ཞབས་དཀར་ཚོགས་དྲུག་རང་གྲོལ་གྱི་བཀའ་འབུམ།

རྒྱལ་སྲས་སྤྲུལ་པའི་གླེགས་བམ།

རྒྱལ་སྲས་སྤྲུལ་པའི་གླེགས་བམ་བཞུགས་སོ། །

ན་མོ་གུ་རུ་མཉྫུ་གྷོ་ཥ་ཡ། །གཡས་ནས་ཙན་དན་ལྡེ་གུ་འཇམ་པོས་སྐུ་ལ་བྱུག་པར་བྱེད་པ་དང་། །གཡོན་ནས་སྟ་གྲི་རྣོན་པོས་སྐུ་ལུས་གཤག་པར་བྱེད་པ་གཉིས་ལ་ཡང་། །ཉེ་རིང་ཆགས་སྡང་ཕྱོགས་རིས་མི་མངའ་དགྲ་གཉེན་བར་མའི་སེམས་ཅན་རྣམས། །རང་གི་བུ་བཞིན་བརྩེ་བས་སྐྱོང་མཛད་སྟོན་པ་སངས་རྒྱས་གུས་ཕྱག་འཚལ། །བྱམས་བརྩེ་བྱང་ཆུབ་སེམས་ཀྱི་གྲུ་ཆེན་ལ། །བརྟེན་ནས་འགྲོ་ཀུན་འཁོར་བའི་མཚོ་ལས་བསྒྲལ། །རྣམ་མཁྱེན་ནོར་བུའི་གླིང་དུ་འཁྲིད་མཁས་པའི། །

དེད་དཔོན་མཆོག་གྱུར་ཇོ་བོ་ཡབ་སྲས་མཆོད། །རྒྱལ་བའི་གསུང་རབ་དགོངས་འགྲེལ་ཚིག་དོན་གཅིག་ཀྱང་མ་ལུས་ཐུགས་སུ་ཆུད། །རྒྱལ་ཁམས་ཡོངས་ལ་བསྟན་པ་སྤེལ་བའི་བསྟན་འཛིན་སྐྱེ་བུས་ས་སྟེང་ཁྱབ། །རྒྱལ་བསྟན་སྤེལ་ལ་འགྲན་ཟླ་བྲལ་ཞེས་རབ་འབྱམས་ཕྱོགས་བཅུའི་ཞིང་ན་གླེང་། །རྒྱལ་བ་གཉིས་པ་བློ་བཟང་གྲགས་པའི་ཞབས་ཀྱི་པདྨོར་ལན་བརྒྱར་འདུད། །བྱམས་དང་སྙིང་རྗེ་བྱང་ཆུབ་སེམས་གཉིས་ཀྱི། །གདམས་པ་སྟོན་མཛད་རྩ་བའི་བླ་མ་ལ། །སྙིང་ནས་ཕྱག་དང་

བཅས་ཏེ་གསོལ་བ་འདེབས། །བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །སྙན་པ་ཡོངས་གྲགས་རྒྱལ་སྲས་ཐོགས་མེད་ཀྱི། །སྙན་བརྒྱུད་གདམས་པ་བློ་སྦྱོང་དོན་བདུན་མའི། །སྙན་པའི་བ་དན་དཀར་པོ་བདག་གིས་འཕྱར། །སྙན་གྱི་དབང་པོ་གཏོད་ལ་ཀུན་གྱིས་ཉོན། །དེ་ཡང་གངས་རིའི་མགོན་པོ་འཕགས་པ་སྤྱན་རས་གཟིགས་ཀྱི་རྣམ་འཕྲུལ་རྒྱལ་སྲས་ཐོགས་མེད་རིན་པོ་ཆེས། རྒྱལ་བའི་གསུང་རབ་ཀུན་གྱི་ཉིང་ཁུ་རྒྱལ་སྲས་རྣམས་ཀྱི་ཐུགས་དམ་གྱི་མཐིལ། སངས་རྒྱས་ཀྱི་ས་རུ་བགྲོད་པའི་མྱུར་

ལམ། དཔལ་ལྡན་ཨ་ཏི་ཤ་ཡི་མན་ངག །བྱང་ཆུབ་ཀྱི་སེམས་གཉིས་ལ་བློ་སྦྱོང་བའི་ཚུལ། སྙན་བརྒྱུད་ཀྱི་གདམས་པ་ཟབ་མོ་ཕྱི་རབས་གང་ཟག་རྣམས་ཀྱི་དོན་དུ་ཡི་གེར་བཀོད་པ་བློ་སྦྱོང་དོན་བདུན་མ་ཞེས་ཡོངས་ལ་གྲགས་པ་དེ་ནི་གང་བཤད་པར་བྱ་བའི་ཆོས་སོ། །དེ་ཇི་ལྟར་འཆད་ན་བླུན་པོ་བདག་དང་བདག་འདྲས་གོ་སླ་ཞིང་ཡིད་ཆེས་པའི་ཕྱིར། དེའི་དོན་གྱི་ཆ་རགས་རིམ་ཙམ་ཞིག་སྔོན་གྱི་གཏམ་རྒྱུད་དང་གསུང་སྒྲོས་ཁྱད་པར་ཅན་རྣམས་དང་སྦྱར་ནས་བཤད་པར་བྱའོ། །དེ་ཡང་འགྲོ་བ་

ཡོངས་ཀྱི་སྔོན་ནས་མ་འདྲིས་པའི་མཛའ་བཤེས་ཆེན་པོ་མཉམ་མེད་ཐུབ་པའི་དབང་པོ་དེ་ཉིད། བསྐལ་པ་དཔག་ཏུ་མེད་པའི་སྔོན་རོལ་ནས་བདེ་བ་ཅན་ལ་སོགས་པའི་དག་པའི་ཞིང་ཁམས་གཞན་ལས་ཀྱང་ཆེས་ཆེར་རྣམ་པར་དག་པའི་ཞིང་ཁམས་ཤིག་ཏུ་རྒྱལ་བ་དབང་པོའི་ཏོག་ཏུ་མངོན་པར་རྫོགས་པར་སངས་རྒྱས་ཟིན་ཀྱང་། སླར་ཡང་སེམས་ཅན་གྱི་དོན་དུ་བྱང་ཆུབ་མཆོག་ཏུ་ཐུགས་བསྐྱེད་པའི་ཚུལ་བསྟན་ནས་བསྐལ་ཆེན་གྲངས་མེད་གསུམ་གྱི་ཚོགས་རྫོགས་ནས། དེ་བཞིན་གཤེགས་པ་འོད་སྲུངས་འཇིག་རྟེན་དུ་བྱོན་པའི་ཚེ། བྲམ་ཟེ་ཁྱེའུ་བླ་མར་གྱུར། དེ་ནས་དགའ་ལྡན་དུ་དམ་པ་ཏོག་དཀར་དུ་གྱུར་པ་དེ་ཉིད་ལྷའི་རོལ་མོའི་སྒྲ་ལས་འཛམ་བུའི་གླིང་དུ་ཕེབས་པར་བསྐུལ་བས། གཟིགས་པ་ལྔས་གཟིགས་ཏེ་སེར་སྐྱའི་གནས་སུ་ཡུམ་སྒྱུ་འཕྲུལ་མའི་ལྷུམས་སུ་ཞུགས་ཤིང་། མཆུ་ཟླ་བ་ལ་སྐུ་བལྟམས། དེ་ནས་དགུང་ལོ་ཉེར་དགུའི་བར་དུ་རྒྱལ་པོའི་ཁབ་ཏུ་བཞུགས་ནས་ལྷ་མི་གྲངས་མེད་སྨིན་པར་མཛད། ཉེར་དགུ་པ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། ལོ་དྲུག་ཏུ་དཀའ་བ་སྤྱད། དེ་ནས་རྒྱ་གར་རྡོ་རྗེ་གདན་གྱི་བྱང་ཆུབ་

ཤིང་དབང་གི་དྲུང་ནས་མངོན་པར་རྫོགས་པར་སངས་རྒྱས་པའི་ཚུལ་བསྟན་ནས་ཆོས་འཁོར་བསྐོར་ཏེ་འགྲོ་བ་གྲངས་མེད་པ་ཞིག་སྨིན་ཅིང་གྲོལ་བར་མཛད་པ་ཡིན་ལ། སྟོན་པ་ཐུགས་རྗེ་ཅན་དེ་ཉིད་ཀྱིས་གསུང་རབ་ཀུན་གྱི་སྙིང་པོ་བྱང་ཆུབ་སེམས་ཀྱི་གདམས་པ། རྒྱལ་ཚབ་བྱམས་པ་མགོན་པོ་ལ་གནང་། དེས་འཕགས་པ་ཐོགས་མེད་ལ་གནང་། དེས་སློབ་དཔོན་དབྱིག་གཉེན་ལ་གནང་། དེས་འཕགས་པ་གྲོལ་སྡེ་ལ་གནང་། དེས་བཙུན་པ་གྲོལ་སྡེ་ལ་གནང་། དེས་སེང་གེ་བཟང་པོ་ལ་གནང་། དེས་གུ་ཎ་མི་ཏྲ་ལ་གནང་། དེས་ཀུ་སུ་ལུ་ཆེ་བ་ལ་གནང་། དེས་ཀུ་སུ་ལུ་ཆུང་བ་ལ་གནང་། དེས་བླ་མ་གསེར་གླིང་པ་ལ་གནང་སྟེ། བླ་མ་འདི་གསེར་གླིང་རྒྱལ་པོའི་སྲས་ཡིན། གླིང་དེ་འཛམ་གླིང་དང་གླིང་ཆུང་གཉིས་ཀ་མ་ཡིན་ཞིང་། གླིང་དེར་རེས་ནང་པའི་བསྟན་པ། རེས་ཕྱི་པའི་བསྟན་པ་བྱུང་བ་ལས། དེ་དུས་ཕྱི་པ་ཡོད། ཁོང་འཁྲུངས་མ་ཐག་དཀོན་མཆོག་ལ་སྐྱབས་འགྲོ་མཛད་པས། མུ་སྟེགས་བྱེད་རྣམས་ཀྱི་བློ་ལ་མ་རན་ཀྱང་། རྒྱལ་པོའི་སྲས་སུ་སོང་བས་ཅི་ཡང་བྱེད་མ་ནུས་སོ། །

ལོ་དྲུག་བདུན་ལོན་དུས་ནགས་གསེབ་ཏུ་བྱོན་པས། ཐུབ་པའི་གསེར་སྐུ་མཐོ་གང་ཙམ་ཞིག་རྙེད་བྱུང་ནས། དེ་ལ་ཕྱག་མཆོད་འབའ་ཞིག་མཛད། ཆེར་སྐྱེད་པ་དང་འདི་ཆོས་ལ་མོས་པར་འདུག་པས། རྒྱ་གར་དུ་ཆོས་སློབ་ཏུ་བཏང་བ་དྲག་ཟེར་ནས་རྒྱ་གར་དུ་བཏང་བས། མཁས་པའི་མཆོག་ཏུ་གྱུར་ཅིང་། གྲགས་པས་ཀྱང་འཛམ་གླིང་ཁྱབ་པར་གྱུར། དེ་ནས་གསེར་གླིང་དུ་བྱོན་ནས་ཐམས་ཅད་ནང་པའི་བསྟན་པ་ལ་བཀོད་དེ་ཆོས་དང་དཔལ་འབྱོར་གཉིས་ཀ་རྒྱས་པར་མཛད་དོ། །དེས་ཇོ་བོ་རྗེ་ལ་གནང་། ཇོ་བོ་འདི་ཟ་ཧོར་རྒྱལ་པོ་དགེ་བ་དཔལ་བྱ་བའི་སྲས་བར་བ་ཡིན། ཁོང་ལ་འབངས་གྲོང་ཁྱེར་འབུམ་ཚོ་བདུན་ཡོད། ལོངས་སྤྱོད་རྒྱ་ནག་སྟོང་ཀུན་དང་མཉམ། ཁོང་འཁྲུངས་མ་ཐག་སྒྲོལ་མའི་ཞལ་གཟིགས། བུ་ཆུང་གི་དུས་སུ་བླ་མ་རཱ་ཧུ་ལ་གུ་ན་བྷ་དྲ་ལ་ཀྱེ་རྡོར་གྱི་དབང་ཞུས་པས་ཞལ་མཐོང་། ཆེར་སྐྱེས་ནས་ལོ་ཉེར་དགུའི་བར་དུ་སྤྱིར་རིག་པའི་གནས་ལྔ་ཁྱད་པར་རྒྱུད་སྡེ་བཞི་ལ་སྦྱངས་པས་མཁས་ཤིང་གྲུབ་པ་བརྙེས། ཡི་དམ་མང་པོའི་ཞལ་གཟིགས། དཀྱིལ་འཁོར་གྱི་སྒོ་མང་པོ་ཕྱེ། ཏིང་ངེ་འཛིན་རི་རྒྱུད་ཙམ་ཡོད་

མངོན་ཤེས་ལྔ་ཐོབ་བོ། །ཇོ་བོའི་ཐུགས་དགོངས་ལ། ད་ནི་ནགས་སམ་དུར་ཁྲོད་དུ་བསྡད་ལ་གསང་སྔགས་ཀྱི་སྒོ་ནས་ཚེ་གཅིག་ལ་སངས་རྒྱས་བསྒྲུབ་པར་བྱའོ་སྙམ་དུ་བསམ་མ་ཐག །བླ་མ་རཱ་ཧུ་ལ་རི་ནག་བྱ་རྐང་ཅན་ན་བཞུགས་པས་མཁྱེན་ནས། དེ་དང་ཇོ་བོ་བཞུགས་པའི་བར་ལ་ཉིན་ལམ་མང་པོ་ཡོད་ཀྱང་སྐད་ཅིག་ལ་ཇོ་བོའི་མདུན་དུ་བྱོན་ནས། ཁྱོད་ཀྱིས་རིག་པའི་གནས་ལྔ་ཤེས་པ་སོགས་གོང་གི་ཡོན་ཏན་དེ་རྣམས་ཀྱིས་གར་ཡང་མི་ཕྱིན་པས། རབ་ཏུ་བྱུང་ལ་ཡི་དམ་ཐུགས་རྗེ་ཆེན་པོ་ལ་གྱིས། བྱམས་སྙིང་རྗེ་བྱང་ཆུབ་ཀྱི་སེམས་འབའ་ཞིག་སྒོམས་གསུངས། བླ་མས་དེ་ལྟར་གསུངས་ཀྱང་། ང་རང་ཆ་ལུགས་འདི་ལ་གནས་ཏེ་གསང་སྔགས་ཀྱི་ཀུན་སྤྱོད་བྱ་སྙམ་དུ་དགོངས་པ་ལ། ནུབ་ཅིག་རྨི་ལམ་དུ་ཐུབ་པ་འཁོར་བཅས་གདུགས་ཚོད་གསོལ་གྱིན་འདུག་པའི་གྲལ་གཤམ་ན་ཁོང་རང་ཡང་འདུག་ལ། ཐུབ་པ་འཁོར་བཅས་ཁོང་ལ་སྤྱན་རས་གཟིགས་ནས། ཁྱོད་ཅི་ལ་ཆགས་ནས་རབ་ཏུ་མི་འབྱུང་གསུངས་པ་ཞིག་རྨིས་པས། ད་ངེས་པར་རབ་ཏུ་འབྱུང་དགོས་པར་འདུག་དགོངས་ནས་ཕལ་

ཆེན་སྡེར་ཚིག་རྫོགས་མཛད་དེ། བླ་མ་དྷརྨ་རཀྵི་ཏ་ལ་བློ་སྦྱོང་ཞུས་པས་བྱང་ཆུབ་སེམས་ལ་ངེས་ཤེས་སྐྱེས། ཡང་བླ་མ་བྱམས་པའི་རྣལ་འབྱོར་པ་ལ་ཞུས་པས་སྔར་བས་ངེས་ཤེས་སྐྱེས། རྡོ་རྗེ་གདན་ལ་ཕྱི་བསྐོར་མཛད་པའི་ནམ་མཁའ་ལ་བུད་མེད་རྒན་གཞོན་གཉིས་འདུག་པས་རྒན་པ་ལ་གཞོན་པས་ཕྱག་འཚལ་ནས། མྱུར་དུ་སངས་རྒྱས་འཐོབ་པར་འདོད་པས་ཆོས་གང་ལ་བསླབ་པར་བྱ་ཞེས་ཞུ་ཡིན་འདུག་པ་ལ། རྒན་པ་ན་རེ། བྱམས་སྙིང་རྗེ་བྱང་ཆུབ་ཀྱི་སེམས་ལ་བསླབ་པར་བྱའོ་གསུངས་ནས། གསང་སྔགས་ལུགས་ཀྱི་བྱང་སེམས་སྒོམ་པའི་མན་ངག་ཅིག་གསུངས་གིན་འདུག་པ་ལ་ཇོ་བོས་ཀྱང་གསན་པས་བུམ་པ་གཅིག་ནས་གཅིག་ཏུ་བྱོ་བ་ལྟར་ཐུགས་སུ་ཆུད་ཅིང་། བྱང་ཆུབ་ཀྱི་སེམས་ལ་སྔར་བས་ཀྱང་ངེས་ཤེས་སྐྱེས། ཡང་ནང་བསྐོར་ལ་བྱོན་པས་གཙང་ཁང་གི་ལྷ་ཆུང་བ་རྣམས་ཀྱིས་ལྷ་ཆེ་བ་ལ་ཕྱག་འཚལ་ནས་སྔར་ལྟར་ཞུས་པས། ལྷ་ཆེ་ཆེ་རྣམས་ཀྱིས་སྔར་ལྟར་གསུངས་ནས། ཕར་ཕྱིན་ལུགས་ཀྱི་བྱང་སེམས་སྒོམ་ལུགས་ཤིག་གསུང་གིན་འདུག་བའང་གསན་པས་སྔར་ལྟར་གྱུར། དེ་ནས་བླ་མ་གསེར་

གླིང་པ་བྱང་ཆུབ་སེམས་ཀྱི་བདག་པོ་བྱེད་ཀྱིན་འདུག་པས། ཁོང་ལའང་ཞུ་རུ་འགྲོ་བར་དགོངས་ནས་ཚོང་པ་མང་པོ་དང་བསྡོངས་ཏེ་གསེར་གླིང་དུ་ཕྱིན་པས་བླ་མ་དང་མཇལ་མ་ཐག་སྐྱེ་བ་སྔ་མའི་བླ་མར་ཤེས། མོས་གུས་ཚད་མེད་སྐྱེས། བླ་མས་ཀྱང་བསྟན་པའི་བདག་པོར་མངའ་གསོལ་བའི་རྟེན་འབྲེལ་བྱེད་པ་ཡིན་གསུངས་ནས། ཁོང་རང་གིས་རྙེད་པའི་གསེར་སྐུ་དེ་གནང་། ཁྱེད་ཅི་ལ་འོང་གསུངས། བདག་བྱང་ཆུབ་ཀྱི་སེམས་ཞུ་རུ་འོང་བ་ལགས་ཞུས་པས། འོ་ན་ལོ་བཅུ་གཉིས་སུ་སྡོད་ནུས་སམ་གསུངས། ནུས་ལགས་ཞུས། དེར་ལོ་བཅུ་གཉིས་དབུ་སྔས་སྦྲེལ་ནས་ཞུས་གདམས་ངག་བུམ་པ་གང་བྱོས་གནང་ནས་བདག་བས་གཞན་གཅེས་ཀྱི་ལྷག་བསམ་རྣམ་དག་འཁྲུངས། དེ་ནས་རྒྱ་གར་རྡོ་རྗེ་གདན་དུ་བྱོན་ཉིན་གཅིག་ཇོ་བོ་ཁ་སར་པ་ཎི་ལ་ཕྱག་མཆོད་མཛད་དུ་བྱོན་པས་ཁ་སར་པ་ཎིས་ཇོ་བོ་ལ་ཁྱོད་ཀྱིས་རྙེད་པ་ལེགས་པོ་རྙེད་དོ་ད་ནི་སེམས་ཅན་ལ་ཕན་པ་དཔག་མེད་སྒྲུབས་ཤིག །ཁྱད་པར་བོད་དུ་སོང་། དེ་ན་ཁྱོད་ཀྱི་ཡི་དམ་སྒྲོལ་མ་ཡང་འགྲོ་དོན་མཛད་ཀྱིན་ཡོད་གསུངས་ནས་ལུང་བསྟན་པ་

ལྟར་བོད་དུ་བྱོན་ནས་བྱང་ཆུབ་སེམས་ཀྱི་གདམས་པ་འདིའི་མཚོན་པའི་ཟབ་རྒྱས་ཆོས་ཀྱི་འཁོར་ལོ་བསྐོར་ནས་འགྲོ་དོན་རྒྱ་ཆེན་པོ་མཛད་དོ། །ཇོ་བོ་རྗེ་ལ་མཁས་གྲུབ་ཀྱི་བླ་མ་བརྒྱ་དང་ལྔ་བཅུ་ཙམ་ཡོད་ཀྱང་། བླ་མ་གསེར་གླིང་པའི་མཚན་ཐོས་པ་ཙམ་གྱིས་སྤྱན་ཆབ་འབྱིན་ཕྱག་ཐལ་མོ་སྦྱོར། ཟླ་བ་རེ་རེ་བཞིན་འདས་མཆོད་ཀྱང་མཛད་པ་ལ་བུ་ཆེན་རྣམས་ཀྱིས་ཇོ་བོ་ལ་མཁས་གྲུབ་ཀྱི་བླ་མ་མང་དུ་བཞུགས་པ་ལ་གསེར་གླིང་བ་ལ་འདི་ཙམ་གྱིས་གུས་པ་ཅི་ལགས་ཞུས་པས། ངའི་བླ་མ་རྣམས་ལ་ཡོན་ཏན་ཆེ་ཆུང་ཡོད་ནས་ཁྱད་པར་བྱས་པ་མིན་གསེར་གླིང་པ་ཁོ་བོ་ལ་བཀའ་དྲིན་ཆེ་བས་ཡིན་གསུངས། བཀའ་དྲིན་ཅི་བདོག་ཞུས་པས། ཁོ་བོ་ལ་ཡོན་ཏན་དུ་བྱ་བ་སེམས་བཟང་པོ་ཕྲིག་ཙམ་ཞིག་ཡོད་པ་འདི་གསེར་གླིང་པའི་སྐུ་དྲིན་ཡིན་གསུངས། ཐེངས་ཅིག་ཕྱག་བསྙུང་དུ་བྱུང་བ་ལ་འབྲོམ་སྟོན་གྱི་པང་དུ་ཕྱག་བཞག་ནས། འདི་ལ་ཁྱོད་ཀྱིས་བྱིན་རླབས་ཤིག་གྱིས་དང་། ཁྱོད་ལ་བསམ་པ་བཟང་པོ་ཡོད་གསུངས་ནས། བསམ་པ་བཟང་པོ་ཁོ་ན་ལ་རྩིས་སུ་མཛད། ཁམས་བདེ་བྱེད་པ་ལའང་སེམས་བཟང་པོ་བྱུང་ངམ་གསུངས།

ཞལ་ཏ་མཛད་པ་ལའང་སེམས་བཟང་པོ་གྱིས་ཨང་གསུངས། ཇོ་བོས། འབྲོམ་སྟོན་པ་རྒྱལ་བའི་འབྱུང་གནས་ལ་གནང་། དེས་མཉམ་མེད་བོ་ཏོ་བ་རིན་ཆེན་གསལ་ལ་གནང་། དེས་ཤ་ར་བ་ལ་གནང་། དེས་བྱང་སེམས་འཆད་ཁ་བ་ལ་གནང་། འཆད་ཁ་བ་ཁོང་གི་སྔར་གསང་སྔགས་གསར་རྙིང་གི་ཆོས་མང་དུ་མཁྱེན། མཚན་ཉིད་ཀྱི་གཞུང་ལ་ཡུན་རིང་སྦྱངས། པོ་ཏི་བརྒྱ་ཙམ་ཞིག་མཁྱེན་ཀྱང་། ཐུགས་ཀྱི་གཏི་ངན་འཚང་རྒྱ་བ་ལ་ཆོས་བྱེད་ལུགས་འདི་འདྲ་མིན་པའི་མན་ངག་གི་གནད་ཟབ་མོ་ཞིག་ཡོད་ཡོང་སྙམ་པ་ཞིག་ནར་མར་བྱུང་། ནམ་ཞིག་ན་དགེ་བའི་བཤེས་གཉེན་གླང་རི་ཐང་པའི་བློ་སྦྱོང་ཚིག་བརྒྱད་མའི་དཔེ་ཞིག་གཟིགས་པས། ཁེ་དང་རྒྱལ་ཁ་གཞན་ལ་འབུལ། །གྱོང་དང་བུབ་ཁ་རང་གིས་ལེན། །གསུངས་པ་དེ་ལ་ཐུགས་དད་ཆེན་པོ་འཁྲུངས་ནས། དཔོན་གཡོག་འགའ་དང་བཅས་ཤ་ར་བའི་སྤྱན་སྔར་ཕྱིན་ཏེ་བདག་གིས་མཐོང་བའི་ཆོས་ཤིག་ན། བདག་གི་བདེ་བ་སེམས་ཅན་ལ་བཏང་ཞིང་། སེམས་ཅན་གྱི་སྡུག་བསྔལ་རང་གི་ཁུར་དུ་བླང་བར་བྱ་གསུངས་པར་གདའ་བས།

དེ་བདག་གི་སེམས་ལ་ཕན་པ་ཞིག་བྱུང་བས། དེ་སངས་རྒྱས་པའི་གདམས་ངག་གཤའ་མ་ཞིག་ལགས་སམ་ཞུས་པས། ཇོ་བོ་སྟོན་པ་ཁྱོད་ཀྱི་སེམས་ལ་ཕན་མ་ཕན་གྱི་ཁ་ན་ཅི་ཡོད། རྣམ་པ་ཐམས་ཅད་མཁྱེན་པའི་སངས་རྒྱས་མ་བསྒྲུབ་ན་མི་བསྒྲུབ། བསྒྲུབ་ཕན་ཆད་བསམ་པ་དེ་ལྟ་བུ་ཞིག་ལ་མ་བརྟེན་པར་འགྲུབ་མི་སྲིད་གསུངས། འོ་ན་དེ་ལ་ཡིད་ཆེས་ཀྱི་ལུང་ཞིག་འཚལ་ཞུས་པས། འཕགས་པ་ཀླུ་སྒྲུབ་ལ་ཚད་མར་མི་བྱེད་པ་སུ་ཡོད། རིན་ཆེན་འཕྲེང་བ་ལས། བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཅེས་གསུངས་གདའ་བ་གསུངས་པས། ཤིན་ཏུ་མོས་པར་གྱུར་ཏེ། བློ་སྦྱོང་གི་གདམས་པ་འདི་ཞུས་ནས་ཐུགས་ཉམས་སུ་བཞེས་པས་གདེངས་ཐོབ་པར་གྱུར་ཅིང་། ཆོས་འདིའི་འཕྲིན་ལས་ཀྱི་བཀའ་བབ་བྱང་སེམས་འཆད་ཁ་བ་དེ་ཉིད་ཀྱིས་སྤྱིལ་བུ་པ་ལ་གནང་། དེས་ལྷ་སྤྱིལ་ཕུ་པ་ལ་གནང་། དེས་རམ་པ་ལྷ་སྡིང་བ་ལ་གནང་། དེས་སངས་རྒྱས་དབོན་ལ་གནང་། དེས་ཡོན་ཏན་དཔལ་ལ་གནང་། དེས་མཁན་ཆེན་བདེ་བ་དཔལ་ལ་གནང་། དེས་མཁན་ཆེན་བཀའ་བཞི་པ་ལ་གནང་།

དེས་རིན་པོ་ཆེ་བསོད་ནམས་གྲགས་པ་ལ་གནང་། དེས་རྒྱལ་སྲས་ཐོགས་མེད་བཟང་པོ་ལ་གནང་། ཁོང་གི་སྐུ་ཚེ་རིལ་པོར་བློ་སྦྱོང་འདི་ཉམས་སུ་བཞེས་པས་བདག་བས་གཞན་གཅེས་པའི་བྱང་ཆུབ་ཀྱི་སེམས་བཅོམ་མ་མ་ཡིན་པ་ཐུགས་རྒྱུད་ལ་འཁྲུངས་པས། འབྲེལ་ཚད་དོན་དང་ལྡན་པར་གྱུར་ཏེ། ཐ་ན་དུད་འགྲོའི་རིགས་སུ་གཏོགས་པ་རྣམས་ཀྱང་སྐུའི་གམ་དུ་ཉེ་བར་སླེབས་པ་ན་ཞེ་སྡང་ཞི་ནས་ཕན་ཚུན་བྱམས་སེམས་དང་ལྡན་པར་གྱུར་ཞེས་གྲགས་སྟེ། དེ་ཡང་སེམས་དཔའ་ཆེན་པོ་དེ་ལ་གཞན་གྱིས་ཕུལ་བའི་ཤ་ཁྱི་ཞིག་ཡོད་པ་ཡང་རྣ་བ་མོ་དང་རྩེ་བ་དང་། སྤྱང་ཀི་ཞིག་ཡོད་པའང་སེམས་ཅན་ལ་མི་འཚེ། ངང་པ་ཞིག་ཡོད་པ་དེས་ཀྱང་སེམས་དཔའ་ཆེན་པོས་བསྐོར་བ་མཛད་པའི་ཚེ་བསྐོར་བ་བྱེད་པ་བྱུང་། བླ་མ་དཔལ་ཡེ་ལ་ཤིག་ནད་བྱུང་དུས་ཁོང་གི་ཤིག་ནད་བླངས་པ་དང་། སྤྲང་པོ་ཤིག་ནད་ཅན་གྱི་ཤིག་ནད་བླངས་པ་སོགས་གཞན་གྱི་སྡུག་བསྔལ་དངོས་སུ་བླངས་པའི་ལོ་རྒྱུས་ཀྱང་མང་དུ་མཆིས། ཚོགས་ཆོས་གསུངས་པའི་དུས་སེམས་ཅན་གྱི་སྡུག་བསྔལ་ལ་མ་བཟོད་ནས་རྒྱལ་སྲས་པ་

ཉིད་ཀྱིས་བཤུམས་ཙ་ན་ཆོས་ཉན་བྱིངས་པོ་ངུ་ཆོ་ཐེག་ཐེག་འོང་། དེ་ལ་མཚན་ཉིད་པ་ཞིག་ན་རེ། མཁན་པོ་བུ་སྟོན་པས་ཆོས་གསུངས་ཙ་ན་བཞད་གད་ཐེག་ཐེག་ཉམས་དགའ་ཞད་ཆེ་བར་འདུག །འདི་པས་ཆོས་གསུངས་པ་འདི་མི་གཅེས་ཤི་བ་བཞིན་དུ་ངུ་ཆོ་ཐེག་ཐེག་སྡུག་ཞད་ཆེ་ཟེར། ཁོང་གི་ཐུགས་རྗེ་ཆེན་པོས་གཞན་ནག་ཅན་བསྐྱབས་པ་དང་། འཇིགས་པས་ཉེན་པ་ཐར་པར་མཛད་པའི་གཏམ་རྒྱུད་ཀྱང་མང་དུ་སྣང་། རྒྱལ་སྲས་རིན་པོ་ཆེ་དེས་རྗེ་བཙུན་རེད་མདའ་བ་ལ་གནང་། དེས་རྗེ་བཙུན་ཙོང་ཁ་པ་ཆེན་པོ་ལ་གནང་། ཁོང་གིས་བྱང་ཆུབ་སེམས་ཀྱི་གདམས་པ་འདི་ཉིད་ཐུགས་ཉམས་སུ་བཞེས་ནས་རྗེས་སུ་གདམས་པ་འདིས་མཚོན་པའི་ཟབ་རྒྱའི་ཆོས་ཀྱི་འཁོར་ལོ་བསྐོར་ནས་སྟོད་ཛ་ཏི་དབྱུག་པས་བརྡུང་པ་མན་ཆད་ནས། སྨད་རྒྱ་མོ་ཆུ་ལ་དེར་འཐག་པ་ཡན་ཆད་ལ་སངས་རྒྱས་ཀྱི་བསྟན་པའི་སྙིང་པོ་གསེར་སྦྱངས་བཙོ་མ་ལྟ་བུས་ཁྱབ་པར་མཛད་ངུར་སྨྲིག་འཆང་བས་འཛིན་མའི་ཁྱོན་ཀུན་དོག་པོར་བགྱིས་ནུས་པ་ཙམ་བྱུང་། དེས་ཐུགས་སྲས་ཧོར་སྟོན་ནམ་མཁའ་དཔལ་ལ་གནང་། དེས་རྗེ་དགེ་འདུན་གྲུབ་ལ་གནང་། དེས་

འདུལ་འཛིན་བློ་གྲོས་སྦས་པ་ལ་གནང་། དེས་པཎ་ཆེན་ཡེ་ཤེས་རྩེ་མོ་ལ་གནང་། དེས་སྐྱབས་མཆོག་དཔལ་ལ་གནང་། དེས་རྗེ་བཙུན་དབེན་ས་བ་ཆེན་པོ་ལ་གནང་། དེས་མཁས་གྲུབ་སངས་རྒྱས་ཡེ་ཤེས་ལ་གནང་། དེས་རྗེ་བཙུན་ཆོས་ཀྱི་རྒྱལ་མཚན་ལ་གནང་། དེས་རྗེ་ཞབས་དྲུང་ལྷ་བ་བློ་བཟང་དར་རྒྱས་ལ་གནང་། དེས་གྲུབ་ཆེན་བློ་བཟང་བྱམས་པ་ལ་གནང་། དེས་གྲུབ་དབང་ཆོས་རྒྱ་མཚོ་ལ་གནང་། དེས་གྲུབ་དབང་བློ་བཟང་རྣམ་རྒྱལ་ལ་གནང་། དེས་ཡོངས་འཛིན་པཎྜི་ཏ་ཡེ་ཤེས་རྒྱལ་མཚན་ལ་གནང་། དེས་དྲིན་ཅན་རྩ་བའི་བླ་མ་ཡོན་ཏན་ལྷུན་གྲུབ་ལ་གནང་། དེས་བདག་ལ་དགྱེས་བཞིན་གནང་བའོ། །བརྒྱུད་པའི་བླ་མ་དེ་དག་རྣམས་ཀྱང་ལུང་རྟགས་ཡོན་ཏན་དུ་མ་ལ་མངའ་བརྙེས་པ། ཡི་དམ་གྱི་ལྷ་མང་པོའི་ཞལ་གཟིགས་པ། སྤྱན་དང་མངོན་ཤེས་སོགས་ཡོན་ཏན་མཐའ་ཡས་པ་མངའ་བ། མཐའ་ཡས་པའི་འགྲོ་བ་སྒྲོལ་བ་ལ་གཅིག་ཏུ་གཞོལ་ཞིང་མཐུ་དང་ལྡན་པ། ཁྱད་པར་བྱང་ཆུབ་ཀྱི་སེམས་གཉིས་ཀྱི་རྟོགས་པ་མཆོག་ཏུ་གྱུར་པའི་མཁས་གྲུབ་འབའ་ཞིག་གོ །བརྒྱུད་པ་ད་

ལས་བྱུང་བའི་གདམས་པ་ཡིད་བཞིན་གྱི་ནོར་ལས་ལྷག་པ་འདི་ཉིད་ཉམས་སུ་ལེན་པ་ལ། དང་པོ་སྔོན་འགྲོ་རྟེན་གྱི་ཆོས་བསྟན་པ་དང་། དངོས་གཞི་བྱང་ཆུབ་ཀྱི་སེམས་གཉིས་སྦྱང་བ་དང་། རྐྱེན་ངན་བྱང་ཆུབ་ཀྱི་ལམ་དུ་ཁྱེར་བ། ཚེ་གཅིག་གི་ཉམས་ལེན་དྲིལ་ནས་བསྟན་པ། བློ་འབྱོངས་པའི་ཚད། བློ་སྦྱོང་གི་དམ་ཚིག །བློ་སྦྱོང་གི་བསླབ་བྱ་དང་བདུན་ལས། དང་པོ་སྔོན་འགྲོ་རྟེན་གྱི་ཆོས་བསྟན་པ་ནི། མཉམ་མེད་གསེར་གླིང་བ་དང་ཇོ་བོ་ཡབ་སྲས་སོགས་བཀའ་གདམས་བླ་མ་རྣམས་ཀྱིས་ཆོས་གང་ཉམས་སུ་ལེན་ཀྱང་། དང་པོ་སྔོན་འགྲོ་སྦྱོར་བའི་ཆོས་དྲུག་གཏོང་བའི་ཕྱག་ལེན་ལྟར། ཐོག་མར་གནས་ཁང་བྱི་དོར་བྱ་ཞིང་སྐུ་གསུང་ཐུགས་ཀྱི་རྟེན་བཀྲམ། མཆོད་པ་གཡོ་མེད་ཅིང་བཀོད་པ་མཛེས་པར་བཤམས། བདེ་བའི་སྟན་ལ་ལུས་རྣམ་སྣང་ཆོས་བདུན་ནམ་ཙོག་བུ་སོགས་སྤྱོད་ལམ་གང་བདེར་གནས་ནས་རང་རྒྱུད་ལ་བརྟགས་ནས་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ། མདུན་གྱི་ནམ་མཁར་ཐུབ་དབང་གི་གཙོར་བྱས་ཚོགས་ཞིང་གི་ལྷ་གསལ་གདབ་བསགས་སྦྱང་གི་གནད་བསྡུས་པ་ཡན་ལག་བདུན་

པ་མཎྜལ་དང་བཅས་པ་འབུལ། ཕྱིན་ཅི་ལོག་གི་བློ་སྣ་མཐའ་དག་འགག་པ་དང་། ཕྱིན་ཅི་མ་ལོག་པའི་བློ་སྣ་མཐའ་དག་རྒྱུད་ལ་སྐྱེ་བ་དང་། རྐྱེན་ཕྱི་ནང་གི་བར་ཆད་ཐམས་ཅད་ཉེ་བར་ཞི་བར་བྱིན་གྱིས་བརླབ་ཏུ་གསོལ་ཞེས་གསོལ་བ་འདེབས་པ་རྣམས་ཐུན་གྱི་ཐོག་མར་བཏང་ནས། ཆོས་གང་ཉམས་སུ་བླང་ཡང་རྒྱུད་ལ་ཉམས་རྟོགས་མ་སྐྱེས་པ་སྐྱེ་བ་དང་། སྐྱེས་པ་རྣམས་གོང་འཕེལ་དུ་འགྲོ་བའི་ཐབས་གནད་བླ་ན་མེད་པའོ། །ཁྱད་པར་བློ་སྦྱོང་འདིའི་བླ་བརྒྱུད་གསོལ་འདེབས་རྒྱས་པ་བྱ་ཞིང་། དེ་མ་ཐུབ་ན། མཉམ་མེད་ཐུབ་པའི་དབང་པོ་མན་ཆད་ནས། །དྲིན་ཅན་རྩ་བའི་བླ་མ་ཡན་ཆད་ཀྱི། །བློ་སྦྱོང་བརྒྱུད་པའི་བླ་མ་ཐམས་ཅད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བློ་ཁ་ཆོས་ལ་ཕྱོགས་པར་བྱིན་གྱིས་རློབས། །དམ་ཆོས་ལམ་དུ་འགྲོ་བར་བྱིན་གྱིས་རློབས། །བྱང་ཆུབ་སེམས་གཉིས་འབྱོངས་པར་བྱིན་གྱིས་རློབས། །བདག་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་གསོལ་བ་ཡང་ཡང་འདེབས་པར་བྱའོ། །དེ་ཡང་ལས་དང་སྐལ་བར་ལྡན་པ་རྣམས་

ཀྱི་ཚེ་འདིར་མྱུར་བར་མྱུར་དུ་སངས་རྒྱས་ཀྱི་གོ་འཕང་ཐོབ་པར་འདོད་པས་ཐོག་མར་ལམ་གྱི་རྩ་བ་བླ་མ་དགེ་བའི་བཤེས་གཉེན་བསྟེན་དགོས་ཏེ། མཉམ་མེད་པོ་ཏོ་བ་ཆེན་པོས་འབྲོམ་སྟོན་པ་རྒྱལ་བའི་འབྱུང་གནས་ལ་སོགས་བླ་མ་དགེ་བའི་བཤེས་གཉེན་མང་པོ་ཚུལ་བཞིན་བསྟེན་ནས་གཞན་ལ་ཡང་། ཆོས་རྣམས་ཀུན་གྱི་དང་པོའི་མགོ་ནི། བཤེས་གཉེན་དམ་པ་མི་བཏང་བ་ཡིན་གསུངས། རྒྱལ་སྲས་ཐོགས་མེད་རིན་པོ་ཆེས། མཁན་ཆེན་བསོད་ནམས་གྲགས་པ་ལ་སོགས་པའི་བཤེས་གཉེན་དམ་པ་མང་པོ་བསྟེན་ནས་གཞན་ལ་ཡང་། གང་ཞིག་བསྟེན་ན་ཉེས་པ་ཟད་འགྱུར་ཞིང་། །ཡོན་ཏན་ཡར་ངོའི་ཟླ་བཞིན་འཕེལ་འགྱུར་བའི། །བཤེས་གཉེན་དམ་པ་རང་གི་ལུས་བས་ཀྱང་། །གཅེས་པར་འཛིན་པ་རྒྱལ་སྲས་ལ་ལག་ལེན་ཡིན། །གསུངས། དེ་བཞིན་དུ་རྗེ་བདག་ཉིད་ཆེན་པོས་རྗེ་བཙུན་རེད་མདའ་བ་ལ་སོགས་པའི་དགེ་བའི་བཤེས་གཉེན་མང་པོ་བསྟེན་ནས་གཞན་ལ་ཡང་། དེ་ནས་འདི་ཕྱིའི་ལེགས་ཚོགས་ཇི་སྙེད་པ། །རྟེན་འབྲེལ་ལེགས་པར་འགྲིག་པའི་རྩ་བ་ནི། །ལམ་སྟོན་བཤེས་གཉེན་དམ་པ་འབད་པ་ཡི། །བསམ་དང་

སྦྱོར་བས་ཚུལ་བཞིན་བསྟེན་པ་རུ། །མཐོང་ནས་སྲོག་གི་ཕྱིར་ཡང་མི་གཏོང་བར། །བཀའ་བཞིན་སྒྲུབ་པའི་མཆོད་པས་མཉེས་པར་བྱ། །ཞེས་གསུངས་པ་ལྟར། མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་དགོས། དེ་ལ་བསམ་པ་དད་གུས་ཀྱིས་བསྟེན་ཚུལ་ནི། སྔོན་སངས་རྒྱས་འཁོར་བཅས་ལྷོ་ཕྱོགས་ཀྱི་རི་མཐོ་བ་ལ་གཤེགས་པ་དང་། འཁོར་དེའི་ནང་ནས་བྱང་ཆུབ་སེམས་དཔའ་མཐོང་བ་དོན་ཡོད་ཀྱི་བསམ་པ་ལ། ཀྱེ་མ་ད་ལྟ་ནི་སངས་རྒྱས་ལ་ཆོས་ཉན་དུ་ཡོད་ན། སངས་རྒྱས་འདས་ནས་ཇི་ལྟར་བྱ་སྙམ་པ་དང་། སངས་རྒྱས་ཀྱི་ཞལ་ནས། ཀྭ་ཡེ་མཐོང་བ་དོན་ཡོད་ཁྱོད། །ཕྱི་མའི་དུས་སུ་གྱུར་པ་ན། །ང་ནི་སློབ་དཔོན་གཟུགས་ཀྱིས་སྟོན་གསུངས། ཡང་སྔོན་སྟོན་པ་སངས་རྒྱས་ཀྱིས་བྱ་གསོད་པའི་རྔོན་པ་སཏྭ་ཞེས་པ་སྐུ་དངོས་ཀྱིས་གདུལ་བའི་སྐལ་བར་མ་གྱུར་པས། ཁོ་རང་འདྲ་བའི་རྔོན་པར་སྤྲུལ་ཏེ་ཐབས་ཀྱིས་བཏུལ་བའི་ལོ་རྒྱུས་བཞིན། སྔོན་དུས་སངས་རྒྱས་ཀྱིས་འདུལ་བའི་སྤྱོད་ཡུལ་དུ་མ་གྱུར་པ་རྣམས་ལ་དེང་

སང་སྙིགས་དུས་འདིར་གང་ལ་གང་འདུལ་གྱི་དགེ་བའི་བཤེས་གཉེན་གྱི་སྐུར་སྤྲུལ་ནས་འགྲོ་བའི་དོན་མཛད་པ་ཡིན་ཏེ། རྔ་བོ་ཆེའི་མདོ་ལས། མྱ་ངན་མ་བྱེད་ཀུན་དགའ་བོ། །ང་ནི་ཕྱི་མའི་དུས་སུ་ནི། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །གསུངས། དེས་ན་ང་ལ་བླ་མ་དགེ་བའི་བཤེས་གཉེན་འདི་རྣམས་སངས་རྒྱས་མི་ཡི་གཟུགས་སུ་ཤར་བ་ཡིན་སྙམ་དུ། སངས་རྒྱས་དང་འདྲ་བའི་དད་གུས་བྱའོ། །སྔོན་རྩི་རྒྱལ་བ་ཡེ་ཤེས་བྱ་བས་སྟོན་མོ་ཞིག་བྱས་ནས། དགེ་བཤེས་ལ་ཡུན་རིང་བ་ལོ་བཅུ་བཞི་ཙམ་བསྟེན་པ་ལ། རྒྱུད་དང་ཆོས་གཉིས་ཧ་ཅང་འདྲེས་མ་འཚལ་ན། དེ་གཉིས་འདྲེས་པའི་ཐབས་ཇི་ལྟར་བགྱི་ཞེས་ཞུས་པས། དགེ་བཤེས་ཀྱི་ཞལ་ནས། རབས་ཆད་པོ་ཅིག་བུ་བུ་ཟེར་ནས་ངུས་སོ། །གཞན་གྱིས་ཁྱོད་བུ་མེད་པར་ཅི་ལ་ངུ་བྱས་པས། ང་བུ་མེད་པས་ངུ་བ་ཡིན་ཟེར་རོ། །དེ་བཞིན་དུ་ཁྱོད་རྒྱུད་དང་ཆོས་འདྲེར་མ་བཏུབ་པ་དེ་ཡང་། ཁྱོད་རང་ལ་དད་པ་མེད་པས་ལན་བ་ཡིན་པས། དད་པ་དད་པ་གྱི་ས་ལ་དུས་གསུངས་སྐད། སྔོན་ཇོ་བོ་རྗེ་ལ་བོད་ཀྱི་དགེ་བཤེས་

མང་པོས་ཆོས་གཅིག་ཞུ་ལགས་ཞུས་པས། དད་པ་བསྐྱེད་མཛོད་གསུངས། དེ་མ་གསན་པ་ཡིན་སྙམ་ནས་སྐད་བསྐྱེད་དེ། ཨ་ཏི་ཤ་ཆོས་ཞུ་ལགས་ཞུས་པས། ཧེ་མ་ཐོས་པ་ཏ་མ་ལགས་ཏེ། གདམས་ངག་དད་པ་ཁོ་ན་ལགས་མོད། དད་པ་བསྐྱེད་མཛོད་གསུངས་སྐད། དེས་ན་བླ་མ་ལ་སངས་རྒྱས་དངོས་དང་། ཞལ་ནས་གསུངས་པའི་ཆོས་ལ་སངས་རྒྱས་ཀྱི་གསུང་དང་ཁྱད་པར་མེད་པའི་ཡིད་ཆེས་ཀྱི་དད་པ་དྲག་པོ་བྱའོ། །སྔོན་ལྷོ་བྲག་གྲུབ་ཆེན་ལས་ཀྱི་རྡོ་རྗེ་ལ། ཡི་དམ་ཕྱག་ན་རྡོ་རྗེ་ཞལ་གཟིགས་པའི་དུས་སུ། གསང་བའི་བདག་པོའི་ཞལ་ནས། ལས་ཀྱི་རྡོ་རྗེ་བླ་མ་ལ་མོས་གུས་མ་ཐོབ་པར་ཡི་དམ་ལྷའི་ཞལ་གཟིགས་ཟེར་བ་དང་། ཉམས་མྱོང་བཟང་པོ་སྐྱེས་ཟེར་བ་རྫུན་ཡིན། འཆི་བ་མི་རྟག་པ་རྒྱུད་ལ་མ་སྐྱེས་པར་འཇིག་རྟེན་བློས་གཏོང་ཟེར་བ་རྫུན་ཡིན། ལས་རྒྱུ་འབྲས་ལ་ཡིད་ཆེས་མེད་པར་སྡིག་པ་མ་བྱས་ཟེར་བ་རྫུན་ཡིན། འཁོར་བའི་ཉེས་དམིགས་མ་དྲན་པར་འཇིག་རྟེན་མཐའ་དག་བློས་གཏོང་ཟེར་བ་རྫུན་ཡིན། ཕན་སེམས་རྡུལ་ཙམ་ཡང་མེད་པར་བྱམས་སྙིང་རྗེ་བྱང་ཆུབ་ཀྱི་སེམས་སྐྱེས་ཟེར་བ་

རྫུན་ཡིན། ཀུན་རྫོབ་ཀྱི་ཆོས་ཐམས་ཅད་བདེན་མེད་དུ་མ་རྟོགས་པར་སྟོང་པ་ཉིད་རྟོགས་ཟེར་བ་རྫུན་ཡིན། ལས་ཀྱི་རྡོ་རྗེ་ཆོས་གཤའ་མ་ཞིག་བྱེད་ན་གཞི་དད་པ་གལ་ཆེ་གསུངས། འོ་ན་ངའི་བླ་མ་འདི་སངས་རྒྱས་དངོས་ཡིན་ན་སྐྱོན་འདྲ་འདུག་པས་སངས་རྒྱས་དངོས་རང་མ་ཡིན་ནོ་སྙམ་ན། དེ་རང་སྣང་མ་དག་པའི་དབང་གིས་དེ་ལྟར་མཐོང་བ་ཡིན་ཏེ། སྔོན་དྲང་སྲོང་སྐར་མ་ལ་དགའ་བས། སངས་རྒྱས་ལ་མུ་སྟེགས་ཀྱི་དྲང་སྲོང་དུ་མཐོང་བ་ཡིན། འཕགས་པ་ཐོགས་མེད་ཀྱིས་རྗེ་བཙུན་བྱམས་པ་ཁྱི་མོ་རོ་སྨད་འབུས་གཡེང་བར་མཐོང་། སློབ་དཔོན་མཚོ་སྐྱེས་ཀྱིས། ཡན་ལག་མེད་པའི་རྡོ་རྗེ་ཕག་རྫིར་མཐོང་། སློབ་དཔོན་སངས་རྒྱས་ཡེ་ཤེས་ཀྱིས་འཕགས་པ་འཇམ་དཔལ་ཞིང་ལས་བྱེད་པར་མཐོང་། ན་རོ་པས་ཏེ་ལོ་བ་ཉ་གསོན་པོར་བསྲེགས་པ་སོགས་མི་འཚམས་པ་བྱེད་པའི་སྨྱོན་པ་ལྟ་བུར་མཐོང་། མཻ་ཏྲི་པས་རྣལ་འབྱོར་གྱི་དབང་ཕྱུག་ཤ་བ་རི་པ་རྔོན་པར་མཐོང་བ་སོགས་སྔོན་བྱོན་སྐྱེས་ཆེན་དམ་པ་རྣམས་ལ་ཡང་མཐོང་སྣང་དེ་འདྲ་བྱུང་ན་ཉོན་མོངས་པའི་གཏིང་དུ་ལྷུང་བ་བདག་ལ་མཐོང་སྣང་ལོག་པ་དེ་འདྲ་འབྱུང་བ་སྨོས་

ཅི་དགོས་སྙམ་དུ་རང་གིས་བླ་མའི་མཛད་སྤྱོད་འགའ་རེ་སྐྱོན་དུ་མཐོང་ཚེ། དཔེར་ན་མཁྲིས་ནད་ཅན་གྱིས་དུང་དཀར་སེར་པོར་མཐོང་བ་བཞིན། དེ་བླ་མའི་སྐྱོན་མ་ཡིན་རང་སྣང་མ་དག་པའི་སྐྱོན་གྱིས་དེ་ལྟར་མཐོང་བ་ཡིན་སྙམ་དུ་སླར་མོས་གུས་ཆེར་བྱའོ། །རས་ཆུང་བས། རྗེ་བཙུན་གྱིས་ཆོས་གསུངས་པ་དང་། གསུང་གང་བྱོན་ཡང་ཐུགས་ཁྲོས་ཐབས་སུ་གསུངས་པ་དེ་ཅི་ལ་དགོངས་པ་ལགས་ཞུས་པས། རྗེ་མི་ལའི་ཞལ་ནས། དེ་གཅིག་ཏུ་ན་ངའི་ཁམས་རིགས་ཀྱང་ཡིན་ལ། གཉིས་སུ་ང་དང་མི་ཕལ་ཆེར་སྤྱོད་པ་ཡེ་རང་མི་མཐུན་པར་འདུག་པ་དེས་ལན་པ་ཡིན་ནམ་གསུངས། དགེ་བཤེས་ལྷ་བཟོ་པ་ལ་སྟོད་ལུང་པས་མཇལ་རེས་ཀྱི་བཀའ་བཀྱོན་དྲག་པོ་རེ་བྱོན་པ་ལ། ལྷ་བཟོ་བའི་སློབ་མའང་ཡིན་པས། ཉག་མོ་བས། སློབ་དཔོན་འདི་འོ་སྐོལ་དཔོན་སློབ་ལ་སྡང་བ་རང་ཞིག་འདུག་བྱས་པས། ལྷ་བཟོ་པའི་ཞལ་ནས། ཁྱོད་ཀྱིས་བཀའ་བཀྱོན་དུ་གོའམ། ཁོ་བོ་ལ་འདིས་འདི་ལྟ་བུ་རེ་མཛད་རེས་ཀྱིས་དཔལ་ཧེ་རུ་ཀའི་བྱིན་གྱིས་བརླབས་པ་འདྲ་བ་རེ་འོང་གིན་ཡོད་གསུངས། དེས་ན་བཀའ་

བཀྱོན་དང་བརྡུང་བརྡེག་བྱས་ན་ཡང་བྱིན་རླབས་དང་བཀའ་བསྒོ་ཡིན་པས་དགའ་བ་བསྒོམ་དགོས་ཏེ། པཎ་ཆེན་ན་རོ་པ་ཆེན་པོའི་སྐྱེ་མཐའ་འགྲོ་མགོན་གཙང་བ་རྒྱ་རས་ཀྱི་ཞལ་ནས། བརྡུང་བརྡེག་བྱས་ན་དབང་བསྐུར་ཡིན། །བྱིན་རླབས་འཇུག་ན་དེ་ལ་འཇུག །བཀའ་བཀྱོན་དྲག་པོ་དྲག་སྔགས་ཡིན། །བར་ཆད་ཐམས་ཅད་དེ་ཡིས་སེལ། །ཐུགས་ལ་མི་འདོགས་དུས་ཙ་ན། །ཐུགས་རྗེའི་ཞགས་པས་འཛིན་རྟགས་ཡིན། །བྱམས་ན་བྱམས་ཏེ་ལེགས་པ་ཡིན། །སྡང་ན་སྡང་པས་འཚོངས་པ་ཡིན། །གསུངས། གཞན་ཡང་སྔོན་སྟོན་པ་སངས་རྒྱས་ཀྱིས། གཞན་ལ་སྡིག་པའི་རྣམ་སྨིན་ཤིན་ཏུ་ཆེ་ཞིང་། སུ་གང་གིས་བཟློག་ཏུ་མེད་པར་མྱོང་དགོས་པ་སྟོན་པའི་ཆེད་དུ་དགོངས་ནས། འཕགས་སྐྱེས་ཀྱིས་ཤཱཀྱ་བདུན་སྟོང་བསད་དུས། དབུ་སྨྱུང་ཞིང་ཀླད་པ་མི་བདེ་བ་བྱུང་བ་དང་། ཉིན་གཅིག་སེང་ལྡེང་གི་ཚལ་བ་སོར་བཞི་བ་ཞིག་ཞབས་ལ་ཟུག་པ་དང་། བདུད་ཀྱིས་སྒྱོགས་རྡོ་འཕངས་པས་ཞབས་གཡས་པའི་མཐེ་བོང་ལ་ཕོག་པའི་ཁྲག་འོ་མའི་རྒྱུན་ལྟར་བབ་པའི་ཚུལ་བསྟན་པ་དང་། ཡང་ལས་ཀྱི་རྣམ་པར་སྨིན་པ་རང་གིས་

མྱོང་ངེས་རྣམས་གཞན་ལ་བསྒྱུར་དུ་མི་བཏུབ་པ་སྟོན་པའི་ཆེད་དུ། ཀུན་ཏུ་རྒྱུ་གནག་ལྷའི་བུ་སངས་རྒྱས་ཀྱི་སྐུ་མདུན་དུ་བསད་པ་ལ། སངས་རྒྱས་ཀྱིས་མ་བསྐྱབས་པར་བཏང་སྙོམས་སུ་བཞག་པ་དང་། ཡང་ཕྱི་རབས་གང་ཟག་རྣམས་ལ་སྡུག་བསྔལ་བྱུང་ན་ཡིད་མི་སུན་པར་བྱ་བའི་ཆེད་དུ། མུ་སྟེགས་ཀྱི་བྲམ་ཟེ་བྷ་ར་ཛས། སངས་རྒྱས་ལ་རྔན་བགྲངས་ཏེ་སྤྱོ་བ་བྱས་པ་དང་། བྲམ་ཟེའི་བུ་མོ་གྲགས་མས་ཤིང་གི་གཞོང་བུར་བཅུག་ནས་ཁོ་མོའི་ལུས་ནི་དགེ་སྦྱོང་གོའུ་ཏ་མས་སྦྲུམ་པར་བྱས་སོ་ཞེས་སྐུར་བ་བཏབ་པ་དང་། གྲོང་ཁྱེར་བ་ལ་ཅན་དུ་བསོད་སྙོམས་ལ་ཕྱིན་པས། འབྲས་ཟེག་པ་གཅིག་ཀྱང་མ་རྙེད་པར་ལྷུང་བཟེད་སྟོང་པར་ལོག་པ་དང་། མཐའ་འཁོབ་ཀྱི་གྲོང་ཁྱེར་ལ་ཕྱིན་དུས། བསོད་སྙོམས་མ་འབྱོར་བར། ཚོང་པའི་རྟ་ཆས་སྲན་མ་རུལ་བ་བཞེས་དགོས་པའི་ཚུལ་བསྟན་པ་དང་། ཡང་ངལ་ཞིང་དུབ་པའི་མཐའ་སྤང་པའི་ཆེད་དུ་སྐུ་རྒྱབ་སྨྱུང་ནས་སྨན་པའི་རྒྱལ་པོ་འཚོ་བྱེད་ལ། སྨན་ཨུཏྤལ་ཧ་ཏ་གྷ་ན་དྷ་བླངས་པ་དང་། སྐུ་ན་བགྲེས་ཏེ་ལོ་དྲུག་ཅུ་རྩ་གཅིག་ལོན་པ་དང་ངལ་ཉེ་གནས་ཤིག་དགོས་

གསུངས་ནས་ཀུན་དགའ་བོས་རྩིས་རྣམ་པ་བཞི་བཟུང་ནས་ལོ་ཉི་ཤུ་རྩ་གཉིས་སུ་ཉེ་གནས་བྱས་པའི་ཚུལ་བསྟན་ཏོ། །དེ་བཞིན་དུ་རང་གི་བླ་མ་ཡང་སངས་རྒྱས་མི་གཟུགས་སུ་ཤར་པ་ཡིན་གཤིས། བཟང་ངན་གྱི་མཛད་པ་གང་བསྟན་ཀྱང་དེ་གང་གི་ཆེད་དུ་བསྟན་པ་ཡིན་མི་ཤེས་སྙམ་དུ་རབ་ཏུ་དད་ཅིང་གུས་པར་བྱའོ། །དེ་ལྟར་ཅི་མཛད་ལེགས་པར་མཐོང་བའི་དད་གུས་ཆེན་པོ་བྱས་ན་བླ་མའི་བྱིན་རླབས་སེམས་ལ་ཞུགས་ནས་ཉམས་དང་རྟོགས་པའི་ཡོན་ཏན་ཐམས་ཅད་འབད་མེད་ལྷུན་གྲུབ་ཏུ་འཆར་སྟེ། ཇོ་མོ་འུར་མོས། ངས་སྒོམ་ཙམ་མ་བྱས་པ་ལ་རྣམ་རྟོག་རང་བཞིན་པ་མི་སྐྱེ་བར་འདུག་ལགས་ཞུས་པས། རྗེ་བཙུན་གྱི་ཞལ་ནས་བླ་མའི་བྱིན་རླབས་ཞུགས་ན། རྣམ་རྟོག་རང་སར་ཞིན་ས་ཕྱག་རྒྱ་ཆེན་པོ་ངོ་འཕྲོད་པ་ཅི་རིགས་ཡོད་གསུངས། ཡང་རྗེ་མི་ལ་རས་པ་ལྷོ་བྲག་ཏུ་རྗེ་མར་པའི་གཟིམ་ཁང་ལ་ཕྱག་འཚལ་བ་ལ་བྱོན་དུས་ན་སྤྱན་ཆབ་མང་པོ་འབྱིན་པ་ལ། རས་ཆུང་བ་རྣམས་ཀྱིས་མི་བཤུམས་པར་ཞུ་ཞུས་པས། ངས་རྗེ་མར་པ་ཡབ་ཡུམ་གྱི་བཀའ་དྲིན་དྲན་པ་ཡིན་གསུངས། སྔོན་གྲུབ་ཐོབ་གླིང་ཆེན་རས་པ་དེ་ཉིད་སྐབས་ཤིག་ཏུ་

དཔལ་ཕག་མོ་གྲུ་བ་ལ་མོས་གུས་ཚད་མེད་པ་སྐྱེས་ནས་གསོལ་བ་འདེབས་ཤིང་སྤྱན་ཆབ་ཕྱུང་སྟེ་དབུ་གྱང་ལ་བརྡབས་པས། དཔལ་ཕག་མོ་གྲུ་པ་དེ་ཉིད་ཚོགས་པ་མང་དག་ཅིག་ལ་གསུང་ཆོས་གནང་གིན་ཡོད་པ་ལ་སྐུའི་བཞུགས་སྟངས་མི་ཐུབ་པར་འགུལ་བསྐྱོད་མཛད་ཀྱིན་འདུག་པ་ལ། མཛད་པ་དེ་འདྲ་ཅི་ལགས་ཞུས་པས། གླིང་རས་ཁོ་མོས་གུས་སྐྱེས་ནས་མགོ་བོ་གྱང་ལ་རྡེབ་ཅིང་འདུག །ང་ལ་སྡོད་ཚུགས་པའི་དབང་མི་གདའ་མོས་གུས་གཏིང་ནས་སྐྱེས་པའི་སློབ་མ་འདི་འདྲ་ལ་ཟེར་པ་ཡིན་གསུངས། སྔོན་སངས་རྒྱས་བཅོམ་ལྡན་འདས་ཀྱིས་སློབ་པ་ལམ་གྱི་དུས་སུ། སྐྱེ་བ་ཡོད་ན་འཆི་བར་འགྱུར། །འགོག་པ་འདི་ནི་བདེ་བ་ཡིན། །བྱ་བའི་ཚིག་བཅད་ཕྱེད་པ་རེ་ཙམ་མམ། ཚིག་བཅད་རེ་རེ་ཙམ་གྱི་ཕྱིར་དུ་བླ་མའི་བཀའ་དྲིན་བསབ་པའམ། བླ་མ་མཉེས་པར་བྱེད་པ་ལ་གསེར་སྲང་བྱེ་བ་ཕྲག་འབུམ་མམ། རྒྱལ་པོའི་སྲས་དང་བཙུན་མོ་ཡང་ཡོན་དུ་ཕུལ་བ་དང་། སྐུ་ལུས་ལ་མར་མེ་སྟོང་འཛུག་པ་སོགས་སྐུ་སྲོག་ལོངས་སྤྱོད་ཐམས་ཅད་ཕངས་པ་མེད་པར་བཏང་སྣང་། བདག་གིས་དེ་ལྟ་

བུའི་དཀའ་ལས་གང་ཡང་མྱོང་མི་དགོས་པར་ཚེ་གཅིག་ལུས་གཅིག་ལ་སངས་རྒྱས་པའི་ཟབ་རྒྱས་ཆོས་མང་པོ་ཐོབ་རྒྱུ་བྱུང་བ་བླ་མ་ཐུགས་རྗེ་ཅན་གྱི་བཀའ་དྲིན་ཡིན། དྲིན་ལན་མཇལ་དགོས་ཤིག་འབྱུང་རྒྱུ་ཡིན་ན་སྟོང་གསུམ་གསེར་གྱི་ཕྱུར་བུར་བཀང་ནས་ལན་སྟོང་ཕུལ་ཡང་སྐུ་དྲིན་གྱི་ཆ་ཤས་ཙམ་ཡང་ག་ལ་འཁོར་སྙམ་དུ། ལྟོ་གོས་ཆོས་གསུམ་གྱི་སྒོ་ནས་བསྐྱངས་པའི་བཀའ་དྲིན་རྣམས་ཡང་ཡང་དྲན་པར་བྱས་ཏེ། བླ་མ་འདི་བདག་ལ་བཀའ་དྲིན་རེ་ཆེ་སྙམ་དུ་ཕྱག་དང་ཞེ་ས་ལྡང་པ་སོགས་གུས་པ་ཁྱད་པར་ཅན་བྱའོ། །སྦྱོར་བ་ཟང་ཟིང་གི་ནོར་འབུལ་བ། ལུས་ངག་གི་ཞབས་ཏོག་བྱེད་པ། བཀའ་བཞིན་སྒྲུབ་པའི་མཆོད་པ་གསུམ་གྱི་སྒོ་ནས་བསྟེན་ཚུལ་ནི། སྔོན་མཉམ་མེད་ཇོ་བོ་རྗེ་ཡེར་བ་ལྷ་རི་སྙིང་པོའི་མགུལ་ན་བཞུགས་དུས། དགེ་བཤེས་འབྲོམ་གྱིས་གསེར་ཞོ་དགུ་དགུ་ལ་སྲང་རེ་བྱས་པའི་སྲང་བརྒྱ་དང་བཅུ། རྟ་བཅོ་བརྒྱད་ལ་སོགས་པའི་འབུལ་མོ་ཆེ་ཕུལ། རྔོག་ལེགས་པའི་ཤེས་རབ་ཀྱིས་བཀའ་གདམས་པ་ཆོས་བུ་ཆོས་ཞུ་དུས་གསེར་གྱི་མཎྜལ་མདའ་གང་བ་ལ་རིན་པོ་ཆེ་སྣ་ཚོགས་པའི་ཚོམ་བུ་བཀོད་ནས་ཕུལ་བ་

དང་། ལྷོ་བྲག་མར་པ་ལ་གཞུང་གི་རྔོག་སྟོན་ཆོས་རྡོར་གྱིས་སྙན་བརྒྱུད་ཀྱི་གདམས་པ་ཞུ་དུས་ཕྱི་ནང་གི་ནོར་ཡོད་ཚད་དང་། ཐ་ན་ར་མ་རྒན་མོ་རྐང་པ་ཆག་པ་ཡན་ཆད་ཕུལ་བ་ལྟར། ཟང་ཟིང་གི་ནོར་གང་ཡོད་ཕུལ་ནས་བླ་མ་མཉེས་པར་བྱ་དགོས། སྔོན་གྲུབ་ཐོབ་གླིང་རས་པས། སྒོ་གཅིག་མཛད་དེ་ཉིན་ཅིག་མོ་རེང་མ་རྒན་མོ་ཞིག་གི་སྒོར་བྱོན་ནས། ད་ནངས་ང་ལ་གདན་ནོན་གྱིས་གསུངས་པས། དྲང་རྒྱུ་མེད་ཟེར་ཐོན་འགྲོ་གྲབས་བྱེད་ཀྱིན་འདུག་པས། མོའི་ཐུ་བ་ནས་བཟུང་སྟེ། ང་ལ་རྩམ་པ་དྲང་རྒྱུ་མེད་ན་ལོ་མ་སྦང་མ་གང་འདུག་བླང་གསུངས། མོ་ནང་དུ་ལོག་སོང་བས། ཕྱེ་སྒྱེ་སྤྲུགས་ཏེ་སྲན་རྩམ་ཕྱེ་སྐྱོགས་སུ་ཧབ་གཉིས་ཙམ་ཡོད་པ་ཁྱེར་བྱུང་བ། ཀ་པཱ་ལར་བླུགས་ནས་བཞེངས་བྱོན་པས། ལམ་ལ་སྒོག་ཆག་གཅིག་ཚར་འདུག་པ་བསྡུས་ཡོང་ནས་ཆུ་ཁར་བྱོན། སྒོག་ཆག་དེ་བརྡུང་། སྲན་རྩམ་དེ་ལ་བསྲེས་ཆུ་བླུག་སྦྲུས་ཏེ་བཅང་བ་ཆེན་པོ་གཅིག་བྱུང་བ་ལ་སྐྱུ་བྱས་སྒོག་ཆུ་དེ་བླུག་ནས་ཞལ་དུ་གསོལ་བས། བདའ་དྲགས་ཏེ་སྲེད་པ་ཅིག་སྐྱེས་པ་ལ་ཁ་ནང་ནས་བཏོན་ཏེ། དཔལ་ཕག་མོ་གྲུ་

བ་མཆོད་ཅེས། ནམ་མཁར་དོར་བཏང་ནས་གད་ཕུག་ཅིག་ཏུ་ཐུགས་དམ་ལ་བཞུགས་སོ། །དེའི་དུས་ཚོད་ན་དཔལ་ཕག་མོ་གྲུབ་ཉེ་གནས་སྟག་ལུང་པའི་ཕྱག་ཕྱི་བྱས་ཏེ། ཞོག་ཇ་བཞེས་པའི་གསོལ་དཀར་གྱི་ནང་དུ་སླེབས་བྱུང་བ་ལ། འགྲོ་བའི་མགོན་པོའི་ཞལ་ནས། ད་ནང་གི་གླིང་རས་ཀྱི་སྒོག་ཆུ་དེ་ཞིམ་གསུངས་པ་ལ། སྟག་ལུང་བས་རྒྱུ་མཚན་ཞུས་པས། ཁོ་བོད་ནང་གི་ལྟོ་བ་ལ་སྒོག་ཆབ་ཅིག་གིས་ཕུལ་ནས་ཟ་ཀྱིན་འདུག་པ་སྲེད་པ་སྐྱེས་ནས། དཔལ་ཕག་མོ་གྲུབ་མཆོད་ཟེར་ནས་འདིར་སྟེར་བྱུང་པ་ཡིན་གསུངས། དེས་ན་ཟས་ཁམ་གཅིག་རྙེད་ཀྱང་བླ་མ་མཆོད་དགོས། སྔོན་སངས་རྒྱས་བཅོམ་ལྡན་འདས་བུ་མོ་ཡེ་ཤེས་ལྡན་ཞེས་བྱ་བར་གྱུར་ཚེ། ཆོས་སྨྲ་བ་ཞིག་སྨྱུང་བ་ལ། སྨན་པས་དེའི་སྨན་ལ། མི་གསོན་པོའི་ཤ་དང་ཁྲག་དགོས། ཟེར་བ་ལ། བུ་མོ་དེས་རང་གི་ལུས་ཀྱི་ཤ་ཁྲག་ཕུལ་པའི་ལོ་རྒྱུས་བཞིན། བླ་མ་ལ་ཕན་ན་རང་གི་ལུས་ཀྱི་ཤ་ཁྲག་འབུལ་དགོས་རུང་མི་ཆགས་པར་དགའ་ཞིང་སྤྲོ་བཞིན་འབུལ་ཐུབ་པ་ཞིག་དགོས། སྔོན་རྗེ་བཙུན་མི་ལ་རས་པས། ལྷོ་བྲག་མར་བ་མཉེས་ཕྱིར། སྲས་མཁར་དགུ་ཐོག་

ཁྱམས་དང་བཅས་པ་བརྩིགས་རྒྱབ་ཏུ་རྒལ་མིག་གསུམ་ཙམ་བྱུང་བ་ལྟར། ལུས་ངག་གི་སྒོ་ནས་བླ་མ་ལ་ཞབས་ཏོག་གང་དགོས་བྱེད་དགོས། རྣལ་འབྱོར་པ་ཕྱག་པ་ཁྲི་མཆོག་གིས་ཇོ་བོ་རྗེའི་བཀའ་བཞིན་རྭ་སྒྲེང་གི་ཤུག་གསེབས་ན་རི་དྭགས་རྣམས་དང་ཁྱད་པར་མེད་པར་བཞུགས་ནས་སྐུ་ཚེ་གང་པོ་སྒྲུབ་པ་མཛད་པས་གྲུབ་པ་ཐོབ་པ་ལྟར། དབེན་པའི་གནས་སུ་བསྡད་ནས་བཀའ་བཞིན་སྒྲུབ་པའི་མཆོད་པ་ཕུལ་ནས་བླ་མ་མཉེས་པར་བྱེད་དགོས། དེ་ལྟར་བསམ་སྦྱོར་གཉིས་ཀྱི་སྒོ་ནས་བླ་མ་ཚུལ་བཞིན་དུ་བསྟེན་ན་དོན་ཐམས་ཅད་འགྲུབ་སྟེ། སྔོན་བྱང་ཆུབ་སེམས་དཔའ་རྟག་ཏུ་ངུས་ཤ་དང་ཁྲག་དང་རུས་པ་དང་། རྐང་སོགས་ཀྱི་ལུས་དང་སྲོག་བཏང་སྟེ། བྱང་ཆུབ་སེམས་དཔའ་ཆོས་འཕགས་ལ་བསྙེན་བཀུར་བྱས་པས་ཚེ་དེ་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ་དང་། ན་རོ་པཎ་ཆེན་གྱིས་ཀྱང་གྲུབ་ཆེན་ཏེ་ལོ་པ་བསྟེན་དུས་ལུས་སྲོག་ཐོད་ལ་བོར་ནས་དཀའ་བ་དཔག་ཏུ་མེད་པ་བྱ་དཀའ་བ་རྣམས་སྤྱད་པས་བཞེད་དོན་གྲུབ་པ་དང་། མར་པ་ལོ་ཙཱས་བླ་མ་ན་རོ་བ་ཆེན་པོ་སྐུ་གཤེགས་ཟིན་

ཀྱང་དད་པའི་ཤུགས་ཆེན་པོས་བཙལ་བས་བླ་མ་དང་མཇལ་བའི་ལོ་རྒྱུས་དང་། རྗེ་བཙུན་མི་ལས་ལྷོ་བྲག་མར་པ་ཡབ་ཡུམ་ལ་བསྙེན་བཀུར་བྱས་པས་དོན་ཐམས་ཅད་གྲུབ་པ་དང་། བྱ་ཡུལ་པས་སྤྱན་སྔ་བ་ཚུལ་བཞིན་དུ་བསྟེན་པས། ནངས་མ་གཅིག་ལ་སྡེ་སྣོད་གསུམ་དང་། རྒྱུད་སྡེ་བཞིའི་ཚིག་དོན་མ་ལུས་པ་ཐུགས་ལ་འཁྲུངས་པ་དང་། དཔལ་ལྡན་འབྲས་སྤུངས་ཀྱི་འབྲས་ཀྱི་ཆར་འབེབས་ནུས་པས་བླ་མའི་བཀའ་བཞིན་བསྒྲུབས་པའི་ཉེ་གནས་ལོ་བཅུ་གཉིས་ཀྱི་སྔོན་དུ་སངས་རྒྱས་པ་དང་། བལ་པོའི་དཔེ་དཀར་བྷེ་ཧ་རར། བླ་མ་གྲུབ་པ་ཐོབ་པའི་ཉིན་པར་ཉིད་ཀྱི་སྔོན་དུ་ཉེ་གནས་ལོ་བཅུ་གཅིག་གི་གོང་དུ་གྲུབ་པ་ཐོབ་པ་དང་། ཇོ་བོ་རྗེའི་ཉེ་གནས་དགོན་པ་གོང་མ་སྒྲུབ་པ་བྱས་པའི་སློབ་མ་གཞན་བས་ཁང་གིས་བླ་མའི་ཞབས་ཏོག་འབའ་ཞིག་བྱས་པས་རྟོག་པ་བཟང་བར་གྱུར་པ་དང་། ཆོས་རྗེ་ས་སྐྱ་བ་ཆེན་པོའི་སློབ་མ་དགེ་བཤེས་གཙུག་ཏོར་རྒྱལ་པོ་འདས་པའི་ཚེ། རིན་པོ་ཆེའི་ཁྲི་དང་གདུགས་དང་མེ་ཏོག་གི་ཆར་བབ་ནས་མཁའ་སྤྱོད་དུ་གཤེགས་པ་ཡུལ་བ་ཐམས་ཅད་ཀྱིས་མཐོང་བ་དང་། དགེ་བའི་བཤེས་གཉེན་ཉི་མ་

འོད་ལ་རྫུ་འཕྲུལ་དང་མངོན་ཤེས་བྱུང་བ་སོགས་གཏམ་རྒྱུད་དེ་རྣམས་དྲན་པར་བྱས་ཏེ་དགའ་ཞིང་སྤྲོ་བཞིན་དུ་བླ་མའི་ཞབས་ཏོག་བྱེད་དགོས། སྔོན་ཇོ་བོ་རྗེ་གཤེགས་ཁར་སློབ་མ་རྣམས་ཚོགས་ནས་བླ་མ་མི་བཞུགས་པ་ལ་ཉེ་བར་སྣང་། བླ་མའི་སྲོལ་འཛིན་པ་སུ་ཡོད་ཅེས་གླེང་བའི་དུས་སུ་ནག་ཚོའི་ཞལ་ནས། ངས་ཏ་མི་ཤེས་ཏེ་ཆོས་ཐམས་ཅད་ཀྱི་ནང་ནས་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་བརྟེན་ནས་སྐྱེ་བར་བཤད་འདུག་པས་བླ་མའི་ཞབས་ཏོག་འབྲོམ་སྟོན་པ་འདྲ་བ་རེ་སུས་ཀྱང་མ་གྲུབ། ཇོ་བོའི་སྲོལ་འཛིན་པ་ཞིག་འོང་ན་ཁོང་ལ་འོང་མཆི་གསུངས། ཡང་ཇོ་བོའི་སློབ་མ་རྣལ་འབྱོར་པའི་ཐུགས་དགོངས་ལ། ང་བསོད་ནམས་ཆུང་བས་བླ་མའི་ཞབས་ཏོག་བྱས་བྱས་ནས་སྒོམ་པའི་དུས་མ་བྱུང་སྙམ་པའི་འདུ་ཤེས་ཤིག་བྱུང་བ་ན། ཇོ་བོའི་ཞལ་ནས་ལུས་ངག་ཡིད་གསུམ་བླ་མའི་ཞབས་ཏོག་ཏུ་བཀོལ་ན་སྒོམ་གྱི་དམིགས་པ་གཞན་ནས་བཙལ་མི་དགོས་གསུང་སྟེ་ཇོ་བོའི་མངོན་པར་མཁྱེན་པའི་ཞལ་ཏ་ཡིན་པར་གདའ། ཡང་རྣལ་འབྱོར་ཆེན་པོས་ཇོ་བོའི་ཞབས་ཏོག་མཛད་པ་ལ་ཁོང་ཀུན་

གྱིས་སྒྲུབ་ཐབས་ཤིག་མ་ཞུས་པར་རྟ་ཕྱུགས་ཀྱི་ཉ་ར་བྱེད་ཅིང་བསྡད་པས་ཅི་ཡང་མི་འོང་སྙམས་ནས་རྩྭ་གཏུབ་ཅིང་ཡོད་ཙ་ན། སྟོན་པའི་ཚེམས་དང་ཞལ་ནེམས་ནེམས་མཛད་ཅིང་བཀྱོན་ཐབས་སུ་ཡོན་ཏན་ཐམས་ཅད་བླ་མའི་ཞབས་ཏོག་བྱས་པ་ལས་འབྱུང་བ་ཡིན་ཏེ། སྒྲུབ་ཐབས་རེ་རེ་ཞུས་པས་ཅི་ཡང་མི་འོང་ཨང་བྱ་བ་ལན་གསུམ་གསུངས། དགེ་བཤེས་དགོན་པ་པའི་ཞལ་ནས། སློབ་དཔོན་སྟོན་པས་ལོ་ཙཱ་བྱས། སློབ་དཔོན་རྣལ་འབྱོར་པས་བླ་མའི་གཡོག་བྱས། ངས་དབེན་པར་རྩེ་གཅིག་ཏུ་སྒོམ་བྱས་པ་ལ་རྟོག་པ་ཁོང་གཉིས་པོ་མཐོ་བར་འདུག་གསུངས། གྲུབ་ཐོབ་གླིང་ཆེན་རས་པས། ང་ལ་དུས་དེང་སང་ཇ་ཞིམ་པོ་རྒྱུན་མ་ཆད་པར་འཐུང་རྒྱུ་བྱུང་བ་འདི་སྔ་མོ་རྗེ་ཕག་མོ་གྲུ་བར་བཀའ་ཆོས་ཞུ་དུས་ཞིག་ལ་ཇ་ཁོག་མ་གང་ཕུལ་པ་ཡིན་ཏེ། དེའི་བསོད་ནམས་ཡིན་ནམ་སྙམ་གསུངས། དེས་ན་སྐལ་ལྡན་གྱི་སློབ་མ་རྣམས་ཀྱིས་དབེན་པར་བསྒོམས་པ་ལས་ཀྱང་མཚན་ལྡན་རྩ་བའི་བླ་མའི་ཞབས་ཏོག་བྱས་ན་ཉམས་རྟོགས་བཟང་པོ་དང་བསོད་ནམས་ཆེན་པོ་སྐྱེ་བས། དུས་དང་རྣམ་པ་ཐམས་ཅད་དུ་བླ་མའི་ཞབས་ཏོག་ཁོ་ན་ལ་

བརྩོན་པར་བྱའོ། །སྔོན་རྗེ་བཙུན་གྲགས་པ་རྒྱལ་མཚན་གྱི་དྲུང་དུ། སློབ་མ་གཅིག་གིས། བླ་མའི་གསུང་བཞིན་ཚེ་འདིའི་འཁྲི་བ་བཅད། ཆུ་བུག་སྒོ་ལ་འདྲིལ་བ་བྱས་ནས་རྩེ་གཅིག་ཏུ་བསྒོམས་པས་བླ་མ་སངས་རྒྱས་སུ་མཐོང་བ་སོགས་ཀྱི་ཡོན་ཏན་མང་རབ་བྱུང་ལགས་པ་བཀའ་དྲིན་ཆེ། ད་འདི་བཞིན་བྱས་ནས་བསྡད་ན་དགའ་འམ། མཚམས་བཏོན་ནས་སྐུ་མདུན་དུ་འོང་ན་དགའ་ཞུས་པས། རྗེ་བཙུན་གྱི་ཞལ་ནས་ང་འཕྲད་དུ་འོང་མི་དགོས། བླ་མའི་རྣལ་འབྱོར་སྒོམ་པ་དང་མ་བྲལ་ན་ཚེ་རབས་ཐམས་ཅད་དུ་བླ་མ་དང་མི་འབྲལ་བ་ཡིན་གསུངས། དེས་ན་བླ་མ་དང་འབྲལ་བ་མེད་པར་འདོད་པས་དུས་རྟག་ཏུ་བླ་མའི་རྣལ་འབྱོར་བསྒོམ་པ་ལ་འབད་དགོས། ཡང་ཆོས་རྗེ་རྒོད་ཚང་པས་ཉམས་ལེན་མཐིལ་བླ་མའི་གསོལ་འདེབས་ལ་མཛད་པ་ལ། དགེ་སློང་སངས་རྒྱས་འོད་ཀྱིས། གསོལ་འདེབས་ཀྱི་ཕན་ཡོན་ཞུས་པ་ལ་འདི་ལྟར་གསུང་སྟེ། གསོལ་བ་བཏབ་པའི་ཕན་ཡོན་ནི། །སྤྱིར་ནི་བསམ་གྱིས་མི་ཁྱབ་ལགས། །མདོ་ཙམ་བསྡུ་ན་འདི་ཚོ་ཡིན། །གསོལ་བ་བཏབ་པའི་ཕན་ཡོན་ནི། །རྗེ་དང་

ཐུགས་ཡིད་གཅིག་ཏུ་འདྲེ། །གསོལ་བ་བཏབ་པའི་ཕན་ཡོན་ནི། །ཐུན་མོང་མ་ཡིན་རྟོག་པ་འཆར། །གསོལ་བ་བཏབ་པའི་ཕན་ཡོན་ནི། །རྒྱུན་ཆད་མེད་པའི་ཉམས་མྱོང་ཡོང་། །གསོལ་བ་བཏབ་པའི་ཕན་ཡོན་ནི། །དཀོན་མཆོག་ཐུགས་རྗེས་རྟག་ཏུ་སྐྱོབ། །གསོལ་བ་བཏབ་པའི་ཕན་ཡོན་ནི། །ཅི་བསམ་དགོས་འདོད་ལྷུན་གྱིས་འགྲུབ། །གསོལ་བ་བཏབ་པའི་ཕན་ཡོན་ནི། །མཁའ་འགྲོ་ཆོས་སྐྱོང་བུ་བཞིན་གཟིགས། །གསུངས། དགེ་བཤེས་སྟོན་པའི་ཞལ་ནས། ངས་ནི་ཡི་དམ་ལྷ་ལ་གསོལ་བ་བཏབ་པ་ལས། ཨ་ཏི་ཤ་ལ་གསོལ་བ་བཏབ་པ་བྱིན་རླབས་ཆེ་བར་ཉམས་མྱོང་ཡོད་གསུངས། རོང་ཆུང་རས་པས། རྗེ་བཙུན་ལག་བསྒོམ་པ་དང་བླ་མ་ལ་གསོལ་བ་བཏབ་པ་ཕན་ཐོག་གང་ཆེ་ལགས་ཞུས་པས། རྗེ་མི་ལའི་ཞལ་ནས། བླ་མ་མཚན་ལྡན་ཞིག་ལ་སློབ་མ་གུས་ལྡན་ཞིག་གིས་གསོལ་བ་བཏབ་ན་སྒོམ་ཞོར་ལ་འོང་གསུངས། དེས་ན་དུས་རྒྱུན་དུ་བླ་མ་ལ་གསོལ་བ་འདེབས་པ་གལ་ཆེ། གཞན་ཡང་བླ་མ་ལན་རེ་ཙམ་དྲན་པའི་ཕན་ཡོན་ནི། ཡེ་ཤེས་གསལ་བ་སྒྲོན་མེའི་རྒྱུད་ལས། གང་གིས་བསྐལ་པ་བརྒྱད་ཁྲི་

བཞི་སྟོང་གི་བར་དུ་སྦྱིན་པ་བཏང་། ཚུལ་ཁྲིམས་བསྲུངས། བཟོད་པ་བསྒོམས། བརྩོན་འགྲུས་བརྩམས། བསམ་གཏན་ལ་མཉམ་པར་བཞག །ཤེས་རབ་བསྐྱེད་པ་ལས། ལྷའི་སྐུ་མཚན་དང་དཔེ་བྱད་ཀྱིས་བརྒྱན་བ་སྐད་ཅིག་དྲན་པ་བསོད་ནམས་ཆེ། དེ་བསྐལ་པ་བརྒྱད་ཁྲི་བཞི་སྟོང་གི་བར་དུ་བསྒོམས་པ་བས་བླ་མ་སྐད་ཅིག་དྲན་པ་བསོད་ནམས་ཆེའོ། །དེ་ཅིའི་ཕྱིར་ཞེ་ན། ཚེ་འདི་ཉིད་དུ་སངས་རྒྱས་པའི་ཕྱིར་རོ། །ཞེས་དང་། ཀུན་འདུས་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམས་པ་པས། །བླ་མ་དྲན་པ་བསོད་ནམས་མཆོག །བསོད་ནམས་འདི་ནི་ཕ་མཐའ་ཡས། །གསུངས། ཀྲི་ཡ་དཔུང་བཟང་གི་རྒྱུད་ལས། སྐྱེས་བུ་གང་ཞིག་འཆི་བའི་ཚེ། །བླ་མ་སྐད་ཅིག་དྲན་གྱུར་ན། །འཕོ་བ་ཀུན་གྱི་མཆོག་ཏུ་འགྱུར། །སྐྱེས་བུ་དེ་ནི་མངོན་སངས་རྒྱས། །གསུངས། བླ་མ་མཐོང་བའི་ཕན་ཡོན་ནི། སྡོང་པོ་བཀོད་པ་ལས། དགེ་བའི་བཤེས་གཉེན་མཐོང་བ་ནི། ཡོན་ཏན་རིན་ཆེན་ཐམས་ཅད་ཀྱི་འབྱུང་གནས་སོ། །བྱང་ཆུབ་སེམས་དཔའི་སྐྱོད་པ་ཐམས་ཅད་

ཡོངས་སུ་ནག་ཅིང་ཡོངས་སུ་རྫོགས་པའི་རྒྱུའོ། །དྲན་པ་རྣམ་པར་དག་པ་བྱེད་པའོ། །གཟུངས་ཀྱི་དཀྱིལ་འཁོར་ལ་སྦྱོར་བའོ། །ཏིང་ངེ་འཛིན་གྱི་སྣང་བ་སྐྱེད་པའོ། །སངས་རྒྱས་མཐོང་བ་སྒྲུབ་པའོ། །སངས་རྒྱས་ཀྱི་ཆོས་ཀྱི་སྤྲིན་གྱི་ཆར་འབབ་པའོ། །ཞེས་དང་། གྲོ་ལུང་པའི་བསྟན་རིམ་ལས། དེ་མཐོང་བས་ཀྱང་ཡོན་ཏན་རིན་ཆེན་ཚོགས། །ཀུན་འབྱུང་རྒྱལ་སྲས་སྤྱོད་པ་རྫོགས་པའི་རྒྱུ། །དྲན་དང་ཏིང་འཛིན་གཟུངས་སོགས་འགྲུབ་པ་སྟེ། །སངས་རྒྱས་མཐོང་ཞིང་དོན་ཆེན་ཀུན་རྫོགས་འགྱུར། །གསུངས། །ཕ་དམ་པའི་ཞལ་ནས། ཡི་དམ་གྱི་ལྷ་བརྒྱའི་ཞལ་མཇལ་བ་ལས། བླ་མའི་ཞལ་རས་ལན་ཅིག་མཇལ་བ་ཕན་ཡོན་ཆེ་སྟེ་བོད་བླུན་པོ་ཚོས་མགོ །འགྲང་བའི་མི་ལ་མར་ཟན་བརྒྱ་བྱིན་པ་ལས། ལྟོགས་པའི་མི་ལ་ཟན་ཆང་གཅིག་བྱིན་པ་བསོད་ནམས་ཆེ་སྟེ་བོད་བླུན་པོ་ཚོས་མི་གོ་གསུངས་སྐད། དེས་ན་དུས་རྟག་ཏུ་བླ་མ་ཡིད་ལ་ཡང་ཡང་དྲན་ཞིང་ཞལ་མཇལ་ཕྱག་དབང་ཞུ་བ་ལ་ཡང་བརྩོན་པར་བྱའོ། །ཡང་སྐུ་བཞེངས་པ་དང་མཆོད་ཅིང་བསྟོད་པའི་ཕན་ཡོན་ནི། ཨ་ཏི་བཀོད་པའི་རྒྱུད་ལས། འཇིག་རྟེན་

ཁམས་ནི་ཐམས་ཅད་ཀྱི། །གསེར་དངུལ་ལ་སོགས་རྒྱུ་ལས་ནི། །སངས་རྒྱས་དཔག་ཏུ་མེད་པ་ཡི། །སྐུ་གཟུགས་གྲངས་མེད་བྱས་པ་བས། །བླ་མའི་སྐུ་འབག་སུས་བྲིས་པ། །འདི་ནི་བསོད་ནམས་ཁྱད་པར་འཕགས། །བརྒྱ་སྟོང་ཁྲི་འབུམ་ཆར་མི་ཕོད། །གང་གིས་བླ་མའི་སྐུ་འབག་ལ། །མཆོད་ཅིང་བསྟོད་པ་སུས་བྱས་པ། །རྡོ་རྗེ་འཆང་ལ་བསྐལ་པ་བརྒྱར། །མཆོད་ཅིང་བསྟོད་པའི་བསོད་ནམས་ཆེ། །འབུམ་ཕྲག་སུམ་ཅུ་རྩ་ལྔ་ཡང་། །ཕོད་ཅིང་མཉམ་པ་མ་ཡིན་ནོ། །གསུངས། འདས་མཆོད་བྱས་པའི་ཕན་ཡོན་ནི། བླ་མའི་ཡོན་ཏན་ཡོངས་སུ་བཟུང་བའི་རྒྱུད་ལས། བླ་མ་འདས་ནས་གདུངས་པས་མཆོད་བྱས་ན། །དགེ་བའི་རྣམ་སྨིན་བླ་མའི་རྗེས་འབྲངས་ཏེ། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང་། །སློབ་མས་བླ་མའི་རྣམ་ཐར་སྙོགས་པར་འགྱུར། །ཞེས་དང་། ཨ་ཏི་བཀོད་པའི་རྒྱུད་ལས། འདས་པའི་ལོ་ཟླ་ཚེས་གྲངས་ལ། །མ་ནོར་བ་ནི་བརྩིས་བྱས་ནས། །མཆོད་པའི་རྣམ་པ་སུས་བྱས་པ། །ཚོགས་གཉིས་རབ་ཏུ་རྫོགས་པ་དང་། །ཚེ་འདིར་ལོངས་སྤྱོད་

འཕེལ་བར་འགྱུར། །ཞེས་དང་། ཤ་ར་བའི་ཞལ་ནས། འདུས་བྱས་ཀྱི་དགེ་བ་ལ། དགེ་བའི་བཤེས་གཉེན་ལ་འདས་མཆོད་བྱས་པ་བསོད་ནམས་ཆེ་གསུངས། དེས་ན་བླ་མའི་སྐུ་བཞེངས་པ་དང་། སྐུ་གཟུགས་ལ་མཆོད་ཅིང་བསྟོད་པ་དང་། ཞིང་བ་རྗེས་དུས་འདས་མཆོད་ཀྱང་ཕུན་སུམ་ཚོགས་པ་བྱའོ། །ཡང་བླ་མ་བསྟེན་ཚུལ་ཅུང་ཟད་རེ་ལོག་ན་ཡང་དོན་མི་འགྲུབ་སྟེ། ཌོཾ་བྷི་ཧེ་རུ་ཀས་དང་པོ་ཕྱུགས་རྫི་བྱེད་པའི་དུས་སུ། ནཱ་རོ་བ་ཆེན་པོ་ལ་དད་ནས་ཡང་ཡང་མཇལ་བས། ནཱ་རོ་བའི་ཞལ་ནས། ཁྱོད་ང་ལ་དད་དམ་གསུངས། དད་ལགས་ཞུས་པས། འོ་ན་ཆང་ཞིག་ཁྱེར་ལ་ཤོག་གསུངས། ཕྱིན་པས་དེའི་ནུབ་འཁོར་ལོ་བདེ་མཆོག་གི་དབང་བསྐུར་བས། དབང་ཐོབ་པ་དང་གྲུབ་པ་ཐོབ་པ་མཉམ་དུ་བྱུང་། དེའི་ཚེ་བྲམ་ཟེ་ཞིག་ཌོཾ་བྷི་པ་ལ་དད་ནས་ཆོས་ཞུ་ཟེར་བ་ལ། བླ་མ་ཌོཾ་བྷི་པའི་ཞལ་ནས། བྲམ་ཟེ་ལ་ང་རྣལ་འབྱོར་པའི་ཕྱིའི་ཀུན་སྤྱོད་ལ་མ་དད་ཡོན་ཏན་འགྲིབ་པ་ཡིན་ནོ་གསུངས། བྲམ་ཟེས་ཌོཾ་བྷི་པ་ལ་བརྟེན་ནས་རྫུ་འཕྲུལ་དང་མངོན་ཤེས་ཐོབ་ཅིང་། བླ་མ་ལ་བསྙེན་བཀུར་ཚུལ་བཞིན་དུ་བྱེད་པའི་ཚེ། བླ་མས་ཆང་

གསོལ་བའི་ཞལ་སྐྱུགས་ཅུང་ཟད་བྲམ་ཟེའི་མགོ་ལ་ཕོག་པ་བྲམ་ཟེ་གཞན་ཞིག་གིས་མཐོང་བ་དེ་ན་རེ། དེ་འདྲ་ཁྱོད་ཀྱི་བླ་མ་ཡིན་ནམ་ཟེར་བ་ལ། ཁོས་ངའི་བླ་མ་མིན་བྱས་པས། ཁོའི་རྒྱུད་ཀྱི་མངོན་ཤེས་དང་རྫུ་འཕྲུལ་ཐམས་ཅད་དུང་གི་རྡུལ་ཕྱིས་པ་བཞིན་དུ་སོང་ངོ་། །ཡང་སྣར་ཐང་པའི་ལམ་མཆོག་འགྲེལ་བ་ལས། བླ་མ་རིགས་ངན་གྱི་ཁྲིའི་དྲུང་ན་སློབ་མ་རྒྱལ་པོ་ཡོད་པའི་མགོ་ཐོག་ཏུ་བླ་མའི་སྐྱུག་པ་བྱུང་བ་ལ་བྱིན་རླབས་བྱུང་སྙམ་པའི་དད་གུས་ཀྱིས་རྐང་མགྱོགས་ཀྱི་དངོས་གྲུབ་ཐོབ་ཅིང་། དེ་ནས་མི་མང་པོས་བསྐོར་བའི་ཚེ། བླ་མ་བྱོན་པ་ལ་ཡིད་ཀྱིས་དད་གུས་བྱས། དངོས་སུ་མིས་འཕྱས་དོགས་ནས་ཕྱག་མ་བྱས་པས་དངོས་གྲུབ་ཡལ་སྐད། སྔོན་སློབ་དཔོན་འཇམ་དཔལ་བཤེས་གཉེན་གྱིས་དཀྱིལ་འཁོར་མངོན་སུམ་དུ་བསྟན་ནས་སངས་རྒྱས་ཡེ་ཤེས་ཞབས་ལ་ཁྱོད་ཐོག་མར་ལྷ་འམ་ང་ལ་ཕྱག་བྱེད་གསུངས་པས། ད་ལམ་ལྷ་གལ་ཆེ་སྙམ་ནས་ཕྱག་མཛད་པས་ལྷ་མེད་སོང་། གཟོད་བླ་མ་རང་ལ་ཕྱག་བྱས་པས་དངོས་གྲུབ་ཐོབ་པར་ཞེས་གསུངས། དེས་ན་རང་རེ་ལ་དུས་གསུམ་སངས་རྒྱས་རྣམས་ལས་

ཀྱང་བླ་མ་དགེ་བའི་བཤེས་གཉེན་རྣམས་བཀའ་དྲིན་དང་བྱིན་རླབས་ཆེ་བ་ཡིན་པས། བླ་མ་བཞེངས་ཤིང་ཕེབས་པའི་དུས་ཕྱག་དང་ལྡང་བ་ཙམ་ཡང་མ་བྱས་པར་བསྡད་ན་ཡང་ཉེས་དམིགས་ཆེ་བས་དུས་རྟག་ཏུ་བླ་མ་ཕྱག་མཆོད་ཞིང་གི་མཆོག་ཏུ་གོ་ནས་ཕྱག་འཚལ་ཞིང་བསྐོར་བ་བྱེད་པ་དང་། མཆོད་བསྟོད་བཀུར་བ་ལ་འབད་པར་བྱའོ། །སྔོན་སངས་རྒྱས་ཡེ་ཤེས་ཀྱིས་འཁོར་ལྔ་བརྒྱ་ཙམ་ལ་ཆོས་འཆད་པའི་ཚེ། འཇམ་དཔལ་བཤེས་གཉེན་ཐག་རིང་པོ་ནས་བྱོན་པ་མ་གཟིགས་པ་ལྟར་སྤྱན་བྱོལ་པས་སྤྱན་གཉིས་ས་ལ་ལྷུང་། གསོལ་བ་བཏབ་པས་ཡེ་ཤེས་ཀྱི་སྤྱན་གནང་སྐད། སྔོན་གླིང་རས་པས་ཕྱག་རྒྱ་མ་བསྟེན་པ་ལ། བླ་མ་ཁྱུང་ཚང་པ་མ་མཉེས་པར་བཀའ་བཀྱོན་འགའ་ཡར་གནང་བར་ལན་ཅིག་མ་དད་པ་ཞིག་བྱུང་། རྒྱུ་དེ་ལ་བརྟེན་ནས་ད་ལྟ་མི་ཁ་ཅུང་ཟད་རེ་ཟེར་བ་ཡང་དེས་ལན་སྙམ་གསུངས། ཡང་སྔོན་སློབ་དཔོན་ནག་པོ་སྤྱོད་པ་དང་། པཎྚི་ཏ་རྒྱལ་བའི་ལྷས་བླ་མའི་བཀའ་བཅག་ནས་སྤྱོད་པ་ལ་བྱོན་ནས། གཉིས་ཀ་ལ་ཁྲག་ཐུར་དུ་ཟགས་ཏེ་གྲོངས་པའི་ཚུལ་བསྟན། དེས་ན་བླ་མ་ལ་མ་དད་པ་ཅུང་ཟད་རེ་དང་། བཀའ་

ལན་རེ་ཙམ་བཅག་ན་ཡང་ཉེས་དམིགས་ཆེ་བས། དུས་ཀུན་དད་ཅིང་གུས་པའི་སྒོ་ནས་བླ་མའི་བཀའ་བཞིན་སྒྲུབ་པ་གཅེས་སོ། །སྔོན་འཕན་ཡུལ་ནང་ན། ཇོ་གདན་པ་ཞིག་གིས་མི་བསད་པས་ཚོགས་གྲལ་ནས་ཕུད་པས། དེ་ཕུར་མདོ་ན་ཆུང་མ་ཞིག་དང་འབྲེལ་ཡོད་པ་ལ། ལན་ཅིག་སྤྱན་སྔ་ཚུལ་ཁྲིམས་འབར་དང་མཇལ་བས་སྤྱན་སྔ་བས་ལས་རྒྱུ་འབྲས་གསུངས་ནས། མདོ་འགག་བླ་མ་དམ་པ་ཞིག་བསྟེན་དགོས་ཚུལ་ཞིབ་པར་གསུངས་པས། ཇོ་གདན་གྱི་བསམ་པ་ལ་བླ་མ་འདི་ཚོ་མི་མགོ་བསྐོར་བའི་རྫུན་ལབ་པ་ལ་ནི་མཁས་པར་གདའ། འོན་ཀྱང་རྭ་སྒྲེང་དུ་འབྲོམ་གྱི་སྐུ་མདུན་དུ་ཕྱིན་པ་ཞིག་བྱས་ནས་དད་པ་ཞིག་སྐྱེ་ཨེ་ཐུབ་བསམས་ནས་ཕྱིན་པས། འབྲོམ་འདས་པ་དང་ཐུག །དེ་ནས་དགེ་བཤེས་དགོན་པ་བ་དང་མཇལ་བས། དགེ་བཤེས་དགོན་པ་བས་ཆོས་གསུངས་པ་ཐམས་ཅད་ལ་ཁོ་ཡིད་མ་ཆེས་ཏེ། ལན་ཅིག་ཚོགས་གཅིག་ན། འདི་འོག་སྟོང་ཕྲག་ཉི་ཤུ་ན། །མནར་མེད་དཔའ་བོ་དེ་ཙམ་མོ། །གསུངས་པས། དེར་ཇོ་གདན་ཡིད་མ་ཆེས་ཏེ། འདི་འོག་དཔག་ཚད་སྟོང་ཕྲག་ཉི་ཤུ་ན་

མི་སུས་ཕྱིན་ནས་མནར་མེད་པ་ཡོད་པ་མཐོང་བ་ལགས་ཞུས་པས། དགེ་བཤེས་དགོན་པ་བ་རེ་ཤིག་སྤྱན་ཆབ་ཀྱིས་བ་རྣངས་ནས་ལན་མ་ཐེབ་པས། དགེ་བཤེས་ཀར་སྡེ་དེ་ཐམས་ཅད་མཁྱེན་པས་གསུངས་པ་ཡིད་ཆེས་ཀྱི་གནས་སུ་བཟུང་དགོས་པ་མ་གཏོགས། དེ་ན་ཕྱིན་མཁན་གྱིས་བཤད་པ་ལ་ཡིད་བརྟན་བྱས་པ་མིན་བྱས་པས། ཇོ་གདན་དེས། དེས་ན་ཐམས་ཅད་མཁྱེན་པ་ཡང་། ཐམས་ཅད་མཁྱེན་པ་ཡིན་ཞེས་མནའ་ཨེ་ཐོན་ཟེར་ནས་ལང་སོང་། ཕྱིས་ཇོ་གདན་དེ་ལ། རྒྱལ་གསེར་ཁང་པའི་བན་དེ་ཞིག་གིས། ཁྱོད་དགེ་བཤེས་དགོན་པ་བ་ལ་དད་པ་སྐྱེས་སམ་བྱས་པས། དགེ་བཤེས་དགོན་པ་བ་དེ་རྫུན་མ་རླབས་པོ་ཆེ་ཞིག་འདུག །ཁོ་དེ་ངུ་བ་སྐད་མང་པོ་བྱེད་འདུག་སྟེ། ཕོ་ཁྱོ་ག་ང་མགོ་བསྐོར་ཐུབ་པ་ཞིག་མིན་ཟེར། དེས་ན་ཁྱོད་དགོན་པ་བ་ལ་དད་པ་ཡོད་དམ་དྲིས་པས། ཁོ་ན་རེ་དད་པའམ་དེ་ཅི་ལ་ཟེར་མི་ཤེས། སྤྱིར་ཆོས་སྒོར་ཞུགས་པ་དང་། བསྙེན་རྫོགས་བྱས་པ་དང་། སྦྱངས་པ་བྱས་པ་དང་། ཆོས་ཞུས་པ་ཐམས་ཅད་ལས་བྱང་ཆུབ་བཟང་མོ་དང་ནུབ་གཅིག་ཉལ་བ་གཉིས་ནུབ་གཅིག་ཉལ་བ་དེ་ལ་དགའ་བ་བྱུང་

ཟེར། གཏམ་དེ་ཁམ་པ་ལུང་པས་གསན་པས་ཞག་བཅུའི་བར་དུ་རྣལ་ཡེ་མ་བྱུང་བར་བཤུམས་གདའ། དེས་ན་ཇོ་གདན་པ་དེ་འདྲ་བ་ཞིག་ཏུ་ནམ་ཡང་མི་འགྲོ་བའི་སྨོན་ལམ་འདེབས་དགོས། མདོར་ན་བླ་མ་བསྟེན་དུས། བཀའ་བཀྱོན་གནང་ཡང་དད་ལོག་མི་བྱེད་ཅིང་། བླ་མ་ཁུར་དུ་མ་སོང་རྒྱན་དུ་འགྲོ་བ་ཞིག་བྱ་དགོས་ཏེ། གཙང་པ་རྒྱ་རས་ཀྱི་ཞལ་ནས། བདེ་སྐྱིད་འཛོམས་ཙ་ན་ཁ་ཕོ་སུས་ཀྱང་ཐོང་། སྡུག་ཐུག་ཙ་ན་ཁ་ཕོ་ཐོན་པ་ཞིག་གྱིས། བླ་མས་ཐུགས་ལ་འདོགས་ཙ་ན་མོས་གུས་སུས་ཀྱང་སྐྱེ། བཀའ་བཀྱོན་བཏང་ཙ་ན་དད་པ་མ་ལོག་པ་ཞིག་གྱིས། འགལ་རྐྱེན་མེད་དུས་ཇོ་བཟང་སུས་ཀྱང་ཡོང་། རྐྱེན་ངན་བྱུང་ཙ་ན་གཉེན་པོས་སླེབས་པ་ཞིག་གྱིས་གསུངས། དགེ་བཤེས་དོལ་བས། ཕུ་ཆུང་བ་ལ་བླ་མ་བསྟེན་ཚུལ་ཞུས་པས། དགེ་བཤེས་པའི་ཞལ་ནས། བླ་མ་བསྟེན་པའི་དུས་ན། དགེ་བའི་བཤེས་གཉེན་གྱི་རྒྱན་དུ་འགྱུར་བར་བྱ་ཡི། ཁུར་དུ་འདུག་པ་མི་བྱ། གསུངས། དེའི་དོན་ནི། དཔེར་ན་རྒྱན་བཟང་པོ་བཏགས་པའི་མི་དེ་རྒྱན་གྱིས་སྐྱོ་བར་མི་འགྱུར་གྱི། རྒྱན་ཡོད་པ་དེ་

སྲིད་དུ་དགའ་བར་འགྱུར་བ་བཞིན་དུ། བླ་མའི་དྲུང་ན་འདུག་པའི་དུས་སུ། བླ་མ་དགྱེས་པར་འགྱུར་བ་བྱ་ཡི། སྐྱོ་བར་འགྱུར་བ་མི་བྱ་གསུངས། དེས་ན་རྒྱལ་བའི་གསུང་རབ་བླ་མ་གོང་མ་རྣམས་ཀྱི་གསུང་བཞིན་མཚན་ལྡན་གྱི་བླ་མ་ཚུལ་བཞིན་དུ་བསྟེན་པ་ལ་འབད་པར་བྱའོ། །དེ་ལྟར་མཚན་ལྡན་གྱི་བླ་མ་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནས། ཐོས་པ་བྱེད་དགོས་ཏེ། སྔོན་འདས་པའི་དུས་དྲང་སྲོང་ཆེན་པོ་མཆོག་ཅེས་བྱ་བ། མངོན་པར་ཤེས་པ་ལྔ་དང་ལྡན་པ་རྟག་ཏུ་བྱམས་སྙིང་རྗེ་དང་ལྡན་པ་ཞིག་བྱུང་བ་ལས། དེ་འདི་སྙམ་དུ་འདི་ཙམ་གྱིས་སེམས་ཅན་རྣམས་ཀྱི་ཉོན་མོངས་པ་སེལ་ཡང་མི་ནུས། འཕགས་པའི་ལྟ་བ་བསྐྱེད་ཀྱང་མི་ནུས་སོ། །འཕགས་པའི་ལྟ་བ་གང་ལས་སྐྱེ་ན་མང་དུ་ཐོས་པ་དང་། ཚུལ་བཞིན་དུ་སོ་སོར་རྟོགས་པ་ལས་སྐྱེ་བས་ཐོས་པ་བཙལ་ལོ་སྙམ་དུ་བརྩོན་པ་ན། སངས་རྒྱས་བཅོམ་ལྡན་འདས་མཐོང་སྟེ་ཆོས་དུ་མ་བསྟན་ནས། ཁྱོད་རྟག་ཏུ་འདུ་འཛི་མེད་པར་ཚུལ་བཞིན་དུ་སོ་སོར་རྟོགས་པ་ལ་བརྩོན་པར་བྱ་ཞེས་གསུངས། ཡང་སངས་རྒྱས་བཅོམ་ལྡན་འདས་ལ། འཁོར་རྣམས་ཀྱིས་

སྦྱིན་པ་དང་། ཚུལ་ཁྲིམས་གཉིས་དང་། ཐོས་པ་བསོད་ནམས་གང་ཆེ་ཞུས་པའི་ལན་དུ། རིགས་ཀྱི་བུ་འདི་ལྟ་སྟེ། དཔེར་ན་རིའི་རྒྱལ་པོ་རི་རབ་ཀྱི་མདུན་ན་ཡུངས་འབྲུ་གཅིག་འདུག་པ་བཞིན་དུ་སྦྱིན་པའི་ཚོགས་དང་ཚུལ་ཁྲིམས་ཀྱང་དེ་དང་འདྲ་བར་བལྟ་བར་བྱའོ། །རིའི་རྒྱལ་པོ་རི་རབ་ཇི་ལྟ་བ་བཞིན་དུ་ཐོས་པའི་ཚོགས་ལྟ་བར་བྱའོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་རྩོམ་པ་རྣམས་ཀྱིས། ཐོས་པའི་ཚོགས་ལ་བརྩོན་པར་བྱའོ། །གསུངས། འོད་སྲུངས་ཀྱི་ལེའུ་ལས། འོད་སྲུངས་འདི་ལྟ་སྟེ། དཔེར་ན་སྤྲིན་མེད་ཅིང་གནམ་དྭངས་བའི་ནམ་མཁའ་ལ་ནི་ཆར་འབབ་པའི་རྒྱུ་མེད་དོ། །འོད་སྲུངས་དེ་བཞིན་དུ་བྱང་ཆུབ་སེམས་དཔའ་ཐོས་པ་ཉུང་བ་ལ་ཡང་དམ་པའི་ཆོས་ཀྱི་ཆར་འབབ་པའི་རྒྱུ་མེད་དོ། དེ་ལ་འདི་སྐད་ཅེས་བྱ་སྟེ། དཔེར་ན་སྤྲིན་མེད་གནམ་ཐང་ནམ་མཁའ་ལ། །ཆར་འབབ་པ་ནི་ནམ་ཡང་མི་དམིགས་སོ། །དེ་བཞིན་བྱང་ཆུབ་སེམས་དཔའ་ཐོས་ཉུང་ལ། །ཆོས་སྟོན་ནམ་ཡང་དམིགས་པར་མི་འགྱུར་རོ། །འོད་སྲུངས་འདི་ལྟ་

སྟེ། དཔེར་ན་སྤྲིན་ཆེན་པོ་ལས་བྱུང་བའི་ཆར་གྱི་རྒྱུན་ནི་ལོ་ཏོག་ཐམས་ཅད་ལ་མངོན་པར་འབབ་བོ། །འོད་སྲུངས་དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་དང་ལྡན་པ་དང་། མང་དུ་ཐོས་པའི་ཆོས་ཀྱི་སྤྲིན་ལས་བྱུང་བའི་དམ་པའི་ཆོས་ཀྱི་ཆར་ཡང་སེམས་ཅན་ལ་མངོན་པར་འབབ་བོ། །དེ་ལ་འདི་སྐད་ཅེས་བྱ་སྟེ། དཔེར་ན་སྤྲིན་ཆེན་གློག་དང་བཅས་པ་ལས། །ཆར་པ་འབབ་པས་ལོ་ཏོག་ངོམས་པར་བྱེད། །དེ་བཞིན་བྱང་ཆུབ་སེམས་དཔའི་དམ་ཆོས་ཀྱི། །སྤྲིན་བྱུང་ཆོས་ཀྱིས་སེམས་ཅན་ཚིམ་པར་བྱེད། །གསུངས། ཡང་སྔོན་བཅོམ་ལྡན་འདས་ཀྱིས་ཆོས་གསུངས་པའི་སྒྲ་ངང་བ་ལྔ་བརྒྱས་ཐོས་པས་དད་ནས་ཤི་འཕོས་མ་ཐག་སུམ་ཅུ་རྩ་གསུམ་གྱི་ལྷར་སྐྱེས་པ་ལ། ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་དུ་གཤེགས་པ་ནི་ངོ་མཚར་རྨད་དེ། ཆོས་ཀྱི་ཆར་གྱིས་ངོམས་པ་མ་མཆིས་སོ། །ཆུང་ངུ་ན་དུད་འགྲོའི་སྐྱེ་གནས་ལྟ་བུ་ཡང་ཆོས་ཐོས་པས་བསོད་ནམས་ཐོབ་ན་མི་ལྟ་ཅི་སྨོས་ཏེ། དད་པའི་སེམས་ཀྱིས་གཟུངས་སུ་བཟུང་བའི་བསོད་ནམས་ཀྱི་འབྲས་བུ་དེ་བས་བརྒྱ་

སྟོང་གིས་ལྷག་སྟེ་དཔེར་མ་མཆིས་སོ་གསུངས། སྔོན་སངས་རྒྱས་འོད་སྲུངས་འཇིག་རྟེན་དུ་བྱོན་དུས་ཆོས་ཀྱི་འཁོར་ལོ་བསྐོར་བ་ན། མི་གཉིས་ཀྱིས་བསྙེན་གནས་བླངས་ཏེ་བསྲུངས་བ་ལས། གཅིག་གིས་གཙང་མར་བསྲུངས་པས་འཁོར་ལོས་སྒྱུར་བའི་རྒྱལ་པོར་གྱུར། གཅིག་གིས་བསྙེན་གནས་རལ་བས་ཀླུར་སྐྱེས་པ་ལས། བསྙེན་གནས་ཀྱི་དཔེ་བླངས་ནས་ཡང་བསྙེན་གནས་བསྲུངས་པས། ཕྱིས་ལྷར་སྐྱེས་ནས་སྟོན་པ་མཆོད་དུ་བྱུང་བ་ལ། ཆོས་བསྟན་པས། འཁོར་བའི་རྒྱ་མཚོ་ལས་ཐར། འཕགས་པའི་གོ་འཕང་ཐོབ་སྐད། ཡང་གཅིག་གིས་སངས་རྒྱས་འོད་སྲུངས་ཀྱི་དུས་སུ། དགེ་བསྙེན་གྱི་བསླབ་པ་བླངས་པ་ཉམས་པས་ནེ་ཙོར་སྐྱེས་ནས། སངས་རྒྱས་ཤཱཀྱ་ཐུབ་པ་དང་མཇལ་ཏེ་སེམས་དད་ཅིང་གུས་པར་གྱུར་པ་ལས་རེ་ཞིག་ན་ཁྲས་བསད་དེ་ཤི་བར་གྱུར་པ་ལྷར་སྐྱེས་ནས། སྟོན་པ་ལས་ཆོས་མཉན་པས་འཕགས་པ་ཐོབ་སྐད། ཡང་སུམ་ཅུ་རྩ་གསུམ་གྱི་ལྷ་ནོར་བུ་དྲི་མ་མེད་པ་ཞེས་བྱ་བ་དེས་སྔོན་ཕ་བསད་པ་ལས། འཆི་ཁར་བཤེས་གཉེན་དམ་པ་དང་འཕྲད་པའི་མཚམས་སྦྱོར་

ཁྱད་པར་ཅན་བྱུང་བ་དང་། སྔོན་གྱི་དགེ་བའི་ལས་ཤིག་གིས་ཐོག་མར་ལྷར་སྐྱེས། ཕྱིས་དམྱལ་བར་སྐྱེས་ཏེ་ངན་སོང་དང་མི་ཁོམ་པར་གཏན་འཁྱམས་ལྟ་བུར་བྱ་དགོས་པ་ལས། དེ་ལ་སོགས་པའི་སེམས་ཅན་གྱི་ཕྱིར་སྤྱོད་རྒྱུད་གསུངས་ཤིང་། དེ་དམྱལ་བར་སྐྱེ་བ་ལ་བརྒྱ་བྱིན་གྱིས་ཆོས་གསུངས་པ་དག་བྱས་པས། དེ་དགའ་ལྡན་གྱི་ལྷར་སྐྱེས་གསུངས། ཡང་སྔོན་སངས་རྒྱས་བཅོམ་ལྡན་འདས་འཇིག་རྟེན་ཁམས་འདིར་བྱོན་ནས་ཆོས་ཀྱི་འཁོར་ལོ་བསྐོར་བའི་དུས་སུ། ལྷ་མིའི་གཙོར་བྱས་པའི་ལས་དང་སྐལ་བར་ལྡན་པའི་གདུལ་བྱ་མང་པོས་བཀའ་ཆོས་ཐོས་པས་སྐད་ཅིག་ཙམ་དང་། དར་ཅིག་ཙམ་བསྒོམས་པས་ཀྱང་དགྲ་བཅོམ་པའི་གོ་འཕང་ཐོབ་པ་དང་། རྗེས་སུ་ཉེ་གནས་ཀུན་དགའ་བོས་ཀྱང་ཞག་བདུན་ཙམ་ལས་བསྒོམ་མ་དགོས་པར་དགྲ་བཅོམ་པ་ཐོབ་པར་གསུངས། དེས་ན་མཚན་ལྡན་གྱི་བླ་མ་དམ་པའི་ཞབས་དྲུང་ནས། ཐེག་པ་ཆེན་པོའི་བཀའ་ཆོས་ཞུས་ནས་ཉན་པ་ལ་བརྩོན་པར་བྱའོ། །ཡང་སྔོན་ཚོང་དཔོན་ཞིག་རྒྱ་གར་མཐའ་ཕྱོགས་ཞིག་ལ་ཚོང་དུ་འགྲོ་ཁར། ནང་མི་རྣམས་ཀྱིས་ནོར་དངོས་པོ་འདི་འདྲ་ཁྱེར་ཤོག་

ཅེས་གཉེར་དམ་བྱས་པའི་ཚེ། ན་ཙོ་སྨྲ་མཁན་ཞིག་ཡོད་པ་དེ་ལ། དངོས་པོ་གང་ཁྱེར་ཡོང་དགོས་བྱས་པས། ནེ་ཙོ་ན་རེ་གཞན་གང་ཡང་མི་དགོས། ལམ་ཁར་ནེ་ཙོའི་ཁྱུ་ཆེན་པོ་ཞིག་དང་འཕྲད་བྱུང་ན། དེའི་དབུས་སུ་སོང་ལ། ནེ་ཙོ་སྨྲ་མཁན་གྱིས་ཁྱེད་རྣམས་ཁམས་བཟང་ཞིང་བཟའ་ཤིང་གི་ར་བ་ན་གང་སྐྱིད་སྐྱིད་བྱས་སྡོད་པ་དགའ་སྟེ། ང་མིའི་ལག་ཏུ་ཐེབས་ནས་སྦུབས་ཤིན་ཏུ་འཐུམས་པ་ཞིག་འདུག་པས། དེ་ལས་ཐར་པའི་ཐབས་གང་འདྲ་བྱས་ན་དྲག་གམ་ཞེས་འཕྲིན་བསྐུར་བྱུང་ཞེས་ལབ་རོག་གྱིས་བྱས་སོ། །དེ་ནས་ཚོང་དཔོན་ལམ་དུ་ཐོན་ནས་ཟླ་ཤས་སོང་ཚེ་ནེ་ཙོའི་ཁྱུ་ཆེན་པོ་ཞིག་དང་འཕྲད་དེའི་དབུས་སུ་སོང་ནས་འཕྲིན་བསྐྱལ་བའི་ཚེ། ནེ་ཙོ་དེ་རྣམས་ཀྱི་ནང་ནས་གཅིག་སེམས་སྡུག་དྲན་མེད་བརྒྱལ་བ་ལྟ་བུའི་གཤོག་པ་ལྷེབ་ལྷེབ་བྱེད་ཅིང་སྐད་ཅིག་ལ་ལྗོན་ཤིང་གི་རྩེ་ནས་ས་ལ་ལྷུངས་ཏེ་ཤི་སོང་བ་ལྟར་བྱས་བས། ཚོང་དཔོན་གྱིས་འཕྲིན་བསྐྱལ་བ་དྲན་སྡིག་པ་ཆེན་པོ་བསགས་སྙམ། འགྱོད་བཞིན་ཚོང་ལ་ཕྱིན་ཚོང་ཐེབས་ནས་ནང་དུ་འཁོར་བ་དང་། ནེ་ཙོ་སྨྲ་མཁན་གྱིས་འཕྲིན་ཨེ་བསྐྱལ་

བྱས་ཚེ། ཚོང་དཔོན་གྱིས་འཕྲིན་བསྐྱལ་ཏེ། ཐོས་མ་ཐག་ནེ་ཙོ་གཅིག་ཤི་སོང་བྱས་པས། དེ་ཐོས་པ་དང་དུས་མཉམ་ནེ་ཙོ་སྨྲ་མཁན་དེ་ཡང་སྡུག་བསྔལ་བའི་ཉམས་དང་བཅས་ཏེ་ཚང་ནང་ནས་གློ་བུར་དུ་ཤི་སོང་བ་ལྟར་བྱས་ཚེ། ཚོང་དཔོན་དེ་ཡང་འགྱོད་པ་རྟས་མི་ཟིན་པ་བྱུང་ནས། ང་ཡིས་འཕྲིན་དེ་འདྲ་གང་དུ་བསྐྱལ་བའི་ས་དེར་སྡིག་པ་ཚབས་ཅན་བསགས། ད་ཆ་ངས་ནེ་ཙོ་སྙིང་རྗེ་བ་འདི་ཡང་མེད་པར་བྱས་ཚར་སྙམ་ཚང་ནས་ཕྱིར་བཏོན་འགྲམ་དུ་ངུ་ཡིན་བསྡད་པས། ནེ་ཙོ་ཤི་རྫུ་བཏབ་པ་ལས་ལངས་ཏེ་བཏབ་བཏབ་པ་བྱས་འཕུར་ནས་རྒྱ་གར་ལ་སོང་ངོ་། །དེ་ལ་དཔག་ནས་ནེ་ཙོ་སྔ་མ་དེས་ཀྱང་ཤི་རྫུ་བྱས་པ་ཡིན་པར་ཤེས་སོ། །དེ་ཡང་ནེ་ཙོ་སྔ་མ་དེས་ཤི་རྫུ་གྱིས་དང་ཚང་ནས་ཐར་ཡོང་ཞེས་བརྡ་བསྟན་པ་དེའི་དོན་ནེ་ཙོ་སྨྲ་མཁན་གྱིས་གོ་ནས། ཤི་རྫུ་བྱས་པས་ཚང་ནས་ཐར་ཏེ་རྒྱ་གར་དུ་སླེབ་པ་བཞིན། བླ་མ་དམ་པས་འཁོར་བ་ནས་ཐར་པའི་ཐབས་དམ་པའི་ཆོས་བསྟན་པ་དེའི་དོན་སློབ་མ་རྣམས་ཀྱིས་གོ་ནས། དེ་བཞིན་ཉམས་སུ་བླངས་ན་འཁོར་བ་ལས་ཐར་ནས་བདེ་ཆེན་སངས་རྒྱས་ཀྱི་ས་ལ་སླེབ་ངེས། སྔོན་ལོང་བ་

ཞིག་གིས། སྟོན་དུས་ནང་མི་རྣམས་བཙས་མ་རྒྱག་ཏུ་སོང་བའི་ཤུལ་དུ་ནང་བསྲུངས་ནས། ཉི་མ་མང་པོ་བསྡད་པས་སེམས་སུན་སྡོད་མ་ཚུགས་པར་ཉིན་གཅིག་ནང་ནས་ཕྱིར་ཐོན་ཕར་རྒྱང་རིང་ཞིག་ཏུ་ཁམས་བསེང་བྱེད་དུ་སོང་བས། སླར་ཕྱིར་འོང་དུས་མགོ་འཐོམས་ནས་ལམ་མ་ཤེས་དུས་ཁོང་སང་གི་གླང་རི་ཁར་ཡོད་པའི་སྐད་གོ་ཚེ་ཁོའི་བསམ་པ་ལ། ད་གླང་གི་མཇུག་མ་ལག་ཏུ་ཐེབས་ན་ཁོ་ནང་དུ་འགྲོ་དུས་ང་ཡང་སླེབས་ཡོང་སྙམ། དེ་ཕྱོགས་སུ་སོང་གླང་གི་རྩར་སླེབ་པ་དང་། མཇུག་མ་ནས་བཟུང་བས་གླང་གི་རྡོ་དང་ཚེར་མ་ལ་སོགས་ས་ཆ་རྩུབ་བོ་གང་དུ་ཁྱེར་ཀྱང་མཇུག་མ་མ་བཏང་བར་གར་འགྲོ་སར་བརྒྱུགས་པས་དགོང་མོ་ནང་དུ་སླེབས་པ་བྱུང་། དེས་ན་བཀའ་གདམས་པའི་གསུང་འགའ་རེ་ན་ལོང་བའི་གླང་མཇུག་བྱ་དགོས་ཟེར་བ་དཔེ་དེ་ཡིན་པར་གདའ། དེ་བཞིན་དུ་བླ་མ་དགེ་བའི་བཤེས་གཉེན་གྱིས་བྱམས་པ་དང་སྙིང་རྗེ་བྱང་ཆུབ་སེམས་ཀྱི་གདམས་པ་བསྟན་པ་རྣམས། རྐྱེན་ངན་གང་བྱུང་ཡང་ནམ་ཡང་མི་བཏང་བར་ཉམས་སུ་བླངས་ནན་མ་ཕུགས་སངས་རྒྱས་ཀྱི་ས་ལ་སླེབ་བར་འགྱུར་

རོ། །སྨྲས་པ། རྣམ་དག་སྡོམ་པ་དམ་ཚིག་ཚུལ་བཞིན་བསྲུང་། །རྣམ་མང་མདོ་སྔགས་དགེ་བའི་ཆོས་སྡུད་ཅིང་། །རྣམ་པ་ཀུན་ཏུ་འགྲོ་བའི་དོན་མཛད་པའི། །རྣམ་གྲོལ་ལམ་སྟོན་བླ་མ་སྤྱི་བོར་བཞུགས། །རྒྱལ་བའི་གསུང་རབ་བསྟན་བཅོས་ཕལ་ཆེར་གྱི། །བར་སྐབས་རྣམས་སུ་ཚིགས་བཅད་མཛད་པ་བཞིན། །འདིར་ཡང་ལེགས་བཤད་འདོམ་པའི་སྐབས་སྐབས་སུ། །ཚིགས་བཅད་དབྱངས་སྙན་དལ་བུས་སྒྲོག་པར་བྱ། །སྐྱོན་ཀུན་ཟད་ཅིང་ཡོན་ཏན་ཀུན་དང་ལྡན། །ཕན་བཏགས་མ་བཏགས་མེད་པར་འགྲོ་ཀུན་གྱི། །མགོན་སྐྱབས་དཔུང་གཉེན་མཛད་པའི་ལྷ་མཆོག་དེ། །སྟོན་པ་སངས་རྒྱས་མ་གཏོགས་གཞན་མ་མཆིས། །མགོན་དེའི་གསུང་རབ་འོ་མའི་རྒྱ་མཚོ་ཡི། །སྙིང་པོ་བྱང་ཆུབ་སེམས་ཀྱི་མར་མཆོག་དེ། །བོད་ཡུལ་ལྗོངས་འདིར་བསྣམས་ནས་བྱོན་མཁན་རྗེ། །མཉམ་མེད་ཇོ་བོ་མ་གཏོགས་གཞན་ན་གང་། །དེ་ཉིད་བདག་ལ་རབ་ཏུ་བརྩེ་བའི་སྒོས། །སྩོལ་མཛད་དྲིན་ཅན་རྩ་བའི་བླ་མ་ཡི། །སྐུ་དྲིན་གཞལ་དགོས་བྱུང་ན་སུ་ཡིས་འཁོར། །སྙམ་ནས་དད་གུས་དབྱར་གྱི་མཚོ་ལྟར་རྒྱས། །དུས་གསུམ་སངས་

རྒྱས་ཐམས་ཅད་མཆོད་པ་ལས། །བླ་མའི་བ་སྤུ་གཅིག་མཆོད་བསོད་ནམས་ཆེ། །བསྐྱེད་རིམ་བསྐལ་པའི་བར་དུ་བསྒོམས་པ་ལས། །བླ་མ་དྲན་པ་བསོད་ནམས་འབུམ་ཕྲག་ལྷག །བསྙེན་སྒྲུབ་བཟླས་པ་ས་ཡ་བྱས་པ་ལས། །བླ་མའི་གསོལ་འདེབས་ལན་གཅིག་བྱས་པ་དགའ། །ཡི་དམ་ལྷ་བརྒྱའི་ཞལ་རས་མཇལ་བ་ལས། །བླ་མ་ཡུད་ཙམ་མཇལ་བ་ཕན་ཡོན་ཆེ། །རང་ལ་དམ་ཆོས་སྟོན་པའི་བླ་མ་རྣམས། །དུས་གསུམ་སངས་རྒྱས་ལས་ཀྱང་དྲིན་ཆེ་བས། །དྲིན་གཟོའི་ཕྱིར་དུ་ཟང་ཟིང་ནོར་འབུལ་ཞིང་། །ལུས་ངག་ཞབས་ཏོག་བཀའ་བཞིན་སྒྲུབ་པས་མཆོད། །བླ་མས་ལྟོ་གོས་ཆོས་གསུམ་གནང་བའི་དུས། །དད་པ་མི་སྐྱེ་བ་ཞིག་མེད་མོད་ཀྱང་། །སྐབས་རེ་བཀའ་བཀྱོན་བརྡུང་གཏག་གནང་བའི་དུས། །དད་པ་མ་ལོག་པ་རེ་བྱེད་པ་གཅེས། །རྟག་ཏུ་ངུ་དང་ནཱ་རོ་མི་ལ་རྗེ། །འབྲོམ་སྟོན་ལ་སོགས་གོང་མའི་རྣམ་ཐར་བཞིན། །དགེ་བའི་བཤེས་གཉེན་ཚུལ་བཞིན་བསྟེན་ནུས་ན། །ཚེ་འདིར་མཆོག་ཐུན་དངོས་གྲུབ་ཐོབ་པར་ངེས། །སངས་རྒྱས་ཀུན་དངོས་མཚན་ལྡན་བླ་མ་ལ། །བརྟེན་ནས་

བྱང་ཆུབ་སེམས་ཀྱི་གདམས་པ་སོགས། །ཟབ་རྒྱའི་ཆོས་ལ་ཐོས་བསམ་སྒོམ་གསུམ་བྱས། །རང་གཞན་དོན་གཉིས་ལྷུན་གྱིས་འགྲུབ་པར་སྨོན། །ཞེས་པ་བར་སྐབས་ཀྱི་ཚིགས་སུ་བཅད་པའོ། དེ་ལྟར་བླ་མ་དགེ་བའི་བཤེས་གཉེན་བསྟེན་ནས། རྙེད་དཀའི་དལ་བའི་རྟེན་ལ་སྙིང་པོ་ལེན་དགོས་ཏེ། རྗེ་རིན་པོ་ཆོས་དལ་བའི་རྟེན་འདི་ཡིད་བཞིན་ནོར་ལས་ལྷག །འདི་འདྲ་རྙེད་པ་ད་རེས་ཙམ་ཞིག་ཡིན། གསུངས། སངས་རྒྱས་ཐུགས་རྗེ་ཅན་གྱི་ཞལ་ནས། མི་ལུས་ནི་ཤིན་ཏུ་རྙེད་པར་དཀའ་ན་དེ་ཐོབ་ནས། དེས་རྙེད་པའི་རྒྱལ་བའི་བསྟན་པ་ལ་རབ་ཏུ་བྱུང་བ་ཡང་རྙེད་ནས། ཐར་པའི་དོན་དང་མི་མཐུན་པ་དག་གིས་བསླུས་ཏེ། གཏན་དུ་སྡུག་བསྔལ་བར་འགྱུར་ཏ་རེ་གསུངས། རྒྱལ་སྲས་རིན་པོ་ཆེའི་ཞལ་ནས། ཆོས་སྒྲུབ་པའི་རྟེན་དལ་འབྱོར་གྱི་མི་ལུས་ཐོབ་པ་ལ། རྒྱུ་དགེ་བ་ཕུན་སུམ་ཚོགས་པ་སྒྲུབ་དགོས་ལ། སེམས་ཅན་གྱི་ནང་ན་དགེ་བ་རྣམ་དག་སྒྲུབ་པ་ཉུང་བས། འབྲས་བུ་དལ་འབྱོར་ཐོབ་པ་དཀའ་ལ། དུད་འགྲོ་ལ་སོགས་པ་འགྲོ་བ་གཞན་ལ་བལྟས་ན་དལ་འབྱོར་ཐོབ་པ་སྲིད་པ་ཙམ་དུ་འདུག་པ་ལས།

བདག་གིས་དལ་འབྱོར་ཐོབ་པ་འདི་དོན་མེད་པར་མི་འགྱུར་བར། ཆོས་རྣམ་དག་ཅིག་བྱེད་དགོས་སྙམ་དུ་སྒོམས་གསུངས། མཉམ་མེད་པོ་ཏོ་བའི་ཞལ་ནས། ཆོས་ཀྱི་དབུ་དལ་འབྱོར་རྙེད་དཀའ་བ་དང་། འཆི་བ་རྗེས་སུ་དྲན་པ་བསྒོམ་པ་འདི་ཡིན་གསུངས། འདི་གཉིས་ཀྱི་དོན་ལ་སོ་ཞིག་ཅི་ཐེབས་བྱེད་དགོས། འདི་གཉིས་ལ་སོ་ཞིག་ཐེབས་ན་ཆོས་ཀྱི་སྒོ་དབྱེ་བས། གོང་མ་ཐམས་ཅད་རྒྱུད་ལ་སྤུངས་པ་བཞིན་དུ་ཡོང་བ་ཡིན་པས། ཆོས་ཀྱི་དབུ་བྱ་བ་དེ་ལ་ཟེར་གསུངས། སྔོན་མདོ་ཁམས་སྒང་གི་མི་གཉིས་ལ་མར་ཁུ་སྤྱི་ལ་དྲངས་པས། ལྟོ་ལ་ངན་ཤོས་ཀྱིས་སྐྱུ་གཏིང་རིང་པོ་བྱས་ཀྱིན་བཅུས་པས། ཁ་ཡི་རྩར་སླེབ་ཙ་ན་སྐེ་རྩར་ཆག་ཀྱིན་མར་ཁུ་བས་ཟན་རང་ཡང་ཁར་མ་ཆུད་པར་ས་ལ་ལྷུང་གིན་སོང་བས། གཅིག་གིས་ཁྲེལ་བས། མར་ཁུ་མང་དུ་འོང་བའི་ཐབས་གཏིང་ཟབ་པ་ཡང་གལ་ཆེ་སྟེ། སྐེ་རྩ་དེར་གཟོབ་ཟེར་རོ། །དཔེ་དེ་བཞིན་དུ་སྐད་ཅིག་ལ་སངས་རྒྱ་བའི་ཐབས་སྟོང་པ་ཉིད་ལ་སོགས་པའི་ཟབ་པ་ཡང་གལ་ཆེ་སྟེ། སྐེ་རྩ་འདྲ་བའི་དལ་འབྱོར་རྙེད་དཀའ་འཆི་བ་མི་རྟག་པ། ལས་འབྲས་

འདི་ལ་གཟབ་དགོས། མ་གཟབ་ན་མར་ཁུ་དང་འདྲ་བའི་སངས་རྒྱས་བས་ཟན་དང་འདྲ་བའི་ལྷ་མི་རང་ཡང་མི་ཐོབ་པར་འགྲོ་གསུངས། སྔོན་འཕན་ཡུལ་རྒྱ་ཕུ་པ་གཅིག་གིས་གཙང་དུ་ཕྱིན་པ་དང་། གཞན་གཙང་པ་རྣམས་གླུ་ལེན་པའི་ངག་ལས། ལོ་ལྡེང་བུ་ཅིག་ཡིན་ནོ་ཅོག །གསེར་གྱི་རི་ལ་བརྐོས་ན་ཨང་། ཟེར་བ་ཐོས་པས། ང་ནི་དེ་རང་ཡིན་སྙམ། ཕྱིར་འོང་ནས་གསེར་བརྐོས་སོ། །དེ་བཞིན་དུ་དལ་འབྱོར་གྱི་མི་ལུས་ཐོབ་པ་འདི་ལྷ་མི་ཀུན་གྱི་སྨོན་པའི་གནས་ཡིན་པས། སྨོན་ནེ་ཐོག་ཏུ་སླེབ་པའི་དུས་འདིར་ཆོས་བྱེད་དགོས། སྔོན་སློབ་དཔོན་ཀླུ་སྒྲུབ་ཀྱིས་མཛད་པའི་སྨོན་ལམ་ནས། མ་སྐྱེས་ཟེར་བ་ཚོར་མ་སྐྱེས། སྐྱེ་བར་ཤོག་ཟེར་བ་རྣམས་ཀྱི་སྟེང་དུ་ད་རེས་ཕྱིན་ནས་འདུག་པས། ད་ཅིའི་ཕྱིར་དོན་མེད་པར་སྡོད་སྙམ་དུ་ཆོས་ལ་འབད་དགོས། སྔོན་ཕ་བུ་གསུམ་གྱིས་ཟན་ཟ་བའི་ཚེ། བུ་ཆུང་བས་རང་གི་ཟན་སྐལ་རྒྱབ་ཏུ་སྦས། ཕ་དང་ཕུ་བོའི་ཟན་ལ་ཟོས་པས། ཁོ་རང་གི་ཟན་རྒྱབ་ནས་ཁྱིས་ཁྱེར་བས་ངུས། མ་དུ་བྱས་པས། བརྒྱ་ལ་ལན་ཅིག་གི་ཟན་དེ་ཁྱིས་ཁྱེར་བ་ཟེར་ཏོ། །དེ་བཞིན་དུ་རང་ཅག་རྣམས་ཀྱིས་ཀྱང་།

རྙེད་པར་དཀའ་བའི་མི་ལུས་ལན་ཅིག་རྙེད་པ་འདི་འཆི་བདག་ཁྱི་རྐུན་དང་འདྲ་བས་མ་ཁྱེར་གོང་དུ་འདིར་སྙིང་པོ་ལེན་དགོས། སྔོན་མི་གཅིག་གི་སྒོར་མི་མང་པོ་བྱུང་བའི་ནང་ནས་དགྲ་སྙིང་ན་བ་ཞིག་ཡོད་པ་མཐོང་ནས། ཁོ་རང་ནང་ན་གྲི་བརྡར་གྱིན་མ་སོད་ཀྱིས་དོགས་ནས། ཕ་མེས་ཀྱིས་བཀུག་སྟེ་དྲི་བོས་གཏོང་ཉེན་ཡོད་ཟེར་ཏོ། །དེ་བཞིན་དུ་ཕ་མེས་དང་འདྲ་བའི་སྔོན་ལས་ཀྱིས་དལ་འབྱོར་གྱི་ལུས་འདི་བཀུག་སྟེ། དྲེ་བོས་ཆོས་མ་བྱས་པར་སྡིག་ལ་ཞུགས་ནས་ཆུད་ཟོས་སུ་གཏོང་ཉེན་ཡོད་གསུངས། སྔོན་མ་གཅིག་ལ་གཙང་ཁྱབ་བསླབ་སྟེ། དགེ་དོན་ལེགས་ཀྱི་གཞི། ཆོས་ཚུལ་རབ་ཀྱི་དབྱིངས། མཆོད་རྟེན་ཐམས་ཅད་ལ་གུས་པས་ཕྱག་འཚལ་ལོ་གྱིས་བྱས་པས། ཁོས་དེ་མ་ཤེས་པར། ཡག་ན་ཡག་ཀྱི་གཞི། ཉེས་ན་ཉེས་ཀྱི་གཞི། ཡག་གཞི་ཉེས་གཞི་ལ་གུས་པས་ཕྱག་འཚལ་ལོ་ཟེར་རོ། །དེ་བཞིན་དུ་དལ་འབྱོར་འདི་ལ་བརྟེན་ནས་དགེ་བ་བསྒྲུབས་ན་སྐྱེ་བ་གཏན་གྱི་བདེ་མགོ་ཚུགས་པས་ཡག་ལ། སྡིག་པ་བསགས་ན་གཏན་དུ་སྡུག་བསྔལ་བར་འགྱུར་བས་དེ་བས་རིག་པ་སྒྲིམ་དགོས།

ཕུ་ཆུང་བའི་ཞལ་ནས། དལ་འབྱོར་གྱི་མི་ལུས་ཐོབ་ནས་དགེ་བའི་ལས་མ་བྱས་པར་ཤི་ན། ནོར་བུ་རིན་པོ་ཆེ་རིན་ཐང་མེད་པ་ཞིག་རྙེད་ནས་ལོངས་མ་སྤྱད་པར་སྟོར་དུ་བཅུག་པ་དང་འདྲ་སྟེ། སྡིག་པ་བྱས་ན་ནོར་བུ་དུག་དང་འདྲེས་པའི་ལྷད་ཟན་རྡོག་པོ་གཅིག་ཏུ་བཙོངས་པ་དང་འདྲ་གསུངས། དེ་བས་ན་ད་རེས་དགེ་བ་ལ་འབད་དགོས། སྔོན་འཕན་ཡུལ་ཕྱ་མཁར་བྱ་བ་ན་མཁར་གཏོས་ཅན་ཞིག་ཡོད་པ་དགྲས་འཕྲོགས་ནས་ཡུན་རིང་དུ་བ་ཉེན་དུ་སོང་བས། རྒད་པོ་ཞིག་དུས་རྟག་ཏུ་མཁར་དེས་གདུང་ནས་ཡོད་པ་ལ། ལན་ཅིག་རྒད་པོའི་རྣ་བ་ལ་ཕྱ་མཁར་ཐོབ་ཟེར་བ་ཐོས་པས་འགྲོ་མི་ནུས་བཞིན་དུ་མདུང་ཞིག་གི་གསུམ་གཉིས་ཙམ་ནས་བཟུང་ཕྱེད་ཤལ་བྱེད་ཅིང་། རྨའི་ཕྱ་མཁར་ཐོབ་པ་འདི་རྨི་ལམ་མིན་ན་རུང་ཟེར་ལོ། །དེ་བཞིན་དུ་དལ་འབྱོར་ཐོབ་པ་འདི་རྨི་ལམ་མིན་ན་རུང་སྟེ་སྙམ་ནས་དགའ་བའི་ཤུགས་ཀྱིས་དེ་ཆུད་མི་གསོན་པར་ཆོས་སྒྲུབ་དགོས་སྙམ་དུ་ཡང་ཡང་བསམ་པར་བྱའོ། །དགེ་བཤེས་དོལ་པ་ཉིད་ཀྱི་ཞལ་ནས། ངས་དལ་འབྱོར་རྙེད་པར་དཀའ་བ་འདི་ལ་འཕྲིག་ཅིག་ཚུད་པས་ཆོས་ཡོད་དེ་ནས་བྱུང་གསུངས། འོ་ན་དལ་

འབྱོར་རྙེད་དཀའི་སྒོམ་སྐྱེས་པའི་ཚད་ཅི་ཙམ་ཡིན་སྙམ་ན། དགེ་བའི་བཤེས་གཉེན་སྤྱན་སྔ་བ་ལྟ་བུ་རེ་ཡིན། ཁོང་མནལ་ཡེ་མ་ལོག་པར་ཐུགས་དམ་མཛད་པ་ལ། དགེ་བཤེས་རྣལ་འབྱོར་བས། བུ་སྐབས་སུ་ཁམས་བག་རེ་མ་གསེང་ན། ཁམས་ལོག་འོང་ཉེན་ཡོད་དོ་གསུངས་པས། དེ་དེར་ལགས་ཏེ། དལ་འབྱོར་རྙེད་དཀའ་འདི་བསམ་ཙ་ན་གཉིད་ལོག་ལོང་རང་མི་གདའ་གསུངས་ཟེར། དེ་ལ་ཆོས་རྗེ་རྒྱལ་སྲས་པའི་གསུང་གིས། དེ་ཤིན་ཏུ་མད་པར་གདའ། དེ་འདྲ་རེ་མེད་ཁ་མི་འདུག་སྟེ། རང་རེས་ནི་དེས་ཆ་ཙམ་ཡང་མ་ནུས་པར་འདུག །ཁོང་གིས་མི་གཡོ་བའི་བསྙེན་པ་དུང་ཕྱུར་དགུ་སོང་ཟེར་སྟེ། མི་ཚེ་ལ་མནལ་ཡེ་མ་ལོག་པའི་ཚོད་དུ་འདུག་གསུངས་པ་ལྟར། དལ་འབྱོར་གྱི་མི་ལུས་རྙེད་དཀའ་བསམས་ནས། དམ་པའི་ཆོས་ལ་ཉིན་མཚན་མེད་པར་འབད་པར་བྱའོ། །དེ་ཡང་དལ་འབྱོར་གྱི་མི་ལུས་རྙེད་དཀའ་བར་མ་ཟད་འཇིག་སླ་བའི་ཚུལ་བསམས་ནས་ཆོས་མྱུར་དུ་བྱ་དགོས་སྟེ། རྗེ་རིན་པོ་ཆེས། རྙེད་དཀའ་འཇིག་སླ་ནམ་མཁའི་གློག་དང་འདྲ། །ཚུལ་འདི་བསམས་ནས་

འཇིག་རྟེན་བྱ་བ་ཀུན། །སྦུན་པ་འཕྱར་བ་བཞིན་དུ་རྟོགས་གྱུར་ནས། །ཉིན་མཚན་ཀུན་ཏུ་སྙིང་པོ་ལེན་པ་དགོས། གསུངས། བདག་ཅག་གི་སྟོན་པའི་ཞལ་ནས། དགེ་སློང་དག་ཤེས་པ་ནི་འགྲིབ། སྲོག་ནི་འཆད་ཚེ་ཡི་འདུ་བྱེད་ནི་འདོར། སྟོན་པའི་བསྟན་པ་ཡང་ངེས་པར་འཇིག་པར་འགྱུར་ན། ཅིའི་ཕྱིར་བརྩོན་འགྲུས་དང་རྟུལ་བ་བརྟན་པོས་སྒྲུབ་པར་མི་བྱེད་གསུངས། ཡང་རྒྱལ་པོ་ལ་གདམས་པ་ལས། རྒྱལ་པོ་ཆེན་པོ་འཇིག་རྟེན་འདི་ནི་འདོར། ཕ་རོལ་ཏུ་ནི་འགྲོ། སྐྱས་ཆེན་པོ་ནི་འདེགས། ནགས་ཁྲོད་སྟུག་པོར་ནི་འཇུག །དགོན་པ་ཆེན་པོར་ནི་འཁྱམས། ཟས་ཀྱི་ཐ་མ་ནི་ཟ། མལ་གྱི་ཐ་མར་ནི་ཉལ། གཉེན་གྱི་ཐ་མས་ནི་བསྐོར་ནས། སྦྱིན་པ་བྱིན་ནོ་ཞེས་གསོལ་བ་ནི་འདེབས། དེའི་ཚེ་དེའི་དུས་ན། ཆོས་འབའ་ཞིག་སྐྱབས་དང་མགོན་དང་དཔུང་གཉེན་དུ་འགྱུར་རོ་གསུངས། རྒྱལ་སྲས་རིན་པོ་ཆེའི་ཞལ་ནས། ཆེ་ལ་ངེས་པ་མེད་ཅིང་འཆི་བའི་རྐྱེན་ཤིན་ཏུ་མང་བས་དེ་རིང་ཙམ་མི་འཆི་བའི་གདེང་ཡང་མི་འདུག་པས། ད་ལྟ་ཉིད་དུ་དམ་པའི་ཆོས་བྱ་དགོས་སྙམ་དུ་སྒོམ་མོ་གསུངས། ཨ་མི་ཐར་རྒྱལ་གྱིས་བོད་ཀྱི་མཐའ་ཅི་

འགྱུར་བྱས་པས། དགེ་བཤེས་སྟོན་པའི་ཞལ་ནས། ཐར་རྒྱལ་བོད་ཀྱི་མཐའ་ལ་མ་རྟོག །ཐར་རྒྱལ་གྱི་མཐའ་ལ་རྟོག་གསུངས་པ་ལྟར། གཞན་གྱི་སྐྱོན་སོགས་ལ་མི་རྟོག་པར། རང་ཉིད་ངེས་པར་འཆི་ཞེང་ནམ་འཆི་ཆ་མེད། དོ་ནུབ་ཙམ་ཡང་མི་འཆི་བའི་གདེང་སྤུ་ཙམ་ཡང་མེད་ཚུལ་ལ་བརྟགས་ནས་ད་ལྟ་རང་འཆི་བྲོད་དམ་པའི་ཆོས་ལ་འབད་དགོས། རྗེ་མི་ལས། ཐུགས་སྲས་རས་ཆུང་པ་ཕེབས་ཁར་ཕྱག་ནས་བཟུང་སྟེ། འཆི་བ་འཆི་བ། རྩ་ན་རྩ་ན། གཏུག་གེ་གཏུག་གེ །གདའ་ཡེ་གདའ་ཡེ། ཞེས་ཞལ་གདམས་མཐར་ཐུག་ལ་འཆི་བ་རྩ་ན་གཏུག་གདའ་ཡེ་གསུངས། ཡང་ཁ་ཆེའི་བླ་མ་ཏ་ཁིན་ལ་ཟེར་བས། མེ་ཏོག་ཅིག་ལ་བལྟས་ནས། མེ་ཏོག་འདི་དང་པོ་མདངས་མཚར་ཞིང་བུང་བ་མང་པོའི་འཕུར་ལྡིང་གཡོ་བཞིན། དབྱངས་སྙན་རྣ་བའི་དབྱིད་དུ་འཇོ་བ་ཞིག་མཆིས་མོད་ཀྱང་། སྟོན་གྱི་སེར་བུ་ཁོ་བྱུང་ཚེ། མདངས་ཉམས་དྲི་ཤོར་ལོ་མ་ཕྱོགས་ཀུན་ཏུ་འཐོར་བུང་བའི་འགྲོ་འོང་ཙམ་ཡང་མེད་པ་དེ་བཞིན་དུ། རང་ཅག་འཁོར་བ་ལ་སྤྱོད་པ་རྣམས་ཀྱང་ཕོ་གཞོན་དང་མོ་གཞོན་སྡེབས།

རྒྱན་གོས་ཀྱི་གཟབ་འཕྱོར་ངོམས། བདེ་བདེ་སྐྱིད་སྐྱིད་སྐད་དུ་འདོད་ཡོན་ཁོ་ནར་སྤྱོད་སྐབས། འཆི་བ་མི་རྟག་པ་ཁོ་བྱུང་ཚེ་ལུས་ཀྱི་བཀྲག་མདངས་ཉམས་དྲོད་ཤོར་མཐར་རུས་པ་དུར་ཁྲོད་ན་ཕྱོགས་ཀུན་ཏུ་འཐོར། ཉེ་འབྲེལ་གྱི་འགྲོ་འོང་ཙམ་ཡང་མེད་པ་དེ་གའི་ངང་ཚུལ་བསམས་ན། ཆོས་ཟབ་མོ་ཞིག་ཡོང་བར་འདུག་ཟེར་བ་བཞིན་དུ། གང་ལ་བལྟས་ཀྱང་མི་རྟག་པ་དྲན་པ་ཞིག་དགོས། ཕུ་ཆུང་པས། གཞན་ཤི་བའི་གཏམ་གསན་པ་རྣམས་གྲངས་བགྲང་གིན་འཆི་བ་འཆི་བ་ཞེས་གསུངས་ཤིང་བསྒོམ་པར་མཛད་གསུངས། དགེ་བཤེས་དགོན་པ་པའི་ཞལ་ནས། ཇོ་བོ་ཀུན་གྱི་ཙབ་ཙུབ་དེ་ཡོངས་ཞོག་ལ། འཆི་བ་གཅིག་པུ་སོམ་དང་། ཆོས་ཡོངས་དེ་ལ་འོང་གི་བྱ་བ་དེ་ཡིན་གསུངས། ཡང་རྗེ་རིན་པོ་ཆེའི་ཞལ་ནས། སྐྱེས་བུའི་དོན་སྒྲུབ་པའི་དུས་ནི་རྟེན་ཁྱད་པར་ཅན་ཐོབ་པའི་དུས་འདི་ཁོ་ན་ཡིན་ལ། འོ་སྐོལ་ཕལ་ཆེར་ངན་འགྲོར་བསྡད་ཅིང་བདེ་འགྲོར་ལན་རེ་ཙམ་འོང་ཀྱང་མི་ཁོམ་པའི་གནས་སུ་ཤས་ཆེ་བས། དེར་ཆོས་སྒྲུབ་པའི་སྐབས་མ་རྙེད་ལ། སྒྲུབ་པས་ཆོག་པའི་རྟེན་རེ་རྙེད་པ་ཡང་ཆོས་ཚུལ་བཞིན་དུ་མི་སྒྲུབ་

པ་ནི། ད་དུང་མི་འཆི་སྙམ་པ་འདི་ལ་ཐུག་འདུག་པས་ན། བློས་མི་འཆི་བའི་ཕྱོགས་འཛིན་པ་ནི། རྒྱུད་པ་ཀུན་གྱི་སྒོ་དང་། འཆི་བ་དྲན་པ་ནི་ཕུན་སུམ་ཚོགས་པ་ཐམས་ཅད་ཀྱི་སྒོའོ་གསུངས། མཁས་གྲུབ་རྗེས། འཆི་བ་མི་རྟག་པའི་བློ་ཤུགས་དྲག་ཅིག་མ་སྐྱེས་ན་མིའི་སྔོན་དུ་གྲུབ་གྲུབ་མཛེས་མཛེས་ལོ་འདོད་གྲགས་འདོད་ཅིག་གིས་ཁྱེར་ནས། ཐོས་བསམ་སྒོམ་གསུམ་དགེ་བ་ལྟར་སྣང་དུ་སོང་ནས་ཚེ་ཕྱི་མ་ལ་ཕན་པ་ཡེ་མི་ཡོང་། གཉིད་རྨུགས་དང་བྲེ་མོའི་གཏམ་དང་བཟའ་བཏུང་རྣམས་ཀྱང་བཤོལ་ཐབས་མེད་པ་བཞིན་སོང་ནས་དེའི་དབང་དུ་འཆོར། མི་རྟག་པའི་བློ་ཤུགས་དྲག་ཅིག་སྐྱེས་ན་འཆི་ཁར་མི་འགྱོད་པའི་སྟེང་དུ་འཆི་བ་ལ་དགའ་བྲོད་སྐྱེ་བ་ཞིག་ཡོང་བས་འཆི་བ་སེམས་པ་གལ་ཆེ་གསུངས། སྔོན་གྱི་དུས་བོད་སྟོན་རྣམས་སྣང་བ་སེལ་ལམ་མི་སེལ། སངས་རྒྱས་ལ་ཡེ་ཤེས་མངའ་འམ་ཞེས་རྩད་གཅོད་པ་ལ། པོ་ཏོ་པའི་ཞལ་ནས། སྣང་སེལ་མི་རྟག་པ་འདི་ཡིན་ཏེ། ཚེ་འདིའི་སྣང་བ་ཐམས་ཅད་འདིས་སེལ་གསུངས། བྱང་དུ་ནད་པ་ཞིག་གི་རིམ་གྲོར་ཟན་གྱི་བཤོས་བུ་བཏང་པ་མི་

གཅིག་གིས་བླངས་པ་ལ་འཕྱས་པས། ངན་ན་ཡང་ངན་བྱང་གསར་ཁའི་བཤོས་བུ་དེ་རང་རྙེད་པར་གྱིས་དང་ཟེར་ལོ། །དེ་བཞིན་དུ་མི་རྟག་པ་སྒོམ་པ་ལ་ཡང་ངན་ངན་པོར་བྱེད་གྱིན་འདུག་སྟེ། འདི་རྒྱུད་ལ་སྐྱེས་པ་མཛོད་དང་། དེས་ཆོག་གི་གསུངས། པོ་ཏོ་བ་ལ་དམིགས་པ་སྤོ་བར་ཞུས་ཙ་ན། སྤོ་རྒྱུ་མེད། འདི་ཁོ་ན་བསྒོམ་འདི་ལས་ཟབ་པ་མེད། ཡང་ཁྱོད་ང་བས་རྒྱུད་ཚོད་མཐོ་ན་འདིར་བསྡད་པས་མི་ཕན། ང་དང་མཉམ་ན་ང་ལ་སྣང་སེལ་ཆེན་པོ་འདིས་ཕན་པ་བྱུང་བས་ཁྱེད་ལའང་ཕན་མཆི་གསུངས། སྔགས་པ་ཞིག་གི་བུ་མོ་ཤེད་ངའི་མེ་ལོང་འདི་ཆུང་ཟེར། ཕ་ཤེད་སྔོན་དུ་བྱད་བལྟ་བ་འདི་ལ་གྱིས་དང་དེར་ཆུང་འདུག་ན་ངའི་འཁར་རྔ་ཚུགས་ལ་སོང་ཟེར་ལོ། །དེ་བཞིན་དུ་མི་རྟག་པ་ཆོས་ཆུང་ཟེར་བ་ལ། སྔོན་ལ་འདི་རྒྱུད་ལ་སྐྱེས་པ་མཛོད་དང་། དེ་ནས་གཞན་རྩད་ཆོད་གསུངས། སྔོན་རྒྱལ་པོ་ཨུ་ཏྲ་མཐའ་ཡས་ཀྱི་བཙུན་མོ་ཟླ་འོད་བྱ་བ་ཞག་བདུན་ནས་འཆི་བར་ངེས་པ་དེར་དགྲ་བཅོམ་མ་རི་མ་ཞེས་པ་ཞིག་ལ་གཏད། རབ་ཏུ་བྱུང་ནས་མི་རྟག་པ་བསྒོམ་དུ་བཅུག་པས་ཞག་བདུན་ནས་ཤི་ནས་ལྷར་སྐྱེས་བཅོམ་ལྡན་འདས་ལ་ཆོས་

མཉན་པས་བདེན་པ་མཐོང་། དེས་ན་འཕོ་བ་འམ་འཆི་ཁ་མའི་ཆོས་ལ་ཡང་འདི་ཟབ་པར་གདའ། སྔོན་བཅོམ་ལྡན་འདས་ཀྱིས་ཞི་ལྷག་གི་ཏིང་ངེ་འཛིན་མཐའ་ཡས་པ་ཞིག་ཐོབ་ཀྱང་ད་དུང་ཐར་པའི་གོ་འཕང་མ་བརྙེས་པ་ལ། ལམ་བདེན་བཞི་མི་རྟག་པ་སོགས་བཅུ་དྲུག་ཁོང་དུ་ཆུད་དེ་བསྒོམས་པས། བདུད་རྩིའི་གོ་འཕང་བརྙེས་ཟེར། དེས་ན་མི་རྟག་པ་བསྒོམས་ན། འཚང་རྒྱས་བ་ལ་ཡང་མྱུར་བ་ཡིན་པས། མྱུར་དུ་མངོན་པར་རྫོགས་པར་སངས་རྒྱས་པར་འདོད་པས་འཆི་བ་མི་རྟག་པ་བསྒོམ་པར་བྱའོ། །ཡང་རྒྱལ་སྲས་རིན་པོ་ཆེས། མདོ་ལས་མི་རྟག་པ་མང་དུ་བསྒོམས་ན་སངས་རྒྱས་ཐམས་ཅད་ལ་མཆོད་པ་བྱས་པ་ཡིན་ནོ། །སངས་རྒྱས་ཐམས་ཅད་ཀྱིས་དབུགས་དབྱུང་བ་ཡིན་ནོ། །སངས་རྒྱས་ཐམས་ཅད་ཀྱིས་ལུང་བསྟན་པ་ཡིན་ནོ། །སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་གསུངས། དེས་ན་སངས་རྒྱས་ཐམས་ཅད་ལ་མཆོད་པར་འདོད་པ་དང་དབུགས་དབྱུང་ལུང་བསྟན་བྱིན་གྱིས་བརླབ་པར་འདོད་པས་འཆི་བ་མི་རྟག་པ་བསྒོམ་པར་བྱ། སྔོན་

དྭགས་པོའི་སློབ་མའི་ཁྱུ་རྒྱན་གྲུབ་ཐོབ་རྣལ་འབྱོར་བ་ཆོས་གཡུང་བྱ་བ་ལ། ཁམས་པ་ཞིག་གིས་གོས་ཡུག་གཅིག་ཕུལ་ནས་ཆོས་ཞུས་པས་མ་གནང་། ཡང་ནན་གྱིས་ཞུས་པས། ཁོའི་ལག་པ་ནས་བཟུང་སྟེ། ང་ཡང་འཆི་ཁྱོད་ཀྱང་འཆི་བྱ་བ་དེ་ལན་གསུམ་བསྐྱར་ནས་བླ་མས་ཀྱང་དེ་ལས་གསུངས་པ་མེད། ང་ལ་ཡང་ཉམས་སུ་ལེན་རྒྱུ་དེ་ལས་མེད། ཁྱོད་རང་ཡང་དེ་སྒོམས། དེ་ལས་ལྷག་པ་ཡོད་རེ་གསུངས་ནས་དབུ་སྙུང་བཞེས། དེར་ཁམས་པས་ཀྱང་བསྒོམས་པས་གྲུབ་ཐོབ་ཅིག་བྱུང་སྐད། དེས་ན་གྲུབ་པ་ཐོབ་པར་འདོད་ན་ཡང་འཆི་བ་མི་རྟག་པ་བསྒོམ་པར་བྱ། སྔོན་ཡེར་པའི་ཞང་བཙུན་གྱིས་གཤེགས་དོགས་འབའ་ཞིག་བྱས། བསྙུན་ནད་ཅུང་ཟད་རེ་ལ་བསྙད་འདོགས་གྱིན། ད་ཆ་ཆ་གསུངས་ནས་ཡོ་བྱད་ཅི་ཡོད་ཐམས་ཅད་གཞན་ལ་བསྔོས་ནས། མེད་མི་རུང་ཅི་རིགས་ལ། མ་ཤིའི་བར་དུ་གཡར་ཆུག་གསུངས། གཤེགས་པ་ན་ལྷའི་རོལ་མོ་དི་རི་བ་ཐམས་ཅད་ཀྱིས་ཚོར་བ་བྱུང་། དེས་ན་འཆི་ཁར་ངོ་མཚར་བའི་ལྟས་འདོད་ན་ཡང་འཆི་བ་མི་རྟག་པ་སྒོམས། སྔོན་མི་ཞིག་གིས་དུར་ཁྲོད་ཅིག་ན་བུད་མེད་ཤི་བའི་རོ་ལྟོ་

དྲལ་བ་ཞིག་མཐོང་ནས། དེ་ཅི་འདྲ་བར་བུད་མེད་ཐམས་ཅད་དེ་འདྲ་ལ་རང་གི་ལུས་ཀྱང་དེ་འདྲའོ་སྙམ་ཡང་ཡང་ཡིད་ལ་བྱས་པས། དེ་ཤི་ནས་རྒྱ་གར་དུ་རྣམ་ཐོས་སྲས་ཀྱི་དཔལ་ལ་འགྲན་དུ་རུང་བའི་གཙོ་བོ་ཆེན་པོ་ཞིག་གི་སྲས་སུ་སྐྱེས། རིགས་ཀྱི་བུ་གྲགས་པ་ཞེས་བྱ་བར་གྱུར་ཏེ་ཆེར་ལོན་པ་ན་བཙུན་མོའི་འཁོར་གྱིས་བསྐོར་ཏེ་འདོད་པའི་ཡོན་ཏན་ཐམས་ཅད་དང་ལྡན་པར་གཉིད་ལོག་སད་ནས་བུད་མེད་གཉིད་ལོག་པ་རྣམས་མཐོང་བ་ན། དུར་ཁྲོད་ཅིག་ན་འདུག་པ་སྙམ་དུ་མི་གཙང་བ་དང་སྐྱུག་བྲོ་བ་དང་། ཡིད་འབྱུང་བ་དང་འཇིགས་པའི་འདུ་ཤེས་སྐྱེས་ཏེ། དེ་ཉིད་དུ་ལངས་ནས་ནམ་ལ་བྲོས་ཕྱིན་པས། བཅོམ་ལྡན་འདས་དང་མཇལ་ཆོས་མཉན་པས་བདེན་པ་མཐོང་དགྲ་བཅོམ་ཐོབ་སྐད། དེ་དང་འདྲ་བར་ད་ལྟ་མི་རྟག་པའི་བློ་ནན་གྱིས་སྦྱངས་ན་སྐྱེ་བ་ཕྱི་མར་ཡང་མི་རྟག་པ་དྲན་ནས་ཅི་ལ་ཡང་མི་ཆགས་ཆོས་མིན་པས་དགོས་པ་མེད་སྙམ་ཆོས་ཁོ་ན་བྱས་ནས་སངས་རྒྱས་ཀྱི་སར་ཐོགས་པ་མེད་པར་འགྲོ་བ་ཞིག་འོང་བས་འཆི་བ་མི་རྟག་པ་བསམ་པ་ལ་འབད་འཚལ། ཡང་ཤི་ན་ལས་ཀྱི་དབང་གིས་

འཁོར་བ་མཐོ་དམན་དུ་སྐྱེས་ནས་བདེ་སྡུག་སྣ་ཚོགས་མྱོང་བའི་ཚུལ་ལ་བསམས་ནས་དགེ་སྡིག་གི་འདོར་ལེན་བྱ་དགོས། སྔོན་ཇོ་བོ་སྟོད་མངའ་རིའི་ཡུལ་དུ་བྱོན་དུས། ལྷ་བཙུན་བྱང་ཆུབ་འོད་ཀྱིས་ཇོ་བོ་ལ་བོད་ཀྱི་ཡུལ་དུ་ཆོས་ཟབ་ཟབ་པོ་དང་མཚར་མཚར་པོ་བས་ཀྱང་རྒྱུ་འབྲས་ཀྱི་ཆོས་ཀྱིས་བསྐྱང་བར་ཞུ་ཞེས་ཞུ་བ་ཕུལ་བས། དེ་ལ་ཇོ་བོ་ཤིན་ཏུ་མཉེས་ནས་ཇོ་བོའི་ཞལ་ནས། ཆོས་ཤིན་ཏུ་ཟབ་པ་ལས་རྒྱུ་འབྲས་ཁོ་ན་ཡིན། ཡི་དམ་གྱི་ལྷའི་ཞལ་མཐོང་བ་བས། ལས་རྒྱུ་འབྲས་ལ་ཡིད་ཆེས་བརྟན་པ་ཐོབ་ན་དེ་ཉིད་མཆོག་ཏུ་གྱུར་པ་ཡིན་ཏེ། གཤིན་རྗེ་གཤེད་ཀྱི་རྣལ་འབྱོར་བ་ཡི་དམ་གྱི་ལྷའི་ཞལ་མཐོང་བས། ད་འདི་ཙམ་ལ་ལྟོས་ཏེ་སྐྱོན་མི་འོང་གིས་སྙམ་ནས། དགེ་འདུན་གྱི་ཡོ་བྱད་ཅུང་ཟད་ཐུག་ཐུབ་ཏུ་སྤྱད་པས། ཡི་དྭགས་གཤིན་རྗེ་གཤེད་ཀྱི་གཟུགས་ཅན་ཞིག་ཏུ་སྐྱེས་པ་དང་། བི་ཀ་མ་ལ་ཤཱི་ལའི་ལག་བདེ་བས། དགེ་འདུན་གྱི་དེ་རིང་གི་བསྙེན་བཀུར་ནངས་པར་དུ་བསྐྱུར་བས། དེའི་ནུབ་མོ་ཡི་དྭགས་སུ་སྐྱེས་པ་དང་། ཡང་དགེ་འདུན་གྱི་གནས་བརྟན་ཞིག་གིས་དགེ་འདུན་ལ་དབང་པོ་ཆེ་བྱས་ཏེ། འབྲས་བྲེ་ཕྱེད་ཐུག་ཐུབ་ཏུ་

སྤྱད་པ་ཡི་དྭགས་ཤིན་ཏུ་དབང་ཆུང་བར་སྐྱེས་པ་ལ་སོགས་པའི་གཏམ་རྒྱུད་མང་དུ་གསུངས། སྔོན་རྒྱལ་པོ་སེང་གེ་སྒྲའི་གྲོང་ཁྱེར་དུ་ལས་རྒྱུ་འབྲས་མེད་པར་ལྟ་བའི་མུ་སྟེགས་རྒྱང་འཕེན་པ་ཞིག་དང་། རྗེ་བཙུན་ཏེ་ལོ་བ་གཉིས་ཀྱིས་རྩོད་པ་བྱས་ཏེ་ལུང་རིགས་ཀྱིས་སུན་ཕྱུང་ཡང་། ཁོ་ན་རེ་ལས་རྒྱུ་འབྲས་དངོས་སུ་མ་མཐོང་བས་ཡིད་མི་ཆེས་ཟེར་བ་ལ། འོ་ན་ཁྱོད་རང་མིག་ཚུལ་ལ་ང་ལ་འཇུས་ཤིག་གསུངས་ནས། དམྱལ་བའི་གནས་སུ་ཁྲིད་དེ་བཙོ་བསྲེག་གི་སྡུག་བསྔལ་ཉམས་སུ་མྱོང་བ་མཐོང་བ་དང་། ཟངས་གཅིག་ན་ཁྲོ་ཆུ་ཁོལ་ཞིང་བཙོ་རྒྱུ་མེད་པ་ཞིག་འདུག་ནས་དྲིས་པས། འཛམ་བུ་གླིང་ན་རྒྱུ་འབྲས་མེད་པར་འདོད་པའི་མུ་སྟེགས་པ་མི་དགེ་སྣ་ཚོགས་སྤྱོད་པ་ཞིག་ཡོད། དེ་ཤི་ན་འདིར་འཚོད་པ་ཡིན་ཟེར་བ་བསྟན་པས་དེར་ཁོ་ན་རེ། མི་དགེ་བ་སྤྱད་པས་ངན་འགྲོར་འགྲོ་བ་བདེན་པར་འདུག་སྟེ། དཀར་པོའི་རྒྱུ་འབྲས་མ་མཐོང་ཞིང་མེད་པས་དགེ་བ་མི་སྒྲུབ་ཟེར་བ་ཡང་ངས་བསྟན་གྱིས་གསུངས་ནས། སུམ་ཅུ་རྩ་གསུམ་པའི་ལྷའི་གནས་སུ་ཁྲིད་དེ། ལྷའི་གཞལ་ཡས་ཁང་རྣམས་ན་ལྷ་ཕོ་མོ་

ཟུང་རེ་འདོད་ཡོན་ལྔའི་བདེ་བ་ལ་སྤྱོད་པ་ལ། ཁང་པ་གཅིག་ན་ལྷ་མོ་རྐྱང་པ་གཅིག་ལས་མི་འདུག་པ་ལ་དྲིས་པས། འཛམ་བུ་གླིང་ན་ལས་རྒྱུ་འབྲས་ཡོད་པར་འདོད་པ་མི་དགེ་བ་སྤོང་ཞིང་དགེ་བ་སྤྱོད་པ་ཞིག་ཡོད། དེ་ཤི་ནས་འདིར་སྐྱེ་བ་ཡིན་ཟེར་བ་དང་། མུ་སྟེགས་པ་དེ་དད་ནས་རྗེས་སུ་བཟུང་སྟེ་གདམས་པ་བསྟན་པས་སྨིན་ཅིང་གྲོལ་བར་གྱུར་ཏོ། །ཡང་རིགས་ངན་གཏུམ་པོའི་གྲོང་ཁྱེར་དུ་ཤན་པ་སྲོག་ཆགས་མང་པོ་བསད་ནས། ཁོ་རང་གི་བུ་སྨད་གསོ་བཞིག་ཡོད་པ་གདུལ་བྱར་གཟིགས་ནས་བྱོན་པ་དང་། ཁོས་སྲོག་ཆགས་མང་པོ་བསད་པའི་ཤ་འཚོད་ཅིང་ཡོད་པ་ལ། བུ་དེ་མི་སྣང་བར་བྱས་ཏེ་ཤ་རྣམས་བུའི་ཤར་བསྒྱུར་ནས། ཏེ་ལོ་པས་ཤ་བླངས་པས་ཁྲོས་ནས་མ་སྦྱིན་ཤའི་ཁ་ཕྱེ་སྟེ་བལྟས་པས། རང་གི་བུའི་ཤར་སོང་ནས་འདུག་པ་མཐོང་ནས་བྲེད་དེ་སྡུག་བསྔལ་ནས་ངུས་པས། ཁྱོད་རང་བུ་མེད་ན་སྡུག་བསྔལ་བ་ལྟར། གཞན་ཡང་བསད་ན་སྡུག་བསྔལ་བསམ་གསོད་བྱས་པས། ཁོ་ན་རེ། ངའི་བུ་བྱུང་ན་དག་མི་གསོད་ཟེར་རོ། །སྲོག་གཅོད་སྤངས་ན་བུ་ཡོད་པ་བྱ་གསུངས་བུ་གཏད་ནས། རང་གི་བྱས་པའི་སྡིག་པ་

ནི། །འབྲས་བུ་རང་ལ་སྨིན་པར་ཤེས། །ཞེས་གསུངས་ནས། ཁོ་དད་པར་གྱུར་ནས་རྗེས་སུ་བཟུང་སྟེ་གདམས་པ་བསྟན་པས་སྨིན་ཅིང་གྲོལ་བར་གྱུར་ཏོ། དེས་ན་ལས་རྒྱུ་འབྲས་འདི་ཤིན་ཏུ་བདེན་པས་ཡིད་ཆེས་ཀྱི་ངེས་ཤེས་བསྐྱེད་ནས་སྲོག་གཅོད་ལ་སོགས་པའི་མི་དགེ་སྡིག་པ་སྤོང་ཞིང་། ཚེ་ཐར་སྲོག་བླུ་སོགས་རྣམ་དཀར་དགེ་བའི་ཕྱོགས་ལ་བརྩོན་པར་བྱའོ། །སྔོན་རྒྱལ་པོ་ཆོས་ཀྱི་བླ་མ་ཞེས་བྱ་བ་དེ་མཐའ་ཡས་པའི་ཞིང་ཚེར་མ་ཅན་ཞེས་བྱ་བ་དགེ་སྡིག་གི་སྒྲ་མི་གྲག་པ་ཞིག་ཏུ་ཕྱིན་ཏེ། ཀླ་ཀློའི་མི་དེ་དག་གི་ཡིད་ལ་ཅི་དྲན་པ་བཤད་ཅིང་ལྷན་ཅིག་འགྲོགས་པས། ཁོང་ཚོ་ན་རེ། ངེད་ཀྱིས་ཅི་དྲན་པ་ཁྱེད་ཀྱིས་ཤེས་པར་འདུག་པས། གང་དག་ཅིག་ན་སངས་རྒྱས་སམ་ཅིག་ཡོད་ཟེར་བ་དེ་ཁྱོད་ཡིན་ནམ་ཟེར་བ་ལ་ཡིན་སྨྲས་སོ། །ཁོང་རྣམས་ན་རེ། ཁྱེད་འདིར་ཅི་ལ་འོང་ཟེར་བ་ལ། ཁྱེད་ཅག་ལ་ཆོས་འཆད་དུ་འོང་བྱས་པས། ཆོས་ཀྱིས་ཅི་བྱེད་ཟེར། ཆོས་མེད་ན་ངན་སོང་དུ་སྐྱེའོ་སྨྲས་པ་དང་། ཁོ་ཅག་ན་རེ། ཆོས་དང་ངན་སོང་སྟོན་དང་ཟེར། དེར་སྤྲུལ་པའི་དམྱལ་བ་བསྟན་པས། འདི་རེ་སྡུག་ཟེར།

ཁྱེད་རང་ཡང་འདི་འདྲར་སྐྱེ་སྨྲས་པས། ཅིའི་ཕྱིར་སྐྱེ་ཟེར། སྲོག་བཅད་པ་ལས་སྐྱེ་སྨྲས་པས། འོ་ན་སྲོག་མི་གཅོད་ཟེར་རོ། །ཡི་དྭགས་བསྟན་པས་འདི་ཅི་ལས་བྱུང་ཟེར། སེར་སྣ་བྱས་པ་ལས་བྱུང་སྨྲས་པས། སེར་སྣ་མི་བྱེད་ཟེར། བྱོལ་སོང་བསྟན་པས་འདི་ཅི་ལས་བྱུང་ཟེར། འདི་ལོག་ལྟ་ལས་བྱུང་སྨྲས་པས། ལོག་ལྟ་མི་བྱེད་ཟེར། ལྷ་མ་ཡིན་འཐབ་རྩོད་བསྟན་པས། འདི་ཅི་ལས་བྱུང་ཟེར། འདི་ཕྲག་དོག་བྱས་པ་ལས་བྱུང་བ་ཡིན་སྨྲས་པས། ཕྲག་དོག་མི་བྱེད་ཟེར། ལྷའི་གཟུགས་དང་ལོངས་སྤྱོད་བསྟན་པས། འདི་རེ་དགའ་ཟེར། འདི་དག་དགེ་བ་སྤྱད་པ་ལས་བྱུང་ངོ་སྨྲས་པ་དང་། ངེད་ཅག་ཀྱང་དགེ་བ་སྤྱོད་དོ་ཟེར་ནས་ཆོས་ལ་ཚུད་དོ། །དེས་ན་ལས་རྒྱུ་འབྲས་ཀྱི་ཆོས་ལ་ཡིད་ཆེས་པར་བྱས་ནས། སྲོག་གཅོད་པ་དང་། སེར་སྣ་དང་། ལོག་ལྟ་དང་། ཕྲག་དོག་སོགས་མི་བྱེད་པར་མཆོད་སྦྱིན་སོགས་རྣམ་དཀར་དགེ་ཆོས་ལ་བརྩོན་པར་བྱའོ། །སྔོན་ཤན་པ་སྲོག་གཅོད་ཀྱི་གླིང་ན། ཤན་པ་དམར་རུ་རྩེ་དང་། དཀར་རུ་རྩེ་ཞེས་བྱ་བ་གཉིས་དགའ་མཐུན་བྱས་ཏེ། ཉིན་རེ་བཞིན་ལུག་རེ་དང་ཕག་རེ་གསོད་པ་

ལ། ཉིན་ཅིག །ལུག་གཅིག་མིག་ཅེར་རེ་བལྟ་ཞིང་ཕག་གིས་ཀྱང་སྐད་ངན་བཏོན་པས། དམར་རུ་རྩེ་ཁྲོས་ནས་ལུག་གི་མིག་ཏུ་ས་བཏབ། ཕག་གི་ལྕེ་བཅད་ནས་བསད་པས་དམྱལ་བར་སྐྱེས་སོ། །དཀར་རུ་རྩེས་སྙིང་རྗེ་སྐྱེས་ནས་གསོད་མ་ཕོད་པར་ནགས་ཁྲོད་ཅིག་ཏུ་བསྡད་པས། དེར་ཁོ་ལྟོགས་ནས་སྔོ་ཞིག་ཟོས་པས་སྔོ་སྨན་དེའི་ནུས་པས་རི་ཁ་ཞིག་ཏུ་འཕུར་ནུས་པ་བྱུང་། དེ་རྔོན་པ་ཞིག་གིས་མཐོང་ནས་རྒྱལ་པོ་ལ་སྨྲས་པས། རྒྱལ་པོ་དེ་ལ་ངོ་མཚར་སྐྱེས་ནས་བྱ་དགའ་མང་པོ་བྱིན་ནོ། །དེ་ལ་ལྷ་ཚངས་པ་ཡ་མཚན་སྐྱེས་ནས་ཚིགས་སུ་བཅད་དེ་སྨྲས་པ། སྲོག་གཅོད་སྡིག་པ་བྱས་པ་ཡི། །རྣམ་སྨིན་མངོན་དུ་སྣང་བ་ནི། །དམར་རུ་རྩེ་ནི་དམྱལ་བར་ལྷུང་། །དཀར་རུ་རྩེ་ནི་མཐོ་རིས་སོང་། །དགེ་སྡིག་ལས་འབྲས་དེ་འདྲ་བ། །མངོན་སུམ་སྣང་བ་ཡ་མཚན་ཆེ། ཟེར་རོ། །དེས་ན་སྲོག་གཅོད་པ་སྤངས་ཏེ་ཚེ་ཐར་གཏོང་དགོས། ཡང་མ་བྱིན་ལེན་པ་རྐུན་མའི་གླིང་ན། རྐུན་མ་མང་པོ་ཁྱིམ་བདག་དཔའ་བོ་ཞེས་བྱ་བའི་མཛོད་དུ་རྐུར་ཕྱིན་པས། ཟླ་བོ་རྣམས་ཀྱིས་ནོར་མང་པོ་ཁུར་བས།

ནང་ནས་རྐུན་མ་དགའ་བོ་ཞེས་བྱ་བའི་བསམ་པ་ལ། ཁྱིམ་བདག་གིས་དཀོན་མཆོག་ལ་བསྔོས་པའི་ནོར་ལ་འདི་ལྟར་འཛིན་ཆགས་ཀྱིས་རྐུ་བ་མཚང་ཆེ་སྙམ་གད་མོ་ཆེན་པོ་ཞིག་ཤོར་བ་ཁྱིམ་བདག་གིས་ཚོར་ཡང་ཁོ་ལ་ཅི་ཡང་མ་བྱས། གཞན་ཟླ་བོ་རྣམས་དེད་པའི་ཚེ། ཤིང་གི་ལྷ་མོ་འོད་འཆང་མས་ལུང་བསྟན་ནས། ཁྱིམ་བདག་གིས་གསེར་གྱི་གཏེར་རྙེད་དེ་ཕྱུག་པོར་གྱུར་ཏོ། །དེ་ལ་ངོ་མཚར་ནས་ལྷའི་དབང་པོ་བརྒྱ་བྱིན་གྱིས་སྨྲས་པ། དགེ་བའི་བསོད་ནམས་མཐུ་ཡིས་ནི། །དཔའ་བོ་ཁྱིམ་བདག་གསེར་དང་ལྡན། །རྐུན་མ་དགའ་བོ་མཐོ་རིས་སྐྱེས། །ཟླ་བོ་གཞན་མ་ངན་སོང་ལྷུང་། །ཨེ་མ་ཤིན་ཏུ་ངོ་མཚར་ཆེ། །མ་བྱིན་ལེན་སྤོངས་སྦྱིན་པ་ཐོངས། །ཟེར་རོ། །དེས་ན་མ་བྱིན་པ་ལེན་པ་སྤངས་ནས་སྦྱིན་པ་མང་པོ་གཏོང་དགོས། ཡང་འདོད་ལོག་སྤྱོད་པ་སྨད་འཚོང་མའི་གླིང་ན། སྨད་འཚོང་མ་དག་འབྱིན་མ་དང་། གསལ་བའི་འོད་ཅེས་བྱ་བ་གཉིས་ཡོད་པའི། གསལ་བའི་འོད་ན་རེ། འདི་ལྟར་ངོ་ཚ་ལ་སྐྱུགས་བྲོ་བ། སྡིག་ཆེ་ལ་ཚིམ་པ་མེད་པ། འདི་འདྲ་བའི་ལས་བྱེད་པ་ཟེར་ནས་སངས་རྒྱས་ཀྱི་དྲུང་དུ་ཕྱིན་ཏེ།

ཚངས་སྤྱོད་ཀྱི་སྡོམ་པ་བླངས་ནས་བསྲུངས་པས་ལྷའི་བུ་རིན་ཆེན་འོད་ཅེས་བྱ་བར་སྐྱེས་སོ། །དག་འབྱིན་མ་འདོད་པ་ལ་ཤིན་ཏུ་ཆགས་ཏེ། མཉམ་པོར་དགའ་བ་ལ་རིན་ཐང་གཞན་གྱིས་སྟེར། འདི་ལས་ལྷག་པ་གང་ན་ཡོད་སྙམ་ནས་འདོད་ལོག་སྤྱད་པས། ཡི་དྭགས་ཀྱི་མངལ་ངན་སྐྱུགས་ཀྱི་འདམ་དུ་སྐྱེས་པས། དེ་ལ་ཡ་མཚན་ནས་ལྷའི་བུ་རིན་ཆེན་སྙིང་པོས་ཚིགས་སུ་བཅད་དེ་སྨྲས་པ། འཁོར་བའི་རྩ་བ་འདོད་ཆགས་ཏེ། །སྤངས་པས་འོད་གསལ་ལྷ་རུ་སྐྱེས། །སྤྱད་པས་དགའ་བྱིན་ཡི་དྭགས་ལྷུང་། །འདི་ཡང་ཡ་མཚན་ངོ་མཚར་ཆེ། །འདོད་ལོག་སྤོངས་ལ་ཚངས་སྤྱོད་སྲུངས། །ཟེར་རོ། དེས་ན་འདོད་པས་ལོག་པར་གཡེམ་པ་སྤངས་ནས་ཚངས་སྤྱོད་ཀྱི་སྡོམ་པ་བསྲུང་དགོས། ཡང་རིགས་ངན་རྫུན་དུ་སྨྲ་བའི་གླིང་ན། རིགས་ངན་རྫུན་པོ་ཆེ་ཞེས་བྱ་བ་དང་། བྲམ་ཟེ་རྫུན་མེད་ཅེས་བྱ་བ་གཉིས་ཀྱིས་རྒྱལ་པོའི་མ་ཧེ་སྟོང་ཁྱུ་ཞིག་འཚོས་པས། མ་ཧེ་རྣམས་ཀྱི་ནང་ན་ཁྱུ་མཆོག་རྟ་རི་ཞེས་བྱ་བ་རྩྭའི་ཕུད་ཟ་བ། ཆུའི་ཕུད་འཐུང་བ། འགྲོ་བའི་སྣ་འདྲེན་པ། སྡོད་པའི་མཇུག་བསྡུད་པ། སྤོ་མཐོ་ལ་

བསྡད་ནས་དགྲ་དང་གཅན་གཟན་གྱི་བྱ་ར་བྱེད་པ་ཞིག་ཡོད་པ་ལ་རྫི་བོ་གཉིས་ཀྱིས་དེ་བསད་ནས་ཟོས་པ་ལ། དེར་རིགས་ངན་ན་རེ། ངེད་རང་གཉིས་ལ་རྒྱལ་པོས་ཆད་པ་འོང་བས། ཁྱུ་མཆོག་རྟ་རི་བ་རྦབ་ལ་ལྷུངས་ནས་ཤི་གྱིས་ཤིག་ཟེར་རོ། །བྲམ་ཟེ་ན་རེ། ངས་སྐྱེས་ནས་རྫུན་བྱེད་མ་མྱོང་བས། ད་ཡང་རྫུན་མི་ཤེས་སོ་ཟེར་སྐད། དེར་རྒྱལ་པོས་ཁྱུ་མཆོག་རྟ་རི་འཚོ་འམ་ཟེར་བ་ལ། བྲམ་ཟེས་ཁྱུ་མཆོག་ངེད་གཉིས་ཀྱིས་བསད་ནས་ཟོས་སོ་བྱས། རིགས་ངན་གྱིས་རྦབ་ལ་ལྷུངས་ནས་ཤི་ཞེས་རྫུན་བྱས་པས་ལྕེ་བཅད་དོ། །དེ་ལ་ཡ་མཚན་ནས་ལྷ་དབང་ཕྱུག་ཆེན་པོས་ཚིགས་སུ་བཅད་དེ་སྨྲས་པ། རྫུན་ལས་ལྡོག་ནས་བདེན་པ་སྨྲས། །བྲམ་ཟེས་བྱ་དགའ་མཐོ་རིས་ཐོབ། །རིགས་ངན་ལྕེ་བཅད་ངན་སོང་ལྷུང་། །དེ་བས་རྫུན་སྤོངས་བདེན་པར་སྨྲོས། །ཟེར་རོ། །དེས་ན་རྫུན་སྤངས་ནས་བདེན་པར་སྨྲ་དགོས། ཡང་ཚིག་རྩུབ་ཨག་ཙར་དུ་སྨྲ་བའི་གླིང་ན། ཁྱིམ་བདག་ནག་པོ་བརྩེགས་པ་ཞེས་བྱ་བ་ཚིག་རྩུབ་མོ་ཤ་སྟག་སྨྲ་བ་ཞིག་དང་། བྲམ་ཟེ་པདྨའི་ངང་ཚུལ་ཅན་ཞེས་བྱ་བ་ངག་འཇམ་པོར་སྨྲ་བ་ཞིག་ཡོད་པས། བྲམ་ཟེས་ཁྱིམ་

བདག་ལ་དེ་སྐད་མ་ཟེར། མཚོན་གྱི་རྨ་ནི་འཚོ་བ་ཡིན། །ཚིག་ངན་རྨིན་འཚོ་མ་ཡིན། །སྨྲས་པས། ཁྱིམ་བདག་ན་རེ། ཚིག་རྩུབ་ཁ་དྲག་གི་ཁ་ནོན་ཡིན། ང་ལ་སུས་ཀྱང་ཚིག་ལྡོག་མི་ནུས་ཟེར་ནས། ཚིག་རྩུབ་དང་ཨག་ཙར་ཉི་ཚེ་སྨྲས་པས། ཡུལ་པ་ཁ་ལོག་སྟེ་ཁྱིམ་ཕྲོགས་ནས། བྲམ་ཟེ་ལ་བྱིན་ནོ། །དེར་དྲི་ཟའི་རྒྱལ་པོ་ཟུར་ཕུད་ལྔ་པ་ངོ་མཚར་སྐྱེས་ནས་ཚིགས་སུ་བཅད་དེ་སྨྲས་པ། ཚིག་རྩུབ་ཀུན་གྱི་ཞེ་བཟློག་པ། །སྨྲས་པས་ཁྱིམ་བདག་ཡུལ་དང་བྲལ། །ངག་འཇམ་ཀུན་གྱི་ཡིད་དང་མཐུན། །བྲམ་ཟེ་ནོར་ལྡན་ངོ་མཚར་ཆེ། །ཨེ་མ་ངོ་མཚར་ཤིན་ཏུ་ཆེ། །ཚིག་རྩུབ་སྤོངས་ལ་ངག་འཇམ་སྨྲོས། །ཟེར་རོ། །དེས་ན་ཚིག་རྩུབ་མོ་སྤངས་ནས་ངག་འཇམ་པོ་སྨྲར་དགོས། ཡང་ངག་འཁྱལ་ཅལ་ཅོལ་དུ་སྨྲ་བའི་གླིང་ན། མགར་བ་མུ་ཅོར་དུ་སྨྲ་བ་ཞེས་བྱ་བ་ངག་འཁྱལ་ཅི་རུང་རུང་དུ་སྨྲ་བ་ཞིག་དང་། འབའ་རོ་གྲགས་པ་སེང་གེ་ཞེས་བྱ་བ་དོན་དང་ལྡན་པའི་གཏམ་ཉི་ཚེ་སྨྲ་བ་ཞིག་ཡོད་པ་ལས། མགར་བའི་ཁྱིམ་དུ་དགེ་སློང་ཉི་མའི་འོད་ཟེར་ཞེས་བྱ་བ་ཞིག་ཕྱིན་པས། མགར་བས་ངག་འཁྱལ་ཅི་

