ཞབས་དཀར་ཚོགས་དྲུག་རང་གྲོལ་གྱི་བཀའ་འབུམ།

སྟོན་པ་ཐུགས་རྗེ་ཅན་གྱི་མཛད་པ་བཅུ་གཉིས་དང་མཐུན་པའི་རྣམ་ཐར།

༄༅། །སྟོན་པ་ཐུགས་རྗེ་ཅན་གྱི་མཛད་པ་བཅུ་གཉིས་དང་མཐུན་པའི་རྣམ་ཐར་གསོལ་འདེབས་ནོར་བུའི་ཕྲེང་བ་ཞེས་བྱ་བ་བཞུགས་སོ།

དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས། །བར་དུ་བསྐལ་ཆེན་གྲངས་མེད་ཚོགས་གཉིས་བསགས། །ཐ་མར་མངོན་པར་རྫོགས་པར་སངས་རྒྱས་པའི། །སྟོན་པ་ཐུགས་རྗེ་ཅན་ལ་གསོལ་བ་འདེབས། །སྐུ་ཚེ་འདི་ཡི་གོང་ལ་དགའ་ལྡན་དུ། །དམ་པ་ཏོག་དཀར་ཞེས་བྱར་སྐྱེ་བ་བཞེས། །གཟིགས་པ་ལྔ་ཡིས་གཟིགས་ནས་དགའ་ལྡན་གྱི། །གནས་ནས་འཕོ་བར་མཛད་ལ་གསོལ་བ་འདེབས། །ས་ལུག་ལོ་ཡི་ས་ག་ཟླ་བའི་ཚེས། །བཅོ་ལྔའི་མཚན་མོ་གླང་ཆེན་ཐལ་དཀར་གྱི།

རྣམ་པས་རབ་མཛེས་སྒྱུ་འཕྲུལ་ལྷ་མོ་ཡི། །ལྷུམས་སུ་ཞུགས་པར་མཛད་ལ་གསོལ་བ་འདེབས། །ལྕགས་ཕོ་སྤྲེལ་ལོར་དབོ་ཟླའི་ཚེས་པ་བཅུའི། །ཉིན་པར་བཀྲ་ཤིས་ལུམ་བིའི་ནགས་ཚལ་དུ། །སྒྱུ་འཕྲུལ་ལྷ་མོའི་རྩིབས་ལོག་གཡས་པ་ནས། །གཟུགས་སྐུ་བལྟམས་པར་མཛད་ལ་གསོལ་བ་འདེབས། །ལང་ཚོ་རབ་རྒྱས་སྐུ་ན་གཞོན་པའི་དུས། །སྟོབས་ལྡན་དྲེགས་ཅན་སྐྱེ་བོ་ཀུན་འདུས་ནས། །ཡིག་རྩིས་སྟོབས་སོགས་སྒྱུ་རྩལ་འགྲན་པའི་ཚེ། །ཀུན་ལས་མཆོག་གྱུར་མཛད་ལ་

གསོལ་བ་འདེབས། །དགུང་ལོ་ཉེར་དགུའི་བར་དུ་རྒྱལ་ས་བཟུང་། །རྒྱལ་སྲིད་སྐྱོང་ཚེ་ཡིད་འོང་ས་མཚོ་དང་། །གྲགས་འཛིན་མ་སོགས་རབ་མཛེས་བཙུན་མོ་ཡི། །འཁོར་གྱིས་བསྐོར་བར་མཛད་ལ་གསོལ་བ་འདེབས། །ན་རྒ་འཆི་བ་གཟིགས་པས་ཐུགས་སྐྱོ་ནས། །ས་ཕོ་བྱི་བའི་ལོ་ལ་རྒྱལ་སྲིད་སྤངས། །མཆོད་རྟེན་རྣམ་དག་དྲུང་ནས་དབུ་སྐྲ་བསིལ། །རབ་ཏུ་བྱུང་བར་མཛད་ལ་གསོལ་བ་འདེབས། །ཆུ་བོ་ནེ་རཉྫ་ནའི་འགྲམ་དུ་བྱོན། །མཁའ་ཁྱབ་ཏིང་ངེ་འཛིན་ལ་སྙོམས་པར་ཞུགས། །གཡོ་བ་མེད་པར་དགུང་ལོ་དྲུག་གི་བར། །དཀའ་སྤྱད་དྲགས་པོ་མཛད་ལ་གསོལ་བ་འདེབས། །བདུད་ཀྱི་སྡེ་རྣམས་ཕམ་པར་བྱ་ཕྱིར་དང་། །རྫོགས་པའི་སངས་རྒྱས་གོ་འཕང་ཐོབ་བྱའི་ཕྱིར། །རྡོ་རྗེ་གདན་གྱི་བྱང་ཆུབ་ཤིང་དབང་གི །དྲུང་དུ་གཤེགས་པར་མཛད་ལ་གསོལ་བ་འདེབས། །ལས་ཅན་རྩྭ་འཚོང་ཁྱེ་འུ་བཀྲ་ཤིས་ཀྱིས། །ཕུལ་བའི་རྩྭ་ཡི་གདན་ལ་སྐྱིལ་ཀྲུང་བྱས། །བྱམས་པའི་ཏིང་ངེ་འཛིན་གྱིས་ནམ་སྲོད་ལ། །བདུད་སྡེ་ཕམ་པར་མཛད་ལ་གསོལ་བ་འདེབས། །དགུང་ལོ་སོ་ལྔ་ཤིང་ཕོ་རྟ་ཡི་ལོར། །ས་ག་ཟླ་བའི་ཚེས་པ་བཅོ་ལྔ་

ཡི། །ཐོ་རངས་མངོན་པར་རྫོགས་པར་སངས་རྒྱས་པའི། །རྨད་བྱུང་མཛད་པ་བསྟན་ལ་གསོལ་བ་འདེབས། །ཚངས་དང་དབང་པོས་གསོལ་བ་བཏབ་པའི་ངོར། །ཆུ་སྟོད་ཟླ་བའི་ཚེས་པ་བཞི་ཡི་ཉིན། །ཝ་ར་ཎ་སིའི་གནས་སུ་བདེན་པ་བཞིའི། །ཆོས་འཁོར་བསྐོར་བར་མཛད་ལ་གསོལ་བ་འདེབས། །དགུང་ལོ་བརྒྱད་ཅུ་གྱ་གཅིག་ལྕགས་འབྲུག་ལོ། །དཔྱིད་ཐའི་ཚེས་པ་བཅོ་ལྔའི་ནངས་བར་ལ། །རྩྭ་མཆོག་གྲོང་དུ་རྡོ་རྗེའི་སྐུ་བཤིག་ནས། །མྱ་ངན་འདའ་བར་མཛད་ལ་གསོལ་བ་འདེབས། །དེ་བཞིན་གཤེགས་པ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །ཁྱེད་ལ་བསྟོད་ཅིང་གསོལ་བ་བཏབ་པའི་མཐུས། །བདག་སོགས་གང་དུ་གནས་པའི་ས་ཕྱོགས་དེར། །ནད་དང་དབུལ་ཕོངས་འཐབ་རྩོད་ཞི་བ་དང་། །ཆོས་དང་བཀྲ་ཤིས་འཕེལ་བར་མཛད་དུ་གསོལ། །ཞེས་སྟོན་པ་ཐུགས་རྗེ་ཅན་གྱི་མཛད་པ་བཅུ་གཉིས་དང་མཐུན་པའི་རྣམ་ཐར་གསོལ་འདེབས་ནོར་བུའི་ཕྲེང་བ་ཞེས་བྱ་བ་འདི་ནི་རང་གཞན་ཡོངས་ལ་ཕན་ཕྱིར་སྟོན་པའི་རྗེས་འཇུག་༧རྣལ་འབྱོར་ཞབས་དཀར་པས་སྦྱར་བའོ། །སརྦ་མངྒ་ལཾ།།

བོད་ཀྱི་རྒྱལ་པོ་པཎྜི་ཏ་གྲུབ་ཆེན་རག་རིམ་ཙམ་ཞིག་མགོ་སྨོས་ནས་བོད་དུ་སྔོན་བྱོན་དམ་པ་རྣམས་ལ་གསོལ།

༄༅། །བོད་ཀྱི་རྒྱལ་པོ་པཎྜི་ཏ་གྲུབ་ཆེན་རག་རིམ་ཙམ་ཞིག་མགོ་སྨོས་ནས་བོད་དུ་སྔོན་བྱོན་དམ་པ་རྣམས་ལ་གསོལ་འདེབས་བཞུགས་སོ།

༄༅། །བོད་དུ་སྔོན་བྱོན་ཆོས་རྒྱལ་དང་། །པཎ་གྲུབ་རང་གི་བླ་མ་རྣམས། །གར་བཞུགས་ཞིང་ཁམས་སོ་སོ་ནས། །རྫུ་འཕྲུལ་སྣ་ཚོགས་སྟོན་བཞིན་བྱོན། །རྣལ་འབྱོར་བདག་ཅག་འཁོར་བཅས་ཀྱི། །འགའ་རྐྱེན་བར་ཆད་སེལ་བ་དང་། །མཆོག་ཐུན་དངོས་གྲུབ་སྩོལ་བའི་ཕྱིར། །བདག་གི་མདུན་གྱི་ནམ་མཁའ་རུ། །ངོ་མཚར་འཇའ་གུར་ཕུབ་པའི་དབུས། །པདྨ་ཉི་ཟླའི་གདན་སྟེང་དུ། །ཞལ་རྣམས་རང་ལ་ཚུར་ཕྱོགས་ཏེ། །སྤྲིན་ཕུང་གཏིབས་པ་ལྟ་བུར་བཞུགས། །རང་ལུས་བྱེ་བ་གྲངས་མེད་

སྤྲུལ། །ངག་གིས་དེ་དག་ཡོན་ཏན་བརྗོད། །ཡིད་ཀྱིས་དད་གུས་ཤུགས་དྲག་བྱས། །ཞབས་ལ་མགོ་བོས་ཕྱག་འཚལ་ལོ། །ལྷ་དང་མི་སོགས་འཇིག་རྟེན་གྱི། །ཁམས་དང་སངས་རྒྱས་ཞིང་ཀུན་ན། །མཆོད་པ་ཇི་སྙེད་ཡོད་པ་རྣམས། །ཐམས་ཅད་བློ་ཡིས་བླངས་ནས་འབུལ། །ཚེ་རབས་ཐོག་མ་མེད་པ་ནས། །ཐ་མ་ད་ལྟ་ཐུག་གི་བར། །བསགས་པའི་སྡིག་སྒྲིབ་ཉེས་ལྟུང་ལ། །གནོང་ཞིང་འགྱོད་པས་མཐོལ་ལོ་བཤགས། །འགྲོ་བ་སོ་སོའི་བློ་ཚོད་དང་། །བསྟུན་ནས་དམ་པའི་ཆོས་

གསུངས་ནས། །མངོན་མཐོ་ངེས་ལེགས་གོ་འཕང་ལ། །འགྲོ་རྣམས་འགོད་ལ་རྗེས་ཡི་རང་། །གདུལ་བྱ་སོ་སོ་རང་རང་ལ། །དབུ་རྫོགས་ཕྱག་ཆེན་ཞི་བྱེད་གཅོད། །ལ་སོགས་ཆོས་ཀྱི་འཁོར་ལོ་ནི། །རྒྱུན་ཆད་མེད་པར་བསྐོར་བར་བསྐུལ། །མ་གྱུར་འགྲོ་ཀུན་དོན་མཛད་ཕྱིར། །བསྐལ་པ་བརྒྱ་ཕྲག་མང་པོའི་བར། །མྱ་ངན་མི་འདའ་བཞུགས་དགོས་ཞེས། །ཐལ་མོ་སྦྱར་ནས་གསོལ་བ་འདེབས། །བདག་གིས་ཅི་བསགས་དགེ་ཚོགས་རྣམས། །སངས་རྒྱས་བསྟན་པ་དར་བ་དང་། །སེམས་ཅན་གནས་སྐབས་བདེ་སྐྱིད་ཅིང་། །མཐར་ཐུག་སངས་རྒྱས་ཐོབ་ཕྱིར་བསྔོ། །ཀུན་ཏུ་བཟང་པོའི་སྤྲུལ་པ་དངོས། །དམ་པའི་ཆོས་ཀྱི་དབུ་རྙེད་པའི། །ལྷ་ཐོ་ཐོ་རི་གཉན་བཙན་ལ། །གསོལ་བ་འདེབས་སོ་བྱིན་གྱིས་རློབས། །ཐུགས་རྗེ་ཆེན་པོའི་སྤྲུལ་པ་དངོས། །དམ་པའི་ཆོས་ཀྱི་སྲོལ་བཏོད་པའི། །ཆོས་རྒྱལ་སྲོང་བཙན་སྒམ་པོ་ལ། །གསོལ་བ་འདེབས་སོ་བྱིན་གྱིས་རློབས། །རྗེ་བཙུན་འཇམ་དབྱངས་སྤྲུལ་པ་དངོས། །དམ་ཆོས་དར་ཞིང་རྒྱས་མཛད་པའི། །རྒྱལ་པོ་ཁྲི་སྲོང་ལྡེའུ་བཙན་ལ། །གསོལ་བ་འདེབས་སོ་

བྱིན་གྱིས་རློབས། །རི་བྲག་རྣམས་ལ་འཛུལ་བ་སོགས། །ངོ་མཚར་རྫུ་འཕྲུལ་སྣ་ཚོགས་པ། །སྟོན་པའི་རྗེ་འབངས་ཉེར་ལྔ་ལ། །གསོལ་བ་འདེབས་སོ་བྱིན་གྱིས་རློབས། །གནས་ཆེན་བསམ་ཡས་འཆིམས་ཕུ་རུ། །མཆོག་ཐུན་དངོས་གྲུབ་ཀུན་བརྙེས་པའི། །གྲུབ་ཆེན་ཉི་ཤུ་ཉར་ལྔ་ལ། །གསོལ་བ་འདེབས་སོ་བྱིན་གྱིས་རློབས། །ལྷ་ས་ཡེར་པའི་གྲུབ་ཆེན་བརྒྱ། །རྩ་བརྒྱད་ལྷོ་བྲག་མཁར་ཆུ་ཡི། །གྲུབ་ཆེན་ཉི་ཤུ་ཉེར་གཅིག་ལ། །གསོལ་བ་འདེབས་སོ་བྱིན་གྱིས་རློབས། །ཆུ་བོ་རི་ནས་གྲུབ་པ་བརྙེས། །ངོ་མཚར་རྫུ་འཕྲུལ་དཔག་མེད་བསྟན། །གྲུབ་ཆེན་སུམ་ཅུ་སོ་ལྔ་ལ། །གསོལ་བ་འདེབས་སོ་བྱིན་གྱིས་རློབས། །ཨོ་རྒྱན་པད་འབྱུང་ཐུགས་སྤྲུལ་མཆོག །ཟབ་གཏེར་དུ་མ་སྤྱན་འདྲེན་མཛད། །གཏེར་སྟོན་བརྒྱ་རྩ་བརྒྱད་རྣམས་ལ། །གསོལ་བ་འདེབས་སོ་བྱིན་གྱིས་རློབས། །ཟངས་མདོག་དཔལ་རིར་ཨོ་རྒྱན་དྲུང་། །ཉིན་རེར་ཕར་ཕེབས་ཚུར་འབྱོན་པའི། །གྲུབ་ཆེན་གཡུ་ཐོག་ཞེས་བྱ་ལ། །གསོལ་བ་འདེབས་སོ་བྱིན་གྱིས་རློབས། །ལུག་གུ་གྲོང་འཇུག་མཛད་དང་སྐུ། །ལྷ་སྐུ་དུ་མར་

སྤྲུལ་ནས་བསྟན། །སྒྲ་བསྒྱུར་མར་བ་ལོ་ཙཱ་ལ། །གསོལ་བ་འདེབས་སོ་བྱིན་གྱིས་རློབས། །འཇིགས་བྱེད་བསྐྱེད་རིམ་མཐའ་རུ་ཕྱིན། །གདུག་ཅན་དགྲ་བགེགས་དངོས་སུ་སྒྲོལ། །གྲུབ་ཆེན་རྭ་ལོ་ཞེས་བྱ་ལ། །གསོལ་བ་འདེབས་སོ་བྱིན་གྱིས་རློབས། །མཁའ་ལ་བྱ་ལྟར་འཕུར་བ་དང་། །རྡོ་ལ་ཞོན་ནས་རྟ་ལྟར་རྒྱུག །གྲུབ་ཆེན་མི་ལ་རས་པ་ལ། །གསོལ་བ་འདེབས་སོ་བྱིན་གྱིས་རློབས། །ཞལ་ཆེམས་མགུར་དབྱངས་ལེན་བཞིན་དུ། །ཞིང་ཁམས་གཞན་དུ་གཤེགས་མཛད་པའི། །མ་གཅིག་ལབ་ཀྱི་སྒྲོལ་མ་ལ། །གསོལ་བ་འདེབས་སོ་བྱིན་གྱིས་རློབས། །རྟ་མཆོག་ཁ་འབབ་ཆུ་ཆེན་ལ། །རས་གོས་རྐྱང་གཅིག་གྲུ་བཏང་བརྒལ། །རས་ཆུང་རྡོ་རྗེ་གྲགས་པ་ལ། །གསོལ་བ་འདེབས་སོ་བྱིན་གྱིས་རློབས། །ཞལ་གདམས་གསུང་འཕྲོར་སྤྱི་བོའི་འོད། །ཕུབ་ཙམ་མཁའ་ལ་སོང་ནས་གཤེགས། །གྲུབ་ཆེན་མེ་ལོང་རྡོ་རྗེ་ལ། །གསོལ་བ་འདེབས་སོ་བྱིན་གྱིས་རློབས། །ཉིན་རེར་རླུང་གི་འགྲོ་འོང་རེས། །ཆོག་ཅིང་རླུང་རྣམས་ལག་སོར་འགྲེམས། །མཉམ་མེད་དྭགས་པོ་ལྷ་རྗེ་ལ། །གསོལ་བ་འདེབས་སོ་བྱིན་གྱིས་

རློབས། །ལྗགས་ལ་པདྨ་སྐྱེས་པའི་སྟེང་། །ཇོ་བོ་སྤྱན་དྲངས་བཞུགས་སུ་བཅུག །འབྲོམ་སྟོན་རྒྱལ་བའི་འབྱུང་གནས་ལ། །གསོལ་བ་འདེབས་སོ་བྱིན་གྱིས་རློབས། །གནམ་མཚོ་ཕྱུགས་མོའི་སེ་མོ་དོར། །ལོ་བརྒྱད་བཞུགས་འཕྲོར་མཁའ་སྤྱོད་གཤེགས། །རས་ཆུང་མ་ཞེས་བྱ་བ་ལ། །གསོལ་བ་འདེབས་སོ་བྱིན་གྱིས་རློབས། །འོ་ཡུག་ཕྱི་གོང་ཐད་ཀྱི་མཁར། །འོད་དང་སྒྲ་དང་བཅས་ཏེ་གཤེགས། །ལྕེ་བཙུན་སེང་གེ་དབང་ཕྱུག་ལ། །གསོལ་བ་འདེབས་སོ་བྱིན་གྱིས་རློབས། །སྒྲུབ་ཕུག་བྲག་རྣམས་ཟང་ཐལ་ཕུག །སྐུ་ཚེ་དེ་ལ་མཁའ་སྤྱོད་བྱོན། །ཞི་བ་འོད་ཅེས་བྱ་བ་ལ། །གསོལ་བ་འདེབས་སོ་བྱིན་གྱིས་རློབས། །སྐུ་ལུས་འདི་ཉིད་མ་སྤངས་པར། །རོལ་མོའི་སྒྲ་བཅས་མཁའ་སྤྱོད་གཤེགས། །དཔའ་དར་འབུམ་ཞེས་བྱ་བ་ལ། །གསོལ་བ་འདེབས་སོ་བྱིན་གྱིས་རློབས། །ནམ་མཁའི་སྤྲིན་གསེབ་ཞག་བདུན་བཞུགས། །ཡི་དམ་ལྷ་ཚོགས་མང་པོ་གཟིགས། །གྲུབ་ཐོབ་སངས་རྒྱས་བསྒོམ་པ་ལ། །གསོལ་བ་འདེབས་སོ་བྱིན་གྱིས་རློབས། །ཚོགས་འཁོར་བསྐོར་འཕྲོར་

མཁའ་ལ་འཕུར། །ཌཱ་མ་རུ་དཀྲོལ་མཁའ་སྤྱོད་གཤེགས། །གྲུབ་ཐོབ་མཁའ་འགྲོ་བཙུན་ཆུང་ལ། །གསོལ་བ་འདེབས་སོ་བྱིན་གྱིས་རློབས། །རླུང་བཟུང་དུས་སུ་དབུ་མར་ཆུད། །ཞག་གསུམ་འོད་གསལ་ངང་ལ་ལུས། །རྒྱལ་བ་ལོ་རས་ཞེས་བྱ་ལ། །གསོལ་བ་འདེབས་སོ་བྱིན་གྱིས་རློབས། །ཕུག་རོན་ཞིག་ལ་གྲོང་འཇུག་མཛད། །ཚེ་མཐར་ཕུང་པོ་ལྷག་མེད་ཡལ། །རྒྱལ་བ་ཁྱུང་ཚངས་ཞེས་བྱ་ལ། །གསོལ་བ་འདེབས་སོ་བྱིན་གྱིས་རློབས། །སྟག་སོགས་གཅན་གཟན་བསྐོར་བ་བྱེད། །མཁའ་འགྲོས་བདུད་རྩི་འདྲེན་མཛད་པའི། །ཆོས་ཀྱི་གྲགས་པ་ཞེས་བྱ་ལ། །གསོལ་བ་འདེབས་སོ་བྱིན་གྱིས་རློབས། །པད་སྤུངས་བར་སྣང་ཁམས་ལ་བཞག །ཡང་དག་ཀུན་རྫོབ་ཡིན་ནོ་གསུངས། །སྤྱན་མངའ་པ་ཞེས་བྱ་བ་ལ། །གསོལ་བ་འདེབས་སོ་བྱིན་གྱིས་རློབས། །སྡིག་རྒྱལ་གླང་དར་ལྕགས་མདས་བསད། །སྐུ་ཚེའི་མཐའ་ལ་འཇའ་ལུས་བརྙེས། །གྲུབ་ཐོབ་ལྷ་ལུང་དཔལ་རྡོར་ལ། །གསོལ་བ་འདེབས་སོ་བྱིན་གྱིས་རློབས། །ཆ་ལུགས་དག་ལ་ངེས་པ་མེད། །ངོ་མཚར་གསུང་བྱོན་གདུལ་བྱ་འདུལ། །གྲུབ་

ཐོབ་འབྲུག་པ་ཀུན་ལེགས་ལ། །གསོལ་བ་འདེབས་སོ་བྱིན་གྱིས་རློབས། །དབྱངས་ཅན་མ་ཡིས་ཕྱག་ཏུ་བསྣམས། །རི་རབ་གླིང་བཞི་གླིང་ཕྲན་བསྟན། །ཀུན་མཁྱེན་ཀློང་ཆེན་རབ་འབྱམས་ལ། །གསོལ་བ་འདེབས་སོ་བྱིན་གྱིས་རློབས། །གསང་བའི་བདག་པོའི་ཞལ་གཟིགས་ནས། །ཟབ་མོའི་གདམས་པ་མང་པོ་ཞུས། །གྲུབ་ཆེན་ལས་ཀྱི་རྡོ་རྗེ་ལ། །གསོལ་བ་འདེབས་སོ་བྱིན་གྱིས་རློབས། །མཁྱེན་རབ་རྗེ་བཙུན་འཇམ་པའི་དབྱངས། །མངོན་སུམ་ཞལ་གཟིགས་གསུང་གླེང་མཛད། །རྒྱལ་བ་བློ་བཟང་གྲགས་པ་ལ། །གསོལ་བ་འདེབས་སོ་བྱིན་གྱིས་རློབས། །གུ་རུ་ཧཱུཾ་མཛད་གླན་སྒོམ་དང་། །རོང་ཆུང་སངས་རྒྱས་དཀོན་མཆོག་མཁར། །ལ་སོགས་མཁའ་སྤྱོད་བྱོན་རྣམས་ལ། །གསོལ་བ་འདེབས་སོ་བྱིན་གྱིས་རློབས། །ཀ་ཐོག་གྲྭ་བ་སྟོང་ཚོ་གཅིག །ལྔ་བརྒྱས་སྐྲ་སེན་ལྷག་མར་བཞག །འཇའ་ལུས་འོད་སྐུར་གྲོལ་རྣམས་ལ། །གསོལ་བ་འདེབས་སོ་བྱིན་གྱིས་རློབས། །ཉི་ཟླས་གླིང་བཞིའི་མུན་སེལ་བཞིན། །བོད་ཁམས་བདེ་སྐྱིད་ལ་འགོད་པའི། །རྒྱལ་བ་པཎ་ཆེན་རྣམ་གཉིས་

ལ། །གསོལ་བ་འདེབས་སོ་བྱིན་གྱིས་རློབས། །ཤེས་བྱ་ཀུན་མཁྱེན་ལེགས་བཤད་བརྩམས། །གངས་ཅན་མཁས་པ་ཐམས་ཅད་ཀྱི། །གཙུག་རྒྱན་ས་སྐྱ་པཎྜི་ཏ། །གསོལ་བ་འདེབས་སོ་བྱིན་གྱིས་རློབས། །ཟག་མེད་འཇའ་ལུས་འོད་སྐུར་གྱུར། །ཀ་བ་རྡོ་རྗེ་ལ་སོགས་པའི། །རེབ་ཀོང་གྲུབ་ཆེན་བརྒྱད་རྣམས་ལ། །གསོལ་བ་འདེབས་སོ་བྱིན་གྱིས་རློབས། །རེབ་ཀོང་མུན་པའི་གླིང་ལྟ་བུར། །དམ་ཆོས་སྒྲོན་མེ་སྦར་མཛད་པའི། །རྗེ་བཙུན་སྐལ་ལྡན་རྒྱ་མཚོ་ལ། །གསོལ་བ་འདེབས་སོ་བྱིན་གྱིས་རློབས། །གཞན་ཡང་སྔོན་ཆད་བོད་ཡུལ་དུ། །མཁའ་ལ་སྐར་ཚོགས་བཀྲ་བ་བཞིན། །མཁས་གྲུབ་དཔག་མེད་བྱོན་ཚད་ལ། །གསོལ་བ་འདེབས་སོ་བྱིན་གྱིས་རློབས། །སྔོན་གྱི་ཆོས་རྒྱལ་པཎ་གྲུབ་རྣམས། །ད་ལྟ་བདག་ངོར་བཤེས་གཉེན་ཚུལ། །འཛིན་པའི་རྩ་བའི་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །མཁྱེན་བརྩེ་ནུས་པ་ཅན་ཁྱེད་རྣམས། །འགྲོ་བ་ཡོངས་ལ་ཐུགས་རྗེས་གཟིགས། །བོད་ཁམས་སེམས་ཅན་ཡུན་རིང་སྐྱོངས། །འདིར་འདུས་བདག་ཅག་འཁོར་བཅས་ལ། །འཆི་མེད་ཚེ་ཡི་དངོས་གྲུབ་སྩོལ། །

འཛད་མེད་ནོར་གྱི་དངོས་གྲུབ་སྩོལ། །རྒྱུད་འཛིན་སྲིད་ཀྱི་དངོས་གྲུབ་སྩོལ། །མི་འཛད་གཏེར་གྱི་དངོས་གྲུབ་སྩོལ། །མངོན་ཤེས་རྫུ་འཕྲུལ་དངོས་གྲུབ་སྩོལ། །འཕྲིན་ལས་རྣམ་བཞིའི་དངོས་གྲུབ་སྩོལ། །ཀུན་བཟང་མཆོག་གི་དངོས་གྲུབ་སྩོལ། །མཆོག་ཐུན་དངོས་གྲུབ་མ་ལུས་སྩོལ། །དེ་ལྟར་གསོལ་བ་བཏབ་པའི་མཐུས། །ཚོགས་ཞིང་རྣམས་ཀྱི་ཐུགས་ཀ་ནས། །འོད་ཟེར་དཔག་ཏུ་མེད་པ་འཕྲོས། །ཕྱི་སྣོད་ནང་བཅུད་རྣམས་ལ་ཕོག །སྣོད་དང་བཅུད་ཀྱི་མ་དག་སྦྱངས། །སྣོད་རྣམས་དག་ཞིང་གཞལ་ཡས་ཁང་། །བཅུད་རྣམས་ལྷ་དང་ལྷ་མོར་གྱུར། །དེ་ནས་ཟས་གོས་ལོངས་སྤྱོད་ཆར། །ཕབས་ནས་གནས་སྐབས་སེམས་ཅན་ལ། །དམ་ཆོས་སྒྲུབ་པའི་མཐུན་རྐྱེན་འཛོམ། །རྫོགས་ལྡན་དུས་བཞིན་སྐྱིད་པ་དང་། །མཐར་ཐུག་འཚང་རྒྱ་ནུས་པ་ཡི། །སྐལ་བ་ཅན་དུ་ཐམས་ཅད་བྱས། །ཚོགས་ཞིང་ཐམས་ཅད་འོད་དུ་ཞུ། །དྲིན་ཅན་རྩ་བའི་བླ་མར་ཐིམ། །རྩ་བའི་བླ་མ་དགྱེས་བཞིན་དུ། །སྤྱི་བོའི་ཚངས་བུག་ནས་ཞུགས་ཏེ། །རང་སྙིང་པདྨ་འདབ་བརྒྱད་དུ། །གྱུར་པའི་སྟེང་དུ་ཟླ་གདན་

ལ། །གཟི་བརྗིད་འོད་ཟེར་འབར་བཞིན་དུ། །རང་ཉིད་སངས་རྒྱས་མ་ཐོབ་བར། །འབྲལ་བ་མེད་པར་རྟག་བཞུགས་ནས། །རང་དོན་མ་ལུས་མཐར་ཕྱིན་ཅིང་། །གཞན་གྱི་དོན་ཡང་རྒྱ་ཆེན་པོ། །འབྱུང་བར་བྱིན་གྱིས་བརླབ་པར་གྱུར། །ཞེས་བོད་ཀྱི་རྒྱལ་པོ་པཎྜི་ཏ་གྲུབ་ཆེན་རག་རིམ་ཙམ་ཞིག་མགོ་སྨོས་ནས་བོད་དུ་སྔོན་བྱོན་དམ་པ་རྣམས་ལ་གསོལ་བ་འདེབས་ཚུལ་འདི་ཡང་༧ཚོགས་དྲུག་རང་གྲོལ་གྱིས་སྣོད་ལྡན་སློབ་བུ་བློ་བཟང་རིན་ཆེན་དང་བློ་བཟང་ནོར་འཕེལ་གཉིས་ལ་སྨྲས་པའོ།། །།

བླ་མའི་གསོལ་འདེབས་བྱིན་རླབས་གཏེར་མཛོད།

༄༅། །བླ་མའི་གསོལ་འདེབས་བྱིན་རླབས་གཏེར་མཛོད་བཞུགས་སོ།།

བད༷ག་ལ་སངས་རྒྱས་ལས་ཀྱང་དྲིན་ཆེ་བའི། །བད༷ག་གི་མཚན་ལྡན་བླ་མ་གར་བཞུགས་ཀྱང་། །བད༷ག་བློ་དད་པས་ལྷང་ལྷང་གསོལ་བ་འདེབས། །བད༷ག་མདུན་ནམ་མཁར་བྱོན་ལ་དགྱེས་བཞིན་བཞུགས། །ཚེ༷་སྔོན་ཚོགས་བསགས་མང་པོ་བྱས་པའི་མཐུས། །ཚེ༷་འདིར་དྲུག་ལྡན་ལུས་ཐོབ་གཞོན་ནུའི་དུས། །ཚེ༷་འདིའི་ཆོས་བརྒྱད་འཆིང་བ་རུང་གིས་གྲོལ༷། །ཚེ༷་དང་སྒྲུབ་པ་སྙོམས་ལ་གསོལ་བ་འདེབས། །ཨེ་མ་མགོན་ཁྱོད་སྔོན་སྦྱངས་བག་ཆགས་བཟ༷ང་། །བཟ༷ང་པོའི་ཆོས་

མཛད་རྣམས་ལ་ཆུང་ནས་ད༷ད། །ད༷ད་གུས་བཟང་པོས་མཚན་ལྡན་བླ་མ་ཡ༷ང་། །ཡ༷ང་དག་ཚུལ་བཞིན་བསྟེན་ལ་གསོལ་བ་འདེབས། །སྐྱོན་མེ༷ད་དལ་འབྱོར་རྙེད་དཀའ་དོན་ཆེ་དང་། །ལོང་མེ༷ད་མྱུར་དུ་འཆི་བའི་ཚུལ་རྟོགས་ནས། །དོན་མེ༷ད་ཚེ་འདིའི་བདེ་ལ་མ་ཆགས་པར། །སྐྱིད་མེ༷ད་ཕ་ཡུལ་སྤངས་ལ་གསོལ་བ་འདེབས། །འཇི༷གས་རུང་ངན་སོང་གསུམ་ལ་རབ་འཇིགས་ནས། །འཇི༷གས་པ་དེ་ལས་སྐྱོབ་མཁན་དཀོན་མཆོག་བསྟེན། །འཇི༷ག་རྟེན་འདི་རུ་སྡིག་སྤོང་དགེ་བ་

སྒྲུབ། །འཇི༷གས་མེད་དཔའ་གདེངས་རྙེད་ལ་གསོལ་བ་འདེབས། །སྲི༷ད་རྩེ་ནས་བཟུང་མནར་མེད་ཡན་ཆད་ཀྱི། །སྲི༷ད་གསུམ་གནས་རྣམས་མེ་མུར་འོབས་ལྟར་མཐོང་། །སྲི༷ད་པའི་བདེ་ལ་མངོན་ཞེན་གཏིང་ནས་ལོག །སྲི༷ད་ལས་ཐར་བར་འདོད་ལ་གསོལ་བ་འདེབས། །ཐར༷་དཀའ་འཁོར་བའི་རྒྱ་མཚོ་ཆེན་པོ་ལས། །ཐ༷ར་ཐབས་བསླབ་པ་གསུམ་གྱི་གྲུར་ཞུགས་ནས། །ཐ༷ར་བར་དཀའ་བ་འཁོར་བའི་རྒྱ་མཚོར་བརྒལ། །ཐ༷ར་བའི་གསེར་གླིང་སྙོགས་ལ་གསོལ་བ་འདེབས། །མ༷་རིག་ཉོན་མོངས་དབང་དུ་སོང་བ་ཡི། །མ༷་གྱུར་འགྲོ་བའི་དོན་དུ་ཐུགས་བསྐྱེད་ནས། །མ༷་རབས་སྤྱོད་སྤངས་རྒྱལ་སྲས་སྤྱོད་པ་རྣམས། །མ༷་ལུས་སྒྲུབ་པར་བརྩོན་ལ་གསོལ་བ་འདེབས། །གས༷ང་སྔགས་ཉམས་སུ་ལེན་མཁན་བླ་མ་ལ། །གས༷ང་སྔགས་དབང་བཞི་ཚད་ལྡན་སྔོན་དུ་ཞུས། །གས༷ང་སྔགས་གཞུང་བཞིན་དམ་ཚིག་ལེགས་བསྲུངས་ནས། །གས༷ང་སྔགས་བསྐྱེད་རྫོགས་བསྒོམས་ལ་གསོལ་བ་འདེབས། །ཡ༷ང་དག་རྫོགས་པའི་སངས་རྒྱས་ཐམས་ཅད་ཀྱིས། །ཡ༷ང་དང་ཡང་དུ་བསྔགས་པའི་མྱུར་ལམ་མཆོག །ཡ༷ང་གསང་རྫོགས་ཆེན་

ཁྲེགས་ཆོད་ཐོད་རྒལ་གཉིས། །ཡ༷ང་ཡང་ཉམས་ལེན་མཛད་ལ་གསོལ་བ་འདེབས། །དམ་པ་གོང་མའི་རྣམ་ཐར་ཇི་བཞིན་དུ༷། །དུ༷་མའི་རི་ཁྲོད་དབེན་པའི་གནས་རྣམས་སུ༷། །སུ༷་དང་མ་ཕྲད་གཅིག་པུར་རྩེ་གཅིག་བསྒོ༷མ། །བསྒོ༷མ་བྱུང་ཤེས་རབ་རྡོལ་ལ་གསོལ་བ་འདེབས། །ཉམ༷ས་དགའི་རང་རིག་གསཾལ་སྟོང་ནམ་མཁའ་རུ། །ཉམ༷ས་རྟོགས་ཟླ་བ་གོང་ནས་གོང་དུ་འཕེལ། །ཉམ༷ས་གྲིབ་སྤྲིན་གྱིས་ནམ་ཡང་མ་བསྒྲིབས་པར། །ཉམ༷ས་མགུར་འོད་དཀར་འགྱེད་ལ་གསོལ་བ་འདེབས། །བསྟ༷ན་པའི་བདག་པོ་སྟོན་པ་སངས་རྒྱས་དང་། །བསྟ༷ན་འཛིན་སྐྱེས་བུ་རྣམས་ཀྱི་བྱིན་རླབས་དང་། །བསྟ༷ན་སྲུང་དམ་ཅན་རྒྱ་མཚོའི་མཐུ་སྟོབས་ཀྱིས། །བསྟ༷ན་པའི་དཔལ་གྱུར་བླ་མའི་ཞབས་བརྟན་ཤོག །རྒྱ༷ལ་བསྟན་རིན་ཆེན་འཛིན་སྐྱོང་སྤེལ་ལ་སོགས། །རྒྱ༷ལ་བའི་མཛད་པ་མ་ལུས་སྒྲུབ་མཛད་པའི། །རྒྱ༷ལ་ཚབ་མཚན་ལྡན་བླ་མའི་ཕྲིན་ལས་ཀྱང་། །རྒྱ༷ལ་ཁམས་ཡོངས་ལ་རྟག་ཏུ་རྒྱས་གྱུར་ཅིག །དམ༷་གཙང་གྲོགས་དང་འགྲོག་གམ་གཅིག་པུ་རུ། །དམ༷་ཚིག་སྡོམ་པ་བསྲུང་བཞིན་བདག་ཉིད་

ཀྱིས། །དམ༷་ཆོས་ཚུལ་བཞིན་ཉམས་སུ་ལེན་པ་ལ། །དམ༷་པ་ཁྱོད་དང་མཚུངས་པར་བྱིན་གྱིས་རློབས། །ཡིད་གཉིས་ཐེ་ཚོམ་མེད་པར་ཉམས་བླངས་མཐུས། །ཚོགས་གཉི༷ས་རབ་རྫོགས་སྒྲིབ་གཉིས་མ་ལུས་བྱང་། །སྐུ་གཉི༷ས་གོ་འཕང་མྱུར་དུ་ཐོབ་གྱུར་ནས། །དོན་གཉི༷ས་ལྷུན་གྱིས་འགྲུབ་པར་བྱིན་གྱིས་རློབས། །ཞེས་པ་འདི་ཡང་སློབ་བུ་རི་ཁྲོད་པ་བློ་བཟང་དོན་གྲུབ་ཀྱིས་བསྐུལ་ངོར། ༧ཚོགས་དྲུག་རང་གྲོལ་གྱིས་མཚོ་སྙིང་ནས་སྨྲས་པའོ།། །།

བླ་མའི་མཚན་དོན་དང་འབྲེལ་བའི་གསོལ་འདེབས།

༄༅། །བླ་མའི་མཚན་དོན་དང་འབྲེལ་བའི་གསོལ་འདེབས་བཞུགས་སོ། །རིག་འཛིན་སྔགས་འཆང་ཡོངས་ཀྱི་གཙུག་གི་རྒྱན། །ལུང་རྟོགས་ཡོན་ཏན་ཚད་མེད་དཔལ་དང་ལྡན། །འགྲོ་ལ་ཆོས་དང་བཀྲ་ཤིས་ཆར་འབེབས་པའི། །རིག་འཛིན་དཔལ་ལྡན་བཀྲ་ཤིས་ལ་གསོལ་བ་འདེབས། །ནོར་བུ་བཞིན་དུ་ཡོན་ཏན་དཔལ་མངའ་ཞིང་། །གསང་ཆེན་བསྟན་པ་སྤེལ་བའི་བཀའ་དྲིན་ཅན། །རྟོགས་ལྡན་ནམ་མཁའ་བཞིན་དུ་འཇིགས་པ་མེད། །དཔལ་ཆེན་ནམ་མཁའ་འཇིགས་མེད་ལ་གསོལ་བ་འདེབས། །དམུ་རྒོད་གདུལ་དཀའི་ཡུལ་རྣམས་ཞབས་ཀྱིས་བཅག །རྣམ་དཀར་དགེ་ལ་འགོད་ཕྱིར་བསམ་བཞིན་དུ། །རྡོ་རྗེ་འཆང་དབང་མི་ཡི་གཟུགས་སུ་ཤར། །ཞབས་དཀར་རྡོ་རྗེ་འཆང་ཆེན་ལ་གསོལ་བ་འདེབས། །ཆོས་ཀུན་གནས་ལུགས་མཐའ་བྲལ་ཆོས་ཀྱི་དབྱིངས། །ཁྱབ་བརྡལ་ཀློང་ཡངས་ནམ་མཁའ་ལྟ་བུ་ཡི། །ངང་ནས་མ་གཡོས་བཞིན་དུ་འགྲོ་དོན་མཛད། །འགྲོ་མགོན་ཁྱབ་བརྡལ་ཀློང་ཡངས་ལ་གསོལ་བ་འདེབས། །ཚེ་རབས་ཀུན་ཏུ་དགེ་བའི་བཤེས་བསྟེན་ནས། །རྒྱུ་ཡི་ཕར་ཕྱིན་འབྲས་བུ་གསང་སྔགས་

ཀྱི། །ལམ་ལ་རིམ་པ་བཞིན་དུ་སློབ་ནུས་ཤིང་། །བསླབ་བཞིན་རྒྱུད་ལ་སྐྱེ་བར་བྱིན་གྱིས་རློབས། །ཞེས་མཚན་དོན་དང་འབྲེལ་བའི་གསོལ་འདེབས་འདི་ལྟ་བུ་ཞིག་དགོས་ཞེས་བློ་ལྡན་བུ་ཆེན་ཉང་གི་མཚམས་པས་བསྐུལ་ངོར། རྣལ་འབྱོར་གུ་ཡངས་བློ་བདེ་ཞབས་དཀར་བས་གནས་གསུམ་དཔའ་བོ་མཁའ་འགྲོ་སྤྲིན་བཞིན་འདུ་བའི་དབེན་གནས་བདེ་བ་ཅན་ནས་སྨྲས་པའོ། །སརྦ་མངྒ་ལཾ།།

གྲུབ་བའི་དབང་ཕྱུག་དཔལ་ཆེན་ནམ་མཁའ་འཇིག་མེད་རིན་པོ་ཆེའི་སྐྱེས་ཕྲེང་གསོལ་འདེབས་རིན་ཆེན་གསེར་གྱི་ཕྲེང་བ།

༄༅། །གྲུབ་བའི་དབང་ཕྱུག་དཔལ་ཆེནནམ་མཁའ་འཇིག་མེད་རིན་པོ་ཆེའི་སྐྱེས་ཕྲེང་གསོལ་འདེབས་རིན་ཆེན་གསེར་གྱི་ཕྲེང་བ་ཞེས་བྱ་བ་བཞུགས་སོ། །

ཕྱོགས་བཅུ་དུས་གསུམ་སངས་རྒྱས་འདུས་པའི་སྐུ། །རིགས་དང་དཀྱིལ་འཁོར་རྒྱ་མཚོའི་མངའ་བདག་མཆོག །འགྲོ་བའི་མགོན་པོ་བདུད་ལས་རྣམ་རྒྱལ་བ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གྲངས་མེད་བསྐལ་པའི་སྔོན་ནས་སངས་རྒྱས་ཏེ། །སྐུ་ཚེ་སྔ་ཕྱི་བྱས་ནས་སྤྲུལ་པ་དང་། །དུས་གཅིག་མང་པོར་སྤྲུལ་པ་ཐམས་ཅད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱ་གར་པཎ་ཆེེན་བཱི་མ་མི་ཏྲ་མཆོག །གྲུབ་པ་མཆོག་བརྙེས་ཛ་ལནྡྷ་ར་

རྗེ། །གླང་ཕྲུག་གཉིས་འཛིན་ཚོང་འདུས་གྲུབ་ཆེན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡེ་ཤེས་སྤྱན་ལྡན་བཻ་རོ་ཙ་ན་མཆོག །རླུང་ལྟར་ཐོགས་མེད་རྡོ་རྗེ་བདུད་འཇོམས་རྗེ། །པདྨའི་དྲུང་དུ་མཉན་ཆེན་དཔལ་དབྱངས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྒྲ་བསྒྱུར་མར་པ་ཆོས་ཀྱི་བློ་གྲོས་ཞབས། །མར་པའི་ཐུགས་ཀྱི་སྲས་མཆོག་མགོ་ལེགས་དང་། །མི་ལའི་མཆེད་གྲོགས་དཔའ་བོ་སྟོབས་ལྡན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་

རློབས། །གཏེར་སྟོན་ཆེན་པོ་རིག་འཛིན་རྒོད་ལྡེམ་ཞབས། །གྲུབ་པའི་དབང་ཕྱུག་རྡོར་བྲག་རིག་འཛིན་རྗེ། །མཐུ་སྟོབས་ནུས་རྩལ་ཆེ་བའི་རྟ་ནག་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྙིགས་དུས་དམུ་རྒོད་སེམས་ཅན་འདུལ་བའི་ཕྱིར། །སྦས་པའི་རྣལ་འབྱོར་གྲུབ་པའི་དབང་ཕྱུག་མཆོག །མཚན་སྙན་དཔལ་ཆེན་ནམ་མཁའ་འཇིགས་མེད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ད་ལྟའི་དུས་འདིར་སྟོད་སྨད་བར་གསུམ་གྱི། །གདུལ་བྱའི་དོན་དུ་བསམ་བཞིན་བྱོན་པ་ཡི། །སྐུ་གསུང་ཐུགས་ཀྱི་སྤྲུལ་སྐུ་རྣམ་གསུམ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །མ་འོངས་དུས་སུ་གདུལ་བྱའི་སྣང་ངོ་རུ། །གང་ལ་གང་འདུལ་སྤྲུལ་པའི་སྐུར་བསྟན་ནས། །བསྟན་དང་འགྲོ་དོན་མཛད་པ་ཐམས་ཅད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བདག་ནི་དེང་ནས་ཚེ་རབས་ཐམས་ཅད་དུ། །མགོན་པོ་ཁྱོད་ཀྱིས་འབྲལ་མེད་རྗེས་བཟུང་སྟེ། །གསུང་གི་བདུད་རྩིས་བདག་རྒྱུད་སྨིན་གྲོལ་ནས། །བསྟན་འགྲོའི་དོན་ཆེན་འགྲུབ་པར་བྱིན་གྱིས་རློབས། །རྗེ་བཙུན་

བླ་མའི་སྐུ་ཚེ་རབ་བརྟན་ཅིང་། །རྣམ་དཀར་འཕྲིན་ལས་ཕྱོགས་བཅུར་རྒྱས་པ་དང་། །སངས་རྒྱས་བསྟན་པའི་སྒྲོན་མེས་ས་གསུམ་གྱི། །འགྲོ་བའི་མུན་སེལ་རྟག་ཏུ་གནས་གྱུར་ཅིག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་གྲུབ་པའི་དབང་ཕྱུག་དཔལ་ཆེན་ནམ་མཁའ་འཇིགས་མེད་རིན་པོ་ཆེའི་སྐྱེས་ཕྲེང་གསོལ་འདེབས་གསེར་གྱི་ཕྲེང་བ་ཞེས་བྱ་བ་འདི་ནི། ཁོང་གི་རྣམ་ཐར་གྱི་ནང་ན་སྔོན་གྱི་སྐྱེས་ཕྲེང་ཡོད་པ་ལྟར་ཚོགས་ནས་བཏོན་ཆོག་པ་འདི་ལྟ་བུ་ཞིག་དགོས་ཞེས། སྔོན་སྦྱངས་ལས་ཀྱི་འཕྲོ་ཅན་སྐལ་ལྡན་སྙིང་གི་བུ་མཆོག་ཉང་གི་མཚམས་པ་དང་། ལྷ་ཁང་དབུ་མཛད་སོགས་རེབ་གོང་དད་ལྡན་སྔགས་མང་ཡོངས་ཀྱིས་བསྐུལ་ངོར། རྒྱལ་ཁམས་འགྲིམས་པའི་རྣལ་འབྱོར་ཞབས་དཀར་བ་གུ་ཡངས་ཡན་པ་བློ་བདེས་དབེན་གནས་བཀྲ་ཤིས་འཁྱིལ་པ་ནས་སྦྱར་བའོ། །སརྦ་མངྒ་ལཾ།། །།

ཞབས་དཀར་བའི་སྐྱེ་རབས་ཉུང་འདུས།

༄༅། །ཞབས་དཀར་བའི་སྐྱེ་རབས་ཉུང་འདུས་བཞུགས་སོ། །བསྐལ་པ་དཔག་ཏུ་མེད་པའི་སྔོན་རོལ་ནས། །མྱུར་དུ་མངོན་པར་རྫོགས་པར་སངས་རྒྱས་སྟེ། །རྒྱལ་བའི་བསྟན་དང་འགྲོ་ལ་ཕན་པའི་ཕྱིར། །གང་ལ་གང་འདུལ་སྐུར་བསྟན་འགྲོ་དོན་མཛད། །སངས་རྒྱས་དུས་སུ་འཕགས་པ་སྤྱན་རས་གཟིགས། །རྒྱ་གར་ཡུལ་དུ་འཇམ་དཔལ་བཤེས་གཉེན་མཆོག །བོད་ཡུལ་དབུས་སུ་དྲན་པ་ནམ་མཁར་གྱུར། །བཀའ་བརྒྱུད་བསྟན་ལ་མི་ལ་རས་པ་དངོས། །བཀའ་གདམས་དུས་སུ་རྒྱལ་སྲས་ཐོགས་མེད་དཔལ། །དགའ་ལྡན་བསྟན་ལ་བློ་གྲོས་རྒྱལ་མཚན་རྗེ། །རིས་མེད་འགྲོ་ངོར་ཐང་སྟོང་རྒྱལ་པོར་སྤྲུལ། །ད་ལྟའི་དུས་འདིར་འགྲོ་མགོན་ཞབས་དཀར་བ། །མ་འོངས་མངོན་དགའ་ལ་སོགས་རིགས་ལྔ་ཡི། །ཞིང་དུ་རིགས་ཀྱི་བདག་པོ་དེ་བདག་གི །དྲུང་དུ་སྲས་ཀྱི་ཐུ་བོ་རེ་རེར་གྱུར། །འབྲེལ་ཚད་གང་འདོད་ཞིང་དུ་འདྲེན་པར་འགྱུར། །འདས་དང་མ་འོངས་ད་ལྟ་དུས་གསུམ་དུ། །གང་ལ་གང་འདུལ་སྣ་ཚོགས་སྐུར་བསྟན་ནས། །བསྟན་དང་འགྲོ་དོན་མཛད་པའི་ཐུགས་རྗེ་ཅན། །སྐྱབས་མགོན་ཡིད་བཞིན་

ནོར་བུ་ལ་གསོལ་བ་འདེབས། །ཕྱོགས་བཅུའི་ཞིང་ཁམས་བྱེ་བ་ཕྲག་བརྒྱ་རུ། །བསྐལ་པ་རྒྱ་མཚོར་བཙལ་ཀྱང་རྙེད་དཀའ་ཞིང་། །རྙེད་པ་དོན་ཆེན་ཡིད་བཞིན་ནོར་བུ་ལས། །ལྷག་པའི་བླ་མ་མཇལ་བ་སྐལ་པ་བཟང་། །བདག་ནི་དེང་ནས་ཚེ་རབས་ཐམས་ཅད་དུ། །མགོན་པོ་ཁྱོད་དང་ནམ་ཡང་མི་འབྲལ་ཞིང་། །གསུང་གི་བདུད་རྩིས་བདག་རྒྱུད་སྨིན་གྲོལ་ནས། །རང་གཞན་དོན་གཉིས་ལྷུན་གྱིས་འགྲུབ་པར་ཤོག །ཅེས་སྐྱེས་ཕྲེང་གསོལ་འདེབས་ཉུང་འདུས་འདི། དད་ཅན་སློབ་མ་སྒྲོལ་མ་སྐྱིད་འཛོམས་ཀྱིས་བསྐུལ་ངོར་ཞབས་དཀར་བས་ཀུན་བཟང་ནགས་ཁྲོད་ནས་སྨྲས་སོ། བཀྲ་ཤིས་དགེའོ། མངྒ་ལཾ༎

བླ་མའི་རྣམ་ཐར་གསོལ་འདེབས་དད་པའི་སྒོ་འབྱེད།

༄༅ །བླ་མའི་རྣམ་ཐར་གསོལ་འདེབས་དད་པའི་སྒོ་འབྱེད་བཞུགས་སོ།

ཕྱོགས་བཅུའི་རྒྱལ་བ་སྲས་བཅས་འདུས་པའི་སྐུ། །བྱིན་རླབས་དངོས་གྲུབ་མ་ལུས་འབྱུང་བའི་གནས། །བསྟན་དང་འགྲོ་བ་ཡོངས་ཀྱི་གཙུག་གི་རྒྱན། །སྐྱབས་མགོན་ཡིད་བཞིན་ནོར་བུར་གསོལ་བ་འདེབས། །མགོན་ཁྱོད་ཤཱ་རིའི་བུ་ཡི་སྨོན་ལམ་བཞིན། །ཕ་མ་རིགས་བཟང་ཆོས་ལྡན་བུ་རུ་སྐྱེས། །ཆུང་ནས་ཆོས་བསླབ་བླ་མ་མང་པོ་མཇལ། །སྡིག་སྤངས་དགེ་བ་བསྒྲུབས་ལ་གསོལ་བ་འདེབས། །སྔོན་བྱུང་བདག་ཅག་སྟོན་པའི་རྣམ་ཐར་བཞིན། །འཁོར་བའི་བྱ་བ་སྙིང་པོ་མེད་

མཐོང་ནས། །ཚེ་འདིའི་བྱ་བ་ཐམས་ཅད་བློ་ཡིས་བཏང་། །རབ་བྱུང་བསྙེན་རྫོགས་མཛད་ལ་གསོལ་བ་འདེབས། །ཕ་ཡུལ་སྤངས་ནས་ཆོས་རྒྱལ་ཞབས་པད་བསྟེན། །གསར་རྙིང་མདོ་སྔགས་ཆོས་ཀྱི་གདམས་པ་ཞུས། །བུམ་པ་གང་བྱོས་ཚུལ་དུ་གནང་བ་བྱུང་། །སྣོད་ལྡན་སློབ་མར་གྱུར་ལ་གསོལ་བ་འདེབས། །ཆོས་རྒྱལ་ངག་གི་དབང་པོས་ལུང་བསྟན་བཞིན། །རྩེ་གཞུང་རི་ཁྲོད་དབེན་པའི་དགའ་ཚལ་དུ། །གཅིག་པུར་བསྡད་ནས་རྩེ་གཅིག་ཉམས་ལེན་བྱས། །ཉམས་རྟོགས་ཡོན་

ཏན་ཤར་ལ་གསོལ་བ་འདེབས། །སྟག་མོ་རྫོང་དང་ལྷ་གཉན་རྒོད་རྩེ་སོགས། །དབེན་པར་ལྷ་འདྲེའི་ཆོ་འཕྲུལ་ཅི་བྱུང་ཡང་། །གནས་ལུགས་ངང་ལ་བཞག་ནས་མགུར་དབྱངས་བླངས། །མི་མཐུན་གཡུལ་ལས་རྒྱལ་ལ་གསོལ་བ་འདེབས། །མཚོ་སྙིང་དབེན་པར་སྤྲོས་མེད་འོད་གསལ་བསྒོམས། །སྤྱན་རས་གཟིགས་སོགས་ལྷ་ཞལ་མང་པོ་མཐོང་། །སྤྲུལ་བསྒྱུར་སྣ་ཚོགས་གོམས་པས་དག་པའི་ངོར། །མཐོང་སྣང་སྣ་ཚོགས་ཤར་ལ་གསོལ་བ་འདེབས། །རྨ་ཆེན་གངས་ནས་སྒྲུབ་པ་བྱས་པའི་ཚེ། །སངས་རྒྱས་བྱང་སེམས་མང་པོའི་ཞལ་གཟིགས་བྱུང་། །བསྟན་པའི་རྒྱལ་མཚན་གཏད་པའི་སྣང་བ་ཤར། །ཐུབ་པའི་རྒྱལ་ཚབ་མཛད་ལ་གསོལ་བ་འདེབས། །གངས་རིའི་ལམ་ནས་འབྲོང་གཡག་བཙན་པོ་བཏུལ། །བྲག་དཀར་སྤྲེལ་རྫོང་གནས་སུ་སྒྲུབ་པ་མཛད། །དབང་སྡུད་བཏང་བས་དམིགས་ཡུལ་དབང་དུ་འདུས། །མགུར་དབྱངས་སྣ་ཚོགས་བླངས་ལ་གསོལ་བ་འདེབས། །དབུས་གཙང་ལྷ་དང་བླ་མ་མཇལ་དུ་སོང་། །ཇོ་བོར་གསེར་ཀོང་ལ་སོགས་མཆོད་འབུལ་བྱས། །གསོལ་བ་བཏབ་པས་སྙིང་རྗེ་ཚད་མེད་

སྐྱེས། །འགྲོ་དོན་རྟེན་འབྲེལ་འགྲིགས་ལ་གསོལ་བ་འདེབས། །ཙ་རིའི་རོང་བསྐོར་བྱས་ནས་གཅིག་ཆར་དུ། །ལོ་གཅིག་སྒྲབ་པ་བྱས་པའི་ཉམས་སྣང་ལ། །དཔའ་བོ་མཁའ་འགྲོའི་ཞལ་གཟིགས་ཚོགས་དཔོན་མཛད། །ལེགས་བཤད་མང་པོ་བརྩམས་ལ་གསོལ་བ་འདེབས། །གངས་དཀར་ཏི་སེར་ལོ་གསུམ་སྒྲུབ་པ་བྱས། །མཁའ་འགྲོས་ལུང་བསྟན་བཞིན་དུ་འགྲོ་དོན་བསྐྱངས། །དད་ཅན་སྣང་ངོར་རྡོ་ལ་ཞབས་རྗེས་སོགས། །གྲུབ་རྟགས་མང་པོ་བསྟན་ལ་གསོལ་བ་འདེབས། །བལ་ཡུལ་མཆོད་རྟེན་མཇལ་ཚེ་ལམ་བར་ནས། །ར་ལུག་རི་དྭགས་བརྒྱ་སྟོང་ཚེ་ཐར་བྱས། །སྟོད་ཀྱི་གསེར་དངུལ་དབུས་གཙང་ཞིང་དུ་བརྫངས། །གསེར་ཀོང་མང་པོ་བསྐྲུན་ལ་གསོལ་བ་འདེབས། །ལ་ཕྱིར་ལོ་གསུམ་མཚམས་བྱས་ཆོས་འཁོར་བསྐོར། །ཚེ་རིང་མཆེད་ལྔའི་ཞལ་གཟིགས་འཕྲིན་ལས་བསྒྲུབས། །བྱ་རུང་ཁ་ཤོར་ཆོས་འཁོར་གསེར་གྱིས་བསྐྲུན། །རྒྱ་ཆེན་སྨོན་ལམ་བཏབ་ལ་གསོལ་བ་འདེབས། །དབུས་གཙང་ཕྱོགས་ནས་མཆོད་སྦྱིན་མང་པོ་བཏང་། །མཆོད་རྟེན་བཀྲ་ཤིས་སྒོ་མང་ཉམས་

གསོ་བྱས། །ཆོས་འཁོར་གདུགས་ཏོག་རིན་ཆེན་གསེར་ལས་བསྐྲུན། །བསྟན་འགྲོའི་བདེ་ཐབས་མཛད་ལ་གསོལ་བ་འདེབས། །མདོ་ཁམས་སྨད་ཀྱི་དམག་འཁྲུག་མང་པོ་བཅད། །ལྷ་ཁང་ཁོ་ན་བརྒྱ་དང་རྩ་བརྒྱད་བཞེངས། །རྒྱལ་ཁམས་ཐམས་ཅད་ཆོས་ཀྱིས་དཀར་པོར་བཏང་། །ཞབས་དཀར་རྡོ་རྗེ་འཆང་ལ་གསོལ་བ་འདེབས། །དང་པོ་བླ་མ་བསྟེན་ནས་གདམས་ངག་གསན། །བར་དུ་རི་ཁྲོད་དབེན་པར་ཉམས་ལེན་གནང་། །ཐ་མར་རྒྱལ་ཁམས་ཡོངས་ལ་འགྲོ་དོན་མཛད། །ཞབས་དཀར་རྡོ་རྗེ་འཆང་ལ་གསོལ་བ་འདེབས། །བདག་ནི་དེང་ནས་བྱང་ཆུབ་མ་ཐོབ་བར། །ཚེ་རབས་ཀུན་ཏུ་བླ་མས་རྗེས་འཛིན་ཅིང་། །བྱང་ཆུབ་ཐོབ་ཀྱང་རིགས་ཀྱི་བདག་པོ་རུ། །བཞུགས་ནས་འབྲལ་བ་མེད་པར་བྱིན་གྱིས་རློབས། །ཞེས་བླ་མའི་རྣམ་ཐར་གསོལ་འདེབས་དད་པའི་སྒོ་འབྱེད་འདི་ནི། དད་ཅན་སློབ་མ་རྣམས་ཀྱིས་བསྐུལ་ངོར། ༧བླ་མ་ཞབས་དཀར་བས་དབེན་གནས་བཀྲ་ཤིས་འཁྱིལ་ནས་སྦྱར་བའོ། །སརྦ་མངྒ་ལཾ།། །།

བླ་མའི་རྣམ་ཐར་གསོལ་འདེབས་སྙིང་རྗེའི་སྒོ་འབྱེད།

༄༅། །བླ་མའི་རྣམ་ཐར་གསོལ་འདེབས་སྙིང་རྗེའི་སྒོ་འབྱེད་བཞུགས་སོ།།

སྟོན་པ་སངས་རྒྱས་སྤྱན་རས་གཟིགས་དབང་སོགས། །ཕྱོགས་བཅུའི་རྒྱལ་བ་སྲས་བཅས་སྙིང་རྗེ་ཀུན། །བུམ་པ་གང་བྱོའི་ཚུལ་དུ་གནང་འདྲ་བའི། །བླ་མ་སྙིང་རྗེ་ཅན་ལ་གསོལ་བ་འདེབས། །ཆུང་ངུའི་དུས་ནས་སྙིང་རྗེའི་བག་ཆགས་སད། །རྩེ་གྲོགས་བྱིས་པ་ཆེ་ཆུང་སུ་མཐོང་ཡང་། །སྙིང་རྗེས་ལག་ན་གང་ཡོད་དགའ་བཞིན་སྟེར། །བླ་མ་སྙིང་རྗེ་ཅན་ལ་གསོལ་བ་འདེབས། །ཆེར་སོང་ཤ་ཉེ་རབས་ཆད་རྒན་མོ་ཞིག །སྙིང་རྗེས་ཇ་མར་ཤ་སོགས་གང་མཁོ་བྱིན། །ཚུར་ལ་བུ་ལྟར་

གཅེས་པ་སྐབས་རེར་དྲན། །བླ་མ་སྙིང་རྗེ་ཅན་ལ་གསོལ་བ་འདེབས། །གཙང་གི་དགོན་མཐའི་རྒན་མོ་རྐང་ཞ་ཞིག །སྙིང་རྗེས་ཅོག་པུ་བྱིན་པས་མོ་རང་གིས། །བཙོངས་ནས་ཕྱེད་ཀས་མང་ཇ་བཏང་པ་ཐོས། །བླ་མ་སྙིང་རྗེ་ཅན་ལ་གསོལ་བ་འདེབས། །མཚོ་སྙིང་དབེན་པར་འགྲོ་ཁར་ཆོས་རྒྱལ་གྱིས། །དངུལ་སྲང་ཁ་ཤས་གནང་བ་མ་ཁྱེར་བར། །མཐའ་ཡི་སྤྲང་མོ་ཞིག་ལ་གནང་དུ་བཅུག །བླ་མ་སྙིང་རྗེ་ཅན་ལ་གསོལ་བ་འདེབས། །མཚོ་བསྐོར་བྱེད་དུས་དད་ཅན་ཡོན་བདག་གིས། །ཕུལ་

བའི་རྟ་གཅིག་ཉམ་ཐག་སྤྲང་པོ་ལ། །སྒ་སྟན་སྲབ་བཅས་བྱིན་པས་སྤྲང་པོ་དགའ། །བླ་མ་སྙིང་རྗེ་ཅན་ལ་གསོལ་བ་འདེབས། །རྨ་ཆེན་གངས་ལ་འགྲོ་དུས་ནད་པ་ལ། །མཛོ་སྒ་ཅོག་པུ་ཟླ་གཅིག་གྲོ་ཁ་བྱིན། །ནད་པ་དྲག་ནས་གླུ་བླངས་རང་ཡུལ་སོང་། །བླ་མ་སྙིང་རྗེ་ཅན་ལ་གསོལ་བ་འདེབས། །ལྷ་སའི་བཤན་པས་ར་ལུག་གསོད་པ་མཐོང་། །སྙིང་རྗེ་ཆེན་པོ་སྐྱེས་ནས་ཇོ་བོ་ཡི། །མདུན་ནས་ཤ་མི་ཟ་བའི་དམ་བཅའ་མཛད། །བླ་མ་སྙིང་རྗེ་ཅན་ལ་གསོལ་བ་འདེབས། །དྲོ་ཤོད་ལམ་ཁའི་སྤྲང་མོ་སྒྲོལ་མ་ལ། །དངུལ་སྲང་ཁ་ཤས་ཇ་མར་རྩམ་པ་བྱིན། །མོས་ཀྱང་སྒྲོལ་མ་འདོན་བཞིན་གཏམ་སྙན་བསྒྲགས། །བླ་མ་སྙིང་རྗེ་ཅན་ལ་གསོལ་བ་འདེབས། །གངས་རིར་གནས་བསྐོར་བྱེད་པའི་སྤྲང་པོ་ལ། །ལྟོ་གོས་བྱིན་པས་མང་པོས་བསྐོར་བ་བྱས། །ལོ་གསུམ་བར་ལ་སྤྲང་པོ་བརྒྱ་ཙམ་བསྐྱངས། །བླ་མ་སྙིང་རྗེ་ཅན་ལ་གསོལ་བ་འདེབས། །དྲོ་ཤོད་ཕྱོགས་ནས་རི་དྭགས་གསོད་མཁན་ལ། །དངུལ་སྲང་སྟོང་ཕྲག་ཙམ་གྱི་རྒྱུ་ནོམས་བྱིན། །རི་དྭགས་བརྒྱ་སྟོང་མང་པོའི་ཚེ་སྲོག་སྐྱབས། །བླ་མ་སྙིང་རྗེ་ཅན་ལ་གསོལ་བ་འདེབས།

གཉའ་ནམ་ཚོང་འདུས་ཚོང་པའི་དམར་མཆོད་བཅད། །དངུལ་བྱིན་ར་ལུག་སྟོང་གི་ཚེ་ཐར་བཏང་། །དེ་རྣམས་འཕེལ་རྒྱས་གླིང་ལ་བཅོལ་དམ་བྱས། །བླ་མ་སྙིང་རྗེ་ཅན་ལ་གསོལ་བ་འདེབས། །ལ་ཕྱིར་སྡོད་ཚེ་ཁྱི་ར་མང་པོ་ཡི། །སྡིག་རྒྱུན་བཅད་པས་ཤ་ཁྱི་མང་པོ་ཕུལ། །ཁྱི་རྫི་བཞག་ནས་ཐམས་ཅད་སྐྱིད་དུ་བཅུག །བླ་མ་སྙིང་རྗེ་ཅན་ལ་གསོལ་བ་འདེབས། །བཀྲ་ཤིས་ལྷུན་པོར་འོང་དུས་གནས་བསྐོར་བ། །སྤྲང་པོ་ལྔ་བརྒྱ་ཙམ་ཞིག་སྔོན་ལ་བཏང་། །རང་ཉིད་རྗེས་ནས་འོང་ཚེ་སྐྱ་སེར་སྟོང་། །རབ་ཏུ་དགའ་ནས་ལྟད་མོ་བལྟ་རུ་བྱུང་། །བླ་མ་སྙིང་རྗེ་ཅན་ལ་གསོལ་བ་འདེབས། །འབྲི་ཆུའི་ཁ་ནས་ཇག་པས་མགྲོན་པོ་བཅོམ། །ཤོར་མ་བདུན་ཅུ་ཙམ་ཞིག་བསྐྱངས་ནས་འོང་། །ཟི་ལིང་ཨམ་འབན་དགའ་ནས་བདག་རྐྱེན་གནང་། །བླ་མ་སྙིང་རྗེ་ཅན་ལ་གསོལ་བ་འདེབས། །མདོ་སྨད་ཕྱོགས་ཀྱི་དམག་འཁྲུག་བྱེད་མཁན་ལ། །སྙིང་རྗེས་ཆོས་དང་གཏམ་བཤད་འགྲིགས་སུ་བཅུག །མི་རྟ་བརྒྱ་ཕྲག་མང་པོའི་ཚེ་སྲོག་སྐྱབས། །བླ་མ་སྙིང་རྗེ་ཅན་ལ་གསོལ་བ་འདེབས། །ནམ་ཚ་ངན་པའི་ལོ་

ཞིག་ཆུ་བཟང་ནས། །རྒྱ་དངུལ་རྡོ་ཚད་དགུ་ཡིས་རྩམ་པ་ཉོས། །སྤྲང་པོ་མུ་གེས་འཆི་ཉེ་མང་པོ་གསོས། །བླ་མ་སྙིང་རྗེ་ཅན་ལ་གསོལ་བ་འདེབས། །མདོར་ན་ཉམ་ཐག་འགྲོ་ཀུན་སྙིང་རྗེ་ནས། །ལྟོ་གོས་ཆོས་གསུམ་བྱིན་ནས་བུ་ལྟར་བསྐྱངས། །ཀུན་གྱིས་ནོར་བུ་བཞིན་དུ་མཆོད་བསྟོད་བཀུར། །བླ་མ་སྙིང་རྗེ་ཅན་ལ་གསོལ་བ་འདེབས། །མགོན་ཁྱོད་ཐུགས་ཀྱི་སྙིང་རྗེ་ཆེན་པོ་དེ། །བདག་གི་རྒྱུད་ལ་སྐྱེ་བར་བྱིན་གྱིས་རློབས། །རྒྱུད་ལ་སྙིང་རྗེ་སྐྱེད་པའི་བླ་མ་དང་། །ཚེ་རབས་ཀུན་ཏུ་འབྲལ་བ་མེད་པར་ཤོག །དེང་ནས་བཟུང་སྟེ་བྱང་ཆུབ་མ་ཐོབ་བར། །ཚེ་རབས་ཀུན་ཏུ་བླ་མའི་རྣམ་ཐར་བཞིན། །སྙིང་རྗེ་ཆེན་པོའི་སྒོ་ནས་ཉམ་ཐག་ཀྱི། །འགྲོ་བ་ཡོངས་ལ་ཕན་ཐོགས་འབྱུང་བར་ཤོག །ཅེས་བླ་མའི་རྣམ་ཐར་གསོལ་འདེབས་སྙིང་རྗེའི་སྒོ་འབྱེད་འདི་ནི། དད་ཅན་སློབ་མ་མང་པོས་བསྐུལ་ངོར་༸བླ་མ་ཞབས་དཀར་བས་སྦྱར་བའོ། །འདི་ཁ་འདོན་བྱེད་མཁན་གྱི་རྒྱུང་ལ་སྙིང་རྗེ་ཆེན་པོ་སྐྱེ་བར་གྱུར་ཅིག། །།

བླ་མའི་གསོལ་འདེབས་བྱིན་རླབས་མྱུར་འཇུག

༄༅། །བླ་མའི་གསོལ་འདེབས་བྱིན་རླབས་མྱུར་འཇུག་བཞུགས་སོ། །འཁོར་བའི་ཕུན་ཚོགས་དུག་སྦྲུལ་ཚང་ལྟ་བུར། །མཐོང་ནས་ཚེ་འདིའི་བྱ་བ་ཐམས་ཅད་ལ། །མངོན་ཞེན་གཏིང་ནས་ལོག་པའི་བྱ་བཏང་བ། །ཚོགས་དྲུག་རང་གྲོལ་ཞབས་ལ་གསོལ་བ་འདེབས། །ཁྱོད་ཐུགས་ཤེལ་དཀར་བུམ་བཟང་ལས་ཐོན་པའི། །ཟབ་ལམ་ལེགས་བཤད་བདུད་རྩིའི་ཆུ་རྒྱུན་གྱིས། །རང་སེམས་ནོར་བུའི་ཉོན་མོངས་དྲི་མ་ཀུན། །བཀྲུས་ནས་དོན་གཉིས་དགོས་འདོད་ཀུན་འབྱུང་ཤོག །ཤེས་བྱའི་ཆོས་རྣམས་མ་ལུས་ས་ལེར་མཁྱེན། །བྱམས་དང་བརྩེ་བས་འགྲོ་ལ་ཟབ་རྒྱས་ཆོས། །སྟོན་པའི་མཚན་ལྡན་རྩ་བའི་བླ་མ་ཡི། །སྐུ་ཚེ་བསྐལ་བརྒྱའི་བར་དུ་བརྟན་པར་ཤོག །ཚོགས་གཉིས་ལས་འཁྲུངས་མཚན་དཔེས་མཛེས་པའི་སྐུ། །ཡན་ལག་དྲུག་ཅུའི་གདངས་ལྡན་སྙན་པའི་གསུང་། །ཉོན་མོངས་རང་གྲོལ་གསལ་སྟོང་འཛིན་མེད་ཐུགས། །བླ་མའི་སྐུ་གསུང་ཐུགས་ལ་གསོལ་བ་འདེབས། །ལུས་ལ་བླ་མའི་སྐུ་ཡིས་བྱིན་གྱིས་རློབས། །ལུས་ཀྱི་སྒྲིབ་དག་བདེ་དྲོད་འབར་བ་དང་། །ལུས་ནི་འཆི་མེད་འཇའ་ལུས་འོད་སྐུར་

གྱུར། །ལུས་ཀྱིས་གཞན་ལ་ཕན་ཐོགས་འབྱུང་བར་ཤོག །ངག་ལ་བླ་མའི་གསུང་གིས་བྱིན་གྱིས་རློབས། །ངག་གི་སྒྲིབ་དག་ནུས་པ་འབྱུང་བ་དང་། །ངག་ནི་འགག་མེད་ཚངས་པའི་དབྱངས་སུ་གྱུར། །ངག་གིས་གཞན་ལ་ཕན་ཐོགས་འབྱུང་བར་ཤོག །སེམས་ལ་བླ་མའི་ཐུགས་ཀྱིས་བྱིན་གྱིས་རློབས། །སེམས་ཀྱི་སྒྲིབ་དག་ཉམས་རྟོགས་འཆར་བ་དང་། །སེམས་ནི་འཁྲུལ་མེད་ཆོས་ཀྱི་སྐུ་རུ་གྱུར། །སེམས་ཀྱིས་གཞན་ལ་ཕན་ཐོགས་འབྱུང་བར་ཤོག །སྐྱབས་གསུམ་ཀུན་འདུས་བླ་མ་རྡོ་རྗེ་འཆང་། །གང་ལ་གང་འདུལ་བཤེས་གཉེན་ཚུལ་བཟུང་ནས། །མཆོག་དང་ཐུན་མོང་དངོས་གྲུབ་སྩོལ་མཛད་པའི། །དྲིན་ཅན་བླ་མ་རྣམས་ལ་གསོལ་བ་འདེབས། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །སྟོན་པ་བླ་ན་མེད་པའི་བསྟན་པ་དང་། །མཇལ་བ་འདི་འདྲ་བླ་མའི་དྲིན་ཡིན་པས། །དགེ་བ་འདི་ཡང་འགྲོ་བ་མ་ལུས་པ། །བཤེས་གཉེན་དམ་པས་འཛིན་པའི་རྒྱུ་རུ་བསྔོ། །དཔལ་ལྡན་བླ་མའི་

རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །ཅེས་པ་འདི་ཡང་དད་གཏོང་ཤེས་རབ་སྙིང་རྗེ་དང་ལྡན་པའི་སློབ་བུ་མཐོ་ལྡིང་དགེ་སློང་ངག་དབང་ཡེ་ཤེས་ཀྱིས་བསྐུལ་ངོར། ༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ། །བཀྲ་ཤིས་ཤོག །

བླ་མ་རྒྱང་འབོད།

༄༅། །བླ་མ་རྒྱང་འབོད་བཞུགས་སོ། །བླ་མ་མཁྱེན། བླ་མ་མཁྱེན། བླ་མ་མཁྱེན། རིགས་རྣམས་ཀུན་གྱི་བདག་པོ། །དཀྱིལ་འཁོར་ཀུན་གྱི་གཙོ་བོ། །བརྟན་གཡོ་ཀུན་གྱི་ཁྱབ་བདག །འཁོར་འདས་ཀུན་གྱི་དཔལ་མགོན། །དྲིན་ཅན་རྩ་བའི་བླ་མ། །ཐུགས་རྗེའི་སྤྱན་གྱིས་གཟིགས་ཤིག །མ་རིག་མུན་པས་བསྒྲིབས་ལ། །ཐུགས་རྗེའི་སྤྱན་གྱིས་གཟིགས་ཤིག །འཆི་བ་ཡོང་སྙམ་མེད་ལ། །ཐུགས་རྗེའི་སྤྱན་གྱིས་གཟིགས་ཤིག །ལྟོ་གོས་ཞེན་པ་ཅན་ལ། །ཐུགས་རྗེའི་སྤྱན་གྱིས་གཟིགས་ཤིག །བློ་བསྐྱེད་ཡོང་རྒྱུ་མེད་ལ། །ཐུགས་རྗེའི་སྤྱན་གྱིས་གཟིགས་ཤིག །སྐྱབས་མགོན་ཁྱེད་རང་མ་གཏོགས། །རེ་ས་གཞན་ན་མི་འདུག །འདི་ཕྱི་བར་དོ་གང་དུ། །ཐུགས་རྗེའི་སྤྱན་གྱིས་གཟིགས་ཤིག །ཅེས་བླ་མ་རྒྱང་འབོད་འདི་ནི་དད་ཅན་སྙིང་གར་རྒྱལ་ལ་གདམས་པའོ།། །།

སྔོན་འགྲོ་ཉུང་འདུས།

༄༅། །སྔོན་འགྲོ་ཉུང་འདུས། ན་མོ་གུ་རུ། དལ་འབྱོར་རྙེད་དཀའ་འཆི་བ་མྱུར་དུ་འོང་། །ལས་འབྲས་འཁོར་བའི་ཉེས་དམིགས་བསམ་པར་བྱ། །ཞེས་པ་ལྟར་བསམ་ལ། དེ་ནས་ཚོགས་ཞིང་གསལ་བ་ནི། འཁོར་བ་ངན་སོང་སྡུག་བསྔལ་ལས་སྐྱོབ་པའི། །སྐྱབས་ཡུལ་ལྷ་ཚོགས་ནམ་མཁའ་གང་བར་བཞུགས་པར་བསམ། དེ་ནས་སྐྱབས་འགྲོ་ནི། བླ་མ་དཀོན་མཆོག་གསུམ་ལ་སྐྱབས་སུ་མཆི། །སེམས་བསྐྱེད་ནི། བྱམས་དང་སྙིང་རྗེ་བྱང་ཆུབ་སེམས་བསྐྱེད་དོ། །ལན་ཅི་རིགས་བརྗོད་ལ། སྐྱབས་ཡུལ་ལྷ་ཚོགས་འོད་ཞུ་རང་ལ་ཐིམ། །རང་ལུས་དྭངས་གསལ་འོད་ཀྱི་ཕུང་པོར་གྱུར། །རྡོར་སེམས་བསྒོམ་བཟླས་ནི། སྤྱི་བོར་རྡོར་སེམས་སྐུ་ལས་བདུད་རྩི་བབ། །རང་གི་ནད་གདོན་སྡིག་སྒྲིབ་དག་པར་གྱུར། ཨོཾ་བཛྲ་སཏྭ་ཞེས་ཡིག་བརྒྱ་བཟླས་ལ། རྡོར་སེམས་འོད་དུ་ཞུ་ནས་རང་ལ་ཐིམ། །རང་ལུས་དྭངས་གསལ་འོད་ཀྱི་ཕུང་པོར་གྱུར། །མཎྜལ་གྱི་ཚོགས་ཞིང་ནི། བྱིན་རླབས་དངོས་གྲུབ་ཆར་ལྟར་འབེབས་མཛད་པའི། །ཚོགས་ཞིང་ལྷ་ཚོགས་ནམ་མཁའ་གང་བར་བཞུགས། །དེ་ནས་མཎྜལ་འབུལ་བ་ནི། དངོས་འབྱོར་ཡིད་ཀྱིས་སྤྲུལ་པའི་མཎྜལ་འབུལ། །བཞེས་ནས་བྱིན་

