉིད་བདེན་པ་མཐོང་བར་ཤོག༔ མཁས་པ་བི་མ་ལ་ཡི་ཐུགས་བཅུད༔ ས་མ་ཡཱ༔ གྷུ་ཡ༔ རྒྱ་རྒྱ་རྒྱ༔ དཔལ་བྱར་མེད་ཀློང་ཡངས་ཀྱི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བྲིས་པ་འདིས༔ སེམས་ཅན་ཐམས་ཅད་འཁོར་བའི་རྒྱ་མཚོ་ལས་བརྒལ་ཏེ་བླ་ན་མེད་པའི་བྱང་ཆུབ་ཏུ་སངས་རྒྱས་པར་གྱུར་ཅིག༔ མངྒ་ལཾ༔

བླ་མའི་རིམ་པ་ཚིག་དོན་བཅུ་པ།

བླ་མའི་རིམ་པ་ཚིག་དོན་བཅུ་པ་ཞེས་བྱ་བ་བཞུགས་སོ༔

རྒྱ་གར་སྐད་དུ༔ གུ་རུ་ཀྲ་མ་མ་ཧཱ་སནྡྷི་མུ་པ་དེ་ཤ་ནཱ་མ༔ བོད་སྐད་དུ༔ བླ་མའི་རིམ་པ་རྫོགས་པ་ཆེན་པོ་གནད་ཀྱི་མན་ངག་ཅེས་བྱ་བ༔ བླ་མ་དམ་པ་རིན་པོ་ཆེ་རྣམས་ལ་ཕྱག་འཚལ་ལོ༔ བླ་མའི་རིམ་པ་བསྟན་པ་ལ་དོན་བཅུ་སྟེ༔ བླ་མའི་མཚན་ཉིད་བསྟན་པ་དང་༔ བླ་མའི་རང་བཞིན་བསྟན་པ་དང་༔ བླ་མ་ཇི་ལྟར་བཀུར་བའི་རིམ་པ་དང་༔ གསོལ་བ་ཇི་ལྟར་བཏབ་པ་དང་༔ དེ་ལ་བྱིན་རླབས་འབྱུང་བས་ཡིད་ཆེས་བསྐྱེད་པའི་མཚན་ཉིད་བསྟན་པ་དང་༔ བླ་མའི་བྱེ་བྲག་བསྟན་པ་དང་༔ བླ་མ་ཇི་ལྟར་མཉེས་པར་བྱ་བའི་རིམ་པ་དང་༔ བླ་མ་ལ་ལོག་པར་བལྟས་ཤིང་མཉེས་པར་མ་བྱས་པའི་ཉེས་དམིགས་དང་༔ དེ་ལ་བཤགས་པའི་ཚད་དང་༔ ཡོན་ཏན་ལ་དམིགས་ནས་བསྟན་པའི་ཁྱད་པར་དང་བཅུའོ༔ དེ་ལ་དང་པོ་བླ་མའི་མཚན་ཉིད་བསྟན་པ་ལ་གཉིས་ཏེ༔ རང་བཞིན་གྱི་མཚན་ཉིད་དང་༔ བརྟགས་པའི་མཚན་ཉིད་དོ༔ རང་བཞིན་གྱི་མཚན་ཉིད་ནི༔ རང་བཞིན་གྱི་གཟུང་འཛིན་ཆུང་བ་དང་༔ རྣལ་རྟོག་ཉུང་བ༔ ཅི་ལའང་ཡངས་པ༔ ལུས་ངག་ལ་

ལྷོད་ཡོད་པའོ༔ བརྟགས་པའི་མཚན་ཉིད་ནི༔ བཀོད་པ་ཆེན་པོ་ལས༔ མཁས་ཤིང་བྱ་བ་དང་བྲལ་བ༔ ཆོས་ཉིད་དོན་ལྡན་ཚད་ཕེབས་པ༔ འདོད་པའི་དོན་ལ་རྨོངས་པ་མེད༔ གསང་སྔགས་བླ་མའི་མཚན་ཉིད་དོ༔ ཞེས་གསུངས་པས༔ ཡང་དག་པར་བརྟགས་ན༔ མཁས་ཤིང་བྱ་བ་དང་བྲལ་བ་ཞེས་པ་བཞི་སྟེ༔ ཡངས་ཤིང་རྒྱུད་ལ་མཁས་པ་དང་༔ གོམས་ཤིང་གསང་སྔགས་ཀྱི་སྒྲུབ་ཐབས་ལ་མཁས་པ་དང་༔ རྟོགས་ཤིང་ལྟ་བ་ལ་མཁས་པ་དང་༔ ཉམས་སུ་བླང་ཞིང་ཉམས་མྱངས་ལ་མཁས་པའོ༔ དང་པོ་ཡངས་ཤིང་རྒྱུད་ལ་མཁས་པས་གསང་སྔགས་ཀྱི་རྒྱུད་མ་ལུས་པའི་དོན་བླ་མ་གོང་མ་རྣམས་ལས་ཐུགས་ལེགས་པར་སྦྱངས་པས༔ སློབ་མ་ལ་འཁྲུལ་པ་མེད་པར་སྟོན་ཤེས་པ་དེ་ཡང་རས་ཆོད་དང་གཟུ་ལུམས་ལ་སོགས་པའི་ཚུལ་མ་ཡིན་པའི་སྟོན་ཤེས་པའོ༔ གོམས་ཤིང་སྒྲུབ་པ་ལ་མཁས་པས་བསྙེན་སྒྲུབ་ཡན་ལག་བཞིའི་དོན་སྡེབས་ཤེས་པའོ༔ རྟོགས་ཤིང་ལྟ་བ་ལ་མཁས་པས་སྤྱིར་ཐེག་པ་ཐ་དག་གི་དོན་ལ་ལྟ་བའི་དོན་ཤེས་པས་གཞན་གྱི་སྒྲོ་འདོགས་ཆོད་པ་དང་༔ བྱེ་བྲག་

ཏུ་ཆོས་ཉིད་མངོན་སུམ་གྱི་དོན་ལ་མཁས་པ་ཡིད་དཔྱོད་ཚིག་གི་སྤྱོད་པ་ལས་གྲོལ་བའོ༔ ཉམས་སུ་བླངས་ཤིང་ཉམས་མྱོང་ལ་མཁས་པ་ན་རང་གིས་ཉམས་སུ་བླངས་པས་ཤེས་བྱ་ནང་གི་སྒྲོ་འདོགས་ཆོད༔ ཉམས་མྱོང་ལ་མཁས་པས་སྐལ་ལྡན་གཞན་གྱི་རྒྱུད་གྲོལ་བར་ནུས་པའོ༔ བྱ་བ་དང་བྲལ་ཞེས་པ་ནི༔ དེ་ཡང་བླ་མ་དེ་འཇིག་རྟེན་གྱི་བྱ་བ་དང་བྲལ་ནས་རི་ཁྲོད་དམ་དགོན་པ་བརྟེན་ཅིང་འཁོར་མང་པོ་དང་འདུ་འཛི་སྤངས་པ་ནི་ཆོས་ཉིད་བྱ་བ་དང་བྲལ་བ་རྒྱུད་ལ་བརྟེན་པའི་རྟགས་སོ༔ ཆོས་ཉིད་དོན་དང་ལྡན་ཅེས་པ༔ ཆོས་ཉིད་དོན་དང་ལྡན་པས་འཇིག་རྟེན་གྱི་རྩིས་གདབ་ལས་འདས་པའོ༔ ཚད་ཕེབས་ཞེས་པ༔ ཆོས་ཚིག་ཕྱིར་མ་སོང་ལག་ཏུ་བླང་རྒྱུའི་ཆོས་ཐམས་ཅད་ཚད་ལ་ཕེབས་པས༔ ཉམས་སྐྱེས་པ་དང་༔ འདོད་པའི་དོན་ལ་རྨོངས་པ་མེད་ཅེས་པ༔ སློབ་མ་དེ་གང་འདོད་པའི་ཆོས་ཀྱི་དོན་ལ་རྨོངས་པ་མེད་པར་སྟོན་ཤེས་པ་ནི་སྔོན་སྦྱངས་པའི་རྟགས་ཡིན་ནོ༔ ཡང་ན་གཏེར་ཆེན་པོ་ལ་ལོངས་སྤྱོད་པའི་རྟགས་སོ༔ དེ་ལྟར་མཚན་ཉིད་ལྔ་དང་ལྡན་ན་བླ་མའི་མཚན་ཉིད་ལྡན་པའོ༔ སྤྱི་དོན་གཉིས་པ་བླ་མའི་རང་བཞིན་ནི༔ ལུས་ཀྱི་སྤྱོད་པ་དལ་ཆགས་པ་དང་༔ ངག་གི་སྤྱོད་པ་དྲང་པོར་སྨྲ་བ་དང་༔ སེམས་ཀྱི་སྤྱོད་པ་ཏིང་ངེ་འཛིན་མ་ཡེངས་པའོ༔ དེ་ལྟ་བུའི་རང་བཞིན་དང་ལྡན་ན་བླ་མ་རྡོ་རྗེ་འཛིན་པ་ཞེས་བྱའོ༔ སྤྱི་དོན་གསུམ་པ༔ བླ་མ་ཇི་ལྟར་བཀུར་བའི་རིམ་པ་ནི༔ བླ་མ་མཐོང་བའི་ཚེ་ན་མཐོང་ཕྱག་འཚལ་བས་ནི༔ སངས་རྒྱས་ཀྱི་ཞིང་ཁམས་མངོན་སུམ་དུ་བྱེད་པའི་དགོས་པ་ཡོད༔ བླ་མ་ལ་

༼སྡེ་མ་གཉིས་ལྷག་མོ་རེད་འདུག༽

༼སྡེ་མ་གཉིས་ལྷག་མོ་རེད་འདུག༽

དུས་རྟག་ཏུ་མཎྜལ་ཕུལ་བས་བྱང་ཆུབ་སེམས་དཔའི་ས་ལ་སྤྱོད་པའོ༔ དུས་རྟག་ཏུ་ལུས་གུས་པ་དང་བཅས་པས་ཕྱག་བཙལ་ན་འཁོར་ལོས་སྒྱུར་བའི་རྒྱལ་པོའི་ལོངས་སྤྱོད་དང་མཉམ་མོ༔ དུས་རྒྱུན་དུ་བསྐོར་བ་བྱས་ན་འགྲོ་བ་ཐམས་ཅད་བྱམས་ཤིང་ཀུན་གྱིས་ལེགས་པ་སྟེར་བར་འགྱུར་རོ༔ དུས་རྟག་ཏུ་དྲིལ་ཕྱིས་བྱས་ན་རྡོ་རྗེའི་མིག་དང་ལྡན་པར་འགྱུར་རོ༔ དྲི་ཞིམ་པོའི་ཐིག་ལེ་བྱས་ན་བདེ་བ་འབའ་ཞིག་ལ་ལོངས་སྤྱོད་དོ༔ བླ་མ་ལ་རང་གི་ལུས་ཕུལ་ཏེ་བླ་མའི་བྱ་བ་ལ་མཁས་པར་བྱས་ན༔ འགྲོ་བ་ཐམས་ཅད་བྲན་དུ་ཁོལ་བར་འགྱུར་རོ༔ ངག་གི་བསྟོད་པ་སྣ་ཚོགས་པས་བསྟོད་ན་དབྱངས་ཀྱི་སྙན་པས་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་རོ༔ བླ་མ་ལ་འཁོར་གསུམ་ཡོངས་སུ་དག་པ་ལན་ཅིག་བྱས་ན་ཚེ་འདི་ལ་བྱ་བ་རྣམས་ལེགས་པར་འགྲུབ་ཅིང་མ་འོངས་དུས་ན་སྟོང་འཁོར་ལོས་སྒྱུར་བའི་རྒྱལ་པོར་སྐྱེ་བར་འགྱུར་རོ༔ ལན་གཉིས་བྱས་ན་ཚེ་འདི་ལ་ཉེས་པ་སྤང་ཞིང་མ་འོངས་པའི་དུས་ན་སྟོང་ས་འཛིན་གྱི་རྒྱལ་པོར་འགྱུར་རོ༔ ལན་གསུམ་བྱས་ན་ཚེ་འདི་ལ་ཀུན་གྱིས་སྙན་པ་སྒྲོག་ཅིང་མཆོད་པའི་གནས་སུ་འགྱུར་བ་དང་༔ མ་འོངས་པའི་དུས་ན་མཁའ་སྤྱོད་ཀྱི་སིདྡྷི་ཐོབ་པར་འགྱུར་རོ༔ ལན་བདུན་བྱས་ན་འདི་ཉིད་ལ་དོན་ཇི་ལྟར་བསམས་པ་ལྟར་འགྲུབ་ལ་འདི་ནས་ཤི་འཕོས་མ་ཐག་ཏུ་རིག་འཛིན་རྒྱལ་པོ་ཆེན་པོར་གྱུར་ནས༔ འགྲོ་བ་རྣམས་ཀྱི་ཁ་ལོ་གྱེན་ལ་བསྒྱུར་བའོ༔ རང་གི་ལོ་གྲངས་ཞིག་བྱས་ན་འདི་ཉིད་ལ་ཚེ་ལ་དབང་བའི་རིག་འཛིན་གྲུབ་པས་ཇི་སྲིད་གནས་པ་བཞིན་དུ་གནས་པ་དང་༔ སེམས་ཅན་རྣམས་ཀྱི་ཉོན་མོངས་པའི་རྟོག་པ་

སེལ་ཞིང་རྫུ་འཕྲུལ་སྣ་ཚོགས་ཀྱིས་འགྲོ་བ་བཏུལ་ནས་ཐ་མ་ཟག་བཅས་མི་སྣང་བར་སངས་རྒྱ་བ་ལ་ཐེ་ཚོམ་མེད་དོ༔ ཡང་རང་གི་བླ་མ་ལ་བདུན་རྣམ་པར་དག་པའི་སྒོ་ནས་རས་ཡུག་ཅིག་ཙམ་ཕུལ་བས་ཀྱང་མ་འོངས་པའི་དུས་ན་ནོར་བུའི་བང་མཛོད་ལ་ལོངས་སྤྱོད་པར་འགྱུར་རོ༔ དེ་ལྟར་ཡང་བདུད་རྩིའི་རྒྱ་མཚོ་བྱུང་བའི་རྒྱུད་ལས༔ ནམ་མཁའ་གང་བའི་སངས་རྒྱས་ལ༔ སྣ་ཚོགས་རིན་ཆེན་སྤྲས་པ་ཡིས༔ སྟོང་གསུམ་གང་བ་ཕུལ་གྱུར་བས༔ བླ་མའི་བ་སྤུ་ཉག་རེ་ལ༔ མར་གྱི་ཐིགས་པ་གཅིག་བྱུགས་པ༔ བརྒྱ་ཕྲག་མང་པོའི་ཆར་མི་ཕོད༔ ཐ་མ་སྤྱོད་ལམ་དུ་མའི་སྒོ་ནས་བླ་མ་མཉེས་པར་བྱས་ཏེ༔ བླ་མ་བཞེངས་པའི་དུས་སུ་ལངས་པ་དང་༔ ཐལ་མོ་སྦྱར་བ་དང་༔ བཞུགས་པའི་དུས་སུ་སྟན་བཏབ་པ་དང་༔ མཎྜལ་ཕུལ་བ་དང་༔ རང་བླ་མའི་དྲུང་དུ་སྦྲིིད་པ་ལུ་བའི་དུས་སུ་ཁ་ལ་ལག་པས་དགབ་པ་དང་༔ མདོར་ན་བག་མ་གསར་བའི་ཚུལ་དུ་བྱས་པས་སྤྲུལ་པའི་ཞིང་ཁམས་སུ་དབུགས་འབྱིན་པར་འགྱུར་རོ༔ དེ་ཡང་བླ་མ་དེ་རང་ལ་གཅེས་པའི་བུ་ལྟར་ཡིད་ལ་ཁུར་བས་བྱིན་རླབས་འདོད་འཇོའི་བ་ལྟར་འབྱུང་བ་དང་༔ དུས་ཀྱི་ལྟོ་བཞིན་དུ་ཡིད་ལ་བྱས་པས་བྱིན་རླབས་བཀྲེས་སྐོམ་པ་ལ་བཟའ་བཏུང་ཟོས་འཐུངས་པ་ལྟར་འབྱུང་བ་དང་༔ ནད་པས་སྨན་པ་བརྟེན་པ་ལྟར་གཡེང་བ་མེད་པར་ཁུར་བས་བྱིན་རླབས་རྟག་ཏུ་བདེ་བ་ལ་ལོངས་སྤྱོད་པའོ༔ དེ་བཞིན་འཇིགས་སར་ལམ་གྱི་སྐྱེལ་མ་བཞིན་དང་༔ མུན་ཁང་གི་སྒྲོན་མ་བཞིན་དང་༔ ཡིད་བཞིན་ནོར་བུ་བཞིན་དུ་ཐབས་སྣ་ཚོགས་ཀྱིས་བླ་མ་བརྟེན་པར་བྱའོ༔ སྤྱི་དོན་བཞི་

པ་གསོལ་བ་ཇི་ལྟར་གདབ་པ་ནི༔ བཀོད་པ་ཡིད་བཞིན་ནོར་བུ་རིན་པོ་ཆེ་འབྱུང་བའི་རྒྱུད་ལས༔ བླ་མ་རྡོ་རྗེ་འཛིན་པ་ནི༔ ཁམས་གསུམ་འཁོར་བའི་གཉེན་གཅིག་པོ༔ འགྲོ་བ་མགོན་མེད་རྣམས་ཀྱི་སྐྱབས༔ ཐར་པའི་ལམ་སྐས་ཆེན་པོ་སྟེ༔ མ་རིག་སེལ་བའི་སྒྲོན་མེ་ལ༔ མུན་པའི་ཚོགས་དག་སྐྱབས་སུ་མཆི༔ འཁོར་བའི་འདམ་གྱི་ཚོགས་དག་ཏུ༔ བྱིང་བ་སྐྱབས་མེད་བདག་ལ་སྐྱོབས༔ དུག་གསུམ་མེ་ཡིས་བརླན་བྲལ་བས༔ སྡུག་བསྔལ་སྐམ་ལ་གནས་པ་ལ༔ ཐུག་རྗེའི་ཆུ་རྒྱུན་བདག་ལ་ཕོབ༔ རྩུབ་འགྱུར་དམྱལ་བའི་མེ་ཆེན་འབར༔ རང་བྱུང་བརླན་གྱིས་བསིལ་བར་མཛོད༔ བླ་མ་རྡོ་རྗེ་འཆང་བའི་ལྷ༔ ལྷ་ཡི་ལྷ་ཁྱོད་ཕྱག་འཚལ་ལོ༔ བདག་ནི་བསྐལ་པ་ཐོག་མ་ནས༔ ལུས་ཀྱིས་བཅིངས་པའི་སེམས་ཅན་དག༔ འབྱུང་བའི་སྣོད་དང་བྲལ་གྱུར་ལ༔ འོད་གསལ་དྲི་མེད་ལུས་ལྡན་ཤོག༔ སྨྲ་བ་ངག་གིས་བཅིངས་པ་ལ༔ འཁྲུལ་བའི་གཏམ་རྒྱུད་ཟུངས་ཟད་ནས༔ བརྗོད་དུ་མེད་པའི་དོན་ལྡན་ཤོག༔ འགྱུར་མེད་སེམས་ཀྱི་རྟོག་པས་བཅིངས༔ མི་རྟོག་གསལ་བའི་སྣང་མཐོང་ནས༔ བསམ་འདས་འཕྲོ་འདུ་ཆད་པར་ཤོག༔ དེ་ལྟར་ལུས་ངག་ཡིད་གསུམ་ལ༔ བྱིན་གྱིས་བརླབས་ནས་སྐུ་གསུམ་གྱི༔ འབྲས་བུ་ཚད་ལ་ཕེབས་པར་མཛོད༔ ཅེས་གསུངས་པས༔ དེ་ལྟར་ཉིན་ལན་གསུམ་མཚན་ལན་གསུམ་གསོལ་བ་བཏབ་པས༔ སྐུ་གསུང་ཐུགས་ཀྱི་བྱིན་རླབས་བརྗོད་ཀྱིས་མི་ལངས་པ་འབྱུང་བ་

ནི་རང་གི་སྤྱི་བོའི་གཙུག་ཏུ༔ འོག་ཟླ་བ་སྟེང་ཉི་མ་དེ་གཉིས་གའུ་ཁ་སྦྱར་བ་ལྟ་བུའི་ནང་ན་ཨ་ཡོད་པ་ལས༔ དེ་ལ་འོད་དཔག་ཏུ་མེད་པ་འཕྲོས་པས་རང་གི་བླ་མ་སྤྱི་བོའི་གཙུག་ཏུ་སྤྱན་དྲངས་ཏེ༔ བླ་མ་སྐྱིལ་ཀྲུང་ཕྱེད་པས་གདན་སྟེངས་སུ་བཞུགས་པ་ལ་གསོལ་བ་བཏབ་པས༔ བླ་མ་བདེ་བའི་ངོ་བོར་ཞུ་ནས་ཞབས་གཡས་པའི་མཐེ་བོང་ལས་བྱང་སེམས་ཀྱི་ཐིག་ལེ་སྲན་མའི་གའུ་ཙམ་ཡུངས་འབྲུ་ཙམ་ཕྲམ་ཕྲམ་བྱུང་སྟེ་སྤྱི་བོར་ཐིམ་པས་ལུས་ཀྱི་སྡིག་པ་དག་ནས་ལུས་བདེ་བའི་ངོ་བོར་ཞུ༔ དེ་ནས་མགྲིན་པར་སླེབས་པས་ལུས་ངག་ཡིད་གསུམ་བདེ་བའི་ངོ་བོར་ཞུ་ནས༔ བདེ་བ་རྒྱ་ཆེན་པོར་འཕེལ་བའི་གནས་པ་ལ་བློ་ཡི་སེམས་གནས་པར་བྱའོ༔ འདི་དུས་ན་བདག་ཇི་བཞིན་སེམས་ཅན་ཐམས་ཅད་ཀྱང་དེ་ལྟར་གྱུར་པ་ལ་བློ་གནས་པར་བྱའོ༔ དེ་ལྟར་ཉིན་ལན་གསུམ་དང་མཚན་ལན་གསུམ་བྱས་ན་བླ་མའི་བྱིན་རླབས་དངོས་སུ་འབྱུང་བ་ཐེ་ལ་ཚོམ་མེད་དོ༔ དེ་ལྟར་འཇིག་རྟེན་འདིར་ཡང་ལེགས་པ་ཐམས་ཅད་འགྲུབ་ཅིང་ཉེས་པ་ཐམས་ཅད་སྤངས་པར་འགྱུར་རོ༔ མ་འོངས་པའི་དུས་ན་ཚོགས་གཉིས་རྫོགས་པས་སྐུ་གཉིས་འགྲུབ་པའོ༔ རྡོ་རྗེ་བདུད་རྩི་འབྱུང་བའི་རྒྱུད་ལས༔ ལྷ་སྐུ་འབུམ་ཕྲག་བསྒོམས་པ་བས༔ བླ་མའི་སྐུ་བསྒོམས་བསོད་ནམས་འཕགས༔ དེས་ན་བླ་མའི་སྐུ་འདི་རིན་ཐང་ཆེ༔ རྫོགས་རིམ་བསྒོམ་པའི་སྔོན་འགྲོ་དམ་པའོ༔ ཞེས་པའོ༔ ཡང་བཀོད་པ་ཆེན་པོ་ལས༔ ཡི་དམ་ལྷ་ཡི་སྐུ་བསྒོམས་ཀྱང་༔ བླ་མའི་སྐུ་ལ་དམིགས་པ་མ་

ལོག་ན༔ བརྒྱ་ཕྲག་སྟོང་གིས་ཆར་ཡང་མི་འགྲོའོ༔ བསྙེན་སྒྲུབ་བཟླས་པ་ས་ཡ་བས༔ བླ་མའི་གསོལ་ཚིག་ལན་གསུམ་བརྗོད་པ་ནི༔ ནུས་པ་འབུམ་ཕྲག་ཆར་ཡང་མི་ཕོད་དོ༔ རྫོགས་པའི་རིམ་པ་བསྐལ་པའི་བར་དུ་ཡང་༔ འདུ་འཛིན་སྤངས་ནས་བསྒོམས་པ་བས༔ བླ་མ་རང་སེམས་དཀྱིལ་དུ་ཤར་བ་ཙམ༔ སྟོང་ཕྲག་ཉི་ཤུ་ཆར་ཡང་མི་ཕོད་དོ༔ དེས་ན་བླ་མ་བསྒོམས་དང་བསྟོད་དང་བསམ་པ་ཡིས༔ སངས་རྒྱས་འབྲས་བུ་གཅིག་ཆར་འགྲུབ་པར་ངེས༔ ཞེས་སོ༔ སྤྱི་དོན་ལྔ་པ་བྱིན་རླབས་འབྱུང་བས་ཡིད་ཆེས་བསྐྱེད་པའི་མཚན་ཉིད་བསྟན་པ་ནི༔ བླ་མ་བརྟེན་པས་བྱིན་རླབས་འབྱུང་༔ བྱིན་རླབས་འབྱུང་བས་བླ་མ་ལ་གདུང་བ་འདི་ལྟར་སྐྱེ་སྟེ༔ སྐྱེས་བུ་མེའི་འོབས་སུ་ཚུད་པའི་སྡུག་བསྔལ་ལས་གྲོལ་བར་འདོད་པ་ལྟར་བླ་མ་ཡིད་ལ་འདོད་པ་དང་༔ རྒྱ་མཚོའི་གླིང་ལ་གྲུ་བ་འདོད་པ་ལྟར་བླ་མ་ཡིད་ལ་འདོད་པ་དང་༔ རྒྱལ་པོའི་བཙོན་དུ་ཚུད་པ་དོན་པར་འདོད་པ་ལྟར་བླ་མ་ཡིད་ལ་འདོད་པ་དང་༔ གཤེད་མའི་ཁུང་དུ་ཚུད་པ་ལས་ཐར་པར་འདོད་པ་ལྟར་བླ་མ་ཡིད་ལ་འདོད་པའོ༔ དེའི་རྟགས་སུ་འཇིག་རྟེན་གྱི་ཟང་ཟིང་དང་༔ ཨ་ཅང་ཆེས་ཏེ་རང་གི་མགོ་དང་ཡན་ལག་དང་ལུས་རྣམས་ཀྱང་བླ་མ་ལ་གཏོང་བར་ནུས་པ་དག་འབྱུང་ངོ་༔ རྡོ་རྗེ་བཀོད་པའི་རྒྱུད་ལས་ཀྱང་༔ རྒྱ་མཚོའི་གླིང་དང་མེ་ཆེན་འོབས༔ རྒྱལ་པོའི་བཙོན་རྭར་ཚུད་པས་ཀྱང་༔ བླ་མ་དྲན་ན་གྲོལ་བར་ངེས༔ ཞེས་སོ༔ སྤྱི་དོན་དྲུག་པ་བླ་མའི་བྱེ་བྲག་བསྟན་པ་ནི༔ བླ་མ་དང་སློབ་དཔོན་གཉིས་ཏེ༔ སློབ་དཔོན་ལ་ཡང་གཉིས༔

འཇིག་རྟེན་པའི་སློབ་དཔོན་དང་༔ འདས་པའི་སློབ་དཔོན་ནོ༔ འཇིག་རྟེན་པའི་སློབ་དཔོན་མིང་དུ་བཏགས་པ་དེ༔ སྨན་དང་༔ རྩིས་དང་༔ བཟོ་དང་༔ ཟས་ནོར་འཚོལ་བའི་ཡོན་ཏན་སློབ་པའི་སློབ་དཔོན་ནོ༔ འདས་པ་ཡང་དག་པའི་སློབ་དཔོན་ལ་དྲུག་སྟེ༔ སྤྱིའི་སློབ་དཔོན་ཡུལ་མི་སྤྱིའི་སློབ་དཔོན་དུ་ཁུར་བའོ༔ སྔགས་པ་སྤྱིའི་སློབ་དཔོན་དུ་ཁུར་བ་དང་གཅིག་ཡིན༔ འདྲེན་པའི་སློབ་དཔོན་ཆོས་སྒོར་འཛུད་པ་དེ་ཡིན༔ དམ་ཚིག་དབང་གི་སློབ་དཔོན་ནི་དབང་བསྐུར་ཞིང་དམ་ཚིག་དང་སྡོམ་པ་འབོག་པའོ༔ ཉམས་ཆག་སྐོང་བའི་སློབ་དཔོན་ནི་རང་དམ་ཚིག་གི་སིལ་བྱུང་བ་དེ་ལ་སྐོང་བཞུས་པ་དང་༔ ཚེ་དབང་བསྐུར་ནས་རང་ལ་སྐྱོབ་པར་བྱེད་པའོ༔ ཤེས་རྒྱུད་འགྲོལ་བའི་སློབ་དཔོན་ནི༔ གྲུབ་པའི་མཐའ་རྣམས་སློབ་པའོ༔ མན་ངག་ལུང་གི་སློབ་དཔོན་ནི་ལུང་འབོགས་པ་དང་མན་ངག་སྟོན་པའོ༔ དེ་ལྟར་སློབ་དཔོན་དྲུག་པོ་དེ་ཡང་༔ དམ་ཚིག་ས་མ་ཡ་བཀོད་པའི་རྒྱུད་ལས༔ སྤྱི་དང་འདྲེན་དང་ཉམས་ཆགས་སྐོང་༔ ཤེས་རྒྱུད་གྲོལ་དང་དམ་ཚིག་དབང་༔ མན་ངག་ལུང་གི་སློབ་དཔོན་ལ༔ ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་བལྟ་སྟེ༔ སྒོ་གསུམ་ཟོལ་ཟོག་སྒྱུ་མེད་པས༔ རབ་ཏུ་གཅེས་དང་ཡིད་འཐད་དབུལ༔ ཅེས་སོ༔ བླ་མ་ལ་གཉིས་ཏེ༔ རྩ་བའི་བླ་མ་དང་༔ ཡན་ལག་གི་བླ་མའོ༔ རྩ་བའི་བླ་མ་ནི༔ བཞི་དང་ལྡན་ཏེ༔ དབང་བསྐུར༔ རྒྱུད་བཤད༔ ལུང་འབོགས༔ མན་ངག་བསྟན༔ ཅེས་པས༔ རང་ཡང་དེའི་ཆོས་ཉམས་སུ་ལེན་པ་དང་བཞི་འཛོམས་ན༔ རྩ་བའི་བླ་མའོ༔ ཡན་ལག་གི་བླ་མ་ནི་གཅིག་ལྡན་གཉིས་ལྡན་གསུམ་ལྡན་བཞི་ལ་སོགས་པའོ༔ དེ་ཡང་རྩ་བའི་བླ་མ་དང་ཡན་ལག་གི་བླ་མ་ཚོགས་བསགས་པའི་ཞིང་ཁྱད་པར་ཆེ་སྟེ༔ སྟོབས་བདུན་

འགྱུར་དུ་ཡོད་པས་གཅིག་ལྡན་པས་གཉིས་ལྡན་ཆེ༔ དེ་བདུན་པས་གསུམ་ལྡན༔ དེ་གསུམ་ཀ་འབུམ་ཕྲག་བདུན་ལ་དགེ་བའི་རྩ་བ་བསྐྱེད་པ་བས་རྩ་བའི་བླ་མ་གཅིག་པོ་ལ་ཚོགས་བསགས་པ་བསོད་ནམས་ཆེའོ༔ ཧེ་རུ་ཀ་མངོན་པར་འབྱུང་བའི་རྒྱུད་ལས༔ ཡན་ལག་བླ་མ་འབུམ་ཕྲག་བདུན༔ གསེར་ནི་རང་ལུས་ཙམ་མཆོད་ཀྱང་༔ རྩ་བའི་བླ་མ་སྲང་གཅིག་གིས༔ ལེགས་པར་མཆོད་པའི་དགོས་གྲུབ་ནི༔ སངས་རྒྱས་ཀྱིས་ཀྱང་བརྗོད་པར་དཀའ༔ ཞེས་སོ༔ ཡང་ཁ་སྦྱོར་ཐིག་ལེའི་རྒྱུད་ལས༔ སངས་རྒྱས་གངྒཱའི་ཀླུང་གི་བྱེ་མ་སྙེད་གདུགས་དང་རྒྱལ་མཚན་ལ་སོགས་པས༔ ཁྱད་པར་གྱི་མཆོད་བཀུར་བྱས་པས༔ བླ་མའི་བ་སྤུའི་ཁུང་གཅིག་ལ༔ མཆོད་པར་བྱས་པས་བསོད་ནམས་ཆེ༔ ཞེས་སོ༔ སྤྱི་དོན་བདུན་པ་ཇི་ལྟར་མཉེས་པར་བྱ་བ་ནི༔ གང་ཟག་རབ་ཀྱིས་ཇི་ལྟར་མཉེས་པར་བྱ་བ་དང་༔ འབྲིང་གིས་ཇི་ལྟར་མཉེས་པར་བྱ་བ་དང་༔ ཐ་མས་ཇི་ལྟར་མཉེས་པར་བྱ་བའོ༔ དེ་ལ་རབ་ཀྱིས་མཉེས་པར་བྱ་བ་ལ་བཞི་སྟེ༔ དད་པས་མཉེས་པར་བྱ་བ་དང་༔ ཤེས་རབ་ཀྱིས་མཉེས་པར་བྱ་བ་དང་༔ བརྩོན་འགྲུས་ཀྱིས་མཉེས་པར་བྱ་བ་དང་༔ ཏིང་ངེ་འཛིན་གྱིས་མཉེས་པར་བྱ་བའོ༔ དེ་ལ་དད་པས་མཉེས་པར་བྱ་བ་ནི༔ མགོ་མཇུག་ཐམས་ཅད་དུ་འཕོ་འགྱུར་དང་སྐྱོ་ངས་མེད་པའོ༔ དེ་ལྟར་ཡང་༔ དཔལ་འཁོར་ལོ་ཆུབ་པར་རོལ་པའི་རྒྱུད་ལས༔ ཡོན་ཏན་ནང་ནས་དད་པ་མཆོག །སྟོང་གསུམ་གང་བའི་སངས་རྒྱས་ལ༔ མཆོད་པས་སྟོང་གསུམ་བཀང་མཆོད་པས༔ འདི་ཡི་མཆོད་པའི་ཆར་མི་

ཕོད༔ ཅེས་སོ༔ ཤེས་རབ་ཀྱིས་མཉེས་པར་བྱ་བ་ནི༔ བླ་མའི་གསུང་སྒྲོས་ལྷག་ཆད་མེད་པར་སྟོན་ཤེས་པ་སྟེ་བླ་མའི་བསྟན་པའི་སྲོལ་མ་ཉམས་པར་བྱེད་པའོ༔ དེ་ལྟར་ཡང་༔ འཁོར་ལོ་ཆུབ་པར་རོལ་པ་ལས༔ ཤེས་རབ་མཆོག་གིས་བླ་མ་ལ༔ རང་གིས་མཉེས་པར་བྱས་པ་ནི༔ སངས་རྒྱས་རྣམས་ཀྱིས་གསུང་པའི་ཆོས༔ བསྐལ་པ་བརྒྱ་ཕྲག་མང་པོར་ཡང་༔ སུ་ཡིས་བཀླགས་ཤིང་བརྗོད་པ་ལས༔ བསོད་ནམས་འབུམ་ཕྲག་བསམ་ཡས་སོ༔ ཞེས་སོ༔ བརྩོན་འགྲུས་ཀྱིས་མཉེས་པར་བྱ་བ་ནི༔ འཇིག་རྟེན་གྱི་བྱ་བ་སྤངས་ནས༔ རི་ཁྲོད་ལ་སོགས་པར་བསྒྲུབས་པས་ལུས་ངག་གི་རྟགས་མང་པོ་སྟོན་ནས༔ སེམས་ཅན་ལམ་ལ་འཇུག་པར་འགྱུར་བས་བླ་མ་མཉེས་པའོ༔ དེ་ཡང་ཆུབ་པར་རོལ་པ་ལས༔ བསྐྱེད་རིམ་བསྐལ་པ་གསུམ་བསྒོམས་པས༔ བླ་མ་མཉེས་པའི་བསོད་ནམས་ནི༔ བདག་གིས་སྤོབས་པ་མ་ཡིན་ནོ༔ ཞེས་སོ༔ ཏིང་ངེ་འཛིན་གྱིས་མཉེས་པར་བྱ་བ་ནི༔ གང་ཟག་འབྲིང་རྣམས་ཀྱིས་མཉེས་པར་བྱ་བ་ནི༔ ལུས་ཀྱིས་མཉེས་པར་བྱ་བ་སྟེ༔ བླ་མའི་ལས་དང་བྱ་བ་རྣམས༔ བྱས་ལ་མཉེས་པར་བྱ་བ་དང་༔ སྲོག་གི་མེལ་ཚེས་མཉེས་པར་བྱ་བ་དང་༔ ཚེ་ཡི་བར་གཅོད་མེ་དང་ཆུ་དང་གཞན་ཡང་རྒྱལ་པོའི་བར་ཆད་འབྱུང་བའི་དུས་ན་བདག་གིས་བླ་མའི་དོད་པོར་འགྲོ་ནུས་པ་དང་༔ མི་གཞན་གྱིས་བླ་མའི་སྐུ་ལ་བར་ཆད་བྱེད་ན་བདག་གིས་དེའི་སྲོག་སྔར་གཅོད་ནུས་པ་དང། དོན་གྱི་བདག་པོ་བླ་མའི་དོན་དུ་སྲོག་གཏོང་ནུས་པའོ༔ དེ་ཡང་དཔལ་བདུད་རྩི་འབྱུང་བའི་རྒྱུད་ལས༔ གལ་ཏེ་བླ་མ་ལ་གནོད་པའི༔ མ་རུངས་སེམས་ཀྱིས་བཅོམ་པ་ལ༔ བདག་ཉིད་ཀྱིས་ནི་གསད་བྱ་ནི༔ སེམས་ཅན་འབུམ་གྱི་སྲོག་བཏོན་པས༔ བསོད་ནམས་འདི་ཡི་ཆར་མི་ཕོད༔

དེ་ཡི་ཕྱིར་ན་བསོད་ནམས་ཞེས༔ དུས་གསུམ་བཞུགས་པའི་སངས་རྒྱས་ཀྱིས༔ ལུང་དུ་བསྟན་པ་ཁོ་ནའོ༔ བླ་མའི་བྱ་བ་རྫོགས་བྱས་ན༔ འདི་ཡང་དེ་དང་མཉམ་པའོ༔ ཞེས་སོ༔ གང་ཟག་ཐ་མས་བླ་མ་དེ་ལྟར་མཉེས་བར་བྱ་བ་ནི༔ རྫས་དང་ལོངས་སྤྱོད་ཀྱིས་མཉེས་པར་བྱ་བ་དང་༔ རྒྱལ་སྲིད་འཁོར་རྣམས་ཕུལ་ནས་མཉེས་པར་བྱ་བ་དང་༔ འཁོར་གསུམ་ཡོངས་སུ་དག་པར་བྱས་ཏེ་ཅི་ཡོད་པས་མ་ཉེས་པར་བྱ་བའོ༔ དོན་གྱི་ཅི་ཡང་རུང་བའི་ཐབས་སྣ་ཚོགས་ཀྱིས་མཉེས་པར་བྱ་བའོ༔ དེ་ཡང་བཀོད་པ་ཆེན་པོའི་རྒྱུད་ལས༔ ཆེ་དང་ཆུང་བའི་བྱེ་བྲག་གང་༔ བླ་མ་མཉེས་པར་གྱུར་པ་ཡིས༔ བསོད་ནམས་བརྗོད་པ་ཤིན་ཏུ་དཀའ༔ ཞེས་པས༔ བླ་མ་ཅི་དང་ཅིའི་སྒོ་ནས་མཉེས་པར་བྱ་བའོ༔ སྤྱི་དོན་བརྒྱད་པ་བླ་མ་ལ་ལོག་པར་བལྟས་པ་དང་༔ བརྙས་པར་བྱས་པའི་ཉེས་དམིགས་ནི་བརྗོད་ཀྱི་མི་ལང་ངོ་༔ གཞན་དག་ལྟ་ཅི་སྨོས་ཏེ༔ རྨི་ལམ་དུ་བླ་མ་ལ་བརྙས་པ་བྱས་པ་ཙམ་ལ་ཡང་འདི་ཙམ་འབྱུང་སྟེ༔ དམ་ཚིག་ས་མ་ཡཱ་བཀོད་པའི་རྒྱུད་ལས་༔ རྨི་ལམ་དུས་ན་ལུས་ངག་ཡིད༔ གལ་ཏེ་རྡོ་རྗེ་སློབ་དཔོན་ལ༔ ཉེས་པ་ཕྲ་མོ་ཙམ་བྱས་ན༔ ཁྱི་ཡི་སྐྱེ་བ་བརྒྱར་བླང་ནས༔ སྨེ་ཤ་ཅན་དུ་སྐྱེ་བར་འགྱུར༔ དེ་ནས་སེམས་ཅན་དམྱལ་བ་ཡི༔ ཚ་གྲང་གཉིས་ཀའི་སྡུག་བསྔལ་ཉིད༔ ཉམས་སུ་མྱོང་བ་ཁོ་ནའོ༔ ཞེས་སོ༔ རྨི་ལམ་དུ་མི་དད་པའམ་མི་གུས་པའམ་མི་མོས་པ་སྐྱེས་པ་ཙམ་ལ་ཉེས་པ་དེ་ཙམ་ཡོད་ན༔ དངོས་སུ་བྱས་ན་བརྗོད་ཀྱིས་མི་ལང་ངོ་༔ དེ་ཡང་མཆོད་རྟེན་མངོན་པར་རྟོགས་པའི་རྒྱུད་ལས༔ སློབ་དཔོན་སྐུ་ལ་བརྙས་པ་ན༔ ཆོས་སྐུ་བཤིག་པས་སྡིག་པ་ཆེ༔ བླ་མའི་གྲིབ་མ་འགོང་བྱས་ན༔ སངས་རྒྱས་སྐུ་བཅོམ་སྡིག་པ་ཆེ༔ བླ་མའི་གསུངས་ལ་སྒྲོས་བཏགས་ན༔ ལྕེ་ཡི་དབང་པོ་བརྒྱད་པར་འགྱུར༔ བླ་མའི་གསུང་ལ་སྐུར་བཏབ་ན༔ དམ་པའི་ཆོས་

དང་རྟག་ཏུ་འབྲལ༔ བླ་མའི་ཐུག་ལ་སྨོད་པ་ན༔ རང་གི་སྒྲོན་མ་རང་གསོད་འདྲ༔ ཞེས་སོ༔ གལ་ཏེ་བླ་མ་ལ་ལུས་ཀྱི་སྒོ་ནས་བརྙས་པ་བྱས་པའམ༔ ཉེས་པ་བྱས་ན་ཤི་འཕོས་མ་ཐག་ཏུ་རྡོ་རྗེ་དམྱལ་བར་འགྲོ༔ ངག་གི་ཉེས་པ་བྱས་ན་གནོད་སྦྱིན་གྱི་ལུས་བླངས་ནས་དེ་ནས་རྡོ་རྗེའི་དམྱལ་བའི་གནས་སུ་འགྱུར་རོ༔ སེམས་ཀྱི་སྒོ་ནས་ཉེས་པ་བྱས་ན་ཚེ་གསུམ་གྱི་འོག་ཏུ་སེམས་ཀྱི་སྣང་བ་དམྱལ་བ་དུཿཁ་རུ་འཁྲུལ་ནས་འགྲོ་བ་ངེས་སོ༔ དེ་ཡང་སྤྱན་རས་གཟིགས་སྙིང་རྗེ་ཕུར་པའི་རྒྱུད་ལས༔ སློབ་དཔོན་ལས་ནི་དངོས་གྲུབ་ཐོབ༔ གལ་ཏེ་དེ་ལ་བརྙས་བྱེད་ན༔ དམྱལ་བའི་སྡུག་བསྔལ་རབ་ཏུ་འཐོབ༔ གལ་ཏེ་དེ་ནས་ཐར་ན་ཡང་༔ བསྐལ་པ་བྱེ་བ་བརྒྱ་སྟོང་དུ༔ དམ་ཆོས་མིང་ཡང་མི་ཐོས་སོ༔ ཞེས་སོ༔ རྡོ་རྗེ་ཐིག་ལེ་འབྱུང་བའི་རྒྱུད་ལས༔ དངོས་གྲུབ་འབྱུང་བའི་དོན་ནི༔ རྟག་ཏུ་སློབ་དཔོན་བརྟེན་པར་བྱ༔ དེས་ནི་འདོད་པའི་འབྲས་བུ་སྟེར༔ དེ་ལ་བརྙས་ན་སྡུག་བསྔལ་ཐོགས༔ ཞེས་སོ༔ ཡང་བླ་མ་སྨད་པའི་ཉེས་པ་ནི༔ སྒྱུ་འཕྲུལ་དྲ་བའི་རྒྱུད་ལས༔ བླ་མ་ནི་སྨོད་པ་དང་༔ ཐུགས་དཀྲུགས་པ་ཡི་ཉེས་པ་ནི༔ ཕྱི་ཡི་རྒྱ་མཚོ་ཆེན་པོ་ལ༔ ཆུ་དེ་སྒྲ་ཡིས་གཏོར་ནུས་པ༔ དེ་ཡི་ཚད་དུ་སྡུག་བསྔལ་མྱོང་༔ རྡོ་རྗེ་དམྱལ་བར་གྲགས་པར་ཡིན༔ ཅེས་སོ༔ རྡོ་རྗེ་མཁའ་འགྲོའི་རྒྱུད་ལས༔ སློབ་དཔོན་སྨད་པར་མི་བྱ་སྟེ༔ འདི་ནི་སངས་རྒྱས་ཀུན་དང་འདྲ༔ སློབ་དཔོན་ལ་ནི་གང་སྨོད་པ༔ ཚེ་འདི་ཉིད་ལ་སྡུག་བསྔལ་འབྱུང་༔ རིམས་དང་དུག་ད་དབྱིག་དུག་དང་༔ ཌཱཀྐི་རྣམས་ཀྱིས་གཙེས་པ་དང་༔ གདོན་དང་ལོག་འདྲེན་གཏུམ་པོ་ཡིས༔ བསད་ནས་སེམས་ཅན་དམྱལ་བར་ལྟུང་༔ ཞེས་སོ༔ གཞན་ཡང་བླ་མའི་

གོས་ཆད་ལ་སོགས་དང་༔ སྐུ་ཡི་གྲིབ་མ་ལ་མི་འགོང་༔ ཡུམ་ལ་མི་སྤྱད༔ བླ་མ་ལ་ཅོ་འདྲི་བར་མི་བྱའོ༔ དེ་སྐད་དུ་ཡང་༔ བཛྲ་ཌཱཀྐིའི་རྒྱུད་ལས༔ སློབ་དཔོན་གྱི་ནི་མལ་སྟན་དང་༔ ལྷྭམ་དང་གདུགས་དང་ན་བཟའ་སོགས༔ མཉེས་པའི་བཙུན་མོ་ལོངས་སྤྱོད་དང་༔ གྲིབ་མ་འགོང་བར་མི་བྱ་ཞིང་༔ ཅོ་འདྲི་བར་ནི་མི་བྱ་ཞིང་༔ གལ་ཏེ་བྱས་ན་དུས་ཀུན་ཏུ༔ དེ་ནི་ཀུན་ཏུ་གཟིར་འགྱུར་ཞིང་༔ དོན་ཉམས་ལེགས་པ་རིང་དུ་འགྱུར༔ ཞེས་སོ༔ སྤྱིི་དོན་དགུ་པ་ཉེས་པ་བྱས་ན་བཤགས་པའི་ཚད་བསྟན་པ་ནི༔ ཉེས་པ་ལན་གཉིས་ནས་བཞི་དང་བཅུ་ལ་སོགས་རྣམས་བཤགས་པར་བྱས་པས་འདག་ལ༔ རང་གི་ལོ་གྲངས་ཙམ་ལས་འདས་ན་ནི་བཤགས་པས་མི་འདག་གི༔ དེ་ལྟར་ཡང་༔ ས་མ་ཡཱ་བཀོད་པ་ལས༔ གལ་ཏེ་བླ་མ་བརྙས་པའི་མིས༔ ལན་གྲངས་བདུན་ནམ་བཅུ་དག་ལ༔ འགྱོད་པ་བྱས་པས་བཤགས་པས་འབྱོངས༔ རང་ལོ་འདས་ནས་བཤགས་པའི་ཡུལ༔ རྡོ་རྗེ་སེམས་དཔས་མ་གནང་ངོ་༔ ཞེས་གསུངས་སོ༔ དེ་ཡང་དུས་ཐམས་ཅད་དུ་བླ་མའི་སྐྱོན་དོར་ཞིང་ཡོན་ཏན་ཅི་འདུག་པ་ལ་བསམ་ཞིང་བླ་མ་བརྟེན་པས༔ རྣལ་འབྱོར་པ་རྣམས་ཀྱིས་འདོད་པའི་དོན་འགྲུབ་པར་ངེས་སོ༔ དེ་ཡང་ཐལ་འགྱུར་གྱི་ལེའུ་དང་པོ་ནས༔ མཚན་ཉིད་རྫོགས་པའི་བླ་མ་ནི༔ ཡོན་ཏན་ཀུན་གྱི་འབྱུང་གནས་ཡིན༔ རྫོགས་པའི་བྱང་ཆུབ་གཞི་འཛིན་པའོ༔ ཞེས་སོ༔ སྤྱི་དོན་བཅུ་པ་ཡོན་ཏན་ལ་དམིགས་ནས་དུས་ཐམས་ཅད་དུ་བླ་མ་བརྟེན་པ་ལ་ཡོན་ཏན་ཇི་ལྟར་འབྱུང་བར་བསྟན་པ་ནི༔ ཡང་ཐལ་འགྱུར་ལས༔ བརྟེན་པ་དེ་ལ་ཡོན་ཏན་ནི༔ དཔག་བསམ་ཤིང་དང་ཡིད་བཞིན་ནོར༔ འདོད་འཇོའི་བ་དང་འདྲ་བ་ལས༔

ཡོན་ཏན་དཔག་ཏུ་མེད་པ་ཐོབ༔ དེ་ལ་དམིགས་ཏེ་བླ་མ་བརྟེན༔ འཁོར་བའི་གཡུལ་ལས་བཟློག་ཕྱིར་རོ༔ ཞེས་གསུངས་སོ༔ དེར་མ་ཟད་ཐུན་མོང་གི་སིདྡྷི་ཡང་བླ་མ་མཉེས་པ་ལས་འབྱུང་ངོ་༔ དེ་སྐད་དུ་ཡང་༔ དམ་ཚིག་ཆེན་པོ་མཆོག་གི་རྒྱུད་ལས༔ དངོས་གྲུབ་འདོད་པའི་དད་པ་ཅན༔ དངོས་གྲུབ་བླ་མ་མཉེས་ལས་འབྱུང་༔ ཞེས་སོ༔ གཞན་ཡང་མཆོད་པ་ཐམས་ཅད་སྤངས་ལ༔ བླ་མ་མཆོད་པས་ཐམས་ཅད་མཁྱེན་པའི་གོ་འཕང་ཆེན་པོ་ཡང་ཐོབ༔ རྡོ་རྗེ་སེམས་དཔའ་མཆོད་པ་ཡང་ཡིན༔ བསོད་ནམས་ཀྱི་ཚོགས་ཐམས་ཅད་ཀྱང་དུས་གཅིག་ལ་བསགས༔ ཆོས་ཕྱོགས་ཀྱི་དཀའ་ཐུབ་ཐམས་ཅད་ཀྱང་དེས་བརྟེན་ཅིང་སྤྱད་པ་ཡིན་ཏེ༔ དེ་བས་བྱ་བ་ཆེ་བཞག་ཆུང་བཤོལ་ལ་བླ་མ་ཇི་ལྟར་མཉེས་པའི་ཐབས་ལ་འབད་པར་བྱའོ༔ དེ་སྐད་དུ་ཡང་༔ དཔལ་སྡོམ་པ་འབྱུང་བའི་རྒྱུད་ལས༔ མཆོད་པ་ཐམས་ཅད་ཡོངས་སྤངས་ལ༔ བླ་མའི་མཆོད་པ་ཡང་དག་བརྩམ༔ དེ་མཉེས་པས་ནི་ཀུན་མཁྱེན་པའི༔ ཡེ་ཤེས་མཆོག་དེ་ཐོབ་པར་འགྱུར༔ བླ་མེད་མཛད་པའི་སློབ་དཔོན་ནི༔ རྡོ་རྗེ་སེམས་དཔའ་རབ་མཆོག་ག༔ིདེ་ཡི་བསོད་ནམས་མ་བསགས་ཤིང་༔ དཀའ་ཐུབ་མ་བརྟེན་ཅི་ཞིག་ཡོད༔ ཅེས་སོ༔ ཡང་གསང་སྔགས་ཀྱི་བླ་མ་རྣལ་འབྱོར་གྱི་དབང་ཕྱུག་ཆེན་པོ་དེ་མཆོད་ཅིང་མཉེས་པར་བྱས་ན་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱང་དེས་མཆོད༔ དཀྱིལ་འཁོར་ཆེན་པོ་ཐམས་ཅད་ཀྱང་དེས་མཆོད༔ ཉེ་བའི་དཀྱིལ་འཁོར་ཐམས་ཅད་ཀྱང་དེས་མཆོད༔ ཉེ་བའི་དཀྱིལ་འཁོར་ཞེས་ཀྱང་བྱ་སྟེ་རང་གི་ཡི་དམ་ལྷ་མཉེས་པ་སྨོས་ཅི་དགོས༔ ཐུན་མོང་གི་གཉིས་པ་སོ་སོར་ཐར་པའི་སྡོམ་

པ་ཉམཔ་དང་༔ མི་དགེ་བ་བཅུ༔ མཚམས་མེད་པ་ལྔ་པོ་ལ་སོགས་པ་དང་༔ ཁྱད་པར་གྱིས་ཉེས་པ་གསང་སྔགས་ཀྱི་དམ་ཚིག་ཉམ་པ་ཡང་འདག་པར་འགྱུར་རོ༔ དེ་སྐད་དུ་ཡང་༔ རྡོ་རྗེ་སེམས་དཔའ་སྒྱུ་འཕྲུལ་དྲ་བའི་རྩ་བའི་རྒྱུད་ལས༔ དབང་ཕྱུག་ལོངས་སྤྱོད་ལྔ་མཆོད་ན༔ དཀྱིལ་འཁོར་ཐམས་ཅད་མཆོད་པ་ཡིན༔ ཉེ་བའི་དཀྱིལ་འཁོར་སྨོས་ཅི་དགོས༔ ཉེས་པ་ཐམས་ཅད་དག་པར་འགྱུར༔ ཞེས་སོ༔ མདོར་ན་བླ་མ་བརྟེན་ཅིང་མཆོད་ན་ཡོན་ཏན་བསམ་གྱིས་མི་ཁྱབ་བོ༔ ཐུགས་ཀྱི་རྒྱུད་དཔལ་གསང་བ་འདུས་པ་ལས༔ དེ་བཞིན་གཤེགས་པ་གངྒཱ་ཀླུང་གི་བྱེ་མ་སྙེད་ལ་མཆོད་པ་དང་༔ བསྙེན་བཀུར་བྱས་པ་བས༔ བླ་མའི་བ་སྤུའི་བུ་ག་གཅིག་ལ་བསྙེན་བཀུར་བྱས་པའམ༔ བ་སྤུའི་བུ་ག་གཅིག་ཙམ་མཉེས་པར་བྱས་ན༔ བསོད་ནམས་ཆེའོ༔ ཞེས་སོ༔ ཟབ་འདུས་དོན་འདྲིལ་སྤྱི་དོན་བཅུ་པ་ཞེས་བྱ་བ༔ བླ་མ་སྒྲུབ་པའི་རིམ་པ༔ སྐལ་ལྡན་གྱི་དོན་དུ་སྤྲུལ་པ་པོ་དགའ་རབ་རྡོ་རྗེས་མཛད་པ་རྫོགས་སོ༔ སྔགས་ཀྱི་སྲུང་མ་ཨེ་ཀ་ཙ་ཏིས་བཀའ་འདིའི་བྱར་གྱིས་ཤིག༔ སྐལ་ལྡན་དང་འཕྲད་པའི་དུས་སུ་ལུང་ཁྲོལ་ཅིག༔ སྟོང་གྲོགས་གྱིས་ལ་དངོས་གྲུབ་བྱིན་ཅིག༔ སྣོད་མིན་གྱི་ལག་དུ་ཤོར་ར་རེ༔ སྲུངས་ཤིག་ས་མ་ཡཱ༔ ས་མ་ཡཱ༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ༔ ཤརྦྱ། ཅ། །སྠཉྵ༔ མངྒཱ་ལཾ༔ བྷ་ཝནྟུ༔

ཆོས་ཀྱི་རྗེ་མཚུངས་མེད་གྲགས་པ་རྒྱ་མཚོའི་རྣམ་ཐར་མེ་ཏོག་གི་ཕྲེང་བ།

ཆོས་ཀྱི་རྗེ་མཚུངས་མེད་གྲགས་པ་རྒྱ་མཚོའི་རྣམ་ཐར་མེ་ཏོག་གི་ཕྲེང་བ་ཞེས་བྱ་བ་བཞུགས་སོ། །

གང་ཞིག་དབྱིངས་ལས་མི་གཡོ་གདོད་མའི་མགོན། །རང་བྱུང་ལྷ་ནི་ཀུན་བཟང་ཡབ་ཡུམ་དང་། །རྡོ་རྗེ་འཆང་སོགས་བརྒྱུད་པའི་བླ་མ་ལ། །གསོལ་བ་འདེབས་སོ་བྱིན་གྱི་བརླབ་ཏུ་གསོལ། །ཡི་དམ་དཀྱིལ་འཁོར་ལྷ་ཚོགས་ལྷག་པའི་ལྷ། །མཁའ་འགྲོ་དམ་ཅན་རྒྱ་མཚོའི་ཚོགས་རྣམས་ཀྱིས། །དངོས་གྲུབ་རྣམ་པ་གཉིས་སྩོལ་བར་ཆད་སོལ། །བདག་ཉིད་དད་པའི་ཡིད་རབ་གཡོས་པ་ལས། །དད་ལྡན་སློབ་མའི་དང་བ་འདྲེན་བྱེད་དུ། །དཔལ་ལྡན་བླ་མའི་རྣམ་ཐར་མདོ་ཙམ་བྲི། །དེ་ལ་ནོངས་པ་མཆིས་ན་བཟོད་མཛད་རིགས། །དེ་ལ་འདིར་བདག་གི་བླ་མ་དམ་པ་རྣལ་འབྱོར་གྱི་དབང་ཕྱུག་དེ་ཉིད། དང་པོ་ཡུལ་མཆོག་ཏུ་གྱུར་པ་རིགས་རུས་ཀྱི་ཆེ་བར་སྐུ་བཞེས་ཚུལ། གཞོན་ནུའི་ཚེ་ནས་ཆོས་ཀྱི་སྐལ་བ་ཡོད་ཚུལ། དེའི་སྟོབས་ཀྱིས་ཆོས་ཀྱི་སྒོར་ཆུད་ཚུལ། དེ་ལས་མཁས་གྲུབ་ཀྱི་བླ་མ་བསྟེན་ཚུལ། དེ་རྣམས་ལས་དམ་པའི་ཆོས་ལ་ཐོས་བསམ་

སྒོམ་པ་མཛད་ཚུལ། དེ་ནས་གྲྭ་བུ་སློབ་དང་སེམས་ཅན་སྤྱི་ལ་ཕན་པ་མཛད་ཚུལ། བར་ཆད་དང་ལོག་འདྲེན་བཏུལ་ཚུལ། ཡི་དམ་ལྷའི་སྣང་བ་ཐོབ་ཚུལ། བླ་མ་རྣམས་ཀྱིས་ལུང་བསྟན་ཐོབ་ཚུལ། ཐ་མ་དག་པའི་དབྱིངས་སུ་གཤེགས་ཚུལ་སོགས་དོན་བཅུས་བསྟན་པ་ལས། དང་པོ་ལྟར་ན། ཡུལ་ནི་དམ་ཆོས་དར་ཞིང་དགེ་བཅུ་ལ་སྤྱོད་པའི་གནས་གྲ་གཙོ་བོ་གྲོང་། ཡབ་ནི་ཀུན་དགའ་འབུམ་ཞེས་འབྲོམ་སྟོན་པ་རྒྱལ་བའི་འབྱུང་གནས་ནས་བརྒྱུད་པའི་འབྲོམ་གྱི་རིགས། སྙེ་མོ་གཞུ་ཀུན་དགའ་ར་བ་ཀ་བ་བརྒྱད་ཅུའི་བདག་པོ་བུ་རེ་སྐྱེས་པ་དང་འབུམ་ཚར་རེ་བཞེངས། གཙུག་ལག་དེར་གདན་འདྲེན་རབ་གནས་བུའི་རྐང་ཚུགས་བྱེད་པས། མིང་ལ་འབུམ་ཞེས་པའང་དེ་ཡིན་པར་འདུག །ཡུམ་ནི་སངས་རྒྱས་རིན་ཆེན་གྱི་བུ་མོ་བསམ་འགྲུབ་འབུམ་གཉིས་ལས། སྲས་ནི་གསུམ་ཡོདཔ་ལས། དྲུང་པ་ཉིད་འབྲིང་

པོར་འཁྲུངས་པར་འདུག །གཉིས་པ་ལྟར་ན། སྐུ་ན་གཞོན་ནུའི་དུས་ནས། ཆོས་ལ་མོས་པ་དད་པ་ངེས་འབྱུང་ཡོད་པས་སེར་གཟུགས་ལ་དགའ་བ། མ་ཎི་སོགས་ཞལ་འདོན་ཕྲན་ཚེག་ལ་བརྩོན་པ། ཁྱད་པར་ཡི་གེ་འབྲི་ཀློག་ལ་ཐུགས་སོང་ནས། སློབ་དཔོན་ལས་ཀློག་རྒྱུ་མ་བྱུང་ནའང་། ངེད་རང་གི་དྲུང་ཕ་ཁུ་ཕ་ཇོ་ལ་ཀ་ཁ་འབྲི་ནུས་གང་ཤེས་བསླབས། དེ་ནས་དཔེ་ཆོས་ཤོག་ཚལ་བ་དང་ཡན་པ་ཁྱེར་ནས་ལས་ཀའི་ཞར་ལ་བསླབས་པས་བརྡའ་འཇོལ་བ་བྱུང་གསུངས། ཇོ་བོ་ཆེ་བ་ཧོར་འདྲ་བྱེད་པས་ཡི་གེ་ལ་ནན་དུ་བསླབས། བདག་གིས་གཡོག་གི་ཞར་ལ་བསླབས་པ་མ་གཏོགས་མ་བྱུང་སྟེ། ཞར་གྲབ་ཙམ་བྱུང་བས། ཨ་མས་ཀྱང་ཁོ་བོས་ཞར་ལ་བྱས་པ་འདི་དྲག་པ་འདུག་ཟེར་ནས། ང་རང་སློབ་བཅུག །ཇོ་ཇོ་ལ་གཡོག་འཆོལ་བ་ཡང་དུ་མར་རེ་བྱས་དུས། དེ་རྣམས་ཀྱི་གཟུགས་ཀྱག་ཀྱོག་བྲིས་པས་དུམ་པ་ཤེས། སྟེང་དུ་ཇོ་ཇོ་ཡི་གེ་སློབ་པར་བཏང་ནས། བདག་གིས་རྩམ་པ་ལ་ཕྱིན་པས། ཇོ་ཇོ་ཡུལ་དུ་བྲོས་འདུག །ང་རང་གིས་ཁྱེར་བའི་རྩམ་པ་མ་ཟད་བར་ཞང་པོ་ལས་ཡི་གེ་བསླབས། ཞག་བརྒྱད་བསྡད། དེ་ནས་ཞང་པོ་ལ་རྩམ་པ་སྐྱིས་སྡོད་བསམ་པ། ཨ་མས་འཐབ་དོགས་ཡུལ་ལ་ཕྱིན། དཔེ་ཆ་འབྲི་ཐུབ་ཙམ་པའི་ཡི་གེ་འདི་དེ་ཡིན་གསུངས། གསུམ་པ་ལྟར་ན་ཞང་པོ་ལ་བཙུན་པ་གཅིག་བྱེད་བསམ་པ་ཡིན་བྱས་པས། དེ་ག་དྲག་ཟེར། ང་རང་ཡང་བློ་ཡུལ་དུ་དེ་ཁ་བཅངས་ནའང་། མ་སྐྱུར་མ་ཕོད་པ་དང་། ནུ་བོ་ཡང་ཆུང་། ཇོ་ཇོ་ནང་སོར་བསྡད་པས། མས་གང་ཡང་མི་ལྕོགས་པར་འདུག་པས་ལོ་གཉིས་འགྱངས། དེ་ནས་འདི་ཚོ་ལ་ཟིན་པའི་དུས་མི་འདུག །ཏིག་པོ་མེད། ང་རང་ཆོས་ལ་འགྲོ་

བསམ། ཡོ་བྱད་འདྲ་བ་ལྐོག་ཏུ་མཚོན་པ་བསགས། ཇོ་ཇོ་ལ་གྲོས་ཤིག་འདེབས་དགོས་བསམ་དོལ་གཞིས་ཁར་ཕྱིན་པས། གྲོས་མེད་པའི་སྟེང་དུ། ངུ་ཞིང་འདིའདྲ་ཕོད་པ་ཟེར། མི་ཤི་བ་ཁད་ཟེར་ནས། ངའི་ཕྱི་ལ་ཡུན་རིང་དུ་བྱུང་། མ་བྱེད་ཟེར་བས། གདོང་དུ་དེ་ཁ་ལགས་བྱས། ཁོང་དང་བྲལ་ནས་ཐག་རིང་དུ་སོང་ནས་ཁྱོད་ལ་ཏིག་ཏིག་མེད། ང་རང་བཙུན་པ་རང་བྱེད་བསམ། དེ་ནས་ཡུལ་དུ་སླེབ་ཨ་མ་ཇོ་ཇོ་འདི་སྐད་ཟེར། ཁྱོད་ཅི་བསམ་པ་ཡིན། ངས་ནི་ཆོས་ཤིག་དང་འཕྲད་ན་རང་ལ་དགའ་ཞིང་ཁྱོད་ལའང་ཕན་ཐོགས་པ་ཡོང་ཟེར་བ་སོགས་ཁེ་ཉེན་མང་དུ་ལབ་ཀྱང་ང་ཤི་བ་ཁད་ཟེར་ཞིང་ངུ་བ་ཡང་བྱེད་པས། ཁྱོད་འབྱུང་མེད་མ་ཞིག་འདུག །ང་འགྲོ་བླ་མ་དེ་ནི་སངས་རྒྱས་དངོས་ཡིན། ཁྱོད་རང་ཡང་བཙུན་མ་བྱེད་ན་སང་ཤོག་བྱས། མ་དང་གཉེན་བཤེས་ལ་འདུན་པ་བོར་རོ། །ཚེ་འདི་ལ་ཕྱི་མིག་མ་བལྟས་པར་ཡོང་དུས། སྒོར་སླེབས་པས་ནང་སོ་དྲུང་བྱང་སེམས་བུ་འདྲེན་དཔལ་བ་དེ། ཐུགས་ལ་འདོགས་པས་རིབ་ཙམ་མཛད་མཇལ་དུ་འགྲོ་བསམ། ཕྱི་ནས་འདི་ལྟར་འགྲོ་ཞུས་པས། མི་དྲག་ཨ་མ་ཉེན་མོ་སྙིང་རྗེ་གསུངས། ཅིས་ཀྱང་འགྲོ་བའི་ལམ་ཡིན། ཨ་མ་ཡང་གཞན་བྱས་པ་ནི་མིན་ཆོས་བྱས་ནས་སྙིང་མི་རྗེ་ཞུས་པས། འོ་ན་ཆོས་མགོ་ཐོན་པར་གྱིས། འདི་ལ་འཐུད་གྱིས་གསུང་སྣམ་བུ་གཅིག་ཇ་སྦྱོར་གཉིས་ཙམ་ཞིག་གོས་ཁ་གང་རྣམས་གནང་བྱུང་དེ་ཚོ་ཡར་ཁྱེར་ཕྱིན། བྱམས་སྡིངས་སུ་སླེབས་པ་ཙམ་གྱིས་སེམས་ལ་དགའ་བ་དཔག་དུ་མེད་པ་བྱུང་། དེ་དགོངས་ཞང་པོས་སྙན་ཞུས་ཕུལ། སང་ཞོགས་དེ། ང་རང་གི་ལོ་ཉི་ཤུ་རྩ་གསུམ་

བྱི་བ་ལོ་ཟླ་བ་ཡར་ངོའི་གྲལ་ཚེས་བཟང་པོ་ལ། མཁན་སློབ་སྤྲུལ་སྐུ་རིན་པོ་ཆེ་དང་། འཁྲུལ་ཞིག་རིན་པོ་ཆེ་རྣམ་གཉིས་དགེ་འདུན་དང་བཅས་པའི་དྲུང་དུ་རབ་ཏུ་བྱུང་སྟེ། མིང་ཡང་མཚན་གཉིས་ཀ་ནས་སྦྱར་ཏེ། གྲགས་པ་རྒྱ་མཚོ་ཞེས་གནང་བས། དུས་དེ་ནས་འཇིག་རྟེན་ལ་སྤྲོ་བ་བཅད། དམ་པ་ཆོས་ཀྱི་སྒོར་ཚུད་པ་ཡིན་གསུང་། ཁྱེད་ཚོ་ཆོས་བྱེད་པ་ལ་གེགས་མེད་པར་བྱས་ཆོག་པ་དགའ་བོ་རང་ཡིན། སློབ་གཉེར་གཞན་ལ་འབུངས། ང་བཙུན་པ་བྱེད་པ་ལ་དཀའ་བ་དེ་ཙམ་བྱུང་གསུང་། བཞི་པ་ལྟར་ན་རྩ་བའི་བླ་མ་མཐར་ཐུག་ཞེན་ཆེ་ཞིང་། གཙུག་གི་ནོར་བུ་བཞུགས་པ་རིན་པོ་ཆེ་སྤྲུལ་སྐུ་བ། འཁྲུལ་ཞིག་རིན་པོ་ཆེ་བྱ་བཏང་ཆོས་རྗེ་གུ་ཡངས་ཡན་པ་བློ་བདེ། མཁས་གྲུབ་དཔལ་ལྡན་རིན་ཆེན་ཆོས་རྗེ་གྲགས་དོན་པ། མཁས་གྲུབ་པདྨ་བཟང་པོ་རྣམས་ཡིན་གསུངས། ངེད་རང་ཡང་དེ་གོ་རྒྱུན་གྱི་ཕྱག་མཆོད་བསྡུས་པ་ཙམ་ལ། དེ་རྣམས་ལ་མཛད་པ་འདུག་པས། གཞན་ཡང་ཆོས་ཀྱི་རྗེ་རིན་པོ་ཆེ་བསོད་ནམས་བཟང་པོ་སོགས་ཀྱིས་ཁྲིད་མ་བུ་ཚང་བར་གནང་བས་གྲོལ་བ་ཆེར་ཐོང་བ་དང་། རྟོགས་ལྡན་རིན་ཆེན་དཀོན་མཆོག་རྡོ་རྗེ་ལ་སོགས་ཀྱིས་ཞེན་མེད་ཀྱི་སྤྱོད་པས་བློ་སྣ་འགྱུར་བ་དང་། ཆོས་རྗེ་བཀྲས་དཔལ་སོགས་ལ་གསང་སྔགས་ཀྱི་དབང་བཀའ་དང་། ཕ་རོལ་ཕྱིན་པའི་ལུང་སྣ་འགའ་ཟུང་གིས་འབྲེལ་བའི་བླ་མ་དམ་པ་མང་དུ་ཡོད་པ་ཞབས་ཏོག་གསུམ་གྱིས་མཉེས་པར་བྱས་ནས་བསྟེན་པ་ཡིན་གསུང་། ཞབས་ཏོག་གསུམ་ལ་སྒྲུབ་པའི་ཞབས་ཏོག་ཉམས་ལེན་སྒོམ་པ་མཛད་པའི་སྐབས་སུ་འབྱུང་བ་ལགས། ཡོ་བྱད་ཀྱིས་མཉེས་པ་ཆེར་མ་བྱུང་ནའང་། བསྟན་པ་རིན་པོ་ཆེའི་ཞབས་ཏོག །བླ་མའི་བཀའ་དྲིན་

གསོབ་བྱེད་ཕ་མའི་དྲིན་ལན་ཁེལ་བྱེད་ངེད་རང་གི་དགེ་སྦྱོར་གྱི་བར་ཆད་ཞི་བའི་ཕྱིར་དུ། དང་པོ་ལ་བསོད་སྙོམས་བྱས་པའི་ནས་མཚོན་པ་གཅིག་ལ་བརྟེན། བྱམས་སྡིངས་སུ་ཁྲིད་ཆེན་མོའི་ཚོགས་མ་བུ་ཕྱག་རྟེན་གང་འོས་དང་བཅས་པ་ཆོས་རྗེ་རིན་པོ་ཆེ་ཞང་དབོན་པས་གཙོ་མཛད། ཆོས་ཞུ་ཕྱེད་དང་ཉིས་བརྒྱ་ཙམ་ལ་ཞུས། དང་པོ་ཆོས་ཞུ་བའི་རྐང་བྱས། གཞན་པའི་རྒྱུ་ཆ་རྐྱེན་གྱིས་ལྕོགས་ཀྱང་སྙིང་གིས་མཆུན་པ་དཀའ་ཙམ་བྱུང་བ་ལ། བདག་གིས་བྱས་པས་བླ་མ་མཆེད་གྲོགས་དང་བཅས་ཤིན་ཏུ་མཉེས་མགོ་ལེགས་ཏེ། རྟིང་དུ་མང་དུ་བྱས་ཆོག་པ་བྱུང་གསུང་། རིན་པོ་ཆེ་གྲགས་དོན་པས་གྲ་ཐང་དུ་རྒྱལ་བའི་བཀའ་འགྱུར་རོ་ཅོག་བསྟན་འགྱུར་དང་བཅས་པ་གནང་དུས་ཆོས་ཉན་རྣམས་ལ་ཚོགས་འཁོར་གཅིག་གཉིས་དང་གཟིམས་ཁང་དུ་གདན་མང་དུ་ཞུས། དྲུང་དུ་ན་བཟའ་སོགས་འབུལ་བས་མཉེས་པར་བྱས། དེ་ནས་དཔལ་སྡིངས་སུ་ཕེབས། རྡོ་རྗེ་ཕྲེང་བའི་དབང་གནང་དུས་དབང་ཞུ་རྣམས་ལའང་། དབང་ཁྲལ་གྱི་དད་བསྐུལ་མཚོན་པ་བསྡུས། ངེད་རང་གི་གཞི་གང་འདུག་བླངས་དུས། དང་པོ་འཛུགས་སྟོན་བཟང་པོ་གཅིག་བྱས། དབང་ཞག་རེ་ཚོགས་དང་། ཐོན་པའི་ཉིན་ཚོགས་ཕུན་སུམ་ཚོགས་པ་དང་། དྲུང་དུ་དབུ་ཞྭ་ན་བཟའ། སྣམ་བུ་འཇམ་པོ་སོགས་དགུ་ཚན། ནས་རྒྱབ་དགུ་ཤ་ཁོག་བཅུ་གཅིག་མར་དུམ་གཅིག་རྣམས་ཕུལ། གངས་ཁྲོད་དགོན་པར་གསང་སྔགས་གསར་སྙིང་གི་རྒྱུད་འབུམ་གཉིས་གནང་དུས་རྒྱུད་མཆོད་ཚོགས་འབུལ་བ་སོགས་ཞུས། ཡང་དེ་གར་རྒྱུད་སྔ་ཕྱི་བར་གསུམ་གྱི་ཆོས་ཞུས་དུས་ཀྱང་འབུལ་

བ་ཚོགས་རྣམས་ཞུས། མདོར་ན་ཆོས་དབང་གདམས་པ་གང་དང་ཅི་ལ་གང་འཚམས་ཀྱི་འབུལ་བ་དབང་སྟོན་ཆོས་སྟོན་གྲོགས་མཆེད་རྣམས་ལ་ཚོགས་ཕལ་ཆེར་བྱས། བྱ་བཏང་བྱས་དུས་ངེད་རང་ལ་བྱེད་རྒྱུ་མེད་པར་ཕན་གཟན་བཀལ་བ་ཡང་དུམ་བུ་བྱུང་གསུང་། གཞན་ཡང་དབོན་པོ་ཆོས་དཔལ་དང་དག་དབང་རྣམ་རྒྱལ་སྤུན་གཉིས་ཀྱི་བཤད་གསར་སོགས་ལ་ང་རང་གི་རྒྱུ་རྣམས་བཏོན། རྩེ་ཐང་དུ་མར་ཇ་སྟོང་ཚད་འབུལ་བ་སོགས་ལན་གཉིས་དང་། གྲ་ཐང་བྱམས་གླིང་རྣམས་སུ་ཚར་འགྱེད་དང་བཅས་པ་རེ་བྱས། རྟིང་དུ་ངེད་རང་གི་ཐབ་ཀྱང་འགྲོས་སྒོ་ཆེས་པ་དང་། སྐྱོང་དགོས་ཀྱང་མང་བས་ལེན་མ་གཏོགས། ཆོས་ཕྱོགས་ལ་གཏོང་བའི་འདོད་ཆེན་པོ་ཡོད་དེ་དཀའ་མོ་འདུག་གསུང་། དང་པོ་དེ་དུས་ང་རང་གི་ཁ་མིན་པ་སྐྱོང་དགོས་མེད་པས་ཕ་མ་ལ་ཡང་ཡོག་མི་ཡོང་ཙམ་བྱས། ཨ་མ་འདས་དུས་མ་ཤི་ཙམ་ནས་དམིགས་པ་དང་འཕོ་བ་གང་ཤེས་ཡོད། ཤི་ནས་དེ་མ་ཐག་གསུང་སྒྲོགས་པ་བཞག །དཀོན་མཆོག་ལ་མཆོད་པ་ཕུལ། དགོན་པ་ནས་གང་དགོས་ཀྱི་ཡོ་བྱད་བླངས། ཇོ་ཇོ་ཉེ་རིང་གི་མ་སླེབས་གོང་དུ་བླ་མ་མཆོད་གནས་སོགས་བཟང་རགས་སྤྱན་དྲངས། འདས་ནས་ཞག་གསུམ་སོང་དུས་ཆོ་ག་ཚུགས་ཞག་ལྔ་སྦྲེལ་ཙམ་དུ་བྱས། ཡུལ་མི་དང་དགོན་པ་ནས་དགེ་འདུན་རྣམས་ལ་འགྱེད་མི་ལ་མི་འཆོར་བ་ཞིག་བྱས། བདུན་ཚིག་ཟླ་མཆོད་སོགས་ང་རང་གིས་བཟུང་ནས་མ་ཆགས་ཙམ་ལོ་མཆོད་རྟེན་བཞེངས་ཚུན་ཆད་ལ་བཅོམ་ལྡན་འདས་སྨན་བླའི་ཕོ་བྲང་དར་ཆ་དང་ཚོན་གྱིས་ངོམས་པ་འདི་བཞེངས་པ་ཡིན། སྡེ་པ་ཆེན་པོ་མིན་པ་གཞན་གྱིས་འདད་དང་ཆ་ལང་དཀའ་གསུང་། བླ་མ་རྣམས་གཤེགས་

རྗེས་སུ་དུས་མཆོད་རེ་ཙམ་འཛིན་པ། ཨོ་རྒྱན་གྱི་ཚེས་བཅུ་རེ་བྱེད་པ་ངེད་རང་གི་དགོན་པ་ཕན་ཚུན་དུ་སྒྲུབ་མཆོད་རེ་གསོ་བ། མ་ཎི་བ་རྣམས་ལ་ཚ་བ་རེ་འདྲེན་པ་སོགས་གང་ལྕོགས་ཀྱི་དགེ་བ་དང་། བླ་མའི་ཕྱོགས་ལ་གཏོང་པས། མི་ཅི་བསམ་ཀྱང་། ངེད་རང་བློ་བདེ་བ་དང་འཕྲལ་ཡང་སྐྱིད་པར་བྱུང་གསུང་། བདག་གིས་ཀྱང་ཙག་ཙག་ཅུག་མཛད་ཀྱང་མཛད་པ་ཆེ་བ་ལ་གཞན་དང་མི་འདྲ་བའི་ཐུགས་ཤོགས་ཆེ་བ་གསུངས་པ་བཞིན་ཡིན་པར་གོ། ལུས་ངག་གི་ཞབས་ཏོག་ལ་སྤྱིར་གྱི་བླ་མའི་ཞབས་ཏོག་ལ་དགེན་བཅུད་མ་བྱས། ཁྱད་པར་གང་གིས་གསུང་པ་ལ་གསུང་བཅག་པ་མེད། དེ་ལས་ཀྱང་བྱམས་སྡིངས་སོགས་སུ་ནང་པའི་འདྲེན་འགུགས་དགོངས་པ་རྣམས་ལ་རྒྱགས་པ་དང་། དང་གདོས་པའི་དཔེ་ཐུབ་པ་བྱས། བྱ་གཏང་ཆོས་རྗེའི་ཐུགས་བཞེད་ལ་འཚར་གཅིག་བཞེད་འདུག་པས། བསོད་སྙོམས་བྱས་ནས་གང་དེས་བསྒྲུབས་ནས་འབུལ་དགོས་བསམ། འཕན་ཡུལ་དུ་བཙལ་བས་མ་རྙེད། བྱང་སྟག་ལུང་དུ་འགྲོ་དགོས་བྱུང་ཡང་དམ་བཅའ་མཐར་སྐྱེལ་བསམ་སྟེ་བཙལ་བས་རྙེད་དེ་ཕུལ་བས་ཐུགས་མཉེས་པར་བྱུང་བླ་མ་གང་མཉེས་དེ་ལག་ན་ཡོད་ན་འབུལ། མེད་ན་བཙལ་ནས་རིན་གྱིས་བསླུ་བ་དད་པ་ཅན་ལ་འདུག་ན་བསྐུལ་བ་སོགས་བྱས་པ་ཡིན་གསུང་ཡང་རྫོང་དུ་ཁྲིད་ཀ་གསུང་པ་ལ་ཕྱག་དཔེ་སྐྱིད་སྨད་དུ་ལུས་ནས་མེད་གསུང་པ་ལ། གཞན་མ་རྣམས་ཨ་མདོ་བ་སོགས་ཀྱིས་ལམ་ལ་འཇིགས་ནས་འགྲོ་ཟེར་བ་མ་བྱུང་། ཆོས་ཐུགས་རྗེས་འཛིན་ན་ངས་འགྲོ་ཞུས་པས། དེ་ལ་ཟླའོ་གཅིག་དགོས་གསུང་མི་དགོས་ཞུས་པས། གཞན་མ་དྲང་ཡང་ཡོད་གསུང་ངེད་གཉིས་ཕྱིན་ཕྱག་དཔེ་རྣམས་ངས་

ཁུར་ཁོས་དར་དང་ཤ་དང་ལོ་ཆས་རྩམ་པ་རྣམས་ཁུར་ཡར་ཡོང་དུས། བྱེ་མ་ཀླུང་གྲོང་དུ་རྟ་པ་བཅུ་དང་ཐུག །རྒྱུག་པ་རིང་པོ་གཅིག་ཡོད་པས་རྟའི་སྣ་གོང་ལ་བརྒྱབ་སྟེ་གདོང་བླངས། ཁོ་འབྲོས་སུ་བཅུག་པས་ཚད་ནས་འབྲོས་པ་ཡང་མ་བྱུང་བར་འགྱེལ་ནས་ལུས་ཏེ། དྲ་བ་ན་གང་འདུག་དང་ལུས་ཆས་ཀྱང་ཤོར། ངས་རྟ་པ་གཉིས་གན་རྐྱལ་སྒྱེལ་བ་རི་ཟུར་དེ་ལ་འཛེགས་པས་ཕྱག་དཔེ་རྣམས་དྲངས་ཏེ། དྲུང་དུ་ལོ་རྒྱུས་ཞུས་པ། གོས་རྣམས་ངས་ཁུར་གཞན་མ་ཁོང་ལ་བསྐུར་ན་འཚེངས་པ་ཞུས་པས། ཉིད་དེ། འདི་ཀ་གོ་བཅད་གཞན་མ་རྣམས་ཤོར་ཀྱང་ངའི་དཔེ་ཆ་མ་ཤོར་བ་ལེགས་གསུང་མཉེས་པ་ཆེར་མཛད། དེ་ལ་སོགས་ཏེ་བླ་མའི་གསུང་བྱུང་ན་ཕྱིས་ཀྱང་མི་དོར་བར་ཕྱིན་པ་མང་གསུང་། གཞན་རྟེན་གསུམ་བཞེངས་པ། གུང་ཐང་དང་། གྲ་ཐང་དང་། ཞོང་སྟེངས་སོགས་ཀྱི་མཆོད་རྟེན་ཞིག་གད་གསོས་བྱེད་པ་ལ་ལུས་ཀྱིས་གང་ལྕོགས་འབུངས་པས་སྒྲིབ་པ་དག་པའི་རྟགས་རེ་ཙམ་བྱུང་བ་ཡོད་གསུང་། ངས་ནི་གང་གསུང་བསྒྲུབས་པ་ལས། བླ་མའི་བཀའ་གཅོག་མ་མྱོང་། ཁྱེད་ཚོས་བླ་མའི་བཀའ་བཅག་ན་སྐྱིད་པོ་མི་ཡོང་གསུང་། ལྔ་པ་ལྟར་ན་བླ་མ་རྣམས་ལས་གདམས་ངག་ཐོབ་ཚུལ་གསན་ཡིག་ལྟར་ལགས། ཉིད་ཀྱིས་ཐོས་བསམ་ལ་སྦྱངས་པ་མཛད་ཚུལ་ནི། ང་རྒན་ཞུགས་ལྟ་བུ་ཡིན་པས་འཛིན་ཡོང་རྒྱུ་མེད། དང་པོ་རྫོགས་ཆེན་གྱི་གཏོར་མ་ཆོས་སྤྱོད་གསོལ་འདེབས། བླ་མའི་ལས་བྱང་ཆོས་སྐྱོང་བསྐང་གསོ། ཞི་ཁྲོའི་བསྒོམ་ཁོག་དོན་ཕྲིན། བསྐང་བཤགས་རྣམས་ཉིན་ནུབ་ཁ་སྦྱར་ཏེ་བཟུང་ནས་བསླབས། དེ་ནས་སྤྱོད་འཇུག །ཐེག་གསུམ་གསལ་

བྱེད་རྣམས་བློ་ལ་ཆུ་རྒྱུག་པ་འདྲ་བྱས། དོན་ཡང་གང་ཤེས་གོ་བར་བསླབས། རྡོར་དབྱིངས་ལག་ལེན། ས་ཆོག་རྒྱས་པ། མཆོད་གར་ལ་སོགས་ཆ་ལག་ཚང་བ་དང་། ཚེ་དཔག་མེད་གྲུབ་རྒྱལ་མ། ལྷ་དགུ་མ། ཀུན་རིག་གཞན་ཕན་འོད་ཟེར་ཆ་ལག་དང་བཅས་རྒྱུད་སྡེ་ལྔའི་སྒྲུབ་མཆོད་བྱེད་ལུགས་རྒྱས་པ། བདེ་མཆོག་ལུ་ཧི་པ་རྣམས་ཁ་ཡོད་ལག་ཡོད་ཙམ་དུ་བསླབས་པ་ཡིན་གསུང་། གཞན་ཡང་སྨན་ལྷ་ཀཾ་ཀ་ནི་སོགས་ཟབ་ཆོས་དང་། བསྙུང་གནས་ཆོས་སྐྱོང་སྐོར་ལག་ལེན་དང་། མདོ་ཕྲན་ཚེགས་སྨན་དཔྱད་སྐོར་ཕན་བྱ་དང་སྒྲའི་མཚམས་སྦྱོར་དུམ་གཅིག་སོགས་གང་ཤེས་འཛིན་ལ་ཁྱེར་ཁ་མེད་ནའང་། སྒྱིད་ལུག་མ་བྱས་པར་དཀའ་བ་སྤྱད་དེ་བསླབས། ཁྱོད་འཛིན་ཡངས་དུམ་པ་འདུག །སློབ་གཉེར་བྱེད་པ་ལ་རྩམ་པ་སྐྱེལ་མཁན་དང་གེགས་མེད་པར་བྱས་ཆོག་པ་རྣམས་འབུལ་རྒྱུ་ཡིན། ང་འདྲ་བ་ཤི་ནས་དགོན་ཁོག་འདི་ཚོ་འཛིན་པ་དང་། མིིའི་སྣ་ངོས་བསྟུན་བསྟུན་གྱིས་མི་འོང་གསུངས་པས་བདག་ལ་ཇི་ལྟར་གསུང་གསུང་པ་བཞིན་བྱུང་། ད་ཉམས་ལེན་མཛད་ཚུལ་ནི་ཁྱེད་སྒོམ་བྱེད་འདོད་ན་འདི་འདྲ་བས་མི་ཡོང་། ངེད་ཚོ་དང་པོ་ཆོས་ལ་བློ་སོང་ཙ་ན་སྤྱིར་གྱིས་ཆོས་སྒོར་ཞུགས་ནས་དགོན་པ་དང་མ་བྲལ་ཙམ་དུ་བྱས་དུས་གལ་ཏེ་ཀླུངས་སུ་ཕྱིན་ནའང་། ཁྱིམ་པའི་ནང་དུ་མི་འགྲོ་བར་ཞག་རེ་ཙམ་ལུས་ནའང་ཅོག་པུ་སོགས་འགེལ་བར་སྡོད་པ། ཁྱད་པར་བྱམས་སྡིང་། ཞུལ་གང་པོ། རྫ་སྤོ་མཐོ། ཚལ་མིན་རི་ཁྲོད། དཔལ་སྡིངས་ཀྱི་སངས་རྒྱས་སྒོམ་ཁོང་། རི་བོ་བསམ་གཏན་གླིང་། ཆོས་ལུང་གི་བྲག་ཕུག་ཞར་མ། ཡང་རྫོང་ལྷན་རྫོང་། སྤང་པོ་སྡིངས། རི་བོ་བདེ་ཆེན་ལ་སོགས་ཏེ་བླ་མ་

གོང་མའི་སྒྲུབ་གནས་དང་རི་བྲག་རྣམས་སུ་གོས་བེན་དུག་དང་། ཁྱི་ཐུལ་རེ་དང་། རས་རྐྱང་བྱས་དུས་རས་ལ་བརྟེན། ལྟོ་འབྲུལ། རྟག་ཏུ་ངུ་། བདུད་རྩི་རིལ་བུ། དབང་ལག །ཆུ་སོགས་ལ་བརྟེན། དཀའ་ཐུབ་བཅུད་ལེན་མ་བྱས་དུས། རྒྱགས་ལ་སྲིས་སྲི་ཡགས་བྱས་ནས་མུན་ཁང་འདག་འབྱར། རི་མི་འབེབས་ཐབ་སྤངས་ལ་སོགས་མང་དུ་བྱས་པ་ཡིན། ཆོས་བྱེད་པ་ལ་ལྟོ་གོས་ལ་གྱོང་རེ་ཙམ་འགེལ་དགོས་པ་ཡིན། ཁྱེད་ཚོས་དཀའ་ཐུབ་སོགས་ཅིའང་། ཆོས་ཉན་པའི་དུས་འདིར་དེ་རིང་གི་གྲོའི་རྐྱེན་མི་ཐེག་པར་ཆོས་ཐུན་ཆེ་ཙམ་བྱུང་ན་ང་ལ་འཐབས་ཚད་ཚད་ཡོད་པར་འདུག །དེ་ལ་བྱང་ཁ་བ་འདི་ཚོ་ཐབས་རྡུགས་པར་འདུག །དེ་འདྲས་མི་ཡོང་། གོང་གི་བཞིན་དགོས་པ་ཡིན་གསུང་། ང་དང་པོ་ནས་དཀའ་ཐུབ་སོགས་བྱེད་པ་ལ་བློ་འགྲོ་བས་གཞན་གྱིས་བྱེད་ཀྱི་ཟེར་བ་ལ་འགྲན་སེམས་སྐྱེས་པས། གྲོགས་མཆེད་གཅིག་བདུད་རྩི་རིལ་བུ་བྱེད་ཟེར་བ་ཐོས་པས་ང་རང་ཡང་ཟ་དགོས། དེ་རིང་རང་ཚོད་གཅིག་ལྟ་བསམ་ནས་ངེད་རང་གི་དྲི་མ་གཅིག་བཏང་ནས་དེ་ལ་གཡམ་པའི་ཐུར་མ་བཙུག་གྱུར་མིད་བྱས་པས། འདི་ལ་སྨན་སོགས་སྦྱར་བས་བཞིན་ཏེ་ཞིམ་བསམ་སྤྲོ་བ་སྐྱེས་གསུང་། རྟིང་དུ་བཅུད་ལེན་སོགས་ཀྱི་ལུང་ཐོབ་ནས། ཞུལ་ར་རྒྱུད་ཕྱིའི་བསྙེན་པར་བྱེད་པའི་རིལ་བུ་བྱས། ཟས་གཞན་གྱི་འཁྲི་བ་བཅད་ནས། སྔོན་ཏུ་ཟླ་བ་དྲུག །རྟིང་དུ་ཟླ་བ་བཞི་བྱས་པས་ཤིན་ཏུ་འཇམ་པར་བྱུང་། བྱམས་ལྡིངས་སུ་དབྱར་ཟླ་བ་དྲུག་ཐབ་སྤངས་བྱས། རྩམ་ཁལ་ཕྱེད་དང་གཉིས་ལ་བརྟེན་ནས། དགེ་སྦྱོར་སྨར་བར་བྱུང་། ཡང་བྱམས་ལྡིངས་སུ་ལོ་

མཚམས་གཅིག་གི་ཁོངས་སུ། རྒྱུད་སྡེ་ལྔའི་སྒྲུབ་མཆོད་བསྙེན་པ་བྱས་པས་བར་ཆད་ཀྱི་སྣང་བ་དུ་མ་ཞིག་བྱུང་བ་བསྐྱེད་རིམ་དང་ལྟ་བས་ཟིན་ཏེ་དགེ་སྦྱོར་གྱི་གྲོགས་སུ་སོང་བ་བྱུང་བ་དགེ་སྦྱོར་འཕེལ་བར་བྱུང་གསུང་། དེ་ལ་སོགས་ཏེ་བྱམས་སྡིངས་སུ་སྔ་ཕྱི་དྲིལ་བས་ལོ་བཞི་ལྔ་ཙམ་མཚམས་བྱས་བསྡད་པས་སྐྱིད་པར་བྱུང་གསུང་། ཚལ་མིན་རི་ཁྲོད་དུ་མུན་ཁང་བྱས་དུས་རྟོགས་ལྡན་ཆོས་དཔལ་དང་ལྷན་ཅིག་ཏུ་ཕྱི་སྒོ་གཅིག །ནང་སྒོ་ཐ་དད་དུ་ཡོད་པས་ཁོང་ཉམས་གཅིག་འུར་བས་དེས་རྐྱེན་བྱས་ངེད་རང་ཡང་འུར་བས་རྡོ་ཆུང་ཆིག་བརྩེགས་བྱས་པའི་བླ་གཡེལ་དེའི་རྩིག་ཁར་རྒྱུག་པས་རྡོ་བྲུལ། ངེད་རང་གཉིས་མ་འགྱེལ་བས་མི་རྣམས་ཀྱིས་ཡ་མཚན་ཙམ་བྱས། གཞན་ཡང་སྦྱོར་དྲུག་གི་རྟགས་རྣམས་ལེགས་པོ་རང་བྱུང་གསུང་། དཔལ་ལྡན་སྡིངས་སུ་ཨ་ཁུ་བཀྲས་དཔལ་གྱིས་གོང་གི་ས་ཕུག་དང་དབྱར་གཅིག་ཟླ་བ་གསུམ་ཟན་སྐམ་རྐྱལ་རླིད་གང་ལ་བརྟེན་ནས། ལྕང་ལྷབ་ལ་ཟན་སྐམ་རྡོོག་པོ་དང་པོར་བདུན་མ་བཏབ། དེ་ནས་སྔ་མ་དེ་ལ་ཞག་རེ་བྱས་བསྡད་པས་ཉམས་རྟོགས་ཀྱི་ཤུལ་དུམ་པ་བྱུང་། ཡིད་ཀྱང་སྟོང་པ་འདྲ་བས་དབྱར་ནི་ལོ་མ་དང་ཟན་སྐམས་འདིས་ཆོག །དགུན་ནི་འབྲུ་མ་རིལ་བུ་སོགས་བྱས་ཆོག །དགེ་སྦྱོར་སོགས་ནི་འཕེལ་བར་འདུག །བསོད་སྙོམས་སོགས་ལྟོ་གོས་ཀྱི་འདུན་མ་མི་བྱེད་པར། དགེ་སྦྱོར་ཁོ་ནས་དུས་འདས་པ་བྱེད་བསམ་བྱུང་གསུང་། བྲག་ཕུག་ཞར་མི་ཤར་དེར་རས་པ་བསམ་ཤེ་དང་ངེད་གྲོགས་མཆེད་གཉིས་ཀྱིས་བསྡད། འབྲུ་ཆན་བྱས་ནས་བྲེ་གསུམ་ལ་ཟླ་བ་གསུམ་ཐུབ་པའི་རྩིས་བྱས་པས་ཁོང་བཅུད་

ལེན་ཟླ་བ་གཅིག་བསྡད། ངས་ཆན་ཐུར་མ་རེ་འགམས་པས་ཆན་ཕོར་བ་གང་གི་རྒྱགས་ལྷག་ཡང་བྱུང་། དགེ་སྦྱོར་ཡང་འཕེལ་བ་རང་གཅིག་བྱུང་། ངེད་གཉིས་ཀྱི་བྲག་སྐྱིབས་ཆུང་བས། ཤིང་ཐོག་སྐལ་བ་ལ་ཐིགས་པ་བྱུང་བ་ལ་ལེན་དུ་ཕྱིན། ཁོང་གི་འདུག་ས་ལ་ཡང་ཡོད་ཚད་འདུག །ཕད་ཆུང་གཅིག་སས་བཀང་ཁྱེར་ཏེ་ཤོད་དེ་ནས་ཐོགས་དེར་སྐྱུར་བས་རང་རེའི་འདི་འདྲ་འཇིགས། ཁྱེད་རང་གི་ཆོས་ཡོང་བ་འདུག །ང་འདྲས་མི་ཡོང་པ་འདུག་གསུང་བྱུང་། ཆོས་རྗེ་དཀོན་རྡོར་པ་ལ་རས་ཆུང་སྙན་བརྒྱུད་དང་། གཏུམ་མོ་གསང་སྒྲུབ་ཀྱི་སྒོ་ནས་རས་རྐྱང་ཞུས། རི་བོར་ལོ་སར་ཟླ་བའི་གྲང་སྒང་ལ་ཁ་ནས་ལུད་པ་འདོར་དུས་ནམ་མཁའ་ལ་འཆགས་ཏེ། ས་ལ་འཐོར་འགྲོ་བའི་དུས་དེར་ངེད་གྲོགས་མཆེད་གསུམ་བཞི་ཞིག་གིས་རས་འབུད་བྱས། ངེད་གཉིས་དྲག་པ་བྱུང་སྟེ། དྲོད་ཀྱིས་རས་ཐུབ་པ་བྱུང་བས་རྩ་བཟང་གསུང་ཆོས་རྗེ་ཡང་མཉེས་པ་ཙམ་བྱུང་། དེ་ནས་བཟུང་ཏེ་འཁྲུལ་འཁོར་གྱི་ཁྲིགས་མ་ཆགས་པར་བྱས་པས། ལུས་སྔར་དང་ཡང་མི་འདྲ་བར་ཡང་བ་སོགས་ཡོན་ཏན་དུམ་པ་བྱུང་། རྟིང་དུ་ཆོས་དྲུག་གི་ཕྱི་ནང་གསང་བའི་འཁྲུལ་འཁོར་ཉི་ཤུ། ལམ་འབྲས་ཀྱི་འཕྲིན་ལས་སུམ་ཅུ་རྩ་གཉིས། སྦ་བཞི་འཆི་མེད་འཁྲུལ་འཁོར་སོགས་མ་ཆགས་པར་བྱས་པས། བོགས་ཆེར་འཕེལ་བས་ཡིད་ཆེས་ཏེ་བྱད་སྤྲོ་བར་བྱུང་གསུང་། སྤངས་པོ་སྡིངས་ན་ཆོས་རྗེ་པ་སྟོད་ལུང་དུ། བླ་མ་གཅིག་གི་ཆོས་ཞུར་གདན་འདྲེན་དུ་བྱུང་བས་ཆོས་བཀའ་མང་དུ་ཞུ་སྒྲོས་སུ་འདུག་པས། ཕྱགས་ཕྱིར་བདག་ཀྱང་འཁྲིད་པར་ཞུས་པས་ཆོས་ལ་ཚུད་དེ། གཞི་བལ་གཟན་པས་བསྡད་པ་འཐད་གསུང་། ཆོས་ལ་ཚུད་ན་གཞི་པའི་ཆུ་དེ་འཐུང་དགོས་པ་འདྲ། གཞན་ཐིགས་མ་གཅིག་མི་ཟ་བར་དམ་