རུང་རུང་སྨྲས་པས། འབའ་རོས་མགར་བ་ལ་བབ་ཅོལ་དུ་མ་སྨྲ། དགེ་སློང་རང་ཡང་བྲང་ཁང་དུ་གཤེགས་འཚལ་བྱས་པས། དགེ་སློང་ལ་འཚོ་བ་མ་དྲངས་པར་ངག་འཁྱལ་བ་བརྗོད་པས། དགེ་སློང་ཁམས་ལོག་སྟེ་རྦབ་ལ་བྲུལ་ཏེ་གྲོངས་སོ། །དེར་རྒྱལ་པོས་ངའི་མཆོད་གནས་འདི་ཙུག་ལ་འགྲོ་བ་ཅི་ཡིན་ཟེར། །འབའ་རོས་ལོ་རྒྱུས་ཞིབ་ཏུ་སྨྲས་པས་འབའ་རོལ་བྱ་དགའ་སྦྱིན། མགར་བའི་ལྕེ་བཅད་དོ། །དེར་ལྷའི་དྲང་སྲོང་སྐར་མདའ་གདོང་གིས་ཚིགས་སུ་བཅད་དེ་སྨྲས་པ། ངག་འཁྱལ་སྨྲ་བ་སྨྱོན་པ་འདྲ། །མགར་བ་མུ་ཅོར་ལྕེ་དང་བྲལ། །འབའ་རོ་ནོར་དང་བྱ་དགའ་ཐོབ། །རྣམ་སྨིན་འཕྲལ་བྱུང་ངོ་མཚར་ཆེ། །ངག་འཁྱལ་སྤོངས་ལ་དོན་དམ་སྨྲོས། །ཟེར་རོ། །དེས་ན་ངག་འཁྱལ་སྤངས་ནས་དོན་དང་ལྡན་པ་སྨྲ་དགོས། ཡང་ཕྲ་མ་འབྱེད་བྱེད་ཀྱི་གླིང་ན། ཕྲ་མ་སྨྲ་བ་དགའ་བྱེད་ཅེས་བྱ་བ་ཕྲ་མ་མང་པོ་བྱེད་པ་ཞིག་ཡོད་པ་དེས། འབའ་རོ་ཡུལ་དཔོན་ཞེས་བྱ་བ་ལོངས་སྤྱོད་ལྡན་པ་ཞིག་ཡོད་པ་དང་། ཡུལ་དེའི་རྒྱལ་པོ་གཉིས་ཀྱི་བར་དུ་ཕྲ་མ་བཅུག་སྟེ། རྒྱལ་པོའི་རྩར་ཕྱིན་ནས་འབའ་རོས་རྒྱལ་པོ་བས་ནོར་ང་ཆེ་འཁོར་

ང་བཟང་རྒྱལ་པོ་ལ་བདོས་ཀྱང་ཐུབ་བོ་ཟེར་གྱིན་འདུག་ཅེས་ཕྲ་མ་བསྐྱལ་བས། རྒྱལ་པོ་དང་འབའ་རོ་འཁྲུག་པ་ཆེན་པོ་ཤོར་ཏེ་འཐབ་བོ། །ཡུལ་དེ་ན་བྲམ་ཟེ་མཛའ་བོ་ཞེས་བྱ་བ་འཐབ་པ་ཐམས་ཅད་སྡུམ་པར་བྱེད་པ་ཞིག་ཡོད་པ་དེས། རྒྱལ་པོ་དང་འབའ་རོ་གཉིས་བསྡུམས་བྱས་ཏེ་རྒྱལ་ཁམས་བདེ་བ་ལ་བཀོད་དོ། །རྒྱལ་པོ་དང་འབའ་རོ་གཉིས་ཀྱིས་ཕྲ་མ་ཡིན་པར་ཤེས་ནས་ཕྲ་མ་མཁན་གྱི་ལྕེ་བཅད། བྲམ་ཟེ་ལ་ཁོང་གཉིས་ཀྱིས་གསེར་སྲང་བརྒྱ་རྩ་རེ་བྱིན་ནོ། །དེར་ཡ་མཚན་སྐྱེས་ནས་མིའམ་ཅིའི་རྒྱལ་པོས་ཚིགས་སུ་བཅད་དེ་སྨྲས་པ། ཕྲ་མ་གཞན་འབྱེད་རྣམ་སྨིན་གྱིས། །ལྕེ་བཅད་ངན་སོང་གནས་སུ་ལྷུང་། །བྲམ་ཟེ་མཛའ་བོ་སྡུམ་མཁན་དེས། །གསེར་སྲང་ཉིས་བརྒྱའི་བྱ་དགའ་ཐོབ། །རྣམ་སྨིན་འཕྲལ་བྱུང་ངོ་མཚར་ཆེ། །ཕྲ་མ་སྤོངས་ལ་འཐབ་རྩོད་སྡུམས། །ཟེར་རོ། །དེས་ན་ཕྲ་མ་སྤངས་ནས་འཐབ་རྩོད་བསྡུམ་དགོས། ཡང་བརྣབ་སེམས་འདོད་པའི་གླིང་ན། ཁྱིམ་བདག་འོད་གསལ་ཞེས་བྱ་བ་ཤིན་ཏུ་ཕྱུག་པ། རང་གི་ནོར་ལ་ཤིན་ཏུ་ཆགས་པ། གཞན་གྱི་ནོར་ལ་ཡང་ཁྲམ་དང་གཡོ་རྒྱུའི་

འབྲལ་བ། ཁྱད་པར་དཀོན་མཆོག་གི་ནོར་ལ་ཆགས་པ་ཞིག་དང་། ལི་ཙ་བྱི་དྲི་མ་མེད་པར་གྲགས་པ་ཞེས་བྱ་བ་ཆགས་པ་དང་བྲལ་བ་ཞིག་ཡོད་པས་ཁྱིམ་བདག་ལ་སྨྲས་པ། འདི་ཙམ་གྱི་ནོར་འདུག་བཞིན་དུ་ཆོག་ཤེས་མེད་པར་གཞན་གྱི་ནོར་ལ་བརྣབ་པ། ཁྱད་པར་དཀོན་མཆོག་གི་ནོར་ལ་བརྣབ་སེམས་བྱེད་པ་འཇིག་རྟེན་འདིར་ཡང་བཀྲ་མི་ཤིས། ཕྱི་མར་ངན་སོང་དུ་ལྟུང་བར་འགྱུར་རོ་བྱས་ཀྱང་མ་ཉན་པར་གཞན་གྱི་ནོར་དང་ཁྱད་པར་དཀོན་མཆོག་གི་དཀོར་ལ་བརྣབ་སེམས་ཆེན་པོ་བྱས་པའི་འབྲས་བུས་ནོར་ཐམས་ཅད་དམག་གིས་འཕྲོག །སྙིང་མ་ཧཱ་ཀ་ལས་བཏོན་ནས་བསད་པས། ཚེ་ཕྱི་མ་ལ་ཡི་དྭགས་སུ་སྐྱེས་སོ། །ལི་ཙ་བྱི་ལ་རྒྱལ་ཁམས་ཀྱི་མིས་བསྙེན་བཀུར་བྱས་ནས་ནོར་ལ་ཟད་པ་མ་བྱུང་ངོ་། །དེ་ལ་ཡ་མཚན་ནས་སའི་ལྷ་མོ་བསྟན་མས་སྨྲས་པ། ཆོག་མི་ཤེས་པའི་འདོད་པ་ལས། །འདིར་སྡུག་ཕྱི་མར་ངན་སོང་མྱོང་། །ཆགས་ཞེན་མེད་པའི་ལི་ཙ་བྱི། །བདེ་ཞིང་ཕྱུག་པ་ངོ་མཚར་ཆེ། །བརྣབ་སེམས་སྐྱུངས་ལ་འདོད་ཡོན་སྤོངས། །ཟེར་རོ། །དེས་ན་བརྣབ་སེམས་སྤངས་ནས་འདོད་ཆུང་ཆོག་ཤེས་བྱེད་དགོས།

ཡང་གནོད་སེམས་བརྡུང་འཚོག་གི་གླིང་ན། གྱད་ཟླ་བ་བཟང་པོ་ཞེས་བྱ་བ་ཐམས་ཅད་ལ་བརྡུང་ཞིང་འཚོག་པ་ཞིག་དང་། ལྷའི་བུ་གསེར་གཟུངས་ཞེས་བྱ་བ་བྱམས་པ་དང་ལྡན་པ་ཞིག་ཡོད་པས། གྱད་ཟླ་བ་བཟང་པོས་དུས་རྒྱུན་དུ་གཞན་ལ་གནོད་སེམས་རང་བྱས་པའི་རྐྱེན་གྱིས་གཤིན་རྗེའི་ཕོ་ཉས་ཁྲིད་ནས་དམྱལ་བར་སྐྱེས་སོ། །ལྷའི་བུ་གསེར་གཟུངས་ནི་དུས་རྒྱུན་དུ་སེམས་ཅན་ལ་བྱམས་པ་དང་ལྡན་པས་མངོན་སུམ་དུ་ལྷ་ཡུལ་དུ་སྤྱན་དྲངས་སོ། །དེའི་ཚེ་ལྷའི་དབང་ཕྱུག་རྣམ་ཐོས་སྲས་ཀྱིས་སྨྲས་པ། ཀུན་ལ་གནོད་སེམས་ལྡན་པ་ཡི། །གྱད་ནི་མངོན་སུམ་གཤིན་རྗེས་ཁྲིད། །བྱམས་པ་ལྡན་པའི་གསེར་གཟུངས་ནི། །ལྷ་གནས་སྤྱན་དྲངས་ངོ་མཚར་ཆེ། །གནོད་སེམས་སྤོངས་ལ་བྱམས་སེམས་སྐྱེད། །ཟེར་རོ། །དེས་ན་གནོད་སེམས་སྤངས་ནས་བྱམས་སྙིང་རྗེ་བསྐྱེད་དགོས། ཡང་ལོག་ལྟ་མུ་སྟེགས་ཀྱི་གླིང་ན། མུ་སྟེགས་འོད་སྲུངས་རྫོགས་བྱེད་ཅེས་བྱ་བ་ཚེ་སྔ་ཕྱི་མེད། དཀོན་མཆོག་རྫུན་ཡིན་ཟེར་རང་ཡང་དེ་ལྟར་བསམ་ལ་གཞན་ལ་ཡང་དེ་ལྟར་སྟོན་པ་ཞིག་དང་། དགེ་སློང་སེང་གེ་

ཞེས་བྱ་བ་དང་པོ་བྱང་ཆུབ་མཆོག་ཏུ་སེམས་བསྐྱེད་པ། བར་དུ་དཀོན་མཆོག་གསུམ་ལ་སྐྱབས་སུ་འགྲོ་བ། ཐ་མར་ཡང་དག་པར་རྫོགས་པའི་སངས་རྒྱས་འཐོབ་པར་སྨོན་ལམ་འདེབས་པ་ཞིག་ཡོད་པས། མུ་སྟེགས་ལྟ་བ་ལོག་པའི་སྐྱོན་གྱིས་དམྱལ་བར་སྐྱེས་སོ། །དགེ་སློང་དཀོན་མཆོག་ལ་མོས་པའི་བྱིན་རླབས་ཀྱིས་བདེ་བ་ཅན་གྱི་ཞིང་ཁམས་སུ་སྐྱེས་སོ། །དེའི་ཚེ་བྱང་ཆུབ་སེམས་དཔའ་རྡོ་རྗེ་སྙིང་པོས་སྨྲས་པ། རྫུ་འཕྲུལ་ལྡན་པའི་མུ་སྟེགས་རྫོགས་བྱེད་ཀྱང་། །མངོན་སུམ་ཉིད་དུ་དམྱལ་བའི་གནས་སུ་སྐྱེས། །ལོག་པར་འཛིན་པ་ཐམས་ཅད་སྙིང་རེ་རྗེ། །ཡང་དག་ལྡན་པའི་དགེ་སློང་སེང་གེ་ནི། །དཀོན་མཆོག་གསུམ་ལ་མོས་གུས་བྱས་པ་ཡིས། །ནུབ་ཕྱོགས་བདེ་བ་ཅན་གྱི་ཞིང་ཁམས་སུ། །སྐྱེས་པ་ཡ་མཚན་ངོ་མཚར་ཤིན་ཏུ་ཆེ། །ལོག་ལྟ་སྤོངས་ལ་ཡང་དག་ལྟ་ལྡན་མཛོད། །ཟེར་རོ། །དེས་ན་ལོག་ལྟ་སྤངས་ནས་ཡང་དག་ལྟ་བ་དང་ལྡན་པར་བྱ་དགོས། གཞན་ཡང་སྔོན་མ་དམ་པ་རྒྱ་གར་གྱིས་ཉིན་གཅིག་ཐུགས་དམ་ལ་བཞུགས་དུས། ཨ་ཚ་ལ་སོགས་པའི་སྒྲ་ལུང་པ་གང་བ་ཙམ་གསན་འོད་གསལ་གྱི་ངང་ནས་

བལྟས་པས། དིང་རི་གླང་འཁོར་གྱི་གྲྭ་བཙུན་རྣམས་ཀྱིས་ཤིག་ཡོད་པའི་དུག་ཧྲུལ་ཉི་མ་ལ་བཞག་པའི་ནང་གི་ཤིག་ཉི་མས་ཚིག་པ་ཡིན་པ་མཁྱེན་ནས། གྲྭ་བཙུན་རྣམས་བོས་ཏེ། ཁྱེད་རྣམས་དམྱལ་བར་འགྲོ་བ་ལ་གཞན་མི་དགོས་པར་གདའ། ཤིག་ཡོད་པའི་དུག་པོ་ཉི་མ་ལ་བཞག་པ་འདི་ཁོ་ནའི་ཆོག་པར་གདའ་གསུངས། དེ་ནས་བཟུང་གྲྭ་བཙུན་རྣམས་ཀྱིས་ཤིག་ཡོད་པའི་གོས་ཉི་མ་ལ་ཡང་མི་འཇོག་པ་བྱུང་། དེས་ན་རང་གི་ལུས་ཀྱི་ཤིག་ཡན་ཆད་མི་གསོད་པར་སྡིག་པ་ཆུང་ངུ་ལ་ཡང་འཛེམས་དགོས། ཡང་ཕ་དམ་པའི་ཞལ་ནས། ཁྱེད་དིང་རིའི་རྒན་རྒོན་ཕལ་ཆེར་དམྱལ་བར་འགྲོ་བ་ལ་གཞན་མི་དགོས། ཁ་ཁོ་ནའི་ཆོག་པར་གདའ་གསུངས། རྒད་པོ་ཞིག་ན་རེ། ངེད་ཚོའི་ཁ་འདིས་དམྱལ་བའི་རྒྱུ་ཅི་ལྟར་སྒྲུབ་པར་གདའ་ཞུས་པས། ཁྱེད་རྣམས་འཆི་ལ་ཉེ་ཡང་མ་ཎི་བགྲང་རྒྱུ་བཞག་ནས། ད་དུང་ལུག་གཅིག་གསོད་ཀྱང་ཀ་གསོད་རོག་གྱིས་ཟེར་ཇུས་ཉེས་གཏོང་། ནང་མི་ཁྱིམ་མཚེས་རྣམས་ལ་ཚིག་ངན་མང་པོ་རྒྱག་པ་འདི་ལགས་མོད་གསུངས་པས། དེ་ནས་བཟུང་རྒན་རྒོན་རྣམས་ཀྱི་ཁ་

འཇམ་དུ་སོང་སྐད། ཡང་རྒད་པོ་གཅིག་ན་རེ། ཁྱེད་ཀྱིས་ཆོས་ཁོ་ན་གསུངས་པ་ལས། སྐབས་རེ་སྒྲུང་དང་གཏམ་རྒྱུད་སོགས་འཇིག་རྟེན་པའི་གཏམ་རེ་ཡང་གསུངས་ན་ལགས་ཞུས་པས། ཕ་དམ་པ་ཐུགས་ཁྲེལ་ཏེ། རྒད་པོ་ཁྱོད་ཀྱི་ཁ་ལ་རུལ་དྲི་མི་ཁའམ་གསུངས་པས། མི་བྲོ་ལགས་ཅི་ཡིན་ནམ་ཞུས་པས། ཁྱོད་ཀྱི་ཁོག་གི་སྙིང་དེ་རུལ་ཡོད་པའི་ཚོད་རེད་གསུངས། དེ་ནས་བཟུང་དིང་རིའི་རྒན་རྒོན་སྙིང་རུལ་བ་ཚོ་གསུངས། རྗེས་སུ་སྐུ་མདུན་དུ་སོང་ན། ཁོང་གིས་སྒྲུབ་ཁང་གི་སྒོ་རྒྱབ་ནས་ནང་དུ་མི་གཏོང་། སྒོ་ན་བཞུགས་དུས་སོང་ན། ན་བཟའི་དབུ་བཏུམ་ནས་བཞུགས། ཞལ་མཇལ་གསུང་ཐོས་དགོས་ཞུས་པའི་ཚེ། ཞལ་མཇལ་རྒྱུ་ཅི་ཡོད། ཨ་ཙ་ར་རྒད་པོ་དེ་ལགས་མོད། ངས་ཆོས་མ་གཏོགས་འཇིག་རྟེན་པའི་གཏམ་ནི་མི་ཤེས། ནམ་འཆི་ཆ་མེད་ལ་ལོང་གཏམ་ལབ་ཁོམ་མེད། ཁྱེད་དིང་རིའི་རྒན་རྒོན་སྙིང་རུལ་པ་ཚོ། འཆི་བ་མི་ཡོང་པས་མ་ཎི་མ་བགྲང་། ཉི་ཕུག་དྲོས་ནས་ལོང་གཏམ་ལོ་བ་གསུངས། དེས་ན་འཆི་བ་བསམས་ནས་ཆོས་གཞན་མ་ནུས་ཀྱང་། མ་ཎི་རེམས་ནས་བགྲང་དགོས། སྔོན་སངས་རྒྱས་

ཀྱིས་ལྗགས་ཀྱི་དབང་པོ་ཕྱུང་སྟེ་ཞལ་གྱི་དཀྱིལ་འཁོར་མངོན་པར་བཀབ་བོ། །དེ་ནས་རིམ་པ་བཞིན་དབུ་དང་སྐུ་དང་། སེང་གེ་ཁྲི་དང་། འཁོར་རྣམས་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་མངོན་པར་བཀབ་བོ། །དེ་ནས་ལྗགས་ཀྱི་དབང་པོ་ཕྱིར་བསྡུས་ཏེ་བཀའ་སྩལ་པ། རིགས་ཀྱི་བུ་འདི་འདྲ་བའི་ལྗགས་ཀྱིས་དེ་བཞིན་གཤེགས་པ་རྣམས་རྫུན་གསུངས་པར་མི་འགྱུར་གྱིས། ཁྱེད་རྣམས་དད་པར་གྱིས་ཤིག་གསུངས། དེས་ན་སངས་རྒྱས་ཀྱིས་རྫུན་མི་གསུངས་པའི་རྟགས་སུ། ལྗགས་ཀྱང་དེ་ལྟར་མངའ་བས་གསུང་ལ་ཡིད་ཆེས་ཀྱི་དད་པ་བསྐྱེད་དགོས། སྔོན་ཉེ་གནས་ལེགས་པའི་སྐར་མས། མུ་སྟེགས་གཅེར་བུ་སྡུག་བསྔལ་འགྱུར་བྱ་བ་དེ་དགྲ་བཅོམ་པ་ཡིན་ཟེར་བ་ལ། སངས་རྒྱས་བཅོམ་ལྡན་འདས་ཀྱིས་གླེན་པ་འདི་ནི་ད་ནས་ཞག་བདུན་ནས། མ་ཞུ་བའི་ནད་ཀྱིས་ཤི་ནས་རྒྱལ་པོའི་ཁབ་ཀྱི་ཕྱི་ས་ཁུང་དུ་སྐྱུགས་པ་ཟ་པའི་ཡི་དྭགས་སུ་སྐྱེ་བར་འགྱུར་ན། དགྲ་བཅོམ་པ་དེ་ལྟར་འགྱུར་རམ་གསུངས་པས། ཁོ་སྡུག་བསྔལ་འགྱུར་གྱི་དྲུང་དུ་སོང་ནས་ཁྱོད་ལ་བཅོམ་

ལྡན་འདས་ཀྱིས་འདི་སྐད་ཟེར་བས་ཟོན་གྱིས་ཤིག་བྱས་པས། དེས་ཟོན་བྱས་ཏེ་ཞག་དྲུག་ལྟོགས་པར་བསྡད་པས། ལྟོགས་ཆེས་ནས་བུ་རམ་ཞིག་ཟོས་ཆུ་བཏུངས་པས་དེ་ཉིད་མ་ཞུ་ནས་ཞག་བདུན་པ་ལ་ཤི་སྟེ། དེར་སྐྱེས་པ་དང་། ལེགས་པའི་སྐྲ་མ་མཚན་མོ་དོན་ཞིག་ལ་ཕྱིན་པས། དེ་ན་ཅག་ཅག་པ་ཞིག་འདུག་པས་སུ་ཡིན་བྱས་པས། ང་གཅེར་བུ་པ་སྡུག་བསྔལ་འགྱུར་ཡིན་ཟེར། ཁྱོད་དེར་སྐྱེས་སམ་བྱས་པས། སྐྱེས་ཁྱོད་བཅོམ་ལྡན་འདས་ལ་ཡིད་མི་ཆེས་སམ་ཟེར། དེས་ན་སངས་རྒྱས་ཀྱིས་དུས་གསུམ་ས་ལེར་མཁྱེན་པས་རྫུན་གསུངས་དོན་མེད་པས་གསུངས་པའི་ཆོས་ལ་ཡིད་ཆེས་དགོས། སྔོན་བདུད་ལྷས་སྦྱིན་གྱིས། སངས་རྒྱས་བཅོམ་ལྡན་འདས་གསོད་སྙམ་སྒྱོགས་རྡོ་འཕང་དགེ་འདུན་པའི་དབྱེན་སོགས་བྱས་དུས་རྒྱུན་དུ་སངས་རྒྱས་འཁོར་བཅས་ལ་གནོད་པ་ཅི་འཁྱོལ་བྱས་ཀྱང་། ཁོ་མ་ཞུ་བའི་ནད་ཀྱིས་ཐེབས་པ་སྨན་པས་ཀྱང་བོར་ནས་འཆི་ལ་ཉེ་ཚེ། སངས་རྒྱས་ཀྱིས་སྙིང་རྗེ་ནས་ཕྱག་སྤྱི་བོར་བཞག་བྱིན་རླབས་བྱས་ཏེ། ནད་ལས་གྲོལ་བར་བྱས། དུས་རྒྱུན་དུ་རང་གི་སྲས་དགྲ་གཅན་འཛིན་དང་ལྷས་སྦྱིན་གཉིས་ལ་

ཁྱད་པར་མེད་པར་བྱམས། དེས་ན་སངས་རྒྱས་བཅོམ་ལྡན་འདས་ལ་དགྲ་གཉེན་ལ་ཁྱད་པར་མེད་པར་ཀུན་ལ་བྱམས་པས་རྫུན་གསུངས་དོན་མེད་པས། སངས་རྒྱས་ཀྱི་ལས་རྒྱུ་འབྲས་ཀྱི་ཆོས་གང་ལ་ཡང་ཡིད་ཆེས་ཀྱི་དད་པ་བསྐྱེད་ནས་སྤང་བླང་མ་ནོར་བར་བྱ། དེ་ཡང་མི་དགེ་བའི་དབང་གིས་ངན་སོང་དུ་སྐྱེས་ན། སྡུག་བསྔལ་ཡོད་པ་སྨོས་ཅི་དགོས། ལས་དང་ཉོན་མོངས་པ་གཞན་གྱི་དབང་གིས་མཐོ་རིས་ལྷ་མིའི་ནང་དུ་སྐྱེས་ན་ཡང་སྡུག་བསྔལ་མ་གཏོགས་བདེ་བ་མེད་དེ། དམྱལ་བར་སྐྱེས་ན་ཚ་གྲང་གི་སྡུག་བསྔལ། ཡི་དྭགས་ལ་བཀྲེས་སྐོམ་གྱི་སྡུག་བསྔལ། དུད་འགྲོ་ལ་བཀོལ་སྤྱོད་ཀྱི་སྡུག་བསྔལ། མི་ལ་སྐྱེ་རྒ་ན་འཆིའི་སྡུག་བསྔལ། ལྷ་མ་ཡིན་ལ་འཐབ་རྩོད་ཀྱི་སྡུག་བསྔལ། ལྷ་ལ་འཆི་འཕོ་ལྟུང་བའི་སྡུག་བསྔལ་ཏེ། སྡུག་བསྔལ་བསམ་གྱིས་མི་ཁྱབ་པ་ཡོད་པ་ཡིན་པས་ན་སྤྱིར་འཁོར་བ་སྡུག་བསྔལ་གྱི་རྒྱ་མཚོ་ཞེས་ཡོངས་སུ་གྲགས་པ་དང་། དགོས་སུ་འཁོར་བའི་ཁྱིམ་ཐབ་བྱས་པ་མེའི་འོབ་སྲིན་མོའི་གླིང་དུག་སྦྲུལ་ནག་པོའི་ཚང་དུ་ཆུད་པའི་མི་དང་འདྲ་ལ། ཡང་དགོས་ཁྱད་པར་ཅན་དུ་

འཁོར་བའི་ཕུན་ཚོགས་ནོར་ལོངས་སྤྱོད་འཛོམ་པོ་རྣམས་ཀྱང་། དུག་དང་འདྲེས་པའི་ཁ་ཟས། སྤུ་གྲིའི་ཁར་ཆགས་སྦྲང་རྩི། དུག་སྦྲུལ་མགོ་ཡི་ནོར་བུ་ལྟར་རེག་ན་ཡང་ཕུང་ལ། དེ་ཉིད་བསྟེན་ན་སྨོས་ཅི་དགོས་སྙམ་དུ། མཐོ་རྒྱལ་པོའི་རྒྱལ་སྲིད་ལ་ཡང་ཡིད་སྨོན་སྐད་ཅིག་ཙམ་ཡང་མེད་པ་ཞིག་བྱ་དགོས་ཏེ། སྔོན་བདག་ཅག་གི་སྟོན་པ་ཐུགས་རྗེ་ཅན་གྱིས་རྒྱལ་སྲིད་དུག་གི་སྡོང་པོ་འདྲ་བར་གཟིགས། ལོངས་སྤྱོད་ཐམས་ཅད་མཆིལ་སྣབས་བཞིན་དུ་དོར་ནས་མཚན་གུང་ཞིག་ལ་བྲོས། མཆོད་རྟེན་རྣམ་དག་དྲུང་ནས་དབུ་སྐྲ་བསིལ། ཆུ་བོ་ནཻ་ར་ཛ་ནའི་འགྲམ་དུ་དཀའ་བ་སྤྱད། རྒྱ་གར་རྡོ་རྗེ་གདན་ན་ནས་སངས་རྒྱས་ཏེ། འགྲོ་ལ་བདེན་བཞིའི་ཆོས་འཁོར་བསྐོར་དུས་སུ་ཡང་ཐོག་མར་སྡུག་བདེན་འཁོར་བའི་ཉེས་དམིགས་ཤ་སྟག་གསུངས་པ་ལ་ལྟོས་དང་འཁོར་བ་སྡུག་བསྔལ་ཡིན་པ་ཧ་གོ་ཡོང་། སངས་རྒྱས་ཀྱི་འཁོར་ཉན་ཐོས་དགྲ་བཅོམ་རྣམས་ཀྱིས་ཀྱང་འཁོར་བ་འདིའི་ནང་དུ་སྐྱེས་ཕྱིན་ཆད་ནས་ནོར་ཡོད་ན་ཡོད་སྡུག་མེད་ན་མེད་སྡུག་ཡོད་མེད་མཉམ་སྡུག །མི་ཚེ་སྡུག་ཟད་ལ་འགྲོ་བའི་ཚུལ་ལ་བསམས་ནས་ཁྱིམ་ནས་ཁྱིམ་མེད་

པར་རབ་ཏུ་བྱུང་ནས་དགྲ་བཅོམ་པའི་གོ་འཕང་ཐོབ། དེ་བཞིན་དུ་རྒྱ་བོད་ཀྱི་མཁས་གྲུབ་རྣམས་ཀྱིས་སྐྱེ་འཆི་འཁོར་བའི་ཉེས་དམིགས་བསམས་ནས། ཕ་ཡུལ་ནོར་རྫས་ཐམས་ཅད་འཕོང་ཕྱིས་པའི་རྡོ་བཞིན་དུ་བསྐྱུར་ནས། མཚན་ལྡན་གྱི་བླ་མ་དམ་པའི་གསུང་བཞིན་ན་བུན་གོས་ལྟར་གྱོན་བྲག་ཕུག་ཞྭ་ལྟར་བསྟེན་གྱོང་ལྟོ་གོས་གཏམ་གསུམ་ལ་བཏང་ནས། སྒྲུབ་པ་ཁོ་ན་ལ་གཞོལ་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་སངས་རྒྱས་ཀྱི་གོ་འཕང་ཚེ་འདི་ཉིད་ལ་ཐོབ་ནས་རང་གཞན་གྱི་དོན་གཉིས་ལྷུན་གྱིས་འགྲུབ་པ་བྱུང་། དེ་ལྟ་བུའི་གོང་མའི་རྣམ་ཐར་རྗེས་འཇུག་གདུལ་བྱ་རྣམས་ཀྱིས་ཉམས་ལེན་དུ་འཁྱེར་ཤེས་དགོས་ལ་སྟོན་པ་སངས་རྒྱས་ནས་བཟུང་ད་ལྟའི་རྩ་བའི་བླ་མ་ཡར་བཟུང་གི་དངོས་བརྒྱུད་བླ་མ་རྣམས་ཀྱིས་འཁོར་བ་སྤྱི་དང་བྱེ་བྲག་ཁྱིམ་ཐབ་དང་འདོད་ཡོན་ལ་སྤྱད་པའི་ཉེས་དམིགས་ཆེར་གསུངས་པའི་ནང་ལྟར། འཇིག་རྟེན་འཁོར་བའི་བདེ་བ་ལ་ཡིད་སྨོན་སྐད་ཅིག་ཙམ་ཡང་མི་བྱེད་པར། འདོད་ཡོན་ཤིག་ཙམ་རེའི་རྩ་བ་ན་སྡུག་བསྔལ་རི་ཙམ་རེ་ཡོད་ཚུལ་ལ་བསམས་ནས། སྐྱུགས་ནད་ཅན་ལ་

ཟས་བསྟན་པ་བཞིན་ཞེན་པ་གཏིང་ནས་ལྡོག་ཅིང་། སེང་གེའི་སྔོན་དུ་རྩྭ་སྔོན་པོ་བཞག་པ་ལྟར་འདོད་པ་སྤུ་ཙམ་ཡང་མེད་པར་ནག་ཅན་བཙོན་དོང་ནས་བྲོས་པ་ལྟར། འཇིག་རྟེན་ཁྱིམ་ཐབ་རྒྱལ་པོའི་བཙོན་ར་འདྲ་བ་འདི་ལ་ཕྱི་མིག་ཙམ་ཡང་མི་ལྟ་བར་རྒྱང་རིང་པོར་བོར་ནས། རི་ཁྲོད་དབེན་པའི་བསིལ་གྲིབ་ཏུ་འཁོད་ནས་དམ་པའི་ཆོས་ཀྱི་བདུད་རྩི་ངོམ་མེད་དུ་འཐུངས་ནས། ཚེ་འདིར་འཆི་མེད་རྡོ་རྗེ་སྐུ་སངས་རྒྱས་ཀྱི་གོ་འཕང་ཐོབ་པ་ཞིག་བྱ་དགོས། དེ་ལྟར་བྱེད་པ་ལ་ཐོག་མར་འདོད་ཡོན་གྱི་ཉེས་དམིགས་བསམས་ནས། ཚེ་བློས་གཏོང་དགོས། འདིར་འདོད་ཡོན་གྱི་ཉེས་དམིགས་ཅུང་ཟད་ཅིག་བརྗོད་ན། སྔོན་སངས་རྒྱས་འཁོར་བཅས་རྒྱལ་པོའི་ཁབ་ཏུ་བསོད་སྙོམས་ལ་གཤེགས་དུས་བསྐལ་པ་དང་པོའི་མིས་གཏེར་སྦས་པ་ཆར་ཆུ་ཆེ་དྲགས་པས་ས་ཁར་ཐོན་ནས་འོད་འབར་བ་གཟིགས་ཚེ། འདི་ན་དུག་སྦྲུལ་དྲག་པོ་འདུག་ཅེས་བསྐོར་ནས་ཕྱིན་པས། དེ་ན་འབྲས་བུ་དང་རྩ་བ་འཐུ་པའི་མི་ཞིག་ཡོད་པས་ཐོས་ནས་འོང་བལྟས་པས། གསེར་ཡིན་ཚེ་བླངས་ནས་ཁྱེར་ཕྱིན་ལྐོག་ནས་ལོངས་སྤྱད་པ་ཡུལ་དེའི་རྒྱལ་པོ་མ་སྐྱེས་དགྲས་

གོ་ནས། མི་དེའི་ནོར་ཐམས་ཅད་འཕྲོག་ནས་བཙོན་རར་ཁྲིད་པ་བཞིན། དེང་སང་ཡང་ནོར་མང་པོ་ཅན་ལ་གཞན་རྒྱལ་བློན་ཧམ་ཅན་གྱི་ཆད་ལས་སྣ་ཚོགས་འབྱུང་བ་ལ་ལྟོས་དང་གོ་ཡོང་། ནོར་ལ་ཆགས་ན་ཕྱི་མར་ཡང་བརླགས་ཏེ། སྔོན་དགེ་སློང་ཞིག་རང་གི་ལྷུང་བཟེད་ལ་ཆགས་ཏེ། ཤི་ནས་ལྷུང་བཟེད་ནང་དུ་སྦྲུལ་གདུག་པ་ཞིག་ཏུ་སྐྱེས་པ་དང་། བུད་མེད་ཞིག་རང་གི་ལུས་ལ་ཆགས་ཏེ་ཤི་བས་ལུས་དེ་ཉིད་ཀྱི་ནང་དུ་སྦྲུལ་གདུག་པ་ཞིག་ཏུ་སྐྱེས་པ་དང་། ཁྱིམ་བདག་ཅིག་གསེར་ལ་ཆགས་བཞིན་དུ་ཤི་བས། གསེར་དེ་ཉིད་ལ་འཁྲིལ་པའི་སྦྲུལ་གདུག་པ་ཞིག་ཏུ་སྐྱེས་པར་གསུངས། དེས་ན་གང་ལ་ཡང་མ་ཆགས་མ་ཞེན་པ་དགོས། ཁྱད་པར་དུ་དཀོར་ལ་ཤིན་ཏུ་འཛེམ་དགོས་ཏེ། སྔོན་གྲུབ་ཐོབ་ཐང་སྟོང་རྒྱལ་པོས་ཕ་བོང་ཆེན་པོ་ཞིག་གི་སྟེང་དུ། ཏིང་ངེ་འཛིན་ལ་བཞུགས་པས། ཐུགས་རྗེའི་ནུས་པས་ཕ་བོང་དེ་གས་པའི་བར་ནས། སྦྲུལ་གཉའ་ཤིང་གང་ཙམ་ལ་སྦལ་བ་མཐེ་བོང་ཙམ་སྟོང་མང་པོས་སོ་འཐམས་ནས་ཡོད་པ་ཞིག་ཐོན་བྱུང་བ་ལ། ལྗགས་ཆབ་གཏོར་ནས་གནས་སྤོར་མཛད་མཐར།

འོ་ཞིང་དང་བསམ་པ་མ་དག་པའི་དགེ་བ་སྟེར་མཁན་དང་། ཟ་མཁན་ཚེ་འདི་འདྲ་བ་ཡང་ཡོང་གསུངས། ཡང་ཀརྨ་པ་ཆེན་པོ་དགུང་ལོ་དྲུག་བཞེས་དུས། ལོང་པོ་ལྕགས་མཁར་ཟེར་བའི་ལུང་བ་དང་ཉེ་བའི་ཐད་ན་བཞུགས་ནས། ཞབས་འཆག་པར་བྱོན་པས། ལམ་ནས་མི་རིང་བ་ན་ཕ་བོང་ཆེན་པོ་ཞིག་ལ། སྐུ་རྩེད་ཀྱི་ཚུལ་དུ་ཕྱག་བཅག་ཕྱོགས་དུ་མ་ནས་བཙུགས་པས། ཕུར་བུའི་ཤུལ་ལྟ་བུ་བྱུང་སྟེ། བར་བྱེ་བ་གཤོག་ཅིག་གསུངས་པས། གཤགས་པའི་བར་ནས་སྲོག་ཆགས་གློ་བ་འདྲ་བ་ཁྲུ་གང་ཙམ་ལ། ཕྱི་ཐམས་ཅད་སྲོག་ཆགས་ནག་པོ་དང་། ནང་ཐམས་ཅད་སྲོག་ཆགས་དཀར་པོ་ཏིལ་གྱི་འབྲུ་ཙམ་ཐེམ་མེར་ནེམ་མེར་གང་བ་བྱུང་བས། ལྗགས་མཆིལ་བཏབ་ནས་ཏིང་ངེ་འཛིན་གཏད་པས། དེའི་མོད་ལ་ཐམས་ཅད་ཤི་བས། རོ་དེ་བསྲེག་སྦྱོང་མཛད་ནས་གནས་སྤར་རོ། །དེའི་རྒྱུ་མཚན་ཞུས་པས། སྔོན་ང་རོལ་བའི་རྡོ་རྗེའི་དུས་སུ་ཡུལ་འདིའི་གཤིན་གསོན་གྱི་དཀོར་ཟ་བའི་བླ་མ་གཅིག་གིས་ང་ལ་ངན་སོང་ནས་འདྲེན་པར་ཞུས་ནས་ངས་ཁས་བླངས་པ་ཡིན། སྲོག་ཆགས་ནག་པོ་མང་པོས་ཟ་བ་གཤིན་ཟས་ཟོས་པའི་

རྣམ་སྨིན་དང་། དཀར་པོ་མང་པོས་ཟ་བ་གསོན་དཀོར་ཟོས་པའི་རྣམ་སྨིན་ཡིན། དེ་ངས་ཁས་བླངས་པ་ལྟར་དྲངས་པ་ལགས། དེ་མིན་ངན་འགྲོ་ནས་ངན་འགྲོར་འགྲོ་བ་ཡིན་གསུངས། ཡང་རྗེ་ཁ་རག་པ་ཆེན་པོའི་དུས་ལ། ཁྲ་ཞིག་གིས་ཉིན་རེ་སྲོག་ཆགས་མང་པོ་བསད་པས། སླར་གང་དུ་སྐྱེས་གཟིགས་པས་སྔར་བསགས་དགེ་སྡིག་གཉིས་ཀྱི་དགེ་བ་དེ་སྔོན་ལ་སྨིན་ནས། འབྲོག་པ་ཤིན་ཏུ་ཕྱུག་པོའི་བུར་སྐྱེས་ནས། སྲོག་གཅོད་ལས་ཀྱི་མྱུར་བར་ཚེའི་དུས་བྱས་སོ། །དེ་ནས་གང་ལ་སྐྱེ་གཟིགས་པས། བླ་མ་དགེ་བའི་བཤེས་གཉེན་གདུལ་བྱ་ཤིན་ཏུ་ཆེ་བར་སྐྱེས་ནས། གདུལ་བྱ་ཆེ་དྲག་གཤིན་གསོན་གྱི་འདྲེན་ཆོག་ཐམས་ཅད་རྟ་སྟེང་ནས་བྱེད་པས། བླ་མ་རྟ་ཆོག་པ་ཞེས་གྲགས་སོ། །མཐར་དབང་མོ་ཆེ་ཞིག་བཙུགས་ནས་མི་ཀུན་འདུས་པའི་དུས། བླ་མ་དེ་སྐུ་གཤེགས་སོང་དེ་ན་རྗེ་ཁ་རག་པའི་ཉེ་གནས་ཀྱང་ཡོད་པས་ཀུན་ཁ་འཆམ་པར། བླ་མའི་དབང་པོ་ལྔ་པོ་ལ་སྦྱང་ཆོག་ཞུ་རྒྱུ་རྗེ་ཁ་རག་པ་ལ་བསྐུར་ན་ལེགས་ཞེས་ཉེ་གནས་ལ་བསྐུར་བས། ཉེ་གནས་ཀྱིས་ཁྱེར་ནས། རྗེའི་དྲུང་དུ་མ་སླེབ་

ཙམ་ན། འདི་ཁྱེར་ན་བཀའ་བཀྱོན་འདྲ་ཡོང་སྙམ། དར་གྱི་སྒྲིལ་འབོག་བཅས་མ་ཚད་ཀྱི་བྲག་འོག་ཅིག་ཏུ་བཞག་ནས། དྲུང་དུ་ཕྱིན་ནས་གནས་ཚུལ་ཕུལ་བས་རྗེའི་ཞལ་ནས། འོ་ན་ངའི་སྣམ་སྦྱར་འདིས་གཡོག་གསུངས། ཏིང་ངེ་འཛིན་གྱི་བྱིན་གྱིས་བརླབས་ནས་གནང་བས། དེ་བཞིན་བྱ་སྙམ་ནས་ཉེ་གནས་ཀྱིས་ཁྱེར་དེ་སོང་བས། བྲག་འོག་དེར་དབང་པོ་ལྔ་པོ་དེ། སྡིག་པ་ཆེ་ཆུང་ར་ཙམ་དུ་སོང་ཟིན་ནས་ཚུར་ལ་གཟེངས་བྱས་པས། འདུལ་སྐལ་གྱི་རྟེན་འབྲེལ་མ་འཛོམ་པས། སྣམ་སྦྱར་གཡོག་མ་ཐུབ་པར་འཇིགས་སྐྲག་གིས་བྲོས་པས། ཕ་ཚད་དུ་བྲག་ཆེན་པོ་ཞིག་ཡོད་པར། དེ་ལས་དབང་གིས་གས་པའི་བར་དུ་སོང་ངོ་། །དེའི་ཕྱི་ལ་སྔོན་ལན་ཆགས་ཀྱི་འབྲེལ་བ་ཡོད་ཚད་ཀྱི་སྲོག་ཆགས་རིགས་འདྲ་གྲངས་མེད་སོང་། མཐར་ལས་ཀྱི་དབང་གིས་བྲག་དེ་སླར་ཁ་ཟུམ་པ་བྱུང་། སྡིག་པ་དེའི་སྙིང་ག་ནས་ཡར་ཤུག་པའི་སྡོང་པོ་ཞིག་སྐྱེས་པས་ཤུག་སྡོང་ཆེན་པོ་དེ་བྱའི་རྐང་པས་མ་ཟད་ཀྱི་བར་དུ། སྡུག་བསྔལ་མྱོང་དགོས་པར་གསུངས། སྔོན་སངས་རྒྱས་ཀྱི་དྲུང་དུ་བུད་མེད་རྒན་མོ་ལོ་བརྒྱ་ལོན་པ། དབུལ་ཞིང་ཕོངས་པ་

མི་སྡུག་པ་ཞིག་ཕྱིན་ནས། དྲི་བ་དང་དྲིས་ལན་རྒྱ་ཆེར་གསུངས་པས་མཐར་སྒྲེས་མོ་དེ་ཤི་འཕོས་ནས། སངས་རྒྱས་འོད་དཔག་མེད་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེས་ནས། སངས་རྒྱས་གྲངས་མེད་པ་ལ་མཆོད་པ་བྱེད་པར་འགྱུར་རོ་ཞེས་ལུང་བསྟན་པས། ཀུན་དགའ་བོས། འོ་ན་འདི་ལྟར་དུ་དབུལ་ཞིང་ཕོངས་པ། མི་སྡུག་པ་གང་ལགས་ཞུས་པས། བཀའ་སྩལ་པ། སྔོན་སངས་རྒྱས་འཁོར་བ་འཇིགས་ལ་ང་རབ་ཏུ་བྱུང་བའི་དུས། འདི་ནི་ངའི་མར་གྱུར་ཏེ་དེའི་གོང་དུའང་། ངའི་སྐྱེ་བ་བརྒྱའི་མ་ཡིན་པས། དེའི་དུས་སུ་ངའི་ཟན་ཞིག་གི་གཤམ་ནས་བཅད་དེ་ཟོས་པས་དེའི་རྣམ་པར་སྨིན་པས། འདི་ཕན་ལ་སྐྱེ་བ་ལྔ་བརྒྱའི་བར་དུ། རྒན་མོ་མི་སྡུག་པ་དབུལ་བར་གྱུར་པས། འདི་ནི་དབུལ་བའི་མཐའ་མ་ཡིན་ནོ་གསུངས། དེས་ན་མཐུ་མ་གཏོང་དཀོར་ཐོངས་ཟེར་བ་ལྟར། དཀོར་འདི་མཐུ་ལས་ཀྱང་འཇིགས་པས། དཀོར་བསྡུས་ནས་རང་གིས་བག་མེད་དུ་ཟ་ཞིང་གཞན་ཉེ་འབྲེལ་གྱི་ཁ་ལ་རྒྱག་པ་སོགས་གཏན་ནས་བྱེད་མི་རུང་པས། འདི་ལ་གཟབ་པར་བྱའོ། །འོ་ན་ཚེ་

བློས་ཇི་ལྟར་གཏོང་དགོས་སྙམ་ན། སྔོན་སངས་རྒྱས་བཅོམ་ལྡན་འདས་ཀྱིས་ཁྱིམ་དང་བཟུང་བ་ཐམས་ཅད་སྤངས་ལོ་དྲུག་དཀའ་བ་སྤྱད་ཚེ་བློས་གཏོང་ལུགས་ཅི་འདྲ་མཛད་འདུག །དེ་ལ་ཁ་མིག་ཡར་བལྟ་བྱེད་དགོས། ཁོང་གིས་རྗེས་འཇུག་འོ་སྐོལ་རྣམས་ལ། ཟས་བསོད་སྙོམས་པ། གོས་ཕྱག་དར་ཁྲོད་པ། གནས་ཤིང་དྲུང་བ། སྨན་བཀུས་ཏེ་བོར་བ་བཞི་བསྟེན་དགོས་ཞེས་གསུངས་པ་ལྟར། ངེད་རྣམས་ཀྱིས་ཀྱང་མཁན་སློབ་རྣམས་ཀྱི་སྤྱན་སྔར་ཇི་ལྟར་ཁས་བླངས་དམ་བཅས་པ་རྣམས་དྲན་པར་བྱས་ནས་ལག་ལེན་ལ་འདེབས་དགོས། དེ་ཡང་ཇི་ལྟར་འདེབས་ན། དངོས་པོ་ཐམས་ཅད་སྤངས་ནས་འཕྲལ་དུ་རྙེད་པའི་བཟའ་བཏུང་བཟང་ངན་གང་རྙེད་ཙམ་གྱིས་ཆོག་ཤེས་པར་བྱེད་པ་ཟས་བསོད་སྙོམས་པ། གོས་བཟང་པོ་དང་མང་པོ་སྤངས་ནས། བཟང་ངན་གང་རྙེད་པས་ཆོག་པར་བྱེད་པ། གོས་ཕྱག་དར་ཁྲོད་པ། གནས་མལ་བཟང་པོ་སྤངས་ཏེ་རྩོལ་མེད་བཟང་ངན་གང་བྱུང་གིས་ཆོག་པས་གནས་ཤིང་དྲུང་བ། གཞན་གྱིས་བཀུས་ཤིང་ལོངས་སྤྱད་དེ་བོར་བའི་སྨན་བཟང་ངན་རྩོལ་མེད་གང་བྱུང་གིས་ཆོག་པར་བྱེད་

པས་སྨན་བཀུས་ཏེ་བོར་བ་དང་། བཞི་པོར་གནས་པར་བྱའོ། །བླ་མ་གོང་མ་རྣམས་ཀྱི་ཞལ་ནས་ཚེ་བློས་གཏོང་བ་ལ། གཏད་པ་བཞི། རྡོ་རྗེ་གསུམ། བུད་སྙེགས་ཐོབ་གསུམ། དགོས་པ་ཡིན་གསུངས། དང་པོ་བཞི་ནི། བློ་ཕུག་ཆོས་ལ་གཏད། ཆོས་ཕུག་སྤྲང་ལ་གཏད། སྤྲང་ཕུག་ཤི་ལ་གཏད། ཤི་ཕུག་བྲག་སྟོང་པར་གཏད། རྡོ་རྗེ་གསུམ་ནི། ཐེབས་མེད་རྡོ་རྗེ་སྔོན་ལ་བཏང་། ཁྲོལ་མེད་རྡོ་རྗེ་རྗེས་ལ་འཇོག །ཡེ་ཤེས་རྡོ་རྗེ་རང་དང་འགྲོགས། ཕྱི་མ་གསུམ་ནི། མི་ཁྱུ་ནས་བུད། ཁྱི་གྲལ་སྙེགས། ལྷ་གྲལ་ཐོབ། གསུམ་མོ། འདི་རྣམས་བཅོམ་ལྡན་འདས་ཀྱིས་རབ་བྱུང་ཇི་ལྟར་མཛད། དཀའ་བ་ལོ་དྲུག་སྤྱད་ལུགས། རྗེས་འཇུག་ཇི་ལྟར་རབ་ཏུ་བྱུང་བ་སོགས་གསུངས་ལུགས་རྣམས་གོན་གོང་གི་གནད་རྣམས་ཤིན་ཏུ་ཟབ་པ་ཆོས་ཀྱི་མཐིལ་དུ་གོ་ནས་ཡོང་། དེ་བཅུ་ལ་ཕུག་ནོར་བཅུ་ཞེས་པའི་ཐ་སྙད་མཛད། དེ་རྣམས་ཡིད་ལ་བཞག་པ་ཙམ་གྱིས་ཉོན་མོངས་ཀྱི་རྫོང་འགྱེལ། ལས་ངན་གྱི་གྲུ་འཇིག །གཉེན་པོའི་ཐང་བདེ་བ་ལ་སླེབས་པས། ཕུག་ནོར་གྱི་མཆོག་རང་དུ་སྣང་ངོ་། །

དེས་ན་ཚེ་བློས་གཏོང་ཚུལ་གྱི་གདམས་པ་འདི་རྣམས་སྙིང་ལ་བཅངས་ནས་ལག་ལེན་ལ་ཐེབས་ངེས་བྱའོ། །སྔོན་ཇོ་བོ་རྗེ་ལྷ་གཅིག་སྐྱེས་བུ་དམ་པ་དེ་འདའ་ཁར་རྣལ་འབྱོར་པ་ཕྱག་པ་ཁྲི་མཆོག་གིས། ཇོ་བོ་གཤེགས་པ་ན་བདག་གིས་བསྒོམ་པར་ཞུ་ཞུས་པས། བྱ་བ་ངན་པ་ཡིན་པས་བོར་ལ་ཐོང་གསུངས། འོ་ན་འཆད་པར་ཞུ་ཞུས་པས་ཀྱང་དེ་སྐད་གསུངས། འོ་ན་རེས་བཤད་རེས་བསྒོམ་མམ་ཞུས་པས་ཀྱང་དེ་སྐད་གསུངས། འོ་ན་ཇི་ལྟར་བགྱི་ཞུས་པས། ཚེ་འདི་བློས་ཐོང་གསུངས། བཙུན་པ་གཅིག་གིས་དགོན་པར་བསྐོར་བ་བྱས་པས། སྟོན་པ་རིན་པོ་ཆེའི་ཞལ་ནས། ཇོ་བོ་བསྐོར་བ་བྱེད་པའང་གློ་བ་དགའ་སྟེ། དེ་བས་ཀྱང་ཆོས་ཤིག་རང་བྱས་ན་དགའ་གསུངས། ཁོའི་བསམ་པ་ལ་ཕྱག་གཅིག་བྱས་ན་དགའ་བ་ཡིན་ནམ་སྙམ་ནས་བྱས་པས་ཀྱང་དེ་སྐད་གསུངས། དེ་བཞིན་དུ་ཁ་ཏོན་དང་སྒོམ་བྱས་པས་ཀྱང་དེ་སྐད་གསུངས། འོ་ན་ཅི་བགྱི་ལགས་ཞུས་པས། ཚེ་འདི་བློས་ཐོང་ཞིག་ལན་གསུམ་གསུངས། ཆོས་རྗེ་རེད་མདའ་བའི་ཞལ་ནས། ཐོས་པའི་གཏིང་དཔོག་ནས། ཚེ་བློས་གཏོང་གི་སྒྲུབ་པ་སྙིང་པོར་བྱེད་པ་ལས་

ལྷག་པའི་རྒྱལ་བ་སྲས་བཅས་མཉེས་པར་བྱེད་པའི་མཆོད་པ་གཞན་མེད། དེའི་ཐད་ན་དེང་སང་གི་འཆད་ཉན་འདྲ་བ་གཞན་དོན་ལྟར་སྣང་ཡིན། རྙེད་བཀུར་ལྷུར་བྱེད་ཀྱི་ཐབས་དབང་བསྐུར་ལུང་ཁྲིད་ལ་སོགས་འཁོར་སྡུད་པའི་ཐབས་གཞན་དོན་ལྟར་སྣང་བྱེད་པ་རྣམས་ལ་སྙིང་པོ་མེད་གསུངས། དེ་བས་ན་གང་ལ་བསམས་ཀྱང་སྙིང་པོ་མེད་པའི་ཚེ་ཐུང་འདི་ལ་མ་ཆགས་པར་བློས་ཅི་ཐོང་བྱའོ། །སྔོན་རས་ཆུང་བ་ལ་རྒད་པོ་བཟའ་མི་གཉིས་ཀྱིས་གཡུ་རྡོག་ཆེན་པོ་ཞིག་བཅོལ་བས། ཚགས་མི་བྱེད་བྱས་པས་མཉན་པར་བཅོལ་སོང་། དགོང་མོ་ས་སྲོས་པ་དང་། མི་ར་སློག་གྱོན་པ། ཕད་ཚེ་ལ་ཁྲེས་པོ་བྱས་པ། སྐྲ་སྤྱི་བོར་བཀྱིག་པ་ཞིག་ནང་དུ་འོང་བ་མཐོང་ནས། ཕྱི་ལ་བལྟར་ཕྱིན་པས། གནམ་སྒོ་ཕྱེད་ནས་གཞན་ཅི་ཡང་མི་འདུག་ཚེ། ལྷ་འདྲེའི་བར་ཆད་དུ་ཤེས་ནས། ནངས་པར་གཡུ་ཁོ་རང་ལ་གཏད་སྐད། དེས་ན་ནོར་ཚགས་བྱེད་པ་ཕར་ཞོག །ཐ་ན་གཞན་གྱིས་ནོར་བཅོལ་བ་ཡང་ལེན་མི་རུང་། སྔོན་རྗེ་བཙུན་མི་ལ་རས་པས་བྲག་དཀར་རྟ་སོ་ན་ཟྭ་ལ་དཀའ་ཐུབ་མཛད་དུས་ལན་ཅིག་

མཚན་མོ་མི་གཅིག་གིས་རྗེ་བཙུན་ལ་ཟས་ནོར་ཡོད་དུ་རེ་ནས་བྱུང་སྟེ་ཕུག་པའི་ནང་ཀུན་གཡེང་གིན་འདུག་པ་ལ། རྗེ་བཙུན་གྱིས་རྒོད་ཅིག་ཤོར་ཏེ། ངས་ཉིན་མོ་མ་རྙེད་པའི་ས་དེ་ནས་ཁྱོད་ཀྱིས་མཚན་མོ་ཨེ་རྙེད་ལྟོས་ཤིག་བྱས་པས། ཁོ་རང་ཡང་རྒོད་ཅིང་ཐོན་སོང་གསུངས། དེ་ལྟ་བུ་བྱེད་རྒྱུ་བྱུང་ན་རབ། མ་བྱུང་ཡང་དེའི་ཆ་འདྲ་ཙམ་རེ་ཅིས་ཀྱང་བྱའོ། །སྔོན་བྱང་ཆུབ་སེམས་དཔའ་མཆེད་དྲུག་ནགས་སུ་སྒོམ་གྱིན་བཞུགས་དུས་པདྨའི་རྩ་བ་གསོལ་བ་ལས་གཅིག་གིས་པདྨའི་རྩ་བརྐུས་སྣང་བས་ཁོང་རྣམས་ཀྱིས་རྩ་བ་སུས་རྐུས་པ་དེ་ལ་ལོངས་སྤྱོད་མངའ་ཐང་གྲ་རྒྱས་པ་རེ་ཡོང་ན་སྡུག་ཐག་ཆོད་པ་རེ་ཡོང་དགོངས་ནས། གཅིག་ན་རེ། བྲམ་ཟེ་ཁྱེད་ཀྱི་རྩ་བ་སུས་ཁྱེར་བ། །འབྱོར་བའི་མཚན་མས་བརྒྱན་པའི་ཁྱིམ་པ་བ། །ཆུང་མ་ཡིད་དུ་འོང་བ་རྙེད་པར་ཤོག །བུ་དང་ཚ་བོ་རྣམས་དང་ལྡན་པར་ཤོག །ཁ་ཅིག་ན་རེ། བྲམ་ཟེ་ཁྱེད་ཀྱི་རྩ་བ་སུས་ཁྱེར་བ། །ཕྲེང་བ་དོ་ཤལ་ཅན་ལྡན་གོས་བཟང་དང་། །བུ་ཡིས་རེག་པའི་རྒྱན་རྣམས་བཏགས་བྱས་ཏེ། །འདོད་པ་མི་ཟད་པ་ལ་སྤྱོད་པར་ཤོག །གཅིག་ན་རེ། གང་གི་རྩ་བ་མཐོང་ལ་ཆོས་

མ་མཐོང་། །དེ་ནི་གཅིག་པུ་དགེ་བ་རྣམས་དང་བྲལ། །བསྙེན་བཀུར་བྱས་པས་མྱོས་པར་གྱུར་ནས་ནི། །ཁ་ཟས་ཞིམ་པོ་དག་ལ་དགའ་བར་ཤོག །གཅིག་ན་རེ། བྲམ་ཟེ་ཁྱེད་ཀྱི་རྩ་བ་སུས་ཁྱེར་བ། །རིགས་བྱེད་ལེགས་པར་ལོབ་ནས་སྟོན་པར་བྱེད། །དཀའ་ཐུབ་ཅན་དུ་རེ་བ་ཆེན་པོ་ཡིས། །དེ་ནི་ཡུལ་མི་ཀུན་གྱིས་མཆོད་བྱེད་ཤོག །ཞེས་དམོད་པ་རེ་རེ་བོར་རོ། །དེས་ན་ནོར་ལོངས་སྤྱོད་མངའ་ཐང་གྲ་རྒྱས་པ་དེ་སྐྱིད་མིན་སྡུག་བསྔལ་གྱི་གྲ་རྒྱས་པ་ཡིན་པས། སྤོང་ཅི་ཐུབ་ལ་འབད་པར་བྱའོ། །བཀའ་གདམས་ཀྱི་བླ་མ་འགའ་རེས་ནོར་འདིས་མཐོ་རིས་ཐར་པའི་གནས་སུ་ཡར་འགྲོ་བའི་ལམ་ནོར་དུ་བཅུག་ནས། དམྱལ་བ་ཡི་དྭགས་ལ་སོགས་པའི་ངན་སོང་གི་ལམ་ལོག་པ་རུ་མར་འགྲོ་བའི་རྒྱུ་བྱེད་པས་ན། ནོར་ཟེར་བའི་སྒྲ་དོན་དེ་ཡིན། དེའི་རྒྱུ་མཚན་ཤེས་ན་ནོར་གསོགས་པ་ཕར་ཞོག །ནོར་ཟེར་བའི་མིང་གོ་ན་ཡང་འཇིགས་རྒྱུ་ཡོང་བར་གདའ་གསུང་སྐད། འཇིག་རྟེན་ཁ་དཔེ་ལ་ཡང་། འཁོར་བ་རྒྱ་ཆེ་ན་སྡུག་བསྔལ་གྲངས་མང་ཟེར་བ་ལྟར། དེང་སང་གི་ཕྱུག་པོ་ཕལ་ཆེར་གྱིས་ནོར་

ཡོད་ཚེ། རང་གིས་ཟ་མི་ཐུབ་གཞན་ལ་སྟེར་མི་ཐུབ། ཆོས་ཕྱོགས་ལ་གཏོང་མི་ཐུབ་པར་ནོར་མང་པོ་བསགས་པའི་མཐར་གང་ཡོད་ན། སེར་སྣ་ཅན་གྱི་ཟས་ནོར་ཏེ། །ཧམ་པ་ཅན་གྱི་ཁ་ལ་རྒྱག །ཟེར་བ་ལྟར་ཡུལ་དེའི་དཔོན་པོའམ། ཡང་ན་མི་ངན་ཧམ་ཅན་གྱིས་དོན་མེད་ཀྱི་བསྙད་མང་པོ་བརྐོས། ནོར་ཐམས་ཅད་ཁྱེར་ཡོང་། གཞན་ཡང་ནོར་ནི་ཕུང་ཁྲོལ་ཀུན་གྱི་རྩ་བ་ཡིན་གསུངས་པ་དང་། མངའ་ཐང་རྒྱས་ཀྱིན་སྡུག་བསྔལ་མཚོ་རྡོལ་གསུངས་པ་དང་ནོར་དགྲ་འདྲེ་འབོད་པའི་གཡབ་མོ་ཡིན་གསུངས་པ་ལྟར། ནོར་ལོངས་སྤྱོད་གྲ་རྒྱས་པ་རྣམས་ལ་མིས་གནོད་པ་ཙམ་དུ་མ་ཟད་ལྷ་འདྲེ་རྣམས་ཀྱིས་ཀྱང་ན་ཚ་ཤི་ཆད་གོད་ཁ་སོགས་མི་འདོད་པའི་རིགས་རྒྱུན་མི་ཆད་དུ་བཏང་ཡོང་། དེས་ན་ཚེ་འདིའི་མི་ནོར་ཟས་གསུམ་གང་ལ་ཡང་མི་ཆགས་པར་རྗེ་མི་ལ་རས་པ་ལྟ་བུ་འོང་བའི་སྨོན་ལམ་འདེབས་པར་བྱའོ། །སྔོན་རྭ་སྒྲེང་ན་ཇོ་བོའི་དངུལ་གྱི་གདུང་ཁང་བྱེད་མཁན་ཨ་ཙ་ར་མ་ནུ་བྱ་བ་ཡོད་པ། ཚེས་བཅོ་ལྔའི་ཟླ་བ་ཤར་བ་ན་ངུ་སྐད། དེ་ཙུག་ཡིན་བྱས་པས། ད་ཙམ་ན་རྒྱ་གར་ན་ངའི་བུ་མོ་རྣམས་ཟླ་རྩེད་བྱེད་པར་དྲན་ཟེར་རོ། །

འོ་ན་ཁྱོད་ད་ལྟ་རང་སངས་རྒྱ་བ་དང་། བུ་སྨད་དང་འཕྲད་པ་གང་ལ་འདམ་བྱས་པས། བུ་སྨད་དང་འཕྲད་པ་འདམ་ཟེར་ལོ། །དེས་ན་རང་རེ་ཡང་འཁོར་བ་ལ་ཤི་སྤར་འཐམ་པ་ཨ་ཙ་ར་མ་ནུ་དེ་འདྲ་བ་ཞིག་ཏུ་མི་འགྱུར་བ་བྱའོ། །སྔར་མངོན་ཤེས་ཀྱིས་ལུང་སྟོན་བྱེད་པ་ཞིག་ཡོད་པ་ལ། དེ་ན་རེ། བྲན་ཀ་མོན་པོ་དམྱལ་བར་སྐྱེ་བར་འདུག་ཟེར། དེར་ཁོ་ན་རེ། དམྱལ་བར་སུ་སྲེག་པ་སྲེག་ང་རང་ནི་འདི་ན་ཆང་འཐུང་ཟེར་ལོ། །དེས་ན་འོ་ཅག་གིས་ཀྱང་འཁོར་བའི་ཉེས་དམིགས་མ་བསམས་ན་བྲན་ཀ་མོན་པོའི་ལན་མོ་བྱེད་ཉེན་ཆེ་བས། ད་ནི་ཤ་ཆང་ལ་སོགས་པའི་འདོད་ཡོན་སྤོང་ཅི་ཐུབ་ལ་འབད་པར་བྱའོ། །སྔར་བྲམ་ཟེ་རྣམས་ལ་དུས་སྟོན་བཟང་པོ་ཟླ་བ་གསུམ་མམ། བཞི་ཡོད་པ་ལ། དེར་བྲམ་ཟེའི་ལག་པ་ལ་སྦྲང་རྩིའི་རྒྱས་བཏབ་པའི་བྲམ་ཟེ་ཞིག་མཁས་པ་ཡོན་ཏན་དང་ལྡན་པ་ཡིན་ཡང་། སྲེད་པ་ཆེ་བས་སྦྲང་རྩིའི་རོ་མངར་བ་ལ་ཆགས་ནས་རྒྱ་དེ་ལྕེས་བལྡགས། དེར་རྒྱ་མེད་པ་དང་སྒོ་སྲུང་གིས་མ་བཏང་བར་དུས་སྟོན་ཤོར་རོ། །དེ་བཞིན་དུ་རང་རེ་ཡང་སྦྲང་རྩི་ལྟ་བུའི་ཚེ་འདིའི་བདེ་སྐྱིད་

ཅུང་ཟད་ལ་ཆགས་ན། དུས་སྟོན་བཟང་པོ་ལྟ་བུའི་གཏན་བདེ་སངས་རྒྱས་ཀྱི་གོ་འཕང་ཐོབ་པའི་སྐལ་པ་འཆད་པས་གང་ལ་ཡང་མ་ཆགས་པར་བྱ་གསུངས་སོ། །སྔོན་ཤཱཀྱའི་རྒྱལ་པོ་བཟང་ལྡན་སོགས་ཤཱཀྱ་ལྔ་བརྒྱ་ཅིག་ཆར་རབ་བྱུང་བྱས་ནས། བཟང་ལྡན་ཕྱག་དར་ཁྲོད་ཀྱི་གོས་གྱོན། རིགས་ངན་ལས་བསོད་སྙོམས་བླངས་ཏེ་བྱུང་བ་རྒྱལ་པོ་གསལ་རྒྱལ་གྱིས་མཐོང་བས་བརྒྱལ་ནས་བོག་སོང་ངོ་། །དེར་དལ་གྱིས་བསླངས་ནས་བཅོམ་ལྡན་འདས་ཀྱི་དྲུང་དུ་བྱོན་ནས། བཟང་ལྡན་རྒྱལ་སྲིད་སྤངས་ནས་འདི་ལྟར་དུ་བགྱིད་པ་ཞེས་ཞུས་པས། བཅོམ་ལྡན་འདས་ཀྱི་ཞལ་ནས། བཟང་ལྡན་ནི་ད་ལྟ་ག་ན་འདུག་ཀྱང་བདག་རེ་སྐྱིད་བདག་རེ་སྐྱིད། སྔར་རྒྱལ་པོའི་ཕོ་བྲང་ན་སྲུང་མ་བརྒྱ་ཕྲག་གིས་བསྐོར་ཏེ་གནས་ཀྱང་རྟག་ཏུ་འཇིགས་ཤིང་བག་ཚ་བ་ལ། ད་ནི་སྤྱིལ་བུ་སྒོ་མེད་ན་ཡང་བག་ཚ་བ་མེད་པར་བདེའོ་ཞེས་ལན་གསུམ་གསུམ་བརྗོད་པར་འདུག་གསུངས། དེ་བཞིན་དུ་ཚེ་བློས་བཏང་ནས། རི་ཁྲོད་དབེན་པའི་དགའ་ཚལ་བསྟེན་པའི་གང་ཟག་དེ་ལས་སྐྱིད་པ་ཞིག་རྒྱལ་པོ་ལ་ཡང་མེད། དེས་ན་སྔོན་གྱི་སྐྱེས་བུ་དམ་པ་རྣམས་ཀྱིས་ཚེ་

བློས་བཏང་ནས་དབེན་པར་སྐྱིད་པའི་རྒྱང་གླུ་ཁོ་ན་བླངས་པ་ལ་ལྟོས་དང་ཧ་གོ་ཡོང་། ཡང་སྔོན་མི་གླེན་པ་ཞིག་ཕྱོགས་གཞན་ཞིག་ཏུ་ཚོང་ལ་སོང་ནས། དགོང་གཅིག་ཚིལ་བུ་ཞིག་མེ་ལ་བསྲེགས་ནས་ཚ་མོ་ཁ་ནང་དུ་བཞག་པས་ཁ་ལྕེ་གཉིས་ཀ་ཚིག་པས། ཨ་ཚ་ཞེས་སྐད་ངན་དང་བཅས་ཏེ་ཕར་རྒྱང་རིང་དུ་འཕང་བའི་ཕྱིར་ཉིན་སྔ་མོ་མཐོང་ཚེ། ད་དུང་ཡང་བྲེད་ནས་ཕྱི་ཟིལ་བ་ཙ་རེ་འདུག་སྟེ། ནང་ན་ད་དུང་མེ་དམར་པོ་ཞིག་འབར་གིན་ཡོད་ཡོང་ཟེར། དེའི་ཕྱོགས་སུ་མི་འགྲོ་སྐད། དེ་བཞིན་དུ་འདོད་ཡོན་ཤིག་ཙམ་རེ་རྩ་ན། སྡུག་བསྔལ་རི་ཙམ་ཡོད་ཚུལ་བསམས་ནས་སྤོང་ཅི་ཐུབ་ལ་འབད་དགོས། སྔོན་མི་གླེན་པ་ཞིག་གིས་རྔ་ཆེན་པོ་ཞིག་ལེན་དུ་སོང་ནས། ཁོས་བསམ་པ་ལ་སྒྲ་དང་གཟུགས་ཆེ་ཚུལ་ལ་ལྕིད་ཁོག་ཆེ་ཡོང་སྙམ་ཤེད་ཆེན་པོས་ཡར་བཏེགས་པས། ཡར་མགོ་ཐོག་ཏུ་ཤོར་ནས་ས་ལ་ལྷུང་དུས་སྒྲ་ཆེན་པོ་བྱུང་ཚེ། ཁོས་འཛུམ་བྱས་ཁྱོད་སྒྲ་ཆེ་བ་མ་གཏོགས་ལྕིད་གང་ཡང་མི་འདུག་ཟེར། དེ་བཞིན་དུ་ལྷ་མིའི་བདེ་སྐྱིད་ཟེར་བ་འདི་ལ་སྒྲ་ཆེ་བ་ཙམ་མ་གཏོགས་སྙིང་པོ་གང་ཡང་མི་འདུག་པས།

གང་ལ་ཡང་མ་ཆགས་པར་བྱའོ། །སྔོན་མི་གླེན་པ་ཞིག་གིས་གཞན་གྱི་སྣུམ་རྫ་མ་གང་ཁུར་ནས་ལམ་ལ་འགྲོ་དུས་བསམ་བློ་འདི་ལྟར་བཏང་། ངས་མི་ཡི་གླ་བྱས་རྔན་པ་བསགས་པས་བ་མོ་ཞིག་ཉོས། བ་མོ་དེ་མང་དུ་སོང་བ་དང་སྐྱེས་དམན་ཞིག་བླངས་དེ་ལ་བུ་ཞིག་བྱུང་ན་བུ་དེས་ང་སྒོ་ན་ཡོད་ཚེ། ཨ་ཕ་ཞེས་བོས་ན་ངས་ཨ་ཟེར་དགོས། ནང་དུ་ཤོག་ལ་ཇ་འཐུང་ཟེར་དུས་ཡོང་ཡོང་ཞེས་མགོ་གུག་གུག་བྱ་དགོས་སྙམ་མོག་གུག་གུག་བྱས་པས། སྣུམ་ཁུར་གྱི་ལུང་ཐག་མགོ་ལ་དཀྲིས་ཡོད་པ་ཤོར་ནས་རྫ་མ་ས་ལ་བརྡབ་ནས་སྣུམ་ཐམས་ཅད་མེད་པ་བྱས་པས། སྣུམ་བདག་ཚིག་པ་ཟོས་ནས་ཁོ་ལ་མང་པོ་བརྡུངས་ནས་བཏང་སྐད། དེས་ན་མི་དྲན་དགུ་དྲན་གྱི་མགོ་ལ་མི་ཡོང་དགུ་ཡོང་དྲན་རྒྱུ་མ་མངན་བཟང་། སྔོན་རྒྱ་གར་ལྷོ་ཕྱོགས་ཀྱི་མི་མདའ་རྩལ་ཆེ་བ་ཞིག །གཞན་རྩལ་ཅན་གྱི་གྲོགས་ཁ་ཤས་དང་འགྲོགས་ནས། རྒྱ་གར་ནུབ་ཕྱོགས་ཀྱི་མཐའ་ལོགས་ཤིག་ཏུ་སོང་སོང་བས། སྐབས་ཤིག་ནགས་ཁྲོད་ཉམས་དགའ་ཞིག་ཏུ་སླེབས། དེ་ན་མཁའ་འགྲོ་མ་ཞིག་ཡོད་པ་དེས། འདོད་པའི་དོན་གཅིག་ཡོད་པ་དེ་ཁོང་རྣམས་ཀྱིས་

བསྒྲུབས་པས་མཁའ་འགྲོ་མ་ཐུགས་མཉེས་ནས་མི་དེ་ཀུན་ལ་ནོར་བུ་ཞིག་བྱིན་པས། མི་དེ་རྣམས་ཀྱིས་གཅིག་གིས་ང་དགོས། ཡང་གཅིག་གིས་ང་དགོས་ཞེས་འཕྲོག་རེས་བྱས་སྟེང་ནས་འཁྲུག་པ་ཤོར་ཚེ། ནང་ནས་མདའ་རྩལ་ཆེ་བའི་མི་དེས། ང་ལ་ནོར་བུ་མི་དགོས་ཁྱེད་རྣམས་ཀྱིས་འཁྲུག་པ་མ་རྒྱག་ཅེས་བར་བཤོལ་བས་མི་ཀུན་ཐང་ཆད་ཚེ་གཅིག་ན་རེ། འོ་ན་ངེད་རྣམས་མི་འགྲིག་ན། ཁོ་ལ་བྱིན་བྱས་པས། གཞན་ཀུན་གྱིས་ཀྱང་དེ་ཡོང་ཞེས། སྔར་ནོར་བུ་མི་དགོས་ཟེར་མཁན་དེ་ལ་བྱིན་ནས་ཐོབ་སྐད། དེས་ན་འདོད་པ་མེད་ན། དངོས་གྲུབ་ཐམས་ཅད་མི་འདོད་བཞིན་དུ་ཐོབ་ཡོང་། སྔོན་ལྷའི་དབང་བོའི་བསོད་ནམས་ལས་ཆེས་ལྷག་པའི་གང་པོ་བྱ་བ་རབ་ཏུ་བྱུང་ནས། ཆོས་གང་ཞིག་ཡིད་ལ་བྱས་ན་མྱུར་དུ་གྲོལ་བ་ཐོབ་པའི་གདམས་ངག་ྀཨཚ་མ་ཞིག་བཅོམ་ལྡན་འདས་ལ་གསོལ་བ་བཏབ་པས། གཞན་ཅི་ཡང་མི་གསུངས་པར་ཁྱོད་འདོད་པ་ལ་ཆགས་ན་གྲོལ་བ་མི་ཐོབ་པས། ཁྱོད་འདོད་པ་ལ་མ་ཆགས་པ་གྱིས་དང་གྲོལ་བ་འཐོབ་བོ་ཞེས་ཚེ་བློས་གཏོང་གི་ཆོས་ཉག་གཅིག་གསུངས་ནས།

ཁོང་གིས་བསྒོམས་པས་དགྲ་བཅོམ་པ་ཐོབ་པར་གསུངས། དེས་ན་དགྲ་བཅོམ་པའི་གོ་འཕང་འཐོབ་པར་འདོད་པས་ཀྱང་། ཚེ་བློས་གཏོང་བའི་གདམས་པ་འདི་ཐུགས་དམ་གྱི་མཐིལ་དུ་གཟུང་བར་བྱའོ། །སྔོན་ཐུབ་པས་ཐུགས་བསྐྱེད་དུས་བསྟན་པ་ལ་ཆོས་གོས་ངུར་སྨྲིག་སོར་བཞི་འཆང་བ་ལའང་བཟའ་བཏུང་བསམ་པ་བཞིན་མ་ཐོབ་ན། བདག་གིས་སངས་རྒྱས་བསླུས་པས་སངས་རྒྱས་མི་ཐོབ་པར་གྱུར་ཅིག །ཅེས་དམ་བཅའ་མཛད་ཅིང་། ཁྱིམ་པའི་སྐྱེ་བོ་ཐམས་ཅད་ཀྱིས། །སེན་མོའི་སྟེང་དུ་ཞིང་རྨོས་ཀྱང་། །ང་ཡི་རབ་ཏུ་བྱུང་བ་རྣམས། །འཚོ་བས་ཕོངས་པར་མི་འགྱུར་རོ། །གསུངས་པས་རང་གི་ངོས་ནས་ཐུབ་པའི་བཀའ་ལ་བློ་འགེལ་ནུས་ན། དབེན་པའི་གནས་སུ་རྩེ་གཅིག་ཏུ་སྒྲུབ་པ་བྱེད་པ་ལ་འཚོ་བས་ཕོངས་མི་སྲིད་དོ། །སྔོན་གྱི་དམ་པ་རྣམས་ཀྱི་རྣམ་ཐར་གྱིས་ཀྱང་ཤེས་ཏེ་རྒྱ་བོད་དུ་སྔོན་བྱོན་པའི་དམ་པ་ཕལ་མོ་ཆེས་ཚེ་འདི་བློས་བཏང་སྟེ། དབེན་པའི་གནས་སུ་སྒྲུབ་པ་ལ་རྩེ་གཅིག་ཏུ་གཞོལ་བ་ཤ་སྟག་མཛད་འདུག་ཀྱང་རྙེད་བཀུར་དང་སྙན་གྲགས་འབད་མེད་དུ་རྒྱས་པ་ལས། འཚོ་བས་ཕོངས་ནས་ཆོས་དང་སྲོག་

གི་བར་ཆད་དུ་གྱུར་པ་དེ་དག་སུ་ལའང་བྱུང་བའི་ལོ་རྒྱུས་མི་སྣང་ངོ་། །དེས་ན་ཚེ་བློས་ཐོངས་ན་རྙེད་བཀུར་སྙན་གྲགས་ཀྱང་འབད་མེད་ལྷུན་འགྲུབ་ཏུ་འོང་བར་གདའ། སྔོན་རྗེ་བཙུན་འབྲོག་ལ་ཕྱི་གངས་ཀྱི་ར་བ་ན་བཞུགས་དུས། མགོན་པོ་བྱ་རོག་གདོང་ཅན་ཡང་བྱུང་བས། རྗེ་མི་ལའི་ཞལ་ནས། ངས་ཚེ་སྟོད་ལ་མཐུ་ཁོ་ན་ལ་ལས་ཀ་བྱེད་དགོས་པ་ཞིག་བྱུང་དུས་ན་ཁྱོད་མི་འདུག །ད་ཁྱོད་ཀྱི་དགོས་པ་ཅི་ཡོད་གསུངས་ནས། གླང་བེར་གཅིག་གིས་བརྡུངས་པས་ཆོས་སྐྱོང་ན་རེ་དེ་དུས་རྗེ་བཙུན་ཆོས་པ་མིན་པས་ང་འཁོར་ས་མེད་པ་ལགས། ད་ནི་རྗེ་བཙུན་ཆོས་ཁོ་ན་མཛད་པས་ཡང་ཡང་འཁོར་དགོས་པ་ཡིན་གསུངས་པས། རྗེ་བཙུན་མི་ལས་ཁྱོད་རང་བདེན་གསུངས། ཡང་རྗེ་བཙུན་ཆུ་བར་ན་བཞུགས་དུས་སུ། ནོར་ལྷ་ཐམས་ཅད་དྲུང་དུ་བྱུང་བས་མི་ལས་གླང་བེར་གྱིས་ཁོང་ཚོ་བརྡུངས་ནས། ངས་ཚེ་སྟོད་ལ་ཟན་ཁམ་རེ་མི་རྙེད་པ་བྱུང་དུས་ཁྱེད་ཚོ་མི་འདུག །ད་ཁྱེད་ཀྱི་དགོས་པ་མེད་གསུངས་པས། དེ་དུས་ན་རྗེ་བཙུན་འདོད་པས་གདུང་པས། ངེད་ཚོ་འཁོར་ས་མ་བྱུང་བ་ལགས། ད་ལྟ་ནི་རྗེ་བཙུན་

འདོད་པ་ཟད་པས། ངེད་ཚོ་རང་དབང་མེད་པར་འཁོར་བ་ལགས་ཞུས་པས། མི་ལའི་ཞལ་ནས་ཁྱེད་བདེན་གསུངས། དེས་ན་ཆོས་སྐྱོང་ནོར་ལྷ་རྣམས་འཁོར་བར་འདོད་ན་ཡང་། ཚེ་བློས་བཏང་ནས་ཆོས་བཞིན་བྱས་ན་འོང་བའི་ཚུལ་ལ་བསམས་ནས། ཚེ་འདིའི་འདོད་ནག་འདིའི་དབང་དུ་མ་སོང་བ་བྱས་ཚེ་བློས་ཅི་ཐོང་ལ་འབད་དགོས། ཚེ་བློས་མ་ཐོངས་བར་དགོན་ཆུང་རེ་བདག་ཏུ་བཟུང་། ཆགས་སྡང་གི་འཁོར་ལོ་བསྐོར་ན། བཀའ་རྒྱུད་པའི་གདུང་བརྒྱུད་ཆད་པ་དང་འདྲ་སྟེ། རྗེ་མི་ལའི་ཞལ་ནས། སྒོམ་ཆེན་པ་སྡོད་ཚུགས་ལ་སྙད་བཏགས་ནས། དགོན་ཆུང་རེ་བརྩིགས་པས་མི་གསོག་དགུ་གསོག་བྱེད་ཙ་ན། སྒོམ་དང་བྲལ་ཚར་བ་ཡིན་གསུང་སྐད་དོ། །ཡང་ངས་གཞི་དགོན་མ་བཟུང་བས་འཚེངས། དགོན་ཆུང་ཁྲ་ཙོང་ངེ་བ་ཞིག་བརྩིགས་ན་འཛིན་ཆགས་ཤུགས་ལ་སྐྱེས། གང་ཟག་བློ་ཆུང་རྣམས་སྒོམ་དང་བྲལ་གསུངས། ཡང་དུས་ཕྱིས་རྩན་ངའི་བརྒྱུད་འཛིན་ཡིན་ཟེར་ནས། རི་ཁྲོད་སྤངས་ཏེ་དགོན་ཆུང་རེ་བཟུང་ནས། མདུན་ན་ཆང་བུམ་རེ་བཞག་ནས་ལག་པས་རྔ་ཁོག་རེ་བཟུང་། ཁས་མི་ནག་པ་ལ་ཆོས་

ནག་སྒྲོག །དེ་ཙམ་ན་ངའི་བརྒྱུད་པ་ཆད་པ་ཡིན་གསུངས། ལར་ཡང་ཆོས་པ་དང་། སྒོམ་ཆེན་པ་བྱ་བ་དེ་ནི་རྒས་ལ་ཐུག་ཙམ་ན་འཛིན་ཆགས་ཇེ་ཆུང་ལ་འགྲོ་དགོས་པ་ཡིན་པ་ལ། དུས་ད་ལྟའི་ཆོས་པ་དང་། སྒོམ་ཆེན་པ་ཕལ་ཆེར་ནི། རྒས་ཁ་ཤི་ཁར་སོང་བ་དང་འཛིན་ཆགས་ཇེ་ཆེར་འགྲོ་བར་འདུག་གསུངས། དེས་ན་སྐྱེ་བ་ནས་ཚེ་རབས་ཐམས་ཅད་དུ་དེ་ལྟ་བུ་ཞིག་ཏུ་མ་གྱུར་པ་བྱའོ། །མདོར་ན་འཁོར་བ་འདིར་འཁོར་བའི་རྒྱུ་རྐྱེན་དེ་ལས་བཟང་ངན་སྣ་ཚོགས་བྱས་པ་ལས་བྱུང་། ལས་དེ་ཆགས་སྡང་ལ་སོགས་པའི་ཉོན་མོངས་པའི་དབང་གིས་བསགས། དེའི་རྩ་བ་གང་ལ་ཐུག་ན། ང་ལྟོགས་ཡོང་། ང་གྲང་ཡོང་། ང་སྐོམ་ཡོང་། ང་ན་ཡོང་། ང་ཤི་ཡོང་། ང་ལ་ཟས་དགོས། ང་ལ་གོས་དགོས། ང་ལ་བུ་དགོས། ང་ལ་ནོར་དགོས། མི་དགོས་དགུ་དགོས་ཀྱི་འདོད་ནག་མཁན། ང་བདག་འགོང་པོ་ཕུང་རྒན་འདི་ལ་ཐུག་འདུག་པས། སྙིགས་དུས་ཀྱི་ཚེ་ཐུང་འདི་ལ་དགྲ་ནག་པོ་བདག་འཛིན་འགོང་པོ་འདི་ཅི་ཐུལ་ལ་འབད་དགོས། བདག་འཛིན་དེ་རིང་བརླག་ན་དེ་རིང་འཚང་རྒྱ།

སང་བརླག་ན་འཚང་རྒྱ་བས། བདག་འཛིན་ཉོན་མོངས་འདུལ་བའི་གདམས་ངག་ནི་ཆོས་ཐམས་ཅད་ཡིན་མོད་ཀྱང་། ཉི་མ་གཅིག་གིས་མུན་ནག་ཀུན་སངས་པ། ཨ་རུ་ར་རྣམ་རྒྱལ་གཅིག་གིས་ནད་ཀུན་འཇོམས་པ། ཡིད་བཞིན་གྱི་ནོར་བུ་གཅིག་གིས་ཀུན་གྱི་རེ་བ་སྐོང་བ། གྲི་གཅིག་གིས་འཆིང་བ་ཀུན་གཅོད་པ། མི་དཔའ་བོ་གཅིག་གིས་དགྲ་ཀུན་ཐུལ་པ་ལྟར་ཆོས་གཅིག་ཉམས་སུ་བླངས་པས། བདག་འཛིན་ཉོན་མོངས་ཀུན་ཐུལ་ནས། ཚེ་གཅིག་ལུས་གཅིག་ལ་སངས་རྒྱས་པར་བྱེད་པའི་གདམས་ངག་ཀུན་གྱི་མཆོག་ཏུ་གྱུར་པ་དེ་གང་ཡིན་སྙམ་ན། དེ་བྱམས་སྙིང་རྗེ་བྱང་ཆུབ་ཀྱི་སེམས་གཉིས་ཡིན་པའི་ཚུལ་ནི། སྔོན་བྱོན་རྒྱལ་བ་སྲས་དང་བཅས་པས་མགྲིན་གཅིག་དབྱངས་གཅིག་ལྟར་གསུངས་པས། བློ་གྲོས་ཅན་རྣམས་ཀྱིས་འདི་ལ་གཅིག་དྲིལ་དུ་འབད་པར་བྱའོ། །སྨྲས་པ། ས་སྐྱོང་རྒྱལ་བློན་ཆེ་དགུའི་སྤྱི་བོར་བཀུར། །ས་སྟེང་འདི་ན་འགྲན་ཟླ་མ་མཆིས་ཀྱང་། །ས་གཞི་བཞིན་དུ་དམན་པའི་ས་བཟུང་ནས། །ས་ལམ་སྟོན་མཁས་བླ་མས་ཐུགས་རྗེས་གཟིགས། །འཇིག་རྟེན་པ་ཡང་དཔོན་པོ་བཟང་པོ་ཡི། །དྲིན་གྱིས་

སྐྱིད་ཚེ་གླུ་དབྱངས་ལེན་པ་བཞིན། །བདག་ཀྱང་བླ་མ་དམ་པའི་བཀའ་དྲིན་གྱིས། །སྐྱིད་པའི་དུས་འདིར་ཆོས་ཀྱི་གླུ་དབྱངས་ལེན། །དལ་འབྱོར་རྙེད་དཀའ་ཐོབ་པ་ད་རེས་ཙམ། །མྱུར་དུ་ལྷ་ཆོས་བྱེད་པའི་དུས་ལ་བབ། །ད་རེས་དོན་ཆེན་བྱང་ཆུབ་མ་བསྒྲུབས་ན། །ཕྱིན་ཆད་མི་ལུས་ཡང་ཡང་རྙེད་པར་དཀའ། །དེ་རིང་ཙམ་ཡང་མི་འཆིའི་ངེས་པ་མེད། །ད་ལྟ་ཉིད་དུ་ལྷ་ཆོས་བྱེད་རེ་རན། །གློ་བུར་ཤི་ནས་འཇིག་རྟེན་ཕ་རོལ་ཏུ། །འགྲོ་དུས་དམ་ཆོས་མ་གཏོགས་ཕན་པ་མེད། །དགེ་སྡིག་གཉིས་ལས་འབྲས་བུ་བདེ་སྡུག་འབྱུང་། །སྡིག་པ་སྤངས་ནས་དགེ་བ་སྒྲུབ་པ་གཅེས། །སྔ་མ་ཅི་བྱས་རང་གི་ལུས་ལ་ལྟོས། །ཕྱི་མར་གར་འགྲོ་རང་གི་སེམས་ལ་དྲིས། །སྡིག་པའི་དབང་གིས་ངན་སོང་གསུམ་པོ་རུ། །སྐྱེས་ན་སྡུག་བསྔལ་ཡོད་པ་སྨོས་ཅི་དགོས། །ལས་ཉོན་དབང་གིས་མཐོ་རིས་ལྷ་མི་རུ། །སྐྱེས་ཀྱང་སྡུག་བསྔལ་མ་གཏོགས་བདེ་བ་མེད། །འཁོར་བར་སྐྱེ་བའི་རྒྱུ་ནི་ལས་ཡིན་པས། །ལས་དེ་གསོག་མཁན་ཉོན་མོངས་བདག་འཛིན་ཏེ། །དཔེར་ན་སྡོང་པོ་རྩད་ནས་གཅོད་པ་ལྟར། །བདག་

འཛིན་ཕུང་རྒན་རྩད་ནས་གཅོད་རེ་རན། །བདག་འཛིན་འགོང་པོ་ཐུལ་ནས་ཚེ་གཅིག་ལ། །སངས་རྒྱས་ཐོབ་ཐབས་གདམས་པ་ཀུན་གྱི་མཆོག །བྱམས་དང་སྙིང་རྗེ་བྱང་ཆུབ་སེམས་གཉིས་པོ། །ད་ནི་ཉམས་སུ་ལེན་པའི་དུས་ལ་བབས། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །གཉིས་པ་དངོས་གཞི་བྱང་ཆུབ་ཀྱི་སེམས་གཉིས་ལ་བློ་སྦྱོང་ཚུལ་ནི། ཡོངས་འཛིན་པཎྚི་ཏའི་ཞལ་ནས། དབང་རྣོན་ཆོས་ཀྱི་རྗེས་སུ་འབྲང་བ་དག་གིས་ནི། སྔོན་ལ་གནས་ལུགས་རྟོགས་པའི་ལྟ་བ་རྒྱུད་ལ་བསྐྱེད་ནས། དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་ཆེན་པོ་བསྐྱེད་པའི་སྒོ་ནས་བྱང་ཆུབ་ཀྱི་སེམས་རྗེས་སུ་སྦྱོང་བའང་ཡོད་གསུངས། དེ་བཞིན་དུ་དགོངས་པ་རབ་གསལ་ལས། ཐེག་ཆེན་གྱི་རིགས་ཅན་ཆོས་ཀྱི་རྗེས་འབྲང་ནི། ཡང་དག་པའི་དེ་ཁོ་ན་ཉིད་ཤེས་པའི་འཚོལ་བ་སྔོན་དུ་བཏང་སྟེ། དོན་དམ་པ་ལེགས་པར་གཏན་ལ་ཕབ་པའི་འོག་ཏུ། སེམས་ཅན་ལ་སྙིང་རྗེ་ཆེན་པོ་བསྐྱེད་པ་ལ་བརྟེན་ནས། སེམས་བསྐྱེད་ཅིང་ཐུབ་པའི་བརྟུལ་ཞུགས་བྱང་སེམས་ཀྱི་སྤྱོད་པ་ལ་སློབ་བོ་གསུངས། དེས་ན་ཐོག་མར་དོན་དམ་བྱང་

ཆུབ་ཀྱི་སེམས་བསྒོམ་ཚུལ་སྟོན་ཏེ། རྒྱལ་སྲས་རིན་པོ་ཆེའི་ཞལ་ནས། སྐྱབས་འགྲོ་སེམས་བསྐྱེད་སྔོན་དུ་བཏང་ནས་བླ་མ་ལ་གསོལ་བ་བཏབ་སྟེ། ཡན་ལག་བདུན་པ་ཕུལ་ནས་ལུས་དྲང་པོར་འདུག་ལ་དབུགས་ཕྱིར་འགྲོ་ནང་འགྲོ་ཉི་ཤུ་རྩ་གཅིག་གི་བར་དུ་ལྷག་ཆད་མེད་པར་བགྲངས་ཏེ། འདིས་བསམ་གཏན་གྱི་སྣོད་དུ་རུང་བར་འགྱུར་རོ། །ཞེས་གསུངས་ལྟར་བྱའོ། །དེ་ནས་དོན་དམ་བྱང་ཆུབ་ཀྱི་སེམས་འདི་ལྟར་བསྒོམ་དོགས་ཏེ། དཔེར་ན། རྨི་ལམ་གྱི་སྣང་བ་སྣ་ཚོགས་དེ་ཉིད་གཉིད་ཀྱིས་བསླད་པའི་སེམས་སྣང་ཡིན་པ་དེ་བཞིན་དུ། ད་ལྟར་གྱི་ཡུལ་སྣང་སྣ་ཚོགས་འདི་ཡང་བག་ཆགས་ཀྱིས་བསླད་པའི་སེམས་སྣང་ཡིན་ཏེ། ལང་ཀར་གཤེགས་པའི་མདོ་ལས། བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། །གསུངས། རྒྱལ་སྲས་རིན་པོ་ཆེས། འདི་ལྟར་གཟུང་བའི་ཡུལ་དུ་གྱུར་པའི་སྣོད་བཅུད་འདི་དག་རྨི་ལམ་དང་འདྲ་སྟེ། རང་གི་སེམས་ཉིད་འཁྲུལ་ནས་དེ་ལྟར་སྣང་བ་ཡིན་གྱི། སེམས་

ལས་ལོགས་སུ་གྱུར་པ་ཅུང་ཟད་ཀྱང་མེད་པར་སྒྲོ་འདོགས་བཅད་གསུངས། སྔོན་བྱང་ཆུབ་སེམས་དཔའ་མཛེས་པའི་ཏོག་གཉིད་ཀྱིས་ལོག་པའི་རྨི་ལམ་ན་གསེར་གྱི་རྔ་ཀུན་ཏུ་སྣང་བ་ཉི་མའི་དཀྱིལ་འཁོར་འདྲ་བ་ཞིག་མཐོང་ངོ་། །ཕྱོགས་ཐམས་ཅད་ན་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་པ་དག་རིན་པོ་ཆེའི་ཤིང་དྲུང་ན་རིན་པོ་ཆེ་བཻཌཱུ་རྻའི་ཁྲི་རྣམས་ལ་བཞུགས་ཤིང་། འཁོར་བརྒྱ་སྟོང་དུ་མས་བསྐོར་ཏེ། མདུན་གྱི་བལྟས་ནས་ཆོས་སྟོན་པ་མཐོང་ངོ་། །དེ་ནས་ཡང་སྐྱེས་བུ་བྲམ་ཟེའི་གཟུགས་ལྟ་བུ་ཞིག་གིས་རྔ་དེ་བརྡུངས་པ་མཐོང་སྟེ། རྔའི་སྒྲ་དེ་ལས། གསེར་འོད་དམ་པའི་རྔ་ཆེན་སྒྲ་ཡིས་ནི། །སྟོང་གསུམ་འཇིག་རྟེན་འཇིག་རྟེན་གསུམ་འདི་ན། །ངན་སོང་སྡུག་བསྔལ་གཤིན་རྗེ་སྡུག་བསྔལ་དང་། །དབུལ་བའི་སྡུག་བསྔལ་སྡུག་བསྔལ་ཞི་བར་ཤོག །རྔ་བོ་ཆེ་ཡི་སྒྲ་སྐད་འདི་ཡིས་ནི། །འཇིག་རྟེན་ཕོངས་པ་ཐམས་ཅད་ཞི་གྱུར་ཅིག །ཇི་ལྟར་ཐུབ་དབང་འཇིགས་མེད་འཇིགས་ཞི་ལྟར། །སེམས་ཅན་འཇིགས་མེད་འཇིགས་དང་བྲལ་བར་ཤོག །ཇི་ལྟར་འཁོར་བར་ཀུན་མཁྱེན་ཐུབ་དབང་པོ། །འཕགས་པའི་ཡོན་ཏན་

ཀུན་དང་ལྡན་པ་ལྟར། །སྐྱེ་དགུ་ཏིང་འཛིན་བྱང་ཆུབ་ཡན་ལག་གི །ཡོན་ཏན་ལྡན་ཞིང་ཡོན་ཏན་རྒྱ་མཚོར་གྱུར། །རྔ་བོ་ཆེ་ཡི་སྒྲ་སྐད་འདི་ཡིས་ནི། །སེམས་ཅན་ཐམས་ཅད་ཚངས་པའི་དབྱངས་ལྡན་གྱུར། །སངས་རྒྱས་བྱང་ཆུབ་དམ་པ་མཆོག་རེག་ཤོག །ཆོས་ཀྱི་འཁོར་ལོ་དམ་པ་བསྐོར་གྱུར་ཅིག །བསྐལ་པ་བསམ་གྱིས་མི་ཁྱབ་བཞུགས་པར་ཤོག །འགྲོ་ལ་ཕན་ཕྱིར་ཆོས་ནི་སྟོན་གྱུར་ཅིག །ཉོན་མོངས་འཇོམས་འགྱུར་སྡུག་བསྔལ་སེལ་བར་ཤོག །འདོད་ཆགས་ཞེ་སྡང་གཏི་མུག་ཞི་གྱུར་ཅིག །ཅེས་པ་ལ་སོགས་པའི་ཚིགས་སུ་བཅད་པའི་སྒྲ་མང་པོ་ཐོས་སོ། །ཡང་སྔོན་སངས་རྒྱས་འོད་སྲུངས་ཀྱི་སྦྱིན་བདག་རྒྱལ་པོ་ཀྲི་ཀྲིའི་རྨི་ལམ་དུ། གླང་པོའི་རྒྱལ་པོ་སྐར་ཁུང་ནས་བྱུང་བ་ལ་དེའི་མཇུག་མ་འཐོག་པ་དང་། སྐོམ་པའི་ཕྱི་ནས་ཁྲོན་པ་སྙེགས་པ་དང་། ཕྱེ་བྲེ་གང་དང་མུ་ཏིག་བྲེ་གང་ཚོང་བྱེད་པ་དང་། ཙན་དན་ཤིང་ཕལ་བ་རིན་མཉམ་པར་བྱེད་པ་དང་། ཀུན་དགའ་ར་བའི་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པ་ལེན་པས་ཕྲོགས་པ་དང་། གླང་པོའི་ཕྲུ་གུས་སྤོས་ཀྱི་གླང་པོ་

འཇིགས་པར་བྱེད་པ་དང་། སྤྲེའུ་མི་གཙང་བས་གོས་པས་གཞན་ལ་སྐུད་པ་དང་། སྤྲེའུ་རྒྱལ་པོར་དབང་བསྐུར་བ་མཐོང་བ་དང་། རས་ཡུག་གཅིག་མི་བཅོ་བརྒྱད་ཀྱིས་བགོས་པ་ལས་རེ་རེའི་ལག་ཏུ་རས་ཡུག་ཚང་མ་རེ་རེ་བྱུང་བ་དང་། སྐྱེ་བོའི་ཚོགས་ཆེན་པོ་འདུས་ནས་འཐབ་རྩོད་བྱེད་པ་རྨིས་པ། སངས་རྒྱས་འོད་སྲུངས་ལ་ཞུས་པས། ཁོང་གི་ཞལ་ནས། ཁྱེད་ཀྱི་རྨིས་ལྟས་དེ་རྣམས། མ་འོངས་པ་ན། ཤཱཀྱ་ཐུབ་པའི་བསྟན་པ་ལ། དགེ་སློང་རྣམས་ཁྱིམ་ནས་བྱུང་ཡང་། གཙུག་ལག་ཁང་དང་རྙེད་པ་ལ་ཆགས་པ་འབྱུང་བ་དང་། གཞན་གྱིས་ཆོས་བཤད་པ་ན་ཉན་པར་མི་བྱེད་པ་འབྱུང་བ་དང་། བཟའ་བའི་ཆེད་དུ་ཆོས་སྟོན་པ་འབྱུང་བ་དང་། མུ་སྟེགས་ཀྱི་གཞུང་དང་སངས་རྒྱས་ཀྱི་བཀའ་མཉམ་པར་འཛིན་པ་འབྱུང་བ་དང་། དགེ་འདུན་གྱི་ལོངས་སྤྱོད་ཀྱིས་ཁྱིམ་པའི་ངོ་སྲུང་བ་འབྱུང་བ་དང་། དགེ་སློང་སྡིག་ཅན་གྱིས་ཁྲིམས་ལྡན་དགེ་སློང་ཟིལ་གྱིས་གནོན་པ་འབྱུང་བ་དང་། ཚུལ་ཁྲིམས་ཉམས་པས། ཚུལ་ཁྲིམས་ལྡན་པ་ལ་སྐུར་བ་འདེབས་པ་འབྱུང་བ་དང་། རྨོངས་པ་རྣམས་རྒྱལ་པོར་དབང་བསྐུར་བ་འབྱུང་བ་

དང་། ཤཱཀྱ་ཐུབ་པའི་བསྟན་པ་ལ་སྡེ་བ་བཅོ་བརྒྱད་འབྱུང་བ་དང་། ཤཱཀྱ་ཐུབ་པའི་བསྟན་པ་རྩོད་པའི་ཆོས་ཀྱིས་ཉམས་པར་འགྱུར་བའི་སྔ་ལྟས་སོ། །ཞེས་མ་འོངས་ལུང་བསྟན་རིམ་པ་བཞིན་དུ་གསུངས། སྔོན་མཉམ་མེད་དྭགས་པོ་རིན་པོ་ཆེ་དེ་ཉིད། དགེ་བཤེས་རྒྱ་ཡོན་བདག་གི་རྩར་བྱོན་ཏེ། ཇོ་བོ་རྗེས་མན་ངག་མཐའ་དག་གསན། དགེ་བཤེས་ཁོང་གི་ཞལ་ནས། ང་ལ་ཇོ་བོའི་གདམས་པ་སངས་རྒྱས་ལག་པས་བྱེད་པ་འདྲ་བ་ཡོད་དེ་ཁྱོད་ལ་བསྟན་གྱིས་གསུངས་ནས། དམིགས་པའི་འགྲོ་ལྡོག་ཟད་པ་མེད་པ་གསུངས་པ་བཞིན་བསྒོམས་པས། རྨི་ལམ་དུ་གསེར་འོད་དམ་པ་དང་མདོ་སྡེ་ས་བཅུ་བ་ནས་བཤད་པའི་ས་བཅུ་ཐོབ་པའི་སྔ་ལྟས་ཀྱི་རྨི་ལམ། ཁྲི་རྐང་དག་ལ་འཛེགས་པ་དང་། །ལྗོན་ཤིང་དག་ལ་འཛེགས་པ་དང་། །ཕལ་བའི་སྐས་ལ་འཛེགས་པ་དང་། །མཆོད་རྟེན་དག་ལ་འཛེགས་པ་དང་། །གྱེན་ལ་ཤིན་ཏུ་འཛེགས་པ་དང་། །རི་བོའི་རྩེ་ལ་འགྲོ་བ་དང་། །རིན་ཆེན་སྐས་ལ་འཛེགས་པ་དང་། །ནམ་མཁའི་སྐས་ལ་འཛེགས་པ་སོགས། །རྨི་ལྟས་ངོ་མཚར་ཅན་དཔག་ཏུ་མེད་པ་

བྱུང་ངོ་། །ཡང་རྗེ་བཙུན་མི་ལ་མཇལ་དུ་འགྲོ་བར་ཐག་བཅད་ནས། བླ་མ་དཀོན་མཆོག་ལ་མཆོད་པ་ཕུལ། གསོལ་བ་བཏབ་ནས་ཉལ་བའི་རྨི་ལམ་ན། རག་དུང་རིང་པོ་ཞིག་བུས་པའི་སྐད་ཀྱིས་འཛམ་བུའི་གླིང་ཐམས་ཅད་ཁྱབ་པ་རྨིས་དེ། དེང་སང་རག་དུང་འདི་ལས་སྒྲ་ཆེ་བ་མེད་ཟེར་བ་རྨིས། ཡང་ནམ་མཁའ་རྟེན་མེད་པ་ལ་རྔ་བོ་ཆེ་ཡང་དག་པ་གཅིག་འདུག་སྟེ། བརྡུངས་པས་སྒྲ་ཆེན་པོ་ཚད་མེད་པ་བྱུང་སྒྲ་དེ་ལ་རི་དྭགས་མང་པོ་ཉན་ཞིང་འདུག །མི་མང་པོ་དཔག་ཏུ་མེད་པ་འདུག་པ་ལ། མོན་མོའི་ཆ་ལུགས་བྱས་པའི་བུད་མེད་གཅིག་ན་རེ། མི་འདི་རྣམས་ལ་རྔ་འདི་བརྡུང་། རི་དྭགས་འདི་རྣམས་ལ་འདི་སྦྱིན་ཟེར་ནས་འོ་མ་ཐོད་ཕོར་གང་བྱིན། འདིས་རི་དྭགས་མང་པོ་འདི་རྣམས་ལ་མི་ཁེབས་བྱས་པས། ཁྱེད་རང་འཐུངས་དང་རི་དྭགས་འདི་རྣམས་ལས། འགྲོ་བ་རིགས་དྲུག་གི་སེམས་ཅན་ཐམས་ཅད་ཁེབས་པར་འོང་ང་ནི་ཉི་མ་ནུབ་ཕྱོགས་སུ་འགྲོ་ཟེར་བ་རྨིས། ད་ལྟ་སྣོད་དང་མི་ལྡན་པ་རྣམས་ལ་ལམ་རིམ་གྱིས་སྦྱངས་ཏེ་རྔའི་སྒྲ་ལ་ཉན་པའི་མི་རྣམས་ཡིན་པར་འདུག །བཀའ་གདམས་ཀྱི་བླ་མ་རྣམས་ཀྱང་དྲིན་ཆེ།

རི་དྭགས་དེ་རྣམས་རི་ཁྲོད་འགྲིམ་པའི་སྒོམ་ཆེན་པ་རྣམས་ཡིན་པར་འདུག །བླ་མ་ཆེན་པོ་མི་ལའི་གདམས་ངག་ཐབས་ལམ་དང་། ཕྱག་རྒྱ་ཆེན་པོ་ཁོ་ནས་ཀྱང་སྔར་གྱི་རྨི་ལམ་གྱི་ལྟས་དེ་ཀ་ལྟར་བྱུང་གསུངས། དེས་ན་ཆོས་ཐམས་ཅད་རྨི་ལམ་གྱི་སྣང་བ་ལྟར་སྣང་ལ་རང་བཞིན་གྱིས་མ་གྲུབ་ཅིང་སེམས་ཀྱི་རྣམ་རོལ་ཏུ་ཤེས་པར་བྱའོ། །ཡང་སྔོན་ལམ་འབྲས་པའི་སྒོམ་ཆེན་པ་ཞིག་ལ་རྩ་རླུང་གི་བྱེད་པས་སྐོམ་པའི་ཉམས་ཤིག་བྱུང་སྟེ། ཆུ་འཐུང་བར་འདོད་ནས། ཆུ་ར་ཆུ་མིག་གཙང་པོ་རྣམས་སུ་ཆུ་འཐུང་དུ་ཕྱིན་པས་ཆུ་མི་འདུག་ཐེ་ཚོམ་སྐྱེས་ནས་ཆོས་གོས་ཕར་ཁའི་བྲག་བར་གཅིག་ཏུ་བཞག་སྟེ། ཕྱིར་ལོག་ནས་ཉལ་བསྡད། གཉིད་སད་པ་དང་སྐོམ་ཉམས་ཀྱང་ཡལ་འདུག །ཆུ་ར་སོགས་ནའང་ཆུ་འདུག །ཆོས་གོས་ཀྱང་ཕ་ཀི་ན་འདུག་པས་ལེན་པ་ལ་ཀོ་བ་བཏང་དགོས་པར་བྱུང་ཟེར། ད་ལྟར་ཆུ་ཡོད་དུ་སྣང་བ་བདེན་རྒྱུ་མེད། ཆུ་མེད་དུ་སྣང་བ་རྫུན་རྒྱུ་མེད་པས་ན། ཅིར་སྣང་རང་སེམས་སུ་ཐག་བཅད་དོ། །འོ་ན་སྣང་བ་འདི་ཕྱི་རོལ་གྱི་དོན་མིན་ན་སྲ་ཞིང་འཐས་པ་སོགས་སུ་སྣང་བ་མི་རིགས་སྙམ་ན།

བག་ཆགས་གོམས་པའི་ཕྱིར་རིགས་ཏེ། འཇམ་དཔལ་རྣམ་པར་རོལ་པ་ལས། ལྷའི་བུ་པདྨ་རྣམ་པར་རོལ་པས་འཇམ་དཔལ་ལ་སྨྲས་པ། འཇམ་དཔལ་ཕྱི་རོལ་གྱི་ཡུལ་འདི་ཇི་ལྟར་བལྟ་བར་བྱ། འཇམ་དཔལ་གྱིས་སྨྲས་པ། ཕྱི་རོལ་གྱི་ཡུལ་འདི་རྣམས་སེམས་རྟོགས་པའི་བག་ཆགས་རྒྱས་པའི་དབང་གིས་སྣང་བ་ཡིན་ནོ། །ལྷའི་བུས་སྨྲས་པ། བག་ཆགས་ཇི་ལྟར་བརྟས་ཀྱང་སྲ་ཞིང་འཐས་པ་འདི་ལྟར་སྣང་དུ་ག་ལ་རུང་། འཇམ་དཔལ་གྱིས་སྨྲས་པ། དེ་ལྟར་སྣང་དུ་རུང་སྟེ། དཔེར་ན་གྲོང་ཁྱེར་ཝ་ར་ཎ་སིར། བྲམ་ཟེ་མོ་ཞིག་གིས་རང་ལུས་སྟག་ཏུ་བསྒོམས་པས། ཐམས་ཅད་ཀྱིས་སྟག་དངོས་སུ་མཐོང་ནས་མི་ཐམས་ཅད་བྲོས་ཏེ། གྲོང་ཁྱེར་སྟོང་བ་བྱུང་ངོ་། །ཡང་དགེ་སློང་ཞིག་གིས་རང་ལུས་མི་གཙང་བར་བསྒོམས་པས། ཐམས་ཅད་ཀྱིས་ཀེང་རུས་སུ་མཐོང་བ་བྱུང་ངོ་། །དེ་རྣམས་ཡུན་ཐུང་ངུས་ཀྱང་དེ་ལྟར་སྣང་ན། ཐོག་མ་མེད་པའི་དུས་ནས། བག་ཆགས་བརྟས་པས་ཅི་སྟེ་མི་སྣང་། དེས་ན་ཅི་སྣང་ཐམས་ཅད་རང་སྣང་ཡིན་ནོ། །མདོར་ན་འོ་སྐོལ་རྣམས་ལ། གཉིད་སེམས་ཀྱི་རྒྱུ་རྐྱེན་གྱི་རྟེན་འབྲེལ་ལས་མཚན་མོ་

བཟང་ངན་གྱི་རྨི་ལམ་མང་པོ་བྱུང་བ་དེ་དག་ཐམས་ཅད་རྨིས་པའི་དུས་སུ་སྣང་ལ་རང་བཞིན་མེད་ཅིང་། ཐམས་ཅད་སེམས་སུ་རང་སྣང་ཙམ་ལས་ཕྱི་རོལ་ན་ལོགས་སུ་གྲུབ་པ་རྡུལ་ཙམ་ཡང་མེད་པ་དེ་བཞིན་དུ། ད་ལྟ་སེམས་ཀྱིས་ལས་བཟང་ངན་སྣ་ཚོགས་བསགས་པའི་རྒྱུ་རྐྱེན་རྟེན་འབྲེལ་ལ་བརྟེན་ནས། སྣོད་བཅུད་བཟང་ངན་གྱི་སྣང་བ་ཅི་སྣང་ཡང་སྣང་བའི་དུས་ནས་རང་བཞིན་གྱིས་གྲུབ་པ་མེད་ཅིང་། སེམས་ཀྱི་རང་སྣང་ཙམ་ལས་ཕྱི་རོལ་ལོགས་སུ་གྲུབ་པ་རྡུལ་ཙམ་ཡང་མེད་པས་ཆོས་ཐམས་ཅད་སེམས་ཀྱི་རོལ་པར་ཤེས་པར་བྱའོ། །འོ་ན་དེ་ལྟར་བྱེད་མཁན་སེམས་ཀྱི་གནས་ལུགས་ཇི་ལྟ་བུ་ཞིག་ཡིན་སྙམ་ན། སེམས་ཀྱི་གནས་ལུགས་བརྟགས་ཤིང་དཔྱད་ནས་བཙལ་བའི་ཚེ། རང་བཞིན་གྱིས་གྲུབ་པ་རྡུལ་ཙམ་ཡང་མེད་པར། གདོད་ནས་སྟོང་ཞིང་གསལ་ལ་འཛིན་པ་མེད་པ་སྒྲིབ་མེད་ཟངས་ཐལ་ཁྱབ་བརྡལ་ཀློང་ཡངས་ནམ་མཁའ་ལྟ་བུ་ཡིན་པས། དེའི་ངང་ལ་ནམ་མཁའ་ལྟ་བུར་མཉམ་པར་འཇོག་དགོས་སྟེ། འགྲོ་བ་ཡོངས་ཀྱི་སྔོན་ནས་མ་འདྲིས་པའི་མཛའ་བཤེས་ཆེན་པོ་འདྲེན་པ་

མཉམ་མེད་སྟོན་པ་སངས་རྒྱས་ཀྱི་ཞལ་གྱི་བུམ་བཟང་ལས། འདི་ལྟར་སེམས་ཡོངས་སུ་ཚོལ་ཏེ། འདོད་ཆགས་པར་འགྱུར་བའམ། ཞེ་སྡང་བར་འགྱུར་བའམ། གཏི་མུག་པར་འགྱུར་བའི་སེམས་དེ་གང་ཡིན། ཅི་འདས་པའམ། མ་འོངས་པའམ། ད་ལྟར་བྱུང་བ་ཞིག་ཡིན། དེ་ལ་སེམས་འདས་པ་གང་ཡིན་པ་དེ་ནི་ཟད་པའོ། །མ་འོངས་པ་གང་ཡིན་པ་དེ་ནི་མ་ཕྱིན་པའོ། །ད་ལྟར་བྱུང་བ་ནི་གནས་པ་མེད་དོ་སྙམ་མོ། །འོད་སྲུངས་སེམས་ནི་ནང་ནའང་མེད་ཕྱི་རོལ་ན་མེད་གཉིས་ཀ་ན་ཡང་མེད་ཅིང་མི་དམིགས་སོ། །འོད་སྲུངས་སེམས་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྟེན་མེད་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པའོ། །འོད་སྲུངས་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ། །ཞེས་དང་། འོད་སྲུངས་སེམས་ནི་ཀུན་ཏུ་བཙལ་ཀྱང་མི་རྙེད་དོ། །གང་མི་རྙེད་པ་དེ་ནི་མ་དམིགས་པའོ། །གང་མི་དམིགས་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །གང་

འདས་པ་ཡང་མ་ཡིན། མ་འོངས་པ་ཡིན་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་ཡང་དག་པར་འདས་པའོ། །གང་དུས་གསུམ་ལས་ཡང་དག་པར་འདས་པ་དེ་ནི་ཡོད་པ་ཡང་མ་ཡིན་མེད་པ་ཡང་མ་ཡིན་ནོ། །ཞེས་གསུངས། གཞན་ཡང་བྱམས་པས་ཞུས་པ། བཅོམ་ལྡན་འདས་ནང་གི་སེམས་ཇི་ལྟར་བལྟ་བར་བགྱི། བཀའ་སྩལ་པ། སེམས་ནི་དབྱིབས་མེད་པ་ནམ་མཁའ་ལྟ་བུའོ། །གསུངས། ཡང་སྔོན་སངས་རྒྱས་བཅོམ་ལྡན་འདས་བྱང་ཆུབ་ཤིང་གི་དྲུང་ན་བཞུགས་དུས། ཕྱོགས་བཅུའི་སངས་རྒྱས་རྒྱ་མཚོ་ཙམ་གྱི་ཞལ་མཐོང་བ་དེ་དག་རྣམས་ཀྱིས་གསུང་གཅིག་གིས་བཀའ་སྩལ་པ། སེམས་ཀྱི་སྤྱོད་ཡུལ་ཅི་འདྲ་ཞེས། །རང་གི་སེམས་ནི་སོ་སོར་རྟོག །སངས་རྒྱས་ཀུན་གྱི་གསུང་ཐོས་ནས། །རང་གི་སེམས་ལ་རྟོགས་བཞིན་དུ། །ཡུན་རིང་དུ་ནི་གནས་པ་ན། །སེམས་ཀྱི་རྣམ་པ་མ་མཐོང་སྟེ། །གསུངས། མཉམ་མེད་པོ་ཏོ་པའི་ཆིག་ལབ་རིང་མོ་ལས། ཁམས་གསུམ་འཁོར་བའི་སྡུག་བསྔལ་གྱི་རྒྱ་མཚོ་ཆེན་པོ་འདིར་ཐོག་མ་མེད་པ་ནས་འཁྱམས་པ་འདི་རང་

སེམས་མ་རྟོགས་པས་ལན་ནས་འདུག །ད་འཁོར་བའི་སྡུག་བསྔལ་གྱི་འཇིགས་ནས་ཐར་པ་དང་ཐམས་ཅད་མཁྱེན་པ་ཐོབ་པར་འདོད་པས་རང་གི་སེམས་རྟོག་དགོས། གསུངས། ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས། དྭགས་པོ་སྨན་ལུང་གི་རྒྱ་སོག་ཕུར་སྒྲུབ་པ་མཛད་པའི་ཚེ། མདུན་གྱི་ནམ་མཁར་རྗེ་བཙུན་འཇམ་པའི་དབྱངས་མངོན་སུམ་བྱོན་ནས་ཉམས་ལེན་མདོར་བསྡུས་གསུངས་པ་ལ། རྗེ་ཉིད་ཀྱིས་བསྡུས་དོན་མཛད་པ་ལས། གང་ལ་གནས་པ་མེད་པར་ནི། །སེམས་ཉིད་ནམ་མཁའ་ལྟ་བུར་བསྒོམ། །དེ་ཡི་གྲོགས་རྣམས་ཀུན་ལ་འབད། །བསེ་རུ་ལྟ་བུར་གནས་པར་བྱ། །འདུ་འཛི་དག་ཀྱང་སྤང་བར་བྱ། །ནང་དུ་མཉམ་པར་བཞག་པར་བྱ། །བྱང་ཆུབ་ཆེན་པོ་བརྙེས་པར་བྱ། །ལས་ཀྱི་རྣམ་པར་སྨིན་པ་གདོན་མི་ཟ། །ངེས་པར་འབྱུང་དང་བྱང་ཆུབ་སེམས་བསྒོམས་ཏེ། །དྲན་པའི་མེ་ཆེན་རྒྱུན་ཆད་མེད་པར་སྦར། །ཡུལ་དྲུག་བུད་ཤིང་ངེས་པར་འཚིག་པར་འགྱུར། །འཁོར་དང་མྱ་ངན་འདས་པའི་ཆོས་རྣམས་ཀུན། །སྔོན་ཆད་གང་གིས་མ་དམིགས་མི་དམིགས་ཕྱིར། །ནམ་མཁའ་བཞིན་དུ་འདི་ཡི་

མཐའ་དང་བྲལ། །ཡུལ་གྱི་སྣང་བ་ནམ་མཁའི་པདྨོ་བཞིན། །སེམས་ཀྱི་འཛིན་པ་བདེ་གཤེགས་སུ་ཡིས་རྙེད། །དབྱིངས་རིག་གཅིག་པ་མོ་གཤམ་བུ་ཡིས་སྒྲུབ། །དེ་འདྲ་གང་ཡིན་དེ་དག་རྒྱལ་བའི་ལམ། །ཞེས་གསུངས། རྗེ་རིན་པོ་ཆེས་དང་པོ་ལྟ་བའི་དོགས་པ་མ་ཆོད་པར་ཡུལ་རྒྱ་གར་རང་དུ་འབྱོན་དགོངས་ཚེ། གྲུབ་ཆེན་ལས་ཀྱི་རྡོ་རྗེས་ཡི་དམ་ཕྱག་ན་རྡོ་རྗེ་ལ་ཞུས་པས་ཡི་དམ་གྱིས་སྐུ་མི་སྟོན་པའི་གཞོམ་མེད་ཀྱི་སྒྲ་ཅིག་གིས་འདི་སྐད་གསུངས། ལས་ཀྱི་རྡོ་རྗེ་མ་ཏི་བྷཏྲ་ཤྲཱི་ལ། ངའི་ཚིག་འདི་ཚོ་རྣ་བར་སྐྱོལ་ཅིག །དུས་གསུམ་སངས་རྒྱས་ཐམས་ཅད་ཀྱི་དགོངས་པ། ཡེ་ཤེས་ཀྱི་ཊཀྐི་མ་ཐམས་ཅད་ཀྱི་སྙིང་གཏམ། རྡོ་རྗེ་འཛིན་པ་བདག་གི་གསང་ཚིག །ཐེག་པའི་ཡང་རྩེ་སྨན་མཆོག་ཆེན་པོའི་སྒྲུབ་པ། སེམས་ཉིད་འོད་གསལ་གྱི་རྩད་ཆོད་གསུངས། ཡང་ལས་ཀྱི་རྡོ་རྗེས་ཞུས་པ། འོད་གསལ་གྱི་ངོ་བོ་ཇི་ལྟ་བུ་ལགས་ཞུས་པས། གསང་བདག་གི་ཞལ་ནས། ལས་ཀྱི་རྡོ་རྗེ། འོད་གསལ་གྱི་ངོ་བོ། ངོ་བོ་རང་བཞིན་ཐུགས་རྗེ་གསུམ་འདུ་གསུངས། ཡང་གསང་བདག་གི་ཞལ་ནས།

ལས་ཀྱི་རྡོ་རྗེ། རིག་པའི་ངོ་བོ་སྟོང་པ་འདི་སུས་ཀྱང་མ་བཅོས་པ། རྒྱུ་མེད་པ། རྐྱེན་མེད་པ། ཡེ་གདོད་མ་ནས་གནས་པ་ཡིན། འདི་ལ་བཅའ་བཅོས་མ་བྱེད་པར་ཁོང་རང་གང་འདུག་གི་སྟེང་དུ་ཞོག་དང་གོལ་ས་མེད། དེ་བཞིན་དུ་རང་བཞིན་གསལ་བ་འདི་ཡེ་གདོད་མ་ནས་སྟོང་པ་དང་དབྱེར་མེད་དུ་ལྷུན་གྱིས་གྲུབ། དེའི་རྩལ་ཐུགས་རྗེ་འགག་མེད་གང་ཤར་ཡང་རང་བཞིན་གྱིས་རྡུལ་ཙམ་དུ་ཡང་མ་གྲུབ་པས་གསུམ་ཀ་དབྱེར་མེད་ཟུང་འཇུག་ཆེན་པོར་ཤེས་པར་གྱིས་དང་། དེས་དབྱེར་མེད་དུ་སངས་རྒྱ་ཡི། གསུངས། མཁས་གྲུབ་རིན་པོ་ཆེའི་ཞལ་ནས། སྔོན་དུ་སེམས་ལྟ་བུ་དེ་ཚོལ་བའི་གཞིར་བྱས་ནས། དེ་ཉིད་ལ་རང་བཞིན་སེམས་པའི་རིག་པས་ཇི་ལྟར་གྲུབ་ཚུལ་བཙལ་བ་ན། ཅུང་ཟད་ཀྱང་མ་རྙེད་པའི་ངེས་པ་ལྷང་ངེ་སྐྱེས་པའི་འཛིན་སྟངས་ཀྱི་ཤུགས་མ་ཉམས་པར་སྐྱོང་བའི་ངེས་ངོ་ན། དང་པོ་འཚོལ་བའི་གཞིར་བྱས་པའི་རང་སེམས་ལ་སོགས་པའི་སྣང་བ་གཏན་ནས་ལྡོག་དགོས་ཞེས་གསུངས། སངས་རྒྱས་གཉིས་པ་ཇོ་བོ་རྗེས། རྒྱ་གར་རྡོ་རྗེ་གདན་གྱི་བྱང་ཕྱོགས་ན་ཇོ་བོ་ཞལ་གྱུས་ཏ་རེའི་ལྷ་ཁང་གི་ཐད་ཀ་

ན་ཚུར་བྱོན་ཙ་ན། ནམ་མཁའ་ན་བུད་མེད་རྒན་གཞོན་གཉིས་ཀྱི་གཞོན་ཤོས་ཀྱིས་ཆོས་ཐམས་ཅད་གང་དུ་འདུས་དྲིས་པས། རྒན་ཤོས་ན་རེ། རང་གི་སེམས་སུ་འདུ་ཟེར། སེམས་ཀྱི་མཚན་ཉིད་ཇི་ལྟ་བུ་ཡིན་ཟེར་བས། སེམས་ཀྱི་མཚན་ཉིད་ནམ་མཁའ་ལྟ་བུ་ཡིན་གསུངས་པས། ཇོ་བོའི་དེའི་དུས་སུ་སེམས་ཙམ་དང་དབུ་མའི་ལྟ་བ་ཐུགས་སུ་ཆུད་སྐད། ཡང་ཇོ་བོ་རང་གི་ཞལ་ནས། སེམས་ནི་ཤིན་ཏུ་བརྟག་དཀའ་སྟེ་ཁ་དོག་མེད་པ་དབྱིབས་དང་བྲལ་བ་ནམ་མཁའ་དང་འདྲ་བ་རང་བཞིན་གྱིས་མ་གྲུབ་པའོ། །གསུངས། སྔོན་ཇོ་བོ་རྗེ་ལ། འབྲོམ་སྟོན་པས་སྟོང་པ་ཉིད་ཀྱི་ལྟ་སྒོམ་ཁོ་ནས་སངས་རྒྱ་བ་ལགས་མ་ཞུས། འདི་ལྟར་སྣང་ཚོད་གྲག་ཚོད་འདི་ཐམས་ཅད་རང་གི་སེམས་ལས་མ་བྱུང་བ་མེད། སེམས་རིག་པ་སྟོང་པ་ཡིན། དེ་རིག་སྟོང་གཉིས་མེད་དུ་རྟོགས་པ་དེ་ལྟ་བ་ཡིན། དེ་ལ་མ་ཡེངས་པར་དྲན་པ་རྒྱུན་ཆགས་པ་དེ་སྒོམ་པ་ཡིན། དེའི་ངང་ནས་སྒྱུ་མ་ལྟ་བུའི་ཚོགས་གཉིས་གསོག་པ་དེ་སྤྱོད་པ་ཡིན། དེ་ད་ལྟ་ཉམས་འོག་ཏུ་ཆུད་པ་ཞིག་ཡོད་ན་རྨི་ལམ་དུ་འོང་། རྨི་ལམ་དུ་བྱུང་ན་འཆི་

ཁར་འོང་། འཆི་ཁར་བྱུང་ན་བར་དོར་འོང་། བར་དོར་བྱུང་ན་མཆོག་གི་དངོས་གྲུབ་འཐོབ་ངེས་པ་ཡིན་གསུངས། འབྲོམ་རིན་པོ་ཆེའི་ཞལ་ནས། ཐམས་ཅད་སེམས་ཀྱི་རང་བཞིན་ཡིན། སེམས་ཉིད་སྟོང་པ་ཉིད་ཀྱི་རང་བཞིན་ཡིན། སྟོང་པ་ཡེ་སྟོང་སྤྲོས་བྲལ་གྱི་རང་བཞིན་དུ་ཤེས་པ་ནི་ཡེ་ཤེས་ཡིན་ཏེ་སངས་རྒྱས་སུ་གསུངས་པས། སངས་རྒྱས་ལས་ལྷག་པའི་ལྷ་མེད་གསུངས། སྔོན་སློབ་དཔོན་བསམ་ཡས་ན་བཞུགས་དུས། དད་ཅན་རྒན་པོ་རྔོག་ཤེས་རབ་རྒྱལ་པོ་ཞེས་བྱ་བ་ལོ་དྲུག་ཅུ་རྩ་གཅིག་ལོན་པ་ཞིག་གིས། འཆི་ཁ་མའི་ཆོས་ཤིག་ཞུ་འཚལ་ཞུས་པས། སློབ་དཔོན་གྱིས་རྒན་པོའི་སྙིང་ཁར་ཕྱག་འཁར་བཙུགས་ནས་གདམས་པ་འདི་གསུངས་སོ། །ཉོན་ཅིག་རྒན་པོ། རང་རིག་པ་བྱང་ཆུབ་ཀྱི་སེམས་འདི་ལ་ལྟོས་ཤིག །གཟུགས་དང་ཁ་དོག་ཏུ་གྲུབ་པ་མེད། མཐའ་དང་དབུས་སུ་གྲུབ་པ་མེད། དང་པོ་བྱུང་ས་མེད་དེ་སྟོང་། བར་དུ་གནས་ས་མེད་དེ་སྟོང་། ཐ་མ་འགྲོས་མེད་དེ་སྟོང་། སྟོང་བ་ཅིར་ཡང་མ་གྲུབ་པ་གསལ་ལ་དྭངས་པ་ཅིག་འདུག་པ་དེ་མཐོང་ནས། ངོ་ཤེས་ན་རང་ངོ་རང་གིས་ཤེས་པ་ཡིན།

དེ་ལྟར་རྟོགས་ན་འབྱུང་བའི་ལུས་རྒས་ཀྱང་བྱང་ཆུབ་ཀྱི་སེམས་ལ་རྒ་བ་མེད་དོ། །རྒན་པོ་ཡང་དག་པའི་དོན་ཉམས་སུ་ལོངས་ཤིག་གསུངས་པས། མིང་ཡང་རྒན་པོ་འཁར་བཙུགས་ཀྱི་གདམས་པ་ཞེས་བྱའོ། །རྔོག་ཤེས་རབ་རྒྱལ་པོ་དེ་ཉོན་མོངས་པའི་འཆིང་བ་ལས་གྲོལ་ནས་གྲུབ་པ་ཐོབ་པོ། །སྔོན་སློབ་དཔོན་ཆེན་པོ་བྲག་དམར་བསམ་ཡས་ན་བཞུགས་དུས། དད་ལྡན་རྒན་མོ་སྟག་བཟའ་དགེ་ལྡན་མས་འཆི་ཁའི་ཆོས་ཤིག་ཞུ་འཚལ་ཞུས་པས། སློབ་དཔོན་གྱིས་རྒན་མོའི་སྙིང་ཁར་ཕྱག་མཛུབ་བཙུགས་ནས། གདམས་པ་འདི་གསུངས་སོ། །རྒན་མོ་ཉོན་ཅིག །ཡང་དག་པར་རྫོགས་པའི་སངས་རྒྱས་ཀྱི་དགོངས་པ་དང་། ཁམས་གསུམ་གྱི་སེམས་ཅན་ལ་ཁྱད་ཅི་ཡོད་བྱས་ན། སེམས་ཉིད་ཀྱི་དོན་རྟོགས་མ་རྟོགས་གཉིས་ལས་མེད། སེམས་ཉིད་ཀྱི་དོན་རྟོགས་ནས་སངས་རྒྱས་ཏེ། དོན་མ་རྟོགས་པའི་མ་རིག་འཁྲུལ་བས་སྡུག་བསྔལ་བྱུང་། མར་འཁོར་བར་འཁྱམས་པ་ཡིན། སངས་རྒྱས་ཀྱི་རྒྱུ་དེ་རང་ལ་ཡོད་ཀྱང་ངོ་མ་ཤེས་པ་ཡིན། རང་ངོ་རང་གིས་ཤེས་པའི་མན་ངག་ནི། ཉམས་སུ་ལེན་

པའི་དུས། རང་རིག་པ་དྲི་མ་མེད་པ། སལ་ལེ་སེང་ངེ་ཧྲིག་གེ་བདེ་བ་གསལ་བ་མི་རྟོག་པ་ཞེན་འཛིན་མེད་པ་བློས་མ་བསླད་པ་འདི་ཁོ་ན་སངས་རྒྱས་ཀྱི་དགོངས་པ་ཡིན། འདི་རྒན་མོས་ཉམས་སུ་ལོང་མཛོད་ཅིག་གསུངས་པས། མིང་ཡང་རྒན་མོ་མཛུབ་བཙུགས་ཀྱི་གདམས་པ་ཞེས་བྱའོ། །རྒན་མོ་དཔོན་གཡོག་གཉིས་པོ་ཉོན་མོངས་པའི་འཆིང་བ་ལས་གྲོལ་ནས་གྲུབ་པ་ཐོབ་བོ། །དེས་ན་འཆི་ཁ་མའི་མི་ལ་ཡང་གདམས་ངག་འདི་ལས་ཟབ་པ་དང་ངོ་མཚར་བ་ཞིག་གཞན་ན་མེད་པར་གདའ། ཡང་གྲུབ་ཆེན་ལས་ཀྱི་རྡོ་རྗེ་ལ། ཡི་དམ་ཕྱག་ན་རྡོ་རྗེ་ཞལ་གསུམ་ཕྱག་དྲུག་པ་ཞིག་གི་ཞལ་གཟིགས་པའི་ཚེ། དབུས་ཞལ་མཐིང་ཁའི་ཞལ་ནས། ལས་ཀྱི་རྡོ་རྗེ། མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས། བསླབ་པའི་གནས་བཞི་ལ་བསླབ་པ་གལ་ཆེ་གསུངས། བསླབ་པའི་གནས་བཞི་གང་ལགས་ཞུས་པས། དང་པོ་སངས་རྒྱས་ངོ་ཤེས་པར་བྱ་བ་ལ་བསླབ། ངོ་ཤེས་ནས་འདྲིས་པར་བྱ་བ་ལ་བསླབ། འདྲིས་ནས་མི་འབྲལ་བར་བྱ་བ་ལ་བསླབ། མ་བྲལ་བའི་དོན་སྨིན་ཅིང་ནར་སོན་པར་བྱ་བ་ལ་བསླབ་གསུངས།

གཡས་ཞལ་དཀར་པོའི་ཞལ་ནས། དེ་ལ་གནད་ཀྱི་གདམས་པ་བཞི་གཅེས་ཏེ། །མཁའ་ལྟར་དག་པའི་ལྟ་བ་ལ། །རིག་པའི་ཁྱུང་ལྡིང་ཡན་དུ་ཆུག །གསེར་གླིང་བསམ་གཏན་སྒོམ་པ་ལ། །མ་ཡེངས་རྒྱུན་དུ་གནས་པར་མཛོད། །གླང་ཆེན་ལྟ་བུའི་སྤྱོད་བ་ལ། །འཛིན་ཆགས་མེད་པར་རོལ་དུ་ཁྲིད། །བསྒྲུབ་ཏུ་མེད་པའི་འབྲས་བུ་ལ། །བརྩོན་འགྲུས་ཤིན་ཏུ་མྱུར་བ་གཅེས། །གསུངས། གཡོན་ཞལ་དམར་པོའི་ཞལ་ནས། དེ་ལ་གཅེས་པ་བཞི་དང་ལྡན་པ་ཞིག་དགོས། །མུ་མཐའ་བྲལ་བའི་ལྟ་བ་ལ། །གདེངས་ཀྱིས་ཆོད་པ་ཤིན་ཏུ་གཅེས། །བསམ་དུ་མེད་པའི་སྒོམ་པ་ལ། །དྲན་པས་ཟིན་པ་རབ་ཏུ་གཅེས། །བླང་དོར་མེད་པའི་སྤྱོད་པ་ལ། །བག་དང་ལྡན་པ་རབ་ཏུ་གཅེས། །འཐོབ་ཏུ་མེད་པའི་འབྲས་བུ་ལ། །རེ་དོགས་བྲལ་བ་ཤིན་ཏུ་གཅེས། །གསུངས། ཡང་ལས་ཀྱི་རྡོ་རྗེས་ཞུས་པ། མྱུར་དུ་མངོན་པར་རྫོགས་པར་འཚང་རྒྱ་བར་འདོད་ཀྱང་རྣམ་གཡེང་ལེ་ལོ་ཆགས་སྡང་རེ་དོགས་ཀྱི་དབང་དུ་སོང་ནས། རྟོགས་པའི་དུས་མི་གདའ་བས། ད་མྱུར་དུ་རྟོགས་པའི་གདམས་པ་ཞིག་བསྟན་དུ་

གསོལ་ཞེས་ཞུས་པས། ལས་ཀྱི་རྡོ་རྗེ། ལྟ་བ་ལ་བལྟ་རུ་མེད་ཀྱང་རྟོགས་སུ་ཡོད་དེ། གཡེང་བ་ཅན་རྣམས་ལ་དཀའ་བས། གཡེང་བ་ཐམས་ཅད་རྒྱབ་ཏུ་བསྐྱུར་བ་གཅེས། སྒོམ་པ་ལ་བསྒོམ་དུ་མེད་ཀྱང་གོམས་སུ་ཡོད་དེ། ལེ་ལོ་ཅན་རྣམས་ལ་དཀའ་བས། མགོ་ལ་མེ་ཤོར་བ་ལྟ་བུའི་བརྩོན་འགྲུས་བསྐྱེད་པ་རབ་ཏུ་གཅེས། སྤྱོད་པ་ལ་སྤྱད་དུ་མེད་ཀྱང་རྩལ་སྦྱང་དུ་ཡོད་དེ། ཆགས་སྡང་ཅན་རྣམས་ལ་དཀའ་བས། ཆགས་སྡང་གཏིང་ནས་སྤོང་བ་རབ་ཏུ་གཅེས། འབྲས་བུ་ལ་འཐོབ་ཏུ་མེད་ཀྱང་མངོན་དུ་འགྱུར་དུ་ཡོད་དེ། རེ་དོགས་ཅན་རྣམས་ལ་དཀའ་བས། རེ་དོགས་ཏིལ་འབྲུ་ཙམ་ཡང་མེད་པ་ཤིན་ཏུ་གཅེས། གསུངས། ཡང་ཞལ་གཅིག་ཕྱག་གཉིས་ཤིན་ཏུ་ཁྲོ་བ་ཞིག་ཏུ་གྱུར་པའི་ཞལ་ནས། ལས་ཀྱི་རྡོ་རྗེ། སྟོང་པ་བཙོན་དུ་ཟུང་། །རིག་པ་རྟོད་ལ་ནོན། གཟུང་འཛིན་བཅུད་ལ་བོར། །རྣམ་རྟོག་འགགས་སུ་ཆུག །ཚིག་བཞི་པོ་འདི་རབ་ཏུ་གཅེས་གསུངས། ཡང་དེ་ལ་གནད་ཀྱི་གདམས་པ་དྲུག་གཅེས་ཏེ། ཆོས་ཉིད་སྟོང་པ་ལ་དངོས་པོའི་ཁོང་འཚང་མི་གཞུག །རིག་པ་གཅེར་བུ་ལ་མཚན་མའི་གོས་ཀྱིས་མི་

དཀྲི །སེམས་ཉིད་གཉུག་མ་ལ་ཆགས་སྡང་གི་རྟེན་མི་བཅའ། ཡེ་ཤེས་རྣམ་དག་ལ་དགེ་སྡིག་གི་བློ་མི་གཞུག །མཚན་མ་རང་གྲོལ་ལ་གཟུང་འཛིན་གྱི་མདུད་པས་མི་བཅིང་། ཡེ་སྟོང་ཡེ་གྲོལ་ལ་དངོས་པོ་དང་མཚན་མར་མི་གཟུང་། ཞེས་གསུངས་ནས་མི་སྣང་བར་གྱུར་ཏོ། །དེ་བཞིན་དུ་དང་པོ་རང་སེམས་སངས་རྒྱས་སུ་ངོ་ཤེས་ནས་ཉམས་སུ་བླངས་ན་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །རྒྱལ་སྲས་རིན་པོ་ཆེའི་སློབ་དཔོན་སྐྱོབ་པ་དཔལ་ལ་གདམས་པ། སེམས་རྟོག་མེད་ཀྱི་ངང་ལ་གསལ་སེང་ངེ་བ་དེའི་ངོ་བོ་ལ་བལྟས་ནས་ཅིར་ཡང་མ་གྲུབ་པར་སྟོང་སང་ངེ་གནས་པ་དེ་ལ། རིག་པ་གསལ་སྟོང་འཛིན་མེད་ཟེར་བ་ཡིན། དེ་དང་པོ་ནས་ཐམས་ཅད་ལ་ཡོད་མོད་ཀྱི་གཟུང་འཛིན་གྱི་རྣམ་པར་རྟོག་པས་བསྒྲིབས་པས་ངོ་མ་ཤེས་པ་ཡིན། ཁྱེད་རང་གིས་ཉམས་ལེན་གྱི་སྟོབས་ཀྱིས་ངོ་བོ་མཐོང་བ་ཡིན་པས། སེམས་ཀྱི་ངོ་བོ་སྟོང་པར་འདུག་པ་དེ་ལ་ལེགས་པར་ལྟོས། དེའི་ཐོག་ཏུ་ཞོག་མཛོད། ཡོན་ཏན་གྱི་འཆར་ཚུལ་གོང་ནས་གོང་དུ་འབྱུང་ཞིང་། མཆོག་གི་དངོས་གྲུབ་ཀྱི་རྒྱུར་

འགྱུར་བས། དགའ་བ་སྒོམས་ལ་ཉམས་སུ་ལོངས་མཛོད་གསུངས། སངས་རྒྱས་སྣང་བ་མཐའ་ཡས་ངུར་སྨྲིག་གར་གྱི་རྣམ་རོལ་པཎ་ཆེན་བློ་བཟང་ཆོས་ཀྱི་རྒྱལ་མཚན་ལ། བྱ་བཏང་རི་ཁྲོད་འཛིན་པ་ཕྱག་རྒྱ་ཆེན་པོའི་རྣལ་འབྱོར་བ་དཔལ་འབྱོར་ཕུན་ཚོགས་ཀྱིས་བསྐུལ་ངོར། ཕྱག་རྒྱ་ཆེན་པོའི་གནད་འགག་མགུར་དུ་བཞེངས་པ་ལས། སྔོན་ཐོག་མ་མེད་ནས་ད་ལྟའི་བར། །སེམས་འཁྲུལ་པའི་དབང་གིས་འཁོར་བར་འཁྱམས། །ད་འཁྲུལ་པའི་རང་མཚང་རིག་པ་ན། །སེམས་སྟོང་ཉིད་རང་ཞལ་རྗེན་པར་མཐོང་། །ཆོས་ཀུན་གྱི་རང་བཞིན་གདོད་མའི་གཤིས། །དོན་དབྱེར་མེད་སེམས་ཀྱི་རྡོ་རྗེ་དེ། །བློས་མ་བཅོས་ལྷུག་པར་འཇོག་པ་འདི། །ལམ་ཕྱག་རྒྱ་ཆེན་པོའི་ཉམས་ལེན་ཡིན། །ཞེས་དང་། གཞན་ཡང་ཉམས་མགུར་འདི་ལྟར་མཛད་དེ། ཧ་ཧ། སེམས་གསལ་རིག་འགག་མེད་སྐྱེ་བ་འདི། །སྐྱེ་མེད་དུ་མཐོང་བ་ཡ་རེ་མཚན། །སྐྱེ་མེད་ལ་གནས་དང་འགག་པ་གང་། །མོ་གཤམ་གྱི་བུ་མོའི་འགྱིང་བག་བཞིན། །སེམས་རང་བཞིན་སྟོང་པའི་མཐའ་དང་བྲལ། །གདང་འགག་མེད་ཅིང་ཡང་འཆར་ཞིང་སྣང་། །དབྱིངས་

གཟུང་འཛིན་གྱི་སྒྲོག་ལས་རྣམ་གྲོལ་ཀྱང་། །དེར་སྦར་འཛིན་བྱེད་པ་འདི་ཅི་འདྲ་ཞིག །ཁོང་གཞན་མ་ཚོ་ལྟ་ཁྲིད་དང་ཕྱག་ཆེན་སྒོམ། །མི་ཁོ་བོ་ལ་བསྒོམ་བྱ་སྒོམ་བྱེད་དང་། །དོན་འདི་སྒོམ་གྱི་མཚན་མ་རྡུལ་ཙམ་མེད། །སྒོམ་སྒྲུབ་ཀུན་ཇི་ལྟར་དགྱེས་དགྱེས་མཛོད། །ད་མྱུར་དུ་ཤི་འམ་གསོན་ཀྱང་སླ། །སེམས་སྣང་སྟོང་བདེ་ཆེན་གྱི་གྲོགས་མཆོག་དང་། །དུས་སྐད་ཅིག་ཀྱང་མི་འབྲལ་འགྲོགས་ནས་འགྲོ། །སྡུག་བསྔལ་ཀུན་ཇི་ལྟར་དགྱེས་དགྱེས་མཛོད། །ཁ་ཕྱིར་བལྟའི་ཐ་སྙད་རྟོག་གེ་བས། །འདི་ཐོས་ན་འགལ་འདུའི་ཕུང་པོར་སེམས། །དོན་ཉམས་མྱོང་ཅན་གྱི་རྣལ་འབྱོར་པས། །གླུ་འདི་འདྲ་གསན་ན་འཛུམ་པ་འཆོར། གསུངས། ཕྱག་ན་པདྨོའི་རྣམ་འཕྲུལ་རྒྱལ་བ་སྐལ་བཟང་རྒྱ་མཚོས་རྗེ་རིན་པོ་ཆེའི་ལེགས་བཤད་དང་། ཡོངས་འཛིན་དམ་པའི་དྲིན་ལ་བརྟེན་ནས་ངེས་དོན་གྱི་རྟོགས་པ་ཐུགས་ལ་འཁྲུངས་ཚེ་ཉམས་མགུར་འདི་གསུངས་སོ། །སྙིང་འདབ་བརྒྱད་ཨ་ཝ་དྷུ་ཏིའི་དབུས། །གཞི་འགྱུར་མེད་སེམས་ཀྱི་རྡོ་རྗེའི་གར། །ལྷ་སངས་རྒྱས་ཀུན་འདུས་བློ་བཟང་གྲགས། །ཕ་བླ་མའི་ངོ་བོར་

ཕྱག་འཚལ་ལོ། །གཞི་འཁོར་འདས་ཆོས་རྣམས་མ་ལུས་པ། །ནང་རང་གི་སེམས་ཀྱིས་བཏགས་པ་ཙམ། །སེམས་དེ་ཡང་བརྟགས་ན་སྐྱེས་འགག་བྲལ། །གནས་ལུགས་ཀྱི་ངོ་བོ་ཨེ་མ་ཧོ། །སྟོན་མཁའ་ལ་ཆུ་འཛིན་དྭངས་པ་བཞིན། །དབྱིངས་རང་སེམས་དབྱེར་མེད་སྣང་ངོ་ལ། །མྱོང་སྣང་གིས་སྤྲོས་པ་མ་ལུས་ནུབ། །ང་སྐྱེ་མེད་ནམ་མཁའི་རྣལ་འབྱོར་བ། །གཤིས་ཅིར་ཡང་མ་གྲུབ་རྫུན་པོ་ཆེ། །སྣང་གྲག་ཀུན་སྒྱུ་མའི་ལྟད་མོར་མཐོང་། །ཉམས་དགའ་བ་སྣང་སྟོང་ཟུང་འཇུག་འདིས། །བསླུ་མེད་ཀྱི་རྟེན་འབྲེལ་ངེས་པ་རྙེད། །རྗེ་མཁྱེན་པའི་གཏེར་དང་དབྱེར་མེད་པའི། །ཕ་བློ་བཟང་གྲགས་པའི་ལེགས་བཤད་དང་། །རྗེ་མཚན་ལྡན་བླ་མའི་བཀའ་དྲིན་ལས། །ངས་ངེས་དོན་གླུ་རུ་བླངས་པ་ཡིན། །གསུངས། སྔོན་ཐུགས་རྗེ་ཆེན་པོའི་སྤྲུལ་པ་རྗེ་སྲོང་བཙན་སྒམ་པོ་ལ། ལྷ་མོ་སྒྲོལ་མའི་སྤྲུལ་པ་རྒྱ་བཟའ་ཀོང་ཇོས། གདམས་ངག་ཚིག་གཅིག་གིས་རྟོགས་གྲོལ་དུས་གཅིག་ཏུ་འོང་བ་ཞིག་ཞུ་འཚལ་ཞེས་ཞུས་པས། སྤྲུལ་པའི་རྒྱལ་པོས་བཀའ་སྩལ་བ། རྒྱ་མོ་བཟའ་ཉོན་ཅིག །སེམས་ཅན་གྱི་བློ་མ་རིག་པ་དེ་སེལ་བར་

བྱེད་པ་ལ། གདམས་ངག་ཚིག་གཅིག་ལས་མེད། སྣང་སྲིད་འཁོར་འདས་ཀྱི་ཆོས་ཐམས་ཅད་ཀྱི་རྩ་བ་སེམས་ཡིན། སེམས་ཕྱི་ན་མེད་པས་ནང་དུ་ལྟོས་ཤིག །བལྟས་པས་སེམས་ཀྱི་ངོ་བོ་གང་དུ་ཡང་མ་རྙེད་ཅིང་མ་གྲུབ་པ། ངོ་བོ་སྟོང་པ། རྣམ་པ་གསལ་བ། ཉམས་སུ་མྱོང་བ་ཞིག་འདུག་པ་དེ་ལྟ་བ། སྟོང་གསལ་ངང་ལས་དུས་རྟག་ཏུ་མ་ཡེངས་པ་དེ་སྒོམ་པ། རང་ཇི་ལྟར་འདུག་ཀྱང་གསལ་སྟོང་དང་མི་འབྲལ་བ་དེ་སྤྱོད་པ། སྟོང་གསལ་གྱི་ངང་ལས་ལུས་བོར་བའི་དུས་སུ་སངས་རྒྱས་པ་འབྲས་བུའོ། །ཞེས་གསུངས་པས་རྒྱ་མོ་བཟའ་རྟོགས་གྲོལ་དུས་གཅིག་ཏུ་གྱུར་ཏོ། །དེས་ན་དམ་པ་གོང་མ་རྣམས་ཀྱི་གསུང་བཞིན། ཆོས་ཐམས་ཅད་ཀྱི་རྩ་བ་སེམས་ཀྱི་རྩད་བརྡར་ཡང་ཡང་བཅད་ནས། ངོ་བོ་སྟོང་པ་ཉིད་ནམ་མཁའ་ལྟ་བུར་གཏན་ལ་ཕབ་ནས། སྟོང་སངས་ནམ་མཁའ་ལྟ་བུའི་རྒྱུན་སྐྱོང་བ་ལ་འབད་པར་བྱའོ། །སྔོན་བླ་མ་ཅོག་རོ་རྣལ་འབྱོར་བ་ལ། སློབ་མ་ཞང་སྒོམ་བྱ་བ་དང་མཚན་ཉིད་པའི་སྟོན་པ་གཉིས་ཀྱིས། རྡུལ་ཕྲ་རབ་འདི་ཆ་བཅས་ལགས་སམ་ཆ་མེད་ལགས་ཞེས་དྲིས་པས།

ང་ལ་ཤེས་པ་སྤྲོས་བྲལ་དུ་ལྷོད་བཞག་ཙ་ན། རྟོག་པ་རང་འགགས་སུ་ཁེག་འགགས་ནས། སེམས་གསལ་དྭངས་རྟོག་མེད་ལ་བཞག་ཚད་ལྷན་ལྷན་འགྲོ་བ་ཞིག་ཡོད་ཀྱིས། རྡུལ་ཕྲ་རབ་འདི་ཆ་བཅས་སམ་ཆ་མེད་ཁྱེད་རང་གང་ཡིན་པ་གྱིས། ང་བརྟག་དཔྱད་རང་མི་འཇུག་གསུངས་སོ། །དེ་བཞིན་དུ་སེམས་ཀྱི་གནས་ལུགས་སྟོང་པ་ཉིད་དུ་རྟོགས་ནས། ཕྱི་གཟུང་བའི་ཡུལ་ལ་ནང་འཛིན་པའི་སེམས་མི་འཇུག་པར་ཤེས་པ་ལྷོད་ཀྱིས་གློད་ནས་ནམ་བཞག་ཀྱང་ཕྲ་རགས་ཀྱི་རྣམ་རྟོག་ཐམས་ཅད་རང་འགག་ལ་སོང་ནས། གསལ་སྟོང་རྣམ་པར་མི་རྟོག་པའི་ཡེ་ཤེས་ཀྱི་ངང་དུ་ལྷན་ལྷན་མ་གནས་ཀྱི་བར་དུ་དྲན་ཤེས་ཀྱིས་བསྐྱང་བར་བྱའོ། །དེ་ལྟར་བསྐྱངས་པས་སྟོང་ཉིད་ཀྱི་རྟོགས་པ་མངོན་དུ་འགྱུར་ཚུལ་ནི། སྔོན་གྲུབ་ཐོབ་གླིང་རས་པས། ལོ་གསུམ་གྱི་དམ་བཅའ་ཕུལ་ནས་སྒྲུབ་པ་ལ་ཞུགས། ཞག་གསུམ་སོང་བའི་ཐོ་རངས་མོས་གུས་ཆེན་པོ་ཞིག་གིས་སྣ་དྲངས་ཏེ། རྟོགས་པ་མུན་ལ་ཁྲི་གདུགས་ཤར་བ་ལྟ་བུ་ཕྱི་ནང་གི་ཆོས་ཐམས་ཅད་ཇི་ལྟ་བ་དང་། ཇི་སྙེད་པ་མཁྱེན་པའི་ཡེ་ཤེས་མདའ་ཕུག་མེད་པར་མངོན་སུམ་དུ་རྟོགས། ཐུགས་དམ་དེ་

ལ་བྲལ་ཐོབ་མེད་པར་བརྟན་པ་ཡང་ཐོབ། གླིང་གི་ཐུགས་དགོངས་ལ་སྣང་བ་རྒྱ་ཡན་མ་རིག་པ་སྡུག་བཙིར་གྱི་ཁ་ན་མི་འདུག །བསྒོམས་མ་བསྒོམ། ངོ་ཤེས་མ་ཤེས། བལྟས་མ་བལྟས། དྲན་མ་དྲན། གང་ལྟར་བྱས་ཀྱང་ཆོས་ཉིད་ཀྱི་ཡོ་ལང་ལས་མི་འདུག་སྙམ་ནས། མཚམས་ལས་ཐོན་ཏེ། དགོན་པ་དང་། ཡུལ་གྲོང་ཀུན་ཏུ་ཉུལ་ཞིང་བསྒོམས་པས། རྗེས་སུ་ཕག་མོ་གྲུ་པ་མཇལ་དུས། རྗེ་ཡི་ཞལ་ནས་གཉུག་མའི་དོན་སྒོམས་ཤིག །གསུངས་ནས་བསྒོམས་ལགས་ཏེ། །བསྒོམ་བྱ་དང་སྒོམ་བྱེད་སྟོར་ནས་ཐལ། །སྒོམ་ཐུན་མཚམས་སུ་གཟུང་རྒྱུ་མི་གདའོ། །ཞེས་པ་ལ་སོགས་པའི་མགུར་ཕུལ་པས་བླ་མ་ཤིན་ཏུ་མཉེས་ནས། རྒྱ་གར་གྱི་ཆུ་བོ་གངྒཱ་ཕན་ཆད་ན་བྲམ་ཟེ་ས་ར་ཧ་ཆེན་པོ་རྟོགས་པ་མཐོ། དེ་ཚུན་ལ་ཁྱོད་རྟོགས་པ་མཐོ་བར་གདའ་གསུངས། ཐུགས་ཤིན་ཏུ་དགྱེས་པར་གྱུར་སྐད། སྔོན་གྲུབ་ཐོབ་ཐང་སྟོང་རྒྱལ་པོས་ཀུན་ལ་མངོན་ཤེས་ཐོགས་མེད་དུ་གསུངས་པས། སློབ་མ་རྣམས་ཀྱིས་ངོ་མཚར་ཆེ། ཇི་ལྟར་མཁྱེན་པར་གདའ་ལགས་ཞུས་པས། སེམས་མཉམ་པར་གཞག་

པས་ཁྱབ་བརྡལ་ནམ་མཁའ་ལྟ་བུས་དུས་གསུམ་ས་ལེར་ཤེས་པས། ང་ལ་སངས་རྒྱས་དངོས་ཀྱི་འདུ་ཤེས་ཞོག་ལ་གསོལ་བ་ཐོབ་གསུངས། དེ་བཞིན་དུ་འགྲོ་མགོན་གཙང་པ་རྒྱ་རས་ཀྱིས་རྟོགས་པའི་མགུར་བཞེངས་པ་ལས། འོད་གསལ་ངང་ལ་མཉམ་རྗེས་མེད། །རྣལ་འབྱོར་ལུས་རྒྱ་ཞིག་ཙ་ན། །མཐའ་བྲལ་འཁོར་འདས་ཡོངས་ལ་ཁྱབ། །ཚེ་ཕྱི་མ་ཁྱེད་སྐུ་ཁམས་ཅི་བདེར་བཞུགས། །བདག་རྫོགས་པ་ཆེན་པོའི་ཕུ་ཐག་བཀྲོལ། །ཕྱག་རྒྱ་ཆེན་པོའི་ངོ་བོ་མཐོང་། །དབུ་མ་ཆེན་པོའི་ངང་དུ་ཉལ། །ཕ་རོལ་ཕྱིན་པའི་ས་ལ་སླེབས། །གསུངས། ཀུན་མཁྱེན་ཀློང་ཆེན་རབ་འབྱམས་པས། །ཡངས་སོ་ཆེ་འོ་ཆོས་ཀྱི་དབྱིངས། །ནམ་མཁའ་འདྲ་སྟེ་སྤྲོས་དང་བྲལ། །ལྟ་བ་རྟོགས་པའི་ཚད་དུ་ཕྱིན། །འདུན་མ་རྩེ་མོར་ཕྱིན་པ་ལགས། །ཞེས་དང་། འཆི་མེད་རིག་པའི་དོན་ལ་སྦྱངས། །འབྱུང་བཞིའི་ཕུང་པོ་ནམ་ཡང་འཇོག །རིག་པ་གནས་ལུགས་བཙན་ས་ཟིན། །ན་རྒ་འཆི་སྐྱིད་རྣལ་འབྱོར་ལགས། །གསུངས། རྗེ་རིན་པོ་ཆེས་མཛད་པའི་ལམ་རིམ་ཆེན་མོ་ལས། དེ་ལྟར་བསྒོམས་པས་ཡུན་རིང་མ་བསྒོམས་སྙམ་ནས་བལྟས་ཙ་ན།

ནམ་དང་ཉི་མ་འུད་འུད་བཅད་ནས་སྣང་ན་སེམས་ཟིན་པ་ཡིན་ལ། རིང་རབ་བསྒོམས་སྙམས་ནས་བལྟས་པ་ན་ཅི་ཡང་མ་སོང་སྣང་ན། སེམས་མ་ཟིན་པ་ཡིན། སེམས་ཟིན་པའི་ཚེ་ན། རྒྱུད་ལ་ཉོན་མོངས་པ་ཆུང་ང་དང་གཉིད་ཀྱང་སྐྱེ་བ་ལ་མི་འོང་སྙམ་པ་འོང་། དེ་ནས་སྔ་དྲོ་ལ་སོགས་པ་ཐུན་རེ་ལ་འཁྱོངས་པ་ན། མཚན་ཉིད་བཞི་ལྡན་དུ་སྐྱེ་སྟེ། མི་རྟོག་པ་ནི་མཉམ་པར་གཞག་པ་ན། དབུགས་ཕྱི་ནང་དུ་འགྱུ་བ་ཡང་མི་ཚོར་བར་དབུགས་དང་རྟོག་པ་ཕྲར་སོང་པའོ། །གསལ་བ་ནི་སྟོན་དུས་ཀྱི་ཉི་མ་ཕྱེད་ཀྱི་དུས་ཀྱི་ནམ་མཁའི་དཀྱིལ་གསལ་བ་དང་ཁྱད་པར་མེད་པའོ། །དྭངས་པ་ནི་ཏིང་གཙང་མའི་ནང་དུ་ཆུ་བླུགས་ནས་ཉི་མ་ལ་བཞག་ནས་བལྟས་པས་དྭངས་པ་དང་འདྲ་བ་འོད་བའོ། །ཕྲ་བ་ནི་མཚན་ཉིད་གསུམ་པོ་དེའི་ངང་ནས་བལྟས་པ་ན་དངོས་པོ་སྤུའི་རྩེ་མོ་གཤགས་པའི་ཆ་གཅིག་བྱུང་བ་ཡང་མཐོང་བ་འོང་བའོ། །གསུངས། དེས་ན་དེ་ལྟ་བུ་ནམ་འོང་གི་བར་བསྒོམ་ལ་འབད་དགོས་ཏེ། སྔོན་གྲུབ་ཐོབ་ཐང་སྟོང་རྒྱལ་པོས་རང་དོན་མངོན་དུ་གྱུར་ནས་གཞན་དོན་ལ་ཕེབས་པའི་དུས་སུ། འབྲས་སྤུངས་

ཀྱི་བཀའ་བཅུ་བ་ཞིག་ན་རེ། ཁྱེད་གང་ནས་བྱོན། ད་གང་དུ་གཤེགས། ཡོན་ཏན་ཅི་མཁྱེན། དོན་གང་ལ་བྱོན་ཟེར་བ་ལ། ང་ཡུལ་བློ་འདས་ཞེན་མེད་ནས་ཡོང་། སློབ་མ་འཚོལ་དུ་འགྲོ། རང་རྒྱུད་འདུལ་བ་ཤེས། དོན་བསྟན་པ་དང་སེམས་ཅན་གྱི་དོན་བྱེད་པ་ཡིན་གསུངས་པས། སློབ་མ་ལ་ཆོས་བཤད་རྒྱུ་ཅི་ཡོད་ཟེར་བ་ལ། ཕྱི་རོལ་གྱི་སྣང་བ་འདི་རྨི་ལམ་སྒྱུ་མ་ལྟ་བུར་སྟོན། ནང་སེམས་ཀྱི་ཆོས་ཉིད་མངོན་སུམ་དུ་སྟོན་པ་ཤེས། ཉམས་ལེན་སློབ་མ་ལ་རག་ལས་གསུངས། དེས་ན་འདི་ལྟ་བུའི་གནས་ལུགས་ཀྱི་དོན་བླ་མས་བསྟན་ཀྱང་ཉམས་ལེན་རང་ལ་རག་ལས་པས། དུས་རྟག་ཏུ་ཉམས་ལེན་ལ་བརྩོན་པར་བྱའོ། །མཉམ་གཞག་ལས་ལངས་ནས་ཐུན་མཚམས་རྣམས་སུ། ཅི་སྣང་ཐམས་ཅད་བདེན་མེད་སྒྱུ་མ་ལྟ་བུར་སྣང་སྟོང་དུ་བསྒོམ་མོ། །དེ་ཡང་མ་ཡིན་པ་ལ་ཡིན་པར་བསྒོམ་པ་མིན། ཡིན་པ་ལ་ཡིན་པར་གསལ་བཏབ་ཅིང་བསྒོམ་པ་ཡིན་ཏེ། དེ་ཡི་རྒྱུ་མཚན་སྔོན་སངས་རྒྱས་ཀྱི་དུས་སུ་སྒྱུ་མ་མཁན་བཟང་པོ་བྱ་བས། རྒྱལ་པོའི་ཁབ་ཀྱི་བཙོག་དགུ་ཐམས་ཅད་འདུས་པའི་གནས་དེར་ཁྱམས་དང་ཁྲི་དང་གདན་

དང་གསོལ་ཟས་དང་རིམ་གྲོ་བ་ལ་སོགས་པ་བཀོད་པ་ཕུན་ཚོགས་ཤིག་སྤྲུལ་ནས། སངས་རྒྱས་ལ་མངོན་ཤེས་ཡོད་མེད་ཚོད་བགམ་པའི་ཕྱིར་གདུགས་ཚོད་ལ་སྤྱན་དྲངས་པས། སངས་རྒྱས་ཀྱིས་མཁྱེན་བཞིན་བྱོན་ནོ། །དེར་སྒྱུ་མ་མཁན་བཟང་པོས་ཚོད་བརྟག་པའི་ཕྱིར་འདི་ལྟར་བགྱིས་བའི་ནོངས་པ་འཆགས་ལགས་སོ། །འདི་དག་བཤིག་པར་འདོད་ཀྱང་མ་ནུས་ལགས་ཞུས་པས། ཁྱོད་ཀྱི་འདི་སྒྱུ་མའི་སྤྲུལ་པ་ཡིན་ནོ། །སེམས་ཅན་རྣམས་ནི་ལས་ཀྱི་དང་། དགེ་འདུན་རྣམས་ནི་ཆོས་ཀྱི་དང་། ང་ནི་ཡེ་ཤེས་ཀྱི་སྒྱུ་མའི་སྤྲུལ་པ་ཡིན་ནོ། །དེ་ལྟར་ཤེས་ན་དེ་དག་དྲོངས་ཤིག་གསུངས་པས་ཁོས་ཀྱང་དྲངས་སོ། །སངས་རྒྱས་འཁོར་བཅས་ཀྱིས་ལོངས་སྤྱད་དེ། འཁོར་རེ་རེས་ཀྱང་། ཇི་ལྟར་དེ་ནི་སྒྱུ་མ་མཁན། །བཟང་པོས་སྤྲུལ་པ་བྱས་པ་ལྟར། །འཇིག་རྟེན་ཆོས་རྣམས་དེ་འདྲ་སྟེ། །བྱིས་པ་རྣམས་ཀྱིས་མི་ཤེས་སོ། །ཞེས་སོགས་ཀྱི་ཚིག་བཅད་རེ་གསུངས་སོ། །རྗེས་སུ། གང་གིས་སྦྱིན་པ་གང་ལ་བྱིན། །སྦྱིན་པ་ཇི་ལྟར་མི་རྟོག་པ། །སྦྱིན་པ་མཉམ་པ་དེ་ཉིད་ཀྱིས། །བཟང་པོ་ལ་ནི་ཡོངས་

རྫོགས་ཤོག །ཅེས་གསུངས་པས། བཟང་པོས་དད་པས་ཏིང་ངེ་འཛིན་ཐོབ་བོ། །དེ་ལས་ལངས་ནས་བྱང་ཆུབ་ཏུ་སེམས་བསྐྱེད་ཅིང་། མི་སྐྱེ་བའི་ཆོས་ལ་བཟོད་པ་ཐོབ། མ་འོངས་པ་ན་སངས་རྒྱས་རྣམ་པར་འཕྲུལ་བའི་རྒྱལ་པོ་ཞེས་བྱ་བར་འགྱུར་ཞེས་ལུང་བསྟན། ཡང་སྔོན་དགེ་བཤེས་རོང་བོ་དཀོན་རྒྱལ་གྱིས། བྲང་རིངས་ཀྱི་མཐའ་འོག་ཏུ་ཇ་མང་བསྐོལ་བྱས། རྟ་བརྒྱ་དང་དངུལ་བྲེ་བཅུ་གཅིག་དང་། དར་ཟབ་མང་པོ་ཕུལ་ནས། ཁྱུང་པོ་རྣལ་འབྱོར་ཁྱོད་ཅག་གིས། །རྒྱ་གར་ཡུལ་དུ་ལན་གསུམ་བྱོན། །བླ་མ་བརྒྱ་དང་ལྔ་བཅུ་བཙལ། །རྩ་བའི་བླ་མ་བཞི་ཡོད་པས། །ཁྱེད་གྲུབ་ཐོབ་ཏུ་གྱུར་ནས་སྣང་བ་རང་བཞིན་མེད་པར་རྟོགས་པ་ཡིན་ཟེར་བས། བྲག་འདི་ལ་ཕར་ཐལ་ཚུར་ཐལ་འགའ་རེ་གྱིས་ལ། ནམ་མཁའ་འདི་ལ་སྐྱིལ་ཀྲུང་གྱིས་ལ་འདུག་དང་ཟེར་པ་ལ། བྲག་རི་དེ་ལ་ཐལ་བྱུང་དུ་ཕྱིན་ཏེ། ནམ་མཁར་སྐྱིལ་ཀྲུང་བཅས་ནས་གཅིག་དང་དུ་མར་སྣང་བ་ལ་སོགས་པའི་རྫུ་འཕྲུལ་འགའ་རེ་བསྟན་པས་རོང་བོ་དང་གྲྭ་པ་ཐམས་ཅད་ཤིན་ཏུ་དད་དེ། དེ་ལྟ་བུའི་ཡོན་ཏན་དེ་གདམས་ངག་གང་བསྒོམས་པ་ལས་བྱུང་བ་ཡིན།

ཟེར་བ་ལ། ཆོས་རྣམས་སྒྱུ་མ་ལྟ་བུ་ལ། །སྒྱུ་མ་ལྟ་བུར་ཉམས་བླངས་པས། །སྒྱུ་མ་ལྟ་བུར་མངོན་སངས་རྒྱས། །སྣང་ཡང་བདེན་མེད་ཆོས་རྣམས་ལ། །བྱིས་པས་བདེན་པར་བཟུང་བས་འཁྲུལ། །མེད་བཞིན་སྣང་བ་ཨེ་མ་ཧོ། །ལ་སོགས་པའི་ཆོས་བཤད་པས་དད་དེ། ཟླ་བ་བཅུ་གཅིག་ནས། རོང་པོས་ཡི་དམ་གྱི་ཞལ་མཐོང་ནས། སྣང་བ་བདེན་མེད་དུ་རྟོགས་སོ། །དེས་ན་སྣང་གྲག་གི་ཆོས་ཐམས་ཅད་སྣང་སྟོང་སྒྱུ་མ་ལྟ་བུར་བསྒོམས་ནས་མངོན་དུ་འགྱུར་ངེས་བྱའོ། །ཀུན་རྫོབ་བྱང་ཆུབ་ཀྱི་སེམས་བསྒོམ་ཚུལ་ནི། སྤྱི་བོར་བླ་མ་ལྷ་སྒོམ་བཞིན་བའི་ངང་ནས་མཐར་སྐོར་དུ་སེམས་ཅན་ཐམས་ཅད་དམིགས་ནས་འདི་ལྟར་བསམ་སྟེ། འཁོར་བ་ལ་ཐོག་མ་མེད་པས་རང་གི་སྐྱེ་བ་ལ་ཡང་ཐོག་མ་མེད་ཅིང་སྐྱེ་བ་གཅིག་ནས་གཅིག་ཏུ་བརྒྱུད་དེ་ཡུལ་ཕྱོགས་དང་ས་ཕྱོགས་འདིར་མ་སྐྱེས་པ་གཅིག་ཀྱང་མེད་སྐྱེས་པ་ལ་གྲངས་ཀྱིས་མི་ཆོད། སེམས་ཅན་འདིའི་ལུས་མ་བླངས་བྱ་བ་གཅིག་ཀྱང་མེད་བླངས་པ་ལ་གྲངས་ཀྱིས་མི་ཆོད། སེམས་ཅན་འདིས་བདག་གི་མ་མ་བྱས་པ་གཅིག་ཀྱང་མེད།

བྱས་བ་ལ་གྲངས་ཀྱིས་མི་ཆོད། སེམས་ཅན་རེ་རེས་ཀྱང་མིའི་རྟེན་ལ་བདག་གི་མ་མ་བྱས་པ་གཅིག་ཀྱང་མེད། བྱས་པ་ལ་གྲངས་ཀྱིས་མི་ཆོད་ཅིང་ད་དུང་ཡང་བྱེད་པར་འགྱུར། དེས་ན་དྲིན་གྱིས་བསྐྱངས་པའི་མ་ཅིས་ཀྱང་ཡིན་སྙམ་དུ་བསམ་མོ། །བདག་གི་མ་འདིས་ཚེ་འདི་ཁོ་ནར་མ་ཟད་ཚེ་རབས་ཐོག་མ་མེད་པ་ནས་བདག་གི་མ་བགྲངས་ལས་འདས་པ་བྱས་བྱས་པ་ཡིན། ཁྱད་པར་ཚེ་འདིར་ཡང་དང་བོར་མངལ་དུ་བརྩེ་བས་བསྐྱངས། བཙས་པའི་ཚེ་འཇམ་པའི་སྟན་ལ་བཞག །སོར་མོ་བཅུའི་རྩེ་ལ་གཡེངས། ཤའི་དྲོད་ལ་སྦྱར། བརྩེ་བའི་འཛུམ་གྱིས་བསུས། དགའ་བའི་མིག་གིས་བལྟས། སྣབས་ཁས་ཕྱིས། མི་གཙང་བ་ལག་པས་ཕྱིས། མ་རང་སྲོག་ལ་བབས་པ་ལྟ་བུའི་སྡུག་བསྔལ་བྱུང་བ་ལས། བདག་ཅུང་ཟད་ན་བ་ལ་སྡུག་བསྔལ་ཆེ་བར་བྱས། སྡིག་སྡུག་གཏམ་ངན་རང་སྲོག་ལའང་མ་བལྟས་པར་ཤ་ཐང་ཐང་དུ་བསྒྲུབས་པའི་ཟས་ནོར་ཐམས་ཅད་བདག་ལ་བརྩེ་བས་ཕོག །མ་རང་གི་ཁྱེར་འཁོས་དང་བསྟུན་པའི་ཕན་པ་དང་བདེ་བ་ཚད་མེད་པ་བསྒྲུབས། གནོད་པ་དང་སྡུག་བསྔལ་ཚད་མེད་པ་ལས་བསྐྱབས་

པས་དྲིན་ཤིན་ཏུ་ཆེ་སྙམ་དུ་བསམ་མོ། །དེ་བཞིན་དུ་ཕ་ལ་སོགས་པའི་དགྲ་གཉེན་བར་མའི་སེམས་ཅན་ཐམས་ཅད་ཀྱིས། ཚེ་སྔོན་མ་རྣམས་ལ་མ་བྱས་པའི་དུས་སུ་ཚེ་འདིའི་མས་དྲིན་གྱིས་བསྐྱངས་པ་བཞིན་དུ་ཕན་ཚད་མེད་བཏགས་གནོད་པ་ཚད་མེད་ལས་བསྐྱབས་པས། དྲིན་ཅན་ཤ་སྟག་ཡིན་སྙམ་དུ་བསམ་མོ། །དཔེར་ནམ་བཟང་མོས་བུ་གཅེས་ཕྲུག་དེ་ལ་ཟས་གོས་ཀྱི་ཕོངས་ནས་ལུས་སེམས་ལ་བདེ་བ་མེད་པའི་ཚེ། ངའི་བུ་ལ་བདེ་བ་ཞིག་བྱུང་ན་སྙམ། མ་སྤྲང་མོ་ཞིག་ཡིན་ན་ཡང་། ཟས་ཁམ་གང་རྙེད་ན་ཡང་མ་རང་གིས་ཟ་མི་ཕོད་པར་བུ་ལ་བྱིན་ནས་དུས་རྒྱུན་དུ་ལུས་ངག་ཡིད་གསུམ་གྱི་སྒོ་ནས་གང་བྱམས་བྱམས་བྱེད་པ་ལྟར། ཚེ་འདིར་ཡང་ལྟོ་གོས་ཀྱི་ཕོངས་པའི་ངན་སློང་སོགས་ལུས་སེམས་ལ་བདེ་བ་མེད་པའི་མ་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་ན་ཅི་མ་རུང་། བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །བདེ་བ་དང་བདེ་བའི་རྒྱུ་དང་ལྡན་བ་ཞིག་བདག་གིས་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ་ཞེས་ཕྱོགས་མེད་ཀྱི་བྱམས་པ་བསྒོམ་

དགོས། སྔོན་ཨ་མདོ་ཕྱོགས་ཀྱི་སྡེ་གཉིས་འཁྲུགས་ནས་མི་བསད་མང་པོ་བྱུང་། ཉིན་ཅིག་རྒན་མོ་མ་བུ་གཉིས་རི་ཁར་ཕྱིན་པས། གཞན་གྱི་སྡེ་དེའི་དམག་འོང་བ་མཐོང་ཚེ། མའི་བསམ་པ་ལ་ང་བསད་རུང་བུ་མོ་འདི་མ་བསད་ན་ཅི་མ་རུང་སྙམས། བྱམས་པའི་སེམས་ཀྱིས་བུ་མོ་དེ་འོག་ཏུ་བཅུག་གོས་ཀྱིས་བཀབ་ནས་བསྡད་པའི་སྟེང་གི་མ་བསང་ནས་སོང་། བུ་མོ་འོག་ན་ཡོད་པ་མ་ཚོར་བར་ཐར་བ་བྱུང་། དེས་ན་བདེ་བ་མེད་པའི་ཕ་མ་སེམས་ཅན་ལ་སྙིང་ཐག་པ་ནས་བྱམས་དགོས་ཏེ། རྒྱལ་སྲས་རིན་པོ་ཆེས། སེམས་ཅན་འདི་དང་འདི་ཞེས་བྱ་བ་བདེ་ཞིང་སྐྱིད་འདུག་ཟེར་བ་གསན་ཙ་ན། དེ་ལེགས་སོ་གསུངས་ནས་ཤིན་ཏུ་མཉེས་ཤིང་། དྲུང་ན་འཁོད་པ་རྣམས་ལ་ཡང་མཉམ་ཉིད་དུ་ཉེ་རིང་མེད་པར་བྱམས་གསུངས། སྔོན་ཀུན་དགའ་བོ་རྒྱལ་པོའི་ཁབ་ཏུ་ཞུགས་ནས་མཐར་གྱིས་བསོད་སྙོམས་བླངས་སོ། །དེའི་ཚེ་བྲམ་ཟེ་ཅི་ཡང་མེད་པ་གཅིག་གིས། མ་རྒན་མོ་ཁུར་ཏེ་སློང་མོ་བྱས། དེ་ཡང་ཁ་ཟས་ཞིམ་པོ་དང་ཤིང་བོག་བཟང་པོ་རྙེད་ནམ་ལ་སྟེར་ཞིང་ཁ་ཟས་ངན་པ་དང་ཤིང་ཐོག་སྐམ་པོ་དག་རྙེད་ན་ཁོ་རང་ཟ་བ་དེ་མཐོང་ནས་

རབ་ཏུ་དགའ་བས། རིགས་ཀྱི་བུ་མ་ལ་སྲིད་ཞུ་བྱེད་ཅིང་མཆོད་པར་བྱེད་པ་ངོ་མཚར་ཆེ་ཞེས་སྨྲས་སོ། །དེ་བཞིན་དུ་རང་གི་མའི་གཙོར་བྱས་པའི་མ་གྱུར་སེམས་ཅན་ཐམས་ཅད་ལ་གང་བྱམས་བྱམས་བྱེད་དགོས། དེ་ལྟར་བྱམས་པ་བསྒོམས་ན་བསོད་ནམས་ཆེ་སྟེ། ཏིང་ངེ་འཛིན་རྒྱལ་པོ་ལས། བྱེ་བ་ཁྲག་ཁྲིག་དཀྲིགས་པའི་ཞིང་དག་ན། །མཆོད་པ་རྣམ་མང་དཔག་མེད་ཇི་སྙེད་པ། །སྐྱེས་མཆོག་རྣམས་ལ་དེ་ཡིས་རྟག་མཆོད་པས། །བྱམས་པའི་སེམས་ཀྱི་གྲངས་དང་ཆར་མི་ཕོད། །ཅེས་དང་། འཇམ་དཔལ་ཞིང་བཀོད་ལས། བྱང་ཤར་མཚམས་ན་སངས་རྒྱས་དབང་ཕྱུག་ཆེན་པོའི་རྒྱལ་བའི་འཇིག་རྟེན་གྱི་ཁམས་སྟོང་གིས་བརྒྱན་པ་ཞེས་བྱ་བ། དགེ་སློང་འགོག་པ་ལ་ཞུགས་པའི་བདེ་བ་བཞིན་དུ་སེམས་ཅན་རྣམས་བདེ་བ་དང་ལྡན་ནོ། །དེར་ལོ་བྱེ་བ་བརྒྱ་སྟོང་དུ་ཚངས་སྤྱོད་སྤྱད་པས་ནི་ཞིང་འདིར་ཐ་ན་སེ་གོལ་གཏོགས་པའི་ཡུན་ཙམ་དུ་སེམས་ཅན་ཐམས་ཅད་ལ་བྱམས་པའི་སེམས་བསྐྱེད་ན། སྔ་མ་ལས་བསོད་ནམས་ཆེས་མང་དུ་བསྐྱེད་པས་ན། ཉིན་མཚན་དུ་གནས་པ་ལྟ་ཅི་སྨོས། ཞེས་དང་།

རྗེ་རིན་པོ་ཆེའི་ཞལ་ནས་བྱམས་པ་ཡོད་ན་ལྷ་མིས་བྱམས་ཤིང་ངང་གིས་འདུ་བ་དང་། རྒྱལ་བས་ཀྱང་བདུད་སྡེ་བྱམས་པའི་སྟོབས་ཀྱིས་ཕམ་པར་མཛད་པས་སྲུང་བའི་མཆོག་ཏུ་འགྱུར་ཞེས་དང་། སྤྱན་སྔ་བས་སྨྱུག་རུམ་པ་ལ་ནན་ཏར་ན་ཕ་རོལ་པོ་འཇོམས་པ་ལ་བྱམས་པ་ཙམ་མེད། དེ་བས་ན་བྱམས་པ་བྱ་བ་འདི་མིང་ཐོས་པ་ཙམ་གྱིས། སྙིང་སངས་སངས་འདུག་གསུངས། འདི་གལ་ཆེ་བའི་རྒྱུ་མཚན་མང་པོ་སྤྱན་སྔ་བས་གསུངས་པས་གླང་ཐང་པས་ཕྱག་མཛད་དེ། བདག་དུས་འདི་ནས་བཟུང་སྟེ། བྱམས་སྙིང་རྗེ་འབའ་ཞིག་བསྒོམ་པར་ཞུ་ཞུས་པས། དགེ་བའི་བཤེས་གཉེན་པས་དབུ་ཞྭ་ཕུད། ཐལ་མོ་སྤྱི་བོར་སྦྱར་ནས། ཤིན་ཏུ་ཆ་ཡང་བཟང་ལགས་ཞེས་ལན་གསུམ་གསུངས། མྱུར་ལམ་ལས། ཚེ་འདི་ལ་འཛམ་བུ་གླིང་ཙམ་ལ་བྱམས་པ་བསྒོམས་ན། དེ་ལ་དབང་བའི་འཁོར་ལོས་བསྒྱུར་བའི་རྒྱལ་པོར་འགྱུར། གླིང་གཉིས་ལ་སྐྱེས་ན། དེ་ལ་དབང་བའི་ཟངས་ཀྱི་འཁོར་ལོས་བསྒྱུར་བའི་རྒྱལ་པོར་འགྱུར། གསུམ་ལ་སྐྱེས་ན་དེ་ལ་དབང་བའི་དངུལ་གྱི་འཁོར་ལོས་བསྒྱུར་བའི་རྒྱལ་པོར་འགྱུར། གླིང་བཞི་ལ་སྐྱེས་ན་

དེ་ལ་དབང་བའི་གསེར་གྱི་འཁོར་ལོས་བསྒྱུར་བའི་རྒྱལ་པོར་འགྱུར། སྟོང་གསུམ་ལ་སྐྱེས་ན་ལྷའི་དབང་པོ་ཚངས་པར་འགྱུར། སྟོང་ཆུང་དང་སྟོང་གཉིས་པ་དང་བར་མ་ལ་སྐྱེས་ན་དེ་ལ་དབང་བའི་བདག་པོར་འགྱུར། ནམ་མཁའི་མཐས་ཁྱབ་པའི་སེམས་ཅན་ལ་སྐྱེས་ན། དེའི་འབྲས་བུ་རྫོགས་པའི་སངས་རྒྱས་མིན་པ་གཞན་དུ་མི་འགྱུར་གསུངས། རྒྱལ་སྲས་རིན་པོ་ཆེའི་བྱམས་པའི་ཤུགས་ཀྱིས་དྲུང་ན་འཁོད་པའི་བྱ་དང་རི་དྭགས་གཅན་ཟན་ཀུན་ཀྱང་གཅིག་ལ་གཅིག་ཕན་ཚུན་གནོད་པ་མེད་ཅིང་བྱམས། སློབ་མ་རྣམས་ཀྱང་ཁོང་ང་ཁོ་ན་ལ་མཉེས་ཤིང་བྱམས་སྙམ་དུ་ཐམས་ཅད་དེ་ལྟར་དུ་སེམས་ཤིང་། དེ་རྣམས་ཀྱང་གཅིག་ལ་གཅིག་མཐོང་ཆེ་ཞིང་བྱམས་པས། ཕན་ཚུན་ཆེ་མི་རྩོད་པར་གྲལ་འོག་ཏུ་སྡོད་པ་ལ་ཧབ་ཐོབ་བྱེད་ཅིང་གཅིག་ལ་གཅིག་སྙན་པར་སྨྲ་བའོ། །གསུངས། ཡང་མཁར་སྔོན་བྱ་བའི་སྡེའི་ཕྱུག་པོ་ཞིག་གིས་དགེ་རྩ་བྱེད་པའི་དུས། ཁྲོ་ཟངས་ཆེན་པོར་ཇ་བསྐོལ་ཡོད་པའི་ནང་དུ་བུ་ཆུང་ལོ་བརྒྱད་ཙམ་ཞིག་ལོན་པ་ལྷུང་སོང་བ་བཏོན་ཚེ། ཤ་ཀུན་ཚོས་པ་མས་མཐོང་བ་དང་། ཤས་མི་

བཟོད་པའི་སྙིང་རྗེ་དྲག་པོ་སྐྱེས་ཏེ། བུ་འདི་ལྷུང་བ་ལས་མོ་ལྷུང་རུང་བཟོད་ཟེར་གདོང་ལ་སྦར་ཤད་བྱས་མགོ་ས་ལ་བརྡབ་ནས་ཁྲག་བྱུང་ཚེ་གཞན་གྱིས་རེ་ཞིག་བར་དུ་བཟུང་ནས་སྡོད་དགོས་བྱུང་། དེ་བཞིན་དུ་རྒྱ་ནང་ན་རྒྱ་མི་ཕལ་ཆེར་གྱིས་ཕག་པ་མ་ཤི་གོང་དུ་ཆུ་ཁོལ་མའི་ནང་དུ་འཚོད་པ་དང་ཕག་ཕྲུག་དང་ཁྱིམ་བྱ་རྣམས་རྫ་ཁོག་ནང་དུ་བཅུག་ནས་འོག་ནས་མེ་སྦར་ནས་གསོན་སྲེག་བྱེད་པ་དང་། བལ་པོ་ན། ཁྱོ་ག་ཤི་ན་རོ་དང་ལྷན་དུ་བུད་མེད་ཀྱང་མེ་ནང་དུ་བཅུག་ནས་གསོན་སྲེག་བྱེད་པ་དང་། གཞན་ཡང་ནག་ཅན་མི་ལ་ཁྲིམས་གཅོད་པ་དང་ཆུ་དང་མེ་དང་གཡང་དུ་ལྷུང་ནས་ཤི་བ་མཐོང་ཐོས་རྣམས་ཡིད་ལ་དྲན་པར་བྱས་ནས་སྡུག་བསྔལ་གྱི་མནར་བའི་ཉམ་ཐག་ཕ་མ་སེམས་ཅན་ལ་ཤས་མི་བཟོད་པའི་སྙིང་རྗེ་ཆེན་པོ་བསྐྱེད་པར་བྱའོ། །སྔོན་མཚུངས་མེད་བཟོད་པ་རྒྱ་མཚོ་ལྷོ་ཁའི་ཕྱོགས་སུ་གནས་བསྐོར་དུ་ཕེབས་པའི་ཉིན་གཅིག་ཤ་བ་ཞིག་རྔོན་པ་གཉིས་དང་ཁྱི་ཞིག་གིས་དེད་ནས། ཆུ་བྲག་འཐབ་པའི་བར་དུ་བཅུག་ཚེ་འགྲོས་མ་རྙེད་པར་སྲོག་དང་འབྲལ་བ་ཤེས་རྔོན་པ་གཉིས་ལ་ཕྱི་མིག་བལྟ་བཞིན་བློས་མ་ཚུགས་འཇིགས་པའི་ཆུ་ནང་དུ་

བྲོས་དུས་དེར་ཁྱིས་རྨུག་རྔོན་པས་རྡོ་ཡིས་རྒྱབ་ནས་གསོད་པའི་དུས། སྙིང་རྗེ་ཚད་མེད་པ་སྐྱེས་ནས་སྤྱན་ཆ་བ་ཤོར་ཞིང་ཤ་བ་ལ་ཕན་པའི་འཕོ་བ་དང་སྨོན་ལམ་རྒྱས་པར་མཛད་སྐད། དེ་བཞིན་སྡིག་ཅན་རྣམས་ཀྱིས་བྱ་དང་རི་དྭགས་ཉ་སོགས་སེམས་ཅན་གཞན་གསོད་པ་རྣམས་ལ་དམིགས་ནས་སྙིང་རྗེ་མཆི་མ་འཁྲུག་ནུས་པ་ཙམ་བསྐྱེད་དགོས། རྗེ་བཙུན་མི་ལ་རས་པ་དབྱར་སོས་ཅིག་ཐང་ཆེན་པོ་དཔལ་ཐང་དུ་བྱོན་པས། ཁྱི་ཞིག་ཤི་བའི་རོལ་འབུ་མང་པོ་བྱུང་འདུག་པ་གཟིགས་ནས་སྙིང་རྗེ་ཆེན་པོ་རྒྱུད་ལ་འཁྲུངས་ནས། ཁྱི་རོ་དེའི་འགྲམ་དུ་ཐུགས་གཏད་ནས་ཞག་དྲུག་བཞུགས། ཁྱི་དེའི་རྣམ་པར་ཤེས་པ་མཐོ་རིས་སུ་དྲངས། འབུ་རྣམས་ལ་ལས་ཀྱི་འབྲེལ་བ་བཞག་གསུངས། ཡང་གཉའ་ནང་ཚོང་འདུས་སུ་ཕེབས་པས་མོན་པ་ཞིག་གིས་ལུག་ནག་པོ་ཞིག་ལ་ཁོང་ལག་བཏང་བས། རྨ་བཟོས་ཙམ་ན་རྒྱུ་མ་ན་ར་ར་ལུག་ཤོར་ཏེ། འཇིགས་ནས་སྐད་ཆེན་པོ་འདོན་ཞིང་འདར་ཁྲི་ལེ་བའི་ངང་ལ་རྗེ་བཙུན་ཡབ་སྲས་ལ་སྐྱབས་འཚོལ་དུ་བྱུང་ནས་ལུག་ཚེའི་དུས་བྱེད་པའི་བར་ལ། རྗེ་བཙུན་གྱིས་སྤྱན་ཆབ་བསིལ་ཞིང་