རླབས་དངོས་གྲུབ་སྩལ་དུ་གསོལ། །ཞེས་འབུལ། ཚོགས་ཞིང་ལྷ་ཚོགས་འོད་ཞུ་རང་ལ་ཐིམ། །རང་ལུས་དྭངས་གསལ་འོད་ཀྱི་ཕུང་པོར་གྱུར། །དེ་ནས་བླ་མའི་རྣལ་འབྱོར་ནི། སྤྱི་བོར་སེང་ཁྲི་པད་ཟླའི་གདན་སྟེང་དུ། །བླ་མ་རྡོ་རྗེ་འཆང་དབང་བཞུགས་པར་གྱུར། །སྐྱབས་གནས་ཀུན་འདུས་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་ཅི་མང་འདོན། བླ་མས་ཏིང་ངེ་འཛིན་གྱིས་དབང་བཞི་བསྐུར། །འོད་དུ་ཞུ་ནས་རང་ལ་ཐིམ་པར་གྱུར། །བླ་མའི་ཐུགས་དང་རང་སེམས་དབྱེར་མེད་འདྲེས། །སེམས་ཉིད་སྟོང་གསལ་ཆོས་སྐུའི་ངང་ལ་བཞག །དེ་ནས་བསྔོ་སྨོན་ནི། འདིའི་མཚོན་དགེ་བས་ཆོས་སྐུ་མངོན་དུ་བྱས། །གཟུགས་སྐུ་གཉིས་ཀྱིས་འགྲོ་དོན་བྱེད་པར་ཤོག །ཅེས་སྔོན་འགྲོ་ཉུང་འདུས་འདི་ནི་རྣལ་འབྱོར་ཞབས་དཀར་པས་སྦྱར་བའོ། །དགེའོ། བཀྲ་ཤིས།

ན་མོ་གུ་རུ་མཉྫུ་གོ་ཥ་ཡ་སོགས་ཉམས་ལེན་གྱི་ལམ་རིམ་པ།

༄༅། །ན་མོ་གུ་རུ་མཉྫུ་གོ་ཥ་ཡ། ཆོས་སྐུ་ཀུན་བཟང་ལོངས་སྐུ་རྡོ་རྗེ་འཆང་། །སྤྲུལ་པའི་སྐུ་མཆོག་ཐུབ་པའི་དབང་པོ་སོགས། །འགྲོ་ལ་ཆོས་ཀྱི་འཁོར་ལོ་བསྐོར་མཛད་པའི། །དངོས་བརྒྱུད་བླ་མ་རྣམས་ལ་ཕྱག་འཚལ་ལོ། །རྒྱལ་དང་དེ་སྲས་རྒྱ་བོད་མཁས་གྲུབ་ཀྱིས། །སྔོན་ཆད་མ་གསུངས་པ་ཞིག་བརྗོད་རྒྱུ་མེད། །འོན་ཀྱང་དེ་དག་རྣམས་ཀྱིས་གསུངས་པའི་དོན། །སླར་ཡང་གླུ་རུ་ལེན་གྱིས་གུས་པས་ཉོན། །དལ་འབྱོར་རྙེད་དཀའ་(དལ་འབྱོར་རྙེད་དཀའ་བསམ་པ་)འཆི་བ་མྱུར་དུ་འོང་། (འཆི་བམི་རྟག་པ་བསམ་པ།) ལས་འབྲས་མི་བསླུ་(ལས་རྒྱུ་འབྲས་བསམ་པ།) འཁོར་བར་བདེ་བ་མེད། (འཁོར་བའི་ཉེས་དམིགས་བསམ་པ།) སྐྱབས་གནས་དཀོན་མཆོག་གསུམ་ལ་སྐྱབས་སུ་མཆི། (སྐྱབས་འགྲོ།) །བྱམས་དང་སྙིང་རྗེ་བྱང་ཆུབ་སེམས་བསྐྱེད་དོ། (སེམས་སྐྱེད།) །སྤྱི་བོར་རྡོར་སེམས་སྐུ་ལས་བདུད་རྩི་བབས། །རང་གི་ནད་གདོན་སྡིག་སྒྲིབ་དག་པར་གྱུར། (རྡོར་སེམས་བསྒོམ་ཟླས།) ལུས་དང་ལོངས་སྤྱོད་དགེ་ཚོགས་ལྷ་ལ་འབུལ། །བཞེས་ནས་བྱིན་རླབས་དངོས་གྲུབ་སྩལ་དུ་གསོལ། (མཎྜལ།) །སྐྱབས་གནས་ཀུན་འདུས་རྩ་

བའི་བླ་མ་ལ། གསོལ་བ་འདེབས་སོ་བདག་རྒྱུད་བྱིན་གྱིས་རློབས། (བླ་མའི་རྣལ་འབྱོར་བསྒོམས་ནས་གསོལ་བ་འདེབས་པ།) །མདུན་གྱི་ནམ་མཁར་སངས་རྒྱས་བཞུགས་པར་མོས། །དེ་ཉིད་ཡིད་ལ་ཝལ་ལེར་དྲན་པར་བྱ། (ཞི་གནས།) །སེམས་ཀྱི་རང་བཞིན་གདོད་ནས་མཁའ་ལྟར་སྟོང་། །སྟོང་གསལ་འཛིན་མེད་ངང་ལ་མཉམ་པར་འཇོག (ལྷག་མཐོང་ལ་མཉམ་པར་འཇོག་ཚུལ།) །སེམས་ཀྱི་མཁའ་ལ་ཆོས་ཀུན་འཇའ་ལྟར་སྣང་། །སྣང་སྟོང་སྒྱུ་མ་ལྟ་བུར་ཤེས་པར་བྱ། (རྗེས་ཐོབ་སྒྱུ་མའི་སྤྱོད་པ།) །གདོས་བཅས་ལུས་འདི་སྣང་སྟོང་ལྷ་སྐུར་བསྒོམས། །ངག་གིས་གྲགས་སྟོང་སྔགས་ཀྱི་བཟླས་པ་བྱ། (བསྐྱེད་རིམ།) །རྩ་གསུམ་འཁོར་ལོ་ཨ་ཧཾ་གསལ་བཏབ་ལ། །བུམ་ཅན་རླུང་གིས་གཏུམ་མོའི་བདེ་དྲོད་སྤོར། (རྫོགས་རིམ་གཞུང་ཤིང་གཏུམ་མོ།) །སྐབས་རེར་འདུན་པ་དྲག་པོས་ཞིང་སྦྱོང་བུ། །མཇུག་ཏུ་བསྔོ་བ་སྨོན་ལམ་རྒྱ་ཡིས་གདབ། །ཚེ་འདི་བློས་བཏང་དབེན་པར་ཉམས་བླངས་ན། །དལ་འབྱོར་ཐོབ་པ་དོན་དང་ལྡན་པར་འགྱུར། །དགེ་འདིས་སྐལ་ལྡན་སློབ་མ་ཐམས་ཅད་ཀྱིས། །ཤེས་རྒྱུད་ཆོས་ལ་བསྐུལ་བའི་རྒྱུར་གྱུར་ཅིག །དགེ་ལེགས་འཕེལ། ཞེས་པ་འདིའང་སྐྱབས་མགོན་ཞབས་དཀར་གྱི་གསུང་བྱིན་རླབས་ཅན་ནོ། །

སྐྱབས་སེམས་གསོལ་འདེབས་དད་པའི་འཇུག་ངོགས།

༄༅། །སྐྱབས་སེམས་གསོལ་འདེབས་དད་པའི་འཇུག་ངོགས་བཞུགས་སོ། །སྐྱབསའགྲོ་ནི། སངས་རྒྱས་ཀུན་དངོས་རྩ་བའི་བླ་མ་དང་། །བསླུ་མེད་གཏན་གྱི་སྐྱབས་གནས་དཀོན་མཆོག་གསུམ། །ཡི་དམ་མཁའ་འགྲོ་ཆོས་སྐྱོང་ཚོགས་རྣམས་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །སེམས་བསྐྱེད་ནི། འགྲོ་ཀུན་དོན་དུ་སངས་རྒྱས་ཐོབ་པར་བྱ། །དེ་ཕྱིར་དམ་པའི་ལྷ་ཆོས་བསྒྲུབ་པར་བགྱི། །རྫོགས་པའི་སངས་རྒྱས་གོ་འཕང་མྱུར་ཐོབ་ནས། །མཐའ་ཡས་འགྲོ་བ་བསྒྲལ་བར་སེམས་བསྐྱེད་དོ། །གསོལ་འདེབས་ནི། རྩ་བརྒྱུད་བླ་མ་ཡི་དམ་ཞི་ཁྲོ་དང་། །ཕྱོགས་བཅུ་དུས་གསུམ་སངས་རྒྱས་བྱང་སེམས་དང་། །གནས་གསུམ་དཔའ་བོ་མཁའ་འགྲོ་ཆོས་སྐྱོང་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །ཞེས་སྐྱབས་སེམས་གསོལ་འདེབས་དད་པའི་འཇུག་ངོགས་འདི་ནི་དད་བརྩོན་ཤེས་རབ་སྙིང་རྗེ་དང་ལྡན་པའི་སློབ་བུ་བློ་བཟང་དགེ་ལེགས་ཀྱིས་བསྐུལ་ངོར༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ།། །།

རྡོར་སེམས་བསྒོམ་བཟླས་སྡིག་སྒྲིབ་འཁྲུ་བའི་ཆུ་རྒྱུན་དང་མཎྜལ་ཞིང་ཁམས་སྒོ་འབྱེད།

རྡོར་སེམས་བསྒོམ་བཟླས་སྡིག་སྒྲིབ་འཁྲུ་བའི་ཆུ་རྒྱུན་བཞུགས། །སྤྱི་བོར་པད་དཀར་ཟླ་སྟེང་དུ། །བླ་མ་རྡོ་རྗེ་སེམས་དཔའ་བཞུགས། །སྐུ་ལས་བདུད་
རྩིའི་ཆུ་རྒྱུན་བབས། །རང་གི་སྡིག་སྒྲིབ་དག་པར་གྱུར། །ཨོཾ་བཛྲ་སཏྭ་ས་མ་ཡ༷ ཞེས་ཡིག་བརྒྱ་བཟླས་མཐར། རྡོར་སེམས་འོད་ཞུ་རང་ལ་ཐིམ། །རང་ཉིད་རྡོ་རྗེ་སེམས་དཔར་གྱུར། རང་ལས་འོད་འཕྲོས་འགྲོ་ལ་ཕོག །འགྲོ་ཀུན་རྡོ་རྗེ་སེམས་དཔར་གྱུར། །ཨོཾ་བཛྲ་སཏྭ་ས་མ་ཡ༴ ཞེས་ཡིག་བརྒྱ་བཟླས་མཐར། རྡོར་སེམས་འོད་ཞུ་རང་ལ་ཐིམ། །རང་ཉིད་རྡོ་རྗེ་སེམས་དཔར་གྱུར། །རང་ལས་འོད་འཕྲོས་འགྲོ་ལ་ཕོག །འགྲོ་ཀུན་རྡོ་རྗེ་སེམས་དཔར་གྱུར། །ཨོཾ་བཛྲ་སཏྭ་ཧཱུཾ། ཞེས་སྙིང་པོ་ཅི་མང་བཟླས་མཐར། དགེ་བ་འདི་ཡིས་མྱུར་དུ་བདག །རྡོ་རྗེ་སེམས་དཔའ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་རྡོར་སེམས་བསྒོམ་བཟླས་སྡིག་སྒྲིབ་འཁྲུ་བའི་ཆུ་རྒྱུན་འདི་ནི་སློབ་བུ་མང་པོ་ལ་༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ།། ༈ །།མཎྜལ་ཞིང་ཁམས་སྒོ་འབྱེད་བཞུགས། །སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང་། །རི་རབ་གླིང་བཞི་གླིང་ཕྲན་འབྱོར་པས་བརྒྱན། །ས་གཞིའི་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་སྤྲུལ་སྐུའི་ཞིང་ལ་སྤྱོད་པར་ཤོག །འོག་མིན་བདེ་ཆེན་ཚངས་པ་རྔ་སྒྲའི་ཞིང་། །ཀུན་བཟང་མཆོད་སྤྲིན་འདོད་ཡོན་ལྷ་མོས་བརྒྱན། །བར་སྣང་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་ལོངས་སྐུའི་ཞིང་ལ་སྤྱོད་པར་ཤོག །འོད་གསལ་ལྷུན་གྲུབ་རྡོ་རྗེ་སྙིང་པོའི་ཞིང་། །འོད་ལྔ་བརྡལ་པ་སྐུ་དང་ཐིག་ལེས་
བརྒྱན། །ནམ་མཁའི་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་ཆོས་སྐུའི་ཞིང་ལ་སྤྱོད་པར་ཤོག །ཅེས་ཆོས་ལོངས་སྤྲུལ་གསུམ་གྱི་མཎྜལ་ཞིང་ཁམས་སྒོ་འབྱེད་ཅེས་བྱ་བ་འདི་ནི་བཤད་སྒྲུབ་བསྟན་པ་འཛིན་པའི་སློབ་བུ་བསྟན་འཛིན་རས་པས་བསྐུལ་ངོར་༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ།། །།

སྒྱུ་ལུས་འོད་སྐུར་གྲོལ་བའི་བླ་མའི་རྣལ་འབྱོར།

སྒྱུ་ལུས་འོད་སྐུར་གྲོལ་བའི་བླ་མའི་རྣལ་འབྱོར་བཞུགས་སོ། །སྐྱབས་འགྲོ་སེམས་བསྐྱེད་ཚད་མེད་བཞི་སྔོན་དུ་བཏང་ནས། དངོས་གཞི་ནི། རང་གནས་ཁོར་ཡུག་ས་གཞི་འདི་དག་ཀུན། །བདེ་བ་ཅན་གྱི་ཞིང་གི་བཀོད་པ་ལྟར། །ཕུན་ཚོགས་ཡོན་ཏན་དུ་མས་རྣམ་པར་བརྒྱན། །མཛེས་ཤིང་ཡིད་འོང་དག་པའི་ཞིང་དུ་གྱུར། །རང་ལུས་འོད་ཞུ་སྟོང་པ་ཉིད་དུ་གྱུར། །སྟོང་པའི་ངང་ལས་པད་དཀར་ཟླ་སྟེང་དུ། །རང་ཉིད་སྤྱན་རས་གཟིགས་དབང་སྐུ་མདོག་དཀར། །ཞལ་གཅིག་ཕྱག་གཉིས་ཕྱག་གཡས་མཆོག་སྦྱིན་དང་། །གཡོན་པས་པདྨ་དཀར་པོའི་སྡོང་བུ་བསྣམས། །དར་དང་རིན་པོ་ཆེ་ཡི་རྒྱན་གྱིས་མཛེས། །སྣང་སྟོང་གཟུགས་བརྙན་ལྟ་བུའི་ཐུགས་ཀ་རུ། །སྙིང་ཡང་སྦུབས་སྟོང་འོད་ཀྱི་གོང་བུར་གྱུར། །སྙིང་དབུས་འཇའ་འོད་འཁྱིལ་བའི་གུར་ཁང་ནང་། །སྣ་ཚོགས་པདྨ་ཉི་ཟླའི་གདན་སྟེང་དུ།

རྩ་བའི་བླ་མ་རྣམ་པ་འོད་དཔག་མེད། །སྐུ་མདོག་དམར་པོ་འོད་ཟེར་འཕྲོ་བ་བཞུགས། །དེ་ལས་འོད་ཟེར་དཔག་ཏུ་མེད་པ་འཕྲོས། །ལུས་ཀྱི་ཕྱི་ནང་བར་གསུམ་ཐམས་ཅད་ཁྱབ། །ཤ་རུས་གདོས་བཅས་སྣང་བ་ཀུན་དག་ནས། །འཆི་མེད་འཇའ་ལུས་རྡོ་རྗེའི་སྐུ་རུ་གྱུར། །གསོལ་འདེབས་ནི། སྙིང་དབུས་པདྨ་ཉི་ཟླའི་གདན་སྟེང་གི །བླ་མ་འོད་དཔག་མེད་ལ་གསོལ་བ་འདེབས། །ཤ་རུས་གདོས་བཅས་སྣང་བ་ཀུན་དག་ནས། །འཇའ་ལུས་འོད་སྐུ་འགྲུབ་པར་བྱིན་གྱིས་རློབས། །ཞེས་དམིགས་པ་དང་བཅས་ཏེ་གསོལ་འདེབས་ཅི་མང་འདོན། ཡང་རླུང་བུམ་པ་ཅན་དང་སྦྲགས་པར་འདོད་ན། སྔོན་དུ་རླུང་རོ་ལན་གསུམ་བསལ་ནས་རླུང་བུམ་པ་ཅན་བཟུང་། དམིགས་པ་དང་བཅས་གསོལ་འདེབས་ཡིད་ཀྱིས་བྱ། མཐར་བསྡུ་རིམ་ནི། རང་ལུས་འོད་ཞུ་འོད་དཔག་མེད་ལ་ཐིམ། །འོད་དཔག་མེད་མགོན་མཁའ་ལ་འཇའ་ལྟར་ཡལ། །སླར་ཡང་སྟོང་པའི་ངང་ལས་སྐད་ཅིག་གིས། །རང་ལུས་འོད་དཔག་མེད་བཅས་གསལ་བར་གྱུར། །ཅེས་བསྔོ་སྨོན་གང་ཤེས་བྱའོ། །ཞེས་ཕུང་པོ་འཇའ་ལུས་འོད་སྐུར་བསྒྱུར་བའི་འོད་དཔག་མེད་ལ་བརྟེན་པའི་ཐུན་མོང་མ་ཡིན་པའི་བླ་མའི་རྣལ་འབྱོར་འདི་ནི་སྐལ་ལྡན་གྱི་སློབ་མ་ཡོངས་ལ་ཕན་ཕྱིར་༧བྱ་བཏང་ཚོགས་དྲུག་རང་གྲོལ་གྱིས་སྦྱར་བའོ།། །། །།སརྦ་མངྒ་ལཾ།། །།

གར་བཞུགས་ཞིང་ནས་བླ་མ་ཚུར་བྱོན་སོགས་བླ་མའི་རྣལ་འབྱོར།

༄༅། །གར་བཞུགས་ཞིང་ནས་བླ་མ་ཚུར་བྱོན་རང་གི་སྙིང་གའི་པད་ཟླར་བཞུ༷གས། །བཞུ༷གས་དང་དུས་མཉམ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་མ༷། །མ༷་ཡིས་བུ་བཞིན་སྐྱོང་མཛད་ཆོས་སྐྱོང་རྣམས་བྱོན་བླ་མའི་སྐུ་ལ་ཐི༷མ། །ཐི༷མ་རྣམས་ཐམས་ཅད་བླ་མའི་སྐུ་ཡི་དབྱིངས་ན་རང་ལ་དགྱེས་བཞིན་བཞུགས། །མཛེས་སྐུ༷་སྐུ༷་གཞན་ལས་མཆོག་སུས་མཐོ༷ང་མཐོ༷ང་ཚེ་སྔོན་ལ༷ས་ལ༷ས་སྒྲིབ་འདག །གསུངས་གང༷་གང༷་གི་རྣ་བས་ཐོས་ན༷་ན༷ད་གདོན་གནོད་འཚེ༷་འཚེ༷་ལས་གྲོལ། །རབ་གས༷ལ་གས༷ལ་སྟོང་ཐུགས་ཀྱིས་གསུང་ར༷བ་ར༷བ་འབྱམས་ཞིང་ཁ༷མས་ཁ༷མས་གསུམ་མཁྱེན། །བླ་མ༷་མ༷་ལུས་འགྲོ་བའི་སྐྱབས་མགོ༷ན་མགོ༷ན་མེད་གདུངས་དབྱ༷ང༵ས་དབྱ༷ངས་ལ་གསོན། ཁྱོད༷་ནི་བླ་མ་ཁྱོད༷་ནི་ཡི་དམ་ཁྱོད༷་ནི་སངས་རྒྱས་ཆོས་ཀྱང་ཡིན། ཁྱོད༷་ནི་དགེ་འདུན་ཁྱོད༷་ནི་དཔའ་བོ་ཁྱོད༷་ནི་མཁའ་འགྲོ་མ་རྣམས་དང་། ཁྱོད༷་ནི་ཆོས་སྐྱོང་ཁྱོད༷་ནི་སྐྱབས་འདུས་ཁྱོད༷་ནི་རྒྱལ་བ་ཀུན་ལས་ལྷག །ཁྱོད༷་ནི་འགྲོ་མགོན་ཁྱོད༷་ལ་རེ་བས་ཁྱོད༷་ཀྱིས་མཆོག་ཐུན་དངོས་གྲུབ་སྩོལ། ལནགསུམ། དེ༷་ལྟར་གསོལ་བ་

བཏབ་པས་བླ་མའི་སྐུ་ལས་བདུད་རྩི་འོད་ཟེར་འཕྲོས། །དེ༷་ཡི་ལུས་ཀུན་ཁྱབ་ནས་ནད་གདོན་སྡིག་སྒྲིབ་ཕྱི་རུ་སངས་ཀྱིས་དག །དེ༷་ནས་བླ་མའི་ཡོན་ཏན་ལྷ་སྐུ་ཡིག་འབྲུ་ཕྱག་མཚན་རྣམ་པར་བྱུང་། །དེ༷་འདྲའི་ལུས་གང་ཡོན་ཏན་བུམ་པ་གང་བྱོས་ཚུལ་དུ་ཐོབ་པར་གྱུར། །ཨོཾ་ཨཱཿགུ་རུ་རཏྣ་སིདྡྷི་ཧཱུཾ། ཞེས་ཅི་མང་བཟླས་མཐར། སྨོན་ལམ་ནི། བླ༷་མས་ཅི་མཛད་ལེགས་པར་མཐོང་ནས་བླ༷་མར་ལོག་ལྟ་མི་སྐྱེ་ཤོག །བླ༷་མ་མཉེས་པའི་བྱ་བ་བསྒྲུབས་ནས་བླ༷་མ་མི་མཉེས་སྤོང་བར་ཤོག །བླ༷་མ་འབྲལ་བ་མེད་པར་བསྟེན་ནས་བླ༷་མས་རྟག་ཏུ་རྗེས་འཛིན་ཤོག །བླ༷་མའི་བྱིན་རླབས་སེམས་ལ་ཞུགས་ནས་བླ༷་མེད་བྱང་ཆུབ་མྱུར་ཐོབ་ཤོག །ཅེས་པ་འདི་ནི་བླ་མ་སྐྱབས་གནས་ཀུན་འདུས་ཀྱི་ངོ་བོར་བལྟས་ནས་རྒྱུན་དུ་སྙིང་དབུས་བསྒོམས་ནས་གསོལ་བ་བཏབ་ཆོག་པའི་བླ་མའི་རྣལ་འབྱོར་ཞིག་དགོས་ཞེས་སྔ་མོ་ནས་སློབ་བུ་ཀུན་དགའ་རྒྱལ་མཚན་དང་། ཕྱིས་སློབ་བུ་ངག་དབང་ཆོས་འཕེལ་གྱིས་ནན་ཆེར་བསྐུལ་ངོར་༧ཚོགས་དྲུག་རང་གྲོལ་གྱིས་སྨྲས་པའོ།། །།

གསོལ་འདེབས་བྱིན་རླབས་མྱུར་འཇུག་མ་དང་བླ་མའི་རྣལ་འབྱོར་བཅས།

༄༅། །གསོལ་འདེབས་བྱིན་རླབས་མྱུར་འཇུག་མ་དང་བླ་མའི་རྣལ་འབྱོར་བཅས་བཞུགས་སོ།།

བླ་མ་མཁྱེན། བླ་མ་མཁྱེན། བླ་མ་མཁྱེན། མ་རིག་མུན་སེལ་དཔལ་ལྡན་བླ་མ། །ཐར་པའི་ལམ་སྟོན་དཔལ་ལྡན་བླ་མ། །འཁོར་བའི་ཆུ་སྒྲོལ་དཔལ་ལྡན་བླ་མ། །དུག་ལྔའི་ནད་སེལ་དཔལ་ལྡན་བླ་མ། །ཡིད་བཞིན་ནོར་བུ་དཔལ་ལྡན་བླ་མ། །ཁྱོད་ལ་གསོལ་འདེབས་བྱིན་གྱིས་རློབས་ཤིག །མི་རྟག་འཆི་བ་སྙིང་ནས་དྲན་པར། །དཔལ་ལྡན་བླ་མས་བྱིན་གྱིས་རློབས་ཤིག །དགོས་མེད་བློ་སྣ་རྒྱུད་ལ་སྐྱེ་བར། །དཔལ་ལྡན་བླ་མས་བྱིན་གྱིས་རློབས་ཤིག །དབེན་པར་རྩེ་གཅིག་སྒྲུབ་པ་

ནུས་པར། །དཔལ་ལྡན་བླ་མས་བྱིན་གྱིས་རློབས་ཤིག །བསྒྲུབ་ལ་བར་ཆད་གང་ཡང་མེད་པར། དཔལ་ལྡན་བླ་མས་བྱིན་གྱིས་རློབས་ཤིག །འཁྲུལ་མེད་གནས་ལུགས་ལྟ་བ་རྟོག་པར། །དཔལ་ལྡན་བླ་མས་བྱིན་གྱིས་རློབས་ཤིག །རྐྱེན་ངན་ཐམས་ཅད་གྲོགས་སུ་འཆར་བར། །དཔལ་ལྡན་བླ་མས་བྱིན་གྱིས་རློབས་ཤིག །བདག་གཞན་དོན་གཉིས་ལྷུན་གྱིས་འགྲུབ་པར། །དཔལ་ལྡན་བླ་མས་བྱིན་གྱིས་རློབས་ཤིག །ད་ལྟ་ཉིད་དུ་བྱིན་གྱིས་རློབས་ཤིག །མྱུར་བར་མྱུར་དུ་བྱིན་གྱིས་

རློབས་ཤིག །འདུག་ས་འདི་རུ་བྱིན་གྱིས་རློབས་ཤིག །གདན་ཐོག་འདི་རུ་བྱིན་གྱིས་རློབས་ཤིག ༈ འཁོར་བའི་ཕུན་ཚོགས་དུག་སྦྲུལ་ཚང་ལྟ་བུར། །མཐོང་ནས་ཚེ་འདིའི་བྱ་བ་ཐམས་ཅད་ལ། །མངོན་ཞེན་གཏིང་ནས་ལོག་པའི་བྱ་བཏང་བ། །ཚོགས་དྲུག་རང་གྲོལ་ཞབས་ལ་གསོལ་བ་འདེབས། །དལ་འབྱོར་རྙེད་དཀའ་ཐོབ་པ་ད་རེས་ཙམ། །མི་རྟག་འཆི་བ་ནམ་འོང་ཆ་མ་མཆིས། །འཁོར་བ་གང་དུ་སྐྱེས་ཀྱང་སྡུག་བསྔལ་རྒྱུ། །དགེ་སྡིག་གང་བྱས་ལས་འབྲས་བསླུ་བ་མེད། །ཐར་ལམ་ཐོབ་པར་བླ་མས་ཐུགས་རྗེས་གཟིགས། །སྐྱབས་འགྲོ་ནི། སངས་རྒྱས་ཀུན་དངོས་རྩ་བའི་བླ་མ་དང་། །བསླུ་མེད་གཏན་གྱི་སྐྱབས་གནས་དཀོན་མཆོག་གསུམ། །ཡི་དམ་མཁའ་འགྲོ་ཆོས་སྐྱོང་ཚོགས་རྣམས་ལ། །བདག་དང་འགྲོ་ཀུན་གུས་པས་སྐྱབས་སུ་མཆི། །ལན་གསུམ། སེམས་བསྐྱེད་ནི། འགྲོ་ཀུན་དོན་དུ་སངས་རྒྱས་ཐོབ་པར་བྱ། །དེའི་ཕྱིར་དམ་པའི་ལྷ་ཆོས་སྒྲུབ་པར་བགྱི། །རྫོགས་པའི་སངས་རྒྱས་གོ་འཕང་མྱུར་ཐོབ་ནས། །མཐའ་ཡས་འགྲོ་བ་སྒྲོལ་བར་སེམས་བསྐྱེད་དོ། །ལན་གསུམ། འདོད་གསོལ་ནི། རྩ་བརྒྱུད་བླ་མ་ཡི་དམ་ཞི་ཁྲོའི་

ལྷ། །ཕྱོགས་བཅུ་དུས་གསུམ་སངས་རྒྱས་བྱང་སེམས་རྣམས། །གནས་གསུམ་དཔའ་བོ་མཁའ་འགྲོ་ཆོས་སྐྱོང་ལ། སྙིང་ནས་གསོལ་བ་འདེབས་སོ་བྱིན་གྱིས་རློབས། །ལན་གསུམ། རྡོ་རྗེ་སེམས་དཔའི་སྒོམ་བཟླས་ནི། སྤྱི་བོར་པད་དཀར་ཟླ་སྟེང་དུ། །བླ་མ་རྡོ་རྗེ་སེམས་དཔའ་བཞུགས། །སྐུ་ལས་བདུད་རྩིའི་ཆུ་རྒྱུན་བབས། །རང་གི་སྡིག་སྒྲིབ་དག་པར་གྱུར། །ཞེས་པའི་སྔགས་ཕྲེང་ལ་དམིགས་ནས། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྲེ་ནོ་པ། ཏིཥྛ་དྲི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་ཝ། མ་ཧཱ་ས་མ་ཡ་ས་ཏྭ་ཨཱཿ ཞེས་ཡིག་བརྒྱ་གང་མང་བཟླས་མཐར། རྡོར་སེམས་འོད་ཞུ་རང་ལ་ཐིམ། །རང་ཉིད་རྡོ་རྗེ་སེམས་དཔར་གྱུར། །རང་ལས་འོད་འཕྲོས་འགྲོ་ལ་ཕོག །འགྲོ་ཀུན་རྡོ་རྗེ་སེམས་དཔར་གྱུར། །ཨོཾ་བཛྲ་སཏྭ་ཧཱུཾ། གང་མང་བརྗོད། མཎྜལ་ངག་འདོན་ནི་སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང་། །རི་རབ་གླིང་བཞི་གླིང་

ཕྲན་འབྱོར་པས་བརྒྱན། །ས་གཞི་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་སྤྲུལ་སྐུའི་ཞིང་ལ་སྤྱོད་པར་ཤོག །འོག་མིན་བདེ་ཆེན་ཚངས་པ་རྔ་སྒྲའི་ཞིང་། །ཀུན་བཟང་མཆོད་སྤྲིན་འདོད་ཡོན་ལྷ་མོས་བརྒྱན། །བར་སྣང་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་ལོངས་སྐུའི་ཞིང་ལ་སྤྱོད་པར་ཤོག །འོད་གསལ་ལྷུན་གྲུབ་རྡོ་རྗེ་སྙིང་པོའི་ངང་། །འོད་ལྔ་བརྡལ་བ་སྐུ་དང་ཐིག་ལེས་བརྒྱན། །ནམ་མཁའི་ཁྱོན་ཀུན་གང་བའི་ཞིང་ཁམས་འབུལ། །འགྲོ་ཀུན་ཆོས་སྐུའི་ཞིང་ལ་སྤྱོད་པར་ཤོག །ཅེས་འབུལ། བླ་མའི་རྣལ་འབྱོར་ནི། རང་ཉིད་གནས་པའི་ས་ཕྱོགས་དག་པའི་ཞིང་། །གནས་ཁང་རིན་ཆེན་ལས་གྲུབ་གཞལ་ཡས་ཁང་། །རང་ལུས་དྭངས་གསལ་འོད་ཀྱི་ཕུང་པོ་ཡི། །སྤྱི་བོར་འཇའ་གུར་ཉིས་རིམ་ཕུབ་པའི་དབུས། །སེང་ཁྲི་པདྨ་ཉི་ཟླའི་གདན་སྟེང་དུ། །སངས་རྒྱས་ཀུན་དངོས་རྩ་བའི་བླ་མ་ནི། །རང་གཞན་ཀུན་ལ་དགྱེས་པའི་སྤྱན་གྱིས་གཟིགས། །གཟི་བརྗིད་འོད་ཟེར་འཕྲོ་བཞིན་བཞུགས་པར་གྱུར། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པད་ཟླའི་གདན་བཞུགས་ལ། །བཀའ་དྲིན་ཆེན་

པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། ཡན་ལག་བདུན་པ་ནི། བཀའ་དྲིན་འཁོར་མེད་རྩ་བའི་བླ་མ་ལ། །ལུས་བརྒྱར་སྤྲུལ་ནས་ལན་བརྒྱར་གུས་ཕྱག་འཚལ། །ལྷ་རྫས་མཎྜལ་སྐུ་གསུང་ཐུགས་རྟེན་གྱི། །ཐོག་དྲངས་ལུས་དང་ལོངས་སྤྱོད་དགེ་ཚོགས་འབུལ། །སྔར་བྱས་སྡིག་པ་ཁོག་དུ་དུག་སོང་ལྟར། །ནོངས་ཞིང་འགྱོད་པས་སྤྱན་སྔར་མཐོལ་ལོ་བཤགས། །ཤུགས་དྲག་དད་པས་ལག་གཉིས་ཐལ་མོ་སྦྱར། །ཕྱི་ནང་གསང་བའི་མཛད་པར་རྗེས་ཡི་རང་། །གསེར་གྱི་འཁོར་ལོ་རྩིབ་སྟོང་གཡས་འཁྱིལ་དུང་། །ཕུལ་བས་ཆོས་ཀྱི་འཁོར་ལོ་བསྐོར་བར་བསྐུལ། །གཡུང་དྲུང་རྡོ་རྗེས་མཚན་པའི་གདན་འབུལ་བས། །བསྐལ་ཆེན་ཁྲི་ཕྲག་བཞུགས་པར་གསོལ་བ་འདེབས། །དགེ་ཚོགས་བླ་མའི་གཞན་དོན་འགྲུབ་ཕྱིར་དང་། །རང་གཞན་འགྲོ་ཀུན་སངས་རྒྱས་ཐོབ་ཕྱིར་བསྔོ། །དེ་མཐུས་བླ་མའི་སྐུ་ཚེ་མཛད་ཕྲིན་རྒྱས། །རང་གཞན་འགྲོ་ཀུན་སངས་རྒྱས་མྱུར་ཐོབ་ཤོག །བསླུ་མེད་སྐྱབས་གནས་ཐམས་ཅད་འདུས་པའི་སྐུ། །དུས་གསུམ་སངས་རྒྱས་ཀུན་ལས་བཀའ་དྲིན་

ཆེ། །འདི་ཕྱི་གཏན་གྱི་སྐྱབས་མགོན་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྩ་བརྒྱུད་བླ་མའི་ཐུགས་ལ་འཁྲུངས་པ་དང་། །རྒྱལ་བ་སྲས་བཅས་ཐུགས་ལ་མངའ་བ་དང་། །མདོ་རྒྱུད་མན་ངག་རྣམས་ནས་གསུངས་པ་ཀུན། །རྩོལ་མེད་རྒྱུད་ལ་འཆར་བར་བྱིན་གྱིས་རློབས། །ཚེ་འདི་ཉིད་ལ་འཆི་མེད་གོ་འཕང་མཆོག །འཕོ་མེད་འཇའ་ལུས་རྡོ་རྗེའི་སྐུ་བརྙེས་ནས། །སངས་རྒྱས་བསྟན་པ་འཛིན་སྐྱོང་སྤེལ་བ་དང་། །སེམས་ཅན་བདེ་དང་ལྡན་པར་བྱིན་གྱིས་རློབས། །སྐབས་འདིར་རང་རང་གི་བླ་མའི་གསོལ་འདེབས་ཀྱང་བྱའོ། །བསྐལ་པ་དཔག་ཏུ་མེད་པའི་སྔོན་རོལ་ནས། །མྱུར་དུ་མངོན་པར་རྫོགས་པར་སངས་རྒྱས་ཏེ། །རྒྱལ་བའི་བསྟན་དང་འགྲོ་ལ་ཕན་པའི་ཕྱིར། །གང་ལ་གང་འདུལ་སྐུར་བསྟན་འགྲོ་དོན་མཛད། །སངས་རྒྱས་དུས་སུ་འཕགས་པ་སྤྱན་རས་གཟིགས། །རྒྱ་གར་ཡུལ་དུ་འཇམ་དཔལ་བཤེས་གཉེན་མཆོག །བོད་ཡུལ་དབུས་སུ་དྲན་པ་ནམ་མཁར་གྱུར། །བཀའ་བརྒྱུད་བསྟན་ལ་མི་ལ་རས་པ་དངོས། །བཀའ་གདམས་དུས་སུ་རྒྱལ་སྲས་ཐོགས་མེད་དཔལ། །དགའ་ལྡན་བསྟན་ལ་བློ་གྲོས་རྒྱལ་མཚན་

རྗེ། །རིས་མེད་འགྲོ་ངོར་ཐང་སྟོང་རྒྱལ་པོར་སྤྲུལ། །ད་ལྟའི་དུས་འདིར་འགྲོ་མགོན་ཞབས་དཀར་བ། །མ་འོང་མངོན་དགའ་ལ་སོགས་རིགས་ལྔ་ཡི། །ཞིང་དུ་རིགས་ཀྱི་བདག་པོ་དེ་དག་གི །དྲུང་དུ་སྲས་ཀྱི་ཐུ་བོ་རེ་རེར་གྱུར། །འབྲེལ་ཐོགས་གང་འདོད་ཞིང་དུ་འདྲེན་པར་གྱུར། །འདས་དང་མ་འོངས་ད་ལྟ་དུས་གསུམ་དུ། །གང་ལ་གང་འདུལ་སྣ་ཚོགས་སྐུར་བསྟན་ནས། །བསྟན་དང་འགྲོ་དོན་མཛད་པའི་ཐུགས་རྗེ་ཅན། །སྐབས་མགོན་ཡིད་བཞིན་ནོར་བུར་གསོལ་བ་འདེབས། །ཕྱོགས་བཅུའི་ཞིང་ཁམས་བྱེ་བ་ཕྲག་བརྒྱ་རུ། །བསྐལ་པ་རྒྱ་མཚོར་བཙལ་ཀྱང་རྙེད་དཀའ་ཞིང་། །རྙེད་པ་དོན་ཆེན་ཡིད་བཞིན་ནོར་བུ་ལས། །ལྷག་པའི་བླ་མ་མཇལ་བ་བསྐལ་པ་བཟང་། །བདག་ནི་དེང་ནས་ཚེ་རབས་ཐམས་ཅད་དུ། །མགོན་པོ་ཁྱོད་དང་ནམ་ཡང་མི་འབྲལ་ཞིང་། །གསུང་གི་བདུད་རྩིས་བདག་རྒྱུད་སྨིན་གྲོལ་ནས། །རང་གཞན་དོན་གཉིས་ལྷུན་གྱིས་འགྲུབ་པར་ཤོག ༈ །རྒྱ་གར་འཕགས་པའི་ཡུལ་ནས་བོད་ཡུལ་འདིར། །ཡོངས་སུ་གྲགས་པའི་དབུ་རྫོགས་ཕྱག་གསུམ་སོགས། །ཟབ་

རྒྱས་ཆོས་ཀྱི་ཆར་པ་འབེབས་མཁས་པའི། །ཞབས་དཀར་རྡོ་རྗེ་འཆང་ལ་གསོལ་འདེབས། །ཁྱོད་ཐུགས་ཤེལ་དཀར་བུམ་བཟང་ལས་ཐོན་པའི། །ཟབ་ལམ་ལེགས་བཤད་བདུད་རྩིའི་ཆུ་རྒྱུན་གྱིས། །རང་སེམས་ནོར་བུའི་ཉོན་མོངས་དྲི་མ་ཀུན། །བཀྲུས་ནས་དོན་གཉིས་དགོས་འདོད་ཀུན་འབྱུང་ཤོག །ཤེས་བྱའི་ཆོས་རྣམས་མ་ལུས་ས་ལེར་མཁྱེན། །བྱམས་དང་བརྩེ་བས་འགྲོ་ལ་ཟབ་རྒྱས་ཆོས། །སྟོན་པའི་མཚན་ལྡན་རྩ་བའི་བླ་མ་ཡི། །སྐུ་ཚེ་བསྐལ་བརྒྱའི་བར་དུ་བརྟན་པར་ཤོག །ཚོགས་གཉིས་ལས་འཁྲུངས་མཚན་དཔེས་མཛེས་པའི་སྐུ། །ཡན་ལག་དྲུག་ཅུའི་གདངས་ལྡན་སྙན་པའི་གསུང་། །ཉོན་མོངས་རང་གྲོལ་གསལ་སྟོང་འཛིན་མེད་ཐུགས། །བླ་མའི་སྐུ་གསུང་ཐུགས་ལ་གསོལ་བ་འདེབས། །ལུས་ལ་བླ་མའི་སྐུ་ཡིས་བྱིན་གྱིས་རློབས། །ལུས་ཀྱི་སྒྲིབ་དག་བདེ་དྲོད་འབར་བ་དང་། །ལུས་ནི་འཆི་མེད་འཇའ་ལུས་འོད་སྐུར་གྱུར། །ལུས་ཀྱིས་གཞན་ལ་ཕན་ཐོགས་འབྱུང་བར་ཤོག །ངག་ལ་བླ་མའི་གསུང་གིས་བྱིན་གྱིས་རློབས། །ངག་གི་སྒྲིབ་དག་ནུས་པ་འབྱུང་བ་དང་། །ངག་ནི་འགག་མེད་ཚངས་

པའི་དབྱངས་སུ་གྱུར། །ངག་གིས་གཞན་ལ་ཕན་ཐོགས་འབྱུང་བར་ཤོག །སེམས་ལ་བླ་མའི་ཐུགས་ཀྱིས་བྱིན་གྱིས་རློབས། །སེམས་ཀྱི་སྒྲིབ་དག་ཉམས་རྟོགས་འཆར་བ་དང་། །སེམས་ནི་འཁྲུལ་མེད་ཆོས་ཀྱི་སྐུ་རུ་གྱུར། །སེམས་ཀྱིས་གཞན་ལ་ཕན་ཐོགས་འབྱུང་བར་ཤོག །སྐྱབས་གསུམ་ཀུན་འདུས་བླ་མ་རྡོ་རྗེ་འཆང་། །གང་ལ་གང་འདུལ་བཤེས་གཉེན་ཚུལ་བཟུང་ནས། །མཆོག་དང་ཐུན་མོང་དངོས་གྲུབ་སྩོལ་མཛད་པའི། །དྲིན་ཅན་བླ་མ་རྣམས་ལ་གསོལ་བ་འདེབས། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །སྟོན་པ་བླ་ན་མེད་པའི་བསྟན་པ་ལ། །མཇལ་བ་འདི་འདྲ་བླ་མའི་དྲིན་ཡིན་པས། །དགེ་བ་འདི་ཡང་འགྲོ་བ་མ་ལུས་པ། །བཤེས་གཉེན་དམ་པས་འཛིན་པའི་རྒྱུ་རུ་བསྔོ། །བླ་མའི་སྐུ་ལས་འོད་འཕྲོས་རང་ལ་ཕོག །མུན་པའི་གླིང་དུ་ཉི་འོད་ཕོག་པ་བཞིན། །ནད་གདོན་སྡིག་སྒྲིབ་ཕྱི་རུ་སངས་ཀྱིས་དག །རང་ལུས་དྭངས་གསལ་འོད་ཀྱི་ཕུང་པོར་

གྱུར། །ཚེ་དང་བསོད་ནམས་ལུང་རྟོགས་ཡོན་ཏན་རྣམས། །ཡར་ངོའི་ཟླ་ལྟར་འཕེལ་ཞིང་རྒྱས་པར་བྱས། །བླ་མའི་སྐུ་གསུང་ཐུགས་ཀྱི་ཡོན་ཏན་རྣམས། །བུམ་པ་གང་བྱོའི་ཚུལ་དུ་ཐོབ་པར་གྱུར། །ཨོཾ་ཨཱཿཧཱུྃ་གུ་རུ་རཏྣ་སརྦ་སིདྡྷི་ཧཱུྃ། ཨོཾ་ཨཱཿགུ་རུ་བཛྲ་དྷ་ར་ག་ན་ཥ་ཊ་སྭ་མུགྷ་ཏི་སརྦ་སིདྡྷི་ཧཱུྃ་ཧཱུྃ། གང་མང་བཟླས་མཐར་དབང་བཞི་ལེན་པ་ནི། བླ་མའི་སྐུ་ལས་འོད་ཟེར་དཔག་མེད་འཕྲོས། །ཕྱི་སྣོད་དག་ཞིང་ནང་བཅུད་ལྷ་རུ་གྱུར། །གནས་གསུམ་ཨོཾ་དཀར་ཨཱཿདམར་ཧཱུཾ་སྔོན་ལས། །འོད་ཟེར་དུང་དང་བྱི་རུ་བཻཌཱུརྱའི། །མདོག་འདྲ་རིམ་པ་བཞིན་དུ་གཅིག་ཆར་བྱུང་། །རང་གི་གནས་གསུམ་རིམ་དང་གཅིག་ཆར་དུ། །ཐིམ་པས་སྒྲིབ་བཞི་དག་ནས་དབང་བཞི་ཐོབ། །སྐུ་བཞིའི་གོ་འཕང་མངོན་དུ་འགྱུར་བར་མཛོད། །བླ་མ་རང་གི་ཚང་བུག་རྒྱ་མཐོང་ཁ། །ཕྱེ་བ་ལྟ་བུའི་ནང་ནས་མར་ལ་བྱོན། །སྙིང་དབུས་འདབ་སྟོང་གེ་སར་བཞད་པའི་རྩེར། །སྐུ་ལས་གཟི་བརྗིད་འོད་ཟེར་འབར་བཞིན་དུ། །ཡེ་ཤེས་སེམས་དཔའི་ཚུལ་དུ་འབྲལ་མེད་བཞུགས། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པད་ཟླའི་གདན་བཞུགས་ལ། །

བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །དེ་ལྟར་གསོལ་བ་བཏབ་པས་བླ་མ་ཡི། །སྐུ་ལས་འོད་ཟེར་ལུས་གང་ཕྱིར་ཡང་འཕྲོས། །ཤ་རུས་གདོས་བཅས་སྣང་བ་ཀུན་དག་ནས། །འཆི་མེད་འཇའ་ལུས་རྡོ་རྗེའི་སྐུ་རུ་གྱུར། །གནས་སྐབས་འགལ་རྐྱེན་བར་ཆད་ཀུན་ཞི་ཞིང་། །མཐུན་རྐྱེན་བསམ་དོན་ཡིད་བཞིན་འགྲུབ་པ་དང་། །མཐར་ཐུག་ཡང་དག་རྫོགས་པའི་སངས་རྒྱས་ཀྱི། །གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །དེ་མ་ཐོབ་པའི་ཚེ་རབས་ཀུན་ཏུ་ཡང་། །མཚན་ལྡན་དགེ་བའི་བཤེས་ཀྱིས་རྗེས་བཟུང་སྟེ། །སྨིན་གྲོལ་གདམས་པའི་བདུད་རྩིར་ལོངས་སྤྱོད་ནས། །རྒྱལ་བསྟན་དར་ཞིང་སྐྱེ་རྒུ་བདེ་ཕྱིར་བསྔོ། ༈ །ཕྱོགས་བཅུ་ཡི་ཞིང་གི་སངས་རྒྱས་རྣམས། །ཕྱོགས་གང་དུ་འགྲོ་ཡང་ཐུགས་རྗེས་གཟིགས། །ཕྱོགས་ཕྱོགས་ན་གནས་པའི་དཔོན་

སློབ་རྣམས། །ཕྱོགས་གཅིག་ཏུ་འདུ་བར་བྱིན་གྱིས་རློབས། །ཚེ་ལྷ་མཆོག་མགོན་པོ་ཚེ་དཔག་མེད། །ཚེ་བསོད་ནམས་རྒྱས་པའི་དངོས་གྲུབ་སྩོལ། །ཚེ་ཡུན་ཐུང་ནམ་འཆི་ཆ་མེད་ཀྱང་། །ཚེ་རིང་པོར་ཡོང་བའི་སྨོན་ལམ་འདེབས། །དུས་གསུམ་དུ་བསགས་པའི་དགེ་བའི་མཐུས། །དུས་འདི་ནས་བྱང་ཆུབ་མ་ཐོབ་བར། །དུས་ཡང་ཡང་མཇལ་ཞིང་མཐར་ཐུག་ཏུ། །དུས་ནམ་ཡང་འབྲལ་མེད་འགྲོགས་པར་ཤོག །ཅེས་པ་འདི་ནི་རྣལ་འབྱོར་ཞབས་དཀར་བས་ཧོར་གྱི་མཚམས་པ་ཀུན་དགའ་ལ་འབྲོང་ལུང་ནས་གདམས་པའོ། །འདིས་ཀྱང་མཐོང་ཐོས་དྲན་རེག་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །དགེའོ། དགེའོ། དགེའོ།། །།

རྗེ་བཙུན་འཇམ་དབྱངས་དམར་སེར་ལ་བསྟེན་པའི་བླ་མའི་རྣལ་འབྱོར།

༄༅། །རྗེ་བཙུན་འཇམ་དབྱངས་དམར་སེར་ལ་བསྟེན་པའི་བླ་མའི་རྣལ་འབྱོར་བཞུགས་སོ།

ན་མོ་གུ་རུ། འཇམ་དབྱངས་དམར་སེར་ལ་བསྟེན་པའི་བླ་མའི་རྣལ་འབྱོར་བསྒོམ་པར་འདོད་པས། ཐོག་མར་སྐྱབས་འགྲོ་སེམས་སྐྱེད་ཚད་མེད་བཞི་སྒོམ་པ་སྔོན་དུ་བཏང་ནས་དངོས་གཞི་ནི། རང་གནས་ས་ཕྱོགས་འཇམ་དབྱངས་ཞིང་ཁམས་སུ། །གསལ་བའི་མདུན་གྱི་ནམ་མཁར་འཇའ་འོད་ཀློང་། །སེང་ཁྲི་པདྨ་ཉི་ཟླ་བརྩེགས་པའི་སྟེང་། །སྐྱབས་གནས་ཀུན་འདུས་རྩ་བའི་བླ་མ་ནི། །རྣམ་པ་མཁྱེན་རབ་རྗེ་བཙུན་འཇམ་པའི་དབྱངས། །སྐུ་མདོག་དམར་སེར་ཞལ་གཅིག་ཕྱག་གཉིས་པ། །ཕྱག་གཡས་ཤེས་རབ་རལ་གྲི་མཁའ་ལ་

འཕྱར། །ཕྱག་གཡོན་པད་དཀར་ཡུ་བ་ཐུགས་ཀར་འཛིན། །སྙན་གྱི་ཐད་ཀར་འདབ་མ་ཁ་ཕྱེ་བའི། ཟེའུ་འབྲུའི་སྟེང་དུ་ཤེར་ཕྱིན་གླེགས་བམ་བསྣམས། །རིང་འཇམ་གནག་སྣུམ་རལ་པའི་ཐོར་ཅོག་བཅིངས། །ཟུར་ཕུད་ལྔ་ལྡན་རིན་ཆེན་རྩེ་ཕྲན་མཛེས། །རིན་ཆེན་རྒྱན་དང་དར་གྱི་ན་བཟའ་ཅན། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །གཞོན་ནུ་བཅུ་དྲུག་ལོན་པའི་ན་ཚོད་ཅན། །འཛུམ་ཞིང་ཞི་བ་སྒེག་པའི་ཉམས་དང་ལྡན། །གནས་གསུམ་ཡི་གེ་གསུམ་མཚན་ཧཱུཾ་ཡིག་ལས། །འོད་

འཕྲོས་རང་བཞིན་གནས་ནས་འཇམ་དབྱངས་དང་། །སངས་རྒྱས་བྱང་སེམས་འཁོར་བཅས་སྤྱན་དྲངས་ཐིམ། །རྒྱལ་ཀུན་འདུས་པའི་བདག་ཉིད་ཅན་དུ་གྱུར། །མཁྱེན་རབ་བདག་པོ་རྗེ་བཙུན་འཇམ་དབྱངས་ཀྱིས། །རང་གཞན་ཡོངས་ལ་དགྱེས་པའི་སྤྱན་གྱིས་གཟིགས། །བརྩེ་བའི་ཐུགས་གཏད་འཛུམ་པའི་ཞལ་བསྟན་ནས། །རིགས་ཀྱི་བུ་ཁྱོད་བྱང་ཆུབ་མ་ཐོབ་བར། །ཚེ་རབས་ཀུན་ཏུ་མགོན་སྐྱབས་ང་ཡིས་བྱེད། །འཁོར་བ་ངན་སོང་འཇིགས་ལས་ང་ཡིས་སྒྲོལ། །གཏན་བདེ་སངས་རྒྱས་ས་ལ་ང་ཡིས་འགོད། །མཆོག་དང་ཐུན་མོང་དངོས་གྲུབ་ང་ཡིས་སྩོལ། །ཁྱད་པར་ཇི་ལྟ་ཇི་སྙེད་གནས་ལུགས་ཀུན། །ཤེས་པའི་ཤེས་རབ་ཆེ་བ་མྱུར་བ་དང་། །ཤིན་ཏུ་གསལ་བ་ཟབ་པ་ངས་སྩོལ་ཞེས། །སྙན་པའི་གསུང་དབྱངས་ལྷང་ལྷང་ཡོད་པར་གྱུར། །རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །མཆོད་ཚོགས་ཀུན་འབུལ་སྡིག་ལྟུང་ཐམས་ཅད་བཤགས། །དགེ་ལ་ཡི་རང་བསྐལ་ཞིང་གསོལ་བ་འདེབས། །འདིའི་མཚོན་དགེ་བ་བྱང་ཆུབ་ཆེན་པོར་བསྔོ། །ས་གཞི་སྤོས་ཀྱིས༴ མཁྱེན་རབ་ཆེ་ཞིང་མྱུར་གསལ་གཏིང་ཟབ་པའི། །རྗེ་

བཙུན་འཇམ་པའི་དབྱངས་ལ་གསོལ་བ་འདེབས། །ཇི་ལྟ་ཇི་སྙེད་ཆོས་ཀྱི་གནས་ལུགས་ཀུན། །ས་ལེར་ཤེས་པའི་ཤེས་རབ་སྩལ་དུ་གསོལ། །མཁའ་ལྟར་ཆེ་ཞིང་གློག་ལྟར་མྱུར་བ་དང་། །ཉི་ལྟར་གསལ་ཞིང་མཚོ་ལྟར་གཏིང་ཟབ་པའི། །ཤེས་རབ་རྒྱུད་ལ་སྐྱེས་ནས་བདག་གཞན་གྱི། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །དེ་ལྟར་སྙིང་ནས་གསོལ་བ་བཏབ་པའི་མཐུས། །རྗེ་བཙུན་འཇམ་པའི་དབྱངས་ལས་འོད་ཟེར་འཕྲོས། །རང་ལ་ཕོག་པས་མི་ཤེས་མུན་པ་སྦྱངས། །རང་ལུས་དྭངས་གསལ་འོད་ཀྱི་ཕུང་པོར་གྱུར། །རྗེ་བཙུན་འཇམ་པའི་དབྱངས་ཀྱི་ཐུགས་ཀ་ནས། །ཤེས་རབ་རལ་གྲི་སྔོ་ཞིང་དྭངས་པ་ཞིག །བྱུང་བའི་ཡུ་བ་རྗེ་བཙུན་ཐུགས་ཀར་ཟུག །རྩེ་མོ་རང་གི་སྙིང་གར་ཟུག་པ་ལ། །བརྟེན་ནས་མཁྱེན་རབ་བདུད་རྩི་དཀར་སེར་གྱི། །ཆུ་རྒྱུན་འདྲ་བའི་རྣམ་པར་རལ་གྲི་ལ། །འཁྲིལ་ནས་བྱུང་བ་རང་སེམས་དྷཱི་ཡིག་ཏུ། །གསལ་བར་ཐིམ་པས་བློ་གྲོས་རྒྱས་པར་གྱུར། །ཨོཾ་ཨ་ར་པ་ཙ་ན་དྷཱི། ཞེས་པའི་སྔགས་གསོལ་བ་འདེབས་པའི་ཚུལ་དུ་མི་ཚིག་གིས་བར་མ་ཆོད་པ་བྱས་ནས་ཅི་ནུས་བཟླས་པའི་རྗེས་སུ། སླར་ཡང་འཇམ་པའི་དབྱངས་ལས་རང་འདྲ་ཞིག །

ཆད་ནས་རང་ལ་ཐིམ་པས་རང་ཉིད་ཀྱང་། །རྗེ་བཙུན་འཇམ་པའི་དབྱངས་ཀྱི་སྐུ་རུ་གྱུར། །རང་ལས་འོད་ཟེར་དཔག་ཏུ་མེད་པ་འཕྲོས། །ནམ་མཁའི་མཐའ་མཉམ་སྣོད་བཅུད་ཡོངས་ལ་ཕོག །མ་དག་ཉེས་སྐྱོན་མི་ཤེས་མུན་པ་སྦྱངས། །ཕྱི་སྣོད་ཐམས་ཅད་འཇམ་པའི་དབྱངས་ཀྱི་ཞིང་། །ནང་བཅུད་སེམས་ཅན་འཇམ་དབྱངས་སྐུ་རུ་གྱུར། ཨོཾ་ཨ་ར་པ་ཙ་ན་དྷཱི། ཅི་མང་བཟླས་པའི་མཐར། རལ་གྲི་ཚུར་བྱུང་རང་གི་སྙིང་གར་ཐིམ། །རྗེ་བཙུན་འཇམ་དབྱངས་རང་གི་ཚངས་བུག་ནས། །བྱོན་ཏེ་རང་སྙིང་པདྨ་འདབ་བརྒྱད་དུ། །གྱུར་པའི་དབུས་སུ་འབྲལ་མེད་བཞུགས་པར་གྱུར། །འདིའི་མཚོན་དགེ་ཚོགས་རྗེ་བཙུན་འཇམ་དབྱངས་ཀྱིས། །ནམ་ཡང་རྗེས་སུ་འཛིན་པའི་རྒྱུ་རུ་བསྔོ། །དེང་ནས་བཟུང་སྟེ་ཚེ་རབས་ཐམས་ཅད་དུ། །འཇམ་པའི་དབྱངས་དང་འབྲལ་བ་མེད་པར་ཤོག །ཚེ་རབས་ཀུན་ཏུ་རྗེ་བཙུན་འཇམ་དབྱངས་ཀྱིས། །ཐེག་མཆོག་བཤེས་གཉེན་དངོས་སུ་མཛད་པའི་མཐུས། །རྒྱལ་བས་བསྔགས་པའི་ལམ་བཟང་དེ་ཉིད་ལས། །སྐད་ཅིག་ཙམ་ཡང་ལྡོག་པར་མ་གྱུར་ཅིག །ཅེས་པ་འདི་ཡང་སློབ་བུ་ཤེས་རབ་ཆུང་བ་མང་པོ་ཞིག་ལ་ཕན་ཕྱིར། ༧ བྱ་བཏང་ཚོགས་དྲུག་རང་གྲོལ་གྱིས་སྦྱར་བའོ། །སརྦ་མངྒ་ལཾ།། །།

ཨོ་རྒྱན་བླ་མའི་རྣལ་འབྱོར།

༄༅། ཨོ་རྒྱན་བླ་མའི་རྣལ་འབྱོར་བཞུགས་སོ།།

རང་གི་སྨིན་མཚམས་ཐད་ཀྱི་ནམ་མཁའ་རུ། །འཇའ་གུར་འཁྱིལ་བའི་དབུས་སུ་པད་ཟླའི་སྟེང་། རང་གི་དྲིན་ཅན་རྩ་བའི་བླ་མ་དང་། །དབྱེར་མེད་ཨོ་རྒྱན་པདྨ་འབྱུང་གནས་ཉིད། །གཞོན་ནུ་བཅུ་དྲུག་ལོན་པའི་ན་ཚོད་ཅན། །སྐུ་མདོག་དཀར་ལ་དམར་བའི་མདངས་ཆགས་པ། །ཞལ་གཅིག་ཕྱག་གཉིས་ཕྱག་གཡས་སྐྱབས་སྦྱིན་གྱི། །ཕྱག་རྒྱས་གསེར་གྱི་རྡོ་རྗེ་ཐུགས་ཀར་འཛིན། །ཕྱག་གཡོན་མཉམ་བཞག་སྟེང་ན་མཚན་ལྡན་གྱི། །ཐོད་པ་བདུད་རྩིའི་བཅུད་ཀྱིས་བཀང་བ་བསྣམས།

ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །གྲུ་མོ་གཡོན་གྱི་ནང་དུ་ཁ་ཊཾ་བསྟེན། །པདྨ་མཐོང་གྲོལ་དབུ་ལ་མཛེས་པར་གསོལ། །སྐུ་ལ་སྔགས་པའི་ཆ་ལུགས་མཐིང་ནག་གོས། །རབ་བྱུང་ཆ་ལུགས་ཚོས་གོས་དམར་པོ་དང་། །རྒྱལ་པོའི་ཆ་བྱད་ཟབ་བེར་སྨུག་ཁྲ་གསོལ། །འཁོར་དུ་བརྒྱུད་པའི་བླ་མ་ཡི་དམ་ལྷ། །སངས་རྒྱས་བྱང་སེམས་དཔའ་བོ་མཁའ་འགྲོ་དང་། །ཆོས་སྐྱོང་སྲུང་མའི་ཚོགས་ཀྱིས་བསྐོར་ནས་བཞུགས། །དེ་དག་གནས་གསུམ་ཡི་གེ་གསུམ་གྱིས་མཚན། །

ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས། །གར་བཞུགས་ཞིང་ནས་བླ་མ་པད་འབྱུང་སོགས། །མཆོད་འོས་སྐྱབས་གྱུར་མ་ལུས་སྤྱན་དྲངས་ནས། །མདུན་གྱི་ལྷ་དང་གཉིས་སུ་མེད་པར་ཐིམ། །ཐམས་ཅད་དགྱེས་འཛུམ་འོད་ཟེར་འཕྲོ་བཞིན་བཞུགས། །བདག་ལུས་བྱེ་བ་དུང་ཕྱུར་གྲངས་མེད་སྤྲུལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །འཁོར་འདས་གཉིས་ཀྱི་མཆོད་ཚོགས་ཁྱད་པར་དུ། །བདག་གཞན་ལུས་དང་ལོངས་སྤྱོད་དགེ་ཚོགས་འབུལ། །སྔར་བྱས་སྡིག་ལྟུང་རྣམས་ལ་སྙིང་ཁོང་ནས། །གནོང་ཞིང་ཤིན་ཏུ་འགྱོད་པས་མཐོལ་ལོ་བཤགས། །རྒྱལ་བ་རྣམས་ཀྱི་ངོ་མཚར་མཛད་པ་དང་། །བདག་གཞན་དགེ་བ་ཀུན་ལ་རྗེས་ཡི་རང་། །ཟབ་ཅིང་རྒྱ་ཆེའི་ཆོས་ཀྱི་འཁོར་ལོ་ནི། །བདག་གཞན་འགྲོ་ལ་རྒྱུན་དུ་བསྐོར་བར་བསྐུལ། །རྡོ་རྗེའི་སྐུ་ལ་སྐྱེ་འཆི་མི་མངའ་ཡང་། །བདག་ཅག་མོས་ངོར་བསྐལ་བརྒྱར་བཞུགས་གསོལ་འདེབས། །བདག་གཞན་ཀུན་གྱི་རྣམ་དཀར་དགེ་བའི་ཚོགས། །བྱང་ཆུབ་གོ་འཕང་ཐོབ་པའི་རྒྱུ་རུ་བསྔོ། །ཨེ་མ་ཧོ། བདེ་བ་ཅན་གྱི་ཞིང་ན་འོད་དཔག་མེད། །པོ་ཏ་ལ་ཡི་

གནས་ན་སྤྱན་རས་གཟིགས། །ཟངས་མདོག་དཔལ་གྱི་རི་ན་པདྨ་འབྱུང་། །ད་ལྟ་གངས་ཅན་ཡུལ་ན་བླ་མ་རྗེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཁྲེགས་ཆོད་ལྟ་བ་རྟོགས་པར་བྱིན་གྱིས་རློབས། །ཐོད་རྒལ་སྣང་བཞི་འཆར་བར་བྱིན་གྱིས་རློབས། །བདག་གཞན་དོན་གཉིས་འགྲུབ་པར་བྱིན་གྱིས་རློབས། །མགོན་ཁྱོད་སྔོན་དུས་གངས་ཅན་ཁྲོད་འདི་ནས། །ལྷོ་ནུབ་སྲིན་པོའི་ཡུལ་དུ་འབྱོན་པའི་ཉིན། །རྗེ་འབངས་རྣམས་ཀྱིས་སྨྲེ་སྔགས་བཏོན་པའི་ཚེ། །རྒྱལ་དབང་ཁྱེད་ཀྱིས་བསླུ་མེད་རྡོ་རྗེའི་གསུངས། །སྔར་འོང་ཕྱིས་མི་འོང་བའི་གུ་རུ་མིན། །དད་པ་ཅན་གྱིས་གསོལ་བ་ནམ་བཏབ་ན། །མི་རེའི་མདུན་ན་པད་འབྱུང་རེ་རེ་བཞུགས། །ཁྱད་པར་ཡར་ངོའི་ཚེས་བཅུའི་དུས་སྐབས་སུ། །མངོན་སུམ་བྱོན་ནས་རྗེས་སུ་འཛིན་ནོ་ཞེས། །འགྱུར་མེད་ཞལ་གྱིས་བཞེས་པའི་དོན་གྱི་འབྲས། །མངོན་སུམ་སྩོལ་པའི་དགའ་སྟོན་དུས་ལ་བབ། །མདོར་ན་དུས་དང་རྣམ་པ་ཐམས་ཅད་དུ། །སྐྱབས་མགོན་རེ་ས་གཞན་ན་མ་མཆིས་པས། །རྗེས་སུ་བཟུང་ནས་མཆོག་དང་ཐུན་མོང་གི །ཅི་འདོད་དངོས་

གྲུབ་ཐམས་ཅད་བསྩལ་དུ་གསོལ། །དེ་ལྟར་སྙིང་ནས་གསོལ་བ་བཏབ་པའི་མཐུས། །གུ་རུའི་སྤྱི་བོའི་འོད་དཀར་དུང་གི་མདོག །མགྲིན་པའི་འོད་དམར་པདྨ་ར་གའི་མདོག །སྙིང་གའི་འོད་སྔོན་བཻཌཱུརྱའི་མདོག་ཅན། །འཕྲོས་ནས་རང་གི་སྤྱི་མགྲིན་སྙིང་གར་ཞུགས། །ལུས་ཀྱི་ཕྱི་ནང་བར་གསུམ་ཐམས་ཅད་ཀྱི། །ནད་གདོན་སྡིག་སྒྲིབ་ཉེས་ལྟུང་མུན་གླིང་དུ། །ཉི་མ་ཤར་བ་བཞིན་དུ་སངས་ཀྱིས་དག །དེ་ནས་འོད་ཟེར་དཀར་དམར་མཐིང་གསུམ་ནང་། །ལྷ་སྐུ་ཡིག་འབྲུ་ཕྱག་མཚན་མང་པོ་བྱུང་། །རང་གི་སྤྱི་མགྲིན་སྙིང་གར་སིབ་སིབ་ཐིམ། །པད་འབྱུང་སྐུ་གསུང་ཐུགས་ཀྱི་ཡོན་ཏན་ཀུན། །བུམ་པ་གང་བྱོས་ཚུལ་དུ་ཐོབ་པར་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃཿ ཞེས་བརྒྱ་སྟོང་ལ་སོགས་བཏོན་པའི་མཐར། ཚོགས་ཞིང་འོད་ཞུ་པད་འབྱུང་སྐུ་ལ་ཐིམ། །པད་འབྱུང་འོད་དུ་ཞུ་ནས་རང་ལ་ཐིམ། །རང་ཉིད་འོད་ཞུ་མཁའ་ལ་འཇའ་ཡལ་ལྟར། །ཅི་ཡང་མི་དམིགས་སྟོང་པ་ཉིད་དུ་གྱུར། །སླར་ཡང་ཆུ་ལས་ཆུ་བུར་རྡོལ་བ་བཞིན། །སྟོང་པའི་ངང་ལས་རང་ཉིད་སྐད་ཅིག་གིས། །པདྨ་འབྱུང་གནས་སྐུ་རུ་ཚུར་བཞེངས་ནས།

སྐུ་ལས་འོད་ཟེར་དཔག་ཏུ་མེད་པ་འཕྲོས། །སྣོད་བཅུད་ལ་ཕོག་མ་དག་ཉེས་སྐྱོན་སྦྱངས། །སྣོད་བཅུད་གཞལ་ཡས་ཁང་དང་ལྷ་རུ་གྱུར། འདིའི་མཚོན་དགེ་ཚོགས་མཐུ་ཡིས་མྱུར་དུ་བདག །བླ་མ་པདྨ་འབྱུང་གནས་འགྲུབ་གྱུར་ནས། །མར་གྱུར་འགྲོ་བ་གཅིག་ཀྱང་མ་ལུས་པ། །ཐམས་ཅད་དེ་ཡི་ས་ལ་འགོད་པར་ཤོག །ཅེས་པ་འདི་ནི་སློབ་བུ་བློ་བཟང་རིན་ཆེན་གྱིས་བསྐུལ་ངོར་༧བྱ་བཏང་ཚོགས་དྲུག་རང་གྲོལ་གྱིས་སྨྲས་པའོ། །བཀྲ་ཤིས་ཤོག། །།སརྦ་མངྒ་ལཾ༎ ༎

མདུན་གྱི་ནམ་མཁར་འཇའ་འོད་གུར་ཁང་ཀློང་སོགས་སྐུ་གསུམ་བླ་མའི་རྣལ་འབྱོར།

༄༅། །མདུན་གྱི་ནམ་མཁར་འཇའ་འོད་གུར་ཁང་ཀློང་། །སྣ་ཚོགས་པདྨ་ཟླ་བའི་གདན་སྟེང་དུ། །སྤྲུལ་སྐུ་རྒྱལ་བ་ཤཱཀྱ་ཐུབ་པ་བཞུགས། །དེ་ཡི་སྤྱི་བོར་པདྨ་ཉི་ཟླའི་སྟེང་། །ལོངས་སྐུ་རྡོ་རྗེ་འཆང་ཆེན་ཡབ་ཡུམ་དང་། །དེ་ཡི་སྤྱི་བོར་པདྨ་ཉི་ཟླའི་སྟེང་། །ཆོས་སྐུ་ཀུན་ཏུ་བཟང་པོ་ཡབ་ཡུམ་དང་། །ཐུབ་དབང་གཡས་ཕྱོགས་པད་ཟླའི་གདན་སྟེང་དུ། །རྒྱལ་བ་གཉིས་པ་པདྨ་འབྱུང་གནས་དང་། །ཐུབ་དབང་གཡོན་ཕྱོགས་པད་ཟླའི་གདན་སྟེང་དུ། །མཁྱེན་རབ་འཇམ་པའི་དབྱངས་དངོས་བློ་བཟང་གྲགས། །ཐུབ་དབང་མདུན་དུ་པད་ཟླའི་གདན་སྟེང་དུ། །རང་གི་རྩ་བའི་བླ་མ་བཞུགས་པའི་མཐར། །ཕྱོགས་བཅུར་བཞུགས་པའི་བླ་མ་ཡི་དམ་ལྷ། །སངས་རྒྱས་བྱང་སེམས་ཉན་ཐོས་རང་རྒྱལ་དང་། །དཔའ་བོ་མཁའ་འགྲོ་ཆོས་སྐྱོང་སྲུང་མས་བསྐོར། །འཇའ་འོད་ཀློང་ན་ཐམས་ཅད་ཁྲ་ལམ་མེ། །མངོན་སུམ་ལྟ་བུར་བཞུགས་པའི་གནས་གསུམ་དུ། །འབྲུ་གསུམ་གྱིས་མཚན་ཐུགས་ཀའི་ཧཱུྃ་ཡིག་ལས། །འོད་འཕྲོས་ཕྱོགས་བཅུའི་ཞིང་ནས་བསྒོམས་པ་དང་། །འདྲ་བའི་ཡེ་ཤེས་པ་རྣམས་སྤྱན་དྲངས་

ཐིམ། །ཐམས་ཅད་རང་ལ་དགྱེས་པའི་སྤྱན་གྱིས་གཟིགས། །ཆོས་སྒྲ་ལྷང་ལྷང་སྒྲོག་བཞིན་བཞུགས་པར་གྱུར། །ལྷ་ཚོགས་དེ་དག་རེ་རེའི་སྐུ་མདུན་དུ། །བདག་ལུས་གྲངས་མེད་སྤྲུལ་ནས་གུས་ཕྱག་འཚལ། །འཇིག་རྟེན་ཁམས་དང་སངས་རྒྱས་ཞིང་ཁམས་སུ། །མཆོད་པ་ཅི་མཆིས་བློ་ཡིས་བླངས་ནས་འབུལ། །སྔར་བྱས་སྡིག་ལྟུང་རྣམས་ལ་དུག་ཁོང་དུ། །སོང་བ་ལྟ་བུའི་འགྱོད་པས་སྤྱན་སྔར་བཤགས། །ཕྱི་ནང་གསང་བའི་མཛད་པ་ཐམས་ཅད་ལ། །རབ་ཏུ་དགའ་བས་རྗེས་སུ་ཡི་རང་བྱས། །བདག་གཞན་ནམ་མཁའི་མཐའ་མཉམ་སེམས་ཅན་ལ། །ཟབ་དང་རྒྱ་ཆེའི་ཆོས་འཁོར་བསྐོར་བར་བསྐུལ། །ཇི་སྲིད་འཁོར་བ་མ་སྟོངས་དེ་སྲིད་དུ། །མྱ་ངན་མི་འདའ་བཞུགས་པར་གསོལ་བ་འདེབས། །བདག་དང་གཞན་གྱིས་དགེ་བ་ཅི་བསགས་ཀུན། །སངས་རྒྱས་གོ་འཕང་ཐོབ་པའི་རྒྱུ་རུ་བསྔོ། །ཆོས་སྐུ་ཀུན་བཟང་ལོངས་སྐུ་རྡོ་རྗེ་འཆང་། །སྤྲུལ་སྐུ་ཤཀ་ཐུབ་པདྨ་འབྱུང་གནས་དང་། །འཇམ་པའི་དབྱངས་དངོས་བློ་བཟང་གྲགས་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྩ་བརྒྱུད་བླ་མ་ཡི་དམ་ཞི་ཁྲོའི་ལྷ། །སངས་རྒྱས་བྱང་སེམས་ཉན་ཐོས་

རང་རྒྱལ་དང་། །དཔའ་བོ་མཁའ་འགྲོ་ཆོས་སྐྱོང་སྲུང་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བློ་ཁ་ཆོས་ལ་ཕྱོགས་པར་བྱིན་གྱིས་རློབས། །དམ་ཆོས་ལམ་དུ་འགྲོ་བར་བྱིན་གྱིས་རློབས། །ལམ་ལ་བར་ཆད་མེད་པར་བྱིན་གྱིས་རློབས། །ངན་པའི་བློ་སྣ་འགགས་པར་བྱིན་གྱིས་རློབས། །བཟང་པོའི་བློ་སྣ་སྐྱེ་བར་བྱིན་གྱིས་རློབས། །བྱམས་དང་སྙིང་རྗེ་འབྱོངས་པར་བྱིན་གྱིས་རློབས། །བྱང་ཆུབ་སེམས་དང་ལྡན་པར་བྱིན་གྱིས་རློབས། །ཕ་རོལ་ཕྱིན་དྲུག་རྫོགས་པར་བྱིན་གྱིས་རློབས། །བསྐྱེད་རྫོགས་མཐའ་རུ་ཕྱིན་པར་བྱིན་གྱིས་རློབས། །རྫོགས་ཆེན་མངོན་དུ་འགྱུར་བར་བྱིན་གྱིས་རློབས། །ཚེ་གཅིག་འཚང་རྒྱ་ནུས་པར་བྱིན་གྱིས་རློབས། །འགྲོ་དོན་རྒྱ་ཆེན་འབྱུང་བར་བྱིན་གྱིས་རློབས། །དེ་ལྟར་གསོལ་བ་བཏབ་པས་ཚོགས་ཞིང་རྣམས། །སྐུ་ལས་བདུད་རྩི་སྣ་ལྔ་འོད་ཟེར་འཕྲོས། །བདག་ལུས་ལ་ཕོག་སྡིག་སྒྲིབ་ཉེས་ལྟུང་སྦྱངས། །རང་ལུས་ཤེལ་གོང་བཞིན་དུ་དྭངས་ཤིང་གསལ། །ཚོགས་ཞིང་ཐམས་ཅད་འོད་ཀྱི་རྣམ་པར་ཞུ། །དབུས་ཀྱི་གཙོ་བོ་གསུམ་གྱི་ཐུགས་ཀར་ཐིམ། །གཙོ་བོ་ཐུབ་དབང་

འོད་ཞུ་རང་ལ་ཐིམ། །རང་ཉིད་ཐུབ་པའི་དབང་པོའི་སྐུ་རུ་གྱུར། །ཀུན་བཟང་རྡོ་རྗེ་འཆང་གི་སྤྱི་བོར་ཞུགས། །ཐུགས་ཀར་ཏིང་འཛིན་སེམས་དཔའི་ཚུལ་དུ་བཞུགས། །རྡོ་རྗེ་འཆང་ཆེན་ཡབ་ཡུམ་དགྱེས་བཞིན་བྱོན། །རང་ཉིད་ཐུབ་དབང་སྐུར་གསལ་སྤྱི་བོ་ནས། །ཞུགས་ཏེ་སྙིང་གར་པདྨ་ཉི་ཟླ་ཡི། །སྟེང་དུ་ཡེ་ཤེས་སེམས་དཔའི་ཚུལ་དུ་བཞུགས། །རང་གི་སྐུ་ལས་འོད་ཟེར་དཔག་མེད་འཕྲོས། །སྣོད་བཅུད་གཉིས་ལ་ཕོག་པས་མ་དག་པ། །སྦྱངས་ནས་སྣོད་རྣམས་ཐམས་ཅད་དག་པའི་ཞིང་། །བཅུད་ཀྱི་སེམས་ཅན་ལྷ་དང་ལྷ་མོར་གྱུར། །དེ་ནས་ཟས་གོས་ལོངས་སྤྱོད་ཆར་ཕབ་ནས། །འགྲོ་ཀུན་བཀྲེས་སྐོམ་དབུལ་འཕོངས་མ་ལུས་ཞི། །དེ་ནས་དམ་ཆོས་བསྟན་པས་ནམ་མཁའ་དང་། །མཉམ་པའི་སེམས་ཅན་སོ་སོའི་སྐད་དུ་ཐོས། །ཀུན་གྱིས་ཚིག་དོན་གནས་རྟོགས་མི་བརྗེད་པའི། །གཟུངས་དང་གཞན་ལ་སྟོན་ནུས་སྤོབ་པ་ཐོབ། །སེམས་ཅན་ཐམས་ཅད་མྱུར་དུ་སངས་རྒྱས་ཀྱི། །གོ་འཕང་ཐོབ་པའི་སྐལ་བ་ཅན་དུ་གྱུར། །ཅེས་པ་འདི་ནི་སྐལ་ལྡན་སྙིང་གི་སློབ་བུ་སེང་བཟང་རྒྱ་མཚོས་བླ་མའི་རྣལ་འབྱོར་ཞིག་དགོས་ཞེས་བསྐུལ་ངོར་༧ཚོགས་དྲུག་རང་གྲོལ་གྱིས་གནས་ཆེན་ཁྱད་འཕགས་མཚོ་སྙིང་ནས་སྦྱར་བའོ། །བཀྲ་ཤིས།།