བཅའ་འབུལ། ངེད་རང་ལ་གསེར་འདབ་གཅིག་ཀྱང་ཡོད། བདུད་རྩི་རིལ་བུ་རྐྱལ་ཆུང་གང་ཡང་ཡོད། ཁར་སོང་ནས་ཀྱང་རིལ་བུ་བྱས་པ། འདི་གཉིས་ཟད་ནས་གཏོར་ཆ་ཏིང་ཤགས་ཀྱང་ཡོད། ཅིས་ཀྱང་འཁྲིད་པར་ཞུས་པས། འོ་ན་གཞན་མས་མིག་ལྟོས་ལོངས་ཁྱེད་རང་སྔོན་ལ་སོང་ལ་ངས་སྒུག་སྡོད་གྱིས་གསུང་། གཞན་མས་མ་ཚོར་ཙམ་བྱས་ཕྱིན་ནས། ངས་པས་ཁལ་ཕྱེད་དང་གཉིས་ཚོད་གཅིག་བྱུང་། དེ་ལ་གཞི་མ་བྱས་རིལ་བུ་ཡང་དུམ་པ་ཟོས། གསེར་དེ་ནད་པ་དེས་ཉོས། ཆོས་ཀྱི་དགོས་ཆ་བྱས། ཆོས་ཐོབ་ཆེ་བ་ཡང་བྱུང་། རིལ་བུ་ཟ་བ་གཞན་གྱིས་ཚོར་བས་བཀྲེས་མཐོང་གི་དུམ་པ་ལྟར་བ་ཡང་བྱུང་བས་རྒྱགས་ཀྱང་མེད་པར་ཡང་བྱུང་གསུང་། ཆོས་ཞུ་བ་ལ་ཡང་རྒྱགས་སོགས་མ་ཐོགས་ཁྱེར་རྒྱུའམ། ལྟོ་གོས་ལ་གྱོང་ཐུབ་པ་དཀའ་བ་དེར་འདུག །ངས་ནི་ལྟོ་གོས་སོགས་ཡོད་ན་ཁྱེར་མེད་ན་གང་བྱུང་ལ་བརྟེན་ལོ་ཉི་ཤུ་རྩ་གསུམ་ནས་བཞི་བཅུ་ཞེ་གསུམ་བར་དཔལ་ལྡན་སྡིངས་ཀྱི་དགོན་པ་མ་བྱུང་རིང་སྤྲང་པོ་རྒྱལ་ཁམས་པ་བྱས། བླ་མ་རྣམས་དང་མཇལ་ཐུབ་ཚད་མཇལ་གདམས་ངག་ཞུ་ཐུབ་ཚད་ཞུས། ཉམས་སུ་བླངས་པ་དེ་སྒོམ་ཐུབ་ཚད་བསྒོམས། མདོར་ན་ལྟོ་གང་བྱུང་གོས་རལ་རྐྱང་། དེ་མིན་ཁྱི་ཐུལ་ལ་བརྟེན་པས་བླ་མ་རྣམས་ཐུགས་ལ་འདོགས་པ། ཆོས་དབང་ཐོབ་ཆེ་བ། གྲོགས་མཆེད་རྣམས་དང་མཐུན་པ། དྲག་ཞན་ཉེ་རིང་སུ་ལའང་བསྟུན་མི་དགོས་པ། གང་དུ་བསྡད་ཀྱང་ཆགས་སྡང་མི་དགོས་པས། དགེ་སྦྱོར་འཕེལ་བ་སྐྱིད་པ་རང་བྱུང་གསུང་། དཔལ་ལྡན་སྡིངས་ཀྱི་བླ་མ་འདི་བྱས་ནས་བྱེད་དཀའ་རུ་སོང་ནས་དཔོན་པོ་སོགས་དྲག་ཞན་གྱི་སེམས་འཛིན། གྲྭ་པ་དམུ་རྒོད་ཀྱི་ལོག་

སྒྲུབ། གྲོགས་པོ་མཉམ་མཉམ་གྱིས་མཐོ་གནོན། ཤ་ཚ་གཡོག་བྱེད་ཀྱི་སྣ་ངུར། ཡོན་བདག་ཕོ་མོའི་བྱོན་གཤེགས། ཡུལ་མི་ངན་པ་རྣམས་ཀྱིས་འཚེ་བ་སོགས་མ་སྐྱིད་པའི་མགོ་དང་པོ་འདྲེས་བྱུང་། ཆོས་སོགས་ཞུ་ཡང་བླ་མའི་མིང་འདྲ་བ་དེས་མི་རེ་དགུ་རེ་ཆེ་བས་དཀའ་བ་ཙམ་བྱུང་སྟེ། བླ་མ་ཚུར་དགོན་པར་གདན་འདྲེན་པ། ཕར་ངེད་རང་འགྲོ་བ་སོགས་སྟབས་གང་འགྲིགས་བྱས་ནས། གྲྭ་བུ་སློབ་དང་ཡོན་བདག་ཕོ་མོ་རྣམས་ལ་ཡང་ཕན་པ་དང་། ཞར་ལ་ཚངས་པར་བྱས་པ་ཡིན་གསུང་། ཁྱེད་རང་ཚོང་ལ་གང་ཡོད་འདི་ཚང་མར་ཞུས་ན་དེས་ཆོག་པ་ཡོད། ངས་ཁོང་པ་འདི་ཆོས་ཀྱིས་ཚིལ་ནག་བརྐྱངས་པ་བཞིན་བྱས་ནས་ཡོད་པ་ཡིན་ཏེ། ཆེད་གཉེར་ཆེར་མི་འདུག །དེ་ནས་བླ་མའི་མིང་གོག་བྱས་ནས་གཞན་ལ་ཞུ་བ་ལ་རྒྱུ་ཆ་རྐྱེན་མང་དུ་དགོས། དཔོན་སློབ་ཀྱི་རྟེན་འབྲེལ་འཛོམ་པ་ཡང་དཀའ་བས། དེ་ལས་འདིར་བྱས་ཆོག་པ་ནི་བྲོད་པ་ཡིན་པས། ད་ལྟ་ཞུ་ན་དགའ་གསུང་། ཁྱེད་རང་ཚོ་རོ་ཉལ་ཉལ་རང་མི་བྱེད་པར་རྒྱུན་དུ་བླ་མའི་རྣལ་འབྱོར་གསོལ་འདེབས་རེ་ཡང་བྱེད། ཡི་དམ་གྱི་ལྷ་གཅིག་ཀྱང་གཙོ་བོར་བཟུང་སྟེ་བསྙེན་པ་བྱེད། ཆོས་སྐྱོང་གཅིག་ལ་གཏོར་མ་མ་ཆགས་ཙམ་རེ་བྱེད་དགོས་པ་ཡིན། ངེད་ནི་ཐོ་རངས་བླ་མ་དམ་པ་རྣམས་ཀྱི་རྣལ་འབྱོར་སྤྱི་འདུས་རེ་སྒོམ། རྫོགས་པ་ཆེན་པོའི་ལམ་ཟབ་བླ་མའི་གསོལ་འདེབས། བི་མ་ལའི་གསོལ་འདེབས། སྐུ་བཞིའི་གསོལ་འདེབས་ཕོ་ཉ་མྱུར་མགྱོགས། རང་གི་བློས་བྱས་པའི་གསོལ་འདེབས། བརྒྱུད་པ་གང་ནས་བརྒྱུད་པའི་ཆོས་དེ་འཆད་དུས་དང་། སྒོམ་དུས་དེའི་གསོལ་འདེབས་མ་ཆགས་ཙམ་བྱས་པས། བླ་མ་རྣམས་ཀྱིས་བྱིན་གྱིས་བརླབས་ཏེ། ལུས་

སེམས་བདེ་བ་དང་ཆོས་རེ་ཙམ་བཤད་ཀྱང་བར་ཆད་ཉུང་ཙམ་བྱུང་། སློབ་མ་ཡང་སྒོམ་པ་རྣམས་ལ་བློ་ཡུལ་དུ་བབས་ནས་ཕན་པ་ཡང་དུམ་པ་བྱུང་བས། བླ་མ་ལ་གསོལ་བ་འདེབས་པའི་ཡོན་ཏན་ཡིན་བསམ་པ་ཡོད་གསུང་། དང་པོ་གུ་རུ་དྲག་སྒྲུབ། ཕྱག་ན་རྡོ་རྗེ་ཨུ་ཙཪྱ། ཁྲོས་ནག །རྟ་མགྲིན་ཡང་གསང་ཁྲོས་པ། རྟ་མགྲིན་ལྕགས་རལ་ཅན་ལ་སོགས་པ་དྲག་པོའི་ལྷ་མང་དུ་བསྒྲུབས་པས་རྟགས་ཐོན་པ་བྱུང་། རྒྱལ་པོ་ལ་སོགས་གནོད་པ་ལ་དྲག་སྒྲུབ་འདི་བསྔགས་པར་འདུག་པས། ད་ལྟ་བསྐྲད་པ་སོགས་བྱེད་པ་ནི་དེ་ཡིན་གསུང་། དཔལ་བདེ་མཆོག་འཁོར་ལོའི་དབང་དང་ལུང་རྣམས་ཐོབ་ནས་གྲངས་བསྙེན་དང་དེ་ནས་ཞག་རེ་བཞིན་ཡི་གེ་བདུན་མ་ཁྲི་ཚོ་རེ། གཞན་མ་གང་ལྕོགས་རེ། ཚེ་དཔག་མེད་གྲུབ་རྒྱལ་མ་ལ་ཁྲི་ཚོ་རེ། ལྷ་དགུའི་སྙིང་པོ་དང་ཡང་སྙིང་ལ་ཁྲི་ཚོ་རེ། གཟུངས་གང་ལྕོགས་རེ་དེ་བར་བསྒྲངས་པས་བྱིན་རླབས་ཞུགས་པ་འདྲ་ཡང་བྱུང་། ཁྱད་པར་དུ་ཕོ་ལོ་བདུན་ཅུ་ལ་ཟིན་འདུག །བར་དུ་ནད་དྲག་པོ་གཉིས་གསུམ་བྱུང་སྟེ་རྐྱེན་བྱས་ནས་མི་ཤི་བར་བསྡད་ཆོག་པ་ཡི་དམ་རྣམས་ཀྱི་ཐུགས་རྗེ་ཡིན་གསུང་། ཆོས་སྐྱོང་ཡང་དམ་ཅན་སྡེ་ལྔ་ལ་བསྐང་གསོ་དང་། རྒྱུན་གཏོར་བྱས་པས་རང་ལ་ཡང་འཁོར་བ་དང་། ཆོས་འཆད་དུས་ལོངས་སྤྱོད་རེ་ཙམ་འདུ་བའི་ཡོན་ཏན་དང་། གནོད་པ་རེ་ཙམ་བྱུང་ན་མ་འབད་ཀྱང་རྟགས་རེ་ཡོང་བ་འདྲ་འདུག །གཟའི་སྒོ་ནས་ནད་པའི་གཏོར་མ་རེ་ཙམ་བྱས་པས་ཕན་པར་བྱུང་། ཁྱོད་རང་ཡང་འདིའི་ཚིག་བརྒྱུད་མ་འདི་ཉོན་སྟེར་བ་ཡིན་གསུང་། ནི་གུ་དང་འབྲེལ་ནས་མགོན་པོ་ཕྱག་དྲུག་པ་འཁོར་བཅས་ལ་གཏོར་མ་དང་བསྙེན་

པ་ཡང་དུ་མར་བྱས་པར་བར་ཆད་རེ་ཙམ་སེལ་བའི་རྣམ་པ་དང་། རྨི་ལམ་དུ་ཡང་སྣང་བ་ཐོབ་པའི་རྣམ་པ་བྱུང་གསུང་། དགོན་གོག་འཛིན་པ་དང་ཆོས་རེ་ཙམ་འཆད་སློབ་མ་རེ་ཙམ་པའི་མི་ཡིན་ན། ཆོས་སྐྱོང་རྣམས་ལ་གཏོར་མ་རེ་བྱེད་པ་ནི་དགོས་བྱེད་ཆེན་པོའི་རིགས་སུ་འདུག །མཐུ་རང་མི་བྱེད་ཀྱང་ལྕགས་རི་དང་། ཆོས་འཆད་དུས་ཡེ་ཤེས་པ་རྣམས་གཏོར་མས་མཉེས་པར་བྱས་པས་བར་ཆད་སེལ་བ་ཨ་ཅང་ཆེ་སྟེ། དེ་རྣམས་ཀྱི་འཁོར་གྱི་འཇིག་རྟེན་པ་ཚོ་མ་མགུ་ནའང་བར་ཆད་བྱེད་པ་གཅིག་ཡིན་པར་འདུག །ང་དཔལ་སྡིངས་སུ་ལོ་གཉིས་གསུམ་དུ་བྱས་པས་ཁྲིད་པ་ཡང་མང་དུ་བྱུང་། དེའི་ནང་ནས་མུན་ཁང་ལ་ནན་ཏན་བྱས་པས་མཚམས་བྱེད་པ་དང་། རྟགས་ཐན་ཐུན་བྱུང་བ་ཡང་མང་དུ་བྱུང་བས་ཕན་པ་ཡང་ཆེར་བྱུང་། ལོ་སྟེང་གཅིག་བྱས་པས་ཁྲིད་པ་མང་པོ་བྱུང་། ཉིན་གཅིག་གྲགས་པ་དཔལ་ལྡན་ལ་ཇོ་ནང་བསྟན་མ་ཡིན་ཟེར་བ་ཞིག་བབས་པ་འདྲ་འདུག་པས། ཁྱོད་ཀྱིས་སང་ལ་གཏོར་མ་ལ་ཆེད་གཉེར་མ་བྱས་ངས་འབུངས་པ་ཡིན་ཟེར་ནས་ངེད་རང་གིས་ཀྱང་ཆེད་གཉེར་ཡང་ཆེ་ཆུང་བྱས། ཁ་ལ་ང་ཁྱོད་འདྲས་མ་འབུངས་ཀྱང་མ་འབུངས་བྱས་པས། དེ་ཀ་ཡིན་ང་འགྲོ་ཁྱོད་ཀྱིས་གྱིས་ཟེར་བས། དེའི་རས་ལེགས་པོ་བྱུང་ནའང་སྟེང་དུ་སྦྱོར་དྲུག་ཡེ་མ་ཚུགས་པར་ལོ་མང་པོ་སོང་རྗེས་བྱས་པས་འཛེར་བ་ཙམ་བྱུང་བས། དེས་ན་ཁྱེད་ཚོ་ཡང་ཆོས་རེ་ཙམ་འཆད་པ་བྱུང་ན་གཏོར་མ་ལ་ནན་ཏན་རེ་ཙམ་དགོས་པར་འདུག་གསུང་།

དྲུག་པ་ལྟར་ན་ངེད་རང་གིས་བཟུངས་པའི་དགོན་པ་བཞི་པའི་གྲྭ་པ་བགྲེས་གཞོན་གཅོང་ཅན་ཉམས་ཆུང་ཡན་གཙོ་བོར་ཆོས་ཀྱིས་བསྐྱངས་ཏེ་ཁྲིད་ཁ་རེ་ཙམ་ཚུགས་པར་བྱས། ལུང་ཕྲན་དབང་སོགས་གང་དགོས་ཀྱི་སྒོ་ནས་ཕན་

སེམས་མ་དོར་བར་བྱས་པ་ཡིན་གསུང་། གཞན་ཡང་ཆོས་ཀྱི་ཕན་པ་སྣ་རེ་ཙམ་བྱས། སྨན་དང་སྨན་དཔྱད་གང་ཤེས་འདིས་ནད་པ་སོགས་ལ་གང་ཕན་བྱས། མདོར་ན་ཚེ་འདས་གཅིག་གི་ཆོ་ག་དབང་བསྐུར་ལ་ཕྱིན་ཀྱང་འདི་ངས་ཅིས་ཀྱང་འདྲོངས་པར་བྱེད་པའི་བསམ་པས་བྱེད་པ་ཡིན། དེ་འདྲའི་དོན་བྱེད་པ་ལ་བསམ་པ་དེ་ཅི་ནས་ཀྱང་གཙོ་ཆེ་བ་ཡིན་རིགས་སུ་འདུག །ཕ་ཇོ་ཕུར་བཀྲ་འདས་ནས་བདུན་ཚིགས་ཀྱི་ཆས་མཚོན་པ་གཅིག་ཤུལ་མ་རྣམས་ཀྱིས་བསྐྱལ་ཁྱེད་རང་གི་ཨ་ཁུ་ཕ་ཇོ་འདས། ཁྱེད་ཀྱིས་འབུངས་ཟེར་བས་དེ་ཙུག་བྱེད་བྱས། རྒྱུད་སྡེ་ལྔའི་སྒྲུབ་མཆོད་བཙུགས་འདུན་པ་དྲག་པོ་བྱས་པས། རྨི་ལམ་ལ་ཕ་ཇོ་མི་གཞན་ཞིག་གི་ཟླ་ལ་མུན་ནག་ཡོད་པའི་མཐའ་འདྲ་ཞིག་ལ་སོང་བས། ངས་རི་རྩེ་ཞིག་ལ་ཁྲིད་བདེ་བ་ཅན་གྱི་ལམ་བསྟན་པས། དེ་ཕྱོགས་ལ་འཕུར་སྙམ་ཕྱེད་པ་ཞིག་བྱུང་། གཞན་ཡང་བློ་བཟང་པོ་འགའ་རེ་ལ་བྱུང་གསུང་། མདོར་ན་བསྟན་པ་ཨ་ཅང་ཆེ། གཞན་མ་མི་དང་གྲོག་སྦུར་ཡན་ལ་ཟན་ཁམ་བུ་རེ་སོགས་ཀྱིས་ཕན་ན་བསམ་པ་བྱས། ངེད་རང་སངས་རྒྱས་སྒྲུབ་པ་ལ་སྡིག་པ་ཡང་ཆུང་ངུས་གནོད། དགེ་བ་ཡང་ཆུང་ངུས་ཕན་པ་ཡིན། ཁྱེད་རང་ཚོ་ཡང་ཕོར་པ་གང་གི་སྟེང་ནས་ཀྱང་ཕུད་ཀྱིས་དཀོན་མཆོག་མཆོད། ལྷག་དེ་ནས་ཁྱི་ཟན་བཅངས་པ་རེ་བྱེད་དགོས་པ་ཡིན་གསུངས། བདུན་པ་ལྟར་ན་གཟུགས་ཅན་གཟུགས་མེད་ཀྱི་ལྷ་འདྲེ་གློ་བུར་གྱི་ལྷ་འདྲེ་སོགས་ཀྱིས་ཆེར་མ་ཚུགས། བྱ་བཏང་བྱས་དུས་ལམ་དགྲ་དང་ཇག་པ་བྱུང་བ་མང་སྟེ། དགྲ་བྱེད་པ་ཚུར་བྱུང་སྟེ་ཕར་གཟན་བཀལ་བ་རྐྱང་ཡིན། དགོན་པ་རྣམས་བཟུང་ནས་སྙམ་

ཆུང་ལ་གནོད་པ་རེ་ཙམ་དང་། རྐུན་མ་རེ་ཙམ་བྱུང་བ་རྣམས་མཐུ་གཏད་ངན་པ་མ་བྱས་ཀྱང་། ཐབས་གང་མཁས་ཀྱི་སྒོ་ནས་བཏུལ་བས། ཕར་ཞྭ་རང་འབུད་མི་དགོས་པ་འདི་ཡིན་གསུང་། ངན་པ་རང་བྱས་པ་ཞིག་ལ་གཏོར་མ་སོགས་མ་བྱས་ཀྱང་ཆོས་སྐྱོང་རྣམས་ཀྱིས་ཤགས་འབྱེད་རེ་ཙམ་བྱུང་བ་འགའ་རེ་བྱུང་གསུང་། བྱམས་སྡིངས་སུ་རྒྱུད་སྡེ་ལྔའི་བསྙེན་པ་བྱས་དུས་སྤྱིལ་པོ་དེའི་སྒོ་དེ་མཐོ་བོར་འདུག་སྟེ་ནང་བཙུན་པ་འདྲ་བའི་གདོང་མཆུ་དམར་ཞིང་རས་ཀྱམ་དང་ཞྭ་ཐེབས་གྱོན་པའི་གཟུགས་ནམ་མཁའ་ལ་སྙེགས་པ་ཞིག་གཉིད་ལ་སོང་བའི་རྨི་ལམ་དུ་འདུག་པས། དང་པོ་སྐྲགས་དངངས་ཀྱང་བྱུང་། དེ་ནས་དྲག་སྒྲུབ་ཀྱི་བསྐྱེད་རིམ་འཁོས་ཆེ་བ་ཙམ་དུ་བྱས། རྨི་ལམ་དེ་ཡང་ཟིན་བྱུང་བས་བདེན་མེད་ཀྱི་ལྟ་བས་ཀྱང་ཟིན། གཉིད་སད་དུས་ནང་དེ་འོད་གསལ་དུ་མེར་རེ་འདུག །དེ་ཁའི་ངང་དུ་བཞག་པས་ཕྱི་སྣང་བ་ཐམས་ཅད་ཀྱང་འོད་གསལ་དུ་སོང་བསམ་པའི་ཉམས་ཞིག་བྱུང་ནས། བདེན་མེད་ཀྱི་ཚིག་མང་པོ་ཁ་ནས་འདོན། ལུས་གར་ཐབས་སུ་བྱེད་པའི་ཡུན་རིང་དུ་འཁྲབ་པ་ཞིག་བྱུང་གསུང་། དཔལ་ལྡིངས་སུ་མཚམས་གཅིག་ཀྱང་བྱས། དཔེ་ཆ་འདྲ་བ་བཞེངས་བྱེད་ཀྱི་གཟིམས་ཁང་དུ་དབྱར་ཞིག་དེར་བསྡད་ཙ་ན་ཐོག་སྨད་དགུ་བབ་པ་ངེད་རང་ཉལ་ཡོད་པའི་ཐོག་གོང་མ་ངེད་རང་གི་ཐད་དེ་ཁ་ཡིན་པར་འདུག །ཉལ་བའི་སྟེང་གི་ཐོག་དེ་ནས་འདམ་དོ་ཙམ་འཁྱོག་འདུག་པས་བབ་དུས་ཡུག་གཅིག་བརྒྱ་འདུག །དེ་ནས་གཞ ོབ་དྲི་དང་མེ་དྲི་ཆེན་པོ་འདུག་སོང་དེའི་ཁང་པ་དེའི་བཞི་ཐོག་ཕུག །མཛོ་མོ་ཞིག་དང་བ་ཆུང་ཞིག་ཤི། རང་ལ་ཅང་མ་བྱུང་བས་རྟིང་དུ་འཇིགས་པ་ཙམ་གྱིས་དཀོན་མཆོག་གི་ཐུགས་རྗེ་ཡིན་པར་གོ། དེ་ནས་གནང་གཞིས་ཙམ་ལ་བུ་འདྲེན་འཛམ་ཟེར་བ་ཞིག་ཡར་ཁ་ན་ཡོད་པ་དེ་ལ་ཨོ་རྒྱན་གྱི་

མཆོད་གནས་རྒྱ་མཚོ་འབེབས་ཀྱི་ཡོད་པས་མོ་བབ་ནས། དགོན་པའི་སློབ་དཔོན་ཡ་གི་དང་ལྷ་འདྲེ་རྣམས་འཁྲུག་པས་སློབ་དཔོན་རྒྱལ་ཟེར་བ་བྱུང་གསུང་། སྡིངས་པོ་ཆེར་ཁྲིད་གཅིག་གཙུགས་པས་ཁྲིད་ཀྱི་སྒང་རང་ལ་སོང་དུས་གདན་ལ་བཞུགས་པ་ལ་སྐྲང་འབུར་ཞིག་བྱུང་ནས་ཟུག་ཆེན་པོ་རང་བྱས། སྡོད་པ་ལའང་ཆོས་ཐུན་གྱི་ཚེར་ཟུག་ཚད་བྱུང་བས། སྒྲུབ་པ་མོ་གཡུ་གང་མ་ན་ཡོད་པས། ངེད་ན་ཟེར་བ་ལབ་ལབ་མང་དུ་བྱེད་པས། རྒྱ་སྐད་མང་པོ་ལབ་བྱེད་པས། ཁྱོད་གང་ནས་ཡིན་ཅི་ན་བྱས་པས། རྒྱ་གར་ནས་ཡིན་རྡོ་རྗེ་གདན་དུ་ཚོགས་འཁོར་ལ་འགྲོ་དགོས་པ་ཡོད། ང་འགྲོ་ཟེར་ང་ལ་ཐུག་སྟེ་བྱས་ནས་གཅིག་པུ་ན་ཟེར་ནས་འདི་ལ་ཅི་ཕན་བྱས་པས། དམ་ཚིག་གི་སེལ་དུམ་ཙམ་པ་ཞིག་གིས་ལེན་པ་ཡིན། ད་ཆོས་ཉན་འདི་ཚོ་ལ་ཡམས་རིམས་ཤིག་ཡོང་བ་ཡོད། དེ་ནས་དྲག་འགྲོ་ཨའུ་ཙི། ཆོས་ཤོད་འཕྲིན་ལས་འདྲ་བྱེད་ཟེར་བ་བྱུང་གསུང་། ཡང་སྡིངས་པོ་ཆེའི་གཟིམས་ཁང་དེ་ན་གླུ་བདུད་ཅིག་འདུག་པས་འཁོར་དང་ཕྱུགས་ལ་གནོད་པ་དུ་མ་རེ་བྱས་བྱུང་། ནུབ་གཅིག་རྨི་ལམ་ན་ཉལ་བའི་སྟེང་གི་གདུང་གསེབ་དེ་ན་སྡིག་པ་རྩིག་བུ་ཆེ་ཤོས་ཙམ་ཞིག་འདུག་པས་རྨི་ལམ་དེ་ཟིན་བྱུང་བ་དང་། ཕག་རྒོད་མཛོ་ཙམ་ཞིག་ཏུ་སྤྲུལ་ནས་ཁྱུར་མིད་བྱས་པས་རྨི་ལམ་འཚུབ་པ་དང་གནོད་པ་རྣམས་ཆད་བྱུང་། གཞན་ཡང་དེ་འདྲའི་རིགས་མང་དུ་གསུང་པ་རྣམས་དྲན་པ་ར་རི་ཙམ་ལས་མི་གསལ་བར་འདུག་པས་མ་བྲིས་པ་ལགས། བྱམས་སྡིངས་སུ་མུན་ཁང་དང་ཐབ་སྤངས་དབྱར་གཅིག་བྱས། དེ་ཐོན་རྟིང་ལུས་ཐམས་ཅད་སྦྲིད་པ་དང་། མིག་དམར་པོར་སོང་རྩ་ཆུར་ཡང་འགྱུར་བྱུང་བས། བརྟག་པ་བྱས་དུས་མཛེ་རང་དུ་ཤེས་བྱུང་། ད་དེ་

ཡང་ན་རྒྱལ་ཁམས་ལ་ཕྱིན་རྒྱུས་མེད་ཀྱི་ཡུལ་དུ་ལམ་ཟན་ལ་བརྟེན་ནས་འདི་ཐོན་ན་རབ། མ་ཐོན་ཀྱང་དགེ་སྦྱོར་གང་ནུས་བྱེད། ཡང་ན་ནི་མི་མེད་པའི་རི་ཁྲོད་ཅིག་ཏུ་འཆི་ས་བྱེད། ད་ངེད་རང་མི་ཁྲོད་དུ་མི་ཚུད་པར་འདུག་བསམ་བྱུང་བ་ལས། སྔ་སོར་འདི་ཁར་མཚམས་ཞིག་བགྱིས་དང་བསམས། ཕྱག་རྡོར་ཨུ་ཙཪྱའི་བསྙེན་པ་ཡང་དུམ་རེ་བྱས། རྫས་ཆེན་རྣམས་པགས་བྱུག་བྱས་པས། བྱུག་པ་བྱས་ཀྱིན་ལོད་དུ་རང་སོང་བྱུང་། ང་འདི་འདྲ་སྲོག་ལ་རྒོལ་བར་འདུག་བསམ་ནས་ཐལ་ཐུལ་དང་ཆེར་མེད་གང་ཡོད་རྣམས་ཀྱི་མཐོ་རྩེ་ཞིག་ཞང་པོ་ལ་བཅོལ། ང་ཤི་འདུག་ཟེར་ན་འདི་ཚོ་ཐོང་ཟེར་བ་བྱས། ལུས་ངག་ཁྱེར་རྒྱལ་ཁམས་ལ་ཕྱིན། ལྷ་རྗེའི་གྲལ་སྐོར་གཅིག་བྱས་ནས་འཆོས་ཤེས་པ་ཡོང་བ་ཡང་སྲིད། ཀླུ་སོགས་ཀྱི་གནོད་པ་ཡིན་ན། གཉན་ས་གང་འདུག་ཏུ་གཅོད་རེ་ཙམ་བྱས་ན་ཐོན་པ་ཡང་སྲིད་བསམ། གལ་ཏེ་མ་ཐོན་ཀྱང་དགེ་སྦྱོར་གང་འཕེལ་བྱེད། ཤི་ཡང་ལ་ཁའི་བྱ་རོ་དང་ཆུ་ཁའི་ཉ་རོ་བྱེད་བསམ་ཕྱིན་པས། ལྷ་རྗེ་ལ་ཅི་ཡིན་ཟེར་བ་བྱས་པས། ལ་ལ་ཅི་ཡིན་ཟེར། ལ་ལ་གང་ཡིན་ཟེར་བ་ལས། ཐིངས་པ་རང་མ་བྱུང་། དོལ་གྱི་ལྕོགས་ཕུག་པས་ཐིངས་ཏེ། སའི་བམ་ལུས་ལ་རྒྱུག་པ་ཡིན། མཛེ་རང་མིན་མཛེ་རྟགས་ཙམ་ཡིན་པས། དྲག་ཟེར་བ་ཡིན་གསུང་པས། ངེད་རང་གི་ཡིད་ཡུལ་དང་མཐུན་པར་བྱུང་། སའི་བམ་ཡིན་པ་ཡང་ཐབ་སྤངས་བྱས་དུས་སོགས་སྣེའི་འོག་དེ་རུལ་འདུག་པས་དེ་གོ་ཁོང་གི་བྱུག་པ་མང་པོ་ཡང་བསླབ། ངེད་རང་གིས་ཀྱང་དྲོད་བཅོས་སྐོར་གྱི་བྱུག་པ་བྱས། རླུང་དང་འཁྲུལ་འཁོར་མང་དུ་བྱས་པས་ཟླ་བ་གཅིག་ནས་སྐྱེད་ཆེར་བྱུང་སྟེ་ཐོན་པ་ཡིན་གསུང་། སྡིངས་པོ་ཆེར་བླ་མ་གད་འོར་བས་དུག་ཅིག་བྱུང་བ་ལས། མ་བྱུང་གོང་དུ་རྨི་ལམ་

དང་མོ་མ་སོགས་ཀྱིས་དུག་ཡོད་ཟེར་བ་ལ། ངེད་རང་རྟོག་པ་རྩིངས་པས། ཁོས་ཞོ་ཞིག་ལ་ཕྱེ་ཞིག་བཏབ་ནས་བྱིན་པས། ཕ་རོལ་ལ་འགྲོ་རྩིས་གྲབས་བྱས། གང་ཡོད་ལ་སྤང་དག་དང་། དཔལ་ལྡན་སྡིངས་ཀྱི་ཚད་ཁང་འདི་ཡང་བཞེངས། མི་རྣམས་ཕལ་ཆེར་ལང་འཆི་བྱས། ཁོང་རྣམས་ན་རེ་འཆི་བ་རང་མི་འོང་དུག་ཡིན་ན་ཨའི་ཆུ་ཚན་ཕན་ཟེར་བས་འགྲོ་དགོས་བསམ་ཡོད་པ་ལ། རྨི་ལམ་ལ་ཡང་ཕྱིན་ན་བསམ་པ་ཞིག་བྱུང་བར་ཕྱིན་པས་ཉེས་མེད་དུ་འཁོར་དེ་ནས་ཆུ་ཚན་གྱི་ཡོན་ཏན་དང་དཀོན་མཆོག་གི་ཐུགས་རྗེ་ལས་ནད་ཀྱང་སྐྱེད་ཆེར་བྱུང་། འཆི་རྩིས་རང་ལ་མ་ཤི་ཙམ་བྱུང་སྟེང་དུ་དཔལ་སྡིངས་སུ་སྐེ་དང་། ཁྱད་པར་ལྕེ་ཁའི་ནང་དུ་མི་ཤོངས་ཚད་བྱས། ལབ་ཀྱང་ཡེ་མི་ཤེས་པ་ཞིག་བྱུང་བས། གཞན་མ་དང་ངེད་རང་བྱིངས་ཀྱིས་འཆི་བར་གཟུང་། ལྷ་རྗེས་ཀྱང་ཐོག་དེར་སྲིན་བྱའི་སྐད་བྱུང་བ་ཐོས་འདུག་པ་དང་བཅས་པས། ལྷ་རྗེས་ཁ་གཏམ་དེ་བྱས། ད་དཀོན་མཆོག་མིན་པ་རེ་ས་མེད་བསམ་སྟེ། བླ་མ་དཀོན་མཆོག་ཤི་བ་ལེགས་སམ། མ་ཤི་བ་ལེགས་གང་ལེགས་པ་ཐུགས་རྗེས་ཟུང་ཐུགས་རྗེས་སྐྱོབ་པའི་དུས་སུ་འདུག་བསམ་ནས་གསོལ་བ་དྲག་ཏུ་བཏབ་པས། ནམ་མཁའ་ནས་སྒྲ་བྱུང་སྟེ་དབང་བཞི་བསྐུར་བ་རྣམས་རིམས་པ་བཞིན་དུ། དང་པོ་ཉིད་དག་པ་བཞིའི་དབང་། གཉིས་པ་ཡེ་ཤེས་རྒྱུན་མི་ཆད་པའི་དབང་། གསུམ་པ་འཁོར་ལོ་བདེ་བ་ཆེན་པོའི་དབང་། བཞི་པ་དག་པ་ཡེ་ཤེས་ཀྱི་དབང་ཟེར་བ་བྱུང་། དེའི་གོ་བ་ལེན་གྱིན་དབང་ཞིག་བླངས། དེ་ནས་ཡུག་ཅིག་སོང་བ་ན། དུས་མིན་འཆི་བར་མི་འགྱུར་ཏེ། །སྐྱེས་བུའི་ཚེ་ལོ་བརྒྱད་ཅུ་ཡིན་ཟེར་རོ། །དེ་ནས་ཡུག་

བསྟན་པ་ཆགས་པ་དྲུག་སྟོང་སུམ་བརྒྱ་ཡིན། གནས་པ་འཇིག་པའང་དྲུག་སྟོང་བརྒྱ་རེ་ཡིན། ཟེར་བ་ཡང་བྱུང་བས་ཡིད་ཉམས་སོས་བྱུང་། བྱམས་སྡིངས་སུ་ཐོག་འོག་ཏུ་ཚུད། ཡང་ཁའི་གྲུ་ཡང་བྱིང་ལ་ཁད་པ་ཡང་ཁ་ནས་དགོན་པར་ཕྱི་ཕྱི་ཞིག་འོང་བས། ལམ་འཛོལ་བ་ཁ་འདྲས་བྱས། གད་པ་རྟ་ཞོན་མདུང་བཟུང་གྱི་ཚོད་ཅིག་ལ་ཐུ་ུལ་ཡུག་གཅིག་བརྒྱལ་དྲན་པ་བྱུང་བ་དང་ཉམས་ཤིག་ལྷན་ཅིག་བྱུང་འདུག་པས་དེའི་ངང་ལ་དགོན་པར་འཁྱོལ་འདུག །དེ་ནས་ཉམས་དེ་སད་ཙ་ན་ཙུག་ཙམ་མི་ཡོང་པར་འདུག །དེ་ལ་སོགས་ཏེ་རྐྱེན་དྲག་པོ་མང་པོས་ངེད་རང་ཡང་འཆི་བར་ཐག་བཅད་པ་མང་པོ་བྱུང་སྟེ། ད་ཚུན་བླ་མ་དཀོན་མཆོག་གི་ཐུག་རྗེས་ལེགས་པོ་རང་བྱུང་ལགས་ཏེ། དེ་ནས་ཁོས་གཅིག་སྐྱལ་གསུང་། ད་ལྟའི་མི་འདི་ཚོ་ན་ཡང་མི་འཆི་གཞན་འཆི་བ་འདུག་པ་མཐོང་ཡང་ངེད་རང་མི་འཆི་བསམ་པའི་མི་རིགས་མང་པོ་འདུག །ཁྱེད་རྣམས་ལ་བར་ཐར་ཡང་ཨེ་ཡོང་ངམ། ད་ཡང་དེ་འདྲའི་གྲབས་རེ་ཙམ་དགོས་པ་ཡིན་གསུང་། བརྒྱད་པ་ལྟར་ན་སྐུ་ན་ཆུང་ངུའི་དུས་སུ་མ་ཎི་རེ་ཙམ་བགྲངས་པས། བྲག་འབྲུ་གུ་གཤོངས་ཀྱི་བྲག་ཕུག་ཅིག་ན་ཐུགས་རྗེ་ཆེན་པོའི་སྐུ་ངོ་མཚར་ཅན་ཞིག་འདུག་པ་ལ་ཕྱག་དང་མཆོད་པ་བྱས་པས། བྱིན་གྱིས་བརླབས་པ་བྱུང་གསུང་། རལ་གྲི་གོང་དུ་འུ་ལག་སྐྱེལ་ཕྱིན། གཡུལ་ཁང་ནང་འདྲ་ཞིག་ཏུ་བསྡད། ཨོ་རྒྱན་གྱི་རྟགས་བསྟོད་ཅིག་ཤེས་པ་མང་དུ་བྱས་པས་རྨི་ལམ་དུ་གུ་རུའི་སྐུ་གཅིག་ནམ་མཁའ་དེ་ལ་བཞུགས་འདུག་པ་ལ་གསོལ་བ་བཏབ་པས་འོད་ཟེར་གྱི་རྣམ་པ་ངེད་རང་ལ་ཚུར་བྱུང་ནས། དེ་ནས་ནམ་མཁའ་ལ་ཇེ་མཐོར་སོང་མི་མཐོང་བ་ཙམ་དུ་ཡལ་བར་རྨིས། ཆུ་བོ་རིར་ཚེ་ཆུ་ལ་ཕྱིན་པས། ལྕང་སར་མདའ་ནས། སྲིན་པོ་རིའི་གཙུག་ལག་ཁང་

མཐོང་བྱུང་བས། བཅོམ་ལྡན་འདས་ལ་དད་པ་གཅིག་ཆེར་སྐྱེས། བདག་བསྐྱེད་མདུན་བསྐྱེད་དང་ཡིད་ཀྱིས་སྤྲུལ་པའི་མཆོད་པ་དང་། ཁ་ནས་གང་ཤེས་ཀྱི་མཆོད་པ་དང་བསྟོད་པ་བྱས་པས། དེ་དགོངས་གངས་དཀར་ཞོལ་དུ་བསྡད་པས། རྨི་ལམ་དུ་སྲིིན་པོ་རི་ངོས་ལ་ཕྱིན་པས། གཙང་པོ་ཐོན་པའི་གླིང་ཁའི་དཀྱིལ་དུ་སླེབས་ཙ་ན། བཅོམ་ལྡན་འདས་དཔའ་བོ་གཅིག་པ་རིན་པོ་ཆེ་དང་རུས་པས་བརྒྱན་པ་སྐུ་མདོག་ནམ་མཁའ་ལྟར་དངས་པ་ཞིག་དང་མཇལ་བྱུང་བས་ཕྱག་དང་སྐོར་བ་མང་དུ་བྱས་པས། ཞལ་ནས་བདུད་རྩིའི་རྒྱུན་བྱུང་བ་འཐུང་བས་ལུས་སེམས་བདེ་བས་ཁྱབ་པ་རིགས་ཀྱི་བུ་ཞེས་ལན་གསུམ་བྱོན་པས་གསུང་གི་སྣང་བ་དང་བཅས་པ་བྱུང་གསུང་། དཔལ་སྡིངས་དགོན་རྩེར་ཕྱག་དྲུག་པའི་ལས་བྱང་གཏོར་ཆོག་རྒྱས་བསྡུས་རན་པ་ཞིག་བྱེད་དགོས་བསམ་པ་ཡོད་པས་དགོངས་ཤིག་རྨི་ལམ་དུ་ཡེ་ཤེས་མགོན་པོའི་སྐུ་ཤིན་ཏུ་ཆེ་བ་ཞིག་བྱོན། ལས་བྱང་བྱེད་བསམ་ན་གྱིས་གསུང་པ་བྱུང་བས། དེ་ནས་བྱས་ཆོག་པར་གོ་ནས་བྱས་པ་ཡིན་གསུང་། དགུ་པ་ལྟར་ན། བྱིས་པའི་དུས་སུ་ཡང་ཁའི་རྒྱལ་སྒོ་གདོང་དུ་ཕྱིན་པས། བླ་མ་དུང་ལོང་དང་། ཨང་ག་རག་གསོལ་ནས། ཆང་དང་ཟམ་ནོར་ཕྲན་ཚེགས་ལྡང་ལ་སློང་གསུང་། མེད་ཞུས་པས་འདི་ན་འདུག་གཞན་ལུགས་འདི་བཞིན་འདུག་རྫུན་མ་ཟེར་གསུང་། གང་ཡོད་ཐིངས་པའི་མངོན་ཤེས་ཅན་ཅིག་བྱུང་བས། ང་གཟིགས་འཕྲལ་དུ་ཆོས་ཀྱི་སྐལ་བ་བཟང་པོ་ཡོད། ཆོས་གྱིས་གསུང་བ་བྱུང་གསུང་། འཁྲུལ་ཞིག་རིན་པོ་ཆེ་ལ་གདམས་ངག་རེ་ཙམ་ཞུས་དུས་བྱེད་དགོས། ཁྱེད་ཀྱིས་འགྲོ་དོན་རེ་ཙམ་ཡོང་བར་འདུག་པས་གསུང་། ངེད་རང་གི་མགྲོན་པོ་དང་ཅི་ཡོང་ཞུས་པས། དེ་རིང་སོང་ཙ་ན་ཡོང་བ་ཡིན་བློ་མ་ལད་པར་གྱིས་ལ་འབུངས་གསུང་། ཆིག་བརྒྱུད་ཀྱིས་དབང་རྗེས་གནང་སོགས། ཉེར་གནས་

དང་མི་གཞན་སྐུ་མདུན་མེད་དུས་ཤོག་གསུང་མང་དུ་གནང་གསུང་། བྱ་བཏང་ཆོས་རྗེས་གཅིག་གནང་བའི་རྗེས་ལ་མ་ཎི་བརྒྱ་རྩ་རེ་བསྐུལ་བ་ཕྱག་ལན་དུ་མཛད་པ། བདག་ལ་བླ་མ་རས་པ་ཁྱེད་དཔལ་སྡིངས་སུ་ཆོས་འཆད་ཙ་ན་མ་ཎི་འདི་བསྐུལ་གསུངས་པ་དང་། གཞན་ཡང་ཁྱོད་རང་ཡང་དགོན་པ་འཛིན་ཙ་ན་འདུག་གྱིས་གསུང་མང་དུ་གསུངས་པ། ང་འདྲས་དགོན་པ་དང་ཅི་ཟིན་བསམ་པ་ལས། སྟེང་དུ་དགོན་པ་འཛིན་ལོ་ཆོས་འཆད་ལོ་རེ་ཙམ་བྱས་དུས། དྲུག་པ་ཉིད་ལ་མངོན་མཁྱེན་ཞིག་མངའ་བར་གོ་གསུང་། ཆོས་ཀྱི་རྗེས་མ་ཎི་འདི་ཁྱེད་ཚོས་ཀྱང་ཆོས་དང་འཆད་པ་བྱུང་ན་གྱིས་གསུང་། བཅུ་པ་ལྟར་ན། ལོ་གཅིག་གཉིས་ཙ་ན། ང་རྒད་པོ་ད་ལོ་སོང་རེས་ཀྱི་མི་གསུངས་པ་དང་། ཆོས་བཞིན་ཞུ་ན་ད་ལྟ་ཞུས་པ་དྲག །དེ་ནས་ངེད་ཀུན་ཨེ་སྡོད་མི་ཤེས་གསུང་། ང་ཤི་ན་ཡང་ཁྱེད་རང་སྤུན་གཉིས་འདི་ཟུང་། སྤྱད་པ་འདི་ཚོ་ཁྱེད་རང་ཚོ་བདག་རྒྱུ་ཡིན། འདི་ཚོ་རྗེས་ལ་གཏོང་རྒྱུ་ཡིན་ཟེར་བ་སོགས་མང་དུ་བྱོན། ཉིན་གཅིག་གློ་བུར་དུ་ངེད་མིང་སྲིང་རྣམས་ལ་འདི་འདྲ་བདག་རྒྱུ་ཡིན་གྱི་ཡི་གེ་རེ་མཛད་ནས་འདི་རྣམས་ཁྱེད་ཚོས་གྱིས། གཞན་མ་གང་འདུག་ང་རང་གི་རྗེས་ལ་ཐོང་གསུང་། ངས་ཕྱོགས་གཅིག་ནས་སླེབས་དུས་ཡི་གེ་རྣམས་སྟོན་མཛད་པ་ལས། བློ་དང་མ་བདེ་བྱ་བ་ནི་མེད་བསམ་པ་ཞིག་བྱུང་། དེ་ནས་ཆོས་ལུང་དུ་དགུན་བི་མ་ལའི་ཁྲིད་གནང་བ་ལས། གནངས་ཞེས་ཙམ་ཐོན་རྒྱུའི་དོ་དགོངས་དེར་ཛཾ་པ་ལྷའི་ཕའི་ཆོ་ག་ལ་ཐེག་པས། ཁོ་དམ་ཉམས་དེར་སོང་བས། དེའི་སྐྱོན་གྱིས་དེ་དགོངས་དེར་ཤིན་ཏུ་སྙུང་སྟེ་དེ་ཁར་འགྲོང་འདྲ་བསམ་པ་ལས། མ་གྲོངས་ཙམ་ལ་སོང་དགོན་པར་ཕེབས་པའི་དགོངས་མོ་དེར། ཁྲོ་བོ་རི་རི་རྟིའི་ཕྱག་རྒྱ་གྱིས་

བགེགས་བསྲུང་བ་ཡིན་གསུང་པ་ཞིག་བྱུང་གསུང་། ཡང་ཡུག་གཅིག་ན། མགོན་པོ་ཚེ་དཔག་མེད་སྐུ་མདོག་དཀར་པོ་ཞིག་བྱོན་ད་ལོ་ལ་མི་འཆི་ཙམ་ཡོང་བ་འདྲ་གསུང་། དེ་རེས་དེ་གསོལ་བ་མི་ཐེབས་ལ་ཁད་པ་ལས། བདག་སོགས་ལ་ཐུགས་རྗེས་གཟིགས་ནས་སྐུ་ཁམས་ཀྱང་དངས། ད་ཞག་ཀྱང་ཆོས་ལུང་དུ་དེའི་དགུན་མཁའ་འགྲོ་སྙིང་ཐིག་བཙུགས་པར་ཆེད་ཀྱང་མེད། བཀའ་ལུང་སྙིང་ཐིག་མ་གཉིས་ཀྱི་ལྷག་ལུས་འདྲ་ཡོད་པ་རྣམས་ཀྱང་རྫོགས་པར་གནང་། ཁྱད་པར་བཀའ་སྡོད་རྗེས་གནང་པོད་ལུང་རྣམས་ཐུགས་རྗེས་བཟུང་ནས་འདི་ཚོ་ཁྱེད་སྤུན་ལ་འཕྲོད་པས་བློ་བདེ་གསུང་། བཀའ་ལུང་ཡང་བཟང་པོ་གནང་། དེ་ནས་དཔྱིད་ཁ་དེར་ཆོས་ལུང་ནས་སྐུ་ཁམས་མགོ་མ་ཨན་ཙམ་མཉེལ་ནས། དཔལ་སྡིངས་སུ་ཕེབས་ནས་ཀྱང་མཉེལ་བ་ཟླ་བ་གཉིས་ཙམ་བྱུང་། དེ་ནས་བདག་གིས་སླེབ་ནས་མཉེལ་བ་ཟླ་བ་གཅིག་ལྷག་ཙམ་གྱི་རིང་ལ། ལུས་ཚགས་ཀྱང་འགྲོལ་རྒྱུ་མེད་པར་བསྙུང་གཡོག་ཞབས་ཏོག་བྱས་པས་བསྙུང་ཟུག་ཆུང་བའི་བར་ལ། ཁྲིད་འདི་འཆད་པ་ལ་འདི་གྱིས་གསུངས་པ་དང་། ཁྱད་པར་རྫོགས་ཆེན་ཆོས་བརྒྱུད་ཡིན་པས། གཞན་ཚོས་སྙིང་ཐིག་མ་གཉིས་མཁོ་བ་ཡོང་པས་འདི་བཞིན་བྱེད་རྒྱུ་ཡིན་སོགས་མང་དུ་གནང་། དེ་ནས་སྤྱིར་གྱི་གྲྭ་བུ་སློབ་དང་། དགོས་ངེད་རང་སྤུན་དང་བཅས་པའི་བསོད་དེས་མ་ཟིན་པའི་རྣམ་པས་མ་བཞུགས་པར་རིག་པས། ཀླུངས་ལ་འཚོལ་འཚོལ་འདྲ་བྱེད་པ་ལ་ཕྱིན། དེ་དགོངས་སླེབས་རྩིས་མ་སླེབ་པས། བློ་དང་ནི་བདེ་དོན་མ་ཆོད་པ་བྱས་པས་ནི་མ་བྱུང་། དེའི་དགོངས་མོ་དེར་གཉིད་ཆེར་ནི་མ་བྱུང་། ཐོ་རངས་རིག་པ་གཅིག་བྱུང་དུས། ཁྱོད་རང་ག་ལེ་གྱིས་དྲུང་པ་ལགས། སྒུག་ནས་

བཞུགས་ཡོད་ཟེར་བས་སེམས་མི་འཚབ་ཙམ་བྱུང་། དེ་ནས་དེའི་དགོངས་མོ་འཕྱི་གཅིག་ཡར་ཡོང་དུས་མ་སླེབ་གོང་དུ་ཇོ་ཇོ་གསུང་པ་མང་དུ་བྱོན། ཁོ་སླེབ་མ་བྱུང་ངམ་གསུང་པ་བྱུང་འདུག་དེ་སླེབ་དུས་ཅི་འདྲ་བྱུང་ཞེས་ཤོད་དུ་དྲིས་པས་མ་ཐེགས་ཙམ་བྱུང་ཟེར་བས་ཡིད་ཀྱང་སོས་པ་ལས། སྐུ་མདུན་དུ་སླེབ་པས་ཇོ་ཇོ་གསུང་པས་ལགས་ཞུས་པས་སླེབ་པ་དགའ་གསུང་། དེ་ནས་ཅང་མི་གསུང་བར་སྙུང་ཟུགས་ཀྱང་ཆུང་དུ་སོང་བས་ཐུགས་དམ་ལ་བཞུགས་ཏེ། ཡོས་ལོ་ཟླ་བ་ལྔ་པའི་ཚེས་བཅུ་དགུའི་ཐོ་རངས་གདུལ་བྱ་དག་པའི་དབྱིངས་སུ་གཤེགས་པ་ལས། དེ་ང་འདྲ་བའི་མིའི་བསོད་ནམས་ཀྱི་སྐལ་པ་ཐམས་ཅད་དུས་འདིར་ནུབ་སོང་བསམ་སྟེ། ཡིད་ཕམ་ཡང་ཆེར་སྐྱེས་མཆི་མ་སོགས་མང་དུ་བྱུང་སྟེ། ཨ་ཁུ་དགེ་སྦྱོང་དང་། ཞང་པོ་བློ་རྒྱལ་གཉིས་ལ་རེ་བ་བྱས་ནས་མ་བྱུང་པ། ཙུག་བྱས། ཡིད་ཀྱི་སྒོ་ནས་གསོལ་བ་འདེབས་པ་དང་། སྨོན་ལམ་མང་དུ་བྱས་པ་རྣམས་ཟིན་པ་དང་། ནམ་ཡང་ལངས་བྱུང་ནས་ཚད་པ་ཡང་ཚ་བས། སྐུ་གདུང་དེ་བཞུགས་ལུགས་བྱས། ཙན་དན་ག་པུར་གྱིས་བྱུག་བདག་གིས་བྱང་ཁར་ཕྱིན་པས། གྲབ་ཡུལ་སོགས་ཀྱི་བསམ་བློ་དང་བློ་གཏིང་ནས་ཀྱང་མ་བདེ་བས་མ་མཐོང་བར་འདུག་སྦྱིན་པ་སོགས་ཀྱི་ལྟས་པ་རྣམས་ཀྱིས་ནམ་མཁའི་གཞི་མ་དྭངས་པ་ལ། འཇའ་སྣ་ལྔ་དང་འཇའ་དཀར་གྱིས་ཁེངས་འདུག་ཟེར་དེ་ལྟར་གཤེགས་ནའང་། ཐུགས་དགོངས་རྫོགས་ཐབས་རྣམས་སྒྲུབ་པ་ལ་ལག་ན་འདོན་རྒྱུ་ཡང་ཆེར་མི་འདུག །གདན་ས་པ་ཡང་ན། སྦྱིན་པ་ཡང་སྟབས་མ་བདེ་བ་འདྲས་བྱས། ངེད་རང་ལ་ཡང་མིའི་ཁྱེར་ཁ་ཆེར་མེད་པའི་སྟེང་དུ། མི་གཅིག་ལག་གཅིག་ཏུ་སོང་བྱུང་ནའང་། དྲུང་པ་ཉིད་ཀྱི་ཐུགས་རྗེ་ལ་བརྟེན་ནས།

མི་ལ་ངོ་མི་ཚ་ཙམ་འགྲུབ་བྱུང་། ལོ་དུས་སུ་སྐུ་གདུང་དེ་བཞུ་བས་རྟེན་སོགས་མ་བྱིན་ཡང་། གདུང་ལྕགས་ཆོད་མང་དུ་བྱོན། དེ་ཁ་དང་མཚུངས་པར་ནང་རྟེན་ཚེ་དཔག་མེད་ཅིག་བཞེངས་པས་སྲོག་ཤིང་རང་ལུགས་སུ་ཡོད་པ་དང་། མར་མེ་འཛིན་པ་སོགས་བྱོན་རྟིང་དུ་བྱང་ཆུབ་ཆེན་པོའི་སྐུ་འབུམ་བཞེངས་དུས། ཡོ་བྱད་སོགས་འབད་མེད་བྱུང་སྟེ། རབ་གནས་ཀྱང་ཤིན་ཏུ་ལེགས་ཏེ་མཐོང་བའི་ཡུལ་ཕྱོགས་ཀྱང་ལོོ་ལེགས་པའི་དགེ་མཚན་ཡང་ཡོད་པ་དང་། དཔལ་ལྡན་སྡིངས་རང་དུ་ཡང་བྱིན་རླབས་ཆེ་བ་དང་། བཀྲ་ཤིས་པའི་རྟགས་མང་དུ་བྱུང་། ཁྱད་པར་བྲེའི་ནང་ན་དབུ་ཐོད་རིལ་པོར་བྱོན་པ་དེ་རིན་པོ་ཆེས་བཀང་ནས་ཡོད་པས་དེའི་ཡོན་ཏན་གྱིས་དཔལ་ལྡན་སྡིངས་པ་རྣམས་ཡར་འཕེལ་རང་ལ་སོང་བྱུང་བ་ཐུགས་རྗེ་ཡིན་པར་འདུག །དེ་ལ་སོགས་ཏེ་ཚད་མེད་པའི་ཐུགས་རྗེ་དང་ཡོན་ཏན་མངའ་བའི་དཔལ་ལྡན་བླ་མ་དམ་པ་དེ་ཉིད་དག་པའི་ཞིང་ཁམས་གང་དུ་བཞུགས་ཀྱང་། སྤྱིར་སེམས་ཅན་ཐམས་ཅད་དང་ཁྱད་པར་ངེད་རང་ལ་གསོལ་བ་འདེབས་པའི་བུ་སློབ་རྣམས་ཐུགས་རྗེས་མི་འདོར་བར་གོ་སྟེ། བདག་གིས་ཕྱག་རྒྱ་ཆེན་པོའི་ཆོས་དེ་འཆད་ལོ་བྱས་དུས། གཞན་མས་མ་རིག་པར་འདུག །ང་རང་འཆད་པའི་ཚིག་སྒྲོས་གཅིག་ལ་བློ་ཐེངས་པ་ལས་དེ་དགོངས་དེ་རྨི་ལམ་དུ་བྱོན་ཏེ། འདི་ཡིན་གསུང་པ་དང་གཞན་ཡང་དགོན་པ་ཕན་ཚུན་དུ་ལེགས་ཉེས་རེ་ཙམ་ཡོད་ན། ལེགས་པ་ལ་དགྱེས་པ་དང་། ཉེས་པ་ལ་མི་དགྱེས་པ་སོགས་རྨི་ལམ་དུ་ཡོང་བ་འདྲ་འདུག་པས། དེས་ན་གསོལ་བ་བཏབ་ན་ཐུགས་རྗེས་འབྲལ་མེད་དུ་གཟིགས་པར་འདུག་པས། མོས་གུས་ལྟེམ་རྐྱང་མེད་པའི་སྒོ་ནས། གསོལ་བ་རྩེ་གཅིག་ཏུ་འདེབས་པ་དང་། གོང་དུ་བཀོད་པའི་ཆེ་བ་ཡོན་ཏན་གྱི་

རྣམ་པར་ཐར་པ་རྣམས་ལ་ཡིད་ཆེས་ཤིང་སྣ་རེ་ཙམ་ལས་མ་བྱུང་ཡང་ཕྱག་ལེན་ལ་ཐེབས་པར་མཛད་པར་ཞུ་ཞུ། འདིར་ཡང་གསུང་པ་རྣམས་ཕལ་ཆེར་ཆོས་གནང་དུས་གསུང་པ་དང་། དཔོན་སློབ་འགོལ་དུས་གསུང་པ་དང་། སྐབས་གཞན་དུ་ཡང་དམ་དུམ་གསུང་པ་རྣམས་བདག་གི་དྲན་པ་ལ་བཟུང་བར་བགྱིས་ཏེ། གསུང་ཇི་ལྟ་བ་བཞིན་ལ་རང་བཟོའི་ལེགས་ལེགས་འདྲའི་ལྷན་པ་སོགས་ཀྱིས་མ་བསླད་པར་བྱས་ཤིང་། དད་ཅན་རྣམས་དང་བ་འདྲེན་བྱེད་དང་། བདག་ཉིད་ཀྱང་བླ་མ་དམ་པ་རྗེས་སུ་དྲན་པའི་ཡིད་གསོ་བའི་ཕྱིར་དང་། བརྒྱུད་པའི་བླ་མ་དམ་པ་རྣམས་ལ་རྣམ་ཐར་རེ་མཛད་པར་འདུག་པས། འདིར་ཡང་འདི་ལྟ་བུ་ཞིག་དགོས་པར་གོ་ནས་བགྱིས་པ་ལགས་པས། མོས་གུས་ཅན་རྣམས་བླ་མའི་ཕྱག་ལེན་ལ་ཡིད་ཆེས་པར་བྱ་བའི་ཕྱིར་གཟིགས་པར་ཞུ་ཞིང་། སྐབས་གཞན་དུ་སྒྲིབ་པའི་ས་བོན་གསོག་པས་དད་པ་ཙམ་མེད་པ་ལ་སྦ་བར་རིགས་སོ། །དེ་ལས་བླ་མའི་རྣམ་པར་ཐར་པ་ལ་མོས་པ་ཅན་རྣམས་དང་བ་འདྲེན་པའི་གསུང་། མེ་ཏོག་གི་ཕྲེང་བ་ཞེས་བྱ་བ། མཚན་ལྡན་བླ་མའི་གདུང་འཛིན་ཤཱཀྱའི་དགེ་སློང་ངག་དབང་རྣམ་རྒྱལ་བསྟན་པའི་རྒྱལ་མཚན་དཔལ་བཟང་པོས། སྟག་གི་ལོ་ཟླ་བ་བརྒྱད་པའི་ཚེས་ཉེར་གཅིག་གི་སྐར་མ་མགོའི་ཉིན་དགའ་ལྡན་བྱམས་པ་སྡིངས་ཀྱི་ཆོས་རྗེ་རིན་པོ་ཆེའི་གཟིམས་ཁང་དམ་པར་སྦྱར་བའི་ཡི་གེ་པ་ནི་བློ་དང་ལྡན་པའི་འཇམ་དཔལ་བློ་གྲོས་ཀྱིས་སོ། །འདིས་ཀྱང་བདག་དང་མཐའ་ཡས་པའི་སེམས་ཅན་ཐམས་ཅད་སེམས་ཉིད་ཡེ་ནས་སངས་རྒྱས་པ་ཉིད་དུ་ཤེས་ཏེ། ཕྱམ་གཅིག་པར་བླ་མའི་དྲིན་ལས་ཇི་ལྟ་བར་རྟོགས་པ་ཉིད་དུ་གྱུར་ཅིག །བླ་མའི་རྣམ་ཐར་ཟླ་བའི་དཀྱིལ་

འཁོར་ལས། །གང་གསུང་ཆ་ཤས་རྫོགས་པའི་འོད་ཟེར་དེ། །བདག་བློའི་མཁའ་ལ་ཤར་ཏེ་བཀོད་པ་ལས། །དད་ལྡན་ཀུན་དའི་ཚལ་རྣམས་དགྱེས་པར་མཛོད། །དེ་ལས་བྱུང་བའི་དགེ་བ་རྒྱ་མཚོ་ལས། །འགྲོ་ཀུན་བུང་བ་ཆོས་ཀྱིས་ཚིམས་བྱས་ནས། །མཐར་ཡང་བླ་མའི་གོ་འཕང་བསྒྲོད་པར་ཤོག །གཞན་ཡང་སྐྱེ་ཞིང་སྐྱེ་བ་ཐམས་ཅད་དུ། །དམ་པས་མ་བཞིན་བརྩེ་བས་རྗེས་བཟུང་སྟེ། །གང་གསུང་སྒྲུབ་བྱེད་ཐུགས་ཀྱི་བུ་གཅིག་པུ། །དམ་ཆོས་ནུ་ཞོས་ངོམས་པ་ཉིད་གྱུར་ཅིག །དགེ་བ་དང་བདེ་སྐྱིད་ལྡན་པའི་བཀྲ་ཤིས་ཕུན་སུམ་ཚོགས་པ་མངའ་བས་ཕྱོགས་ཀུན་ཏུ་ཁྱབ་པར་གྱུར་ཅིག །སརྦ་མངྒལཾ།། །།

བླ་མ་རྒྱལ་བ་ཞང་ཆེན་པོའི་རྣམ་པར་ཐར་པ།

བླ་མ་རྒྱལ་བ་ཞང་ཆེན་པོའི་རྣམ་པར་ཐར་པ་བཞུགས་སོ། །

བརྗོད་བྲལ་སྟོང་བའི་ཀློང་དཀྱིལ་ནས། །འོད་འབར་རྒྱལ་བ་ལོངས་སྤྱོད་རྫོགས། །ཐུགས་རྗེས་སྤྲུལ་པའི་བརྒྱུད་འཛིན་པ། །བླ་མ་མཆོག་ལ་གུས་ཕྱག་འཚལ། །བླ་མ་རྒྱལ་བ་ཞང་ཆེན་པོ་འདི་ཉིད། ཡུལ་ཡར་འབྲོག་སྒང་གི་སྒྲུབ་མཚོ་གླིང་དགུ་བླ་དོ་ཞེས་བྱ་བར་ཡབ་ཞང་སྲས་རྡོ་རྗེ་དངོས་གྲུབ་དང་། ཡུམ་ཞུ་མོ་ཉེ་རེ་ལྕམ་གཉིས་ཀྱི་སྲས་མཚན་བརྗོད་པར་དཀའ་བའི་བཀྲ་ཤིས་རྡོ་རྗེ་ཞེས་བྱ་བ་མེ་མོ་གླང་ལ་སྐུ་འཁྲུངས་ཏེ། དགུང་ལོ་བཅུ་གཅིག་ཕན་ཆད་ཡུམ་གྱི་རྩར་བཞུགས་ནས། དེ་ནས་ཡུམ་དེ་སྡང་བས་ཨ་ནེ་མ་ཇོ་ཞིག་གི་རྩར་རིང་དུ་ཁྲིད་ནས་ཕྱིན་པའི་དུས་སུ། བླ་མ་ལྕེ་སྒོམ་ནག་པོ་དང་མཇལ་བའི་དུས། བླ་མ་དགྱེས་ནས་འདི་ལ་སངས་རྒྱས་ཀྱི་སྤྲུལ་པ་གཅིག་འོངས་པ་ཡིན་པས་འདི་ང་ལ་ཕུལ་དང་གསུངས་ནས་ཁོང་གི་སྤྱན་སྔར་ལོ་གཅིག་བཞུགས། དེ་ནས་ཆོས་ཀྱི་རྒྱ་མཚོ་ཆེན་པོ་ཤེས་རབ་ཀྱི་པདྨ་རྒྱས་པར་འཁྲུངས་པས།

འདུལ་བ་མདོ་སྡེ་དབུ་ཚད་གསན་པ་དང་སྔགས་གསར་རྙིང་གི་བླ་མ་མཁས་ཤིང་གྲུབ་པ་ཐོབ་པའི་ཁྱད་འཕགས་ཀྱི་བླ་མ་བཅུ་གསུམ་བརྟེན་ནས། མཁྱེན་པ་ཆེ་ཞིང་། དགུང་ལོ་ཉི་ཤུ་རྩ་གཅིག་གི་བར་ལ་ཐོས་བསམ་མཛད་དོ། །དེ་ནས་ཉང་སྟོད་སྣ་ཁུ་ཡུལ་ན་བཞུགས་པའི་དུས། ཐོ་རངས་སྒྲ་ཆེན་པོ་གཅིག་གྲགས་ཏེ། བཞེངས་ནས་གཟིགས་པས་ནམ་མཁའ་འཇའ་དང་འོད་དུ་འཁྲུགས་པའི་དཀྱིལ་ན། དཔའ་བོ་དང་དཔའ་མོ་དང་། ཐུགས་རྗེ་ཆེན་པོ་དང་། སྒྲོལ་མ་དང་། སྔོན་གྱི་བླ་མ་རྣམས་ཀྱིས་ལུང་བསྟན་པ། ཀྱཻ་ཨེ་མ་ཚེ་གཅིག་ལུས་གཅིག་གིས་སངས་རྒྱ་བའི་མན་ངག་རྫོགས་པ་ཆེན་པོ་གསང་བ་བླ་ན་མེད་པའི་སྐོར་བྲག་སེང་གེ་དང་འདྲ་བ་ལ་ཡོད་ཀྱི། དེ་ཐོན་ལ་སེམས་ཅན་གྱི་དོན་དཔག་ཏུ་མེད་པ་གྱིས་ཤིག །འཕྲད་ཆོག་གི་ཆོས་ནི་ངོ་མཚར་ཨེ་མ། ཞེས་ལུང་བསྟན་ཏེ་མི་སྣང་བར་གྱུར་ཏོ། །

དགུང་ལོ་བཅོ་བརྒྱད་ཀྱི་དུས་སུ་ལུང་བསྟན་ངོ་མ་ཤེས་གསུངས། དེའི་སྲོད་ལ་བསམ་མནོ་བཏང་བའི་རྗེས་ལ་མི་ཞྭ་དཀར་པོ་གྱོན་པ་ཞིག་ན་རེ། དངོས་གྲུབ་སྦྱིན་གྱིས་འདོངས་གསུངས་ནངས་པར་ཐོ་རངས་ཀྱང་བྱུང་ནས་འདོངས་གསུངས་ནས་ཕྱིན་པས། ཉང་སྨད་པ་ཚབ་ཉི་མ་མདར་སླེབས་པའི་ནུབ་མོ་བན་དྷེ་མང་པོ་ཚོགས་ནས་སེར་ལྷ་གསོལ་ཞིང་འདུག་ནས་བཟའ་བཅའ་མང་པོ་བྱིན་པས་དེའི་ལོར་མུ་གེ་ཆེན་པོ་ཡོད་པས་དངོས་གྲུབ་དེ་ལ་ཟེར་རམ་སྙམ་པའི་ནམ་ལངས་ཁར་འདོངས་ཟེར་བ་ལ། བན་དྷེ་དེ་རྣམས་ཀྱིས་ཆང་མང་པོ་དྲངས་ཆོས་གཏམ་ཡང་མང་དུ་བྱས་ཏེ་ཤེས་རབ་དང་ཐོས་བསམ་ལ་མགུ་བ་ཡིན་སྐད། དེ་ནས་ཉི་མ་དྲོས་པ་ལ་ཁར་ལ་བྱོན་ནས་ལམ་ངོ་མ་ཤེས་ཙམ་ན། ཡང་དགེ་བསྙེན་ཞྭ་དཀར་ཅན་གྱིས་སྣ་དྲངས་ནས་ཕྱིན་ཏེ། སྟག་ཐབས་སུ་སླེབས་པའི་ནུབ་མོ་ཁང་སྟོང་ཞིག་ཏུ་ཉལ་ཙམ་ན། ཁོ་ན་རེ། འདིར་མ་བསྡད་ད་ལྟ་འདོངས་ཟེར་ཙ་ན་སྒོར་ཐོན་མ་ཐག་ཏུ་ཁང་སྟོང་དེ་འགྱེལ་ལོ། །དེའི་ནུབ་ཆར་ཆེན་པོ་བྱུང་ནས་བྲག་ཁང་ཞིག་ཏུ་བསྡད་པའི་ནུབ་མོ་ཁོའི་སྤྲུལ་པས་བཟའ་བཏུང་མང་པོ་ཁྱེར་བྱུང་། དེ་ནས་ནངས་པར་ར་ལག་ཚུགས་བརྒལ་ནས་འོ་ཡུག་མདའ་ན་མར་འཁྲུག་པ་ཡོད་ཀྱང་ཁོའི་སྤྲུལ་པས་འཇིགས་པ་མེད་པར་འུ་ཡུག་བར་བརྟོལ་བའི་ཉིན་པར་ཤིན་ཏུ་བཀྲེས་པ་བྱུང་བ་ལ་ཤིང་ཐུན་མ་ཀུན་གྱིས་བཟའ་བཏུང་བྱིན་ནས་ཕྱིན་པས་བྲག་སེང་གེ་དང་འདྲ་བའི་རྩར་སླེབས་པ་དང་། ཁོ་སྟོར་ནས་མ་རྙེད། སྤྱན་གྱིས་ཀུན་ཏུ་གཟིགས་ཀྱང་མ་རྙེད། ཕྱི་ལོག་ཏུ་མ་བཏུབ་གནས་པ་ལས། ཁ་བྱང་དུ་བལྟས་པས་རྩྭ་བཟང་པོ་སྐྱེས་པའི་སྒོ་གཅིག་འདུག་ནས། ལག་ན་མཚལ་རྣོན་ཅིག་ཡོད་པ་དེ་བརྒྱབ་པས་ནང་དུ་ཁྲོལ་གྱིས་སོང་ནས། ནང་དུ་ཕྱིན་པས་བྲག་ཕུག་གི་དབུས་

ན་དཀྱིལ་འཁོར་གཅིག་གི་དབུས་ན་ཉི་མ་ཤར་ནས་འདུག་པ་ལ། མཚལ་རྣོན་གྱིས་རྔོགས་པས། སྦྲུལ་དང་སྦལ་པ་ཤིག་ཤིག་འདུག་ནས་རིམ་པ་བཞིན་དུ་བསལ་ནས་སྟེང་དུ་བཏོན་ཏེ་བལྟས་པས་ཐུགས་ལ་ཆོས་ནི་ང་རང་མཁས། ནོར་ཞིག་བྱུང་ན་དགའ་བ་ལ་སྙམ་བལྟས་པས། དེ་ནས་ཁ་བྱང་བརྒྱ་རྩ་བརྒྱད་བྱུང་ནས་རབ་ཏུ་དགའ་ནས་བྲོ་འཁྲབས་སོ། །དེ་ནས་འབྲེང་ཞག་ཅིག་གིས་གྲིལ་ནས་ལུང་གི་ཕུག་ཅིག་ཏུ་བལྟས་པས། ས་རུབ་ནས་མ་མཐོང་བར་ཡོད་ཙ་ན། ཡང་དགེ་བསྙེན་གཅིག་གིས་མར་མེ་དང་བཟའ་བཏུང་ཁྱེར་ནས་དཔེ་ལ་བལྟ་ཡིན་ཡོད་ཙ་ན། སྐད་གདངས་ཤིན་ཏུ་འཇིགས་སུ་རུང་བ་ཞིག་སྒོ་དྲུང་དུ་བྱུང་བ་དང་། ཁོས་འདི་ལུང་བསྟན་པའི་སྤྲུལ་པ་དེ་ཡིན་པར་ཨ་ལྕེས་མ་རིག །ཅེས་སྨྲས་པ་དང་། ངས་ཨ་ལྕེ་ཁྲིད་ནས་འོང་གི་ཟེར་བ་དང་། དེ་ནས་ཅི་ཞིག་ཙམ་ན་སྐད་ཤིན་ཏུ་འཇིགས་པ། ཕུག་པ་རྡིབ་པ་སྙམ་བྱེད་ནས། སྤྱན་བཏེག་བྱས་པས་སྒོ་དྲུང་ན་མིག་སླ་ང་ཙམ་ཡོད་པ་ཁ་ཁྲག་ཏུ་ཁོལ་བ་གཅིག་མཆེ་བ་གཙིགས་ཤིང་འཇིགས་སུ་རུང་བ་ཞིག་འདུག་པ་དང་བྲེད་དེ། འདི་དང་འཕྲད་པ་ཅི་ཡིན་སྙམ་པ་དང་། ཡང་གོང་དུ་ལུང་བསྟན་པ་ཨ་ལྕེས་མ་རིག་བྱས་པས། དེའི་ཞལ་ནས། ང་ནི་ཨེ་ཀ་ཛཱ་ཏི་ཡིན། ཚོགས་འཁོར་བརྒྱ་དང་རྩ་བརྒྱད་ཐོང་། ལོ་གསུམ་བར་དུ་མ་བཤད་ཅིག །ཅེས་གསུངས་ནས་བཞུད། དགེ་བསྙེན་ཞྭ་དཀར་ཅན་དེ་ནི་དགེ་བསྙེན་རྡོ་རྗེ་ལེགས་པའོ། །དེ་ནས་ཕུག་པའི་སྒོ་བཀག་ནས། གཡུ་ཆུང་ཞིག་ཡོད་པས་མི་ཞིག་གིས། བའི་ཤ་དང་ནས་ཁལ་གསུམ་ལ་ཚོགས་བརྒྱ་རྩ་བརྒྱད་བཏང་ངོ་། །དེ་ནས་ཉང་སྟོད་ཁུ་ཡུལ་ནས་ཤོག་

བུ་དང་ཡོ་བྱད་བསྣམས་ནས་བྱོན། ཉང་རྟག་རྗེད་དུ་ཤ་མོ་དཀར་མཚོ་བྱ་བ་ཡོན་བདག་མོ་དད་པ་ཅན་ཅིག་གིས་ཞབས་ཏོག་ཆེར་མཛད་ནས་དཔེ་རྣམས་ཚང་བར་བྲིས། ལོ་གསུམ་གསང་བ་མ་ཐུབ་གསུངས་དེ་ནས་དགུང་ལོ་ཉི་ཤུ་རྩ་ལྔ་ལ་དབུས་སུ་བྱོན་ནས། སྐྱི་སྒང་དུ་གནས་ཆུང་གཅིག་བརྩིགས། དེ་ནས་གཙང་དུ་བྱོན་ནས་ཤག་མོ་དཀར་མཚོ་དང་འགྲོགས་ནས་ཤངས་དང་རྟ་ནག་ནས་ཡར་ལ་བྱོན་པས་དེར་ཟམ་ཁ་གཅིག་ཏུ་གྲུབ་ཐོབ་སེང་གེ་དབང་ཕྱུག་དང་མཇལ་ནས། དོན་སྐུ་གསུམ་དབྱེར་མེད་དུ་གཏན་ལ་ཕབ། ཆོས་རྣམས་ཀྱི་རྗེས་གནང་བྱིན་ནས་མི་སྣང་བར་གཤེགས་སོ། །དེ་ནས་དབུས་སུ་བྱོན་བླ་མ་ལ་སྟོད་པ་ལ་སོགས་ཏེ་གྲུབ་ཐོབ་མང་པོ་དང་མཇལ་ནས་གདམས་པ་མ་ལུས་པའི་ཞུན་ཐར་ཆོད་པར་མཛད་དོ། །ཆགས་ཞེན་འཁྲི་བ་བཅས་པ་ལ་དགོངས་ཏེ་ཡོ་བྱད་སྤོང་ཐག་མཛད་ཅིང་ཆོས་ཀྱི་རྒྱ་མཚོའི་ནང་ནས་ཡིད་བཞིན་ནོར་བུའི་གསང་བ་བླ་ན་མེད་པ་སྤྱན་སྔར་འཚོགས་ཤིང་འདུས་པ་རྣམས་སྨིན་ཅིང་གྲོལ་ཏེ་སངས་རྒྱས་པར་མཛད་དོ། །དེ་ནས་དུས་སྐབས་ཤིག་ཏུ་སློབ་དཔོན་གཉེར་སྒོམ་གྱིས་ཚུར་ཁུངས་སུ་གདན་དྲངས་པའི་དུས་སུ་ཚོགས་འཁོར་མཛད་པའི་ཐོ་རངས་ཁ་བི་མ་ལ་དང་མཇལ་ནས་བྱིན་རླབས་དང་རྗེས་གནང་མཛད་དེ། མཁའ་ལ་གཤེགས་ཏེ་མི་སྣང་བར་གྱུར་ཏོ། །དེའི་ཚེ་དགུང་ལོ་དྲུག་ཅུ་རྩ་གཅིག་བཞེས་པ་ཡིན་ནོ། །དེའི་ལོ་ལ་བདག་ཅག་གི་ཡུམ་དང་རྟེན་འབྲེལ་མཛད་ནས་སྒོམ་ཁང་དུ་བཞུགས། ཚོགས་པ་ཡང་རྒྱ་ཆེར་འདུས། ཆོས་འཁོར་མང་པོ་མཛད། བདག་ཅག་ལྕམ་སྲིང་གསུམ་འཁྲུངས་ནས་སྒོམ་ཁང་དུ་ཞིང་དང་མཁར་ལས་ལ་སོགས་པ་ཅི་རིགས་པ་མཛད། དེའི་དུས་སུ་བླ་མའི་ཞལ་ནས་བདག་གིས་ཚོགས་

པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་ཏེ་གསུངས། སྐུ་ལུས་ལ་གྲིབ་མ་མེད་པ་དང་། སྐབས་སུ་རིགས་ལྔར་གསལ་བ་དང་། རྫོགས་པ་ཆེན་པོའི་ཆོས་གསུངས་པའི་དུས་སུ་འཇའི་གུར་ཕུབ་པ་ཀུན་གྱིས་མཐོང་། དེའི་ཚེ་རང་གི་བུ་ཆེན་རྣམས་བསྡུས་ནས། བླ་མ་གཞུང་པས་དབུ་མཛད་པའི་དགེ་བའི་གཤེས་གཉེན་རྣམས་ལ་ཅི་བདོག་པ་ཐམས་ཅད་འཁོར་གསུམ་ཡོངས་སུ་དག་པར་མཛད་དོ། །དེ་ནས་དགུང་ལོ་བདུན་ཅུ་དོན་གཅིག་ཕག་གི་ལོའི་ལུག་གི་ཟླ་བའི་ཉི་ཤུ་གཉིས་ཀྱི་ནམ་ཕྱེད་ན་སྐུ་གཤེགས་པའི་ཚུལ་བསྟན་ཏེ། ཤར་ཕྱོགས་སུ་སྒྲ་ཆེན་པོ་བདུན་བསྒྲགས་སོ། །ས་ཆེན་པོ་གསུམ་བཏུད་དུ་གཡོས་སོ། །ནམ་མཁའ་ལ་སིལ་སྙན་དང་དྲི་ཞིམ་གྱི་ངད་དུ་གྱུར། འཇའ་ཚོན་སྣ་ལྔའི་གདུགས་ཕུབ། འོད་ཕུབ་ཆུང་ཙམ་ནི་ནམ་མཁའ་ལ་གཅལ་དུ་བཀྲམ་སྟེ། ཞང་ཆེན་པོ་མྱ་ངན་ལས་འདས་སོ། །དེའི་ཕྱིར་ནུབ་པུར་ཁང་བརྩེགས་ཏེ་པུར་སྦྱངས་པས་སྐུ་ལྔའི་ཚབ་ཏུ་རིང་བསྲེལ་ལྔ་བྱོན། ས་བཅུ་དྲུག་ནོན་པའི་རྟགས་སུ་གདུང་ཤ་རཱི་རམ་བཅུ་དྲུག་བྱོན། མེ་ཏོག་གི་ཆར་བབས། དེར་འདུས་པའི་མི་རྣམས་ལ་མི་རྟོག་པའི་ཏིང་ངེ་འཛིན་སྐྱེས་སོ། །ས་ཆེན་པོ་ལ་འཁོད་པར་བྱས་སོ། །ཀྱེ་མ་ཀྱེ་ཧུད་རྒྱལ་བ་ཞང། །འཛམ་གླིང་ཆོས་ཀྱི་འོད་ནུབ་ན། །རྗེས་འཇུག་མུན་པ་གང་གིས་སེལ། །བླ་མ་ཁྱོད་ཀྱི་ཐུགས་རྗེ་ཡིས། །ཆུ་བུར་མིག་གི་གོ་སོལ་ལ། །ཡེ་ཤེས་སྒྲོན་མ་བསྟན་དུ་གསོལ། རྫོགས་སོ།། །།དགེའོ། །

འཁྲུལ་ཞིག་སེང་གེ་རྒྱབ་པའི་རྣམ་ཐར།

འཁྲུལ་ཞིག་སེང་གེ་རྒྱབ་པའི་རྣམ་ཐར་བཞུགས།

ན་མོ་གུ་རུ་བྷྱཿ། ཨེ་མ་ངོ་མཚར་ཆོས་ཉིད་ཐེག་དགུའི་མཁའ་ལ་ཐུགས་རྗེའི་སྐལ་ལྡན་ཕོ་མོ་ལ་ཉི་འོད་ཤར། །རྗེས་འཇུག་གི་མ་རིག་ལིང་ཐོག་སྐྱེ་མེད་མཁའ་ལ་ཡལ། །ཀུན་ལ་འཛིན་མེད་སྤྲོས་བྲལ་ཆོས་ཀྱི་དབྱིངས་སུ་རོ་གཅིག་མཉམ་ཉིད་པའི། །རེ་ས་འགྲོ་མགོན་དྲིན་ཅན་བླ་མ་རྣམས་ལ་གུས་པས་ཕྱག་འཚལ་བསྟོད། །ཨོཾ་ཨཱཿཧཱུྃ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས། འཁྲུལ་རྗེས་འཇུག་གི་དོན་དུ་མེ་ལོང་རྡོ་རྗེས་ཞུས་པ་ཞིག་བླ་མའི་ལོ་རྒྱུས་ཟུར་ཙམ་ནི། །ཡུལ་ལ་ཁྱད་འཕགས་གཡོ་རུ་གྲྭ་ཡི་ནང་། །ཡབ་ཤངས་པའི་རྣལ་འབྱོར་པ་བཟང་པོ་ཡིན་སྐད་ཡབ་ཡུམ་སོ་བ་འབྲང་དུ་ཡུམ་བཀྲ་ཤིས་དངོས་གྲུབ་གཉིས་ཀྱི་སྲས། །སྐུ་འཁྲུངས་ངོ་མཚར་རྟགས་ལྡན་ཉི་མ་ཤར་བ་དང་རི་རྩེ་ལ་ཕྱིན་པ་དང་འཇའ་ཡིས་བསྐོར་བ་ཀུན་རྣམས་མོས། །སྐྱེ་བ་སྔོན་དུ་ཆོས་ཀྱི་འབྲེལ་པས་ལས་འཕྲོ་སད་པས་འདིར་བླ་མ་བཟང་པོའི་དབོན་པོར་འཁྲུངས། །ལོ་དགུའི་བླ་མ་ཀུན་ལ་དུས་སུ་གསོལ་འདེབས་མོས་གུས་སྲོད་ཐོ་རངས་སུ་བསྐྱངས། །ལོ་བཅུ་ལོན་ནས་ངེས་འབྱུང་དད་པ་ཐུན་མོང་མ་ཡིན་པ་སྐྱེས། །འཇིག་རྟེན་ཚེ་འདིའི་ཕྱོགས་སུ་གཏོང་རི་དབུ་སྙུང་བཞེས་དག་ལ་བློ་མ་ཞུགས། །བྱས་པ་ཐམས་ཅད་འཇིག་པའི་ཆོས་ཅན་མིག་ཅེར་རེ་མི་བདེན་རྫུན། །སྒྱུ་མ་ལྟ་བུར་སངས་རྒྱས་ཀྱིས་མདོ་རྒྱུད་རྣམས་སུ་གསུངས་ནས་འདུག་པ་ལ། །མ་རྟོགས་པ་འདི་རྣམས་བདེན་བདེན་རྟག་རྟག་འདྲ་བ་འདི་ལྟ་བུ། །འཁོར་བ་འདི་ལ་སེམས་ཤིང་འཇིགས་པས་ཤུམ་ཤུམ་ཟིང་ཟིང་སྐུ་ལུས་ཀྱི་སྤུ་བྱས། །བཅུ་གཉིས་ལོན་དུས་མི་ལ་གུས་པའི་བཟའ་བཅའ་ལ་མཐོ་འགྲོགས་བྱས་པ་གཞན་

གྱི་སྤྱོད་པ་ལ། །ཐུགས་མུག་སྐྱོ་བ་དྲག་པོ་ཡུལ་མི་སྐྱེས་བ་དེ་རྣམས་གཏིང་ནས་སྐྱེས། །དུས་དེ་ན་མཐོ་འགྲོགས་ཁྱད་གསོད་མི་བྱེད་དམ་བཅའ་མཛད་པས་མཐར་འཁྱོལ། །བཅུ་གསུམ་ལོན་ཚེ་མཚན་ལྟས་མནལ་ལམ་ཆུ་མིག་གཙང་མ་རྡོལ་བ་དང་ཉི་མ་ཤར་བ་ཟླ་བ་ཤར་བ་སོགས་ལྟས་བཟང་པོ་བྱུང་ལུང་བསྟན་ནི། །ཐུགས་རྗེ་ཆེན་པོས་མཛད་ཅིང་དེའི་དུས་སུ་རྫོགས་ཆེན་གཏད། །སྤྱན་རས་གཟིགས་ཀྱིས་བྱིན་བརླབས་ཐུགས་རྗེ་དེས། །ངན་ཞིང་མི་གང་དབུལ་ཞིང་སྤྲང་པོ་དང་ངན་ལོང་ཤིག་དང་འཇི་བ་རྣམས་ལ། །སྙིང་རྗེས་མ་བཟོད་དུས་རྒྱུན་དུ་སྐྱོང་བའི་དམ་བཅའ་མཛད་པ་མཐར་ཡང་འཁྱོལ་བ་ཡིན། །བཅོ་བརྒྱད་ལོན་ཚེ་འཁོར་འདས་སྣང་སྲིད་ཀྱིས་བསྡུས་སྣང་བ་ཐམས་ཅད་བདེན་མེད་ཁོང་དུ་ཆུད་སྣང་བ་ལ་གཟིགས། །གཏད་མེད་སྨྱོན་པའི་སྤྱོད་པས་བྲང་དང་བརླ་དང་ཚང་ར་ལ་ཁྱད་མེད་པར་རྟོགས་པའི་སྒོ་ནས་སྐབས་སུ་བྲང་ཨན་རེ་བརྡུངས་ཡང་དུས་གཅིག་གི་ཚེ་ཨ་མ་ན་རེ་ཁྱོད་ཀྱིས་གསོལ་མཆོད་གྱིས་ཟེར་ནས་ཟན་གཡག་གཏད་པ་རྒྱལ་པོ་མཆོད་བསེན་མོ་མཆོད་བྱས་པས་ཁྱོད་འདྲའི་བུ་འོང་བ་སྐྱེ་བ་ཟེར་མི་སྣང་བཟློག །སེམས་ཀྱིས་སེམས་བལྟས་དངོས་མེད་སྟོང་པར་ཆོས་ཐམས་ཅད་སྟོང་པ་ཉིད་དུ་ངེས་གོ། མཐའ་བཞི་་མུ་བྲལ་སྙིང་པོའི་དོན་དེ་ཁོང་དུ་ཆུད་པར་བྱུང་། །དགུང་ལོ་ཉི་ཤུ་རྩ་ལྔ་ཟེར་ལོན་ནས་ཚེ་འདིའི་བྱ་བ་གློས་བཏང་ནས་ཆོས་ལ་བྲོས། །ལེ་འུ་སྒང་པའི་མཁན་པོ་དང་བཀྲ་ཤིས་སྒང་པ་བ་སྟེ་མཁན་སློབ་གཉིས་པོ་ཡིས། །བདག་གི་མཁན་སློབ་མཛད་དེ་བསྟན་ཐུབ་པའི་བསྟན་པ་ལ་རབ་ཏུ་བྱུང་བ་བྱས་སོ། །དམ་པའི་ཆོས་འདུལ་བའི་བསྲུང་བྱ་དང་བསླབ་བྱའི་དོན་བསླབ་པ་ལེགས་པར་ལུང་ནོས། །དེ་ནས་དྲིན་ཅན་བླ་མའི་སྤྱན་སྔར་བྱོན་ཏེ་སེང་གེ་རྒྱབ་ཏུ་བཞུགས་ནས་ཆོས་སྒོ་ཕྱེས། །གཏིང་ཕྱུང་དབང་ནས་ཁྲིད་ཞང་

མཚལ་པའི་ཆོས་སྐོར་རྣམས་རྫོགས་པར་ཞུས། །ཡུལ་དེ་ནས་ཞིང་བརྩོང་ནས་འཁོར་གསུམ་དག་པར་བྱས། །མཁན་སློབ་ཉི་ཟླ་ཟུང་གཅིག་རྩ་རི་བ་རྗེ་བཙུན་མ་དང་། ཀ་རི་ཀ་དང་། བེང་རྣམས་ཞུས། སེངྒེ་མཇིང་བསྣོལ་ཞུས། །རས་པ་དྲི་རས་ཆུང་པའི་ཨ་ཐུང་། ཞི་བྱེད་སྤྱོད་སྐབས་དང་པོ་དང་འབྲིང་པོ་ཤོག་དྲིལ་བཞི་འཕོ་བ་སྤྱི་རྟོལ་མ་གསེར་སྲང་མ། དང་པོའི་སྒྲུབ་པ་དང་པོ་ལུགས་མེད་ལྷ་རི་དཔལ་དང་ནི། །སྤྲུལ་སྐུ་གཞོན་འབུམ་སྟོན་ཕྱར་བྱང་གཏུམ་མོ་གསང་སྒྲུབ་ཡོན་དང་། །མཁས་བཙུན་ཁྱད་འཕགས་སློབ་དཔོན་ཇོ་སྲས་བདེ་མཆོག་ནམ་མཁའ་དང་མཉམ་པ་དང་། ཆོས་སྐྱོང་རྣམས་ཞུས། །མྱུར་ཟབ་གདམས་པའི་གནད་ཞུས་བླ་མ་བརྒྱད། །ཆོས་བདག་གུ་རུ་ཇོ་འབེར་ཀྱི་ཐུགས་ཀྱིས་བཟུང་ནས་ཁྱད་འཕགས་གུ་རུ་གཙུག་གི་རྒྱན་གཅིག་པོ། །དབང་རྫོགས་པ་ཆེན་པོ་སྙིང་ཏིག་ཡོངས་སུ་རྫོགས་མན་ངག་དཔེ་རྒྱུད་རྗེས་གནང་བཅས་མ་ལུས་པ་དང་། །གསང་དེ་ལྟར་གསང་བ་བ་སྙིང་ཏིག་རྒྱལ་བའི་དགོངས་པ་སྟེ། །ཚུལ་ཇི་ལྟར་གསུངས་ན་ཡིད་དཔྱོད་ཚིག་ལ་མ་བརྟེན་མངོན་སུམ་དུ། །མཐའ་བྲལ་ནམ་མཁའི་མཐོང་ནས་འོད་ཟེར་འཕྲོ། །ཞི་ཁྲོ་རང་གསལ་བསྟན་པའི་དྲིན་ཅན་ལགས། །ལར་ནི་ཚེ་འདིའི་ཆེ་དག་སྤངས་ཏེ་དམན་ས་རྒྱུན་དུ་བཟུང་། །སྒྲུབ་པ་མཆོག་གི་མྱུར་དུས་རྒྱུན་དུ་བླངས་རི་ཁྲོད་དབེན་ས་བརྟེན་ཞང་གི་བཞུགས་གནས་ཁྲོ་བོ་མ་དང་། །ཆེ་འབྲེལ་ཚེ་འདི་ལ་སངས་རྒྱ་ཆུང་འབྲེལ་སྙིང་པོའི་ཐབས་རྡུགས་ཀྱང་སྤྲུལ་སྐུའི་ཞིང་དོན་དང་སྤྲད། །ཞེ་འདོད་མེད་པའི་གནད་འགྱོད་པ་མེད་དོ་རྗེས་བུ་སློབ་རྣམས་འཇུག་གོ་བ་ལོང་། །དུས་ངན་སེམས་ཅན་ལ་སྐྱོ་ཤས་ཡི་ཚེ་འདི་པ་རྣམས་མུག་ལམ་ཁྱེར་ཞིང་ཁམས་བལྟ། །སྣང་བ་མི་བསྟུན་ཐིག་ལེ་འདི་ལ་གོམས་པ་སུ་བྱེད་ང་དང་གཅིག །ངུས་གསུམ་གྱི་སངས་རྒྱས་ཐམས་ཅད་ཀྱི་

ཡོན་ཏན་རྫོགས་ཏེ་སྐུ་གདུང་འབར་བ་ནས་གསུངས་པ་བཞིན་ཆོས་ཟད་ཀ་དག་ཏུ་ཨ་ཏིའི་ངང་། །ཨ་ཡེ་ཇི་བཞིན་པ་ཀྱེ་མ་འཁྲུལ་ཞིག་དྲིན་ཅན་སངས་རྒྱས་དབོན་པོ་ཀྱེ། དྲེད་པོ་གནོང་བའི་གདུང་ཤུགས་འོ་དོད་དུས་རྒྱུན་དུ་འབོད། །བརྒྱུད་པའི་བླ་མའི་བླ་མ་དྲིན་ཅན་འཁྲུལ་ཞིག་རིན་པོ་ཆེ། མི་ལུས་སྙིང་པོའི་དོན་ཅན་གོང་མ་ལ་ལྟོས་ནས་དོང་དུ་ལྷུང་། །བླ་མ་དང་འབྲལ་མེད་ཐུགས་རྗེའི་ཐག་པ་དུས་རྒྱུན་དུ་ཐོངས། །ཐེག་ཆེན་སྔགས་གསར་རྙིང་གཉིས་ཀ་ཞིང་ལ་ཉམས་ལེན་ཐན་པ་བྱུང་། །བླ་མ་རྣམས་ལ་མོས་གུས་བྱས་སོ་བྱིན་བརླབས་ཆུ་རྒྱུན་ཕོབས། །ལེ་ལོ་ཅན་སྙིང་མེད་པོ་ཡིས་ཉམས་ལེན་ཟླ་བ་ཕྱི་མ་དང་སང་ཕོད་དུ་ཕྱི་བཤོལ་བྱས། །ཉམས་མཆོག་ཐུན་མོང་རྟོགས་གློ་བུར་རྐྱེན་ཅི་ལ་ཡང་བརྟེན་ནས་གཏད་མེད་དུ་སྟོན་ཅིག་རྩ་བ་བླ་མ་ཡི་དམ་མཁའ་འགྲོ་གསུམ། །འཁྲུལ་ཞིག་སེང་གེ་རྒྱབ་པའི་རྣམ་ཐར་རྫོགས་སོ།། །།དགེའོ། །

འཁྲུལ་ཞིག་སངས་རྒྱས་དབོན་པོའི་རྣམ་ཐར་ཉིད་ཀྱིས་མཛད་པ་ནོར་བུའི་གསལ་བྱེད།

འཁྲུལ་ཞིག་སངས་རྒྱས་དབོན་པོའི་རྣམ་ཐར་ཉིད་ཀྱིས་མཛད་པ་ནོར་བུའི་གསལ་བྱེད་ཅེས་བྱ་བ་བཞུགས་སོ། །

དགོངས་ཀློང་མཁའ་ལྟར་དག་པ་ཆོས་སྐུའི་མཁའ་ཀློང་ལ། །རང་བཞིན་ལྷུན་གྱིས་གྲུབ་པ་ལོངས་སྐུའི་དཀྱིལ་འཁོར་རྒྱས། །སྤྲུལ་པའི་འོད་ཀྱིས་འགྲོ་བའི་མུན་པ་སེལ། །སྐུ་གསུམ་མངོན་གྱུར་དྲིན་ཅན་བླ་མ་རྒྱལ་གྱུར་ཅིག །ཚད་མེད་པའི་མཁྱེན་རབ་དང་ཐུགས་རྗེས་འགྲོ་བ་རྣམས་ཡང་དག་པའི་ལམ་ལ་འཁྲིད་པར་མཛད་པའི་དེད་དཔོན་དམ་པ་དེ་ལས། ཁོ་བོས་ཡང་ཟབ་བླ་ན་མེད་པའི་གདམས་པ་མ་ལུས་པ་ཐོབ་ཅིང་། །ཉམས་སུ་ལེན་ཅིང་སྐལ་བ་དང་ལྡན་པའི་གདུལ་བྱ་གཅིག་གཉིས་ཙམ་ལ་གདམས་པའི་དོན་གནང་བར་བྱེད་ཀྱིན་ཡོད་པའི་ཐད་དུ། དད་མོས་དང་ལྡན་པའི་བུ་སློབ་འགའ་ཞིག་གིས། ཁོ་བོའི་རྣམ་ཐར་ཅུང་ཞིག་བྲིས་གསུང་པ་ལ་བརྟེན་ནས། ཁོ་བོའི་རྣམ་ཐར་ལ་སོགས་བཀོད་པའི་འོས་ཅན་མ་ཡིན་ཞིང་། ལོག་ལྟ་ཅན་རྣམས་ཀྱིས་སྒྲིབ་པ་བསགས་པའི་རྐྱེན་དུ་གྱུར་ཀྱང་། ཁོང་རྣམ་པའི་ནན་མ་ཐུབ་པ་ལ་བརྟེན་ནས། ཁོ་བོའི་རྣམ་ཐར་ནོར་བུའི་གསལ་བྱེད་བཀོད་པ་ལ། བླ་མ་ཡི་དམ་

མཁའ་འགྲོའི་ཚོགས་དང་བཅས་པ་རྣམས་ཀྱིས་བཟོད་པར་གསོལ་ལ་ཐུགས་རྗེས་འཛིན་པར་ཞུ་ཞིང་། འདིར་བཅོམ་ལྡན་འདས་མགོན་པོ་འཇམ་པའི་དབྱངས་ཀྱི་རྣམ་འཕྲུལ་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱིས་བཞེངས་པའི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་མ་ག་དྟ་རྡོ་རྗེ་གདན་དང་གཉིས་སུ་མེད་པའི་ཡུལ་བྱང་དཀར་གྱི་ལྷ་སྡིངས་ཞེས་བྱ་བ་ནི། ཁོ་བོའི་ཡུལ་ཡིན། ཁོ་བོའི་སྐྱེ་བ་སྔ་མའི་སྐྱེ་ས་གཙུག་ལག་ཁང་ཆེན་པོ་འདིའི་བྱང་ཕྱོགས་ན། སངས་རྒྱས་མ་ཆགས་པདྨ་ཅན་གྱིས་བྱིན་གྱིས་བརླབས་པའི་བྱང་ཆུབ་སེམས་བསྐྱེད་གླིང་ཞེས་བྱ་བའི་བྱ་འདབས་གླིང་འོག་ཅེས་བྱ་བར། ཕ་ནི་སྤ་ཀུན་དགའ་རྒྱལ་མཚན་ཅེས་བྱ་བ་དང་། མ་ནི་ངམ་མོ་དད་པ་སྐྱིད་ཅེས་བྱ་བའི་བུར་སྐྱེས་ཤིང་དེར་ཡང་ལས་ཀྱི་དབང་གིས་ཆོས་ལ་མི་ཚུད་པའི་རིགས་སུ་འདུག་པ། དཀོན་མཆོག་གི་ཐུགས་རྗེ་ལ་བརྟེན་ནས་ལོ་བདུན་བརྒྱད་ཀྱི་དུས་སུ་ཚེའི་དུས་བྱས་ཏེ། ཡང་དེ་ཁའི་གོང་ལ་གདངས་འབྲེལ། ཕ་དགེ་