ལུག་ལ་འཕོ་བ་མཛད་ནས། རྣམ་ཤེས་བྱང་ཆུབ་ལམ་ལ་བཀོད་དེ་སྙིང་རྗེ་ཆེན་པོ་མི་བཟོད་པའི་ངང་ནས། ཨེ་མ་འཁོར་བའི་སེམས་ཅན་རྣམས། །ཐར་བའི་ལམ་ལ་ཡར་ལྟོས་དང་། །ཨ་ཙ་མ་སྡིག་ཅན་སྙིང་རེ་རྗེ། །ལ་སོགས་པའི་མགུར་གནང་། དེ་བཞིན་དུ་འོ་སྐོལ་རྣམས་ཀྱིས་ཀྱང་ར་ལུག་གཡག་གསུམ་གསོད་སར་སོང་ནས་མིག་ནས་མཆི་མ་མ་བྱུང་གི་བར་དུ་སྙིང་རྗེ་བསྒོམ་དགོས། སངས་རྒྱས་སྣང་བ་མཐའ་ཡས་ཀྱི་སྤྲུལ་པ་པཎ་ཆེན་རིན་པོ་ཆེའི་ཞལ་ནས་ཐོག་མར་ཤན་པས་གསོད་བཞིན་པའི་ལུག་ལྟ་བུའི་སྡུག་བསྔལ་གྱི་ཉམ་ཐག་པའི་འགྲོ་བ་ལ་བསྒོམ། དེའི་ཚུལ་ནི། མདུན་དུ་དེའི་རྣམ་པ་གསལ་བར་དམིགས་ནས། ཡན་ལག་རྣམས་ནི་བཅིངས། བྲང་གི་པགས་པ་ནི་གཤགས། ཤན་པའི་ལག་པ་ཁོང་བར་བཅུག་པས། སྲོག་ལ་བབ་པ་ནི་མངོན་སུམ་དུ་ཤེས། མིག་ཤན་པའི་གདོང་ལ་ཧྲིག་ཧྲིག་བལྟ་ཞིང་སྡུག་བསྔལ་གྱིས་ཉམ་ཐག་པའི་ཚུལ་བསམས་ནས། དེས་ན་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང་། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །

སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་བྱའོ། །ཞེས་སྙིང་རྗེ་སྒོམ་ཚུལ་གསལ་བར་གསུངས་པ་ལྟར་ཡང་དང་ཡང་དུ་བསྒོམ་པར་བྱའོ། །དཔེར་ན་མ་སྒོ་རུ་སོང་ཤུལ་ནས་བུ་ཐབ་ཁའི་མེ་ནང་དུ་ལྷུངས་ནས་རྐང་ལག་ཚིག །རྒྱུ་མ་ལུག་པ་མཐོང་ཚེ། བཟོད་བླགས་མེད་པའི་སྙིང་རྗེ་ཤས་མི་བཟོད་པ་སྐྱེ་བ་ལྟར་ནག་ཅན་གྱི་མི་བཙོན་དོང་དུ་ཆུད་པ་དང་། སྡིག་ཅན་གྱི་མི་དམྱལ་བའི་མེ་དོང་དུ་ལྷུངས་པ་སོགས་སྡུག་བསྔལ་གྱིས་ཉམ་ཐག་པ་ཐམས་ཅད་ཡང་ཡང་ཡིད་ལ་དྲན་པར་བྱས་ཏེ། དེ་དག་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་ན་ཅི་མ་རུང་། སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བ་ཞིག་བདག་གིས་བྱའོ། །དེ་ལྟར་བྱེད་ནུས་པར་བླ་མ་ལྷས་བྱིན་གྱིས་བརླབ་ཏུ་གསོལ། ཞེས་གསོལ་བ་འདེབས་བཞིན་སྙིང་རྗེ་ཤུགས་དྲག་ལ་རྒྱུན་རིང་བ་བསྒོམ་པར་བྱའོ། །རྒྱལ་སྲས་རིན་པོ་ཆེ་དགུང་ལོ་བཅུ་དྲུག་ཙམ་ལོན་དུས་སུ། དགེ་བཤེས་གཅིག་གིས་བང་ཆེན་པ་ལ་བཏང་བས། བོ་དོང་ནས་ས་སྐྱར་འབྱོན་

པའི་ཕྱེད་ལམ་སླེབ་པའི་ཐང་དཀྱིལ་གཅིག་ན་ཁྱིའི་ཕྲུག་གུ་བཞི་ལྔ་ཞིག་སྐྱེས་པ་མས་བོར་ནས་སོང་འདུག་པ་གཟིགས་པས་སྙིང་རྗེ་ནས་བཤུམས་ཤིང་། འཁྱག་པ་དང་། ཕོ་རོག་གཅན་ཟན་གྱིས་གསོད་ཀྱི་དོགས་དེ་རིང་འདི་བ་བསྐྱལ་ལ་དོ་ནུབ་མཚན་བསྐྱངས་ལ་འགྲོ་དགོས་དགོངས་ཁྱི་གུ་ནང་དུ་སྐྱེལ་བ་ལོག་ནས་བྱོན་གསུངས། ཡང་དགུང་ལོ་ཉི་ཤུ་ཙམ་ལ། ཨེའི་དགེ་འདུན་རྣམས་ཆོས་གཞི་ལ་བཏེགས་པས་རྒྱ་སྒོའི་རྩ་ན་སྤྲང་མོ་ཞ་བོ་ཞིག་ཡོད་པ་དེ་ངུ་ཡིན་འདུག་པ་ལ་ཐུགས་ཀྱིས་མ་བཟོད་ནས་ཅི་ཉེས་དྲིས་པས། བཙུན་པ་ཐམས་ཅད་འབྱོན་པར་འདུག་དེ་ནས་ང་ལ་ལྟོ་སྟེར་མི་མི་འོང་ཟེར། ངས་ཁྱོད་ལེན་དུ་འོང་གིས་དུཿཁ་མ་བྱེད་གསུངས་ཏེ་ཐག་པ་ཁྱེར་ནས་བྱོན་ཏེ་སྔོན་ལ་གོས་གདན་བསྐྱལ། དེ་ནས་མོ་རང་ཁུར་ནས་ཆོས་པའི་རར་བསྐྱལ་གསུངས། དེས་ན་སེམས་ཅན་དངོས་སུ་དུཿཁ་བ་མཐོང་ན་ལྟ་སྨོས་ཀྱང་ཅི་འཚལ། གཞན་གྱིས་སེམས་ཅན་དུཿཁ་བ་འདི་འདྲ་འདུག་ཟེར་བ་གསན་ན། ངའི་མ་རྒན་དེ་སྙིང་རེ་རྗེ་གསུངས་ཏེ། བཤུམས་ནས་གསུང་གླེང་ཀྱང་འཕྲོ་ཆད་ནས་འགྲོ་ཞིང་། གླང་རི་ཐང་བ་ལ་གཞན་གྱིས་ངོ་ནག་པོ་

བྱས་པ་གསན་པས། ངས་མ་རྒན་སེམས་ཅན་རྣམས་ཀྱི་དུཿཁ་འདི་ལ་བསམ་ཙ་ན་ངོ་གདོང་དཀར་པོ་ཡོང་བ་མི་འདུག་གསུངས་ཟེར། དེ་ཁོང་མད་པར་གདའ་གསུངས་ནས་སྤྱན་ཆབ་ཉིལ་ཉིལ་མཛད་ཅིང་འདི་ལྟར་ཡང་གསུངས་སོ། །དུཿ ཁའི་མང་གཟིར་འགྲོ་འདི་ཡལ་བོར་ནས། །རང་ཉིད་ཞི་བདེ་འབའ་ཞིག་དོན་གཉེར་བ། །ཕ་མ་མེ་ཡིས་ཚིག་པ་ཡལ་བོར་ནས། །རང་ཉིད་བསིལ་བའི་རྫིང་བུར་ཁྲུས་བྱེད་འདྲ། །འགྲོ་འདིས་རང་གི་བདེ་བ་ཡལ་བོར་ནས། །བདག་གི་དོན་དུ་ཁ་ཁུར་གང་བླངས་པ། །ས་དང་རྒྱ་མཚོའི་རྡུལ་བས་ཆེས་མང་ན། །དེ་དག་བདག་གིས་ཇི་ལྟར་ཡལ་བར་འདོར། །ཐོག་མེད་དུས་ནས་ལན་མང་ཕན་བཏགས་པའི། །འགྲོ་མང་བཟོད་དཀའི་སྡུག་བསྔལ་གྱིས་གཟིར་བ། །མཐོང་ཐོས་དྲན་ཡང་གས་པར་མ་གྱུར་པ། །བདག་གི་སྙིང་འདི་ལྕགས་ལས་བྱས་སམ་ཅི། །སྔོན་ཆད་ཡང་ཡང་དུཿ ཁ་སེལ་བྱེད་མ། །མནར་མེད་མེ་ཡི་ནང་དུ་ཚིག་གྱུར་པ། །དེ་ལ་སྙིང་རྗེའི་བསམ་པ་མི་སྐྱེ་བ། །བདག་འདྲ་མི་ཡི་ལུས་ཅན་དུད་འགྲོར་ཟད། །ཅེས་གསུངས་ཤིང་། སྙིང་རྗེའི་ཉམས་

བྱུང་རྒྱལ་དུ་བཏང་ན་ཉིན་མཚན་ཁོར་ཡུག་ཏུ་དེ་ཉིད་ལ་རྩེ་གཅིག་ཏུ་འབྱམས་ནས་ཕྱི་རོལ་པས་བལྟས་ན་བརྒྱལ་བར་མངོན་པ་ལྟར་ཡོང་གིན་འདུག་གསུངས། གཞན་ཡང་འདི་ལྟར་གསུངས་ཏེ། ངན་སོང་གསུམ་ཏ་ཨ་ཅང་ཆེ། མིའི་ནང་ནས་ཀྱང་དུཿ ཁ་ལ་དངོས་སུ་སྤྱོད་པ་འདི་རྣམས་སྙིང་ཤིན་ཏུ་རྗེ་མོད། བསམ་བློ་ལེགས་པར་བཏང་ན་དུཿཁ་ཡི་རྒྱུ་ལ་ལོངས་སྤྱོད་པ་འདི་རྣམས་སྙིང་རྗེ་གསུངས་ཤིང་། ད་ལྟ་འཇིག་རྟེན་གྱི་མི་ཆེ་རུ་རེ། གྲུང་དུ་རེ། འཁོར་མང་ཁ་དྲག་ནོར་ཆེ་ལས་སུ་སྡིག་པ་འབའ་ཞིག་བྱེད་པ་དེ་འདྲ་རྣམས་གཟིགས་པའམ། དྲན་པའམ། དེ་དག་གི་གླེང་མོ་བྱུང་ཙ་ན་སྤྱན་ཆབ་འབྱིན་ཞིང་། ཕ་རོལ་པོ་རྣམ་རྟོག་སྐྱེར་འོང་བསམ་པ་བྱུང་ནས་ཉམས་སྣ་བསྐྱིལ་གིན་ཚོད་བཟུང་བ་མིན་ན། དེ་འདྲ་རྣམས་དང་ཕྲད་ཙ་ན་མཆི་མ་རང་དབང་མེད་པར་ཡོང་གིན་འདུག་གསུངས། དགེ་བཤེས་སྟོན་པའི་དྲུང་དུ། ཁམ་པ་ལུང་པའི་སློབ་མ་བཙུན་པ་ཞིག་བྱུང་བ་ལ་སྟོན་པའི་ཞལ་ནས། ཁམ་པ་ལུང་པ་ཁོང་ཅི་མཛད་ཀྱིན་འདུག་གསུངས་པས། ཁོང་པ་གྲོག་ཁ་རེར་བཞུགས་དབུ་བཏུམས་ཏེ་བཤུམས་པ་འབའ་ཞིག་མཛད་ཀྱིན་གདའ་

ཞུས་པས། སྟོན་པས་དབུ་ཞྭ་ཕུད། ཐུགས་ཀར་ཐལ་མོ་སྦྱར། སྤྱན་ཆབ་མང་པོ་ཕྱུང་ནས་ཤིན་ཏུ་ངོ་མཚར་ཆེ། ཆོས་བྱ་བ་ཁོང་གིས་བྱས་པ་ཡིན། འདིའི་ཡོན་ཏན་མང་པོ་བཤད་རྒྱུ་ཡོད་དེ། ད་ལྟ་བཤད་ན་ཁོང་མི་མཉེས་པར་འདུག་གསུངས་པར་གདའ། དེས་ན་ཇོ་བོ་བཀའ་རྒྱུད་རྣམས་ཀྱང་ཐུགས་དམ་གྱི་གཙོ་བོ་འདི་ལ་མཛད་པར་གདའ་གསུངས། དེ་ཡང་སྙིང་རྗེ་ཆེན་པོ་ནི། ཐེག་པ་ཆེན་པོའི་ལམ་གྱི་རྩ་བ་མེད་མི་རུང་ཡིན་ཏེ། རྣམ་སྣང་མངོན་བྱང་ལས། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་འབྱུང་བ་ཡིན། ཞེས་དང་། བློ་གྲོས་མི་ཟད་པར་བསྟན་པ་ལས། བཙུན་པ་ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་མི་ཟད་དོ། །དེ་ཅིའི་ཕྱིར་ཞེ་ན། སྔོན་དུ་འགྲོ་བའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་དབུགས་ཕྱི་ནང་དུ་རྒྱུ་ནི་མིའི་སྲོག་གི་དབང་བོའི་སྔོན་དུ་འགྲོ་བ་ཡིན་ནོ། །དེ་བཞིན་དུ་བྱང་ཆུབ་སེམས་དཔའ་སྙིང་རྗེ་ཆེན་པོ་ནི་ཐེག་པ་ཆེན་པོ་ཡང་དག་པར་བསྒྲུབ་པའི་སྔོན་དུ་འགྲོ་བ་ཡིན་ནོ། །ཞེས་དང་། གཱ་ཡ་གཽ་རི་ལས་ཀྱང་།

འཇམ་དཔལ་བྱང་ཆུབ་རྣམས་ཀྱི་སྤྱོད་པའི་རྩོམ་པ་ནི་གང་། གནས་ནི་གང་། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་རྣམས་ཀྱི་སྤྱོད་པའི་རྩོམ་པ་ནི་སྙིང་རྗེ་ཆེན་པོའོ། །གནས་ནི་སེམས་ཅན་ནོ། །ཞེས་དང་། ཆོས་ཡང་དག་པར་སྡུད་པ་ལས་ཀྱང་། བཅོམ་ལྡན་འདས་བྱང་ཆུབ་སེམས་དཔའ་ཆོས་རབ་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔའ་ཆོས་གཅིག་རབ་ཏུ་བཟུང་ཞིང་རབ་ཏུ་རྟོགས་པར་བགྱིས་ན། སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་ན་མཆིས་པ་ལགས་སོ། །ཆོས་གཅིག་པོ་གང་ཞེ་ན། འདི་ལྟ་སྟེ་སྙིང་རྗེ་ཆེན་པོའོ། །བཅོམ་ལྡན་འདས་སྙིང་རྗེ་ཆེན་པོས་ནི་སངས་རྒྱས་ཀྱི་ཆོས་ཐམས་ཅད་བྱང་ཆུབ་སེམས་དཔའ་རྣམས་ཀྱི་ལག་མཐིལ་དུ་མཆིས་པ་ལགས་སོ། །བཅོམ་ལྡན་འདས་དཔེར་བགྱི་ན། འཁོར་ལོས་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་དེ་གང་དུ་མཆིས་པ་དེར། དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ། །

བཅོམ་ལྡན་འདས་དཔེར་བགྱི་ན་སྲོག་གི་དབང་པོ་མཆིས་ན། དབང་པོ་གཞན་རྣམས་ཀྱང་མཆིས་པར་འགྱུར་རོ། །བཅོམ་ལྡན་འདས་དེ་བཞིན་དུ་སྙིང་རྗེ་ཆེན་པོ་མཆིས་ན་བྱང་ཆུབ་སེམས་དཔའི་ཆོས་གཞན་རྣམས་ཀྱང་འབྱུང་བར་འགྱུར་རོ། །ཞེས་དང་། སློབ་དཔོན་ཟླ་བ་གྲགས་པས་ཀྱང་། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་ཚོགས་འདིའི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་གྱུར་པ། །དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །ཞེས་སྙིང་རྗེ་ཆེན་པོ་སངས་རྒྱས་ཀྱི་གོ་འཕང་སྒྲུབ་པ་ལ་ཐོག་མཐའ་བར་གསུམ་དུ་གལ་ཆེ་བ་མེད་མི་རུང་དུ་གསུངས་སོ། །དེས་ན་སློབ་དཔོན་ཀ་མ་ལ་ཤི་ལའི་ཞལ་ནས། སྙིང་རྗེ་ནི་ཏིང་ངེ་འཛིན་ལ་འདུག་ཀྱང་རུང་། སྤྱོད་ལམ་ཐམས་ཅད་དུ་ཡང་རུང་སྟེ། དུས་ཐམས་ཅད་དུ་སེམས་ཅན་ཐམས་ཅད་ལ་བསྒོམ་པར་བྱའོ། །གསུངས་པ་ལྟར་བསྒོམ་པ་ལ་བརྩོན་པར་བྱའོ། །དེ་ལྟར་བྱམས་པ་དང་སྙིང་རྗེ་ཆེན་པོ་ཡང་ཡང་བསྐྱེད་ནས། བདག་བས་གཞན་གཅེས་ཀྱི་བློས་བདག་ཅག་གི་སྟོན་པ་ཐུགས་

རྗེ་ཅན་གྱི་སྐྱེས་རབས་རྣམ་པར་ཐར་པ་ལྟར་འགྲོ་བ་གཞན་དོན་ལ་ལུས་དང་སྲོག་ལ་མི་ལྟ་བར་འཇུག་དགོས་ཏེ། སྔོན་ཐུབ་པའི་དབང་པོ་འདི་རྒྱལ་པོ་པདྨ་བྱ་བར་འཁྲུངས། དུས་ཅིག་གི་ཚེ་ཁོང་གི་མངའ་རིས་སུ་ནད་ཡམས་ཆེན་པོ་བྱུང་ནས་མི་མང་པོ་ཤི་བས། རྒྱལ་པོས་སྨན་པ་རྣམས་བོས་ཏེ། འདི་ལ་ཅིའི་ཕན་དྲིས་པས། དེ་དག་ན་རེ་ཉ་རོ་ཧི་ཏའི་ཤ་ཡོད་ན་ཕན། གཞན་གང་ཕན་ནད་ཀྱི་གྲིབ་ཀྱིས་རྨུགས་ནས་མི་ཤེས་པར་འདུག་ཞུས་པས། རྒྱལ་པོས་དུས་བཟང་ལ་བབ་པའི་སྔ་དྲོ་ཁྲུས་བྱས་གོས་གསར་པ་གྱོན། གསོ་སྦྱོང་བླངས་དཀོན་མཆོག་ལ་མཆོད་པ་རྒྱ་ཆེན་པོ་ཕུལ། གསོལ་བ་དྲག་པོ་བཏབ་ནས། བདག་ཤི་མ་ཐག་ཆུ་ཀླུང་ཟློག་བྱེད་དུ། ཉ་རོ་ཧི་ཏར་སྐྱེ་བར་གྱུར་ཅིག །ཅེས་སྨོན་ལམ་བཏབ་སྟེ། ཁང་བཟང་ཁྲུ་སྟོང་པའི་ཁ་ནས་མཆོངས་སོ། །དེ་མ་ཐག་ཏུ་ཆུ་དེར་ཉ་དེར་རྫུས་ཏེ་སྐྱེས་སོ། །དེ་ནས་མིའི་སྐད་དུ། ཉ་རོ་ཧི་ཏ་ཡིན་པས། ངའི་ཤ་ལོངས་ལ་ཟོ་ཞིག་ཅེས་སྨྲས་པས། ཐམས་ཅད་ཀྱིས་ཤ་བླངས་ཏེ་གཞོགས་གཅིག་གི་ཤ་ཟད་ཙ་ན་གཞོགས་སྒྱུར་ཅིང་བཅད་པས། གཅིག་ཟོས་ཙ་ན་གཅིག་གི་ཤ་སྐྱེས་ཏེ།

དེ་ལྟར་གཞོགས་རེ་མོས་ཀྱི་ཟོས་པས་ནད་ཐམས་ཅད་ལ་ཕན་ནོ། །དེར་མི་རྣམས་ལ། ཁྱེད་ཀྱི་དོན་དུ་ངས་འདི་ལྟར་བྱས་སོ་ཞེས་སྔར་གྱི་ལོ་རྒྱུས་གསུངས་ཏེ། ངེད་ཀྱིས་དྲིན་ལན་དུ་སྡིག་པ་སྤོངས་ལ་དགེ་བ་ཅི་ནུས་སྒྲུབས་ཤིག་གསུངས་པས། དེ་དག་གིས་ཀྱང་བཀའ་བཞིན་སྒྲུབ་བོ། །དེ་ནས་བཟུང་སྟེ་དེ་དག་ངན་འགྲོ་ལོག་པར་མ་ལྷུང་ངོ་གསུངས། ཡང་ཐུབ་པ་འདི་ཉིད་རུས་སྦལ་ཆེན་པོ་ཞིག་ཏུ་འཁྲུངས་པའི་དུས་སུ། ཚོང་བ་ལྔ་བརྒྱ་རྒྱ་མཚོར་ཕྱིན་པས་གྲུ་ཞིག་སྟེ་འཆི་བ་ལ་ཐུག་པ་ལ། རུས་སྦལ་གྱི་མིའི་སྐད་དུ། ཐམས་ཅད་ང་ལ་ཞོན་ཅིག་ངས་བསྒྲལ་གྱིས་གསུངས་ནས། རྒྱ་མཚོ་ལས་བསྒྲལ་བས་ཐང་ཆད་དེ་མཚོ་མཐར་གཉིད་པས། སྦྲང་བུ་ཀེ་ཏ་ཀ་བརྒྱད་ཁྲིས་ཁོང་གི་ཁྲག་འཇིབ་པས། གཉིད་སད་དེ་བལྟས་པས་སྦྲང་བུ་མང་པོ་འདུག །ཆུར་ཕྱིན་པ་འམ་ས་ལ་འགྲེས་ན། སྦྲང་བུ་མང་པོ་འཆི་བར་འདུག་དགོངས་དེ་ཀ་ལ་བཞུགས་ཏེ་སྐུ་ཚེ་བཏང་བས། སངས་རྒྱས་པའི་དུས་སུ་སྦྲང་བུ་རྣམས་ལྷ་བརྒྱད་ཁྲིར་གྱུར་ནས། སངས་རྒྱས་ལ་ཆོས་ཉན་པས། དེ་དག་གིས་བདེན་པ་མཐོང་བར་

གསུངས། ཡང་རྒྱལ་པོ་གསེར་གྱི་གཙུག་ཏོར་གྱི་སྲས། གཙུག་ན་ནོར་བུ་ཞེས་བྱ་བར་གྱུར་ཚེ། དབུ་ལ་རིན་པོ་ཆེའི་གཙུག་ཏོར་ཡོད་པ་ལས། བདུད་རྩི་འབབ་ཅིང་། དེ་ལྕགས་ལ་རེག་པས་ལྕགས་རྣམས་གསེར་དུ་བསྒྱུར་ནུས་པ་དེ་བྲམ་ཟེ་སློང་མཁན་ཞིག་ལ་བཅད་ནས་སྦྱིན་པ་དང་། རྒྱལ་པོ་བྱམས་པའི་སྟོབས་སུ་གྱུར་ཚེ། གནོད་སྦྱིན་སྤུན་ལྔ་ལ་སྐུ་ལུས་ཀྱི་ཁྲག་གི་སྦྱིན་པ་བཏང་བ་དང་། རྒྱལ་བུ་སྙིང་སྟོབས་ཆེན་པོར་གྱུར་པའི་ཚེ། སྟག་མོ་ལ་སྐུ་ལུས་སྦྱིན་པ་དང་། རྒྱལ་བུ་ཟླ་འོད་དུ་གྱུར་ཚེ་བྲམ་ཟེ་ལ་དབུ་བཅད་ནས་སྦྱིན་པ་སོགས་སློབ་པ་ལམ་གྱི་དུས་སུ་རང་ཡལ་བར་དོར་གཞན་གཅེས་པར་བཟུང་ནས། གཞན་དོན་མཛད་མཛད་ནས་སངས་རྒྱས་པ་ལྟར། རང་གིས་ཀྱང་ཚེ་རབས་ཐམས་ཅད་དུ་བདག་བས་གཞན་གཅེས་ཀྱི་བློས་ལུས་སྲོག་ལོངས་སྤྱོད་ཐམས་ཅད་ཕངས་པ་མེད་པར་བཏང་ནས། མ་གྱུར་འགྲོ་བའི་དོན་ཁོ་ན་ལ་འབད་པར་བྱའོ་སྙམ་པའི་དམ་བཅའ་ཡིད་སྨོན་ཡང་ཡང་བྱའོ། །སྐྱེས་བུ་ཆེན་པོའི་རྣམ་རྟོག་བརྒྱད་ནི། བདག་གིས་ནམ་ཞིག་སེམས་ཅན་གྱི་དུཿཁ་སེལ་བར་ནུས་སྙམ་པ་དང་། ནམ་ཞིག་དབུལ་

བས་ཉེན་པའི་སེམས་ཅན་རྣམས་འབྱོར་པ་ཆེན་པོ་ལ་འཇོག་ནུས་སྙམ་པ་དང་། ནམ་ཞིག་ཤ་ཁྲག་དང་བཅས་པའི་ལུས་ཀྱི་སེམས་ཅན་གྱི་དོན་ནུས་སྙམ་པ་དང་། ནམ་ཞིག་དམྱལ་བར་ཡུན་རིང་དུ་གནས་ནས་ཀྱང་སེམས་ཅན་ལ་ཕན་འདོགས་སྙམ་པ་དང་། ནམ་ཞིག་འཇིག་རྟེན་དང་འཇིག་རྟེན་ལས་འདས་པའི་འབྱོར་པ་ཆེན་པོས་སེམས་ཅན་གྱི་བསམ་པ་རྫོགས་པར་བྱེད་ནུས་སྙམ་པ་དང་། ནམ་ཞིག་སངས་རྒྱས་སུ་གྱུར་ནས་སེམས་ཅན་གྱི་དུཿཁ་ངེས་པར་འབྱིན་ནུས་སྙམ་པ་དང་། སེམས་ཅན་ལ་མི་ཕན་པའི་སྐྱེ་བ་དང་། དོན་དམ་པའི་རོ་ལ་གཅིག་ཏུ་སྤྱོད་པ་དང་། སྐྱེ་བོ་ཐམས་ཅད་ལ་སིམ་པར་མི་བྱེད་པའི་ཚིག་དང་། གཞན་ལ་མི་ཕན་པའི་འཚོ་བ་དང་། ལུས་དང་ཤེས་རབ་དང་ནོར་དང་དབང་ཕྱུག་དང་ལྡན་པ་དང་། གཞན་ལ་གནོད་པ་བྱེད་པ་ལ་དགའ་བར་ཚེ་རབས་ཐམས་ཅད་དུ་མ་གྱུར་ཅིག་སྙམ་པ་དང་། སེམས་ཅན་གྱི་སྡིག་པའི་འབྲས་བུ་བདག་ལ་སྨིན་ཞིང་། བདག་གི་བདེ་བའི་འབྲས་བུ་དེ་དག་ལ་སྨིན་པར་གྱུར་ཅིག་སྙམ་པ་རྣམས་སོ། །ངོ་བོ་རྣམ་རྟོག་ཡིན་ཀྱང་ངོ་མཚར་ཅན་ཡིན་པས་སྐྱེས་

བུ་ཆེན་པོ་རྣམས་ཀྱང་བསྒོམ་པར་གསུངས་ན། འོ་སྐོལ་རྣམས་ཀྱིས་ལྟ་ཅི་སྨོས། དེས་ན་འདི་ལ་ནན་ཏན་བྱེད་པ་གཅེས་སོ། །སྔོན་བདག་ཅག་གི་སྟོན་པ་འདི་མཛའ་བོའི་བུ་མོ་རུ་གྱུར་ཚེ། རྒྱ་མཚོར་རིན་ཆེན་ལེན་དུ་ཆས་པས་མས་སྒོ་བཅད་ནས་ཉལ་ཏེ། འགྲོར་མ་བཅུག་པ་ལ་ཁྲོས་ནས་མའི་མགོ་རྐང་པས་ཕུལ་ནས་ཕྱིའི་རྒྱ་མཚོར་སོང་དུས་གྲུ་ཞིག་ཤིང་ཚལ་ཞིག་ལ་འཇུས་ནས་རྒྱ་མཚོའི་གླིང་ཞིག་ཏུ་སླེབས། ལྕགས་ཁང་ཞིག་གི་ནང་དུ་ཕྱིན་པས་མི་གཅིག་གི་མགོ་ལ་ལྕགས་ཀྱི་འཁོར་ལོ་བསྐོར་ནས་ཀླད་པའི་དཀྱིལ་དུ་འབུགས་ཀྱིན་འདུག །འདིས་ཅི་བྱས་པ་ཡིན་དྲིས་པས་མའི་མགོ་ལ་འགོམས་པའི་རྣམ་སྨིན་ཡིན་ཟེར། འོ་ནང་ཡང་ལས་ཀྱི་འདིར་ཁྲིད་སྙམ་པ་དང་། དེ་མ་ཐག་ལྕགས་ཀྱི་འཁོར་ལོ་དེ་མགོ་ཐོག་ཏུ་བྱུང་ནས་འཁོར་ཏེ། སྡུག་བསྔལ་གྱིས་གཟེར་ཚེ་དེས་རྐྱེན་བྱས་སེམས་ཅན་ལ་སྙིང་རྗེ་དྲག་པོ་སྐྱེས་ཏེ། ངས་སེམས་ཅན་གྱི་ཕྱིར་དུ་འཁོར་ལོ་འདི་བཟོད་པར་བྱ་ཡིས། གཞན་གང་གིས་འདི་འདྲའི་ལས་བྱས་པ་རྣམས་འདིར་མ་འོངས་ཤིག་བྱས་པས། འཁོར་ལོ་ནམ་མཁའ་ལ་འཕགས་ནས་འདུག་པ་དང་། ཤི་འཕོས་

ནས་དགའ་ལྡན་དུ་སྐྱེས་སོ། །ཡང་སྔོན་དེ་བཞིན་གཤེགས་པ་དམྱལ་བའི་ཤིང་རྟ་འདྲེན་པའི་གྱད་དུ་གྱུར་ཚེ། ཤིང་རྟ་དྲངས་པས་རོགས་གཞན་ཞིག་ཡོད་པས་འདྲེན་མ་ནུས་ཚེ། དམྱལ་སྲུང་རྣམས་ཀྱིས་བརྡུངས་པ་ལ་སྙིང་རྗེ་སྐྱེས་ནས། འདིའི་ཐག་པ་ཡང་ངའི་གཉའ་བར་ཐོག་དང་། བདག་གཅིག་པུས་དྲང་བར་བྱའོ་བྱས་པས། དམྱལ་སྲུང་ན་རེ། ཁྱོད་སྙིང་རྗེ་ཆེ་བ་ཞིག་ཡོད་ཟེར། ལྕགས་ཀྱི་ཐོ་བ་མགོ་ལ་བརྒྱབས་པས། ཁོང་ཚེ་འཕོས་ནས་ལྷར་སྐྱེས་སོ། །དེས་ན་མྱུར་དུ་མཐོ་རིས་ལྷའི་གནས་སུ་སྐྱེ་འདོད་རྣམས་ཀྱིས་ཀྱང་། བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ལ་བསླབ་པར་བྱའོ། །ཡང་སྔོན་མི་ནག་མདུང་ཐུང་ཅན་གྱིས་ཚོང་པ་ལྔ་བརྒྱ་གསོད་པའི་བསམ་ངན་སྐྱེས་པ་ན། དེད་དཔོན་སྙིང་རྗེ་ཅན་གྱི་བསམ་པ་ལ། མི་ལྔ་བརྒྱའི་སྲོག་དང་བྲལ་བ་བྱུང་ན། དེ་རྣམས་སྙིང་རྗེ། དེའི་ལས་དབང་གིས་མི་འདི་དམྱལ་བར་སྐྱེ་ངེས་པས་འདི་ཡང་སྙིང་རེ་རྗེ། དེ་བས་བདག་གིས་མི་འདིའི་སྲོག་བྲལ་ནས་ང་རང་གཅིག་པུ་དམྱལ་བར་འགྲོ་བར་བྱའོ་སྙམ་ནས། མི་དེ་ཁོ་རང་གིས་མདུང་བསྣུན་

ནས་བསད་པས། སྙིང་རྗེ་ཆེན་པོའི་དབང་གིས་བསྐལ་པ་འབུམ་གྱི་འཁོར་བ་ཕྱིར་བསྙིལ་ཚོགས་རྫོགས་པར་གསུངས། སྔོན་བྲམ་ཟེ་ཁྱེའུ་སྐར་མས་ཚེ་ལོ་བཞི་ཁྲི་བཞི་སྟོང་དུ་ཚངས་པར་སྤྱད་ནས་བཞུགས་ཚེ། བུ་མོ་ཞིག་ཆགས་པའི་དབང་གིས་སྲོག་འཆད་དུ་ཉེ་བར་གཟིགས་ནས། སྙིང་རྗེ་ཆེན་པོ་སྐྱེས་ཏེ་ཁྱིམ་དུ་ལོ་བཅུ་གཉིས་གནས་ནས་ཡང་ཁྱིམ་ནས་བྱུང་སྟེ། ཚངས་པར་སྤྱད་པས་བསྐལ་པ་ཁྲིའི་འཁོར་བ་ཕྱིར་བསྙིལ་དེ་ཚོགས་རྫོགས་པར་གསུངས། དེས་ན་སྲོག་བཅད་པ་དང་མི་ཚངས་སྤྱད་པ་ལ་སོགས་པའི་སྡིག་པས་མི་གོས་པར་འདོད་པས་ཀྱང་། བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ལ་བསླབ་པར་བྱའོ། །སྔོན་འཕགས་པ་ཐོགས་མེད་ཀྱིས་རྗེ་བཙུན་བྱམས་པ་བསྒྲུབས་པས་ཉིན་གཅིག་ལམ་ནས་ཁྱི་མོ་རོ་སྨད་འབུས་གཡེང་བ་ཞིག་གཟིགས་པས། ཤས་མི་བཟོད་པའི་སྙིང་རྗེ་ཆེན་པོ་སྐྱེས་བརླ་ཤ་བཅད་པའི་སྟེང་དུ་འབུ་རྣམས་ལྕེས་ལེན་རྩིས་བྱས་པས་ལས་སྒྲིབ་ཀུན་དག་ནས། རྒྱལ་བ་བྱམས་མགོན་ཞལ་མཇལ། བླ་མ་དྷརྨ་རཀྵི་ཏས་བདག་གཞན་མཉམ་བརྗེས་ཀྱི་བྱང་ཆུབ་ཀྱི་སེམས་ཤུགས་དྲག་པོས་བརླའི་

ཤ་བཅད་དེ་ནད་པ་ཞིག་ལ་ཕན་པའི་ཕྱིར་དུ་བྱིན་པས། ཐུགས་རྗེ་ཆེན་པོའི་ཞལ་གཟིགས་ཤིང་བྱིན་གྱིས་བརླབས། བླ་མ་བྱམས་པའི་རྣལ་འབྱོར་བས། བདག་གཞན་མཉམ་བརྗེས་བྱང་ཆུབ་ཀྱི་སེམས་འབའ་ཞིག་བསྒོམས་པས། བྱམས་མགོན་ཞལ་གཟིགས་ལུང་བསྟན་ཐོབ། ཇོ་བོ་རྗེས་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ཐུགས་དམ་གྱི་མཐིལ་དུ་མཛད་པས། རྗེ་བཙུན་སྒྲོལ་མ་ལ་སོགས་ལྷག་པའི་ལྷ་མང་པོའི་ཞལ་གཟིགས་ཤིང་རྒྱ་བོད་གཉིས་སུ་འགྲོ་དོན་རྒྱ་ཆེན་པོ་བྱུང་། དེས་ན་ཡི་དམ་ལྷའི་ཞལ་མཐོང་འདོད་པ་དང་། གདུལ་བྱ་འགྲོ་དོན་ཆེ་བར་འདོད་པས་ཀྱང་། བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ལ་བསླབ་པར་བྱའོ། །རྗེ་བཙུན་བྱམས་པ་མགོན་པོ་རྒྱལ་པོ་གསེར་མདོག་ཞེས་བྱ་བར་གྱུར་པའི་ཚེ། དེ་བཞིན་གཤེགས་པ་གསེར་བཟང་འོད་ཀྱི་དྲུང་ནས་ཐུགས་བསྐྱེད། དེ་ནས་བསྐལ་པ་བརྒྱད་ཁྲི་བཞི་སྟོང་ལོན་ནས། ཐུབ་པའི་དབང་པོ་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ། དེ་བཞིན་གཤེགས་པ་ཤཱཀྱ་ཐུབ་ཆེན་གྱི་དྲུང་དུ་ཐུགས་བསྐྱེད་པར་གསུངས། ཐུགས་

བསྐྱེད་པ་ལ་བྱམས་མགོན་སྔ་ཡང་འཚང་རྒྱ་བ་ལ་ཐུབ་པའི་དབང་པོ་སྔ་བ་ནི་བདག་བས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་འདི་ཆེས་ཤུགས་དྲག་ཏུ་བསྐྱེད་པའི་མཐུ་ཡིན་པར་གསུངས། དེས་ན་མྱུར་དུ་མངོན་པར་རྫོགས་པར་སངས་རྒྱས་པར་འདོད་པས་ཀྱང་། བདག་བས་གཞན་གཅེས་ཀྱི་བྱང་ཆུབ་ཀྱི་སེམས་རིན་པོ་ཆེ་ལ་བསླབ་པར་བྱའོ། །དེ་ལྟར་བྱམས་པ་དང་སྙིང་རྗེ་བདག་བས་གཞན་གཅེས་ཀྱི་བྱང་ཆུབ་ཀྱི་སེམས་ཀྱིས་ཀུན་ནས་བསླང་སྟེ། ལུས་དང་ལོངས་སྤྱོད་དགེ་ཚོགས་དང་བཅས་པ་ཐམས་ཅད་བློ་ཡིས་བླངས་ནས་མ་སེམས་ཅན་ཐམས་ཅད་ལ་གཏོང་བའི་ཚུལ་ནི། སྡོང་པོ་བཀོད་པའི་མདོ་ལས། བདག་ཉིད་འགྲོ་བ་ཐམས་ཅད་ཀྱི་ཉེ་བར་འཚོ་བའི་ཡིད་བཞིན་གྱི་ལུས་སུ་བསྒྱུར། ཞེས་དང་། རྡོ་རྗེ་རྒྱལ་མཚན་གྱི་མདོ་ལས། འབྱུང་བ་ཆེན་པོ་བཞི་ནི་སྒོ་སྣ་ཚོགས་ཚུལ་སྣ་ཚོགས་ནས། སེམས་ཅན་ཐམས་ཅད་ཀྱི་ཉེ་བར་འཚོ་བ་དེ་བཞིན་དུ། བྱང་ཆུབ་སེམས་དཔའི་བདག་ཉིད་ཀྱི་ལུས་ཀྱང་སེམས་ཅན་ཐམས་ཅད་ཀྱི་ཉེ་བར་འཚོ་བའི་གཞིར་བསྒྱུར་ཞེས་དང་། བྱང་ཆུབ་སེམས་དཔའི་ས་ལས། བྱང་ཆུབ་སེམས་

དཔའ་དབེན་པར་སོང་སྟེ། ཡིད་ནང་དུ་བསྡུས་ནས། བསམ་པ་དག་ཅིང་སྙིང་ཐག་པ་ནས། དད་པས་ཀུན་ཏུ་རྟོགས་པ་དག་གིས། སྦྱིན་པར་བྱ་བའི་ཆོས་རྣམ་པ་སྣ་ཚོགས་པ་རྒྱ་ཆེན་པོ་དཔག་ཏུ་མེད་པ་དག་མོས་ཤིང་སེམས་ཅན་རྣམས་ལ་སྦྱིན་པ་དག་སྟོབ་པར་བྱེད་དེ། དེས་བྱང་ཆུབ་སེམས་དཔའ་ཚེགས་ཆུང་ངུས་ཚོགས་དཔག་ཏུ་མེད་པ་འཕེལ་བར་འགྱུར་རོ། །དེ་ནི་བྱང་ཆུབ་སེམས་དཔའ་ཤེས་རབ་དང་ལྡན་པའི་སྦྱིན་པའོ། །ཞེས་གསུངས་པ་ལྟར་གང་ལ་གང་འདོད་ཀྱི་རྣམ་པར་བློས་སྤྲུལ་ནས་གཏོང་བ་ཡིན། དེ་ལ་དང་པོ་ལུས་གཏོང་བའི་དམིགས་པ་ནི། ཡོངས་འཛིན་རིན་པོ་ཆེའི་ཞལ་ནས། རང་གི་ལུས་ཡིད་བཞིན་གྱི་ལུས་ཀྱི་རྣམ་པར་བསམས་ལ། ཐོག་མར་ཚེ་འདིའི་མ་གསལ་བཏབ་སྟེ། དེ་ལ་བྱམས་པ་དང་སྙིང་རྗེའི་ཀུན་ནས་བསླངས་ཏེ། རང་གི་ལུས་རང་འདོད་ལ་ལྟོས་པ་མེད་པར་མ་ལ་བཏང་བས། ལུས་དེ་ལས་གང་ལ་གང་འདོད་ཀྱི་དངོས་པོ་ཐམས་ཅད་བྱུང་ནས། མ་རྒན་དེའི་ལུས་ཀྱི་ཉེས་སྐྱོན་ཐམས་ཅད་དག་ནས་མཐོ་རིས་ཀྱི་ཡོན་ཏན་བདུན་དང་ལྡན་པའི་ལུས་ཕུན་སུམ་ཚོགས་པ།

ནད་ལ་སོགས་པའི་སྐྱོན་རྣམ་པ་ཀུན་ནས་མེད་ཅིང་། ལྷའི་ལུས་ལྟ་བུར་བཟང་ཞིང་ཡོན་ཏན་ཐམས་ཅད་དང་ལྡན་པ་ཞིག་ཏུ་གྱུར། ལུས་དེ་ལ་དགོས་པའི་ལོངས་སྤྱོད་ཐམས་ཅད་ཀྱང་བསམ་པ་བཞིན་དུ་གྲུབ་སྟེ་ཆོས་སྒྲུབ་པའི་ཕྱི་ནང་གི་མཐུན་རྐྱེན་ཐམས་ཅད་ཚང་། སེམས་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་ཕྱིན་དྲུག་བསྡུ་བཞི་ལ་སོགས་པ་ལམ་ཐམས་ཅད་རྫོགས་ཏེ། ལུས་གཟུགས་ཀྱི་སྐུ་དང་སེམས་ཆོས་སྐུའི་རང་བཞིན་དུ་གྱུར་པར་བསམ་མོ། །དེ་ནས་རང་གི་ཕ་ལ་ཡང་དམིགས་ནས་དེ་བཞིན་དུ་སྦྱར་ཏེ་གཏོང་བའི་སེམས་བསྒོམ། དེ་ནས་ཉེ་འབྲེལ་གཞན་རྣམས་ལ་དེ་བཞིན་དུ་བསྒོམ། དེ་ནས་རང་གི་ཉེ་འཁོར་གྱི་སེམས་ཅན་རྣམས་ལ་དེ་བཞིན་དུ་བསྒོམ། དེ་ནས་རིམ་གྱིས་རྒྱ་ཇེ་ཆེར་བཏང་སྟེ་འཛམ་བུའི་གླིང་གི་སེམས་ཅན་རྣམས་དང་། གླིང་བཞིའི་སེམས་ཅན་རྣམས་དང་། དེ་ནས་སྟོང་དང་པོ། དེ་ནས་སྟོང་གཉིས་པ། དེ་ནས་སྟོང་གསུམ་པ། མཐར་སེམས་ཅན་ཐམས་ཅད་ལ་དམིགས་པ་གོང་བཞིན་བྱས་ལ་གཏོང་བ་བསྒོམ། ཡང་རེས་འགའ་དམྱལ་བ་མནར་མེད་ནས་བཟུང་སྟེ་རིམ་གྱིས་སེམས་ཅན་ཐམས་ཅད་ལ་

ལུས་གཏོང་བའི་དམིགས་པ་སྦྱང་། དེའི་ཚུལ་ནི། རང་གི་ལུས་ཡིད་བཞིན་གྱི་ལུས་ཀྱི་རྣམ་པ་ལས་ལུས་དཔག་ཏུ་མེད་པ་སེམས་ཅན་གྱི་གྲངས་དང་མཉམ་པ་སྤྲུལ་ནས། ཡང་སོས་ལ་སོགས་པའི་ཚ་དམྱལ་བརྒྱད། ཆུ་བུར་ཅན་ལ་སོགས་པའི་གྲང་དམྱལ་བརྒྱད། ཉི་ཚེ་བ་དང་ཉེ་འཁོར་བའི་སེམས་ཅན་དམྱལ་བ་ཇི་སྙེད་ཡོད་པ་རྣམས་ལ་བཏང་བས། དེ་ཐམས་ཅད་གསེར་འགྱུར་གྱི་རྩིས་ལྕགས་གསེར་དུ་བྱེད་པ་ལྟར་སྐད་ཅིག་ལ་དམྱལ་བའི་ལུས་འགྱུར་ནས། འཕགས་པའི་ནོར་བདུན་གྱིས་ཕྱུག་པའི་མཐོ་རིས་ཡོན་ཏན་བདུན་ལྡན་གྱི་ལུས་དལ་འབྱོར་གྱི་ལུས་ཤ་སྟག་ཐོབ་པར་བསམ་མོ། །ཡིད་བཞིན་གྱི་ནོར་བུ་རིན་པོ་ཆེ་ལས་ཟས་གོས་སོགས་གང་ལ་ཅི་འདོད་པར་འབྱུང་བ་ལྟར་ཡིད་བཞིན་གྱི་ལུས་ལས་དམིགས་ཡུལ་དེ་དག་ལ་ཁ་ཟས་རོ་བརྒྱ་བ། གོས་སྟོང་ཕྲག་བརྒྱ་བ། ཁང་བ་བརྩེགས་པ་ལྔ་བརྒྱ་བ་དང་། སྨོན་ལམ་གཅིག་ཏུ་བྱས་པའི་གྲོགས་ཕུན་སུམ་ཚོགས་པ་སྟེ། གང་གིས་ལོངས་སྤྱོད་པའི་རྟེན། ཡུལ་གང་ལ་ལོངས་སྤྱོད་པའི་ལོངས་སྤྱོད། གང་ལྷན་ཅིག་ལོངས་སྤྱོད་པའི་འཁོར་

ཕུན་སུམ་ཚོགས་པ་རྣམས་ཐོབ་ཅིང་། དེ་ཐམས་ཅད་ཀྱང་ཐེག་པ་ཆེན་པོ་དམ་པའི་ཆོས་སྒྲུབ་པའི་མཐུན་རྐྱེན་དུ་གྱུར་པར་བསམ་མོ། །དེ་བཞིན་དུ་ཕྱིའི་རྐྱེན་གཙོ་བོ་ཐེག་པ་ཆེན་པོའི་དགེ་བའི་བཤེས་གཉེན་མཚན་ཉིད་དང་ལྡན་པས་དགྱེས་བཞིན་དུ་རྗེས་སུ་འཛིན་པ། གང་ལ་ཐོས་བསམ་བྱ་བའི་གཞི་མདོ་སྔགས་ཀྱི་གསུང་རབ་ལ་སོགས་ཕྱིའི་རྐྱེན་རྣམས་དང་། ནང་གི་རྐྱེན་དད་པ་སོགས་འཕགས་པའི་ནོར་བདུན། དབང་པོ་ལྔ། སྟོབས་ལྔ། རྫུ་འཕྲུལ་གྱི་རྐང་པ་བཞི། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད། ལམ་བསླབ་པ་རིན་པོ་ཆེ་གསུམ། བྱམས་སྙིང་རྗེ་བྱང་ཆུབ་ཀྱི་སེམས་རྒྱུད་ལ་སྐྱེས་ཏེ་སྤྱོད་པ་ཕ་རོལ་ཏུ་ཕྱིན་པ་དྲུག་སྤྱད་པས། ཚོགས་གཉིས་མཐར་ཕྱིན་ཏེ་སངས་རྒྱས་ནས་ཐམས་ཅད་ཀྱང་སེམས་རྒྱུད་ཆོས་སྐུའི་བདེ་བ་དང་ལྡན་པར་བསམ་མོ། །དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན། ཡི་དྭགས་ཀྱི་རིགས་སུམ་ཅུ་སོ་དྲུག་གིས་བསྡུས་པའི་སེམས་ཅན་ཇི་སྙེད་ཡོད་པ་རྣམས་ལ་ལུས་བཏང་བས། སྔར་བཞིན་དེ་དག་སོ་སོའི་ལུས་སེམས་ཀྱི་ཉེས་སྐྱོན་དང་གདུང་བ་

རྣམས་ཞི་ཞིང་སྒྲིབ་གཉིས་དག་སྟེ། སངས་རྒྱས་ནས་ཆོས་སྐུའི་བདེ་བ་དང་ལྡན་པར་བསམ་མོ། །དེ་བཞིན་དུ་འཇིག་རྟེན་གྱི་ཁམས་ན་དུད་འགྲོ་བྱིངས་ན་གནས་པ་རྣམས་དང་ཁ་འཐོར་བ་རྣམས་ལ་བཏང་བས། དེ་དག་སོ་སོའི་ལུས་སེམས་ཀྱི་ཉེས་སྐྱོན་དང་གདུང་བ་རྣམས་ཞི་ཞིང་སྒྲིབ་གཉིས་དག་སྟེ། སངས་རྒྱས་ནས་ཆོས་སྐུའི་བདེ་བ་དང་ལྡན་པར་བསམ་མོ། །དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ན་གླིང་བཞི་གླིང་ཕྲན་བརྒྱད་ན་མི་ཁོམ་པའི་སྐྱེ་གནས་སུ་སོང་བའི་མིའི་འགྲོ་བ་དང་། གཞན་ཡང་ཚེ་དེ་ལ་ཐར་ལམ་བསྒྲུབ་པའི་སྐལ་བ་མེད་པ་རྣམས་ལ་ལུས་བཏང་བས། སྔར་བཞིན་དེ་དག་སོ་སོའི་ལུས་སེམས་ཀྱི་ཉེས་སྐྱོན་དང་གདུང་བ་རྣམས་ཞི་ཞིང་སྒྲིབ་གཉིས་དག་སྟེ། སངས་རྒྱས་ནས་ཆོས་སྐུའི་བདེ་བ་དང་ལྡན་པར་བསམ་མོ། །ཚེ་དེ་ལ་ཐར་ལམ་སྐྱེ་བའི་སྐལ་བ་དང་ལྡན་པའི་མི་རྣམས་ལ་ལུས་བཏང་བས། ལམ་སྒྲུབ་པའི་ཕྱིའི་རྐྱེན་རྣམས་དང་ནང་གི་བསམ་པའི་རྐྱེན་ཐམས་ཅད་ཚང་ནས་སྔར་ལྟར་སངས་རྒྱས་པར་བསམ་མོ། །དེ་བཞིན་དུ་རྒྱལ་ཆེན་རིགས་བཞི་ལ་སོགས་པའི་འདོད་ལྷ་

རིགས་དྲུག །ཚངས་རིས་ནས་འབྲས་བུ་ཆེ་བའི་བར་གྱི་གཟུགས་ཁམས་གནས་རིགས་བཅུ་བདུན། གཟུགས་མེད་སྐྱེ་མཆེད་མུ་བཞིན་གནས་པའི་སེམས་ཅན་རེ་རེ་ལའང་ལུས་ཚང་བ་རེ་རེ་བཏང་བས། སྔར་བཞིན་དེ་དག་སོ་སོའི་ཉེས་སྐྱོན་དང་སྒྲིབ་གཉིས་དག་ནས་རིམ་གྱིས་སངས་རྒྱས་པར་བསམ། སྲིད་པ་བར་མ་དོ་ན་གནས་པའི་སེམས་ཅན་རྣམས་ལ་བཏང་བས་དེ་དག་སོ་སོའི་ལུས་སེམས་ཀྱི་ཉེས་སྐྱོན་དང་གདུང་བ་རྣམས་ཞི་ཞིང་སྒྲིབ་གཉིས་དག་སྟེ། སངས་རྒྱས་ནས་ཆོས་སྐུའི་བདེ་བ་དང་ལྡན་པར་བསམ་མོ། །ཡང་རེས་འགའ་ནི་ཤར་ལ་སོགས་པ་ཕྱོགས་མཚམས་ཀྱིས་ཕྱེ་བའི་སེམས་ཅན་རྣམས་ལ་རིམ་གྱིས་བཏང་བར་བྱ་སྟེ། འདི་ལྟར་ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་ཇི་སྙེད་ཡོད་པ་རྣམས་ལ་ལུས་བཏང་ལ་རིམ་གྱིས་སྔར་བཞིན་སངས་རྒྱས་པར་བསམ། དེ་བཞིན་དུ་ཕྱོགས་མཚམས་ལྷག་མ་རྣམས་ལའང་འདྲ་བར་ཤེས་པར་བྱའོ། །དེ་ལྟར་སེམས་ཅན་ལ་རང་གི་ལུས་གཏོང་བའི་ཚུལ་སྒོ་སྣ་ཚོགས་ནས་སྦྱངས་ཏེ། རེས་འགའ་རང་གི་ལུས་དཔག་ཏུ་མེད་པ་སྤྲུལ་ནས་

སེམས་ཅན་རེ་རེ་ལའང་བཏང་བས་གང་ལ་གང་འདོད་ཀྱིས་ཚིམ་པར་བསམ། རེས་འགའ་ལུས་གཅིག་པུ་འདི་ལས་གང་ལ་གང་འདོད་ཀྱི་དངོས་པོ་དཔག་ཏུ་མེད་པ་སྤྲུལ་ནས་སེམས་ཅན་རྣམས་ལ་གཏོང་། དེ་ལྟར་སེམས་ཅན་ཐ་མལ་པ་རྣམས་ལ་ལུས་གཏོང་བའི་དམིགས་པ་སྦྱངས་ནས་ལམ་ཞུགས་ཀྱི་གང་ཟག་རྣམས་ལ་རང་གིས་ལུས་གཏོང་བའི་ཚུལ་ནི། ཐེག་པ་དམན་པའི་གང་ཟག་རྣམས་ལ་རང་གི་ལུས་ཡིད་བཞིན་གྱི་ལུས་ཀྱི་རྣམ་པར་བསྒྱུར་ནས་རེ་རེ་ལ་ལུས་རེ་རེ་ཕུལ་བས། ཐེག་དམན་གྱི་ལམ་དུ་ཞུགས་པའི་ཉན་རང་དེ་རྣམས་ཀྱི་ཉེས་སྐྱོན་ཐམས་ཅད་སྐད་ཅིག་ལ་དག་ནས། སྐུ་ལུས་གཟུགས་ཀྱི་སྐུར་གྱུར་ཐུགས་རྒྱུད་ཀྱི་སྒྲིབ་པ་དང་གནས་ངན་ལེན་ཐམས་ཅད་སྐད་ཅིག་ལ་དག །ཐེག་པ་ཆེན་པོའི་ས་ལམ་རྫོགས་ཏེ་ཐུགས་ཆོས་ཀྱི་སྐུར་གྱུར་པར་བསམ། དེ་བཞིན་དུ་ཐེག་པ་ཆེན་པོའི་ཚོགས་ལམ་ནས་ས་བཅུ་པའི་བར་གྱི་བྱང་ཆུབ་སེམས་དཔའ་རྣམས་ལ་རང་གི་ལུས་ཡིད་བཞིན་གྱི་ལུས་ཀྱི་རྣམ་པར་བློས་སྤྲུལ་ནས་ཕུལ་བས། སེམས་དཔའ་ཆེན་པོ་དེ་དག་གི་སྐུ་ལུས་དང་ཐུགས་རྒྱུད་ལ་ཉེས་སྐྱོན་

ཕྲ་མོ་ཡོད་པ་ཐམས་ཅད་དག་ཚོགས་གཉིས་མྱུར་དུ་རྫོགས་ཏེ། སྐུ་མཚན་དཔེས་སྤྲས་པའི་གཟུགས་སྐུ་དང་། ཐུགས་ཆོས་སྐུར་གྱུར་པར་བསམ་མོ། །དེ་ནས་རྩ་བརྒྱུད་ཀྱི་བླ་མ་དམ་པ་རྣམས་དང་། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ལ་སྔར་བཞིན་དུ་རང་གི་ལུས་ཡིད་བཞིན་གྱི་ལུས་ཀྱི་རྣམ་པ་དཔག་ཏུ་མེད་པར་བསམས་ཏེ་ཕུལ་བས། དེ་དག་རེ་རེའི་དྲུང་དུའང་ལུས་དུ་མར་སྤྲུལ། ལུས་རེ་རེ་ལ་མགོ་དཔག་ཏུ་མེད་པ་དང་། མགོ་རེ་རེ་ལ་ལྕེ་དཔག་ཏུ་མེད་པར་བློས་སྤྲུལ་ཏེ། རྒྱུ་དང་འབྲས་བུའི་ཡོན་ཏན་ལས་བརྩམས་ཏེ་ངག་གིས་བསྟོད་དབྱངས་བརྗོད་པ་དང་། ཡིད་ཀྱིས་དད་པ་བསྒོམ་ཞིང་ལུས་ཀྱིས་ཕྱག་འཚལ་བ་དང་། ཡིད་བཞིན་གྱི་ལུས་ལས་མཆོད་པའི་ཚོགས་རབ་འབྱམས་བསམ་གྱིས་མི་ཁྱབ་པ་བྱུང་བར་བསམས་ཏེ་ཕུལ་བས། དེ་རྣམས་ཀྱི་ཐུགས་རྒྱུད་ལ་ཟག་པ་མེད་པའི་བདེ་བ་ཆེན་པོ་འཁྲུངས་པར་བསམ་ཞིང་། ཕྱོགས་བཅུའི་ཞིང་ན་མཆོག་གི་སྤྲུལ་པའི་སྐུ་མྱ་ངན་ལས་འདའ་བའི་ཚུལ་སྟོན་དུ་ཉེ་བ་རྣམས་ལ། རང་གི་ལུས་སྔར་ལྟར་ཕུལ་

ཞིང་གསོལ་བ་བཏབ་པས། མྱ་ངན་ལས་མི་འདའ་བར་བསྐལ་པའི་བར་དུ་བཞུགས་ནས་ཆོས་འཁོར་བསྐོར་བར་བསམ། རང་གི་བླ་མ་དངོས་སུ་བཞུགས་པ་རྣམས་ལ་ལུས་སྔར་བཞིན་ཕུལ་བས། སྐུ་ཚེ་མཛད་པ་འཕྲིན་ལས་དང་བཅས་པ་རྒྱ་ཆེར་འཕེལ་བར་བསམ་མོ། །ཡང་རང་གི་ལུས་ཡིད་བཞིན་གྱི་ལུས་ཀྱི་རྣམ་པ་དཔག་ཏུ་མེད་པར་སྤྲུལ་ནས་སྣོད་ཀྱི་འཇིག་རྟེན་རྣམས་ལ་བཏང་བར་བྱ་སྟེ། དེ་ཡང་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་སྣོད་ཀྱི་ཞིང་རྣམས་ལ་བཏང་བས། སྣོད་ཀྱི་འཇིག་རྟེན་གྱི་མི་གཙང་བ་སྡོང་དུམ་ཚེར་མ། གྱོ་མོ། གསེག་མ། ངམ་གྲོག །གཡང་ས་ལ་སོགས་པའི་སྣོད་ཀྱི་སྐྱོན་ཐམས་ཅད་དག་ཅིང་གནས་འགྱུར་ཏེ། འཇིག་རྟེན་གྱི་ཁམས་ཐམས་ཅད་ཀྱང་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ་ཐ་གྲུ་ཆེ་བ། ཡངས་པ་རེག་ན་འཇམ་ཞིང་བདེ་བ། དྲི་མ་མེད་ཅིང་འོད་གསལ་བ་ཙན་དན་སྦྲུལ་གྱི་སྙིང་པོའི་དྲི་བསུང་དང་ལྡན་པ། ལྷའི་མེ་ཏོག་སྣ་ཚོགས་གཅལ་དུ་བཀྲམ་པ། མཐའ་རིན་པོ་ཆེའི་ཕ་གུ་དང་རྩིག་པ། གསེར་དང་། དངུལ་དང་།

མུ་ཏིག་གི་ཕྱེ་མ་གྲམ་བུར་བརྡལ་བ་ཨུཏྤལ་དང་། ཀུ་མུད་ད་དང་། པདྨ་འགྱིང་ཞིང་ལྡེམ་པས་ཁེབས་པ། ཆུ་བྱ་སྣ་ཚོགས་སྐད་སྙན་པར་སྒྲོག་པ་དགའ་ཞིང་འཕྱོ་ལ་ལྡིང་བས་བརྒྱན་པའི་ཡན་ལག་བརྒྱད་དང་ལྡན་པའི་མཚོ་དང་། རྫིང་དང་ལྟེང་ཀ་དག་གིས་མཛེས་པར་བྱས་པ་སོགས་དག་པའི་ཞིང་ཕུན་སུམ་ཚོགས་པར་གྱུར་ཏེ། སངས་རྒྱས་བྱང་སེམས་འཕགས་པའི་ཚོགས་རྣམས་ལ་མཆོད་པའི་སྤྲིན་གྱི་ཕུང་པོ་ཆེན་པོ་བསམ་གྱིས་མི་ཁྱབ་པར་བྱུང་བར་བསམ་ཞིང་། ཞིང་དེ་དག་ན་ཡོད་པའི་བཅུད་ཀྱི་སེམས་ཅན་རྣམས་ལ་དེ་ལྟ་བུའི་ཕུན་སུམ་ཚོགས་པའི་འབྱོར་བ་དེ་དག་ང་རྒྱལ་དང་རྒྱགས་པ་དང་དྲེགས་པའི་རྐྱེན་དུ་སྐད་ཅིག་ཀྱང་མི་འགྲོ་ཞིང་། བྱང་ཆུབ་སྒྲུབ་པའི་མཐུན་རྐྱེན་ཤ་སྟག་ཏུ་གྱུར་པར་བསམས་སྟེ། འདི་ནི་སངས་རྒྱས་ཀྱི་ཞིང་སྦྱོང་དུ་ཡང་འགྱུར་བས་གལ་ཆེའོ། །དེ་ལྟར་ལུས་གཏོང་བའི་དམིགས་པ་སྦྱངས་ནས། ལོངས་སྤྱོད་གཏོང་བའི་དམིགས་པ་སྦྱོང་བ་ནི། ཟས་གོས་གནས་ཁང་འཁོར་གཡོག་སོགས་གང་ལ་གང་འདོད་ཀྱི་ལོངས་སྤྱོད་བསམ་གྱིས་མི་ཁྱབ་པ་བློས་སྤྲུལ་ནས། ཐོག་མར་རང་གི་མ་ནས་

བཟུང་། མཐར་སེམས་ཅན་ཐམས་ཅད་ཀྱི་བར་གོང་བཞིན་བཏང་བས། འཇིག་རྟེན་དང་འཇིག་རྟེན་ལས་འདས་པའི་ལོངས་སྤྱོད་བསམ་གྱིས་མི་ཁྱབ་པ་ཡུལ་དེ་དག་རེ་རེ་ལའང་ཆ་ཚང་བ་རེ་བྱུང་ཞིང་། དེ་དག་ཀྱང་ཚོགས་རྫོགས་པའི་མཐུན་རྐྱེན་ཤ་སྟག་ཏུ་གྱུར་ནས། དེའི་རྐྱེན་གྱིས་མྱུར་དུ་ཚོགས་རྫོགས་ནས་སངས་རྒྱས་པར་བསམ། དེ་ནས་ལམ་ཞུགས་ཉན་རང་རྣམས་དང་བྱང་ཆུབ་སེམས་དཔའ་རྣམས་ལ་ལོངས་སྤྱོད་བསམ་གྱིས་མི་ཁྱབ་པར་སྤྲུལ་ཏེ། སྔར་ལྟར་འབུལ་བའི་དམིགས་པ་བྱེད། དེ་ནས་རྩ་བརྒྱུད་ཀྱི་བླ་མ་རྣམས་དང་ཕྱོགས་བཅུའི་སངས་རྒྱས་རྣམས་ལ་ལོངས་སྤྱོད་བསམ་གྱིས་མི་ཁྱབ་པ་བློས་སྤྲུལ་ནས་འབུལ་ཞིང་དམིགས་པ་སྔར་ལྟར་བྱེད། དེ་ནས་དགེ་རྩ་གཏོང་བའི་དམིགས་པ་སྦྱོང་བ་ནི། རང་གིས་དུས་གསུམ་དུ་བསགས་པ་དང་གསོག་པར་འགྱུར་བའི་དགེ་བའི་རྩ་བ་ཐམས་ཅད་དམིགས་ཡུལ་དུ་བྱས་ལ། ཚེ་འདིའི་མ་ནས་བཟུང་མཐར་སེམས་ཅན་ཐམས་ཅད་ཀྱི་བར་ལ་གཏོང་ཚུལ་གོང་ལྟར་བྱེད། དེ་ནས་ཉན་རང་རྣམས་དང་བྱང་སེམས་རྣམས་དང་། རྩ་བརྒྱུད་ཀྱི་བླ་མ་རྣམས་

དང་སངས་རྒྱས་རྣམས་ལའང་གོང་ལྟར་འབུལ་བའི་དམིགས་པ་སྦྱང་། དེ་ལྟར་རང་གི་ལུས་ལོངས་སྤྱོད་དགེ་རྩ་རྣམས་གཞན་ལ་གཏོང་བའི་དམིགས་པ་སྦྱོང་བ་ནི། བྱང་ཆུབ་སེམས་དཔའི་སྤྱོད་པ་རྨད་དུ་བྱུང་བ་ཡིན་པས་ཐེག་པ་ཆེན་པོའི་མདོ་སྡེ་རྣམས་སུ་རྒྱ་ཆེར་བསྔགས་ཤིང་། དེའི་ནང་ནས་ཀྱང་དགེ་རྩ་གཏོང་བ་འདི་ཤིན་ཏུ་གལ་ཆེ་བར་གསུངས། དེ་ནས་གཞན་གྱི་སྡུག་བསྔལ་ལེན་པ་ལ་འཇུག །དེ་ཡང་གཞན་གྱི་སྡུག་བསྔལ་བླངས་ནས་མི་མངོན་པར་བྱེད་པའམ། རང་གི་ཕུང་པོ་ལས་ལོགས་སུ་གཞན་ཞིག་ཏུ་འཇོག་པ་ལྟ་བུ་མིན་གྱི། རང་གི་སྙིང་གི་ནང་དུ་ལེན་པ་ཡིན་པས། མ་རྒན་སེམས་ཅན་གྱི་རྒྱུ་ཀུན་འབྱུང་དང་འབྲས་བུ་སྡུག་བསྔལ་ཐམས་ཅད་མ་ལུས་པ་བླངས་ཏེ། རང་གི་སྙིང་གི་ནང་དུ་གཅེས་འཛིན་གནས་པའི་མགོ་ཐོག་ཏུ་བབ་པའི་མོས་པ་བྱ་གསུངས། དེ་ལྟར་མི་འདོད་པ་མཐའ་དག་བདག་གཅེས་འཛིན་གྱི་ཐོག་ཏུ་སྤུངས་པས། གཅེས་འཛིན་འགོང་པོ་སྐད་ཅིག་ཉིད་ལ་བརླགས་པར་བསམ། ལེན་པ་བསྒོམ་པ་འདིའི་སྐབས་སུ་ཡང་སྔར་བཤད་པ་ལྟར། རང་གི་ཚེ་འདིའི་མ་ནས་མཐར་སེམས་ཅན་

ཐམས་ཅད་ཀྱི་བར་རིམ་གྱིས་ལེན། ཡང་རེས་འགའ་དམྱལ་བ་པ་རྣམས་ནས་བཟུང་རིམ་གྱིས་བླངས་ཏེ། ཚ་དམྱལ་བ་རྣམས་ལ་ལྕགས་སྲེགས་ཀྱི་ས་གཞིར་མེས་བསྲེག་པ་དང་། མཚོན་གྱིས་གཏུབ་པ་དང་། ཟངས་ཞུན་ཁར་ལྡུགས་པ་ལ་སོགས་པ་ཚ་བའི་སྡུག་བསྔལ་ཇི་སྙེད་ཅིག་ཡོད་པ་རྣམས་དང་། གྲང་དམྱལ་བ་རྣམས་ལ་ལུས་འཁྱག་རོམ་གྱི་སྦུབས་སུ་ཆུད་པ་དང་། གྲང་བས་ཉེན་ཏེ་ལུས་དུམ་བུ་སྟོང་དུ་གས་པ་སོགས་གྲང་བའི་སྡུག་བསྔལ་ཇི་སྙེད་ཅིག་ཡོད་པ་རྣམས་བསམས་ཏེ། བཟོད་བླགས་མེད་པའི་སྙིང་རྗེ་བསྐྱེད་ནས་བདག་གིས་མ་རྒན་འདི་རྣམས་འདི་ལྟར་དུ་ཉམ་ཐག་པ་སྙིང་རེ་རྗེ། སྡུག་བསྔལ་འདི་ཐམས་ཅད་བདག་གིས་བླངས་ལ་འདི་རྣམས་ད་ལྟ་ཉིད་དུ་ཐར་བར་བྱའོ་སྙམ་དུ་སྙིང་རྗེ་དང་ལྷག་བསམ་ཤུགས་དྲག་པོས་དམྱལ་བའི་གནས་ཀྱི་སྡུག་བསྔལ་ཐམས་ཅད་རང་གི་ཕུང་པོའི་སྟེང་དུ་བླངས་པས། དམྱལ་བ་པ་དེ་དག་ཐམས་ཅད་སྡུག་བསྔལ་དང་བྲལ། ཉོན་མོངས་པ་ཐམས་ཅད་ཞི། ལུས་གནས་འགྱུར་ཏེ་མཚན་དཔེས་བརྒྱན་པའི་ལུས་སུ་གྱུར་སེམས་ཆོས་སྐུར་གྱུར་

པར་བསམས་ཤིང་དེ་ལྟར་གྱུར་ན་དགའ་བའི་འདུན་པ་དྲག་པོ་བྱའོ། །དེ་བཞིན་དུ་ཡི་དྭགས། དུད་འགྲོ། ལྷ་མ་ཡིན། མིའི་འགྲོ་བ། འདོད་ལྷ་རིགས་དྲུག །གཟུགས་མེད་ཀྱི་ལྷ་རྣམས་ལ་སོ་སོའི་སྡུག་བསྔལ་ཇི་ལྟར་ཡོད་པ་རྣམས་བསམས་ལ། སྡུག་བསྔལ་དེ་དང་དེ་དག་ལས་མྱུར་དུ་གྲོལ་ན་ཅི་མ་རུང་སྙམ་པ་དང་། སྡུག་བསྔལ་དེ་དང་དེ་དག་ཐམས་ཅད་བདག་གི་ཕུང་པོ་འདིའི་སྟེང་དུ་བླངས་ནས། དེ་དག་མྱུར་དུ་ཐར་བར་བྱའོ་སྙམ་དུ་སྙིང་རྗེ་དང་ལྷག་བསམ་ཤུགས་དྲག་ཏུ་བསྐྱེད་ནས། དེ་དག་གི་སྡིག་སྡུག་རྣམས་རང་ལ་བླངས་པས་དེ་དག་སྡིག་སྡུག་ཐམས་ཅད་དང་བྲལ་ནས། སངས་རྒྱས་པར་བསམས་ཤིང་དེ་ལྟར་གྱུར་ན་དགའ་བའི་འདུན་པ་དྲག་པོ་བྱ། དེ་ནས་ཉན་རང་རྣམས་ཀྱི་སྐུ་ལུས་ལ་ཡོད་པའི་ནད་དང་རྒས་པའི་སྡུག་བསྔལ་ལ་སོགས་པ་རྣམས་དང་། ཐུགས་རྒྱུད་ཀྱི་གནས་ངན་ལེན་དང་བག་ཆགས་ཐམས་ཅད་རང་ལ་བླངས་པས། དེ་དག་གི་སྐུ་ལུས་སྐད་ཅིག་ལ་གནས་འགྱུར་ནས་གཟུགས་ཀྱི་སྐུ་དང་། ཐུགས་ཆོས་ཀྱི་སྐུར་གྱུར་ནས་སངས་རྒྱས་པར་བསམ། དེ་ནས་བྱང་ཆུབ་སེམས་དཔའ་རྣམས་ཀྱི་

ཐུགས་རྒྱུད་ལ་ཡོད་པའི་ཤེས་སྒྲིབ་ཕྲ་མོ་ཚུན་ཆད་རང་གི་རྒྱུད་ལ་ཚུར་བླངས་པས། སེམས་དཔའ་ཆེན་པོ་དེ་རྣམས་སྐད་ཅིག་ལ་སངས་རྒྱས་པར་བསམ། དེ་ནས་སྣོད་ཀྱི་འཇིག་རྟེན་གྱི་ངམ་གྲོག་དང་གཡང་ས་ལ་སོགས་པ། ལས་དབང་གིས་བྱུང་བའི་སྐྱོན་ཐམས་ཅད་རང་གི་ཕུང་པོ་འདིའི་སྟེང་དུ་བླངས་པས། སྣོད་ཀྱི་ཉེས་སྐྱོན་ཐམས་ཅད་དག་ནས་དག་པའི་ཞིང་ལྟ་བུར་གྱུར་པར་བསམས་གསུངས། མདོར་བསྡུ་ན་རྒྱལ་སྲས་རིན་པོ་ཆེས། ཐོག་མར་རང་གི་རྩ་བའི་མ་གསལ་བར་དམིགས་ཏེ། འདིས་བདག་ལྟོ་བ་ན་གནས་པ་ནས་བཟུང་སྟེ། ཆུད་མ་ཟོས་པར་བསྐྱངས་པས་སངས་རྒྱས་ཀྱི་བསྟན་པ་དང་མཇལ་ཞིང་། ལམ་སྒྲུབ་ཏུ་བྱུང་བས་ཤིན་ཏུ་དྲིན་ཆེ། ཚེ་འདི་ཁོ་ནར་མ་ཟད་ཀྱི་ཐོག་མ་མེད་པ་ནས། བྱམས་པའི་མིག་གིས་བལྟས། བརྩེ་བའི་སེམས་ཀྱིས་བཟུང་། གནོད་པ་ལས་བསྐྱབས། ཕན་བདེ་བསྒྲུབས་པས་ཤིན་ཏུ་དྲིན་ཆེ། དེ་ལྟར་བདག་གི་དོན་བྱས་བྱས་ནས་འདིས་འཁོར་བར་དུཿ ཁ་སྣ་ཚོགས་མྱོང་བ་སྙིང་རེ་རྗེ་སྙམ་དུ་ཡིད་ལ་དྲག་ཏུ་སྒོམས་ལ། ད་ནི་ངས་ཀྱང་འདི་ལ་ལན་དུ་ཕན་གདགས་

གནོད་པ་བསལ་བར་བྱའོ། །འདི་ལ་གང་གིས་གནོད་ན་དུཿ ཁ་དང་ཀུན་འབྱུང་གཉིས་ཀྱིས་གནོད་དེ་དུཿ ཁས་དངོས་སུ་གནོད་ཅིང་། ཀུན་འབྱུང་གིས་བརྒྱུད་ནས་གནོད་པས། དེ་གཉིས་ངས་བླངས་སྙམ་དུ་བསམས་ལ། མའི་རྒྱུད་ན་ཡོད་པའི་དུཿ ཁ་ཀུན་འབྱུང་ཐམས་ཅད་མ་ལུས་པར་རང་གི་སྙིང་ནང་དུ་བྱུང་བར་བསྒོམ་ཞིང་། བྱུང་ན་དགའ་བའི་འདུན་པ་དྲག་ཏུ་བྱའོ། །མ་ལ་ཅིས་ཕན་ན་བདེ་བ་དང་དགེ་བས་ཕན་པས། བདག་གི་བདེ་དགེ་ཐམས་ཅད་རང་འདོད་ལ་ལྟོས་པ་མེད་པར་མ་ལ་བཏང་བས། མ་དེ་འཕྲལ་ལ་བདེ་ཞིང་ཆོས་སྒྲུབ་པའི་མཐུན་རྐྱེན་ཐམས་ཅད་འཛོམ་ནས། འཕྲལ་ལ་སངས་རྒྱས་ནུས་པ་ཙམ་དུ་གྱུར་པར་བསྒོམ་ཞིང་། དེ་ལྟར་གྱུར་ན་དགའ་བའི་འདུན་པ་དྲག་ཏུ་བསྐྱེད་དོ། །དེ་བཞིན་དུ་ཕ་ལ་སོགས་ལའང་བསྒོམ་སྟེ། མཐར་སེམས་ཅན་ཐམས་ཅད་ལ་བསྒོམ་པར་བྱའོ། །དེ་ཡང་འདི་ལྟར་སེམས་ཅན་ཐམས་ཅད་ཀྱང་། ཐོག་མ་མེད་པ་ནས་བདག་གི་ཕ་མར་གྱུར་ཏེ། ཕན་དཔག་ཏུ་མེད་པ་བཏགས་པས་དྲིན་ཤིན་ཏུ་ཆེ་ལ། དྲིན་ཅན་དེ་རྣམས་འཁོར་བར་དུཿ ཁ་སྣ་ཚོགས་ཀྱིས་གཙེས་པ་ལ་དུཿ ཁ་དེ་དག་དང་བྲལ་ན་ཅི་

མ་རུང་སྙམ་པའི་སྙིང་རྗེ་དྲག་ཏུ་བསྒོམ་ལ། དེ་དག་གི་དུཿཁ་བདག་ལ་ཐིམ་ཞིང་། བདག་གི་ལུས་ལོངས་སྤྱོད་དུས་གསུམ་གྱི་དགེ་བ་རྣམས་སེམས་ཅན་ལ་བཏང་ནས། དེ་དག་བདེ་དགེ་འཕེལ་བར་བསམ། དེ་ལྟར་གྱུར་ན་དགའ་བའི་འདུན་པ་དྲག་ཏུ་བྱའོ། །བདག་གཞན་བརྗེ་བའི་བློ་དེ་སྐྱེ་སླ་བའི་ཕྱིར། རླུང་ཕར་འགྲོ་བ་ན་དེ་དང་འགྲོགས་ནས་བདག་གི་བདེ་དགེ་ཐམས་ཅད་གཞན་ལ་སོང་ཞིང་། ཚུར་འོང་བ་ན་གཞན་གྱི་སྡིག་སྡུག་ཐམས་ཅད་བདག་ལ་བྱུང་བར་སྒོམས་གསུངས། ཡུལ་ཡིད་དུ་འོང་མི་འོང་བར་མ་གསུམ་ལ་བརྟེན་ནས་ཆགས་སྡང་རྨོངས་གསུམ་སྐྱེས་པ་ན། བདག་ལྟར་ཡུལ་གསུམ་ལ་བརྟེན་ནས། དུག་གསུམ་སྐྱེས་པའི་སེམས་ཅན་མང་པོ་ཡོད་པས། དེ་རྣམས་ཀྱི་དུག་གསུམ་ཐམས་ཅད་བདག་ལ་འདུས་ནས། དེ་རྣམས་ལ་ཆགས་སྡང་གཏི་མུག་མེད་པའི་དགེ་བ་གསུམ་དང་ལྡན་པར་གྱུར་ཅིག་སྙམ་དུ་བསྒོམ་མོ། །དེ་ལ་དྲན་པ་བསྐུལ་ཕྱིར་སེམས་ཅན་རྣམས་ཀྱི་སྡིག་པ་དང་དུཿ ཁ་ཐམས་ཅད་བདག་ལ་སྨིན་ཞིང་། བདག་གི་བདེ་བ་དང་དགེ་བ་ཐམས་ཅད་སེམས་ཅན་ཐམས་

ཅད་ལ་སྨིན་པར་གྱུར་ཅིག་ཅེས་བརྗོད་ཅིང་འདུན་པ་དྲག་ཏུ་བྱའོ། །གཞན་གྱི་དུཿ ཁ་ལེན་ནུས་པར་བྱ་བའི་ཕྱིར། བདག་ལ་མ་འོངས་པ་ན་འབྱུང་བའི་དུཿ ཁ་རྣམས་ད་ལྟ་བླངས་པས། རྒྱུད་གཞན་གྱི་དུཿ ཁ་ཡང་ལེན་ནུས་པར་འགྱུར་རོ་ཞེས་གང་གསུངས་པ་ལྟར་བྱའོ། །དེ་ལྟར་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་མ་སྦྱངས་ན། གཞན་གང་བསྒོམས་ཀྱང་ལམ་ལ་ས་ཆོད་ཆེན་པོ་མི་འབྱུང་བས། འདི་རྒྱུད་ལ་སྐྱེ་བའི་ཕྱིར་དུ་བསྐལ་པ་དུ་མའི་བར་དུ་འབད་དགོས་ཀྱང་འབད་པར་བྱ་སྟེ། འབྲོམ་རིན་པོ་ཆེས། རྣལ་འབྱོར་པ་ཆེན་པོ་ལ། ཁྱོད་ལ་རྣ་རྩར་རྔ་བོ་ཆེ་བརྡུངས་ཀྱང་མི་ཞིག་པའི་སྒོམ་ཡོད་ཀྱང་། བྱམས་པ་དང་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེ་བ་ཡིན་གསུངས། ཇོ་བོ་རྗེས་བྱམས་པ་དང་སྙིང་རྗེ་སྦྱོང་མི་ཤེས་པའི་བྱང་ཆུབ་སེམས་དཔའ་བོད་ཀྱི་ཤེས་པ་གསུངས། ཡང་ཐེག་ཆེན་ཆོས་སྒོར་འཇུག་འདོད་པས། །མུན་སེལ་གདུང་བ་ཞི་བྱེད་པ། །ཉི་ཟླ་ལྟ་བུའི་བྱང་ཆུབ་སེམས། །བསྐལ་པར་འབད་པས་སྐྱེ་ཡང་རུང་། གསུངས། ཞང་སྣ་ཆུང་སྟོན་པས་ཇོ་བོ་ལ་

གདམས་ངག་ཞུས་ཀྱང་། འཇིག་རྟེན་བློས་ཐོང་། བྱང་ཆུབ་ཀྱི་སེམས་བསྒོམ་བྱ་བ་ཞིག་ལས་མི་འོང་བྱས་པ་ལ། དགེ་བཤེས་སྟོན་པས་ཁྲེལ་ནས། དེ་ཇོ་བོའི་གདམས་ངག་གི་མཐིལ་ཕྱུང་པ་ལ་གསུངས། རྗེ་རིན་པོ་ཆེས་བསྐལ་པ་དུ་མའི་བར་དུ་རྨད་དུ་བྱུང་བའི་མཁྱེན་རབ་ཀྱིས་ཆེས་ཕྲ་བར་བྱས་ཏེ། ལམ་རྣམས་ལ་དཔྱད་པ་ན་འདི་ཉིད་འཚང་རྒྱ་བའི་ཐབས་དམ་པར་རྒྱལ་བ་སྲས་བཅས་ཀྱིས་གཟིགས་གསུངས། དགེ་བཤེས་འཆད་ཁ་བ་ཞིང་གཤེགས་ཁར་སྣང་སྲིད་ཀྱི་སྒྲ་གཅིག་ལ་བློ་སྦྱོང་གི་སྒྲ་འདི་ལས་སྙན་པ་མེད་པས་ཁྱེད་ཀྱིས་བརྗོད་དང་གསུངས། དེས་ན་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་ཚུལ་གྱི་ཆོས་སྐོར་འདི་རྣམས་ཐུགས་དམ་གྱི་མཐིལ་དུ་བཟུང་ནས། རང་གི་ཉམས་སུ་ལེན་ཅིང་གཞན་ལ་ཡང་རྒྱ་ཆེར་བཤད་པར་བྱའོ། །སྨྲས་པ། དབང་ཕྱུག་ཕུན་ཚོགས་དཔའ་བོ་མཁའ་འགྲོ་ཡང་། །དབང་དུ་བསྡུ་ན་གཞན་རྣམས་སྨོས་ཅི་དགོས། །དབང་ཕྱུག་བརྒྱད་ལྡན་ཟླ་མེད་བླ་མ་ཡིས། །དབང་དང་བྱིན་རླབས་དངོས་གྲུབ་མཐའ་དག་སྩོལ། །རང་གི་སེམས་ལ་གོམས་འདྲིས་ཡོང་

ཕྱིར་དང་། །སྐལ་བཟང་སློབ་མ་གཞན་ལ་ཕན་པའི་ཕྱིར། །གལ་ཆེ་དུས་སུ་འབུམ་ཡང་བརྒྱ་ཚར་རེ། །སྒྲོག་བཞིན་ཆོས་འདི་ཡང་ཡང་བསྒྲག་པར་བྱ། །སྣང་སྲིད་སྣོད་བཅུད་ཆོས་རྣམས་མ་ལུས་པ། །རྨི་ལམ་བཞིན་དུ་སྣང་སྟོང་སེམས་ཀྱི་འཕྲུལ། །སེམས་ཀྱི་གནས་ལུགས་གདོད་ནས་ནམ་མཁའ་འདྲ། །སྟོང་གསལ་འཛིན་མེད་ངང་ལ་མཉམ་པར་ཞོག །ཐུན་མཚམས་རྣམས་སུ་རང་གཞན་སྣོད་བཅུད་ཀུན། །སྒྱུ་མ་ལྟ་བུར་སྣང་ལ་རང་བཞིན་གྱིས། །གྲུབ་པ་རྡུལ་ཙམ་མེད་པར་ཤེས་བྱས་ནས། །རྒྱལ་སྲས་སྤྱོད་པ་གང་ལ་བསླབ་པར་བྱ། །འཁོར་པའི་སྡུག་བསྔལ་མྱོང་བའི་སེམས་ཅན་གྱིས། །རང་གི་ཕ་མ་མ་བྱས་གཅིག་ཀྱང་མེད། །བྱས་ཚེ་ཚེ་འདིའི་མ་བཞིན་དྲིན་ཆེ་བས། །ཕ་མ་འདི་དག་འཁོར་འཁྱམས་སྙིང་རེ་རྗེ། །སྙམ་དུ་ཡིད་ཀྱིས་བདེ་དགེ་གཞན་ལ་བཏང་། །གཞན་གྱི་སྡུག་བསྔལ་ཚུར་ལ་ལེན་པར་བྱ། །ཡུལ་སྣང་ཡིད་དུ་འོང་དང་མི་འོང་དང་། །བར་མ་གསུམ་ལ་བརྟེན་ནས་དུག་གསུམ་པོ། །སྐྱེས་དུས་འདི་ལྟར་གཞན་ལ་སྐྱེས་ཚད་ཀུན། །རང་ལ་འདུ་བར་གྱུར་ཅིག་སྙམ་དུ་སྒོམས། །འགྲོ་ཀུན་སྡིག་དང་

སྡུག་བསྔལ་བདག་ལ་སྨིན། །བདག་གི་བདེ་དགེ་འགྲོ་ལ་སྨིན་གྱུར་ཅིག །སྙམ་དུ་བརྗོད་ན་དེ་འདྲའི་གཏམ་སྙན་ཞིག །འཇིག་རྟེན་ཁམས་ན་མེད་པས་བརྗོད་པར་རིགས། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །གསུམ་པ་རྐྱེན་ངན་བྱང་ཆུབ་ཀྱི་ལམ་དུ་བསྒྱུར་ཚུལ་ནི། །རྒྱལ་སྲས་རིན་པོ་ཆེའི་ཞལ་ནས། དུཿ ཁ་ཐམས་ཅད་བདག་འཛིན་གྱིས་བསྐྱེད་པས། བདག་འཛིན་ལ་དགྲར་བལྟས་ཏེ། བདག་མེད་ལ་བདག་ཏུ་ལྟ་བའི་བློ་འདིས་འཁོར་བ་ཐོག་མེད་ནས་ད་ལྟའི་བར་དུ། དུཿཁ་ཐམས་ཅད་བསྐྱེད་ཅིང་མཐོ་བ་ལ་ཕྲག་དོག །དམའ་བ་ལ་བརྙས་བཅོས། མཉམ་པ་ལ་འགྲན་སེམས་ཐམས་ཅད་འདི་ལས་བྱུང་ཞིང་། བདག་འཁོར་བ་ལས་མི་ཐར་བ་དང་། མི་དང་མི་མ་ཡིན་པས་གནོད་པ་ལ་སོགས་པ་དུཿཁ་ཐམས་ཅད་འདིས་བྱས་པ་ཡིན་ཏེ། ཞི་བ་ལྷས། འདི་ཡིས་བརྒྱ་ཕྲག་ཐམས་ཅད་དུ། །འཁོར་བར་བདག་ལ་གནོད་པ་བྱས། །ད་ནི་འཁོན་རྣམས་དྲན་བྱས་ཏེ། །ཁྱོད་ཀྱིས་རང་དོན་སེམས་པ་གཞོམ། །ཞེས་གསུངས་པས་བདག་འཛིན་ནམ་བྱུང་ཙ་ན། བརྟགས་ན་བདག་

གང་ཡང་མི་འདུག་པ་ལ། ཅིའི་ཕྱིར་བདག་ཏུ་འཛིན། ཞེས་བདག་འཛིན་ནམ་སྐྱེས་དུས་སྤངས་ཏེ། ཕྱིན་ཆད་བདག་གཅེས་འཛིན་མི་སྐྱེ་བར་བྱ་བའི་ཕྱིར་འབད་པར་བྱ་གསུངས། ཤ་བོའི་ཞལ་ནས། ད་རེས་ཀྱི་ཚེ་ཐུང་འདི་ལ་འགོང་པོ་འདི་ཅི་ཐུལ་ཞིག་བྱ་འཚལ་གསུངས། དགེ་བཤེས་འབན་གྱི་ཞལ་ནས། ད་ནི་སེམས་ཀྱི་མཁར་སྒོར་གཉེན་པོའི་མདུང་ཐུང་ཞིག་མནན་ལ་བསྡད་པ་མིན་པ་གཞན་བྱ་རྒྱུ་མེད། ཁོ་བསྒྲིམས་ན་ང་ཡང་བསྒྲིམ། ཁོ་གློད་ན་ང་ཡང་གློད་གསུངས། བདག་འཛིན་ལ་དགྲར་བལྟས་ནས་སྤོང་བ་འདི་ལ་ཤ་བོ་སྒང་པའི་ཞལ་ནས། འགོང་བོ་འགོང་རྫོང་གི་ཆོས་ཞེས་གསུངས་སོ། །དེ་ལྟར་བདག་འཛིན་ལ་དགྲར་བལྟས་ནས། གཞན་གཅེས་པར་འཛིན་དགོས་ཚུལ་ནི། རྒྱལ་སྲས་རིན་པོ་ཆེས། སྤྱིར་སེམས་ཅན་ཐམས་ཅད་ཐོག་མ་མེད་པ་ནས་ཀྱི་མ་བྱས་པའི་དྲིན་ཅན་ཡིན་པས། སྔར་ཡང་དྲིན་ཆེ་ལ་བླ་ན་མེད་པའི་བྱང་ཆུབ་སྒྲུབ་པ་ཡང་སེམས་ཅན་ལ་རག་ལས་ཏེ། ཞི་བ་ལྷས། སེམས་ཅན་རྣམས་དང་རྒྱལ་བ་ལ། །སངས་རྒྱས་ཆོས་འགྲུབ་འདྲ་བ་ལ། །རྒྱལ་ལ་གུས་བྱེད་དེ་བཞིན་དུ། །

སེམས་ཅན་ལ་མིན་ཅི་ཡི་ཚུལ། །ཞེས་གསུངས་པ་ལྟར། སངས་རྒྱས་སྒྲུབ་པའི་གང་ཟག་ལ། སངས་རྒྱས་དང་སེམས་ཅན་མཉམ་པའི་ཚོད་ཡིན་པས། དེ་ལྟར་དྲིན་ཆེ་བའི་སེམས་ཅན་རྣམས་ལ་བྱམས་པ་དང་སྙིང་རྗེ་དྲག་པོ་བསྒོམས་ནས། དེ་དག་གི་དུཿ ཁ་བདག་ལ་བླང་ཞིང་། བདག་གི་བདེ་དགེ་དེ་རྣམས་ལ་སྦྱིན་པར་བྱའོ། །ཁྱད་པར་དུ་བདག་ལ་གནོད་པར་བྱེད་པའི་མིའམ་མི་མ་ཡིན་པ་བྱུང་ན། གནོད་བྱེད་འདིས་ཐོག་མ་མེད་པ་ནས་བདག་གི་མ་བྱས་ནས། རང་གི་སྡིག་སྡུག་གཏམ་ངན་ལ་མ་འཛེམས་པར་བདག་གི་དོན་བྱས་བྱས་ནས། འཁོར་བར་དུཿ ཁ་སྣ་ཚོགས་མྱོང་ཞིང་། འཁྲུལ་བའི་སྟོབས་ཀྱིས་སྔོན་གྱི་ཉེ་དུ་ཡིན་པར་ངོ་མ་ཤེས་པ་དང་། བདག་གི་ལས་ངན་གྱིས་བསྐུལ་ནས། འདིས་བདག་ལ་གནོད་པའི་སྡིག་པ་བྱས་པས་ཕྱིས་དེའི་འབྲས་བུ་དུཿཁ་མྱོང་བར་འགྱུར་བས། བདག་ལ་བརྟེན་ནས་འདིས་དུས་ཡུན་རིང་པོར་དུཿ ཁ་མྱོང་ཞིང་། མྱོང་བར་འདུག་པས་སྙིང་རེ་རྗེ་སྙམ་དུ་དྲག་ཏུ་བསྒོམ། སྔར་ནི་ངས་འདི་ལ་གནོད་པ་འབའ་ཞིག་བྱས་འདུག །ད་ནི་འདིའི་གནོད་པ་བསལ་ཞིང་

ཕན་པ་བསྒྲུབ་པར་བྱ་སྙམ་དུ་བསམས་ལ་གཏོང་ལེན་དྲག་ཏུ་བསྒོམ། ཁྱད་པར་མིའམ་ཁྱི་ལྟ་བུ་ཡིན་ན་དེ་ལ་དངོས་སུ་ཕན་ཅི་ཐོག་ལ་འབད་ཅིང་། གང་ལྟར་བྱས་ཀྱང་དངོས་སུ་ཕན་གདགས་མ་ནུས་ན། བསམ་པས་གནོད་བྱེད་འདི་དུཿ ཁ་དང་བྲལ། བདེ་བ་དང་ལྡན། སངས་རྒྱས་མྱུར་དུ་ཐོབ་པར་གྱུར་ཅིག་སྙམ་དུ་ཞེ་ཐག་པ་ནས་བསམ་ཞིང་། ངག་ཏུའང་བརྗོད་པར་བྱའོ། །ཡང་ད་ཕྱིན་ཆད་བདག་གིས་དགེ་བ་ཅི་བྱེད་ཐམས་ཅད་འདིའི་དོན་དུ་བྱའོ་སྙམ་པའི་སེམས་བསྐྱེད་པར་བྱའོ། །པཎ་ཆེན་ཤཱཀྱ་ཤྲཱིའི་རྣམ་ཐར་བཞི་ནི། ཉིན་གཅིག་གི་འཚོ་བ་ལས་ལྷག་མ་བྲེ་གང་ཡང་རང་དོན་དུ་མི་འཛིན་པ་དང་། ཉིན་ཞག་ཕྲུགས་གཅིག་ལ་ཆོས་སྤྱོད་བཅུ་ཁ་ཚང་རེ་མཛད་པ་དང་། རྐྱེན་ངན་ཅི་བྱུང་ཡང་སྟོང་པ་ཉིད་སྒོམ་པ་མ་གཏོགས་སྲུང་བ་གཞན་མི་བྱེད་པ་དང་། གནོད་པ་བྱེད་པའི་ལན་དུ་ཕན་འདོགས་པ་དང་བཞི་ཡིན་པ་ལས། ཐ་མ་འདི་དང་ཆོས་རྗེ་རྒོད་ཚང་བའི་ཐུགས་དམ་བཅུ་གཉིས་ཀྱི་ཡ་གྱལ་གྱི་གནོད་བྱེད་ལ་ལན་དུ་ཕན་འདོགས་པའི་དམ་བཅའ་མཛད་པ་སོགས། སྐྱེས་བུ་ཆེན་པོ་རྣམས་ཀྱིས་གནོད་ལན་ལ་ཕན་འདོགས་པ་ཕལ་ཆེ་བ་

བསམ་པའི་སྒོ་ནས་ཕན་འདོགས་པ་ཡིན་ལ། དེ་ཡོད་ན་སྦྱོར་བས་ཕན་འདོགས་པ་འབད་མེད་དུ་འབྱུང་སྟེ། བྱང་ཆུབ་སེམས་འགྲེལ་ལས། གཞན་དོན་ལས་ལ་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་པ། །དེ་ནི་དེ་ལ་དོན་གྱིས་ཞུགས། །ཞེས་གསུངས་པས། གནོད་བྱེད་ལ་ཕན་སེམས་དྲག་ཏུ་བྱའོ། །འདི་ཡོད་ན་བློ་སྦྱོང་གི་བསླབ་བྱ་དང་། དམ་ཚིག་ཀྱང་ཕལ་ཆེར་འདིར་འདུས་སོ་གསུངས། སྔོན་བཅོམ་ལྡན་འདས་དྲང་སྲོང་བཟོད་པ་ཅན་དུ་གྱུར་པ་ན། རྒྱལ་པོ་རྩོད་འབྱུང་བློན་པོ་བཞི་དང་བཅས་པས། དེའི་ཡན་ལག་བཅད་པའི་ཚེ། ཁྱེད་ཀྱིས་ད་ལྟར་ངའི་ཡན་ལག་བཅད་པས། ངས་མ་འོངས་པའི་དུས་ན། ཁྱོད་ཀྱི་ཉོན་མོངས་པ་དང་སྡུག་བསྔལ་ཐམས་ཅད་གཅད་པར་བྱའོ། །ཞེས་དང་། ཡང་དེ་ལ་ཕྱག་དར་གྱི་རྡུལ་གཏོར་བ་ན། ཁྱེད་ཀྱིས་ང་ལ་རྡུལ་གྱིས་བགོས་པས་ངས་མ་འོངས་པ་ན་ཁྱེད་ཀྱི་ཉོན་མོངས་པའི་རྡུལ་བསལ་བར་བྱའོ། །ཞེས་དམ་བཅས་པ་དང་། གཞན་ཡང་སྐྱེས་བུ་དམ་པ་རྣམས་ཀྱིས། གནོད་ལན་དུ་ཕན་འདོགས་པའི་དམ་བཅའ་མཛད་

པའི་རྗེས་སུ་སློབ་པར་འདོད་པས། དེ་ལྟར་དམ་བཅའ་ཞིང་སྨོན་ལམ་འདེབས་པའི་ཚུལ་ནི། རྒྱལ་སྲས་རིན་པོ་ཆེས། ཡན་ལག་བདུན་པ་སྔོན་དུ་བཏང་ནས། སེམས་རྩེ་གཅིག་པའི་སྒོ་ནས། མཁྱེན་བརྩེ་ནུས་པ་ཕུལ་དུ་ཕྱིན་པའི་མཐུས། །འགྲོ་ལ་ཕན་པར་འདོད་པའི་བསམ་པའི་དོན། །ཇི་ལྟར་བསམ་བཞིན་འགྲུབ་མཛད་བསླུ་མེད་སྐྱབས། །རྒྱལ་སྲས་བཅས་བདག་ལ་དགོངས་སུ་གསོལ། །བདག་གམ་བདག་གི་བཤེས་ལ་སྒོ་གསུམ་གྱིས། །གནོད་པ་བྱེད་པ་མཐོང་ཐོས་དྲན་གྱུར་ན། །བཟོད་དང་སྙིང་རྗེའི་སྟོབས་ཀྱིས་གནོད་བྱེད་ལ། །ཅི་ནུས་དངོས་པོ་བསམ་པས་ཕན་གདགས་བགྱི། །གང་ཞིག་ཁྲོ་དང་ང་རྒྱལ་དབང་གྱུར་ནས། །བདག་གི་ལུས་ལ་རྨ་སྲོལ་ཆེར་བཏོད་དེ། །འཆི་བར་ངེས་པའི་གནས་སྐབས་བྱུང་གྱུར་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །ནོར་ལ་ཆགས་པའམ་བདག་ལ་སྡང་བ་ཡིས། །བདག་གི་བདོག་ཀུན་ཕྲོགས་ནས་ཉིན་གཅིག་ཙམ། །འཚོ་བའི་ཟས་ཙམ་མེད་པའི་སྐབས་བྱུང་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །འགྲོ་མང་དབུས་སུ་སྡང་མིག་ལྡན་པའི་མིས། །ཚིག་ངན་བཟོད་

པར་དཀའ་བས་དམ་འཕབ་ནས། །གདོང་པ་འདེགས་པའི་སྐབས་ཀྱང་མེད་བྱས་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །གང་ཞིག་ཐོས་ན་བདག་ལ་འགྲོ་ཀུན་གྱིས། །ཁྲེལ་བར་འགྱུར་བའི་གྲགས་ངན་མི་བཟད་པ། །ཕྱོགས་བཅུར་བསྒྲགས་པ་མཐོང་ཐོས་དྲན་གྱུར་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །བདག་ལ་ཉེས་སྐྱོན་ཡོད་དམ་མེད་ཀྱང་རུང་། །མཐོ་དམན་མཉམ་པ་སུ་ཡང་རུང་བ་ཡིས། །གནོད་པའི་རྣམ་པ་ཆེ་ཆུང་ཅི་བྱས་ཀྱང་། །དེ་ཚེ་དམ་བཅའ་འདི་ནི་དྲན་པར་བགྱི། །བདག་གི་མཐུན་ཕྱོགས་རྣམས་ལ་གཞན་དག་གིས། །གནོད་པ་བྱས་པ་མཐོང་ཐོས་དྲན་གྱུར་ནས། །ཆགས་སྡང་དབང་གིས་བདག་སེམས་འཁྲུག་གྱུར་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །བདག་གི་ལུས་དང་སྲོག་ལ་གནོད་བྱེད་པ། །དེ་དག་ཚེ་རིང་ནད་མེད་དགྲ་དང་བྲལ། །ལམ་ལ་བར་དུ་གཅོད་པ་ཀུན་སྤངས་ནས། །ཆོས་སྐུ་སྐྱེ་འཇིག་བྲལ་བ་མྱུར་ཐོབ་ཤོག །མཐུ་འམ་འཇབ་བུས་བདག་གི་ནོར་ཁྱེར་དེ། །དཔལ་འབྱོར་ཕུན་ཚོགས་ཆོག་ཤེས་བློ་དང་ལྡན། །འཕགས་པའི་

ནོར་བདུན་དག་ལ་ལོངས་སྤྱད་ནས། །ལོངས་སྤྱོད་རྫོགས་སྐུའི་དཔལ་འབྱོར་མྱུར་ཐོབ་ཤོག །བདག་གི་དགེ་བའི་བར་ཆད་བྱེད་པ་རྣམས། །ཅི་བསམ་ཐམས་ཅད་ཆོས་བཞིན་འགྲུབ་གྱུར་ནས། །བར་དུ་གཅོད་པའི་བདུད་བཞི་རབ་བཅོམ་སྟེ། །སྤྲུལ་སྐུ་ཐོབ་ནས་འགྲོ་ཀུན་དོན་བྱེད་ཤོག །བདག་གི་ཡན་ལག་གཅོད་པར་བྱེད་རྣམས་ཀྱི། །ཉོན་མོངས་དུཿ ཁ་བདག་གིས་གཅོད་པར་ཤོག །བདག་ནི་ཆུ་བོར་འདོར་བར་བྱེད་ན་དེ། །འཁོར་བའི་ཆུ་ལས་བདག་གིས་སྒྲོལ་བར་ཤོག །བདག་ནི་བཙོན་རར་འཆིང་བྱེད་དེ་དག་གི །བདག་ལྟའི་འཆིང་བ་བདག་གིས་གཅོད་པར་ཤོག །བདག་གི་བདེ་བ་འཇོམས་པར་བྱེད་བ་རྣམས། །ཟག་མེད་བདེ་ལ་བདག་གིས་འགོད་པར་ཤོག །བདག་ལ་དུཿ ཁ་སྐྱེད་པར་བྱེད་པ་དེའི། །དུཿཁ་རྒྱ་མཚོ་བདག་གིས་སྐེམ་པར་ཤོག །མདོར་ན་སུ་ཡིས་དངོས་སམ་བསམ་པ་ཡིས། །བདག་ལ་འཕྲལ་དང་ཡུན་དུ་གནོད་པའི་ལས། །བྱས་དང་བྱེད་དང་བྱ་འགྱུར་དེ་དག་གི །གནོད་པ་ཐམས་ཅད་བདག་གིས་སེལ་བར་ཤོག །ཅེས་གསུངས་པ་ལྟར་གནོད་ལན་དུ་ཕན་འདོགས་པའི་དམ་བཅའ་དང་སྨོན་ལམ་བྱ་ཞིང་

འཕྲལ་དུ་ལག་ལེན་ལ་ཡང་ཕན་ཅི་ཐོག་བྱའོ། །ཡང་དངོས་སུ་གྲགས་ངན་དང་སྐུར་བ་བཏབ་ཀྱང་མི་ཁྲོ་བ་གླང་ཐང་བ་ལྟ་བུ་རེ་བྱེད་དགོས་ཏེ། ཁོང་ལ་ཁྱིམ་བདག་ཕྱུག་པོ་ཞིག་གིས་བུ་མ་སོས་པ་ལ། ཐེངས་གཅིག་བུ་ཞིག་སྐྱེས་པ་ལ་མོ་རྩིས་བྱས་པས། དགེ་བཤེས་བཟང་པོ་ཞིག་གི་བུ་ཡིན་བྱས་ན་སོས་པར་འདུག་ཟེར་བས། ཁོ་བོའི་ཆུང་མས་བུ་དེ་ཁོང་གི་དྲུང་དུ་བཞག་སྟེ། ཁྱེད་རང་གི་བུ་དེ་ན་ཡོད་དོ་བྱས་ནས་བྲོས་ཐབས་སུ་བྱས་སོང་བས་ཁོང་བ་ཅིའང་མི་གསུངས་པར། བུད་མེད་གཞན་ཞིག་ལ་བཅོལ་ནས་གསོས་པས་ཐམས་ཅད་ཐེ་ཚོམ་དུ་གྱུར། ལོ་འགའ་སོང་ཙ་ན་ཕ་མ་གཉིས་འོངས་ནས་བསྙེན་བཀུར་དང་འབུལ་བ་ཆེན་པོ་བྱས་ཏེ་བུ་བླངས་ཟེར་བ་དང་། སྣེ་ཟུར་བ་ལའང་ཕྲག་དོག་གིས་དེ་འདྲ་བྱུང་བའི་ལོ་རྒྱུས་གསུངས། དེས་ན་གྲགས་པ་ངན་པ་དེ་འདྲ་བྱུང་ན་ཡང་། དེ་ལྟར་མི་ཁྲོ་སྙམ་དུ་བསམ་པར་བྱའོ། །མ་ཉེས་ཀྱང་ཉེས་པར་ཁས་བླངས་ན་སྡིག་པ་འཛད་དེ། རྭ་སྒྲེང་དུ་དགེ་སློང་བཟང་པོ་ཞིག་གིས་ཇ་རྡུང་བའི་རྩ་རུ་ཕྱིན་པས། སྡེར་མ་བོར་བའི་ཁག་བྱུང་ནས། མཁན་པོ་ལ་བདག་ལ་

ཉེས་པ་མེད་དེ་གང་དྲག་ཞུས་པས། ཁས་ལོང་ལ་མང་ཇ་བསྐོལ་རྒྱལ་གྱིས། ད་གཟོད་གཙང་སར་ཐོན་པར་འདུག་གིས་གསུངས་པས། ཁོང་གིས་ཀྱང་དེ་ལྟར་བྱས་པས། དེའི་ནུབ་མོ་སྡིག་པ་མང་པོ་དག་པའི་རྟགས་བྱུང་། ཕྱིས་གཞན་ནས་སྡེར་མའི་རྩད་ཆོད་བྱུང་སྟེ། ཁོང་གཙང་སར་ཡང་ཐོན་པས་མཁན་པོ་ལའང་མོས་སུ་སོང་། དེ་ལྟར་བྱས་པ་ལ་དགའ་བ་སྐྱེས་གསུངས། ཡང་གནོད་བྱེད་ལྷ་འདྲེ་ཡིན་ན། ངས་ཐོག་མ་མེད་པ་ནས་ཁྱོད་ཀྱི་ཤ་ཁྲག་ལ་སོགས་པ་ཟོས་ཤིང་བཏུངས་པས། དེའི་ལན་དུ་བདག་གི་ཤ་ཁྲག་ལ་སོགས་པ་ཁྱོད་ལ་སྦྱིན་པར་བྱའོ་སྙམ་དུ་བསམས་ལ། གནོད་བྱེད་དེའི་མདུན་དུ་རང་གི་ལུས་བློས་ཁ་ཕྱེ་སྟེ། བདག་གི་ཤ་ཁྲག་རུས་པ་ལ་སོགས་པ་གང་འདོད་ཟོ་སྙམ་དུ་བློས་ལིངས་ཀྱིས་བསྐྱུར་ཞིང་ངག་ཏུའང་བརྗོད་པར་བྱའོ། །དེ་ནས་གནོད་བྱེད་དེས་བདག་གི་ཤ་སོགས་ཟོས་པས་བཀྲེས་སྐོམ་སོགས་ཞི་ནས། ལུས་སེམས་ཟག་མེད་ཀྱི་བདེ་བས་གང་ཞིང་། བྱང་ཆུབ་ཀྱི་སེམས་གཉིས་འབྱོངས་པར་བསམ་མོ། །དེ་བཞིན་ཤ་ཁྲག་ཟ་བའི་ལྷ་འདྲེ་ཇི་སྙེད་ཡོད་པ་ཐམས་ཅད་ལ། བདག་གི་ལུས་སྔར་ལྟར་བྱིན་

པས་ཐམས་ཅད་ཚིམ་ནས་བདེ་ཞིང་དགེ་བར་གྱུར་པར་བསམ། དེ་ལྟར་ན་ཉེས་པ་ཐམས་ཅད་བདག་གཅེས་འཛིན་ལས་བྱུང་འདུག་པས། དེ་ལ་དགྲར་བལྟས་ལ་གནོད་པ་ཅི་འཁྱོལ་བྱ་ཞིང་། ཕན་བདེ་ཐམས་ཅད་སེམས་ཅན་ལས་བྱུང་འདུག་པས། དེ་ལ་གཉེན་དུ་བལྟས་ལ་ཕན་ཅི་ཐོགས་བྱེད་དེ། གླང་རི་ཐང་བའི་ཞལ་ནས། ངས་ཅི་ཙམ་པའི་ཆོས་ཟབ་མོ་ཞིག་ཞལ་ཕྱེ་ནས་བལྟས་ཀྱང་། སྐྱོན་ཐམས་ཅད་རང་གི་ཡིན། ཡོན་ཏན་ཐམས་ཅད་ཇོ་བོ་སེམས་ཅན་པའི་ཡིན་པར་འདུག །དེའི་གནད་ཀས་ཁེ་དང་རྒྱལ་ཁ་གཞན་ལ་གཏོང་། གྱོང་དང་བུབ་ཁ་རང་གིས་ལེན་པ་འདི་མིན་པ་གོ་རྒྱུ་མེད་གསུངས། ཉོན་མོངས་པ་དང་ཕྱི་ནང་སྣོད་བཅུད་ཀྱི་གནོད་པ་ལ་བརྟེན་པའི་དུཿ ཁ་གང་བྱུང་ཡང་། ཉོན་མོངས་པ་དང་དུཿ ཁ་འདི་དག་ཐམས་ཅད་རང་གི་སེམས་འཁྲུལ་བའི་སྣང་བ་ཡིན་པས། བདེན་པར་གྲུབ་པ་ཅུང་ཟད་ཀྱང་མེད། ཀུན་རྫོབ་ཏུ་དེ་ལྟར་སྣང་བ་ནི་རྨི་ལམ་དུ་མེས་ཚིག་པའམ་ཆུས་ཁྱེར་ནས་ཉམ་ཐག་པ་ལྟར་མི་བདེན་པ་ལ་བདེན་པར་བཟུང་བས་ལན་པ་ཡིན། དོན་དམ་པར་ནི་ཆོས་ཐམས་ཅད་

ཅིར་ཡང་གྲུབ་པ་མེད་པས། ཉོན་མོངས་སམ་དུཿ ཁ་དེའི་ངོ་བོ་ལ་བལྟས་ན། དེ་དང་པོ་གང་ནས་ཀྱང་མ་སྐྱེས་པས་སྐྱེ་མེད་ཆོས་སྐུ་ཡིན། མ་སྐྱེས་པ་ལ་འགག་རྒྱུ་མེད་པས་འགག་མེད་ལོངས་སྐུ་ཡིན། སྐྱེ་འགག་མེད་པ་ལ་བར་དུ་གནས་པ་མེད་པས་གནས་མེད་སྤྲུལ་སྐུ་ཡིན། དེ་རྣམས་ངོ་བོ་དབྱེར་མེད་པ་ངོ་བོ་ཉིད་ཀྱི་སྐུ་ཡིན་པས། འཁྲུལ་སྣང་སྐུ་བཞིར་བལྟ་བ་འདི་སྐུ་བཞི་ངོ་སྤྲོད་ཀྱི་གདམས་པ་ཡིན་ནོ་གསུངས། པཎ་ཆེན་ཤཱཀྱ་ཤྲཱིའི་རྣམ་ཐར་བཞིའི་ནང་ནས། རྐྱེན་ངན་ཅི་བྱུང་ཡང་སྟོང་པ་ཉིད་བསྒོམས་ལྟར་འོ་སྐོལ་གྱིས་ཀྱང་ལྷ་འདྲེ་ལ་སོགས་པའི་རྐྱེན་ཅི་བྱུང་ཡང་སྟོང་ཉིད་བསྒོམས་ན་སྲུང་པའི་མཆོག་ཏུ་འགྱུར་ཏེ། སློབ་དཔོན་ཨཱརྻ་དེ་བའི་ཞལ་ནས། སྟོང་པ་ཉིད་ནི་བསྒོམས་བྱས་ན། །འཆི་བདག་གིས་ཀྱང་མི་ཚུགས་ཏེ། །བདུད་རྣམས་བྱེ་བ་དག་གིས་ཀྱང་། གནོད་པར་འགྱུར་བར་ག་ལ་སྲིད། གསུངས། སྔོན་རྗེ་བཙུན་མི་ལ་རས་པ་བྲག་དམར་ཁྱུང་ལུང་ན་བཞུགས་དུས། བགེགས་ཀྱི་རྒྱལ་པོ་བི་ནཱ་ཡ་ཀས་ཨ་ཙ་ར་བདུན་དུ་རྫུས་ནས་གླགས་འཚོལ་དུ་བྱུང་དུས། ཁྲོ་བོའི་ལྟ་སྟངས་ཀྱི་ངང་ནས་སྔགས་བཟླས་རུང་མ་སོང་།

སྙིང་རྗེ་ཆེན་པོ་ཐུགས་ལ་འཁྲུངས་ནས་ཆོས་བཤད་རུང་འགྲོར་མ་འདོད་པའི་ཚེ། ཐུགས་ལ་ང་ལ་ལྷོ་བྲག་མར་པས་ཆོས་ཐམས་ཅད་རང་སེམས་སུ་ངོ་སྦྲད་ཅིང་། རང་སེམས་འོད་གསལ་སྟོང་པར་ཁོ་ཐག་ཆོད་པ་ལ། གདོན་བགེགས་ཕྱི་རོལ་དུ་བཟུང་ནས་སོང་ན་དཀའ་བ་འདི་བྱེད་དོན་མི་འདུག་དགོངས་མི་འཇིགས་པའི་གདེངས་མངོན་དུ་གྱུར་ནས། ལྟ་བ་གདེངས་དང་ལྡན་པའི་མགུར་གསུངས་བཞིན། ནང་དུ་ཐལ་གྱིས་བྱོན་པས། ཨ་ཙ་ར་རྣམས་འཇིགས་སྐྲག་དང་ངས་ནས་གཅིག་ལ་གཅིག་ཐིམ་པའི་མཐར། གཅིག་པོ་ཡང་རླུང་ཚུབ་འཁྱིལ་བ་ཞིག་བྱས་ནས་མེད་པར་སོང་། ཡང་སྔོན་སྒོམ་ཆེན་པ་ཞིག །བྲག་ཕུག་འདྲེ་ཅན་ཞིག་ཏུ་བསྡད་པའི་འདྲེ་མོ་ཞིག་བྱུང་ནས། མ་སྡོད་བྱས་ཀྱང་མ་ཉན་པར་སྟོང་ཉིད་བསྒོམ་བཞིན་བསྡད་པས། འདྲེ་མོ་ཕྱིར་ལོག་ནས་འདྲེ་དམག་མང་པོ་ཁྲིད་འོངས་ཐོག་མར་རྡོ་ཆར་ཞིག་ཕབ་ནས་ནང་དུ་འོངས་ནས་འདྲེ་གཅིག་གིས་མི་ཁོ་གང་ཟེར་ཚེ། ད་ཅིའི་འདི་ན་ཡོད་དེ་ད་མི་འདུག་ཟེར་སྨིན་ཕྲག་ལ་མཛུབ་མོ་བཙུགས་ཚེ། འདྲེ་མོ་ཞར་མ་ཞིག་ན་རེ། རེ་ཡོད་རེ་མེད་པ་

ཞིག་གིས་རྡོ་རྗེས་བརྒྱབས་ནས་ངའི་མིག་ཡ་ཅིག་འདི་ཡང་བཅར་བ་ཡིན་པས། ད་བསྡད་ན་མི་བཟང་འགྲོ་འགྲོ་ཟེར་ཐམས་ཅད་སོང་སྐད། དེས་ན་སྟོང་ཉིད་བསྒོམས་ན་ལྷ་འདྲེས་གནོད་པར་ཡང་མི་ནུས་པས་སྟོང་ཉིད་བསྒོམ་པ་གལ་ཆེའོ། །གཞན་ཡང་གནོད་བྱེད་འདིས་བདག་བྱང་ཆུབ་ཀྱི་སེམས་གཉིས་སྦྱོང་བའི་བསྐུལ་མ་བྱས་པས་བཀའ་དྲིན་ཆེ། བདག་གཉེན་པོ་དང་བྲལ་ནས། ཉོན་མོངས་བ་སྐྱེས་བ་མ་ཚོར་བ་ལ་འདིས་སྦྲན་པས། བླ་མ་འམ་སངས་རྒྱས་ཀྱི་སྤྲུལ་པ་ཡིན་སྙམ་དུ་བསམ། ཡང་མཛེ་ནད་ལ་སོགས་དུཿ ཁ་དྲག་པོ་བྱུང་ན། དུཿ ཁ་འདི་མེད་ན་བདག་ཚེ་འདིའི་ཤོམ་ར་ལ་སོང་ནས་ཆོས་མི་དྲན་པར་འདུག་པ་ལ། འདིས་ཆོས་དྲན་དུ་བཅུག་པས་འདི་བླ་མ་དཀོན་མཆོག་གི་འཕྲིན་ལས་ཡིན་སྙམ་དུ་བསམ། མདོར་ན་བླ་མ་ལ་བརྟེན་ཏེ་བྱང་ཆུབ་ཀྱི་སེམས་སྐྱེ་བ་ལྟར། གནོད་བྱེད་དམ་དུཿ ཁ་འདི་དག་ལ་བརྟེན་ནས། བདག་ལ་བྱང་ཆུབ་ཀྱི་སེམས་གཉིས་སྐྱེ་བར་འདུག་པས། འདི་དག་གིས་གོ་བཅད་སྙམ་དུ་ཞེ་ཐག་པ་ནས་བསམ་མོ། །བདག་ལ་དུཿ ཁ་བྱུང་བ་ན་འདི་མེད་ན་དགའ་སྟེ་སྙམ་པའི་བསམ་པ་འབྱུང་བས།

དེའི་ཚེ་ཁྱེད་ཀྱིས་དུཿ ཁ་མི་འདོད་ཅིང་བདེ་བ་འདོད་ན་བདེ་བའི་རྒྱུ་ཚོགས་བསོགས་ཤིག་བྱས་པའི་བརྡ་ཡིན་གྱི་སྙམ་པ་བྱས་ལ། བླ་མ་དཀོན་མཆོག་གི་མཆོད་པ། དགེ་འདུན་གྱི་བསྙེན་བཀུར། འབྱུང་བོའི་གཏོར་མ་སོགས། མདོར་ན་ལུས་ངག་ཡིད་གསུམ་གྱི་སྒོ་ནས་ཚོགས་གསོག་པ་ལ་འབད་ཅིང་སྐྱབས་འགྲོ་སེམས་བསྐྱེད་བྱ་སྟེ། བླ་མ་དང་དཀོན་མཆོག་ལ་མཎྜལ་ཕུལ་ལ་གསོལ་བ་དྲག་ཏུ་བཏབ་ནས། བདག་ན་བ་ལེགས་ན་ན་བར་བྱིན་གྱིས་བརླབ་ཏུ་གསོལ། སོས་པ་ལེགས་ན་སོས་པར་བྱིན་གྱིས་བརླབ་ཏུ་གསོལ། ཤི་བ་ལེགས་ན་ཤི་བར་བྱིན་གྱིས་བརླབ་ཏུ་གསོལ། ཞེས་རེ་དོགས་འགོག་པའི་གསོལ་བ་གདབ་བོ། །ཁྱེད་དུཿ ཁ་མི་འདོད་ན་དུཿ ཁའི་རྒྱུ་སྡིག་པ་སྤོངས་ཤིག་བྱས་པའི་བརྡ་ཡིན་སྙམ་པ་བྱས་ལ། སྔར་བྱས་ཀྱི་སྡིག་པ་ལ་འགྱོད་པ་རྣམ་པར་སུན་འབྱིན་པའི་སྟོབས་དང་། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པ་ཉེས་པ་ལས་ལྡོག་པའི་སྟོབས་དང་། དཀོན་མཆོག་ལ་སྐྱབས་སུ་འགྲོ་ཞིང་། བྱང་ཆུབ་ཀྱི་སེམས་བསྐྱེད་པ་རྟེན་གྱི་སྟོབས་དང་། སྟོང་པ་ཉིད་བསྒོམ་པ་དང་། གཟུངས་

སྔགས་ཁྱད་པར་ཅན་ཟློས་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། སྟོབས་བཞིའི་སྒོ་ནས་སྡིག་པ་བཤགས་པ་ཚད་དུ་སློང་བར་བྱའོ། །གདོན་ལ་གཏོར་མ་ཕུལ་ཏེ། ཁྱེད་ཀྱིས་བདག་གིས་བྱང་ཆུབ་ཀྱི་སེམས་གཉིས་སྦྱོང་བའི་གྲོགས་བྱས་པས་བཀའ་དྲིན་ཆེ། ད་དུང་སེམས་ཅན་གྱི་དུཿ ཁ་བདག་ལ་སྨིན་པར་མཛད་དུ་གསོལ། ཞེས་ཞེ་ཐག་པ་ནས་གསོལ་བ་གདབ་བོ། །དེ་ལྟར་མི་ནུས་ན་གཏོར་མ་བྱིན། བྱམས་སྙིང་རྗེ་བསྒོམས་ལ། ངས་ཁྱོད་ལ་འཕྲལ་དང་ཡུན་དུ་གང་ཕན་བྱ་ཡིས། ངའི་ཆོས་ཀྱི་བར་ཆད་མ་བྱེད་ཅིག་ཅེས་བསྒོ་བར་བྱའོ། །ཆོས་སྐྱོང་ལ་གཏོར་མ་ཕུལ་ལ། ཆོས་ཀྱི་འགལ་རྐྱེན་ཞི་བ་དང་། མཐུན་རྐྱེན་འགྲུབ་པར་གསོལ་བ་གདབ་པོ། །ནད་གདོན་དང་དགྲ་ལ་སོགས་པ་གློ་བུར་བ་བྱུང་ནས་དུཿ ཁ་དྲག་པོ་བྱུང་ན། འཇིག་རྟེན་གྱི་ཁམས་ན་འདི་ལྟ་བུའི་སྡུག་བསྔལ་བྱུང་བ་དཔག་ཏུ་མེད་པ་ཡོད་པས། དེ་རྣམས་སྙིང་རེ་རྗེ་སྙམ་དུ་བསམས་ལ། དེ་དག་གི་དུཿ ཁ་ཐམས་ཅད་བདག་ལ་འུབ་ཀྱི་བསྡུ། ཡང་གནོད་བྱེད་འདིས་བདག་གིས་བྱང་ཆུབ་ཀྱི་སེམས་གཉིས་སྦྱང་བའི་གྲོགས་བྱས་པས་བླ་མ་ལྟར་བཀའ་དྲིན་ཆེ་སྙམ་དུ་

བསམ། ཡང་དུཿ ཁ་བ་མཐོང་ན་དེ་མ་ཐག་ཏུ་བླང་ཞིང་། རང་ངམ་གཞན་ལ་ཉོན་མོངས་པ་དྲག་པོ་སྐྱེས་པ་ན། གཞན་གྱི་ཉོན་མོངས་པ་ཐམས་ཅད་བདག་ལ་འདུ་བར་གྱུར་ཅིག་སྙམ་དུ་ཞེ་ཐག་པ་ནས་བསམ་མོ། །རྐྱེན་ངན་ལམ་དུ་བྱ་ཐབས་འདི་ཐམས་ཅད་ཀྱིས་རེ་དོགས་གཉིས་འགོག་པ་ཡིན་པས། མཐར་ཐུག་རེ་དོགས་གཉིས་དང་བྲལ་བའི་ལམ་ལ་སྐྱེལ་ཡང་། ད་ལྟའི་དུས་སུ་དགྲ་ཟུན་གཉིས་སུ་བྱས་ནས་སྦྱོང་བ་ཤིང་འཁྱོགས་པོ་སྲོང་བ་དང་འདྲའོ་ཞེས་གླང་རི་ཐང་པས་གསུངས་སོ། །སྨྲས་པ། ཆོས་རབ་འབྱེད་པའི་བློ་གྲོས་རྒྱ་ཆེ་བའི། །ཆོས་རྣམས་ཀུན་གྱི་དེ་ཉིད་ལེགས་རྟོགས་ནས། །ཆོས་དབྱིངས་ངང་ལས་ནམ་ཡང་མ་གཡོས་བཞིན། ཆོས་ཀྱི་འཁོར་ལོ་བསྐོར་བའི་བླ་མ་མཆོད། །ཆོས་ཚིག་ལྷུག་པར་སྨྲ་བའི་བར་སྐབས་རེ། །ཚིགས་སུ་བཅད་པ་ཡོད་ན་ལྷག་པར་སྙན། །དེ་ཕྱིར་གོང་དུ་བཤད་པའི་མདོ་འགག་རྣམས། །སླར་ཡང་ཚིགས་སུ་བཅད་ནས་སྨྲ་བར་བྱ། །སྣོད་བཅུད་སྡིག་པའི་འབྲས་བུའི་གང་བའི་ཚེ། །རྐྱེན་ངན་བྱང་ཆུབ་ལམ་དུ་བསྒྱུར་བ་གཅེས། །སྡུག་བསྔལ་རང་ཉིད་གཅེས་

པར་བཟུང་ལས་བྱུང་། །བདེ་སྐྱིད་གཞན་རྣམས་གཅེས་པར་བཟུང་ན་ཡོང་། །གནོད་བྱེད་རང་གི་ཚེ་སྔོན་མ་ཡིན་ཀྱང་། །ཉོན་མོངས་གནོད་གྱིས་སྨྱོས་ནས་ངོ་མ་ཤེས། །བུ་ལ་གནོད་པ་བྱེད་པ་སྙིང་རེ་རྗེ། །གནོད་བྱེད་དགྲ་འདིས་ཚེ་སྔོན་མ་བྱས་དུས། །བུ་ངའི་དོན་དུ་སྡུག་བསྔལ་དཔག་མེད་མྱང་། །ད་ཡང་བུ་ངའི་ལས་ཀྱིས་ཁོ་བསྐུལ་ནས། །ང་ལ་གནོད་པ་བྱས་ན་ཕྱི་མ་རུ། །སྡུག་བསྔལ་མྱོང་ངེས་ཤིན་ཏུ་སྙིང་རེ་རྗེ། །བདག་ལ་གནོད་པའི་ལན་དུ་བྱམས་པ་དང་། །སྙིང་རྗེ་བྱང་ཆུབ་སེམས་གཉིས་བསྒོམ་གྱུར་ན། །ཚོགས་རྫོགས་སྒྲིབ་བྱང་སངས་རྒྱས་ཐོབ་པར་འགྱུར། །ང་ལ་གནོད་པར་མི་འདུག་ཕན་པར་འདུག །སྙམ་དུ་དྲིན་གཟོ་མི་དང་ཁྱི་ལྟ་བུ། །དངོས་སུ་ཡོད་ན་ཕན་ཐོགས་གང་ནུས་བྱ། །མེད་ན་ཡིད་ཀྱིས་གཏོང་ལེན་ཡང་ཡང་བྱ། །རྨི་ལམ་སྐབས་སུ་མེས་ཚིག་ཆུས་ཁྱེར་ནས། །ཉམ་ཐག་པ་ལྟར་སྡུག་བསྔལ་གང་བྱུང་ཀྱང་། །འཁྲུལ་སྣང་ཙམ་ཡིན་རང་བཞིན་གྲུབ་པ་མེད། །ཉོན་མོངས་སྡུག་བསྔལ་ངོ་བོ་བལྟས་ཙ་ན། །གང་ནས་མ་སྐྱེས་སྐྱེ་མེད་ཆོས་ཀྱི་སྐུ། །མ་སྐྱེས་པ་ལ་འགག་མེད་ལོངས་སྐུ་ཡིན། །སྐྱེ་འགག་

གནས་པ་མེད་པ་སྤྲུལ་པའི་སྐུ། །དེ་རྣམས་དབྱེར་མེད་ངོ་བོ་ཉིད་ཀྱི་སྐུ། །ཉོན་མོངས་སྡུག་བསྔལ་ངོ་བོ་སྐུ་བཞི་རུ། །བལྟ་བ་སྐུ་བཞི་ངོ་སྤྲོད་གདམས་པ་ལགས། །ཤེས་ན་གནོད་བྱེད་མ་ཡིན་བྱང་ཆུབ་སེམས། །གཉིས་པོ་སྦྱོང་བའི་གྲོགས་ཡིན་ངོ་མཚར་ཆེ། །སྡུག་བསྔལ་མེད་ན་སྙམ་པ་སྐྱེས་པའི་ཚེ། །འོ་ན་དེ་རྒྱུ་སྡིག་པ་སྤོང་དགོས་པའི། །བརྡའ་ཡིན་སྙམ་དུ་སྔར་བྱས་འགྱོད་པ་དང་། །ཕྱིན་ཆད་མི་བྱེད་སྙམ་པའི་དམ་བཅའ་བྱ། །བདེ་བ་ཡོད་ན་སྙམ་པ་སྐྱེས་ཙ་ན། །འོ་ན་དེ་རྒྱུ་ཚོགས་གསོག་བྱ་དགོས་པའི། །བརྡའ་ཡིན་སྙམ་དུ་མཆོད་སྦྱིན་གཏོང་བ་དང་། །ལུས་ངག་ཡིད་གསུམ་སྒོ་ནས་ཚོགས་གསོག་བྱ། །གདོན་ལ་གཏོར་མ་ཕུལ་ཏེ་བྱང་ཆུབ་སེམས། །སྦྱོང་བའི་གྲོགས་ལྡན་མཛོད་ཅེས་བསྒོ་བར་བྱ། །ཆོས་སྐྱོང་མཆོད་ལ་ཆོས་ཀྱི་འགལ་རྐྱེན་ཞི། །མཐུན་རྐྱེན་འགྲུབ་པར་མཛོད་ཅེས་འཕྲིན་བཅོལ་བྱ། །གློ་བུར་ནད་གདོན་དགྲ་སོགས་སྡུག་བསྔལ་རིགས། །རང་ངམ་གཞན་ལ་བྱུང་བ་མཐོང་ཐོས་ཚེ། །འདི་འདྲའི་སྡུག་བསྔལ་ཡོད་ཚད་སྙིང་རེ་རྗེ། །འགྲོ་ཀུན་སྡུག་བསྔལ་ཡིད་ཀྱིས་རང་

ལ་བསྡུ། །དཔེར་ན་རྩྭ་ཤིང་ཅི་ཙམ་མང་ན་ཡང་། །མེ་དཔུང་འབར་བའི་གྲོགས་སུ་འགྲོ་བ་ལྟར། །གནོད་བྱེད་སྡུག་བསྔལ་ཅི་ཙམ་བྱུང་ན་ཡང་། །བྱང་ཆུབ་སེམས་གཉིས་འཕེལ་བའི་གྲོགས་སུ་འགྱུར། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །བཞི་པ་ཚེ་གཅིག་གི་ཉམས་ལེན་དྲིལ་ནས་བསྟན་པ་ནི། རྒྱལ་སྲས་རིན་པོ་ཆེས། ད་ནས་བཟུང་སྟེ་ཟླ་བ་འདི་དང་། ལོ་འདི་དང་། མ་ཤིའི་བར་དང་། སངས་རྒྱས་ཀྱི་བར་དུ་བྱང་ཆུབ་ཀྱི་སེམས་གཉིས་དང་མི་འབྲལ་བར་བྱའོ། །ཞེས་བློས་འཕེན་པ་དྲག་པོ་ཡང་ཡང་བྱའོ་གསུངས། དེ་ཡང་རྗེ་བཙུན་མི་ལ་རས་པ་བྲག་དཀར་རྟ་སོར་བཞུགས་དུས་སུ། བདག་ཉམས་རྟོགས་ཁྱད་པར་ཅན་ཞིག་མ་སྐྱེས་ཀྱི་བར་དུ་རི་ཁྲོད་འདིར་ལྟོགས་གྲིར་ཤི་རུང་། དད་ཟས་དང་གཤིན་ཟས་ཀྱི་ཐལ་བ་འགམ་ཕྱིར་མི་འབབ། འཁྱུགས་གྲིར་ཤི་རུང་གོས་ཕྱིར་མི་འབབ། སྐྱོ་གྲིར་ཤི་རུང་འདུ་འཛི་དང་གཡེང་བའི་ལས་མི་བྱེད། ན་སྟེ་ཤི་རུང་སྨན་ཐུན་གཅིག་གི་ཕྱིར་ཡང་མི་འབབ། ཚེ་འདིའི་བྱ་བ་སྒྲུབ་ཕྱིར་ལུས་འགུལ་བ་ཙམ་ཡང་མི་བྱེད་པར་སྒོ་གསུམ་ཡེངས་མེད་དུ་སངས་རྒྱས་

བསྒྲུབ་བོ། །བདག་གི་དམ་བཅའ་འདི་རྣམས་འགྲུབ་པར་བླ་མ་ཡི་དམ་རྣམས་ཀྱི་བྱིན་གྱིས་རློབས་ཤིག །མཁའ་འགྲོ་ཆོས་སྐྱོང་རྣམས་ཀྱིས་འཕྲིན་ལས་སྒྲུབས་ཤིག །གལ་ཏེ་དམ་བཅའ་འདི་རྣམས་ལས་འགལ་ན་བསྒྲུབ་པ་མི་བྱེད་པའི་མི་ལུས་བས་ཤི་བ་སྐྱིད་པས། དམ་ཅན་རྒྱ་མཚོས་དམ་བཅའ་ལས་འགལ་མ་ཐག་ཏུ་ངའི་སྲོག་ཆོད་ཅིག །བླ་མ་ཡི་དམ་གྱིས་ཕྱི་མར་དམ་པའི་ཆོས་དང་མཇལ་ནས་བསྒྲུབ་པ་བྱེད་ནུས་པའི་མི་ལུས་སུ་སྐྱེ་བར་བྱིན་གྱིས་རློབས་ཤིག །ཅེས་དམ་བཅས་ནས་དམ་བཅའ་སྨོན་ལམ་གྱི་གླུ་འདི་བླངས་སོ། རྗེ་ནཱ་རོའི་བུ་བརྒྱུད་ཐར་པའི་ལམ། །སྤྲང་རི་ཁྲོད་ཟིན་པར་བྱིན་གྱིས་རློབས། །བདུད་འཇིག་རྟེན་གྱི་གཡེང་བས་མི་གཡེང་བར། །བསྒོམ་མཉམ་གཞག་གི་བསམ་གཏན་འཕེལ་བར་ཤོག །ཞི་གནས་ཀྱི་རྫིང་ལ་མི་ཞེན་པར། །ལྷག་མཐོང་གི་མེ་ཏོག་འཁྲུངས་པར་ཤོག །སྤྲོས་བཅས་ཀྱི་ཙབ་ཙུབ་མི་ལྡང་བར། །སྤྲོས་མེད་ཀྱི་ལོ་འདབ་རྒྱས་པར་ཤོག །སྒྲུབ་ཁང་དུ་ཡིད་གཉིས་མི་སྐྱེ་བར། །ཉམས་རྟོགས་ཀྱི་འབྲས་བུ་སྨིན་པར་ཤོག །བདུད་རིགས་ཀྱིས་བར་ཆད་མི་

ནུས་པར། །རང་སེམས་ལ་ངེས་ཤེས་འདྲོངས་པར་ཤོག །ཐབས་ལམ་ལ་ཐེ་ཚོམ་མི་སྐྱེ་བར། །ཕ་རྗེས་བུ་ཡིས་ཟིན་པར་ཤོག །རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་རི་ཁྲོད་ཟིན་པར་བྱིན་གྱིས་རློབས། །ཞེས་སྨོན་ལམ་བཏབ་ནས་དཀའ་སྤྱད་སྙིང་རུས་མཛད་ནས་ལོ་དྲུག་བསྒོམས་པའི་མཐར་ཕྱག་རྒྱ་ཆེན་པོའི་དངོས་གྲུབ་ཐོབ་ནས་ནམ་མཁའ་ལ་འཕུར་ནུས་པ་བྱུང་། སྔོན་ཇོ་བོ་རྗེས་མངའ་རིས་སུ་ཕེབས་དུས། ལོ་ཙཱ་བ་རིན་ཆེན་བཟང་པོས་ཆོས་མང་པོ་ཞུས་སོ། །ཇོ་བོས་ངའི་ལོ་ཙཱ་བ་ལ་འགྲོ་དགོས་གསུངས་པས། དབུ་དཀར་པོར་སོང་བ་བསྟན་ནས། ད་སྒྲུབ་པ་ཞིག་བྱེད་པར་ཞུས་པས། འོ་ན་དེ་ལྟར་གྱིས་གསུངས། དེར་ཁོང་གི་སྒྲུབ་ཁང་གསུམ་རིམ་སྒོ་ལ་རིམ་པ་བཞིན། སྒོ་འདིའི་ནང་ཡན་ཆད་དུ། མི་དགེ་བ་དང་། ཆོས་མིན་དང་། རང་འདོད་ཀྱི་རྟོག་པ་སྐྱེས་ན་ཆོས་སྐྱོང་རྣམས་ཀྱིས་ངའི་མགོ་ཚལ་བར་ཁོས་ལ། ཕྱི་མར་མནར་མེད་དུ་སྐྱུར་ཅིག་ཅེས་མནའ་བོར་ནས་བསྒྲུབས་པས་ལོ་དྲུག་ནས་མཆོག་གི་དངོས་གྲུབ་ཐོབ་བོ། །དེས་ན་ཆོས་བཞིན་བྱེད་པ་ལ་ཐོག་མར་འཕེན་པ་དྲག་པོ་བཏང་དམ་བཅའ་ཞེ་མནའ་བོར་ནས་སྒྲུབ་པ་

གལ་ཆེའོ། །གཞན་དུ་འགྲོ་ཡང་ཁེ་དང་རྒྱལ་ཁ་གཞན་ལ་སྟེར། གྱོང་དང་ཕམ་ཁ་རང་གིས་ལེན་སྙམ་པའི་འཕེན་པ་བཏང་ནས་སོང་ན་རྐྱེན་ངན་པ་རེ་འཕྲད་ཀྱང་བློ་སྦྱོང་མི་འཆོར་ཏེ། སྐྱོར་མོ་ལུང་ན་ཇོ་གདན་བཟང་པོ་ཞིག་ཡོད་པ། དུས་མི་བདེ་བ་ཞིག་གི་དུས་སུ། ཉིན་གཅིག་རྒྱུ་འགྲུལ་ལ་འགྲོ་དགོས་པ་བྱུང་བས། ཁོང་གི་ཐུགས་དགོངས་ལ། དེང་སང་གི་དུས་མི་བདེ་ལུགས་འདིས། དེ་རང་ཡང་ཅི་ཡོང་མི་ཤེས་ཏེ། མི་འདོད་པའི་རྐྱེན་ཅི་བྱུང་ཡང་ཆོས་མ་ཤོར་བ་ཞིག་བྱེད་དགོས་སྙམ་པའི་འཕེན་པ་བཏང་ནས་ཕྱིན་པས། འཇིགས་སར་མི་ངན་མང་པོ་རུབ་ཀྱིས་བྱུང་བས། དང་པོ་སྙིང་ཧད་པ་ཞིག་བྱུང་། དེའི་རྗེས་ལ་ད་ནང་གི་དམ་བཅའ་དྲན་ནས། ཁྱེད་རང་ལ་འཁྱེར་རྒྱུ་གང་འདུག་ཁྱེར་ཅིག་བྱས། ཁོང་ཚོའི་གསེབ་ཏུ་ཕྱིན་པས་ཐུགས་བདེ་འབོལ་གྱིས་སོང་གསུངས། དེས་ན་དུས་རྒྱུན་དུ་བློ་སྦྱོང་གི་ནང་ལྟར་བྱམས་པ་དང་སྙིང་རྗེ་བྱང་ཆུབ་ཀྱི་སེམས་གཉིས་དང་ནམ་ཡང་མི་འབྲལ་བར་བྱའོ་སྙམ་པའི་བློས་འཕེན་པ་དྲག་པོ་ཡང་ཡང་བཏང་བར་བྱའོ། །རྒྱལ་སྲས་རིན་པོ་ཆེས། སྐུ་ཚེ་ཧྲིལ་པོར་

བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱངས་པ་ལྟར། ཐུན་དང་ཐུན་མཚམས། འགྲོ་འཆག་ཉལ་འདུག་སྤྱོད་ལམ་ཐམས་ཅད་ལ་ཡང་དང་ཡང་དུ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་གཉིས་ལ་བློ་སྦྱོང་བའོ། །དེ་ལྟར་སྦྱངས་ཀྱང་རྒྱུད་ལ་མི་སྐྱེ་ན་སྐབས་རེ་རི་ཁྲོད་ཤིན་ཏུ་དབེན་པའི་མི་མེད་ལུང་སྟོང་ངམ། ཡང་ན་གཞན་གྱི་སྐད་མི་གོ་བའི་བུག་པ་ཕུག་རིང་ཚོར་ཕྱིན་ནས། རང་གི་མདུན་དུ་བླ་མ་འཕགས་པ་ཐུགས་རྗེ་ཆེན་པོའི་རྣམ་པར་བསྒོམས་ལ། བླ་མ་སྤྱན་རས་གཟིགས་དབང་ཕྱུག་མཁྱེན། བྱམས་སྙིང་རྗེ་བྱང་ཆུབ་ཀྱི་སེམས་བསྒོམས་ཀྱང་རྒྱུད་ལ་མི་སྐྱེ་བའི་ལས་ངན་དྲེད་པོ་བདག་ལ་ཐུགས་རྗེས་གཟིགས། བྱམས་སྙིང་རྗེ་བྱང་ཆུབ་ཀྱི་སེམས་ད་ལྟ་ཉིད་དུ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་སྐད་ངན་བཏོན་ནས་ངུ་ངག་གིས་གསོལ་བ་འདེབས། དེ་ནས་རྐང་པ་གཡས་ཀྱི་པུས་མོ་ཡར་གྱེན་དུ་བསླང་། གཡོན་གྱི་པུས་མོ་མར་ས་ལ་ཕབ། ལག་པ་གཡས་ཀྱི་གྲུ་མོ་པུས་མོར་བཙུགས་ཏེ་ལག་སོར་རྣམས་འགྲམ་པ་ལ་སྦྱར། གཡོན་གྱི་སོར་མོ་རྣམས་པུས་མོ་ལ་བཀབ་སྟེ། མྱ་ངན་གྱི་འདུག་སྟངས་བྱས་ལ།

དམྱལ་བ་ཡི་དྭགས་ལ་སོགས་པའི་རིགས་དྲུག་གི་སེམས་ཅན་གྱི་སྡུག་བསྔལ་རིམ་བཞིན་རྒྱུད་སྟེང་དུ་བླངས་ནས་རང་གིས་མྱང་བར་བསམ་ཞིང་། དེ་ལྟར་མངོན་སུམ་དུ་མྱོང་མཁན་གྱི་མ་རྒན་སེམས་ཅན་ཉམ་ཐག་རྣམས་ཀྱི་ཉིན་རེ་ཙམ་གྱི་སྡུག་བསྔལ་ཡང་སུ་ཞིག་གིས་བཟོད་སྙིང་རེ་རྗེ་སྙམ་དུ་ངག་ཏུ་ཡང་། ངའི་ཕ་མ་སེམས་ཅན་ཉམ་ཐག་འདི་རྣམས་སྙིང་རེ་རྗེ། འཕགས་པ་སྤྱན་རས་གཟིགས་དབང་ཕྱུག་མཁྱེན། ཕ་མ་སེམས་ཅན་འདི་རྣམས་ལ་ཐུགས་རྗེས་གཟིགས་ཞེས་སྐད་ངན་ཆེན་པོ་རྒྱབ་ནས་ངུ་ཞིང་། ངུ་རྒྱུ་མི་ཡོང་ན་ཡང་ཡོང་བ་ལྟར་བྱས་ཡུན་རིང་ངུས་ན་ནམ་ཞིག་ངུ་རྒྱུ་ཡོང་ཏེ་བླ་མ་གོང་མ་འགའ་རེས། སྨྱོ་རྫུ་བྱས་ན་སྨྱོ་འགོ །ཆོས་རྫུ་བྱས་ན་ཆོས་འགོ་ཟེར་བ་དང་། ངུ་བའི་ཁ་ལ་བལྟས་ན་ངུ་བྲོ། རྒོད་པའི་ཁ་ལ་བལྟས་ན་རྒོད་བྲོ་ཟེར་བ་ལྟར། སྐབས་ཐོག་དེར་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་བཅོས་མ་མ་ཡིན་པ་ཞིག་མ་སྐྱེས་ཀྱང་སྐྱེས་སོང་བ་ལྟར་བྱས་དུས་ན། ཆོས་ཐམས་ཅད་རྟེན་འབྲེལ་ལ་རག་ལས་པས། སྐབས་ཤིག་བྱམས་སྙིང་རྗེ་བྱང་ཆུབ་ཀྱི་སེམས་བཅོས་མ་མ་

ཡིན་པ་རྒྱུད་ལ་སྐྱེ་བར་གསུངས། སྔོན་ལྡི་རི་བྲག་པོ་བྱ་བ་སྤུན་གཉིས་ཀྱིས། དགེ་བཤེས་སྟོན་པ་ལ་གྲུབ་མཐའ་ཉན་འོངས་པས། སྟོན་པ་རིན་པོ་ཆེའི་ཞལ་ནས། རྒྱ་གར་ན་ནང་པ་སངས་རྒྱས་པའི་འཇུག་པ་གཅིག་བྱ་བ་དང་། ཕྱི་རོལ་པའི་འཇུག་པ་རྣམ་པ་བདུན་བྱ་བ་ཡོད་ཟེར། རང་ཅག་བླ་མའི་མན་ངག་སྒོམས། མན་ངག་གང་ཡིན་ན་འཆི་བ་དང་ལས་འབྲས་མང་དུ་བསྒོམས་ལ་ཚུལ་ཁྲིམས་དག་པར་བྱ། བྱམས་པ་དང་སྙིང་རྗེ་བྱང་ཆུབ་ཀྱི་སེམས་བརྟན་པར་བསྒོམས་ནས། དེས་འཕངས་པས་སྒོ་དུ་མ་ནས་ཚོགས་གསོག་སྒྲིབ་པ་སྦྱོང་བ་མན་ངག་ཡིན་གསུངས། ཡང་སྟོན་པ་འོད་ཟེར་རྒྱ་མཚོ་བྱ་བ་ཞིག་གིས་ཞུས་པ་ལ་ཡང་དེ་སྐད་གསུངས། ཁམས་པ་དཔལ་འབར་གྱིས་འགྲོ་ཆོས་ཞུས་པས་ཀྱང་སྟོན་པ་རིན་པོ་ཆེའི་ཞལ་ནས། འགྲོ་འཆག་ཉལ་འདུག་ཐམས་ཅད་ཏིང་ངེ་འཛིན་དུ་འགྲོ་བ་ཞིག་ཡོད་དེ། དེ་གཞོན་དུས་ལུས་སེམས་ལ་སྦྱངས་པ་བྱས་པ་ཞིག་ལ་ཡོང་བ་ཡིན། རང་ཅག་བླ་མའི་མན་ངག་སྒོམས། མན་ངག་གང་ཡིན་ན་འཆི་བ་དང་ལས་འབྲས་མང་དུ་བསམས་ནས་ཚུལ་ཁྲིམས་དག་པར་བྱ། བྱམས་དང་སྙིང་

རྗེ་བྱང་ཆུབ་ཀྱི་སེམས་བརྟན་པར་སྒོམས། དེས་འཕངས་པས་ཚོགས་སྣ་ཚོགས་ནས་གསོག །སྡིག་སྣ་ཚོགས་ནས་སྦྱངས་པ་དེ་མན་ངག་ཡིན་གསུངས། དེས་ན་བྱང་ཆུབ་ཀྱི་སེམས་གཉིས་སྐྱེས་པ་དང་འཕེལ་བའི་དོན་དུ་ཅི་ནུས་པའི་ཚོགས་གསོག་པར་བྱའོ། །ཚོགས་གསོག་ཚུལ་ནི་བླ་མའི་ཞབས་ཏོག །དཀོན་མཆོག་མཆོད་པ། དགེ་འདུན་ལ་བསྙེན་བཀུར། ངན་སློང་ལ་སྦྱིན་གཏོང་བྱ་ཞིང་ཁྱད་པར་ཚེགས་ཆུང་ངུའི་ཚོགས་གཉིས་བདེ་བླག་ཏུ་རྫོགས་པའི་ཐབས་གཏོར་མ་བཏང་ན་ཕན་ཡོན་ཆེ་སྟེ། སྔོན་གྲོང་ཁྱེར་སེར་སྐྱའི་ནགས་ཁྲོད་དུ། གཅུང་དགའ་བོ་ཆོས་ཡིད་ལ་བྱེད་ཅིང་ཡོད་པའི་དྲུང་དུ་ནམ་གྱི་ཆ་སྨད་ལ། ཡི་དྭགས་ཁ་ལ་མེ་འབར་བ་འཇིགས་ཤིང་སྐྱི་གཡའ་བ་ཞིག་བྱུང་ནས། ཁྱོད་ད་སྟེ་ཞག་བདུན་ནས་འཆི་བ་ཡོད། ངའི་ཟས་སྐལ་ཡིན་ཟེར་བས། དགའ་བོ་བྲེད་ནས་བཅོམ་ལྡན་འདས་ལ་ཞུས་པས། སྟོན་པས་གཟུངས་སྔགས་གཟི་བརྗིད་ཚད་མེད་པའི་གཏོར་མ་འདི་ཐོངས་གསུངས་ནས། དགའ་བོས་གཏོར་མ་བཏང་བས་དུས་མ་ཡིན་པར་འཆི་བའི་འཇིགས་པ་ལས་གྲོལ་ཏེ།

ཡོན་ཏན་ཚད་མེད་བརྙེས་པར་གསུངས། སྔོན་རྣལ་འབྱོར་ཀུན་ལྡན་རི་པ་ཞེས་པ་ཞིག་གིས། གཏོར་མ་གཏོང་བའི་དུས་སུ། མི་མ་ཡིན་ཕྲ་མོ་མང་པོ་གླུ་གར་བྱེད་ཅིང་རྩེད་མོ་བྱེད་ཀྱིན་ཡོད་པ་ལས་ཕྱིས་དེ་རྣམས་ངུ་བ་ལ། ཁྱེད་རྣམས་ཅི་ལ་དུ་བྱས་པས། ཁྱེད་ད་ཞག་བདུན་ནས་འཆི་བར་འདུག་པས། ངེད་རྣམས་ལ་གཏོར་མ་སྟེར་མཁན་མི་ཡོང་བ་འདུག་པས་དུ་བ་ཡིན་ཟེར་སྐད། དེ་ལ་ཐབས་མེད་དམ་བྱས་པས། ཁོང་རྣམས་ན་རེ། ཐབས་ཡོད། བདོག་པ་ཐམས་ཅད་ཐོངས་ཤིག །ངེད་རྣམས་ཀྱིས་རྒྱ་མཚོའི་འགྲམ་ན་སྨན་ཆེན་པོ་ཞེས་བྱ་བའི་དངུལ་ཆུ་ཡོད་པས་བླངས་ནས་སྦྱིན་གྱིས། དེའི་བཅུད་ལེན་གྱིས་ཤིག་དང་ཚེ་འཕེལ་བར་འགྱུར་རོ་ཞེས་ཟེར་བས། རྣལ་འབྱོར་པས་རྫས་ཀྱི་དངོས་པོ་ཡོད་ཚད་པོ་གཏོར་མར་བཏང་བས་ཚེ་འཕེལ་ནས་ལོ་ལྔ་བརྒྱ་ཐུབ་པར་གསུངས། གཞན་ཡང་གཏོར་མ་བརྒྱ་རྩ་བཏང་ན་ཚེ་ཡི་བར་ཆད་སེལ་ཞིང་ཚེ་རིང་བ་སོགས་ཕན་ཡོན་བཅུ་གཉིས་ཙམ་འབྱུང་བར་གཏོར་མ་བརྒྱ་རྩའི་རྣམ་བཤད་ནས་གསུངས་སོ། །དེས་ན་གཏོར་མ་བརྒྱ་རྩ་གཏོང་བ་ལ་ཡང་བརྩོན་པར་བྱའོ། །ཚོགས་བསགས་ན་སྒོམ་གང་

ཡང་རྒྱུད་ལ་མྱུར་དུ་སྐྱེས་ནས་གྲུབ་པ་ཐོབ་སྟེ། སྔོན་ནུབ་ཕྱོགས་ཨོ་རྒྱན་གྱི་ཡུལ་ན་གྲུབ་པ་ཐོབ་པ་རྣམས་ཀྱིས་ཐོག་མར་ཚེ་བློས་གཏོང་དུས། ནོར་གང་ཡོད་དགེ་འདུན་སྡེ་ལ་ཕུལ་ནས་དབེན་པར་སྒོམ་བྱས་པས། ཉམས་རྟོགས་མྱུར་དུ་ཤར་ནས་གྲུབ་པ་ཐོབ་པ་ཤ་སྟག་བྱུང་། རྗེས་སུ་དགེ་འདུན་གྱི་སྡེ་རྣམས་འཐོར་བ་བྱུང་ནས་གྲུབ་པ་ཐོབ་འདོད་པ་རྣམས་ཀྱིས་ཚེ་བློས་གཏོང་དུས། ནོར་གང་ཡོད་ཁྱིམ་པ་སོགས་ཞིང་མ་དག་པ་ལ་བཏང་ནས་དབེན་པར་སྒྲུབ་པ་ཡིན་རིང་བྱས་ཀྱང་གྲུབ་པ་ཐོབ་པ་མ་བྱུང་སྐད། བླ་མ་དྷརྨ་རཀྵི་ཏས། བསོད་ནམས་ཀྱི་ཚོགས་རླབས་ཆེན་བསགས་པའི་མཐུས། གནས་ལུགས་སྟོང་པ་ཉིད་ཀྱི་དོན། ཀླུ་སྒྲུབ་ཡབ་སྲས་ཀྱི་དགོངས་པ་བཞིན་ཐུགས་ལ་འཁྲུངས། དབུ་མ་རིགས་ཚོགས་རྣམས་ཀྱང་གཞན་གྱི་བསླབ་པ་དང་དཔེ་གཟིགས་པ་ལ་མ་ལྟོས་པར་ཐུགས་ལ་ཝལ་གྱིས་ཤར་ནས་ཞལ་འདོན་དུ་མཛད་པ་ཞིག་བྱུང་གསུངས། དེས་ན་བྱམས་པ་དང་སྙིང་རྗེ་བྱང་ཆུབ་ཀྱི་སེམས་གཉིས་རྒྱུད་ལ་སྐྱེས་ནས། རང་གཞན་གྱི་དོན་གཉིས་ལྷུན་གྱིས་འགྲུབ་པའི་ཕྱིར་སྒོ་སྣ་ཚོགས་ནས་

ཚོགས་གསོག་པ་ལ་འབད་པར་བྱའོ། །རྒྱལ་སྲས་རིན་པོ་ཆེས། བདག་གཅེས་འཛིན་གྱི་རྣམ་རྟོག་བྱུང་བ་ན། འདིས་ཐོག་མ་མེད་པ་ནས་དུཿཁ་སྣ་ཚོགས་ལ་སྦྱར། ཚེ་འདིར་ཡང་སྡིག་པ། ཆོས་འདོད་པ་བཞིན་མ་བྱུང་བ་ལ་སོགས་པ་ཐམས་ཅད་འདིས་བྱས་པ་ཡིན་སྙམ་པ་བྱས་ལ། བདག་གཅེས་འཛིན་གྱི་རྣམ་རྟོག་རྒྱངས་ཀྱིས་སྤང་བར་བྱའོ་གསུངས། སྤྱན་སྔ་བ་བློ་གྲོས་རྒྱལ་མཚན་གྱི་ཞལ་ནས། ང་རྒྱལ་གྱི་བྲག་རི་ལ་བདག་འཛིན་གྱི་རྫོང་བཅས་ནས་ཉོན་མོངས་ཀྱི་དམག་དཔུང་འགྱེད་པ། ཞེ་སྡང་གི་རལ་གྲིས་བསོད་ནམས་ཀྱི་ལྗོན་ཤིང་གཅོད་པ། ཁོང་ཁྲོའི་གཞུ་ལ་ཚིག་རྩུབ་ཀྱི་མདའ་བཀང་སྟེ་ཕ་རོལ་གྱི་སྙིང་ལ་འདེབས་པ། སེར་སྣའི་ཞགས་པས་གཏོང་སེམས་ཀྱི་སྐྱེས་བུ་དམ་དུ་བཅིང་བ། ཚུལ་མིན་ཡིད་བྱེད་ཀྱི་རླུང་དམར་གྱིས་འདོད་ཆགས་ཀྱི་ཆུ་བོ་གཡོས་པས་དགེ་བའི་གྲུ་བཤིག་པ། ཐེ་ཚོམ་གྱི་ཁ་ཕྲག་ཏུ་ཤེས་རབ་ཀྱི་འགྲོས་བཤོལ་བ། ཐར་འདོད་ཀྱི་སྐྱེས་བུ་ལྟ་ངན་གྱི་དོང་དུ་འཇུག་པའི་དགྲ་བོ་འདི་ལ་སྔོན་ཆད་དགྲར་མགོ །ད་ནི་རྗེ་བླ་མའི་བྱིན་རླབས་ཀྱིས་རང་ལ་དགྲར་ངོ་འཕྲོད། ཞེས་གསུངས་ཤིང་། སེམས་

དཔའ་ཆེན་པོ་ཧོར་སྟོན་པའི་ཞལ་ནས། གཏི་མུག་མ་རིག་པས་དྲངས་པའི་རང་གཅེས་པར་འཛིན་ཅིང་། གཞན་ཡལ་བར་འདོར་བ་འདིས་ལོག་པར་ལྟ་བའི་མཚོན་རྣོན་པོ་བཟུང་སྟེ། དགེ་སྡིག་ཁྱད་དུ་བསད་ནས་མངོན་མཐོ་ངེས་ལེགས་ཀྱི་སྲོག་གཅོད་པའི་སྡིག་ཅན་བཤན་པ་མཁན་དེ་ཡང་འདིར་འདུག །རང་གཅེས་འདིས་དུག་གསུམ་གྱི་རྐྱལ་བ་ཐོགས་དགེ་བའི་ལོ་ཐོག་འཇོམས་པར་བྱེད་པའི་ཆོམ་རྐུན་དེ་ཡང་འདིར་འདུག །སྙིང་གི་ཕུགས་སུ་བསོད་ནམས་མ་ཡིན་པའི་རྫས་ངན་དུ་མ་བསགས་ནས། མི་དང་མི་མ་ཡིན་གྱི་གནོད་བྱེད་ཐམས་ཅད་སྤྱན་འདྲེན་པར་བྱེད་པའི་ཕུང་བྱེད་འུག་པའི་མགོ་བོ་ཅན་དེ་ཡང་འདིར་འདུག །མདོར་ན་གྱོང་དང་སྡུག་བསྔལ་ཐམས་ཅད་བསྐྱེད་པའི་གཞི་རང་གཅེས་ཀྱི་དབང་དུ་ལུས་ངག་ཡིད་གསུམ་གྱི་སྤྱོད་པ་བཏང་ན། ཕྱི་དགྲ་དང་ནང་འཁྲུག །འདི་ཕྱིའི་གནོད་པ་ཐམས་ཅད་འབྱུང་བའི་སྔ་ལྟས་ལྟས་ངན་གྱི་བྱེའུ་མགོ་སྔོན་ལྟ་བུ་དེ། རང་གཅེས་འཛིན་གཞན་ཡལ་བར་འདོར་བའི་བློར་ཤེས་པར་བྱས་ལ། འདི་ལ་དགྲར་ཅེར་གྱིས་བཟུང་ལ་དགྲ་ཟུན་གྱི་རུ་ཕྱེད་པར་བྱ་ཞེས་

གསུངས་པ་ལྟར། བདག་འཛིན་ལ་དགྲ་རུ་བལྟས་ནས་མིང་ངན་བཏགས། ནམ་བྱུང་ཡང་ཁྱད་གསོད་སུན་འབྱིན་ཁོ་ན་བྱས། ཚེ་མཇུག་འདི་ལ་འགོང་པོ་འདི་ཅི་ཐུལ་ལ་འབད་པར་བྱའོ། །རྒྱལ་སྲས་རིན་པོ་ཆེས། དགེ་སྦྱོར་ཐམས་ཅད་ཀྱི་གཤམ་དུ་ད་ནས་སངས་རྒྱས་མ་ཐོབ་ཀྱི་བར་དུ་བྱང་ཆུབ་ཀྱི་སེམས་གཉིས་སྦྱོང་བ་དང་མི་འབྲལ་བར་གྱུར་ཅིག །རྐྱེན་ངན་ཅི་བྱུང་ཐམས་ཅད་ཆོས་འདིའི་གྲོགས་སུ་འཁྱེར་བར་གྱུར་ཅིག །ཅེས་སྨོན་ལམ་གདབ་ཅིང་། བླ་མ་དཀོན་མཆོག་དང་ཆོས་སྐྱོང་ལ་གཏོར་མ་ཕུལ་ནས། དེ་ལྟར་འགྱུར་བར་མཛད་དུ་གསོལ། ཞེས་གསོལ་བ་ཡང་གདབ་བོ་གསུངས། གསོལ་བ་འདེབས་ཚུལ་ཡང་དུས་གསུམ་སྐྱབས་གནས་ཀུན་འདུས་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །བླ་མ་དགེ་བའི་བཤེས་གཉེན་རིན་པོ་ཆེ་བརྒྱུད་པ་དང་བཅས་པ་རྣམས་ཀྱི་ཐུགས་རྒྱུད་ལ་ཅི་ལྟར་འཁྲུངས་པ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་ལ་ཇི་ལྟར་མངའ་བ། ངེས་པའི་དོན་གྱི་མདོ་སྡེ་རིན་པོ་ཆེ་རྣམས་ཀྱི་བརྗོད་བྱའི་དོན་གྱི་མཐིལ། ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་རིན་པོ་

ཆེ་རྣམ་པ་གཉིས་བདག་གི་རྒྱུད་ལ་ད་ལྟ་ཉིད་དུ་སྐྱེ་བར་བྱིན་གྱིས་བརླབ་ཏུ་གསོལ། འབྱོར་པ་རྒུད་པ། མཐོ་བ་དམའ་བ། བདེ་བ་སྡུག་པ། ན་བ་འཆི་འཕོ་བ། སྐྱེ་བའི་གནས་སྐབས་ཐམས་ཅད་དུ་བྱང་ཆུབ་ཀྱི་སེམས་རིན་པོ་ཆེ་མི་བརྗེད་པར་མངོན་དུ་འགྱུར་བར་བྱིན་གྱིས་བརླབ་ཏུ་གསོལ། རྐྱེན་དང་བར་ཆད་ཅི་བྱུང་ཡང་ཆོས་འདིའི་གྲོགས་སུ་འཁྱེར་ནུས་པར་བྱིན་གྱིས་བརླབ་ཏུ་གསོལ། ཞེས་གསོལ་བ་འདེབས་པར་བྱའོ། །འོ་ན་ཆོས་འདིའི་ལུགས་ཀྱི་འཆི་ཁ་མའི་གདམས་ངག་ཅི་ལྟར་བྱེད་ན། རྒྱལ་སྲས་རིན་པོ་ཆེས། ཡོ་བྱད་ཐམས་ཅད་བླ་མ་དཀོན་མཆོག་ལ་མཆོད་པ་ལ་སོགས་བསོད་ནམས་གང་ཆེ་སར་གཏང་ལ། དེ་རྣམས་ལ་ཆགས་ཞེན་མེད་པར་བྱ། བླ་མ་དཀོན་མཆོག་ལ་ཡན་ལག་བདུན་པ་ཕུལ་སྟེ། བདག་བར་དོ་ཚེ་རབས་ཕྱི་མ་ཐམས་ཅད་དུ་བྱང་ཆུབ་ཀྱི་སེམས་གཉིས་སྦྱོང་བར་བྱིན་གྱིས་བརླབ་ཏུ་གསོལ། ཆོས་འདི་སྟོན་པའི་བླ་མ་དང་མཇལ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ་ཅིང་། དེ་ལྟར་སྨོན་ལམ་ཀྱང་གདབ་པོ། །བདག་གཅེས་འཛིན་གྱི་རྣམ་

རྟོག་འདིས་སྔར་ཡང་སྡུག་ཏུ་བཅུག །ད་དུང་ཡང་འདི་དང་མ་བྲལ་ན་བདེར་མི་སྟེར་འདུག་ཅིང་། ད་ལྟ་ཡང་ལུས་འདི་ལ་གཅེས་པར་བཟུང་ནས་དུཿཁ་བར་འདུག་པས། ལུས་ལ་གཅེས་འཛིན་གྱི་རྣམ་རྟོག་སྤངས་ནས། སེམས་ལ་བདག་ཏུ་བཟུང་རྒྱུ་མི་འདུག་པས། ལུས་སེམས་གང་ལ་ཡང་བདག་འཛིན་སྤང་ལ་བཞག་གོ །ངས་བར་དོར་ཡང་བྱང་ཆུབ་ཀྱི་སེམས་གཉིས་སྦྱང་བར་བྱའོ་སྙམ་པའི་འདུན་པ་དྲག་པོ་ཡང་ཡང་བྱའོ། །དེ་ནས་སྔར་གྱི་བྱང་ཆུབ་ཀྱི་སེམས་གཉིས་སྦྱོང་ཚུལ་དེ་དྲན་པར་བྱེད་པའོ་གསུངས། སྤྱོད་ལམ་ནི། སྔོན་ཡང་དག་པར་རྫོགས་པའི་སངས་རྒྱས་ཀྱིས། གྲོང་ཁྱེར་རྩྭ་ཅན་དུ། མྱ་ངན་ལས་འདའ་བའི་ཚུལ་སྟོན་པའི་ཚེ། སྐུའི་གཞོགས་གཡས་པ་ཕབ། ཕྱག་གཡས་འགྲམ་པ་ལ་སྦྱར། གཡོན་བརླའི་སྟེང་དུ་བརྐྱངས། ཞབས་གཡས་པའི་སྟེང་དུ་གཡོན་པ་བཞག །དབུ་བྱང་དང་ཞལ་ནུབ་ཏུ་བསྟན་ནས་གཤེགས་པར་མཛད་དོ་སྙམ་དུ་སྟོན་པའི་རྣམ་ཐར་དྲན་པར་བྱས་ཏེ། གཞོགས་གཡས་པ་ཕབ། མཐེའུ་ཆུང་ངམ་སྲིན་ལག་གིས་སྣ་བུག་གཡས་བཀག་ལ་རླུང་གཡོན་ནས་རྒྱུ་བར་བྱ། ལག་པ་

གཡོན་བརླའི་སྟེང་དུ་བརྐྱངས། རྐང་པ་གཡས་པའི་སྟེང་དུ་གཡོན་པ་བཞག །མགོ་བྱང་ཁ་ནུབ་ཏུ་བལྟ་བར་བྱའོ། །དེ་ལྟ་བུའི་སྤྱོད་ལམ་གྱིས་གནས་ན་བདུད་དང་ལོག་འདྲེན་གྱིས་གནོད་པར་མི་ནུས་ཤིང་། ཉོན་མོངས་པས་ཀྱང་མི་བརྫི་བ་དང་། སྟོན་པའི་རྣམ་ཐར་རྗེས་སུ་དྲན་པའི་མཐུས་བྱང་ཆུབ་ཀྱི་སེམས་རིན་པོ་ཆེ་ཤུགས་དྲག་སྐྱེ་བ་སོགས་ཕན་ཡོན་ཤིན་ཏུ་ཆེ་བར་གསུངས། དེས་ན་སྤྱོད་ལམ་འདི་ནི་འཆི་ཁ་ཙམ་དུ་མ་ཟད་དེང་སང་མཚན་མོ་ཉལ་བའི་ཚེ་ནའང་འདི་ལྟར་བྱས་ན་ཤིན་ཏུ་ལེགས་སོ། །དེ་ནས་བྱམས་སྙིང་རྗེ་སྔོན་དུ་འགྲོ་བས་རླུང་འགྲོ་འོང་ལ་བསྐྱོན་ནས་གཏོང་ལེན་གཉིས་པོ་སྦྱང་ངོ་། །དེའི་རྗེས་ལ་འཁོར་འདས་སྐྱེ་འཆི་ལ་སོགས་པ་ཐམས་ཅད་སེམས་སྣང་ཡིན། སེམས་ཉིད་ཅིར་ཡང་མ་གྲུབ་པའི་ངང་ལ་བློས་ཅིར་ཡང་མི་འཛིན་པར་བཞག་གོ །དེ་ལྟར་བྱང་ཆུབ་ཀྱི་སེམས་གཉིས་པོ་དེ་སྤེལ་ཞིང་སྒོམ་པའི་འཕྲོ་ལ་འཆི་བར་བྱའོ། །འཆི་ཁ་མའི་གདམས་ངག་ལ་འུད་ཆེ་བ་མང་སྟེ། འདི་བས་ངོ་མཚར་ཆེ་བ་མེད་གསུངས། དེ་ཡང་བྱམས་པ་དང་སྙིང་རྗེ་བདག་བས་གཞན་གཅེས་ཀྱི་སྒོ་

ནས་འཕོས་ན་འཕོ་བའི་མཆོག་ཡིན་ཏེ། མ་སྨད་གཉིས་ཆུས་ཁྱེར་བས། མ་ལ་བུ་མོ་འདི་མ་ཤི་ན། བུ་མོ་ལ་མ་འདི་མ་ཤི་ན་སྙམ་པའི་བསམ་པ་བྱུང་བས་གཉིས་ཀ་ཚངས་པའི་གནས་སུ་སྐྱེས་པར་གསུངས། རྒྱལ་སྲས་རིན་པོ་ཆེས། སྐུ་གཤེགས་ཁར་སྙིང་རྗེ་དམིགས་པ་ཆེད་ཀྱིས་མ་བྱས་ཀྱང་། འགྲོ་བའི་དུཿ ཁ་དྲན་ཙམ་ན་ངམ་ངམ་ཤུགས་ཀྱིས་སྐྱེས་པར་འདུག །བྱུང་རྒྱལ་དུ་བཏང་ན་ཉིད་ཅག་རྣམས་ཡ་ང་བར་དོགས་ནས་དྲན་འཛིན་ཆེན་པོ་བྱས་པ་ཡིན་འཆི་ཁར་འཕོ་བ་ཡང་སྒོམ་པ་ལ་འདི་འདྲའི་འཕྲོ་ལ་ཤི་ན་ཡང་ལེགས་པ་ཡིན་མོད་གསུངས། གཞན་ཡང་དམྱལ་བ་གྱད་ཀྱི་ཤིང་རྟ་འདྲེན་པ་དང་། མཛའ་བོའི་བུ་མོའི་ལོ་རྒྱུས་སོགས་དང་། བདག་བས་གཞན་གཅེས་ཀྱི་བློ་བཅོས་མིན་སྐྱེས་པས། འདི་ཉིད་དུའང་ངོ་མཚར་བའི་ལྟས་དུ་མ་འབྱུང་སྟེ། བྱ་བ་ཀོ་ཁར་ཀོ་བ་གཅིག་གི་ནང་དུ་བཙུན་པ་དྲུག་དང་བང་ཆེན་པ་གཅིག་གིས་ཞུགས་ནས་ཀོ་བ་གཏང་བས་ཆུའི་བཞི་ཆ་ཙམ་སོང་བ་དང་། ཀོ་མཁན་ན་རེ་ཅུང་ལྕི་འདུག་པས་སྐྱལ་ཤེས་པ་ཡོད་ན་གཅིག་འཐོན་རོགས་གྱིས། ཡང་ན་ང་ཡིས་འཐོན་གྱི་ཁྱེད་རང་གཅིག་གིས་སྐྱ་བ་ཟུངས་

ཟེར་བ་ལ། ཐམས་ཅད་ཀྱིས་གཉིས་ཀ་མི་ཤེས་པར་འདུག །བང་ཆེན་པ་དེ་ན་རེ་ཐམས་ཅད་ཤི་བ་བས་ང་གཅིག་པུ་ཤི་བ་དྲགས་ཟེར་ནས་ཆུ་ལ་མཆོངས་པས། དེ་མ་ཐག་འཇའ་ཟུག །མེ་ཏོག་གི་ཆར་བབ། སྐྱལ་མི་ཤེས་ཀྱང་ཇི་ཞིག་ལྟར་ན་ཆུ་མཐར་ཐོན་ནས་མ་ཤི་ཟེར། དེས་སྔར་ཆོས་ཙམ་བྱས་པའི་རིགས་སུ་མི་འདུག་ཟེར་ཏེ། བློ་རྣམ་དག་ལན་རེ་ལའང་དེ་འདྲ་འབྱུང་ན། འཆི་ཁར་མང་དུ་བསྒོམས་ན་འཕོ་བའི་མཆོག་ཡིན་པ་སྨོས་ཅི་དགོས་གསུངས། ཡང་འཕོ་བྱ་འཕོ་བྱེད་དང་བྲལ་བའི་དོན་དམ་བྱང་ཆུབ་ཀྱི་སེམས་ཀྱི་སྒོ་ནས་འཕོ་ན་ཡང་འཕོ་བའི་མཆོག་ཡིན་ཏེ། གྲུབ་ཆེན་ལས་ཀྱི་རྡོ་རྗེའི་ཞལ་ནས། འཆི་ཁར་ཚེ་འདིའི་ཆགས་ཞེན་གྱི་འཁྲུལ་པ་ཐམས་ཅད་རྦད་ཀྱིས་བཅད་ལ། དོན་དམ་པར་སེམས་ལ་སྐྱེ་ཤི་མེད་པར་ཐག་བཅད། ཕྱག་རྒྱ་ཆེན་པོ་ལ་སྒོམ་རྒྱུ་མེད་པར་ཐག་བཅད། སྒོམ་མེད་ཀྱི་དོན་ལ་མ་ཡེངས་པར་བཞག་པས་ཡེ་ཤེས་ཟང་ཐལ་དུ་སོང་ནས་བར་དོ་མེད་པར་འཚང་རྒྱའོ་གསུངས། དེས་ན་བྱམས་སྙིང་རྗེ་བྱང་ཆུབ་ཀྱི་སེམས་གཉིས་ཀྱི་སྒོ་ནས་འཕོ་བར་བྱའོ། །གཞན་ཡང་དམིགས་

པ་དང་རླུང་སྦྱོར་སོགས་ཀྱི་སྒོ་ནས་འཕོ་བའང་ཤིན་ཏུ་ཟབ་གསུངས། རྫས་ཀྱི་འཕོ་བ་ནི། རྡོ་ཁབ་ལེན་དང་། འགྲོན་བུ་བུ་ཆེ་མ་བསྲེགས་པ་ཞིབ་ཏུ་བཏགས་ནས་སྦྲང་སྨྱོན་གྱིས་སྦྲུས་ཏེ་རིལ་བུ་སྲན་མ་ཙམ་བྱས་པ་འཆི་ཁར་ཆང་ལ་སྦྱངས་ནས་སྤྱི་གཙུག་ཏུ་བསྐུད་པའང་གནད་ཟབ་མོ་ཡིན་གསུངས་སོ། །སྨྲས་པ། ལེགས་བྱས་དགེ་ཚོགས་བྱེ་བས་བསྐྲུན་པའི་སྐུ། །ལེགས་བཤད་འགྲོ་བའི་རྣ་བར་སྒྲོག་པའི་གསུང་། །ལེགས་ཉེས་ཆོས་ཀུན་ས་ལེར་མཁྱེན་པའི་ཐུགས། །ལེགས་ཚོགས་རྩ་བ་བླ་མའི་ཞབས་ལ་འདུད། །དམ་པའི་ཆོས་ཀྱི་གླུ་དབྱངས་ལེན་པ་དེ། །དམ་པ་གོང་མའི་ཕྱག་སྲོལ་ཡིན་པས་ན། །དམ་ཆོས་གླུ་དབྱངས་སྙན་མོ་ལེན་ལ་སྤྲོ། །དམ་གཙང་མཆེད་ལྕམ་སློབ་བུའི་ཚོགས་རྣམས་ཉོན། །དེང་ནས་བཟུང་སྟེ་སངས་རྒྱས་མ་ཐོབ་བར། །བྱང་ཆུབ་སེམས་གཉིས་སྦྱོང་བའི་འཕེན་པ་བཏང་། །ཡང་དང་ཡང་དུ་བྱང་ཆུབ་སེམས་གཉིས་སྦྱང་། །དེ་གཉིས་སྐྱེ་དང་འཕེལ་ཕྱིར་ཚོགས་བསགས་བྱ། །རང་ཉིད་གཅེས་པར་འཛིན་པའི་རྣམ་རྟོག་འདིས། །སྔར་ཡང་སྡུག་བཏང་ད་དུང་ཡིན་ན་ཡང་། །སྡུག་ལ་སྦྱོར་

ངེས་ཆོས་བཞིན་མ་བྱུང་བ། །འདི་ཡིས་ལན་པ་ཡིན་པས་དུག་བཞིན་སྤོངས། །དགེ་སྦྱོར་མཇུག་ཏུ་སངས་རྒྱས་མ་ཐོབ་བར། །བྱང་ཆུབ་སེམས་དང་ནམ་ཡང་མི་འབྲལ་ཤོག །རྐྱེན་ངན་ཅི་བྱུང་བྱང་ཆུབ་སེམས་གཉིས་ཀྱི། །གྲོགས་སུ་འཁྱེར་བར་ཤོག་ཅེས་སྨོན་ལམ་གདབ། །འཆི་ཁར་ཡོ་བྱད་ཐམས་ཅད་མཆོད་པ་སོགས། །བསོད་ནམས་ཆེ་སར་བཏང་ནས་ཆགས་མེད་བྱ། །བླ་མ་མཆོག་གསུམ་མདུན་གྱི་ནམ་མཁར་དམིགས། །ཡིད་ཀྱིས་ཡན་ལག་བདུན་པ་མཎྜལ་ཕུལ། །བདག་ནི་བར་དོར་ཕྱི་མར་སོང་ན་ཡང་། །བྱང་ཆུབ་སེམས་གཉིས་འབྱོངས་པར་བྱིན་གྱིས་རློབས། །བྱང་ཆུབ་སེམས་ཀྱི་གདམས་པ་སྟོན་མཛད་པའི། །རྩ་བའི་བླ་མར་མཇལ་བར་བྱིན་གྱིས་རློབས། །ཞེས་པས་གསོལ་བ་ཤུགས་དྲགས་ཡང་ཡང་བཏབ། །དེ་ལྟར་འགྲུབ་པའི་བསྔོ་བ་སྨིན་ལམ་བྱ། །ལུས་འདི་གཅེས་པར་བཟུང་ནས་སྡུག་བསྔལ་བར། །འདུག་པས་ལུས་ཀྱི་གཅེས་འཛིན་རྣམ་རྟོག་སྤོངས། །སེམས་ལ་བདག་ཏུ་བཟུང་རྒྱུ་མི་འདུག་པས། །ལུས་སེམས་གང་ལ་བདག་འཛིན་སྤངས་ལ་བཞག །

བར་དོར་སོང་ཡང་བྱང་ཆུབ་སེམས་གཉིས་པོ། །སྦྱང་བར་བྱ་སྙམ་འདུན་པ་ཡང་ཡང་བྱ། །དེ་ནས་འཆི་ཁར་བྱང་ཆུབ་སེམས་གཉིས་པོ། །སྦྱོང་ཚུལ་དེ་ཡང་ཡིད་ལ་དྲན་པར་བྱ། །གཞོགས་གཡས་འོག་བཅུག་ལག་གཡས་འགྲམ་པ་བརྟེན། །མཐེ་འུ་ཆུང་གིས་སྣ་བུག་གཡས་པ་བཀག །དེ་ནས་བྱམས་དང་སྙིང་རྗེ་སྔོན་དུ་བཏང་། །རླུང་གི་འགྲོ་འོང་ལ་བརྟེན་གཏོང་ལེན་སྦྱོངས། །དེ་ཡི་རྗེས་ལ་འཁོར་འདས་སྐྱེ་འཆི་སོགས། །སྣང་གྲགས་ཆོས་རྣམས་རང་གི་སེམས་སྣང་ཡིན། །སེམས་ཉིད་ངོ་བོ་ཅིར་ཡང་མ་གྲུབ་པའི། །ངང་ལ་ཅིར་ཡང་མི་འཛིན་རང་བབས་བཞག །དེ་ལྟར་བྱང་ཆུབ་སེམས་གཉིས་སྤེལ་བཞིན་དུ། །བསྒོམ་པའི་འཕྲོ་ལ་འཆི་བར་བྱེད་པ་གཅེས། །འཆི་ཁ་མ་ཡི་གདམས་ངག་འུད་ཆེ་བ། །མང་པོ་འདུག་ཀྱང་འདི་ཉིད་ངོ་མཚར་ཆེ། །མཚན་ལྡན་བླ་མ་དམ་པའི་ཐུགས་ཀྱི་སྲས། །མར་གྱུར་འགྲོ་བ་ཡོངས་ཀྱི་གཅེས་ཕྲུག་ངས། །འདི་འདྲའི་གདམས་པ་ཟབ་མོ་བསྒོམ་བཞིན་དུ། །མཐོ་རིས་ཐར་པའི་གནས་སུ་ཡར་ལ་འགྲོ། །ཨེ་མ་དད་ལྡན་སྐྱེ་བོ་ཕོ་མོ་རྣམས། །འཆི་ངེས་ནམ་འཆི་ཆ་མེད་འཆི་དུས་སུ། །

གདམས་ངག་འདི་འདྲ་བརྟེན་ལ་ཡར་ཤོག་དང་། །ཕྱི་མར་དག་པའི་ཞིང་ནས་མཇལ་བར་ངེས། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །ལྔ་པ་བློ་འབྱོངས་པའི་ཚད་ནི། རྒྱལ་སྲས་རིན་པོ་ཆེས། ཐེག་པ་ཆེ་ཆུང་གི་ཆོས་ཐམས་ཅད་ཀྱི་དགོས་པ་ནི། བདག་འཛིན་འདུལ་བར་འདུས་པས། བདག་འཛིན་གྱི་གཉེན་པོར་མ་སོང་ན་ཆོས་བྱས་ཚད་དོན་མེད་དུ་སོང་བ་ཡིན། ཆོས་བྱས་ཚད་བདག་འཛིན་གྱི་གཉེན་པོར་སོང་ན་བློ་སྦྱོང་རྒྱུད་ལ་སྐྱེས་པའི་རྟགས་ཡིན། ཆོས་ཆོས་སུ་སོང་མ་སོང་གི་ཁྱད་པར་འདི་ན་ཡོད་པས། འདི་ཆོས་པ་སྲང་ལ་འཇལ་བའི་རྒྱ་མ་ཡིན་གསུངས། གཞན་དག་ན་རེ། ཇོ་བོ་དེ་ཀུན་གྱི་རྒྱུད་ལ་ཆོས་སྐྱེས་འདུག །ཆོས་པ་བཟང་པོ་བྱ་བ་དེ་ལ་ཟེར་བ་ཡིན་ཞེས་གཞན་གྱིས་མ་ཁྲེལ་བའང་དཔང་པོ་ཡིན་མོད་ཀྱིས། དེ་གཙོ་བོར་མི་བཟུང་སྟེ། འཇིག་རྟེན་ཕལ་བ་རྣམས་ཀྱིས་བདག་གི་སེམས་མི་རྟོགས་པས། ཕྱིའི་སྤྱོད་ལམ་ལེགས་པ་སྣ་རེ་ཙམ་མཐོང་བས་ཀྱང་མ་གུ་སྲིད་པས་སོ། །དེས་ན་རང་གི་སེམས་ཀྱིས་མ་ཁྲེལ་བ་ཞིག་དབང་པོའི་གཙོ་བོ་ཡིན་པས། བློ་གཟུ་བོས་ལེགས་པར་

བརྟགས་པས་རང་ལ་རང་གིས་མ་ཁྲེལ་ན་བློ་འབྱོངས་པའི་རྟགས་ཡིན་པས། གཉེན་པོ་བསྐྱེད་ལ་རང་ལ་རང་གིས་མ་ཁྲེལ་པ་ལ་འབད་པར་བྱའོ། །བློ་ལེགས་པར་སྦྱངས་པའི་སྟོབས་ཀྱིས། ད་ཕྱིན་ཆད་རྐྱེན་ངན་ཅི་བྱུང་ཡང་བློ་སྦྱོང་གིས་ལམ་དུ་ཁྱེར་བས་ཆོག་སྙམ་པའི་བློ་གདེང་འཆོས་ན་བློ་འབྱོངས་པའི་ཚད་ཡིན་པས། རྐྱེན་ངན་ཅི་བྱུང་ཡང་དེ་ལ་དགའ་བ་བསྒོམས་ནས། དེའི་སྟེང་དུ་གཞན་གྱི་རྐྱེན་ངན་ཐམས་ཅད་ལེན་པ་ལ་ཉམ་ང་བ་མེད་པར་བསླབ་པར་བྱའོ། །རྟ་རྩལ་ཅན་དེ་ཡེངས་ཀྱང་རྟ་ལས་མི་ལྷུང་བ་ལྟར། མ་བརྟགས་པར་གློ་བུར་དུ་གནོད་བྱེད་ལ་སོགས་པ་རྐྱེན་ངན་བྱུང་ན་ཞེ་སྡང་སོགས་མི་སྐྱེ་བར། རྐྱེན་ངན་དེ་ཉིད་བློ་སྦྱོང་གི་གྲོགས་སུ་ཁད་ཀྱིས་འགྲོ་ཡིན་འདུག་ན། བློ་སྦྱོང་འབྱོངས་པའི་ཚད་ཡིན་པས། དེ་ལྟར་འགྱུར་བ་ལ་འབད་པར་བྱའོ། །འབྱོངས་པའི་ཚད་འདི་དག་ནི་བློ་སྦྱོང་རྒྱུད་ལ་སྐྱེས་པའི་རྟགས་ཡིན་གྱི། འབྱོངས་ཟེར་ནས་ད་སྦྱོང་མི་དགོས་པ་མ་ཡིན་པས་རྟགས་འདི་དག་བྱུང་ནས་ཀྱང་འབད་དེ་བློ་སྦྱོང་བར་བྱའོ་གསུངས། གཞན་ཡང་སྐྱེས་ཆེན་དམ་པ་རྣམས་ཀྱི་ཐུགས་ཀྱིས་མི་ཁྲེལ་ཞིང་བསྟོད་བཀུར་

བསྔགས་གསུམ་བྱེད་ན་དབང་པོ་ཀུན་གྱི་མཆོག་ཡིན་ཏེ། རྒྱལ་སྲས་རིན་པོ་ཆེ་ལ་སྐྱེས་བུ་དམ་པ་གཞན་གྱིས་བསྟོད་བཀུར་བསྔགས་གསུམ་མཛད་ཚུལ་ནི། སྤང་ལོ་ཙཱ་བ་བློ་གྲོས་བསྟན་པའི་གསུང་ན་རེ། ཐོག་མར་ཤེས་བྱ་ཀུན་ལ་མཁས་པར་བྱ། །བར་དུ་མཁས་པའི་ཚོགས་སུ་ལེགས་པར་བཤད། །ཐ་མར་འདྲིས་པའི་དོན་ལ་བརྩོན་པར་སྒོམ། །དུས་གསུམ་རྒྱལ་བ་ཀུན་གྱི་བཞེད་གཞུང་ཡིན། ཞེས་ས་སྐྱ་པཎྚི་ཏས་གསུངས་པ་དེ་གུ་རུ་ཐོགས་མེད་ཁོང་གིས་བྱས་པ་ཡིན་ནོ། །འོ་སྐོལ་ཆོས་པ་རྣམས་ཀྱི་ནང་ན་ཆོས་བྱེད་པ་མང་རབ་འདུག་སྟེ། བརྟན་པ་ཐོབ་པ་རང་དུ་ཙམ་བདོག་གམ། གཞན་གྱི་རྒྱུས་ནི་ང་ལ་མེད། བརྟན་པ་ཐོབ་ངོ་ཤེས་པ་གུ་རུ་ཐོགས་མེད་ཁོང་ཡིན། ཕོ་སྐྱེས་པ་ཟེར་ན་དེ་ཀུན་ལ་ཟེར་ལགས། མི་གཞན་གྱིས་ངའི་རྒྱུད་ཚོད་དུ་སླེབ་པ་ལ་ད་རུང་དཀའ་ལས་ཆེན་པོ་ཡོད། ངས་གུ་རུ་ཐོགས་མེད་ཀྱི་རྒྱུད་ཚོད་ལ་སླེབ་པ་ལ་བསྐལ་བ་མང་པོར་ཚོགས་གསོག་དགོས། ང་ཁོང་གི་བླ་མ་ཡིན། ཁོ་ངའི་སློབ་མ་ཡིན་ཏེ། ང་ནི་བླ་མ་གཅིག་ལས་ཀྱང་དེ་ལ་མོས། མི་རྒན་ནམ་འཆི་བའི་སྔས་