རྗེ་བཙུན་མི་ལ་ལ་བསྟེན་པའི་བྱིན་རླབས་མྱུར་འཇུག་བླ་མའི་རྣལ་འབྱོར།

༄༅། །རྗེ་བཙུན་མི་ལ་ལ་བསྟེན་པའི་བྱིན་རླབས་མྱུར་འཇུག་བླ་མའི་རྣལ་འབྱོར་བཞུགས།།

རང་ཉིད་གནས་པའི་ས་ཕྱོགས་ཁོད་སྙོམས་དྲི་མ་དང་བྲལ་རྒྱ་ཆེ་ཞིང་། །ཡིད་དུ་འོང་བའི་དབུས་སུ་རི་བོ་རྩེ་མོ་རབ་དཀར་གངས་ཀྱིས་མཛེས། །ན་བུན་དངུལ་མདོག་རྐེད་ལ་འཁྲིལ་ཞིང་ལྗོན་ཤིང་སྣ་ཚོགས་ཕང་ཕུང་གཡོ། །དྭངས་བསིལ་རྙོག་མེད་འབབ་ཆུ་དུ་མས་སྒྲ་སྐད་སྙན་པ་སྒྲོག་ཅིང་འབབ། །རབ་མཛེས་དྲི་ཞིམ་འབྱུང་བའི་མེ་ཏོག་མཐུ་ཆེ་སྨན་གྱི་ཚོགས་རྣམས་དང་། །རོ་མངར་སིས་ཐོག་ཟ་ཚོད་ལ་སོགས་ཁ་ཟས་མང་པོས་ཁོར་ཡུག་གང་། །ཤ་བ་དགོ་བ་གནའ་བ་ལ་སོགས་རི་དྭགས་

བག་ཕེབས་རྒྱུ་ཞིང་རྩེ། །ཁུ་བྱུག་ལ་སོགས་བྱ་རྣམས་སྙན་པའི་སྒྲ་འབྱིན་བུང་བས་གླུ་དབྱངས་ལེན། །ཤིན་ཏུ་ཉམས་དགའི་གནས་སུ་མ་བྱས་རང་བྱུང་ཡིད་འོང་བྲག་ཁུང་གི །ནང་དུ་ཁྲི་སྙན་ས་ལེའི་པགས་པ་འཇམ་མཉེན་མཛེས་པའི་གདན་སྟེང་དུ། །ངོ་བོ་བཀའ་དྲིན་འཁོར་མེད་རང་གི་རྩ་བའི་བླ་མ་ཡིན་པ་ལ། །རྣམ་པ་མི་ལ་བཞད་པའི་རྡོ་རྗེ་སྐུ་མདོག་སྔོ་བསངས་འཛུམ་ཉམས་ཅན། །ཞལ་གཅིག་ཕྱག་གཉིས་ཕྱག་གཡས་འགྲམ་པར་སྦྱར་ནས་རྡོ་རྗེའི་གླུ་དབྱངས་ལེན། །གཡོན་པས་མཚན་ལྡན་

ཐོད་པ་བདུད་རྩིའི་བཅུད་ཀྱིས་གཏམས་པ་ལྟེ་འོག་བསྣམས། །དབུ་སྐྲ་གནག་ཅིང་སྣུམ་པའི་ལྕང་ལོ་རྒྱབ་དང་དཔུང་པ་གཡས་གཡོན་གཤམས། །སྐུ་ལ་རས་དཀར་ན་བཟའ་སྒོམ་ཐག་གསོལ་ཞིང་ཞབས་གཉིས་ཕྱེད་སྐྱིལ་བཞུགས། །སྲས་མཆོག་ཉི་ཟླ་ལྟ་བུ་མཉམ་མེད་སྒམ་པོ་པ་དང་རས་ཆུང་སོགས། །རས་པའི་ཚོགས་དང་ཚེ་རིང་མཆེད་ལྔ་ལ་སོགས་མཁའ་འགྲོ་མང་པོས་བསྐོར། །ནམ་མཁའི་ལྷ་ཡིས་མེ་ཏོག་བདུད་རྩི་་ལ་སོགས་ཆར་འབེབས་སྒྲ་སྙན་དཀྲོལ། །སྣང་བ་ཐམས་ཅད་ཁ་དོག་མཛེས་པའི་འཇའ་དང་འོད་དུ་ཁྲ་ལམ་མེ། །བླ་མ་དེ་ཉིད་གནས་གསུམ་འབྲུ་གསུམ་གྱིས་མཚན་ཐུགས་ཀའི་ཧཱུཾ་ཡིག་ལས། །འོད་འཕྲོས་ཤར་ཕྱོགས་མངོན་དགའ་ལ་སོགས་གར་བཞུགས་ཞིང་ནས་བསྒོམ་པ་དང་། །འདྲ་བའི་ཡེ་ཤེས་པ་རྣམས་སྤྱན་དྲངས་མདུན་བསྐྱེད་རྣམས་དང་དབྱེར་མེད་ཐིམ། །ཀུན་གྱིས་རང་ལ་དགྱེས་པའི་སྤྱན་གྱིས་གཟིགས་ཤིང་འཛུམ་བཞིན་བཞུགས་པར་གྱུར། ༈ ངོ་མཚར་རྗེ་བཙུན་རིན་པོ་ཆེའི། །ཞབས་ལ་གུས་པས་ཕྱག་འཚལ་ལོ། །རིན་ཆེན་ལས་གྲུབ་སྣོད་ནང་དུ། །རོ་བརྒྱའི་བཅུད་ལྡན་བཟའ་བཏུང་

འབུལ། །རང་བྱུང་མཚན་ལྡན་ཀ་པཱ་ལར། །བདུད་རྩི་བཅུད་ཀྱིས་བཀང་སྟེ་འབུལ། །ལྷ་མི་ཀུན་གྱི་ཡིད་འཕྲོག་པའི། །པདྨ་ཅན་སོགས་ཕྱག་རྒྱ་འབུལ། །སྨན་མཆོག་ཨ་རུ་རྣམ་རྒྱལ་དང་། །གསེར་དངུལ་གོས་དར་ལ་སོགས་འབུལ། །བདག་གིས་བསོད་ནམས་ཚོགས་རྫོགས་པའི། །ཕྱིར་དུ་བརྩེ་བས་བཞེས་སུ་གསོལ། །གང་གིས་འགྲན་པའི་ཟླ་དང་བྲལ། །གངས་ཅན་ཁྲོད་ཀྱི་སེང་གཅིག་པོ། །མི་ལ་རས་པ་ཞེས་བྱ་བའི། །སྐྱེས་མཆོག་ཁྱོད་ཉིད་བདག་ལ་དགོངས། །མགོན་ཁྱོད་གངས་རིའི་ཁྲོད་འདི་ནས། །ཤར་ཕྱོགས་མངོན་པར་དགའ་བའི་ཞིང་། །ཕོ་བྲང་གཙོ་བོ་མི་བསྐྱོད་པའི། །སྲས་ཀྱི་ཐུ་བོར་སྤྱན་དྲངས་དུས། །ཞི་བ་འོད་སོགས་བུ་སློབ་ལ། །དད་གུས་ལྡན་པས་གསོལ་བཏབ་ན། །དེ་ཉིད་མདུན་ན་ང་ཉིད་བཞུགས། །གང་བསམ་འདོད་པའི་དོན་སྩོལ་ཞེས། །འགྱུར་མེད་བདེན་པའི་ཞལ་བཞེས་ལྟར། །སྙིང་ནས་གསོལ་བ་འདེབས་ལགས་པས། །ད་ལྟ་ཉིད་དུ་བདག་ཉིད་ནི། །ཁྱེད་ཀྱི་བརྩེ་བས་རྗེས་སུ་ཟུངས། །སྙན་བརྒྱུད་ཟབ་མོའི་དབང་བཞི་སྐུར། །བགེགས་དང་ལོག་འདྲེན་

བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །མགོན་ཁྱོད་ལྟ་བུར་བྱིན་གྱིས་རློབས། །དེ་ལྟར་མོས་གུས་གདུང་བའི་ཤུགས། །དྲགས་པོས་གསོལ་བ་བཏབ་པའི་མཐུས། །རྗེ་བཙུན་ཆེན་པོའི་ཐུགས་ཀ་ནས། །འོད་ཟེར་ཁ་དོག་ལྔ་ལྡན་པ། །འཇའ་ཚོན་ཤར་བ་ལྟ་བུའི་ནང་། །ལྷ་སྐུ་ཡིག་འབྲུ་ཕྱག་མཚན་ཚོགས། །དཔག་མེད་ཉི་ཟེར་རྡུལ་བཞིན་བྱུང་། །རང་གི་སྤྱི་མགྲིན་སྙིང་ག་སོགས། །ལུས་ཀྱི་ཆ་ཤས་ཐམས་ཅད་ལ། །མཚོ་ལ་ཁ་བ་བབས་པ་བཞིན། །སིབ་སིབ་ཐིམ་པས་ནད་གདོན་དང་། །སྡིག་སྒྲིབ་ཉེས་ལྟུང་མ་ལུས་པ། །སྐད་ཅིག་ཉིད་ལ་སངས་ཀྱིས་དག །སྐུ་གསུང་ཐུགས་ཀྱི་ཡོན་ཏན་རྣམས། །མ་ལུས་རང་གིས་ཐོབ་པར་གྱུར། །ཨོཾ་ཨཱཿགུ་རུ་ཧ་ས་བཛྲ་སིདྡྷི་ཧཱུྃ། ཅེས་པ་ཅི་མང་བཟླས་པའི་མཐར། སླར་ཡང་འོད་འཕྲོས་འཁོར་ལ་ཕོག །འཁོར་རྣམས་རྗེ་བཙུན་ཐུགས་ཀར་ཐིམ། །རྗེ་བཙུན་རང་གི་སྤྱི་བོ་ནས། །ཞུགས་ཏེ་སྙིང་དབུས་བཞུགས་པར་བསམ། །ཞེས་རྗེ་བཙུན་མི་ལ་ལ་བསྟེན་པའི་བྱིན་རླབས་མྱུར་འཇུག་བླ་མའི་རྣལ་འབྱོར་འདི་ནི་བྱ་བཏང་༧ཚོགས་དྲུག་རང་གྲོལ་གྱིས་སྐལ་ལྡན་སློབ་བུ་ངག་དབང་བཀྲ་ཤིས་ལ་སྨྲས་པའོ།། །།

མྱུར་ལམ་བླ་མའི་རྣལ་འབྱོར།

༄༅། །མྱུར་ལམ་བླ་མའི་རྣལ་འབྱོར་བཞུགས་སོ།།

༄༅། །ན་མོ་གུ་རུ། མྱུར་ལམ་བླ་མའི་རྣལ་འབྱོར་བསྒོམ་པ་ལ། སྦྱོར་དངོས་མཇུག་གསུམ་ལས། དང་པོ་སྦྱོར་བ་ནི། གནས་ཁང་བྱི་དོར་བྱ། བླ་མའི་སྐུ་འདྲ་སོགས་སྐུ་གསུང་ཐུགས་རྟེན་བཀྲམ། མཆོད་པ་ཅི་འབྱོར་བཤམས། བདེ་བའི་སྟན་ལ་ལུས་དྲང་པོར་བསྲང་། ཡིད་གཞན་དུ་མི་ཡེངས་པར་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་བཏང་། གཉིས་པ་དངོས་གཞི་ནི། རང་ཉིད་གནས་པའི་ས་ཕྱོགས་དག་པའི་ཞིང་། །གནས་ཁང་རིན་ཆེན་ལས་གྲུབ་གཞལ་ཡས་ཁང་། །རང་ལུས་དྭངས་གསལ་འོད་ཀྱི་ཕུང་པོ་ཡི། །སྤྱི་བོར་འཇའ་གུར་ཉིས་རིམ་ཕུབ་པའི་དབུས། །སེང་ཁྲི་པདྨ་

ཉི་ཟླའི་གདན་སྟེང་དུ། །སངས་རྒྱས་ཀུན་དངོས་རྩ་བའི་བླ་མ་ཡིས། །རང་གཞན་ཀུན་ལ་དགྱེས་པའི་སྤྱན་གྱིས་གཟིགས། །གཟི་བརྗིད་འོད་ཟེར་འཕྲོ་བཞིན་བཞུགས་པར་གྱུར། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པད་ཟླའི་སྟེང་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ། །བཀའ་དྲིན་འཁོར་མེད་རྩ་བའི་བླ་མ་ལ། །ལུས་བརྒྱ་སྤྲུལ་ནས་ལན་བརྒྱར་གུས་ཕྱག་འཚལ། །ལྷ་རྫས་མཎྜལ་སྐུ་

གསུང་ཐུགས་རྟེན་གྱི། །ཐོག་དྲངས་ལུས་དང་ལོངས་སྤྱོད་དགེ་ཚོགས་འབུལ། །སྔར་བྱས་སྡིག་པ་ཁོང་དུ་དུག་སོང་ལྟར། །གནོང་ཞིང་འགྱོད་པས་སྤྱན་སྔར་མཐོལ་ལོ་བཤགས། །ཤུགས་དྲག་དད་པས་ལག་གཉིས་ཐལ་མོ་སྦྱར། །ཕྱི་ནང་གསང་བའི་མཛད་པར་རྗེས་ཡི་རང་། །གསེར་གྱི་འཁོར་ལོ་རྩིབས་སྟོང་གཡས་འཁྱིལ་དུང་། །ཕུལ་ནས་ཆོས་ཀྱི་འཁོར་ལོ་བསྐོར་བར་བསྐུལ། །གཡུང་དྲུང་རྡོ་རྗེས་མཚན་པའི་གདན་ཕུལ་ནས། །བསྐལ་ཆེན་ཁྲི་ཕྲག་བཞུགས་པར་གསོལ་བ་འདེབས། །དགེ་ཚོགས་བླ་མའི་བཞེད་དོན་འགྲུབ་ཕྱིར་དང་། །རང་གཞན་འགྲོ་ཀུན་སངས་རྒྱས་ཐོབ་ཕྱིར་བསྔོ། །དེ་མཐུས་བླ་མའི་སྐུ་ཚེ་མཛད་འཕྲིན་རྒྱས། །རང་གཞན་འགྲོ་ཀུན་སངས་རྒྱས་མྱུར་ཐོབ་ཤོག །བསླུ་མེད་སྐྱབས་གནས་ཐམས་ཅད་འདུས་པའི་སྐུ། །དུས་གསུམ་སངས་རྒྱས་ཀུན་ལས་བཀའ་དྲིན་ཅན། །འདི་ཕྱི་གཏན་གྱི་སྐྱབས་མགོན་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྩ་བརྒྱུད་བླ་མའི་ཐུགས་ལ་འཁྲུངས་པ་དང་། །རྒྱལ་བ་སྲས་བཅས་ཐུགས་ལ་མངའ་བ་དང་། །མདོ་རྒྱུད་མན་ངག་རྣམས་ནས་

གསུངས་པ་ཀུན། །རྩོལ་མེད་རྒྱུད་ལ་འཆར་བར་བྱིན་གྱིས་རློབས། །ཚེ་འདི་ཉིད་ལ་འཆི་མེད་གོ་འཕང་མཆོག །འཕོ་མེད་འཇའ་ལུས་རྡོ་རྗེ་སྐུ་བརྙེས་ནས། །སངས་རྒྱས་བསྟན་པ་འཛིན་སྐྱོང་སྤེལ་བ་དང་། །སེམས་ཅན་བདེ་ལ་འགོད་པར་བྱིན་གྱིས་རློབས། །སྐབས་འདིར་སྤྲོ་ན་རང་གི་བླ་མའི་གསོལ་འདེབས་ཀྱང་བྱ། བླ་མའི་སྐུ་ལས་འོད་འཕྲོས་རང་ལ་ཕོག །མུན་པའི་གླིང་དུ་ཉི་འོད་ཕོག་པ་བཞིན། |ནད་གདོན་སྡིག་སྒྲིབ་ཕྱི་རུ་སངས་ཀྱིས་དག །རང་ལུས་དྭངས་གསལ་འོད་ཀྱི་ཕུང་པོར་གྱུར། །ཚེ་དང་བསོད་ནམས་ལུང་རྟོགས་ཡོན་ཏན་རྣམས། །ཡར་ངོའི་ཟླ་ལྟར་འཕེལ་ཞིང་རྒྱས་པར་བྱས། །བླ་མའི་སྐུ་གསུང་ཐུགས་ཀྱི་ཡོན་ཏན་རྣམས། །བུམ་པ་གང་བྱོས་ཚུལ་དུ་ཐོབ་པར་གྱུར། །ཨཾཨཱཿཧཱུཾ་གུ་རུརཏྣསརྦསིདྡྷི་ཧཱུཾ། ཅི་མང་བཟླས་མཐར། བླ་མའི་སྐུ་ལས་འོད་ཟེར་དཔག་མེད་འཕྲོས། །ཕྱི་སྣོད་དག་ཞིང་ནང་བཅུད་ལྷ་རུ་གྱུར། །གནས་གསུམ་ཨོཾ་དཀར་ཨཱཿདམར་ཧཱུྃ་སྔོན་ལས། །འོད་ཟེར་དུང་དང་བྱེ་རུ་བཻཌཱུརྱའི། །མདོག་འདྲ་རིམ་པ་བཞིན་དང་གཅིག་ཆར་འཕྲོས། །རང་གི་གནས་གསུམ་རིམ་དང་གཅིག

ཆར་དུ། །ཐིམ་པས་སྒྲིབ་བཞི་དག་ཅིང་དབང་བཞི་ཐོབ། །སྐུ་བཞིའི་གོ་འཕང་མངོན་དུ་གྱུར་པར་མཛད། །བླ་མ་རང་གི་ཚངས་བུག་རྒྱ་མཐོངས་ཁ། །ཕྱེས་པ་ལྟ་བུའི་ནང་ནས་མར་ལ་བྱོན། །སྙིང་དབུས་གེ་སར་འདབ་སྟོད་བཞད་པའི་རྩེར། །སྐུ་ལས་གཟི་བརྗིད་འོད་ཟེར་འབར་བཞིན་དུ། །ཡེ་ཤེས་སེམས་དཔའི་ཚུལ་དུ་འབྲལ་མེད་བཞུགས། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པད་ཟླའི་སྟེང་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ། །དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་། །ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །དེ་ལྟར་གསོལ་བ་བཏབ་པས་བླ་མ་ཡི། །སྐུ་ལས་འོད་འཕྲོས་ལུས་གང་ཕྱིར་ཡང་འཕྲོས། །ཤ་རུས་གདོས་བཅས་སྣང་བ་ཀུན་དག་ནས། །འཆི་མེད་འཇའ་ལུས་རྡོ་རྗེའི་སྐུ་རུ་གྱུར། །གནས་སྐབས་འགལ་རྐྱེན་བར་ཆད་ཀུན་ཞི་ཞིང་། །མཐུན་རྐྱེན་བསམ་དོན་མ་ལུས་འགྲུབ་པ་དང་། །མཐར་ཐུག་

ཡང་དག་རྫོགས་པའི་སངས་རྒྱས་ཀྱི། །གོ་འཕང་ཐོབ་པར་བྱིན་གྱིས་རློབས་པར་གྱུར། །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །དེ་ནས་སྐབས་འདིར་སྔར་ཁྲིད་ཐོབ་པའི་གནས་ལུགས་ལྟ་ཐོག་ཏུ་ཡུན་རིང་འཇོག་གོ །གསུམ་པ་མཇུག་ཏུ་ཇི་ལྟར་བྱ་བ་ནི། བསྔོ་སྨོན་བཀྲ་ཤིས་ཚིགས་བཅད་གང་ཤེས་ཀྱིས་མཐའ་བརྒྱན་པར་བྱའོ། །ཞེས་མྱུར་ལམ་བླ་མའི་རྣལ་འབྱོར་ཞེས་བྱ་བ་འདི་ནི། དད་གཏོང་ཤེས་རབ་སྙིང་རྗེ་དང་ལྡན་པའི་སློབ་བུ་འཇིགས་མེད་རྒྱལ་མཚན་སོགས་དད་ཅན་གྱི་སློབ་མ་མང་པོས་བསྐུལ་ངོར། བྱ་བཏང་༧ཚོགས་དྲུག་རང་གྲོལ་གྱིས། དཔའ་བོ་མཁའ་འགྲོ་སྤྲིན་བཞིན་འདུ་བའི་གནས་ཆེན་གངས་རིའི་རྫུ་འཕྲུལ་ཕུག་གི་དབེན་གནས་ཉམས་དགའ་ནས་སྦྱར་བའོ། །སརྦ་མངྒ་ལཾ།། །།

བྱང་སྒྲ་མི་སྙན་གྱི་ཚེ་སྒྲུབ་ཀྱི་བླ་མ་བརྒྱུད་པའི་གསོལ་འདེབས།

༄༅། །བྱང་སྒྲ་མི་སྙན་གྱི་ཚེ་སྒྲུབ་ཀྱི་བླ་མ་བརྒྱུད་པའི་གསོལ་འདེབས་བཞུགས་སོ། །འཆི་མེད་རྡོ་རྗེའི་སྐུ་བརྙེས་ཚེ་དཔག་མེད། །ལོ་སྟོང་ཐུབ་པའི་དགྲ་བཅོམ་བློ་གྲོས་དཔལ། །ལྔ་བརྒྱར་བཞུགས་པའི་མི་ཐུབ་ཟླ་བ་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །ཉིས་བརྒྱར་བཞུགས་པའི་སློབ་དཔོན་དར་མ་གྲགས། །བརྒྱད་ཅུར་བཞུགས་པའི་དཔལ་ཆེན་རྒྱལ་བ་གྲུབ། །སུམ་བརྒྱར་བཞུགས་པའི་ཡེ་ཤེས་རྒྱལ་པོ་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །ཉིས་བརྒྱར་བཞུགས་པའི་སློབ་དཔོན་ཤེས་རབ་གྲགས། །བརྒྱ་ལྷག་བཞུགས་པའི་ཡེ་ཤེས་དངོས་གྲུབ་རྗེ། །དེ་ཡིས་རྗེས་བཟུང་སློབ་དཔོན་ཇོ་གདན་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །བསྟན་པའི་སྲོག་ཤིང་ཇོ་གདན་རྡོ་རྗེ་དཔལ། །འགྲོ་བའི་སྐྱབས་གནས་མངའ་རིས་རིན་ཆེན་མགོན། །དེ་སྲས་བཀའ་བཞི་རིན་ཆེན་བཟང་པོ་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །བྱང་ཆུབ་སེམས་དཔའ་རིན་ཆེན་མགོན་པོ་དང་། །བུ་སྟོན་ཐམས་ཅད་མཁྱེན་པ་རིན་ཆེན་གྲུབ། །ལོ་བརྒྱར་བཞུགས་པའི་རིན་ཆེན་རྣམ་རྒྱལ་ལ། །

གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ། །མཁས་གྲུབ་ཆེན་པོ་དགེ་ལེགས་དཔལ་བཟང་མཆོག །དེ་སྲས་བ་སོ་ཆོས་ཀྱི་རྒྱལ་མཚན་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །གྲུབ་པའི་དབང་ཕྱུག་ཆོས་ཀྱི་རྡོ་རྗེ་དང་། །རྒྱལ་བ་དབེན་ས་བློ་བཟང་དོན་གྲུབ་རྗེ། །མཁས་གྲུབ་གཉིས་འཛོམས་སངས་རྒྱས་ཡེ་ཤེས་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །དགུང་ལོ་བརྒྱར་བཞུགས་ཆོས་ཀྱི་རྒྱལ་མཚན་ཞབས། །ཀུན་གཟིགས་རྒྱལ་དབང་ལྔ་པ་ཆེན་པོ་དང་། །སྐྱབས་མགོན་པཎ་ཆེན་བློ་བཟང་ཡེ་ཤེས་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །རྗེ་བཙུན་ཁྲི་ཆེན་ངག་དབང་མཆོག་ལྡན་དང་། །གངས་རིའི་མགོན་པོ་སྐལ་བཟང་རྒྱ་མཚོའི་ཞབས། །ཐམས་ཅད་མཁྱེན་པ་དཔལ་ལྡན་ཡེ་ཤེས་ལ། །གསོལ་བ་འདེབས་སོ་ཚེ་ཡི་དངོས་གྲུབ་སྩོལ། །བརྒྱད་ཅུར་བཞུགས་པའི་སྐལ་བཟང་ཚུལ་ཁྲིམས་རྗེ། །ཆོས་འདིས་བཀའ་བབས་ཆོས་རྒྱལ་ངག་གི་དབང་། །སྐུ་ཚེ་མཐར་ཕྱིན་ཚོགས་དྲུག་རང་གྲོལ་ལ། །གསོལ་བ་འདེབས་སོ་ཚེ་ཡི་དངོས་གྲུབ་

སྩོལ། །ཚེ་འདི་ཉིད་ལ་འཆི་མེད་གོ་འཕང་མཆོག །འཕོ་མེད་འཇའ་ལུས་རྡོ་རྗེའི་སྐུ་བརྙེས་ནས། །སངས་རྒྱས་བསྟན་པ་འཛིན་སྐྱོང་སྤེལ་བ་དང་། །སེམས་ཅན་བདེ་ལ་འགོད་པར་བྱིན་གྱིས་རློབས། །ཞེས་བྱང་སྒྲ་མི་སྙན་གྱི་ཚེ་སྒྲུབ་ཀྱི་བླ་མ་བརྒྱུད་པའི་གསོལ་འདེབས་འདི་ནི་ཆོས་རྒྱལ་ངག་གི་དབང་པོའི་གསུང་ལྟར། རྗེས་སུ་རྣལ་འབྱོར་ཞབས་དཀར་པས་བྲིས་པའོ། །སརྦམངྒལཾ༎ ༎

བྱང་སྒྲ་མི་སྙན་གྱི་ཚེ་སྒྲུབ་ཀྱི་རྒྱུན་འཁྱེར་འཆི་མེད་ཚེ་ཡི་ཡང་སྙིང་།

༄༅། །བྱང་སྒྲ་མི་སྙན་གྱི་ཚེ་སྒྲུབ་ཀྱི་རྒྱུན་འཁྱེར་འཆི་མེད་ཚེ་ཡི་ཡང་སྙིང་ཞེས་བྱ་བ་བཞུགས་སོ། །

བྱང་སྒྲ་མི་སྙན་གྱི་ཚེ་སྒྲུབ་ཉམས་སུ་ལེན་པར་འདོད་པས་ཐོག་མར་སངས་རྒྱས་ཆོས་ཚོགས་མ་ལན་གསུམ་བྱ། དེ་ནས་དངོས་གཞི་ནི། ཆོས་རྣམས་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་རང་གི་འོག་ཕྱོགས་སུ། །ནམ་མཁས་གར་ཁྱབ་འབྱུང་བཞི་བརྡལ་བའི་སྟེང་། །རྒྱ་ཁྱོན་ཚད་མེད་རི་རབ་ཆེན་པོའི་དབུས། །གནམ་ལྕགས་རྡོ་རྗེ་རྭ་སྟོང་ལྡན་པ་ཡི། །མར་གྱི་རྭ་སྟོང་དབང་ཆེན་ས་གཞིར་ཟུག །ར་བར་རྟ་མགྲིན་སྟོང་གིས་འོག་གདོན་རྣམས། །སྲུང་བའི་ཚུལ་དུ་སྤྱན་གྱིས་ཐུར་ལ་གཟིགས། །ཡར་གྱི་རྭ་སྟོང་

ཚངས་པའི་གནས་སུ་སླེབས། །ར་བར་ཕྱག་རྡོར་སྟོང་གིས་སྟེང་གདོན་རྣམས། །སྲུང་བའི་ཚུལ་གྱིས་སྤྱན་གྱིས་གྱེན་ལ་གཟིགས། །རྡོ་རྗེའི་ལྟོ་བ་རི་རབ་ཁར་གནས་པའི། །ཕྱི་རོལ་མེ་དཔུང་འབར་བའི་ཀློང་དཀྱིལ་ན། །ཕྱག་ན་མཚོན་ཆ་སྣ་ཚོགས་ཐོགས་པ་ཡི། །ཁྲོ་བོ་དམར་ནག་འཇིགས་རུང་གྲངས་མེད་ཀྱིས། །བར་གཅོད་བདུད་རིགས་སྲུང་བའི་ཚུལ་དུ་བཞུགས། །རྡོ་རྗེའི་ལྟོ་བ་ཡངས་ཤིང་རྒྱ་ཆེ་བའི། །ནང་དུ་རིན་ཆེན་ལས་གྲུབ་གཞལ་ཡས་ཁང་། །དེ་དབུས་ལྕགས་ཀྱི་པདྨ་ཟླ་བའི་

སྟེང་། །ཧྲཱིཿལས་བྱུང་བའི་རང་ཉིད་ཚེ་དཔག་མེད། །སྐུ་མདོག་དམར་པོ་བྱུ་རུའི་མདོག་ལྟ་བུ། །ཞལ་གཅིག་ཕྱག་གཉིས་མཉམ་གཞག་ཚེ་བུམ་བསྣམས། །དར་དང་རིན་པོ་ཆེ་ཡི་རྒྱན་གྱིས་མཛེས། །མཚན་བཟང་སུམ་ཅུ་དཔེ་བྱད་བརྒྱད་ཅུས་སྤྲས། །ཟླ་བའི་རྒྱབ་ཡོལ་ཕྲག་གོང་ཉི་ཟླ་འཆར། །འོད་ཟེར་དམར་པོ་འབར་ཞིང་འཁྱིལ་བའི་དབུས། །ཞབས་གཉིས་རྡོ་རྗེ་སྐྱིལ་མོ་ཀྲུང་གིས་བཞུགས། །གནས་གསུམ་ཨོཾ་ཨཱཿཧཱུྃ་གི་ཡི་གེས་མཚན། །ཁོང་པའི་ནང་གི་ཅུང་ཟད་རྒྱབ་ངོས་ལ། །ཉེ་བར་ལྕགས་ཀྱི་སྲོག་རྩ་སྦ་དབྱུག་ཙམ། །ཡར་སྣ་སྤྱི་བོ་མར་སྣ་གསང་གནས་ཟུག །དེ་ཡི་ནང་དུ་དབུ་མ་མདའ་སྨྱུག་ཙམ། །ཁ་དོག་སྔོ་སྐྱ་དམར་བའི་མདངས་དང་ལྡན། །དེ་ནང་འོད་གསལ་རླུང་ནི་དམར་ལྗང་གིས། །འཁྱུག་གེ་གང་བ་དེ་ལ་མེ་ལོང་ངོས། །གཟུགས་བརྙན་ཤར་བཞིན་སྔགས་ཕྲེང་ཚར་བརྒྱད་ཀྱི། །ཕྱོགས་བཞི་མགོ་བོ་གྱེན་བསྟན་མཚམས་བཞི་ཡི། །མགོ་བོ་ཐུར་བསྟན་སྔགས་རྣམས་མགོ་མཇུག་འབྲེལ། །དབུ་མའི་ཡར་རྩེ་མར་རྩེ་མ་ལུས་ཁྱབ། །ཡར་སྣེའི་ནང་དུ་རང་འདྲའི་ཚེ་ལྷ་དཀར། །མར་

སྣེའི་ནང་དུ་རང་འདྲའི་ཚེ་ལྷ་དམར། །སྙིང་གའི་རྩ་འཁོར་ཐད་ཀའི་དབུ་མའི་ནང་། །རང་འདྲའི་ཚེ་ལྷ་དམར་ལ་སྔོ་མདངས་ཆགས། །དེ་ཡི་ཐུགས་ཀར་དཀར་གསལ་ཟླ་བའི་སྟེང་། །འཆི་མེད་ཚེ་ཡི་བདུད་རྩིས་ཡོངས་གང་བའི། །རིན་ཆེན་གསེར་གྱི་བུམ་པ་བཟང་པོའི་ནང་། །ཟླ་བའི་གདན་ལ་རྡོ་རྗེ་རྩེ་ལྔ་པའི། །ལྟེ་བར་འོད་ཀྱི་ག་འུ་ཁ་སྦྱོར་ནང་། །ཧྲཱིཿཡིག་དམར་པོ་ཚིག་དྲག་རིང་ཆ་བཅས། །ཧཱུྃ་ཡིག་སྔོན་པོ་གཉིས་ཀྱིས་ཕན་ཚུན་འཁྲིལ། །འོད་ཟེར་སྣ་ལྔ་འཕྲོ་བ་ཡེ་ཤེས་ལྔའི། བདག་ཉིད་རང་གི་སེམས་ཀྱི་ངོ་བོར་གྱུར། །རང་གི་ཐུགས་ཀའི་ཧྲཱིཿལས་འོད་འཕྲོས་པས། །སྟེང་ཕྱོགས་ཡོན་ཏན་བཀོད་པའི་ཞིང་ཁམས་ནས། །རང་དང་འདྲ་བའི་ཚེ་ལྷ་ཡེ་ཤེས་པ། །སྤྱན་དྲངས་སྤྱི་གཙུག་རྒྱབ་ངོས་བཞུགས་པར་གྱུར། །དངོས་འབྱོར་ཡིད་ཀྱིས་སྤྲུལ་པ་ལས་བྱུང་བའི། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །མགོན་ཁྱོད་སྐུ་གསུང་ཐུགས་ཀྱི་ཡོན་ཏན་ལ། །ལུས་ངག་ཡིད་གསུམ་གུས་པས་ཕྱག་འཚལ་བསྟོད། །མགོན་པོ་ཚེ་དཔག་མེད་ལ་གསོལ་བ་འདེབས། །འཆི་མེད་ཚེ་ཡི་

དངོས་གྲུབ་བསྩལ་དུ་གསོལ། །དེ་ལྟར་གསོལ་བ་བཏབ་པས་ཚེ་དཔག་མེད། །ཐུགས་ཀའི་འོད་འཕྲོས་རང་གི་ཚེ་བསོད་ནམས། །གཞན་གྱིས་ཁྱེར་བ་ཡར་བ་འཐོར་བ་དང་། །ས་ཆུ་མེ་རླུང་ནམ་མཁའི་ཁམས་ཀྱི་བཅུད། །ལྷ་ཀླུ་མི་ཡི་ཚེ་བསོད་བཀྲག་མདངས་དང་། །ཕྱོགས་བཅུའི་རྒྱལ་བའི་བྱིན་རླབས་མ་ལུས་པ། །འཆི་མེད་ཚེ་ཡི་བདུད་རྩིའི་རྣམ་པར་བསྡུས། །ཚེ་དཔག་མེད་མགོན་ཕྱག་གི་བུམ་པར་ཐིམ། །དེ་ལས་བདུད་རྩིའི་རྒྱུན་བབས་རང་ལུས་ཀྱི། །ནད་གདོན་སྡིག་སྒྲིབ་ཕྱི་རུ་སངས་ཀྱིས་དག །སྤྱི་བོའི་གཙུག་ནས་རྐང་མཐིལ་ཡན་ཆད་པོ། །འཆི་མེད་ཚེ་ཡི་བདུད་རྩིས་གང་བར་གྱུར། །ནང་གི་ཧྲཱིཿདང་ཧཱུྃ་ལས་ལྷ་མོ་སྤྲོས། །གཡས་པས་པདྨ་གཡོན་པས་བུམ་པ་བསྣམས། །དར་དང་རིན་ཆེན་རྒྱན་གྱིས་མཛེས་པ་གསུམ། །དབུ་མའི་ཡར་མར་སྙིང་གའི་ལྷ་ལ་ཕུལ། །རང་དང་སྤྱི་བོའི་ཚེ་ལྷའི་གནས་གསུམ་གྱི། །ལྷ་རྣམས་མཉེས་ནས་རང་འདྲའི་ཡུམ་ལ་འཁྱུད། །སྦྱོར་མཚམས་བྱང་སེམས་དཀར་དམར་རྒྱུན་བབས་པས། །རང་ལུས་ནང་གང་དགའ་བཞི་བདེ་དྲོད་འབར། །ལུས་ལ་སྔར་མེད་གཞོན་ཤ་

ཆགས་པ་དང་། །སྟོབས་རྩལ་བཀྲག་མདངས་གཟི་བརྗིད་ཆེས་ཆེར་རྒྱས། །སེམས་ལ་བདེ་སྟོང་རྟོགས་པ་ཁྱད་པར་ཅན། །སྐྱེས་ནས་འཆི་མེད་རིག་འཛིན་འཐོབ་པར་གྱུར། །ལྷ་རྣམས་ཐུགས་སྲོག་སྔགས་ལས་འོད་ཟེར་འཕྲོས། །ཕྱི་སྣོད་འཇིག་རྟེན་བདེ་བ་ཅན་གྱི་ཞིང་། །ནང་བཅུད་སེམས་ཅན་ཚེ་དཔག་མེད་ཀྱི་སྐུར། །གསལ་བའི་སྔགས་སྒྲ་འུར་འུར་གྲག་པར་གྱུར། །ན་མོ་བུདྷཱ་ཡ། ན་མོ་དྷརྨཱ་ཡ། ན་མོ་སངྒཱ་ཡ། ཏདྱ་ཐཱ། ཨོཾ་ཨད་ཏེ། བྷ་ད་ཏེ། བྷི་ད་ཏེ། བྷིན་ན་ཏེ། ཀུན་ན་ཏེ། ཏ་ཀེ །ཐ་ཀེ །ཐ་ར་ཀེ །ཏ་ར་ཀེ །ཧཱུྃ་རུ་མ་ཏི། ཧི་ལི་ཧི་ལི། མི་ལི་མི་ལི། སཾ་བྷཀྵ། བི་བྷཀྵ། བྷ་མུ་ན། ཛི་ཛཱ་བ་ནཱཾ། སི་སནྶ་དྷུ། བྷནྡྷ་སྭཱ་ཧཱ། ཞེས་འཆི་མེད་རང་གཟུངས་ཅི་མང་བཟླས། ཨོཾ་ཨཱཿཧཱུཾ། ཚེ་དཔག་མེད་མགོན་ལྗགས་ཀྱི་འོད་ཟེར་གྱིས། །གཏོར་མའི་བཅུད་རྣམས་དྲངས་ཏེ་གསོལ་བར་གྱུར། །དངོས་འབྱོར་ཡིད་ཀྱིས་སྤྲུལ་པ་ལས་བྱུང་བའི། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །མགོན་ཁྱོད་སྐུ་གསུང་ཐུགས་ཀྱི་ཡོན་ཏན་ལ། །ལུས་ངག་ཡིད་གསུམ་གུས་པས་ཕྱག་

འཚལ་བསྟོད། །ཚེ་དཔག་མེད་མགོན་འོད་ཞུ་རང་ལ་ཐིམ། །རང་ཉིད་མགོན་པོ་ཚེ་དཔག་མེད་པ་བཞིན། །སྐྱེ་འཆི་མི་མངའ་རྡོ་རྗེའི་སྐུ་བརྙེས་ནས། །བསྟན་དང་འགྲོ་དོན་རླབས་ཆེན་བྱེད་པར་ཤོག །གཞན་ཡང་བསྔོ་སྨོན་བཀྲ་ཤིས་གང་ཤེས་བྱའོ།། ༈ །།དེ་ལ་བསྡུ་ན། ཆོས་རྣམས་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་འབྱུང་བཞི་རི་རབ་ཁར། །གནམ་ལྕགས་རྡོ་རྗེའི་ལྟེ་བར་གཞལ་ཡས་ཁང་། །དེ་དབུས་ལྕགས་ཀྱི་པདྨ་ཟླ་བའི་སྟེང་། །རང་ཉིད་ཚེ་དཔག་མེད་མགོན་སྐུར་གསལ་བའི། །ཁོང་པར་ལྕགས་ཀྱི་སྲོག་རྩ་སྦ་དབྱུག་ཙམ། །ཡར་སྣ་སྤྱི་གཙུག་མར་སྣ་གསང་གནས་ཟུག །དེ་ནང་དབུ་མ་སྔོ་སྐྱ་དམར་མདངས་ཅན། །དེ་ཡི་ནང་དུ་སྔགས་ཕྲེང་ཚར་བརྒྱད་དང་། ། དབུ་མའི་ཡར་མར་སྙིང་གར་ཚེ་ལྷ་གསུམ། །སྙིང་གའི་ཚེ་དཔག་མེད་ཀྱི་ཐུགས་ཀ་རུ། །ཚེ་བུམ་ནང་དུ་གསེར་གྱི་རྡོ་རྗེ་ཡི། །ལྟེ་བར་འོད་ཀྱི་གའུ་ཁ་སྦྱོར་ནང་། །ཧྲཱིཿཡིག་དམར་པོ་ཧཱུཾ་ཡིག་སྔོན་པོ་གཉིས། །ཕན་ཚུན་འཁྲིལ་བ་འོད་ཟེར་ལྔ་འཕྲོ་བ། །ཡེ་ཤེས་ལྔ་མཚོན་སེམས་ཀྱི་ངོ་བོར་གྱུར། །རང་གི་ཐུགས་ཀའི་ཧྲཱིཿལས་འོད་འཕྲོས་པས། །

སྟེང་ཕྱོགས་ཡོན་ཏན་བཀོད་པའི་ཞིང་ཁམས་ནས། །རང་དང་འདྲ་བའི་ཚེ་ལྷ་ཡེ་ཤེས་པ། །སྤྱན་དྲངས་སྤྱི་གཙུག་རྒྱབ་ངོས་བཞུགས་པར་གྱུར། །དངོས་འབྱོར་ཡིད་ཀྱིས་སྤྲུལ་པ་ལས་བྱུང་བའི། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །མགོན་ཁྱོད་སྐུ་གསུང་ཐུགས་ཀྱི་ཡོན་ཏན་ལ། །ལུས་ངག་ཡིད་གསུམ་གུས་པས་ཕྱག་འཚལ་བསྟོད། །མགོན་པོ་ཚེ་དཔག་མེད་ལ་གསོལ་བ་འདེབས། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །དེ་ལྟར་གསོལ་བ་བཏབ་པས་ཚེ་དཔག་མེད། །ཐུགས་ཀའི་འོད་འཕྲོས་རང་གི་ཚེ་བསོད་རྣམས། །གཞན་གྱིས་ཁྱེར་བ་ཡར་བ་འཐོར་བ་དང་། །ས་ཆུ་མེ་རླུང་ནམ་མཁའི་ཁམས་ཀྱི་བཅུད། །ལྷ་ཀླུ་མི་ཡི་ཚེ་བསོད་བཀྲག་མདངས་དང་། །ཕྱོགས་བཅུའི་རྒྱལ་བའི་བྱིན་རླབས་མ་ལུས་པ། །འཆི་མེད་ཚེ་ཡི་བདུད་རྩིའི་རྣམ་པར་བསྡུས། །ཚེ་དཔག་མེད་ཀྱི་ཕྱག་གི་བུམ་པར་ཐིམ། །དེ་ལས་བདུད་རྩིའི་རྒྱུན་བབས་རང་ལུས་ཀྱི། །སྤྱི་བོའི་གཙུག་ནས་རྐང་མཐིལ་ཡན་ཆད་གང་། །ཚེ་དང་བསོད་ནམས་ཉམས་པ་སོར་ཆུད་ནས། །འཆི་མེད་ཚེ་ཡི་རིག་འཛིན་

ཐོབ་པར་གྱུར། །ན་མོ་བུད་དྷཱ་ཡ། ན་མོ་དྷརྨཱ་ཡ། ན་མོཿསངྒཱ་ཡ། ཏདྱ་ཐཱ། ཨོཾ་ཨད་ཏེ། བྷ་ད་ཏེ། བྷི་ད་ཏེ། བྷིན་ན་ཏེ། ཀུན་ན་ཏེ། ཏ་ཀེ །ཐ་ཀེ །ཐ་ར་ཀེ །ཏ་ར་ཀེ །ཧུརུ་མ་ཏི། ཧི་ལི་ཧི་ལི། མི་ལི་མི་ལི། སཾ་བྷཀྵ། བི་བྷཀྵ། བྷ་མུ་ན། ཛི་ཛཱ་བ་ནཱཾ། སི་སནྶདྷུ། བྷནྡྷ་སྭཱ་ཧཱ། ཞེས་གཟུངས་སྔགས་ཅི་ནུས་བཟླ། མཇུག་ཏུ། ཚེ་ཡི་ལྷ་མཆོག་མགོན་པོ་ཚེ་དཔག་མེད། །ལོ་སྟོང་བཞུགས་པའི་དགྲ་བཅོམ་བློ་གྲོས་སོགས། །ཚེ་ཁྲིད་བརྒྱུད་པའི་བླ་མའི་བྱིན་རླབས་ཀྱིས། །འཆི་མེད་ཚེ་ཡི་རིག་འཛིན་འཐོབ་པར་ཤོག །ཅེས་བརྗོད། དེ་བས་ཀྱང་བསྡུ་བར་འདོད་ན་རང་གཞན་ཀུན་གྱི་སྤྱི་བོར་བླ་མ་ཚེ་དཔག་མེད་བསྒོམས་ལ། ཧཱུཾ། སྐྱེ་འཆི་རབ་སྤངས་རྡོ་རྗེ་ཚེ། །བདག་ལ་ཚེ་ཡི་དངོས་གྲུབ་བསྩལ་ཏུ་གསོལ། །ཨོཾ་བཛྲ་ཨཱ་ཡུ་ཥེ་ས་ར་ཧ་ཀ་ར་རེ་ཤ་ར་རེ་ཧཱུཾ་ཕཊ། ཅེས་གསོལ་བ་བཏབ་ནས་བདུད་རྩི་འབེབས་སྦྱོང་སོགས་ཀྱི་དམིགས་པ་བྱེད་བཞིན། ན་མོ་བུདྡྷ་ཡ། ན་མོ་དྷརྨཱ་ཡ། ན་མཿོསངྒཱ་ཡ། ཏདྱ་ཐཱ། ཨོཾ་ཨ་ད་ཏེ། བྷ་ད་ཏེ། བྷི་ད་ཏེ། བྷིན་ན་ཏེ། ཀུན་ན་ཏེ། ཏ་ཀེ །ཐ་ཀེ །ཐ་ར་ཀེ །ཏ་ར་ཀེ ཧུ་རུ་མ་ཏི། ཧི་ལི་ཧི་ལི། མི་ལི་མི་ལི། སཾ་བྷཀྵ། བི་བྷཀྵ།

བྷ་མུ་ན། ཛི་ཛཱ་བ་ནཱ། སི་སནྶདྷུ། བྷནྡྷ་སྭཱ་ཧཱ། ཞེས་གཟུངས་སྔགས་བཟླ། མཇུག་ཏུ། རང་གཞན་ཁམས་གསུམ་སེམས་ཅན་ཐམས་ཅད་ཀྱི་ཚེ་མི་གྱུར་བ་གཡུང་དྲུང་ལྟ་བུར་གྱུར་ཅིག །མི་ཤིགས་པ་རྡོ་རྗེ་ལྟ་བུར་གྱུར་ཅིག །མི་ནུབ་པ་རྒྱལ་མཚན་ལྟ་བུར་གྱུར་ཅིག །འཆི་བ་མེད་པའི་ཚེ་ཡི་རིག་འཛིན་འཐོབ་པར་གྱུར་ག །ཅེས་བརྗོད། ཤིན་ཏུ་བསྡུ་ན། རྣམ་པར་མི་རྟོག་པའི་ངང་ནས་ཞག་རེ་ལ་གཟུངས་སྔགས་ཚར་བདུན་རེ་མ་ཆག་པར་བཟླས་ན། དེས་ཀྱང་ལོ་དགུ་བཅུ་མ་བརྒལ་བ་མེད་གསུངས། ཞེས་སྒྲ་མི་སྙན་གྱི་ཚེ་སྒྲུབ་ཀྱི་རྒྱུན་ཁྱེར་འཆི་མེད་ཚེ་ཡི་ཡང་སྙིང་ཞེས་བྱ་བ་འདི་ནི། ལེ་ལོ་ཆེ་ཞིངཚེ་རིང་བ་ལ་དགའ་བའི་ཉེ་གནས་བློ་བཟང་ཤེས་རབ་དང་། སློབ་བུ་སངས་རྒྱས་རིན་ཆེན་གཉིས་ཀྱིས་ཚེ་སྒྲུབ་ཚིགས་བཅད་འདོན་བདེ་བ། དམིགས་རིམ་ཉུང་ལ་འདུས་པ་འདི་ལྟ་བུ་ཞིག་དགོས་ཞེས་བསྐུལ་ངོར། ༧ མི་རྒན་ཞབས་དཀར་བས་དབེན་གནས་ཆུ་བཟང་ནས་སྦྱར་བའོ། །འདིས་ཀྱང་ཀུན་ལ་ཕན་ཐོགས་པར་གྱུར་ཅིག། ༎

བྱང་སྒྲ་མི་སྙན་གྱི་ཚེ་སྒྲབ་མདོར་བསྡུས།

༄༅། །བྱང་སྒྲ་མི་སྙན་གྱི་ཚེ་སྒྲུབ་མདོར་བསྡུས་བཞུགས་སོ། །རང་གཞན་ཀུན་གྱི་སྤྱི་བོར་བླ་མ་ཚེ་དཔག་མེད་བསྒོམས་ལ། ཧཱུཾ། སྐྱེ་འཆི་རབ་སྤངས་རྡོ་རྗེའི་ཚེ། །བདག་ལ་ཚེ་ཡི་དངོས་གྲུབ་སྩལ་དུ་གསོལ། །ཨོཾ་བཛྲ་ཨ་ཡུ་ཥེ་ས་ར་ཧ་ཀ་ར་རེ་ཤ་ར་རི་ཧཱུྃ་ཕཊ། ཞེས་གསོལ་བ་བཏབ་ནས་བདུད་རྩི་འབེབ་སྦྱོང་སོགས་ཀྱི་དམིགས་པ་བྱེད་བཞིན། ན་མོ་བུདྡྷ་ཡ། ན་མོ་དྷརྨཱ་ཡ། ན་མོ་སངྒཱ་ཡ། ཏདྱ་ཐཱ། ཨོཾ་ཨད་ཏེ། བྷད་ཏེ། བྷིད་ཏེ། བྷིན་ན་ཏེ། ཀུན་ན་ཏེ། ཏ་ཀེ །ཐ་ཀེ །ཐ་ར་ཀེ །ཏ་ར་ཀེ །ཧུ་རུ་མ་ཏི། ཧི་ལི་ཧི་ལི། མི་ལི་མི་ལི། སཾ་བྷཀྵ། བྷི་བྷཀྵ། བྷ་མུ་ན། ཛི་ཛཱ་བ་ནཱཾ། སི་སནྶ་དྷུ། བྷནྡྷ་སྭཱ་ཧཱ། ཞེས་བཟླ། མཇུག་ཏུ། རང་གཞན་ཁམས་གསུམ་སེམས་ཅན་ཐམས་ཅད་ཀྱི་ཚེ་མི་འགྱུར་བ་གཡུང་དྲུང་ལྟ་བུར་གྱུར་ཅིག །མི་ཤིགས་པ་རྡོ་རྗེ་ལྟ་བུར་གྱུརཅིག །མི་ནུབ་པ་རྒྱལ་མཚན་ལྟ་བུར་གྱུར་ཅིག །འཆི་བ་མེད་པའི་ཚེ་ཡི་རིག་འཛིན་ཐོབ་པར་གྱུར་ཅིག །ཅེས་བརྗོད། ཤིན་ཏུ་བསྡུ་ན་རྣམ་པར་མི་རྟོག་པའི་ངང་ནས། ཞག་རེ་ལ་གཟུངས་སྔགས་ཚར་བདུན་རེ་མ་ཆག་པར་བཟླས་ན། དེས་ཀྱང་ལོ་དགུ་བཅུ་མ་བརྒལ་པ་མེད་གསུངས། ཞེས་བྱང་སྒྲ་མི་སྙན་གྱི་ཚེ་སྒྲུབ་ཉུང་འདུས་འདི་ནི་མི་རྒན་ཞབས་དཀར་

པས་སྦྱར་བའོ། །འདིས་ཀྱང་ཀུན་ལ་ཕན་ཐོགས་པར་གྱུར་ཅིག །སརྦ་མངྒ་ལཾ།། །།

བཀྲ་ཤིས་འཆི་མེད་དཔལ་སྟེར།

༄༅། །བཀྲཤིས་འཆི་མེད་དཔལ་སྟེར་ཞེས་བྱ་བ་བཞུགས་སོ། །ཨོཾ་སྭ་སྟི། བཀྲ་ཤིས་དང་པོ་སྟོན་པ་སངས་རྒྱས་དང་། །བཀྲ་ཤིས་གཉིས་པ་སྐྱོབ་པ་དམ་པའི་ཆོས། །བཀྲ་ཤིས་གསུམ་པ་འདྲེན་པ་དགེ་འདུན་སྟེ། །སྐྱབས་གནས་དཀོན་མཆོག་གསུམ་གྱི་བཀྲ་ཤིས་ཤོག །བཅོམ་ལྡན་མགོན་པོ་ཚེ་དཔག་མེད་པ་དང་། །སྒྲོལ་མ་དཀར་མོ་གཙུག་ཏོར་རྣམ་རྒྱལ་སོགས། །འགྲོ་ལ་ཚེ་ཡི་དངོས་གྲུབ་མཆོག་སྩོལ་བའི། །ཚེ་ཡི་ལྷ་ཚོགས་རྣམས་ཀྱི་བཀྲ་ཤིས་ཤོག །དགུང་ལོ་སྟོང་ཚོ་གཞེས་པའི་བློ་གྲོས་དཔལ། །དགུ་བརྒྱ་དགུ་བཅུ་གཞེས་པའི་ཞི་བ་འཚོ། །དྲུག་བརྒྱ་གཞེས་པའི་སློབ་དཔོན་ཀླུ་སྒྲུབ་སོགས། །མཁས་པའི་དབང་པོ་རྣམས་ཀྱི་བཀྲ་ཤིས་ཤོག །འཆི་མེད་རྡོ་རྗེའི་སྐུ་བརྙེས་པདྨ་དང་། །དྲུག་བརྒྱ་གཞེས་པའི་དམ་པ་རྒྱ་གར་དང་། །བརྒྱ་དང་ཉེར་ལྔར་བཞུགས་པའི་ཐང་སྟོང་སོགས། །གྲུབ་པའི་དབང་ཕྱུག་རྣམས་ཀྱི་བཀྲ་ཤིས་ཤོག །སུམ་བརྒྱ་བདུན་ཙམ་བཞུགས་པའི་གྲུབ་རྒྱན་མ། །བརྒྱ་ལྷག་བཞུགས་པའི་དགེ་སློང་དཔལ་མོ་དང་། །ལོ་བརྒྱར་བཞུགས་པའི་མ་གཅིག་ལབ་སྒྲོལ་སོགས། །ཡེ་ཤེས་མཁའ་འགྲོ་རྣམས་ཀྱི་བཀྲ་ཤིས་ཤོག །སྟོང་

གསུམ་མི་མཇེད་བདག་པོ་ཚངས་པ་དང་། །ལྷ་རྣམས་ཀུན་གྱི་དབང་པོ་བརྒྱ་བྱིན་གཉིས། །ཚེ་རིང་མཆེད་ལྔ་རྨ་ཆེན་སྤོམ་ར་སོགས། །ཚེ་རིང་ལྷ་ཡི་ཚོགས་ཀྱི་བཀྲ་ཤིས་ཤོག །བླ་མ་མཆེད་ལྕམ་སློབ་མ་ཡོན་བདག་ཀུན། །སྐུ་ཚེ་བསྐལ་པ་བྱེ་བ་བརྒྱ་སྟོང་བར། །བརྟན་ཅིང་རྣམ་དཀར་མཛད་པ་འཕྲིན་ལས་ཀྱང་། །ཕྱོགས་དུས་ཀུན་ཏུ་རྒྱས་པའི་བཀྲ་ཤིས་ཤོག །འཆི་བ་མེད་པའི་ཚེ་ལ་མངའ་བརྙེས་ཤིང་། །རྒུད་པ་མེད་པའི་ལུས་ཀྱི་ལང་འཚོ་རྒྱས། །གཞོམ་གཞིག་བྲལ་བ་རྡོ་རྗེ་ཕ་ལམ་ལྟར། །སྐུ་ཚེ་སྲ་ཞིང་བརྟན་པའི་བཀྲ་ཤིས་ཤོག །ལུས་ནི་སྲེད་མེད་བུ་བཞིན་སྟོབས་ཆེ་ཞིང་། །ཉི་མ་བཞིན་དུ་བཀྲག་མདངས་གཟི་བརྗིད་འབར། །པདྨའི་རྩ་བ་ལྟ་བུར་སྣམ་བག་ལྡན། །རི་བོ་བཞིན་དུ་བརྟན་པའི་བཀྲ་ཤིས་ཤོག །སྐུ་ཚེ་ཉི་ཟླ་མཉམ་པའི་བཀྲ་ཤིས་ཤོག །བསོད་ནམས་རི་བོར་མཉམ་པའི་བཀྲ་ཤིས་ཤོག །འགྲོ་དོན་ནམ་མཁའ་མཉམ་པའི་བཀྲ་ཤིས་ཤོག །སྙན་གྲགས་ཕྱོགས་བཅུར་རྒྱས་པའི་བཀྲ་ཤིས་ཤོག །ཅེས་བཀྲ་ཤིས་འཆི་མེད་དཔལ་སྟེར་ཞེས་བྱ་བ་འདི་ནི་ཚེ་སྒྲུབ་ཀྱི་མཇུག་ཏུ་འཇོག་སྙམས་ནས་རྣལ་འབྱོར་ཞབས་དཀར་པས་སེམས་ལ་ཉིན་གཅིག་ཤར་བ་ལྟར་དབེན་གནས་འབྲོང་ལུང་ནས་སྦྱར་བའོ། །སརྦ་མངྒ་ལཾ༎

སྤྱན་རས་གཟིགས་ཀྱི་བསྒོམ་བཟླས་ཞལ་མཐོང་གསུང་ཐོས་མ།

༄༅། །སྤྱན་རས་གཟིགས་ཀྱི་བསྒོམ་བཟླས་ཞལ་མཐོང་གསུང་ཐོས་མ་བཞུགས་སོ། རང་ཉིད་གནས་པའི་ས་ཕྱོགས་དག་པའི་ཞིང་། །མདུན་གྱི་ནམ་མཁར་རབ་མཛེས་སྤྲིན་དཀར་རྩེར། །འཇའ་འོད་སྣ་ལྔའི་གུར་ཁྱིམ་ཕུབ་པའི་དབུས། །སེང་ཁྲི་པདྨ་ཉི་ཟླའི་གདན་སྟེང་དུ། །ངོ་བོ་བླ་མ་རྣམ་པ་སྤྱན་རས་གཟིགས། །སྐུ་མདོག་དཀར་པོ་ཞལ་གཅིག་ཕྱག་གཉིས་པ། །ཕྱག་གཡས་མཆོག་སྦྱིན་གཡོན་པས་པདྨ་བསྣམས། །དར་དང་རིན་པོ་ཆེ་ཡི་རྒྱན་གྱིས་མཛེས། །འགྲོ་བའི་དོན་དུ་ཞབས་གཉིས་བཞེངས་ནས་བཞུགས། །རིགས་བདག་འོད་དཔག་མེད་ཀྱིས་དབུ་ལ་མཛེས། །བདག་གཞན་ཀུན་ལ་དགྱེས་པའི་སྤྱན་གྱིས་གཟིགས། །ཞལ་ནས་ཆོས་སྒྲ་ལྷང་ལྷང་སྒྲོག་པར་གྱུར། འཕགས་པའི་ཞབས་ལ་ཕྱག་འཚལ་མཆོད་པ་འབུལ། །ལྷང་ལྷང་ཡི་གེ་དྲུག་མས་གསོལ་བ་འདེབས། །སྐུ་ལས་འོད་འཕྲོས་རང་གི་སྡིག་སྒྲིབ་སྦྱངས། །རང་ལུས་དྭངས་གསལ་འོད་ཀྱི་ཕུང་པོར་གྱུར། །ཨོཾ་མ་ཎི་པདྨེ་ཧཱུྃ། ཞེས་གསོལ་འདེབས་ཚུལ་དུ་ཅི་མང་བཟླས་མཐར། འཕགས་པ་སྤྱན་རས་གཟིགས་དབང་ཐུགས་རྗེ་ཡིས། །རང་ཉིད་འཕགས་པ་སྤྱན་

རས་གཟིགས་སུ་གྱུར། །ཐུགས་ཀར་ཟླ་སྟེང་ཐུགས་སྲོག་ཧྲཱིཿཡིག་མཐར། །ཡིག་དྲུག་སྔགས་ཀྱི་ཕྲེང་བས་བསྐོར་བར་གྱུར། །འོད་འཕྲོས་སྣོད་བཅུད་མ་དག་ཉེས་སྐྱོན་སྦྱངས། །ཕྱི་སྣོད་དག་ཞིང་འགྲོ་ཀུན་སྤྱན་རས་གཟིགས། །སྒྲ་རུ་གྲག་ཚད་ཡི་གེ་དྲུག་མའི་སྒྲ། །དྲན་རྟོག་སྟོང་གསལ་འཛིན་མེད་ཐུགས་སུ་གྱུར། །ཨོཾ་མ་ཎི་པདྨེ་ཧཱུྃ། ཅི་མང་བཟླས་མཐར། རང་མདུན་ནམ་མཁའི་འཕགས་པ་སྤྱན་རས་གཟིགས། །རང་གི་སྤྱི་བོའི་ཚངས་བུག་ནས་ཞུགས་ཏེ། །རང་སྙིང་པདྨ་འདབ་བརྒྱད་གྱུར་པའི་དབུས། །རང་རྒྱུད་བྱིན་གྱིས་བརླབ་ཕྱིར་བཞུགས་པར་གྱུར། །ཅེས་བསྔོ་སྨོན་གང་ཤེས་བྱའོ། །ཞེས་པ་འདི་ཡང་དད་བརྩོན་ཤེས་རབ་སྙིང་རྗེ་དང་ལྡན་པའི་སློབ་བུ་སྐལ་བཟང་ཤེས་རབ་ཀྱིས་ཁྱེད་ལ་འཕགས་པའི་ཞལ་གཟིགས་བྱུང་བ་དང་མཐུན་པའི་བསྒོམ་བཟླས་ཤིག་དགོས་ཞེས་བསྐུལ་ངོར་༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ།། །།

སྤྱན་རས་གཟིགས་ཀྱིས་སྒོམ་བཟླས་ཕན་བདེའི་འབྱུང་གནས།

༄༅། །སྤྱན་རས་གཟིགས་ཀྱིས་སྒོམ་བཟླས་ཕན་བདེའི་འབྱུང་གནས་བཞུགས་སོ། །རང་གནས་ས་ཕྱོགས་དག་པའི་ཞིང་། །མདུན་གྱི་ནམ་མཁར་འཇའ་འོད་ཀློང་། །པད་དཀར་ཟླ་བའི་གདན་སྟེང་དུ། །བླ་མ་སྤྱན་རས་གཟིགས་དབང་བཞུགས། །སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་མཐུས། །སྤྱན་རས་གཟིགས་ལས་འོད་ཟེར་འཕྲོས། །རང་གཞན་ནད་གདོན་སྡིག་སྒྲིབ་སྦྱངས། །ཐམས་ཅན་སྤྱན་རས་གཟིགས་སུ་གྱུར། །ༀ་མ་ཎི་པདྨེ་ཧཱུཾ། ཅི་མང་བཟླས་མཐར། དགེ་བ་འདི་ཡིས་མྱུར་དུ་བདག །སྤྱན་རས་གཟིགས་དབང་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །འཕགས་པ་སྤྱན་རས་གཟིགས་དབང་ནི། །ཡིད་བཞིན་ནོར་བུ་རྙེད་པ་ལྟར། །བདག་གཞན་ཡོངས་ཀྱི་དབུལ་བ་སེལ། །དགོས་འདོད་འབྱུང་བའི་བཀྲ་ཤིས་ཤོག །ཅེས་སྤྱན་རས་གཟིགས་ཀྱི་བསྒོམ་བཟླས་ཕན་བདེའི་འབྱུང་གནས་ཅེས་བྱ་བ་འདི་ནི་དད་ཅན་མང་པོའི་བསྐུལ་ངོར་ཞབས་དཀར་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ།།

སྨྱུང་གནས་ཆོ་ག་བདེ་གཤེགས་ལམ་བཟང་།

༄༅། །སྨྱུང་གནས་ཆོ་ག་བདེ་གཤེགས་ལམ་བཟང་ཞེས་བྱ་བ་བཞུགས་སོ།། །།

ན་མོ་ཨརྱ་ལོ་ཀི་ཤྭ་ར་ཡ། སྟོང་གསལ་ཆོས་སྐུའི་ནམ་མཁའ་ཡངས་པ་ནས། །འོད་གསལ་སྤྱན་རས་གཟིགས་དབང་ཉི་མ་ཡིས། །ཚད་མེད་ཐུགས་རྗེའི་འོད་སྣང་རབ་སྤྲོས་ནས། །གྲངས་མེད་འགྲོ་ཀུན་ཕན་བདེའི་དྲོད་ཀྱིས་སྐྱོངས། །དེ་ཡང་སྐྱེ་ཤི་འཁོར་བའི་སྡུག་བསྔལ་ལ་འཇིགས་ནས། ཚེ་འདིའི་བྱ་བ་བློས་བཏང་། འགྲོ་ཀུན་དོན་དུ་སངས་རྒྱས་ཐོབ་འདོད་ཀྱི་བསམ་པས། དབེན་པའི་གནས་སུ་ལྷ་གཅིག་གི་འཚེངས་པ་བོད་ཀྱི་ལྷ་སྐལ་སྤྱན་རས་གཟིགས་ཀྱི་སྒྲུབ་ཐབས་སྨྱུང་གནས་ཆོ་ག་དང་འབྲེལ་བར་ཉམས་སུ་ལེན་པར་འདོད་པས། གནས་ཁང་བྱི་དོར་བྱ། སྐུ་གསུང་ཐུགས་ཀྱི་རྟེན་

བཀྲམ། རས་བྲིས་ཀྱི་དཀྱིལ་འཁོར་རམ་མ་འབྱོར་ན་མཎྜལ་སོགས་སྟེགས་ཀྱི་ཁར་འབྲུའི་ཚོམ་བུ་ལྔ་བཀོད། ལྷའི་དཀྱིལ་འཁོར་དུ་བསམ་མོ་བུམ་པ་མཆོད་གཏོར་སོགས་མཐོང་བརྒྱུད་ཕྱུག་ལེན་ལྟར་བཤམས། ཆོ་ག་དངོས་ལ། ཐོག་མར་སྔ་བར་ལངས་ནས་ཁྲུས་བྱ། ལག་གཉིས་ཐལ་མོ་སྦྱར་བ་པདྨ་ཁ་ཕྱེ་བའི་ཚུལ་དུ་སྙིང་གར་བཞག་པ་པདྨའི་རིགས་ཀྱི་ཕྱག་རྒྱ་བཅིངས་ནས། ཨོཾ་པདྨ་ཨུད་བྷ་ཝ་ཡེ་སྭཱ་ཧཱ། ཞེས་བརྗོད། ཕྱོགས་བཅུའི་སངས་རྒྱས་བྱང་སེམས་ཀྱི་ཞབས་ལ་ཕྱག་བྱས་པར་བསམ་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཀྐ་ཙིཏྟ་བཛྲ་པྲ་ན་མེ་ན་སརྦ་ཏ་ཐཱ་ག་ཏ་བཛྲ་པཱ་ད་བྷན་དྷ་ན་ཀ་རོ་མི། ཞེས་བརྗོད། ལུས་འབུལ་བར་བསམ་ལ།

ཕྱོགས་བཅུའི་སངས་རྒྱས་བྱང་སེམས་ཐམས་ཅད་ལ། །བྱང་ཆུབ་མ་ཐོབ་བར་དུ་བདག་ལུས་འབུལ། །སངས་རྒྱས་བྱང་སེམས་རྣམས་ཀྱིས་ལུས་བཞེས་ནས། །བདག་ལ་དངོས་གྲུབ་བླ་མེད་སྩལ་དུ་གསོལ། །ཞེས་བརྗོད། སྐྱབས་སེམས་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་དང་། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་བརྩེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ཏེ། །རྫོགས་པའི་བྱང་ཆུབ་སེམས་བསྐྱེད་དོ། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་སྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །

བདག་གིས་རྫོགས་པའི་བྱང་ཆུབ་ཕྱིར། །དེང་ནས་བྱང་ཆུབ་སེམས་བསྐྱེད་དོ། །ལན་གསུམ། གསོ་སྦྱོང་ཐོག་མར་བླ་མའི་དྲུང་དུ་ལེན་པ་ནི། བླ་མ་ལ་ཕྱག་གསུམ་བཙལ་མདུན་དུ་གུས་པས་འདུག །མཎྜལ་ཕུལ་རྗེས་བླ་མའི་རྗེས་སུ་ཟླ་བའི་སྒོ་ནས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རྟ་ཅང་ཤེས་ལྟ་བུ། །གླང་པོ་ཆེན་པོ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་

དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར། གསོ་སྦྱོང་ཡང་དག་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་སྟེ་ཇི་སྲིད་སང་ཉི་མ་མ་ཤར་གྱི་བར་དུ། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར། གསོ་སྦྱོང་ཡང་དག་པར་བླང་བར་བགྱིའོ། །ལན་གསུམ་གྱི་རྗེས་སུ་བླ་མས་ཐབས་ཡིནནོ། །ཞེས་གསུངས་པ་ལ། ལེགས་སོ། ཞེས་བརྗོད། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཅིང་། །རྫུན་གྱི་ཚིག་ཀྱང་མི་སྨྲ་འོ། །སྐྱོན་ནི་མང་པོ་ཉེར་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་རྒྱན་དང་ནི། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི།

སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤོང་། །བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་མང་འཁྲུག་སེམས་ཅན་རྣམས། །སྲིད་པའི་མཚོ་ལས་སྒྲོལ་པར་ཤོག །ཅེས་རྗེས་ཟློས་བྱ། ཨོཾ་ཨ་མོ་གྷ་ཤཱི་ལ། སཾ་བྷ་ར་སཾ་བྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ། པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ་ཨ་ཝ་ལོ་ཀི་ཏེ་ཧཱུྃ་ཕཊ་སྭཱ་ཧཱ། ཞེས་ཚུལ་ཁྲིམས་རྣམ་དག་གི་གཟུངས་ལན་གསུམ་བླ་མས་རྗེས་ཟློས་ཀྱིས་སྣ་དྲངས་ཏེ་ཉེར་གཅིག་བཟླས་རྗེས། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །ཚུལ་ཁྲིམས་རྣམ་པར་དག་དང་ལྡན། །རློམ་སེམས་མེད་པའི་ཚུལ་ཁྲིམས་ཀྱིས། །ཚུལ་ཁྲིམས་ཕ་རོལ་ཕྱིན་རྫོགས་ཤོག །ཚུལ་ཁྲིམས་བསླབ་པ་རིན་པོ་ཆེ། །མ་སྐྱེས་པ་རྣམས་སྐྱེས་གྱུར་ཅིག །སྐྱེས་པ་ཉམས་པ་མེད་པ་དང་། །གོང་ནས་གོང་དུ་འཕེལ་བར་ཤོག །ཅེས་བསྔོ་སྨོན་གྱིས་མཐའ་བརྒྱན་པར་བྱས་ལ། དེ་ནས་རྟེན་གྱི་དྲུང་ནས་ལེན་ཚུལ་ནི། སློབ་དཔོན་དགོངས་སུ་གསོལ་དང་ཐབས་ལེགས་འཇོག་པ་མ་གཏོགས་གཞན་རྣམས་སྔར་བཞིན་བྱ། ཐུབ་བའི་དབང་པོ་རྗེ་བཙུན་སྤྱན་རས་གཟིགས། །དཔལ་ལྡན་དཔལ་མོ་ཟླ་བ་གཞོན་ནུའི་ཞབས། །མཁས་གྲུབ་ཡེ་

ཤེས་བཟང་དང་པེ་ཉ་བ། །ཟླ་བ་རྒྱལ་མཚན་རྣམས་ལ་གསོལ་བ་འདེབས། །གྲུབ་ཐོབ་ཉི་ཕུག་པ་དང་རྡོ་རྗེ་རྒྱལ། །མཁས་བཙུན་དགྲ་འཇིགས་ཞབས་དང་རྩེ་འདུལ་བ། བྱང་སེམས་བདེ་ཅན་པ་དང་ཆུ་བཟང་པ། །རིན་ཆེན་ཤེར་འབུམ་རྣམས་ལ་གསོལ་བ་འདེབས། །རྒྱལ་བའི་སྲས་པོ་ཐོགས་མེད་བཟང་པོ་དཔལ། །ཀུན་མཁྱེན་ཤེས་རབ་དཔལ་དང་ཚུལ་ཁྲིམས་མཚན། །ཡོན་ཏན་རིན་ཆེན་སངས་རྒྱས་རྒྱ་མཚོའི་ཞབས། །སྐྱབས་མཆོག་དཔལ་མངའ་རྣམས་ལ་གསོལ་བ་འདེབས། །གངས་ཅན་གྲུབ་མཆོག་རྒྱལ་བ་དབེན་ས་བ། །བུདྡྷ་ཛྙཱ་ན་བློ་བཟང་ཆོས་ཀྱི་རྒྱན། །དཀོན་མཆོག་རྒྱལ་མཚན་དམ་ཚིག་རྡོ་རྗེ་སྟེ། །མཁས་གྲུབ་དམ་པ་རྣམས་ལ་གསོལ་བ་འདེབས། །རྗེ་བཙུན་བླ་མ་བློ་བཟང་ཡེ་ཤེས་ཞབས། །སྤྲུལ་སྐུ་ལྷ་པ་རིག་གྲོལ་འདུས་པའི་གཙོ། །ཡེ་ཤེས་དཔལ་མངའ་མཁས་དང་གྲུབ་པའི་རྗེ། །དྲིན་ཅན་བླ་མ་རྣམས་ལ་གསོལ་བ་འདེབས། །བློ་བཟང་རྣམ་འདྲེན་རྒྱལ་བ་ཀུན་གྱི་དངོས། །ངག་གི་དབང་ཕྱུག་བྱམས་དང་སྙིང་རྗེའི་གཏེར། །རྗེ་བཙུན་བློ་བཟང་དཔལ་ལྡན་ཡེ་ཤེས་ལ། །སྙིང་གི་ཁོང་ནས་གུས་པས་

གསོལ་བ་འདེབས། །བསྟན་པའི་གསལ་བྱེད་ཡེ་ཤེས་རྒྱལ་མཚན་དཔལ། །ལུང་རྟོགས་མངའ་བདག་ཡེ་ཤེས་ཆོས་བཟང་དང་། །བཀའ་དྲིན་མཉམ་མེད་བྱམས་པ་ཆོས་དར་ཞབས། །སྒོ་གསུམ་གུས་པ་ཆེན་པོས་གསོལ་བ་འདེབས། །ཁྱབ་བདག་འཁོར་ལོའི་མགོན་པོ་ཐུགས་རྗེ་ཅན། །ཉིད་སྐུའི་ཆ་ཤས་ལྷ་ལམ་ཡོངས་གང་བའི། །རབ་འབྱམས་དཀྱིལ་འཁོར་འཁོར་ལོའི་ལྷ་ཚོགས་ཀྱི། །རྟེན་དང་བརྟེན་པར་ཤར་ལ་གསོལ་བ་འདེབས། །དེ་ལྟར་བསྟོད་པས་བྱང་ཆུབ་སྙིང་པོའི་བར། །དངོས་དང་བརྒྱུད་པའི་བླ་མ་མཆོག་རྣམས་ཀྱི། །དྲི་མེད་རྣམ་ཐར་ཇི་བཞིན་འཛིན་པ་ལ། །རྟག་ཏུ་ངུ་དང་ནོར་བཟང་ལྟ་བུར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །མཆོད་པ་བྱིན་རླབས་ནི། རང་ཉིད་སྤྱན་རས་གཟིགས་སུ་གསལ་བར་གྱུར། །ཨོཾ་པདྨནྟ་ཀྲི་ཏ་ཧཱུྃ་ཕཊ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭཱ་བྷཱ་ཝ་ཤུདྡྷོ྅་ཧཾ། མཆོད་རྫས་མི་དམིགས་སྟོང་པ་ཉིད་དུ་གྱུར། །སྟོང་

པའི་ངང་ལས་བྷྲཱུཾ་ལས་རིན་པོ་ཆེའི། །སྣོད་རྣམས་ནང་དུ་ཨོཾ་ཡིག་ཞུ་བ་ལས། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོ་རྣམས། །རང་བཞིན་སྟོང་པ་རྣམ་པ་མཆོད་པའི་རྫས། །བྱེད་ལས་ཟག་མེད་བདེ་སྟོང་མཆོད་སྤྲིན་གྱིས། །ས་དང་བར་སྣང་ནམ་མཁའི་ཁྱོན་གང་གྱུར། །ཨོཾ་ཨརྒྷཾ་ཨཱཿཧཱུྃ། ༀ་པཱ་ཏྱཾ་ཨཱཿཧཱུྃ། ཨོཾ་པུཥྤེ་ཨཱཿཧཱུཾ། ཨོཾ་དྷཱུ་པེ་ཨཱཿཧཱུྃ། ཨོཾ་ཨཱ་ལོ་ཀེ་ཨཱཿཧཱུཾ། ཨོཾ་གནྡྷེ་ཨཱཿཧཱུཾ། ཨོཾ་ནཻ་ཝིདྱ་ཨཱཿཧཱུཾ། ༀཤ་བྡ་ཨཱཿཧཱུྃ། ཞེས་པས་བརླབས་ཏེ། ཚོགས་ཞིང་སྨྱན་འདྲེན་ནི། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་ཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཐུགས་རྗེའི་བདག་ཉིད་རྩ་བརྒྱུད་བླ་མ་དང་། །ཡི་དམ་ལྷ་དང་སྐྱབས་གནས་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །སྤྱན་འདྲེན་མཆོད་པའི་གནས་འདིར་གཤེགས་སུ་གསོལ། །བཞུགས་གསོལནི། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་

ནི། །ཇི་སྲིད་མཆོད་པ་བདག་འབུལ་ན། །དེ་སྲིད་བཅོམ་ལྡན་བཞུགས་སུ་གསོལ། །ཞེས་བརྗོད་དུས་མདུན་གྱི་ནམ་མཁར་བཞུགས་པར་བསམ༔ དེ་ནས་ཡན་ལག་བདུན་པའི་དང་པོ་ཕྱག་གི་ཡན་ལག་ནི། སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །བླ་མའི་སྐུ་ནི་རྡོ་རྗེའི་སྐུ། །མཛེས་ཤིང་ལྟ་བས་ཆོག་མི་ཤེས། །བསམ་གྱིས་མི་ཁྱབ་ཡོན་ཏན་རྫོགས། །བླ་མའི་སྐུ་ལ་ཕྱག་འཚལ་ལོ། །བླ་མའི་གསུང་ནི་ཚངས་པའི་དབྱངས། །འགག་མེད་སེང་གེའི་སྒྲ་དང་ལྡན། །མུ་སྟེགས་རི་དྭགས་སྐྲག་མཛད་པའི། །བླ་མའི་གསུང་ལ་ཕྱག་འཚལ་ལོ། །བླ་མའི་ཐུགས་ནི་ནམ་མཁའ་འདྲ། །བདེ་གསལ་མི་རྟོག་སྟོང་པའི་ངང་། །རྣམ་ཐར་གསུམ་ལ་ལེགས་གནས་པའི། །བླ་མའི་ཐུགས་ལ་ཕྱག་འཚལ་ལོ། །དུས་གསུམ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ཕྱག་སྟོང་འཁོར་ལོས་སྒྱུར་