གཉེན་པདྨ་སྐྱབས་བྱ་བ་དང་། མ་འབྲོམ་མོ་སྐྱིད་པ་ལེགས་ཞེས་བྱ་བའི་བུར་སྐྱེས་ནས། བུ་ཁོ་བོ་གཅིག་པུ་ལས་མེད་པའི་སྟབས་ཀྱིས་ཆོས་སྒོར་མི་འཇུག་ཅིང་། འཇིག་རྟེན་གྱི་བྱ་བ་ལ་འཇུག་བསམ་པ་ཡོད་ན་ཡང་ང་རང་ཚེ་སྔོན་གྱི་ལས་བསམ་པ་རྣམ་པར་དག་པ་དང་། དྲིན་ཅན་བླ་མ་དམ་པ་རྣམས་ཀྱི་ཐུགས་རྗེ་ལ་བརྟེན་ནས། ལོ་ལྔའི་སྟེང་དུ་ཁྱི་སྨྱོན་གྱིས་ཉི་མ་གུང་མཐིལ་ལ་རྨུགས་པས། ཁོ་བོ་བསྟན་པའི་སྒོར་འཇུག་པའི་འདྲེན་པའི་བླ་མ་འདི་བྱུང་ཞིང་། གཞན་ཡང་ཁོ་བོ་ཆུང་ངུ་ནས། དད་མོས་ལྡན་པ་ཞིག་ཡོད་པ་ལ་བརྟེན་ཏེ། དབྱར་གྱི་དུས་སུ་གཙུག་ལག་ཁང་ཆེན་པོར་ཕྱོགས་ནས་གདན་དྲངས་པའི་མཁན་པོ་དུང་སྟོང་བཞི་ལ་སོགས་པ་རྣམས་ཀྱིས་གཏོར་མ་གཏོང་པའི་གཏོར་སྐད་བཏང་བ་དེ་ཐོས་པ་ལ་བརྟེན་ནས། ཁོ་བོས་ཡང་དྲན་པ་སད་པ་སྙམ་བྱེད་དེ། ཕོར་ཆུང་རེར་ཆུ་ཐིགས་པ་རེ་དང་། རྩམ་པ་ཕུམ་རེ་བླུགས་ནས་དགོངས་མོ་ས་རུབ་མཚམས་སུ་ནམ་མཁའ་ལ་གཏོར། གཏོར་མ་ལ་འབྱོན་པར་ཞུ་ཟེར་པའི་སྐད་རིང་གསུམ་གསུམ་ནམ་མཁའ་ལ་གཏོང་དུས། ནམ་མཁའ་ལ་བླ་མ་ཡི་དམ་མཁའ་འགྲོ་བཞུགས་པ་སྙམ་བྱེད་ཅིང་། རེས་འགའ་གདུག་འདྲེ་ཨེ་ཡིན་བསམ། འཇིགས་ཞུམ་པ་ཞུད་ཚིལ་པ་ཡང་བྱུང་། དེའི་དུས་དད་པ་མོས་གུས་དང་། སྙིང་རྗེ་ཆེན་པོ་ཡང་བོངས་ལ་བསྟུན་པའི་ཆེན་པོ་ཡོད་པ་ལ་བརྟེན་ནས། ལོ་བདུན་གྱི་སྟེང་དུ་མཁན་ཆེན་ཤེས་རིན་དང་། སློབ་དཔོན་ལྷ་ཤེས་རབ་རྒྱལ་མཚན་པའི་དྲུང་དུ་དགེ་ཚུལ་གྱི་བསླབ་པ་

བླངས་ཤིང་། བསྟན་པའི་སྒོར་ཞུགས་ནས་དད་པ་དང་ཤེས་རབ་འཐད་རབ་ཡོད་པ་ལ། ཁོ་བོའི་སློབ་ཆུང་གཅིག་གི་སྤུན་ལ་དབང་ཕྱུག་ཟེར་བ་ཞིག་ལ་མཛེ་བྱུང་ནས། དེའི་གཡོག་བྱུག་པ་ལ་སོགས་ཐམས་ཅད་བྱས་པས། ཁོ་བོའི་དད་པ་དང་ཤེས་རབ་ཐམས་ཅད་དེས་འགྲིབ་ནས། ཤེས་རབ་སྙིང་པོ་འཛིན་པ་ལ། ཟླ་བ་གསུམ་གྱི་བར་དུ་སློབ་དཔོན་གྱིས་རྒྱུགས་བླངས། ཁོ་བོས་རྒྱུགས་མ་འཕྲོད་པར། སློབ་དཔོན་གྱིས་བརྡུངས་པའི་སྐྱེལ་མ་ཡང་མཛེ་ཕོ་དེས་བྱས་པས། ཤེས་རབ་ཇེ་ཆུང་ལ་སོང་ཞིང་། དེ་དུས་ཕར་ཕྱིིན་ལ་སློབ་གཉེར་ཞིག་བྱས་པས་ཀྱང་། ཤེས་རབ་མེད་པའི་སྟོབས་ཀྱིས། རང་སྦྱོང་ལ་མི་མ་མགུ་བ་ཞིག་བྱུང་ལགས་ཤིང་། དེ་དུས་བླ་མ་ཤཱཀྱ་རིན་ཆེན་པའི་དྲུང་དུ། འཇམ་དབྱངས་དཀར་པོ་དཔའ་བོ་གཅིག་པ་དང་། དབྱངས་ཅན་མ། མི་གཡོ་བ་དཀར་པོ། འཇམ་དཔལ་སྨྲ་སེང་དང་བཅས་པ་རྣམས་ཀྱི་ལུང་ཞུས་ནས། ཟང་འཇམ་དབྱངས་དཀར་པོ་ལ་མོས་པ་བྱུང་སྟེ། དེ་ལ་བསྙེན་པ་བྱས་པས། དེས་བྱིན་གྱིས་བརླབས་པའི་རྟགས་ལ། སྔར་མེད་པའི་བྱམས་པ་དང་། སྙིང་རྗེ་རྒྱུད་ལ་དུངས་པ་སྐྱེ་བ་དང་། ནུབ་གཅིག་གི་རྨི་ལམ་ན་ཡང་། མི་དཀར་པོ་ཞིག་གིས་ཤེལ་གྱི་ཕྲེང་བ་དང་། པོ་ཏི་བྱིན་པ་དང་། ལྡུམ་ར་ཞིག་གི་ནང་ན་མེ་ཏོག་ཙམ་པ་ཀ་དཀར་ལ་དངས་པའི་ཁྲོད་ནས། མེ་ཏོག་ཕོར་བ་ཙམ་འཐུ་བ་ལ་སོགས་པ་རྨིས་པ་དང་། ཁོ་བོས་ཡིག་ཆ་འཛིན་པ་ལ་ཚིག་རྐང་གཉིས་གཉིས་ཙམ་ལས་མི་ཟིན་པ་དེ་ལ། ཡུག་ཁ་གྲས་ཀྱི་ཡིག་ཕྲེང་བདུན་ཕྲེང་གི་ཤོག་ལོག་རེ་ཙམ་ཟིན་པ་བྱུང་བས། དེ་ལ་བརྟེན་ནས་སློབ་གཉེར་ལ་ཅི་ནུས་སུ་བྱེད་ཀྱིན་ཡོད་པའི་ཐད་ནས། ཡི་དམ་དེའི་ཐུགས་རྗེ་ལ་བརྟེན་ནས། སྙིང་རྗེ་དང་དག་སྣང་ཆེན་པོ་རྒྱུད་ལས་སྐྱེས་པའི་མཐུས། བསྟན་པ་རིན་པོ་ཆེའི་རྩ་ལག་མཁན་ཆེན་རིན་པོ་ཆེ་བསོད་ནམས་གྲགས་པ་དང་། མཁན་ཆེན་རིན་པོ་ཆེ་བསོད་ནམས་བཟང་པོ་དཔོན་

སློབ་གཉིས་ཀྱི་དྲུང་དུ། ཕར་ཕྱིན་དང་། སྤྱོད་འཇུག་དང་། འདུལ་བ་ལ་སོགས་པ་རྣམས་ཀྱང་ཉན་ཅིང་། གཞན་ཡང་རྟ་མགྲིན་དང་སྒྲོལ་མ་ལ་སོགས་པ། བཀའ་གདམས་ལྷ་བཞི་ལ་སོགས་པའི་ལུང་དང་། མདོར་ན་བྱ་སྤྱོད་ཀྱི་ལྷ་མང་རབས་ཀྱི་ལུང་ཐོབ་ཅིང་། མཁྱེན་རབ་དང་ཐུགས་རྗེའི་བདག་ཉིད་མཁན་ཆེན་རིན་པོ་ཆེ་བུ་སྟོན་ཁ་ཆེའི་དྲུང་དུ། སློབ་དཔོན་གཞོན་བཟང་གིས་ཞུས་པའི་ཞར་ལ། ས་སྐྱ་པའི་བླ་མའི་རྣལ་འབྱོར་ཐུན་མོང་མ་ཡིན་པ་དང་། ཡུམ་ཆེན་མོའི་སྒྲུབ་ཐབས་དང་། ཐུགས་རྗེ་ཆེན་པོ་དཔལ་མོ་ལུགས། འཇམ་དཔལ་སྨྲ་སེང་། ཡུམ་དུ་སྒྲུབ་པ་དང་བཅས་པ་རྣམས་ཐོབ་ཅིང་བླ་མ་ཤཱཀྱ་རིན་ཆེན་པའི་དྲུང་དུ། སྔ་ཕྱི་བར་གསུམ་དྲིལ་ཏེ་ཐོབ་པ་ལ། ཀྱེ་རྡོ་རྗེའི་དབང་བསྐུར། གཤེད་དམར་ལྷ་ལྔའི་དབང་བསྐུར། རྡོ་རྗེ་འཇིགས་བྱེད་ཀྱི་དབང་བསྐུར། ནཱ་རོ་མཁའ་སྦྱོད་ཀྱི་བྱིན་རླབས། རྩ་དབུ་མའི་ཁྲིད་དང་བཅས། བཅོམ་ལྡན་འདས་ཡེ་ཤེས་ཁྱུང་ཁྲའི་སྒྲུབ་ཐབས། རྟ་མགྲིན་དྲག་པོ་སུམ་སྦྲགས་ཀྱི་སྒྲུབ་ཐབས། ཕྱག་རྡོར་རས་ཆུང་ལུགས་ཀྱི་དབང་སྒྲུབ་ཐབས་དང་བཅས་པ། སྦྱོར་བ་ཡན་ལག་དྲུག་གི་ཐོག་མར་དགེ་བ། བར་དུ་དགེ་བ། ཐ་མར་དགེ་བ་དང་བཅས་པའི་ཁྲིད། ཀུན་མཁྱེན་རིན་པོ་ཆེ་ཇོ་ནང་པའི་ལུགས་གྱི་ཁྲིད་ལུང་དང་། གཅོད་ཡུལ་སྲས་བརྒྱུད་ཀྱི་སྐོར་ལ། སྟོང་པ་དབང་རྒྱལ་གྱི་ཁྲིད་ལུང་ཨོ་རྒྱན་བསྙེན་སྒྲུབ་ཀྱི་ཁྲིད་གེགས་སེལ་གདམས་པ་དང་བཅས་པ་མ་ལུས་པ་ཐོབ། གཞན་ཡང་བསྐྱེད་རིམ་རྫོགས་རིམ་ལ་སོགས་པ་མང་དུ་ཐོབ། བླ་མ་ཡེ་རྒྱལ་བའི་དྲུང་དུ། གཅོད་ཡུལ་ཆོས་ཁ་ཚང་བ་དང་གཞན་ཡང་ངེས་དོན་གྱི་ཁྲིད་དང་། ཡི་དམ་ལྷའི་ལུང་མང་དུ་ཐོབ། མཁན་ཆེན་རིན་པོ་ཆེ་གཞོན་ནུ་མགོན་པོའི་དྲུང་དུ། ཁྲོ་ཕུ་བའི་ལུགས་ཀྱི་མན་ངག་བརྒྱ་རྩ། ཆོས་ཆུང་བརྒྱ་རྩ། སྒྲུབ་ཐབས་བརྒྱ་རྩ་ལ་སོགས་པ་དང་། སྨན་ལྷའི་མདོ་ཆོག་ཇོ་བོའི་ལུགས་ཀྱི་གཏོར་ལུང་རྒྱ་མཚོ་ལ་སོགས་པའི་མན་ངག་དུ་མ་ཐོབ་ཅིང་། མཁན་ཆེན་རིན་པོ་ཆེ་གྲགས་པ་རྒྱལ་མཚན་པའི་དྲུང་དུ། ཕར་ཕྱིན་དང་། འདུལ་བ། སྤྱོད་འཇུག་པར་ཎ་

ཤ་ཝ་རི། ལྷ་མོ་འོད་ཟེར་ཅན་དང་། རྗེ་བཙུན་མ་སྒྲོལ་མ། དཔལ་དོན་ཡོད་ཞགས་པ། ཨ་མོ་གྷ་པ་ཤའི་རྒྱུད་དང་བཅས་པ། རྣམ་ཐོས་སྲས་ཀྱི་རྗེས་གནང་། ཐུགས་རྗེ་ཆེན་པོའི་དམར་ཁྲིད། བློ་སྦྱོང་ལ་སོགས་པ་མང་དུ་ཐོབ་ཅིང་། གཞན་ཡང་དེའི་དུས་བདག་ལ་ཤེས་རབ་ཅུང་ཟད་སྐྱེས་པའི་མཐུས། ནན་ཏན་ལ་གཙོ་ཆེར་བྱས་ནས། ཆོས་རྗེ་འགྲོ་བའི་མགོན་པོ་བསོད་ནམས་རྒྱལ་མཚན་པའི་དྲུང་ནས། ཆོས་འཁོར་ཆེན་པོའི་གསོས་རྣམས་ཞབས་ཏོག་ལ་སོགས་པ་ཕུན་སུམ་ཚོགས་པ་ལེགས་པར་བསྒྲུབས་ནས། བྱ་ལོ་ཟླ་བ་དང་པོའི་ཚེས་གསུམ་ནས་སྟ་གོན་བཙུགས་ཤིང་། ཚེས་བཅོ་ལྡའི་ཉིན་པར་རབ་ཏུ་གནས་པའི་དངོས་གཞི་མཛད། ཚེས་བཅུ་བདུན་ལ་མཇུག་གི་ཆོག་ལེགས་པར་རྫོགས་པར་མཛད་པའི་ཚེས་བཅོ་བརྒྱད་ཀྱི་ཉིན་པར་ཆོས་ཀྱི་རྗེ་རིན་པོ་ཆེ་བསོད་ནམས་རྒྱལ་མཚན་པས་གཙོར་མཛད་ཅིང་། བསྟན་པའི་གསལ་བྱེད་བླ་མ་གུང་པ་ལ་སོགས་པ། དཔལ་ལྡན་ས་སྐྱ་པ། གཙང་ཕྱོགས་ཀྱི་བླ་མ་དགེ་བའི་བཤེས་གཉེན་པ་བཟང་རགས་ཐམས་ཅད་འཚོགས་བ་དང་། མཁན་རིན་པོ་ཆེ་བྲུལ་ཕུ་བ་དང་། དགལ་ལྡན་པ་བློ་གྲོས་སེང་གེས་དབུ་མཛད་དབུ་རུ་སྟོད་སྨད་ཀྱི་དགེ་བའི་བཤེས་གཉེན་པར་བཟང་རགས་འཚོགས་པ་དང་སྤྱན་མདའ་གྲགས་པ་རྒྱལ་མཚན་པས་གཙོ་མཛད་དབུ་རུ་ལུང་པའི་དགེ་བའི་བཤེས་གཉེན་བཟང་རག་ཚོགས་པ་མདོར་ན་ཚོགས་པ་རྒྱ་མཚོ་ལྟ་བུའི་དབུས་སུ། ཕ་རོལ་ཏུ་ཕྱིན་པ་ལ་ཐོས་པའི་བྱ་བའི་ཆེ་བ་དབྱུང་ཞིང་། ཉན་བཤད་བྱེད་པའི་དགའ་སྟོན་ལ་དམིགས་ཏེ། བདག་ཅག་ལ་བཟུང་འཆད་ལ་སོགས་པ་ཆེར་མོད་ཀྱང་། དྲིན་ཅན་བླ་མ་རྣམས་ཀྱི་ཐུགས་རྗེ་དང་། མཆེད་

གྲོགས་གོང་མ་ཉེ་འབྲེལ་རྣམས་ཀྱིས་ཐུགས་ལ་བཏགས་པ་ལ་བརྟེན་ནས། མང་ཇ་འབུལ་ནོད་དང་བཅས་པ་ལེགས་པར་བསྒྲུགས་ནས། ཉན་བཤད་བྱེད་པ་ལ་དམིགས་ནས། ཆོས་གྲྭ་ཆེན་པོ་རྩེ་ཐང་དུ་ཕྱིན་ཏེ། དྲུང་འཇམ་དབྱངས་ཤཱཀྱ་རྒྱལ་མཚན་པའི་དྲུང་དུ། ཕར་ཚད་འདུལ་བ་མངོན་པ་ལ་སོགས་པ་ཉན་ཅིང་། སློབ་དཔོན་དཔལ་རྒྱལ་བ་དང་། སློབ་དཔོན་པཎྜི་ཏའི་དྲུང་དུ། ཕར་ཕྱིན་ཉན་པས། ཕར་ཕྱིན་གྱི་དོན་ཐམས་ཅད་ལྷོངས་པར་གོ་བ་ཡང་བྱུང་ཆོས་རྗེ་རིན་པོ་ཆེ་མོན་ཕྱོགས་ནས། ཡར་འབྲོག་ཏུ་ཕྱགས་ཕེབས། ལྷོ་ཕྱོགས་ནས་ཕེབས་པའི་སྐུ་སྐྱོས་ལ་སྐྱི་གཡོང་ལ་སོགས་པའི་དགོན་སྡེ་རྣམས་སུ། མང་ཇ་འབུལ་ནོད་ལ་སོགས་པ་མཛད་ནས། དེ་རྣམས་འགྲུབ་པའི་གཏམ་སྙན་སྐྱེལ་བ་ལ་འགྲོ་དུས་དགེ་བཤེས་ཀུན་དགའ་དཔལ་མོ་རྣམས་ཀྱིས། ངེད་ལའང་། ཆོས་རྗེ་མཇལ་བ་ལ་འགྲོ་བ་འཐད་གསུང་ནས། ངེད་ཀྱིས་ཀྱང་མཇལ་བ་ལ་ཕྱིན། ངེད་རང་གི་བཤད་གསར་བྱས་བའི་སྐུ་སྐལ་དང་། ཕྱགས་ཕེབས་པའི་ཤངས་ལེན་ལ། སྐུ་འཁོར་སུམ་བརྒྱ་ཙམ་འདུག་པ་ལ། མང་ཇ། ཆོས་རྗེའི་དྲུང་དུ་འབུལ་བ། གཞན་ཡང་གང་འོས་ཀྱི་འབུལ་བ་དང་། དགེ་འདུན་སོ་སོའི་ཕྱག་ཏུ་དར་ཁ་རེའི་འགྱེད་དང་བཅས་པ་བསྒྲུབས་ནས་བསྡད་ཡོད་དུས། བླ་མ་བཟོད་པས་དབུ་མཛད། གྲོས་ལ་དབང་བ་རྣམས་ཀྱིས་ངེད་ལ་ཞལ་ཏ་བྱོན་པ་ལ། ད་ལྟ་ཤ་བ་རྭ་ཅོའི་འབོགས་མཚམས་སུ་འདུག་པས། ཁྱོད་ཀྱིས་ཆོས་རྗེའི་ཉེ་གནས་གྱིས། ཤ་ཡང་ཁྱོད་རང་ཚ་བ་ཡིན་གསུང་པ་ལ། ངེད་ཀྱིས་ཞུ་བ་

བྱས་ནས། མི་ལྟོག་གི་གཅེས་ཕྲུག་གང་ཡང་མི་ཤེས། མཐོང་གོམས་ལ་སོགས་ཅི་ཡང་མེད་པའི་སྐྱིད་དེ་པར་བསྡད་པས། འདི་འདྲའི་ཞབས་ཏོག་མི་ཡོང་ལགས་ཤིང་། ངའི་མགོ་འདོན་བྱས་པ་མི་ཡོང་བར། མགོ་སྨོད་པ་འདྲ་བ་ཞིག་ལས་མི་ཡོང་པས་ཁྱེད་རྣམས་ཀྱིས་ཞུ་ནས། ང་རང་རྒྱགས་ཁ་སེ་མདའ་རེ་ཙམ་ཁྱེར་ནས། ཕྱག་ཕྱིར་འབྲང་ནས་གདམས་ངག་གི་ཞུན་ཐར་ཆོད་པ་ཞིག་བྱུང་ན་ཐུགས་ལ་བཏགས་དེ་མ་བྱུང་ན། དད་པ་ཅན་གྱི་དཀོར་ཟས་ཀྱིས་ཚོས་ནས་སེམས་ལ་འདྲེ་ཞུགས་ནས། ལུས་ངག་ཡིད་གསུམ་གྱིས་བྱ་བ་གང་མིན་བྱས་ནས། མ་ཇོ་བཙུན་མ་ལ་སོགས་པ་ལ་བྱི་ཕྲུག་བཏོན་པ་ལ་སོགས་པ་བྱུང་ན། ཆོས་རྗེ་རིན་པོ་ཆེའི་ཞབས་འདྲེན། ངེད་རང་གི་མགོ་སྨད་དུ་སོང་ནས་འདི་ཕྱི་གཉིས་ཀའི་འདུན་མ་འཆོར་བ་ལས་མི་ཡོང་བས། དེ་འདྲ་མི་གསུང་བར་ཞུ་བྱས། ང་རང་གིས་ཐག་བཅད་མ་ཉན་པ་དང་། ཆོས་རྗེ་རིན་པོ་ཆེའི་དྲུང་ནས་ཀྱང་ཐུགས་རྗེས་བཟུང་ནས་དེ་མི་འཐད། ན་སོ་གཞོན་པས་ད་དུང་སློབ་གཉེར་གྱིས་གསུང་ནས་ཞལ་ཏ་བཟང་པོ་དང་། དཔལ་ལྡན་ཨ་ཏི་ཤའི་ཐུགས་དམ་སྤྱན་རས་གཟིགས་ཀྱི་སྐུ་ལི་མ་གཅིག་གདུང་ཁང་པད་སྤུངས་དང་བཅས་པ་གཅིག་ཕར་ཕྱིན་གྱི་གཞུང་། བརྒྱད་སྟོང་འགྲེལ་ཆེན་དབུ་ཞྭ་ན་བཟའ་བཞུགས་གདན་དང་བཅས་པ་གནང་ནས། ན་སོ་གཞོན་པ་ལ་སློབ་གཉེར་གྱིས་མཚན་ཉིད་པ་འདི་དད་པ་ཆུང་བས་བློ་ཆུད་ཟོས་ལ་མ་སོང་བར་མིག་མར་ལྟ་མ་བྱེད་པར་ཡར་ལྟ་གྱིས་ལ་བློ་ཆོས་དང་མཐུན་པར་གྱིས། དེ་ལྟར་བྱས་ན་རང་ལ་ཁེབས་ཆེ་ཞིང་གཞན་

ལ་ཕན་པར་ཡོང་གསུང་། དེ་དུས་ཆོས་རྗེའི་དྲུང་དུ། རྫོགས་པ་ཆེན་པོ་གསང་བ་ཐིག་ལེའི་སྐོར། ཁྲིད་རྒྱབ་ཆོས་སུ་སྙན་བརྒྱུད་ཡི་གེ་ཅན་དང་ཡི་གེ་མེད་པ་ལ་སོགས་པའི་རྒྱུད་མན་ངག་དང་བཅསས་པ་མ་ལུས་པ་ཟླ་བ་གསུམ་གྱི་བར་དུ་གནང་། གཞན་ཡང་ཡང་དབེན་པའི་དབོན་པོ་ཡིན་ཟེར་བ་ཞིག་གི་ཞར་ལ་ཤོག་གསུངས་ནས། ཚོགས་བདག་དམར་པོ། ཚོགས་བདག་སྤྲེལ་གདོང་མ་དང་བཅས་པ་རྣམས་མ་ལུས་པར་ཐུགས་ལ་བཏགས། སློབ་གཉེར་བྱེད་པ་ལ་འདི་ཚོ་ལ་གསོལ་བ་ཐོབ་གསུངས་ནས་མི་གཡོ་བ་དཀར་པོ། སྔོན་པོ་པུས་བཙུགས། འཇམ་དབྱངས་ཨ་ར་པ་ཙ་ན། སྨྲ་སེང་། ཕག་མོ། ཤེས་རབ་གསལ་བྱེད་རྣམས་ཀྱི་ལུང་དང་རྗེས་གནང་། བྱིན་རླབས་དང་བཅས་པ་མ་ལུས་པར་གནང་། གཞན་ཡང་ཐུགས་རྗེ་ཆེན་པོ་རྒྱལ་པོ་ལུགས་དང་། ཐུགས་རྗེ་ཆེན་པོའི་སྐོར་མ་ལུས་པ་དང་། ཨོ་རྒྱན་རིན་པོ་ཆེ་སངས་རྒྱས་མཉམ་སྦྱོར་དང་། ཀུན་བྱེད་རྒྱལ་པོ་ལ་སོགས་སེམས་སྡེའི་སྐོར་མང་དག་ཏུ་གནང་ཞིང་། གཞན་ཡང་གུ་རུའི་ཐུགས་སྒྲུབ་དབང་དང་བཅས་པ། རྫོགས་ཆེན་མཉམ་ཉིད་རང་གྲོལ་ལ་སོགས་མ་ལུས་པ་ཐུགས་ལ་བཏགས། ཕ་རྒན་དང་བསྡོངས་ནས་བསམ་ཡས་སུ་སླེབས། དེའི་དཔྱིད་སོར་རྒྱལ་ནང་དུ་གྲུབ་ཐོབ་ནམ་མཁའི་སྙིང་པོའི་སྒྲུབ་ཁང་གི་ཞོལ་དུ་། ཟླ་བ་གསུམ་གྱི་བར་དུ་འཕགས་མ་དབྱངས་ཅན་མ་ལ་གསོལ་བ་བཏབ་པས། རྨི་ལམ་དུ་བྱིན་གྱིས་བརླབས་པའི་མཚན་མ་འདྲ་བྱུང་ཞིང་། དེའི་བསྙེན་པའི་ཁ་སྐོང་ལ་སྦྱིན་སྲེག་ཅིག་ཉི་ཤུ་དགུའི་ཉིན་པར་བྱས་པས། ནམ་མཁའ་གཡའ་དག་པ་ལ་སྦྱིན་སྲེག་

བྱེད་པའི་སྟེང་དུ། འཇའ་ཚོན་བླ་རེས་ཕུབ་པ་འདྲ་བ་བྱུང་བས་དེ་དུས་བླ་མ་ཤཱཀྱ་རིན་ཆེན་པ་བཞུགས་པས། རྟེན་འབྲེལ་ལེགས་པོ་ཡིན་གསུང་ནས། དེ་ནས་བཟུང་ནས་ཤིན་ཏུ་ཐུགས་ལ་འདོགས་པ་ཞིག་བྱུང་། ལར་ན་དེ་དུས་རྨི་ལམ་གྱི་རྟགས་མཚོན་པ་དེ་དང་། སེམས་ཅན་ཐམས་ཅད་ལ་ཕ་མའི་འདུ་ཤེས། བྱམས་སྙིང་རྗེ་རང་ཤུགས་ཀྱིས་སྐྱེ་བ་ཞིག་བྱུང་། དེའི་དབྱར་སོ། རྒྱལ་སྲས་རིན་པོ་ཆེ་ཐོགས་མེད་པ་མཇལ་ནས། ཐེག་པ་ཆེན་པོ་བློ་སྦྱོང་གི་ཁྲིད་དང་། སྙིང་པོ་དོན་གསུམ་གྱི་ཁྲིད། དེ་ལ་སོགས་པའི་བསྐྱེད་རིམ་དང་། རྫོགས་རིམ་གྱི་ལུང་མ་ལུས་བ་ཐུགས་ལ་བཏགས། དེའི་དུས་སུ་བྱམས་པ་དང་། སྙིང་རྗེ་ངེས་འབྱུང་གི་སྐྱོ་ཤས་དྲག་པོ་ཞིག་སྐྱེས་ནས། ཁོང་གི་དྲུང་དུ་ཆང་མི་འཐུང་བ་དང་། རྡོར་ནག་བསྲུང་པ་དང་། ལུས་སྐྱེས་སེམས་ཅན་ཕྱིར་མི་འདོར་བ་དང་། མདོར་ན་ལུས་ངག་ཡིད་གསུམ་གྱི་དགེ་སྦྱོར་ཕྲན་ཚེགས་ལ་སོགས་པའི་དམ་བཅའ་དུ་མ་དག་ཏུ་ཕུལ་བས། བློ་མི་རྟག་རྒྱུད་ལ་སྐྱེས་པ་དང་། བློ་སྣ་བཙན་ཐབས་སུ་ཐུང་བ་བྱུང་བས། སློབ་གཉེར་གྱིས་ཀྱང་འཆི་ཁར་མི་ཕན་པར་འདུག་བསམས་ནས་སློབ་གཉེར་ལ་ཡང་བློ་གཞོལ་དུ་སོང་ཞིང་། གཟུངས་ཀྱི་དཔལ་བའི་དྲུང་དུ། རྣམ་རྒྱལ། རྣམ་འཇོམས། ཆོས་སྐྱོང་གུར་མགོན། བདེ་མཆོག་དུས་ཀྱི་འཁོར་ལོའི་དབང་བསྐུར། མདོར་ན་ཕྲན་ཚེགས་ཀྱི་ཡི་དམ་ལྷའི་སྒྲུབ་ཐབས་མ་ལུས་པ་ཐོབ། ཆོས་རྗེ་རིན་པོ་ཆེ་རང་བྱུང་རོལ་པའི་རྡོ་རྗེའི་དྲུང་དུ། ཐུགས་རྗེ་ཆེན་པོ་རྒྱལ་བ་རྒྱ་མཚོའི་ལུང་དང་། སྐུ་གསུམ་ངོ་སྤྲོད་ལ་སོགས་པ་

མདོར་ན་མང་དུ་ཐོབ། མཁན་ཆེན་བསོད་རྣམས་རིན་ཆེན་པའི་དྲུང་དུ། མདོ་བཀའ་འགྱུར་གྱི་ལུང་དང་ས་སྐྱ་པའི་རྒྱལ་སྲས་ལམ་བཟང་ལ་སོགས་པ་མདོར་ན་མ་ལུས་པ་ཐོབ། བླ་མ་ཀུན་གཞོན་པའི་དྲུང་དུ་སྐུ་གསུམ་ངོ་སྤྲོད། ནཱ་རོ་ཆོས་དྲུག་འཕགས་པ་སྐལ་པ་བཟང་པོ། མདོ་དྲིན་ལེན་བསབས་པ་ལ་སོགས་པ་མང་དག་ཏུ་ཐོབ་ཅིང་། བླ་མ་བཟོད་པའི་དྲུང་དུ་ཆོས་རྗེ་རིན་པོ་ཆེས་མཛད་པའི་དངུལ་ཆུའི་བཅུད་ལེན་གྱིས་ཐོག་དྲངས། གསུང་སྒྲོས་ཁ་འཐོར་ཐམས་ཅད་ཐོབ། ཆོས་རྗེ་པཎ་ཆེན་པའི་དྲུང་དུ། ཕྱག་རྒྱ་ཆེན་པོའི་ཡི་གེ་བཞི་པ། རོ་སྙོམས་སྒང་དྲིལ། ཞང་ཚལ་པའི་གཟེར་ལྔ། ཐོག་བབས། ཚེ་དཔག་མེད་རས་ཆུང་ལུགས་ཀྱི་སྒྲུབ་ཐབས། དབང་ཆོག་དང་བཅས་པ་ཚང་བར་ཐོབ། ཕག་མོ་ཤེས་རབ་གསལ་ཤེས་ཀྱི་བྱིན་རླབས་སྒྲུབ་ཐབས་དང་བཅས་པ། གསར་མ་ལུགས་ཀྱི་བཅོམ་ལྡན་འདས་ཀྱི་སྐྱེས་རབས། བླ་མ་མར་སྟོན་གྲགས་རྒྱལ་གྱི་དྲུང་དུ། ཕྱག་རྒྱ་ཆེན་པོ་ལྷན་གཅིག་སྐྱེས་སྦྱོར་བྲམ་ཟེ་ཆེན་པོ་ས་ར་ཧའི་ལུགས་ཀྱི་ཕྱག་རྒྱ་ཆེན་པོ་ཐོབ། རྫོགས་ཆེན་ཨ་རོའི་ཁྲིད་མོ་ཆེ། ཕྱག་རྒྱ་ཆེན་པོ་གང་ག་མ་ལ་སོགས་མང་དག་ཏུ་ཐོབ། བླ་མ་རྟོགས་ལྡན་ཤེས་རབ་མགོན་པོའི་དྲུང་དུ། ཕྱག་རྒྱ་ཆེན་པོ་བསམ་གཏན་ཐུན་ཆོག་སྔ་བཞིའི་ངོ་སྤྲོད། མཁའ་འགྲོ་གསང་ཁྲིད། རི་ཆོས་མའི་ལུས་སྦྱོང་། གཏུམ་མོ་ལུས་སྦྱོང་ཉི་ཤུ་པ། རྒྱུན་གཅོད་རྟག་ངུ། འབྲུ་ཅན་རྡེའུ་ལ་སོགས་པའི་དཀའ་ཐུབ། བཅུད་ལེན་གྱི་བེ་བུམ་ཆེན་མོ་ཐོབ། དེ་ནས་ཆོས་རྗེ་རིན་པོ་

ཆེ་ཉིད་འབྲི་གུང་ན་བཞུགས་པ། གདན་འདྲེན་ཕྱིན་ནས་བསམ་ཡས་སུ་ཕྱག་ཕེབས་དུས་ཁྲིད་མགྱོགས་པར་ཚུགས་ནས་ཡོང་གསུངས་ནས། སྟག་ལོ་ཟླ་བ་བཅུ་གཅིག་པའི་ཚེས་གསུམ་ལ་ཁྲིད་བཙུགས་ནས། ཚེས་བཅོ་བརྒྱད། ཕྱི་ཚེས་བཅུ་བདུན་གྱི་ཉི་མ་ཕྱེད་ཙམ་ལ་གཤེགས་དུས། ནམ་མཁའ་འཇའ་དང་འོད་ཀྱིས་ཁེངས་། གཟིམས་ཁང་ལ་འཇའི་གུར་ཕུབ་སྣང་སྲིད་ཐམས་ཅད་འཇའ་འོད་ཟེར་གསུམ་གྱིས་ཁེངས། ས་གཡོས་ཆེན་པོ་ལན་མང་དག་ཏུ་བྱུང་། པུར་སྦྱོང་དུས། ས་གཞི་ཐམས་ཅད་རིང་བསྲེལ་སྤྱན་ལྗགས། ཐུགས་སྐུ་གཟུགས་ཡི་གེ་ལྔ་ལ་སོགས་པ་གཅལ་བཀྲམ་ནས་མི་རྣམས་ངོ་མཚར་གྱི་ས་ལ་བཀོད་པའི་དུས། དྲུང་དུ་བཞུགས་པ་རྣམས་ཀྱིས་ཞལ་ཏ་ཐུགས་རྗེས་འཛིན་པར་ཞུ་ཞུས་པས། ཞལ་ཏ་མང་པོས་ཅི་བྱེད། དངོས་པོ་གང་འདུག་གི་མིན་མོ་སྐྱིད་པ་ལགས་ཞེས་པ་འདི་ལ་སྤྲུལ་སྐུ་གྲགས་པ་འོད་ཟེར་བ་འཁྲུངས་རྒྱུ་ཡིན་པས་མང་འགྱེད་བྱེད་པ་ཡིན་མོད་གསུངས་ནས་ཞལ་ཏ་གཞན་མ་གནང་ཞིང་། ལར་ཁྱེར་ཚོའི་ལྷག་བྱུང་ན་སྐྱིད་པ་ལགས་ལ་ཉེར་ལེན་ཞིག་ལྟོས་གསུང་པ་དང་། དགེ་བཤེས་དེ་ག་ན་འདུག །འདུག་ན་འདིར་ཤོག་གྱིས་གསུང་པའི་ཞལ་ཏ་ཐེང་གཉིས་གསུམ་དུ་གནང་བ་ཡིན་ནའང་དྲུང་ན་བཞུགས་པའི་མཁན་སངས་རྡོར་དང་། དགེ་བཤེས་ཀུན་དགའ་དཔལ་ལ་སོགས་པ་རྣམས་ཀྱིས། བླ་མ་ཤཱཀྱ་རིན་ཆེན་པའི་ཕྱོགས་འདེང་བྱས་ནས་ངེད་ལ་ནི་ཞལ་ཏ་མ་བསྒྱུར། དེ་སྟེང་སྟོད་སྨད་ཀྱི་ཡོན་བདག་གྲ་བ་བུ་སློབ་ཡོད་པ་གྲོས་ལ་དབང་བ་རྣམས་འདུས་པའི་དུས་སུ། ངེད་རང་ལའང་རྔན་ཆེན་ཆེ་བ་ལ་ལ་སོགས་བསམ་ཡས་པ་རྣམས་ཀྱིས་བྱས་པས་སྟོན་པ།

གཞན་རྣམས་ཀྱིས་དེ་བཞིན་དུ་བྱས་བྱུང་བས། མི་གོ་མ་ཆོད་ཐིང་ངེ་བ་ལས་མེད་ལགས་ཤིང་། ཐམས་ཅད་ཀྱིས་ལྐུགས་ནག་ཟེར་བའི་དུས་སུ་ང་རང་གི་རྟོག་པ་ལ་དཔལ་ཀུན་ཏུ་བཟང་པོའི་རྒྱལ་ཚབ་ཆོས་ཀྱི་རྗེ་རིན་པོ་ཆེ་ལ་འདི་ལྟ་བུ་བྱུང་ནས། ང་ལ་གཞན་གང་གིས་ཀྱང་ཅི་བྱེད། འཇིག་རྟེན་གྱི་བྱ་བ་ཐམས་ཅད་བཏང་ནས། མི་ཁྱུ་ནས་བུད་པ་བྱས་ཏེ། ངོ་མི་ཤེས་པའི་ས་ཕྱོགས་སུ་ཕྱིན་ནས། དཔོན་པོར་བླ་མ་དཀོན་མཆོག་སྤྱི་བོར་ཁུར། ཁ་དྲག་ཏུ། ཁ་ཉེན་དབང་ཆུང་ལ་རྒྱབ་གཏད། དམའ་མོའི་ས་བཟུང་། ཧྲུལ་པོའི་གོས་གྱོན་ནས། སྤྲང་པོ་ལྟར་གང་གིས་ཀྱང་མཐོང་ཚོད་མེད་པ་བྱས་ཏེ། ཚེ་གཅིག་གི་སྒྲུབ་པ་ནན་ཏན་སྙིང་པོར་མ་བྱས་ན། གཞན་གང་གིས་ཀྱང་ཕན་པར་མི་འདུག་པ་ལ། ད་ང་འདི་ཚོའི་གསེང་ཏུ་ཅི་བྱེད་བསམ་པ་བྱུང་བས། ཁོང་རྣམ་ཀྱི་ཁྲོད་དུ་མ་བཞུགས་པས། འདིས་ལོགས་མན་ཡིན་པ་འདྲ་བའི་ཐུགས་དགོངས་བྱུང་ནས། ང་ལ་ཤོགས་གསུངས་པའི་ཞལ་ཏ་འབྱོན་གྱིན་འདུག་པས། ཡང་བློ་ཞིག་སྐྱེས་ཏེ། གལ་ཏེ་ཁོང་རྣམ་པའི་ཐུགས་དང་འགལ་བ་བྱས་པས་ཀྱང་མི་ཡོང་། ལར་ངས་དེར་ཕྱིན་ཀྱང་གཞན་གྱི་ཞབས་ཏོག་ནི་མི་ཡོང་སྟེ། པུར་གྱི་ཞབས་ཏོག་ཙམ་ཞིག་བྱུང་ན་བསམ་ནས། ཁོང་རྣམ་པའི་ཁྲོད་དུ་ཕྱིན། མིང་ང་རང་ལ་བློ་གྲོས་དང་དངོས་པོ་ལ་སོགས་པ་འདོན་རྒྱུ་ཡོད་པ་དེར་ནི་མི་འདུག །འདིར་ཡོང་བ་ལ་པུར་ཀྱི་ཞབས་ཏོག་ཙམ་ཞིག་བྱུང་ན། ཐུགས་ལ་འདོགས་པར་ཞུ་ཟེར་བ་ཞུས་པས་བླ་མ་རིན་པོ་ཆེ་གུ་རུ་བ་དང་། བླ་མ་རིན་པོ་ཆེ་རྩེ་དཔོན་སློབ་གཉིས་དང་། ཟུལ་ཕུ་གནས་ཀྱི་ཨ་ཁུ་

སྟོན་པ། སྟོན་པ་གྲགས་རྡོར་ལ་སོགས་པ་མདོར་ན་སྟོད་སྨད་ཀྱི་ཡུས་པོ་ཆེ་རྣམས་ཞབས་ཏོག་བྱེད་ཟེར། ཁོང་རྣམས་དང་ཡང་མ་འཆམ་པའི་སྐབས་སུ། ཨ་ཁུ་སྟོན་པས་ཁ་རྡོལ་བྱས་ནས། ད་འདི་རིགས་ལ་མི་འཆམ་པ་བྱས་པས་ཀྱང་མི་ཡོང་། སུས་ཞབས་ཏོག་བྱས་ཀྱང་བྱིན་རླབས་མ་གཏོགས། བཟའ་ཡོང་བ་དེ་ཡང་མིན་པས་འདིའི་འཐད་འོས་སུས་བལྟས་ཀྱང་། ཁོ་རང་དབོན་པོའི་འོས་ཡིན་པས། ཁོ་རང་བྱེད་དུ་ཆུགས་གསུངས་ནས་ཁ་ཕོལ་བྱུང་བས། ང་རང་གི་ལུས་སེམས་ལ་འང་ས་དང་པོ་ཐོབ་པའི་བདེ་བ་ཙམ་རྙེད་བྱུང་བ་དང་། ཁོང་རྣམ་པ་ཚོ་མ་འཆམ་པ་དེ་བདག་གི་གྲོགས་སུ་བྱུང་ནས། པུར་གྱི་ཞབས་ཏོག་བྱ་ཆོག་པ་བྱུང་བས། དེའི་བྱིན་བརླབས་ཀྱིས་ངེད་རང་ལ་གྲོགས་མེད་ནའང་། ད་བར་སྐྱིད་པོ་བྱས་པ་ཡིན། དེ་ནས་ཆོས་རྗེ་རིན་པོ་ཆེའི་གཤེགས་རྫོངས། ཕྱོགས་ཀྱིས་ཇ་བཀོལ་རྣམས་བསྒྲུབས་པའི་བར་དེར། བདག་གི་ཕ་རྒན་ཡུན་རིང་། ཟུག་གཟེར་ཆེ་བ་བྱས་ནས། ཅིས་ཀྱང་ཕན་མ་ཐོགས་པར་འདས། ཁོ་བོས་ཤུལ་དུ་དགེ་བ་དགེ་གཞུག་ལ་སོགས་མི་ལ་ངོ་མི་ཚ་ཙམ་བསྒྲུབས། ངེས་འབྱུང་དང་སྐྱོ་ཤས་མི་རྟག་པ་སྙིང་ནས་ཚེ་འདིའི་ཞེན་པ་ལོག་པ་ཙམ་ཞིག་བྱུང་། དེའི་བར་དེར་ཆོས་རྗེ་རིན་པོ་ཆེའི་ནང་རྟེན། མཆོད་ཁང་སོགས་བཞེངས་པ་ལ། ལུས་ངག་ཡིད་གསུམ་ལ་ཟོལ་མེད་ཀྱི་ཐིལ་བླངས་ནས། ཞབས་ཏོག་ལ་འབུངས་ཏེ་བརྩིགས་པ་ལས། སྡིག་པ་དག་བའི་རྟགས་ལ་སོགས་པ་ཡང་མང་དག་ཏུ་བྱུང་། ལུས་སེམས་ལ་ཡང་ཚེ་འདིའི་སྣང་བ་ལོག་པའི་

ཉམས་ཐན་ཐུན་ཡང་སྐྱེས། ནང་རྟེན་མཆོད་ཁང་དང་བཅས་པ་བར་ཆད་མེད་པར་གྲུབ། དེའི་དུས་སུ་ཡང་། བདག་གི་མ་རྒན་མོ་ཡང་གཅོང་དམ་པོ་ཞིག་གིས་ཟིན་ནས། ཟླ་བ་དྲུག་ཙམ་གྱི་བར་དུ་ནད་པ་སྐ་རགས་ཅན་ཉམ་ཐག་པ་བྱུང་ཞིང་། དེ་ནས་ཟླ་བ་བདུན་གྱི་བར་དུ་གདན་ལ་འབྱར་ནས། བསྒུལ་བསྐྱོད་ལ་སོགས་པ་གང་ཡང་མི་ཤེས་པ། ཁ་རུ་སིང་པོ་ཕྱེ་བཏབ་པ་ཧུབ་རེ་མ་གཏོགས་པ་གང་ཡང་མི་འགྲོ་བ། དེ་ཡང་འཐུང་མི་ཤེས་པར་ཁོ་བོས་སྨྱུག་སྦུབས་རིང་པོ་བཅས་ནས། དེ་ཁར་བཅུག་ནས་བྱིན་པས་ཤེས་ཙམ་བྱུང་། དེའི་དུས་སུ་ངེད་རང་ལ་སྤུན་ཟླ་དང་ཨ་ལྕེ་སྲིང་མོ་མེད་པར་མི་གཅིག་པོ་ལག་གཅིག་ཏུ་སོང་བས། ལུས་ངག་གི་ཐོག་ཏུ་ཉིན་མཚན་གཉིས་ཁ་སྦྱོར་སྤྱོད་དེ་ཆེ་བྱུང་ཡང་། སེམས་ཐོག་ཏུ་ཁྱོད་འདྲ་བ་ཡོང་བ། ལུས་ལ་ན་ཚ་ནི་མེད། རང་བཞིན་གྱིས་གཡོག་བྱས་པས་ཆོག་པ་འདི་ལ་ཁྱོད་སྡུག་བསྔལ་འདི་འདྲ་ཡོང་བས། སྙིང་མི་བཟོད་པ་འདུག་ལར་སྐྱོན་ཆེ་མ་རྒན་མོ་འདིའི་ཁོང་པའི་ནང་དུ་ཟླ་བ་དགུ། ངོ་དང་བཅུའི་བར་དུ་ཁུར་སྤྱོད་སྤྱོད་དཔག་ཏུ་མེད་པ་བྱས། སྐྱེས་ནས་ཀྱང་སྣབ་ཁས་འཕྱི་བ་དང་། ཤུ་ཤུ་ལག་པས་འཕྱི་བ་ལ་སོགས་པ་བྱས། གསོས་བསྐྱངས་བྱས་པའི་དྲིན་ཅན་ཡིན་པ་ལ། ད་འདི་འདྲའི་སྐྱོ་ངལ་མི་བཟོད་པ་ཁྱོད་འདྲ་བ་ཡོང་བ་བསམ་ནས། དེས་རྐྱེན་བྱས་ནས་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཆེན་པོ་སྐྱེ་བའི་རྐྱེན་བྱས་པས་མ་རྒན་མོ་དེ་དྲིན་ཆེ་བར་བྱུང་། དེ་ནས་མ་རྒན་མོ་འདས་ནས་རྗེས་ཀྱི་བྱ་བ་རྣམས་བསྒྲུབས། ལྕགས་ཟད་བརྡར་ཟད་ལ་སོང་བའི་སྟབས་ཀྱིས་པུར་དེ་སྦྱིན་སྲེག་ཅིག་བྱེད་རྒྱུ་ཡང་མ་བྱུང་། པུར་དེ་དུར་ཁྲོད་དུ་གདན་དྲངས་དུས་ལྟས་ཁྱད་པར་ཅན་བྱུང་། བླ་མ་རྡོར་བསམ་དེར་བཞག་ནས། ཁྱེད་ཀྱིས་ཁྱི་བྱུང་ན་སྲུངས། བྱས་ཟོས་ཟིན་པ་དང་རུས་པ་དུམ་ཞིག་ཁྱེེར་བྱོན། ཚ་ཚའི་ཁྲོད་དུ་གཏོང་བ་ཡིན་བྱས་ཁོང་གིས་ཐོད་པ་དུམ་བུ་གཅིག་ཁྱེར་བྱོན།

ཟླ་མཆོད་ཀྱི་དུས་ལ་བབས་པས། དེ་དུས་བླ་མ་རས་པ་བཞུགས་པས། ཚ་ཚ་འདེབས་པ་ལ་ཐོད་པ་དེ་ཁོང་གིས་བསྲེགས་ནས་ཐོད་ངེ་བ་ཚིག་ནས་བསྟན་བྱུང་བས། འདི་ཚ་ཚའི་ཁྲོད་དུ་གཏོང་བ་མི་དྲག་པར་འདུག་རྡོ་རྗེ་ཕག་མོའི་སྐུ་བྱོན་འདུག་པ་གསུང་། བལྟས་པས་ཕག་མོའི་སྐུ་ཡ་མཚན་པ་ཞིག་བྱོན་འདུག་ཚ་ཚ་བཏབ་ནས་གདུང་རུས་ནི་དེའི་ཁྲོད་དུ་མ་བཏང་། ཆོས་རྗེ་རིན་པོ་ཆེ་གཤེགས། ཕ་རྒན་དང་མ་རྒན་གཉིས་འདས་པས། བློ་སྣ་བཙན་ཐབས་སུ་ལོག་པ་ཁ་འདྲ་ཞིག་ཀྱང་བྱུང་། ཡང་མི་ཐམས་ཅད་ཀྱིས་ཁ་གསག་ལ་སོགས་པ་ཡང་བཏང་བས། འཚེ་བ་འདྲ་བ་ཞིག་ཀྱང་བྱུང་བས། མྱ་ངན་བསངས་པ་འམ། ཕ་མ་གཉིས་ཀྱི་དགེ་བ་ལ་དམིགས་ནས་གསེར་ཞོ་གང་གི་མར་ཁྱེར། ལྷ་སར་ཇོ་བོ་རིན་པོ་ཆེ་མཇལ་བ་ལ་ཕྱིན། ལྷ་ས་ར་མོ་ཆེའི་བཞི་སྡེ་ཁང་ན་ཞང་རིན་པོ་ཆེའི་སྐུ་ལྡིར་གཅིག་ཡོད་པའི་དྲུང་དེར་ཉལ་ས་བྱས་ཀྱིན་མཚན་དུས་གསོལ་བ་བཏབ། ཉིན་ཇོ་ཤཱཀ་རྣམ་གཉིས་ལ་གསོལ་བ་བཏབ། མར་མེ་ཕུལ་བསྐོར་བ་བྱས་དུས། ནུབ་གཅིག་གི་རྨི་ལམ་ན། ཇོ་བོ་མི་བསྐྱོད་རྡོ་རྗེའི་ཕྱག་གཡས་པའི་ཕྱག་མཛུབ་གཅིག་ལ་འཇིབས་པས། འོ་མ་ལྟ་བུའི་བདུད་རྩིའི་རྒྱུན་ལྷུག་ལྷུག་བྱུང་བས། ལུས་སེམས་བདེ་ལ་སེམས་གཟུང་འཛིན་དང་བྲལ་བའི་ཉམས་ཁྱད་པར་ཅན་བྱུང་བ་དེའི་ངང་ལ་གཉིད་སད་དུས་ཀྱང་། ཡུན་རིང་པོར་དེའི་ཉམས་དེ་དང་མ་བྲལ་བ་ཞིག་བྱུང་། དེའི་བྱིན་རླབས་ཡིན་པ་འདྲ། བླ་མ་དགེ་བའི་བཤེས་གཉེན་པ་རྣམས་ཀྱི་དྲུང་དུ་ཟབ་དོན་གྱི་ཆོས་ཞུ་བ་ལ་དཀའ་ལས་ཆེན་པོ་མ་དགོས་ཤིང་། དེ་ནས་བསམ་ཡས་སུ་སླེབས་ཏེ། དགོས་མེད་རྒྱུད་ལ་སྐྱེ་བ་སྙམ་པ་ཞིག་བྱུང་བས། སྟོན་བསོད་སྙོམས་ལ་ཡང་མི་འགྲོ་བའི་གྲབས་ཤིག་བྱས་ཙ་ན། གྲོགས་མཆེད་གཅིག་ན་རེ། བསོད་སྙོམས་ལ་ཕྱིན་པ་དྲག་ཟེར་རྡོ་ཡན་བསམ་ཡས་མན་ལ་ཕྱིན་པས། ནས་ཁལ་ལྔ་ཙམ་ཞིག་རྙེད། དེས་མིའི་ལོངས་སྤྱོད་བྱས་ནས། ད་ཡུལ་ལ་ཞེན་པ་བྱས་

ཀྱང་དགོས་པ་མེད་པས། རྒྱུས་མེད་ཀྱི་ས་ཆར་འགྲོ་དགོས་བསམ་ནས། ལ་ཕར་རྒྱབ་ལ་འགྲོ་བའི་ལམ་ལ་ཞུགས་དུས་གྲོགས་མཆེད་རྣམས་ན་རེ། ཟླ་བོ་མེད་པར་མ་འགྲོ་བསྡད་པ་དྲག་ཟེར་དུས། དང་པོ་ཨ་མའི་དེ་ནས་ཡོང་ཙ་ན་ཡང་ཟླ་བོ་དང་གོས་མེད་དུ་ཡོང་བ་ཡིན། ད་ཞག་འཆི་པའི་དུས་སུ་ཡང་ཟླ་བོ་དང་གོས་མེད་གཅིག་པུར་འགྲོ་བ་ཡིན་པ་ལ། ཟླ་བོས་ག་ན་ལངས་བྱས། རས་ཀྱི་གླང་རུ་ཞིག་ཡོད་པ་དེ་ཁུར་ནས་ཕྱིན་པའི་སྒོ་འགག་ཏུ་ཤར་སྒོ་བའི་ཡོན་བདག་དགེ་བ་བསྙེན་གྱི་ནུ་བོ་དོན་ཡོད་བཟང་པོ་ཟེར་བ་དེ་ཕྱེ་རྐྱལ་པ་ཆེན་པོ་ཁུར་ནས་བྱུང་བ་དང་ཏུག་འཕྲད། རྟེན་འབྲེལ་ཤིན་ཏུ་བཟང་བྱས་ནས་དབུར་སྟོད་ངོས་ལ་ཕྱིན་ནས། བྲོག་ནང་དུ་སླེབ་དུས། བླ་མ་ཨོ་རྒྱན་པའི་དྲུང་དུ་མཇལ་དུ་འགྲོ་དགོས་སྙམ་པ་ལ། བླ་མ་ཨོ་རྒྱན་པ་འབྲི་གུང་ལ་བཞུད་ནས། མི་བཞུགས་ཟེར་བ་ཞིག་ཐོས་པས། དེར་ཨོ་རྒྱན་ལམ་ཕྱིན་པར། ཆོས་རྗེ་པཎ་ཆེན་པའི་དྲུང་དུ་འགྲོ་བསམ་ནས། ལ་ཞིག་ལ་འཛེགས་དུས། སྟོད་ཡ་གི་ནས་མར་ལ་བྱིས་པ་སིལ་པོ་ཁུར་བ་ཞིག་བྱུང་པས་རྟེན་འབྲེལ་ཞིག་བརྟག་དགོས་བསམ་ནས་བལྟས་ཙ་ན། སིལ་པོ་དེ་ཡང་ལྕི་བ་གསེར་ཁ་མ་གཅིག་གིས་ལྟེམ་གྱིས་ཁེངས་འདུག་ཁྱོད་ལ་མིང་ཅི་ཟེར་བྱས་པས། གུ་རུ་སྐྱབས་ཟེར་བ་ཡིན་ཟེར་བས། རྟེན་འབྲེལ་བཟང་བསམ་ནས་ཡར་འཛེགས། ལ་ཁ་དེར་སླེབས་དུས། དགོན་པ་ཡང་མཐོང་། མོས་གུས་ཐུན་མོང་མ་ཡིན་པ་ཞིག་དེར་སྐྱེས་ནས་ཡར་ཕྱིན་དུས། ངེད་རང་གི་གྲོགས་མཆེད་རྩེ་ཐང་པ། སྔོན་ལ་སླེབས་པ་ཚོས་ངོ་ཤེས་ནས། ཆོས་ཉིད་རང་གྲོལ་ཟེར་བ་ཞིག་ཡོད་པ་བསུ་བ་ལ་བཏང་བྱུང་བས། རྟེན་འབྲེལ་བཟང་སྙམ་སེམས་སྤྲོ་སིང་པ་ཞིག་བྱུང་། གྲོགས་མཆེད་རྣམས་ཀྱིས་ཀྱང་ཆོས་རྗེ་མཇལ་མ་ཟིན་པར་འདུག་པས། ངས་སླེབས་པ་དང་དགོངས་ཇའི་ཐོག་ཏུ་མཇལ་བ་ལ་ཕྱིན་ནས་ཆོས་རྗེའི་དྲུང་ནས་དགྱེས་ཚོར་ཆེན་པོ་ཡང་མཛད། གང་དགོས་ཀྱི་ཆོས་ལ་སོགས་པ་དང་།

སྒོས་སུ་ཕག་མོ་ཤེས་རབ་གསལ་བྱེད་ཀྱི་བྱིན་རླབས། རྗེས་གནང་དང་བཅས་པ་ཐུགས་རྗེས་བཟུང་། དེ་ནས་ཨོ་རྒྱན་དུ་ཕྱིན། བླ་མ་རིན་པོ་ཆེ་ཨོ་རྒྱན་པ་མཇལ། དགྱེས་ཚོར་ལ་སོགས་པ་ཆེན་པོ་མཛད། དེ་དུས་སྟོད་སྨད་ཀྱི་གྲྭ་པ་ཐམས་ཅད་བསོད་སྙོམས་དང་། དོན་གཉེར་ལ་སོང་ནས། དགོན་པ་སོ་གསོད་པར་འདུག་པས། བསྙེན་སྒྲུབ་ཅིག་བྱས་ན་བསམ། བཅོམ་ལྡན་འདས་ཕག་མོའི་བསྙེན་སྒྲུབ་ཟླ་བ་གསུམ་གྱི་བར་དུ་བྱས་པས་ཐུགས་རྗེས་འཛིན་པའི་རྟགས་རྨི་ལམ་དུ་ཅུང་ཟད་ཙམ་ཡང་བྱུང་། མཚམས་དེ་ཐོན་ནས། རིན་པོ་ཆེ་ཨོ་རྒྱན་པས་དགུན་དེར་རྫོགས་པ་ཆེན་པོ་སྙིང་ཐིག་གི་ཁྲིད་གསུང་། ད་ལན་ཁྱོད་ཡོད་པས་ལྷག་ལུས་མེད་པར་གནང་དགོས་གསུང་ནས། ལྷག་མ་མ་ལུས་པ་རྫོགས་པར་གནང་ཞིང་། དེ་རྗེས་དབང་གོང་མ། རྒྱབ་ཆོས་ཡང་ཏིག་དང་བཅས་པ་ཡང་གནང་། བསྐང་གསོའི་ལུང་དང་ལས་བྱང་གི་ལུང་། ལར་ནི་རྫོགས་པ་ཆེན་པོའི་ཆ་ལག་མ་ལུས་པ། རྗེས་གནང་བྱིན་རླབས་དང་བཅས་པ་ཐུགས་རྗེས་བཟུང་། དཔལ་ནཱ་རོ་པའི་ཆོས་དྲུག་རྒོད་ཚང་པའི་ཁྲིད་ཆེན་བརྒྱད། ཟབ་མོ་ལྔ་ལྡན་གྱི་ཁྲིད། གཞན་ཡང་ཆོས་རྗེ་འཇིག་རྟེན་མགོན་པོའི་འཁྲུངས་ཆོས་ལ་སོགས་པ་མང་དག་ཏུ་གནང་། ཆོས་རྗེ་འབྲུག་པའི་ཐུབ་ལྔ་དང་། དབུ་མའི་ཚིག་ལ་སོགས་པ་དབུ་མའི་ལུང་མང་དག་ཏུ་ཡང་གནང་ཞིང་། ཟླ་བ་ལྔའི་བར་ལ་ང་ཆུ་རིལ་བུའི་བཅུད་ལེན་བྱས་པས། བཅུད་ལེན་ཡང་འབྱོངས་པོ་བྱུང་བའི་སྟོབས་ཀྱིས་ལུས་ལ་ན་ཚ་མེད་ཅིང་། སེམས་གཟུང་འཛིན་གྱི་རྟོག་པ་དང་བྲལ་བའི་ངང་ནས་ལར་སྔར་ཕན་ཆད་མི་ཚེ་དོན་མེད་ལ་བསྐྱལ་འདུག །ད་ཕྱིན་ཆད་ཚེ་འདིའི་བྱ་བ་སྣབ་བཞིན་དུ་རྒྱང་བཏང་ནས། ཕྱི་མའི་བྱ་བ་ལ་གཏིང་བསྙབ་བྱས་ནས་གཅིག་པུར་དབེན་པ་བརྟེན་ཏེ། ཆེ་འདོད་དང་། དྲག་འདོད་དང་ཚོང་སོ་ནམ་ཁེ་སྤོགས་ལ་སོགས་པ། མདོར་ན་ཆོས་དང་མི་མཐུན་པ་ཐམས་ཅད་སྐྱུར་ལ། ཚེ་འདི་བློས་བཏང་ནས་མི་མང་གི་གྲལ་འགོ་དང་། གཞན་གྱི་ཤ་ཚ་གྲོས་འདེབས་དང་མདོར་ན་འཇིག་རྟེན་འདིའི་བྱ་བ་བྱེད་རེ་ཤི་སྙམ་པའི་ཞེ་མནའ་གཏིང་ནས་བསྐྱལ་ནས།

ད་ཡུལ་ལ་ལོག་པའི་དོན་ཡང་མི་འདུག་གངས་ཏི་སེ་ལ་ཕྱིན་ནས་མི་ཚེ་ཐོད་བོར་གྱི་སྒྲུབ་པ་ཞིག་བྱེད་དགོས་སྙམ་པ་བྱུང་ནས། བླ་མ་ཨོ་རྒྱན་པའི་དྲུང་དུ་ཞུས་པ་འབྲི་གུང་པའི་སྟོད་རིའི་ཐེམས་ཀྱི་ཁྲོད་དུ་འགྲོ་བར་ཞུ་ཞུས་པས། འགྲོ་བ་མི་དྲག་གསུང་ནས་ཁོང་གིས་བཏང་དུ་མ་ཉན་པས། ད་བླ་མའི་བཀའ་བཅགས་པས་མི་ཡོང་བསམ་ནས། ཏེ་སེ་ལ་མ་ཕྱིན་པར་སྐྱིད་སྨད་ལ་ཡོང་ནས། འཕན་ཡུལ་ལུང་པ་མན་ཆད་ཀྱི་རི་ཁྲོད་དགོན་པ་རྣམས་སུ་གནས་གཏད། གནས་འབྲེལ་འཇོག་དགོས་བསམ་ནས་རྒྱལ། ཉན་པོ་ལ་སོགས་པའི་འཕན་ཡུལ་ལུང་པའི་དགོན་པ་རྣམས་ལྟད་མོ་ལྟ་ཡིན། གནས་འབྲེལ་རེ་ཙམ་བཞག་བླ་མ་རྣམས་ལའང་བླ་མའི་རྣལ་འབྱོར་རེ་རེ་ཙམ། ཁོ་རང་རྣམ་པའི་དགོན་པའི་ཆོས་ལུགས་དང་མཐུན་པའི་ཆོས་འབྲེལ་རེ་ཙམ་ཞུས། དེ་ནས་དགེ་མོར་ཆོས་རྗེ་རིན་པོ་ཆེབསམ་གཏན་པའི་དྲུང་དུ། བླ་མའི་རྣལ་འབྱོར་ངོ་སྤྲོད་དང་བཅས་པ། གྲུབ་ཐོབ་གཅེར་གྱི་རྣམ་ཐར་འཁྲུངས་ཆོས་དང་། ཆོས་རྗེ་རྒྱ་བྲག་པ་དང་། སངས་རྒྱས་སྒོམ་པ་གཉིས་ཀྱི་རྣམ་ཐར་དང་བཅས་པ་ཞུས། དེ་ནས་ཆུ་འཐུང་མ་གཅིག་ལ་ཆུ་འཐུང་གི་ལུང་ཞུས་ནས་བསམ་ཡས་སུ་སླེབས་དུས། བླ་མ་ཤཱཀྱ་རིན་ཆེན་པའི་དྲུང་དུ་མཇལ་བ་ལ་མཆིམས་ཕུར་ཕྱིན་པས་ཁྱོད་སླེབས་པ་དེ་བཟང་། ད་ལོ་དབྱར་འདིར་སྡོད་གསུང་ནས་ཞལ་ཏ་བཟང་པོ་གནང་། སྡོད་པའི་ཚིག་བྱས་ནའང་། ང་རང་ལ་ནི་ནས་ལ་སོགས་རྡོག་པོ་གཅིག་ཀྱང་མེད། འབྲེལ་ཅན་རྣམས་ཀྱང་ནས་ཀྱི་སྐད་ངན་འདོན་ཀྱིན་འདུག་པས། ང་ལ་སྟེར་དགོས་པ་བྱུང་གིས་དོགས་པ་ཡིན་པ་འདྲ་བསམ་པའི་

རྣམ་རྟོག་ཅིག་སྐྱེས། དེ་བས་ཀྱང་ང་རང་ཆུ་འཐུང་བ་དྲག་བསམ། ཡང་དབེན་གནས་ཀྱི་གཟིམས་ཁང་རྙིང་མ་རུ། ཟླ་བ་ཧྲིལ་པོ་གསུམ་ལ་ཆུ་འཐུང་པས། ཆུ་འབྱོངས་པོ་བྱུང་། ངེས་འབྱུང་དང་སྐྱོ་ཤས་དཔག་ཏུ་མེད་པ་སྐྱེ་བ་ཞིག་བྱུང་། ལུས་ལ་བལྟས་ཙ་ན་ཡང་རང་བཞིན་གྱིས་དངས་ལ་སྣུམ་བག་དང་ལྡན་པ་དང་། ལག་པ་ལ་བལྟས་པས་ཕྱི་གསལ་ནང་གསལ་ལྟ་བུ་ཞིག་བྱུང་ནས། དགེ་སྦྱོར་ཤིན་ཏུ་འཕེལ་བ་སྐྱིད་པ་ཞིག་བྱུང་། དེ་ནས་དགུན་སོ་དེར་བླ་མ་ཤཱཀ་རིན་པའི་ཞལ་ཏ་ལ་འདིར་སྡོད་ལ། རིན་པོ་ཆེ་གུ་རུ་པའི་དྲུང་དུ། ད་ལོ་ཆོས་ཉོན་གསུང་། ཞལ་ཏ་གནང་བས། རིན་པོ་ཆེ་གུ་རུའི་དྲུང་དུ་རྫོགས་ཆེན་སྙིང་ཁྲིད་ཉན་ཅིང་། སག་ཡ་བྲག་ཕུག་ཏུ་བསྡད་པ་ལ་མཐུན་རྐྱེན་ཆེར་མེད་པས་ནམ་ཟླ་གྲང་བ་དང་། མི་མང་གི་ཁྲོད་དུ་འགྲོ་བ་དང་། དཀའ་ཐུབ་བཅུད་ལེན་བྱེད་པ་མི་འགྲུབ་པར་འདུག་སྙམ་པས་དེར་ཚོགས་ཆུང་རེ་ཙམ་བྱུང་བའི་ཟན་སྐམ་རྣམས་ལ་མཁན་པོ་བྱས་ནས། ཟན་རྡོག་རེ་ལ་ཚལ་དྲུག་དྲུག་ཏུ་བྱས་ནས། ཞག་གསུམ་གྱི་འཚོ་བ་བྱས། ཚོགས་འཁོར་ཚོགས་ཆང་དང་བཅས་པ་རྣམས་ཀྱིས་འཕྲལ་ཕྱིར་ནས། ཟན་སྐམ་རྐྱལ་ཆུང་ཙམ་བྱུང་ཞིང་། ཆོས་ཐོན་ནས་ཟན་སྐམ་རྐྱལ་ཆུང་གང་དང་། གཏོར་ཕྱེ་འགྱེད་མཁན་བྱུང་བ་བསགས་པས་རྩམ་པ་དུམ་གཅིག་ཡོད་པ་ལ་དམིགས་རྟེན་བྱས་ནས། དེར་མཚམས་དམ་པོ་བྱས་ནས་བསྡད་པ་དྲག་པར་འདུག་སྙམ་པ་བྱུང་། །སྡོད་ས་མི་ཚོང་སར་བྱས་ནས། ཁོང་རྣམ་པའི་ཕུད་ལ་ཕར་འབོད་ཚུར་འབོད་དང་། བཟའ་བཏུང་གི་ལན་མཇལ་རེས་རྣམས་མཐོང་ནས་དུང་འདྲ་དེ་ཡང་ལྡང་སྟེ། དགེ་སྦྱོར་གྱིའང་སད་དུ་འགྲོ་བ་འདུག་སྙམ་ནས། དེར་མཚམས་

དམ་པོ་ཞིག་བྱས་ནས་ཟླ་བ་གསུམ་གྱི་བར་དགེ་སྦྱོར་ལ་ཞུགས་པས། དགེ་སྦྱོར་འཕེལ་ཞིང་ཉམས་རྟོགས་རྣམས་ཀྱང་ཅི་རིགས་པ་བྱུང་། ཁྱད་པར་ནུབ་གཅིག་གི་རྨི་ལམ་ན་གཙང་པ་བྲོ་པ་ཤིང་རྩེད་བྱེད་པའི་ཤིང་བཙུགས་པའི་ཐག་པ་གཅིག་ལ་འཇུས་པ་སྙམ་བྱེད་པ་ཞིག་ལ་སྐྱེ་དམན་མང་པོ་ཞིག་གིས་ཐག་པ་དེ་ནས་འཐེན་པས་ནམ་མཁའ་ལ་ཡེར་ཁྱེར་བ་སྙམ་བྱེད་པ་ཞིག་ལ། ནམ་མཁའ་ལ་ཕྱག་ན་རྡོ་རྗེའི་སྐུ་ཡིན་སྙམ་པ་འམ། རེས་འགའ་སངས་རྒྱས་སྟོང་བཞུགས་པའི་ཐང་ཁ་གཅིག་ཡིན་པ་སྙམ་བྱེད་པ་ཞིག་ལ། ལུས་སེམས་ལ་བདེ་སྟོང་གི་ཉམས་ཁྱད་པར་ཅན་སྐྱེས། དེའི་མོད་ལ་གཉིད་སད་བྱུང་། ལུས་ལ་བདེ་བས་ཁྱབ་ཅིང་། སེམས་ལ་གཟུང་འཛིན་གྱི་རྟོག་པ་ཐམས་ཅད་རང་སར་དག་པའི་ངང་ནས། བྲག་ཕུག་དེ་འོད་གསལ་གྱིས་ལྟེམས་ཁེངས་འདུག་པའི་ངང་ནས་དར་ཅིག་ནས་དྲན་པ་རྙེད་ཙ་ན། རྨི་ལམ་དེ་ཡང་བཟང་། ནང་གི་འོད་གསལ་འདི་ཡང་ལེགས་སྙམ་ནས། སེམས་ལ་དགའ་བྲོད་ཀྱི་འཛིན་པ་ཞིག་ཞུགས་འདུག་པས། དེ་ཉིད་ཀྱི་ངང་ལ་དེ་ཉིད་བླ་མར་ཤར་ནས། ཨ་ཕ་ཁྱོད་འདྲ་བ་ཡོང་བ་མདངས་སུམ་རྨི་ལམ་གྱི་ཉམས་དུམ་པ་ཤར་བ་དང་། ད་ལྟ་འོད་གསལ་གྱི་སྣང་བ་ཅུང་ཟད་ཤར་བ་འདི་ལ་དེ་ཙམ་གྱི་ཞེན་ཆགས། ལར་ཆོས་རྗེ་བླ་མ་རིན་པོ་ཆེའི་སྐུ་དྲིན་ལ་བརྟེན་ནས། ཆོས་སྐུ་ཀ་དག་ཆེན་པོའི་ཀློང་ཡངས་ནས། ལོངས་སྐུ་དངས་པ་ཞིང་ཁམས་ཀྱི་སྣང་བ་དང་། སྤྲུལ་སྐུ་འགག་མེད་ཆེན་པོའི་ངང་ལས། གང་ཤར་འཛིན་མེད་དུ་རང་གྲོལ་ཞིང་ཐུགས་རྗེ་

བྱམས་དང་སྙིང་རྗེ་མ་བུ་གཅིག་པ་ལ། བརྩེ་བ་ལྟ་བུའི་སེམས་ཀྱིས་འགྲོ་ལ་ཕན་པ་རྒྱ་ཆེར་བསྒྲུབས་ཤིང་། མདོར་ན་སྐུ་གསུམ་འདུ་འབྲལ་མེད་པའི་དགོངས་པ་ལ་དུས་ཐམས་ཅད་དུ་འབྲལ་མེད་ཉམས་སུ་ལེན་པ་འདི་འདྲའི་དོན་རྟོགས་ནས། དེ་ལྟ་བུའི་ཉམས་ལེན་གྱི་ལྷ་རེ་མཐོང་བ་ལ་དགའ་བྲོད་རང་འཆར་ཅི་དགོས། ལར་སྐྱིད་པ་ཡིན། སྣང་སྲིད་འོད་གསལ་དུ་ཤར་བ་འདི་སྐྱིད་པ་ཡིན། གང་ཤར་སྐུ་གསུམ་དུ་མཐོང་བ་འདི་སྐྱིད་པ་ཡིན། བླ་མ་རིན་པོ་ཆེའི་སྐུ་དྲིན་ལ་འཁོར་ཐབས་མི་འདུག་པ་སྙམ་ནས། བླ་མ་ལ་མོས་གུས་དཔག་ཏུ་མེད་པ་ཞིག་ཀྱང་སྐྱེས། ད་ཅི་བྱས་ཆོས་ཡིན། གང་ཤར་ལམ་ཡིན། སྣང་སྲིད་བླ་མར་ཤར་བ་འདི་ལྟ་བུའི་དོན་རྟོགས་པས། ཅི་བྱས་བདེ་བར་འདུག་སྙམ་པའི་རྟོགས་པ་ཁྱད་པར་ཅན་ཞིག་ཀྱང་སྐྱེས། དེ་ནས་ཞག་ཕྱི་མའི་ཐོ་རངས་ཀྱི་རྨི་ལམ་ཞིག་ན། ནམ་ལངས་པ་དང་ཉི་མ་རྩེ་ཤར་བ་དང་། ནམ་མཁའ་ནས་འབྲུའི་ཆར་པ་སི་ལི་ལི་བབས་པ་ཞིག་རྨིས་པའི་མོད། སེམས་ཀྱི་ཐོག་ཏུ་བདེ་ཡ་ལེ་བའི་རྣམ་པ་ཞིག་ལ། ངོ་བོ་དེ་དགའ་བར་ཤར་པའི་རིག་འདྲ་བ་འདུག །དེའི་མོད་ལ་གཉིད་སད་ཙམ་ན་ཡང་། དགའ་ཡ་ལེ་ཁ་འདྲ་འདུག་པས། དེའི་མོད་ལ་དགའ་བྲོད་ཀྱི་བདུད་ཞུགས་པ་མ་ཚོར་བ་འདུག་པ་སྙམ་པའི་ངང་དེ་ལ། སྐྱག་གཏད་མེད་དགའ་བྲོད་ཀྱི་བདུད་ཡིན་དུ་ཆུག་ཅི་བྱས་ཆོས། གང་ཤར་ལམ། སྣང་སྲིད་བླ་མར་ཤར་དུས། བདེ་སྡུག་ཅི་བྱུང་ཡང་ཁྱད་པར་སྤུ་ཙམ་ཞིག་ཀྱང་མེད་པར། ཐམས་ཅད་ཀུན་ཏུ་བཟང་པོའི་

རོལ་པ་ཡིན་པར་གདིང་ཆོས། དེ་ནས་དེ་ཁའི་རྗེས་ལ་ཅི་བྱུང་ཡང་འདྲ་བ་ཡིན་པ་ལ། ཉི་མ་ཤར་བ་དེ་ཉིད་གནས་སྐབས་སུ་སྡིག་པ་འདག་པའི་རྟགས་ཡིན་པར་གོ། འབྲུའི་ཆར་བབས་པ་དེ་ཉིད་འབྲས་བུ་ལམ་དུ་བྱེད་པའི་རྟགས་ཡིན་པར་འདུག་པས། བླ་མ་དམ་པ་རྣམས་ཀྱི་བཀའ་དྲིན་ཡིན་སྙམ་པའི་མོས་གུས་དུངས་པ་ཞིག་ཀྱང་སྐྱེས། དེ་ནས་བཟུང་ནས་ལོ་དྲུག་གི་བར་ལ། ཆོས་རྗེ་རིན་པོ་ཆེ་གུ་རུ་པའི་དྲུང་གི་ཐུགས་རྗེས་བཟུང་ནས། དགེ་སྦྱོར་འཕེལ་ཞིང་སྐྱིད་པ། མི་སུ་ལའང་ཤེས་འབྲེལ་ལ་སོགས་མེད་ཅིང་། དམའ་བའི་ས་བཟུང་ནས་བེམ་པོ། རྟག་ཧྲལ་གྱིས་ཕྱིའི་འཕྱོར་ཆས་དང་། ནང་གི་དགེ་སྦྱོར་བྱེད་པའི་གོས་ཀྱི་གོ་བཅད་ཅིང་དེ་བར་གྱི་འཚོ་བ་དེ། ཚོགས་འཁོར་ཚོགས་ཆུང་རྣམས་ལ། ཞུས་སེ་བྱས། དེས་མ་ལྕོག་བའི་བར་སྐབས་རྣམས་སུ་དངུལ་ཆུའི་བཅུད་ལེན་དང་། རྟག་ཏུ་ངུ་གཉིས་ཀྱི་བཅུད་ལེན་ལ་སོགས་རྣམས་ལ་བརྟེན་ནས་བསྡད་པས། །ང་རང་སྐྱིད་པའི་དགེ་སྦྱོར་འཕེལ་བ་དང་། ཕྱི་ལྟར་དུ་སྙིང་རྗེའི་གནས་དང་། ཉམ་ཐག་པ་ལྟ་བུ་བྱུང་། དེའི་དུས་གཞན་གྱི་གྲལ་འགོར་མི་སྡོད་པ་ལ་སོགས་པ་བྱས་དུས། བླ་མ་རིན་པོ་ཆེ་གུ་རུ་པའི་དྲུང་ནས་ཀྱང་བཀའ་བཀྱོན་དང་། བླ་མ་བཀྲས་དཔལ་བ་ལ་སོགས་པ་རྣམས་ཀྱིས་དམན་པའི་ཆོས་བརྒྱད་འདི་འདྲས་ཅི་བྱེད་ཟེར་ནས་བཀའ་བཀྱོན་བྱུང་ཡང་། ང་རང་ལ་དགེ་སྦྱོར་འཕེལ་བར་བྱུང་བས་དེ་འཐད་པར་བྱུང་། དེ་ནས་རི་མོ་ཅན་དང་། བློན་པོ་འགོས་དང་། བྱ་འུག་ལྷ་ཁང་ལ་སོགས་པ་རྣམས་སུ་ཡང་དཀའ་ཐུབ་བྱེད་ཅིང་། སྒྲུབ་པ་

ནན་ཏན་སྙིང་པོ་བྱས་དུས། རྨི་ཉམས་དང་ཤེས་ཉམས་དང་། སྣང་ཉམས་རྣམས་ཐན་ཐུན་བྱུང་བ་རྣམས་ཡི་གེ་གཞན་དུ་ཤེས་པར་བྱ། དེ་ནས་རིན་པོ་ཆེ་སྤྲུལ་སྐུ་བའི་དྲུང་ལྷོ་བྲག་ནས་ཕྱགས་ཕེབས་ཏེ་མཇལ་བ་ལ་རིན་པོ་ཆེ་གུ་རུ་བ་བྱོན་པའི་ཕྱགས་ཕྱི་ལ་ཕྱིན་ནས། རིན་པོ་ཆེ་གུ་རུ་བའི་དྲུང་དུ་ཡང་། གསང་བ་བླ་ན་མེད་པའི་སྙིང་ཏིག་གི་ཐོག་དྲངས་དབང་གང་བརྒྱུད་ཐེག་མཆོག་གུ་རུའི་ཐུགས་སྒྲུབ་ཚེ་བརྟན་ལུགས། དེ་ལ་སོགས་པའི་ཨོ་རྒྱན་གྱི་གཏེར་ཆོས་མང་དག་ཏུ་ཞུས་ཤིང་ཐུགས་ལ་བཏགས། རིན་པོ་ཆེ་སྤྲུལ་སྐུ་བའི་དྲུང་དུ་ཡང་། ཡང་ཟབ་མཁའ་འགྲོ་སྙིང་ཐིག་ཕྱག་ན་རྡོ་རྗེ་མདོ་ལུགས། ཕྱག་ན་རྡོ་རྗེ་གཏུམ་པོ་ཁྲ་ཐོག །ཆོས་རྗེ་རིན་པོ་ཆེའི་གསུང་སྒྲོས་ཁ་ཐོར་མང་དག་ཏུ་ཐུགས་ལ་བཏགས་ཤིང་། བདག་གི་ཕྱི་མའི་བླ་མ་དང་འཇིག་རྟེན་འདིས་ཕའི་གོ་བཅད་ནས། ཐུགས་རྗེས་བུ་བཞིན་དུ་སྐྱོང་། དེའི་དུས་སུ་བླ་མ་རིན་པོ་ཆེ་སྟག་ཚང་པ་མཆིམས་ཕུར་བྱོན་དུས། ཆོས་རྗེ་ཡང་དགོན་པའི་ལུགས་ཀྱི་ལྷན་ཅིག་སྐྱེས་སྦྱོར། གཏུམ་མོ་ཞག་བདུན་མའི་ཁྲིད། ཆོས་ཀྱི་རྡོ་རྗེའི་སྦ་བཤད། བར་དོ་གནད་ཕྲེང་གི་བྱིན་རླབས་དང་བཅས། ཐུགས་རྗེ་ཆེན་པོའི་དམར་ཁྲིད། ལྷ་བཅུ་མའི་དབང་བསྐུར་སྒྲུབ་ཐབས་དང་བཅས་པ། གཞན་ཡང་རི་ཆོས་ཀྱི་ཆ་ལག་ལ་སོགས་པ་ཕྱག་རྒྱ་ཆེན་པོའི་ཆོས་མང་དག་ཏུ་ཐུགས་ལ་བཏགས། བླ་མ་རི་ཁྲོད་པ་བྱ་བྲལ་བ་ལ། རྒྱུད་ཕྱིའི་ངོ་སྤྲོད། གདམས་པ་དང་ཚགས་ཀྱི་མགོ་བྱས། རྒྱུད་ཕྱི་མ་ཆ་ལག་དང་བཅས་པ་རྣམས་ཀྱི་པོད་ལུང་། ཞལ་གདམས་དང་བཅས་པ་གནང་། ཆོས་ཀྱི་

རྗེ་རིན་པོ་ཆེ་བསོད་ནམ་རྒྱལ་མཚན་པའི་དྲུང་ནས་མཁན་པོ་མཛད། སློབ་དཔོན་མན་ཙུ་ཤྲཱི་པའི་དྲུང་ནས་སློབ་དཔོན་མཛད། མཁན་ཆེན་བཀྲས་སངས་བའི་དྲུང་ནས་གསང་སྟོན་མཛད། ལོ་བཅོ་བརྒྱད་ཀྱི་ཐོག་ཏུ་བསྙེན་པར་རྫོགས་པ་ཐོབ་ཅིང་། གཞན་ཡང་ཆོས་རྗེ་རིན་པོ་ཆེ་པའི་དྲུང་དུ་དཔལ་དུས་ཀྱི་འཁོར་ལོ། བརྟག་གཉིས། གུར། སམ་བྷུ་ཊི། སྡུད་པ་རྩ་འགྲེལ། སྦྱོར་བ་ཡན་ལག་དྲུག །དྲུང་པ་ཉིད་ཀྱིས་མཛད་པའི་ཁྲིད་ཡིག་རྫོགས་པ། གཟེར་ལྔ་ལམ་འབྲས་རྣལ་འབྱོར་བཞི། ཤིན་ཏུ་སྤྲོས་མེད། སྤྱོར་ཡུལ་དྲུང་པ་ཉིད་ཀྱིས་མཛད་པའི་དམར་ཁྲིད། བདེ་མཆོག་ལུགས་ཀྱི་དབང་མངོན་རྟོག་དང་བཅས་པ། ཆོས་རྗེ་རྒྱལ་སྲས་ཐོགས་མེད་བས་མཛད་པའི་བླ་མའི་རྣལ་འབྱོར། གསོལ་འདེབས་དང་བཅས་པ། རྡོ་རྗེ་འཇིགས་བྱེད་ཀྱི་སྒྲུབ་ཐབས། རྡོ་རྗེ་དབྱངས་ཅན་མ་དཀར་མོ། དམར་མོ། ཙརྩི་ཀའི་སྒྲུབ་ཐབས་ལ་སོགས་པ་དང་། ཆོས་རྗེ་འཕགས་པས་མཛད་པའི་མནྜལ་འབུལ་ཆོག་གསོལ་འདེབས་དང་བཅས་པ། བླ་མ་ཤཱཀ་རིན་པའི་དྲུང་དུ། ཨུ་རྒྱན་བསྙེན་སྒྲུབ་གེགས་སེལ་དང་བཅས་པ། རི་ཆོས་སྐོར་གསུམ་དང་བཅས་པ་མང་དག་ཏུ་ཐོབ་ཅིང་། མདོར་ན་དཀའ་ཐུབ་དང་ཆུ་འཐུང་གི་ལྟོ་གོ་བཅད་ཅིང་། བེར་པོ་སྟག་རལ་གྱིས་གོས་གོ་བཅད་ནས་སྒྲུབ་པ་ནན་ཏན་སྙིང་པོར་བྱས་པ་ལ་ལྕགས་རི་མུ་ཁྱུད་ཀྱི་ནང་དུ། གསང་སྤྱོད་དཔྱིད་ལོ་གཅིག་བསྐྱངས་པ་ལ། དགེ་སྦྱོར་ཤིན་ཏུ་འཕེལ་ཞིང་ལུས་སེམས་བདེ་བའི་ཐད་ནས། བསམ་ཡས་པར་ཁང་དུ་ཉལ་དུས་ནུབ་གཅིག་རྨི་ལམ་དུ། དབུ་རྩེ་སྟོད་པདྨ་ཅན་ཀྱི་སྟེང་ན་ཡོད་

པ་སྙམ་བྱེད་པ་ལ། མདུན་གྱི་ནམ་མཁའ་ལ་འོད་ཀྱི་ལྷ་མོ་གསུམ་གར་བྱེད་ཅིང་སྙན་པའི་གླུ་དབྱངས་སྒྲོགས་པའི་ནང་ལ་རིགས་ཀྱི་བུ་སྔ་མ་ལྟར་གྱིས་ཤིག་ལན་གསུམ་གསུངས་ནས། འཇའ་ལྟར་ཡལ་བར་གྱུར་པའི་མོད་ལ་གཉིད་སད་བྱུང་ནས། ལུས་ལ་བདེ་སྟོང་གི་ཉམས་ཁྱད་པར་ཅན་དང་། སེམས་རྟོག་མེད་ཀྱི་ངང་དུ་ཏིང་ངེ་འཛིན་ལ་ཡུན་རིང་དུ་གནས་པ་གྱུར། ལྷ་སར་ཕྱིན་དུས་གཅིག་ཙ་ན། བླ་མ་ཤཱཀ་རིན་པའི་དྲུང་ནས། ངེད་དཔོན་སློབ་གཉིས་ཀྱིས་ཇོ་བོ་རིན་པོ་ཆེའི་ལྕགས་སྒོའི་མདུན་དུ། བླ་མ་བརྒྱུད་པ་དང་། ཞི་ཁྲོའི་བསྐང་བཤགས་བྱས་དུས། སྟེང་གི་གདུང་གསེབ་ནས། གོས་ཆེན་ཁ་དོག་གསུམ་བསྣོལ་བའི་མེ་ཏོག་ལ་མུ་ཏིག་བརྒྱུས་པ་ཞིག །བདག་གི་སྤྱི་གཙུག་ཏུ་རང་བཞིན་གྱིས་བབས་བྱུང་བས། བླ་མ་རིན་པོ་ཆེ་ཤཱཀ་རིན་པའི་གསུང་ནས། འདི་རྟེན་འབུལ་ལེགས་ཤིང་། ལ་ཉེ་བཟང་བ་ཡིན་གསུང་ནས་དགྱེས་ཚོར་ཆེན་པོ་མཛད། ངེད་རང་ལའང་དེས་འཕྲོད་པ་བཞིན་བྱུང་བས། མཁན་ཆེན་རིན་པོ་ཆེ་ཕྱོགས་ལས་རྣམ་པར་རྒྱལ་བའི་དྲུང་དུ། བླ་མའི་རྣལ་འབྱོར་དང་། སྦྱོར་བ་ཡན་ལག་དྲུག་གི་ངོ་སྤྲོད་དང་བཅས་པ། ཡི་གེ་བརྒྱ་པའི་ལུང་། ཐུགས་རྗེ་ཆེན་པོ་འགྲོ་བ་འདུལ་བའི་ལུང་དང་བཅས་པ་རྣམས་གནང་། ཆོས་རྗེ་ཀུན་གཞོན་པའི་དྲུང་དུ། བླ་མའི་རྣལ་འབྱོར་ངོ་སྤྲོད་དང་བཅས་པ། སྐྱེས་མཆོག་ཆོས་རྗེའི་གསུང་སྒྲོས་ཁ་འཐོར་བ་ཡང་འགའ་གནང་། མཁན་ཆེན་དྷརྨཱ་ཤྲཱི་པའི་དྲུང་དུ། བློ་སྦྱོང་ཐུན་གཅིག་པ་སྙིང་པོ་དོན་གསུམ། སུམ་པ་ལོ་ཙྪ་དང་མཁའ་འགྲོའི་བརྡའི་ངོ་སྤྲོད་གསུང་

སྒྲོས་དང་བཅས་པ་རྣམས་གནང་། སྐྱིད་སྡུག་ལམ་ཁྱེར། སྒྲོལ་མ་མནྜལ་བཞི་པ། སྒྲོལ་མ་དཀར་མོ་ནང་སྒྲུབ་ཏུ་བྱ་བའི་ལུང་ཐོབ། སློབ་དཔོན་གཞོན་ནུ་རྡོལ་གྱི་དྲུང་དུ། ཡེ་ཤེས་ཁྱུང་ཁྲའི་ལུང་ཐོབ། གནོད་སྦྱིན་ཨ་པ་ར་ཙིཏྟའི་སྒྲུབ་ཐབས། གཞན་ཡང་གཅོད་ཡུལ་གྱི་གདམས་པའི་སྐོར་མང་དུ་ཐོབ། བླ་མ་བསོད་ཤེ་བའི་དྲུང་དུ་རི་ཆོས་ཀྱི་ཟབ་པའི་དབུགས་བཞི་བར་དོའི་གདམས་པ། བར་དོ་བྱང་ཆུབ་སེམས་ཀྱི་ཁྲིད། ཀུན་ཏུ་བྱང་ཆུབ་སེམས་ཀྱི་ཁྲིད། ཀུན་རྫོབ་བྱང་ཆུབ་སེམས་ཀྱི་ཁྲིད། གཏུམ་མོའི་གཞུང་ཁྲིད། སྦ་བཞིའི་ངོ་སྤྲོད། སྦ་བཞིའི་འཁྲུལ་འཁོར། ཆོས་རྗེ་ཡང་དགོན་པའི་བཀའ་ཤོག་གཏུམ་མོའི་འཁྲུལ་འཁོར་ཉི་ཤུ་པ་ལ་སོགས་གདམས་པ་མང་དག་ཏུ་གནང་། རིན་པོ་ཆེ་ཆོས་དབྱིངས་པའི་དྲུང་དུ་སེམས་ཁྲིད་ཡིད་བཞིན་ནོར་བུའི་ཁྲིད། ཤོག་དྲིལ་བཞིའི་ལུང་རྒྱབ་ཆོས་ནོར་བུའི་ཕྲེང་བ། ཕྱག་རྒྱ་ཆེན་པོའི་སྒང་དྲིལ། ཞང་རིན་པོ་ཆེའི་བཀའ་འབུམ་པོ་ཏི་གཉིས། ཛམ་བྷ་ལ་སེར་པོ། ནག་པོ། མགོན་པོ་ཕྱག་བཞི་པ། གཟེར་ལྔ་ཞལ་ཀྱལ་མ་དང་བཅས་པ་གནང་། དེ་ལ་སོགས་པའི་མཁས་གྲུབ་ཀྱི་བླ་མ་དམ་པ་རྣམས་མང་དུ་བསྟེན་ཅིང་། ལྗགས་ཀྱི་པད་མོ་དང་། གསུང་གི་བདུད་རྩི་མྱངས་ནས། ཨུ་རྒྱན་ཨེ་ཝཾ། ཡེར་པ། ལྷ་ས་པོ་ཏ་རི། སྒྲགས་རོ་བོ། བྱམས་སྡིངས། ཡར་འབྲོག་ཞལ་དྲོ་དགོན་པ། རྒྱལ་ནང་རས་ལྕགས་མཚོ། མཁའ་ར་མཚོ་ལ་སོགས་པའི་དབེན་གནས་དང་། ཨོ་རྒྱན་པདྨ་དང་།

སྔར་གྱི་གྲུབ་ཆེན་གོང་མ་རྣམས་ཀྱིས་བྱིན་ཀྱིས་བརླབས་པའི་གནས་མཆོག་རྣམས་སུ་སྒྲུབ་པའི་རྒྱལ་མཚན་བཙུགས་ཤིང་། ལྟོ་གོས་ལ་གྱོང་བསྐུར། དམའ་བའི་ས་བཟུང་། ཧྲུལ་པོའི་གོས་གྱོན་ནས། སྤྱིར་གྱི་བསྟན་པ་རིན་པོ་ཆེ་དང་སྒོས་ཀྱི་རྫོགས་པ་ཆེན་པོའི་ཞབས་འདྲེན་དུ་མ་སོང་བ་བྱེད་པའི་ཁུར་ཆེན་པོ་ཁུར་ནས། སྒྲུབ་པ་ནན་ཏན་སྙིང་པོར་བྱས་དུས། བླ་མ་ཡི་དམ་མཁའ་འགྲོ་རྣམས་ཀྱིས་བྱིན་གྱི་རླབས་ཞུགས་ཤིང་། ཐུགས་རྗེས་བཟུང་བ་ལ་བརྟེན་ནས་ལུས་ངག་ལའང་ཉམས་དང་རྟོགས་པ་མཚོན་རེ་བྱུང་པ་ལ་དགའ་བྲོད་ལ་སོགས་པའི་བདུད་དུམ་པ་རེ་ཞུགས་དུས། དཀོན་མཆོག་གི་ཐུགས་རྗེ་ལ་བརྟེན་ནས། བདུད་དེ་ངོས་ཟིན་དུས། བདུད་དེ་ཁ་ལམ་དུ་སོང་ནས། དགེ་སྦྱོར་གྱི་བོགས་རྒྱངས་པ་རེ་ཡོད་པ་བྱུང་ཞིང་། ཁྱད་པར་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས། པཎ་ཌི་ཏ་ཆེན་པོ་བི་མ་ལ་མི་ཏྲ་གཉིས་ཀྱིས་ཐོག་དྲངས་པའི་གྲུབ་ཆེན་ཉི་ཤུ་རྩ་ལྔས་བྱིན་གྱིས་བརླབས་པའི་དབེན་གནས་མཆིམས་ཕུ་དགེའུ་དགེ་གོང་བློན་བོ་མགུལ། སག་མ་བྲག་ཕུག་རི་མོ་ཅན་རྣམས་སུ་དྲིན་ཅན་རིན་པོ་ཆེ་འོད་གསལ་རང་གྲོལ་གྱི་ཐུགས་རྗེས་གཟིགས། ཞབས་ལ་བཏུད། ལོ་དྲུག་གི་བར་སྒྲུབ་པའི་རྒྱལ་མཚན་བཙུགས་ཤིང་། ལོ་དྲུག་གི་བར་ལ་ཇོ་བོ་བཟང་ནས་འབུལ་མཁན་མེད། སྙིང་རྗེ་ནས་སྟེར་མཁན་མེད་པས་ང་རང་གིས་ཀྱང་ལྟོ་གོས་ཀྱི་ཕྱིར། སྡུག་དོགས་ནས་བསོད་སྙོམས་ལ་སོགས་པ་དང་། མདའ་ན་མར་ལ་འདོད་ཡོན་གཉེར་བ་ལ་སོགས་པ་མ་བྱས་པར་འདག་འབྱར་དང་རི་ནས་མི་འབེབས་པ་ལ་

དཀའ་ཐུབ་བཅུད་ལེན་ཚོགས་སུ་བྱུང་བའི་སྐལ་བ་རྣམས་ལ་བརྟེན་ཅིང་། གོས་བེར་པོ་རྟག་ཧྲལ་ཤ་འགག །གཉལ་ཚོས་དཀར་པོར་སོང་བ་གཅིག་ལ་བརྟེན་ནས་བསྡད། དེ་དུས་རིན་པོ་ཆེ་གུ་རུ་བས་ཐུགས་ལ་བཏགས་ཀྱང་། བདག་གི་དཀོར་ལྕིའི་དོགས་ནས། རྩམ་ནས་ན་བཟའ་ལ་སོགས་པ་ཅི་གནང་ཡང་མ་ཞུས་པ་ཡིན། སྒྲུབ་པ་ནན་ཏན་སྙིང་པོར་བྱས་དུས། སྦྱོར་དྲུག་གི་གེགས་དང་། ཤིག་གེགས་ལ་སོགས་པ་བྱུང་ཡང་། དེ་རྣམས་ཐམས་ཅད་ཀྱང་བླ་མ་དཀོན་མཆོག་གི་ཐུགས་རྗེ་དང་། ང་རང་གི་མོས་གུས་ལ་བརྟེན་ནས་ལམ་གྱི་བོགས་སུ་སོང་ནས། རིན་པོ་ཆེ་པ་དང་། བླ་མ་ཤཱཀ་རིན་པ། བླ་མ་ཏེ་རྩེ་བ་རྣམས་ཀྱིས་དབུ་མཛད། དགེའུ་ན་བཞུགས་པའི་གྲ་རོགས་གྲོགས་མཆེད་ཡོན་བདག་ཕོ་མོ་དང་བཅས་པ་ཐམས་ཅད་ཀྱིས་ཐུགས་རྗེས་གཟིགས། བྱམས་པོ་བྱས་པ་ལ་བརྟེན་ནས། ཨན་དགེ་སྦྱོར་མི་འཕེལ་ཞིང་སོ་མ་གསོད་པར་བྱུང་བས། ངེད་རང་གྲོགས་མཆེད་ཀྱིས། བྱ་ཆུ་མིག་ལ་སོགས་པའི་རི་བྲག་དུམ་པ་བརྟེན་ཅིང་། ལྷག་པར་བྱ་ཆུ་མིག་ཏུ་བསྡད་དུས་ལོ་ལྔ་ཙམ་གྱི་བར་ལ། དགེ་སྦྱོར་འཕེལ་ཞིང་སྒྱུ་ལུས་བདེ་བ། ཉམས་དང་རྟོགས་པ་ལ་སོགས་ཀྱང་ངང་གིས་འཕེལ་བར་བྱུང་བའི་ཐད་ནས་ཡོན་བདག་ཕོ་མོ་ལ་སོགས་པ་ཐན་ཐུན་གྱིས་ཚོར་ནས། སེམས་ལ་ཕན་པའི་གདམས་ངག་ཀྱང་ཐན་ཐུན་སྟོན་དགོས་པ་བྱུང་ཞིང་། དེ་དག་གི་ཐད་དུ་ལག་ན་ཅི་ཡང་མེད་དུས། ཆོས་རྗེ་རིན་པོ་ཆེའི་བཅོ་བརྒྱད་མཆོད་པ་བྱེད། གཞན་