ཁ་དེར་གུ་རུ་ཐོགས་མེད་ཡོད་པ་ཞིག་བྱུང་ན་དགའ་སྟེ། ང་ཕྱོགས་ཐམས་ཅད་དུ་རྒྱུག །ཁོང་ས་གཅིག་ཏུ་བཞུགས་པ་འདིས་ཡིད་སྨོན་ཐོག་ཏུ་ཨེ་འབབ་ཡིན་གསུངས་ཟེར་ཞིང་། གསུང་ཡིག་སྙན་དང་གས་དང་བཅས་པ་བསྐུར་བའི་ནང་ན་ཡང་། ཁྱོད་ལ་ང་འདྲའི་སློབ་དཔོན་བརྒྱ་ཡོད་ཀྱང་། །ང་ལ་ཁྱོད་འདྲའི་སློབ་མ་ཁྱོད་ལས་མེད། །ཅེས་སོགས་ཀྱི་བསྟོད་པ་མང་པོ་ཡང་འདུག་གོ །ཀུན་མཁྱེན་རོང་པོའི་གསུང་ན་རེ། ང་ལ་ཕ་བས་ལྷག་པའི་བུ་གཅིག་ཡོད་པ་ཡིན། ངའི་སློབ་མ་འདི་འདྲ་གཞན་ལ་ཡོད་ན་སྨོན་ནེ་འཆོར། སྐྱེས་བུ་དམ་པ་འདི་འདྲ་འཇིག་རྟེན་ན་དཀོན་གསུངས་ཟེར། བླ་མ་རིན་ཡེ་བ་བླ་མ་ཡིན་ཡང་། སེམས་དཔའ་ཆེན་པོའི་མཚན་བརྗོད་ཙམ་ན། ཕྱག་ཐལ་མོ་སྦྱར། སྤྱན་ཆབ་འབྱིན་ཟེར་རོ། །རྒྱ་མ་དཔོན་པོས་ཆོས་རྗེ་ཀུན་མཁྱེན་པ་ལ་མཇལ་དུ་ཕྱིན་དུས། ཁྱེད་དངུལ་ཆུ་བ་རྣམས་བླ་མའི་སྐལ་བ་བརྒྱ་ལ། རྒྱལ་སྲས་པ་དེ་མཚུངས་པ་མེད་པའི་བྱང་ཆུབ་སེམས་དཔའ་ཡིན། འདི་ནས་འཕོས་མ་ཐག་བྱམས་མགོན་གྱི་དྲུང་དུ་ཟང་ཐལ་ལེར་འགྲོ་རྒྱུ་དེ་ཡིན། དེའི་རྒྱུ་ཐམས་ཅད་ཁོང་ལ་ཚང་བ་ཡིན་གསུངས་ཟེར།

ཡང་རྟ་ནག་ཏུ་འབྱོན་སྐབས་ཤིག །དངུལ་ཆུའི་ཐད་ཀྱི་སྤྲིན་ལ་ཕྱག་མཛུབ་བཙུགས་ནས། དེར་འདུས་པ་རྣམས་ལ་ཕ་གིའི་འོག་ན་སངས་རྒྱས་མི་གཟུགས་སུ་བཞུགས་པ་གཅིག་ཡོད་པ་ཡིན་ཨེ་ཤེས་གསུངས་ཟེར། དཔལ་ལྡན་ས་སྐྱའི་དགེ་བའི་བཤེས་གཉེན་འཇམ་སྒེག་གི་གསུང་ན་རེ། དབུས་གཙང་གཉིས་པོ་འདི་ན་མཐོང་ཐོས་དྲན་པ་ལ་དགེ་བའི་བཤེས་གཉེན་མང་པོ་འདུག་སྟེ། གཞན་སུ་བས་ཀྱང་བོ་དོང་ཐོགས་མེད་ལ་སྨོན། ང་ཡང་ཚེ་མཇུག་ལ་སྒོམ་ཞིག་ཞུ་རྒྱུ་བྱུང་ན་བོ་དོང་ཐོགས་མེད་དེ་ལ་ཞུ། ཁོང་མཚམས་དམ་པོ་ཞིག་ཡོད་པར་འདུག་པས། རྟེན་འབྲེལ་མ་འགྲིག་ན། ང་རང་གི་སློབ་མ་རྡོར་གཞོན་ལ་སྒོམ་ཞིག་ཞུ། འདི་གཉིས་མིན་པ་བླ་མ་སྒོམ་ཆེན་སུ་ལ་ཡང་ཡིད་མི་སྨོན་གསུངས་ཟེར། བླ་མ་མཉམ་མེད་པས། ཁོ་རང་གི་སློབ་མ་སྒོམ་ལ་འགྲོ་བ་རྣམས་ལ། ཁྱོད་ཚེ་འདི་དང་འདྲེས་པའི་སྒོམ་ཞིག་བྱེད་ན་བླ་མ་འདི་དང་འདིའི་རྩར་རྒྱུགས། ས་མེད་རྡུལ་མེད་ཀྱི་ཆོས་ཤིག་བྱེད་ན་བོ་དོང་ཐོགས་མེད་དེའི་རྩར་རྒྱུགས། ད་ལྟ་དེ་བས་ལྷག་པ་མེད་དོ་གསུངས་པ་འདུག་ཟེར། མཁན་ཆེན་བུ་

སྟོན་པའི་གསུང་གིས་ཀྱང་། སྡེ་སྣོད་གསུམ་གྱི་དོན་ལ་མཁས་གྱུར་ཅིང་། །རྒྱུད་སྡེ་ཟབ་མོའི་རྟོགས་པ་ཀུན་ཆུབ་པ། །བྱང་ཆུབ་སེམས་གཉིས་འབྱོངས་པ་རྒྱལ་བའི་སྲས། །ཞེས་སོགས་ཀྱི་བསྟོད་པ་ཡང་མཛད་ཅིང་། སེམས་དཔའ་ཆེན་པོ་ཞ་ལུར་བྱོན་པས་རེས་ཁོང་རང་གི་གྲྭ་པ་རྣམས་ལ། ད་ལྟ་བོད་གངས་ཅན་གྱི་ཁྲོད་ན་ཆོས་ཤེས་ནས་ཉམས་སུ་བླང་ངོ་ཤེས་པ། རྒྱལ་སྲས་ཐོགས་མེད་པ་ཙམ་གཅིག་ཡིན། ངས་ཀྱང་ཆོས་ཤེས་ཤེས་ཏེ། ཀུན་མཁྱེན་འཕགས་འོད་ཀྱི་གསུང་ཞིག་ལ་བརྟེན་ནས་བཤད་ཉན་བྱེད་དགོས་པ་བྱུང་ནས། ཁོང་གི་འདྲ་བའི་ཉམས་ལེན་བྱུང་བ་མེད། འདི་ལྟ་བུའི་བྱང་ཆུབ་སེམས་དཔའ་ལ་ཆོས་འབྲེལ་ཐོགས་པ་ཙམ་རེས་ཀྱང་འཁོར་བ་མཐའ་ཅན་དུ་འགྱུར་ངོ་ཤེས་པ་ཡིན་པས། མཚམས་ལ་ཡོད་ཀྱང་གསེང་ལ་ཆོས་ཞུས། དེ་བར་གྱི་ཞབས་ཏོག་ཐམས་ཅད་བླ་བྲང་ནས་བྱེད་པ་ཡིན་གསུངས་ཟེར། དེའི་རེས་སེམས་དཔའ་ཆེན་པོས་ཀྱང་ཟླ་བ་གཅིག་ཞ་ལུར་བཞུགས་ནས། གང་ལ་གང་འདོད་ཀྱི་ཆོས་གསུངས་ཏེ། འགྲོ་བ་དཔག་ཏུ་མེད་པའི་དོན་མཛད་ཅེས་གྲགས་སོ། །དེ་བཞིན་དུ་སྐྱེ་བུ་དམ་པ་གཞན་རྣམས་

ཀྱིས་བསྔགས་བརྗོད་བྱེད་ན་བྱམས་སྙིང་རྗེ་བྱང་ཆུབ་ཀྱི་སེམས་གཉིས་འབྱོངས་པའི་རྟགས་ཡང་དག་པ་ཡིན་པར་ཤེས་པར་བྱའོ། །གླང་རི་ཐང་པའི་ཞལ་ནས། ངས་བློ་འབྱོངས་མ་འབྱོངས་ཁམས་སུ་སྟོན་པ་ཤེར་འབུམ་ཅན་དུ་ཕྱིན་ནས་ཤེས། ཁོང་སྙིང་དང་འདྲ་བའི་མཆེད་གྲོགས་ཡིན་པས། ང་བྱུང་བ་ལ་རབ་ཏུ་དགའ་ནས་རྙེད་བཀུར་ཕུན་ཚོགས་འོང་དུ་རེ་བ་ལ། དེ་ལྟར་མི་བྱེད་པར་མ་ཟད་སླར་བརྡུང་བརྡེག་བྱས། ཅི་ཡོད་འཕྲོག་ཀྱང་ང་ལ་ཁོང་ཁྲོ་མི་སྐྱེ་ཞིང་སྔར་གྱི་བརྩེ་བ་དེ་མི་འགྱུར་བ་འདུག་ན་འབྱོངས་པ་ཡིན་འདྲ་གསུངས། དེ་བཞིན་དུ་རེ་ཆེ་ས་ནས་གནོད་པ་བསྐྱལ་ན། སྔར་གྱི་བརྩེ་གདུངས་དེ་མི་འགྱུར་ན་བྱམས་སྙིང་རྗེ་བྱང་སེམས་ལ་བློ་འབྱོངས་པའི་རྟགས་ཡིན། སྔོན་སངས་རྒྱས་ཀྱིས་སློབ་པ་ལམ་གྱི་གནས་སྐབས་སུ། ཤི་བིའི་རྒྱལ་པོར་གྱུར་ཚེ་སྤྱན་གཉིས་པོ་བླངས་ནས། བྲམ་ཟེ་ལོང་བ་གཅིག་ལ་བྱིན་པ་དང་། རི་བོང་དུ་གྱུར་པའི་ཚེ་བྲམ་ཟེ་བཀྲེས་པ་ཞིག་གསོ་ཕྱིར་མེ་དཔུང་གི་ནང་དུ་མཆོང་བ་དང་། ལྷའི་དབང་པོར་གྱུར་ཚེ་ལྷ་མ་ཡིན་དང་གཡུལ་འགྱེད་དུས། རང་གི་སྲོག་

བློས་བཏང་ནས་བྱའི་ཕྲུག་གུའི་སྲོག་བསྐྱབས་པ་དང་། དྲང་སྲོང་བཟོད་པ་སྨྲ་བར་གྱུར་ཚེ། རྒྱལ་པོས་ཡན་ལག་ཐམས་ཅད་གཏུབས་ཀྱང་བཟོད་པ་བསྒོམས་པ་དང་། ཚངས་པའི་རྒྱལ་པོར་གྱུར་པའི་ཚེ་ཡན་ལག་བྱིན་ནས། ལྟ་ངན་ཡང་དག་ལམ་ལ་བཀོད་པ་དང་། གླང་པོ་ཆེར་གྱུར་ཚེ་སྐྱེ་བོ་བདུན་བརྒྱ་ཙམ་བཀྲེས་པས་ཉེན་པ་ལ། ལུས་པོ་གཡང་ལ་བསྐྱུར་ནས་བྱིན་ཏེ་གསོས་པ་ལྟར། གཞན་སྡུག་བསྔལ་གྱིས་ཉམ་ཐག་ལ་རང་གི་གཅེས་པའི་ལུས་ཀྱང་གཏོང་སྙམ་པ་ཡང་ཡང་བྱུང་ན། བྱམས་པ་དང་སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་རྒྱུད་ལ་འབྱོངས་པའི་རྟགས་སོ། །ཡང་སྔོན་སངས་རྒྱས་རྒྱལ་བུ་ཐམས་ཅད་སྒྲོལ་དུ་གྱུར་ཚེ། བུ་དང་བུ་མོ་རྒྱལ་སྲིད་ཀུན་སྦྱིན་པར་བཏང་བ་དང་། ས་སྐྱོང་རྒྱལ་པོར་གྱུར་ཚེ་དུད་འགྲོ་བགྲང་ལས་འདས་པའི་སྲོག་སྐྱོབ་མཛད་པ་དང་། བྲམ་ཟེ་ཞིག་ཏུ་གྱུར་ཚེ་དཀའ་ཐུབ་ཀྱིས་ཟས་ཅུང་ཟད་ལས་མེད་རུང་། དེ་ཡང་སློང་བ་ཞིག་བྱུང་བ་ལ་སྦྱིན་པར་བཏང་བ་དང་། ཚོང་དཔོན་ཟིལ་གྱིས་མིན་ནོན་པར་གྱུར་ཚེ། རང་ལ་ནོར་རྫས་མེད་རུང་། ཕོངས་པ་སྙིང་རྗེ་ནས་རྩྭ་བཙོང་ནས་རིན་གྱིས་

སློང་མཁན་གསོས་པ་ལྟར། རང་ལ་ནོར་རྫས་གང་ཡོད་ཐམས་ཅད་གཏོང་ནུས་ཤིང་། མེད་རུང་ནོར་བཙལ་ནས་ཀྱང་། སེམས་ཅན་ཕོངས་པ་གསོ་སྙམ་པའི་འདུན་པ་ཡང་ཡང་སྐྱེས་ན་བློ་སྦྱོང་རྒྱུད་ལ་སྐྱེས་པའི་རྟགས་སོ། །ཡང་སྔོན་སངས་རྒྱས་གཙུག་ཕུད་བྱང་ཆུབ་ཏུ་གྱུར་ཚེ། རྒྱལ་པོས་བརྙས་ཀྱང་ཁྲོ་མེད་བཟོད་པ་བསྒོམས་པ་དང་། མ་ཧེ་རུ་གྱུར་ཚེ་སྤྲེའུས་ཡང་དང་ཡང་དུ་གཙེས་པ་ལ། ཁྲོ་མེད་བཟོད་པ་བསྒོམས་པ་དང་། ངང་པའི་རྒྱལ་པོར་གྱུར་ཚེ་རྙི་ནང་དུ་བཟུང་ཀྱང་ཁྲོ་བ་དང་འཇིགས་པ་མེད་པར་སླར་ཆོས་བསྟན་པ་དང་། ཀུན་ཏུ་རྒྱུ་བྱང་ཆུབ་ཏུ་གྱུར་ཚེ། མང་པོས་བརྙས་ཀྱང་ཁྲོ་མེད་བཟོད་པ་བསྒོམས་པ་ལྟར། མཆོག་དམན་བར་བ་མང་པོས་བརྙས་སྨོད་ཁྱད་གསོད་སུན་འབྱིན་བརྡེག་བརྡུང་གང་བྱས་ཀྱང་། ཁོང་ཁྲོ་མི་ལངས་པར་བཟོད་པ་བསྒོམ་ནུས་ན་བློ་སྦྱོང་རྒྱུད་ལ་སྐྱེས་པའི་རྟགས་ཡིན། ཡང་སྔོན་བྱང་ཆུབ་སེམས་དཔའ་སྤྲེའུར་གྱུར་ཚེ། སྡིག་ཅན་ཁྲོན་པའི་ནང་ནས་དྲངས་རྗེས་སུ་མི་ངན་དེས་གནོད་པ་བསྐྱལ་ཀྱང་། གནོད་ལན་དུ་ཡང་ཕན་བཏགས་པ་དང་། རི་དྭགས་ཤ་རར་

གྱུར་ཚེ། རང་ལ་གནོད་པ་སྐྱེལ་བའི་སྡིག་རྒྱལ་གཡང་ལ་ལྷུང་ནས་འཆི་ལ་ཉེ་བ་སྙིང་རྗེས་ཡར་དྲངས་པ་དང་། རི་དྭགས་བསེ་རུར་གྱུར་ཚེ་ཆུས་ཁྱེར་བའི་མི་ཆུ་ལས་བསྒྲལ་ནས་རྗེས་སུ་མི་ངན་དེས་གནོད་པ་བྱས་ཀྱང་ཕན་བཏགས་པ་དང་། རྒྱལ་བུ་དགེ་དོན་དུ་གྱུར་ཚེ། སྡིག་དོན་གྱིས་བསམ་ངན་སྐྱེས་ནས། མིག་ལ་སྨྱུག་ཚལ་བརྒྱབ་ནས་མིག་བཅར་ཀྱང་རྗེས་སུ་གནོད་ལན་དུ་ཕན་གདགས་པ་ལྟར། རང་ལ་གནོད་པ་བྱེད་མཁན་ཅི་བྱུང་རུང་བཟོད་པ་བསྒོམ་པར་མ་ཟད། ད་དུང་སྙིང་རྗེ་ཆེན་པོས་གནོད་ལན་དུ་ཕན་འདོགས་པ་དང་། དངོས་སུ་ཕན་འདོགས་མ་ནུས་ན་ཡང་། ཡིད་ཀྱིས་བྱ་ཞིང་མ་འོངས་པ་ན་ཕན་ཐོགས་པའི་སྨོན་ལམ་འདེབས་པ་བྱུང་ན། བྱང་ཆུབ་ཀྱི་སེམས་འབྱོངས་པའི་རྟགས་ཡང་དག་པའོ། །སྔོན་ཕན་ཡུལ་གླང་ཐང་བ་ཡིན་པའི་སྟོན་སྒོམ་བྱང་ཆུབ་སེམས་དཔའ་གཅིག་ལ་ཤིག་ནད་བྱུང་བའི་སྟེང་དུ་གཞན་གྱི་ཤིག་ནང་ཐམས་ཅད་བླངས་ཏེ། ཤིག་ཐམས་ཅད་ལ་ལུས་དངོས་སུ་སྦྱིན་པར་བཏང་ནས་གཤེགས་པ་རྒྱལ་སྲས་རིན་པོ་ཆེས་གསན་ཚེ་རྗེས་སུ་ཡི་རངས། ཤཱཀྱ་ཐུབ་པ་རུས་སྦལ་དུ་འཁྲུངས་པའི་དུས་སུ།

སྲིན་བུ་ཀེ་ཏ་ཀ་བརྒྱད་ཁྲིར་སྐུ་ལུས་སྦྱིན་པར་བཏང་བ་དང་དོན་གྱི་ཆ་མཐུན་པ་དེ་ཉིད་ཡིན། ཁོང་གི་སེམས་ལ་འགྱོད་པ་ཡོང་བའི་རིགས་སུ་མི་འདུག་ངོ་མཚར་ཆེ་གསུངས། ཁོང་གིས་ཀྱང་འཆད་ཉན་མཛད་ཚེ། འཇམ་དབྱངས་དོན་ཡོད་པ་སྐུ་མཆེད་ཀྱིས་བོ་དོང་དུ་ཆོས་གསུངས་པའི་དུས། རྒྱ་སྒོའི་འགག་ན་ཤིག་ནད་ཚབ་ཅན་བྱུང་བའི་སྤྲང་རྒན་ལུས་ཀྱི་ཟུང་ཤོར་བ་གོས་དང་སྟན་ལ་སོགས་པ་ཤིག་གི་ཕུང་པོར་གྱུར་པ་ཞིག་གི་དྲི་ཆེན་པོ་མནམ་པ་ཞིག་འདུག་པ་དེ་ལ། དྲུང་སྐུ་མཆེད་པའི་སྐྱ་བོ་ཚོས། དྲུང་ནས་སྐྱུག་བྲོ་འགག་དེར་མ་བསྡད་ཟེར་ཞིང་འབུད་པར་གཟིགས་པས། སྙིང་རྗེ་དྲག་པོ་སྐྱེས་ཤིང་སྤྱན་ཆབ་ཤོར་ཏེ། དེའི་ནུབ་མོ་ཁོའི་གོས་དང་སྟན་ཤིག་གི་ཕུང་པོར་གྱུར་པ་རྣམས་ནང་དུ་ཁྱེར། སྤྲང་པོ་ལ་ན་བཟའ་གཅིག་གཉིས་དང་། བཟའ་རྒྱུ་གནང་ནས་ཤིག་རྣམས་ལ་སྐུ་ལུས་སྦྱིན་པར་བཏང་སྟེ། ཤིག་གི་ཕུང་པོའི་གསེབ་ཏུ་གཟིམས་ནས་ཞག་གཅིག་གཉིས་སོང་བ་དང་། སློབ་དཔོན་དང་མཆེད་གྲོགས་འགའ་རེས་ཚོར་ནས་བལྟར་བྱོན་པས། སྤྲང་པོའི་གོས་དང་སྟན་ཤིག་གི་ཕུང་པོར་སོང་བ་

རྣམས་གསོལ་སྐུ་ལུས་ཐམས་ཅད་འབྲུམ་ནད་འཐུག་པོ་བྱུང་བ་བཞིན་དུ་གྱུར་འདུག་པ་མཐོང་ནས། ཁོང་རྣམ་པ་ཧ་ལས་ཏེ། ཉིད་ད་དུང་ལུས་གཏོང་བའི་དུས་ཙམ་ལ་མ་སླེབ་ལས་ཆེ། དེ་འདྲ་ཧ་ཅང་ཐལ་དྲགས་མི་མཛད་པར་ཞུ་ཞེས་ཞུ་བ་ནན་གྱིས་ཕུལ་ཡང་མ་གསན་པར་གསོས་པས། རིང་པོར་མ་ལོན་པར་ཤིག་རྣམས་ཡལ་ནས་སོང་ཞེས་གྲགས་སོ། །དེ་བཞིན་དུ་རང་གཞན་གྱི་ཤིག་ཐམས་ཅད་ལ་ལུས་ཟར་འཇུག་ནུས་ན་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་འབྱོངས་པའི་རྟགས་ཡིན། སྔོན་རྗེ་བཙུན་མི་ལ་རས་པ་ལ། ཨ་ནེས་ཆུང་དུས་སྡུག་མང་པོ་བཏང་བའི་རྗེས་ནས་ཆོས་མཛད་དུས་ཀྱང་། གཡོ་ཐབས་དུ་མའི་སྒོ་ནས་ཞིང་རྣམས་ལེན་དུས། ཁོང་གི་ཐུགས་བསམ་ལ། ཞེ་སྡང་སྐྱེ་ཡུལ་མེད་ན་བཟོད་པ་སུ་ལ་བསྒོམ། ང་རང་དོ་ནུབ་ཤིན་ཞིང་གི་མི་ཚད་འདི་རྣམས་ཀྱིས་ཀྱང་ཅི་བྱེད་སངས་རྒྱས་ཐོབ་པའི་ཐབས་ལ་བཟོད་པ་མཆོག་ཏུ་གསུངས་པ་ཡིན། དེ་བསྒོམ་པའི་རྟེན་ཨ་ནེ་ཡིན་ཞིང་དམ་པའི་ཆོས་དང་མཇལ་བ་ཡང་ཨ་ཁུ་དང་ཨ་ནེའི་དྲིན་ཡིན། བཀའ་དྲིན་དུ་ཆེ་བའི་དྲིན་ལན་དུ་ཕྱི་མ་སངས་རྒྱས་ཐོབ་པའི་སྨོན་ལམ་

རྟག་ཏུ་འདེབས། ཚེ་འདིར་ཞིང་དུ་མ་ཟད་ཁང་པ་ཡང་བྱིན་པས་ཆོག་སྙམ་པ་བྱུང་བ་ལྟར། ཨ་ནེ་ལ་ཡང་གོ་བར་ལབ་སྟེ་བྱང་ཆུབ་སྒྲུབ་པ་ལ་བླ་མའི་གདམས་ངག་མིན་པ་ཅིས་ཀྱང་དགོས་པ་མེད་པས། ཞིང་དུ་མ་ཟད་ཁང་པ་ཡང་ཨ་ནེས་ཁྱེར་ཅིག་བྱས་གླུ་འདི་བླང་ངོ་། །རྗེ་བླ་མའི་བཀའ་དྲིན་རི་ཁྲོད་འགྲིམས། །སྤྲང་པོའི་སྐྱིད་སྡུག་ཁྱེད་རང་ཤེས། །འཇིག་རྟེན་འཁོར་བ་ལས་ཀྱིས་དུ་བ། །འབགས་ན་ཐར་པའི་སྲོག་རྩ་གཅོད། །སྐྱེ་བའི་སོ་ནམ་སྡིག་པའི་ལས། །སྤྱད་ན་ངན་སོང་སྡུག་བསྔལ་མྱོང་། །ཉེ་དུའི་གདུང་སེམས་བདུད་ཀྱི་མཁར། །བརྩིགས་ན་མེ་འོབས་ཀྱི་ནང་དུ་ཚུད། །ཟས་ནོར་གྱི་གསོག་འཇོག་མི་ཡི་ནོར། །བསགས་ཚད་དགྲ་བོའི་རྒྱགས་ཕྱེ་ཡིན། །སྐྱིད་འདོད་ཀྱི་ཇ་ཆང་བཙན་དུག་གི་ཆུ། །འཐུངས་ན་ཐར་པའི་སྲོག་རྩ་གཅོད། །ཨ་ནེའི་ཞིང་རིན་སེར་སྣའི་ཟས། །ཟོས་ན་ཡི་དྭགས་ཀྱི་གནས་སུ་སྐྱེ། །ཨ་ནེའི་ཁ་ཏ་ཞེ་སྡང་གི་ཚིག །ལབ་ན་བདག་གཞན་གཉིས་ཕུང་ཡོང་། །བདག་གི་ཞིང་ཁང་ཐམས་ཅད་ནི། །ཨ་ནེས་ཁྱེར་ལ་དགའ་བར་གྱིས། །མི་ཁ་ཆོས་ཀྱིས་སངས་པ་ཡིན། །ལྷ་

ཁ་སྙིང་པོའི་སྒྲུབ་པ་ཡིན། །འདྲེ་ཁ་སྙིང་རྗེས་གནོན་པ་ཡིན། །ཉེས་ཁ་རླུང་ལ་བསྐུར་བ་ཡིན། །རང་ཁ་གྱེན་ལ་བལྟ་བ་ཡིན། །རྗེ་མི་བསྐྱོད་ཀྱི་ངོ་བོ་བཀའ་དྲིན་ཅན། །སྤྲང་རི་ཁྲོད་ཐུབ་པར་བྱིན་གྱིས་རློབས། །ཞེས་པའི་གླུ་བླངས་པས། ཨ་ནེ་ན་རེ། ཆོས་པ་བཟང་པོ་བྱ་བ་ཚ་བོ་འདི་འདྲ་ལ་ཟེར་བ་ཡིན། དགའ་རབ་ཡིན་ཟེར། དགའ་ནས་སོང་ངོ་། །ཡང་རྒྱལ་སྲས་རིན་པོ་ཆེ་འཇམ་དབྱངས་བསོད་ནམས་རྒྱལ་མཚན་པས་ཆོས་ཞུ་བ་ལ་ས་སྐྱར་གདན་དྲངས་ནས། ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཏེ། ཚུར་བྱོན་དུས། ལབ་བཙས་ནག་པོར་ཇག་པ་བྱུང་སྟེ། སེམས་དཔའ་ཆེན་པོ་རང་གི་སྐུ་ལ་མ་རེག །ཞབས་ཏོག་པ་རྣམས་འོལ་ལེ་བ་རེ་བཀྱིགས་ཏེ། ཇག་པ་ཟ་མ་ཟ་དུས། ཞབས་ཏོག་པ་གཅིག་བཀྱིགས་པ་གྲོལ་བྱུང་བའི་རྩ་ན་ཇག་པའི་རལ་གྲི་བཞག་འདུག་པ་ཁྱེར་ནས་བྲོས་ན་བསམ་ཡོད་ཙ་ན། སེམས་དཔའ་ཆེན་པོས་མཁྱེན་ནས། ཉིད་དེ་བློ་ཙབ་ཙུབ་མ་བྱེད་ཨང་གསུངས་པས་འབྲོས་མ་ནུས་ཟེར། དངོས་པོ་འདི་རྣམས་རིན་ཆེན་སྒང་བའི་ས་ཆར་མ་འཁྱེར། ངས་བློས་བཏང་ཡོད་པས་འཕྲོག་པ་ཡིན་སྙམ་པའི་བློ་

ཡང་མ་བྱེད། ངའི་གོས་ལགས་འཁྱེར་ན་ཡང་ཁྱེར་གསུངས་པས། ཇག་པ་རྣམས་ཀྱིས་ཕྱག་འཚལ་ནས། ངེད་ཚོ་ཡང་ཕོངས་ནས་ཐབས་རྡུགས་པས། ཉིད་ལྟ་བུ་ཞིག་དང་ཐུག་ཟེར་གྱིན་འདུག་ཟེར། ཇག་པ་རྣམས་ལ་རྗེས་ཟློས་བྱེད་དུ་བཅུག་ནས་བསྔོ་བ་ཡང་མཛད་ཅེས་ཐོས་ཤིང་། ཉིད་ཀྱི་ཞལ་ནས། ནོར་ལ་ཆགས་པའམ་བདག་ལ་སྡང་བ་ཡིས། །བདག་གི་བདོག་ཀུན་འཕྲོགས་ནས་ཉིན་གཅིག་ཙམ། །འཚོ་བའི་ཟས་ཙམ་མེད་པའི་སྐབས་བྱུང་ནའང་། །དེ་ཚེ་དམ་བཅའ་འདི་ནི་དྲན་པར་བགྱི། །ཞེས་གནོད་ལན་དུ་ཕན་འདོགས་པར་དམ་བཅས་པ་ལྟར་མཛད་དོ། །བདག་གི་ཡོངས་འཛིན་དམ་པ་ཨ་རིག་དགེ་བཤེས་རིན་པོ་ཆེ་ལ་དད་ཅན་སྦྱིན་བདག་གཞན་གྱིས་ཕུལ་པའི་དུད་འགྲོ་མང་པོ་ཡོད་པ། ཉིན་གཅིག་མགོ་ལོག་གི་ཇག་པ་མང་པོ་བྱུང་ནས་དེད་ནས་སོང་བ་ཁོང་གིས་གསན་ཚེ། སྡིག་པའི་རྒྱུ་དེ་རྣམས་མེད་པ་ཞིག་བྱ་སྙམ་ཡོད་ད་བར་ལུས་སོང་། ད་རེས་འདོད་ཐོག་ཏུ་ཕབས་བྱུང་གསུངས། དགེ་འདུན་པ་རྣམས་འཚོགས་སུ་བཅུག་ནས་མང་ཇ་བཏང་། བསྔོ་བ་རྒྱས་པ་ཞིག་གསུངས་ནས།

སུ་དག་འདོད་ཆེན་དབང་གིས་བདག་གི་ནོར། །ཐམས་ཅད་འཕྲོག་གམ་འཕྲོག་ཏུ་འཇུག་ན་ཡང་། །ལུས་དང་ལོངས་སྤྱོད་དུས་གསུམ་དགེ་བ་རྣམས། །དེ་ལ་བསྔོ་བ་རྒྱལ་སྲས་ལག་ལེན་ཡིན། །ཞེས་རྒྱལ་སྲས་རིན་པོ་ཆེའི་གསུངས་པ་ལག་ལེན་ལ་འདེབས་རྒྱུ་བྱུང་གསུངས། ཐུགས་གང་དགྱེས་དགྱེས་མཛད་སྣང་། ཡང་བཀྲ་ཤིས་སྒོ་མང་དགོན་ཆེན་གྱི་ཐག་ཉེའི་རི་ཁྲོད་ན། དགེ་སློང་གཅིག་བཞུགས་པ་ལ། ཤིང་བསྒྱེལ་བའི་མི་ཞིག་ཡོད་པ་དེས་ཉིན་གཅིག་དགེ་སློང་རི་ལ་ཁམས་བསེང་དུ་ཕེབས་པའི་ཤུལ་དུ་མི་དེ་ནང་དུ་འཛུལ་ནས། གང་ཡོད་ཁུར་ནས་སྒོར་ཐོན་པ་དང་། དགེ་སློང་ཁམས་བསིང་ནས་ཕེབས་པ་གཉིས་ཁ་ཐུག་བརྒྱབ་པས། མི་དེས་ཅི་ཡང་མི་སྨྲ་བར་ཡར་ལངས་ནས་བསྡད་ཚེ། དགེ་སློང་གིས་ད་ཡར་ནང་དུ་ཁུར་བྱས་ནང་དུ་ཁུར་ནས་ས་ལ་ཕོག །ཇ་སྐོལ་དུ་བཅུག་འཐུངས་ནས། ད་དུང་དེའི་ཐོག་ཏུ་གང་ཡོད་བསྣན་ནས་མང་དུ་བཏང་། ཁྲེས་པོ་བཏེགས་ཏེ། ད་སོང་གཞན་ལ་ངས་རྐུས་ཡོང་མ་ཟེར། ང་ལ་གནང་སོང་གྱིས། ཕྱིན་ཆད་གཞན་ལ་དེ་འདྲ་མ་བྱེད་ཅེས་ཁ་ཏ་བསླབ་བྱ་མཛད་མི་དེ་རང་ཡུལ་དུ་བཏང་

བས། རྗེས་སུ་བསྔོ་བ་སྨོན་ལམ་ཀྱང་བྱས་ཟེར་བའི་དགེ་སློང་བྱང་ཆུབ་སེམས་དཔའ་ཞིག་བྱུང་། དེས་ན་དེ་འདྲའི་ཇག་པ་རྐུན་མ་བྱུང་ནས་རང་གི་ནོར་ཐམས་ཅད་ཁྱེར་ན་ཡང་། དགའ་ཞིང་སྤྲོ་བཞིན་བསྔོ་བ་དང་སྨོན་ལམ་འདེབས་ཐུབ་པ་བྱུང་ན། བྱང་ཆུབ་ཀྱི་སེམས་རྒྱུད་ལ་འབྱོངས་པའི་རྟགས་ཡིན། སྔོན་སངས་རྒྱས་བཅོམ་ལྡན་འདས་ཀྱིས། བློ་གྲོས་ཆེན་པོ། ངས་ཤའི་ཟས་ནི་སུ་ལའང་མ་གནང་མི་གནང་གནང་བར་མི་འགྱུར་རོ། །རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་ངས་བཤད་དོ། །ཡང་འཁྲུལ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་པོ་རྣམས་ཀྱང་དངངས་གྱུར་ན། །རྣལ་འབྱོར་ཅན་གྱིས་ཤ་མི་ཟ། །གསུངས་པ་ལྟར། འཕགས་པ་ཀ་ཏ་ཡ་ན་འབྲུམ་བུ་མེ་དབལ་ནག་པོས་སྙུང་བ་ལ། སྨན་པས་ར་ཤ་དང་ར་ཁྲག་ཕྱི་ནང་གཉིས་ཀར་གཏོང་བར་ཞུས་པས། བསླབ་པ་ལས་འགལ་བ་ལས་འཆི་བ་དགའ་གསུངས་ནས། མ་བཞེས་པར་མྱ་ངན་ལས་འདས་པ་དང་། འགྲོ་མགོན་ཕག་མོ་གྲུ་པས་བསླབ་པ་གསུམ་ལ་གཅེས་སྤྲས་སུ་མཛད་ཅིང་།

ཁ་ན་མཐོ་བའི་ཟས་ཤ་ལ་སོགས་པ་གཏན་ནས་སྤངས་པས། ཚིལ་བུའི་སྡོར་ཙམ་བཏབ་པའི་ཐུག་པའང་མི་བཞེས་ཤིང་། སྐུ་མྱ་ངན་ལས་འདའ་ཁར་དུག་གི་སྙུང་གཞི་བྱུང་བ་ལ། སྔགས་ཀྱིས་བཏབ་པའི་ཆང་གི་ཉིད་ཁུ་ཞལ་གང་བཞེས་ན་ཕན་པར་གསལ་བཞིན་དུ། སྐུ་སྲོག་དང་བདོས་ནས་སྤངས་པར་གསུངས། རྗེ་སྟག་ལུང་ཐང་བ་སྐུ་གཤེགས་ཁར་བཞེས་ཐུག་ལ་ཚིལ་བུའི་སྡོར་བཏབ་ན་སྙུང་དྭངས་འགྲོ་བར་ཞུས་པ་ལ། མི་ཚེ་ཧྲིལ་བོ་བསྲུང་ཐུབ་ནས། ཤི་ཁར་སྡོམ་པ་ཉམས་པས་ཅི་རུང་གསུངས་མ་གསན་པར་སྐུ་གཤེགས་པ་དང་། དགེ་བཤེས་ཁ་རག་པའི་སྐུ་ཚེ་སྔ་མར། ཚེ་རབས་ལྔ་བརྒྱའི་བར་དུ་ཤ་མ་བཞེས་པར་བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱངས་པའི་མཐུས། སྐུ་རིང་དེ་ལ་ཇོ་མོ་ཁ་རག་གི་རི་ཁྲོད་དེ་ན་བཞུགས་དུས། བྱ་རི་དྭགས་ཐམས་ཅད་ཉེ་དྲུང་དུ་འཁོད་ཅིང་། རྒྱུན་དུ་གནས་པའི་ཚེ་དབྱར་རི་དྭགས་མོ་རྣམས་ཀྱི་འོ་མ་ཡང་བཞོས་ནས་འཐུང་སྐད། རྒྱལ་སྲས་རིན་པོ་ཆེས། སྐུ་ཚེ་དེ་ལ་དགོངས་ལོ་ལྔ་བཅུ་ང་བདུན་བར་དུ་ཤ་གཏན་ནས་མ་བཞེས་ཤིང་། སློབ་མ་གཞན་ལ་ཡང་ཉིད་ཀྱི་ཞལ་

ནས། ཐོག་མེད་དུས་ནས་གཉེན་གྱུར་སྲོག་ཆགས་རྣམས། །ལས་ཀྱི་ཤི་ནའང་མཆི་མ་འབྱུང་རིགས་ན། །དེ་དག་ཤ་ཡི་ཆེད་དུ་བསད་པའི་ཤ། །ཟ་བར་རིགས་པ་མ་ཡིན་ཤེས་རབ་གྲུབ། །གསུངས། ཇོ་བོ་རྗེ། འབྲི་གུང་སྐྱོབ་པ་ཡབ་སྲས། སྟག་ལུང་ཐང་བ་སོགས་སྐྱེས་ཆེན་མང་པོ་ཞིག་གིས། བུ་རམ་དང་སྦྲང་རྩི་སོགས་ལ་ཚོགས་དང་། འོ་མ་དང་ཞོ་སོགས་ལ་ཚོགས་ཆང་མཛད་པའི་ལོ་རྒྱུས་ལ། དཔོན་སློབ་ལོ་ཆེན་ནི་རྗེས་སུ་ཡི་རངས་ཆེར་མཛད་ཅིང་། ཆོས་རྗེ་རྒོད་ཚང་སྣ་ཚོགས་རང་གྲོལ་གྱིས་ཀྱང་། དེང་སང་བན་དེ་ཕལ་མོ་ཆེས་ཟ་འདོད་འཐུང་འདོད་ཁོ་ནའི་ཆེད་དུ། ཚོགས་ཆང་བཟོས་ནས་བག་མེད་དུ་འཐུང་མཁན་ཚོ་བལྟས་ན་ནི། གོང་གི་ཇོ་བོ་དང་འབྲི་སྟག་སོགས་ཀྱི་མཛད་པ་དེ་ཡང་ཡ་མཚན་ཆེའོ། །གསུངས། དཔེར་ན་ཨ་མ་བཟང་མོ་དེས། རང་གི་བུ་བུ་མོའི་ཤ་གཏན་ནས་ཟ་འདོད་མི་སྐྱེ་བ་ལྟར། ཕ་མ་སེམས་ཅན་གྱི་ཤའི་རིགས་སུ་གྱུར་པ་གཏན་ནས་ཟ་འདོད་མི་སྐྱེ་བ་བྱུང་ན་བྱམས་སྙིང་རྗེ་བྱང་ཆུབ་ཀྱི་སེམས་རྒྱུད་ལ་སྐྱེས་པའི་རྟགས་ཡིན། སྔོན་རྒྱ་གར་གྱི་རྒྱལ་པོ་ཞིག་

གིས། འབངས་མི་ཞིག་ལ་ཆད་པ་གཅོད་ངེས་བྱུང་ཚེ། འཇིགས་ནས། ཕ་མ་བུ་གསུམ་ཡོད་པ་ཞག་བརྒྱད་ཀྱིས་སླེབ་པའི་ཡུལ་ཞིག་ལ་བྲོས་ནས་སོང་བས་ལམ་ནོར་ནས་ཞག་བཅུ་གཉིས་ལ་ཡང་མ་སླེབ་པར་ཀུན་ལྟོགས་ནས་ཤི་ལ་ཐུག་ཚེ། བུའི་ཕ་མའི་དྲིན་ལན་འཇལ་ཕྱིར་གཡང་ཞིག་ལ་མཆོངས་ནས་འཆི་རུ་བཅུག་པས། ཕ་མ་གཉིས་ཀྱིས་བུའི་ཤ་ཟ་མི་འདོད་ན་ཡང་། སྲོག་མི་འཆད་པར་འགྲོ་སར་སླེབ་ཕྱིར། མི་འདོད་བཞིན་དུ་ཟ་དགོས་བྱུང་བ་ལྟར། བྱང་ཆུབ་སེམས་དཔའ་ལ་ནམ་ཡང་ཤ་ཟ་འདོད་ཀྱི་སྲེད་པ་གཏན་ནས་མི་སྐྱེ་ན་ཡང་། ལོ་ལོན་ལུས་ཟུང་ཟད་ཟས་གཞན་གྱིས་མ་ཕན་ཚེ། གཞན་དོན་དུ་ལུས་སྲོག་འཚོ་བའི་ཕྱིར་མི་ཟ་ཐུ་མེད་འདྲ་བྱུང་ནས་ཤ་ཟ་དགོས་བྱུང་ཚེ། འདོད་སྲེད་གཏན་ནས་མི་སྐྱེ་བར་མ་ཟད་སེམས་ཅན་དེ་ལ་དམིགས་པའི་བྱམས་སྙིང་རྗེ་བྱང་ཆུབ་ཀྱི་སེམས་སྐྱེ་ན། བློ་སྦྱོང་རྒྱུད་ལ་སྐྱེས་པའི་རྟགས་ཡིན། ཡི་དམ་ཕྱག་ན་རྡོ་རྗེའི་ཞལ་ནས། ལས་ཀྱི་རྡོ་རྗེ་ཚེ་འདི་ལ་བློ་ལོག་ན་ལྟོ་གོས་ཀྱིས་ཕོངས་ཀྱང་མི་འགྱོད། བླ་མའི་བཀའ་དང་མ་འགལ་ན། དམ་ཚིག་ཉམས་ཟེར་ཡང་མི་འགྱོད། དལ་འབྱོར་

ཆུད་མ་ཟོས་ན། ཆོས་མ་བྱས་ཟེར་ཡང་མི་འགྱོད། སེམས་ལ་གཡོ་སྒྱུ་མེད་ན། འཕགས་པ་མ་མཉེས་ཟེར་ཡང་མི་འགྱོད། སྟོང་ཉིད་སྙིང་རྗེ་དང་མ་བྲལ་ན། ཆོས་སྤྱོད་ཞན་ཟེར་ཡང་མི་འགྱོད། མཉམ་པ་ཉིད་ཀྱི་རྟོགས་པ་ཤར་ན། གང་ཟག་གིས་གཤེ་ཡང་མི་འགྱོད་པས། དེ་རྣམས་དང་ལྡན་པ་ཞིག་བྱེད་དགོས་གསུངས་པ་ལྟར་བྱུང་ན་བློ་སྦྱོང་རྒྱུད་ལ་སྐྱེས་པའི་རྟགས་ཡིན་གསུངས། ཡང་བློ་སྦྱོང་རྒྱུད་ལ་མ་སྐྱེས་པའི་རྟགས་ལ་འདི་འདྲ་འབྱུང་སྟེ། སྔོན་ལམ་ཁ་ཞིག་ནས་དགེ་སློང་གཅིག་ལ་གྲྭ་པ་ཁ་རྒོད་ཞིག་འཕྲད་ཚེ། ཁྱོད་སུ་འདྲ་ཞིག་ཡིན་ཞེས་དྲིས་པས། བློ་སྦྱོང་བ་ཞིག་ཡིན་བྱས་པས། གྲྭ་པ་ན་རེ། ཁྱོད་བློ་སྦྱོང་བ་ཡིན་ན་ཁྱོད་ཀྱི་ཕའི་ཤ་ཟོ་བྱས་པས། ཁོ་ངོ་མདངས་འགྱུར་བརྡུང་རེ་རྒྱག་གྲབ་བྱས་ཚེ། ངས་ཁྱོད་ལ་ཀུ་རེ་བྱས་བློ་མ་འབྱོངས་འདུག་པས་ད་དུང་བློ་སྦྱོངས་ཟེར་སྐད། དེ་བཞིན་དུ་ཚིག་ངན་རེ་ཙམ་ཡང་མི་ཐེག་ན་བློ་མ་འབྱོངས་པ་ཡིན། ཡང་སྔོན་རྒྱལ་བ་འབྲི་གུང་བས་སློབ་མ་མང་པོ་གངས་རིར་བཏང་། ལོ་ཁ་ཤེས་སྒྲུབ་པ་བརྒྱབས་ནས་འོངས་པ་ལ་ཁྱེད་རྣམས་ཀྱི་རྒྱུད་ལ་

ཉམས་རྟོགས་ཡོན་ཏན་ཅི་འདྲ་སྐྱེས་གསུངས་པས། ནང་ནས་དབུ་མཛད་ན་རེ། སྒྱུ་ལུས་འབྱོངས་ལགས་ཞུས་པས། ཁྱོད་རྗེས་སུ་གཅིག་སྡོད་གསུངས་བསྡད་ཚེ། ཁྱོད་ཀྱིས་སྒྱུ་ལུས་འབྱོངས་པ་ལགས་ཏེ། ཁྱོད་ལ་གངས་རི་ནས་བུད་མེད་ཀྱི་གཏམ་ངན་ཞིག་བྱུང་བ་དེ་བདེན་ན་ཤིན་ཏུ་མ་ལེགས་པ་ཞིག་བྱུང་གསུངས་ཚེ། ཁོ་ངོ་མདངས་འགྱུར་ནས། དེ་སུས་སྐུ་མདུན་དུ་ཞུ་མཁན་བྱུང་། ངས་ཡིད་ལ་ཡང་མ་ཤར་ན་ང་ལ་འདི་འདྲའི་གཏམ་ངན་སྒྲོག་པ་ཟེར་ཚིག་ངན་མང་པོ་ལབ་ཚེ། ཁོང་གིས་ངས་ཁྱོད་ལ་ཀུ་རེ་བྱས་པ་ཡིན། སྒྱུ་ལུས་མ་འབྱོངས་འདུག་པས་ད་དུང་སྦྱོངས་གསུངས་སྐད། དེས་ན་གཏམ་ངན་རེ་རྣ་བས་ཐོས་ཚེ་མི་བཟོད་ན་བློ་སྦྱོང་རྒྱུད་ལ་མ་སྐྱེས་པ་ཡིན། སྔོན་བླ་མ་ཞིག་གིས་ཤའི་ཉེས་དམིགས་མང་པོ་བཤད་ཚེ། དེའི་ཉིན་ཉེ་གནས་ཀྱིས་ཚོད་བརྟགས་ཕྱིར་ཤ་སྐུ་མདུན་དུ་མ་ཁྱེར་བས། བླ་མས་ཤ་ཁྱེར་ཤོག་བྱས་པས། ཉེ་གནས་ཀྱིས་དེ་རིང་ཁོང་གིས་ཤའི་ཉེས་དམིགས་མང་པོ་གསུངས་ཚེ། མི་བཞེས་སམ་སྙམ་ཁྱེར་འོང་མ་ནུས་བྱས་པས། དེ་ཁས་བཤད་ཚོད་རེད། ད་ཤ་ཚོད་ཁྱེར་ཤོག་ཟེར་སྐད།

ལ་དག་པ་གཅིག་ན་རེ། བཤད་རྒྱུད་དེ་བླ་མ་ཚོས་བཤད་ཡོང་ཏེ། གོ་རྒྱུ་དེ་བླ་མས་ཀྱང་གོ་མི་ཡོང་ཟེར་བ་ལྟར། ཁས་ཆོས་བཤད་མང་པོ་བྱས་ཀྱང་། ལག་ལེན་ལ་མི་ཐེབས་ན་བློ་སྦྱོང་རྒྱུད་ལ་མ་སྐྱེས་པའི་རྟགས་ཡིན། སྔོན་ཇོ་བོ་རྗེ་སྟོང་མངའ་རིས་ན་བཞུགས་དུས་བོད་པའི་དྲུང་ཡིག་ཅིག་ཡོད་པ་ཉིན་གཅིག་དཔེ་ཆ་ལ་སྣག་ཚ་བོ་བ་གཟིགས་ནས་འགྲམ་ལྕག་ཅིག་བཏང་། རྗེས་སོར་དབུས་གཙང་དུ་སླེབས་ནས་ཡང་དྲུང་ཡིག་གིས་སྣག་ཚ་བོ་ནས་མ་དཔེ་བརྫད་པ་གཟིགས་ནས་ཡང་འགྲམ་ལྕག་ཚ་བོ་ཞིག་བཏང་ཚེ་ཁོ་ཚིག་པ་ཟོས་ནས་ང་ལ་འགྲམ་ལྕག་ལན་གཅིག་མིན་ལོ་སྔ་མ་མངའ་རིས་ནས་ཀྱང་གཅིག་བཏང་། ད་ལན་ཡང་གཅིག་བཏང་ཞེས་ཚིག་ངན་སྨྲས་པའི་ཚེ། ཇོ་བོ་རྗེས། ངེད་རྒྱ་གར་བ་ད་ལྟ་ཁོང་ཁྲོ་ལངས་ཀྱང་ད་ལྟ་ཞི་ནས་སེམས་ལ་བཞག་རྒྱུ་མི་འོང་། ཁྱེད་བོད་ཀྱི་མི་འདི་བསམ་པ་ངན་པར་འདུག་གསུངས་སྐད། དེས་ན་བོད་ཀྱི་སྐུ་དྲག་བསམ་པ་ངན་པ་ཁ་ཅིག་གིས། སྔར་གཞན་གྱིས་གནོད་པ་རེ་བསྐྱལ་བ་ཞེ་ལ་བཞག་ནས་ཕྱིས་གནོད་ལན་འཇལ་ཐུབ་པའི་དུས་བྱུང་ཚེ། གནོད་ལན་ཅི་

འཁྱོལ་བསྐྱེལ་ཞིང་། གལ་ཏེ་ཕའི་རིང་ལ་བསྐྱེལ་མ་ཐུབ་ན་ཞེ་ལ་བཞག་ནས་བུའི་རིང་ལ་གནོད་བསྐྱེལ་བ་ལྟར། བསམ་ངན་ཡིད་ལ་བཞག་ནས་ནམ་ཡང་མི་བརྗེད་པར་དྲན་ཅིང་། གནོད་ལན་དུ་གནོད་བསྐྱེལ་སྙམ་པ་ཡིད་ན་ཡོད་ཕྱིན། བློ་སྦྱོང་རྒྱུད་ལ་མ་སྐྱེས་པའི་རྟགས་ཡིན་གསུངས། དེ་ལྟར་བློ་སྦྱོང་རྒྱུད་ལ་སྐྱེས་མ་སྐྱེས་ལེགས་པར་བརྟགས་ནས་རྒྱུད་ལ་སྐྱེས་པའི་རྟགས་ཁྱད་པར་ཅན་དེ་དག་རྣམས་དང་ལྡན་པ་ཞིག་བྱའོ། །སྨྲས་པ། རབ་གུས་མཆོད་བསྟོད་བཀུར་ལ་མི་ཆགས་ཤིང་། །རབ་མང་གནོད་པ་བྱེད་ལ་མི་སྡང་བར། །རབ་ཡངས་ནམ་མཁའ་ལྟ་བུའི་རྣལ་འབྱོར་པ། །རབ་མཆོག་བླ་མ་རྗེ་ཡིས་འགྲོ་ཀུན་སྐྱོངས། །གཞོན་ནུ་སོ་དཀར་དུས་སུ་བློ་སྦྱངས་པས། །མགོ་བོ་དཀར་པོར་སོངས་ཀྱང་བློ་རེ་བདེ། །ལུས་སེམས་གཉིས་པོ་བདེ་ཞིང་སྐྱིད་པའི་མོད། །མགུར་དབྱངས་སྐད་གསེང་མཐོན་པོས་ལེན་སྙིང་འདོད། །ཚིགས་སུ་བཅད་པའི་ལེགས་བཤད་སྙན་མོ་ཡིས། །ཐོས་ཚད་ཡིད་ལ་དགའ་བ་བསྐྱེད་པར་ནུས། །དེ་ཕྱིར་དད་ཅན་རྣམས་ཀྱིས་ཐོས་པའི་མོད། །སེམས་ལ་ཕན་ཐོགས་འབྱུང་བའི་མགུར་དབྱངས་འཐེན། །

ཐེག་པ་ཆེ་ཆུང་ཆོས་རྣམས་ཐམས་ཅད་ཀྱི། །དགོས་པ་བདག་འཛིན་ཕུང་རྒན་འདུལ་ལ་འདུས། །དམ་ཆོས་བདག་འཛིན་གཉེན་པོར་མ་སོང་ན། །བྱས་ཚད་ཐམས་ཅད་དོན་མེད་སོང་བ་ཡིན། །བདག་འཛིན་ཉོན་མོངས་གཉེན་པོར་སོང་ཙ་ན། །བློ་སྦྱོང་རྒྱུད་ལ་སྐྱེས་པའི་རྟགས་ཀྱི་མཆོག །ལྷ་ཆོས་བྱས་ཚད་གནད་དུ་སོང་མ་སོང་། །ཁྱད་པར་འདི་ན་ཡོད་པས་ཆོས་པ་ཀུན། །སྲང་ལ་འཇལ་བའི་རྒྱ་མ་འདི་ཡིན་གསུངས། །ཆོས་པ་བཟང་པོ་བྱ་བ་དེ་ཡིན་ཞེས། །གཞན་གྱིས་མ་ཁྲེལ་དཔང་པོ་ཡིན་མོད་ཀྱང་། །རང་གི་སེམས་ལ་རང་གིས་མ་ཁྲེལ་བ། །བྱུང་ན་དཔང་པོའི་གཙོ་བོ་ཡིན་པར་གདའ། །མི་འདོད་རྐྱེན་ངན་ཅི་བྱུང་བློ་སྦྱོང་གི །ལམ་དུ་ཁྱེར་ན་ཆོག་གོ་སྙམ་པ་ཡི། །བློ་གདེང་ཡོད་ན་བློ་སྦྱོང་འབྱོངས་པའི་ཚད། །རྟ་རྩལ་ཅན་གྱི་མི་དེ་རྟ་ཐོག་ནས། །ཡེངས་ཀྱང་སྟེང་ནས་ས་ལ་མི་ལྷུང་ལྟར། །གློ་བུར་གནོད་བྱེད་རྐྱེན་ངན་ཅི་བྱུང་ཡང་། །དེ་ལ་ཞེ་སྡང་ལ་སོགས་མི་སྐྱེ་བར། །རྐྱེན་ངན་ཅི་བྱུང་ཐམས་ཅད་བློ་སྦྱོང་གི །གྲོགས་སུ་འགྲོ་བར་འདུག་ན་བློ་སྦྱོང་ཆོས། །རྒྱུད་ལ་སྐྱེས་པའི་རྟགས་ཚད་

བཟང་པོ་ལགས། །དེ་ལྟར་འབྱོངས་རག་བར་དུ་འབད་པར་བྱ། །བློ་སྦྱོང་རྒྱུད་ལ་འབྱོངས་རྟགས་བྱུང་ཟེར་ནས། །ཕྱིན་ཆད་སྦྱོང་མི་དགོས་པ་མ་ཡིན་པས། །བློ་སྦྱོང་རྒྱུད་ལ་སྐྱེས་རྟགས་ཅི་བྱུང་ཡང་། །ད་དུང་ཡང་ཡང་འབད་ནས་སྦྱང་བར་བྱ། །བློ་སྦྱོང་རྒྱུད་ལ་སྐྱེས་པའི་རྟགས་ཚད་དང་། །ལྡན་པའི་སྐྱེས་བུ་དམ་པ་སུ་ཡིན་ཀྱང་། །ཡིད་བཞིན་ནོར་བུ་དབང་གི་རྒྱལ་པོ་བཞིན། །ཀུན་གྱིས་སྤྱི་བོར་བཀུར་ནས་མཆོད་པར་འོས། །དེ་ལྟར་བློ་སྦྱོང་སྒོམ་པའི་གང་ཟག་རྣམས། །སྐྱེ་བ་ཕྱི་མར་འགྲོ་སའི་ལམ་གཅིག་ཅིང་། །སངས་རྒྱས་ཞིང་གཅིག་རིགས་ཀྱི་བདག་པོ་གཅིག །སངས་ཡང་མཉམ་པོར་རྒྱ་བའི་སྐལ་བ་ཡོད། །རྣལ་འབྱོར་བདག་ཅག་དཔོན་སློབ་ཡོན་མཆོད་ཀུན། །སྐྱེ་བ་ཕྱི་མར་དག་པའི་ཞིང་ནས་མཇལ། །ངོ་མཚར་སངས་རྒྱས་ཞིང་ཁམས་ཐམས་ཅད་དུ། །ལྷན་དུ་སོང་ནས་རྒྱལ་བ་མཆོད་གྱུར་ཅིག །ཅེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །དྲུག་པ་བློ་སྦྱོང་གི་དམ་ཚིག་བསྟན་པ་ནི། རྒྱལ་སྲས་རིན་པོ་ཆེས། ང་བློ་སྦྱོང་བ་ཡིན་ཟེར་ནས་བསླབ་པ་ཕྲ་མོ་ཁྱད་དུ་གསོད་པ་སྤངས་ཏེ། བསམ་པ་བློ་

སྦྱོང་དང་ལྡན་པའི་སྒོ་ནས། སོ་ཐར་ནས་རྡོ་རྗེ་ཐེག་པའི་བར་རང་གིས་ཇི་ལྟར་ཁས་བླངས་པའི་བསླབ་པ་རྣམས་མ་ཉམས་པར་བསྲུང་བར་བྱའོ། །བསླབ་བྱ་ཕྲ་མོ་ཡིན་ཡང་ཁྱད་དུ་བསད་ན་ཤིན་ཏུ་ཉེས་པ་ཆེ་སྟེ། བཅོམ་ལྡན་འདས་ཀྱིས་ཆོས་གསུངས་པ་ལ། བཙུན་ཆུང་གཅིག་ཆོས་ཉན་དུ་བྱུང་བས། ཁྱོད་འོད་སྲུངས་ཀྱི་བསྟན་པ་ལ་རྨ་འབྱིན་པར་མ་ཟད། ངའི་བསྟན་པ་ལའང་རྨ་འབྱིན་པར་བྱེད་དམ། རང་གི་གཟུགས་ཀྱིས་ཆོས་ཉོན་གསུངས་པས། བཙུན་ཆུང་དེ་ལོག་སོང་། ཕྱིར་ཉིན་སྦྲུལ་ཆེན་པོ་ཞིག་གི་མགོ་ལ། ཤིང་ཨེ་ལའི་འདབ་ཀྱི་སྡོང་པོ་ཆེན་པོ་སྐྱེས་པ་ཞིག་བྱུང་བ་ལ་མི་ཐམས་ཅད་སྐྲག་ནས་བྲོས་པས། བཅོམ་ལྡན་འདས་ཀྱིས་ཐམས་ཅད་ལ་མ་འཇིགས་ཤིག །ཁར་སང་གི་བཙུན་ཆུང་དེ་ཡིན་གསུངས། འོ་ན་འདིའི་རྒྱུ་ཅི་ཡིན་ཞུས་པས་འདི་འོད་སྲུངས་ཀྱི་དགེ་སློང་ཡིན་པ་ལ། ཁོ་བྲེལ་བ་ཞིག་གི་དུས་སུ་ལམ་འགག་གཅིག་ཏུ་ཤིང་ཨེ་ལའི་འདབ་ཀྱི་ཡལ་ག་ལ་ཆོས་གོས་ཐོགས་པས་དགེ་སློང་ཁྲོས་ཏེ། བསླབ་པ་ཁྱད་དུ་བསད་ནས་ཤིང་བཅད་པས་འདི་ལྟར་གྱུར་པ་ཡིན་གསུངས།

དེས་ན་བསླབ་པ་ཕྲ་མོ་ཚུན་ཆད་མ་ཉམས་པར་བསྲུང་བར་བྱའོ། །སྔོན་སློབ་དཔོན་ཇོ་བཙུན་བྱ་བའི་དགེ་བཤེས་བཟང་པོ་ཞིག་གིས་བླ་མའི་དུས་མཆོད་བཅད་པས། ཚལ་པའི་དཔོན་དགའ་དེས་ཁོང་གི་སློབ་མ་གཅིག་ལ་ད་ལྟ་དབུས་གཙང་གི་དགེ་བཤེས་ཙམ་ལ་ཁོང་བཟང་བར་འདུག་པ་བླ་མའི་དུས་མཆོད་གཅོད་པ་རང་མི་འཐད་དམ་བྱས་པས། ཁོས་སློབ་དཔོན་གྱི་དྲུང་དུ་ཕྱིན་ཏེ་མི་ཀུན་འདི་སྐད་ཟེར་བྱས་པས། ང་བླ་མ་ལ་མོས་གུས་མེད་པའམ། ཆ་རྐྱེན་འཕངས་པ་མིན། དེ་ལ་དམིགས་ནས་ཚོང་པ་མང་པོ་ཡོང་བར་གདའ་བ་དང་། དགེ་འདུན་རྣམས་གཡེངས་ནས་དགེ་སྦྱོར་འཆག་པ་དང་། བཙུན་པ་གཉེན་པོ་ཆུང་ཆུང་རྣམས་ཆུད་ཟ་བར་འདུག་པས་བཅག་པ་ཡིན། སྡོམ་གསུམ་ལ་ཉེས་ལྟུང་གིས་མ་གོས་པ་ཞིག་བྱེད་ཀྱིན་ཡོད། འདིས་ཐུགས་དགོངས་རྫོགས་མཆི་གསུངས་པ་ལ། རྒྱལ་སྲས་རིན་པོ་ཆེའི་ཞལ་ནས། དུས་མཆོད་རང་དེ་བཟང་བར་འདུག་ངོ་མཚར་ཆེ་གསུངས། བདག་གཅེས་འཛིན་མེད་པར་གཞན་གྱིས་གོ་བར་བྱ་བའི་ཕྱིར། ཤིང་གཉན་གཅོད་པ་དང་། མཛེ་ཕོ་དང་འགྲོགས་པ་ལ་སོགས་པ་ཐོ་ཅོའི་སྤྱོད་པ་རྣམས་

སྤངས་ཏེ། དགེ་བཤེས་སྟོན་པས་རྭ་སྒྲེང་དུ་བསྟན་པའི་སྲོལ་བཙུགས་པའི་བཀའ་གདམས་ཀྱི་རྣམ་ཐར་དང་མི་འགལ་བར་བྱའོ། །མིའི་གནོད་པ་བཟོད་ལ། ལྷ་འདྲེའི་གནོད་པ་མི་བཟོད་པ་དང་། ཆེ་བ་ལ་གུས་ལ་ཆུང་བ་ལ་བརྙས་པ་དང་། གཉེན་ལ་བྱམས་ལ་དགྲ་ལ་སྡང་བ་ལ་སོགས་ཕྱོགས་རེ་བ་ཐམས་ཅད་སྤངས་ལ། ཐམས་ཅད་ལ་བློ་འབྱོངས་པར་བསླབ་བོ། །བསམ་པ་སྔར་རང་གཅེས་པར་འཛིན་པ་ཏེ། ད་བདག་བས་གཞན་གཅེས་པར་བསྒྱུར་ལ། ལུས་ངག་གི་སྤྱོད་པ་གྲོགས་ཆོས་མཐུན་རྣམས་དང་འདྲ་བར་སོ་ཐུབ་པར་བྱ་སྟེ། བློ་སྦྱོང་ཐམས་ཅད་མངོན་ཚན་ཆུང་ལ་ཆོད་ཆེ་བ་ཞིག་བྱེད་དགོས་ཞེས་འཆད་ཁ་བ་ལ་གསུངས་པས། གཞན་གྱིས་མ་ཚོར་བར་རྒྱུད་སྨིན་པ་ཞིག་བྱའོ། །གཞན་ལ་འཇིག་རྟེན་པའི་སྐྱོན་ཞར་བ་ལ་སོགས་དང་། ཆོས་ཀྱི་སྐྱོན་ཚུལ་ཁྲིམས་འཆལ་བ་ལ་སོགས་པ་མི་སྙན་པའི་ཚིག་རྣམས་མི་བརྗོད་པའོ། །སྤྱིར་སེམས་ཅན་ཐམས་ཅད་དང་། ཁྱད་པར་ཆོས་སྒོར་ཞུགས་པ་རྣམས་ལ་སྐྱོན་མཐོང་ན། ང་རང་སྣང་བ་མ་དག་པ་ཡིན་གྱིས། ཁོང་བ་ལ་དེ་འདྲའི་སྐྱོན་

ཡོད་ཉེན་མེད་སྙམ་དུ་བསམ་ལ་གཞན་སྐྱོན་རྟོགས་པའི་བློ་དེ་སྤང་བར་བྱའོ། །འགའ་ཞིག་གིས་ལ་ལ་ལ་འཕྱ་སྨོད་བཏང་ཙ་ན། ནཱ་རོ་པས་ཏེ་ལོ་བ་ཉ་བཤའ་བ་ལ་སོགས་སུ་མཐོང་བ་དང་། སངས་རྒྱས་ཡེ་ཤེས་ཀྱིས་འཇམ་དཔལ་བཤེས་གཉེན་ཁྱིམ་བཙུན་ཉོ་ཚོང་བྱེད་པར་མཐོང་བ་སོགས་ཀྱི་གཏམ་རྒྱུད་གསུངས་ནས། འོ་སྐོལ་རང་བློ་མ་དག་པ་ཡིན། ཁོང་ཀུན་ཅི་འདྲ་ཡིན་མི་ཤེས། ལར་ཡང་འོ་སྐོལ་གྱིས་མི་ལ་སྐྱོན་བརྗོད་མང་པོ་བྱས་ཙ་ན། འོ་སྐོལ་ལ་ཡང་ཐམས་ཅད་ཀྱིས་ཚུར་འཐབ་པ་ཞིག་རྟེན་འབྲེལ་གྱིས་ཅིས་ཀྱང་འོང་གསུངས། དེས་ན་གཞན་སྐྱོན་རྟོགས་པའི་བསམ་སྦྱོར་སྤང་བར་བྱའོ། །རང་རྒྱུད་ལ་ཉོན་མོངས་པ་གང་ཆེ་བརྟགས་ནས། གང་ཆེ་བ་དེའི་གཉེན་པོར་ཆོས་ཐམས་ཅད་སྤུངས་ནས། དེ་ཉིད་ཐོག་མར་བཏུལ་ལོ། །བློ་སྦྱོང་བྱས་པས་ཚེ་འདིའི་རྙེད་བཀུར་ལ་སོགས་པ་དང་། ཕྱི་མ་ལ་ལྷ་མིའི་བདེ་བ་དང་། རང་ཉིད་མྱ་ངན་ལས་འདས་པ་ཐོབ་པ་ལ་སོགས་པ་རང་འདོད་ཐམས་ཅད་སྤང་བར་བྱའོ། །དངོས་པོའི་བདེན་འཛིན་དང་། བདག་གཅེས་འཛིན་གྱི་རྣམ་རྟོག་འདྲེས་པའི་དགེ་སྦྱོར་ཐམས་ཅད་ཟས་དུག་ཅན་

དང་འདྲ་བས་དེ་སྤང་བར་བྱའོ། །ཕ་རོལ་གྱིས་གདོན་པ་བྱས་པ་ལ་འཁོན་དུ་བཟུང་ནས། འཁོན་དེ་ལས་ནམ་ཡང་མི་ལྡོག་པ་དེ་སྤང་བར་བྱའོ། །གཞན་གྱིས་ཚིག་ངན་སྨྲས་པའི་ལན་དུ་གཞན་གྱི་བློ་ལ་གནོད་པའི་ཚིག་ངན་མི་སྨྲ་ཞིང་ཉེས་པ་བྱུང་ན་འདིས་ལན་ཞེས་མི་སྨྲའོ། །སྔོན་མུ་སྟེགས་སྟོན་པ་ལ་ཕྱོགས་པའི་ཀུན་ཏུ་རྒྱུ་ཞིག་གིས། ཀུན་དགའ་བོ་ལ། ཁྱེད་ཀྱི་དགེ་སྦྱོང་གོའུ་ཏ་མ་ཡོན་ཏན་ཆེན་པོ་དང་ལྡན་ཟེར་བ་རྫུན་ནོ། །ཡང་དག་པ་ཁོ་བཙས་ནས་ཞག་བདུན་ལོན་པ་ན་མ་ཤི་བས་སྡིག་ཅན་ཡིན་པར་མངོན་ནོ། །ཡབ་རྒྱལ་པོ་དང་ཆུང་མ་རྣམས་ཀྱི་གདོང་མཆི་མས་གང་བཞིན་བསྐྱུར་ནས་བྲོས་པས་ཁྲེལ་མེད་པ་ཡང་ཡིན་པར་མངོན་ནོ་ཞེས་ངན་སྨྲས་བྱས་སོ། །ཡང་མུ་སྟེགས་སྟོན་པ་དྲུག་གིས། སྟོན་པ་སངས་རྒྱས་ལ་ཕྲག་དོག་གི་དབང་གིས་འདི་སྐད་སྨྲས་ཏེ། གོའུ་ཏ་མ་འདིས་ཅི་ཡང་མི་ཤེས་ཕོ་བྲང་ནས་བྱུང་སྟེ་བྱང་ཆུབ་ཤིང་དྲུང་ན་འདུག་འདུག་ནས། ང་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་ཟེར་བ་རྫུན་ནོ། །དེ་ཡིན་ན་རྒྱལ་པོ་ཨ་ཁྱི་ཏས་བསོད་སྙོམས་སྦྱིན་པར་བོས་ནས། རྟ་ཆས་

འབའ་ཞིག་བྱིན་ཏེ་ངན་དུ་བྱས་ཀྱང་མ་ཤེས་ཏེ་དེར་སོང་བས་ན་ཐམས་ཅད་མཁྱེན་པ་མ་ཡིན་ནོ། །ཡང་ཀུན་དགའ་བོ་ལ་ཀུན་དགའི་ར་བ་ན་བྱ་མང་པོ་ཅིའི་ཕྱིར་ཅ་ཅོའི་སྐད་འབྱིན་ཞེས་དྲིས་ན། བྱ་མང་པོ་ཟས་ཕྱིར་རོ་ཞེས་སྨྲས་སོ། །དེ་དང་སྦྱར་ན་ཐམས་ཅད་ཤེས་པ་མ་ཡིན་ནོ། །བཙས་མ་ཐག་ཏུ་མ་ཡང་ཤི་བས། བཀྲ་མི་ཤིས་ཏེ་སྡིག་ཅན་ཡང་ཡིན་ནོ། །ཕ་མ་ལ་རིམ་གྲོ་མི་བྱེད་པར་རི་ལ་ལངས་ཏེ་སོང་པས་དྲིན་མི་ཤེས་པ་ཡིན་ནོ། །ཆུང་མ་བླངས་པ་ལ་ཡང་ཆུང་མའི་བྱ་བ་མ་བྱས་པར་བོར་ནས་སོང་བས་ཁྲེལ་མེད་པ་ཡང་ཡིན་ནོ། །དཔེར་ན་རླུང་ཆེན་པོ་ལངས་ན་ཤིང་ལོ་ཐམས་ཅད་ལྷན་ཅིག་སྤུངས་པ་ལྟར་སངས་རྒྱས་ཀྱི་ཆོས་ཀྱང་དེ་དང་འདྲའོ། །བྱ་མང་པོ་མིས་བོར་བའི་ཁ་ཟས་ལ་འདུ་བ་ལྟར། འཁོར་ཡང་དེ་དང་འདྲ་སྟེ་ཅི་རྙེད་རྙེད་ལེན་ཅིང་ཟའོ། །དེས་ན་དགེ་སྦྱོང་གོའུ་ཏ་མ་འཁོར་བཅས་ལ་སུ་ཞིག་མཆོད་པ་བྱ་བར་སེམས་ཞེས་སྐུར་བ་བཏབ་བོ། །དེས་ན་སངས་རྒྱས་ལ་ཡང་དེ་འདྲའི་སྐུར་བ་འདེབས་མཁན་བྱུང་ན། འོ་སྐོལ་ལ་སྨོས་ཅི་དགོས་སྙམ་དུ་གཞན་གྱིས་གཤེ་སྐུར་སྣ་ཚོགས་པ་བྱེད་མཁན་བྱུང་ཡང་ལན་དུ་ཚིག་ངན་མི་སྨྲ་

བར་ཁ་རོག་པར་གནས་པར་བྱའོ། །གཞན་ཡང་གྲུབ་ཐོབ་ཨོ་རྒྱན་པ་ལ་སློབ་མ་རྣམས་ཀྱིས་ཞུས་པ། བྱང་ཆུབ་སེམས་དཔའ་གཞན་དོན་བྱེད་པ་ལ་མི་ཁ་དང་གཤེ་སྐུར་ལ་མི་འཇིགས་པ་ཞིག་དགོས་གསུངས་པ་དེ་ལ་ཇི་ལྟ་བུ་ཞིག་དགོས་ལགས་ཞུས་པས། དེ་འདི་ལྟར་ཡིན་མོད། བྱང་ཆུབ་མཆོག་ཏུ་སེམས་བསྐྱེད། ཐེག་པ་ཆེན་པོ་ཁས་བླངས། འགྲོ་བ་སེམས་ཅན་གྱི་དོན་ལ་ཞུགས་པའི་དུས་སུ། ཕྱི་མིས་གཤེ་སྐུར་དང་ངན་སྨྲ་ལ་མི་འཇིགས་པ་ཞིག་དགོས་པ་ཡིན། གཤེ་སྐུར་དང་ངན་སྨྲ་ལ་འཇིགས་ན། ཐེག་པ་ཆེན་པོ་མི་ཡོང་། གཏམ་ངན་དང་སྒྲོ་སྐུར་ལ་འཇིགས་ན་ཐེག་པ་ཆེན་པོ་མི་བཏུབ། མ་ཉེས་པའི་ཁ་ཡོགས་དང་། འཕྱར་ཁ་ལ་འཇིགས་ན་ཐེག་པ་ཆེན་པོ་མི་ཡོང་བས། བདེ་སྡུག་དང་མཐོ་དམན་གང་བྱུང་ཡང་། ཆོས་ཉིད་ཀྱི་ཀློང་དུ་རྒྱག་པ་གཅིག་དགོས་པ་ཡིན། དེའི་རྒྱུ་མཚན་ཐེག་པ་ཆེན་པོ་ཟེར་བ་མི་དེས་གོ་མོད། བྱང་ཆུབ་སེམས་དཔའ་ཟེར་བ་དེ་ཡང་སེམས་ཅན་དཔག་ཏུ་མེད་པའི་དོན་འགྲུབ་པ་ལ་ཟེར་བ་ཡིན་མོད། སེམས་ཅན་གྱི་དོན་མི་འགྲུབ་ན་སེམས་བསྐྱེད་ཀྱི་དགོས་པ་མེད།

བསྟོད་སྨད་དང་གཤེ་སྐུར་ལ་སོགས་པའི་སྙན་པ་དང་། མི་སྙན་པ་དང་། བདེ་བ་དང་སྡུག་བསྔལ་ལ་སོགས་པའི་འགལ་མཐུན་ཐམས་ཅད་སེམས་དཔའ་གཞན་དོན་ལ་ཞུགས་པའི་དུས་སུ་ཡོང་བ་ཡིན་ཏེ། ཆོས་རྗེས་སྐྱ་བའི་ཞལ་ནས། འཕེན་ཟེལ་རིན་ཆེན་ལ་བལྟ་ཡི། །འགལ་དུ་མ་ལ་ནི་སུ་ཞིག་དཔྱོད། །ཅེས་གསུངས་པས། ཉན་ཐོས་དང་ལྟ་སྤྱོད་མཐུན་པའི་སྤྱིལ་ཆུང་རེ་རུ་ཞུགས། ངག་ཏུ་སེམས་བསྐྱེད་པ་སྐད་དུ་ཟེར། འགྲོ་དོན་ལ་ཤི་བཟུར་ཀུ་བཟུར་དུ་བཟུར། བདེ་སྡུག་ལ་སྐྱོན་ཡོན་དུ་བལྟ། འགལ་རྐྱེན་དུམ་ཙམ་བྱུང་ན། བྱ་འཇོལ་མོ་བཞིན་དུ་ས་ཕྱོགས་གཞན་དུ་བཟུར་ནས་འགྲོ་བ་དེ་ལ། གཤེ་སྐུར་དང་ལོག་སྒྲུབ་གང་ན་ཡོང་། དཔེར་ན་མགོ་ཆག་དང་རྨས་མའི་རིགས་དེ་དཔའ་བོ་གཡུལ་དུ་ཞུགས་པ་ལས་ཡོང་བ་ལགས་མོད། སྡར་མ་ཝ་བྲོས་བྱེད་པ་ལ་རྨས་ག་ན་མཆི། དཔེ་དེ་བཞིན་དུ་བསྟོད་སྨད་དང་སྒྲོ་སྐུར་ལ་སོགས་པ་ཐེག་པ་ཆེན་པོ་གཞན་དོན་བྱེད་དུས་ཡོང་བ་ཡིན། དེའི་རྒྱུ་མཚན་ཡང་མ་རུངས་པ་འདུལ་བ་ལ་འཕྲིན་ལས་ཀྱང་བཞི་ཀ་དགོས། སྡོད་ས་ངེས་མེད་དུ་སྡོད་དགོས། ཟླ་བོ་སེམས་ཅན་དང་

འགྲོགས་དགོས། སུ་མ་རུངས་པ་རྣམས་དང་འགྲོགས་དགོས་པ་ཡིན་མོད། དཔེར་ན་ཕྱུགས་མ་འཚོ་བའི་རྫི་བོ་དེ་བློ་མི་གསལ་བ་འདྲ། ཕྱུགས་རྫི་ཡང་དུས་ཐམས་ཅད་དུ་ཕྱུགས་དང་འགྲོགས་པ་ལས་ཤེས་པ་བླུན་པ་ལས་འོས་ཅི་ཡོད། དེ་དང་འདྲ་བ་སྨན་པ་མཁས་པ་དེ་དུས་རྟག་ཏུ་ནད་པ་དང་འགྲོགས་དགོས་ཏེ། ནད་པ་དང་འགྲོགས་མི་ནུས་ན་སྨན་པའི་བྱ་བ་མི་འགྲུབ། བརྟགས་པ་མཁན་པོ་དེ་དུས་རྟག་ཏུ་མཛེ་བོ་དང་འགྲོགས་དགོས་ཏེ། དེ་ལམ་དུ་མི་སློང་ན་བརྟགས་པ་མཁན་པོའི་དོན་མི་འགྲུབ་སྟེ། དེ་ལ་གཞན་གྱིས་བལྟས་ན་དུས་རྟག་ཏུ་ནད་པ་དང་མཛེ་བོ་སྐྱོང་བ་དེ་ལ་ཡང་འབྲང་གཙང་མོ་ཙམ་ཡོང་སྟེ་མི་མཆི། དེ་བཞིན་དུ་འགྲོ་དོན་བྱེད་པའི་དུས་སུ། ལོག་སྒྲུབ་མི་ཡོང་བ་ལ་རེ་མ་རེ་མེད། དེ་བྱུང་བ་ཐམས་ཅད་ཆོས་ཉིད་ཀྱི་སྟེང་དུ་རོ་སྙོམས་དགོས་པ་ལགས་མོད། དེ་རོ་མི་སྙོམས་ན་སེམས་དཔའ་ཆེན་པོ་རྣམས་ཀྱི་རྣམ་ཐར་ལ་བལྟས་ནས། ཕོ་སོ་སྐྱེད་དང་མིག་ཐག་འཆང་བས། ད་རུང་གནས་རི་ཁྲོད་ཀྱི་དགོན་པར་དབེན་པ་བརྟེན་པ་དྲག་པ་ཡིན་ཏེ། དེ་ལ་དགོངས་ནས་ཆོས་རྗེ་ས་སྐྱ་བའི་ཞལ་

ནས། བསྟོད་སྨད་ཕལ་ཆེར་ཡ་རབས་ལ། །འབྱུང་གི་མ་རབས་བདེ་བའི་རྒྱུ། །ནོར་གོད་ཕལ་ཆེར་ཕྱུག་པོ་ལ། །འབྱུང་གི་དབུལ་པོ་བདེ་བའི་རྒྱུ། །ཞེས་གསུངས་པས། སྐབས་དོན་ལ་མཐོ་དམན་གྱིས་ལོག་སྒྲུབ་མི་བཟོད་ན། ཆོས་བརྒྱད་རང་དགར་སྤྱད་པས། གཞན་དོན་བས་རང་དོན་ཡང་མི་འགྲུབ་སྟེ། སློབ་དཔོན་ཀླུ་སྒྲུབ་ཀྱི་ཞལ་ནས། འཇིག་རྟེན་མཁྱེན་པ་རྙེད་དང་མ་རྙེད་དང་། །བདེ་དང་མི་བདེ་སྙན་དང་མི་སྙན་དང་། །བསྟོད་སྨད་ཞེས་བགྱི་འཇིག་རྟེན་ཆོས་བརྒྱད་པོ། །བདག་གི་ཡིད་ཡུལ་མིན་པས་མགོ་སྙོམས་མཛོད། །ཅེས་གསུངས། འཇིག་རྟེན་ཆོས་བརྒྱད་མགོ་སྙོམས་དགོས་པར་གདའ། འགྲོ་དོན་ཕེར་བ་འདི་དཀའ་ལས་ཆེ་བ་ལགས་མོད། འགྲོ་དོན་ཕེར་བ་ལ་སྟོང་པ་ཉིད་དང་སྙིང་རྗེ་ཟུང་དུ་ཆུད་ནས་ལེགས་ཚོགས་ཀྱི་རྟེན་འབྲེལ་འགྲིགས་པ་ལ་མཁས་པ་ཞིག་དགོས་པར་གདའ། ཆོས་བརྒྱད་ཀྱི་དབང་དུ་སོང་ན་གཞན་དོན་ལྟ་ཞོག །རང་དོན་ཡང་མི་འགྲུབ་པས་སེམས་ཅན་གྱིས་ལོག་སྒྲུབ་མི་བཟོད་པ་ན་ད་དུང་སྒྲུབ་པ་རང་བྱས་ན་བཟང་། སེམས་ཅན་ད་དུང་མི་འཛད་པས། ཧ་ཅང་རིང་རྒྱུ་ཙམ་མེད། འགྲོ་དོན་

ལ་ཞུགས་ནས་སྒྲོ་སྐུར་ལ་འཇིགས་མ་འཇིགས་མེད། དེའི་རྒྱུ་མཚན་སེམས་ཅན་གྱི་གཤིས་དེ་ཀ་ལས་མ་གྲུབ་པ་ལགས་མོད། སངས་རྒྱས་ཞལ་བཞུགས་པའི་དུས་ནའང་སྐུར་བ་བྱུང་སྟེ། བཅོམ་ལྡན་འདས་ཆུ་བོ་ནེ་རཉྫ་ནའི་འགྲམ་ན་དཀའ་ཐུབ་ལ་བཞུགས་པའི་དུས་སུ་བདུད་ཀྱིས་ཟན་སྐམ་རུལ་བ་དང་། སྦང་སྐམ་སྤྱིལ་བོའི་མཐའ་མར་གཏོར་ནས་དཀའ་ཐུབ་བྱས་པ་མེད་དོ་ཟེར་ནས་སྐུར་བ་བཏབ་པ་དང་། ཡང་སྐྱེ་བོ་མང་པོའི་དབུས་ན་ཐུགས་བསྐྱེད་གསུངས་པའི་དུས་སུ། བདུད་ཀྱི་བུ་མོས་བཅོམ་ལྡན་འདས་ལ་བུ་ཆུང་གཏད་དུ་བྱུང་བ་དང་། སློབ་དཔོན་ཀླུ་སྒྲུབ་ཀྱིས་གསེར་ཁར་ཆོས་གསུང་དུ་བྱོན་པས། གསེར་པ་རྣམས་ན་རེ། དགེ་སློང་འདི་བྱུང་བས་གསེར་ཡོང་འཕྲོ་ཆད། དགེ་སློང་དེ་འདྲེ་ཅན་གཅིག་འདུག་ཟེར་བ་ལྟ་བུའམ། སློབ་དཔོན་ཞི་བ་ལྷས། དཔལ་ན་ལེནྡྲའི་གཙུག་ལག་ཁང་དུ་བྱོན་པ་དང་། དེའི་གཉེར་པ་ན་རེ། ཁྱེད་བྱུང་བས་མ་ཧེའི་ཞོ་བསྐམས་ཁྱེད་བསོད་ནམས་མེད་པ་གཅིག་འདུག་པས། ད་མ་ཡོང་ཟེར་བས། དེར་སློབ་དཔོན་ཐུགས་མུག་སྟེ། སེམས་ཅན་མོས་པ་སྣ་

ཚོགས་པ། །རྒྱལ་བས་ཀྱང་ནི་མི་མགུ་ན། །བདག་འདྲ་ངན་པས་སྨོས་ཅི་དགོས། །གསུངས་ནས་གཤེགས་སྐད། དེས་ན་གཤེ་སྐུར་གྱིས་ཀྱང་ཐབས་མི་ཆག །གཤེ་སྐུར་འདེབས་མཁན་གྱིས་ཀྱང་ཐབས་མི་ཆག་པ་རོ་སྙོམས་ཤིང་དགག་སྒྲུབ་མེད་པ་ཞིག་དགོས་པ་ཡིན་གསུངས་པ་ལྟར་བྱའོ། །གཞན་གྱིས་གནོད་པ་བྱས་པ་ཞེ་ལ་བཞག་ནས། གནོད་པའི་ལན་འཇལ་བའི་དུས་བྱུང་ཙ་ན་འཇལ་བ་དེ་སྤོང་བའོ། །མིའི་སྐྱོན་མཚང་ནས་འབྲུ་བ་དང་། མི་མ་ཡིན་ལ་སྲོག་སྔགས་བཟློ་བ་ལ་སོགས་པ་གཞན་གྱི་སེམས་ལ་གནོད་པ་དྲག་པོ་འབྱུང་བའི་སྤྱོད་ལམ་མི་བྱེད་པའོ། །རང་ལ་འབབ་པའི་ལས་ཁུར་རམ་ཁག་ངན་གཡོ་སྒྱུའི་སྒོ་ནས་གཞན་ལ་བསྒྱུར་བ་སོགས་ཁོང་སྐྱོན་ཅན་གྱི་སྤྱོད་པ་དེ་ལྟ་བུ་སྤོང་བའོ། །འདི་ཤིན་ཏུ་ཉེས་པ་ཆེ་སྟེ། སྔོན་ཁ་ཆེའི་དགེ་སློང་ར་བ་ཏི་ཞེས་བྱ་བ་མངོན་ཤེས་དང་རྫུ་འཕྲུལ་ཐོབ་པ། སློབ་མ་མང་པོ་ཡོད་པ་ཞིག་ནགས་ཀྱི་གསེབ་ན་ཆོས་གོས་ངུར་སྨྲིག་ཅིག་འཚོད་ཀྱིན་ཡོད་ཙ་ན། དེ་དང་ཉེ་བའི་ཁྱིམ་བདག་ཞིག་གི་བེའུ་སྟོར་ནས་འཚོལ་དུ་ཕྱིན་པས། དགེ་སློང་གཅིག་མེ་གཏོང་གིན་འདུག །ཁྱེད་ཅི་བྱེད་པ་ཡིན་

བྱས་པས། ཆོས་གོས་འཚོད་པ་ཡིན་ཟེར། ཚོས་ཕྲུ་ཁ་ཕྱེ་ནས་བལྟས་པས་ཤ་རུས་འདུག་པ་ཟེར། ཁོང་རང་གིས་ཀྱང་ཤ་རུས་སུ་མཐོང་། དེར་ཁོས་ཁྲིད་ནས་རྒྱལ་པོ་ལ་གཏད་དེ། འདིས་བདག་གི་བེའུ་བརྐུས་པས་ཆད་པ་ཆོད་ཅིག་བྱས་པས། རྒྱལ་པོས་དེ་དོང་དུ་བཅུག་གོ །དེ་ནས་ཞག་འགའ་ནས་ཁོ་རང་གིས་བེའུ་རྙེད་དེ། དགེ་སློང་དེས་བེའུ་བརྐུས་པར་མི་གདའ་བས། གཏོང་བར་ཞུ་ཞུས་ནའང་རྒྱལ་པོ་ཡེངས་ནས་ཟླ་བ་དྲུག་ཏུ་བཏང་བ་མ་བྱུང་། དེར་ཁོང་རང་གི་སློབ་མ་རྫུ་འཕྲུལ་ཐོབ་པ་མང་པོ་ཡོད་པ་རྒྱལ་པོའི་ཁབ་ཏུ་བྱོན་ནས། དགེ་སློང་འདི་བཟང་པོ་ཞིག་ལགས་པས་གཏོང་བར་ཞུ་ཞུས་ཏེ། རྒྱལ་པོ་དགེ་སློང་གཏོང་དུ་བྱོན་པས། དགེ་སློང་འོ་བརྒྱལ་བ་གཟིགས་ནས་ཤིན་ཏུ་འགྱོད་དེ། ཁོས་ཀྱང་ལོན་ཐོངས་པ་ལགས་ནའང་། ངས་བརྗེད་པ་དེས་སྡིག་པ་ཆེན་པོ་བསགས་འདུག་ཞུས་པས། ང་རང་གི་ལས་ཀྱིས་ལན་པ་ཡིན་གསུངས། ལས་ཅི་འདྲ་བསགས་ཞུས་པས། ང་སྔོན་རྐུན་པོ་ཞིག་ཏུ་སྐྱེས། དེ་དུས་བེའུ་གཅིག་བརྐུས་པས། བདག་པོས་དེད་ནས། ནགས་གསེབ་ན་རང་

སངས་རྒྱས་ཤིག་མཉམ་པར་བཞག་འདུག་པའི་མདུན་དུ་བསྐྱུར་ནས་བྲོས་པས། དེས་རང་སངས་རྒྱས་ཁྲིད་དེ་ཞག་དྲུག་དོང་དུ་བཅུག །དེའི་རྣམ་སྨིན་གྱིས་སྐྱེ་བ་མང་པོར་ངན་སོང་གི་དུཿ ཁ་མང་པོ་མྱང་། ཚེ་འདིར་ཡང་དུཿ ཁ་མྱང་བ་དེ་རྣམ་སྨིན་གྱི་ཐ་མ་ཡིན་གསུངས། དེས་ན་གཡོ་སྒྱུ་ཉེས་པ་ཆེ་ཚུལ་བསམས་ནས་དུག་བཞིན་དུ་སྤང་བར་བྱའོ། །ཕུག་རང་བཟང་བར་འདོད་ནས་གཞན་ལས་ཕམ་ཁ་ལེན་པ་དང་། འདྲེ་གདོན་ནམ་ནད་ཞི་བར་འདོད་ནས་བློ་སྦྱོང་བ་ནི་ལྟོ་བཅོས་དང་འདྲ་བར་རང་འདོད་སྤང་བར་བྱའོ། །ཚན་གཅིག་གིས་རྣམ་རྟོག་ལ་བློ་སྦྱོང་བ་འདི་འདྲེ་གདོན་ལ་ཕན་པའི་ཐབས་ཤིག་ཏུ་གོ་བ་འདྲ་སྟེ། དེ་ཙུག་སོང་ན་བོན་བྱེད་པ་དང་ཁྱད་མེད། ཆོས་བྱ་བ་ཉོན་མོངས་དང་རྣམ་རྟོག་གི་གཉེན་པོར་འགྲོ་བ་ཞིག་དགོས་པ་ཡིན་གསུངས། ཕ་དམ་པ་ལ། ཆོས་བྱ་བ་ཅི་ལ་ཟེར་ལགས་ཞུས་པས། ཉོན་མོངས་པའི་གཉེན་པོར་འགྲོ་བ་ཞིག་ལ་ཟེར་བ་ཡིན་གསུངས། ལོངས་སྤྱོད་ཐུན་མོང་བ་ལ་ཐབས་སྣ་ཚོགས་ཀྱི་སྒོ་ནས་བདག་གིས་ཐོབ་པར་བྱེད་པའི་བསམ་སྦྱོར་སྤོང་བའོ། །འཇིག་རྟེན་པ་ཀུན་གྱིས་རང་གི་ལྷ་མ་མགུ་

ནས་རང་ལ་གནོད་པ་བྱས་ན་ལྷ་བདུད་དུ་བབས་ཟེར་བ་ལྟར། བློ་སྦྱོང་གི་སྒོ་ནས་ང་རྒྱལ་དང་རློམ་སེམས་དྲག་པོ་བྱས་ན། ཆོས་ཆོས་མིན་དུ་སོང་བ་ཡིན། བློ་སྦྱོང་གིས་རང་རྒྱུད་འདུལ་དགོས་པ་ཡིན་པ་ལ། ང་རྒྱལ་གྱིས་རང་རྒྱུད་ལྷག་པར་རེངས་ན་ཆོས་གནད་དུ་མ་སོང་སྟེ། འདྲེས་ཤར་སྒོ་ནས་གནོད་པ་ལ། གླུད་ནུབ་སྒོར་སྐྱེལ་བ་དང་འདྲ་བས། དེས་ན་སྨན་ནད་ཐོག་ཏུ་བཏང་ཞིང་བདག་གཅེས་སྤངས་ལ་ཀུན་ལ་བྲན་གྱི་ཐ་མ་ལྟར་བྱའོ། །རང་གི་ཉེ་དུ་གྲོགས་མཆེད་ལ་སོགས་པ་ཤིན། དེ་དག་གི་ཟས་ནོར་དང་དཔེ་ཆ་ལ་སོགས་པ་ང་ལ་ཡོང་། ཡོན་བདག་ལ་ན་ཚ་ཤི་ཆད་བྱུང་ན་ཚོགས་གསོག་ཡོང་། རང་དང་མཉམ་པའི་སྒོམ་ཆེན་ཤིན། ང་གཅིག་པུ་ལ་སྐུ་བསོད་ཡོང་། དགྲ་ཤི་ན་གནོད་བྱེད་མི་ཡོང་བས་ང་འཚེངས་སྙམ་པ་ལྟ་བུ་རང་སྐྱིད་པའི་ཐབས་སུ་གཞན་སྡུག་པར་འདོད་པ་སྤང་ངོ་། །འདི་ཉེས་པ་ཆེ་ལ་འབྱུང་ཉེ་བས་ཟོན་ཆེར་བྱེད་དགོས། ཆོས་པ་གཉོམ་ཆུང་རྣམས་ལ་དངོས་སུ་དགྲ་གར་མ་རང་མེད་ནའང་དགྲ་གཉེན་འདི་བློའི་འཛིན་སྟངས་སུ་འདུག་པས། བླ་མ་སློབ་དཔོན་དཔོན་པོ་

དགོན་སྡེ་ཡུལ་ཕྱོགས་སོགས་ཀྱི་ཕྱོགས་ཆ་བཟུང་ནས། རང་ཕྱོགས་གཞན་ཕྱོགས་སུ་ཕྱེ་སྟེ། གཞན་ཕྱོགས་ཀྱིས་གནོད་པ་སྤུ་ཙམ་ཡང་མ་བསྐྱལ། རང་ཕྱོགས་ཀྱིས་ཕན་སྤུ་ཙམ་ཡང་མ་བཏགས་ཀྱང་། ཕོ་རུས་ཆེ་བར་འདོད་པ་འགའ་ཞིག །དངོས་བས་ཞེ་སྡང་ཆེ་བའི་རིགས་ཡོང་བར་འདུག །དགེ་བཤེས་ཆེ་རབ་གཉིས་འགྲན་ཟླར་ཡོད་པ་ལ། གཅིག་ལ་བུད་མེད་ཡོད་ཟེར་བ་ཐོས་པས། ཉེ་གནས་ལ་ཇ་ཞིམ་པོ་ཞིག་སྐོལ་ཅིག་གཏམ་སྙན་ཐོས་ཟེར། ཇ་བསྐོལ་ནས་དྲངས་ཏེ། གཏམ་སྙན་ཅི་གསན་ཞུས་པས། རང་རེའི་འགྲན་ཟླ་དེ་ལ་བུད་མེད་བྱུང་ལོ་ཟེར། དེ་ཀུན་སྤངས་གྲགས་རྒྱལ་གྱིས་གསན་པས། ཞལ་ནག་ཏིང་སོང་ནས། དེ་གཉིས་སྡིག་པ་གང་ཆེའམ་གསུངས་ཟེར་ཏེ། ཐུགས་ཤིན་ཏུ་མེད་པར་འདུག་གསུངས། ཡོངས་འཛིན་རིན་པོ་ཆེའི་ཞལ་ནས། དབེན་པའི་གནས་སུ་གནས་པ་རྣམས་ལ། དངོས་སུ་ལུས་སྲོག་ལ་གནོད་པ་བྱེད་པའི་དགྲ་མ་བྱུང་ཡང་། གྲོགས་ནང་ཕན་ཚུན་ལ་དོན་མེད་དུ་ཚུལ་མིན་ཡིད་བྱེད་ཀྱི་རྣམ་རྟོག་གིས་དགྲར་འཛིན་པ་ནི་འབྱུང་ཉེ། དེའི་ཚེ་འགའ་ཞིག་ལ་དགྲར་བཟུང་། འགའ་ཞིག་ལ་

གཉེན་ཉེ་བར་བཟུང་སྟེ། ཁོང་ཚོ་དང་ངེད་ཚོ་ཞེས་ཕྱོགས་རིས་སུ་གཅོད། དེ་ལ་བརྟེན་ནས་དགེ་འདུན་གྱི་སྡེ་འཁྲུག་འབྱུང་། དགེ་འདུན་གྱི་སྡེ་འཁྲུག་ནི་རྣམ་པར་སྨིན་པ་ཤིན་ཏུ་ཚབས་ཆེ་བར་གསུངས་ཏེ། སྔོན་དམ་པ་གོང་མ་རྣམས་ཀྱི་ཞལ་ནས། དགེ་འདུན་གྱི་སྡེ་འཁྲུག་པའི་ཚེ། གང་འཁྲུག་པ་བྱེད་པ་དེ་རྣམས་མནར་མེད་དུ་འགྲོ་བ་སྨོས་ཅི་དགོས། ས་དེར་གནས་པའི་སྲོག་ཆགས་གཞན་རྣམས་ལའང་ཁོང་ཁྲོ་རྒྱས་ཏེ་དམྱལ་བར་འགྲོ་བ་དང་། གནས་དེའི་ས་ཚིག་པ་ཞེས་བྱ་བར་འགྱུར་གསུངས། དེས་ན་ས་ཚིག་པ་ལ་མྱུ་གུ་མི་སྐྱེ་བ་བཞིན་དུ། སྡེ་འཁྲུགས་བྱས་པའི་ས་དེར་ཡང་སྒྲུབ་པ་བྱས་ཀྱང་འབྲས་བུ་གསར་དུ་མི་འབྱུང་བར་གསུངས་ཏེ། འདུལ་བ་ལུང་ལས་ཀྱང་། ལྷས་བྱིན་གྱིས་དགེ་འདུན་གྱི་དབྱེན་བྱས་པའི་ཚེ་སྟོང་གསུམ་འཇིག་རྟེན་གྱི་ཁམས་འདིར་སྲོག་ཆགས་སུའི་རྒྱུད་ལའང་དགེ་བའི་སེམས་མ་སྐྱེས་པ་གསར་དུ་སྐྱེ་བའི་རྒྱུན་ཆད་པར་གསུངས་པ་ལྟར་རོ། །དེས་ན་བསམ་གྱིས་མི་ཁྱབ་བརྗོད་ཀྱིས་མི་ལངས་པའི་རྣམ་པར་སྨིན་པ་རབ་ཏུ་ཚ་བ་མྱོང་དགོས་པའི་ལས་ཚབས་པོ་ཆེ་དེ་

འདྲ་བ་ལ་ནི་སྲོག་གི་ཕྱིར་ཡང་མི་འཇུག་ཅིང་། དེ་འདྲ་བའི་ཀུན་སློང་གི་བསམ་པ་ཕྲ་མོ་ཙམ་ཡང་བཀག་ནས་ཚེ་རབས་ཐམས་ཅད་དུའང་། དེ་འདྲ་བའི་ལས་ཚབས་པོ་ཆེ་གསོག་པར་མ་གྱུར་ཅིག་ཅེས་སྨོན་ལམ་གདབ་བོ། །སྔོན་དགེ་བཤེས་གསལ་ཤེ་ཟེར་བ་སྡེ་སྣོད་ཐམས་ཅད་ལ་སྦྱངས་པའི་མཁས་པ་ཞིག་ཡོད་པ་དེས་ནམ་ཞིག་ན་སྡེ་འཁྲུག་གི་དཔོན་པོ་བྱས་པས། དགེ་བཤེས་སྟོན་པའི་ཞལ་ནས། ངའི་གསལ་ཤེ་ལོ་གསུམ་གྱིས་ཤི་བ་འགྱངས། ཁོ་དེའི་གོང་དུ་ཤི་ན་སྡེ་སྣོད་གསུམ་པ་ཞིག་ཤི་བ་ཡིན་པ་ལ་གསུངས། ཡང་དགེ་བཤེས་པོ་ཏོ་བ་མྱ་ངན་ལས་འདའ་ཁར། དགེ་འདུན་རྣམས་ལ་ཞལ་གདམས་གནང་སྟེ། རང་རེ་གཏོར་མ་ཆེན་པོ་ཞིག་བཞེངས་ཏེ་མནའ་ཞིག་བསྒགས་དགོས་ཡོད་དེ་མ་བྱུང་། སངས་རྒྱས་ཀྱི་བསྟན་པ་དུང་ལ་རྡུལ་ཕྱིས་པ་བཞིན་འོར་ཕྱིད་ལ་གཏོང་བ་དེ་དགེ་འདུན་གྱི་སྡེ་འཁྲུག་འདི་ཡིན་ནོ་གསུངས། དེ་ལྟ་བུའི་གནད་རྣམས་བསམ་ནས་སྤྱིར་སེམས་ཅན་སུ་ལའང་ངན་སེམས་མི་བསྐྱེད་ཅིང་། རྣམ་པ་ཀུན་ནས་གང་ཕན་དང་། ལྷག་པར་རང་གི་མིག་ལམ་དུ་སྣང་བའི་གྲོགས་ཆོས་མཛད་རྣམས་ལ་དག་སྣང་དང་

གུས་པ་ཅི་སྐྱེ་བྱའོ། །ཞེས་གསུངས་སོ། །སྨྲས་པ། མངོན་པར་རྟོགས་པའི་ཡོན་ཏན་ཚད་མེད་རྣམས། །མངོན་དུ་གྱུར་ཀྱང་སྦས་པའི་ཚུལ་སྟོན་ཞིང་། །མངོན་མཐོང་ངེས་ལེགས་མ་ནོར་ལམ་བཟང་ཀུན། །མངོན་སུམ་སྟོན་མཁས་བླ་མས་རྟག་ཏུ་སྐྱོངས། །ཆོས་པས་འཇིག་རྟེན་གླུ་ལེན་མི་འོས་ཀྱང་། །ཆོས་ཀྱི་མགུར་དབྱངས་སྐབས་རེ་ལེན་པར་རིགས། །ཆོས་བཞིན་བྱེད་པའི་བྱ་བཏང་རྣལ་འབྱོར་ངས། །ཆོས་ཀྱི་མགུར་དབྱངས་སྙན་ལ་རིང་བ་ལེན། །ང་ནི་ཐེག་ཆེན་བློ་སྦྱོང་མཁན་ཡིན་ཟེར། །བསླབ་པ་ཕྲ་མོ་ཁྱད་དུ་གསོད་མི་རུང་། །སོ་སོ་ཐར་ནས་རྡོ་རྗེ་ཐེག་པའི་བར། །རང་གིས་ཁས་བླངས་བསླབ་པ་ཉམས་མེད་སྲུངས། །བདག་འཛིན་མེད་པ་གཞན་གྱིས་གོ་བའི་ཕྱིར། །ཤིང་གཉན་གཅོད་དང་མཛེ་བོ་འགྲོགས་པ་སོགས། །ཐོ་ཅོའི་སྤྱོད་པ་ངན་པ་རྣམས་སྤངས་ཏེ། །དགེ་བའི་བཤེས་གཉེན་སྟོན་པས་རྭ་སྒྲེང་དུ། །བསྟན་པའི་སྲོལ་བཟང་བཙུགས་པའི་བཀའ་གདམས་ཀྱི། །རྣམ་ཐར་དང་དང་ནམ་ཡང་འགལ་མི་བྱ། །མི་ཡི་གནོད་པ་བཟོད་ལ་ལྷ་འདྲེ་ཡི། །གནོད་པ་མི་བཟོད་ཆེ་ལ་གུས་

ན་ཡང་། །ཆུང་ལ་བརྙས་དང་གཉེན་ལ་བྱམས་ན་ཡང་། །དགྲ་ལ་སྡང་བ་ལ་སོགས་ཕྱོགས་རེ་བ། །ཐམས་ཅད་སྤངས་ནས་ཀུན་ལ་བློ་འབྱོངས་དགོས། །སྔ་སོར་རང་ཉིད་གཅེས་པར་འཛིན་པ་དེ། །ད་ནི་བདག་བས་གཞན་གཅེས་བསྒྱུར་ན་ལེགས། །ལུས་ངག་སྤྱོད་པ་ཆོས་མཐུན་གྲོགས་འདྲ་བར། །འགྱུར་ལྡོག་མེད་པར་རང་སོ་ཐུབ་པར་བྱ། །བློ་སྦྱོང་ཐམས་ཅད་མངོན་ཚན་ཆུང་བ་ལ། །ས་ཆོད་གཞན་ལས་ཆེ་བ་བྱེད་པ་དགོས། །གཞན་སྐྱོན་ཞར་བ་ཚུལ་ཁྲིམས་འཆལ་སོགས་ལ། །མི་སྙན་ཚིག་རྣམས་ནམ་ཡང་བརྗོད་མི་བྱ། །གཞན་གྱི་ཡིད་འོང་འཇམ་པའི་གཏམ་རྣམས་སྨྲ། །སེམས་ཅན་སྤྱི་དང་ཁྱད་པར་ཆོས་པ་ཡི། །སྐྱོན་འདྲ་མཐོང་ན་རང་སྣང་མ་དག་པའི། །དབང་གིས་དེ་ལྟར་སྣང་བ་མ་གཏོགས་པ། །ཁོང་ལ་དེ་འདྲའི་སྐྱོན་མེད་སྙམ་དུ་བསམས། །གཞན་གྱི་སྐྱོན་ལ་ནམ་ཡང་རྟོགས་མི་བྱ། །རང་རྒྱུད་ཉོན་མོངས་གང་ཆེ་སྔོན་ལ་འདུལ། །རང་འདོད་རྙེད་བཀུར་རེ་བ་རྒྱབ་ཏུ་སྐྱུར། །གཅེས་འཛིན་དབང་གིས་དགེ་སྦྱོར་གང་བྱེད་སྤངས། །གནོད་པ་བྱས་པ་འཁོན་དུ་འཛིན་མི་བྱ། །ཚིག་ངན་ལན་དུ་ཚིག་ངན་མི་སྨྲ་ཞིང་། །

ཉེས་པ་བྱུང་ན་འདིས་ལན་ཟེར་མི་རུང་། །གནོད་པའི་ལན་དུ་གནོད་པ་བསྐྱེལ་མི་བྱ། །ཁག་ངན་གཞན་གྱི་ཐོག་ཏུ་བསྒྱུར་བ་སྤངས། །ནད་གདོན་ཞི་ཕྱིར་བློ་སྦྱོང་བསྒོམ་མི་བྱ། །ཐུན་མོང་ལོངས་སྤྱོད་ཐབས་ཀྱིས་ལེན་པ་སྤངས། །ང་རྒྱལ་རློམ་སེམས་གཏན་ནས་བྱེད་མི་རུང་། །རང་སྐྱིད་གཞན་ཀུན་སྡུག་ན་བསམ་མི་བྱ། །དེ་དང་དེ་འདྲའི་བློ་སྦྱོང་དམ་ཚིག་རྣམས། །ནམ་ཡང་ཉམས་པ་མེད་པར་བསྲུང་ནུས་ན། །གནས་སྐབས་མཐར་ཐུག་འདོད་དོན་མ་ལུས་པ། །འབད་མེད་ལྷུན་གྱིས་འགྲུབ་པར་གདོན་མི་ཟ། །དེང་ནས་བཟུང་སྟེ་ཚེ་རབས་ཐམས་ཅད་དུ། །བདག་གཞན་འགྲོ་ཀུན་མཐོ་ནས་མཐོ་རུ་སོང་། །མཐར་ཐུག་སངས་རྒྱས་ཞིང་དུ་ལེགས་ཕྱིན་ནས། །ངོ་མཚར་ལྟད་མོ་སྣ་ཚོགས་བལྟ་བར་སྨོན། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །། ༈ །བདུན་པ་བློ་སྦྱོང་གི་བསླབ་བྱ་བསྟན་པ་ནི། རྒྱལ་སྲས་རིན་པོ་ཆེས། བློ་སྦྱོང་མི་ཉམས་ཤིང་འཕེལ་བར་བྱེད་པའི་ཐབས་ལ་སློབ་པ་སྟེ། དེ་ལ་ཟས་དང་གོས་ཀྱི་རྣལ་འབྱོར་ལ་སོགས་པ་ཐམས་ཅད་གཞན་ཕན་གྱི་སེམས་འབའ་ཞིག་གིས་བྱེད་

པའོ། །བློ་སྦྱོང་བསྒོམས་པས་ན་ཚ་དང་འདྲེ་གདོན་དང་། མིས་སྡང་བ་དང་། རང་གི་ཉོན་མོངས་ཆེར་འགྲོ་བ་ལ་སོགས་བྱུང་ནས་བློ་སྦྱོང་བསྒོམ་སྙིང་མི་འདོད་པ་བྱུང་ན། འཇིག་རྟེན་གྱི་ཁམས་ན་བདག་གི་ཉེས་པ་འདི་ལྟ་བུ་བྱུང་བའི་སེམས་ཅན་མང་པོ་ཡོད་པས། དེ་རྣམས་སྙིང་རེ་རྗེ་སྙམ་དུ་བསམས་ནས། དེ་དག་གི་ཉེས་པ་རྣམས་བདག་ལ་འདུས་པར་གྱུར་ཅིག་སྙམ་དུ་བསམ་ཞིང་གཏོང་ལེན་བསྒོམ་པར་བྱའོ། །སྔ་དྲོའི་ཚེ་དེ་རིང་བྱང་ཆུབ་ཀྱི་སེམས་གཉིས་དང་མི་འབྲལ་བར་བྱ་དགོས་སྙམ་པའི་འཕེན་པ་བཏང་ནས། ཉིན་མོའང་དེ་བཞིན་དུ་དྲན་ཤེས་བཞིན་གྱིས་ཟིན་པར་བྱས་ལ། དགོངས་མོ་ཉལ་བ་ན་ཉིན་པར་གྱི་སྤྱོད་པ་རྣམས་ལ་བརྟགས་ཏེ། བྱང་ཆུབ་ཀྱི་སེམས་གཉིས་དང་འགལ་བ་བྱུང་ན། བདག་ལ་རྔན་བགྲངས་ཏེ་བཤགས་པ་བྱས་ལ། ཕྱིས་དེ་འདྲ་མི་འབྱུང་བའི་བློ་བསྐྱེད། མ་འགལ་བར་འདུག་ན་དགའ་བ་བསྒོམ་སྟེ། ཕྱིས་ཀྱང་དེ་བཞིན་དུ་བྱའོ་སྙམ་དུ་བསམ་མོ། །འཁོར་དང་ལོངས་སྤྱོད་ལ་སོགས་པ་ཕུན་སུམ་ཚོགས་པ་བྱུང་ན་དེས་མ་དྲེགས་པར་སྒྱུ་མ་ལྟ་བུར་ཤེས་པར་བྱ་སྟེ། གཞན་ལ་ཕན་པའི་ཐབས་སུ་ཅི་

འགྱུར་བྱ་ཞིང་། ཤིན་ཏུ་རྒུད་དེ་འོག་ནས་འགྲོ་བ་ཆུ་ལས་མེད་པ་བྱུང་ན་ཡང་། དེ་ཡང་སྒྱུ་མ་ལྟ་བུར་ཤེས་པར་བྱ་སྟེ། གཞན་གྱི་རྒུད་པ་ཐམས་ཅད་ལེན་པ་ལ་ཞུམ་པ་མེད་པར་བྱའོ། །ཆོས་སྤྱིའི་དམ་ཚིག་དང་། ཁྱད་པར་བློ་སྦྱོང་གི་དམ་ཚིག་གཉིས་མེད་ན། འདི་ཕྱིའི་བདེ་བ་གང་ཡང་མི་འབྱུང་བས། དམ་ཚིག་གཉིས་སྲོག་ལས་ཀྱང་གཅེས་པར་བསྲུང་བའོ། །ཉོན་མོངས་པ་སྐྱེས་པ་ན། དང་པོ་དྲན་པ་དཀའ། བར་དུ་བཟློག་པ་དཀའ། ཐ་མར་རྒྱུན་ཆོད་པར་དཀའ་བས། དང་པོ་ནམ་སྐྱེས་པ་ན་ངོས་ཟིན་པར་བྱས་ལ། བར་དུ་གཉེན་པོའི་སྟོབས་བསྐྱེད་དེ་སྤངས་ནས། མཐར་མི་འབྱུང་བར་བྱ་བའི་ཕྱིར་འབད་པར་བྱའོ། །ཆོས་བསྒྲུབ་པའི་རྒྱུའི་གཙོ་བོ་བླ་མ་བཟང་པོ་དང་མཇལ་བ་དང་། རང་གི་བློ་ལས་སུ་རུང་པས་ཆོས་ཚུལ་བཞིན་ཉམས་སུ་ལོངས་པ་དང་། ཆོས་བསྒྲུབ་པ་ལ་དགོས་པའི་མཐུན་རྐྱེན་འཛོམ་པ་སྟེ། དེ་གསུམ་རང་མ་ཚང་ན་དགའ་བ་བསྒོམ་ཞིང་གཞན་ལ་དེ་གསུམ་ཚང་བར་སྨོན་ལམ་གདབ། རང་ལ་དེ་གསུམ་མ་ཚང་ན་འཇིག་རྟེན་གྱི་ཁམས་ན་བདག་ལྟར་རྒྱུའི་གཙོ་བོ་གསུམ་

མ་ཚང་བས་ཆོས་རྣལ་མ་མ་བྱུང་བ་མང་པོ་ཡོད་པས། དེ་རྣམས་སྙིང་རེ་རྗེ་སྙམ་དུ་དེ་རྣམས་ཀྱི་རྒྱུ་གསུམ་མ་ཚང་བའི་ཉེས་པ་ཐམས་ཅད་བདག་ལ་སྨིན་ནས། དེ་དག་ལ་རྒྱུ་གསུམ་ཚང་བར་གྱུར་ཅིག་སྙམ་དུ་ཞེ་ཐག་པ་ནས་སྒོམ་མོ། །ཐེག་པ་ཆེན་པོའི་ཡོན་ཏན་ཐམས་ཅད་བླ་མའི་མོས་གུས་ལ་རག་ལས་པས། བླ་མ་ལ་མོས་གུས་ཉམས་པ་མེད་པ་དང་། བློ་སྦྱོང་ཐེག་ཆེན་གྱི་ཡང་སྙིང་ཡིན་པས། དེ་སྒོམ་པ་ལ་སྤྲོ་བ་ཉམས་པ་མེད་པ་དང་། ཐེག་པ་ཆེ་ཆུང་གི་བསླབ་བྱ་ཕྲ་མོ་ཚུན་ཆད་མ་ཉམས་པར་བསྲུང་བའོ། །དེ་རྣམས་ཀྱི་ནང་ནས་ཀྱང་བླ་མའི་མོས་གུས་འདི་ཤིན་ཏུ་གལ་ཆེ་སྟེ། རྣལ་འབྱོར་གྱི་དབང་ཕྱུག་རྗེ་བཙུན་མི་ལ་རས་པ་དེ་ཉིད་དབེན་པའི་རི་ལ་བཞུགས་དུས། དབུས་ཕྱོགས་སུ་སྤྲིན་ལངས་པ་ནམ་མཐོང་བའི་ཚེ། སྤྲིན་མ་ཀིའི་འོག་ན། ངའི་བླ་མ་ཡོད་གསུངས་ནས་ཕྱག་མཛད་ཅིང་ཁྱད་པར་མཆོང་ལུང་ཁྱུང་གི་རྫོང་ན་འོད་གསལ་ཕྱག་རྒྱ་ཆེན་པོའི་ངང་ལ་བཞུགས་པའི་དུས་ནམ་ཞིག་གི་ཚེ། འཚོ་བའི་སྟ་གོན་ལ་བཞེངས་པས། ཕྱེ་ཚྭ་ཆུ་སྡོར་དག་ལྟ་ཅི་སྨོས་ཏེ། གོ་ཁ་ན་ཤིང་ཡང་མི་འདུག །ཐ་བ་ཁ་ན་ཆུ་དང་མེ་ཡང་མི་

འདུག་པས། ངའི་འདི་ཧ་ཅང་རང་ཡང་བློས་བཏང་དྲགས་འདུག་པས། ཤིང་ཞིག་འཐུ་རུ་འགྲོ་དགོས་དགོངས་ནས་བྱོན་ཏེ། ཤིང་ཐུ་བ་གང་ཙམ་རྙེད་པའི་ཚེ་རླུང་ཆེན་པོ་ཞིག་གློ་བུར་དུ་ལངས་ནས་རས་བཟུང་ཚེ་ཤིང་ཁྱེར། ཤིང་བཟུང་ཚེ་རས་ཁྱེར་བ་ལས་ཐུགས་དགོངས་ལ། ངས་སྔར་རི་ཁྲོད་དུ་དེ་ཙམ་ཞིག་བསྡད་རུང་། ད་དུང་བདག་འཛིན་བློས་མ་ཐོངས་པར་འདུག །བདག་འཛིན་བློས་མ་ཐོངས་པའི་ཆོས་སྒྲུབ་པས་ཅི་བྱེད་སྙམ། རས་དགའ་ན་རས་ཁྱེར། ཤིང་དགའ་ན་ཤིང་ཁྱེར་གསུངས་གཉིས་ཀ་བློས་བཏང་སྟེ་བཞུགས་པས། འཚོ་བ་ངན་པའི་སྟབས་ཀྱི་བསེར་མའི་རྣམ་བས་ཡུད་ཅིག་ཐུགས་དྲན་མེད་དུ་ཐིམ་པ་ལས་བཞེངས་པའི་ཚེ། རླུང་ཞི་བ་དང་རས་དེ་ཤིང་སྡོང་གཅིག་གི་རྩེ་ལ་ལིང་ངེ་འདུག་པ་དང་། ཐུགས་སྐྱོ་བའི་ཉམས་ཤར་བའི་ངང་ལ་ཕ་བོང་ལུག་རོ་ཙམ་ཞིག་གི་ཁར་མཉམ་པར་བཞག་པའི་མཐར། ཤར་ཕྱོགས་གྲོ་བོ་ལུང་གི་ཕྱོགས་སུ་སྤྲིན་དཀར་པོ་ཞིག་ལིང་བྱུང་བས། སྤྲིན་ཡ་ཀིའི་འོག་ན་གྲོ་བོ་ལུང་གི་དགོན་པ་ཡོད། དེ་ན་ངའི་བླ་མ་སྒྲ་བསྒྱུར་མར་པ་ལོ་ཙཱ་དེ་བཞུགས་

ཏེ་སྙམ་པ་དང་། བླ་མ་ཡབ་ཡུམ་མཆེད་གྲོགས་རྡོ་རྗེ་སྤུན་གྱི་འཁོར་དང་བཅས་པའི་དབུས་ན་རྒྱུད་ཀྱི་བཤད་པ་དབང་དང་གདམས་ངག་རྣམས་གནང་ཚུལ་དྲན་ནས། ད་ལྟ་བཞུགས་ན་ཅི་ལ་ཐུག་རུང་མཇལ་དུ་འགྲོ་བ་ཡིན་ཏེ་དགོངས་པ་དང་། སྔར་གྱི་སྐྱོ་ཤས་དེའི་ཁར་བླ་མ་དྲན་དྲགས་ཐུགས་སྐྱོ་བ་ཚད་ལས་འདས་པ་ཞིག་གི་ངང་ནས། སྤྱན་ཆབ་མང་པོ་བསིལ་ཞིང་ཐུགས་སྐྱོ་བའི་གདུང་དབྱངས་བླ་མ་དྲན་དྲུག་གི་མགུར་འདི་གསུངས་སོ། །ཕ་དྲན་པས་གདུང་སེལ་མར་པའི་ཞབས། །སྤྲང་གདུང་དབྱངས་ཐལ་ལོ་མར་པ་རྗེ། །བྲག་དམར་མཆོང་ལུང་ཤར་ཕྱོགས་ན། །ཆུ་འཛིན་སྤྲིན་དཀར་ལང་མ་ལིང་། །སྤྲིན་དཀར་པོ་ལྡིང་བའི་འོག་ཞིག་ན། །རྒྱབ་རི་གླང་ཆེན་འགྱིངས་བའི་མདུན་ཞིག་ན། །མདུན་རི་སེང་ཆེན་འགྱིངས་འདྲའི་སྟེང་ཞིག་ན། །གནས་ཆེན་གྲོ་བོ་ལུང་གི་དགོན་པ་ན། །རྡོ་ཆེན་ཨ་མོ་ལི་ཀའི་ཁྲི་སྟེང་ན། །གདན་ཁྲི་སྙན་ས་ལེའི་པགས་སྟེང་ན། །དེ་ན་སུ་བཞུགས་སུ་མི་བཞུགས། །དེ་ན་སྒྲ་བསྒྱུར་མར་པ་བཞུགས། །དུས་ད་ལྟ་བཞུགས་ན་དགའ་བ་ལ། །ང་མོས་གུས་ཆུང་རུང་མཇལ་སྙིང་འདོད། །གདུང་སེམས་ཆུང་

རུང་མཇལ་སྙིང་འདོད། །ངས་བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །ཡུམ་མ་ལས་ལྷག་པའི་བདག་མེད་མ། །དུས་ད་ལྟ་བཞུགས་ན་དགའ་བ་ལ། །ས་སྐོར་ཐག་རིང་ཡང་མཇལ་སྙིང་འདོད། །ལམ་བགྲོད་པར་དཀའ་ཡང་མཇལ་སྙིང་འདོད། །བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །རྒྱུད་ཟབ་མོ་དགྱེས་པ་རྡོ་རྗེ་དེ། །དུས་ད་ལྟ་གསུངས་ན་དགའ་བ་ལ། །ང་ཤེས་རབ་ཆུང་རུང་འཛིན་སྙིང་འདོད། །བློ་གྲོས་ཆུང་ཡང་སྐྱོར་སྙིང་འདོད། །བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །སྙན་བརྒྱུད་བརྡའ་ཡི་དབང་བཞི་དེ། །ད་ལྟ་བསྐུར་ན་དགའ་བ་ལ། །ང་འབུལ་བ་ཆུང་རུང་ཞུ་སྙིང་འདོད། །དབང་ཡོན་མེད་རུང་ཞུ་སྙིང་འདོད། །བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །ཁྲིད་ཟབ་མོ་ནཱ་རོ་ཆོས་དྲུག་དེ། །ད་ལྟ་གསུང་ན་དགའ་བ་ལ། །ང་སྙིང་རུས་ཆུང་རུང་ཞུ་སྙིང་འདོད། །ང་བསྒོམ་བསྲན་ཆུང་རུང་སྒོམ་སྙིང་འདོད། །བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་

ཙཱ་དྲན། །མཆེད་གྲོགས་དབུས་གཙང་དད་འདུས་དེ། །ད་ལྟ་བཞུགས་ན་དགའ་བ་ལ། །ང་ཉམས་རྟོགས་ངན་རུང་བསྡུར་སྙིང་འདོད། །གོ་བ་ཞན་རུང་བསྡུར་སྙིང་འདོད། །བསམ་ཞིང་མཚན་ལྡན་བླ་མ་དྲན། །བསྒོམ་ཞིང་མར་པ་ལོ་ཙཱ་དྲན། །སྤྲང་མོས་གུས་ཀྱི་ངང་ནས་འབྲལ་མེད་ཀྱང་། །བླ་མ་སྙིང་ནས་དྲན་པ་ཡི། །འདོད་པས་གདུངས་ནས་བཟོད་གླགས་མེད། །དབུགས་སྟོད་དུ་འཚངས་ནས་སྐད་མ་ཐོན། །བུའི་གདུང་བ་སོལ་ཅིག་བཀའ་དྲིན་ཅན། །ཞེས་གསུངས། ཡང་རྒྱལ་བ་དགེ་འདུན་གྲུབ་ཀྱིས་ཉིན་གཅིག་ཤར་ཕྱོགས་གངས་རིའི་རྩེ་ན་སྤྲིན་དཀར་པོ་ལྡིང་བ་མཐོང་བའི་རྐྱེན་བྱས། རྗེ་ཡབ་སྲས་ཆོས་མཛད་མཆེད་གྲོགས་དང་བཅས་པ་དྲན་ཏེ། ཤར་གངས་རི་མའི་གདུང་དབྱངས་འདི་བླངས་སོ། །ཤར་གངས་རི་དཀར་པོའི་རྩེ་མོ་ན། །སྤྲིན་དཀར་པོ་གནམ་ལ་བསྙེག་འདྲ་བ། །དེ་མཐོང་བའི་མོད་ལ་བླ་མ་དྲན། །དྲིན་བསམས་ཤིང་བསམས་ཤིང་དད་པ་སྐྱེས། །སྤྲིན་དཀར་པོ་ལྡིང་བའི་ཤར་ཕྱོགས་ན། །འབྲོག་དགེ་ལྡན་རྣམ་པར་རྒྱལ་བ་དེར། །མཚན་བརྗོད་པར་དཀའ་བའི་དྲིན་པོ་ཆེ། །ཕ་བློ་བཟང་གྲགས་པ་

ཡབ་སྲས་བཞུགས། །ལམ་རིམ་པ་གཉིས་ཀྱི་རྣལ་འབྱོར་སོགས། །ཆོས་ཟབ་ལ་ཤིན་ཏུ་རྒྱས་པར་གསུངས། །བོད་ཁ་བ་ཅན་གྱི་སྐལ་ལྡན་ལ། །མགོན་ཁྱོད་ཀྱི་བཀའ་དྲིན་བསམ་མི་ཁྱབ། །སྒོས་སྙོམ་ལས་འཛིན་པའི་དགེ་འདུན་གྲུབ། །བློ་ཅུང་ཟད་ཆོས་ལ་ཕྱོགས་པ་འདི། །རྗེ་ཡབ་སྲས་རྣམས་ཀྱི་བཀའ་དྲིན་ཡིན། །དྲིན་ཆེ་བར་ངེས་སོ་ཡབ་སྲས་རྣམས། །དུས་འདི་ནས་བྱང་ཆུབ་སྙིང་པོའི་བར། །རྗེ་ཡབ་སྲས་ཁྱེད་རྣམས་མ་གཏོགས་པར། །སྐྱབས་རེ་ས་གཞན་དུ་མི་འཚོལ་བས། །ཐུགས་བརྩེ་བའི་ལྕགས་ཀྱུས་དྲང་དུ་གསོལ། །དྲིན་ཇི་བཞིན་འཁུར་བར་མ་ནུས་ཀྱང་། །སེམས་ཆགས་སྡང་དབང་དུ་མ་སོང་བར། །མགོན་ཁྱོད་ཀྱི་བསྟན་པ་འཛིན་པ་ལ། །དུས་ནམ་ཡང་བརྩོན་པ་བགྱིད་པར་སྨོན། །ལར་ད་ལྟ་གངས་རིའི་ཁྲོད་འདི་ན། །རང་བསྟན་པ་འཛིན་པར་ཁས་ལེན་ཅིང་། །གཞན་བསྟན་འཛིན་དགྲ་བོའི་དྭངས་མར་འཛིན། །ཚུལ་འདི་ལ་སྐྱོ་བ་གཏིང་ནས་སྐྱེས། །གཞན་འཕུང་བར་འདོད་པའི་ཀུན་སློང་དང་། །རྒྱུད་མཚན་འཛིན་དམ་པོས་བཅིངས་ལགས་ཀྱང་། །ལམ་མཐོན་པོར་

གནས་པའི་ཁས་ལེན་བྱེད། །འདི་བརྟགས་ན་ཀུན་གྱིས་ཁྲེལ་བའི་རྒྱུ། །ལམ་གོལ་སར་རྒས་པའི་སྡུག་ཡུས་ཀྱིས། །ཆོས་ཚུལ་བཞིན་བྱེད་པའི་གང་ཟག་ལ། །རྒྱུད་ཁོང་ནས་འཁྲུགས་པའི་གདུག་སེམས་ཅན། །གདོན་ཐུགས་ལ་ཞུགས་པ་མ་ལགས་སམ། །དགྲ་ཉོན་མོངས་འདུལ་ཐབས་མི་བྱེད་པར། །ཤགས་འགྱེད་པ་ཙམ་གྱི་བཤད་ཉན་ཡང་། །འདྲེ་ཤར་སྒོའི་ཕྱོགས་སུ་གནས་པ་ལ། །གླུད་ནུབ་སྒོར་གཏོང་བ་དོན་རེ་ཆུང་། །དོན་དེ་ལྟར་གོ་བའི་བཤེས་གཉེན་ང་། །སྤྱིར་ལུས་ཅན་ཀུན་ལ་བཀའ་དྲིན་བསམ། །སྒོས་ཆོས་མཛད་ཡོངས་ལ་དག་སྣང་སྦྱོང་། །དགྲ་ནང་ན་འདུག་པའི་ཉོན་མོངས་འདུལ། །མི་ཁོ་བོའི་རྗེས་འཇུག་གྲོགས་པོ་རྣམས། །ཡིད་ཕྱོགས་སུ་ལྷུང་བས་མ་འཆིང་བར། །བློ་གཟུ་བོར་གནས་པའི་རྟོག་དཔྱོད་ཀྱིས། །ལམ་དྲང་པོར་ཞུགས་པ་ཅིས་ཀྱང་ལེགས། །གཏམ་འདི་ལ་བརྟེན་ནས་འགྲོ་བ་རྣམས། །བྱམས་སྙིང་རྗེས་དྲངས་པའི་སེམས་བསྐྱེད་དང་། །དབྱིངས་སྤྲོས་བྲལ་རྟོགས་པའི་ལྟ་བ་ཡིས། །དཔལ་བླ་མེད་བྱང་ཆུབ་མྱུར་ཐོབ་ཤོག །གསུངས། རྒྱལ་བ་སྐལ་བཟང་རྒྱ་མཚོས་ཀྱང་།

རི་སྨན་ལྗོངས་དྲི་བཟང་ངད་པ་འཐུལ། །དུས་གསུམ་དུ་མེ་ཏོག་ལྡིང་ཁང་བཀྲ། །ཤིང་གཡུ་ལོ་རྒྱས་པའི་ཚང་ཚིང་གིས། །རྗེ་བླ་མའི་མཛེས་སྐུ་ཡི་ལ་ཤར། །ཆབ་ལྷུང་ལྷུང་འབབ་པའི་ཉལ་འགྲོའི་སྒྲ། །ཡིད་ཁོས་སུ་ཕེབས་པའི་འདབ་ཆགས་སྐད། །ཆོས་ལེགས་བཤད་དར་དིར་སྒྲོག་པ་ཡིས། །རྗེ་བླ་མའི་གསུང་དབྱངས་ཡིད་ལ་དྲན། །སྟོན་གཡའ་དང་བྲལ་བའི་དགུང་སྔོན་སྤོར། །སྤྲིན་དཀར་གསལ་ལང་ལོང་རྩིབ་ཤར་སྒྲེང་། །ཉི་གཞོན་གྱི་འོད་སྣང་ལམ་ལམ་འདིས། །རྗེ་བླ་མའི་མཁྱེན་བརྩེ་ཡིད་ལ་ཤར། །གསུངས། དེ་བཞིན་དུ་བླ་མ་སྐྱེས་བུ་དམ་པ་མང་པོས། བླ་མ་དྲན་པའི་གདུང་དབྱངས་བླངས་པ་མང་ངོ་། །དེས་ན་རང་ཉིད་ཡུལ་གང་ན་གནས་ཀྱང་བླ་མ་མི་བརྗེད་པར་ཉི་མ་རེ་རེ་བཞིན་ཡང་ཡང་ཡིད་ལ་དྲན་པར་བྱས་ཏེ། སངས་རྒྱས་དངོས་སུ་མོས་ལ་རབ་ཏུ་གུས་པའི་ཕྱག་འཚལ་ཞིང་གསོལ་འདེབས་ཀྱི་གདུང་དབྱངས་ལེན་པར་བྱའོ། །སྔོན་ཞང་སྒོམ་རི་པས། ཆོས་རྗེ་རྒོད་ཚང་བ་ལ་ཁྲིད་ཞུས་ནས། ལིང་དེའི་བྲག་ལ་སྒོམ་གྱིན་བཞུགས་པས། མངའ་བདག་ཡབ་ཡུམ་ཤིན་

ཏུ་དད་དེ། དགྲ་ནག་གི་དབང་ཞིག་ཞུ་བར་འདོད་ནས། ཁོང་པ་གདན་དྲངས་ཞབས་ཏོག་བཟང་པོ་བྱས་ཏེ། དྲུང་པ་གང་ལ་ཐུགས་དམ་མཛད་པའི་ཆོས་ཤིག་ཐུགས་ལ་འདོགས་པར་ཞུ། བདག་ཅག་ཀྱང་དེ་ལ་ཡི་དམ་བྱེད་པ་ལགས། ཞུས་པས། ཁོང་བ་ན་རེ། བདག་ལ་ཉམས་སུ་བླང་རྒྱུའི་ཆོས་གསུམ་ཡོད་དེ། ཉིད་ཅག་གིས་མི་འོང་མཆི། ཡོང་ན་བྱིན་པས་ཆོག་གསུངས། ཁོང་ཚོའི་བསམ་པ་ལ་ནག་འཇིགས་སྐོར་གསུམ་ཡིན་ཡོང་སྙམས་ནས། གསུམ་པོ་ཅིས་ཀྱང་ཐུགས་ལ་འདོགས་པར་ཞུ། བདག་ཅག་ཀྱང་ཉམས་སུ་ལེན་ལགས་ཞུས་པས། ཁོང་པ་ན་རེ། འོ་ན་ཆོས་རྣམ་དག་བྱེད་པ་ལ། ཆགས་སྡང་སྤོང་དགོས་པར་གསུངས། དང་པོ་འདོད་པའི་ཡུལ་སྤོང་བྱ་བ་ཡིན་པས། བདག་ལའང་ཉིད་ཅག་གི་མངའ་ཐང་ཙམ་མེད་ཀྱང་། བསམ་གླིང་ལ་སོགས་པའི་དགོན་གཞིས་དང་། འབྲི་མཚམས་ཕྱོགས་ན་འཁོར་དང་བུ་སློབ་རྒྱ་ཆེ་རབ་ཡོད་དེ། དེ་ཐམས་ཅད་སྤངས་ནས་བྱ་བྲལ་བྱས་པ་དེ་ཉམས་ལེན་གཅིག་ལགས་ཏེ། དེ་ཉིད་ཅག་གིས་མི་འོང་མཆི། གཉིས་པ་དགྲའི་སྒོ་གཤམ་བར་མ་ལ་རྒྱོབ་བྱ་བ་ཡིན་

པས། ངེད་རང་གི་དགྲ་རྣམས་ཀྱི་ཡུལ་དུ་ཕྱིན་ནས་སྒོ་ཡོན་བླངས་པས་ཁོང་ཚོའང་ཤིན་ཏུ་དད་དེ། ཁོང་འདི་བཞིན་མཛད་ཕྱིན་ཆད་འོ་སྐོལ་རྣམས་ཀྱིས་ཀྱང་ཞབས་ཏོག་བྱ་དགོས་ཟེར་ནས་ནང་དུ་བོས་ཏེ་བསྙེན་བཀུར་བཟང་པོ་བྱས། དེ་ལྟར་དགྲ་རྣམས་དགའ་བ་བསྐྱེད་ཅིང་རང་གཞན་གྱི་ཞེ་སྡང་ཞི་བར་བྱས་པ་དེ་གཅིག་ལགས་ཏེ་མི་འོང་མཆི། གསུམ་པ་ནི་ཆགས་སྡང་སྤངས་ཤིང་དབེན་པ་བརྟེན་ནས། དལ་བར་བསྡད་དུ་འཕངས་པར་གདའ་བས། སྒོ་གསུམ་སྐད་ཅིག་ཀྱང་མི་དལ་བར་དགེ་སྦྱོར་གྱིས། དེ་གཅིག་ལགས་ཏེ་མི་འོང་མཆི། གསུངས་པ་ལྟར། ལུས་ངག་ཡིད་གསུམ་དགེ་བ་དང་མི་འབྲལ་བར་བྱེད་པའོ། །ཡུལ་སེམས་ཅན་དང་སེམས་ཅན་མ་ཡིན་པ་ཐམས་ཅད་ལ་ཕྱོགས་རིས་མེད་པར་བློ་སྦྱོང་བ་དང་། བློ་ལ་གང་ཤར་ཐམས་ཅད་བློ་སྦྱོང་གིས་ཁྱད་པར་བྱས་ནས། ཁ་ཙམ་མ་ཡིན་པར་གཏིང་ནས་འབྱོངས་པར་བྱེད་པའོ། །རང་གི་འགྲན་ཟླར་འདུག་པ་དང་ལྷན་ཅིག་ཏུ་འགྲོགས་པ་དང་། ཕར་གནོད་པ་མ་བྱས་ཀྱང་ཚུར་གནོད་པ་བྱེད་པ་དང་། ཕན་བཏགས་པའི་ལན་དུ་གནོད་

སྐྱེལ་བ་དང་། ལས་ཀྱི་དབང་གིས་སྙིང་དུ་མི་སྡུག་པ་ལ་སོགས་པ་སྐྱེ་དཀའ་བ་རྣམས་ལ་ལྷག་པར་བྱམས་སྙིང་རྗེ་སྒོམ་ཞིང་། བླ་མ་དང་ཕ་མ་ལ་སོགས་པ་ཡུལ་གཉན་པ་རྣམས་ལ་གནོད་པར་འགྱུར་བ་ཁྱད་པར་དུ་སྤང་བར་བྱའོ། །ཟས་གོས་ལ་སོགས་འཛོམ་པ་དང་། མི་དང་མི་མ་ཡིན་གྱི་གནོད་པ་མེད་པ་དང་། ཁམས་བཟང་བ་ལ་སོགས་པ་མཐུན་རྐྱེན་འཛོམ་པ་ལ་མི་ལྟོས་པར། མཐུན་རྐྱེན་མ་འཛོམ་ན་མ་འཛོམ་པ་དེ་ཉིད་བྱང་ཆུབ་ཀྱི་སེམས་ཀྱི་སྒོ་ནས་ལམ་དུ་འཁྱེར་བའོ། །ཐོག་མ་མེད་པ་ནས་ལུས་ཇི་སྙེད་བླང་བ་དོན་མེད་དུ་སོང་འདུག །ད་རེས་ཀྱི་ཚེ་འདི་ལ་དོན་གྱི་གཙོ་བོ་ཞིག་སྒྲུབ་དགོས་པར་འདུག་པས། ཚེ་འདི་བས་ཆོས་གཙོ། ཆོས་ལ་བཤད་སྒྲུབ་གཉིས་ལས་སྒྲུབ་པ་གཙོ། ཆོས་གཞན་བས་བྱང་ཆུབ་ཀྱི་སེམས་སྦྱོང་བ་གཙོ། དེའང་ལུང་རིགས་ཀྱི་སྒོ་ནས་སྦྱོང་བ་ལས་བླ་མའི་མན་ངག་ལ་བརྟེན་ནས་སྦྱོང་བ་གཙོ་ཆེ་སྟེ། ཏིང་འཛིན་ཚོགས་ཀྱི་ལེའུ་ལས། ཇི་ཙམ་གྱི་སེམས་མཉམ་པར་འཇོག་ནུས་པ་དེ་ཙམ་གྱིས་གདམས་ངག་ཁོ་ནས་ཚིམ་པར་བྱས་ལ། སེམས་ཀྱི་ངང་ཚུལ་འཕྲལ་དུ་འབྱུང་བ་ཡང་། བླ་མ་ལ་ཞུས་ཤིང་

བསྒོམ་པར་བྱ་ཡིས། ཚད་མ་རྣམ་བདུན་དང་། བརྡའ་སྤྲོད་རྣམ་བཞི་དང་། ཆོས་མངོན་པ་རྣམ་བདུན་དང་། རྣལ་འབྱོར་སྤྱོད་པའི་ས་ལ་སོགས་པའི་མཚན་མས་ཡིད་མི་གདུང་སྟེ། བསྐལ་པ་དཔག་ཏུ་མེད་པར་ངལ་བ་བྱས་ཀྱང་། ཐ་སྙད་ཉེ་བར་སྦྱར་བ་དག་ནི་མི་ཟད་ཀྱིས། ཚེ་ཡོངས་སུ་གཏུགས་པ་ཁོ་ནར་ཟད་དོ་ཞེས་དང་། ཇོ་བོ་རྗེའི་ཞལ་ནས། ཚེ་ནི་ཡུན་ཐུང་ཤེས་བྱའི་གནས་ཀྱང་མང་། །ཚེ་ཡི་ཚད་ཀྱང་ཅི་ཙམ་མི་ངེས་པས། །ངང་པས་ཆུ་ལ་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བྱ། །གསུངས། དེ་ཡང་པུ་ཏོ་བ་དང་། དགེ་བཤེས་ཆོས་ཀྱི་འོད་ཟེར་བྱ་བའི་མཁས་པ་ཆེན་པོ་ཞིག་ཡོད་པ་དེ་གཉིས་ལ། སློབ་མཐུན་མོང་བ་མང་པོ་ཡོད་པ་ལས། ཁོང་ཚོ་ན་རེ། པོ་ཏོ་བས་ཆོས་བཤད་དུས་ངེས་ཤེས་སྐྱེ་བ་ཙམ་ཁྱེད་ཀྱིས་བཤད་པ་ལ་མི་སྐྱེ་བར་འདུག་ཞུས་པས། ཁོང་གི་ཐུགས་དགོངས་ལ་ཆོས་ང་མཁས་པས་དེ་ཙུག་མི་ཐང་། འོན་ཀྱང་ངང་ལ་མེད་པའི་གདམས་ངག་ཁོང་ལ་ཡོད་པ་ཡིན་ཏེ་འོང་སྙམ་ནས། ཁོང་གིས་ཀྱང་པོ་ཏོ་བ་ལ་ཆོས་མཉན་པས། ཁོང་རང་ཡང་

ངེས་ཤེས་སྐྱེས་ནས། ཁོང་ལ་ཆོས་མཉན་པས་མ་ཤེས་པའི་ཤེས་རྒྱུ་མ་བྱུང་སྟེ། མ་གོ་བའི་གོ་རྒྱུ་ཞིག་བྱུང་གསུངས་པས། པོ་ཏོ་བ་ན་རེ། བདེན་མ་ཤེས་པའི་ཤེས་རྒྱུ་མེད་དེ་ཆོས་ཁྱེད་རང་མཁས། མགོ་བའི་གོ་རྒྱུ་ཡོད་དེ་ངས་ཆོས་ཀྱི་མདེའུ་རྩེ་ནང་དུ་བསྒྱུར་ནས་བཤད་པ་ཡིན་གསུངས། དེས་ན་བླ་མའི་མན་ངག་རང་གི་རྒྱུད་སྟེང་དུ་བསྐོར་ནས་ཉམས་སུ་ལེན་པ་གཅེས་སོ། །སྤྱོད་ལམ་གཞན་བས་མལ་དུ་བསྡད་ནས་སྦྱང་བ་གཙོ་ཆེ་སྟེ། ཤ་ར་བའི་ཞལ་ནས། ངས་མདུན་མ་ཐམས་ཅད་སྟན་ཐོག་གཅིག་ཏུ་བཅད་པ་ཡིན་གསུངས། ལ་སྟོད་ལྷོར་ཆོས་འཁོར་ཞིག་བྱུང་བ་ལ། སྐྱེས་པ་ཀུན་རྟ་རྩེད་ལ་སོགས་པ་མང་པོ་བྱེད་ཀྱིན་འདུག་པ་ལ། མ་གཅིག་ཞ་མའི་གཡོག་མོས་ཀྱང་བལྟས་པས་ཡ་མཚན་སྙམས་ནས། དགོང་མོ་མ་གཅིག་ལ། དེ་རིང་ལྟད་མོ་གདའ། ཁྱད་པར་དུ་ལངས་ནས་རྟ་རྒྱུག་པ་ལ་ཆགས་ཀྱིན་གདའ་ཞུས་པས། མ་གཅིག་ན་རེ། ངས་དེ་འདྲ་མིན་པ། སྟན་ཐོག་ཏུའང་ཆགས་གསུངས། ཡང་དགོན་པའི་ཞལ་ནས། ལྟོགས་འཁྱགས་འཛོམ་པའི་སྤྱིལ་པོ་རུ། །སྡུག་རྒུར་ཚུགས་པའི་སྙིང་རུས་ཅན། །སྟན་ལ་

ཆགས་པའི་སྐྱ་རྩལ་ཅན། །གསུངས། རྗེ་མི་ལས། དྭགས་པོ་ལྷ་རྗེ་ལ། གདམས་ངག་ཟབ་ཤོས་ཤིག་ཡོད་པ་ད་གཟོད་སྟེར་རོ་གསུངས་ནས་མ་གནང་། དྭགས་པོ་ཡུལ་ལ་འགྲོ་ཁར། གདམས་ངག་དེ་ཐུགས་ལ་འདོགས་པར་ཞུ་ཞུས་པས། ཕངས་པར་འདུག་གསུངས་ནས་མ་གནང་། དེ་ནས་དྭགས་པོ་བ་ལ་སྐྱེལ་ཐུང་བྱས། སོ་སོར་ཁམས་བདེ་བྱས་ནས། དྭགས་པོ་བ་ཐག་རིང་པོར་སོང་བ་དང་། བོས་ཏེ་ལོག་ལ་ཤོག་དང་གསུངས་ནས། ལོག་ཕྱིན་པས། འཕངས་ཏེ་མ་ཕན་བསྟན་གྱིས་གསུངས་ནས། ན་བཟའ་སློག་སྟེ། སྟན་ཐོག་ཏུ་བཞུགས་དྲགས་པས། འཕོངས་རྨེན་པར་སོང་བ་དེ་བསྟན་ནས། ཟབ་ཤོས་འདི་ཡིན་ནོ་གསུངས། བླ་མ་གོང་མ་འགའ་རེས་སྟོན་ཆེན་ལྷམ་རྡོལ་བརྒྱ་ལས། བསྒོམ་ཆེན་སྟན་རྡོལ་གཅིག་དགའ་གསུངས་སྐད། དེས་ན་གནས་བསྐོར་སོགས་འགྲོ་འདུག་མང་པོ་མི་བྱེད་པར་གནས་བཟང་པོ་གཅིག་ནས། འཕོངས་རུལ་གདན་རྡོལ་ཤི་རུང་། བྱང་ཆུབ་སེམས་ཀྱི་གདམས་པ་ཟབ་མོ་འདི་འདྲ་བསྒོམ་དགོས། ཡུལ་སྤོང་བ་བས་གཉེན་པོ་བརྟེན་པ་གཙོ་

ཆེ་བས་གཙོ་བོ་དེ་རྣམས་ཉམས་སུ་ལེན་པའོ། །ཆོས་སྒྲུབ་པའི་དུཿ ཁ་མི་བཟོད་པར་དགྲ་འདུལ་བ་དང་གཉེན་སྐྱོང་བ་ལ་སོགས་པའི་དུཿ ཁ་བཟོད་པ་གོ་ལོག་གོ །ཆོས་རྣམ་དག་བྱེད་པ་ལ་འདུན་པ་མི་བྱེད་པར། ཚེ་འདིའི་དཔལ་འབྱོར་ལ་འདུན་པ་བྱེད་པ་ནི་འདུན་པ་གོ་ལོག་གོ །ཐོས་བསམ་སྒོམ་གསུམ་གྱི་སྒོ་ནས་ཆོས་ཀྱི་རོ་མི་མྱང་བར། འཇིག་རྟེན་གྱི་བདེ་བའི་རོ་མྱང་བ་ནི་རོ་མྱོང་གོ་ལོག་གོ །སྡིག་པ་བྱེད་པ་ལ་སྙིང་རྗེ་མི་སྒོམ་པར། ཆོས་ཕྱིར་དཀའ་ཐུབ་བྱེད་པ་ལ་སྙིང་རྗེ་སྒོམ་པ་ནི་སྙིང་རྗེ་གོ་ལོག་གོ །དེ་ཡང་སྔོན་སློབ་དཔོན་པཎྜི་ཏ་ཟེར་བ་དང་། ཉེ་གནས་གཞོན་རྒྱལ་ཟེར་བ་གཉིས་སྤུན་ཡིན་པས། པཎྜི་ཏ་ན་རེ། གཞོན་རྒྱལ་ཟེར་བའི་བློ་མ་ཁུག་པ་འཆི་བ་མ་དྲན་པ་འདི་སྙིང་རྗེ་གསུངས། ཉེ་གནས་ན་རེ། པཎྜི་ཏ་ཟེར་བའི་མཁོས་མེད་པོ་རང་གི་ལྟོ་གོས་ཙམ་ཡང་མི་འབྱོར་བ་འདི་སྙིང་རྗེ་ཟེར་ལོ། ཁོའི་དེ་གོ་ལོག་ཡིན་གསུངས། གོ་ལོག་འདི་པེ་ཏ་མགོན་སྐྱིད་ཀྱིས་ཀྱང་བྱས་ཏེ། མོས་འབད་རྩོལ་ཆེན་པོ་བྱས་པས་རྩམ་པ་བྲེ་བཞི་ཙམ་དང་། ཤ་གཟུགས་གཅིག །ཆང་དམ་གང་རྙེད་ནས་ཁྱེར་ཏེ། མི་ལ་བཞུགས་སར་

ཕྱིན་ནས་བཙལ་བའི་དུས་སུ་མ་རྙེད། མཇུག་ཏུ་བྲག་འོག་ཅིག་ན་འདུག་པས། ཁོང་ཟས་སུ་ཟྭ་ཁོ་ན་གསོལ་བས་མདོག་སྔོ་ནག་ཏུ་སོང་། ཚྭ་མེད་པས་ལུས་ལ་སྤུ་ཆེན་པོ་སྐྱེས་འདུག་པ་མཐོང་ནས། འདི་མི་མ་ཡིན་ནམ་སྙམ་དུ་འཇིགས་པ་ཞིག་བྱུང་། ལེགས་པར་བརྟགས་པས་སོ་དེ་འདྲ་བར་འདུག་ནས་རྩ་རུ་ཕྱིན་ཏེ་ལག་པས་འཇུས་ནས། གཞན་གྱི་ཆོས་པ་ཀུན་རང་ཡང་སྐྱིད། གཉེན་ལ་ཡང་ཕན་པ་ཞིག་འདུག་སྟེ། ཨ་ཇོའི་ཆོས་འདི་འདྲ་རང་སྡུག་ལ། གཞན་ལ་མི་ཕན་པ་སུའི་ལུགས་ཡིན་ནམ་ཟེར་ནས་ངུས་སོ། །མོ་སྡུག་མ་ཆོས་རྒྱུས་ཆུང་བས་ལན་པ་ཡིན། ཨ་ཇོ་དེ་འདྲ་ལ་སྙིང་རྗེ་བསྒོམ་མི་དགོས། ཐམས་ཅད་མོའི་ཨ་ཇོ་ལྟར་སོང་ན་གོ་བཅད་པ་ཡིན། འོན་ཀྱང་མོའི་དེ་སྡིག་པར་མི་འགྲོ་གསུངས། མོའི་ཤ་ཆང་དེ་གསོལ་བས་རྩམ་མདུད་གྲོལ་ནས་ནམ་མཁའ་ལ་འཕུར་བ་ཡིན་པར་འདུག་པས། དོན་ཆེན་འགྲུབ་པར་གདའ་གསུངས། རང་ལ་ལྟོས་པའི་མི་ཆོས་ལ་མི་སྦྱོར་བར། ཚེ་འདིའི་དཔལ་འབྱོར་ཆེ་བའི་ཐབས་ལ་སྦྱོར་བ་ནི་གཉེར་སེམས་གོ་ལོག་གོ །འཁོར་འདས་ཀྱི་བདེ་བ་དང་

དགེ་བ་ལ་དགའ་བ་མི་བསྒོམ་པར། དགྲ་ལ་དུཿཁ་བྱུང་ན་དགའ་བ་བསྒོམ་པ་ནི་རྗེས་སུ་ཡི་རང་གོ་ལོག་གོ །གོ་ལོག་དྲུག་སྤངས་ནས། གོ་མ་ལོག་པ་དྲུག་ཉམས་སུ་བླང་བར་བྱའོ། །ཆོས་ལ་ངེས་འབྱུང་མ་སྐྱེས་པས་རེས་བྱེད་རེས་མི་བྱད་པ་སྤངས་ནས། རྩེ་གཅིག་ཏུ་རྒྱུན་མི་འཆད་པར་བློ་སྦྱོང་བའོ། །བློ་སྦྱོང་ཉིད་ལ་བློ་ལིངས་སྒྱུར་ནས་ཕྱོགས་གཅིག་ཏུ་སྦྱོང་བའོ། །རང་རྒྱུད་ལ་ཉོན་མོངས་གང་ཆེ་བརྟགས་ནས་དེ་འབད་པ་དྲག་པོས་སྤང་སྟེ། དེ་ནས་ཉོན་མོངས་དེ་སྐྱེ་བའི་ཡུལ་བསྟེན་པ་ལ་སོགས་པའི་སྒོ་ནས་དེ་སྐྱེ་མི་སྐྱེ་བརྟགས་ཏེ། སྐྱེ་ན་ཡང་གཉེན་པོས་སྤང་ཞིང་། མི་སྐྱེ་བར་འགྱུར་བའི་བར་དུ་འབད་པར་བྱའོ། །ཕ་རོལ་ལ་བདག་གི་དྲིན་ཡོད་པ་དང་། རང་གིས་ཆོས་ཡུན་རིང་ལ་དོས་དྲགས་པ་བྱས་པ་དང་། མཁས་པ་དང་བཙུན་པ་ལ་སོགས་པའི་ཡུས་མི་བྱེད་པ་སྟེ། བདག་བས་གཞན་གཅེས་སྒོམ་པ་ལ་ཡུས་བྱས་མེད་དོ། །མི་ལ་རེ་བ་མ་ཆེ་ལྷ་ལ་གསོལ་བ་ཐོབ་བྱ་བ་རྭ་སྒྲེང་བའི་བཀའ་ཡིན་གསུངས། བདག་ལ་གཞན་གྱིས་མི་མང་སར་རྨ་ཕབ་པ་ལ་སོགས་ལ་ལན་མི་བྱ་ཞིང་ཀོ་ལོང་མི་སྡོམ་མོ། །ད་ལྟ་འོ་སྐོལ་

ཆོས་པ་རྣམས་ཀྱི་ཆོས་བདག་འཛིན་གྱི་གཉེན་པོར་མ་སོང་བས། བཟོད་བསྲན་ཤའུ་བས་ཆུང་། ཀོ་ལོང་གཙང་བཙན་བས་དམ་པར་འདུག་སྟེ། དེས་ཆོས་ཀྱི་གོ་མི་ཆོད་པས་བདག་འཛིན་གྱི་གཉེན་པོར་འགྲོ་བ་ཞིག་དགོས་གསུངས། ཅུང་ཟད་ཙམ་ལ་དགའ་མི་དགའི་རྣམ་འགྱུར་སྟོན་པ་ནི་གྲོགས་ལ་གཟན་པས་མི་བྱའོ། །གཞན་ལ་ཕན་བཏགས་པའམ། ཆོས་བྱས་པ་ལ་ཚིག་གི་གཏང་རག་དང་། སྙན་གྲགས་ལ་རེ་བ་མེད་པར་བྱའོ། །དེ་ལྟར་ཚེ་ཧྲིལ་གྱིས་བྱང་ཆུབ་ཀྱི་སེམས་གཉིས་པོ་མཉམ་རྗེས་གཉིས་ཀྱི་སྒོ་ནས་ལེགས་པར་སྦྱངས་ནས་འབྱོངས་པའི་གདེངས་ཐོབ་པར་བྱའོ། །དུས་དང་སེམས་ཅན་དང་ཚེ་དང་ཉོན་མོངས་པ་དང་ལྟ་བའི་སྙིགས་མ་ལྔ་སྟེ། ལྔ་བདོ་བའི་དུས་འདིར་བདེ་བའི་རྐྱེན་ནི་ཉུང་། མི་དང་མི་མ་ཡིན་གྱིས་འཚེ་བ་ལ་སོགས་པའི་དུཿ ཁའི་རྐྱེན་ཤིན་ཏུ་མང་བས། རྐྱེན་ངན་གྱི་རུ་འཛིངས་པ་ན། དེ་ཉིད་བློ་སྦྱོང་གི་གྲོགས་སུ་བྱས་ནས་བློ་སྦྱོང་བསྒོམས་པས་རྐྱེན་ངན་ཅི་ཙམ་མང་ཡང་དགེ་སྦྱོར་འཕེལ་བར་འགྱུར་བས། དུག་ཐམས་ཅད་སྨན་དུ་བསྒྱུར་བར་བྱེད་པའི་བདུད་རྩི་ལྟ་བུ། བླ་མ་

གསེར་གླིང་པའི་མན་ངག་འདི་མན་ངག་གཞན་ལས་ཁྱད་པར་དུ་འཕགས་པ་ཡིན་ནོ། །དེ་ལྟར་བློ་སྦྱོང་ཤེས་ན། གྲོང་ཁྱེར་སྐྱིད་པའི་འབྱུང་གནས་བྱ་བ་བློ་སྦྱོང་སྒོམ་པའི་ལུས་འདི་ཉིད་ལ་ཟེར་བ་ཡིན་ཏེ། རང་གཞན་འཁོར་འདས་ཀྱི་བདེ་བ་ཐམས་ཅད་འདི་ལས་འབྱུང་བ་ཡིན་པས། རྩོམ་པ་ཐམས་ཅད་གཅིག་ཏུ་དྲིལ་ནས། སེམས་དང་ཆོས་འདྲེས་པར་ལེགས་པར་བློ་སྦྱངས་ན། རིང་པོར་མི་ཐོགས་པར་རང་གཞན་གྱི་དོན་ཕུན་སུམ་ཚོགས་པ་ཐོབ་པར་འགྱུར་རོ་གསུངས་སོ། །སྨྲས་པ། ཆོས་རྗེ་བླ་མར་ཕྱག་འཚལ་མཆོད་པ་འབུལ། །ཆོས་འགལ་སྡིག་ལྟུང་ཀུན་བཤགས་རྗེས་ཡི་རང་། །ཆོས་འཁོར་བསྐོར་ཞིང་རྟག་པར་བཞུགས་གསོལ་འདེབས། །ཆོས་སྤྱོད་དགེ་བ་བྱང་ཆུབ་ཆེན་པོར་བསྔོ། །དེ་ལྟར་ཚོགས་བསག་སྒྲིབ་སྦྱོང་གནད་བསྡུས་པའི། །ཡན་ལག་བདུན་པ་ཞིག་ཀྱང་སྔོན་བཏང་ནས། །སླར་ཡང་བློ་སྦྱོང་བསླབ་བྱའི་རིམ་པ་རྣམས། །ཚིགས་སུ་བཅད་ནས་དབྱངས་སུ་ལེན་པར་བྱ། །ཟས་གོས་སྤྱོད་ཀྱང་གཞན་ཕན་སེམས་ཀྱིས་སྤྱོད། །རྐྱེན་ངན་མང་དུས་ལྷག་པར་གཏོང་ལེན་སྒོམས། །སྔ་དྲོ་བྱང་ཆུབ་སེམས་གཉིས་

བསྒོམ་སྙམ་པའི། །འཕེན་པ་བཏང་ནས་ཉིན་མོ་དྲན་ཤེས་བརྟེན། །དགོང་མོ་བྱང་ཆུབ་སེམས་གཉིས་འགལ་བའི་རིགས། །བྱུང་ན་རང་ལ་རྔན་བགྲངས་བཤགས་པ་བྱ། །ཕྱིན་ཆད་དེ་འདྲ་མི་བྱེད་འདུན་པ་བསྐྱེད། །མ་འགལ་འདུག་ན་རང་ལ་དགའ་བ་སྒོམས། །ཕྱིན་ཆད་དེ་བཞིན་བྱའོ་སྙམ་དུ་བསམ། །དར་བ་བྱུང་ཚེ་ཁེང་དྲེགས་མི་བྱ་ཞིང་། །རྒུད་པ་བྱུང་ཀྱང་ཞུམ་པ་མེད་པར་བྱ། །ཆོས་སྤྱིའི་དམ་ཚིག་ཁྱད་པར་བློ་སྦྱོང་གི །དམ་ཚིག་གཉིས་པོ་སྲོག་ལས་གཅེས་པར་སྲུངས། །ཉོན་མོངས་སྐྱེས་ཚེ་ངོས་བཟུང་གཉེན་པོས་སྤངས། །ཕྱིན་ཆད་མི་འབྱུང་ཕྱིར་དུ་འབད་པར་བྱ། །བླ་མ་བཟང་ཞིང་རང་བློ་ལས་སུ་རུང་། །མཐུན་རྐྱེན་འཛོམ་ཚེ་དེ་ལྟར་གཞན་ལ་ཡང་། །འཛོམ་པར་གྱུར་ཅིག་སྙམ་དུ་སྨོན་ལམ་གདབ། །མ་འཛོམ་དུས་སུ་འདི་ལྟར་མ་འཛོམ་པར། །ལྷ་ཆོས་མ་འོང་བ་རྣམས་སྙིང་རེ་རྗེ། །མ་འཛོམ་ཉེས་པ་ཐམས་ཅད་བདག་ཉིད་ལ། །འདུས་པར་གྱུར་ཅིག་སྙམ་དུ་གཏོང་ལེན་བྱ། །བླ་མའི་མོས་གུས་ཉམས་པ་མེད་པ་དང་། །བློ་སྦྱོང་བསྒོམ་ལ་སྤྲོ་བ་མི་ཉམས་ཤིང་། །ཐེག་པ་ཆེ་ཆུང་

བསླབ་བྱ་ཉམས་མི་བྱ། །ལུས་ངག་ཡིད་གསུམ་དགེ་དང་མི་འབྲལ་ཞིང་། །ཡུལ་ལ་ཕྱོགས་རིས་མེད་པར་བློ་སྦྱོང་སྒོམས། །ཁྱད་པར་ལམ་གོལ་རྣམས་ལ་རྟག་པར་སྒོམས། །མཐུན་རྐྱེན་འཛོམ་ལ་མི་བལྟ་མ་འཛོམ་པ། །དེ་ཉིད་བྱང་ཆུབ་སེམས་ཀྱི་གྲོགས་སུ་འཁྱེར། །འཇིག་རྟེན་འདི་བས་དམ་པའི་ལྷ་ཆོས་གཙོ། །ཆོས་ལ་བཤད་སྒྲུབ་གཉིས་ལས་སྒྲུབ་པ་གཙོ། །ལྷ་ཆོས་གཞན་ལས་བྱང་ཆུབ་སེམས་གཉིས་གཙོ། །དེའང་ལུང་རིགས་སྒོ་ནས་སྦྱོང་བ་ལས། །བླ་མའི་མན་ངག་སྒོ་ནས་སྦྱོང་བ་གཙོ། །སྤྱོད་ལམ་གཞན་ལ་བརྟེན་ནས་སྦྱོང་བ་ལས། །རང་གི་མལ་དུ་བསྡད་ནས་སྦྱོང་བ་གཙོ། །ཡུལ་ངན་སྤོང་ལས་གཉེན་པོ་བརྟེན་པ་གཙོ། །གཙོ་བོ་དེ་རྣམས་ཉམས་སུ་ལེན་པར་བྱ། །ལྷ་ཆོས་སྒྲུབ་པའི་སྡུག་བསྔལ་མི་བཟོད་པར། །དགྲ་འདུལ་བ་དང་གཉེན་སྐྱོང་ལ་སོགས་པའི། །སྡུག་བསྔལ་བཟོད་པ་བཟོད་པ་གོ་ལོག་གོ །དམ་ཆོས་བྱེད་ལ་འདུན་པ་མི་བྱེད་པར། །དོན་མེད་ཚེ་འདིའི་དཔལ་འབྱོར་ཆེ་ཐབས་ལ། །འདུན་པ་བྱེད་པ་འདུན་པ་གོ་ལོག་གོ །ཐོས་བསམ་སྒོམ་གསུམ་སྒོ་ནས་ཆོས་ཀྱི་རོ། །མི་མྱང་འཇིག་རྟེན་འདི་

ཡི་བདེ་བའི་རོ། །མྱང་བ་དེ་ནི་རོ་མྱོང་གོ་ལོག་གོ །སྡིག་པ་བྱེད་ལ་སྙིང་རྗེ་མི་བསྒོམ་པར། །ཆོས་ཀྱི་ཕྱིར་དུ་དཀའ་བ་སྤྱོད་པ་ལ། །སྙིང་རྗེ་བསྒོམ་པ་སྙིང་རྗེ་གོ་ལོག་གོ །རང་ལ་ལྟོས་པའི་མི་རྣམས་ལྷ་ཆོས་ལ། །མི་སྦྱོར་ཚེ་འདིའི་དཔལ་འབྱོར་ཆེ་ཐབས་ལ། །སྦྱོར་བ་དེ་ནི་གཉེར་སེམས་གོ་ལོག་གོ །འཁོར་འདས་གཉིས་ཀྱི་བདེ་དང་དགེ་བ་ལ། །དགའ་བ་མི་བསྒོམ་སྡུག་བསྔལ་དགྲ་བྱུང་ན། །དགའ་བ་རྗེས་སུ་ཡི་རང་གོ་ལོག་གོ །གོ་ལོག་དྲུག་པོ་དེ་ཉིད་ཤེས་བྱས་ནས། །མ་ལོག་པ་དྲུག་ཉམས་སུ་ལེན་པར་བྱ། །རེས་བྱེད་རེས་འཇོག་གཉིས་པོ་མི་བྱེད་པར། །རྩེ་གཅིག་རྒྱུན་ཆད་མེད་པར་བློ་སྦྱོང་སྒོམས། བློ་སྦྱོང་ཁོ་ན་བློ་གཏད་དོལ་ཆོད་སྦྱངས། །ཉོན་མོངས་གང་ཆེ་བརྟགས་ནས་དུག་བཞིན་སྤངས། །དེ་ནས་ཉོན་མོངས་སྐྱེ་བའི་ཡུལ་ལ་བརྟེན། །ད་དུང་སྐྱེས་སམ་མི་སྐྱེ་ལེགས་པར་བརྟགས། །སྐྱེ་ན་གཉེན་པོས་སྤོང་ཞིང་ཕྱིན་ཆད་ཀྱང་། །ནམ་ཡང་མི་སྐྱེ་བར་དུ་འབད་པར་བྱ། །གཞན་ལ་ལྟོ་གོས་ཆོས་ཀྱིས་ཕན་བཏགས་ཤིང་། །རང་གིས་ཆོས་ཀྱང་ཡུན་རིང་བྱས་པ་སོགས། །

རང་གཞན་བསྟན་འགྲོའི་དོན་ཆེན་གང་བསྒྲུབས་ཀྱང་། །ངས་བྱས་སྙམས་པའི་ཁོང་ཡུས་མ་ཆེ་ཞིང་། །རང་ལ་གཞན་གྱིས་མི་མང་འཚོགས་ས་རུ། །རྨ་ཕབ་ན་ཡང་ཀོ་ལོང་མི་སྡོམ་ཞིང་། །དགའ་དང་མི་དགའ་རྣམ་འགྱུར་སྟོན་པ་དེ། །གྲོགས་ལ་གཟན་པས་ནམ་ཡང་མི་བྱ་བར། །རྟག་ཏུ་འཛུམ་པའི་བཞིན་གྱིས་གནས་པར་བྱ། །གཞན་ལ་ཕན་བཏགས་པ་དང་ཆོས་བྱས་པ། །རྣམས་ལ་ཚུར་ལ་ཚིག་གི་གཏང་རག་དང་། །སྙན་གྲགས་འོང་དུ་རེ་བ་མེད་པར་བྱ། །དེ་ལྟར་བློ་སྦྱོང་བསླབ་བྱ་མ་ཉམས་པར། །བསླབ་ན་རང་གཞན་དོན་གཉིས་འགྲུབ་པར་ངེས། །ཞེས་པ་བར་སྐབས་ཀྱི་ཚིགས་སུ་བཅད་པའོ།། །།དེ་ཡང་འོ་སྐོལ་རྣམས་ཀྱིས་དཀའ་ལས་ཆེར་མེད་བཞིན་དུ། བླ་མ་རྣམས་ཀྱི་དྲིན་ལས་རང་གཞན་ཐམས་ཅད་འཚེངས་པའི་གདམས་པ་ཡིད་བཞིན་གྱི་ནོར་བུ་ལྟ་བུ་འདི་དང་འདི་འདྲ་ཐོབ་པ་ལ་དགའ་སྦྲོ་ཚད་མེད་པ་བསྐྱེད་ཅིང་། ཚེ་བློས་བཏང་སྟེ་དབེན་པ་བརྟེན་ནས་ཉིན་མཚན་མེད་པར་དཀའ་སྤྱད་སྙིང་རུས་ཀྱི་སྒོ་ནས་ཉམས་སུ་ལེན་དགོས་ཏེ། སྔོན་ཇོ་བོས་བླ་མ་གསེར་གླིང་པ་ལ་བྱང་ཆུབ་སེམས་ཀྱི་གདམས་པ་འདི་ཞུ་རུ་ཕེབས་

དུས། རྒྱ་མཚོ་ཆེན་པོ་ལ་གྲུ་བཏང་ནས་ཟླ་བ་བཅུ་གསུམ་བྱོན་པ་སོགས། ཆོས་ཕྱིར་དཀའ་བ་མང་པོ་སྤྱོད་དགོས་བྱུང་ཚེ། བུ་སློབ་རྣམས་ལ་ཁྱེད་རྣམས་ཀྱིས་དཀའ་བ་མ་སྤྱད་པར་ཆོས་ཟབ་མོ་རྙེད་པ་དོན་རེ་ཆེ་ཡི། ད་ལེགས་པར་སྤྱོད་ཅིག་གསུངས། རྗེ་རིན་པོ་ཆེས་མདོ་རྒྱུད་ཀྱི་གསུང་རབ་དགོངས་འགྲེལ་ཐམས་ཅད། གང་ཟག་གཅིག་གི་ཉམས་ལེན་གྱི་རིམ་པར་དྲིལ་ནས་ཉམས་སུ་བླངས་ནས་གདེངས་ཐོབ་པའི་གསུང་ཉམས་མགུར་དུ་མཛད་དེ། ཐེག་ཆེན་གཉིས་ཀྱི་ཐུན་མོང་ལམ་དང་ནི། །ཐུན་མོང་མིན་པའི་ལམ་གྱི་རིམ་པ་གཉིས། །གནད་བསྡུས་ཚང་བའི་ལམ་ལ་འདྲིས་པར་སྦྱངས། །ཚུལ་འདི་བསམས་ཤིང་འདུན་མ་ལེགས་ནས་གདའ། །གསུངས། གཞན་ཚ་གོའི་དཔོན་པོ་ངག་དབང་གྲགས་པ་སོགས་ལ་ངེས་འབྱུང་བྱང་སེམས་ཡང་དག་པའི་ལྟ་བ་སྟེ། ལམ་གྱི་གཙོ་བོ་རྣམ་གསུམ་གནང་ནས། དེ་ལྟར་ལམ་གྱི་གཙོ་བོ་རྣམ་གསུམ་གྱི། །གནད་རྣམས་ཇི་བཞིན་རང་གིས་རྟོགས་པའི་ཚེ། །དབེན་པ་བརྟེན་ནས་བརྩོན་འགྲུས་སྟོབས་བསྐྱེད་དེ། །གཏན་གྱི་འདུན་མ་མྱུར་དུ་སྒྲུབས་ཤིག་

བུ། །གསུངས། དེ་ཡང་སྔོན་རྒྱ་གར་གྲུབ་ཐོབ་ལཱུ་ཨི་བས་ཀྱང་རྗེ་བཙུན་མའི་བཀའ་བཞིན་དབེན་པའི་གནས་སུ་འཚོ་བ་དཀའ་ཐུབ་ལ་བརྟེན་ནས་སྒྲུབ་པ་མཛད་པ་དང་། གྲུབ་ཚེ་ན་དྲིལ་བུ་བས་ཀྱང་དབེན་པའི་ནགས་ཁྲོད་དུ་དཀའ་སྤྱད་དྲག་པོའི་སྒོ་ནས་སྒྲུབ་པ་མཛད་པར་གསུངས། དེ་བཞིན་དུ་རྒྱ་གར་གྱི་གྲུབ་ཆེན་ཕལ་མོ་ཆེས་དབེན་པའི་གནས་སུ་སྒྲུབ་པ་རྩེ་གཅིག་ཏུ་མཛད་པར་གདའ། བོད་དུ་སྔོན་བྲག་ཡེར་པའི་ཞང་བཙུན་དར་མས་མི་རྟག་ངེས་འབྱུང་གིས་རྒྱུད་བསྐུལ་ནས། ཟང་ཟིང་ལོངས་སྤྱོད་ཀྱི་འཆིང་ཐག་རྦད་ཀྱིས་བཅད། སྐུ་ཚེ་གང་པོར་ཞེན་མེད་ཀྱི་བྱ་བཏང་ཁོ་ན་མཛད། གནས་དབེན་པར་སྒྲུབ་པའི་རྒྱལ་མཚན་བཙུགས། བྲག་རྒྱབ་ཀྱི་གཉན་སྟོན་ཤག་འབྱུང་གིས་ད་ལྟ་ཉིད་དུ་འཆི་ཉེན་ཡོད་གསུངས། ཐ་ན་མེ་ཤིང་གི་ཚགས་ཀྱང་མི་མཛད་པར་བྱ་རི་དྭགས་ཀྱི་སྤྱོད་པ་དང་ཁྱད་པར་མེད་པར་མཛད་ནས་གནས་དབེན་པ་རྣམས་སུ་སྒྲུབ་པ་ཁོ་ན་མཛད། འབན་གུང་རྒྱལ་གྱིས་འཇིག་རྟེན་ཆོས་བརྒྱད་མགོ་བསྙམས། ཀུན་སློང་ངན་པའི་དབང་དུ་སྐད་ཅིག་ཀྱང་མ་ཤོར་བ་མཛད། སྐུ་འཚོ་ཙམ་ལ་སྡིག་མེད་ཀྱི་བསོད་སྙོམས་གསོལ་

ཏེ་སྒྲུབ་པ་རང་མཛད། གྲུབ་ཐོབ་ཉི་ཕུག་པས། བྲག་རྟ་སྒོ་དབེན་པའི་མཐའ་རྩ་རུ། ཕྱེ་ཕུལ་དགུ་ལ་འཚོ་བའི་རྟེན་མཛད་ནས་དགུང་ལོ་བདུན་སྒྲུབ་པ་མཛད། ཤངས་ལྷ་ཕུའི་རིན་ཅེན་རྨོག་ཅོག་པས། ཤིང་ལོ་མའི་ཟས་ལ་བཅུད་ལེན་མཛད་ནས་ལོ་བཅུ་གསུམ་སྒྲུབ་པའི་རྒྱལ་མཚན་བཙུགས། རྒྱལ་གྱི་ཤྲཱིའི་རྗེ་རྒྱལ་བ་རྒོད་ཚང་བས་བྱང་ལྷ་ཁབ་དབེན་པའི་མཚོ་དབུས་སུ་ཚེ་བློས་བཏང་ཆུ་ཡི་དཀའ་ཐུབ་ལ་བརྟེན་ནས་ལོ་གསུམ་དུ་སྒྲུབ་པའི་སྲོལ་ཁ་བཟུང་། མོན་བུམ་ཐང་གི་དུང་མཚོ་རས་པས་འཇིག་རྟེན་གྱི་འདོད་ཡོན་བློས་བཏང་ཆུ་ཡི་བཅུད་ལེན་བྱས་ལོ་སུམ་ཅུར་སྒྲུབ་པའི་རྒྱལ་མཚན་བཙུགས། ཀོང་སྡིང་གི་གཏེར་སྟོན་འཇའ་ཚོན་སྙིང་པོས་གནས་བང་རི་འཇོག་གི་རི་ཁྲོད་དུ་ལོ་བཅུ་བདུན་བུག་སྒོ་འདག་སྦྱར་མཛད། གྲུབ་ཐོབ་བཀའ་བཞི་པས། གནས་སྔོ་རི་དབེན་པའི་བས་མཐའ་རུ། གང་བྱུང་གི་འཚོ་བ་ལ་བརྟེན་ནས། རྩེ་གཅིག་ཏུ་སྒྲུབ་པའི་རྒྱལ་མཚན་བཙུགས། ངོར་ཆེན་ཆོས་ཀྱི་རྒྱལ་པོས་གནས་དཔལ་རི་གཉིས་པ་དམར་སྒོམ་དུ། འཇིག་རྟེན་གྱི་ཞེན་པ་བློས་བཏང་ནས་ཚེ་ཧྲིལ་པོར་སྒྲུབ་པའི་རྒྱལ་

མཚན་བཙུགས། རྗེ་ཀརྨ་པ་ཆོས་འཕེལ་གྱིས་གནས་དམིགས་ལུང་དབེན་པའི་བས་མཐའ་རུ། ལོ་བཅུ་གཉིས་སྒྲུབ་ཁང་གཅིག་ཏུ་བཞུགས། རི་མཚམས་ཀྱི་ཁ་རག་སྒོམ་ཆུང་བས། གཙང་གི་ཇོ་མོ་ཁ་རག་གི་བྲག་ཕུག་ཏུ། རི་དྭགས་ཀྱི་འོ་མ་སོགས་ལ་བརྟེན་ནས་སྒྲུབ་པ་ཡུན་རིང་མཛད། ཡུལ་ངམ་ཤོད་ཀྱི་ཆོས་རྗེ་ལོ་རས་པས། བྱང་གནམ་མཚོ་ཕྱུག་མོའི་མཚོ་དབུས་སུ། ལོ་གཅིག་གི་འཚོ་རྟེན་ལ་དཔོན་གཡོག་གཉིས་ཀྱིས་ལོ་བདུན་གྱི་རྒྱགས་བྱས་སྒྲུབ་པ་མཛད་པ་དང་། ཁྱད་པར་དུ་རྗེ་བཙུན་མི་ལ་རས་ཆེན་དེ། བྲག་དཀར་རྟ་སོ་དབུ་མ་རྫོང་ན་བཞུགས་དུས་ན། བཀའ་གདམས་པའི་དགེ་བཤེས་ཤེར་སེང་བྱ་བ་དེ། བལ་པོར་རྟེན་མཆོད་བསྒུགས་པ་ལ་འོངས་ནས། ཀློང་མདའ་ནས་བལྟས་པས། བྲག་དཀར་ན་དུད་པ་སྔོ་ཁྱུག་བྱུང་བ་མཐོང་ནས་ལམ་འགྲུལ་ལ། ཡ་ཀིར་སུ་ཡོད་པ་ཡིན་དྲིས་པས། ཡ་ཀི་ན་གུང་ཐང་རྩ་བ་མི་ལ་ཤེར་རྒྱལ་གྱི་བུ་ཐོས་པ་དགའ་བྱ་བ་ཁུ་བོ་དང་ཡུལ་པ་ཐམས་ཅད་ཕུང་ལ་གཏོང་མཁན་དེ་ཡོད་པ་ཡིན་ཟེར། དགེ་བཤེས་ཀྱིས་ཡང་དྲིས་པ། འོ་ན་ཁོ་ད་ལྟ་དེར་ཅི་བྱེད་པ་ཡིན་བྱས་པས། ལམ་

འགྲུལ་ལ་ལན་རེ་སྡིག་བཤགས་བྱེད་པ་ཡིན་ཟེར། ལ་ལན་རེད་དུང་ཡང་མཐུ་སྒྲུབ་པ་ཡིན་ཟེར། ཚོད་ལོང་བ་མི་འདུག་ཟེར། དེར་དགེ་བཤེས་བལ་པོར་འགྲོ་བ་བཤོལ་ནས་བྲག་དཀར་ལ་ཕྱིན་པས། ཕུག་པའི་ནང་ན་མི་གཅེར་བུ་ལུས་ཐལ་སྐྱ་ཐུལ་ལེ་བ་ཞིག་འདུག་པས། དགེ་བཤེས་ཀྱིས་ཁྱེད་འདིར་ཅི་བྱེད་པ་ཡིན། འདིར་བསྡད་ནས་ཅི་ཙམ་སོང་བྱས་པས། མི་ལ་ན་རེ། སྐྱེ་ཤིའི་འཇིགས་པས་ཆོས་བྱེད་པ་ཡིན་འདིར་བསྡད་ནས་ལོ་བཅུ་གཅིག་ཙམ་སོང་ཟེར། དགེ་བཤེས་ཀྱི་བསམ་པ་ལ། འོ་ན་ཁོང་གིས་ངའི་སྣ་ལེན་ཅིག་བྱེད་ཡོང་བསམས་ནས་ཡུད་ཙམ་བསྡད་པས། མི་ལ་ན་རེ་ཁྱེད་རང་བྲག་རྩ་ཕ་གིར་སོང་ལ་བཞུགས་མཛོད་ཟེར་བས། དགེ་བཤེས་ཀྱིས་བྲག་རྩར་ཕྱིན་ནས་བསྡད་པས། མི་ལའི་བསམ་པ་ལ། དགེ་བཤེས་ལ་ཁུར་པོ་ཆེན་པོ་འདུག་པས། ང་ལ་ཡང་བཟའ་རྒྱུ་འདྲ་སྟེར་རམ་བསམས་ནས་ཡོད་ཙ་ན། ཉིན་གཅིག་ནི་དགེ་བཤེས་ན་རེ། སྒོམ་ཆེན་པ་འདིར་ཤོག་དང་། ངའི་མིག་ལ་རྡུལ་སོང་བ་ལེན་རོག་གྱིས་ཟེར་བས། མི་ལས་ཕྱིན་ནས་ཁོང་གི་མིག་རྡུལ་བསལ་ནས་

ཕུག་ལ་ཡར་བལྟས་པས། དགེ་བཤེས་ཀྱིས་རྫ་མ་ལ་ཟན་གཡོས་པ་དང་། སྐྱོ་ཚ་སྐོལ་བའི་ཟན་ཁ་ལེ་འདུག་པ་དང་། གཞན་ཡང་རྩམ་པ་དང་། མར་དང་། བུ་རམ་ཡང་འདུག་པས། མི་ལའི་བསམ་པ་ལ། དགེ་བཤེས་འདིས་ང་ལ་བཟའ་རྒྱུ་བྱིན་པའི་རིགས་སུ་མི་འདུག་པས། རྫ་མ་དེ་གཡར་ནས་བཀྲུས་ལ་འཐུང་དགོས། ཡུག་ཅིག་གིས་བཅུད་ལེན་དུ་འགྲོ་བར་འདུག་བསམས་ནས། ངའི་རྫ་མ་ཆག་པས་དགེ་བཤེས་ཀྱི་རྫ་མ་དེ་ཐེབས་ཅིག་གཡར་དགོས་གསུངས་པས། ཁོང་བའི་བསམ་པ་ལ། སྒོམ་ཆེན་པ་རི་ཁར་ཡུན་རིང་བསྡད་པ་གཙང་སྤྲ་ཆེ་བ་ཡིན་པས་རྫ་མ་བཀྲུས་ནས་གཏད་དགོས་བསམས་ནས། ཉིད་ཅག་ཡུག་ཙམ་ཕར་བཞུད་དང་། དེ་ནས་ངས་སྐད་ཅིག་བཏང་ཙམ་ན་རྫ་མ་ལེན་དུ་བྱོན་ཟེར་བས། མི་ལའི་བསམ་པ་ལ་རྫ་མ་གཡར་བྱས་པ་དེ་ལེགས། ང་ལ་ཟན་མར་ཞིག་དང་སྐྱོ་ཚ་ཞིག་སྟེར་བར་འདུག །དེ་ཡང་ཟན་དང་སྐྱོ་ཚ་སྤགས་ནས་ཟ། བུ་རམ་ལ་བཅུད་བྱེད། མར་ལ་སྐུ་མཉེད་བྱེད་བསམ་སྟེ་དགའ་ནས་ཡོད་ཙ་ན། དགེ་བཤེས་ཀྱིས་རྫ་མ་ལེན་དུ་བྱོན་ཟེར་བས་ཕྱིན་ཙ་ན། རྫ་མ་བཀྲུས་ནས་གཙང་སང་ངེ་

གཏད་བྱུང་བས། དེར་མི་ལ་ངོ་ནག་ཏིང་བྱས་ནས། ད་རྫ་མ་མི་དགོས་ཟེར་ནས་སོང་། འདི་ལ་ནི་བླ་མ་རྗེ་བཙུན་ཆེན་པོ་དཔལ་ལྡན་བཞད་པའི་རྡོ་རྗེ། དུས་ཕྱིས་ཀྱང་ཡང་ཡང་དེའི་ཉིན་མོ་ལས་ཡི་མུག་པ་མ་བྱུང་གསུངས་སྐད། དེ་ནས་དགེ་བཤེས་རྒྱགས་ཟད་ནས་ཡུལ་དུ་ཕྱིན་ཏེ། གླེ་གླེང་ལ་ཞོར་འཕྲོས་བྱུང་བས། སྐ་སྐྱོང་པ་མཁན་པོ་ན་རེ། སྒོམ་ཆེན་དེ་རྒྱགས་མེད་ཕོངས་པ་ཞིག་ཡོད་པ་མིན་ནམ། ཁྱེད་ཀྱིས་རྫ་མ་ལེན་ཤོག་བྱས་དུས་ལག་ན་ཅི་འདུག་གསུངས། ལག་ན་ཕོར་གོག་སྟོང་པ་ཞིག་འདུག་ཞུས་པས། འོ་དེ་ཡིན་སྒྲུབ་པ་པོ་རྒྱགས་མེད་གཅིག་ཡིན་པར་འདུག་པས། ད་མྱུར་པོར་བསྙེན་བཀུར་བཟང་པོ་ཁྱེར་ལ་སོང་། ཆོས་ཀྱང་ཞུས་གསུངས་ནས། ཡང་བྲག་དཀར་དུ་ཆ་རྐྱེན་བཟང་པོ་ཁྱེར་ནས་ཕྱིན་པ་དང་། ཁོང་རྣམས་སླེབ་པའི་ཟླ་བ་གཅིག་གི་སྔོན་ཙམ་ལ་རྗེ་བཙུན་གྲུབ་པ་ཐོབ་ནས་གཉའ་ནམ་ཕྱོགས་སུ་གཤེགས་ཚར་འདུག་ཟེར། དུས་ཕྱིས་ཞབས་ལ་གཏུགས་ནས་ཆོས་ཞུས་པས་གྲུབ་ཐོབ་ཆེན་པོ་ལི་ཁོར་བྱར་རུ་ཡིན་སྐད། གཏམ་རྒྱུད་འདི་རྣམས་གསན་དུས་ཀྱུ་ར་རིན་པོ་ཆེ་འབྲི་ཁུང་པས་

སྤྱན་ཆབ་དཔག་ཏུ་མེད་པ་བྱོན་སྐད་དོ། །དུས་ཕྱིས་ཀྱང་འབྲི་ཁུང་པའི་ཞལ་ནས། རི་པ་རྣམས་ལ་ཁྱེད་ཚོ་རི་ལ་འགྲོ་བ་རྣམས་ཀྱིས་ཕུག་སྟོན་རེ་གྱིས་ལ་འཚོ་བ་མཉམ་པོར་ཟོ་ཞིག །ལ་ལ་ཕྱུག་པོ། ལ་ལ་དབུལ་པོ་མ་བྱེད་ཅིག་གསུང་ནན་ཆེན་པོ་མཛད་པ་ཡིན་ཟེར། ད་ལྟ་ཡང་རི་པ་ཚོས་ཕུག་སྟོན་རེ་བྱེད་པ་གཏམ་རྒྱུད་འདིའི་རྗེས་སུ་འབྲངས་ནས་བྱེད་པ་ལགས་སོ། །ཡང་བྱ་ཞིག་གིས་ལུག་གི་སྲེ་ལོང་ཞིག་ཕུག་སྒོར་སྐྱུར་ནས་སོང་བ་དེས་ཀྱང་ཟླ་བ་གསུམ་ཙམ་ཆུའི་དབལ་བསད་པས་ལུས་པོ་མཉེན་ལྕུག་གེ་སོང་སྐད། དེ་བཞིན་དུ་དཀའ་སྤྱད་སྙིང་རུས་ཀྱི་སྒོ་ནས་ཚེ་དང་སྒྲུབ་པ་སྙམས་ནས་ད་ལྟ་འཆི་ཡང་ཉམས་དགའ་ཡལ་ལེ། ཤེས་པ་སྤྲོ་སེང་ངེ་། བག་དྲོ་འུར་རེ། བློ་བདེ་འབོལ་ལེ་འཆི་བ་ཞིག་བྱ་དགོས་ཏེ། མ་གཅིག་རི་མའི་ཞལ་ནས། མི་གཅིག་འཆི་བ་ལ་ང་ལས་ཉམས་དགའ་བ་མེད། ངའི་འཆི་བ་འདི་ཀུན་དཔེར་ན་རི་ཆེན་པོའི་འོག་ནས་ཐར་པའི་ཚོད་ཡིན་གསུངས། དེ་འདྲ་དེས་དུཿ ཁ་འདོད་ཀྱང་མི་མྱོང་སྟེ། གླང་ཐང་བ་ཆེན་པོ་སྐུ་འདའ་རུ་ཆ་ཙ་ན། ང་དམྱལ་བར་སྐྱེ་རུ་འདོད་ནས་སྙིང་ཐག་པས་སྨོན་ལམ་མང་པོ་བཏབ་པ་

ཡིན་ཏེ། དེའི་སྨོན་ལམ་མི་འགྲུབ་པ་འདྲ། ད་ལྟ་ང་ལ་དག་པའི་སྣང་བ་འབའ་ཞིག་ལས། ཐ་མལ་གྱི་སྣང་བ་ཙམ་ཡང་མི་འདུག་གསུངས། ཞང་སྟོན་ཆོས་བླ་གྲོངས་ཁར་མགུར་གསུངས་པ། སྐྱབས་གནས་དཀོན་མཆོག་གསུམ་ལ་བློ་གཏད་བྱས། རིན་ཆེན་བྱང་ཆུབ་མཆོག་ཏུ་སེམས་བསྐྱེད་ཅིང་། །ཟབ་ཡངས་ཆོས་ཀྱི་ངང་ལས་མ་གཡོས་པར། །འཆི་བ་འདི་ནི་བསོད་ནམས་བསགས་པ་ཡིན། །གསུངས། རྣལ་འབྱོར་གྱི་དབང་ཕྱུག་འཆད་ཁ་བས་ཐུགས་ལེགས་པར་སྦྱངས་པས། བདག་བས་གཞན་གཅེས་ཀྱི་ཐུགས་རང་འདོད་ཀྱི་འཁྲི་བ་གཏན་ནས་མེད་པ་སྐྱེས་པས་གེ་དང་ཐོབ་ཚེ། སྔོན་སྦྱངས་ལས་ཀྱི་འཕྲོ་སད་པས། །རང་གི་མོས་པ་མང་བའི་རྒྱུས། །སྡུག་བསྔལ་གཏམ་ངན་ཁྱད་བསད་ནས། །བདག་འཛིན་འདུལ་བའི་གདམས་ངག་ཞུས། །ད་ནི་ཤི་ཡང་མི་འགྱོད་དོ། །གསུངས། དེ་བཞིན་དུ་མདོ་སྨད་ཕྱོགས་ཀྱི་རྗེ་བཙུན་དཔལ་ལྡན་བཀྲ་ཤིས་ཀྱི་ཞལ་ནས། ང་དང་པོ་འཆི་བར་འཇིགས་ནས་ཐོས་པ་བཙལ། །བར་དུ་འཆི་བྲོད་དགོས་སྙམ་ཉམས་ལེན་བྱས། །ཐ་མ་འཆི་རྒྱུ་མེད་པར་