བའི་རྒྱལ་པོ་སྟོང་། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་། །གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཌཱ་ཀིའི་གཙོ་མོ་ལ་ཀྵིཾ་ཀཱ་རའི་ཞབས། །མངའ་རིས་པཎ་ཆེན་ཟླ་བ་གཞོན་ནུ་དང་། །ཡེ་ཤེས་བཟང་པོ་ཟླ་བ་རྒྱལ་མཚན་སོགས། །བརྒྱུད་པའི་བླ་མ་རྣམས་ལ་ཕྱག་འཚལ་ལོ། དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་དཔལ་དབྱངས། །བདུད་དཔུང་མ་ལུས་འཇོམས་མཛད་གསང་བའི་བདག །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེ་ལྡན་པ། །ཐམས་ཅད་ཁྱེན་པའི་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པས་འདོད་ཆགས་བྲལ་བར་གྱུར། །དགེ་བས་ངན་སོང་ལས་གྲོལ་ཅིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་ལྡན། །དགེ་

འདུན་ལ་ཡང་ཕྱག་འཚལ་ལོ། །ཐབས་མཁས་ཐུགས་རྗེས་ཤཱཀྱའི་རིགས་སུ་འཁྲུངས། །གཞན་གྱིས་མི་ཐུབ་བདུད་ཀྱི་དཔུང་འཇོམས་པ། གསེར་གྱི་ལྷུན་པོ་ལྟ་བུར་བརྗིད་པའི་སྐུ། །ཤཱཀྱའི་རྒྱལ་པོ་ཁྱེད་ལ་ཕྱག་འཚལ་ལོ། །འཇིག་རྟེན་འདྲེན་པའི་གཙོ་བོ་ཚེ་དཔག་མེད། །དུས་མིན་འཆི་བ་མ་ལུས་འཇོམས་མཛད་པ། །མགོན་མེད་སྡུག་བསྔལ་གྱུར་པ་རྣམས་ཀྱི་སྐྱབས། །སངས་རྒྱས་ཚེ་དཔག་མེད་ལ་ཕྱག་འཚལ་ལོ། །ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱའི་འོད་ལ་ཕྱག་འཚལ་ལོ། །གཞོན་ནུའི་ཆ་ལུགས་འཆང་བ་པོ། །ཤེས་རབ་སྒྲོན་མེས་རབ་ཏུ་བརྒྱན། །འཇིག་རྟེན་གསུམ་ན་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་ལོ། །སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །འཕགས་པ་སེང་གེའི་སྒྲ་དང་ཡིད་བཞིན་ནོར། །པདྨ་གར་དབང་

ཐུགས་རྗེ་མི་གཤོལ་དང་། །དོན་ཡོད་ཞགས་དང་ཧ་ལ་ཧ་ལ་སྟེ། །སྤྱན་རས་གཟིགས་དབང་རྣམས་ལ་ཕྱག་འཚལ་ལོ། །པདྨ་རྒྱན་དང་རྡོ་རྗེ་ཆོས་དབང་ཕྱུག །ཧ་རི་ཧ་རི་ལ་ཞོན་མགྲིན་སྔོན་ཏེ། །ཕྱོགས་བཅུར་བཞུགས་པའི་འཕགས་པ་ཐུགས་རྗེ་ཅན། །སྤྱན་རས་གཟིགས་དབང་རྣམས་ལ་ཕྱག་འཚལ་ལོ། །འཁོར་བ་ལས་སྒྲོལ་ཏ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་ལ་ཕྱག་འཚལ་ལོ། །སྟོབས་པོ་ཆེ་དང་དྲག་ཤུལ་ཆེ། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་པོ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་ལོ། །ཞེས་བརྗོད། མཆོད་པའི་ཡན་ལག་ནི། རང་གི་ཐུགས་ཀའི་ཧྲཱིཿཡིག་ལས་བྱུང་བའི་མཆོད་པའི་ལྷ་མོ་མང་པོས་མཆོད་པར་གྱུར། ཨོཾ་ཨཱརྱ་ལོ་ཀི་ཤྭ་ར་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏིཙྪ་སྭཱ་ཧཱ། །ཞེས་བརྗོད། མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མར་

མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མ་ཕུར་མ་རི་རབ་མཉམ་པ་དང་། །བཀོད་པས་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །སྤྲོ་ནམཎྜལ་རྒྱས་བསྡུས་སྐབས་དང་སྦྱར་ནས་འབུལ། བཤགས་པའི་ཡན་ལག་ནི། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །སྤྲོ་ན་ལྟུང་བཤགས་དང་བླ་མ་རྡོ་རྗེ་འཛིན་པ་ཡན་འདོན། རྗེས་སུ་ཡི་རང་གི་ཡན་ལག་ནི། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རངས། །ཆོས་འཁོར་བསྐོར་བའི་ཡན་ལག་ནི། གང་རྣམས་ཕྱོགས་

བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ། །མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པའི་ཡན་ལག་ནི། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །བསྔོ་བའི་ཡན་ལག་ནི། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཕྱིར་བསྔོའོ། །ཚད་མེད་བཞི་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཞེས་པ་ལན་གསུམ། ཚོགས་ཞིང་

རྣམས་རང་གནས་སུ་གཤེགས་པར་གྱུར། །བདག་བསྐྱེད་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུདྡྷོ྅་ཧཾ། ཆོས་རྣམས་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་ཡིག་དྲུག་སྒྲ་དབྱངས་གྲགས། །རང་སེམས་དཀར་གསལ་ཟླ་བར་གསལ་བ་ལས། །སྟེང་དུ་ཡིག་གེ་དྲུག་མ་གཟུགས་སུ་ཤར། །ཟླ་བ་ཡིག་དྲུག་ཡོངས་སུ་གྱུར་པ་ལས། །པདྨ་འདབ་སྟོང་ལྟེ་བར་ཡིག་དྲུག་མཚན། །དེ་ལས་འོད་འཕྲོས་འཕགས་པའི་སྐུ་ཡང་སྤྲོས། །རྒྱལ་བ་མཆོད་ཅིང་འགྲོ་བའི་དོན་ཡང་མཛད། །དེ་རྣམས་ཚུར་འདུས་ཡོངས་སུ་གྱུར་པ་ལས། །རང་ཉིད་ཐུགས་རྗེ་ཆེན་པོ་བཅུ་གཅིག་ཞལ། །རྩ་བའི་ཞལ་དཀར་གཡས་ལྗང་གཡོན་པ་དམར། །དེ་སྟེང་དབུས་ལྗང་གཡས་དམར་གཡོན་པ་དཀར། །དེ་སྟེང་དབུས་དམར་གཡས་དཀར་གཡོན་པ་ལྗང་། །དེ་སྟེང་ཁྲོ་ཞལ་སྤྱན་གསུམ་དབུ་རལ་དམར། །དེ་སྟེང་ཞི་ཞལ་དམར་པོ་གཙུག་ཏོར་ཅན། །དང་པོའི་ཕྱག་གཉིས་ཐུགས་ཀར་ཐལ་མོ་སྦྱར། །གཡས་ཀྱི་གཉིས་པས་ཤེལ་དཀར་ཕྲེང་བ་བསྣམས། །གསུམ་པ་མཆོག་སྦྱིན་བཞི་པས་འཁོར་ལོ་འཛིན། །

གཡོན་གྱི་གཉིས་པས་གསེར་གྱི་པདྨ་བསྣམས། །གསུམ་པས་སྤྱི་བླུག་བཞི་པས་མདའ་གཞུ་འཛིན། །ལྷག་མ་དགུ་བརྒྱ་དགུ་བཅུ་གོ་གཉིས་པོ། །མཆོག་སྦྱིན་ཕྱག་རྒྱ་ཕྱག་མཐིལ་སྤྱན་གྱིས་མཛེས། །རི་དྭགས་པགས་པས་ནུ་མ་གཡོན་པ་བཀབ། །རས་བཟང་ཤམ་ཐབས་སྐྱ་རགས་ནོར་བུས་སྤྲས། །རིན་ཆེན་རྒྱན་དང་དར་གྱི་ན་བཟས་མཛེས། །ཞབས་གཉིས་མཉམ་པར་པད་ཟླའི་སྟེང་ན་བཞེངས། །སྐུ་ལས་འོད་ཟེར་དཀར་པོ་འཕྲོ་བར་གྱུར། །དེ་ཡི་ཐུགས་ཀར་ཟླ་སྟེང་སྤྱན་རས་གཟིགས། །ཞལ་གཅིག་ཕྱག་གཉིས་མཆོག་སྦྱིན་པདྨ་བསྣམས། །དེ་ཡི་ཐུགས་ཀར་ཟླ་སྟེང་ཧྲཱིཿཡིག་དཀར། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །ཐུགས་ཀར་ཧཱུྃ་ཡིག་སྔོན་པོས་མཚན་པར་གྱུར། །ཨོཾ་པདྨ་ཨུད་བྷ་ཝ་ཡེ་སྭཱ་ཧཱ། །ཞེས་བརྗོད་ནས་སྔར་བཤད་པའི་པདྨའི་རིགས་ཀྱི་ཕྱག་རྒྱས་སྙིང་ག་དང་། སྨིན་མཚམས་དང་། མགྲིན་པ་དང་། དཔུང་མགོ་རྣམས་སུ་རེག་ཅིང་བྱིན་གྱིས་བརླབས་པར་མོས། རང་གི་ཐུགས་ཀའི་ཧྲཱིཿལས་འོད་ཟེར་འཕྲོས། །རང་བཞིན་གནས་ནས་སྤྱན་རས་གཟིགས་དབང་ལ། །སངས་རྒྱས་བྱང་ཆུབ་སེམས་དཔའི་ཚོགས་རྣམས་ཀྱིས། །བསྐོར་བ་སྤྱན་དྲངས་རང་དང་

དབྱེར་མེད་གྱུར། །སླར་ཡང་འོད་འཕྲོས་དབང་ལྷ་སྤྱན་དྲངས་ནས། །དབང་བསྐུར་སྒྲིབ་དག་རིགས་ལྔས་དབུ་བརྒྱན་གྱུར། །མཆོད་པ་ནི། རང་གི་ཐུགས་ཀའི་ཧྲཱིཿཡིག་ལས་བྱུང་བའི། །མཆོད་པའི་ལྷ་མོ་མང་པོས་མཆོད་པར་གྱུར། །ཨོཾ་ཨཱརྱ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏིཙྪ་སྭཱ་ཧཱ། བསྟོད་པ་ནི། སྐྱོན་གྱིས་མ་གོས་སྐུ་མདོག་དཀར། །རྫོགས་སངས་རྒྱས་ཀྱིས་དབུ་ལ་བརྒྱན། །ཐུགས་རྗེའི་སྤྱན་གྱིས་འགྲོ་ལ་གཟིགས། །སྤྱན་རས་གཟིགས་ལ་ཕྱག་འཚལ་བསྟོད། །ཞེས་པས་བསྟོད། བགྲང་ཕྲེང་བྱིན་རླབས་ནི། ཐལ་མོ་སྙིང་གར་སྦྱར་ནས། ༀ་གུ་རུ་སརྦ་ཏ་ཐཱ་ག་ཏ་ཀཱ་ཡ་ཝཀྐ་ཙིཏྟ་པྲ་ན་མེ་ན་སརྦ་ཏ་ཐཱ་ག་ཏ་བཛྲ་པཱ་ད་བྷན་དྷ་ན་ཀ་རོ་མི། །ཞེས་བླ་མ་དང་ལྷ་ལ་ཕྱག་བྱས་ནས་ཕྲེང་བ་སྙིམ་པར་བཅུག་སྟེ། ཨོཾ་བ་སུ་མ་ཏི་ཤྲི་ཡེ་སྭཱ་ཧཱ། ཞེས་པ་ལན་བདུན་བཟླས་ནས་བྱིན་གྱིས་བརླབས། བཟླས་དམིགས་ནི། རང་གི་ཐུགས་ཀར་ཟླ་སྟེང་ཧྲཱིཿཡིག་མཐར། །སྔགས་ཕྲེང་གཡས་སུ་བསྐོར་ལས་འོད་ཟེར་འཕྲོས། །རང་ལུས་ནང་གང་སྡིག་སྒྲིབ་ཐམས་ཅད་སྦྱངས། །ཕྱིར་འཕྲོས་འཕགས་པའི་སྐུ་ཡང་དཔག་མེད་སྤྲོས། །འགྲོ་བའི་སྒྲིབ་སྦྱངས་འཕགས་

པའི་གོ་འཕང་ལ། །བཀོད་ནས་འོད་ཟེར་སྐུ་རྣམས་ཚུར་འདུས་ཏེ། །སླར་ཡང་ཐུགས་ཀའི་ཧྲཱིཿལ་ཐིམ་པར་གྱུར། །ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཛྙཱ་ན་སཱ་ག་ར་བཻ་རོ་ཙ་ན། བྱཱུ་ཧ་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱཀྶཾ་བུདྡྷ། ན་མཿསརྦ་ཏ་ཐཱ་ག་ཏེ་བྷྱཿ ཨརྷ་ཏེ་བྷྱཿ སམྱཀྶཾ་བུདྡྷེ་བྷྱཿ ནམ་ཨཱརྱ་ཨ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭ་ཡ། མ་ཧཱ་སཏཱ་ཡ། མ་ཧཱ་ཀཱ་རུ་ཎི་ཀཱ་ཡ། ༈ ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་ཝཥྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་ཝ་རེ། སི་ལི་མི་ལི་ཙི་ཏི་ཛྭ་ལ་མ་པ་ནཱ་ཡ་སྭཱ་ཧཱ། ཞེས་གཟུངས་རིང་གཅིག་གིས་སྣ་དྲངས། སྙིང་པོ་བརྒྱ་དང་བདུན་རེ། བརྒྱ་རྩ་བརྒྱད་བཟླས་མཐར། ཡིག་བརྒྱ་ཡང་བརྗོད། མདུན་བསྐྱེད་ནི། ༀ་སྭཱ་བྷཱ༴ཧཱཾ། དཀྱིལ་༢ཁོར་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་བྷཱུཾ་ཡིག་ལས་བྱུང་བའི། །པདྨ་སྣ་ཚོགས་རྡོ་རྗེའི་ལྟེ་བ་རུ། །སྣ་ཚོགས་རིན་ཆེན་ལས་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབ་བཞི་དང་བཅས། །མཚན་ཉིད་ཐམས་ཅད་ཡོངས་སུ་རྫོགས་པའི་དབུས། །སྣ་ཚོགས་པདྨ་འདབ་བརྒྱད་ལྟེ་བ་རུ། །རིན་ཆེན་ཁྲི་སྟེང་སྣ་ཚོགས་པད་ཟླའི་

གདན། །ཕྱོགས་བཞིའི་འདབ་མ་རེ་ལ་ཟླ་གདན་རེ། །དབུས་ཀྱི་གདན་ལ་ཧྲཱིཿདཀར་ལས་བྱུང་བའི། །པདྨའི་ལྟེ་བར་ཧྲཱིཿ་ཡིས་མཚན་པ་ལས། །འོད་འཕྲོས་འཕགས་པ་མཆོད་ཅིང་འགྲོ་དོན་མཛད། །དེ་རྣམས་ཚུར་འདུས་ཡོངས་སུ་གྱུར་པ་ལས། །འཕགས་པ་ཐུགས་རྗེ་ཆེན་པོ་བཅུ་གཅིག་ཞལ། །རྩ་བའི་ཞལ་དཀར་གཡས་ལྗང་གཡོན་པ་དམར། །ཞེས་པ་ནས་དེ་ཡི་ཐུགས་ཀར་ཟླ་སྟེང་ཧྲཱིཿཡིག་དཀར། །ཞེས་པ་ཡན་ཆད་སྔར་བཞིན་བརྗོད། ཤར་གྱི་གདན་ལ་ཧཱུྃ་ལས་མི་བསྐྱོད་སྔོ། །ཕྱག་གཡས་ས་གནོན་གཡོན་པ་མཉམ་བཞག་མཛད། །ལྷོ་ཡི་གདན་ལ་ཏྲཱཾ་ལས་རིན་འབྱུང་སེར། །ཕྱག་གཡས་མཆོད་སྦྱིན་གཡོན་པ་མཉམ་བཞག་མཛད། །ནུབ་ཀྱི་གདན་ལ་ཨོཾ་ལས་རྣམ་སྣང་དཀར། །ཕྱག་གཉིས་བྱང་ཆུབ་མཆོག་གི་ཕྱག་རྒྱ་མཛད། །བྱང་གི་གདན་ལ་ཨཱཿལས་དོན་གྲུབ་ལྗང་། །ཕྱག་གཡས་སྐྱབས་སྦྱིན་གཡོན་པ་མཉམ་བཞག་མཛད། །ཀུན་ཀྱང་ཞལ་གཅིག་ཕྱག་གཉིས་སྐྱིལ་ཀྲུང་བཞུགས། །རིན་ཆེན་རྒྱན་དང་དར་གྱི་ན་བཟས་མཛེས། །ཀུན་གྱི་གནས་གསུམ་ཨོཾ་ཨཱཿཧཱུྃ་གིས་མཚན། །གཙོ་བོའི་

ཐུགས་ཀར་ཟླ་སྟེང་ཧྲཱིཿཡིག་ལས། །འོད་འཕྲོས་པོ་ཏ་ལ་ནས་སྤྱན་རས་གཟིགས། །འཁོར་བཅས་སྤྱན་དྲངས་དམ་ཡེ་དབྱེར་མེད་གྱུར། །སླར་ཡང་དབང་གི་ལྷ་རྣམས་སྤྱན་དྲངས་ནས། །དབང་བསྐུར་སྒྲིབ་དག་རིགས་ལྔས་དབུ་བརྒྱན་གྱུར། །མཆོད་པ་ནི། རང་གི་ཐུགས་ཀའི་ཧྲཱིཿཡིག་ལས་བྱུང་བའི། །མཆོད་པའི་ལྷ་མོ་མང་པོས་མཆོད་པར་གྱུར། །རྒྱལ་བ་རྒྱ་མཚོའི་མཆོད་རྫས་ལས་གྲུབ་པའི། །ཞིང་ཁམས་རྒྱ་མཚོའི་མཆོད་ཚོགས་རྒྱ་མཚོའི་ཚོགས། །ཡོན་ཏན་རྒྱ་མཚོའི་རྒྱལ་བ་འཁོར་བཅས་ལ། །དད་པ་རྒྱ་མཚོས་འབུལ་ལོ་བཞེས་སུ་གསོལ། །ཨོཾ་ཨཱརྱ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏིཙྪ་སྭཱ་ཧཱ། ཞེས་པའི་བར་བརྗོད། བསྟོད་པ་ནི། ཕྱག་སྟོང་འཁོར་ལོས་ཞེས་པ་དང་། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་བསྟོད། །བུམ་སྒྲུབ་ནི། བདག་མདུན་གཉིས་ཀྱི་ལྷ་ཡི་ཕྱག་མཛུབ་ལས། །བདུད་རྩིའི་རྒྱུན་བབས་བུམ་པ་གང་བར་གྱུར། །ཅེས་གཟུངས་རིང་བརྒྱ་རྩ་བརྒྱད་བཟླས།

ཡིག་བརྒྱ་ཡང་བརྗོད། དེ་ནས་པོ་བསྟོད་ནི། རང་གི་སྤྱི་བོར་པད་ཟླའི་གདན་སྟེང་དུ། །དགེ་སློང་དཔལ་མོ་རབ་བྱུང་ཆ་བྱད་ཅན། །ཞལ་གཅིག་ཕྱག་གཉིས་ཐུགས་ཀར་ཐལ་མོ་སྦྱར། །ངོ་ཆེན་བསྟོད་པ་བྱེད་གྲོགས་མཛད་པར་གྱུར། །ཨོཾ་བླ་མ་འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་རྟེན་བླ་མ་སྲིད་པ་གསུམ་གྱིས་བསྟོད་པ་པོ། །ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པའི་རྒྱལ་མཆོག་བསྟོད་པས་གྲུབ་པར་མཛད་པ་པོ། །འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་གཤེགས་དཔག་མེད་སྐུ་སྟེ་སྐུ་བཟང་འཛིན་པ་པོ། །བདེ་གཤེགས་སྣང་མཐའ་ཡས་ཀྱི་དབུ་རྒྱན་འཛིན་པ་པོ། །ཕྱག་གཡས་མཆོད་སྦྱིན་ཡི་དྭགས་བཀྲེས་སྐོམ་སེལ་པ་པོ། །ཕྱག་གཡོན་གསེར་གྱི་པདྨས་རྣམ་པར་བརྒྱན་པ་པོ། །དྲི་ཞིམ་རལ་པའི་ཕྲེང་བ་དམར་སེར་འཁྱུག་པ་པོ། །ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །སྤྱན་གྱི་པདྨ་མཆོག་ཏུ་བཟང་ཞིང་ཡངས་པ་པོ། །ཁ་བ་དུང་ལྟར་རྣམ་དཀར་དྲི་དང་ལྡན་པ་པོ། །དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ། །མཛེས་པའི་འོད་ཟེར་སྐྱ་རེངས་

དམར་པོས་བརྒྱན་པ་པོ། །པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །སྟོན་ཀའི་སྤྲིན་གྱི་མདོག་དང་ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །རི་དྭགས་པགས་པས་ནུ་མ་གཡོན་པ་བཀབ་པ་པོ། །སྙན་ཆ་གདུ་བུས་སྒེག་ཅིང་རྒྱན་རྣམས་འཆང་པ་པོ། །དྲི་མ་མེད་པ་པདྨའི་མཆོག་ལ་གནས་པ་པོ། །ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ། །གསེར་གྱི་སྐེ་རགས་མཆོག་ལ་ནོར་བུས་སྤྲས་པ་པོ། །སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཐུབ་པའི་སྐྱེས་མཆོག་མཚོ་ཆེན་ཕ་རོལ་ཕྱིན་པ་པོ། །ཚོགས་གཉིས་བསོད་ནམས་མང་པོ་ཉེ་བར་བསགས་པ་པོ། །རྟག་ཏུ་བདེ་བའི་འབྱུང་གནས་རྒ་ནད་སེལ་པ་པོ། །གསུམ་མཐར་མཛད་ཅིང་མཁའ་སྤྱོད་སྤྱོད་པ་སྟོན་པ་པོ། །ལུས་ཅན་མཆོག་སྟེ་བདུད་དཔུང་འཁྲུག་ལས་རྒྱལ་བ་པོ། །གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། །ཚངས་པའི་གནས་པ་བཞི་ཡིས་དབེན་པར་མཛད་པ་པོ། །ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པ་པོ། །ཚོགས་ཀུན་

ཉེ་བར་བསགས་ཤིང་བསྟན་པ་གཉེར་བ་པོ། །འོ་མའི་མཚོ་དང་ཆུ་ཡི་མཚོ་ལས་སྒྲོལ་བ་པོ། །གང་ཞིག་རྟག་ཏུ་ཐོ་རེངས་ལངས་ནས་གུས་པ་ཡིས། །སྤྱན་རས་གཟིགས་ཀྱི་དབང་པོ་ཡིད་ལ་སེམས་བྱེད་ཅིང་། །བསྟོད་པའི་མཆོག་འདིས་དག་ཅིང་གསལ་བར་བསྟོད་བྱེད་ན། །དེ་ནི་སྐྱེས་པ་འམ་ནི་བུད་མེད་ཡིན་ཡང་རུང་། །སྐྱེ་བ་འདི་འམ་མ་འོངས་སྐྱེ་བ་ཐམས་ཅད་དུ། །འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །ཞེས་ཕྱག་དང་བཅས་པོ་བསྟོད་ཉེར་གཅིག་བྱའོ། །འདོད་གསོལ་ནི། འཕགས་པ་སྤྱན་རས་གཟིགས་དབང་ཐུགས་རྗེའི་གཏེར། །འཁོར་དང་བཅས་པ་བདག་ལ་དགོངས་སུ་གསོལ། །བདག་དང་ཕ་མ་རིགས་དྲུག་སེམས་ཅན་རྣམས། །མྱུར་དུ་འཁོར་བའི་མཚོ་ལས་བསྒྲལ་དུ་གསོལ། །ཟབ་དང་རྒྱ་ཆེ་བླ་མེད་བྱང་ཆུབ་སེམས། །མྱུར་དུ་རྒྱུད་ལ་སྐྱེ་བར་མཛད་དུ་གསོལ། །ཐོག་མེད་ནས་བསགས་ལས་དང་ཉོན་མོངས་རྣམས། །ཐུགས་རྗེའི་ཆབ་ཀྱིས་མྱུར་དུ་དག་མཛད་ནས། །ཐུགས་རྗེའི་ཕྱག་བརྐྱངས་བདག་དང་འགྲོ་བ་རྣམས། །བདེ་བ་ཅན་གྱི་ཞིང་དུ་དྲངས་དུ་གསོལ། །འོད་

དཔག་མེད་དང་སྤྱན་རས་གཟིག་དབང་གིས། །ཚེ་རབས་ཀུན་ཏུ་དགེ་བའི་བཤེས་མཛད་ནས། །མ་ནོར་ལམ་བཟང་ལེགས་པར་བསྟན་ནས་ཀྱང་། །མྱུར་དུ་སངས་རྒྱས་ས་ལ་བཞག་ཏུ་གསོལ། །ཞེས་གདུངས་ཤུགས་དྲག་པོས་གསོལ་བ་གདབ། ཀ་དག་དབྱིངས་ལས་ལོངས་སྤྱོད་རྫོགས་སྐུར་བཞེངས། །ཁ་དོག་རབ་དཀར་འཕགས་མཆོག་སྤྱན་རས་གཟིགས། །ག་རུ་བཞུགས་ཀྱང་སྐད་ཅིག་ཡུད་ཙམ་ལ། །ང་ཡི་མདུན་གྱི་ནམ་མཁར་གཤེགས་སུ་གསོལ། །ཅ་ཅོའི་གཏམ་དང་ལྟོ་གོས་བློ་ཡིས་བཏང་། །ཆ་རྒྱུས་སྔོན་མེད་རི་སུལ་ཉམས་དགའ་རུ། །ཇ་ཕུད་སོགས་མཆོད་སྙིང་ནས་གསོལ་བཏབ་ཚེ། །ཉ་རྒྱས་ཟླ་ལྟར་ཞལ་སྟོན་སྤྱན་རས་གཟིགས། །ཏ་ལའི་ཤིང་སོགས་རྒྱས་པའི་ནགས་ཁྲོད་སོགས། །ཐ་མལ་རྣམ་གཡེང་མེད་པའི་གནས་རྣམས་སུ། །ད་ལྟ་དམ་ཆོས་སྒྲུབ་དུས་སྒྱུ་ལུས་ལ། །ན་ཟུག་མེད་པར་མཛོད་ཅིག་སྤྱན་རས་གཟིགས། །པ་སངས་ལྟར་དཀར་བསམ་པས་ཀུན་བསླངས་ཏེ། །ཕ་ཡུལ་སྤངས་ནས་དབེན་པའི་དགའ་ཚལ་དུ། །བ་སྤུ་གཡོ་བཞིན་གསོལ་བ་བཏབ་པའི་དུས། །མ་ལྟར་བརྩེ་བས་སྐྱོངས་ཤིག་སྤྱན་

རས་གཟིགས། །ཙ་རི་ལ་སོགས་རི་ཁྲོད་གང་བཟང་དུ། །ཚ་གྲང་ཁྱད་བསད་གང་ཤེས་རྒྱུན་ཆད་མེད། །ཛ་ཧུའི་རྒྱུན་ལྟར་བསྒོམ་དུས་མཐུན་རྐྱེན་རྣམས། །ཝ་བཙུགས་ཆུ་ལྟར་སྩོལ་ཅིག་སྤྱན་རས་གཟིགས། །ཞ་ལོང་འོན་ལྐུགས་བྲན་བཞིན་དམན་ས་བཟུང་། །ཟ་མ་ངན་ངོན་ཟོས་ནས་རིར་སྡོད་དུས། །འ་འུར་ལྷ་འདྲེའི་འཇིགས་སྣང་ཅི་བྱུང་རྣམས། །ཡ་མཚན་སྣང་བར་སྒྱུར་ཅིག་སྤྱན་རས་གཟིགས། །རྭ་ཅན་ཤ་འབྲོང་སོགས་གནས་རི་ཁྲོད་ནས། །ལྭ་བེམ་གོས་སུ་གྱོན་ནས་ཉིན་མཚན་དུ། །ཤ་ཐང་བསྐྱེད་ནས་བསྒྲུབ་ལ་གཞོལ་བའི་ཚེ། །ས་ལམ་ཐོབ་པར་མཛོད་ཅིག་སྤྱན་རས་གཟིགས། །ཧ་ལའི་དུག་ཟོས་མི་བཞིན་སྡུག་མྱོང་བའི། །ཨ་མའི་གཙོ་བྱས་འགྲོ་ཀུན་འཁོར་བ་ལས། །སྒྲོལ་ལ་བདག་ནི་མྱུར་དུ་མགོན་ཁྱོད་དང་། །མཚུངས་པར་བྱིན་གྱིས་རློབས་ཤིག་སྤྱན་རས་གཟིགས། །གཏོར་མར་ཆབ་བྲན་ལ། ཨོཾ་པདྨནྟ་ཀྲི་ཧཱུྃ་ཕཊ། ཨོཾ་སྭཱ་བྷཱ༴ཧཾ། གཏོར་མ་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་བྷཱུཾ་ལས་རིན་པོ་ཆེའི། །སྣོད་དུ་ཨོཾ་ཡིག་འོད་དུ་ཞུ་བ་ལས། །གཏོར་མ་ཟག་མེད་བདུད་རྩིའི་

རྒྱ་མཚོར་གྱུར། །ཨོཾ་ཨཱཿཧཱུཾ། ལན་གསུམ། ༀ་ཨཱརྱ་ལོ་ཀི་ཤྭ་ར་ས་པ་རི་ཝཱ་ར་ཨི་དམ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལན་གསུམ། འཕགས་པ་ཐུགས་རྗེ་ཆེན་པོའི་ལྷ་ཚོགས་ལ། །འདོད་ཡོན་ལྔ་ལྡན་མཆོད་གཏོར་འདི་འབུལ་བས། །བཞེས་ནས་བདག་དང་འགྲོ་དྲུག་སེམས་ཅན་ལ། །བླ་མེད་མཆོག་གི་དངོས་གྲུབ་སྩལ་དུ་གསོལ། །ཨོཾ་ཨཱ་ཀཱ་རོ་མུ་ཁཾ་སརྦ་དྷརྨ་ཎཾ་ཨདྱ་ནུཏྤནྣ་ཏྭ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་ལན་གསུམ། དཀར་ཕྱོགས་སྐྱོང་མཛད་མཁའ་འགྲོ་ཆོས་སྐྱོང་རྣམས། །འདོད་ཡོན་ལྔ་ལྡན་མཆོད་གཏོར་འདི་བཞེས་ལ། །བསྟན་དར་འགྲོ་ཀུན་བདེ་དང་ལྡན་པ་དང་། །བདག་སོགས་བསམ་དོན་ཡིད་བཞིན་འགྲུབ་པར་མཛོད། །ན་མ་སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། །ཞེས་ལན་གསུམ། གཞི་བདག་ལ་སོགས་མཐུ་ལྡན་སྡེ་བརྒྱད་རྣམས། །འདོད་ཡོན་ལྔ་ལྡན་མཆོད་གཏོར་འདི་བཞེས་ལ། བསྟན་དར་བདག་སོགས་འགལ་རྐྱེན་ཀུན་ཞི་ཞིང་། །ཆོས་ལྡན་བསམ་དོན་ཡིད་བཞིན་འགྲུབ་པར་མཛོད། །གཞན་ཡང་གཏོར་བསྔོ་གང་དགོས་རྣམས་སྐབས་འདིར་བྱའོ། །དེ་ནས་ལྷ་ལ་ཁྲུས་གསོལ་ནི། དངོས་སུ་མེ་ལོང་ལ་གཟུགས་བརྙན་ཤར་བར་བུམ་པའི་ཆུས་ཁྲུས་གསོལ་ནས།

འགྲོ་བའི་སྒྲོན་མེ་སྤྱན་རས་གཟིགས་དབང་ལ། །དྲི་ཞིམ་བདུད་རྩིའི་རྒྱུན་གྱིས་ཁྲུས་གསོལ་བས། །འགྲོ་བའི་སྒྲིབ་གཉིས་དྲི་མ་ཀུན་བསལ་ནས། །དྲི་བྲལ་སྐུ་གསུམ་བརྙེས་པའི་བཀྲ་ཤིས་ཤོག །ཨོཾ་སརྦ་ཏ་ཐཱ་ག་ཏ༴ཤྲི་ཡེ་ཨཱཿ་ཧཱུཾ། དེ་བཞིན་གཤེགས་དང་དེ་ཡི་སྲས་རྣམས་ལ། ཞེས་པ་དང་། གཞན་ཡང་ཚིགས་བཅད་ཅི་རིགས་བྱ། དེ་ནས་སྐུ་ཕྱི་བ་ནི། དེ་དག་སྐུ་ལ་མཚུངས་པ་མེད་པའི་གོས། ནས། དྷ་ན་ཡེ་སྭཱ་ཧཱ། ཞེས་པའི་བར་བརྗོད། གོས་འབུལ་བ་ནི། སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱོང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །རྒྱན་འབུལ་ནི། རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་པས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བྱེད་ཅིང་། །སེམས་ཅན་སྡུག་

བསྔལ་མང་གཟིར་མྱུར་སྒྲོལ་ཤོག །སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིག་བཟང་བློ་གསལ་ང་རྒྱལ་མེད་པ་དང་། སྙིང་རྗེ་ཆེ་ཞིང་བླ་མ་ལ་གུས་ལྡན། །སྤྱན་རས་གཟིགས་དབང་དམ་ཚིག་ལ་གནས་ཤོག །ཞེས་པ་དང་། སྤྱན་རས་གཟིགས་མགོན་ཁྱེད་སྐུ་ཅི་འདྲ་དང་། །ཞེས་པ་དང་། ཁྱེད་ལ་བསྟོད་ཅིང་གསོལ་བ་བཏབ་པའི་མཐུས། །སོགས་ཅི་རིགས་འདོན། བཟོད་གསོལ་ནི། བཅོམ་ལྡན་ཐུགས་རྗེ་ཆེན་པོ་དགོངས་སུ་གསོལ། །བདག་ཅག་བྱིང་རྨུགས་འཕྲོ་རྒོད་དབང་དུ་སོང་། །ཏིང་འཛིན་མི་གསལ་སྔགས་མ་དག་པ་དང་། །ལྷག་ཆད་འགལ་འཁྲུལ་ཅི་མཆིས་བཟོད་པར་གསོལ། །ཡིག་བརྒྱ་ལན་གསུམ། རང་ཁྲུས་བྱ་བ་ནི། འཕགས་པ་གཙོ་འཁོར་མདུན་གྱི་ནམ་མཁར་བྱོན། །སྐུ་ལས་བདུད་རྩི་དཀར་པོའི་རྒྱུན་བབས་པས། །རང་གཞན་ནད་གདོན་སྡིག་སྒྲིབ་བག་ཆགས་བཅས། །ལྷག་མ་མེད་པར་མྱུར་དུ་དག་པར་གྱུར། །ཨོཾ་མ་ཎི་པདྨེ་ཧཱུཾ། ཅི་མང་བཟླ་ཞིང་ཁྲུས་བྱ། ལན་གསུམ་འཐུང་། ཉོན་སྒྲིབ་དང་ཤེས་སྒྲིབ་དག་ནས་སྐྱེ་མེད་ཆོས་སྐུ་རྟོགས་པར་བསམ། སྨྱུང་གནས་དངོས་གཞིའི་ཉིན་ཁྲུས་བྱ། ཁོག་ཏུ་མི་འཐུང་། དགེ་བ་འདི་ཡིས་མྱུར་དུ་བདག །ཞེས་སོགས་བསྔོ་སྨོན་བཀྲ་ཤིས་ཅི་རིགས་

བྱ། ཐུན་མཚམས་ཀྱི་བྱ་བ་ལ་འཇུག །སྦྱོར་བ་དང་དངོས་གཞིའི་ཉིན་ཐུན་གསུམ་བྱ། ཆོ་ག་གསུམ་གཏོང་དགོས། ཐུན་དང་པོ་གཉིས་ལ་གསོ་སྦྱོང་ལེན། ཐུན་གཞན་དང་གྲོལ་རྒྱུའི་ཉིན་གསོ་སྦྱོང་བཞག་ལ་གཞན་རྣམས་སྔར་བཞིན་འདོན། གྲོལ་བའི་ཉིན་དཀྱིལ་འཁོར་བསྡུ་བ་ནི། རྟེན་ཡོད་ན། འདིར་ནི་གཟུགས་དང་ལྷན༴བཛྲ་ཡེ་སྭཱ་ཧཱ། ཞེས་པས་བརྟན་བཞུགས་བྱ། མེད་ན། ༀ། ཁྱེད་ཀྱིས་སེམས་ཅན་དོན་ཀུན་མཛད༴བཛྲ་མུཿཡེ་ཤེས་པ་གཤེགས། དམ་ཚིག་པ་རྣམས་འོད་ཞུ་རང་ལ་ཐིམ། །རང་ཡང་མི་དམིགས་མཁའ་ལ་འཇའ་ལྟར་ཡལ། །སྟོང་པའི་ངང་ལས་རང་ཉིད་སྤྱན་རས་གཟིགས། །ཞལ་གཅིག་ཕྱག་གཉིས་སྐུ་རུ་བཞེངས་པར་གྱུར། །བསྔོ་སྨོན་ནི། འདིས་མཚོན་དུས་གསུམ་བསགས་པའི་དགེ་བ་རྣམས། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །རྫོགས་པའི་སངས་རྒྱས་གོ་འཕང་མྱུར་ཐོབ་ནས། །མཐའ་ཡས་འགྲོ་བ་མ་ལུས་འདྲེན་པར་ཤོག །དམིགས་པ་མེད་པའི་སྙིང་རྗེའི་བདག་ཉིད་ཅན། །འཕགས་མཆོག་སྤྱན་རས་གཟིགས་ཀྱི་དཀྱིལ་འཁོར་དུ། །བསྒོམ་བཟླས་མཆོད་བསྟོད་སྨྱུང་བར་གནས་པ་སོགས། །དགེ་བའི་བྱ་བ་ཅུང་ཟད་བསྒྲུབས་པ་ཡི། །མཐུ་ལ་བརྟེན་ནས་

བདག་དང་འགྲོ་བ་ཀུན། །རྒྱལ་བའི་གོ་འཕང་མྱུར་དུ་ཐོབ་པར་ཤོག །བདག་གཞན་སེམས་ཅན་ཚེ་རབས་ཐམས་ཅད་དུ། །དལ་འབྱོར་ཚང་བའི་མི་ཡི་ལུས་ཐོབ་ནས། མཚན་ལྡན་བླ་མ་དམ་པའི་ཞབས་དྲུང་དུ། །སྐྱེས་བུ་གསུམ་སོགས་ལམ་གྱི་རིམ་པ་ཡིས། །རྒྱུད་སྦྱངས་སྒོ་གསུམ་སྡིག་སྒྲིབ་ཀུན་དག་ནས། །རྡོ་རྗེ་ཐེག་པའི་སྣོད་དུ་འགྱུར་བར་ཤོག །བཅོས་མིན་ངེས་པར་འབྱུང་བའི་བློས་བསྐུལ་ནས། །ཐབས་དང་ཤེས་རབ་བྱང་ཆུབ་སེམས་བསྒོམ་སྟེ། །མྱུར་དུ་འཕགས་པའི་གོ་འཕང་ཐོབ་གྱུར་ནས། །འགྲོ་བ་དྲུག་སོགས་སེམས་ཅན་མ་ལུས་པ། །གནས་ངན་ལས་དྲངས་སངས་རྒྱས་སར་འགོད་ཤོག །སྐྱེ་བ་ཀུན་ཏུ་འཕགས་མཆོག་སྤྱན་རས་གཟིགས། །ལྷག་པའི་ལྷར་གྱུར་རྗེས་སུ་རབ་བཟུང་ནས། །འཁོར་བའི་སྡུག་བསྔལ་རྒྱ་མཚོར་བྱིང་བ་རྣམས། །ཡང་དག་ལམ་ལ་མྱུར་དུ་འདྲེན་བྱེད་པའི། །དེད་དཔོན་ཆེན་པོར་བདག་ཉིད་གྱུར་ནས་ཀྱང་། །པོ་ཏ་ལ་རུ་འགྲོ་ཀུན་འདྲེན་པར་ཤོག །སྐྱབས་མཆོག་ཚོགས་དྲུག་རང་གྲོལ་གྱིས། །མཛད་པའི་བདེ་གཤེགས་ལམ་བཟང་གི །སྨོན་ལམ་རིན་ཆེན་ཐེམ་སྐས་འདི། །འགའ་རེས་ནན་ཆེར་བསྐུལ་བའི་ངོར། །བློ་བཟང་བྱམས་པ་

ཆོས་འཕེལ་གྱིས། རང་ལོ་བཅུ་བདུན་སྟེང་ནས་བྲིས། བཀྲ་ཤིས་ནི། བླ་མ་ཡི་དམ་སངས་རྒྱས་བྱང་སེམས་དང་། །མཁའ་འགྲོ་ཆོས་སྐྱོང་སྲུང་མའི་བཀྲ་ཤིས་ཤོག །རང་གཞན་འགྲོ་ཀུན་གནས་སྐབས་མཐར་ཐུག་གི །དོན་རྣམས་ཡིད་བཞིན་འགྲུབ་པའི་བཀྲ་ཤིས་ཤོག །གཞན་ཡང་བསྔོ་སྨོན་ཤིས་བརྗོད་གང་ཤེས་ཀྱིས་མཐའ་བརྒྱན་པར་བྱའོ། །དེ་ལྟར་ཉམས་སུ་ལེན་པའི་ཤ་ཆང་སྒོག་བཙོང་ལ་ཕུག་ཏིལ་སྲན་མས་སྦགས་པ་སོགས་མི་བཟའ། དཀར་གསུམ་མངར་གསུམ་སོགས་བརྟེན། ཟས་གདན་གཅིག་བྱ། སྣོད་འཁར་བ་དང་། ལོ་མ་དང་། ལག་མཐིལ་རྣམས་སུ་མི་བཟའ། ཕྱི་དྲོ་ཇ་བུ་རམ་སྦྲ་རྩི་མ་གཏོགས་ཞོ་འོ་མ་དང་། ཤིང་ཏོག་གི་རིགས་སོགས་འདུལ་བར་དུས་རུང་གི་ཟས་སུ་གསུངས་པ་རྣམས་ཀྱང་མི་ཟ། དངོས་གཞིའི་ཉིན་ཐོ་རེངས་ནས་བཟུང་སྟེ་སྨྲ་བ་བཅད། འབྲུ་ཉག་གཅིག་གམ། ཆུ་ཐིགས་ཙམ་གྱི་བཟའ་བཏུང་མི་བྱ། བཟླས་པའི་སྐབས་སུ་གཉིད་དང་ཐ་མལ་གྱི་གཏམ་དང་། བག་མེད་པར་ལྷ་གཞན་གྱི་བཟླས་པ་སོགས་མི་བྱའོ། དེ་ལྟར་ཉམས་སུ་བླང་བའི་ཕན་ཡོན་ནི། ཐུགས་རྗེ་ཆེན་པོའི་རྒྱུད་ལས། གང་ལ་ལ་ཞིག་ཆོ་ག་བཞིན་སྦྱོར་བར་བགྱི་ན། དེ་དག་གི་སུག་པར་སངས་རྒྱས་ཀྱི་གོ་འཕང་ཐོབ་པ་ལགས་སོ། །གསུངས། སྨྱུང་གནས་ལན་གཅིག་བསྲུངས་པའི་ཕན་ཡོན་ནི། རྒྱུད་དེ་ཉིད་ལས། སུ་ཞིག་བདག་གི་སླད་དུ་ཚེས་བཅུ་བཞིའམ། བཅོ་ལྔ་ལ་སྨྱུང་གནས་བགྱིས་ན་དེ་བསྐལ་པ་བཞི་ཁྲིའི་

འཁོར་བ་ཕྱིར་བསྙིལ་བར་འགྱུར་ལགས་སོ། །གསུངས། གཟུངས་ཚར་གཅིག་བརྗོད་པའི་ཕན་ཡོན་ནི། རྒྱུད་དེ་ཉིད་ལས། ལན་གཅིག་བརྗོད་པས་རྩ་བའི་ལྟུང་བ་བཞི་པོ་དག་ཀྱང་བྱང་བར་འགྱུར། མཚམས་མ་མཆིས་པ་ལྔ་པོ་དག་ཀྱང་མ་ལུས་པ་བྱང་བར་འགྱུར། །གསུངས། ལན་བརྒྱ་རྩ་བརྒྱད་བཟླས་པའི་ཕན་ཡོན་ནི། ཐུགས་རྗེ་ཆེན་པོའི་ཆོ་ག་ཞིབ་མོ་ལས། གཟུངས་སྔགས་འདི་ཡང་ལན་གཅིག་བརྒྱ་རྩ་བརྒྱད་བཟླས་བརྗོད་བགྱིས་ན། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་དཀྱིལ་འཁོར་དེར་འདུག་སྟེ། མཚམས་མེད་ལྔ་ལ་སོགས་ལས་ཀྱི་སྒྲིབ་པ་མི་དགེ་བ་ཇི་སྙེད་མཆིས་པ་ཐམས་ཅད་བྱང་བར་འགྱུར་རོ། །ལུས་དང་ངག་དང་ཡིད་ཀྱི་ལས་རྣམས་ཡོངས་སུ་དག་པར་འགྱུར་རོ། །སངས་རྒྱས་ཀྱི་ཏིང་ངེ་འཛིན་གྱི་སྟོབས་ཀྱང་ཐོབ་བོ། །འོད་ཟེར་གྱི་དབང་བསྐུར་བའི་སྟོབས་ཀྱང་ཐོབ་བོ། །ས་དང་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་འགྱུར་རོ། །ཞེས་གསུངས། ཐ་ན་སྤྱན་རས་གཟིགས་ཀྱི་མཚན་ལན་གཅིག་ཙམ་བརྗོད་པའི་ཕན་ཡོན་ནི། ཐུགས་རྗེ་ཆེན་པོའི་རྒྱུད་ལས། བཅོམ་ལྡན་འདས་བདག་གི་མིང་འཛིན་པ་ནི་དོན་མཆིས་ཏེ། སངས་རྒྱས་བྱེ་བ་ཕྲག་འབུམ་གྱི་བས་ལྷག་གོ །བདག་གི་མིང་འཛིན་པའི་སེམས་ཅན་ཐམས་ཅད་ནི་ཕྱིར་མི་ལྡོག་པ་ཉིད་ལ་གནས་པར་འགྱུར། བྲོ་ནད་ཐམས་ཅད་ལས་ཡོངས་སུ་ཐར་བར་འགྱུར། སྒྲིབ་པ་ཐམས་ཅད་དང་ལུས་ངག་དང་ཡིད་ཀྱི་ཉེས་པར་སྤྱོད་པ་ཐམས་ཅད་ལས་ཡོངས་སུ་ཐར་བར་འགྱུར་ལགས་སོ། ཞེས་དང་། དམ་ཆོས་པད་དཀར་ལས། སངས་རྒྱས་གངྒའི་ཀླུང་གི་བྱེ་མ་སྙེད་རྡུལ་གྱི་

གྲངས་དང་མཉམ་པ་ལ་མཆོད་ཅིང་བསྙེན་པ་དང་། སྤྱད་རས་གཟིགས་ཀྱི་མཚན་ཙམ་འཛིན་པ་དང་ལན་གཅིག་ཙམ་ཕྱག་བྱས་པ་ཕན་ཡོན་མཉམ་པར་གསུངས་གཞན་ཡང་སྨྱུང་གནས་ཀྱི་བསྙེན་ཚད་སོང་བའི་གང་ཟག་དེ་རི་དེ་ཡི་རྩེ་མོར་ཕྱིན་ན། རླུང་ཕོག་ཚད་ཀྱི་སེམས་ཅན་ལ་ངན་འགྲོ་མེད། དེ་བཞིན་དུ་ཆུ་བོ་ལ་བརྒལ་ཚད་ཆུ་འཐུང་ཚད་དང་ལུས་ཀྱི་གྲིབ་མ་ཕོག་ཚད་མཐོང་ཐོས་དྲན་རེག་ཐམས་ཅད་ལ་ངན་འགྲོ་མེད། ཅེས་དམ་པ་གོང་མ་རྣམས་ཀྱིས་གསུངས། དེས་ན་ཡི་དམ་གྱི་ལྷ་ཁྱད་པར་ཅན་འདི་བསྒོམ་བཟླས་ལ་བརྩོན་པར་བྱས་ན། འདི་ཁོ་ན་རང་གིས་འཚང་རྒྱ་བར་འགྱུར་རོ། །སྨྲས་པ། གཅིག་ཆོག་ལྷ་མཆོག་འཕགས་པ་སྤྱན་རས་གཟིགས། །བསྙེན་པའི་ཆོ་ག་བདེ་གཤེགས་ལམ་བཟང་ལ། །བརྟེན་ནས་སྐལ་བཟང་སྐྱེ་བོ་མ་ལུས་པ། །མྱུར་དུ་སངས་རྒྱས་ས་རུ་ཕྱིན་པར་ཤོག །ཅེས་སྨྱུང་གནས་ཆོ་ག་བདེ་གཤེགས་ལམ་བཟང་འདི་ནི་ཆོས་མཐུན་གྱི་སློབ་མ་མང་པོས་སྨྱུང་གནས་ཀྱི་ཆོ་ག་ཚིག་ཉུང་དོན་འདུས་ཤིག་དགོས་ཞེས་བསྐུལ་ངོར། ༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རིའི་རྫུ་འཕྲུལ་ཕུག་ནས་སྦྱར་བའོ།། །།སརྦ་མངྒ་ལཾ། །སྤྱན་རས་གཟིགས་དབང་ཐུགས་རྗེའི་འོད་སྣང་གིས། །མ་རིག་གཉིད་སངས་ཕན་བདེའི་སྣང་བ་རྒྱས། །འགྲོ་དྲུག་ཐར་པའི་ལམ་དུ་འཁྲིད་མཛད་པ། །གྲུབ་དབང་སྐྱབས་མཆོག་ཞལ་གྱི་བུམ་བཟང་ལས། །ཐོན་པའི་ཆོ་ག་བདེ་གཤེགས་ལམ་བཟང་འདི། །འགྲོ་བའི་དོན་དུ་པར་དུ་བསྐྲུན་པ་པོ། །ལྷ་རྗེ་དགེ་སློང་འཇིགས་མེད་རྒྱ་མཚོ་དང་། །འབྲི་རྐོ་བྱེད་མཁན་

ཧོར་ནག་དགེ་སློང་ཡིན། །དགེ་བའི་མཐུ་ལ་བརྟེན་ནས་བདག་གཞན་ཀུན། །རིང་མིན་རྣམ་མཁྱེན་ས་ལ་འཁོད་པར་ཤོག། །།

སྨྱུང་གནས་ཆོ་ག་ཐར་པའི་ཐེམ་སྐས།

༄༅། །སྨྱུང་གནས་ཆོ་ག་ཐར་པའི་ཐེམ་སྐས་བཞུགས་སོ།།

ན་མོ་ཨཱར་ལོ་ཀི་ཤྭ་ར་ཡ། ཕྱག་ན་པདྨ་དགེ་སློང་དཔལ་མོ་དང་། །ཟླ་བ་གཞོན་ནུ་ཡེ་ཤེས་བཟང་པོ་སོགས། །དངོས་དང་བརྒྱུད་པའི་བླ་མ་ཐམས་ཅད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ཡང་གྲུབ་མཆོག་དགེ་སློང་མ་དཔལ་མོའི་ལུགས་ཀྱི་ཐུགས་རྗེ་ཆེན་པོའི་སྒྲུབ་ཐབས་སྨྱུང་གནས་ཆོ་ག་དང་འབྲེལ་བར་ཉམས་སུ་ལེན་པར་འདོད་པས། མཐོང་བརྒྱུད་ཀྱི་ཕྱག་ལེན་ལྟར་གནས་ཁང་བྱི་དོར་བྱ། སྐུ་གསུངཐུགས་རྟེན་བཀྲམ། དཀྱིལ་འཁོར་བུམ་པ་མཆོད་གཏོར་སོགས་གང་དགོས་ཅི་འབྱོར་བཤམས་ལ་ནངས་སྔ་བར་ལངས་ནས་ཁྲུས་བྱ། ལག་པ་ཐལ་མོ་ཁ་སྦྱར་བ་པདྨ་ཁ་ཕྱེ་བའི་

ཚུལ་དུ་སྙིང་གར་བཞག་པ་པདྨའི་རིགས་ཀྱི་ཕྱག་རྒྱ་བྱས་ལ། ཨོཾ་པདྨ་ཨུད་བྷ་ཝ་ཡེ་སྭཱ་ཧཱ། ཞེས་བརྗོད། ཕྱོགས་བཅུའི་རྒྱལ་བ་སྲས་བཅས་ལ་ཕྱག་བྱ་བར་བསམ་ལ། ཨོཾ་སརྦ་ཏ་ཐཱ་ག་ཏ་བཛྲ་པཱ་ད་བྷན་དྷ་ནཾ་ཀ་རོ་མི། ཞེས་བརྗོད། རང་ལུས་ཕུལ་བར་བསམ་ལ། ཕྱོགས་བཅུའི་རྒྱལ་བ་སྲས་བཅས་བདག་ལུས་འབུལ། །བཞེས་ནས་དངོས་གྲུབ་བླ་མེད་སྩལ་དུ་གསོལ། །ཞེས་བརྗོད། དེ་ནས་སྐྱབས་སེམས་ནི། སངས་རྒྱས་ཆོས་ཚོགས་མ་ལན་གསུམ་བརྗོད། གསོ་སྦྱོང་ནི། རྟེན་གྱི་དྲུང་དུ་ཕྱག་གསུམ་འཚལ། ས་གཞི་སྤོས་ཀྱིས་མཎྜལ་ཕུལ་ལ། ཕྱོགས་བཅུའི་རྒྱལ་བ་སྲས་བཅས་བདག་ལ་

དགོངས། །སྔོན་གྱི་རྒྱལ་བས་གསོ་སྦྱོང་མཛད་པ་བཞིན། །བདག་ཀྱང་སང་ཉིན་ཉི་མ་མ་ཤར་བར། །འགྲོ་ལ་ཕན་ཕྱིར་གསོ་སྦྱོང་བླང་བར་བགྱི། །སྲོག་གཅོད་མ་བྱིན་ལེན་དང་མི་ཚངས་སྤྱོད། །རྫུན་ཆང་ཁྲི་སྟན་ཆེ་མཐོ་དུས་མིན་ཟས། །དྲི་དང་རྒྱན་ཕྲེང་གླུ་གར་སྤང་བར་བྱ། །བླ་མེད་བྱང་ཆུབ་གོ་འཕང་མྱུར་ཐོབ་ཤོག །ཨོཾ་ཨ་མོ་གྷ་ཤཱི་ལ་སཾ་བྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ་པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ་ཨ་ཝ་ལོ་ཀི་ཏེ་ཧཱུྃ་ཕཊ་སྭཱ་ཧཱ། ཞེས་ཚུལ་ཁྲིམས་རྣམ་དག་གི་གཟུངས་ཉེར་གཅིག་བརྗོད། ཚུལ་ཁྲིམས་བསླབ་པ་རྒྱུད་ལ་སྐྱེ་གྱུར་ཅིག །སྐྱེས་པ་མི་ཉམས་གོང་དུ་འཕེལ་བར་ཤོག །ཅེས་སྨོན་ལམ་གདབ། དེ་ནས་མཆོད་པ་བྱིན་རླབས་ནི། རང་ཉིད་སྤྱན་རས་གཟིགས་ཀྱི་སྐུ་རུ་གྱུར། །འོད་འཕྲོས་མཆོད་པའི་མ་དག་ཉེས་སྐྱོན་སྦྱངས། །བྷཱུཾ་ལས་རིན་པོ་ཆེ་ཡི་སྣོད་རྣམས་སུ། །ཨོཾ་ལས་མཆོད་པའི་ཚོགས་རྣམས་འབྱུང་གྱུར་ཅིག །ཨོཾ་ཨཱཿཧཱུཾ། ལན་གསུམ། ཚོགས་ཞིང་སྤྱན་འདྲེན་ནི། རང་ལས་འོད་འཕྲོས་རྒྱལ་བ་སྲས་བཅས་རྣམས། །སྤྱན་དྲངས་མདུན་གྱི་ནམ་མཁར་བཞུགས་པར་གྱུར། །ཡན་ལག་བདུན་པ་ནི། ལུས་ངག་ཡིད་གསུམ་གུས་པས་ཕྱག་འཚལ་ལོ། །དངོས་འབྱོར་ཡིད་ཀྱིས་སྤྲུལ་

པའི་མཆོད་པ་འབུལ། །མི་དགེ་སྡིག་པ་བྱས་ཚད་མཐོལ་ལོ་བཤགས། །སྐྱེ་འཕགས་དགེ་བ་རྣམས་ལ་རྗེས་ཡི་རང་། །ཟབ་ཅིང་རྒྱ་ཆེའི་ཆོས་འཁོར་བསྐོར་བར་བསྐུལ། །མྱ་ངན་མི་འདའ་བཞུགས་པར་གསོལ་བ་འདེབས། །རྣམ་དཀར་དགེ་ཚོགས་སངས་རྒྱས་ཐོབ་ཕྱིར་བསྔོ། །རྫོགས་པའི་སངས་རྒྱས་གོ་འཕང་མྱུར་ཐོབ་ཤོག །ཚད་མེད་བཞི་ནི། སེམས་ཅན་ཐམས་ཅད་བདེ་དང་བདེ་རྒྱུ་ལྡན། །སྡུག་བསྔལ་སྡུག་བསྔལ་རྒྱུ་དང་བྲལ་བར་ཤོག །སྡུག་བསྔལ་མེད་པའི་བདེ་དང་མི་འབྲལ་ཞིང་། །ཆགས་སྡང་བྲལ་བའི་བཏང་སྙོམས་ལ་གནས་ཤོག །ཚོགས་ཞིང་ཐམས་ཅད་རང་གནས་གཤེགས་པར་གྱུར། །དེ་ནས་བདག་མདུན་བུམ་གསུམ་བསྐྱེད་པ་ནི། །ཨོཾ་སྭཱ་བྷཱ་ཝ་ཤུདྷ་སརྦ་དྷརྨ་སྭ་བྷཱ་ཝ་ཤུད་དྷོ྅་ཧཾཿ བདག་མདུན་བུམ་གསུམ་སྟོང་པ་ཉིད་དུ་གྱུར། །སྟོང་པའི་ངང་ལས་པད་ཟླའི་གདན་སྟེང་དུ། །རང་ཉིད་ཧྲཱིཿལས་འཕགས་པ་བཅུ་གཅིག་ཞལ། །ཕྱག་སྟོང་སྤྱན་སྟོང་ཞབས་གཉིས་བཞེངས་ནས་བཞུགས། །མདུན་དུ་བྷྲཱུཾ་ལས་གཞལ་ཡས་ཁང་གི་དབུས། །པདྨའི་ལྟེ་བར་ཧྲཱིཿལས་བཅུ་གཅིག་ཞལ། །ཕྱག་སྟོང་སྤྱན་སྟོང་ཞབས་གཉིས་བཞེངས་

ནས་བཞུགས། །གཙོ་བོའི་ཕྱོགས་བཞིར་པདྨ་འདབ་བཞི་ལ། །ཧཱུཾ་ལས་མི་བསྐྱོད་ཏཱཾ་ལས་རིན་འབྱུང་དང་། །ཨོཾ་ལས་རྣམ་སྣང་ཨཱཿལས་དོན་གྲུབ་བཞུགས། །བུམ་པའི་ནང་དུ་ཧྲཱིཿལས་བཅུ་གཅིག་ཞལ། །ཕྱག་སྟོང་སྤྱན་སྟོང་ཞབས་གཉིས་བཞེངས་ནས་བཞུགས། །བདག་མདུན་བུམ་གསུམ་ལྷ་ཡི་ཐུགས་ཀ་རུ། །ཡེ་ཤེས་སེམས་དཔའ་འཕགས་པ་ཚོན་གང་གི །ཐུགས་ཀར་ཏིང་འཛིན་སེམས་དཔའ་ཧྲཱིཿཡིག་ལ། །བཟླ་བྱའི་སྔགས་ཀྱི་ཕྲེང་བས་བསྐོར་བར་གྱུར། །གནས་གསུམ་འབྲུ་གསུམ་ཧྲཱིཿལས་འོད་འཕྲོས་ལྷ། །ཡེ་ཤེས་སྤྱན་དྲངས་དམ་ཚིག་སོ་སོར་ཐིམ། །སླར་ཡང་འོད་འཕྲོས་དབང་ལྷ་སྤྱན་དྲངས་ནས། །དབང་བསྐུར་སྒྲིབ་དག་རིགས་ལྔས་དབུ་བརྒྱན་གྱུར། །མཆོད་པ་ནི། རང་གི་ཐུགས་ཀའི་ཧྲཱིཿ ཡིག་ལས་བྱུང་བའི། །མཆོད་པའི་ལྷ་མོ་མང་པོས་མཆོད་པར་གྱུར། །ཨོཾ་ཨཱརྱ་ལོ་ཀི་ཤྭ་ར་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏིཙྪ་སྭཱ་ཧཱ། བསྟོད་པ་ནི། འགྲོ་བ་ཡོངས་ལ་བུ་གཅིག་ལྟར་བརྩེ་བའི། །འཕགས་པ་སྤྱན་རས་གཟིགས་ལ་ཕྱག་འཚལ་བསྟོད། །བཟླས་དམིགས་ནི། རང་གི་ཐུགས་ཀའི་ཧྲཱིཿཡིག་སྔགས་ཕྲེང་ལས། །འོད་འཕྲོས་འཕགས་མཆོད་འགྲོ་བའི་སྒྲིབ་

པ་སྦྱངས། །མདུན་བསྐྱེད་ལས་ཀྱང་འགྲོ་བའི་དོན་མཛད་ཅིང་། །བུམ་པའི་ལྷ་ལས་བདུད་རྩི་འབབ་པར་གྱུར། །ཨོཾ་ན་མོ་རཏྣ་ཏྲ་ཡཱ་ཡ། ན་མཿ ཨཱརྱ་ཛྙཱ་ན་སཱ་ག་ར་བཻ་རོ་ཙ་ན། བྱཱ་ཧ་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སཾ་མྱཀྶཾ་བུདྡྷ། ན་མཿསརྦ་ཏ་ཐཱ་ག་ཏེ་བྷྱཿ ཨརྷ་ཏེ་བྷྱཿ སམྱཀྶཾ་བུདྡྷེ་བྷྱཿ ན་མ་ཨཱརྱ་ཨ་ཝ་ལོ་ཀི་ཏེ་ཤྭ་རཱ་ཡ། བོ་དྷི་སཏྭ་ཡ། མ་ཧཱ་སཏྭ་ཡ། མ་ཧཱ་ཀཱ་རུ་ཎི་ཀཱ་ཡ། ༈ ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ་ཝཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མེ་ཝ་རེ། ཨི་ལི་མི་ལི་ཙི་ཏི་ཛཱ་ལ་མ་པ་ནཱ་ཡ་སྭཱ་ཧཱ། ཞེས་པའི་གཟུངས་རིང་བརྒྱ་རྩ་བརྒྱད་བཟླས་མཐར་བུམ་ལྷ་ཡེ་ཤེས་པ་གཤེགས་དམ་ཚིག་པ། །འོད་ཞུ་བུམ་པའི་ཆུ་དང་དབྱེར་མེད་གྱུར། །དེ་ནས་པོ་བསྟོད་ནི། རང་གི་སྤྱི་གཙུག་པད་ཟླར་དགེ་སློང་མ། །དཔལ་མོ་བཞུགས་ནས་ངོ་ཆེན་མཛད་པར་གྱུར། །ཨོཾ་འཇིག་རྟེན་མགོན་པོ་ལ་ཕྱག་འཚལ་ལོ། ཞེས་ཕྱག་དང་བཅས་པོ་བསྟོད་ཉེར་གཅིག་བར་བྱའོ། །འདོད་གསོལ་ནི། འཕགས་པ་སྤྱན་རས་གཟིགས་དབང་ཐུགས་རྗེའི་གཏེར། །ཞེས་པའི་གསོལ་བ་བ་དབ། གཏོར་མ་བྱིན་རླབས་ནི། སྟོང་པའི་ངང་ལས་བྷྲཱུཾ་ལས་རིན་པོ་ཆེའི། །

སྣོད་དུ་ཨོཾ་ལས་གཏོར་མ་བདུད་རྩིར་གྱུར། །ཨོཾ་ཨཱཿཧཱུཾ། གཏོར་འབུལ་ནི། ཡི་དམ་ཐུགས་རྗེ་ཆེན་པོར་མཆོད་གཏོར་འབུལ། །བླ་མེད་མཆོག་གི་དངོས་གྲུབ་སྩལ་དུ་གསོལ། །མཁའ་འགྲོ་ཆོས་སྐྱོང་རྣམས་ལ་གཏོར་མཆོད་འབུལ། །བསྟན་དང་བསྟན་འཛིན་བུ་བཞིན་སྐྱོང་བར་མཛོད། །ཡུལ་ལྷ་གཞི་བདག་རྣམས་ལ་གཏོར་མཆོད་འབུལ། །འགལ་རྐྱེན་ཀུན་སོལ་མཐུན་རྐྱེན་སྒྲུབ་པར་མཛོད། །ཁྲུས་གསོལ་ནི། དངོས་སུ་མེ་ལོང་ལ་ལྷའི་གཟུགས་བརྙན་ཤར་བ་ལ་བུམ་ཆུས་ཁྲུས་གསོལ་ལ། འཕགས་པ་ཐུགས་རྗེ་ཆེན་པོའི་ལྷ་ཚོགས་ལ། །དྲི་ཞིམ་བདུད་རྩིའི་ཆུ་ཡིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ༴ཤྲི་ཡེ་ཨཱཿཧཱུྃ། རྒྱལ་བ་སྲས་བཅས་ཁྲུས་ཆབ་འདི་གསོལ་བས། །སེམས་ཅན་ལས་ཉོན་སྒྲིབ་པ་དག་གྱུར་ཅིག །ཨོཾ་སརྦ་ཏ་ཐཱ༴ སྐུ་ཕྱི་ནི། དེ་དག་སྐུ་ལ་མཚུངས་པ་མེད་པའི་གོས༴ ན་བཟའ་ནི། སྲབ་འཇམ་ཡང་བ་ལྷ་ཡི་གོས་ཕུལ་བས། །བདག་གཞན་བཟོད་པའི་གོས་ཀྱིས་བརྒྱན་པར་ཤོག །རྒྱན་འབུལ་ནི། ཡིད་འོང་མཛེས་པའི་རིན་ཆེན་རྒྱན་ཕུལ་བས། །འགྲོ་ཀུན་མཚན་དཔེས་བརྒྱན་པའི་སྐུ་ཐོབ་ཤོག །བཟོད་གསོལ་ནི། ཏིང་འཛིན་མ་གསལ་སྔགས་མ་དག་པ་དང་། ལྷག་ཆད་འགའ་འཁྲུལ་ཅི་མཆིས་

བཟོད་པར་གསོལ། །ཡིག་བརྒྱ་བརྗོད། རང་ཁྲུས་ནི། འཕགས་པ་མདུན་བྱོན་སྐུ་ལས་བདུད་རྩི་བབས། །རང་གི་ནད་གདོན་སྡིག་སྒྲིབ་དག་པར་གྱུར། །ཨོཾ་མ་ཎི་པདྨེ་ཧཱུཾ། ཅི་མང་བཟླ་ཞིང་། བུམ་ཆུ་འཐུང་ཁྲུས་བྱ། སྨྱུང་གནས་དངོས་གཞིའི་ཉིན་མི་འཐུང་། ཁྲུས་བྱ། དེ་ནས་བསྔོ་སྨོན་བཀྲ་ཤིས་ཀྱི་ཚིགས་བཅད་བརྗོད། ཐུན་མཚམས་ཀྱི་བྱ་བ་ལ་འཇུག །དེ་ཡང་ཉིན་རེར་ཆོ་ག་གསུམ་གཏོང་དགོས། ཆོ་ག་དང་པོ་ལ་གསོ་སྦྱོང་ལེན། གཞན་དང་གྲོལ་ཉིན་གསོ་སྦྱོང་བཞག་ལ་གཞན་རྣམས་སྔར་བཞིན་བྱ། ཆོ་ག་གཞན་ལ་འཇུག་པའམ། སྨྱུང་གནས་གྲོལ་ཉིན་མཇུག་ཏུ་དཀྱིལ་འཁོར་བསྡུ་རིམ་ནི། ཡེ་ཤེས་པ་གཤེགས་དམ་ཚིག་རང་ལ་བསྡུ། །རང་ཡང་མི་དམིགས་མཁའ་ལ་འཇའ་ལྟར་ཡལ། །སྟོང་པའི་ངང་ལས་རང་ཉིད་སྤྱན་རས་གཟིགས། །ཞལ་གཅིག་ཕྱག་གཉིས་སྐུ་རུ་བཞེངས་པར་གྱུར། །བསྔོ་སྨོན་ནི། འདིས་མཚོན་དུས་གསུམ་བསགས་པའི་དགེ་བ་རྣམས། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །རྫོགས་པའི་སངས་རྒྱས་གོ་འཕང་མྱུར་ཐོབ་ནས། །མཐའ་ཡས་འགྲོ་བ་མ་ལུས་འདྲེན་པར་ཤོག །བཀྲ་ཤིས་ནི། བླ་མ་ཡི་དམ་སངས་རྒྱས་བྱང་སེམས་དང་། །མཁའ་འགྲོ་ཆོས་སྐྱོང་སྲུང་མའི་བཀྲ་ཤིས་ཤོག །བདག་གཞན་སེམས་ཅན་གནས་སྐབས་

མཐར་ཐུག་གི །དོན་རྣམས་ཡིད་བཞིན་འགྲུབ་པའི་བཀྲ་ཤིས་ཤོག །དེ་ལྟར་ཆོ་ག་ལན་གཅིག་བཏང་ཡང་མཐར་བྱང་ཆུབ་ཀྱི་གོ་འཕང་ཐོབ་པར་འགྱུར། སྨྱུང་གནས་ལན་གཅིག་བསྲུངས་ན་བསྐལ་པ་བཞི་ཁྲིའི་འཁོར་བ་ཕྱིར་བསྙིལ། གཟུངས་སྔགས་ལན་གཅིག་བཟླས་ཀྱང་རྩ་བའི་ལྟུང་བ་བཞི་དང་། མཚམས་མེད་ལྔ་བྱས་པ་ཡང་དག་པར་འགྱུར། ལན་བརྒྱ་རྩ་བརྒྱད་བཟླས་ན་ལས་ངན་སྡིག་སྒྲིབ་ཀུན་བྱང་ཞིང་དག་ནས། སངས་རྒྱས་ཀྱི་ཏིང་ངེ་འཛིན་དང་། འོད་ཟེར་གྱི་དབང་བསྐུར་བའི་སྟོབས་ཐོབ། ས་དང་ཕ་རོལ་ཕྱིན་པ་ཡང་ཡོངས་སུ་རྫོགས་པར་འགྱུར་རོ། །ཐ་ན་སྤྱན་རས་གཟིགས་ཀྱི་མཚན་ལན་གཅིག་བརྗོད་ཀྱང་ཕྱིར་མི་ལྡོག་པའི་ས་ལ་གནས་པར་འགྱུར་རོ། །ཞེས་རྒྱུད་ལས་གསུངས་སོ། །དེས་ན་འདི་ལ་བརྩོན་པར་མཛོད་ཅིག །སྨྲས་པ། བོད་ཀྱི་ལྷ་སྐལ་འཕགས་པ་སྤྱན་རས་གཟིགས། །བསྙེན་པའི་ཆོ་ག་ཐར་པའི་ཐེམ་སྐས་ལ། །བརྟེན་ནས་སྐལ་བཟང་སྐྱེ་བོ་རྣམ་མཁྱེན་གྱི། །གོ་འཕང་མཐོན་པོར་སོན་པའི་སྨོན་ལམ་འཚལ། །ཞེས་སྨྱུང་གནས་ཆོ་ག་ཐར་པའི་ཐེམ་སྐས་ཞེས་བྱ་བ་འདི་ནི། དད་གཏོང་ཤེས་རབ་སྙིང་རྗེ་དང་ལྡན་པའི་སློབ་བུ་སྦྱིན་པ་ནོར་བུས་ཁོ་བོ་ལ་སྨྱུང་གནས་ཆོ་ག་འདོན་བདེ་བའི་ཕྱིར་ཚིགས་སུ་བཅད་པ། དགེ་སྦྱོར་གཞན་བྱེད་དགོས་སམ། བྲེལ་བ་འདྲ་བྱུང་དུས་ཇ་ཐེབ་གཅིག་ཙམ་ལ་ཡང་བཏོན་ན་ཚར་བའི་ཆོ་ག་ཤིན་ཏུ་བསྡུས་པ་ཞིག་དགོས་ཞེས་བསྐུལ། ༸ངོར་བྱ་བཏང་ཚོགས་དྲུག་རང་གྲོལ་གྱིས་དཔའ་བོ་མཁའ་འགྲོ་སྤྲིན་བཞིན་འདུ་བའི་གནས་མཆོག་གངས་རིའི་རྫུ་འཕྲུལ་ཕུག་ཏུ་སྦྱར་བའོ། །འདིས་ཀྱང་གཞན་ལ་ཕན་ཐོགས་པར་གྱུར་ཅིག །སརྦ་མངྒ་ལཾ།།

རྡོ་རྗེ་སེམས་དཔའི་ཁྲུས་ཀྱི་ཆོ་ག་བདུད་རྩིའི་བུམ་བཟང་།

༄༅། །རྡོ་རྗེ་སེམས་དཔའི་ཁྲུས་ཀྱི་ཆོ་ག་བདུད་རྩིའི་བུམ་བཟང་བཞུགས་སོ།།

དཔལ་རྡོ་རྗེ་སེམས་དཔའི་སྒོནས་ཁྲུས་བྱེད་པར་འདོད་པས། དང་པོ་སྐྱབས་འགྲོ་སེམས་སྐྱེད་རྣམས་སྔོན་དུ་བཏང་སྟེ། ལྟ་བའི་གདེངས་དང་ལྡན་པས། ཨ། རང་སེམས་མ་བཅོས་སྟོང་པའི་རང་རྩལ་ལས། རང་རིག་རྡོ་རྗེ་སེམས་དཔའ་སྐུ་མདོག་གངས་རི་ལྟར་དཀར་བ། ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་ཡུམ་དང་སྦྱོར་བ། གཉིས་ཀའང་དར་དང་རིན་པོ་ཆེའི་རྒྱན་གྱིས་བརྒྱན་པ། སྣང་ལ་རང་བཞིན་གྱིས་མ་གྲུབ་པ། ལྷུན་གྲུབ་འོད་ཀྱི་སྐུ་རུ་ལམ་མེ།

སྟོང་གསལ་འཛིན་པ་མེད་པར་ཤིག་གེ །གསལ་ལ་ཕྱོགས་ལྷུང་མེད་པར་དྭངས་སང་ངེར་གསལ་བར་གྱུར། ཅེས་དར་གཅིག་སེམས་བཟུང་། ༀ་བཛྲ་ཨ་མྲྀ་ཏས་བསངས། སྭཱ་བྷཱ་ཝས་སྦྱངས། མདུན་གྱི་བུམ་པ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་བཾ་ལས་བྱུང་བའི་བུམ་པ་དཀར་པོ་ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་དཀྲིས་ཤིང་། དཔག་བསམ་ཤིང་གིས་ཁ་བརྒྱན་པ། དྭངས་ཤིང་གསལ་བའི་ནང་དུ་འོད་ལྔའི་ཐིག་ལེ་འཁྲིགས་པའི་

གཞལ་ཡས་སུ་ཉི་ཟླའི་གདན་གྱི་སྟེང་དུ། དཔལ་རྡོ་རྗེ་སེམས་དཔའ་སྐུ་མདོག་ཤེལ་གྱི་རི་བོ་ལ་ཉི་མ་ཤར་བ་ལྟ་བུ། ཞལ་གཅིག་ཕྱག་གཉིས་ཀྱིས་རྡོར་དྲིལ་འཛིན་པས་ཡུམ་དང་གཉིས་སུ་མེད་པར་སྦྱོར་བའི་འོད་སྐུ་དྭངས་གསལ་གྱི་ཐུགས་ཀར་ཟླ་སྟེང་ཐུགས་སྲོག་ཡི་གེ་ཨ་ཀར་པོའི་མཐར་ཐིག་ལེ་ལྔ་ཚོམ་གྱི་ནང་དུ་ཡང་སྙིང་འབྲུ་ལྔ་པ་གཡོ་འགུལ་མེད་པར་གནས་པ། དེའི་མཐར་ཡི་གེ་བརྒྱ་པའི་སྔགས་འབྲུ་རྣམས་ཁ་དོག་དཀར་པོ་གཡས་བསྐོར་དུ་འཁོར་བ། དེ་ལས་འོད་ཟེར་རང་མདོག་དཀར་པོའི་ཚོགས་དཔག་ཏུ་མེད་པ་ཕྱོགས་བཅུར་འཕྲོ་ཞིང་། རང་གཞན་གྱི་སྒྲིབ་གཉིས་བག་ཆགས་སྡིག་སྒྲིབ་དང་བཅས་པ་ཐམས་ཅད་ཡིད་ལ་དྲན་པ་ཙམ་གྱིས་འཇོམས་ཤིང་། དྲུངནས་འབྱིན་ནུས་པ་གཅིག་ཏུ་སྐད་ཅིག་གིས་བཀྲ་ལམ་གྱིས་གསལ་བར་གྱུར། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོ། གཉིས་སུ་མེད་པར་གྱུར། ཨོཾ་བཛྲ་སཏྭ་ས་པ་རི་ཝཱ་ར་ཨརྒྷཾ་ནས་ཤབྡའི་བར་མཆོད། ཧཱུཾ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་

མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་སེམས་དཔར་ཕྱག་འཚལ་བསྟོད། །ཅེས་པས་བསྟོད། བདག་ཉིད་རྡོ་རྗེ་སེམས་པའི་ཐུགས་ཀ་ནས་འོད་ཟེར་འཕྲོས་པས། བུམ་པའི་ལྷའི་ཐུགས་རྒྱུད་བསྐུལ་བས་ཐུགས་སྲོག་སྔགས་ཕྲེང་དང་བཅས་པ་ལས་བདུད་རྩིའི་རྒྱུན་བབས་པས་བུམ་པ་བདུད་རྩིས་ཀར་མེར་གྱིས་གང་བར་གྱུར་པར་བསམ་ལ། ཡིག་བརྒྱ་བཟླ་བའམ། ཡང་ན་འབྲུ་ལྔ་པ་ཅི་མང་བཟླས་མཐར། བུམ་ལྷ་འོད་དུ་ཞུ་ནས་བུམ་པའི་ཆུ་དང་དབྱེར་མི་ཕྱེད་པར་གྱུར། དེ་ནས་ཁྲུས་བྱ་བ་ནི། དཔལ་རྡོ་རྗེ་སེམས་དཔའི་སྐུ་གསུང་ཐུགས་གཉིས་སུ་མེད་པའི་ཡེ་ཤེས་ཀྱི་བུམ་ཆུ་འདིས། སློབ་མ་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ལུས་ཀྱི་ཕྱི་ནང་བར་གསུམ་ཐམས་ཅད་བཀྲུས་པས། ཚོ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་དམ་ཚིག་ཉམས་ཆག་ཐམས་ཅད་དུད་ཁུ་དང་སོལ་ཁུའི་རྣམ་པ། ནད་ཐམས་ཅད་རྣག་ཁྲག་ཆུ་སེར། གདོན་ཐམས་ཅད་སྲོག་ཆགས་སྦལ་ལྕོང་འབུ་སྲིན་སོགས་ཀྱི་རྣམ་པས་རྐང་ལག་གི་སེན་མོ་ཉི་ཤུ་དང་། འོག་སྒོ་གཉིས་དང་བ་སྤུའི་བུ་ག་ཐམས་ཅད་ནས།