ལ་སྟེར་རྒྱུ་མ་བྱུང་ཙ་ན། ང་རང་གི་སྤོལ་ཏ་ཕོར་བ་ཁ་མཐོ་བ་དང་། སྐྱོ་ཚ་ཚྭ་བྲོ་བ་དང་། གཏོར་མ་ཕོར་བ་རེ་ལ་བརྟེན་ནས་མཆོད་པའི་གོ་བཅད་ཅིང་། དེ་རིང་ཡོན་བདག་ཕོ་མོ་རྣམས་ཀྱིས་ཕུལ་བའི་སྤྱོད་པ་རྣམས་ཆུད་ཟོས་ལ་མ་སོང་ཞིང་། དོན་ཡོད་པར་བྱ་བའི་ཕྱིར་དུ་ཟླ་བ་བྱུང་ངོ་ཅོག་གི་བཅྭོ་བརྒྱད་མཆོད་པ་ལ། མཁའ་འགྲོ་ཆོས་སྐྱོང་ལ་གཏོང་ཚོགས་དང་། རི་ཁྲོད་ན་བཞུགས་པ་རྣམས་ལ་ཚོགས་ཀྱི་འཁོར་ལོས་མཉེས་པར་བྱས་ཤིང་། གཞན་ལོ་དུས་ཀྱི་བཅྭོ་བརྒྱད་མཆོད་པ་ལ། ང་རང་གང་ཡོད་དུ་སོ་སོའི་ཕྱག་ཏུ་གྲལ་འགྱེད་དང་བཅས་པ་བསྒྲུབས་པའི་བྱིན་བརླབས་ཀྱིས་ཅུང་དྲག་ཏུ་སོང་ནས། ཐན་ཐུན་བྱུང་བ་རྣམས་བསམ་ཡས་ལ་འཚོགས་སུ་ལོ་བཅག་མའམ། ལོ་རེ་བཞིན་དུ་དགེ་འདུན་ཚོགས་པ་རྒྱ་མཚོ་ལྟ་བུ་ལ་བསྙེན་ཅིང་བཀུར་བ་དང་། དེ་སྟེང་རིན་པོ་ཆེ་གུ་རུ་པའི་དྲུང་ནས་ལ་གསོལ་བ་མ་ཐེབས་པའི་དུས། ཆོས་རྗེ་རིན་པོ་ཆེ་དེ་ཉིད་ཀྱི་ཐུགས་དགོངས་ལ། སྐྱིད་སྨད་ལ་སོགས་པའི་ཆོས་སྡེ་རྣམས་སུ། མང་ཇ་འབུལ་བ་དང་བཅས་པ་ཞིག་བསྒྲུབ་ན་དགོངས་པ་ཡོད་པ་ལ་ཐུགས་དགོངས་མ་རྫོགས་པར་གཤེགས། ད་ང་རང་གི་རིན་པོ་ཆེའི་ཞབས་ཏོག་གཞན་འགྲུབ་པ་དེར་ནི་མི་འདུག་ཆོས་རྗེ་རིན་པོ་ཆེ་དྲི་མེད་པའི་ཕྱག་སྲོལ་མི་ཉམས་པ་དང་། དྲུང་པ་དེ་ཉིད་ཀྱིས་ཀྱང་ཐུགས་དགོངས་ལམ་ལུས་དེ་འདྲ་བར་དེ་རྫོགས་པར་བྱ་བའི་ཕྱིར་དུ། བསམས་ཡས་སུ་བླ་ཆེན་པས་གཙོ་མཛད་ཚོགས་པ་རྒྱ་མཚོ་ལྟ་བུ་ལ་ཚར་འགྱེད་དང་བཅས་པ། བླ་མ་བཀྲ་ཤིས་དཔལ་བས་དབུ་མཛད་མཆིམས་ཕུ་

བ་རྣམས་ལ་ཚོགས་ཀྱི་འཁོར་ལོ། བྱམས་སྡིངས། རི་བོ་བྱ་ཆུ་མིག་རྣམས་སུ་ཡང་ཚོགས་འཁོར་འགྱེད་དང་བཅས་པ། སྐྱིད་སྨད་ཀྱི་ཆོས་སྡེ་རྣམས་སུ་མང་ཇ་འགྱེད་འབུལ་ནོད་དང་བཅས་པ། གུང་ཐང་མེ་ཏོག་མཆོད་པ་རྩེ་ཐང་གཉིས་སུ་མང་ཇ་འབུལ་ནོད་དང་བཅས་པ་བསྒྲུབས་ནས། དད་པས་སྦྱིན་པ་ཆུད་མ་ཟོས་པ་བྱས་ཤིང་། དེའི་ཁུལ་ནས་རང་གི་ལུས་ངག་ཡིད་གསུམ་དགེ་བ་ལ་བསྐུལ་བ་དང་། སེམས་ཅན་ལ་ཕན་ཅི་ཐོགས་མདོར་ན་སྟོད་སྨད་ཆུ་ལྷོ་བྱང་རྣམས་སུ་ཐ་ན་གཏོར་མ་ཕོར་བ་རེ་ཡན་གྱིས་སེམས་ཅན་ལ་ཕན་པ་ཅི་འགྲུབ་བྱས་ཤིང་། རང་ལས་ཅུང་ལྷག་པ་རྣམས་ལ་འདུན་པ་ཆེན་པོས་མོས་པ་དང་། གུས་པ་དཔག་ཏུ་མེད་པས་སངས་རྒྱས་སུ་བསྒོམས་པ་དང་། རང་དང་མཉམ་པར་གྱུར་བ་རྣམས་ལའང་མཐོ་གནོན། ཆགས་སྡང་འགྲན་སེམས་སྤངས་ནས་དག་པའི་སྣང་བ་ཁོ་ན་བསྒོམས། བླ་མའི་འདུ་ཤེས་སུ་དམ་བཅས་པ་དང་། རང་ལས་དམན་པར་གྱུར་པ་རྣམས་ལའང་ཞེ་སྡང་པ་དང་། ཁྱད་དུ་གསོད་པ་ཐམས་ཅད་སྤངས་ནས་བྱམས་པ་དང་། སྙིང་རྗེ་ཕྱོགས་རིས་མེད་པས། ལུས་ངག་ཡིད་གསུམ་གྱི་སྒོ་ནས་ཕན་པ་ཅི་འགྲུབ་བགྱིས་ཤིང་། མདོར་ན་དམའ་བའི་ས་བཟུང་། ཧྲུལ་པོའི་གོས་གྱོན། དཀའ་ཐུབ་དང་བཅུད་ལེན་ལ་བརྟེན་གྱིན། ཕྱོགས་མཐའ་དག་ཏུ་བླ་མ་དགེ་བཤེས་གཉེན་མཁས་བཙུན་བཟང་གསུམ་བཞུགས་ཟེར་བ་རྣམས་ཀྱི་ཞབས་དྲུང་དུ་ཕྱིན་ནས་གདམས་བའི་རྩ་གདར་བཅད་ཅིང་། མཆིམས་ཕུ་ལ་སོགས་པའི་དབེན་གནས་ཁྱད་པར་ཅན་རྣམས་སུ་སྒྲུབ་པ་ནན་ཏན་སྙིང་པོར་བྱས་པས། དེ་དང་མཐུན་པའི་བྱིན་རླབས་དག་ཡོན་ཏན་ཀྱང་མཚོན་རེ་སྐྱེས་པ་ལགས་པས་། ད་ཕྱིན་ཆད་བདག་

གི་རྗེས་སུ་འཇུག་པའི་བུ་སློབ་རྣམས་ཀྱང་། ཡར་བླ་མ་དཀོན་མཆོག་ལ་མོས་གུས། མཉམ་པར་གྱུར་པ་རྣམས་ལ་དག་པའི་སྣང་བ། དམན་པར་གྱུར་པ་རྣམས་ལ་ཕ་མའི་འདུ་ཤེས་ཀྱིས་ཕྱོགས་རིས་མེད་པའི་བྱམས་པ་དང་། སྙིང་རྗེ་བྱང་ཆུབ་ཀྱི་སེམས་ཟུང་དུ་ཆུད་པའི་སྒོ་ནས་ཕན་པ་རྒྱ་ཆེར་སྒྲུབ་པ་དང་། གཞན་ཡང་བླ་མ་དང་ཆོས་ལ་ཕྱོགས་རིས་དང་བདག་བཟུང་མི་མཛད་པར། མཁས་ཤིང་གྲུབ་པ་བརྙེས་པའི་བླ་མ་དམ་པ་རྣམས་བསྟེན། ཐོས་པས་ཕྱིའི་སྒྲོ་འདོགས་གཅོད། བསམ་པས་ནང་གི་སྒྲོ་འདོགས་གཅོད་ཅིང་། སྒོམ་པས་ཕྱི་ནང་གསང་གསུམ་གྱི་སྒྲོ་འདོགས་ཐམས་ཅད་ཆོད་པར་བྱས་ནས། དབེན་པའི་གནས་སུ་སྒྲུབ་པ་ནན་ཏན་སྙིང་པོར་མཛོད་ཅིག །དེ་ལྟར་མཛད་པས་བླ་མའི་བྱིན་རླབས་རྒྱུད་ལ་ཞུགས། ཡི་དམ་མཁའ་འགྲོས་བྱིན་གྱིས་བརླབས་པའི་དུས་སུ་གཞན་དོན་བྱེད་པ་ལ་ལུས་ངག་ཡིད་གསུམ་གྱི་གྱོང་དང་། སྐྱེ་བོའི་ལོག་སྒྲུབ་ལ་སོགས་བཟོད་པ་དང་། རང་དོན་གྱི་འཁྲིས་མ་ཞུགས་པ་མཛད་ནས། བསྟན་པ་རིན་པོ་ཆེའི་ཁུར་ཆེན་པོ་བསྣམས་པ་དང་། བླ་མ་དམ་པ་རྣམས་ཀྱི་ཕྱག་སྲོལ་མི་ཉམས་ཤིང་། ཐུགས་དགོངས་རྫོགས་པར་བྱ་བའི་ཕྱིར་དུ་འཇིག་རྟེན་འདིའི་ཆོས་དང་མི་མཐུན་པའི་བྱ་བ་ཅི་དང་ཅི་ཡིན་པ་ཐམས་ཅད་རིང་དུ་དོར་བ་དང་། ཆོས་དང་མཐུན་པའི་བྱ་བ་གང་ལ་འང་བརྩོན་པས་སྐྱོ་ངལ་དང་། ཕྱོགས་རིས་མེད་པའི་སྒོ་ནས་འགྲོ་བ་སེམས་ཅན་གྱི་དོན་རྒྱ་ཆེན་པོ་བསྒྲུབ་པར་བརྩོན་པ་ཐུགས་ལ་འདོགས་པར་ཞུ། ཚུལ་འདི་ཉིད་རྣལ་འབྱོར་གྱི་དབང་

ཕྱུག་ཆེན་པོ་ནམ་མཁའི་སྙིང་པོས་བྱིན་གྱིས་བརླབས་པའི་ཀུ་སུ་ལུའི་བྱ་བྲལ་བ་ཤེས་རབ་རྒྱ་མཚོས། བླ་མ་རྡོར་བསམ་བླ་མ་ནམ་རིན། བླ་མ་སངས་རྒྱས་རྒྱལ་མཚན་རྣམས་ཀྱིས་བསྐུལ་བའི་ངོར། སྟག་གི་ལོ་ཟླ་བ་བརྒྱད་པའི་ཚེས་བཅུ་གསུམ་ལ་བབས་པ་སངས་རྒྱས་མྱ་ངན་འདས་ནས་ལོ་སུམ་སྟོང་བཞི་བརྒྱ་ཉི་ཤུ་རྩ་དྲུག་སོང་བའི་དུས་ན། ཆུ་མིག་དཔལ་གྱི་དབེན་གནས་སུ་སྦྱར་བའོ།། །།

བི་མ་སྙིང་ཐིག་གི་སྤྲོས་མེད་དབང་དཀྱིལ།

བི་མ་སྙིང་ཐིག་གི་སྤྲོས་མེད་དབང་དཀྱིལ་ནི་གཞི་མཐིང་ག་མཐར་འོད་ལྔའི་ར་བས་བསྐོར་བ་དབུས་སུ་བུམ་པ་བསྣོལ་མ་གཉིས་ཀ་དམར་པོ་མགུལ་ཆིངས་དར་ལྗང་ཁུ་རྒྱན་པདྨ་དམར་པོ་ཤིང་ལོས་བརྒྱན་པ་ཞབས་གཉིས་ལ་སྣ་ཚོགས་པད་གདན་སྟེང་མའི་ཞབས་མདུན་དང་ལོག་མའི་ཞབས་ལྷོར་བསྟན་ཏོ། ཞབས་གཉིས་མཚམས་སུ་ཐིག་ལེ་དཀར་པོ། དེ་བཞིན་ལྷོ་ནུབ་ཏུ་སེར་པོ། ནུབ་བྱང་དམར་པོ། བྱང་ཤར་ལྗང་གུ་སོ་སོ་ལ་འོད་ལྔས་འདི་ལྟར་བསྐོར་ཏེ་ཐམས་ཅད་ཀྱང་རེག་ཐུག་མེད་པ་བྲི། སྤྲོས་མེད་དཀྱིལ་འཁོར་འདི་ལ་བྲི་ཚུལ་མི་འདྲ་བ་ཡོད་ཀྱང་ཀུན་མཁྱེན་ཆེན་པོའི་ཡིག་ཆ་ལས་འབྱུང་བ་ལྟར་ཡིན་པས་ཡིད་ཆེས་ཀྱི་གནས་ཡིན་ལ། འདིའི་ཐིག་འདེབས་ཚུལ་ཟབ་མོ་ཡང་ཐིག་ཏུ་ཡོད་གསུངས། འདི་ཤིན་ཏུ་སྤྲོས་མེད་ཀྱི་གོང་དུ་དགོས། བི་མ་སྙིང་ཐིག་སྤྲོས་བཅས་དཀྱིལ་འཁོར་གྲི་ཚུལ་རྟབ་བས་སོགས་མཁའ་འགྲོ་སྙིང་ཐིག་དང་འབྲ། རྩིབས་དང་རྟ་བབས་སྣམ་བུའི་ཁ་དོག་སོགས་ཀྱང་ཁྱད་མེད། ལྷ་གནས་ལ་དབུས་སུ་པད་འདབ་བརྒྱད་ལྟེ་བ་མཐིང་གཟེའུ་འབྲུ་སེར་པོ་ཅན། དབུས་སུ་རྣམ་སྣང་ཡབ་ཡུམ་མཐིང་ག་ཡབ་འཁོར་དྲིལ། པད་འདབ་ཤར་དུ་རྡོར་སེམས་ཡབ་ཡུམ་གཞན་གསུམ་ལའང་ཡབ་ཡུམ་རིགས་འགྲེ་ཡབ་ཐམས་ཅད་གཡས་རང་རྟགས་ཕྱག་མཚན་ཐུགས་ཀ་དང་གཡོན་དྲིལ་བུ་དཀུར་བརྟེན་ཐམས་ཅད་གཡས་རང་རྟགས་ཕྱག་མཚན་ཐུགས་ཀ་དང་གཡོན་དྲིལ་བུ་དཀུར་བརྟེན་ཐམས་ཅད་ལོངས་སྤྱོད་རྫོགས་སྐུ། ཡུམ་རྣམས་སྐུ་མདོག་ཡབ་ལྟར་གྲི་ཐོད་འཛིན་པའོ། ཞབས་རྡོར་སྐྱིལ། མཚམས་ཀྱི་འདབ་བཞིར་ཤར་ལྷོར་ལ་སྱེ་དཀར་མོ་མེ་ལོང་། པད་ཟླའི་གང་ན་ལ་བཞུགས་པའོ། ལྷོ་ནུབ་མཱ་ལེ་མཐིང་ག་རིན་པོའི་ཕྲེང་བ། ནུབ་བྱང་གྷཱི་རྟི་དམར་མོ་པི་ཝཾ། བྱང་ཤར་ནཱི་རྟི་ལྗང་གུ་གར་གྱི་ཕྱག་རྒྱ་ཅན་པད་ཉིའི་གདན་ལ་སེམས་སྐྱིལ་གྱིས་

བཞུགས་པ། པདྨ་བྲི་ཚུལ་ལ་ཕྱོགས་བཞིན་ངམ་རྨས་ཤར་དཀར་ལྷོ་སེར་ནུབ་དམར་ལྗང་ཕྱི་རིམ་མཐིང་པ། མཚམས་བཞིའི་ནང་མ་དམར་སྐྱ་ཕྱི་མ་ལྗང་གུ་ཡིན་ནོ། འདོད་སྣམ་པ་མཆོ་བའི་ལྷ་མོ་སྤྱི་ལྟར་རོ། སྒོ་བ་ཡ་ཡུམ་མེད། ཕྱི་རོལ་དུ་རྡོར་དང་དེ་ཕྱིར་མེ་རི་ལྔ་ལྡན་གྱིས་སྦུད་དགོས། དུར་ཁྲོད་དང་དབང་སྲེང་མེད། ཀུན་མཁྱེན་ཆེན་པོའི་ཕྱག་བཞེས་བཞིན་གཏེར་ཆེན་བླ་མ་མཆོག་གི་དཀྱིལ་དྲང་ལ་ཞིབ་ཏུ་བལྟས་ནས་ཇི་ལྟ་བ་བཞིན་བྲིས་པ་ཡིན། ཀུན་མཁྱེན་ཆེན་པོའི་ཕྱག་ལེན་རྒྱུན་ལ་འཁྲུལ་མེད་ཡིན་གསུངས། འགྱུར་མེད་སྐལ་བཟང་ཁུ་དབོན་གྱི་ཕྱག་བྲིས་པས་བཤུས་སོ།། །།དགེའོ།།

གྲུབ་ཐོབ་མེ་ལོང་རྡོ་རྗེའི་རྣམ་ཐར་དྲི་ལོག་མ།

གྲུབ་ཐོབ་མེ་ལོང་རྡོ་རྗེའི་རྣམ་ཐར་དྲི་ལོག་མ་བཞུགས་སོ།

ཨཱོཾ་ཨཱཿཧཱུཾ། །ཆོས་སྐུའི་བླ་མ་དམིགས་མེད་ངང་། །ལོངས་སྐུའི་བླ་མ་འོད་གསལ་སྐུ། །སྤྲུལ་སྐུའི་བླ་མ་ཐུགས་རྗེ་ཅན། །བླ་མ་གསུམ་ལ་གསོལ་བ་འདེབས། །དུག་གསུམ་གྲོལ་བར་བྱིན་གྱིས་རློབས། །ཆོས་དབྱིངས་བླ་མ་མི་རྟོག་དང་། །མེ་ལོང་བླ་མ་གསལ་དག་ལྷ། །མཉམ་ཉིད་བླ་མ་མཐོ་དམའ་མེད། །སོར་རྟོགས་བླ་མ་མ་འདྲེས་གསལ། །བྱ་གྲུབ་བླ་མ་རིགས་འཁོར་བཅས། །བླ་མ་ལྔ་ལ་གསོལ་བ་འདེབས། །དུག་ལྔ་གྲོལ་བར་བྱིན་གྱིས་རློབས། །ཨོཾ་ཨཱཿཧཱུྃ། བྱིན་རླབས་རྟོགས་པས་འཁོར་མཛད་བླ་མ་དང་། །བསྒྲུབས་པས་དངོས་གྲུབ་འབྱུང་བ་ཡི་དམ་ལྷ། །འུར་བས་གཞན་སྣང་ཐུལ་བ་མཁའ་འགྲོའི་ཚོགས། །བྱིན་གྱིས་རློབས་ཤིག་རྗེས་འཇུག་ཐུགས་རྗེས་ཟུངས། །མོས་པས་ཐུགས་དགོངས་གཅིག་གྱུར་ཆོས་མཛད་དང་། །རྟོགས་པས་དགོངས་དོན་གྲོལ་བ་དམ་པའི་ཆོས། །དམ་ཚིག་གཙང་བས་བསྒྲུབས་པའི་ཆོས་སྐྱོང་རྣམས། །བསྟན་པ་སྲུངས་ཤིག་བར་ཆད་རྐྱེན་རྣམས་སོལ། །ཨོཾ་ཨཱཿཧཱུྃ། ཕྱེན་སྭཱ་ཧཱ། སྒྲགས་ནང་རྟུག་པ་མེ་ལོང་ལ། །འཕྲེང་པོའི་སྟོན་པ་དབང་ཕྱུག་ཁོང་། །དྲི་ལོག་རྣམ་ཐར་ཞུ་ུའོ་ཟེར། །ཤོག་བུར་འཆལ་གཏམ་

ཁ་གཅིག་ལོངས། །ཨོཾ་ཨཱ་ཿཧཱུྃ། དེ་ལྟར་ཉོན་མོངས་པ་དམིགས་སུ་མེད་པ་ཆོས་སྐུ་མེ་ལོང་གི་རྣམ་ཐར། རང་རྒྱུད་རྩུབ་ལ་སྟོང་པ་ཆོས་སྐུ་མེ་ལོང་གི་རྣམ་ཐར། འདུས་འདུ་ཤེས་ལ་མཐའ་དང་བྲལ་བ་ཆོས་སྐུ་མེ་ལོང་གི་རྣམ་ཐར། དེ་གསུམ་ཆོས་སྐུ་མེ་ལོང་གི་རྣམ་ཐར། ཨོཾ་ཨཱཿཧཱུྃ། མཐའ་བྲལ་གཅིག་ཏུ་བསྡུས་པ་ལོངས་སྐུ་མེ་ལོང་གི་རྣམ་ཐར་གཅིག་གི་སྟོང་པ་ཡེ་ཤེས་ལྔ་མདངས་དང་ལྡན་པ་ལོངས་སྐུ་མེ་ལོང་གི་རྣམ་ཐར། ཅང་མེད་ཞི་ཁྲོ་སྐུ་རུ་གསལ་བ་ལོངས་སྐུ་མེ་ལོང་གི་རྣམ་ཐར། དེ་གསུམ་ལོངས་སྐུ་མེ་ལོང་གི་རྣམ་ཐར། ཨོཾ་ཨཱཿཧཱུྃ། མ་བྱིན་པར་གཞན་གྱི་ཆུང་མ་ལ་རྐུ་བ་སྤྲུལ་སྐུ་མེ་ལོང་གི་རྣམ་ཐར། མི་ཚངས་པ་རང་གི་བུ་མོ་ལ་སྤྱོད་པ་སྤྲུལ་སྐུ་མེ་ལོང་གི་རྣམ་ཐར། རྫུན་བླ་མ་ལ་གཏོང་བ་སྤྲུལ་སྐུ་མེ་ལོང་གི་རྣམ་ཐར། སྲོག་གཅོད་རང་གི་བུ་ཕྲུག་གསོད་པ་སྤྲུལ་སྐུ་མེ་ལོང་གི་རྣམ་ཐར། འགྲོགས་གཞུང་ཡོན་བདག་དང་རྩོད་པ་སྤྲུལ་སྐུ་མེ་ལོང་གི་རྣམ་ཐར། མཇེ་ཨ་མ་ལ་སྟོན་པ་སྤྲུལ་སྐུ་མེ་ལོང་གི་རྣམ་ཐར། མི་ངས་ཆུང་མ་ལ་བྱེད་པ་སྤྲུལ་སྐུ་མེ་ལོང་གི་རྣམ་ཐར། རང་རེའི་བླ་མ་རང་རེས་ཆོག་པ་སྤྲུལ་སྐུ་མེ་ལོང་གི་རྣམ་ཐར། དེ་རྣམས་སྤྲུལ་སྐུ་མེ་ལོང་གི་རྣམ་ཐར་བསྡུས་པའོ། །ཨོཾ་ཨཱཿཧཱུྃ། བླ་མ་རྣམས་དང་རྨི་ལམ་དུ་

མཇལ་བ་རྫུན་རྐྱལ་མེ་ལོང་གི་རྣམ་ཐར། བསྟན་གཙོ་དང་ཐུགས་རྗེ་ཆེན་པོ་དང་ཕག་མོ་དང་ལྷན་སྐྱེས་དང་རྟ་མགྲིན་རྣམས་ཀྱི་ཞལ་མཐོང་བ་རྫུན་རྐྱལ་མེ་ལོང་གི་རྣམ་ཐར། རྫོགས་པ་ཆེན་པོ་སྙིང་ཏིག་ཟབ་པའི་ཡོན་ཏན་གྱིས་བདག་དང་འབྲེལ་ཚད་དོན་དང་ལྡན་པ་རྫུན་རྐྱལ་མེ་ལོང་གི་རྣམ་ཐར། དེ་གསུམ་རྫུན་རྐྱལ་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། རྡོ་ལ་རྡོག་རྗེས་བདུན་བརྒྱད་བྱུང་བ་ཟོག་པོ་མེ་ལོང་གི་རྣམ་ཐར། བྲག་རྒོད་མཆེ་བ་ལ་གཡུང་དྲུང་རིས་དང་ལག་རྗེས་རྒྱབ་པ་ཟོག་པོ་མེ་ལོང་གི་རྣམ་ཐར། རྨོང་སྤུས་རྒྱལ་བསེན་ཐུབ་པ་ཟོག་པོ་མེ་ལོང་གི་རྣམ་ཐར། དེ་གསུམ་ཟོག་པོ་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། འཁོར་བའི་ཉེས་དམིགས་དྲན་པ་ཆོས་པ་མེ་ལོང་གི་རྣམ་ཐར། རྟག་ཏུ་འཆི་བ་དྲན་པ་ཆོས་པ་མེ་ལོང་གི་རྣམ་ཐར། བླ་མ་མཚན་ལྡན་འཚོལ་བ་ཆོས་པ་མེ་ལོང་གི་རྣམ་ཐར། མོས་གུས་གསོལ་བ་འདེབས་པ་ཆོས་པ་མེ་ལོང་གི་རྣམ་ཐར། རྒྱུ་འབྲས་ལ་ཐུབ་ཚད་འཛེམ་པ་ཆོས་པ་མེ་ལོང་གི་རྣམ་ཐར། དག་སྣང་བཏུབ་ཚད་ཀྱིས་སྦྱངས་པ་ཆོས་པ་མེ་ལོང་གི་རྣམ་ཐར། བླ་མ་ཕྱོགས་མེད་ལ་མོས་གུས་བྱེད་པ་ཆོས་པ་མེ་ལོང་གི་རྣམ་ཐར། གདམས་ངག་ཟབ་མོ་ཞུ་བ་ཆོས་པ་མེ་ལོང་གི་རྣམ་ཐར། དེ་ཚོ་ལ་ལས་འབྲེལ་དུ་མ་རེ་འཇོག་པ་ཆོས་པ་མེ་ལོང་གི་རྣམ་ཐར། དེ་རྣམས་ཆོས་པ་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། ཞེན་ལོག་དགོས་མེད་དུ་འབྱོངས་པའི་རི་ཁྲོད་མེ་ལོང་གི་རྣམ་ཐར། དབེན་གནས་བྲག་ཕུག་འཛིན་པ་རི་ཁྲོད་མེ་ལོང་གི་རྣམ་ཐར། འཕོང་ལ་ཚེར་མ་ཟུགས་པ་བཞིན་བྱེད་པ་རི་ཁྲོད་མེ་ལོང་

གི་རྣམ་ཐར། དེ་གསུམ་རི་ཁྲོད་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། དཀའ་ཐུབ་སྣ་ཚོགས་བྱེད་པ་ལྟོགས་བརྐམ་མེ་ལོང་གི་རྣམ་ཐར། རས་རྐྱང་གྱོན་ཞིང་ཁྱི་ལྤགས་འདིང་བ་ལྟོགས་བརྐམ་མེ་ལོང་གི་རྣམ་ཐར། བླ་མ་རྣམས་ལ་གདམས་ངག་ཞུ་བའི་ཕྱག་རྟེན་དང་ཚོགས་འཁོར་ངུ་བ་ལ་བྱེད་པ་ལྟོགས་བརྐམ་མེ་ལོང་གི་རྣམ་ཐར། དེ་གསུམ་ལྟོགས་བརྐམ་མེ་ལོང་གི་རྣམ་ཐར་རོ། ཨོཾ་ཨཱཿཧཱུྃ། རྒྱ་ནད་དང་ཤིག་ནད་ཞུགས་པ་དབང་ཆུང་མེ་ལོང་གི་རྣམ་ཐར། སློང་མོས་བཞད་གང་དུ་གྱུར་པ་དབང་ཆུང་མེ་ལོང་གི་རྣམ་ཐར། རྔན་ཆེན་རྒྱུན་ཆད་མེད་པ་དབང་ཆུང་མེ་ལོང་གི་རྣམ་ཐར། དེ་གསུམ་དབང་ཆུང་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། བླ་མ་རྣམས་ཀྱི་ཐུགས་རྗེས་བཟུང་བ་གྲུབ་ཐོབ་མེ་ལོང་གི་རྣམ་ཐར། མི་འགྱུར་ཕག་མོས་བཅུག་པ་གྲུབ་ཐོབ་མེ་ལོང་གི་རྣམ་ཐར། དུས་ངན་གྱི་སྣང་བ་བདེ་ཤོས་སུ་འདུག་པ་གྲུབ་ཐོབ་མེ་ལོང་གི་རྣམ་ཐར། དེ་གསུམ་གྲུབ་ཐོབ་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། ངོ་བོ་སྟོང་ཉིད་དུ་རྟོགས་པ་རྟོགས་ལྡན་མེ་ལོང་གི་རྣམ་ཐར། རང་བཞིན་ཡེ་ཤེས་ལྔ་ལྡན་དུ་རྟོགས་པ་རྟོགས་ལྡན་མེ་ལོང་གི་རྣམ་ཐར། ཐུགས་རྗེས་སྐུ་གསུམ་ཀུན་ཁྱབ་ཏུ་རྟོགས་པ་རྟོགས་ལྡན་མེ་ལོང་གི་རྣམ་ཐར། དེ་གསུམ་རྟོགས་ལྡན་མེ་ལོང་གི་རྣམ་ཐར་རོ། །ཨོཾ་ཨཱཿཧཱུྃ། ཆོས་སྐུ་མེ་ལོང་གི་རྣམ་ཐར་གྱིས། །རང་གི་ངོ་བོ་རྟོགས་པར་མཛོད། །ལོངས་སྐུ་མེ་ལོང་གི་རྣམ་ཐར་གྱིས། །རང་གི་རང་བཞིན་རྟོགས་པར་མཛོད། སྤྲུལ་སྐུ་མེ་ལོང་གི་རྣམ་ཐར་གྱིས། །མཚང་

ངན་ཕྱི་རུ་ཕྱིན་པར་མཛོད། །རྫུན་རྐྱལ་མེ་ལོང་གི་རྣམ་ཐར་གྱིས། །ང་རྒྱལ་དབྱིངས་སུ་དག་པར་མཛོད། །ཟོག་པོ་མེ་ལོང་གི་རྣམ་ཐར་གྱིས། །ཆགས་སྡང་རང་སར་དག་པར་མཛོད། །ཆོས་པ་མེ་ལོང་གི་རྣམ་ཐར་གྱིས། །མི་ཚེ་བཟང་ལ་སྐྱོལ་བར་མཛོད། །རི་ཁྲོད་མེ་ལོང་གི་རྣམ་ཐར་གྱིས། །ཞེན་ཆགས་གཏིང་ནས་མེད་པར་མཛོད། །ལྟོག་བརྐམ་མེ་ལོང་གི་རྣམ་ཐར་གྱིས། །ཆོས་ཕྱོགས་སྡུག་བསྲན་ཐུབ་པར་མཛོད། གྲུབ་ཐོབ་མེ་ལོང་གི་རྣམ་ཐར་གྱིས། །གང་ཡིན་མགོ་ནི་ཐོན་པར་མཛོད། །རྟོག་ལྡན་མེ་ལོང་གི་རྣམ་ཐར་གྱིས། །སངས་རྒྱས་ཚེ་འདིར་འགྲུབ་པར་མཛོད། །ༀ་ཨཱཿཧཱུྃ། སྤྲང་པོ་མེ་ལོང་རྡོ་རྗེ་ཡི། །རྣམ་ཐར་བཅུ་གཅིག་བརྩམ་ཡིག་མ། །སྟོན་པ་དབང་ཕྱུག་ཐུགས་དགྱེས་མཛོད། །སྒྲགས་ནང་རྟུག་པ་མེ་ལོང་གི་རྣམ་ཐར་དྲི་ལོག་མ་ཞེས་བྱ་བ་རྫོགས་སོ།། །།ཤུབྷྃ། ཛ་ཨནྟུ། །

རིན་པོ་ཆེ་འོད་གསལ་རང་གྲོལ་གྱི་རྣམ་པར་ཐར་པ།

རིན་པོ་ཆེ་འོད་གསལ་རང་གྲོལ་གྱི་རྣམ་པར་ཐར་པ་ཞེས་བྱ་བ་བཞུགས་སོ། །

དེ་ལྟར་ངོ་མཚར་མཆོག་གིས་བརྒྱན་པ། ཕྱམ་བརྡལ་རྫོགས་པ་ཆེན་པོའི་ངང་ལས་སྐད་གཅིག་གཡེལ་བ་མེད་ཅིང་པདྨོ་རྒྱས་པར་མཛད་པའི་བླ་མ་དམ་པ། སྣ་ཚོགས་རང་གྲོལ་ཆེན་པོ་དེ་ཉིད་ལ། ཁོ་བོས་འོད་གསལ་རྡོ་རྗེ་སྙིང་པོའི་དོན་རྣམས་ཕྱིན་ཅི་མ་ལོག་པར་ཞུས་ཏེ། ཐོས་བསམ་སྒོམ་གསུམ་དང་། ལུས་ངག་ཡིད་གསུམ་གྱིས་ཅི་མཉེས་སུ་བསྒྲུབས་ཏེ། དེའང་ཁོ་བོའི་ཡུལ་ནི་གཡུ་རུ་གཞུང་འབེ་ཞེས་བྱ་བར། ཡབ་དཔལ་མགོན་དར་ཞེས་བྱ་བ་དང་། ཡུམ་སེ་མོ་ཞེས་བྱ་བའི་སྲས་སུ་འཁྲུངས་ཏེ། ཆུང་ངུའི་དུས་ནས་དད་པ་དང་། ངེས་འབྱུང་སྐྱོ་ཤས་དྲག་པོ་ཐུན་མོང་མ་ཡིན་པ་སྐྱེ་བ་ཞིག་ཡོད་ཅིང་། ལོ་དགུ་ལོན་པའི་དུས་སུ། ཨ་ནེ་ཞིག་གི་གོ་ན་བསྡད་པའི་དུས་སུ། བྱ་བྲལ་བ་ཁྱི་ལྤགས་སྐེད་ལ་དཀྲིས་པ་ཞིག །ང་སྨྱོ་བ་ནི་མིན། འབོག་པ་ནི་མིན། བླ་མ་ལ་གསོལ་བ་འདེབས་ཟེར་བ་ཞིག་མཐོང་བ་ཙམ་གྱིས་ངེས་འབྱུང་སྐྱེས་པས། ང་ཕྱགས་ཕྱིར་འཁྲིད་པར་ཞུ་

ཞུས་ནས། ཟླ་ཤས་ཀྱི་བར་ཕྱི་ལ་འབྲངས་ཏེ། ཐུགས་རྗེ་ཆེན་པོ་དཔལ་མོ་ལུགས་ཀྱི་སྐོར་རྣམས་ཞུས་ནས་ཡིག་དྲུག་བགྲངས་པས། ཉམས་སམ་རྨི་ལམ་གྱི་སྣང་བ་ལ་བྱིན་གྱིས་རླབས་སྙམ་བྱེད་པ་བྱུང་དུས། འགྲོ་བ་ལ་བྱམས་པ་དང་། སྙིང་རྗེའི་སྣང་བ་དཔག་ཏུ་མེད་པ་སྐྱེས། གཞུང་གི་ཕུར། བླ་མ་བསོད་ནམས་རྒྱལ་མཚན་པ་ལ་དགེ་བསྙེན་དང་ཡོངས་རྫོགས་ཞུས་ཤིང་། ཕྱག་ན་རྡོ་རྗེ་གཏུམ་པོ། འགྲོ་བཟང་། བདེ་མཆོག་ལྷན་སྐྱེས་རྣམས་ཞུས་ནས་བསྙེན་པ་ཅུང་ཟད་བྱས་པས་རྟགས་རྣམས་མཚོན་པ་བྱུང་། དེ་ནས་ཉི་ཤུ་རྩ་ལྔ་ན་ཟུལ་ཕུར་ཕྱིན་ཏེ། མཁན་ཆེན་ཟུལ་ཕུ་བ་དང་། སློབ་དཔོན་ཤཱཀྱ་དོན་གྲུབ་གཉིས་ལས་དགེ་སློང་ཆིག་རྫོགས་ཞུས་ནས། སློབ་དཔོན་ཤཱཀྱ་དོན་གྲུབ་ལས་འདུལ་བ་གཞི་སྟོང་བསླབས། བླ་མ་དམ་པ་ཤཱཀྱ་ཤེས་རབ་ལས་ལྷན་ཅིག་སྐྱེས་སྦྱོར། ཏིལླི་པའི་བརྡའི་ཆོས་བཞི། གཏུམ་མོ་ཞག་བདུན་མ། མི་ལའི་གཏུམ་མོ་གཞུང་ཁྲིད། རི་ཆོས་སྐོར་གསུམ་

བདེ་མཆོག་ལྷ་བཅུ་གསུམ་མ་བླ་མ་སྒྲུབ་པ། དམུས་ལོང་སྦས་པ་མིག་འབྱེད་ཀྱི་དབང་རྣམས་ཞུས་ནས། ཟང་ཟིང་གི་ཡོན་འབུལ་རྒྱུ་མེད་པས། ཟླ་བ་བདུན་གྱི་བར་དུ་སྒྲུབ་པའི་མཆོད་པ་ཕུལ་ནས་བསྒོམས་པས། སེམས་སྤྲོས་བྲལ་གྱི་ངོ་བོ་མཐོང་ཞིང་། བླ་མ་ཤིན་ཏུ་མཉེས་ནས་ཁྱོད་ཀྱིས་སེམས་ཅན་ལ་ཕན་ཐོགས་པ་ཞིག་འོད་བར་འདུག་གསུང་སྟེ། དགྱེས་ཚོར་ཆེན་པོ་མཛད། དེ་དུས་འབྲུ་ཆེན་དང་། བཅུད་ལེན་ཐན་ཐུན་ལ་བརྟེན་ཅིང་། གོས་ཀྱང་ཁྱི་ལྤགས་རེ་དང་བེར་བོ་གཅིག་ལ་བརྟེན་ནས་སྒྲུབ་པ་སྙིང་པོར་བྱས་ཤིང་། བླ་མ་དམ་པ་ལྷ་སར་འབྱོར་པའི་ཕྱགས་ཕྱི་ལ་ཕྱིན་ཏེ། ཆུ་འཐུང་ཞུས་ཏེ་ཆུ་དབྱར་གཅིག་འཐུངས་པས་སྙིང་རུས་ཆེ་གསུང་ནས་ཤིན་ཏུ་ཐུགས་རྗེས་བཟུང་སྟེ། དད་པ་ཐུན་མོང་མ་ཡིན་པ་སྐྱེས་པས། བླ་མ་སྤྲུལ་པའི་སྐུར་འདུག་སྙམ་ནས་གསོལ་བ་བཏབ་པ། ཀྱེ་ཀྱེ་མགོན་པོ་སྤྲུལ་པའི་སྐུ། །བདག་སོགས་རིགས་དྲུག་སེམས་ཅན་རྣམས། །ཐོག་མཐའ་མེད་པའི་དུས་ཉིད་དུ། །ཉིང་འཁྲུལ་ཟོ་ཆུའི་འཁོར་ལོ་བཞིན། །བཟོད་མེད་སྡུག་བསྔལ་ཆས་ཀྱིས་བརྒྱན། །ཐར་མེད་ཡུན་རིང་མནར་བ་ལ། །ཐུགས་རྗེའི་ལྕགས་ཀྱུས་དྲང་དུ་གསོལ། །ཆུ་བཟང་དུ་བླ་མ་དམ་པ་གྲགས་པ་བཤེས་གཉེན་པ་ལ། རྫོགས་ཆེན་བླ་མ་གཞུངས་ནས་བརྒྱུད་པ། ནི་གུ་ཆོས་དྲུག་ཆོས་སྐྱོང་ཕྱག་དྲུག་པ། མཁའ་སྤྱོད་ཀྱི་སྐོར་རྣམས་ཞུས། ཚེ་འདིའི་དབང་དུ་མ་གྱུར་ཙམ་པའི་འདུན་པ་བྱས་ཤིང་། སྲིན་པོ་རི་རུ་སློབ་དཔོན་གྲགས་པ་ཤེས་རབ་ལས་

ཕར་ཕྱིན། བརྟག་གཉིས། རྣམ་འཇོམས་ཤོལ་པོ་ལུགས། ས་སྐྱ་པའི་དཔའ་པོ་གཅིག་པ། ཆོས་སྐྱོང་སེར་ནག་རྣམས་ཞུས། ཀུན་རིག་གཞན་ཕན་རྣམ་གཟིགས་རྣམས་བསླབས་ཤིང་ལུས་ངག་ཡིད་གསུམ་སེལ་མེད་ཀྱི་སྒོ་ནས་མོས་གུས་རྣམ་པར་དག་པའི་མཆོད་པ་ཕུལ། བྱེ་རྫིང་པའི་མཁན་པོ་བསོད་ཤེའི་དྲུང་དུ་སྟོན་པའི་ལུགས་ཀྱི་སྦྱོར་དྲུག་ལུང་ཐོབ་ཙམ་དང་། སྒྲོལ་མ་བཅུ་བདུན་མའི་དབང་ལས་ཁ་ཚར་དང་བཅས་པ། སྨན་བླའི་མདོ་ཆོག །རྣམ་འཇོམས་དཔའ་བོ་གཅིག་པ། སྨེ་བརྩེགས་རྣམས་ཞུས་ཤིང་ཐུགས་རྗེས་ཤིན་ཏུ་འཛིན་པར་མཛད། མཁན་པོ་ཨ་དགེ་བ་ལས་བཀའ་གདམས་ལམ་རིམ། བློ་སྦྱོང་གི་དབང་། ཞི་བྱེད་རྨ་སོ་ཀམ་གསུམ་རྣམས་དང་། མགོན་པོ་ཨ་གྷོ་རའི་རྗེས་གནང་དང་བཅས་པ་ཞུས། ལྷོ་བྲག་ཤར་དུ་ཕྱིན་ཏེ། ཆོས་རྗེ་རྒོད་ཚང་པའི་སྐྱེ་བ་བླ་མ་ན་ལུང་པའི་དྲུང་དུ། རྒོད་ཚང་པའི་ལྷན་ཅིག་སྐྱེས་སྦྱོར། ཁྲིད་ཆེན་བརྒྱད། རྟེན་འབྲེལ་སྙིང་པོ་རྣམས་ཞུས་ནས་ཟླ་བ་བདུན་དུ་ཉམས་ལེན་རྩེ་གཅིག་ཏུ་བྱས་ཏེ། འཚོ་བ་ཡང་སྐྱོ་ཚ་ཕོར་རེ་ལས་མེད་པ་ལ་གསོལ་བ་ཁོ་ན་བཏབ་ཅིང་། ཚེ་འདིའི་འདུན་པ་ཐོངས་པར་བྱ་སྙམ་པའི་ཞེ་བཅད་དྲག་ཏུ་སྐྱེས། ལྷོ་བྲག་མཁར་ཆུར་གནས་སྐོར་ལ་ཕྱིན་ཏེ། བླ་མ་འགའ་ཞིག་གི་དྲུང་དུ་ཆོས་འབྲེལ་ཙམ་ཞུས། ལྷ་མོ་ནང་དུ་བླ་མ་ལྷ་མོ་འཁར་བ་བྱ་བ་དགུང་ལོ་བརྒྱད་ཅུ་རྩ་ལྷག་བཞེས་པའི་དྲུང་དུ། ཟླ་བ་ལྔ་བསྡད་ནས་

ཞི་བྱེད་སོ་སྐོར་དང་། གཞན་ཡང་ཕན་བྱའི་སྐོར་མང་དུ་ཞུས། འཚོ་བ་ཡང་རྟག་ཏུ་ངུའི་རིལ་བུ་ཚོ་གཅིག་ལ་བརྟེན་ཅིང་ཡུལ་ཕྱོགས་སུ་མི་ལོག་པར། བླ་མའི་དྲུང་འདི་ཉིད་དུ་ཉམས་ལེན་ཁོ་ན་ལ་བརྩོན་པར་བྱེད་ལ། ཚེ་འདིའི་འདུན་མ་ལ་དོན་མེད་སྙམ་པ་རྒྱུད་ལ་སྐྱེས་ཤིང་། ལྷན་ཅིག་འཛོམ་པའི་སྒྱུ་ལུས་འདི་ཡང་ནམ་བོར་ཆ་མེད་པར་འདུག་སྙམ་པ་དང་། གཉེན་ཉེ་དུའི་བརྩེ་གདུང་ལ་ཡང་རྒྱབ་ཀྱིས་ཕྱོགས་པའི་འདུན་པ་སྐྱེས་ཤིང་གྲོ་བོ་ལུང་དུ་གནས་སྐོར་ལ་ཕྱིན་ཏེ། མར་པའི་གདན་ས་བླ་མ་དཀོན་མཆོག་རྒྱལ་མཚན་དང་མཇལ། ནཱ་རོའི་ཆོས་དྲུག་ཞུས་ནས། མི་ལ་ཕུག་པར་ཟླ་བ་ལྔ་ཙམ་བསྒོམ་ཞིང་། ཆོས་དྲུག་གི་རྟགས་དུམ་པ་བྱུང་བས། བླ་མ་མཉེས་ནས་ལྷ་ཁང་སར་པའི་དགོན་གཞི་དང་བཅས་ཁྱོད་ལ་སྟེར་བ་ཡིན། གདན་ས་བྱེད་དགོས་གསུང་པ་ནན་ཆེར་མཛད། བདག་འདྲའི་སྤྲང་པོ་འཁྱམས་པོས་གོང་མའི་གདན་ས་མི་ཡོང་ལགས་པས་བཀའ་བཀྱོན་མི་གནང་བར་ཞུ་ཞུས་པས། ཁྱེད་དགེ་སྦྱོར་ལ་བློ་འགྲོ་བར་འདུག་པ་འདི་ལ་དཀའ་ལས་ཅི་ཡང་མེད་པས་གྱིས་གསུངས་ཀྱང་། བཀའ་གཅོག་པར་མི་འོས་ན་འང་། སྐུ་དྲིན་ལ་དགེ་སྦྱོར་ཅི་ནུས་བྱེད་པར་ཞུ་ཞུས་ནས་མི་ལ་ཕུག་པར་བསྡད་དུས། བྱ་བྲལ་བ་གནས་སྐོར་ལ་བྱུང་བ་ཞིག་དང་འཕྲད། ཙཱ་རིའི་ལམ་ཡིག་རིམ་པ་གཉིས་ཙམ་ཁོ་བོའི་ལག་ན་འདུག་པས། དེ་རྣམས་ལ་ལྟད་མོ་

བྱས་དུས། ཙཱ་རིའི་ཆེ་བའི་ཡོན་ཏན་དང་བསྔགས་པ་ཕུན་སུམ་ཚོགས་པ་འདུག་པས། སྐད་ཅིག་ལ་བློ་འགྱུར་ནས། ཚེ་འདི་བློས་བཏང་ནས་ཅི་ནས་ཀྱང་ཙཱ་རི་ལ་འགྲོ་སྙམ་པའི་བདུན་པ་དྲག་པོ་སྐྱེས་ཤིང་། དེ་ཡང་ཙཱ་རིའི་གནས་སྒོ་ལྷ་ས་ནས་འབྱེད་དགོས། བཅུ་གཅིག་ཞལ་གྱི་དྲུང་དུ་གསོལ་བ་འདེབས་དགོས་བྱ་བ་འདུག་པས། ལྷ་སར་ཕྱིན་ཏེ་དཀོན་གཉེར་ལ་ཞུ་བ་བྱས་ནས་གསོལ་བ་ཞག་འགར་བཏབ་དུས། རྨི་ལམ་དུ་མི་དཀར་པོ་ཤེལ་གྱི་མདོག་ལྟ་བུ་གཅིག་གིས་བདུད་རྩིའི་རིལ་བུ་ཡིན་ཟེར་བ་སྦྱིན་པ་རྨིས་པས། ལུས་ངག་ཡིད་གསུམ་བདེ་བ་སྙམ་བྱེད་ཅིང་། གཉིད་སད་པ་དང་རྟོག་པ་དང་བྲལ་བའི་བདེ་གསལ་མི་རྟོག་པའི་ཉམས་ཞག་གཉིས་ཀྱི་བར་དུ་བྱུང་ཞིང་། དེ་དུས་སུ་སྐོར་བ་དང་གསོལ་བ་འདེབས་པ་ཞག་འགའ་བྱས་དུས། ལ་སྟོད་རྡོར་གླིང་པ་ཙཱ་རིར་འབྱོན་པ་དཔོན་སློབ་སུམ་ཅུ་སྐོར་བྱུང་པ་དང་བསྡོངས་ནས་ཕྱིན་དུས་ཙཱ་རིའི་རྙིང་མར་སླེབས་ཏེ། དགྱེར་སྒོམ་ཞིག་པོས་བཏབ་པའི་གནས་རྫ་ཁྲོད་ནུབ་བྱ་བར་བསྡད་ནས། གཡུ་མཚོ་བསྐོར་ཞིང་ལུས་ངལ་ལ་སྟོབས་མེད་པར་གྱུར་ཀྱང་། མར་རྒན་བྱས་ན་སྒྲིབ་པ་འདགས་པའི་སྟོབས་ཆེ་ཟེར་བས་མར་རྒན་བྱས་དུས། འཁོས་ཀ་ཆུང་བས་ལུས་ངག་ལ་སྐྱོ་དུབ་ཆེར་བྱུང་ཡང་བཟོད་པར་བྱས་ཤིང་། མོས་གུས་དང་དག་པའི་སྣང་བས་མཆེད་གྲོགས་རྣམས་མཉེས་པར་བྱས་པས། མཐོང་སྣང་ལ་སོགས་རབ་རིབ་གསལ་བ་རྣམས་ཀྱང་རང་སེམས་དག་པའི་རྟེན་འབྲེལ་ཁོ་ནར་འདུག་

སྙམ་པ་དང་། རེ་གོང་པའི་དབུ་མཛད་བཟང་པོ་གཅིག་ལ་ནི་གུ་ཆོས་དྲུག་དང་། བླ་མ་མགོན་པོ་དབྱེར་མེད། བྱིན་རླབས་ཅན་གྱི་ནཱ་རོ་པའི་རྒྱན་དྲུག་ཐོད་པ་མཚན་ལྡན་རྣམས་ཨ་ཕོ་རྡོར་འཛིན་ལ་གཡར་པོ་ཞུས་ཏེ། བཀའ་དང་བཅས་པ་རྫོགས་པར་ཞུས་ནས་ཉམས་སུ་བླངས་པས། མི་རྒོད་གཏུམ་མོ་སྒོམ་དུས་རས་ཐུབ་ཙམ་བྱུང་ལ། སྒྱུ་ལུས་བདེན་མེད་ཁོང་དུ་ཆུད། །རྨི་ལམ་འདུན་པའི་ཡིད་དང་བྲལ། །བར་དོའི་ཞིང་ཁམས་མངོན་དུ་འགྱུར། །འཕོ་བ་འཕོ་བྱེད་རྟེན་དང་བྲལ། །འགྲོ་དྲུག་སྐྱེ་སྒོ་ཆོད་དམ་སྙམ། །ངེས་པའི་ཤེས་པ་གཏིང་ནས་སྐྱེས། །དེ་དུས་ལོ་གསུམ་གྱི་དམ་བཅའ་བྱས། ལུང་ཕྲན་ན་བཞུགས་པའི་བླ་མ་འགའ་ཞིག་ལས་ཆོས་འབྲེལ་ཞུས་ཤིང་། ལོ་གསུམ་བསྡད་དུས་ལ་བར་སྐས་མགོ་བྱ་བ་ན། ཡོན་བདག་མོ་དད་པ་ཅན་རྡོར་རྒྱན་བྱ་བ་ཞིག་གིས། རྟ་རྒོད་མ་གཅིག་ཕུལ་བ་ལ་བརྟེན་ཏེ། ལག་ན་ཡོད་པའི་གཏོར་ཆ་དང་ཆས་རྣམས་གྲོགས་མཆེད་གཅིག་ལ་འཚོང་དུ་བཅུག་ནས། ཙཱ་རི་རས་པ་བརྒྱད་བརྒྱ་ལ་ཚོགས་ཀྱི་འཁོར་ལོ་བསྒྲུབས་ནས། ཆགས་ཞེན་གྱི་འཁྲི་བ་བཅད། ཟང་ཟིང་རྣམས་དོན་ཡོད་པར་བྱས་ཏེ། ལུང་ཕྲན་འགའ་ཞིག་ཏུ་ཆུ་འཐུང་ཞིང་སྒྲུབ་པ་བྱས་པས། གེགས་ཆེན་པོ་བྱུང་ནས་ཆུར་དང་ཁར་མ་བྱུང་བར། ལུས་ཀྱི་ཉམས་སྟོབས་རྣམས་བྲི། ལྟ་བའི་མིག་འབྲལ་ཀྱང་ཁོང་དུ་རྡིབ་ཅིང་ཡས་བཅིབས་མས་བཅིབས་གཉིས་ལ་འཇག་མའི་ཀ་བ་བཙུགས་ཏེ་བྱས།

སྨྲ་བའི་ལྕེ་ཡང་མི་འགྱུར་བ་ལ། ལུས་རྒུད་རྩིབ་མ་རྒྱུ་མ་ལ་ཟུག །དེ་དུས་བེམས་རིག་བྲལ་བར་གྱུར་ཀྱང་འགྱོད་མེད་ངང་ལ་ཉལ་ནས་བསྡད། ཞག་བདུན་ལོན་ནས་གེགས་སེལ་ཏེ། །འཐུང་ཆུ་འོ་མ་ལྟ་བུར་གྱུར། །ཆུ་སྒྲ་ཐོས་དུས་བཅུད་རྣམས་ལོན་པ་སྙམ། །ལུས་ཀྱང་ཤིང་བལ་ལྟ་བུར་ཡང་། །མིང་ཡང་བླ་མ་ཆུ་བར་གྲགས། །དེ་ནས་བཟུང་སྟེ་གྲོགས་མཆེད་རྣམས་ལ་ཆུ་འཐུང་གི་ལུང་དང་། སྦ་བཞིའི་འཁྲུལ་འཁོར་ལ་སོགས་པ་མང་དུ་བསྟན་ཏེ་ཕན་པ་འགའ་རེ་ཙམ་གྱིས་མཉེས་པར་བྱས་སོ། །གནས་བཟང་པོ་འདིར་སྒྱུ་ལུས་མ་བོར་བ་ལ་དགེ་སྦྱོར་ཁོ་ན་ལ་བརྩོན་པ་ཆེར་བྱེད་དགོས་སྙམ་ནའང་། བླ་མ་ཁ་རག་པ་བྱ་བ་ཆོས་འབྲེལ་ཡོད་པ་ཞིག་གི་གསུང་ནས། ཅིས་ཀྱང་ཡར་ཕྱོགས་ལ་ཕྱིན་པ་འཐད་པས་འདེངས་གསུང་ནས་སྟོད་ཕྱོགས་ལ་འོངས་ཤིང་། ཆུ་བོ་རིར་བླ་མ་ཤཱཀྱ་ཤེས་རབ་སྐུ་གཤེགས་པའི་པུར་དང་མཇལ་ཙམ་ཞིག་བྱུང་། དེ་དུས་བཀའ་དྲིན་དྲན་པས་གདུང་གི་དྲུང་དུ་ཞག་བཅུ་གཅིག་གི་བར་ལ་གསོལ་བ་འདེབས་ཀྱིན་བསྡད་པས། ངེས་འབྱུང་དང་སྐྱོ་ཤས་དྲག་པོ་ཞིག་སྐྱེས་ཏེ། སྟོད་རྩེ་འམ། ལྷོ་མོན་སོགས་དགེ་སྦྱོར་འཕེལ་བ། དཀའ་ཐུབ་དང་བཅུད་ལེན་གྱི་རྫས་མང་ལ་ཆུ་བཟང་ས་གཅིག་ཏུ་འགྲོ་དགོས་བསམ་ཙ་ན། གྲོགས་མཆེད་མང་པོ་ཞིག་ལྷོ་མོན་ལ་འབྱོན་ཟེར་བས། དེ་རྣམས་དང་ལྷན་ཅིག་ཏུ་ཟང་ཟིང་ཆ་ཅི་ཡོད་རྣམས་ལྷན་དུ་ཟ་ལ། དགེ་སྦྱོར་ཡང་མཉམ་དུ་བྱེད་ཅིང་སྐྱིད་སྡུག་ཅི་བྱུང་བསྲེ་བ་ཡིན་ཟེར་བ་ཁ་

འཆམ་དུ་བྱས་ཏེ་ཕྱིན་པ་ལས། མོན་ཁར་སླེབས་དུས་སྒྲུབ་པ་རྩེ་གཅིག་ཏུ་བྱེད་པའི་འདུན་པ་དང་ཅུང་ཟད་བྲལ་ཏེ། གྲོགས་མཆེད་ལ་ལ་དངོས་པོ་ཁོ་ནའི་ཆེད་དུ་སོང་། རེ་ཞིག་ཆོས་འདོན་དང་རིམ་གྲོ་འདྲ་བྱེད་དུ་སོང་སྟེ། དགུན་ལོ་དེར་ང་རང་གཅིག་པུས་བུམ་ཐང་རྒྱ་ལེ་མཁར་བྱ་བའི་བྲག་ལ་སྒྲུབ་པ་ཁོ་ན་བྱེད་ཀྱིན་བསྡད། དེ་ནས་མོན་ནུབ་ཕྱོགས་སྔ་ལོང་བྱ་བར་ཕྱིན་པས་ནགས་དང་ས་རྣམས་ན་རེ། བླ་མ་གུ་རུ་བཟང་པོ་ཡིན་ཟེར་བས། གུ་རུའི་མིང་དུ་གྲགས། དེའི་དུས་གསོན་པོའི་དགེ་བ་འབུལ་བ་ལ། རྟ་དང་། སྟག་གཟིག་དང་། ནས་དང་འབྲས་ལ་སོགས་པ་མང་པོ་བྱུང་ཞིང་། བླ་མ་དམ་པ་ཀུན་མཁྱེན་པ་བུམ་ཐང་དུ་ཕེབས་ཟེར་བའི་སྙམ་གྲགས་ཆེ་བ་ལ་བརྟེན་ཏེ། །མཇལ་དུ་འགྲོ་བསམ་པའི་འདུན་པ་སྐྱེས་པ་ལ། མོན་ཡུལ་ནུབ་ཕྱོགས་པ་རྣམས་ཀྱིས་བསོད་ནམས་དང་དགེ་བ་ཡང་འཕེལ་དུ་བསྒྱུར་པ་དང་། བདག་གི་དད་པའི་གདུང་ཤུགས་མ་ལོག་པ་ལ་བརྟེན་ནས། སྔ་ལོང་དུ་ཕྱགས་ཕེབས། ཡུལ་དེ་ན་འཁྲུག་པ་ཆེན་པོ་ཡོད་ཅིང་། མིའི་གཤིས་སྤྱོད་ཤིན་ཏུ་རྩུ་བ་པ་ལས་མེད་ནའང་། ཆོས་རྗེའི་དྲུད་དུ་མཇལ་དུ་ཕྱིན་པས། ཆོས་རྗེའི་གསུང་གིས་ཡུལ་ཁམས་འདི་ན་གཡུལ་ངོ་དྲག་པོ་ཡོད་དམ་གསུང་། ནང་འཁྲུག་བྱེད་ཅིང་གདའ་ལགས་ཞུས་ཤིང་། ངེད་ཀྱིས་ཚེས་བཅུ་གཅིག་གི་ཉིན་འདེགས་པས། ཐུགས་རྗེས་འཛིན་པར་ཞུ་ཞུས་པས། ཡུལ་ཁམས་ན་འཁྲུག་ལོངས་ཆེན་པོ་འདུག་པས། མི་མང་པོ་འདུས་ནས་འཁྲུག་རྩོད་འབྱུང་དོགས་ཡོད་གསུང་པས་

ངེད་ཀྱི་གྲོང་དཔོན་རྣམས་ཀྱི་སར་ཕྱིན་ནས་འཁྲུག་པ་མི་ཡོང་པའི་གཉའ་བྱེད་ལགས། ཁོ་རང་རྣམས་ལ་ཡང་འབུལ་བ་ཅི་ཡོད་ཁྱེར་ཤོག་ཟེར་བ་བྱས་པས་ཆོག་ལགས་ཟེར་བ་ཞུས་ཏེ། གོང་བཞིན་དུ་མི་རྣམས་ལ་གཉའ་ཁྲིགས་རྣམས་བྱས་ནས་འདམ་ས་ལྷ་ཁང་བྱ་བའི་ནགས་ཆེན་པོ་གཅིག་ཏུ་ཚེས་བཅུ་མཛད་དེ། དེའི་ཞབས་ཏོག་རྣམས་བསྒྲུབས་ཤིང་། འཁོར་གསུམ་ཡོངས་དག་གི་སྤྱད་པ་རྣམས་ཕུལ་ནས་དགེས་པར་མཛད་དོ། །ཡུལ་ཁམས་དེའི་མི་སྐྱ་ཕོ་མོ་མ་ལུས་པ་འདུས་པས་འབུལ་བ་རྟ་དང་གསེར་གཡུ་དར་རས་འབྲས་ནས་ལ་སོགས་དཔག་ཏུ་མེད་པ་ཕུལ། དེ་ཉིན་འཁྲུག་རྩོད་མེད་ཅིང་། འགྲོ་བ་རྣམས་ཐར་པའི་ས་ལ་འགོད་པར་མཛད། དེའི་དུས་ངེད་ཀྱི་ཕྱི་ལ་འདེངས་གསུངས་ནས། མོན་མེ་ན་ལོག་ཀུན་བཟང་གླིང་དུ་ཕེབས་དུས་སྙིང་ཐིག་གི་ཁྲིད་གསུངས་ཏེ། ཁྲིད་པ་ཤིན་ཏུ་མང་བ་ཞིག་གི་སྤྲོས་བཅས་ཀྱི་དབང་བཞི་བྱས། ཁྲིད་རྗེས་གནང་དང་བཅས་པ་ཐུགས་ལ་བཏགས་ཏེ་གནང་། ཨོ་རྒྱན་གླིང་བྱ་བའི་དགོན་ཆུང་ཞིག་ཆོས་རྗེས་བཏབ་ནས་འདིར་སྡོད་གསུངས་པས་བཀའ་མ་ཆོག་པར་ལོ་གཅིག་གི་བར་ལ་བསྡད་། བུམ་ཐང་དུ་གཤེགས་དུས་འདིར་ཡང་བསྡད་པར་མི་འཐད་པར་འདུག་འདེངས་གསུངས་པས། དེ་ནས་བཟུང་ནས་ཕྱགས་ཕྱིར་འབྲེངས་ཤིང་ལུས་ངག་གི་ཞབས་ཏོག་རང་སེམས་ཀྱིས་མ་ཁྲེལ་བར་བསྒྲུབས་ཤིང་། བོད་ཀྱི་གདན་འདྲེན་རིམ་པར་བྱུང་བས། བོད་ལ་ཕྱགས་འདེགས་པའི་ཕྱགས་ཕྱི་ལ་ལུས་དང་གྲིབ་མ་བཞིན་དུ་བྱས་ཏེ།

དབང་ཁྲིད་ཀྱི་གདམས་པ་བཅས་པ་ཟབ་པ་དང་རྒྱ་ཆེ་བའི་མན་ངག་སྤྱི་དང་བྱེ་བྲག་ཏུ་གྱུར་པ་རྣམས་རྫོགས་པར་གནང་སྟེ། འབྲི་གུང་དུ་ཕྱགས་ཕེབས། ཞྭ་པདྨ་དབང་ཆེན་གྱི་གཙུག་ལག་ཁང་ལ་དཀར་མེ་ཅོད་པན་སོགས་ཀྱི་མཆོད་པས་མཉེས་པར་མཛད། དེ་དུས་སྙུང་གཞི་དུམ་གཅིག་བྱུང་བ་ལ་བརྟེན་ནས། ཞལ་ཆེམས་ལ་སོགས་པའི་ཡིག་རིགས་སོགས་ཀྱང་མཛད་དེ། མཆིམས་ཕུར་འགྲོ་གསུང་བ་ལ་སྟོན་སོ་མཆིམས་ཕུར་ཕྱག་ཕེབས། ཁྲིད་པ་ཤིན་ཏུ་མང་བ་ཞིག་འཛོམ་སྟེ་ཁྲིད་ཀྱི་སྒང་ལ་སོང་དུས། ཆོས་རྗེ་ཉིད་གདོད་མའི་དབྱིངས་སུ་སྐུ་འཕོ་བའི་ཚུལ་བསྟན་ཏེ། རྗེས་ཀྱི་གཤེགས་རྫོངས། ཁྲིད་འཕྲོ་ལ་སོགས་པ་རྣམས་དང་། ཕྱི་རྟེན་ནང་རྟེན། ཟླ་བ་བྱུང་ངོ་ཅོག་གི་དུས་སུ་མཆོད་པ་དང་བཅས་པ་བསྒྲུབས་ཤིང་། མཆིམས་ཕུ་རིན་པོ་ཆེའི་གནས་དེ་ཉིད་དུ། རི་ནས་མི་འབེབ་དམ་བཅས་ཏེ་སྒྲུབ་པའི་མཆོད་པས་བླ་མ་མཉེས་པར་བྱ་སྙམ་པ་ལ། བླ་མ་དེ་ཉིད་ཀྱི་འཕྲིན་ལས་རྣམ་པར་དག་པ་དང་། སྔོན་གྱི་ལས་སྨོན་དག་པའི་འཕེན་པས། རེས་འགའ་ཆོས་རྗེའི་ཕྱག་སྲོལ། གཞན་དོན་ལ་དམིགས་ཏེ་དོན་གཉེར་གྱི་སློབ་མ་རྣམས་ལ་ཁྲིད་ཀ་རེ་ཙམ་བསྟན། རེས་འགའ་རང་དོན་གྱི་སྒྲུབ་པ་ལོ་རེ་ཙམ་ཡང་བྱས་ལ། བར་སྐབས་རྣམས་སུ་ཡང་སོས་དལ་དང་ལེ་ལོར་མ་བསྡད་པར། ཆོས་ཀྱི་རྗེས་རྒྱལ་མཚན་དམ་པ་འཁོན་ས་སྐྱ་པ་འགྲོ་བའི་མགོན་པོ་བསོད་ནམ་རྒྱལ་མཚན་པའི་དྲུང་དུ། དུས་འཁོར།

སྦྱོར་དྲུག་གཉིས། དམར་ཁྲིད། སེམས་བསྐྱེད་ཆེན་མོ། བརྟག་གཉིས། གཟེར་ལྔ་སྨན་དཔྱད་མ། གཤེད་དམར་ལྷ་ལྔ་མའི་རྫོགས་རིམ་སྤྲོས་མེད་ཀྱི་ཁྲིད། ལྷ་བཅུ་གསུམ་མའི་རྫོགས་རིམ། རྣལ་འབྱོར་བཞིའི་ཁྲིད་རྣམས་ཞུས། བླ་མ་ཤཱཀྱ་རཏྣ་ལས་སྦྱོར་དྲུག་སྟོན་པ་ལུགས། བདེ་མཆོག་ལུས་དཀྱིལ། ནཱ་རོ་མཁའ་སྤྱོད་ཀྱི་རྗེས་གནང་དང་བཅས་པ། བླ་མ་བུངྔྷ་ཤྲཱི་ལས། མཁའ་འགྲོ་སྙིང་ཏིག་གུ་རུ་ཚེ་བརྟན་གྱི་སྐོར། བླ་མ་བློ་གྲོས་པ་ལས་སེལ་དང་བཅས། ནཱ་རོ་ཆོས་དྲུག་འཆི་མེད། ལམ་འབྲས་འཁྲུལ་འཁོར་ཀྱེ་རྡོར་ཀྱི་བཀའ། འཇིགས་བྱེད་ལྷ་བཅུ་གསུམ་མ། ཕྱག་ན་རྡོ་རྗེ་འཁོར་ལོ་ཆེན་པོའི་བཀའ་བསྐྱེད་རྫོགས་དང་བཅས་པ། གཤེད་དམར་ལྷ་ལྔ་མའི་བཀའ། ལྷ་བཅུ་གསུམ་མའི་བཀའ། རྣམ་སྲས་རྟ་བརྒྱད་མའི་བཀའ་རྗེས་གནང་དང་བཅས་པ་ཞུས། དེ་ལྟར་ལུས་ངག་ཡིད་གསུམ་ལ་རང་དོན་གྱི་འཁྲིས་མེད་པར་བྱས་ཏེ། ངམ་ཤོད་ལྷོ་བྱང་ས་ཆ་སྟོད་སྨད་ཀྱི་དད་པ་ཅུང་ཟད་ཐོབ་པ་རྣམས་ཐར་པའི་ལམ་སྣ་ཙམ་ལ་བཀོད་ཅིང་། ཟང་ཟིང་གི་དངོས་པོ་ཐན་ཐུན་བྱུང་པ་རྣམས་རང་གཞན་ཚོགས་བསགས་པར་བྱ་བའི་ཆེད་དུ། ཇོ་བོ་མཆེད་གཉིས་ཀྱི་ཐོག་དྲངས་པ། སྐུ་གསུང་ཐུགས་ཀྱི་རྟེན་ལྷ་ས། བསམ་ཡས་ན་བཞུགས་པ་རྣམས་ལ་གསེར་ཆབ་དཀར་མེ་ཅོད་པན་བསམ་ཡས་སྡེ་དགོན་ན་བཞུགས་པའི་དགེ་འདུན་ཆོས་བྱེད་ཀྱི་རིགས་སུ་གྱུར་པ་རྣམས་ལ་ཚོགས་འཁོར་འབུལ་ནོད་ལ་སོགས་པ་བསྒྲུབས་ཤིང་། མདོར་ན་ནད་ཀྱིས་གཙེས་པའི་ཉམས་ཐག་པ་

གཅིག་ཡན་ཆད་ལ་ཕན་པའི་བསམ་པས་ཟིན་པར་བྱས་ཏེ། དད་མོས་ཀྱི་ས་ལ་འཁོད་པ་ཙམ་དུ་བྱས་ལ་བདག་མ་གཏོགས་པའི་བླ་མ་གོང་མ་རྣམས་ནི་རིག་འཛིན་གྱི་བླ་མ་དངོས་སུ་བྱོན་པ་ཡིན་ཞིང་། བདག་ལྟ་བུའི་གང་ཟག་གིས་རྗེས་སུ་དཔག་པར་མི་ནུས་ཀྱང་། བཤེས་གཉེན་དམ་པ་ཤེས་རབ་རྒྱ་མཚོ་ཡིས། །གུས་པའི་ཚུལ་གྱིས་ཡང་ཡང་བསྐུལ་བའི་ངོར། །བསམ་ཡས་མཆིམས་ཕུར་དཔལ་གྱི་རི་ཁྲོད་དུ། །སྤྲོ་བའི་སེམས་ཀྱིས་མདོ་ཙམ་བརྗོད་པ་ལ། །ནོངས་པ་མཆིས་གང་མཁས་རྣམས་བཟོད་པར་གསོལ། །དགེ་བ་དེ་ཡིས་མཁའ་ཁྱབ་འགྲོ་བ་ཀུན། །ཟབ་ཡང་རྡོ་རྗེའི་རྩེ་མོར་རབ་ཕྱིན་ཏེ། །གདོད་མའི་ས་ལ་གཏན་སྲིད་ཟིན་པར་ཤོག །བླ་མ་དམ་པ་འོད་གསལ་རང་གྲོལ་གྱི་རྣམ་པར་ཐར་པ་མདོར་བསྡུས་པ། ཕྱི་རབས་ཀྱི་དོན་དུ་བཀོར་པ་རེ་ཞིག་རྫོགས་སོ། །དགེའོ།། །།

རིག་འཛིན་ཆེན་པོ་ཀུ་མ་རཱ་ཛའི་རྣམ་ཐར་ལོ་རྒྱུས་དང་བཅས་པ།

རིག་འཛིན་ཆེན་པོ་ཀུ་མ་རཱ་ཛའི་རྣམ་ཐར་ལོ་རྒྱུས་དང་བཅས་པ་བཞུགས་སོ། །

ཨོཾ་ཨཱཿཧཱུཾཿ། བཅོམ་ལྡན་ཀུན་བཟང་སངས་རྒྱས་ཀུན་གྱི་རྗེ། །རྒྱལ་བ་རིགས་གསུམ་རིགས་འཛིན་ཆེན་པོ་དང་། །སྙན་ཁུང་བརྒྱུད་པའི་བླ་མ་དམ་པ་རྣམས། །བདག་སོགས་འགྲོ་བ་ཡོངས་ལ་བྱིན་གྱིས་རློབས། ཁྱད་པར་བདག་བློའི་མུན་སེལ་རིན་པོ་ཆེ། །ཐུགས་དགོངས་ཀློང་ཡངས་ཀུན་ཏུ་བཟང་དང་མཉམ། །རྣམ་ཐར་མཛད་སྤྱོད་དམ་པ་རིན་ཆེན་ཉིད། །སྐུ་དྲིན་མི་འཁོར་དྲིན་ཅན་ཉིད་ལ་འདུད། །ཡི་དམ་ལྷ་ཚོགས་མ་དང་མཁའ་འགྲོ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །ཆོས་སྐྱོང་བཀའ་སྲུང་ཕོ་མོས་བར་ཆད་སོལ། །ཀྱེ་མ་བདག་འདྲའི་བན་ལྡོམ་གཞོན་རྒྱལ་གྱི། །ལོ་རྒྱུས་བྲི་བར་འོས་པ་མ་ཡིན་ཀྱང་། །གུས་ལྡན་སློབ་མས་ཡང་ཡང་བསྐུལ་བའི་ཕྱིར། །ཅལ་ཅོལ་འགའ་ཞིག་འབྲི་འོ་བྱིན་གྱིས་རློབས། །དེ་ལ་སྤྱིར་མི་མཇེད་ཀྱི་འཇིག་རྟེན་གྱི་ཁམས། ཁྱད་པར་དུ་ལྷོ་འཛམ་བུ་གླིང་གསེར་གྱི་བྱེ་མ་བརྡལ་བ་ལྟ་བུ་འདིར་སྐུ་གསུང་ཐུགས་ཀྱི་བསྟན་པ་རིན་པོ་ཆེ་འདི་དར་བར་མཛད་པ་པོ་སྟོན་པ་ཉིད་དང་མཚུངས་པ་དཔག་ཏུ་མེད་པ་བྱོན་ཞིང་། ཁྱད་པར་དུ་བོད་ཁ་བ་ཅན་གྱི་རྒྱལ་ཁམས་མུན་པའི་སྨག་འཐིབས་པ་དང་འདྲ་བ་འདིར། ཆོས་ཀྱི་རྗེ་རིན་པོ་ཆེ་གསུམ་གྱི་སྐུ་དྲིན་ལ་བསྟན་པ་འཛིན་སྐྱོང་སྲུང་བར་མཛད་པ་སྤྲུལ་པའི་སྐུ་གྲངས་ལས་འདས་པ་བྱོན་ཞིང་། དེ་དག་གི་རྣམ་པར་ཐར་པ་ཤླཽ་ཀ་རེས་ཀྱང་ཡིད་ཚིམ་པ་དག་གི་མཛད་པ་ལ། ཡིད་ཕྲོགས་པས་བྲི་བར་མི་ནུས་ཏེ། སྟོན་པ་དང་བསྟན་པའི་རིམ་པ་རྣམས་ལ་མོས་གུས་ཅུང་ཟད་ཡོད་པ་ཡི་གེར་བཀོད་པ་ཡིན་གྱི། དད་པ་ཅན་སྒྱིད་མི་ལུག་པའི་ཕྱིར། དེ་ལ་བོད་ཀྱི་ཡུལ་དུ་རྡོ་རྗེ་གདན་ལྟ་བུ་དཔལ་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་བསམ་ཡས་དང་ཉེ་བའི་འོན་ཞེས་བྱ་བ་

དགེ་བཅུ་ཚང་བའི་དབུས་མདའ་བར་གསར་ཞེས་བྱ་བ། ཨོ་རྒྱན་པདྨ་རིན་པོ་ཆེ་ནས་བརྒྱུད་པའི་སྔགས་པའི་རིགས་རྒྱུད་ངོ་མ་ཞེས་བྱ་བ། ཕ་ཇོ་སྲས་བསོད་ནམས་དཔལ་ཞེས་བྱ་བ་དང་། ཤཱཀྱ་ཁྲི་མགོན་ཞེས་བྱ་བ། ཨག་ཚར་ཅན་གྱི་བུ་མོ་ཁྱེར་ཚ་འབུམ་མེ་ཞེས་བྱ་བ་གཉིས་ལ་ངེད་བུ་ཚ་མིང་སྲིད་ལྔ་ལས། ཆེ་བ་ནི་ཨ་ལྕེ་ལྡན་ནེ། དེ་འོག་ཕུ་བོ་བསོད་ནམས་འབུམ་བྱ་བ་ཁྱིམ་འཛིན་དུ་བཅུག་པས། ཆོས་བྱས་ཏེ་བྱ་བྲལ་ཞིག་བྱུང་བ་ལ་ཏི་སེ་ལ་བྲོས་སོ། དེ་འོག་བདག་ཐར་པ་རྒྱལ། དེ་འོག་ནུ་བོ་འཚོ་བྱེད། དེ་འོག་སྲིིང་མོ་འབེར་མོ་བྱ་བ་ཡིན། བདག་ཆུང་བའི་སྐབས་སུ་གསོ་ཤིན་ཏུ་དཀའ་བ་བྱུང་ཟེར། ཨ་ཁུ་དགེ་བའི་བཤེས་གཉེན་མཁས་པ་བར་གསར་པའི་ཚ་བོ་ཡིན། ལོ་བཞི་ཙམ་ལོན་དུས་ལུག་གི་བལ་བྲེག་པ་ལ་ཁོང་གི་གོས་མ་བཤུ་ཞེས་སྨྲ། དད་པ་དང་སྙིང་རྗེ་ཅུང་ཟད་ཡོད། ལོ་དྲུག་བདུན་ལོན་ཙམ་ན། ཕས་ཞག་འགར་ཡི་གེ་ཁྲིད་པས་འབྱོར་ཀློག་ཚུན་ཆད་བསླབ། རྗེས་ང་རང་གིས་སྦྱོང་བས་ཤེས་སོ། །གཤར་མ་དཔེ་གོག་ཁྱེར་ནས་བལྟས་ཤིང་བྲིས་པ་དང་མཚུངས་པར་ཤེས་པར་བྱུང་། རྩལ་ཡིག་འོག་ལེ་གཅིག་ཤེས་ཏེ། ཕྱིས་མཁས་པ་གཞན་ཅུང་ཟད་བསྟེན་ནས་བསླབ། ལས་ལ་དཔེ་གོག་འདྲ་བ་ཁྱེར་ནས་ཡི་གེའི་རི་མོ་སྤྱངས། གཙུག་ཏོར་ལ་སོགས་པའི་མདོ་ཕྲན་ཅུང་ཟད་བཏོན། ཕོ་མཆིན་གྱི་ནད་བུ་ཅུང་ཟད་ཀྱི་རྐྱེན་གྱིས་ཞང་པོ་སློབ་དཔོན་ཅིག་ཡོད་པས། གཏུམ་མོ་ཅུང་ཟད་བསྒོམས་པ་དང་། བདེ་མཆོག་ཡིག་བདུན་གྱི་བསྙེན་པ་དུམ་རེ་བྱས་པས་རྟགས་ཕྲན་དེ་འདྲ་མཐོང་། དེར་མ་སྡུག་མ་ཤི་ནས་ཕས་ཀོང་པོ་ན་མར་ཁྲིད་དེ། འོག་ཤོད་ཀྱི་མཐོ་སྟེང་དགོན་པར་བླ་མ་དགྱེས་རྡོར་བྱ་བ་ལས་ཀྱེ་རྡོར་

དང་བདེ་མཆོག་གི་དབང་ཐོབ། །དེ་ནས་ཡར་ལ་ལོག་ནས་ཕ་བུ་གསུམ་གྱིས་གཡེ་དང་སྒོམ་པོར་འཁྱམས། ངས་གཡེར་སྔགས་པ་གཅིག་གི་འཕགས་པ་བརྒྱ་ཚར་གཅིག་བཏོན། བླ་མ་ནུབ་བྱ་བ་བགྲེས་པོ་གཅིག་ལ་རྟ་མགྲིན་ལྷ་བཞིའི་དབང་ཞུས། ཁོང་ཕ་བུ་གཉིས་ཀྱིས་གཡེར། མ་བསྡད་པར་སྒོམ་པོ་སྟོད་དུ་སོང་ཡོད་པས་རྗེས་སུ་སྙགས། ཕས་རྩིག་གཟོ་འདྲ་བྱེད་ཀྱིན་འདུག །ངས་ལོ་དགུ་ལོན་དུས་ན་འགྲོན་གྱི་དགོན་པར་མཁན་པོ་གཙང་པོ་བྱ་བ་འདུལ་བ་དང་། སྤྱོད་འཇུག །བརྟག་གཉིས་ལ་སོགས་པ་མཁྱེན་པ་ཞིག་ལ། ཡོངས་རྫོགས་ཀྱི་དགེ་བསྙེན་བྱས་བཙུན་པར་བསྲུངས། སློབ་དཔོན་དགེ་སློང་གཅིག་ལས་རྡེའུའི་དཀའ་ཐུབ་དང་། སྤྱན་རས་གཟིགས་གང་པར་ཕུག་མོ་ཆེ་ནས་ཐོན་པའི་ལུང་བག་ཙམ་ཞུས། རྡེའུའི་དཀའ་ཐུབ་བྱས་པས་ཤིག་ནད་ཚབས་ཆེ་ལ་དར་དྲག་པ་ཁོང་ནས་ཤིག་ཁ་ནས་ཡར་བྱུང་། གོས་རས་གླེགས་གཅིག་གི་ཤན་འགག་རན་པ་ཞིག་ལས་མེད་པས་ཅུང་ཟད་ཉེན་ན་ཡང་ཆོས་ཁོ་ན་ལ་མོས་པས་ལེགས་པར་བྱུང་། དེར་ཕ་འདས་ལྟས་བཟང་པོ་བྱུང་། ང་ལོ་བཅུ་གཅིག་ལོན་པ་ཞིག་གིས་ནུ་བོ་ལོ་དྲུག་ལོན་པ་ཞིག་སྐྱོང་དགོས་པ་བྱུང་། དེ་དུས་རྗེ་ཨོ་རྒྱན་པ་ཨེ་ན་ཕྱགས་ཕེབས་ཡོད་པ་ཐོས་པས། ང་རང་གཅིག་པུས་མཇལ་དུ་ཕྱིིན་པས། གཉལ་སྟོད་ཀྱི་ལུང་ལ་གཅིག་གི་ཕུར་རྗེས་སླེབས། ཆོས་འབྲེལ་ཙམ་ཐོབ། ཞག་གཅིག་བསྡད་ནས་ནུ་བོ་ཁྲིད་ནས་ཞང་པོ་ཅན་དུ་བསྐྱལ། བདག་སློབ་དཔོན་ཚུལ་རྒྱལ་བྱ་བ་ཞིག་གིས་ཁྲིད་ནས་གདན་ས་ཕག་མོ་གྲུར་ཕྱིན། དེ་དུས་ལོ་བཅུ་གཉིས་ཙམ་ལོན། མཁན་པོ་ཡེར་པ་དང་སློབ་དཔོན་མངའ་རིས་པ་གཉིས་ལས་དགེ་ཚུལ་གྱི་བསླབ་པ་བླངས། བླ་མ་ལྷ་ཁང་པ་བྱ་བས། ཕག་མོ་ཁམས་གསུམ་མའི་བརྡ་བཞིའི་བྱིན་རླབས་ཀྱི་ཆོས་སྒོ་ཕྱི་

རིན་པོ་ཆེ་གྲགས་ཡེ་བ་དཔལ་ཕག་མོ་གྲུབ་པའི་སྤྲུལ་པ་དེ་ལས་རྗེ་ནཱ་རོ་པའི་ཆོས་དྲུག་རྙིང་མ་དང་། ཆོས་རྗེ་འབྲི་གུང་པའི་འཁྲུངས་ཆོས་ཟབ་ཆོས་དང་བཅས་པ་ལོ་ལྔའི་བར་ལ་ཞུས། དེའི་བར་སྐབས་སུ་བླ་མ་འཚེར་སྟེངས་པ་བྱ་བ་ཞིག་ལས་བརྟག་གཉིས་རྔོག་ལུགས་ཤེས་པ་ཙམ་དུ་སྦྱངས། བླ་མས་གསུངས་པ་ནི་མིན། ངའི་རྟོགས་པ་བསྐྱེད་རྫོགས་ལ་འབྱམས་པས། དེ་གཉིས་བསྡུར་ན་སྐད་ཅིག་མའི་རྟོགས་པ་བསྐྱེད་རིམ། དེའི་རང་བཞིན་མི་དམིགས་པ་དེ་རྫོགས་རིམ་དུ་འདུག་སྙམ་པ་ཞིག་བྱུང་སྟེ་རྟོགས་པ་མ་སྐྱེས་སོ། །དེའི་གོང་དུ་ཡུལ་ན་ཡོད་དུས་ཆུང་དུས་ཨ་ནེ་སློབ་དཔོན་མ་ཞིག་ཡོད་པར་འདུག་པའི་བེའུ་བུམ་གཅིག །ཕས་ཁྱེར་བྱུང་བས་འཁོར་འདས་དབྱེར་མེད་བྱ་བ་ཞིག་འདུག་ནས་དེ་ལ་བསམ་པས་རྟོགས་པ་ཅིག་འཆར་ལ་ཁད་པ་ཞིག་བྱུང་བ་ལ། དེ་ནས་ཐེ་ཚོམ་གྱིས་སོང་། བྱིས་པ་རྣམས་རྩེ་བའི་སར་བསམ་གཏན་སྒོམ་པ་གང་བཟང་འགྲན་ནོ་བྱས། ལུང་པའི་ཕུར་ཤིང་ལེན་དུ་ཕྱིན་པས། བྲག་ཕུག་གམ་བྱ་སྐྱིབས་འདུག་པ་དེར་བསྡད་ན་རི་ཁྲོད་ཀྱི་བག་ཆག་གཅིག་གདའ། གཞན་ཡང་བླ་མ་ལ་ཀྱཻ་རྡོར་གྱི་ཕྲན་བུ་འདྲ་བ་དང་། རྩ་ལྟུང་དང་། བླ་མ་ལྔ་བཅུ་པ་ལ་སོགས་འགའ་རེ་ཞུས། སྐབས་སུ་དཔོན་སངས་ཤེ་བྱ་བ་ལྷ་མཁས་ལ་དད་པ་ཆེ་བ་ཞིག་གི་སར་ལྷ་བསླབས་མ་ཎི་ཡིག་དྲུག་རེ་མང་དུ་བསྒྲངས་པས། ནམ་མཁའ་ནི་མིན་ས་གཞི་ལ་ཁང་བུ་ལེགས་པོའི་ནང་ན་སྤྱན་རས་གཟིགས་ཕྱག་བཞི་པ་ཞིག་བཞུགས་པའི་དྲུང་དུ་མཇལ་བ་ཡང་རྨིས། དེའི་བར་སྐབས་ཤིག་ཏུ་སློབ་དཔོན་བྱ་སྟོན་བྱ་བའི་ཕྱག་ཕྱི་ལ། གྲ་ཕྱིར་བླ་མ་ཁྱུང་ནག་ཤཱཀྱ་དར་ལས་ཕུར་པ་རྩར་ཐུང་ཇོ་མོ་ལུགས་དང་། གཤིན་རྗེ་གཤེད་དང་། དགྲ་ནག་ཚེ་བདག་ཀུན་གྱི་དབང་ཀུན་གྱི་དབང་རྒྱུད་གདམས་ངག་ལས་ཀྱི་གཤིན་རྗེའི་ཞལ་གྱི་ངོ་སྤྲོད་ཚུན་ཆད་ཐོབ། ཕྱག་

རྡོར་རས་ཆུང་བའི་ལུང་བག་ཙམ་ཡང་ཕག་མོ་གྲུར་ཞུས། ཡང་དེ་དུས་སེ་གསོ་པ་མཁན་པོ་རིན་པོ་ཆེ་དང་མཇལ། སློབ་དཔོན་རྗེ་ཚ་བ་བྱ་བ་ལས་མགོན་པོ་ཕྱག་བཞི་པ་རྒ་ལོའི་ལུགས་ཞུས། ཕག་མོ་གྲུར་ཡང་ཕག་མོ་གྲུ་པའི་ཞལ་མྱུར་ལྷ་དང་། དར་དམར་མ་ཟབ་ཆོས་སུ་སྒྲུབ་སྐོར་དང་དབང་འགའ་ཞུས། བླ་མ་རྔོག་པའི་ཀྱེ་རྡོར་གྱི་ཡུམ་བཀའ་དེ་དཀོན་པ་ཡིན་ཟེར། མཆེད་གྲོགས་མང་པོའི་ཟླ་ལ་ཞུས། མ་ཡཱ་རྔོག་ལུགས་ཆོས་དྲུག་དང་། མཁའ་སྤྱོད་མ་དཀར་མོ་ཞུས། ཆོས་རྗེ་རང་གིས་བསྐོས་པའི་གདན་ས་པ། བླ་མ་དར་མ་མགོན་ལས་རྒྱལ་བ་རྒྱ་མཚོ་དང་། སྐུ་གསུམ་ངོ་སྤྲོད་ཞུས། སློན་དཔོན་དབོན་པོ་བསོད་ནམས་རྡོ་རྗེ་ལས་ཀུན་རིགས་ཆགས་ལོ་ལུགས་དང་། སྨན་བླའི་མདོ་ཆོག་དང་། དོན་ཞགས་དང་དངུལ་ཆུའི་གདམས་པ་དྲང་སྲོང་གཞུང་སྐྱེས་ཀྱིས་མཛད་པ་ཞུས། སློབ་དཔོན་རྒྱལ་སྟོན་ལས་ནཱ་རོ་པའི་འགྲེལ་ཆེན་གྱི་ལུང་ཞུས། བླ་མ་རས་པ་དང་སློབ་དཔོན་མཁས་པ་བསོད་ནམས་རྡོ་རྗེ་ལས་དྲག་སྒྲུབ་དང་རྩ་རླུང་གི་གདམསཔའི་གནད་གཅིག་ཞུས། ཆོས་རྗེ་པ་ལས་རྒྱུད་བླ་མའི་ལུང་དང་། རས་ཆུང་བསྙེན་སྒྲུབ་ལག་ལེན། དོ་ཧ་ལ་སོགས་ལུང་མང་དུ་ཞུས། དེའི་བར་སྐབས་གཅིག་ཏུ་འོན་དུ་ཡོང་བ་གཅིག་དང་ཕྱིས་དབྱར་གཅིག་གང་པོ་སྒང་དུ་བསྡད་པ་གཅིག་སྟེ་གཉིས་ལ་སོགས་པས་ལོ་བདུན་བསྡད་ཀྱི་རིང་ལ། ལམ་འབྲས་ཞ་ལུགས་ཁྲིད་ཀྱི་ལུང་ནས་ཞི་བྱེད་མོ་ལུགས། ཕྱག་རྒྱ་ཆེན་པོ་ཆ་གཉིས་མ། ཞལ་གྱི་བདུད་རྩི་དམ་ལ་སོགས་མི་གཡོ་བ་སྐོར་གསུམ། འདུལ་བ་མིན་པ་མཁྱེན་ཚོ་མའི་བར་ཞུས། དེ་ནས་མཚུར་ཕུར་བསྡད་ཡོད་དུས་སུ་ཆོས་རྗེ་པ་འཁྲུངས་པའི་ཡ་

མཚན་ཐེངས་གཅིག་གཉིས་ཐོས། དེ་ནས་གྲ་པའི་ཞི་བྱེད་པ་ཏི་སེ་ལ་ཕྱིན་པ་དཔོན་གཡོག་གཉིས་གྱིས་གླང་གོར་དུ་ཆོས་རྗེ་པ་ལོ་བདུན་ལོན་པ་ཞིག་དང་མཇལ་ནས། ཆོས་གསུངས་རྣམ་ཐར་རྒྱས་པ་གཅིག་འདུག་པ་དེ་ཁོང་ལ་བསྐུར་ནས་སྟོད་ལུང་མདོ་བར་སོང་ཞིག་གསུངས་པ་འདུག་པ་ལས། ཁོང་གཉིས་བྱུང་རྣམ་ཐར་ལ། ལ་ལས་དད་ལོག་བྱས། བདག་སྔར་ནས་མོས་པའི་སྟོབས་ཀྱིས་ནམ་ལ་བྲིས། ཁོང་གཉིས་ཞག་གསུམ་ལས། བསྡད་དུ་མ་བཙུད་བར་ཕུད། ངེད་རྣམ་ཐར་ལ་བལྟས་ཤིང་མོས་པ་དྲག་པོ་སྐྱེས་པས། རྨི་ལམ་ངོ་མཚར་ཅན་བཏུད་མ་མང་པོ་བྱུང་ནས། ང་རང་གིས་དང་བླངས་བྱས་ཏེ་ལ་སྟོད་དུ་ཕྱིན་དིང་རི་གླང་འཁོར་བལྟས། བྷུ་ཅྭད་ཕྱིན་དགེ་ཚུལ་མཛད་མ་ཐག་དང་མཇལ། གྲུབ་ཆེན་པ་དང་། ཆོས་རྗེ་པ་གཉིས་ལ་བླ་མའི་ཞུ་ཡིག་དང་ཕྱག་རྟེན་ཡོད་པ་རྣམས་ཕུལ་ཐུགས་ལ་འདོག་པར་མཛད། དྲུང་སི་བ་བསྙུང་པའི་བསྙུང་གཡོག་པ་བདག་གིས་བྱས། ང་རང་ལའང་འགོས་ནས་མིག་དེ་ཤོར་བྱུང་། དེ་དུས་ནམ་ཟླ་སོས་ཀ་ཡིན་པ་དང་། ན་བས་ཆོས་མ་ཐོབ། དེ་ནས་མཚུར་ཕུར་ཕྱིན་ལན་སྦྱར། བླ་མ་ཨོ་རྒྱན་པ་གོང་དུ་གདན་དྲངས་པའི་ཞར་ལ་མཚུར་ཕུར་ཚུར་བྱོན། གཉན་རས་ལ་དྲུང་གིས་སྙིང་ཏིག་ཞུས་པའི་ཞར་ལ་ཐོབ་སྟེ་མཁས། དྲུང་ནས་གཡོར་པོ་གུང་གསལ་དུ་གདན་དྲང་པའི་ཕྱགས་ཕྱི་ལ་ཡོད་པ། བླ་མ་སྒོམ་པ་བྱ་བའི་བཟང་པོ་དེ་ལ་ངས་མདོ་སྡེ་རྒྱན་གྱི་ལུང་དང་། རྨི་ལམ་འབྲེལ་བ་གསུམ་ལྡན་ཞུས། མཚུར་ཕུར་སླེབས་པའི་དུས་སུ་དྲིན་ཅན་མེ་ལོང་པའི་ཐུགས་རྗེའི་ཐག་པས་བཟུང་སྟེ་ལྷོ་བྲག་མཁར་ཆུ་ནས་འབྲི་གུང་གཅུང་རིན་པོ་ཆེའི་སློབ་མ་སྒོམ་ཆེན་གསུམ་ལ། རི་མོ་དེ་ལ་ནན་ཆག་གཅིག་སློབས་ལ་ང་ཅན་དུ་ཤོག་

གསུང་བྱུང་ཡང་། ཆོས་རྗེ་པ་སྐུ་ལུས་མ་རྒྱས། ཁོང་དྲག་ཤོས་བཀའ་ཆགས་སྡང་བྱས་པས་ཁོང་བློས་མ་ཐེངས་པར་ལོ་གཅིག་ལྷག་ལུས། ལར་མཚུར་ཕུ་ལ་སྟོད་དང་། ས་སྐྱར་ཡུག་གཅིག་བསྡད་པ་བརྩིས་པས་ལོ་བཅུ་གཅིག་ཙམ་ཐོས་བསམ་ལས་སྒོམ་པ་ཆེར་མ་བྱུང་། གྲུབ་ཆེན་པ་དང་ཆོས་རྗེ་པ་གཉིས་མཇལ་འདོད་པ་རྐྱེན་ཅིག་གིས་མ་མཇལ། དེ་ནས་ཤམ་པོ་གངས་སུ་དྲིན་ཅན་མེ་ལོང་པ་དང་མཇལ། ཡར་ཀླུང་དུ་སླེབས་ནས། གྲ་ཕྱིར་བླ་མ་དགེ་སློང་སྔར་ནས་ཟབ་ཆོས་ཞུས་པ་གཅིག་ཡོད་པས། དགོན་ཆུང་ཞིག་ཏུ་དགུན་ཐོག་གཅིག་བསྡད་དེ་ཆོས་ལྷག་མ་ཞུས། ཡར་ཀླུང་དུ་བླ་མ་ནམ་མཁའ་བ་ལས་གསང་སྐོར་གནད་ཀྱི་ངོ་སྤྲོད་ཞུས། སྐལ་ལྡན་དགོན་པར་བླ་མ་རིན་པོ་ཆེ་ཆོས་ཀྱི་སེང་གེ་ལས་ཀྱང་། སློབ་དཔོན་རིན་ཆེན་སེང་གེ་ནས་བརྒྱུད་པའི་གསང་གནད་ཀྱི་ངོ་སྤྲོད་དང་། མཁར་ཆུ་དམ་པའི་ཧཱུཾ་སྐོར་ལ་སོགས་པ་ཟབ་ཆོས་ཞུས། དེ་དུས་ཡང་དྲིན་ཅན་གྱི་ཐུགས་རྗེས་བཟུང་སྟེ། གསུངས་ཤོག་རྟེན་དང་བཅས་པ་བསྐུར་ནས་བླ་མ་སྐལ་ལྡན་པ་འབྱོན་པའི་ཟླ་ལ་ཅིས་ཀྱང་ཤོག་གསུངས་ནས་ཕྱིན། དེ་ནས་ཐུགས་རྗེས་བཟུང་ནས་ལྟོ་གོས་ཆོས་གསུམ་གྱིས་བསྐྱངས། རྫོགས་པ་ཆེན་པོ་སྙིང་ཏིག་གི་གཙོས་པའི་ཟབ་ཆོས་དང་ཕྱག་དཔེ་བཞུགས་སོ་ཅོག་གི་ལུང་མཛད་དེ། ཤིན་ཏུ་ཐུགས་རྗེས་བཟུང་། བླ་མ་མདོ་རས་པས་བཞེངས་པའི་བུམ་ཆུང་གི་ཁང་པའི་ནང་ལ་དབྱར་རིལ་པོ་གཉིས་སུ་རི་མོ་བྱས་མཁར་ཆུ་བཟང་པོར་འདུག་པས་ཁམས་འདུས་བག་ཙམ་ཡང་བྱུང་། ཁྱད་པར་དུ་ཤིག་ནད་དྲག་པོ་དགུན་ཐོག་གཅིག་བྱུང་། དེ་དུས་གོས་ཀྱང་རི་འགག་ཟད་པོ་གཅིག །ཟླ་གམ་ཞན་པ་གཅིག །རས་ཐང་ཐེང་པོ་ཞིག་དང་གསུམ་ལ་ཉིན་གོས་མཚན་གོས་ཡིན། རྟོགས་པའི་ཐ་ལོ་གོ་ཡུལ་ཐེབས་གཅིག་ཀྱང་སྐྱས། ཡི་གེ་

དུ་མ་གཅིག་བྱས་ནས་གཟིགས་སུ་ཕུལ་བས། བླ་མ་ཀུན་དགའ་བས་ཁྱོད་ཞིབ་པར་འདུག་གསུངས་ནས་མཉེས། དེ་ནས་བདག་གིས་བླ་མེད་ཆེན་པོ་འདི་སྟེར་བར་མི་ཡོང་། སྒོམ་ཆེན་པ་ཆོས་ཀྱིས་ཕོངས་པ་རེ་རེ་ཙམ་བྱུང་ན། ཁྲེགས་གཅོད་འདི་བྱེད་པར་ཞུས་པས། ཁྱེད་འོང་བ་ཀུན་གྱིས་བྱས་པས་ཆོག་པ་ལ་མི་བྱེད་མི་འོང་བ་ཀུན་གྱིས་བྱེད་པར་འདུག་གསུངས་ནས་རྗེས་གནང་ཡང་ཐུགས་རྗེས་བཟུང་། དུས་སྐབས་ཤིག་ཏུ་ཆོས་ཞུ་ཚོ་གཅིག་འདུག་པའི་དབང་ཞར་ལ་མཚམས་ལ་ཡོད་པ་ལ་ཤོགས་གསུང་ནས་དབང་ཚར་བས་ཚོགས་ཀྱི་རྗེས་ལ། ལ་ལ་གྱེས་སོང་བ་ཞིག་ལ། བླ་མ་རིན་པོ་ཆེའི་དབུའི་སྟེང་གི་ནམ་མཁའི་ཐད་སོར་ཟུར་ན་མགོན་པོ་ཕྱག་བཞི་པ་ཆུང་ངུ་ཞིག་བཞུགས་པ་མཐོང་། དེ་དང་དུས་མཚུངས་སུ་གཟིམས་ཁང་གི་སྒོའི་ཐད་ན་ཡར་གཟིགས་པས་བཞུག་གདན་ལེགས་པོ་མ་དྲན། མ་སྔགས་ཀྱི་སྲུང་མ་དཔལ་ཨེ་ཀ་ཛ་ཊི་མཐིང་མོ་ཞིང་དབྱུག་དང་སྤྱང་མོ་བསྣམས་པ། སྐུ་ཐོག་གཉིས་བརྩེགས་དང་མཉམ་པ་གཅིག་བཞུགས་པ་མཐོང་། དེ་ནས་ཡུག་གཅིག་ན་སྒོའི་ཕྱི་རོལ་གྱི་སྒོ་ཕུག་གི་འོག་ན་ལས་མཁན་ཁྲག་རལ་ཅན་གཉིས་ཀ་མར་བལྟས་ནས་ཁྲག་གི་མཚོ་ཆུང་གཅིག་ནས་ལག་པ་གཉིས་ཀྱིས་བཅུས་ནས་འཐུང་བ་མཐོང་། དེ་ཀུན་ཞུས་པས་གོང་མ་གཉིས་ལ་ཅི་ཡང་མི་གསུང་། ཕྱི་མ་དེ་ལ་དམ་ཉམས་གཅིག་འཆི་བའི་རྟགས་ཡིན་གསུངས། གཞན་ལྷ་ཞལ་དང་ཉག་ཉོག་ར་རིམ་མཐོང་། ལྷ་ཆེ་ཤོས་དེ་བག་ཙམ་མཐོང་བ་ལགས། དེ་རེས་ལོ་ལྔ་བླ་མ་འདུ་འབྲལ་མེད་པར་བསྟེན། སྔར་ལོ་གསུམ་དང་བརྒྱད་བསྟེན། ད་དུས་མཁར་ཆུའི་ནུབ་ངོས་སྨད་ན་ཨོ་རྒྱན་གྱིས་བཞུགས་པའི་སྙུག་ཚལ་སྤུག་བྱ་བ་དཀྱིལ་འཁོར་ཟླ་གམ་ཡོད་པ་ཞིག་འདུག །དེ་ལམ་ལ་ཅུང་ཟད་ཉེ། དེའི་ཞོགས་གཅིག་ན་