ཉལ་ནས་བསྡད། །རྒད་པོ་ང་ཡི་བྱ་བ་ཚར་ནས་གདའ། །གསུངས་པ་དེ་ལྟ་བུ་ཞིག་བྱ་དགོས། མཇུག་ཏུ་དེ་ལྟར་ཉམས་སུ་བླངས་པའི་དགེ་ཚོགས་རྣམས། རང་གཞན་གྱི་གནས་སྐབས་དང་མཐར་ཐུག་གི་འདོད་པའི་དོན་ཐམས་ཅད་ཡིད་བཞིན་དུ་འགྲུབ་པའི་ཕྱིར་འདུན་པ་དྲག་པོའི་བསྔོ་བ་སྨོན་ལམ་བྱ་དགོས་ཏེ། བསོད་ནམས་དམ་པའི་མདོ་ལས། མི་ལུས་ཐོབ་པའི་དུས་འདིར་དགེ་བ་ཆུང་ངུ་ནས་བསག་དགོས། དེ་ཡང་བསྔོ་དགོས་མ་བསྔོས་པའི་རྫས་རྣམས་ནི་བྱེ་ཚན་ལ་ཆུ་ཐིག་རྒྱབ་ན་མྱུར་དུ་སྐམས་པ་དང་འདྲ། བསྔོ་བ་བྱས་པའི་ཕན་ཡོན་ནི། རྒྱ་མཚོ་ཆེན་པོར་ཆུ་ཐིགས་ཞིག་བླུག་ན་ཆུ་དེ་མི་ཟད་ཅིང་སླར་འཕེལ་བར་འགྱུར་བ་དང་འདྲ་གསུངས། སྔོན་དེ་བཞིན་གཤེགས་པ་རིན་ཆེན་སྙིང་པོ་ལ། རྒྱལ་པོ་རྩིབས་ཀྱི་མུ་ཁྱུད་འཁོར་བཅས་ཀྱིས་བསྙེན་བཀུར་དཔག་མེད་བྱས་ནས། དགེ་བའི་རྩ་བ་བླ་ན་མེད་པའི་བྱང་ཆུབ་ཏུ་བསྔོར་བཅུག་པས། དེ་བཞིན་གཤེགས་པ་འོད་དཔག་མེད་དུ་གྱུར། དེ་བཞིན་གཤེགས་པ་འབྲུག་སྒྲ་དབྱངས་ཀྱི་རྒྱལ་པོ་ལ། འཁོར་ལོས་བསྒྱུར་བའི་རྒྱལ་པོ་ནམ་མཁས། བསྙེན་བཀུར་དཔག་མེད་

མཛད་ནས། དེ་བཞིན་གཤེགས་པ་ཞིང་གཞན་དུ་གཤེགས་པ་དང་། དགེ་བའི་རྩ་བ་གང་དུ་བསྔོ་ཐེ་ཚོམ་དུ་གྱུར་པ་ན། དེ་བཞིན་གཤེགས་པ་དེས་སྤྲུལ་པ་ཞིག་བཏང་སྟེ། དགེ་བའི་རྩ་བ་རྫོགས་པའི་བྱང་ཆུབ་ཏུ་བསྔོར་བཅུག་པས། རྗེ་བཙུན་འཇམ་པའི་དབྱངས་སུ་གྱུར། སྔོན་ཡུལ་དབུས་ཀྱི་རྒྱལ་པོ་གོས་སྦྱིན་གྱིས། སངས་རྒྱས་རིན་ཆེན་གཙུག་ཏོར་ཅན་འཁོར་བཅས་ལ་བསྙེན་བཀུར་བྱས་ནས། དགེ་བའི་རྩ་བ་འཁོར་ལོས་བསྒྱུར་བའི་རྒྱལ་པོ་ཐོབ་པར་བསྔོས་ནས་དུང་ཕུལ་བས། འཁོར་ལོས་བསྒྱུར་བའི་རྒྱལ་པོ་དུང་དུ་འགྱུར་བར་ལུང་བསྟན་པ་དང་། མཐའི་རྒྱལ་པོ་ནོར་ལྡན་གྱིས་སངས་རྒྱས་རིན་ཆེན་གཙུག་ཏོར་ཅན་འཁོར་བཅས་ལ་བསྙེན་བཀུར་ནས་དགེ་བའི་རྩ་བ་རྫོགས་པའི་བྱང་ཆུབ་ཏུ་བསྔོས་ནས། བཅོམ་ལྡན་འདས་མགོན་པོ་བྱམས་པར་འགྱུར་བར་ལུང་བསྟན་པ་བྱུང་། སྔོན་སངས་རྒྱས་བཅོམ་ལྡན་འདས་ཡངས་པའི་གྲོང་ཁྱེར་ན་བཞུགས་དུས། ཡུལ་མི་རྣམས་ཀྱིས་ཆོས་སྟོན་དྲངས་པའི་དགེ་བ་རྣམས། ཁོང་རྣམས་ཀྱི་ཕ་མེས་ཡི་དྭགས་སུ་སྐྱེས་པ་རྣམས་ཀྱི་དོན་དུ་བསྔོས་པས། ཡི་དྭགས་

རྣམས་དེ་ཉིད་དུ་ཚེ་འཕོས་ནས་སུམ་ཅུ་རྩ་གསུམ་གྱི་ལྷ་གནས་སུ་སྐྱེས། སྔོན་གྲོང་ཁྱེར་རྡོ་ཅན་གྱི་བཤན་པ་དང་སྨད་འཚོང་མ་སོགས་དམྱལ་བར་སྐྱེས་ནས་སྡུག་བསྔལ་མྱོང་བ་རྣམས་ཀྱི་དོན་དུ་ཡུལ་ན་ཡོད་པའི་བུ་དང་བུ་མོ་རྣམས་ཀྱིས་ཁོང་རྣམས་ཀྱིས་བསགས་པའི་ཟས་ནོར་གྱི་སྟེང་ནས། འཕགས་པ་ཀཏྱ་ན་ལ་བསོད་སྙོམས་ཕུལ། འཕགས་པས་ཀྱང་བསྔོ་བ་མཛད་པས། དེ་དག་རྣམས་དམྱལ་བ་ནས་ཐར་པར་གྱུར། སྔོན་དབུལ་མོ་གཉེན་དགའ་མོས། མར་བསླང་ནས་གྱོ་རལ་ཞིག་གི་ནང་དུ་མར་མེ་ཆུང་ངུ་ཞིག་སྦར་ནས། སངས་རྒྱས་བཅོམ་ལྡན་འདས་ཀྱི་སྤྱན་སྔར་ཕུལ་བས། དགེ་བའི་རྩ་བ་འདིས་སྐྱེ་དགུའི་ཚེ་ལོ་བརྒྱ་ཐུབ་པ་ན། འཇིག་རྟེན་དུ་སྟོན་པ་ཤཱཀྱ་ཐུབ་པ་ཇི་ལྟ་བ་དེ་བཞིན་དུ་བདག་ཀྱང་འགྱུར་བར་ཤོག་ཅིག་ཅེས་སྨོན་ལམ་བཏབ་པས། སངས་རྒྱས་ཀྱིས་ཀུན་དགའ་བོ་ལ། བུ་མོ་འདི་ནི་མ་འོངས་པའི་དུས་ན་སངས་རྒྱས་མར་མེ་འོད་ཅེས་བྱ་བ་དབང་བཅུ་དང་ལྡན་པར་འགྱུར་རོ་ཞེས་ལུང་བསྟན་པ་བྱུང་། སྔོན་སངས་རྒྱས་འཇིག་རྟེན་དབང་ཕྱུག་རྒྱལ་པོའི་དྲུང་དུ། དགེ་སློང་ཆོས་ཀྱི་འབྱུང་གནས་ཀྱིས་རང་གི་སངས་

རྒྱས་ཀྱི་ཞིང་ཁམས་བཟུང་བ་ཇི་བཞིན་དུ་བདག་ཀྱང་སྨོན་ལམ་འདེབས་ཀྱིས་འགྲུབ་པར་གྱུར་ཅིག་ཅེས་བརྗོད་པས། བདེ་བ་ཅན་གྱི་ཞིང་ཁམས་གྲུབ་པར་གྱུར། སྔོན་མུ་ལྟོ་བའི་དཔོན་ཞིག་གིས་འཕགས་པ་རང་སངས་རྒྱས་ཤིག་ལ་སྣུམ་ཁུར་ཞིག་ཕུལ་ནས། དགེ་བའི་རྩ་བ་འདིས་བདག་མིའི་རྒྱལ་པོར་གྱུར་ཏེ། འདི་བས་ཁྱད་དུ་འཕགས་པའི་སྟོན་པ་ལ་བསྙེན་བཀུར་བར་ཤོག་ཅེས་སྨོན་ལམ་བཏབ་པས། ཤཱཀྱའི་རྒྱལ་པོ་བཟང་ལྡན་དུ་གྱུར་ནས། སངས་རྒྱས་འཁོར་བཅས་ལ་བསྙེན་བཀུར་རྒྱ་ཆེན་པོ་བྱས་སོ། །སྔོན་ཡུལ་མི་ཞིག་གིས་སངས་རྒྱས་འོད་སྲུངས་ཀྱི་མཆོད་རྟེན་གྱི་གླང་པོའི་གཟུགས་ཞིག་པ་བཅོས་ཤིང་ལྡོང་རོས་ཀྱིས་བསྐུས་ཏེ་སྨོན་ལམ་བཏབ་པས། ཚེ་རབས་ཐམས་ཅད་དུ་གཟུགས་བཟང་ཞིང་ལོངས་སྤྱོད་ཆེ་བ་དང་། གསེར་གྱི་གླང་པོ་རྟག་ཏུ་ཡོད་པར་གྱུར། སྔོན་པདྨའི་མིག་གིས་སངས་རྒྱས་ཀྱི་མཆོད་རྟེན་ལ། རིན་པོ་ཆེ་ཐོན་ཀ་གཅིག་ཕུལ་བས། བསྐལ་པ་དགུ་བཅུ་རྩ་གཅིག་གི་བར་དུ་འབྱོར་པ་ཆེ་བར་གྱུར། འབྲས་བུ་ཐོབ་པའི་སྨོན་ལམ་བཏབ་པས་དགྲ་བཅོམ་པར་གྱུར། རྒྱལ་པོ་

ཀ་པི་ནས་སངས་རྒྱས་འོད་སྲུངས་ཀྱི་མཆོད་རྟེན་ལ་ཞིག་གསོ་བྱས་པས་ཚེ་རབས་ཐམས་ཅད་དུ་ཕུན་སུམ་ཚོགས་པ་ཐམས་ཅད་ཐོབ་ཅིང་། དད་པ་དང་སྨོན་ལམ་གྱི་མཐུས་དགྲ་བཅོམ་པའི་གོ་འཕང་ཐོབ་པར་གྱུར། དེས་ན་བསགས་པའི་དགེ་ཚོགས་རྣམས། རང་གཞན་སེམས་ཅན་ཐམས་ཅད་གནས་སྐབས་བདེ་ཞིང་མཐར་ཐུག་སངས་རྒྱས་ཀྱི་གོ་འཕང་མྱུར་དུ་ཐོབ་པའི་རྒྱུ་རུ་དམིགས་ནས་བསྔོ་བ་དང་སྨོན་ལམ་གྱི་རྒྱས་འདེབས་བྱེད་ཚུལ་ནི། མགོན་པོ་ཀླུ་སྒྲུབ་ཀྱི་གསུང་འདི་ལྟར་བྱ་སྟེ། དེ་ལྟར་བགྱིས་པའི་བསོད་ནམས་དང་། །བདག་གིས་བགྱིས་དང་མ་བགྱིས་གང་། །དེས་ནི་སེམས་ཅན་ཐམས་ཅད་ཀྱང་། །བླ་མེད་བྱང་ཆུབ་སེམས་ལྡན་ཤོག །སེམས་ཅན་ཐམས་ཅད་དྲི་མེད་དབང་། །ཡོངས་རྫོགས་མི་ཁོམ་ཀུན་འདས་ཤིང་། །སྤྱོད་པ་རང་དབང་ཡོད་པ་དང་། །འཚོ་བ་བཟང་དང་ལྡན་པར་ཤོག །ལུས་ཅན་དག་ནི་ཐམས་ཅད་ཀྱང་། །ལག་ན་རིན་ཆེན་ཉིད་ལྡན་ཞིང་། །ཡོ་བྱད་ཐམས་ཅད་མཐའ་ཡས་པ། །འཁོར་བ་སྲིད་དུ་མི་ཟད་ཤོག །བུད་མེད་ཐམས་ཅད་དུས་ཀུན་ཏུ། །སྐྱེས་མཆོག་ཉིད་དུ་འགྱུར་བར་ཤོག །

ལུས་ཅན་ཐམས་ཅད་རིག་པ་དང་། །རྐང་པར་ལྡན་པ་ཉིད་དུ་ཤོག །ལུས་ཅན་ཁ་དོག་ལྡན་པ་དང་། །གཟུགས་བཟང་གཟི་བརྗིད་ཆེ་བ་དང་། བལྟ་ན་སྡུག་ཅིང་ནད་མེད་དང་། །སྟོབས་ཆེན་ཚེ་དང་ལྡན་པར་ཤོག །ཐམས་ཅད་ཐབས་ལ་མཁས་གྱུར་ཏེ། །སྡུག་བསྔལ་ཀུན་ལས་ཐར་པ་དང་། །དཀོན་མཆོག་གསུམ་ལ་གཞོལ་བ་དང་། །སངས་རྒྱས་ཆོས་ནོར་ཆེར་ལྡན་ཤོག །བྱམས་དང་སྙིང་རྗེ་དགའ་བ་དང་། །ཉོན་མོངས་བཏང་སྙོམས་གནས་པ་དང་། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཀྱིས་བརྒྱན་ཅིང་། །ཚོགས་རྣམས་ཐམས་ཅད་ཡོངས་རྫོགས་ཏེ། །མཚན་དང་དཔེ་བྱད་གསལ་བ་དང་། །བསམ་གྱིས་མི་ཁྱབ་ས་བཅུ་དག །རྒྱུན་མི་འཆད་པར་བགྲོད་པར་ཤོག །བདག་ཀྱང་ཡོན་ཏན་དེ་དག་དང་། །གཞན་ཀུན་གྱིས་ཀྱང་རྒྱན་ལྡན་ཏེ། །ཉེས་པ་ཀུན་ལས་གྲོལ་བ་དང་། །སེམས་ཅན་ཀུན་མཆོག་བྱམས་པ་དང་། །སེམས་ཅན་ཀུན་གྱི་བསམ་པ་དང་། །དགེ་བ་ཐམས་ཅད་རྫོགས་བགྱིད་ཅིང་། །རྟག་ཏུ་ལུས་ཅན་ཐམས་ཅད་ཀྱི། །སྡུག་བསྔལ་སེལ་བར་

བགྱིད་པར་ཤོག །འཇིག་རྟེན་ཀུན་ན་སྐྱེ་བོ་གང་། །སུ་དག་འཇིགས་པས་སྐྱོ་བ་དེ། །བདག་གི་མིང་ཙམ་ཐོས་པས་ཀྱང་། །ཤིན་ཏུ་འཇིགས་པ་མེད་པར་ཤོག །བདག་ནི་མཐོང་དང་དྲན་པ་དང་། །མིང་ཙམ་ཐོས་པས་སྐྱེ་བོ་རྣམས། །རབ་དང་འཁྲུགས་མེད་རྣལ་མ་དང་། །རྫོགས་པའི་བྱང་ཆུབ་ངེས་པ་དང་། །ཚེ་རབས་ཀུན་ཏུ་རྗེས་འབྲངས་བའི། །མངོན་ཤེས་ལྔ་པོ་ཐོབ་པར་ཤོག །སེམས་ཅན་ཀུན་ལ་རྣམ་ཀུན་ཏུ། །རྟག་ཏུ་ཕན་བདེ་བགྱིད་པར་ཤོག །འཇིག་རྟེན་ཀུན་ན་སྐྱེ་བོ་ཀུན། །སྡིག་པ་བྱེད་པ་འདོད་གྱུར་པ། །དེ་དག་ཐམས་ཅད་གནོད་མེད་པ། །རྟག་ཏུ་གཅིག་ཆར་བཟློག་གྱུར་ཅིག །ས་དང་ཆུ་དང་མེ་དང་རླུང་། །སྨན་དང་དགོན་པའི་ཤིང་བཞིན་དུ། །རྟག་ཏུ་སེམས་ཅན་ཐམས་ཅད་ཀྱིས། །རང་དགར་གེགས་མེད་སྤྱོད་པར་ཤོག །སེམས་ཅན་རྣམས་ལ་སྲོག་བཞིན་འཕངས། །དེ་དག་བདག་ལ་ཆེས་འཕངས་ཤོག །བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་

གྱུར་ཅིག །ཅེས་པ་དང་། གཞན་ཡང་བཟང་སྤྱོད་དང་། སྤྱོད་འཇུག་སྨོན་ལམ་སོགས་བསྔོ་སྨོན་གྱི་རིགས་རྒྱ་གང་ཆེ་བྱའོ། །ཐུན་མཚམས་རྣམས་སུ་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་ཀྱི་གདམས་པ་བློ་སྦྱོང་གཞན་དང་། རྒྱལ་བའི་གསུང་རབ་དགོངས་འགྲེལ་རྣམ་ཐར་གསུང་མགུར་རྣམས་ལ་བལྟ་ཞིང་། བསྟན་དང་འགྲོ་བ་ཡོངས་ལ་ཡང་དངོས་སམ་བརྒྱུད་ནས་ཕན་གང་ཐོགས་ལ་འབད་ཅིང་། མདོར་ན་ཚེ་འདི་ཉིད་ལ་རང་གཞན་གྱི་དོན་གཉིས་ལྷུན་གྱིས་འགྲུབ་པ་ཞིག་བྱའོ།། །། ༈ །སྨྲས་པ། ཉེ་རིང་མེད་པར་སེམས་ཅན་ཀུན་གྱི་སྐྱིད་སྡུག་ལེགས་ཉེས་ས་ལེར་མཁྱེན། །ཕྱོགས་རིས་མེད་པར་འགྲོ་ལ་བརྩེ་བའི་མཉམ་མེད་ཤཱཀྱའི་རྒྱལ་པོ་དེ། །སྐྱོ་ངལ་མེད་པར་སླར་ཡང་བདག་ཅག་སྣང་ངོར་དགེ་བའི་བཤེས་སུ་སྦྲུལ། །སྦ་གསང་མེད་པར་ཟབ་རྒྱས་ཆོས་སྟོན་སྐུ་དྲིན་ཅན་ཁྱོད་གཙུག་ན་མཛེས། །མཚན་ལྡན་བླ་མ་སྨན་པའི་རྒྱལ་པོ་ཡིས། །བྱང་ཆུབ་སེམས་ཀྱི་སྨན་མཆོག་གནང་བ་དེ། །འཐུངས་པས་ཉོན་མོངས་ནད་ལས་གྲོལ་བའི་མོད། །སྐུ་དྲིན་བསམས་ཀྱིན་ལེགས་བཤད་

མཆོད་སྤྲིན་སྤྲོ། །བྱམས་དང་སྙིང་རྗེ་བྱང་ཆུབ་སེམས་གཉིས་པོ། །མཉམ་རྗེས་གཉིས་ཀྱི་སྒོ་ནས་ལེགས་སྦྱངས་ན། །སྙིགས་མའི་དུས་འདིར་རྐྱེན་ངན་ཅི་བྱུང་ཡང་། །བྱང་ཆུབ་སེམས་གཉིས་འཕེལ་བའི་གྲོགས་སུ་འགྱུར། །ཀུན་གྱི་སྲོག་ལ་གནོད་པའི་དུག་གི་ཆུ། །སྨན་དུ་བསྒྱུར་བྱེད་བདུད་རྩི་ལྟ་བུ་ཡི། །བླ་མ་གསེར་གླིང་བ་ཡི་མན་ངག་འདི། །མན་ངག་གཞན་ལས་ཁྱད་པར་འཕགས་པ་ཡིན། །དེ་ལྟར་ལེགས་པར་བློ་སྦྱོང་ཤེས་གྱུར་ན། །གྲོང་ཁྱེར་སྐྱིད་པའི་འབྱུང་གནས་ཞེས་བྱ་བ། །བློ་སྦྱོང་སྒོམ་པའི་ལུས་འདིར་ཟེར་བ་ཡིན། །སྲིད་ཞིའི་བདེ་སྐྱིད་ཐམས་ཅད་འདི་ལས་འབྱུང་། །བློ་སྦྱོང་རིན་ཆེན་ཆེ་ཆུང་མང་མཆིས་ཀྱང་། །ནང་ནས་ཚིག་དོན་དག་གསལ་འོད་འབར་བའི། །བློ་སྦྱོང་དོན་བདུན་ཡིད་བཞིན་ནོར་བུ་འདི། །ཆོས་མཛད་གཞོན་ནུའི་སྤྱི་བོའི་རྒྱན་དུ་མཛེས། །ལུང་རིགས་ནོར་བུ་བྱེ་བས་ཡོངས་གང་གཞུང་ལུགས་རབ་འབྱམས་རྒྱ་མཚོ་ནས། །ལེགས་འོང་ངོ་མཚར་གཏམ་རྒྱུད་གསུང་བགྲོས་གཟི་བརྗིད་འོད་སྟོང་ཕྱོགས་བརྒྱར་འཕྲོ། །རིས་མེད་སྐལ་བཟང་གདུལ་བྱའི་བློ་གྲོས་པདྨོ་ཐམས་ཅད་ཁ་འབྱེད་པའི། །

སྔར་མེད་ལེགས་བཤད་ཉི་མ་མཆོག་འདི་གསར་དུ་ཤར་ལ་ད་ལྟོས་ཤིག །དངོས་བརྒྱུད་བླ་མ་རྣམས་ཀྱི་བཀའ་དྲིན་ལས། །རྙེད་པའི་བློ་སྦྱོང་གདམས་པ་ཟབ་མོ་འདི། །རྣལ་འབྱོར་རང་གི་སེམས་ལ་གོམས་ཕྱིར་དང་། །སྐལ་བཟང་གཞན་ལའང་ཕན་ཕྱིར་བཤད་པ་ལགས། །བྱིས་པ་ཆུང་ངུས་རྒན་པོས་བཤད་པའི་གཏམ། །གོ་ནས་གང་ཤེས་གཞན་ལ་སྒྲོག་པའི་ཚེ། །རེ་གཉིས་ནོར་ནས་འཁྲུལ་ཚིག་སྨྲ་ན་ཡང་། །ཕ་མས་གོ་ཚེ་ཁོང་ཁྲོ་མི་སྐྱེ་ལྟར། །བླུན་པོ་བདག་གིས་རྒྱལ་བ་སྲས་བཅས་གསུང་། །འགའ་ཞིག་གོ་ནས་གང་ཤེས་བཤད་པ་ཡིན། །ནང་གི་ཚིག་དོན་རེ་གཉིས་ནོར་སོང་ཡང་། །མཁས་པས་མཁྱེན་ཚེ་མ་ཁྲེལ་ཆོས་བཞིན་འཆོས། །ལེགས་པར་བཤད་པའི་དགེ་ཚོགས་འགྲོ་ཀུན་གྱིས། །བྱང་ཆུབ་སེམས་ཉིད་འབྱོངས་པའི་རྒྱུ་རུ་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །བྱང་ཆུབ་སེམས་དང་ནམ་ཡང་མི་འབྲལ་ཤོག །གནམ་ལ་དྲི་མེད་འོད་གསལ་ཉི་ཟླ་གཟའ་སྐར་ཚོགས་རྣམས་ནམ་འཆར་དང་། །ས་ལ་གཡོ་མེད་རི་རབ་ལྷུན་པོ་གླིང་བཞི་གླིང་ཕྲན་ནམ་གནས་བར། །

སྙན་བརྒྱུད་དྲི་མེད་བྱང་ཆུབ་སེམས་ཀྱི་གདམས་པ་ཟབ་མོ་འདི་ཉིད་ཀྱང་། །ནམ་ཡང་ཉམས་མེད་ས་འདིར་གནས་ནས་བསྟན་འགྲོ་ཡོངས་ལ་ཕན་ཐོགས་ཤོག །འདི་ཉིད་མཐོང་ཐོས་དྲན་རེག་སྐྱེ་བོ་ཡིས། །བདག་བས་གཞན་གཅེས་བྱང་ཆུབ་སེམས་ཀྱི་སྒོས། །ཁེ་དང་རྒྱལ་ཁ་གཞན་ལ་སྟེར་ནུས་ཤིང་། །གྱོང་དང་ཕམ་ཁ་རང་གིས་ལེན་པར་ཤོག །གང་དུ་ཁྱེར་ཀྱང་ལམ་ལ་བར་ཆད་མེད། །གང་ལ་བཞག་ཀྱང་ས་དེར་ལོ་ཕྱུགས་ལེགས། །གང་གིས་མཆོད་བསྟོད་བཀུར་བ་ཐམས་ཅད་ཀྱིས། །གང་བསམ་དོན་ཀུན་འགྲུབ་པའི་བཀྲ་ཤིས་ཤོག། །།ཅེས་བློ་སྦྱོང་དོན་བདུན་མ་དང་འབྲེལ་བའི་ཆོས་ཀྱི་གཏམ་རྒྱལ་སྲས་སྤྲུལ་པའི་གླེགས་བམ་ཞེས་བྱ་བ་འདི་ནི། ལུང་རྟོགས་ཡོན་ཏན་དུ་མ་དང་ལྡན་པའི་བླ་མ་སྐལ་ལྡན་རང་གྲོལ། བྱང་ཆུབ་སེམས་གཉིས་འབྱོང་བའི་བླ་མ་སྦྱིན་པ་ནོར་བུ། མཁས་བཙུན་བཟང་གསུམ་འཛོམ་པའི་ཕུག་བྲག་མཁན་པོ་དང་། བླ་མ་ཡེ་ཤེས་དབང་ཕྱུག །འཕགས་ནོར་བདུན་གྱིས་ཕྱུག་པའི་བྲག་དམར་བླ་མ་དང་། བླ་མ་ཚུལ་ཁྲིམས། དབེན་པར་སྒྲུབ་ལ་གཞོལ་བའི་རྡོ་རྗེ་སློབ་དཔོན་དང་། རྫོགས་

ཆེན་པ། དད་གཏོང་བློ་གྲོས་ཆེ་བའི་བློ་བཟང་དར་རྒྱས་དང་། དགེ་སློང་རབ་འབྱོར། རྟོགས་ལྡན་ནམ་མཁའི་རྣལ་འབྱོར། བླ་མ་འཇམ་དབྱངས་དང་། ལོ་ཆེན་པ། ཕྱོགས་མེད་རི་ཁྲོད་འགྲིམ་པའི་ལ་ཞིང་གྲུབ་ཆེན་དང་། གང་ཤར་རང་གྲོལ། བསླབ་གསུམ་རྒྱན་གྱིས་མཛེས་པའི་ལ་དག་མཁན་པོ་དང་། ཕྱག་མཛོད་སྐལ་བཟང་། ཚེ་འདི་བློས་བཏང་སློབ་མ་མཁས་པ་དང་། ཀུན་དགའ་ཉི་མ། གཞན་ཡང་ཆོས་བཞིན་མཛད་པའི་ཨུ་རྒྱན་དང་། མདོ་སྔགས་བསྟན་འཛིན། བསྐལ་བཟང་ཚུལ་ཁྲིམས། ཡོན་ཏན་རྒྱ་མཚོ། བློ་བཟང་ནོར་བུ། བསྟན་འཛིན་ཉི་མ། བསྟན་འཛིན་ཟླ་བ། རྒྱལ་སྲས་བཟང་པོ། འབྲེལ་ཚད་དོན་ལྡན་སོགས། བྱང་ཆུབ་ཀྱི་སེམས་གཉིས་ལ་བློ་སྦྱོངས་པའི་སྐལ་བཟང་ལས་འཕྲོ་ཅན་གྱི་སློབ་མ་བརྒྱ་ཕྲག་དུ་མས། འདི་ལྟ་བུའི་ཟབ་མོའི་གདམས་པ་ཞིག་དགོས་ཞེས་ཡང་ཡང་བསྐུལ་བའི་ངོར། རང་གཞན་ལ་ཕན་དུ་རེ་བའི་བློས། ཕྱོགས་མེད་ཀྱི་རྒྱལ་ཁམས་དང་། ངེས་མེད་ཀྱི་རི་ཁྲོད་ཉམས་དགའ་རྣམས་འགྲིམ་པའི་རྣལ་འབྱོར་ཞབས་དཀར་བས།

བཀའ་རྒྱུད་གོང་མའི་གདན་ས། ལྷ་དང་དྲང་སྲོང་བཞུགས་གནས། མ་དང་མཁའ་འགྲོའི་དོར། འདུ་འཛི་གྲོང་གི་ཕ་རོལ། གཡའ་དང་གངས་ཀྱི་འདབས་རོལ། སྤྲིན་དང་ན་བུན་རྒྱུན་དུ་འཁྲིགས་པའི་འབྲོག་ལ་ཕྱི་གངས་ཀྱི་རྭ་བའི་དབེན་གནས་བདུད་འདུལ་ཕུག་མོ་ཆེ་ནས་སྦྱར་བའོ།། །།༈ །སྨྲས་པ། རྒྱལ་བ་སྲས་དང་བཅས་པའི་ཐུགས་དམ་མཐིལ། །བླ་མ་གསེར་གླིང་པ་ནས་བརྒྱུད་པ་ཡི། །སྙན་བརྒྱུད་གདམས་པ་བློ་སྦྱོང་དོན་བདུན་མའི། །སྙིང་པོ་རྒྱལ་སྲས་སྤྲུལ་པའི་གླེགས་བམ་འདི། །ཕྱོགས་དུས་ཀུན་ཏུ་དར་ཞིང་རྒྱས་པའི་ཕྱིར། །རྒྱལ་བ་བློ་བཟང་གྲགས་པ་འཁྲུངས་པའི་ཡུལ། །མདོ་ཁམས་སྨད་ཀྱི་རེ་ཀོང་ས་ཡི་ཆ། །གནས་མཆོག་བཀྲ་ཤིས་འཁྱིལ་ནས་པར་དུ་བསྒྲུབས། །འདིས་མཚོན་དགེ་བས་ཕན་བདེ་འབྱུང་བའི་གནས། །བྱམས་དང་སྙིང་རྗེ་བྱང་ཆུབ་སེམས་མཆོག་གི །གདམས་པ་ཡིད་བཞིན་ནོར་བུ་ལྟ་བུ་འདི། །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག། །།སརྦ་མངྒ་ལཾ།། །།

སྙིང་རྗེ་སྤྲུལ་པའི་གླེགས་བམ།

སྙིང་རྗེ་སྤྲུལ་པའི་གླེགས་བམ་བཞུགས་སོ། །

ན་མོ་གུ་རུ་མཉྫུ་གྷོ་ཥ་ཡ། གཡས་ནས་ཙན་དན་ལྡེ་གུས་བྱུགས་པ་དང་། །གཡོན་ནས་སཏྭ་གྲིས་གཤགས་པ་གཉིས་ལ་ཡང་། །ཉེ་རིང་ཆགས་སྡང་མེད་པར་བརྩེ་བས་སྐྱོང་། །སངས་རྒྱས་ཐུགས་རྗེ་ཅན་ལ་མགོས་ཕྱག་འཚལ། །མར་གྱུར་འགྲོ་བའི་དོན་དུ་མནར་མེད་དུ། །བསྐལ་ཆེན་ཁྲི་ཕྲག་མང་པོར་གནས་དགོས་ཀྱང་། །སྙིང་རྗེས་མི་སྐྱོ་གཞན་དོན་ལྷུར་ལེན་པའི། །འཕགས་པ་སྤྱན་རས་གཟིགས་ལ་ཕྱག་འཚལ་ལོ། །བདག་བས་གཞན་གཅེས་བྱང་ཆུབ་སེམས་འབྱོངས་ནས། །ཉམ་ཐག་

འགྲོ་དོན་མཛད་ལ་སྐྱོ་ངལ་མེད། །གནོད་པའི་དགྲ་ཡང་བུ་བཞིན་སྐྱོང་མཛད་པའི། །རྩ་བརྒྱུད་བླ་མ་རྣམས་ལ་གུས་པས་འདུད། །ནང་པ་སངས་རྒྱས་པ་ཡི་ཁྱད་ཆོས་མཆོག །ལེགས་ཚོགས་ཡོན་ཏན་མ་ལུས་འབྱུང་བའི་གནས། །ཆོས་ཀྱི་རྩ་བ་སྙིང་རྗེ་རིན་པོ་ཆེ། །བདག་གཞན་རྒྱུད་ལ་སྐྱེ་བར་བྱིན་གྱིས་རློབས། །ཕན་བདེའི་འབྱུང་གནས་རྫོགས་པའི་སངས་རྒྱས་ནི། །དམ་ཆོས་བསྒྲུབས་ལས་འབྱུང་སྟེ་དེ་ཡི་ནི། །རྩ་བ་སྙིང་རྗེ་དག་ལ་རག་ལས་པས། །ཐོག་མར་སྙིང་རྗེ་ཁོ་ན་བསྟོད་པར་

བགྱི། །སྙིང་རྗེ་ཆེན་པོ་ཡིད་བཞིན་ནོར་བུ་ཡི། །ཅོད་པན་ཐོགས་པའི་བྱང་ཆུབ་སེམས་དཔའ་ལ། །ངན་སོང་གསུམ་དང་ངན་འགྲོ་ལ་སོགས་པས། །གནོད་པ་བྱ་བའི་འཇིགས་པ་མེད་པར་འགྱུར། །འཁོར་ལོས་བསྒྱུར་རྒྱལ་འཁོར་ལོ་ཡོད་པ་ལ། །འཁོར་དང་དཔུང་རྣམས་ཤུགས་ཀྱིས་འདུ་བ་ལྟར། །ཆོས་ཀྱི་རྩ་བ་སྙིང་རྗེ་ཡོད་པ་ལ། །ཆོས་གཞན་ཀུན་ཀྱང་ཤུགས་ཀྱིས་འབྱུང་བར་འགྱུར། །དཔེར་ན་ཉི་མ་ཤར་ན་མུན་པ་སངས། །དེ་ཡི་དྲོད་ཀྱིས་འགྲོ་ལ་ཕན་པ་ལྟར། །སྙིང་རྗེ་རྒྱུད་ལ་ཤར་ན་ཉོན་མོངས་སངས། །དེ་ཡི་

ཆོས་ཀྱིས་འགྲོ་ལ་ཕན་པར་འགྱུར། །མྱུར་དུ་མངོན་པར་རྫོགས་པར་སངས་རྒྱས་པར། །འདོད་པས་ཆོས་ཀྱི་ཐོག་མཐའ་བར་གསུམ་དུ། །སྙིང་རྗེ་བསྒོམ་པ་ཤིན་ཏུ་གལ་ཆེ་ཞེས། །གསུངས་རྣམས་སྒྲོག་ལ་རང་ཉིད་སྤྲོ་བར་གྱུར། །དེའི་ཕྱིར་སྙིང་རྗེ་དགོས་པའི་རྒྱུ་མཚན་ནི། །ལུང་འདྲེན་མང་པོ་བྱས་ནས་འཆད་པ་ལ། །མདོ་རྒྱུད་བསྟན་བཅོས་ཚད་མར་འཛིན་པ་ཡི། །དད་ལྡན་སྙིང་རྗེ་འདོད་རྣམས་དགའ་བས་ཉོན། །དེ་ཡང་མྱུར་དུ་མངོན་པར་རྫོགས་པར་འཚང་རྒྱ་བར་འདོད་པས་དམ་པའི་

ཆོས་བྱེད་དགོས། ཆོས་ཀྱི་ཐོག་མཐའ་བར་གསུམ་གང་དུ་ཡང་སྙིང་རྗེ་འདི་གལ་ཆེ་བའི་རྒྱུ་མཚན་ནི། ཇི་སྐད་དུ། སློབ་དཔོན་ཟླ་བ་གྲགས་པའི་ཞལ་གྱི་བུམ་བཟང་ལས། གང་ཕྱིར་བརྩེ་ཉིད་རྒྱལ་བའི་ལོ་ཏོག་ཕུན་སུམ་ཚོགས་འདི། །ས་བོན་དང་ནི་སྤེལ་ལ་ཆུ་འདྲ་ཡུན་རིང་དུ། །ལོངས་སྤྱོད་གནས་ལ་སྨིན་པ་ལྟ་བུར་འདོད་འགྱུར་བ། །དེ་ཕྱིར་བདག་གིས་ཐོག་མར་སྙིང་རྗེ་བསྟོད་པར་བགྱི། །ཞེས་དང་། དེ་བཞིན་དུ་རྗེ་བདག་ཉིད་ཆེན་པོའི་ཞལ་ནས། ཐོག་མར་གལ་ཆེ་བ་ནི། སྙིང་རྗེ་ཆེན་པོས་ཡིད་བསྐྱོད་ནས་སེམས་ཅན་ཐམས་ཅད་འཁོར་བ་ལས་འདོན་པའི་ཕྱིར་ངེས་པར་དམ་བཅའ་བར་འགྱུར་ལ། སྙིང་རྗེ་མེད་ན་དེ་ལྟར་བྱེད་པར་མི་འོང་བས། འགྲོ་བ་མ་ལུས་སྒྲོལ་བའི་ཁུར་འཁྱེར་བ་ནི། དེ་ལ་རག་ལས་པའི་ཕྱིར་དང་། ཁུར་དེ་མི་འཛིན་ན་ཐེག་པ་ཆེན་པོར་མི་ཆུད་པའི་ཕྱིར། ཞེས་གསུངས། བར་དུ་གལ་ཆེ་བ་ནི། དེ་ལྟར་ལན་གཅིག་སེམས་དེ་ལྟ་བུར་སྐྱེས་ནས་ཞུགས་ཀྱང་། སེམས་ཅན་གྲངས་མང་ཞིང་བྱ་བྱེད་ངན་པ་དང་། བསླབ་པར་བྱ་བ་ཡང་ཤིན་ཏུ་བྱ་དཀའ་ཞིང་མཐའ་ཡས་པ་དང་། དུས་ཀྱང་དཔག་ཏུ་

མེད་པར་དགོས་པར་མཐོང་བ་ན་ཞུམ་ནས་ཐེག་པ་དམན་པར་ལྟུང་བ་ལ། སྙིང་རྗེ་ཆེན་པོ་ལན་གཅིག་བསྐྱེད་པ་ཙམ་མ་ཡིན་པར་ཇེ་འཕེལ་དུ་གོམས་པར་བྱས་པས་རང་གི་བདེ་སྡུག་ལ་མི་བལྟ་ཞིང་། གཞན་གྱི་དོན་ལ་མི་སྐྱོ་བས་ཚོགས་ཐམས་ཅད་བདེ་བླག་ཏུ་རྫོགས་པར་བྱེད་གསུངས། ཐ་མར་གལ་ཆེ་བ་ནི། སངས་རྒྱས་རྣམས་འབྲས་བུ་བརྙེས་པའི་ཚེ་ཡང་། ཐེག་དམན་བཞིན་ཞི་བར་མི་གནས་པར། ནམ་མཁའ་ཇི་སྲིད་དུ་འགྲོ་བའི་དོན་མཛད་པ་ཡང་སྙིང་རྗེ་ཆེན་པོའི་མཐུ་སྟེ། དེ་མེད་ན་ཉན་ཐོས་ལྟར་འགྱུར་བའི་ཕྱིར་རོ་གསུངས། འཕགས་པ་བྱམས་པའི་རྣམ་ཐར་ལས། བྱང་ཆུབ་སེམས་དཔའི་སྙིང་རྗེ་ཆེན་པོའི་ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་ཅོད་པན་ཐོགས་པའི་བྱང་ཆུབ་སེམས་དཔའ་རྣམས་ལ། ངན་སོང་ངན་འགྲོ་ལ་སོགས་གནོད་པ་བྱ་བའི་འཇིགས་པ་མེད་དོ་གསུངས། ཆོས་ཡང་དག་པར་སྡུད་པའི་མདོ་ལས། རིགས་ཀྱི་བུ་སྒྲུབ་པ་ལ་གནས་པ་ཇི་ལྟར་རིགས་པར་བྱ། སྨྲས་པ། གང་སེམས་ཅན་རྣམས་ལ་བྱམས་པ་དང་སྙིང་རྗེ་ཆེན་པོ་མི་འདོར་བའོ། །ཞེས་པ་དང་།

སྙིང་རྗེ་ཆེན་པོ་ནི་བྱང་ཆུབ་སེམས་དཔའི་བསླབ་པ་ཐམས་ཅད་ཀྱི་རྩ་བ། ཞེས་པ་དང་། ཡང་སེམས་ཅན་གྱི་ཞིང་ནི་བྱང་ཆུབ་སེམས་དཔའི་སངས་རྒྱས་ཀྱི་ཞིང་སྟེ། སངས་རྒྱས་ཀྱི་ཞིང་ལས་སངས་རྒྱས་ཀྱི་ཆོས་ཐམས་ཅད་འཐོབ་པར་འགྱུར་བས་དེ་ལ་ལོག་པར་སྒྲུབ་པར་མི་རིགས་སོ། །ཞེས་པ་དང་། སྡོང་པོ་བཀོད་པའི་མདོ་ལས། སྙིང་རྗེ་བྱམས་པའི་སྤྲུལ་པ་འདི་འདྲ་བ། །སེམས་ཅན་སྒྲོལ་སླད་ཕན་པའི་སེམས་ལྡན་པས། །རྣམ་དག་ཡིད་ཅན་འདི་ནི་ཅི་འདྲ་བ། །དེ་འདྲའི་འགྲོ་བ་ལྷ་དང་མིར་བཅས་དཀོན། །ཞེས་པ་དང་། ཡང་བློ་གྲོས་རྒྱ་མཚོས་ཞུས་པ་ལས། བློ་གྲོས་རྒྱ་མཚོ་གསུམ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་དང་རིམ་གྲོ་བླ་ན་མེད་པའོ། །གང་ཞེ་ན། བྱང་ཆུབ་ཏུ་སེམས་བསྐྱེད་པ་དང་། གང་ཆོས་ཡོངས་སུ་འཛིན་པ་དང་། གང་སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་པའོ། །ཞེས་པ་དང་། ཡང་དེ་ཉིད་ལས། བློ་གྲོས་རྒྱ་མཚོ་བྱང་ཆུབ་སེམས་དཔའ་རྣམས་ཀྱིས་ཐེག་པ་ཆེན་པོ་སྡུད་པར་འགྱུར་བའི་ཆོས་ནི་གཅིག་སྟེ། འདི་ལྟར་བྱང་ཆུབ་ཀྱི་སེམས་མི་བརྗེད་ཅིང་བག་ཡོད་པའོ། །གཞན་

ཡང་ཆོས་གཅིག་སྟེ་འདི་ལྟར་བདག་གི་བདེ་བ་ལ་མི་ཆགས་པའི་སྙིང་རྗེ་ཆེན་པོའོ། །ཞེས་གསུངས། མཚན་བརྗོད་ལས། སྙིང་རྗེ་ཆེ་དང་ཤེས་རབ་དང་། །ཐབས་ཀྱིས་འགྲོ་དོན་བྱེད་པའི་མཆོག །དགའ་མགུ་རངས་པའི་བསམ་པ་ཅན། །ཞེས་དང་། ཧེ་བཛྲ་ལས། སྟོང་པ་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་དེ་ལ་བྱ། །ཞེས་དང་། བྲམ་ཟེ་ཆེན་པོའི་ཞལ་ནས། གཉིས་མེད་སེམས་ཀྱི་སྡོང་པོ་དམ་པ་ནི། །ཁམས་གསུམ་མ་ལུས་ཀུན་ཏུ་ཁྱབ་པར་སོང་། །སྙིང་རྗེའི་མེ་ཏོག་གཞན་ཕན་འབྲས་བུས་འཛིན། །མིང་ནི་མཆོག་ཏུ་གཞན་ལ་ཕན་པའོ། །ཞེས་གསུངས། གཱ་ཡ་གོ་རིའི་མདོ་ལས། སྙིང་རྗེ་དང་ཐབས་དང་བྱང་ཆུབ་སེམས་ལ་གོམས་པར་བྱས་པས། ཚེ་འདི་ཉིད་ལ་གདོན་མི་ཟ་བར་ཁྱད་པར་དུ་འགྱུར་ཞེས་གསུངས་སོ། །རབ་ཏུ་ཞི་བ་རྣམ་པར་ངེས་པ་ཆོ་འཕྲུལ་གྱི་མདོ་ལས། བཟང་སྐྱོང་། བྱང་ཆུབ་སེམས་དཔའ་ཆོས་བཞི་དང་ལྡན་ན། དམ་པའི་ཆོས་ཡོངས་སུ་འཛིན་ཏེ། གང་ཞེ་ན། བདག་ལ་མི་ཆགས་པ་དང་། གཞན་ལ་བདེ་བ་སྟོབ་པ་དང་། སྙིང་རྗེ་ཆེན་པོ་རབ་ཏུ་

ཐོབ་པ་དང་། ཆོས་ཡོངས་སུ་འཚོལ་བའི་མི་ངོམས་པ་སྟེ་བཞི་པོ་དག་གོ །ཞེས་གསུངས། མདོ་སྡུད་པ་ལས། གང་ལ་ཕན་དང་སྙིང་བརྩེར་བཅས་པས་སྤྱད་སྤྱད་པ། །རིགས་སྔགས་འདི་ལ་བསླབས་ནས་མཁས་པ་བྱང་ཆུབ་རེག ། འདུས་བྱས་བདེ་དང་འདུས་མ་བྱས་བདེ་གང་ཡིན་པ། །བདེ་བ་དེ་ཀུན་འདི་ལས་འབྱུང་བར་རིགས་པར་བྱ། །ཞེས་གསུངས། རྒྱལ་སྲས་ཞི་བ་ལྷའི་ཞལ་ནས། སྙིང་རྗེ་མདུན་དུ་བཞག་ནས་སུ། །དགེ་བ་སྤེལ་ལ་ནན་ཏན་བྱ། །གསུངས། ཇོ་བོའི་ཞལ་ནས། ཐེག་པ་ཆེན་པོ་ལྟ་བས་མ་ཕྱེ་སྙིང་རྗེས་ཕྱེ་གསུངས། དུས་འཁོར་རྩ་རྒྱུད་ལས། སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་སུ་དེ་བརྗོད་བྱ། །ཞེས་དང་། བརྟག་གཉིས་ལས། གང་ཤེས་རབ་དང་སྙིང་རྗེ་ཆེ་བ་ནི་ཐེག་པ་ཆེན་པོ་ཡིན་ལ། གང་ཆུང་བ་རྣམས་ནི་ཐེག་པ་ཆུང་ངུའོ། །ཞེས་དང་། ཡུམ་ལས། བྱམས་པ་ཆེན་པོ་དང་སྙིང་རྗེ་ཆེན་པོ་དང་དགའ་བ་ཆེན་པོ་དང་བཏང་སྙོམས་ཆེན་པོའི་ཆོས་སྟོན་ཞེས་དང་། བྱང་ས་ལས། བྱང་ཆུབ་སེམས་དཔས་ནི་དབུལ་པོར་འགྱུར་དུ་དོགས་པའི་འཇིགས་པས་སྦྱིན་པ་སྦྱིན་པར་ཡང་མི་

བྱེད་དེ། སྙིང་རྗེའི་བསམ་པ་འབའ་ཞིག་གིས་བྱེད་དོ་ཞེས་དང་། གཞན་ཡང་ཡིད་ལ་མི་བྱེད་པར་སེམས་ཅན་རྣམས་ལ་སྙིང་བརྩེ་བར་བསྒོམ་པར་བྱེད་དོ། །དེ་བསྒོམས་པའི་རྒྱུས་སེམས་ཅན་རྣམས་ལ་སྙིང་རྗེ་བའི་བསམ་པ་འཐོབ་པར་འགྱུར་ཏེ། དེས་ན་སེམས་ཅན་གྱི་དོན་དུ་ངན་སོང་རྣམས་ལ་ཁྱིམ་དུ་གནས་པའི་ཚུལ་གྱིས་གནས་པར་བྱེད་གསུངས། གྲུབ་ཐོབ་བིརཝ་པའི་ཞལ་ནས། ཐོགས་མེད་བརྩེ་བས་བསྐྱངས་པ་ཡི། །དྲིན་ཅན་རྣམས་ལ་སྙིང་རྗེ་བསམས། །གནོད་བྱེད་འདི་རྣམས་བདག་གི་མ། །སྔོན་ཚེ་ཡང་ཡང་ཕན་བཏགས་ཀྱང་། །སྨྱོན་པ་ལྟ་བུར་རང་དབང་མེད། །མི་དགེའི་ལས་ཀྱིས་མནར་མེད་འགྱུར། །དེ་ལྟར་དྲན་པས་སྲིད་གསུམ་ལ། །སྙིང་རྗེ་མཐར་ཕྱིན་འགྱུར་བ་ཡིན་གསུངས། དེས་ན་སྙིང་རྗེ་ཐེག་པ་ཆེན་པོའི་ཆོས་ཀྱི་རྩ་བ་ཡིན་ཏེ། འདི་མེད་ན་ཕ་རོལ་ཏུ་ཕྱིན་པ་དྲུག་དང་། བསྐྱེད་རྫོགས་སོགས་མདོ་སྔགས་ཀྱི་ལམ་ལ་ཅི་ཙམ་འབད་ཀྱང་ཐེག་པ་ཆེན་པོར་མི་ཚུད། ཐེག་པ་དམན་པར་ལྟུང་བར་འགྱུར་བས། ཐབས་དུ་མའི་སྒོ་ནས་སྙིང་རྗེ་བསྒོམ་པ་ལ་ཉིན་མཚན་མེད་པར་

འབད་པར་བྱའོ། །གཞན་ཡང་སློབ་དཔོན་དཔའ་བོའི་ཞལ་ནས། ཡོན་ཏན་མ་ལུས་བྱང་ཆུབ་སེམས་ལ་བརྟེན། །བྱང་ཆུབ་མཆོག་སེམས་སྙིང་རྗེའི་རྒྱུ་ལས་འབྱུང་། །ཞེས་དང་། དེ་ཡིས་མཛད་པའི་ཕར་ཕྱིན་བསྡུས་པ་ལས། ཡེ་ཤེས་སྣང་བ་མཁའ་ལྟར་ཡངས་པ་ལ། །སྙིང་རྗེ་ལྡན་པ་གཅིག་པུ་ཕ་རོལ་བརྒལ། །སེམས་ཅན་མ་ལུས་ཀུན་ལ་ཁྱབ་པ་ཡི། །སྙིང་རྗེ་ཆེན་པོ་འཇིག་རྟེན་ཀུན་ཏུ་འབྱུང་། །ཞེས་དང་། རྗེ་མི་ལས། སྟོང་ཉིད་རྟོགས་ན་སྙིང་རྗེ་སྐྱེ། །སྙིང་རྗེ་སྐྱེས་ན་བདག་གཞན་མེད། །བདག་གཞན་མེད་ན་འགྲོ་དོན་འགྲུབ། །འགྲོ་དོན་འགྲུབ་ན་ང་དང་མཇལ། །གསུངས། ལུང་གཞན་ལས་ཀྱང་། བྱང་ཆུབ་སེམས་དཔའ་མཉམ་བཞག་པས། །གོམས་པའི་སྟོབས་ཀྱིས་རྫོགས་པ་ན། །དངོས་འཛིན་གདོན་གྱིས་ཟིན་པ་ལ། །ཁྱད་པར་དུ་ཡང་སྙིང་རྗེ་སྐྱེ། །ཞེས་དང་། དབང་མདོར་བསྟན་ལས། སྟོང་ཉིད་དཔག་བསམ་ལྗོན་ཤིང་ལས། །དམིགས་མེད་སྙིང་རྗེའི་འབྲས་བུ་འབྱུང་། །ཞེས་དང་། སེམས་ཅན་མགུ་བར་བྱ་བའི་བསྟོད་པ་ལས། ང་ལ་གུས་པ་སེམས་ཅན་དོན་ཏེ་གུས་པ་གཞན་དག་མིན། །གང་

གིས་སྙིང་རྗེ་མ་བཏང་ང་ལ་གུས་པ་སྟེ། །སྙིང་རྗེས་བཏང་ན་གནས་པར་གྱུར་པ་ལྟུང་བ་གང་ཡིན་པ། །དེ་ནི་སྙིང་རྗེས་བླང་པར་ནུས་ཀྱི་གཞན་གྱིས་མིན། །གང་གིས་སྙིང་རྗེ་སེམས་ཅན་རྗེས་སུ་ཞུགས་གྱུར་པ། །དེས་ནི་ང་ཡང་མཉེས་བྱས་དེས་ནི་བསྟན་པའི་ཁུར་ཡང་བཟུང་། །ཚུལ་ཁྲིམས་ཐོས་པ་སྙིང་རྗེ་དག་དང་བློ་དང་གསལ་བ་དག ། གང་ལ་ཡོད་པ་དེས་ནི་རྟག་ཏུ་བདེ་བར་གཤེགས་པ་མཆོད། །གསུངས། དོན་གྱི་ལམ་རིམ་བེའུ་བུམ་སྔོན་པོ་ལས། ཐེག་པ་ཆེ་ལ་སྙིང་རྗེ་གལ་ཆེ། དེ་ཡང་སྦྲུལ་ཁར་ཚུད་པ་ལྟ་བུ་མེད་ན་བྱང་ཆུབ་སེམས་དཔའི་མིང་མི་འོང་། ཞེས་པ་སྟེ་དུག་སྦྲུལ་གྱི་སྟེང་དུ་བྱ་རྣམས་ཀྱིས་འཕུར་དུས། ཁོའི་ཁ་རླངས་ཀྱིས་ཕོག་ན་བྱ་དེ་འབྲོས་སྙམ་ཡང་འབྲོས་ས་མེད། སྦྲུལ་དེ་ལ་འང་ད་བྱ་གཏོང་སྙམ་ཡང་། བྱ་ནམ་མཁའ་ལ་ལྡིང་བ་དེ། ཁོའི་སྟེང་དུ་སྡིགས་ཀྱིས་ལྷུང་ཡོང་། དེ་བཞིན་དུ་སྙིང་རྗེ་ཆེན་པོ་ཡོད་ན་སེམས་ཅན་བྱད་ངན་པ་དང་། བྱས་པ་མི་གཟོ་བ་དང་། གྲངས་མང་བ་དང་། སྟོང་པ་ཉིད་ཡིན་པ་སོགས་ཅི་ཡོད་ཀྱང་། སྙིང་རྗེ་དེས་ཟིན་ནས་སླར་མ་བཏང་གི་བར་

དུ་འཛིན་པ་དམ་དུ་འཆའ། རྐྱེན་གྱིས་བསྒྱུར་མི་ཐུབ་པ་ཞིག་འོང་བ་ཡིན། དེ་འདྲའི་སྙིང་རྗེ་ཆེན་པོ་ཞིག་མེད་ན་བྱང་ཆུབ་སེམས་དཔའི་མིང་རང་ཡང་མི་འོང་གསུངས། དཔེ་ཡི་ལམ་རིམ་རིན་ཆེན་སྤུངས་པ་ལས། ཁམས་པ་འཇམ་དཔལ་བྱ་བའི་རྐང་པ་ན་བ་གཅིག་ལ། དགེ་བཤེས་སྟོན་པའི་ཞལ་ནས། ད་ཁྱོད་ཀྱི་མ་རྒན་ཡུལ་སྣ་གདོང་ན། ཁྱི་ཚན་ཅིག་གིས་རྨུག་གིན་འདུག །གྲོགས་ཀྱང་སུ་ཡང་མི་འདུག་བྱས་ན། རྐང་བ་ན་བ་རང་ཡང་མི་དྲན་པར། སྡུག་རྒན་མ་དེས་དེ་ན་ཅི་བྱེད་ན་ཟེར་ནས་འཐེངས་ཁྱེར་ལིང་ངེ་ཆ་ངེས་གསུངས། དེ་བཞིན་དུ་འོ་སྐོལ་ལ་སེམས་ཅན་ཐམས་ཅད་ལ་མའི་བློ་བཅོས་མ་མ་ཡིན་པ་རེ་སྐྱེས་ན། སེམས་ཅན་གྱི་སྡུག་བསྔལ་མཐོང་ཙམ་ན་སྙིང་རྗེ་ཤས་མི་བཟོད་པ་ཞིག་འོང་སྟེ་གསུངས། དེ་ལྟར་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་སྙིང་རྗེ་བཅོས་མ་མ་ཡིན་པ་ཞིག་སྐྱེས་ན། སྨོན་འཇུག་གཉིས་ཀྱི་སེམས་རང་དབང་མེད་པར་སྐྱེ། དེ་སྐྱེས་ཙམ་ན་སྟོང་པ་སྙིང་རྗེ་གཉིས་སུ་མེད་པའི་བྱང་ཆུབ་ཀྱི་སེམས་སྐྱེ་བ་ལ་ཚེགས་མེད་དེ། མདོ་ལས། གང་ལ་མགོ་མཆིས་པ་ལ་འཚོ་བ་མཆིས་

སོ། །གང་ལ་སྙིང་རྗེ་མཆིས་པ་ལ་བྱང་ཆུབ་ཀྱི་སེམས་མཆིས་སོ། །གང་ལ་བྱང་ཆུབ་ཀྱི་སེམས་མཆིས་པ་ལ་སངས་རྒྱས་མཆིས་སོ། །གསུངས། སྐྱེས་རབས་ལས། སྐྱེ་བོ་སྙིང་རྗེ་མེད་པས་ན། །ནང་མི་ལ་ཡང་ཕྱི་མི་བཞིན། །ལུས་ངག་ཡིད་ཀྱི་སྤྱོད་པ་རྣམས། །མི་རིགས་སྤྱོད་པ་མཆོག་ཏུ་འགྱུར། །ཞེས་དང་། དེ་བས་ཆོས་ལ་དད་པ་ཡིས། །སྙིང་རྗེ་གཏང་བར་མི་བྱ་སྟེ། །ཆར་འབབ་ལོ་ཏོག་འཕེལ་བ་བཞིན། །དེ་ལས་ཡོན་ཏན་འཕེལ་བར་འགྱུར། །ཞེས་དང་། འཕགས་པ་ཐོགས་མེད་ཀྱིས། །དེ་ལ་སྙིང་རྗེ་བསམ་པས་ཀྱང་ལས་དགེ་བ་ཚེ་འདི་ལ་མྱོང་བར་འགྱུར་ཏེ། འདི་ལྟར་འདི་ན་ཁ་ཅིག་སེམས་ཅན་ཕ་རོལ་རྣམས་དང་། གང་ཟག་ཕ་རོལ་རྣམས་ལ་སྙིང་རྗེའི་བསམ་པ་དང་། ཕན་པའི་བསམ་པ་ཤས་ཆེར་མངོན་པར་འདུ་བྱེད་པ་ལྟ་བུའོ། །ཞེས་དང་། ཉི་ཁྲི་སྣང་བ་ལས། བྱང་ཆུབ་སེམས་དཔའི་སྙིང་རྗེ་ནི། །སྲིད་པ་དགའ་བར་བྱེད་པ་སྟེ། །བློ་ཡིས་དེར་ནི་གནས་པ་ཡང་། བརྐམ་པ་རྗེས་སུ་སེམས་མ་ཡིན། །ཞེས་དང་། ཡེ་ཤེས་དམ་པས་ཞུས་པར། བྱང་ཆུབ་

སེམས་དཔའ་སྙིང་རྗེ་དེ་ལྟ་བུ་དང་ལྡན་པ་ནི། ཉེས་པའི་ཆོས་དང་ཡང་ལྡན་པར་མི་འགྱུར་ལ། ཉེས་པ་ཐམས་ཅད་སྤོང་པར་བྱེད་དོ། །ཞེས་དང་། དྲན་པ་ཉེར་བཞག་ལས། གང་གི་སེམས་ཀྱང་མྱོང་མིན་པའི། །སྙིང་རྗེ་ཡིས་ནི་རྣམ་བརྒྱན་པ། །དེ་ཡི་གྲོགས་པོར་འཇིག་རྟེན་འདིར། །འགྱུར་རོ་སྙན་པ་ཀུན་ཏུ་ཁྱབ། །གང་ཞིག་སྙིང་རྗེས་རྣམ་བརྒྱན་དང་། །མི་ཡི་འཇིག་རྟེན་ན་དེ་ལྷ། །སྙིང་རྗེ་ཡི་ནི་གང་དབུལ་བ། །དེ་ནི་ཤིན་ཏུ་དབུལ་བར་འདོད། །སྙིང་རྗེ་ཐུབ་པས་བསྔགས་པ་ཡིན། །སྙིང་རྗེ་དྲི་མེད་སྙིང་པོ་ཡིན། །སྙིང་རྗེས་སྐྱོན་རྣམས་འཇོམས་པའོ། །སྙིང་རྗེ་ཟད་པ་མེད་པའི་གཏེར། །ཡོན་ཏན་རྒྱན་རྣམས་ཀྱི་ཡང་མཆོག །སྙིང་རྗེའི་བཞོན་མ་གང་ལ་ཡོད། །དེ་ནི་མཆོག་གི་འོ་མ་ལྡན། །ཐེག་ཆེན་རྐྱལ་བ་ལ་ཞོན་པའི། །བརྩེ་བའི་སྙིང་རྗེ་ལག་གནས་ནས། །སྐྱོན་གསུམ་རླབས་ནི་ཤུགས་པོ་ཆེ། །སྲིད་པའི་རྒྱ་མཚོ་ལས་སྒྲོལ་བྱེད། །ཞེས་དང་། སློབ་དཔོན་ངག་དབང་གྲགས་པས་ཀྱང་། སྙིང་རྗེ་སྙིང་ནི་འཇག་གྱུར་པ། །ཡེ་ཤེས་ཐར་པ་དེ་ཡིན་གྱི། །ཆོས་གཞན་མང་པོས་ཅི་ཞིག་བྱ། །མི་འཚེ་ཆོས་ཀྱི་མཆོག་ཡིན་

པར། །གྲུབ་པའི་མཐའ་ནི་ཀུན་ལས་འདོད། །ཅེས་གསུངས། གླང་རི་ཐང་པས་ན་བཟའ་ཞིག་ཕུལ་ཏེ། སྤྱན་སྔ་བ་ལ་གདམས་ངག་ཞུས་པས། བྱམས་པ་སྙིང་རྗེ་སྟོན་པའི་ཚིགས་བཅད་གཅིག་གསུངས་ནས། བྱམས་པ་དང་སྙིང་རྗེ་བསྒོམ་པ་འདི་མན་ངག་ཡིན་སྙམ་པ་ཡིན་གསུངས། བྱེད་ན་རེ་རེས་ཀྱང་ཆོག་གམ་སྙམ་པ་ལྟ་བུ་ལགས་སོ་གསུངས། དགེ་བཤེས་ཕུ་ཆུང་བ་དང་ཁམས་པ་ལུང་པ་དེ་ཀུན། ཆོས་གསུངས་རེས་ཀྱིས། སོ་སོར་ཐར་པའི་སྡོམ་པ་དང་ལྡན། བྱམས་པ་དང་སྙིང་རྗེ་བྱང་ཆུབ་ཀྱི་སེམས་བརྟན། སྨོན་ལམ་གྱིས་ཁ་ལོ་བསྒྱུར། མན་ངག་འདི་ཁོ་ན་ཡིན་སྙམ་པ་ཡིན་ཇོ་བོ་བ་བྱ་བ་ཞིག་ཁོ་ན་གསུངས། དགེ་བཤེས་ཤྭ་བོ་པས། བྱམས་སྙིང་རྗེ་གལ་ཆེ་བའི་རྒྱུ་མཚན་མང་དུ་གསུངས་པས། གླང་ཐང་པས་ཕྱག་འཚལ་ནས། བདག་དུས་ད་ནས་བཟུང་སྟེ་བྱམས་སྙིང་རྗེ་བསྒོམ་པར་ཞུ་ཞུས་པས། ཤྭ་བོ་པས་དབུ་ཞྭ་ཕུད་ནས། ཕྱག་སྤྱི་བོར་ཐལ་མོ་སྦྱར་ནས། ཤིན་ཏུ་ཆ་ཡང་བཟང་ལགས་ཞེས་ལན་གསུམ་གསུངས། རྒྱ་གར་མཁས་པ་ཆེན་པོ་སངས་རྒྱས་གསང་བས་

མཛད་པའི་མན་ངག་ལམ་རིམ་ལས། སེམས་ཅན་མ་ལུས་ཐམས་ཅད་ལ། །སྙིང་རྗེའི་ཐག་པ་མ་ཆད་པར། །ཉོན་མོངས་ལམ་ལས་སྒྲོལ་བྱེད་ཅིང་། །བྱམས་པ་དག་གིས་མཉེས་པར་གྱིས། །དེ་བཞིན་འཁོར་བའི་བཙོན་ར་ལས། །སྙིང་རྗེའི་ཞགས་པ་ཆེར་བརྐྱངས་ནས། །ཉོན་མོངས་འདམ་ནས་འདྲེན་པར་བྱེད། །སྙིང་རྗེ་ཆེན་པོར་སྐྱོ་མི་བྱེད། །ཅེས་དང་། སྙིང་རྗེ་ཆེན་པོ་གོམས་བྱས་ན། །རྣལ་འབྱོར་དོན་ཆེན་རྟོགས་པ་ཡིས། །དུས་མཐའ་མེད་པར་དེ་ལྟར་སྒོམས། །ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་གཅིག །རྒྱུ་སྤྱོད་བསོད་ནམས་ཚོགས་ཆེན་ལྡན། །གསུངས། རྗེ་དྭགས་པོ་རིན་པོ་ཆེས། གཞན་ཕན་ཞན་མེད་ཀྱི་སྙིང་རྗེ་འདི། །ཐབས་ཀྱི་མཆོག་ཏུ་བཙིར་གྱིས་བཟུང་། །ཞེས་དང་། སྙིང་རྗེ་མེད་པའི་ཆོས་པ་དེ། །འབད་རྩོལ་བྱས་ཀྱང་ཉན་ཐོས་ལམ། །ཞེས་དང་། ཇོ་བོ་རྗེས། སེམས་ཅན་ལ་བཟོད་བླགས་མེད་པའི་སྙིང་རྗེ་ཡོད་ན། བྱ་བ་ཐམས་ཅད་དོར་ནས་སེམས་ཅན་ཅི་འདྲོངས་བྱེད་པ་ཞིག་འོང་། དེ་ལ་བརྟེན་ནས་ཕ་མ་ཡིན་ངོ་ཤེས་པར་གོ །ཉེ་རིང་གཅིག་ཀྱང་མེད།

དེ་དག་བདེ་ན་སྐྱིད་ན་དགའ་བའི་སེམས་འབའ་ཞིག་སྦྱོང་ངོ་། །དེ་ཡང་སངས་རྒྱས་ཐོབ་ན་བདེ་སྐྱིད་ཐམས་ཅད་ཞོར་ལ་འོང་བས། སངས་རྒྱས་ལ་ཅི་འཁོད་བྱེད་པའོ། །ཞེས་དང་། འབྲོམ་དེས་ན་ཕན་སེམས་ཀྱི་རྩ་བ་སྙིང་རྗེ་ཡིན། སྙིང་རྗེ་ལ་བརྟེན་ནས་བྱང་ཆུབ་སེམས་དཔའི་ཆོས་ཐམས་ཅད་འབྱུང་གསུངས། སྔོན་འཕགས་སྐྱེས་པོའི་བུས་རང་གི་ཉེ་དུ་རྣམས་ཡབ་ཀྱིས་བསད་པ་ཐོས་ནས། སྙིང་རྗེ་སྐྱེས་པའི་དབང་གིས། འདི་ནས་རྩེད་མོ་བྱེད་པའི་སིལ་སྙན་སྒྲ་མ་ཡལ་བཞིན་དུ་ཡབ་ཀྱིས་བཀྲོངས་མ་ཐག་སུམ་ཅུ་རྩ་གསུམ་དུ་ལྷའི་བུ་མོ་རྣམས་ཀྱིས་རོལ་མོ་བྱེད་པའི་ནང་དུ་སྐྱེས་པ་སོགས་ཕན་ཡོན་མཐའ་ཡས་སོ། །སྐྱོབ་པ་འཇིག་རྟེན་མགོན་པོས། ང་ཡི་བུ་སློབ་གང་ཡིན་པ། །སྟོང་ཉིད་སྙིང་རྗེའི་བརྒྱུད་པ་བཟུང་། །རྗེ་གོང་མ་འདི་ལས་བྱུང་བ་ཡིན། །གསུངས། གྲུབ་ཐོབ་ཨོ་རྒྱན་པས། དཔལ་ནཱ་རོ་པའི་བརྒྱུད་པ་འཛིན་པ་རྣམས་ཀྱིས། སྔོན་དུ་ཕྱག་རྒྱ་ཆེན་པོ་སྐྱེ་བ་མེད་པའི་དོན་རྟོགས་པར་བྱས་ཏེ། དེ་རྒྱུད་ལ་ལེགས་པར་བརྟན་པའི་ངང་ནས། སེམས་ཅན་ཐམས་ཅད་ལ་ཉེ་རིང་མེད་པའི་སྙིང་རྗེ་

ཆེན་པོས་འགྲོ་བ་ཐམས་ཅད་འཁོར་བ་ལས་བསྒྲལ་བའི་དོན་དུ་ཡོན་ཏན་དཔག་ཏུ་མེད་པའི་རྩལ་སྦྱོངས་གསུངས། རྗེ་རྒོད་ཚང་བའི་ཞལ་ནས། རྟོགས་པ་ཉིན་མཚན་ཁོར་ཡུག་ཏུ་སོང་བ་ཞིག་པས། བདག་གཞན་བརྗེ་ནུས་པའི་སྙིང་རྗེ་སྐྱེས་པ། ང་སྙིང་རྗེའི་ངོས་འདམས་པ་ཡིན་གསུངས། དགེ་བཤེས་སྟོན་པ་ལ་རྣལ་འབྱོར་པ་ཆེན་པོས། ཁོ་བོ་ལ་རླུང་མཉམ་འཇུག་ལ་སོགས་པའི་ཏིང་ངེ་འཛིན་འདི་དང་འདི་ཡོད་བྱས་པས། ཁྱོད་ལ་རྣ་རྩར་རྔ་བོ་ཆེ་བརྡུངས་ཀྱང་མི་ཤིགས་པའི་སྒོམ་ཡོད་ཀྱང་། བྱམས་སྙིང་རྗེ་བྱང་ཆུབ་ཀྱི་སེམས་མེད་ན་ཉིན་མཚན་དུ་བཤགས་པ་བྱ་དགོས་པའི་སར་སྐྱེ་བ་ཡིན་ནོ་གསུངས། ཆོས་ཡང་དག་པར་སྡུད་པའི་མདོ་ལས། བྱང་ཆུབ་སེམས་དཔའ་ནི་སྟོང་པ་ཉིད་ཀྱི་ངང་ཚུལ་ཅན་ཏེ་འཁོར་བ་ལ་མི་གནས་སོ། །བྱང་ཆུབ་སེམས་དཔའ་ནི་སྙིང་རྗེའི་ངང་ཚུལ་ཅན་ཏེ་མྱ་ངན་ལས་འདས་པ་ལ་མི་གནས། ཞེས་དང་། རབ་ཏུ་ཞི་བ་ཆོ་འཕྲུལ་གྱི་མདོ་ལས་ཀྱང་། སེམས་ཅན་ཐམས་ཅད་ལ་བྱམས་པ་ཆེན་པོ་དང་། སྙིང་རྗེ་ཆེན་པོ་དང་ལྡན་ཞིང་ཐམས་ཅད་མཁྱེན་པ་ཉིད་ཀྱི་སེམས་ཡིད་ལ་བྱེད་པས་གནས་པ་

འདི་ནི་བྱང་ཆུབ་སེམས་དཔའི་སེམས་ཀྱི་རྒྱན་ནོ། །ཞེས་དང་། ལུང་གཞན་ལས། སྨོན་པ་དང་ནི་འཇུག་པ་དང་། །དེ་བཞིན་ཟབ་དང་རྒྱ་ཆེ་དང་། །མི་ལྡོག་འབྲས་བུ་ཐོབ་པས་ན། །ཐེག་པ་ཆེན་པོ་ཁྱད་པར་འཕགས། །དེ་ཡི་སྔོན་དུ་འགྲོ་བ་ནི། །བརྟན་པ་རྣམས་ཀྱི་སྙིང་པོའོ། །ཞེས་དང་། སློབ་དཔོན་རིན་ཆེན་འབྱུང་གནས་ཞི་བས་ཀྱང་། སྙིང་རྗེ་བརྟན་པས་བྱང་ཆུབ་ཀྱི་སེམས་བརྟན་པར་འགྱུར་ཏེ། སྐྱེ་བ་དང་གནས་པ་དང་མཐར་ཐུག་གི་རྒྱུ་ཡིན་པའི་ཕྱིར། སེམས་ཅན་ལ་སྙིང་རྗེ་ཆེ་བ་ནི་རྙེད་པར་དཀའ་གསུངས་སོ། །ནམ་མཁའ་ཀློང་ཡངས་ལས། རྟོགས་པའི་རྟེན་འབྲེལ་སེམས་ལ་འཆར་བ་དང་། །བྱམས་དང་སྙིང་རྗེ་ཕྱོགས་རིས་མེད་པ་དང་། །ཆོས་རྣམས་ཀུན་ལ་དག་སྣང་སྐྱེས་པའི་ཚེ། །བླ་མའི་བྱིན་རླབས་སེམས་ལ་ཞུགས་པ་ཡིན། །གསུངས། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་སྙིང་རྗེ་ཡོད་ན་ཐེག་པ་ཆེན་པོའི་རིགས་སུ་གསུངས། ཡང་མདོ་སྡེ་རྒྱན་

ལས། སྙིང་རྗེས་ཟིན་པའི་བརྩེ་ལྡན་རྣམས། །ཞི་ལ་འང་ཡིད་ནི་མི་གནས་ན། །འཇིག་རྟེན་བདེ་དང་རང་སྲོག་ལ། །ཆགས་པར་འགྱུར་བ་སྨོས་ཅི་དགོས། །ཞེས་དང་། ཨོ་རྒྱན་ཆེན་པོས། ཉོན་མོངས་ཟད་ན་ཆོས་ལ་བྱ་རྒྱུ་མེད། །སྙིང་རྗེ་མེད་ན་ཆོས་ཀྱི་རྩ་བ་རུལ། །འཁོར་བའི་སྡུག་བསྔལ་ཡང་དང་ཡང་དུ་སོམས། །ཆོས་ལ་ཕྱི་བཤོལ་མ་མཛད་རྗེ་འབངས་རྣམས། །གསུངས། དབུ་མ་རྒྱན་ལས། ཡང་དག་བཤེས་འཚོལ་སྔོན་བཏང་སྟེ། །དོན་དམ་རྣམ་པར་ངེས་གྱུར་ནས། །ལྟ་ངན་འཐིབ་གནས་འཇིག་རྟེན་ལ། །སྙིང་རྗེ་ཀུན་ཏུ་བསྐྱེད་ནས་སུ། །འགྲོ་དོན་བྱེད་པ་དཔའ་གྱུར་པ། །བྱང་ཆུབ་བློ་རྒྱས་མཁས་པ་ནི། །བློ་དང་སྙིང་རྗེས་བརྒྱན་པ་ཡི། །ཐུབ་པའི་བརྟུལ་ཞུགས་ཡང་དག་སྤྱོད། །ཅེས་དང་། ཕ་དམ་པས། སྟོང་ཉིད་རྟོགས་པས་སྡིག་པ་བྱས་པས་སྟོ་འམ་མི་སྟོ་ཞུས་པས། སྟོང་པ་ཉིད་རྟོགས་པས་སྡིག་པ་བྱ་དོན་མེད། སྟོང་ཉིད་རྟོགས་པ་དང་སྙིང་རྗེ་སྐྱེ་བ་དུས་མཉམ་གསུངས། གཞན་ཡང་སྙིང་རྗེ་དགོས་པའི་རྒྱུ་མཚན་དང་ཕན་ཡོན་མདོ་རྒྱུད་བསྟན་བཅོས་མང་པོ་ནས་ཡང་དང་ཡང་དུ་གསུངས་ཏེ། གཙུག་ན་

རིན་པོ་ཆེའི་མདོ་ལས། དེ་བྱམས་པའི་གོ་ཆ་བགོས་ཤིང་། སྙིང་རྗེ་ཆེན་པོའི་གནས་ལ་གནས་ནས་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་མངོན་པར་བསྒྲུབ་པ་ལ་བསམ་གཏན་དུ་བྱེད་དོ་གསུངས། ཕལ་པོ་ཆེ་ལས། ཀྱེ་རིགས་ཀྱི་བུ། སེམས་ཅན་གྱི་ཁམས་ལ་དམིགས་ནས་ལུས་དང་ངག་དང་ཡིད་ཀྱི་རྩོམ་པ་ཐམས་ཅད་ནི་འཁོར་བ་ན་རྒྱུ་བ་རྣམས་ཡང་དག་པར་འདྲེན་པའི་ཕྱིར་ཚད་མེད་པའི་སྙིང་རྗེ་ཆེན་པོ་སྟེ། འཇིག་རྟེན་པའི་གཙུག་ལག་གམ། འཇིག་རྟེན་ལས་འདས་པའི་གཙུག་ལག་གི་སྦྱོར་བས་ཡང་དག་པར་བརྩོན་ཞིང་། དགེ་བ་ལ་བསྐུལ་བ་ནི་སྔོན་གྱི་རྒྱལ་བ་ལ་བྱ་བ་བྱེད་པའོ། །དེ་བཞིན་གཤེགས་པ་མཆོད་པའོ། །ཆོས་ཀྱི་རྒྱལ་མཚན་བསྒྲེངས་པའོ། །ཐར་པའི་ལམ་པོ་ཆེའི་སྲོལ་བཏོད་པའོ། །སྐྱེས་བུ་དམ་པའོ། །རིན་པོ་ཆེའི་ཏོག་གོ །གསུངས། ཁྲི་བརྒྱད་སྟོང་པ་ལས། སྙིང་རྗེ་ཆེན་པོ་དང་ལྡན་པའི་སེམས་ཡངས་པ་ཚད་མ་ངེས་པ། ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་པ་བསྒོམ་པར་བྱའོ་ཞེས་དང་། དབུ་མ་འཇུག་པ་ལས། ཉན་

ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང་། །སྙིང་རྗེའི་སེམས་དང་གཉིས་སུ་མེད་བློ་དང་། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །དེའི་ཕྱིར་ན་ཐོག་མར་སྙིང་རྗེ་ལ་བསྔགས་པར་བགྱི། །ཞེས་དང་། སློབ་དཔོན་ཀླུ་སྒྲུབ་ཀྱིས། གདོད་ནས་སྐྱེ་མེད་དོན་དེ་ནི། །བློ་ཡིས་གཏིང་ནས་རྟོགས་གྱུར་ན། །འཁོར་བའི་འདམ་དུ་བྱིངས་པ་ལ། །སྙིང་རྗེ་ངང་གིས་སྐྱེ་བར་འགྱུར། །གསུངས། སློབ་དཔོན་དཔའ་བོའི་ཞལ་ནས། ན་བའི་བུ་ལ་ཁྱད་པར་དུ། །མ་ནི་གདུང་བ་སྐྱེ་བ་ལྟར། །དེ་བཞིན་བྱང་ཆུབ་སེམས་དཔའ་ནི། །དམ་པ་མིན་ལ་ཁྱད་པར་བརྩེ། །ཞེས་དང་། སློབ་དཔོན་ཨ་བྷ་བྷྱའི་ཞལ་ནས། སྡུག་བསྔལ་དྲག་པོས་གདུངས་པ་ཡི། །སྡུག་བསྔལ་ཅན་དག་མཐོང་བའི་ཚེ། །སྙིང་རྗེ་རུས་པའི་གཏིང་ནས་ནི། །སྐྱེ་ཞིང་དེ་ལ་ཕན་པར་བྱེད། །ཅེས་དང་། དོ་ཧ་ལས། སྙིང་རྗེ་དང་བྲལ་སྟོང་པ་ཉིད་ཞུགས་གང་། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམས་ན་ཡང་། །འཁོར་བ་འདིར་གནས་ཐར་པ་ཐོབ་མི་འགྱུར། །གང་

དག་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་དང་། སྙིང་པོ་མཆོག་ལས། སྙིང་རྗེ་ཆེན་པོས་ནི་སེམས་ལས་སུ་རུང་བ་དང་། འཚེ་བ་མེད་པ་དང་། དགའ་བས་བརྒྱན་པའི་མཆོག་ཐོབ་པར་བྱེད་དོ་ཞེས་དང་། མདོ་སྡེ་རྒྱན་ལས། སྙིང་རྗེས་འདོད་ཆགས་གནས་སུ་དག །ཀུན་རྟོག་ཡེ་ཤེས་ཆོས་ཀྱི་སྐུ། །ཞེས་དང་། ཀུན་མཁྱེན་ཀློང་ཆེན་རབ་འབྱམས་པས། སྙིང་རྗེས་འདོད་ཆགས་མེད་ཅིང་ཆོས་ཀྱི་སྐུ། །སོ་སོར་རྟོག་པའི་ཡེ་ཤེས་མངོན་དུ་བྱེད། །ཅེས་དང་། གཙང་སྨྱོན་ཧེ་རུ་ཀས། བདག་བས་གཞན་གཅེས་སྙིང་རྗེ་མེད་ན། །སྟོང་ཉིད་གོ་བ་ཇི་ལྟར་བཟང་ཡང་། །ཆད་ལྟའི་གྲུབ་མཐའ་ལོགས་ན་མེད་དོ། །རང་སེམས་སྙིང་རྗེའི་ཆུ་རྒྱུན་མེད་ན། །ཇོ་བཟང་བཟང་བརྫུས་རང་གཞན་བསླུའོ། །གསུངས། སློབ་དཔོན་ཀླུ་སྒྲུབ་ཀྱིས་མཛད་པའི་སྒོམ་པའི་རིམ་པ་མདོ་ཀུན་ལས་བཏུས་པ་ལས། སེམས་ཅན་རྣམས་ལ་སྙིང་རྗེ་ཆེ་བ། རྙེད་པར་དཀའ་བ་ཅིས་མངོན་ཞེ་ན་མདོ་སྡེ་མང་པོ་ལས་ཐོས་པའི་ཕྱིར་ཏེ། ཟླ་བའི་སྙིང་པོའི་ལེའུ་ལས་འབྱུང་བ།

གྲོགས་པོ་དག་སེམས་ཅན་རྣམས་ལ་སྙིང་རྗེ་བ་དང་། སྙིང་བརྩེ་བ་ནི་རྙེད་པར་དཀའ་སྟེ། དགྲ་དཔའ་བོ་ལག་ན་རྡོ་རྗེ་ཐོགས་ཤིང་དྲག་ཏུ་འདེབས་པའི་ནང་ནས་སྒྲོལ་བ་བཞིན་ནོ། །ཞེས་གསུངས་སོ། །བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས་འབྱུང་བ། འདི་ལ་བྱང་ཆུབ་སེམས་དཔའ་བྱང་ཆུབ་ཏུ་མངོན་པར་མོས་པའི་སྔོན་དུ་འགྲོ་བ་ནི་སྙིང་རྗེ་ཆེན་པོ་ཡིན་ནོ། །དཔེར་ན་མིའི་སྲོག་གི་སྔོན་དུ་འགྲོ་བ་ནི་དབུགས་འབྱིན་པ་དང་རྔུབ་པའོ། །དེ་བཞིན་དུ་བྱང་ཆུབ་སེམས་དཔའ་ཐེག་པ་ཆེན་པོ་ཡང་དག་པར་བསྒྲུབ་པའི་སྔོན་དུ་འགྲོ་བ་ནི་སྙིང་རྗེ་ཆེན་པོའོ། །དཔེར་ན་འཁོར་ལོས་སྒྱུར་བའི་རྒྱལ་པོའི་རིན་པོ་ཆེ་ཐམས་ཅད་ཀྱི་སྔོན་དུ་འགྲོ་བ་ནི་འཁོར་ལོ་རིན་པོ་ཆེའོ། །དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་ཡང་སངས་རྒྱས་ཀྱི་ཆོས་ཐམས་ཅད་ཀྱི་སྔོན་དུ་འགྲོའོ་ཞེས་གསུངས་སོ། །ཡང་དེ་ཉིད་ལས་བདག་གི་འཁྲུལ་པ་ལ་སོ་སོར་རྟོག་ཅིང་། གཞན་གྱི་འཁྲུལ་པ་ལ་སྙིང་རྗེ་བའོ་ཞེས་ཀྱང་གསུངས་སོ། །ཁྱིམ་བདག་དཔལ་བྱིན་གྱིས་ཞུས་པ་ལས་ཀྱང་། ཁྱིམ་བདག་རྣམས་འདི་ལ་བྱང་ཆུབ་སེམས་དཔའ་བྱང་ཆུབ་མངོན་པར་རྫོགས་

པར་འཚང་རྒྱ་བར་འདོད་པས། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་དེ་ལུས་དང་སྲོག་ལ་མ་ཆགས་པར་བྱའོ། །ནོར་དང་འབྲུ་དང་། ཁྱིམ་དང་། ཆུང་མ་དང་། བུ་ཕོ་དང་། ཟས་དང་། སྐོམ་དང་། གོས་དང་། བཞོན་པ་དང་། མལ་ཆ་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཡོ་བྱད་ཐམས་ཅད་ལ་མ་ཆགས་པར་བྱའོ། །དེ་ཅིའི་ཕྱིར་ཞེན། ཁྱིམ་བདག་རྣམས་སེམས་ཅན་དག་ནི་ཕལ་ཆེར་ལུས་དང་སྲོག་ལ་སོགས་པ་ལ་ཆགས་ཏེ། སྡིག་པའི་ལས་བྱས་པས་ངན་འགྲོ་རྣམས་སུ་སྐྱེ་ལ། སེམས་ཅན་རྣམས་ལ་སྙིང་རྗེ་ཆེན་པོའི་སེམས་བསྐྱེད་ནས། ལུས་དང་སྲོག་ལ་མ་ཆགས་པར་བདེ་འགྲོར་སྐྱེ་སྟེ། དེས་སེམས་ཅན་ཐམས་ཅད་ཡིད་ལ་བྱས་ལ། སྦྱིན་པ་ལ་སོགས་པ་དགེ་བའི་ཆོས་ཐམས་ཅད་ལ་བརྩོན་པར་བྱའོ་ཞེས་གསུངས་སོ། །བྱང་ཆུབ་སེམས་དཔའ་རྣམས་ནི་སྙིང་རྗེའི་བདག་ཉིད་ཅན་ཡིན་ཏེ། ཇི་ལྟ་ཞེ་ན། འཕགས་པ་དཀོན་མཆོག་སྤྲིན་གྱི་མདོ་ལས་འབྱུང་བ། རིགས་ཀྱི་བུ་ཆོས་བཅུ་དང་ལྡན་ན། བྱང་ཆུབ་སེམས་དཔའ་སྙིང་

རྗེའི་བདག་ཉིད་ཅན་རྣམས་ཡིན་ནོ། །བཅུ་གང་ཞེ་ན་འདི་ལྟ་སྟེ། སེམས་ཅན་སྡུག་བསྔལ་བ་དང་། སྐྱབས་མེད་པ་དང་། མགོན་མེད་པ་དང་། རྟེན་མེད་པ་དང་། དཔུང་གཉེན་མེད་པ་དག་མཐོང་ན། བྱང་ཆུབ་ཏུ་སེམས་བསྐྱེད་དོ། །བྱང་ཆུབ་ཏུ་སེམས་བསྐྱེད་ནས། ཆོས་ཉིད་ཐོབ་པར་བྱ་བའི་ཕྱིར་འབད་རྩོལ་བརྩོན་འགྲུས་རྩོམ་སྟེ། དཀའ་བ་སྤྱོད་པ་བརྒྱ་དག་ཀྱང་བྱེད་དོ། །དེ་དག་ཆོས་ཉིད་ཐོབ་ནས་སེམས་ཅན་རྣམས་ལ་ཕན་པར་བྱེད་དོ། །འདི་ལྟ་སྟེ། སེམས་ཅན་སེར་སྣ་ཅན་རྣམས་སྦྱིན་པ་ལ་གཞོལ་བར་བྱེད། ཚུལ་ཁྲིམས་འཆལ་བ་རྣམས་ཚུལ་ཁྲིམས་ལ། གནོད་སེམས་ཅན་རྣམས་བཟོད་པ་ལ། ལེ་ལོ་ཅན་རྣམས་བརྩོན་འགྲུས་ལ། སེམས་འཁྲུགས་པ་རྣམས་བསམ་གཏན་ལ། སེམས་ཅན་ཤེས་རབ་འཆལ་བ་རྣམས་མཐོང་ན་ཤེས་རབ་ལ་གཞོལ་བར་བྱེད་ཀྱང་། སེམས་ཅན་གྱི་སྡུག་བསྔལ་མི་བཟད་པ། རྩུབ་པ་ཚ་བ་དག་གིས་ཉེན་ཅིང་བྱང་ཆུབ་ལ་ཕྱིར་ལྡོག་པར་མི་འགྱུར་རོ། །རིགས་ཀྱི་བུ་ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའ་སྙིང་རྗེའི་བདག་ཉིད་ཅན་ཡིན་ནོ་ཞེས་གསུངས་སོ། །

གཟུངས་ཀྱི་དབང་ཕྱུག་གི་རྒྱལ་པོས་ཞུས་པ་ལས་ཀྱང་། ཀྱེ་མ་སེམས་ཅན་འདི་དག་ནི་སྲིད་པའི་འཁོལ་པོ་ཆེན་པོ། ཆུང་མ་དང་། བུ་ཕོ་དང་། བུ་མོ་ལ་ཡོངས་སུ་ཞེན་པས་སྦགས་པ་རང་དབང་མེད་པ་བདག་ལ་མི་འབྱོངས་པ་དག་སྟེ། རང་དབང་ཡོད་པའི་བདག་ལ་འབྱོངས་པར་བྱ་བ་དང་། གང་དགའ་བར་འགྲོ་བར་བྱ་བའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ། སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ཕན་ཚུན་དུ་མི་འཕྲོད་པ་ཁྲོ་བ་དང་། ཞེ་སྡང་དང་། གནོད་སེམས་མང་བ་དག་སྟེ། ཁྲོ་བ་དང་། ཞེ་སྡང་དང་། གནོད་སེམས་སྤང་བར་བྱ་བའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་སྡིག་པའི་གྲོགས་པོས་ཡོངས་སུ་ཟིན་པ། དགེ་བའི་བཤེས་གཉེན་དང་བྲལ་བ་སྡིག་པའི་ལས་བྱེད་པ་དག་སྟེ། དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་། སྡིག་པའི་གྲོགས་པོ་ཡོངས་སུ་སྤང་པར་བྱ་བའི་ཕྱིར། དེ་དག་ལ་

ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་བརྐམ་པ། ཆགས་པ་ཟིལ་གྱིས་མི་གནོན་པ་ཆོག་མི་ཤེས་ཤིང་། འཕགས་པའི་ཤེས་རབ་ཀྱི་གནས་པ་དང་བྲལ་བ་དག་སྟེ། ཆགས་པ་སྤངས་བ་དང་། འཕགས་པའི་ཤེས་རབ་བསྐྱེད་པའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་ལས་ཀྱི་རྣམ་པར་སྨིན་པ་ལ་མི་ལྟ་ཞིང་རྟག་པ་དང་ཆད་པ་ལ་གནས་པ་དག་སྟེ། རྟེན་ཅིང་འབྲེལ་བར་འབྱུང་བ་ཟབ་མོ་དང་། ལས་དང་བྱ་བ་ལ་གཟུད་པའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་མ་རིག་པ་དང་། གཏི་མུག་གིས་ལྡོངས་པ་དང་། བདག་དང་སེམས་ཅན་དང་། སྲོག་དང་། གསོ་བ་དང་། སྐྱེས་བུ་དང་། གང་ཟག་ལ་མངོན་པར་ཞེན་པ་དག་སྟེ། འཕགས་པའི་ཤེས་རབ་ཀྱི་མིག་རྣམ་པར་དག་པར་བྱ་བ་དང་། ལྟ་བར་གྱུར་པ་ཐམས་

ཅད་སྤང་བར་བྱ་བའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་འཁོར་བ་ལ་མངོན་པར་དགའ་བ། ཕུང་པོ་ལྔའི་གཤེད་མས་ཡོངས་སུ་ཟིན་པ་དག་སྟེ། ཁམས་གསུམ་ཐམས་ཅད་ལས་དབུགས་དབྱུང་བའི་ཕྱིར། དེ་དག་ལ་ཆོས་བསྟན་པར་བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་བདུད་ཀྱི་ཞགས་པས་བཅིང་བས་བཅིངས་པ་གཡོ་བ་དང་། རློམ་སེམས་ལ་གནས་པ་དག་སྟེ། བདུད་ཀྱི་ཞགས་པས་བཅིངས་པ་ཐམས་ཅད་ལས་རྣམ་པར་དགྲོལ་བ་དང་། གཡོ་བ་དང་། རློམ་སེམས་སྤང་པའི་ཕྱིར་དེ་དག་ལ་ཆོས་བསྟན་པར་བྱའོ་སྙམ་དུ། སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེ་བ་དང་། ཀྱེ་མ་སེམས་ཅན་འདི་དག་ནི་མྱ་ངན་ལས་འདའ་བའི་སྒོ་བཅད་ཅིང་ངན་འགྲོའི་སྒོ་ཕྱེ་བ་དག་སྟེ། མྱ་ངན་ལས་འདས་པའི་སྒོ་དབྱེ་བ་དང་། ངན་འགྲོའི་སྒོ་གཅད་པར་བྱ་བའི་ཕྱིར། དེ་དག་ལ་ཆོས་བསྟན་པར་

བྱའོ་སྙམ་དུ་སེམས་ཅན་རྣམས་ལ་བྱང་ཆུབ་སེམས་དཔའི་སྙིང་རྗེ་ཆེན་པོ་སྐྱེའོ་ཞེས་གསུངས། སློབ་དཔོན་ཀཱ་མ་ལ་ཤཱི་ལས་མཛད་པའི་སྒོམ་རིམ་དང་པོ་ལས། ཐམས་ཅད་མཁྱེན་པ་ཉིད་མྱུར་དུ་ཐོབ་པར་འདོད་པས་མདོར་ན་སྙིང་རྗེ་དང་། བྱང་ཆུབ་ཀྱི་སེམས་དང་། སྒྲུབ་པ་དང་། གནས་པ་འདི་གསུམ་ལ་འབད་པར་བྱའོ། །དེས་ན་སངས་རྒྱས་ཀྱི་ཆོས་མ་ལུས་པའི་རྒྱུའི་རྩ་བ་ནི་སྙིང་རྗེ་ཆེན་པོ་ཁོ་ན་ཡིན་པ་ཤེས་པར་བྱས་ལ་དེ་ཉིད་ལ་ཐོག་མ་ཁོ་ནར་བསྒོམ་མོ། །དེ་སྐད་དུ་འཕགས་པ་ཆོས་ཡང་དག་པར་སྡུད་པ་ལས་གསུངས་ཏེ། དེ་ནས་བཅོམ་ལྡན་འདས་ལ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཆོས་རབ་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔས་ཆོས་གཅིག་རབ་ཏུ་བཟུང་ཞིང་རབ་ཏུ་རྟོགས་པར་བགྱིས་ན་སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་དུ་མཆིས་པ་ལགས་སོ། །ཆོས་གཅིག་པོ་གང་ཞེ་ན། འདི་ལྟ་སྟེ། སྙིང་རྗེ་ཆེན་པོའོ། །བཅོམ་ལྡན་འདས་སྙིང་རྗེ་ཆེན་པོས་ནི་སངས་རྒྱས་ཀྱི་ཆོས་

ཐམས་ཅད་བྱང་ཆུབ་སེམས་དཔའ་རྣམས་ཀྱི་ལག་མཐིལ་དུ་མཆིས་པ་ལགས་སོ། །བཅོམ་ལྡན་འདས་དཔེར་བགྱིས་ན་འཁོར་ལོས་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་སངས་རྒྱས་ཀྱི་ཆོས་ཐམས་ཅད་མཆིའོ། །བཅོམ་ལྡན་འདས་དཔེར་བགྱིས་ན་སྲོག་གི་དབང་པོ་མཆིས་ན་དབང་པོ་གཞན་རྣམས་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་དུ་སྙིང་རྗེ་ཆེན་པོ་མཆིས་ན་བྱང་ཆུབ་སེམས་དཔའི་ཆོས་གཞན་རྣམས་ཀྱང་འབྱུང་བར་འགྱུར་རོ་ཞེས་འབྱུང་ངོ་། །འཕགས་པ་བློ་གྲོས་མི་ཟད་པ་བསྟན་པ་ལས་ཀྱང་གསུངས་ཏེ། བཙུན་པ་ཤཱ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་ནི་མི་ཟད་དོ། །དེ་ཅིའི་ཕྱིར་ཞེ་ན། སྔོན་དུ་འགྲོ་བའི་ཕྱིར་རོ། །བཙུན་པ་ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་དབུགས་ཕྱི་ནང་དུ་རྒྱུ་བ་ནི་མིའི་སྲོག་གི་དབང་པོའི་སྔོན་དུ་འགྲོ་བ་ཡིན་ནོ། །དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་ནི་ཐེག་

པ་ཆེན་པོ་ཡང་དག་པར་འགྲུབ་པའི་ཕྱིར་སྔོན་དུ་འགྲོ་བ་ཡིན་ནོ་ཞེས་བྱ་བ་ལ་སོགས་པ་རྒྱས་པར་བཤད་དོ། །འཕགས་པ་ག་ཡཱ་གཽ་རིའི་མདོ་ལས་ཀྱང་གསུངས་ཏེ། འཇམ་དཔལ་བྱང་ཆུབ་སེམས་དཔའ་རྣམས་ཀྱི་སྤྱོད་པའི་རྩོམ་པ་ནི་ཅི། གནས་ནི་གང་། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་རྣམས་ཀྱི་སྤྱོད་པའི་རྩོམ་པ་ནི་སྙིང་རྗེ་ཆེན་པོའོ། །གནས་ནི་སེམས་ཅན་ནོ་ཞེས་དེ་ལ་སོགས་པ་རྒྱ་ཆེར་འབྱུང་ངོ་། །དེ་ལྟར་སྙིང་རྗེ་ཆེན་པོས་བསྐྱོད་པས་བྱང་ཆུབ་སེམས་དཔའ་རྣམས་བདག་ཉིད་ལ་མི་ལྟ་བར་གཞན་ལ་ཤིན་ཏུ་ཕན་པ་དོན་དུ་གཉེར་བའི་ཕྱིར་བསགས་པ་ཤིན་ཏུ་བྱ་དཀའ་ཞིང་ཡུན་རིང་ལ་དུབ་པར་འགྱུར་བ་ལ་འཇུག་གོ །འཕགས་པ་དད་པའི་སྟོབས་བསྐྱེད་པ་ལས་གསུངས་པ་ལྟ་བུ་སྟེ། དེ་ལ་སྙིང་རྗེ་ཆེན་པོ་ནི་གང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྡུག་བསྔལ་སྐྱེ་བ་མི་ལེན་པ་ཅི་ཡང་མེད་དོ། །དེས་བདེ་བའི་སྐྱེ་བ་མི་འདོར་བ་ཅི་ཡང་མེད་དོ་ཞེའོ། །དེ་ལྟར་ཤིན་ཏུ་བྱ་དཀའ་བ་ལ་ཞུགས་ནས་རིང་པོར་མི་ཐོགས་པར་ཚོགས་ཡོངས་སུ་རྫོགས་ཏེ་གདོན་མི་ཟ་བར་ཐམས་ཅད་མཁྱེན་པའི་གོ་འཕང་འཐོབ་

པར་འགྱུར་རོ། །དེ་བས་ན་སངས་རྒྱས་ཀྱི་ཆོས་ཐམས་ཅད་ཀྱི་རྩ་བ་ནི་སྙིང་རྗེ་ཆེན་པོ་ཁོ་ནའོ། །སྙིང་རྗེ་ཆེན་པོས་ཡོངས་སུ་ཟིན་པས་ན་སངས་རྒྱས་བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་ཀྱི་གོ་འཕང་བརྙེས་ནས། འགྲོ་བ་མ་ལུས་པའི་དོན་མཛད་ཅིང་བཞུགས་སོ། །མི་གནས་པའི་མྱ་ངན་ལས་འདས་པ་ལྟ་བུ་ཡང་བཅོམ་ལྡན་འདས་ཀྱི་ཐུགས་རྗེ་ཆེན་པོའི་རྒྱུས་མྱ་ངན་ལས་འདས་པར་མི་གནས་སོ། །དེ་ཡང་སྡུག་བསྔལ་བའི་སེམས་ཅན་ལ་དམིགས་ཤིང་ཡིད་ལ་བྱ་བ་མང་དུ་བྱས་པས་སྐྱེ་བར་འགྱུར་ཏེ། སེམས་ཅན་འཇིག་རྟེན་གསུམ་ན་སྤྱོད་པ་ཐམས་ཅད་སྡུག་བསྔལ་རྣམ་པ་གསུམ་གྱིས་ཇི་ལྟར་མཐུན་པ་བཞིན་དུ་སྡུག་བསྔལ་ལོ་ཞེས་དེ་ལྟར་སེམས་ཅན་ཐམས་ཅད་ལ་བསྒོམ་མོ། །དེ་ལ་སེམས་ཅན་དམྱལ་བ་དེ་དག་ནི་རྒྱུན་མི་འཆད་ཅིང་ཡུན་རིང་ལ་ཚ་བ་ལ་སོགས་པའི་སྡུག་བསྔལ་སྣ་ཚོགས་ཀྱི་ཆུ་བོར་བྱིང་ངོ་ཞེས་བཅོམ་ལྡན་འདས་ཀྱིས་བཀའ་བསྩལ་ཏོ། །དེ་བཞིན་དུ་ཡི་དྭགས་རྣམས་ཀྱང་ཕལ་ཆེར་ཤིན་ཏུ་མི་བཟད་པའི་བཀྲེས་པ་དང་། སྐོམ་པའི་སྡུག་བསྔལ་གྱི་མེས་བསྐམས་པའི་ལུས་ཤིན་

ཏུ་སྡུག་བསྔལ་མང་པོ་མྱོང་སྟེ། ལོ་བརྒྱར་ཡང་ལ་ལ་མཆིལ་མའི་ཐལ་བ་དང་། མི་གཙང་བ་ཡང་བཟར་མི་རྙེད་དོ་ཞེས་བཅོམ་ལྡན་འདས་ཀྱིས་བཀའ་བསྩལ་ཏོ། །དུད་འགྲོ་རྣམས་ཀྱང་གཅིག་ལ་གཅིག་ཟ་བ་དང་། ཁྲོ་བ་དང་། རྣམ་པར་འཚེ་བ་དང་། གསོད་པ་ལ་སོགས་པས་སྡུག་བསྔལ་མང་པོ་མྱོང་བ་ཁོ་ནར་སྣང་སྟེ། འདི་ལྟར་ཁ་ཅིག་སྣ་འབུགས་པ་དང་། བརྡེགས་པ་དང་། བཅིངས་པ་དང་། གདགས་པ་ལ་སོགས་པ་བདག་ལ་དབང་མེད་པར་ཀུན་གྱིས་བདའ་བ་ཡིན་ཏེ། མི་འདོད་བཞིན་དུ་ཁལ་ཆེན་པོ་ལྕི་བ་བསྐུར་བས་ངལ་ལོ། །དེ་བཞིན་དུ་དགོན་པ་ན་འཁོད་པ་ཡང་ཉེས་པ་མེད་པར་ཁ་ཅིག་ཕྱེད་དུ་ཚོལ་ཞིང་གསོད་དེ། རྟག་ཏུ་འཇིགས་པས་ཡིད་འཁྲུགས་ཏེ་ཕན་ཚུན་འཁོད་ཅིང་འབྲོས་པ་ཡང་གྲངས་མེད་པའི་སྡུག་བསྔལ་དཔག་ཏུ་མེད་པ་མྱོང་བ་ཁོ་ནར་སྣང་ངོ་། །དེ་བཞིན་དུ་མི་ལ་ཡང་སེམས་ཅན་དམྱལ་བའི་སྡུག་བསྔལ་ལ་སོགས་པ་ཡོད་པ་ཁོ་ན་སྟེ། འདི་ན་རྐུན་པོ་ལ་སོགས་པས་གང་དག་ཡན་ལག་གཏུབས་པ་དང་། གསལ་ཤིང་ལ་བསྐྱོན་པ་དང་། དཔྱངས་ཏེ་བཏགས་པ་ལ་སོགས་པས་ཉོན་མོངས་པ་དེ་དག་ནི་

སེམས་ཅན་དམྱལ་བའི་སྡུག་བསྔལ་ཁོ་ན་ཡིན་ནོ། །གང་དག་དབུལ་ཞིང་ཕོངས་པ་དེ་དག་ནི་ཡི་དྭགས་དང་འདྲ་བར་བཀྲེས་ཤིང་སྐོམ་པས་སྡུག་བསྔལ་ལོ། །བྲན་ལ་སོགས་པ་གང་དག་གཞན་གྱིས་ལུས་ལ་དབང་བྱས་པ་དང་། གང་དག་མཐུས་མནན་ཏེ་གནོད་པར་བྱེད་པ་དེ་དག་ནི་དུད་འགྲོ་དང་འདྲ་བར་བརྡེགས་པ་དང་། གདགས་པ་ལ་སོགས་པས་སྡུག་བསྔལ་ལོ། །དེ་བཞིན་དུ་བཙལ་བར་བྱ་བ་དང་། གཅིག་ལ་གཅིག་གནོད་པར་བྱེད་པ་ལ་སོགས་པ་དང་། སྡུག་པ་དང་བྲལ་བ་དང་། མི་སྡུག་པ་དང་ཕྲད་པ་ལ་སོགས་པ་དེ་དག་ལ་སྡུག་བསྔལ་དཔག་ཏུ་མེད་དོ། །གང་དག་ཁ་ཅིག་ཕྱུག་ཅིང་སྐྱིད་པ་དང་འདྲ་བར་སྣང་བ་དེ་དག་ཀྱང་འབྱོར་བའི་མཐའ་ནི་རྒུད་པ་སྟེ། ལྟ་བ་ངན་པ་སྣ་ཚོགས་གཟིང་གཟིང་བར་ནུབ་ཅིང་། སེམས་ཅན་དམྱལ་བ་ལ་སོགས་པའི་སྡུག་བསྔལ་མྱོང་བར་འགྱུར་བའི་རྒྱུ་ལས་དང་ཉོན་མོངས་པ་བསགས་པས་གད་ཁ་ན་འདུག་པ་དང་འདྲ་བར་སྡུག་བསྔལ་གྱི་རྒྱུར་གྱུར་པ་ཡང་ཡང་དག་པར་སྡུག་བསྔལ་བ་ཁོ་ན་ཡིན་ནོ། །ལྷ་ལ་ཡང་གང་དག་འདོད་པའི་ཁམས་ན་སྤྱོད་པ་དེ་དག་ནི་

འདོད་པའི་མེས་ཡིད་རབ་ཏུ་འབར་ཞིང་སེམས་འཁྲུགས་པ་དང་འདྲ་བར་གཤའ་མར་མི་འདུག་ལ། སྐད་ཅིག་ཀྱང་སེམས་མཉམ་པར་འཇོག་པར་མི་འགྱུར་ཏེ། རབ་ཏུ་ཞི་བ་བདེ་བའི་ནོར་གྱིས་དབུལ་བ་དེ་དག་ལ་བདེ་བ་ཅི་ཞིག་ཡོད། རྟག་ཏུ་འཆི་འཕོ་བ་དང་ལྟུང་བ་ལ་སོགས་པའི་འཇིགས་པའི་མྱ་ངན་གྱིས་ནོན་པ་དག་སྟེ་དེ་དག་ཇི་ལྟར་བདེ། གང་དག་གཟུགས་དང་གཟུགས་མེད་པ་ན་སྤྱོད་པ་དེ་དག་ཀྱང་སྐད་ཅིག་སྡུག་བསྔལ་གྱིས་སྡུག་བསྔལ་བ་ལས་འདས་མོད་ཀྱི། འོན་ཀྱང་དེ་དག་འདོད་པ་ན་སྤྱོད་པའི་བག་ལ་ཉལ་བ་རྣམས་ཤིན་ཏུ་མ་སྤངས་པས་ཡང་སེམས་ཅན་དམྱལ་བ་ལ་སོགས་པར་ལྟུང་བ་ཡོད་པར་འགྱུར་བའི་སྡུག་བསྔལ་ཡོད་པ་ཉིད་དོ། །ལྷ་དང་མི་འདི་དག་ཐམས་ཅད་ནི་ལས་དང་ཉོན་མོངས་པ་ལ་སོགས་པའི་རྒྱུས་གཞན་གྱི་དབང་དུ་གྱུར་པས་ན་འདུ་བྱེད་ཀྱི་སྡུག་བསྔལ་གྱིས་སྡུག་བསྔལ་བ་ཉིད་དོ། །དེ་ལྟར་འགྲོ་བ་ཐམས་ཅད་སྡུག་བསྔལ་གྱི་མེ་ལྕེའི་ཕྲེང་བའི་ས་ཡིན་པར་བལྟས་ལ། ཇི་ལྟར་བདག་ཉིད་ཀྱི་སྡུག་བསྔལ་མི་སྡུག་པ་ལྟར་གཞན་དག་གི་ཡང་དེ་དང་འདྲ་བར་སེམས་ཤིང་། སེམས་ཅན་ཐམས་ཅད་ལ་

སྙིང་བརྩེ་བ་ཁོ་ན་བསྒོམ་པར་བྱ་སྟེ། ཐོག་མ་ཁོ་ནར་མཛའ་བཤེས་ཀྱི་ཕྱོགས་ལ་གོང་དུ་སྨོས་པའི་སྡུག་བསྔལ་སྣ་ཚོགས་མྱོང་བར་བལྟ་ཞིང་བསྒོམ་པར་བྱའོ། །དེ་ནས་སེམས་མཉམ་པས་བྱེ་བྲག་མེད་པར་བལྟ་སྟེ། ཐོག་མ་མེད་པ་ཅན་གྱི་འཁོར་བ་ལན་བརྒྱར་ཡང་བདག་གི་གཉེན་དུ་མ་གྱུར་པའི་སེམས་ཅན་གང་ཡང་མེད་དོ་སྙམ་དུ་སེམས་པས་ཕལ་བ་ལ་བསྒོམ་པར་བྱའོ། །གང་གི་ཚེ་མཛའ་བཤེས་ཀྱི་ཕྱོགས་དང་འདྲ་བར་ཕལ་པ་རྣམས་ལ་ཡང་སྙིང་རྗེ་མཚུངས་པར་འཇུག་པ་དེའི་ཚེ་དགྲའི་ཕྱོགས་ལ་ཡང་དེ་བཞིན་དུ་སེམས་མཉམ་པ་ཉིད་ལ་སོགས་པ་ཡིད་ལ་བྱེད་པས་བསྒོམ་པར་བྱའོ། །གང་གི་ཚེ་མཛའ་བཤེས་ཀྱི་ཕྱོགས་དང་འདྲ་བར་དགྲ་ལ་ཡང་མཉམ་པར་འཇུག་པ་དེའི་ཚེ་རིམ་གྱིས་ཕྱོགས་བཅུའི་སེམས་ཅན་ཐམས་ཅད་ལ་ཡང་བསྒོམ་པར་བྱའོ། །གང་གི་ཚེ་ཡིད་དུ་འོང་བའི་བུ་མི་བདེ་བ་བཞིན་དུ་སེམས་ཅན་ཐམས་ཅད་ལ་ཡང་སྡུག་བསྔལ་གཏན་ནས་དབྱུང་བར་འདོད་པའི་རྣམ་པའི་སྙིང་རྗེ་རང་གི་ངང་གིས་འཇུག་པ་བདག་ཉིད་ཀྱིས་མཚུངས་པར་གྱུར་པ་དེའི་ཚེ་དེ་རྫོགས་པ་ཡིན་པས་སྙིང་རྗེ་ཆེན་

པོའི་མིང་ཐོབ་སྟེ། འཕགས་པ་བློ་གྲོས་མི་ཟད་པས་བསྟན་པའི་མདོ་ལས་བསྔགས་པ་བཞིན་ནོ། །འདི་ལྟར་སྙིང་རྗེ་བསྒོམ་པའི་གོ་རིམ་འདི་ནི་བཅོམ་ལྡན་འདས་ཀྱིས་ཆོས་མངོན་པའི་མདོ་ལ་སོགས་པ་ལས་བཀའ་བསྩལ་ཏོ། །དེ་ལྟར་སྙིང་རྗེ་གོམས་པའི་སྟོབས་ཀྱིས་སེམས་ཅན་མ་ལུས་པ་དྲངས་པར་དམ་བཅས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་པའི་རང་བཞིན་གྱིས་བྱང་ཆུབ་ཀྱི་སེམས་སྒྲིམ་མི་དགོས་པ་ཁོ་ནར་སྐྱེ་སྟེ། འཕགས་པ་ཆོས་བཅུ་པའི་མདོ་ལས། སེམས་ཅན་མགོན་མེད་པ། སྐྱབས་མེད་པ། གླིང་མེད་པ་དག་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ་ཞེས་གསུངས་པ་བཞིན་ནོ། །གཞན་གྱིས་ཡང་དག་པར་འཛིན་དུ་བཅུག་པ་ལས་ཀྱང་བྱང་ཆུབ་སེམས་དཔའ་ལ་བྱང་ཆུབ་ཀྱི་སེམས་བསྐྱེད་མོད་ཀྱི། འོན་ཀྱང་སྙིང་རྗེ་ཆེན་པོས་ནོན་ཏེ། བྱང་ཆུབ་སེམས་དཔའ་བདག་ཉིད་ཀྱིས་བྱང་ཆུབ་ཏུ་སེམས་བསྐྱེད་པ་ཁྱད་ཆེ་བར་བཅོམ་ལྡན་འདས་ཀྱིས་འཕགས་པ་དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ལས་བཀའ་བསྩལ་ཏོ། །བྱང་ཆུབ་ཀྱི་སེམས་

དེ་སྒྲུབ་པ་དང་མི་ལྡན་ཡང་འཁོར་བའི་ནང་ན་འབྲས་བུ་ཆེ་བར་བཅོམ་ལྡན་འདས་ཀྱིས་དེ་སྐད་བྱམས་པའི་རྣམ་པར་ཐར་པ་ལས་བཀའ་བསྩལ་ཏེ། རིགས་ཀྱི་བུ་འདི་ལྟ་སྟེ་དཔེར་ན་རྡོ་རྗེ་རིན་པོ་ཆེ་ཆག་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་གནོན་ཏོ། །རྡོ་རྗེ་རིན་པོ་ཆེའི་མིང་ཡང་མི་འདོར་ཞིང་དབུལ་བ་ཐམས་ཅད་ཀྱང་བཟློག་གོ །རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་རྡོ་རྗེ་རིན་པོ་ཆེ་སྒྲུབ་པ་དང་མི་ལྡན་པ་ཡང་ཉན་ཐོས་དང་རང་སངས་རྒྱས་ཀྱི་གསེར་གྱི་རྒྱན་ཐམས་ཅད་ཟིལ་གྱིས་གནོན་ཏོ། །བྱང་ཆུབ་སེམས་དཔའི་མིང་ཡང་མི་འདོར་ཞིང་འཁོར་བའི་དབུལ་བ་ཡང་བཟློག་པར་བྱེད་དོ་ཞེས་འབྱུང་ངོ་གསུངས། སྒོམ་རིམ་བར་པ་ལས་ཀྱང་། འདི་ལ་ཐམས་ཅད་མཁྱེན་པ་ཉིད་ཤིན་ཏུ་མྱུར་དུ་ཐོབ་པར་འདོད་པ་དེ་རྟོགས་པ་དང་ལྡན་པས་དེ་ཐོབ་པར་བྱེད་པའི་རྒྱུ་རྣམས་དང་རྐྱེན་རྣམས་ལ་མངོན་པར་བརྩོན་པར་བྱའོ། །འདི་ལྟར་ཐམས་ཅད་མཁྱེན་པ་ཉིད་འདི་ནི་རྒྱུ་མེད་པ་ལས་འབྱུང་བར་མི་རུང་སྟེ། ཐམས་ཅད་ཀྱང་དུས་ཐམས་ཅད་དུ་ཐམས་ཅད་

མཁྱེན་པ་ཉིད་དུ་འབྱུང་བར་ཐལ་བར་འགྱུར་བའི་ཕྱིར་རོ། །ལྟོས་པ་མེད་པར་འབྱུང་ན་ནི་གང་དུ་ཡང་ཐོགས་པར་མི་རུང་སྟེ། གང་གིས་ན་ཐམས་ཅད་མཁྱེན་པ་ཉིད་དུ་མི་འགྱུར་རོ། །དེ་ལྟ་བས་ན་ལ་ལར་བརྒྱ་ལམ་ནས་འགའ་ཞིག་འབྱུང་དུ་ཟད་པས་དངོས་པོ་ཐམས་ཅད་ནི་རྒྱུ་ལ་ལྟོས་པ་ཁོ་ན་ཡིན་ནོ། །ཐམས་ཅད་མཁྱེན་པ་ཉིད་དུ་ཡང་ལ་ལར་བརྒྱ་ལམ་ནས་འགའ་ཞིག་འགྱུར་ཏེ། དུས་ཐམས་ཅད་དུ་ཡང་མ་ཡིན། གནས་ཐམས་ཅད་དུ་མ་ཡིན། ཐམས་ཅད་ཀྱང་མ་ཡིན་པས་དེའི་ཕྱིར་དེ་ནི་རྒྱུ་དང་རྐྱེན་ལ་ལྟོས་པར་ངེས་སོ། །རྒྱུ་དང་རྐྱེན་དེ་དག་གི་ནང་ནས་ཀྱང་མ་ནོར་ཅིང་མ་ཚང་བ་མེད་པ་རྣམས་བསྟེན་པར་བྱའོ། །རྒྱུ་ནོར་བ་ལ་ནན་ཏན་བྱས་ན་ཡུན་ཤིན་ཏུ་རིང་པོ་ཞིག་གིས་ཀྱང་འདོད་པའི་འབྲས་བུ་འཐོབ་པ་མེད་དོ། །དཔེར་ན་རྭ་ལས་འོ་མ་བཞོ་བ་བཞིན་ནོ། །རྒྱུ་མཐའ་དག་མ་སྤྱད་པ་ལས་ཀྱང་འབྲས་བུ་འབྱུང་བ་མེད་དེ། ས་བོན་ལ་སོགས་པ་གང་ཡང་རུང་བ་ཞིག་མེད་ན་མྱུ་གུ་ལ་སོགས་པ་འབྲས་བུ་མི་འབྱུང་བའི་ཕྱིར་རོ། །དེ་ལྟ་བས་ན་འབྲས་བུ་དེ་འདོད་པས་རྒྱུ་དང་རྐྱེན་མ་ནོར་བ་དང་མཐའ་དག་ལ་བསྟེན་པར་བྱའོ། །

འབྲས་བུ་ཐམས་ཅད་མཁྱེན་པ་ཉིད་ཀྱི་རྒྱུ་དང་རྐྱེན་དེ་དག་གང་ཞེ་ན། སྨྲས་པ། བདག་ལྟ་བུའི་དམུས་ལོང་དང་འདྲ་བས་དེ་དག་བསྟན་པར་མི་ནུས་མོད་ཀྱི། འོན་ཀྱང་བཅོམ་ལྡན་འདས་ཉིད་ཀྱིས་མངོན་པར་རྟོགས་པས་སངས་རྒྱས་ནས་གདུལ་བྱ་རྣམས་ལ་ཇི་སྐད་བཤད་པ་དེ་བཞིན་དུ་བདག་གིས་བཅོམ་ལྡན་འདས་ཀྱི་བདག་ཉིད་ཀྱིས་བཤད་དོ། །བཅོམ་ལྡན་འདས་ཀྱིས་དེར་བཀའ་སྩལ་པ། གསང་བའི་བདག་པོ། ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ་ཞེས་འབྱུང་ངོ་། །དེ་ལྟ་བས་ན་ཐམས་ཅད་མཁྱེན་པ་ཉིད་འཐོབ་པར་འདོད་པས་སྙིང་རྗེ་དང་། བྱང་ཆུབ་ཀྱི་སེམས་དང་། ཐབས་དང་གསུམ་པོ་འདི་དག་ལ་བསླབ་པར་བྱའོ། །སྙིང་རྗེས་བསྐྱེད་ན་བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་མངོན་པར་འདོན་པའི་ཕྱིར་ངེས་པར་དམ་འཆའ་བར་འགྱུར་རོ། །དེ་ནས་བདག་ལ་ལྟ་བ་བསལ་ནས་ཤིན་ཏུ་བྱ་དཀའ་ཞིང་རྒྱུན་མི་འཆད་ལ་ཡུན་རིང་པོར་བསྒྲུབས་པའི་བསོད་ནམས་དང་ཡེ་

ཤེས་ཀྱི་ཚོགས་ལ་གུས་པར་འཇུག་གོ །དེ་ཞུགས་ནས་ངེས་པར་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་སྒྲུབ་བོ། །ཚོགས་རྣམས་ཡོངས་སུ་རྫོགས་ན་ཐམས་ཅད་མཁྱེན་པ་ཉིད་ལག་ཏུ་ཐོབ་པ་དང་འདྲ་བར་འགྱུར་རོ། །དེ་བས་ན་ཐམས་ཅད་མཁྱེན་པ་ཉིད་ཀྱི་རྩ་བ་ནི་སྙིང་རྗེ་ཁོ་ན་ཡིན་པས་དེ་ནི་ཐོག་མ་ཁོ་ནར་གོམས་པར་བྱའོ། །ཆོས་ཡང་དག་པར་སྡུད་པ་ལས་ཀྱང་བཀའ་བསྩལ་ཏེ། བཅོམ་ལྡན་འདས་བྱང་ཆུབ་སེམས་དཔའ་ཆོས་རབ་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔས་ཆོས་གཅིག་རབ་ཏུ་བཟུང་ཞིང་རབ་ཏུ་རྟོགས་པར་བགྱིས་ན། སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་དུ་མཆིས་པ་ལགས་སོ། །ཆོས་གཅིག་པོ་གང་ཞེ་ན། འདི་ལྟ་སྟེ་སྙིང་རྗེ་ཆེན་པོའོ་ཞེས་འབྱུང་ངོ་། །སྙིང་རྗེ་ཆེན་པོས་ཡོངས་སུ་ཟིན་པས་ན། སངས་རྒྱས་བཅོམ་ལྡན་འདས་རྣམས་རང་གི་དོན་ཕུན་སུམ་ཚོགས་པ་མཐའ་དག་བརྙེས་ཀྱང་སེམས་ཅན་གྱི་ཁམས་མཐར་ཐུག་པའི་བར་དུ་བཞུགས་པར་མཛད་དོ། །ཉན་ཐོས་བཞིན་དུ་མྱ་ངན་ལས་འདས་པའི་གྲོང་ཁྱེར་ཤིན་ཏུ་ཞི་བར་ཡང་འཇུག་པར་མི་

མཛད་དེ། སེམས་ཅན་ལ་གཟིགས་ནས་མྱ་ངན་ལས་འདས་པའི་གྲོང་ཁྱེར་ནི་ཞི་བདེ་ལྕགས་ཀྱི་ཁང་པ་འབར་བ་བཞིན་དུ་ཐག་རིང་དུ་སྤོ་བས། བཅོམ་ལྡན་འདས་རྣམས་ཀྱི་མི་གནས་པའི་མྱ་ངན་ལས་འདས་པའི་རྒྱུ་ནི་སྙིང་རྗེ་ཆེན་པོ་འདི་ཉིད་ཡིན་ནོ། །དེ་ལ་སྙིང་རྗེ་བསྒོམ་པའི་རིམ་པ་དེ་དང་པོ་འཇུག་པ་ནས་བརྩམས་ཏེ་བརྗོད་པར་བྱའོ། །ཐོག་མར་རེ་ཞིག་བཏང་སྙོམས་བསྒོམས་པས་སེམས་ཅན་ཐམས་ཅད་ལ་རྗེས་སུ་ཆགས་པ་དང་། ཁོང་ཁྲོ་བ་བསལ་ཏེ་སྙོམས་པའི་སེམས་ཉིད་བསྒྲུབ་པར་བྱའོ། །སེམས་ཅན་ཐམས་ཅད་བདེ་བ་ནི་འདོད་སྡུག་བསྔལ་བ་ནི་མི་འདོད་ལ། ཐོག་མ་མེད་པ་ཅན་གྱི་འཁོར་བ་ན་སེམས་ཅན་གང་ལན་བརྒྱར་བདག་གི་གཉེན་དུ་མ་གྱུར་པ་དེ་གང་ཡང་མེད་དོ་སྙམ་དུ་ཡོངས་སུ་བསམ་ཞིང་། འདི་ལ་བྱེ་བྲག་ཅི་ཞིག་ཡོད་ན་ལ་ལ་ནི་རྗེས་སུ་ཆགས། ལ་ལ་ནི་ཁོང་ཁྲོ་བར་གྱུར་པས་དེ་ལྟ་བས་ན་བདག་གིས་སེམས་ཅན་ཐམས་ཅད་ལ་སེམས་སྙོམས་པ་ཉིད་དུ་བྱའོ་སྙམ་དུ་དེ་ལྟར་ཡིད་ལ་བྱ་ཞིང་བར་མའི་ཕྱོགས་ནས་བརྩམས་ཏེ། མཛའ་བཤེས་དང་དགྲ་ལ་ཡང་སེམས་སྙོམས་པ་ཉིད་དུ་བསྒོམ་

མོ། །དེ་ནས་སེམས་ཅན་ཐམས་ཅད་ལ་སེམས་སྙོམས་པ་ཉིད་དུ་བསྒྲུབས་ནས་བྱམས་པ་བསྒོམ་མོ། །བྱམས་པའི་ཆུས་སེམས་ཀྱི་རྒྱུད་བརླན་ཏེ་གསེར་ཡོད་པའི་ས་གཞི་བཞིན་དུ་བྱས་ལ་སྙིང་རྗེའི་ས་བོན་བཏབ་ན་བདེ་བླག་ཏུ་ཤིན་ཏུ་ཡོངས་སུ་རྒྱས་པར་འགྱུར་རོ། །དེ་ནས་སེམས་ཀྱི་རྒྱུད་བྱམས་པས་བསྒོས་ནས་སྙིང་རྗེ་བསྒོམ་པར་བྱའོ། །སྙིང་རྗེ་དེ་ནི་སེམས་ཅན་སྡུག་བསྔལ་བ་ཐམས་ཅད་སྡུག་བསྔལ་དེ་དང་བྲལ་བར་འདོད་པའི་རྣམ་པ་ཡིན་ནོ། །ཁམས་གསུམ་པའི་སེམས་ཅན་ཐམས་ཅད་ནི་སྡུག་བསྔལ་ཉིད་རྣམ་པ་གསུམ་གྱིས་ཅི་རིགས་པར་ཤིན་ཏུ་སྡུག་བསྔལ་བ་དག་ཡིན་པས་དེའི་ཕྱིར་སེམས་ཅན་ཐམས་ཅད་ལ་དཔེ་བསྒོམ་པར་བྱ་སྟེ། འདི་ལྟར་རེ་ཞིག་སེམས་ཅན་དམྱལ་བ་པའི་སེམས་ཅན་གང་དག་ཡིན་པ་དེ་དག་ནི་རྒྱུན་མི་འཆད་ཅིང་། ཡུན་རིང་ལ་ཚ་བ་ལ་སོགས་པའི་སྡུག་བསྔལ་སྣ་ཚོགས་ཀྱི་ཆུ་བོར་བྱིངས་པ་ཁོ་ན་ཡིན་ནོ་ཞེས་བཅོམ་ལྡན་འདས་ཀྱིས་བཀའ་བསྩལ་ཏོ། དེ་བཞིན་དུ་ཡི་དྭགས་རྣམས་ཀྱང་ཕལ་ཆེར་ཤིན་ཏུ་མི་བཟད་པའི་བཀྲེས་པ་དང་སྐོམ་པའི་སྡུག་བསྔལ་གྱིས་སེམས་བསྐམས་པའི་ལུས་ཤིན་ཏུ་སྡུག་

བསྔལ་མང་པོ་མྱང་ངོ་ཞེས་བཀའ་བསྩལ་ཏོ། །དུད་འགྲོ་རྣམས་ཀྱང་གཅིག་ལ་གཅིག་ཟ་བ་དང་། ཁྲོ་བ་དང་། གསོད་པ་དང་། རྣམ་པར་འཚེ་བ་ལ་སོགས་པའི་སྡུག་བསྔལ་རྣམ་པ་མང་པོ་མྱོང་བ་ཁོ་ནར་སྣང་ངོ་། །མི་རྣམས་ཀྱང་འདོད་པ་ཡོངས་སུ་འཚོལ་བས་ཕོངས་ནས་གཅིག་ལ་གཅིག་འཁུ་བ་དང་། གནོད་པ་བྱེད་པ་དང་། སྡུག་པ་དང་བྲལ་བ་དང་། མི་སྡུག་པ་དང་ཕྲད་པ་དང་། དབུལ་ཕོངས་ལས་གྱུར་པ་ལ་སོགས་པའི་སྡུག་བསྔལ་དཔག་ཏུ་མེད་པ་ཉམས་སུ་མྱོང་བར་སྣང་ངོ་། །གང་དག་འདོད་ཆགས་ལ་སོགས་པའི་ཉོན་མོངས་པས་ཀུན་ནས་དཀྲིས་པ་སྣ་ཚོགས་ཀྱིས་སེམས་དཀྲིས་པ་དག་དང་། གང་དག་ལྟ་བ་ངན་པ་རྣམ་པ་སྣ་ཚོགས་གཟིང་གཟིང་བར་འགྱུར་བ་དེ་ཐམས་ཅད་ཀྱང་སྡུག་བསྔལ་གྱི་རྒྱུ་ཡིན་པས་གད་ཁ་ན་འདུག་པ་བཞིན་དུ་ཤིན་ཏུ་སྡུག་བསྔལ་ཁོ་ན་ཡིན་ནོ། །ལྷ་རྣམས་ཀྱང་ཐམས་ཅད་འགྱུར་བའི་སྡུག་བསྔལ་ཉིད་ཀྱི་སྡུག་བསྔལ་བ་དག་སྟེ། འདོད་པ་ལ་སྤྱོད་པའི་ལྷ་གང་དག་ཡིན་པ་དེ་དག་ནི་རྟག་ཏུ་འཆི་འཕོ་བ་དང་ལྟུང་བ་ལ་སོགས་པའི་འཇིགས་པའི་མྱ་ངན་གྱིས་

སེམས་ལ་གནོད་ན་ཇི་ལྟར་བདེ། འདུ་བྱེད་ཀྱི་སྡུག་བསྔལ་ཉིད་ལས་དང་ཉོན་མོངས་པའི་མཚན་ཉིད་ཀྱི་རྒྱུའི་གཞན་གྱི་དབང་གི་ངོ་བོ་ཉིད་དང་། སྐད་ཅིག་རེ་རེ་ལ་འཇིག་པའི་ངང་ཚུལ་ཅན་གྱི་མཚན་ཉིད་དེ། འགྲོ་བ་ཐམས་ཅད་ལ་ཁྱབ་པ་ཡིན་ནོ། །དེ་བས་ན་འགྲོ་བ་མཐའ་དག་ནི་སྡུག་བསྔལ་གྱི་མེ་ལྕེ་འབར་བའི་ནང་དུ་ཞུགས་པ་ཡིན་པར་བལྟས་ལ། ཇི་ལྟར་བདག་སྡུག་བསྔལ་མི་འདོད་པ་ལྟར་གཞན་ཐམས་ཅད་ཀྱང་དེ་དང་འདྲའོ་སྙམ་དུ་བསམ་ཞིང་། ཀྱེ་མ་ཀྱེ་ཧུད་བདག་ལ་སྡུག་པའི་སེམས་ཅན་འདི་དག་སྡུག་བསྔལ་ན་སྡུག་བསྔལ་དེ་ལས་ཇི་ལྟར་ཐར་བར་བྱ་ཞེས་བདག་ཉིད་སྡུག་བསྔལ་བ་བཞིན་དུ་བྱེད་ཅིང་དེ་དང་བྲལ་བར་འདོད་པའི་རྣམ་པའི་སྙིང་རྗེ་དེས་ཏིང་ངེ་འཛིན་ལ་འདུག་ཀྱང་རུང་། སྤྱོད་ལམ་ཐམས་ཅད་དུ་ཡང་རུང་སྟེ། དུས་ཐམས་ཅད་དུ་སེམས་ཅན་ཐམས་ཅད་ལ་བསྒོམ་པར་བྱ་སྟེ། ཐོག་མ་ཁོ་ནར་མཛའ་བཤེས་ཀྱི་ཕྱོགས་རྣམས་ལ་ཇི་སྐད་སྨོས་པའི་སྡུག་བསྔལ་སྣ་ཚོགས་ཉམས་སུ་མྱོང་བར་མཐོང་བས་བསྒོམ་པར་བྱའོ། །དེ་ནས་སེམས་ཅན་མཉམ་པ་ཉིད་ཀྱིས་བྱེ་བྲག་མེད་པར་མཐོང་ནས་སེམས་ཅན་ཐམས་ཅད་ནི་བདག་

གི་གཉེན་དུ་གྱུར་པ་ཁོ་ནའོ་སྙམ་དུ་བསམ་ཞིང་བར་མའི་ཕྱོགས་རྣམས་ལ་བསྒོམ་པར་བྱའོ། །གང་གི་ཚེ་དེ་ལ་མཛའ་བཤེས་ཀྱི་ཕྱོགས་བཞིན་དུ་སྙིང་རྗེ་དེ་མཉམ་པར་ཞུགས་པར་གྱུར་པ་དེའི་ཚེ་ཕྱོགས་བཅུའི་སེམས་ཅན་ཐམས་ཅད་ལ་བསྒོམ་པར་བྱའོ། །གང་གི་ཚེ་བུ་ཆུང་ངུ་སྙིང་དུ་སྡུག་པ་སྡུག་བསྔལ་བར་གྱུར་པའི་མ་བཞིན་དུ་བདག་ཉིད་ཀྱིས་ཤིན་ཏུ་སྡུག་བསྔལ་བ་འདོན་པར་འདོད་པའི་རྣམ་པ་རང་གི་ངང་གིས་འཇུག་པའི་སྙིང་རྗེ་དེ་སེམས་ཅན་ཐམས་ཅད་ལ་མཉམ་པར་ཞུགས་པར་གྱུར་པ་དེའི་ཚེ་རྫོགས་པ་ཞེས་བྱ་སྟེ། སྙིང་རྗེ་ཆེན་པོའི་མིང་ཡང་འཐོབ་བོ། །བྱམས་པ་བསྒོམ་པ་ནི་མཛའ་བཤེས་ཀྱི་ཕྱོགས་ལ་ཐོག་མར་བྱས་ནས་བདེ་བ་དང་འཕྲད་པར་འདོད་པའི་རྣམ་པ་སྟེ། རིམ་གྱིས་ཐ་མལ་བ་དང་དགྲ་ལ་ཡང་བསྒོམ་པར་བྱའོ། །དེ་ལྟར་དེའི་སྙིང་རྗེ་གོམས་པར་བྱས་ནས། རིམ་གྱིས་སེམས་ཅན་མཐའ་དག་མངོན་པར་འདོན་པར་འདོད་པ་རང་གི་ངང་གིས་འབྱུང་བ་ཉིད་དུ་འགྱུར་རོ་ཞེས་གསུངས་སོ། །དེས་ན་འོ་སྐོལ་རྣམས་སྔོན་གྱི་སྤྲེལ་རྒན་བྱང་ཆུབ་སེམས་དཔའི་མི་བརྒྱུད་ཡིན་པས་ཀུན་གྱི་རྒྱུད་ན་

སྙིང་རྗེ་རྟ་རྔ་ཙམ་རེ་མཆིས་མོད། འོན་ཀྱང་མ་བྲག་སྲིན་མོ་ཡིན་པའི་སྟབས་ཀྱིས་ཤ་ཁྲག་ལ་འདོད་སྲེད་ཆེ་བས་སྙིང་རྗེ་ཟིལ་གྱིས་མནན་ནས་ཆེན་པོ་ཞིག་རྒྱུད་ལ་སྐྱེ་དཀའ་རུང་། ཆོས་ཀྱི་རྩ་བ་ཡིན་པས་སྙིང་རྗེ་ཆེན་པོ་ཞིག་རྒྱུད་ལ་ཨེ་སྐྱེས་ཀྱི་ཕྱིར་དུ་ཚོགས་བསགས་སྒྲིབ་པ་སྦྱང་བླ་མ་དཀོན་མཆོག་ལ་གསོལ་བ་འདེབས་བཞིན་དུ་འབད་ན། ནམ་ཞིག་སྙིང་རྗེ་ཆེན་པོ་བཅོས་མ་མ་ཡིན་པ་ཞིག་རྒྱུད་ལ་སྐྱེ་བར་འགྱུར་རོ།། ༈ །།སྨྲས་པ། འགྲོ་བ་ཡོངས་ལ་བུ་གཅིག་ལྟར་བརྩེ་བའི། །སངས་རྒྱས་ཐུགས་རྗེ་ཅན་ལ་གསོལ་བ་འདེབས། །བདག་དང་འགྲོ་བ་སེམས་ཅན་ཐམས་ཅད་ཀྱི། །རྒྱུད་ལ་སྙིང་རྗེ་སྐྱེ་བར་བྱིན་གྱིས་རློབས། །སྙིང་རྗེ་ཆེན་པོའི་ནོར་བུ་རིན་པོ་ཆེ། །ཐོགས་པའི་བྱང་ཆུབ་སེམས་དཔའ་དེ་དག་ལ། །ངན་སོང་ངན་འགྲོའི་འཇིགས་པ་མེད་དོ་ཞེས། །འཕགས་པ་བྱམས་པའི་རྣམ་ཐར་མདོ་ལས་གསུངས། །སྙིང་རྗེ་ཆེ་བའང་རྙེད་པར་དཀའ་བ་སྟེ། །སྡང་དགྲ་དཔའ་བོའི་ལག་གི་རྡོ་རྗེ་ཡིས། །འདེབས་པའི་ནང་ནས་སྒྲོལ་བ་བཞིན་ནོ་ཞེས། །ཟླ་བའི་སྙིང་པོའི་ལེའུ་དག་ལས་གསུངས། །ཕན་དང་སྙིང་བརྩེར་བཅས་པས་རྒྱལ་

སྲས་ཀྱི། །སྤྱོད་པར་བསླབ་ན་མཁས་པས་བྱང་ཆུབ་རེག །འདུས་བྱས་འདུས་མ་བྱས་ཀྱི་དགེ་བ་ཀུན། །འབྱུང་ཞེས་མདོ་སྡེ་སྡུད་པ་དག་ལས་གསུངས། །བྱམས་དང་སྙིང་རྗེ་ཀུན་མཁྱེན་ཉིད་ཀྱི་སེམས། །ཡིད་ལ་བྱེད་པས་གནས་པ་འདི་ཉིད་ནི། །བྱང་ཆུབ་སེམས་དཔའི་སེམས་ཀྱི་རྒྱན་ནོ་ཞེས། །རྣམ་པར་ངེས་པ་ཆོ་འཕྲུལ་མདོ་ལས་གསུངས། །རྣམ་པ་ཐམས་ཅད་མཁྱེན་པའི་ཡེ་ཤེས་དེ། །སྙིང་རྗེ་རྩ་བ་བྱང་ཆུབ་སེམས་མཆོག་གི །རྒྱུ་ལས་བྱུང་བ་ཐབས་ཀྱིས་མཐར་ཕྱིན་ཅེས། །རྣམ་པར་སྣང་མཛད་མངོན་བྱང་རྒྱུད་ལས་གསུངས། །སྙིང་རྗེའི་ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སྟོན་པ་སངས་རྒྱས་ཉིད་དང་གཅིག །རྒྱུ་སྤྱོད་བསོད་ནམས་ཚོགས་ཆེན་ལྡན་ནོ་ཞེས། །རྒྱ་གར་མཁས་པ་སངས་རྒྱས་གསང་བས་གསུངས། །སྙིང་རྗེ་བརྟན་པས་བྱང་ཆུབ་སེམས་བརྟན་དེ། །སྐྱེ་དང་གནས་པ་མཐར་ཐུག་རྒྱུ་ཡིན་ཕྱིར། །སེམས་ཅན་རྣམས་ལ་སྙིང་རྗེ་ཆེ་བ་ནི། །རྙེད་པར་དཀའ་ཞེས་རིན་ཆེན་འབྱུང་གནས་གསུངས། །ཐེག་པ་ཆེ་ཆུང་གཉིས་ཀྱི་ཁྱད་པར་ཡང་། །ལྟ་བའི་སྒོ་ནས་ཕྱེ་བ་མ་

ཡིན་པར། །སྙིང་རྗེའི་སྒོ་ནས་ཕྱེ་བ་ཡིན་ནོ་ཞེས། །སངས་རྒྱས་གཉིས་པ་ཇོ་བོའི་ཞལ་ནས་གསུངས། །སྟོང་ཉིད་ཟབ་མོ་རྟོགས་ན་སྙིང་རྗེ་སྐྱེ། །སྙིང་རྗེ་ཆེན་པོ་སྐྱེས་ན་བདག་གཞན་མེད། །བདག་གཞན་མེད་ན་འགྲོ་དོན་འགྲུབ་བོ་ཞེས། །ཚེ་གཅིག་སངས་རྒྱས་མི་ལ་རས་པས་གསུངས། །སྙིང་རྗེ་ཆེན་པོ་མེད་ན་དམ་ཆོས་ཀྱི། །རྩ་བ་རུལ་ཞེས་ཨོ་རྒྱན་པདྨས་གསུངས། །སྙིང་རྗེ་མེད་པའི་ཆོས་པས་འབད་བྱས་ཀྱང་། །ཉན་ཐོས་ལམ་ཞེས་དྭགས་པོ་ལྷ་རྗེས་གསུངས། །སྙིང་རྗེ་དང་བྲལ་སྟོང་པ་ཉིད་ཞུགས་གང་། །ལམ་མཆོག་མི་རྙེད་ས་ར་ཧ་པས་གསུངས། །སྟོང་ཉིད་རྟོགས་དང་སྙིང་རྗེ་སྐྱེ་བ་གཉིས། །དུས་མཉམ་ཡིན་ཞེས་དམ་པ་རྒྱ་གར་གསུངས། །དེ་བཞིན་རྒྱ་བོད་མཁས་གྲུབ་ཐམས་ཅད་ཀྱི། །སྙིང་རྗེ་ཡོད་པའི་ཕན་ཡོན་མེད་པའི་སྐྱོན། །ལན་གཅིག་མ་ཡིན་ཡང་ཡང་གསུངས་པ་ལ། །ལྟོས་དང་ཡིད་ཆེས་ངེས་ཤེས་རྙེད་པར་འགྱུར། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། ༈ །ད་ནི་བྱམས་སྙིང་རྗེ་ལྷག་བསམ་དག་པའི་སྒོ་ནས། སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་དེ། རྒྱུ་ཕ་རོལ་ཏུ་ཕྱིན་པའི་ཐེག་

པས་རྒྱུད་སྦྱངས། འབྲས་བུ་རྡོ་རྗེ་ཐེག་པའི་ལམ་བཟང་ལ་སློབ་པར་འདོད་པའི་གང་ཟག་གིས་ཕ་མ་སེམས་ཅན་གྱི་ཤ་ཁྲག་ཟ་མི་རུང་བའི་རྒྱུ་མཚན་བཤད་པར་བྱ་སྟེ། དེ་ཡང་འགྲོ་བ་ཡོངས་ཀྱི་སྔོན་ནས་མ་འདྲིས་པའི་མཛའ་བཤེས་ཆེན་པོ་སྟོན་པ་སངས་རྒྱས་ཀྱི་གསུང་དྲི་མ་མེད་པ་སའི་དངོས་གཞིར་དྲངས་པ་ལས། སྔོན་ཡུན་རིང་པོ་འདས་པ་ནས་གང་དུ་ཁྱེད་མ་སྐྱེས་པ་དང་། མ་སོང་བ། མ་ཤི་བའི་ས་ཕྱོགས་དེ་ནི་ངས་མ་མཐོང་ངོ་། །ཡུན་རིང་པོར་འདས་པ་ནས་སེམས་ཅན་གང་ཁྱེད་ཀྱི་ཕ་འམ། མ་འམ། ཕུ་ནུའམ། སྲིང་མོ་འམ། སློབ་དཔོན་ནམ། མཁན་པོའམ། བླ་མའམ། བླ་མའི་གནས་སུ་མ་གྱུར་པ་དེ་ནི་ངས་མཐོང་བར་དཀའོ་གསུངས། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་གྱིས་མཛད་པའི་ལམ་རིམ་བདེ་ལམ་ལས། སེམས་ཅན་འདིའི་ལུས་མ་བླངས་བྱ་བ་གཅིག་ཀྱང་མེད་བླངས་པ་གྲངས་ཀྱིས་མི་ཆོད། སེམས་ཅན་འདིས་བདག་གི་མ་མ་བྱས་པ་གཅིག་ཀྱང་མེད་བྱས་པ་ལ་གྲངས་ཀྱིས་མི་ཆོད་གསུངས། སློབ་སྤྲིངས་ལས། གང་གི་ལྟོར་མ་ཉལ་བའི་

སེམས་ཅན་དེ་མེད་ན། །གསུངས། བྱེ་བྲག་ཏུ་མིའི་རྟེན་ལ་མ་མ་བྱས་པ་གཅིག་ཀྱང་མེད་བྱས་པ་ལ་གྲངས་ཀྱིས་མི་ཆོད་དེ། བདེ་ལམ་ལས། སེམས་ཅན་རེ་རེས་ཀྱང་མིའི་རྟེན་ལ་བདག་གི་མ་མ་བྱས་པ་གཅིག་ཀྱང་མེད། བྱས་པ་གྲངས་ཀྱིས་མི་ཆོད་ཅིང་། ད་དུང་ཡང་བྱེད་པར་འགྱུར་ཞེས་དང་། སློབ་སྤྲིངས་ལས། མ་ཡི་ཐུག་མཐའ་རྒྱ་ཤུག་ཚི་གུ་ཙམ། །རིལ་བུར་བགྲངས་ཀྱང་ས་ཡིས་ལངས་མི་འགྱུར། །གསུངས། མ་ནམ་བྱས་རེས་ཀྱིས་ཚེ་འདིའི་མས་བསྐྱངས་པ་བཞིན་ཕན་ཚད་མེད་བཏགས། གནོད་པ་ཚད་མེད་ལས་བསྐྱབས་ཏེ། བདེ་ལམ་ལས། དང་པོ་མངལ་དུ་བརྩེ་བས་བསྐྱངས། བཙས་པའི་ཚེ་འཇམ་པའི་སྟན་ལ་བཞག་སོར་མོ་བཅུའི་རྩེ་ལ་གཡེངས། ཤའི་དྲོད་ལ་སྦྱར། བརྩེ་བའི་འཛུམ་གྱིས་བསུས། དགའ་བའི་མིག་གིས་བལྟས། སྣ་བས་ཁས་ཕྱིས། མི་གཙང་བ་ལག་པས་ཕྱིས། མ་རང་སྲོག་ལ་བབས་པ་ལྟ་བུའི་སྡུག་བསྔལ་བྱུང་བ་ལས་བདག་ཅུང་ཟད་ན་བ་ལ་སྡུག་བསྔལ་ཆེ་བར་བྱས། སྡིག་སྡུག་གཏམ་ངན་རང་སྲོག་ལའང་མ་བལྟས་པར་ཤ་ཐང་ཐང་དུ་བསྒྲུབས་པའི་ཟས་ནོར་ཐམས་

ཅད་བདག་ལ་བརྩེ་བས་ཕོག །མ་རང་གི་འཁྱེར་འཁོས་དང་བསྟུན་པའི་ཕན་པ་དང་བདེ་བ་ཚད་མེད་པ་བསྒྲུབས། གནོད་པ་དང་སྡུག་བསྔལ་ཚད་མེད་པ་ལས་བསྐྱབས་པས་དྲིན་ཤིན་ཏུ་ཆེ་གསུངས། འབྲུག་པ་ཀུན་ལེགས་ཀྱིས། མ་བྱས་པའི་ནུ་ཞོ་རྒྱ་མཚོར་བསྐྱིལ་ན། ཁམས་གསུམ་སྣོད་དུ་ག་ལ་ཤོང་གསུངས། ལུང་གཞན་ལས་ཀྱང་། སེམས་ཅན་གཅིག་གིས་མ་བྱས་པའི། །ནུ་ཞོ་འཐུངས་པ་གང་ཡིན་པ། །རྒྱ་མཚོ་ཆེན་པོ་བཞི་ལ་ཡང་། །དེ་ཡི་ཚད་ཙམ་ཡོད་མ་ཡིན། །གསུངས། དེ་ལྟར་ཐོག་མ་མེད་པ་ནས་དྲིན་གྱིས་བསྐྱངས་པའི་མ་གྱུར་སེམས་ཅན་རྣམས་ཉོན་མོངས་པའི་གདོན་གྱིས་ཡིད་དཀྲུགས་ནས་ཤེས་པ་ལ་རང་དབང་མ་ཐོབ་བར་སྨྱོས། མངོན་མཐོ་ངེས་ལེགས་ཀྱི་ལམ་ལ་ལྟ་བའི་མིག་དང་བྲལ། དགེ་བའི་བཤེས་གཉེན་གྱི་ལོང་འཁྲིད་ནི་མེད། སྐད་ཅིག་རེ་རེས་ཉེས་སྤྱོད་ཀྱིས་དབྱེན་སྤྱོས་པས་ནི་བརྡེག་འཆའ། སྤྱིར་འཁོར་བ་དང་ཁྱད་པར་ངན་འགྲོ་འཇིགས་སུ་རུང་བའི་གཡང་ཁ་འགྲིམས་པ་རྣམས་མ་རབས་ཁྲེལ་མེད་ཅིག་ཡིན་ན་མ་གཏོགས། ཡལ་བར་འདོར་མི་རུང་སྟེ། སློབ་

སྤྲིངས་ལས། གང་གི་ནུ་ཞོ་བྱམས་པའི་ཤུགས་ཀྱིས་གཟག་འཐུང་བ། །ངལ་བ་མང་བསྟེན་བྱམས་པ་ལ་བསྟེན་དེ་དག་འདིར། །ཤིན་ཏུ་མ་རབས་ཤིག་ནའང་སྤང་བར་སུ་ཞིག་སྤྲོ། །གསུངས། ཕྱག་ན་པད་དཀར་འཛིན་དངོས་རྒྱལ་བ་སྐལ་བཟང་རྒྱ་མཚོའི་གསུང་མགུར་ལས། ཚེ་འདིར་མངལ་དུ་བཟུང་བའི་མ་རྒན་ལ། །དྲིན་དུ་བརྩི་ན་སྐྱེ་བ་གྲངས་མེད་ཅིག །ཕན་པ་ཁོ་ནས་བསྐྱངས་པའི་སེམས་ཅན་རྣམས། །བློ་ཡིས་འདོར་བར་ནུས་སམ་སྙིང་གཏམ་ཡིན། །གསུངས། ཡལ་བར་མི་འདོར་བ་ཙམ་དུ་མ་ཟད། ཕ་མ་སེམས་ཅན་ཉམ་ཐག་ལ་སྙིང་རྗེ་བསྐྱེད་ན་ཕ་མ་སེམས་ཅན་གྱི་སྡུག་བསྔལ་བསལ་འདོད་དང་། བདེ་ལ་འགོད་འདོད་ཀྱི་བློ་ངང་ངམ་ཤུགས་ཀྱིས་སྐྱེ། དེ་སྐྱེས་ན་སྡུག་བསྔལ་སེལ་ཞིང་བདེ་ལ་འགོད་ཐབས་སངས་རྒྱས་ཀྱི་བསྟན་པ་ཐམས་ཅད་ལ་ངང་ངམ་ཤུགས་ཀྱིས་འཇུག་ལ། སྙིང་རྗེ་མ་བསྐྱེད་ན་སེམས་ཅན་རྣམས་ཡལ་བར་འདོར་བའི་བློ་ངང་ངམ་ཤུགས་ཀྱིས་སྐྱེ། དེ་སྐྱེས་ན་སྡུག་བསྔལ་སེལ་ཞིང་བདེ་ལ་འགོད་པའི་ཐབས་སངས་རྒྱས་ཀྱི་བསྟན་པ་ལ་ངང་ངམ་ཤུགས་ཀྱིས་རྒྱབ་ཀྱིས་ཕྱོགས་པར་འགྱུར་བ་རྟེན་

འབྲེལ་གྱི་ཆོས་ཉིད་ཡིན་པས། དེས་ན་སེམས་ཅན་ལ་ཕན་འདོགས་མི་འདོགས་སངས་རྒྱས་ཀྱི་བསྟན་པ་འཛིན་མི་འཛིན་ཐམས་ཅད་སྙིང་རྗེ་ཡོད་མེད་ལ་རག་ལས་པས། བསྟན་པའི་སྒོར་ཞུགས་པའི་གང་ཟག་རྣམས་ཀྱིས་ཆོས་གཞན་མང་པོ་ལ་བསླབ་པ་རེ་ཞིག་བཞག་ནས། བསྟན་པའི་རྩ་བ་སྙིང་རྗེ་འདི་གཅིག་པུར་བསླབ་ན་ཆོས་གཞན་ཐམས་ཅད་འབྱུང་བར་འགྱུར་བས། ཚེ་སྔོན་དྲིན་གྱིས་བསྐྱངས་པའི་ཕ་མ་སེམས་ཅན་རྣམས་སྡུག་བསྔལ་གྱིས་ཉམ་ཐག་པའི་ཚུལ་ལ་དམིགས་ནས། གང་དུ་འགྲོའམ་འདུག་ཀྱང་རུང་དུས་རྟག་ཏུ་སྙིང་རྗེ་ལ་འདི་ལྟར་སློབ་དགོས་ཏེ། བཤན་པས་གསོད་པའི་ར་ལུག་དང་། རྔོན་པ་དང་ཁྱི་ཡིས་འདེད་པའི་རི་དྭགས། ཁྲ་ཡིས་འཛིན་པའི་བྱ་བྱིའུ། རྐང་པས་གཅུར་བའི་འབུ་རོ་སྨད་ས་ལ་འབྱར་ནས་རོ་སྟོད་འགུལ་བ། ནད་ཐར་མེད་ཀྱིས་བཟུང་ནས་ཕར་མ་ཤི་ཚུར་མི་གསོན་པ། ལྟོ་གོས་ཀྱིས་ཕོངས་ནས་འཆི་ལ་ཉེ་བ། ཁྱི་ལ་རྡོ་དབྱུག་པས་བརྒྱབ་ནས་སྐད་ངན་རིང་ངུ་བ་སོགས། སྡུག་བསྔལ་མི་བཟོད་པ་ཐོག་ཏུ་བབས་པའི་སེམས་ཅན་མཐོང་ངམ་ཐོས་དུས་དང་། རང་ག་

དེ་འདྲའི་སྡུག་བསྔལ་གྱིས་མནར་བའི་སེམས་ཅན་རྣམས་ཡིད་ངོར་གསལ་བཏབ་ནས། རང་གི་སྐྱེ་བ་སྔོན་མར་ཕ་མར་གྱུར་པའི་སེམས་ཅན་འདི་རྣམས་ཀྱིས་ད་ལྟ་སྡུག་བསྔལ་འདི་ལྟ་བུ་མྱོང་བ་སྙིང་རེ་རྗེ། འདི་རྣམས་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང་། སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བ་ཞིག་བྱའོ་སྙམ་དུ་བསྒོམ་དགོས་ཏེ། པཎ་ཆེན་རིན་པོ་ཆེས་མཛད་པའི་བདེ་ལམ་ལས། ཐོག་མར་ཤན་པས་གསོད་བཞིན་པའི་ལུག་ལྟ་བུའི་སྡུག་བསྔལ་གྱིས་ཉམ་ཐག་པའི་འགྲོ་བ་རྣམས་ལ་སྒོམས། དེའི་ཚུལ་ནི། མདུན་དུ་དེའི་རྣམ་པ་གསལ་བར་དམིགས་ནས། ཡན་ལག་རྣམས་ནི་བཅིངས། བྲང་གི་པགས་པ་ནི་གཤགས། ཤན་པའི་ལག་པ་ཁོང་བར་བཅུག་པས། སྲོག་ལ་བབས་པ་ནི་མངོན་སུམ་དུ་ཤེས། མིག་ཤན་པའི་གདོང་ལ་རིག་རིག་ཏུ་བལྟ་ཞིང་། སྡུག་བསྔལ་གྱིས་ཉམ་ཐག་པའི་ཚུལ་བསམས་ནས། དེས་ན་འདི་ཉིད་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང་།

སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་བྱའོ། །ཞེས་སྙིང་རྗེ་བསྒོམ་ཚུལ་གསལ་བར་གསུངས་པ་ལྟར་བསྒོམ་མོ། །དེ་ལ་མྱོང་བ་ཐོན་པ་ན་དགེ་འདུན་གྱི་དཀོར་ལ་བག་མེད་དུ་སྤྱོད་པ་དང་། ཚུལ་འཆལ་དང་། ཆོས་སྤོང་མཁན་དང་། ལོག་ལྟ་ཅན་དང་། སེམས་ཅན་ལ་འཚེ་ཞིང་སྡིག་པ་མི་དགེ་བ་སྣ་ཚོགས་བྱེད་པ་སྐྱེན་སྐྱེན་བོར་བྱེད་པའི་འགྲོ་བ་རྣམས་ལ་དམིགས་ནས་བསྒོམ་དགོས་པར་གསུངས་སོ། །ཡང་སྐབས་རེ་རང་གི་ཁ་བསུམ་ལ་ཤ་ཡི་ཆེད་དུ་འདི་ལྟར་བྱས་ནས་གསོད་པ་འཇིག་རྟེན་ཁམས་ན་མང་པོ་ཡོད་པས། དེ་རྣམས་སྐྱེ་བ་སྔོན་མའི་ཕ་མ་ཡིན་སྙིང་རེ་རྗེ་སྙམ་དུ་ཡང་ཡང་བསམ་པར་བྱའོ། །གལ་ཏེ་སྙིང་རྗེ་མི་སྐྱེ་ན་ནད་པ་ཚབས་ཅན་དང་། རྔོན་པས་རི་དྭགས་གསོད་པ། ཤན་པས་ལུག་གསོད་པའི་རྩར་སོང་ནས། ངའི་ཕ་མ་སེམས་ཅན་འདི་རྣམས་སྙིང་རེ་རྗེ་སྙམ་དུ་བསྒོམས་ན་སྙིང་རྗེ་སྐྱེ་ཞེས་ཇོ་བོ་ཡབ་སྲས་ཀྱིས་གསུངས་པ་ལྟར་བྱའོ། །དེ་ལྟར་སྙིང་རྗེ་ཆེན་པོ་སྒོམ་བཞིན་དུ་དཔེར་ན་བུ་

སྡུག་ཤི་བའི་དུས་ཀྱི་མ་བཞིན་དུ་སེམས་ཅན་ཉམ་ཐག་རྣམས་བློས་ནམ་ཡང་མི་བརྗེད་པར་ཞེ་ཕུགས་སུ་བཞག་ནས། རང་ཉིད་སྐྱིད་འདོད་དང་བདེ་འདོད་ཀྱི་བློ་དོར་ནས་གཞན་གྱི་སྡུག་བསྔལ་སེལ་བའི་ཐབས་སྙིང་ལ་བཅངས་ནས་དེ་བཞིན་སྨོན་ལམ་ཡང་འདེབས་དགོས་ཏེ། ཀུན་མཁྱེན་ཀློང་ཆེན་པས། དེ་བས་བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བ་འགྲོ་བའི་སྡུག་བསྔལ་དག །སྐད་ཅིག་ཉིད་ལ་བྲལ་བར་ཤོག་ཅིག་ཅེས། །སྙིང་ཁོང་རུས་པའི་གཏིང་ནས་བསམ་པར་བྱ། །ཞེས་དང་། ཡུམ་བར་པ་ལས། སེམས་ཅན་སྡུག་བསྔལ་བ་དག་མཐོང་བ་ན། འདི་སྙམ་དུ་སེམས་ཅན་འདི་དག་སྡུག་བསྔལ་དང་བྲལ་བར་ཤོག་ཅིག་ཅེས་སེམས་པ་ཡིན་ཏེ་གསུངས། ཨོ་རྒྱན་རིན་པོ་ཆེའི་ཞལ་ནས། ཁྱད་པར་སྙིང་རྗེ་བྱམས་པའི་གཙོ་བོ་ནི་ལུས་བསྐྱེད་པའི་མ་ཡིན་ལ། དེའི་དྲིན་ནི་འཁོར་བའི་ཚད་མེད་མུ་མེད་པས། འདི་ལ་བྱམས་སྙིང་རྗེ་ཚད་མེད་པ་བྷེཾ། ཞེས་དང་། ཡང་། ཐར་མེད་ལས་ཀྱི་འཁོར་བའི་དོང་རིང་དུ། ལས་ཀྱིས་མནར་བའི་འགྲོ་རྣམས་སྙིང་རེ་རྗེ། །ཞེས་གསུངས་པ་ལྟར་རང་གི་ཚེ་འདིའི་ཕ་མས་གཙོ་བྱས་

པའི་འཁོར་བའི་སྡུག་བསྔལ་གྱིས་མནར་བའི་མ་སེམས་ཅན་ཐམས་ཅད་སྙིང་རེ་རྗེ། འདི་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་ན་ཅི་མ་རུང་། བྲལ་བར་གྱུར་ཅིག །བྲལ་བ་ཞིག་བདག་གིས་བྱའོ་སྙམ་དུ་བསམ་དགོས་ཏེ། སྐུ་གསུམ་དོན་ཐིག་ལས། འགྲོ་བ་དྲུག་གི་སེམས་ཅན་ཐམས་ཅད་ནི། །བདག་གི་ཕ་མར་མ་གྱུར་གཅིག་ཀྱང་མེད། །ཕ་མ་འདི་དག་འཁོར་འཁྱམས་སྙིང་རེ་རྗེ། །བརྩེ་སེམས་བུ་གཅིག་ཤི་བའི་མ་བཞིན་དུ། །འཁོར་བའི་མཚོ་ལས་སྒྲོལ་བར་དམ་བཅའ་ཞིང་། །ཇི་ལྟར་བྱ་མས་སྒོང་སྲོ་བཀབ་པ་ལྟར། །རྣམ་མཁྱེན་ས་ལ་འགོད་པའི་བྱམས་པ་དང་། །རྒྱལ་པོའི་གདུང་རྒྱུད་ཆད་ཁར་སྲས་འཁྲུངས་ལྟར། །བདེ་དགའ་རྒྱ་མཚོ་ཐོབ་བའི་དགའ་བ་དང་། །དྲང་སྲོང་རྒྱལ་པོས་གཏོར་མ་བསྔོ་བ་བཞིན། །ཉེ་རིང་དགྲ་གཉེན་མེད་པའི་བཏང་སྙོམས་དང་། །འགྲོ་རྣམས་བླ་མེད་ས་ལ་འགོད་བྱའི་ཕྱིར། །བདག་གིས་ཐེག་ཆེན་བླ་མེད་བསྒྲུབ་བར་བགྱི། །གནོད་པའི་ལན་དུ་ཕན་པའི་གདུང་ཤུགས་བསྐྱེད། །ཅེས་དང་། རྒྱལ་བ་སྐལ་བཟང་རྒྱ་མཚོས། །

བདག་དྲིན་གྱིས་བསྐྱངས་པའི་མ་རྒན་རྣམས། །གནས་འཇིགས་རུང་འཁོར་བའི་རྒྱ་མཚོར་ལྷུངས། །སྡུག་ཉམ་ཐག་ངང་ཚུལ་མི་བསམ་ན། །བུའི་དོན་སྙིང་གཏིང་ནས་རུལ་བས་ན། །རང་སྐྱིད་འདོད་བློ་སྣ་ལིངས་ཀྱིས་བོར། །གཞན་ཕན་བདེའི་ཐབས་དགུ་སྙིང་ལ་བཅངས། །གསུངས། །དེ་ལྟར་སེམས་ལ་བཞག་ནས་དྲིན་གཟོ་ལ། ཐབས་མཁས་བསྡུ་བ་རྣམ་བཞིའི་སྒོ་ནས་འགྲོ་དོན་ལ་བརྩོན་དགོས་ཏེ། བདེ་ལམ་ལས། སེམས་ཅན་ཐམས་ཅད་སྦྱིན་པས་འཁོར་དུ་བསྡུས་ཏེ། ཚར་གཅོད་རྗེས་འཛིན་གྱི་སྒོ་ནས་ཆོས་སྟོན་པའི་སྙན་པར་སྨྲ་བ་དང་། ཆོས་བསྟན་པའི་དོན་ཉམས་སུ་ལེན་དུ་འཇུག་པའི་སྤྱོད་པ་དང་། གཞན་ལ་བསྟན་པ་ལྟར་རང་གིས་ཀྱང་ཉམས་སུ་ལེན་པའི་དོན་མཐུན་པ་སྟེ། གཞན་དོན་བྱེད་པའི་ཐབས་བཟང་པོ་འདི་རྣམས་ལ་བརྟེན་ནས་སེམས་ཅན་ཐམས་ཅད་སྨིན་གྲོལ་གྱི་ལམ་ལ་འགོད་པར་བྱའོ། །ཞེས་གསུངས་པ་ལྟར་སྤྱིར་འགྲོ་བ་ཡོངས་ལ་ཕན་པའི་ཕྱིར་དུ་ཀུན་གྱིས་འབད་དགོས། ཁྱད་པར་ཤ་འདིའི་ཕྱིར་རྒྱ་བོད་ཧོར་གསུམ་སོགས་འཇིག་རྟེན་གྱི་ཁམས་ཐམས་ཅད་ན་ལོ་རེ་ཟླ་རེ་ཉིན་རེ་བཞིན་དུ་ར་ལུག་གཡག་

གསུམ་བྱ་དང་རི་དྭགས་སོགས་སེམས་ཅན་གྲངས་མེད་པ་གསོད་ཚུལ་བསམས་ནས། དངོས་སམ་བརྒྱུད་ནས་སེམས་ཅན་གཞན་གྱི་ཚེ་སྲོག་ལ་གནོད་པའི་ལས་སྡིག་ཟས་ཕ་མའི་ཤ་ཟ་བ་སྤང་དགོས། གལ་ཏེ་མ་སྤངས་ན་ཉེས་པ་ཆེ་སྟེ། སངས་རྒྱས་ཀྱི་གསུང་ལངྐར་གཤེགས་པའི་མདོ་ལས། ཁེ་ཡི་ཕྱིར་དུ་སེམས་ཅན་གསོད། །ཤ་ཡི་ཕྱིར་ནི་ནོར་སྦྱིན་བྱེད། །དེ་དག་གཉིས་ཀ་སྡིག་ལས་ཅན། །ངུ་འབོད་ལ་སོགས་རྣམས་སུ་འཚོད། །གང་གིས་ཐུབ་པའི་ཚིག་འདས་ཏེ། །བསམ་པ་ངན་པས་ཤ་ཟ་ན། །འཇིག་རྟེན་གཉིས་ནི་གཞིག་པའི་ཕྱིར། །ཤཱཀྱའི་བསྟན་ལ་བརྟུལ་ཞུགས་བླངས། །ཤིན་ཏུ་མི་བཟད་དམྱལ་བར་ཡང་། །སྡིག་པའི་ལས་ཅན་དེ་དག་འདོང་། །མ་རུངས་འོ་དོད་འབོད་སོགས་སུ། །ཤ་ཟ་དེ་དག་བཙོ་བར་འགྱུར། །ཞེས་དང་། ཡང་། སེམས་ཅན་གཅིག་ལ་གཅིག་ཟ་བ། །ཤ་ཟན་དག་གི་རིགས་སུ་སྐྱེ། །དྲི་མི་ཞིམ་ཞིང་སྨད་པ་དང་། །སྨྱོན་པ་རྣམས་སུ་སྐྱེ་བར་འགྱུར། །གདོལ་པ་སྨེ་ཤ་ཅན་རིགས་དང་། །བཙོ་བླག་མཁན་དུ་ཡང་སྐྱེ་འོ། །ཕྲ་མེན་རིགས་ཀྱི་སྐྱེ་གནས་དང་། །ཤ་

ཟའི་རིགས་སུ་སྐྱེ་བར་བསྟན། །མི་ཡི་ཐ་མ་དེ་དག་ནི། །སྲིན་དང་བྱི་ལའི་མངལ་དུ་སྐྱེ། །ཞེས་དང་། ཡང་། དེ་ལྟར་ཤ་དང་ཆང་ལ་སོགས། །བར་ཆད་བྱེད་པར་འགྱུར་བ་འོ། །མ་འོངས་པ་ཡི་དུས་སུ་ནི། །ཤ་ཟན་གཏི་མུག་སྨྲ་བ་དག །ཤ་ནི་སྡིག་མེད་རུང་བ་ཞེས། །སངས་རྒྱས་ཀྱིས་ནི་བཤད་ཅེས་ཟེར། །ཞེས་པ་ལ་སོགས་པ་མདོ་སྡེ་རྣམས་སུ་རྒྱ་ཆེར་གསུངས་པའི་ཕྱིར་རོ། །འདུལ་བར་ཡང་ཤ་ལ་གནང་བའི་སྐབས་མེད་པར་རིགས་དགོས་ཏེ། སངས་རྒྱས་རང་ཉིད་ཀྱིས་འདུལ་བར་མ་གནང་བར་གསུངས་པའི་ཕྱིར་རོ། །མདོ་རྩར་གནང་ངོ་ཞེ་ན། འདི་གཞི་ཡོད་སྨྲའི་ཡིན་ལ། སྡེ་པ་གཞན་བཞིར་ཡང་བལྟ་དགོས་པའི་ཕྱིར་རོ། །ཞེས་ཀུན་མཁྱེན་དོལ་བོ་བ་ཤེས་རབ་རྒྱལ་མཚན་གྱིས་གསུངས་སོ། །གསང་སྔགས་ནས་ཀྱང་ཤ་ཟ་བ་མ་གནང་སྟེ། དུས་ཀྱི་འཁོར་ལོའི་རྒྱུད་ཕྱི་མ་ལས། ཤ་ལ་སོགས་པ་ཟོས་པས་གདོན་མི་ཟ་བར་ས་ཡི་འོག་ཏུ་གང་གི་ལུས་ནི་ཆེས་ཆེ་བ། །སྲོག་ཆགས་ཡི་དྭགས་སོགས་སུ་ངེས་པར་སྐྱེ་བར་འགྱུར་ཏེ། ཞེས་སོགས་དུ་མ་གསུངས་པ་དང་། དང་པོའི་སངས་རྒྱས་ཀྱི་རྒྱུད་དུ་ཡང་།

ཟ་བ་པོ་དང་གསོད་པ་པོ། །གཉིས་པོ་དག་ཀྱང་གསོད་པ་སྟེ། །ཞེས་གསུངས་པའི་ཕྱིར་རོ། །འོ་ན་ཤ་ལྔ་ལ་སོགས་པ་ཅི་ལྟར་ཞེ་ན། དེ་ལ་འདིར་རང་བཞིན་གྱིས་ཤི་བ་སྟེ། ཤའི་ཆེད་དུ་མ་བསད་པའི་ཤ་ལྔ་ལ་བདུད་རྩིའི་རིལ་བུ་བསྒྲུབས་ནས། རྒྱ་ཤུག་གི་ཚི་གུ་ཙམ་རྣལ་འབྱོར་པས་དམ་ཚིག་གི་དོན་དུ་བཟའ་བར་བྱ་སྟེ། ལུས་ཀྱི་སྟོབས་འཕེལ་བ་དང་། རིགས་ཀྱི་ང་རྒྱལ་བཅག་པ་དང་། སེམས་ཅད་དེ་དག་དྲང་བར་བྱེད་པའི་དོན་ཏོ། །འདིར་རྣལ་འབྱོར་པས་ཤ་ཟོས་པའི་སེམས་ཅན་དེ་དག་དྲང་ནུས་པ་མ་གཏོགས་པས་ཤ་ཟ་བར་བྱ་བ་མིན་ཏེ། ཀྱེ་རྡོ་རྗེར། ཤ་ནི་མཁས་པས་བཟའ་བྱ་བ། །སེམས་ཅན་དེ་དེའི་དབང་དུ་འགྱུར། །ཞེས་གསུངས་པའི་ཕྱིར་རོ། །གཞན་ཡང་གསང་སྔགས་ནས་ཤ་ཟ་བར་གསུངས་པ་དེ་སྒྲ་ཇི་བཞིན་པ་མིན་ཏེ། མཁའ་འགྲོ་རྒྱ་མཚོའི་འགྲེལ་པར་ཡེ་ཤེས་ཀྱི་བདག་ཉིད་ཀྱིས་རྣམ་པར་རྟོག་པ་ཟ་བར་བྱེད་དོ། །ཞེས་རྣམ་རྟོག་ཟ་བར་གསུངས་སོ། །འཕགས་པ་འཇམ་དཔལ་གྱིས། ཞེ་སྡང་བསམ་པ་མེད་པའི་ཕྱིར། །གཞན་གྱི་ཤ་རྣམས་མ་འཕྲོག་ཤིང་། །ཐུབ་པས་རང་

གི་ཤ་རྣམས་བྱིན། །སྐྱེ་བ་འདིར་ནི་ཁྱོད་སངས་རྒྱས། ཞེས་དང་། ཡང་། རྫས་ཀྱིས་ཉོས་པ་ཉ་ཡི་ཤ། །ཟོས་པས་བླུས་པ་ཡིན་ནམ་ཅི། །གླང་པོའི་རྩལ་དང་སྤྲིན་ཆེན་དང་། །མྱང་འདས་དང་ནི་སོར་ཕྲེང་ཅན། །ལང་ཀར་གཤེགས་པའི་མདོ་ཉིད་ལས། །ཐུབ་པས་ཤ་ནི་མ་གནང་ངོ་། །རྫས་ཐོབ་དོན་དུ་སྲོག་གཅོད་དང་། །བཟའ་བའི་དོན་དུ་རིན་འཇལ་བ། །གཉིས་པོ་དག་ཀྱང་གསོད་པ་སྟེ། །ངུ་འབོད་ལ་སོགས་རྣམས་སུ་འཚོད། །རྫས་ཀྱི་དོན་དུ་སེམས་ཅན་གསོད། །རྫས་སྟེར་མེད་ན་སུས་ཀྱང་མིན། །བྱ་དང་བྱེད་པོ་ཡང་དག་འབྲེལ། །རྟག་ཏུ་སྲོག་ཆགས་གསོད་པ་པོ། །གང་ཚེ་རྫས་ཀྱིས་ཉ་ཉོས་པས། །ཁྱིམ་གནས་རྣམས་ལ་སྡིག་མེད་ན། །དེ་བཞིན་སྐུ་གཟུགས་ལ་སོགས་པ། །བྱས་པའང་ཇི་ལྟར་བསོད་ནམས་འགྱུར། །མཆོད་རྟེན་རྩིག་མཁན་གྱིས་བྱས་དང་། །ཉ་ནི་ཉ་པས་བསད་པ་སྟེ། །མཆོད་རྟེན་ཕྱག་བྱེད་བྱེད་པོ་མིན། །ཉ་ཟོས་གསོད་པ་པོ་ལ་མིན། །གང་ཚེ་ཉ་དེ་ཟོས་པ་ཡིས། །སྡིག་པ་ཟ་བ་པོར་མེད་ན། །དེ་ཚེ་མཆོད་རྟེན་མཆོད་པ་ཡི། །བསོད་ནམས་མཆོད་བྱེད་པོ་ལ་མེད། །གསོད་པ་པོ་དང་ཟ་བ་པོ། །

གཉིས་པོ་དག་ཀྱང་སོ་སོ་སྟེ། །གསོད་པ་པོ་ནི་ནོར་ལ་སྲེད། །ཟ་བ་པོ་ནི་ཟས་ཀྱི་དོན། །གསོད་པོ་ནོར་ལ་སྲེད་པ་དག །བསྐལ་པ་འབུམ་དུ་འཚོད་པ་འོ། །ཟ་བོ་ཤ་ལ་སྲེད་པ་དག །བསྐལ་པ་བྱེ་བར་འཚོད་པ་འོ། །ཉན་ཐོས་ཀྱིས་ནི་ཆེད་དག་ཏུ། །ཉ་པས་ཉ་ནི་བསད་པ་དང་། །བྲམ་ཟེ་ཡི་ནི་ཆེད་དག་ཏུ། །ཆང་མས་ཆང་ནི་བྱས་པ་དང་། །ཁ་ན་མ་ཐོ་མེད་གཞན་མིན། །ཤ་ཟ་བ་ཡི་མི་གང་ཞིག །དང་པོ་ཡི་དྭགས་འགྲོ་བ་སྟེ། །ཕྱི་ནས་ངུ་འབོད་འགྲོ་བ་འོ། །ཤ་ཟ་བ་ལ་སྙིང་རྗེ་དང་། །ཆང་འཐུང་བ་ལ་དགའ་བ་དང་། །ཕ་རོལ་བུད་མེད་འཛིན་གསུངས་པ། །སྨད་པ་ལས་བྱེད་བཏང་སྙོམས་མེད། །ཅེས་པ་འདི་སྔགས་སུ་ཡང་གཏོགས་སོ། །རྗེ་མི་ལས། ཤ་ཁྲག་ཟས་སུ་ཟ་བྱེད་ཅིང་། །སྲོག་གཅོད་ལས་སུ་སོང་བ་རྣམས། །ཚ་དམྱལ་བརྒྱད་དུ་སྲེག་པར་བྱེད། །ཅེས་དང་། ས་པཎྚི་ཏས། ཐེག་པ་ཆེ་ལས་ཤ་རྣམས་བཀག །ཟོས་ན་ངན་འགྲོའི་རྒྱུ་རུ་གསུངས། །ཞེས་དང་། རྗེ་བཙུན་གྲགས་པ་རྒྱལ་མཚན་གྱིས། དྲན་པ་ཉམས་པའི་ཆང་དང་གཅིག །སྙིང་རྗེ་ཉམས་པའི་ཤ་དང་

གཉིས། །གྲགས་པ་ཉམས་པའི་བུད་མེད་གསུམ། །འདི་གསུམ་སྒོམ་ཆེན་གྱི་ཁོང་སྐྲན་ལགས། །ངེས་འབྱུང་གི་མེ་བཙའ་མྱུར་དུ་ཐོབ། །ཆོས་སྨྱོན་པའི་ཚུལ་དུ་ཉམས་སུ་ལོངས། །གསུངས། མཁས་གྲུབ་རྗེས་མཛད་པའི་སྡོམ་གསུམ་རྣམ་བཤད་ལས། ཤའི་རོ་ལ་ཆགས་པའི་དབང་གིས་ཤ་ཟ་བར་རུང་བར་འདུལ་བ་ལས་གནང་ངོ་ཞེས་ཁོ་བོ་ཅག་ནི་རྣམ་པ་ཐམས་ཅད་དུ་མི་སྨྲ་ལ། དེ་འདྲ་བར་སྐྱོན་མེད་པར་གཉིད་ཀྱི་རྨི་ལམ་དུ་ཡང་མི་སྨྲའོ་གསུངས། དེས་ན་ཐེག་པ་ཆེན་པོའི་བྱང་ཆུབ་མཆོག་ཏུ་སེམས་བསྐྱེད་པ་གང་དག་ཤ་ཟོས་ན་རང་གི་སྙིང་རྗེ་ཆེན་པོ་ཉམས་འགྲོ་ཞིང་བློའི་ཤུགས་ཆུང་དུ་འགྲོ་བ་མྱོང་བས་གྲུབ་པ་དང་། རང་དོན་དུ་རོ་ལ་སྲེད་པ་དྲག་པོ་སྐྱེ་བར་མཐོང་ནས། དགག་བྱ་དེ་དག་འགོག་པའི་སླད་དུ་རྣམ་གསུམ་དག་མ་དག་དང་། བསད་པ་དང་རང་ཤི་བའི་ཤ་ཐམས་ཅད་མི་ཟ་བ་ཡིན་ན་ནི་མཆོག་ཏུ་ངོ་མཚར་ཆེ་ཞེས་གསུངས། དེ་བཞིན་དུ་རྒྱ་བོད་ཀྱི་མཁས་གྲུབ་མང་པོས་གསུངས་སྣང་། རྒྱས་པར་སྤྲོ་ན་རྨད་བྱུང་སྤྲུལ་པའི་གླེགས་བམ་དུ་བལྟ་བར་བྱའོ། །མདོར་བསྡུ་ན་ཤ་ཟོས་པའི་རྣམ་སྨིན་གྱིས་ཚེ་ཕྱི་མར་དམྱལ་བ་

ཡི་དྭགས་དུད་འགྲོ་གསུམ་མམ་གང་རུང་དུ་སྐྱེ། ཚ་གྲང་བཀྲེས་སྐོམ་བཀོལ་སྤྱོད་ཀྱི་སྡུག་བསྔལ་ཡུན་རིང་མྱོང་། བརྒྱ་ལ་མཐོ་རིས་སུ་སྐྱེས་ཀྱང་། ཚེ་ཐུང་ནད་མང་གདོལ་བ་གཞུང་ལུགས་ལ་མི་བརྟེན་པ། རིགས་ངན་རྨེ་ཤ་ཅན་གྱི་རིགས་དང་། བཙོ་བླག་མཁན་སོགས་སུ་སྐྱེས་ནས་སྡུག་བསྔལ་དུ་མ་མྱོང་བར་གསུངས། གཞན་ཡང་ཤ་འདིའི་ཕྱིར་ཚེ་འདིར་ཡང་མི་ནོར་ཟས་གསུམ་ཟད་ནས་སྤྲང་པོར་གྱུར་པ་དང་། ཐོས་བསམ་སྒོམ་གསུམ་ཤོར་ནས་གྲོང་ཁྱིམ་འགྲིམས་པ་མང་། ཤ་འཆོས་ཐིག་ལེ་རྒྱས་ནས་མཚན་ཉིད་པའི་དགེ་བཤེས་ཕལ་ཆེར་གྱིས་བཙུན་ཆུང་སོགས་ལ་བརྟེན་ནས་དགེ་འདུན་གྱི་ལྷག་མ་བཅུ་གསུམ་གྱི་དང་པོ་འཕོག་གི་བཅུག་ནས་ཚུལ་ཁྲིམས་ཉམས། ཕྱག་རྫོགས་པ་འགའ་ཞིག་གིས་བཙུན་མ་སོགས་ལ་བརྟེན་ནས་བསྒོམ་བསྒྲུབ་ཤོར་བ་མང་། འགའ་ཞིག་གིས་ཤ་འཆོས་ཚོ་གསོག་ནས་ལུས་ལས་སུ་མི་རུང་དྲང་པོར་བཞག་ཀྱང་འཁྱོགས་པོར་འགྲོ། ཡར་ལངས་ནས་སྡོད་མི་ཚུགས་མལ་ནས་ཕག་བཞིན་ཉལ་སྡོད་དགོས། རྒྱུན་དུ་ཁུར་པོ་ལྕི་མོ་ཞིག་ཁུར་ཡོད་པ་ལྟར། འགྲོ་

འདུག་འགུལ་སྐྱོད་མི་ནུས་དབུགས་འཚེངས་འཆི་ལ་ཁད་བྱེད་པ་མང་། ཤ་འདི་ཟོས་ན་བྱིང་རྨུགས་གཉིད་གསུམ་འཕེལ། རིག་པ་མི་གསལ། ཉིན་པར་གཉིད་ན་ཚད་པ་སོགས་ནད་དྲག་པོ་སྟེང་དུ་འབྱུང་། ཧ་ཅང་ཟོས་ཆེ་ན་དྲོས་འཁྱག་བྱས་ཤ་དུག་གི་སོང་། སྨན་འཐུང་རིམ་གྲོ་བྱས་རུང་མི་དྲག །སྒོ་ཡི་རྒྱུ་ཟད། ཁྱིམ་གྱི་ཟས་ཟད། ལུས་ཀྱི་སྟོབས་ཟད། ཟད་ཐོག་ཟད་བཞག་བྱས་ཤི་སོང་བ་མང་། ཤ་ཁྲག་ལ་ལོངས་སྤྱོད་པའི་ས་ཕྱོགས་སུ་དཀར་ཕྱོགས་ཀྱི་ལྷ་ནི་མི་འཁོར། ནག་ཕྱོགས་ཤ་ཁྲག་ལ་དགའ་བ་འདུ། མི་རྣམས་ལ་ནད་དང་ཕྱུགས་རྣམས་ལ་གོད་ཁ་འབྱུང་། ཤ་ཁྲག་གར་ཡོད་སར་ཚད་པ་རྒྱུ་གཟེར་དམར་བཤལ་སོགས་ནད་རིམས་མང་པོ་འོང་། མི་ཕྱུགས་ཁྱི་གསུམ་དུས་མིན་དུ་འཆི། ཆར་ཆུ་མི་འབབ་སད་སེར་ཐན་པ་སོགས་ཡུལ་ཕྱོགས་ལ་བཀྲ་མི་ཤིས་པ་མང་པོ་འབྱུང་། ཤ་འདི་ཕ་མ་སེམས་ཅན་གྱི་ཤ་ཁྲག་ཡིན་པས། མང་པོ་ཟོས་ན་སྡིག་སྒྲིབ་ཀྱིས་ཆོས་པ་རྣམས་ཀྱིས་ཐོས་བསམ་སྒོམ་གསུམ་ཅི་ཙམ་བྱས་ཀྱང་ཉམས་རྟོགས་ཁྱད་པར་ཅན་མི་སྐྱེ་སྔར་སྐྱེས་པ་ཡང་འགྲིབ་པར་འགྱུར། ཤ་འདིས་ཆགས་སྡང་སོགས་

ཉོན་མོངས་པ་ཀུན་སློངས། སྲོག་གཅོད་མ་བྱིན་ལེན་སོགས་མི་དགེ་བ་བྱེད་དུ་འཇུག །ཤ་འདི་ལ་བརྟེན་ནས་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་བསམ་གྱིས་མི་ཁྱབ་པ་མྱོང་དགོས། ཤ་འདི་ལ་དགའ་བའི་མི་ལ་ཚེ་འདི་ཕྱི་གང་དུ་བདེ་སྐྱིད་སྙན་གསུམ་མི་འབྱུང་། སྡིག་སྡུག་གཏམ་ངན་དུས་རྒྱུན་དུ་འབྱུང་། ཤ་འདིས་བསྟན་པའི་མིག་རྐྱེན་ལ་ཡང་གནོད་དེ། སྤྱིར་གཞིས་ཀ་རྩེ་དང་རྒྱལ་རྩེ་རྩིས་ཐང་ལ་སོགས་པའི་ཕྱོགས་གཞན་དང་ཁྱད་པར་ལྷ་སའི་གླིང་གི་ཤན་པ་རྣམས་ཀྱིས་རྭ་ཡི་ཁང་པ་ཕུག །ཉིན་རེ་བཞིན་ར་ལུག་གཡག་གསུམ་བརྒྱ་སྟོང་བསད། ཇོ་བོ་ཆེན་པོའི་བསྐོར་ལམ་ན་ཤ་ཁྲག་ནང་ཁྲོལ་རྣམས་ཐང་མ་བཞིན་དུ་བརྡལ། སྤྱན་གཟིགས་ལྟར་བཤམས་ནས། ཇོ་ཤཱཀ་རྣམ་གཉིས་རྒྱལ་བ་ཡབ་སྲས་སེར་འབྲས་དགེ་གསུམ་ན་བྱང་ཆུབ་སེམས་དཔའ་འདྲ་ཡོད་ན་འདི་ཨེ་གཟིགས། གཟིགས་ན་སྙིང་རྗེ་ཆེན་པོ་རེ་ཨེ་སྐྱེ་གི་ཟེར་བ་ལྟར་ཉི་མ་གནམ་ལ་དུ་ཤར་པོ་བཤམས་ནས་བཙོང་བ་འདི། ཇོ་ཤཱཀ་རྣམ་གཉིས་རྒྱལ་བ་རིན་པོ་ཆེ་སེར་འབྲས་སོགས་བླ་མ་དགེ་བའི་བཤེས་གཉེན་

དང་། བྱང་ཆུབ་སེམས་དཔའི་སྤྲུལ་པ་ཤན་པ་འདྲ་གིས་འདྲེན་གྱིན་ཡོད་ན་ཅི་ཤེས། འོན་ཀྱང་འདྲེན་གྱིན་ཡོད་པའི་དབང་དུ་བཏང་ཡང་འདྲེན་ཚུལ་བཙོག་པ་ཞིག་རེད། སྔོན་ཨ་མདོའི་ཕྱོགས་ཀྱི་མི་གཅིག་ལྷ་སར་སོང་ཤ་ཁྲོམ་མཐོང་ནས་ཕྱིས་ཡུལ་དུ་སླེབས་དུས། ཡུལ་མི་འགའ་རེས་ཁྱོད་ལས་ཅན་པོ་དབུས་གཙང་དག་པའི་ཞིང་དུ་མཇལ་དུ་སོང་བ་སྐལ་བ་བཟང་ལྟད་མོ་ཅི་མཐོང་སྨྲས་པའི་ལན་དུ། དག་པའི་ཞིང་ན་ཡང་མ་དག་པ་མང་པོ་འདུག །ལྟད་མོ་བཟང་ངན་སྣ་ཚོགས་མཐོང་ཞེས་སྨྲས་པ་ལྟར། ཐག་རིང་མདོ་སྨད་སོགས་ཀྱི་མི་རྣམས་ཀྱིས་དབུས་གཙང་དག་པའི་ཞིང་ཞེས་ཚད་མར་བཟུང་ནས་སོང་དུས་དེ་འདྲ་མཐོང་ཚེ། ར་ལུག་འདི་རྣམས་བསད་ཚད་དབུས་གཙང་གི་བླ་མ་རྣམས་ཚོས་འདྲེན་གྱི་ཡོད་ནི་ཡིན་ན་བཟང་གི །དེ་མིན་ན་འདི་ངན་གི །ཆོས་ཡུལ་ཞིག་དང་མི་རིགས་གི་ཟེར་བ་ཐོས་རྒྱུ་མང་པོ་སྣང་། འགའ་ཞིག་གིས། དབུས་གཙང་དག་པའི་ཞིང་འཕགས་པ་སྤྱན་རས་གཟིགས་དངོས་རྒྱལ་བ་རིན་པོ་ཆེའི་བཞུགས་གནས་ཕོ་བྲང་པོ་ཏ་ལའི་ཐག་ཉེ་ལྷ་ལྡན་ར་ས་འཕྲུལ་སྣང་གི་ཇོ་བོའི་བསྐོར་ལམ་ན་ཡང་འདི་

འདྲ་ཡོད་ཅེས་དཔེར་འཐེན་ཚད་ཀྱིས་བཞག་ནས་སྡིག་པའི་ལས་བྱེད་པ་ཡང་འདུག་པས། འདི་འདྲའི་བསྟན་པའི་མིག་རྐྱེན་བཙོག་པ་ཞིག་གཞན་གང་ན་ཡང་མི་སྣང་། ཉིན་རེ་བཞིན་དུ་ལྷ་སའི་གླིང་བར་ན་ར་ལུག་མང་པོ་གསོད་པ་དང་། ཇོ་བོའི་སྐུ་རྒྱབ་ན་ཤ་བརྒྱ་སྟོང་མང་པོ་བཤམས་ནས་ཚོངས་བ་འདི་འདྲ། མི་ལ་ཡབ་སྲས་སོགས་སྔོན་བྱོན་སྐྱེས་ཆེན་དམ་པ་ཆོས་རྒྱལ་བྱང་ཆུབ་སེམས་དཔའ་རྣམས་ཀྱིས་གཟིགས་རྒྱུ་ཡིན་ན་སྤྱན་ཆབ་བསིལ་ཏེ། སྔོན་གཉའ་ནང་ན་ཚོང་འདུས་སུ་དམར་ཁེ་བའི་ཚོང་བ་མང་དུ་བྱུང་ཚེ། རྗེ་བཙུན་དཔོན་སློབ་གཉིས་བསོད་སྙོམས་ལ་བྱོན་པས་ཤའི་རྩིག་པ་བརྩིགས། མགོའི་ཕུང་པོ་སྤུངས། པགས་པ་གཅལ་དུ་བཀྲམ། ཁྲག་གི་རྒྱ་མཚོ་བསྐྱིལ་ཏེ་སེམས་ཅན་གསོད་རྒྱུ་མང་པོ་སྲང་ལ་བརྒྱུས་པའི་དབུས་ན། མོན་པ་རྒན་པོ་ལག་པ་ཞ་བ་ཞིག་གིས་ཀྱང་། ལུག་ནག་པོ་ཆེན་པོ་ཞིག་ལ་ཁོང་ལག་བཏང་པས། རྨ་བཟོས་ཙམ་ལ་རྒྱུ་མ་ནར་ར་ར་ལུག་ཤོར་ཏེ། འཇིགས་པའི་སྐད་ཆེན་པོ་འདོན་ཞིང་། འདར་ཁྲིལ་ལེ་བའི་ངང་ནས་རྗེ་བཙུན་ཡབ་སྲས་ལ་སྐྱབས་འཚོལ་དུ་བྱུང་ནས་