ནག་ཉིལ་ཉིལ་ཐོན་ནས། ས་རིམ་པ་བདུན་གྱི་འོག་ཏུ་སོང་བས། སྐྱེ་འགྲོའི་སྲོག་དབུགས་ལ་རྔམས་ཤིང་། ཁ་གདངས་ཡོད་པའི་གཤིན་རྗེ་རྣམས་ཀྱི་ཁ་ནང་དུ་བདུད་རྩི་ཤ་ཁྲག་གི་རྣམ་པར་ཡང་དང་ཡང་དུ་བབས་པས་ཚིམས་ཏེ། གནོད་པའི་སེམས་ཞི་ནས་བྱམས་པའི་སེམས་ཀྱིས་རང་ལ་དགྱེས་པར་གྱུར། ཡང་ཚ་དམྱལ་བ་རྣམས་ལ་བདུད་རྩི་བསིལ་བའི་ཆར་དང་བཅས། གྲང་དམྱལ་བ་རྣམས་ལ་བདུད་རྩི་འོད་ཟེར་དྲོད་དང་ལྡན་པའི་རྣམ་པར་བབས་པས་དམྱལ་བ་རྣམས་ཀྱི་ཚ་གྲང་གི་སྡུག་བསྔལ་ཞི་ནས་བདེ་བའི་ལུས་སུ་གྱུར། ལྕགས་བསྲེགས་ཀྱི་ཁང་པ་སོགས་བསིལ་ཁང་དང་། གསལ་ཤིང་གི་མཚོན་ཆ་སོགས་དཔག་བསམ་གྱི་ཤིང་ལ་སོགས་པའི་ཡིད་འོང་གི་རྣམ་པར་གྱུར་བསམ་ལ། སློབ་མ་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ། ཁྱད་པར་དུ་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་སྡིག་སྒྲིབ་ཉེས་ལྟུང་གི་དྲི་མའི་ཚོགས་ཐམས་ཅད་ཤནྟིཾ་ཀུ་རུ་ཡེ་སྭཱ་ཧཱ། དེ་ནས་བྱབས་པ་ནི། བདག་ཉིད་རྡོ་རྗེ་སེམས་དཔའི་

ཐུགས་ཀ་ནས་འོད་ཟེར་གྱི་ཚོགས་དཔག་ཏུ་མེད་པ་འཕྲོས་པས། སློབ་མ་རྣམས་ཀྱི་ལུས་ཀྱི་སྟོད་སྨད་ཐམས་ཅད་དུ་ཞུགས་པས། ལུས་ཀྱི་ན་ཚ་སེམས་ཀྱི་སྡུག་བསྔལ་ཐམས་ཅད་རིན་པོ་ཆེ་སྦྱར་ལེན་གྱིས་སྦུར་མ་བླངས་པ་ལྟར་ཙེན་གྱིས་བླངས། འུབ་ཀྱིས་བསྡུས་ཏེ་ཁ་ནང་གི་ཆུ་ལ་ཐིམ་པར་གྱུར། བསྲུང་འཁོར་བསྒོམ་པ་ནི། འོ་རིགས་ཀྱི་བུ་ཁྱོད་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་དམ་ཚིག་ཉམས་ཆག་ཐམས་ཅད་བྱང་ཞིང་དག་ནས། ལུས་ཤེལ་སྒོང་གཡའ་དག་པ་ལྟར་ཕྱི་བལྟས་ནང་གསལ་ཞིང་། ནང་བལྟས་ཕྱི་གསལ་བ་གཅིག་ཏུ་གྱུར་པའི་སྙིང་གར་འོད་ཀྱི་གའུ་ཁ་སྦྱོར་གྱི་ནང་དུ་བསྲུང་བྱའི་རྣམ་པར་ཤེས་པའི་ངོ་བོ་ཨ་ཡིག་གི་གཟུགས་སུ་གསལ་བ་དེ་བཅུག་ནས་བརྟན་པར་བྱས། བདག་ཉིད་རྡོ་རྗེ་སེམས་དཔའི་ཐུགས་ཀ་ནས་ཡེ་ཤེས་ཀྱི་རྡོ་རྗེ་རྩེ་ལྔ་རྩེ་དགུ་རྡོ་རྗེ་རྒྱ་གྲམ་ཆེ་ཆུང་ཁ་དོག་སྣ་ཚོགས་པ་དཔག་ཏུ་མེད་པ་འཕྲོས་པས། སློབ་མའི་ལུས་ཀྱི་ཕྱི་ནང་བར་གསུམ་ཤ་སྐྱི་པགས་མཚམས་ཐམས་ཅད་ལ་ཁྱབ་པས། རྡོ་རྗེ་ཆེ་བའི་ཁོང་གསེང་རྣམས་སུ་རྡོ་རྗེའི་རྡུལ་ཕྲ་རབ་ཀྱིས་བར་

མཚམས་མེད་པར་གཏམས་ཏེ། གདོན་བགེགས་འབྱུང་པོ་མི་མ་ཡིན་དང་། འཆི་བདག་གཤིན་རྗེ་སོགས་གང་གིས་ཀྱང་གླགས་མི་ནུས་པར་མི་ཤིགས་པའི་བསྲུང་བའི་འཁོར་ལོར་གྱུར། ཨོཾ་བཛྲ་རཀྵ་རཀྵ་ཡེ་སྭཱ་ཧཱ། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། བཀྲ་ཤིས་སོགས་ཀྱིས་མཐའ་བརྒྱན་པར་བྱའོ། །རྡོ་རྗེ་སེམས་དཔའི་ཁྲུས་ཀྱིཆོ་ག་བདུད་རྩིའི་བུམ་བཟང་འདི་ནི། དག་སྣང་མོས་གུས་བརྩོན་འགྲུས་ཀྱི་ནོར་གྱི་ཕྱུག་ཅིང་། ཟབ་དོན་གཅོད་ཀྱི་གདམས་པ་ལ་མི་ཕྱེད་པའི་དད་པ་བརྟན་པོ་ཐོབ་པའི་མཆེད་གྲོགས་འོད་ཟེར་གྱིས་བསྐུལ་ངོར། རྣལ་འབྱོར་ཞབས་དཀར་པས་རང་གཞན་ཡོངས་ལ་ཕན་ཕྱིར་སྦྱར་བའོ། །སརྦ་མངྒ་ལཾ།།

གཅོད་དམིགས་བདག་འཛིན་གཅོད་པའི་སྟྭ་རེ།

༄༅། །གཅོད་དམིགས་བདག་འཛིན་གཅོད་པའི་སྟ་རེ་བཞུགས་སོ། །ཐོག་མར་སངས་རྒྱས་ཆོས་ཚོགས་མའི་སྐྱབས་སེམས་བྱ། དེ་ནས་དཀར་འགྱེད་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །ཐོད་པ་བྲེགས་ནས་མི་མགོའི་སྒྱེད་བུར་བཀལ། །ཕཊ྄། གཟུགས་ཕུང་གཏུབས་ནས་ཐོད་པའི་ནང་དུ་བསྐྱུར། །རླུང་གཡོས་མེ་སྦར་ཐོད་པའི་རྫས་རྣམས་ཁོལ། །ཕཊ྄། སྟེང་དུ་འབྲུ་གསུམ་འོད་དུ་ཞུ་བ་ལས། །འདོད་ཡོན་ལྔ་ལྡན་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུཾ། ལན་གསུམ། ཕཊ྄། དཀོན་མཆོག་སྲི་ཞུའི་མགྲོན་ལ་མཆོད་པ་འབུལ། །མགོན་པོ་ཡོན་ཏན་མགྲོན་ལ་དགའ་སྟོན་འགྱེད། །ཕཊ྄། རིགས་དྲུག་སྙིང་རྗེའི་མགྲོན་ལ་སྦྱིན་པ་གཏོང་། །གདོན་བགེགས་ལན་ཆགས་མགྲོན་ལ་བུ་ལོན་འཇལ། །ཕཊ྄། བླ་མ་དཀོན་མཆོག་མཆོད་པས་མཉེས་གྱུར་ཅིག །དམ་ཅན་རྒྱ་མཚོའི་ཐུགས་དམ་བསྐངས་གྱུར་ཅིག །ཕཊ྄། རིགས་དྲུག་སེམས་ཅན་འདོད་པ་ཚིམ་གྱུར་ཅིག །གདོན་བགེགས་ལན་ཆགས་བུ་ལོན་བྱང་གྱུར་ཅིག །དམར་

འགྱེད་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །པགས་པ་གཤགས་ནས་ཕྱོགས་བཞིར་དམར་ཆལ་བཀྲམ། །ཕཊ྄། ཤ་གཏུབས་ཁྲག་དང་སྦྲགས་ནས་ལྷ་འདྲེ་ལ། །ཆེ་ཐོབ་ཆུང་ཐོབ་ཕངས་པ་མེད་པར་སྦྱིན། །ཕཊ྄། པགས་པ་གཏུབས་ནས་མཁོ་དགུའི་དངོས་པོ་རུ། །བསྒྱུར་ནས་སྦྱིན་པས་ལྷ་འདྲེ་ཚིམ་གྱུར་ཅིག །ཕཊ྄། ལྷ་འདྲེ་ཚིམས་ནས་བཞད་སྒྲ་དི་རི་རི། །རང་རང་སོ་སོའི་གནས་སུ་སླེབས་པར་གྱུར། །ཕཊ྄། ཆོས་རྣམས་རྨི་ལམ་བཞིན་དུ་སེམས་ཀྱིས་འཕྲུལ། །སེམས་ཉིད་སྟོང་གསལ་འཛིན་མེད་ངང་ལ་བཞག །ཕཊ྄། འདིས་མཚོན་དགེ་ཚོགས་སངས་རྒྱས་ཐོབ་ཕྱིར་བསྔོ། །རྫོགས་པའི་སངས་རྒྱས་གོ་འཕང་མྱུར་ཐོབ་ཤོག །ཅེས་པ་འདི་ནི་སློབ་བུ་སྐལ་བཟང་ཤེས་རབ་ཀྱིས་བསྐུལ་ངོར་༧བྱ་བཏང་ཚོགས་དྲུག་རང་གྲོལ་གྱིས་གནས་ཆེན་ལ་ཕྱི་ནས་སྦྱར་བའོ།།

ཟབ་ལམ་གཅོད་ཀྱི་དམིགས་རིམ།

༄༅། །ཟབ་ལམ་གཅོད་ཀྱི་དམིགས་རིམ་བཞུགས་སོ།།

སྐྱབས་སེམས་ནི། སངས་རྒྱས་ཆོས་ཚོགས་མ་ལན་གསུམ་བྱ། དེ་ནས་མགྲོན་གོང་འོག་ཐུན་མོང་དུ་བདུད་རྩིའི་འགྱེད་བྱ་བ་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །ཐོད་པ་བྲེགས་ནས་མི་མགོའི་སྒྱེད་བུར་བཀལ། །ཕཊ྄། གཟུགས་ཕུང་གཏུབས་ནས་ཐོད་པའི་ནང་དུ་བསྐྱུར། །རླུང་གཡོས་མེ་སྦར་ཐོད་པའི་རྫས་རྣམས་ཁོལ། །ཕཊ྄། སྟེང་དུ་འབྲུ་གསུམ་འོད་དུ་ཞུ་བ་ལས། །འདོད་ཡོན་ལྔ་ལྡན་

བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུཾ། ལན་གསུམ། ཕཊ྄། དཀོན་མཆོག་སྲི་ཞུའི་མགྲོན་ལ་མཆོད་པ་འབུལ། །མགོན་པོ་ཡོན་ཏན་མགྲོན་ལ་དགའ་སྟོན་འགྱེད། །ཕཊ྄། རིགས་དྲུག་སྙིང་རྗེའི་མགྲོན་ལ་སྦྱིན་པ་གཏོང་། །གདོན་བགེགས་ལན་ཆགས་མགྲོན་ལ་བུ་ལོན་འཇལ། །ཕཊ྄། བླ་མ་དཀོན་མཆོག་མཆོད་པས་མཉེས་གྱུར་ཅིག །དམ་ཅན་རྒྱ་མཚོའི་ཐུགས་དམ་བསྐང་གྱུར་ཅིག །ཕཊ྄། རིགས་དྲུག་སེམས་ཅན་འདོད་པ་ཚིམ་གྱུར་ཅིག །གདོན་བགེགས་ལན་ཆགས་བུ་ལོན་བྱང་

གྱུར་ཅིག །དེ་ནས་དཀར་པོ་འོ་མའི་འགྱེད་བྱ་བ་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །ཐོད་པ་བྲེགས་ནས་མི་མགོའི་སྒྱེད་བུར་བཀལ། །ཕཊ྄། གཟུགས་ཕུང་གཏུབས་ནས་ཐོད་པའི་ནང་དུ་བསྐྱུར། །རླུང་གཡོས་མེ་སྦར་ཐོད་པའི་རྫས་རྣམས་ཁོལ། །ཕཊ྄། སྟེང་དུ་འབྲུ་གསུམ་འོད་དུ་ཞུ་བ་ལས། །འདོད་ཡོན་ལྔ་ལྡན་འོ་མའི་རྒྱ་མཚོར་གྱུར། །ཨོཾ་ཨཱཿཧཱུཾ། ལན་གསུམ་བརྗོད། ཕཊ྄། རང་ལ་གནོད་པའི་ལྷ་འདྲེའི་གཙོ་བྱས་པའི། །སྣང་ཞིང་སྲིད་པའི་ལྷ་འདྲེ་ཡོངས་ལ་སྦྱིན། །ཕཊ྄། ལྷ་འདྲེ་ཀུན་གྱིས་འཐུང་ཞིང་ཁྲུས་བྱས་པས། །ལུས་ནད་སེམས་ཀྱི་སྡུག་བསྔལ་དག་གྱུར་ཅིག །དེ་ནས་དཀར་ལ་མི་དགའ་བ་ལ་ཁྲག་གི་དམར་འགྱེད་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །ཐོད་པ་བྲེགས་ནས་མི་མགོའི་སྒྱེད་བུར་བཀལ། །ཕཊ྄། གཟུགས་ཕུང་གཏུབས་ནས་ཐོད་པའི་ནང་དུ་བསྐྱུར། །རླུང་གཡོས་མེ་སྦར་

ཐོད་པའི་རྫས་རྣམས་ཁོལ། །ཕཊ྄། སྟེང་དུ་འབྲུ་གསུམ་འོད་དུ་ཞུ་བ་ལས། །འདོད་ཡོན་ལྔ་ལྡན་ཁྲག་གི་རྒྱ་མཚོར་གྱུར། །ཨོཾ་ཨཱཿཧཱུྃ། ལན་གསུམ་བརྗོད། ཕཊ྄། དཀར་ལ་མི་དགའ་དམར་ལ་དགའ་བ་ཡི། །སྣང་ཞིང་སྲིད་པའི་ལྷ་འདྲེ་ཡོངས་ལ་སྦྱིན། །ཕཊ྄། ངོམས་ཤིང་ཚིམ་ནས་བསམ་ངན་སྦྱོར་རྩུབ་ཞི། ཕན་པ་བྱང་ཆུབ་སེམས་དང་ལྡན་གྱུར་ཅིག །དེ་ནས་ཡང་ཁྲ་འགྱེད་དམ། སྣ་ཚོགས་འགྱེད་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་ཕུང་གི །པགས་པ་གཤག་ནས་ཕྱོགས་བཞིར་དམར་ཆལ་བཀྲམ། །ཕཊ྄། ཤ་གཏུབས་ཁྲག་དང་སྦྱར་ནས་ལྷ་འདྲེ་ལ། །ཆེ་ཐོབ་ཆུང་ཐོབ་ཕྱོགས་རིས་མེད་པར་སྦྱིན། །ཕཊ྄། པགས་པ་གཏུབས་པ་མཁོ་དགུའི་དངོས་པོ་རུ། །བསྒྱུར་ནས་སྦྱིན་པས་ལྷ་འདྲེ་ཚིམ་གྱུར་ཅིག །དེ་ནས་གང་ལ་གང་འདོད་ཀྱི་འགྱེད་ནི། ཕཊ྄། རང་གི་སེམས་ཉིད་རྡོ་རྗེ་རྣལ་འབྱོར་མའི། །རྣམ་པར་སྤྱི་བོའི་གཙུག་ནས་རྒྱངས་ཀྱིས་ཐོན། །ཕཊ྄། ཕྱག་གཡས་གྲི་གུག་རྣོན་པོས་གཟུགས་

ཕུང་གི །མགོ་བོ་བཅད་ནས་ལྷན་སྐྱེས་འདྲེ་ལ་སྦྱིན། །ཕཊ྄། སྙིང་ཕྱུང་རང་ལ་གནོད་པའི་ལྷ་འདྲེར་སྦྱིན། །དོན་སྙིང་ལྔ་པོ་འདོད་ལ་དོན་སྙིང་སྦྱིན། །ཕཊ྄། དབང་པོ་ལྔ་པོ་འདོད་ལ་དབང་པོ་སྦྱིན། །ཡན་ལག་འདོད་པ་རྣམས་ལ་ཡན་ལག་སྦྱིན། །ཕཊ྄། པགས་པ་འདོད་པ་རྣམས་ལ་པགས་པ་སྦྱིན། །ཤ་རུས་ཁྲག་ཚིལ་འདོད་ལ་དེ་དག་སྦྱིན། །ཕཊ྄། ལྷ་འདྲེ་ཚིམ་པས་བཞད་སྒྲ་དི་རི་རི། །རང་རང་སོ་སོའི་གནས་སུ་སླེབ་པར་གྱུར། །ཕཊ྄། ཆོས་རྣམས་རྨི་ལམ་བཞིན་དུ་སེམས་ཀྱིས་འཕྲུལ། །སེམས་ཉིད་སྟོང་གསལ་འཛིན་མེད་ངང་ལ་བཞག །བསྔོ་སྨོན་བྱ་བ་ནི། ཕཊ྄། འདིས་མཚོན་དགེ་ཚོགས་སངས་རྒྱས་ཐོབ་ཕྱིར་བསྔོ། །མྱུར་དུ་སངས་རྒྱས་འགྲོ་དོན་བྱེད་པར་ཤོག །ཅེས་པ་འདི་ནི་སློབ་བུ་སྐལ་བཟང་ཤེས་རབ་ཀྱིས་བསྐུལ་ངོར། ནཱ་རོ་གསང་གཅོད་ཀྱི་དམིགས་རིམ་དང་མཐུན་པར་བྱ་བཏང་ཚོགས་དྲུག་རང་གྲོལ་གྱིས་དབེན་གནས་གངས་རི་ནས་སྦྱར་བའོ།། །།

ཟབ་ལམ་གཅོད་ཀྱི་ངག་འདོན་བདག་འཛིན་གཅོད་པའི་སྟུ་རེ།

༄༅། །ཟབ་ལམ་གཅོད་ཀྱི་ངག་འདོན་བདག་འཛིན་གཅོད་པའི་སྟ་རེ་བཞུགས་སོ།།

ཕཊཿ གནས་སྤྱི་གཙུག་འཇའ་གུར་འཁྱིལ་བའི་ཀློང་། །གདན་སེང་ཁྲི་པདྨ་ཉི་ཟླའི་སྟེང་། །སྐྱབས་ཀུན་འདུས་རྩ་བའི་བླ་མ་ནི། །མ་ལབ་ཀྱི་སྒྲོན་མའི་ཆ་བྱད་ཅན། །སྐུ་རབ་དཀར་ཞལ་གཅིག་ཕྱག་གཉིས་མ། །གཡས་ཌཱ་མ་རུ་ནི་ནམ་མཁར་ཁྲོལ། །གཡོན་དྲིལ་བུ་དཀུར་བརྟེན་མཆན་ཁུང་ན། །ཡབ་ཧེ་རུ་ཀཿམཚོན་ཁ་ཊཱཾ་བསྣམས། །ཞབས་གཡས་བསྐུམ་གཡོན་བརྐྱངས་གར་སྟབས་བསྒྱུར། །དར་སྣ་ཚོགས་ན་བཟའི་རྒྱན་གྱིས་མཛེས། །ཞལ་འཛུམ་བཞིན་བཞད་བཞིན་སྐལ་ལྡན་བུ། །

ཁྱོད་འཁོར་བ་སྤྱི་ཡི་སྡུག་བསྔལ་དང་། །སྒོས་ནད་གདོན་འགལ་རྐྱེན་བར་ཆད་སོགས། །འཇིགས་ཀུན་ལས་ཨ་མས་སྐྱོབ་བོ་ཞེས། །གསུང་ཚངས་དབྱངས་ཆོས་སྒྲ་སྒྲོག་བཞིན་བཞུགས། །ཕཊཿ གཅོད་ཁྲིད་བརྒྱུད་པའི་གསོལ་འདེབས་ནི། ན་མོ་གུ་རུ་དེ་ཝ་ཌཱཀྐི་ནི་སརྦ་སིདྡྷི་ཧཱུྃ། སྟོན་པ་སངས་རྒྱས་རྗེ་བཙུན་འཇམ་དབྱངས་དང་། །ཨརྱ་དྷེ་ཝ་ཕ་གཅིག་དམ་པ་སོགས། །ཕ་བརྒྱུད་ཐབས་ཀྱི་བརྒྱུད་པའི་བླ་མ་ལ། །གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །ཆོས་སྐུ་ཡུམ་ཆེན་རྗེ་བཙུན་སྒྲོལ་

མ་དང་། །སུ་ཁ་སིདྡྷི་མ་གཅིག་ལབ་སྒྲོན་སོགས། །མ་བརྒྱུད་ཤེས་རབ་བརྒྱུད་པའི་བླ་མ་ལ། །གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །སྟོན་པ་སངས་རྒྱས་རྗེ་བཙུན་བྱམས་པ་དང་། །འཕགས་པ་ཐོགས་མེད་གཅུང་གཅིག་དབྱིག་གཉེན་སོགས། །སྲས་བརྒྱུད་ཟུང་འཇུག་བརྒྱུད་པའི་བླ་མ་ལ། །གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །རྡོ་རྗེ་འཆང་ཆེན་རྗེ་བཙུན་འཇམ་དབྱངས་དང་། །དཔའ་བོ་རྡོ་རྗེ་བློ་བཟང་གྲགས་པའི་དཔལ། །སྤྱོད་བརྒྱུད་བརྒྱུད་པའི་བླ་མ་ཐམས་ཅད་ལ། གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །བརྒྱུད་པ་ཀུན་འདུས་ཞབས་དཀར་རྡོ་རྗེ་འཆང་། །དེ་སྲས་ལྷུན་གྲུབ་རིགས་འཛིན་ཆོས་ཀྱི་རྗེ། །བྱིན་རླབས་སྙན་བརྒྱུད་རྩ་བའི་བླ་མ་ལ། །གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །ཟག་མེད་བདེ་སྟེར་རྗེ་བཙུན་རྣལ་འབྱོར་མ། །བསླུ་མེད་བླ་མ་ཡི་དམ་དཀོན་མཆོག་གསུམ། །མཐུ་ལྡན་བསྟན་སྲུང་རྒྱ་མཚོར་བཅས་རྣམས་ལ། །གསོལ་བ་འདེབས་སོ་བརྟུལ་ཞུགས་མཐར་ཕྱིན་རློབས། །ཚེ་འདི་བློ་ཡིས་ཐོང་བར་བྱིན་གྱིས་རློབས། །ངེས་

འབྱུང་བྱང་སེམས་འབྱོངས་པར་བྱིན་གྱིས་རློབས། །བདག་མེད་གནས་ལུགས་རྟོགས་པར་བྱིན་གྱིས་རློབས། །གཅོད་ཡུལ་མཐའ་རུ་ཕྱིན་པར་བྱིན་གྱིས་རློབས། །དེ་ལྟར་གསོལ་བ་བཏབ་པས་བླ་མ་ལྷའི། །སྐུ་ལས་བདུད་རྩི་འོད་ཟེར་སྣ་ཚོགས་འཕྲོས། །རང་གཞན་ལུས་ཞུགས་ནད་གདོན་སྡིག་སྒྲིབ་སྦྱངས། །སེམས་ཉིད་སྤྲོས་བྲལ་གནས་ལུགས་མངོན་དུ་གྱུར། །ཕཊཿ རང་ལུས་ཀྱི་ལྟེ་འོག་སྤྱི་གཙུག་བར། །རྩ་དབུ་མ་ཕྱི་དཀར་ནང་དམར་བ། །དཔེ་རག་དུང་ལྟ་བུའི་མར་སྣ་རུ། །སེམས་ཐིག་ལེ་དཀར་འཚེར་འཕར་ཞིང་འདར། །ཕཊཿ སྐར་མདའ་བཞིན་མ་གཅིག་ཐུགས་ཀར་འཕང་། །ལུས་ས་ལ་འགྱེལ་ནས་སྟོང་གསུམ་གང་། །མདོག་དཀར་ཞིང་འཚོ་ལ་རབ་ཏུ་གཙང་། །དཔེ་བྲམ་ཟེ་སྐྱེ་བདུན་ཤ་ལྟར་གྱུར། །ཕཊཿ རང་སེམས་ཉིད་མ་གཅིག་ཐུགས་ཀ་ནས། །ལས་བྱེད་ཀྱི་མཁའ་འགྲོའི་རྣམ་པར་ཐོན། །གཡས་བདག་འཛིན་གཅོད་བྱེད་གྲི་ཁུག་གིས། །ཕྱིའི་ལྤགས་པ་བཤུས་ནས་ཤ་རུ་གཏུབ། །ཕཊཿ ཤ་ཁྲག་རྣམས་ལྤགས་སྟེང་བརྩིགས་ཤིང་བསྐྱིལ། །རྐང་ཁུ་བ་ཀླད་པ་ཐོད་པར་བསྡུས། །འབྲུ་གསུམ་གྱིས་

སྦྱངས་རྟོགས་སྦར་གསུམ་བྱས། །མྱོང་གྲོལ་གྱི་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ། ལན་གསུམ་བྱས། ཕཊཿ རང་ཐུགས་ཀའི་ཧཱུཾ་ལས་འོད་ཟེར་འཕྲོས། །མགྲོན་སོ་སོའི་གནས་ནས་སྤྱན་དྲངས་ཏེ། །རང་མདུན་གྱི་ནམ་མཁར་སྤྲིན་བཞིན་འཁྲིགས། །འོག་དམའ་བའི་ས་ལ་ཁྲོམ་བཞིན་ཚོགས། །ཕཊཿ རང་ཐུགས་ནས་ལྷ་མོ་གཡས་གསེར་སྐྱོགས། །གཡོན་བྷན་དྷ་ཐོགས་པ་གྲངས་མེད་འཕྲོས། །གཡས་སྐྱོགས་ཀྱིས་བདུད་རྩིའི་རྒྱ་མཚོ་གཅུས། །ཕཊཿ ཕ་བཀའ་དྲིན་གསུམ་ལྡན་བླ་མ་མཆོད། །ཐུགས་བརྩེ་བས་བཞེས་ནས་བདག་གཞན་གྱི། །རྒྱུད་སྨིན་ཅིང་གྲོལ་བར་བྱིན་གྱིས་རློབས། །ཕཊཿ ལྷ་ཡི་དམ་ཞི་ཁྲོའི་ལྷ་ཚོགས་མཆོད། །ལམ་རིམ་གཉིས་རྟོགས་པ་འཆར་བ་དང་། །མཆོག་ཐུན་མོང་དངོས་གྲུབ་མ་ལུས་སྩོལ། །ཕཊཿ རྗེ་རྒྱལ་བ་སྲས་དང་བཅས་པ་མཆོད། །ལམ་ངེས་འབྱུང་བྱང་སེམས་ཡང་དག་ལྟ། །བདག་རྒྱུད་ལ་སྐྱེ་བར་བྱིན་གྱིས་རློབས། །ཕཊཿ གནས་གསུམ་གྱི་དཔའ་བོ་མཁའ་འགྲོ་མཆོད། །ས་ལམ་གྱི་བར་ཆད་ཀུན་ཞི་ཞིང་། །ལུས་ལྷན་སྐྱེས་བདེ་སྟོང་ཡེ་ཤེས་སྐྱེད། །ཕཊཿ དཔལ་ཆོས་སྐྱོང་སྲུང་མའི་ལྷ་

ཚོགས་མཆོད། །ཞི་རྒྱས་དང་དབང་དྲག་ལས་རྣམས་སྒྲུབས། །ཁྱད་པར་དུ་ཆོས་ཀྱི་འགལ་རྐྱེན་སོལ། །ཕཊཿ མ་འགྲོ་བ་རིགས་དྲུག་ཡོངས་ལ་བསྔོ། །ཀུན་སོ་སོའི་སྡུག་བསྔལ་ལས་ཐར་ནས། །དུས་གཏན་དུ་བདེ་ཞིང་སྐྱིད་པར་ཤོག །ཕཊཿ ཤ་ཁྲག་དང་རུས་ལྤགས་ནང་ཁྲོལ་བཅས། །སྤྱིར་སྣང་སྲིད་ལྷ་འདྲེ་ཡོངས་ལ་བསྔོ། །དགོས་བདག་ལ་གནོད་པའི་འདྲེ་ལ་བསྔོ། །སེམས་གདུག་རྩུབ་བསམ་སྦྱོར་ཀུན་ཞི་ཞིང་། །རྒྱུད་བྱང་ཆུབ་སེམས་དང་ལྡན་གྱུར་ནས། །ཆོས་སྒྲུབ་པའི་མཐུན་རྐྱེན་ཆར་བཞིན་ཕོབ། །ཕཊཿ མགྲོན་ཐམས་ཅད་ཐུགས་ཡིད་རབ་ཏུ་ཚིམ། །ཀུན་དགྱེས་པའི་བཞད་སྒྲ་དི་རི་རི། །ཕཊཿ བདག་ལུས་དང་མགྲོན་རྣམས་མིང་བརྡ་ཙམ། །དཔེ་རྨི་ལམ་སྒྱུ་མ་བཞིན་དུ་བལྟ། །ཕཊཿ ལུས་མཆོད་སྦྱིན་བྱས་པའི་དགེ་བའི་མཐུས། །མ་འགྲོ་ཀུན་སངས་རྒྱས་མྱུར་ཐོབ་ཤོག །ཕཊཿ བྱ་མང་ཚོགས་མི་ལ་འདྲོགས་པ་ལྟར། །དག་པ་ཡེ་ཤེས་ལྷ་ཡི་མགྲོན། །ཀ་དག་ཆོས་སྐུའི་ཀློང་དུ་གཤེགས། །མ་དག་ལོག་འདྲེན་ཤ་ཟའི་མགྲོན། །གཉིས་འཛིན་འཁྲུལ་པའི་ཀློང་དུ་གཤེགས། །ཕཊཿ ཆོས་རྣམས་ཐམས་ཅད་

སྣང་སྟོང་སེམས་ཀྱིས་འཕྲུལ། །སེམས་ཉིད་སྟོང་གསལ་འཛིན་མེད་ངང་ལ་བཞག །ཕཊཿ སླར་ཡང་སྣང་སྟོང་ཟུང་འཇུག་ལྷ་ཡི་སྐུ། །གསལ་འཚེར་འོད་ལྔ་འཁྲུགས་པའི་ཀློང་དུ་གསལ། །ཕཊཿ བསྔོ་བ་ནི། ཨ། དགེ་དང་མི་དགེའི་རྟོགས་ཚོགས་རང་གྲོལ་ལ། །རེ་དང་དོགས་པའི་མཚན་མ་མི་དམིགས་ཀྱང་། །སྣང་ཆའི་རྟེན་འབྲེལ་བསླུ་མེད་དགེ་ཚོགས་རྒྱུན། །ཟག་མེད་ཆོས་ཀྱི་དབྱིངས་སུ་བསྔོ་བར་བྱ། །ཀུན་རྫོབ་ལུས་ཀྱི་སྦྱིན་པ་ལ་བརྟེན་ནས། །སྐལ་པར་བསགས་པའི་བུ་ལོན་ལན་ཆགས་བྱངས། །དོན་དམ་བདེན་པའི་ཆོས་ཀྱིས་རྒྱུད་གྲོལ་ཚེ། །བདག་གི་འདུས་པ་དང་པོར་སྐྱེ་བར་ཤོག །དེ་ཚེ་རང་བཞག་མ་བཅོས་གཉུག་མའི་དོན། །མི་བསྲུན་ལྷ་འདྲེའི་རྒྱུད་ལ་སྐྱེས་ནས་ཀྱང་། །ངར་འཛིན་འཁྲུལ་པའི་རྗེས་སུ་མི་འབྲང་བར། །བྱམས་དང་སྙིང་རྗེས་ཤེས་རྒྱུད་གང་བར་ཤོག །བདག་ཀྱང་བརྟུལ་ཞུགས་འགྲོ་དོན་མཐར་ཕྱིན་ནས། །ཕྱོགས་ལས་རྣམ་རྒྱལ་འབྲེལ་ཚད་དོན་ལྡན་གྱི། །འཕྲིན་ལས་མཐར་ཕྱིན་འཇའ་ལུས་མངོན་འགྱུར་ཤོག །ཅེས་པ་འདི་ཡང་བྱ་བཏང་ཚོགས་དྲུག་རང་གྲོལ་གྱིས་སྦྱར་བའོ། བཀྲ་ཤིས།། །།

གཅོད་དམིགས་བདག་འཛིན་རྩད་གཅོད།

༄༅། །གཅོད་དམིགས་བདག་འཛིན་རྩད་གཅོད་བཞུགས་སོ།།

སྐྱབས་འགྲོ་སེམས་སྐྱེད་ཚད་མེད་བཞི་བསྒོམ་པ་སྔོན་དུ་བཏང་ནས། ཕཊཿ གནས་སྤྱི་གཙུག་འཇའ་གུར་འཁྱིལ་བའི་ཀློང་། །གདན་སེང་ཁྲི་པདྨ་ཉི་ཟླའི་སྟེང་། །སྐྱབས་ཀུན་འདུས་རྩ་བའི་བླ་མ་ནི། །མ་ལབ་ཀྱི་སྒྲོན་མའི་ཆ་བྱད་ཅན། །སྐུ་རབ་དཀར་ཞལ་གཅིག་ཕྱག་གཉིས་མ། །གཡས་ཌཱ་མ་རུ་ནི་ནམ་མཁར་འཁྲོལ། །གཡོན་དྲིལ་བུ་དཀུར་བརྟེན་མཆན་ཁུང་ན། །ཡབ་ཧེ་རུ་ཀཿ མཚོན་ཁ་ཊཱཾ་བསྣམས། །ཞབས་གཡས་བསྐུམ་གཡོན་བརྐྱངས་གར་སྟབས་བསྒྱུར། །དར་སྣ་ཚོགས་ན་བཟའི་རྒྱན་གྱིས་མཛེས།

ཐུགས་རབ་ཏུ་དགྱེས་པའི་སྤྱན་གྱིས་གཟིགས། །ཞལ་འཛུམ་ཞིང་བཞད་བཞིན་སྐལ་ལྡན་བུ། །ཁྱོད་འཁོར་བ་སྤྱི་ཡི་སྡུག་བསྔལ་དང་། །སྒོས་ནད་གདོན་འགལ་རྐྱེན་བར་ཆད་སོགས། །འཇིགས་ཀུན་ལས་ཨ་མས་སྐྱོབ་བོ་ཞེས། །གསུང་ཚངས་དབྱངས་ཆོས་སྒྲ་སྒྲོག་བཞིན་བཞུགས། །ཕཊཿ རང་ལུས་ཀྱི་ལྟེ་འོག་སྤྱི་གཙུག་བར། །རྩ་དབུ་མ་ཕྱི་དཀར་ནང་དམར་བ། །དཔེ་རག་དུང་ལྟ་བུའི་མར་སྣ་རུ། །སེམས་ཐིག་ལེ་དཀར་འཚེར་འཕར་ཞིང་འདར། །ཕཊཿ སྐར་མདའ་བཞིན་མ་

ཅིག་ཐུགས་ཀར་འཕང་། །ལུས་ས་ལ་འགྱེལ་ནས་སྟོང་གསུམ་གང་། །མདོག་དཀར་ཞིང་འཚོ་ལ་རབ་ཏུ་གཙང་། །དཔེ་བྲམ་ཟེ་སྐྱེ་བདུན་ཤ་ལྟར་གྱུར། །ཕཊཿ རང་སེམས་ཉིད་མ་གཅིག་ཐུགས་ཀ་ནས། །ལས་བྱེད་ཀྱི་མཁའ་འགྲོའི་རྣམ་པར་ཐོན། །གཡས་བདག་འཛིན་གཅོད་བྱེད་གྲི་གུག་གིས། །ཕྱིའི་པགས་པ་བཤུས་ཤིང་ཤ་རུས་གཏུབ། །ཕཊཿ ཤ་ཁྲག་རྣམས་པགས་སྟེང་བརྩིགས་ཤིང་བསྐྱིལ། །རྐང་ཁུ་བ་ཀླད་པ་ཐོད་པར་བསྡུས། །འབྲུ་གསུམ་གྱིས་སྦྱངས་རྟོགས་སྦར་གསུམ་བྱས། །མྱོང་གྲོལ་གྱི་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུྃ། ལན་གསུམ། ཕཊཿ རང་ཐུགས་ཀའི་ཧཱུྃ་ལས་འོད་ཟེར་འཕྲོས། །མགྲོན་སོ་སོའི་གནས་ནས་སྤྱན་དྲངས་ཏེ། །རང་མདུན་གྱི་ནམ་མཁར་སྤྲིན་བཞིན་འཁྲིགས། །འོག་དམའ་བའི་ས་ལ་ཁྲོམ་ལྟར་ཚོགས། །ཕཊཿ རང་ཐུགས་ནས་ལྷ་མོ་གཡས་གསེར་སྐྱོགས། །གཡོན་བྷནྡྷ་འཛིན་པ་གྲངས་མེད་འཕྲོས། །གཡས་སྐྱོགས་ཀྱིས་བདུད་རྩིའི་རྒྱ་མཚོ་གཅུས། །ཕཊཿ ཕ་བཀའ་དྲིན་གསུམ་ལྡན་བླ་མ་མཆོད། །ཐུགས་བརྩེ་བས་བཞེས་ནས་བདག་གཞན་གྱི། །རྒྱུད་སྨིན་

ཅིང་གྲོལ་བར་བྱིན་གྱིས་རློབས། །ཕཊཿ ལྷ་ཡི་དམ་མཁའ་འགྲོའི་ཚོགས་རྣམས་མཆོད། །ལམ་རིམ་གཉིས་རྟོགས་པ་འཆར་བ་དང་། མཆོག་ཐུན་མོང་དངོས་གྲུབ་མ་ལུས་སྩོལ། །ཕཊཿ རྗེ་རྒྱལ་བ་སྲས་དང་བཅས་པ་མཆོད། །ལམ་ངེས་འབྱུང་བྱང་སེམས་ཡང་དག་ལྟ། །བདག་རྒྱུད་ལ་སྐྱེ་བར་བྱིན་གྱིས་རློབས། །ཕཊཿ གནས་གསུམ་གྱི་དཔའ་བོ་མཁའ་འགྲོ་མཆོད། །ས་ལམ་གྱི་བར་ཆད་ཀུན་ཞི་ཞིང་། །ལུས་ལྷན་སྐྱེས་བདེ་སྟོང་ཡེ་ཤེས་སྐྱེད། །ཕཊཿ དཔལ་ཆོས་སྐྱོང་སྲུང་མའི་ལྷ་ཚོགས་མཆོད། །ཞི་རྒྱས་དང་དབང་དྲག་ལས་རྣམས་སྒྲུབས། །ཁྱད་པར་དུ་ཆོས་ཀྱི་འགལ་རྐྱེན་སོལ། །ཕཊཿ མ་འགྲོ་བ་རིགས་དྲུག་ཡོངས་ལ་བསྔོ། །ཀུན་སོ་སོའི་སྡུག་བསྔལ་ལས་ཐར་ནས། །དུས་གཏན་དུ་བདེ་ཞིང་སྐྱིད་པར་ཤོག །ཅེས་དཀར་འགྱེད་དང་། དེ་ནས་མར་འགྱེད་ནི། ཕཊ༔ ཤ་ཁྲག་རུས་ལྤགས་པ་ནང་ཁྲོལ་བཅས། །སྤྱིར་སྣང་སྲིད་ལྷ་འདྲེ་ཡོངས་ལ་བསྔོ། །སྒོས་རང་ལ་གནོད་པའི་འདྲེ་ལ་བསྔོ། །སེམས་གདུག་རྩུབ་བསམ་སྦྱོར་ཀུན་ཞི་ཞིང་། །རྒྱུད་བྱང་ཆུབ་སེམས་དང་ལྡན་གྱུར་ནས། །

ཆོས་སྒྲབ་པའི་མཐུན་རྐྱེན་ཆར་བཞིན་ཕོབ། །ཁྲ་འགྱེད་ནི། ཕཊཿ མགྲོན་ཐམས་ཅད་ཐུགས་ཡིད་རབ་ཏུ་ཚིམ། །ཀུན་དགྱེས་པའི་བཞད་སྒྲ་དི་རི་རི། །ཕཊཿ བྱ་མང་ཚོགས་མི་ལ་འདྲོག་པ་ལྟར། །མགྲོན་ཐམས་ཅད་རང་རང་གནས་སུ་གཤེགས། །ཕཊཿ བདག་ལུས་དང་མགྲོན་རྣམས་མིང་བརྡ་ཙམ། །དཔེ་རྨི་ལམ་སྒྱུ་མ་བཞིན་དུ་བལྟ། །ཕཊཿ ལུས་མཆོད་སྦྱིན་བྱས་པའི་དགེ་བའི་མཐུས། །མ་འགྲོ་ཀུན་སངས་རྒྱས་མྱུར་ཐོབ་ཤོག །ཅེས་པ་འདི་ཡང་བྱ་བཏང་༧ཚོགས་དྲུག་རང་གྲོལ་གྱིས་སྦྱར་བའོ།། ༈ །།མི་རྐང་འབུད་ལུགས་ནི། ཨོཾ་སྙན་ལ་རིང་བ་བུང་བའི་སྐད་ལྟ་བུ། ཧཱུྃ་རྔམ་ལ་འཚེར་བ་རྟ་སྐད་ལྟ་བུ། ཏཱྃ་དྲག་ལ་གཏུམ་པ་སྟག་མོའི་ངར་སྐད་ལྟ་བུ། ཧྲཱིཿའགྱུར་ལ་ལྡེམ་པ་དྲི་ཟའི་སྐད་ལྟ་བུ། ཨཱཿའགྱུར་ལྡེམ་གོང་འདྲ་ནས་གཤམ་འདེགས་ཙམ་བྱེད་པ་ལ་ཌཱཀྐིའི་སྤྱུག་གླུ་ཟེར། ཡང་རྫོགས་ཆེན་བདུན་འབུད་ནི། མཆོད། བླ་མ་མཆོད། ཡི་དམ་མཆོད། མཁའ་འགྲོ་མཆོད། ཆོས་སྐྱོང་མཆོད། མཆོད། མཆོད། དགེའོ། བཀྲཤིས།། །།

ཕོ་བ་སྤྱི་གཙུག་འཇའ་གུར་མ།

༄༅། །འཕོ་བ་སྤྱི་གཙུག་འཇའ་གུར་མ་བཞུགས་སོ། དག་སྣང་གི་འཕོ་བ་སྤྱི་གཙུག་འཇའ་གུར་མའི་བརྒྱུད་པ་ནི། མགོན་པོ་འོད་དཔག་མེད། འཕགས་པ་སྤྱན་རས་གཟིགས། དེས་བདག་ཚོགས་དྲུག་རང་གྲོལ་ལའོ། །སྐྱབས་འགྲོ་སེམས་བསྐྱེད་ཚད་མེད་བཞི་སྔོན་དུ་བཏང་ནས། དངོས་གཞི་ནི། རང་ཉིད་སྤྱན་རས་གཟིགས་སུ་གསལ་བའི་ལུས་ཀྱི་དབུས་ན་རྩ་དབུ་མ་དང་། སྙིང་གའི་ཐད་ཀའི་དབུ་མའི་ནང་དུ་རང་སེམས་ཐིག་ལེའི་རྣམ་པར་བསྒོམས། སྤྱི་བོར་རྩ་བའི་བླ་མ་འོད་དཔག་མེད་ཀྱི་རྣམ་པར་བཞུགས་པའི་སྐུའི་དབུས་ནས་རྩ་དབུ་མ་ཞིག་གསང་བའི་ལམ་བརྒྱུད་ནས་མར་བྱུང་། རང་གི་དབུ་མའི་ཡར་སྣེ་དང་། མགོན་པོ་འོད་དཔག་མེད་ཀྱི་དབུ་མའི་མར་སྣེ་གཉིས་རག་དུང་ཁ་སྤྲད་པ་ལྟར་བསམ། དེ་ནས་གསོལ་འདེབས་ནི། གནས་སྤྱི་གཙུག་འཇའ་གུར་འོད་ཀློང་ན། །སྐྱབས་བསླུ་མེད་འོད་དཔག་མེད་མགོན་ལ། །འཁོར་བྱང་ཆུབ་སེམས་དཔའི་ཚོགས་ཀྱིས་བསྐོར། །ཁྲ་ལམ་མེར་མངོན་སུམ་བཞུགས་པ་ལ། །ཡིད་མོས་གུས་གདུངས་པས་གསོལ་བ་འདེབས། །སེམས་ཐིག་ལེ་དབུ་མའི་ལམ་བརྒྱུད་ནས། །མགོན་ཁྱོད་ཐུགས་ཆོས་སྐུའི་མཁའ་དབྱིངས་སུ། །དུས་ད་ལྟ་འཕོ་བར་བྱིན་གྱིས་རློབས། །

ཞེས་བརྗོད་མཐར། ཧིཀ །བརྗོད་ལ་རྣམ་ཤེས་འོད་དཔག་མེད་ཀྱི་ཐུགས་ཀར་འཕངས། ཀ་ཞེས་མར་ཕབ། དེ་ལྟར་རྟགས་མ་ཐོན་གྱི་བར་དུ་སྦྱང་བར་བྱའོ། །ཞེས་འཕོ་བ་ཉུང་བསྡུས་འདི་ནི་ཚོགས་དྲུག་རང་གྲོལ་གྱིས་སྦྱར་བའོ། །མཇུག་ཏུ་སྨོན་ལམ་ནི། ཨེ་མ་ཧོ། ངོ་མཚར་སངས་རྒྱས་སྣང་བ་མཐའ་ཡས་དང་། །གཡས་སུ་ཇོ་བོ་ཐུགས་རྗེ་ཆེན་པོ་དང་། །གཡོན་དུ་སེམས་དཔའ་མཐུ་ཆེན་ཐོབ་རྣམས་ལ། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །བདེ་སྐྱིད་ངོ་མཚར་དཔག་ཏུ་མེད་པ་ཡི། །བདེ་བ་ཅན་ཞེས་བྱ་བའི་ཞིང་ཁམས་དེར། །བདག་ནི་འདི་ནས་ཚེ་འཕོས་གྱུར་མ་ཐག །སྐྱེ་བ་གཞན་གྱིས་བར་མ་ཆོད་པ་རུ། །དེ་རུ་སྐྱེས་ནས་སྣང་མཐའི་ཞལ་མཐོང་ཤོག །དེ་སྐད་བདག་གིས་སྨོན་ལམ་བཏབ་པ་ལྟར། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱིས། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ། །ཤཱཀྱའི་དབང་པོ་འདྲེན་པ་འོད་དཔག་མེད། །མི་ཕམ་འཇམ་དབྱངས་གསང་བདག་སྤྱན་རས་གཟིགས། །བདེ་གཤེགས་འཁོར་བཅས་རྟེན་འབྲེལ་མི་བསླུ་བའི། །བདེན་པས་སྨོན་ལམ་ཅི་བཏབ་མྱུར་འགྲུབ་ཤོག །ཏདྱཐཱ། ཨོཾ་པཉྩི་ཀྲི་ཡ་ཨ་ཝ་བོ་དྷ་ན་ཡེ་སྭཱ་ཧཱ།། །།

ཚོགས་མཆོད་འདོད་དགུའི་ཆར་འབེབས།

༄༅། །ཚོགས་མཆོད་འདོད་དགུའི་ཆར་འབེབས་བཞུགས་སོ།།

ན་མོ་གུ་རུ་དེ་ཝ་ཌཱཀྐི་ཡེ། བླ་མ་ཡི་དམ་མཁའ་འགྲོ་ཆོས་སྐྱོང་མཆོད། །འདོད་དགུའི་དངོས་གྲུབ་ཆར་བཞིན་དབབ་ཏུ་གསོལ། །ཚོགས་ཀྱི་མཆོད་པའི་ཐབས་མཁས་ལྕགས་ཀྱུ་ཡིས། །མཆོག་ཐུན་དངོས་གྲུབ་འགུགས་ཚུལ་འདི་ན་བཤད། །དེ་ཡང་རང་གཞན་ཡོངས་ལ་ཕན་པའི་ལྷག་བསམ་གྱིས་ཚོགས་མཆོད་བྱ་བར་འདོད་པས། གནས་ཁང་བྱི་དོར་བྱ། སྐུ་གསུང་ཐུགས་ཀྱི་རྟེན་བཀྲམ། ལོག་འཚོ་མ་ཡིན་པའི་མཆོད་པ་དང་ཚོགས་རྫས་ཅི་འབྱོར་མཐོང་བ་བརྒྱུད་པའི་ཕྱག་ལེན་ལྟར་བཀོད་པ་མཛེས་པར་བཤམས་ལ། སྐྱབས་འགྲོ་སེམས་སྐྱེད་ཚད་མེད་བཞི་སྒོམ་པ་སྔོན་དུ་བཏང་། དངོས་གཞི་

རང་ཉིད་ཡི་དམ་ལྷ་གང་རུང་གི་གསལ་སྣང་དང་ང་རྒྱལ་བརྟན་པོའི་ངང་ནས། ཚོགས་རྫས་བྱིན་རླབས་ནི། ཧཱུྃ། རང་ཉིད་ཡི་དམ་ལྷར་གསལ་ཐུགས་ཀ་ནས། །འོད་འཕྲོས་སྣོད་བཅུད་མ་དག་ཉེས་སྐྱོན་སྦྱངས། །ཕྱི་སྣོད་དག་པའི་ཞིང་དང་གཞལ་ཡས་ཁང་། །ནང་བཅུད་སེམས་ཅན་ལྷ་དང་ལྷ་མོར་གྱུར། །གནས་ཁང་རིན་ཆེན་ལས་གྲུབ་གཞལ་ཡས་དབུས། །མཚན་ལྡན་ཐོད་པ་རིན་ཆེན་སྣོད་རྣམས་སུ། །ཚོགས་རྫས་བཤམས་པའི་སྟེང་དུ་ཨོཾ་ཨཱཿཧཱུཾ། །འོད་ཞུ་ཟག་མེད་བདུད་རྩིའི་རྒྱ་མཚོར་གྱུར། །ཨོཾ་ཨཱཿཧཱུཾ།

ལན་གསུམ། དེ་ནས་སྤྱན་འདྲེན་ནི། ཧཱུྃ། རང་གི་ཐུགས་ཀའི་འོད་འཕྲོས་ཕྱོགས་བཅུ་ནས། །རྩ་གསུམ་ལྷ་ཚོགས་བཀའ་སྡོད་ཆོས་སྐྱོང་སོགས། །མཆོད་འོས་མགྲོན་གྱུར་མ་ལུས་སྤྱན་དྲངས་ཏེ། །གནམ་ས་བར་སྣང་གང་བར་བཞུགས་པར་གྱུར། །ཚོགས་ཕུད་རིམ་པ་གསུམ་དང་ལྷག་མ་གཅིག་བཅས་བཞི་བཅད་ལ། ཕུད་དང་པོ་ལག་ཏུ་ཐོགས་ལ། རང་གི་ཐུགས་ནས་ལྷ་མོ་གྲངས་མེད་སྤྲོས། །ཚོགས་ཀྱི་མཆོད་པ་བསྣམས་ནས་ལྷ་ལ་འབུལ། །ལྷ་ཚོགས་རྣམས་ཀྱི་ལྗགས་ཀྱི་འོད་ཟེར་གྱི། །སྦུ་གུས་ཚོགས་བཅུད་དྲངས་ཏེ་གསོལ་བར་གྱུར། ཧཱུྃ། བླ་མ་ཡི་དམ་སངས་རྒྱས་བྱང་སེམས་དང་། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །ཡུལ་ལྷ་གཞི་བདག་རྣམས་ལ་ཚོགས་མཆོད་འབུལ། །བཞེས་ནས་མཆོག་ཐུན་དངོས་གྲུབ་སྩལ་དུ་གསོལ། །མ་གྱུར་ནམ་མཁའི་མཐའ་མཉམ་སེམས་ཅན་དང་། །གདོན་བགེགས་ལན་ཆགས་ལྷ་རུ་གྱུར་པ་ལ། །ཚོགས་མཆོད་སྦྱིན་པས་ངོམས་ཤིང་ཚིམས་གྱུར་ནས། །དྲིན་ལན་འཁོར་ཞིང་ལན་ཆགས་བྱང་གྱུར་ཅིག །ག་ན་ཙཀྲ་པཱུ་ཛ་ཁཱ་ཧི། ཚོགས་ཕུད་བར་པ་ཐོགས་ལ། ཧོ། བདག་ཅག་མ་རིག་ཉོན་མོངས་དབང་

སོངས་ནས། །ལྷ་ཚོགས་ཐུགས་དང་འགལ་བ་ཅི་མཆིས་པ། །ཚོགས་ཀྱི་མཆོད་པའི་སྒོ་ནས་མཐོལ་ཞིང་བཤགས། །སྡིག་སྒྲིབ་ཉེས་ལྟུང་བྱང་ཞིང་དག་གྱུར་ཅིག །ཨོཾ་བཛྲ་སཏྭ༴ ཞེས་ཡིག་བརྒྱ་བརྗོད། ཟན་གྱི་མི་གཟུགས་སམ། ཡང་ན་ཚོགས་ཀྱི་ཞབས་ནས་ཟན་ཞིག་བཅད་ནས་མདུན་དུ་བཞག་ལ། ཧཱུྃ་བྷྱོ་ཛཿ འཇིགས་རུང་ཁྲོ་ཚོགས་བཀའ་སྡོད་ཕོ་ཉར་འགྱེད། །རང་གཞན་འཕུང་བྱེད་བདག་འཛིན་ཉོན་མོངས་རྣམས། །མ་རུངས་དགྲ་བགེགས་གཟུགས་ཀྱི་རྣམ་པ་རུ། །བཀུགས་ནས་དམིགས་པའི་རྟེན་ལ་ཐིམ་པར་གྱུར། །ཞེས་ཕུར་པའམ་མཚོན་སྟེང་དུ་ཚད་ཙམ་མམ་ཡང་ན་ཅུང་ཟད་བསྣུན་ལ། བདག་འཛིན་ཉོན་མོངས་ཐམས་ཅད་མཱ་ར་ཡ་རྦད། དེ་ནས་ཚོགས་ཕུད་ཐ་མ་དང་བསྲེས་ནས་ལག་ཏུ་ཐོགས་ལ། ཧཱུྃ། བདག་གཞན་འཕུང་བྱེད་བདག་འཛིན་ཉོན་མོངས་རྣམས། །སྟོང་ཉིད་མཚོན་གྱིས་བསྒྲལ་ནས་ལྷ་ཚོགས་ཀྱི། །ཆོས་དབྱིངས་ཞལ་དུ་བསྟབ་བོ་དགྱེས་པར་རོལ། །བདག་འཛིན་ཉོན་མོངས་གཡུལ་ལས་རྒྱལ་བར་མཛོད། །མ་ཧཱ་མཾ་ས་ལ་ཁཱ་ཧི། དེ་ནས་བསྐང་བ་ནི། ཧཱུྃ། མཆོག་ཐུན་དངོས་གྲུབ་རྣམས་ལ་མངའ་བརྙེས་པའི། །རྩ་བརྒྱུད་བླ་མ་རྣམས་

ཀྱི་ཐུགས་དམ་བསྐང་། །ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་། །སངས་རྒྱས་བྱང་སེམས་རྣམས་ཀྱི་ཐུགས་དམ་བསྐང་། །དཔའ་བོ་མཁའ་འགྲོ་རྣམས་ཀྱི་ཐུགས་དམ་བསྐང་། །ཆོས་སྐྱོང་སྲུང་མ་རྣམས་ཀྱི་ཐུགས་དམ་བསྐང་། །ཡུལ་ལྷ་གཞི་བདག་རྣམས་ཀྱི་ཐུགས་དམ་བསྐང་། །རིགས་དྲུག་ཕ་མ་རྣམས་ཀྱི་ཐུགས་དམ་བསྐང་། ལན་ཆགས་མགྲོན་གྱུར་རྣམས་ཀྱི་ཐུགས་དམ་བསྐང་། །ཚོགས་ཀྱི་མཆོད་པས་ཐུགས་དམ་བསྐངས་བའི་མཐུས། །བདག་གཞན་སེམས་ཅན་ལོངས་སྤྱོད་ཀུན་ལྡན་ཞིང་། ། ཚོགས་རྫོགས་སྒྲིབ་བྱང་སངས་རྒྱས་མྱུར་འཐོབ་ཤོག །དེ་ནས་ཚོགས་ལ་རོལ་བའི་ཚེ། ཚོགས་དཔོན་བླ་མ་འདྲ་བཞུགས་ན། ཚོགས་འབུལ་མཁན་གྱིས་བཟའ་བ་གཡས་དང་བཏུང་བ་གཡོན་དུ་ཐོགས་ལ་ལག་གཉིས་བསྣོལ་ཏེ། ཚོགས་ཀྱི་མཆོད་པ་རྒྱན་དུ་རོལ། ཞེས་བརྗོད་ལ་འབུལ། སློབ་དཔོན་གྱིས་པད་སྐོར་གྱི་ཕྱག་རྒྱ་བྱས། ཨ་ཧོ་མ་ཧཱ་སུ་ཁ། ཞེས་བརྗོད་ལ་བླངས་ཏེ་རོལ། གཞན་རྣལ་འབྱོར་ཕོ་མོ་རྣམས་ལ་བཟའ་བ་གཡས་བསྐོར་དུ་བཀྲམ། བཏུང་བ་གཡོན་བསྐོར་དུ་འབུལ། སྐབས་འདིར་སྤྲོ་ན་རྡོ་རྗེ་གླུ་ཡི་མཆོད་པ་ཡང་བྱའོ། །མཇུག་ཏུ་ལྷག་མ་བསྔོ་བ་ནི། ཨོཾ་ཨཱཿཧཱུཾ། རྣལ་འབྱོར་དཔོན་སློབ་སྲུང་ཞིང་སྐྱོང་མཛད་པའི། །ལྷག་ལ་རེ་ཞིང་
དབང་བའི་ཚོགས་རྣམས་ཀྱིས། །གཙང་མ་ཕུད་ཀྱི་ལྷག་མ་འདི་བཞེས་ལ། །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །མ་ཧཱ་སརྦ་པཱུ་ཛ་ཁཱ་ཧི། ཞེས་ལྷག་མ་ཕྱི་རོལ་གྱི་གཙང་སར་བསྐྱལ་ལོ། །དེ་ནས་བསྔོ་སྨོན་བཀྲ་ཤིས་ཀྱིས་མཐའ་བརྒྱན་པར་བྱའོ། །སྨྲས་པ། བླ་མ་ལྷ་དང་མཁའ་འགྲོ་ཆོས་སྐྱོང་ལ། །ཚོགས་ཀྱི་མཆོད་པ་ཕུལ་བའི་བསོད་ནམས་ཀྱིས། །ཚེ་བསོད་ལུང་རྟོགས་ཡར་ངོའི་ཟླ་ལྟར་རྒྱས། །བདེ་སྐྱིད་ཉི་མ་འཆར་བའི་སྨོན་ལམ་འཚལ། །ཞེས་ཚོགས་མཆོད་འདོད་དགུའི་ཆར་འབེབས་ཞེས་བྱ་བ་འདི་ནི་སློབ་བུ་འཇིགས་མེད་རྒྱལ་མཚན་གྱིས་ཡང་ཡང་བསྐུལ་ངོར། བྱ་བཏང་ཚོགས་དྲུག་རང་གྲོལ་གྱིས་གནས་ཆེན་གངས་རི་ནས་སྦྱར་བའོ། ༈

ཚོགས་མཆོད་ཀུན་བཟང་མཆོད་སྤྲིན།

ཚོགས་མཆོད་ཀུན་བཟང་མཆོད་སྤྲིན་བཞུགས་སོ།། རང་ཉིད་སྐད་ཅིག་གིས་དཔལ་རྡོ་རྗེ་སེམས་དཔའ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་ཡུམ་དང་བཅས་པའི་སྐུར་བཞེངས་པར་གྱུར། རང་ལྷར་གསལ་བའི་སྐུ་ལས་འོད་ཟེར་འཕྲོས་པས། སྣོད་བཅུད་ཐམས་ཅད་ལ་ཕོག་པས་མ་དག་པའི་ཉེས་སྐྱོན་སྦྱངས་ནས། ཕྱི་སྣོད་ཐམས་ཅད་དག་པའི་ཞིང་དང་གཞལ་ཡས་ཁང་། ནང་བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོའི་རང་བཞིན་དག་པ་རབ་འབྱམས་འབའ་ཞིག་ཏུ་

གྱུར། རང་གཞན་ཐམས་ཅད་ཀྱི་གནས་གསུམ་དང་ལག་པའི་མཐིལ་ལས་དུས་གསུམ་བསགས་པའི་དགེ་བའི་མཐུ་ལས་ཕྱི་ནང་གསང་བའི་མཆོད་སྤྲིན་བསམ་གྱིས་མི་ཁྱབ་པ་བྱུང་ནས་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་གྱུར། ཨོཾ་ན་མོ་བྷ་ག་ཝ་ཏེ་བཛྲ་ས་རཱ་པྲ་མརྡྷ་ནེ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛྭ་བཛྲེ། མ་ཧཱ་བིདྱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྚོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨ་ཝ་ར་ན་བི་ཤྭ་དྷ་ནི་བཛྲེ་སྭཱ་ཧཱ། ཞེས་མཆོད་པའི་སྤྲིན་གྱི་གཟུངས་བརྗོད། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཨོཾ་སྭཱ་བྷ་ཝ་ཤུད་དྷ་སརྦ་དྷརྨ་སྭཱ་བྷ་ཝ་ཤུདྡྷོ྅་ཧཾ། གནས་ཁང་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་བྷྲཱུཾ་ལས་བྱུང་བའི་རིན་པོ་ཆེ་སྣ་བདུན་ལས་གྲུབ་པའི་གཞལ་མེད་ཁང་ཕུན་སུམ་ཚོགས་པའི་ནང་དུ་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་བརྟེན་རྫས་སྐོང་རྫས་ལ་སོགས་པ་སྲིད་ཞིའི་འདོད་ཡོན་གྱི་རྣམ་པ་མ་ཚང་བ་མེད་པ། མཁོ་དགུ་ཚང་བ།

བཟང་དགུས་འབྱོར་པ། མཛེས་དགུས་བརྒྱན་པ། ངོ་བོ་ཡེ་ཤེས་སྒྱུ་མའི་རང་བཞིན་ཅན། རྣམ་པ་བདེ་བའི་མཆོད་པའི་ཚོགས་བསམ་གྱིས་མི་ཁྱབ་པས་གང་བར་གྱུར། ན་མཿསརྦ་ཏ་ཐཱ་ག་ཏ་བྷྱོཿ་བི་ཤྭ་མུ་ཁེ་བྷྱཿསརྦ་ཏྠད་ཁཾ་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་བརྗོད། ཨ་མྲྀ་ཏས་བསང་། སྭཱ་བྷ་ཝས་སྦྱང་། རྫས་རྣམས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ཨཱཿལས་བྱུང་བའི་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ། དེའི་སྟེང་དུ་ཨོཾ་ཨཱཿ ཧཱུཾ་རྣམས་མེར་གྱིས་ཞུ་བ་ལས་ངོ་བོ་བདེ་སྟོང་གཉིས་སུ་མེད་པའི་ཡེ་ཤེས་ཡིན་པ་ལ་རྣམ་པ་ཁ་དོག་དྲི་རོ་རེག་བྱ་ཕུན་སུམ་ཚོགས་པ་ཟག་མེད་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུཾ། ལན་གསུམ། རང་གི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་བཞུགས་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་ཐམས་ཅད་དང་། ཁྱད་པར་དུ་རང་གི་དྲིན་ཅན་རྩ་བའི་བླ་མ། བསྙེན་སྒྲུབ་བྱས་པའི་ཡི་དམ།

བསྟེན་མཆོད་སྒྲབ་པའི་སྲུང་མ། ཡུལ་འདིའི་གཞི་བདག་དཀར་ཕྱོགས་ལ་མངོན་པར་དགའ་བ་ཐམས་ཅད་མ་ལུས་པ། གར་བཞུགས་དག་པའི་ཞིང་ཁམས་སོ་སོ་ནས་ཕྲིན་ལས་འདོད་དགུར་སྒྱུར་བའི་རྣམ་རོལ་བསམ་གྱིས་མི་ཁྱབ་པའི་བཀོད་པ་ཆེན་པོས་གནས་འདིར་སྤྱན་དྲངས། ཨོཾ་བཛྲ་ས་མ་ཡ་ཛཿ མདུན་གྱི་ནམ་མཁའ་བར་སྣང་ས་གཞིའི་ཁམས་ན་རང་རང་གང་འདོད་པའི་གདན་ལ་དགྱེས་བཞིན་དུ་བཞུགས་པར་གྱུར། རང་གི་ཐུགས་ཀ་ནས་འདོད་ཡོན་གྱི་ལྷ་མོའི་ཚོགས་དཔག་ཏུ་མེད་པ་སྤྲོས་ནས། ཚོགས་ཀྱི་འཁོར་ལོའི་ཡོ་བྱད་རྣམས་ཐོགས་ཏེ། ལྷ་ཚོགས་རྣམས་ལ་ཕུལ་བས་ཐུགས་བརྩེ་བ་ཆེན་པོའི་སྒོ་ནས་བཞེས་ཏེ། མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང་། ཁྱད་པར་དུ་རྣལ་འབྱོར་པ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་ཕྱི་ནང་གསང་བའི་འགལ་རྐྱེན་བར་ཆད་ཐམས་ཅད་ཞི་བ་དང་། མཐུན་རྐྱེན་སྨོན་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་ཆར་བཞིན་དུ་བསྙིལ་དུ་གསོལ། །ཧཱུཾ། བླ་མེད་

མཆོག་གི་མཆོད་པ་དམ་པ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་འདི། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །ཨོཾ་བཛྲ་ཨརྒྷཾ་ནས་ཤབྡ་མ་ཧཱ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བྷ་ལིངྟ་མ་ཧཱ་ག་ན་ཙཀྲ་པཱུ་ཛ་ཁཱ་ཧི། ཨོཾ་ཨཱཿཧཱུཾ། ཚོགས་ཕུད་གཅིག་དང་ལྷག་ཕུད་གཅིག་དཀྱིལ་འཁོར་ལ་ཕུལ་ལ། མཆོག་ཐུན་དངོས་གྲུབ་རྣམས་ལ་མངའ་བརྙེས་པའི། །རྩ་བརྒྱུད་བླ་མ་རྣམས་ལ་ཚོགས་མཆོད་འབུལ། །ཡི་དམ་ལྷ་ཚོགས་རྣམས་ལ་ཚོགས་མཆོད་འབུལ། །སངས་རྒྱས་བྱང་སེམས་རྣམས་ལ་ཚོགས་མཆོད་འབུལ། །དཔའ་བོ་མཁའ་འགྲོ་རྣམས་ལ་ཚོགས་མཆོད་འབུལ། །ཆོས་སྐྱོང་སྲུང་མ་རྣམས་ལ་ཚོགས་མཆོད་འབུལ། ཡུལ་ལྷ་གཞི་བདག་རྣམས་ལ་ཚོགས་མཆོད་འབུལ། །བཞེས་ནས་བདག་ཅག་རྣམས་ལ་དངོས་གྲུབ་སྩོལ། །མི་ལ་ཚེ་ཡི་དངོས་གྲུབ་བསྩལ་དུ་གསོལ། །ནོར་ལ་གཡང་གི་དངོས་གྲུབ་བསྩལ་དུ་གསོལ། །ཟས་ལ་བཅུད་ཀྱི་དངོས་གྲུབ་བསྩལ་དུ་གསོལ། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཨོཾ་ཨཱཿཧཱུཾ། དཀོན་མཆོག་སྲི་ཞུའི་

མགྲོན་ལ་ཚོགས་མཆོད་འབུལ། །མགོན་པོ་ཡོན་ཏན་མགྲོན་ལ་དགའ་སྟོན་འགྱེད། །རིགས་དྲུག་སྙིང་རྗེའི་མགྲོན་ལ་སྦྱིན་པ་གཏོང་། །གདོན་བགེགས་ལན་ཆགས་མགྲོན་ལ་བུ་ལོན་འཇལ། །བླ་མ་དཀོན་མཆོག་མཆོད་པས་མཉེས་གྱུར་ཅིག །དམ་ཅན་རྒྱ་མཚོའི་ཐུགས་དམ་སྐོང་གྱུར་ཅིག །རིགས་དྲུག་སེམས་ཅན་འདོད་པ་ཚིམ་གྱུར་ཅིག །གདོན་བགེགས་ལན་ཆགས་བུ་ལོན་བྱང་གྱུར་ཅིག །ཨོཾ་ཨཱཿཧཱུཾ། ཚོགས་ཀྱི་ལོངས་སྤྱོད་རྒྱ་ཆེན་འདི་དག་གིས། །སྐྱེས་མཆོག་བླ་མ་རྣམས་ཀྱི་ཐུགས་དམ་བསྐང་། །ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་། །མ་དང་མཁའ་འགྲོ་རྣམས་ཀྱི་ཐུགས་དམ་བསྐང་། །གཏེར་བདག་གཏེར་སྲུང་རྣམས་ཀྱི་ཐུགས་དམ་བསྐང་། །གཞི་བདག་གཞི་སྲུང་རྣམས་ཀྱི་ཐུགས་དམ་བསྐང་། །མཆོད་ཡུལ་གོང་མ་རྣམས་ཀྱི་ཐུགས་དམ་བསྐང་། །སྦྱིན་ཡུལ་འོག་མ་རྣམས་ཀྱི་ཐུགས་དམ་བསྐང་། །རིགས་དྲུག་ཕ་མ་རྣམས་ཀྱི་ཐུགས་དམ་བསྐང་། །ལན་ཆགས་མགྲོན་གྱུར་རྣམས་ཀྱི་ཐུགས་དམ་བསྐང་། །ཐམས་ཅད་ཐུགས་དམ་གཉན་པོ་དེས་བསྐངས་ལ། །གཡར་དམ་སོར་ཆུད་དངོས་གྲུབ་

བསྩལ་དུ་གསོལ། །ཨོཾ་ཨཱཿཧཱུཾ། སངས་རྒྱས་བསྟན་པ་སྲུང་བའི་མཐུ་བོ་ཆེ། །རྣལ་འབྱོར་བུ་བཞིན་སྐྱོང་བའི་དམ་ཚིག་ཅན། །ཆོས་སྐྱོང་དམ་ཅན་རྒྱ་མཚོར་ཚོགས་མཆོད་འབུལ། །བཞེས་ནས་བྱང་ཆུབ་སྒྲུབ་པའི་གྲོགས་མཛོད་ཅིག །ཡུལ་འདིའི་གཞི་བདག་གཉན་པོ་འཁོར་བཅས་ལ། །གཙང་མ་ཕུད་ཀྱི་ཚོགས་མཆོད་འདི་འབུལ་ལོ། །རྣལ་འབྱོར་དཔོན་སློབ་བསམ་དོན་འགྲུབ་པ་དང་། །སངས་རྒྱས་བསྟན་པ་རྒྱས་པའི་འཕྲིན་ལས་མཛོད། །བསྟན་སྲུང་ཁྱེད་ལ་འཕྲིན་ལས་བཅོལ་བ་ནི། །འདྲེན་མཆོག་ཤཱཀྱའི་བསྟན་པ་སྲུང་བ་དང་། །གངས་ཅན་ལྗོངས་འདིར་བདེ་སྐྱིད་ཕུན་ཚོགས་ཤིང་། །བསྟན་པ་འཛིན་པའི་སྐྱེས་བུ་དམ་པ་རྣམས། །ཞབས་པད་བརྟན་ཅིང་ཡུན་རིང་གྲོགས་མཛོད་ཅིག །ཡར་ངོའི་ཟླ་ལྟར་འཚེ་བ་མེད་པ་དང་། །ཆོས་དང་མཐུན་པའི་གསོལ་བ་བཏབ་པ་ཡི། །མཐུན་རྐྱེན་མ་ལུས་ལྷུན་གྱིས་འགྲུབ་པར་མཛོད། །གང་ཞིག་ཡིད་ལ་དྲན་པ་ཙམ་གྱིས་ཀྱང་། །འདོད་དགུའི་དངོས་གྲུབ་མ་ལུས་སྩོལ་མཛད་པའི། །ཆོས་སྐྱོང་ཡིད་བཞིན་ནོར་བུ་འཁོར་བཅས་ཀྱིས། །བདག་

སོགས་བསམ་དོན་འགྲུབ་པའི་གྲོགས་མཛོད་ཅིག །ཨོཾ་ཨཱཿཧཱུཾ། དམ་ཅན་རྒྱ་མཚོའི་ཚོགས་རྣམས་ཀྱིས། །མཆོད་སྦྱིན་ཚོགས་གཏོར་འདི་བཞེས་ལ། །རྣལ་འབྱོར་དཔོན་སློབ་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་པ་བཟང་། །ལོངས་སྤྱོད་རྒྱ་ཆེན་ཀུན་འཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱིས་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་རྣམས་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་ནོར་འཕེལ་ཞིང་ཆོས་འཕེལ་དང་། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་ཤོག །ཨོཾ་ཨཱཿཧཱུཾ། ཕུན་ཚོགས་འདོད་ཡོན་ལྔ་ལྡན་པའི། །བདུད་རྩི་རྒྱ་མཚོའི་ཚོགས་གཏོར་འདི། །ས་ཡི་ལྷ་མོ་བརྟན་མ་དང་། །སྟོང་གསུམ་གཞི་བདག་ཐམས་ཅད་དང་། །ཚེ་རིང་མཆེད་ལྔ་བསྟན་སྐྱོང་བཅས། །གངས་ལྗོངས་གནས་པ་

ཐམས་ཅད་དང་། །ཁྱད་པར་ཡུལ་ཕྱོགས་འདིར་གནས་པའི། །ཡུལ་ལྷ་གཞི་བདག་རྣམས་ལ་འབུལ། །མཆོད་སྦྱིན་གཏོར་མས་ཚིམ་གྱུར་ནས། །རྣལ་འབྱོར་དཔོན་སློབ་འཁོར་བཅས་ཀྱི། །ལས་དང་བྱ་བ་ཅི་བྱེད་ཀྱང་། །ཀོ་ལོང་ཕྲག་དོག་མ་མཛད་པར། །མཐུན་རྐྱེན་ཡིད་བཞིན་འགྲུབ་པར་མཛོད། །བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །ལྷག་མ་གཏོར་བ་ནི། ཨོཾ་ཨཱཿཧཱུཾ། རྣལ་འབྱོར་དཔོན་སློབ་འཁོར་བཅས་ཀུན། །རྟག་ཏུ་སྲུང་ཞིང་བྱ་ར་བྱེད། །ཐམས་ཅད་འདིར་བྱོན་ལྷག་གཏོར་བཞེས། །བཅོལ་བའི་ཕྲིན་ལས་འགྲུབ་པར་མཛོད། མ་ཧཱ་སརྦ་པཱུ་ཛ་ཁཱ་ཧི། རྩ་གསུམ་ལྷ་ཡི་དཀྱིལ་འཁོར་དུ། །ཚོགས་ཀྱི་འཁོར་ལོ་བསྐོར་བ་ཡིས། །བདག་སོགས་འགྲོ་བ་མ་ལུས་པ། །དཀྱིལ་འཁོར་གཅིག་ཏུ་འགྲུབ་པར་ཤོག །རྩ་གསུམ་ལྷ་ཡི་དཀྱིལ་འཁོར་དུ། །ཚོགས་འཁོར་ཕུལ་པའི་བསོད་ནམས་ཀྱིས། །

སྦྱིན་བདག་ལ་སོགས་འགྲོ་ཀུན་གྱི། །རྡོ་རྗེ་འཛིན་པ་འཐོབ་པར་ཤོག །འདི་དང་དུས་གསུམ་འབྲེལ་བ་ཡི། །དགེ་རྩ་ཇི་སྙེད་བསགས་པ་ཀུན། །མར་གྱུར་སེམས་ཅན་ཐམས་ཅད་ཀྱི། །སངས་རྒྱས་འཐོབ་པའི་རྒྱུ་རུ་བསྔོ། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །སྦྱིན་བདག་འཁོར་དང་བཅས་པ་རྣམས། །ཚེ་འདིར་བསམ་པའི་དོན་འགྲུབ་ཅིང་། །བར་ཆད་ཞི་ནས་བཀྲ་ཤིས་པ། །བསམ་པ་ཆོས་བཞིན་འགྲུབ་པར་ཤོག །ཡོན་ཏན་མཆོག་བརྙེས་རྒྱལ་བ་སྲས་བཅས་རྣམས། །ཚད་མེད་ཐུགས་རྗེའི་དབང་གིས་དེང་འདིར་དགོངས། །འདིས་མཚོན་དགེ་བས་ཕན་བདེ་འབྱུང་བའི་གནས། །སངས་རྒྱས་བསྟན་པ་རྟག་ཏུ་རྒྱས་གྱུར་ཅིག །ཤཱཀྱའི་རྒྱལ་པོ་ལ་སོགས་ཆོས་དབྱིངས་སུ། །སྙོམས་པར་ཞུགས་རྣམས་དགོངས་པ་ཡོངས་རྫོགས་ཤིང་། །བསྟན་འཛིན་དམ་པ་རྣམས་ཀྱི་ཞབས་པད་བརྟན། །ཚོགས་མཆོག་འདུས་སྡེ་བཤད་སྒྲུབ་འཕེལ་གྱུར་ཅིག །བདག་ཅག་རྣམས་ལ་རེ་ཞིང་ལྟོས་པ་ཡི། །སྦྱིན་བདག་

ཕོ་མོ་ཚེ་འདས་ཇི་སྙེད་དང་། །དམིགས་པའི་ཡུལ་རྣམས་ངན་སོང་འཇིགས་དང་བྲལ། །དལ་འབྱོར་རྟེན་ཐོབ་སྐྱ་གསུམ་མངོན་གྱུར་ཤོག །བདག་ཅག་རྣམས་ལ་རེ་ཞིང་ལྟོས་པ་ཡི། །སྦྱིན་བདག་ཕོ་མོ་ཚེ་ལྡན་ཇི་སྙེད་དང་། །ལྟོས་བཅས་ཚེ་ལྡན་རྣམས་ཀྱི་འགལ་རྐྱེན་ཞི། །ཚེ་རིང་ནད་མེད་བདེ་སྐྱིད་ལྡན་པར་ཤོག །གཞན་ཡང་ལྗོངས་འདིར་ནད་མུག་འཁྲུག་རྩོད་སོགས། །མི་མཐུན་རྒུད་པའི་མིང་ཡང་མི་གྲགས་ཤིང་། །ཕུན་ཚོགས་དགེ་ལེགས་ཡར་ངོའི་ཟླ་བཞིན་རྒྱས། །བཀྲ་ཤིས་ཆེན་པོས་ཕྱོགས་ཀུན་ཁྱབ་གྱུར་ཅིག །ཅེས་ཚོགས་མཆོད་ཀུན་བཟང་མཆོད་སྤྲིན་ཞེས་བྱ་བ་འདི་ནི་དད་ཅན་ཉེ་གནས་སྐལ་བཟང་འཕྲིན་ལས་ཀྱིས་འདི་ལྟ་བུ་ཞིག་དགོས་ཞེས་བསྐུལ་ངོར། ཕྱོགས་ཕྱོགས་ནས་བསྡུས་ཏེ། ༧ ཚོགས་དྲུག་རང་གྲོལ་གྱིས་བྱམས་པའི་གླིང་ནས་སྦྱར་བའོ། །སརྦ་མངྒ་ལམ། །དགེའོ།། །།