བར་ཆོད་བྱེད་པ་ཆུ་འཕྱར་ནས་འབབ་པ་ལ་རླུང་བརྒྱབ་པས་སྐད་ཤིན་ཏུ་འཇིགས་པ་སྣ་ཚོགས་འོང་བ། ནགས་ཚལ་འཐུག་པོ་ཡོད་པ་མི་མ་ཡིན་གྱི་སྐད་ཉིན་མོ་ཡང་སྒྲ་སྒྲོག་པ་ཞིག་ཏུ་དགུན་ཐོག་གཅིག་ང་རང་གཅིག་པུས་དགེ་སྦྱོར་བྱས་པས་དགེ་སྦྱོར་ཡང་འཕེལ་བར་བྱུང་། བཅོམ་ལྡན་འདས་མའི་རྟགས་རྐྱང་འགའ་ཟུང་བྱུང་། ཤེས་རབ་ཀྱི་རྩ་ཁ་ཡང་སྐྱེས་ནས་མགུར་མའང་འགའ་བྱས། དེ་ནས་དྲིན་ཅན་བླ་མ་མ་གཤེགས་ཙམ་ལ་ཡར་ཀླུང་དུ་འོང་། ཚར་སྟེང་གི་དགོན་ཆུང་དེ་བཏབ། དེའི་དགུན་སྟོད་ལ་ལས་ཡུར་མ་ཐོན། ལ་ལས་མགོ་ལ་མ་བྱེད་པ་དེ་ལ་སྐུ་གཤེགས་པ་སེམས་ཀྱིས་ཚོར་ཏེ། ང་རང་གཅིག་པུས་མཁར་ཆུར་སླེབས་ལ་ཁད་དུ་ཕྱིན། གྲོང་པའི་ལྷོ་བྲག་སྟོད་ལས་མ་ཐོས། མར་ལ་ཕྱིན་པས་ས་སྟེགས་ཀྱི་ཐད་ཁར་བླ་མའི་སྲས་པོས་མཁར་ཆུའི་བྱ་བ་ཚར་ནས་སྒྲགས་ངོས་སུ་བྱོན་པ་དང་མཇལ་ནས་གྲའི་ཕུ་ཚུན་ཆད་ཕྱགས་ཕྱིར་འོང་། སྙུང་ལུས་པུར་སྦྱངས་པས་རྟེན་བྱོན་པ། ཞལ་ཆེམས་ཚན་པ་གཉིས་ལ་སོགས་པ་གནང་། ཡར་ལུང་དུ་དགོན་ཆུང་དེར་ཟླ་མཆོད་གཅིག་བཙུགས་ཏེ་བསྡད། དེ་ནས་ཡུན་མི་རིང་བ་ལ་སྐྱོ་བ་བསངས་པ་ལ་གནས་གཏད་ལ་ཙཱ་རི་རྙིང་མར་གནས་ཆེན་དུ་བདག་རང་གཅིག་པུར་བསྒྲོད་དེ་ཕྱིན། ལར་གཡུ་མཚོ་བསྐོར་བར་ཁྲལ་དང་དད་འབུལ་བསྡུས། ལམ་སྣ་བ། འགྲོ་མགོན་དཀོན་གཉེར། གཏོར་གཉེར། མ་རྒན། གླིང་སྒྲུབ་ལ་སོགས་ཆུ་གདན་ཆུ་གས་དུམ་དང་བཅས་པས་བསྐོར་བར་གདའ། བདག་རང་གཅིག་པུས་ཆུ་སྟན་ཆུ་ཞྭ་གཅིག་ཡོད། ཙྭ་རི་ཡུལ་ཆུང་ཚུན་ཆད་སྟོན་པ་གྲོགས་པོ་གཅིག་ཡོད། དེ་ནས་ལ་ཆུང་གཅིག་བརྒལ་བ་ན་ཀྲིག་མོ་ལྷའི་ནེ་རིང་བྱ་བའི་ལུང་པ་ན། རང་བྱུང་རྡོ་སྐུའི་མཆོད་རྟེན་ཆུང་ཆུང་གཅིག་གདའ་བ་ལ་འཇའ་ཚོན་ཟུག་པ་མཐོང་། འགྲོ་དོན་ནམ་དེ་ཡོང་ཟེར་བ་གདའ། དེ་ནས་ཀ་ལ་དུང་

མཚོ་བྱ་བ་ནས་ལ་ཆུང་བརྒལ་བ་ན་ལྷ་མོ་ལ་བྱ་བའི་གཤམ་ན། དཔལ་ལྷ་མོ་རང་བྱུང་རྒྱལ་མོ་རེ་མ་ཏཱི་ཆུའི་ཞལ་ཁེབས་ཡོད་པ་མཐོང་། དེ་ནས་དཔལ་ཤེལ་གྱི་རི་བྱ་བའི་གངས་འདབས་གཅིག་ལ་འཛེགས་ཕྱིན་པས་ལམ་ཅུང་ཟད་ནོར་ནས་ཆར་ལྷགས་ཀྱིས་ཅུང་ཟད་ཉེན། དེ་ནས་མ་མགོན་གྱི་བླ་མཚོ་དང་མཚོ་མོ་འོད་འབར་བ་བྱ་བ་འདུག །རྒྱུས་མེད་པས་བྲག་ཕུག་ཡོད་པ་མ་རྙེད་པར་ཞག་གཅིག་གནས་ཀྱིས་ཅུང་ཟད་ཉེན། དེ་ནས་ལ་ཆུང་གཅིག་བརྒལ་བའི་སར་གཡུ་མཚོ་ཟླུམ་པོ་བྱ་བ་གྲགས་པ་ཅན་དེར་སླེབས། དེར་ལས་དག་པ་ཀུན་གྱིས་མཐོང་སྣང་གཟིགས་སྣང་མང་པོ་འཆར་བར་ཡོད་པར་གདའ། བན་ལྡོམ་བདག་ལ་ནམ་མཁའ་རྣམ་དག་སྣ་སྤྲིན་གྱིས་མ་བསྒྲིབས་པ་སྟོན་ཁའི་ནམ་མཁའ་ལྟ་བུ། འོག་ན་མཚོ་ཤིན་ཏུ་དངས་བ་རྙོག་པ་དང་ཉ་ལྕིབས། སྔོ་ལྡུམ་འབག་འབོག་ལ་སོགས་པ་མེད་པ་ཤིན་ཏུ་དངས་པ་ལ་མེ་ལོང་གཡའ་དག་པའི་ནང་ལྟ་བུ། དེ་གཉིས་ཀྱི་བར་རམ་མཚོའི་ནམ་མཁའ་ལ་འཇའ་ཚོན་ཤིན་ཏུ་དངས་པ་རི་མོ་གཅིག་ཐུར་ལ་ཟུག་པ་དེ་གསུམ་དུས་གཅིག་ལ་དེར་སླེབས་མ་ཐག་གི་ཉི་མ་སྔ་དྲོ་དང་པོ་ལ་མིག་གི་ཡུལ་དུ་མངོན་སུམ་དུ་མཐོང་ངོ་། །དེར་ཕུག་པ་གཅིག་ཏུ་ཞག་གསུམ་བསྡད་ཅུང་ཟད་གཉན་པར་འདུག །བདུན་ལ་སོགས་པ་ཞག་འགའ་བསྡད་སྙམ་པ་ལ། རྒྱགས་ཕྱེ་མ་ཐེག་པས་ལམ་ནོར་ན་སྙམ་མ་བསྡད། དེ་ནས་གཡུ་མཚོ་སྐྱོག་མོ་དང་། སྟག་ཚང་རོང་བྱ་བ་ཤིན་ཏུ་གཉན་ཟེར་བ་ཞིག་ཏུ་བར་ཞག་གཅིག་བསྡད། ཡང་ལམ་དུམ་གཅིག་ནོར་བས་གངས་ཡོད་པའི་ལུང་ཆུང་གཅིག་ཏུ་ཉི་མ་འཕྱིས་པས་ཕུག་པ་མ་རྙེད་པར་མཚན་ཡལ་ལེ་ཆར་པས་ཉེན། དེ་ནས་ངོ་མཚར་རོང་བྱ་བ་ནས་དཀྲིག་མོ་ལྷའི་ནེ་རིང་དུ་ཞག་གཅིག་བསྡད། དེ་ནས་སྔར་གྱི་ཐམས་ཅད་དགུན་གཞུགས་

བྱེད་པའི་གཞི་ཆེན་མོར་སླེབས། ཞག་བཅུ་ལྷག་ཙམ་བསྡད། དེ་ནས་བྱར་སྨད་དུ་ཕྱིན། བླ་མ་དྷརྨ་བྱ་བ་བདག་གི་བླ་མའི་མཆེད་གཅིག་འདུག་པ་དེས་ཐུགས་ལ་བཏགས། མཛོ་འམ་སྐྱེ་དམན་མ་བརྟེན་པ་གཅིག་བྱ་སྙམ་པ་ལགས་ཞུས་པས་མི་འཐད་པས་ཆོས་ཀྱི་རྗེ་ཡབ་སྲས་དྲི་གསུངས་པ་ཡན་ཆད་བྱོན། དེ་འདྲ་སོགས་ཀྱི་བསླབ་བྱ་མཛད། དེ་ནས་ཚར་སྟེང་དུ་གཞི་བྱས། མཚུར་ཕུ་དང་སེ་གསོབ་ཏུ་མཁན་པོ་རིན་པོ་ཆེའི་དྲུང་དུ་ཕྱིན། སྙིང་ཏིག་སྤྱོད་གཟེར་ལྔ་རྣམས་ལ་མཉེས་པའི་གསུང་བྱོན་པས་དཔེ་བྲིས་ལུང་དང་བཅས་པ་ཕུལ། མཚུར་ཕུར་ཆོས་རྗེ་ལ་རྒྱུད་བཅུ་བདུན་ལ་སོགས་ཀྱི་ལུང་བྱས། སྐབས་ཤིག་ལ་སྟོད་དུ་གྲུབ་ཆེན་པ་དང་མཇལ་བ་ལ་ཕྱིན་པས་ལམ་ཁར། ས་ཆ་ཤངས་སུ་ཐེ་བའི་ལང་འགྲོ་བྱ་བའི་ཡུལ་ན། ལོ་བརྒྱད་ཅུ་ཙམ་བཞེས་པའི་ལྷ་ཆེན་འཁོར་བན་བྱ་བའི་སྔགས་པ་གཅིག་ལས། གཤིན་རྗེ་ཚེ་བདག་གི་སྐོར་དང་སྣ་འགའ་ཞུས། དེ་ནས་ཡར་ནུབ་ཕྱོགས་ལ་ཆུང་ཞིག་བརྒལ་བ་ན་མཚར་བྱ་བའི་ལུང་ཆུང་ཞིག་ཏུ་གསང་སྐོར་གྱི་བདག་པོ་ལྕེ་སྒོམ་ནག་པོར་གྲགས་པ་དེའི་ཡང་ཚ་ཡོད་པར་འདུག་པ་དང་། ལམ་འཛོལ་ནས། ཁོང་ལྕེ་སྒོམ་གྱི་མག་ཚའི་བརྒྱུད་པའི་ཞལ་ངོ་སློབ་དཔོན་སྒོམ་པ་བྱ་བ་བསྒྲེས་པོ་ཞིག་ལས་གསང་སྐོར་སྙན་བརྒྱུད་ངོ་སྤྲོད། མཁས་པ་བི་མ་ལའི་བསམ་གཏན་མིག་གི་སྒྲོོན་མེའི་ཁྲིད་རྫོགས་པ་དང་། རྩ་བའི་རྒྱུད་ལྔ་ལས་འཕྲོས་པའི་ལྷ་རྒྱུག་འདྲེ་རྒྱུ་ཡན་ཆད་ཀྱི་དཔེ་བྲིས། ལུང་ཐམས་ཅད་མ་ལུས་པར་ཞུས། དེ་ནས་ལ་སྟོད་དིང་རི་སྣམ་རུ་སླེབས། ལ་སྟོད་གཞོན་དགའི་གདུང་བརྒྱུད། དཔོན་པོ་དབང་སྒྲུབ་བྱ་བ་ལས། ཡང་དགོན་པའི་རི་ཆོས་དང་གསང་སྐོར་གྱི་མན་ངག་བསམ་གཏན་མིག་གི་སྒྲོན་མེ་ཐིག་ལེ་ཕྱི་ནང་ལ་སློོབ་པ་ཡོད་པ་རྣམས་ཞུས་ཤིང་གནང་། ལོ་སྟོད་དུ་ཐེངས་གཉིས་པོ་དེ་ལས་མ་ཕྱིན། མར་ལམ་གཙང་གྲོམ་པ་ས་སྐྱ་བའི་ཐད་ན་བླ་མ་བཀྲ་ལུང་བ་བྱ་བ་བཟང་པོ་གཅིག་ལ་ཕྱིན། ཡང་ལན་གཅིག་དེར་གཏད་ནས་ཕྱིན་པའི་ལན་

གཉིས་ལ། ཆོས་བཅོམ་ལྡན་འདས་གཤིན་རྗེ་དགྲ་ནག་གི་དབང་རྫོགས་པ། རྒྱུད་གདམས་ངག་མ་ལུས་པ། རབ་ཏུ་གནས་པའི་ཆོ་ག་ཚེ་དཔག་མེད་མདོ་ལུགས་ཀྱི་ཆོ་ག །བླ་མ་གཉན་ལ་ཚེམ་བུའི་སྤྱན་རས་གཟིགས་ཀྱི་སྙན་བརྒྱུད། སྙན་བརྒྱུད་ཡི་གེེ་བཞི་པ། ཐུགས་རྗེ་ཆེན་པོའི་གསང་སྒྲུབ་ཀྱི་ཏིང་ངེ་འཛིན་གྱི་དབང་ལ་སོགས་པ་ཟབ་པ་འགའ་ཞིག་ཞུས། ཡང་གཙང་གི་རྒྱང་གྱིང་དཀར་བྱ་བ་ཡོད་པས་རྒྱང་དཀར་གྱི་དགོན་པར་གསང་སྐོར་སྙན་བརྒྱུད་ཀྱི་རྩ་བ་ཁོང་དུ་འདུག་པས། ཡང་སློབ་དཔོན་ཡེ་ཤེས་མགོན་ལ་བརྒྱུད་པ་གཏུགས་སོ། སྙེ་མདོར་རྗེ་རིན་པོ་ཆེ་བ་སྐུ་མཆེད་གསུམ་འཛོམ་པ་ལས་བརྒྱུད་པ་ཕྱི་མོའི་དབང་གི་གདམས་པ། རྒོད་ཚང་པའི་ཁྲིད་ཆེན་བརྒྱད། བླ་མ་ཀུན་དགའ་བ་ལས་ཀུན་བྱེད་རྒྱུད་གསུམ་བརྒྱུད་པ་ལྡེ་མིག་ཆ་བཞི་ལ་སོགས་པ་ཞུས། དོལ་གྱི་སྤོང་རར། སློབ་དཔོན་གཞོན་ནུ་ལས་སྔགས་ཀྱི་སྔགས་གནད། མདོ་བྱི་རུ་བླ་མ་སངས་རྒྱས་འབུམ་ལས་ཨ་རོའིི་ཁྲིད་མོ་ཆེར་གྲགས་པའི་གདམས་ངག །འཁོར་བ་རྩད་གཅོད་མ་ལུས་ཞུས། རྒྱང་དུ་སློབ་དཔོན་བོན་སྟོན་ལས་སྔགས་སྲུང་སྔགས་གནད་ཕུག་རོན་བཅུ་གསུམ། རྫོགས་ཆེན་བོན་ལུགས། ལུང་དྲུག་རྣམས་ཞུས། དེ་ནས་གཞི་འཚལ་སྟེང་ནས་ཆོས་རྗེའི་གསུང་གིས་ང་ཡང་ཀོང་པོར་གདན་འདྲེན་ཡོད་ཁྱོད་ཀྱང་ཤོག་གསུངས་ནས་འཕྲལ་དུ་མཇལ་འཕྲད་བྱས། རྩ་རི་གསར་མར་ངེད་གཉིས་ཀྱིས་གནས་སྐོར་གཅིག་བྱས། གཡུ་མཚོ་ལ་དགུན་གཞུག་ལྟ་བུ་སྟོན་ཁ་ནས། ཟླ་བ་རིལ་པོ་བདུན་ངོ་གཅིག་དང་བརྒྱད་གདན་ཐོག་གཅིག་ཏུ་སྐད་ཐོས་ཀྱིས་བསྐོར་ནས་མི་གཅིག་མེད་པར་གཅིག་པུར་བསྡད། འདྲེ་རྟོག་གིས་ཆོ་འཕྲུལ་ཉམས། རྨི་ལམ་གསུམ་མང་བར་བྱུང་། འཛམ་བྷ་ལས་དངོས་གྲུབ་ལྟ་བུའི་ལྟས་ཕྱག་གཡས་པས་དེ་བྱིན། གཞི་བདག་

འདྲ་བར་འདུག་པ་གཅིག་གི་རྒྱབ་ཕྱོགས་ངོས་སུ་བདག་ལ་རལ་གྲི་རྣོན་པོ་ཤུབས་དང་བཅས་པ་རྐུ་ཐབས་སུ་བྱིན་ནས་ཆོས་ཀློད་དེ་གྱིས་བྱ་བ་ཞིག་བྱུང་། དགོངས་མོ་སྦྱིན་བསྲེག་ཅུང་ཟད་བྱས་པའི་ནུབ་མོ་གཞི་བདག་གྷ་ཡ་ངྷ་ར་ཁོང་རང་གིས་ཁུལ་དང་། ཕོ་བྲང་གཅིག་འདུག་བར་ངེད་གསུམ་ལ་བསྙེན་བཀུར་བྱས། ཁོ་རང་གི་རྟ་ཚུན་ཆད་བསྟན་དེའི་ཀླུ་བསེན་མོ་གཅིག་ཕོ་རིགས་གཅིག་གིས་དངོས་སུ་བར་ཆད་དྲག་པོ་བརྩམས། མཚོ་ལྔ་ཡོད་པའི་ལྷོ་ཕྱོགས་ཀྱི་མཚོ་ཆེ་བ་ཞིག་གི་སྟེང་དུ་འོད་ལྔའི་ལྦུ་བ་སེར་པོ་ཕུབ་ཙམ་པ་ཞིག་ཡར་དེད་མར་དེད་ཕར་དེད་ཚུར་དེད་གཅིག་ལ་གཅིག་ཐིམ། ཡང་ཐུགས་རྗེ་དེ་དང་འབྲེལ་བ་འགའ་མཐོང་། དེ་ནས་མཚམས་ཕྱིར་ཐོན་ནས་གླང་པོ་སྒང་དང་། གནས་པའི་རི་ཁྲོད་རྣམས་སུ་བླ་མ་དབོན་པོས་དབུ་མཛད་རི་པ་ཕལ་མོ་ཆེ་རྣམས་ལ་གསང་བ་སྙིང་ཏིག་གི་མགོ་བྱས་པ་མང་དུ་བཤད་ནས་ཡར་དྭགས་པོར་འོངས། སྔར་ལམ་རྒྱ་བཏང་ན་ཡང་འཐད་ཟེར་བ་བྱུང་ཡང་མ་བརྟག་པའི་ལས་གཉེན་མི་འཐད་པར་འདུག་པས་མ་བྱས། ད་རེས་ཐོང་ཟེར་ནས་བདག་རྐྱེན་ཅུང་ཟད་བྱེད་མི་འདྲ་བྱུང་བས། ཐོག་མར་ཡུ་བ་། ང་ལ་བྱ་བའི་མི་ངན་གྱི་གདུག་རྩུབ་ཀྱིས་བགྲོད་དཀའ་བས། དེ་ལ་ལམ་རྒྱ་བཏང་། དེ་ནས་རིམ་གྱིས་དྭགས་པོའི་ལུང་པ་དང་། ཨེ་རོར་ཚུན་ཆོད་ལ་ལོ་གསུམ་དང་ཟླ་བ་བཞི་བཏང་། གཙོ་བོར་བླ་མའི་བྱིན་བརླབས་དང་རང་གི་སྨོན་ལམ་དང་དམ་ཅན་མཐུ་ཆེན་རྣམས་ཀྱི་བྱིན་རླབས་ལས་ལེགས་པར་བྱུང་། དེ་དག་གི་གོང་དུ་ཡོན་བདག་གི་སྐྱེ་མཆེད་ལ་བརྟེན་ནས། དགོན་པར་གཞིས་ཁ་པས་དམག་བརྒྱབ་ནས་བཅོམ་ཡང་། སློབ་གྲོགས་བསྡུས་ནས་མཐུ་གཏད་ཀྱང་ཆེར་མ་བྱས། ཤམ་པོ་གངས་ལ་བསྡད་དགེ་སྦྱོར་ཡང་འཕེལ་སྐྱིད་ནས་ཡོད་ཙ་ན། རྩེ་ཞིང་པའི་སྲས་མོ་ཨ་འབུམ་ཀྱིས་རྩེ་ཞིང་དུ་བོས། རམ་གྱི་ཕུ་དང་བྲག་ལོག་

སྙུག་ལོག་གཅིག་ལ་ཞག་ཉི་ཤུ་ཙམ་སྡོད་དགོས་པ་བྱུང་། དབོན་མོ་ཕག་མོ་དེ་དྲིན་ཅན་རིན་པོ་ཆེའི་སློབ་མའམ་ཡོན་བདག་གི་རྩ་བ་ཡིན་པས། སློབ་དཔོན་རི་པ་གཅིག་དང་གཉིས་ཀྱིས་བོས། ཞག་གཅིག་གཙང་ཁང་དུ་བསྙེན་བཀུར་བྱས་གསེར་ཞོ་གང་བྱིན་ནས་རྒྱངས་བ་གཅིག་ཏུ་བྱོན་དང་ཟེར་ནས་རིག་པ་ཅན་མ་ཡིན་ཡང་། ཡར་ནུབ་ཕྱོགས་སུ་སྤྱན་གཡས་པའི་མ་ཧཱ་རེ་གཡར་ནས་ལོ་ཤས་སྡོད་གཞི་བྱས། ཁོང་ཡོན་མཆོད་གཉིས་ཀྱིས་ཐུགས་ལ་བཏགས་པས་ད་དུང་འབྲེལ་ཟབ་པ་དེ་ལགས་སོ། །ནུབ་ཕྱོགས་སུ་ཡང་རི་ཁྲོད་འགའ་བཏབ་པ་ལ། བྱང་ས་བའི་བདེ་ཆེན་སྟེང་ལ་སོགས་པར་ཡུན་དུ་སྡོད་ས་མ་བྱུང་ཡང་རི་ཁྲོད་འགའ་ཟུང་བཏབ། ཀོང་པོ་ན་ཡང་གྲུབ་སྨད་ཀྱི་མཐོང་སྨོན་ལ་སོགས་པ་འགའ་བཏབ་པ་དང་། དྭགས་པོ་སྟོད་ན་ཡང་བསམ་གྲུབ་གླིང་ལྷུན་གྲུབ་རྫོགས་ལ་སོགས་པ་བཏབ། སེམས་ཅན་ལ་ཕན་ཅི་ཐོགས་ཁོ་ན་བྱས་པ་ལགས་མོད། ཡང་མ་ཧཱ་རི་ན་སྡོད་དུས་དཔོན་གཡོག་བདུན་ཙམ་གྱིས་འབྲི་གུང་གི་རྒྱབ། ཏེ་སྒྲོའི་ཨོ་རྒྱན་རིན་པོ་ཆེའི་བཞུགས་གནས་ཀྱིས་གཙོ་བྱས་པའི་རི་ཁྲོད་ལུང་སྟོང་འགའ་བསྐོར་ཏེ། ཇོ་མོ་གངས་དང་ཇོ་མོ་ཁ་རག་དང་། ཤངས་ཀྱི་ཟབ་བུའི་གཏེར་ཁུང་མན་ཆད་བསྐོར་བས་དེ་ལོ་ཁམས་ཤིན་ཏུ་བཟང་བ་གཅིག་བྱུང་། དེ་ཡན་ཆད་ནི་ཆོས་ཕྱོགས་སུ་དད་པའི་ངལ་དུབ་ཀྱིས་ཅུང་ཟད་དཀའ་བར་བྱུང་ཡང་། དལ་འབྱོར་གྱི་ལུས་ཆུད་མི་ཟ་བར་བྱ་བ་དང་། ཐེག་པ་ཆེན་པོའི་ཚུལ་མི་འདོར་བར་མོས་པར་བྱས་བའི་རྣམ་གཞག་ཡིན་མོད། འདི་ལྟར་བཀོད་པའི་དངོས་དོན་སློབ་མ་རྣམས་ཀུན་ལ་ཚེ་འདིའི་འབྲེལ་ཐག་འཁྲི་བ་བཅད། བླ་མ་དཀོན་མཆོག་གི་ཕྱོགས་སུ་བློ་སྣ་ཀྱུར་གྱིས་བསྒྱུར་བས་ཆོས་ལས་མ་བྲལ་བར། གོང་མའི་རྣམ་ཐར་ལ་ཡིད་སྨོན་པས་སྡོད་ས་རི་ཁྲོད་དང་། ལུང་སྟོངས་སུ་བྱེད་པ། ཚེ་འདིའི་དྲི་མ་ངན་པས་

མ་གོས་པས་ཆོས་བརྒྱད་དང་བྲལ་བ། སྙིང་པོ་དོན་གྱི་དགོངས་པའི་དྲན་འཛིན་ལས་མ་ཡེངས་པར། ཆོས་སྤྱོད་ཁྱད་དུ་མི་གསོད་པར་སེམས་བསྐྱེད་ཀྱི་རྗེས་མཐུན་སེམས་ཅན་ཉེ་རིར་མེད་པ་ལ་ཕན་ཅི་ཐོགས་བྱེད་པ་དང་། དོན་ཆེན་པོ་ཡལ་བར་མི་འདོར་བར་བརྩོན་པ། གོང་མའི་གདུང་གསོབ་པ། ཚེ་འདིའི་མཐུན་འཇུག་སྤོང་པ་ལ་སོགས་པའི་ཆོས་ཕྱོགས་སུ་གཞོལ་བ་རེ་ཙམ་འང་སྲིད་མཐའ་མ་བཀག་པས་དེ་ལྟ་བུའི་རྐྱེན་བསྐུལ་དུ་སོང་ན་ལེགས། ལོག་སྲེད་ཅན་གྱི་ལག་ཏུ་འགྲིམས་ནས་ལོག་པར་བལྟས་པས་སྐྱབས་གནས་འདོར་བའི་ཉེས་པ་སྤོང་བའི་ཕྱིར་སྦ་བར་རིགས་སོ། །དཔལ་ཀུན་ཏུ་བཟང་པོ་ནས་དངོས་ཅག་བདག་ཡོན་མཆོད་དམ་ཉམས་གྱི་དྲི་མས་གོས་པ་མེད་ཅིང་། བརྒྱུད་པ་སྐྱོན་ལྔའི་སེལ་མེད་པས་དམ་ཚིག་འདི་ལ་བརྩོན་པས་སྒྲིམས་མཛོད། ཚེ་འདིའི་ཆོས་ལྟར་བཅོས་པའི་བྱ་བ་རྩོལ་བ་ཆེན་པོས་ལྡེར་སོ་ལ་སོགས་སྐུ་གཟུགས། གསུང་རབ་ལ་སོགས་བཞེངས། བསོད་ནམས་མང་པོ་བསགས་ན། རང་ཉིད་ལྷུན་གྲུབ་ཆོས་སྐུར་སོན་ནས་སྤྲུལ་པ་དུ་མས་འགྲོ་དོན་རྒྱུན་མི་ཆད་པས། སྨིན་གྲོལ་མཛད་པར་གདའ་བས། དབེན་པའི་གནས་སུ་སྐབས་དོན་གལ་ཆེན་དེ་ལ་དོན་དུ་གཉེར་ན། རང་གཞན་གྱི་དོན་ལྷུན་གྲུབ་ཏུ་གཟིགས་གདའ་བས་དེ་རྣམས་ཀྱིས་ཐུགས་དགྱེས་པར་མཛད་འཚལ། བདག་འདྲའི་བན་ལྡོམ་ཀུ་མ་རཱ་ཛ་ལ། །ཀུན་དགས་ཡང་དང་ཡང་དུ་བསྐུལ་བ་དང་། །གཞན་ཡང་རེ་རེ་གཉིས་གཉིས་དེ་སྐད་ཟེར་བ་དང་། ད་ལོའི་སྐབས་སུ་རྩར་སྡོད་ཅིང་གཡོག་པོ་གུས་པར་བྱེད་པ་རིན་རྒྱལ་གྱིས་ཡང་ཡང་བསྐུལ་ནས་བྲིས་པའོ། །འདི་འདྲའི་ཡིག་གེ་འཁྱམས་པ་ན། །མོས་གུས་མི་བྱེད་སྡིག་པ་བསོགས། །དད་ཅན་སུན་འབྱིན་སྐྱོན་བསལ་ཡིན། །འདི་བྲིས་དགེ་བ་ཅི་ཡོད་པས། །སེམས་ཅན་སངས་རྒྱས་ཉིད་དུ་ཤོག །ཅལ་

ཅོལ་རིང་མོ་ཞེས་བྱ་བ་མོས་གུས་ཅན་གྱིས་གཙོ་བོར་བསྐུལ་བའི་ཕྱིར། སྟག་ལོ་དབྱར་ཟླ་ར་བའི་ཡར་ཚེས་བརྒྱད་ཀྱི་ཉིན་མོར་བྲིས་པ་འདི་ཡོངས་སུ་རྫོགས་སོ།། །།དགེའོ། །བླ་མ་དམ་པ་ཀུ་མ་རཱ་ཛ་དེ་ཉིད། དྭགས་པོ་དང་ལུང་གི་ཕུར་སྐུ་འདས་བའི་ཚུལ་བསྟན་པའི་ཚེ། ཕྱི་རབས་ཀྱི་དོན་དུ་འདས་རྗེས་གསུངས་པ། ཡི་གེར་བཏབ་པ་ནི། ཨོཾ་ཨཱཿཧཱུྃསྤྲང་པོ་བྱ་བྲལ་གཞོན་ནུ་རྒྱལ་པོས་གདམས་པ་ནི། །ཨེ་མ་ངས་ནི་ངོ་བོ་སྐྱོང་བ་དེ་དང་རང་རིག་རྩ་གདར་བཅད། །དམིགས་མེད་སྤྲོས་བྲལ་མཐའ་དང་བྲལ་བར་རྟོགས། །ཆོས་སྐུའི་ངང་དུ་ཀུ་མ་རཱ་ཛ་འཆི། །རང་བཞིན་དབྱིངས་ལ་ལྟ་སྟངས་རིག་པ་གཅུན། །ཞི་ཁྲོའི་དཀྱིལ་འཁོར་ཐིག་ལེ་ཉག་གཅིག་རྟོགས། །ལོངས་སྐུའི་ངང་དུ་ཀུ་མ་རཱ་ཛ་འཆི། །ཐུགས་རྗེས་སེམས་ཅན་གཞན་ཕན་གཙོ་བོར་བྱས། །ཤར་གྲོལ་རིག་པ་ཆོས་ཉིད་མ་དང་འཕྲད། །སྤྲུལ་སྐུའི་ངང་དུ་ཀུ་མ་རཱ་ཛ་འཆི། །ཡེ་ཐོག་དང་པོའི་སངས་རྒྱས་དྲི་མ་མེད། །གཞིར་སྣང་རང་གདངས་དང་པོའི་བྱུང་སར་ཐིམ། །ལྷུན་གྲུབ་སྦུབས་སུ་ཀུ་མ་རཱ་ཛ་འཆི། །ང་ཡི་ཟབ་དོན་སྙིང་པོའི་གདམས་པ་རྣམས། །བཅུད་དུ་དྲིལ་ནས་ཉམས་ལེན་སྙིང་པོ་བསྟན། །བདག་གི་རྗེས་འཇུག་སྐལ་ལྡན་སྙིང་གི་བུ། །ཇི་ལྟར་བསྒྲུབས་ཀྱང་ཆོས་དང་མཐུན་པར་མཛོད། །ང་ཡི་གཏམ་གཞུག་འགྲོ་ཁའི་ཚིག་འདི་རྣམས། །ཕྱི་རབས་དོན་དུ་སྙིང་ནས་མོས་ལ་སྟོན། །ཏིག་ཏིག་གང་ལ་ཡང་མི་འདུག །ལར་སྣང་བ་འདི་གཏད་པ་མེད་པ་གཅིག་ཡིན། སྐྱག་པ་ངས་དྲིན་ཅན་རིན་པོ་ཆེ། ཕཊ་ཕཊ། ཧ་ཧ་ཕཊ། ཅེས་གསུངས་ནས་ཐུགས་འཕོ་བའི་ཚུལ་བསྟན་ཏེ། ས་ཆེན་པོ་འདི་རབ་ཏུ་གཡོས། ནམ་མཁའ་ལ་སིལ་སྙན་གྱི་སྒྲ་རང་གྲགས། འཇའ་ཚོན་གྱི་གུར་ཕུབ་སྟེ་འགྲོ་བ་རྣམས་

ངོ་མཚར་གྱི་ས་ལ་བཀོད། ཨྠྀི། ཨོཾ་ཨཱཿཧཱུྃཿགུ་རུ་ཀུ་མ་རཱ་ཛ་ལ་ན་མོ། །གདོད་མའི་མགོན་དང་རྣམ་དབྱེར་མི་ཕྱེད་ཅིང་། །རིག་འཛིན་ཆེན་པོ་བི་མ་མི་ཏྲ་དངོས། །ཡོན་ཏན་རྒྱ་མཚོ་ནམ་མཁའི་མཐའ་དང་མཉམ། །ཆོས་རྗེ་ཀུ་མ་རཱ་ཛའི་ཞབས་ལ་འདུད། །དཔལ་ལྡན་ཚོགས་གཉིས་ཡོན་ཏན་རྫོགས་པའི་གཙོ། །འཇིག་རྟེན་གསུམ་མགོན་ཆོས་རྗེ་བླ་མ་ལ། །དད་པའི་གདུང་ཤུགས་གཡོ་བས་ཕྱག་འཚལ་ཞིང་། །སྙིང་ནས་མཆི་མ་འཁྲུགས་པས་སྐྱབས་སུ་འཆི། །སྐུ་ཚེ་སྔ་མའི་སྔ་མ་དཔག་མེད་ནས། །མཐའ་ཡས་འགྲོ་ལ་ཐུགས་རྗེའི་སྤྱན་དབྱེ་བས། །དེ་རིང་འགྲོ་བ་ཀུན་གྱི་གཉེན་གྱུར་ཅིག །འདིར་ཡང་ས་སྟེང་འཇིག་རྟེན་རྒྱན་གྱུར་མཆོག །བསྟན་པ་རིན་ཆེན་ཕྱོགས་བཅུར་རྒྱས་མཛད་ཅིང་། །རླབས་ཆེན་སྤྱོད་པ་དམ་པའི་ཁུར་བསྣམས་ཏེ། །སྣ་ཚོགས་མཛད་པས་འགྲོ་ཀུན་བདེ་ལ་བཀོད། །གྲགས་དཀར་ཡོན་ཏན་ཕྲེང་བས་གནམ་ས་ཁྱབ། །སླར་ཡང་རྟག་པར་འཛིན་རྣམས་གདུལ་བྱའི་ཕྱིར། །ཐ་མའི་མཛད་པས་ཤར་ཕྱོགས་དང་ལུང་དུ། །ཆུ་མོ་ལུག་ལོའི་སྟོན་ཟླ་ཐ་ཆུང་ལ། །མི་རྟག་མྱ་ངན་འདའ་འཚུལ་བསྟན་པར་གྱུར། །རྒྱན་གྱུར་འཇིག་རྟེན་བླ་མ་དེ་གཤེགས་ཏེ། །ཡིད་བཞིན་ནོར་བུ་རིན་ཆེན་དབྱིངས་སུ་སྟོར། །བསྟན་པ་རིན་ཆེན་དཔག་བསམ་ཤིང་ཆག་སྟེ། །གྲུ་ཆེན་འཇིག་རྟེན་བླ་མ་དེ་རིང་ཞིག །རྣམ་པ་ཀུན་ཏུ་ལྷ་རྫས་ཆར་འབབ་ཅིང་། །འོད་ཟེར་ལྔ་ལྡན་ཡེ་ཤེས་སྣང་བ་གསལ། །ལྷར་བཅས་འཇིག་རྟེན་ངོ་མཚར་ཡིད་གཡོས་ཏེ། །མཁའ་འགྲོས་མཆོད་སྤྲིན་སིལ་སྙན་སྒྲ་བསྒྲགས་ཏེ། །སྔོན་མེད་སྣང་བ་ངོ་མཚར་དཔག་མེད་ཅིང་། །སྤོས་བསུང་དྲི་དང་དུས་མིན་རོལ་མོས་གང་། །ཉིན་མཚན་ཁོར་ཡུག་

འོད་ལྔའི་མདངས་ཤར་བས། །བྱང་ཆུབ་སྙིང་པོར་འགྲོ་བ་འདྲེན་པར་མཛོད། །ས་འདི་རིར་བཅས་ཞི་བས་ཆེར་གཡོས་ཤིང་། །ནགས་ཚལ་ལྗོན་ཤིང་འདུད་པས་ཕྱག་ཀྱང་འཚལ། །མེ་ཏོག་ཆུ་གཙང་འཛུམ་པའི་མདངས་གསལ་ཞིང་། །བྱ་དང་རི་དྭགས་སྒྲ་འབྱིན་སྐྱབས་སུ་འགྲོ། །མཁའ་འགྲོའི་སྤྲིན་ཕུང་འདུ་བས་སྡུན་བསུས་ཏེ། །རིག་འཛིན་རྒྱལ་བའི་ཞིང་དུ་གཤེགས་པར་གྱུར། །བསྟན་པའི་ཉི་མ་དེ་རིང་འདིར་ནུབ་སྟེ། །འཚོ་བྱེད་སྨན་གྱི་རྒྱལ་པོ་གཤེགས་ཀྱི་མེད། །ཐར་ལམ་དེད་དཔོན་དམ་པ་ཞིག་གྱུར་ཅིང་། །བདེ་ལེགས་ཀུན་འབྱུང་ཡིད་བཞིན་ནོར་བུ་སྟོར། །ཀྱེ་མ་ཀྱེ་ཧུད་འཇིག་རྟེན་སྟོངས་ཀྱིས་མེད། །དཀར་ཕྱོགས་ཡེ་ཤེས་ཉིན་བྱེད་ནུབ་གྱུར་ཅིང་། །བདུད་རིགས་མུན་པའི་ཚོགས་རྣམས་རྒྱས་གྱུར་ཏེ། །རྒྱལ་ཁམས་ཀུན་ཏུ་དུས་ཚིགས་ཡོལ་བར་གྱུར། །ཞིང་དེའི་སྣང་བ་དམ་པའང་ནུབ་གྱུར་ལ། །ལྷ་མིའི་འཇིག་རྟེན་མ་རིག་མུན་པས་ལྡོངས། །ཐར་གླིང་ས་མཁན་ཆེན་པོ་དེ་མེད་པས། །ད་ནི་འགྲོ་བ་མྱ་ངན་བྱ་བའི་རིགས། །རྒྱལ་བ་དྲན་དང་མྱ་ངན་འདའ་བསམ་པས། །ཞི་བའི་གླིང་འགྲོ་ཡོན་ཏན་བསམ་མི་ཁྱབ། །ཆོས་དེ་ཚད་མེད་ལེགས་པར་གསུངས་པ་སྟེ། །དེ་བས་ཆེས་ལྷག་དགེ་ཚོགས་རྣམས་འཕེལ་འགྱུར། །ཀྱེ་མ་ཀྱི་ཧུད་ཐུགས་རྗེའི་དབྱིང་རུམ་ནས། །མགོན་མེད་བདག་གི་གདུང་བའི་ཚིག་འདི་གསོན། །སྣ་ཚོགས་སྡུག་བསྔལ་མང་ལྡན་འཁོར་བ་པ། །མགོན་མེད་དཔུང་གཉེན་བྲལ་བའི་ཚོགས་རྣམས་དང་། །བདག་ཅག་དད་ལྡན་ལྟོས་པའི་སྐྱེ་དགུ་རྣམས། །ད་ནི་ཅི་བྱ་སུ་ལ་རེ་བར་བྱ། །བསྟན་ལ་མངོན་པར་ལྷགས་པའི་ལྷ་རྣམས་དང་། །དད་ལྡན་མི་རྣམས་མྱ་ངན་མེས་གདུངས་ཤིང་། །དུས་འདིར་ཕན་བཞེད་བྱེད་པའི་ལྗོན་ཤིང་ཆག །

སྐྱབས་དང་སྐྱོབ་པ་དཔུང་གཉེན་མེད་པར་གྱུར། །བདག་ཅག་གདུལ་བྱའི་བསོད་ནམས་མཚོ་བསིལ་སྐམ། །ཞི་གྱུར་རིན་ཆེན་བླ་མ་དབྱིངས་སུ་ཡལ། །ཆོས་ཀྱི་གླང་པོ་དེ་རིང་གཟིམས་པར་གྱུར། །རང་བཞིན་འོད་གསལ་ཡེ་ཤེས་ཉི་མ་ནུབ། །ཕན་བདེའི་འོད་དཀར་ནུབ་རིའི་རྒྱབ་ཏུ་ཡོལ། །ལྷ་མིའི་བདེ་འབྱུང་བུམ་པ་བཟང་པོ་ཆག །ས་མཁན་དེད་དཔོན་རིག་འཛིན་བླ་མ་གཤེགས། །གླིང་བཞི་འཇིག་རྟེན་རྒྱན་གྱུར་སྟོངས་སོ་ཀྱེ། །ཐུགས་རྗེ་ཅན་ཡང་བརྩེ་བ་སྤོངས་བ་བཞིན། བདག་ཅག་བོར་ནས་ཞིང་ཁམས་གཞན་དུ་གཤེགས། །མགོན་མེད་སྐྱེ་དགུ་རེ་ཞིང་ལྟོས་པ་རྣམས། །རང་བཞིན་དོར་ནས་ཡལ་བར་འདོར་ཕོད་དམ། །དུས་མིན་ཉི་ཟླའི་འགྲོས་ཀྱང་མ་ལོག་ལ། །ས་དང་བར་སྣང་དག་ཀྱང་མ་འཚོལ་ན། །བདག་ཅག་རྣམས་ལ་དུས་ཚིག་འདི་ལྟ་བུ། །མྱ་ངན་གདུངས་པས་སྙིང་ལ་ཁྱབ་པར་གྱུར། །གང་དུ་བསམས་ཀྱང་དེད་དཔོན་བླ་མ་དྲན། །རི་རྩེ་ནགས་ཀྱི་མཐོངས་དང་གངས་རིའི་འདབས། །སྒྲུབ་པའི་གནས་མཆོག་སྔོན་ཆད་དགྱེས་དགྱེས་པས། །ས་ཕྱོགས་གང་ན་འང་དེང་ནས་ཡོངས་མི་བཞུགས། །ཉེ་འཁོར་ཉེ་བར་སྤྱད་པའི་ཚོགས་མཐོང་ནས། །དགྱེས་པའི་སྤྱན་མཆོག་གཟིགས་པར་མཛད་དེའང་གྲོངས། །འོད་གསལ་རིན་ཆེན་ཆོས་ཉིད་བསྒོམ་བསམ་ཡང་། །དམ་པའི་གསུང་རྣམས་དྲན་ནས་མཆི་མ་ཤོར། །ལྷར་བཅས་འགྲོ་བའི་བསོད་ནམས་དཔག་བསམ་ཤིང་། །ཕན་བདེའི་ཡལ་འདབ་རྒྱས་པར་མི་མཛད་པར། །དུས་མིན་མེ་ཏོག་འབྲས་བུ་སྐོམ་གྱུར་ཏེ། །གདུལ་བྱའི་བྱ་ཚོགས་ད་ནི་གང་དུ་བསྟེན། །འཁོར་བ་མི་བཟད་སྡུག་བསྔལ་དུ་མའི་ཕྲེང་། །བསྒྲོད་དཀར་ཞུགས་ལ་བརྩེ་བས་མི་གཟིགས་པར། །འཇིགས་པའི་འཕྲང་ལས་སྐྱེལ་མས་བསླུས་པ་བཞིན། །བདག་ཅག་དོར་ནས་མགོན་པོ་གང་དུ་གཤེགས། །

དུས་གསུམ་རྒྱལ་བ་ཀུན་དང་དབྱེད་མེད་ཅིང་། །དཔག་མེད་མཛད་པས་འགྲོ་བའི་ཁ་ལོ་བསྒྱུར། །མཐོང་ཐོས་དྲན་རེག་འཁོར་བ་ཕྱིར་བསྙིལ་བ། །ཡོན་ཏན་རྒྱ་མཚོའི་བླ་མ་གང་དུ་གཤེགས། །བརྩེ་བའི་ཐུགས་རྗེ་གཞན་ལས་ལྷག་གྱུར་ཅིང་། །མཛད་པའི་ཕྲིན་ལས་གནས་རིགས་ཁྱབ་པར་འདུག །སྤྱན་དང་མངོན་ཤེས་སྤང་རྟོགས་ཕུན་སུམ་ཚོགས། །འཕགས་པའི་བླ་མ་དེ་རིང་གང་དུ་གཤེགས། །ཐུགས་རྗེའི་མཁའ་ལ་མཁྱེན་བརྩེའི་སྤྲིན་འཁྲིགས་ཏེ། །ཕྱི་ནང་གསང་བའི་ཆོས་ཆེན་ཆར་འབེབས་པས། །མ་ལུས་འགྲོ་བའི་རེ་བ་སྐོང་མཛད་པ། །མཆོག་གྱུར་བསྟན་པའི་རྩ་ལག་གང་དུ་གཤེགས། །མགོན་པོ་གངས་རིའི་དཀྱིལ་འཁོར་རྒྱས་པ་ལ། །ཐུགས་རྗེ་ཞི་བ་བསིལ་བའི་རྒྱུན་བབས་པས། །འགྲོ་ཀུན་ཉོན་མོངས་མེ་ཚོགས་ཞི་མཛད་པ། །ས་འཛིན་འཇིག་རྟེན་གསུམ་མགོན་གང་དུ་གཤེགས། ཚོགས་གཉིས་པད་རྫིང་ཡན་ལག་བརྒྱད་ལྡན་ནས། །དད་ལྡན་བུང་བ་མང་པོའི་ཚོགས་རྣམས་ལ། །ཞི་བདེའི་དགའ་སྟོན་དམ་པ་མི་འགྱེད་པར། །རྣམ་གྲོལ་ཡོན་ཏན་ཚོགས་ཆེན་གང་དུ་གཤེགས། །ས་གསུམ་སྐྱེ་དགུ་ཞི་ལ་བཞག་གོ་ཞེས། །ཕན་བདེའི་འོད་སྟོང་དྲ་བ་བགྱེད་མཛད་ཅིང་། །འགྲོ་བའི་ལམ་ཡངས་དཀར་པོར་མཛད་པ་ཅན། །དགེ་ལེགས་ཉིན་མོའི་དབང་ཕྱུག་གང་དུ་གཤེགས། །འཁོར་ཚོགས་དབུས་ན་ཆ་ཤས་གསལ་བའི་སྐུ། །བྱམས་པའི་ཞལ་བཟང་ལྟ་བས་མི་ངོམས་ལ། །ཐུགས་རྗེའི་ཕྱག་གཉིས་འགྲོ་ལ་རྐྱོང་མཛད་པ། །མགོན་པོ་སྟོན་ཟླའི་དཀྱིལ་འཁོར་གང་དུ་གཤེགས། །འཁོར་བའི་ཆུ་གཏེར་ཤིན་ཏུ་བརྒལ་དཀའ་ལས། །སྲིད་གསུམ་རྒྱ་མཚོའི་ཕ་རོལ་སྒྲོལ་མཛད་ཅིང་། །ཞི་བ་རིན་ཆེན་གླིང་དུ་སྐྱེལ་མཛད་པ། །གྲུ་ཆེན་མཉེན་པའི་རྒྱལ་པོ་གང་དུ་གཤེགས། །

ཐོག་མེད་དུས་ནས་ཉེ་བར་གོམས་པ་ཡིས། །འཁོར་བའི་གཅོང་ནད་ཤིན་ཏུ་སྦྱང་དཀའ་བར། །ཞི་མཛད་བདུད་རྩིའི་གསོས་སྨན་ཀུན་གྱི་བདག །འཚོ་བྱེད་སྨན་པའི་རྒྱལ་པོ་གང་དུ་གཤེགས། །ཉི་ཟླའི་སྣང་བས་གསལ་བར་མ་ནུས་པའི། །གཏི་མུག་མུན་པ་རྨད་བྱུང་སེལ་མཛད་ཅིང་། །གདུལ་བྱའི་མཁའ་ལ་མཁྱེན་བརྩེའི་རྣམ་གྲོལ་ཅན། །སྔོན་མེད་ནམ་མཁའི་ནོར་བུ་གང་དུ་གཤེགས། །རླབས་ཆེན་མཛད་པ་ཐུགས་རྗེའི་རང་བཞིན་ནི། །ཆུ་སྲིན་འཛིན་པ་ཁྲི་ཡིས་མི་བསྐྲུན་པ། །འབྱུང་པོ་འཛིན་མ་འདི་ན་མཚུངས་པ་མེད། །དཔག་ཡས་སྐྱེ་དགུའི་བླ་མ་གང་དུ་གཤེགས། །མི་གཡོ་དངས་པ་རྒྱ་མཚོའི་རང་བཞིན་ལ། །འདོད་འབྱུང་ནོར་བུ་གདེངས་ཅན་གཙུག་གིས་རྒྱན། ས་སྟེང་རྒྱན་གྱུར་མཚུངས་མེད་ཆོས་ཀྱི་རྗེ། །གཞན་ལས་ཆེ་མཆོག་བླ་མ་གང་དུ་གཤེགས། །བསོད་ནམས་ཡེ་ཤེས་ཚོགས་ཆེན་རྫོགས་པའི་སྐུ། །མཐོང་བ་ཙམ་གྱིས་དད་པའི་རླབས་གཡོ་ཞིང་། །འགྲོ་ཀུན་བསོད་ནམས་ཞིང་གི་མཆོག་གྱུར་པ། །ལྷར་བཅས་འཇིག་རྟེན་མཆོད་སྡོང་གང་དུ་གཤེགས། །འཁོར་གྱི་ཁྱམས་སུ་ཚངས་དབྱངས་སེངྒེའི་སྒྲ། །དམ་ཆོས་རིན་ཆེན་ཆར་པ་འབེབབས་མཛད་ཅིང་། །མ་རིག་ཐེ་ཚོམ་དྲ་བ་གཅོད་ལ་མཁས། །ཡེ་ཤེས་རྔ་སྒྲའི་བླ་མ་གང་དུ་གཤེགས། །ཆོས་ཉིད་མི་གཡོ་ཏིང་འཛིན་ཡངས་པའི་ཀློང་། །འོད་གསལ་ཉི་ཟླ་དགོངས་ཀློང་རྒྱ་ཆེ་ཞིང་། །མཉམ་རྗེས་དབྱེར་མེད་རྟག་ཏུ་ཆོས་སྐུའི་ངང་། །དབྱིངས་རིག་མཐར་ཕྱིན་བླ་མ་གང་དུ་གཤེགས། །དཔག་མེད་དུས་ནས་མཁྱེན་བརྩེ་རླབས་ཆེ་ཞིང་། །ལུང་རིག་མན་ངག་སྙིང་པོའི་གང་ཆེན་མཚོ། །བྱིན་རླབས་དངོས་གྲུབ་རིན་ཅེན་འབྱུང་བའི་གནས། །ཡོན་ཏན་རྒྱ་མཚོའི་བླ་མ་གང་དུ་གཤེགས། །ཞི་རྒྱས་དབང་དྲག་ཕྲིན་ལས་མངའ་བརྙེས་ཤིང་། །རླབས་

ཆེན་མཛད་པས་གདུལ་བྱ་གང་དུ་སྐྱོང་། །འོད་གསལ་བསྟན་པ་ཕྱོགས་བཅུར་རྒྱས་མཛད་པ། །སྟོབས་ཆེན་རྒྱལ་བའི་རྣམ་འཕྲུལ་གང་དུ་གཤེགས། །བདག་ཅག་དད་ལྡན་འགྲོ་ལ་མི་གཟིགས་པར། །གདོད་མའི་དབྱིངས་སུ་ཞི་ལ་ཐུགས་གཞོལ་བ། །བརྩེ་ཆེན་ཐབས་མཁས་ཐུགས་རྗེ་གང་དུ་གཤེགས། །སླན་ཆད་ཁྱེད་ཞལ་མཐོང་བའི་སྐབས་མཆིས་སམ། །ཐ་མའི་མཛད་པ་མངོན་པར་སྐྱོ་བའི་གནས། །དགེ་བའི་འཇིག་རྟེན་སྟོང་ལ་མི་གཟིགས་སམ། །སྡུག་བསྔལ་མང་ལྡན་མེ་ཚོགས་སྤུངས་པ་འདིར། །ཐུགས་རྗེའི་ཆར་རྒྱུན་བསིལ་བས་མི་སྦྱོང་ངམ། །མགོན་གྱུར་དག་ཀྱང་རེ་བ་མེད་མཛད་ན། །བདག་ཅག་རྣམས་ལ་སུ་ཞིག་སྐྱབས་སུ་གྱུར། །ཀྱེ་མ་སྐྱབས་མཆོག་བླ་མ་ཐུགས་རྗེ་ཅན། །ཞི་བའི་དབྱིངས་ནས་ཐུགས་རྗེས་ཕྱག་རྐྱོངས་ལ། །བདག་ཅག་འགྲོ་ཀུན་དེ་རིང་དྲང་དུ་གསོལ། །འཁོར་བའི་རྒྱ་མཚོ་སྟོངས་པར་མཛད་དུ་གསོལ། །དེ་ལྟར་གདུང་བས་ཉིན་མཚན་གསོལ་བ་འདེབས། །གུས་པས་ཕྱག་འཚལ་རྟག་ཏུ་སྐྱབས་སུ་མཆི། །བདག་དང་མཁའ་མཉམ་སེམས་ཅན་ཐམས་ཅད་ཀྱི། །དུས་རྣམས་རྟག་ཏུ་འདྲེན་མཆོག་མཛད་དུ་གསོལ། །མཐའ་ཡས་ཞིང་དང་འགྲོ་བ་ཇི་ཙམ་པར། །བློ་ཡིས་མངོན་སྤྲུལ་དེ་དག་ཐལ་སྦྱོར་ཏེ། །དད་བརྒྱའི་འདབ་སྟོང་གཡོ་བས་ཕྱག་འཚལ་ཞིང་། །བསྟོད་དབྱངས་ཡན་ལག་རྒྱ་མཚོས་བསྟོད་པར་བགྱི། །འགྲོ་བའི་མགོན་པོ་ཤིན་ཏུ་ཐུགས་རྗེ་ཅན། །རྒྱན་གྱུར་འཇིག་རྟེན་བླ་མ་དེང་ཤར་ཏེ། །འོད་གསལ་སྙིང་པོའི་བསྟན་པ་གསལ་མཛད་ནས། །ཞི་བའི་དབྱིངས་སུ་གཤེགས་ལ་གུས་ཕྱག་འཚལ། །ཐུགས་རྗེས་རྟག་ཏུ་འཁོར་བ་ཡོངས་བཟུང་སྟེ། །ཞི་བ་ཕྱོགས་གཅིག་མྱ་ངན་

མི་འདའ་བར། །འགྲོ་ལ་ཕན་གཟིགས་ཐ་མའི་མཛད་པ་ཡིས། །ངོ་མཚར་འཇིག་རྟེན་ཁྱབ་ལ་གུས་ཕྱག་འཚལ། །སྟོན་ཁའི་ཟླ་བ་དང་པོ་ཞི་བ་ཡིས། །ནགས་ཁྲོད་དམ་པར་སྐུ་ཚེ་གཏོང་བ་ལས། །སླར་ཡང་བྱིན་རླབས་ཐུགས་རྗེས་རྨད་དུ་བྱུང་། །རྒྱལ་བའི་མཛད་པར་མཚུངས་ལ་གུས་ཕྱག་འཚལ། །གང་དུ་མགོན་པོ་མྱ་ངན་འདས་གྱུར་པ། །དེ་ཚེ་ས་དང་ནགས་ཚལ་བཅས་པ་གཡོས། །དུས་མིན་སྒྲ་དང་སིལ་སྙན་དཔག་མེད་འཁྲོལ། །ལྷ་རྫས་མཆོད་པས་མཛེས་ལ་གུས་ཕྱག་འཚལ། །ཕྱོགས་རྣམས་སྟོན་ཁའི་མདོག་བཟང་མཛེས་པ་ལས། །དད་པའི་མཁའ་དབྱིངས་འོད་ལྔའི་བླ་རེ་བྲེས། །དྲྭ་བ་དྲྭ་ཕྱེད་ཟླུམ་འཁྲིམས་ཟ་འོག་རིས། །རབ་འཁྱིལ་སྣང་བ་ཤར་ལ་གུས་ཕྱག་འཚལ། །སྐུ་གདུང་མཆོད་ལས་ཉིན་མཚན་ཕྱད་པར་ཡང་། །མཁའ་འགྲོའི་སྒྲ་དང་སིལ་སྙན་གླིང་བུ་དང་། །ལྷ་རྫས་རོལ་མོ་འོད་ལྔའི་སྣང་བར་བཅས། །ཡ་མཚན་མཆོད་སྤྲིན་མཐོ་ལ་གུས་ཕྱག་འཚལ། །གང་ལ་སྐུ་གདུང་ཞུགས་ཀྱིས་འབར་བ་ན། །འོད་ལྔའི་སྣང་བས་ནམ་མཁའ་ཁྱབ་གྱུར་ཅིང་། །འགྲོ་ཀུན་མི་རྟོག་བསམ་གཏན་ས་ལ་གནས། །ངོ་མཚར་སྣང་བས་ཁྱབ་ལ་གུས་ཕྱག་འཚལ། །དེ་ཚེ་མཁའ་ལ་སྙན་པའི་སྒྲ་གྲགས་ཤིང་། །དུད་སྤྲིིན་རྩ་ེལ་འོད་ཟེར་ཚོགས་ཤར་བས། །ནམ་མཁའི་དབྱིངས་ཁྱབ་ཁྱད་པར་ནུབ་ཕྱོགས་གསལ། །འགྲོ་བའི་ཡིད་རབ་གཡོ་ལ་གུས་ཕྱག་འཚལ། །ཐབས་ཀྱི་སྐུ་གདུང་རྒྱས་པར་མཛད་པ་ལས། །དབུ་ཐོད་རིལ་བུ་འོད་ལྡའི་དཀྱིལ་འཁོར་དུ། །རང་བྱོན་འོད་ལྔའི་ཀློང་ན་རྫོགས་པར་བཞུགས། །ངོ་མཚར་རྟེན་དུ་གྱུར་ལ་གུས་ཕྱག་འཚལ། །སིལ་བུའི་གདུང་གཞུག་མཆོད་རྟེན་བཞེངས་པ་ནའང་། །འོད་ལྔའི་གདུགས་དང་བླ་རེས་རྒྱལ་མཚན་མཆོག །ནམ་མཁའི་དབྱིངས་ན་སྣང་བས་མཛེས་གྱུར་པ། །བསོད་

ནམས་ཞིང་དུ་གྱུར་ལ་གུས་ཕྱག་འཚལ། །དམ་པ་རྣམས་ཀྱི་ཚུལ་འདི་བསམ་མི་ཁྱབ། །སྲིད་པ་ཇི་སྲིད་ཕན་བདེ་མཛད་པ་སྟེ། འདི་ཡི་རླབས་ཆེན་སྤྱོད་པ་མཐའ་ཡས་པ། །འདི་ལྟ་འོ་ཞེས་བསམ་པའི་ཡུལ་ལས་འདས། །ལ་ལར་གཤེགས་དང་ལ་ལར་བལྟམས་པ་དང་། །ལ་ལར་མཉམ་གཞག་ལ་ལར་ཞིང་རྣམས་སྦྱོང་། །ལ་ལར་དོན་མཛད་ལ་ལར་བདུད་རྣམས་འདུལ། །དབྱིིངས་ལས་མི་གཡོ་སྤྲུལ་པ་རྒྱུན་མི་ཆད། །དེ་སླད་བདག་ཅག་དོན་ལྡན་འགྲོ་བ་རྣམས། །འཁོར་བའི་གནས་ནས་ཞི་བའི་ནགས་འདབས་སུ། །འདི་ཡི་ཐུགས་རྗེས་མྱུར་དུ་འདྲེན་ངེས་པས། །དུས་མེད་རྒྱུན་དུ་གུས་པས་གསོལ་བ་འདེབས། །དམ་པ་འདི་དང་འགའ་ཞིག་ཕྲད་གྱུར་ཏེ། །གསུང་ཙམ་ཐོས་དང་ཞལ་མཐོང་སྐྱེ་དགུ་རྣམས། །ངན་སོང་རྣམས་ཆད་ཐར་ལམ་བྱང་ཆུབ་རྙེད། །དེ་སོགས་ཡོན་ཏན་བརྗོད་ཀྱིས་ཡོངས་མི་ལངས། །ལྷར་བཅས་འགྲོ་བའི་དད་དཔོན་བླ་མ་ལ། །བདག་གཞན་མ་ལུས་གུས་པས་ཕྱག་འཚལ་ཞིང་། །ནམ་མཁའ་མཐའ་ཀླས་ཏིང་འཛིན་སྤྲིན་ཚོགས་ཀྱིས། །མངོན་པར་བཀང་སྟེ་བླ་མེད་མཆོད་སྤྲིན་བགྱི། །ལུས་དང་ངག་ཡིད་སྡིག་ཀུན་ཅི་མཆིས་པ། ཐུགས་རྗེའི་ཟེར་གྱིས་བསལ་བར་མཛད་དུ་གསོལ། །ལས་དང་ཉོན་མོངས་མེ་ཚོགས་ཇི་སྙེད་ཀུན། །ཡེ་ཤེས་ཆུ་བོས་ཞི་བར་མཛད་དུ་གསོལ། །དེང་ནས་བྱང་ཆུབ་སྙིང་པོ་མཆིས་ཀྱི་བར། ཁྱེད་ཀྱིས་རྣམ་གྲོལ་ཐུགས་རྗེས་ཕྱག་རྐྱོངས་ལ། །འཁོར་བ་ངན་སོང་སྡུག་བསྔལ་མི་འབྱུང་ཞིང་། །ཐེག་པ་དམན་ལས་བསྐྱབ་པར་མཛད་དུ་གསོལ། །རྟག་ཏུ་བཤེས་གཉེན་དམ་པ་བརྟེན་བྱེད་ཅིང་། །འོད་གསལ་ཡེ་ཤེས་ས་དང་ལམ་རྫོགས་ནས། །བྱང་ཆུབ་ཞི་བ་ཐོབ་པར་མཛད་དུ་གསོལ། །བདག་ཅག་གང་དུ་སྐྱེ་བ་རྣམ་ཀུན་ཏུ། ཁྱེད་དང་མི་འབྲལ་བསྒྲོད་པ་གཅིག་པ་ཡིས། །གཞན་དོན་རླབས་ཆེན་ཕྲིན་ལས་

རྫོགས་པར་ཤོག །ཐུགས་རྗེའི་སྤྱན་མཆོག་དམ་པ་དཀྱུས་རིང་བས། དུས་རྣམས་ཀུན་ཏུ་བདག་ཅག་གཟིགས་མཛོད་ལ། །ཉེས་ཀུན་རྣམ་སེལ་ལེགས་དགུ་ལྷུན་གྲུབ་ནས། །འདོད་དགུའི་རེ་བ་རྫོགས་པར་མཛད་དུ་གསོལ། །སྐྱབས་དང་སྐྱོབ་པ་དཔུང་གཉེན་མཛད་དུ་གསོལ། །མགོན་དང་བཤེས་དང་ས་མཁན་མཛད་དུ་གསོལ། །ཡེ་ཤེས་འོད་གསལ་སྒྲོན་མེ་སྤར་དུ་གསོལ། །འདུ་འབྲལ་མེད་པར་བྱིན་གྱིས་བརླབ་ཏུ་གསོལ། །དེ་ལྟར་བདག་བློ་མོས་པའི་གདུང་ཤུགས་ཀྱིས། །མཆོག་ཏུ་གུས་པས་གསོལ་བ་བཏབ་པ་ཡི། །དགེ་བ་འདི་ཡིས་བདག་དང་འགྲོ་བ་ཀུན། །འཆི་མེད་མྱ་ངན་མེད་པའི་གནས་ཐོབ་ཤོག །བླ་མ་དམ་པ་ཀུ་མ་རཱ་ཛ་དགོངས་པ་ཡོངས་སུ་མྱ་ངན་ལས་འདས་པའི་ཚེ། གདུང་བའི་ཡིད་དང་སྨྲེ་སྔགས་ཀྱི་སྒོ་ནས་གསོལ་བ་འདེབས་པའི་རབས་པདྨ་སྟོང་ལྡན་ཞེས་བྱ་བ། བླ་མ་དམ་པ་ལ་མི་ཕྱེད་པའི་དད་པ་དང་ལྡན་ཞིང་བདེ་བར་གཤེགས་པའི་གསུང་རབ་ཕལ་པོ་ཆེ་ལ་ཐོས་པ་དང་། བསམ་པ་དང་། སྒོམ་པ་ལས་བྱུང་བའི་ཤེས་རབ་ལེགས་བར་སྦྱངས་པ། ཀུན་མཁྱེན་ངག་གི་དབང་པོས་སྦྱར་བ་འདི་ཡོངས་སུ་རྫོགས་སོ།། །།ཤུ་བྷཾ། སརྦ་མངྒལཾ།

ཀུན་མཁྱེན་དྲི་མེད་འོད་ཟེར་གྱི་རྣམ་ཐར་མཐོང་བ་དོན་ལྡན།

ཀུན་མཁྱེན་དྲི་མེད་འོད་ཟེར་གྱི་རྣམ་ཐར་མཐོང་བ་དོན་ལྡན་བཞུགས་སོ། །

ཨོཾ་སྭ་སྟི་སརྦ་མཾ་ག་ལ་སིངྔྷི་ཕ་ལ་ཧོ། །བླ་མའི་རྣམ་ཐར་མཐོང་བ་དོན་ལྡན་ཞེས་བྱ་བ། བརྒྱུད་པ་གསུམ་གྱི་བླ་མ་དམ་པ་རྣམས་ལ་ཕྱག་འཚལ་ལོ། །གང་གིས་ཐོག་མར་འགྲོ་དོན་ཐུགས་བསྐྱེད་ནས། །བར་དུ་གྲངས་མེད་དབུ་ལ་ཁུར་ཆེན་ཁྱེར། །ཐ་མར་བྱང་ཆུབ་མངོན་པར་སངས་རྒྱས་ནས། །ལྷ་མཛེས་སྲས་མཆོག་ལུམྦའི་ཚལ་བལྟམས་བཞིན། །སྐྱེས་མཆོག་འདི་ཡང་དེ་ཡི་རྗེས་འགྲོ་བའི། །སྔོན་རོལ་བསྐལ་པ་མང་པོར་ཚོགས་བསགས་ནས། །བར་དུ་བརྩོན་པའི་གོ་ཆ་མཐའ་ཡས་ཤིང་། །ཐ་མར་དོན་གཉིས་མཛད་དེ་གཙུག་གིས་མཆོད། །བདག་ཉིད་ཆེན་པོ་དྲི་མེད་འོད་ཟེར་གྱི། །རྣམ་ཐར་ནམ་མཁའི་མཐའ་དང་རྒྱ་མཚོའི་ཁྱོན། །ཚུ་རོལ་བློ་ཡིས་རྟོགས་པར་དཀའ་ན་ཡང་།

བཀའ་དྲིན་དྲན་དང་ཕྱི་རབས་དོན་དུ་སྤྲོ། །ཆུར་ཉལ་ཚལ་ན་རྟ་བདུན་ཤར་བ་ཡིས། །རྐང་དྲུག་དགའ་སྟོན་འཕེལ་བར་གྱུར་པ་ལྟར། །བདག་བློའི་སྙིང་གི་པདྨོ་ཁ་ཕྱེས་ལ། །འཆད་རྩོད་རྩོམ་པའི་སྤོབས་པ་བསྐྱེད་དུ་གསོལ། །དེ་ཡང་འདིར་སྐྱེས་མཆོག་དེའི་བཀའ་དྲིན་མི་འདོར་བ་དང་། ཕྱི་རབས་སྐལ་ལྡན་རྣམས་ཀྱི་དོན་དུ། ཆོས་རྗེ་རིན་པོ་ཆེའི་རྣམ་ཐར་མཐོང་བ་དང་། ཐོས་པ་དང་། རྟོགས་པའི་ཚུལ་མདོ་ཙམ་ཞིག་ཡི་གེར་འགོད་པ་ལ། བླ་མ་དམ་པ་རྣམས་ཀྱིས་བྱིན་གྱིས་བརླབ་ཏུ་གསོལ། མཁའ་འགྲོ་ཆོས་སྐྱོང་གི་ཚོགས་རྣམས་ཀྱིས་སྟོངས་གྲོགས་མཛོད་ཅིག །དེ་ལ་བཅོམ་ལྡན་འདས་རྣམ་པར་སྣང་མཛད་གང་ཆེན་མཚོའི་སྐུའི་ཞིང་ཁམས་ཐམས་ཅད་ཁྱབ་ཅིང་སྐུ་ལ་ཞིང་ཁམས་ཐམས་ཅད་ཡོངས་སུ་རྫོགས་པ།

ཞབས་རྡོ་རྗེ་སྐྱིལ་མོ་ཀྲུང་དུ་བཞུགས་པའི་ཕྱག་གཉིས་མཉམ་གཞག་གི་མཐིལ་ན། ལྷུང་བཟེད་སྤོས་ཆུས་གཏམས་པར་མེ་ཏོག་ཉི་ཤུ་རྩ་ལྔ་བརྩེགས་མར་གནས་པའི་བཅུ་གསུམ་པ། ཐུགས་ཀ་དཔལ་གྱི་བེའུའི་ཐད་པདྨའི་ཟེའུ་འབྲུ་གཅིག་གི་སྟེང་ན་གཞི་དང་སྙིང་པོ་མེ་ཏོག་གིས་བརྒྱན་པ་ཞེས་བྱ་བ། ཐུབ་པའི་དབང་པོ་འདིའི་གདུལ་ཞིང་འཛམ་གླིང་བྱེ་བ་ཕྲག་བརྒྱར་གནས་པ་ལ། གླིང་བཞི་ལས་ལྷོ་ཕྱོགས་འཛམ་གླིང་། སའི་ལྟེ་བ་རྡོ་རྗེ་གདན་ལས་དཔག་ཚད་བརྒྱ་ལྷག་གིས་བསྒྲོད་པའི་ས་ཕྱོགས་གཡོ་རུ་གྲ་ཕུ་སྟོད་གྲོང་ཞེས་བྱ་བར། སློབ་དཔོན་ཆེན་པོ་པདྨའི་དངོས་སློབ། དཔལ་རྟ་མགྲིན་གྱི་གྲུབ་ཐོབ་གདུང་རུས་ངན་ལམ། མཚན་བཙུན་པ་རྒྱལ་བ་མཆོག་དབྱངས་ཞེས་བྱ་བ་དེའི་གདུང་རུས་ཀྱི་བརྒྱུད་པ་ཟམ་མ་ཆད་པ་དེའི་མི་རབས་ཉི་ཤུ་རྩ་ལྔ་སོང་བ་ན། ཨ་མེས་ལྷ་སྲུང་ཞེས་བྱ་བ་བདུད་རྩི་སྨན་གྱི་གྲུབ་པ་ཐོབ་པ། དགུང་ལོ་བརྒྱ་དང་ལྔ་ཐུབ་པ་དེའི་སྲས་སློབ་དཔོན་བསྟན་པ་སྲུང་ཞེས་བྱ་བ་གཅིག་དང་། ཡུམ་མཁའ་འགྲོའི་སྤྲུལ་པ་འབྲོག་བཟའ་བསོད་ནམས་རྒྱན་གཉིས་ཀྱི་སྲས་སུ་འཁྲུངས་པའི་ལྟས་ལ། ཡུམ་གྱི་རྨི་ལམ་དུ་སེངྒེ་ཆེན་པོ་གཅིག་གི་དཔྲལ་བར་ཉི་མ་གཉིས་དུས་གཅིག་ལ་ཤར་བ་འོད་ཟེར་ཁྱིལ་ཁྱིལ་མོ་རང་གི་ལུས་ལ་ཐིམ་པ་རྨིས་ཏེ། དུས་ཚོད་ས་ཕོ་སྤྲེའུའི་ལོ་ཟླ་བ་གཉིས་པའི་ཚེས་བརྒྱད། སྐར་མ་རྒྱལ་འཛོམས་པ་ལ་སྐུ་བ་ལྟམས་པའི་ཚེ། བུད་མེད་ནག་མོ་རལ་གྲི་ཐོགས་པ་བཞིན་དང་མཆེ་བ་གཉེར་བ་ཞིག་ན་རེ། ངས་བསྲུངས་བ་ཡིན་ཟེར་ནས་ཕྱག་ཏུ་བླང་། སླར་ཡུམ་ལ་གཏད་དེ་མི་སྣང་བར་གྱུར་ཏོ། །དེ་ནི་ནམ་གྲུ་རེ་མ་ཏིའོ། །ཡང་ལན་ཅིག་ཡུར་མ་བྱེད་དུས།

མུ་ཁར་བསྙལ་ནས་ཡོད་པའི་ཚེ། ཡུམ་བྱ་བ་གཅིག་གིས་བྲེལ་ནས་ཡོད་དུས། སེར་བ་བབས་པས་བུ་ཆུང་བརྗེད་ནས་ནང་དུ་ཕྱིན་པ་དང་། དྲན་ནས་ཞིང་ཁར་བལྟས་པས་བུ་ཆུང་མི་འདུག་ནས། ངུ་ཞིང་ནང་དུ་ཡོང་བ་དང་། སྔར་གྱི་བུད་མེད་ནག་མོ་དེས། བུ་ཆུང་མཛོད་ནས་ཁྱེར་བྱུང་སྟེ། རལ་གྲི་བརྡེག་ལ་ཁད་བྱས་ནས་སྤྲུལ་པའི་སྐུ་ལ་བརྙས་པ་བྱེད་པ་ཟེར་ནས་མི་སྣང་བར་གྱུར་ཏོ། །རང་བཞིན་དུས་ཐམས་ཅད་དུ། ནམ་གྲུ་རེ་མ་ཏི་གཟུགས་ཐ་དད་པའི་སྒོ་ནས་འབྲལ་བ་མེད་པར་ཞབས་ཏོག་བྱས་སོ། །དེ་ཡང་སྤྲུལ་པའི་སྐུ་ཡིན་པར་པདྨའི་བཀའ་ཆེམས་ལས་ལུང་བསྟན་ཟིན་པ་ཡིན་ཏེ། དུས་ཀྱི་ཐ་མ་ལ་རྒྱལ་བ་མཆོག་དབྱངས་ཀྱི་རིགས་རྒྱུད་ཀྱི་ཐ་མ་ལ་འཇམ་དབྱངས་ཀྱིས་སྤྲུལ་པ་གཅིག་གིས་སྔགས་ཀྱི་བསྟན་པ་དར་བར་བྱེད་ཅིང་། དེ་ནས་ཡང་བརྒྱུད་པ་གཉིས་ཀྱི་བར་དར་བར་བྱེད་པ་ཡིན་ཏེ། ༈ལུམྦའི་ཚལ་ན་དོན་གྲུབ་བལྟམས་པའི་ཚེ། །ལྷ་དབང་ཀླུ་ཡི་རྒྱལ་པོས་ཁྲུལ་གསོལ་ནས། །དར་དཀར་སླེ་འུས་བླངས་ནས་ཤིས་པ་བརྗོད། །དགའ་བའི་མདངས་ཕྱུངས་ལེགས་པར་མཆོད་པ་ལྟར། །སྐྱེས་མཆོག་འདི་ཡང་བལྟམས་པར་གྱུར་བའི་ཚེ། །ནམ་གྲུ་རེ་མ་ཏི་ཡི་ཕྱག་གཉིས་ཀྱིས། །ལེགས་པར་བླངས་ནས་བསྲུང་ཞིང་སྐྱོབ་བོ་ཞེས། །སླར་ཡང་ཡུམ་ལ་གཏད་ནས་མི་སྣང་གྱུར། །ཞེས་པ་ནི་བལྟམས་པའི་ཚིགས་སུ་བཅད་པའོ། །དེ་ལྟར་ཆུང་ངུ་ནས་དད་པ་དང་། སྙིང་རྗེ་དང་བློ་གྲོས་ཆེ་ཞིང་། དགུང་ལོ་ཆུ་ཕོ་བྱི་བ་ལྔ་ནས་འབྲི་ཀློག་ཞིབ་

པར་མཁྱེན། ཤིང་སྟག་བདུན་ལ་ཡབ་ལས་བདེ་གཤེགས་འདུས་པ། རྟ་མགྲིན། ཕུར་པ། །གུ་རུའི་ཕྲིན་ལས་གཞུང་། སྨན་རྩིས་ལ་སོགས་པ་མཁྱེན་པར་མཛད། མེ་འབྲུག་དགུང་ལོ་དགུ་ལ་གྲྭ་ཕྱི་ཚོང་འདུས་སུ། ཉི་ཁྲི། བརྒྱད་སྟོང་པ་གཉིས་བརྒྱ་ཚར་བཏོན་པས་ཐུགས་ལ་ཆུད། ས་མོ་ལུག་དགུང་ལོ་བཅུ་གཉིས་ལ་བསམ་ཡས་སུ་མཁན་པོ་བསམ་རིན་པ་བསམ་འགྲུབ་རིན་ཆེན་དང་། སློབ་དཔོན་ལྷ་ཀུན་དགའ་འོད་ཟེར་ལས་རབ་ཏུ་བྱུང་ནས་ཚུལ་ཁྲིམས་བློ་གྲོས་ཞེས་མཚན་གསོལ་ཏེ། འདུལ་བ་བསླབས་ཤིང་། བཅུ་གཉིས་ལ་གྲལ་སྐོར་དང་བཤད་པ་མཛད་དོ། །ཟས་གཙང་སྲས་པོ་ཁབ་ནས་མངོན་ཕྱུང་སྟེ། །རྣམ་དག་དྲུང་དུ་རབ་བྱུང་བསྙེན་པར་རྫོགས། །འཁོར་བའི་ཉེས་དམིགས་གཟིགས་པའི་ཚུལ་བསྟན་ནས། །འགྲོ་བའི་ཁ་ལོ་གྱེན་ལ་བསྒྱུར་བར་མཛད། །དེ་ལྟར་དམ་པ་འདི་ཡང་བསམ་ཡས་སུ། །བསྟན་པའི་གཞི་མ་འདུལ་བ་ཡིན་དགོངས་ནས། །ཉན་ཅིང་བཤད་ནས་ཕུལ་དུ་ཕྱིན་པར་མཛད། །ཐུབ་ཆེན་རྗེས་འགྲོ་དེ་ལ་གུས་པས་འདུད། །༈དེ་ནས་དགུང་ལོ་བཅུ་དྲུག་ལ། སློབ་དཔོན་བཀྲ་ཤིས་རིན་ཆེན་ལ། ལམ་འབྲས་གཉིས་དང་། ཆོས་དྲུག་གཉིས་དང་། ཕག་མོའི་ཆོས་དྲུག་དང་། བདེ་མཆོག་དྲིལ་བུ་པའི་དབང་དང་བཅས་པ། །ཕྱག་རྡོར་འཁོར་ལོ་ཆེན་པོའི་དབང་གདམས་པར་བཅས་པ་ཞུས་ཤིང་། སློབ་དཔོན་དབང་ཡེས་ལས་དུས་འཁོར། གསར་མའི་རྒྱུད་འབུམ་ལ་སོགས་རྒྱུད་སྡེ་མང་པོ་དང་། ཟ་ལུང་རིན་པོ་ཆེ་ལས་ཞང་ཚལ་པའི་ཆོས་

སྐོར། རྒོད་ཚང་པའི་ལམ་ཁྲིད། དམ་པའི་ཞི་བྱེད་སྔ་ཕྱི་བར་གསུམ། མ་གཅིག་གི་གཅོད་རྣམ་དྲུག་ལ་སོགས་པ་གསན་ཅིང་། དགུང་ལོ་བཅུ་དགུ་མེ་ཕོ་སྟག་ལ་གསང་ཕུར་བྱོན་ནས། མཁས་པའི་ཕུལ་དུ་ཕྱིན་པ་བླ་བྲང་པ་ཆོས་དཔལ་ལྡན་རྒྱལ་མཚན་དང་ཆོས་གྲགས་གཉིས་ཀྱི་དྲུང་དུ། བྱམས་པའི་ཆོས་ལྔ། ཚད་མ་རྣམས་འགྲེལ། །ཚད་བཏུས་རྣམས་ཀྱི་ཉན་བཤད་ལོ་དྲུག་ལ་ཞུན་ཐར་ལེགས་པར་བཅད་དེ། མགོན་པོ་བྱམས་པའི་རྒྱུད་བླ་མར། རྣམ་རྟོག་ལས་གཞན་དེ་དག་གི། སྤང་རྒྱུ་གཞན་མེད་དེ་ཡི་ཕྱིར། །ཐོས་པ་དེ་ཕྱིར་ཐོས་པ་མཆོག །ཅེས་དང་མཐུན་པར་དམ་པ་དེ་ཉིད་ཀྱིས། ཐོས་བསམ་གནས་ལ་བློ་གྲོས་ལེགས་སྦྱངས་ནས། །མི་ཤེས་མུན་སེལ་རྨོངས་པའི་ཚང་ཚིང་བསྲེགས། །ཤེས་བྱ་རབ་གཟིགས་མཁས་པའི་ཕ་མཐར་ཕྱིན། །ཅེས་པ་འདི་ཡང་བར་སྐབས་ཀྱི་ཚིགས་སུ་བཅད་པའོ། །དེ་ནས་སྐབས་འགའ་ཞིག་ཏུ། མི་གཡོ་བ་དང་དབྱངས་ཅན་མ་ཤེས་རབ་གསལ་བྱེད་ལ་སོགས་པའི་སྒྲུབ་པ་མཛད་པས། ལྷ་སོ་སོའི་ཞལ་གཟིགས་ཤིང་གསུང་ཐོས་པ་དང་། ཁྱད་པར་དབྱངས་ཅན་མ་དང་མཇལ་དུས། དབྱངས་ཅན་གྱི་ཕྱག་མཐིལ་དུ་བཞག་ནས་གླིང་བཞི་རི་རབ་དང་བཅས་པ་ཞག་བདུན་དུ་གཟིགས་སོ། །དེ་ནས་མགྲིན་པ་ལོངས་སྤྱོད་ཀྱི་རྩ་ཁ་བྱེ་སྟེ་བློ་གྲོས་ཕྱོགས་མེད་དུ་རྒྱས་ཏེ། གསང་ཕུ་ལ་སོགས་པའི་རིག་གྲར་བསམ་ཡས་པ་ལུང་མང་བ་ཞེས་གྲགས་སོ། །གཞན་ཡང་སྐད་གཉིས་སྨྲ་བ་བློ་གྲོས་བརྟན་པའི་དྲུང་དུ་ཚད་

མ་སྡེ་བདུན་གྱི་རྣམ་བཤད་དང་། ཤེས་རབ་སྙིང་པོའི་རྒྱ་ཆེར་འགྲེལ་གྱི་བཤད་པ་དང་། ཏིང་ངེ་འཛིན་རྒྱལ་པོ་ལ་སོགས་པའི་ཟབ་མོ་མདོ་ལྔའི་བཤད་པ་དང་། སྙན་ངག་མེ་ལོང་གཞུང་འགྲེལ་ལ་སོགས་པ་མང་དུ་གསན་ནོ། །དེ་ལྟར་ལུང་དང་མན་ངག་དང་། རིག་པ་དང་སྙན་ངག་དང་། སྡེབས་སྦྱོར་ལ་དབང་འབྱོར་པས་ཕྱོགས་ཐ་དད་དུ་བྱོན་ནས། མཁས་གྲུབ་ཀྱི་བླ་མ་དུ་མ་ལས་མདོ་དང་རྒྱུད་དང་མན་ངག་རྣམས་མང་དུ་ཞུས་ཤིང་། སློབ་དཔོན་གཞོན་ནུ་དོན་གྲུབ་ལས་རྙིང་མའི་རྒྱུད་འབུམ། འདུས་མདོ་སྒྱུ་འཕྲུལ་སེམས་ཕྱོགས་ལ་སོགས་པ་མང་དུ་གསན་ནོ། །སློབ་དཔོན་གཞོན་ནུ་རྒྱལ་པོ་ལས་བཀའ་དང་པོ་བདེན་པ་བཞིའི་འགྲེལ་པ་གཏམ་གྱི་ཚོགས་དང་། བར་པ་མཚན་ཉིད་མེད་པའི་འགྲེལ་པ་རིག་པའི་ཚོགས་དྲུག་རྩ་བ་ཤེས་རབ་རིག་པ་དྲུག་ཅུ་པ། སྟོང་ཉིད་བདུན་ཅུ་པ། ཞིབ་མོ་འཐག་པ་རྩོད་པ་བཟློག་པ། ཐ་མ་དོན་དམ་ངེས་པའི་འགྲེལ་པ་ཆོས་དབྱིངས་བསྟོད་པ་ལ་སོགས་པའི་བསྟོད་ཚོགས་ཞུས་ཤིང་། སློབ་དཔོན་གཞོན་ནུ་རྡོ་རྗེ་ལས་སྤྱོད་འཇུག་བསླབ་བཏུས་ཇོ་བོའི་བཀའ་གདམས་སྐོར། སྙན་བརྒྱུད་མང་དུ་ཞུས་ཤིང་། མཁན་པོ་པ་ལས་ཁྲོ་ཕུ་པའི་ཆོས་སྐོར། སྒྲུབ་ཐབས་རྒྱ་མཚོ། མཁའ་འགྲོ་རྒྱ་མཚོ། དཔལ་བོ་རྒྱ་མཚོ། ཆོས་འབྱུང་བརྒྱ་རྩ། འདུལ་བ་ལུང་། མདོ་སྡེ་རྒྱས་འབྲིང་བསྡུས་གསུམ། རྡོ་རྗེ་གཅོད་པ། སྡུད་པ། ཤེས་རབ་སྙིང་པོ། ཤེས་རབ་ཁྲི་པ། ཚུལ་ལྔ་བཅུ་པ་ལ་སོགས་པའི་མང་པོ་གསན་ཅིང་། ཆོས་རྗེ་ཀརྨ་པ་རང་བྱུང་རྡོ་རྗེ་ལས་སྦྱོར་དྲུག་གེགས་སེལ་དང་བཅས་པ། ནཱ་རོ་ཆོས་

དྲུག །སྐུ་གསུམ་ངོ་སྤྲོད། ཐུགས་རྗེ་ཆེན་པོ་རྒྱལ་བ་རྒྱ་མཚོ། ཐུགས་རྗེ་ཆེན་པོ་རྒྱལ་པོ་ལུགས། གསང་འདུས། སམ་བྷུ་ཊི། མ་ཧཱ་མ་ཡཱ། གཤེད་དམར་ནག་རྣམས་གསན་ཅིང་། སློབ་དཔོན་དབང་ཡེས་ལས་སྦྱོར་དྲུག་བསྙེན་སྒྲུབ་ཡི་དམ་དམར་ཁྲིད། སངས་རྒྱས་ཐོད་པ། མཁའ་འགྲོ་གུར། འཇིགས་བྱེད་རྭ་ལུགས་ཀྱི་རྒྱུད་རྟོག་པ་བདུན་པ་དང་། གསུམ་པའི་དབང་གདམས་ངག་རྫོགས་རིམས་དང་བཅས་པ། རླུང་འཁོར་ཛཾ་བྷ་ལ་དང་། ཀུ་རུ་ཀུལླེ། ཐུབ་པ། ཡུམ་སྒྲུབ། བྱམས་པ། གནས་བརྟན་བཅུ་དྲུག །སྨན་ལྷ་སོགས་ཀྱི་སྒྲུབ་ཐབས་མང་དུ་ཞུས་ཤིང་། ཤུག་གསེབ་རིན་པོ་ཆེ་ལས། དོ་ཧ་སྐོར་གསུམ། རི་ཆོས་སྐོར་གསུམ། རྟེན་འབྲེལ་བརྒྱ་རྩ་ཞུས་ཤིང་། སློབ་དཔོན་སྟོན་ཚུལ་ལས་དྲང་སྲོང་གཞུང་སྐྱེས་ཀྱི་དངུལ་ཆུའི་བཅུད་ལེན་དང་བྱེ་མའི་བཅུད་ལེན་ཞུས་ཤིང་། བླ་མ་འཇམ་དབྱངས་པ་ལས། དུས་འཁོར་ས་རིས། མེམཁའ་རྒྱ་མཚོའི་ལྔ་བསྡུས། ཉི་ཟླ་གཟའ་འཛིན། བརྟག་གཉིས། རྡོ་རྗེ་རྩེ་མོ། འཇམ་དཔལ་རྩ་རྒྱུད། རྡོ་རྗེ་འབྱུང་བ། ཀུན་དགའ་སྙིང་པོའི་འགྲེལ་པ། དེ་ཁོ་ན་ཉིད་བསྡུས་པ་ཏ་ཐ་སཾ་གྲ་ཧ། སྦྱོར་རྒྱུད། རྡོ་རྗེ་དབྱིངས། ཀུན་རིག །རབ་གནས་དོན་གསལ་ལ་སོགས་པ་ཞུས་ཤིང་། ས་སྐྱ་པའི་བླ་མ་བདག་ཉིད་ཆེན་པོའི་དྲུང་དུ། ཐུགས་བསྐྱེད་ཆེན་མོ། རྒྱུད་གསུམ་གྱི་གདམས་པ་ཁ་ཚར་ཞུས་ཤིང་། བླ་མ་ཁྲོ་ཕུ་བ་ལས། རྡོ་རྗེ་ཕྲེང་བ་གུར་མགོན་དྲེག་མགོན་ལ་སོགས་པ་ཞུས་ཤིང་། བླ་

མ་འཚོགས་འདུས་པ་ལས། ཆོས་དབང་ལུགས་ཀྱི་གསང་བ་ཡོངས་རྫོགས་ཐུགས་རྗེ་ཆེན་པོ་ཡང་སྙིང་འདུས་པ། རྫོགས་ཆེན་སངས་རྒྱས་མཉམ་སྦྱོར། འཁོར་བ་དོང་སྤྲུག །བླ་མ་གསང་འདུས། མགོན་པོ་མ་ནིང་། བཅུད་ལེན་བརྒྱ་རྩ། རྒྱ་མཚོ་དུ་རུ་ཀའི་གཏད་རྒྱ། གཟོ་ཡིག་པ་ཏྲ། མེ་སྒྱོགས་ཆུ་སྒྱོགས། དཔག་ཆེན་དཔག་ཆུང་། ཁྲོམ་སྒྲུབ་པ་ལ་སོགས་ཞུས་ཤིང་། ཁང་དམར་པ་ལས། ཚེ་བདག་པཱ་ལ་པ་ཏྲ། ཚ་ཚ་སྙོན་པ། ཙིཏྟ་དམར་པོ། མ་མོ་དུག་གི་སྤུ་གྲི། དུ་བ་རླུང་ཞོན། འབུམ་པ་ནག་པོ། མུ་སྟེགས་ལྷ་བདུན། རྡོ་རྗེ་གཅོད་པ། སེར་བ་སྲུང་འབེབས་ལ་སོགས་པ་ཞུས་ཤིང་། གཉོས་མཐིང་མ་པ་ལས། བཀའ་བརྒྱད་བདེ་གཤེགས་འདུས་པ། གནམ་ལྕགས་ཨུར་མོ། ཕུར་པ་གཏེར་མ། ཌཱཀྐི་གསང་བ་ཡེ་ཤེས། མགོན་པོ་ལེ་བདུན་མ། སྟག་ཞོན། བྱ་ཞོན། སེང་ཞོན་སྒྲུབ་ཐབས་ལ་སོགས་པ་ཞུས་ཤིང་། དེ་ཡང་སྔར་གསང་ཕུར་བཞུགས་དུས། ཁམས་པ་རྣམས་ཀྱིས་གནས་ཁང་གཅིག་ནས་གཅིག་ཏུ་ལན་བདུན་ཕུད་པས། ཁྲོ་ཕུ་བ་དཀོན་མཆོག་དཔལ་དང་ལྷན་ཅིག་བཞུགས་ཤིང་ཡོད་པ་ལ། དགུང་གཅིག་གི་སྐབས་སུ། བླ་བྲང་པ་ཆོས་དཔལ་བཟང་པོས་ཁྲོ་ཕུ་བ་ལ་ཤོག་གསུང་ནས། དགེ་བཤེས་བསམ་ཡས་པ་འདི་འདིར་ཆགས་ན་གྲ་ས་འདི་ལ་ཕན་པ་ཞིག་འོང་བ་འདུག་སྟེ། ཁམས་པ་ངན་པ་འདི་རྣམས་ཀྱིས་སྡོད་དུ་མི་འཇུག་པ་འདུག་པས། ཇ་འདི་ཁྱེར་ལ་ཁོང་གལ་ཆེ་བ་རྣམས་ལ་དྲོང་། སྣམ་བུ་འདི་གཉིས་ཐོང་། ཁྱེད་

ཀྱིས་ལབ་ལབ་གྱིས། ངའི་ཡང་ལབ་པ་ཡིན་གྱིས་གསུངས་ནས། ཇ་ཞོ་ཕྱེད་དང་སྣམ་བུ་གཉིས་བསྐུར་བ་ཁྱེར་ནས། སློབ་དཔོན་པས་འདི་སྐད་གསུང་། ཇ་འདི་འཐུང་བྱས་པས། ཇ་སང་བཏུང་བས་ཆོག །དོ་དགོངས་མི་ཁོམ་པར་ཡོད་ཟེར་ནས་གཤེགས་སོ། །ཕྱིར་ནང་ཐོ་རེང་ཁྲེས་པོ་བསྒྲོགས་ནས་ངེད་འགྲོ་བ་ཡིན། ངའི་ཤུལ་ན་ཁོང་རྣམས་ཟོ་ཞིག་གསུངས་ནས་བཞུད་དོ། །གྲོགས་པོ་གཅིག་ཡར་བྱུང་བ་དང་ལོ་ཙཱ་བ་ཆེན་པོའི་སྐུ་འབུམ་རྩར་འཕྲད་བྱུང་བས། ཁྱོད་འགྲོ་བ་ཨི་ཡིན་ཟེར་བས། ང་ཁམས་པའི་ཐད་དུ་སྡོད་ས་མི་འདུག་པས་འགྲོ་ཟེར། ཁྱོད་རྩོམ་པ་ལ་ནི་ཐོགས་པ་མེད། ཁོང་རྣམས་ལ་ངན་སྨྲས་ཀྱི་ཚིགས་བཅད་ཅིག་འཇོག་རྒྱུ་ཡིན་ནམ་ཟེར་བས། ཤོག་བུ་བྲེ་ཁ་གང་ལ་ཤོང་ཐང་ཞིག་བྲིས་ནས་ཆོས་ཁྲིར་བསླན་ཡོད། ད་དུང་འདི་ནས་དུམ་གཅིག་བསྐུར་བས། འདི་ཁྱེར་ཅིག་གསུངས་ནས་རྐྱེན་ལ་ཁམས་འདུས་པ་ཀ་ཁ་སུམ་ཅུ་མཛད་ནས་ཡར་བསྐུར། ཁོང་རྣམས་ཀྱིས་ཆོས་ཀྱི་ཁྲིའི་ཡིག་ངན་དེ་དར་དུ་མ་སྟེར། ཀ་ཁ་སུམ་ཅུ་འདི་རྒྱ་ཡུལ་ཡན་ཆོད་དུ་དར་བར་གྱུར་ཏོ། །དེ་ནས་སྐབས་གཅིག་ཏུ་དབུར་སྟོད་ལ་ཡར་བསོད་སྙོམས་ལ་བྱོན་པ་ལ། ན་བཟའ་ལ་ཡང་ཆོས་ཤམ་སྟོད་ཐུང་བོད་ཕྲུག་དུང་ཁའི་ཕྱམ་ཙེ་ཐོ་རེ་པ་ཞིག་དང་། མཐའ་གཉིས་སུ་མ་ལྷུང་བ་ཙམ་ལས་མེད། ཆ་མདའི་ཡུལ་ཁང་ཞིག་ཏུ་བཞུགས་པའི་ནུབ་མོ་དབུས་སྟོད་ནས་ཡོང་པའི་དགེ་བཤེས་གཅིག་ཀྱང་དེར་བསྡད་འདུག་པ་དེ་ན་རེ། ཁྱེད་གང་ནས་ཡིན་ཟེར། ང་གསང་ཕུ་ནས་ཡོང་བ་ཡིན་བྱས་པས། སློབ་

གཉེར་ཅི་བྱས་ཟེར་བས། འདུལ་བ་དང་། བྱམས་ཆོས་ལྔ། ཚད་མ་ལ་སོགས་པ་ཤེས། ཁྱེད་གང་ནས་ཡིན་གསུངས་པས། ང་རྒྱ་མ་ནས་ཡིན། ཡུལ་ནི་ཟོལ་ཕུག་པ། བཙུན་པ་ནི་བྱ་ཡུལ་དུ་བྱས། སློབ་གཉེར་ནི་དབུ་མ་འཇུག་པ་ལེགས་པོ་ཞིག་ཤེས་ཟེར་བས། འོ་ན་རྒྱ་མ་ན་གྲུབ་ཐོབ་ལྕོག་ལའི་སྒྲུབ་ཁང་བྲག་ཁུང་ཞིག་ཡོད་ཟེར་བ་དེ་ཅི་འདྲ་ཞིག་ཡོད་གསུངས་པས། བྲག་ཁུང་ལེགས་པོ་ཞིག་ཡོད་ཅི་བྱེད་ཟེར། བསོད་སྙོམས་ལ་ནས་རྐྱལ་པ་བཟང་བ་གང་རྙེད་ན། དེར་དགུན་བཞུགས་གཅིག་བྱས་ན་བསམས་གསུངས་པས། འོ་ན་ང་ཡང་དགུན་དེར་འདུག །ང་ལ་སྐོར་འདི་ན་ཚར་ནས་བསྡུ་རྒྱུ་འགའ་ཞིག་ཡོད། ངས་ཞབས་ཏོག་བྱེད་ཟེར། གྲོང་དེར་སྔགས་པ་བུ་ཕྲུག་མི་སོས་པ་ཞིག་འདུག་པས། ཁྱེད་ཀྱིས་རྟ་མགྲིན་ནག་པོའི་སྦྱིན་བསྲེགས་ཨེ་ཤེས་ཟེར། ཤེས་གསུངས་པས། འོ་ན་ང་ཅན་བྱོན་ཟེར་ནས་སྦྱིན་བསྲེགས་མཛད་པས། ནས་རྐྱལ་པ་བཟང་བ་གང་ཕུལ། དེ་ནས་དགེ་བཤེས་དེ་དང་བསྡོངས་ནས་ལྕོག་ལའི་བྲག་ཁུང་དུ་བྱོན། ཟླ་བ་བརྒྱད་དུ་མཚམས་བྱེད་པའི་དམ་བཅའ་མཛད། མུན་ཁང་ཞིག་མཛད་ནས་བཞེས་པ་དེར་དྲངས། ཐོ་རངས་ཀྱི་ཐུན་ལ་དགེ་བཤེས་དེ་ལ་ཕར་ཕྱིན་ཐུན་ཆེ་བ་རེ་གསུང་། ཟླ་བ་ལྔ་སོང་བའི་ཐོ་རེས་ཁར། ནམ་མཁར་སིལ་སྙན་གྱི་སྒྲ་དང་། གླུ་དབྱངས་སྙན་པོ་གསན་ནས་གཟིགས་པས། ལུང་པའི་མདའ་ན་བྱེ་མའི་རི་ཆུང་དང་། འབབ་ཆུ་གཅིག་ཡོད་པའི་ས་ནས་ཡར། རྟ་གསར་ཁྲབ་དང་དྲིལ་བུ་གཡེར་ཁས་བརྒྱན་པ་ཞིག་ལ། བུད་མེད་ལོ་