ལུག་ཚེའི་དུས་བྱེད་པའི་བར་ལ། རྗེ་བཙུན་གྱིས་སྤྱན་ཆབ་བསིལ་ཞིང་ལུག་ལ་འཕོ་བ་མཛད་ནས་རྣམ་ཤེས་བྱང་ཆུབ་ལམ་ལ་བཀོད་དེ། སྙིང་རྗེ་ཆེན་པོ་མི་བཟོད་པའི་ངང་ནས་མགུར་འདི་གསུངས་སོ། །ཨེ་མ་འཁོར་བའི་སེམས་ཅན་རྣམས། །ཐར་བའི་ལམ་ལ་ཕར་ལྟོས་དང་། །ཨ་ཙ་མ་སྡིག་ཅན་སྙིང་རེ་རྗེ། །ལས་རེ་རྨོངས་མི་ལུས་ཀྱི་ལོད་པ་ལ། །ཞེ་རེ་འཕངས་སེམས་ཅན་གྱི་གསོད་ལུགས་ལ། །གྱོང་རེ་ཆེ་མགོ་བོའི་བསྐོར་ལུགས་ལ། །ཙུག་རེ་དྲག་ཕ་མའི་འཆི་ལུགས་ལ། །ཇི་ལྟར་བྱེད་སྡིག་ཤའི་བརྩིགས་ལུགས་ལ། །ཅི་རེ་བྱེད་ཁྲག་གི་མང་ལུགས་ལ། །ཇི་ཙམ་ལྟོགས་ཤ་ཡི་ཟ་ལུགས་ལ། །གང་ནས་བསམ་སྣང་བའི་འཁྲུལ་ལུགས་ལ། །སྡིག་རེ་ཆེ་སྙིང་རྗེ་མེད་ལུགས་ལ། །ཇི་ཙམ་བསྒྲིབས་རྨོངས་པའི་གཏི་མུག་ལ། །ཅི་རེ་བྱེད་སྡིག་པའི་སོ་ནམས་ལ། །སུ་ཡིས་སྤྱོད་འདོད་པས་གདུང་ལུགས་ལ། །གང་གིས་བྱས་ཡུལ་ལུགས་ཀྱི་ངན་པ་ལ། །ཙུག་རེ་བྱེད་སྐྱོ་བ་སྐྱེ་ལུགས་ལ། །ཅི་རང་བྱེད་སྡིག་ཅན་གྱི་བྲེལ་ལུགས་ལ། །ཕྱི་མ་སྐད་ཅིག་མི་དྲན་པའི། །མི་འདི་འདྲ་མཐོང་ན་ང་རེ་འཇིགས། །སྡིག་སྤྱོད་རྣམས་

དྲན་བཞིན་སྣང་བ་འཁྲུལ། །རས་ཆུང་པ་ལྷ་ཆོས་ཤིག་ཨེ་དྲན་ཨང་། །དྲན་ན་སྐྱོ་ཤས་སྙིང་རླུང་ལྡང་། །བསྒོམས་ན་རི་ཁྲོད་གནས་སུ་གཤེགས། །བསམས་ན་བླ་མའི་བཀའ་དྲིན་སོམས། །འབྲོས་ན་སྡིག་སྤྱོད་རྩ་ནས་བྲོས། །གཏོང་ན་འཇིག་རྟེན་གྱི་བྱ་བ་ཐོངས། །འཛིན་ན་སྒྲུབ་པའི་དམ་བཅའ་ཟུངས། །ཤེས་ན་མི་ཚེ་ཆོས་ལ་སྐྱོལ། །ཅེས་གསུངས་པས། རས་ཆུང་པ་ལ་ཡང་སྐྱོ་ཤས་དང་ངེས་འབྱུང་དྲག་པོ་གཏིང་ནས་སྐྱེས་ཏེ་སྤྱན་ཆབ་མང་པོ་བསིལ་ཞིང་། བླ་མ་ལགས་ད་བདག་ཀྱང་བླ་མའི་བཀའ་བཞིན་ཆོས་བརྒྱད་སྡིག་ཟས་ཀྱི་འཚོ་བ་སྤངས་ནས་བསྒོམ་པ་ལགས་གསུངས་ནས། དཔོན་སློབ་གཉིས་བྱོན་པས་ཀུན་དད་ནས། ཤ་ཆང་སོགས་འཚོ་བའི་ཡོ་བྱད་མང་པོ་ཕུལ་རུང་སྡིག་ཟས་འཇིག་རྟེན་ཆོས་བརྒྱད་དུ་འདུག་གསུང་། མ་བཞེས་པར་ལ་ཕྱི་བདུད་འདུལ་ཕུག་ཏུ་བྱོན་ནས་སྒྲུབ་པ་མཛད་སྣང་། དེང་སང་བྱང་ཆུབ་སེམས་དཔའ་ཡིན་ཟེར་མཁན་ཚོ་ཡང་ལྷ་སའི་ཇོ་བོར་བསྐོར་བ་བྱེད་དུ་སོང་ན་ཤ་ཁྲོམ་ཡོད་སར་སླེབས་ཚེ། འདི་རྣམས་སྙིང་རེ་རྗེ་ཞེས་མིག་ནས་མཆི་མ་ཞིག་འོངས་ནས་

ཐུར་གི་ཕྱི་དགོས་པ་གཅིག་ཀྱང་མཐོང་རྒྱུ་མི་སྣང་། ཤ་གན་ཚོན་པོ་རེད་ཟེར། ཁ་ནང་དུ་འགྲམ་ཆུ་འཁྱིལ་ནས་མར་མིད་པའི་བྱང་ཆུབ་སེམས་དཔའ་ལྟོ་རྐྱལ་སྙིང་རྗེ་མེད་པའི་རང་མཚང་སྟོན་པ་མང་པོ་སྣང་། དེང་སང་མདོ་དབུས་གཙང་གསུམ་སོགས་ན་དགོན་པ་ལྷ་ཡུལ་འདྲ་བ་མང་པོ་ཚུགས་སྣང་ཡང་། དེའི་ཐག་ཉེ་ན་སྲོག་གཅོད་ཀྱི་ལས་ལ་རྔམས་པའི་གྲོང་སྡེ་ངན་པ་དམྱལ་ཁམས་འདྲ་བ་རེ་ཚུགས་ཡོད་པ་འདི་གཉིས་རྒྱལ་བའི་གསུང་རབ་ལ་བལྟས་ན་མེ་ཆུ་བཞིན་གཏན་ནས་མ་འཕྲོད་པར་འདུག །འདི་གཉིས་ཀ་བཙུགས་ཕྱིན་ཆད་བསྟན་པ་ལ་ཕྱོགས་གཅིག་ནས་ཆོས་ཀྱི་འཁོར་ལོ་བསྐོར་ནས་ཕན་ཞིག་བཏགས། ཕྱོགས་གཅིག་ནས་སྡིག་པའི་ས་བོན་བཏབ་ནས་གནོད་ཅིག་བསྐྱལ་བར་གདའ། སངས་རྒྱས་ཀྱི་བསྟན་པ་སྙིང་རྗེ་ལ་རག་ལས་པས། སྡིག་ཅན་ཤན་པས་ཕ་མ་སེམས་ཅན་གྱི་སྲོག་གཅོད་པ་འདི་ལ་སྙིང་རྗེ་ཞིག་མི་སྐྱེ་ཕན་ཞིག་མི་འདོགས་ན། བསྟན་པ་ཡོད་པ་དགོས་པ་ཅི་ཡང་མ་བྱུང་བ་ཡིན་པས། ཕྱོགས་དེ་ན་བསྟན་པ་ཡོད་པར་མ་སེམས། ཤ་རེ་ཉོ་དགོས་དུས་བཟང་གི་སྙམ་ཤན་པ་རྣམས་དགོན་པའི་ཐག་ཉེ་ན་

བསམ་བཞིན་དུ་སྡོད་དུ་བཅུག །ཤན་པས་ཁོང་རྣམས་ཀྱིས་ཤ་ཉོ་སྙམ་དགེ་འདུན་པ་ལ་དམིགས་ནས་བསད། དགེ་འདུན་པས་ཤན་པས་ར་ལུག་ཚོན་པོ་རྐྱང་པ་བསད་ནས་ཤ་ཚིལ་བརྩིག་ཡོད་སྙམ་ནས་སོང་སྟེ་ཉོས་ནས་འོང་བ་འདི་ལ། ཆོས་པ་ཡིན་ཟེར་མཁན་འགའ་རེས་རྣམ་གསུམ་དག་པའི་ཤ་ཡིན་ཚོད་ཟེར་དགའ་དགའ་སྤྲོ་སྤྲོ་བྱས་ཉོ་བ་འདི་ངས་བལྟས་ན་དག་མ་དག་མི་ཤེས་ཏེ། ངེས་ངེས་པོ་གསུམ་ཚང་བ་ཁྲིག་ཁྲིག་རེད། བློ་གྲོས་ཅན་གྱིས་ཐུགས་བསམ་རེ་ཐོངས། དེང་སང་བླ་མ་དགེ་བཤེས་སུ་ཡིན་ཡང་སྡིག་པར་སྐྲག་པ་ལྟར་མཛད་པ་མང་ཡང་། གཞན་གྱིས་བསད་པའི་ཤ་ཉོས་ནས་ཟོས་པ་འདི་ལ་ཉེས་དམིགས་ཆེ་སྙམ་ནས་སྐྲག་པ་ཉུང་བར་གདའ། བླ་མ་རེས་དགོན་རེ་བཏབ་ནས་བསྟན་པ་བཙུགས་ཚོ་ཟེར་ཏེ། ཕྱོགས་དེར་སྲོག་གཅོད་སོགས་མི་དགེ་བའི་ལས་སྔར་བས་ཆེ་བ་ཚུགས་བྱུང་ན་ནི། སྡིག་རྒྱུན་ཞིག་ཚུགས་སོང་བ་ཡིན། བསྟན་པ་ཚུགས་ཡོད་པར་མ་སེམས། སྲོག་གཅོད་ཀྱི་ལས་འདི་ལ་མ་འཛེམ་ན་ནང་པའི་ཆོས་ཀྱང་ལོག་པར་སྤྱད་པ་ཡིན་པས། ཕྱི་རོལ་པ་ལ་ཆོས་ལོག་ཅེས་སྨོད་

རྒྱུ་སྤུ་ཙམ་མི་འདུག །མིང་མ་གཏོགས་དོན་གྱིས་གཅིག་པར་གདའ། སྐྱབས་མགོན་རྒྱལ་བ་ཡབ་སྲས་སེར་འབྲས་དགེ་གསུམ་གྱི་བླ་མ་དགེ་བའི་བཤེས་གཉེན་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཐུགས་རྒྱུད་གཏམས་ཡོད་ཟེར་བ་རྣམས་དང་། བོད་ཁྲི་སྐོར་བཅུ་གསུམ་གྱི་ཆོས་རྒྱལ་ཆེན་པོ་སྔ་ཕྱི་རིམ་པར་བྱོན་པ་ཐམས་ཅད་ཀྱིས་ཇག་རྐུ་བྱེད་ས་མེད་ཆང་སོགས་བསྟེན་མི་རུང་ཞེས་བཀའ་ཕེབས་ཞེས་ཡང་ཡང་ཐོས་ཀྱང་། ཤན་པ་རྣམས་ཀྱིས་ཚེ་གང་པོ་ར་ལུག་གཡག་གསུམ་གྱི་སྟེང་ན། གཤིན་རྗེའི་གྲོང་ཁྱེར་ས་འོག་ན་ཡོད་པ་ཡར་ས་སྟེང་དུ་བུད་བཞག་པ་བཞིན་ཉིན་རེ་བཞིན་སེམས་ཅན་བརྒྱ་ཕྲག་མང་པོའི་ཤ་བརྩིགས་ཁྲག་བསྐྱིལ་བ་འདི་གཅོད་དགོས། དགེ་འདུན་པ་རྣམས་ཀྱིས་ཀྱང་ཕ་མའི་སྲོག་ལ་འཚེ་བ་མེད་པའི་སླད་དུ། ཤ་མ་ཟ་ཞེས་ཆོས་གསུངས་ཁྲིམས་བཞག་ཟེར་བ་ཞིག་ད་སྔ་གོ་རྒྱུ་ཆེན་པོ་ཞིག་རང་མི་གདའ། སྡིག་རྒྱུན་འདི་གཅོད་ཐུབ་པ་ཞིག་བྱུང་ན། ཚེ་འདིར་ཡང་བླ་མ་ལྷ་དང་མཁའ་འགྲོ་ཆོས་སྐྱོང་དཀར་ཕྱོགས་ཀྱི་ལྷ་རྣམས་དགྱེས་ཤིང་འཁོར་ནས་སྲུང་སྐྱོབ་བྱེད་ཅིང་། རྒྱལ་ཁམས་ཐམས་ཅད་དུ་ཆར་ཆུ་དུས་སུ་

འབབ་ལོ་ཕྱུགས་ལེགས་པ་དང་། སེར་འབྲས་དགེ་གསུམ་ལྷ་ལྡན་སོགས་ཀྱི་སྐྱ་སེར་ཕོ་མོ་རྣམས་ཀྱི་ནད་རིམས་ཞི་ནས་ཚེ་རིང་ནད་མེད་སྐུ་རིམ་དང་བསྲུང་བའི་མཆོག་ཏུ་འགྱུར། གྲྭ་པ་ཤའི་ཕྱིར་དུ་ཡལ་ནས་ཐོས་བསམ་མི་འོང་བར་ཕ་ཡུལ་དུ་ལོག་འགྲོ་བ་རྣམས་ཀྱང་ལྡོག་མི་དགོས་པར་འགྱུར་བས་ཕན་ཐོགས་ཆེ། དབུས་གཙང་དུ་མཇལ་བའི་མགྲོན་པོ་རྣམས་ཀྱིས་ཀྱང་རྒྱུ་ནོམ་ས་ཤ་ཁུད་དུ་མི་ཡལ་བར་ཆོས་ཕྱོགས་སུ་འགྲོ། ཕྱོགས་ཕྱོགས་ཀྱི་ར་ལུག་གཡག་གསུམ་མང་པོའི་སྲོག་ཀྱང་ཤུགས་ཀྱིས་ཐར་བས། སྐྱབས་མགོན་རྒྱལ་བ་པཎ་ཆེན་སོགས་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་རིང་བའི་ཚེ་སྒྲུབ་ཞབས་བརྟན་གྱི་མཆོག་ཏུ་འགྱུར། ཤ་ཁྲག་ཇོ་བོའི་སྐུ་རྒྱབ་ནས་མ་བཙོང་ན་སྐོར་ལམ་གཙང་སིང་ངེ་བ་བསྟན་པའི་མིག་རྒྱན་དུ་ཡང་མཛེས། སྡིག་སྒྲིབ་ཀྱིས་ཇོ་བོའི་བྱིན་རླབས་ཉམས་པ་ཡང་མི་ཉམས་པར་ཆེ་རུ་འགྲོ། ཤ་ཟོས་པའི་ཉེས་པ་སོགས་མེད་པར་སེམས་ཅན་མང་པོའི་ཚེ་ཐར་པའི་དགེ་བའི་མཐུས་ཕྱི་མར་ཡང་ལྷ་མིའི་གོ་འཕང་ཐོབ་ནས་བདེ། མདོར་ན་ཚེ་འདི་ཕྱི་གང་དུ་བདེ་བ་འབྱུང་

བ་ཚད་ལྡན་གྱི་རྒྱལ་བའི་གསུང་རབ་དགོངས་འགྲེལ་ལ་བལྟས་ན་གསལ་བ་ཀུན་གྱི་ཐུགས་ན་མངའ་བ་དེ་རེད་གསལ་བཏབས་པ་མ་གཏོགས་ཞུ་ཅི་དགོས། གཞན་ཡང་ངེད་རྣམས་ཀྱིས་སོ་ཐར་བྱང་སེམས་སྔགས་སྡོམ་རྣམས་ཁས་བླངས་ལམ་རིམ་བློ་སྦྱོང་ཕྱག་རྫོགས་ལམ་འབྲས་ཞི་བྱེད་གཅོད་ཡུལ་སོགས་མདོ་སྔགས་ཆོས་ཀྱི་ཉིང་ཁུ་རྣམས་ཉམས་སུ་ལེན་མཁན་རྣམས་ཀྱིས་གྲལ་ཡིན་ཕྱིན་དངོས་སམ་བརྒྱུད་ནས་སེམས་ཅན་ལ་གནོད་པར་འགྱུར་བའི་ལས་ཐམས་ཅད་སྤངས་ནས་ཕན་གང་ཐོགས་བྱེད་དགོས། ཁྱད་པར་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་ནས་བཟུང་སེམས་ཅན་ཐམས་ཅད་ཕ་མ་རུ་བསམས་ནས་ཉམ་ཐག་ཀུན་ལ་སྙིང་རྗེ་བསྐྱེད་དགོས། དྲིན་གཟོ་ལ་ཕན་འདོགས་བྱེད་དགོས་པ་དེ་བདེན་པར་ཁས་ལེན་ན། ད་ལྟ་སྟོན་པའི་རྗེས་འཇུག་ཏུ་ཁས་ལེན་པའི་འོ་སྐོལ་རྣམས་ཀྱིས་ཕ་མ་སེམས་ཅན་ཉམ་ཐག་ར་ལུག་གཡག་གསུམ་སོགས་ལ་དྲིན་གཟོ་རུ་ཕན་ཞིག་མི་འདོགས་རུང་། སྲོག་དབུགས་བཅད་པའི་ཤ་ཁྲག་དམར་པོ་ཟོས་ནས་ཕམ་གླན་པ་འདི་ཤིན་ཏུ་མི་རིགས་ཏེ། དེང་སང་འཇིག་རྟེན་པ་སྨོས་ཅི་དགོས། དགེ་འདུན་

པ་རྣམས་ཀྱིས་ཕལ་ཆེ་བའི་ལོངས་སྤྱོད་ཀྱི་གཞི་མ་ཤ་འདི་ཁོ་ན་ལ་བྱས་ཚེ། ཟ་བ་པོ་མང་བཞིན་ཕ་མ་ར་ལུག་གི་སྲོག་ལ་འཚེ་བ་མང་པོ་འདི་བྱུང་བ་ཡིན་པས། དགེ་འདུན་པ་རྣམས་ཀྱིས་སྡིག་ཟས་ཕ་མའི་ཤ་ཁྲག་དམར་པོ་ལ་ལོངས་སྤྱོད་པ་འདི་སྟོན་པའི་རྗེས་འཇུག་རྣམས་ཀྱི་སྤྱོད་ཡུལ་ཞིག་གཏན་ནས་མ་ཡིན། སྙིང་རྗེ་མེད་པའི་བདུད་དང་སྲིན་པོ་གཤིན་རྗེ་རྣམས་ཀྱི་སྤྱོད་པ་མ་ནོར་བ་དངོས་ལག་ལེན་ལ་བཏབ་པ་ཡིན་པས། བསྟན་འགྲོ་ལ་གཅེས་སྤྲས་མཛད་འདོད་པའི་བྱང་ཆུབ་སེམས་དཔའ་འདྲ་ཡོད་ན། སྙིགས་དུས་བཙུན་པ་རྣམས་ཀྱི་སྤྱོད་ཁྱེར་ངན་པ་འདི་ལ་ཐུགས་རྗེ་རེ་གཟིགས་དགོས་ཏེ། ལྕང་སྐྱ་ཐམས་ཅད་མཁྱེན་པའི་ཞལ་གྱི་བུམ་བཟང་ལས། སེམས་ཅན་ཤ་ཁྲག་རུས་གསུམ་སྤུངས་དཀྱིལ་དུ། །གྲི་འཕྱར་མཆིལ་མིད་ཆེས་ཆེར་རིངས་ཤིང་རྔམས། །དཔུང་ཚོགས་དགྲ་བགེགས་འདུལ་ལ་ཆས་འདྲ་བའི། །དགེ་འདུན་གཟུགས་བརྙན་རྣམས་ལ་ཐུགས་རྗེས་གཟིགས། །ཞེས་གསུངས་པ་དེ་ཐུགས་ཤིན་ཏུ་མད་དེ། དེའི་རྒྱུ་མཚན་ཡང་འདི་ལྟར་སོམས་དང་ཧ་གོ་ཡོང་། ཕ་མ་ར་ལུག་འབྲི་

གཡག་ལ་སོགས་སེམས་ཅན་ལས་ངན་པ་མང་པོ་ཡུལ་ཐག་རིང་པོ་ནས་དེད་འོང་དུས་ལྟོགས་སྐོམ་ངལ་བས་སྡུག་བསྔལ་མྱང་། ཤན་པའི་སྒོ་དྲུང་དུ་སླེབས་ནས། སྡིག་ཅན་ཤན་པ་མིག་དམར་གྱི་ལག་ཏུ་སྤྲད་ནས་མགོ་བཅད་དེ་གསོད་པའམ། ཡང་ན་ཁ་བསུམ། ཡང་ན་རྩིབ་ལོགས་ནས་སྙིང་ལ་གྲི་ཕྲ་མོའམ་འབུག་རྣོན་པོ་རྒྱག །ཡང་ན་བྲང་གཤགས་ནས་ཁོག་ཏུ་ལག་པ་བཏང་ཏེ་སྲོག་རྩ་དམར་པོ་བཅད་ནས་གསོད་པའི་དུས་སྐབས་རྣམས་སུ། ར་ལུག་གང་ཡིན་ཡང་དངངས་ཤིང་སྐྲག་ནས་འཐེན་བསྐོར་བྱས། སྐད་འདོན་སུག་བཞི་འདར། བཤན་པའི་གདོང་ལ་མིག་ཧྲིག་ཧྲིག་བལྟ། ལུག་འགའ་རེ་མིག་མཐར་ཆུ་འཁྱིལ་མཆི་མ་ཁྲིལ་ལེར་གཏོང་། སྙིང་རྗེ་རྒྱུ་དེ་ན་ཡོད་མོད། དེ་མཐོང་ཞིང་ཐོས་ན་བླ་མ་དགེ་འདུན་པ་ཞིག་མི་དགོས། རྒན་རྒོན་གཞོན་ནུ་སྙིང་རྗེ་ཅན་གྱི་མིག་ནས་མཆི་མ་འཆོར། དེ་ཚོ་བསམ་ན་ཤ་ཟོས་པ་ཕ་མ་གཉིས་ཀྱི་ཤ་ཟོས་པ་ལས་ཐུ། སྲོག་དབུགས་གཅོད་དུས་བཟོད་བླགས་མེད་པའི་ན་ཚ་སྡུག་བསྔལ་བསམ་གྱིས་མི་ཁྱབ་པ་མྱོང་། ཇ་ཐེབ་རེ་ལ་འཆི་རྒྱུ་མེད། ལུས་པོ་ཤིག་ཤིག་ཡོམ་ཡོམ་འགུལ།

འོ་སྐོལ་རྣམས་ཀྱི་མགོ་གཅོད་པ་དང་། ཁ་སྣ་བསུམ་པའམ། ཡང་ན་ཁོག་ཏུ་ལག་པ་བཏང་ནས་སྲོག་རྩ་འཐེན་པ་ཕར་ཞོག །རང་གི་ཤ་སེན་མོ་གཉིས་ཀྱི་བར་དུ་འཚིར་དང་། དེ་ཙམ་གྱི་སྡུག་བསྔལ་མི་བཟོད་ན། ཕ་མ་ར་ལུག་རྣམས་ཀྱིས་དེ་བས་བརྒྱ་སྟོང་འགྱུར་གྱི་སྡུག་བསྔལ་མྱངས་ནས་ཤི་བ་ཡིན་པས། དེ་ལྟར་རང་ལུས་ལ་དཔེ་བླངས་བསམ་མནོ་ཞིབ་ཏུ་བཏང་ན་བྱང་ཆུབ་སེམས་དཔའ་རྣམས་སྙིང་རླུང་ལྡངས་ན། འོ་སྐོལ་རྣམས་ལ་སྙིང་མེད་ན་མ་གཏོགས་ཡོད་ན་སྙིང་རྗེ་ཞིག་སྐྱེ་དགོས་ཏེ། དཔེར་ན་ཚེ་འདིའི་རང་གི་མ་རྒན་གཞན་གྱིས་བསད་ནས་ཤ་བཙོས་དྲངས་ན་མ་དེ་ལ་སྙིང་རྗེ་སྐྱེའམ་མི་སྐྱེ། དཔེ་དེ་བཞིན་དུ་ར་ལུག་གཡག་གསུམ་གང་ཡིན་ཡང་རང་གི་ཚེ་སྔོན་མའི་མ་དྲིན་ཅན་ཡིན་པས། གཞན་གྱིས་བསད་ནས་བྱིན་ཀྱང་སྙིང་རྗེ་ཞིག་ཅི་ལ་མི་སྐྱེ། གལ་ཏེ་སྙིང་རྗེ་མི་སྐྱེ་རུང་། འདོད་སྲེད་ཅིག་སྐྱེས་ནས་ཟ་མཁན་རྣམས་ལས་ཀྱི་སྲིན་པོ་བས་སྙིང་རྗེ་ཆུང་ཞིང་། ཁྲ་དང་སྤྱང་ཀི་བས་ཤ་དད་ཆེ་བ་ཡིན་ཏེ། སྔོན་རྒྱལ་པོ་གླང་དར་གྱིས་བསྟན་པ་བསྣུབས་ནས་བསྟན་པ་ཕྱི་དར་གྱི་དུས།

ལྷ་བླ་མ་ཡེ་ཤེས་འོད་ཀྱིས་བོད་ཀྱི་ཆོས་ལོག་པར་སྤྱོད་ཚད་ལ་བཀའ་ཤོག་བརྫངས་པ་ལས། ལས་ཀྱི་སྲིན་པོ་བས་ནི་སྙིང་རྗེ་ཆུང་། །ཁྲ་དང་སྤྱང་ཀི་བས་ནི་ཤ་དད་ཆེ། །སོགས་གསུངས་ནས། སྡེ་སྣོད་གསུམ་གྱི་ཆོས་ལ་སྐུར་བཏབ་ནས། །མནར་མེད་དམྱལ་བར་སྐྱེ་བ་སྙིང་རེ་རྗེ། །གསུངས་པ་ཐུགས་བདེན་ཏེ། ཤ་ཡི་ཕྱིར་ཕ་མ་སེམས་ཅན་མང་པོའི་སྲོག་ལ་ཉིན་རེ་བཞིན་འཚེ་བ་མཐོང་ཐོས་བཞིན་དུ་བླ་མ་དགེ་བཤེས་རྣམས་ཀྱི་རྒྱུད་ལ་ཡང་སྙིང་རྗེ་ཞིག་མི་སྐྱེ། སེམས་ཅན་འདི་ཀུན་སྙིང་རྗེ། ཤ་འདི་སྡིག་པའི་རྩ་བ་རང་རེད། ཤ་ཟ་མི་རུང་བར་འདུག་ཅེས་ཆོས་ཤིག་ཀྱང་མི་གསུང་བར་ཅི་བདེར་ལོངས་སྤྱད་ན་སྙིང་རྗེ་མེད་པའི་སྲིན་པོ་ལས་ངན་ཏེ། ལྷོ་ནུབ་སྲིན་པོའི་ཡུལ་ན་ཡང་སྲིན་པོ་རྒན་པ་རྣམས་ཀྱི་ཁ་སྐད་ལ། སྲིན་པོ་གདོང་དམར་བོད་ཀྱི་ཡུལ་ན་ཤ༡་ཁྲག༢་ཟོས༡་འཐུང༢་བ་ཙམ་དུ་མ་ཟད། རུས་པ་ཡང་བརྡུངས་ནས་ཁུ་བ་འཐུང་བ་རེད་དེ་ཞེད་གི་ཞེས་གླེང་སྐད། དེས་ན་སྲིན་པོ་ལས་ངེད་ཚོ་སྙིང་རྗེ་ཆུང་། སྙིང་རྗེ་མེད་པའི་སྲིན་པོ་ཞིག་གཞན་ན་ཡོད་མ་སེམས། ཁྲ་དང་སྤྱང་ཀི་སོགས་ཀྱིས་ཉི་མ་རེ་གཉིས་རེ་ལ་ཤ་མེད་པར་

འདུག་དུས་མང་། ཤ་ཡིས་འགྲངས་ཚེ་ལྟོགས་རགས་བར་དུ་ཤའི་ཕྱིར་དུ་མི་འབད་པར་ས་ཞིག་ལ་བབས་ནས་ལྷོད་དེ་སྡོད། ངེད་ཚོའི་བླ་མ་དཔོན་པོ་ལ་སོགས་པའི་མི་ཕལ་ཆེ་བ་ཉིན་གཅིག་ལ་ཤ་མེད་པར་སྡོད་མི་ཚུགས། ཤས་རྒྱགས་རུང་ད་དུང་ཕྱིན་ཆད་ཟ་དགོས་སྙམ་ཤ་མང་པོ་ཉོ། ཤ་རིན་གྱི་ནོར་རྫས་མང་པོ་གསོག་འཇོག་བྱེད་པས། ཁྲ་དང་སྤྱང་ཀི་རྣམས་ལས་ངེད་ཚོ་ཤ་དད་ཆེ་ངེས། དེས་ན་སྡེ་སྣོད་གསུམ་ན་སྟོན་པའི་རྗེས་འཇུག་རྣམས་ཀྱིས་སེམས་ཅན་ལ་དངོས་སམ་བརྒྱུད་ནས་གནོད་པའི་བྱ་སྤྱོད་ངན་པ་འདྲ་གཏན་ནས་བྱེད་མི་རུང་ཞེས་གསུངས་ཚད་ལ། ཁ་གསང་ནས་མིན་ཞེས་མ་སྨྲས་པ་ཙམ་མ་གཏོགས་དོན་གྱིས་སྐུར་བ་བཏབ་པར་འགྱུར་བས། མནར་མེད་དམྱལ་བར་སྐྱེ་ངེས། ཅི་ལ་མི་སྐྱེ། དེ་རུ་སྐྱེ་བའི་རྒྱུ་སྒྲུབ་པའི་འོ་སྐོལ་སྙིགས་དུས་ཀྱི་ཆོས་པའི་གཟུགས་བརྙན་ཕལ་ཆེ་བ་རྣམས། ལྷ་བླ་མ་ཡེ་ཤེས་འོད་སོགས་སར་གནས་ཀྱི་བྱང་ཆུབ་སེམས་དཔའ་རྣམས་ཀྱི་སྙིང་རྗེའི་ཡུལ་ལས་གཞན་འོས་ཅི་ཡོད་ལེགས་པར་སོམས་དང་ཧ་གོ་ཡོང་། འོ་ན་སངས་རྒྱས་ཀྱིས་རྗེས་འཇུག་རྣམས་

ལ་རྣམ་གསུམ་དག་པའི་ཤ་གནང་ངོ་ཟེར་ན། གནང་བ་བྱིན་པ་ལ་ཡང་རྣམ་པ་མང་བས། ཐམས་ཅད་པོ་ར་ཆུ་ལ་བརྒལ་བ་བཞིན་བྱེད་ག་ལ་རུང་། ཡུལ་ཕྱོགས་དེ་ན་ཤ་མ་གཏོགས་འཚོ་བའི་ཟས་གཞན་མེད། ཡུལ་དུས་ཀྱི་དབང་གིས་སྲོག་འཚོ་བའི་ཕྱིར་བསྟེན་དགོས་པ་བྱུང་ན། དགག་བྱ་བ་ལ་དགོས་པ་གཙོ་བྱ་བ་ཡིན་པས། རྣམ་གསུམ་དག་པའི་ཤ་ཅུང་ཟད་ཙམ་རེ་བསྟེན་ཆོག །དགེ་སློང་རྒན་པ་རླུང་གིས་འཆི་ལ་ཉེ་བའི་ནད་རྩི་ལ་ཟས་གཞན་གྱིས་ཕན་པ་མ་བྱུང་བར་ཤས་ཕན་ན་རྣམ་གསུམ་དག་པའི་ཤ་བསྟེན་ཆོག་ཅེས་གསུངས་པ་ཡིན་གྱི། གཞན་ཟས་དཀར་གསུམ་མངར་གསུམ་རྩམ་པ་གྲོ་ཞིབ་འབྲས་སོགས་ཅི་འདོད་ཟ་རྒྱུ་ཡོད། དགོས་པ་གཞན་མེད་བཞིན་དུ་བསྟེན་རུང་ཆོག་ཅེས་པའི་ཚིག་ཏུ་འཁྲུལ་པར་མི་བྱ་སྟེ། དེ་ཡིན་ན་སངས་རྒྱས་ཀྱིས་ཕྱིན་ཆད་ངའི་ཉན་ཐོས་རྣམས་ཤ་བཟར་མི་རུང་ངོ་ཞེས་བཅས་པ་མཛད་པ་དང་། ཤ་ཆང་གཉིས་རང་གིས་ལོངས་སྤྱོད་པ་ལྟ་ཅི་སྨོས། གཞན་ལ་བྱིན་པ་ཡང་དམྱལ་བ་ངུ་འབོད་དུ་སྐྱེ་ཚུལ་སོགས་ཤ་ཟོས་པའི་ཉེས་དམིགས་མཐའ་ཡས་པ་གསུངས་པ་ཐམས་ཅད་རྫུན་ཡིན་ཞེས་སྨྲ་

དགོས། གཞན་ཡང་སངས་རྒྱས་ཀྱིས་རྣམ་གསུམ་དག་པའི་ཤ་ཤན་པའི་ལག་ནས་བླངས་གསུངས་པ་ཡང་རྣམ་པ་མང་། དེ་ཡུལ་དུས་དང་བསྟུན་དགོས་ཏེ། སྔོན་སངས་རྒྱས་ཀྱི་དུས་དང་། དེང་སང་གི་དུས་ཀྱི་དགེ་འདུན་པ་དང་ཤན་པ་རྣམས་ཀྱིས་བསམ་སྦྱོར་གཅིག་དགོས་མོད། སངས་རྒྱས་ཀྱི་དུས་ལུང་རྟོགས་ཀྱི་བསྟན་པ་དར་བས། དགེ་འདུན་པ་རྣམས་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་གཞན་དབང་དུ་སོང་ནས་ཤ་མི་ཟ་ནོར་རྫས་གསོག་འཇོག་གཏན་ནས་མི་བྱ། ཕྱོགས་གཅིག་ཏུ་འཚོགས་ནས་དུས་རྒྱུན་མི་སྡོད། བོད་བཞིན་དགོན་པ་མང་པོ་ཡང་མེད། དེའི་དུས་ཀྱི་ཤན་པ་རྣམས་ཀྱིས་ཀྱང་རང་གི་ཁ་དང་ཉེ་འབྲེལ་སོགས་ཀྱི་ཆེད་མ་གཏོགས་གཞན་དགེ་འདུན་པས་ལོངས་སྤྱོད་སྙམ་དེ་ལ་དམིགས་ནས་ར་ལུག་གཅིག་ཙམ་ཡང་གསོད་པའི་བསམ་སྦྱོར་མེད། དེའི་དུས་དགེ་འདུན་པ་རྒན་པ་རླུང་ཤས་ཆེ་བ་འཆི་ལ་ཉེ་བའི་རླུང་ནད་ལ་ཕན་ཕྱིར་ཤན་པའི་ལག་ནས་ཤ་ཅུང་ཟད་རེ་བླངས་ནས་ཟོས་ཀྱང་རྣམ་གསུམ་དག་པ་ཡིན་པ་དེ་བདེན་ཀྱང་། དེང་སང་སངས་རྒྱས་ཀྱི་བསྟན་པ་དར་

དར་འདྲ་ཡང་། ལུང་གི་བསྟན་པ་ཙམ་མིན་རྟོགས་པའི་བསྟན་པ་ཉམས་པའི་དུས་ངན་འདིར། དགེ་འདུན་པ་ཕལ་ཆེ་བ་དུག་གསུམ་དུག་ལྔའི་གཞན་དབང་དུ་སོང་། སྡིག་ཟས་ཕ་མའི་ཤ་ཁྲག་འདི་ལོངས་སྤྱོད་ཀྱི་གཞི་མར་བསྟེན། གསོག་འཇོག་ཁྱིམ་པ་ལས་ཆེ་བ་བྱས། དགོན་ཆེན་ཀྱང་མང་པོ་ཚུགས་བྱུང་ཚེ། ཤན་པ་རྣམས་ཀྱིས་ཀྱང་དགེ་འདུན་པ་རྣམས་ཀྱིས་ཤ་ཟ་བ་དང་རིན་ཆེན་པོ་བྱིན་ནས་ཉོ་བ་ཤེས། དགེ་འདུན་པ་སྤྱི་ལ་དམིགས་ནས་ཕ་མ་ར་ལུག་མང་པོ་བསད། དགེ་འདུན་པ་རྣམས་ལ་ཤ་དགོས་ཤའི་ཕྱིར་དུ་ཕ་མའི་སྲོག་གཅོད་དགོས། སྲོག་གཅོད་པ་ལ་ཤན་པ་འཇོག་དགོས་བྱུང་ནས། ཤན་པ་ཡོད་ཚད་བསམ་བཞིན་དུ་དགོན་པའི་ཐག་ཉེར་བཞག །བཤན་པས་དགེ་འདུན་པ་སྤྱི་ལ་དམིགས་ནས་ཕ་མ་ར་ལུག་གཡག་གསུམ་གསོད་པ་མཐོང་ཐོས་དོགས་གསུམ་ཡོད་བཞིན་དུ། རྣམ་གསུམ་དག་པ་ཡིན་ཞེས་སྨྲས་ན། དེ་དགེ་འདུན་པ་ཡོངས་ལ་རྫུན་གྱི་ཕམ་པ་ཡང་འབྱུང་ཉེན་ཆེ་ལ། དགེ་འདུན་ཡོངས་ཀྱི་ཁ་ནས་མ་བཤད་པ་མ་གཏོགས་དོན་གྱིས་བཤན་པ་རྣམས་ལ་གསོད་པ་ཁྱེད་ཚོས་སོད་དང་ཉོ་བ་ངེད་ཚོས་ཉོ་ཞེས་བཤད་པ་

དང་ཁྱད་པར་མེད། ཁ་ནས་ཕར་ལུག་འདི་སོད་དང་། ཤན་པས་ཚུར་ལ་དགེ་འདུན་པ་རྣམས་ལ་དམིགས་ནས་ལུག་འདི་ཙམ་ཞིག་བསད་ཅེས་མ་བཤད་པ་ཙམ་གྱིས་རྣམ་གསུམ་དག་པར་མི་འགྱུར། དེས་ན་དེང་སང་དགོན་པའི་ཐག་ཉེའི་བཤན་པས་བསད་པའི་ཤ་འདི་རྣམ་གསུམ་མི་དག་པར་མ་ཟད། ཕྱོགས་དེར་འཚོགས་པའི་དགེ་འདུན་ཤ་བཞེས་ཚད་སྤྱི་ལ་དམིགས་ནས་བསད་པའི་བསྔོས་ཤ་ཡིན་པས། བློ་གྲོས་དང་ལྡན་པ་རྣམས་ཀྱིས་དགོན་མཐའ་ན་གནས་པའི་ཤན་པས་བསད་པའི་ཤ་འདི་ལོག་འཚོ་རུ་བསམས་ནས་འཛེམས་པ་གལ་ཆེ། དེས་ན་སངས་རྒྱས་ཀྱི་གསུང་དེ་འདྲའི་རིགས་ཡུལ་དུས་དང་བསྟུན་ཤེས་དགོས། དེང་སང་བླ་མ་རྣམས་ལ་ཡང་སྦྱིན་བདག་གིས་ཁྱེད་ཀྱི་འཚོ་བ་ལ་ལུག་ཅིག་བསད་ནས་ཤ་འདྲེན་རྒྱུ་ཡིན་ཞེས་ཞུས་ན། ངོ་ཚ་ནས་འཛེམ་པ་འདྲ་ཡིན་ན་མ་གཏོགས། སྦྱིན་བདག་གིས་བླ་མ་ལ་དམིགས་ནས་ལུག་བསད་དེ་དྲངས་ན། ལུག་དེ་གང་ཡིན་ཀྱང་བླ་མས་མཐོང་ཐོས་དོགས་གསུམ་ཡོད་ཀྱང་། རང་གིས་ཟོས་པས་མི་ཆོག་གཞན་ལ་ཡང་ཟོ་ཟོ་ཟེར་གྲྭ་པ་རྣམས་གྲོགས་སུ་

སྦྲན་ནས་ཟ་བ་མང་། བསྔོས་ཤ་ཟེར་བ་དེ་བླ་མ་ཡིན་ཀྱང་ཁྱེད་ལ་ལུག་བསད་ནས་འདྲེན་རྒྱུ་ཡིན་ཞེས་ཞུ་དགོས་པ་མིན། བླ་མ་ལ་དམིགས་ནས་བསད་པ་དེ་བླ་མ་ཁོ་རང་གིས་མཐོང་ཐོས་དོགས་གསུམ་བྱུང་བ་དེས་ཆོག་ཡོང་། གལ་ཏེ་རྣམ་གསུམ་དག་རུང་སོ་ཐར་བྱང་སེམས་སྔགས་སྡོམ་བླངས་ནས། ལམ་རིམ་བློ་སྦྱོང་ཕྱག་རྫོགས་ལམ་འབྲས་ཀྱི་ནང་ལྟར། བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་བའི་བྱང་ཆུབ་སེམས་དཔའ་འམ། ཉན་ཐོས་ཀྱི་ཆ་ལུགས་འཛིན་པ་རྣམས་ཀྱིས་སེམས་ཅན་ར་ལུག་རྣམས་ཕ་མ་རུ་བསམས་ནས། དེའི་སྲོག་ལ་གནོད་ཀྱིས་དོགས་ནས་མི་ཟ་བ་དང་སངས་རྒྱས་ཀྱི་བསྟན་པ་སྙིང་རྗེ་ལ་རག་ལས་པས། བསྟན་པའི་མིག་རྐྱེན་ལ་ཕན་པའི་ཕྱིར་ཡང་ཤ་གཏན་ནས་མི་ཟ་བ་ཞིག་གལ་ཆེ་སྟེ། འབྲུག་པ་ཀུན་ལེགས་ཀྱིས། བསམ་མནོ་བཏང་ན་ཕ་མའི་ཤའམ་བུའི་ཤ་སུས་ཟ་ནུས། ཉན་ཐོས་རྣམས་ཁ་ཤ་ཟ་བར་འདོད་པ་དང་། རང་ལ་ཉེས་པར་འགྱུར་བའི་དམིགས་ཤ་མ་བྱུང་ན། དེས་ཆོག་པར་བརྩིས་ནས། ཉན་ཐོས་རྣམ་གསུམ་དག་པའི་ཤ། །ཟ་བར་རུང་གིས་མི་ཟ་ན། །ལྷས་སྦྱིན་གྱི་ནི་བརྟུལ་ཞུགས་

འགྱུར། །གསུངས་པ་ལ་འཁྲིས་ནས་ཤ་བཞེས་ཀྱིན་འདུག་སྟེ། འདི་ལ་མཚུངས་པ་ཞིག་ཞུ་ན། སྟུ་ཤར་པོ་གསུམ་འཁོར་བ་ཞིག་ལ་བྱས་ཨེ་ཆོག །མི་ཆོག་ན་ཚོང་འདུས་གསུམ་དུ་མ་བྲིན་པའི་ཤ་ཡང་ཟོས་མི་ཆོག །དོན་ལ་མི་བསམ་པར་ཚིག་ལ་འཁྲིས་པ་འདིས་ཕུགས་སྐྱོན་གཅིག་ནི་རང་ལ་འོང་གསུངས། འོ་ན་ལྷ་ས་གཞིས་ཀ་རྩེ་སོགས་ཀྱི་ཤན་པ་འདི་རྣམས་ཀྱི་ནང་ནས་སངས་རྒྱས་བྱང་སེམས་ཀྱི་སྤྲུལ་པས་ཡར་འདྲེན་པ་ཡང་ཡོད་སྲིད། སྔོན་ཡང་ཡོད་པའི་རྒྱུ་མཚན་ལོ་རྒྱུས་འདུག་པས། ལྷ་སའི་ཤན་པ་འདི་རྣམས་ཀྱི་ལག་ནས་ཉོས་ན་ཉེས་པ་མེད་ཟེར་ན། སྔོན་དེ་འདྲ་རེ་རེ་ཙམ་བྱུང་འདུག་དེང་སང་ཡང་ལོས་ཡོད་སྙམ་པ་དེ་དག་སྣང་སྦྱང་པ་ཡིན་ན་ལེགས་ཏེ། ཁ་ཤ་ཟ་འདོད་པའི་གཡོ་སྒྱུ་མིན་ན་རུང་སྟེ། ལྷ་སའི་ཤན་པ་ཐམས་ཅད་ཀྱིས་འདྲེན་གྱིན་ཡོད་སྙམ་ནས་ཤ་ཟ་ག་ལ་རུང་། ཤན་པ་སྟོང་གི་ནང་ན་ཡང་འདྲེན་མཁན་གཅིག་ཀྱང་ཨེ་ཡོད་ཅི་ཤེས། སུ་ལ་མངོན་ཤེས་ནི་མེད། ཤན་པ་རྣམས་ཀྱིས་རྣམ་ཤེས་དག་ཞིང་དུ་དྲངས་རྟགས་ཁྱད་པར་ཅན་བསྟན། བླ་མ་དམ་པའི་མངོན་ཤེས་

ཀྱིས་མཁྱེན་ནས་དེས་འདྲེན་པར་ཐག་ཆོད་ཅེས་ལུང་བསྟན་ཐོབ་པའི་ཤན་པ་ཡོད་ན་ལེགས་ཏེ། དེ་འདྲ་དཀོན། གལ་ཏེ་དེ་འདྲ་ཡོད་ཀྱང་སྔོན་སངས་རྒྱས་བྱང་སེམས་རྣམས་ཀྱིས་ཕ་མ་སེམས་ཅན་ཤི་བའི་རྣམ་ཤེས་དག་ཞིང་དུ་དྲངས་ཟེར་བ་རྣ་ཐོས་ཡོད་པས་དེ་ལུགས་མཛད་ན་ལེགས་ཀྱི། སྲོག་བཅད་ནས་རྣམ་ཤེས་དག་ཞིང་དུ་འདྲེན་པ་འདི་འཕྲལ་དུ་ཕ་མ་སེམས་ཅན་སྡུག་ལ། ཕུགས་སུ་རྒྱལ་བ་སྲས་བཅས་ཀྱི་རྣམ་ཐར་དང་ཡང་མི་མཐུན་པའི་འདྲེན་ཚུལ་བཙོག་པ་ཞིག་རེད། དེས་ན་སངས་རྒྱས་བྱང་སེམས་རྣམས་ཀྱིས་ཀྱང་བསྟན་པའི་ཞབས་འདྲེན་འདི་རེ་ཞིག་འཇོག་རོག་གྱིས། འོ་ན་ཤ་ནི་སྙིང་རྗེ་ཅན་གྱིས་ཟ། །ཆང་ནི་དམ་ཚིག་ཅན་གྱིས་འཐུང་། །གསུངས་པའང་འདུག་པས། སྙིང་རྗེ་ཅན་གྱིས་ཤ་ཟོས་ན་སྐྱོན་མེད་ཟེར་ན། དེ་ཡིན་ན་སངས་རྒྱས་དང་འཁོར་ཉན་ཐོས། རྒྱན་དྲུག་མཆོག་གཉིས། ཇོ་བོ་རྗེ་ཡབ་སྲས་སོགས་སྐྱེས་ཆེན་དམ་པ་རྣམས་ཀྱིས་ཤ་ཆང་མ་བཞེས་པར་འདུག་པས། དེ་རྣམས་ལ་སྙིང་རྗེ་དང་དམ་ཚིག་མེད་པ་ཡིན་ནམ། ཡང་ན་དེ་དག་རྣམས་ལས་ཁྱོད་ལ་སྙིང་རྗེ་ཆེན་པོ་ཡོད་ཅེས་ཁས་ལེན་དགོས་པར་འགྱུར།

དེས་ན་སྙིང་རྗེ་ཅན་གྱིས་ཕ་མ་སེམས་ཅན་གྱི་ཤ་ཁྲག་དམར་པོ་ཟ་དོན་མེད། ཤ་ཟ་བ་ལ་སྙིང་རྗེ་མེད་དེ། ཞི་བྱེད་ཀྱི་རྒྱུད་ལས། ཤ་ཟ་བ་ལ་སྙིང་རྗེ་མེད། །གསུངས། འོ་ན་ཤ་ནི་སྙིང་རྗེ་ཅན་གྱིས་ཟ་གསུངས་པ་ལ་དགོངས་གཞི་ཅི་ཡོད་ཟེར་ན། བྱང་ཆུབ་སེམས་དཔའ་སྙིང་རྗེ་ཅན་གྱིས་བསྟན་འགྲོ་ལ་དགོས་པ་ཆེན་པོ་ཡོད་ཚེ། རྨ་ལ་ཕན་ཕྱིར་ཁྱི་ཚིལ་གླན་པ་ལྟར་སྲེད་པ་མེད་རུང་། གཞན་ལ་ཕན་པའི་དགོས་པའི་དབང་གིས་སྙིང་རྗེ་བཞིན་ཟ་བ་ལ་དགོངས་ནས་དེ་སྐད་གསུངས་པ་ཡིན་ལ། རང་དགར་སྙིང་རྗེ་ཅན་གྱིས་ཕ་མའི་ཤ་ཟ་བ་ཕར་ཞོག་ལག་ཏུ་ཡང་ལེན་པར་མི་འགྱུར། དེང་སང་དགོས་པ་གང་ཡང་མེད་པར་ཤ་ཟ་བ་རྣམས་ནི་རང་གི་ནང་ན་སྙིང་རྗེ་མེད་པའི་རང་མཚན་ཕྱིར་བསྟན་པ་ཡིན་པས་གཞན་མ་སེམས། མདོ་ཧྲིལ་གྱིས་དྲིལ་བའི་སྙིང་པོ་ལ། དེང་སང་སྡེ་དགོན་ཕལ་ཆེ་བའི་ལོངས་སྤྱོད་ཀུན་གྱི་གཞི་མ་རུ་ཤ་ཟ་བ་འདིས་ཕ་མ་ར་ལུག་འབྲི་གཡག་བྱ་ཕག་ལ་སོགས་པའི་སྲོག་ལ་འཚེ་བ་བྱུང་ནས། སེམས་ཅན་གྱི་བདེ་སྐྱིད་འཕྲོག །རྒྱལ་བའི་བཀའ་དང་འགལ་བས་སངས་རྒྱས་ཀྱི་བསྟན་པ་བཤིག་

པར་འདུག །དགེ་འདུན་པ་རྣམས་ཀྱིས་ཤ་མི་ཟ་བ་ཞིག་བྱུང་ན་ཉེས་བྱས་ཀྱི་སྒོ་མང་པོ་ཞིག་རང་བཞིན་གྱིས་ཁེགས་ནས། བསྟན་པ་ཡང་ཡུན་རིང་དུ་གནས་ཤིང་སེམས་ཅན་ལ་བདེ་སྐྱིད་འབྱུང་བར་འགྱུར་ངེས། དེས་ན་རྒྱལ་བ་གཉིས་པ་བློ་བཟང་གྲགས་པའི་དཔལ་ལ་སོགས་པའི་གསར་རྙིང་གི་གྲུབ་མཐའ་ཕལ་མོ་ཆེས་རང་རང་གི་བསྟན་པ་ལ་གཅེས་སྤྲས་སུ་མཛད་འདོད་པའི་ཕྱི་རབས་ཀྱི་བླ་མ་ཆོས་རྒྱལ་རྣམས་ཀྱིས། སྔོན་སངས་རྒྱས་ཀྱི་དུས་རྒྱ་གར་དུ་ཁྲིམས་ཇི་ལྟར་བཅས་པ་དང་། བོད་དུ་བསྟན་པ་སྔ་དར་གྱི་དུས་རྒྱལ་པོ་ཁྲི་སྲོང་ལྡེའུ་བཙན་གྱིས་ཆོས་ཁྲིམས་ཇི་ལྟར་བསྡམས་པ་དེ་ལྟར། དགེ་འདུན་ཡོངས་ཀྱིས་ཀྱང་སྐོམ་དུ་དཀར་དང་ཇ་གསོལ་ཞིང་། ཟས་སུ་འབྲུ་དང་བུར་སྦྲང་མར་ཐུད་སོགས་སྡིག་མེད་ཀྱི་ཟས་མ་གཏོགས་སྡིག་ཟས་ཤ་སོགས་ཟ་མི་རུང་བའི་ཆོས་གསུངས་ཁྲིམས་ཀྱང་འཇོག་དགོས་ཏེ། སངས་རྒྱས་ཀྱི་ཞལ་ནས། ཤ་ནི་གཅན་གཟན་རྣམས་ཀྱི་ཟས། །བཟར་མི་རུང་བར་ཐུབ་ཆེན་གསུངས། །ཟོས་ན་ཉེས་པ་གང་ཡིན་དང་། །མ་ཟོས་པ་ཡི་ཡོན་ཏན་དག །ཤ་ཟ་དེ་ལ་གང་ཡོད་པ། །བློ་གྲོས་ཆེན་པོས་ཤེས་

པར་གྱིས། །འཁྲུལ་བ་དང་ནི་གཉེན་བྱས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་པོ་རྣམས་ནི་དངངས་གྱུར་པས། །རྣལ་འབྱོར་ཅན་གྱིས་ཤ་མི་བཟའ། །ཞེས་དང་། རྒྱལ་པོ་ཁྲི་སྲོང་ལྡེའུ་བཙན་གྱིས། རབ་བྱུང་མཁན་པོས་སྡོམ་ཕོག་ཁྲིམས་བཅས་བཞིན། །སྡེ་སྣོད་གསུམ་ནས་ཇི་ལྟར་བཤད་བཞིན་གྱིས། །དགེ་འདུན་སྐོམ་དུ་དཀར་དང་ཇ་གསོལ་ཅིག ། ཟས་སུ་འབྲུ་དང་བུར་སྦྲང་མར་ཐུད་གསོལ། །གོས་སུ་ཐང་ཤམ་ངུར་སྨྲིག་ཆས་མཛོད་ཅིག ། གནས་སུ་གཙུག་ལག་ཁང་སྡེའི་ནང་དུ་བཞུགས། །ཆང་ནག་ཤ་དང་ལྷད་ཟས་མ་སྟེན་ཅིག ། གསུངས་སོ། །དེས་ན་དེང་སང་བོད་དུ་ཆོས་དར་ཡུན་རིང་ཞིང་དར་ཆེས་དྲགས་པས། ཐམས་ཅད་ཆོས་དྲེད་དུ་སོང་ནས་དགོན་སྡེ་དང་གཙུག་ལག་ཁང་གི་ཐག་ཉེར་མཐོང་ཐོས་དོགས་གསུམ། འབྱུང་བའི་སྡིག་པའི་གྲོགས་པོ་བཤན་པ་ལག་དམར་བཞག་ནས་ཕ་མ་ར་ལུག་བརྒྱ་སྟོང་མང་པོ་བསད། ཤ་ཡི་རྩིག་པ་བརྩིགས། ཁྲག་གི་ཆུ་རྒྱུན་བཙུགས་ནས་བསྟན་པ་ལ་རྨ་ཕབ། སེམས་ཅན་ལ་སྡུག་གཏོང་བ་འདི་ལ་བསྟན་པའི་བདག་པོ་སྟོན་

པ་སངས་རྒྱས་དང་། རྒྱལ་བ་བློ་བཟང་གྲགས་པ་སོགས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཐུགས་རྗེ་རེ་གཟིགས་ཞེས་གསོལ་བ་འདེབས། རྒྱལ་བ་ཡབ་སྲས་རྒྱལ་ཚབ་དམ་པ་དགའ་ལྡན་གསེར་ཁྲི་སོགས་བསྟན་འཛིན་གྱི་སྐྱེས་བུ་དམ་པ་ད་ལྟར་བཞུགས་པ་དང་། སླད་ནས་འབྱོན་པ་རྣམས་ཀྱིས་འདི་ལ་ཐུགས་མཉམ་རེ་ཞོག་ཅེས་ཐུགས་རྒྱུད་འགྲོ་བའི་དོན་དུ་བསྐུལ། སྐྱ་སེར་ཕོ་མོ་བློ་ལྡན་སྙིང་རྗེ་ཅན་རྣམས་ཀྱིས་ཕ་མ་སེམས་ཅན་གསོད་པའི་ཤན་པ་དང་ཤ་ཁྲག་དམར་པོའི་ཟས་ངན་པ་འདི་ལ་ལྟག་པ་རེ་སྟོན་ཅེས་སྙིང་ཐག་པ་ནས་སྨྲས་པ་ཡིན་པས་སེམས་ལ་ཞོག །ཁྱད་པར་ཁྱེད་བླ་མ་སྐྱེས་བུ་དམ་པ་རྣམས་ཀྱིས་བསད་ཚད་གསོ་ནུས་ཤིང་། ཟོས་ཚད་འདྲེན་གྱིན་ཡོད་པ་རྣམས་ཀྱིས་ཀྱང་། དེང་སང་སྙིགས་དུས་འདིར་ཡར་འདྲེན་པའི་ནུས་པ་མཆིས་པའི་བླ་མ་སྐུ་སྐྱེས། དགེ་བཤེས་སྔགས་འཆང་སོགས་སྙིང་ཁམས་ཅན་མང་པོས་སེང་གེའི་མཆོངས་སར་ཝ་ལྡིང་བ་ལྟར་བྱས། རང་གཞན་གཉིས་ཕུང་བྱེད་པར་འདུག་པས། དེ་རྣམས་ལ་ཕན་ཕྱིར་ཡར་འདྲེན་མི་ནུས་པ་ལྟར་མཛོད་ལ་ཤ་མ་ཟ་དང་

འགྲོ་བ་ཡོངས་ལ་བཀའ་དྲིན་ཆེ་བར་འགྱུར་རོ། །སྨྲས་པ། སྙིང་རྗེ་ནམ་མཁའ་མཛོད་ལ་དབང་བསྒྱུར་བའི། །འཕགས་མཆོག་སྤྱན་རས་གཟིགས་ལ་གསོལ་བ་འདེབས། །སྙིང་རྗེས་ཕོངས་པའི་སེམས་ཅན་ཐམས་ཅད་ཀྱི། །རྒྱུད་ལ་སྙིང་རྗེ་ཆེན་པོའི་དངོས་གྲུབ་སྩོལ། །མྱུར་དུ་སངས་རྒྱས་ཐོབ་པར་འདོད་པ་ཡིས། །བྱམས་དང་སྙིང་རྗེ་ལྷག་བསམ་དག་པའི་སྒོས། །སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །རྒྱལ་སྲས་སྤྱོད་པ་རྣམས་ལ་བསླབ་པར་བྱ། །རང་གི་ཚེ་རབས་ཐོག་མ་མ་མཆིས་པས། །ཚེ་སྔོན་ཕ་མར་མ་གྱུར་སེམས་ཅན་མེད། །དངོས་སམ་བརྒྱུད་ནས་ཕ་མ་སེམས་ཅན་གྱི། །སྲོག་ལ་གནོད་པའི་ཤ་ཁྲག་ཟ་མི་རུང་། །སྡིག་ཟས་ཕ་མའི་ཤ་ཁྲག་ཟོས་ཚད་ཀུན། །ཕྱི་མར་དམྱལ་བ་འོ་དོད་འབོད་སོགས་སུ། །བཙོས་ནས་སྡུག་བསྔལ་ཆེན་པོ་མྱོང་དགོས་ཞེས། །ལང་ཀར་གཤེགས་པའི་མདོ་ལས་རྒྱས་པར་གསུངས། །ཤ་ཁྲག་རུས་གསུམ་བཙོས་ནས་ཟོས་གྱུར་ན། །ཕྱི་མར་དམྱལ་བ་ཁྲོ་ཆུ་ཁོལ་མར་སྐྱེ། །ཤ་ཁྲག་ཁམས་གསུམ་ཕུང་བར་བྱེད་པའི་ཟས། །ཡིན་ཞེས་

ཐུགས་རྗེ་ཆེན་པོའི་རྒྱུད་ལས་གསུངས། །ཤ་ཁྲག་ཟོས་པའི་ལུས་ལ་དྲི་ཟ་འདུས། །བཅུད་འཕྲོག་ཕྱི་མར་སྲིན་པོ་ཤ་ཟ་མོ། །ལང་ཀའི་ཡུལ་དུ་དེ་དག་འཁོར་རོ་ཞེས། །རྙིང་རྒྱུད་ཀུན་འདུས་རིག་པའི་མདོ་ལས་གསུངས། །ཤ་ཟོས་ཚེ་ཐུང་ཕལ་ཆེར་དམྱལ་བར་འགྲོ། །ལན་དུའང་སྲོག་གཅོད་རང་ཤ་གཞན་གྱིས་ཟ། །རྒྱུ་སོང་འབྲས་བུ་དེ་དང་མཚུངས་སོ་ཞེས། །རྒྱལ་བུ་དད་པ་བརྟན་པོའི་ཞལ་ནས་གསུངས། །དེའི་ཕྱིར་ཤ་ཡི་ཉེས་དམིགས་ལེགས་བསམས་ནས། །ར་ལུག་ལ་སོགས་སེམས་ཅན་གང་གི་ཤ། །ཡིན་ཀྱང་ནམ་ཡང་ཟ་བར་མི་རུང་ཞེས། །སྟོན་པ་སངས་རྒྱས་ཞལ་ནས་ཡང་ཡང་གསུངས། །ཤ་ལ་སྲེད་པའི་དབང་གིས་ཤ་ཟ་བར། །རུང་བར་འདུལ་བ་ལས་ནི་གནང་ངོ་ཞེས། །ཁོ་བོ་ཅག་ནི་རྣམ་པ་ཐམས་ཅད་དུ། །མི་སྨྲ་དེ་འདྲ་བ་ལ་སྐྱོན་མེད་པར། །གཉིད་ཀྱི་རྨི་ལམ་དུ་ཡང་མི་སྨྲ་འོ། །སེམས་བསྐྱེད་པ་ཡིས་གང་དག་ཤ་ཟོས་ན། །རང་གི་སྙིང་རྗེ་ཆེན་པོ་ཉམས་འགྲོ་ཞིང་། །རོ་ལ་སྲེད་པ་དྲགས་པོ་སྐྱེར་མཐོང་ནས། །དགག་བྱ་དེ་དག་ངེས་པར་འགོག་སླད་དུ། །རྣམ་གསུམ་དག་དང་མ་དག་ཤ་ཐམས་ཅད། །

མི་ཟ་བ་ནི་མཆོག་ཏུ་ངོ་མཚར་ཆེ། །ཞེས་པ་མཁས་གྲུབ་ཐམས་ཅད་མཁྱེན་པས་གསུངས། །སེམས་ཅན་ཤ་ཁྲག་རུས་གསུམ་སྤུངས་དཀྱིལ་དུ། །གྲི་འཕྱར་དགྲ་བགེགས་འདུལ་ལ་ཆས་འདྲ་བའི། །དགེ་འདུན་གཟུགས་བརྙན་རྣམས་ལ་ཐུགས་རྗེ་ཡི། །གཟིགས་ཞེས་ལྕང་སྐྱ་ཐམས་ཅད་མཁྱེན་པས་གསུངས། །ལྷག་པར་བྱང་ཆུབ་སེམས་དཔའ་ཤ་ཡི་རོར། །སྲེད་པ་ཆེ་ན་མ་གྱུར་སེམས་ཅན་ལ། །སྙིང་རྗེ་སྐྱེས་པའང་ཉམས་པར་འགྱུར་རོ་ཞེས། །རྭ་སྒྲེང་ཁྲི་ཆེན་རྡོ་རྗེ་འཆང་གིས་གསུངས། །དེ་ཕྱིར་འཇིག་རྟེན་ཁམས་ན་ཉིན་རེ་བཞིན། །ཤ་ཡི་ཕྱིར་དུ་སེམས་ཅན་གྲངས་མེད་རེ། །གསོད་པ་རྣམས་ལ་སྙིང་རྗེ་ཆེར་བསྐྱེད་ནས། །སེམས་ཅན་གཞན་སྲོག་སྐྱོབ་ལ་འབད་པར་བྱ། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། ༈ །།གཞན་ཡང་གལ་ཆེ་ན་འབུམ་ལ་བརྒྱ་ཚར་འདོན་པའི་དཔེ་ལྟར། ད་དུང་ཡང་ནན་ཏན་གྱིས་བཤད་པར་བྱ་སྟེ། སྟོན་པ་ཐུགས་རྗེ་ཅན་གྱི་གསུང་རབ་ཀྱི་མ་མོ་སོ་སོར་ཐར་པའི་མདོ་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་

གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །གསུངས། སེམས་ཅན་གྱི་སྡུག་བསྔལ་ཞི་ཞིང་བདེ་བ་ཐམས་ཅད་བསྟན་པ་ལས་འབྱུང་སྟེ། སྤྱོད་འཇུག་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག ། གསུངས། བསྟན་པ་དེ་འཛིན་མཁན་ངུར་སྨྲིག་འཛིན་པའི་དགེ་སློང་རྣམས་ཡིན་ཏེ། འཇམ་དཔལ་རྩ་རྒྱུད་ལས། སངས་རྒྱས་བསྟན་པ་རིན་ཆེན་སྣོད། །འབར་བའི་སྣོད་ནི་དཀའ་ཐུབ་ཅན། །ངུར་སྨྲིག་འཛིན་པ་ཤཱཀྱའི་སྲས། །དགེ་སློང་རྣམས་ནི་ཡིན་ཕྱིར་རོ། །གསུངས། དེས་ན་སྡིག་སྤོང་དགེ་བ་སྒྲུབ་པ་སངས་རྒྱས་ཀྱི་བསྟན་པ་ཡིན། དེ་འཛིན་མཁན་རྣམས་དགེ་འདུན་ཡིན་ན། ཕ་མ་སེམས་ཅན་གྱི་སྲོག་བཅད་པའི་ཤ་ཁྲག་འདི་དགེ་འདུན་པ་ཞིག་གིས་ཟ་བ་ཕར་ཞོག །སྐྱེ་བོ་ཕལ་པ་ཞིག་གིས་ཀྱང་ཟ་ག་ལ་ཕོད། སྡིག་ཟས་ཕ་མའི་ཤ་ཁྲག་འདི་དེང་སང་ས་དགེ་རྙིང་འབྲུག་སོགས་ཀྱི་དགེ་འདུན་ཡོངས་ཀྱི་ལོངས་སྤྱོད་ཀྱི་གཞི་མར་བསྟེན་པ་འདི་རྗེས་འཇུག་རྣམས་ཀྱི་སྤྱོད་ཡུལ་ཞིག་

གཏན་ནས་མ་ཡིན་ཏེ། དེ་ཡི་རྒྱུ་མཚན་གང་ཡིན་ཞེ་ན། འོ་སྐོལ་རྣམས་ཀྱི་ཚེ་འཁོར་བ་ཐོག་མ་མེད་པས་སེམས་ཅན་ཐམས་ཅད་ཀྱི་ཕ་མ་མ་བྱས་པ་གཅིག་ཀྱང་མེད་ལ། ཚེ་རབས་སྔོན་མའི་མ་དང་ཚེ་འདིའི་ཕ་མ་གཉིས་ཀྱིས་བསྐྱངས་པ་ལ་ཁྱད་པར་མེད། ཁྱད་པར་ཚེ་སྔོན་མའི་མ་རྣམས་ཀྱིས་ཚེ་འདིའི་མའི་དྲིན་གྱིས་བསྐྱངས་པ་ལས་ལྷག་གིས་ངེད་རྣམས་ཀྱི་དོན་དུ་ལུས་སྲོག་ཀྱང་འཕངས་པ་མེད་པར་བཏང་བའི་དུས་ཀྱང་མང་ཞེས་ཐམས་ཅད་མཁྱེན་པ་སངས་རྒྱས་ཀྱིས་གསུངས་པས་དེ་སུ་ཞིག་གིས་མི་བདེན་ཟེར། དེ་བདེན་པར་རྩི་ན། ཕ་མ་སེམས་ཅན་དྲིན་ཅན་དེ་རྣམས་ཀྱི་དྲིན་ལན་དུ་ད་ལྟ་ཕན་ཞིག་མི་འདོགས་རུང་། སྲོག་བཅད་ནས་ཤ་ཟོས་ཁྲག་འཐུང་བར་མི་རིགས་ཀྱང་། ཤ་ཟོས་པ་ཙམ་དུ་མ་ཟད་རུས་པ་མུར་ཤ་ཡི་བཟང་ངན་གླེང་བ་འདི་སྙིང་རྗེ་མེད་པའི་སྲིན་པོའི་སྤྱོད་པ་མ་ནོར་བ་དངོས་ཡིན་ཏེ། དེ་ཅིའི་ཕྱིར་ཞེ་ན། ཕ་མ་ར་ལུག་རྣམས་སྡིག་ཅན་ཤན་པས་གསོད་ཚེ་དངངས་ཤིང་སྐྲག །འཐེན་སྐོར་མང་པོ་བྱས་སྐད་ངན་འདོན། མིག་མཐར་ཆུ་འཁྱིལ་སུག་བཞི་འདར། ཤན་པའི་གདོང་ལ་མིག་

ཧྲིག་ཧྲིག་བལྟ། མིག་ནས་མཆི་མ་ཁྲི་ལེར་གཏོང་། སྙིང་རྗེ་རྒྱུ་དེ་དུས་ཡོད་མོད། ཤན་པ་ལག་དམར་གྱི་དམེ་ལག་གི་གོན་པའི་ཁ་གྱེན་དུ་བརྫེས། གྲི་རྣོན་པོས་མགོ་བོ་རྦད་ཀྱིས་བཅད་ཚེ། བཟོད་བླགས་མེད་པའི་སྡུག་བསྔལ་མྱོང་། ཇ་ཐེབས་རེ་ལ་ཡན་ལག་ལུས་པོ་ཤིག་ཤིག་ཡོམ་ཡོམ་འགུལ། དེ་སོགས་སྡུག་བསྔལ་མྱོང་བ་བསམ་ན་བྱང་ཆུབ་སེམས་དཔའ་སྙིང་རླུང་ལྡང་ན། འོ་སྐོལ་རྣམས་ཀྱི་སྙིང་འདི་རུལ་བ་ཞིག་ཡིན་ནམ། ཡང་ན་ཆུང་ནས་མེད་དམ། ཡང་ན་ལྕགས་ཤིག་ཡིན་ན་མ་གཏོགས། སྙིང་རྗེ་ཞིག་མི་སྐྱེ་བའི་གནས་ཡོད་དམ། སྔོན་ཤན་པ་ཞིག་གིས་ལུག་མང་པོ་བསད་ནས་སྒོ་ལ་བཤང་གཅི་འདོར་དུ་སོང་བའི་ཤུལ་ན་ལུག་གཅིག་ཡོད་པ་དེས་རང་གི་སྲོག་གཅོད་པར་ཤེས་ནས། ཤན་པའི་གྲི་བཞག་ཡོད་པ་ས་ལ་དོང་བྲུས་ནས་སྦས་སྟེང་དུ་ས་བཀབ་ནས་ཉལ་བསྡད་པའི་ལོ་རྒྱུས་སོགས་སོམས་དང་། དེ་རྣམས་ཨེ་བདེན་མི་བདེན་བལྟ་བར་འདོད་ན། ལྷ་སའི་ཤན་པས་ལུག་གསོད་པའི་ཁང་བའི་སྒོའམ་སྟེང་ནས་སྡོད་ལ་ལུག་བརྒྱ་སྟོང་མང་པོ་ཉིན་རེ་བཞིན་གསོད་པ་ལ་ལྟོས་དང་ཧ་གོ་ཡོང་། ཕ་མ་ར་ལུག་གཡག་

གསུམ་གྱི་སྡུག་བསྔལ་བཟོད་དམ་མི་བཟོད་ཀྱི་ཚད་བལྟ་ན། རང་གི་ཁ་སྣ་བསུམ་པའམ། ཡང་ན་རང་གི་ཤ་པགས་པ་སེན་མོ་གཉིས་ཀྱི་བར་དུ་ཚིར་དང་། ལུག་གི་ཁ་བསུམ་པ་དང་། མགོ་བོ་བཅད་པ་དང་། ཁོག་ཏུ་ལག་པ་བཏང་ནས་སྲོག་རྩ་བཅད་པའི་ན་ཚ་སྡུག་བསྔལ་དེ་བས་བརྒྱ་སྟོང་འགྱུར་གྱི་ཆེ་བས། དེ་ལྟ་བུའི་སྡུག་བསྔལ་སྟེང་དུ་བྱུང་ན་བཟོད་མི་བཟོད་ཀྱི་ཧ་གོ་ཡོང་། དེ་ལྟར་རང་ལུས་ལ་དཔེ་བླངས་བསམ་མནོ་ཞིབ་ཏུ་གཏོང་ཤེས་ན། སྐྱ་སེར་ཕོ་མོ་སུ་ཞིག་ཡིན་རུང་། སྡིག་ཟས་ཕ་མའི་ཤ་ཁྲག་མཐོང་ན་སྙིང་རྗེ་ཞིག་མི་སྐྱེ་རུང་། འདོད་སྲེད་སྐྱེས་ནས་ཟ་བའི་མི་སུ་ཞིག་ཡོད། དཔེར་ན་ཚེ་འདིའི་དྲིན་ཅན་གྱི་ཕ་མ་གཉིས་སམ། ཡང་ན་བུ་བསད་ནས་ཤ་རང་ལ་བྱིན་ན། སྲེད་པ་སྐྱེས་ནས་ཟའམ་མི་ཟ། འབྲུག་པ་ཀུན་ལེགས་ཀྱིས། ཕ་བྱས་པའི་རུས་པའི་ཕུང་པོ་དང་། མ་བྱས་པའི་ནུ་ཞོ་རྒྱ་མཚོར་བསྐྱིལ་ན་ཁམས་གསུམ་སྣོད་དུ་ག་ལ་ཤོང་། དེས་ན་བསམ་མནོ་བཏང་ན་ཕ་མའི་ཤའམ་བུའི་ཤ་སུས་ཟ་ནུས་གསུངས། མཉམ་མེད་པོ་ཏོ་བས། མ་མགྲོན་དུ་བོས་པའི་མདུན་དུ་བུའི་

ཤ་བཙོས་ནས་དྲངས་ན་དགའ་བར་འགྱུར་རམ། དེ་བཞིན་དུ་སངས་རྒྱས་མཆོད་པ་ལ་སྲོག་བཅད་པའི་མཆོད་པ་དེ་དང་མཚུངས་གསུངས། དེ་རྣམས་ལ་བསམ་བློ་གཏོང་མཁན་ནི་མེད། རང་གིས་ལག་བཞག་པ་དང་། ཁས་སོད་ཅེས་བཤད་པའི་ཤ་འདྲ་ཡིན་ན་མ་གཏོགས། གཞན་གྱིས་བསད་པའི་ཤ་གང་ཟོས་ཀྱང་ཉེས་པ་མེད་དམ་སྙམ་ཟ་བ་འདི་སངས་རྒྱས་བྱང་སེམས་རྣམས་ཡི་མུག་སྐྱེ་བའི་རྒྱུ་ཡིན་ཏེ། ཆོས་རྗེ་འབྲུག་པ་ཀུན་ལེགས་ཀྱིས། མོན་པའི་ཁ་གཏམ་ལ། བོད་མིག་མ་ཞིམ་པ་ཡིན། ཁ་མ་ཞིམ་པ་མིན་ཟེར་བ་བཞིན། དངོས་སུ་བསད་ན་ཁྱེད་དེ་འདྲ་མཛད་མཁན་མི་ཡོང་ཟེར། ལྐོག་ཏུ་བསད་ནས་ཤ་ཚིལ་བྱིན་བྱུང་ན། ཡོན་བདག་གིས་གཟབ་ཐུགས་རྗེས་བཟུང་། རྗེས་སུ་ཡི་རང་ཟེར་བ་འདི་ཡི་མུག་གསུངས། དེས་ན་ས་དགེ་རྙིང་གསུམ། འབྲི་དྭགས་ཀར་གསུམ་སོགས་རྒྱ་བོད་ཧོར་སོག་ཏུ་དར་བའི་གྲུབ་མཐའ་གར་ཡོད་ཕལ་ཆེར་གྱི་གཙུག་ལག་ཁང་དང་དགོན་པའི་ཐག་ཉེ་ན། སྡིག་ཅན་ཤན་པ་ལག་དམར་གྱིས་ཤའི་རྩིག་པ་བརྩིགས། མགོའི་ཕུང་པོ་སྤུངས། ཁྲག་གི་རྒྱ་མཚོ་བསྐྱིལ། པགས་པ་དང་

ནང་ཁྲོལ་གཅལ་དུ་བཀྲམ། རྭ་དང་རུས་པའི་ཁང་པ་ཕུག །ཕ་མ་སེམས་ཅན་དྲིན་ཅན་ར་ལུག་གཡག་གསུམ་གྱི་སྲོག་དབུགས་བཅད་པའི་ཤ་ཁྲག་དྲོན་མོ་མཁས་བཙུན་བཟང་གསུམ་གྱིས་ཉོས། བཙུན་ཆུང་ཤེད་ཅན་གྱིས་འཁུར། ཡུལ་དུ་སོང་ནས་དཔུང་ཚོགས་དགྲ་བོ་འདུལ་ལ་ཆས་པ་བཞིན་སེམས་ཅན་ཤ་རུས་མང་པོ་མདུན་དུ་སྤུངས་པའི་དཀྱིལ་དུ། མིག་རིག་རིག་བལྟ་ཞིང་གྲི་འཕྱར་ནས་སྟེང་དུ་རུབ། གྲི་ཡིས་གཙབ། རྔམས་ནས་ཟོས། རྗེས་མེད་ཐལ་བའི་རྡུལ་ཕྲན་བཞིན་དུ་གཏོང་བ་འདིས་སངས་རྒྱས་ཀྱི་བསྟན་པ་བཤིག །དཀོན་མཆོག་གི་དབུ་འཕང་སྨད། དགེ་འདུན་གྱི་སྡེ་བརྫད། སེམས་ཅན་གྱི་བདེ་སྐྱིད་འཕྲོག་པར་ཐག་ཆོད་པས། བསྟན་འཛིན་སྐྱེས་བུ་རྣམས་ཀྱིས་འདི་ཐབས་མཁས་ཐུགས་རྗེ་དུ་མའི་སྒོ་ནས་མེད་པ་ཞིག་མ་བཟོས་ན། ཕྱི་རོལ་པས་ཀྱང་དེའི་ལྷག་བྱེད་རབས་ཀྱང་མེད་ལ། བྱེད་ཚུལ་ཡང་མེད་པར་གདའ། ཆོས་རྗེ་འབྲུག་པ་ཀུན་ལེགས་ཀྱིས། ཤ་ཆང་རྒྱ་མཚོར་བསྐྱིལ་བ་འདི་སྔར་མུ་སྟེགས་པ་ལ་ཡོད་ཟེར། ནང་པ་སངས་རྒྱས་པ་ཡིན་ན་ཅི་སྲིད་གསུངས།

ད་འདི་ལྟར་བྱས་ཕྱིན་ཆད་རྒྱ་གར་དུ་དར་བའི་སངས་རྒྱས་ཀྱི་བསྟན་པ་རིན་པོ་ཆེ་ཡང་རྒྱལ་བ་སྲས་དང་བཅས་པ་གཤེགས་པའི་རྗེས་སུ་རྒྱན་དྲུག་མཆོག་གཉིས་གྲུབ་ཐོབ་བརྒྱད་ཅུ་སོགས་བྱོན་དུས་རྣམས་སུ་རེ་ཞིག་གནས་ཀྱང་། དེ་ནས་རིམ་གྱིས་བསྟན་པའི་རང་སྐྱས་བཏེགས་ནས་འོག་མིན་དུ་ཕེབས་སོང་། དེང་སང་ཡོད་པ་ཕྱི་རོལ་དམར་མཆོད་བྱེད་པའི་ལུགས་དང་འདྲེས་པའི་བསྟན་པ་ཡིན། བསྟན་པ་རྣམ་དག་པོ་མེད་ཟེར་དགོས། དེ་བཞིན་དུ་བོད་དུ་དར་བའི་སངས་རྒྱས་ཀྱི་བསྟན་པ་ཡང་སྔོན་མཁན་སློབ་ཆོས་གསུམ་གཤེགས་པའི་རྗེས་སུ་ཇོ་བོ་རྗེ་དང་རྗེ་བདག་ཉིད་ཆེན་པོ་ཡབ་སྲས་ཀྱི་བར་དུ་སྡིག་པའི་དྲི་མས་མ་གོས་པར་རེ་ཞིག་བཟང་པོ་བྱས་གནས་ཀྱང་། དེ་ནས་རྗེས་འཇུག་ཕལ་ཆེར་ཤན་པ་དང་ཐག་ཉེ་བྱས་བསྡད་པ་དང་བསྟན་པ་ཡང་སྐྱོ་ནས། ཇོ་བོ་རྗེ་ཡབ་སྲས་ཀྱི་དུས་སྐབས་དྲན་ནས་ཡར་དགའ་ལྡན་དུ་ཐེག་སོང་། ད་ལྟ་ཡོད་པ་འདི་ཀུན་ཤན་པ་མིག་དམར་གྱི་ཤ་ཁྲག་དང་འདྲེས་པའི་བསྟན་པ་སླད་ཅན་ཡིན། ད་སླད་མེད་དཀའ་ཟེར་དགོས། དེ་ཅིའི་ཕྱིར་ཞེ་ན། སངས་རྒྱས་ཀྱི་བསྟན་པ་སྡིག་སྤོང་དགེ་སྒྲུབ་ཡིན་པ་དེ་

བདེན་ན། ཀུན་གྱིས་ཤ་མང་པོ་ཉོས་ནས་ཟོས་ཚེ་ཤ་ཁེ་བར་འདུག་སྙམ་ནས་སྲོག་གཅོད་ལ་བརྩོན་པའི་ཤན་པ་མང་པོ་བྱུང་། དེ་རྣམས་ཀྱིས་ཉིན་རེ་བཞིན་ཕ་མ་ར་ལུག་བརྒྱ་སྟོང་མང་པོའི་སྲོག་ལ་འཚེ་བའི་སྡིག་པ་ཚབས་ཅན་བསགས་ནས་བསྟན་པ་སྡིག་པས་བསླད་པ་ཡིན་ལ། ཆོས་པ་འཇིག་རྟེན་པ་ཐམས་ཅད་དང་ཁྱད་པར་དགེ་འདུན་པ་རྣམས་ཀྱིས་ཤ་མ་ཟོས་ན་སྲོག་ལ་འཚེ་མཁན་ཀྱང་མི་འབྱུང་། དཔེར་ན་རྒྱ་གར་བས་ཇ་མ་འཐུང་ཚེ་ཡུལ་དེར་ཇ་བཙོང་ས་མི་འགྲོ་བ་ལྟ་བུའོ། །སྲོག་ལ་འཚེ་མཁན་མེད་ཚེ་སེམས་ཅན་མང་པོ་ཚེ་ཐར་དུ་འགྲོ་བ་རྟེན་འབྲེལ་གྱི་ཆོས་ཉིད་ཡིན་པས། དེ་བས་དགེ་བ་ཕུན་སུམ་ཚོགས་པ་ཞིག་མེད་ཀྱང་དེ་མི་སྒྲུབ་པའི་ཕྱིར་རོ། །ཤའི་ཕྱིར་དུ་སྡིག་པ་བྱེད་བཞིན་དུ་དགོན་ས་དཀར་ཁྲ་ཤིག་གེ་ཀུན་བསྟན་པའི་གཞི་མ་དང་། ཞྭ་དམར་སེར་རྣམས་བསྟན་འཛིན་ཡིན་སྙམ་ནས་དེ་སྐད་སྨྲ་ན་ཡང་། ཞེ་འདོད་དང་ལག་ལེན་གཉིས་རྒྱབ་འགལ་ཡིན་པས། ཆོས་པའི་མིང་ཙམ་ཞིག་མ་གཏོགས་དོན་གྱིས་ཁྱིམ་པ་དང་ཁྱད་མེད་དེ། རྗེ་མི་ལས། གྲོང་ལྟག་གི་དགོན་ཆུང་ཁྲ་བོ་དེ། །མིང་དགོན་པར་

བཏགས་ཀྱང་གྲོང་པ་ཡིན། །བཀའ་གདམས་ཀྱི་བཙུན་ཆུང་སྲང་རྡོ་མགོ །མིང་བཙུན་པར་བཏགས་ཀྱང་ལུས་བསྒྱུར་ཡིན། །གསུངས་སོ། །དེ་ལྟར་བྱེད་ན་རྟགས་ཙམ་འཛིན་གྱི་བསྟན་པ་ཟེར་བ་ཞིག་ཕྱི་ནས་འོང་ཞེས་ཟེར་བ་རྣམས་ད་སླེབས་ཡོད་དོ་ཞེས་ཀུན་ལ་བསྒྲགས་པར་རིགས་སོ། །འོ་ན་སངས་རྒྱས་ཀྱི་བསྟན་པ་འཛིན་ཅིང་། སེམས་ཅན་ལ་བདེ་སྐྱིད་སྤེལ་བར་འདོད་ན་ཅི་ལྟ་བུ་ཞིག་མཛད་དགོས། ཞེས་བླ་མ་སྐྱེས་བུ་དམ་པ་རྣམས་ཀྱིས་བྲན་བདག་ལྟ་བུ་ལ་ཐུགས་རབ་ཏུ་བརྩེ་བའི་སྒོ་ནས་གསུང་འབྱོན་ན། འདི་ལྟར་མཛད་དགོས་ཏེ། སངས་རྒྱས་ཀྱིས། བློ་གྲོས་ཆེན་པོ། ངས་ཤའི་ཟས་ནི་སུ་ལའང་མ་གནང་། མི་གནང་གནང་བར་མི་འགྱུར་རོ། །རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་ངས་བཤད་དོ། །ཡང་འཁྲུལ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་པོ་རྣམས་ཀྱང་དངངས་གྱུར་ན། །རྣལ་འབྱོར་ཅན་གྱིས་ཤ་མི་ཟ། །གསུངས། ལེགས་གྲུབ་ཀྱི་རྒྱུད་ལས། དེ་བཞིན་མ་ཤའི་སྲན་ཆན་དག ། དངོས་གྲུབ་འདོད་པས་རྣམ་པར་སྤངས། །གསུངས། མཉམ་མེད་སྒམ་པོ་

བའི་ཞལ་ནས། སྡིག་ཟས་ཁྲ་བོའི་ཤ་དང་གཅིག །མྱོས་བྱེད་སེར་མོའི་ཆང་དང་གཉིས། །བསླུ་ཁྲིད་ན་ཆུང་གཞོན་དང་གསུམ། །ཆོས་གཤའ་མ་ཞིག་བྱེད་ན་འདི་གསུམ་སྤོངས། །སྙིང་ནས་མཛད་ན་འདི་གསུམ་སྤོངས། །གསུངས། དེ་བཞིན་དུ་མདོ་རྒྱུད་བསྟན་བཅོས་ཐམས་ཅད་ནས་མགྲིན་གཅིག་དབྱངས་གཅིག་ལྟར་གསུངས། སྐྱབས་མགོན་རྒྱལ་བ་པཎ་ཆེན་དང་། རྒྱལ་ཚབ། བཀའ་བློན། སེར་འབྲས་སོགས་ཀྱི་བླ་མ་དགེ་བསྐོས་ལས་སྣ་ཐམས་ཅད་གྲོས་བྱས་པའམ། ཡང་ན་རང་རང་གི་ས་སྒོ་གོ་ཕྱོགས་ན་བསྟན་དགྲ་སྡིག་ཅན་ཤན་པ་གང་འདུག་མི་བཞག་པར་ཚར་བཅད། གལ་ཏེ་བསྡད་ན་ཟས་གཞན་མ་གཏོགས་སྲོག་དབུགས་བཅད་པའི་ཤ་ཁྲག་དགེ་འདུན་པ་ཡོངས་ལ་བཙོང་ས་མེད་པའི་ཁྲིམས་ཞོག །སེར་འབྲས་དགེ་གསུམ་སོགས་སངས་རྒྱས་ཀྱི་བསྟན་པ་འཛིན་པའི་དགེ་འདུན་པ་ཆོས་གོས་དམར་སེར་སོར་བཞི་འཛིན་པ་ཡན་ཆད་ཀྱིས་ཟས་དཀར་གསུམ་སོགས་སྡིག་དང་མ་འདྲེས་པའི་ཟ་མ་མ་གཏོགས། ཕ་མ་སེམས་ཅན་གྱི་སྲོག་དབུགས་བཅད་པའི་ཤ་ཁྲག་ཟ་བ་ཕར་ཞོག །ལག་

ཏུ་ཡང་བླང་མི་ཆོག་པའི་ཁྲིམས་སྡོམས། བསྟན་པའི་སྦྱིན་བདག་གྲོང་སྡེའི་སྐྱེ་ཕོ་མོ་མཆོག་དམན་བར་མ་ཐམས་ཅད་ཀྱིས་ཀྱང་རང་བཞིན་གྱིས་ཤི་བ། ནད་ཀྱིས་ཤི་བ། གཡང་ལ་ལྷུངས་པ། འགགས་ནས་ཤི་བ། གཅན་གཟན་སོགས་ཀྱིས་བསད་པའི་སེམས་ཅན་གྱི་ཤ་མ་གཏོགས། ཕ་མའི་སྲོག་དབུགས་བཅད་པའི་ཤ་ཟ་མི་རུང་ཞེས་ཉེས་དམིགས་ཆེ་ཚུལ་གྱིས་ལས་འབྲས་བདེན་པའི་ཆོས་གསུངས་ལ། རབ་བྱུང་ན་སྡིག་ཟས་སྲོག་དབུགས་བཅད་པའི་ཤ་ཁྲག་འདིའི་མིང་མ་གཏོགས་ཤུལ་ཡང་མི་ཤེས་པ་ཞིག་བཟོས་ཞེས་སྙིང་ཁོང་རུས་པའི་གཏིང་ནས་གསོལ་བ་འདེབས། ཁྱེད་སངས་རྒྱས་དང་བྱང་ཆུབ་སེམས་དཔའི་སྤྲུལ་པ་རིས་མེད་བསྟན་འགྲོའི་དོན་བྱེད་པ་ལ་བསམ་བཞིན་སྐུའི་སྐྱེ་བ་བཞེས་པ་ཡིན་ཟེར་བ་རྣམས་ཀྱང་ཁང་བཟང་ཉམས་དགའ་བ་རེའི་ནང་དུ་འཛུལ་ནས་སྐྱིད་རྒྱབ་ནས་བཞུགས་མ་འདུག་པར། ཕྱི་རོལ་ཏུ་བྱོན་ལ་སེམས་ཅན་གྱི་སྐྱིད་སྡུག་ལེགས་ཉེས་ལ་གཟིགས་དང་། འགྲོ་དོན་ཇི་ལྟར་མཛད་དགོས་ཀྱི་ཧ་གོ་ཡོང་། སྔོན་སངས་རྒྱས་ཀྱིས་རྒྱལ་སྲིད་བཟུང་ཡོད་དུས་ཕོ་བྲང་གི་ཕྱི་སྒོ་ལ་བྱོན་ནས་སྐྱེ་རྒ་ན་འཆི་བཞི་

གཟིགས་པའི་རྐྱེན་གྱིས་རྒྱལ་སྲིད་སྤངས། མཆོད་རྟེན་རྣམ་དག་དྲུང་ནས་དབུ་སྐྲ་བསིལ། ཆུ་བོ་ནཱཻ་རཉྫ་ནའི་འགྲམ་དུ་དཀའ་བ་སྤྱད་སངས་རྒྱས་ནས་ཀྱང་ཁང་བཟང་གཅིག་བཟོས། ནང་དུ་འཛུལ་ནས་མ་བསྡད་པར་ཕྱོགས་ཀུན་ཏུ་བྱོན་ནས་འགྲོ་དོན་མཛད་ཚུལ། ཆོས་འཁོར་བསྐོར་ཚུལ་གྱི་རྣམ་ཐར་གསུང་རྣམས་ཐུགས་ལ་བཞག་ནས་དེ་བཞིན་མཛད་འཚལ། ཁྱེད་སངས་རྒྱས་དང་བྱང་ཆུབ་སེམས་དཔའི་སྤྲུལ་པ་སྐྱེས་བུ་དམ་པ་རྣམས་ཀྱིས་དང་པོ་ཐུགས་བསྐྱེད་དུས། སེམས་ཅན་སྡུག་བསྔལ་ཅན་མཐོང་ངམ་ཐོས་སམ། སུས་གསོལ་བ་བཏབ་ཀྱང་བཏང་སྙོམས་སུ་སྐད་ཅིག་ཙམ་ཡང་མི་སྡོད་པར་འགྲོ་བའི་དོན་བྱེད་ཅེས་ཐུགས་བསྐྱེད་ཡང་ཡང་མཛད་སྨོན་ལམ་ཀྱང་བཏབ་པ་ཡིན་ཚུལ་དགོངས་ནས། ད་ཐུགས་བསྐྱེད་དམ་བཅའ་མ་འདོར་བར་འགྲོ་བ་འདི་དག་གི་དོན་ཅི་ནས་ཀྱང་མཛོད། གལ་ཏེ་མ་མཛད་པར་བཏང་སྙོམས་ཡལ་བར་དོར་ན། སྔོན་ཐུགས་རྗེའི་གཏེར་ཆེན་འཕགས་མཆོག་ཕྱག་ན་པད་དཀར་བསྣམས་པས་ཀྱང་། ཐུགས་བསྐྱེད་དམ་བཅའ་དོར་བས་དབུ་ཇི་ལྟར་སོང་ཕྱི་ནས་སྔར་གྱི་དེ་བས་

ཐུགས་བསྐྱེད་མཛད་ནས། འགྲོ་དོན་ལ་བརྩོན་དགོས་པ་བྱུང་བའི་ལོ་རྒྱུས་རྣམས་ཐུགས་ལ་མངའ་བ་གསལ་བཏབ་པ་ཡིན་པས་ཐུགས་ཀྱིས་དགོངས་འཚལ། འོ་ན་ཧ་ཧ་ཁྱོད་བན་རྒན་ཞིག་གི་ཁས་བཀོད་པ་བཏང་ཚེ་ཡོང་བར་འདུག་སྟེ། དེ་སངས་རྒྱས་སྟོང་གིས་བསྒྲུབས་ཀྱང་ཕྱག་ལེན་ལ་ཐེབས་པ་མི་འདུག །ཤ་འདི་སྡིག་ཟས་ཀྱི་མི་ཚད་དུག་ཟས་རེད། ཟོས་ཚད་སང་གནངས་ནས་སྦོས་ནས་འཆི་བར་གདའ་ཞེས་བཤད་ཀྱང་ཆོད་དཀའ་བར་གདའ། སྔོན་བསྐལ་པ་འདི་ཆགས་པ་ནས་བཟུང་དར་བར་འདུག །ད་ལྟ་གསར་དུ་བྱུང་བ་ཞིག་མིན། ཁྱོད་མིན་རུང་ཤ་ཀུན་གྱིས་སྤངས་ན་འདོད་དེ། སྔོན་གྱི་སྐྱེས་ཆེན་དམ་པ་རྣམས་ཀྱིས་ཀྱང་མ་ཆོད་པར་ལུས་སོང་། སྡིག་ཅན་བླ་མས་མི་འཁྱོབ། ཉེས་ཅན་དཔོན་པོས་མི་འཁྱོབ། བུ་རུལ་ཕ་མས་མི་འཁྱོབ། སེམས་ཅན་གཅིག་གི་ལས་སླེབ་ཚེ། སངས་རྒྱས་སྟོང་གི་མཐུ་རྡུགས་བྱ་བ་ཡིན་པས། ལས་ཀྱི་རྣམ་པར་སྨིན་པ་སངས་རྒྱས་ཀྱིས་ཀྱང་བཟློག་ཏུ་མེད་ན་ངེད་ཚོ་འདྲ་བས་བྱ་ཐབས་མེད། སེམས་ཅན་རང་རང་གི་ལས་བཟང་ངན་གང་ལ་སྤྱོད་དུ་ཆུག །ཁྱོད་ཤེས་ཆུང་འདོད་ཐག་མ་ཉེ།

སྙིང་རྗེ་སྐྱེ་སླ་ན་ཁོང་ཁྲོ་རྒྱུན་མི་འཆད། ཁ་རོག་བསྡད་པ་གདམས་ངག་ཟབ་པས་ཁྱོད་ཀྱིས་སྨྱོན་པ་བཞིན་དགོས་མི་དགོས་མང་པོ་མ་ལབ་པར་ཁ་རོག་སྡོད་ཅིག་ཅེས་བཀའ་བཀྱོན་ལྟ་བུའི་གསུང་འབྱོན་ན། དེ་བན་རྒན་ང་འདྲའི་བླུན་པོས་ཅི་ཟེར་གི་བལྟ་སྙམ་ཚོད་བརྟགས་ཕྱིར་དུ་ཀུ་རེ་གསུངས་པ་ཡིན་ལས་ཆེ། དེ་ལ་ངས་ཀྱང་ལན་འབུལ་བས་དགོངས་འཚལ། ང་ཤེས་ཆུང་འདོད་ཐག་ཉེ་བའི་བན་རྒན་སྙོམས་ཆུང་ཞིག་གི་ཁ་གདངས་པ་ཙམ་ཞིག་ཀྱང་། ཁྱེད་དེང་སང་གི་སངས་རྒྱས་བྱང་སེམས་ཀྱི་སྤྲུལ་པ་དངོས་ཡིན་ཟེར་བའི་སྐྱེས་བུ་དམ་པ་སྟོང་ཕྲག་གཅིག་གིས་བསྒྲུབས་ཀྱང་ཕྱག་ལེན་ལ་མི་ཐེབས་ན། སྐྱོན་ཀུན་ཟད་ཡོན་ཏན་ཀུན་ལྡན་སངས་རྒྱས་བྱང་སེམས་རྣམས་ཀྱི་སྤྲུལ་སྐུ་ཡིན་ཟེར་བ་ཅང་བདེན་ནམ། བསྐལ་པ་དང་པོ་རྫོགས་ལྡན་གྱི་དུས་ཀྱི་མི་རྣམས་ཚེ་དཔལ་སྟོབས་འབྱོར་ལྷ་དང་མཉམ་སྐད། བར་དུ་བོད་དུ་ཡང་བྲག་སྲིན་མོ་དང་། འཕགས་པའི་རྣམ་འཕྲུལ་བྱང་ཆུབ་སེམས་དཔའ་གཉིས་ཀྱིས་མི་རྒྱུད་སྤེལ་དུས། ཤིང་ཐོག་གྲོ་ནས་འབྲས་སོགས་ལ་ལོངས་སྤྱད་པ་མ་གཏོགས། ཤ་ཁྲག་ཟོས་ཟེར་

བ་མི་འདུག་པས། བསྐལ་པ་ཆགས་ནས་བཟུང་དར་ཡོད་ཟེར་བ་ཡང་ཅུང་མི་བདེན་པར་གདའ། སྔོན་སངས་རྒྱས་ཀྱི་དུས་ནས་བཟུང་ཇོ་བོ་ཡབ་སྲས་ཀྱི་བར་གྱི་སངས་རྒྱས་ཀྱི་རྗེས་འཇུག་མཁས་བཙུན་བཟང་གསུམ་གྱིས་ཆོད་པའི་ལོ་རྒྱུས་དང་གཏམ་རྒྱུད་མང་པོ་འདུག །ཟས་དཀར་གསུམ་མངར་གསུམ་སོགས་ལ་ལོངས་སྤྱོད་གསུངས་པ་མ་གཏོགས། དམར་གསུམ་སྐྱུར་གསུམ་ཞེས་མ་གསུངས་འདུག་པས། སྔོན་གྱི་སྐྱེས་བུ་དམ་པའི་དུས་སུ་ཡང་མ་ཆོད་གསུངས་པ་ཡང་སྒྲོ་སྐུར་དུ་འགྱུར་བས་མི་རུང་སྙམ། སངས་རྒྱས་བྱང་ཆུབ་སེམས་དཔའ་འམ་བླ་མ་དགེ་བའི་བཤེས་གཉེན་རྣམས་ཀྱིས་ཆོས་བསྟན་ནས། མཚམས་མེད་ལྔ་སོགས་ཀྱི་ལས་ངན་ཚན་པོ་ཆེ་བྱས་པའི་སྡིག་ཅན་ཡང་འཁོར་བ་ངན་སོང་གི་འཇིགས་པ་ལས་བསྐྱབས་ནས་བདེ་ཆེན་གྱི་ཞིང་དུ་དྲངས་པའི་ལོ་རྒྱུས་འདུག་པས། དགོངས་གཞི་ཅན་འདྲ་མ་གཏོགས་སྡིག་ཅན་བླ་མས་མི་འཁྱོབ་གསུངས་པ་ཡང་མི་བདེན་སྙམ། སྙིང་རྗེ་སྐྱེ་སླ་ན་ཁོང་ཁྲོའི་རྒྱུན་མི་འཆད་ན། སངས་རྒྱས་བྱང་སེམས་རྣམས་ལས་སྙིང་རྗེ་སྐྱེ་སླ་བ་ཞིག་གཞན་མེད་པས་དེ་རྣམས་ལ་ཡང་

ཁོང་ཁྲོའི་རྒྱུན་མི་འཆད་དུ་ཁས་ལེན་དགོས་པ་སོགས་མི་འགྲིགས་པ་དུ་མ་འབྱུང་། ཁ་རོག་བསྡད་ཚད་གདམས་ངག་ཟབ་ན། ཆོས་གསུངས་པའི་སངས་རྒྱས་བྱང་སེམས་དགེ་བའི་བཤེས་གཉེན་དང་། ད་ལྟ་ཐོས་བསམ་བྱེད་པའི་གྲྭ་པ་རྣམས་ཀྱིས་བགྲོ་གླེང་བྱས་པ་ལས། དུད་འགྲོ་རྣམས་ཁ་རོག་པ་བསྡད་འདུག་པས། དེ་གདམས་ངག་ཟབ་པར་འགྱུར། སྨྱོས་ཚད་ཐམས་ཅད་ཀྱི་ཁ་ལ་ཡིད་བརྟན་མེད་ན། རྗེ་མི་ལས། ང་ཕ་སྨྱོ་བུ་སྨྱོ་བརྒྱུད་པ་སྨྱོ། །གསུངས་པས། དེ་རྣམས་ཀྱི་གསུང་ལ་ཡང་ཡིད་བརྟན་མི་རུང་བར་འགྱུར། ད་ངས་བསམས་ན་དམ་པ་གོང་མའི་རྣམ་ཐར་དང་གསུང་ལྟར་ཆོས་ཀྱིས་སྨྱོ་དགོས། སྨྱོས་ནས་བཤད་དགོས་པས། ང་ཁ་རོག་པ་འདུག་ཅི་ལ་དགོས། ད་དུང་ལབ་རྒྱུ་ཡིན། ཕ་མ་སེམས་ཅན་གྱི་སྡུག་ལ་བསམས་ན་སྡོད་མི་ཐུབ་པར་གདའ། འོ་ན་ཁྱོད་ཀྱིས་ཅི་བཤད་ནའང་ཤོད་ཟེར་ན། འོ་ལགས་སོ་དེ་ཡིན་ན་ད་ལྟ་བོད་དུ་སངས་རྒྱས་ཀྱི་བསྟན་པ་ཉི་མ་བཞིན་དུ་ཤར། བསྟན་འཛིན་གྱི་སྐྱེས་བུ་མང་པོས་གངས་ཅན་ལྗོངས་འདི་དོག་པོར་བགྱི་བའི་དུས་སྐབས་བཟང་

པོ་འདིར་ཀུན་གྱིས་སྡིག་པ་གཅིག་མི་ཆོད་ན། སངས་རྒྱས་ཀྱི་བསྟན་པ་ནུབ་བསྟན་འཛིན་རྣམས་ཞིང་བརྗེས་ནས་ཆོད་ཡོང་ངམ། སྔོན་རྐང་པ་ཡ་གཅིག་ཞ་ཡོད་པའི་མི་ཞིག་རྐྱང་ཞིག་ལ་ཞོན་ནས་གླུ་ཁོ་ན་ལེན་པ་ལ། གཞན་གྱིས་ཁྱོད་འདི་ཙམ་གྱི་གླུ་མང་པོ་ཅི་ལ་བླངས་དྲིས་པས། ཁོ་བོ་རྐྱང་ལ་ཞོན་ནས་གླུ་མི་ལེན་ན་ནམ་ལེན་ཞེས་སྨྲས་པ་ལྟར། ད་ལྟ་བསྟན་དང་བསྟན་འཛིན་ཡོད་དུས་འདིར་སྡིག་པ་མི་གཅོད་ན་ནམ་ཚོད་གཅོད། དཔེར་ན་དཔའ་བོའི་དཔུང་ཚོགས་འཛོམ་དུས་དགྲ་འདུལ་དགོས་པ་ལྟར། ད་རེས་བོད་ལ་བསྟན་པ་དར་བསྟན་འཛིན་སྐྱེས་བུ་མང་པོ་དཔུང་གདང་གཤིབས་ནས་བཞུགས་དུས་འདིར། སྲིན་པོ་གདོང་དམར་བོད་ཡུལ་གྱི་བསྟན་པའི་ཞབས་འདྲེན། ཕ་མའི་སྲོག་གི་གཤེད་མ། ཤན་པ་ཕོ་མོ་དང་ཤ་ཁྲག་དམར་གྱི་ལོངས་སྤྱོད་འདི་གཏན་ནས་མེད་པ་ཞིག་བཟོ་དགོས། ཀུན་གྱིས་བརྩོན་པར་བྱས་ན་འདིའི་མི་ཚད་ཚོ་ཡང་ཆོད་ཡོང་སྟེ། འདོད་ཡོན་ལྔའི་ནང་གི་ཆེ་ཤོས་བུད་མེད་བསྟེན་པའི་བདེ་བ་འདི་ཡིན་ཞེས་རྒྱུད་སོགས་ནས་གསུངས་པ་སེམས་ཅན་ཐམས་ཅད་ཀྱིས་ཆོད་དཀའ་ཡང་། དགེ་འདུན་པ་ཡོངས་

ཀྱིས་རྦད་ཀྱིས་བཅད་ཚེ། ད་ལྟ་ཆགས་བྲལ་གྱི་དགེ་འདུན་ངུར་སྨྲིག་འཛིན་པའི་སྡེ་པས་ས་སྟེང་ཁེབས་པ་ཙམ་བྱུང་བ་མངོན་སུམ་ཚད་མ་འདི་ལ་གཟིགས། འདི་ལྟ་བུའི་སྤང་དཀའ་བ་ཡང་ཆོད་ན། དེ་ལ་བལྟས་ན་ཤ་སྤོང་སླ་སྟེ། དེ་ཅིའི་ཕྱིར་ཞེ་ན། ཤ་མ་ཟོས་ཀྱང་། ཤ་བས་ལྷག་གི་རོ་མངར་ཞིང་བཅུད་ཆེ་བའི་ཁ་ཟས་མང་པོ་ལ་ལོངས་སྤྱོད་རྒྱུ་ཡོད་པའི་ཕྱིར་རོ། །ད་ལྟ་ཕྲན་ངས་ཀྱང་། ལས་འབྲས་བདེན་པའི་ཆོས་བཤད་པའི་ཡུལ་ཆུང་མང་པོས་སྲོག་མི་གཅོད་པའི་ཁས་ལེན་དང་། བཙུན་པ་མང་པོས་ཤ་མི་ཟ་བའི་དམ་བཅའ་བྱེད་པ་མང་པོ་བྱུང་ན། ཁྱེད་གོ་ས་མཐོ་ཞིང་། ཐབས་ལ་མཁས་པ་ཐུགས་རྗེ་ཆེ་བའི་སྐྱབས་མགོན་རྒྱལ་བ་པཎ་ཆེན། རྒྱལ་ཚབ་དམ་པ་དགའ་ལྡན་གསེར་ཁྲི། རྒྱལ་བའི་ཡོངས་འཛིན་སེར་འབྲས་ཀྱི་བླ་མ་སོགས་སྐྱེས་ཆེན་དམ་པ་བཞུགས་ཚད་ཐམས་ཅད་ཀྱིས་ཤ་ཡི་འཚོ་བ་སྤངས་ནས། གཞན་སྐྱ་སེར་ཕོ་མོ་དྲག་ཞན་ཐམས་ཅད་ལ་སྤྱིར་ལས་རྒྱུ་འབྲས་བདེན་པའི་ཆོས་དང་ཤ་ཡི་ཉེས་དམིགས་ཟ་མི་རུང་བའི་བཅས་པ་མཛད་ཚུལ། མདོ་རྒྱུད་བསྟན་བཅོས་ན་ཡོད་ཚད་ཐམས་ཅད་

བསྒྲགས་ནས་དགེ་འདུན་རྣམས་ཀྱིས་ཤའི་རིགས་སྤང་དགོས། ཁྱེད་ཁྱིམ་པ་ཕོ་མོ་ཡ་རབས་རྣམས་ཀྱིས་ཀྱང་སྤོང་ཐུབ་ན་རབ། དེ་མིན་རུང་རང་བཞིན་གྱིས་ཤི་བའི་ཤ་འདྲ་མ་གཏོགས། གཞན་གྱིས་སྲོག་དབུགས་བཅད་པའི་ཤ་ཁམ་གང་ཟོས་རུང་ཚེ་འདིའི་ཕ་མ་གཉིས་བསད་པའི་ཤ་ཟོས་པ་དང་ཁྱད་མེད་པས་མི་རུང་དུག་ལྟར་སྤོང་དགོས་ཞེས་ཡང་ཡང་ནན་ཆེར་གསུངས། དེ་བཞིན་དུ་སངས་རྒྱས་ཀྱི་བསྟན་པ་དར་བའི་ཡུལ་ཕྱོགས་ཐམས་ཅད་ཀྱི་བླ་མ་སྐྱེས་བུ་དམ་པ་མཆོག་དམན་བར་པ་ཐམས་ཅད་ཀྱིས་ཤ་སྤངས་ན། སངས་རྒྱས་བདེན་པའི་གསུང་དྲི་མ་མེད་པ་ལ་མི་ཉན་པ་སུ་ཡོད། སྡིག་ཅན་གྱི་ཤན་པ་ཡིན་ཡང་སྣང་བ་འགྱུར་ནས་སྤངས་ན་གཞན་སྨོས་ཅི་དགོས། དེས་ན་བླ་མ་སྐྱེས་བུ་དམ་པ་རྣམས་ཐབས་མཁས་ལ་ཐུགས་རྗེ་ཆེ་བ་རྣམས་ཀྱིས་བློ་ཐབས་དུ་མའི་སྒོ་ནས། སྡིག་ཟས་ཕ་མའི་ཤ་ཟ་བ་གཅོད་པ་ལ་བརྩོན་པར་རིགས་སོ། །འོ་ན་དགག་བྱ་བ་ལ་དགོས་པ་གཙོ་བོ་ཡིན་པས་ཤ་འདི་རྦད་ཀྱིས་བཅད་བཏང་ན། རླུང་ཤས་ཆེ་བའི་རྒན་རྒོན་བླ་རྒན་དང་། གསང་སྔགས་ཚོགས་ཀྱི་འཁོར་ལོ་དང་། བླ་མ་སྐྱེས་བུ་དམ་པའི་འཚོ་བ་

སོགས་སྔོན་གྱི་རྒྱལ་བ་སྲས་བཅས་དུས་གསུམ་མཁྱེན་པ་རྣམས་ཀྱིས། ཤའི་རིགས་སྤངས་ནས་དཀར་གསུམ་མངར་གསུམ་སོགས་ཟས་སྣ་གཞན་བསྟེན་ན། ཤ་ལ་ཉེས་པ་མཐའ་ཡས་པས་ཕྱི་རབས་སྟོན་པའི་རྗེས་འཇུག་རྣམས་ཀྱིས་ཤ་ཟ་མི་རུང་། དུག་ལྟར་སྤོང་དགོས་ཞེས་ལན་གཅིག་མ་ཡིན་པར་ཡང་ཡང་གསུངས་པ་རྣམས། མ་འོངས་པ་ན་རྗེས་འཇུག་བླ་རྒན་རླུང་གིས་འཆི་བ་མ་མཁྱེན། མཁྱེན་རུང་འཚོ་བའི་ཟས་བཅད་ནས་འཆི་རུ་བཅུག་པ་ཡིན་ཞེས་ཞུ་དགོས་པས་དེ་མི་འགྲིག །རླུང་ནད་ཅན་གྱི་ཁ་ནང་དུ་སྡིག་ཟས་ཕ་མའི་ཤ་ཁྲག་གི་ཐལ་བ་ཞིག་རྒྱག་དགོས་དོན་མེད། རླུང་ནད་ལ་ཕན་པའི་ཟས་བརྒྱ་དགོས་ན་སྟོང་ཡོད་པ་སྨན་རྒྱུད་སོགས་ནས་བཤད། ཐ་ན་སྒོག་སྐྱ་ཡན་ཆད་ཀྱིས་ཆོག་པར་གསུངས། དེ་ཚོའི་གཅིག་བསྟེན་པས་མི་འོང་ན་གཉིས་བསྟེན་ན་མི་ཆོག་གམ། ཐབས་མེད་ཀྱི་སྲོག་དབུགས་བཅད་པའི་ཤ་ཁྲག་ཅིག་དགོས་ཟེར་བ་འདི། སངས་རྒྱས་ཀྱི་བསྟན་པ་ཉམས་དམའ་ཞིང་། ཕ་མ་སེམས་ཅན་ར་ལུག་སོགས་སྙོམས་ཆུང་བའི་ཚོད་ཀྱི་གཏམ་ཞིག་ཡིན་པས་སྙིང་རྗེ་མེད་དམ།

རླུང་ནད་ཅན་གྱིས་ཞོ་ཐུད་མར་སོགས་ལོངས་སྤྱོད་དང་རླུང་གིས་མི་འཆི་བའི་ཁེག་ངས་འཁུར། གྲོང་པ་ཕལ་ཆེར་གྱིས་ཤ་ཟ་འདོད་ཀྱང་ཤ་དཀོན་ནས་མ་ཟོས་པར་ལོ་མང་པོ་སོང་བ་ཡོད་དེ། རླུང་ནད་ཡུལ་གྲོང་དེ་ལ་ཆེ་རབས་ཀྱི་གཏམ་མི་སྣང་། སྲིན་པོ་གདོང་དམར་བོད་ཡུལ་འདི་མ་གཏོགས། གླིང་གཞན་དང་འགྲོ་བ་གཞན་མང་པོས་ཤ་མི་ཟ། དེ་རྣམས་ལ་ཤ་ཟོ་ཞེས་སྟོན་རྒྱུ་ཡིན་ན། སྐྱུགས་ནད་ཅན་ལ་ཟས་བསྟན་པ་ལྟར་འགྱུར་སྐད། སེམས་ཅན་དེ་དག་ཀྱང་རླུང་ནད་ཀྱིས་ཤི་བའི་སྐད་ཆ་མི་འདུག །རང་ག་སྐྱེས་མཐའ་འཆི་བ་འཇིག་རྟེན་འཁོར་བའི་ཆོས་ཉིད་རེད། བྱ་ཐབས་ཅི་ཡོད། ཚོགས་ཀྱི་འཁོར་ལོ་ལ་ཤ་མི་དགོས། བཟའ་བཏུང་ཐམས་ཅད་ངོ་བོ་ཟག་པ་མེད་པའི་ཡེ་ཤེས་ཡིན་པ་ལ་རྣམ་པ་ཤ་ལྔ་བདུད་རྩི་ལྔ་རུ་སྤྲུལ་ནས་ཕུལ་ན་དེས་ཆོག །གལ་ཏེ་དམིགས་པའི་རྟེན་དུ་རྫས་ཙམ་རེ་དགོས་ན་ཡང་། མི་རྙེད་སྙམ་ནས་སེམས་ཀྱི་དཔའ་ཞུམ་ཅི་དགོས། སེམས་ཅན་གྱི་སྲོག་མ་བཅད་ན་སེམས་ཅན་མང་དུ་འགྲོ། སེམས་ཅན་མང་བ་ཙམ་དུ་འཆི་བ་མང་། ཤི་བ་མང་བ་ཙམ་དུ་རོ་མང་། རོ་དེ་རྣམས་ཤ་ཁྲག་ཡིན་པས་དེས་ཚོགས་

རྫས་ཅི་ལ་མི་འོང་། གསང་སྔགས་ཀྱི་རྒྱུད་ལས་ཀྱང་། ཚོགས་འཁོར་ལ་ཤ་དགོས་གསུངས་ཀྱང་། སྲོག་དབུགས་བཅད་པའི་ཤ་དགོས་ཤི་བའི་ཤས་མི་ཡོང་ཞེས་མ་གསུངས་སོ། །བླ་མ་སྐྱེས་བུ་དམ་པ་ཡིན་ན་འཚོ་བ་ཤ་མི་དགོས། དགོས་ན་སྐྱེས་བུ་དམ་པ་ཨེ་ཡིན་མི་ཤེས། དེང་སང་གི་སྐྱེས་བུ་དམ་པ་རྣམས་སྔོན་གྱི་རྒྱན་དྲུག་མཆོག་གཉིས་ཇོ་བོ་རྗེ་ཡབ་སྲས་སོགས་ཀྱི་ཡན་ཞིག་མིན་ནམ་སྙམ། དེ་འདི་ཙམ་ཡིན་ཕྱིན་ཟས་དཀར་གསུམ་མངར་གསུམ་སོགས་ཀྱིས་ཡོང་། གལ་ཏེ་དུས་ཀྱི་དབང་གིས་སྐྱེས་བུ་དམ་པ་ཚོས་ཀྱང་ཞལ་ཤ་ལ་དགྱེས་ནས། དེ་གས་མི་ཡོང་བར་ཐབས་མེད་ཀྱིས་ཕ་མའི་ཤ་བཞེས་དགོས་གསུངས་ན། བསྟན་པའི་མིག་རྐྱེན་ལ་མི་གནོད་པའི་ཕྱིར་གསང་ནས་ཚོལ་དང་། ར་ལུག་ཚོན་པོ་གློ་བུར་དུ་ཤི་བའི་ཤ་རྙེད་པས་སྦས་པའི་ཚུལ་གྱིས་དེ་ལུགས་གནང་འཚལ། འོ་ན་ཤ་ཟོས་པའི་ཉེས་པ་ཆུང་ངུ་དེ་ཙམ་ཞིག་ལ་ཆོས་གཞན་མི་དགོས། ཐ་ན་གཟུངས་སྔགས་དང་དེ་བཞིན་གཤེགས་པའི་མཚན་རེ་བརྗོད་པས་ཀྱང་བྱང་ཞིང་དག་པར་འགྱུར་བས། ལྟུང་བཤགས་མི་ཤེས་པ་སུ་ཡང་

མེད། བླ་མ་སྐྱེས་བུ་དམ་པ་མི་དགོས་དགེ་འདུན་པ་ལྷན་པ་སེར་པོ་གྱོན་ཚད་ཀྱིས་ཤ་ཟོས་ཀྱང་སྐྱོན་གྱིས་མི་གོས་ཟེར་ན། ཤ་འདིའི་ཕྱིར་ཕ་མ་ར་ལུག་བརྒྱ་སྟོང་མང་པོའི་སྲོག་གཅད་པ་འདི་ཉེས་པ་ཆུང་ན། ཁྱེད་ཚོས་ཉེས་པ་ཆེན་པོ་དེ་གང་ལ་ཟེར། སྡིག་ཟས་ཕ་མའི་ཤ་ཟོས་པའི་ཉེས་པ་འདི་ལས་ཆེན་པོ་ཞིག་གང་ན་ཡང་མེད། ཟ་བ་མང་ཚེ་ཤན་པས་ཕ་མའི་སྲོག་གཅོད་ཚུལ་ལ་ལྟོས། བསྟན་པའི་སྒོར་ཞུགས་པ་ཕལ་ཆེར་གྱིས། སངས་རྒྱས་ཀྱིས། སྡིག་པ་ཅི་ཡང་མི་བྱ་ཞིང་། །གསུངས་པ་སོགས་ཤེས་བཞིན་ཁྱད་དུ་བསད་ནས། ཕྱིས་ཚེ་གང་པོར་སྒྲིབ་སྦྱོང་བྱས་ཀྱང་ཤའི་ཉེས་པ་སོགས་ཉེས་པ་ཆེན་པོ་གཞན་ཕར་ཞོག །ངག་འཁྱལ་གཅིག་ཙམ་སྨྲས་པའི་ཉེས་པ་ཡང་འདག་དཀའ་སྟེ། སྔོན་དགེ་སློང་ཞིག་གིས་དགྲ་བཅོམ་པ་སྐད་ངན་པ་ཞིག་ལ་ཁྱི་ཟུགས་པ་འདྲའོ་སྨྲས་པས། ཕྱིས་བཤགས་པ་བྱས་དམྱལ་བར་མ་སོང་ཀྱང་། ཁྱིའི་སྐྱེ་བ་ལྔ་བརྒྱ་ལེན་དགོས་པ་བྱུང་བ་སོགས་ཀྱི་གཏན་ཚིགས་ལོ་རྒྱུས་རྣམས་ལ་སོམས་དང་། གལ་ཏེ་བྱང་ནས་རང་ལ་སྐྱོན་གྱིས་མི་གོས་རུང་། རང་ལ་བརྟེན་ནས་ཕ་མ་སེམས་ཅན་ལ་གནོད་པ་ཆེན་པོ་

འབྱུང་ན་སྙིང་རྗེ་ནས་དེ་དག་ལ་ཕན་ཕྱིར་སྤོང་ཅི་ལ་མི་དགོས། སྔོན་གྱི་སྐྱེས་བུ་དམ་པ་རྣམས་ཀྱིས་ཆོས་བྱས་ན་ཤའི་ཉེས་པ་དག་ནས་རང་ལ་སྐྱོན་གྱིས་མི་གོས་རུང་། ཕ་མ་སེམས་ཅན་དྲིན་ཅན་ལ་དངོས་སམ་བརྒྱུད་ནས་གནོད་འཚེ་འབྱུང་བ་མཁྱེན་ནས་དེ་ལ་མི་བཟོད་པའི་སྙིང་རྗེ་ཆེན་པོ་སྐྱེས་ཏེ། ཕ་མ་སེམས་ཅན་ལ་ཕན་པའི་ཆེད་དུ་ཤ་སྤངས་པ་ཡིན། སངས་རྒྱས་ཀྱི་བསྟན་པ་སྙིང་རྗེ་ལ་རག་ལས་པས། བསྟན་པ་འཛིན་ན་འགྲོ་ཀུན་ཕ་མར་ཤེས་པའི་སྙིང་རྗེ་ཆེན་པོ་རྟག་ཏུ་བསྐྱེད་ནས། སྡུག་བསྔལ་ཉེས་བརྒྱའི་རྒྱ་མཚོར་གཡེངས་པའི་ཕ་མ་སེམས་ཅན་ཡོངས་ལ་དངོས་སམ་བརྒྱུད་ནས་ཕན་པའི་ཐབས་སངས་རྒྱས་ཀྱིས་གང་བསྟན་པ་རྣམས་བྱ་དགོས་མོད། ཚེ་སྔོན་དྲིན་གྱིས་ཡང་ཡང་བསྐྱངས་པའི་ཕ་མ་སེམས་ཅན་རྣམས་ད་ལྟ་སྡུག་བསྔལ་གྱིས་མནར་བ་ལ་དྲིན་གཟོར་ཕན་མི་འདོགས་རུང་གནོད་འཚེ་བྱས་ནས་གང་ཡོང་། དེ་བས་ཁྲེལ་མེད་ན་རག་བྱེད་ཚུལ་ཞིག་ཨེ་ཡོད་སོམས་དང་། རང་ལ་སྐྱོན་གྱིས་མི་གོས་རུང་། ཕ་མ་སེམས་ཅན་ལ་གནོད་ན་ཤ་ཙམ་དུ་མ་ཟད་ལུས་ལོངས་སྤྱོད་ཐམས་ཅད་གཏོང་

དགོས་ན་ཡང་གཏོང་བ་ནང་པ་སངས་རྒྱས་པའི་ཁྱད་ཆོས་ཡིན་པས་གོ་བར་གྱིས། འོ་ན་ཤ་ཟོས་པའི་ཉེས་པ་ཆེ་རུང་། དེ་ལ་བརྟེན་ནས་གཞན་བསྟན་འགྲོའི་དོན་རྒྱ་ཆེར་འབྱུང་བས་ཉེས་པ་ལས་ཕན་ཡོན་ཆེ་བ་དེ་འདེམས་དགོས་ཟེར་ན། ཕ་མ་སེམས་ཅན་གྱི་ཤ་ཁྲག་ལ་བརྟེན་ནས་སྔར་ཡང་བསྟན་འགྲོའི་དོན་རྒྱ་ཆེན་མ་བྱུང་ལ་ཕྱིན་ཆད་ཀྱང་མི་འབྱུང་། མི་འབྱུང་བའི་རྟགས་སུ་དུས་གསུམ་མཁྱེན་པའི་རྒྱལ་བ་སྲས་བཅས་ཀྱིས་སྔོན་ཤ་སྤངས་ནས་བསྟན་འགྲོའི་དོན་མཛད། ཕྱི་རབས་རྗེས་འཇུག་རྣམས་ལ་ཡང་སྡིག་ཟས་ཤའི་རིགས་སྤོངས་ཞེས་གསུངས་སྣང་། ད་ལྟ་བལྟས་ན་ཡང་ཤ་ལ་བརྟེན་ནས་ལུས་སྟོབས་རྒྱས་ཏེ་ཐིག་ལེ་འཕེལ་འགའ་རེས་བཙུན་ཆུང་གི་བརླ་ཤ་བརྡར། འགའ་ཞིག་གིས་སྐྱེ་དམན་གྱི་སྟུ་མཉེ། ཁ་ཅིག་གིས་ཁེ་ཚོང་ཞིང་ལས་འཚོ་སྐྱོང་བརྡུང་རེས་བྱེད། ཕལ་ཆེར་གྱིས་ཤ་རྒྱགས་རེ་འཆོས་ནས་གཉིད་མཁན་མང་བ་མ་གཏོགས། བསྟན་འགྲོའི་དོན་རྒྱ་ཆེན་འདི་བྱུང་དང་། ཡོན་ཏན་འདི་སྐྱེས་ཞེས་སྟོན་རྒྱུ་གང་ཡང་མི་སྣང་། ད་ཤ་སྤངས་ནས་བསྟན་འགྲོའི་དོན་རྒྱ་ཆེན་པོ་མ་བྱུང་ཡང་རུང་། སྔོན་གྱི་སྐྱེས་བུ་དམ་པ་ཚོས་ཤ་

སྤངས་ནས་བསྟན་འགྲོའི་དོན་ཡོང་བ་དེ་ཙམ་ཞིག་བྱུང་ན་དེས་ཆོག །དེ་བས་ཆེ་ཞིག་མི་དགོས། སྔོན་གྱི་བཀའ་གདམས་པ་དང་བཀའ་བརྒྱུད་གོང་མའི་རྣམ་ཐར་ལྟར་དགེ་འདུན་པ་ཡོངས་ཀྱིས་ཟས་དཀར་གསུམ་མངར་གསུམ་སོགས་སྡིག་དང་མ་འདྲེས་པའི་ཟ་མ་མ་གཏོགས། ཤ་ཡི་རིགས་མཐའ་དག་སྤངས་ནས་མི་ཟ་བ་དང་། ཁྱིམ་པ་ཕོ་མོ་རྣམས་ཀྱིས་ཀྱང་རང་གར་ཤི་བ་སོགས་ཀྱི་ཤ་མ་གཏོགས། སྲོག་དབུགས་བཅད་པའི་ཕ་མ་སེམས་ཅན་གྱི་ཤ་ཁྲག་དམར་པོ་ལ་ལོངས་མི་སྤྱོད་པར། སངས་རྒྱས་ཀྱི་བསྟན་པ་དར་བའི་ཡུལ་ཕྱོགས་ཐམས་ཅད་ན་སྲོག་གཅོད་ཀྱི་སྒྲ་ཙམ་ཡང་མི་གྲག་པའི་བསྐལ་པ་ཞིག་བྱུང་ན། དེའི་བསོད་ནམས་ལ་གཟུགས་ཤིག་ཡོད་ན་ནམ་མཁའི་ཁམས་ལ་ཡང་མི་ཤོང་། སངས་རྒྱས་ཀྱི་བསྟན་པའི་ཉི་མ་བོད་ལ་ཤར་ནས། སེམས་ཅན་ཐམས་ཅད་བདེ་སྐྱིད་ཀྱི་འོད་ཁང་དུ་ཆུད་ཡོད་ཅེས་ལྷ་མི་ཡོངས་ལ་སྐད་གསང་མཐོན་པོས་སྒྲོགས་པར་རིགས་པས་དེ་ལུགས་ཀུན་གྱིས་གནང་འཚལ། གལ་ཏེ་སྙིགས་མ་ལྔ་བདོ་བའི་དུས་འདིར་སངས་རྒྱས་ཀྱི་བསྟན་པ་ཉམས་དམའ།

དཀར་ཕྱོགས་པ་རྣམས་མཐུ་ཆུང་། ནག་ཕྱོགས་པ་རྣམས་མཐུ་ཆེ། སེམས་ཅན་ལས་ངན་པའི་དབང་གིས་དེ་ལྟར་ཆོད་པའི་སྐལ་པ་མ་བྱུང་ན། ཕ་མ་སེམས་ཅན་རེ་རེ་ཙམ་གྱི་སྲོག་བསྐྱབས་ན་ཡང་ཕན་ཡོན་ཆེ་བ་ཀུན་གྱི་ཐུགས་ཀྱིས་མཁྱེན་པར་གསལ་བ་ལ་ཞུ་ཅི་དགོས། དེས་ན་སྐྱབས་མགོན་རྒྱལ་བ་ཐུགས་རྗེ་ཅན། པཎ་ཆེན་ཐམས་ཅད་མཁྱེན་པ། རྒྱལ་ཚབ་རིན་པོ་ཆེ་སོགས་སར་གནས་བྱང་ཆུབ་སེམས་དཔའ་རྣམས་ཀྱིས། ལྷ་ལྡན་སོགས་ཕྱོགས་ཕྱོགས་ཀྱི་དགོན་མཐའི་གཙུག་ལག་ཁང་སོགས་ཀྱི་ཐག་ཉེའི་ཤན་པ་རྣམས་ཀྱིས་ཉིན་རེ་བཞིན་ལུག་བརྒྱ་སྟོང་མང་པོ་བསད་དེ། ཤ་ཁྲོམ་བརྩིགས་ནས་བཙོང་པ་འདི་ཇེ་ཉུང་དུ་གཏོང་བའི་ཆོས་གསུངས་ཁྲིམས་འཇོག་པ་སོགས་ཐབས་སྣ་ཚོགས་བྱེད་པ་དང་། གཞན་བླ་མ་དགེ་བཤེས་རྒྱལ་བློན་བྱང་ཆུབ་སེམས་དཔའ་ཁྱིམ་པ་ཕོ་མོ་སྙིང་རྗེ་ཅན་མཆོག་དམན་བར་མ་ཐམས་ཅད་ཀྱིས་ཆོས་ཀྱི་མཆོག་ཏུ་ཕ་མ་སེམས་ཅན་ར་ལུག་གཡག་གསུམ་སོགས་ཤན་པས་གསོད་པ་རྣམས་ཀྱི་སྲོག་བླུ་ཚེ་ཐར་ཅི་མང་གྱིས། ལོ་རེ་བཞིན་བཀའ་ཆོས་གནང་བའི་བླ་མ་རྣམས་ཀྱིས་སྐྱ་སེར་ཕོ་མོ་དྲག་ཞན་ཐམས་

ཅད་ལ། ཤའི་ཉེས་དམིགས་ཟ་མི་རུང་བར་སྤང་དགོས་ཚུལ་མདོ་རྒྱུད་བསྟན་བཅོས་ན་གང་ཡོད་ལུང་རིགས་འབྲེལ་བའི་སྒོ་ནས་གསུངས་ལ། དགེ་འདུན་པ་རབ་ཀྱིས་ཤ་སྤོང་ཅི་ཐུབ་ལྟོས། འབྲིང་གིས་ཤི་ཤ་མ་གཏོགས་སྲོག་བཅད་པའི་ཤ་མ་ཟ། ཐ་མས་ཀྱང་ཤན་པས་སྲོག་དབུགས་བཅད་པའི་ཤ་ཁྲག་སྐབས་རེ་ཙམ་ཟ་ཡང་རྒྱུན་དུ་བག་མེད་དུ་མ་ཟ་འདོད་ཆུང་ཆོག་ཤེས་བྱེད་དགོས་པའི་བཀའ་ཆོས་གནང་བར་ཞུ་ཞེས་ཐལ་མོ་སྦྱར་ནས་གསོལ་བ་འདེབས། དེ་ལྟར་མཛད་ན་སངས་རྒྱས་ཀྱི་བསྟན་པ་དང་། སངས་རྒྱས་དང་བྱང་ཆུབ་སེམས་དཔའ་ཡོད་པའི་རྟགས་དང་ཁྱད་ཆོས་སུ་གདའ། བསྟན་པ་གནས་པ་དང་བྱང་ཆུབ་སེམས་དཔའ་བཞུགས་པའི་ཁྱད་ཆོས་སུ་དེ་ལྟ་བུ་ཞིག་ཅི་ནས་ཀྱང་དགོས། ཉམ་ཐག་ཕ་མ་སེམས་ཅན་གྱི་སྲོག་ལ་བབ་ཡོད་པ་རྣམས་ཀྱི་ནང་ནས་སྲོག་བླུ་གཅིག་ཙམ་བྱས་ཏེ། ཚེ་དར་བཏགས་ནས་ལྷ་ལ་ཕུལ་ཏེ། སངས་རྒྱས་ཀྱི་བསྟན་པ་དར་ཞིང་སེམས་ཅན་ལ་བདེ་སྐྱིད་འབྱུང་བའི་གསོལ་འདེབས་བྱས་སྨོན་ལམ་བཏབ་ན་དེ་བས་དགེ་བ་ཞིག་གཞན་ན་མེད། དེ་མི་འཇིགས་པ་སྐྱབས་ཀྱི་

སྦྱིན་པ་ཡིན་པ་གཞིར་བཞག །སངས་རྒྱས་ཀྱི་བསྟན་པའི་རྩ་བ་སྙིང་རྗེ་ཡིན་དེའི་ཡན་ལག་ལྟ་བུ་སྡིག་སྤོང་དགེ་བ་སྒྲུབ་པ་རྣམས་ཡིན་པས། མི་དེས་དོན་གྱི་སངས་རྒྱས་ཀྱི་བསྟན་པ་གཟུང་བར་འགྱུར། དཔེར་ན་བུ་ལ་བྱམས་ན་མ་ཤུགས་ཀྱིས་དགའ་བ་ལྟར། ཕ་མ་སེམས་ཅན་ལ་ཕན་བཏགས་ན་རྒྱལ་བ་སྲས་བཅས་རྣམས་ཐུགས་དགྱེས་པའི་མཆོད་པའི་མཆོག་ཏུ་འགྱུར། བསོད་ནམས་ཀྱི་ཚོགས་དེའི་མཐུས་མ་འོངས་པ་ན་མཚན་དཔེས་མཛེས་པའི་ཟུང་འཇུག་རྡོ་རྗེ་འཆང་གི་སྐུ་ཐོབ་པས་ནམ་ཡང་མི་འཇིགས་པའི་སྐུ་གསུང་ཐུགས་རྟེན་བཞེངས་པའི་མཆོག་ཏུ་འགྱུར། ཚེ་ཐར་སྲོག་བླུ་བྱས་པའི་མཐུས་ཚེ་འདིར་ཡང་ཚེ་རིང་ནད་མེད་པའི་ཚེ་སྒྲུབ་ཞབས་བརྟན་ཀུན་གྱི་མཆོག་ཏུ་འགྱུར་རོ། །དེ་ནས་མཇུག་ཏུ་ཇི་ལྟར་གདམས་པ་ནི། དེང་སང་ས་གསུམ་འགྲོ་བའི་མིག་ལྟ་བུའི་སྟོན་པ་ནི་ཞལ་མི་བཞུགས་ཤིང་། དཔང་གྱུར་གྱི་སྐྱེ་བོ་ཕལ་ཆེར་ཟད་པ་དང་། དེ་ཉིད་མ་མཐོང་བའི་སྐྱེ་བོ་མང་པོས་སྟོན་པའི་བསྟན་པ་དཀྲུགས་པའི་དུས་འདིར་ཐར་འདོད་རྣམས་ཀྱིས་བག་ཡོད་དྲན་ཤེས་བསྟེན་དགོས་ཏེ། སློབ་དཔོན་དབྱིག་གཉེན་གྱིས། སྟོན་པ་

འཇིག་རྟེན་མིག་ནི་ཟུམ་གྱུར་ཅིང་། །དཔང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་པ་ཡི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །རང་བྱུང་རང་བྱུང་བསྟན་པ་གཅེས་འཛིན་རྣམས། །མཆོག་ཏུ་ཞིང་གཤེགས་འགྲོ་མགོན་མེད་པ་ན། །འདོམས་མེད་ཡོན་ཏན་འཇོམས་པར་བྱེད་པ་ཡི། །དྲི་མས་དགའ་མགུར་དེང་སང་འདི་ན་སྤྱོད། །དེ་ལྟར་ཐུབ་པ་དག་གི་བསྟན་པ་ནི། །ལྐོག་མར་སྲོག་འབྱིན་འདྲ་དང་དྲི་མ་རྣམས། །སྟོབས་དང་ལྡན་པའི་དུས་སུ་རིགས་ནས་ནི། །ཐར་པ་འདོད་པ་རྣམས་ཀྱིས་བག་ཡོད་གྱིས། །ཞེས་གསུངས་པ་ལྟར། ཐེག་པ་ཆེན་པོའི་ཆོས་ཀྱི་སྲོག་དང་འདྲ་བའི་སྙིང་རྗེ་ཆེན་པོའི་བསྟན་པ་རིན་པོ་ཆེ་ཉམས་པའི་དུས་འདིར་སྡིག་ཟས་ཤ་ལ་སྲེད་པ་མང་པོས་ཤ་ཟོས་ཆོག་པའི་ལུང་རིགས་ལྟར་སྣང་མང་པོ་བསྟན་ནས། རྣམ་གསུམ་དག་མ་དག་གཉིས་ཀ་འཇོལ་ཉོག་ཏུ་སྤྱོད་པའི་དུས་འདིར་བློ་གྲོས་ཅན་རྣམས་ཀྱིས་སྟོན་པའི་གསུང་རབ་དང་། རྒྱ་བོད་མཁས་གྲུབ་ཚད་ལྡན་རྣམས་ཀྱི་གསུང་དཔང་པོར་བཞག་ནས་བླང་དོར་མ་ནོར་བར་མཛོད་ཅེས་

གདམས་སོ། །ད་ནི་ཉི་མ་ནུབ་ཀྱི་རི་མགོར་ལྷུང་བ་བཞིན་དུ། སངས་རྒྱས་ཀྱི་བསྟན་པ་རིན་པོ་ཆེ་ནུབ་ལ་ཉེ། བསྟན་པའི་རྩ་བ་སྙིང་རྗེ་ཆེན་པོ་ནི་རང་གཞན་གང་གི་རྒྱུད་ན་མེད་པའི་དུས་འདིར་ཆོས་མིན་སྡིག་པའི་ལས་ལ་དགའ་བ་རྣམས་རྒྱལ་བའི་དུས་ཡིན་ཏེ། ཀུན་མཁྱེན་ཀློང་ཆེན་རབ་འབྱམས་པས། ཨེ་མ་དེང་སང་བསྟན་པ་ཡི། །ཉི་མ་ནུབ་ཀྱི་རི་མགོར་ལྷུང་། །མདོ་རྒྱུད་ཟེར་གྱི་སྣང་བ་ཡང་། །མཁས་གྲུབ་འགའ་ལས་གང་ནའང་དཀོན། །དེ་ཡི་གཞུང་ལ་བསྟེན་རྣམས་ཀྱང་། །གཞན་དུ་ལོག་པའི་བཤེས་ཀྱིས་འཁྲིད། །མིག་ལྡན་འགྲོ་བ་ལྡོང་འགྱུར་ཞིང་། །འབྱུང་པོའི་བྱ་རྣམས་དགའ་བའི་དུས། །ཆོས་མ་ཡིན་རྣམས་རྒྱལ་ལ་ལྟོས། །ཞེས་གསུངས་པའི་ཐོག་ཏུ་བབས་པའི་དུས་འདིར། འདི་འདྲའི་ཆོས་བཤད་བྱེད་པའང་དཀའ་སྟེ། ས་སྐྱ་པཎ་ཆེན་གྱིས། ད་ནི་ཕྱོགས་བཅུའི་སངས་རྒྱས་ལ། །ཐལ་སྦྱར་ནས་ནི་འདི་སྐད་གསོལ། །བདག་གིས་བདེན་པར་སྨྲ་ལགས་སམ། །འོན་ཏེ་རྫུན་དུ་སྨྲ་བར་བགྱི། །བདེན་པར་སྨྲས་ན་གཞན་སེམས་བསྲེག །རྫུན་པར་སྨྲས་ན་བསྟན་པ་འཇིག །སྨྲ་བ་སྤངས་ན་དོན་མི་རྟོགས། །

དེས་ན་དམ་པའི་སྤྱོད་པ་དཀའ། །ཨེ་ཊ་ཞེས་བྱའི་དྲང་སྲོང་མཆོག །དེ་ཡིས་གསོད་པའི་མཆོད་སྦྱིན་བཀག །དེའི་ཚེ་ཤ་ལ་དགའ་བ་ཡི། །གནོད་སྦྱིན་རྣམས་ཀྱིས་བསད་ཅེས་གྲགས། །དེང་སང་ན་ཡང་ཡུལ་དེ་ལ། །ཨེ་ཊ་གདུག་པའི་ཡུལ་ཞེས་ཟེར། །དམ་ཆོས་སྨྲ་བའི་དགེ་སློང་མཆོག །མེ་ཏོག་ཟླ་མཛེས་ཐུགས་རྗེ་ཅན། །དམ་ཆོས་བཤད་པའི་ལེ་ལན་གྱིས། །རྒྱལ་པོའི་ཆད་པས་བཅད་ཅེས་ཐོས། །གཞན་ཡང་བདེན་པར་སྨྲ་བའི་རྒྱུས། །སྨྲ་བ་པོ་ལ་འཇིག་རྟེན་ཀུན། །ལོག་པར་འཇུག་པ་མང་ལགས་པས། །ཐུགས་རྗེ་མངའ་བས་བསྐྱབ་ཏུ་གསོལ། །ཞེས་གསུངས་པ་ལྟར་དཀོན་མཆོག་ལ་གསོལ་བ་འདེབས་བཞིན་བློ་ཁ་ནང་དུ་ལོག་ནས་རང་གི་སེམས་ལ་བལྟ་བར་བྱ་སྟེ། མཉམ་མེད་པོ་ཏོ་བའི་ལམ་རིམ་ལས། འཛམ་གླིང་སངས་རྒྱས་གཉིས་པར་གྲགས་པ་ཡི། །ཇོ་བོའི་བཀའ་བརྒྱུད་བདུད་རྩི་ལྟ་བུ་འདི། །ཚོང་འདུས་འོ་མ་བཞིན་དུ་བསྲེས་བསླད་བྱས། །དེང་སང་དུས་ན་གྲོང་བསྐོར་བྱེད་པར་གྱུར། །དམ་པ་ཕན་ཚུན་གཅིག་གིས་གཅིག་བསྟོད་པ། །དེང་སང་དུས་ན་ཐམས་ཅད་

འགྲན་པར་གྱུར། །དབེན་པར་ཀུན་ནས་ཚུལ་བཞིན་སེམས་པ་དེ། །དེང་སང་དུས་ན་ཉིན་པར་སྐར་མ་ཙམ། །ཚེ་འདི་བློས་བཏང་ཐར་ལམ་བསྒོམ་པ་དེ། །དེང་སང་དུས་ན་རང་འོད་མེད་པར་བྱེད། །ཚེ་འདིའི་དོན་གཉེར་ཡོ་བྱད་གསོག་པ་དེ། །དེང་སང་དུས་ན་རང་འོད་ཅན་དུ་བྱེད། །བསླབ་ལ་གུས་ཤིང་དམན་ས་འཛིན་པ་དེ། །དེང་སང་དུས་ན་ཀུན་གྱིས་བརྙས་བཅོས་བྱེད། །སྡིག་ལ་མི་འཛེམ་རྩབ་རལ་བྱེད་པ་དེ། །དེང་སང་དུས་ན་ཀུན་གྱིས་སྤྱི་བོར་བཀུར། །དམ་པ་ཐམས་ཅད་རིམ་གྱིས་གཤེགས་གྱུར་པས། །དེང་སང་དུས་ན་བརྟེན་ས་མེད་པར་གྱུར། །རང་གི་འཁོར་བའི་སྐྱོན་ལ་བསམ་བྱས་ནས། །ཤེས་པ་ནང་དུ་བཟློག་སྟེ་བལྟ་བར་བྱ། །ཞེས་གསུངས་པ་ལྟར་རང་སེམས་ལ་བལྟ་བ་མན་ངག་བླ་ན་མེད་པ་ཡིན་མོད། འོན་ཀྱང་རྗེ་བདག་ཉིད་ཆེན་པོའི་ཞལ་ནས། ས་འདི་མཁས་གྲུབ་བརྒྱ་སྟོང་གིས། །རིན་ཆེན་ཁུར་ཆེན་འཛིན་པའི་ཚེ། །འབད་པ་དུ་མས་དེ་རྣམས་ཀྱི། །སྤྱན་སྔར་སོ་སོའི་ལེགས་བཤད་ལེན། །དུས་ཀྱི་དབང་གིས་དེ་ཉམས་ཚེ། །དེ་དག་རྣམས་ཀྱི་ཐུགས་ཀྱི་བཅུད། །ཡི་གེར་བཀོད་པའི་གཞུང་མང་

རྣམས། །བླ་མའི་མན་ངག་ལ་བརྟེན་ནས། །ལེགས་པར་སྦྱངས་ཏེ་ལེན་པ་ནི། །དེ་ཡི་དོད་དུ་མཁས་པས་ཤེས། །ཞེས་གསུངས་པ་ལྟར་བདག་གིས་ཀྱང་སྔོན་བྱོན་མཁས་གྲུབ་རྣམས་ཀྱི་ཐུགས་བཅུད་ཡི་གེར་བཀོད་པའི་གཞུང་མང་པོ་ནས་འདི་ཉིད་བླངས་པ་ཡིན་པས། བློ་གྲོས་ཅན་གཞན་གྱིས་ཀྱང་འདི་ཉིད་ཉམས་སུ་ལེན་པར་འོས་ཏེ། སློབ་དཔོན་ཀཱ་མ་ལ་ཤཱི་ལས། དམ་པ་ཕྲག་དོག་ལ་སོགས་དྲི་མ་ཐག་བསྲིང་བ། །ཡོན་ཏན་རྣམས་ཀྱིས་མི་མངོན་ཆུ་ཡི་མཚོ་འདྲ་དག ། རྣམ་པར་ཕྱེ་ནས་ལེགས་པར་བཤད་རྣམས་འཛིན་བྱེད་དེ། །ངང་པ་རབ་དགའ་ཆུ་ལས་འོ་མ་ལེན་པ་བཞིན། །དེ་ལྟ་བས་ན་མཁས་རྣམས་ཀྱིས། །ཕྱོགས་ལྷུང་དཀྲུགས་ཡིད་རིང་སྤོངས་ལ། །བྱིས་པ་ལས་ཀྱང་ལེགས་བཤད་པ། །ཐམས་ཅད་བླང་བ་ཁོ་ན་ཡིན། །གསུངས་པ་ལྟར་ཉམས་སུ་བླང་ན་གང་ཟག་དེ་གནས་སྐབས་ཀུན་ཏུ་བདེ་ཞིང་། མཐར་ཐུག་སངས་རྒྱས་ཀྱི་གོ་འཕང་བདེ་བླག་ཉིད་དུ་འཐོབ་པར་འགྱུར་རོ།། ༈ སྨྲས་པ། སྙིང་རྗེ་ཆེན་པོའི་སྒོ་ནས་དུས་ཀུན་ཏུ། །སྙིང་རྗེའི་ཡུལ་གྱུར་འགྲོ་ལ་ལྷ་ཆོས་

ཀྱི། །སྙིང་པོ་སྙིང་རྗེའི་ཆོས་ཀྱི་ཆར་འབེབས་པའི། །སྙིང་རྗེའི་མངའ་བདག་བླ་མ་སྤྱི་བོར་བཞུགས། །ཆོས་མཛད་སྐྱེས་བུ་རྣམས་ཀྱི་རྒྱན་གྱི་མཆོག །དཔག་མེད་ཡོན་ཏན་མ་ལུས་འབྱུང་བའི་གནས། །ཆོས་ཀྱི་རྩ་བ་སྙིང་རྗེ་རིན་པོ་ཆེའི། །ཡོན་ཏན་དྲན་བཞིན་བསྟོད་བསྔགས་མེ་ཏོག་འཐོར། །སྙིང་རྗེ་ཆེན་པོ་ཡིད་བཞིན་ནོར་བུ་འདྲ། །སྙིང་རྗེ་ཆེན་པོ་གཏེར་ཆེན་བུམ་བཟང་འདྲ། །སྙིང་རྗེ་ཆེན་པོ་དཔག་བསམ་ལྗོན་ཤིང་འདྲ། །སྙིང་རྗེ་ཆེན་པོ་འཛམ་གླིང་ཉི་མ་འདྲ། །སྙིང་རྗེ་ཡོད་ན་ཆོས་ཀྱི་རྩ་བ་ཚུགས། །སྙིང་རྗེ་ཡོད་ན་བདག་གཞན་དོན་གཉིས་འགྲུབ། །སྙིང་རྗེ་ཡོད་ན་སངས་རྒྱས་དངོས་དང་མཚུངས། །སྙིང་རྗེ་ཡོད་ན་ལྷ་མི་ཀུན་གྱིས་སྨོན། །སྙིང་རྗེ་ཡོད་ན་ཐོག་མར་སེམས་ཅན་གྱི། །དོན་དུ་སྨོན་འཇུག་བྱང་ཆུབ་སེམས་བསྐྱེད་ནུས། །སྙིང་རྗེ་ཡོད་ན་བར་དུ་རྒྱལ་སྲས་ཀྱི། །སྤྱོད་པ་རླབས་པོ་ཆེ་ལ་སློབ་པར་ནུས། །སྙིང་རྗེ་ཡོད་ན་ཐ་མར་སངས་རྒྱས་ཚེ། །ཞི་བར་མི་གནས་སེམས་ཅན་འདྲེན་པར་ནུས། །སྙིང་རྗེ་ཆེ་ན་གསང་སྔགས་སྒོར་ཞུགས་ནས། །ཚེ་གཅིག་སངས་རྒྱས་གོ་འཕང་ཐོབ་པར་ནུས། །སྙིང་རྗེ་ཡོད་ན་

བསྟན་འགྲོར་ཕན་པའི་ཕྱིར། །ཐོས་བསམ་སྒོམ་གསུམ་འཆད་རྩོད་རྩོམ་གསུམ་ནུས། །སྙིང་རྗེ་ཆེན་པོས་བདག་ཡིད་རབ་བསྐྱོད་ནས། །འགྲོ་ལ་ཕན་ཕྱིར་སྙིང་རྗེའི་གླེགས་བམ་བརྩམས། །འདི་ལ་འགལ་འཁྲུལ་ནོངས་པ་ཅི་མཆིས་པ། །བླ་མ་རྒྱལ་བ་སྲས་བཅས་སྤྱན་སྔར་བཤགས། །སྙིང་རྗེའི་མངའ་བདག་བླ་མ་རྒྱལ་སྲས་ཀྱིས། །གང་བརྩམས་འགྲོ་ལ་ཕན་པར་བྱིན་གྱིས་རློབས། །ལུང་དང་རིགས་པའི་སྡེབས་སྦྱོར་ཀུན་ཚང་བའི། །ཆོས་ཀྱི་སྙིང་པོ་སྙིང་རྗེའི་སྨན་མར་འདི། །སྐལ་བཟང་ཆོས་མཛད་ཡོངས་ཀྱིས་གསོལ་ནུས་ན། །བྱང་ཆུབ་སེམས་ཀྱི་ལུས་སྟོབས་རྒྱས་པར་འགྱུར། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །སྙིང་རྗེ་ཆེན་པོ་སྐྱེ་བའི་རྒྱུ་རུ་བསྔོ། །ཚེ་རབས་ཀུན་ཏུ་སྙིང་རྗེ་ཆེན་པོ་དང་། །འབྲལ་བ་མེད་པར་ཤོག་ཅེས་སྨོན་ལམ་འདེབས། །འདི་ཕྱི་བར་དོ་ཚེ་རབས་ཐམས་ཅད་དུ། །སྙིང་རྗེ་ཅན་གྱི་བླ་མ་མཇལ་བར་ཤོག །སྙིང་རྗེའི་ལྷ་མཆོག་སྤྱན་རས་གཟིགས་དབང་དང་། །སྐད་ཅིག་ཙམ་ཡང་འབྲལ་བར་མ་གྱུར་ཅིག །ས་གཞི་ནམ་གནས་བར་དུ་གླེགས་བམ་

འདིས། །ས་ཐོག་འདི་ན་སྡིག་ཟས་ཤ་ཡི་ཕྱིར། །ས་ལ་བསྒྱེལ་ནས་སེམས་ཅན་གསོད་ཚད་ཀྱི། །ས་སྟེང་སྐྱེ་འགྲོ་ཡོངས་ལ་ཕན་པར་ཤོག །རྒྱལ་མཚན་རྩེ་མོའི་ཏོག་གི་ནོར་བུ་ལྟར། །རྒྱལ་བ་སྲས་བཅས་རྣམས་ཀྱིས་རབ་བསྔགས་པའི། །རྒྱལ་བསྟན་སྙིང་པོ་སྙིང་རྗེའི་ནོར་བུ་ཡིས། །རྒྱལ་ཁམས་ཡོངས་ལ་ཕན་པའི་བཀྲ་ཤིས་ཤོག །ཅེས་སངས་རྒྱས་དང་བྱང་ཆུབ་སེམས་དཔའ་རྒྱ་བོད་ཀྱི་མཁས་གྲུབ་རྣམས་ཀྱིས་གསུངས་པའི་བྱམས་སྙིང་རྗེ་བྱང་ཆུབ་སེམས་ཀྱི་ཆོས་འཁོར་རྣམས་ཀྱི་ནང་ནས་འདིར་མཁོ་བ་རྣམས་ཕྱོགས་གཅིག་ཏུ་བསྒྲིགས་པས་གླེགས་བམ་ཆུང་ཆུང་ཞིག་ལོངས་ཚེ། གསུང་ཆོས་དེ་རྣམས་ལས་སླར་ཡང་སྤྲུལ་པའི་གླེགས་བམ་ཞིག་དང་འདྲ་བ་བྱུང་སྙམ་ནས། མཚན་ཡང་སྙིང་རྗེ་སྤྲུལ་པའི་གླེགས་བམ་ཞེས་བྱ་བ་འདི་ནི། རང་གི་ཡིད་ལ་གོམས་པ་དང་། སྐལ་བཟང་གཞན་ལ་ཕན་པའི་ཕྱིར་སྔ་གོང་ནས་རྩོམ་འདུན་ཡོད་པའི་ཁར། གྲུབ་པའི་དབང་ཕྱུག་དཔལ་ཆེན་ནམ་མཁའ་འཇིགས་མེད་ཀྱི་སྐུ་གསུང་ཐུགས་ཀྱི་སྤྲུལ་པ། མཁས་བཙུན་བཟང་གསུམ་གྱི་ཡོན་ཏན་དང་ལྡན་པའི་སྤྲུལ་སྐུ་རྣམ་གསུམ་དང་།

མཁས་གྲུབ་གཉིས་འཛོམ་ཀུན་བཟང་སྟོབས་ལྡན་དབང་པོའི་ཐུགས་སྲས་རྣམ་གཉིས། སྐལ་ལྡན་ལས་འཕྲོ་ཅན་གྱི་དགེ་སློང་བློ་གྲོས། མི་གཞི་ལྷ་ལས་བཟང་བའི་མཚམས་པ་ཚེ་མགོན། སྒྲུབ་བརྒྱུད་བསྟན་པ་འཛིན་པའི་བྱ་བྲལ་འཇིགས་མེད། གུ་ཡངས་བློ་བདེའི་སློབ་བུ་བློ་བཟང་མཁས་མཆོག་སོགས་ཐེག་པ་ཆེན་པོའི་སྣོད་ལྡན་གྱི་སློབ་མ་མང་པོས། ཆོས་ཀྱི་རྩ་བ་སྙིང་རྗེ་ཆེན་པོ་འདི་ཀུན་གྱི་རྒྱུད་ལ་སྐྱེ་དཀའ་བར་འདུག་པས། ཕྱིན་ཆད་སྙིང་རྗེ་སྐྱེ་བའི་ཐབས་སུ་འདི་ལྟ་བུའི་ལེགས་བཤད་ཟབ་མོ་ཞིག་དགོས་ཞེས་ལྷ་རྫས་དང་བཅས་ཏེ་ཡང་ཡང་བསྐུལ་བའི་ངོར། བྱམས་སྙིང་རྗེ་བྱང་ཆུབ་ཀྱི་སེམས་ལ་བློ་སྦྱོང་བའི་རྣལ་འབྱོར་ཞབས་དཀར་པས་དབེན་གནས་བཀྲ་ཤིས་འཁྱིལ་ནས་སྦྱར་བའོ། །འདིས་ཀྱང་བསྟན་པ་དང་འགྲོ་བ་ཡོངས་ལ་ཕན་དཔག་ཏུ་མེད་པ་ཐོགས་པར་གྱུར་ཅིག། ༈ །།སྭ་སྟི། རྨད་བྱུང་གོམས་སྟོབས་ཐུགས་ཀྱི་རྒྱ་མཚོ་ལས། །འཁྲུངས་པའི་གཞན་ཕན་སྙིང་རྗེའི་དཀྱིལ་འཁོར་རྫོགས། །སྡེབས་ལེགས་ལུང་རིགས་རི་དྭགས་གཟུགས་ཀྱིས་མཛེས། །སྔར་མེད་སྤྲུལ་པའི་གླེགས་བམ་ཟླ་བ་ཞིག །ལྷག་བསམ་ཤར་

རིའི་རྩེ་ལས་འཕགས་པའི་མོད། །ཆོས་བརྒྱད་ཆོས་སུ་རློམ་པའི་པདྨ་ཟུམ། །ཆོས་མིན་ཆོས་ལྟར་བཅོས་པའི་ཚ་གདུང་བཅིལ། །ལེགས་ཚོགས་ཀུ་མུད་བཞད་པ་མ་ཡིན་ཀྱང་། །འགྲོ་ལ་རྗེས་བརྩེའི་རྒྱུན་བཟང་གངྒཱ་མོ། །ཁྱོད་ཐུགས་བདེ་འབྱུང་རལ་ཀློང་སིམ་པའི་མཐར། །གཞན་ཕན་སྐལ་ལྡན་ཤིང་རྟས་ཉེར་དྲངས་པས། །བྱང་སེམས་སྙིང་རྗེའི་རྒྱ་མཚོར་ཅིས་མི་འཇུག །འོན་ཀྱང་ཐུབ་བསྟན་ཆུ་ལྷའི་འཕང་པར་ཕྱོགས། །འདོད་ལྷའི་བྲན་གཡོག་སེར་གཟུགས་འབྱུང་པོའི་བྱས། །ནོར་འཛིན་ཁེངས་ལ་ཉེ་བའི་དུས་སྐབས་འདིར། །འདི་འདྲའི་དམ་ཆོས་ཐོས་པའང་མགོན་ཁྱོད་དྲིན། །དྲིན་ལན་གསབ་ཕྱིར་དབྱངས་གསལ་གཟུགས་རིས་སྤེལ། །སྤེལ་བའི་དགེ་འབྲས་མ་གྱུར་འགྲོ་བ་རྣམས། །རྣམ་གྲོལ་ཉེར་ཞིའི་ས་ལ་མ་བཞག་བར། །བར་མི་འཆད་པའི་གཞན་དོན་སྒྲུབ་རྒྱུར་བསྔོ། །དེའི་མཐུས་རྒྱལ་བསྟན་རིན་ཆེན་སྙིང་པོའི་བཅུད། །ལས་ལྡན་སྐྱེ་རྒུའི་རྒྱུད་ལ་རང་ཞུགས་ནས། །འགྲོ་ཀུན་ཕན་བདེའི་དཔལ་གྱིས་རྟག་འཚོ་ཞིང་། །ཐུབ་བསྟན་ཡུན་དུ་གནས་པའི་བཀྲ་ཤིས་ཤོག །ཅེས་པའང་བུདྡྷ་རཏྣས་སོ། །སརྦ་མངྒ་ལཾ།། །།

ཡ་མཚན་སྤྲུལ་པའི་གླེགས་བམ།

ཡ་མཚན་སྤྲུལ་པའི་གླེགས་བམ་བཞུགས་སོ། །

ན་མོ་གུ་རུ། ཉི་མ་འབུམ་ལས་གཟི་བརྗིད་འོད་འབར་བླ་མ་ཐུབ་པའི་དབང་པོ་རྗེ། །དེང་ནས་བཟུང་སྟེ་འབྲལ་བ་མེད་པར་བདག་གི་སྤྱི་བོའི་རྒྱན་དུ་བཞུགས། །འདྲེན་པ་མཉམ་མེད་སྟོན་པས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་རྣམས། །རྩོལ་བ་མེད་པར་རྒྱུད་ལ་འཆར་བར་ཡང་དང་ཡང་དུ་བྱིན་གྱིས་རློབས། །ཤེས་རབ་མཁའ་ལས་ཡངས་བའི་ཡི་དམ་འཇམ་དབྱངས་སྙིང་གི་དབུས་སུ་བཞུགས། །མཁའ་ལྟར་ཆེ་ཞིང་གློག་ལྟར་མྱུར་བ་ཉི་མ་བཞིན་དུ་གསལ་ལ་དྭངས། །རྒྱ་མཚོའི་

གཏིང་ལྟར་དཔག་པར་དཀའ་བའི་ཤེས་རབ་མཆོག་དེ་མྱུར་ཐོབ་ནས། །འཆད་རྩོད་རྩོམ་ལ་ཐོགས་མེད་དངོས་གྲུབ་གཏེར་ཁ་ནང་ནས་རྡོལ་དུ་གསོལ། མཁའ་འགྲོའི་གཙོ་མོ་ལྟ་བས་མི་ངོམས་དབྱངས་ཅན་ལྷ་མོ་དགྱེས་འཛུམ་ཅན། །རབ་སྙན་པི་ཝང་སྒྲ་དང་ལྷན་དུ་གསུང་དབྱངས་སྙན་པོ་འབྱོན་བཞིན་དུ། །བདག་གི་མགྲིན་པའི་པདྨོར་བཞུགས་ལ་གཞན་གྱི་རྣར་སྙན་ཡིད་འབབ་ཀྱི། །ལེགས་བཤད་འདོམས་ལ་བར་ཆད་མེད་པར་སྨྲ་བ་སྙན་པའི་དཔལ་སྦྱིན་ཞིག །བླ་མ་དམ་པ་རྣམས་ཀྱིས་

བསྩལ་བའི་དམ་པའི་ཆོས་ཀྱི་གླེགས་བམ་རྣམས། །བདག་སེམས་གསལ་སྟོང་ཀུན་དགའ་ར་བར་གཅིག་ཀྱང་མ་ལུས་ཤོང་བ་མཚར། །ནང་ནས་ཡ་མཚན་སྤྲུལ་པའི་གླེགས་བམ་གཞན་ལ་ཕན་ཕྱིར་སྦྱིན་ལ་སྤྲོ། །ཤེས་རབ་ཆེ་ཞིང་དད་པ་ཅན་གྱིས་ནོར་བུ་བཞིན་དུ་གུས་པས་ལོངས། །ཞེས་ཚིགས་སུ་བཅད་པའི་དབྱངས་སྙན་པོས་སྡུན་བསུས་ནས་ལྷག་བསམ་དག་པའི་སྒོ་ནས་རང་གཞན་ལ་ཕན་པའི་གཏམ་འཆད་པ་ལ་འཇུག་པར་བྱའོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་རྒྱ་བོད་ཀྱི་མཁས་གྲུབ་ཐམས་ཅད་ཀྱི་

རྣམ་པར་ཐར་པ་དང་གསུང་བཞིན་དུ། སྤྱིར་འཁོར་བ་སྡུག་བསྔལ་གྱི་རང་བཞིན། སྒོས་སུ་འདོད་ཡོན་ལྔ་སྡུག་བསྔལ་གྱི་ལོངས་སྤྱོད། དེའི་ནང་ནས་ཀྱང་ལྟོ་གོས་བུད་མེད་གསུམ་སྡུག་བསྔལ་གྱི་འབྱུང་གནས། ཁྱད་པར་ལུས་འདི་སྡུག་བསྔལ་ཐམས་ཅད་འདྲེན་པའི་གཞི་མ་ཡིན་ཚུལ་ཞིབ་ཏུ་བསམས་ནས། ལུས་ལོངས་སྤྱོད་གང་ལ་ཡང་ཆགས་ཞེན་སྤུ་ཙམ་ཡང་མེད་པར་འཕོངས་ཕྱིས་པའི་རྡོ་བཞིན་བསྐྱུར་ནས། ནག་ཅན་བཙོན་དོང་ནས་བྲོས་པ་ལྟར། ཕ་ཡུལ་བདུད་ཀྱི་བཙོན་ར་ནས་བྲོས་

ཏེ། རི་ཁྲོད་དབེན་པའི་གནས་སུ་སོང་ནས་རི་དྭགས་རྨས་མ་བཞིན་དུ་གཅིག་པུར་དམ་པའི་ཆོས་ཁོ་ན་ལ་འབད་དགོས་ཏེ། དེ་ཡི་རྒྱུ་མཚན་གང་ཡིན་ཞེ་ན། སྤྱིར་རང་གཞན་སེམས་ཅན་ཐམས་ཅད་ཚེ་འཁོར་བ་ཐོག་མ་མ་མཆིས་པ་ནས། ཐ་མ་ད་ལྟ་ལ་ཐུག་གི་བར་དུ། ཡང་དག་པའི་དོན་ལ་རྨོངས་པའི་མ་རིག་པ་དང་། ལས་རྒྱུ་འབྲས་ཀྱི་དབྱེ་བ་ལ་རྨོངས་པའི་མ་རིག་པ་གཉིས་སམ་གང་རུང་གི་དབང་དུ་སོང་། མ་རིག་པའི་དབང་གིས་ཆགས་སྡང་སོགས་ཉོན་མོངས་པ་ཐམས་ཅད་རྒྱས། ཉོན་མོངས་པའི་དབང་གིས་ལས་བཟང་ངན་སྣ་ཚོགས་པ་བསགས། ལས་ཀྱི་དབང་གིས་འཁོར་བ་མཐོ་དམན་གྱི་གནས་རྣམས་བྱུང་། འགྲོ་བ་དྲུག་གམ་ལྷ་མིན་གྱི་གཙོ་བོ་ཐག་བཟང་རིས་སོགས་ལྷའི་ཁོངས་དང་ཕལ་བ་རྣམས་དུད་འགྲོའི་ཁོངས་སུ་བསྡུས་པས་འགྲོ་བ་ལྔའི་ལུས་གང་ཡང་རུང་བ་བླངས། སྤྱི་མཐུན་ལ་འགྱུར་བའི་སྡུག་བསྔལ། སྡུག་བསྔལ་གྱི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ། བྱེ་བྲག་ཏུ་དམྱལ་བ་ཚ་གྲང་། ཡི་དྭགས་ལ་བཀྲེས་སྐོམ། དུད་འགྲོ་བཀོལ་སྤྱོད། མི་ལ་སྐྱེ་རྒ་ན་འཆི། ལྷ་མ་ཡིན་ལ་འཐབ་རྩོད།

ལྷ་ལ་འཆི་འཕོ་ལྟུང་བའི་སྡུག་བསྔལ་བསམ་གྱིས་མི་ཁྱབ། དཔེར་ན་མེའི་དོང་ཆེན་པོ་ཚ་བའི་ངར་དང་ལྡན་པ་གཏིང་ཟབ་ལ་དཔངས་མཐོ་བ། རྒྱ་ཆེ་ལ་མུ་མེད་པ་འཇིགས་སུ་རུང་བའི་ནང་དུ་མི་མང་པོ་ལྷུང་ན། མཐོ་དམན་གང་དུ་ལྷུང་རུང་སྡུག་བསྔལ་གྱི་གནས། མེ་ནང་གི་མི་སུ་དང་འགྲོགས་ཀྱང་སྡུག་བསྔལ་གྱི་གྲོགས། མེ་མ་མུར་གང་ལ་ལོངས་སྤྱོད་ཀྱང་སྡུག་བསྔལ་གྱི་ལོངས་སྤྱོད། འགྲོ་འདུག་འགུལ་བསྐྱོད་སོགས་བྱ་བ་གང་བྱས་ཀྱང་སྡུག་བསྔལ་གྱི་རང་བཞིན་ལས་མ་འདས་པ་ལྟར། ལས་ཉོན་གྱི་དབང་གིས་འཁོར་བའི་གནས་འདིའི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་གནས། སུ་དང་འགྲོགས་ཀྱང་སྡུག་བསྔལ་གྱི་གྲོགས། ཅི་ལ་ལོངས་སྤྱོད་ཀྱང་སྡུག་བསྔལ་གྱི་ལོངས་སྤྱོད། བྱ་བ་ཅི་བྱས་ཀྱང་སྡུག་བསྔལ་སྒྲུབ་པའི་ཐབས་འབའ་ཞིག་ལས་མ་འདས། བདེ་བའི་གོ་སྐབས་སྐད་ཅིག་ཙམ་ཡང་མེད་དེ། རྒྱ་ཆེར་རོལ་པ་ལས། སྲིད་སྲེད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་

འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །ཞེས་དང་། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །གསུངས། སློབ་དཔོན་ཀླུ་སྒྲུབ་ཀྱིས། འཁོར་བ་དེ་འདྲ་ལགས་པས་ལྷ་མི་དང་། །དམྱལ་བ་ཡི་དྭགས་དུད་འགྲོ་རྣམ་དག་ཏུ། །སྐྱེ་བ་བཟང་པོ་མ་ལགས་སྐྱེ་བ་ནི། །གནོད་པ་དུ་མའི་སྣོད་གྱུར་ལགས་མཁྱེན་མཛོད། །གསུངས། ཀློང་ཆེན་རབ་འབྱམས་པས། འཁོར་བ་རྒྱལ་པོའི་བཙོན་ར་འདྲ། །འཁྲུལ་སྣང་སྡུག་བསྔལ་དཔག་ཏུ་མེད། །ད་རེ་བདེ་ཆེན་བྱང་ཆུབ་གླིང་། །གཏན་གྱི་འདུན་མ་བྱས་ན་འོང་། །གསུངས། སྐུ་གསུམ་དོན་ཐིག་ལས། རིགས་དྲུག་རྣམས་ལ་འགྱུར་དང་འདུ་

བྱེད་དང་། །སྡུག་བསྔལ་སྡུག་བསྔལ་དག་གིས་མནར་བ་དག །ལེགས་པར་བརྟགས་ན་སྡུག་བསྔལ་ཕུང་པོ་སྟེ། །ལས་འབྲས་བླང་དོར་འབད་ཅིང་བརྩོན་པར་བྱ། །ད་ལན་རྒྱུ་རྐྱེན་རྟེན་འབྲེལ་འཛོམ་དུས་འདིར། །ཡང་གསང་རྡོ་རྗེ་ཐེག་པའི་སྒོར་ཞུགས་ཏེ། །བསྐྱེད་རྫོགས་ཟབ་མོའི་དོན་ལ་གཅིག་ཏུ་གཞོལ། །གསུངས། འཁོར་བའི་སྡུག་བསྔལ་ཐམས་ཅད་རྒྱས་པར་བཤད་ན་ལྕེ་བརྒྱར་སྤྲུལ་ནས། བསྐལ་པ་བྱེ་བར་བརྗོད་ཀྱང་རྫོགས་པའི་ཡུལ་ལས་འདས་ཏེ། ལྷོ་བྲག་མར་བས་རྗེ་མི་ལ་ལ། བུ་ཡིས་འཁོར་བའི་སྡུག་བསྔལ་སོམས། །འཁོར་བའི་རང་བཞིན་འདི་འདྲ་ཞེས། །བདག་གིས་ལྕེ་བརྒྱར་རབ་སྤྲུལ་ནས། །བསྐལ་པ་བྱེ་བ་བསམ་ཡས་སུ། །བཤད་ཀྱང་བརྗོད་ཀྱིས་མི་ལང་བས། །ངས་བཤད་དམ་ཆོས་ཆུད་མ་གསན། །ཞེས་གསུངས་སོ། །སྒོས་སུ་འདོད་ཡོན་ལྔ་ནི་སྡུག་བསྔལ་གྱི་ལོངས་སྤྱོད་ཁོ་ན་ཡིན་ཏེ། དཔེར་ན་ལུས་ལ་ན་ཟུག་བསྐྱེད་པའི་དུག་དང་འདྲེས་བའི་ཟས་དེ་ལ་སྡུག་ཟས་མ་གཏོགས་སྐྱིད་ཟས་ཞེས་སུས་མི་སྨྲ་བ་བཞིན། སྡུག་བསྔལ་སྐྱེད་པའི་འདོད་ཡོན་

འདི་ལ་སྡུག་བསྔལ་གྱི་ལོངས་སྤྱོད་མ་གཏོགས་བདེ་བའི་ལོངས་སྤྱོད་སུས་ཟེར། སྡུག་བསྔལ་གྱི་ལོངས་སྤྱོད་ཡིན་པའི་རྟགས་སུ་བཟའ་བཏུང་མང་པོ་ཟོས་པས་བརྒྱགས་ཆེས་ན། ན་ཚ་ཟུག་རྔུ་བྱུང་འཆི་ལ་ཁད་བྱེད་པ་མཐོང་ཐོས་མངོན་གྱུར་དུ་འབྱུང་བ་ལ་ལྟོས། བདེ་བའི་རྒྱུ་ཡིན་ན་སྤྱད་ཀྱིན་བདེ་བ་ཆེར་འགྲོ་དགོས་ཀྱི་སྡུག་བསྔལ་ཞིག་བསྐྱེད་དོན་ག་ལ་ཡོད། དེ་ཅིའི་ཕྱིར་ཞེ་ན། འདོད་ཡོན་བདེ་བའི་རྒྱུ་ཡིན་པའི་ཕྱིར་རོ། །སྡུག་བསྔལ་བསྐྱེད་ན་སྡུག་བསྔལ་གྱི་ལོངས་སྤྱོད། བདེ་བ་བསྐྱེད་ན་བདེ་བའི་ལོངས་སྤྱོད་ཅེས་སྨྲས་དགོས་ཀྱི། དེ་གཉིས་གོ་ལྡོག་ཏུ་བླུན་པོ་ཞིག་ཡིན་ན་མ་གཏོགས་མཁས་པ་སུ་ཞིག་གིས་སྨྲས། སྡུག་བསྔལ་གྱི་ལོངས་སྤྱོད་ཡིན་ཞེས་བརྒྱ་སྨྲ་རུང་། ལྟོགས་ཡོད་དུས་རྩམ་པ་དང་ཤ་སོགས་ཟོས་ན་བདེ་ཆམ་མེར་འགྲོ་བར་འདུག་པས། བདེ་བ་ཞིག་ཀྱང་ཡོད་ཚོད་རེད་ཟེར་ན། དེ་ལྟོགས་པའི་སྡུག་བསྔལ་ཆེན་པོ་འགགས་ནས། རྒྱགས་པའི་སྡུག་བསྔལ་གྱི་འགོ་རྩོམ་དུ་ཡོད་པའི་བར་དེ་ལ། བདེ་བའི་མིང་བཏགས་པ་ཡིན་གྱི། དོན་གྱི་བདེ་བ་ཞིག་ཡིན་དོགས་མེད། དེའི་དུས་ན་རྒྱགས་པའི་སྡུག་བསྔལ་ཆུང་བས་

ལྐོག་གྱུར་གྱི་ཚུལ་དུ་མི་མངོན་པར་ཡོད། དེ་བཞིན་དུ་ཉི་མས་ཚ་དུས་བསིལ་གྲིབ་ཞིག་ཏུ་སོང་ན་ཚ་བའི་སྡུག་བསྔལ་འགགས་ནས། བདེ་བ་ལྟར་སྣང་ཡང་གྲང་བའི་སྡུག་བསྔལ་གྱི་འགོ་ནས་བཟུང་བ་ཡིན། དེ་དུས་སྡུག་བསྔལ་ཆུང་བས་ལུས་སེམས་ཀྱིས་དངོས་སུ་མི་ཚོར་ཡུན་རིང་ན་སྐབས་ཤིག་གྲང་བའི་སྡུག་བསྔལ་མངོན་གྱུར་དུ་འབྱུང་། དེས་མཚོན་འདོད་ཡོན་ལྔའི་ལོངས་སྤྱོད་ཐམས་ཅད་དེའི་རང་བཞིན་ཡིན། འཁོར་བ་འདི་ན་སྡུག་བསྔལ་མི་སྐྱེད་པའི་ལོངས་སྤྱོད་ཅིག་ག་ན་ཡོད། དཔེར་ན་ཕྱེ་མ་ལེབ་གཟུགས་ལ་ཆགས་པས། མར་མེ་དང་མེ་འབར་བ་ལྷ་ཁང་དུ་མཐོང་། ནང་དུ་མཆོངས་ནས་འཆི་བ་དང་། རྒྱ་གར་གྱི་རི་དྭགས་ཤིག་སྒྲ་སྙན་ལ་ཆགས་པས། མི་འགའ་ཞིག་གིས་པི་ཝང་བརྡུང་མདའ་བརྒྱབ་ནས་གསོད་པ་དང་། བུང་བ་དྲི་ལ་ཆགས་པས། དྲི་གར་ཡོད་སར་སོང་ཆུ་དང་འདམ་གྱིས་གོས་གཤོག་པ་ཆད་ནས་འཆི་བ་དང་། སྦྲང་རྩི་བསགས་པ་མི་ཡིས་ལེན་དུས་གསོད་པ་དང་། ཉ་རོ་མངར་བ་ལ་ཆགས་པས་མཚོ་འགྲམ་དུ་སོང་ཉ་བས་དོལ་དང་། ལྕགས་ཀྱུས་བཟུང་ནས་

གསོད་པ་དང་། གླང་པོ་ཆེ་རེག་བྱ་ལ་ཆགས་པས་གླང་རྫི་ཕྲུ་གུས་ལྕགས་ཀྱུས་བཏབ་ནས་བྲན་དུ་བཀོལ་བ་དང་། ཉི་མས་གདུང་ཚེ་གླང་ཆེན་ཕལ་ཆེར་མཚོ་རུ་ཞུགས། རེག་བྱ་འཇམ་ཚེ་ཕར་ཕར་སོང་ནས་ཕྱིར་འོང་མི་ནུས་པར་འཆི་བ་ལྟར། འདོད་ཡོན་ལྔ་པོ་བསྟེན་པའི་མི་རྣམས་ཀྱིས་རྒྱལ་པོ་ཕན་ཚུན་འཐབ་ནས་མི་མང་པོ་བསད། མངའ་ཐང་འཕྲོག །རྒྱལ་བློན་བཀྲོངས། བན་བོན་སྔགས་གསུམ་གྱིས་དུག་མཐུ་ངན་སྔགས་བྱས་རང་གཞན་ཕུང་ལ་སྦྱོར། སྡེ་བ་ཚོ་བ་རྣམས་ཀྱིས་ཕན་ཚུན་གསོད་རེས་བྱེད། བླ་མ་སློབ་མ་གྲྭ་རོགས་གྲོགས་མཆེད་རྣམས་འཁོན། དགོན་པ་རྣམས་ཀྱིས་རྒྱབ་འགྲས་བརྒྱབ། ནང་འཁྲུག་ལངས། ཇག་པ་རྐུན་མ་རྒྱལ་པོས་ཁྲིམས་དུ་བཟུང་། མིག་བླངས་རྐང་ལག་གཅོད། ཁྱིམ་པ་ཕོ་མོ་རྣམས་ཀྱིས་ཁྲལ་མི་ཐེག །འུ་ལག་བབས། དམག་ལ་སོང་། ཚ་གྲང་བཀྲེས་སྐོམ་ངལ་དུབ་དངངས་སྐྲག་འཇིགས་གསུམ། བརྡེག་བརྡུང་ན་ཚ་ཟུག་རྔུ་མི་བཟོད་པ་སོགས་ཚེ་འདིའི་མི་འདོད་པ་ཐམས་ཅད་འདོད་ཡོན་ལྔ་པོ་འདི་ལ་བརྟེན་ནས་འབྱུང་། ཕྱི་མར་སྤྱིར་འཁོར་བ་ཁྱད་པར་ངན་སོང་དུ་སྐྱེས་

ནས་སྡུག་བསྔལ་མྱོང་བའི་རྒྱུ། འདོད་ཆགས། ཞེ་སྡང་། གཏི་མུག །ང་རྒྱལ། ཕྲག་དོག །སེར་སྣ་སོགས་ཉོན་མོངས་པ་བརྒྱད་ཁྲི་བཞི་སྟོང་དང་། སྲོག་གཅོད་པ། མ་བྱིན་ལེན། མི་ཚངས་སྤྱོད། རྫུན། ཕྲ་མ། ཚིག་རྩུབ། ངག་འཁྱལ། བརྣབ་སེམས། གནོད་སེམས། ལོག་ལྟ་སྟེ་མི་དགེ་བ་བཅུ་དང་། མཚམས་མེད་པ་ལྔ། ཉེ་པ་ལྔ། ལྕི་བ་བཞི། ལོག་པ་བརྒྱད་ལ་སོགས་མི་དགེ་བ་ཐམས་ཅད་འདོད་ཡོན་ལྔ་པོ་འདི་ལ་བརྟེན་ནས་བསགས་ཡོང་། དེས་ན་འདོད་ཡོན་ལྔ་ག་ལ་བརྟེན་པའི་མི་རྣམས་ལ། སྡུག་སྡིག་གཏམ་ངན་གསུམ་གྱི་མཚོ་བརྡོལ་ནས། ཚེ་འདི་ཕྱི་གང་དུ་ནམ་ཡང་བདེ་བའི་གོ་སྐབས་ཤིག་མེད་དེ། སློབ་དཔོན་དབྱིག་གཉེན་གྱིས། རི་དྭགས་གླང་པོ་ཕྱེ་མ་ལེབ་དང་ཉ། །སྦྲང་མ་ལྔ་པོ་ལྔ་ཡིས་བཅོམ་གྱུར་ན། །གཅིག་གིས་འཇོམས་ན་གང་ཞིག་ལྔ་རྣམས་ནི། །ཤིན་ཏུ་བསྟེན་པ་ཅི་ཕྱིར་འཇོམས་མི་འགྱུར། །གསུངས། ཁ་རག་སྒོམ་ཆུང་བས། སྙན་གྲགས་བདུད་ཀྱི་ཕྱེ་གཏོར་ཡིན། །རྙེད་བཀུར་འཆིང་བའི་ཞགས་པ་ཡིན། །བསོད་ནམས་དགེ་སྦྱོར་བར་

ཆད་ཡིན། །དུག་ལ་སྨན་དུ་མ་ལྟ་ཨང་། །གསུངས། དྭགས་པོ་ལྷ་རྗེས། ནོར་རྫས་སྒྱུ་མའི་བསླུ་བྲིད་སྡུག་བསྔལ་རྒྱུ། །ཕ་ཡུལ་བདུད་ཀྱི་བཙོན་ར་འཆིང་བྱེད་མཁན། །སུ་དག་འདི་ལ་ཞེན་པ་འཁོར་བར་འཁོར། །གསུངས། རྗེ་སྐལ་ལྡན་རྒྱ་མཚོས། ཡུལ་སྡེ་དགོན་བདུད་ཀྱི་བཙོན་ར་ཡིན། །དཔོན་གྲྭ་སློབ་དགེ་བའི་བར་ཆད་ཡིན། །ནོར་རྙེད་བཀུར་འཆིང་བྱེད་ཐག་པ་སྟེ། །གསུངས། རིག་པའི་དབང་ཕྱུག་གིས། འདོད་ཡོན་དགྲ་བོའི་དྭངས་མ་འདྲ། ཉེ་འབྲེལ་འཆིང་བའི་ཞགས་པ་འདྲ། །ཆེ་འདོད་འགོང་པོ་ཕུག་ཞུགས་འདྲ། །སྣང་ཤས་མ་ཆེ་རྒྱ་མ་པ། །གསུངས། དེས་ན་ཚེ་འདིའི་བྱ་བ་དང་དམ་པའི་ཆོས་བྱེད་པ་གཉིས་མཉམ་དུ་མི་འོང་སྟེ། ལྷོ་བྲག་མར་པས། རྗེ་བཙུན་མི་ལ་ལ། བུ་འཇིག་རྟེན་འདི་བློས་མ་ཐོངས་པར། འདི་ཡི་བྱ་བ་དང་། དམ་པའི་ཆོས་བསྲེས་ན། ཆོས་ཤོར་ཟེར་བ་དེ་རང་ཡིན་གསུངས། ཚེ་འདིའི་ཕུན་ཚོགས་ཆེ་ཐབས་མ་ཤོར་བར་ཆོས་བསྒྲུབས་ནས། ཐར་པ་ཐོབ་པར་འདོད་པ་རྨོངས་པའི་ཞེ་འདོད་ཡིན་ཏེ། ས་སྐྱ་པཎ་ཆེན་གྱིས། ཚེ་འདིའི་ཕུན་ཚོགས་ཆེ་ཐབས་མ་ཤོར་བར། །

གཏན་གྱི་ཕན་བདེ་ཐར་པ་རེ་བ་དེ། །རྨོངས་པས་ཞེ་འདོད་གཟུ་ལུམ་ཉིད་ཡིན་པས། །ཚེ་འདི་བློས་ཐོངས་འབད་པས་བྱང་ཆུབ་སྒྲུབས། །གསུངས། དམ་པའི་ཆོས་དང་ཚེ་འདིའི་བྱ་བ་གཉིས་མཉམ་དུ་སྒྲུབ་པར་འདོད་པ་རྣམས་ཀྱིས་རང་ཉིད་བསླུ་བ་ཡིན་ཏེ། ཆོས་རྗེ་རྒྱལ་སྲས་པས། དམ་པའི་ཆོས་དང་ཚེ་འདིའི་བྱ་བ་གཉིས། །མཉམ་དུ་འགྲུབ་པ་སུ་ཞིག་ཡོད་མ་ཡིན། །སྒྲུབ་པར་འདོད་པ་དེ་དག་རང་ཉིད་ཀྱིས། །རང་ཉིད་བསླུ་བ་ཉིད་ལ་ཐེ་ཚོམ་མེད། །གསུངས། ཚེ་འདི་བློས་མ་ཐོངས་པར་ཅི་ཙམ་དགེ་བ་ལ་འབད་ཀྱང་། ཚེ་འདིའི་ལག་ཆ་ཆོས་བརྒྱད་ཀྱི་ཁོལ་པོ་ཡིན་པས། ཕྱི་མར་ལག་སྟོང་གཅེར་བུར་འགྲོ་དགོས་ཏེ། ཁྲོ་ཕུ་ལོ་ཙ་བའི་ཞལ་ནས། ཚེ་སྲོག་ལྦུ་བར་མ་ཤེས་ཤིང་། །ཞེ་ནས་འཆི་བ་མ་དྲན་ན། །དགེ་ཕྱོགས་མང་པོ་བྱས་གྱུར་ཀྱང་། །ད་དུང་ཚེ་འདིའི་ལག་ཆ་ཡིན། །རྙེད་བཀུར་སྒྱུ་མར་མ་ཤེས་ཤིང་། །ཆེ་འདོད་ཁེ་གྲགས་མ་བོར་ན། །མི་ཡིས་དམ་པར་བཟུང་གྱུར་ཀྱང་། །ད་དུང་ཆོས་བརྒྱད་ཀྱི་ཁོལ་པོ་ཡིན། །ཚེ་འདི་ཐང་ལ་མ་བོར་ན། །ཇི་ཙམ་དགེ་ལ་

འབད་བྱས་ཀྱང་། །ཕྱི་མར་ལག་སྟོང་གཅེར་བུར་འགྲོ། །ཕྱི་མར་ཅི་འཁྱེར་ཨ་ཙ་མ། །འཁོར་བའི་ཉེས་དམིགས་མ་གོ་ཞིང་། །འདོད་ཡོན་ཚིམ་པ་མ་མཆིས་ན། །ཁ་ལྟའི་རྦད་ཁམ་ཆེ་ན་ཡང་། །ད་དུང་ཟོག་པོ་རྫུན་ཆེན་ཡིན། །གསུངས། ཚེ་འདི་བློ་སམ་ཐོངས་པར་ཚེ་འདི་པ་དང་ལྷན་དུ་གནས་པ་རྣམས་སྟོན་པའི་རྗེས་འཇུག་མ་ཡིན་ཏེ། འབྲུག་པ་ཀུན་ལེགས་ཀྱིས། བཅོམ་ལྡན་འདས་ཀྱི་གསུང་ན་ཅི་འདུག །མ་འོངས་པ་ན་ངའི་ཉན་ཐོས་ཡིན་ཟེར་བསྟན་པ་ལ་རྨ་འབྱིན་པ་མང་དུ་འབྱུང་། དེ་ཚོ་ངའི་ཉན་ཐོས་མིན། ང་དེ་ཚོའི་སྟོན་པའང་མིན་གསུངས། དེ་ལ་རྟགས་ཇི་ལྟ་བུ་ཞུས་པས། རྔོག་ཆགས་རྟ་དང་འདབ་ཆགས་བྱ། །སྡེར་ཆགས་ཁྱི་དང་རྨིག་ཆགས་ཕྱུགས། །ཞིང་དང་ཁང་པ་འབྲུ་རྗེན་དང་། །གཡོག་པོ་སྐྲ་ཅན་བསྲེལ་བ་རྣམས། །དམན་པ་བརྒྱད་ཀྱི་གཅིག་ཡིན་ནོ། །གསུངས་པས། སངས་རྒྱས་ནི་སྔ་དྲོ་ཆོས་གོས་དང་ལྷུང་བཟེད་འཁར་བསིལ་བསྣམས་ནས། མཉན་ཡོད་ཀྱི་གྲོང་ཁྱེར་ཆེན་པོར་བསོད་སྙོམས་ལ་གཤེགས་ཟེར་བ་མིན་པ། དྲེའུ་ཁལ་བཀལ། འུ་ལག་བདས། རྟ་བཟང་ཞོན་ནས་སོང་ཟེར་བ་མི་

གདའ། ཁོང་ལྷ་དང་མི་ཐམས་ཅད་ཀྱིས་མཆོད་པ་དེས། མཛོ་རྟ་འགའ་ལོས་ཤོམས་ཏེ། མི་མཛད་པར་འདུག །རྒྱུ་འབྲས་ཕྲ་མོ་འདི་ཀུན་ལ་འཛེམ་དཀའ་མོ་རང་འདུག །མཛོ་རྟས་བརྫིས་པ། རྐང་འོག་ལག་འོག་ཏུ་སོང་བ། མེ་ཤིང་ཁྲོད་ནས་ཤི་བ་གྲངས་ཀྱིས་མི་ཆོད། སྡིག་དང་འདྲེས་པའི་དགེ་བ་འདི་ཀུན་ལྟར་སྣང་དགེ་ནའང་། དོན་ལ་སྡིག་པ་ལ་དགེ་བར་མིང་བཏགས་པར་འདུག་གསུངས། ཚེ་བློས་མ་ཐོངས་པར་རང་ཆོས་པར་རློམ་པ་བླུན་པོ་ཡིན་ཏེ། རིག་པའི་དབང་ཕྱུག་གིས། ཆོས་ཀྱི་ཉམས་ལེན་སྣ་གཅིག་མ་གྲུབ་པར། ཁྱོད་ཉིད་ཆོས་པར་རློམ་པ་ཀྱེ་མ་བླུན། །ཆོས་ཀྱི་དང་པོ་ཚེ་འདི་བློས་ཐོངས་པ། །རང་གི་རྒྱུད་ལ་འདུག་གམ་མི་འདུག་ལྟོས། །གསུངས། ཚེ་བློས་ཐོངས་ན་བདེ་བའི་འགོ་ཚུགས་པ་ཡིན་ཏེ། སངས་རྒྱས་ཀྱིས། གལ་ཏེ་བདེ་བ་ཀུན་འདོད་ན། །འདོད་པ་ཐམས་ཅད་ཡོངས་སུ་སྤོངས། །འདོད་པ་ཐམས་ཅད་ཡོངས་སྤངས་ན། །མཆོག་ཏུ་བདེ་བ་འཐོབ་པར་འགྱུར། །ཞེས་དང་། སློབ་དཔོན་ཀླུ་སྒྲུབ་ཀྱིས། གཡན་པ་འཕྲུག་ན་བདེ་སྙམ་སྟེ། །དེ་