བསང་མཆོད་མདོར་བསྡུས་བ།

༄༅། །བསང་མཆོད་མདོར་བསྡུས་བཞུགས་སོ། །བསང་གཏོང་བར་འདོད་པས། སྐྱབས་སེམས་ཚད་མེད་བཞི་སྔོན་དུ་བཏང་ནས། དེ་ནས་རང་ཡི་དམ་གང་ཡིན་པ་དེའི་སྐུར་བཞེངས་པར་མོས་ནས། ངག་ཏུ། རང་ཉིད་སྐད་ཅིག་གིས་ཡི་དམ་ལྷའི་སྐུར་བཞེངས་པར་གྱུར། ཨོཾ་བཛྲ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ཨོཾ་འོད་དུ་ཞུ་བ་ལས་མི་གཙང་བའི་གྲིབ་ངན་པ་ཐམས་ཅད་སེལ་ནུས་པའི་དྲི་ཞིམ་དུད་སྤྲིན་འཁྲིགས་པའི་གསེབ་ནས་མེ་ལོང་པི་ཝཾ་སྤོས་ཕོར་ཞལ་ཟས་ན་བཟའ་ཐོགས་པའི་མཆོད་པའི་ལྷ་མོ་གྲངས་མེད་པ་དང་། བཟའ་བཏུང་གོས་རྒྱན་འབྲུ་སྨན་དར་གོས་རིན་པོ་ཆེའི་རིགས་དཔག་ཏུ་མེད་པ་བྱུང་ནས། ས་དང་བར་སྣང་ནམ་མཁའི་ཁྱོན་ཐམས་ཅད་བསང་གི་མཆོད་པས་ཡོངས་སུ་གང་བར་གྱུར། ཨོཾ་ཨཱཿཧཱུྃ། ལན་གསུམ། རང་གི་ཐུགས་ཀའི་འོད་འཕྲོས་ཚོགས་ཞིང་ལྷ། །མ་ལུས་སྤྱན་དྲངས་མདུན་གྱི་ནམ་མཁར་བཞུགས། །རྩ་བརྒྱུད་བླ་མ་རྣམས་ལ་བསང་མཆོད་འབུལ། །རྟོགས་པས་བདག་རྒྱུད་གྲོལ་བར་མཛད་དུ་གསོལ། །ཡི་དམ་ལྷ་ཚོགས་རྣམས་ལ་བསང་མཆོད་འབུལ། །ཐུགས་རྗེས་གཞན་རྒྱུད་སྨིན་པའི་དངོས་གྲུབ་སྩོལ། །ཕྱོགས་བཅུའི་སངས་རྒྱས་རྣམས་ལ་བསང་མཆོད་འབུལ། །

རྟེན་འབྲེལ་ཐབས་ལ་མཁས་པར་བྱིན་གྱིས་རློབས། །བྱང་ཆུབ་སེམས་དཔའ་རྣམས་ལ་བསང་མཆོད་འབུལ། །འབྲེལ་ཚད་དོན་དང་ལྡན་པར་བྱིན་གྱིས་རློབས། །འཕགས་པ་ཉན་རང་རྣམས་ལ་བསང་མཆོད་འབུལ། །སངས་རྒྱས་བསྟན་པ་འཛིན་སྐྱོང་སྤེལ་བར་མཛོད། །དཔའ་བོ་མཁའ་འགྲོ་རྣམས་ལ་བསང་མཆོད་འབུལ། །བསྟན་འཛིན་སྐྱེས་བུའི་འཕྲིན་ལས་སྒྲུབ་པར་མཛོད། །ཆོས་སྐྱོང་སྲུང་མ་རྣམས་ལ་བསང་མཆོད་འབུལ། །རྣལ་འབྱོར་བདག་ཅག་བུ་བཞིན་སྐྱོང་བར་མཛོད། །ལྷ་ཀླུ་སྡེ་བརྒྱད་རྣམས་ལ་བསང་མཆོད་འབུལ། །བཅོལ་བའི་ཕྲིན་ལས་ཐོགས་མེད་སྒྲུབ་པར་མཛོད། །ཡུལ་ལྷ་གཞི་བདག་རྣམས་ལ་བསང་མཆོད་འབུལ། །བར་ཆད་ཀུན་སོལ་བསམ་དོན་འགྲུབ་པར་མཛོད། །ལྷ་དང་མི་ལ་མི་གཙང་གྲིབ་ཕོག་པ། །བསང་ངོ་དག་བྱེད་བསང་གི་དུད་པས་བསང་། །མུན་ལ་ཉི་མ་ཤར་བཞིན་དག་གྱུར་ནས། །གངས་ཀྱི་རི་བོ་བཞིན་དུ་གསལ་བར་ཤོག །མ་རིག་དབང་གིས་ནོངས་པ་ཅི་མཆིས་པ། །བཟོད་པར་བཞེས་ལ་རང་རང་གནས་སུ་གཤེགས། །བསམ་དོན་ཐམས་ཅད་ཆོས་བཞིན་འགྲུབ་པ་དང་། །དགེ་ལེགས་རྒྱུན་མི་འཆད་པའི་བཀྲ་ཤིས་ཤོག །ཅེས་བསང་མཆོད་ཉུང་འདུས་འདི་ཡང་བྱ་བཏང་ཚོགས་དྲུག་རང་གྲོལ་གྱིས་ལ་ཕྱི་ནས་སྨྲས་པའོ།།

མནོལ་བསངས་མདོར་བསྡུས།

༄༅། །མནོལ་བསངས་མདོར་བསྡུས་བཞུགས་སོ། མནོལ་བསང་གཏང་བར་འདོད་པས། རང་ཉིད་ཡི་དམ་གང་རུང་དུ་མོས། བསང་ལ་ཆབ་བྲན་ལ། ཨོཾ་བཛྲ་ཨ་མྲྀ་ཏས་བསངས། སྭ་བྷ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུཾ་འོད་དུ་ཞུ་བ་ལས་བྱུང་བའི་མི་གཙང་བའི་གྲིབ་ངན་པ་ཐམས་ཅད་སེལ་ནུས་པའི་དག་བྱེད་དྲི་ཞིམ་དུད་པའི་སྤྲིན་གྱིས་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་གྱུར། ༀ་ཨཱཿཧཱུྃ། ལན་གསུམ། གཙང་ཞིང་དྲི་ཞིམ་དུད་སྤྲིན་འདིས། །མི་གཙང་གྲིབ་རྣམས་ཐམས་ཅད་བསང་། །ཟས་གྲིབ་གོས་གྲིབ་བཙོག་གྲིབ་དང་། །ཉམས་གྲིབ་དཀོར་གྲིབ་ཐམས་ཅད་བསང་། །འཁོན་གྲིབ་དམ་གྲིབ་ཡུགས་གྲིབ་དང་། །མཛེ་གྲིབ་རོ་གྲིབ་ཐམས་ཅད་བསང་། །ལྷ་མི་ཡོངས་ལ་ཕོག་པའི་གྲིབ། །མ་ལུས་བསང་གི་དུད་པས་བསང་། །བསང་གིས་མི་བསང་གང་ཡང་མེད། །ནད་གདོན་སྡིག་སྒྲིབ་ཐམས་ཅད་བསང་། །མ་དག་གྲིབ་ཀྱིས་མནོལ་བ་ཀུན། །རྣམ་དག་ཆོས་ཀྱི་དབྱིངས་སུ་བསང་། །མགོ་བོ་བཏུམ་པ་སངས་པ་བཞིན། །ལུས་ཀྱི་གྲིབ་རྣམས་སངས་

གྱུར་ཅིག །ན་བུན་མཁའ་ལ་ཡལ་བ་བཞིན། །ངག་གི་གྲིབ་རྣམས་སངས་གྱུར་ཅིག །མེ་ལོང་ས་རྡུལ་ཕྱིས་པ་བཞིན། །ཡིད་ཀྱི་གྲིབ་རྣམས་སངས་གྱུར་ཅིག །གངས་ལ་ཉི་འོད་ཕོག་པ་བཞིན། །ལུས་ལ་བཀྲག་མདངས་འབར་བར་ཤོག །པི་ཝཾ་གླིང་བུའི་སྒྲ་སྙན་བཞིན། །ངག་གི་སྐད་གདངས་སྙན་པར་ཤོག །ཤེལ་ལ་གཟུགས་བརྙན་ཤར་བ་ལྟར། །སེམས་ལ་ཉམས་རྟོགས་འཆར་བར་ཤོག །ཅེས་འདོན་བཞིན་བསང་བཏང་ནས། ནང་ཐམས་ཅད་ལ་བདུག་ན་གྲིབ་ཐམས་ཅད་སངས་ནས་ཁམས་སངས་ཤིང་བདེ་བར་འགྱུར་རོ། །ཞེས་པ་འདི་ནི་ཉེ་གནས་རྣམས་ལ་ཕན་ཕྱིར་༧ཚོགས་དྲུག་རང་གྲོལ་གྱིས་སྦྱར་བའོ། །སརྦ་མངྒ་ལཾ།། །།

གཡང་འགུག་དབུལ་བ་ཀུན་སེལ།

༄༅། །གཡང་འགུག་དབུལ་བ་ཀུན་སེལ་ཞེས་བྱ་བ་བཞུགས་སོ།།

ན་མོ་གུ་རུ། གཡང་འགུག་བྱེད་པར་འདོད་པས། ཐོག་མར་སྐྱབས་འགྲོ་སེམས་སྐྱེད་ཡི་དམ་མངོན་རྟོགས་སྒོམ་པ་རྣམས་སྔོན་དུ་བཏང་། དེ་ནས་དངོས་གཞི་ལ། གཡང་རྟེན་མཆོད་པ་རྒྱས་པར་བཤམས། མདའ་དར་ཕྱོགས་ཀུན་ཏུ་གཡོབ་བཞིན་དུ་འདི་སྐད་དོ། །ཀྱཻ། ནོར་བདག་ཛམ་ལྷ་འཁོར་བཅས་ཀྱིས། ། གནས་འདིར་ཕྱྭ་གཡང་འགུག་པའི་ཕྱིར། །འོད་ཟེར་ལྕགས་ཀྱུ་ལྟ་བུ་འཕྲོས། །ཁབ་ལེན་རྡོ་ཡིས་ལྕགས་བླངས་ལྟར། །སྟེང་ཕྱོགས་ལྷ་ཡི་གོོས་གཡང་ཁུག །འོག་ཕྱོགས་ཀླུ་ཡི་ནོར་གཡང་ཁུག །བར་གྱི་མི་ཡི་བུ་གཡང་ཁུག །འཇིག་རྟེན་ཁམས་ཀྱི་ཕྱྭ་

གཡང་ཁུག །ལུས་འཕགས་ཡུལ་གྱི་ལུས་གཡང་ཁུག །འཛམ་བུ་གླིང་གི་ཆོས་གཡང་ཁུག །བ་གླང་སྤྱོད་ཀྱི་ནོར་གཡང་ཁུག །སྒྲ་མི་སྙན་གྱི་ཚེ་གཡང་ཁུག །རྒྱ་གར་རྒྱལ་པོའི་འབྲས་གཡང་ཁུག །རྒྱ་ནག་རྒྱལ་པོའི་ཇ་གཡང་ཁུག །རོང་པ་རྣམས་ཀྱི་ནས་གཡང་ཁུག །འབྲོག་པ་རྣམས་ཀྱི་མར་གཡང་ཁུག །རྒྱལ་སྲིད་སྣ་བདུན་གཡང་ཁུག་ཅིག །བཀྲ་ཤིས་རྟགས་བརྒྱད་གཡང་ཁུག་ཅིག །རིན་ཆེན་སྣ་བདུན་གཡང་ཁུག་ཅིག །བཀྲ་ཤིས་རྫས་བརྒྱད་གཡང་ཁུག་ཅིག །གཡང་

རྣམས་གཅིག་ཀྱང་མ་ལུས་པ། །སྟེང་འོག་ཕྱོགས་མཚམས་ཀུན་ནས་འོང་། །གཡང་རྟེན་འདི་དག་ཐམས་ཅད་ལ། །ཐིམ་ནས་གཉིས་སུ་མེད་པར་གྱུར། །གཡང་ཀུན་འཕེལ་ནས་ནང་རྣམས་གང་། །གཡས་གཡོན་ཁྱིམ་མཚེའི་ནང་དུ་སོང་། །ས་ཆ་ཡུལ་ཕྱོགས་ཐམས་ཅད་ལ། །བཀྲ་ཤིས་གཡང་ཀུན་འཁྱིལ་བར་ཤོག །བསྭོ་ཆ་འོ་ལྷ་རྒྱལ་ལོ། ཡང་རྒྱས་པར་སྤྲོ་ན་མདའ་དར་གཡབ་བཞིན། །ཨོཾ། ཕན་བདེའི་འབྱུང་གནས་ཆོས་ཀྱི་གཡང་། །རྒྱལ་བ་ཡབ་སྲས་བཤད་པའི་གཡང་། །མི་ལ་རས་པའི་སྒོམ་པའི་གཡང་། །དེ་རིང་གནས་འདིར་གཡང་དུ་ལེན། །ཚེ་དཔག་མེད་མགོན་ཚེ་ཡི་གཡང་། །རྣམ་ཐོས་སྲས་ཀྱི་མཛོད་ཀྱི་གཡང་། །རྗེ་བཙུན་སྒྲོལ་མའི་བུ་ཡི་གཡང་། །དེ་རིང་གནས་འདིར་གཡང་དུ་ལེན། །ཚེ་རིང་རྣམ་དྲུག་ཚོ་ཡི་གཡང་། །མཐུན་པ་སྤུན་བཞི་མཐུན་པའི་གཡང་། །རྒྱ་ནག་ཧྭ་ཤང་བུ་ཡི་གཡང་། །དེ་རིང་གནས་འདིར་གཡང་དུ་ལེན། །གེ་སར་རྒྱལ་པོའི་རྟ་ཡི་གཡང་། །འདོད་འཇོ་བ་ཡི་འོ་མའི་གཡང་། །གཡང་མོ་ལུག་གི་བལ་དཀར་གཡང་། །དེ་རིང་གནས་འདིར་གཡང་དུ་ལེན། །ཁམས་གསུམ་ཀུན་གྱི་

ཟས་ནོར་ཀུན། །རང་དབང་མེད་པར་འདུ་བར་ཤོག །སྲིད་ཞིའི་བདེ་སྐྱིད་མ་ལུས་པ། །རང་བཞིན་ཤུགས་ཀྱིས་འབྱུང་བར་ཤོག །ཡིད་བཞིན་ནོར་དང་དཔག་བསམ་ཤིང་། །གཏེར་ཆེན་བུམ་བཟང་ཇི་བཞིན་དུ། །གཡང་རྟེན་འདི་ལས་དགོས་འདོད་ཀུན། །འབད་རྩོལ་མེད་པར་འབྱུང་བར་ཤོག །ཁ་གཡང་བཀྲ་ཤིས་བརྗོད་པ་བཞིན། །མི་གཡང་རབ་ཏུ་འཕེལ་དུ་གསོལ། །ནོར་གཡང་རབ་ཏུ་འཕེལ་དུ་གསོལ། །ཟས་གཡང་རབ་ཏུ་འཕེལ་དུ་གསོལ། །མཇུག་ཏུ། ཡུལ་ཕྱོགས་ཐམས་ཅད་ལ་བཀྲ་ཤིས་པར་གྱུར་ཅིག །ས་གཞི་ཐམས་ཅད་ལ་བྱིན་ཆགས་པར་གྱུར་ཅིག །ཕྱི་ནང་ཐམས་ཅད་ལ་གཡང་འཁྱིལ་བར་གྱུར་ཅིག །ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །གཞན་ལ་སྨོན་ལམ་བཀྲ་ཤིས་ཤེས་ཚད་བརྗོད་པར་བྱའོ། །ཞེས་གཡང་འགུག་དབུལ་བ་ཀུན་སེལ་ཞེས་བྱ་བ་འདི་ནི། ཁྱུང་དགོན་སྤྲུལ་སྐུ། ཉང་གི་མཚམས་པ། ལྷ་ཁང་དབུ་མཛད་སོགས་རེབ་གོང་སྔགས་མང་གིས་བསྐུལ་ངོར། བླ་མ་ཞབས་དཀར་བས་བཀྲ་ཤིས་འཁྱིལ་པ་ནས་སྦྱར་བའོ། །འདིས་ཀྱང་སེམས་ཅན་དབུལ་བའི་སྡུག་བསྔལ་སེལ་བར་གྱུར་ཅིག །སརྦ་མངྒ་ལཾ།། །།

ཛམ་ནག་གི་མངོན་རྟོགས་འདོད་དགུའི་ཆར་འབེབས།

༄༅། །ཛམ་ནག་གི་མངོན་རྟོགས་འདོད་དགུའི་ཆར་འབེབས་ཞེས་བྱ་བ་བཞུགས་སོ།།

ན་མོ་ཨཱརྱ་ཛམ་བྷ་ལ་ཡེ། འདིར་འདོད་དགུའི་ནོར་གྱི་ཆར་འབེབས་པའི་ནོར་བདག་ཛམ་ནག་གི་མངོན་རྟོགས་བསྒོམ་པར་འདོད་པས། ཐོག་མར་གནས་ཁང་བྱི་དོར་བྱ། ཛམ་ནག་གི་སྐུ་སོགས་རྟེན་གང་ཡོད་བཀྲམ། མཆོད་པ་ཅི་འབྱོར་བཤམས། བདེ་བའི་སྟན་ལ་ལུས་གནད་དྲང་པོར་བསྲངས། དགེ་སེམས་ཁྱད་པར་ཅན་གྱི་ངོས་ནས་སྐྱབས་འགྲོ་སེམས་སྐྱེད་ཚད་མེད་བཞི་བསྒོམ་པ་སྔོན་དུ་བཏང་ནས། རང་ཉིད་སྐད་ཅིག་ཉིད་ལ་འདོད་དགུའི་ནོར་གྱི་ཆར་འབེབས་པའི་ཨཱརྱ་ཛམ་བྷ་ལ་ནག་པོ་སྐུ་མདོག་བུང་བ་ལྟར་གནག་པ། གཅེར་བུ་རིགས་ངན་གྱི་ཆ་ལུགས་ཅན། རྣ་བ་མ་ཕུག་པ། མིའུ་ཐུང་གི་རྣམ་པ་ཅན།

མཚན་མ་གྱེན་དུ་བསྒྲེངས་པ། དམར་ལ་ཟླུམ་པའི་སྤྱན་གསུམ་སྡང་མིག་ཏུ་བགྲད་ཅིང་། ཞལ་གདངས་ཤིང་མཆེ་བ་རྣོན་པོ་བཞི་གཙིགས་པ། ཕྱག་གཡས་པས་ཁམས་གསུམ་གྱི་སྙིང་ཁྲག་ཐམས་ཅད་བསྡུས་པའི་ཁྲག་གིས་བཀང་པའི་ཐོད་པ་ཐུགས་ཀར་འཛིན་ཅིང་། གཡོན་པས་འདོད་དགུའི་ནོར་སྐྱུགས་པའི་གཏེར་གྱི་ནེའུ་ལེ་བརླ་གཡོན་པ་ལ་བརྟེན་པའི་ཚུལ་གྱིས་འཛིན་པ། ཞབས་གཡས་བསྐུམས་གཡོན་བརྐྱངས་པའི་གར་སྟབས་ཀྱིས་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་

པདྨ་དང་ཟླ་བའི་གདན་ལ་གནོད་སྦྱིན་རྣམ་ཐོས་བུའི་གཟུགས་ཅན་ནོར་བུ་སྐྱུགས་པའི་སྟེང་ན་འགྱིང་བ། ཕྱག་གི་ནེའུ་ལེ་དང་ཞབས་ཀྱི་གནོད་སྦྱིན་གྱི་ཁ་དང་ཡན་ལག་རྣམས་ཀླུ་ཆེན་བརྒྱད་སྦྲུལ་གྱི་རྣམ་པས་བརྒྱན་པའི་གདེངས་ཀ་ནོར་བུ་འོད་འབར་བ་དང་། སྤྱི་བོའི་རྒྱལ་བ་མི་བསྐྱོད་པའི་ཕྱག་གི་ནོར་བུ་རྣམས་ལས་གསེར་དངུལ་ཟངས་ལྕགས་འབྲུ་སྨན་ནོར་བུ་དར་ཟབ་སོགས་དགོས་འདོད་ཀྱི་ཆར་ཕབ་ནས། རང་ཉིད་གནས་པའི་ས་ཆ་ཡུལ་རིས་གནས་ཁང་ཐམས་ཅད་འཛད་པ་མེད་པའི་ཟས་ནོར་ལོངས་སྤྱོད་ཀྱིས་གང་བར་གྱུར། ཨོཾ་ཛམྦྷ་ལ་ཛ་ལེནྟྲ་ཡེ་སྭཱ་ཧཱ། ཞེས་སྙིང་པོ་ཅི་མང་བཟླ། རང་གི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་ཞིང་གི་རྒྱལ་བ་ཞི་ཁྲོ་ནོར་ལྷ་གཏེར་བདག་ཐམས་ཅད་ནོར་བདག་ཛམ་ནག་གི་སྐུའི་རྣམ་པར་མདུན་གྱི་ནམ་མཁར་སྤྱན་དྲངས། ནམ་མཁའི་ཁམས་ཁྱབ་པར་བཞུགས་ནས་དགོས་འདོད་ཀྱི་ཆར་ཕབ་པས་རང་ཉིད་གནས་པའི་ས་ཆ་ཡུལ་རིས་ཐམས་ཅད་འཛད་པ་མེད་པའི་ཟས་ནོར་ལོངས་སྤྱོད་ཀྱིས་གང་བར་གྱུར། ཨོཾ་ཛམྦུ་ལ་ཛ་ལེནྟྲ་ཡེ་སྭཱ་ཧཱ། ཅི་མང་བཟླ། བདག་མདུན་གྱི་ལྷ་རྣམས་ཀྱི་ཐུགས་ཀ་ནས་འོད་

ཟེར་ཉི་མ་འབུམ་ཕྲག་དུས་གཅིག་ལ་ཤར་བ་ལས་ཀྱང་ཆེས་ཆེར་དཔག་ཏུ་མེད་པ་ཕྱོགས་བཅུར་འཕྲོས་པས་སྟེང་ཕྱོགས་ལྷའི་ཡུལ་གྱི་ལྷའི་པཉྩ་ལི་ཀའི་གོས་ལ་སོགས་གོས་ཀྱི་རིགས་དང་། རོ་བརྒྱ་ལྡན་པའི་ཟས་ལ་སོགས་པའི་ཟས་ཀྱི་རིགས་དང་། འཆི་མེད་ཚེ་ཡི་བཏུང་བ་ལ་སོགས་པའི་བཏུང་བའི་རིགས་དང་། འོག་ཕྱོགས་ཀླུའི་ཡུལ་གྱི་ཡིད་བཞིན་གྱི་ནོར་བུ་ལ་སོགས་རིན་པོ་ཆེའི་རིགས་དང་། བར་མིའི་ཡུལ་གྱི་ཅང་ཤེས་ཀྱི་རྟ་དང་གླང་པོ་ཆེ་འདོད་འཇོའི་བ་དང་འབྲི་མོ་ལ་སོགས་པའི་ཁལ་རྟ་བཞོན་མའི་རིགས་དང་། གཞན་ཡང་གསེར་དངུལ་ཟངས་ལྕགས་འབྲུ་སྨན་ནོར་བུ་དར་ཟབ་སོགས་འདོད་དགུའི་ཟས་ནོར་ལོངས་སྤྱོད་ཀྱི་རིགས། ཆོས་སྒྲུབ་པའི་མཐུན་རྐྱེན་དུ་འགྲོ་བ་བཀྲ་ཤིས་པའི་དངོས་པོ་ཇི་སྙེད་ཅིག་མཆིས་པ་དེ་དག་ཐམས་ཅད་ལ་འོད་ཟེར་ཕོག་པ་ཙམ་གྱིས་རྡོ་ཁབ་ལེན་གྱིས་ཁབ་བླངས་པ་དང་། རིན་པོ་ཆེ་སྦུར་ལེན་གྱིས་སྦུར་མ་བླངས་པ་ལྟར། ཙེན་གྱིས་བླངས་འུབ་ཀྱིས་བསྡུས་ཏེ་རང་ཉིད་གནས་པའི་ས་ཆ་ཡུལ་རིས་གནས་ཁང་ཐམས་ཅད་ལ། རི་ལྟར་སྤུང་ཞིང་མཚོ་ལྟར་འཁྱིལ་ནས་

ནམ་ཡང་འཛད་པ་མེད་པའི་གཏེར་དང་ནམ་མཁའ་མཛོད་ལ་མངའ་དབང་བསྒྱར་ནས་རྫོགས་ལྡན་གྱི་དུས་བཞིན་བདེ་སྐྱིད་ཀྱི་དཔལ་ལ་ཉིན་མཚན་འཁོར་མོ་ཡུག་ཏུ་སྤྱོད་པའི་སྐལ་པ་དང་ལྡན་པར་གྱུར་ཅིག །ཨོཾ་ཛམ་བྷ་ལ་ཛ་ལེནྟྲ་ཡེ་སྭཱ་ཧཱ། ཅི་མང་བཟླ། མཇུག་ཏུ། ཨོཾ་ཨཱརྱ་ཛམ་བྷ་ལ་ས་པ་རི་ཝཱ་ར་ཨརྒྷཾ་ནས་ཤབྡའི་བར་གྱིས་མཆོད། ནོར་གྱི་དབང་ཕྱུག་རིན་ཆེན་གཏེར་མངའ་ཞིང་། །གནོད་སྦྱིན་ནོར་འཆང་མང་པོ་ཀུན་གྱི་རྗེ། །བྱང་ཕྱོགས་སྐྱོང་བའི་མགོན་པོ་ཛམ་བྷ་ལ། །དངོས་གྲུབ་མཆོག་སྩོལ་མཛད་ལ་ཕྱག་འཚལ་བསྟོད། །ཞེས་མཆོད་བསྟོད་བསྔོ་སྨོན་བཀྲ་ཤིས་ཀྱིས་མཐའ་བརྒྱན་པར་བྱའོ། །ཞེས་ཛམ་ནག་མངོན་རྟོགས་འདོད་དགུའི་ཆར་འབེབས་ཞེས་བྱ་བ་འདི་ནི་དད་གཏོང་ཤེས་རབ་སྙིང་རྗེ་དང་ལྡན་པའི་སློབ་བུ་གནམ་ལ་རྒྱལ། ལྷ་མཚོ། བཀྲ་ཤིས། འབུམ་པ་སོགས་ཞོ་འོང་ལ་ཁའི་དད་ཅན་སྔགས་མང་རྣམས་ཀྱིས་འདི་ལྟ་བུ་ཞིག་དགོས་ཞེས་ཡང་ཡང་བསྐུལ་ངོར་༧འཕགས་པའི་ནོར་གྱིས་ཕྱུག་པའི་རྣལ་འབྱོར་ཞབས་དཀར་པས་དབེན་གནས་བཀྲ་ཤིས་འཁྱིལ་པ་ནས་སྦྱར་བའོ། །འདིས་ཀྱང་སེམས་ཅན་དབུལ་བའི་སྡུག་བསྔལ་ཐམས་ཅད་སེལ་བར་གྱུར་ཅིག །སརྦ་མངྒ་ལཾ།། །།

བླ་མ་ཡིད་བཞིན་ནོར་བུ་སོགས།

༄༅། །བླ་མ་ཡིད་བཞིན་ནོར་བུ་དང་། །དབྱེར་མེད་ནོར་བདག་ཛམ་ནག་ལ། །བདག་ནི་གུས་པས་གསོལ་བ་འདེབས། །ཅི་འདོད་དངོས་གྲུབ་སྩལ་དུ་གསོལ། སྔགས་ཅི་མང་བརྗོད། ཨོཾ་ཛམྦྷ་ལ་ཛ་ལེནྟྲ་ཡེ་སྭཱ་ཧཱ། བདག་གིས་ནོར་བདག་ཛམ་ནག་བཞིན། །འགྲོ་ཀུན་དབུལ་ཕོངས་ཀུན་བསལ་ནས། །སེམས་ཅན་ཐམས་ཅད་ཛམ་བྷ་ལྷའི། །གོ་འཕང་མཆོག་ལ་འགོད་པར་ཤོག །བཅོམ་ལྡན་ནོར་བདག་ཛམ་བྷ་ལྷས། །ཡིད་བཞིན་ནོར་བུ་རྙེད་པ་ལྟར། །བདག་གཞན་གཉིས་ཀྱི་དབུལ་བ་སེལ། ། དགོངས་འདོད་འབྱུང་བའི་བཀྲ་ཤིས་ཤོག །ཅེས་པ་འདི་ནི་རྣལ་འབྱོར་ཞབས་དཀར་པས་སྦྱར་བའོ།། ༎

གཏོར་བསྔོ་མདོར་བསྡུས།

༄༅། །གཏོར་བསྔོ་མདོར་བསྡུས་བཞུགས་སོ།།

ན་མོ་གུ་རུ། གཏོར་བསྔོས་བྱེད་པར་འདོད་པས། ཐོག་མར་རང་ཡི་དམ་གྱི་ལྷ་གང་ཡིན་པའི་སྐུར་མོས་ལ། ངག་ཏུ། རང་ཉིད་སྐད་ཅིག་ཉིད་ལ་ཡི་དམ་ལྷའི་སྐུར་བཞེངས་པར་གྱུར། ༀ་བཛྲ་ཨ་མྲྀ་ཏ༴ སྭ་བྷ་ཝ༴ སྟོང་པའི་ངང་ལས་ཨཱཿལས་བྱུང་བའི་ཐོད་པ་དཀར་པོ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔ་ཡི་གེ་གསུམ་གྱིས་སྦྱངས་རྟོག་སྦར་གསུམ་བྱས་པ་ལས། གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་ཟག་མེད་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། གསུམ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས། །

ཕྱོགས་བཅུའི་ཞིང་ནས་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་ཡུལ་ལྷ་སྤྱན་དྲངས་ཏེ། །མདུན་གྱི་ནམ་མཁའ་ཡངས་པར་བཞུགས་པར་གྱུར། །དབང་བསྐུར་རྒྱུད་བཤད་མན་ངག་གནང་བ་ཡི། །རྩ་བརྒྱུད་བླ་མ་རྣམས་ལ་མཆོད་གཏོར་འབུལ། །བཞེས་ནས་བདག་ཅག་དཔོན་སློབ་འཁོར་བཅས་ཀྱི། །ཤེས་རྒྱུད་སྨིན་ཅིང་གྲོལ་བར་བྱིན་གྱིས་རློབས། །ཅི་འདོད་དངོས་གྲུབ་མ་ལུས་སྩོལ་མཛད་པའི། །ཡི་དམ་ལྷ་ཚོགས་རྣམས་ལ་གཏོར་མཆོད་འབུལ། །བཞེས་ནས་བདག་ཅག་དཔོན་སློབ་འཁོར་བཅས་ལ།

ཅི་འདོད་དངོས་གྲུབ་མ་ལུས་སྩལ་དུ་གསོལ། །ཕྱི་ནང་གསང་བའི་བར་ཆད་ཀུན་སེལ་བའི། །དཔའ་བོ་མཁའ་འགྲོ་རྣམས་ལ་གཏོར་མཆོད་འབུལ། །བཞེས་ནས་བདག་ཅག་དཔོན་སློབ་འཁོར་བཅས་ཀྱི། །འགལ་རྐྱེན་བར་ཆད་ཐམས་ཅད་ཞི་བར་མཛོད། །རྒྱལ་བའི་བསྟན་དང་བསྟན་འཛིན་བུ་བཞིན་དུ། །སྐྱོང་བའི་ཆོས་སྐྱོང་རྣམས་ལ་གཏོར་མཆོད་འབུལ། བཞེས་ནས་བདག་ཅག་དཔོན་སློབ་འཁོར་བཅས་ཀྱི། །ཞི་རྒྱལ་དབང་དྲག་འཕྲིན་ལས་སྒྲུབ་པར་མཛོད། །ཆོས་མཛད་སྐྱེས་བུ་རྣམས་ཀྱི་གྲོགས་མཛད་པའི། །ཡུལ་ལྷ་གཞི་བདག་རྣམས་ལ་གཏོར་མཆོད་འབུལ། །བཞེས་ནས་བདག་ཅག་དཔོན་སློབ་འཁོར་བཅས་ཀྱི། །མཐུན་རྐྱེན་བསམ་དོན་མ་ལུས་འགྲུབ་པར་མཛོད། །བཞེས་ནས་བྱང་ཆུབ་སྒྲབ་པའི་གྲོགས་མཛོད་ཅིག །ཅི་འདོད་དངོས་གྲུབ་ཐམས་ཅད་ཆར་བཞིན་ཕོབ། །སངས་རྒྱས་བསྟན་པ་རྒྱས་པའི་གྲོགས་མཛོད་ཅིག །གནོད་བྱེད་དགྲ་བགེགས་ཐལ་བའི་རྡུལ་དུ་རློག །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །ཅེས་པ་འདི་ཡང་ཚོགས་དྲུག་རང་གྲོལ་གྱིས་སྦྱར་བའོ།། ༈ །།ཆོས་དབྱིངས་ངང་ལས་དྲག་པོའི་སྐུ་རུ་བཞེངས། །མ་རུངས་དགྲ་བགེགས་

འདུལ་མཛད་བསྟན་སྲུང་མཆོག །ཡེ་ཤེས་མགོན་པོ་དམ་ཅན་ཆོས་རྒྱལ་དང་། །ནོར་བདག་རྣམ་སྲས་དྲེགས་པ་ལྕམ་སྲིང་དང་། །དཔལ་ལྡན་ལྷ་མོ་ཚེ་རིང་མཆེད་ལྔ་སོགས། །ཆོས་སྐྱོང་ཕོ་རྒྱུད་མོ་རྒྱུད་འཁོར་བཅས་རྣམས། །གར་བཞུགས་དག་པའི་ཞིང་ཁམས་སོ་སོ་ནས། །ངོ་མཚར་རྫུ་འཕྲུལ་སྣ་ཚོགས་སྟོན་བཞིན་དུ། །ཐོགས་པ་མེད་པར་གནས་འདིར་གཤེགས་སུ་གསོལ། །རང་རང་དགྱེས་པའི་གདན་ལ་བརྟན་པར་བཞུགས། །དངོས་འབྱོར་ཡིད་ཀྱིས་སྤྲུལ་པའི་མཆོད་གཏོར་འབུལ། །བཞེས་ནས་བྱང་ཆུབ་སྒྲུབ་པའི་གྲོགས་མཛོད་ཅིག །ཅི་འདོད་དངོས་གྲུབ་ཐམས་ཅད་ཆར་བཞིན་ཕོབ། །སངས་རྒྱས་བསྟན་པ་རྒྱས་པའི་གྲོགས་མཛོད་ཅིག །གནོད་བྱེད་དགྲ་བགེགས་ཐལ་བའི་རྡུལ་དུ་རློག །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །ཅེས་གསར་མའི་ཆོས་སྐྱོང་རྣམས་ཀྱི་གཏོར་བསྔོས་ཉུང་བསྡུས་འདི་ནི་རྣལ་འབྱོར་ཞབས་དཀར་བས་སྦྱར་བའོ།། ༈ །།ཧཱུྃ། །ཞི་བས་མི་ཐུལ་དྲག་པོས་འདུལ་དགོས་པའི། །གནོད་བྱེད་དགྲ་བགེགས་ཐམས་ཅད་འདུལ་བའི་ཕྱིར། །ཆོས་ཉིད་ཞི་བའི་དབྱིངས་ལས་མ་གཡོས་བཞིན། །སྙིང་རྗེའི་དབང་གིས་དྲག་པོའི་སྐུ་རུ་བཞེངས་། །སྔགས་སྲུང་གཙོ་

མོ་ཨེ་ཀ་ཛཱ་ཏི་དང་། །དགྲ་སྲོག་མྱུར་གཅོད་གཟའ་བདུད་རཱ་ཧུ་ལ། །འཕྲིན་ལས་མྱུར་སྒྲུབ་དམ་ཅན་རྡོ་རྗེ་ལེགས། །བོད་ཁམས་སྐྱོང་བའི་ཚེ་རིང་མཆེད་ལྔ་དང་། །བསྟན་མ་བཅུ་གཉིས་བདུད་བཙན་ཀླུ་གསུམ་སོགས། །ཆོས་སྐྱོང་ཕོ་རྒྱུད་མོ་རྒྱུད་འཁོར་བཅས་རྣམས། །གར་བཞུགས་དག་པའི་ཞིང་ཁམས་སོ་སོ་ནས། །ངོ་མཚར་རྫུ་འཕྲུལ་སྣ་ཚོགས་སྟོན་བཞིན་དུ། ། ཐོགས་པ་མེད་པར་གནས་འདིར་གཤེགས་སུ་གསོལ། །རང་རང་དགྱེས་པའི་གདན་ལ་བརྟན་པར་བཞུགས། །དངོས་འབྱོར་ཡིད་ཀྱིས་སྤྲུལ་པའི་མཆོད་གཏོར་འབུལ། །ཅེས་རྙིང་མའི་ཆོས་སྐྱོང་རྣམས་ཀྱི་གཏོར་བསྔོས་ཉུང་འདུས་འདི་ནི་རྣལ་འབྱོར་ཞབས་དཀར་བས་སྦྱར་བའོ།། ༈ །།ཨོཾ་ཨཱཿཧཱུཾ། ཕན་བདེའི་འབྱུང་གནས་སངས་རྒྱས་བསྟན་སྲུང་མ། །ཆོས་མཛད་བུ་ལྟར་སྐྱོང་བའི་དམ་ལྡན་མ། ། ཚེ་རིང་མཆེད་ལྔ་འཁོར་བཅས་གཏོར་མཆོད་འབུལ། །བཞེས་ནས་བྱང་ཆུབ་སྒྲུབ་པའི་གྲོགས་མཛོད་ཅིག །ཅི་འདོད་དངོས་གྲུབ་ཐམས་ཅད་ཆར་བཞིན་ཕོབ། །སངས་རྒྱས་བསྟན་པ་རྒྱས་པའི་གྲོགས་མཛོད་ཅིག །གནོད་བྱེད་དགྲ་བགེགས་ཐལ་བའི་རྡུལ་དུ་རློག །རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད། །ཅེས་པ་འདི་ཡང་ཞབས་དཀར་བས་བྲིས་པའོ།། །།

གཏོར་མ་བརྒྱ་རྩ་བསྡུས་པ།

༄༅། །གཏོར་མ་བརྒྱ་རྩ་བསྡུས་པ་བཞུགས་སོ།།

ན་མོ་ལོ་ཀི་ཤྭ་ར་ཡ། གཏོར་མ་བརྒྱ་རྩ་གཏོང་བར་འདོད་པས། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་བཏང་། རིལ་བུ་རྣམས་སྣོད་གཅིག་ཏུ་བཤམས། ཆུ་གཙང་མས་བཀང་ལ། དེ་ནས། རང་ཉིད་སྐད་ཅིག་གི་འཕགས་པ་ཐུགས་རྗེ་ཆེན་པོའི་སྐུར་༼ཞལ་གཅིག་ཕྱག་གཉིས་སམ་ཕྱག་བཞི་པ་གང་རུང་བསྐྱེད་མཆན་༽བཞེངས་པར་གྱུར། མ་ཎི་བརྒྱ་རྩ་བརྗོད། ཨོཾ་བཛྲ་ཨ་མྲྀ་ཏས་བསངས། ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་རང་གི་མདུན་དུ་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ལས་གཏོར་མ་དྭངས་ཤིང་ཐོགས་པ་མེད་པའི་ཡེ་ཤེས་ཀྱི་བདུད་

རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་བརྗོད། མཆོག་དམན་བར་མའི་མགྲོན་རྣམས་མ་ལུས་པ། །མཆོད་སྦྱིན་གནས་འདིར་གཤེགས་བཞུགས་དགྱེས་པར་རོལ། ཨོཾ་བཛྲ་ཨརྒྷཾ་ནས། ཤབྡའི་བར་བརྗོད། སམྦྷ་རའི་སྔགས་བརྗོད་པའི་རྗེས་སུ་དེ་བཞིན་གཤེགས་པ་བཞིའི་མཚན་བརྗོད། རིན་ཆེན་སྣོད་དུ་བཟའ་བ་རི་རབ་ཙམ། །གཏུང་བ་རྒྱ་མཚོ་ཙམ་དུ་རབ་སྤྲུལ་ཏེ། །བླ་མ་ཡི་དམ་དཀོན་མཆོག་གསུམ་ལ་འབུལ། །བྱིན་རླབས་དངོས་གྲུབ་ཐམས་ཅད་སྩལ་དུ་གསོལ། །དཔའ་བོ་མཁའ་འགྲོ་ཆོས་སྐྱོང་རྣམས་

ལ་འབུལ། །ཞི་རྒྱས་དབང་དྲག་ཕྲིན་ལས་འགྲུབ་པར་མཛོད། །ཕན་མཛད་དྲང་སྲོང་བདེན་ཚིག་འགྲུབ་ལ་འབུལ། །བསྟན་འགྲོར་ཕན་པའི་སྨོན་ལམ་འགྲུབ་ཏུ་གསོལ། །ནོར་ལྷ་གཏེར་གྱི་བདག་པོ་རྣམས་ལ་འབུལ། །འདོད་དགུའི་ལོངས་སྤྱོད་ཆར་བཞིན་དབབ་ཏུ་གསོལ། །ཡུལ་ལྷ་གཞི་བདག་དཀར་ཕྱོགས་ལྷ་ལ་འབུལ། །འགལ་རྐྱེན་ཀུན་སོལ་མཐུན་རྐྱེན་སྒྲུབ་པར་མཛོད། །མི་མིན་གནོད་སྦྱིན་མཐུ་ཆེན་རྣམས་ལ་འབུལ། །བསྟན་དང་འགྲོ་ཀུན་བུ་བཞིན་སྐྱོང་བར་མཛོད། །གནོད་བྱེད་གདོན་བགེགས་འབྱུང་པོ་རྣམས་ལ་བསྔོ། །ནད་མུག་མ་གཏོང་ལོ་ལེགས་འབྲུ་ནོར་སྤེལ། །མཁའ་མཉམ་མ་གྱུར་འགྲོ་བ་ཡོངས་ལ་བསྔོ། །ཐམས་ཅད་གཏན་དུ་བདེ་ཞིང་སྐྱིད་པར་ཤོག །བཀྲེས་ཤིང་སྐོམ་པའི་ཡི་དྭགས་རྣམས་ལ་བསྔོ། །ཐམས་ཅད་ནམ་མཁའ་མཛོད་ལ་དབང་འབྱོར་ཤོག །ལན་ཆགས་ཤ་འཁོན་གཉེར་བ་རྣམས་ལ་བསྔོ། །ཤ་འཁོན་ཀུན་དག་བུ་ལོན་བྱང་གྱུར་ཅིག །ཤི་ནས་བར་དོར་འཁྱམས་པ་རྣམས་ལ་བསྔོ། །འཇིགས་སྐྲག་ཀུན་ཞི་དག་ཞིང་བགྲོད་པར་ཤོག །གློ་བུར་ལྷགས་ཤིང་ལྷག་མར་རེ་བར་བསྔོ། །འདོད་

དགུའི་ཆར་གྱིས་ཐམས་ཅད་ཚིམས་གྱུར་ཅིག ༈ །འཆི་བསླུ་གཏོང་བར་སྤྲོ་ན་གཏོར་ཁ་གསོས་ལ། ཨོཾ་བཛྲ་ཨ་མྲྀ་ཏ་སོགས་གོང་བཞིན་བསང་སྦྱང་བརླབས་ནས། སམ་བྷ་ར་འོས་ཙམ་གྱིས་བསྔོས་ལ་དེ་བཞིན་གཤེགས་པ་བཞིའི་མཚན་བརྗོད་དེ། མཆོད་སྦྱིན་གྱི་གཏོར་མ་རྒྱ་ཆེན་པོ་འདིས་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་གཙོས་སེམས་ཅན་ཐམས་ཅད་ཚེ་སྲོག་འཕྲོག་པར་བྱེད་པའི་ཡི་དྭགས་ཀྱི་གཙོ་བོ་ཁ་ལ་མེ་འབར་མ་ལ་སོགས་པའི་འབྱུང་པོ་ས་སྟེང་ལ་རྒྱུ་བ། ས་འོག་ཏུ་རྒྱུ་བ། ས་བླ་ལ་རྒྱུ་བ། ཟ་འདྲེ་སྲོག་གཅོད་དབུགས་ལེན་གྱི་རིགས་སུ་གྱུར་པ་རྣམས་ལ་བསྔོའོ། །སྟེར་རོ། །སྦྱིན་ནོ། །མཆོད་སྦྱིན་གྱི་གཏོར་མ་འདི་ཉིད་ཀྱིས་ཚིམས་པར་གྱིས་ལ་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་གཙོས་སེམས་ཅན་ཐམས་ཅད་ཀྱི། ཚེ་མ་འཕྲོག །སྲོག་མ་འཕྲོག །མདངས་མ་འཕྲོག །གཟི་བརྗིད་མ་འཕྲོག །གནོད་པའི་བསམ་སྦྱོར་ཀུན་ཞི་ནས་ཕན་པ་བྱང་ཆུབ་ཀྱི་སེམས་དང་ལྡན་པར་གྱུར་ཅིག ༈ །སྟོན་པའི་གསུངས་བཞིན་འོག་མའི་མགྲོན་རྣམས་ཀྱིས། །སྡིག་སྤོངས་དགེ་སྒྲུབས་

བསམ་པ་བཟང་པོ་གྱིས། །འགལ་འཁྲུལ་ནོངས་པ་ཅི་མཆིས་བཟོད་པར་གསོལ། །མགྲོན་རྣམས་དགྱེས་ཤིང་རང་རང་གནས་སུ་གཤེགས། །དགེ་བས་བདག་གཞན་སངས་རྒྱས་མྱུར་ཐོབ་ཤོག །བཀྲ་ཤིས་ཆེན་པོས་ཕྱོགས་ཀུན་ཁྱབ་གྱུར་ཅིག །སྨོན་ལམ་ནི། འདི་ལྟར་བགྱིས་པའི་བསོད་ནམས་དང་། །བདག་གི་དུས་གསུམ་དགེ་བའི་མཐུས། །ཉམས་ཐག་འགྲོ་བ་མཐའ་དག་གི །མགོན་སྐྱབས་དམ་པར་བདག་གྱུར་ཅིག །ཚ་གདུང་དམྱལ་བའི་འཇིགས་པ་རྣམས། །སྐྱོབ་བྱེད་བསིལ་བའི་ཆར་དང་ནི། གྲང་བའི་དམྱལ་བ་མཐའ་དག་གི །གདུང་སེལ་ཉི་མའི་མཆོག་གྱུར་ཅིག །རོ་བརྒྱའི་ཟས་སྐོམ་རྒྱ་མཚོ་ཡིས། །ཡི་དྭགས་མ་ལུས་དབུགས་འབྱིན་ཅིང་། །བཀོལ་སྤྱོད་རྨོངས་པའི་མུན་སེལ་བའི། །སྒྲོན་མེའི་མཆོག་ཏུ་བདག་གྱུར་ཅིག །ཕྲག་དོག་འཐབ་རྩོད་སྡུག་བསྔལ་གྱི། །མདའ་ཆར་འབབ་ལ་གོ་ཆ་དང་། །འཆི་འཕོ་ལྟུང་བའི་ཆུ་འཁྲུག་པར། །སྒྲོལ་བྱེད་བརྟན་པོའི་གཟིངས་གྱུར་ཅིག །འཇིགས་རུང་སྐྱེ་རྒ་ན་འཆི་ཡི། །རིམས་ནད་དྲག་པོས་གཙེས་པ་ལ། །ཉོན་མོངས་ནད་ཀུན་སེལ་བྱེད་པའི། །སྨན་

པའི་མཆོག་ཏུ་བདག་གྱུར་ཅིག །བདག་ནི་དབུལ་ཞིང་ཕོངས་རྣམས་ལ། །འདོད་དགུ་འབྱུང་བའི་གཏེར་ཆེན་དང་། །གཉེན་དང་བྲལ་བས་གདུངས་རྣམས་ཀྱི། །གཉེན་དང་བཤེས་སུ་ངེས་གྱུར་ཅིག །བདག་ཀྱང་ཚེ་རབས་ཐམས་ཅད་དུ། །དལ་འབྱོར་རྟེན་བཟང་དགེ་བའི་བཤེས། །ཡིད་བཞིན་ནོར་བུ་སྤྱི་བོར་འཛིན། །ཐོས་བསམ་བསྒོམ་པའི་གྲུར་ཞུགས་ནས། །སྐུ་གསུམ་གླིང་དུ་ཕྱིན་གྱུར་ཅིག །ཅེས་པ་འདི་ཡང་སློབ་བུ་བློ་བཟང་དོན་འགྲུབ་སོགས་གྲྭ་བཙུན་ཤེས་རབ་དམན་པ་འགའ་རེས་བསྐུལ་ངོར། ཞབས་དཀར་བས་དབེན་གནས་ལ་ཕྱི་གངས་ར་ནས་སྦྱར་བའོ། །བློ་དམན་རྣམས་ཀྱི་ཚུལ་འདི་ལྟར་རྒྱུན་དུ་མ་ཆག་པར་བཏང་ན་ཕན་ཡོན་དཔག་ཏུ་མེད་པ་ཡོད་པས། གཏོར་རིལ་མ་འབྱོར་བའི་དུས་སུ་ཡང་གྲོ་ནས་ཀྱི་ཡོས་དང་། འབྲས་དང་ཕྱུར་བ་སོགས་བྱིན་གྱིས་བརླབས་ནས་གཏོང་བ་དང་། འགྲུལ་ལམ་སོགས་ལ་འགྲོ་ཚེ་མཚོ་རྫིང་བུ་ལུ་མ་རྒྱུག་ཆུ་གང་གི་ནང་དུ་རིལ་བུ་རྣམས་བླུག་ནས་ངག་ནས་འདོན་བཞིན་ལམ་དུ་འགྲོ་ཞིང་། དུས་རྒྱུན་དུ་མ་ཆག་པར་བཏང་ན་འདི་ཁོ་ནས་ཀྱང་དལ་འབྱོར་གྱི་མི་ལུས་ཐོབ་པ་དོན་ལྡན་དུ་འགྱུར་རོ། །གཞན་གྱི་སྐུ་རིམ་སོགས་འབུམ་ཐེར་གྱི་གྲངས་གསོག་དགོས་པ་རྣམས་ལ་འདི་ཁོ་ནའོ། །རང་ཡང་སོས་དལ་བའི་དུས་སུ་འདི་བཞིན་གང་མང་བྱེ་བ་བརྒྱ་སྟོང་སོགས་གང་འགྲུབ་གཏོང་བ་ལ་བརྩོན་པར་གྱིས་ཤིག །

གོང་གི་འཆི་བསླུ་གྲུབ་དབང་ཡེ་ཤེས་ཆོས་འཕེལ་གྱི་གསུང་དང་། སྨོན་ལམ་པཎ་ཆེན་ཆོས་རྒྱན་གསུང་གཏོར་མ་བརྒྱ་རྩ་ནས་ཁ་བསྐངས་པའོ། །བཀྲ་ཤིས།། །།

མཁའ་འགྲོ་མཆེད་ལྔའི་གསེར་སྐྱེམས་དངོས་གྲུབ་ཆར་འབེབས།

༄༅། །མཁའ་འགྲོ་མཆེད་ལྔའི་གསེར་སྐྱེམས་དངོས་གྲུབ་ཆར་འབེབས་བཞུགས་སོ། ཨོཾ། འཆི་མེད་ཚེ་ཡི་མཆོག་སྩོལ་ཚེ་རིང་མ། །སྣང་གསལ་པྲ་སྟོན་མཐིང་གི་ཞལ་བཟང་མ། །ཟས་ཀྱི་དཔལ་སྟེར་མི་གཡོ་གླང་བཟང་མ། །ནོར་གྱི་མཆོག་སྩོལ་ཅོད་པཎ་མགྲིན་བཟང་མ། །རྐང་བཞི་འཕེལ་མཛད་གཏལ་དཀར་འགྲོ་བཟང་མ། །མཁའ་འགྲོ་ཆེན་མོ་མཆེད་ལྔ་ཡང་། །སྔོན་གྱི་ཐུགས་དམ་རྗེས་དགོངས་ལ། །བྲན་གཡོག་མང་པོའི་འཁོར་དང་བཅས། །ལྷབ་ལྷུབ་མང་པོའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །འདིར་གཤེགས་དམ་རྫས་མཆོད་གཏོར་བཞེས། །བཅོལ་བའི་འཕྲིན་ལས་འགྲུབ་པར་མཛོད། །ཨོཾ་ཨཱཿཧཱུཾ། ལན་གསུམ་གྱིས་གསེར་སྐྱེམས་བྱིན་གྱིས་བརླབས་ལ། དེ་ནས། ཨོཾ། མཁའ་འགྲོ་བཀྲ་ཤིས་ཚེ་རིང་མ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །ཚེ་དང་རིགས་རྒྱུད་དངོས་གྲུབ་སྩོལ། །མཁའ་འགྲོ་མཐིང་གི་ཞལ་བཟང་མ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །པྲ་དང་འཁོར་འབངས་དངོས་གྲུབ་སྩོལ། །མཁའ་

འགྲོ་མི་གཡོ་གླང་བཟང་མ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །བཟའ་བཏུང་ལོངས་སྤྱོད་དངོས་གྲུབ་སྩོལ། །མཁའ་འགྲོ་ཅོད་པཎ་མགྲིན་བཟང་མ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །རིན་ཆེན་བང་མཛོད་དངོས་གྲུབ་སྩོལ། །མཁའ་འགྲོ་གཏལ་དཀར་འགྲོ་བཟང་མ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །རྟ་ནོར་ལུག་གསུམ་དངོས་གྲུབ་སྩོལ། །མཁའ་འགྲོ་མཆེད་ལྔ་འཁོར་བཅས་ལ། །མཆོད་པ་དམ་པ་འདི་འབུལ་ལོ། །གསེར་སྐྱེམས་གཙང་མ་འདི་བཞེས་ལ། །ཅི་འདོད་དངོས་གྲུབ་ཆར་བཞིན་ཕོབ། །ཞི་རྒྱས་དབང་དང་མངོན་སྤྱོད་སོགས། །བཅོལ་བའི་ལས་རྣམས་མྱུར་དུ་སྒྲུབས། །ལུས་དང་གྲིབ་མ་བཞིན་དུ་འགྲོགས། །བདེ་ཆེན་སྦར་བའི་གྲོགས་མཛོད་ཅིག །ཅེས་ཚེ་རིང་མཆེད་ལྔའི་གསེར་སྐྱེམས་དངོས་གྲུབ་ཆར་འབེབས་ཞེས་བྱ་བ་འདི་ནི། ལྷ་མོའི་གསོལ་མཆོད་དང་། སྡེ་བརྒྱད་གསེར་སྐྱེམས་ལ་གཞི་བྱས་ནས། ཞབས་དཀར་པས་བྲིས་པའོ། །སརྦ་མངྒ་ལཾ།། །།

ཤར་ཐམས་ཅད་མཁྱེན་པ་བློ་བཟང་ཆོས་གྲགས་རྒྱ་མཚོའི་ཡང་སྤྲུལ་མྱུར་འབྱོན།

༄༅། །ཤར་ཐམས་ཅད་མཁྱེན་པ་བློ་བཟང་ཆོས་གྲགས་རྒྱ་མཚོའི་ཡང་སྤྲུལ་མྱུར་འབྱོན་བཞུགས་སོ། ཨོཾ་སྭསྟི། ཕྱག་ན་པདྨོ་སྙིགས་དུས་གདུལ་བྱའི་ངོར། །ངུར་སྨྲིག་འཆང་བའི་ཚུལ་འཛིན་སྐྱབས་མགོན་རྗེ། །མི་མངོན་དབྱིངས་ནས་མགོན་མེད་གདུལ་བྱ་ཡི། །མྱ་ངན་གདུངས་པའི་དབྱངས་འདིར་ཡུད་ཙམ་དགོངས། །ཁྱེད་སྐུ་ཉི་མ་གློ་བུར་ནུབ་སོང་བ། །ཀུན་གྱི་ཡིད་ལ་ཝ་ལེར་དྲན་པའི་མོད། །མིག་ནས་མཆི་མ་ཆར་བཞིན་འབབ་པ་འདི། །གཟིགས་ན་ཐུགས་ཀྱིས་བཟོད་དམ་སྙིང་རྗེའི་གཏེར། །སྐྱབས་མགོན་ཡིད་བཞིན་ནོར་བུ་མེད་ཤུལ་དུ། །དད་ལྡན་ལྟོས་བཅས་རེ་བ་སུ་ཡིས་སྐོང་། །ཀྱེ་མ་ཀྱེ་ཧུད་གདུལ་བྱ་སྙིང་རྗེ་ནས། །སླར་ཡང་སྤྲུལ་སྐུ་འབྱོན་པར་མཛད་དུ་གསོལ། །བདག་ཀྱང་དེང་ནས་བྱང་ཆུབ་མ་ཐོབ་བར། །ཚེ་རབས་ཀུན་ཏུ་སྐུ་ཡི་གྲིབ་མ་བཞིན། །རྗེས་སུ་འབྲངས་ཤིང་གསུང་གི་བདུད་རྩི་ལ། །ངོམས་པ་མེད་པར་ལོངས་སུ་སྤྱོད་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོང་འཕང་མྱུར་ཐོབ་
ཤོག །ཅེས་པ་འདི་ནི་བྱ་བཏང་བ་ཚོགས་དྲུག་རང་གྲོལ་བདག་གིས་གདུངས་དབྱངས་སུ་བླངས་པ་ཡིན་པས་ལན་གཅིག་གདུང་མདུན་ནས་གསུངས་པར་ཞུ་ལགས།

རྒྱལ་བསྟན་འཛིན་མཁན་ཡོངས་ཀྱི་གཙུག་གི་རྒྱན་སོགས་མྱུར་འབྱོན།

རྒྱལ་བསྟན་འཛིན་མཁན་ཡོངས་ཀྱི་གཙུག་གི་རྒྱན། །ཡོན་ཏན་རྒྱ་མཚོ་ལྟ་བུའི་དགེ་བའི་བཤེས། །འབྲེལ་ཚད་དོན་ལྡན་སྐྱབས་མགོན་ཡིད་བཞིན་ནོར། །གར་བཞུགས་ཞིང་ནས་བུ་ལ་བརྩེ་བས་དགོངས། །མགོན་ཁྱོད་ཞིང་ཁམས་གཞན་དུ་གཤེགས་སོང་ཞེས། །མི་སྙན་གཏམ་དེ་ཀུན་གྱིས་ཐོས་མ་ཐག །མིག་ནས་མཆི་མ་ཆར་བཞིན་འབབ་པ་ལ། །བརྩེ་བས་གཟིགས་དང་རྗེ་བཙུན་མཁྱེན་པའི་གཏེར། །ཉི་མ་ནུབ་ཀྱང་སླར་ཡང་འཆར་བ་བཞིན། །མགོན་ཁྱོད་ཞིང་ཁམས་གཞན་དུ་གཤེགས་ན་ཡང་། །སླར་ཡང་སྤྲུལ་སྐུ་གསལ་བོར་མྱུར་བྱོན་ནས། སློབ་མ་ཡང་སློབ་རྗེས་སུ་བཟུང་དུ་གསོལ། བདག་ནི་དེང་ནས་ཚེ་རབས་ཐམས་ཅད་དུ། །རྗེ་བཙུན་ཁྱེད་དང་ནམ་ཡང་མི་འབྲལ་ཞིང་། །ནམ་ཞིག་མངོན་པར་རྫོགས་པར་སངས་རྒྱས་ཚེ། །སྲས་ཀྱི་ཐུ་བོར་འགྱུར་བར་བྱིན་གྱིས་རློབས། །ཞེས་དྲིན་ཅན་རྩ་བའི་བླ་མ་གསེར་ཁང་རྡོ་རྗེ་འཆང་ཆེན་པོའི་སྤྲུལ་སྐུ་མྱུར་འབྱོན་འདི་ནི་རང་གཞན་ལ་ཕན་ཕྱིར་རྣལ་འབྱོར་ཞབས་དཀར་བས་གནས་ཆེན་འདམ་བུ་བྲག་དཀར་གསེར་ཁང་ནས་སྦྱར་བའོ། །

རྩ་བརྒྱུད་བླ་མ་ཡི་དམ་ཞི་ཁྲོ་དང་སོགསམྱུར་འབྱོན།

རྩ་བརྒྱུད་བླ་མ་ཡི་དམ་ཞི་ཁྲོ་དང་། །ཕྱོགས་བཅུ་དུས་གསུམ་སངས་རྒྱས་བྱང་སེམས་དང་། །གནས་གསུམ་དཔའ་བོ་མཁའ་འགྲོ་ཆོས་སྐྱོང་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །ཕན་བདེའི་འབྱུང་གནས་བསྟན་པའི་སྲོག་ཤིང་མཆོག །སྙིགས་མའི་འགྲོ་བ་ཡོངས་ཀྱི་སྐྱབས་མགོན་རྗེ། །གྲུབ་པའི་དབང་ཕྱུག་པདྨ་རང་གྲོལ་ལ། །གསོལ་བ་འདེབས་སོ་ཐུགས་རྗེའི་སྤྱིན་གྱིས་གཟིགས། །མགོན་ཁྱོད་གཟུགས་སྐུའི་བཀོད་པ་ཆོས་དབྱིངས་སུ། །བསྡུས་ཀྱང་སྔོན་གྱི་ཐུགས་བསྐྱེད་སྨོན་ལམ་བཞིན། །སླར་ཡང་སྤྲུལ་སྐུ་འཁྲུལ་མེད་གསལ་པོ་ཞིག །ཉི་མ་བཞིན་དུ་འགྲོ་ལ་འཆར་དུ་གསོལ། །བླ་མ་རྒྱལ་བ་སྲས་བཅས་བྱིན་རླབས་དང་། །བདག་གཞན་དུས་གསུམ་བསགས་པའི་དགེ་བའི་མཐུས། །དཔལ་ལྡན་བླ་མའི་སྤྲུལ་སྐུ་མྱུར་འབྱོན་ནས། །གདུལ་བྱ་སྨིན་གྲོལ་ལམ་ལ་འགོད་པར་ཤོག །ཅེས་སྙིགས་དུས་འགྲོ་མགོན་གྲུབ་པའི་དབང་ཕྱུག་པདྨ་རང་གྲོལ་བདེ་བར་གཤེགས་པའི་སྤྲུལ་སྐུ་མྱུར་འབྱོན་འདི་ནི་དད་གཏོང་བློ་གྲོས་ཡངས་པའི་སོག་ཚའི་དགེ་བྱིས་དགེ་འདུན་རབ་བརྟན་གྱིས་བསྐུལ་ངོར་རྣལ་འབྱོར་ཚོགས་དྲུག་རང་གྲོལ་གྱིས་ཐོ་ནོ་ཅིའི་དབེན་གནས་བདེ་ཆེན་དགའ་ཚལ་ནས་སྦྱར་བའོ། །

ཕན་བདེའི་འབྱུང་གནས་མདོ་རྒྱུད་རིན་པོ་ཆེ་སོགས་མྱུར་འབྱོན།

ཕན་བདེའི་འབྱུང་གནས་མདོ་རྒྱུད་རིན་པོ་ཆེ། །རྣལ་འབྱོར་ཚོགས་རིན་ཆེན་མཛད་ཀྱི་སྒོ་ཕྱེས་ནས། །སྐལ་བཟང་གདུལ་བྱའི་རེ་བ་ཡོངས་སྐོང་བའི། །སྐྱབས་མགོན་ཡིད་བཞིན་ནོར་བུར་གསོལ་བ་འདེབས། །རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར། །མགོན་ཁྱོད་གཟུགས་སྐུའི་བཀོད་པ་ཆོས་དབྱིངས་སུ། །བསྡུས་ཀྱང་སླར་ཡང་སྤྲུལ་སྐུ་མྱུར་བྱོན་ནས། །གདུལ་བྱ་སྨིན་གྲོལ་ལམ་ལ་འགོད་པར་མཛོད། །བདག་ཀྱང་དེང་ནས་བྱང་ཆུབ་མ་ཐོབ་བར། །ཚེ་རབས་ཀུན་ཏུ་འབྲལ་མེད་རྗེས་འཛིན་ཅིང་། །ཁྱོད་གསུང་མདོ་རྒྱུད་ཆོས་ལ་ལེགས་སྦྱངས་ནས། །རྣམ་མཁྱེན་སངས་རྒྱས་གོ་འཕང་མྱུར་ཐོབ་ཤོག །ཅེས་གྲུབ་དབང་རྫོགས་ཆེན་རིན་པོ་ཆེའི་སྤྲུལ་སྐུ་མྱུར་འབྱོན་འདི་ནི། སྤྲུལ་སྐུ་རྣམ་གཉིས་ཨ་ལགས་སོག་ཚ་ལ་སོགས་པའི་སློབ་མ་བུ་ཆེན་རྣམས་ཀྱིས་འཇའ་ཤེས་མེ་ལོང་ལྷ་རྫས་དྲི་མ་མེད་པ་ཕུལ་ནས་བསྐུལ་ངོར། ༧རྣལ་འབྱོར་ཞབས་དཀར་བས་སྦྱར་བའོ། ༈ །

འཇིགས་བྲལ་ཕྱོགས་ལས་རྣམ་རྒྱལ་ཡོངས་འཛིན་རྗེ་སོགས་མྱུར་འབྱོན།

འཇིགས་བྲལ་ཕྱོགས་ལས་རྣམ་རྒྱལ་ཡོངས་འཛིན་རྗེ། །འབྲལ་མེད་བསྟེན་ནས་མདོ་སྔགས་གཞུང་ལ་སྦྱངས། །སློབ་མ་བཟང་པོ་གཞན་ལ་འདོམ་མཁས་
པའི། །མཚན་ལྡན་བླ་མའི་ཞབས་ལ་གསོལ་བ་འདེབས། །མགོན་ཁྱོད་གཟུགས་སྐུའི་བཀོད་པ་ཆོས་དབྱིངས་སུ། །བསྡུས་ཀྱང་མི་མངོན་དབྱིངས་ནས་བརྩེ་བས་དགོངས། །སླར་ཡང་ཁྱེད་ཀྱིས་གདུལ་བྱར་སྙིང་རྗེ་ནས། །སྤྲུལ་སྐུ་མྱུར་དུ་འབྱོན་པར་མཛད་དུ་གསོལ། །ཕྱོགས་བཅུའི་རྒྱལ་བ་སྲས་བཅས་བྱིན་རླབས་དང་། །བདག་གཞན་དུས་གསུམ་བསགས་པའི་དགེ་བའི་མཐུས། །དཔལ་ལྡན་བླ་མའི་སྤྲུལ་སྐུ་མྱུར་བྱོན་ནས། །གདུལ་བྱ་སྨིན་གྲོལ་ལམ་ལ་འགོད་པར་ཤོག །ཅེས་མཁས་བཙུན་བཟང་གསུམ་དང་ལྡན་པའི་བླ་མ་དགེ་བའི་བཤེས་གཉེན་འཇིགས་མེད་བཟང་པོའི་སྤྲུལ་སྐུ་མྱུར་འབྱོན་འདི་ནི་ཤེལ་དགོན་གྱི་དགེ་འདུན་པ་རྣམས་ཀྱིས་བསྐུལ་ངོར། ༧རྣལ་འབྱོར་ཞབས་དཀར་པས། དབེན་གནས་བཀྲ་ཤིས་འཁྱིལ་བ་ནས་སྦྱར་བའོ། ༈

སྤྲུལ་སྐུ་མྱུར་བྱོན་སྤྱི་འགྲོ།

སྤྲུལ་སྐུ་མྱུར་བྱོན་སྤྱི་འགྲོ་བཞུགས་སོ། །བསླུ་མེད་དཀོན་མཆོག་གསུམ་དང་ཡི་དམ་ལྷར། །ཟོལ་མེད་སྒོ་གསུམ་གུས་པས་གསོལ་བ་འདེབས། །མགོན་མེད་གདུལ་བྱ་རྣམས་ཀྱི་རེ་བའི་དོན། །གེགས་མེད་འགྲུབ་པའི་བྱིན་རླབས་དངོས་གྲུབ་སྩོལ། །རྗེ་བཙུན་བླ་མའི་གཟུགས་སྐུ་ཆོས་དབྱིངས་སུ། །བསྡུས་ཀྱང་མི་མངོན་དབྱིངས་ནས་བརྩེ་
བས་དགོངས། །སླར་ཡང་ཁྱེད་ཀྱིས་གདུལ་བྱར་སྙིང་རྗེ་ནས། །སྤྲུལ་སྐུ་མྱུར་དུ་འབྱོན་པར་མཛད་དུ་གསོལ། །བསྟེན་མཆོད་བསྒྲུབས་པའི་ཆོས་སྐྱོང་སྲུང་མ་ཡིས། །མཚན་ལྡན་བླ་མའི་ཡང་སྲིད་གར་འཁྲུངས་ཀྱང་། །འགལ་རྐྱེན་བར་ཆད་ཐམས་ཅད་ཞི་བ་དང་། །མཐུན་རྐྱེན་བསམ་དོན་འགྲུབ་པའི་འཕྲིན་ལས་མཛོད། །ཕྱོགས་བཅུའི་རྒྱལ་བ་སྲས་བཅས་བྱིན་རླབས་དང་། །བདག་གཞན་དུས་གསུམ་བསགས་པའི་དགེ་བའི་མཐུས། །དཔལ་ལྡན་བླ་མའི་སྤྲུལ་སྐུ་མྱུར་བྱོན་ནས། །བསྟན་འགྲོ་ཡོངས་ལ་ཕན་ཐོགས་འབྱུང་བར་ཤོག །ཅེས་བླ་མ་བདེ་བར་གཤེགས་པ་གང་ལ་བཏོན་མཆོག་པའི་སྤྲུལ་སྐུ་མྱུར་འབྱོན་ཉུང་འདུས་འདི་ནི། དེང་སང་བླ་མ་ཆུང་ཆུང་རེ་གཤེགས་དུས་དད་ཅན་སློབ་མ་འགའ་རེས་སྤྲུལ་སྐུ་མྱུར་འབྱོན་རེ་བཏོན་ན་འདོད་པ་རྣམས་ལ་ཕན་ཕྱིར་ཞབས་དཀར་བས་སྦྱར་བའོ། དགེའོ། དགེའོ།། །།

ཆོས་སྤྱོད་སྨོན་ལམ་རིམ་པ་བདེ་སྐྱིད་ཉི་མ་རང་འཆར།

༄༅། །ཆོས་སྤྱོད་སྨོན་ལམ་རིམ་པ་བདེ་སྐྱིད་ཉི་མ་རང་འཆར་ཞེས་བྱ་བ་བཞུགས་སོ།།

༄༅། །ནམ་མཁས་གར་ཁྱབ་རིག་པས་ཁྱབ། །རིག་པས་གར་ཁྱབ་ཆོས་སྐུས་ཁྱབ། ཆོས་སྐུས་གར་ཁྱབ་ལོངས་སྐུས་ཁྱབ། །ལོངས་སྐུས་གར་ཁྱབ་སྤྲུལ་སྐུས་ཁྱབ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ། །མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ། །མ་

ནམ་མཁའ་དང་མཉམ་པའི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ། །བདག་སོགས་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་ཆོས་སྐུ་ནམ་མཁའ་ལྟ་བུ་ཐོབ་པར་བྱིན་གྱིས་རློབས་ཤིག །ལོངས་སྐུ་ཉི་ཟླ་ལྟ་བུ་ཐོབ་པར་བྱིན་གྱིས་རློབས་ཤིག །སྤྲུལ་སྐུ་སྐར་ཚོགས་ལྟ་བུ་ཐོབ་པར་བྱིན་གྱིས་རློབས་ཤིག །ཚེ་འདི་ཉིད་ལ་ལྷུན་གྲུབ་སྐུ་གསུམ་ཀློང་དུ་འཚང་རྒྱ་བར་བྱིན་གྱིས་རློབས་ཤིག །ད་ལྟ་ཉིད་དུ་བྱིན་གྱིས་རློབས་ཤིག །མྱུར་བ་ཉིད་དུ་བྱིན་

གྱིས་རློབས་ཤིག །འདུག་ས་འདི་རུ་བྱིན་གྱིས་རློབས་ཤིག །མ་གྱུར་ནམ་མཁའི་མཐའ་དང་མཉམ་པའི་མ་སེམས་ཅན་ཐམས་ཅད་ཀྱི་དོན་དུ་ཐོབ་བྱ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཅི་ནས་ཀྱང་མྱུར་བར་མྱུར་དུ་ཐོབ་པར་བྱ། དེའི་ཕྱིར་དུ་རང་བཞིན་ཆོས་ཀྱི་དབྱིངས་དང་མཉམ་པའི་བླ་མ་རྒྱལ་བ་སྲས་དང་བཅས་པ་ཐམས་ཅད་ཀྱིས་ཐུགས་ཉམས་སུ་བཞེས་པའི་དམ་པའི་ཆོས་ཀྱི་ཉིང་ཁུ་རྣམས་ཉམས་སུ་བླང་བར་བགྱིའོ། །ཕྱོགས་བཅུའི་རྒྱལ་བའི་བྱིན་རླབས། བདག་གཞན་དུས་གསུམ་བསགས་པའི་དགེ་བ། ཁྱད་པར་དུ་བདག་གི་ཚེ་གང་པོ་ལ་དགེ་བ་བགྱིས་པ་དང་། ཏིང་ངེ་འཛིན་བསྒོམས་པའི་བསོད་ནམས་ཀྱི་མཐུ་ལ་བརྟེན་ནས། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་འབྲལ་བར་གྱུར་ཅིག །སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་

སྙོམས་ལ་གནས་པར་གྱུར་ཅིག །ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་བཞུགས་པའི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ། མངོན་ཤེས་དང་རྫུ་འཕྲུལ་ལ་ཐོགས་པ་མེད་པ། མཆོག་ཐུན་མོང་གཉིས་ཀྱི་དངོས་གྲུབ་སྩོལ་བ་ལ་མངའ་དབང་བསྒྱུར་བ་ཐམས་ཅད་དང་། ཁྱད་པར་དུ་ཡང་རང་གི་དྲིན་ཆེན་རྩ་བའི་བླ་མ། བསྙེན་བསྒྲུབ་བྱས་པའི་ཡི་དམ། བསྟེན་མཆོད་སྒྲུབ་པའི་སྲུང་མ་ཁྱད་པར་ཅན་རྣམས་ཀྱིས། མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དང་། ཁྱད་པར་དུ་ཡང་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ། ཐུགས་རྗེའི་སྤྱན་གྱིས་ཉིན་མཚན་དུས་དྲུག་ཏུ་གཟིགས་ཤིང་དགོངས་ལ། ཚེ་འདིའི་ནད་གདོན་འགལ་རྐྱེན་བར་ཆད་ཐམས་ཅད་ཉེ་བར་ཞི་ཞིང་ཚེ་དཔལ་བསོད་ནམས་ཐམས་ཅད་འཕེལ་ཞིང་རྒྱས་པ་དང་། ཁྱད་པར་དུ་ཡང་ཞི་རྒྱས་དབང་དྲག་སྒྲུབ་པ་ཆེན་པོ་བརྒྱད་ལ་སོགས་པའི་མཆོག་དང་ཐུན་མོང་གཉིས་ཀྱི་དངོས་གྲུབ་མ་ལུས་པ་ཆར་བཞིན་དུ་

བསྙིལ་དུ་གསོལ། རྩ་བརྒྱུད་བླ་མ་ཡི་དམ་ཞི་ཁྲོ་དང་། །ཕྱོགས་བཅུ་དུས་གསུམ་སངས་རྒྱས་བྱང་སེམས་དང་། །གནས་གསུམ་དཔའ་བོ་མཁའ་འགྲོ་ཆོས་སྐྱོང་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བདག་དང་མཁའ་མཉམ་སེམས་ཅན་ཐམས་ཅད་ཀྱི། །མི་མཐུན་རྐྱེན་དང་བར་ཆད་ཞི་བ་དང་། །མཐུན་པའི་ལམ་སྣ་ཆོས་ལ་དྲང་དུ་གསོལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །བླ་མ་དཀོན་མཆོག་གསུམ་ལ་གསོལ་བ་འདེབས། །འགལ་རྐྱེན་བར་ཆད་མི་འབྱུང་ཞིང་། །མཐུན་རྐྱེན་བསམ་པ་འགྲུབ་པ་དང་། །མཆོག་དང་ཐུན་མོང་དངོས་གྲུབ་སྩོལ། །ཞེས་གསོལ་བ་བཏབ་པས། ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་བཞུགས་པའི་ཚོགས་ཞིང་ཐམས་ཅད་ཀྱི་སྐུ་ལས་འོད་དང་འོད་ཟེར་བདུད་རྩིའི་རྒྱུན་དཔག་ཏུ་མེད་པ་འཕྲོས་ནས། བདག་སོགས་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་ལུས་སེམས་ལ་ཞུགས་པས། ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ངན་པ་ཐམས་ཅད་དང་། ཁྱད་པར་

དེང་འདིར་གནས་སྐབས་ཀྱི་ལུས་ཀྱི་ན་ཚ། སེམས་ཀྱི་སྡུག་བསྔལ། ཚེའི་བར་ཆད་ཆག་ཆེ་ཉམ་ང་མི་འདོད་ཉེར་འཚེའི་རིགས་སུ་གྱུར་པ་གང་ཡོད་ཚད་ཐམས་ཅད་མུན་པའི་གླིང་དུ་ཉི་མ་ཕོག་པ་བཞིན་དུ་ལྷག་མེད་དུ་སྦྱངས། ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ཐམས་ཅད་ཡར་ངོའི་ཟླ་ལྟར་གོང་ནས་གོང་དུ་འཕེལ་ཞིང་རྒྱས་པའི་སྐལ་པ་རྒྱུད་ལ་བཞག །སླར་ཡང་འོད་ཟེར་དཔག་ཏུ་མེད་པ་ཆེས་ཆེར་འཕྲོས་ཏེ། སྣོད་བཅུད་འཇིག་རྟེན་གྱི་ཁམས་ཐམས་ཅད་ལ་ཕོག་པས་མ་དག་པའི་ཉེས་སྐྱོན་ཐམས་ཅད་སྦྱངས་ནས། ཕྱི་སྣོད་འཇིག་རྟེན་གྱི་ཁམས་ཐམས་ཅད་དག་པའི་ཞིང་ཁམས་ཆེན་པོ་དང་གཞལ་ཡས་ཁང་། ནང་བཅུད་ཀྱི་སེམས་ཅན་ཐམས་ཅད་མཚན་དཔེའི་གཟི་བྱིན་རབ་ཏུ་འབར་བའི་ལྷ་དང་ལྷ་མོའི་རང་བཞིན་དག་པ་རབ་འབྱམས་འབའ་ཞིག་ཏུ་གྱུར། དེ་ལྟར་འགྱུར་བར་རྩ་བརྒྱུད་བླ་མ་རྣམས་ཀྱིས་བྱིན་གྱིས་རློབས་ཤིག །ཡི་དམ་ལྷ་ཚོགས་རྣམས་ཀྱིས་དངོས་གྲུབ་སྩོལ་ཅིག །མཁའ་འགྲོ་དང་ཆོས་སྐྱོང་སྲུང་མ་དཀར་ཕྱོགས་ལ་