བཅུ་དྲུག་མའི་ན་ཚོད་ཙམ་ཟ་འོག་གི་གོས་དང་། གསེར་གཡུས་བརྒྱན་པ། གསེར་གྱི་པ་ཏྲས་གདོང་གཡོགས་པ་ཞིག་ཞོན་ནས་བྱོན་པའི་ཐུ་བ་ལ་འཇུས་ནས་འཕགས་མ་ཐུགས་རྗེས་འཛིན་པར་ཞུ་ཞུས་པས། རིན་པོ་ཆེའི་དབུ་རྒྱན་གཅིག་འདུག་པ་དེ་ཕུད་ནས་ཁོང་གི་མགོ་ལ་བསྐོན་ནས། དུས་འདི་ནས་བཟུང་སྟེ་བྱིན་གྱིས་བརླབ་ཅིང་དངོས་གྲུབ་སྦྱིན་པར་བྱའོ། །ཞེས་གསུངས་ནས། དེའི་བྱིན་བརླབས་ཀྱིས་ཟླ་བ་གཅིག་གི་བར་དུ། བདེ་གསལ་མི་རྟོག་པའི་ཏིང་ངེ་འཛིན་ཕྱམ་བརྡལ། རིག་འཛིན་ཆེན་པོ་ཀུ་མ་རཱ་ཛ་དང་མཇལ་པའི་ལུང་བསྟན་ཡང་ཐོབ། དེ་ནས་མཚམས་བཀྲོལ་ནས་ཡབ་ཡུམ་གྱི་དོན་དུ་ཀུན་རིག་གི་ཆོ་ག་བརྒྱ་རྩ་བརྒྱད་མཛད། སློབ་དཔོན་ལ་བསྟེན་ཚུལ་གྱི་ཆོ་ག་ཡང་འདི་ཙམ་མཛད་པས་བྱིན་བརླབས་ཡོང་ངེས་སྙམ་ནས་དབང་ཞུས་པའི་ཞུ་བ་བྱས། དེས་ཆོག་གསུངས། སློབ་དཔོན་ཆུ་ལེན་དུ་སོང་རིང་། ཚོན་རྩི་ཚོས་མོངས་དང་། རྩིག་པ་བྱ་ཅག་མ་བྱེད་པའི་ལྕོག་གི་ལྡེལ་ཀ་དང་བཅས་པས་དཀྱིལ་འཁོར་ལེགས་པ་གཅིག་བཞེངས་ཚར་འདུག་ན་སྔགས་པ་ཕྱུག་པོ་བཟའ་ཚང་འཁོར་གཅིག་དང་། ཕོ་མོ་སུམ་ཅུ་ཙམ་གྱིས་དབང་ཞུས་སོ། །ཀྱེ་མ་ཀྱེ་ཧུད་མགོན་པོ་ཐུགས་རྗེ་ཅན། །མི་མངོན་དབྱིངས་ནས་བདག་ལ་གཟིགས་མཛོད་ལ། །ངག་གི་དབང་པོའི་མཁྱེན་རབ་འོད་སྟོང་གིས། །བདག་བློའི་སྙིང་གི་མུན་པ་མྱུར་དུ་སོལ། །དེ་ནས་དགུང་ལོ་ཉེར་བདུན་ལ། རིག་འཛིན་ཆེན་པོའི་དྲུང་དུ་འབྱོན་པ་ལ་བསམ་ཡས་ན་མར་བྱོན་པར། གཡག་སྡེ་པཎ་ཆེན་དང་འཕྲད་པས། ད་ཁྱོད་གར་འགྲོ་ཐམས་ཅད་ཆོས་

རྗེ་ཀརྨ་པ་ལས་ཆོས་ཞུ་བ་ལ་ཡར་འཚོགས་པས་དེར་འགྲོ་ན་འཐད་ཟེར་བ་ལ། ང་ཡར་སྟོད་རྒྱམ་གྱི་ཕུ་ན་རིག་འཛིན་ཆེན་པོ་ཀུ་མ་རཱ་ཛ་བཞུགས་ཟེར་བ་ལ་མཇལ་དུ་འགྲོ་བ་ཡིན་གསུངས་ནས། རྒྱམ་ཕུར་བྱོན་པས་རིག་འཛིན་ཆེན་པོ་དཔོན་སློབ་རྣམས་སྦྲ་ཕྱ་ཐེར་བདུན་ཅུ་ཙམ་མཛད་ནས་བཞུགས་པ་དང་མཇལ། བླ་མའི་ཞལ་ནས་མདང་ལྷའི་བྱ་ཡིན་ཟེར་པའི་བྱ་ཡ་མཚན་ཅན་གཅིག་ལ་བྱ་བྲན་སྟོང་གིས་བསྐོར་ནས་ངའི་དཔེ་ཆ་ཁྱེར་ནས་ཕྱོགས་ཐ་དད་དུ་སོང་བ་རྨིས། དེ་ཁྱེད་ལ་ལྟ་བ་ཡིན་པར་འདུག །ངའི་ཆོས་འདིའི་བརྒྱུད་པ་འཛིན་པ་ཞིག་ཡོང་བར་འདུག་གསུངས་ནས་དགྱེས་ཚོར་ཆེན་པོ་མཛད། འདི་དུས་དགུང་ལོ་ཉེར་བདུན་འགྲོ་གསུངས། དཔྱིད་ཀའི་བརབཀའ་ཆོས་སྒུགས་ནས་ཞེས་པའང་འདུག་དེར་ལུང་སྟོང་གཅིག་ནས་གཅིག་ཏུ་ལན་དགུ་འཕོ་སྐྱས་བྱས་ནས། གཞི་རེ་ཟིན་དུས་སྐྱས་རེ་བྱས་པས་ལུས་ངག་ལ་གཟན་པར་བྱུང་། གོས་ངན་པས་ཉེ་གནས་བཙུན་ཆུང་འགའ་ཡོད་པ་དང་། བསྐོར་ཁྱི་ཡང་སྡང་བར་བྱུང་། ཁྲིད་སང་ཉིན་འཛུགས་པའི་དོ་དགོངས་ཁྲིད་གཉེར་བ་གཉིས་ཀྱིས་ཚོགས་བྲེ་ཆེན་པོ་ཞིག་ཁྱེར་ནས། དགེ་བཤེས་བསམ་ཡས་པའི་ཆོས་ཁྲལ་གར་ཡོད། དབང་གང་རྒྱུད་དང་བཅས་པ་ཞུ་བ་ལ་ནས་ཁལ་བདུན་རེ་དགོས་པ་ཡིན་ཟེར་བས། ང་ལ་ནི་བྲེ་གང་ཡང་མེད་ཆོས་ཐོབ་པར་བྱེད་པ་ཡིན་གསུངས་པས་བསྡད་པ་ཡིན་བྱས་པས། ཁྲིད་པ་འདི་ཙམ་གཅིག་གི་ཆོས་ཁྲལ་སུས་འཇལ་ཟེར་བ་དང་། སྐྱེ་བ་སྔ་མ་ཚོགས་མ་བསགས་པས་དཀའ་ལས་དེ་ཙམ་ཞིག་བྱས་པས། ཆོས་ཁྲལ་ལ་སྡུག་ནས་འགྲོ་དགོས་པ་འདུག་པས་མི་ལ་ངོ་ཚ། ནམ་ལངས་ཙ་ན་ལུང་པ་འདིའི་མདོར་སླེབས་པ་བྱེད་དགོས་དགོངས་ནས།

ཐོ་རངས་བཞེངས་ཀྱིན་ཡོད་ཙ་ན། དགེ་བཤེས་བསམ་ཡས་པ་ཁྱེད་ད་ལྟ་ཆོས་རྗེའི་དྲུང་དུ་ཤོག་གསུངས་ཟེར་བས། ངེད་རང་འགྲོ་རྩིས་ཡིན་ཡང་གསུང་བཅག་ན་མི་ཉན་དགོངས་ནས་ཞབས་དྲུང་དུ་ཕྱིན་པས། ཞལ་འཛུམ་མཛད་ནས། སྤྲ་སྤྲོ་མ་བྱེད་པར་བཞུགས་ལ་ཇ་འཐུང་གསུང་། ཁྲིད་གཉེར་བ་གཉིས་ཤོག་གྱིས་གསུངས་ནས། ཚ་བ་གནང་བའི་གྲལ་དུ་དགེ་བཤེས་འདིའི་ཆོས་ཁྲལ་ནང་ནས་འདེབས་པ་ཡིན་ཁོང་མ་གཙེར། ང་ལ་ད་རེས་ཀྱི་ཆོས་ཉན་འདི་ཚོ་ཐམས་ཅད་ལས་ཁོང་དགའ་བ་ཡིན་གསུང་། །ཨེ་མ་ངོ་མཚར་རྨད་དུ་བྱུང་བའི་ཚུལ། །ཆོས་འཕགས་དྲུང་དུ་རྟག་ངུ་མཇལ་པ་དང་། །བྱམས་མགོན་དྲུང་ན་ཐོགས་མེད་མཇལ་བ་ལྟར། །དམ་པས་དམ་པ་བརྟེན་པ་འདི་ནི་མཚར། ཕྱེ་བྲེ་གསུམ་དང་དངུལ་ཆུ་རིལ་བུ་ཉི་ཤུ་རྩ་གཅིག་གིས་ཟླ་བ་གཉིས་ཀྱི་གསོལ་བ་མཛད་ཅིང་། ཁ་བ་བབས་དུས་སྒྱེ་ནང་དུ་བཞུགས་ནས། གོས་གདན་གཉིས་ཀའི་གོ་བཅད་ཅིང་། ཆོས་ཕྱོགས་སུ་དཀའ་བ་མང་དུ་སྤྱད་ནས། བླ་མའི་དྲུང་དུ་ཆོས་བཀའ་ཡང་མང་བར་གསན་ནས། གཏེར་མ་ཉང་ལུགས་ཀྱི་གུ་རུ་ཞི་དྲག་བྱིན་རླབས་ལུ་གུ་རྒྱུད། བཀའ་བརྒྱད་ཕག་ནག་དམར་པོ་ལ་སོགས་པའི་སྒྲུབ་ཐབས་མང་པོ་དང་། ཀུན་བྱེད་རྒྱལ་པོ། ཨ་རོ་ནམ་མཁའ་རླུང་འབྱམས། ཀུན་བཟང་ཆེ་བ་རང་གནས། སྲིད་པའི་འབེབས་ཆེན་མོ། ཀློང་ཆེན་རབ་འབྱམས་ཀྱི་ཤེས་བྱ་མཐའ་གཅོད། ཕྱི་སྐོར་ནང་སྐོར་གསང་སྐོར་གྱི་རྒྱུད་མང་པོ་དང་། ཁྱད་པར་གསང་བ་བླ་ན་མེད་པའི་དབང་བཞི། ཟབ་མོ་པོད་བཞི་ཕྲན་ཚེག་དང་བཅས་པ། རྒྱུད་བཅུ་བདུན་ཊི་ཀ་དང་བཅས་པ། མན་ངག་བརྒྱ་

དང་བཅུ་དགུ་ཕྲན་ཚེག་དང་བཅས་པ། བཀའ་སྲུང་ཨེ་ཀ་ཙ་ཏིའི་སྒྲུབ་ཐབས་ལེགས་ལྡན་ལྕམ་དྲལ། གཟའ་བདུད་དང་། དམ་ཅན་གྱི་སྒྲུབ་ཐབས་སྐོར་དང་བཅས་པ་ལ་སོགས་ཞུས་ཤིང་། བསྟན་པ་དམ་པའི་ཆ་ལུགས་མ་ལུས་པ། བཀའ་ཡི་བསྟན་པའི་བབས་རྗེས་གནང་དང་བཅས་ནས་གནང་བར་མཛད་དེ་བསྟན་པས། ཁམས་གསུམ་ཆོས་ཀྱི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས། ཆོས་ཀྱི་རྒྱལ་པོར་གྱུར་ཅིང་གང་གིས་མཐོང་བ་དང་། ཐོས་པ་དང་། དྲན་པ་དང་། རེག་པ་ཐམས་ཅད་གདོད་མའི་ས་ལ་འགོད་པའི་མཐུ་ཆེན་པོ་མངའ་བ་ཡིན་ནོ། །གདོད་མའི་མགོན་དང་རྣམ་དབྱེར་མི་ཕྱེད་ཅིང་། །འགྲོ་བའི་དོན་དུ་ཐུགས་རྗེས་ཐབས་ཆེན་འགྱེད། །ཐེག་མཆོག་སྙིང་པོའི་ཆར་རྒྱུན་རྒྱ་ཆེ་བས། །སྐལ་བཟང་ལྟ་སྤྱོད་ལོ་ཏོག་རྒྱས་མཛད་བསྟོད། །དེ་ནས་མཆིམས་ཕུར་ལོ་བདུན་གྱི་བར་དམ་བཅའ་སྒྲུབ་པ་མཛད་དུས། ལྷུན་གྲུབ་སྒང་དུ་ཕག་མོ་ནག་མོའི་ཞལ་ཞག་བདུན་མཐོང་། དེ་ནས་ཨོ་རྒྱན་དྲག་སྒྲུབ། ཆེ་མཆོག་དབུ་ཉི་ཤུ་རྩ་གཅིག་ཕྱག་བཞི་བཅུ་ཞེ་གཉིས་པ་ལ་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉི་ཤུ་རྩ་ལྔས་བསྐོར་བ་སྐབས་སྐབས་སུ་གཟིགས་སོ། །གནོད་སྦྱིན་ཛཾ་ལྷས་ནོར་བུ་གཅིག་ཕུལ་བ་དང་། རྡོ་རྗེ་གཡུ་སྒྲོན་མས་ཞལ་བསྟན་ནས། རང་གི་ཕྱི་སྒྲུབ་ནང་སྒྲུབ་གསང་སྒྲུབ་བླ་ན་མེད་པ་དང་བཅས་པའི་སྒྲུབ་ལུགས་ཕུལ་ལོ། །དགེའུ་གོང་དུ་བཞུགས་དུས་གུ་རུ་ཞི་བའི་ཞལ་གཟིགས། མཁའ་སྤྱོད་དུ་བྱོན་ནས་མཁའ་འགྲོ་མ་རྣམས་ཀྱིས་ཆོས་འཆད་ལུགས་རྣམ་ཐར་རྣམས་གཟིགས་ཤིང་། བཀྲ་ཤིས་མེ་ཏོག་འཐོར་བ་དང་། འབྱོན་

དུས་མཁའ་འགྲོ་མ་རྣམས་ཀྱིས་སྐྱེལ་ཐུང་བྱས་ཏེ། མཁའ་འགྲོ་སྙིང་ཐིག་གི་རྗེས་གནང་ཕུལ་ལོ། །དགེ་འུར་བཞུགས་དུས་ཕག་མོ་དམར་མོ་དང་། རྡོ་རྗེ་སེམས་དཔའ་དང་། རྟ་མགྲིན། སྒྲོལ་མ། ཚེ་དཔག་མེད་བཞེངས་སྟབས་རྣམས་འོད་དཀྱིལ་ནས་ཞལ་གཟིགས་སོ། །དུར་ཁྲོད་དུ་བཞུགས་དུས་ལས་ཀྱི་མཁའ་འགྲོ་མ་ཨེ་ཀ་ཙ་ཏི་སྤྱན་གཅིག་མ། སྤྱང་མོ་ཞིང་དབྱུག་ཅན་མཐིང་མོ། གཟའ་བདུད། རྡོ་རྗེ་ལེགས་པ་རྣམས་གཟིགས་སོ། །བྱ་འུག་ལྷ་ཁང་དུ་མགོན་པོ་ཕྱག་བཞི་པ། རྡོ་རྗེ་བདུད་འདུལ། དགེ་བསྙེན་ཉེར་གཅིག་གཟིགས་སོ། །ཆོས་ཁམས་དགེ་བ་རྒྱ་མཚོའི་གོས་ཅན་གཞིར། །བྱང་ཆུབ་སེམས་མཆོག་བཟང་པོའི་ས་ལུད་བྲན། །སྨོན་དང་འཇུག་པའི་ས་བོན་ལེགས་བཏབ་ནས། །དགེ་བཅུའི་ལོ་ཐོག་གསར་དུ་སྨིན་མཛད་བསྟོད། །དེའི་དཔྱིད་སོར་ཇོ་བོ་མཇལ་དུ་བྱོན་པས་ཇོ་བོའི་མཛོད་སྤུ་ནས་འོད་ཟེར་སྤྲོས་པ། ཉིད་ཀྱི་མཛོད་སྤུར་ཐིམ་པས། བྱ་རྒོད་ཕུང་པོའི་རི་དང་། ལིའི་ཡུལ་དང་། པཎྜི་ཏ་མ་ཧཱ་མུ་ཏྲ་བྱ་བར་སྐུ་འཁྲུངས་པ་དང་། རྒྱ་གར་དུ་མཁྱེན་པའི་ཆོས་གསར་རྙིང་ལ་སོགས་པ་ཐུགས་ལ་བཀྲ་ལམ་པ་ཞིག་གསལ་བས་ཐུགས་རབ་ཏུ་བདེ་བ་ཞིག་བྱུང་། དན་ཕག་ཏུ་བྱོན་ནས་གསང་སྙིང་གསན་ཏེ་མར་ལམ་རེས་མོ་དགོན་པར་བྱོན་ནས། བླ་མ་རེས་མོ་བ་དང་གསུང་གླེང་མཛད་པར། བུད་མེད་ནག་མོ་གཅིག་གིས་པོ་ཏི་གཅིག་ཁྱེར་བྱུང་ནས་གཟིགས་པས། ཌཱཀྐི་ཙིཏྟ་བྱ་བ་ཞིག་འདུག་དེའི་འཕྲོ་ལ་མི་སྣང་བར་གྱུར་ཏོ། །དེ་ལ་བླ་མ་རེས་མོ་བ་ངོ་མཚར་སྐྱེས་ནས་ཆོས་ཞུས་པས། མཆིམས་

ཕུར་སྙིང་ཐིག་གསུང་བའི་ཞལ་བཞེས་མཛད་ནས་བྱོན་ནོ། །དགུང་ལོ་ཉི་ཤུ་རྩ་བརྒྱད་ལ་བཞེས་པ་འབྲི་ཁུང་ཆོས་ཀྱི་རྒྱལ་པོ་སྐུ་འཁྲུངས་པ་དང་དུས་མཚུངས་པ་ཤིང་ཕག་ལོ་ཡིན་དགོས། མཐོང་སྣང་འོད་དྲ་ལས་དགུང་ལོ་སོ་གཉིས་ལ་གསུངས་པ་མཛད་འདུག་དེ་ལྟར་ན་ས་མོ་ཡོས་ཡིན། ར་མོ་ཅན་དུ་སྙིང་ཐིག་གསུངས་པས་ཆོས་འཛུགས་པའི་སར་མེ་ཏོག་གི་ཆར་བབས། སྤྲོས་བཅས་ཀྱི་ཚེ་འོད་མཐིང་ཀས་ཐམས་ཅད་བརྡལ་བར་ཁྱབ་ཅིང། སྤྲོས་མེད་ཀྱི་དགོངས་མོ་འོད་ཟེར་ཁ་དོག་ལྔས་ཁྱབ་ཅིང་། ཨོ་རྒྱན་སྐུ་མདོག་མཐིང་ཁ་དང་། ཡེ་ཤེས་མཚོ་རྒྱལ་དམར་མོ་ཕྱག་ན་བུམ་པ་བསྣམས་ནས། ཁོང་རང་ལ་དབང་བསྐུར་དུས་ནམ་མཁའ་ལ། འོད་དང་སྒྲ་དང་། སིལ་སྙན་དང་། ངོ་མཚར་བ་མང་པོ་བྱུང་ཞིང་། དཀྱིལ་འཁོར་གྱི་རྩར་བུ་མོ་ལོ་བཅུ་དྲུག་ཙམ་གཡུ་ལྟར་སྔོ་བ་བདུན་བྱུང་ནས། བྲོ་འཁྲབ་པས་ཆེད་དུ་དགྱེས་པ་དང་མི་དགྱེེས་པ་ལ་སོགས་པ་མ་མཛད་གསུང་། འདིའི་དུས་སུ་ཨོ་རྒྱན་ཡབ་ཡུམ་འཁོར་དང་བཅས་པས་མཁའ་འགྲོ་སྙིང་ཐིག་གི་རྗེས་གནང་། ལྷ་རིང་བྲག་དང་། ཨོ་རྒྱན་རྫོང་དང་། ཞྭའི་ལྷ་ཁང་གསོ་དགོས་པ་དང་། བསྟན་བཅོས་རྩོམ་པའི་ལུང་བསྟན་ཡང་ཐོབ། མཚན་ཡང་ཨོ་རྒྱན་གྱིས་དྲི་མེད་འོད་ཟེར་བཏགས། ཡེ་ཤེས་མཚོ་རྒྱལ་གྱིས་རྡོ་རྗེ་གཟི་བརྗིད་ཅེས་གསོལ་ཏོ། །དེ་ཡང་ཨ་ཏི་བཀོད་པ་ཆེན་པོ་དང་། སྒྲ་ཐལ་འགྱུར་རྩ་བའི་རྒྱུད་ནས། དེ་འོག་བློ་གྲོས་མཆོག་གིས་འཛིན། །ཞེས་པ་ནི་ཆོས་རྗེ་རིན་པོ་ཆེར་བཞེད། བཀའ་ཆེམས་ལས། བློ་གྲོས་མིང་ཅན་ཐོགས་མེད་བྱ་བཞིན་རྒྱུ། །ཞེས་གསུངས་སོ། །སྐྱེས་བུ་འདི་ནི་འཕགས་ཆེན་མཆོག་ལ་དབང་། །རྒྱལ་བས་ལུང་བསྟན་ཆོས་བདག་རྣམས་ཀྱིས་བསྟོད། །མཁའ་འགྲོ་རྣམས་ཀྱིས་ཟབ་གཏེར་བདག་པོར་བསྐོས།

འདི་འདྲའི་མཁས་གྲུབ་དམ་པ་གཞན་སུ་ཞིག །དེ་ནས་གངས་རི་ཐོད་དཀར་གྱི་མགུལ་དུ་བྱོན་ནས་བསྟན་མ་བཅུ་གཉིས་ལྷ་རབས་མཆེད་དགུ་རྣམས་ཀྱིས་བསུ་བ་མཛད་པའི་སྣང་བ་བྱུང་ངོ་། །ལོ་གསུམ་སྒྲུབ་པ་མཛད་ཅིང་བཞུགས་དུས། ཐོ་རངས་ཁ་ཞིག་གི་རྨི་ལམ་ན་བླ་མ་ཀུ་མ་རཱ་ཛ་བྱོན་ནས་སྡིག་མཛུབ་གཅིག་མཛད་དེ། ཅི་ཡང་མི་གསུངས་པས་དབང་གི་བརྡ་རུ་གོ་བ་དང་། འདི་དུས་གཤེགས་རྟགས་བྱུང་ཡང་། ཏིང་ངེ་འཛིན་གཅིག་གིས་ཚེ་འཕེལ་བ་ཡིན་གསུང་། དེའི་ཉི་མ་རྩེ་ཤར་ལ་མངོན་སུམ་གཟིགས་དུས། ཤར་ཕྱོགས་ཀྱི་ནམ་མཁའ་ལས་སྒྲ་ཞིག་གྲགས་པ། དེའི་དུས་ནམ་མཁར་གཟིགས་པས། འོད་ཀྱི་དཀྱིལ་འཁོར་ཚོམ་བུ་དང་བཅས་པའི་དཀྱིལ་དུ་ཀུན་བཟང་ཡབ་ཡུམ་དང་། ཞི་ཁྲོའི་དཀྱིལ་འཁོར་མང་པོ་ས་གཞི་བར་སྣང་སྟེང་འོག་ཕྱོགས་མཚམས་གང་བར་གཟིགས་པ་དང་། བི་མ་ལ་སྐུ་མདོག་ལྗང་སེར་དང་མཁའ་སྤྱོད་ཀྱི་བླ་མ་བཞི། བླ་མ་ཀུ་མ་རཱ་ཛ་ལོངས་སྤྱོད་རྫོགས་པའི་ཆ་བྱད་དང་། ཨོ་རྒྱན་པདྨ་རྒྱལ་པོའི་ཆ་བྱད་ཅན་གཟིགས་པ་དང་། དེ་ནས་བཟུང་ལྷའི་ཞལ་མང་པོ་རྒྱུན་ཆད་མེད་པར་གཟིགས་གསུང་། དེ་ནས་བོད་ཀྱི་རི་བོ་རྩེ་ལྔར་བྱོན་དུས་འཇའ་དང་འོད་ཀྱི་གུར་མང་པོ་ཕུབ་ནས་ཡ་མཚན་གྱི་རྟགས་མང་པོ་བྱུང་ཞིང་། སྒྱུ་འཕྲུལ་སྐོར་གྱི་ཆོ་ག་མཛད་པས་ཞི་ཁྲོའི་དཀྱིལ་འཁོར་ནམ་མཁའ་དང་བྲག་ལ་སོགས་པ་ཐམས་ཅད་དུ་ཚོམ་བུ་གསལ་བར་ཀུན་གྱིས་མཐོང་བ་དང་། དར་ཅིག་སྣང་བ་འགྱུར་ནས། ཤར་ལྷོའི་མཚམས་སུ་གཟིགས་པས། ནམ་མཁར་བི་མ་ལ་བཞུགས་ནས་ཕྱག་མཛུབ་ཤར་ལྷོའི་

མཚམས་སུ་བསྟན་པ་གཟིགས་པ་དང་། ལྷ་ཁང་གསོ་བའི་སྔར་གྱི་ལུང་བསྟན་རྗེས་སུ་དྲན་ནོ། །དེ་ལྟའི་སྐྱེས་བུ་ཁྱུ་མཆོག་དེའི་ཡོན་ཏན་བརྗོད་པ། ཁྲོམ་ནས་ཆོས་བཤད་གངྒཱའི་ཆུ་རྒྱུན་འདྲ། །རིག་གྲྭར་རྩོད་དུས་འབྲུག་སྒྲ་སྒྲོགས་པ་འདྲ། །བསྟན་བཅོས་རྩོམ་དུས་རི་གཟར་འབབ་ཆུ་འདྲ། །མཉམ་པར་འཇོག་དུས་རྣལ་འབྱོར་མངོན་སུམ་འདྲ། །ཞེས་པ་དོན་ལ་གནས་པའོ། །འདི་དུས་གཏེར་ལུང་ལས། ཨོ་རྒྱན་གྱི་སློབ་དཔོན་གྱིས། འབྲི་གུང་སྒོམ་པ་ཀུན་རིན་ལ། འབྲི་ཞེས་བྱ་བའི་ས་ཕྱོགས་སུ། །ཀུན་དགའི་མིང་ཅན་བདུད་ཀྱི་བུ། །ལུས་ལ་མཚོན་ཆའི་རི་མོ་ཡོད། །ཤི་ནས་དམྱལ་བར་སྐྱེ་བར་འགྱུར། །ལྷོ་ཡི་ཕྱོགས་ནས་འཇམ་དབྱངས་ཀྱི། །སྤྲུལ་པ་གཅིག་གིས་ཐུལ་གྱུར་ན། །མནར་མེད་གནས་ནས་ཐར་བར་འགྱུར། །ཞེས་པ་དེ་སྒོམ་པ་ཀུན་རིན་གྱིས་མཐོང་བ་དང་། ལུས་ལ་བལྟས་པས་རྒྱབ་ཀྱི་སྒལ་གཞུང་གཡས་སུ་རལ་གྲི་འདྲ་བའི་ཤ་མཚན་ཅིག་འདུག་པས་ངས་དབུས་གཙང་འཁྲུག་པ་ཞིག་བྱ་དགོས་བསམ་པ་ཡོད་ཀྱང་། དམྱལ་བར་འགྲོ་ན་བྱེད་དོན་ཆུང་བས། བླ་མ་དཔལ་མཆོག་པ་ལ་འཇམ་དབྱངས་ཀྱི་སྤྲུལ་པ་གཅིག་འཚོལ་ལ་ཤོག །ཆོས་ཞུ་ཡིན་གསུངས་པ་དང་། བླ་མ་དཔལ་མཆོག་བ་དབུས་གཙང་དུ་འཚོལ་དུ་བྱོན་པས། དབུས་གཙང་ན་བླ་མ་རྒྱལ་སྲས་པ་ལས་ཐུགས་རབ་ཆེ་བ་མི་འདུག་པས། སྒོམ་པ་ཀུན་རིན་ལ་ཀུན་མཁྱེན་པ་གདན་དྲང་བྱས་པས། ཁྱེད་དད་པ་སྐྱེས་པ་ན་ང་དད་པ་སྐྱེ་བ་ཡིན་པས་དེ་ལྟར་བྱའོ་གསུངས་སོ། །དེ་ནས་འབྲི་གུང་དུ་འབྱོན་པར་ཞལ་བཞེས་མཛད་དུས། མནལ་ལམ་དུ་སེང་གེ་བཞིའི་ཁྲིའི་སྟེང་ན་བི་མ་ལ་བཞུགས་ནས་ང་ནི་ཀུ་མ་རཱ་ཛའི་སྤྲུལ་བ་ཡིན། པདྨ་བརྩེགས་པའི་ཞིང་དུ་འགྲོ་སངས་རྒྱས་ཀྱི་བསྟན་པ་དར་བར་

གྱིས་ཤིག་གསུངས། ཡང་དེའི་སང་དགོངས་ཕག་མོ་ལྕགས་གདོང་མ། ཁོང་གི་གཟིམས་སའི་མདུན་གྱི་རྒྱ་མཐོངས་ཁར་བྱོན་པ། བླ་མ་ཀུ་མ་རཱ་ཛའི་སྤྲུལ་པ་ཡིན་པར་མཁྱེན་པ་དང་། ཡང་བསྟན་པའི་གཉེར་གཏད་དོ། །འདིའི་དུས་སུ་མྱ་ངན་འདས་ཆུང་མཛད་དོ། །འཁོར་གསུམ་ཡོངས་སུ་དག་པ་ལན་གཉིས་སུ། འབུལ་བ་ལྔ་དང་བདུན་གྱིས་བླ་མའི་གཤེགས་རྫོང་མཛད་ཀྱང་། བླ་མའི་ཕྱི་རྟེན་ནང་རྟེན་ལ་འོད་གསལ་སྙིང་པོའི་བསྟན་པ་མི་ནུབ་པར་བྱ་བའི་ཕྱིར་དུ། ཐེག་མཆོག་རིན་པོ་ཆེའི་མཛོད་བརྩམས་པ་དང་། དེ་དུས་སྔགས་བདག་གཟའ་དང་དམ་ཅན་རྣམས་དང་དངོས་སུ་མི་དང་མི་ལབ་པ་བཞིན་བྱུང་བ་དང་། ལས་སྒྲུབ་པ་དང་ལུང་བསྟན་པ་དང་བཀའ་སྲུང་བ་ལ་སོགས་པ་ཡང་མཛད་དོ། །ཇི་ལྟར་མཚན་མོ་དངས་པའི་ནམ་མཁའ་ལས། །རི་བོང་འཛིན་པ་ཤར་བས་ཀུ་མུད་ཏ། དགོད་པ་བཞིན་དུ་ཁ་བྱེ་ལྷག་གེར་གསལ། །ཞར་ལ་རྒྱུ་སྐར་ཚོགས་རྣམས་དམན་པར་གྱུར། །སྙིགས་མའི་དུས་འདིར་འཇམ་དབྱངས་སྤྲུལ་པ་མཆོག །ཀུན་མཁྱེན་བྱོན་པས་སྐལ་ལྡན་མཆོག་ཏུ་རྒྱལ། །ཞར་ལ་བླ་མའི་གཟུགས་བརྙན་རྣམས་ཀྱང་ཉམས། །ཡོན་ཏན་མཆོག་གིས་དམན་རྣམས་ཟིལ་གྱིས་གནོན། དེ་ལྟར་སྔར་བསམ་ཡས་སུ་བཞུགས་དུས་ཡ་བོ་དབང་རྒྱལ་ཞེས་བྱ་བས། གདན་དྲངས་ནས་ཞག་བདུན་དུ་ཀུན་རིག་གི་དབང་ཞུས། སྙིང་ཏིག་གི་ཁྲིད་ཞུས་པའི་སྔ་ཤོས་གླུ་མཁན་པ་བསོད་ནམས་སེང་གེས་བྱས། ཕྱོགས་ཀྱི་དགེ་བའི་བཤེས་གཉེན་འདུས་པ་རྣམས་ཀྱི་སྔ་ཤོས་སློབ་དཔོན་གཞོན་ནུ་སངས་རྒྱས་ཀྱིས་བྱས་ཏེ། ཡོན་བདག་ལ་སྔ་ཤོས་ཡ་བོ་དབང་རྒྱལ། བུ་སློབ་ཀྱི་སྔ་ཤོས་གླུ་མཁན་པ་བསོད་ནམས་སེང་གེ། དགེ་བའི་བཤེས་གཉེན་འདུ་བའི་སྔ་ཤོས་སློབ་དཔོན་དཔལ་མཆོག་

ཅེས་བྱ་བར་གྲགས་ཤིང་། རྒྱ་མ་པ་དཀོན་གཉེར་གྱིས་གླུ་མཁན་བསོད་ནམས་སེང་གེ་ལ། ཁྱོད་ཀྱིས་མ་བསྐོར་པའི་ས་ཆ་མེད་པས་རྫོགས་ཆེན་ལ་སུ་མཁས་པར་འདུག །ངས་ཞུ་འདོད་པ་ཡིན་ཞེས་ཟེར་བ་ལ། ངས་དབུས་གཙང་གི་བླ་མ་མ་མཇལ་བ་མེད། རྫོགས་ཆེན་པ་ཡང་མང་པོ་སྣང་སྟེ། ངེད་རང་དང་ཉེ་བའི་ས་ཕྱོགས་ཞིག་ན་ཡོངས་ཀྱི་དགེ་བའི་བཤེས་གཉེན་ཁྱད་པར་དུ་རྫོགས་པ་ཆེན་པོ་ལ་མཁས་པ་ཞིག་བཞུགས་ཟེར་བས། ཁོང་གདན་འདྲེན་པ་ལ་བཏང་ནས་རྒྱ་མའི་གནས་སུ་གདན་དྲངས། རྒྱ་མ་སྒང་པའི་དགེ་བའི་བཤེས་གཉེན་པ་རྣམས་དང་། དཀོན་གཉེར་གྱིས་སྙིང་ཏིག་ཞུས་པའི་ཚེ། ཁོང་རྣམས་དྲི་བ་ལ་རྒྱུགས་ནས་བགྲོ་གླེང་བྱེད་པར་ཞུས་པས། དེ་དེ་ལྟར་བགྱི། རིག་གྲྭ་སོགས་ཟླ་བ་གཅིག་གི་བར་དུ་ཁྱེད་རྣམས་ལ་རྩོད་རྒྱུ་ཡོད་པ་ཡིན། ཞག་བཅུ་ཙམ་གྱི་བར་དུ་མདོ་རྒྱུད་དཔང་པོར་བཞག་ནས་ལུང་རིག་གིས་རྩོད་པ་བྱེད་གསུངས་པས། ཁོང་རྣམས་སྤོབས་པ་མེད་པར་གྱུར་ནས་ངེད་རྣམས་ཀྱིས་མ་གོ་བར་འདུག་པས། ཆོས་ཐུགས་ལ་འདོག་པར་ཞུ་ཟེར་ཞིང་ཐམས་ཅད་འདུན་པར་གྱུར། དབུས་སྟོད་དུ་སྒོམ་པ་ཀུན་རིན་གྱིས་གདན་དྲངས་ནས། བྱོན་པ་དང་གྲོག་གི་མདར་ཕྱགས་ཕེབས་དུས། ཏེ་སྒྲོའི་ལས་ཀྱི་ཌཱཀྐིས་བསུ་བ་མཛད་ཅིང་ཨོ་རྒྱན་དགོན་པ་ཕུལ་ལོ། །དེ་ནས་ཞྭའི་ལྷ་ཁང་དུ་བྱོན་དུས། མི་དཀར་པོ་ཞྭ་དཀར་པོ་ཅན་ཅིག་བྱུང་ནས་ཞྭ་ཕུད་དེ་ཕྱག་བྱས་ཤིང་། ཞྭའི་ལྷ་ཁང་ལ་སྡིགས་མཛུབ་ཞིག་མཛད་ཅིང་འདུག་གོ། །དགུང་ལོ་ཞེ་གཉིས་བཞེས་པ་ས་མོ་གླང་གི་ལོ་ཡིན་བྱ་བ་རྩིས་ཀྱི་ཡི་གེ་ཞིབ་མོར་བྲིས་འདུག །ཚེས་བཅུའི་དུས་སུ་མཁའ་འགྲོ་འདུ་ཚོགས་མང་བར་གཟིགས་སོ། །དེ་ནས་

ཞྭའི་ལྷ་ཁང་གསོ་དུས་དབུ་རྩེའི་རྒྱབ་ནས་གསེར་འགུ་ཚེ་གང་བཅུས་ནས། གཙུག་ལག་ཁང་བཞེངས་པའི་ཆ་རྐྱེན་དང་ལྷ་རྣམས་ཀྱི་སྐུ་གསེར་བྱས། གཏེར་ཁ་མང་བར་འདུག་ཀྱང་རྒྱ་མཐོངས་འོག་ནས་སྔགས་བག་རེ་ཙམ་དང་། སྒྲུབ་ཐབས་ཐོར་བུ་དང་། གཟོ་ཡིག་པ་ཏྲ་དང་། བསྟན་མ་བཅུ་གཉིས་ཀྱི་སྒྲུབ་ཐབས་དང་། དམ་ཅན་གྱི་སྒྲུབ་ཐབས་ཙམ་ལས་གཞན་མ་བླངས་གསུང་། ས་རྡོ་བསལ་དུས། མནན་པའི་ཐོད་པ་མང་པོ་འཕར་ཞིང་བྱུང་བ། ན་བཟའ་གཡབ་པས་བཟུང་ཞིང་སླར་གནོན་པ་དང་། དེའི་དུས་ལེགས་ཉེས་ཀྱི་གཏམ་མི་དགོས། གཟའ་དང་རྡོ་རྗེ་ལེགས་པས་མང་དུ་བཤད་པ་བྱུང་། ཉིན་བཞིན་དུ་བུ་ཚ་གཡུ་རྣ་ཅན་ལོ་བརྒྱད་པ་ཙམ་ཞིག །བཟོ་རིག་པ་རྣམས་ཀྱི་རྩར་སླེབས་ནས་གྲོའི་སྐབས་སུ་གར་སོང་ཆ་མེད་ལ་འགྲོ་ཡིན་འདུག་པར། ཐམས་ཅད་ཀྱིས་ཅི་ཡིན་བགྲོས་ཏེ་སང་ཉིན་གྲོའི་དུས་ན་གར་སོང་བལྟ་དགོས་ཞེས་ཐམས་ཅད་མཐུན་པར་སྨྲས་སོ། །གྲོ་ལ་འགྲོ་བའི་དུས་སུ་བསྲུངས་པས། རྩིག་པའི་གསེབ་ཏུ་ཐིམ་ནས་གར་སོང་ཆ་མེད། འདི་ནི་དཔལ་ལྡན་བླ་མ་དམ་པའི་ཐུགས་རྗེས་གཙུག་ལག་ཁང་བཞེངས་པའི་སྟོང་གྲོགས་དམ་ཅན་རྡོ་རྗེ་ལེགས་པས་མཛད་པར་མངོན་ནོ། །ལུང་པ་ནས་བྲག་ལ་བརྐོས་པའི་རྡོ་རིང་ཆེན་པོ་མཉམ་པ་གཉིས་ཡོད་པ་ལ། གཅིག་ཅུང་ཟད་ཆག་ནས་གཉིས་ཀ་ལ་ཞྭའི་ས་ཆའི་ཐོབ་རིགས་གཟོང་གིས་བརྐོས་ནས་ཡོད་པ་ལས། ཕྱིས་གཙུག་ལག་ཁང་བཞེངས་དུས་རྩ་བ་འགྱེལ་བ་ལ་སོང་ནས། ཤིང་བཟོའི་འཕྲུལ་དང་། མི་ལག་གདེངས་པས་ཐག་འགྱོགས་འདེབས་པའི་

འཕྲུལ་ཅི་བྱས་ཀྱང་བསླངས་མ་ནུས། ཆོས་རྗེ་ཉིད་ཀྱིས་གཏོར་མ་ཞིག་མཛད་བདེན་པའི་ཚིག་བརྗོད་ནས། སྐུ་ཆོས་ཀྱི་གཡབ་མོ་བརྡུལ་བས་རྡོ་རིངས་བསྲངས་པར་གྱུར་ཏེ། ངོ་མཚར་བའི་ཆོ་འཕྲུལ་དུ་བསྟན། དེ་ནས་མཐའ་དམག་གི་འབྱུང་པོ་ཐམས་ཅད་ཡུན་རིང་དུ་མནན་ནས་སྔར་གྱི་མནན་པའི་སེམས་ཅན་རིགས་མི་གཅིག་པ་མང་པོའི་ཐོད་པའི་ནང་གི་ལངྒི་གསོ་དགོས་པ་རྣམས་གསོས། མནན་པ་མཛད་པའི་གྲབས་མཛད་པའི་ཚེ་ས་རྡོའི་ཆར་བབས་རླུང་ནག་གི་འཚུབ་མ་གཡོས་ཏེ་རྩུབ་འགྱུར་ཆེར་བྱུང་བས། མི་རྣམས་སྐྲག་ཅིང་བརྒྱལ་ནས་མནན་པ་བྱེད་པའི་གྲོགས་མ་བྱུང་། ཆོས་རྗེ་པ་ཉིད་ཀྱིས་ཧེ་རུ་ཀའི་གར་དང་སཾ་ཀྲྀ་ཏའི་སྐད་མང་པོ་མཛད་པའི་ཚེ། ཐོད་པ་རྣམས་ས་ལས་འཕར་བ་གཅིག་ལ་གཅིག་བརྡབས་པའི་སྐད་བྱུང་། ཐོད་པ་ཆེ་ཤོས་གཅིག་ནམ་མཁའ་ལ་འཕར་ཞིང་འདུག་པ། ཞབས་གཡོན་པས་མནན་ནས། གར་དགུའི་ཉམས་དང་ལྡན་པར་མཛད་པའི་ཚེ། ཀུན་མཁྱེན་བསོད་ནམས་བཟང་པོས་གུ་རུ་དྲག་པོའི་སྐུར་མཐོང་ནས། ཐོད་པ་རྣམས་ཕྲ་མེན་མཆོད་རྟེན་གྱི་ཞབས་སུ་མནན་ནོ། །སྟོབས་ཆེན་འདི་ཡི་མཛད་པ་མཐའ་ཡས་ཀྱིས། །དྲག་པོས་འདུལ་ལ་ཁྲོ་ཞིང་གཏུམ་པར་སྟོན། །ཞི་བས་འདུལ་ལ་དགྱེས་པའི་ཞལ་བཟང་འཛུམ། །མདོར་ན་རྫུ་འཕྲུལ་ཆོ་འཕྲུལ་དཔག་ཏུ་མེད། །དེ་ནས་རབ་གནས་མཛད་པའི་དུས་སུ་ཀུན་ཏུ་བཟང་པོའི་སྐུར་གྱུར་ནས་འདུག་པ་དང་། ཐུགས་ཀ་ནས་འོད་ཟེར་མང་པོ་འཕྲོས་པ་ལས། འོད་ཟེར་རེ་རེའི་རྩེ་ལ་སངས་རྒྱས་བྱང་ཆུབ་སེམས་དཔའ་

གྲངས་མེད་པ་བཞུགས་པ་ལས་ཅན་གྱི་སློབ་མ་འགའ་ཡིས་མཐོང་བ་དང་། ལ་སྟོད་དབང་རིན་བྱ་བས་མེ་ཏོག་ཐམས་ཅད་སངས་རྒྱས་དང་བྱང་ཆུབ་སེམས་དཔས་གཏོར་བ་ཡང་མཐོང་ངོ་། ཁོང་རང་གི་ཐུགས་ཉམས་ལ། བཅོམ་ལྡན་འདས་ཐུབ་པ་དང། བྱམས་པ་དང་། གནས་བརྟན་བཅུ་དྲུག་རྣམས་ཞལ་མཛུམ་ལྷག་ལྷག་མཐོང་གསུང་ངོ་། །བྱམས་པས་ཕྱག་མཛུབ་གདེངས་ནས་ལུང་བསྟན་པ། ཁྱེད་སྐྱེ་བ་གཉིས་འདས་པའི་འོག་ཏུ། པདྨ་བརྩེགས་པའི་ཞིང་དུ་བྱང་ཆུབ་སེམས་དཔའ་རི་རབ་མར་མེའི་རྒྱལ་མཚན་ཞེས་བྱ་བར་འགྱུར་རོ། །ཞེས་གསུངས་པའི་ལུང་བསྟན་ཐོབ་བོ། །སྐྱེ་བ་སྔོན་ནས་རྒྱལ་བ་རྒྱ་མཚོ་ལ། ཚོགས་ཆེན་རབ་བསགས་ལྷག་པར་མཉེས་བགྱིས་པས། །ཚེ་འདིར་སངས་རྒྱས་བསྟན་པའི་ཁུར་ཁྱེར་ནས། །རྒྱལ་བས་ལུང་བསྟན་མཛད་ལ་ཕྱག་འཚལ་ལོ། །སྤྲེའུ་ལོའི་ཚེས་བཅུ་མཛད་པའི་ཚེ། ནམ་མཁའ་འོད་ཕུང་གི་དཀྱིལ་དུ་ཨོ་རྒྱན་སྐུ་མདོག་དཀར་པོ་ཌཱཀྐི་སྡེེ་ལྔས་བསྐོར་བ་ལས་འོད་ཟེར་འཕྲོ་བ་ཞིག་གཟིགས་སོ། །མི་ཁྲི་བཞི་སྟོང་འདུས་པ་ལས། ཏེ་སྒྲོའི་མཁའ་འགྲོ་མ་རྣམས་དེར་ལྷགས་ནས། མཁའ་འགྲོ་བབས་པ་བཅུ་ཕྲག་ལྔ་བཅུ་བྱུང་ནས་ལེགས་ཉེས་ཐམས་ཅད་སྨྲ་བ་དང་། མོན་བུམ་ཐང་དུ་འབྱོན་པར་ཡང་ལུང་བསྟན་ཏོ། །དེར་ཞྭ་པདྨ་དབང་ཆེན་གྱི་རབ་གནས་ཚར་ནས། ཏེ་སྒྲོ་ལ་བྱོན་ནས་ཞག་ཉི་ཤུ་རྩ་གཅིག་གི་བར་དུ་ཞི་ཁྲོའི་དཀྱིལ་འཁོར་བཞེངས་ནས་བསྐང་གསོ་བརྒྱ་རྩ་མཛད་དེ། བར་སྐབས་སུམ་ཇོ་གཉིས་དམ་སེལ་བྱས་པས་གནས་དེ་

ཉམས་འདུག་པ་གསོས། མིས་མི་ཐར་པའི་བྲག་ལ་ཆོས་རྗེ་ཉིད་ཀྱིས་རྒྱ་མཚན་དང་ཅོད་པན་བཙུགས་སོ། །དེ་ནས་ཤུག་གསེབ་ཏུ་བྱོན་ནས་བཞུགས་དུས། གསལ་སྣང་ཞིག་ལ་ཇོ་མོ་ཁ་རག་གི་རྒྱབ་ནས་ལུས་པོ་མེད་པའི་ཁྲོ་བོའི་མགོ་བོ་རི་བས་ཆེ་བ་ཞིག་མིག་འཕྲུལ་འཕྲུལ། ཁ་ནས་གློག་འཁྱུགས་པ་ཞིག་འདུག་པ་དང་། ཡར་ཀླུངས་ཟོ་ཐང་གོང་པོ་རི་ནས། དེ་ལས་ཆེ་བའི་མགོ་བོ་ནག་པོ་ཞིག་བྱུང་ནས་མིག་འཕྲུལ་ཞིང་ཁ་ནས་འོད་འཕྲོ་བས། འོད་དེ་ཇོ་མོ་ཁ་རག་གི་མགོ་དེའི་ཐད་ནས་ཡར་སོང་བ་དང་། ཁ་རག་གི་མགོ་བོ་དེ་མེད་པར་འོད་དེ་ལ་སྟོད་ནས་ཡལ་སོང་བས། བོད་ཁམས་ཀུན་སེར་བ་དང་། རྡོའི་ཆར་པ་དང་། གློག་དང་། འོད་ཀྱི་ཁྱོམ་ཁྱོམ་འདུག་པ་དང་། དུས་མི་བདེ་བ་ཡོང་མཐར་འབྲོས་པ་ཡིན་གསུངས་ནས། ཡེར་པ་ལ་སོ་ནམ་ཞིག་བྱ་བསམ་པ་དང་། ལྷ་སར་མ་ཎིའི་ཁང་བུ་ཞིག་བརྩེག་བསམས་པ་ཡིན་ཏེ། ད་རེས་མི་འགྲུབ་པར་གདའ་བས། ངེད་རང་དཔོན་སློབ་ཚོ་བུམ་ཐང་དུ་འགྲོ་གསུངས་ནས་ཞལ་ཏ་མང་དུ་མཛད་དོ། །དབུས་གཙང་འདི་ན་ནད་མུག་མཚོན་གསུམ་དར། །འདི་འདྲའི་ས་ཆར་སྡོད་པ་མི་རིགས་པས། །ལུང་བསྟན་བཞིན་དུ་གློ་མོན་འདུལ་བར་དགོངས། །དུས་གསུམ་རྣམ་མཁྱེན་དེ་ལ་གུས་ཕྱག་འཚལ། །དེ་ནས་ལྷ་སར་བྱོན་དུས། འདི་འབྲིི་གུང་པའི་རྩ་བའི་བླ་མ་ཡིན་ཟེར་ནས། ཡར་ཀླུང་པས་བཀྲོང་པའི་རྩིས་བྱས་དམག་གིས་བསྐོར་ནས་བཀྲོང་པར་བརྩམས་པ་ལ་ཐུན་མོང་གི་དངོས་གྲུབ་བརྒྱད་ཀྱི་ཡ་གྱལ།

མི་སྣང་བའི་རྫུ་འཕྲུལ་མཛད་པས། བཙལ་བྱུང་ཡང་མ་མཐོང་བས། དེ་བྲོས་ནས་མི་འདུག་ཟེར་ཞིང་། ཁོང་རྣམས་ཀྱིས་གླག་མ་རྙེད་དོ། །སྐྱེས་ཆེན་འདི་ནི་དངོས་གྲུབ་གཟུགས་སྤྲིན་ཆེ། །རྫུ་འཕྲུལ་ཐོགས་མེད་ཆོས་སྐྱོང་ལས་རྣམས་སྒྲུབ། །དེ་འདྲའི་མཛད་སྤྱོད་སུ་ཡིས་འགྲན་པར་ནུས། །རྩོད་མེད་གྲུབ་ཆེན་དེ་ལ་གུས་ཕྱག་འཚལ། །ལྷ་སའི་བར་ཁང་ན་བཞུགས་ཤིང་། ཇོ་བོའི་མདུན་དུ་བཞུགས་པ་ལས། ཇོ་བོའི་སྐུ་ལས་གསེར་ལྟ་བུའི་འོད་ཟེར་འཕྲོ་བ་དང་། ཇོ་བོའི་དབུའི་སྟེང་འོད་ཀྱི་ནང་ན་སངས་རྒྱས་རབས་བདུན། སྨན་བླ་སྒྲོལ་མ་དཀར་སྔོན་བདེ་མཆོག །དགྱེས་རྡོར་སྤྱན་རས་གཟིགས་རྒྱལ་པོ་ལུགས་ཕྱག་སྟོང་སྤྱན་སྟོང་། རྒྱལ་བ་རྒྱ་མཚོ་རྣམས་ཀྱི་མཐའ་ན། མགོན་པོ་བེར་ནག་ཅན་དང་། རྒྱལ་ཆེན་བཞི་དང་། མགོན་པོ་སེང་གདོང་། དཔལ་ལྡན་ལྷ་མོ་རྣམས་བཞེངས་ནས། ནམ་མཁར་གཟིགས་ཤིང་འདུག་པ་གཟིགས་སོ། །དེའི་ཉིན་པར་བྲག་ལྷ་ཀླུ་ཕུག་ཏུ་བྱོན་ནས། ཉིན་དང་མཚན་དུ་རིན་པོ་ཆེ་གཅིག་ཐུགས་ལ་ཝལ་ཝལ་བྱུང་ནས། མཚན་མོ་མནལ་ལམ་དུ་གངས་ཏི་སེ་དང་། ཙཱ་རི་ཤེལ་རི་རྣམས་སུ་བྱོན་ནས་ལེགས་པར་གཟིགས་པ་ཞིག་རྨིས་གསུང་། དེ་ནས་ལྷོ་རུ་བྱོན་དུས། ཕོ་མ་སྐྱོང་ཐང་དུ་དགེ་བསྙེན་ཉེར་གཅིག་དང་། དམུ་རིས་བསུ་བ་བྱས། སྤྱན་གཟིགས་དྲངས་པ་ཡང་བྱུང་། ཡང་བུམ་ཐང་དུ་བྱོན་དུས་དགེ་བསྙེན་ཉེར་ཅིག་གིས་བསུ་བ་བྱས་འཇའི་གུར་ཕུབ། འོད་ཟེར་དྲ་བ་འབྲེལ། སྐྱེས་མཆོག་

དམ་པ་མི་ཡི་སེངྒེ་དེས། །སངས་རྒྱས་བསྟན་ལ་སྟོན་པའི་བྱ་བ་མཛད། །ཆེར་འབག་ཆེར་འཚེངས་ཆུང་འབག་ཆུང་དུ་འཚེངས། །ཐར་ལམ་སྟོན་མཛད་དེ་ལ་གུས་ཕྱག་འཚལ། །གཞན་ཡང་གདུལ་བར་དཀའ་བའི་ཕྱོགས་གློ་མོན་དགེ་སྡིག་མི་ཤེས་ཤིང་། གསོད་གཅོད་ལ་དགའ་བ་ཆོས་མ་དར་བའི་ས་ཕྱོགས་རྣམས་སུ་ཡང་། འགྲོ་བ་སེམས་ཅན་རྣམས་རྗེས་སུ་འཛིན་པའི་སླད་དུ། མཁའ་འགྲོ་ཆོས་སྐྱོང་རྣམས་ཀྱིས་དེ་དག་ཟིལ་གྱིས་མནན་ནས། རི་རྒྱ་དང་ཀླུང་རྒྱ་དང་། ལམ་རྒྱ་མཛད་ནས། ཐམས་ཅད་བདེ་འཇམ་གྱི་ལམ་ལ་བཀོད་དེ། བྱང་ཆུབ་ཀྱི་ས་བོན་ཐེབས་པར་མཛད་ཅིང་བྱམས་པ་ལྷ་ཁང་དུ་ཕྱག་ཕེབས་པ་དང་། ཐར་པའི་གླིང་དུ་གཟིགས་པས། རི་རྩེ་ལ་འོད་ཀྱི་འཁོར་ལོ་ཞིག་གཟིགས། ཐར་པའི་གླིང་དུ་བཞུགས་དུས། ལྷོ་ཕྱོགས་ཀྱི་མཚོ་ནག་པོ་གཅིག་གི་ནང་ནས། གཡག་རོག་པོ་གཅིག་ཐོན་བྱུང་བས། རི་བོ་འདེགས་པ་དང་དུ་བ་འཐུལ་བ་ལ་སོགས་པའི་ཆོ་འཕྲུལ་བྱུང་བས། ས་འདུལ་བའི་རྟེན་འབྲེལ་མང་པོ་མཛད། མོན་བུམ་ཐང་ཆོས་ཀྱི་སྒྲ་མི་གྲགས་པའི་ས་རྣམས་སུ། ཚོགས་པ་འབུམ་ཕྲག་འདུ་བའི་དགེ་འདུན་གྱི་སྡེ་བཙུགས། ཐར་པ་གླིང་དུ་མིང་བཏགས། སློབ་དཔོན་དཔལ་མཆོག་གི་གཅུང་པོ། སློབ་དཔོན་སངས་རྒྱས་ཀུན་དགའ་ཞེས་བྱ་བ་བླ་མར་བསྐོས། ཐམས་ཅད་དམ་པའི་ཆོས་རྫོགས་པ་ཆེན་པོའི་ལྟ་སྒོམ་ལ་བཀོད་དོ། །མངོན་པར་རྫོགས་སངས་རྒྱས་

ཀྱང་བཤེས་གཉེན་མཆོག་ཏུ་བསྟེན། །སྤངས་རྟོགས་ཕུན་སུམ་ཚོགས་ཀྱང་སེམས་ཅན་དོན་ལ་བརྩོན། །རང་དོན་ཆོས་སྐུ་བརྙེས་ཀྱང་གཞན་དོན་གཟུགས་སྐུའི་མཛོད། །སྔོན་མེད་ནམ་མཁའི་ནོར་བུ་དེ་ནི་གཙུག་གིས་མཆོད། །དེ་ནས་ལྷོ་བྲག་དང་། ཡར་འབྲོག་པ་ལ་སོགས་པའི་གདན་འདྲེན་བྱུང་ནས། ནན་གྱིས་ཞུས་པས། མཁན་ཆེན་དགེ་འདུན་རྒྱལ་མཚན་གྱི་ཞབས་སུ་དགེ་འདུན་ལྔ་བརྒྱ་འདུ་བ་དང་། བླ་མ་སྤུས་གོང་པ་ལ་དགེ་འདུན་སུམ་བརྒྱ་ལྷག་འདུས་པ་རྣམས་ལ་འོད་གསལ་རྡོ་རྗེ་སྙིང་པོའི་ཁྲིད་བསྟན་ནས་སྨིན་གྲོལ་ལ་བཀོད་དོ། །དེ་ནས་ཁྲི་དཔོན་རྡོ་རྗེ་རྒྱལ་མཚན་པས་གདན་དྲངས་ནས་ཡར་འབྲོག་ཏུ་ཆོས་གསུང་དུས། དབུ་སྟོད་ནས་བླ་མ་ཨོ་རྒྱན་པ་དང་། རྒྱས་སྲས་བཟོད་པ་དགེ་སློང་གཞོན་ནུ་བཀྲ་ཤིས་ལ་སོགས་པ་རྣམས་མཇལ་དུ་བྱོན། དབུས་སུ་འབྱོན་པའི་ཞུ་བ་བྱས། ཁོང་རྣམས་ཚུར་འབྱོན་ཁར། རྒྱལ་སྲས་བཟོད་པ་ལ། དོ་དགོངས་ངའི་ཕྱ་ཐེར་འོག་ཏུ་ཤོག །དོ་ནུབ་ལྷན་དུ་སྡོད་པ་ཡིན་གསུང་། དེར་བྱོན་པས་གསོལ་ཇ་བ་ཆོས་དཔལ་རྒྱལ་མཚན་ལ། ངེད་དཔོན་སློབ་ལ་ཟས་སྣ་བཟང་པོ་གྱིས་ལ་དྲོངས། ཇ་བཟང་པོ་ཞིག་ཀྱང་བཀོལ་གསུང་ནས་དགྱེས་ཚོར་ཆེན་པོ་མཛད། དབུས་པ་རྣམས་འགྲོ་ཆུག །སུ་ལ་ཡང་མ་སྨྲ། ཁྲི་དཔོན་རྡོ་རྗེ་རྒྱལ་མཚན་གྱིས་མཁའ་འགྲོ་སྙིང་ཏིག་གི་ཞུ་བ་བྱས་པས་བཤད་པར་བྱས་ནས་ཡོད། ཁྱོད་མཁའ་འགྲོ་སྙིང་ཐིག་

འཚོལ་བ་ལ་ཀོང་པོར་ཆོས་རྒྱལ་རིན་ཆེན་གླིང་པའི་རྩར་འགྲོ་བ་ཡིན་ཟེར་ཞིང་འདུག་པ། དེ་ལྟར་གྱིས་བྱས་ནས་བཏང་བ་ཡིན། ཀོང་པོ་ན་རིན་ཆེན་གླིང་པ་དང་། དྭགས་པོ་བྱར་ན་གཏེར་སྟོན་གྱི་དངོས་སློབ་སྤྲུལ་སྐུ་ལེགས་ལྡན་པ་གཉིས་ལ། མཁའ་འགྲོ་སྙིང་ཐིག་ཞུས་ནས་འདུག་པ་ལེགས། ད་གདོད་རྒྱུད་དག་མ་དག་གི་གཏམ་མི་ཡོང་བ་ཡིན། དོན་དམ་པར་ཆོས་འདིའི་བདག་པོ་ང་ཡིན། ཉམས་སྣང་དང་རྨི་ལམ་ལ་ཆོས་འདིའི་བདག་པོ་ཁྱོད་ཡིན་གསུང་བ་དང་། དངོས་སུ་ཆོས་བདག་གི་མཁའ་འགྲོ་རྣམས་ཀྱིས་མངོན་སུམ་དུ་ང་ལ་གཏད་པ་ཡིན། ཁྱོད་རང་རིངས་རྒྱུ་མེད་ན་སྡོད་ལ་ཆོས་འདི་ཉོན། ཕོག་ནི་ནང་ནས་སྟེར། གླུ་གང་མཁས་བྲོ་རར་བཅུག་ན་གསལ་བྱ་བ་ཡིན་པས། ཁོང་གཉིས་དང་གང་མཁས་ཡིད་ཆེས་སྐྱེ་བ་ཡིན་གསུང་། རྒྱལ་སྲས་རིན་པོ་ཆེས་བླ་མ་ཨོ་རྒྱན་པ་ལ་མཁའ་འགྲོ་སྙིང་ཐིག་གསུང་པ་འདྲ་བས་ཁྱེད་རང་བཞུགས་ན་འཐད་གསུང་པས། ཁོང་ན་རེ། བི་མ་སྙིང་ཐིག་ཚར་མང་ཞིག་ཐོབ། མཁའ་འགྲོ་སྙིང་ཐིག་ལ་ཡང་དེ་ལས་ལྷག་པ་མེད་ལས་ཆེ་ངེད་འགྲོ་བ་ཡིན་གསུང་། འོ་ན་དེ་ལྟར་མཛོད་བྱས་ཁོང་རྣམས་བཞུད། འབྲོག་ཁྲི་དཔོན་པས་གཙོར་མཛད་དཔོན་གཡོག་བཅུ་གསུམ་དགེ་སློང་དཔལ་འབྱོར་བླ་མ་དང་དཔོན་སློབ་ཡོངས་དྲིལ་དཔོན་གཡོག་བཅོ་ལྔ་ལ་མཁའ་འགྲོ་སྙིང་ཐིག་གི་ཁྲིད་གསུང་། གཏེར་ནས་བྱོན་འཕྲལ་མཁའ་འགྲོའི་ཁ་རླངས་ཐུ་ལེ་བའི་ཆོས་ཡིན་པས་དམ་དོགས་ཆེ་བར་མཛོད།

ཀུན་ཏུ་བཟང་པོ་སངས་རྒྱས་མི་གཟུགས་ཅན། །ཆོས་མཆོག་ཟབ་གཏེར་མཁའ་འགྲོ་སྙིང་ཐིག་སྟེ། །སྲས་ཀྱི་ཐུ་བོ་རྒྱལ་སྲས་བཟོད་པ་ལ། །ཐུགས་ཀྱི་དཀྱིལ་དུ་དགོངས་པས་དགྱེས་པར་གནང་། །བསྙེལ་བ་མི་མངའ་ཐུགས་རྗེའི་བདག་ཉིད་ཅན། ཁྱེད་ཀྱི་རྗེས་འཇུག་རྣམས་ལ་ཐར་པའི་ལམ། །ཚེ་གཅིག་སངས་རྒྱས་ལག་ཏུ་གཏོད་མཛད་པའི། །བཤེས་གཉེར་དམ་པ་དེ་ལ་ཕྱག་འཚལ་ལོ། །དེ་ནས་གཡོར་པོ་གཞུང་དུ་གདན་དྲངས་པ་ལ་སྔར་དགྲར་འཛིན་ཅིང་ཡོད་ནའང་། མཛད་པ་དང་འདྲ་བ་ལ་དད་པར་གྱུར་ནས་ཏཱའི་སི་ཏུ་བྱང་ཆུབ་རྒྱལ་མཚན་གྱིས་སྔོན་ལ་ཇ་འདྲེན། རྟིང་ལ་ཇ་སིག་གཅིག །ནས་ཁལ་ལྔ་བཅུ། དེའི་ཤ་མར་ཐུད་རྣམས་ཕོག་བཏབ། ན་བཟའ་ཆ་ཚང་གཅིག་འབུལ་བར་བྱས། དེ་ནས་སྙན་པ་དང་གྲགས་པ་དང་གདུལ་བྱ་ཆེ་ཞིང་། འཆད་རྩོད་རྩོམ་པའི་ཡོན་ཏན་ལ་དད་དེ། སངས་རྒྱས་དཔལ་རིན་གྱིས་དཔོན་སློབ་ཀྱི་མཚམས་སྦྱར། གོང་དཀར་དུ་ཕྱགས་ཕེབས། སི་ཏུ་བས་གཙོ་མཛད་རྣམས་ལ་ཨོ་རྒྱན་དྲག་པོའི་དབང་དང་བྱིན་རླབས་གནང་བས་མོས་པ་ཐོབ་སྟེ། རྗེ་གཤེགས་པའི་རྗེས་སུ་འང་གདུང་འབུལ་གྱིས་མཉེས་པར་བྱས་པའོ། །དེ་ནས་ཁྲིད་བཙུགས་ཏེ་སྟོང་ཕྲག་ཡོད་ཟེར་བའི་ཚོགས་པ་འདུས། དབུ་སྟོད་ནས་ཀྱང་བླ་མ་དམ་པ་རྒྱལ་སྲས་བཟོད་པ་དང་། དགེ་སློང་གྲགས་པ་དཔལ་གྱིས་ཐོག་དྲངས་ཆོས་ཉན་མང་རབས་

ཆོས་གསན་དུ་བྱོན། ཚོགས་པ་ཆེས་པས་ཆོས་ཉན་ལ་ཕྱག་དམ་འགྱེད་དགོས་པ་བྱུང་། དེར་ཚོགས་པ་རྣམས་སྨིན་གྲོལ་གྱི་ལམ་ལ་བཀོད། དེའི་དུས་སུ་ཆོས་རྗེ་བླ་མ་རྒྱལ་མཚན་དམ་པའི་དྲུང་ནས། འཕན་ཡུལ་བའི་སློབ་མ་ཐུན་མོང་བ་ཞིག་ལ། བླ་མ་དམ་པས་རྫོགས་པ་ཆེན་པོའི་གཞི་ལམ་འབྲས་བུའི་བཞེད་ཚུལ་ཅི་འདྲ་བ་ཡིན་ཞུས་པ་ལས། གཞི་ལམ་འབྲས་བུའི་བཞེད་ཚུལ་ཚིག་ཉུང་ལ་དོན་འགྲིལ་བ་ཞིག་རིན་པོ་ཆེ་གསེར་གྱི་མཆོད་སྡོང་ཞེས་བྱ་བ་ཚིགས་སུ་བཅད་པའི་དབྱངས་ཀྱིས་ཕུལ་བའི་རྒྱབ་ཡིག་ལས། རབ་གསལ་སྙན་པར་སྨྲ་བའི་ངག་འདི་ནི། །འཆད་རྩོད་རྩོམ་པའི་གནས་ལ་མ་རྨོངས་ཤིང་། །ལུང་རིག་མན་ངག་དུ་མའི་བློ་མིག་ཅན། །སྙིང་པོའི་དེ་ཉིད་རྟོགས་པའི་རྣལ་འབྱོར་པས། །གཞུང་རི་རིན་ཆེན་བརྩེགས་པའི་གནས་ནས་ཕུལ། །ཅེས་པའི་ཞུ་ཡིག་ཕྱག་ཏུ་ཕུལ་བས། ཆོས་རྗེ་བསོད་རྒྱལ་བ་བསམ་ཡས་སུ་བཞུགས་པས། ཆོས་རྗེ་དོར་དུ་ཕྱག་ཐེགས་པའི་ཤུལ། གཟིམས་ཆུང་གི་གློ་ཕུག་ཏུ་ལུས་ནས་འདུག་པ་བསམ་ཡས་གྱི་དཀོར་གཉེར་དེས། རྫོགས་ཆེན་པའི་སྒོམ་ཆེན་ཅིག་ལ་ཁྱེད་ཀྱི་བླ་མ་རྫོགས་ཆེན་པའི་གསུང་སྒྲོས་ཞིག །ཆོས་རྗེ་བསོད་རྒྱལ་བ་ཕྱག་ཐེགས་པའི་གཟིམས་ཆུང་དུ་ལུས་ནས་འདུག་ཟེར་བས། དེ་ང་ལ་ཨེ་སྟེར་བྱས་པས་ཆོག་ཟེར་ནས་བྱིན། དོ་རེད་ས་རྩ་སྨག་དུས་སྒོ་དྲག་པོ་བརྡུང་ཞིང་འདུག་པ་བལྟས་པས། དཀོར་གཉེར་དེས་སྦྱིན་པས་ཆོག་ལེ་མ་རེད། གསུང་

ཤོག་མཛད་ནས་ཉེ་གནས་ལེན་དུ་བཏང་འདུག་པ་ལ་ད་ལྟ་རང་སྐུར་གསུང་། སྐྱིལ་སྨད་པའི་ཟུལ་ཕུ་བ་སྟོན་གྲགས་ཀྱིས་ཁྲིད་གཞི་ལ་ནས་ཁལ་སུམ་བརྒྱ་ཕུལ། སྐྱོར་མོ་ལུང་པ་དེས་ནས་ཁལ་ཉིས་བརྒྱ་འབུལ་ཟེར་བ་དང་། གཞན་ཡང་བརྒྱ་འབུལ་བ་ཁ་ཡར་བྱུང་། དེ་དུས་དབུས་སྟོད་ནས་ཏའི་སི་ཏུ་ཤཱཀྱ་བཟང་པོས་ཐོག་དྲངས། སློབ་མ་རྣམས་ཀྱིས་གདན་འདྲེན་ཡང་བྱུང་། སྐབས་ཤིག་ལ་ཞུ་ནན་ཆེས་པས་འབྱོན་པར་མཛད། ཕྱག་འཇོག་ཁར་རང་དུ་གཞུང་ནས་ཀུན་མཁྱེན་པའི་སློབ་མ་སྔར་མཚན་ཉིད་པོ་ཏི་འགའ་ཡར་ཤེས་པ་གཅིག་གིས་དྲུང་དུ་ང་རང་མཇལ་ནས་ཆོས་ཞུ་བ་མང་ཚད་ཡོད་ནའང་། ལོ་བདུན་དུ་མཚམས་ཀྱི་དམ་བཅས་བྱས་ཡོད་པས་ཡོང་བའི་ཐབས་མ་བྱུང་། ཆོས་ཀྱི་དྲི་བ་འདི་རྣམས་ཀྱི་ལན་གསལ་པོ་ཐུགས་ལ་འདོགས་པར་ཞུ་ཟེར་ནས། ཞུ་ཡིག་དང་འབུལ་བ་བྱུང་ནས། ཉིན་པར་ནི་ཆོས་དང་མཇལ་མཁན་གྱིས་བྲེལ་བས་ཐུགས་མ་སྐབས། ནུབ་མོ་བླ་མ་དམ་པ་བཟོད་པས། ཕྱག་བྲིས་མཛད་ནས། དྲིས་ལེན་དོན་གྱི་རབ་འབྱེད་ཅེས་བྱ་བ་བསྐུར། དེ་ནས་བྱོན་པས་ལམ་དུ་ཞབས་ཏོག་པ་མང་བས་ཞག་སྦྲེལ་འགོར། ཚུ་རི་ཕ་རི་རྣམས་བསུ་བ་ནི་ཚོ་འཁྲུགས། ཚུར་རིའི་གཙང་འགྲམ་ན་ཆོས་ཁྲི་བརྩེགས་ནས་གསང་ཕུ་གླིང་སྟོད་པའི་སློབ་དཔོན་ཡེ་རྒྱལ་གྱིས་ཐབ་ཁྱོགས་ནས་ཇ་གསོལ་བའི་རིང་ལ། ཆོས་ཀྱི་དྲི་བ་ཚིག་རེ་ཞུས་པ་ལ་མདའ་ཚད་མང་རབ་རེའི་ལན་གསུང་། དེ་ནས་ཆོས་

ཀྱི་དྲི་བ་ཞུ་བའི་སྤོབས་པ་མེད་པར་གསང་ཕུ་བ་ལ་ངེད་རང་འདྲ་བ་གཞན་མེད་པས། སྐྱོང་བྲན་ཐུགས་ལ་འདོགས་པར་ཞུས། ཡང་དགོས་སུ་ངེད་རང་གླིང་སྟོད་པ་ཉམས་ནས་ཡོད་ཞུས་པས། ཁོང་ལ་ཇ་བཟང་པོ་གདུམ་གཅིག །སྲབ་ཆམ་གཅིག །གསེར་སྲང་བཅུ། གླིང་སྟོད་པ་སྤྱི་ལ་ཇ་སིག་ལྔ། ཀླད་ཡོལ་ཆེན་མོ་གཅིག །ཐེར་རས་ཕྲུག་གསུམ། དགུ་ཚན་གཅིག་གནང་། །ཨེ་མ་ཚོགས་གཉིས་བསགས་པའི་འབྲས་བུ་དུས་འདིར་སྨིན། །ནམ་མཁའ་མཛོད་ལ་མངའ་བརྙེས་ཕྲིན་ལས་ཅན། །སྦྱིན་པ་རྣམ་བཞིས་སེམས་ཅན་ཚིམ་མཛད་ཅིང་། རེ་བ་སྐོང་མཛད་དེ་ལ་ཕྱག་འཚལ་ལོ། །དེ་ནས་ཡར་མོ་ཆེ་བའི་ཇོ་གདན་རྣམས་ཀྱིས་རོལ་ཆ་དང་བཅས་ལྦུ་བ་གདོང་ནས་བསུ་བ་བྱས། ར་མོ་ཆེར་ཕེབས་ཇ་ཞུ་ཞིང་ཡོད་པའི་སྐབས་སུ། རྨེ་རུ་བའི་ཇོ་གདན་རྣམས་མཇལ་བ་དང་། སེར་སྦྲེངས་ལ་བྱུང་བ་ལ་མཇལ་ཁ་མ་བྱུང་། ཟླ་བ་ཕྱེད་ནི་ལྷ་སར་བཞུགས་པ་ལྷ་ས་དང་། ར་ས་གཉིས་ཀྱི་བར་དུ་ཁྲི་མཐོན་པོ་བརྩིགས་ཏེ་ཐུགས་བསྐྱེད་གསུངས་པས། ས་ཕྱོགས་དེ་ཆོས་ཉན་གྱིས་གང་། གསང་མཚུར་སྡེ་གསུམ་གྱི་དགེ་གཤེས་ང་རྒྱལ་ཅན་མང་པོས་ཆོས་ཉན་སར་ལྟད་མོ་བལྟས་པས། ལས་རྒྱུ་འབྲས་ཀྱི་ཆོས་བཤད་མཛད་པའི་རྟིང་ན། ཁོང་རྣམས་དད་པ་སྐྱེས་ནས། འདི་འདྲ་ཞིག་ཡིན་པ་ཟེར་ཞིང་ཕྱག་བཙལ་ཏེ་ཆོས་ཉན་གྱི་གྲལ་ལ་འཁོར། །ཆོས་ཚར་ནས་ར་མོ་ཆེར་འབྱོན་ཞིང་ཡོད་པ་ལ། །སི་ཏུ་ཤཱཀྱ་བཟང་པོས་ཞུ་ཡིག་དང་གདན་འདྲེན། གཞན་ཡང་བླ་མ་དཔོན་སྐྱ་མང་ཚད་

ཅིག་གིས་སླེབ་ནས་བྱུང་། ཡར་འབྱོན་པར་ཞལ་གྱིས་བཞེས། དེ་ནས་སྙིང་ཐིག་གི་ཁྲིད་གསུངས་པ་ལ། སྙེ་ཕུ་ཤུག་གསེབ་ཏུ་བྱོན། ཁྲིད་ཉན་སྟོང་ཕྲག་ཚོགས་པས་ཁྲིད་ཞུ་ཚོ་འདི་ཙམ་མང་འདུག་པས། ཁྲིད་གཞིས་མི་ལྕོགས་པར་འདུག་ཅིང་ཁྲིད་གཞི་རྒྱུ་ཁྲིད་གཉེར་བ་ལ་འབུལ་བར་ཞུ་ཞུས་པས། ཆོས་ཉན་རྣམས་ཀྱིས་མི་ལྕོགས་ན་ཁས་མི་ལེན་པ་ཡིན་ཟེར་བ་ལ། ཆོས་རྗེའི་དྲུང་དུ་ཁྲིད་གཞིའི་ནས་མང་པོ་ཕུལ་བས་མཉེས་པ་ཆེ་བ་ཨེ་ཡིན། ང་གར་འགྲོ་མཁའ་འགྲོ་ཆོས་སྐྱོོང་གིས་བྱ་བ་སྒྲུབ་ཅིང་ཡོད་པས། ཚོགས་འཁོར་ལ་མི་ཐོགས་གསུངས་ནས། ཕྱག་དམ་བཀྱེ་ནས་ཆོས་གསུང་། དགེ་སློང་དཔོན་གྲགས་པས་དབུ་སྟོད་དུ་ཡར་འགྲོ་བའི་ཞུ་བ་བྱས་བས། དེ་བཞིན་མཛད་གསུང་། ངའི་རྟ་བཙོང་ནས་མེད་པས་ལྷ་ས་བར་དུ་ཆིབས་པ་ཞིག་གཡར་པོ་ཞུ་ཞུས་པས། རྟ་མེད་ན་ཁྱེད་གར་ཐོན་རྟ་ཁྱེར་བས་ཆོག་གསུང་། ནང་པར་ཚ་བ་གནང་ནས། ཆིབས་པ་རྔམ་པ་སྒྲ་སྒྲོགས་བཏང་། རྟ་བསྒྱུར་བ་ལ་རྟོགས་ལྡན་གྱད་ཐུང་ཟེར་བ་བཏང་། ལམ་རིང་ཐུང་གཉིས་ཡོད་པའི་ཐུང་བ་དེ་ས་གཟར་བས་རིང་བ་དེ་སྐོར་གསུངས། ཕྱག་དབང་ཞུས་ཤིང་ཡོད་ཀྱང་ལྡབས་ནས་གསུངས། ཞལ་ཏའི་ལུགས་བཞིན་རྟོགས་ལྡན་གྱིས་བྱེད་བྱས་པས། ཐུགས་ཀྱིས་གཟིགས་ཆ་ཡིན། ངས་མི་ཚེ་རྟ་ལ་བསྐྱལ་བས་ཨའུ་ཙི་ཉེ་ས་ནས་འགྲོ་བྱས་པས། རྟས་བརྡབས་རྩིབ་མ་གཉིས་བཅགས། རྟོགས་ལྡན་རྟ་བཟློག་ནས་འགྲོ་དུས། རྟས་བརྡབས་པ་མ་ཞུ་བཀའ་བཀྱོན་ཐུགས་ཁྲེལ་ཡོང་ཟེར་ནས།

ངག་བསྡམས་ཤུགས་གསེབ་ཏུ་སླེབས་དུས་ཆིབས་རྟ་ཀ་བ་ལ་བཏད། དྲུང་དུ་ཕྱག་འཚལ་བ་ལ་སོང་བས། ངན་པ་རྣམས་བྱས་པ་ལ་མི་ཉན་དེ་ཨེ་མ་བྱུང་གསུང་། དགེ་སློང་དཔོན་གྲགས་པར་ར་མོ་ཆེར་སྨན་དཔྱད་རིམ་གྲོ་ཆེན་པོ་དགོས་པ་བྱུང་། དེས་ན་ཐོགས་པ་མེད་པའི་མངོན་པར་ཤེས་པ་ཡོད་པར་ཡིད་ཆེས་སོ། །མི་ཡི་ཁྱུ་མཆོག་ཆོས་ཀྱི་འཁོར་ལོ་བསྐོར། །སྨྲ་བའི་ཟླ་བ་མངོན་ཤེས་སྤྱན་དང་ལྡན། །འཕགས་པའི་གང་ཟག་འདི་འདྲ་གཞན་སུ་ཞིག །དུས་གསུམ་རྣམ་མཁྱེན་དེ་ལ་གུས་ཕྱག་འཚལ། །དེ་ནས་དབུ་སྟོད་དུ་བྱོན་ནས། སི་ཏུས་མཁར་བ་རིར་གདན་དྲངས། ཞག་གསུམ་དུ་བཞུགས་དབྱར་གནས་ཀྱི་ཕོགས་བཏབ་ནས། ཡར་ཨོ་རྒྱན་དུ་བྱོན་ཚོགས་པ་རྒྱ་མཚོ་ལྟ་བུ་འཚོགས། ཨོ་རྒྱན་གྱི་རྫ་འདབས་མན་ཆད། ཕ་རིའི་བྲག་རྩ་དེ་ཡན་ཆད། ཕྱ་ཐེར་དཀར་ནག་ཁྲ་གསུམ་གྱིས་བཀང་། ཆོས་ཉན་རྙེད་པ་ལས་སུམ་ལོག་གིས་མང་། གསར་པའི་ཆོས་ཉན་གྱི་དྲག་པ་དུས་འཁོར་བ་དགེ་འདུན་དཔལ་གྱིས་ཐོག་དྲངས། ཆོས་འཆད་པའི་བླ་མ་སློབ་དཔོན་ཡང་བཞི་བཅུ་ལ་སླེབས་ཙམ་འདུག །འབྲི་གུང་བའི་ཁུལ་གྱི་བླ་མ་སློབ་དཔོན། དཔོན་སྐྱ་མང་པོ་འཚོགས་པ་ལ། འོད་གསལ་རྡོ་རྗེ་སྙིང་པོའི་ཁྲིད་ཟླ་བ་བཞི་པའི་ཚེས་བཅོ་ལྔའི་ཉིན་པར་བཙུགས་ནས། ཚེས་བརྒྱད་གཅིག་ལ་འཚོགས་པ་ལ་འགྱེད་ཆེན་གཅིག་མཛད། ཟླ་བ་བྱུང་ངོ་ཅོག་གི་ཚེས་བཅུ་ལ་འཕན་ཡུལ་ཡན་ཆད་རྩེ་མོ་རྒྱལ་་མན་ཆོད་ཚོགས་པ་རྒྱ་མཚོ་ལྟ་བུ་ལ་ཚེས་བཅུའི་མཆོད་པ་གྱ་ནོམས་པ་མཛད་སྔར་སྙིང་ཐིག་གི་ཁྲིད་ཞུ་བའི་དུས་ཆོས་ཁྲལ་ལ་མ་ཐོགས་པས་ད་

གཟོད་ང་ལ་ཆོས་བཤད་པའི་དུས་བྱུང་ན། ཆོས་ཁྲལ་ལ་བཅད་ཐང་མི་བྱེད་པ་དང་། དད་རྫས་ཕྱག་ཏུ་ཅི་བྱུང་བའི་སུམ་གཉིས་ཚེས་བཅུ་དང་ཚེས་བརྒྱད་ལ་བཏང་ཞིང་སུམ་ཆ་གཅིག་གིས་འཕྲལ་དགོས་འཚོ་བ་དང་། བུ་སློབ་གཟིགས་སྐྱོང་མཛད་པའི་དམ་བཅའ་བརྟན་པོ་མཛད། དད་ཟས་ཆུད་མི་གསོན་པའི་ཆེད་དུ། ཚེས་བཅུ་དང་། ཚེས་བརྒྱད་ཀྱི་ཟན་ཡང་སིངས་པོ་དང་དར་བས་བརྫི་ཞིང་། སྤྱན་ལམ་དུ་འབྱུང་བའི་བཟའ་བཏུང་དངོས་པོ་མཆོད་པ་གཉིས་ལ་དམིགས་སྒོམ་བྱས་པ་ལ། ཆེ་བཙུན་གལ་པོ་ཆེར་བྱས་པ་སུ་བྱུང་ཡང་། འདི་ཟོས་པས་མི་འཇུ་གསུང་ནས་མི་གནང་། འགྱེད་མཛད་དུས་གྲལ་མཐོ་བ་རྣམས་ཀྱི་སྐལ་པ་ཆད་དོགས་མེད་གསུངས་ནས། །གྲལ་གཞུག་ནས་ཡར་ལ་འགྱེད། བཀུར་སྟི་དགེ་འདུན་ལ་དགོས་པ་ཡིན། སྡིག་ཅན་རྣམས་ལ་མི་དགོས་གསུང་ནས་སྐྱེ་ནག་ལ་མི་གནང་། ཆེན་པོར་འདོད་པ་རྣམས་ལ་གདན་མི་འདིང་། བཀུར་སྟི་མི་མཛད་པ་ནི་ཐུགས་ཀྱི་དམ་བཅའ་ཡིན། འབྱོར་ལྡན་ཕྱུག་པོ་རྣམས་ཀྱི་ཚོགས་གསོག་དང་འབུལ་བ་ཅི་ཙམ་བྱས་ཀྱང་། ཆོས་དད་གུས་ཀྱི་སྒོ་ནས་སྒྲུབ་པ་ཡིན་ཕྱག་བྱེད་བཟང་། ཐུགས་ལ་བཏགས་ཞལ་དུ་མི་འདོན། བརྡབ་ལན་དང་གནང་སྦྱིན་མི་མཛད། བྱས་ན་ཚོང་དུ་འགྲོ་བས་ཁོང་རང་གི་དངོས་པོ་དེ་ཆུད་ཟོས་ཡིན། ཤཱཀྱ་ཐུབ་པ་ལ་རས་ཡུག་གསེར་སྲང་སྟོང་རི་བ་ཕུལ་ཡང་། བསྔོ་བ་མཛད་པ་མ་གཏོགས་པ་གནང་སྦྱིན་མཛད་པའི་སྲོལ་མེད། ཚོགས་བསགས་དང་ཆོས་འདོན་ལ་སོགས་པ་ཡོན་བདག་གིས་བྱ་རྒྱུ་ཡིན། ཡོན་མཆོད་

གོ་ལོག་ན་ནན་ལྟར་མི་བཟང་གསུང་། འདུལ་བ་ལུང་ལ་སོགས་གཏམ་རྒྱུད་ལུང་འདྲེན་མང་བར་མཛད། སྤྲང་པོ་ལ་སོགས་པ་ཉམ་ཆུང་གིས་སྐྱོ་ར་ནག་པོ་གཅིག་དྲངས་ན་ཡང་ཞིམ་ཞིམ་ལྟར་གསོལ། མདོ་བསྔོ་དང་ཡོན་བཤད་རྒྱས་པ་རེ་མཛད། ཚོགས་གཉིས་མཁའ་ལ་སྒྲིིབ་གཉིས་ཆུ་འཛིན་བྲལ། །མཁྱེན་པའི་ཉི་གཞོན་འོད་སྟོང་ལྷག་གེ་བས། །སྐལ་ལྡན་རྣམས་ཀྱི་འདབ་སྟོང་རྒྱས་པ་དང་། །མཉམ་དུ་སྐྱེ་དགུའི་རྐང་དྲུག་ཚིམ་མཛད་བསྟོད། །དེ་ནས་ཚོགས་པ་ལ་དབང་ཁྲིད་ཤིན་ཏུ་རྒྱས་པར་མཛད་ནས། རྒྱབ་ཆོས་གསུང་པའི་ཉིན་གཅིག་གི་སྐབས་ན། རྒྱལ་སྲས་བཟོད་པས་སྤོས་ཕོར་དང་བཅས་ནང་དུ་གདན་དྲངས་པའི་ཚེ་ཡང་། ཁྱོད་ལ་བྲེལ་བ་མེད་ན། མཁའ་འགྲོ་སྙིང་ཐིག་གི་དྲས་ཁའི་ཤོག་བུ་འགའ་དྲོས་གསུང་ཚར་བ་དང་སྐས་དེ་ཕར་བསྒྱུར་ལ་སུ་ཡང་མ་བཏང་བར་སྙུག་གུ་ཚུགས་གསུང་ནས། ཞལ་ཆེམས་དྲི་མ་མེད་པའི་འོད་སྤྲད་པའི་སྐབས་སུ། ད་ནི་མི་སྡོད་པདྨ་ལས་འབྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །ཚེ་ཟད་ལས་ཟད་སྨོན་ལམ་འཕེན་པ་ཟད། གསུང་པའི་སྐབས་སུ་རྒྱལ་སྲས་བཟོད་པ་སྤྱན་ཆབ་ཀྱིས་བརྣང་བཞིན་དུ། ཕྱག་བཙལ་ནས་གསོལ་བ་བཏབ་ཅིང་རྟེན་འབྲེལ་ངན་པ་འདི་འདྲ་བ་མི་གསུང་བར་ཞུ་ཞུས་པས། རྟེན་འབྲེལ་ངན་རྒྱུ་ཅི་ཡོད། ད་ལྟ་དལ་བའི་དུས་སུ་བྱས་པས་ད་གཟོད་བྲེལ་བའི་དུས་སུ་ཕན་པ་ཡིན་གསུང་ནས། བུ་སློབ་སྤྱི་ལ་ཞལ་ཆེམས་དྲི་མ་མེད་པ་འདི་དང་སྒོས་སུ་སྙིང་ཐིག་པ་རྣམས་ལ་ཞལ་ཆེམས་

གནད་ཀྱི་མེ་ལོང་གཉིས་མཛད་ནས། མཁའ་འགྲོ་སྙིང་ཐིག་གི་པོ་ཏིའི་ནང་དུ་བཅུགས། འདི་འདྲ་བྱས་སུ་ལ་ཡང་མ་སྨྲ་གསུངས་སོ། །གཤེགས་པར་དགོངས་ནས་སྲས་ཀྱི་ཐུ་བོ་ལ། །ཞལ་ཆེམས་བཞག་ནས་མངོན་ཤེས་ཡོད་པར་བསྟན། །མཐོང་སྤངས་མ་རིག་ཚོགས་ལས་དབེན་པ་ཡིན། །འཇམ་དབྱངས་དངོས་སུ་བསྟན་ལ་གུས་པས་བསྟོད། །དེ་ནས་ཆོས་ཉན་འབྲེལ་བ་ཡོད་པ་རྣམས་སོ་སོར་གྱེས་བླ་མ་སློབ་དཔོན་རྣམས་དང་ཆོས་ཉན་གྲྭ་པ་རྣམས་ཀྱིས་དབང་གོང་མ་ལ་སོགས་པའི་ཞུ་བ་བྱས་པས། འདི་གུ་རུ་ཇོ་འབེར་གྱིས་ཀྱང་མ་གནང་བའི་ཆོས་ཡིན་མི་འོང་གསུང་། ནན་གྱིས་ཞུས་པས། འོ་ན་ཁྲིད་གཉེར་ངན་པ་དེ་རྣམས་ཀྱིས་སྤྱང་ཀི་བྱེད་པར་ཡོད་འདུག །ཁྲིད་གཉེར་བ་བརྗེས་གསུང་ནས། དབང་ཞུ་བ་རྣམས་ལ་དམིགས་པ་ཕོག་ནས་རི་ལ་བཏང་སྟེ། རིམ་པ་བཞི་དུ་དབང་མཛད། རྒྱུད་བཅུ་བདུན། ཐེག་མཆོག་རིན་པོ་ཆེའི་མཛོད། ཡང་ཏིག་ཡིད་བཞིན་ནོར་བུ་དང་བཅས་པ་རྫོགས་པར་གསུང་ཆོས་ཐོན་པའི་ཚོགས་འཁོར་གྱི་ནང་པར་རང་རེ་དཔོན་སློབ་ཟབ་མོའི་ཆོས་ཀྱི་འཁོར་ལོ་བསྐོར་ནས། ཚོགས་ཀྱི་དགའ་སྟོན་བྱེད་པ་ཡང་ད་ནང་ཙམ་དུ་གདའ་འོ། ཁྱེད་རང་གཞན་དོན་ནུས་པ་རྣམས་ཀྱིས་སྐལ་བ་དང་ལྡན་པའི་སློབ་མ་གང་བྱུང་ལ་རང་འདོད་ཀྱི་འཁྲིས་མེད་པར་དབང་བསྐུར། རྒྱུད་ཤོད། མན་ངག་སྟོན། དམ་ཆོས་ཉམས་སུ་ལེན་པ་རྣམས་འཇེག་རྟེན་གྱི་བྱ་བ་དོན་དུ་མ་གཉེར་བར། ཁྲེགས་ཆོད་དང་ཐོད་རྒལ་གྱི་དོན་ལ་མཉམ་པར་ཞོག །མ་གོ་བའི་

སྐབས་བྱུང་ན་ཁོ་བོས་བྱས་པའི་ཡང་ཐིག་ཡིད་བཞིན་ནོར་བུ་འདི། ནོར་བུ་བསམ་འཕེལ་དང་འདྲ་བ་ཡིན་པས་བལྟ་རྟོག་ཞིབ་མོ་གྱིས་ལ་སྒོམས་དང་། འཁོར་བ་ཟད་སར་བསྐྱལ་ནས་མྱང་འདས་ཀྱི་ས་ལ་སླེབས་པར་འགྱུར་རོ། །ཞེས་ལེགས་པར་གདམས་སོ། །གནམ་གཡོགས་བྲལ་བའི་མཁལ་ལ་མཐའ་དབུས་མེད། །ལྟ་སྒོམ་རྫོགས་ལ་སྲིད་ཞི་མཉམ་པ་ཉིད། །ཟད་སར་བསྐྱལ་བས་ཀུན་བཟང་དགོངས་པ་རྫོགས། །ཆོས་རྗེ་ཀློང་ཆེན་རབ་འབྱམས་དད་བརྒྱས་མཆོད། །དེ་ནས་ཞྭའི་ལྷ་ཁང་གི་གཙུག་ལག་ཁང་གི་ཉམ་གསོས་རྣམས་མཛད་པ་དང་། མཆོད་པ་འབུལ་བ་ལ་འབྱོན་པའི་སྐབས་སུ། ཆོས་སྐྱོང་ལ་གསོལ་ཀ་མཛད་ཁྲོམ་ལ་ཆོས་གསུངས་པའི་ཚེ་མེ་ཏོག་གི་ཆར་རྩོད་པ་མེད་པར་བབས། ཐམས་ཅད་ལ་ཐར་པའི་ས་བོན་ཐེབས་པར་མཛད། ཆུ་བོ་རིར་ཕྱགས་ཕེབས་པ་དང་། ཨོ་རྒྱན་དུ་བྱོན་ནས། རྟེན་འབྲེལ་རྣམས་འཆུག་ཡོན་བདག་རྣམས་ལ་ཡང་མི་འཐད་པ་འགའ་རེ་བྱུང་བར་འདུག །ཁོ་བོས་ཁྱེད་རྣམས་ལ་མྱ་ངན་མི་འཇོག་གསུང་། དེ་ནས་བསམ་ཡས་པའི་དུད་གཏོང་དྲུག་གི་གདན་འདྲེན་བྱུང་བས། རྒྱ་མར་ཞག་ཤས་གཅིག་བཞུགས་ནས་ལ་ལ་བྱོན་པའི་ཐོ་རངས་འཇམ་དབྱངས་ཀུན་དགའ་རྒྱལ་མཚན་པ་ལ་སོགས་པ་བླ་མ་སློབ་དཔོན། ཡོན་བདག་བུ་སློབ་དང་བཅས་པས་སྐྱེས་ཐུང་བྱས་ནས། རྒྱ་མ་ཡུན་ཐང་དུ་ཕྱག་ཕེབས་པས་ཆིབས་ལས་གཞོས་ནས། ས་འཇའ་ལིའི་སྟེང་ན་བཞུགས་ཏེ། ད་ཁྱེད་རང་རྣམས་ཕྱིར་ལོག་འཕྲེང་བ་ལས་མི་ཡོང་། ཁྱེད་རྣམས་ཀྱིས་ཀྱང་ད་ནང་ནས་ང་མཐོང་བ་མིན། ཁྱེད་རང་རྣམས་ཆོས་

ལ་འབུངས། ངེད་དུམ་པ་ཞིག་འདིར་འདུག་གསུང་པས། ཐམས་ཅད་ཀྱི་གདོང་མཆི་མས་ཁེབས་ཏེ་སོ་སོར་གྱེས། དེ་ནས་ལ་ལ་བྱོན་ནས་མཆིམས་ཕུར་ཕྱགས་ཕེབས་པའི་ཉིན་པར། འོ་རྒྱ་གར་གྱི་དུར་ཁྲོད་བསིལ་བ་ཚལ་གྱི་དོད་པོ་ཡིན་པས། གཞན་དུ་སྐྱེས་པ་བས་འདིར་ཤི་བར་དགའ་བར་བཤད། ངའི་སྒྱུ་ལུས་ཀྱི་ཕུང་པོ་འདི་ཡང་མཆིམས་ཕུའི་དུར་ཁྲོད་ཆེན་པོ་འདིར་འཇོག །བསམ་པ་གཅིག་ཀྱང་ཐོག་ཏུ་ཕེབས་པ་ཡིན་གསུང་དུད་གཏོང་དྲུག་གིས་ཐོག་དྲངས་པའི་ཕྱོགས་ནས་འདུས་པའི་ཚོགས་པ་རྣམས་ལ་ཁྲིད་བཏབ། ཚོགས་པ་ཆེས་པས་སྤྲོས་མེད་ཀྱི་དབང་ལ་ཞག་གྲངས་མང་རབས་ཤིག་སོང་བའི་སྐབས་སུ། བསྙུངས་པའི་ཚུལ་བསྟན་ཡང་ནུབ་རེ་བཞིན་དབང་མཛད། བཅུ་དྲུག་གི་ཉིན་པར་མཆོད་གཏོར་ཤོམ་དབང་བྱེད་གསུང་པས། སྐུ་བསྙུངས་པས་འོ་བརྒྱལ་ཞག་གསུམ་སྐུ་ངལ་གསོ་བར་མཛད་པར་ཞུས་པས། དེ་མི་དགོས་དབང་འདི་ཚར་བ་ཞིག་བྱེད་གསུང་པ་ལ་ནན་གྱིས་ཞུས་པས་དབང་འདི་ཚར་བ་ཞིག་བྱེད་བསམ་པ་ཡིན་ཏེ། ཁྱེད་རྣམས་མི་ཉན་པར་འདུག་གསུང་ནས་སྟེང་དུ་བཞུད། དེ་ནས་ཆུ་མོ་ཡོས་ཀྱི་ལོ་ལྔ་བཅུ་རྩ་དྲུག་བཞེས་པ་ལ་རྒྱལ་གྱི་ཟླ་བའི་ཚེས་བཅོ་བརྒྱད་ཀྱི་དྲོ་ཁར་སོང་བ་དང། གུ་རུ་པ་དང་། སློབ་དཔོན་ཀུན་དཔལ་ལ་སོགས་པ་འགའ་ཞིག་དྲུང་དུ་ཡོད་པ་ལ་མཆོད་པ་གཅིག་ཤོམ་ལ་ཁྱེད་རང་རྣམས་མདོར་སོང་གསུང་། དེ་རྣམས་མི་འགྲོ་འདིར་འདུག་པར་ཞུ་ཞུས་པས། འོ་ན་སྒྱུ་ལུས་གོག་པ་འདི་འདོར་བ་ཡིན་པས། ཁྱེད་རང་རྣམས་ཞེད་མི་དགོས། ཅ་ཅོ་མ་བྱེད་པར་