བས་གཡན་པ་མེད་ན་བདེ། །འདོད་ཡོན་སྤྱད་ན་བདེ་སྙམ་སྟེ། །དེ་བས་འདོད་ཡོན་སྤངས་ན་བདེ། །གསུངས། སྐྱེས་མཆོག་པས། ཚེ་འདི་རླུང་ལ་བསྐུར་ནུས་ན། །ཞེན་ལོག་པོ་ཞེས་འདོགས་པ་ལགས། །ཅིས་ཀྱང་དགོས་པ་མེད་ཙ་ན། །གྲགས་པས་ས་སྟེང་ཁྱབ་པ་ལགས། །གསུངས། ཚེ་གཅིག་ལ་སངས་རྒྱས་པ་ཡང་ཚེ་བློས་ཐོངས་ན་ཡོང་སྟེ། དྭགས་པོ་ལྷ་རྗེས། དགེ་བཤེས་གཉུག་རུམ་པ་ལ། ཚེ་གཅིག་ལུས་གཅིག་ལ་འཚང་རྒྱ་བ་སྲིད་དམ་ཞུས་པས། ཚེ་འདི་ལ་ལྟོས་པ་སྤུ་ཙམ་མེད་པ་ཞིག་དགོས་པ་ཡིན་གསུངས། འཇིག་རྟེན་གྱི་བྱ་བ་ཐམས་ཅད་བཞག་ན་ཆོས་བྱེད་པའི་སྐལ་པ་དང་ལྡན་ཏེ། རྗེ་མི་ལས། རས་པ་ཞི་བ་འོད་ལ། །ལར་ཐམས་ཅད་བཞག་ནས་འགྲོ་དགོས་ན། །དུས་ད་ལྟ་བཞག་ན་དོན་ཆེན་ལགས། །མི་ངའི་ཟེར་དེ་ཚོ་ཉན་སྤྱོད་ན། །བུ་ཁྱོད་ལ་ལྷ་ཆོས་སྐལ་པ་ཡོད། །གསུངས། ཚེ་བློས་མ་ཐོངས་ན་ཆོས་མི་འོང་། ཐོངས་ན་ཆོས་ཡོང་བས་ན། སྐྱེས་བུ་དམ་པ་ཐམས་ཅད་ཀྱིས་ཚེ་བློས་བཏང་། རྗེས་འཇུག་རྣམས་ལ་ཚེ་བློས་ཐོངས་ཞེས་ཡང་ཡང་གསུངས་ཏེ། ཇོ་བོ་རྗེས། བསོད་ནམས་ཟེར་བའི་

འདུ་འཛི་དེ་ཡང་ཆོས་ཀྱི་བར་ཆད་ཡིན་པས་སྤོངས། །རྙེད་དང་བཀུར་སྟི་བདུད་ཀྱི་ཞགས་པ་ཡིན་པས་སྲང་ཁའི་རྡོ་བཞིན་སོལ། །བསྟོད་དང་གྲགས་པའི་ཚིག་རྣམས་བསླུ་བྲིད་ཡིན་པས་མཆིལ་སྣབས་བཞིན་དུ་དོར། །ད་ལྟ་བདེ་སྐྱིད་སྙན་གསུམ་འཛོམ་ཡང་ཡུད་ཙམ་ཡིན་པས་རྒྱབ་ཏུ་སྐྱུར། །གསུངས། ཀློང་ཆེན་རབ་འབྱམས་པས། མདོར་ན་ཚེ་འདིའི་བྱ་བ་ཐམས་ཅད་ཀུན། །ཁ་ཟས་བཟང་ལ་བཙན་དུག་འདྲེས་པ་བཞིན། །སྙིང་ནས་སྤོང་བ་དམ་པའི་རྣམ་ཐར་ལགས། །ངེས་པར་བྱང་ཆུབ་སྒྲུབ་པའི་དུས་ལ་བབ། །གསུངས། གང་ཤར་རང་གྲོལ་གྱིས། ལར་ད་ལྟའི་གཉེན་གྲོགས་ཀུན་གྱིས་བསླུ། །ཚེ་འདི་ནི་ཡུད་ཙམ་ཟད་ནས་འགྲོ། །ནོར་ཟས་གོས་སོགས་ལ་མ་ཆགས་པར། །ད་ཀུན་སྤང་གྱིས་ཤིག་སྙིང་གི་བུ། །གསུངས། སྤྱན་སྔ་བས། ཇ་ཐུད་ཤ་མར་ལ་སོགས་པ། །བཀྲ་མི་ཤིས་པ་དེ་དག་གིས། །ཁྱོད་ལ་ལྟས་ངན་གཏོང་འགྱུར་གྱིས། །སྦྲུལ་གདུག་དེ་དག་མྱུར་སྤོངས་ལ། །དཔག་ཚད་བརྒྱ་ཡི་ཕ་རོལ་སོང་། །གསུངས། གྲུབ་ཆེན་ཡུལ་མོ་བས། ཉམས་ལ་ཡར་བསྐྱེད་

མེད་པ་དེ། །ཟླ་བ་ཉི་མས་ནོན་པ་འདྲ། །དེ་གཉིས་སྣང་གི་ཡུལ་ལ་ཞེན་པས་ལན། །སེམས་འཁྲི་བ་ཆོད་ཅིག་སྐལ་ལྡན་ཀུན། །གསུངས། ཁ་རག་སྒོམ་ཆུང་པས། ཆོས་མིན་ཆོས་ལྟར་བཅོས་པ་ཡི། །ཆོས་ལ་བརྟེན་པའི་གཡོ་སྒྱུ་ཡིས། །ཚེ་འདིའི་ཆེ་ཐབས་མ་སྒྲུབ་པར། །འཇིག་རྟེན་བློ་ཡིས་ཐོངས་ཤིག་ཨང་། །གསུངས། རྗེ་མི་ལས། བུ་སྙིང་ནས་ལྷ་ཆོས་བྱ་བསམ་ན། །དད་པ་གཏིང་ནས་སྐྱེས་པ་ན། །ཚེ་འདི་ལ་ཕྱི་མིག་མི་ལྟ་ན། །བདེན་པ་རང་ཕྱིར་འབྲང་བ་ན། །གཉེན་འདུན་བདུད་ཀྱི་བཤོལ་འདེབས་ཡིན། །བདེན་ནོ་མ་སྙམ་འཁྲི་བ་ཆོད། །ཟས་ནོར་བདུད་ཀྱི་སོ་བ་ཡིན། །འདྲིས་ཤིང་ངན་ནོ་འཛིན་ཆགས་སྤོངས། །འདོད་ཡོན་བདུད་ཀྱི་ཞགས་པ་ཡིན། །འཆིང་བར་ངེས་སོ་ཞེན་པ་ཐོངས། །གཞོན་གྲོགས་བདུད་ཀྱི་བུ་མོ་ཡིན། །བསླུ་བར་ངེས་སོ་ཁོང་ཟོན་གྱིས། །ཕ་ཡུལ་བདུད་ཀྱི་བཙོན་ར་ཡིན། །ཐར་བར་དཀའ་ཡིས་མྱུར་དུ་བྲོས། །གསུངས། མཁས་བཙུན་གཞོན་ནུ་གྲུབ་ཀྱིས། འདྲིས་བཤེས་མང་ན་ཕྱོགས་རིས་ཞེན་པ་འཕེལ། །སོག་རུམ་མང་པོས་ལུས་ངག་དགེ་སྦྱོར་གཅོག །འདྲིས་མེད་

ཡུལ་དུ་འཁྱམས་ན་མི་འཐད་དམ། །ཤ་ཚའི་གཏམ་ཡིན་རང་གི་སྙིང་ལ་དྲིས། །གསུངས། གཙང་པ་རྒྱ་རས་ཀྱིས། ཆགས་སྡང་རྩ་བ་ཕ་ཡུལ་སྤོངས། །སྡུག་བསྔལ་རྩ་བ་ཁྱིམ་ཐབས་སྤོངས། །འཛིན་ཆགས་རྩ་བ་ནོར་རྫས་སྤོངས། །གཡེང་བའི་རྩ་བ་ངོ་བསྲུང་སྤོངས། །གསུངས། ཚེ་བློས་གཏོང་ན་སྙིང་ཁམ་ཆེ་བ། མི་དང་མི་བསྟུན་པ། ཕྱི་རྩིས་མེད་པ། ཞེན་ལོག་ཆེ་བ་བཞི་དགོས་ཏེ། རྒྱལ་བ་ཡང་དགོན་པས། ཚེ་འདི་རླུང་ལ་བསྐུར་བའི་སྙིང་ཁམ་དང་གཅིག །བློ་སྣ་མི་དང་མི་བསྟུན་པའི་ལོང་མེད་དང་གཉིས། །དགོས་མེད་ཕྱི་རྩིས་བོར་བའི་འཕྲལ་ཕྱིད་དང་གསུམ། །འདོད་ཡོན་འཁྲི་བ་ཆོད་པའི་ཞེན་ལོག་དང་བཞི། །ཚེ་འདི་བློ་ཡིས་གཏོང་ན་དགོས་པ་རང་ལགས་སོ། གསུངས། དེང་སང་སྡུག་བསྔལ་ཐམས་ཅད་སྐྱེད་པའི་གཞི་མ་འདོད་ཡོན་ལོངས་སྤྱོད་འཛོམ་པ་ཁ་ཅིག་གིས། འདོད་ཡོན་ལྔའི་ཉེས་དམིགས་མཐའ་དག་རྒྱལ་བ་སྲས་བཅས་ཀྱིས་གསུངས་པ་མ་གོ །རང་གིས་ཀྱང་འཕྲལ་དུ་སྡུག་བསྔལ་མྱོང་བ་མ་ཤེས་པར་བདེ་བའི་རྒྱུ་རུ་རློམ་ནས། གཞན་ཚེ་བློས་བཏང་

ནས་དབེན་པའི་དགའ་ཚལ་ཉམས་དགའི་ལྗོན་ཤིང་དང་བྲག་རིའི་བསིལ་གྲིབ་སོགས་ལ་དགེ་བ་སྒྲུབ་ཏུ་འགྲོ་བ་ལ། ཡིད་སྨོན་བྱས་ནས་ཡོན་ཏན་མི་བརྗོད་པར་མ་ཟད། དེ་ལ་འདོ་མེད་སྨྱོན་པ་གླེན་པ་གོ་མ་ཆོད་ཟེར། བྲག་ཕུག་ཡུན་རིང་གླ་བས་བཟུང་ཡོད། བྲག་སྟོད་མཐོན་པོར་བྱ་རྒོད་གནས་འདུག་སྟེ། དེ་ལ་ཉམས་རྟོགས་ཡོན་ཏན་ཅང་བྱུང་ཨེ་འདུག །བུ་མ་སྐྱེས་རུལ་སོང་། ཆོས་བྱེད་ན་ཡུལ་བཟང་པོ་ནས་བྱས་ན་ཡོང་། རི་ཞིག་ལ་འགྲོ་མི་དགོས། ཁྱོད་ཀྱིས་འཆུག་འདུག །ད་འདི་ལྟར་གྱིས་ཟེར་ནས་ཁ་ཏ་མང་པོ་བྱེད་པ་དེ་དཔེ་བཞག་ན། དུག་དང་འདྲེས་པའི་ཟས་ལ་སྤྱོད་པའི་མི་ཞིག་གིས་སྡུག་བསྔལ་བསྐྱེད་པར་མ་ཤེས་པར་ཟས་ཀྱི་མཆོག་ཏུ་རློམ་ནས། གཞན་དུག་དང་འདྲེས་པའི་ཁ་ཟས་སྤངས་ནས་ལྷའི་བདུད་རྩི་འཐུང་དུ་འགྲོ་བ་ལ། འདོ་མེད་སྨྱོན་པ་གོ་མ་ཆོད། བདུད་རྩི་ལྷས་རྒྱུན་དུ་འཐུང་གི་དེ་ལ་ཡོན་ཏན་ཅང་ཡོང་ཨེ་འདུག །བུ་མ་སྐྱེས་རུལ་སོང་། བདུད་རྩི་འཐུངས་ན་དུག་དང་བསྲེས་ནས་འཐུང་ན་ཡོང་། བདུད་རྩི་གཅིག་པུ་འཐུང་ག་ལ་དགོས་ཁྱོད་ཀྱིས་འཆུག་འདུག །ད་འདི་ལྟར་གྱིས་ཞེས་ཁ་ཏ་

མང་པོ་བྱས་པ་དང་འདྲ། ཡང་འགའ་རེས་ཚེ་བློས་བཏང་ནས་ཆོས་བྱེད་པ་ལ་དེ་མ་བྱེད་འདི་གྱིས་ཞེས་ཚེ་འདིའི་ཆེ་འདོད་གྲགས་འདོད་སོགས་འཇིག་རྟེན་ཆོས་བརྒྱད་ཀྱི་ཆེ་ཐབས་སློབ་པ་དེ། མིག་ཅན་ལ་མིག་མེད་ཀྱིས་ལམ་བསྟན་པ་དང་འདྲ་བས་གཞན་མ་སེམས། སྤྱིར་འདོད་ཡོན་འདུ་འཛིའི་ཉེས་དམིགས་ལ་བལྟས་ན་ཚེ་བློས་བཏང་། རི་ཁྲོད་ན་གནས་པ་སངས་རྒྱས་སོང་བ་དང་མཚུངས་ཞེས་རྗེ་སྤྱན་སྔ་བས་གསུངས། འདོད་པ་ཟད་ན་འཕགས་པ་དངོས། འདོད་པ་ཆུང་ན་འཕགས་པའི་རིགས་ཡིན་ཞེས་མདོ་ལས་གསུངས། བྱ་བཏང་རི་ཁྲོད་པའི་བདེ་བདེ་ལྟ་བུ་ལྷའི་དབང་པོས་ཀྱང་རྙེད་པར་དཀའ་ཞེས་སྤྱོད་འཇུག་ལས་གསུངས་ན། གཞན་རྒྱ་གར་རྒྱ་ནག་བལ་པོ་བོད་ཀྱི་རྒྱལ་པོ་སོགས་མིའི་རྒྱལ་པོ་རྣམས་ཀྱིས་མི་རྙེད་པ་སྨོས་ཅི་དགོས། དེ་ཅིའི་ཕྱིར་ཞེ་ན། བྱ་བཏང་རི་ཁྲོད་པས་ཁྱིམ་ཚང་བཟའ་མིའི་ཁ་མི་སོས། རྒྱབ་མི་ཁེབས། དགྲ་མི་ཐུལ། གཉེན་མི་འཁྱོངས། ཁེ་མི་ལོན། སྟོན་ཐོག་མི་འོང་བ་སོགས་ཀྱི་སེམས་ཁྲལ་གང་ཡང་བྱེད་མི་དགོས་པར་དུས་རྒྱུན་དུ་དལ་བར་གནས་

པས་སེམས་བདེ། བདེ་བའི་མཆོག་ནི་སེམས་སྐྱིད་པ་ཡིན་ཏེ། ས་སྐྱའི་ལེགས་བཤད་ལས། བདེ་བའི་མཆོག་ནི་སེམས་སྐྱིད་པ། །ནོར་གྱི་མཆོག་ནི་སྦྱིན་པ་སྟེ། །གསུངས། ཡང་བྱ་བཏང་རི་ཁྲོད་པས་ཚེ་འདིའི་དགྲ་འདུལ་གཉེན་སྐྱོང་ཁེ་ཚོང་ཞིང་ལས་འཚོ་སྐྱོང་སོགས་བྱ་བ་གང་ཡང་བྱེད་མི་དགོས་པས་དུས་རྒྱུན་དུ་ལུས་དལ་བར་གནས་པས་བདེ། ཚེ་འདིའི་དོན་དུ་རྫུན་ཕྲ་མ་ཚིག་རྩུབ་ངག་འཁྱལ་ལབ་མི་དགོས་པས་དུས་རྒྱུན་དུ་ངག་དལ་བར་གནས་པས་བདེ། ལུས་ངག་ཡིད་གསུམ་རྟག་ཏུ་བདེ་ཞིང་སྐྱིད་པས་ཆོས་གང་འདོད་བྱས་ན་འོང་། ཆོས་བྱས་ན་གཏན་དུ་བདེ་ཞིང་སྐྱིད་པར་འགྱུར། དེས་ན་མདོ་ལས། སུ་དག་ནགས་ཁྲོད་མངོན་པར་དགའ་བ་ཡི། །དགེ་སྦྱོང་དེ་ནི་ཤིན་ཏུ་བདེ་བ་མྱོང་། །ཞེས་དང་། ཚུལ་ཁྲིམས་ཡོངས་སུ་དག་པ་རབ་གནས་ཏེ། །བསམ་གཏན་བསམ་མི་ཁྱབ་ལ་རྟག་གནས་ཤིང་། །སུ་དག་ནགས་ཁྲོད་མངོན་པར་དགའ་བ་ནི། །དེ་དག་ནམ་ཡང་ཡིད་གཉིས་འོང་མི་འགྱུར། །གསུངས། ཐུགས་རྗེ་ཆེན་པོས། ལས་འབྲས་བླང་དོར་བྱེད་ལས་དགེ་བ་མེད། །དབེན་གནས་རི་ཁྲོད་ཟིན་

ལས་སྐྱིད་པ་མེད། །གསུངས། རྗེ་མི་ལས། ཕ་བླ་མས་བྱིན་རླབས་རི་ཁྲོད་འགྲིམས། །རི་ན་བུན་ཅན་སྤྲང་པོའི་གཏན་ཡུལ་སྐྱིད། །རང་གཅིག་པུ་ཡི་ལུས་ལ་ལྷ་ཚོགས་འཁོར། །ལྷ་དྲིན་ཅན་རྣམས་འཁོར་བས་ངང་གིས་སྐྱིད། །གསུངས། དཔེར་ན་མ་རྒན་མོ་གཅིག་ལ་བུ་མང་པོ་ཡོད་པས། བུ་ལ་ན་ཚ་ཤི་ཆད་བྱུང་ན་སེམས་མི་བདེ། སེམས་མ་བདེ་བས་སྨྲེ་སྔགས་སོགས་བཏོན་པས་ངག་མི་བདེ། མིག་ཆུ་བྱུང་ལག་པས་བྲང་ལ་བརྡུང་བ་སོགས་བྱས་ལུས་མི་བདེ། ཟས་ནོར་ལོངས་སྤྱོད་འཛོམ་ནས་ཁ་སྐྱིད་ཀྱང་སྒོ་གསུམ་བདེ་བ་ལ་ཕན་པ་མེད་པར་སྡུག་བསྔལ་མྱོང་བ་ལྟར། འཇིག་རྟེན་པའི་རྒྱལ་པོ་འཁོར་འབངས་སྡེ་རིགས་འདོད་ཡོན་ལྔའི་ལོངས་སྤྱོད་འཛོམ་པ་ལ་དེའི་ཚོད་ཀྱི་མི་འདོད་པའི་ཆག་ཆེ་ཉམ་ང་དུས་རྒྱུན་དུ་འབྱུང་བས་སེམས་མི་བདེ། སེམས་མ་བདེ་བས་གཏམ་བཟང་ངན་མང་པོ་སྨྲས་པས་ངག་མི་བདེ། འགྲོ་འདུག་འགུལ་བསྐྱོད་སོགས་བྱས་པས་ལུས་མི་བདེ། གཞན་འགའ་རེས་ཕྲག་དོག་བྱས་ནས་དུག་མཐུ་ངན་སྔགས་མཚོན་སོགས་ཀྱིས་ངན་བྱས། ལུས་སེམས་ཀྱི་ཐོག་ཏུ་

ན་ཚ་ཟུག་རྔུ་མི་བཟོད་པ་བྱུང་། ངག་གིས་འཁུན་བུ་མ་ཎི་བཞིན་བགྲང་དགོས་པའི་དུས་ཀྱང་འབྱུང་། དུས་རྟག་ཏུ་ལུས་ངག་ཡིད་གསུམ་ལ་དལ་ཞིང་བདེ་བའི་སྐབས་མེད་པས་ཆོས་གཏན་ནས་མི་འོང་། ཆོས་མ་འོང་ན་ཚེ་སྔོན་བསོད་ནམས་ཀྱི་འཕེན་ཤུགས་ཟད་ཚེ་ངན་སོང་གསུམ་དུ་སྐྱེས་ནས་སྡུག་བསྔལ་ལ་སྤྱོད་པར་འགྱུར། དེས་ན་ཁྱེའུ་གངྒཱ་མས་རྒྱལ་བུ་ཀུན་དུ་དགེ་ལ། ནགས་ཁྲོད་དབེན་པའི་གནས་མཐོང་ན། །འཁོར་མང་རྒྱལ་པོའི་ཕོ་བྲང་དག །གྲོག་ཚང་ཧྲུལ་པོ་དག་དང་མཚུངས། །ཞེས་དང་། ཁྱིམ་གྱི་སོ་ནམས་བྱ་བ་ལ། །སྔ་མ་བྱས་པས་ཉོན་མོངས་ནས། ཕྱི་མ་བྱེད་པར་ཤ་ཐང་ཆད། །ཁྱིམ་ནི་སྦྲུལ་གྱི་ཚང་དང་འདྲ། །ཞེས་དང་། འཁོར་བ་མི་རྟག་སྒྱུ་མའི་ཆོས་འདི་ལ། །བླུན་པོ་ཆགས་ཤིང་མཁས་པས་སྨད་པའི་གནས། །དེས་ན་བདག་ཀྱང་དབེན་པ་བསྟེན་པ་ལགས། །རྒྱལ་པོ་ཉིད་ཀྱང་དབེན་པ་བསྟེན་ན་ལེགས། །གསུངས། ཡང་དགོན་སྡེ་གྲོང་སོགས་རྣམ་གཡེང་འདུ་འཛི་ཆེ་སར་དགེ་བ་དཔག་མེད་སྒྲུབ་པ་བས། དབེན་པར་ཉལ་ནས་བསྡད་པ་དགའ་སྟེ། སྤྱན་སྔ་བས། འདུ་འཛིར་དགེ་བ་དཔག་

མེད་སྒྲུབ་པ་བས། །དབེན་པར་ཉལ་ནས་སྡོད་པ་ཆེས་དགའ་སྟེ། །སྡུག་བསྔལ་རྒྱ་མཚོ་བདེ་བའི་རྒྱ་མཚོ་གཉིས། །འདམ་ཁ་མ་ནོར་དགོས་སོ་ཤཱཀྱའི་སྲས། །གསུངས། དེ་ཅིའི་ཕྱིར་ཞེ་ན། འདུ་འཛིའི་ནང་ནས་ཉོན་མོངས་དུག་ལྔ་འཕེལ། དགེ་བ་ལས་མི་དགེ་བ་མང་། དབེན་པར་ཉོན་མོངས་ཀུན་ཞི་ནས་མི་དགེ་བཅུའི་ལས་མི་བྱེད། མི་དགེ་བ་བཅུ་སྤངས་པ་དགེ་བཅུ་ཡིན། དགེ་བཅུ་ལ་དུས་རྒྱུན་ཏུ་གནས་ན་ངན་སོང་གསུམ་དུ་མི་སྐྱེ། ངན་སོང་དུ་མ་སྐྱེས་ན་མཐོ་རིས་ལྷ་མིའི་གནས་མིན་གཞན་དུ་སྐྱེ་ས་མེད། བྱ་བཏང་བ་དབེན་པར་ཉལ་བསྡད་ཀྱང་མཐོ་རིས་ཀྱི་བདེ་བ་ཤུགས་ཀྱིས་ཐོབ་ཡོང་བའི་ཕྱིར་རོ། །ཡང་ཕ་ཡུལ་ནས་དགེ་སྦྱོར་བརྒྱ་བྱས་པ་བས། དབེན་པའི་གནས་ནས་དགེ་སྦྱོར་གཅིག་བྱས་པ་དགའ་སྟེ། རྗེ་སྐལ་ལྡན་རྒྱ་མཚོས། ཡུལ་གྱི་དགེ་སྦྱོར་བརྒྱ་བས། །དབེན་པའི་དགེ་སྦྱོར་གཅིག་དགའ། །དེས་ན་རི་ལ་སོང་ལ། །གང་ནུས་དགེ་ལ་འབོད་ཅིག །གསུངས། དེ་ཅིའི་ཕྱིར་ཞེ་ན། ཕ་ཡུལ་ནས་སེམས་རྣམ་གཡེང་གི་དབང་དུ་འགྲོ། སེམས་གཡེངས་ནས་དགེ་སྦྱོར་ལོ་

བསྐལ་པར་བྱས་ཀྱང་འབྲས་བུ་མི་འབྱུང་སྟེ། སེམས་ནི་རྣམ་པར་གཡེང་བའི་མིས། །བསྐལ་པར་བཟླས་ཀྱང་འབྲས་མི་འབྱིན། །གསུངས་པ་དང་། གང་ཤར་རང་གྲོལ་གྱིས། སེམས་གཡེང་བས་བཟླས་བརྗོད་དཀའ་ཐུབ་སོགས། །ལོ་མང་པོར་འབད་ཀྱང་དོན་མེད་ན། །ཞག་ལོ་ཟླ་ཁ་ཤས་དགེ་སྦྱོར་ལ། །འཕྲལ་འབྲས་བུ་རེ་བ་གད་མོའི་རྒྱུ། གསུངས། དབེན་པར་འདུ་འཛི་མེད་པས་སེམས་ནང་དུ་ཁུག་ནས་དགེ་སྦྱོར་གང་བྱས་གནད་དུ་འགྲོ། གནད་དུ་སོང་ན་ཉམས་རྟོགས་ཡོན་ཏན་འབྱུང་སྟེ། ཀློང་ཆེན་རབ་འབྱམས་པས། རི་ངོགས་དབེན་པའི་གནས་མཆོག་ན། །ཉམས་རྟོགས་ཡོན་ཏན་གོང་འཕེལ་བས། །ཆོས་ཉིད་རིག་པའི་གཏན་ཡུལ་ཟིན། །རི་ཁྲོད་དབེན་པ་འགྲིམ་དུ་གཤེགས། །སྔོན་གྱི་རྒྱལ་བའི་ཡོན་ཏན་དང་། །གྲུབ་ཐོབ་གོང་མའི་ཡོན་ཏན་ཡང་། །དབེན་པ་བསྟེན་ལས་བྱུང་བར་གསུངས། །རི་ཁྲོད་དགོན་པ་འགྲིམ་དུ་གཤེགས། །གསུངས། མདོ་ལས་ཀྱང་། སྔོན་གྱི་སངས་རྒྱས་འཇིག་རྟེན་མགོན། །གང་དུ་མྱ་ངན་འདའ་འགྱུར་བ། །ཀུན་གྱིས་དགོན་པ་རབ་དབེན་དུ། །བླ་མེད་བྱང་

ཆུབ་བརྙེས་པར་གྱུར། །ཞེས་དབེན་པའི་བསྔགས་བརྗོད་རྒྱ་ཆེར་གསུངས་པའི་ཕྱིར་རོ། །དབེན་པར་སྒྲུབ་པ་བྱས་ན། བླ་མའི་ཞབས་ཏོག །ཕ་མའི་དྲིན་ལན། འགྲོ་དོན་རྣམས་དུས་གཅིག་ལ་འགྲུབ་སྟེ། ལྷོ་བྲག་མར་བས་རྗེ་བཙུན་མི་ལ་འབྱོན་ཁར། སྒྲུབ་པ་ནུས་ན་བླ་མའི་ཞབས་ཏོག །ཕ་མའི་དྲིན་ལན། སེམས་ཅན་གྱི་འགྲོ་དོན་ཐམས་ཅད་དུས་གཅིག་ལ་འགྲུབ་པ་ཡིན་གསུངས། དེས་ན་ཚེ་བློས་བཏང་ནས་རི་ཁྲོད་དབེན་པར་གནས་ནས། ཆོས་བྱེད་པ་ལ་རྒྱལ་སྲས་བྱང་ཆུབ་སེམས་དཔའ་ཐམས་ཅད་ཀྱིས་ཡིད་སྨོན་གཏོང་ན། གཞན་འཇིག་རྟེན་པའི་རྒྱལ་བློན་ཁྱིམ་པ་ཕོ་མོས་གཏོང་དགོས་པ་སྨོས་ཅི་དགོས། རྒྱལ་སྲས་ཞི་བ་ལྷས། ནགས་ན་བྱ་དང་རི་དྭགས་དང་། །ཤིང་དག་མི་སྙན་བརྗོད་མི་བྱ། །འགྲོགས་ན་བདེ་བ་དེ་དག་དང་། །ནམ་ཞིག་ལྷན་ཅིག་བདག་གནས་འགྱུར། །གསུངས། བུ་མོ་བདུན་གྱིས་རྟོག་བརྗོད་ལས། ཤིང་དྲུང་ནེ་ཙོ་ལྟར་ལྗང་བའི། །དུར་བ་འཇམ་པའི་གོས་ཅན་ཏུ། །མཐོང་ཆོས་བདེ་བའི་དགའ་སྟོན་དང་། །ནམ་ཞིག་བདག་ནི་ཉལ་བར་འགྱུར། གསུངས།

རྗེ་སྐལ་ལྡན་རྒྱ་མཚོས། རི་ཡིད་འོང་ཉམས་དགའ་མཐོང་བའི་ཚེ། །སྤྲང་སྐལ་ལྡན་དབེན་པའི་དགའ་ཚལ་དྲན། །བྱ་སྣ་ཚོགས་སྐད་སྙན་སྒྲོགས་ཐོས་ཚེ། །བདག་དབེན་པའི་གནས་ལ་ཡིད་རབ་གཡོས། །ཤིང་སྣ་ཚོགས་སྔོ་ལྗང་འདབ་རྒྱས་ཚེ། །བདག་དབེན་པའི་ནགས་ཚལ་དྲན་ཞིང་སྤྲོ། །རྫ་ཁྲ་ཁྲ་ལྡེམ་པ་མཐོང་བའི་ཚེ། །བདག་དེ་རུ་འགྲོ་སྙམ་འདུན་པ་ཤར། །གྲོགས་བཟང་པོ་འགའ་རེ་རི་ལ་བཞུགས། །རི་ཤིན་ཏུ་དབེན་པའི་དགའ་ཚལ་ན། །རང་གཅིག་པུར་དྲང་སྲོང་སྤྱོད་ལ་གནས། །དེ་བསམ་ཞིང་བསམ་ཞིང་སྨོན་པ་སྐྱེས། གསུངས། བློ་གྲོས་ཅན་རྣམས་ཀྱིས་ཚེ་བློས་བཏང་ནས་དབེན་པར་སྒོམ་སྒྲུབ་མཛད་པའི་རྣལ་འབྱོར་མཆོག་དམན་སུས་མཐོང་ཡང་། དེ་ལྷའི་དབང་པོ་ཚངས་པ་བརྒྱ་བྱིན་ལས་ཀྱང་བསོད་ནམས་ཆེ་ཞིང་། འཕགས་པ་སྤྱན་རས་གཟིགས་ཀུན་ཏུ་བཟང་པོ་སོགས་རྒྱལ་སྲས་རྣམས་དང་སྐལ་པ་མཉམ་པར་བལྟས་ནས་བརྙས་སྨོད་ནམ་ཡང་མི་བྱ་བར་བསྙེན་བཀུར་ཕུན་སུམ་ཚོགས་པ་བྱོས། ནམ་ཞིག་རང་ཡང་ཁྱིམ་གྱི་མེ་འོབས་ནས་ཐོན། དབེན་པའི་བསིལ་གྲིབ་ཏུ་འཁོད་ནས་དམ་པའི་ཆོས་ཀྱི་བདུད་རྩི་

འཐུང་བའི་ཡིད་སྨོན་བྱེད་པ་གཅེས། དེང་སང་ཟས་ནོར་གྱི་གསོག་འཇོག་སོགས་ཚེ་འདིའི་ལག་ལེན་བྱེད་པའི་ཆོས་པའི་གཟུགས་བརྙན་འགའ་རེས། ཚེ་བློས་བཏང་ཟེར་བ་དེ། སེམས་ཀྱིས་ཐོང་ས་དགོས་ཕྱིའི་རྣམ་འགྱུར་ལ་བལྟས་ནས་མི་ཤེས་ཚོ་ཟེར། ཞེ་འདོད་དང་ལག་ལེན་མཐུན་པའི་བྱ་བཏང་རི་ཁྲོད་བཟང་པོ་ལ་ཡང་ཡ་མཚན་པར་བལྟས་ནས་བསྙེན་བཀུར་མི་བྱེད་པར་མ་ཟད། ཚེ་བློས་སུས་ཐོངས་ཡོད་མི་ཤེས་ཚོ་ཟེར། བྱ་བཏང་བ་དེ་བས་ཁོ་བོས་ཚེ་བློས་ཐོངས་ཡོད་བ་ལྟ་བུའི་གཏམ་ཁམ་པོ་ཆེར་སྨྲས། བྱ་བཏང་བ་སྒོམ་ཆེན་བཟང་པོ་དེ་འགབ་ཀྱི་སྟན་དམའ་མོར་བཞག །ཁོ་རང་གོང་དུ་འགྱིང་། བརྙས་སྨོད་བྱས་ཧ་ཧ་ཚོ་ཟེར་བ་དེ་ཆོས་ཤེས་པའི་མཁས་པ་ཞིག་གི་མཛད་སྤྱོད་ཅིག་དང་། བཤད་རྒྱུའི་གཏམ་ཞིག་མ་ཡིན་ཏེ། ཚེ་བློས་ཐོངས་ཡོད་ན་མི་ནོར་ཟས་གསུམ་འདོར་བ་ཆོས་ཉིད་ཡིན་ཏེ། མི་གཙང་བ་བློས་བཏང་ནས་མི་འཕེན་པར། དེ་ཡར་ལ་གསོག་འཇོག་བྱེད་དམ་ཐུགས་བསམ་བཞེས་ཚེ་བློས་ཐོངས་ན་ཡང་དེ་དང་འདྲ། ནང་སེམས་ལ་གང་ཡོད་ཕྱིའི་རྣམ་འགྱུར་ལ་བལྟས་ནས་

ཤེས་དགོས་ཏེ། སྦ་དབྱུག་བཟུང་ནས་བསོད་སྙོམས་བྱས་གསོག་འཇོག་མི་བྱེད་པ་ལ་བྱ་བྲལ་ཟེར་གྱི་བླ་མ་མི་ཟེར། གདུགས་རྒྱལ་མཚན་བསྐོར་ནས་འགྲོ་དོན་བྱེད་པ་བླ་མ་ཟེར་གྱི་བྱ་བྲལ་མི་ཟེར། དེ་ཕྱིའི་རྣམ་འགྱུར་ལ་བལྟས་ནས་ཤེས་པ་ཡིན་གྱི། མངོན་ཤེས་ཀྱིས་ཤེས་པ་ག་ལ་ཡིན། ཚེ་བློས་བཏང་བ། ཞེ་འདོད་དང་ལག་ལེན་མཐུན་དགོས་ཀྱི། གསོག་འཇོག་བྱས་ནས་ངས་ཚེ་བློས་ཐོངས་ཡོད་ཅེས་སྨྲས་ན་འཇིག་རྟེན་རྒད་པོ་ཡན་ཆད་ཀྱི་བཞད་གད་ཀྱི་གནས་ཡིན་པས་གཞན་མ་སེམས། སྨྲས་པ། ཕན་བདེའི་འབྱུང་གནས་བླ་མ་རིན་པོ་ཆེ། །ནོར་བུ་བཞིན་དུ་སྤྱི་བོའི་རྒྱན་དུ་བཞུགས། །ལག་གཉིས་ཐལ་མོ་སྦྱར་ནས་གསོལ་བ་འདེབས། །བྱིན་རླབས་དངོས་གྲུབ་དགོས་འདོད་ཆར་བཞིན་ཕོབ། །བླ་མ་འཇམ་དབྱངས་དབྱངས་ཅན་ལྷ་མོ་ཡི། །དྲིན་གྱིས་ལེགས་བཤད་འདོམས་པའི་སྐལ་བ་བྱུང་། །བར་སྐབས་འདིར་ཡང་རྣར་སྙན་ཡིད་འབབ་ཀྱི། །དམ་ཆོས་གླུ་དབྱངས་ལེན་ལ་བདག་ཡིད་སྤྲོ། །ཚེ་རབས་ཐོག་མ་མེད་ནས་ད་ལྟའི་བར། །རང་གཞན་འགྲོ་ཀུན་མ་རིག་དབང་དུ་སོང་། །ང་མེད་པ་ལ་ངར་བཟུང་ཆགས་སྡང་

ལངས། །དེ་ལ་བརྟེན་ནས་ཉོན་མོངས་གཞན་རྣམས་རྒྱས། །ཉོན་མོངས་དབང་གིས་ལས་ནི་སྣ་ཚོགས་བསགས། །ལས་ཀྱི་དབང་གིས་འགྲོ་བ་རིགས་དྲུག་གི །ནང་དུ་སྐྱེས་ནས་སྡུག་བསྔལ་དཔག་མེད་མྱངས། །བདེ་བའི་གོ་སྐབས་སྐད་ཅིག་ཙམ་མ་བྱུང་། །འཁོར་བའི་ཁྱིམ་ཐབ་བྱེད་པ་སྲིན་མོའི་གླིང་། །དུག་སྦྲུལ་ནག་པོའི་ཚང་དུ་ཆུད་པ་འདྲ། །འདོད་ཡོན་ལོངས་སྤྱོད་དུག་དང་འདྲེས་པའི་ཟས། །སྤུ་གྲིའི་ཁ་ཡི་སྦྲང་རྩི་བརྟགས་དང་མཚུངས། །སྐྱུག་ནད་ཅན་གྱི་མི་ལ་ཟས་བསྟན་བཞིན། །འདོད་སྲེད་ཞེན་པ་གཏིང་ནས་ལོག་པ་དགོས། །སེང་གེའི་སྔོན་དུ་རྩྭ་ཕུང་སྤུངས་པ་ལྟར། །ནོར་ལ་འདོད་པ་སྤུ་ཙམ་མེད་པ་གཅེས། །ནག་ཅན་བཙོན་དོང་ནང་ནས་བྲོས་པ་ལྟར། །ད་རེས་འཁོར་པའི་ནང་ནས་འབྲོ་རེ་ར་ན། །ཕྱེ་ལེབ་རི་དྭགས་བུང་བ་ཉ་དང་གླང་། །གཟུགས་སྒྲ་དྲི་རོ་རེག་བྱས་ཕུང་བ་ལྟར། །འདོད་ཡོན་ལྔ་ག་སྟེན་པའི་སྐྱེ་བོ་རྣམས། །འདི་ཕྱི་གཉིས་ཀ་ཕུང་བར་གདོན་མི་ཟ། །དེ་ཕྱིར་ཚེ་འདིའི་བྱ་བ་བློས་ཐོངས་ལ། །གཅིག་པུར་རི་ཁྲོད་དབེན་པའི་དགའ་ཚལ་དུ། །ཉོན་མོངས་ནད་བརྒྱ་

འཇོམས་པའི་སྨན་གྱི་མཆོག །དམ་ཆོས་བདུད་རྩི་འཐུང་ལ་ཡིད་སྨོན་མཛོད། །ཅེས་བར་སྐབས་ཀྱི་ཚིགས་སུ་བཅད་པའོ།། ༈ །།འདོད་ཡོན་ལྔའི་ནང་ནས་ལྟོ་གོས་བུད་མེད་གསུམ་པོ་འདི་སྡུག་བསྔལ་གྱི་འབྱུང་གནས་ཡིན་ཏེ། དེ་ཡི་རྒྱུ་མཚན་གང་ཡིན་ཞེ་ན། དེ་ཡང་ཇ་འདི་དང་པོ་མི་རྣམས་ཀྱིས་འཐུ་བའི་ཕྱིར་ཕར་འགྲོ་ཚུར་འགྲོ་བྱས་དུས་ས་དང་ཤིང་ལ་གནས་པའི་སྲིན་འབུ་མང་པོ་རྐང་ལག་གིས་བསད་པ་གྲངས་མང་། ཤིང་གི་ཡལ་ག་བཅག་ནས་ཤིང་སྡིག་བླངས། ཇ་ལོ་འཐུ་བའི་གཡོག་པོ་རྣམས་ཀྱིས་ཚ་གྲང་བཀྲེས་སྐོམ་ངལ་དུབ་ན་ཤི་སོགས་སྡུག་བསྔལ་མི་བཟོད་པ་མང་པོ་མྱངས། ཐག་རིང་ནས་བཀལ་འོང་དུས་མཛོ་གཡག་རྟ་དྲེལ་མང་པོ་ལ་བཀལ་འོང་། ས་ཐག་རིང་ཞིང་ཁལ་ལྕི་བས་ངལ་དུབ་རྒལ་བ་ཐོན་པ་དང་། ལམ་ནས་ཤི་བ་ཡང་མང་། ཚོང་དཔོན་དང་གཡོག་པོ་མང་པོས་ཉིན་པར་གྱི་ལྟོ་བཅག །མཚན་མོའི་གཉིད་བཅག་ནས་ཡར་བཀལ་མར་ཕབ་སོ་དང་མེལ་ཚེ་བྱས། དགུན་ཡིན་ན་གྲང་ནས་རྐང་ལག་བྱིལ་ཆད་སྡུག་མྱངས། དབྱར་ཡིན་ན་ཉི་མའི་ཚ་བས་གདུངས་ཁ་སྐོམ་བཟའ་བཏུང་སྤྱོད་ལམ་དམན་

ལྷག་ལ་བརྟེན་ནས་ཚ་བའི་ནད་སོགས་ནད་སྣ་དུ་མ་བྱུང་ནས་མི་མང་པོ་ཤི་བ་དང་། ཁྱད་པར་ཚོང་དཔོན་བུ་གཅེས་སྙིང་དང་འདྲ་བ་ཤི་བ་མང་། སྡིག་པ་དེ་ཀུན་གྱི་ནང་ནས་ཕལ་ཆེ་བ་ཞིག་ཇ་འཐུང་མཁན་རྣམས་ལ་འབྱུང་སྟེ། དེ་ཅིའི་ཕྱིར་ཞེ་ན། ཇ་འཐུང་བ་པོ་མེད་ན། ཇ་འཐུ་མཁན་དང་ཚོང་མཁན་མི་འབྱུང་སྟེ། དཔེར་ན་རྒྱ་གར་གྱི་མིས་ཇ་མི་འཐུང་བས། དེ་ལ་ཇ་ཚོང་མི་འགྲོ་བ་ལྟ་བུའོ། །ཇ་འཐུང་མཁན་ཡོད་ནས། ཇ་ཚོང་བ་པོ་དེའི་དོན་དུ་འོང་བ་ཡིན་པའི་ཕྱིར་རོ། །རྒྱ་ནག་དང་བོད་ཀྱི་མི་རྣམས་འཁྲུལ་བ་ཙམ་མ་གཏོགས་ཇ་འདི་ལ་དགོས་པ་ཅི་ཡང་མེད་དེ། ཚེ་ཕྱི་མར་མི་ཕན་པ་གཞིར་བཞག །ཚེ་འདི་ལ་ཡང་ཟས་ཟ་རྒྱུ་མེད་ན་ཇ་ཅི་ཙམ་འཐུངས་ཀྱང་བཟའ་བའི་ཚབ་ཏུ་མི་འགྲོ། ཆུ་མེད་ན་སྐོམ་དུས་ཇ་སྤར་བ་བྱས་འཆོས་ཀྱང་བཏུང་བའི་ཉམ་ལ་མི་ཕན། དགོས་པ་མེད་པ་ཙམ་དུ་མ་ཟད་ཇ་འདིས་རང་གཞན་མང་པོ་ཚེ་འདི་ཕྱི་གཉིས་ཀར་མི་འདོད་པ་དུ་མ་གཏོང་བས་ཇ་འདིས་ཡུལ་ཁམས་ཕུང་ལ་སྦྱོར་ཏེ། ཇ་ཉོ་མི་རྣམས་ཀྱིས་ཉོ་དུས་རིན་ཆེན་པོ་བྱིན་ནས་ཉོ་དགོས། མཐོ་བ་རྟ་གླང་གསེར་དངུལ་

ནས། དམའ་བ་གྲོ་ནས་ཁབ་སྐུད་ཡན་ཆད་ཀྱི་ནོར་རྫས་ཐམས་ཅད་དོན་མེད་ཤིང་ལོ་ཞིག་གི་རིན་དུ་ཟད་ནས། མཆོག་དམན་བར་བ་ཐམས་ཅད་བུ་ལོན་འོག་ཏུ་ཚུད། ལྷག་པར་གྲྭ་པ་གྲྭ་རྐྱང་དང་ཁྱིམ་པ་ཉམ་ཆུང་རྣམས་དབུལ་པོར་བཏང་བ་མང་། ཇ་ཧ་ཅང་འཐུང་ཆེ་ན། རླུང་ཤས་ཆེ་བས་རླུང་ལངས། མཚན་མོ་གཉིད་མི་ཁུག །དེས་ན་སྤྱན་སྔ་བ་བློ་གྲོས་རྒྱལ་མཚན་གྱིས་མཛད་པའི་ཇ་དཀར་དགག་པའི་གཏམ་སྨྱོ་ཆུ་སུན་འབྱིན་ལས། དུས་ངན་སྙིགས་མ་ལྔ་བདོ་ལ། །ཐམས་ཅད་འདོད་ཡོན་ལྔ་ཡིས་བསླུས། །ཁྱད་པར་ཇ་འདིས་བརླགས་པ་ཙམ། །དགྲ་བོ་ཡིས་ཀྱང་ག་ལ་བྱེད། །འདི་དང་ཕྱི་མ་ཐམས་ཅད་བརླགས། །ནོར་ཤོར་སྲོག་ཤོར་ཆོས་ཀྱང་ཤོར། །ཇ་ཡི་ཕྱིར་དུ་ནོར་ཟད་ནས། །སྤྲང་པོར་འགྲོ་བ་གྲངས་མི་ཆོད། །སྦྱོར་ཐེབས་རེ་ལ་བཞི་ཆ་རེ། །འཇལ་དགོས་བྱུང་བ་ཤིན་ཏུ་མང་། །སྦྱོར་ཐེབས་བཞི་བཅུར་མར་ཞོ་བཅུ། །སྤྲང་པོར་འགྲོ་བ་འོས་མེད་དོ། །འཁོར་ལོས་སྒྱུར་རྒྱལ་ལོངས་སྤྱོད་ཀྱང་། །འདི་ལྟར་བྱས་ན་བརླག་པ་ལ། །ཡུན་རིང་འགོར་བ་ག་ལ་སྲིད། །ཇ་ལ་དགའ་དང་ཆང་ལ་དགའ། །

བུད་མེད་དགའ་ལ་དུས་ནམ་ཡང་། །ཚོད་ཟིན་ཡོང་བའི་ཁ་ལེ་མེད། །ཚོད་ཟིན་མེད་ན་དེ་ཙམ་དུ། །ནོར་ཟད་སྤྲང་པོར་ཅིས་མི་འགྲོ། །ཕྱུག་པོ་འདོད་ན་དགྲ་བོ་ཆེ། །ཇ་ལ་གདོན་དུ་ཤེས་པར་གྱིས། །ཇ་དཀར་མང་དུ་འཐུང་བ་ཡི། །ལུས་ལ་ནད་མ་ཞུགས་པ་མེད། །གྲང་བའི་ནད་ཀྱིས་འཕྲལ་དུ་གདུངས། །མི་འདོད་བཞིན་དུ་འཁུར་དགོས་པ། །བདག་གིས་མང་དུ་མཐོང་ཞིང་ཐོས། །ཆུ་བསགས་ཆུ་རྐྱལ་བཞིན་སོང་ཏེ། །ཤི་བ་བྱུང་བ་ཤིན་ཏུ་མང་། །ཇ་ཡིས་རྐང་ལག་སྐྱོག་པོ་རུ། །བཏང་བའི་གྲངས་ནི་སུ་ཡིས་ཆོད། །ལུས་བྱིང་མི་བདེ་བད་ཀན་བསྐྱེད། །དང་ཁ་དོག་ཅིང་ཟས་མི་འཇུ། །ལར་ནི་ནད་རྣམས་ཐམས་ཅད་བསྐྱེད། །ནད་ཀྱིས་གདུང་བཞིན་ཇ་དགོས་ཞེས། །འཐུང་བ་དག་ཀྱང་མང་དུ་མཐོང་། །ཇ་ཡིས་སྨྱོ་བར་གྱུར་པའི་མི། །མ་གཏོགས་སུ་ཞིག་དེ་ལྟར་བྱེད། །དེས་ན་ཇ་འདི་སྨྱོ་ཆུ་རུ། །གདོན་མི་ཟ་བར་ཤེས་པར་མཛོད། །མདོར་ན་ནད་ལ་མི་དགའ་ན། །ཇ་འདི་དགྲ་རུ་ཤེས་པར་གྱིས། །ཞེས་པ་ལ་སོགས་པའི་ཉེས་དམིགས་ཆེ་ཚུལ་མང་པོ་གསུངས། གཞན་ཡང་ཇ་འདིས་

མཚན་ཉིད་པའི་སློབ་གཉེར་ཆད། སྒོམ་ཆེན་པའི་ཐུགས་དམ་ཆག་ཚུལ་སོགས་ཆོས་ཀྱི་བར་ཆད་དུ་འགྲོ་ཞེས་ཆོས་རྗེ་འབྲུག་པ་ཀུན་ལེགས་ཀྱིས་གསུངས། དེ་བདེན་ཏེ། ཇ་མང་པོ་འཐུང་མཁན་དེ། མར་སྒོ་ལ་བརྒྱ་སྟོང་འབུད་དགོས། མལ་ས་དྲོན་པོ་ནས་ཐུགས་དམ་ཕར་ཞོག །རང་ག་སྡོད་དུ་ཡང་མི་འཇུག །ཆར་ཆུ་མུན་ནག་ཁ་བ་བབས་རུང་ཕྱི་སྒོ་ལ་འགྲོ་དགོས། འགྲོ་ཐག་རིང་། དབྱར་ཡིན་ན་ལམ་ལ་མ་བལྟས་ན་སྲིན་འབུ་མང་པོ་རྐང་པས་བརྫིས་ནས་གསོད། གཞན་གྱི་ཁྱི་བཙན་པོ་ཡོད་ས་ཞིག་ཡིན་ན་ཕྱི་སྒོ་ལ་སོང་ནས་གཏོང་གི་ཡོད་པའི་སྒང་ལ་སྐབས་རེ་ཁྱི་ཤོར་ནས་གཏོང་དུ་མ་བཅུག །དེད་ནས་གསང་སྣེ་ན་ཆུ་ཙ་ར་ར་བྲོས་པས། ས་རྡོ་སོགས་ལ་ཐོགས་ནས་རྐང་སྣེ་ཚོ་ནས་ཁྲག་ཙ་ར་ར་བྱེད་པའི་དུས་ཀྱང་འབྱུང་། གཅིན་གཏོང་དུས་སྔོ་རླན་སོགས་སྲིན་འབུ་མང་སར་བཏང་ན། ལན་རེ་ལའང་འབུ་བཅུ་ལྷག་རེ་འཆི་དུས་འབྱུང་། གལ་ཏེ་རེ་གཉིས་མི་འཆི་དུས་མེད། གཅིན་གྱི་དུག་གིས་སྔོ་ལྗང་རྩྭ་རྣམས་སེར་པོར་བཏང་། མདོག་ཤོར་ནས་སྐམ། དེས་ན་སངས་རྒྱས་ཀྱིས་སྔོ་རླན་སྟེང་དུ་གཤང་གཅི་མ་འདོར།

སྐྱེ་བ་མ་གཅོད། སྲོག་གཅོད་མ་བྱེད་གསུངས་པ་རྣམས་དང་འགལ་ནས། གཅིན་གཅིག་གཏོང་བའི་རིང་ལ་སྡོམ་པ་གསུམ་བཏང་བ་ཡིན། སྡོམ་པ་གང་ཤོར་ན་ངན་སོང་གསུམ་གང་རུང་དུ་སྐྱེ་ཞེས་གསུངས། ཇ་བསྐོལ་ན་ཆུ་དང་ཤིང་ཅི་ནས་ཀྱང་དགོས། ཇ་མང་པོ་འཐུང་མཁན་ཡིན་ན་དེ་ཙམ་གྱི་ཆུ་ཤིང་མང་དགོས། ཆུ་ཤིང་འདི་གཉིས་ཀྱང་སྡིག་པའི་རྩ་བ་རང་ཡིན། ཆུ་ཐག་རིང་ན་དེ་ལེན་དུ་འགྲོ་བས་ལམ་ལ་བལྟས་ནས་མ་སོང་ན་དབྱར་ཡིན་ན་སྲིན་འབུ་མང་པོ་གསོད། དེ་ན་སངས་རྒྱས་ཀྱིས་མིག་གིས་གཉའ་ཤིང་གང་ཙམ་ལ་བལྟས་ནས་འགྲོ་དགོས་ཞེས་བཅས་པ་མཛད་པ་ཡང་། འབུ་མི་གསོད་པ་སོགས་ལ་དགོངས་ནས་གསུངས་པ་ཡིན། མིག་གིས་ཕྱོགས་ཀུན་ཏུ་བལྟས་ལམ་ལ་མི་ལྟ་བར་རྐང་པས་འབུ་མང་པོ་བསད་ན། སྐབས་དེར་སྡོམ་པ་གཉིས་ཤོར་བ་ཡིན། ཆུ་ནང་ན་འབུ་མེད་པའི་ཆུ་དཀོན། མཚོ་དང་ཆུ་མིག་སོགས་ན་འབུ་ཆུང་ཆུང་ཁབ་རྩེ་ཙམ་དང་སྤུ་རྩེ་ཙམ་པས་ཁེངས་ཡོད། གཞན་རྫ་ཆུ་དང་ཆུ་ཆེན་ཡིན་ཡང་ཆུ་ལེན་དུས་མ་བལྟས་ན་འབུ་ཆུང་རེ་གཉིས་ཡོང་སྲིད།

དེས་ན་སངས་རྒྱས་ཀྱིས་ཆུ་ཚགས་དགོས་ཞེས་གསུངས་པ་ཡིན། ཆུ་ལེན་དུས་ཆུ་ཚགས་ལ་མ་བཙག །ཡང་ན་ཞིབ་ཏུ་བལྟས་ནས་མ་བླངས་ན་འབུ་མང་པོ་ཡོང་། འབུ་བཙོས་ནས་འཐུང་ན་སྐབས་དེར་ཡང་སྡོམ་པ་གཉིས་ཤོར་སོང་བ་ཡིན། ཆུ་དེ་ལེན་སྣོད་ཀྱི་ནང་གི་ངོས་ལ་བཀྲུ་བཤལ་བྱས། ཆུ་ས་ལ་བོ་དུས་མ་བལྟས་ན་ས་ཡི་འབུ་ཆེ་ཆུང་མང་པོ་ལ་ཕོག་ཆུས་ཁྱེར་ནས་འཆི། ཁ་ཅིག་མ་ཤི་ཡང་འཆི་ལ་ཁད་ཀྱི་འཇིགས་སྐྲག་དང་སྡུག་བསྔལ་མྱོང་། ཆུ་ཕྱོགས་གཞན་ནས་ཚུར་རྐ་ལ་དྲངས་ན། རྐ་བརྐོ་དུས་སྲིན་འབུ་མང་པོ་གསོད། ཆུ་དྲངས་ན་ཟླ་རེ་འཕྲོ་རྐ་མགོ་ནས་ལོག་ཆུ་ཆད་ན་རྐ་ནང་དུ་གནས་པའི་སྲིན་འབུ་ཉི་མས་བསྲེག །བྱིའུ་ཆུང་གིས་ཟ། སྐམ་ན་གནས་པའི་སྲིན་འབུ་མང་པོ་རྐ་ནང་དུ་འཚངས། རྐ་མགོ་ནས་ཆུ་མར་བཏང་དུས་རྐ་ནང་ན་གནས་པའི་འབུ་ཐམས་ཅད་ཆུ་ཡིས་ཁུར་ནས་འཆི་བ་སོགས་སྡིག་པ་འབའ་ཞིག་བསག་ཡོང་། ཡང་མེ་ཤིང་ལ་ཤིང་རློན་པ་བཅད་ན་སྐྱེ་བ་གཅོད་པ་དང་། གཅོད་དུ་བཅུག་པ་ཡིན་པས་སྡོམ་པ་ཞིག་དེ་དུས་ཤོར། ཤིང་བཅད་ནས་ས་ལ་སྒྱེལ་གཏུབ་གཤག་པའི་དུས་སོགས་སུ་ཤིང་སྐམ་

པོ་ཡིན་ན་ཤུན་པ་དང་ནང་ན་འབུ་དཀར་པོ་ཆེ་ཆུང་མང་པོ་ཡོད་པ་ས་ལ་འཕངས་ནས་འཆི། ཕལ་ཆེར་ཤིང་མེ་ལ་བསྲེག་དུས་འཆི། ལྕི་བ་འཐུ་ན་འཐུ་དུས་ཕར་འགྲོ་ཚུར་འགྲོ་མང་པོ་བྱེད་དགོས། དེ་དུས་ས་ལ་མ་བལྟས་ན་ས་ཡི་སྲིན་འབུ་ཆེ་ཆུང་མང་པོ་གསོད། ལྕི་བ་ལ་འབུ་མང་པོ་བརྟེན་ནས་ཡོད། དེས་ནས་ཡར་ལེན་དུས་ཁུར་ནས་འོང་བའི་དུས་ཉི་མ་ལ་སྐམ་དུས་འབུ་མང་པོ་འཆི། གལ་ཏེ་མ་ཤི་བ་རྣམས་ཇ་བསྐོལ་དུས་མེ་ནང་དུ་བཞག་ནས་འཆི་སྟེ། འབྲུག་པ་ཀུན་ལེགས་ཀྱིས། ཇ་མང་པོ་བསྐོལ་ཚེ་ཐབ་ཤིང་གི་ནང་དུའང་མེ་ལ་གང་ཙམ་འཆི་ཤེས་པ་དང་ཚད་གཟུང་དུ་མི་འདུག་གསུངས། སྡིག་པ་དེ་ཐམས་ཅད་ཀྱི་ཆེ་ཤོས་དེ་འཐུང་མཁན་ལ་འབྱུང་བས། གཞན་ཞིག་ལ་འབྱུང་བར་མ་སེམས། གཞན་ཡང་ཇ་འདིས་ཉོན་མོངས་དུག་ལྔ་སློང་། མི་དགེ་བཅུ་ཡང་བྱེད་དུ་འཇུག་པས། མི་དགེ་བ་ཆེ་ཆུང་གང་བྱས་ཀྱང་ཕྱི་མར་ངན་སོང་གསུམ་མ་གཏོགས་གཞན་དུ་སྐྱེ་ས་མེད། འོ་ན་ཇ་འདི་ལ་སངས་རྒྱས་ཀྱིས་མ་འཐུང་ཞེས་ཆང་ལྟར་བཅས་པ་མ་མཛད་པས་འཐུངས་ན་སྐྱོན་མེད་ཟེར་ན། སྔོན་སངས་

རྒྱས་ཀྱི་དུས་སུ་ཇ་འདི་དངོས་སུ་མེད་པས་བཅས་པ་མཛད་རྒྱུ་ཞིག་མ་བྱུང་བ་ཡིན། དངོས་སུ་ཡོད་རྒྱུ་ཞིག་ཡིན་ན་ཆང་ལས་ལྷག་པ་འདི་ལ་བཅས་པ་མཛད་ངེས་ཞེས་སྐྱེས་བུ་དམ་པ་དུ་མས་གསུངས། འོན་ཀྱང་སངས་རྒྱས་ཀྱིས་དངོས་སུ་བཅས་པ་མ་གནང་ཡང་། ཤུགས་ཀྱིས་བཅས་པ་མཛད་ཡོད་དེ། མི་རུང་བ་དང་མཐུན་པའི་ཕྱོགས་ཀུན་སྤོངས། །ཞེས་གསུངས་པས་ན། ཇ་འདི་ལས་མི་རུང་བ་དང་མཐུན་ཚབས་ཆེ་བ་ཞིག་གཞན་ན་མེད། དེས་ན་ཆོས་པ་འཇིག་རྟེན་པ་སུ་ཡིན་ཡང་ཇ་འདི་སྤངས་ན་ལེགས། གལ་ཏེ་ངན་གོམས་ཀྱི་དབང་གིས་འཐུང་དགོས་པ་བྱུང་ནས་སྤོང་མི་ནུས་ཀྱང་བག་མེད་དུ་མི་འཐུང་བར་ཚོད་འཛིན་དགོས། དེང་སང་མཚན་ཉིད་སྒོམ་ཆེན་པ་མན་ཆད་ཀྱིས་ཇ་འདི་སྐྱོན་དུ་མི་མཐོང་བར་ཡོན་ཏན་དུ་རློམ་ནས། ཇ་མང་པོ་མངར་པོ་འཐུང་རྒྱུ་བྱུང་ན་འཛུམ་ལངས། གཏམ་མང་པོ་ལབ་ཉི་མ་ནམ་ཚ་བཏང་ཆོས་སྤྱོད་ཚོ་སྐད་གསེང་མཐོན་པོས་དབྱངས་བྱས་ནས་བཏོན། ཇ་མེད་པར་ཉིན་གཅིག་ཙམ་ལ་ཡང་སྡོད་མི་ཚུགས་པར་སློབ་གཉེར་དང་། ཐུགས་དམ་ཀྱང་མི་འོང་བ་ལྟ་བུའི་ཐུགས་ཁྲལ་མཛད་པ་ཆོས་མ་

ཤེས་པའི་རང་མཚང་དུ་གོ་ནས། ཇ་འདི་ལ་སྲེད་པ་ཆུང་བར་གྱིས། ལྷག་པར་བྱ་བཏང་རི་ཁྲོད་ན་སྡོད་པ་རྣམས་ཀྱིས་ཇ་འདི་ལ་འདོད་ཆུང་ཆོག་ཤེས་དུས་རྒྱུན་དུ་བསྟེན་པ་གཅེས།། ༈ །།ཡང་མར་འདིའི་ཆེད་དུ་མཛོ་མོའི་བུ་མངལ་ནས་ཕྱིར་ཐོན་མ་ཐག་ནས་བསད། ཡང་ན་འོ་མ་མི་སྟེར་བར་མུ་གེས་འཆི་རུ་འཇུག །འབྲི་ཡི་བུ་དུས་རྒྱུན་དུ་རྟོད་ཕུར་ལ་བཏགས། ནུ་ཞོ་མངར་མོ་ཅུང་ཟད་རེ་མ་གཏོགས་འཐུང་དུ་མི་འཇུག །ཁོ་རང་གི་ཁ་ཡིས་རྩྭ་ཟ་ཆུ་འཐུང་རག་གི་བར་དུ་ཟླ་བ་མང་པོར་མུག་སྡུག་མྱང་། ལུས་རྒུར་ཁོག་པ་གུམ་ཕྱུགས་འཚོ་མཁན་གྱིས་ཉིན་པར་གྱི་ལྟོ་བཅག །མཚན་མོའི་གཉིད་བཅག །ཆར་ཆུ་མུན་ནག་གི་ནང་ནས་སྡུག་བསྔལ་མྱོང་། མཛོ་འབྲི་བཞོ་མཁན་གྱིས་གཅི་བ་གཅིན་གྱི་འདམ་རྫབ་ནང་ནས་བཞོ་དུས་དཀའ་ལས་མྱོང་། འོ་མ་བཞོས་པ་ཙམ་དུ་མ་ཟད་ཚུར་ཁྱེར་འོངས་ནས་མེ་སྦར་འོ་མ་བསྐོལ། ཞོ་བསྙལ། འོ་མ་སྐྲོགས། མར་བླངས། དར་བསྐོལ། ཕྱུར་བ་བསྐམ། ཐུད་བཅའ་བ་སོགས་ཁར་ཟ་རག་གི་བར་དུ་དལ་བ་མེད། མཛོ་འབྲི་རྣམས་ཀྱི་ནུ་མ་ནས་ཉིན་རེ་

བཞིན་ལག་པས་ཤེད་ཀྱི་འཐེན་པས་སྐབས་ཤིག་ཚ། རྨ་བྱུང་ཕྲ་བ་རྒྱག །ཕྱུགས་རྣམས་ཀྱིས་རྩྭ་ཟ་དུས་ཆུ་འཐུང་དུས་ཕར་འགྲོ་ཚུར་འོང་། ཉལ་དུས་རྣམས་སུ་ས་ཡི་སྲིན་འབུ་གྲངས་ཀྱིས་མི་ལང་བ་གསོད། མར་དེ་ཡར་མར་ལ་འཁྱེར་དུས་རྟ་དྲིལ་མཛོ་གཡག་ལ་བཀལ་ནས་རྒལ་རྨ་བྱུང་། ལྟོག་སྐོམ་ཚ་གྲང་ངལ་དུབ་ཀྱི་སྡུག་བསྔལ་མྱོང་། །མར་ཕར་སྟེར་ཚུར་ལེན་སོགས་ཀྱི་ཕྱིར་མི་རྣམས་ཀྱིས་ཀྱང་སྡུག་བསྔལ་དུ་མ་མྱོང་། མར་གྱི་སྟེང་ནས་ཆགས་སྡང་སེར་སྣ་སོགས་ཉོན་མོངས་ཀུན་ལྡང་། མ་བྱིན་ལེན་རྫུན་སོགས་མི་དགེ་བ་བཅུའམ་གང་རུང་གཅིག་གཉིས་རེ་བྱེད་ངེས། བྱས་ན་ཕྱི་མར་དམྱལ་བ་ཡི་དྭགས་དུད་འགྲོ་གསུམ་གྱི་གནས་སུ་སྐྱེ། འོ་མ་ཞོ་དང་མར་ཕྱུར་བ་ཐུད་རྣམས་ཀྱིས་སྒོ་ཕྱུགས་སོགས་གཞན་ལ་སྡུག་བཏང་ན། ཟ་མཁན་གྱི་སྟེང་དུ་ཚེ་འདི་ཕྱི་གཉིས་ཀ་སྡུག་སྡིག་གཏམ་ངན་གསུམ་འདྲེན་ཚུལ་བསམས་ན་མར་འདི་སྡིག་ཟས་ཁོ་ན་ཡིན་པས། མར་འདི་མང་པོ་ཟ་བའི་ཆོས་པ་ལ་ཉམས་རྟོགས་ཤིག་འཆར་མི་དགོས་སྒྲིབ་སྦྱོང་མ་བྱས་ན་ཉམས་གྲིབ་ཞིག་འོང་བའི་ཚོད་ཡིན། འོ་ན་མར་འདི་ལ་ལུས་སྟོབས་

རྒྱས་པ་རྒ་ཁ་སྲ་བ་རླུང་ལ་ཕན་པ་བཀྲེས་སྐོམ་སེལ་བ་སོགས་ཡོན་ཏན་དུ་མ་ཡོད་ཚུལ་སྨན་རྒྱུད་སོགས་ནས་གསུངས་འདུག་པས། འདི་བསྟེན་པར་རིགས་ཟེར་ན། སྤྱིར་འཁོར་བའི་ཕུན་ཚོགས་ཀྱི་བདེ་བ་ནི། སེམས་ཅན་རྣམས་མ་རིག་འཁྲུལ་པའི་དབང་དུ་སོང་ནས་སྡུག་བསྔལ་ལ་བདེ་བར་བཟུང་། བདེ་བའི་མིང་བཏགས་པ་ཙམ་མ་གཏོགས། དོན་དུ་བདེ་བ་སྤུ་ཙམ་ཞིག་མེད། དཔེར་ན་དུག་དང་འདྲེས་པའི་ཟས་ཞིམ་པོ་ཞིག་ཟོས་ན་ཕྲལ་དུ་ཁ་ལ་ཞིམ་ཞིང་ཁོག་ཏུ་སོང་ན། བདེ་བ་འབྱུང་བ་ལྟར་སྣང་ཡང་། ཕྱི་ནས་སྡུག་བསྔལ་ཚད་མེད་བསྐྱེད་པ་ལྟར། འཁོར་བའི་ཕུན་ཚོགས་ཀྱང་འཕྲལ་དུ་ལོངས་སྤྱོད་དུས་བདེ་བ་ལྟར་སྣང་ཡང་། ཕུགས་སུ་སྡུག་བསྔལ་ཚད་མེད་བསྐྱེད་པས་དེས་ན་འཁོར་བའི་ཕུན་ཚོགས་ཐམས་ཅད་སྡུག་བསྔལ་གྱི་རང་བཞིན་ཁོ་ན་ཡིན། བདེ་བ་མིན་རུང་བདེ་བ་ལྟ་བུའི་ཡོན་ཏན་ལྟར་སྣང་རེ་ཙམ་ཡོད་ན་བསྟེན་ཆོག་པ་ག་ལ་འགྱུར། དེ་ཡིན་ན་བུད་མེད་ལ་སྤྱད་ན་སྐབས་དེར་བདེ་བ་ཚད་མེད་སྐྱེས། དེ་ལ་བརྟེན་ནས་ན་ཆུང་བུ་དང་བུ་མོ་རྣམས་ལང་ཚོ་རྒྱས། ཆང་འཐུང་ན་འཕྲལ་དུ་

ལུས་ལ་གཟི་མདངས་འབར། སེམས་ལ་དགའ་བདེ་འཆར་བ་སོགས་ཡོན་ཏན་ལྟར་སྣང་དེ་མེད་ནི་འཇིག་རྟེན་ཕུན་ཚོགས་ལ་མེད་མི་སྲིད་པས་ཐམས་ཅད་བསྟེན་ན་ཆོག་སྟེ། དེ་ག་ལ་རུང་། དཔེར་ན་དུག་དང་འདྲེས་པའི་ཟས་ཞིམ་རུང་ཕྱི་ནས་སྲོག་འཆད་པ་ཤེས་ན་སྨྱོན་པ་འདྲ་མ་གཏོགས་བློ་ལྡན་སེམས་ཡོད་ཀྱིས་ནམ་ཡང་མི་ཟ་བ་ལྟར། འདོད་ཡོན་ལོངས་སྤྱོད་ལ་བདེ་བ་ལྟར་སྣ་རེ་ཡོད་ཀྱང་ཕྱི་ནས་སྡུག་བསྔལ་ཚད་མེད་བསྐྱེད་པ་ཤེས་ནས། མར་སོགས་འདོད་ཡོན་སྤངས་ནས། རབ་ཏིང་འཛིན་ཟས། འབྲིང་བཅུད་ལེན། ཐམས་ཀྱང་དཀའ་སྤྱད་སྡུག་འཁུར་བྱས། སྡིག་དང་མ་འདྲེས་པའི་ཆོས་བྱེད་པ་གཅེས། གལ་ཏེ་དུས་ཀྱི་དབང་གིས་ཟས་དེ་མིན་མེད། ལྟོག་པའི་དབང་གིས་བསྟེན་དགོས་པ་བྱུང་ན་ཡང་། དུག་ཟས་ཟ་ན་མི་གནོད་པའི་རྫས་སྔགས་སྨན་བསྟེན་དགོས་པ་ལྟར། སྡིག་ཟས་འཇུ་བ་ཚུལ་ཁྲིམས་དང་དགེ་སྦྱོར་རྣམ་པར་དག་པ་བྱས། བག་མེད་དུ་བསྟེན་པ་མ་ཡིན་པར་སྲོག་འཚོ་བ་ཙམ་དུ་ཅུང་ཟད་རེ་བསྟེན་པར་བྱ། དེང་སང་བླ་རྒན་ཁ་སེར་མགོ་དཀར་འགའ་རེས། ཟས་དཀར་གསུམ་མངར་གསུམ་དགེ་འདུན་པའི་

ཟས་ཡིན་ཟེར། མར་ཁ་ལ་ཟོས་པས་མི་ཆོག་མར་ཁུ་ཕོར་བ་གང་དོ་རེ་འཐུང་། འོ་མ་དང་ཞོ་ཕོར་བ་མང་པོ་འཐུང་། ཐུད་ཟོས་བརྒྱགས་ནས་འཆི་ཚད་པ་རྐྱང་བྱས། སྐབས་རེ་ཕོ་བར་ནད་ཟུག་ལངས། མར་འགྲིམས། སྐྱུག་རྫོགས་པ་རྣམས་ཀྱིས་འདོད་ཡོན་གྱི་ཉེས་དམིགས་དང་ཟས་ཀྱི་ཚོད་རིག་པ་མི་ཉལ་བར་རྣལ་འབྱོར་ལ་བརྩོན་དགོས་གསུངས་པ་རྣམས་མ་ཤེས་པའི་རང་མཚང་ཕྱིར་བསྟན་པ་ཡིན་པས་གཞན་མ་སེམས། ཡང་དེང་སང་དགོན་པ་ཕལ་ཆེར་གྱིས། མཛོ་འབྲི་སོགས་སྡུག་བསྔལ་གྱི་རྩ་བ། ཀུན་གྱིས་སྡོམ་པ་འཆོར་བའི་རྒྱུ་ཡིན་པར་མ་ཤེས་པར་ཆོས་ཀྱི་མཐུན་རྐྱེན་དུ་གོ་ནས། སྤྱི་ཐོག་ནས་མཛོ་མོ་བཅུ་ཉི་ཤུ་སུམ་ཅུ་བྱས་བཞག །ལོ་རེ་བཞིན་འོ་མའི་ཕྱིར་མཛོ་མོའི་རྟོལ་བུ་རྣམས་གཅིག་ཀྱང་མི་འཇོག་པར་བསད་ནས། དེའི་སྐལ་གྱི་འོ་མ་བཞོས་ནས་འཐུང་བ་འདི་སྟོན་པའི་རྗེས་འཇུག་ཆོས་པ་རྣམས་ཀྱིས་སྤྱོད་ཡུལ་ཞིག་གཏན་ནས་མ་ཡིན། འོ་མ་འཐུང་ན། དམ་པ་གོང་མའི་རྣམ་ཐར་ལྟར། དམ་པ་ཆོས་ཀྱི་འོ་མ་བཞོས་ནས་འདི་ལྟར་འཐུང་དགོས་ཏེ། རྗེ་བཙུན་མི་ལ་ལ།

འགའ་ཞིག་གིས་སྐུ་བགྲེས་ཙ་ན་དུམ་རེ་གསོལ་བའི་བ་མོ་རེ་བཟུང་ན་དགའ་ལགས་ཞུས་ཚེ་ལན་དུ་མགུར་འདི་གསུངས་སོ།། ༈ །།རྗེ་མི་བསྐྱོད་ཀྱི་ངོ་བོ་རྡོ་རྗེ་འཆང་། །སྤྲང་ཞེན་པ་ཟད་པར་ཐུགས་རྗེས་བཟུང་། །ང་སྒྱུ་མ་ལུས་ཀྱི་ནགས་ཁྲོད་དུ། །སྟོང་ཉིད་སྙིང་རྗེའི་ན་སྤང་རྒྱས། །ཞེན་མེད་དད་པའི་ཤེ་མ་ཡི། །དམ་ཚིག་གཙང་མའི་ལག་པ་བཀྲུས། །ཐབས་ཤེས་གཉིས་ཀྱི་མཛོ་སྐྱོགས་སུ། །སེམས་ཉིད་རིན་ཆེན་བ་མོ་འཇོ། །རྣམ་དག་གཉུག་མའི་སྒོམ་ཆེན་ལ། །ཟག་མེད་བདེ་ཆེན་གྱི་འོ་མ་འདྲེན། །སྤྲོས་མེད་ཆོས་ཉིད་ཀྱི་ཞལ་དུ་གསོལ། །ཆགས་མེད་ལོངས་སྤྱོད་མགུར་གྱི་བཞེས། །དམིགས་མེད་སྙིང་རྗེའི་ཐུགས་ལ་བསྟིམས། །ཕྲིན་ལས་ཕྱོགས་མེད་ཀྱི་ཟག་པ་གཏོང་། །འགྲོ་དོན་ལྷུན་གྲུབ་སྒྲེགས་པ་ཀློག །དེ་འདྲའི་བ་མོ་འཇོ་བ་ལ། །ཁྱོད་འཇིག་རྟེན་བ་མོའི་དགོས་པ་མེད། །ཆོས་བརྒྱད་ཀྱི་དགོན་པར་ང་མི་སྡོད། །ཁྲེལ་མང་ཀྱི་སྤྱོད་པ་བྱེད་ལ་ཐུག །གསུངས།། ༈ །།ཡང་རྩམ་པ་འདིའི་ཕྱིར་དུ། ཞིང་འདེབས་དུས་མཛོ་གླང་གཡག་ལ་ས་གཤག་ཏུ་བཅུག་ན་ས་སྲ་བས། འཐེན་མི་

ཐུབ་པས་ཤུགས་ལངས་ནས་འཐེན་ན་ཕུང་པོ་ངལ་དུབ། འགྲོ་མ་ནུས་ན་ཞིང་རྨོ་མིས་ཤུགས་དྲག་བརྡུངས་ནས་དེང་སྐབས་ཤིག་གཉའ་བ་སྐྲངས། སྡུག་བསྔལ་མྱོང་ཞིང་། རྨོ་མཁན་གྱི་མི་དེའི་རྐང་ལག་རོ་སྟོད་ན། ས་གཤག་དུས་ཞིང་ཐོག་ན་སྲིན་འབུ་ཆེ་ཆུང་གང་ཡོད་ཐམས་ཅད་ས་འོག་ཏུ་བདས། ས་འོག་གི་སྲིན་འབུ་ཐམས་ཅད་ས་སྟེང་དུ་ཕུལ། ཉི་མས་བསྲེགས། བྱ་དང་བྱེའུ་ཆུང་གིས་ཟོས། ཞིང་སྟེང་དུ་ཆུ་གཏོང་དུས་གྲོག་མ་སོགས་སྲིན་འབུ་མང་པོ་ཆུ་ལ་འདེབས། སྟོན་ལོ་ཐོག་ལེན་དུས་ལོ་དང་ས་ལ་གནས་པའི་འབུ་ཐམས་ཅད་རྐང་ལག་གིས་བརྫིས། ལོ་ཐོག་རྡུང་དུས་ཀྱང་འབུ་གཅུར། ཞིང་གི་སོ་ནམ་འདིའི་ཕྱིར་ཁྱིམ་པ་ཕོ་མོ་ཐམས་ཅད་ཀྱིས་ལོ་གཅིག་མ་ཡིན་པར་དུས་རྒྱུན་དུ་དབྱར་དགུན་སྟོན་དཔྱིད་ཐམས་ཅད་སྡུག་དཀའ་ལས་བསམ་གྱིས་མི་ཁྱབ་པ་མྱོང་། ཁྱིམ་པ་ཕོ་མོས་སོ་ནམ་མ་ཐུབ་པར་ཉིན་པར་ལྟོ་དང་མཚན་མོ་གཉིད་བཅག་ནས་རེམས་པས། སྤྱོད་ལམ་དང་ཟས་ཀྱི་དམན་ལྷག་གི་ཚོད་མི་ཟིན་པར་ལུས་ལ་ན་ཟུག་བསྐྱེད་ནས་ལོ་ཟླ་བ་བྱས་ནས་ན་བ་དང་། མ་དྲག་པར་ཤི་བ་ཡང་

གྲངས་མང་། མདོར་ན་ཞིང་དེ་བཏབ་ནས་བཟུང་རྩམ་པ་བྱས་ནས་ཁ་ནང་དུ་ཟ་རག་གི་བར་དུ་མི་ཕྱུགས་གཉིས་ཀས་ལུས་སེམས་ཀྱིས་སྡུག་མྱོང་། ཆགས་སྡང་བྱས་ནས་སྡིག་པ་བྱས་ཚུལ་རྣམས་ཞིབ་ཏུ་བསམས་ན། གྲོ་ནས་འབྲས་སྲན་སོགས་ཁ་ཟས་འདི་ཐམས་ཅད་སྡིག་སྡུག་གཏམ་ངན་གསུམ་གྱི་རྩ་བ་ཆེ་ཤོས་འདི་ཀ་ཡིན་ཏེ། འབྲུག་པ་ཀུན་ལེགས་ཀྱིས། ད་ལྟ་ཆོས་པ་འདི་ཀུན་ཟན་བཞེས་པ་ལ་ཉེས་པ་མེད་པ་འདྲ་བ་ཞིག་མཛད་ནས། ལྷུང་བཟེད་བརྟོལ་ལ་ཁད་གནང་། ཁམ་ཟན་བུ་ཆུང་གི་འཛོག་མགོ་ཙམ་བུ་རམ་མུར་པ་བཞིན་འདུག་སྟེ། སྡིག་པའི་རྩ་བ་རང་ཟན་འདི་ལ་ཐུག །དཔེར་ན་ཞིང་ཐོག་ཏུ་ཆུ་གཏོང་བ་ནས་མགོ་བཟུང་བའི་སྒྲེ་སློག་ལ་འཆི་བ་ཙམ་རང་། ཉ་པས་ཆུ་འགྲམ་དུ་སྦྲང་བུ་དང་བཅས་ན་ཨེ་འགྲོ་ཡིན། གཞན་མས་འདིའི་སྲོག་གཅོད་ལུགས་ཀྱི་ཡ་ལངས་པར་དཀའ་གསུངས། སྡིག་པ་དེ་ཀུན་གྱི་ཕལ་ཆེ་བ་ཞིག་ཞིང་འདེབས་པའི་ཁྱིམ་པ་ལས། ཟ་མཁན་བླ་མ་དགེ་སློང་སྒོམ་ཆེན་པ་སོགས་ཀྱི་སྟེང་དུ་འབྱུང་། དེ་ཅིའི་ཕྱིར་ཞེ་ན། ཟ་མཁན་མང་པོ་མེད་ན་ཞིང་འདེབས་མི་དགོས། གལ་ཏེ་ཁྱིམ་པ་ཕོ་མོས་རང་

ཁ་གསོ་ཕྱིར་ཅུང་ཟད་རེ་བཏབ་ན་ཆོག་པས་སྡིག་པ་ཆུང་། ཟ་མཁན་མི་མང་པོ་བྱུང་ཚེ་དེ་དག་རྣམས་ཀྱི་ཆེད་དུ་དམིགས་ནས་ཞིང་ཡང་འདེབས་དགོས་པ་ཙམ་དུ་མ་ཟད་རྡོ་ཐོག་མིན་ཚད་ལ་འདེབས་དགོས་པ་བྱུང་། བཏབ་ནས་སྡིག་པ་མང་པོ་བསགས་པ་ཡིན་པའི་ཕྱིར་རོ། །དེས་ན་བླ་མ་དགེ་སློང་བྱ་བཏང་རི་ཁྲོད་ན་སྡོད་པ་རྣམས་ལ་ཁྱིམ་པ་ཕོ་མོ་དད་ཅན་གྱིས་རྩམ་པ་སོགས་ལྟོ་ཆས་ཕུལ་བ་སྡིག་ཟས་ཡིན་པར་མ་ཟད་དད་པས་ཕུལ་བའི་དཀོར་ཟས་ཡིན་པས་མང་པོ་ཟོས་དྲག་ན་ཐར་པའི་སྲོག་རྩ་གཅོད་དེ། རྫེ་མི་ལས། དཀོར་གཉན་པོ་སྲོག་གི་སྤུ་གྲི་དེ། །མང་ཐལ་ན་ཐར་པའི་སྲོག་རྩ་གཅོད། །གསུངས། དེས་ན་དེའི་དོན་དུ་དམིགས་ནས་དགེ་སྦྱོར་རྣམ་དག་བྱེད་པ་གཅེས། འོ་ན་ཁྱིམ་པ་ཕོ་མོའི་ནང་ན་རྩམ་པ་སོགས་ཟས་ཟོས་ནས་ལུས་ཀྱིས་ཕྱག་བསྐོར་ངག་གིས་ཁ་ཏོན་སོགས་དགེ་བ་སྒྲུབ་པ་དང་། གཞན་བླ་མ་དཀོན་མཆོག་གི་ཕྱོགས་སུ་གཏོང་བ་དང་དབུལ་པོར་སྦྱིན་པ་བྱེད་པ་ནི་ཉུང་བར་གདའ། ཞིང་བཏབ་ནས་རང་གི་ཁ་ལ་ཟ་བའི་ཁྱིམ་པ་རྣམས་ཤི་ན་ངན་སོང་ཞིག་མ་གཏོགས་ཡར་འོང་མཁན་མེད་

ཚོད་ནི་འདུག་ཟེར་ན། རང་གི་ཞིང་བཏབ་ནས་རང་ཟས་ཟོས་སྡིག་པ་ཞིག་མེད་ཚོ་ཟེར་ཏེ། འདི་ལྟར་སྡིག་པ་ཡོད་ཚུལ་ཤེས་ནས་ཆོས་ཕྱོགས་རེ་ཕྱེད་བཏང་ནས་དགེ་སྡིག་མགོ་མཉམ་པ་རེ་བྱེད་མ་ཐུབ་ན། བརྒྱགས་ཚད་ཟོས་ནས་བ་གླང་ལྟར་ཉལ་ནས་སྡོད་མཁན་གྱི་ཁྱིམ་པ་ཕོ་མོ་རྣམས་ཤི་ན་ཡར་ཡོང་ཞིག་གང་ནས་ཡོང་། འོན་ཟས་ཀྱིས་མི་རྣམས་ཀྱི་ལུས་སྲོག་འཛིན་པར་འགྱུར། སྲོག་བརྟན་ན་ཆོས་འཇིག་རྟེན་གྱི་བྱ་བ་གང་ཡང་འོང་། འདི་བསྟེན་པར་རིགས་ཟེར་ན། ཚེ་འདིའི་སྲོག་འཛིན་རུང་ཆོས་རེ་བཅའ་མ་ནུས་ན། སྲོག་འཛིན་ཐབས་ཟས་འདིའི་ཆེད་དུ་སྡིག་པ་མང་པོ་བྱས་ན། ཚེ་ཕྱི་མར་སྲོག་འཛིན་དུ་མི་འགྲོ། སྲོག་གཅོད་དུ་གྱུར་ནས་སྲོག་ལན་བྱེ་བ་ཐེར་འབུམ་མང་པོ་འཇལ་དགོས། དཔེར་ན་ཕྱི་རྩིས་ཕོག་པའི་མི་གཅིག་གིས་ཉིན་ཞག་གཅིག་བརྒྱག་པའི་ཟས་བྱུང་ཡང་། དེའི་དབང་གིས་ཕྱིས་ཞག་པོ་སུམ་བརྒྱ་དྲུག་ཅུ་ཙམ་ལ་མུག་སྡུག་མྱང་དགོས་པ་ཤེས་ན། ཉིན་གཅིག་ལ་སྡུག་བསྲན་བྱེད་པ་ལྟར་བློ་གྲོས་ཅན་གྱི་ཆོས་པས་ཚེ་འདིའི་ཡུད་ཙམ་གྱི་སྲོག་འཛིན་པ་ལ་ཡོན་ཏན་དུ་མི་འཛིན་པར་སྐྱེ་བ་ཕྱི་མར་སྡུག་བསྔལ་མྱོང་ཚུལ་བསམས་

ནས། ཏིང་འཛིན་གྱི་ཟས་དང་། བཅུད་ལེན་དཀའ་སྤྱད་སྡུག་སྒུར་བྱེད་པར་རིགས། སྲོག་བཟུང་བ་ཙམ་ཡོན་ཏན་མིན། སྲོག་བཟུང་ནས་ཆོས་རེ་བཅའ་མ་ནུས་པར་སྡིག་པ་རྐྱང་བྱས་ན་སྲོག་བཟུང་བ་བས་ཤི་བ་དྲག་ཚེ་ཚད་ལ་བབས་ན་ཟས་ཀྱིས་སྲོག་མི་འཛིན་པར་མ་ཟད་གནོད་ནས་སྲོག་གཅོད་དུ་འགྱུར་བ་མང་། ཟས་ཉེས་དམིགས་ཡོད་ཚུལ་མདོ་རྒྱུད་བསྟན་བཅོས་ནས་གསུངས་པ་བསམ་ན། ཆོས་ཞིག་མ་ནུས་ན། ཟས་རང་གར་ཟ་བ་ལས་ལྟོགས་གྲིར་འཆིར་འཇུག་དགོས་པའི་ཚོད་ཡིན། འཆི་རུ་འཇུག་སུས་ནུས། འཆི་རུ་འཇུག་པ་ཕར་ཞོག །ཉིན་གཅིག་ལ་ལྟོ་མེད་ན་ཡང་སྡོད་མི་ནུས་པར་སྲོག་གཅོད་རྐུ་འཕྲོག་སོགས་ལས་ངན་པ་བསགས་ནས། ཕྱི་མར་ངན་སོང་གསུམ་དུ་འགྲོ་བ་མང་། ད་བློ་ལྡན་རྣམས་ཀྱིས་ཟས་འདི་ཡང་བདེ་བའི་རྒྱུ་རུ་མ་བསམ་པར་སྡུག་བསྔལ་བསྐྱེད་པའི་རྒྱུ་འབའ་ཞིག་དུ་འདུག་སྙམ་དུ་བསམ་པ་གལ་ཆེ། དེ་ལྟར་ཤེས་ན་ཟས་མང་པོ་བྱུང་ན་དགའ་བ་དང་། མ་བྱུང་ན་སྡུག་བསྔལ། བཟང་པོ་ལ་འདོད་སྲེད། ངན་པ་ལ་ཞེན་ལོག་མི་སྐྱེ་བར། ཟས་བཟང་ངན་གང་ཡིན་

རུང་སྲོག་འཚོ་ཙམ་གྱིས་ཆོག་པར་འདུག་སྙམ། འདོད་ཆུང་ཆོག་ཤེས་དུས་རྒྱུན་དུ་འབྱུང་། དེ་བྱུང་ན་ཟས་ངན་པ་འདིའི་སྟེང་ནས་འཐབ་རྩོད་དམག་འཁྲུག་སོགས་ལས་ངན་པ་མི་གསོག །མ་བསགས་ན། ངན་སོང་གསུམ་དུ་མི་སྐྱེ་བ་སོགས་ཕན་པའི་དགོས་པ་དུ་མ་འབྱུང་། དེས་ན་ཁྱིམ་པ་ཕོ་མོ་རྣམས་ཀྱིས་ཀྱང་ཟས་ལ་འདོད་ཆུང་ཆོག་ཤེས་བསྟེན་ནས་ཆོས་ཕྱོགས་རེ་གཏོང་ཨེ་ཐུབ་བལྟ་དགོས། བླ་མ་དགེ་བཤེས་དགེ་སློང་བན་དེ་བྱ་བཏང་སྒོམ་ཆེན་པ་སོགས་ཆོས་མཛད་སྐྱེ་བོ་ཕོ་མོ་རྣམས་ཀྱིས་དུས་ངན་ལ་ཟས་འདི་མ་གཏོགས་ལུས་འཚོ་བའི་ཟས་གཞན་ཟ་རྒྱུ་མ་མཆིས་པས། སྲོག་འཚོ་བའི་ཐབས་སུ་སྡིག་ཟས་འདི་བསྟེན་དགོས་པ་བྱུང་ཡང་། མགོ་མིན་ཚད་གསུས་པ་བྱས་ཅི་ཡོག་ཟ་བ་འདི་ཟས་ཀྱི་ཉེས་དམིགས་མ་ཤེས་པའི་རང་མཚང་དུ་གོ་ནས། དཔེར་ན་ནད་ལ་ཕན་ཕྱིར་སྨན་བསྟེན་པ་དང་། རྨ་ལ་ཕན་པའི་ཕྱིར་ཁྱི་ཚིལ་གླན་བ་ལྟར། ལུས་སྲོག་བཟུང་ནས་ཆོས་འོང་བའི་ཐབས་སུ་ཟས་ཡོད་རུང་ཚོད་རིག་པར་བྱས། འགྲང་ལྟོག་རན་པར་བྱ་དགོས། ངེས་པར་སྙིང་ནས་ལྷ་ཆོས་རྣམ་དག་བྱེད་པའི་མིས། འཇིག་རྟེན་

འདིའི་ཞིང་ལས་སོགས་ཟས་ཀྱི་རྩོལ་བ་ཐམས་ཅད་སྤངས་ནས་ཚེ་ཕྱི་མའི་རྒྱགས་ཕྱེ་དམ་པའི་ཆོས་ཀྱི་སོ་ནམས་འདི་ལྟར་བྱ་དགོས་ཏེ། ༈ རྗེ་བཙུན་མི་ལ་རས་པས། གཞི་མཉམ་པ་ཉིད་ཀྱི་ཞིང་ས་ལ། །ལམ་དད་པ་བརྟན་པོས་ཆུ་ལུད་སྦྱར། །སེམས་དཀར་པོ་དྲི་མེད་ཀྱི་ས་བོན་བཏབ། །གསོལ་འདེབས་དྲག་པོའི་གཡུ་འབྲུག་ལྡིར། །བྱིན་རླབས་རྩོལ་མེད་ཀྱི་ཆར་པ་བབས། །སེམས་ཡིད་གཉིས་མེད་པའི་རྨོན་དོར་ལ། །ཐབས་ཤེས་རབ་གཉིས་ཀྱི་རྨོས་གཤོལ་བཏགས། །འཁྲུལ་རྟོགས་མེད་པའི་སྐྱེས་བུ་ཡིས། །ཡེངས་པ་མེད་པའི་ཐོང་ཞིག་འཛིན། །བརྩོན་འགྲུས་དྲག་པོའི་ལྕག་གིས་འབྲབ། །ཉོན་མོངས་དུག་ལྔའི་ཐ་བ་སློག །རང་རྒྱུད་ངན་པའི་རྡོ་བ་སོལ། །གཡོ་ཟོལ་མེད་པའི་ཡུར་མ་བྱེད། །ལས་འབྲས་བདེན་པའི་སྙེ་མ་ལ། །རྣམ་ཐར་བཟང་པོའི་བཙས་མ་རྔ། །གདམས་ངག་བཟང་པོའི་འབྲས་བུ་ཡིས། །གཏད་སོ་མེད་པའི་བང་བ་འགེངས། །མཁའ་འགྲོའི་རྔོད་འཐག་ཟས་ཀྱི་མཆོག །བདག་རྣལ་འབྱོར་སྒྲུབ་པའི་འཚོ་བ་ཡིན། །ཞེས་གང་གསུངས་པ་

ལྟར་བྱའོ།། ༈ །།ཡང་སྦྲང་རྩི་དང་བུ་རམ་སོགས་ཟས་གཞན་རྣམས་ཀྱང་སྡིག་དང་འདྲེས་པའི་ཟས་ཡིན་པས་ཡོན་ཏན་དུ་མི་རློམ་པར་ཚོད་བཟུང་ན་བཟང་། སྦྲང་རྩི་འདི་སྦྲང་མས་ཕྱོགས་ཕྱོགས་ཀྱི་མེ་ཏོག་གི་བཅུད་བསྡུས་ནས་བྱུང་བ་ཡིན། མེ་ཏོག་མང་པོ་བསྐོར་ནས་ལེན་དུས་སྡུག་མང་པོ་མྱང་། ཤི་བ་ཡང་གྲངས་མང་། ཚུར་བསྡུས་པ་མི་ཡིས་བླངས་ཚེ་སེམས་སྡུག་བུང་བ་ཕལ་ཆེར་ཆུ་ལ་ལྕེབས། ཕལ་ཆེར་མུ་གེས་འཆི། བུང་ཕྲུག་རྣམས་སྦྲང་རྩི་དང་ལྷན་དུ་གཅུར་ནས་འོ་སྐོལ་རྣམས་ལ་བཙོང་དུ་ཁྱེར་ཡོད་པ་ཡིན་སྐད། དེ་བཞིན་བུ་རམ་ཡང་ལེན་དུས་བུར་ཤིང་དང་ས་ན་གནས་པའི་སྲིན་འབུ་མང་པོ་གསོད། དེ་བརྡུངས་ནས་བསྐོལ་དུས་ཀྱང་མི་རྣམས་ཀྱིས་དཀའ་ལས་མྱང་། དེ་བཞིན་ཤིང་ཐོག་སྔོ་ཚོད་སོགས་ལེན་དུས་ཀྱང་རྩི་ཤིང་ལ་གནས་པའི་སྲིན་བུ་གྲངས་མེད་གཅུར་ཡོང་། དེས་ན་འབྲུག་པ་ཀུན་ལེགས་ཀྱིས། སྦྲང་བུ་འདི་ཀུན་ཀྱང་སྦྲང་མ་འཆི་བ་དང་། སྦྲང་རྩིའི་སེམས་ཁྲལ་བསྐྱེད་པ། བུ་རམ་གྱི་ཚི་ཆེན་པོ་འདིའི་དཀྱིལ་དུ་སྦྲང་ཟིལ་ཅི་ཙམ་འཆི་ཤེས་ཤིང་བགྲང་བར་དཀའ། དེས་མཚོན་ཕྲ་མོ་ཀུན་ངོས་མ་ཟིན་

པ་ཡིན། གཡག་བསད་པ་དང་ས་གུ་ཙི་བསད་པ་གཉིས་ཀྱི་ཤའི་ལན་ཆགས་འཇལ་བ་དཀའ་སླ་མ་གཏོགས། སྲོག་གི་ལན་ཆགས་ལ་ཁྱད་མེད། ཤ་ལ་ཆེ་ཆུང་ཁྱད་ཡོད་མོད། སྲོག་ལ་ཆེ་ཆུང་ཁྱད་མེད་དམ་བསམས་གསུངས། གཞན་ཡང་ཐ་མ་ཁ་དང་། སྒོག་བཙོང་སོགས་ལ་ཡང་ཉེས་པ་མང་པོ་ཡོད་ཅེས་སྐྱེས་བུ་དམ་པ་དུ་མས་གསུངས། མདོར་ན་འདོད་ཡོན་ཤིག་ཙམ་རེ་རྩ་ན་སྡིག་སྡུག་གཏམ་ངན་རི་ཙམ་པ་རེ་ཡོད་པས་ན། གང་ལ་ཡང་ཚོད་འཛིན་དགོས། དུག་དང་འདྲེས་པའི་ཟས་ལྟར་མཐོང་ནས། འདོད་སྲེད་ཞེན་པ་གཏིང་ནས་ལྡོག་དགོས། ནད་ལ་ཕན་ཕྱིར་སྨན་བསྟེན་པ་ལྟར་སྲོག་འཚོ་ཙམ་མ་གཏོགས་མང་པོ་རྙེད་ཀྱང་མི་བསྟེན་པ་ཞིག་དགོས། སྔོན་གྱི་སྐྱེས་ཆེན་དམ་པ་ཐམས་ཅད་ཀྱིས་འདོད་ཡོན་ཚུར་མི་སྒྲུབ་པ་ཕར་ཞོག །རང་ལ་ཡོད་པ་རྣམས་ཀྱང་འཕོངས་ཕྱིས་པའི་རྡོ་ལྟར་བསྐྱུར་ནས། རི་ཁྲོད་དབེན་པར་སོང་ནས་བྲག་ཕུག་ཞྭ་ལྟར་བསྟེན། ན་བུན་གོས་ལྟར་གྱོན། དཀའ་སྤྱད་སྡུག་ཁུར་ཟས་ལྟར་བསྟེན་པ་ཡང་། ཁོང་རྣམས་ཀྱིས་མ་རྙེད་ནས་དེ་ལྟར་མཛད་དགོས་བྱུང་བ་

མིན། དེང་སང་འོ་སྐོལ་རྣམས་བུ་བཟང་དྲགས་རྙེད་ནས་བསྟེན་པ་མ་ཡིན། ཁོང་རྣམས་ཀྱིས་འདོད་ཡོན་བསྒྲུབ་རྒྱུ་ཡིན་ན་འོ་སྐོལ་རྣམས་ཀྱི་འདི་ལས་བརྒྱ་སྟོང་ཁྲི་འགྱུར་གྱི་འདོད་ཡོན་རྙེད། ལྷའི་བདུད་རྩི་རོ་བརྒྱའི་ཟས་ལ་ཡང་སྤྱོད་ནུས་ཏེ། འཁོར་བའི་ལོངས་སྤྱོད་འདི་རྣམས་ཀྱི་ནང་ན་སྡིག་དང་མ་འདྲེས་པའི་ཟས་ཤིག་དཀོན་པས། སྡིག་ཟས་མང་པོ་ཟོས་ན་སྡིག་སྒྲིབ་ཀྱིས་བཀབ་ནས། སྒོམ་སྒྲུབ་ཅི་ཙམ་བྱས་ཀྱང་ཉམས་རྟོགས་མི་སྐྱེ་བར་མ་ཟད་སྔར་སྐྱེས་ཡོད་པ་རྣམས་ཀྱང་འགྲིབ་འཇུག་གི་དོགས་ནས་དུག་ལྟར་སྤངས་ནས། སངས་རྒྱས་ཀྱིས་ཀྱང་རྒྱལ་སྲིད་མཆིལ་མའི་ཐལ་བ་བཞིན་སྤངས་ནས་ཆུ་བོ་ནེ་རཉྫ་ནའི་འགྲམ་དུ་ལོ་དྲུག་དཀའ་བ་སྤྱད་ནས་སངས་རྒྱས། དེ་བཞིན་དུ་རྗེ་བཙུན་མི་ལ་གྲུབ་ཐོབ་ཐར་པའི་རྒྱལ་མཚན་སོགས། སྔོན་བྱོན་སྐྱེས་བུ་དམ་པ་རྣམས་ཀྱིས་དབེན་པར་དཀའ་སྤྱད་བྱས་ནས་སྒྲུབ་པ་མཛད་པས་གྲུབ་པ་ཐོབ་པ་ཡིན། དེང་སང་འོ་སྐོལ་སྒོམ་ཆེན་པའི་ཁུར་འཛིན་པ་ལོ་མང་པོར་རིལ་མཚམས་དང་འདག་འབྱར་བྱས་པ་རྣམས་ལ་ཡང་རྨེ་ཤ་མང་པོ་གསོག་པ་མ་གཏོགས་ཉམས་རྟོགས་རི་བོང་རྭ་ལྟར་གྱུར་པ་ཡང་

བླ་མའི་གདམས་ངག་མ་ཟབ་པ་དང་། རང་གི་སྙིང་རུས་ཆུང་བ་སོགས་ཀྱིས་མ་ལན། གང་གིས་ལན་ན་སྡིག་ཟས་འདོད་ཡོན་ལོངས་སྤྱོད་དཀོར་ནག་གི་དུག་ཆུ་འདི་སྤོང་མ་ནུས་པར། འདི་ལ་རྔམས་ནས་བག་མེད་དུ་ལོངས་སྤྱད་པས་ལན་པ་ཡིན་པས་ཧ་དེ་གོ་ནས། ཡར་ཐར་པའི་གོ་འཕང་འཐོབ་ཕྱིར་ཆོས་གཤའ་མ་ཞིག་མཛད་འདོད་རྣམས་ཀྱིས་དུས་རྒྱུན་ཏུ་འདོད་ཆུང་ཆོག་ཤེས་ཞེན་ལོག་ངེས་འབྱུང་རྒྱུད་ལ་བསྟེན་ནས། དབེན་པར་བསྡད་ནས་ཉམས་ལེན་མཛད་དུས་སྲོག་མི་འཆད་པ་ཙམ་གྱི་ཟས་སྐོམ་གང་བྱུང་གང་རྙེད་ངན་ངོན་ཙམ་ལ་བརྟེན་ནས་དཀའ་སྤྱད་ཀྱི་སྒོ་ནས་དམ་པ་གོང་མའི་རྣམ་ཐར་དང་མཐུན་པར་སྒྲུབ་པ་བྱེད་པ་གཅེས། ལུས་རི་ལ་བཞག་ཀྱང་སེམས་གྲོང་དུ་བཏང་། དུས་རྟག་ཏུ་བཟའ་བཏུང་གཉིད་གསུམ་སེམས་ལ་བཅིངས་པ་འདི་དེང་སང་བདག་འདྲའི་བྱ་བཏང་བསྒོམ་ཆེན་པ་ཕལ་ཆེ་བ་ཞིག་གི་ཐུགས་དམ་གྱི་མཐིལ་དུ་སོང་འདུག་པས། ད་རང་ལེགས་སུ་འདོད་པ་རྣམས་ཀྱིས་དེ་ལྟར་དུ་མ་སོང་བ་ཞིག་ཅི་ནས་ཀྱང་གྱིས་ཞེས་ཐལ་མོ་སྦྱོར་རོ། །སྨྲས་པ། སངས་རྒྱས་ཀུན་

དངོས་རྩ་བའི་བླ་མ་ལ། །ཅི་གསུང་བཀའ་བཞིན་སྒྲུབ་པའི་མཆོད་པ་འབུལ། །དམ་གཙང་རྡོ་རྗེའི་མཆེད་ལྕམ་སློབ་མ་ལ། །སྐབས་འདིར་དབྱངས་སྙན་དམ་ཆོས་དགའ་སྟོན་འགྱེད། །ཆོས་ཀྱི་བར་ཆད་སྡུག་བསྔལ་སྐྱེད་པའི་རྒྱུ། །ཇ་མར་རྩམ་པ་སྦྲང་རྩི་བུ་རམ་དང་། །ཐ་མ་ཁ་དང་སྒོག་བཙོང་ལ་སོགས་པའི། །འདོད་ཡོན་ཉེས་དམིགས་བཤད་ན་བརྗོད་མི་ལངས། །མདོར་ན་འདོད་ཡོན་ཤིག་ཙམ་རྩ་ན་ཡང་། །སྡུག་བསྔལ་ཕུང་པོ་རི་ཙམ་ཡོད་པར་གསུངས། །དཔེར་ན་དུག་དང་འདྲེས་པའི་ཟས་ལྟར་དུ། །མཐོང་ནས་མངོན་ཞེན་སྤུ་ཙམ་མེད་པ་དགོས། །འཇིག་རྟེན་འདི་ཡི་ཟས་ནོས་ལོངས་སྤྱོད་ཀྱི། །ནང་ན་སྡིག་དང་མ་འདྲེས་ཟས་ཞིག་དཀོན། །སྡིག་ཟས་མང་པོ་ཟོས་ན་སྡིག་སྒྲིབ་ཀྱིས། །བསྒྲིབས་ནས་ཉམས་རྟོགས་ཡོན་ཏན་སྐྱེ་མི་འགྱུར། །དེ་ཕྱིར་ཚེ་འདིའི་བྱ་བ་བློ་ཡིས་ཐོངས། །སྔོན་བྱོན་དམ་པ་གོང་མའི་རྣམ་ཐར་བཞིན། །དཀའ་སྤྱད་སྙིང་རུས་སྒོ་ནས་རི་ཁྲོད་དུ། །ཚེ་དང་སྒྲུབ་པ་སྙོམས་པ་ཤིན་ཏུ་གཅེས། །དེང་སང་འཚོ་བ་མེད་པའི་སྐྱིད་འདོད་མཁན། །འགའ་རེ་རི་ལ་བསྡད་ཀྱང་གྲོང་ཡུལ་དྲན། །སྦྱིན་བདག་

འགའ་རེས་ཟས་ནོར་སྟེར་དུ་རེ། །མ་བྱུང་གནས་སྐོར་བྱེད་ཟེར་འགྲོ་བ་མཐོང་། །ཁྱི་ཡིས་ལྷ་ཁང་ཡང་ཡང་བསྐོར་བ་དེ། །དད་པ་མ་ཡིན་ཞལ་ཟས་རྐུ་ཕྱིར་ལགས། །དེ་བཞིན་ལྟོ་གོས་མ་རྙེད་གནས་ཆེན་ཚོ། །འགྲིམས་པའི་ཧ་ཡང་གོ་ཚེ་གད་མོ་འཆོར། །དེ་ཕྱིར་ཇ་མར་ཤ་ཐུད་ཡིད་ལ་དྲན། །དོན་མེད་གནས་བསྐོར་གྲོང་ཡུལ་མ་འགྲིམ་ཞེས། །བདག་དང་བདག་འདྲའི་བྱ་བཏང་སྒོམ་ཆེན་ལ། །སྙིང་གཏམ་ཞུས་པ་ལགས་པས་ཐུགས་ལ་ཟུངས། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། ༈ །།ཡང་ཤ་འདི་སྡིག་ཟས་ངོ་ཐོག་ཡིན་ཏེ། ར་ལུག་ཕག་དང་གཡག་སོགས་གསོད་ཉེས་གདུག་པ་ཅན་གྱི་སྒོ་ནས། རང་ངམ་གཞན་གྱིས་བསད་ནས་ཤ་ཁྲག་དམར་པོ་ཟ་བ་འདི་ཚེ་འདིའི་ཕ་མ་གཉིས་ཀྱི་ཤ་ཟོས་པ་དང་དོན་དུ་ཁྱད་པར་སྤུ་ཙམ་ཡང་མེད། དེ་ཡི་རྒྱུ་མཚན་གང་ཡིན་ཞེ་ན། རང་རེ་རྣམས་ཀྱི་ཚེ་འཁོར་བ་ཐོག་མ་མེད་པས། སེམས་ཅན་ཐམས་ཅད་ཕ་མར་མ་གྱུར་པ་གཅིག་ཀྱང་མེད། ཚེ་རབས་སྔོན་མའི་མ་དང་ཚེ་འདིའི་མ་གཉིས་མ་ཡིན་པ་དང་དྲིན་གྱིས་བསྐྱངས་པ་ལ་ཡང་

ཁྱད་པར་མེད། ལྷག་པར་ཚེ་རབས་སྔོན་མ་རྣམས་སུ་རང་གི་ཕ་མ་བྱས་པའི་སེམས་ཅན་རྣམས་ཀྱིས་ཚེ་འདིའི་ཕ་མ་གཉིས་ཀྱི་དྲིན་གྱིས་བསྐྱངས་པ་ལས་ཀྱང་བརྒྱ་སྟོང་འགྱུར་གྱི་ཕན་ཚད་མེད་པ་བཏགས་པ་དང་། གནོད་པ་ཚད་མེད་པ་ལས་བསྐྱབས་པ་མང་། རང་གི་ལྟོ་རྒྱབ་གཉིས་ཀྱི་ཕྱིར་ཚེ་སྔོན་ཕ་མ་དེ་རྣམས་ཀྱི་ལུས་སྲོག་ཀྱང་ཕངས་པ་མེད་པར་བཏང་བ་ཡོད་ཅེས་ཐམས་ཅད་མཁྱེན་པ་སངས་རྒྱས་རྣམས་ཀྱིས་གསུངས། དེ་མི་བདེན་སུ་ཞིག་སྨྲས། སངས་རྒྱས་ཀྱི་གསུང་དེ་བདེན་པར་བརྩི་ན། ད་ལྟ་ཕ་མ་སེམས་ཅན་དེ་རྣམས་ཀྱི་དྲིན་ལན་དུ་ཕན་ཞིག་མི་འདོགས་རུང་། སྲོག་བཅད་ནས་ཤ་ཟོས་ཁྲག་འཐུང་བ་འདི་སྙིང་རྗེ་མེད་པའི་སྲིན་པོའི་སྤྱོད་པ་མ་ནོར་བ་དངོས་ཡིན་ཏེ། དེ་མིན་ན་སྙིང་རྗེ་ཞིག་ཅི་ལ་མི་སྐྱེ། ཕ་མ་ར་ལུག་རྣམས་སྡིག་ཅན་ཤན་པའི་ལག་ཏུ་སྤྲད་ནས་གསོད་ཚེ། དངངས་ཤིང་སྐྲག །འཐེན་སྐོར་མང་པོ་བྱས། སྐད་ཆེན་པོས་འབའ། མིག་མཐའ་ལ་ཆུ་འཁྱིལ་སུག་བཞི་འདར་ཤན་པའི་གདོང་ལ་མིག་ཧྲིག་ཧྲིག་ལྟ། ལུག་འགའ་རེའི་མིག་ནས་མཆི་མ་ཁྲིལ་ལེར་གཏོང་། བྱང་ཆུབ་སེམས་དཔའ་ཡོད་ན་སྙིང་རྗེ་རྒྱུ་

དེའི་དུས་ཡོད་མོད། ཤན་པ་ལག་དམར་གྱིས་དམེ་ལག་གིས་གོན་པའི་ཁ་གྱེན་དུ་བརྫེས། གྲི་རྣོན་པོ་བརྡར་ལ་ངོ་བླངས་གཉའ་བར་མྱངས་ནས། མགོ་བོ་རྦད་ཀྱིས་གཅོད་ཚེ་བཟོད་གླགས་མེད་པའི་སྡུག་བསྔལ་མྱང་། ཇ་ཐེབས་རེ་ལ་ཡན་ལག་གཡབ། ལུས་པོ་ཤིག་ཤིག་ཡོམ་ཡོམ་འགུལ། འོ་སྐོལ་རྣམས་ཀྱིས་མགོ་གཅོད་མི་དགོས་རང་གི་ཤ་སེན་མོ་གཉིས་ཀྱི་བར་དུ་ཚིར་དང་། དེ་ཙམ་གྱི་སྡུག་བསྔལ་མི་བཟོད་ན་ཕ་མ་ར་ལུག་རྣམས་ཀྱིས་དེ་བས་བརྒྱ་སྟོང་འགྱུར་གྱི་སྡུག་བསྔལ་མྱངས་ནས་ཤི་བ་ཡིན་པས། དེ་ལྟར་རང་ལུས་ལ་དཔེ་བླངས་བསམ་མནོ་ཞིབ་ཏུ་བཏང་ན། བྱང་ཆུབ་སེམས་དཔའ་ཞིག་ཡིན་ན་སྙིང་རླུང་ལྡངས་ན། འོ་སྐོལ་རྣམས་ལ་སྙིང་རྗེ་ཞིག་མི་སྐྱེ་རུང་། འདོད་སྲེད་ཅིག་སྐྱེས་ནས་ཟ་བ་སྲིན་པོ་མ་གཏོགས་གཞན་སུ་ཞིག་ཡོད། ཆོས་རྗེ་འབྲུག་པ་ཀུན་ལེགས་ཀྱིས། སྤྱིར་གྱི་ཐེག་པ་ཆེ་ལ་ཤ་རྣམས་བཀག་གསུངས་པ་ཡོད། དེའི་དོན་སྙིང་རྗེ་ལ་གནོད། ཤའི་བྲོ་བ་ཚོར་བ་དེས། སྲོག་ལ་གནོད་དོགས་པ་དང་། བློ་ལད་དོགས། ཁྱད་པར་སེམས་ཅན་ཐམས་ཅད་ཕ་མ་ཡིན་པར་མདོ་རྒྱུད་

ཀུན་ནས་གསུངས་ཤིང་། རང་གིས་ཀྱང་མྱོང་བས་གྲུབ་པར་སེམས་ཅན་ལ་ཐོག་མར་འདི་ནས་བྱུང་མེད་པས་ཕ་མ་ཡིན་པར་ཡིད་ཆེས། ཕ་བྱས་པའི་རུས་པའི་ཕུང་པོ་དང་། མ་བྱས་པའི་ནུ་ཞོ་རྒྱ་མཚོར་བསྐྱིལ་ན། ཁམས་གསུམ་སྣོད་དུ་ག་ལ་ཤོང་། དེས་ན་བསམ་མནོ་བཏང་ན་ཕ་མའི་ཤ་འམ་བུའི་ཤ་སུས་ཟ་ནུས། ཉན་ཐོས་རྣམས་ཁ་ཤ་ཟ་བར་འདོད་པ་དང་། རང་ལ་ཉེས་པར་འགྱུར་པས་དམིགས་ཤ་མ་བྱུང་ན། དེས་ཆོག་པར་བརྩིས་ནས། ཉན་ཐོས་རྣམ་གསུམ་དག་པའི་ཤ། །ཟ་བར་རུང་གིས་མི་ཟ་ན། །ལྷས་སྦྱིན་གྱིས་ནི་བརྟུལ་ཞུགས་འགྱུར། །གསུངས་པ་ལ་འཁྲིས་ནས་ཤ་བཞེས་ཀྱིན་འདུག་སྟེ། འདི་ལའང་མཚུངས་པ་ཞིག་ཞུ་ན། སྟུ་ཤར་པོ་གསུམ་འཁོར་བ་ཞིག་ལ་བྱས་ཨེ་ཆོག་མི་ཆོག་ན། ཚོང་འདུས་གསུམ་དུ་མ་བྲིན་པའི་ཤ་ཡང་ཟོས་མི་ཆོག །དོན་ལ་མི་བསམ་པར་ཚིག་ལ་འཁྲིས་པ་འདིས་ཕུག་སྐྱོན་གཅིག་ནི་རང་ལ་འོང་གསུངས། མཉམ་མེད་པོ་ཏོ་བས་མ་མགྲོན་དུ་བོས་པའི་མདུན་དུ་བུའི་ཤ་བཙོས་ནས་དྲངས་ན་དགའ་བར་འགྱུར་རམ་མི་འགྱུར། དེ་བཞིན་དུ་སངས་རྒྱས་མཆོད་པ་ལ་སྲོག་བཅད་པས་

མཆོད་པའང་དེ་དང་མཚུངས་གསུངས། མདོ་དྲན་པ་ཉེར་བཞག་ལས། ཤ་ཆང་གཉིས་རང་གིས་ལོངས་སྤྱོད་པ་ལྟ་ཅི་སྨོས། སྦྱིན་པར་བྱིན་ཀྱང་དམྱལ་བ་ངུ་འབོད་དུ་སྐྱེ་གསུངས། ཤ་ཟ་བ་པོ་དང་གསོད་པ་པོ་གཉིས་ཀྱིས་ཟ་བ་པོ་ལ་ཉེས་བ་ཆེན་པོ་འབྱུང་སྟེ། ཆོས་རྗེ་འབྲུག་པ་ཀུན་ལེགས་ཀྱིས། ཁ་ཟས་ཀྱང་ཟ་བ་པོ་དང་གསོད་མཁན་གཉིས། ཟ་མཁན་ཉེས་པ་ཆེ་བར་དུས་ཀྱི་འཁོར་ལོ་ནས་གསུངས་ཏེ། ཟ་བ་པོ་མེད་ན་གསོད་པ་པོ་མི་འབྱུང་ཟེར་བ་འདུག་གསུངས་པས། འགའ་རེས་འོ་ན་བྲེ་ལོག་སྲང་ལོག་འཆོས་མཁན་དང་ཚོང་པ་གཉིས་ནང་སྡིག་པ་ཚོང་པ་ཆེ་པར་འདུག་ཞུས་པས། དེ་ལོས་ཆེ། སྲང་དེ་ལ་སྟེར་མཁན་དང་། བྲེ་དེ་ལ་འཇལ་མཁན་མེད་ན་བྲེ་ལོག་སྲང་ལོག་འཆོས་པས་དོན་ག་ལ་ཡོད། ཁེ་དེ་མཐོང་བས་བླ་དེ་བཙོང་བ་ཡིན་གསུངས། གསུང་དེ་ལ་དཔག་ན་གཞན་ཇ་མར་རྩམ་པ་སོགས་ཟས་གང་ཡིན་ཡང་འབུལ་མཁན་ལས་ཀྱང་། ཟ་མཁན་ཉེས་པ་ཆེ་བ་གོ་སླ་བས་འདོད་ཡོན་དཀོར་ལ་རྔམས་པ་རྣམས་ཀྱིས་སོར་བཞི་ཐུགས་ཀར་ཁྲོམ་ལ་བསམ་མནོ་ཐོངས། གཞན་ཡང་ཤ་ཡི་

ཉེས་དམིགས་མདོ་རྒྱུད་བསྟན་བཅོས་ན་མཐའ་ཡས་པ་གསུངས་པ་རྣམས་ཀྱི་དོན་བསྡུ་ན། ཤ་ཟོས་པའི་རྣམ་སྨིན་གྱིས་དམྱལ་བ་ཡི་དྭགས་དུད་འགྲོ་གསུམ་མམ་གང་རུང་དུ་སྐྱེ། ཚ་གྲང་བཀྲེས་སྐོམ་བཀོལ་སྤྱོད་ཀྱི་སྡུག་བསྔལ་མྱོང་། མཐོ་རིས་སུ་སྐྱེས་ཀྱང་ཚེ་ཐུང་ནད་མང་། རིགས་ངན་རྨེ་ཤ་ཅན་དང་བཙོ་བླག་མཁན་སོགས་སུ་སྐྱེས་ནས་སྡུག་བསྔལ་དུ་མ་མྱོང་བར་གསུངས། གཞན་ཡང་ཤ་འདིའི་ཕྱིར་དུ་ཚེ་འདིར་ཡང་མི་ནོར་ཟས་གསུམ་ཟད་ནས་སྤྲང་པོར་འགྱུར་བ་དང་། ཐོས་བསམ་སྒོམ་གསུམ་ཤོར་ནས་གྲོང་ཁྱིམ་འགྲིམ་པ་མང་། ཤ་འཆོས་ཐིག་ལེ་རྒྱས་ཚེ་དགོན་པ་ཕལ་ཆེར་གྱི་གྲྭ་པས་བཙུན་ཆུང་སོགས་ལ་བརྟེན་ནས་ལྷག་མ་བཅུ་གསུམ་གྱི་དང་པོ་ཕོག་ནས་ཚུལ་ཁྲིམས་ཤོར། ཕྱག་རྫོགས་པའི་ཆོས་པ་ཕལ་ཆེར་གྱིས་བཙུན་མ་དང་སྐྱེ་དམན་བསྟེན་ནས་སྒོམ་སྒྲུབ་ཤོར་བ་མང་། འགའ་རེས་ཤ་འཆོས་ནས་ཚོ་བསོགས་ལུས་ལས་སུ་མི་རུང་དྲང་པོར་བསྲང་ཀྱང་འཁྱོགས་པོར་འགྲོ་ཡར་ལངས་ན་སྡོད་མི་ཚུགས་ཉལ་སྡོད་དགོས། དུས་རྒྱུན་ཏུ་དབོག་རྒྱུ་མེད་བའི་ཁུར་པོ་ལྕི་མོ་ཞིག་ཁུར་ཡོད་པ་ལྟར་འགྲོ་འདུག་འགུལ་སྐྱོད་མི་ནུས།

སོང་ན་ལ་མི་ཆོད་དབུགས་འཚེངས་འཆི་ལ་ཁད་བྱེད། མི་ལ་བཤད་ཚུལ་མེད་པའི་སྡུག་བསྔལ་ལ་དེ་ཆེ། ཤ་ཟོས་ན་བྱིང་རྨུགས་གཉིད་གསུམ་འཕེལ། རིག་པ་མི་གསལ་ཉིན་པར་གཉིད་ན་ཚད་པ་སོགས་ནད་དྲག་པོ་སྟེང་དུ་འབྱུང་། ཧ་ཅང་ཟོས་ཆེ་ན་ཕོ་བ་ངན་པ་ན་གཟེར་ལངས། མར་འགྲིམས་སྐབས་འགའ་རེ་མ་ཞུ་ཕོ་བར་བསྡད་མགོ་ན་ཟུག་གཟེར་ལྡང་། སྨན་པས་སྨན་སྦྱིན་པ་འཐུང་རུང་མི་འཚོ་བར་ཤ་དུག་གིས་ཤི་བ་མང་། ཤ་ཁྲག་ལ་ལོངས་སྤྱོད་པའི་ས་ཕྱོགས་སུ་དཀར་ཕྱོགས་ཀྱི་ལྷ་མི་འདུ། ནག་ཕྱོགས་ཤ་ཁྲག་ལ་དགའ་བ་འདུ། མི་རྣམས་ལ་ནད་དང་། ཕྱུགས་ལ་གོད་ཁ་གཏོང་། ཤ་ཁྲོམ་གར་ཡོད་སར་ཚད་པ་ཁྲག་འགྲིམས་སོགས་ནད་རིམས་ཀྱང་མི་གཅིག་པ་མང་པོ་འབྱུང་། མི་ཕྱུགས་མང་པོ་དུས་མིན་དུ་འཆི། ཤ་འདི་ཕ་མ་སེམས་ཅན་དྲིན་ཅན་རྣམས་ཀྱི་ཤ་ཁྲག་ཡིན་པས། མང་པོ་ཟོས་ན་སྡིག་སྒྲིབ་ཀྱིས་ཆོས་པ་རྣམས་ཀྱིས་ལམ་རིམ་བློ་སྦྱོང་ཕྱག་རྫོགས་སོགས་བསྒོམས་ཀྱང་རྒྱུད་ལ་བྱམས་སྙིང་རྗེ་བྱམས་སེམས་ལྟ་བ་སོགས་ཀྱི་ཉམས་རྟོགས་ཁྱད་པར་ཅན་མི་སྐྱེ། སྔར་སྐྱེས་པ་ཡང་

འགྲིབ། ཤ་འདིས་ཆགས་སྡང་སོགས་ཉོན་མོངས་པ་ཀུན་སློང་། སྲོག་གཅོད་མ་བྱིན་ལེན་སོགས་མི་དགེ་བ་བཅུ་ཡང་བྱེད་དུ་འཇུག །མི་དགེ་བའི་དབང་གིས་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་བསམ་གྱིས་མི་ཁྱབ་པར་མྱོང་དགོས། མདོར་ན་ཁ་ཤ་ལ་དགའ་ན་ཚེ་འདི་ཕྱི་གང་དུ་བདེ་སྐྱིད་སྙན་གསུམ་གང་ཡང་མི་འོང་། སྡིག་སྡུག་གཏམ་ངན་གསུམ་དུས་རྒྱུན་དུ་འོང་བས། དེས་ན་སྐལ་བཟང་གཏན་གྱི་བདེ་བ་འདོད་པ་རྣམས་ཡུད་ཙམ་གྱི་བདེ་བ་ལ་མ་ཞེན་པར་སྡིག་ཟས་ཕ་མའི་ཤ་ཁྲག་དུག་ལྟར་སྤང་དགོས་ཏེ། ལང་ཀར་གཤེགས་པའི་མདོ་ལས། གང་གིས་ཐུབ་པའི་ཚིག་འདས་ཏེ། །བསམ་པ་ངན་པས་ཤ་ཟ་ན། །འཇིག་རྟེན་གཉིས་ནི་བཤིག་པའི་ཕྱིར། །ཤཱཀྱའི་བསྟན་ལ་བརྟུལ་ཞུགས་ཉམས། །ཤིན་ཏུ་མི་བཟད་དམྱལ་བར་ཡང་། །སྡིག་པའི་ལས་ཅན་དེ་དག་འདོད། །མ་རུངས་ངུ་འབོད་ལ་སོགས་སུ། །ཤ་ཟ་དེ་དག་བཙོ་བར་འགྱུར། །རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང་། །མ་བསྐུལ་བ་ཡང་ཡོངས་མེད་པས། །དེ་བས་ཤ་ནི་མི་ཟའོ། །རྣལ་འབྱོར་ཅན་གྱིས་

ཤ་མི་ཟ། །ང་དང་སངས་རྒྱས་དག་གིས་བཤད། །སེམས་ཅན་གཅིག་ལ་གཅིག་ཟ་བ། །ཤ་ཟན་དག་གི་རིགས་སུ་སྐྱེ། །དྲི་མི་ཞིམ་ཞིང་སྨད་པ་དང་། །སྨྱོན་པ་རྣམས་སུ་སྐྱེ་བར་འགྱུར། །གདོལ་བ་རྨེ་ཤ་ཅན་རིགས་དང་། །བཙོ་བླག་མཁན་དུ་ཡང་ཡང་སྐྱེ། །མཁའ་འགྲོའི་རིགས་ཀྱི་སྐྱེ་གནས་དང་། །ཤ་ཟའི་རིགས་སུ་སྐྱེ་བར་འགྱུར། །མི་ཡི་ཐ་མ་དེ་དག་ནི། །སྲིན་དང་བྱི་ལ་རིགས་སུ་སྐྱེ། །གླང་པོའི་རྩལ་དང་སྤྲིན་ཆེན་དང་། །མྱ་ངན་འདས་དང་སོར་འཕྲེང་དང་། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་ཡང་རྣམ་པར་སྨད། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རྣམས་ཀྱིས་སྨད་པ་ལ། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཤ་ལ་སོགས་པ་སྤང་པའི་ཕྱིར། །བྲམ་ཟེའི་རིགས་དང་རྣལ་འབྱོར་ཅན། །ཤེས་རབ་ཅན་དང་ནོར་ལྡན་པར། །དེ་དག་རྣམས་སུ་སྐྱེ་བར་འགྱུར། །མཐོང་དང་ཐོས་དང་དོགས་པ་ཡིས། །ཤ་རྣམས་ཐམས་ཅད་རྣམ་པར་སྨད། །ཤ་ཟན་རིགས་སུ་སྐྱེ་བ་ཡི། །རྟོག་གེ་བ་རྣམས་མི་ཤེས་སོ། །ཇི་ལྟར་འདོད་

ཆགས་ཐར་པ་ལ། །བར་ཆད་བྱེད་པར་འགྱུར་བ་བཞིན། །དེ་ལྟར་ཤ་དང་ཆང་ལ་སོགས། །བར་ཆད་བྱེད་པར་འགྱུར་བའོ། །མ་འོངས་པ་ཡི་དུས་ན་ནི། །ཤ་ཟ་གཏི་མུག་སྨྲ་བ་དག །ཤ་ནི་སྡིག་མེད་རུང་ངོ་ཞེས། །སངས་རྒྱས་རྣམས་ཀྱིས་བཤད་ཅེས་ཟེར། །ཟས་ལ་སྨན་དང་འདྲ་བ་དང་། །བུ་ཡི་ཤ་དང་མཚུངས་པར་ཡང་། །རན་པར་དང་ནི་མི་འཕྲོད་པར། །རྣལ་འབྱོར་ཅན་གྱིས་ཟས་ལ་སྤྱོད། །སེང་གེ་དག་དང་སྟག་རྣམས་དང་། །ཝ་ལ་སོགས་དང་འགྲོགས་འགྱུར་བས། །ངས་ནི་བྱམས་པས་གནས་པ་ལ། །རྟག་ཏུ་རྣམ་པ་ཀུན་ཏུ་སྨད། །ཐར་པའི་ཆོས་དང་འགལ་བའི་ཕྱིར། །མི་རྣམས་དངངས་པར་འགྱུར་པའི་ཤ། །དེ་ཕྱིར་བཟའ་བར་མི་བྱ་སྟེ། །འདི་ནི་འཕགས་པའི་རྒྱལ་མཚན་ནོ། །ཞེས་པ་ལ་སོགས་པའི་ཤའི་ཉེས་དམིགས་རྒྱ་ཆེར་གསུངས། གཞན་ཡང་མྱ་ངན་ལས་འདས་པའི་མདོ་ལས། འོད་སྲུང་ངས་ནི་དེང་ཕན་ཆད་ཉེ་གནས་སུ་གྱུར་པ་རྣམས་ཀྱིས་ཤ་ཐམས་ཅད་བཟར་མི་རུང་ངོ་གསུངས། གལ་ཏེ་ཟས་ཀྱི་ནང་ན་ཤ་སྣང་ན་མ་ཟ་ཞིག །ཟོས་ན་ཉེས་པ་དང་བཅས་སྟེ། ངས་ཤ་ཟ་བ་མི་སྣང་བ་དང་བཅས་

པ་འདི་རྒྱས་པར་བསྟན་ན་ཟད་པའི་མཐའ་མེད་དེ། མྱ་ངན་ལས་འདས་པའི་དུས་ལ་བབ་པས་ཕྱོགས་ཙམ་ཞིག་བཤད་དོ་གསུངས། དེས་ན་སངས་རྒྱས་ཀྱི་གསུང་བཞིན་ཐམས་ཅད་ཀྱིས་ཤ་སྤང་དགོས། འོན་དགག་བྱ་བ་ལ་དགོས་པ་གཙོ་བས། ཤ་རླུང་ཤས་ཆེ་བའི་རྒན་རྒོན་བླ་རྒན་དང་། གསང་སྔགས་ཚོགས་ཀྱི་འཁོར་ལོ། །བླ་མ་སྐྱེས་བུ་དམ་པའི་འཚོ་བ་སོགས་དགོས་པ་ཆེས་མང་བས་སྤང་མི་རུང་ཟེར་ན། རླུང་ནང་ཅན་གྱི་ཁ་ནང་དུ་སྡིག་ཟས་ཕ་མའི་ཤ་ཁྲག་ཞིག་རྒྱག་དགོས་པའི་ངེས་པ་མེད། རླུང་ནད་ལ་ཕན་པའི་ཟས་བརྒྱ་དགོས་ན་སྟོང་ཡོད་པ་སྨན་རྒྱུད་སོགས་ནས་གསུངས། དེ་ཚོའི་གཅིག་བསྟེན་ན་མི་ཡོང་ན་གཉིས་བསྟེན་ན་མི་ཆོག་གམ། ཐ་ན་སྒོག་སྐྱ་ཡན་ཆད་ཀྱིས་ཆོག་པར་གསུངས། རླུང་ནད་ཅན་གྱིས་ཞོ་ཐུད་མར་གསུམ་གང་རུང་བསྟེན་དང་རླུང་གིས་མི་འཆི་བའི་ཁག་ཐེག །ཚོགས་ཀྱི་རྫས་དགོས་ན་ཡང་། སེམས་ཅན་གྱི་སྲོག་མ་བཅད་ན་ཤ་མང་དུ་མི་འགྲོ་རུང་མེད་ག་ལ་འགྲོ། སྲོག་མ་བཅད་ན་སེམས་ཅན་མང་དུ་འགྲོ། སེམས་ཅན་མང་བ་ཙམ་དུ་འཆི་བ་མང་། འཆི་བ་མང་བ་

ཙམ་དུ་རོ་མང་། རོ་དེ་རྣམས་ཤ་ཁྲག་རུས་པ་ཡིན་པས། དེས་ཚོགས་རྫས་ཅི་ལ་མི་འོང་། བླ་མ་དམ་པ་ཡིན་ན་འཚོ་བ་ཤ་མི་དགོས་ཏེ། དེང་སང་གི་བླ་མ་དམ་པ་རྣམས་སྔོན་གྱི་རྒྱན་དྲུག་མཆོག་གཉིས་ཇོ་བོ་རྗེ་ཡབ་སྲས་རྣམས་ཀྱི་ཡན་ཞིག་མིན་ནམ་སྙམ། དེ་དག་དང་འདྲ་ན་ཟས་དཀར་གསུམ་མངར་གསུམ་སོགས་ཀྱིས་ཡོང་། གལ་ཏེ་དུས་ཀྱི་དབང་གིས་སྐྱེས་བུ་དམ་པས་ཀྱང་ཁ་ཤ་ལ་དགའ་ན་ཚོལ་དང་། ར་ལུག་གློ་བུར་དུ་ཤི་བའི་ཤ་ཚོན་པོ་རྙེད་པས་དེ་ལུགས་གནང་འཚལ། འོ་ན་སངས་རྒྱས་ཀྱིས་རྗེས་འཇུག་རྣམས་ལ་རྣམ་གསུམ་དག་པའི་ཤ་ཟོ་ཞེས་གནང་བ་བྱིན་ཡོང་བས་སྡིག་པ་མེད་ཀྱི་ཤ་ལ་ལོངས་སྤྱད་ཀྱང་ཉེས་པ་མེད་ཟེར་ན། གནང་བ་བྱིན་པ་ལ་ཡང་རྣམ་པ་མང་། ཡུལ་ཕྱོགས་རེན་ཤ་མ་གཏོགས་འཚོ་བའི་ཟས་གཞན་མེད། ཡུལ་དུས་ཀྱི་དབང་གིས་སྲོག་འཚོ་བའི་ཕྱིར་བསྟེན་དགོས་ན། དགག་བྱ་བ་ལ་དགོས་པ་གཙོ་ཡིན་པས་རྣམ་གསུམ་དག་པའི་ཤ་ཅུང་ཟད་རེ་བསྟེན་ཆོག །དགེ་སློང་རྒན་པ་རླུང་གིས་འཆི་བའི་ནད་རྩི་ལ་ཟས་གཞན་གྱིས་ཕན་མ་བྱུང་། ཤ་ཡིས་ཕན་ན་རྣམ་གསུམ་དག་པའི་ཤ་བསྟེན་ཆོག་པར་

གསུངས་པ་ཡིན་གྱི། གཞན་ཟས་དཀར་གསུམ་མངར་གསུམ་རྩམ་པ་གྲོ་ཞིབ་འབྲས་སོགས་ཅི་འདོད་ཟ་རྒྱུ་ཡོད་བཞིན་དུ་བསྟེན་རུང་ཉེས་པ་མེད་བསྟེན་ན་ཆོག་གསུངས་པའི་ཚིག་ཏུ་འཁྲུལ་བར་མི་བྱ། དེ་ཡིན་ན་ཤ་ཟོས་པའི་ཉེས་དམིགས་གསུངས་པ་རྣམས་ཀྱང་རྫུན་ཡིན་ཟེར་དགོས། སངས་རྒྱས་ཀྱིས་སོ་སོར་ཐར་པའི་མདོ་གསུངས་ཙ་ན། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །གསུངས། དེ་ཡིན་ན་སྡིག་པ་མི་དགེ་བའི་རྩ་བ་ཤ་འདི་ཡིན་པས་སྤོང་ཅི་ལ་མི་དགོས། སྤངས་ན་སེམས་ཅན་ལ་དངོས་སམ་བརྒྱུད་ནས་ཕན་པའི་དགེ་བ་ཕུན་སུམ་ཚོགས་པར་འགྱུར་བའི་ཕྱིར་རོ། །གལ་ཏེ་ཡུལ་དུས་ཀྱི་དབང་གིས་ཤ་ཟ་དགོས་པ་བྱུང་ན་ཡང་། ཤ་ཟ་སྤྱི་ལ་དམིགས་པའི་ཤན་པའི་ཤ་ལྟ་བུ་དང་། རང་ལ་སྒེར་དུ་དམིགས་ནས་སྲོག་དབུགས་བཅད་པའི་ཤ་མ་ཡིན་པས་ཤི་ཤ་སོགས་ཟ་དགོས། དེ་ཡང་ཤ་ཟ་ན་ཤན་པ་དང་སྲིན་པོ་རྣམས་ལྟར་བརྔམས་ནས་མི་ཟ་བར། སེམས་ཅན་དེ་དག་ལ་དམིགས་པའི་སྙིང་རྗེ་བསྐྱེད། སྔགས་དང་ཏིང་ངེ་འཛིན་གྱི་བྱིན་གྱིས་བརླབས། རྩ་གསུམ་ལྷ་

དང་ཆོས་སྐྱོང་ལ་ཕུད་མཆོད། ཤ་ཟ་དུས་ཀྱང་རྒྱགས་ཆེས་པ་མ་ཡིན་པར་ཚོད་བཟུང་། རན་པར་ཟ་དགོས། ཟོས་ཚར་ནས་སེམས་ཅན་དེ་དག་ལ་དམིགས་པའི་དགེ་སྦྱོར་བྱས། བསྔོ་བ་དང་སྨོན་ལམ་རྣམ་དག་མ་བྱས་ན། སྔར་བཤད་པའི་ཉེས་དམིགས་དེ་ཐམས་ཅད་སྟེང་དུ་འབྱུང་བར་ངེས་སོ།། ༈ །།ཡང་ཆང་འདི་ཡང་སྡིག་པའི་བཏུང་བ་ངོ་ཐོག་ཡིན། ཆང་གི་རྒྱུའི་ནས་དང་འབྲས་སོགས་ཀྱི་ཕྱིར་སྡིག་པ་བྱས་ཚུལ་རྣམས་སྔར་བཤད་པ་ལྟར་ཡིན་པས་སྨོས་མི་དགོས། ཆང་འཚོད་པའི་མེ་ཤིང་ཆུ་ཡི་ཕྱིར་སྡིག་པ་བྱེད་པ་ཡང་སྔར་བཤད་པ་ལྟར་ཡིན། ཆང་དེ་འཐུང་ན་འདོད་ཆགས་ཞེ་སྡང་སོགས་ཉོན་མོངས་པ་ཀུན་སློང་། ཞེས་ཨོ་རྒྱན་རིན་པོ་ཆེས་གསུངས། ཉོན་མོངས་པ་སྐྱེས་ཕྱིན་སྲོག་གཅོད། མ་བྱིན་ལེན། མི་ཚངས་སྤྱོད། རྫུན་སོགས་མི་དགེ་བ་བྱེད་པ་ཆོས་ཉིད་ཡིན་ཏེ། སྔོན་དགེ་སློང་ཁྲིམས་ལྡན་གཅིག་ལ་བུད་མེད་ཅིག་གིས་ཆང་ཞིག་ཁྱེར། ར་ཞིག་ཁྲིད་འོང་ནས། ཁྱེད་ཀྱིས་ར་འདི་སོད། ཡང་ན་ཆང་འདི་འཐུང་། ཡང་ན་མོ་ལ་ཆགས་པ་ཞིག་སྤྱོད་དགོས། ཞེས་སྨྲས་པས། དེ་རྣམས་གང་ཡང་བྱས་

མི་ཆོག་སྨྲས་པས། ཅི་ནས་ཀྱང་གཅིག་བྱེད་དགོས་བྱས་པས། དགེ་སློང་གི་བསམ་པ་ལ། ཆང་འདི་འཐུང་ན་ཉེས་པ་ཆུང་སྙམ་བླངས་ནས་ཆང་འཐུང་བས་བཟི་ཚེ། འདོད་ཆགས་ལངས་ནས་མི་ཚངས་པ་སྤྱད། ར་ཡང་བསད་ནས་སྡོམ་པ་ཤོར་སྐད། ཡང་ཆང་འཐུང་ན་ཐོས་བསམ་པ་ལ་ཐོས་བསམ་མི་འོང་། སྒོམ་ཆེན་པ་རྣམས་ལ་སྒོམ་མི་འོང་། ཁྱིམ་པ་རྣམས་ལ་སོ་ནམ་མི་འོང་། ཆོས་འཇིག་རྟེན་གཉིས་ཀྱི་དོན་ཆེན་སྒྲུབ་དགོས་པ་རྣམས་ཆང་འདི་འཐུང་བས་འཆོར་ཞེས་སློབ་དཔོན་ཀླུ་སྒྲུབ་ཀྱིས་གསུངས། ཡང་ཆང་འཐུང་ན་ཤེས་པ་རབ་རིབ་ཏུ་གྱུར་ནས་བསྐྱེད་རྫོགས་སོགས་བསྒོམས་ཀྱང་གསལ་པོ་མི་འཆར། མ་ཤར་ན་ཉམས་རྟོགས་ཤིག་ག་ལ་སྐྱེ། བྱང་ཆུབ་སྒྲུབ་པའི་བར་ཆད་ལ་ཆང་འདི་ཆེ་ཞེས་འབྲོམ་སྟོན་པ་ཆེན་པོས་གསུངས། མི་ཚེ་ཡུན་ཐུང་ནམ་འཆི་ཆ་མེད་ལ་ཆོས་ཤིག་བྱ་བསམ་པས་ཀྱང་ཆང་འཐུང་ན་རྣམ་གཡེང་བྱས། ཉིན་མཚན་གར་ཤོར་མི་ཤེས། མི་ཚེ་ཡད་མ་ཡུད་ལ་འཆོར། ཚེ་ཕྱི་མར་ལག་སྟོང་དུ་འགྲོ་དགོས། ཆང་འཐུང་ན་ཚེ་འདིར་ཡང་དོན་ཆེན་སྒྲུབ་དགོས་པ་ཀུན་

འཆོར་བ་ཙམ་དུ་མ་ཟད། ཐ་མ་རང་གི་སྲོག་གཅོད་དུ་འགྱུར། ཆང་འཐུང་མགོ་གོས་ཀྱིས་བཏུམ་ནས་ཤི་བ་དང་གྲང་ནས་ཤི་བ་མང་། གཡང་ས་ལ་ལྷུང་བ། རྟ་ཡིས་དྲུད་ནས་བསད་པ། དགྲ་ལག་ཏུ་ཤོར་བ་སོགས་ཆང་འཐུང་ལ་ཆག་སྒོ་ཆེན་པོ་ཡོང་ཡོང་ཞིག་ཆང་མི་འཐུང་བ་ལ་མི་འོང་། ཆང་འཐུང་ན་མགོ་ན། ཟས་སྐྱུགས། མིག་ཚ། གཉིད་ཆེ། བྱ་བ་བཟང་པོ་སྒྲུབ་པ་དཀོན། སྨྱོན་པ་བཞིན་བྱ་བ་མ་ཡིན་པ་ཐམས་ཅད་བྱས། ཕུང་ཚབས་ལ་ཆང་འདི་ལས་ཆེ་བ་ཞིག་མེད། དེས་ན་སྐྱེས་བུ་དམ་པ་རྣམས་ཀྱིས་མགྲིན་གཅིག་ཏུ་ཆང་ནི་ཉེས་པ་ཀུན་གྱི་གཞི་གསུངས། མདོ་དྲན་པ་ཉེར་བཞག་ལས། ཆང་འཐུང་ན་ཚ་དམྱལ་དུ་སྐྱེས་ནས་འཚོད་པ་དང་། ཆུ་བོ་རབ་མེད་ཀྱི་ནང་དུ་སྐྱུར་བ་དང་། དམྱལ་སྲུང་རྣམས་ཀྱིས་ཉ་བཏོན་ཏེ་ལྕགས་བསྲེགས་ལ་རྡེབ་པ་ལྟར་བྱེད། ལྕགས་བཞུ་བ་ཁར་བླུགས་ནས་ནང་ཐམས་ཅད་བསྲེགས་ནས་གཤང་ལམ་ནས་ཐོན། མིར་གྱུར་ཀྱང་། ལྐུག་པ་དང་། དམན་པ་དང་། བླུན་པོའི་ལུས་ལེན། བརྗེད་ངེས་ཆེ་བ་དང་། གཉིད་ཆེ་བ་དང་། བློ་གྲོས་དམན་པ་དང་། ངོ་ཚ་དང་ཁྲེལ་ཆུང་བ་དང་།

གནོད་སྦྱིན་དང་ཁྱིའི་སྐྱེ་བ་ལྔ་བརྒྱ་རེ་དང་། སྨྱོན་པའི་ལུས་དེ་ལས་ཀྱང་མང་བར་སྐྱེའོ། །ཡང་ཕ་རོལ་པོ་ལ་ཡང་ཆང་བླུད་ན་ཚེ་རབས་ལྔ་བརྒྱར་ལག་མེད་དུ་འོང་ན། བདག་འཐུང་བ་ལྟ་ཅི་སྨོས། ཡང་སྡོམ་འཛིན་ལ་ཆང་བྱིན་ན་དམྱལ་བ་ངུ་འབོད་ཆེན་པོར་སྐྱེའོ་གསུངས། དེས་ན་ཆང་འདི་རྩྭ་ཟིལ་ཙམ་ཡང་བཏུང་མི་རུང་སྟེ། དགྲ་བཅོམ་པ་ལེགས་འོང་གི་གླེང་གཞིར། གང་ཞིག་ཆང་གི་བཏུང་བ་རྩྭའི་རྩེ་མོ་གང་ཡན་འཐུང་བར་བྱེད་པ་ནི་ངའི་ཉན་ཐོས་མ་ཡིན་ལ། ང་ནི་དེ་ཡི་སྟོན་པ་མ་ཡིན་ནོ་གསུངས། རང་གཞན་ཀུན་བདེ་བར་འདོད་པ་སྤྱི་དང་། ཁྱད་པར་བླ་མ་གྲྭ་པ་དགེ་བཤེས་བྱ་བཏང་སྒོམ་ཆེན་པ་ཀུན་གྱིས་ཆོས་གཤའ་མ་ཞིག་བྱེད་འདོད་ན། ཚོགས་རྫས་ཙམ་མ་གཏོགས་སྨྱོ་ཆུ་འདི་གཏན་ནས་སྤང་དགོས་ཏེ། མདོ་ལས། ཕུང་ཁྲོལ་ཀུན་གྱི་རྩ་བ་ཡི། །ཆང་གི་བཏུང་བ་རྟག་ཏུ་སྤང་། །གསུངས། དྭགས་པོ་ལྷ་རྗེས། སྡིག་ཟས་ཁྲ་བོའི་ཤ་དང་གཅིག །མྱོས་བྱེད་སེར་མོའི་ཆང་དང་གཉིས། །བློ་ཁྲིད་ན་ཆུང་གཞོན་དང་གསུམ། །འདི་གསུམ་ཆོས་པའི་བཙན་དུག་ཡིན། །ཆོས་

གཤའ་མ་ཞིག་བྱེད་ན་འདི་གསུམ་སྤོངས། །སྙིང་ནས་མཛད་ན་འདི་གསུམ་སྤོངས། །གསུངས། ཁ་རག་སྒོམ་ཆུང་བས། ཤེས་པ་འཕྱོ་ལ་ལུས་ལ་གནོད། །མཁས་བཙུན་རྣམས་ཀྱིས་སྨད་པའི་གནས། །ཉེས་པ་ཐམས་ཅད་འབྱུང་བའི་རྒྱུ། །ཆང་དང་བུད་མེད་སྤོངས་ཤིག་ཨང་། །གསུངས། བླ་མ་སྐྱེས་ཆེན་དམ་པ་དང་། གསང་སྔགས་ཀྱི་རྣལ་འབྱོར་ཆེན་པོ་རྟོགས་པ་མཆོག་དང་ལྡན་པ་འདྲ་ཡིན་ན་མ་གཏོགས། གཞན་སྔགས་ཀྱི་སྒོར་ཞུགས་པའི་སྔགས་པའི་ཁུར་འཛིན་པ་སོགས་སྐྱེ་བོ་ཕལ་པ་རྣམས་ཀྱིས་གླང་རྒན་གྱིས་ཆུ་འཐུང་བ་ལྟར་ཆང་མང་པོ་འཐུང་ནུས་པ་ལ། དེ་ཙམ་གྱི་ཉེས་དམིགས་ཆེ་བ་འབྱུང་བ་མ་གཏོགས། ཡོན་ཏན་ཞིག་སྐྱེ་བ་རྒྱལ་བ་སྲས་བཅས་ཀྱིས་སྔར་མ་གསུངས་ཏེ། དཔལ་ཨོ་རྒྱན་ཆེན་པོ་ལྷོ་ནུབ་སྲིན་པོའི་ཡུལ་དུ་བཞུད་པའི་དུས་སུ་རྗེ་འབངས་སྤྱི་དང་ཁྱད་པར་སྔགས་པ་རྣམས་ལ་ཞལ་གདམས་འདི་ལྟར་གསུངས་སོ༔ ང་ཡི་རྗེས་འཇུག་སྔགས་འཆང་ཚོགས་རྣམས་གསོན༔ པད་འབྱུང་སྲིན་པོ་འདུལ་དུ་འགྲོ་བ་ལ༔ མྱ་ངན་མ་བྱེད་ཞལ་གདམས་འདི་ཉིད་ནི༔ ང་ཉིད་བཞུགས་དང་ཁྱད་མེད་

སེམས་ལ་ཆོངས༔ སྔགས་པ་འཕུང་བྱེད་རྒྱུ་ནི་ཆང་ནག་ཡིན༔ ཆང་ལ་འདོད་ཆགས་ཞེ་སྡང་གཏི་མུག་དང་༔ ང་རྒྱལ་ཕྲག་དོག་ཉོན་མོངས་མ་ལུས་པ༔ སློང་བའི་རྒྱུ་ཀུན་འདི་ལ་ཚང་བ་ཡིན༔ དེ་ཕྱིར་ཆང་ནག་མ་འཐུང་ཞལ་གདམས་ཡིན༔ ཆང་འཐུང་ལྷ་བསྒོམ་བཟླས་བརྗོད་བྱེད་པ་ནི༔ རབ་ཚ་ཟངས་ཞུན་ཁར་ལྡུད་དམྱལ་བར་སྐྱེ༔ ཆང་འཐུང་ཟོར་འཕེན་མནན་གཏད་བྱེད་པ་ནི༔ ལྷ་མིན་འཁྲུག་པའི་དམག་དཔོན་ཆེན་པོར་སྐྱེ༔ ཆང་འཐུང་བླ་མ་རྡོ་རྗེ་སྤུན་ལ་ནི༔ བརྡེག་རྡུང་བྱེད་པ་རྡོ་རྗེ་དམྱལ་བར་སྐྱེ༔ ཆང་འཐུང་ཆོས་རྩོད་ང་རྒྱལ་བྱས་པ་ཡིས༔ ལྕེ་ལ་ཐོང་གཤོལ་རྨོ་བའི་དམྱལ་བར་སྐྱེ༔ ཆང་འཐུང་གཞན་ལ་གྲི་འཕྱར་ཁྲོས་པ་ཡིས༔ གནོད་སེམས་བྱེད་པ་ཡང་སོས་དམྱལ་བར་སྐྱེ༔ ཆང་འཐུང་གཞན་གྱི་བུད་མེད་ལ་སྤྱོད་པ༔ ཤལ་མ་རི་ཡི་སྡོང་པོར་རྟག་ཏུ་འདྲུད༔ ཆང་འཐུང་རྐུ་འཕྲོག་སྣ་ཚོགས་བྱས་པ་ཡིས༔ ཡི་དྭགས་མཚོན་ཆའི་འཁོར་ལོ་ཅན་དུ་སྐྱེ༔ ཆང་འཐུང་ངོ་ཚ་ཁྲེལ་འཛེམ་བྲལ་བ་དེ༔ གླེན་ཅིང་ལྐུགས་པའི་དུད་འགྲོའི་གནས་སུ་སྐྱེ༔ སྔགས་པ་ཆང་འཐུང་ཁྱི་

ཡི་ལུས་སུ་སྐྱེ༔ གལ་ཏེ་མིར་སྐྱེས་ན་ཡང་སྨྱོན་པར་སྐྱེ༔ ཆང་འཐུང་དེ་ཕྱིར་མདོ་དང་རྒྱུད་སྡེ་ནས༔ བཀག་ཕྱིར་པདྨས་ཆང་འཐུང་གསུངས་པ་མེད༔ མ་འོངས་སྙིགས་མའི་དུས་ཀྱི་སྔགས་པ་རྣམས༔ ཆང་འཐུང་ཨོ་རྒྱན་པདྨའི་གསུང་ཡིན་ཟེར༔ དེ་དག་ང་ཡི་རྗེས་འཇུག་མ་ཡིན་ཏེ༔ ནག་པོ་བདུད་ཀྱི་རྗེས་སུ་ཞུགས་པ་ཡིན༔ ང་བསམ་ང་སྒོམ་ང་མཆོད་བྱེད་པའི་མིས༔ ཆང་འཐུང་པདྨ་ང་ཉིད་བསླུས་པ་ཡིན༔ ཞེས་གསུངས་སོ༔ དེས་ན་ཀུན་གྱིས་ཆང་མ་འཐུང་བ་རབ་ཡིན༔ གལ་ཏེ་ཁྱིམ་པ་ཕོ་མོ་རྣམས་ཀྱི་ནང་ནས་འགའ་རེས་བག་ཆགས་ངན་པའི་དབང་གིས་ཆང་འཐུང་དགོས་པ་བྱུང་ན་ཡང་སྔར་བཤད་པའི་ཆང་གི་ཉེས་དམིགས་རྣམས་བསམས་ནས་ཆེན་པོ་མི་འཐུང་བར་འདོད་ཆུང་ཆོག་ཤེས་བསྟེན་པ་གཅེས། ཡང་སྔགས་པ་རྣམས་ཀྱིས་ཀྱང་ཚོགས་ཀྱི་འཁོར་ལོ་བསྐོར་དུས་སྔགས་ཀྱི་གཞུང་བཞིན། ཨོཾ་ཨཱཿཧཱུཾ། ཧ་ཧོ་ཧྲཱིཿལ་སོགས་སྔགས་དང་ཏིང་ངེ་འཛིན་གྱི་བྱིན་གྱིས་བརླབས། རྩ་གསུམ་ལྷ་མཆོད། རང་ལུས་ལྷར་གསལ་བ་ལ་ཟག་མེད་ཀྱི་བདུད་རྩིས་མཆོད་པའི་ཚུལ་དུ་ཅུང་ཟད་རེ་བསྟེན་པ་མ་གཏོགས།

རང་དགར་ཧུབ་གང་འཐུང་རུང་དུག་དང་ཁྱད་པར་མེད་དེ། བརྟག་གཉིས་ཀྱི་རྒྱུད་ལས། ཧ་གསུམ་ལ་སོགས་དང་བྲལ་བར། །ཅི་སྟེ་དམ་ཚིག་ཅན་གྱིས་འཐུང་། །དེ་ནི་དུག་འགྱུར་ཐེ་ཚོམ་མེད། །སྔགས་ཀྱི་དངོས་གྲུབ་མི་འབྱུང་ངོ་། །གསུངས། བྱིན་རླབས་བྱས་ནས་འཐུང་ཡང་། ཆང་གིས་མྱོས་ན་དམྱལ་བ་ངུ་འབོད་དུ་སྐྱེ་སྟེ། རྒྱུད་དེ་ཉིད་ལས། སུ་ཞིག་ཆང་གིས་མྱོས་གྱུར་པ། །དེ་ལ་གེགས་ནི་མང་པོ་འབྱུང་། སྔགས་པ་ཆང་གིས་མྱོས་གྱུར་གང་། །ངུ་འབོད་གནས་སུ་འཚོད་པར་འགྱུར། །གསུངས། དེ་ལྟར་བཀའ་དང་འགལ་ན་རྩ་ལྟུང་གཉིས་པ་འཕོག་སྟེ། བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བརྗོད། །གསུངས། རྩ་ལྟུང་ཕོག་ན་ཚེ་འདིར་སྡུག་བསྔལ་མྱོང་ཞིང་ཕྱི་མར་དམྱལ་བར་འགྲོ་སྟེ། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་བཟུང་བར་འགྱུར། །དེ་ནས་སྡུག་བསྔལ་མྱོང་འགྱུར་ཞིང་། །ཐུར་དུ་བལྟས་ཏེ་དམྱལ་བར་འགྲོ། །གསུངས། དེས་ན་བློ་གྲོས་ཅན་གྱིས་གཟབ་འཚལ། ད་ནི་ཆོས་བཞིན་བྱེད་ན་རབ་

བྱུང་དགེ་སློང་སྔགས་པ་སྒོམ་ཆེན་པ་རྣམས་ཀྱིས་དམ་པའི་ཆོས་ཀྱི་བདུད་རྩི་འདི་ལྟར་འཐུང་དགོས་ཏེ། དགེ་སློང་རྡོ་རྗེ་འཛིན་པ་ཕག་མོ་གྲུ་པས། ཞིང་སྨོན་ལམ་དག་པའི་ས་གཞི་ལ། །ནས་དགེ་བ་བཅུ་ཡི་ས་བོན་བཏབ། །ཐབས་ཤེས་གཉིས་ཀྱི་རྒལ་དོར་འབྲེལ། །རྩ་བའི་བླ་མས་སྣ་ཁྲིད་བྱས། །དབང་པོ་རབ་ཀྱི་ཐོང་གཤོལ་བཟུང་། །དད་གུས་ཀྱི་སྙིམ་པས་རོལ་ཏུ་བརྩེགས། །བྱང་ཆུབ་སེམས་ཀྱི་ལྗང་བུ་འཁྲུངས། །མི་དགེ་སྡིག་པའི་ལྡུམ་བུ་བསལ། །བསོད་ནམས་དགེ་ཚོགས་ཀྱི་སྟོན་ཐོག་འཁྲུངས། །འཁོར་བ་རྩད་གཅོད་ཟོར་བས་བརྔས། །དུ་མ་རོ་གཅིག་གི་བམ་པོར་བཅིངས། །བྱང་ཆུབ་སེམས་ཀྱི་བཟུང་ཐག་བྲེས། །ཐེག་ཆེན་རྒྱན་ལྡན་སྐྱེས་བུས་ཁུར། །ལྷུན་གྲུབ་ཁང་པའི་སྟེང་དུ་ཕོག །ཀུན་ཤེས་ཞེ་འདོད་ཀྱི་ཚར་མ་བརྩིགས། །ཀུན་ཁྱབ་ཁྲི་གདུགས་ཉི་མས་སྐམ། །བདེ་ཆེན་ཁང་པའི་སྟེང་དུ་བཤར། །འཁོར་བ་བདེ་འཁྱམས་དབྱུག་པས་བརྡུངས། །ཤེས་རབ་ཡེ་ཤེས་ཀྱི་རླུང་ལ་འཕྱར། །གཡེང་བ་མེད་པའི་བྲེ་ལ་འཇལ། །ཐོས་བསམ་སྒོམ་གསུམ་གྱི་སྒྱིད་བོ་བཙུགས། །སྟོང་ཉིད་

ཟངས་ཀྱི་ནང་དུ་བཙོས། །འོད་གསལ་ཕྱ་རའི་ནང་དུ་བརྡལ། །ཡེ་ཤེས་བདུད་རྩིའི་ཕབ་ཕྱེ་བཏབ། །ཆོས་ཉིད་ངང་དུ་གཟིམས་སུ་བཅུག །ས་བཅུའི་བར་དུ་ཞག་གསུམ་བཞག །བྱང་ཆུབ་སེམས་ཀྱི་སྐམ་པས་བཟུང་། །ཡེ་ཤེས་སླང་ངའི་ནང་དུ་བསྡུས། །བཀའ་རྒྱུད་བླ་མ་མགྲོན་དུ་བོས། །དཔའ་བོ་མཁའ་འགྲོའི་གྲལ་གཅིག་བཤམས། །འགྲོ་བའི་དོན་ལ་བཞེས་སུ་གསོལ། །འཐུང་ན་དུག་གསུམ་ནད་རྣམས་སེལ། །མཐོ་རིས་རིགས་དྲུག་སེམས་ཅན་མཉེས། །མི་ངེད་ཀྱིས་ཆང་འཐུང་དེ་ལྟར་འཐུང་། །གསུངས་པ་ལྟར་བཞེས་པ་གལ་ཆེ།། ༈ །།ཡང་ལུས་ལ་གྱོན་པའི་གོས་འདི་ཡང་སྡིག་པ་དང་སྦྲགས་པའི་གོན་པ་ཡིན་ཏེ། སྣམ་བུ་དང་ཕྱིང་བ་འདིའི་ཕྱིར་དུ། ལུག་གི་རྒྱབ་ཀྱི་བལ་ལེན་དུས། ས་ལ་བསྒྱེལ་རྐང་ལག་ཐག་པས་བསྡམས། བལ་གྱི་ཚུར་འཐེན་ནས་བྲེགས་ན་ཚ། འབྲེག་མི་ཤེས་པའི་མི་ཡིས་བྲེགས་ན་གྲི་ཡིས་ཤ་བཅད། འབྲེག་ཡུན་རིང་ན་ལུག་གི་རྐང་ལག་ན། སྦོས་ནས་འཆི་ལ་ཁད་བྱེད། འགའ་རེས་ལུག་ས་ལ་སྒྱེལ་དུས་ཐབས་མི་མཁས་པར་རྡོ་དང་ས་

འབུར་ཤིང་སོགས་ཀྱི་སྟེང་དུ་ཤེད་ཀྱིས་བསྒྱེལ་ནས་རྐང་ལག་བཅག་པ་དང་། ཐབས་ྈརྡུག་འགའ་རེས་འབྲེག་གཏན་ནས་མ་ཤེས། རྨ་ཆེ་ཆུང་མང་པོ་བཟོས། རྨ་ལ་སྲིན་འབུ་བཏབ་ཉེན་བྱས་ནས་ཤི་བ་མང་། ཡང་ནམ་ཚ་ངན་པ་ལུག་ཤེད་ངན་དུས་འདྲེག་མ་རན་བཞིན་དུ་བལ་བྲེགས་ནས་བླངས་ན། ཁ་ཆར་བུ་ཡུག་འཚུབ་ན་ལུག་ཐམས་ཅད་གྲང་ནས་སུག་བཞི་འདར། རབ་ཏུ་གྲང་ན་ཤེད་ངན་པའི་རིགས་ཤི་བ་གྲངས་མང་། མ་ཤི་བ་རྣམས་ཀྱིས་ཀྱང་རྒྱབ་ཏུ་བལ་སྐྱེ་རག་ཤེད་འབུད་རག་གི་བར་དུ་ནངས་ནུབ་ཆར་འབབ་དུས་སོགས་སུ་གོས་མེད་གཅེར་བུར་བསྡད་པ་ལྟ་བུའི་གྲང་བའི་སྡུག་བསྔལ་འབྱུང་། འཆི་ལ་ཁད་བྱེད། བལ་ལེན་དུས་དབྱར་ས་ན་གནས་པའི་སྲིན་འབུ་ཕྲ་རགས་མང་པོ་མི་ཕྱུགས་གཉིས་ཀའི་རྐང་ལག་ལུས་པོ་སོགས་ཀྱིས་བརྫིས་ནས་གཅུར། ལུག་གི་རྒྱབ་ཀྱི་ལུག་ཤིག་བརྒྱ་སྟོང་ཡོད་པ། གྲི་དང་ལག་གིས་བསད་པ་དང་། ཉི་མས་བསྲེག་པ། མུ་གེས་འཆི་བ་གྲངས་ཀྱིས་མི་ཟིན། བལ་འབྲེག་པའི་མི་བྲན་དང་གཡོག་སོགས་ཀྱིས་ཉི་མ་ཚ་བ་དང་། ཆར་ནང་སོགས་ནས་ཚ་གྲང་བཀྲེས་སྐོམ་ངལ་དུབ་

མང་པོ་བླངས། ལུག་རྒོད་པོ་བཟུང་དུས་རྭ་དང་རྐང་ལག་གིས་བརྒྱབ་ནས་མིག་དང་རྐང་ལག་བསྣད་པ་མང་། ལུག་མང་པོའི་བལ་བྲེགས་ན་ལག་པ་དང་མགོ་བོ་རོ་སྟོད་ན། ཡང་བལ་བཀྲུས་བསེད་བཀལ། ཐགས་སུ་བཏགས། སྤུ་བསླང་། མདོག་བསྒྱུར་བཟོ་བྱས་ནས་ལུས་ལ་གྱོན་རག་གི་བར་སྡུག་བསྔལ་དཀའ་ལས་མང་པོ་མྱོང་། དེའི་དུས་རྣམས་སུ་ཡང་ས་དང་རྩི་ཤིང་བར་སྣང་ན་གནས་པའི་སྲིན་འབུ་མང་པོ་གནོད་འཚེ་བྱུང་ནས་འཆི། གོས་ཀྱི་ནང་ནས་ར་ལུག་གི་པགས་པ་གྱོན་ན། ར་ལུག་ཚོན་པོའི་པགས་པ་མ་གཏོགས། གཞན་མུ་གེས་ཤི་བ་སོགས་ཀྱི་པགས་པས་མི་ཡོང་ཐེད་འགྲོ་ཚོ་ལྤགས་ཅི་ནས་ཀྱང་དགོས། དེ་དགོས་ན་ཚོན་པོ་རྐྱང་མི་འཆི། ཚོ་དུས་ཤ་དང་པགས་པ་ལ་དམིགས་ནས་གསོད་དགོས། བསད་བའི་པགས་པ་མང་པོ་བསྡུས་ནས་བཟོས་པ་གྱོན་ན། སེམས་ཅན་ཐམས་ཅད་ཕ་མ་དྲིན་ཅན་ཤ་སྟག་ཡིན་ཞེས་སངས་རྒྱས་ཀྱིས་གསུངས་པས་ན། དོན་གྱི་ཚེ་འདིའི་ཕ་མ་གཉིས་བསད་པའི་པགས་པ་དམར་བཤུ་བྱས་བླངས་མཉེས་བཟོས་ནས་རྒྱབ་ཏུ་གྱོན་པ་དང་ཁྱད་པར་སྤུ་

ཙམ་མེད་པས་སྡིག་སྒྲིབ་ཚད་ལས་འདས་པ་འབྱུང་། མ་ཅིག་ལབ་སྒྲོན་གྱིས། ཁྱི་ལྤགས་འདི་ལ་གྲིབ་སོགས་ཉེས་པ་ཆེ་ཚུལ་མང་པོ་གསུངས། གསུང་དེ་ལ་དཔག་ན། དེང་སང་སྤྱང་ཐུལ་ཝ་ཞྭ་སོགས་གཅན་གཟན་མ་རུངས་པའི་པགས་པ་གྱོན་གདན་དུ་འདིངས་པ་སོགས་ལ་ཉམས་གྲིབ་དེས་ཆེ་ཞིག་མི་འབྱུང་རུང་། དེ་ཙམ་ཞིག་ཡོང་བ་སྨོས་ཅི་དགོས། དེ་ཅིའི་ཕྱིར་ཞེ་ན། ཁྱིས་མི་གཙང་བ་ཟ་ཡང་སྡིག་པ་ཆེན་པོ་མི་བྱེད་ལ། ཝ་སྤྱང་སོགས་ཀྱིས་མི་གཙང་བ་ཟ་བ་ཙམ་དུ་མ་ཟད། ཅི་ཟ་སྲོག་དབུགས་བཅད་པའི་ཤ་ཁྲག་སྡིག་ཟས་ཁོ་ན་ཟ་བའི་ཕྱིར་རོ། །མི་དང་དུད་འགྲོ་གང་ཡིན་རུང་སྡིག་པ་ཅན་ཐམས་ཅད་ལ་དེའི་ཚོད་ཀྱི་སྒྲིབ་པ་ཆེ་སྟེ། མི་གསོད་པའི་དམེ་པོ་དང་། ར་ལུག་གསོད་པའི་ཤན་པ། རི་དྭགས་གསོད་པའི་རྔོན་པ་རྣམས་ཀྱི་གོས་གྱོན་ཟས་ཟོས་སམ་ལྷན་དུ་བསྡད་ན་གྲིབ་མ་ཕོག་རུང་གྲིབ་འཕོག་པ་མཐོང་ཐོས་མྱོང་བས་ཀྱང་ཤེས་སོ། །འོ་ན་ཁྱི་ཡིས་མི་གཙང་བ་ཟ་བས་གྲིབ་ཆེ་གསུངས་པ་ཡིན་ཟེར་ན། མི་གཙང་བ་མི་ཟ་བ་དཀོན། དེ་ཡིན་ན་ཕག་གི་ཤ་ཟ་ག་ལ་རུང་། མི་གཙང་བ་ཁོ་ན་ཟ། ར་ལུག་འབྲི་གཡག་ཕལ་ཆེ་

བས་ཀྱང་། མི་ཡི་གཅན་འཐུང་སྐྱག་སྐམ་ཟ་བ་མང་བས། དེ་རྣམས་ལ་ཡང་གྲིབ་ཆེ་བས་ཤ་ཟོས་པགས་པ་གྱོན་མི་རུང་བར་འགྱུར། དེ་ཡིན་ན་གཅན་གཟན་རྣམས་ཀྱིས་ལྟོགས་དུས་མི་གཙང་བ་རྙེད་ན་ཟ་བ་ཕར་ཞོག །ཐ་ན་རྩག་ཆད་བལ་རུལ། སྲིན་འབུ་སོགས་མི་གཙང་བ་དུ་མ་ཟ་བས། དེ་གཏན་ནས་གྱོན་མི་རུང་བར་འགྱུར་ངེས། ཡང་ལྷག་པར་འབུ་རས་དང་། གོས་ཆེན་གྱོན་མི་རུང་། དེའི་རྒྱུ་དེ་སྲིན་འབུ་ཞིག་གསོས་པའི་ཁོག་ནས་སྡོམ་གྱི་བ་ཐག་ལྟར་འཐེན་ནས་བླངས་པ་ཡིན། དེ་ལེན་དུས་སྲིན་འབུ་མང་པོ་འཆི་བ་ཡིན་སྐད། གལ་ཏེ་མ་ཤི་བ་རྣམས་ཀྱང་ཁོག་གི་འཐེན་ནས་ལེན་དུས་ནད་ཟུག་གནོད་པ་ཆེན་པོ་འོང་ནས་འཆི་ལ་ཁད་བྱེད་ངེས། དེ་ལེན་དུས། ཐགས་སུ་འཐག་དུས། ཁ་སྒྱུར་དུས་སོགས། རྒྱབ་ཏུ་གོན་རག་བར་དུ་མི་མང་པོས་སྡུག་དཀའ་ལས་མྱོང་། སྲིན་འབུ་མང་པོ་གསོད། དེ་གྱོན་ན་རང་མཐོང་ང་རྒྱལ་དང་། ཟད་འགྲོ་བའི་སེར་སྣ། གོས་དེ་ལ་སྙིང་པོ་མེད་ཅིང་སྡིག་པ་ཆེ་བ་མ་ཤེས་པའི་གཏི་མུག །གོས་དེ་མི་གཙང་བ་སོགས་ཀྱིས་བརྫད་པ་དང་། གཞན་

གྱིས་ཕྲོག་ན་ཞེ་སྡང་། གཞན་གྱིས་གོས་དེ་ལས་བཟང་བ་གྱོན་ཡོད་པ་མཐོང་ན་གཞན་མཐོ་བར་དོགས་པས་ཕྲག་དོག །ཁོ་ལ་ག་འདྲ་ཞིག་བྱུང་ན་སྙམ་པའི་འདོད་ཆགས། གོས་འདི་བཟང་འདི་དང་མ་བྲལ་ན་སྙམ་པའི་ཞེན་ཆགས་སོགས་ཉོན་མོངས་པ་ཀུན་སློང་། ཉོན་མོངས་པའི་དབང་གིས་བརྣབ་སེམས་གནོད་སེམས་སྐྱེས། རྫུན་ཕྲ་མ་ཚིག་རྩུབ་སྨྲས། སྲོག་གཅོད་མ་བྱིན་ལེན་སོགས་མི་དགེ་བའི་ལས་ཐམས་ཅད་ཉིན་རེ་བཞིན་གསོག །མི་དགེ་བའི་དབང་གིས་ཚེ་འདིར་ཡང་སྡུག་ལ། ཕྱི་མར་སྤྱིར་འཁོར་བའི་སྡུག་བསྔལ། ཁྱད་པར་ངན་སོང་གསུམ་གྱི་སྡུག་བསྔལ་དོས་དྲག་ལ་ཡུན་རིང་མྱོང་དགོས། དེས་ན་སྔོན་གྱི་སྐྱེས་བུ་དམ་པ་རྣམས་ཀྱིས་པགས་པ་དང་གོས་ཆེན་གྱོན་པ་ཕར་ཞོག །སྣམ་ཐེར་རས་ཀྱང་མི་གྱོན་པར། གྲུབ་ཆེན་རྣམས་ཀྱིས་གསང་གནས་ྈའགེབ་པ་ལ་ཨང་རག་རེ་ཙམ་མ་གཏོགས་གཏུམ་མོའི་བདེ་དྲོད་ཀྱི་གོས་གྱོན། སྐུ་ལ་མཛེས་པའི་རུས་པའི་རྒྱན་དྲུག་གསོལ་ནས་ན་བཟའ་ཡེ་མེད་པ་བྱས། སྟོན་པ་སངས་རྒྱས་ཀྱིས་ཀྱང་ལོ་དྲུག་དཀའ་བ་སྤྱད་དུས་ན་བཟའ་ཡེ་མེད་པ་བྱས། སྐུ་གཅེར་བུར་ཏིང་ངེ་འཛིན་

གྱི་ངང་ལ་བཞུགས། སངས་རྒྱས་ནས་ཀྱང་ཤ་ནའི་གོས་སོགས་གོས་ངན་ངོན་ཙམ་བསྣམས་པ་མ་གཏོགས། གོས་ཆེན་མང་པོ་བརྩེགས་ནས་མགོ་མན་ཆད་བཏུམ་གསུངས་པ་ཞིག་མེད། དེ་བཞིན་དུ་སྔོན་གྱི་སྐྱེས་བུ་དམ་པ་རྣམས་ཀྱིས་རོ་གོས་དུག་ཧྲུལ་སོགས་ལུས་འཚོ་བའི་གོས་ངན་ངོན་གང་རྙེད་རེ་བསྟེན་པ་ཡིན། དེ་ལྟར་མཛད་པ་ཁོང་རྣམས་ཀྱིས་མ་མཁྱེན་པ་དང་། མ་འདོད་པ་དང་མ་རྙེད་པ་ཡང་མ་ཡིན་ཏེ། གོས་ལ་བརྟེན་ནས་ཕ་མ་སེམས་ཅན་མང་པོར་དངོས་སམ་བརྒྱུད་ནས་རིམ་གྱིས་གནོད་ཀྱིས་དོགས་ནས། རང་གིས་ཀྱང་གྱོན་ན་སྡིག་སྒྲིབ་ཀྱིས་བཀབ་ནས་ཉམས་རྟོགས་ཁྱད་པར་ཅན་མི་སྐྱེ་བར་མཁྱེན་ནས་མ་གྱོན་པ་ཡིན་ཡང་། དེང་སང་བྱ་བཏང་སྒོམ་ཆེན་པ་སོགས་མདོ་སྔགས་ཉམས་སུ་ལེན་པ་རྣམས་ཀྱིས་ཅི་ཙམ་འབད་ཀྱང་ཉམས་རྟོགས་མི་སྐྱེ་བའི་གེགས་དང་། ཕྱི་མར་ངན་སོང་གི་རྒྱུ། སྡིག་པའི་རྩ་བ་དེ་ཕར་དེད་ན་ལྟོ་གོས་འདི་ཡིན་པར་མ་ཤེས། འགའ་རེས། ནང་ན་ཡོན་ཏན་ཀུན་ལྡན་ཡང་། །ཆ་ལུགས་ངན་ན་ཀུན་གྱིས་བརྙས། །ཞེས་ས་སྐྱ་པཎ་ཆེན་རིན་པོ་ཆེས་གསུངས་པ་དེ་

བདེན་པར་འདུག་གོ་ཟེར། དེ་གང་ལ་དགོངས་ནས་གསུངས་པ་ཡིན་གྱི་དགོངས་པ་མི་འཚོལ། དེ་བྱ་བཏང་རི་ཁྲོད་པ་འཇིག་རྟེན་ཆོས་བརྒྱད་དཀར་ནག་ཁྲ་གསུམ་བློས་བཏང་ནས། རང་གཞན་གྱི་དོན་དུ་བླ་མེད་བྱང་ཆུབ་འཐོབ་པའི་ཕྱིར་དུ་ཆོས་རྣམ་དག་བྱེད་པ་རྣམས་ལ་གསུངས་པ་ཡིན་སྙམ་གོ་ལོག་ཏུ་གོ་ནས། ཁ་ལ་ཟ་རྒྱུ་མེད་པ་རྣམས་ཀྱིས་ཀྱང་རྒྱབ་ལ་གོན་རྒྱུ་གཅིག་གིས་མི་ཆོག་གཉིས། གཉིས་ཀྱིས་མི་ཆོག་གསུམ་བཞི་སོགས་མང་པོ་བསྒྲུབས་ནས་སྤོར་ལེན་བྱས་ནས་གྱོན་པ་རྣམས་ལ། ཉམས་རྟོགས་འཆར་བ་ཕར་ཞོག །ཉམས་གྲིབ་ཀྱིས་རྨི་ལམ་བཟང་པོ་ཞིག་ཀྱང་རྨི་དཀའ། བྱ་བཏང་སྒོམ་ཆེན་པ་ཕར་ཞོག །མིང་ཙམ་ཡང་འཐོབ་དཀའ། ལྟོ་གོས་མང་ན་ཁྱིམ་པ་རྣམས་དང་ཁྱད་སྤུ་ཙམ་མེད། ཚེ་བློས་བཏང་དེ་གང་ལ་ཟེར། ཁྱིམ་པ་རྣམས་ལྟར་ལྟོ་གོས་སྒྲུབ་པ་ཞིག་ལ་ཟེར་རམ། ཚེ་འདིའི་བདེ་ཐབས་ལྟོ་གོས་གཏམ་གསུམ་བློས་བཏང་བ་ལ་ཟེར། སེམས་ནང་དུ་ཁུག །བྲང་སྟེང་དུ་སོར་བཞི་ཁྲོམ་ལ་སོམས་དང་། འོ་ན་ད་ཅི་བྱེད་དགོས། ལྟོ་ཡེ་མེད་པ་བྱས་ནས་མ་ཟོས་འཆི་ལ་ཁད་ཀྱི་ཡི་དྭགས་འདྲ་བ་ཞིག་བྱས།

གོས་ཡེ་མེད་པར་མུ་སྟེགས་གཅེར་བུ་པ་ལྟ་བུ་ཞིག་བྱས། ཡང་ན་སྤྲང་པོ་ལྟར་དུག་པོ་ཚེམ་བེར་གྱོན་པ་འམ། ཡང་ན་དེ་ཡང་མ་བྱས་ནས་གསང་བར་ལྷན་པ་ཞིག་གིས་འགེབས་པ་ཡང་ན་ལག་པས་བཀབ་ནས་སྡོད་དགོས་པ་ཡིན་ནམ་ཟེར་ན། ཆོས་ཕྱིར་དེ་ལྟ་བུ་ཞིག་བྱེད་ནུས་ན་ཆོས་དང་ཡང་མཐུན་ཤིན་ཏུ་ལེགས་ཏེ། དེ་འདྲ་རྗེ་མི་ལ་སོགས་སྔོན་གྱི་སྐྱེས་བུ་དམ་པ་རྣམས་ཀྱིས་ལག་ལེན་ལ་ཡང་བཏབ་འདུག །དེང་སང་དེ་ལྟ་བུ་ཕར་ཞོག །དེའི་ཆ་འདྲ་ཙམ་ཡང་བྱེད་མཁན་མེད། འོ་སྐོལ་རྣམས་ཀྱིས་ཡང་དག་པར་རྫོགས་པའི་སངས་རྒྱས་ནས་བཟུང་རིམ་པར་བྱོན་པའི་སྐྱེས་བུ་དམ་པ་གོང་མ་རྣམས་ཀྱི་རྣམ་ཐར་ལ་ཁ་མིག་ཡར་ལྟ་བྱེད་དགོས། རྗེས་འཇུག་རྣམས་ལ་ཇི་གསུངས་འདུག །དེ་ལྟར་བསྒྲུབ་དགོས་པ་ཡིན། འོ་ན་སྔོན་གྱི་རྒྱལ་བ་སྲས་བཅས་ཀྱིས་ཇི་མཛད། འོ་སྐོལ་རྣམས་ལ་ཇི་ལྟར་གྱིས་ཞེས་གསུངས་ཡོད་ཟེར་ན། དེ་སངས་རྒྱས་ཀྱི་སྐྱེས་རབས་དམ་པ་གོང་མའི་རྣམ་ཐར་མདོ་རྒྱུད་བསྟན་བཅོས་རྣམས་སུ་རྒྱས་པར་བཤད་ཡོད་མོད། འདིར་མདོར་བསྡུས་ཏེ་བཤད་ན། སྔོན་

སངས་རྒྱས་བཅོམ་ལྡན་འདས་ཀྱིས་སློབ་ལམ་གྱི་གནས་སྐབས་སུ་རྒྱལ་པོ་སོགས་ཀྱི་སྐུའི་སྐྱེ་བ་བཞེས་ཚེ་ཟས་ནོར་ལོངས་སྤྱོད་བུ་བུ་མོ་སྤྱན་ཡན་ཆད་སྦྱིན་པར་བཏང་ནས་ཚོགས་བསགས། ཐ་ན་དབུ་གཅིག་པུ་ཡང་ལན་སྟོང་ཙམ་སྦྱིན་པར་བཏང་། ཕྱིས་སྐུ་ཚེ་དེ་ལ་ཡང་རྒྱལ་སྲིད་མཆིལ་སྣབས་བཞིན་དོར་ནས་ཟས་གོས་མེད་པར་བྱས། ཆུ་བོ་ནེ་ར་ཛ་ནའི་འགྲམ་དུ་ལོ་དྲུག་དཀའ་བ་སྤྱད་ནས་སངས་རྒྱས་ནས། རྗེས་འཇུག་འོ་སྐོལ་ཡོངས་ལ་མི་ནོར་ཟས་གསུམ་ཐམས་ཅད་བློས་ཐོངས་ལ། གནས་ཤིང་དྲུང་སོགས་དང་། ཟས་བསོད་སྙོམས་གྱིས། གསོག་འཇོག་བྱས་ནས་ཟ་མི་རུང་། བྱིན་ལེན་མ་བྱས་པ་དང་། ཟས་ཞག་གིས་ལོན་པ་ཡང་ཕྱི་ཉིན་ལོངས་སྤྱོད་མི་རུང་། སོགས་ཀྱིས་བཅས་པ་མཛད། དུས་རྟག་ཏུ་ཟས་གོས་གནས་མལ་མཁོ་བའི་ཡོ་བྱད་ངན་ངོན་ཙམ་བསྟེན་དགོས་གསུངས། དེ་བཞིན་དུ་དམ་པ་གོང་མ་ཐམས་ཅད་ཀྱིས་མཛད་ནས། རྗེས་འཇུག་རྣམས་ལ་བློ་ཕུགས་ཆོས་ལ་གཏོད། ཆོས་ཕུགས་སྤྲང་ལ་གཏོད། སྤྲང་ཕུགས་ལྟོགས་གྲིར་འཆི་བ་ལ་གཏོད། འཆི་ཕུགས་བྲག་ཕུག་སྟོང་པ་ལ་གཏོད་

གསུངས། ཡང་མི་གྲལ་ནས་བུད། ཁྱི་གྲལ་སྙོགས། ལྷ་གྲལ་ཐོབ་གསུངས། ཡང་ཐེབས་མེད་རྡོ་རྗེ་སྔོན་ལ་བཏང་། ཁྲེལ་མེད་རྡོ་རྗེ་རྗེས་ལ་ཞོག །ཡེ་ཤེས་རྡོ་རྗེ་རང་དང་འགྲོགས་གསུངས། དེ་བཞིན་དུ་མཁས་གྲུབ་རཱ་ག་ཨ་སྱེས་ཀྱང་། བཀའ་རྒྱུད་གོང་མས་གསུངས་པ་ཡི། །རི་ཆོས་རྣམས་ཀྱི་དོན་རྩ་ནི། །ཚེ་འདིའི་བྱ་བ་བློས་བཏང་ནས། །ཕ་ཡུལ་སྤངས་ནས་གནས་རི་རུ། །མི་རྟག་འཆི་བས་སེམས་དངངས་ཏེ། །ལྟོ་གོས་གཏམ་ལ་གྱོང་བསྐུར་ནས། །ཆུ་འཐུང་རྡོ་མུར་རོ་གོས་གྱོན། །གསུངས། སྤྱན་སྔ་བས། གོས་སུ་བེམ་པོ་མདའ་སྡུག་གྱོན། །སྐོམ་དུ་ཚྭ་མེད་རྡོར་མེད་འཐུང་། །ཟས་སུ་གྱི་ན་ངན་ངོན་ཟོ། །བརྒྱ་ལ་མི་ཡིས་མི་མཐོང་ཞིང་། །གལ་ཏེ་མི་ཡིས་མཐོང་བ་ན། །མིག་རྩ་ཤ་ཞན་མདོག་ནག་ཅིང་། །གསང་བར་ལྷན་པ་གྱོན་པ་ཞིག །སྐྱེས་བུ་འདི་འདྲ་སྙིང་རྗེ་ཞེས། །སྙིང་རྗེའི་ཡུལ་དུ་བྱེད་པ་ཞིག །ད་ནི་ལག་ལེན་མི་འགལ་རེ། །གསུངས་པ་ལྟར་ཅི་ལ་བྱེད་མི་དགོས། སྔོན་གྱི་སྐྱེས་བུ་དམ་པ་རྣམས་ཀྱིས་ཆོས་ཕྱིར་དཀའ་སྤྱད་སྡུག་འཁུར་བྱེད་དགོས་པ་བྱུང་ན།

འོ་སྐོལ་རྣམས་ཀྱིས་དེ་བས་ལྷག་པ་ཞིག་བྱེད་མི་དགོས་ཀྱང་། དེ་དང་མཉམ་པ་འམ། གལ་ཏེ་མ་ནུས་ན། དེའི་ཆ་འདྲ་ཙམ་ཞིག་བྱ་དགོས་པ་སྨོས་ཅི་དགོས། ཚེ་སྔོན་སྡིག་པ་མང་པོ་བསགས་པའི་ཁར། ཚེ་འདིར་ཡང་སྡིག་ཟས་དང་། སྡིག་པའི་གོས་ཁོ་ན་ལ་ལོངས་སྤྱོད་ན་ནམ་ཡང་ཐར་པའི་གོ་འཕང་ཞིག་ག་ལ་འཐོབ། དེང་སང་བྱ་བཏང་སྒོམ་ཆེན་པ་སོགས་ཆོས་སྒོར་ཞུགས་ཚད་ཡོངས་ལ་ཆོས་རྣམ་དག་ཞིག་མི་འོང་བའི་གེགས་གང་གིས་བྱས་ན། ལྟོ་གོས་འདི་གཉིས་བློས་མ་ཐོངས་པ་འདི་ཀས་ལན། ལྟོ་གང་བཟང་གོན་པ་གང་དྲོ་མཛད་མཁན་ལ་ཆོས་རྣམ་དག་ཞིག་འོང་བ་རྒྱལ་བ་སྲས་བཅས་ཀྱིས་སྔར་མ་གསུངས་ཏེ། ཆོས་རྗེ་འབྲུག་པ་ཀུན་ལེགས་ཀྱི་ཞལ་ནས། ལྟོ་གོས་འདི་བློ་ཡིས་མ་ཐོངས་ན། །པོ་ཏི་མཁྱེན་པའི་དགེ་བཤེས་ཀྱང་། །བཙུན་པའི་ཁྲལ་འཇལ་མ་གཏོགས་པ། །སངས་རྒྱས་ཀྱི་བསྟན་པ་ཟིན་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །འཇིགས་རུང་གི་སྔགས་པ་ཧཱུྃ་སྒྲ་སྒྲོགས། །རྔ་སིལ་གྱི་ལྡན་པ་གཅོག་ལགས་ཀྱང་། །དོན་གྱི་ཐུགས་སྒྲུབ་ཡིན་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །

ཐོར་ཚུགས་ཚོ་ཧཱུྃ་གིས་བརྒྱན་པ་ཡི། །རྟོགས་ལྡན་གྱི་སྤྱོད་པ་མཛད་ལགས་ཀྱང་། །སྤྱོད་པ་བཞི་དང་མཐུན་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །ཁྲི་ཐོག་ན་བཞུགས་པའི་བླ་མ་ཡང་། །ཆོས་བཤད་ཀྱི་འབྲུག་སྒྲ་སྒྲོགས་ལགས་ཀྱང་། །གཞན་ཕན་གྱི་ཐུགས་རྗེ་འབྱུང་བ་དཀའ། །ལྟོ་གོས་འདི་བློ་ཡིས་མ་ཐོངས་ན། །རི་ཁྲོད་ན་གནས་པའི་སྒོམ་ཆེན་ཀྱང་། །ཕྱི་ལྟར་གྱི་སྒྲུབ་ཚུགས་མ་ལགས་པ། །ནང་དོན་གྱི་རྟོགས་པ་འཆར་བ་དཀའ། །ལྟོ་གོས་འདི་བློ་ཡིས་མ་ཐོངས་ན། །བུག་སྒོ་ལ་འཛུལ་བའི་གྲུབ་ཐོབ་ཀྱང་། །ཉམས་ཀྱི་རྩལ་སྣང་མ་གཏོགས་པ། །མཐར་ཐུག་གི་སངས་རྒྱས་འཐོབ་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །རྒྱལ་ཁམས་ཀྱི་གནས་ཆེན་སྐོར་མཁན་ཀྱང་། །ས་གུ་ཙི་རྐང་པས་གསོད་གསོད་ནས། །གནས་ཆེན་ནས་དངོས་གྲུབ་ཐོབ་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །འདུལ་བའི་གྲྭ་སར་བཞུགས་མཁན་ཀྱང་། །འཕྲལ་གྱི་བསྲུང་སྡོམ་རེམས་ལགས་ཀྱང་། །ཕུགས་ཀྱི་ཚུལ་ཁྲིམས་ཡིན་པ་དཀའ། །ལྟོ་གོས་འདི་བློ་ཡིས་མ་ཐོངས་