མངོན་པར་དགའ་བའི་ལྷ་རྣམས་ཀྱིས་རྟག་ཏུ་གཡེལ་བ་མེད་པར་དེ་ལྟ་བུའི་གྲོགས་མཛད་དུ་གསོལ། ༈ ཕྱོགས་བཅུའི་རྒྱལ་བའི་བྱིན་རླབས། བདག་གཞན་དུས་གསུམ་བསགས་པའི་དགེ་བ། ཁྱད་པར་དུ་ཡང་བདག་གི་ལྷག་བསམ་རྣམ་པར་དག་པའི་སྒོ་ནས་ཚེ་གང་པོ་ལ་དགེ་བ་བགྱིས་པ་དང་། ཏིང་ངེ་འཛིན་བསྒོམས་པའི་མཐུ་དང་བྱིན་རླབས་དེ་རྣམས་ལ་བརྟེན་ནས། ཕྱི་སྣོད་འགྲོ་བ་རིགས་དྲུག་གི་གནས་ངན་པ་ཐམས་ཅད་སྐད་ཅིག་ཉིད་ལ་གནས་འགྱུར་ནས། དག་པའི་ཞིང་ཁམས་ཆེན་པོ་དང་། གཞལ་ཡས་ཁང་གི་རང་བཞིན་དུ་གྱུར་ཅིག །ནང་བཅུད་ཁམས་གསུམ་གྱི་སྐྱེ་འགྲོ་སེམས་ཅན་ཐམས་ཅད་ལྷ་དང་ལྷ་མོའི་རང་བཞིན་དག་པ་རབ་འབྱམས་འབའ་ཞིག་ཏུ་གྱུར་ཅིག །རི་ཐམས་ཅད་རོ་བརྒྱ་ལྡན་པའི་ཁ་ཟས་དང་། འབྲས་དཀར་གྲོ་ནས་ལ་སོགས་པའི་འབྲུའི་ཕུང་པོ་ཆེན་པོར་གྱུར་ཅིག །ཆུ་ཐམས་ཅད་རོ་བརྒྱའི་བཅུད་ལྡན་རྒྱ་ཇའི་བཏུང་བ་དང་། འཆི་མེད་ཚེ་ཡི་བདུད་རྩིའི་རང་བཞིན་དང་། མཚོ་ཐམས་ཅད་ཡན་ལག་བརྒྱད་ལྡན་ཁྲུས་ཀྱི་རྫིང་བུ་དང་། འོ་མ་མར་ཁུའི་རྒྱ་མཚོ་ཆེན་པོར་གྱུར་ཅིག །རྩི་ཤིང་ནགས་ཚལ་

ཐམས་ཅད་བཞི་བརྒྱ་རྩ་བཞིའི་ནད་ཐམས་ཅད་འཇོམས་ནུས་པའི་ཨ་རུ་ར་རྣམ་རྒྱལ་དང་། རྩྭ་ཀླུ་བདུད་རྡོ་རྗེ་ལ་སོགས་པའི་ཤི་སོས་སྨན་གྱི་བྱེ་བྲག་སྣ་ཚོགས་པར་གྱུར་ཅིག །ཕལ་པའི་ས་རྡོ་གངས་རྫ་གཡའ་བྲག་སྣང་བའི་དངོས་པོ་ཐམས་ཅད་གསེར་དངུལ་ཟངས་ལྕགས་འབྲུ་སྨན་གཡུ་བྱུར་ནོར་བུ་གོས་དར་རྟ་ནོར་ལུག་གསུམ་རྒྱན་གོས་ཁ་ཟས་ལ་སོགས་པ་གང་ལ་གང་འདོད་ཅི་ལ་ཅི་འདོད་ཀྱི་རང་བཞིན་ཅན་དུ་གྱུར་ཅིག །གཞན་ཡང་ཕུན་སུམ་ཚོགས་པའི་ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་རྣམས་སུ། ལྷ་དང་མིའི་ཡོ་བྱད་དམ་པ། གཟུགས་མཛེས་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ། འདོད་པའི་ཡོན་ཏན་ལྔ་དང་ལྡན་པའི་ཕྱི་ནང་གསང་བའི་མཆོད་སྤྲིན་བསམ་གྱིས་མི་ཁྱབ་བརྗོད་ཀྱིས་མི་ལངས་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུས་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་གྱུར་ཅིག །བདག་གིས་དུས་ད་ནས་བཟུང་སྟེ་ཐབས་མཁས་བསྡུ་བ་རྣམ་པ་བཞིའི་སྒོ་ནས་སེམས་ཅན་ཐམས་ཅད་ལ་

ཕན་པ་དཔག་ཏུ་མེད་པ་ཐོགས་པར་གྱུར་ཅིག །ཐོས་བསམ་སྒོམ་གསུམ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །འཆད་རྩོད་རྩོམ་གསུམ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །ལམ་བསླབ་པ་གསུམ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །ལུང་སྡེ་སྣོད་གསུམ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །རྒྱུད་སྡེ་ཆེན་པོ་བཞིའི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །སྤྱན་དང་མངོན་ཤེས་རྫུ་འཕྲུལ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །མདོར་ན་རང་གི་ལུས་ངག་ཡིད་གསུམ་གྱི་སྒོ་ནས་སེམས་ཅན་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །གཞན་ཡང་སྐྱེ་བ་ནས་ཚེ་རབས་ཐམས་ཅད་དུ་རང་ཉིད་མཐོང་ཐོས་དྲན་རེག་ཐམས་ཅད་དད་པའི་སྤུ་ལོང་གཡོ་ཞིང་བྱང་ཆུབ་མཆོག་གི་ས་བོན་རྒྱུད་ལ་བསྐྲུན་ནུས་པར་གྱུར་ཅིག །རང་ཉིད་མཐོང་ཐོས་དྲན་རེག་ཐམས་

ཅད་ཀྱི་ལུས་ཀྱི་ན་ཚ་སེམས་ཀྱི་སྡུག་བསྔལ་གང་ཡོད་ཚད་ཐམས་ཅད་ཉེ་བར་ཞི་ནས། ལུས་ལ་བདེ་བ་སེམས་ལ་དགའ་བ་དཔག་ཏུ་མེད་པ་འཆར་བར་གྱུར་ཅིག །རང་ཉིད་མཐོང་ཐོས་དྲན་རེག་ཐམས་ཅད་གར་སོང་གི་ཡུལ་ལ་བཀྲ་ཤིས་ཤིང་། གང་བསམ་གྱི་དོན་ཐམས་ཅད་འགྲུབ་པར་གྱུར་ཅིག །གར་བསྡད་ཀྱི་ས་ལ་བྱིན་ཆགས་ཤིང་། གང་ཡོད་ཀྱི་ནོར་ལ་གཡང་འཁྱིལ་བར་གྱུར་ཅིག །གཞན་ཡང་རང་ཉིད་མཐོང་ཐོས་དྲན་རེག་ཐམས་ཅད་ཁ་ཟས་འདོད་ཟས། རྒྱབ་གོས་འདོད་གོས། རྐང་པ་རྟ་འདོད་རྟ། ལག་པ་ནོར་འདོད་ནོར། སེམས་ཆོས་འདོད་ཆོས་དང་མཇལ་བའི་སྐལ་པ་དང་ལྡན་པར་གྱུར་ཅིག །ཁྱད་པར་དུ་ཡང་རང་ཉིད་མཐོང་ཐོས་དྲན་རེག་ཐམས་ཅད་ཀྱི་རྒྱུད་ཀྱི་བསམ་ངན་སྦྱོར་རྩུབ་ཐམས་ཅད་ཞི་ནས་ཕན་པ་བྱང་ཆུབ་ཀྱི་སེམས་དང་ལྡན་པར་གྱུར་ཅིག །རང་ཉིད་མཐོང་ཐོས་དྲན་རེག་ཐམས་ཅད་ཀྱི་རྒྱུད་ལ་ཆོས་མིན་གྱི་བསམ་པ་སྐད་ཅིག་ཙམ་ཡང་མི་འཆར་ཞིང་། ཆོས་ལྡན་གྱི་བྱ་བ་རྟག་ཏུ་དྲན་ནས། དམ་པའི་ཆོས་ཁོ་ན་ཚུལ་བཞིན་དུ་བསྒྲུབ་པའི་སྐལ་པ་དང་ལྡན་པར་གྱུར་

ཅིག །མདོར་ན་རང་ཉིད་མཐོང་ཐོས་དྲན་རེག་ཐམས་ཅད་གནས་སྐབས་སུ་བདེ་ཞིང་། མཐར་ཐུག་སངས་རྒྱས་ཀྱི་གོ་འཕང་བདེ་བླག་ཉིད་དུ་ཐོབ་པར་གྱུར་ཅིག །བླ་མ་རྒྱལ་ཀུན་ཚོགས་གཉིས་རླབས་པོ་ཆེ། །བདག་གཞན་འགྲོ་ཀུན་དུས་གསུམ་དགེ་བའི་ཚོགས། །ཡོངས་རྫོགས་བདག་གི་རྒྱུད་ལ་མྱུར་སྨིན་ནས། །བདག་ནི་མྱུར་བར་མྱུར་དུ་སངས་རྒྱས་ཤོག །ཕྱོགས་བཅུའི་རྒྱལ་བ་རབ་འབྱམས་ཐམས་ཅད་ཀྱི། །སྐུ་གསུང་ཐུགས་ཡོན་ཐམས་ཅད་ཕྱོགས་གཅིག་ཏུ། །སྡོམ་འདྲའི་ཡོན་ཏན་ཞིང་གི་རྡུལ་སྙེད་ཀྱི། །གྲངས་ལས་འདས་པ་བདག་ལ་འབྱུང་བར་ཤོག །གྲོགས་གཞན་མི་དགོས་བདག་ཉིད་གཅིག་པུ་ཡིས། །སྔོན་གྱི་རྒྱལ་བས་འདྲེན་པར་མ་ནུས་པའི། །མ་གྱུར་སེམས་ཅན་གཅིག་ཀྱང་མ་ལུས་པ། །ཐམས་ཅན་སངས་རྒྱས་ས་ལ་འགོད་པར་ཤོག །བདག་གིས་འོད་ཟེར་དཔག་ཏུ་མེད་པ་སྤྲོས། །ནམ་མཁའི་མཐའ་མཉམ་སྣོད་བཅུད་ཡོངས་ལ་ཕོག །མ་དག་ཉེས་སྐྱོན་མུན་ལ་ཉི་ཤར་བཞིན། །ལྷག་མ་མེད་པར་ཡོངས་སུ་སྦྱོང་བར་ཤོག །སླར་ཡང་འོད་ཟེར་དཔག་མེད་ཆེས་ཆེར་འཕྲོས། །སྣོད་བཅུད་ལ་ཕོག་

གསེར་འགྱུར་རྩི་མཆོག་གིས། །ལྕགས་ལ་རེག་བཞིན་སྣོད་རྣམས་དག་པའི་ཞིང་། །བཅུད་རྣམས་ལྷ་དང་ལྷ་མོར་འགྱུར་བར་ཤོག །མ་དག་གནས་ཀུན་དག་པའི་ཞིང་དུ་གྱུར། །འགྲོ་ཀུན་མཚན་དཔེས་བརྒྱན་པའི་ལྷར་གྱུར་ནས། །རིན་ཆེན་གསེར་གྱི་གླིང་ན་རྡོ་མེད་བཞིན། ཁམས་གསུམ་འཁོར་བའི་མིང་ཡང་མེད་པར་ཤོག །སེམས་ཅན་ཐམས་ཅད་གཅིག་མེད་གདུལ་བྱར་རྫོགས། །སངས་རྒྱས་བྱང་སེམས་ཡོངས་ཀྱི་འཕྲིན་ལས་རྫོགས། །ཐུགས་སྐྱེད་མཐར་ཕྱིན་ཐུགས་དགོངས་ཡོངས་སུ་རྫོགས། །དགྱེས་བཞིན་སངས་རྒྱས་ཡོངས་རྫོགས་བཞུགས་པར་ཤོག །བདག་གིས་སེམས་ཅན་སངས་རྒྱས་སར་བཀོད་ནས། །ད་དུང་མི་སྡོད་ཆོས་དབྱིངས་ནམ་གནས་བར། །སངས་རྒྱས་ཡོངས་ལ་མཉེས་པའི་མཆོད་པའི་སྤྲིན། །བསམ་གྱིས་མི་ཁྱབ་སྤྲུལ་ནས་མཆོད་པར་ཤོག །སྐྱོ་ངལ་མེད་པར་ཉིན་མཚན་དུས་དྲུག་ཏུ། ། དཔག་ཏུ་མེད་པའི་མཆོད་སྤྲིན་ཕུལ་བའི་མཐུས། །རྒྱལ་བ་ཀུན་གྱིས་བུ་གཅིག་ལྟར་བརྩེ་ཞིང་། །བདག་གི་བསྔགས་པས་ཞིང་ཀུན་འགེངས་པར་ཤོག །མདོར་ན་བདག་

གིས་གང་འདོད་ཀུན་བྱིན་ནས། །སེམས་ཅན་ཀུན་གྱི་རེ་བ་ཡོངས་བསྐངས་ཤིང་། །མཆོད་སྤྲིན་བསམ་གྱིས་མི་ཁྱབ་ཀུན་ཕུལ་ནས། །སངས་རྒྱས་ཀུན་གྱི་ཐུགས་དགོངས་ཡོངས་རྫོགས་ཤོག །བདག་གི་ལྷག་བསམ་རྣམ་པར་དག་པའི་སྒོས། །སྨོན་ལམ་རྣམ་པར་དག་པ་བཏབ་པ་བཞིན། །བླ་མ་རྒྱལ་བ་སྲས་དང་བཅས་རྣམས་ཀྱིས། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ། །བླ་མ་རྒྱལ་བ་སྲས་བཅས་བྱིན་རླབས་དང་། །བདག་གཞན་དུས་གསུམ་བསགས་པའི་དགེ་བའི་མཐུས། །བདག་ནི་དེང་ནས་ཚེ་རབས་ཐམས་ཅད་དུ། །བསྟན་དང་འགྲོ་བའི་དཔལ་དུ་འགྱུར་བར་ཤོག །ནོར་བུ་དར་ཟབ་ནང་དུ་སྦས་བཞག་ཀྱང་། །ཀུན་ལ་ཕན་བདེ་བཀྲ་ཤིས་འབྱུང་བ་ལྟར། །བདག་ནི་དེང་ནས་ཚེ་རབས་ཐམས་ཅད་དུ། །དབེན་པར་བསྡད་ཀྱང་འགྲོ་ལ་ཕན་པར་ཤོག །ཉི་ཟླ་མི་སྡོད་ཕྱོགས་བཞི་བསྐོར་ནས་ནི། །གླིང་བཞིའི་འགྲོ་བ་ཡོངས་ལ་ཕན་པ་ལྟར། །བདག་ནི་དེང་ནས་ཚེ་རབས་ཐམས་ཅད་དུ། །རྒྱལ་ཁམས་བསྐོར་ཀྱང་འགྲོ་ལ་ཕན་པར་ཤོག །རྨད་བྱུང་སྲས་བཅས་རྒྱལ་བའི་བྱིན་རླབས་དང་། །རྟེན་འབྲེལ་བསླུ་བ་མེད་

པའི་བདེན་པ་དང་། །བདག་གི་ལྷག་བསམ་དག་པའི་མཐུ་སྟོབས་ཀྱིས། །རྣམ་དག་སྨོན་པའི་གནས་ཀུན་མྱུར་འགྲུབ་ཤོག །ཤཱཀྱའི་དབང་པོ་འདྲེན་པ་འོད་དཔག་མེད། །མི་ཕམ་འཇམ་དབྱངས་གསང་བདག་སྤྱན་རས་གཟིགས། །བདེ་གཤེགས་འཁོར་བཅས་རྟེན་འབྲེལ་མི་བསླུ་བའི། །བདེན་པས་སྨོན་ལམ་ཅི་བཏབ་མྱུར་འགྲུབ་ཤོག །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །བསྔོ་བ་སྨོན་ལམ་བཏབ་ཚད་འགྲུབ་པར་ཤོག །དེ་ལྟར་དུ་འགྲུབ་པ་ཡང་དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་པ་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པའི་སྟོབས་ཀྱིས། ཇི་ལྟར་སྨོན་པའི་གནས་རྣམས་དེ་དེ་བཞིན་དུ་འགྲུབ་པར་གྱུར་ཅིག །ཏདྱ་ཐཱ། ཨོཾ་པཉྩི་གྲི་ཡ་ཨ་ཝ་བོ་དྷ་ན་སྭཱ་ཧཱ། ཨོཾ་དྷ་རེ་དྷ་རེ་བྷནྡྷ་རེ་སྭཱ་ཧཱ། ཞེས་ཆོས་སྤྱོད་

སྨོན་ལམ་གྱི་རིམ་པ་བདེ་སྐྱིད་ཉི་མ་རང་འཆར་ཞེས་བྱ་བ་འདི་ནི། དད་བརྩོན་ཤེས་རབ་སྙིང་རྗེ་དང་ལྡན་པའི་སྐལ་ལྡན་སྙིང་གི་སློབ་བུ་བློ་བཟང་ཤེསརབ་ཀྱིས་རྒས་ཁར་འགྲོ་ལ་ཕན་པའི་ཆོས་སྤྱོད་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་ངོར། ༧ཞབས་དཀར་པས་རང་གིས་རྒྱུན་དུ་བློ་ལ་འདོན་པ་རྣམས་དབེན་གནས་ཉམས་དགའ་རིག་པ་དྭངས་པའི་རྨ་འགྲམ་རི་ཁྲོད་གཅིག་ནས་བྲིས་པའོ། འདིས་ཀྱང་མཐོང་ཐོས་དྲན་རེག་ཐམས་ཅད་ལ་ཕན་པ་དཔག་ཏུ་མེད་པ་ཐོགས་པར་གྱུར་ཅིག །སརྦ་མངྒ་ལཾ། དགེའོ། །

བླ་མ་རྡོ་རྗེ་སེམས་དཔར་གུས་ཕྱག་འཚལ་སོགས་སྨོན་ལམ།

༄༅། །བླ་མ་རྡོ་རྗེ་སེམས་དཔར་གུས་ཕྱག་འཚལ། །མཆོད་ཚོགས་ཀུན་འབུལ་སྡིག་ལྟུང་མཐོལ་ལོ་བཤགས། །མཛད་པར་ཡི་རང་བསྐུལ་ཞིང་གསོལ་བ་འདེབས། །དགེ་ཚོགས་མངོན་དགའི་ཞིང་དུ་སྐྱེ་ཕྱིར་བསྔོ། །བདག་ནི་ནམ་ཞིག་འཆི་བའི་དུས་སྐབས་སུ། །མདུན་དུ་རྡོ་རྗེ་སེམས་དཔའ་མངོན་སུམ་བྱོན། །འཛུམ་པའི་ཞལ་བསྟན་ཐུགས་རྗེའི་ཕྱག་བསྐྱངས་ནས། །མངོན་པར་དགའ་བའི་ཞིང་དུ་འདྲེན་པར་ཤོག །ས་གཞི་ཤེལ་དཀར་མེ་ལོང་ངོས་ལྟར་མཉམ། །ཡངས་ཤིང་རྒྱ་ཆེ་གསལ་ཞིང་འོད་ཟེར་འབར། །མནན་ན་ནེམ་ཞིང་བཏེག་ན་འཕར་བྱེད་པ། །མངོན་པར་དགའ་བའི་ཞིང་དུ་སྐྱེ་བར་ཤོག །རིན་ཆེན་སྣ་བདུན་ལས་གྲུབ་བྱང་ཆུབ་ཤིང་། །དཔག་ཚད་འབུམ་ལྡན་ལོ་འབྲས་ཕུན་སུམ་ཚོགས། །ཆོས་སྒྲ་སྙན་པར་སྒྲོག་ཅིང་འདོད་དགུ་འབྱུང་། །མངོན་པར་དགའ་བའི་ཞིང་དུ་སྐྱེ་བར་ཤོག །མན་དྷ་ར་སོགས་མེ་ཏོག་དུ་མས་བརྒྱན། །འདོད་འབྱུང་ནོར་བུའི་ཚོགས་རྣམས་ཕྱོགས་བཅུར་བཀྲམ། །ཡན་ལག་བརྒྱད་ལྡན་མཚོ་ལ་ངང་པ་འདུ། །མངོན་པར་དགའ་བའི་ཞིང་དུ་སྐྱེ་བར་ཤོག །རིན་

ཆེན་ལས་གྲུབ་དཔག་བསམ་ལྗོན་པའི་ཤིང་། །ལོ་མ་མེ་ཏོག་འབྲས་བུ་དར་དཔྱངས་མཛེས། །དེ་སྟེང་སྤུ་སྡུག་བྱ་ཚོགས་སྐད་སྙན་སྒྲོག །མངོན་པར་དགའ་བའི་ཞིང་དུ་སྐྱེ་བར་ཤོག །རླུང་གིས་བསྐྱོད་ཚེ་ལྗོན་ཤིང་ཐམས་ཅད་ལས། །སྣ་ཚོགས་མེ་ཏོག་ཆར་འབེབས་དྲི་ཞིམ་འཐུལ། །འདོད་ན་ཟས་གོས་རྒྱན་གྱི་ཆར་ཡང་འབེབས། །མངོན་པར་དགའ་བའི་ཞིང་དུ་སྐྱེ་བར་ཤོག །ཡན་ལག་བརྒྱད་ལྡན་ཁྲུས་ཀྱི་རྫིང་བུ་རྣམས། །རིན་ཆེན་སྣ་བདུན་ཐེམ་སྐས་ཕ་གུས་བསྐོར། །ལྷ་ཤིང་མྱ་ངན་མེད་པའི་ཕྲེང་བས་མཛེས། །མངོན་པར་དགའ་བའི་ཞིང་དུ་སྐྱེ་བར་ཤོག །བུད་མེད་སྐྱོན་བྲལ་དབྱངས་ཅན་ལྷ་མོ་དང་། །མཚུངས་པའི་མཛེས་སྡུག་ཡིད་འོང་གཞོན་ནུ་མ། །བདུན་སྟོང་བདུན་དང་ལྷན་ཅིག་བརྩེ་དགའ་སྐྱོང་། །མངོན་པར་དགའ་བའི་ཞིང་དུ་སྐྱེ་བར་ཤོག །ཤེལ་སོགས་རིན་ཆེན་སྣ་བདུན་གཞལ་ཡས་ཁང་། །རིན་ཆེན་ལས་གྲུབ་ཁྲི་དང་དར་ཟབ་ལྡན། །ངོ་མཚར་གོས་རྒྱན་ཟས་མཆོག་སྣ་ཚོགས་མངའ། །མངོན་པར་དགའ་བའི་ཞིང་དུ་སྐྱེ་བར་ཤོག །ཧ་ཅང་གྲང་བ་མ་ཡིན་དྲོ་བའང་མིན། །བསིལ་དྲོད་ཁོད་སྙོམས་འཇམ་བདེ་

དལ་བའི་རླུང་། །འདོད་ན་ལྡང་ཞིང་མི་འདོད་ཚེ་ན་ཞི། །མངོན་པར་དགའ་བའི་ཞིང་དུ་སྐྱེ་བར་ཤོག །བྱ་དང་ལྗོན་ཤིང་སྙན་པའི་བ་དན་ལས། །ཐོས་པར་འདོད་ན་སྙན་པའི་ཆོས་སྒྲ་འབྱིན། །མི་འདོད་ཚེ་ན་གཅིག་ཀྱང་སྒྲ་མི་གྲགས། །མངོན་པར་དགའ་བའི་ཞིང་དུ་སྐྱེ་བར་ཤོག །གང་འདོད་ཡིད་ལ་དྲན་པ་ཙམ་གྱིས་འབྱུང་། །ནད་གདོན་དགྲ་དང་དབུལ་ཕོངས་འཐབ་རྩོད་སོགས། །མི་འདོད་སྡུག་བསྔལ་མི་སྙན་མིང་ཡང་མེད། །མངོན་པར་དགའ་བའི་ཞིང་དུ་སྐྱེ་བར་ཤོག །ཀུན་ཀྱང་མེ་ཏོག་པདྨར་བརྫུས་ཏེ་སྐྱེ། །ཐམས་ཅད་གཟུགས་མཛེས་བལྟ་བས་ཆོག་མི་ཤེས། །མཚན་དཔེའི་རྒྱན་ལྡན་མངོན་ཤེས་རྫུ་འཕྲུལ་མངའ། །མངོན་པར་དགའ་བའི་ཞིང་དུ་སྐྱེ་བར་ཤོག །རྡོ་རྗེ་སེམས་དཔར་མཉེས་པའི་མཆོད་སྤྲིན་འབུལ། །ཉིན་རེ་བཞིན་དུ་ཟབ་རྒྱས་ཆོས་ལ་ཉན། །ཐམས་ཅད་ཐེག་པ་ཆེན་པོའི་ཆོས་ལ་སྤྱོད། །མངོན་པར་དགའ་བའི་ཞིང་དུ་སྐྱེ་བར་ཤོག །ཕྱོགས་བཅུའི་ཞིང་ཕྱིན་རྒྱལ་བ་སྲས་བཅས་མཆོད། །ཆོས་ཉན་ངོ་མཚར་ཞིང་གི་བཀོད་པར་བལྟས། །སླར་ཡང་མྱུར་དུ་རང་གནས་

ལྡོག་པར་བྱེད། །མངོན་པར་དགའ་བའི་ཞིང་དུ་སྐྱེ་བར་ཤོག །མངོན་པར་དགའ་བའི་ཞིང་དུ་སྐྱེས་ནས་ཀྱང་། །ས་ལམ་ཡོན་ཏན་མ་ལུས་མཐར་ཕྱིན་ནས། །ཚེ་འདིའི་དྲིན་ཅན་ཕ་མས་ཐོག་དྲངས་པའི། །སྐྱེ་བོའི་ཚོགས་རྣམས་བདག་གིས་འདྲེན་པར་ཤོག །ཅེས་པ་འདི་ནི་སློབ་བུ་ཀུན་བཟང་གཞན་ཕན་གྱིས་བསྐུལ་ངོར། ༧བྱ་བཏང་ཚོགས་དྲུག་རང་གྲོལ་གྱིས་སར་གནས་དག་པ་མཁའ་སྤྱོད་དཔལ་གྱི་ཙ་རི་དྲའི་གཅིག་ཆར་ཡང་དགོན་ནས་སྦྱར་བའོ། །དགེའོ།། ༎

སྨོན་ལམ་སངས་རྒྱས་ཞིང་ཁམས་གྲངས་མེད་ཀྱི་སྒོ་རྣམས་འབྱེད་པའི་ལྡེ་མིག

༄༅། །སྨོན་ལམ་སངས་རྒྱས་ཞིང་ཁམས་གྲངས་མེད་ཀྱི་སྒོ་རྣམས་འབྱེད་པའི་ལྡེ་མིག་ཞེས་བྱ་བ་བཞུགས་སོ།།

༄༅། །ཕྱོགས་བཅུའི་ཞིང་ཁམས་རྣམས་ཡིད་ལ་བྱས་ནས་འདི་སྐད་དོ། །ཨེ་མ་ཧོ། འདི་ནས་ཤར་གྱི་ཕྱོགས་རོལ་ན། །མངོན་པར་དགའ་བའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །རྡོ་རྗེ་སེམས་དཔའ་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་ལྷོ་ཡི་ཕྱོགས་རོལ་ན། །དཔལ་དང་ལྡན་པའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །རིན་ཆེན་འབྱུང་ལྡན་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་

ཤོག །འདི་ནས་ནུབ་ཀྱི་ཕྱོགས་རོལ་ན། །པདྨ་བརྩེགས་པའི་ཞིང་ཁམས་ཡོད། །ཞིང་ཁམས་དེ་ན་སྤྲུལ་པའི་སྐུ། །བཅོམ་ལྡན་སྣང་བ་མཐའ་ཡས་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་བྱང་གི་ཕྱོགས་རོལ་ན། །ལས་རབ་རྫོགས་པའི་ཞིང་ཁམས་ཡོད། །ཞིང་ཁམས་དེ་ན་སྤྲུལ་པའི་སྐུ། །བཅོམ་ལྡན་དོན་ཡོད་གྲུབ་པ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་བྱང་ཤར་ཕྱོགས་རོལ་ན། །སྟོབས་

རྣམས་བཀོད་པ་ཞེས་བྱ་བའི། །ཞིང་ཁམས་ཤིན་ཏུ་ཡངས་པ་ཡོད། །ཞིང་ཁམས་དེ་ན་མཐུ་སྟོབས་ཀྱི། །བདག་པོ་ཕྱག་ན་རྡོ་རྗེ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་ཤར་ལྷོའི་ཕྱོགས་རོལ་ན། །ཐུགས་རྗེས་བརྒྱན་པའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །སྤྱན་རས་གཟིགས་དབང་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་ལྷོ་ནུབ་ཕྱོགས་རོལ་ན། །འཇམ་པའི་མགོན་ཞེས་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །འཇམ་དཔལ་གཞོན་ནུར་གྱུར་པ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་ནུབ་བྱང་ཕྱོགས་རོལ་ན། །འཁྲུགས་པ་ཞི་བྱེད་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །མི་འཁྲུག་པ་ཞེས་བྱ་བ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་སྟེང་གི་ཕྱོགས་རོལ་ན། །ནམ་མཁའ་རྣམ་དག་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །ནམ་མཁའི་རྒྱལ་པོ་ཞེས་

བྱ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །འདི་ནས་འོག་གི་ཕྱོགས་རོལ་ན། །མི་གཡོ་ཞེས་བྱའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །འོད་སྲུངས་ཆེན་པོ་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །ཕྱོགས་བཅུའི་ཞིང་ཁམས་དེ་རྣམས་ཀྱི། །དབུས་སུ་གཏོགས་པའི་བར་སྣང་ན། །དུར་ཁྲོད་མེ་རི་འབར་བ་ཞེས། །འཇིགས་སུ་རུང་བའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །པདྨ་དབང་གི་རྒྱལ་པོ་ཞེས། །ཁྲོ་བོའི་ཆས་ཀྱིས་བརྒྱན་པ་བཞུགས། །སྐྱེ་བ་འདི་ཡི་འོག་རོལ་ཏུ། །ཞིང་ཁམས་དེ་རུ་འགྲོ་བར་ཤོག །གཞན་ཡང་ཕྱོགས་བཅུ་དབུས་རྣམས་སུ། །གཏོགས་པའི་ཞིང་ཁམས་དཔག་མེད་ཡོད། །ཞིང་ཁམས་དེ་དག་ཐམས་ཅད་ན། །སངས་རྒྱས་བྱང་སེམས་དཔག་མེད་བཞུགས། །སྐྱེ་བ་འདི་ཡི་འོག་རོལ་ཏུ། །དེ་དག་རྣམས་སུ་འགྲོ་བར་ཤོག །སོང་ནས་སངས་རྒྱས་དེ་དག་ལ། །བསོད་ནམས་སྟོབས་དང་རྫུ་འཕྲུལ་གྱིས། །ལག་པའི་མཐིལ་ནས་མཆོད་པའི་སྤྲིན། །

བསམ་གྱིས་མི་ཁྱབ་སྤྲོས་ནས་ཀྱང་། །སངས་རྒྱས་འཁོར་བཅས་མཆོད་པར་ཤོག །དེ་ཚེ་སངས་རྒྱས་དེ་རྣམས་ཀྱིས། །ཕྱག་གཡས་བརྐྱངས་ནས་མགོ་ལ་བཞག །བྱང་ཆུབ་ལུང་བསྟན་ཐོབ་པར་ཤོག །ཟབ་དང་རྒྱ་ཆེའི་ཆོས་ཐོབ་ནས། །རང་རྒྱུད་སྨིན་ཅིང་གྲོལ་བར་ཤོག །ཉིན་རེ་བཞིན་དུ་ཕྱོགས་བཅུ་ཡི། །སངས་རྒྱས་ཞིང་ཁམས་གྲངས་མེད་དུ། །སངས་རྒྱས་མཆོད་དང་བལྟ་བའི་ཕྱིར། །རྫུ་འཕྲུལ་ཐོགས་པ་མེད་པ་ཡིས། །སོང་ནས་མཆོད་ཅིང་བལྟ་བར་ཤོག །ཤུལ་གྱི་ཉེ་དུ་གྲྭ་སློབ་སོགས། །ལྷ་ཡི་མིག་གིས་གསལ་བར་མཐོང་། །སྲུང་སྐྱོབ་བྱིན་གྱིས་རློབ་བྱེད་ཅིང་། །འཆི་དུས་ཞིང་དེར་འཁྲིད་པར་ཤོག །ཕྱོགས་བཅུར་བཞུགས་པའི་སངས་རྒྱས་རྣམས། །འཇིག་རྟེན་ཁམས་སུ་སུ་འབྱོན་ཀྱང་། །རྫུ་འཕྲུལ་ཐོགས་པ་མེད་པ་ཡིས། །འོངས་ནས་མཆོད་ཅིང་དམ་ཆོས་ཉན། །སླར་ཡང་སངས་རྒྱས་ཞིང་ཁམས་སུ། །ཐོགས་པ་མེད་པར་འགྲོ་བར་ཤོག །ཕྱོགས་བཅུའི་སངས་རྒྱས་མ་ལུས་པའི། །སྲས་ཀྱི་ཐུ་བོར་བདག་གྱུར་ནས། །དེ་ནས་རིང་པོར་མི་ཐོགས་པར། །རྫོགས་པའི་སངས་རྒྱས་ཐོབ་པར་ཤོག །

རྫོགས་སངས་རྒྱས་ནས་ཕྱོགས་བཅུ་ཡི། །སངས་རྒྱས་ཀུན་གྱི་མཛད་པ་རྣམས། །གཅིག་ཏུ་བསྡུས་པ་ལས་ལྷག་པའི། །རླབས་ཆེན་མཛད་པས་འགྲོ་བ་ནི། །ཕྱོགས་བཅུའི་རྒྱལ་བས་མ་བསྒྲལ་བ། །དེ་དག་བདག་གིས་ཡོངས་བསྒྲལ་ཏེ། །འཁོར་བའི་རྒྱ་མཚོ་སྟོངས་ནས་ཀྱང་། །སངས་རྒྱས་ཞིང་ཁམས་འགེངས་པར་ཤོག །ཞལ་མཐོང་གསུང་ཐོས་བླ་མ་དང་། །ཕྱོགས་བཅུའི་སངས་རྒྱས་བྱང་སེམས་དང་། །ཡི་དམ་མཁའ་འགྲོ་ཆོས་སྐྱོང་དང་། །ཆོས་ཉིད་བདེན་པའི་བྱིན་རླབས་དང་། །བདག་གི་ལྷག་བསམ་དག་པའི་མཐུས། །སྨོན་ལམ་འདི་བཞིན་མྱུར་འགྲུབ་ཤོག །ཅེས་སྨོན་ལམ་འགྲུབ་པའི་གཟུང་སོགས་འདོན། བསྡུ་ན། ཕྱོགས་བཅུ་དང་དབུས་ཕྱོགས་རྣམས་སུ་གཏོགས་པའི་སངས་རྒྱས་ཀྱི་ཞིང་ཁམས་ཐམས་ཅད་གྲངས་མང་བ་ཏིལ་གྱི་གང་བུ་ཁ་ཕྱེ་བ་བཞིན་དང་། འཇའ་ཤེལ་མིག་ལ་བཀབ་ནས་དགོན་སྡེ་སོགས་ལ་བལྟས་པ་བཞིན་ཁྲ་ལམ་མེར་ཕྱོགས་ཕྱོགས་ན་ཡོད་སྙམ་དུ་བསམས་ནས། ད་ལྟ་ཉིད་དུ་ཞིང་ཁམས་དེ་རྣམས་ལ་སོང་ན་ཅི་མ་རུང་། སྐྱེ་བ་འདི་ཡི་འོག་རོལ་ཏུ་དེ་རྣམས་སུ་འགྲོ་བར་ཤོག་ཅིག་སྙམ་དུ། ཨེ་མ་ཧོ། སྟེང་འོག་ཕྱོགས་མཚམས་དབུས་རྣམས་སུ། །སངས་རྒྱས་ཞིང་ཁམས་གྲངས་མེད་

ཡོད། །ཞིང་ཁམས་དེ་དག་ཐམས་ཅད་ན། །སངས་རྒྱས་བྱང་སེམས་གྲངས་མེད་བཞུགས། །སྐྱེ་བ་འདི་ཡི་འོག་རོལ་ཏུ། །བསོད་ནམས་སྟོབས་དང་རྫུ་འཕྲུལ་གྱིས། ། གྲངས་མེད་ཞིང་ཁམས་དེ་རྣམས་སུ། །ཐོགས་པ་མེད་པར་འགྲོ་བར་ཤོག །ཅེས་ཉིན་རེ་བཞིན་དུ་ཡང་ཡང་སྨོན་ལམ་གདབ། འདི་བྲིས་པའི་རྒྱུ་མཚན་ནི། རང་ཉིད་འཁྲུལ་པའི་རྨི་ལམ་དུ་རྩ་བའི་བླ་མས་ཁྱོད་ཀྱིས་རྫོགས་པ་རང་བྱུང་ལྟར་སངས་རྒྱས་ཞིང་ཁམས་ཡིད་ལ་བྱས་ནས་སྨོན་ལམ་བཏབ་ན་ཡང་བཟང་གསུངས་པ་ཞིག་རྨིས་པ་ལ་བརྟེན་ནས་བྱ་བཏང་ཚོགས་དྲུག་རང་གྲོལ་གྱིས་རང་གཞན་ཡོངས་ལ་ཕན་ཕྱིར་སྦྱར་བའོ། །འདི་ཉིད་མཐོང་ཐོས་ཀློག་འདོན་བྱེད་པ་ཀུན་སྐྱེ་བ་འདི་ཡི་འོག་རོལ་ཏུ་ཞིང་ཁམས་དེ་རྣམས་སུ་ཐོགས་པ་མེད་པར་བུ་ཕ་ཁྱིམ་དུ་འགྲོ་བ་ལྟར་ལེགས་པར་འགྲོ་བའི་ལམ་མཁན་ནམ་ལྡེ་མིག་ལྟ་བུར་གྱུར་ཅིག །སརྦ་མངྒ་ལཾ།། །།འདིས་མཚོན་དུས་གསུམ་བསགས་པའི་དགེ་ཚོགས་རྣམས། །སྟོན་པས་བདག་གཞན་རྗེས་སུ་འཛིན་པ་དང་། །བསྟན་པ་དར་ཞིང་བསྟན་འཛིན་སྐུ་ཚེ་བརྟན། །འགྲོ་ཀུན་བདེ་ཞིང་སྐྱིད་པའི་རྒྱུ་རུ་བསྔོ།། །།

རིགས་ལྔའི་ཞིང་སྦྱོང་སྨོན་ལམ།

༄༅། །རིགས་ལྔའི་ཞིང་སྦྱོང་སྨོན་ལམ་བཞུགས་སོ།།

ཀྱེ། སྐལ་ལྡན་རིགས་ཀྱི་བུ་རྣམས་མ་ཡེངས་པར་ཉོན་ཅིག །འདི་ནས་ཤར་གྱི་ཕྱོགས་རོལ་ན། ཤར་ཕྱོགས་མངོན་པར་དགའ་བའི་ཞིང་ཁམས་ཞེས་བྱ་བ་ས་གཞི་ཤེལ་ལས་གྲུབ་པ། རིན་པོ་ཆེ་སྣ་བདུན་གྱི་མིག་མང་རིས་སུ་བྲིས་པ། བཏེག་ན་འཕར་ཞིང་མནན་ན་ནེམ་པ། མཐའ་རིན་པོ་ཆེའི་རྭ་བའི་བསྐོར་བས་ནང་དུ་ཡན་ལག་བརྒྱད་ལྡན་གྱི་མཚོ་ལ་སྤྲུལ་པའི་ངང་པས་བརྒྱན་པ། བྱ་དེ་རྣམས་ཀྱིས་གསུང་སྙན་ཆོས་ཀྱི་རང་སྒྲ་སྒྲོག་པ། གཞན་ཡང་འདོད་དགུ་འབྱུང་བའི་དཔག་བསམ་གྱི་

ཤིང་ལ་དྲིལ་བུ་དར་དཔྱངས་གཡེར་ཁ་བཏག་པ་ལས་ཆོས་ཀྱི་སྒྲ་འབྱིན་པ། ཡིད་བཞིན་གྱིནོར་བུ་དང་འཛམ་བུ་ཆུ་བོའི་གསེར་དང་ཁ་དོག་ལྔ་ལྡན་གྱི་མེ་ཏོག་སྣ་ཚོགས་གཅལ་དུ་བཀྲམ་པ། ཕུན་སུམ་ཚོགས་པའི་ཞིང་ཁམས་དེ་ཉིད་ཀྱི་དབུས་ན། རིན་པོ་ཆེ་ཤེལ་གྱི་གཞལ་མེད་ཁང་། །གྲུ་བཞི་སྒོ་བཞི་རྒྱན་རྟ་བབ་སོགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། བཅོམ་འདས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་བལྟ་བས་ཆོག་མི་ཤེས་པ་ཞིག་གིས། འཁོར་

བྱང་ཆུབ་སེམས་དཔའ་ཚོགས་དཔག་ཏུ་མེད་པ་ལ། ཉི་མ་རེ་རེ་བཞིན་དུ་ཆོས་ཐུན་བཞི་བཞི་འཆད་ཅིང་། འཁོར་དེ་དག་གིས་རང་རང་གི་ཉེ་འཁོར་རྣམས་ལ་ཆོས་སྟོན་པ། ཕུན་སུམ་ཚོགས་པའི་ཞིང་ཁམས་དེ་ན་བདེ་སྐྱིད་ཚད་མེད་པ་ཡོད་དོ། །སྐྱེ་རྒ་ན་འཆི་ལ་སོགས་པའི་སྡུག་བསྔལ་གྱི་མིང་ཙམ་ཡང་མེད་དོ། །འདི་ནས་འོད་ཀྱི་ལམ་དཀར་པོ་ཞིག་ཤར་ཕྱོགས་མངོན་པར་དགའ་བའི་ཞིང་ཁམས་སུ་ཟུག་པའི་ནང་དུ། བླ་མ་ལྷ་དང་ཌཱཀྐི་རྣམས་ཀྱིས་ལམ་སྣ་དྲངས་ཏེ་འོད་ཀྱི་ལམ་དཀར་པོ་དེ་ཉིད་བརྒྱུད་ནས་སོང་། ཤར་ཕྱོགས་མངོན་པར་དགའ་བའི་ཞིང་ཁམས་སུ་སླེབས་ནས། རིགས་ཀྱི་བདག་པོ་རྡོ་རྗེ་སེམས་དཔའི་ཞལ་མཐོང་གསུང་ཐོས་ཕྱིར་མི་ལྡོག་པའི་ས་ཐོབ་སོང་སྙམ་པའི་མོས་པ་མཛོད་ཅིག །སེམས་འགྱུ་བའི་འཕེན་པ་སླར་ལ་མ་ལྡོག་ཅིག །ཕགས་པྲ་བེ་ཤ་ཡ་ཨ་ལ་ལ། ཞེས་སྟོང་པ་ཉིད་ཀྱི་རྒྱས་གདབ་བོ། །ཀྱཻ། སྐལ་ལྡན་རིགས་ཀྱི་བུ་རྣམས་མ་ཡེངས་པར་ཉོན་ཅིག །འདི་ནས་ལྷོ་ཡི་ཕྱོགས་རོལ་ན། ལྷོ་ཕྱོགས་དཔལ་དང་ལྡན་པའི་ཞིང་ཁམས་ཞེས་བྱ་བ་ས་གཞི་གསེར་ལས་གྲུབ་པ། རིན་པོ་ཆེ་སྣ་བདུན་གྱི་མིག་

མང་རིས་སུ་བྲིས་པ། བཏེག་ན་འཕར་ཞིང་མནན་ན་ནེམ་པ། མཐའ་རིན་པོ་ཆེའི་རྭ་བས་བསྐོར་བའི་ནང་དུ་ཡན་ལག་བརྒྱད་ལྡན་གྱི་མཚོ་ལ་སྤྲུལ་པའི་ངང་པས་བརྒྱན་པ། བྱ་དེ་རྣམས་ཀྱིས་གསུང་སྙན་ཆོས་ཀྱི་རང་སྒྲ་སྒྲོག་པ། གཞན་ཡང་འདོད་དགུ་འབྱུང་བའི་དཔག་བསམ་གྱི་ཤིང་ལ་དྲིལ་བུ་དར་དཔྱངས་གཡེར་ཁ་བཏག་པ་ལས་ཆོས་ཀྱི་རང་སྒྲ་འབྱིན་པ། ཡིད་བཞིན་གྱི་ནོར་བུ་དང་འཛམ་བུ་ཆུ་བོའི་གསེར་དང་ཁ་དོག་ལྔ་ལྡན་གྱི་མེ་ཏོག་སྣ་ཚོགས་པ་གཅལ་དུ་བཀྲམ་པ། ཕུན་སུམ་ཚོགས་པའི་ཞིང་ཁམས་དེ་ཉིད་ཀྱི་དབུས་ན། རིན་པོ་ཆེ་གསེར་གྱི་གཞལ་མེད་ཁང་། གྲུ་བཞི་སྒོ་བཞི་རྒྱན་རྟ་བབ་སོགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། བཅོམ་ལྡན་འདས་དཔལ་རིན་ཆེན་འབྱུང་ལྡན་སྐུ་མདོག་སེར་པོ་བལྟ་བས་ཆོག་མི་ཤེས་པ་ཞིག་གིས། འཁོར་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ལ། ཉི་མ་རེ་རེ་བཞིན་དུ་ཆོས་ཐུན་བཞི་བཞི་འཆད་ཅིང་། འཁོར་དེ་དག་གིས་རང་རང་གི་ཉེ་འཁོར་རྣམས་ལ་ཆོས་སྟོན་པ། ཕུན་སུམ་ཚོགས་པའི་ཞིང་ཁམས་དེ་ན་བདེ་སྐྱིད་ཚད་

མེད་པ་ཡོད་དོ། སྐྱེ་རྒན་འཆི་ལ་སོགས་པའི་སྡུག་བསྔལ་གྱི་མིང་ཙམ་ཡང་མེད་དོ། །འདི་ནས་འོད་ཀྱི་ལམ་སེར་པོ་ཞིག་ལྷོ་ཕྱོགས་དཔལ་དང་ལྡན་པའི་ཞིང་ཁམས་སུ་ཟུག་པའི་ནང་དུ། བླ་མ་ལྷ་དང་ཌཱཀྐི་རྣམས་ཀྱིས་ལམ་སྣ་དྲངས་ཏེ་འོད་སེར་པོའི་ལམ་བརྒྱུད་ནས་སོང་། ལྷོ་ཕྱོགས་དཔལ་དང་ལྡན་པའི་ཞིང་ཁམས་སུ་སླེབས་ནས། རིགས་ཀྱི་བདག་པོ་རིན་ཆེན་འབྱུང་ལྡན་གྱི་ཞལ་མཐོང་གསུང་ཐོས་ཕྱིར་མི་ལྡོག་པའི་ས་ཐོབ་སོང་སྙམ་པའི་མོས་པ་མཛོད་ཅིག །སེམས་འགྱུ་བའི་འཕེན་པ་སླར་ལ་མ་ལྡོག་ཅིག །ཕགས་པྲ་བེ་ཤ་ཡ་ཨ་ཨ། ཞེས་སྟོང་པ་ཉིད་ཀྱི་རྒྱས་གདབ་བོ། །ཀྱེ །སྐལ་ལྡན་རིགས་ཀྱི་བུ་རྣམས་མ་ཡེངས་པར་ཉོན་ཅིག །འདི་ནས་ནུབ་ཀྱི་ཕྱོགས་རོལ་ན། ནུབ་ཕྱོགས་བདེ་བ་ཅན་གྱི་ཞིང་ཁམས་ཞེས་བྱ་བ་ས་གཞི་པདྨ་ར་ག་ལས་གྲུབ་པ། རིན་པོ་ཆེ་སྣ་བདུན་གྱི་མིག་མང་རིས་སུ་བྲིས་པ། བཏེག་ན་འཕར་ཞིང་མནན་ན་ནེམ་པ། མཐའ་རིན་པོ་ཆེའི་རྭ་བས་བསྐོར་བའི་ནང་དུ་ཡན་ལག་བརྒྱད་ལྡན་གྱི་མཚོ་ལ་སྤྲལ་པའི་ངང་པས་བརྒྱན་པ། བྱ་དེ་རྣམས་ཀྱིས་གསུང་སྙན་ཆོས་ཀྱི་རང་སྒྲ་སྒྲོག་པ། གཞན་ཡང་འདོད་དགུ་

འབྱུང་བའི་དཔག་བསམ་གྱི་ཤིང་ལ་དྲིལ་བུ་དར་དཔྱངས་གཡེར་ཁ་བཏག་པ་ལས་ཆོས་ཀྱི་རང་སྒྲ་འབྱིན་པ། ཡིད་བཞིན་གྱི་ནོར་བུ་དང་འཛམ་བུ་ཆུ་བོའི་གསེར་དང་ཁ་དོག་ལྔ་ལྡན་གྱི་མེ་ཏོག་སྣ་ཚོགས་པ་གཅལ་དུ་བཀྲམ་པ། ཕུན་སུམ་ཚོགས་པའི་ཞིང་ཁམས་དེ་ཉིད་ཀྱི་དབུས་ན། རིན་པོ་ཆེ་པདྨ་ར་ག་ལས་གྲུབ་པའི་གཞལ་མེད་ཁང་། གྲུ་བཞི་སྒོ་བཞི་རྒྱན་རྟ་བབ་སོགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། བཅོམ་ལྡན་འདས་དཔལ་འོད་དཔག་མེད་སྐུ་མདོག་དམར་པོ་བལྟ་བས་ཆོག་མི་ཤེས་པ་ཞིག་གིས། འཁོར་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ལ། ཉི་མ་རེ་རེ་བཞིན་དུ་ཆོས་ཐུན་བཞི་བཞི་འཆད་ཅིང་། འཁོར་དེ་དག་གིས་རང་རང་གི་ཉེ་འཁོར་རྣམས་ལ་ཆོས་སྟོན་པ། ཕུན་སུམ་ཚོགས་པའི་ཞིང་ཁམས་དེ་ན་བདེ་སྐྱིད་ཚད་མེད་པ་ཡོད་དོ། །སྐྱེ་རྒ་ན་འཆི་ལ་སོགས་པའི་སྡུག་བསྔལ་གྱི་མིང་ཙམ་ཡང་མེད་དོ། །འདི་ནས་འོད་ཀྱི་ལམ་དམར་པོ་ཞིག་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་ཟུག་པའི་ནང་དུ། །བླ་མ་ལྷ་དང་ཌཱཀྐི་རྣམས་ཀྱིས་ལམ་སྣ་དྲངས་ཏེ་འོད་

དམར་པོའི་ལམ་དེ་ཉིད་བརྒྱུད་ནས་སོང་། ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སླེབས་ནས། རིགས་ཀྱི་བདག་པོ་འོད་དཔག་མེད་ཀྱི་ཞལ་མཐོང་གསུང་ཐོས་ཕྱིར་མི་ལྡོག་པའི་ས་ཐོབ་སོང་སྙམ་པའི་མོས་པ་མཛོད་ཅིག །སེམས་འགྱུ་བའི་འཕེན་པ་སླར་ལ་མ་ལྡོག་ཅིག །ཕཊ྄་པྲ་བེ་ཤ་ཡ་ཨ་ཨ། ཞེས་སྟོང་པ་ཉིད་ཀྱི་རྒྱས་གདབ་བོ། ཀྱེ །སྐལ་ལྡན་རིགས་ཀྱི་བུ་རྣམས་མ་ཡེངས་པར་ཉོན་ཅིག །འདི་ནས་བྱང་གི་ཕྱོགས་རོལ་ན། བྱང་ཕྱོགས་ལས་རབ་རྫོགས་པའི་ཞིང་ཁམས་ཞེས་བྱ་བ་ས་གཞི་ཨིནྡྲ་ནཱི་ལ་མར་གད་ལས་གྲུབ་པ། རིན་པོ་ཆེ་སྣ་བདུན་གྱི་མིག་མང་རིས་སུ་བྲིས་པ། བཏེག་ན་འཕར་ཞིང་མནན་ན་ནེམ་པ། མཐའ་རིན་པོ་ཆེའི་རྭ་བས་བསྐོར་བའི་ནང་དུ་ཡན་ལག་བརྒྱད་ལྡན་གྱི་མཚོ་ལ་སྤྲུལ་པའི་ངང་པས་བརྒྱན་པ། བྱ་དེ་རྣམས་ཀྱིས་གསུང་སྙན་ཆོས་ཀྱི་རང་སྒྲ་སྒྲོག་པ། གཞན་ཡང་འདོད་དགུ་འབྱུང་བའི་དཔག་བསམ་གྱི་ཤིང་ལ་དྲིལ་བུ་དར་དཔྱངས་གཡེར་ཁ་བཏག་པ་ལས་ཆོས་ཀྱི་རང་སྒྲ་འབྱིན་པ། ཡིད་བཞིན་གྱི་ནོར་བུ་དང་འཛམ་བུ་ཆུ་བོའི་གསེར་དང་ཁ་དོག་ལྔ་ལྡན་གྱི་མེ་ཏོག་སྣ་ཚོགས་པ་གཅལ་དུ་

བཀྲམ་པ། ཕུན་སུམ་ཚོགས་པའི་ཞིང་ཁམས་དེ་ཉིད་ཀྱི་དབུས་ན། རིན་པོ་ཆེ་ཨིནྡྲ་ནཱི་ལ་མར་གད་ལས་གྲུབ་པའི་གཞལ་མེད་ཁང་། གྲུ་བཞི་སྒོ་བཞི་རྒྱན་རྟ་བབ་སོགས་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། བཅོམ་ལྡན་འདས་དཔལ་དོན་ཡོད་གྲུབ་པ་སྐུ་མདོག་ལྗང་གུ་བལྟ་བས་ཆོག་མི་ཤེས་པ་ཞིག་གིས། འཁོར་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ལ། ཉི་མ་རེ་རེ་བཞིན་དུ་ཆོས་ཐུན་བཞི་བཞི་འཆད་ཅིང་། འཁོར་དེ་དག་གིས་རང་རང་གི་ཉེ་འཁོར་རྣམས་ལ་ཆོས་སྟོན་པ། ཕུན་སུམ་ཚོགས་པའི་ཞིང་ཁམས་དེ་ན་བདེ་སྐྱིད་ཚད་མེད་པ་ཡོད་དོ། །སྐྱེ་རྒན་འཆི་ལ་སོགས་པའི་སྡུག་བསྔལ་གྱི་མིང་ཙམ་ཡང་མེད་དོ། །འདི་ནས་འོད་ཀྱི་ལམ་ལྗང་ཁུ་ཞིག་བྱང་ཕྱོགས་ལས་རབ་རྫོགས་པའི་ཞིང་ཁམས་སུ་ཟུག་པའི་ནང་དུ། བླ་མ་ལྷ་དང་ཌཱཀྐི་རྣམས་ཀྱིས་ལམ་སྣ་དྲངས་ཏེ་འོད་ལམ་ལྗང་གུའི་ལམ་དེ་ཉིད་བརྒྱུད་ནས་སོང་། བྱང་ཕྱོགས་ལས་རབ་རྫོགས་པའི་ཞིང་ཁམས་སུ་སླེབས་ནས། རིགས་ཀྱི་བདག་པོ་དོན་ཡོད་གྲུབ་པའི་ཞལ་མཐོང་གསུང་ཐོས་ཕྱིར་མི་ལྡོག་པའི་ས་

ཐོབ་སོང་སྙམ་པའི་མོས་པ་མཛོད་ཅིག །སེམས་འགྱུ་བའི་འཕེན་པ་སླར་ལ་མ་ལྡོག་ཅིག །ཕཊ྄་པྲ་བེ་ཤ་ཡ་ཨ་ཨ། ཞེས་སྟོང་པ་ཉིད་ཀྱི་རྒྱས་གདབ་བོ། ཀྱེ །སྐལ་ལྡན་རིགས་ཀྱི་བུ་རྣམས་མ་ཡེངས་པར་ཉོན་ཅིག །འདི་ནས་སྟེང་གི་ཕྱོགས་རོལ་ན། སྟེང་ཕྱོགས་འོག་མིན་སྟུག་པོ་བཀོད་པའི་ཞིང་ཁམས་ཞེས་བྱ་བ་ས་གཞི་བཻ་ཌཱུརྱ་ལས་གྲུབ་པ། རིན་པོ་ཆེ་སྣ་ཚོགས་ཀྱི་མིག་མང་རིས་སུ་བྲིས་པ། བཏེག་ན་འཕར་ཞིང་མནན་ན་ནེམ་པ། མཐའ་རིན་པོ་ཆེའི་རྭ་བས་བསྐོར་བའི་ནང་དུ་ཡན་ལག་བརྒྱད་ལྡན་གྱི་མཚོ་ལ་སྤྲུལ་པའི་ངང་པས་བརྒྱན་པ། བྱ་དེ་རྣམས་ཀྱིས་གསུང་སྙན་ཆོས་ཀྱི་རང་སྒྲ་སྒྲོག་པ། གཞན་ཡང་འདོད་དགུ་འབྱུང་བའི་དཔག་བསམ་གྱི་ཤིང་ལ་དྲིལ་བུ་དར་དཔྱངས་གཡེར་ཁ་བཏག་པ་ལས་ཆོས་ཀྱི་རང་སྒྲ་འབྱིན་པ། ཡིད་བཞིན་གྱི་ནོར་བུ་དང་འཛམ་བུ་ཆུ་བོའི་གསེར་དང་ཁ་དོག་ལྔ་ལྡན་གྱི་མེ་ཏོག་སྣ་ཚོགས་གཅལ་དུ་བཀྲམ་པ། ཕུན་སུམ་ཚོགས་པའི་ཞིང་ཁམས་དེ་ཉིད་ཀྱི་དབུས་ན། རིན་པོ་ཆེ་བཻ་ཌཱུརྱ་ལས་གྲུབ་པའི་གཞལ་མེད་ཁང་། གྲུ་བཞི་སྒོ་བཞི་རྒྱན་རྟ་བབ་སོགས་ཚད་དང་མཚན་ཉིད་ཐམས་ཅད་

ཡོངས་སུ་རྫོགས་པའི་དབུས་སུ། བཅོམ་ལྡན་འདས་དཔལ་རྣམ་པར་སྣང་མཛད་སྐུ་མདོག་སྔོན་པོ་བལྟ་བས་ཆོག་མི་ཤེས་པ་ཞིག་གིས། འཁོར་བྱང་ཆུབ་སེམས་དཔའི་ཚོགས་དཔག་ཏུ་མེད་པ་ལ། ཉི་མ་རེ་རེ་བཞིན་དུ་ཆོས་ཐུན་བཞི་བཞི་འཆད་ཅིང་། འཁོར་དེ་དག་གིས་རང་རང་གི་ཉེ་འཁོར་རྣམས་ལ་ཆོས་སྟོན་པ། ཕུན་སུམ་ཚོགས་པའི་ཞིང་ཁམས་དེ་ན་བདེ་སྐྱིད་ཚད་མེད་པ་ཡོད་དོ། །སྐྱེ་རྒ་ན་འཆི་ལ་སོགས་པའི་སྡུག་བསྔལ་གྱི་མིང་ཙམ་ཡང་མེད་དོ། །འདི་ནས་བཻ་ཌཱུརྱའི་སྐས་ཆེན་པོ་ཞིག་སྟེང་ཕྱོགས་འོག་མིན་གྱི་བར་དུ་བཙུག་པའི་སྟེང་དུ། བླ་མ་ལྷ་དང་ཌཱཀྐི་རྣམས་ཀྱིས་ལམ་སྣ་དྲངས་ཏེ་བཻ་ཌཱུརྱའི་སྐས་ཆེན་པོ་དེ་ཉིད་ལ་འཛེགས་ནས་སོང་། སྟེང་ཕྱོགས་འོག་མིན་གྱི་ཞིང་ཁམས་སུ་སླེབས་ནས། རིགས་ཀྱི་བདག་པོ་རྣམ་པར་སྣང་མཛད་ཀྱི་ཞལ་མཐོང་གསུང་ཐོས་ཕྱིར་མི་ལྡོག་པའི་ས་ཐོབ་སོང་སྙམ་པའི་མོས་པ་མཛོད་ཅིག །སེམས་འགྱུ་བའི་འཕེན་པ་སླར་ལ་མ་ལྡོག་ཅིག །ཕཊ྄་པྲ་བེ་ཤ་ཡ་ཨ་ཨ། ཞེས་སྟོང་པ་ཉིད་ཀྱི་རྒྱས་གདབ་བོ། ༈ །།།སྨོན་ལམ་ནི། འདི་ནས་ཤར་གྱི་ཕྱོགས་རོལ་ན། །

མངོན་པར་དགའ་བའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །རྡོ་རྗེ་སེམས་དཔའ་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །རྣལ་འབྱོར་དཔོན་སློབ་འཁོར་བཅས་ཀུན། །བསོད་ནམས་སྟོབས་དང་རྫུ་འཕྲུལ་གྱིས། །ཞིང་ཁམས་དེ་རུ་བགྲོད་པར་ཤོག །འདི་ནས་ལྷོ་ཡི་ཕྱོགས་རོལ་ན། །དཔལ་དང་ལྡན་པའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །རིན་ཆེན་འབྱུང་ལྡན་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །རྣལ་འབྱོར་དཔོན་སློབ་འཁོར་བཅས་ཀུན། །བསོད་ནམས་སྟོབས་དང་རྫུ་འཕྲུལ་གྱིས། །ཞིང་ཁམས་དེ་རུ་བགྲོད་པར་ཤོག །འདི་ནས་ནུབ་ཀྱི་ཕྱོགས་རོལ་ན། །བདེ་བ་ཅན་གྱི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །སྣང་བ་མཐའ་ཡས་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །རྣལ་འབྱོར་དཔོན་སློབ་འཁོར་བཅས་ཀུན། །བསོད་ནམས་སྟོབས་དང་རྫུ་འཕྲུལ་གྱིས། །ཞིང་ཁམས་དེ་རུ་བགྲོད་པར་ཤོག །འདི་ནས་བྱང་གི་ཕྱོགས་རོལ་ན། །ལས་རབ་རྫོགས་པའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །དོན་ཡོད་

གྲུབ་པ་ཞེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །རྣལ་འབྱོར་དཔོན་སློབ་འཁོར་བཅས་ཀུན། །བསོད་ནམས་སྟོབས་དང་རྫུ་འཕྲུལ་གྱིས། །ཞིང་ཁམས་དེ་རུ་བགྲོད་པར་ཤོག །འདི་ནས་སྟེང་གི་ཕྱོགས་རོལ་ན། །འོག་མིན་ཞེས་བྱའི་ཞིང་ཁམས་ཡོད། །ཞིང་ཁམས་དེ་ན་བཅོམ་ལྡན་འདས། །རྣམ་པར་སྣང་མཛད་ཅེས་བྱ་བཞུགས། །སྐྱེ་བ་འདི་ཡི་འོག་རོལ་ཏུ། །རྣལ་འབྱོར་དཔོན་སློབ་འཁོར་བཅས་ཀུན། །བསོད་ནམས་སྟོབས་དང་རྫུ་འཕྲུལ་གྱིས། །ཞིང་ཁམས་དེ་རུ་བགྲོད་པར་ཤོག །སོང་ནས་སངས་རྒྱས་དེ་དག་ལ། །མཇལ་ཞིང་མཆོད་པ་རྒྱ་མཚོའི་ཚོགས། །བསམ་གྱིས་མི་ཁྱབ་སྤྲུལ་བྱས་ནས། །སངས་རྒྱས་འཁོར་བཅས་མཆོད་པར་ཤོག །དེ་ཚེ་དེ་བཞིན་གཤེགས་པ་རྣམས། །ཕྱག་གཡས་བརྐྱངས་ནས་མགོ་ལ་བཞག །བྱང་ཆུབ་ལུང་བསྟན་ཐོབ་པར་ཤོག །ཟབ་དང་རྒྱ་ཆེའི་ཆོས་ཐོས་ནས། །རང་རྒྱུད་སྨིན་ཅིང་གྲོལ་བར་ཤོག །དེ་ནས་རིང་པོར་མི་ཐོགས་པར། །མྱུར་དུ་མངོན་པར་སངས་རྒྱས་ནས། །ཚེ་འདིའི་ཕ་མའི་ཐོག་དྲངས་པའི། །མར་གྱུར་སེམས་ཅན་ཐམས་

ཅད་ཀུན། རང་རང་གང་འདོད་ཞིང་ཁམས་སུ། །ཐོགས་པ་མེད་པར་འདྲེན་པར་ཤོག །དྲངས་ནས་འཁོར་བ་སྟོངས་པར་ཤོག །སངས་རྒྱས་ཞིང་ཀུན་འགེངས་པར་ཤོག སྨོན་ལམ་དེ་བཞིན་འགྲུབ་པར་ཤོག །དེ་ལྟར་དུ་འགྲུབ་པ་ཡང་། དཀོན་མཆོག་གསུམ་གྱིས་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་བདེན་པའི་སྟོབས་ཀྱིས་ཇི་ལྟར་སྨོན་པའི་གནས་རྣམས་ཐམས་ཅད་དེ་དེ་བཞིན་དུ་འགྲུབ་པར་གྱུར་ཅིག །ཏདྱཐཱ། ཨོཾ་པཉྩི་གྲི་ཡ་ཨ་བ་བྷོ་དྷ་ན་ཡེ་སྭཱ་ཧཱ། ཞེས་ཞིང་སྦྱོང་སྨོན་ལམ་འདི་ཡང་བྱ་བཏང་ཚོགས་དྲུག་རང་གྲོལ་གྱིས་དབེན་གནས་ལ་ཕྱི་གངས་ཀྱི་རྭ་བ་ནས་སྦྱར་བའོ། །འདིས་ཀྱང་ཀུན་ལ་ཕན་ཐོགས་པར་གྱུར་ཅིག །སརྦ་མངྒ་ལཾ༎ །།

སྨོན་ལམ་རིན་ཆེན་གསེར་གྱི་ཕྲེང་བ།

༄༅། །སྨོན་ལམ་རིན་ཆེན་གསེར་གྱི་ཕྲེང་བ་བཞུགས་སོ། །བླ་མ་མཁྱེན། བླ་མ་མཁྱེན། བླ་མ་མཁྱེན། དུང་དུང་སྙིང་ནས་མཚན་ལྡན་བླ་མ་ལ། །ལྷང་ལྷང་གདུང་བའི་དབྱངས་ཀྱིས་གསོལ་བ་འདེབས། །འཛུམ་འཛུམ་དགྱེས་བཞིན་མདུན་གྱི་ནམ་མཁར་བྱོན། །མྱུར་མྱུར་སྨོན་ལམ་འགྲུབ་པའི་དཔང་པོར་བཞུགས། །དྲིན་ཅན་བླ་མའི་ཅི་མཛད་རྣམ་ཐར་ལ། །ལོག་ལྟ་སྐད་ཅིག་ཙམ་ཡང་མི་སྐྱེ་ཞིང་། །བསམ་དང་སྦྱོར་བས་ཚུལ་བཞིན་བསྟེན་པའི་མཐུས། །བྱིན་རླབས་སྙིང་ལ་མྱུར་དུ་འཇུག་པར་ཤོག །དལ་བརྒྱད་འབྱོར་བཅུ་ཚང་བའི་མི་ལུས་འདི། །ཤིན་ཏུ་རྙེད་དཀའ་དོན་ཆེར་ཤེས་གྱུར་ནས། །ཉིན་མཚན་ཀུན་ཏུ་སྙིང་པོ་ལེན་པའི་བློ། །རྒྱུན་ཆད་མེད་པར་རྒྱུད་ལ་སྐྱེ་བར་ཤོག །སྐྱེས་མཐར་འཆི་ངེས་ནམ་འཆིའི་ཆ་ཡང་མེད། །འཆི་དུས་ཕན་པ་དམ་པའི་ཆོས་ཁོ་ན། །སྙམ་ནས་ཚེ་འདིའི་བྱ་བ་བློ་ཡིས་ཐོངས། །དབེན་པར་འཆི་བྲོད་དམ་ཆོས་སྒྲུབ་པར་ཤོག །ངན་སོང་གསུམ་གྱི་སྡུག་བསྔལ་མེ་ཡི་འོབ། །འཇིགས་རུང་གཡང་ས་དུག་སྦྲུལ་ཚང་ལྟ་བུར། །མཐོང་ནས་དེ་ལས་སྐྱོབ་མཁན་དཀོན་མཆོག་གསུམ། །ཁ་

ཙམ་མིན་པའི་སྐྱབས་འགྲོ་བྱེད་པར་ཤོག །དཀར་ནག་ལས་འབྲས་མི་བསླུར་ཤེས་བྱས་ནས། །དགེ་བ་བཅུ་སོགས་དགེ་ལ་རབ་གཞོལ་ཞིང་། །མི་དགེ་བཅུ་སོགས་མི་དགེ་སྡིག་པའི་ལས། །སྲོག་ལ་བབ་ཀྱང་ནམ་ཡང་མི་བྱེད་ཤོག །མ་རིག་དབང་གིས་སྡིག་པའི་ལས་བྱས་དང་། །ཤེས་བཞིན་ཁྱད་དུ་བསད་ནས་སྡིག་ལྟུང་ལས། །སྔོན་ཆད་གང་བྱས་སྟོབས་བཞིའི་བཤགས་པ་ཡིས། །བཤགས་ནས་སྡིག་ལྟུང་རྩད་ནས་འདག་པར་ཤོག །སྲིད་རྩེ་ནས་བཟུང་དམྱལ་བ་ཡན་ཆད་འགྲོའི། །སྤྱི་དང་བྱེ་བྲག་སྡུག་བསྔལ་ཚུལ་བསམ་ནས། །འཁོར་བ་སྡུག་བསྔལ་རྒྱ་མཚོ་ཆེན་པོ་ལས། །ཐར་འདོད་ཤུགས་དྲག་རྒྱུད་ལ་སྐྱེ་བར་ཤོག །སྡུག་བསྔལ་གསུམ་གྱིས་མནར་བའི་འགྲོ་རྣམས་ཀྱིས། །ཡང་ཡང་མ་བྱས་དྲིན་གྱིས་བསྐྱངས་པའི་ཚུལ། །བསམ་ནས་འགྲོ་བ་སྒྲོལ་བའི་ཁུར་ཁྱེར་ནས། །རླབས་ཆེན་སེམས་སྐྱེད་རྒྱུད་ལ་སྐྱེ་བར་ཤོག །དུས་གསུམ་རྒྱལ་བ་མ་ལུས་དགྱེས་པའི་ལམ། །ཕ་རོལ་ཕྱིན་དྲུག་བསྡུ་བའི་དངོས་པོ་བཞི། །རྒྱལ་སྲས་རྣམས་ཀྱི་སྤྱོད་པ་རླབས་པོ་ཆེ། །མ་ལུས་སྤྱོད་ལ་ཞུམ་པ་མེད་པར་ཤོག །ཐུན་མོང་

ལམ་སྦྱངས་སྣོད་རུང་གྱུར་ནས་ཀྱང་། །ཐེག་པ་ཀུན་ལས་ཁྱད་འཕགས་བླ་ན་མེད། །སྐལ་ལྡན་སྐྱེས་བུ་རྣམས་ཀྱི་འཇུག་ངོགས་མཆོག །རྡོ་རྗེ་ཐེག་པའི་ཆོས་ཀྱི་སྒོར་འཇུག་ཤོག །མཁས་ཤིང་གྲུབ་པ་བརྙེས་པའི་བླ་མ་བསྟེན། །དབང་བཞིས་རྒྱུད་སྨིན་དམ་ཚིག་མིག་བཞིན་སྲུང་། །བསྐྱེད་རྫོགས་ལྷ་སྔགས་ཏིང་འཛིན་ཉམས་ལེན་ཀུན། །ནམ་ཡང་འཆུག་མེད་མཐའ་རུ་ཕྱིན་པར་ཤོག །ཚིག་རེ་ཙམ་ཡང་བསྐལ་བརྒྱར་རྙེད་དཀའ་བའི། །ཐེག་དགུའི་ཡང་རྩེ་ཟབ་ལམ་རྫོགས་པ་ཆེ། །ཁྲེགས་ཆོད་ཐོད་རྒལ་དགོངས་པ་མངོན་གྱུར་ནས། །ཁམས་གསུམ་འཁོར་བ་དོང་ནས་སྤྲུགས་པར་ཤོག །ཡང་ཡང་དྲིན་གྱིས་བསྐྱངས་པའི་འགྲོ་ཀུན་ལ། །བཟང་བཟང་ཕན་པ་དཔག་མེད་འདོགས་པའི་ཕྱིར། །ཟབ་ཟབ་གདམས་པ་འདི་བཞིན་ཉམས་ལེན་ཚེ། །འཇིགས་འཇིགས་བར་ཆད་གང་ཡང་མི་འབྱུང་ཤོག །དེ་ལྟར་ལམ་བཟང་སྟོན་པའི་བླ་མ་དང་། །དེ་བཞིན་སྒྲུབ་ལ་གཞོལ་བའི་རྡོ་རྗེ་སྤུན། །དེ་དག་རྣམས་ཀྱི་ཞབས་བརྟན་འཕྲིན་ལས་རྒྱས། །དེ་སྐད་སྨོན་ལམ་བཏབ་བཞིན་མྱུར་འགྲུབ་ཤོག །ཅེས་སྨོན་ལམ་རིན་ཆེན་

གསེར་གྱི་ཕྲེང་བ་འདི་ནི་དད་གཏོང་ཤེས་རབ་ཀྱི་ནོར་གྱིས་ཕྱུག་པའི་སྙིང་གྲོགས་དགེ་འདུན་འཕྲིན་ལས་དང་དཀོན་མཆོག་རྒྱལ་མཚན་གཉིས་ཀྱིས། བླ་མའི་གསོལ་འདེབས་ཀྱི་མཇུག་ཏུ་རྫོགས་ཆེན་གཞུང་ལྟར་བཤེས་གཉེན་བསྟེན་ཚུལ་ནས་ཐོད་རྒལ་གྱི་བར་མྱུར་དུ་རྒྱུད་ལ་སྐྱེ་བའི་འདོད་སྨོན་བཅས་ཡོད་པ་དགོས་ཞེས་རྒྱང་རིང་པོ་ནས་བསྐུལ་ངོར། ༧བྱ་བཏང་ཚོགས་དྲུག་རང་གྲོལ་གྱིས་མཚོ་སྙིང་མ་ཧཱ་དེ་ཝ་ནས་སྦྱར་བའོ། །སརྦ་མངྒ་ལཾ་བཀྲིས།། །།

ཁ་ཏོན་བྱས་པའི་མཇུག་ཏུ་འདོན་རྒྱུའི་སྨོན་ལམ།

༄༅། །ཁ་ཏོན་བྱས་པའི་མཇུག་ཏུ་འདོན་རྒྱུའི་སྨོན་ལམ་བཞུགས་སོ། །དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས། །ཐུགས་སྨོན་བཞིན་དུ་སངས་རྒྱས་འགྲོ་བ་འདྲེན། །བླ་མ་རྒྱལ་བ་སྲས་བཅས་གུས་པས་འདུད། །བདག་གིས་སྨོན་ལམ་འགྲུབ་པར་བྱིན་གྱིས་རློབས། །རྣལ་འབྱོར་བདག་ཅག་དཔོན་སློབ་འཁོར་བཅས་ཀྱི། །ཁ་ཏོན་མ་ཎི་བཏོན་པའི་དགེ་བ་དང་། །གཞན་ཡང་དུས་གསུམ་བསགས་པའི་དགེ་བའི་མཐུས། །དྲིན་ཅན་བླ་མའི་བཞེད་དོན་ཀུན་འགྲུབ་ཤོག །ལུས་སྲོག་བསྐྱེད་པའི་དྲིན་ཅན་ཕ་མ་དང་། །ཆོས་གྲོགས་གྲྭ་སློབ་ཡོན་བདག་དྲིན་ཅན་དང་། །ཞོན་བཀལ་བཞོས་པའི་སྒོ་ཟོག་དྲིན་ཅན་ཀུན། །མྱུར་དུ་རྫོགས་པའི་སངས་རྒྱས་ཐོབ་པར་ཤོག །ཤ་ཟོས་སྤུ་དང་པགས་པ་གྱོན་པ་དང་། །རྡོ་དང་དབྱུག་པས་བརྡུང་དང་མཚོན་གྱིས་བསད། །དུག་དང་མཐུས་བསད་རྐང་པའི་གཅུར་ཚད་ཀྱི། །འགྲོ་རྣམས་སངས་རྒྱས་གོ་འཕང་མྱུར་ཐོབ་ཤོག །གཞན་ཡང་ནམ་མཁའ་ཡངས་པའི་མཐའ་མཉམ་པའི། །མར་གྱུར་སེམས་ཅན་གཅིག་ཀྱང་མ་ལུས་པ། །ཚོགས་རྫོགས་སྒྲིབ་བྱང་སངས་རྒྱས་ཐོབ་པར་ཤོག །སྨོན་ལམ་དེ་དག་མྱུར་དུ་འགྲུབ་གྱུར་ཅིག །ཅེས་པ་འདི་ནི་ཞབས་དཀར་བ་ཚོགས་དྲུག་རང་གྲོལ་གྱིས་སྦྱར་བའོ། །དགེའོ།། ༈ །།

རྒྱལ་ཁམས་བདེ་ཞིང་སྐྱིད་པའི་གསོལ་འདེབས།

རྒྱལ་ཁམས་བདེ་ཞིང་སྐྱིད་པའི་གསོལ་འདེབས་བཞུགས་སོ། །བླ་མ་དཀོན་མཆོག་གསུམ་ལ་གསོལ་བ་འདེབས། །ཆར་ཆུ་དུས་སུ་འབབ་པར་བྱིན་གྱིས་རློབས། །ལོ་ཕྱུགས་རྟག་ཏུ་ལེགས་པར་བྱིན་གྱིས་རློབས། །མི་ནད་ཕྱུགས་ནད་ཞི་བར་བྱིན་གྱིས་རློབས། །དུས་འཁྲུག་མུ་གེ་མེད་པར་བྱིན་གྱིས་རློབས། །དགྲ་ཇག་ཆོམ་རྐུན་ཞི་བར་བྱིན་གྱིས་རློབས། །སད་སེར་ཐན་པ་མེད་པར་བྱིན་གྱིས་རློབས། །རྒྱལ་ཁམས་བདེ་ཞིང་སྐྱིད་པར་བྱིན་གྱིས་རློབས། །ཞེས་རྒྱལ་ཁམས་བདེ་ཞིང་སྐྱིད་པའི་གསོལ་འདེབས་འདི་ནི་རྣལ་འབྱོར་ཞབས་དཀར་བས་སྦྱར་བའོ། །དེ་ལྟར་གསོལ་བ་བཏབ་ན་རྒྱལ་ཁམས་ཐམས་ཅད་བདེ་ཞིང་སྐྱིད་པར་འགྱུར་རོ། །དེས་ན་གསོལ་འདེབས་འདི་རྒྱལ་ཁམས་ཡོངས་ལ་སྟོན་ལ་ཀུན་གྱིས་ཐོན་ཅིག །མངྒ་ལཾ༎ ༎

བསླུ་མེད་དཀོན་མཆོག་གསུམ་གྱི་བྱིན་རླབས་ཀྱིས་སོགས་སྨོན་ལམ།

༄༅། །བསླུ་མེད་དཀོན་མཆོག་གསུམ་གྱི་བྱིན་རླབས་ཀྱིས། །བདག་གི་ཕ་མ་འཁོར་བ་ངན་སོང་གི །སྡུག་བསྔལ་ལས་སྒྲོལ་བདེ་བ་ཅན་སྐྱེས་ནས། འོད་དཔག་མེད་མགོན་མཉེས་པར་བྱེད་གྱུར་ཅིག །བདག་གིས་ཐོག་མ་མེད་ནས་ད་ལྟའི་བར། །རྣམ་དཀར་ལས་ཀྱི་འབྲས་བུ་གང་བགྱིས་པ། །དེ་ཡི་མཐུ་ལས་ཕ་མ་སེམས་ཅན་ནི། །དྲིན་ཅན་མཐའ་དག་འཁོར་བ་ལས་སྒྲོལ་ཤོག །བདག་གི་ལུས་སྲོག་བསྐྱེད་པའི་ཕ་མ་དང་། །བདག་ལ་ཐར་ལམ་སྟོན་པའི་མཁན་སློབ་རྣམས། །ཚོགས་གཉིས་རབ་རྫོགས་སྒྲིབ་གཉིས་རབ་བྱང་ནས། །ཀུན་མཁྱེན་ཆོས་ཀྱི་རྒྱལ་པོ་མཉེས་གྱུར་ཅིག །བདག་ལ་རེ་ལྟོས་བགྱིས་པའི་སྦྱིན་བདག་དང་། །བདག་གིས་གནོད་འཚེ་བྱས་པའི་འགྲོ་བ་དང་། །བདག་ལ་གནོད་འཚེ་བྱས་པའི་སེམས་ཅན་རྣམས། །ཚོགས་རྫོགས་སྒྲིབ་བྱང་སངས་རྒྱས་མྱུར་ཐོབ་ཤོག །བདག་གིས་བརྡེག་ཙོག་ཤ་ཁྲག་ཟས་པ་དང་། །སྲོག་གཅད་སྤུ་དང་ལྤགས་པ་གྱོན་པ་སོགས། །འགྲོ་བ་དེ་རྣམས་གཙོར་བྱས་སེམས་ཅན་རྣམས། བདག་ལ་བསྟེན་ནས་རྣམ་མཁྱེན་མྱུར་ཐོབ་ཤོག །ཞབས་དཀར་བས་གསུངས་པའོ།།