མཉམ་གཞག་ལ་སྡོད་གསུངས་ནས་ཆོས་སྐུའི་བཞུགས་སྟངས་ཀྱིས་གདོད་མའི་ཟད་སར་གཤེགས་སོ། །ཀྱེ་མ་ཀྱེ་ཧུད་སྐྱབས་གནས་ཐུགས་རྗེ་ཅན། །རྒྱ་མཚོའི་གོས་ཅན་འདི་དག་དང་མཚུངས་སུ། །ད་ནི་མི་བཞུགས་གདོད་མའི་སར་གཤེགས་པ། །བདག་ཅག་སྐལ་བ་ལྡན་རྣམས་འདོར་ཕོད་དམ། །བཤེས་བྲལ་དམུལ་ལོང་ཐང་ཆེན་དབུས་ལྷུང་ལྟར། །མགོན་པོ་ཁྱེད་མིན་བདག་ཅག་སུ་ལ་རེ། །བྱང་ཆུབ་ལྗོན་ཤིང་རྐང་འཐུང་ཆག་གྱུར་པས། །སྡུག་བསྔལ་ཚད་པས་གདུངས་ལ་བསིལ་བྱེད་སུ། །དཔལ་ལྡན་ཡོན་ཏན་དཔག་མེད་འབྱུང་བའི་གནས། །མྱ་ངན་འདས་པའི་འབྲོག་དགོན་དེར་གཤེགས་པས། །ལྷར་བཅས་རྣམས་ཀྱི་གཙུག་རྒྱན་རིན་པོ་ཆེ། །ཡེངས་མ་སྐབས་ལ་སྟོར་ཞིང་མགོན་མེད་གྱུར། །སྨྲ་བའི་སེང་གེ་སྐྱེས་མཆོག་ཆེན་པོས་ཀྱང་། །བས་མཐའི་ནགས་སུ་དེད་དཔོན་སྟོར་བ་ལྟར། །དེ་རིང་བདག་སྙིང་མྱ་ངན་ཆེན་པོས་གདུངས། །ད་ནི་དབྱིངས་ནས་ཐུགས་རྗེས་གཟིགས་འཚལ་ལོ། །ཞེས་པ་ནི་སྨྲེ་སྡགས་ཀྱི་ཚིགས་སུ་བཅད་པའོ། །དེ་ནས་རྒྱལ་གྱི་ཟླ་བ་དང་། ཆོ་འཕྲུལ་གྱི་རིང་ལ་ཉིན་མཚན་མེད་པར་འཇའི་གུར་ཕུབ། མེ་ཏོག་གི་སིལ་མ་བཀྲམ། འཁྱགས་པ་རྣམས་རང་ཞུ། སེ་བའི་དུང་ལོ་རྒྱས། དེར་ཚོགས་པའི་སྐལ་ལྡན་འགའ་ཞིག་ལ། འོད་གསལ་གྱི་སྣང་བས་ཕྱམ་བརྡལ་བར་གྱུར། ཞག་ཉི་ཤུ་ལྔའི་བར་སྐུ་གདུང་བཞུགས་པ་ལ། ཙནྡན་དང་། ག་པུར་གྱི་དྲི་ཟིལ་གྱིས་ནོན་པའི་དྲི་ངད་བཟང་པོས་ཁྱབ་པར་གྱུར། ཞལ་ཏ་ལ་གདུང་ཁང་གསར་

པ་མ་བརྩིག་པར། རྙིང་བ་ཞིག་ཏུ་ཁྱེར་ལ་བཞུགས་གསུང་པས། མཆོད་པའི་སྤྲིན་ཕུང་མང་པོ་དང་བཅས་ནས་གདུང་ཁང་རྙིང་པ་ཞིག་ཏུ་གདན་དྲངས་པའི་ཚེ། ས་ཆེན་པོ་འདི་རབ་ཏུ་གཡོས་ཤིང་། འུར་འུར་ཆེམ་ཆེམ་པའི་སྒྲ་ལན་བདུན་དུ་གྲགས་པར་གྱུར་ཏོ། །ཐུབ་བའི་དབང་པོ་ཀུ་ཤའི་ཚལ་གཟིགས་ཚེ། །ཉན་ཐོས་རྣམས་ཀྱང་མྱ་ངན་གྱིས་གདུངས་ལྟར། །དྲི་མེད་འོད་ཟེར་མཆིམས་ཕུར་གཟིགས་པའི་ཚེ། །མཐོང་ཐོས་རྣམས་ཀྱང་མྱ་ངན་ཟུག་རྔུས་གཟིར། །མཁའ་ཀློང་ཡངས་པའི་དབྱིངས་ཀྱང་མ་རྡིབས་ལ། །འབྱུང་བ་འཛིན་མ་འདི་ཡང་མ་ཆག་ན། །ཆུ་གཏེར་ཆེན་པོ་འཁྲུགས་པར་མ་གྱུར་ཅིང་། །བདག་ཅག་རྣམས་ལ་འདི་ལྟར་གྱུར་འདི་ཅི། །དེ་ནས་བཞུས་པའི་ཚེ། ཐུགས་ལྗགས་སྤྱན་གསུམ་གདུང་ཁང་ནས་འཕར་ཏེ། སྐལ་བ་དང་ལྡན་བའི་པང་དུ་བྱོན་པ་དང་། རིགས་ལྔའི་རང་བཞིན་ཐོབ་པའི་རྟགས་སུ། ཤ་རཱི་རཾ་ལ་སོགས་པ་གདུང་རིགས་ལྔ་དང་རིང་བསྲེལ། ཕྲ་མོ་གྲངས་ལས་འདས་ཤིང་འཕེལ་གདུང་དུ་གྱུར་ནས། རེ་རེ་ལ་ཡང་བརྒྱ་ཕྲག་འཕེལ་ཞིང་ད་ལྟའི་བར་དུ། འཕེལ་བ་ཀུན་གྱིས་མཐོང་ཞིང་རྩོད་པ་མེད་དོ། །འདི་ནི་ཆོས་ཀྱི་སྐུ་ལས་གཟུགས་ཀྱི་སྐུར་བཞེངས་ཏེ། གདུལ་བྱའི་ཁམས་དང་མོས་པ་ཇི་ལྟ་བ་བཞིན་དུ་འཆད་རྩོད་རྩོམ་གསུམ་ལ་སྤོབས་པ་ཐོགས་པ་མེད་པར་འཇུག་སྟེ། དེ་ལ་སངས་རྒྱས་བཅོམ་ལྡན་འདས་ཀྱི་བསྟན་པ་དམ་པའི་ཆོས་རྒྱུ་དང་འབྲས་བུའི་ཐེག་པ་བསམ་གྱིས་མི་ཁྱབ་པ་དག་ལས། དམ་པ་

རྣམས་ཀྱི་བཀའ་དྲིན་ལ་བརྟེན་ནས་ཁོ་བོ་ཅག་གི་ཁོང་དུ་ཆུད་པའི་དོན་ཕྱིར་བསྟན་བཅོས་སུ་བཀོད་པ་ལ། ཕྱིའི་གནས་དང་ནང་གི་གནས་དང་དེ་ཁོ་ན་ཉིད་ཀྱི་གནས་གསུམ་དུ་རྣམ་པར་བཞག་པ་ལ། དང་པོ་ནི་གསུང་རབ་ལ་འཇུག་པའི་ཐེམ་སྐས་སམ་ཐུན་མོང་དུ་གྱུར་པ་དག་གི་ཕྱོགས་སུ་གཏོགས་པའི་བསྟན་བཅོས་ལ། ཡི་གེའི་སྡེབ་སྦྱོར་ལ་འཇུག་པ་རིན་ཆེན་སྙེ་མ་ཆེ་༡ཆུང་༢གཉིས། རིག་པ་ཀློག་པའི་དོན་བསྡུས། ༣སྒྲ་བཞིའི་མཚམས་སྦྱོར། ༤ཀློག་གི་བསྟན་བཅོས་ཟླ་བ་གསལ་བྱེད། ༥སྡེབ་སྦྱོར་ལ་འཇུག་པ་ཉི་མའི་ཤིང་རྟ། ༦ལྕི་ཡང་གི་གནས་པ་རིན་པོ་ཆེའི་སྡེ་མིག༧མངོན་བརྗོད་ལ་འཇུག་པ་མེ་ཏོག་གི་འཁྲི་ཤིང་། ༨སྙན་ངག་གི་བསྟན་བཅོས་མེ་ཏོག་རྒྱས་པའི་སྐྱེད་མོས་ཚལ། ༩དཔེར་བརྗོད་ཀྱི་གནས་ངེས་པ་ཀླུ་ཤིང་གི་མེ་ཏོག༡༠། སྤེལ་མའི་གནས་ལ་འཇུག་པ་ཚངས་པའི་གསུང་དབྱངས་ཏེ། ༡༡གཙོ་བོ་ལུས་ལྟ་བུའི་བསྟན་བཅོས་རྣམ་པར་དབྱེ་བ་དང་། ཐམས་ཅད་སྤེལ་མར་སྟོན་པ་འཕྲོས་པ་ཡན་ལག་གི་བསྟན་བཅོས་ལ། མིའམ་ཅི་ཀུན་ཏུ་དགའ་བའི་ཟློས་གར། ༡༢གཞོན་ནུ་ཞི་བའི་རྟོགས་པ་བརྗོད་པ་མེ་ཏོག་གི་ཆུན་པོ། ༡༣བློ་གསལ་རི་བོང་གི་རྟོགས་བརྗོད། ༡༤ལེགས་པར་གདམས་པ་ལྷའི་རྔ་བོ་ཆེ་ལྟ་བུའི་གཏམ། ༡༥པོ་ཏ་ལ་ཀུན་ཏུ་དགའ་བའི་གཏམ། ༡༦ལེགས་པར་སྦྱར་བའི་སྙན་ངག་ཟླ་བའི་འཁྲི་ཤིང་རབ་ཏུ་བཟང་པོ། ༡༧མེ་ཏོག་གི་ར་བ། ༡༨ནགས་ཀྱི་གཏམ་པདྨ་དཀར་པོ། ༡༩ནགས་ཀྱི་གཏམ་གངས་རིའི་རྒྱན། ༢༠ནགས་ཀྱི་གཏམ་ཀུན་ཏུ་བཟང་པོ། ༢༡ནགས་ཀྱི་གཏམ་ཀུ་མུ་དའི་འཁྲི་ཤིང་། ༢༢ནགས་

ཚལ་ཀུན་ཏུ་དགའ་བའི་གཏམ། ༢༣ཆོས་ཀྱི་སྡོམ་བཞི་དྲི་མ་མེད་པའི་གཏམ། ༢༤ཆོས་བཞི་རིན་པོ་ཆེའི་ཕྲེང་བ། ༢༥སློབ་དཔོན་བརྟག་པའི་རབ་ཏུ་བྱེད་པ། ༢༦རབ་བྱུང་བརྟག་པའི་རབ་ཏུ་བྱེད་པ། ༢༧སྐྱེ་བ་བརྟགས་པའི་རབ་ཏུ་བྱེད་པ། ༢༨མཁས་བླུན་བརྟག་པའི་རབ་ཏུ་བྱེད་པ། ༢༩བཤེས་གཉེན་བརྟག་པའི་རབ་ཏུ་བྱེད་པ། ༣༠ཆོས་དང་ཆོས་མིན་བརྟག་པའི་རབ་ཏུ་བྱེད་པ། ༣༡ཤིན་ཏུ་བྱ་དཀའ་བའི་གནས་ཀྱི་དཔེར་བརྗོད་ཡི་གེར་བཀོད་པ། ༣༢དབྱངས་ངེས་པ་ཅན་གྱི་རྒྱན། ༣༣དུས་ལ་མངོན་པར་སྐྱོ་བའི་རབས། ༣༤རང་ལ་གྲོས་སུ་བཏབ་པའི་རབས། ༣༥ཐར་པ་ལ་བསྐུལ་བའི་རབས། ༣༦བདེ་བར་གཤེགས་པའི་ཐུགས་རྗེ་ལ་བསྐུལ་བའི་རབས། ༣༧ཕྱོགས་ཀྱི་སྡེ་སྣོད་འཛིན་པ་རྣམས་ལ་གཏམ་དུ་བྱ་བའི་རབས། ༣༨བླ་མ་དམ་པ་ལ་ཞུ་བ་ཞུ་ཡིག་རིན་ཆེན་གསེར་གྱི་མཆོད་སྡོང་། ༣༩ཞུ་ཡིག་པདྨ་སྟོང་ལྡན། ༤༠ཞུ་ཡིག་ནོར་བུའི་དྲ་བ། ༤༡ཞུ་ཡིག་རྨ་བྱའི་ང་རོ། ༤༢ཕྱོགས་ཀྱི་སློབ་མ་ལ་བསྔགས་པ་ལྷའི་རྔ་སྒྲ། ༤༣སྦྱིན་བདག་ལ་བསྔགས་པ་རིན་པོ་ཆེའི་བང་མཛོད། ༤༤དྲི་བ་ཉི་ཤུ་པའི་ལན་རྒྱ་ཆེར་བཤད་པ། ༤༥སེམས་དང་ཡེ་ཤེས་ཀྱི་དྲི་བའི་ལན་རྒྱ་ཆེར་བཤད་པ། ༤༦མཁས་གྲུབ་དམ་པ་རྣམས་ཀྱི་མྱང་འདས་ཆེ་ཆུང་། ༤༧བསྟན་པ་སྙིགས་མའི་སྐྱོ་བ་བསམ་པ། ༤༨རྒྱུ་ལ་ཁམས་འདུས་པ་མེ་ཏོག་ཕྲེང་ལྡན། ༤༩རྐྱེན་ལ་ཁམས་འདུས་པ་ཀ་ཁ་སུམ་ཅུ། ༥༠གཉིས་ཀ་ལ་ཁམས་འདུས་པ་དྲན་པའི་མེ་ལོང་། ༥༡སྐྱེ་བོ་དགའ་བ་སྐྱེད་པ་གླུ་གར་གྱི་རྩེད་མོ། ༥༢བྱིས་པ་བཞད་གད་སློང་བ་སྤྲེའུའི་ཟློས་གར། ༥༣འཇིག་རྟེན་ལུགས་ལ་

འཇུག་པ་མཛངས་ཀྱི་འཕྲུལ་ཡིག༥༤། བདེ་བར་གཤེགས་པ་ལ་བསྟོད་པ་རྔ་བོ་ཆེའི་དབྱངས་སྙན། ༥༥ཡུམ་ལ་བསྟོད་པ་ཡིད་བཞིན་ནོར་བུ། ༥༦ཡོན་ཏན་ཚད་མེད་པར་བསྟོད་པ། ༥༧བསམ་གྱིས་མི་ཁྱབ་པར་བསྟོད་པ། ༥༨དཔེ་ལས་འདས་པར་བསྟོད་པ། ༥༩སྤྱན་རས་གཟིགས་ལ་བསྟོད་པ་ལྷའི་སིལ་སྙན། ༦༠རྟ་མགྲིན་ལ་བསྟོད་པ་གློག་གི་ཕྲེང་བ། ༦༡འཇམ་དཔལ་དཀར་པོ་ལ་བསྟོད་པ་མུ་ཏིག་གི་ཕྲེང་བ། ༦༢དམར་པོ་ལ་བསྟོད་པ་མིའམ་ཅིའི་དབྱངས་སྙན། ༦༣སེར་པོ་ལ་བསྟོད་པ་དྲི་ཟའི་རྒྱུད་མངས། ༦༤སྔོན་པོ་ལ་བསྟོད་པ་སྤྲིན་གྱི་ང་རོ། ༦༥འཕགས་མ་དབྱངས་ཅན་མ་ལ་བསྟོད་པ་གཞོན་ནུ་མཆོག་དགའི་དབྱངས་ཀུ་མུ་ཏའི་ཕྲེང་བ་པདྨའི་དྲ་བ། ༦༦འཕགས་མ་ནོར་རྒྱུན་མ་ལ་བསྟོད་པ་གསེར་གྱི་སྤྲིན་ཕུང་། ༦༧ཀུ་རུ་ཀུལླེ་ལ་བསྟོད་པ་དབང་པོའི་རྒྱུད་མངས། ༦༨དུག་སེལ་མ་ལ་བསྟོད་པ་ཀླུའི་གཙུག་རྒྱན། ༦༩འོད་ཟེར་ཅན་ལ་བསྟོད་པ་འཇིགས་པ་ཀུན་སེལ། ༧༠དཔལ་མོ་ལ་བསྟོད་པ་དབང་པོའི་མེ་ཏོག༧༡། ཕག་མོ་དཀར་མོ་ལ་བསྟོད་པ་དཔལ་གྱི་ཕྲེང་འཛིན། ༧༢དམར་མོ་ལ་བསྟོད་པ་དུས་ཀྱི་ཕྲེང་བ། ༧༣ནག་མོ་ལ་བསྟོད་པ་དངོས་གྲུབ་ཀུན་འབྱུང་། ༧༤མི་གཡོ་དཀར་པོ་ལ་བསྟོད་པ་མལླི་ཀའི་ཕྲེང་བ། ༧༥དམར་པོ་ལ་བསྟོད་པ་དུས་མཚམས་ཀྱི་སྤྲིན། ༧༦སྔོན་པོ་ལ་བསྟོད་པ་འབྱུང་པོ་ཀུན་འདུལ། ༧༧སྒྲོལ་མ་ལ་བསྟོད་པ་དཔྱིད་ཀྱི་ང་རོ། ༧༨ཚོགས་བདག་ལ་བསྟོད་པ་ནོར་བུའི་བང་མཛོད། ༧༩དབང་ཕྱུག་ལ་བསྟོད་པ་ལྷའི་མེ་ཏོག༨༠ཁྱབ་འཇུག་ལ་བསྟོད་པ་ཀླུའི་ང་རོ། ༨༡དབུ་མ་ལ་བསྟོད་པ་ཀུ་མུ་ཏའི་གཉེན། ༨༢ཚངས་

པ་ལ་བསྟོད་པ་རྒྱ་མཚོའི་རྦ་རླབས། ༨༣དུས་ཀྱི་ལྷ་ལ་བསྟོད་པ་དཔྱིད་ཀྱི་ཐིག་ལེ། ༨༤རི་དང་རྒྱ་མཚོ་ལ་བསྟོད་པ་ཕྱོགས་ཀྱི་ང་རོ། ༨༥མཆིམས་ཕུའི་གནས་ལ་བསྟོད་པ་དུས་བཞིའི་མེ་ཏོག༨༦། ཡེར་བའི་གནས་ལ་བསྟོད་པ་པདྨའི་ཕྲེང་བ། ༨༧གངས་རི་ཐོད་དཀར་གྱི་གནས་ལ་བསྟོད་པ་རོལ་མོའི་དབྱངས་སྙན། ༨༨ལུམ་པའི་གཙུག་ལག་ལ་བསྟོད་པ་རྒྱ་མཚོའི་རྦ་རླབས། ༨༩བསམ་ཡས་ཀྱི་ཡུལ་གྱི་བཀོད་པ་གསལ་བར་བྱེད་པ་གངས་རིའི་རྒྱན། ༩༠གསང་ཕུའི་ཆོས་གྲྭ་ལ་བསྔགས་པ་ཡོན་ཏན་ཕྲེང་ཚོགས། ༩༡ཞྭ་པདྨ་དབང་ཆེན་གྱི་གཙུག་ལག་ཁང་ལ་བསྟོད་པ་རོལ་མོའི་སྤྲིན་ཕུང་། ༩༢དཀར་ཆག་རྒྱས་པར་རྩིས་ཀྱི་ཡིག་གེ་ཞིབ་མོ། ༩༣བསྡུས་པ་ངོ་མཚར་དྲན་བྱེད། ༩༤གསོལ་འདེབས་དད་རྒྱན་གྱི་མེ་ཏོག་༩༥ལ་སོགས་ཕྲ་མོའི་གནས་དཔག་ཏུ་མེད་པ་ཞིག་སྐྱེ་བོ་ཆོས་ལ་འཇུག་པའི་ཆེད་དུ་སྦྱར་བ་ཡིན་ནོ། །སྙན་ངག་མཚོ་ཆེན་སྡེབ་སྦྱོར་པདྨའི་ཚལ། །མངོན་བརྗོད་གེ་སར་འདབ་སྟོང་རབ་རྒྱས་ཏེ། ཚིག་དོན་རྣམ་བཀྲའི་རང་བཞིན་བཀོད་ལེགས་པ། བློ་གསལ་རྐང་དྲུག་ལྡན་རྣམས་དགའ་བར་མཛོད། འདི་རྣམས་ཕྱིའི་གནས་དང་མཐུན་པའི་བསྟན་བཅོས་ཀྱི་དཀར་ཆག་སྟེ་དང་པོའོ།། །།དེ་ནས་ནང་གི་གནས་རྒྱ་ཆེར་བཤད་པ་ལ། རྒྱུ་མཚན་ཉིད་དང་འབྲས་བུ་སྔགས་ཀྱི་ཐེག་པ་གཉིས་ལས། རེ་ཞིག་མཚན་ཉིད་ཐེག་པའི་ཕྱོགས་སུ་གཏོགས་པའི་བསྟན་བཅོས་ལ། བྱམས་པའི་ཆོས་ལྔའི་སྤྱིའི་དོན་འགྲེལ་དུ་ས་ལམ་གྱི་རྣམ་པར་བཞག་པ་རིན་ཆེན་ཐེམ་སྐས་རྩ་༩༦འགྲེལ་༩༧དང་བཅས་པ། མངོན་རྟོགས་རྒྱན་གྱི་ལུས་རྣམ་བཞག་གསལ་བྱེད་རྒྱན་གྱི་སྣང་བ། ༩༨འདུལ་

བ་ཀ་རི་ཀའི་གསལ་བྱེད་འོད་ཀྱི་སྙེ་མ། ༩༩རང་རྒྱུད་ཤར་གསུམ་གྱི་དོན་བསྡུས་དེ་ཁོ་ན་ཉིད་ལ་འཇུག་པ། ༡༠༠དབུ་མ་ཐལ་འགྱུར་གྱི་གནས་གསལ་བ་རབ་ཏུ་མི་གནས་པའི་དོན་བསྡུས། ༡༠༡བདེ་བ་གཉིས་རབ་ཏུ་བྱ་བ་ལ་འཇུག་པ། ༡༠༢དེའི་མན་ངག་ལམ་རིམ་གསལ་བ། ༡༠༣སེམས་སྤྱོད་དོན་གྱི་སྙིང་པོ། ༡༠༤ལུང་སྦྱོར་རིན་པོ་ཆེའི་ཕྲེང་བ། ༡༠༥སེམས་བསྐྱེད་རིན་པོ་ཆེ་གསེར་གྱི་མེ་ཏོག༡༠༦། བསླབ་བྱ་རྒྱལ་སྲས་ལམ་བཟང་། ༡༠༧ཟབ་མོ་མདོ་ལྔའི་དོན་བཤད། ༡༠༨སྨོན་ལམ་རྒྱ་མཚོའི་སྙིང་པོ། ༡༠༩གཅོད་ཡུལ་དག་པའི་ལམ་ཁྱེར། ༡༡༠ཕུང་པོ་གསུམ་པའི་ཉམས་ལེན། ༡༡༡འདའ་ཀ་ཡེ་ཤེས་ཀྱི་སྒོམ་ཐབས་ལ་སོགས་པ། ༡༡༢བྱང་ཆུབ་སེམས་དཔའི་སྤྱོད་པ་མདོ་དང་མཐུན་པའི་གནས་དུ་མ་རྒྱུ་འབྲས་ཟབ་མོའི་ལམ་ལ་བརྟེན་ནས་ཐར་པ་འདོད་པ་དག་གི་དོན་དུ་ལེགས་པར་བཀོད་པ་ཡིན་ནོ། །ཟབ་ཅིང་རྒྱ་ཆེའི་གསུང་རབ་གངས་ཆེན་མཚོ། །རྒྱལ་བ་རྒྱས་སྲས་གདེངས་ཅན་དབང་པོའི་གནས། ཡོན་ཏན་ཡིད་བཞིན་འབྱུང་གནས་ཕྱོགས་གསལ་བས། །དད་ལྡན་ཐར་པ་འདོད་རྣམས་དགའ་བར་མཛོད། །དོན་གཉིས་པ་གསང་སྔགས་རྡོ་རྗེ་ཐེག་པའི་ཕྱོགས་སུ་གཏོགས་པའི་བསྟན་བཅོས་ལ། རྒྱུད་སྡེ་བཞིའི་གནས་ཟབ་ཅིང་རྒྱ་ཆེ་བར་བསྟན་པ་ལས། བཤད་པའི་གནས་གསལ་བར་བསྟན་པ་ཡིད་བཞིན་རིན་པོ་ཆེའི་མཛོད་རྩ་བ། ༡༡༣འགྲེལ་པ་པདྨ་དཀར་པོ་དང་བཅས་པ། ༡༡༤སྒྱུ་འཕྲུལ་དྲ་བ་ཆེན་པོའི་ཆོས་ཀྱི་རྣམ་གྲངས་ལས། གསང་བའི་སྙིང་པོ་དེ་ཁོ་ན་ཉིད་དུ་ངེས་པའི་སྤྱི་དོན་ཡིད་ཀྱི་གསང་འགྲེལ་ཕྱོགས་བཅུ་མུན་སེལ་ཡིན་ནམ། མུན་སེལ། ༡༡༥བསྡུས་དོན་མ་རིག་མུན་སེལ། ༡༡༦རིགས་ལྔ་ཡེ་ཤེས་སྣང་བ་རྣམས་དང་། ༡༡༧ཆོས་སྤྱོད་ཐམས་ཅད་ཀྱི་མངོན་པར་རྟོགས་པའི་རྒྱུད་ཀྱི་བཤད་འགྲེལ་

བྱང་ཆུབ་ལྗོན་ཤིང་། ༡༡༨རྒྱུད་སྡེ་བཞིའི་སྤྱི་དོན་བཤད་པ་རྡོ་རྗེ་འབྱུང་བ། ༡༡༩དམ་ཚིག་གསུམ་བཀོད་ཀྱི་རྣམ་བཤད་ཉི་མའི་འོད་ཟེར། ༡༢༠ཕྲིན་སྒྲུབ་ཆོ་གའི་སྐོར་ལ། སྒྱུ་འཕྲུལ་ཞི་ཁྲོའི་སྐོངས་བཤགས་ཀྱི་ཆོ་ག་རྒྱས་པ། ༡༢༡དེའི་ལེའུ་ལག་བསྡུས་པ། ༡༢༢བླ་མའི་ཕྲིན་སྒྲུབ་རིན་པོ་ཆེའི་སྒྲོན་མེ། ༡༢༣ཐུགས་རྗེ་ཆེན་པོ་འཁོར་བ་དོང་སྤྲུག་གི་ཆོ་ག་པདྨ་ཅོད་པན། ༡༢༤ཀུན་རིག་རྩ་བའི་དཀྱིལ་འཁོར་དུ་སློབ་མ་འཇུག་ཅིང་དབང་བསྐུར་བའི་ཆོ་ག༡༢༥། རྡོ་རྗེ་སློབ་དཔོན་གྱི་ལས་རིམ་རྒྱས་པ། ༡༢༦སློབ་མའི་ལས་རིམ་བསྡུས་པ། ༡༢༧རབ་ཏུ་གནས་པའི་ཆོ་ག་ཀུན་ཏུ་བཟང་པོ། ༡༢༨ཆ་གསུམ་རྒྱས་པ་འོད་ཀྱི་སྙེ་མ། ༡༢༩བསྡུས་པ་རིན་ཆེན་སྙིང་པོ། ༡༣༠སྲེག་སྦྱོང་དོན་རབ་གསལ་བ། ༡༣༡ཐིག་རྩ་འོད་ཀྱི་ཕྲེང་བ། ༡༣༢སྒྲོལ་མའི་མཎྜལ་བཞི་པའི་ཆོ་ག་བདེ་ལེགས་ཀུན་འབྱུང་། ༡༣༣ཁྲི་མོན་ལས་ཐར་པའི་ཆོ་ག་ཡིད་བཞིན་ནོར་བུ། ༡༣༤འཇིགས་པ་བརྒྱད་སྐྱོབ་ཀྱི་ཆོ་ག་པདྨའི་དྲ་བ། ༡༣༥འཕགས་མ་དུག་སེལ་གྱི་ཆོ་ག་བདུད་རྩིའི་ལྗོན་ཤིང་། ༡༣༦འཕགས་མ་དབྱངས་ཅན་མའི་ཁྲུས་ཀྱི་ཆོ་ག་རིན་ཆེན་ནོར་བུ། ༡༣༧རྣམ་པར་རྒྱལ་བའི་ཆོ་ག་ཡིད་བཞིན་ཕྲེང་བ། ༡༣༨སྨན་བླའི་ཆོ་ག་ཡོན་ཏན་ཕྲེང་ཚོགས། ༡༣༩གནས་བརྟན་བཅུ་དྲུག་གི་ཆོ་ག་གཞན་ཕན་ནོར་བུ། ༡༤༠ཁ་འབར་མའི་གཏོར་ཆེན་བར་ཆད་ཀུན་སེལ། ༡༤༡ཁྲོ་བོ་བཅུའི་སྲུང་བཟློག་གི་ཆོ་ག་གནས་ལུགས་འཁོར་ལོ། ༡༤༢གཙུག་ཏོར་ཆོ་ག་བགེགས་དཔུང་ཞི་བྱེད། ༡༤༣དྲེགས་པ་སྤྱིའི་བསྐང་གསོ་དངོས་གྲུབ་ཀུན་འབྱུང་། ༡༤༤སྤྱི་གསོལ་ཆེན་མོ། ༡༤༥ཕུད་རབས་རྒྱས་པ། ༡༤༦རྔན་ཡིག་ཆེན་མོ། ༡༤༧བྱེ་བྲག་མ་མོའི་བསྐང་གསོ་

ཁྲག་མཚོ་ཁོལ་མ། ༡༤༨གཟའ་ཡི་བསྐང་གསོ་དགྲ་ལས་རྣམ་རྒྱལ། ༡༤༩གནོད་སྦྱིན་དམར་ནག་གི་བསྐང་གསོ་རི་རབ་བརྩེགས་པ། ༡༥༠དམ་ཅན་གྱི་བསྐང་གསོ་ལས་བཞི་ལྷུན་གྲུབ། ༡༥༡མ་མགོན་སྤྱིའི་བསྐང་གསོ་ཡིད་བཞིན་ལྷུན་གྲུབ་རྣམས་དང་། ༡༥༢བསྐྱེད་རིམ་གཙོ་བོར་བཏོན་པ་སྒྲུབ་ཐབས་ཀྱི་སྐོར་ལ་བླ་མའི་སྤྱི་སྒྲུབ་དངོས་གྲུབ་འབྱུང་གཏོར། ༡༥༣བྱེ་བྲག་བི་མ་ལའི་སྒྲུབ་པ་དངོས་གྲུབ་ཆར་འབེབས། ༡༥༤པདྨ་ཞི་བར་སྒྲུབ་པ་རིན་ཆེན་ཁང་བརྩེགས། ༡༥༥། པདྨ་དྲག་པོར་སྒྲུབ་པ་གནམ་ལྕགས་འབར་བ། ༡༥༦ཡི་དམ་ཞི་ཁྲོ་སྤྱི་སྒྲུབ་ཡང་དག་དོན་གྱི་སྙིང་པོ། ༡༥༧རྟ་མགྲིན་དྲེགས་པ་མཐར་བྱེད། ༡༥༨ཕུར་པ་སྐུ་གསུམ་འདུས་པ། ༡༥༩བདེ་མཆོག་ཡིད་བཞིན་འཁོར་ལོ། ༡༦༠འཇམ་དཔལ་བདུད་རྩི་འབྱུང་བ་རྣམས་དང་། ༡༦༡མཁའ་འགྲོ་མ་སྤྱིའི་སྒྲུབ་ཐབས་གསེར་གྱི་དྲྭ་བ། ༡༦༢བྱེ་བྲག་གཙོ་བོ་རྐྱང་པར་སྒྲུབ་པ་ཐབས་ཀྱི་འཁོར་ལོ། ༡༦༣དཔའ་བོ་རྐྱང་པར་སྒྲུབ་པ་ཤེས་རབ་འཁོར་ལོ། ༡༦༤སྦྲག་མར་སྒྲུབ་པ་བདེ་ཆེན་འཁོར་ལོ། ༡༦༥གསང་བ་སྙིང་གི་སྒྲུབ་པ་གནད་ཀྱི་ཕྲེང་བ། ༡༦༦ཡང་གསང་ཐོད་རྒལ་དུ་སྒྲུབ་པ་སྲོག་གི་ཐིག་པ་རྣམས་དང་། ༡༦༧ཕྲ་མོའི་སྒྲུབ་པ་ལ་ཚེ་སྒྲུབ་བདུད་རྩིའི་བུམ་པ། ༡༦༨འཆི་མེད་དབང་པོའི་ཕྲེང་བ། ༡༦༩ངན་སོང་བ་སྦྱོང་བ་ལྷ་ལྔའི་སྒྲུབ་ཐབས་ཟླ་བའི་ནོར་བུ། ༡༧༠རྣམ་སྣང་གི་སྒྲུབ་ཐབས་ངན་སོང་ཀུན་སྦྱོང་། ༡༧༡རྡོ་རྗེ་སེམས་དཔའི་སྒྲུབ་ཐབས་སྒྲིབ་པ་རྣམ་སེལ། ༡༧༢མི་འཁྲུགས་

པའི་སྒྲུབ་ཐབས་ངན་སོང་རྣམ་སྦྱོང་། ༡༧༣ཤཱཀྱ་ཐུབ་པའི་སྒྲུབ་ཐབས་འོད་ཟེར་ཀུན་འབྱུང་། ༡༧༤བྱམས་པའི་སྒྲུབ་ཐབས་པདྨ་བརྩེགས་པ། ༡༧༥འཇམ་དཔལ་དཀར་པོའི་སྒྲུབ་ཐབས་ཤེས་རབ་གསལ་བྱེད་༡༧༦སྨྲ་བའི་སེང་གེའི་སྒྲུབ་ཐབས་བློའི་མུན་སེལ། ༡༧༧ཨ་ར་པ་ཙ་ན་དཀར་པོའི་སྒྲུབ་ཐབ་ཤེས་རབ་འཁོར་ལོ། ༡༧༨སེར་པོའི་སྒྲུབས་ཐབས་འོད་ཀྱི་སྣང་བ། ༡༧༩མི་གཡོ་དཀར་པོའི་སྒྲུབ་ཐབས་སྙིང་གི་མུན་སེལ། ༡༨༠ཕག་མོ་དཀར་མོའི་སྒྲུབ་ཐབས་འོད་གྱི་སྙིང་པོ། ༡༨༡། རལ་གཅིག་མ་དཀར་མོའི་སྒྲུབ་ཐབས་དགའ་བ་བསྐྱེད་པ། ༡༨༢དབྱངས་ཅན་མ་དཀར་མོའི་སྒྲུབ་ཐབས་ཟླ་བ་འདོད་འཇོ། ༡༨༣། དམར་མོའི་སྒྲུབ་ཐབས་ཉི་མའི་འདོད་འཇོ། ༡༨༤ཀུ་རུ་ཀུལླེའི་སྒྲུབ་ཐབས་རིན་པོ་ཆེའི་མེ་ཏོག༡༨༥། ཚོགས་བདག་དམར་པོའི་སྒྲུབ་ཐབས་ནོར་བུའི་བང་མཛོད། ༡༨༦རྣམ་ཐོས་ཀྱི་སྒྲུབ་ཐབས་རྒྱལ་མཚན་རྩེ་མོ། ༡༨༧ཛམ་ལྷ་སེར་པོའི་སྒྲུབ་ཐབས་གསེར་གྱི་ཁང་བརྩེགས། ༡༨༨ནག་པོའི་སྒྲུབ་ཐབས་འབྱོར་པ་རྒྱ་མཚོ། ༡༨༩ནོར་རྒྱུན་མའི་སྒྲུབ་ཐབས་གཏེར་གྱི་བུམ་པ། ༡༩༠ཨ་གུ་ལིའི་སྒྲུབ་ཐབས་ཉི་མའི་དཀྱིལ་འཁོར། ༡༩༡འོད་ཟེར་ཅན་གྱི་སྒྲུབ་ཐབས་ཟླ་བའི་འཁོར་ལོ། ༡༩༢ལྷ་མོ་གཟུངས་ཀྱི་སྙེ་མའི་སྒྲུབ་ཐབས་དཀར་མོའི་ཕྲེང་བ། ༡༩༣དབང་ཕྱུག་གི་སྒྲུབ་ཐབས་འཇིག་རྟེན་གསུམ་སྣང་། ༡༩༤ཁྱབ་འཇུག་གི་སྒྲུབ་ཐབས་གྲོང་ཁྱེར་སུམ་བརྩེགས་རྣམས་དང་། ༡༩༥གཞན་ཡང་དྲེགས་པ་སྤྱིའི་སྒྲུབ་ཐབས་རི་ནག་སྤུངས་པ། ༡༩༦བྱེ་བྲག་མ་མགོན་ལྕམ་དྲལ་གྱི་སྒྲུབ་ཐབས་དུས་ཀྱི་མཚོན་ཆ། ༡༩༧འཇིགས་པ་མ་

མོའི་སྒྲུབ་པ་སྲོག་གི་སྤུ་གྲི། ༡༩༨དྲག་པོ་གཟའི་སྒྲུབ་ཐབས་འཇིག་རྟེན་ཕུང་བྱེད། ༡༩༩ཤན་པ་གནོད་སྦྱིན་གྱི་སྒྲུབ་ཐབས་རོ་ལངས་སྐར་མདའ། ༢༠༠སྐྱེས་བུ་དམ་ཅན་གྱི་སྒྲུབ་ཐབས་གིང་ཆེན་འབར་བ། ༢༠༡ཆོ་འཕྲུལ་གནམ་ལྕགས་ཀྱི་སྒྲུབ་པ་ལྟས་ངན་འཕྲུལ་གྱི་བང་མཛོད། ༢༠༢འགལ་བྱེད་ཁྲམ་ལ་འདེབས་པ་རྒྱ་མཚོ་དུ་རུ་ཀའི་གཏད་ཁྲམ་༢༠༣ལ་སོགས་ཏེ་ཕྲིན་ལས་རྣམ་བཞིས་བསྟན་པ་ཡུན་རིང་དུ་གནས་པའི་ལས་རིམ་སྒྲུབ་པ་༢༠༤རྣམས་དང་།

༈ངེས་དོན་རྫོགས་རིམ་མཐར་ཐུག་སྙིང་པོའི་དོན་ལ་སྒྱུ་འཕྲུལ་རིམ་པ། ཡང་གསང་ཐིག་ལེའི་གནད་ཡིག་བསྟན་པ་ལ། ཡང་དག་བྱང་ཆུབ་སྙིང་པོའི་རྫོགས་རིམ་ཡེ་ཤེས་འཁོར་ལོ། ༢༠༥བདེ་མཆོག་རིམ་པ་ལྔ་པའི་ཟབ་དོན་སྙིང་པོའི་ཡང་ཞུན། ༢༠༦གསང་འདུས་རིམ་པ་ལྔ་པའི་ཟབ་དོན་འོད་གསལ་འཁོར་ལོ། ༢༠༧སྦྱོར་བ་ཡན་ལག་དྲུག་གི་བསྡུས་དོན་དེ་ཉིད་འདུས་པ། ༢༠༨ལམ་འབྲས་བུ་དང་བཅས་པའི་རིམ་གཉིས་འཁོར་ལོ། ༢༠༩ཆོས་དྲུག་གི་སྙིང་པོ་ཡང་ཞུན། ༢༡༠བསྡུས་པ་འོད་གསལ་རྣམ་སྦྱོང་། ༢༡༡ཐབས་ལམ་ཟབ་མོའི་དོན་བསྡུས་གསང་བའི་དེ་ཉིད། ༢༡༢ཤེས་རབ་ཀྱི་ལམ་རིམ་སེམས་ཁྲིད་སྙིང་པོར་བསྟན་པ། ༢༡༣ཕྱག་རྒྱ་ཆེན་པོའི་ལམ་རིམ་གྱི་ཟབ་དོན་རྣལ་འབྱོར་བཞིའི་སྙིང་པོ། ༢༡༤ཅིག་ཅར་བའི་ཟབ་དོན་ཐོག་བབས། ༢༡༥དམར་ཁྲིད་གཉིས་ཀའི་ཆ་རྐྱེན་སྐུ་གསུམ་དོན་ཁྲིད་ནམ་མཁའ་སྐོར་གསུམ། ༢༡༦མེ་ལོང་བཞིའི་གནས་ལུགས། ༢༡༧སེམས་ཀྱི་རྡོ་རྗེའི་གླུ། ༢༡༨སྣང་བ་ལམ་ཁྱེར་འཁོར་འདས་ཁ་སྦྱོར། ༢༡༩རྐྱེན་སྣང་རང་གྲོལ་ཟབ་དོན་འདུས་པ་རྣམས་དང་། ༢༢༠གཞན་

ཡང་ཞི་བྱེད་དོན་གྱི་སྙིང་པོ། ༢༢༡གཅོད་ཡུལ་གནས་ལུགས་རང་བབས་ལ་སོགས་ཏེ། ༢༢༢བོད་འདིར་གྲགས་སོ་ཅོག་གི་ཟབ་དོན་རྫོགས་རིམ་རྣམས་བླ་མ་ལས་ཐོས་པའི་དོན་ཤེས་རབ་གསུམ་གྱིས་ངེས་པར་བྱས་པ་རྣམས་ལས་སྙིང་པོའི་ཡང་ཞུན་དུ་བསྔགས་ཏེ་བཀོད་པ་ཡིན་ནོ། །ཡང་ཟབ་འབྲས་བུ་ཡིད་བཞིན་འོག་མིན་གནས། །ཐམས་ཅད་བདེ་ཆེན་སྐུ་གསུམ་གཞལ་ཡས་ཁང་། །ཡེ་ཤེས་རྔ་སྒྲ་མཛེས་པའི་འོད་གསལ་བས། །སྐལ་བཟང་སྐྱེ་བོའི་ཚོགས་རྣམས་དགའ་བར་མཛོད། །ལེགས་པར་སྦྱར་བ་བསྟན་བཅོས་ཀྱི་དཀར་ཆག་ལས་ནང་གི་གནས་བསྟན་པ་སྟེ་གཉིས་པའོ།། །།༈དེ་ནས་དེ་ཁོ་ན་ཉིད་ཀྱི་བསྟན་བཅོས་རྒྱ་ཆེར་བཤད་པ་ལ། གསང་བའི་གནས་མདོ་སྤྱིར་བསྟན་པ་དང་། གསང་ཆེན་བླ་ན་མེད་པའི་གནས་བྱེ་བྲག་ཏུ་བཤད་པ་གཉིས་ལས། རེ་ཞིག་གི་སྤྱིར་བསྟན་པ་ལ། ཐེག་པ་མཐའ་དག་གི་དོན་རྫོགས་པ་ཆེན་པོའི་ལམ་དུ་འཇུག་པའི་སྔོན་འགྲོའི་ཐབས་ལམ་༢༢༣ཙམ་དུ་ཤེས་པར་བྱ་བའི་ཕྱིར་ཀུན་དང་མཐུན་ལ་གོང་དུ་འདྲེན་པའི་ལམ་འབྲས་བུ་དང་བཅས་སྟོན་པའི་བསྟན་བཅོས་ཀྱི་གནས་ལུགས་གསལ་བ། ༢༢༤མན་ངག་རིན་པོ་ཆེའི་རྫོགས་པ་ཆེན་པོ་སེམས་ཉིད་ངལ་གསོ། ༢༢༥དེའི་འགྲེལ་པ་ཤིང་རྟ་ཆེན་པོ། ༢༢༦། བསྡུས་དོན་ཉི་མའི་སྙིང་པོ། ༢༢༧ཆོས་འབྱུང་ཤེས་རབ་གསལ་བྱེད། ༢༢༨ཁྲིད་ཡིད་འཁོར་བ་དོང་སྤྲུག་༢༢༩རྫོགས་པ་ཆེན་པོ་བསམ་གཏན་ངལ་གསོ༢༣༠། དེའི་འགྲེལ་པ་ཤིང་རྟ་རྣམ་དག་༢༣༡བསྡུས་དོན་ཟླ་བའི་སྙིང་པོ། ༢༣༢ཁྲིད་ཡིག་ཐར་གླིང་གསལ་བྱེད། ༢༣༣རྫོགས་པ་ཆེན་པོ་སྒྱུ་མ་ངལ་གསོ། ༢༣༤དེའི་འགྲེལ་པ་ཤིང་རྟ་དྲི་མེད། ༢༣༥ཁྲིད་ཡིད་ངེས་དོན་སྙིང་པོ་རྣམས་དང་། ༢༣༦སེམས་སྡེ་སྤྱིའི་དོན་བཤད་ལ་བྱང་ཆུབ་ཀྱི་སེམས་ཀུན་བྱེད་རྒྱལ་པོའི་སེམས་འགྲེལ་ཉི་མའི་འོད་ཟེར། ༢༣༧ཁྲིད་ཡིག་ནམ་མཁའ་ཀློང་གསལ། ༢༣༨མན་ངག་གི་དོན་འགྲེལ་རང་གྲོལ་སྐོར་གསུམ་ལ་རྫོགས་པ་ཆེན་པོ་སེམས་ཉིད་རང་གྲོལ། ༢༣༩འགྲེལ་པ་ཆེན་པོ་འོད་ཀྱི་འཁོར་ལོ། ༢༤༠ཁྲིད་ཡིག་ཆོས་སྐུ་རང་ཤར། ༢༤༡རྫོགས་པ་ཆེན་པོ་ཆོས་

ཉིད་རང་གྲོལ། འགྲེལ་པ་འོད་ཀྱི་སྙེ་མ། ༢༤༣ཁྲིད་ཡིག་ཆོས་སྐུ་རང་བབས། ༢༤༤རྫོགས་པ་ཆེན་པོ་མཉམ་ཉིད་རང་གྲོལ། ༢༤༥འགྲེལ་པ་འོད་ཀྱི་དྲ་བ། ༢༤༦ཁྲིད་ཡིག་ཆོས་སྐུ་ལྷུན་གྲུབ་རྣམས་དང་། ༢༤༧ཀློང་སྡེ་སྤྱིའི་དོན་བཤད་ལ། ཀློང་གསུམ་སྤྱིའི་དོན་བཤད་ཆིངས། ༢༤༨ནམ་མཁའ་རབ་འབྱམས་འགྲེལ་པ་ཡངས་དོག་མེད་པའི་རྒྱ་གྲོལ། ༢༤༩མན་ངག་གི་དོན་འགྲེལ་ཆོས་དབྱིངས་རིན་པོ་ཆེའི་མཛོད། ༢༥༠འགྲེལ་པ་ཆོས་དབྱིངས་གསལ་བ། ༢༥༡ཁྲིད་ཡིག་ཁྱབ་བརྡལ་ཀློང་ཡངས་༢༥༢རྣམས་དང་མན་ངག་གི་སྡེ་སྤྱི་དོན་བཤད་པ་ལ། སྐུ་དང་ཡེ་ཤེས་རྒྱས་པ་ལྷུན་གྲུབ་སྙིང་པོ། ༢༥༣འགྲེལ་པ་མི་ནུབ་རྒྱལ་མཚན། ༢༥༤མཚན་དཔེ་སྐུ་གསུམ་ལག་ཁྲིད། ༢༥༥མན་ངག་གི་དོན་འགྲེལ་ཀུན་འདུས་རིག་པའི་གལ་མདོ། ༢༥༦ཀུན་གསལ་སྙིང་གི་དོན་འགྲེལ། ༢༥༧བར་དོ་འོད་ཀྱི་སྙེ་མ་༢༥༨ལ་སོགས་པ་ཟབ་ཅིང་རྒྱ་ཆེ་བའི་གནས་བསྟན་པ་ལགས་སོ། །ཡང་ཟབ་ཆོས་མཆོག་ངེས་དོན་སྙིང་པོའི་མཁར། །སྐུ་དང་ཡེ་ཤེས་ཉི་མའི་འོད་བརྡལ་བས། །བླ་མེད་བསྟན་པའི་པད་ཚལ་རྒྱས་པ་དང་། །མཉམ་དུ་གདུལ་བྱའི་བྱ་ཚོགས་དགའ་བར་ཤོག །དོན་གཉིས་པ་གསང་ཆེན་བླ་ན་མེད་པའི་གནས་མདོ་སྤྱི་དང་བྱེ་བྲག་ཏུ་བཤད་པ་ལ། སྤྱིའི་ཆིངས་རྒྱ་ཆེར་བསྟན་པ་དང་། བྱེ་བྲག་ཟབ་དོན་སྙིང་པོ་བསྡུ་བ་གཉིས་ལས། རེ་ཞིག་གསང་ཆེན་ངེས་པ་ཐེག་པའི་རྒྱལ་པོའི་རྣམ་བཞག་ཡོ་གའི་ཕྱོགས་ཀྱི་དོན་དུ་ཕབས་པའི་གནས་གསལ་བྱེད། གྲུབ་མཐའ་རིན་པོ་ཆེའི་མཛོད། ༢༥༩རྒྱུད་བཅུ་བདུན་མན་ངག་བརྒྱ་དང་བཅུ་དགུའི་དོན་འགྲེལ་ཐེག་མཆོག་རིན་པོ་ཆེའི་མཛོད། ༢༦༠ལམ་ཁྱེར་གནད་ཀྱི་དོན་འགྲེལ་

ཚིག་དོན་རིན་པོ་ཆེའི་མཛོད། ༢༦༡ཆིངས་ངེས་པ་མན་ངག་རིན་པོ་ཆེ་གསེར་གྱི་སྒྲོམ་བུ། ༢༦༢བྱེ་བྲག་ཟབ་དོན་སྙིང་པོར་བསྡུ་བ་ལ། ཁྲིད་ཀྱི་ཡི་གེ་སེམས་སྦྱོང་བདུན་པ། ༢༦༣སངས་རྒྱས་མཉམ་སྦྱོར། ༢༦༤ཁྱུང་ཆེན་གཤོག་རྫོགས། ༢༦༥མན་ངག་གི་ལུང་རྫོགས་པར་སྟོན་པ་བླ་མ་ཡང་ཐིག་ཡིད་བཞིན་ནོར་བུ་ཆོས་སྡེ་ལྔ་བཅུ་རྩ་བཞི་པ། ༢༦༦དེ་ལས་ཤིན་ཏུ་ཟབ་པའི་གནས་བསྡུས་པ་ཟབ་མོ་ཡང་ཏིག་ཆོས་ཚན་སུམ་ཅུ་རྩ་ལྔ་པ་༢༦༧རྣམས་ནི་བླ་མ་སྙིང་ཏིག་བྱིན་རླབས་ལག་ཁྲིད་ཀྱི་སྐོར་དང་། ཁྱད་པར་དུ་སྨོན་ལམ་ལུང་བསྟན་དང་འབྲེལ་པ་མཁའ་འགྲོ་སྙིང་ཐིག་གི་སྐོར་ལ་མན་ངག་དུས་ལ་བབས་པ། མཁའ་འགྲོ་ལུང་བསྟན་གྱི་བབས་ལུགས་ངོ་བོ་ལག་ཁྲིད་དུ་བསྟན་པ། ༢༦༨དབང་ཁྲིད་གདམས་པའི་མཚོན་ཚུལ། ༢༦༩བྱིན་རླབས་སེམས་ལ་ཤར་བ་ངེས་ངོན་སྙིང་པོའི་གདམས་པ༢༧༠སྟེ་གནད་གསུམ་ཆོས་སྡེ་ལྔ་བཅུ་རྩ་ལྔར་གཏན་ལ་ཕབས་པ་ནི། མཁའ་འགྲོ་ཡང་ཏིག་གི་ཆོས་ཀྱི་རྣམ་གྲངས་སོ། །ཞར་ལ་ཆོས་སྤྱོད་ལས་རིམ་གསོལ་འདེབས་དྲུག་པ། ༢༧༡། སྙིང་པོ་དོན་གྱི་མགུར། ༢༧༢རྡོ་རྗེའི་གླུ་སུམ་ཅུ་དང་བཅས་པ་རྣམས་ནི་དེ་དག་གི་ཆ་ལག་ཏུ་བསྟན་པ་སྟེ། ཤིན་ཏུ་ཟབ་པའི་ཡང་ཟབ་ངོ་མཚར་རྨད་དུ་བྱུང་བའི་སྐོར་དུ་གཏོགས་པ་རྣམས་ཕྱི་རབས་སྐལ་ལྡན་རྣམས་ཀྱི་དོན་དུ་བུམ་ཐང་ཐར་པ་གླིང་དུ་དཀར་ཆག་ལ་བཏབ་པ་གུ་རུ་ལུགས་སུ་ཆོས་རྗེ་རིན་པོ་ཆེའི་སྐུ་གསུང་ཐུགས་ཆེ་བའི་ཡོན་ཏན་བསྟན་པའི་ཕྱིར་རྣམ་པར་ཐར་པ་གསལ་བར་བཀོད་པ་ཡིན་ནོ།། །།ངག་གི་དབང་པོས་འཆད་ལུགས་མཐོང་ཙ་ན། །སྐུ་མཆེད་གསུམ་པོའི་ཆོས་འཆད་

དིག་དིག་པོ། །ཀློང་ཆེན་རབ་འབྱམས་རིག་གྲྭར་རྩོད་ཙ་ན། །ཕྱ་གཙང་དན་གསུམ་རྩོད་པ་རྐྱང་རྐྱང་པོ། །ཀུན་མཁྱེན་ཆེན་པོའི་རྩོམ་པ་མཐོང་ཙ་ན། །བུ་དོལ་ཤེར་གསུམ་རྩོམ་པ་མོག་མོག་པོ། །སྣ་ཚོགས་རང་གྲོལ་ལྟ་དགོངས་མཐོང་ཙ་ན། །ཆེན་པོ་གསུམ་གྱི་གྲུབ་མཐའ་ཡུ་ཡུ་པོ། །འཕན་པ་བཟང་པོའི་མཛད་སྤྱོད་མཐོང་ཙ་ན། །ཆེན་པོར་འདོད་པའི་སྤྱོད་པ་དམན་དམན་འདྲ། །པདྨ་ལས་འབྲེལ་ཡོན་ཏན་མཐོང་ཙ་ན། །རྟོགས་ལྡན་མིང་བཏགས་རྣམས་ཀྱང་བླུན་བླུན་པོ། །གུ་ཡངས་བློ་བདེའི་བྱ་བྲལ་མཐོང་ཙ་ན། །བཟང་པོ་ཞིག་པོའི་སྤྱོད་པ་དམན་དམན་འདྲ། །དྲི་མེད་འོད་ཟེར་གཞན་དོན་མཐོང་ཙ་ན། །ཆེན་པོར་རློམ་རྣམས་གཞན་དོན་ལད་མོ་འདྲ། །ཞེས་པ་འདི་ཡང་བདག་ཉིད་ཆེན་པོ་འདི་གཞན་ལས་ཆེས་མཆོག་ཏུ་གྱུར་པའོ། །ཚོགས་གཉིས་རྦ་རླབས་ཡེ་ཤེས་ཆུ་གཏེར་ཅན། །མཁྱེན་རྩེའི་ལྦུ་ཕྲེང་རི་དབང་བརྩེགས་ངོག་རོལ། །དབང་བཞིའི་ཆུ་རྒྱུན་སྐྱེ་དགུའི་དྲི་མ་སྦྱོང་། །བདེན་གཉིས་དལ་འབབས་དེ་ལ་གུས་པས་བསྟོད། །ཐུགས་རྗེ་ཀླུ་དབང་མཁྱེན་བརྩེའི་གདེངས་ཀས་མཛེས། །ནུས་སྟོབས་གྲུ་ཆར་སྐྱེ་རྒུའི་ཞིང་སར་གཤིམ། །བྱམས་པའི་ཕུད་སྒྲ་ཕྱོགས་ཀྱི་མཐར་ཁྱབ་པ། །སྐྱབས་ཆེན་ཆུ་ལྷ་དེ་ལ་གུས་པས་བསྟོད། །ཆོས་ཀྱི་ལྷུན་པོ་ཐོས་བསམ་བང་རིམ་ཅན། །བཤེས་གཉེན་འདོད་ལྷའི་ཚོགས་ཀྱི་བསྟིི་གནས་མཆོག །གནས་ལུགས་འགྱུར་མེད་རྟོགས་པའི་ལྷུན་འཐུག་པ། ཆོས་ཀྱི་རི་བོ་དེ་ལ་མཆོག་ཏུ་བསྟོད། །མཛད་པའི་ཉི་གཞོན་ཕྲིན་ལས་འོད་སྟོང་ཅན། །

སྐལ་ལྡན་རྣམས་ཀྱི་པད་མཚོར་ཤར་བ་ལས། །བསླབ་གསུམ་གེ་སར་མཆོག་ཏུ་རྒྱས་པ་ཡིས། །རྗེ་འཇུག་རྐང་དྲུག་བཅུད་ཀྱིས་རྒྱས་མཛད་བསྟོད། །སྦྱིན་པ་རྣམ་བཞིས་གཞན་རྒྱུད་ཚིམ་མཛད་ནས། །ཚུལ་ཁྲིམས་གསུམ་གྱིས་རང་རྒྱུད་མཛེས་པར་གཏམས། །བཟོད་པ་གསུམ་གྱིས་དཀའ་ཐུབ་མཐར་ཕྱིན་ནས། །རྒྱུད་གསུམ་ཐུགས་དགོངས་རྫོགས་མཛད་དེ་ལ་བསྟོད། །བརྩོན་འགྲུས་གསུམ་གྱིས་དོན་གཉིས་ལེགས་གྲུབ་ནས། །བསམ་གཏན་གསུམ་གྱིས་རིག་དང་མངོན་ཤེས་གྲུབ། །ཤེས་རབ་གསུམ་གྱིས་ཨ་ཏིའི་རྩེ་མོར་སོན། །ཀུན་བཟང་ཆོས་ཀྱི་རྗེ་དེར་དད་བརྒྱས་བསྟོད། །རིམ་གཉིས་ཐབས་ཀྱི་ཡེ་ཤེས་སྟོབས་དང་ལྡན། །དུས་གསུམ་དགེ་བ་འཁོར་གསུམ་དག་པར་བསྔོ། །གནས་ལུགས་ཇི་ལྟར་ཤེས་བྱ་ཇི་སྙེད་མཁྱེན། །འཇམ་དབྱངས་དངོས་སུ་བྱོན་དེར་གུས་པས་བསྟོད། །བྱམས་པའི་སྤྱན་གྱིས་འགྲོ་ལ་རྟག་ཏུ་གཟིགས། །སྙིང་རྗེས་སྡུག་ཕོངས་རྣམས་ལ་རྟག་ཏུ་སྐྱོང་། །དགའ་དང་དགྱེས་པས་འགྲོ་རྣམས་སྲིད་མཚོར་སྒྲོལ། །དགྲ་དང་བུ་མཉམ་འགྲོ་དོན་གཡེལ་བ་མེད། །ཚད་མེད་བཞི་ལྡན་དེ་ལ་གུས་པས་བསྟོད། །ཆོས་དང་ཟང་ཟིང་གཡབ་མོས་གདུལ་བྱ་འབོད། །སྙན་སྨྲའི་གསུང་གིས་ངེས་པའི་ཆོས་ལ་སྦྱོར། །དོན་མཐུན་ཆོས་ལ་བགས་ཕབ་ཨ་ཏིར་སྦྱོར། །བསྡུ་བ་བཞི་ཡིས་འགྲོ་དོན་མཛད་ལ་བསྟོད། །ཐོས་པས་སྡེ་སྣོད་རྒྱུད་སྡེའི་དོན་ལ་མཁས། །བསམ་པས་ཟབ་དོན་སྙིང་ཏིག་ཡིན་པར་རྟོགས། བསྒོམས་པས་ཀུན་ཏུ་བཟང་པོའི་ས་ལ་སླེབས། །སངས་རྒྱས་

བཤེས་གཉེན་གཟུགས་སུ་སྤྲུལ་ལ་བསྟོད། །ཅེས་པ་འདི་ནི་སྒོ་གསུམ་གུས་པའི་སྒོ་ནས། ཆོས་རྗེ་རིན་པོ་ཆེའི་མཁྱེན་རབ་ཕྲིན་ལས་ཀྱི་མཛད་པ་ལ་ཐུན་མོང་མ་ཡིན་པའི་སྒོ་ནས་དད་པའི་རླབས་གཡོ་བས་མངོན་པར་བསྟོད་ཅིང་གཙུག་ཏུ་ཁུར་བའོ། །གྲྭ་ཕུ་བསམ་ཡས་གསང་ཕུ་སྐྱམ་གྱི་ཕུ། །ལྷ་རི་བྲག་དང་ཤུག་གསེབ་ཨོ་རྒྱན་རྫོང་། །རྒྱ་མ་གྲོང་དང་གཡོར་པོ་གཞུང་རྣམས་དང་། །ལྷོ་བྲག་མོན་ཡུལ་རྣམས་སུ་ཞབས་ཀྱིས་བཅགས། །སྐལ་ལྡན་རྣམས་ལ་ཐར་པའི་ས་བོན་བཏབ། །ཆོས་འཁོར་བསྐོར་ཞིང་སྨིན་གྲོལ་རྒྱ་ཆེར་མཛད། །ཐ་མའི་མཛད་པ་མཆིམས་ཕུར་མྱང་འདས་མཛད། །སྐྱེས་མཆོག་བཞུགས་པའི་གནས་རྣམས་ལ་ཕྱག་འཚལ། །དེ་ལྟར་ལེགས་པར་སྦྱར་བའི་ཆོས་རྗེ་རིན་པོ་ཆེའི་རྣམ་པར་ཐར་པ་འདི་ནི། ལུང་རིག་འཛིན་པ་སྤྲུལ་སྐུ་དཔལ་འབྱོར་རྒྱ་མཚོ་དང་། དད་དང་གུས་པར་ལྡན་པས་མཉེས་པ་གསུམ་བསྒྲུབས་པ། དམ་ཚིག་དང་ལྡན་པའི་སློབ་དཔོན་བློ་གྲོས་བཟང་པོ་དཔོན་སློབ་གཉིས་ཀྱིས་ཡང་དང་ཡང་དུ་ནན་གྱིས་བསྐུལ་བས་རང་གིས་རྟོག་ཚོགས་དང་། རྒྱལ་སྲས་རིན་པོ་ཆེ་བཟོད་པར་སྐུ་ལུས་དང་གྲིབ་མ་བཞིན་དུ་བརྟེན་པས། གསུང་སྒྲོས་དང་མཛད་ཚུལ་རྣམས་ལེགས་པར་ཞུས་ནས། འཕྲི་བསྣན་དང་ལྷག་ཆད་མེད་པར་ཡི་གེར་བཏབ་པའོ།། །།རྟ་བདུན་རྒྱལ་པོའི་འོད་ཀྱིས་མ་གསལ་ཞིང་། །ཆུ་གཏེར་ཆེན་པོའི་རླབས་ཀྱིས་མ་གཤེར་བ། །སངས་རྒྱས་རབས་བདུན་གྱིས་ཀྱང་མ་ཐུལ་བའི། །གདུལ་དཀའ་འདུལ་མཛད་སྐྱེས་མཆོག་རྣམ་ཐར་འདི། །སྒྲོ་སྐུར་སྤངས་ནས་ལེགས་པར་བཀོད་པ་ཡིན། །ཟས་

གཙང་སྲས་པོ་མཚན་དཔེས་བརྒྱན་པ་ཡི། །ཞབས་པད་ཉི་གཞོན་ལྟ་བུར་དམར་བ་ལ། །གཙུག་ཏུ་ཁུར་བའི་ལྷ་ཆེན་གདོང་བཞི་དང་། མེ་ཏོག་པདྨའི་གཉེན་ལ་སོགས་པ་འང་། །མཐོང་བ་དོན་ལྡན་འདི་ཉིད་རྟོགས་གྱུར་ན། །དགྱེས་པའི་སྤྱན་འབྱེད་བཟང་པོས་མདངས་ཕྱུང་ནས། །མངོན་པར་བསྟོད་ཅིང་དགའ་སྟོན་འགྱེད་པར་ངེས། །དྲི་མེད་འོད་ཟེར་འོད་སྟོང་འགྱེད་པ་འདྲ། །གསང་བ་སྙིང་ཐིག་དབང་གི་རྒྱལ་པོ་བཞིན། །དགོས་འདོད་ཀུན་འབྱུང་སྲིད་ཞིའི་དབུལ་བ་སེལ། །འདི་དོན་རྟོགས་པར་འདོད་པ་མང་ན་ཡང་། །སྟོན་ཀའི་མཚན་མོ་དངས་པའི་མཁའ་དབྱིངས་སུ། །རི་བོང་འཛིན་གཟུགས་འོད་དཀར་ཅན་ཤར་བས། །དམན་པའི་སྐར་ཚོགས་ཁ་དོག་ཉམས་བྱས་ལྟར། ཁོ་བོ་འཆད་རྩོད་རྩོམ་གསུམ་རབ་རྒྱས་པས། །རྡོ་རྗེ་ཕ་ལམ་རིན་ཆེན་འབིགས་པ་ལྟར། །ཚིག་དོན་རྣམ་བཀྲ་བསམ་འཕེལ་ཕྲེང་སྤེལ་ནས། །ལེགས་བཤད་སྲད་བུར་བརྒྱུས་པའི་ཕྲེང་བ་འདི། །རྣམ་ཐར་ནོར་བུ་ཆུ་དངས་ཇི་བཞིན་དུ། །སེམས་ཀྱི་རྟོག་པ་མ་ལུས་སེལ་བྱེད་ཡིན། །དྲི་མེད་འོད་ཟེར་བལྟ་བའི་མེ་ལོང་མཆོག །ཚུལ་ཁྲིམས་བློ་གྲོས་ཡོན་ཏན་རྒྱས་པར་བསྟན། །སྔ་རབས་བྱོན་ནས་མ་འོང་སླད་ཀྱིས་འབྱོན། །སུས་ཀྱང་མ་རྟོགས་རྟོགས་པར་མི་འགྱུར་རོ། ཁོ་བོའི་བློ་གྲོས་ནམ་མཁའ་ཡངས་པ་ལ། །ཐོས་བསམ་ཆུ་འཛིན་རབ་ཏུ་རྒྱས་པ་ཡིས། །ལུང་དང་རིག་པའི་གློག་ཕྲེང་གར་བྱེད་པས། །རྟོགས་པའི་འབྲུག་སྒྲ་ཆེམ་ཆེམ་སྒྲོགས་པ་དང་། །མཉམ་དུ་དམ་ཆོས་ཆུ་རྒྱུན་འབེབ་པ་ཡིན། །དགེ་བཅུའི་ལོ་ཐོག་སྨིན་པར་བྱེད་

པ་ལ། །སྐྱེ་བ་སྔོན་ནས་སྦྱངས་པའི་ཤེས་རབ་ཅན། །རིགས་དང་སྤྱོད་ཡུལ་བཟང་པོའི་རྣམ་གྲོལ་ཅན། །སློབ་མའི་མཆོག་གྱུར་བཀའ་བཞི་འཛིན་པ་པོ། །རང་བཞིན་དཔལ་འབྱོར་བཟང་པོ་འབྱུང་བའི་གནས། །དམ་ཆོས་རྒྱ་མཚོས་འགྲོ་བ་སྨིན་མཛད་པའི། །རྫོགས་ཆེན་བསྟན་པ་འཛིན་པའི་སྐྱེས་བུ་དང་། །བློ་གྲོས་རྣམ་པར་དཀར་བའི་ངུར་སྨྲིག་འཛིན། །བཟང་པོའི་སྤྱོད་ཡུལ་སྡོམ་གསུམ་དམ་ཚིག་ལྡན། ཐོས་བསམ་དོན་གཞོལ་བླ་མ་ཅི་མཉེས་བྱེད། །རྡོ་རྗེ་སྙིང་པོའི་བརྟུལ་ཞུགས་འཛིན་པ་དང་། །དཔོན་སློབ་གཉིས་ཀྱིས་ཡང་ཡང་བསྐུལ་བའི་ངོར། །རྣམ་ཐར་མཐོང་བ་དོན་ལྡན་འདི་སྤྲོས་པས། །འགྲོ་བའི་རྨོངས་པ་མ་ལུས་རབ་བསལ་ནས། །རྫོགས་པ་ཆེན་པོའི་དོན་ལ་སྤྱོད་པ་དང་། །དོན་གཉིས་ཕུན་ཚོགས་འགྲུབ་པའི་རྒྱལ་པོར་ཤོག །ཡི་གེ་པ་ནི་སྐྱེ་བ་སྔོན་རོལ་ནས། །ཆོས་ལ་སྦྱངས་པའི་བསོད་ནམས་དཔལ་ལྡན་ཅན། །བློ་གྲོས་ཐེག་མཆོག་སྙིང་པོའི་རྣལ་འབྱོར་པ། །ཨ་ཏི་ཡོ་ག་འཆང་བས་ལེགས་པར་བྲིས། །དགེ་བ་དཔག་ཡས་རིན་ཆེན་གྲུ་བོ་ཆེས། །འགྲོ་དྲུག་མ་རྣམས་སྲིད་པའི་མཚོ་བསྒྲལ་ནས། །མི་གཡོ་རིན་ཆེན་གླིང་དུ་རབ་སོན་ཏེ། །དམ་པའི་ཆོས་ཀྱི་དགའ་སྟོན་འགྱེད་པར་ཤོག །བཀྲ་ཤིས་གང་ཞིག་སྐུ་བཞིའི་གངས་རི་ལས། །དམ་ཆོས་ཡན་ལག་བརྒྱད་ལྡན་ཆུ་ཀླུང་གིས། །འགྲོ་བའི་ཚ་གདུང་མ་ལུས་ཞི་བ་དང་། །མཉམ་དུ་དགེ་ལེགས་ཕུན་སུམ་ཚོགས་

གྱུར་ཅིག །རྒྱལ་སྲས་དྲི་མེད་འོད་ཟེར་གྱི། །རྣམ་ཐར་མཐོང་བ་དོན་ལྡན་འདི། །བྱང་ཕྱོགས་གངས་ཀྱི་རི་ཁྲོད་དུ། །བྱར་མེད་བརྟུལ་ཞུགས་འཛིན་པ་ཡི། །ཆོས་གྲགས་བཟང་པོ་མདོ་ཁམས་པ། །ཕ་ཡི་བུ་མཆོག་དེ་ཡིས་བཀོད། །ལེགས་པར་ལྟོས་ལ་ཞིབ་མོར་དཔྱོད། །འདི་ནི་ཚངས་པའི་རྔ་ཆེན་དང་། །རབ་དགའི་རྒྱུད་མངས་ལས་འཕགས་ཤིང་། །མཁས་པའི་འདུན་སར་འཇུག་པར་སྤྱོད། །འདི་སོགས་དགེ་བ་རབ་དཀར་དྲི་མེད་དེས། །སྤངས་རྟོགས་ཡོན་ཏན་དུ་མའི་མཛོད་འཛིན་པའི། །དེད་དཔོན་བླ་མ་རྣམས་ནི་མཉེས་བྱས་ནས། །ཀུན་བཟང་གདོད་མའི་ས་ལ་རབ་གནས་ཤོག །ཤུབྷཾ། །བཀྲ་ཤིས།། །།

རྫོགས་པ་ཆེན་པོ་བི་མ་སྙིང་ཏིག་མ་བུའི་སྔོན་འགྲོ་ཚོགས་བསགས་ཀྱི་དམིགས་རིམ་ངག་འདོན་མདོར་བསྡུས་པ་གདོད་མའི་གསེང་ལམ།

རྫོགས་པ་ཆེན་པོ་བི་མ་སྙིང་ཏིག་མ་བུའི་སྔོན་འགྲོ་ཚོགས་བསགས་ཀྱི་དམིགས་རིམ་ངག་འདོན་མདོར་བསྡུས་པ་གདོད་མའི་གསེང་ལམ་ཞེས་བྱ་བ་བཞུགས་སོ། །

ན་མོ་གུ་རུ་བྷྱཿ། འདིར་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་གྱི་མཐར་ཐུག་འོད་གསལ་རྫོགས་པ་ཆེན་པོ་མན་ངག་སྡེའི་ཡང་བཅུད་སློབ་དཔོན་ཆེན་པོ་བི་མ་ལ་མི་ཏྲའི་བཀའ་སྲོལ་ལས་བྱུང་བའི་གསང་བ་སྙིང་ཏིག་མ་བུའི་ཁྲིད་རིམ་ཟབ་མོའི་རྒྱུད་སྨིན་པའི་གང་ཟག་གིས། སྔོན་འགྲོའི་རིམ་པ་རྒྱུན་གྱི་རྣལ་འབྱོར་དུ་བྱ་བའི་ཚུལ་ནི། གནས་དབེན་པར་བདེ་པའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། རླུང་རོ་དགུ་ཕྲུགས་སམ་སུམ་ཕྲུགས་སུ་བསལ་བས་སྡིག་སྒྲིབ་ཐམས་ཅད་སང་གིས་དག་པར་བསམ་ལ། སེམས་ཅན་ཐམས་ཅད་ཀྱི་དོན་དུ་ལམ་ཟབ་མོ་ཉམས་སུ་བླང་བར་བགྱིའོ་སྙམ་པས། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པདྨའི་གདན་བཞུགས་ནས། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། ཞེས་བརྗོད་པ་དང་ཆབ་ཅིག་ཏུ་རང་གི་སྤྱི་བོར་པདྨ་ཉི་ཟླའི་གདན་ལ་རྩ་བའི་བླ་མ་རྡོ་རྗེ་སེམས་དཔའི་རྣམ་པར་བཞུགས་པ་ལ། མོས་གུས་གདུང་ཤུགས་དྲག་པོས། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་ཀྱིས་བརླབ་ཏུ་གསོལ། ཞེས་གསོལ་བ་བཏབ་པས། བླ་མའི་ཞབས་གཡས་

པའི་མཐེ་བོང་ལས་བདུད་རྩི་དཀར་པོའི་རྒྱུན་བབས། རང་གི་ཚངས་བུག་ནས་ཞུགས། ལུས་ཐམས་ཅད་གང་བདེ་བ་ཆེན་པོའི་ཡེ་ཤེས་སྐྱེས། མཐར་བླ་མ་འོད་དུ་ཞུ་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ་རིག་པ་འཛིན་མེད་དུ་འཇོག །དེ་ནས་འདུས་བྱས་ཐམས་ཅད་མི་རྟག་པར་བསམ་པ་སོགས་བློ་སྦྱོང་གི་རིམ་པས་ངེས་འབྱུང་དང་། སྙིང་རྗེ་དང་། དད་པ་ཤུགས་དྲག་ཏུ་བསྐྱེད་ཅིང་། རྣམ་པར་མི་རྟོག་པའི་བསམ་གཏན་གྱི་ངང་ནས་ཚོགས་བསག་གི་རིམ་པ་ལ་འཇུག་པར་བྱ་སྟེ། དེ་ལ་དང་པོ་སྐྱབས་སུ་འགྲོ་བ་ནི། ས་ཕྱོགས་དག་པའི་ཞིང་ཁམས་ཆེན་པོར་གྱུར་པའི་དབུས། རང་གི་མདུན་དུ་དཔག་བསམ་གྱི་ལྗོན་ཤིང་ཡལ་ག་ལོ་མ་མེ་ཏོག་འབྲས་བུ་ཕུན་སུམ་ཚོགས་པ་ནམ་མཁའི་དབྱིངས་ཐམས་ཅད་ཁྱབ་པའི་ལྟེ་བར་སེང་ཁྲི་པདྨ་ཉི་ཟླའི་གདན་ལ་རྩ་བའི་བླ་མ་ཀུན་ཏུ་བཟང་པོའི་རྣམ་པར་བཞུགས་པ་ལ་བརྒྱུད་པའི་བླ་མ་རྣམས་དང་། མདུན་གྱི་ཡལ་གར་དཔལ་རྡོ་རྗེ་སེམས་དཔའ་ལ་ཡི་དམ་དཀྱིལ་འཁོར་གྱི་ལྷོ་ཚོགས་རྣམས་དང་། གཡས་སུ་སྟོན་པ་ཐུབ་པའི་དབང་པོར་དུས་གསུམ་གྱི་སངས་རྒྱས་སྤྲུལ་སྐུའི་རྣམ་པ་ཅན་རྣམས་ཀྱིས་བསྐོར་བ། རྒྱབ་ཏུ་ཆོས་དཀོན་མཆོག་གླེགས་བམ་བྲག་རི་བརྩེགས་པ་ལྟ་བུ། གཡོན་དུ་ཐེག་པ་ཆེ་ཆུང་གི་དགེ་འདུན། བར་མཚམས་ཀུན་ཏུ་མཁའ་འགྲོ་ཆོས་སྐྱོང་ནོར་ལྷའི་ཚོགས་སྤྲིན་ཕུང་

གཏིབས་པ་ལྟར་བཞུགས་པའི་མདུན་དུ་རང་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་ཏུ་དྲིལ་ཏེ་སྐྱབས་སུ་འགྲོ་བའི་མོས་པས། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་དྲུག་གུས་པས་སྐྱབས་སུ་མཆི། ཞེས་བརྒྱ་སྟོང་སོགས་ཅི་ནུས་ཀྱི་མཐར། སྐྱབས་ཡུལ་རྣམས་ཀྱི་ཐུགས་ཀ་ནས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཏེ་དག་པའི་ཞིང་དུ་འུར་གྱིས་སོང་བར་བསམ། ཚོགས་ཞིང་རྣམས་དབུས་ཀྱི་བླ་མ་ལ་ཐིམ་ཞིང་། དེ་ཡང་རང་ལ་བསྟིམས་ཏེ་གནས་ལུགས་དོན་གྱི་སྐྱབས་འགྲོའི་ངང་དུ་ངལ་བསོ། གཉིས་པ་སེམས་བསྐྱེད་ནི། དོན་དམ་པར་གཟོད་མ་ནས་རྣམ་པར་དག་ཀྱང་། ཀུན་རྫོབ་འཁྲུལ་པའི་དབང་གིས་སྡུག་བསྔལ་གྱི་རྒྱུ་འབྲས་བསམ་གྱིས་མི་ཁྱབ་པ་ལ་རྟག་པར་ལོངས་སྤྱོད་པའི་མ་རྒན་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱའོ་སྙམ་པ་སྨོན་པ་དང་། དེའི་ཆེད་དུ་ལམ་ཟབ་མོ་ཉམས་སུ་བླང་བར་བགྱི་འོ་སྙམ་པ་འཇུག་པ་སེམས་བསྐྱེད་པའི་དོན་ཡིད་ལ་དྲན་བཞིན་ཏུ། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་

བསྐྱེད་དོ། །ཞེས་ཅི་ནུས་དང་། མཐར་སྤྲོ་ན་དབུགས་འགྲོ་འོང་ལ་བརྟེན་ནས་བདེ་སྡུག་གཏོར་ལེན་གྱི་དམིགས་པ་དང་། འཁོར་གསུམ་རང་བཞིན་མེད་པར་ཤེས་པའི་དོན་དམ་སེམས་བསྐྱེད་ཀྱི་ངང་དུ་མཉམ་པར་བཞག །གསུམ་པ་རྡོ་རྗེ་སེམས་དཔའི་བསྒོམ་བཟླས་ནི། རང་ལུས་ཐ་མལ་སྤྱི་གཙུག་ཏུ༔ པད་དཀར་ཟླ་བའི་དཀྱིལ་འཁོར་སྟེང་༔ ཨ་ལས་རྡོ་རྗེ་སེམས་དཔའ་དཀར༔ རྡོར་དྲིལ་འཛིན་པས་ཡུམ་ལ་འཁྱུད༔ རིན་ཆེན་རྒྱན་སྤྲས་སེམས་སྐྱིལ་བཞུགས༔ ཐུགས་ཀར་ཟླ་སྟེང་ཧཱུྃ་གི་མཐར༔ སྙིང་པོ་ཡི་གེ་བརྒྱ་པས་བསྐོར༔ སྐུ་དང་སྔགས་ལས་བདུད་རྩིའི་རྒྱུན༔ དཀར་ནར་བབས་ཏེ་སྤྱི་བོར་ཞུགས༔ བདག་གི་ལུས་ཀུན་གང་བ་ཡིས༔ སྡིག་སྒྲིབ་དག་ནས་ཤེས་གོང་ལྟར༔ དྲི་མ་མེད་པའི་ལུས་སུ་གྱུར༔ ༀོ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ། ཏིཥྠ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིངྔྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾཤྲི་ཡཿཀུ་རུ་ཧཱུྃ། ཧ་ཧ་ཧ་ཧ་ཧོཿབྷ་ག་ཝཱན་སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་ཝ་མ་ཧཱ་ས་མ་ཡཱ་ས་ཏྭ་ཨཱཿཞེས་ཅི་ནུས་དང་། ཨོ་བཛྲ་ས་ཏྭ་ཧཱུྃ། ཞེས་

པའང་ཇི་ལྟར་རིགས་པ་བཟླས་མཐར། མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགའ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས་སོ། །སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས། སྡིག་སྒྲིབ་དག་པའི་གནང་བ་བྱིན་ནས་རང་ལ་ཐིམ་པར་བསམ་ལ་དམིགས་མེད་ཀྱི་ངང་དུ་བློ་འཇོག །བཞི་པ་མཎྜལ་ནི། ཚོགས་ཞིང་སྐྱབས་ཡུལ་ལྟར་གསལ་བཏབ་པའི་སྤྱན་སྔར་ལེགས་པར་བཤམས་པའི་མཎྜལ་རང་གཞན་མཁའ་ཁྱབ་སེམས་ཅན་ཐམས་ཅད་ཀྱིས་ཕུལ་བར་མོས་ཏེ། ཐོག་མར་སྤྲུལ་སྐུའི་མཎྜ་ལ་ཚོམ་བུ་སོ་བདུན་འགོད་ཅིང་། རིགས་ལྔ་གངས་ཆེན་མཚོའི་ཞིང་ཁམས་སྣོད་བཅུད་ཀྱི་འབྱོར་པ་མཐའ་ཀླས་པར་བསམ་ལ། །རིན་ཆེན་མཎྜལ་ཡིད་འོང་མཆོད་པའི་སྤྲིན། །འདོད་དགུའི་འབྱོར་ཚོགས་དཔག་མེད་དང་ལྡན་པ། །དཔག་ཡས་ནམམཁའི་རྒྱན་གྱུར་འདི་ཕུལ་བས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག །ཅེས་དབུལ། ལོངས་སྐུའི་མཎྜལ་ལ་ཚོམ་བུ་དགུ་འམ་

བདུན་བཀོད་ལ་འོག་མིན་སྟུག་པོ་བཀོད་པའི་ཞིང་ཁམས་རྒྱན་དང་བཀོད་པ་ཕུན་སུམ་ཚོགས་ཤིང་མཆོད་པའི་ལྷ་མོ་མཐའ་ཡས་པའི་སྤྲིན་འཕྲོ་བར་བསམ་ལ། འོག་མིན་བདེ་ཆེན་རིན་ཆེན་གཞལ་ཡས་ཁང་། །སྣ་ཚོགས་མཆོད་པའི་སྤྲིན་གྱི་བླ་བྲེ་ཅན། །ནམ་མཁའ་གང་བར་དམིགས་ཏེ་ཕུལ་བ་ཡིས། །འགྲོ་ཀུན་ལོངས་སྐུའི་ཞིང་ལ་སྤྱོད་ཤོག །ཅེས་དབུལ། ཆོས་སྐུའི་མཎྜལ་ལ་ཚོམ་བུ་ལྔའམ་གཅིག་བཀོད་ནས། ཆོས་ཀྱི་དབྱིངས་རང་བཞིན་འོད་གསལ་བའི་ཞིང་ཁམས་ཆེན་པོར་སྐུ་དང་ཐིག་ལེའི་རིག་གདངས་འབྱམས་ཀླས་པར་བསམ་ལ། འོད་གསལ་ལྷུན་གྲུབ་ཡེ་ཤེས་རིགས་ལྔའི་ཞིང་། །སྐུ་དང་ཐིག་ལེས་ཡེ་ནས་བརྒྱན་པ་འདི། །རང་སྣང་དག་པས་ལེགས་པར་ཕུལ་བ་ཡིས། །ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག །ཅེས་དབུལ། ལྔ་པ་བླ་མའི་རྣལ་འབྱོར་ནི། སྣོད་བཅུད་དག་པའི་ཞིང་ཁམས་ཆེན་པོའི་དབུས། །རང་མདུན་ནམ་མཁའ་ཡེ་ཤེས་འོད་ལྔའི་ཀློང་། །སེང་ཁྲི་པདྨ་ཉི་ཟླའི་གདན་སྟེང་དུ། །སྐྱབས་གནས་ཀུན་འདུས་རྩ་བའི་བླ་མ་དང་། །དབྱེར་མེད་གདོད་མའི་མགོན་པོ་ཀུན་ཏུ་བཟང་། །མཐིང་གསལ་ཞལ་གཅིག་ཕྱག་གཉིས་མཉམ་བཞག་ཅན། །དར་དང་རིན་ཆེན་རྒྱན་རྫོགས་

སྐྱིལ་ཀྲུང་བཞུགས། །སྟེང་གི་ཆ་ལ་བརྒྱུད་པའི་བླ་མ་དང་། །མཐའ་བསྐོར་མཆོག་གསུམ་མཁའ་འགྲོ་ཆོས་སྲུང་ཚོགས། །སྣང་སྟོང་ཟུང་འཇུག་ཡེ་ཤེས་སྒྱུ་མའི་སྐུ། །གསང་གསུམ་མི་ཟད་རྒྱན་གྱི་འཁོར་ལོའི་སྤྲིན། །གང་འདུལ་མོས་ངོར་ཅིར་ཡང་འཆར་བར་གྱུར། ཅེས་གསལ་བཏབ་ལ། ཨོཾ་ཨཱཿཧཱུྃ། །གདོད་མའི་མགོན་པོ་ཀུན་བཟང་ཡབ་ཡུམ་དང་། །ལྷུན་གྲུབ་རྒྱལ་བ་ཞི་ཁྲོ་རབ་འབྱམས་དང་། །བདེ་ཆེན་རྒྱལ་བ་རྡོ་རྗེ་འཆང་ཆེན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཀ་དག་ལྷུན་གྲུབ་ཟབ་མོའི་གནས་ལུགས་མཆོག །ད་ལྟ་ཉིད་དུ་རྟོགས་པར་བྱིན་གྱིས་རློབས། །ཡེ་ཤེས་སྒྱུ་མ་རྡོ་རྗེ་སེམས་དཔའ་དང་། །དཀྱིལ་འཁོར་མངའ་བདག་ཕྱག་ན་རྡོ་རྗེ་དང་། །རྒྱལ་བའི་རྣམ་འཕྲུལ་དགའ་རབ་རྡོ་རྗེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཀ་དག་ལྷུན་གྲུབ་ཟབ་མོའི་གནས་ལུགས་མཆོག །ད་ལྟ་ཉིད་དུ་རྟོགས་པར་བྱིན་གྱིས་རློབས། །མཁྱེན་རབ་སྤྲུལ་པ་འཇམ་དཔལ་བཤེས་གཉེན་དང་། །བློ་མཆོག་མངའ་བ་ཤྲཱི་སིཾ་ཧ་དང་། །དངོས་གྲུབ་མཆོག་བརྙེས་ཛྙཱ་ན་སཱུ་ཏྲ་ལ། །གསོལ་བ་༴ཀ་དག་༴ད་ལྟ་༴མཁས་

གྲུབ་ཆེན་པོ་བི་མ་མུ་དྲ་དང་། །རང་བྱུང་ཆེན་པོ་པདྨ་འབྱུང་གནས་དང་། །ཚོགས་ཆེན་གཉིས་རྫོགས་ཆོས་རྒྱལ་ཆེན་པོ་ལ། །གསོལ་བ་༴ཀ་དག་༴ད་ལྟ་༴སེམས་ཉིད་དབང་ཐོབ་ཏིང་འཛིན་བཟང་པོ་དང་། །ཐར་གླིང་སྣང་ཕྱེད་ལྡང་མ་ལྷུན་རྒྱལ་དང་། །འོད་གསལ་ལུས་གྲུབ་སེང་གེ་དབང་ཕྱུག་ལ། །གསོལ་བ༴ཀ་དག༴ད་ལྟ༴། ཆོས་ཉིད་མི་གཡོ་རྒྱལ་བ་ཞང་སྟོན་དང་། །གསུང་རབ་མཛོད་བརྙེས་མཁས་པ་ཉི་འབུམ་དང་། །དམ་ཆོས་རྒྱས་མཛད་གུ་རུ་ཇོ་འབེར་ལ། །གསོལ་བ༴ཀ་དག༴ད་ལྟ༴། གཟུང་འཛིན་འཁྲུལ་ཞིག་སེངྒེ་རྒྱབ་པ་དང་། །དངོས་གྲུབ་མཆོག་བརྙེས་གྲུབ་ཆེན་མེ་ལོང་དང་། །རིག་འཛིན་ཆེན་པོ་ཀུ་མཱ་རཱ་ཛ་ལ། །གསོལ་བ༴ཀ་དག༴ད་ལྟ༴། འོད་གསལ་སྒྱུ་མ་ཀློང་ཆེན་རབ་འབྱམས་དང་། །མཁས་གྲུབ་ཆེན་པོ་ཁྱབ་བརྡལ་ལྷུན་གྲུབ་དང་། །སྤྲུལ་བའི་སྐུ་མཆོག་གྲགས་པ་འོད་ཟེར་ལ། །གསོལ་བ༴ཀ་དག༴ད་ལྟ༴། འཁྲུལ་ཞིག་ཆེན་པོ་སངས་རྒྱས་དབོན་པོ་དང་། །རྒྱལ་པའི་གདུང་འཚོབ་ཟླ་བ་གྲགས་པ་དང་། །གྲུབ་པའི་དབང་ཕྱུག་ཀུན་བཟང་རྡོ་རྗེ་ལ། །གསོལ་བ༴ཀ་དག༴ད་ལྟ༴སྙིང་པོའི་མངའ་བདག་རྒྱལ་

མཚན་དཔལ་བཟང་དང་། །རྒྱལ་བས་ལུང་བསྟན་སྣ་ཚོགས་རང་གྲོལ་དང་། །འཁོར་འདས་རྒྱ་གྲོལ་བསྟན་འཛིན་གྲགས་པ་ལ། །གསོལ་བ༴ཀ་དག་༴ད་ལྟ་༴། ཤེས་བྱ་ཀུན་གཟིགས་མདོ་སྔགས་བསྟན་འཛིན་དང་། །གསང་བདག་དཔའ་བོ་འཕྲིན་ལས་ལྷུན་གྲུབ་དང་། །བརྒྱུད་སྲོལ་ཀུན་འདུས་གཏེར་ཆེན་བླ་མ་ལ། གསོལ་བ༴ཀ་དག༴ད་ལྟ༴། བི་མའི་རྣམ་འཕྲུལ་རིན་ཆེན་རྣམ་རྒྱལ་དང་། མཚོ་རྒྱལ་དངོས་སྣང་མི་འགྱུར་དཔལ་སྒྲོན་དང་། །ཐམས་ཅད་མཁྱེན་པ་ཨཽ་ཌི་ཡཱ་ན་ལ། །གསོལ་བ༴ཀ་དག༴ད་ལྟ༴རིག་འཛིན་འགྱུར་མེད་ཕྲིན་ལས་རྣམ་རྒྱལ་དང་། །གདོད་མའི་མགོན་པོ་ཕྲིན་ལས་ཆོས་སྒྲོན་དང་། །རྡོ་རྗེ་འཆང་དངོས་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱི་རློབས། །ཀ་དག་ལྷུན་གྲུབ་ཟབ་མོའི་གནས་ལུགས་མཆོག །ད་ལྟ་ཉིད་དུ་རྟོགས་པར་བྱིན་གྱིས་རློབས། །རེ་དོགས་བློ་ཟད་འཁོར་འདས་ཆོས་སྐུར་གྲོལ། །ལྷུན་གྲུབ་འོད་གསལ་ཟང་ཐལ་རིག་པར་ཤར། །སྐུ་གསུམ་རྩལ་རྫོགས་འཕོ་འགྱུར་མེད་པར་རྟོགས། །བདག་གཞན་ཡོངས་གྲོལ་ཀུན་བཟང་ཐོབ་པར་ཤོག །ཅེས་རྩ་བརྒྱུད་ཀྱི་བླ་མ་རྣམས་ཀྱི་ཡོན་ཏན་རྗེས་སུ་དྲན་བཞིན་པས་གསོལ་བ་གདབ་ཅིང་། སླར་

ཡང་རྩ་བའི་བླ་མ་ལ་ཕུར་ཚུགས་སུ་གསོལ་བ་འདེབས་པ་ནི། ཀྱེ་བླ་མ་རྡོ་རྗེ་འཛིན་པ་ནི། །ཁམས་གསུམ་འཁོར་བའི་གཉེན་གཅིག་པུ། །འགྲོ་བ་སྐྱབས་མེད་རྣམས་ཀྱི་སྐྱབས། །ཐར་པའི་ཐེམ་སྐས་ཆེན་པོ་སྟེ། །མ་རིག་སེལ་བའི་སྒྲོན་མ་ལ། །མུན་པའི་ཚོགས་བདག་སྐྱབས་སུ་མཆི། །འཁོར་བ་འདམ་གྱི་མཚོ་ནང་དུ། །བྱིང་བ་སྐྱབས་མེད་བདག་ལ་སྐྱོབས། །ཉོན་མོངས་མེ་ཡིས་གདུངས་པ་ལ། །ཐུགས་རྗེའི་ཆར་གྱིས་བསིལ་བར་མཛོད། །བླ་མ་སངས་རྒྱས་རིན་པོ་ཆེ། །བདག་ལ་རེ་ས་གཞན་ན་མེད། །དེང་ནས་བྱང་ཆུབ་སྙིང་པོའི་བར། །སྐྱིད་སྡུག་རེ་ལྟོས་ཁྱེད་མཁྱེན་པས། །མགོན་མེད་བདག་ལ་ཐུགས་རྗེས་གཟིགས། །ནད་གདོན་བགེགས་དང་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ཅེས་པས་མོས་གུས་ཀྱི་ཉམས་མ་སྐྱེས་བར་དུ་གསོལ་བ་བཏབ་པའི་མཐར་དབང་བླང་བ་ནི། འཁོར་གྱི་ལྷ་ཚོགས་རྣམས་རྩ་བའི་བླ་མའི་སྐུ་ལ་ཐིམ་པས་བླ་མ་སྔར་བས་ཀྱང་གཟི་བྱིན་ཆེར་འབར་བའི་གནས་གསུམ་དུ་ཨོཾ་ཨཱཿཧཱུྃ་དཀར་དམར་མཐིང་གསུམ་འོད་འབར་བས་མཚན་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་གྱུར། བདག་དང་མཁའ་ཁྱབ་ཀྱི་སེམས་ཅན་ཐམས་ཅད་དབང་བཞིའི་

ཆུ་བོས་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། གུ་རུའི་སྤྱི་བོའི་ཨོཾ་ལས་འོད་ཟེར་དཀར་པོ་འཕྲོས། རང་གི་སྤྱི་བོར་ཐིམ་པས་བུམ་པའི་དབང་ཐོབ། ལུས་ཀྱི་དྲི་མ་སྦྱངས། ལམ་བསྐྱེད་རིམ་སྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས། མགྲིན་པའི་ཨཱཿལས་འོད་ཟེར་དམར་པོ་འཕྲོས། རང་གི་མགྲིན་པར་ཐིམ་པས་གསང་བའི་དབང་ཐོབ། ངག་གི་དྲི་མ་སྦྱངས། ལམ་རྩ་རླུང་སྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་འཕྲོས། རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་སྦྱངས། ལམ་ཐིག་ལེ་སྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་པ་ཅན་དུ་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས། རང་གི་གནས་གསུམ་དུ་ཐིམ་པས་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་སྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་པ་ཅན་དུ་བྱས་སོ། སླར་ཡང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐུ་བཞིའི་བདག་ཉིད་དཔལ་ལྡན་བླ་མ་དམ་པ་ལ་གསོལ་བ་འདེབས་སོ།

བདག་ལ་དབང་བསྐུར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཀ་དག་གནས་ལུགས་ཀྱི་ལྟ་བ་རྟོགས་པར་བྱིན་གྱིས་བརླབ་ཏུ་གསོལ། ལྷུན་གྲུབ་སྣང་བཞིའི་ཡེ་ཤེས་མཐར་ཕྱིན་པར་བྱིན་གྱིས་བརླབ་ཏུ་གསོལ། ཞེས་མོས་གུས་གདུང་ཤུགས་དྲག་པོས་གསོལ་བཏབ་པས་བླ་མ་འོད་ལྔའི་གོང་བུར་གྱུར་པ་རང་གི་ཚངས་བུག་ནས་སིབ་ཀྱིས་ཐིམས་པས། རང་གི་སྒོ་གསུམ་དང་བླ་མའི་རྡོ་རྗེ་གསུམ་དབྱེར་མེད་གྱུར་པར་བསམ་ལ་བློ་འདས་གཉུག་མའི་རང་ཞལ་ལྟ་བས་མཚམས་སྦྱར་ཏེ་གནས་ལུགས་གཏན་ལ་དབབ་པའི་སྔོན་འགྲོ་དང་། ཁྲེགས་ཆོད་དང་ཐོད་རྒལ་གྱི་སྔོན་འགྲོ་དང་དངོས་གཞིའི་ཉམས་ལེན་སོགས་ལ་ཇི་ལྟར་རིགས་པར་འཇུག་གོ། བླ་མའི་རྣལ་འབྱོར་འདི་བླ་མའི་རིམ་པ་དངོས་གྲུབ་རྒྱ་མཚོ་ལྟར་ཉམས་སུ་བླང་ནའང་ཤིན་ཏུ་ལེགས་སོ། གང་ལྟར་ཡང་ཐུན་ལས་ལྡང་བ་ན། རང་བཞིན་དག་པའི་དགེ་བ་འདིས། །འཁོར་བ་ངན་སོང་དོང་སྤྲུགས་ཏེ། །སྲིད་ན་འགའ་ཡང་མི་གནས་པར། །ཐམས་ཅད་སངས་རྒྱས་མྱུར་ཐོབ་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་ཐམས་ཅད་དུའང་སྣང་གྲགས་རིགས་གསུམ་བླ་མའི་གསང་བ་གསུམ་གྱི་ཡེ་ཤེས་སུ་ལམ་དུ་ཁྱེར་ཞིང་ཚོགས་གཉིས་ཟུང་འབྲེལ་གྱི་རྣལ་འབྱོར་ལ་བརྩོན་པར་བྱའོ། །དེ་ལྟར་

རྫོགས་པ་ཆེན་པོ་བི་མ་སྙིང་ཏིག་གི་སྔོན་འགྲོ་ཚོགས་བསག་གི་ངག་འདོན་གཙོ་བོར་བཏོན་ཅིང་དམིགས་རིམ་ཅུང་ཟད་དང་བཅས་པ་འདི་ཡང་། རང་གཞན་ལམ་འདིར་འཇུག་པར་འདོད་པའི་བློ་གྲོས་དམན་པ་རྣམས་ལ་ཕན་པའི་བསམས་པས། རྗེ་གཏེར་ཆེན་བླ་མ་འགྲོ་འདུལ་གཏེར་བདག་གླིང་པ་ཡབ་སྲས་ཀྱི་བཞེད་པ་ལྟར། རྒྱལ་ཁམས་ཉུལ་བའི་ད་རི་དྲཱ་འཇམ་དབྱངས་མཁྱེན་བརྩེའི་དབང་པོས་གངས་རིའི་ཁྲོད་ཀྱི་ཤམྦྷ་ལ་ཤར་དཔལ་སྤུངས་ཐུབ་བསྟན་ཆོས་འཁོར་གླིང་དུ་ཟིན་བྲིས་སུ་བགྱིས་པའི་དགེ་བས་འགྲོ་ཀུན་ནང་གསལ་གཞོན་ནུ་བུམ་སྐུའི་དབྱིངས་སུ་མྱུར་དུ་འཇུག་པའི་རྒྱུར་གྱུར་ཅིག །

རྫོགས་པ་ཆེན་པོ་བི་མ་སྙིང་ཐིག་གི་དཔེ་ཐོ་མཐོང་བར་རབ་གསལ།

རྫོགས་པ་ཆེན་པོ་བི་མ་སྙིང་ཐིག་གི་དཔེ་ཐོ་མཐོང་བར་རབ་གསལ་བཞུགས་སོ།

ན་མོ་གུ་རུ། རྫོགས་པ་ཆེན་པོ་བི་མ་སྙིང་ཐིག་གི་དཔེ་ཐོ་ལ། ཁ་བྱང་ཉི་མས་བརྒྱན་པ་དང་ཁ་བྱང་སྒྲོན་མ་རང་གསལ། གསེར་ཡིག་ཅན་བསྟན་པ་བུ་གཅིག་གི་རྒྱུད་གཏགས་པས་གྲོལ་བ་བསྟན་པ་བུ་གཅིག་གི་གསང་འགྲེལ། རྡོ་རྗེ་འཆང་གི་གསུང་བ་མཆོད་འོས་དུས་གནད་ངེས་པ། སངས་རྒྱས་ཀྱི་འདས་རྗེས་གསུམ་པ། ཡང་འདས་རྗེས་གསུམ་དང་རིག་འཛིན་གྱི་འདས་རྗེས་བཞི་པ། མཁས་པ་བྱེ་མ་ལའི་ཞལ་ཆེམས། ཟབས་ཡིག་ཅན་སྤྲོས་གཅོད་བཅུ་དྲུག་པ། རིན་པོ་ཆེ་རླུང་གི་ཁྲིད་ལ། ཕྲ་ཡིག་ཅན་ཡང་སྦས་གབ་པའི་དུམ་བུ། མདོ་བྱང་བསྡུས་སྒྲོན། དམིགས་གཏད་གསལ་སྒྲོན། རྟགས་ཡིག །ཚད་ཡིག ཡི་གེའི་དམར་རུའི་རྒྱབ་ཡིག་སྟོད་ཆ། རྒྱབ་ཡིག་སྨད་ཆ། གསང་བསྒྲོན་མ་དགུ་སྐོར། རང་བཞིན་གནད་དབབ་