ན། །བརྒྱུད་པ་བཟང་པོའི་དབོན་པོ་ཡང་། །ཕྲལ་གྱི་ཟས་ནོར་བཟང་ལགས་ཀྱང་། །སངས་རྒྱས་ཀྱི་གདུང་ཚབ་ཡིན་པ་དཀའ། །ལྟོ་གོས་འདི་བློ་ཡིས་མ་ཐོངས་ན། །ཁྲིད་ཆེན་དང་ཁྲིད་ཆུང་ཞུ་མཁན་ཀྱང་། །འདིར་ལྟོས་ཀྱི་ཟས་ནོར་མ་གཏོགས་པ། །དོན་ཁྲིད་རྒྱུད་ལ་སྐྱེ་བ་དཀའ། །གསུངས། དེས་ན་བློ་ལྡན་ལྷ་ཆོས་རྣམ་དག་བྱེད་འདོད་པ་རྣམས་ཀྱིས་སྤྱིར་སྟོན་པས་གསུངས་པའི་འདུལ་བའི་གཞུང་བཞིན་དང་། སྒོས་སུ་འཕགས་པའི་རིགས་བཞིར་གནས། དམ་པ་གོང་མའི་གསུང་གི་གཏད་པ་བཞི། བུད་སྙེགས་ཐོབ་གསུམ། རྡོ་རྗེ་གསུམ་དང་བཅུ་པོ་འདི་ལ་ཕུགས་ནོར་བཅུ་ཟེར། འདི་བཅུ་དུས་རྒྱུན་དུ་བསྟེན་པ་གཅེས། དེ་ལྟར་བྱས་ནས་ཤི་སོང་ན་ཡང་ལེགས་ཏེ། གང་ཤར་རང་གྲོལ་གྱིས། བླ་མས་རྗེས་བཟུང་བྱ་བཏང་ཁྱོད། །སྔར་བྱས་ལས་ལ་འགྱོད་པ་བསྐྱེད། །མི་ཡི་ཁྱུ་ནས་རོ་ལྟར་བུད། །དཀའ་སྤྱད་སྡུག་འཁུར་དང་དུ་ལོངས། །རྣལ་འབྱོར་དབང་ཕྱུག་མི་ལ་ཡི། །སྙིང་རུས་མཐུ་ཡིས་ཇི་ལྟར་ཐོབ། །སོས་དལ་སྐྱིད་ཆོས་ཅན་རྣམས་ལ། །ཇི་ལྟར་འདུག་ལ་བསམ་བློ་ཐོངས། །ལས་ཉོན་དབང་གིས་སྐྱེས་

ཕྱིན་ཆད། །ནམ་ཡང་འཆི་བ་མཉམ་པ་ལ། །ཆོས་ཕྱིར་དཀའ་སྤྱད་དྲག་བསྟེན་ནས། །མྱུར་དུ་ཤི་ན་མི་ལེགས་སམ། །གསུངས། ༈ ཡང་བུད་མེད་བསྟེན་ན་སྡུག་སྡིག་གཏམ་ངན་གྱི་གཞི་མ། འཁོར་བ་ངན་སོང་དུ་མར་འཁྲིད་པའི་ས་མཁན་ཡིན་ཏེ། ཆུང་མ་ཞིག་ལེན་རྒྱུ་ཡིན་ན། དེའི་རིན་ལ་ནོར་རྫས་རྔམས་ཆེན་ཐམས་ཅད་སྟེར་དགོས། ཕྱུག་པོ་ཡང་དབུལ་པོར་གཏོང་། རྒུར་རྒུར་ཤ་དང་། འབྲུ་འབྲུ་ཆང་བྱས་ནས་སྟོན་ཆེན་བྱེད་དགོས། ར་ལུག་གཡག་གསུམ་བསད་བའི་རྣམ་སྨིན་གྱིས་དམྱལ་བར་སྐྱེ་བ་ཕར་ཞོག །ཤ་ཆང་གཞན་ལ་བྱིན་པའི་རྣམ་སྨིན་གྱིས་ཀྱང་དམྱལ་བ་མནར་མེད་དུ་སྐྱེ་སྟེ། དྲན་པ་ཉེར་བཞག་ལས། ཤ་ཆང་གཉིས་རང་གིས་ལོངས་སྤྱོད་པ་ལྟ་ཅི་སྨོས། སྦྱིན་པར་བྱིན་ཀྱང་དམྱལ་བ་ངུ་འབོད་དུ་སྐྱེ་གསུངས། ཤ་ཆང་མང་པོ་བསགས་ནས་སྟོན་མོ་ཆེན་པོ་བྱེད་པ་རྣམས་ཀྱིས་སྐབས་རེར་བསམ་མནོ་ཐོངས་དང་བཟང་། ཆགས་པ་སྤྱད་པས་བདེ་བ་ལྟར་སྣང་ཡང་། དོན་དུ་སྡུག་བསྔལ་ལ་བདེ་བའི་མིང་བཏགས་ནས་བདེ་བར་བཟུང་བ་ཡིན་པས་བདེ་བ་དངོས་མིན།

དཔེར་ན་དུག་དང་འདྲེས་པའི་ཟས་དེ་ཟོས་ནས་བཟུང་སྡུག་བསྔལ་གྱི་འགོ་ཚུགས་པ་ལྟར། ཆགས་པ་སྤྱད་ནས་བཟུང་སྡུག་བསྔལ་གྱི་འགོ་ཚུགས་སོང་། དཔེར་ན་དུག་དང་འདྲེས་པའི་ཟས་དེ་ཟ་དུས་སྡུག་བསྔལ་ཕྲ་བས་བདེ་བ་ལྟར་སྣང་རུང་། ཕྱི་ནས་སྡུག་བསྔལ་ཆེ་རུ་སོང་ནས་ལུས་སེམས་ཀྱིས་མྱོང་བ་ལྟར། འདོང་ཆགས་སྤྱོད་དུས་སྡུག་བསྔལ་ཕྲ་བས་བདེ་བ་ལྟར་སྣང་རུང་། ཕྱི་ནས་ལུས་སྟོབས་ཤོར། གཟི་མདངས་ཉམས། གྲང་ནད་བསྐྱེད། རོ་སྨད་ན། ཁྱད་པར་འབྲས་བུ་སྐྲངས། འགའ་རེ་རྨ་ངན་པ་འགོས་ནས་སྡུག་བསྔལ་ཆེན་པོ་འབྱུང་། འདོད་ཆགས་ཁོ་རང་བདེ་བ་ཡིན་ན་སྤྱད་ཀྱིན་བདེ་བ་ཆེར་འགྲོ་དགོས་སྟེ། སྤྱད་ཀྱིན་སྡུག་བསྔལ་ཆེར་བསྐྱེད་པ་དེ་སྡུག་བསྔལ་ཡིན་པའི་རྟགས་ཡིན། དེས་ན་མདོ་ལས། ཡུད་ཙམ་བདེ་ལ་ཆགས་པ་ནི། །འབར་བའི་ཁྲི་ལ་ཆགས་པའོ། །གསུངས། ཆགས་པ་སྤྱད་པའི་རྗེས་སུ་སྡུག་བསྔལ་གྱི་གཞི་མ་བུ་བུ་མོ་མང་པོ་འོང་། དེ་ཀུན་གྱི་ཁ་མི་སོས། རྒྱབ་མི་ཁེབས་པས་སེམས་ཁྲལ་ཆེ། ལྟོ་རྒྱབ་གཉིས་ཀྱི་ཕྱིར་ཁེ་ཚོང་ཞིང་ལས་འཚོ་སྐྱོང་སོགས་བྱས། ཚ་གྲང་བཀྲེས་

སྐོམ་སོགས་མི་འདོད་པའི་སྡུག་བསྔལ་དུ་མ་འབྱུང་། བརྣབ་སེམས་གནོད་སེམས་ངག་འཁྱལ་སོགས་མི་དགེ་བཅུ་ཉིན་རེ་བཞིན་བྱེད་དགོས། བྱས་ན་ཚེ་ཕྱི་མར་དམྱལ་བ་མ་གཏོགས་གཞན་དུ་འགྲོ་ས་མེད། ཁྱད་པར་བྱ་བཏང་སྒོམ་ཆེན་པས་ཕྱག་རྒྱ་མ་བསྟེན་པ། ཕུང་བའི་གཞི་མ་ཞིག་བསྟེན་པ་ཡིན། ཕྱག་རྒྱ་མ་བསྟེན་ཕྱིན་ཆད་རྒྱུ་ནོམ་པ་དགོས། ཕྱག་རྒྱ་མ་བསྟེན་པ་དང་བྱ་བཏང་བྱེད་པ་གཉིས་མི་འོང་། ནོར་རྫས་ས་ཞིང་ཁང་པ་སོགས་གསར་དུ་བསགས་དགོས། དེ་གསར་དུ་གསོག་རྒྱུ་ཞིག་གི་དབང་དུ་སོང་ན། ཚེ་འདི་པ་བྱེད་དགོས། ཚེ་འདི་པ་བྱས་ན་སྡིག་སྡུག་གཏམ་ངན་གསུམ་རྒྱུན་མི་འཆད་པས། བདེ་བའི་གོ་སྐབས་མེད། ཆོས་མི་དགོས་འཇིག་རྟེན་གྱི་བདེ་བ་ཡང་མི་འོང་། དེས་ན་མདོ་ལས། བལྟས་ཤིང་གཏམ་ཡང་ཕོངས་གྱུར་ན། །དེ་ཉིད་བསྟེན་པ་སྨོས་ཅི་དགོས། །གསུངས་པ་དེ་ཐུགས་བདེན་ཏེ། དེང་སང་ཁྲིམས་ལྡན་འགའ་རེས་བུད་མེད་ལ་བལྟས་གཏམ་ཞིག་སྨྲས་ཀྱང་། འགའ་རེས་དགེ་སློང་དེས་ཀྱང་སྡོམ་པ་ལ་ཁྲིག་ཁྲིག་ཞིག་མེད་ཚོད་རེད་ཟེར། བསྙེན་བཀུར་

སྙན་གྲགས་ཆེ་བ་ཡང་ཉམས་པར་འགྱུར། བླ་མ་སྐྱེས་བུ་དམ་པ་ཡིན་ཡང་བསྐུར་བ་བཏབ། བསྙེན་བཀུར་མི་འབྱུང་། བསྟན་འགྲོའི་དོན་ཆེན་པོ་འོང་བ་ཕར་ཞོག །རང་དོན་ཡང་མི་འོང་བ་མཐོང་ཐོས་མང་། སྔོན་ཨ་མདོ་བླ་རྒན་ཞིག་གིས་བུད་མེད་གཅིག་ལ་ཆགས་པ་སྤྱད་པས་བུད་མེད་དེ་ལ་རྨ་ངན་པ་ཞིག་ཡོད་པ་ཞག་གཅིག་ལ་འགོས། ཕྱིས་སྨན་པས་སྨན་བཏང་། ཁོ་རང་གིས་མགོ་རྒུར་ནས་གསང་མཚན་ལ་སྔགས་བཏབ་ཚེ། གཞན་རྣམས་ཀྱིས་དེའི་ལན་མོ་བྱས་དཔེ་འཐེན་ཚད་དུ་བཞག་ནས་ཧ་བགད་བྱེད་པ་ཞིག་བྱུང་སྐད། དེས་ན་རབ་བྱུང་དགེ་སློང་བྱ་བཏང་སྒོམ་ཆེན་བླ་མ་རྣམས་ཀྱིས་དུས་རྒྱུན་དུ་ཚུལ་ཁྲིམས་བསྲུངས་ཀྱང་དཀོར་གྱིས་ཚོས་ནས། སྐབས་རེར་གསང་ནས་བུད་མེད་རེ་བསྟེན་རུང་ཆོག་སྙམ་ནས་བསྟེན་ན། ནད་ངན་འདྲ་འགོས་ནས་གསང་མི་ཚུགས་པར་སྨན་པ་བོས་སྔགས་འདེབས་དགོས་པ་ཚོ་འབྱུང་ཉེན་ཆེ་བས། ངོ་ཚ་ཁྲེལ་ལ་འཛེམ་པ་རྣམས་ཀྱིས་དེ་འདྲའི་གཏམ་རྒྱུད་རྣམས་སོམས་ལ་ཤིན་ཏུ་གཟབ་འཚལ། ཚེ་ཕྱི་མར་དམྱལ་བ་སོགས་སུ་སྐྱེས་ནས་སྡུག་བསྔལ་དཔག་མེད་མྱོང་དགོས་ཚུལ་ནི།

བུ་སྟོན་རིན་པོ་ཆེའི་ཞལ་ནས། ལོག་པར་གཡེམ་པས་དམྱལ་བ་བསྡུས་འཇོམས་སུ། །གསལ་ཤིང་འབར་བར་རོ་སྨད་འབིགས་པར་འགྱུར། །དེ་ནས་མི་རུ་སྐྱེས་ཀྱང་མ་ནིང་འགྱུར། །རྨི་ལམ་བུད་མེད་སྤྱད་བའི་རོ་མྱངས་ན། །དམྱལ་བ་པདྨ་ལྟར་གས་ནང་དུ་ནི། །བུམ་པར་འཚོད་ཅིང་གཏུན་གྱིས་འཚོག་གྱུར་ན། །དངོས་སུ་སྤྱད་པ་ལྟ་ཡང་སྨོས་ཅི་དགོས། །བུད་མེད་མཐོང་ནས་ཚུལ་མིན་ཡིད་བྱེད་པ། །མིག་ནི་ཟངས་ཞུན་འབར་བས་སྲེག་པར་བྱེད། །བུད་མེད་གླུ་དབྱངས་ཐོས་པས་ཆགས་གྱུར་པ། །རྣ་བར་རོ་མྱགས་བསྐོལ་བ་རྡུག་པར་བྱེད། །བུད་མེད་གླུ་དབྱངས་གར་ལ་ཆགས་པ་ཡི། །ཁུ་བ་ཕྱུང་ནས་འགྱོད་པར་མི་བྱེད་པ། །ལྕགས་ཀྱི་མེ་མདག་ཆར་བ་ལུས་ལ་འབབ། །གཞན་གྱི་ཆུང་མ་ལ་སྤྱད་རྫུན་སྨྲ་ན། །ངུ་འབོད་ཆེན་པོ་མུན་པས་ཀུན་ཁྱབ་པར། །སྤྱི་བོ་ནས་ཕུག་ལྕེ་ཕྱུངས་བཅད་ཀྱང་ནི། །སྐད་ཅིག་རེ་རེར་སྐྱེ་ཞིང་གཅོད་པར་བྱེད། །མི་རུ་སྐྱེས་ཀྱང་དམུས་ལོང་འོན་པ་དང་། །ལམ་ཟན་སློང་བ་དག་ཏུ་སྐྱེ་བར་འགྱུར། །དགེ་བསྙེན་མ་ལ་ལོག་པར་གཡེམ་པ་ཡིས། །རབ་ཏུ་

ཚ་བར་ཐལ་བའི་ལྷག་མ་ཡང་། །མེད་པར་སྲེག་ཅིང་ཚེ་རབས་བཞི་བརྒྱ་རུ། །ཟ་མ་དག་ཏུ་སྐྱེ་བར་འགྱུར་བ་ཡིན། །ཞེས་དང་། བུད་མེད་མཚན་མ་སྙན་དངགས་ཀྱིས་བསྟོད་པ། །སྐྱེ་བ་ལྔ་བརྒྱར་མངལ་གྱི་སྲིན་བུར་སྐྱེ། །ཆགས་པ་སྤྱད་ཅིང་རེག་པ་སྨོས་ཅི་དགོས། །ཞེས་མདོ་དང་འདུལ་བ་རྣམས་ནས་རྒྱས་པར་གསུངས་པའི་དོན་ཚིག་ཉུང་དུར་བསྡུས་ནས་གསུངས་པར་གདའ། སློབ་དཔོན་བཻ་རོ་ཙཱ་ནའི་ཞལ་ནས། བུད་མེད་བྱ་བ་བཙན་དུག་ཧ་ལ་ཡིན། །སེམས་ཅན་གང་གིས་ཟོས་ཀྱང་འཆི་བ་ཡིན། །བུད་མེད་བྱ་བ་ལས་ཀྱི་སྲིན་མོ་ཡིན། །སེམས་ཅན་གང་གིས་འཁོར་ཡང་ལ་འུར་འཆི། །བུད་མེད་བྱ་བ་དམྱལ་བའི་འདམ་རྫ་བ་ཡིན། །སེམས་ཅན་གང་གིས་འཁོར་བ་འདམ་ལ་འཛིན། །བུད་མེད་བྱ་བ་འཁོར་བའི་བཙོན་ར་ཡིན། །གང་གིས་འབགས་ཀྱང་ཐར་བ་འཐོབ་མི་སྲིད། །བུད་མེད་བྱ་བ་བདུད་ཀྱི་མྱ་ངན་ཡིན། །གང་གིས་འབྲེལ་ཀྱང་སྡུག་བསྔལ་ཚད་མེད་མྱོང་། །བདག་གི་སེམས་ལ་འདོད་ཆགས་ས་བོན་མེད། །སེམས་ལ་མེད་པར་ལུས་ལ་ཅི་ལ་སྐྱེ། །ཞེས་དང་། ཁ་རག་སྒོམ་ཆུང་པས། བཟར་མེད་ཁྱིམ་

ཐབས་བྱས་པ་ན། །དོགས་མེད་བུ་ཚ་བྱུང་ནས་ནི། །ཁྲེལ་མེད་སྤྲང་པོ་བྱ་དགོས་ཀྱི། །གྲོས་ཉེས་ཆུང་མ་མ་ལེན་ཨང་། །ཞེན་ཆགས་བྲལ་བའི་དམ་པ་ལ། །ལས་ཀྱི་ཕྱག་རྒྱའི་དགོས་པ་མེད། །ཞེན་ཆགས་སེམས་དང་འདྲེས་པ་ཡི། །ཕྱག་རྒྱས་ངན་འགྲོར་འཁྲིད་དོ་ཨང་། །གསུངས། འབྲུག་པ་ཀུན་ལེགས་ཀྱིས། སྡུག་བསྔལ་བུད་མེད་བསྟེན་པའི་བདེ་བ་དེ། །དབང་གསུམ་བསྐུར་དོན་ཡིན་ཞེས་གསུངས་ནའང་། །དེ་བསྟེན་ནུས་པ་ཐོབ་པ་ཡོད་དམ་ཀྱེ། །རྩལ་མེད་རྟ་རྒོད་ཞོན་པ་ཨའུ་མཚར། །ཞེས་དང་། དབང་གསུམ་དངོས་གྲུབ་སྟེར་བའི་རིག་མ་དེ། །མ་གསང་སྒྲུབ་དང་ས་སྤྱོད་སྡུག་བསྔལ་བསྐྱེད། །བུ་མོ་བཙུན་མའི་འཁོར་གྱིས་བསྐོར་བ་འདིས། །རྩ་ལྟུང་བདུན་པ་ཕོག་གོ་སྙིང་གཏམ་ཡིན། །ཞེས་དང་། རང་སེམས་བདེ་ཆེན་གྱི་ཁང་བཟང་ན། །རང་སྣང་འགགས་མེད་ཀྱི་མཁའ་འགྲོ་བཞུགས། །ཐབས་མཆོག་ཁྱད་པར་ཅན་ཞིག་དེ་ན་གདའ། །ཆགས་པས་བུད་མེད་མ་བསྟེན་ཨང་། །གསུངས། འོ་ན་ཇི་ལྟར་བྱེད་དགོས་ཟེར་ན་ཆོས་བཞིན་བྱེད་ན་རྗེ་བཙུན་མི་ལ་རས་པ་ལྟར།

ཆགས་བྲལ་སྟོང་ཉིད་ཀྱི་ཕྱག་རྒྱ་བསྟེན་དགོས་ཏེ། རྗེ་མི་ལས། སྤྱིར་ཡང་བུད་མེད་ཆགས་པའི་རྒྱུ། །མཚན་ལྡན་རིག་མ་ཤིན་ཏུ་དཀོན། །ལམ་ཕོ་ཉའི་བགྲོད་པ་ངོ་མཚར་ཡང་། །ཁྱོད་སྐྱེ་བོ་ཡ་ཀའི་སྒྲོ་བསྐུར་མཆི། །ཡོངས་དེ་ཕྱིར་ཕྱག་རྒྱ་བསྟེན་པ་དཀའ། །ང་ཆགས་བྲལ་སྟོང་པའི་བུད་མེད་ལ། །སྙིང་རྗེའི་མདངས་ཅན་བཞིན་བཟང་མ། །བྱམས་པའི་འཛུམ་ཀྱིས་ཡིད་འཕྲོག་ཅིང་། །སྣ་ཚོགས་དཀར་དམར་རེའུ་འབྲི་ལ། །གཉིས་མེད་ཐུག་ཕྲད་དར་གྱིས་གཡོགས། །རོ་སྙོམས་སྤྱོད་པའི་ཀ་ཤ་ཅན། །ཉམས་དགའ་བ་བཞིའི་ལན་ཚར་ལ། །དུ་མ་རོ་གཅིག་དོ་ཤལ་ཅན། །གཞི་གཉུག་མའི་དོན་རྟོགས་མཚར་སྡུག་ལྡན། །དེ་རྣལ་འབྱོར་ང་ཡི་གྲོགས་མོ་ཡིན། །ཁྱེད་འཁོར་བའི་ཁྱིམ་ཐབས་ང་མི་འདོད། །གསུངས། བུད་མེད་ལ་སྤྱད་ནས་ཡོན་ཏན་ཞིག་ལེན་རྒྱུ་ཡོད་ན་ཁྱིམ་པ་རྒད་པོ་དང་། སེར་ཁྱིམ་པ་འགའ་རེས་ཚེ་གང་པོ་བྱས་སྟེ། མི་ཁ་གཏམ་ངན་གྱོང་དང་ཕམ་ཁ་མ་གཏོགས་ནང་ནས་ཡོན་ཏན་ཏིལ་འབྲུ་ཙམ་ཡང་ལེན་རྒྱུ་མ་བྱུང་། བུད་མེད་ལ་སྤྱད་སྤྱད་ནས་སུ་ཡང་མཐོ་རིས་ཐར་པ་ཐོབ་ཟེར་བ་ཞིག་མི་

སྣང་། དེས་ན་བློ་གྲོས་ཅན་གྱིས་བུད་མེད་བསྟེན་པའི་ཉེས་དམིགས་མདོ་རྒྱུད་དུ་མ་ནས་གསུངས་པའི་ཚིག་དོན་རྣམས་ཡང་ཡང་ཡིད་ལ་བསམས་ནས། ལྷའི་བུ་མོ་མཐོང་ཡང་ཆགས་པ་མི་སྐྱེ་བར་ཚུལ་ཁྲིམས་བསྲུངས་བའི་ཕན་ཡོན་མ་བསྲུངས་བའི་ཉེས་དམིགས་མཐའ་ཡས་གསུངས་པ་སོམས་ལ། མིག་འབྲས་བཞིན་ཚུལ་ཁྲིམས་བསྲུངས་ལ་མདོ་སྔགས་ཀྱི་ཆོས་གང་ཡང་ཉམས་སུ་ལོངས། ཀུན་མཁྱེན་ཐུ་བཀྭན་རིན་པོ་ཆེས། སྔགས་རྙིང་འགའ་རེས་སྔོན་གྱི་དཔེ་ཧྲུལ་སེར་གོག་མ། ད་དུང་ཟད་ཟད་བར་དུ་ཀློགས་གསུངས་པ་ལྟར། འདོད་ཡོན་ཤ་ཆང་བུད་མེད་ལ་སྤྱོད་པ་སྔགས་སུ་རློམས་པའི་སྔགས་པ་དུད་དྲེགས་ཅན་རྣམས་ཀྱིས་ད་དུང་གསང་མཚན་ཟད་ཟད་བར་དུ་ཆགས་པ་སྤྱོད་ལ། གཞན་ཆགས་བྲལ་གྱི་རྣལ་འབྱོར་པ་རྣམས་ལ་ཐེག་དམན་ཉན་ཐོས་པ་ཚོ་ཞེས་ཁ་མ་གཏོང་། སྔགས་ན་ཐིག་ལེ་ཡུངས་འབྲུ་ཙམ་ཉམས་ན། མཁའ་འགྲོ་འབུམ་ཕྲག་ངུ་ཙི་ལྡིར་གསུངས། དེ་བདེན་ན་དེང་སང་དབྱར་གྱི་གླང་དང་། སྟོན་གྱི་ཁྱི་ལྟར་སྤྱོད་པ་རྣམས་ཀྱིས་ལས་ལ་མཁའ་འགྲོ་ཀུན་གྱིས་ཧས་

རིང་པོ་འདེབས་ཀྱི་ཡོད་ཚོད་ན་འདུག་པས། ཐིག་ལེ་ཡར་འདྲེན་མི་ནུས་པས་བཤགས་པ་རེ་གྱིས་དང་བཟང་ངོ་།། ༈ །།སྨྲས་པ། ཉི་མ་བཞིན་དུ་ཀུན་ལ་ཕན་ཐོགས་པའི། །དཔལ་ལྡན་བླ་མས་འགྲོ་ཀུན་བརྩེ་བས་སྐྱོངས། །སྐབས་སྐབས་སྙན་པའི་གླུ་རེ་ལེན་པ་དེ། །རང་གཤིས་ཡིན་ཀྱང་གཞན་གྱིས་མཉན་པར་འོས། །ཚེ་རབས་འཁོར་བ་ཐོག་མ་མ་མཆིས་པས། །ཕ་མ་མ་བྱས་སེམས་ཅན་གཅིག་ཀྱང་མེད། །བྱས་ཚེ་ཚེ་འདིས་ཕ་མས་བསྐྱངས་པ་ལྟར། །ཡང་ཡང་དྲིན་གྱིས་བསྐྱངས་པ་ཤ་སྟག་ཡིན། །དྲིན་ཅན་འགྲོ་ལ་ཕན་ཞིག་མི་ཐོག་རུང་། །བསད་ནས་ཟ་བ་ཁྲེལ་མེད་རྣམས་ཀྱི་ལུགས། །ར་ལུགས་གྲི་ཡིས་གསོད་པ་སྙིང་རེ་རྗེ། །སྡིག་ཟས་ཕ་མའི་ཤ་ལ་མ་རྔམས་ཤིག །དོན་ཡལ་ནོར་ཟད་ཐོས་བསམ་སྒོམ་ཉམས་ཤིང་། །ཁྱད་པར་སྡོམ་པ་དམ་ཚིག་ཉམས་པའི་རྒྱུ། །སྨྱོ་ཆུ་ཆང་གི་ཉེས་དམིགས་དྲན་བཞིན་དུ། །རྩྭེ་རྩེའི་ཟིལ་པ་ཙམ་ཡང་བཏུང་མི་བྱ། །སྣམ་བུ་འབུ་རས་གོས་ཆེན་ལ་སོགས་པའི། །གོས་ཀྱི་ཕྱིར་དུ་སྲོག་ཆགས་གྲངས་མེད་འཆི། །སྡིག་པའི་གོས་ཀྱི་ཉེས་དམིགས་ལེགས་བསམས་ནས། །

ངན་ངོན་གོས་གྱོན་གཏུམ་མོའི་བདེ་དྲོད་སྦོར། །འཇིག་རྟེན་ཁྱིམ་ཐབས་བུད་མེད་ལེན་པ་དེ། །སྡིག་སྡུག་གཏམ་ངན་ཐམས་ཅད་སྐྱེད་པའི་གཞི། །དེ་ཕྱིར་གཅིག་པུར་དབེན་པར་སྒོམ་སྒྲུབ་གྱིས། །ལུས་སེམས་དགའ་བདེས་མྱོས་ཚེ་སྐྱིད་གླུ་ལོངས། །སྐྱ་མིན་སེར་མིན་འདི་མེད་ཕྱི་མེད་ཀྱི། །བྱ་བ་ངན་པ་ནམ་ཡང་མ་བྱེད་ཅེས། །སྙིགས་དུས་སྐྱ་སེར་ཕོ་མོ་ཐམས་ཅད་ལ། །སྐད་གསེང་མཐོན་པོས་བཤད་བཞིན་མི་སྡོད་འགྲོ། །འདི་འདྲའི་མགུར་དབྱངས་ལེན་བཞིན་རི་ཁྲོད་ལ། །འགྲོ་བའི་མི་ལ་སྐྱིད་པོ་ཡོང་བར་སྣང་། །དེ་ཕྱིར་སྐལ་བཟང་ལས་འཕྲོ་ཅན་གྱི་མིས། །རི་ཁྲོད་དབེན་པ་འགྲིམས་ལ་ལྷ་ཆོས་གྱིས། །ཞེས་པའང་བར་སྐབས་ཀྱི་ཚིགས་སུ་བཅད་པའོ།། ༈ །།ཁྱད་པར་ལུས་འདི་སྡུག་བསྔལ་ཐམས་ཅད་འདྲེན་པའི་རྩ་བ་ཡིན་ཏེ། ལུས་འདི་མེད་ན་ལྟོ་གོས་སོགས་འདོད་ཡོན་ལྔས་གང་ཡང་མི་དགོས། དེ་མ་དགོས་ན་སྡིག་པ་མི་བྱེད། སྡིག་པ་མ་བྱས་ན་སྡུག་བསྔལ་མི་འབྱུང་། ལུས་འདི་བླངས་ཕྱིན་ལྟོ་གོས་སོགས་འདོད་ཡོན་ཅི་ནས་ཀྱང་དགོས། དེ་དགོས་ཕྱིན་

སྡིག་པ་ཅི་ནས་ཀྱང་བྱེད། སྡིག་པ་བྱས་ཕྱིན་ཚེ་འདི་ཕྱི་གཉིས་ཀར་སྡུག་བསྔལ་ཅི་ནས་ཀྱང་འབྱུང་། དཔེར་ན་ལུས་ལ་རྣག་ཁྲག་ལ་སོགས་པའི་རྨ་འབྲས་ཆེན་པོ་ཞིག་ཡོད་ན། དེ་དང་མ་བྲལ་བར་དུ་ན་ཟུག་འབྱུང་བ་དང་། ལྕི་བའི་ཁུར་པོ་ཞིག་གིས་ནོན་ན། དེ་མ་ཕོག་བར་དུ་ནམ་ཡང་བདེ་བ་ཞིག་མེད་པ་ལྟར། ལས་དང་ཉོན་མོངས་པའི་དབང་གིས་འཁོར་བའི་ནང་འདིར་ལུས་ཤིག་བླངས་ཕྱིན། དེ་དང་མ་བྲལ་བར་དུ་བདེ་བ་ཞིག་མི་འབྱུང་སྟེ་ལུས་འདིས་ཚེ་འདིར་ན་རྒ་འཆི་བ་སོགས་སྡུག་བསྔལ་དུ་མ་འདྲེན། ཕྱི་མར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་སྟེང་དུ་འདྲེན་པ་ཡིན། དེས་ན་སྤྱིར་འཁོར་བའི་ཉེས་དམིགས་ཁྱད་པར་ལུས་འདིའི་ཉེས་དམིགས་ཐམས་ཅད་ཤེས་པའི་བྱང་ཆུབ་སེམས་དཔའ་རྣམས་ཀྱིས་ལུས་འདི་གོས་རྒྱན་ལྟར་རྒྱན་དུ་བཟུང་ནས་བྱི་དོར་མི་བྱེད་པར། རྨ་འབྲས་སམ་ཁུར་ལྕི་བ་ལྟར་ཁུར་དུ་བཟུང་། ལུས་འདི་དོར་ནས་སྐྱེ་རྒ་ན་འཆི་སོགས་སྡུག་བསྔལ་གྱི་མིང་ཙམ་ཡང་མི་ཐོས་པའི་འཕགས་པའི་གོ་འཕང་ཞིག་འཐོབ་ན་སྙམ། དེ་འཐོབ་ཐབས་ཆོས་སྒྲུབ་པའི་ཕྱིར་ལུས་འདི་འདོར་བ་ལ་ཆགས་པ་ཕར་

ཞོག །ཁུར་པོ་ཞིག་ཕོག་པ་ལྟར་སྤྲོ་བ་ཡིན། འོ་སྐོལ་རྣམས་ཀྱིས་ཀྱང་དེ་ལྟར་ཤེས་ན། གཅིན་སྐྱགས་སྣབས་ལུད་སོགས་མི་གཙང་བའི་རྫས་སུམ་ཅུ་སོ་གཉིས་ཀྱིས་གང་བའི་ཕུང་པོ་མི་གཙང་རྫས་ཀྱི་རྐྱལ་བ་འདི་བཟང་པོ་ཕན་འདོགས་ཅན་དུ་འཛིན་པའི་བློ་ལོག་ནས་དགྲ་ལྟར་མཐོང་ཡོང་། དེ་ལྟར་ཞེན་པ་ལོག་ན་ལུས་ཀྱི་གཅེས་འཛིན་བློས་ཐོངས། ཕྱིན་ཆད་འཁོར་བའི་གནས་འདིར་སྐྱེ་འདོད་ཀྱི་བློ་མི་སྐྱེ་བར། ད་རེས་ནས་བཟུང་འདི་ལས་ཐར་ནས་སྡུག་བསྔལ་གྱི་མིང་ཙམ་ཡང་མེད་པའི་པདྨོ་ལས་རྫུས་ཏེ་སྐྱེ། ལུས་མཚན་དཔེས་བརྒྱན་པའི་སྐུ། ངག་ཡན་ལག་དྲུག་ཅུའི་གསུང་། སེམས་གསལ་སྟོང་ཆོས་ཀྱི་སྐུ་འཐོབ་པའི་སྐལ་བ་ཞིག་བྱུང་ན་སྙམ་པས་ཐར་འདོད་ཀྱི་བློ་བཅོས་མ་མ་ཡིན་པ་ཞིག་སྙིང་ཁོང་རུས་པའི་གཏིང་ནས་སྐྱེ། ཚེ་འདིར་འཁོར་བ་ལས་ཐར་ཐབས་ཀྱི་ཆོས་ལ་འབད་པ་མ་གཏོགས། འཁོར་བའི་ལུས་ལོངས་སྤྱོད་གང་ལ་ཡིད་སྨོན་སྐད་ཅིག་ཙམ་ཡང་མི་སྐྱེ་བར་ལུས་ཀྱི་གཅེས་འཛིན་ལྟོ་གོས་གཏམ་གསུམ་ཐམས་ཅད་འཕོངས་ཕྱིས་པའི་རྡོ་ལྟར་བློས་བཏང་ནས། ཆོས་མ་གཏོགས་གཞན་

བསམ་རྒྱུ་ཅི་ཡང་མེད། ཚེ་བློས་ཐོངས་ན་ཟས་ནོར་སྒྲུབ་བློ་གཏན་ནས་མི་སྐྱེ། སྒྲུབ་བློ་མ་སྐྱེས་ན་ཉོན་མོངས་པ་མི་ལྡང་། ཉོན་མོངས་པ་མ་ལངས་ན་ལས་ངན་མི་གསོག །ལས་ངན་མ་བསགས་ན་འཁོར་བར་མི་སྐྱེ། འཁོར་བར་མ་སྐྱེས་ན་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་ཡོང་། དེས་ན་རྒྱལ་བ་གོང་མ་རྣམས་ཀྱིས་ཚེ་བློས་ཐོངས་ན་ཐར་པའི་ལམ་སྣ་ཟིན་གསུངས་པའི་རྒྱུ་མཚན་དེ་ཡིན། དེ་ལྟར་མ་ཤེས་ན་ལུས་ལ་གཅེས་འཛིན་སྐྱེ། གཅེས་འཛིན་གྱི་དབང་གིས་ལྟོ་གང་བཟང་གོན་པ་གང་དྲོ་སོགས་འདོད་ཡོན་ལྔ་སྒྲུབ་བློ་སྐྱེ། དེ་སྐྱེས་ན་སྤྱིར་འདོད་ཡོན་ལྔ་དང་ཁྱད་པར་ལྟོ་གོས་བསྒྲུབ་དགོས། དེ་བསྒྲུབ་རྒྱུའི་དབང་དུ་སོང་ན་ཆགས་སྡང་སོགས་ཉོན་མོངས་པ་ཀུན་ལྡང་། ལངས་ཕྱིན་མི་དགེ་བཅུ་སོགས་ལས་ངན་པ་གསོག་ལས་ངན་པའི་དབང་གིས་སྤྱིར་འཁོར་བ་དང་ཁྱད་པར་ངན་སོང་གསུམ་དུ་སྐྱེས་ནས་ཐར་བའི་དུས་མི་འབྱུང་། དེས་ན་བླ་མ་སྐྱེས་བུ་དམ་པ་རྣམས་ཀྱིས་ཚེ་བློས་མ་ཐོངས་ན་ཇི་ཙམ་དགེ་བ་ལ་འབད་པ་བྱས་ཀྱང་ཐར་པ་ནམ་ཡང་མི་འཐོབ་ཅེས་གསུངས་པ་ལ་མཁས་པ་ཞིག་གིས་དཔྱད་ཤེས་

ན་གོ་རྒྱུ་ཆེན་པོ་ཡོད། འོ་ན་ཆོས་ཀྱི་གནད་གཅིག་མ་རྟོགས་ན་ཚེ་བློས་ཐོངས་པ་ཙམ་གྱིས་གང་ཡང་མི་ཡོང་། དེས་ཡོང་ན་སྤྲང་པོ་རྣམས་ཀྱིས་སྔར་ནས་ཐར་པ་ཐོབ་པར་རིགས་ཟེར་ན། དེ་གཉིས་ཕྱིའི་རྣམ་འགྱུར་འདྲ་རུང་ནང་གི་བསམ་ཚུལ་འདྲ་དོགས་མེད། སྤྲང་པོས་མ་རྙེད་པ་མ་གཏོགས་རྙེད་ན་དགའ་བ་ལ་མ་རྙེད་ན་སེམས་ཁྲལ་ཆེ། ཚེ་བློས་བཏང་གིས་རྙེད་ཀྱང་དགའ་བ་མེད། རྙེད་ཚད་མི་ལེན། མ་རྙེད་ཀྱང་འགྱོད་པ་མེད་རྙེད་པ་མི་འཚོལ། ཚེ་བློས་ཐོངས་ཟེར་བ་མ་གཏོགས། ཚེ་ཕྱི་ཐོངས་གསུངས་པ་མེད། དཔེར་ན་ནོར་བུ་དང་མཆིང་བུ་གཉིས་དབྱིབས་མཚུངས་ཀྱང་། དགོས་འདོད་འབྱུང་མི་འབྱུང་གི་ཁྱད་ཆེ་བ་ལྟར། ཚེ་བློས་བཏང་དང་སྤྲང་པོ་གཉིས་ཕྱིའི་རྣམ་འགྱུར་མཚུངས་ཀྱང་། ནང་གི་བསམས་ཚུལ་མི་གཅིག་པས་ཐར་པ་འཐོབ་མི་འཐོབ་ཀྱི་ཁྱད་པར་གནམ་ས་བས་ཀྱང་ཆེ། དེས་ན་ཚེ་བློས་བཏང་བ་དང་སྤྲང་པོ་གཉིས་གཅིག་སྙམ་ནས། ཁ་ནས་ཀྱང་དེ་སྐད་སྨྲས་པས་ཆོས་མ་ཤེས་པའི་རང་མཚང་ཕྱིར་བསྟན་པ་ཡིན་པས་གཞན་མ་སེམས། ཚེ་བློས་བཏང་པ་དང་སྤྲང་པོ་ཁྱད་མེད་

སྨྲས་ན་སྔོན་ཡང་དག་པར་རྫོགས་པའི་སངས་རྒྱས་འཁོར་ཉན་ཐོས་དགྲ་བཅོམ། རྒྱ་བོད་ཀྱི་སྐྱེས་ཆེན་དམ་པ་ཐམས་ཅད་ཀྱང་སྤྲང་པོ་དང་ཁྱད་པར་མེད་ཅེས་དོན་གྱིས་སྐུར་བ་བཏབ་པར་འགྱུར། སངས་རྒྱས་བྱང་སེམས་ཀུན་གྱིས་ཚེ་བློས་ཐོངས་ཞེས་ལན་གྲངས་དུ་མར་གསུངས་པ་རྣམས་ཀྱང་སྤྲང་པོའི་རྒྱུ་ཙམ་བསྟན་པ་མ་གཏོགས། ཐར་པའི་རྒྱུ་རུ་དོན་གྱིས་མི་འགྱུར་ཞེས་དགག་པ་བཏང་བར་འགྱུར། དེ་ཡིན་ན་ཚེ་བློས་མ་ཐོངས་བ་ཐམས་ཅད་དེ་ལས་ཁྱད་འཕགས་སུ་ཁས་ལེན་དགོས། དེ་ཁས་ལེན་ན་ཁྱོད་དངོས་འགལ་གྱི་ཁུར་གྱིས་ནོན་ནས་འོག་ནས་འཁུན་དགོས་པའི་ཚོད་ཙམ་འབྱུང་ཡང་། ད་དེ་ཙམ་གྱིས་ཞོག་ལ་ཐོངས། ཡང་དེང་སང་ལྟོ་གང་བཟང་གོན་པ་གང་དྲོ་བྱེད་པ་འགའ་རེས། རྗེ་སྐལ་ལྡན་རྒྱ་མཚོས། ལྟོ་གང་བཟང་གོན་པ་གང་དྲོ་སྙམ། །ཆོས་བཟང་པོ་ཞར་དང་ཞོར་ལ་ལུས། །གསུངས་པ་སོགས་མ་ཤེས། གཞན་དབེན་པར་འཚོ་བ་དཀའ་ཐུབ་ལ་བརྟེན་ནས་དམ་པའི་ཆོས་ཀྱི་སྙིང་པོ་ལེན་པ་ལ། གླེན་པ་ཨུ་ཚུགས་ཅན། ཆོས་ཕྱིར་རང་ལུས་བཟང་པོ་ལག་ཉེས་ལ་མ་གཏོང་། དཀའ་བ་སྤྱོད་མི་རུང་།

གྲོང་ཆོག་སོགས་གྱིས་ལྟོ་མོད་པ་གོས་དྲོ་བ་གྱིས། ལུས་ལ་གཅེས་སྤྲས་བྱེད་པ་གལ་ཆེ་ཚོ་ཟེར། ཁ་ཏ་བྱེད་པ་དེ། དཔེ་བཞག་ན། མི་གཙང་བའི་རྐྱལ་བ་ཆེན་པོ་ཞིག་ཁུར་ཡོད་པའི་མིས། གཞན་ཞིག་གི་ས་མི་གཙང་བའི་རྐྱལ་བ་ཁུར་བ་ཕོག་ནས་ལོ་ཏོག་སྐྱེ་ཕྱིར་གཏོར་བ་མཐོང་ན། གླེན་པ་ཨུ་ཚུགས་ཅན། ལོ་ཏོག་སྨིན་ཕྱིར་གཏོར་ནས་ཅི་བྱ། དུས་རྒྱུན་དུ་ཁུར་ལ་མི་གཙང་བ་ཇེ་མང་དུ་ཐོངས། བྱི་དོར་བྱེད་པ་གལ་ཆེ། ཞེས་སྨྲས་པ་དང་འདྲ་བའི་མི་དེ་ཤིན་ཏུ་གླེན་བ་ཡིན་ཏེ། རྗེ་མི་ལས། ཕུང་པོ་མི་གཙང་རྫས་ཀྱི་རྐྱལ་བ་ལ། །བཟང་འདོད་བྱི་དོར་བྱེད་པ་ཤིན་ཏུ་གླེན། །གསུངས། ཡང་སྔར་བཤད་པ་ལྟར། འཁོར་བའི་ལུས་དང་ལོངས་སྤྱོད་འདིའི་ཕྱིར་དུས་རྒྱུན་དུ་ཁྱིམ་པ་ཕོ་མོ་རྣམས་ཀྱིས་སོ་ནམ་ཞིང་ལས་འཚོ་སྐྱོང་སོགས་བྱས། ཉེས་པ་མཐའ་ཡས་པ་གསོག་ཚུལ་ལ་བསམ་བློ་ཞིབ་ཏུ་བཏང་ན། དགོན་པའི་གྲྭ་པ་འགའ་རེ་དཀོར་གྱིས་ཚིག་ནས། བུད་མེད་བསྟེན། ཁྱིམ་པའི་ལས་ལ་རེམས་པ་དེ། དཔེར་ན་བསིལ་ཁང་ནས་མི་སྡོད་པར་མིག་ཟུམས་ནས་མར་མེ་ཆེན་པོ་འབར་བའི་

དཀྱིལ་དུ་མཆོངས་ནས་ཚིག་ཚེ་ཡན་ལག་གཡབ་པ་དང་འདྲ་བས་གཞན་མ་སེམས། འོ་ན་འཁོར་བའི་ལུས་དང་ལོངས་སྤྱོད་ཐམས་ཅད་སྡུག་བསྔལ་འབའ་ཞིག་ཡིན་གསུངས་པ་དང་། དལ་འབྱོར་རྙེད་དཀའ་དོན་ཆེ་ཡིད་བཞིན་ནོར་ལས་ལྷག་གསུངས་པ་དང་། སྔགས་བླ་མེད་ན་གཟུགས་ཕུང་རྣམ་སྣང་སོགས་ཕུང་པོ་ལྔ་རིགས་ལྔ་ཡིན་པས། ཟས་གོས་སོགས་ལྷ་ལ་མཆོད་པའི་ཚུལ་དུ་ལེགས་པར་མ་ཕུལ་བར། དཀའ་སྤྱད་བྱས་ན་ལྷ་ལ་བརྙས་པ་ཡིན་པས། ཕུང་པོ་སངས་རྒྱས་ལྔའི་བདག་ཉིད། །དེ་ལ་སྨོད་པ་བརྒྱད་པ་ཡིན། །གསུངས་པས། རྩ་ལྟུང་བརྒྱད་པ་ཕོག །ཚ་གྲང་བཀྲེས་སྐོམ་ངལ་དུབ་མཚོན་ཆ་རྡོ་དང་དབྱུག་པས་བརྡུངས་ནས་བསད་པའམ། ཡང་ན་ྈགཡངས་ལ་མཆོངས་པ་འགགས་ནས་འཆི་བ་སོགས་བྱས་ན། ཡི་དམ་གྱི་ལྷ་བསད་པ་ལྟ་བུའི་ཉེས་པ་འབྱུང་གསུངས་པ་དང་། འདི་གཉིས་འགལ་བ་ཆེ་ཟེར་ན། དེ་གང་ལ་དགོངས་ནས་གསུངས་པ་ཡིན་ཤེས་ན་འགལ་བ་མེད། དགོངས་པ་མ་ལོན་ན་འགལ་བ་ལྟར་འགྱུར། དལ་འབྱོར་དོན་ཆེ་རྙེད་དཀའ་ཡིད་བཞིན་ནོར་ལས་ལྷག་གསུངས་པ་དེ།

མར་ངན་སོང་གསུམ་སོགས་མི་ཁོམ་པའི་གནས་བརྒྱད་ལ་བལྟས་ན་ད་ལྟའི་ལུས་འདི་ཡིད་བཞིན་ནོར་ལས་ལྷག་པ་དེ་བདེན་པས་ན། དེ་ལ་དགོངས་ནས་གསུངས་པ་ཡིན་ལ། འཁོར་བའི་ཉེས་དམིགས་བཤད་དུས་ཕུང་པོ་འདི་སྡུག་བསྔལ་ཐམས་ཅད་སྐྱེད་པའི་གཞི་མ་ཡིན། མི་གཙང་རྫས་ཀྱིས་གང་བའི་རྐྱལ་བ་དང་འདྲ་གསུངས་པ་དེ། འཁོར་བའི་སྐྱེ་རྒ་ན་འཆི་སོགས་སྡུག་བསྔལ་གྱི་མིང་ཙམ་མི་ཐོས་པའི་དགྲ་བཅོམ་པའི་སྐུ་དང་། སངས་རྒྱས་བཅོམ་ལྡན་འདས་ཀྱི་མཚན་དཔེ་གཟི་བརྗིད་འབར་བའི་སྐུ་ལ་བལྟས་ན། ད་ལྟའི་ཕུང་པོ་འདི་མི་གཙང་རྐྱལ་བ་དང་མཚུངས་པ་དེ་བདེན་པས། དེ་ལ་དགོངས་ནས་གསུངས་པ་ཡིན། དཔེར་ན་ལྕགས་ཀྱི་དུས་ལྕགས་ཕྱེ་ཟེར་བ་ལྟར། ལུས་ཐ་མལ་བའི་དུས་ཐ་མལ་ལུས་ཟེར། གསེར་འགྱུར་གྱི་རྩིས་ལྕགས་ཕྱེ་རྣམས་གསེར་དུ་བསྒྱུར་དུས་ལྕགས་མི་ཟེར་བར་གསེར་ཟེར་བ་ལྟར། མཚན་ལྡན་བླ་མ་ལས་གསང་སྔགས་སྨིན་བྱེད་དབང་དང་གྲོལ་བྱེད་ཁྲིད་ཐོབ་ནས། བསྐྱེད་རྫོགས་བསྒོམས་ནས་ཐ་མལ་བའི་ལུས་ལྷར་བསྒྱུར་དུས། ཐ་མལ་ལུས་མི་ཟེར་

བར་ཡི་དམ་ལྷ་ཡིན་ཞེས་བརྗོད་ཀྱང་ཆོག །སྤྱིར་ཆོས་ཐམས་ཅད་སེམས་ཀྱི་སྒྱུར་ཕྱོགས་ཡིན། སྒོས་སུ་གསང་སྔགས་མོས་ལམ་གྱིས་འགྲུབ་པ་ཡིན་པས། ལུས་ལྷ། ངག་སྔགས། སེམས་ཐུགས་ཀྱི་རང་བཞིན་དུ་ཡེ་ནས་ཡིན་ཡང་ལེགས། མིན་ཡང་རུང་། གང་ལྟར་ནའང་། གསང་སྔགས་རྡོ་རྗེ་ཐེག་པའི་གཞུང་བཞིན་སྣོད་བཅུད་ཐམས་ཅད་ལྷ་དང་གཞལ་ཡས་ཁང་གི་རང་བཞིན། འདོད་ཡོན་སྤྱོད་ཚད་ལྷ་ལ་མཆོད་པའི་ཚུལ་དུ་མོས་ན་སྐབས་ཤིག་ཐ་མལ་སྣང་ཞེན་ཆོད་ནས། རང་སྣང་ལྷའི་ཞིང་ཁམས་དང་རང་ལུས་ལྷ་རུ་གྱུར། མཐར་ཐུག་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་འགྱུར་བས་ན། གནས་སྐབས་ལམ་གྱི་དུས་སུ་རང་གཞན་གྱི་ལུས་ལྷ་རུ་བལྟས། མཆོད་བསྟོད་བཀུར་ན། ཐ་མལ་དུ་བཟུང་ནས་བརྙས་སྨོད་ཁྱད་གསོད་སུན་འབྱིན་བརྡེག་རྡུང་སོགས་བྱེད་པའི་ཉེས་པ་ཀུན་ཁེགས་ནས་ཀུན་ལ་ཕན་བདེ་འབྱུང་ཞིང་། ཁྱད་པར་རྩ་རླུང་ཐིག་ལེ་རྒྱས་ནས་ལམ་ལ་ས་ཆོད་ཆེན་པོ་འབྱུང་བ་སོགས་ཕན་པའི་དགོས་པ་དུ་མ་ཡོད་པར་དགོངས་ནས། དཀའ་སྤྱད་སོགས་མི་རུང་ལྷ་བརྙས་པ་དང་བསད་པ་ལྟ་བུའི་

ཉེས་པ་ཆེ་ཞེས་གསང་སྔགས་རྡོ་རྗེ་ཐེག་པའི་ཁྱད་ཆོས་ཙམ་དུ་གསུངས་པ་ཡིན་གྱི། ངེས་དོན་དུ་རང་ལུས་ལྷ་རུ་གསལ་ནུས་པའི་རྣལ་འབྱོར་པ་ཞིག་གིས་དེ་ལ་འབུལ་རྒྱུ་ཞིག་ཀྱང་སྤྲུལ་ནུས་པས་ལྷ་ལ་བརྙས་པ་བྱེད་དགོས་དོན་མེད། གལ་ཏེ་མ་ཕུལ་ཀྱང་སྣང་སྟོང་ལྷ་སྐུ་ལ་བཀྲེས་སྐོམ་མི་མངའ། ཕུལ་ཀྱང་བཞེས་པའི་ངེས་པ་མེད། མདོ་སྡེ་ན། བཅོམ་ལྡན་འདས་ནི་གཞན་གྱི་དོན་དུ་གཟུགས་བཟུང་ཀྱང་། ཞལ་ཟས་ལྟོ་བར་བཞེས་མ་མྱོང་བའི་ལོ་རྒྱུས་འདུག་ཅེས་འབྲུག་པ་ཀུན་ལེགས་ཀྱིས་གསུངས། སྐུ་ལ་བཀྲེས་སྐོམ་མེད་བཞེས་པའི་ངེས་པ་ཡང་མེད་ན་བརྙས་རྒྱུ་དང་གསོད་རྒྱུ་ཞིག་ག་ན་ཡོད། དེ་མེད་ན་ཉེས་པ་འབྱུང་དོགས་མེད། དེ་ལྟར་རང་ལུས་ལྷ་རུ་གསལ་མི་ནུས་པས་གཡང་ས་ལ་མཆོངས་པ་དང་འགགས་པ་དང་། དཀའ་སྤྱད་དྲག་པོ་སོགས་བྱས་ནས་བསད་རུང་སྡིག་པ་ཡོད་པ་ཡིན་གྱི། ཡི་དམ་ལྷ་བསད་པའི་ཉེས་པ་མི་འབྱུང་། འོ་ན་བླ་མས་སློབ་བུའི་ལུས་ལྷ་རུ་གསལ་བཏབ་ནས། གསང་སྔགས་ཀྱི་དབང་བསྐུར་ནས་བཟུང་། རང་ལུས་ལྷ་རུ་གསལ་མི་གསལ་སུ་ཡིན་རུང་བརྙས་པ་

བྱས་ན་ཉེས་པ་འབྱུང་ཟེར་ན། དེ་ཡིན་ན་སྔོན་སྟོན་པ་སངས་རྒྱས་ཀྱིས་མ་མཁྱེན་པར་ལོ་དྲུག་དཀའ་བ་སྤྱད་ནས། ཡི་དམ་བརྙས་འདུག །དེ་བཞིན་དུ་རྟག་ཏུ་ངུ་། ནཱ་རོ་པ། རྗེ་མི་ལ། རྒོད་ཚང་པ། སྤྱན་སྔ་བ་སོགས་སྔོན་བྱོན་སྐྱེས་བུ་དམ་པ་མང་པོས་དཀའ་སྤྱད་བྱས་ནས་ཡི་དམ་ལ་ཕམ་གླན་འདུག །སངས་རྒྱས་ཀྱིས་སློབ་པ་ལམ་གྱི་གནས་སྐབས་སུ། ལྗོན་ཤིང་གཅིག་གི་དྲུང་དུ་ནི། །དབུ་ནི་ལན་སྟོང་སྦྱིན་པར་བཏང་། །ཞེས་གསུངས། སངས་རྒྱས་ཀྱིས་ལྷ་མང་པོ་བསད་པ་ཡིན་ཞེས་ཟེར་དགོས། དེ་ཡིན་ན་འོ་སྐོལ་རྣམས་ཀྱིས་ཡི་དམ་ལྷའི་ཀླུང་རྟ་དར་དུ་བཅུག་འདུག །ད་དུས་བསམ་ན་ཡི་དམ་ལྷའི་ཀླུང་རྟ་དར་བ་ཡིན་མིན་མི་ཤེས། ཕྱི་ནས་ཤི་དུས་བྱའམ་ཁྱིའི་ཀླུང་རྟ་དར་དུ་བཅུག་པ་ཡིན་པ་ཐག་ཆོད། དེང་སང་སྔགས་བླ་མེད་ཀྱི་དབང་ལུང་རི་ཙམ་ཐོབ་པས་འགའ་རེས། གཞན་སྨྱུང་གནས་བ་སྲུང་བ་སོགས་ཆོས་ཕྱིར་དཀའ་བ་སྤྱད་ནས་དལ་བའི་རྟེན་ལ་སྙིང་པོ་ལེན་པ་ལ་ཡོན་ཏན་དུ་མི་ལྟ་བར་མ་ཟད། སྔགས་ཀྱི་དབང་ཐོབ་པའི་རྣལ་འབྱོར་པས་དཀའ་སྤྱད་ཀྱིས་ལུས་གདུངས་སུ་བཅུག་ན་སྔགས་ཀྱི་རྩ་ལྟུང་འཕོག་པའི་

རྒྱུ། ཕྱི་རོལ་མུ་སྟེགས་པའི་ཆོས་ལུགས་དང་འདྲ་བས་དེ་མི་རུང་ཟེར་སྐྱོན་དུ་བལྟས་ནས་བརྙས་སྨོད་བྱེད་པ་མང་། དེ་ཆོས་མ་ཤེས་པའི་རང་མཚང་བསྟན་པ་ཡིན་པས་གཞན་མ་སེམས། ད་ཁྱོད་ཀྱིས་ཕག་བཞིན་གསོས་ནས་ནང་ན་ལེན་རྒྱུ་ཞིག་ཡོད་ན་ལོངས། གཞན་ཆོས་ཕྱིར་དཀའ་སྤྱད་ནུས་པའི་སྐལ་བཟང་ཕོ་མོ་རྣམས་ལ་གཏམ་དེ་སྐད་སྨྲ་བར་མི་རིགས། ཆོས་ཕྱིར་དཀའ་བ་སྤྱོད་པ་འདི། ཕ་བླ་མ་མཁའ་འགྲོ་མཉེས་པའི་ཞབས་ཏོག །ལས་སྒྲིབ་སྦྱོང་བའི་ཕྱགས་ཤིང་། ཉམས་རྟོགས་སྲེ་བའི་མཐུན་རྐྱེན་གྱི་མཆོག་ཡིན་ཏེ། རྗེ་མི་ལས། སྙིང་རུས་སྡུག་སྲན་གྱི་སྒྲུབ་པ་འདི། །ཕ་བླ་མ་མཉེས་པའི་ཞབས་ཏོག་ཡིན། །གཅིག་པུར་རི་ཁྲོད་འགྲིམ་པ་འདི། །མཁའ་འགྲོ་མཉེས་པའི་ཞབས་ཏོག་ཡིན། །རང་རྩིས་མེད་པའི་དམ་ཆོས་འདི། །སངས་རྒྱས་བསྟན་པའི་ཞབས་ཏོག་ཡིན། །ན་རྒ་ཤི་སྐྱིད་སྙིང་རུས་འདི། །ལས་སྡིག་སྒྲིབ་སྦྱོང་བའི་ཕྱགས་ཤིང་ཡིན། །སྡིག་ཟས་སྤངས་པའི་དཀའ་ཐུབ་འདི། །ཉམས་རྟོགས་སྐྱེ་བའི་མཐུན་རྐྱེན་ཡིན། །གསུངས། ཆོས་ཕྱིར་རང་གིས་དཀའ་བ་སྤྱད་

གཞན་ཡང་དེ་ལ་བསྐུལ་ན་ཕན་ཡོན་དང་བཀའ་དྲིན་དཔག་མེད་ཡོད་དེ། རྗེ་མི་ལས། ཆོས་ཕྱིར་དཀའ་བ་སྤྱོད་པ་ལ། །བསོད་ནམས་དཔག་ཏུ་མེད་པ་ཡོད། །དེ་ལ་འཇུག་ཅིང་བསྐུལ་བ་ལ། །བཀའ་དྲིན་དཔག་ཏུ་མེད་པ་ཡོད། །གསུངས། ཐམས་ཅད་བསམ་པ་ལ་རག་ལས་པས། ཚེ་འདིའི་ཆེ་འདོད་གྲགས་འདོད་རྙེད་པ་སོགས་ཆོས་བརྒྱད་འདོད་ནས་དཀའ་བ་སྤྱད་ན་ཕན་ཡོན་མེད་པ་བདེན་ཏེ། འབྲོམ་གྱིས་ཚེ་འདིའི་འདོད་པས་ཀུན་ནས་བསླངས་པའི་ལས་བྱས་པ་རྣམས་ལ་འབྲས་བུ་ཅི་མཆིས་ཞུས་པས། ཇོ་བོ་རྗེའི་ཞལ་ནས། འབྲས་བུ་དེ་ཁོ་ན་ཉིད་མཆི་གསུངས། ཕྱི་མར་ཅི་མཆིས་ཞུས་པས། དམྱལ་བ་མཆི། ཡི་དྭགས་མཆི། དུད་འགྲོ་མཆི་གསུངས། དེ་མ་གཏོགས་རང་གཞན་སེམས་ཅན་ཐམས་ཅད་ཀྱི་དོན་དུ་འཐོབ་བྱ་བླ་ན་མེད་པ་ཡང་དག་པར་རྫོགས་པའི་སངས་རྒྱས་འཐོབ་པར་འདོད་ནས། དེའི་ཕྱིར་ཆོས་བྱེད་དུས་དཀའ་བ་དཔག་ཏུ་མེད་པ་སྤྱད་ཀྱང་ཉེས་པ་སྤུ་ཙམ་མེད་པར་མ་ཟད། ཕན་ཡོན་དཔག་མེད་ཡོད་པ་མདོ་རྒྱུད་བསྟན་བཅོས་ཀུན་ནས་གསུངས་པས། འདི་ལ་འགལ་བ་འཕུད་རྒྱུ་ཞིག་མེད།

དེས་ན་བློ་གྲོས་ཅན་གྱིས་འཚོ་བ་དཀའ་ཐུབ་ལ་བརྟེན་ནས་དགེ་སྦྱོར་བྱེད་པ་གཅེས་ཏེ། གང་ཤར་རང་གྲོལ་གྱིས། དད་ཟས་འདི་འཕྲལ་ཞིམ་ཕུགས་སུ་གནོད། །དཀའ་སྤྱད་དེ་འཕྲལ་སྡུག་ཕུགས་སུ་ཕན། །དགེ་སྦྱོར་གྱིས་འདིར་བདེ་ཕྱི་མར་སྐྱིད། །དེའི་ཕྱིར་ན་དད་ཟས་མ་ཟ་བར། །དཀའ་ཐུབ་ཀྱི་ངང་ནས་དགེ་སྦྱོར་མཛོད། །གསུངས། འདི་ལྟ་བུའི་ཚིག་གི་ངོས་ནས་འགལ་བ་ལྟ་བུ་མང་བས། དེ་གང་ལ་དགོངས་ནས་གསུངས་པ་ཡིན་མ་ཤེས་ན་འཁྲུལ་གཞི་ཆེན་པོ་འབྱུང་། སྔར་ཡང་མཁས་པར་རློམས་པ་མང་པོས་རྒྱལ་བའི་གསུང་རབ་མདོ་སྔགས་དང་། རྒྱ་བོད་ཀྱི་པཎྜི་ཏ་དང་གྲུབ་པའི་དབང་ཕྱུག་རྣམས་ཀྱིས་གསུངས་པའི་བསྟན་བཅོས་ཀྱི་དགོངས་དོན་གང་ཡིན་མ་ཤེས། ཚིག་གི་འགལ་འབྲེལ་གཅིག་པུ་བརྩིས་ནས། འགའ་རེ་ཆོས་རྣམ་དག་ཏུ་ཐག་བཅད་དེ་ཡར་བཞག་འགའ་རེ་ཆོས་ལོག་ཏུ་ཐག་བཅད་ནས་མར་དོར། རྒྱལ་བའི་གསུང་ལ་ཡང་བླང་དོར་གཉིས་བྱས། ཆོས་སྤོང་གི་ལས་ངན་བསགས་ནས། ངན་སོང་གི་གཡང་ཁར་གོམ་འགྲོས་འཁྱོར་བ་བྱུང་འདུག་པས་བློ་གྲོས་

ཅན་གྱིས་རྒྱལ་བའི་བཀའི་དགོངས་དོན་འཚོལ་བ་ལ་འབད་པ་གལ་ཆེ་སྟེ། རྗེ་སྐལ་ལྡན་རྒྱ་མཚོས། སྐྱབས་དཀོན་མཆོག་གསུམ་ལ་བློ་གཏོད་ལ། །བཀའ་དྲི་མེད་དགོངས་དོན་ཚོལ་ལ་འབོད། །གསུངས། རྒྱལ་བའི་གསུང་རབ་ཀྱི་དགོངས་པ་ལོན་ན་མཁས་པ་ཡིན་ཏེ། བཀའ་ཐང་ལས། ཚིག་ལ་མཁས་ན་མཁས་པ་མ་ཡིན་ཏེ། །མི་གཡོ་དོན་ལ་མཁས་ན་མཁས་པ་ཡིན། །གསུངས། རྒྱལ་བའི་བཀའི་དགོངས་པ་མ་ལོན་ན་ཆོས་ཀྱི་ཚིག་མང་པོ་ཤེས་ནས་ཅི་བྱ། ལྷས་སྦྱིན་གྱི་བློ་ལ་ཡང་གསུང་རབ་གླང་པོ་ཆེའི་རྒྱབ་ཁལ་རེ་ཡོད་པར་བཤད། དེས་ན་མཁས་པའི་དབང་པོ་ཞིག་མཛད་ན་འདི་ཀ་ངོ་མཚར་ཆེ། འོ་ན་འདོད་ཡོན་ལོངས་སྤྱོད་ཐམས་ཅད་འཕོངས་ཕྱིས་པའི་རྡོ་བཞིན་འདོར་དགོས་ན། ཉམས་ལེན་དུས་སུ་ཁམས་ཀྱི་རྟེན་གསོ་བཙལ། །མཐུན་པའི་ཡོ་བྱད་ཀུན་དང་ལྡན་པར་བྱ། །གསུངས་པ་ལྟ་བུ་སྔགས་ཀྱི་གཞུང་ན་མང་། ས་བཟང་བ་དང་གྲོགས་བཟང་བ། །རྣལ་འབྱོར་བདེ་བའི་ཡོ་བྱད་ལྡན། །གསུངས་པ་ལྟ་བུ་མདོ་ན་མང་བས། དེ་དག་དང་འགལ་བར་འགྱུར་ཟེར་ན། འོ་དེ་འགལ་དོགས་མེད། མཐུན་

རྐྱེན་བསགས་དགོས་ཟེར་བ་དེ། མང་པོ་ཞིག་ལ་གོ་ནས་ཧམ་པ་མ་ཆེ། ཧམ་པ་ཆེ་ན་མཐུན་རྐྱེན་འགལ་རྐྱེན་དུ་སོང་ནས་སྡོམ་པ་དམ་ཚིག་ཀྱང་ཤོར་ཡོང་། མཐུན་རྐྱེན་བསགས་གསུངས་པ་དེ། རྗེ་མི་ལས་ཟ་ཚོད་བསགས་ནས་མཐུན་རྐྱེན་བྱས་པ་ལྟར། སྔོ་དང་ཤིང་འབྲས་ཙམ་གྱིས་སྲོག་འཚོ་རུ་བཅུག་ན་ཡང་། མཐུན་རྐྱེན་བསགས་ནས་འགྲིགས་ཚར་བ་ཡིན། རྗེ་མི་ལས། སྡིག་ཟས་སྤངས་པའི་དཀའ་ཐུབ་འདི། །ཉམས་རྟོགས་སྐྱེ་བའི་མཐུན་རྐྱེན་ཡིན། །གསུངས་པས་ན། མཐུན་རྐྱེན་གྱི་མཆོག་ནི་དཀའ་ཐུབ་ཡིན་ཏེ། རྗེ་སྐལ་ལྡན་རྒྱ་མཚོས། རྩམ་ཐང་སོགས་ཅི་འབྱོར་འཚོ་བ་ཡིས། །འབྱུང་བཞི་ནི་ཆ་སྙོམས་བདེ་བར་ཤོག །གསུངས་པས་ན། རྩམ་པ་ཕོར་བ་གང་རྙེད་བྱུང་ན་མཐུན་རྐྱེན་འགྲིགས་པ་ཞིག་དགོས། དེ་ལྟ་བུའི་སྲོག་འཚོ་ཐབས་གང་ལ་མཐུན་རྐྱེན་ཟེར། འདོད་ཡོན་དཀོར་ནག་གི་དུག་ཆུ་མང་པོ་བསག་དགོས་གསུངས་པའི་ཚིག་དུ་འཁྲུལ་བར་མི་བྱ། ཇ་ཆང་ཤ་ཐུད་མར་སོགས་མང་པོ་བསགས་པ་ཆོས་ཀྱི་བར་ཆད་ཐར་པའི་སྲོག་གཅོད་པའི་སྤུ་གྲི་ཡིན་ཏེ། རྗེ་མི་ལས།

ཟས་ཞིམ་པོ་ཇ་ཆང་ཚོགས་འཁོར་དེ། །མང་ཐལ་ན་དགེ་སྦྱོར་བར་ཆད་ཡིན། །དེ་བས་ཀྱང་གྱི་ནའི་འཚོ་བ་དགའ། །དཀོར་གཉན་པོ་སྲོག་གི་སྤུ་གྲི་འདི། །མང་ཐལ་ན་ཐར་པའི་སྲོག་རྩེ་གཅོད། །དེ་ཡིས་ཀྱང་སེམས་ཁུར་ཆུང་ན་དགའ། །གསུངས། ཡོན་བདག་དད་པ་ཅན་གྱིས་ཕུལ་བའི་དཀོར་ཟས་མང་པོ་ཟོས་ན་ཉམས་རྟོགས་སྐྱེ་བ་ཕར་ཞོག །དཀོར་གྱིས་ཆོས་ནས་ཇེ་བླུན་དུ་སོང་། མཐར་བོང་བུ་ལྟ་བུར་འགྱུར་ཏེ། སྤྱན་སྔ་པས། དཀོར་གྱིས་ཆོས་པས་འཕྲལ་དུ་ཇེ་བླུན་སོང་། །བོང་བུ་མངོན་སུམ་ཡོང་ངོ་ཤཱཀྱའི་སྲས། །གསུངས། དེས་ན་སྔོན་བྱོན་རྡོ་རྗེ་འཆང་གི་བརྒྱུད་པ་ཏཻ་ལོ་ནཱ་རོ་མི་ལ་སོགས་ཀྱིས་ཆོས་སྒྲུབ་པའི་སྔོན་དུ་ཟས་ནོར་ལོངས་སྤྱོད་མང་པོ་བསགས་ཞེས་རྣམ་ཐར་ན་ཨེ་འདུག་ལྟོས། སངས་རྒྱས་བཅོམ་ལྡན་འདས་འཁོར་ཉན་ཐོས་དགྲ་བཅོམ་བྱང་ཆུབ་སེམས་དཔའ་རྣམས་ཀྱིས་ཆོས་སྒྲུབ་པའི་མཐུན་རྐྱེན་ཡོ་བྱད་བསགས་ཞེས་ཟེར་བ་ཐོས་སམ་ཅི། མཐུན་རྐྱེན་ཞེས་ལོ་མང་པོ་འདང་པ་ཞིག་བསགས་དགོས་ན། སངས་རྒྱས་ཀྱིས་ཟས་ཞག་ལོན་དང་། གསོག་འཇོག་བྱས་པ་དང་། བྱིན་ལེན་མ་བྱས་པར་ཟ་མི་

རུང་ཞེས་བཅས་པ་མཛད་པ་དང་། གནས་ཤིང་དྲུང་དང་། ཟས་བསོད་སྙོམས་པ་གྱིས་གསུངས་པ་དང་། བདག་ཏུ་འཛིན་པ་ཁབ་སྐུད་ཙམ་ཡང་མི་བྱ་གསུང་དོགས་མེད། དེང་སང་འགའ་རེས་ཁོ་བོའི་སྔོན་དུ་མཐུན་རྐྱེན་བསྒྲུབས་ནས་ཕྱིས་ཆོས་བྱེད་རྒྱུ་ཡིན་ཟེར། འདྲེ་འདུལ་གྲོང་ཆོག་རྫུན་གཡོ་སྒྱུ་ཁྲམ་གྱི་སྒོ་ནས་ཡོན་བདག་དད་པ་ཅན་གྱི་ལག་ནས་དཀོར་མང་པོ་སྡུད་པ་དེ། ཁོ་བོས་སྔོན་ལ་དུག་བསགས་ནས་ཕྱིས་བདུད་རྩི་དང་བསྲེས་ནས་འཐུང་བ་ཡིན་ཞེས་ཕྱོགས་ཕྱོགས་སུ་བརྒྱུགས་ནས། དུག་མང་པོ་སྡུད་པ་དང་འདྲ་བས་གཞན་མ་སེམས། ཆོས་རྣམ་དག་ཅིག་བྱེད་ན་རང་གི་མི་ནོར་ཟས་གསུམ་ཐམས་ཅད་ཕར་བློས་གཏོང་དགོས་ན། གཞན་གྱི་ཟས་ནོར་ལོངས་སྤྱོད་ཚུར་སྡུད་མི་རུང་བ་སྨོས་ཅི་དགོས། འདི་ནི་དམ་པ་གོང་མའི་རྣམ་ཐར་གསུང་དང་གཏན་ནས་རྒྱབ་འགལ་ཡིན་པས། དེ་སྐད་སྨྲས་ནས་ལག་ལེན་ལ་འདེབས་པ་རྣམས་ཀྱི་ཁ་ལ་ཉན་མི་རུང་། རང་གི་སྡོམ་པ་དང་ཉམས་ལེན་འཆོར་དུ་འཇུག་པའི་སྡིག་པའི་གྲོགས་པོ་ཞིག་ཆོས་གྲོགས་སུ་བརྫུས་ནས་ཡོངས་བ་ཡིན་པས་དོགས་ཟོན་གྱིས།

ཚེ་འདིའི་བྱ་བ་བསམ་ན་མཁོ་བ་མང་། །ཟེར་བ་ལྟར། རྣལ་འབྱོར་པར་མཁོ་བའི་ཡོ་བྱད་ཐམས་ཅད་བསག་རྒྱུ་ཞིག་གི་དབང་དུ་སོང་ན། ལྟོ་གོས་བཟང་པོ་དང་། ལྷ་ཆ་མཆོད་ཆ་རྩ་ཅན་མང་པོ་དགོས། ཉེ་གནས་ལ་བཙུན་ཆུང་གཟུགས་མཛེས་ལག་བདེ་འམ། བུ་མོ་གཞོན་ནུ་ཞིག་ཀྱང་དགོས། དེར་མ་ཟད་ཟས་གོས་རྒྱུའི་གསེར་དངུལ་དར་ཟབ་རྟ་ནོར་ལུག་གསུམ་ས་ཞིང་སོགས་ཀྱང་དགོས་པས་བསགས་ཀྱིས་ག་ལ་ལང་། འོ་ན་ཚེ་འདི་དང་ཆོས་གཉིས་ཚ་གྲང་ལྟར་འགལ་ན། སྐྱེས་བུ་དམ་པ་དུ་མས་ལུགས་གཉིས་གཅིག་གྲོགས་སུ་གཅིག་ཁྱེར། གཞན་ལ་ལུགས་གཉིས་ཟུང་འབྲེལ་གྱི་ཞལ་གདམས་གནང་བ་དང་འགལ་བར་འགྱུར་ཟེར་ན། དཔེར་ན་ལོ་ཏོག་གི་ཕྱིར་འབད་ན་སོག་མ་ཞོར་ལ་འབྱུང་བ་ལྟར། འཇིག་རྟེན་གྱི་བྱ་བ་སྤངས་ནས་དམ་པའི་ཆོས་བཞིན་བྱས་ན་འཇིག་རྟེན་འདིའི་ལོངས་སྤྱོད་ཤུགས་ཀྱིས་རྒྱས། ལོངས་སྤྱོད་རྒྱས་པ་རྣམས་ཀྱང་ཆོས་ཕྱོགས་སུ་བཏང་ན་ཆོས་སུ་འགྱུར་བས་དེ་སྐད་གསུངས་པ་ཡིན་ཏེ། ཆོས་བཞིན་བྱས་ན་ཆར་བཞིན་འབབ། །ཟེར་བ་དང་། འཇིག་

རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་བུ་རྒྱས། །གསུངས། འཇིག་རྟེན་བསྟན་བཅོས་ཀྱི་མཆོག་ས་སྐྱའི་ལེགས་བཤད་ལས། འཇིག་རྟེན་ལུགས་ཀྱི་རྗེས་འབྲང་ནས། །ཁོ་བོས་དམ་པའི་ཆོས་འདི་བསྟན། །ཞེས་དམ་པའི་ཆོས་བསྟན་གསུངས་ཀྱི། འཇིག་རྟེན་བྱ་བ་བྱེད་ཚུལ་བསྟན་མ་གསུངས་པའི་ཕྱིར་རོ། །དེས་ན་འཇིག་རྟེན་གྱིས་དང་ཆོས་ཀྱི་གྲོགས་ཡིན་གསུངས་པའི་ཚིག་ཏུ་འཁྲུལ་བར་མི་བྱ། འཇིག་རྟེན་འདིའི་བྱ་བ་བྱས་ནས་ཆོས་ཤིག་འོང་བ་རྒྱལ་བ་རྣམས་ཀྱིས་མ་གསུངས་ཏེ། ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྱུར། །གསུངས། ཆོས་རྗེ་རྒྱལ་སྲས་པས་ཀྱང་། དམ་པའི་ཆོས་དང་ཚེ་འདིའི་འདུ་ནམ་གཉིས། །མཉམ་དུ་སྒྲུབ་པ་སུ་ཞིག་ཡོད་མ་ཡིན། །གསུངས། འོ་ན་འདོད་ཡོན་ལྔའི་ལོངས་སྤྱོད་དུག་དང་མཚུངས། འདི་ལ་བརྟེན་ནས་ཆོས་མི་འོང་ན། སྐྱེས་བུ་དམ་པ་འགའ་རེས། ལྟོ་གོས་ཕྱག་རྒྱ་མ་སོགས་འཛོམ་ན་ཆོས་ཡོང་གསུངས་པ་དང་འགལ་ཟེར་ན། དེ་སྤྱིར་འཁོར་བའི་ནང་ན་བདེ་བ་ཞིག་གཏན་ནས་མི་སྲིད་པས། སེམས་ཅན་ཀུན་གྱིས་འདོད་ཡོན་སོགས་འཁོར་

བའི་ཕུན་ཚོགས་སྤངས་ནས། ཐར་པའི་བདེ་བ་དོན་དུ་གཉེར་དགོས་པ་ངེས་དོན་ཡིན་ཀྱང་། བན་བོན་སྡིག་པས་ཁྱིམ་པ་སེར་སྣ་དང་ཆགས་ཞེན་ཆེ་བ་ལ་འདོད་ཡོན་ལོངས་སྤྱོད་འདི་བཟང་། ཁྱོད་བསོད་ནམས་ཆེན་པོ་རེད་ཅེས་འཛུམ་ལྡང་གི་བཅུག །དེ་ནས་འདོད་ཡོན་ལོངས་སྤྱོད་འདིའི་སྟེང་ནས་ཆོས་བྱས་ན། དེ་བས་ཐར་པའི་བདེ་བ་ཡོང་བས། ཚེ་འདིར་སྐྱིད་ཕྱི་མ་སྐྱིད་ཕྱིར་མཆོད་སྦྱིན་གྱིས། ཉམས་ལེན་མཛོད་ཅེས་གང་ཟག་ཁ་ཅིག་ཡར་རིམ་གྱིས་ཁ་དྲངས་པས་དྲང་དོན་ཙམ་དང་། གཞན་འདོད་ཡོན་གྲོགས་སུ་འགྲོ་བའི་སྐྱེས་བུ་དམ་པ་དང་སྔགས་ཀྱི་རྣལ་འབྱོར་པ་རྟོགས་པ་མཐོན་པོ་སྐྱོན་གྱིས་མ་གོས་པ་ལ། ཁ་མི་གཏོང་བའི་ཕྱིར་དེ་སྐད་གསུངས་པ་ཡིན་གྱི། ཆོས་མཛད་གང་ཟག་སྤྱི་ལ་འདོད་ཡོན་སོགས་དང་། མང་པོ་འཛོམ་ན་ཆོས་ཡོང་གསུངས་པའི་ཚིག་ཏུ་འཁྲུལ་བར་མི་བྱ། དེ་ལྟར་མ་ཤེས་བླུན་པོ་འགའ་རེས་བདེན་པར་བཟུང་། ལག་ཇེ་དམ་དང་། ཞེན་ཆགས་ཇེ་ཆེ། འདོད་སྲེད་སོགས་ཉོན་མོངས་ཀུན་མེ་བཞིན་འབར། འདོད་ཡོན་ཕྱིར་ལས་མི་དགེ་བ་ཆེན་པོ་བསགས་ནས་ཤི་མ་ཐག་དམྱལ་བའི་གཏིང་རྡོ་

བྱེད་ངེས། ཡང་སྔགས་ནས་ཤ་ཆང་བུད་མེད་སོགས་འདོད་ཡོན་སྤྱོད་ཅེས་གསུངས་པས་ན། སྔགས་ཀྱི་རྣལ་འབྱོར་པས་འདོད་ཡོན་ལ་སྤྱད་ཀྱང་སྐྱོན་མེད་ཟེར་ན། སྤྱོད་གསུངས་པ་ཁྱོད་བདེན་ཏེ། སྤྱོད་ཚུལ་ལ་རྣམ་པ་མང་བས་དེ་ཤེས་དགོས། ལས་དང་པོ་བས་ཤ་ཆང་སོགས་རྫས་ཙམ་མ་གཏོགས་མི་བསྟེན་པར་ཡིད་ཀྱིས་གཞན་བཟའ་བཏུང་རྣམས་ཤ་ལྔ་བདུད་རྩི་ལྔར་དམིགས་ནས་མོས་པས་སྤྱོད། རྟོགས་པ་ཅུང་ཟད་མཐོ་རུ་སོང་ནས་ཤ་ཆང་དངོས་སུ་སྤྱོད་ཅིང་། ལས་རྒྱ་དངོས་སུ་མི་སྤྱོད་པར་ཡེ་རྒྱ་ཙམ་ལ་མོས་པས་སྤྱོད། རྟོགས་པ་མཐོན་པོར་སླེབས་ནས་ལས་རྒྱ་མཚན་ལྡན་ལ་དངོས་སུ་སྤྱད་ཀྱང་སྐྱོན་མེད་པས་སྤྱོད་དགོས། དེ་ན་གསང་སྔགས་མོས་ལམ་གྱི་འགྲུབ་པས། ལས་དང་པོ་བ་འོ་སྐོལ་རྣམས་ཀྱིས་ཤ་ཆང་རྫས་ཙམ་རེ་དང་། ཡེ་ཤེས་ཀྱི་ཕྱག་རྒྱ་མ་ཙམ་རེ་མོས་པ་བྱེད་པ་མ་གཏོགས། དངོས་སུ་འདོད་ཡོན་ལ་བག་མེད་དུ་སྤྱོད་མི་རུང་། སྤྱོད་གསུངས་པ་རྣམས་ཐོག་མ་ནས་བག་མེད་དུ་བསྟེན་དགོས་ན། སྔགས་ན་ཤ་ལྔ་བདུད་རྩི་ལྔ་བསྟེན་གསུངས། དེའི་ནང་ན། ཁྱི་ཤ་གཅིན་

སྐྱགས་ཡང་འདུ་ན་དེ་ལས། གཅིན་དང་སྐྱགས་པ་ཡང་ཤ་ཆང་བཞིན་བསྟེན་དགོས་པར་རིགས། དེ་ཅིའི་ཕྱིར་ཞེ་ན། བསྟེན་གསུངས་པ་རྣམས་ལ་སྤྱོད་དགོས་པའི་ཕྱིར་རོ། །གཅིན་སྐྱགས་པ་བསྟེན་སུས་ནུས། དེས་ན་སྔགས་ཀྱི་ལམ་ཉམས་སུ་ལེན་པའི་གང་ཟག་ལས་དང་པོ་བ་འདོད་ཡོན་ལམ་དུ་འཁྱེར་མི་ནུས་པ་རྣམས་ཀྱིས་ཕྱིས་འདོད་ཡོན་ལམ་གྱི་གྲོགས་སུ་འཁྱེར་ནུས་པའི་རྟེན་འབྲེལ་དུ་རྫས་ཙམ་བསྟེན་ཞེས་གསུངས་པ་ཡིན་པར་ཧ་གོ་དགོས། ཐོག་མ་ནས་བྱིས་བ་ཆུང་ངུས་གང་མི་ཡོག་བ་ལ་དོ་བྱིན་ན་ཟས་ལོག་ཕོ་བས་མི་འཇུ་བར་འཆི་བ་ལྟར། གསང་སྔགས་ཀྱི་སྒོར་ཞུགས་མ་ཐག་ནས་འདོད་ཡོན་ལ་བག་མེད་དུ་སྤྱད་ན་དེ་འདྲ་འབྱུང་ངེས། སྔོན་རྗེ་མི་ལ་ལ་གཞན་འགའ་རེས། ཁྱེད་ཀྱིས་མཛེས་སེ་བླངས་ནས་ལྷོ་བྲག་མར་པའི་རྣམ་ཐར་བསྐྱངས་ན་ལགས་ཞུས་ཚེ། སེངྒེའི་ལད་མོ་ཝས་བྱས་པས་མི་འོང་གསུངས། འོན་རྗེ་མི་ལས་མིའི་བུ་མོར་མ་ཟད་མི་མ་ཡིན་གྱི་བུ་མོ་ཕྱག་རྒྱར་བཞེས། མིའི་འདོད་ཡོན་མ་ཟད་ལྷ་དང་མཁའ་འགྲོ་མ་ཡོངས་ཀྱི་ཚོགས་དཔོན་མཛད་ནས། ལྷོ་བྲག་མར་པ་ལས་ཆེས་ཆེར་འདོད་ཡོན་ལ་སྤྱད་

ཚུལ་རྣམ་ཐར་ན་འདུག་ཟེར་ན། དཔེར་ན་གཞོན་ནུ་ལང་ཚོ་དར་ལ་བབ་ཚེ། ཤ་ཆང་ཕོར་པ་གང་གི་མི་ཚད་དོ། ཟོས་ཀྱང་ཕུང་པོ་རྒྱས་པ་ལྟར། བསྐྱེད་རིམ་གྱིས་ཐ་མལ་སྣང་ཞེན་སྦྱངས། རྫོགས་རིམ་གྱིས་དབུ་མའི་རྩ་མདུད་སོགས་ལྷོད་བོར་བཏང་ནས་གྲོལ། རྩ་རླུང་ལས་སུ་རུང་། དབབ་བཟུང་ལྡོག་འགྲེམས་ནུས། ཐིག་ལེ་ཡུངས་འབྲུ་ཙམ་ཡང་མི་འཆོར། ཤ་ཆང་བདུད་རྩིར་བྱིན་གྱིས་རློབ་ནུས་པའི་དུས་སུ་ཤ་ཆང་བུད་མེད་མཚན་ལྡན་བརྒྱ་སྟོང་བསྟེན་རུང་། རྩ་རླུང་ཐིག་ལེ་རྒྱས། བདེ་སྟོང་ཕྱག་རྒྱ་ཆེན་པོ་མཆོག་གི་དངོས་གྲུབ་འཐོབ་པར་འགྱུར་སྟེ། ཀུན་མཁྱེན་པད་དཀར་གྱིས། ལུས་ལྷ་ངག་སྔགས་སེམས་ཀྱི་ཏིང་འཛིན་དང་། །རྩ་སྦྱངས་རླུང་འགགས་ཐིག་ལེ་གྱེན་བཟློག་པ། །རྡོ་རྗེ་ཐེག་པའི་གསང་ཚིག་ངོ་མ་ཡིན། །བག་གིས་ཉམས་སུ་བཞེས་དང་འདོད་དོན་འགྲུབ། །གསུངས། ཐིག་ལེ་དབབ་བཟུང་ལྡོག་འགྲེམས་ནུས་པའི་རྗེ་མི་ལ་ལྟ་བུའི་གང་ཟག་ལས་རྒྱ་མ་ལ་བརྟེན་ནས་མཆོག་གི་འདོད་དོན་འགྲུབ་པ་རྣམས་ལ་བསྟེན་ཞེས་གསུངས་པ་ཡིན། གཞན་གསང་སྔགས་ཀྱི་དབང་རེ་

ཐོབ་ཚད་ཀྱིས་ཤ་ཆང་བུད་མེད་ལ་བག་མེད་དུ་སྤྱོད་ཅེས་གསུངས་པའི་ཚིག་ཏུ་འཁྲུལ་ནས་ཧམ་པ་མཆེ། ཧམ་པ་ཆེ་ནས་ཕྱག་རྒྱ་མ་བསྟེན། ཐིག་ལེ་ཀུན་ཤོར། ངོ་ནག་དུང་ངེ་སོང་། མུག་ཕྲུག་ཐར་རེ་བཏང་། ཆང་འཐུང་བས་མགོ་བོ་ན། ཟས་ཁ་ནས་སྐྱུགས། ཤ་ཟོས་པ་ཕོ་བས་མི་འཇུ། ན་ཟུག་ལངས། སྨན་དང་རིམ་འགྲོ་བྱས། གསང་སྔགས་ཉམས་སུ་མ་ལོན་པའི་མཚང་ཐམས་ཅད་རང་གིས་བསྟན་ནས་ཆགས་བྲལ་གྱི་གང་ཟག་གིས་འཕྱ་སྨོད་ཀྱི་གནས་སུ་འགྱུར། འདོད་ཡོན་ལ་བརྟེན་ནས་ཉོན་མོངས་པ་ལངས། ལས་ངན་པ་བསགས་པའི་དབང་གིས་ཕྱི་མར་དམྱལ་བ་རྡོ་རྗེ་གདན་དུ་སོང་། གསང་སྔགས་རྡོ་རྗེ་ཐེག་པའི་མྱུར་ལམ་ཡང་། མདོ་ལས་ཀྱང་རིང་དུ་བཏང་། ཐེག་པ་འོག་མ་ཟིལ་གྱིས་གནོན་མི་དགོས། འོག་ཏུ་ལྷུང་ནས་ཁ་ཡར་འཁོར་དུས་མེད་པས་གཞན་མ་སེམས། ཡང་སྔགས་ཀྱི་རྣལ་འབྱོར་པས་འདོད་ཡོན་སྤྱད་པའི་ཉེས་དམིགས་ཀྱིས་ངན་འགྲོར་ག་ལ་འགྲོ། སྔགས་ཀྱི་གཞན་མི་ཤེས་རུང་། ཨོཾ་ཨཱཿཧཱུཾ། བཏོན་ནས་ཟོས་ཀྱང་སྡིག་སྒྲིབ་མི་ཡོང་ཞེས་གསུངས་འདུག་ཟེར་ན། དེ་ཡིན་ན་ལས་

སླ་བ་འདུག །ཨོཾ་ཨཱཿཧཱུཾ་མི་ཤེས་པ་མེད། དེས་ཅུང་མི་ཡོང་། དེས་ཡོང་ན་སྔགས་མིན་རུང་མདོ་ན་ཡང་གཟུངས་སྔགས་དང་དེ་བཞིན་གཤེགས་པའི་མཚན་རེ་བརྗོད་པས་ཀྱང་མཚམས་མེད་ལྔ་སོགས་སྡིག་སྒྲིབ་རི་རབ་ཙམ་འདག །མྱུར་དུ་འཚང་རྒྱ་བ་སོགས་ཕན་ཡོན་གསུངས་པ་མང་། དེ་ཡིན་ན་གཞན་མི་དགོས། འདོད་ཡོན་ལ་སྤྱད་ནས་སྒོ་རུ་སྐྱགས་པ་གཏོང་བའི་འགྲོ་ཞོར་ལ་སྒོ་ཡི་ཡ་ཐེམས་ལ་བྲིས་པའི་པདྨོ་ཨུཥྞཱི་ཥའི་འོག་ཏུ་འཛུལ་ན་དེ་གཅིག་པུས་ཆོག་པར་གདའ། དེས་ན་ཨོཾ་ཨཱཿཧཱུཾ་སོགས་བཏོན་པས་ཉེས་པ་མི་འབྱུང་གསུངས་པ་རྣམས་ཀྱང་། ཆོས་ཀྱི་ཆེ་བ་བརྗོད་ནས། གདུལ་བྱ་ཁ་ཅིག་དྲངས་པས་དྲང་དོན་དུ་དེ་སྐད་གསུངས་པ་ཡིན་གྱི། ངེས་དོན་དུ་སྔགས་བཏོན་པ་གཅིག་པུས་མི་ཆོག །སྔགས་ཀྱི་གཞུང་བཞིན་ཟབ་གསལ་གཉིས་མེད་ཀྱི་ལྷའི་བསྐྱེད་རིམ་གྱི་ངང་ནས། ཧཱུྃ་གིས་ཁ་དོག་དྲི་ནུས་ཀྱི་སྐྱོན་སྦྱངས། ཨཱཿཡིས་བདུད་རྩིར་རྟོགས་པར་བྱས། ཨོཾ་གྱིས་མང་པོ་སྤེལ་ཚུལ་གྱི་དམིགས་པ་སོགས་བྱེད་དགོས། ལྷ་སྔགས་ཏིང་ངེ་འཛིན་གསུམ་པོ་དགོས་ཕྱིན་སྔགས་ཀྱི་

གཞུང་བཞིན་ཉམས་སུ་ལེན་པའི་རྣལ་འབྱོར་པ་བཞིག་ངེས་པར་དགོས། ཨོཾ་ཨཱཿཧཱུཾ་ཁ་ནས་འདོན་ཤེས་པ་གཅིག་པུས་ཆོག་པར་མ་སེམས། ཡང་སྔགས་ལམ་དུ་མ་ནས། སྔགས་ཀྱི་སྒོར་ཞུགས་པས་ཐོག་མཐའ་བར་གསུམ་གང་དུའང་འདོད་ཡོན་ལྔ་ལ་སྤྱད་ཆོག་ཅེས་རྒྱུད་དུ་མ་ནས་གསུངས་འདུག །དེས་ན་འདོད་ཡོན་ལ་སྤྱད་རུང་སྐྱོན་གྱིས་མི་གོས་པའི་རྟགས་ཡིན་ཟེར་ན། དེ་ཚེ་སྔོན་སྦྱངས་བའི་སྐལ་ལྡན་ལས་འཕྲོ་ཅན། ངེས་འབྱུང་སྐྱོ་ཤས་བྱང་ཆུབ་ཀྱི་སེམས་ཡང་དག་པའི་ལྟ་བ་རིམ་གཉིས་ཀྱི་རྟོགས་པ་དང་ལྡན་པས་འདོད་ཡོན་སྤྱད་ཀྱང་། འདོད་སྲེད་ཀྱི་དབང་དུ་མི་འགྲོ་བར་ལམ་གྱི་གྲོགས་སུ་འགྲོ་བའི་གང་ཟག །ཤ་ཆང་བུད་མེད་སོགས་འདོད་ཡོན་གང་དགོས་འབད་རྩོལ་མེད་པར་ཤུགས་ཀྱིས་འཛོམ་པའི་བླ་མ་རྒྱལ་བློན་ཕྱུག་པོའི་གཅེས་ཕྲུག་ལྟ་བུ་རེ་གཉིས་ལ་དགོངས་ནས་གསུངས་པ་ཡིན་གྱི། གཞན་འཁོར་བར་ཞེན་པ་མ་ལོག་འདོད་སྲེད་ཆེ་བའི་རིགས་གསང་སྔགས་ཀྱི་སྒོར་ཞུགས་མ་ཐག་ནས་བསྐྱེད་རྫོགས་ཀྱི་ལམ་སྒོམ་པ་བཞག་ནས། རང་ལ་མེད་རུང་གླིང་གཞན་དུ་ཚོལ་ལ་ཤ་ཆང་བུད་མེད་ལ་བག་མེད་དུ་སྤྱོད་ལ་

སྲེད་པ་ཆེར་ཐོངས་ཞེས་གསུངས་པ་མ་ཡིན་པ་ཧ་གོ་དགོས། སྔགས་ཀྱི་རྣལ་འབྱོར་པས་ཀྱང་ནད་ལ་ཕན་ཕྱིར་སྨན་དང་། རྨ་ལ་ཕན་ཕྱིར་ཁྱི་ཚིལ་བསྟེན་པ་ལྟར། བྱང་ཆུབ་ཐོབ་པའི་གྲོགས་སུ་འགྲོ་བ་ལ་དམིགས་ནས་འདོད་ཡོན་བསྟེན་དགོས་ཀྱི། འདོད་སྲེད་ཀྱི་དབང་གིས་བསྟེན་པ་ཞིག་སྔགས་གཞུང་དུ་མ་ནས་མ་གསུངས། དཔེར་ན་གཙུབ་ཤིང་གཉིས་གཙུབས་པ་ལས་མེ་བྱུང་ནས་འབར་ན་ཤིང་གཉིས་བསྲེགས་ནས་མེ་ཆེར་འབར་བ་ལྟར། ཕྱག་རྒྱ་བསྟེན་ནས་བདེ་སྟོང་གི་རྟོགས་པ་ཁྱད་པར་ཅན་སྐྱེས་ནས་འདོད་ཆགས་སོགས་ཉོན་མོངས་པ་རྣམས་ཆུང་དུ་སོང་། ཉམས་རྟོགས་ཆེར་འགྲོ་བ་ཞིག་དགོས། མཐར་ཐུག་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱས་དུས་ཉོན་མོངས་པ་ཀུན་གཏན་ཟད་དུ་སོང་བ་ཡིན། རྡོ་རྗེ་འཆང་གིས་ཕྱག་རྒྱ་མ་འཆང་བ་ཟུང་འཇུག་གི་མཚོན་བྱེད་ཙམ་ཡིན་གྱི་ཆགས་པས་བུད་མེད་ཞིག་བསྟེན་ཡོད་པར་མ་སེམས། མདོ་སྔགས་ཀྱི་ཆོས་གང་ཡིན་ཡང་ཉོན་མོངས་པའི་གཉེན་པོ་ཡིན་པས། ཉོན་མོངས་པའི་གཉེན་པོར་སོང་ན་སྔགས་ཉམས་སུ་ལོན་པ་ཡིན་གྱི།

ཉོན་མོངས་པ་ཆེར་གཏོང་བའི་གྲོགས་སུ་སོང་ན་ག་འདྲ་ཡིན་མི་ཤེས། དེང་སང་གསང་སྔགས་ཉམས་སུ་ལེན་པ་འགའ་རེས་སྐབས་ཤིག་འདོད་སྲེད་ཆེར་སོང་། བུད་མེད་ཀྱང་གཅིག་གིས་མི་ཆོག་གཉིས། གཉིས་ཀྱིས་མི་ཆོག་གསུམ་བཞི་མང་པོ་དགོས་པ་བྱུང་། ཁོ་ལ་དབང་ཐོབ་རྒྱུ་ཡིན་ན་རྒྱལ་ཁམས་ཀྱི་བུ་མོ་གཟུགས་མཛེས་པ་ཀུན་བསྡུས་ནས་སྤྱོད་པའི་ཚོད་ན་གདའ། ཆང་ཡང་གླང་རྒན་དང་བོང་རྒན་གྱིས་ཆུ་འཐུང་བ་ལྟར་འཐུངས་ནས། མཐར་གྲུབ་རྟགས་ལ་ཆང་གིས་བཟི་ནས་ལྕེ་ལྐུགས། ཟས་སྐྱུགས། ཐིག་ལེ་བཏང་ནས་ལུས་ཟུངས་ཤོར། ཕྲུ་གུ་ཐར་རེ་གཏོང་བ་མང་། དེས་ན་ངན་སྐྱོན་གྱིས་མི་གོས་པ་རེ་གཉིས་རེ་སྲིད་ཀྱང་། ཕྱི་མིག་ཡུལ་དུ་བཙོག་པ། མདོ་རྒྱུད་ཀྱི་དགོངས་པ་དང་མི་མཐུན་བར་གདའ། ཁོ་བོས་དེ་རྣམས་ལ་ཁ་བཏང་བ་མིན་ཏེ། འབྲུག་པ་ཀུན་ལེགས་ཀྱིས། མི་ལ་འཕོག་བསམ་པ་ནི་མ་ཤར། སྤྱིར་ཡང་སྙིགས་དུས་སུ་སོང་། ཐུབ་པའི་གསུང་བཞིན་བལྟས་པས་དེ་དང་མཐུན་པར་རང་གིས་མ་མཐོང་། རང་ལ་ཁྱེར་ཁོས་མེད་པས། བློ་ལ་གང་ཤར་བྲིས་པ་ལགས། མིས་མི་བྱེད་པ་ཞིག་

བྱེད་ཀྱི་འདུག་ཀྱང་མ་བྱས། བྱེད་པ་ཞིག་མི་བྱེད་པ་འདུག་ཀྱང་མ་བྱས། སྙན་ངག་ཡིན་ན་རང་བཞིན་བརྗོད་པའི་རྒྱན་ལྟ་བུ་ལགས་པས། སྐྱོན་མེད་དམ་བསམ་པ་ནི་ཤར་གསུངས་པ་དང་མཚུངས། ཡང་བུ་བུ་མོ་ལྷོ་བྲག་མར་པ་སོགས་སྔོན་གྱི་སྐྱེས་བུ་དམ་པ་མང་པོ་ལའང་འདུག་པས། དེ་རྣམས་ཀྱིས་ཀྱང་སྔགས་ཉམས་སུ་མ་ལོན་པ་ཡིན་ནམ་ཟེར་ན། དེ་དང་འདྲ་ན་ལེགས་ཏེ་འདྲ་དོགས་མེད། སེང་གེ་དང་། ཕག་གི་ཕྲུག་གུ་ལྟར་ཁྱད་ཆེ་སྟེ། ལྷོ་བྲག་མར་པའི་སྲས་དར་མ་མདོ་སྡེ་གཤེགས་དུས། རྒད་པོ་གཅིག་གིས། ཁོང་རྒན་རྒོན་གཉིས་ཀྱི་བུ་ཤི་དུས་ཁྱེད་ཀྱིས་སྒྱུ་མ་རྨི་ལམ་ཡིན་གསུངས། ཁྱེད་ཀྱི་སྲས་ཡང་སྒྱུ་མ་རྨི་ལམ་ལགས་པས་ཐུགས་ཁྲལ་མི་མཛད་པར་ཞུ་ཞུས་པས། སྒྱུ་མ་རྨི་ལམ་ཡིན་པ་ཁྱོད་བདེན་ཏེ། ཁྱོད་ཀྱི་བུ་དང་ངའི་བུ་མི་གཅིག །ངའི་བུ་དེ་བསྡད་ན་བསྟན་པ་དང་སེམས་ཅན་ལ་ཕན་ཐོགས་པ་ཞིག་འོང་བ་ཡིན་པས། སྒྱུ་མའི་ནང་གི་སྒྱུ་རྒོད། རྨི་ལམ་ནང་གི་རྨི་རྒོད། བུ་ཡི་ནང་གི་བུ་རྒོད་ཡིན་གསུངས། ཡང་སྔོན་སྐྱེས་བུ་དམ་པ་རྣམས་ཀྱིས་བསྟན་འགྲོར་ཕན་

པའི་བུ་སྤྲུལ་པ་ཡིན། ཐིག་ལེ་ཤོར་ནས་ལན་ཆགས་ཀྱི་བུ་བྱུང་བ་མ་ཡིན་ཏེ། འབྲུག་པ་ཀུན་ལེགས་ཀྱིས། ང་ལ་བུད་མེད་དང་བཅས་ནས་ཆོས་བཤད་ན་སངས་རྒྱས་ཞེ་ཁྲེལ་འགྲོ། མར་པ་ལོ་ཙཱ་དགྱེས་པ་རྡོ་རྗེ་དངོས་ཡིན་པས། ཁོང་གིས་བུ་ཚ་སྤྲུལ་པ་ཡིན་མོད། ཀུན་ད་ཤོར་བའི་ཕྲུག་གུ་ག་ན་ཡིན། ད་ལྟ་མར་པའི་བུ་བརྒྱུད་ཡིན་ཟེར་ནས། སྔོ་ལོའི་གྲངས་བྱས་ནས་ནང་འཐབ་བྱེད་གི་ཨེ་འདུག །ཆོས་འཆད་པ་ལ་ཡང་ན་སྐྱོན་མེད་པ་ཞིག་དགོས། ཡང་ན་རང་སྐྱོན་ཐལ་མོས་བཀབ་ནས་གཞན་སྐྱོན་མཛུབ་མོས་འདྲུ་བ་གཅིག་དགོས། ང་ལ་དེ་གཉིས་ཀ་མེད་པས་ཆོས་མི་བཤད་གསུངས། གྲུབ་ཆེན་དྲིལ་བུ་བས། སྲས་སྲས་མོ་གཉིས་ཡོད་པ། མི་མང་ཁྲོད་ནས་ས་ལ་བརྡབས་ནས་རྡོ་རྗེ་དྲིལ་བུར་བསྒྱུར། ཕྱག་གཉིས་སུ་བསྣམས་ཡུམ་ལ་འཁྱུད་ནས་ནམ་མཁའ་ལ་གཤེགས་ནས། དྲིལ་བུ་པ་ཞེས་མཚན་ཐོགས་པ་ཡིན་སྐད། སྤྲུལ་པ་ཡིན་པའི་རྟགས་དེས་ཀྱང་ཤེས། སྤྲུལ་པ་མིན་རུང་དེ་ལྟར་བསྒྱུར་ནུས་ན་བསྟེན་ཆོག །དེ་འདྲ་མ་གཏོགས་གཞན་གྱིས་བསྟེན་ག་ལ་རུང་། མདོ་སྔགས་གཉིས་ཀྱི་ཆོས་ཉམས་སུ་ལེན་བའི་གང་

ཟག་མཆོག་དམན་ཐམས་ཅད་ཀྱིས་སྲོག་འཚོ་ཙམ་གྱི་ཟས་གོས་གནས་མལ་སོགས་བསྟེན་དགོས་ཀྱི་གསོག་འཇོག་རྒྱ་ཆེན་བྱས། འདོད་ཡོན་དཀོར་ནག་གི་དུག་ཆུ་ལ་བག་མེད་དུ་སྤྱོད་དགོས་ཞེས་མདོ་སྔགས་གང་ནས་ཀྱང་མ་གསུངས། གསང་སྔགས་པ་རྣམས་ཀྱིས་ཀྱང་རྗེ་བཙུན་མི་ལ་ཡབ་སྲས་སོགས་སྔོན་གྱི་སྐྱེས་བུ་དམ་པ་རྣམས་ཀྱི་རྣམ་ཐར་ལྟར། ཟས་ནོར་ལོངས་སྤྱོད་ཀྱི་འཁྲི་བ་བཙན་ཆོད་བྱས། དབེན་པར་དཀའ་སྤྱད་སྙིང་རུས་བྱས་ནས་སྔགས་ཉམས་སུ་ལེན་དགོས། སྔགས་ན་འདོད་ཡོན་བསྟེན་དགོས་གསུངས་པ་ཡང་ཕལ་ཆེར་སྲོག་འཚོ་ཙམ་བསྟེན་དགོས་གསུངས་པ་ཡིན་པར་གོ་དགོས། ཕྱག་རྒྱ་མ་མ་བསྟེན་ན་སྔགས་མི་འགྲུབ་པས་བསྟེན་དགོས་གསུངས་པ་ཡང་། དབང་གསུམ་པའི་དུས་དང་རྫོགས་རིམ་གྱི་རྟོགས་པ་མཐོན་པོར་སོང་བའི་དུས་སོགས་སུ་བསྟེན་ན་དགོས་པ་ཆེ་བ་འགའ་ཞིག་ལ་དགོངས་ནས་དེ་སྐད་གསུངས་པ་ཡིན། དེ་ལ་ཡང་ལས་རྒྱ་མ་བསྟེན་རུང་གསང་སྔགས་ཐབས་མང་དཀའ་བ་མེད་པ་ཡིན་ཞིང་མོས་ལམ་གྱིས་འགྲུབ་པས། ཡེ་ཤེས་ཀྱི་ཕྱག་རྒྱ་བསྟེན་

ན་ཡང་ཆོག་པར་གསུངས། དེས་ན་འདོད་ཡོན་ལྔ་དང་ལས་ཀྱི་ཕྱག་རྒྱ་མེད་པར་སྔགས་གཏན་ནས་མི་འགྲུབ་གསུངས་པའི་ཚིག་ཏུ་འཁྲུལ་བར་མི་བྱའོ། །ཤ་ཆང་སོགས་འདོད་ཡོན་ལྔ་དང་ལས་ཀྱི་ཕྱག་རྒྱ་མ་བསྟེན་པར་སྔགས་མི་འགྲུབ་ན། བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་གསུམ་གྱིས་ཕྱག་རྒྱ་མ་བསྟེན་པས་མི་འགྲུབ་པར་འགྱུར། དེ་ཅིའི་ཕྱིར་ཞེ་ན། སྔགས་ཡིན་པའི་ཕྱིར་རོ། །དེ་མི་འགྲུབ་ན། ལམ་དེ་ཉམས་སུ་བླངས་ན་འཚང་རྒྱ་གསུངས་པ་རྣམས་ཀྱང་རྫུན་པར་འགྱུར། རྣལ་འབྱོར་བླ་མེད་རྒྱུད་ཀྱི་རྒྱལ་པོ་རྫོགས་པ་ཆེན་པོའི་སྒྲ་ཇི་བཞིན་ཉམས་སུ་ལེན་ན། འདོད་ཡོན་ལྔ་དང་ཕྱག་རྒྱ་མ་དང་དུ་བླངས་ནས་མི་བསྟེན་པར་མ་ཟད། འཁོར་འདས་ཀྱི་ཆོས་གང་ལ་ཡང་སྤང་བླང་དགག་སྒྲུབ་མི་བྱེད་པར། ཁྲེགས་ཆོད་ཐོད་རྒལ་ཁོ་ན་ལ་གཞོལ་ན་འཇའ་ལུས་ཟུང་འཇུག་གི་སྐུ་འགྲུབ་པར་གསུངས། བསྐྱེད་རིམ་ལ་རྫོགས་རིམ་གྱིས་སྣོན་པ་བཏབ་ན་ལམ་མྱུར་བ་ཙམ་མ་གཏོགས་ཟབ་གསལ་གཉིས་མེད་ཀྱི་བསྐྱེད་རིམ་ཁོ་ན་ཉམས་སུ་བླངས་ཀྱང་གྲོལ་བར་གསུངས། དེས་ན་སྔགས་ཀྱི་གཞུང་ཤིང་བསྐྱེད་རྫོགས། རྫོགས་པ་ཆེན་པོ་ཡིན་

གྱི། ཕྱག་རྒྱ་མ་བསྟེན་པ་ལམ་གྱི་ཡན་ལག་ཙམ་ཡིན་གྱི། དེང་སང་གསང་སྔགས་པ་འགའ་རེས། རྩ་བ་དོར་ནས་ཡལ་ག་བརྙབས་པ་ལྟར། བསྐྱེད་རྫོགས་རྫོགས་ཆེན་བཞག་ནས་ལས་རྒྱ་བསྟེན་པ་མང་། དཔེར་ན་མེ་ཆེན་པོ་མི་སྦར་བར། མེ་གྲོགས་ཤིང་ཡིན་སྙམ་ནས་བསགས་ཀྱང་། མེ་མེད་པར་ཤིང་ཅི་ཙམ་བསགས་ཀྱང་གྲོགས་སུ་མི་འགྲོ་བར་མ་ཟད། ཁུར་དུ་འགྲོ་བ་ལྟར། གསང་སྔགས་ཀྱི་བསྐྱེད་རྫོགས། རྫོགས་ཆེན་མི་སྒོམ་པར། སྤྱིར་འདོད་ཡོན་ལྔ་དང་། ཁྱད་པར་ལས་རྒྱ་མ་བསྟེན་པ་དེ་དང་འདྲ། གསང་སྔགས་ཁོ་ན་ཉམས་སུ་ལེན་ཀྱང་། ཕྱག་རྒྱ་མ་མ་བསྟེན་བཞིན་དུ་འཚང་རྒྱ་བའི་ཚུལ་བསམ་གྱིས་མི་ཁྱབ། དེས་ན་སྔགས་ཀྱི་ལམ་ཉམས་སུ་བླངས་ན་སྐབས་ཤིག་ལས་རྒྱ་མ་བསྟེན་པར་ཉམས་སུ་ལེན་ཚུལ་མེད་པ་ལྟ་བུ་དང་། ཉམས་སུ་བླངས་རུང་རྫོགས་རིམ་གྱི་རྟོགས་པ་ཁྱད་པར་ཅན་མི་སྐྱེ་སྙམ་པ་རང་འཁྲུལ་བ་ཙམ་དུ་མ་ཟད། དེ་ཡིན་ན་བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་རྣལ་འབྱོར་བླ་ན་མེད་པའི་རྒྱུད་ཀྱི་བསྐྱེད་རིམ་རྫོགས་ཆེན་ཕྱག་ཆེན་སོགས་ན་ཕྱག་རྒྱ་མ་ལ་ཅུང་ཟད་རག་

མ་ལུས་པར་རྟོགས་པ་ཁྱད་པར་ཅན་འཁྲུངས་ནས་ཚེ་གཅིག་ལ་འཚང་རྒྱ་བའི་ཚུལ་མང་པོ་གསུངས་པ་རྣམས་ཀྱང་རྫུན་ཡིན་ཟེར་དགོས། དེ་ཡིན་ན་སྔར་ཕྱག་རྒྱ་མ་བསྟེན་པར་སངས་རྒྱས་པའི་སྐྱེས་བུ་དམ་པ་རྣམས་ལ་ཡང་སྐུར་པ་འདེབས་དགོས་པ་སོགས་མི་འགྲིགས་པ་བཅོ་བརྒྱད་འབྱུང་། དེས་ན་བསྐྱེད་རྫོགས་རྫོགས་ཆེན་ཕྱག་ཆེན་སོགས་གསང་སྔགས་ལ་ཡང་ཐབས་མེད་པའི་འདོད་ཡོན་དང་ཕྱག་རྒྱ་བསྟེན་དགོས་པའི་ངེས་པ་མེད། གསང་སྔགས་ནི་ཐབས་མང་དཀའ་བ་མེད་པ་དང་གསུངས་པས་ན། ཐབས་གཞན་བསྟེན་རྒྱུ་མང་། གཞན་གང་ལ་བརྟེན་ནས་ཉམས་སུ་བླངས་ན་ཡང་མཆོག་ཐུན་གྱི་དངོས་གྲུབ་འཐོབ་པར་འགྱུར། ཕྱག་རྒྱ་ཀུན་གྱི་མཆོག་ནི། ཕྱག་རྒྱ་ཆེན་པོ། རྫོགས་པ་ཆེན་པོ། དབུ་མ་ཆེན་མོ་ཡིན་ཞེས་མཁས་གྲུབ་དུ་མས་གསུངས་ལ། དགོངས་པ་ལུང་སྟོན་གྱི་རྒྱུད་ལས། ཀུན་རྫོབ་དང་ནི་དོན་དམ་དག ། འདི་ནི་དབང་པོ་གཉིས་ཡིན་ལ། །ཟུང་དུ་འཇུག་པ་གྲགས་པ་ནི། །དེ་དག་གཉིས་མེད་དེ་སྦྱོར་བ། །དེ་ལ་མཉམ་པར་སྦྱོར་བ་ཡིས། །དེ་དག་ཐམས་ཅད་ཉེ་བར་སྤྱད། །འདི་ནི་སངས་རྒྱས་ཐམས་ཅད་

ཀྱི། །འདོད་ཆགས་ཆེན་པོའི་ཚུལ་མཆོག་གོ །གསུངས་པ་འདི་བཞག་ནས། བུད་མེད་བསྟེན་པ་ནི་ནོར་བུ་བཞག་ནས་མཆིང་བུ་བླངས་པ་དང་འདྲ་བས་མཁས་པས་སྨད་པའི་གནས་ལས་གཞན་མ་སེམས། དེ་ལྟར་གོ་ན་སྡོམ་གསུམ་མིག་གི་འབྲས་བཞིན་བསྲུང་། མི་ནོར་ཟས་གསུམ་གང་ལ་ཆགས་པ་མེད་པར་རི་ཁྲོད་དབེན་པའི་བསིལ་གྲིབ་ན་གཅིག་པུར་མདོ་སྔགས་ཀྱི་ཆོས་ཉམས་སུ་ལེན་པ་རྣམས་བསྟན་པ་ཡོངས་ཀྱི་བདག་པོ་རུ་གོ་ནས་དད་གུས་ཚད་མེད་སྐྱེ་ངེས། ཕྱག་རྒྱ་མ་ཞིག་མ་བསྟེན་པས་གསུང་རབ་ཐམས་ཅད་གདམས་པར་མ་ཤར་བ་དང་། གསང་སྔགས་པ་མིན་པར་ག་ལ་འགྱུར། དེ་འགྱུར་ན་སྟོན་པ་སངས་རྒྱས། ཇོ་བོ་ཡབ་སྲས། གསང་སྔགས་བསྟན་པའི་བདག་པོ་རྣམས་ཀྱང་། གསང་སྔགས་པ་མིན་ཉན་ཐོས་པ་ཡིན་ཞེས་བསྐུར་བ་བཏབ་པར་འགྱུར། སྤྱིར་མདོ་སྔགས་ཀྱི་ཆོས་གང་ཡིན་ཡང་ཉམས་སུ་ལེན་པའི་རྣལ་འབྱོར་པས་འཇིག་རྟེན་ཆོས་བརྒྱད་བློས་བཏང་ནས། ཉམས་དགའ་རིག་པ་དྭངས་པའི་དབེན་གནས་སུ་ཉམས་སུ་བླངས་ན་ཉམས་རྟོགས་སྐྱེ་ཞིང་། ཁྱད་པར་གནས་

ལུགས་སྟོང་གསལ་སྤྲོས་བྲལ། ཕྱག་རྫོགས་དབུ་གསུམ་གྱི་དགོངས་དོན་ལ་མཉམ་པར་བཞག་ན། ལུས་སེམས་ལ་ཤིན་སྤྱངས་ཀྱི་བདེ་བ་བསམ་གྱིས་མི་ཁྱབ་པ་སྐྱེ། མ་བསྒྲུབས་ལྷ་ཞལ་མང་པོ་མཐོང་། མངོན་ཤེས་རྫུ་འཕྲུལ་ཀྱང་འབྱུང་། རང་དོན་མངོན་དུ་གྱུར། གཞན་བསྟན་འགྲོ་ལ་ཡང་དངོས་སམ་བརྒྱུད་ནས་ཕན་པ་རྒྱ་ཆེན་ཐོགས་པས། དེས་ན་དེ་ལྟ་བུའི་རྣལ་འབྱོར་པ་ཞིག་ལ་ཡིད་སྨོན་གཏོང་དགོས། དེ་མིན་ཁྱིམ་པ་ལས་གསོག་འཇོག་ཆེར་བྱས། འདོད་ཡོན་དཀོར་ནག་ལ་སྤྱོད་པ་མདོ་སྔགས་སུ་ཡིན་རུང་། གྲོང་ལྟག་གི་དགོན་ཆུང་སོགས་གནས་གང་དུ་བསྡད་རུང་རང་གཞན་གྱི་དོན་གང་ཡང་མི་འགྲུབ་ཅེས་རྒྱལ་བ་སྲས་བཅས་ཀྱིས་གསུངས་མཐོང་ཐོས་མྱོང་བས་ཀྱང་ཤེས་པར་ནུས། དེས་ན་མདོ་སྔགས་པ་སུ་ཞིག་ཡིན་རུང་། འདོད་ཡོན་ལ་སྐྱོན་དུ་བལྟས་ནས་སྤོང་ཅི་ཐུབ་གྱིས་དང་བཟང་ངོ་།། །། སྨྲས་པ། ཆོས་ཕྱིར་ལུས་སྲོག་ལོངས་སྤྱོད་གཏོང་ནུས་པའི། །གྲུབ་ཐོབ་གོང་མའི་རྣམ་ཐར་དྲན་བཞིན་དུ། །དེ་དག་རྣམས་ལ་ཁ་མིག་ཡར་ལྟ་བྱས། །ཁ་ནས་བསྟོད་དབྱངས་སྒྲོགས་བཞིན་ལྷ་ཕྱག་འབུལ། །

ལས་ཉོན་གཉིས་ཀྱིས་བསྐྱེད་པའི་སྒྱུ་ལུས་འདི། །མི་རྟག་མི་བརྟན་སྙིང་པོ་གང་ཡང་མེད། །རླུང་མཁྲིས་བད་ཀན་ནད་གདོན་དགྲ་ལ་སོགས། །མི་འདོད་སྡུག་བསྔལ་འདྲེན་པའི་ཚུལ་མཁྱེན་ནས། །སྔོན་བྱོན་རྒྱལ་བ་གོང་མས་ཆོས་ཕྱིར་དུ། །ལུས་དང་ལོངས་སྤྱོད་ཕངས་མེད་བཏང་བ་བཞིན། །འོ་སྐོལ་རྣམས་ཀྱང་སྙིང་པོ་མེད་པའི་ལུས། །ཆོས་ཕྱིར་བཏང་ནས་སྙིང་པོ་ལེན་པའི་རིགས། །གསང་སྔགས་རྣལ་འབྱོར་མི་ལའི་རྣམ་ཐར་བཞིན། །ལོ་མང་དཀའ་བ་སྤྱོད་པ་ཕར་ལ་ཞོག །ཉིན་གཅིག་ཙམ་ཡང་དཀའ་སྤྱད་མི་ནུས་པའི། །སྙིང་རུས་ཆུང་བའི་སྐལ་མེད་ཁ་ཅིག་གིས། །རང་ཉིད་ཐེག་པ་ཆེན་པོར་མ་སླེབས་པར། །ཐེག་ཆེན་སྤྱོད་པའི་སྐབས་ཀྱི་གཏམ་འདྲ་ལབ། །ཟས་སྐལ་ཟོས་ནས་ལས་སྐལ་མི་ལས་བཞིན། །ཤ་ཆང་སྤྱད་ནས་བསྐྱེད་རྫོགས་མི་སྒོམ་པར། །སེངྒེ་མཆོངས་སར་ཝ་ཡིས་ལྡིང་ཙ་ན། །ཕར་ཁར་མི་སླེབས་གཡང་ལ་ལྷུང་བ་ལྟར། །འགའ་རེ་ཆང་གིས་བཟི་ནས་ལམ་དུ་འགྱེལ། །ལ་ལའི་ལྕེ་ལྐུགས་རང་གཞན་ངོ་མི་ཤེས། །དཀའ་སྤྱད་སྙིང་རུས་གང་

ཡང་མི་ནུས་པའི། །མི་དང་འགྲོགས་ན་རང་ཡང་ཇེ་ངན་འགྲོ། །ཁག་ངན་སྔགས་ལ་བཀལ་ནས་སྤྱོད་ངན་གྱིས། །རྒྱལ་ཁམས་འཕུང་པའི་མི་དང་མ་འགྲོགས་ཤིག །ཚེ་འདི་བློས་བཏང་སྡོམ་པ་དམ་ཚིག་གཙང་། །དབེན་པར་སྒྲུབ་པ་ལྷུར་ལེན་རྣལ་འབྱོར་པར། །འགྲོགས་ན་ཚེ་འདིར་རང་དོན་འགྲུབ་པ་དང་། །གཞན་དོན་ཡིན་ཡང་ཤུགས་ཀྱིས་འོང་བར་ངེས། །དམ་པའི་བྱིན་རླབས་དབེན་པའི་རི་སུལ་དུ། །དམ་པའི་ལྷ་ཆོས་བྱེད་པའི་རྣལ་འབྱོར་པས། །དམ་པ་གོང་མ་རྣམས་ཀྱི་ཕྱག་སྲོལ་བཞིན། །དམ་ཆོས་གླུ་དབྱངས་འདི་འདྲ་ལེན་པར་རིགས། །ཞེས་བར་སྐབས་ཀྱི་ཚིགས་སུ་བཅད་པའོ།། ༈ །།གཞན་ཡང་མདོ་ལས། ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲ་སྨིན་པར་འགྱུར། །གསུངས་པ་དང་། ལུས་ཅན་རྣམས་ཀྱི་ལས་དག་ནི། བསྐལ་པ་བརྒྱར་ཡང་ཆུད་མི་ཟ། །ཚོགས་ཞིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་པ་དང་། སྡིག་པ་ཆུང་དུ་བྱས་པས་ཀྱང་། །འཇིག་རྟེན་ཕ་རོལ་འཇིགས་ཆེན་དང་། །ཕུང་ཁྲོད་ཆེན་པོ་བྱེད་འགྱུར་ཏེ། །ཁོང་བར་སོང་བའི་དུག་བཞིན་ནོ། །

ཞེས་དང་། ཨོ་རྒྱན་རིན་པོ་ཆེས། ཚེ་རབས་མང་པོར་སྡུག་བསྔལ་རྒྱུར་འགྱུར་བའི། །སྡིག་པས་ཚེ་འདིར་བདེ་བས་ཅི་ཞིག་བྱ། །ཚེ་འདི་ཡུན་ཐུང་ལོ་ཟླ་འགའ་ཞིག་ཡིན། །འཇིག་རྟེན་ཕྱི་མར་ཚད་གཟུང་མེད་པའི་ཕྱིར། །ཚེ་རབས་གཏན་དུ་སྡུག་བསྔལ་མི་འབྱུང་ཞིང་། །བདེ་བའི་ཐབས་སུ་དགེ་སྡིག་བླང་དོར་བྱ། །གསུངས། དེ་བཞིན་དུ་མདོ་རྒྱུད་བསྟན་བཅོས་གང་ན་ཡང་ལས་རྒྱུ་འབྲས་ཕྲ་ཞིང་ཕྲ་བ་ཡང་ཁྱད་དུ་མི་གསོད་པར་འདོར་ལེན་བྱེད་དགོས་ཞེས་མཐུན་པར་གསུངས་པས་ན། སྡིག་པའི་སྐྱོན་གྱིས་མི་གོས་པའི་སྐྱེས་བུ་དམ་པ་འདྲ་ཡིན་ན་མ་གཏོགས། གཞན་མདོ་སྔགས་ཀྱི་ཆོས་སྒོར་ཞུགས་པའི་མཆོག་དམན་བར་མ་སུ་ཡིན་ཡང་ལས་རྒྱུ་འབྲས་མི་བསླུ་བ་ལ་ངེས་པ་བརྟན་པོ་རྙེད་ནས། སངས་རྒྱས་སྲས་བཅས་ཀྱིས་ཅི་གསུང་ལས་རྒྱུ་འབྲས་ལྟར་བྱེད་དགོས། འོ་ན་ཇི་སྐད་བྱེད་དགོས་ཟེར་ན། མདོ་ལས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། །གསུངས་པ་ལྟར་སེམས་ཅན་ཐམས་

ཅད་ལ་འཕྲལ་དུ་གནོད་ལ་ཕུགས་སུའང་གནོད་པའི་ལས་ཐམས་ཅད་མི་དགེ་བ་ཡིན་པས་སྤོང་དགོས། སེམས་ཅན་ལ་འཕྲལ་དུ་ཕན་ལ་ཕུགས་སུའང་ཕན་པའི་ལས་ཐམས་ཅད་དགེ་བ་ཡིན་པས་སྒྲུབ་དགོས། དཔེར་ན་གཏར་སྲེག་གིས་ནད་འདོན་པ་འཕྲལ་དུ་ཅུང་ཟད་ལུས་ལ་གནོད་རུང་ཕུགས་སུ་ནད་བཏོན་ནས་ཕན་པ་ལྟར་འཕྲལ་དུ་གནོད་པ་མི་དགེ་བ་ལྟར་སྣང་ཡང་ཕུགས་སུའང་ཕན་ཐོགས་ཆེན་པོ་འབྱུང་ན་དོན་དུ་དགེ་བ་ཡིན་པས་བསྒྲུབ་དགོས། དཔེར་ན་དུག་དང་འདྲེས་པའི་ཁ་ཟས་སྦྱིན་པར་བཏང་བ་འཕྲལ་དུ་ཕན་པ་ལྟར་སྣང་ཡང་ཕྱི་ནས་སྡུག་བསྔལ་ཚད་མེད་སྐྱེད་པ་ལྟར། འཕྲལ་དུ་གཞན་ལ་ཕན་པ་དགེ་བ་ལྟར་སྣང་ཡང་ཕུགས་སུ་གནོད་པ་ཆེན་པོ་འབྱུང་ན། དོན་དུ་མི་དགེ་བ་ཡིན་པས་སྤོང་དགོས། དེ་དག་གི་བླང་དོར་ཞིབ་མོ་རྒྱས་པར་སངས་རྒྱས་ཀྱི་གསུང་རབ་དང་ལམ་རིམ་སོགས་ནས་བཤད་པ་ལྟར་བྱེད་དགོས། འོ་ན་སངས་རྒྱས་ཀྱིས་ཆོས་ཐམས་ཅད་རྫུན་པ་བསླུ་བ་མི་རྟག་པ་སྙིང་པོ་མེད་པ་སྒྱུ་མ་དང་། རྨི་ལམ་བྲག་ཆ་ལྟ་བུ་ཡིན་གསུངས་འདུག་པས། དགེ་སྡིག་ལ་བླང་དོར་ཞིབ་ཏུ་མ་བྱས་ཀྱང་རུང་ཟེར་ན།

དེ་ལ་ཆོས་རྗེ་འབྲུག་པ་ཀུན་ལེགས་ཀྱིས། སྒྱུ་མ་ཡིན་གསུངས་ཏེ། ཆགས་སྡང་དང་ནོར་རྫས་སྒྱུ་མར་མི་འགྲོ་བས་ཀུན་སྤྱོད་སྒྱུ་མར་འགྲོ་བ་འདི་ཇི་ལྟར་ཡིན་མ་ཤེས་གསུངས། དེ་ཐུགས་བདེན་ཏེ། ཆོས་ཀུན་སྒྱུ་མར་ཤར་བའི་རྣལ་འབྱོར་པ་བཟང་པོ་ཞིག་ཡིན་ན། དེ་ལྟར་མ་རྟོགས་པ་རྣམས་ལ་ལྷག་པར་སྙིང་རྗེ་སྐྱེས། རྨི་ལམ་ལ་རང་བཞིན་མེད་རུང་གཉིད་ལས་སད་རག་བར་དུ་ལུས་སེམས་གཉིད་སོགས་འཚོགས་པའི་རྟེན་འབྲེལ་ལས་རྨི་ལམ་བཟང་ངན་སྣ་ཚོགས་བྱུང་། བདེ་བ་མྱོང་བ་དང་སྡུག་བསྔལ་མྱོང་སྣང་བ་ཡོད་པ་ལྟར། ཆོས་ཐམས་ཅད་ལ་རང་བཞིན་མེད་རུང་དེ་ལྟར་མངོན་དུ་མ་གྱུར་བར་དུ། རྒྱུ་མ་རིག་ཉོན་མོངས་དགེ་སྡིག་གི་ལས་སྣ་ཚོགས་པའི་རྟེན་འབྲེལ་ལས། འབྲས་བུ་བདེ་སྡུག་མྱོང་བ་ངེས་ཤེས་ཆེར་སོང་ནས། སྔར་བས་ལས་འབྲས་ལ་འཛེམ་པ་ཞིག་ཡིན་ཀྱང་། དེང་སང་དབུ་རྫོགས་ཕྱག་གསུམ་གྱི་ལྟ་བ་སྒོམ་པར་རློམས་པ་ཕལ་ཆེར་རྒྱུ་འབྲས་ལ་ཇེ་རྩིང་དུ་འགྲོ་བ་འདི་ཇི་ཡིན་མི་ཤེས་ཏེ། ལས་རྒྱུ་འབྲས་ལ་མི་འཛེམ་པར་མི་དགེ་བ་དང་འདྲེས་པའི་སྤྱོད་པ་ཆལ་ཆོལ་བྱེད་

དུས་སྒྱུ་མ་ཡིན་པས་ཆགས་སྡང་སོགས་ཉོན་མོངས་པ་མེ་ལྟར་འབར། ལས་ངན་པ་མཚོ་ལྟར་རྡོལ་བ་སོགས་ཀྱི་དུས་ཁྱོད་ཀྱི་སྒྱུ་མ་གང་དུ་སོང་། འདི་ནི་དབུ་རྫོགས་ཕྱག་ཆེན་པ་རུ་བརྫུས་ནས་ལས་རྒྱུ་འབྲས་ལ་གནོད་པའི་ཆོམ་རྐུན་ཞིག་སྙིགས་དུས་འདིར་བྱུང་བ་ཡིན་པས་གཞན་མ་སེམས། ཆོས་ཐམས་ཅད་སྒྱུ་མ་རྨི་ལམ་ལྟར་རྟོགས་ནས་ཇི་བཞིན་མངོན་དུ་གྱུར་པའི་སངས་རྒྱས་རྣམས་ལ་རང་གི་ངོས་ནས་ཕན་གནོད་མེད་རུང་། སེམས་ཅན་རྣམས་ལ་ཕན་ཕྱིར་སྡིག་སྤོང་དགེ་སྒྲུབ་བྱེད་པ་སངས་རྒྱས་པའི་ཁྱད་ཆོས་ཡིན། སངས་རྒྱས་ནས་རྒྱུ་འབྲས་ལ་མི་འཛེམ་པར་སྡིག་པ་བྱེད་པའི་སངས་རྒྱས་ཤིག་སྔར་ཡོད་མ་མྱོང་། འོ་སྐོལ་རྣམས་ཚེ་འཁོར་བ་ཐོག་མ་མེད་པའི་དུས་ནས་མ་རིག་པའི་དབང་དུ་སོང་། ང་མེད་པ་ལ་ངར་བཟུང་ནས་ཉོན་མོངས་པ་ལངས། ལས་བཟང་ངན་སྣ་ཚོགས་བསགས་པས། འཁོར་བའི་ཆོས་འདི་རྣམས་མ་བཅོས་བཞིན་དུ་བྱུང་། ཚུགས་ཐུབ་བདེན་གྲུབ་ཏུ་བཟུང་ནས། ད་བར་འཁོར་བ་འདིར་ཡང་དང་ཡང་འཁྱམས་ནས་བདེ་སྡུག་སྣ་ཚོགས་མྱངས་བ་ཡིན། ད་སངས་རྒྱས་བཅོམ་ལྡན་འདས་ཀྱིས་ཆོས་ཐམས་ཅད་

སྒྱུ་མ་རྨི་ལམ་ཡིན་གསུངས་པ་ཐོས་པ་ཙམ་གྱིས་ལས་དགེ་སྡིག་བསགས་ན་འབྲས་བུ་བདེ་སྡུག་མི་མྱོང་བར་ག་ལ་འགྱུར། སྒྱུ་མ་རྨི་ལམ་ཡིན་ཞེས་ྈ་ གོ་བ་དང་ངེས་ཤེས་སྐྱེས་པ་ཙམ་གྱིས་མི་ཆོག །དེ་ལྟར་བསྒོམས་ནས་སྐབས་ཤིག་མངོན་སུམ་དུ་སྒྱུ་མ་རྨི་ལམ་དང་ཁྱད་མེད་དུ་སོང་ནས། ལུས་བལ་ལྟར་བརྒྱངས། འདམ་ལྟར་བརྫིས། ཟན་ལྟར་བཅད་རུང་། ཟན་ཞིག་ལ་དེ་ལྟར་བྱས་པ་ཙམ་གྱི་སྣང་བ་མ་གཏོགས། སྡུག་བསྔལ་གྱི་སྣང་བ་གཏན་ནས་མི་འབྱུང་ན་འདོར་ལེན་མ་བྱས་ཀྱང་རུང་། འོན་ཀྱང་རང་ལ་ཕན་གནོད་མེད་རུང་འཚང་རྒྱ་བ་ལ་སྒྲིབ་གཉིས་སྦྱང་ཚོགས་གཉིས་གསོག་དགོས་པས་འདོར་ལེན་བྱེད་དགོས། སངས་རྒྱས་ནས་གཞན་སེམས་ཅན་ལ་ཕན་གནོད་འབྱུང་བ་ཤེས་ནས་སེམས་ཅན་ཐམས་ཅད་ལ་ཕན་ཕྱིར་རྒྱུ་འབྲས་ཀྱི་འདོར་ལེན་དུས་ནམ་ཡང་བྱེད་དགོས། དེ་ལྟར་མ་ཤེས་པར་སྟོང་ཉིད་ཀྱི་གཏམ་ཙམ་གོ་ནས་བཟུང་། སྔོན་གྱི་གྲུབ་ཆེན་ཕལ་ཆེར་གྱི་ལན་མོ་བྱས་ནས་སྡིག་པ་བསགས་ན། རང་གི་སྟེང་དུ་ཚེ་འདིར་ཡང་མཐོང་ཆོས་མྱོང་འགྱུར་དུ་སྡིག་པའི་འབྲས་བུ་སྨིན་ནས་རྣམ་སྨིན་

རྩུབ་པོ་མྱོང་དགོས། ཕྱི་མར་ཡང་སྡུག་བསྔལ་ཚད་མེད་འབྱུང་། དེས་ན་ཆོས་ཐམས་ཅད་སྒྱུ་མ་རྨི་ལམ་ལྟར་གྱུར་ནས་རི་བྲག་ལ་ཐལ་བྱུང་དུ་བགྲོད་ནུས། ལུས་འདོད་དགུར་བསྒྱུར་ནས། བདེ་སྡུག་གང་གིས་ལུས་སེམས་ལ་ཕན་གནོད་སྤུ་ཙམ་ཡང་མི་འབྱུང་བའི་ཚད་ལ་སླེབས་རག་བར་དུ་ལས་རྒྱུ་འབྲས་ལྟར་བྱེད་པ་གཅེས། འོ་ན་ཚེ་འདིའི་སྣང་བ་དང་། རྨི་ལམ་གྱི་སྣང་བ་ལ་ཁྱད་མེད་ན། རྨི་ལམ་ལ་གྲི་བཏབ་ནས་མི་བསད། རྐུ་བྱས། བུད་མེད་ལ་སྤྱད་པ་སོགས་རྨིས་ན་སྡོམ་པ་འཆོར་ངམ་མི་འཆོར་ཟེར་ན། དེ་དངོས་སུ་སེམས་ཅན་ལ་གནོད་པ་མེད་པས་སྡོམ་པ་མི་འཆོར་བས། སངས་རྒྱས་ཀྱིས་རྨི་ལམ་ལ་བཅས་པ་མ་མཛད་པ་ཡིན། འོན་ཀྱང་འཁོར་བ་ངན་སོང་དུ་སྐྱེ་བའི་རྒྱུ་བག་ཆགས་ངན་པ་ཡིན་པས། སངས་རྒྱས་ཀྱིས་དུས་ནམ་ཡང་ཡིད་ལ་བསམ་ངན་སྦྱོར་རྩུབ་སྐད་ཅིག་མ་གཅིག་ཙམ་ལ་ཡང་དྲན་མི་རུང་གསུངས་པ་དང་འགལ་བ་ཡིན། དེ་མི་དགེ་བཅུའི་ནང་གི་གནོད་སེམས་སུ་གཏོགས་པས་བཤགས་པ་བྱ་དགོས། ཁྱད་པར་རང་གིས་བཀའ་དྲིན་གསུམ་ལྡན་གྱི་བླ་མ་ལ་ལོག་ལྟ་བྱས་ནས་སྒྲོ་སྐུར་འདེབས་པ་

འཁོན་འཛིང་བྱེད་པ་ལྟ་བུ་རྨིས་ན་ཡང་དམྱལ་བར་སྐྱེ་བ་རྒྱུད་དུ་མ་ནས་གསུངས་འདུག་པས། དེ་འདྲ་རྨིས་ན་དེ་མ་ཐག་ཏུ་དུག་ཁོང་དུ་སོང་བ་ལྟ་བུའི་འགྱོད་སེམས་ཀྱིས་བཤགས་སྡོམ་ཡང་ཡང་བྱ་དགོས། འོ་ན་རྨི་ལམ་དུ་སེམས་ཅན་གྱི་སྲོག་སྐྱོབ་པ་བླ་མ་ལ་བསྙེན་བཀུར་བྱེད་པ་ལྟ་བུ་རྨིས་ན། ཕན་ཡོན་ཡོད་དམ་ཟེར་ན། དེ་མཐོ་རིས་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་ཐབས་ཀྱི་རྒྱུ་བག་ཆགས་བཟང་པོ་རྒྱུད་ལ་ཐེབས་པས། ཕན་ཡོན་ཡོད་ཅེས་སྐྱེས་བུ་དམ་པ་འགའ་ཞིག་གི་ཞལ་ནས་ཐོས། འོ་ན་ཆོས་པས་སྲིན་འབུ་སོགས་བསད་ཀྱང་སྐྱོན་གྱིས་མི་གོས། སྨྱུང་གནས་ཀྱི་བསྙེན་ཚད་སོང་བའི་ཆོས་མཛད་གང་ཟག་དེ་མཐོང་ཐོས་དྲན་རེག་རྣམས་ངན་སོང་དུ་མི་ལྟུང་བར་མཐོ་རིས་སུ་སྐྱེ་བར་སྨྱུང་གནས་ཀྱི་ཕན་ཡོན་འགའ་ཞིག་ན་སྣང་། གཞན་ཡང་མདོ་དང་སྔགས་ཉམས་སུ་བླངས་ནས་རྟོགས་པ་ཁྱད་པར་ཅན་སྐྱེས་པའི་རྣལ་འབྱོར་པ་མཐོང་ཐོས་དྲན་རེག་སྨིན་ཅིང་གྲོལ་བའི་ཕན་ཡོན་མདོ་སྔགས་ཀྱི་གཞུང་དུ་མ་ནས་གསུངས། ཐ་ན་གཟུངས་སྔགས་འགའ་རེ་བཏོན་ནས། སྔ་མོ་མཆིལ་མ་རྐང་

མཐིལ་ལ་བྱུགས་ན། དེའི་ཉིན་སྲིན་འབུ་གང་བསད་ཚད་སུམ་ཅུ་རྩ་གསུམ་གྱི་ལྷར་སྐྱེ་ཞེས་སྔགས་འབུམ་དང་ཉིན་ཞག་ཕྲུག་གཅིག་གི་ཉམས་ལེན་བྱ་ཚུལ་དུ་མ་ནས་བཤད། གཞན་ཡང་རྙིང་མའི་བཏགས་གྲོལ་མཐོང་གྲོལ་སོགས་མདོ་སྔགས་ཀྱི་ཕྱོགས་སུ་གཏོགས་པའི་ཆོས་ཟབ་མོ་དང་། དེ་བཞིན་གཤེགས་པའི་མཚན་གཟུངས་སྔགས་ཁམས་ཆེན་རེ་ཚར་གཅིག་ཙམ་རེ་ཀླགས་ན། མགུལ་དུ་བཏགས་ན། མིག་གིས་མཐོང་ན། རྣ་བས་ཐོས་ན། དེ་ལ་རེག་ན། འོག་ཏུ་འཛུལ་ན་ཡང་སྡིག་པ་རི་རབ་ཙམ་ཡང་སྐད་ཅིག་དེ་ཉིད་ལ་འདག་ཅིང་། བསོད་ནམས་དཔག་ཏུ་མེད་པ་ཐོབ་ཅེས་མདོ་རྒྱུད་བསྟན་བཅོས་ན་མང་པོ་སྣང་། རྟེན་འདུས་རིལ་བུ་ཁམས་ཆེན། སྐྱེ་བདུན་རིལ་བུ། བདུད་རྩི་ཆོས་སྨན་སོགས་ཏིལ་འབྲུ་ཙམ་ཁར་སོང་ཡང་སྡིག་ཅན་ཡིན་ཡང་ངན་སོང་དུ་མི་སྐྱེ་བར་མཐོ་རིས་ཐར་པའི་གོ་འཕང་ཐོབ་ཚུལ་གྱི་ཕན་ཡོན་མང་པོ་སྣང་། ཆོས་པ་རྣམས་ཀྱིས་དེ་རྣམས་ཤེས་པས། མཁས་པའི་སྡིག་པ་ལྕི་ཡང་ཡང་གསུངས་པའི་རྒྱུ་མཚན་དེ་ཚོ་ཡིན། དེ་རྣམས་ལག་ལེན་ལ་བཏབ་ན་ཆོས་པས་སྡིག་པ་བྱས་རུང་ཉེས་པ་མེད་པ་ཙམ་དུ་མ་

ཟད། ཕན་ཡོན་ཀྱང་འགའ་ཞིག་ལ་བརྟེན་ནས་འབྱུང་ཚོད་ན་འདུག་ཟེར་ན། འོ་དེ་རྒྱལ་བའི་གསུང་རབ་ཀྱི་དགོངས་པ་མ་ལོན་པས་ཅལ་ཅོལ་ཆེན་པོ་ཞིག་སྨྲས་པ་ཡིན་ཏེ། ཆོས་པ་བཟང་པོ་མཐོང་ཐོས་དྲན་རེག་ལ་ཕན་ཐོགས་པ་དེ་བདེན་ན། ཕན་བཏགས་ན་ལེགས་ཀྱིས་སྲིན་འབུ་སོགས་བསད་ནས་སྡིག་པ་བྱས་པས་གང་ཡོང་། མ་བསད་བཞིན་དུ་ཕན་འདོགས་ཚུལ་མེད་དམ། བསད་ན་ཉེས་པ་མེད་ཟེར་བ་དེ་གླེན་པ་ཁྱོད་མ་གཏོགས་གཞན་མཁས་པ་སུ་ཞིག་གིས་སྨྲར་སྤོབས། ཆོས་པ་རྣམ་དག་ཞིག་མི་དགོས་ཆོས་སྒོར་ཞུགས་པ་སུ་ཡིན་ཡང་། བསམ་བཞིན་དུ་སྡིག་པ་བྱས་ན། གཞན་སྐྱེ་བོ་ཐ་མལ་བས་སྡིག་པ་བྱས་པ་དང་ཡང་མི་འདྲ། སྡིག་པ་བྱས་པའི་ཉེས་དམིགས་ཀྱི་སྟེང་དུ་སོ་ཐར་དང་འགལ་བའི་ཉེས་པ། དེའི་སྟེང་དུ་བྱང་སེམས་ཀྱི་སྡོམ་པ་དང་འགལ་པའི་ཉེས་པ། དེ་ཙམ་དུ་མ་ཟད་དེའི་སྟེང་དུ་སྔགས་ཀྱི་སྒོར་ཞུགས་པ་ཞིག་ཡིན་ན། གསང་སྔགས་ཀྱི་དམ་ཚིག་དང་འགལ་པའི་ཉེས་པ་རྣམས་དུས་གཅིག་ལ་འབྱུང་བས་ཉེས་འགལ་གྱི་ཁུར་གྱིས་ནོན་པར་འགྱུར། སྲོག་གཅོད་སོགས་སྡིག་པའི་

འབྲས་བུས་ངན་སོང་དུ་སྐྱེ་བ་ཙམ་དུ་མ་ཟད། སྡོམ་གསུམ་གྱི་བཅས་པ་གསུམ་གང་རུང་གཅིག་དང་འགལ་རུང་། དམྱལ་བར་འགྲོ་བར་གསུངས་པས། ནམ་ཡང་ངན་སོང་གསུམ་ནས་ཐར་པའི་དུས་མི་འབྱུང་། གཟུངས་སྔགས་ཀྱི་ཆུ་རྐང་མཐིལ་གཉིས་སུ་བྱུགས་ནས་ཕན་གསུངས་པའི་དགོངས་གཞི་ཡང་། ཉིན་དེར་འཛེམས་ཀྱང་མ་མཐོང་། མ་གོ་མ་ཤེས་པའི་དབང་གིས་སྲིན་འབུ་ཆུང་ཆུང་རེ་གཉིས་རེ་བསད་ཨེ་གཏོང་སྙམ་ནས་སྙིང་རྗེ་སྐྱེས། གལ་ཏེ་དེ་རིང་ཉིན་སྲིན་འབུ་རེ་རྐང་པས་བརྫིས་ནས་བསད་སོང་ན་ཡང་སྔགས་འདིའི་ནུས་པས་སུམ་ཅུ་རྩ་གསུམ་གྱི་ལྷ་གནས་སུ་སྐྱེ་བར་ཤོག་སྙམ་པའི་གཞན་ཕན་བྱང་ཆུབ་སེམས་ཀྱིས་ཀུན་ནས་བསླངས་ཏེ། དེའི་དོན་དུ་དམིགས་ནས་གཟུངས་སྔགས་བཟླས། སྔགས་ཆུ་རྐང་མཐིལ་དུ་བྱུགས་ན། ཆོས་ཐམས་ཅད་བསམ་པ་ལ་རག་ལས་པས། བསམ་པ་བཟང་ན་ས་དང་ལམ་ཡང་བཟང་གསུངས་པ་དང་། །བསམ་པ་བཟང་ན་ཅི་བྱས་ཆོས་སུ་འགྲོ་ཞེས་སྐྱེས་བུ་དམ་པས་གསུངས་པ་ལྟར་ཡིན་པས། བསམ་པ་བཟང་པོའི་སྟོབས་དང་། དེ་བཞིན་གཤེགས་པའི་གསུང་

གཟུངས་སྔགས་ཀྱི་ནུས་པ་སོགས་ཀྱི་མཐུ་ལ་བརྟེན་ནས་ཕན་ཐོགས་ཡོང་། གལ་ཏེ་ལས་ངན་པའི་དབང་གིས་ཁོ་ལ་ཕན་མ་ཐོགས་རུང་། བསམ་པ་བཟང་པོའི་མཐུས་རང་ལ་ཉེས་པ་མི་འབྱུང་བ་ལ་དགོངས་ནས་དེ་སྐད་གསུངས་པ་ཡིན་གྱི། དེ་མ་ཡིན་པར་ངས་སྔགས་ཆུ་རྐང་པ་ལ་བྱུགས་ཡོད་པས། སྲིན་འབུ་མང་པོ་བསད་ཀྱང་རུང་། སུམ་ཅུ་རྩ་གསུམ་གྱི་ལྷར་སྐྱེ་བས་བཟང་ངོ་སྙམ་ནས་མི་འཛེམ་པར་མིག་གིས་མཐོང་། རྣ་བས་ཐོས། ཡིད་ཀྱིས་ཤེས་བཞིན་དུ་རྐང་པ་གཉིས་ཀྱིས་བརྫིས་ནས་ཅི་སོད་བྱས་ན། དེ་མང་བསད་དགེ་ཡིན་ཟེར་བའི་རྒྱ་ནག་གི་ཕྱོགས་ཀྱི་རྒྱ་ཟ་ལར་མུ་སྟེགས་པའི་ཆོས་ལུགས་དང་། རྒྱ་གར་བལ་པོའི་ཕྱོགས་ཀྱི་ཕྱི་རོལ་མུ་སྟེགས་པ་ཁ་ཅིག་གི་ཆོས་ལུགས། ནང་པ་སངས་རྒྱས་ཀྱི་ལུགས་དང་གཏན་ནས་མ་འདྲེས་པ་དེ་ཁོ་ན་ལ་ལག་ལེན་བྱས་པ་ཡིན་པས། ཕན་ཡོན་སྤུ་ཙམ་མེད་པར་མ་ཟད། བླ་མའི་བཀའ་དང་འགལ། སྐྱབས་འགྲོའི་བསླབ་བྱར་འགལ། སོ་ཐར་བྱང་སེམས་སྔགས་སྡོམ་གྱི་བཅས་པ་དང་འགལ། མདོ་རྒྱུད་བསྟན་བཅོས་ཐམས་ཅད་ན་སྡིག་པ་ཅི་

ཡང་མ་བྱེད་གསུངས་པ་སོགས་དང་རྒྱབ་འགལ་བྱས་པ་ཡིན་པས། སྡིག་པ་དེ་བས་ཆེ་བ་ཞིག་གཞན་ན་མེད། གཟུངས་སྔགས་དང་དེ་བཞིན་གཤེགས་པའི་མཚན་བརྗོད་པ་སོགས་ཆོས་ཀྱི་ཕན་ཡོན་བཤད་པ་དེ་ཀུན་ཀྱང་། སྔོན་ཆད་མ་རིག་ཉོན་མོངས་དུག་ལྔའི་དབང་གིས་སྡིག་པ་བྱས་པ་དང་ཕྱིན་ཆད་ཀྱང་གཉེན་པོ་སྟོབས་ཆུང་ཉོན་མོངས་སྟོབས་ཆེ་བས། རང་ལ་དབང་མ་བྱུང་བར་དེའི་དབང་གིས་སྡིག་པ་རེ་བྱས་སོང་ན། ཕྱིས་དེ་མ་ཐག་དེ་ལ། སྐུ་གསུང་ཐུགས་རྟེན་གྱི་དྲུང་ངམ་ཡང་ན་མདུན་གྱི་ནམ་མཁར་ཚོགས་ཞིང་བསྐྱེད་པ་རྟེན་གྱི་སྟོབས་དང་། སྔར་བྱས་ཀྱི་སྡིག་པ་དུག་ཁོང་དུ་སོང་བ་ལྟར་གནོད་ཞིང་འགྱོད་པ་སུན་འབྱིན་པའི་སྟོབས་དང་། གཟུངས་སྔགས་དང་དེ་བཞིན་གཤེགས་པའི་མཚན་བརྗོད་པ་སོགས་གཉེན་པོ་ཀུན་ཏུ་སྤྱོད་པའི་སྟོབས་དང་། ཕྱིན་ཆད་སྲོག་ལ་བབས་ཀྱང་དེ་འདྲའི་སྡིག་ལས་མི་བྱེད་དོ་ཞེས་ཚོགས་ཞིང་གི་མདུན་དུ་དམ་བཅའ་བ་ཉེས་པ་ལས་སླར་ལོག་པའི་སྟོབས་བཞི་ཚང་བའི་བཤགས་པ་བྱས་ན་འདག་པ་ལ་དགོངས་ནས་དེ་སྐད་གསུངས་པ་ཡིན་གྱི། དེ་ལྟར་མ་ཡིན་པར་སྡིག་པ་གང་བྱས་གཟུངས་སྔགས་

རེ་དང་། ལྟུང་བཤགས་ཀྱི་ལྷ་ཚོགས་ལྟ་བུའི་དེ་བཞིན་གཤེགས་པའི་མཚན་རེ་བརྗོད་པ་དང་། གཟུངས་མཆོག་རྒྱལ་པོ་པདྨོ་ཨུཥྞཱི་ཥ་སོགས་ཀྱི་འོག་ཏུ་འཛུལ་བ་ཙམ་གྱིས་འདག་པས་ལས་སླ་བར་འདུག་སྙམ་ནས་བསམ་བཞིན་དུ་སྡིག་པ་བྱས་ནས། ཕྱིས་འགྱོད་སྡོམ་སོགས་མེད་པར་ཁ་ནས་བཤགས་ཚིག་རེ་དང་། གཟུངས་སྔགས་སོགས་བཏོན་པས་སྡིག་པ་འདག་པ་ཞིག་རྒྱལ་བ་སྲས་བཅས་ཀྱིས་མ་གསུངས་ཏེ། མཁས་གྲུབ་རཱ་ག་ཨ་སྱེའི་ཞལ་ནས། འགྱོད་པ་མེད་ན་བཤགས་པས་མི་འདག་པས། །སྔར་བྱས་སྡིག་པ་ཁོང་དུ་དུག་སོང་ལྟར། །ངོ་ཚ་འཇིགས་སྐྲག་འགྱོད་པ་ཆེན་པོས་བཤགས། །ཕྱིན་ཆད་སྡོམ་སེམས་མེད་ན་མི་འདག་པས། །ཕྱིན་ཆད་སྲོག་ལ་བབས་ཀྱང་མི་དགེའི་ལས། །ད་ནི་མི་བགྱིད་སེམས་ལ་དམ་བཅའ་བཟུང་། །གསུངས། སྡིག་པ་མི་འདག་པ་ཙམ་དུ་མ་ཟད། སངས་རྒྱས་ཀྱི་བཀའ་ཡི་དགོངས་པ་མ་ལོན་པར་ལོག་པར་གོ་ནས་ལོག་པར་སྤྱད་པ་ཡིན་པས། ཉེས་པ་དཔག་ཏུ་མེད་པ་འབྱུང་བ་ཚད་ལྡན་གྱི་མཁས་གྲུབ་དུ་མས་གསུངས། དཔེར་ན་མེ་ཆེན་པོ་འབར་ནས་འོང་བ།

དེ་གསོད་པའི་གཉེན་པོ་ཆུ་ཡིན་ཀྱང་། མཚོ་ཁོ་ལ་མེ་འབར་ན་གཞན་གསོད་ཐབས་ཅི་ཡང་མེད་པ་ལྟར། སྡིག་པའི་གཉེན་པོ་ཆོས་ཡིན་ཡང་། ཆོས་སྡིག་པའི་གྲོགས་སུ་ཤོར་སོང་བ་དེ། བཤགས་ཐབས་མེད་པའི་སྡིག་པ་མནར་མེད་དམྱལ་བར་སྐྱེ་བའི་རྒྱུ་འབའ་ཞིག་ཡིན་པས་གཞན་མ་སེམས། མཁས་པའི་སྡིག་པ་ལྕི་ཡང་ཡང་གསུངས་པ་དེ། མཁས་པས་བླང་དོར་གྱི་གནས་ཤེས་པས་སྡིག་པ་བྱེད་མི་སྲིད། གལ་ཏེ་བག་མེད་པའི་དབང་གིས་རེ་རེ་ཙམ་བྱས་སོང་ཡང་། ཕྱིས་དེ་མ་ཐག་ཏུ་སྡིག་པ་རུ་ངོ་ཤེས། དེའི་དབང་གིས་ངན་སོང་དུ་སྐྱེ་བ་ཤེས་ནས་འཇིགས་ཤིང་སྐྲག་སྟེ། ཉེས་ལྟུང་དང་ཞག་གཅིག་ཙམ་ཡང་མི་འགྲོགས་པར་སྟོབས་བཞིའི་བཤགས་པ་ཤེས་ཚད་བྱས་ཏེ་འདག་ཏུ་འཇུག་པ་ལ་དགོངས་ནས་དེ་སྐད་གསུངས་པ་ཡིན་གྱི། དེ་ལྟར་མ་ཡིན་པར་དགེ་བའི་ཕན་ཡོན་སྡིག་པའི་ཉེས་དམིགས་ཤེས་ནས། དགེ་སྡིག་བླང་དོར་མི་བྱེད་པར་སྡིག་པ་ལ་སྤྱད་ན་ཡང་། ཡང་གསུངས་སྙམ་ནས་འཁྲུལ་བར་མི་བྱའོ། །དེང་སང་ཆོས་ཤེས་ཟེར་བ་འགའ་ཞིག་གིས་རྒྱལ་བའི་གསུང་རབ་ཀྱི་དགོངས་པ་མ་ལོན་པར་ཆོས་ཀྱི་ཕན་ཡོན་

རེ་ཙམ་གོ་ཚེ། དེ་ཚིག་སྒྲ་ཇི་བཞིན་པར་བཟུང་ནས། ཁོང་ཚོའི་སྡིག་པ་བྱས་ཀྱང་སྐྱོན་གྱིས་མི་གོས་པའི་བློ་གདེང་ཡོད་པ་ཡིན་ཟེར་ཁ་ཕོ་ནམ་མཁའི་འབྲུག་ལྟར་སྒྲོགས། སྡིག་པ་མི་དགེ་བའི་ལས་ལ་མི་འཛེམ་པ་མང་། དེ་སྐད་སྨྲས་ནས་ལག་ལེན་ལ་སྡིག་ལས་འདེབས་པ་རྣམས་ཀྱིས་ཆོས་མ་ཤེས་པའི་རང་མཚང་ཕྱིར་བསྟན་ནས། ཆོས་ཀྱི་བདག་པོ་རྒྱལ་བ་སྲས་བཅས་རྣམས་ཐུགས་ཁྲེལ་དུ་བཅུག །རང་གཞན་ཀུན་འཕུང་ལ་སྦྱོར་བའི་ཐབས། ཆོས་ལ་བརྟེན་ནས་རྙེད་པ་ཡིན་པས་གཞན་མ་སེམས། དེས་ན་སྐྱེས་བུ་བློ་གྲོས་ཅན་རྣམས་ཀྱིས་སངས་རྒྱས་ཀྱི་གསུང་རབ་ཀྱི་དགོངས་དོན་ཇི་བཞིན་སྡིག་པའི་ལས་སྲོག་ལ་བབས་ཀྱང་ཤེས་བཞིན་མ་བྱེད། གལ་ཏེ་མ་རིག་འཁྲུལ་བའི་དབང་གིས་སྡིག་པའི་ལས་ཅུང་ཟད་རེ་ཙམ་བྱས་སོང་ན་ཡང་། དུག་ཆུ་ཁོལ་མ་ཁོག་ཏུ་ཤོར་བ་ལྟར་འཇིགས་སྐྲག་གནོང་འགྱོད་ཀྱི་སྒོ་ནས། དེ་བཞིན་གཤེགས་པའི་མཚན་བརྗོད་ནས་ཕྱག་འཚལ་བ་སོགས་སྡིག་པ་འདག་པའི་གཉེན་པོ་གང་ཤེས་ལ་འབད། ཕྱིན་ཆད་སྲོག་ལ་བབས་ཀྱང་མི་བྱེད་པའི་དམ་བཅའ་བྱས་ན།

རྒྱལ་བ་སྲས་བཅས་ཀྱིས་ཇི་སྐད་གསུངས་བའི་ཕན་ཡོན་རྣམས་འབྱུང་བར་གདོན་མི་ཟའོ། །འོ་ན་སྔོན་དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་ཅན་བསད་པས། བསྐལ་བ་འབུམ་གྱི་འཁོར་བ་ཕྱིར་བསྙིལ་ཏེ་ཚོགས་རྫོགས་པའི་ལོ་རྒྱུས་དང་། སྔོན་བྲམ་ཟེ་ཁྱེའུ་སྐར་མས་བུད་མེད་ཅིག་མོ་ནད་ཀྱིས་འཆི་ལ་ཉེ་བ་སྙིང་རྗེ་ནས་ཁྱིམ་ཐབས་ལོ་བཅུ་གཉིས་བྱས། སླར་ཚངས་པར་སྤྱད་པས་བསྐལ་པ་ཁྲིའི་འཁོར་བ་ཕྱིར་བསྙིལ་ཏེ་ཚོགས་རྫོགས་པའི་གཏམ་རྒྱུད་སོགས་མདོ་རྒྱུད་བསྟན་བཅོས་ན་དེ་འདྲའི་ལོ་རྒྱུས་མང་པོ་སྣང་བས། དེང་སང་ཆོས་པ་རྣམས་ཀྱི་བྱ་བ་སྤྱོད་པ་འགའ་ཞིག་གིས་སྡོམ་པ་འཆོར་བ་ལྟར་སྣང་ཡང་། སྡོམ་པ་བསྲུང་བ་ལས་ལྷག་པའི་རང་གཞན་ལ་ཕན་པའི་དགོས་པ་ཆེ་ན། དགག་བྱ་བ་ལ་དགོས་པ་གཙོ་ཡིན་པས། སྡོམ་པ་བསྲུང་བའི་ཕན་ཡོན་ལས། དགོས་པ་ཆེན་པོ་ཡོད་པ་དེ་འདེམ་དགོས། དགོས་པ་ཆེ་ན་རྩ་བ་བཞིའི་སྡོམ་པ་འཆོར་བའི་བྱ་བ་མ་ཡིན་པ་ཡང་བྱས་ཆོག་ན། གཞན་ཕྲན་ཚེགས་རྣམས་བྱས་ན་ཆོག་པར་སྨོས་ཅི་དགོས་ཟེར་ན། འོ་དེ་རང་འདོད་ཀྱི་དྲི་མ་གཏན་ནས་མ་མཆིས་པ། གཞན་ལ་ཕན་ན་

སེམས་ཅན་རེ་རེའི་ཕྱིར་ཡང་དམྱལ་བ་མནར་མེད་ཀྱི་མེ་ཆེན་པོར་བསྐལ་བ་རྒྱ་མཚོར་གནས་དགོས་ཀྱང་སྐྱོ་ངལ་མེད་པའི་བྱམས་སྙིང་རྗེ་བྱང་ཆུབ་སེམས་ཀྱི་སྟོབས་རྒྱས་ཤིང་། ཡང་དག་པའི་ལྟ་བ་མངོན་དུ་གྱུར་ནས་སྡུག་བསྔལ་ལྟར་སྣང་ཙམ་ལས། ལུས་སེམས་ཀྱིས་སྡུག་བསྔལ་དངོས་སུ་མྱོང་མི་དགོས་པའི་བྱང་ཆུབ་སེམས་དཔའ་རེ་རེ་ཙམ་གྱི་སྤྱོད་ཡུལ་ཡིན་གྱི། འོ་སྐོལ་རང་འདོད་ཀྱི་དྲི་མའི་སྦུབས་ན་གནས་ཤིང་། གཞན་ཕན་གྱི་དགོས་པ་ཆེན་པོ་མེད་པ་དང་། ཡོད་ཀྱང་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་མི་ཟིན་པ་རྣམས་ཀྱི་སྤྱོད་ཡུལ་ཞིག་ཡིན་པར་མ་སེམས། དེ་ཡིན་སྙམ་ནས་ལག་ལེན་ལ་བཏབ་ན། སེང་གེ་མཆོངས་སར་ཝ་ལྡིང་ན་ལྟག་ཚིགས་འབུད་པ་ལྟར་རང་འཕུང་བའི་ལག་ཆ་ཞིག་ཆོས་ནས་རྙེད་པ་ཡིན། འོ་སྐོལ་རྣམས་ཀྱིས་སྔོན་གྱི་སྐྱེས་བུ་དམ་པ་དེ་རྣམས་ཀྱིས་བྱས་པའི་སྡིག་པ་ཆེན་པོ་དེ་འདྲ་ཞིག་བྱེད་པ་ཕར་ཞོག །སྲིན་འབུ་ཁབ་རྩེ་ཙམ་གསོད་པ་དང་། གཞན་གྱི་ཟས་ནོར་ཏིལ་འབྲུ་ཙམ་ཡང་ལེན་མི་རུང་སྟེ། སྔོན་དེད་དཔོན་སྙིང་རྗེ་ཅན་གྱིས་སྡིག་ཅན་མདུང་ཐུང་ཅན་བསད་

པས་བསྐལ་པ་མང་པོའི་ཚོགས་རྫོགས་པར་བཤད་ཀྱང་། ཕྱིས་སྲོག་བཅད་པའི་ལས་ཀྱི་རྣམ་སྨིན་ལ་ལྕགས་ཀྱི་མདུང་རྣོན་པོ་ཞིག་རྐང་མཐིལ་ནས་བཏབ་སྤྱི་བོའི་བར་ཕུག་ནས་སྡུག་བསྔལ་མྱངས་གསུངས། སྔོན་རྗེ་མི་ལ་སེམས་ཅན་ཐམས་ཅད་ཀྱི་དོན་དུ་ཚེ་གཅིག་ལུས་གཅིག་ལ་འཚང་རྒྱ་བའི་འཚོ་བའི་ཐེབས་སུ། ཟྭ་བཞེས་དུས་ཟྭ་ནང་གི་འབུ་བསལ་ཀྱང་སྤྱན་གྱིས་མ་གཟིགས་པ་རྣམས་བཞེས་པས། ཚེ་གཅིག་ལ་སངས་རྒྱས་ཀྱང་། ཕྱིས་རྒྱལ་བ་ལོ་རས་པའི་སྐུའི་སྐྱེ་བ་བཞེས་དུས་སྐབས་ཤིག །ཤིག་བྲེ་ལ་གཞལ་ཆོག་པ་ལྟ་བུའི་མང་པོ་བྱུང་། ཟོས་ཏེ་རྣམ་སྨིན་མྱངས་བའི་ཚུལ་བསྟན། སློབ་དཔོན་ཀླུ་སྒྲུབ་ཀྱིས་ཟུང་འཇུག་སྐུ་བརྙེས་ནས་དགུང་ལོ་དྲུག་བརྒྱ་ཙམ་བཞུགས་ཀྱང་། སྐུ་ཚེ་སྔ་མ་ཞིག་ལ་འཇག་མ་འཐུ་དུས་སྲིན་འབུ་ཞིག་གི་སྐེ་འཇག་མའི་བར་དུ་བཅར་ནས་ཤི་བའི་རྣམ་སྨིན་གྱིས་རྗེས་སུ་སྡིག་ཅན་གྱི་མི་གཅིག་གིས་དབུ་གཅོད་སྙམ་གྲི་བརྒྱབ་ནས་མ་ཆོད་ཚེ་ཁོང་གིས་འཇག་མས་ཆོད་གསུངས་ནས་བཅད་པས་གཤེགས་པའི་ཚུལ་བསྟན། ལྷ་ལྕམ་པདྨ་གསལ་ཨོ་རྒྱན་དང་མཇལ་ནས་ཆོས་ཐོབ་ཀྱང་། ཚེ་སྔོན་ཁྱི་

གཅིག་བསད་པའི་ལས་ཀྱི་ལྷག་མས་སྐྱེ་བ་མང་པོ་ཞིག་ཏུ་ལུས་ངན་པ་བླངས། ཕྱི་ནས་ལས་འབྲེལ་རྩལ་དང་། པདྨ་གླིང་པ། རིན་ཆེན་གླིང་པར་གྱུར་ཀྱང་། གཤེ་སྐུར་བྱེད་པ་དང་། དགྲ་ལྡང་བ་མང་པོ་བྱུང་འདུག །ལས་ཀྱི་རྣམ་པར་སྨིན་པ་སྐྱེས་བུ་དམ་པས་ཀྱང་ལྡོག་ཏུ་མེད་པར་མྱངས་བའི་ཚུལ་བསྟན་པ་མང་། བྱང་ཆུབ་སེམས་དཔའ་རང་འདོད་གཏན་ནས་ཟད་པ། གཞན་ལ་ཕན་ན་རང་དམྱལ་བར་ལྷུང་ཡང་བཟོད་སྙམ་པས། བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཀུན་ནས་བསླངས་ནས་ལས་བྱས་པ་རྣམས་ཀྱིས་ཀྱང་དེ་འདྲའི་རྣམ་སྨིན་རྩུབ་པོ་རེ་མྱངས་དགོས་ན། འོ་སྐོལ་རྣམས་ཀྱི་རང་འདོད་ཀྱིས་ཀུན་ནས་བསླངས། དགོས་པ་ཆུང་ངུའི་ཕྱིར་དུ་སྡིག་པ་ཆེན་པོ་བྱེད་པ་རྣམས་ཀྱིས་ལས་དེ་འདྲ་བྱས་ན་རྣམ་སྨིན་ཆེན་པོ་མྱོང་དགོས་པ་སྨོས་ཅི་དགོས། དེང་སང་འགའ་རེས། སྦྱང་ལྤགས་དང་། ཝ་ལྤགས། སྟག་ལྤགས་སོགས་གཅན་གཟན་གྱི་པགས་པ་འདོད་ནས། འདི་ཡིས་སེམས་ཅན་ལ་གནོད་འཚེ་བྱེད་པས། འདི་བསད་ན་ཉེས་པ་མེད་ཟེར་རང་འདོད་ཁོང་དུ་བཅུག་ནས།

ཝ་སྤྱང་སྟག་སོགས་གཅན་གཟན་གསོད་པ་དང་། གཞན་གྱིས་ཟས་ནོར་ཅུང་ཟད་རེ་བརྐུས་ན། འདིས་ཀུན་ལ་གནོད་འདུག་ཟེར། ཕྲན་ཚེགས་རེའི་དོན་དུ་མི་རྐུན་དང་ཁྱི་རྐུན་བྱི་བ་གསོད་པ་དང་། རང་ངམ་གཞན་གཉེན་བཤེས་སོགས་ལ་སྟེར་སྙམ། ཕྱུག་པོ་སེར་སྣ་ཅན་གྱི་ཟས་ནོར་སོགས་མ་བྱིན་པ་ལེན་པ་དང་། ཕ་མ་དང་ཉེ་འབྲེལ་ལ་ཕན་དུ་རེ་ནས། དགེ་སློང་བནྡེ་སྐྱ་སེར་ཕབ་ནས་ཁྱིམ་འཛིན་པ་དང་། འདོད་ཡོན་ལམ་གྱི་གྲོགས་སུ་མི་འགྲོ་བར་འདོད་ཡོན་གྱི་དབང་དུ་འགྲོ་ཡང་སྔགས་ལ་འདོད་ཡོན་ཐབས་མེད་ཀྱི་བསྟེན་དགོས་པ་ཡིན་ཟེར་ཁག་ངན་སྔགས་ལ་བཀལ་ནས་ཤ་ཆང་བུད་མེད་ལ་བག་མེད་དུ་སྤྱོད་པ་དང་། རང་ལ་རྙེད་བཀུར་གྲགས་པ་སོགས་འོང་དུ་རེ་ནས། ལྷ་མ་མཐོང་ཡང་ཡི་དམ་ལྷའི་ཞལ་མཐོང་། མངོན་ཤེས་རྫུ་འཕྲུལ་མེད་རུང་ཡོད་ཡོད་ལྟ་བུའི་རྫུ་བག་བྱས། མདོ་སྔགས་ཀྱི་དབང་ལུང་ཁྲིད་གསུམ་མ་ཐོབ་རུང་། གཞན་ལ་དབང་ལུང་ཁྲིད་གསུམ་བྱེད་པ་དང་། རང་ཆེ་འདོད་གྲགས་འདོད་བདེ་འདོད་ཀྱིས་ཀུན་ནས་བསླངས་ཏེ་ཁང་པ་ཆེན་པོ་ཕུག །དགོན་པ་བཏབ་ནས་ར་ལུག་གཡག་གསུམ་བརྒྱ་སྟོང་

བསད། སྲིན་འབུ་བྱེ་བ་ཐེར་འབུམ་གྱི་རབས་རྩ་བ་དགུ་རྒྱུད་ནས་གཅོད་པ་དང་། དགོན་པའི་སྤྱི་ཐོག་ནས་བཞོ་མཛོ་མ་ཉི་ཤུ་སུམ་ཅུ་བཞག །ལོ་རེ་བཞིན་རྟོལ་བུ་གསོད་པ་སོགས་སྡིག་པ་ཚབས་ཆེན་བྱེད་པ་རྣམས། སྐྱོན་གྱིས་མི་གོས་པའི་སྐྱེས་བུ་དམ་པ་འདྲ་ཡིན་ན་མ་གཏོགས་གཞན་སུ་ཡིན་རུང་། སྟེང་དུ་ཉེས་པ་དཔག་ཏུ་མེད་པ་འབྱུང་བ་ཡིད་གཉིས་ཐེ་ཚོམ་མི་དགོས་པར་ཐག་ཆོད། དེས་ན་རང་ལེགས་སུ་འདོད་པ་རྣམས་ཀྱིས་ལས་རྒྱུ་འབྲས་ལྟར་སྡིག་པ་མི་དགེ་བ་ཕྲ་ཞིང་ཕྲ་བ་ལ་འཛེམ་པ་གལ་ཆེ། དེ་ལྟར་མི་དགེ་བ་ཆུང་ངུ་ཙམ་གྱིས་ཀྱང་སྐྱོན་གྱིས་མི་གོས་པར་འདོད་ན། ཆགས་སྡང་སོགས་ཉོན་མོངས་པ་སྲོག་གཅོད་མ་བྱིན་ལེན་སོགས་མི་དགེ་བ་ཐམས་ཅད་སྐྱེད་པའི་རྩ་བ་སྤྱིར་འདོད་ཡོན་ལྔ་དང་། སྒོས་སུ་ལྟོ་གོས་བུད་མེད་གསུམ་ཁྱད་པར་ལུས་ཀྱི་གཅེས་འཛིན་འདི་ཡིན་པས། དམ་པ་གོང་མ་རྣམས་ཀྱི་རྣམ་ཐར་ལྟར་བློས་བཏང་ནས་ཆོས་བཞིན་འདུལ་བ་བཞིན་བྱེད་དགོས། མདོར་ན་འདོད་ཆགས་སོགས་ཉོན་མོངས་པ་ལམ་དུ་འཁྱེར་ནུས་པའི་རྣལ་འབྱོར་པ་ཨུ་དུམ་ཝཱ་རའི་མེ་ཏོག་

ལས་ཀྱང་དཀོན་པས། སྙིགས་དུས་འདིར་གསང་སྔགས་པ་ཡིན་རུང་སྤོང་བ་གནད་ཆེ་སྟེ། གསང་བའི་བདག་པོ་ལ། ལས་ཀྱི་རྡོ་རྗེས། གསང་སྔགས་པ་ཉོན་མོངས་པ་ལམ་དུ་འཁྱེར་བ་ལགས་སམ་ཞུས་པས། གསང་བདག་གི་ཞལ་ནས། ཉོན་མོངས་པ་ལམ་དུ་འཁྱེར་བ་ཧ་ཅང་ཆེ་སྟེ། དུག་གིས་ལྟོ་ཡོང་བ་ལ་རྨ་བྱ་ལས་མེད། ཉོན་མོངས་པ་མ་སྤངས་པར་ལམ་དུ་འཁྱེར་ནུས་པའི་གང་ཟག་དེ་ཨུ་དུམ་ཝཱ་རའི་མེ་ཏོག་ལས་ཀྱང་དཀོན། གང་ཟག་དབང་པོ་རབ་ལ་ཉོན་མོངས་པ་གྲོགས་སུ་འཆར་སྟེ། ཐ་མལ་བ་ལ་དུག་དུ་འགྱུར་བས་སྤོང་བ་ཟབ། དང་པོ་སྤངས་པ་ཇི་ལྟར་ཙམ་ན་ཀློང་དུ་གྱུར་ནས་ཉོན་མོངས་པ་དང་། འདོད་པའི་ཡོན་ཏན་ཐམས་ཅད་སྒྱུ་མར་ཤར་ནས་ཞེན་ཆགས་གང་ཡང་མི་སྐྱེ། བྱུང་ཡང་དགག་མི་དགོས། གནོད་པ་མེད། མ་བྱུང་ཡང་སྒྲུབ་བློ་མི་སྐྱེ། རེ་བ་མེད། དེ་ཙ་ན་ལམ་དུ་ལོངས་པའི་ཚད་ཡིན། མངོན་ཞེན་མ་ལོག་པའི་བར་དུ་ཉོན་མོངས་པ་ལམ་དུ་འཁྱེར་བས་སྦྲང་བུ་རྩིའི་བཅུད་ལ་འཁོར་བས་འབྱར་བ་དང་འདྲ་གསུངས། ལམ་ཉམས་སུ་ལེན་པ་ལ་བར་ཆད་གང་ཆེ་ཞུས་པས།

གསང་བདག་གི་ཞལ་ནས། དང་པོ་ལམ་ལ་འཇུག་པའི་དུས་སུ་བློ་ཕྱིན་ཅི་ལོག་ཏུ་འཁྲིད་པའི་རྐྱེན་གང་བྱུང་ཡང་བར་ཆད་ཡིན། ཁྱད་པར་དུ་སྐྱེས་པ་ལ་བུད་མེད་བདུད་དུ་ཆེ། བུད་མེད་ལ་སྐྱེས་པ་བདུད་དུ་ཆེ། ཐུན་མོང་དུ་ལྟོ་གོས་གཉིས་བདུད་དུ་ཆེ་གསུངས། ཡང་ཞུས་པ། ད་ལྟའི་གསང་སྔགས་པ་ཕལ་ཆེར་ཞིག་གིས། ཕྱག་རྒྱ་མ་བསྟེན་པ་བོགས་ཆེ་ཟེར་བར་གདའ་བས་དེ་ཇི་ལྟར་ལགས་ཞུས་པས། གསང་བདག་གི་ཞལ་ནས། ལམ་གྱི་བོགས་ཐོན་པའི་ཕྱག་རྒྱ་མ་གསེར་ལས་དཀོན། བུད་མེད་ངན་མ་མོས་གུས་བྱི་བོ་ལ་བྱེད། དག་སྣང་སྙིང་སྡུག་ལ་བྱེད། ཚོགས་བསགས་ཁྱོ་བོ་ལ་འབུལ། ཞེན་ལོག་ལྷ་ཆོས་ལ་བྱེད། ཉན་ན་ཁྱི་ལ་ཡང་སྤྱོད། དད་པ་ཁ་ནས་སྐྱེ། ལྡོག་ན་སྙིང་ནས་ལྡོག །སེར་སྣ་དང་མིག་སེར་ཆེ། ཡར་འགྲོ་བའི་ལས་མི་གསོག་པར་མར་འདྲེན་པའི་ལྕགས་ཀྱུ་བྱེད། ཆོས་འཕེལ་བའི་བོགས་འདོན་མི་ཡོང་བར་ཆགས་སྡང་དང་། སྡུག་བསྔལ་གྱི་སྣ་སུན་བྱེད། ཆགས་པས་གྲོལ་དུ་རེ་ནས་བསྟེན་པར་གདའ་སྟེ། ཉོན་མོངས་པ་འཕེལ་བའི་རྒྱུར་སོང་། ཁམས་

རྒྱས་པའི་རྟེན་ཡོང་དུ་རེ་ཙ་ན། ཉམས་གྲིབ་ཀྱི་ཐུམ་པོར་ཁྱེར་སོང་། དམ་ཚིག་མི་སྲུང་བུད་མེད་འཆོལ་མ་བདུད་མོ་ཡིན་གསུངས། བསྟེན་དུ་རུང་ཙམ་དེ་གང་ལགས་ཞུས་པས། གསང་བདག་གི་ཞལ་ནས། གོང་གི་སྐྱོན་དེ་རྣམས་ལས་ལོག་པ་ཞིག་དགོས། ཁྱད་པར་དུ་ཆོས་ལ་མོས་པ། བློ་ཆེ་བ། ངང་རྒྱུད་རིང་བ་དང་། དད་པ་དང་སྙིང་རྗེ་ཆེ་བ། ཕ་རོལ་ཏུ་ཕྱིན་པ་དྲུག་རྒྱུད་ལ་ཚང་བ། བླ་མའི་བཀའ་མི་གཅོག་པ། སྒྲུབ་པ་པོ་ལ་གུས་པ། སྔགས་ཀྱི་དམ་ཚིག་མིག་འབྲས་བཞིན་སྲུང་བ། དབང་གི་དུས་མིན་པ་གཡེམ་མི་ཤོར་བ། གཙང་སྦྲ་ལ་གནས་པ་བྱུང་ན་ལམ་གྱི་གྲོགས་སུ་འགྲོ་སྟེ། དེ་ལྟ་བུ་ཤིན་ཏུ་དཀོན་པས། དེ་ལྟ་བུ་ཡང་ཆགས་པ་ཅན་དྲངས་པའི་དོན་ཡིན་ཅིང་། དབང་པོ་རབ་ཀྱི་ཆོས་སྐལ་ཡིན། ཐ་མལ་པ་རྣམས་ལ་ཉོན་མོངས་རང་གར་འགྲོ་བས་དེ་ལས་ལྡོག་དགོས། སྔགས་ཀྱི་སྒོར་ཞུགས་ནས། དམ་ཚིག་མ་བསྲུང་ན། འཚང་རྒྱ་བ་ལ་རེ་བ་མ་བྱེད་གསུངས། ཡང་ལས་ཀྱི་རྡོ་རྗེས་ཞུས་པ། ཆོས་བྱེད་པ་ལ་ལྟོ་གོས་དང་། ལུས་ཀྱི་གཅེས་འཛིན་འདི་གས་ལན་འདུག་པས། འདི་གསུམ་བློས་ཐོངས་

པའི་གདམས་པ་ཞིག་ཞུ་བྱས་པས། གསང་བདག་གི་ཞལ་ནས། ལས་ཀྱི་རྡོ་རྗེ་ལུས་འདི་ནམ་ཡང་འཇིག་པ་ཡིན། ཚེ་ཚད་ཀྱང་སྔོན་ནས་བསྐོས་ཚད་རེ་ཡོད། རྒན་གཞོན་ལ་ངེས་པ་མེད། ཐམས་ཅད་འཆི་བ་ལས་མ་འདས་པས་གཟུགས་ལེགས་ཀྱང་དེ་ལ་ཆགས་པས་མ་ཤི་བར་འདུག་པ་ངས་མ་མཐོང་། ལུས་ཀྱི་གཅེས་འཛིན་ཐམས་ཅད་བློས་ཐོངས་ལ་རི་ཁྲོད་འགྲིམས། གོས་ནི་དུག་པོ་གྱོན་ཀྱང་ཆོག །ལྟོ་ནི་རྡོ་དང་ཆུས་ཀྱང་ཡོང་། མི་རྣམས་ཀྱིས་ཆོས་བྱེད་མ་ནུས་པ་ཡིན་གསུངས། དེས་ན་བློ་གྲོས་ཅན་རྣམས་ཀྱིས་ལུས་ལོངས་སྤྱོད་གང་ལ་མ་ཆགས་པར་ཚེ་བློས་བཏང་ནས་རི་ཁྲོད་དབེན་པར་དམ་པའི་ལྷ་ཆོས་ཉམས་སུ་ལེན་པ་གཅེས་སོ། །སྨྲས་པ། མཚན་ལྡན་བླ་མ་དེད་དཔོན་ཆེན་པོ་རྣམས་ཀྱིས་དྲིན་ལས་ལེགས་ཐོབ་པའི། །མཐོང་ཐོས་འགྲོ་ལ་ཕན་པའི་ཡིད་བཞིན་ནོར་བུ་ལྟ་བུའི་གླེགས་བམ་འདི། །ལན་གཅིག་ལན་གཉིས་བཀླག་ཀྱང་ཚེ་འདིའི་ཆགས་ཞེན་ཆུང་དུ་ཆུང་དུ་འགྲོ། །རི་ཁྲོད་དབེན་པར་ལྷ་ཆོས་བྱེད་འདོད་ངང་གིས་འབྱུང་བས་ཡ་མཚན་ཆེ། །དེ་ཕྱིར་ལྷ་

ཆོས་སྙིང་ནས་བྱེད་པས་གླེགས་བམ་འདི་ཉིད་སྔས་སུ་ཞོག །ཡང་དང་ཡང་དུ་ལྟོས་དང་བླ་མ་བཟང་པོས་བཀའ་ཆོས་གནང་བ་དང་། །ཁྱད་པར་མེད་པར་ཚེ་འདིའི་བྱ་བ་དགོས་མེད་བློ་སྣ་ཡང་མི་སྐྱེ། །ཚེ་བློས་ཐོངས་ཚེ་ཆོས་ཀྱི་ཕྱེད་གྲུབ་འཁོར་བའི་གནས་ནས་འཕགས་པར་འགྱུར། །ཨེ་མ་བློ་ལྡན་གྲོགས་པོ་སློབ་མ་ཡོན་བདག་ཕོ་མོ་དད་ཅན་རྣམས། །ནམ་འཆི་ཆ་མེད་འདོད་ཡོན་ཉེས་དམིགས་སོམས་ལ་གང་ལ་མ་ཆགས་པ། མཚན་ལྡན་བླ་མ་དམ་པ་བསྟེན་ལ་རི་ཁྲོད་དབེན་པའི་དགའ་ཚལ་དུ། །གཅིག་པུར་དམ་པའི་ལྷ་ཆོས་མཛད་དང་བདེ་སྐྱིད་ཉི་མ་བཞིན་དུ་འཆར། །ཡ་མཚན་སྤྲུལ་པའི་གླེགས་བམ་འདི་ཉིད་དབུས་ཀྱི་རི་བོ་ནམ་གནས་བར། ས་སྟེང་འདི་རུ་ཡུན་རིང་གནས་ཤིང་ཡིད་བཞིན་ནོར་བུ་གནས་པ་བཞིན། །གང་དུ་གནས་པའི་ས་དེར་ནད་མུག་འཁྲུག་རྩོད་མིང་ཡང་མི་གྲགས་ཤིང་། །རྟག་ཏུ་བཀྲ་ཤིས་བྱིན་རླབས་གཡང་ཆགས་རྫོགས་ལྡན་དུས་བཞིན་སྐྱིད་པར་ཤོག །ཅེས་ཡ་མཚན་སྤྲུལ་པའི་གླེགས་བམ་ཞེས་བྱ་བ་འདི་ནི་བསླབ་གསུམ་རྒྱན་གྱིས་མཛེས་ཤིང་། འཕགས་ནོར་བདུན་གྱིས་ཕྱུག་པའི་རིག་འཛིན་ཨོ་

རྒྱན་རྣམ་རྒྱལ་དང་། བླ་མ་གངས་རི་པ། མཁས་བཙུན་བཟང་གསུམ་འཛོམ་པའི་ལ་དག་མཁན་པོ་བྱ་བཏང་རིན་ཆེན་དང་། ཕྱག་མཛོད་ཨོ་རྒྱན། དད་ལྡན་ཤེས་རབ་ཆེ་བ་གཉེར་པ་ཨ་མཆོག་དང་། གསོལ་དཔོན་མཁས་པ། ཚེ་འདིའི་སྣང་ཤས་དོར་ནས་ཕྱི་མ་དོན་དུ་གཉེར་བའི་སློབ་བུ་གྲུབ་ཆེན་དང་། ཀུན་དགའ་བསྟན་འཛིན། བསྟན་འཛིན་རང་གྲོལ་ལ་སོགས་དད་ཅན་གྱི་སློབ་མ་ཡོངས་ཀྱིས་འདི་ལྟ་བུ་ཞིག་དགོས་ཞེས་ཡང་ཡང་བསྐུལ་ངོར་རྒྱལ་ཁམས་ཕྱོགས་མེད་ཀྱི་རི་ཁྲོད་འགྲིམ་པའི་བྱ་བཏང་རྣལ་འབྱོར་ཞབས་དཀར་པས། རྒྱལ་བ་ཡབ་སྲས་ཀྱི་གདན་ས། མཁས་གྲུབ་ཀུན་གྱི་བཞུགས་ས། ཆོས་ཀྱི་འཁོར་ལོ་བསྐོར་ས། དབུས་གཙང་དག་པའི་ཞིང་གི་ལྷ་ལྡན་ར་ས་འཕྲུལ་སྣང་གི་ཐག་ཉེ་ས། མཁས་གྲུབ་དུ་མའི་གདན་ས། ཉམས་དགའ་རིག་པ་དྭངས་པའི་དབེན་གནས། མཁར་རྡོ་བསམ་གཏན་གླིང་གི་ཡང་རྩེ། མཚུངས་མེད་བཟོད་པ་རྒྱ་མཚོའི་སྒྲུབ་གནས། འོད་གསལ་ཉི་འོད་འཁྱིལ་བའི་ཕུག་མོ་ཆེ་ནས་སྦྱར་བའོ། །འདིས་ཀྱང་བསྟན་པ་དང་འགྲོ་བ་ཡོངས་ལ་ཕན་པ་དཔག་ཏུ་མེད་

པ་ཐོགས་པར་གྱུར་ཅིག། །། བསྐལ་བཟང་འགྲོ་བའི་འདྲེན་མཆོག་པད་དཀར་འཆང་། །གསུམ་ལྡན་རྡོ་རྗེ་འཛིན་པའི་སྐུར་ཤར་བ། །བདག་ལ་སངས་རྒྱས་ལས་ཀྱང་དྲིན་ཆེ་བའི། །སྐྱབས་མཆོག་དམ་པ་གང་དེར་གུས་པས་འདུད། །སྔོན་བྱོན་མཁས་གྲུབ་དུ་མའི་དགོངས་པའི་བཅུད། །ཀུན་འདུས་ཡ་མཚན་སྤྲུལ་པའི་གླེགས་བམ་འདི། །འབྲི་སྐོ་བྱེད་པོ་ལྷ་ཁང་དབུ་མཛད་དང་། །བསྟན་འཛིན་ཉི་མ་སོགས་ཀྱིས་པར་དུ་བསྒྲུབས། །འདིས་མཚོན་དགེ་བས་ཕན་བདེ་འབྱུང་བའི་གནས། །སངས་རྒྱས་བསྟན་པ་རིན་ཆེན་དར་ཞིང་རྒྱས། །བསྟན་འཛིན་དམ་པ་རྣམས་ནི་ཞབས་པད་བརྟན། །མཛད་འཕྲིན་ཡར་ངོའི་ཟླ་བཞིན་གོང་འཕེལ་ཤོག །གཞན་ཡང་ལྗོངས་འདིར་ནད་མུག་འཁྲུག་རྩོད་ཞི། །ཆར་ཆུ་དུས་བབ་ལོ་ལེགས་འབྲུ་ཕྱུག་འཕེལ། །རྫོགས་ལྡན་དུས་བཞིན་བདེ་ཞིང་སྐྱིད་པ་ཡི། །བཀྲ་ཤིས་ཆེན་པོས་ཕྱོགས་ཀུན་ཁྱབ་གྱུར་ཅིག །ཅེས་པར་བྱང་སྨོན་ཚིག་ཉུང་བསྡུས་འདི་ནི། སྔོན་བྱོན་མཁས་གྲུབ་དུ་མའི་ལུང་གིས་ཟིན་པའི་ཉམས་དགའ་རིག་པ་དྭངས་བའི་དབེན་གནས་བཀྲ་ཤིས་འཁྱིལ་ནས་པར་དུ་བསྒྲུབ་སྐབས། དབུ་མཛད་སྐལ་བཟང་སྐྱབས་ཀྱིས་བསྐུལ་ངོར། འདུན་པ་མ་ལོག་ཙམ་དུ་ཁྱབ་བརྡལ་ཀློང་ཡངས་ཀྱིས་བྲིས་པ་ཛ་ཡནྟུ།། །།སརྦ་མངྒ་ལཾ།། །