ཆགས་ཅན་རླུང་གི་པྲ་ཁྲིད། ཡང་སྙིང་བཅུད་དུམ། འཕྲུལ་དུམ། དུང་ཡིག་ཅན་རྒྱུད་ཀྱི་ཁོང་དོན་སྒྲོན་མ་སྣང་བྱེད། གནད་ཡིག་གསང་བ། ཁོང་སྙིང་བསྡེབ་པ། གཡུ་ཡིག་ཅན་མ་ཡིག་བུ་ཡིག ཁ་བྱང་མིང་རྣམ་པར་བཀོད་པ། མན་ངག་དུམ་དུམ་ཁྲིགས། ཁྱུང་ཆེན་མཁའ་ལྡིང་། ཁྱུང་ཆེན་མཁའ་ལྡིང་། སེམས་ཀྱི་དམིགས་དྲུག་གི་རྣམ་པར་བཤད་པ། སྤྲོས་མེད་དབང་གི་ཏི་ཀ་ལ། དབང་བསྐུར་རིམ་པར་འཇུག་པའི་དུས་བཤད་པ་ལ། ཤིན་ཏུ་སྤྲོས་མེད་དབང་འཁོར་འདས་རུ་ཤན་དབྱེ་བའི་ལག་ལེན་པྲ་ཁྲིད། ཤིན་ཏུ་སྤྲོས་མེད་དབང་གི་ཕྲ་ཏི་ག རབ་ཏུ་སྤྲོས་པ་མེད་པའི་དབང་། དབང་གི་ཕྲ་ཏིག་རྣམ་པར་དབྱེ་བ། ཟངས་ཡིག་ཅན་གྱི་དབང་བཞིའི་རིམ་པ་སྟོན་པའི་གནད། སྤྲོས་མེད་དབང་ཆོག སྙིང་ཐིག་བབས་ལུགས་ཆེན་མོ། དམ་ཚིག་རབ་འབྱེད། སྙིང་ཐིག་གི་ལོ་རྒྱུས་ཆེན་མོ། ལོ་རྒྱུས་ཆེན་མོའི་སྨད་ཆ་གནས་

འབྱེད་བདུན་པ། སངས་རྒས་འདས་རྗེས་གསུམ་གྱི་རྒྱུད། རྒྱ་མཚོ་ཨར་ལ་གཏད་པ། རྒྱ་མཚོ་ཨར་གཏད་ཀྱི་མན་ངག་སྣང་བ་འདུས་པའི་གལ་མདོ། བདུད་རྩི་སྙིང་གི་ཐིག་པ། རིག་པའི་གནད་དོན་བལྟ་བ། ཐོད་རྒལ་བོགས་འདོན། སྨུག་ནག་ཁྲོས་མའི་དུས་གནད་ངེས་པ། ཟབ་པ་པོད་བཞིའི་ངོ་བོ་ཉིད་ཀྱི་དེབས། མན་ངག་བརྒྱད་བཅུའི་ཐེམས། སྤྲོས་བཅས་དབང་གི་ཕྱག་བཞེས། སྤྲོས་མེད་དབང་། དེའི་གནད་ཀྱི་ཡི་གེ་དག་པ། དེའི་བུབ་ཐིག་དང་དགེ་སྦྱར། ཤིན་ཏུ་སྤྲོས་མེད་དབང་། སྤྲོས་མེད་དབང་གི་ཏི་ཀ་ལ། སྤྲོས་བཅས་དབང་ལྕེ་བཙུན་མཛད་པ། རྫོགས་པ་ཆེན་པོའི་དབང་གསུམ་པ་དང་ཤིན་ཏུ་སྤྲོས་མེད་དབང་དང་རབ་ཏུ་སྤྲོས་མེད་དབང་དང་། དབང་བཞིའི་དུས་དང་མཚན་མ་བསྟན་པ་ཕྲ་ཊྲིཀྵྟ་བཅས། ཉམས་ལེན་ལག་ཁྲིགས་མའི་ཁྲིད། བཅུར་ཕུར་གསུམ་གྱི་རྒྱལ་ཡིག་གསང་བའི་མན་ངག རྒྱབ་ཡིག་གནད་བསྡུས་སྒྲོན་མེ། བསམ་གཏན་མིག་གི་སྒྲོན་མ། རྟེན་འབྲེལ་བསྡུས་པའི་སྒྲོན་མ། རྡོ་རྗེ་སེམས་དཔའ་དམིགས་དྲུག་གི་གཟུང་རྩ་བ། ལྕེ་བཙུན་གྱི་མགུར། སྤྲོས་མེད་དབང་དཀྱིལ་ཁྲི་ཐབས་བཅས་ལེགས་པར་བཞུགས་པའི་ཟབ་ཆོས་འདི་ཉིད་སྔགས་ཀྱི་སྤུང་མས་གཡེལ་བ་མེད་པར་སྲུངས་ཤིག་བཛྲ་ས་མ་ཡ་རཀྵ་ནྟུ། །དགེ་འོ།

༼མ་ལྷག་མོ་རེད་འདུག༽

༼མ་ལྷག་མོ་རེད་འདུག༽

བི་མ་སྙིང་ཐིག་གི་དཀར་ཆག་ཉིན་མོར་བྱེད་པ།

བི་མ་སྙིང་ཐིག་གི་དཀར་ཆག་ཉིན་མོར་བྱེད་པ་བཞུགས་སོ། །

ཐ་སྙད་ཚིག་གིས་མི་མཚོན་དོན་དམ་ལྟ། །བྱིན་བརླབས་བརྒྱུད་པས་སྩོལ་ལམ་ཨ་ཏིའི་ཐེག །

སྟོན་མཛད་ཀུན་བཟང་ཡབ་ཡུམ་རྡོ་རྗེ་སེམས། །དགོངས་བརྒྱུད་བླ་མ་ཚེ་རབས་གཏན་གྱི་སྐྱབས། །

སྒྲ་ཚིག་བྱ་རྩོལ་ལས་འདས་ཆོས་ཉིད་བདེན། །གནས་ལུགས་བརྡས་འཇལ་རྟོགས་གྲོལ་དུས་མཉམ་པ། །དགའ་རབ་ཤྲཱི་སིང་འཇམ་དཔལ་བཤེས་གཉེན་དང་། །བི་མ་མི་ཏྲས་བྱང་ཆུབ་བར་དུ་སྐྱོངས། འབུམ་ཕྲག་དྲུག་ཅུ་རྩ་བཞིའི་ཡང་ཞུན་ཏེ། །རྒྱུད་ཆེན་བཅུ་བདུན་སྙན་ནས་སྙན་དུ་སྩལ། །ལྕེ་བཙུན་ལྡང་མ་བོད་བྱོན་གྲུབ་ཐོབ་ཀྱི། །སྙིང་ཐིག་བླ་བརྒྱུད་ཚོགས་ལ་དད་ཕྱག་བརྩེགས། ཁྱད་པར་གངས་ལྗོངས་བསྟན་འགྲོའི་བསོད་ནམས་ཀྱི། །མགྲོན་དུ་ལེགས་བོས་མཁན་སློབ་ཆོས་གསུམ་གྱིས། །མདོ་སྔགས་བསྟན་པའི་ཉི་འོད་འབུམ་བརྡལ་བས། །འཁོར་བའི་གཅོང་མུན་བསལ་དེར་སྙིང་ནས་གུས། །ལུང་རྟོགས་སྐལ་ལྡན་ཤིང་རྟའི་སྤུན་ཟླ་གང་། །ཀུན་ཉོན་རུས་བུ་བཀྲུ་ཕྱིར་བརྒྱུད་པའི་ཚུལ། །ལམ་གསུམ་ལས་འོངས་གང་མཁྱེན་ཛ་ཧྣུའི། །ལྟོར་བསྐྱིལ་བཀའ་དྲིན་སུམ་ལྡན་བླ་མར་འདུད། །སྔ་འགྱུར་རྡོ་རྗེ་ཐེག་པའི་གསེར་ལྡན་མ། །སྟོབས་འབྱོར་དཔུང་པས་ཁུར་བའི་ལྷག་མ་ཅན། །སྡེ་བཞི་དགེ་བཅུའི་མངའ་བདག་ཆོས་རྒྱལ་གྱི། །གདུང་བརྒྱུད་རྒྱལ་པོ་ཛཿདེ་འདི་མིན་སུ། །ཆོས་བརྒྱད་དབུ་རྨོག་བཙན་པོས་ཁེངས་པ་ཅན། །ལྟར་སྣང་འཇིག་རྟེན་འབྱོར་པ་ཕྲུ་མའི་གུར། །བདེན་དུ་འཛིན་པའི་རྒྱལ་ཕྲན་གེལ་པ་ཕལ། །དགེ་བཅུའི་མིག་གིས་ཆོས་རྒྱལ་མཆོག་འདིར་ལྟོས། །སྐྱེ་ཀུན་ལེགས་བྱས་ཚོགས་གཉིས་ས་བོན་གྱིས། །དེང་འདིར་བོད་ཆེན་འཛིན་མར་དབང་བསྒྱུར་ཞིང་། །བསྟན་ལ་སྲི་ཞུ་མི་ལྷོད་ངོ་མཚར་གྱི། །རྣམ་ཐར་འདི་ཀོས་འཇིག་རྟེན་སྐལ་བཟང་བྱས། །དེ་ལ་གང་གླེང་བར་བྱ་བ་ནི། མི་མཇེད་འཇིག་རྟེན་གྱི་ཁམས་འདིར།

སྐལ་བཟང་སངས་རྒྱས་སྟོང་འབྱོན་པའི་རྣམ་འདྲེན་བཞི་པ་རྒྱལ་བ་ཤཱཀྱ་ཐུབ་པ་ཞེས་གྲགས་པ་འདི་ཉིད། རྫོགས་ཆེན་སྟོན་པ་བཅུ་གཉིས་ཀྱི་ནང་ཚན་དུ་བཞུགས་པ་ཡིན་ཡང་། རེ་ཞིག་ཡོངས་གྲགས་ལ་འདུལ་བ་རྣམ་པ་བཞིས་མཛད་པ་བཅུ་གཉིས་མཐར་དབྱུངས་ནས་མདོ་ལུགས་ཆོས་འཁོར་རྣམ་པ་གསུམ་བསྐོར་ནས་གསང་སྔགས་སླར་འབྱུང་བར་ལུང་གིས་བསྟན་པ་ལྟར། རི་མ་ལ་ཡའི་རྩེར་གསང་བའི་བདག་པོས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ཀྱིས་རྒྱལ་པོ་ཛཿལ་རྨི་ལྟས་ངོ་མཚར་བ་དང་བཅས་མ་ཧཱ་ཡོ་གའི་རྒྱུད་རྣམས་གླེགས་བམ་གྱི་ཆར་བབས། ཨ་ནུ་ཡོ་གའི་རྒྱུད་རྣམས་སིངྒ་ལར་བབ། དེ་སྐབས་ནུབ་ཕྱོགས་ཨུ་རྒྱན་གྱི་ཡུལ་དུ་སློབ་དཔོན་ཆེན་པོ་དགའ་རབ་རྡོ་རྗེས་རྫོགས་པ་ཆེན་པོའི་རྒྱུད་རྣམས་རྡོ་རྗེ་སེམས་དཔའ་ལ་དངོས་སུ་གསན། སྔགས་ཕྱོགས་རང་གི་བཞེད་པ་ལྟར་ན་སྔར་བཅོམ་ལྡན་འདས་ཞལ་བཞུགས་དུས་གསང་སྔགས་ཡོད་པར་ཡང་འདོད་ཅིང་། རྒྱ་གར་དུ་གྲུབ་པ་ཐོབ་པ་དུ་མ་གསང་སྔགས་སྤྱོད་ཅིང་སྐལ་ལྡན་སྐྱོང་ཡང་སྔར་གྱི་ལུང་དེ་ཡོངས་སུ་མ་གྲགས་པ་ལ་དགོངས། བོད་འདིར་ཆོས་རྒྱལ་ཁྲི་སྲོང་གིས་མཁན་སློབ་གདན་དྲངས་ནས་གཙུག་ལག་ཁང་བཞེངས་ཤིང་མདོ་སྔགས་ཀྱི་བསྟན་པ་ཁྱབ་བརྡལ་དུ་སྤེལ། ཁྱད་པར་ཉང་ཏིང་འཛིན་བཟང་པོས་ལུང་བསྟན་པ་ལྟར་སློབ་དཔོན་བི་མ་མི་ཏྲ་སྤྱན་དྲངས་པ་དང་། ལོ་ཙཱ་བ་སྐ་བ་དཔལ་བརྩེགས་ཀྱིས་རྫོགས་ཆེན་གྱི་ཆོས་དུ་མ་བསྒྱུར། ཆོས་རྒྱལ་ཡབ་སྲས་སོགས་ཀྱིས་གསན། སླར་ཕྱི་རབས་ཀྱི་གདུལ་བྱར་དགོངས་ཏེ་དབུ་རུ་ཞྭའི་ལྷ་ཁང་དུ་གཏེར་དུ་སྦས་པ་

ལྡང་མ་ལྷུན་རྒྱལ་གྱིས་བཏོན་པར་བི་མ་སྙིང་ཐིག་ཏུ་གྲགས་པ་དང་། པདྨས་རྫོགས་པ་ཆེན་པོའི་སྐོར་ཏེ་སྒྲོ་བྲག་དཀར་དུ་སྦས་པ་གཏེར་སྟོན་རིན་ཆེན་ཚུལ་རྡོར་པས་བཏོན་པ་མཁའ་འགྲོ་སྙིང་ཐིག་གཉིས་ལ་མ་གཉིས་དང་། སྔ་མའི་དོན་སྙིང་པོ་དྲིལ་བ་བླ་མ་ཡང་ཏིག་དང་། རྗེས་མར་མྱུ་གུ་དང་། སྡོང་པོ་དང་། ལོ་འབྲས་མེ་ཏོག་སོགས་བསྐྱེད་པ་བཞིན་རྒྱས་པར་བཀྲལ་བ་མཁའ་འགྲོ་ཡང་ཏིག་སྟེ་བུ་གཉིས་ལ་སྙིང་ཐིག་ཡ་བཞིར་གྲགས། བི་མ་སྙིང་ཐིག་མ་བུའི་དོན་གསལ་བར་ཀུན་མཁྱེན་ཀློང་ཆེན་རབ་འབྱམས་པས་བཀྲལ་བ་ཟབ་མོ་ཡང་ཏིག་ཡིན་པས། ཆོས་འདི་རྣམས་ཉམས་སུ་བླངས་ན་གསང་སྔགས་སྤྱི་དང་མི་འདྲ་བའི་ཁྱད་པར་འཇའ་ལུས་འཕོ་བ་ཆེན་པོའི་སྐུས་བསྐལ་པ་མ་སྟོངས་བར་འགྲོ་དོན་མཛད་པར་རྒྱལ་དབང་པདྨ་དང་། བི་མ་ལ་ལྟ་བུ་ཡིན་ཞིང་། རྒྱ་བོད་དུ་གྲུབ་པ་ཐོབ་པ་ཤིན་ཏུ་མང་བའི་གཏམ་ཡོངས་གྲགས་ལ་བསྐྱར་ཟློས་མ་དགོས། སྐབས་དོན་གླེང་བར་འོས་པ་ནི་རྒྱ་གར་དུ་སྔགས་གསར་རྙིང་གི་དབྱེ་བ་མེད་ཀྱང་། བོད་འདིར་བསྟན་པ་འཕེལ་འགྲིབ་ཀྱིས་ཕྱེ་བ་ཡིན་མོད། དེ་ལ་སྔགས་ཕྱི་ནང་གི་ནང་པར་རྣལ་འབྱོར་བླ་མེད་ཅེས་ཐེག་པའི་ཡ་གྱལ་དུ་འདོད་པ་མཚུངས་ལ་རྙིང་མ་རྣམས་དེ་ལས་ལྷག་པར་ཨ་ནུ་དང་ཨ་ཏིར་དབྱེ་བས་ཐེག་རིམ་དགུ་བྱུང་ཞིང་། འདིར་བཤད་ཀྱི་རྫོགས་པ་ཆེན་པོ་ནི་ཐེག་པའི་རྒྱལ་པོ་སྟེ་འདི་ཉིད་ཀྱིས་གཞལ་ན་རིམ་པ་འོག་མ་བརྒྱད་པོའི་ཐེག་པ་རྣམས་ཀྱིས་དོན་ལ་ཡོད་མ་མྱོང་བའི་སེམས་རྟོག་གློ་བུར་བ་འབའ་ཞིག་གིས་འགྱུར་བ་མེད་པ་ལ་བློས་བཟོ་འཆོས་ཤིང་བསྒྱུར། སྤང་དུ་མེད་པ་ལ་གཉེན་པོས་བཅོས་ནས་སྤངས།

བསལ་དུ་མེད་པ་ལ་བསལ་འདོད་ཀྱི་བློས་སྐྱོན་དུ་དམིགས། ཐོབ་ཏུ་མེད་པ་ལ་གཞན་ནས་ཐོབ་བྱར་ཡོད་པའི་རེ་དོགས་ཀྱི་དབྱེན་བཅུག །རྩོལ་སྒྲུབ་དང་བྲལ་བར་འབད་རྩོལ་གྱིས་མ་རིག་པ་ཆེན་པོས་རང་གནས་ཀྱི་ཡེ་ཤེས་ལ་བསྒྲིབས་པས་རྣལ་མའི་དེ་ཁོ་ན་ཉིད་ལ་རེག་པའི་སྐབས་མེད་པ་སྟེ། འདི་ལྟར་ཐེག་པ་འོག་མའི་ཉན་རང་གིས་རྟོགས་པའི་བདག་མེད་ནི་ཤེས་པ་དང་རྡུལ་རྫས་ལ་དོན་དམ་དུ་འདོད་ལ། རྣམ་རིག་སྨྲ་བས་རང་ཤེས་རང་གསལ་ཉིད་ཀྱི་རྣམ་ཤེས་ལ་དོན་དམ་ཡོངས་གྲུབ་ཏུ་འདོད་པ་དག་ནི་འཇིག་རྟེན་པའི་སེམས་དང་སེམས་བྱུང་ལས་འདས་པ་མེད་ཅིང་། དབུ་མས་བདེན་པ་གཉིས་ཀྱིས་གཞལ་བའི་སྐྱེ་མེད། འགག་མེད། ཡོད་མེད། མེད་མིན་ལ་སོགས་གཏན་ཚིགས་ཆེན་པོ་བཞི་ལ་སོགས་པས་དཔྱད་པའི་འགོག་བདེན་དང་། མཐའ་བྲལ་དང་། སྤྲོས་བྲལ་སོགས་ཀྱི་མཚུངས་དཔེ་ནམ་མཁའ་ལྟ་བུའི་སྟོང་པར་འཛིན་པ་དང་། སྔགས་འོག་མའི་བྱ་བས་དག་པ་གསུམ་གྱི་ལྷ་གཙང་སྦྲ་སོགས་དཀའ་ཐུབ་ཀྱིས་མཉེས་པའི་དངོས་གྲུབ་འགྲུབ་པར་འདོད་པ་དང་། ཉེ་བའི་རྣལ་འབྱོར་གྱིས་ལྟ་སྤྱོད་གོང་འོག་ཡ་ཆ་བས་མཚན་འཛིན་དང་། རྣལ་འབྱོར་གྱིས་དོན་དམ་པའི་བྱིན་རླབས་ལྷར་བལྟས་ནས་ཕྱག་རྒྱ་བཞིའི་རྣལ་འབྱོར་ལ་དམིགས་པ་དང་། རྣལ་འབྱོར་ཆེན་པོས་བསྐྱེད་རིམ་དང་། རྫོགས་རིམ་རྩ་ཐིག་རླུང་གསུམ་ལ་གནད་དུ་གཅུན་པས་ཡེ་ཤེས་སྐྱེ་བར་འདོད་ཅིང་། རྗེས་སུ་རྣལ་འབྱོར་གྱིས་དབྱིངས་ཡེ་ཤེས་བསྐྱེད་བྱ་སྐྱེད་བྱེད་ལྷའི་དཀྱིལ་འཁོར་དུ་བལྟ་བ་སོགས་མདོར་ན་ཨ་ནུ་མན་ཆད་ཀྱི་རིམ་པ་དེ་དག་ཐམས་ཅད་བློས་རིག་པའི་

གྲུབ་མཐའ་ཁོ་ན་སྟེ། དེ་དག་ཐམས་ཅད་ཀྱང་བློ་ངོར་འདི་ནི་མེད་དོ། །སྟོང་ངོ་། བདེན་ནོ། །སྙམ་པའི་སྙམ་བྱེད་དང་། ཡིད་བྱེད་དང་། རྟོག་དཔྱོད་ཀྱི་ཡུལ་ཡུལ་ཅན་ལ་ཆོས་ཉིད་ཡིན་པར་བརླམས་པ་ལས་གཉུག་མའི་གནས་ལུགས་ཇི་བཞིན་མཐོང་བ་ནི་མེད་དོ། །དེ་དག་རྣམས་ནི་སེམས་ཀྱིས་བྱས་ཤིང་བཅོས་པས་སེམས་ནི་ཚོགས་བརྒྱད་ཀུན་ཏུ་རྟོག་པ་དོར་བྱའི་དྲི་མ་ཡིན་ལ། འདི་ལྟར་རང་བཞིན་རྫོགས་པ་ཆེན་པོ་ནི་སེམས་ལས་འདས་པའི་སེམས་ཉིད་རིག་པ་རང་བྱུང་གི་ཡེ་ཤེས་འོད་གསལ་འདུས་མ་བྱས་པར་གཤིས་ཀྱི་ཡོན་ཏན་ཐམས་ཅད་ལྷུན་གྲུབ་ཏུ་བཞུགས་པ་ལས་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་དང་གཞན་གྱི་རྐྱེན་ལ་སོགས་པའི་ཁམས་ལ་རང་བཞིན་གྱིས་གྲོལ་བས་ལྟོས་མི་དགོས་པ་ནམ་མཁའ་ལྟ་བུའི་མཚན་ཉིད་གནས་ལུགས་འཕོ་འགྱུར་མེད་པར་གྲུབ་པའི་གནད་ཀྱིས་ཐོག་མའི་མགོན་པོ་ཀུན་ཏུ་བཟང་པོ་ཉིད་ཀྱང་བྱས་པ་མེད་པར་རང་བྱུང་གི་ཡེ་ཤེས་རང་རྟོགས་པའི་ཆ་ནས་སངས་རྒྱས་པ་ལས་ཐོས་བསམ་དང་འདུ་བྱས་པའི་ཚོགས་བསགས་སོགས་རྐྱེན་གཞན་གྱིས་མ་བྱུང་བར་བསྟན་པ་སྟེ་རྩ་བ་ཤེས་རབ་ལས། རང་བཞིན་རྒྱུ་དང་རྐྱེན་ལས་ནི། །འབྱུང་བར་རིགས་པ་མ་ཡིན་ནོ། །རྒྱུ་དང་རྐྱེན་ལས་བྱུང་བ་ནི། །རང་བཞིན་བྱས་པ་ཅན་ཞེས་བྱར། །ཇི་ལྟ་བུར་ན་རུང་བར་འགྱུར། །རང་བཞིན་དག་ནི་བཅོས་མེད་དང་། །གཞན་ལ་ལྟོས་པ་མེད་པ་ཡིན། །ཅེས་གསུངས་པ་འདིས་རང་བཞིན་གཤིས་ཀྱི་གནས་ལུགས་རྫོགས་པ་ཆེན་པོའི་གྲུབ་པའི་མཐའ་རྒྱུ་རྐྱེན་ལས་འདས་པའི་འདུས་མ་བྱས་ཀྱི་ཡེ་ཤེས་མངོན་པར་རྟོགས་པའི་སྒྲ་དབྱངས་མངོན་སུམ་དུ་སྒྲོགས་པར་མཛད་

དོ། །དེ་ལ་ཨ་ཏི་ནི་ཤིན་ཏུ་བའི་དོན་ཏེ། མཆོག་དང་། རབ་དང་། ཕུལ་དང་། རྩེ་མོ་དང་། ཡང་སྙིང་དུ་གྱུར་པའོ། །ཡོ་ག་རྣལ་འབྱོར་ཏེ། རྣལ་འབྱོར་ཐམས་ཅད་ཀྱི་མཐར་ཐུག་པས་ན་ཤིན་ཏུ་རྣལ་འབྱོར་རོ། །དེ་ཉིད་རྫོགས་རིམ་ཐམས་ཅད་ཀྱི་སྙིང་པོར་གྱུར་པས་དེའི་བླ་ན་བགྲོད་བྱ་གཞན་མེད་ལ། འདི་ཉིད་ཀྱིས་ཤིན་ཏུ་ཟབ་ཅིང་བརྟག་པར་དཀའ་བའི་ནམ་མཁའ་ལྟ་བུའི་སྐྱེ་བ་མེད་པའི་ཆོས་ཉིད་བཅར་ཕོག་ཏུ་སྟོན་པས་ན་ཆེན་པོའི་སྒྲས་བསྟན་པ་ཡིན་ཏེ། བཅོམ་ལྡན་འདས་ཀྱིས། ནམ་མཁའ་ལྟར་བསམ་གྱིས་མི་ཁྱབ་པའི་ཆོས་སྟོན་པ་ནི་ཤིན་ཏུ་ཆེན་པོའོ། །ཞེས་བཀའ་སྩལ་པའང་འདིའི་ངེས་ཚིག་ལ་དགོངས་པའོ། །དེ་ལྟར་ཡིན་ན་དེའི་ཕྱིར་རྫོགས་པ་ཆེན་པོའི་རང་བཞིན་འདི་ཉིད་བདེ་བར་གཤེགས་པས་བཀའ་འཁོར་ལོ་བར་པར་སྤྲོས་པའི་མཚན་མ་མི་དམིགས་པའི་ཚུལ་གྱིས་བསམ་མི་ཁྱབ་པའི་གནས་ལུགས་རྒྱས་པར་བསྟན་མོད་ཀྱི། གཤིས་ཀྱི་བཞུགས་ཚུལ་མ་བསྟན། འཁོར་ལོ་ཐ་མར་གཤིས་ཀྱི་བཞུགས་ཚུལ་བསྟན་ཀྱང་དེ་མངོན་དུ་བྱེད་པའི་ལམ་མཚན་ཉིད་པ་མ་བསྟན། དེའི་ཕྱིར་འཁོར་ལོ་བར་པའི་དགོངས་པ་འཕགས་མཆོག་ཀླུས་བཀྲལ་བའི་རིགས་ཚོགས་ཀྱི་དགོངས་པ་མ་འགྱུར་བ་དང་། དེའི་ཆོས་དབྱིངས་བསྟོད་པ་སོགས་དང་། ཐ་མའི་དགོངས་པ་རྒྱལ་ཚབ་བྱམས་པ་དང་འཕགས་མཆོག་ཐོགས་མེད་སྐུ་མཆེད་སོགས་ཀྱིས་བཀྲལ་བ་བཅས་ཤིང་རྟ་ཆེན་པོ་རྣམ་གཉིས་ཀྱི་དགོངས་པ་མཐར་ཐུག་འགལ་བར་མི་འདུ་བར་རྫོགས་པ་ཆེན་པོ་ཉིད་དུ་དོན་གྱིས་གནས་ཏེ་གང་གི་ཕྱིར་ཞེ་ན། རང་བཞིན་ཆོས་ཉིད་ཟབ་མོའི་གནས་ལུགས་དེ་

ལས་གཞན་སློབ་དཔོན་དེ་དག་མི་བཞེད་ཅིང་། དེ་ལས་གཞན་དུ་རྫོགས་པ་ཆེན་པོའང་མ་གྲུབ་པའི་ཕྱིར་རོ། །དབྱེ་ན་གསུམ་སྟེ། སེམས་ཀྱི་སྡེའི་ངོ་བོ་ནི་ཐེག་པའི་རིམ་པ་དང་། བདེན་པ་གཉིས་དང་། ཕར་ཕྱིན་དྲུག་དང་། རིམ་པ་གཉིས་སོགས་ལ་དེར་འཛིན་གྱི་འདུ་ཤེས་དམ་པོས་དཀྲིས་པའི་ཟག་པ་དང་བཅས་པའི་ལམ་བདེན་འདུ་བྱས་པ་གང་ཞིག་དག་མཉམ་ཆེན་པོའི་ཡེ་ཤེས་གཉུག་མའི་བྱང་ཆུབ་སེམས་ཀྱི་རང་བཞིན། ཆོས་དབྱིངས་སྤྲོས་པ་དང་བྲལ་བ་དོན་དམ་བདེན་པའི་གཤིས་དེ་ཉིད་རྒྱུ་འབྲས་དགེ་སྡིག་བླང་དོར་གྱི་ཆ་ལས་རྣམ་པར་གྲོལ་བའི་དབྱིངས་ཆེན་པོར་ལ་བཟླ་བའོ། །དེ་ལྟར་བསྟན་པ་ཟབ་མོའི་གནས་ལ་བལྟ་བའི་བློ་གྲོས་ཀྱི་སྤྱན་ཕྲ་བ་འགའ་ཞིག་གིས་རྫོགས་ཆེན་གྱིས་ཐབས་ཀྱི་ཆ་ཡལ་བར་དོར་བ། ལས་རྒྱུ་འབྲས་ལ་སྐུར་པ་བཏབ་བོ། །ཞེས་ནན་གྱིས་འགོག་པར་བྱས་སོ། །ཟབ་མོའི་གནས་ལ་བྱིས་པའི་བློ་གྲོས་སྐྲག་པ་སྐྱེ་བ་བདེན་ཀྱང་ཆོས་འདི་པས་རྣམ་ཤེས་རྟོག་པའི་ཡུལ་ལས་འདས་པའི་ཡེ་ཤེས་ཀྱི་རྒྱལ་ཁམས་དོན་དམ་པའི་བདེན་པ་ཆོས་ཀྱི་དབྱིངས་འདུས་མ་བྱས་སུ་སྨྲ་བ་གང་ཞིག །ཁམས་གསུམ་དང་དཀར་ནག་ལས་ཀྱི་ཆ་འདུ་བྱས་པའི་ཁམས་སུ་མི་གནས་ཤིང་དེ་ལས་ཡོངས་སུ་གྲོལ་བའི་བདག་ཉིད་ཅན་དུ་འདོད་པའི་ཕྱིར་རྒྱུ་རྐྱེན་གྱིས་མ་བསྐྱེད་པ་སྔར་གྱི་ལུང་རྣམས་ཀྱིས་ཀྱང་རྟོགས་པར་ནུས་ལ། གལ་ཏེ་དེར་འདོད་ན། སློབ་དཔོན་ཀླུ་སྒྲུབ་ཀྱི་དབུ་མ་རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས། ལས་དཀར་ནག་

གི་རྒྱུ་འབྲས་ཐམས་ཅད་རྣམ་རྟོག་གི་མཚན་མ་ཙམ་ལས་བྱུང་བར་གསུངས་ནས་དེ་དག་ཐམས་ཅད་སྤྲོས་པ་དང་བྲལ་བའི་སྟོང་པ་ཉིད་ཀྱིས་ཞི་བར་གསུངས་ཤིང་། དེ་ཉེ་བར་ཞི་བའི་ཚུལ་ཡང་། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །དེ་ནི་དེ་ཉིད་མཚན་ཉིད་དོ། །ཞེས་དང་། ཡང་དེ་ཉིད་ལས། ཉོན་མོངས་ལས་དང་ལུས་རྣམས་དང་། །བྱེད་པ་པོ་དང་འབྲས་བུ་དག །དྲི་ཟའི་གྲོང་དང་སྨིག་རྒྱུ་དང་། །མིག་ཡོར་ཆུ་ཟླ་ཇི་བཞིན་ནོ། །ཞེས་དང་། དེ་ཉིད་ཀྱི་དབུ་མ་སྲིད་པ་འཕོ་བ་ལས། ཅིར་ཡང་མི་རྟོག་སྟོང་པ་སྟེ། །ཡིད་ལ་མི་བྱེད་སྐྱེ་འཆི་མེད། །སྣང་བ་སྒྱུ་མ་དགེ་སྡིག་བྲལ། །སྟོང་དང་སྙིང་རྗེ་འཁོར་འདས་སྟོང་། །སྒྱུ་མ་གསལ་སྟོང་བརྗོད་མེད་ཀྱི། །ཆོས་ཉིད་གསལ་དངོས་རྟོག་པ་མེད། །ཅེས་སོགས་དོན་དམ་བདེན་པའི་ཆོས་ཉིད་རྟོགས་པའི་དོན་འདུས་བྱས་པའི་དཀར་ནག་གི་ལས་ཐམས་ཅད་ཀྱིས་འཆིང་གྲོལ་མེད་པར་བཟང་ངན་རོ་མཉམ་ཆེན་པོར་རྟོགས་པར་སྔར་སྨོས་པ་ལྟར་ཆོས་ཐམས་ཅད་ཀྱི་རང་བཞིན་སྨོན་པ་མེད་པའི་མཚན་ཉིད་ཅན་དུ་ལ་བཟླ་བའི་ཆོས་ཉིད་དྲང་ཐད་དུ་སྟོན་པའི་སྐབས་ཏེ། སེམས་སྡེ་ལ་དབྱེ་ན་བདུན་ཏེ། འབྲས་བུ་སེམས་ཀྱི་བྱུང་སར་འདོད་སེམས་ཕྱོགས་པ། གོལ་སྒྲིབ་ལ་བཟླ་བ། གཏན་ཚིག་ཁུང་རྡིབ་པ། རྒྱ་ཆད་ཕྱོགས་ལྷུང་མེད་པ། ཕྱོགས་འཛིན་གྲུབ་མཐའི་ས། བློ་བྲལ་ཕྱོགས་འཛིན་ལས་འདས་པ། སེམས་ཀྱི་ཕྱོགས་ཡིན་དུ་སྨྲ་བ་རྣམས་སོ། །གཉིས་པ་ཀློང་གི་སྡེའི་ངོ་བོ་ནི་རང་བྱུང་གི་ཡེ་ཤེས་ཆོས་ཉིད་ཀུན་ཏུ་བཟང་པོའི་ཀློང་ཡངས་པར་ཆོས་ཅན་ཇི་ལྟར་སྣང་བ་

ཐམས་ཅད་རང་སྣང་བཀོད་པའི་རྒྱན་ཙམ་ལས་འཆིང་གྲོལ་དང་། ཤར་བྱ་ཤར་བྱེད་དུ་མ་གྲུབ་པས། སེམས་སྡེ་ལྟར་རྩལ་དང་རོལ་པར་སྣང་བར་མི་བཞེད་ཅིང་། ལྟོས་གྲུབ་དང་། ཡོད་མེད་དང་། ཡིན་མིན་དང་། དག་མ་དག་གང་དུའང་མི་དཔྱོད་པར་ཡེ་གྲོལ་ཕྱོགས་འབྱམས་ཆེན་པོར་གཏན་ལ་ཕབ་པ་འདི་ཉིད་ཀྱི་གྲུབ་པའི་མཐའོ། །དབྱེ་ན་ཀློང་ནག་པོ་རྒྱུ་མེད་དུ་སྨྲ་བ། ཀློང་ཁྲ་བོ་སྣ་ཚོགས་དུ་སྨྲ་བ། ཀློང་དཀར་པོ་སེམས་སུ་སྨྲ་བ། ཀློང་རབ་འབྱམས་རྒྱུ་འབྲས་ལ་བཟླའོ། །དེ་དག་ཀྱང་བསྡུ་ན། རོལ་པ། རྒྱན། ཆོས་ཉིད། བྱ་བྲལ་གྱི་ཀློང་བཞིའོ། །མན་ངག་སྡེ་ནི། འོག་མ་གཉིས་ལས་ཁྱད་པར་དུ་གྱུར་པ་སྟེ། འདི་ལྟར་སེམས་སྡེས་སེམས་ཡིན་པས་གསལ་བ་ལས་ཟབ་མོའི་ཕྱོགས་ཤས་ཆེ་བར་བསྒྲུབས་ཀྱང་། གསལ་བའི་རྩལ་ཆོས་ཉིད་དུ་མ་རྟོགས་པས་ཡིད་དཔྱོད་དུ་འཛིན་པར་ཉེ་ཞིང་། ཀློང་སྡེས་ཟབ་གསལ་མཉམ་པར་བསྒྲུབས་ཀྱང་ཆོས་ཉིད་ལ་འཛིན་པའི་ཡིད་དཔྱོད་ལས་སྟོང་ཕྱོགས་ཀྱི་གོལ་སར་ཤོར་ཉེ་ལ། མན་ངག་སྡེ་ནི། ངོ་བོ་ཀ་ནས་དག་པ་བརྗོད་བྲལ་བློ་འདས་ཆེན་པོའི་གདངས་རང་སྣང་ལྷུན་གྲུབ་ཀྱི་རང་རྩལ་ལས་ཆོས་ཅན་གྱི་སྣང་བ་ཐམས་ཅད་ཆོས་ཉིད་སྤྲོས་པ་དང་བྲལ་བའི་དབྱིངས་སུ་སྡུད་པའི་དོན་གྱིས་ཁྱད་པར་དུ་འཕགས་པའོ། །ངོ་བོ་ནི། གདོད་མ་ཉིད་ནས་གྲོལ་ཞིང་ཀ་ནས་དག་པའི་ཆོས་ཉིད་ལ་ཉི་ཚེ་བའི་བལྟ་བྱའི་ཡུལ་དང་། ལྟ་བྱེད་ཀྱི་ཤེས་པ་གཉིས་སུ་ཆད་པས་འཁྲུལ་མ་འཁྲུལ་དང་། རྟོགས་མ་རྟོགས་སུ་བསྒྲུབ་པའི་ལྟོས་གཞི་དང་། ལྟོས་པའི་ཆོས་ལས་ལོག་པས། རང་གི་ངོ་

བོ་སྤྲོས་བྲལ་གྱི་ཆ་ནས་ཤེས་བྱ་ཤེས་བྱེད་ཀྱི་ཡུལ་ཡུལ་ཅན་གཉིས་ཀ་ཡང་དག་པ་མ་ཡིན་པར་མཉམ་ཞིང་ཐ་སྙད་ཙམ་དུ་བཏགས་པ་ལས་དེར་འཛིན་གྱི་བསམ་བརྗོད་ལས་ཡང་དག་པར་འདས་པས་ན། བློ་དང་། ཡིན་སྙམ་དང་། སྙམ་བྱེད་དང་། ཡིད་དཔྱོད་ལས་འདས་པའི་དོན་གནད་ཐོག་ཏུ་ཕེབས་པའི་མེ་བཙའ་ལྟ་བུ་སྟེ། རྩ་བ་ཤེས་རབ་ལས། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །ཞེས་གསུངས་ཤིང་། འཇམ་དཔལ་གྱིས། རང་བཞིན་གྱིས་ནི་འོད་གསལ་བ། །གདོད་ནས་དག་པ་ནམ་མཁའ་བཞིན། །མེད་ནས་ཆོས་རྣམས་མཚན་ཉིད་སྤངས། །ཆོས་དང་ཆོས་ཉིད་ཡང་མེད་དོ། །དངོས་པོ་མེད་པའི་མཁའ་དང་མཚུངས། །ཚིག་དང་ཡི་གེ་ཀུན་ལས་གྲོལ། །ཞེས་སོ། །འདི་ལ་ནང་གསེས་ཀྱི་དབྱེ་བ་མང་དུ་ཡོད་ཀྱང་མདོར་བསྡུ་ན། ལུས་དང་འདྲ་བ་ཕྱི་སྐོར། མིག་དང་འདྲ་བ་ནང་སྐོར། སྙིང་དང་འདྲ་བ་གསང་སྐོར། ཐམས་ཅད་རྫོགས་པ་དང་འདྲ་བ་ཡང་གསང་སྔ་ན་མེད་པའི་སྐོར་ཏེ་བཞིའོ། །དང་པོ་ཕྱི་སྐོར་གྱི་ངོ་བོ་ལ་ཉོན་མོངས་མ་གྲུབ་པས་དུག་ལྔ་ལམ་དུ་ཁྱེར། རང་བཞིན་ལ་རྩོལ་སྒྲུབ་མེད་པས་ཅིར་སྣང་ཆོས་ཉིད་དུ་ཤར། མཚན་ཉིད་ལ་ཕྱོགས་ཆ་མེད་པས་སྟོང་ཉིད་གང་དུའང་ཕྱེ་བ་མེད་པའོ། །ནང་སྐོར་གྱི་ངོ་བོ་གཟུགས་ཅན་ལས་འདས་པས་མཚན་མ་མེད་པའི་ཆོས་ཉིད། རང་བཞིན་འགྲོ་འོང་མེད་པས་རྟག་པ་རྒྱུན་གནས་ཀྱི་ཡེ་ཤེས་སོ། །མཚན་ཉིད་ནི། འཁོར་འདས་གཉིས་ཀ་ལ་ཟུག་པས་རྩ་བ་ལྟ་བུ།

རང་ངོ་ཐ་དད་དུ་འགྲིལ་བས་སྡོང་པོ། རྩལ་སྣང་ཅིར་ཡང་རྒྱས་པས་ཡལ་ག །གསལ་ཆ་མི་འགག་པས་མེ་ཏོག །སྣ་ཚོགས་གཅིག་ཏུ་སྨིན་པས་འབྲས་བུ་ལྟ་བུའོ། །གསང་སྐོར་གྱི་ངོ་བོ་ངོ་སྤྲད་པ་དང་རྟོགས་པ་དུས་མཉམ་པས་ཤེས་རབ་གསུམ་ལ་མ་ལྟོས། རང་བཞིན་དབུགས་ཆད་པ་དང་གྲོལ་བ་དུས་མཉམ་པས་གོམས་སྟོབས་ལ་མ་ལྟོས་མཚན་ཉིད་ནི་སངས་རྒྱས་པ་དང་ཐུགས་རྗེ་འབྱུང་བ་དུས་མཉམ་པས་རྒྱུ་ཚོགས་གཉིས་ལ་མི་ལྟོས་པའོ། །ཡང་གསང་བླ་ན་མེད་པ་ནི། ངོ་བོ་ཤེས་བྱ་མ་ཡིན་པས་ཤེས་བྱེད་ལ་མི་ལྟོས་རང་བཞིན་མངོན་སུམ་མཐོང་བས་ཆོས་ཉིད་ཡིད་དཔྱོད་དུ་མི་གནས། མཚན་ཉིད་ནི་སྣང་བ་བཞིས་འབྲས་བུ་ཕྱིས་དུས་ལ་རེ་བ་མི་འཆའ་བར་ཚེ་འདི་ཉིད་ཀྱིས་གདོད་མའི་གཞི་དབྱིངས་སུ་སྦྱོར་བའོ། །དེ་ལྟར་བསྟན་པ་ཐམས་ཅད་ཀྱི་སྙིང་པོ་རྫོགས་པ་ཆེན་པོའི་མན་ངག་སྡེ་པའི་ལུགས་འདིས་སོ་སོའི་རང་གི་རིག་པ་ནི་ཡེ་ཤེས་ཀྱི་ཉམས་སུ་མྱོང་བྱའི་ཡུལ་ཡིན་ལ་ཟག་པ་དང་བཅས་པའི་ཉེ་བར་ལེན་པའི་རྣམ་ཤེས་ཚོགས་བརྒྱད་པོའི་རང་བཞིན་ཅན་གྱི་སེམས་ལས་འདས་པའི་ཚུལ་ནི། སེང་གེ་རྩལ་རྫོགས་ལས། སེམས་དང་ཡེ་ཤེས་བག་ཆགས་དངོས་མ་ཡིན། །ཡེ་ཤེས་བག་ཆགས་ཀུན་དང་བྲལ་གྱུར་ཀྱང་། །སེམས་ཀྱིས་སྣ་ཚོགས་བག་ཆགས་སྡུད་པར་བྱས། །སེམས་དང་ཡེ་ཤེས་གཉིས་སུ་མ་ཕྱེ་ན། །སྣང་བ་ཡུལ་གྱི་རྩ་བ་མི་ཆོད་པས། །རྐྱེན་བྲལ་ཆོས་ཉིད་དག་ཀྱང་རྟོགས་པར་དཀའ། །ཞེས་དང་། ནཱ་རོ་པའི་ཁོ་ན་ཉིད་སྒྲུབ་པའི་ཐབས་ལས་ཀྱང་། བྱང་ཆུབ་སེམས་ཀྱི་རང་རིག་འདི། །བག་ཆགས་འཁྲུལ་པའི་དབང་གིས་ན། །བརྟགས་

པས་སྣ་ཚོགས་མེད་བཞིན་འགྲུབ། །སེམས་ཀྱི་བག་ཆགས་ཕྱིར་སྣང་ཡང་། །རིག་པ་འོད་གསལ་འགྱུར་བ་མེད། །ཅེས་དང་། རྣམ་རྟོག་སེམས་ཀྱི་རྒྱུ་བ་བྲལ། །རང་རིག་འོད་གསལ་འཛིན་པ་མེད། །ཅེས་སོ། །མདོར་ན་སྣང་གྲགས་བསམ་ཡུལ་དུ་གནས་སོ་ཅོག་ཐམས་ཅད་ནི་སེམས་ཀྱི་སྣང་བ་སྟེ་འཁོར་བའི་ཆོས་ཐམས་ཅད་ཀྱི་རང་གི་མཚན་ཉིད་འཛིན་པའི་སེམས་ཏེ། འཕགས་པ་སྟོང་ཕྲག་བརྒྱ་པ་ལས་ཀྱང་། སེམས་ལ་སེམས་མ་མཆིས་ཏེ་སེམས་ཀྱི་རང་བཞིན་ནི་འོད་གསལ་བའོ། །ཞེས་འཇིག་རྟེན་པའི་སེམས་སེམས་བྱུང་ལས་འདས་པའི་སེམས་ཉིད་ཀྱི་དོན་དུ་གསུངས་པའང་སྔ་མ་དང་དོན་གཅིག་གོ། གཞན་ཡང་འཕགས་པ་དཀོན་མཆོག་བརྩེགས་པ་ལས། སེམས་དང་ཡིད་དང་རྣམ་པར་ཤེས་པ་དང་ཡང་བྲལ་བ། ཏིང་ངེ་འཛིན་གྱི་གནས་ཀྱང་མི་འདོར་བ་སྟེ། འདི་ནི་དེ་བཞིན་གཤེགས་པའི་ཐུགས་ཀྱི་གསང་བ་བསམ་གྱིས་མི་ཁྱབ་པ་ཡིན་ནོ། །ཞེས་སོ། །འཕགས་པ་ཀླུ་སྒྲུབ་ཀྱིས་ཀྱང་། སེམས་མེད་པ་ན་ཆོས་ཀྱང་མེད། །དེ་ལྟར་ལུས་དང་ཁམས་ཀྱང་མེད། །དེ་ལྟར་གཉིས་མེད་ལམ་གྱིས་ནི། །དེ་ཉིད་དུ་ནི་རབ་ཏུ་བཤད། །ཅེས་པ་ལ་སོགས་རྒྱ་ཆེར་གསུངས་པ་རྣམས་ཀྱང་སེམས་ལས་འདས་པའི་རིགས་ལ་དགོངས་པ་ཡིན་ཏེ་གྲོལ་ལུགས་ཆེན་པོ་བཞིའི་ངང་དུ་གནས་པ་རང་གི་རིག་པ་རང་བྱུང་གི་ཡེ་ཤེས་དེ་གཉིས་ལམ་འདི་ཉིད་ཀྱི་ཁྱད་ཆོས་སུ་ངེས་པར་བྱས་ནས། དེ་ཚུལ་བཞིན་རྟོགས་པར་བྱ་བ་ལ་སྟོང་ངོས་ཀ་དག་གིས་རིག་པ་སྤྲོས་བྲལ་དུ་གྱུར་པས་སྟོང་པའི་ཆོས་ཟད་སར་བྱེད་པ་ཁྲེགས་ཆོད་དང་། སྣང་ངོས་ལྷུན་གྲུབ་ཀྱིས་རྡོས་བཅས་འོད་གསལ་དུ་དྭངས་

པས་སྣང་བའི་ཆོས་ཉིད་ཟད་པར་བྱེད་པ་གཉིས་སོ། །དང་པོ་ནི་ཐེག་པ་མཆོག་འདིའི་དགོངས་པ་རིག་པའི་ངོ་བོ་འཆིང་གྲོལ་མེད་པའི་གཤིས་ལུགས་ཀ་ནས་དག་པའི་ངོ་བོ་དེ་ཉིད་མ་བཅོས་པ་རྒྱ་གང་དུའང་མ་ཆད། རང་གི་རང་བཞིན་ལ་ངོ་བོ་འདི་ཞེས་གདགས་སུ་མེད་པས་ཕྱོགས་གང་དུའང་མ་ལྷུངས་ཤིང་། རྟོག་པའི་བློ་དང་བྲལ་བས་བསམ་བརྗོད་ལས་འདས་པའི་ཟང་ཐལ་རྗེན་པའི་རིག་པ་དེ་ཉིད་སྟོང་པ་ཉིད་དང་། ལམ་དུས་ཚིག་དང་ཡི་གེས་མི་མཚོན་པས་མཚན་མ་མེད་པ་དང་། འབྲས་བུའི་ངོས་ནས་ཐོབ་བྱ་རེ་དོགས་མེད་པས་སྨོན་པ་མེད་པ་དང་། རིག་པའི་ཆ་ལས་བྱང་ཆུབ་ཀྱི་ཡོན་ཏན་རྣམས་རྫོགས་ཤིང་འོད་གསལ་བའི་རང་བཞིན་གྱི་རྣམ་པར་ཐར་པ་བཞིའི་བདག་ཉིད་ཅན་གྱི་རིག་པ་གང་ལ་ལྟ་སྒོམ་སྤྱོད་འབྲས་རྟོགས་བཅས་རྟོགས་མེད་ཀྱི་ཤེས་པས་བསྡུས་པའི་ཆོས་རྣམས་མི་འགྲུབ་ཅིང་བལྟས་པས་མི་མཐོང་། བསྒོམས་པས་མི་རྟོགས། སྤྱོད་པས་ཕན་མི་བཏགས། འབྲས་བུ་སྒྲུབ་ཏུ་མེད་ལ། དེ་མེད་པས་ས་ལ་སྦྱང་བ་དང་། ལམ་ལ་བསྒྲོད་པ་དང་། འབྲས་བུ་ལ་དམིགས་པ་དང་། དེ་དང་དེའི་རིམ་པའང་བྱར་མེད་པ་སྟེ། ལམ་འདིས་སངས་རྒྱས་རྣམས་ཀྱི་མཐར་ཐུག་པ་ཆོས་ཀྱི་སྐུ་ཡིན་ན་དེ་ནི་ཐོབ་ལ་གཞན་དུ། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་ཡི། །སྐྱེ་བོ་དེ་དག་ང་མི་མཐོང་། །སངས་རྒྱས་རྣམས་ཀྱི་ཆོས་ཀྱི་སྐུ། །ཞེས་གསུངས་པས་སོ། །དེའི་ཕྱིར་རྡོ་རྗེ་སྙིང་པོ་ཀ་དག་གི་རིག་པ་ནི་གདོད་མའི་ཆོས་ཀྱི་སྐུའི་ཡིན་ལུགས་ཇི་ལྟ་བ་ལ་གོམས་སུ་འཇུག་པ་སྟེ། སྤྲོས་པའི་སྒྲིབ་བྱེད་ལས་གྲོལ་བ་ཉི་མ་རང་བཞིན་གྱིས་གསལ་

བ་ལྟ་བུ་ཡིན་ལ། རིམ་པ་བརྒྱད་པོའི་ཉེར་ལེན་སེམས་ཀྱི་ཀུན་ཏུ་རྟོག་པ་འབའ་ཞིག་གིས་བསྐྱེད་པའི་མཚན་བཅས་ཀྱི་རིམ་པ་ལ་བརྟེན་པ་སྒྲིབ་བྱེད་ཀྱིས་སྒྲིིབ་པ་སྦྱངས་ནས་གཟོད་ཉི་མ་མཐོང་བར་འདོད་པ་ལྟ་བུའི་ཁྱད་ཡོད་པས་རང་བྱུང་གི་ཡེ་ཤེས་ལ་རྟོག་པའི་ལྟ་སྒོམ་སྤྱོད་འབྲས་ཀྱིས་མ་བཅོས་པར་རང་བཞག་ཉིད་དུ་ལ་ཟློ་བ་སྟེ་རིག་པ་དེ་ཉིད་རྒྱ་ཡན། མ་བཅོས། མི་འཆོས། མི་བསྒོམ། མི་ཡེངས། མི་འཁྲུལ། རྟོག་དཔྱོད་མ་ཞུགས་པ། ལྷག་གེརྗེན་ནེ། ལྷོད་དེ་བར་རང་བབ་ཏུ་བཞག་པ་ཙམ་ལྟ་བ་དང་སྒོམ་པའི་ཇ་དྭགས་བཏགས་པ་ཙམ་སྟེ། རང་ཤར་ལས། རིག་པ་སྤྲོས་དང་བྲལ་བ་ལ། །འཁྲུལ་དང་མ་རིག་ག་ལ་ཡོད། །ཡེ་ཤེས་སེམས་དང་བྲལ་བ་ལ། །མ་རིག་བག་ཆགས་ག་ལ་ཡོད། །ཅེས་སོ། །དེ་ལྟར་མཉམ་པར་བཞག་པ་ཉིད་ཀྱིས་རིག་པ་ཀ་དག་ཆེན་པོའི་གཤིས་མ་བཅོས་པའི་གནས་ལུགས་བཅར་ཕོག་ཏུ་ངོ་འཕྲོད་པ་ལ་གཟུང་འཛིན་གྱིས་འཆིང་མི་ནུས་ཤིང་། དེ་ལ་བསྒོམ་བྱ་སྒོམ་བྱེད་ཀྱི་སླད་མི་གཞུག་པའི་ཚུལ་རྡོ་རྗེའི་གད་མོ་ཆེན་པོ་བཅུ་གཉིས་སོགས་ཀྱིས་ལེགས་པར་སྟོན་ཅིང་། ལམ་འདི་ཉིད་ལ་གོམས་པ་བརྟན་པར་གྱུར་པ་ན་མཐར་གྱིས་གྲོལ་བའི་ཀ་དག་ཆེན་པོར་སྡུད་པ་ནི་འབྱུང་བཞི་རགས་པའི་རྡུལ་ཕྲན་ཡེ་ཤེས་ཀྱི་མེ་སྟོབས་སུ་གྱུར་པས་སྦྱངས་ཏེ། ཆོ་འཕྲུལ་ཆེན་པོ་དང་བཅས་ཏེ་ཐིམ་པར་འགྱུར་ལ་གཞན་དོན་དུ་འགྱུར་ན་རྡུལ་ཕྲན་དེངས་པ་དེ་རིང་བསྲེལ་རྣམ་བཞིར་སྤྲུལ་ནས་འཇོག་པའང་ཡོད་ལ། རིག་པ་ནི་ཆོས་སྐུའི་དབྱིངས་སུ་འཁྱིལ་ནས་སྤྲུལ་པའི་སྐུ་རྒྱུན་ཆད་མེད་པས་འགྲོ་དོན་མཛད་པའོ། །

གཉིས་པ་ལྷུན་གྲུབ་ཀྱི་སྣང་བ་གཏན་ལ་ཕབ་པ་ཐོད་རྒལ་གྱི་མན་ངག་ནི། དེ་ཡང་ཁྲེགས་ཆོད་ཀྱི་གཟུང་ཡུལ་འཁྲུལ་པའི་སྣང་བ་གཞི་མེད་རྩ་བྲལ་གཤིས་ཐོག་ཏུ་གྲོལ་བ་ཡིན་ལ། འདིར་ནི་ཁམས་གསུམ་གྱི་སྣང་ཆ་དེ་དག་ཐམས་ཅད་རིག་པའི་རང་གདངས་འོད་ལྔའི་ཐིག་ལེ་ཆེན་པོའི་འོད་གསལ་དུ་གྲོལ་བའི་ཕྱིར་འོག་མ་ལས་ཁྱད་པར་དུ་འཕགས་པར་བཤད་པ་འདིས་ཀྱང་དབྱིངས་ཀྱི་སྣང་བ་དང་། སྙིང་པོ་རིག་པ་རྡོ་རྗེ་ལུ་གུ་རྒྱུད་སྨིན་པའི་མཐར་ཆོས་ཉིད་ཟད་པའི་སྣང་བས་ཁམས་གསུམ་ཕྱི་ནང་གི་འབྱུང་བ་རྣམས་འོད་གསལ་དུ་དེངས་པའི་ལམ་མདོར་བསྟན་ཅིང་། དེ་ཡང་བཅའ་བ་ལུས་ཀྱི་གནད་གསུམ། འཁྲིད་པ་དབྱིངས་ཀྱི་གནད་གསུམ། སྣང་བ་ཡུལ་གྱི་གནད་གསུམ་དུ་བསྡུས་ཏེ། ལྷག་མཐོང་གི་རིག་པ་རྡོ་རྗེ་ལུ་གུ་རྒྱུད་ལ་བལྟས་པས་གོམས་པའི་རིམ་པས་སྣང་བ་གཞིར་འབྱོངས་ཤིང་། ཆོས་ཉིད་མངོན་སུམ་གྱིས་ཞིང་ཁམས་ཀྱི་སྒོ་ཕྱེ། དེ་ལས་ཐིག་ལེ་སྐུ་རུ་སྨིན་དུ་ཉེ་བ་ཉམས་གོང་འཕེལ་སྤྲུལ་སྐུ། སྐུ་རུ་སྨིན་པ་རིག་པ་ཚད་ཕེབས་ལོངས་སྐུ། དེ་ནས་སྣང་བ་ཐམས་ཅད་ཐིག་ལེ་ཆེན་པོ་གཅིག་གི་དཀྱིལ་འཁོར་དུ་དག་ནས་བློས་བཏགས་པའི་ཆོས་སོ་ཅོག་ཐམས་ཅད་ཟད་ཅིང་ཆོས་ཉིད་དུ་འཛིན་པ་ཙམ་ཡང་ཟད་པས་ཆོས་སྐུའི་སྣང་བ་མཐོང་བ་སྟེ། ཐལ་འགྱུར་ལས། ཆོས་ཉིད་མངོན་སུམ་མཐོང་བ་ཡིས། །ཡིད་དཔྱོད་འཛིན་པའི་མཐའ་ལས་འདས། །ཉམས་སྣང་གོང་དུ་འཕེལ་བ་ཡིས། །འཁྲུལ་པའི་སྣང་བ་ནུབ་པ་དང་། །བར་དོའི་ཡེ་ཤེས་མངོན་དུ་བྱེད། །རིག་པ་ཚད་ཕེབས་སྣང་བ་ཡིས། །སྐུ་གསུམ་རྟོགས་

པའི་ལམ་སྣང་འདིས། །ཆོས་ཉིད་ཟད་པའི་སྣང་བ་ཡིས། ཁམས་གསུམ་འཁོར་བའི་རྒྱུན་ཐག་ཆད། །ཅེས་སོ། །འདི་ལྟར་གསང་བ་བླ་ན་མེད་པ་འདིར་ཐོག་མ་ནས་འཁོར་བའི་སེམས་ལས་འདས་པའི་རང་བྱུང་གི་རིག་པ་ཉིད་བཅར་ཕོག་ཏུ་ལམ་དུ་བྱེད་པ་ལ་མཁས་པས་མྱུར་དུ་འབྲས་བུ་རང་ཐོག་ཏུ་ཕེབས་པའི་གནད་ཀྱང་དེ་ཡིན་ལ། དེ་ལྟར་མ་ཡིན་ན་ཉམས་སུ་ལེན་དུས་འཁོར་བའི་སེམས་དང་སེམས་བྱུང་ལས་འབྲས་བུ་འཁོར་བ་ཉིད་དེ་རྒྱུ་འབྲས་མི་བསླུ་བར་གཅིག་པའི་ཕྱིར་འགལ་བར་འདུ་བའི་སྐབས་མེད་ལ། ཁྱད་པར་མངོན་སུམ་འོད་གསལ་ལ་ལྟ་བའི་རིག་པ་སྐད་ཅིག་མ་དེ་ཉིད་ནི་ཁམས་གསུམ་པའི་སེམས་སེམས་བྱུང་ཀུན་གཞི་དང་བཅས་པ་ལྡོག་པ་སྟེ། མངོན་སུམ་ལ་བལྟས་པས་ནང་ཀུན་རྟོག་གིས་འཕྲོ་འདུ་མེད་པས་འདོད་པའི་སེམས་ལོག །གསལ་པའི་ངང་ལས་གསལ་བར་འཇོག་བྱེད་ཀྱི་གཉེན་པོ་མེད་པས་གཟུགས་ཀྱི་ཁམས་ལས་ལོག །རྟོག་མེད་རྩེ་གཅིག་ལ་ཆོས་ཉིད་ཀྱི་ངང་དུ་ཞེན་པའི་བློ་མེད་པས་གཟུགས་མེད་ཀྱི་ཁམས་ལས་ལོག །དྭངས་ལ་རིག་པའི་ཕྱིར་ཀུན་གཞི་ལས་ལོག །རང་བྱུང་གི་ཡེ་ཤེས་སུ་ཐག་ཆོད་པས་ཀུན་གཞིའི་རྣམ་ཤེས་ལས་ལོག །སྣང་བ་འོད་གསལ་གྱི་ཡུལ་ལས་ཐ་མལ་གྱི་རྗེས་སུ་སྣང་བ་མེད་པས་སྒོ་ལྔའི་རྣམ་ཤེས་ལས་ལོག །དེའི་ཚེ་དཔྱོད་བྱེད་ཀྱི་རྟོག་པ་དང་ཆགས་སྡང་གི་ཀུན་རྟོག་མེད་པས་ཡིད་ཤེས་དང་ཉོན་ཤེས་ལས་ལོག་སྟེ། མདོར་ན་ཁམས་གསུམ་གྱི་སེམས་དང་སེམས་བྱུང་ཐམས་ཅད་ལས་རྣམ་པར་གྲོལ་བ་ནི་སངས་རྒྱས་ཀྱི་ཡེ་ཤེས་ཞི་བ་ཉིད་ལས་གཞན་མ་

ཡིན་པའི་མཐར་ཐུག་པ་སྟེ། གང་དག་སྔགས་ཀྱི་གྲུབ་མཐའ་རྒྱུད་སྡེ་འོག་མ་རྣམས་སུ་རོ་རྐྱང་གི་རླུང་དབུ་མར་ཚུད་པས་བདེ་གསལ་མི་རྟོག་པའི་ཡེ་ཤེས་ལ་ལྷན་ཅིག་སྐྱེས་པའི་ཡེ་ཤེས་སུ་འདོད་པ་གང་ཞིག །ཚོགས་བརྒྱད་ཀྱི་རྣམ་ཤེས་ལས་མ་ལོག་སྟེ། ཚོར་བ་བདེ་བ་ནི་ཡིད་དང་ཉོན་ཡིད་ཀྱི་རྗེས་སུ་བསྐྱེད་ཅིང་། སེམས་རྟོག་མེད་ཀྱི་ཆ་ནི་ཀུན་གཞི་ལས་གཞན་དུ་མ་འདས་ཤིང་། རླུང་དང་ཁམས་རྣམས་རོ་རྐྱང་གི་ལམ་ནས་དབུ་མར་འཇུག་ཅིང་། དེའི་རྩ་མདུད་རེ་རེ་གྲོལ་སྟོབས་ཀྱིས་ས་བཅུའི་སྤངས་རྟོགས་འཆར་བར་འདོད་པས་འགྲོ་དྲུག་གི་རྩ་འདབ་ཏུ་རླུང་སེམས་ཞུགས་པས་མ་དག་པའི་འཁྲུལ་སྣང་འཆར་བའི་ཕྱིར་གོལ་མ་གོལ་ཀྱི་གནད་ཀྱང་དེ་ཡིན་ལ། འདིར་ནི་རླུང་རྣམས་རང་ཞིར་འཇོག་པ་ལས་དབུ་མར་འཇུག་པ་སོགས་མེད་ཅིང་རྩ་འདབ་སོ་སོའི་རླུང་རང་དག་ལ་སོང་དུས་འོད་ཀྱི་རྩའི་ཡེ་ཤེས་ཀྱི་རང་ས་ན་རང་གསལ་བས་དག་པ་ཡེ་ཤེས་ཀྱི་སྣང་བ་སྐུ་དང་། ཞིང་ཁམས་དང་འོད་ཀྱི་རང་བཞིན་ལས་མ་དག་པའི་འཁྲུལ་སྣང་འཆར་བའི་སྐབས་མེད་ཅིང་དབུ་མའི་འོད་ཀྱི་རྩ་རྣམས་འཕེལ་བས། རྩ་མདུད་ཀྱི་རྣམ་པ་རྣམས་རིམ་གྱིས་འོད་དུ་ཡལ་བའི་ཡོན་ཏན་ལས་སའི་མངོན་རྟོགས་རྣམས་རང་སྣང་དུ་འཆར་རོ། །དེ་ཡང་རྩ་མདུད་དང་པོ་གཉིས་འོད་དུ་ཡལ་བས། ཕྱིར་སྣང་འོད་ཀྱི་ནང་དུ་སངས་རྒྱས་ཀྱི་ཞིང་ཁམས་བརྒྱ་ཕྲག་འཆར་ལ། དེ་དག་ཏུ་འོད་ཟེར་འགྱེད་པ་དང་། རང་སྣང་དུ་འདུས་པས་བགྲོད་པ་དང་། ལུས་འགུལ་བས་ཞིང་བརྒྱ་གཡོ་བ་དང་། ནང་དུ་ཆོས་ཉིད་མི་རྟོག་པའི་ཏིང་ངེ་འཛིན་བརྒྱ་ལ་འཇུག་

ཅིང་ལྡང་བ་ལ་སོགས་འབྱུང་བའི་ཕྱིར་དེ་དག་གིས་མཚོན་པའི་ལམ་འོག་མ་ལས་ཆེས་ཁྱད་པར་དུ་འཕགས་པར་ཤེས་པར་བྱ་དགོས་ལ། དེ་ལྟར་སྣང་བཞིའི་ལམ་མཐར་ཕྱིན་པ་དེའི་ཚེ་ཁྲེགས་ཆོད་ཀྱིས་ལུས་རྡུལ་ཕྲན་དུ་དེངས་པ་ཡོད་ཀྱང་རྡོ་རྗེའི་སྐུ་མི་འགྲུབ། དེ་མ་གྲུབ་པས་རྟེན་དེས་འཁོར་བ་མ་སྟོངས་ཀྱི་བར་གཞན་དོན་རླབས་པོ་ཆེ་སྒྲུབ་པའི་ཐབས་མེད་པས། གཟུགས་སྐུ་དེ་ཉིད་ཆུའི་ཟླ་བ་ལྟར་སྣང་གཟུགས་ཡོད་ཀྱང་རེག་གཟུགས་མེད་པར་བཞུགས་ནས་སེམས་ཅན་གྱི་དོན་དཔག་ཏུ་མེད་པར་མཛད་པ་ལ་འཕོ་བ་ཆེན་པོའི་སྐུ་ཞེས་སློབ་དཔོན་ཆེན་པོ་པདྨ་འབྱུང་གནས་དང་། བི་མ་ལ་མི་ཏྲ་ལྟ་བུའོ། །གལ་ཏེ་རྟེན་དེས་རེ་ཞིག་གདུལ་བར་བྱ་བ་མེད་ན། ཕྱིར་གསལ་ཟུང་འཇུག་གཟུགས་ཀྱི་སྐུའི་རང་སྣང་དེ་ཉིད་ནང་དབྱིངས་སྤྲོས་པ་དང་བྲལ་བ་ཆོས་སྐུའི་ངང་དུ་ཐིམ་ནས་སོ་སོ་རང་གི་རིག་པ་ཕྲ་བའི་ཡེ་ཤེས་ནང་གསལ་གཞོན་ནུ་བུམ་སྐུའི་ཚུལ་གྱིས་འཁྱིལ་པ་ལས། དེའི་ངང་དུ་གདུལ་བྱར་འདུལ་བྱེད་ཀྱི་རོལ་པ་བཀྱེ་བ་ན། འགག་པ་མེད་པའི་ཐུགས་རྗེ་ཆེན་པོའི་ཡེ་ཤེས་འཕྲོ་བའི་གཞིར་ཤིན་ཏུ་མཉམ་པར་བཞག་པ་ལས་མ་གཡོས་བཞིན་དུ་བཞུགས་པའི་ཆོས་ཉིད་དེ་ནི་དབྱིངས་དང་ཡེ་ཤེས་གཉིས་སུ་མེད་པའི་ཆོས་ཀྱི་སྐུའི་མཐར་ཐུག་པ་སྟེ། ཀ་དག་དང་ལྷུན་གྲུབ་གཉིས་མེད་ཀྱི་གྲོལ་ས་ཀ་དག་ཆེན་པོ་གདོད་མའི་གཞིའི་གནས་ལུགས་སུ་བྱང་ཆུབ་པ་ཡིན་ལ། ངོ་བོ་ཉིད་མེད་པར་སྨྲ་བའི་དབུ་མ་རྣམས་ཀྱིས་འདི་སྐབས་སུ་འཇུག་པ་ཐམས་ཅད་ཞི་བའི་འགོག་པ་དམ་པ་ལ་གནས་པས་རང་སང་གི་སྐུ་

དང་ཡེ་ཤེས་ཀྱང་མི་འདོད་དེ་སྤྲོས་པའི་མཐའ་ཐམས་ཅད་དང་བྲལ་བ་ཉིད་ཀྱང་སྟོང་པ་མཐའ་གཅིག་ཏུ་བཞེད་པའི་ཕྱིར་རོ། །མདོར་ན་རྫོགས་པ་ཆེན་པོའི་གནས་ལུགས་ནི་ལྟ་བ་ཡོངས་གྲུབ། རྒྱུ་འབྲས་དག་མཉམ། བདེན་པ་དབྱེར་མེད། གཟུང་འཛིན་རང་ཞིག །སྐྱེ་འགག་ཟང་ཐལ། སྤྲོས་མ་སྤྲོས་ཀྱི་མཐར་མ་ལྷུངས། བློས་མ་བཅོས། ཕྱིར་མི་འཕྲོ། ནང་དུ་མི་གཟུང་། བར་དུ་མི་བཞག །བརྗོད་ཚད་ཐམས་ཅད་ཚིག་དང་ཐ་སྙད་ཀྱི་སྦུན་པ། བསམ་ཚད་དཔྱོད་ཚད་ཐམས་ཅད་རྟོག་པས་བཏགས་པ་ཁོ་ནར་སོང་བས་རང་ངོ་ཁས་ལེན་གྱི་མཐར་མི་གནས་པའི་ངང་དུ་ལ་བཟླ་བ་ཞིག་སྟེ། རྡོ་རྗེ་སེམས་དཔའ་སྙིང་གི་མེ་ལོང་ལས། རིག་པའི་ཆོས་ཐམས་ཅད་བདག་རྟོག་གི་བློ་དང་བྲལ་བར་ཤེས་པར་གྱིས་ཤིག །ཅེས་སོ། །འོན་ཀྱང་སྔ་ཕྱི་ཅི་རིགས་པ་རྣམས་སུ་ཆོས་ཉིད་ཟབ་མོ་བློས་བྱས་ཀྱི་སྒྲུབ་པར་རློམ་པ་རྣམས་ནི་ཆོས་ཉིད་བློ་བྲལ་གྱི་གཏམ་ཟབ་མོས་སྐྲག་པར་འགྱུར་ཞིང་། འདིས་ལམ་གྱི་རིམ་པ་འོག་མ་རྣམས་སུན་ཕྱུང་བ་ལྟར་སྣང་བ་ལ་ཟབ་མོའི་ཕྱོགས་དང་རྒྱ་ཆེ་བའི་གནས་ལ་ཤིན་ཏུ་མཛའ་བ་མ་ཡིན་པའི་རྟོག་གེའི་བློ་གྲོས་ལྟར་སྣང་དང་ལྷན་ཅིག་ཏུ་དུས་སྔ་ཕྱི་ཙམ་ལའང་ཕྲག་དོག་པའི་དཀའ་ཐུབ་རེས་འགའ་མ་ཡིན་པར་ལྷུར་ལེན་པ་དག་བྱུང་མོད་ཀྱི། འཕགས་པ་འཇམ་དཔལ་གྱིས། བྱ་བ་རྣམས་ལ་རྣལ་འབྱོར་པ། །ལམ་ཆེན་དག་ཏུ་ཡོངས་འཛིན་པ། །རི་དྭགས་སྨིག་རྒྱུ་སྙེགས་པ་ལྟར། །རྟག་ཏུ་སྣང་ཡང་མི་ཟིན་ནོ། །དེ་བས་དེ་དག་ཐམས་ཅད་ཀྱང་། །ཡང་དག་མིན་པའི་བློ་དང་

བཅས། །འོག་མ་འོག་མའི་རྣལ་འབྱོར་བློ། །གོང་མ་གོང་མའི་ཁྱད་པར་འཕགས། །འོག་མའི་བློ་ནི་གོང་མ་ཡི། །ཤེས་རབ་ཀྱིས་ནི་སུན་འབྱིན་ནོ། །ཞེས་གསུངས་པ་བཞིན་ཤེས་པར་བྱ་ཞིང་རྩོད་པའི་ཀུན་སློང་ཆོས་ཉིད་བསམ་གྱིས་མི་ཁྱབ་པའི་ངང་དུ་ཞི་བ་ལ་མཁས་པར་བྱའོ། །སྐབས་འདིིའི་སྙིང་ཐིག་ཡ་བཞི་ནི་མན་ངག་སྡེའི་ཡང་གསང་བླ་ན་མེད་པའི་སྐོར་ཡིན་པར་ཤེས་པར་བྱ་ཞིང་། སྤྱིར་རྫོགས་པ་ཆེན་པོའི་ཆོས་ཉིད་འདི་སྔ་འགྱུར་རྙིང་མར་ཕུག་ཐུག་ཀྱང་། གསར་མའི་མཁས་གྲུབ་ཁྱད་པར་འཕགས་པ་དུ་མས་ཀྱང་ཉམས་བཞེས་མཛད་པ་ཕྱོགས་ཙམ་བརྗོད་ན། རྗེ་བཙུན་ས་སྐྱ་པཎྜི་ཏ་དང་། མི་ལ་བཞད་པའི་རྡོ་རྗེ་སོགས་ཀྱིས་ཀྱང་ཐུགས་ཉམས་སུ་བཞེས་ཚུལ་སོ་སོའི་གསུང་དུ་གསལ་ལ། དེ་བཞིན་དུ་རྒྱལ་བའི་དབང་པོ་ཀརྨ་པ་རིམ་བྱོན་དང་། རྗེ་བཙུན་ཙོང་ཁ་པ། ཀུན་མཁྱེན་ལྔ་པ་རིན་པོ་ཆེ་སོགས་ཀྱིས་ཀྱང་ཐུགས་དམ་གྱི་གཙོ་བོར་མཛད་ཚུལ་སོ་སོའི་རྣམ་ཐར་དང་གསུང་སོགས་གུང་བསྟུན་པས་ཤེས་ཤིང་། ས་ལུགས་ལ་བསམ་གཏན་གླིང་པའི་ཨ་ཏི་ཞེས་པའི་རྫོགས་ཆེན་གྱི་ཆོས་སྐོར་ཟབ་ཅིང་རྒྱ་ཆེ་བར་ཡོད་ལ། དཀར་བརྒྱུད་ཕྱོགས་ལ་ཆོས་རྗེ་རང་བྱུང་རྡོ་རྗེ་ལ་བི་མ་ལ་མི་ཏྲས་དངོས་སུ་གནང་བའི་རྫོགས་ཆེན་ཀརྨ་སྙིང་ཏིག་ཞེས་པའི་སྐོར་དང་། སངས་རྒྱས་སྣང་བ་མཐའ་ཡས་ཀྱི་སྒྱུ་འཕྲུལ་ཞང་གཡུ་བྲག་པ་འགྲོ་བའི་མགོན་པོས་ཀྱང་རྫོགས་ཆེན་གྱིས་ཆོས་ཚུལ་རང་གཏེར་དུ་བཞེས་པའི་ལོ་རྒྱུས་སྣང་ལ། རིགས་འདུས་སྨན་པའི་

རྒྱལ་པོས་བྱིན་གྱིས་བརླབས་པའི་སྤྲུལ་པའི་སྐུ་གཡུ་ཐོག་ཡོན་ཏན་མགོན་པོ་ལ་མཁའ་འགྲོ་མ་དཔལ་ལྡན་ཕྲེང་བས་སྩལ་བ་གཡུ་ཐོག་སྙིང་ཏིག་དང་། སྙིགས་དུས་ཀྱི་རྒྱལ་བ་གཉིས་པ་མཉམ་མེད་ཙོང་ཁ་བ་ཆེན་པོའི་ཐུགས་དམ་དུ། གྲུབ་ཆེན་ལས་ཀྱི་རྡོ་རྗེས་དཔལ་གསང་བའི་བདག་པོ་ལ་ཞུས་ལན་བདུད་རྩི་སྨན་མཆོག་ཅེས་རྫོགས་པ་ཆེན་པོའི་ལྟ་གྲུབ་ཀྱི་ཟབ་གནད་ཇི་བཞིན་དུ་སྟོན་པའི་ཆོས་སྐོར་རྒྱས་པར་ཡོད་ལ། དེ་དག་གིས་མཚོན་པའི་སྙན་བརྒྱུད་དང་དག་སྣང་དུ་བྱོན་པའི་ཆོས་ཚན་སོགས་གྲུབ་མཐའ་སོ་སོར་ནང་གསེས་ཕྲན་ཚེག་མང་ཡང་ཐམས་ཅད་སྨོས་ཀྱིས་མི་ལོངས་སོ། །དེ་བས་ན་རྫོགས་པ་ཆེན་པོའི་ཆོས་སྡེ་ཐམས་ཅད་ཀྱི་ཡང་ཞུན་སྙིང་ཐིག་ཡ་བཞི་ཟབ་མོ་ཡང་ཐིག་བཅས་བསོད་ནམས་དཔལ་གྱི་འདུ་བྱེད་པོ་ཆོས་རྒྱལ་མཆོག་འདིའི་རིགས་བརྒྱུད་ནི། འོད་གསལ་ལྷ་ཡི་གདུང་བརྒྱུད་རྔུ་ཆེན་རྒྱལ་མོ་ཚ་བཅོ་བརྒྱད་ཀྱི་ཡ་གྱལ་འགར་ཆེན་ཡེ་ཤེས་བཟང་པོའི་སྲས་གཉིས་ལས་བསོད་ནམས་རིན་ཆེན་གྱིས་འགྲོ་བའི་མགོན་པོ་ཆོས་རྒྱས་འཕགས་པའི་ཞབས་ལ་ཐུག་སྟེ་གསོལ་དཔོན་གྱི་ལས་ཀ་བཟུང་། སེ་ཆེན་རྒྱལ་པོས་འཇའ་ས་སོགས་ཆེན་པོའི་ལས་ཀ་བྱིན། སྐུ་ཚེའི་མཐར་ས་དམར་ཡང་དགོན་དུ་ཚོགས་པ་སྟོང་ཕྲག་ཙམ་ཆོས་ཀྱིས་བསྐྱངས། དེའི་དབོན་པོ་རྔུ་རྒུ་རུ་ལ་སྲས་དགུ་འཁྲུངས་པའི་ནང་ནས་སྟོང་དཔོན་ཟླ་བ་བཟང་པོ་ལ་གོང་མ་མཆོད་ཡོན་གྱིས་ས་དམར་སྟོང་དཔོན་གྱི་གོ་ས་གནང་། དེའི་སྲས་རྔུ་རྒྱལ་བ་བཟང་པོའི་སྲས་པདྨ་བསྟན་སྲུང་། དེའི་སྲས་དཀར་ཆེན་བྱང་ཆུབ་འབུམ། དེའི་སྲས་རྔུ་ཆོས་ཀྱི་རྡོ་རྗེ་ནི་ཀཿཐོག་རྡོ་རྗེ་

གདན་དུ་བྱོན་ཏེ་མཁས་གྲུབ་ཡེ་ཤེས་རྒྱལ་མཚན་བསྟེན་ནས་གསང་སྔགས་སྔ་འགྱུར་གྱི་རིང་ལུགས་ལ་ཐོས་བསམ་སྒོམ་གསུམ་མཐར་ཕྱིན་པར་མཛད་ནས་མཁས་ཤིང་གྲུབ་པའི་དབང་ཕྱུག་ཏུ་གྱུར། མཆེད་ཡ་བདེ་ཆེན་བསོད་ནམས་བཟང་པོ་ཡུམ་འདས་པའི་དགོངས་རྫོགས་སྒྲུབ་པར་ཀཿ་ཐོག་ཏུ་བྱོན་ནས་ཕྱིར་མ་ཕེབས་པར། དགེ་འདུན་རྒྱལ་མཚན་སོགས་མཆེད་གཞན་རྣམས་ཀྱིས་ཕྱིར་འབོད་པར་མཛད་པ་ན། ཀརྨ་པ་ཆོས་གྲགས་རྒྱ་མཚོ་དང་། རྔོག་ཆོས་ཀྱི་རྡོ་རྗེ་གཉིས་ནས་ལུང་བསྟན་པ་ལྟར་ཕྱིར་མ་ཕེབས་པར་རིམ་གྱིས་ལྕགས་རར་གླིང་ས་སྐྱོང་བདག་དྲུང་གི་གམ་དུ་ཕེབས་ནས་ལས་ཤུགས་ཀྱི་མངའ་ཐང་ཆེན་པོ་བདོ་བའི་འགོ་ཚུགས་ཤིང་སྡེ་དགེ་ཞེས་པའི་མཚན་ཡང་འདི་སྐབས་ཤེད་དུ་བྱུང་བར་མངོན། དེ་ལ་སྲས་བཞི་བྱུང་བའི་བོ་ཐར་དུ་གྲགས་པ་དེས་གྲུབ་ཐོབ་ཐང་སྟོང་རྒྱལ་པོ་བླ་མར་བསྟེན་ནས་ཆོས་ཀྱི་སྡེ་འདི་ཉིད་ཐོག་མར་ཚུགས། དེ་ནས་རྒྱལ་སྲིད་ཆོས་བཞིན་དུ་སྐྱོང་བ་རིམ་པར་བྱོན་པའི་སྲས་ས་སྐྱོང་ས་དབང་བཟང་པོའི་རྒར་རྗེ་དཔོན་མོ་ཚེ་དབང་ལྷ་མོ་བསུས་པར་སྲས་མི་ཡི་དབང་པོ་ཆོས་རྒྱལ་བླ་མ་ཚེ་དབང་རྡོ་རྗེ་རིག་འཛིན་དང་སྲས་མོ་རྟ་མགྲིན་ཕྲིན་ལས་དབང་མོ་ལྕམ་དྲལ་ད་ལྟ་ཕན་བདེའི་རྩ་ལག་དམ་པར་བཞུགས་བཞིན་པ་འདི་ཡུམ་སྲས་ཀྱིས་རྒྱལ་བསྟན་རིན་པོ་ཆེ་ཐུགས་དབུས་སུ་བཅངས་ཤིང་ཁྱད་པར་ཟབ་ཆོས་འདི་བཞེངས་པའི་ཕན་ཡོན་ཆེ་བར་དགོངས་ནས་སྙིང་ཐིག་ཡ་བཞི་རིན་པོ་ཆེ་དད་པས་གསེར་ཞུན་མས་ཚར་གཅིག་སྤུས་ལེགས་ན་བཟའ་གླེགས་ཤིང་དྲིལ་ཆས་དང་

བཅས་ཏེ་བཞེངས་འཕྲོར། བླ་མ་ཡང་ཏིག །མཁའ་འགྲོ་ཡང་ཐིག་སྟེ་བུ་པོད་གཉིས་པར་དུ་བཞེངས་པར་མཛད་པའི་བཟང་པོ་ལེགས་བྱས་ཀྱི་འཕྲོ་མཐུད་དུ་ཆོས་རྒྱལ་བླ་མ་མཆོག་གི་རྒྱལ་སྲིད་སྐྱོང་བའི་སྲས་ཆེ་བ་དམ་ཚིག་རྡེ་རྗེ་མཁྱེན་རབ་ཀྱི་པདྨོ་རྣམ་པར་རྒྱས་པའི་ཞལ་སྔ་ནས་གང་གི་ཐུགས་རབ་ཟླ་མེད་པས་སྔ་འགྱུར་གྱི་བསྟན་པ་རིན་པོ་ཆེ་ལ་གུས་ཤིང་ཡབ་རྗེ་ཆོས་རྒྱལ་ཡུམ་སྲས་རྣམས་ཀྱི་མཛད་པ་འཕྲོ་མཐུད་དུ་མཁའ་འགྲོ་སྙིང་ཐིག་སྟེ་སྙིང་ཐིག་མ་གཉིས་དང་། ཟབ་མོ་ཡང་ཏིག་བཅས་ལེགས་བྱས་ཀྱི་གཏོང་བ་ཆེན་པོའི་ཕྱག་རིང་པོར་བརྐྱངས་པས་འབྱོར་པ་མི་ཟད་པ་ནམ་མཁའ་མཛོད་ཀྱི་སྒོ་འཕར་ཡངས་པོར་ཕྱེས་ནས་བྲི་བརྐོས་ཞུས་སྦྱོར་སོ་སོར་ཇི་ལྟར་འོས་པའི་ཡོན་སྔོན་གྱི་སྲོལ་རྒྱུན་ལྟར་གྱིས་ཚིམ་པར་མཛད་ནས། དྲུག་ཅུ་སྐོར་བཅུ་བཞི་པའི་ནང་ཚན་རྣམ་འགྱུར་ལྕགས་སྟག་ལོ་ནས་རིམ་པར་བསྒྲུབས་ཏེ། རྣམ་རྒྱལ་ཞེས་པ་ཆུ་སྦྲུལ་ལོའི་སྟོན་གསུམ་ལོ་ཏོག་དང་འབྲས་བུ་ཡོངས་སུ་སྨིན་པའི་དུས་བཟང་པོར་ལེགས་པར་གྲུབ་པ་ཡིན་ལ། དེ་ཡང་འཆད་ཉན་སྒོམ་གསུམ་གང་ལའང་ཡི་གེ་ལ་མི་བརྟེན་པའི་ཐབས་མེད་ཅིང་། དེ་ཉིད་ཀྱང་དག་མ་དག་ལ་ཤིན་ཏུ་ལྟོས་དགོས་པར་མཁྱེན་དཔྱོད་རྣམ་པར་ཡངས་པས་ལེགས་པར་གཟིགས་ནས་ཆོས་སྦྱིན་རླབས་པོ་ཆེའི་རྒྱུན་སྤེལ་བའི་ཚེ་ཁོ་བོ་ལ་ཞུས་དག་བྱེད་དགོས་ཚུལ་གྱི་བཀའ་སྩལ་གཙུག་གི་ཅོད་པན་དུ་གུས་པས་མཆོད་ནས་ཡི་གེ་ཕྱི་མོ་དག་པ་འགའ་ཞིག་སྒོ་བསྟུན་ནས་དག་པར་བྱས་པ་ལས། སླར་ཡང་སྡེབས་ནོར་བཅོས་བསླད་ལྟ་བུའི་རིགས།

རང་བློས་གང་དཔོག་དཔྱད་པས་དག་པར་བགྱིས་ཤིང་། བརྡ་རྙིང་རེ་ཟུང་སྣང་བ་དང་སྔགས་ལེགས་སྦྱར་ཁོ་ནར་མ་ངེས་པས་འགའ་ཞིག་བརྡ་སྤྲོད་པའི་ལུགས་དང་བསྟུན་པར་དཀའ་བར་སྣང་ཡང་ལེགས་སྦྱར་དང་བསྟུན་ཞིང་མི་མཐུན་པ་རྣམས་ཡིག་རྙིང་སོར་བཞག་ལས་འོལ་ཚོད་མ་སྤོབས་པས་དཔྱད་འོས་མ་མཆིས་ཤིང་། གཞན་བབ་བཅོལ་མེད་པར་དཔྱད་གཞིར་འོས་པ་རྣམས་བཏང་སྙོམས་སུ་མ་སོང་བར་ཡང་ཡང་ཞུ་དག་གྲུབ་པ་ཡིན། དེ་ཡང་ཐེག་པ་ཆེན་པོའི་ཆོས་ལ་སྤྱོད་ཅིང་མོས་པ་ནི་སྐལ་བ་དང་ལྡན་པའི་གང་ཟག་ཏེ། དཔལ་མགོན་འཕགས་པ་ཀླུས། བསོད་ནམས་ཆུང་ངུས་ཆོས་འདི་ལ། །ཐེ་ཚོམ་ཙམ་ཞིག་ཟ་མི་སྲིད། །ཐེ་ཚོམ་ཙམ་ཞིག་ཟོས་པས་ཀྱང་། །སྲིད་པ་ཧྲུལ་པོར་བྱེད་བར་འགྱུར། །ཞེས་གསུངས་ཤིང་མཛད་པ་བཟང་པོ་འདིས་ཀྱང་ལྷ་སྲས་ཉིད་བྱང་ཆུབ་སེམས་དཔའི་མཚན་ཉིད་གསལ་བར་བསྟན་པ་ནི། ཇི་སྐད་དུ། དུ་བ་ལས་ནི་མེར་ཤེས་དང་། །ཆུ་སྐྱར་ལས་ནི་ཆུར་ཤེས་བཞིན། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། །ཞེས་པས་བྱང་ཆུབ་སེམས་དཔའི་མཚན་ཉིད་གསལ་བར་བྱས་པ་ཡིན་ཞིང་། དེ་ཡང་ལས་བཟོ་བ་རྣམས་ཀྱང་ཟ་ཡོན་སོགས་མི་འཕངས་པར་མཛད་དེ་ལས་བྱས་དོན་ཡོད་མཛད་པ་བི་མ་སྙིང་ཐིག་གྲགས་པའི་ཆོས་ཚན་འདིར་དཔེ་ཆ་བཞུགས་བྱང་ལ། ཐོག་མར་དཀར་ཆག་ཉིན་མོར་བྱེད་པ་སྡེབ། ༡༤ ཀ་ཁ་བྱང་སྡེབ། ༡༢ ཁ་བཏགས་གྲོལ་རྒྱུད། ༡༢ ག་བཏགས་གྲོལ་རྒྱུད་འགྲེལ། ༦༣ ང་མཆོད་འོས་དུས་

གནད་ངེས་པ། ༥ ཅ་སངས་རྒྱས་འདས་རྗེས་གསུམ་པ། ༣ ཆ་འདས་རྗེས་རྒྱུད་འགྲེལ་དང་རིག་འཛིན་འདས་རྗེས་ཞར་བྱུང་བཅས། ༡༤ ཇ་བྱེ་མ་ལའི་ཞལ་ཆེམས། ༥ ཉ་སྤྲོས་གཅོད་དུམ་བུ་བཅུ་དྲུག ༢༩ ཏ་རླུང་གི་པྲ་ཁྲིད། ༦ ཐ་མན་ངག་སྦས་དུམ། ༨ ད་མདོ་བྱང་བསྡུས་སྒྲོན། ༢ ན་དམིགས་གཏད་གསལ་སྒྲོན། ༣ པ་གསང་ཆེན་རྟགས་ཡིག་༨ ཕ་ཚད་ཀྱི་ཡི་གེ ༦ བ་དམར་རུའི་རྒྱབ་ཡིག་༥ མ་རྒྱབ་ཡིག་སྨད་ཆ། ༡༤ ཙ་སྒྲོན་མ་དགུ་སྐོར། ༢༥ ཚ་དཔེ་ཐོ་ལ་རང་བཞིན་གནད་དབབ། ཛ་རླུང་གི་པྲ་ཁྲིད་ཟེར་བ་དཔེ་ཐོ་ལ་སྣང་སྟེ་དཔེ་མི་སྣང་། ཝ་ཡང་སྙིང་བཅུད་དུམ། ༥ ཞ་འཕྲུལ་དུམ། ༤ ཟ་སྒྲོན་མ་སྣང་བྱེད། ༣༤ འ་གནད་ཡིག་གསང་བ། ༡༢ ཡ་རྒྱུད་ཁོང་སྙིང་ཐིག་སྡེབ། ༥ ར་གཡུ་ཡིག་པོ་ཏི་སྨུག་ཆུང་། ༥༤ ལ་ཁ་བྱང་མིང་རྣམ་བཀོད། ༣ ཤ་དུམ་བུ་བདུན་ཅུ་རྩ་བཞི་པ། ༡༤ ས་ཁྲེགས་ཆོད་ཡི་གེ། ༥ ཧ་སེམས་ཀྱི་དམིགས་དྲུག་རྣམ་བཤད། ༦༣ ཨ་སྤྲོས་མེད་དབང་གི་ཏི་ཀ ༧ ཀི་དབང་བསྐུར་འཇུག་པའི་དུས་བཤད། ༤ ཀུ་སྤྲོས་མེད་དབང་རུ་ཤན་དབྱེ་བའི་པྲ་ཁྲིད། ༣ ཀེ་སྤྲོས་མེད་དབང་གི་ཕྲ་ཏིག །ཀོ་རབ་ཏུ་སྤྲོས་མེད་དབང་། ༤ ཁི་དབང་གི་ཕྲ་ཏིག་རྣམ་དབྱེ་དཔེ་མ་ཚང་བ་རྐོ་རྒྱུ་མ་བྱས་སླར་དཔེ་རྙེད་ན་རྐོ་འདོད། ཁུ་དབང་བཞི་སྟོན་པའི་དུས་གནད། ༧ ཁེ་སྤྲོས་མེད་དབང་ཆོག ༩ ཁོ་དམ་ཚིག་རབ་དབྱེ། ༡༡ གི་སྙིང་ཐིག་ལོ་རྒྱུས། ༢༤ གུ་གནས་འབྱེད་བདུན་པ། ༣༢ གེ་སངས་རྒྱས་འདས་རྗེས་གསུམ་གྱི་རྒྱུད། ༦ གོ་རྒྱ་མཚོ་ཨར་གཏད། ༣ ངི་ཨར་

གཏད་སྣང་བ་འདུས་པའི་གལ་མདོ། ༣ ངུ་བདུད་རྩི་སྙིང་ཐིག ༤ ངེ་རིག་པའི་གནད་དོན་ལྟ་བ། ༢ ངོ་ཐོད་རྒལ་བོགས་འདོན་སྙིང་གི་ཡང་ཞུན། ༦ ཅི་སྨུག་ནག་ཁྲོས་མ། ༣ ཅུ་ཟབ་པ་པོད་བཞི། ༢ ཅེ་མན་ངག་བརྒྱད་བཅུ་དགུའི་ཐེམ་བྱང་། ༣ ཅོ་སྤྲོས་བཅས་དབང་གི་ཕྱག་བཞེས། ༦ ཆི་སྤྲོས་མེད་དབང་བསྐུར། ༣ ཆུ་སྤྲོས་མེད་དབང་བསྐུར་གནད་ཀྱི་ཡི་གེ ༢ ཆེ་བུམ་ཡིག་དང་དག་པ་སྦྱར་བ། ༢ ཆོ་ཤིན་ཏུ་སྤྲོས་མེད་དབང་། ༤ ཇི་སྤྲོས་མེད་དབང་གི་ཏི་ཀ ༩ ཇུ་སྤྲོས་བཅས་དབང་ལྕེ་བཙུན་གྱིས་མཛད་པ་དང་། རྫོགས་ཆེན་དབང་གསུམ་པ། ཤིན་ཏུ་སྤྲོས་མེད། རབ་ཏུ་སྤྲོས་མེད། དབང་བཞིའི་དུས་མཚན་བསྟན་པའི་ཕྲ་ཊིག་བཅས། ༢༤ ཇེ་ཉམས་ལེན་ལག་ཁྲིད་ངོ་མཚར་ཅན། ༢༠ ཇོ་བཅུད་ཕུར་རྒྱབ་ཡིག་གསང་བའི་མན་ངག ༣ ཉི་རྒྱབ་ཡིག་གནད་བསྡུས་སྒྲོན་མེ། ༣ ཉུ་བསམ་གཏན་མིག་གི་སྒྲོན་མེ། ༣ ཉེ་རྟེན་འབྲེལ་བསྡུས་པའི་སྒྲོན་མ་དང་། ཉ་རྡོར་སེམས་དམིགས་དྲུག་རྩ་བ་གཉིས་དཔེ་མེད། ཏི་ལྕེ་བཙུན་ཉམས་མགུར། ༡ཨཱ་སྤྲོས་མེད་དབང་དཀྱིལ་བྲི་ཐབས། ༡བཅས་ཆོས་ཚན་དྲུག་ཅུ་རེ་བཞི་བཞུགས་པ་ཡིན་ནོ། །ཆོས་ཀྱི་གླེགས་བམ་འདི་ལྟ་བུ་བཞེངས་ཤིང་གཞན་དག་ལ་ཆོས་སྦྱིན་གྱི་ཚུལ་དུ་སྤེལ་བ་བསོད་ནམས་རྒྱ་ཆེན་པོའི་རྒྱུ་ཡིན་ཏེ། ཆོས་སྤྱོད་བཅུའི་མདོ་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་དང་། །ཆོས་སྤྱོད་བཅུ་ཡི་

བདག་ཉིད་ནི། །བསོད་ནམས་ཕུང་པོ་དཔག་མེད་ཐོབ། །ཞེས་དང་། དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་མོད་ཀྱང་། །མཐར་ཕྱིན་པར་ནི་འགྱུར་མ་ལགས། །ཞེས་སོ། །འདིར་སྨྲས་པ། །རྒྱལ་བས་གདུལ་བྱར་འཚམས་པའི་ཆོས་འཁོར་གསུམ། །དྲང་དང་འདྲེས་མ་ངེས་པའི་ཆོས་འཁོར་ཞེས། །ཕྱེ་བར་ལུང་བསྟན་ཤིང་རྟ་ཆེན་པོ་དེའི། །བཞེད་སྲོལ་ལྡེམ་དགོངས་བྲལ་བ་ངེས་དོན་གྱི། །མཐར་ཐུག་ལམ་བདེན་ཀུན་གྱི་བསྒྲུབས་འབྲས་སུ། །ས་སྐྱ་པཎ་ཆེན་བཞེད་པའི་རྫོགས་ཆེན་ལ། །སྡེ་གསུམ་སྐོར་བཞིར་ཕྱེ་བའི་ཡང་གསང་འདི། །སྤྱོད་རྣམས་གདོས་བཅས་ཕུང་པོ་ཟད་སར་འཁྱོལ། །ཕྱི་བལྟས་ཡིད་དཔྱོད་གྲུབ་མཐར་མི་རེ་བའི། །ནང་དུ་མཉམ་པར་འཇོག་པས་གནས་ལུགས་དོན། །མངོན་སུམ་དབང་པོའི་ཡུལ་དུ་བལྟ་བ་ཡི། །ལྟད་མོར་ལོངས་སྐུའི་ཞིང་ཁམས་ཉུལ་འདི་མཚར། །དེས་ན་དེང་དུས་སྙིགས་མ་ལྔ་བདོ་པས། །མདོ་སྔགས་ཆོས་ཚུལ་ཕལ་ཆེར་མིང་ཙམ་དུ། །ལུས་པའི་དུས་འདིར་ཡང་གསང་རྫོགས་པ་ཆེ། །ཉམས་སུ་བླངས་ན་བྱིན་རླབས་ཆེར་ཐོབ་འགྱུར། །འདིར་འབད་བསོད་ནམས་རྒྱ་མཚོ་བསྲུབས་སྐྱེས་ཀྱི། །དགེ་ཚོགས་ནམ་མཁའི་ནོར་བུ་གཟི་འབར་བས། །ལྔ་བདོའི་མུན་རུམ་སྟུག་པོ་བསལ་བྱས་ནས། །རྫོགས་ལྡན་བསྐལ་པས་འགྲོ་ཀུན་འཚོ་བར་ཤོག །རྒྱལ་དང་དེ་སྲས་འགྲོ་ཕྱིར་སྤྲུལ་པའི་གར། །རིས་བྲལ་བསྟན་འཛིན་མཆོག་

རྣམས་ཞབས་པད་བརྟན། །ཆོས་ཀྱི་ཆར་འབེབས་ལུང་རྟོགས་ཞིང་ས་རྒྱས། །སྐུ་དང་ཡེ་ཤེས་གསེར་སྙེ་གཡུར་ཟ་ཤོག །བོད་ཆེན་ཕན་བདེའི་འབྱུང་གནས་ཆོས་ཀྱི་རྒྱལ། །ས་སྐྱོང་ཡབ་སྲས་ཞབས་པད་རྡོ་རྗེ་ལྟར། །བསྐལ་བརྒྱར་བརྟན་ཞིང་ཆོས་སྲིད་དབྱར་གྱི་ཆུ། །འཕེལ་རྒྱས་མངའ་འབངས་སྐྱེ་དགུ་སྐྱོང་གྱུར་ཅིག །བཀྲ་ཤིས་ཀུན་གྱི་འབྱུང་གནས་མཆོག་གསུམ་གྱི། །བདེན་པ་བསླུ་བ་མེད་པས་འདིར་སྨོན་པའི། །དོན་ཀུན་བུམ་པ་བཟང་དང་དཔག་བསམ་ཤིང་། །གཏེར་གྱི་བུམ་པ་བཟང་པོའི་རྗེས་འགྲོར་ཤོག །བི་མ་སྙིང་ཐིག་གི་དཀར་ཆག་ཉིན་མོར་བྱེད་པ་ཞེས་བྱ་བ་ཤཱཀྱའི་དགེ་སློང་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་ལྷ་སྲས་རིན་པོ་ཆེའི་བཞེད་པ་བཞིན་རང་གནས་ཞེ་ཆེན་རི་ཁྲོད་བདེ་ཆེན་པདྨ་འོད་གླིང་དུ་བཅད་རྒྱའི་སྐབས་བྲིས་པའི་ཡི་གེ་པ་ནི་མཆོག་སྤྲུལ་ཚངས་དབྱངས་སྙན་གྲགས་ཀྱིས་བགྱིས་པ་དགེའོ། །དགེའོ།། །