མར་མེའི་སྨོན་ལམ།

༈ མར་མེའི་སྨོན་ལམ་བཞུགས་སོ། །ཨོཾ་ཨཱཿཧཱུཾ། མར་མེའི་འོད་སྣང་འཇའ་འོད་དུ། །གྱུར་པས་གནམ་ས་བར་སྣང་ཁྱབ། །ནང་ནས་མཆོད་པའི་ལྷ་མོ་དང་། །གང་འདོད་ལོངས་སྤྱོད་འབྱུང་གྱུར་ཅིག །བླ་མ་ཡི་དམ་དཀོན་མཆོག་གསུམ། །མཁའ་འགྲོ་ཆོས་སྐྱོང་ཚོགས་བཅས་ལ། །དངོས་འབྱོར་ཡིད་ཀྱིས་སྤྲུལ་པ་ཡི། །སྣང་གསལ་མར་མེ་འདི་འབུལ་ལོ། །མར་མེ་ཕུལ་བའི་བསོད་ནམས་ཀྱིས། །མ་རིག་མུན་པ་སངས་བར་ཤོག །ལས་ངན་སྡིག་སྒྲིབ་དག་པར་ཤོག །རྐྱེན་ངན་བར་ཆད་ཞི་བར་ཤོག །ཚེ་དང་བསོད་ནམས་འབར་གྱུར་ཅིག །ཉམས་རྟོགས་ཡོན་ཏན་འབར་གྱུར་ཅིག །སངས་རྒྱས་བསྟན་པ་འབར་གྱུར་ཅིག །འགྲོ་ལ་བདེ་སྐྱིད་འབར་གྱུར་ཅིག །ཅེས་མར་མེའི་སྨོན་ལམ་འདི་ནི་རྣལ་འབྱོར་ཞབས་དཀར་བས་སྦྱར་བའོ། །སརྦ་མངྒ་ལཾ༎ ༎

བླ་མ་དཀོན་མཆོག་གསུམ་ལ་ཕྱག་འཚལ་ལོ་སོགས་སྨོན་ལམ།

༄༅། །བླ་མ་དཀོན་མཆོག་གསུམ་ལ་ཕྱག་འཚལ་ལོ། །དངོས་འབྱོར་ཡིད་ཀྱིས་སྤྲུལ་པའི་མཆོད་པ་འབུལ། །ཐོག་མེད་ནས་བསགས་སྡིག་ལྟུང་མཐོལ་ལོ་བཤགས། །རང་གཞན་སྐྱེ་འཕགས་དགེ་ལ་རྗེས་ཡི་རང་། །ཟབ་རྒྱས་ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་བཞུགས་པར་གསོལ་བ་འདེབས། །དགེ་ཚོགས་སངས་རྒྱས་ཐོབ་པའི་རྒྱུ་རུ་བསྔོ། །འདིས་མཐུས་རང་གཞན་སངས་རྒྱས་མྱུར་ཐོབ་ཤོག །བླ་མ་དཀོན་མཆོག་གསུམ་གྱི་ཐུགས་རྗེ་དང་། །རང་གཞན་དུས་གསུམ་བསགས་པའི་དགེ་བའི་མཐུས། །ཚེ་རབས་ཀུན་དུ་བླ་མ་མཇལ་བ་ལ། །ཇོ་བོ་རྗེ་དང་འབྲོམ་སྟོན་ལྟ་བུར་ཤོག །བསམ་དང་སྦྱོར་བས་ཚུལ་བཞིན་བསྟེན་པ་ལ། །རྟག་ཏུ་ངུ་དང་ནོར་བཟང་ལྟ་བུར་ཤོག །ངོམ་པ་མེད་པའི་ཐོས་བསམ་བྱེད་པ་ལ། །ཀུན་མཁྱེན་བློ་བཟང་ཡབ་སྲས་ལྟ་བུར་ཤོག །ཆོས་བཞིན་འདུལ་བ་བཞིན་དུ་བྱེད་པ་ལ། །བཀའ་གདམས་སྐུ་མཆེད་སློབ་བརྒྱུད་ལྟ་བུར་ཤོག །ཆོས་ཕྱིར་དཀའ་སྤྱད་སྙིང་རུས་བྱེད་པ་ལ། །བཀའ་བརྒྱུད་མི་ལ་ཡབ་སྲས་ལྟ་བུར་ཤོག །རྒྱལ་བའི་བསྟན་པ་འཛིན་སྐྱོང་སྤེལ་བ་ལ། །འཛམ་གླིང་རྒྱན་དྲུག་

མཆོག་གཉིས་ལྟ་བུར་ཤོག །སྤྱན་དང་མངོན་ཤེས་རྫུ་འཕྲུལ་སྟོན་པ་ལ། །རྒྱ་གར་གྲུབ་ཐོབ་བརྒྱད་བཅུ་ལྟ་བུར་ཤོག །ལྷ་སྲིད་སྡེ་བརྒྱད་བྲན་དུ་འཁོལ་བ་ལ། །པད་འབྱུང་རྗེ་འབངས་ཉེར་ལྔ་ལྟ་བུར་ཤོག །མཁྱེན་རབ་ཆེན་པོས་བླང་དོར་འབྱེད་པ་ལ། །དབྱངས་ཅན་མ་དང་འཇམ་དབྱངས་ལྟ་བུར་ཤོག །མཐུ་སྟོབས་ཆེན་པོས་ལོག་འདྲེན་འདུལ་བ་ལ། །རྟ་མགྲིན་ཕྱག་ན་རྡོ་རྗེ་ལྟ་བུར་ཤོག །ཟུག་རྔུའི་ནད་ཀུན་སེལ་བར་བྱེད་པ་ལ། །བཅོམ་ལྡན་སྨན་བླའི་རྒྱལ་པོ་ལྟ་བུར་ཤོག །དུས་མིན་འཆི་བ་མ་ལུས་བཟློག་པ་ལ། །མགོན་པོ་ཚེ་དཔག་མེད་པ་ལྟ་བུར་ཤོག །བླ་མའི་ཚུལ་བཟུང་འགྲོ་དོན་བྱེད་པ་ལ། །སྐྱབས་མགོན་རྒྱལ་བ་ཡབ་སྲས་ལྟ་བུར་ཤོག །རྒྱལ་པོའི་ཚུལ་བཟུང་རྒྱལ་ཁམས་སྐྱོང་བ་ལ། །འཇམ་དབྱངས་གོང་མ་རྒྱལ་པོ་ལྟ་བུར་ཤོག །སྐྱོ་ངལ་མེད་པས་འགྲོ་ཀུན་འདྲེན་པ་ལ། །སྤྱན་རས་གཟིགས་དང་སངས་རྒྱས་ལྟ་བུར་ཤོག །མདོར་ན་རང་གཞན་དོན་གཉིས་འགྲུབ་པ་ལ། །དངོས་དང་བརྒྱུད་པའི་བླ་མ་ལྟ་བུར་ཤོག །གང་གང་སྨོན་ལམ་ཇི་ལྟར་བཏབ་པ་བཞིན། །དེ་དེ་བཞིན་དུ་ཐམས་ཅད་འགྲུབ་པར་ཤོག །བྱ་བཏང་པ་ཚོགས་དྲུག་རང་གྲོལ་གྱིས་སྦྱར་བའོ།།

ཅི་བསམ་འགྲུབ་པའི་སྨོན་ལམ།

༄༅། །ཅི་བསམ་འགྲུབ་པའི་སྨོན་ལམ་བཞུགས་སོ། །དཀོན་མཆོག་བྱིན་རླབས་སེམས་ལ་འཇུག་པར་ཤོག །དགེ་ཚོགས་སྣོད་བཅུད་ཡོངས་ལ་སྨིན་པར་ཤོག །ཕྱི་སྣོད་ཐམས་ཅད་དག་པའི་ཞིང་དུ་ཤོག །ནང་བཅུད་སེམས་ཅན་ལྷ་དང་ལྷ་མོར་ཤོག །ཡུལ་ཕྱོགས་རྩྭ་མེད་རྣམས་ལ་རྩྭ་སྐྱེ་ཤོག །ལུང་པ་ཆུ་མེད་རྣམས་ལ་ཆུ་རྡོལ་ཤོག །ས་ཆ་ཤིང་མེད་རྣམས་ལ་ཤིང་སྐྱེ་ཤོག །ཞིང་ས་ལོ་མེད་རྣམས་ལ་ལོ་ཡག་ཤོག །རྨང་པོ་བུ་མེད་རྣམས་ལ་བུ་སྐྱེ་ཤོག །དབུལ་པོ་ནོར་མེད་རྣམས་ལ་ནོར་ཐོབ་ཤོག །གླེན་པ་གོ་མེད་རྣམས་ལ་བློ་སྐྱེ་ཤོག །བན་སྔགས་ཆོས་མེད་རྣམས་ལ་ཆོས་འཕེལ་ཤོག །བླ་མ་སློབ་མ་ཡོན་བདག་མཇལ་བར་ཤོག །བཀྲ་ཤིས་ཆོས་མཐུན་སྒོ་ནས་མཇལ་བར་ཤོག །ཆོས་ལྡན་བྱ་བ་བྱེད་དུས་མཇལ་བར་ཤོག །རང་གཞན་དོན་གཉིས་སྒྲུབ་དུས་མཇལ་བར་ཤོག །མི་ཕྱུགས་རྒས་ཁར་སྐྱིད་དང་འཕྲད་པར་ཤོག །ཕ་མ་རྒས་ཁར་ཆོས་དང་མཇལ་བར་ཤོག ཐམས་ཅད་འཆི་ཁར་ལམ་སྣ་ཟིན་པར་ཤོག །ཅི་བསམ་ཐམས་ཅད་ལྷུན་གྱིས་འགྲུབ་པར་ཤོག །ཅེས་ཅི་བསམ་འགྲུབ་པའི་སྨོན་ལམ་འདི་ཡང་༧ཞབས་དཀར་པས་བྲིས་ནས་ཕུལ་བའོ།། །།

ཕུན་སུམ་ཚོགས་པའི་བཀྲ་ཤིས།

༄༅། །ཕུན་སུམ་ཚོགས་པའི་བཀྲ་ཤིས་བཞུགས་སོ། ཨོཾ་སྭསྟི། སངས་རྒྱས་ནམ་མཁའ་གང་བའི་བཀྲ་ཤིས་ཤོག །ཆོས་ཀྱིས་བར་སྣང་གང་བའི་བཀྲ་ཤིས་ཤོག །དགེ་འདུན་ས་གཞི་གང་བའི་བཀྲ་ཤིས་ཤོག །སྐྱབས་གནས་དཀོན་མཆོག་གསུམ་གྱི་བཀྲ་ཤིས་ཤོག །མཐོན་པོ་ནམ་མཁའ་ལ་ཡང་བཀྲ་ཤིས་ཤོག །དམའ་མོ་ས་གཞི་ལ་ཡང་བཀྲ་ཤིས་ཤོག །ཡངས་པོ་བར་སྣང་ལ་ཡང་བཀྲ་ཤིས་ཤོག །གནམ་ས་བར་སྣང་ཁྱབ་པའི་བཀྲ་ཤིས་ཤོག །ནམ་མཁའི་ཆར་པ་འབབ་པའི་བཀྲ་ཤིས་ཤོག །བར་སྣང་འཇའ་སྤྲིན་འཁྲིགས་པའི་བཀྲ་ཤིས་ཤོག །ས་གཞིར་ལོ་ཕྱུགས་ལེགས་པའི་བཀྲ་ཤིས་ཤོག །བདེ་སྐྱིད་ཉི་མ་འཆར་བའི་བཀྲ་ཤིས་ཤོག །ཕ་མ་བུ་གསུམ་འཛོམ་པའི་བཀྲ་ཤིས་ཤོག །མི་ནོར་ཟས་གསུམ་འཛོམ་པའི་བཀྲ་ཤིས་ཤོག །ལྟོ་གོས་ཆོས་གསུམ་འཛོམ་པའི་བཀྲ་ཤིས་ཤོག །བདེ་སྐྱིད་སྙན་གསུམ་འཛོམ་པའི་བཀྲ་ཤིས་ཤོག ལྷ་མིའི་དགའ་སྟོན་འགྱེད་པའི་བཀྲ་ཤིས་ཤོག །སྙན་པའི་གླུ་དབྱངས་ལེན་པའི་བཀྲ་ཤིས་ཤོག །སྐྱིད་པའི་བྲོ་ཆུང་འཁྲབ་པའི་བཀྲ་ཤིས་ཤོག །དགའ་བའི་གར་ཡང་བསྒྱུར་

བའི་བཀྲ་ཤིས་ཤོག །ལྷ་ཡི་ཡུལ་བཞིན་བདེ་བའི་བཀྲ་ཤིས་ཤོག །རྫོགས་ལྡན་དུས་བཞིན་སྐྱིད་པའི་བཀྲ་ཤིས་ཤོག །རྟག་ཏུ་དགའ་ཞིང་སྤྲོ་བའི་བཀྲ་ཤིས་ཤོག །ཐམས་ཅད་ཕུན་སུམ་ཚོགས་པའི་བཀྲ་ཤིས་ཤོག །ཅེས་ཕུན་སུམ་ཚོགས་པའི་བཀྲ་ཤིས་འདི་ཡང་༧ཞབས་དཀར་པས་སྦྱར་པའོ།། །།

བཀྲ་ཤིས་རིན་ཆེན་ཕྲེང་བ།

༄༅། །བཀྲ་ཤིས་རིན་ཆེན་ཕྲེང་བ་ཞེས་བྱ་བ་བཞུགས་སོ།།

ཨེ་མ་ཧོ། གཡོ་རྩོལ་མེད་པའི་རང་ལུས་ཁང་བཟང་དུ། །བྱིང་རྒོད་མེད་པའི་རིག་པ་རང་གསལ་འདི། །འཕོ་འགྱུར་མེད་པའི་ཆོས་སྐུའི་བཙན་ས་ཟིན། །འདུ་འབྲལ་མེད་པའི་བླ་མའི་བཀྲ་ཤིས་ཤོག །རང་རིག་འཁྲུལ་མེད་གཞི་ཡི་སངས་རྒྱས་དང་། སྨྲ་བསམ་བརྗོད་མེད་ལམ་གྱི་དམ་པའི་ཆོས། །མི་འགྱུར་འབྲལ་མེད་འབྲས་བུའི་དགེ་འདུན་སྟེ། །དོན་དམ་བསླུ་མེད་མཆོག་གསུམ་བཀྲ་ཤིས་ཤོག །ཡེ་ནས་བཀྲ་ཤིས་ཀུན་ཏུ་བཟང་མོའི་མཁར། །མཁའ་མཉམ་རྒྱལ་བ་ཞི་ཁྲོའི་ལྷ་ཚོགས་

བཀྲ། །བཀྲ་ཤིས་སྐུ་ཐིག་ཚོམ་བུའི་ཆར་ཆེན་རྣམས། །རྣམ་དག་ཁམས་སུ་འབེབས་པའི་བཀྲ་ཤིས་ཤོག །རང་ལུས་ཙིཏྟ་འོད་ལྔའི་གཞལ་ཡས་ཀྱི། །རང་བྱུང་གདོད་མའི་མགོན་པོ་ཀུན་བཟང་ལ། །རང་བབས་གཉུག་མའི་རྒྱུན་གྱིས་གསོལ་བཏབ་ཚེ། །རང་ཞལ་མངོན་སུམ་མཇལ་བའི་བཀྲ་ཤིས་ཤོག །བསླུ་མེད་སློབ་དཔོན་པད་འབྱུང་ཐུགས་ཀྱི་བཅུད། །འཁྲུལ་མེད་ལམ་བཟང་ཨ་ཏིའི་དོན་རྟོགས་ནས། །བསྒོམ་མེད་ཆུ་བོའི་རྒྱུན་གྱི་ཏིང་འཛིན་ལ། །འབྲལ་མེད་རྒྱུན་དུ་གནས་

པའི་བཀྲ་ཤིས་ཤོག །ཀ་དག་ཟང་ཐལ་རྟོགས་པའི་མཚོན་ཆ་ཡིས། །མ་དག་དུག་ལྔའི་རྣམ་རྟོག་གང་ཤར་ཡང་། །ཡང་དག་ལྟ་བའི་ངང་དུ་བསྒྲལ་ནས་ཀྱང་། །ཡེ་དག་ཡེ་ཤེས་འཆར་བའི་བཀྲ་ཤིས་ཤོག །སྤང་ཐོབ་མེད་པའི་གདོད་མའི་རྒྱལ་ས་རུ། །འགྱུར་མེད་རིག་པས་རྒྱལ་ས་རབ་བཟུང་ནས། །ཁྲེགས་ཆོད་ཐོད་རྒལ་ཟུང་འབྲེལ་ཉམས་ལེན་ལ། །ཉིན་མཚན་ཁོར་ཡུག་འདྲེས་པའི་བཀྲ་ཤིས་ཤོག །སྒོ་གསུམ་འཁྲུལ་འཁོར་རླུང་རིག་གནད་བཅིངས་པས། །སྒྲོན་མ་བཞི་ཡིས་ཉམས་བླངས་དབྱིངས་ནང་དུ། །རིག་པ་ཚུད་དེ་ཐིག་ལེ་གསུམ་སྦྲེལ་ཤར། །ཆོས་ཉིད་མངོན་སུམ་མཐོང་བའི་བཀྲ་ཤིས་ཤོག །དབྱིངས་རིག་སྨིན་མཚམས་བྲལ་ནས་དབང་པོའི་སྒོར། །མངོན་སུམ་གསལ་ཞིང་ཐིག་ལེའི་ནང་དུ་ནི། རྡོར་སེམས་སྐུ་རྐྱང་འགུལ་འཁྲིག་མེད་པར་གསལ། །ཉམས་སྣང་གོང་དུ་འཕེལ་བའི་བཀྲ་ཤིས་ཤོག །དབྱིངས་ཀྱིས་སྣང་བ་ཐམས་ཅད་རྒྱས་ཐེབ་པས། །ཐིག་ལེའི་ནང་དུ་རྣམ་སྣང་དབྱིངས་ཕྱུག་སོགས། །རིགས་ལྔའི་ཚོམ་བུ་གྲངས་མེད་ཡོངས་ཤར་བའི། །རིག་པ་ཚད་ལ་ཕེབས་པའི་བཀྲ་ཤིས་

ཤོག །ཉམས་སྣང་འཕེལ་ཟད་འོད་ཀྱི་ནང་དུ་ནི། །སོར་མོ་ཙམ་སྣང་འཁོར་འདས་འདུ་ཤེས་བྲལ། །འབྱུང་བཞིར་ཟང་ཐལ་བསྒྲོད་ཅིང་མངོན་ཤེས་རྒྱས། །ཆོས་ཉིད་ཟད་སར་འཁྱོལ་བའི་བཀྲ་ཤིས་ཤོག །སྐྱེ་འཇུག་སོགས་ལ་དབང་ཐོབ་རིག་པ་ནི། །བེམ་པོར་བཅུག་པས་སྐད་འབྱིན་འགུལ་བ་དང་། །མཚམས་མེད་ལྔ་སྤྱད་འཚང་རྒྱ་ནུས་པར་བྱེད། །ཡ་མཚན་གྲུབ་རྟགས་སྟོན་པའི་བཀྲ་ཤིས་ཤོག །རྫོགས་ཆེན་མ་རིག་མུན་སེལ་སྒྲོན་མེ་འདི། །འདི་ལྟར་ཚུལ་བཞིན་ཉམས་སུ་བླངས་པའི་ཚེ། །ཚེ་དང་ཆོས་འབྱོར་རྒྱས་ཤིང་འདོད་པའི་དོན། །དོན་རྣམས་ཆོས་བཞིན་འགྲུབ་པའི་བཀྲ་ཤིས་ཤོག །དམ་ཉམས་འདྲེས་ཁྱེར་བསྲེ་བསླད་མ་ཞུགས་པའི། །དམ་ཆོས་མཁའ་གྲོའི་ཞལ་རླངས་མ་ཡལ་བ། །དམ་ལྡན་རིག་འཛིན་རྣམས་ཀྱིས་ཉམས་བཞེས་ཚེ། །དམ་བཅའ་སྙིང་རུས་སྐྱེད་པའི་བཀྲ་ཤིས་ཤོག །མ་རིག་ཉོན་མོངས་ཆོས་བརྒྱད་རྒྱང་བསྲིངས་ནས། །མ་རྣམས་དོན་དུ་དམ་ཆོས་སྒྲུབ་པའི་ཚེ། །མ་དང་མཁའ་འགྲོས་བར་ཆད་ཉེར་འཚེ་ཀུན། །མ་བསྐུལ་ན་ཡང་སྒྲོལ་བའི་བཀྲ་ཤིས་ཤོག །མི་ཚེ་

འདི་བཟུང་ཚེ་རབས་ཐམས་ཅད་དུ། །མི་མཐུན་བར་ཆད་མིང་ཙམ་མེད་པ་ཡི། །མི་དམིགས་སྤྲོས་བྲལ་ཀུན་བཟང་དགོངས་བཅུད་ཀྱི། །མི་ཤིགས་སྲུང་བའི་འཁོར་ལོའི་བཀྲ་ཤིས་ཤོག །ཡེ་དག་གནས་ལུགས་ཀ་དག་ཁྲེགས་ཆོད་དབྱིངས། །ལྷུན་གྲུབ་སྐུ་དང་ཡེ་ཤེས་ཡོངས་ཤར་ནས། །སླར་ཡང་རང་རིག་ཀུན་བཟང་གཞི་ཐོག་ཏུ། །གཞོན་ནུ་བུམ་སྐུ་བརྙེས་པའི་བཀྲ་ཤིས་ཤོག །ཆོས་སྐུའི་དབྱིངས་ལས་ལོངས་སྤྱོད་རྫོགས་སྐུ་དང་། །གྲངས་མེད་སྤྲུལ་སྐུས་འཁོར་བ་དོང་སྤྲུགས་ནས། །འགྲོ་བ་ཐམས་ཅད་གདོད་མའི་སར་བཀོད་དེ། །འཁོར་བའི་མིང་ཙམ་མེད་པའི་བཀྲ་ཤིས་ཤོག །མ་ནོར་ལམ་བཟང་གསང་ཆེན་རྡོ་རྗེ་ཐེག །ཐེག་པའི་ཡང་རྩེ་རྫོགས་པ་ཆེན་པོའི་ཁྲིད། །ཁྲིད་ཚུལ་མཚན་ལྡན་རྩ་བའི་བླ་མའི་སྐུ། །སྐུ་ཚེ་བསྐལ་བརྒྱར་བརྟན་པའི་བཀྲ་ཤིས་ཤོག །རྒྱལ་དབང་པད་འབྱུང་བི་མ་ལ་སོགས་བཀའ། །བཀའ་གཏེར་ལས་འོངས་སྔ་འགྱུར་གསང་ཆེན་བསྟན། །བསྟན་པའི་སྒོར་ཞུགས་རྡོ་རྗེ་མཆེད་ལྕམ་ཀུན། །ཀུན་ཀྱང་ཞབས་པད་བརྟན་པའི་བཀྲ་ཤིས་ཤོག །གཏེར་སྟོན་བདུད་འཇོམས་གླིང་པས་སྤྱན་དྲངས་

པའི། །གཏེར་ཆོས་ཀུན་བཟང་ཐུགས་ཀྱི་ཡང་སྙིང་འདི། །གཏེར་ཁ་བརྡོལ་ལྟར་གང་ཞིག་སྲིད་མཐའི་བར། །གཏེར་གསར་བསྟན་པ་རྒྱས་པའི་བཀྲ་ཤིས་ཤོག །རྒྱལ་པ་ཀུན་གྱི་ཉེ་ལམ་གཅིག་པུ་རུ། །རྒྱལ་བས་ཡོངས་བསྔགས་ཐེག་མཆོག་རྫོགས་པ་ཆེ། །རྒྱལ་དབང་པདྨའི་རིང་ལུགས་རྙིང་མ་བའི། །རྒྱལ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །དམ་པས་བྱིན་བརླབས་དབེན་པའི་རི་སུལ་དུ། །དམ་གཙང་དཔོན་སློབ་མཆེད་གྲོགས་ལྷན་ཅིག་འཛོམས། །ཟབ་གསང་རྫོགས་པ་ཆེན་པོའི་བཤད་སྒྲུབ་ཀྱི། །བསྟན་པའི་རྒྱལ་མཚན་མི་ནུབ་ཚུགས་པར་ཤོག །དམ་པས་བྱིན་བརླབས་དབེན་གནས་གང་བཟང་དུ། །དམ་གཙང་དཔོན་སློབ་འཁོར་དང་བཅས་རྣམས་ཀྱིས། །དམ་པ་གོང་མའི་རྣམ་ཐར་ཇི་བཞིན་དུ། །དམ་ཆོས་ཉམས་སུ་ལེན་པའི་བཀྲ་ཤིས་ཤོག །གངས་རྫ་གཡའ་དང་ནགས་ཚལ་དུར་ཁྲོད་སོགས། །ཡིད་མཐུན་བག་ཕེབས་རི་ཡི་རྒྱུད་བཟང་ཞིང་། །བྱིན་ལྡན་མ་མོ་མཁའ་འགྲོ་འདུ་བའི་གནས། །དུས་ཀུན་རྟག་ཏུ་བརྟེན་པའི་བཀྲ་ཤིས་ཤོག །འདྲེན་མཆོག་ཤཱཀྱའི་

བསྟན་པ་རིན་པོ་ཆེ། །ཕྱོགས་དུས་ཀུན་དུ་དར་ཞིང་རྒྱས་པ་དང་། །བསྟན་པ་འཛིན་པའི་སྐྱེས་བུ་དམ་པ་རྣམས། །སྐུ་ཚེ་འཕྲིན་ལས་རྒྱས་པའི་བཀྲ་ཤིས་ཤོག །བདག་གཞན་གང་གིས་དམ་ཆོས་བསྒྲུབ་པ་ལ། །ལྷ་ཀླུ་གཞི་བདག་སྡེ་བརྒྱད་འབྱུང་པོའི་ཚོགས། །གནོད་པ་སྐད་ཅིག་ཙམ་ཡང་མི་སྐྱེལ་ཞིང་། །ཅི་བསམ་ཆོས་བཞིན་འགྲུབ་པའི་བཀྲ་ཤིས་ཤོག །བླ་མ་ཆོས་གྲོགས་སློབ་དཔོན་ཡོན་བདག་འཛོམས། །ཕ་མ་བུ་གསུམ་མི་ནོར་ཟས་གསུམ་འཛོམས། །ལྷ་ཆོས་མི་ཆོས་བདེ་སྐྱིད་སྙན་གསུམ་འཛོམས། །རྟག་ཏུ་འདོད་དགུ་འཛོམས་པའི་བཀྲ་ཤིས་ཤོག །ཅེས་པའང་ཞབས་དཀར་རྡོ་རྗེ་འཆང་གིས་གསུང་འབུམ་ལས་བྱུང་བའོ།། །།

དཀར་ཆག་གསལ་བའི་མེ་ལོང་ལས་སྐྱབས་མགོན་ཞབས་དཀར་པའི་གསུང་འབུམ་གྱི་ཐོ་ཡིག་སྔོན་དུ་གཡ་མ་བཀྲ་ཤིས་དཀྱིལ་དུ་བཞུགས་པའི་ཕྱག་དཔེའི་ཐོ།

༄༅། །དཀར་ཆག་གསལ་བའི་མེ་ལོང་ལས་སྐྱབས་མགོན་ཞབས་དཀར་པའི་གསུང་འབུམ་གྱི་ཐོ་ཡིག་བཞུགས།

ཨོཾ་སྭ་སྟི། བསྐལ་མང་སྔོན་ནས་ཚོ༷གས་གཉིས་ཆུ་གཏེར་བསྲུབས་ལས་འཐོན་ཏེ་སྒྲིབ་གཉིས་སྤྲིན་བྲལ་མཁའ་ལ་རྒྱུ། །རྨད་བྱུང་མཚན་དང་དཔེ་བྱད་བཟང་པོའི་བཅུ་དྲུ༷ག་ཆ་རྫོགས་མཁྱེན་བརྩེའི་རི་དྭགས་གཟུགས་ངོམས་པ། །ལྷུན་གྲུབ་འཕྲིན་ལས་ར༷ང་བཞིན་འོད་དཀར་འབུམ་དུ་འགྱད་པས་རྣམ་གྲོ༷ལ་ཀུན་དཱ་བཞད་པའི་གཉེན། །སྐྱེ་དགུའི་ཉོན་མོངས་ཚ་བའི་གདུངས་སེལ་དཔལ་ལྡན་བླ་མ་རྒྱུ་སྐར་བདག་པོས་དགེ་ལེགས་སྩོལ། །བསིལ་ལྡན་འགྲོ་ལ་བརྩེ་བའི་གྲུ་འཛིན་

མགོ༷ན། །ངུར་སྨྲིག་འཆང་བའི་ཟོལ་ལ་བརྟེན་བྱས་ནས། །ཞ༷བས་སེན་བཀོད་དེར་རྣམ་དཀ༷ར་མཛད་བཟང་གིས། །གངས་ཅན་སྐྱེ་དགུའི་ཕན་བདེ་སྤེལ་བ༷ར་མཛད། །གང་ཐུགས་མཁའ་ལ་བྱ༷མས་པ༷འི་སྤྲིན་གཡོས་སྟེ། །ཟབ་གསང་ཆོས་ཀྱི་དབྱར་རྔ་ལྡིར་བའི་མོད། །སྐལ་ལྡན་མདོངས་མཐའི་ཚོགས་རྣམས་གཏན་བདེའི་གར། །བསྒྱུར་དང་ལྷན་ཅིག་སྒྲུབ་བསྟན་དར་བར་བྱས། །མགོན་དེས་མཉམ་མེད་བུ་རམ་ཤིང་པ་ཡིས། ལེགས་གསུངས་མདོ་རྒྱུད་ཀུན་གྱི་སྙིང་པོའི་དོན། །གཅིག་ཏུ་བསྡུས་

རྣམས་སྐལ་བཟང་གདུལ་བྱ་ལ། །ལེགས་པར་བསྩལ་པའི་བཀའ་འབུམ་མ་ཎིའི་ཕྲེང་། །འདི་ཀོ་བློ་མུན་སེལ་བའི་འོད་སྟོང་ཅན། །སྲིད་པར་རིང་དུ་འཁྱམས་པའི་ངལ་སྟེགས་མཆོག །ཉོན་མོངས་ནད་རབ་འཇོམས་པའི་སྨན་གྱི་ཕུལ། །དགོས་འདོད་རྩོལ་བའི་དབང་གི་རྒྱལ་པོ་ཡིན། །གང་ཞིག་གཏན་བདེའི་རིན་ཆེན་གླིང་མཆོག་ཏུ། །བསྒྲོད་པར་འདོད་པའི་སྐལ་ལྡན་སྐྱེ་བོ་ཀུན། །ལེགས་གསུང་གྲུ་གཟིངས་འདི་ལ་ཞུགས་གྱུར་ཏེ། །སྲིད་པའི་ཆུ་བོ་མྱུར་དུ་བརྒལ་བར་མཛོད། །རྨད་བྱུང་མཁྱེན་པའི་གངས་རི་ལས་འོང་པའི། །མདོ་རྒྱུད་དགོངས་དོན་རྙོག་བྲལ་ཆུ་བོའི་རྒྱུན། །སྐལ་བཟང་དད་པའི་འཛིན་མའི་ལྟོར་འཁྱིལ་བའི། །བཀའ་འབུམ་བཞུགས་བྱང་གསལ་བའི་མེ་ལོང་འགོད། །དེ་ལ་འདིར་རང་ཅག་ལྷ་དང་བཅས་པའི་འགྲོ་བ་ཐམས་ཅད་ཀྱི་སྐྱབས་མགོན་དང་དཔུང་གཉེན་དམ་པར་གྱུར་པ། མཁྱེན་བརྩེ་ནུས་གསུམ་གྱི་ཡོན་ཏན་ཚད་མེད་ཅིང་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་གདོད་མ་ནས་གཉུག་མ་ལྷན་ཅིག་སྐྱེས་པའི་ཡེ་ཤེས་ཀྱི་ངང་དུ་རོ་མཉམ་པར་རྟོགས་པས་ཀུན་རྟོག་གི་སྤྲོས་པ་མཐའ་དག་

དབྱིངས་སུ་དག་ཅིང་། ཀུན་རྫོབ་ཀྱི་སྣང་ཆ་སྒྱུ་མར་གཟིགས་པའི་ལས་འབྲས་ཀྱི་བླང་དོར་ཕྲ་ཞིབ་འབྱེད་པ་ལ་མཁས་པ། མཐར་ཐུག་གི་སྤྱན་ལྔ་དང་མངོན་པར་ཤེས་པ་དྲུག་ལ་སོགས་པའི་ཡོན་ཏན་ཐམས་ཅད་ཡོངས་སུ་རྫོགས་པས་གང་འདུལ་དེར་སྟོན་གྱིས་གདུལ་བྱའི་རེ་བ་སྐོང་བ། གསུང་གི་དབང་ཕྱུག་ལ་མངའ་དབང་བསྒྱུར་པས་སངས་རྒྱས་ཐམས་ཅད་ཀྱི་གསང་བའི་གནས་རྣམས་སྐལ་བ་དང་ལྡན་པ་དག་ལ་ལྷུག་པར་སྟོན་པ། ས་བཅུའི་ཡོན་ཏན་མཐར་ཕྱིན་པས་ཇི་ལྟ་ཇི་སྙེད་ཀྱི་ཤེས་བྱ་ཐམས་ཅད་ལ་ཡེ་ཤེས་ཀྱི་གཟིགས་པ་ལྷུན་གྱིས་གྲུབ་ཅིང་དུས་གསུམ་སངས་རྒྱས་ཐམས་ཅད་ཀྱི་ཐུགས་དགོངས་མཉམ་པ། མདོར་ན་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་བདག་ཉིད་རང་ཅག་གི་དཔལ་ལྡན་བླ་མ་དམ་པ་ཁྱབ་བདག་དེ་བཞིན་གཤེགས་པ་ཐམས་ཅད་ཀྱི་ངོ་བོ་བཀའ་དྲིན་གཞལ་དུ་མ་མཆིས་པ་མཚན་བརྗོད་པར་དཀའ་བ་༧སྐྱབས་མགོན་ཚོགས་དྲུག་རང་གྲོལ་ཞེས་མཚན་སྙན་གྲགས་པའི་གདུགས་དཀར་སྲིད་པའི་རྩེ་མོར་སོན་ཏེ་སྐྱེ་དགུའི་བླ་ན་འཁོར་བ་དེ་ཉིད་ཀྱི་མཛད་པ་ཐམས་ཅད་ཀྱི་ཕུལ་དུ་ཕྱིན་པ།

རྟོགས་པའི་བསྟན་པ་བསླབ་པ་རིན་པོ་ཆེ་རྣམ་པ་གསུམ་གང་ལས་འབྱུང་བའི་གཞི་སྡེ་སྣོད་གསུམ་གྱི་བརྗོད་བྱ་བླ་ན་མེད་པ། མདོ་རྒྱུད་ཀྱི་དགོངས་དོན་ཐུབ་བསྟན་ཡོངས་རྫོགས་ཀྱི་གནད་ཕྱིན་ཅི་མ་ལོག་པར་གསལ་བར་སྟོན་པའི་ལེགས་པར་བཤད་པ་འཇིག་རྟེན་གསུམ་གྱི་སྒྲོན་མེ་གཅིག་པུར་གྱུར་པ། ད་ལྟ་དང་ཕྱི་རབས་ཀྱི་གང་ཟག་ལས་དང་སྐལ་བ་ལྡན་པ་དམ་པའི་ཆོས་ལ་ཡིད་རབ་ཏུ་ཕྱོགས་པར་གྱུར་ཅིང་། དགེ་བའི་བཤེས་གཉེན་ལ་ཤིན་ཏུ་གུས་པའི་ལེགས་སྨོན་གྱི་སྟེང་དུ་སླེབས་པ་རྣམས་ལ་རང་རང་གི་སྐལ་བ་དང་འཚམས་པར་ལེགས་པར་བསྩལ་པའི་བཀའ་འབུམ་རིན་པོ་ཆེའི་གླེགས་བམ་ཇི་སྙེད་ཅིག་བཞུགས་པ་རྣམས་ཕྱོགས་གཅིག་ཏུ་བཀོད་པའི་ཐོག་མར་༼ཀ༽ ཀ་པ་ལ་སྙིགས་དུས་འགྲོ་བ་ཡོངས་ཀྱི་སྐྱབས་མགོན་ཞབས་དཀར་རྡོ་རྗེ་འཆང་ཆེན་པོའི་རྣམ་པར་ཐར་པ་རྒྱས་པར་བཤད་པ་སྐལ་བཟང་གདུལ་བྱ་ཐར་འདོད་རྣམས་ཀྱི་རེ་བ་སྐོང་བའི་ཡིད་བཞིན་གྱི་ནོར་བུ་བསམ་འཕེལ་དབང་གི་རྒྱལ་པོ་ཞེས་བྱ་བ་ཕི་ལིང་གི་རས་དཀར་ཁྲའི་ཐུམ་ཅན། ༼ཀ༽ ཡང་ཀ་པ་ལ་འགྲོ་མགོན་ཞབས་དཀར་པའི་སྐུ་ཚེ་སྨད་ཀྱི་

རྣམ་ཐར་ཐོག་མཐའ་བར་དུ་དགེ་བ་ཡིད་བཞིན་ནོར་བུ་དགོས་འདོད་ཀུན་འབྱུང་མ་རས་དམར་ཁྲའི་ཐུམ། ༼ཁ༽ ཁ་པ་ལ་འགྲོ་བའི་སྐྱབས་མགོན་རྡོ་རྗེ་འཆང་ཆེན་པོའི་གསུང་མགུར་གླེགས་བམ་དང་པོ་ཕི་ལིང་གི་རས་སྔོན་པོ་ཤིང་ལོའི་རི་མོ་ཅན་གྱི་ཐུམ། ༼ག༽ ག་པ་ལ་གསུང་མགུར་གླེགས་བམ་གཉིས་པ་ཕི་ལིང་གི་རས་སྔོན་པོ་ཤིང་ལོ་ཅན་གྱི་ཐུམ། ༼ང༽ ང་པ་ལ་ངོ་མཚར་སྤྲུལ་པའི་གླེགས་བམ་དང་། བཀའ་གདམས་སྤྲུལ་པའི་གླེགས་བམ་གཉིས་ཕི་ལིང་གི་རས་ཁྲ་བོའི་ཐུམ། ༼ཅ༽ ཅ་པ་ལ་རྒྱལ་སྲས་སྤྲུལ་པའི་གླེགས་བམ་དང་། འཇམ་དབྱངས་སྤྲུལ་པའི་གླེགས་བམ་གཉིས་དང་། ལམ་རིམ་གསལ་བའི་སྒྲོན་མེ་གསུམ་ཕི་ལིང་རས་སྔོ་ཁྲའི་ཐུམ། ༼ཆ༽ ཆ་པ་ལ་གདམས་ངག་གསེར་གྱི་རི་བོ་དང་། རྨད་བྱུང་སྤྲུལ་པའི་གླེགས་བམ། ཡ་མཚན་སྤྲུལ་པའི་གླེགས་བམ་གསུམ་ཕི་ལིང་གི་རས་དཀར་ཁྲའི་ཐུམ། ༼ཇ༽ ཇ་པ་ལ་ཆོས་བཤད་གཞན་ཕན་ཉི་མ་དང་། ཆོས་བཤད་གཞན་ཕན་ཟླ་བ་གཉིས་གོས་དམར་པོ་སྤྲིན་རིས་ཅན་གྱི་ཐུམ། ༼ཉ༽ ཉ་པ་ལ་ཆོས་བཤད་

གཞན་ཕན་ནོར་བུ་ཕི་ལིང་གི་རས་ཁྲའི་ཐུམ། ༼ཏ༽ ཏ་པ་ལ་གསུང་འབུམ་སྣ་ཚོགས་ཀྱི་སྐོར་ལ། སྤྲིངས་ཡིག་བ་དན་དཀར་པོ། དཀར་ཆག་ཐར་ལམ་དཀར་པོ། སྤྲིངས་ཡིག་པི་ཝང་རྒྱུད་མང་། དཀར་ཆག་གསལ་བའི་མེ་ལོང་། སྤྲིངས་ཡིག་བཀྲ་ཤིས་དཔལ་འབར། རྟེན་བཞེངས་ཕན་ཡོན། ཨོ་རྒྱན་སྤྲུལ་པའི་གླེགས་བམ། རྗེ་རིན་པོ་ཆེ་ལ་བསྟོད་པ། ལུང་བསྟན་དག་སྣང་ཆོས་ཀྱི་སྒོ་འབྱེད། བློ་སྦྱོང་འདོད་འབྱུང་ནོར་བུ། ཁྲེགས་ཆོད་མཁའ་ལྡིང་གཤོག་རླབས། ཐོད་རྒལ་ཏིང་འཛིན་སྒོ་འབྱེད། ཐོད་རྒལ་ཞལ་ཤེས་བདུད་རྩིའི་བུམ་བཟང་། ལེགས་བཤད་གསེར་གྱི་ཐུར་མ། སེམས་ཁྲིད་ཡིད་བཞིན་ནོར་བུ། གདམས་པ་གཅིག་ཤེས་ཀུན་གྲོལ། བསམ་གཏན་ཆོས་དྲུག །ཟབ་མོ་ལྟ་བའི་གདམས་པ། སྤྲུལ་བསྒྱུར་ངོ་མཚར་སྒྱུ་མའི་ལྟད་མོའི་དགའ་སྟོན། རྫོགས་པ་ཆེན་པོའི་ཕན་ཡོན་བླ་མའི་རྣལ་འབྱོར། བསྒོམས་པའི་ཕན་ཡོན་བཅས་ཕི་ལིང་གི་རས་སྔོ་ཁྲའི་ཐུམ། ༼ཐ༽ཐ་པ་ལ་ལེགས་བཤད་ཀུན་བཟང་མཆོད་སྤྲིན། ལེགས་བཤད་ཉི་མ་རང་ཤར། དག་སྣང་སྤྲུལ་པའི་གླེགས་བམ་གསུམ་ཕི་ལིང་གི་

རས་དམར་ཁྲའི་ཐུམ། ༼ད༽ ད་པ་ལ་འདོན་ཆོས་སྤྱོད་ཕྱོགས་གཅིག་ཏུ་བསྒྲིགས་པ། བྱང་སྒྲ་མི་སྙན་གྱི་ཚེ་སྒྲུབ་གཉིས་གོས་དམར་པོའི་ཐུམ། ༼ན༽ ན་པ་ལ་སྣ་ཚོགས་ཀྱི་སྐོར་ལ། དབང་ཁྲིད་ལུང་གསུམ་གྱི་བརྒྱུད་པའི་གསོལ་འདེབས། རྒྱལ་བ་བློ་བཟང་དགྱེས་པའི་གླུ་དབྱངས་དང་ཞལ་གདམས་ཁ་ཤས། ཆོས་རྒྱལ་ངག་གི་དབང་པོས་གནང་བའི་ལྟ་མགུར། བླ་མ་དགེ་བའི་བཤེས་གཉེན་རྣམས་ཀྱི་མཚན་ཐོ། གསུང་མགུར་ཁ་ཤས། བཀྲ་ཤིས་འཁྱིལ་པའི་གནས་བསྟོད། བཅའ་ཡིག་དྲང་སྲོང་བདེན་ཚིག །རེབ་གོང་སྔགས་མང་ལ་ཁྲིམས་སུ་བཅའ་བའི་རིམ་པ་ཆོས་ཀྱི་སྒོ་འབྱེད། བཅའ་ཡིག་རིན་ཆེན་ཐེམ་སྐས། བཅའ་ཡིག་ཆོས་ཀྱི་སྒོ་འབྱེད། འཕྲིན་ཡིག་གདུང་བ་ཀུན་སེལ། རྣམ་ཐར་རིན་ཆེན་ཕྲེང་བ། གྲངས་འདྲེན་མེ་ཏོག་ཕྲེང་བ། རྒོད་བྲོ་བའི་གཏམ་རྒྱུད། སེམས་ཀྱི་ངོ་སྤྲོད་གོ་སླ་འཁྱེར་བདེ། དྲིན་ཅན་ཨ་མའི་ཕྱི་མའི་ལམ་ཡིག །ཟབ་མོ་དབུ་མའི་ལྟ་བ་ངོ་མཚར་རྨད་བྱུང་། སྒོ་དམར་བསྟན་འཛིན་ཉི་མ་རིན་པོ་ཆེའི་རྣམ་ཐར་སྟོད་ཆ། གྲུབ་དབང་སྐལ་ལྡན་རང་གྲོལ་

གྱི་རྣམ་ཐར་ཐ་མ། བླ་མ་པདྨ་རང་གྲོལ་རིན་པོ་ཆེའི་རྣམ་ཐར་ཐ་མ། སྤྱང་ལུང་དཔལ་ཆེན་ནམ་མཁའ་འཇིགས་མེད་རིན་པོ་ཆེའི་རྣམ་ཐར། བཀའ་ཤོག་བཀྲ་ཤིས་གཞི་འཛིན་སོགས་ཚན་པ་གསུམ། དད་པའི་ཨ་ལོང་འདྲེན་པའི་མདོ་རྒྱུད་ལུང་གི་ལྕགས་ཀྱུ། ཆོས་ཉན་ཚུལ། ཆོས་སྤྱོད་ཉི་མ་རང་ཤར། སྨོན་ལམ་བདེ་སྐྱིད་ཀུན་འབྱུང་། སྨོན་ལམ་རིན་ཆེན་གསེར་གྱི་ཕྲེང་བ། མར་མེའི་སྨོན་ལམ། ཚོགས་མཆོད་འདོད་དགུའི་ཆར་འབེབས། རིགས་ལྔའི་ཞིང་སྦྱོང་སྨོན་ལམ་བཅས་གོས་རས་དམར་ཁྲའི་ཐུམ་ཅན། ༼པ༽ པ་པ་ལ་སྣ་ཚོགས་ཀྱི་སྐོར་ལ། བདག་ཅག་གི་སྟོན་པ་ཐུགས་རྗེ་ཅན་གྱི་ཡོན་ཏན་རྗེས་སུ་དྲན་ཚུལ་ཆོས་ཀྱི་སྒོ་འབྱེད། སྤྲིངས་ཡིག་ཀུན་དགའི་དཔལ་སྟེར་ངོ་མཚར་དཔྱིད་ཀྱི་རྒྱལ་མོའི་གླུ་དབྱངས། སྤྲིངས་ཡིག་རྣར་སྙན་ཡིད་འབབས་དྲི་ཟའི་བུ་མོའི་གླུ་དབྱངས། སྤྲིངས་ཡིག་བདེ་སྐྱིད་ཉི་མ་རང་འཆར། སྤྲིངས་ཡིག་ཉི་མའི་འོད་ཟེར། སྤྲིངས་ཡིག་ཟླ་བའི་འོད་ཟེར། སྤྲིངས་ཡིག་ནོར་བུའི་འོད་ཟེར། སེམས་ལ་གང་ཤར་ཡི་གེར་བཀོད་པ། ལོ་རྒྱུས་གསལ་བའི་སྒྲོན་མེ། མི་རྟག་སྒྱུ་མའི་ཆོས་བཤད།

དབུས་གཙང་ཕྱོགས་སུ་བསྐུར་བའི་ཞུ་ཡིག་སྣ་ཚོགས། སྤྲུལ་སྐུ་མྱུར་འབྱོན་འགའ་ཞིག །ལེགས་བཤད་བདུད་རྩིའི་ཆུ་རྒྱུན། གསང་སྔགས་སྔ་འགྱུར་ལ་རྩོད་པ་སྤོང་བ་རྒོལ་ངན་དངོས་པོ་འཇོམས་པའི་རྩོད་ལན་རྡོ་རྗེ་ཕ་ལམ། ལུང་འདྲེན་རིན་ཆེན་གཏེར་མཛོད། ཛམ་ནག་གི་མངོན་རྟོགས་འདོད་དགུའི་ཆར་འབེབས། ཡེ་ཤེས་ཀྱི་ཕྱག་རྒྱ་མ་ལ་བསྟེན་ནས་བདེ་སྟོང་གི་ཡེ་ཤེས་བསྐྱེད་ཚུལ་དཔྱིད་ཀྱི་རྒྱལ་མོའི་གླུ་དབྱངས། འདོན་ཆོས་སྤྱོད་ཀྱི་སྐོར་གྱི་དཔེ་ལྷག་བཅས་ཕི་ལིང་གི་རས་ཁྲའི་ཐུམ། ༼ཕ༽ ཕ་པ་ལ་སྐྱབས་མགོན་དམ་པའི་ཞབས་ཀྱི་པདྨོ་ལ་སྐལ་བཟང་གདུལ་བྱའི་ཚོགས་ཀྱིས་བསྟོད་བསྔགས་པདྨ་དཀར་པོའི་ཕྲེང་བ་བློ་གསལ་གཞོན་ནུའི་མགུལ་རྒྱན་བལ་རས་དཀར་ཁྲའི་ཐུམ་ཅན། ༼བ༽བ་པ་ལ་གསུང་མགུར་ལྷག་པོ་གླེགས་བམ་དང་པོ་རས་སྔོ་ཁྲའི་ཐུམ། ༼མ༽ མ་པ་ལ་གསུང་མགུར་ལྷག་པོ་གླེགས་བམ་གཉིས་པ་གོས་སྔོན་པོའི་ཐུམ། ༼ཙཾ༽ ཙ་པ་ལ་དབུས་གཙང་གི་གསུང་མགུར་ལྷག་པོ་གླེགས་བམ་གསུམ་པ་གོས་སྔོན་པོའི་ཐུམ་ཅན་བཞུགས་པ་བཅས།

ཁྱོན་བསྡོམས་པའི་གསུང་འབུམ་པོ་ཏི་བཅུ་བཞི་དང་མགུར་མ་ལྷག་པོ་པོ་ཏི་གསུམ་བཅས་པོ་ཏི་བཅུ་བདུན་བཞུགས་སོ། །འདིར་སྨྲས་པ། རྒྱལ་ཀུན་བརྩེ་བའི་རང་གཟུགས་གྲུ་འཛིན་མགོན། །གངས་ཅན་འགྲོ་ལ་རྗེས་སུ་ཆགས་པ་ཡིས། །ཆུ་ཟླའི་གར་གྱི་གྲུབ་པའི་བརྟུལ་ཞུགས་ཅན། །སྐྱབས་མཆོག་དམ་པས་འབྲལ་མེད་བརྩེ་བས་སྐྱོངས། །གང་ཐུགས་ཟབ་ཡངས་ཆུ་གཏེར་ལས་འོངས་པའི། །བཀའ་འབུམ་བསམ་འཕེལ་དབང་གི་རྒྱལ་པོ་འདིས། །མཐའ་དག་གདུལ་བྱའི་རེ་བ་མ་ལུས་པ། །ཡོངས་སུ་སྐོང་བའི་བྱེད་པོ་འདི་ལས་གང་། །ཐུབ་གསུང་ཀུན་གྱི་སྙིང་པོ་གཅིག་བསྡུས་པ། །ལེགས་བཤད་ཀུན་གྱི་མཐར་ཐུག་འདི་རྣམས་ནི། །ཐོས་བསམ་སྒོམ་པའི་ཕན་ཡོན་སྨོས་ཅི་དགོས། །མཚན་ཙམ་ཐོས་པའང་བསྐལ་མང་བསོད་ནམས་འབྲས། །དེང་ནས་ཚེ་རབས་ཀུན་ཏུ་དལ་འབྱོར་གྱི། །རྟེན་བཟང་ཐོབ་ནས་ཐེག་མཆོག་དགེ་བའི་བཤེས། །སྐྱབས་མགོན་དམ་པའི་མགོན་གྱིས་རྗེས་བཟུང་ནས། །གསུང་གི་བདུད་རྩིས་བདག་རྒྱུད་གྲོལ་བར་ཤོག །ཇི་སྲིད་འགྲོ་ཁམས་གནས་པ་དེ་སྲིད་དུ། །བཀའ་འབུམ་རིན་ཆེན་

དབང་གི་རྒྱལ་པོ་འདིས། །མཐའ་ཡས་ཕན་བདེའི་དཔལ་ཡོན་ཡོངས་སྦྱིན་པས། །ཆོས་ཀྱི་རྒྱལ་མཚན་བདག་གིས་འཛིན་པར་ཤོག །འདི་ལས་ཐོབ་པའི་ལེགས་བྱས་བསོད་ནམས་ཀྱིས། །བདག་དང་མ་རྒན་ལུས་ཅན་མཐའ་དག་ཀུན། །སྒྲིབ་གཉིས་བག་ཆགས་བཅས་པ་མྱུར་སྤངས་ནས། །དོན་གཉིས་མཐར་ཕྱིན་སངས་རྒྱས་ཐོབ་པར་ཤོག །རྒྱལ་བསྟན་ཡོངས་སུ་རྫོགས་པའི་རྒྱལ་མཚན་མཆོག །ནམ་ཡང་མི་ནུབ་རིང་དུ་གནས་གྱུར་ནས། །འཇིག་རྟེན་ཀུན་ཏུ་བདེ་ལེགས་དཔལ་འབྱོར་གྱི། །བཀྲ་ཤིས་ཆེན་པོས་ཡོངས་སུ་ཁྱབ་གྱུར་ཅིག །ཅེས་པ་འདི་ནི་བར་སྐབས་ཀྱི་ཚིགས་སུ་བཅད་པའོ། །སརྦ་མངྒ་ལཾ༎ ༎

འགྲོ་བའི་མགོན་པོ་ཞབས་དཀར་ཚོགས་དྲུག་རང་གྲོལ་གི་གསུང་འབུམ་གྱི་བཞུགས་བྱང་མ་ཎིའི་ཕྲེང་བ།

༄༅། །འགྲོ་བའི་མགོན་པོ་ཞབས་དཀར་ཚོགས་དྲུག་རང་གྲོལ་གི་བསུང་འབུམ་གྱི་བཞུགས་བྱང་མ་ཎིའི་ཕྲེང་བ་ཞེས་བྱ་བ་བཞུགས་སོ།།

རྗེ་ཞབས་དཀར་ཚོགས་དྲུག་རང་གྲོལ་གྱིས་ལེགས་གསུངས་མདོ་རྒྱུད་ཀུན་གྱི་སྙིང་པོའི་དོན་གཅིག་ཏུ་བསྡུས་རྣམས། སྐལ་བཟང་གདུལ་བྱ་ལ་ལེགས་པར་བསྩལ་པའི་བཀའ་འབུམ་མ་ཎིའི་ཕྲེང་གི་བཞུགས་བྱང་གསལ་བའི་མེ་ལོང་འགོད་དེ་ལ་པོད་ ཀ༽ སྙིགས་དུས་འགྲོ་བ་ཡོངས་ཀྱི་སྐྱབས་མགོན་ཞབས་དཀར་རྡོ་རྗེ་འཆང་ཆེན་པོའི་རྣམ་པར་ཐར་པ་རྒྱས་པར་བཤད་པ་སྐལ་བཟང་གདུལ་བྱ་ཐར་འདོད་རྣམས་ཀྱི་རེ་བ་སྐོང་བའི་ཡིད་བཞིན་གྱི་ནོར་བུ་བསམ་འཕེལ་དབང་གི་རྒྱལ་

པོ་ལ་ལྡེབ། ༤༨༥ 1-970 བཅས། ༈ པོད་ ཁ༽ འགྲོ་མགོན་ཞབས་དཀར་བའི་སྐུ་ཚེའི་སྨད་ཀྱི་རྣམ་ཐར་ཐོག་མཐའི་བར་དུ་དགེ་བ་ཡིད་བཞིན་ནོར་བུ་དགོས་འདོད་ཀུན་འབྱུང་ལ་ལྡེབ། ༣༤༥ 1-690 ༈ རྗེ་བཙུན་ཞབས་དཀར་རྡོ་རྗེ་འཆང་ཆེན་པོའི་གསང་བའི་རྟོགས་བརྗོད་མནྡྷ་ར་བའི་ཕྲེང་བ་དེ་ཁོ་ན་ཉིད་སྣང་བ་འཕགས་མའི་ཞལ་ལུང་ལ་ལྡེབ། ༣༦ 691-762 གྲུབ་པའི་དབང་ཕྱུག་དམ་པ་དཔལ་ཆེན་ནམ་མཁའ་འཇིགས་མེད་མཆོག་གི་རྣམ་པར་ཐར་བ་སྙིང་

བོར་དྲིལ་བ་སྐལ་བཟང་ཐར་པར་འཁྲིད་པའི་དེད་དཔོན་ལ་ལྡེབ། ༥༣ 763-868 བསྟན་འཛིན་ཉི་མ་རིན་པོ་ཆེའི་སྐུ་ཚེའི་སྟོད་ཀྱི་མཛད་པ་ཅུང་ཟད་ཚིགས་སུ་བཅད་པ་ལ་ལྡེབ། ༥ 869-878 གྲུབ་དབང་པདྨ་རང་གྲོལ་རིན་པོ་ཆེའི་སྐུ་ཚེའི་སྟོད་ཀྱི་རྣམ་པར་ཐར་པ་རིན་ཆེན་ཕྲེང་བའི་སྨད་ཆ་རིན་ཆེན་ཕྲེང་མཛེས་ལ་ལྡེབ། ༡༧ 879-912 བླ་མ་སྐལ་ལྡན་བདེ་བར་གཤེགས་པའི་སྐུ་ཚེ་ཐ་མའི་རྣམ་ཐར་ཡི་གེ་ཉུང་ངུའི་ལམ་ནས་སྟོན་པ་མི་རྟག་འཆི་བ་སྟོན་པའི་སློབ་དཔོན་ལ་ལྡེབ། ༩ 913-929 བཅས། ༈ པོད་ ག༽ བྱ་བཏང་ཚོགས་དྲུག་རང་གྲོལ་གྱིས་ཕྱོགས་མེད་རི་ཁྲོད་འགྲིམས་པའི་ཚེ་རང་གཞན་ཆོས་ལ་བསྐུལ་ཕྱིར་གླུ་དབྱངས་དགའ་སྟོན་འགྱེད་པ་རྣམས་ཀྱི་སྟོད་ཆ་ལ་ལྡེབ། ༣༤༥ 1-760 ཆོས་རྒྱལ་མཆོག་གི་ཞབས་པད་བསྟེན་དུས་རྩེ་གཞུང་སོགས་ངེས་མེད་དབེན་པར་བཞེངས་པའི་སྐོར། 9-195 མཚོ་སྙིང་མ་ཧཱ་དེ་བ་ནས་དམ་པ་ཉིད་ཀྱིས་ཉིད་ལ་གསལ་འདེབས་དགེ་བསྐུལ་གྱི་ཚུལ་དུ་བཞེངས་པའི་སྐོར། 195-420 མཚོ་སྙིང་མ་ཧཱ་དེ་བ་ནས་སྐལ་བཟང་གི་གདུལ་བྱ་རི་བའི་ཚོགས་ཀྱི་

ཞུས་ལེན་ཞལ་གདམས་ཀྱི་སྐོར། 420-757 མཇུག་བྱང་། 757-759 བཅས། ༈ པོད་ ང༽ བྱ་བཏང་ཚོགས་དྲུག་རང་གྲོལ་གྱིས་ཕྱོགས་མེད་རི་ཁྲོད་འགྲིམས་པའི་ཚེ་རང་གཞན་ཆོས་ལ་བསྐུལ་ཕྱིར་གླུ་དབྱངས་དགའ་སྟོན་འགྱེད་པ་རྣམས་ཀྱི་བར་ཆ་ལ་ལྡེབ། ༣༠༤ 1-607 མཚོ་སྙིང་དབེན་པའི་དགའ་ཚལ་ནས་དད་ཅན་ཡོན་བདག་ཕོ་མོ་རྣམས་ལ་གདམས་པའི་སྐོར། 11-283 མཚོ་སྙིང་མ་ཧཱ་དེ་བ་ནས་ཡུལ་ཕྱོགས་གདུལ་བྱས་ཞུས་ལན་ཆབ་ཤོག་གི་སྐོར། 283-391 ས་བཅུའི་དབང་ཕྱུག་རྨ་ཆེན་སྦོམ་རའི་གངས་རིའི་མགུལ་ནས་བཞེངས་པའི་སྐོར། 391-481 བྲག་དཀར་སྤྲེལ་རྫོང་དང་ཀྱ་ཕུག་པདྨ་རྫོང་དང་ཟྭ་ལུང་སོགས་ནས་བཞེངས་པའི་སྐོར། 481-538 དབེན་གནས་ཁྱད་འཕགས་དག་པ་མཁའ་སྤྱོད་དཔལ་གྱི་ཙཱ་རི་ཏྲ་ནས་བཞེངས་པའི་སྐོར། 538-607 བཅས། ༈ པོད་ ཅ༽ བྱ་བཏང་ཚོགས་དྲུག་རང་གྲོལ་གྱིས་ཕྱོགས་མེད་རི་ཁྲོད་འགྲིམས་པའི་ཚེ་རང་གཞན་ཆོས་ལ་བསྐུལ་ཕྱིར་གླུ་དབྱངས་དགའ་སྟོན་འགྱེད་པ་རྣམས་ཀྱི་སྨད་

ཆ་ལ་ལྡེབ། ༢༠༡ 1-402 གནས་ཆེན་གངས་དཀར་གྱི་རྒྱལ་པོ་ཏེ་སེ་ནས་བཞེངས་པའི་སྐོར། 1-164 གངས་རི་ནས་ཕྱིར་ཕེབས་ཤིང་ཁྱུང་ལུང་དང་སྤུ་ཧྲེངས་སོགས་ས་ཆ་མང་བོ་བརྒྱུད་སྐབས་བཞེངས་པའི་སྐོར། 164-207 བལ་ཡུལ་མཆོད་རྟེན་རྣམ་གཉིས་ལ་མཇལ་དུ་ཕེབས་པའི་ལམ་སྐབས་དང་བཀའ་བརྒྱུད་གོང་མའི་གདན་ས་འབྲོག་ལ་ཕྱི་གངས་ཀྱི་ར་བ་ནས་བཞེངས་པའི་སྐོར། 207-232 དབུས་གཙང་སོགས་ནས་བཞེངས་པ་ཁ་ཐོར་སྣ་ཚོགས་པའི་སྐོར། 232-290 སྤྲིངས་ཡིག་ཀ་ལ་པིངྐའི་སྒྲ་དབྱངས། 290-294 ཉམས་མགུར་ཁུ་བྱུག་སྔོན་མོའི་སྐད་སྙན། 294-296 འདུན་མ་ལེགས་པའི་མགུར་དབྱངས་གདངས་སྙན་པི་ཝང་གླིང་བུ། 296-298 དམ་ཆོས་གསེར་འོད་དམ་པའི་རྔ་སྒྲ། 298-300 རྒྱལ་བ་ཡབ་སྲས་ལ་ཕུལ་བའི་ཞུ་ཤོག་རབ་དཀར་གོས་བཟང་། 300-304 སྐྱོ་མགུར་པི་ཝང་རྒྱུད་མང་། 304-307 མན་ངག་གསེར་གྱི་ཐུར་མ་། 307-311 ཞལ་གདམས་སྣ་ཚོགས། 311-389 དམ་པ་གང་གི་བཀའ་དྲིན་གྱིས་འཚོ་བའི་བན་ཆུང་སངས་རྒྱས་རིན་

ཆེན་གྱིས་བྲིས་པའི་བསྟོད་ཚིག 389-398 སྤར་བྱང་སྨོན་ཚིག་ཁྱབ་གདལ་ཀློང་ཡངས་ཀྱི་མཛད་པ། 398-402 ༈ སྤྲིངས་ཡིག་ཀུན་དགའི་དཔལ་སྟེར་ངོ་མཚར་དཔྱིད་ཀྱི་རྒྱལ་མོའི་གླ་དབྱངས་ལ་ལྡེབ། ༤ 403-410 སྤྲིངས་ཡིག་རྣར་སྙན་ཡིད་འབབ་དྲི་ཟའི་བུ་མོའི་གླུ་དབྱངས་ལ་ལྡེབ། ༤ 411-418 སྙིང་གཏམ་དབྱངས་ཅན་པི་ཝང་ལ་ལྡེབ། ༤ 418-419 སྤྲིངས་ཡིག་བདེ་སྐྱིད་ཉི་མ་རང་འཆར་ལ་ལྡེབ། ༤ 419-425 དབུས་གཙང་ལ་སྤྲིངས་ཡིག་ཉི་མའི་འོད་ཟེར་ལ་ལྡེབ། ༥ 425-433 མངའ་རིས་ལ་སྤྲིངས་ཡིག་ཟླ་བའི་འོད་ཟེར་ལ་ལྡེབ། ༥ 433-441 རོང་མཚམས་ལ་སྤྲིངས་ཡིག་ནོར་བུའི་འོད་ཟེར་ལ་ལྡེབ། ༤ 441-448 སེམས་ལ་གང་ཤར་ཡི་གེར་བཀོད་པ་ལ་ལྡེབ། ༣ 448-452 ལོ་རྒྱུས་གསལ་བའི་སྒྲོན་མེ་ལ་ལྡེབ། ༢ 452-455 མི་རྟག་སྒྱུ་མའི་ཆོས་བཤད་ལ་ལྡེབ། ༣ 455-459 ཆབ་ཤོག་སྐོར་ལ་ལྡེབ། ༧ 459-472 སྤྲིངས་ཡིག་པི་ཝང་རྒྱུད་མང་ལ་ལྡེབ། ༦ 473-484 སྤྲིང་ཡིག་སྙན་

པའི་བ་དན་དཀར་པོ་ལ་ལྡེབ། ༢ 484-488 སྔགས་མང་གི་བཅའ་ཡིག་ཆོས་ཀྱི་སྒོ་འབྱེད་ལ་ལྡེབ། ༡༧ 489-521 བཅའ་ཡིག་ཆོས་ཀྱི་སྒོ་འབྱེད་ལ་ལྡེབ། ༢ 521-524 སྙིང་གཏམ་རིན་ཆེན་ཕྲེང་བ་ལ་ལྡེབ། ༢ 525-527 སྐྱོན་གྱིས་མ་གོས་བླ་མར་གསོལ་བ་འདེབས་ལ་ལྡེབ། ༡ 528 ཞལ་གདམས། དཔལ་ལྡན་བླ་མའི་ཞབས་ལ་འདུད་སོགས་ལ་ལྡེབ། ༢ 528-530 དྲིན་ཅན་ཨ་མའི་ཕྱི་མའི་ལམ་ཡིག་ལ་ལྡེབ། ༧ 531-544 ཨ་མ་དྲན་པའི་མགུར་ལ་ལྡེབ། ༢ 544-547 རྗེ་བླ་མ་སངས་རྒྱས་སྤྱི་བོར་བཞུགས་སོགས་ལ་ལྡེབ། ༢ 547-550 མ་ཡི་དྲིན་བསབ་ལ་ལྡེབ། ༣ 550-555 བཅས། ༈ པོད་ ཆ གླེགས་བམ་དགུ་ལས། ངོ་མཚར་སྤྲུལ་པའི་གླེགས་བམ་ལ་ལྡེབ། ༡༤༢、1-283 བཀའ་གདམས་སྤྲུལ་པའི་གླེགས་བམ་ལ་ལྡེབ། ༢༢༨ 285-740 བཅས། ༈ པོད་ ཇ༽ སྤྲུལ་པའི་གླེགས་བམ་དགུ་ལས། རྒྱལ་སྲས་སྤྲུལ་པའི་གླེགས་ལ་ལྡེབ། ༡༦༥ 1-330 སྙིང་རྗེ་སྤྲུལ་པའི་གླེགས་ལ་ལྡེབ། ༦༩ 331-468

ཡ་མཚན་སྤྲུལ་པའི་གླེགས་ལ་ལྡེབ། ༨༧ 469-642 བཅས། ༈ པོད་ ཉ༽ གླེགས་བམ་དགུ་ལས། རྨད་བྱུང་སྤྲུལ་པའི་གླེགས་བམ་ལ་ལྡེབ། ༡༢༨ 1-256 འཇམ་དབྱངས་སྤྲུལ་པའི་གླེགས་བམ་ལ་ལྡེབ། ༡༣༢ 257-519 བཅས། ༈ པོད་ ཏ༽ གླེགས་བམ་དགུ་ལས། དག་སྣང་སྤྲུལ་པའི་གླེགས་བམ་ལ་ལྡེབ། ༡༥༣ 1-30š ཨོ་རྒྱན་སྤྲུལ་པའི་གླེགས་བམ་ལ་ལྡེབ། ༡༣༧ 307-579 བཅས། ༈ པོད་ ཐ༽ ཆོས་བཤད་གསུམ་ལས། ཆོས་བཤད་གཞན་ཕན་ཉི་མ་ལ་ལྡེབ། ༡༥༤ 1-308 ཆོས་བཤད་གཞན་ཕན་ཟླ་བ་ལ་ལྡེབ། ༡༧༢ 309-651 བཅས། ༈ པོད་ ད༽ ཆོས་བཤད་གསུམ་ལས། ཆོས་བཤད་གཞན་ཕན་ནོར་བུ་ལ་ལྡེབ། ༣༡༦ 1-631 བཅས། ༈ པོད་ ན༽ ལེགས་བཤད་གསུམ་ལ། ལེགས་བཤད་ཀུན་བཟང་མཆོད་སྤྲིན་ལ་ལྡེབ། ༡༥༧ 1-313 ལེགས་བཤད་ཉི་མ་རང་ཤར་ལ་ལྡེབ། ༡༣༠ 315-574 ལེགས་བཤད་བདུད་རྩིའི་ཆུ་རྒྱུན་ལ་ལྡེབ། ༢༠ 575-614

བཅས། ༈ པོད་ པ༽ གདམས་ངག་གསུམ་ལས། མི་ཤེས་མུན་པ་མཐུག་པོ་སེལ་བའི་ལམ་རིམ་གསལ་བའི་སྒྲོན་མ་ལ་ལྡེབ། ༨༥ 1-169 རང་གཞན་ཐམས་ཅད་འཚེངས་པའི་གདམས་ངག་གསེར་གྱི་རི་བོ་ལ་ལྡེབ། ༨༡ 171-292 ལེགས་བཤད་གསེར་གྱི་ཐུར་མ་ལ་ལྡེབ། ༡༣ 293-317 ༈ ལྟ་བའི་མགུར་གསུམ་ལས། འོད་གསལ་རྫོགས་པ་ཆེན་པོའི་ཁྲེགས་ཆོད་ལྟ་བའི་གླུ་དབྱངས་ས་ལམ་མ་ལུས་མྱུར་དུ་བགྲོད་པའི་རྩལ་ལྡན་མཁའ་ལྡིང་གཤོག་རླབས་ལ་ལྡེབ། ༣༣ 319-384 འོད་གསལ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་གླུ་དབྱངས་ཏིང་འཛིན་སྒོ་འཕར་བརྒྱ་ཕྲག་གཅིག་ཆར་འབྱེད་པའི་ལྡེའུ་མིག་ལ་ལྡེབ། ༣༣ 385-449 ཐོད་རྒལ་གནད་ཀྱི་ཞལ་ཤེས་མགུར་དབྱངས་བདུད་རྩིའི་བུམ་བཟང་ལ་ལྡེབ། ༨༥ 451-470 ༈ ཁྲིད་ཡིག་སྣ་ཚོགས་སྐོར་ལས། སེམས་འཁྲིད་ཡིད་བཞིན་ནོར་བུ་ལ་ལྡེབ། ༥ 471-479 སེམས་ཁྲིད་སྙིང་གི་ནོར་བུ་ལ་ལྡེབ། ༢ 479-482 གདམས་པ་གཅིག་ཤེས་ཀུན་གྲོལ་ལ་ལྡེབ། ༣ 482-486 རྫོགས་ཆེན་ཀུན་གྱི་ཡང་བཅུད་

ཉམས་ལེན་ལམ་ཁྱེར་གདམས་པ་ལ་ལྡེབ། ༣ 486-489 ཟབ་མོ་དབུ་མའི་ལྟ་བ་ངོ་མཚར་རྨད་བྱུང་ལ་ལྡེབ། ༩ 491-507 རྒྱལ་བ་བློ་བཟང་དགྱེས་པའི་གླུ་དབྱངས་ལ་ལྡེབ། ༡༢ 509-581 རྡོར་སེམས་སྒོམ་བཟླས་བྱིན་རླབས་བླ་མའི་རྣལ་འབྱོར་ཆོས་བཤད་དང་བཅས་པ་ལ་ལྡེབ། ༩ 533-550 བླ་མའི་རྣལ་འབྱོར་བསྒོམས་པའི་ཕན་ཡོན་ལ་ལྡེབ། ༩ 551-567 རྟེན་བཞེངས་བྱས་པའི་ཕན་ཡོན་ལ་ལྡེབ། ༡ 569 སྲོག་ཤིང་འབྲི་ཚུལ་མདོར་བསྡུས་ལ་ལྡེབ། ༡ 569-570 རྟེན་བཤད་ཀུན་འདུས་ནོར་བུ་ལ་ལྡེབ། ༣ 570-574 དུག་དོན་ལུང་དང་རིག་པའི་མདའ་མོ་ལ་ལྡེབ། ༩ 575-592 གྲངས་འདྲེན་མེ་ཏོག་ཕྲེང་བ་བློ་གསལ་གཞོན་ནུའི་མགུལ་རྒྱན་ལ་ལྡེབ། ༤༧ 593-685 བཅས། ༈ པོད་ ཕ༽ སྟོན་པ་ཐུགས་རྗེ་ཅན་གྱི་མཛད་པ་བཅུ་གཉིས་དང་མཐུན་པའི་རྣམ་ཐར་གསོལ་འདེབས་ནོར་བུའི་ཕྲེང་བ་ལ་ལྡེབ། ༣ 1-5 བོད་ཀྱི་རྒྱལ་པོ་པཎྜི་ཏ་གྲུབ་ཆེན་རག་རིམ་ཙམ་ཞིག་མགོ་སྨོས་ནས་བོད་དུ་སྔོན་བྱོན་དམ་པ་རྣམས་ལ་གསོལ་

འདེབས་ལ་ལྡེབ། ༦ 7-18 བླ་མའི་གསོལ་འདེབས་བྱིན་རླབས་གཏེར་མཛོད་ལ་ལྡེབ། ༣ 19-24 བླ་མའི་མཚན་དོན་དང་འབྲེལ་བའི་གསོལ་འདེབས་ལ་ལྡེབ། ༡ 25-26 གྲུབ་བའི་དབང་ཕྱུག་དཔལ་ཆེན་ནམ་མཁའ་འཇིག་མེད་རིན་པོ་ཆེའི་སྐྱེས་ཕྲེང་གསོལ་འདེབས་རིན་ཆེན་གསེར་གྱི་ཕྲེང་བ་ལ་ལྡེབ། ༣ 27-31 ཞབས་དཀར་བའི་སྐྱེ་རབས་ཉུང་འདུས་ལ་ལྡེབ། ༡ 33-34 བླ་མའི་རྣམ་ཐར་གསོལ་འདེབས་དད་པའི་སྒོ་འབྱེད་ལ་ལྡེབ། ༣ 35-40 བླ་མའི་རྣམ་ཐར་གསོལ་འདེབས་སྙིང་རྗེའི་སྒོ་འབྱེད་ལ་ལྡེབ། ༣ 41-46 བླ་མའི་གསོལ་འདེབས་བྱིན་རླབས་མྱུར་འཇུག་ལ་ལྡེབ། ༢ 47-49 བླ་མ་རྒྱང་འབོད་ལ་ལྡེབ། ༡ 51 སྔོན་འགྲོ་ཉུང་འདུས་ལ་ལྡེབ། ༡ 53-54 ན་མོ་གུ་རུ་མཉྫུ་གོ་ཥ་ཡ་སོགས་ཉམས་ལེན་གྱི་ལམ་རིམ་པ་ལ་ལྡེབ། ༡ 55-56 སྐྱབས་སེམས་གསོལ་འདེབས་དད་པའི་འཇུག་ངོགས་ལ་ལྡེབ། ༡ 57 རྡོར་སེམས་བསྒོམ་བཟླས་སྡིག་སྒྲིབ་འཁྲུ་བའི་ཆུ་རྒྱུན་ལ་ལྡེབ། 57 མཎྜལ་ཞིང་ཁམས་སྒོ་འབྱེད་ལ་ལྡེབ། ༡ 58 སྒྱུ་ལུས་འོད་སྐུར་གྲོལ་

བའི་བླ་མའི་རྣལ་འབྱོར་ལ་ལྡེབ། ༢ 59-60 གར་བཞུགས་ཞིང་ནས་བླ་མ་ཚུར་བྱོན་སོགས་བླ་མའི་རྣལ་འབྱོར་ལ་ལྡེབ། ༡ 61-62 གསོལ་འདེབས་བྱིན་རླབས་མྱུར་འཇུག་མ་དང་བླ་མའི་རྣལ་འབྱོར་བཅས་ལ་ལྡེབ། ༧ 63-76 རྗེ་བཙུན་འཇམ་དབྱངས་དམར་སེར་ལ་བསྟེན་པའི་བླ་མའི་རྣལ་འབྱོར་ལ་ལྡེབ། ༣ 77-82 ཨོ་རྒྱན་བླ་མའི་རྣལ་འབྱོར་ལ་ལྡེབ། ༤ 83-89 མདུན་གྱི་ནམ་མཁར་འཇའ་འོད་གུར་ཁང་ཀློང་སོགས་སྐུ་གསུམ་བླ་མའི་རྣལ་འབྱོར་ལ་ལྡེབ། ༢ 91-94 རྗེ་བཙུན་མི་ལ་ལ་བསྟེན་པའི་བྱིན་རླབས་མྱུར་འཇུག་བླ་མའི་རྣལ་འབྱོར་ལ་ལྡེབ། ༣ 95-100 མྱུར་ལམ་བླ་མའི་རྣལ་འབྱོར་ལ་ལྡེབ། ༨ 101-107 བྱང་སྒྲ་མི་སྙན་གྱི་ཚེ་སྒྲུབ་ཀྱི་བླ་མ་བརྒྱུད་པའི་གསོལ་འདེབས་ལ་ལྡེབ། ༢ 109-111 བྱང་སྒྲ་མི་སྙན་གྱི་ཚེ་སྒྲུབ་ཀྱི་རྒྱུན་འཁྱེར་འཆི་མེད་ཚེ་ཡི་ཡང་སྙིང་ལ་ལྡེབ། ༦ 113-123 བྱང་སྒྲ་མི་སྙན་གྱི་ཚེ་སྒྲུབ་མདོར་བསྡུས་ལ་ལྡེབ། ༡ 125-126 བཀྲ་ཤིས་འཆི་མེད་དཔལ་སྟེར་ལ་ལྡེབ། ༡ 127-128 སྤྱན་རས་གཟིགས་ཀྱི་བསྒོམ་བཟླས་

ཞལ་མཐོང་གསུང་ཐོས་མ་ལ་ལྡེབ། ༡ 129-130 སྤྱན་རས་གཟིགས་ཀྱིས་སྒོམ་བཟླས་ཕན་བདེའི་འབྱུང་གནས་ལ་ལྡེབ། ༡ 131-132 སྨྱུང་གནས་ཆོ་ག་བདེ་གཤེགས་ལམ་བཟང་ལ་ལྡེབ། ༡༨ 133-168 སྨྱུང་གནས་ཆོ་ག་ཐར་པའི་ཐེམ་སྐས་ལ་ལྡེབ། ༥ 169-178 རྡོ་རྗེ་སེམས་དཔའི་ཁྲུས་ཀྱི་ཆོ་ག་བདུད་རྩིའི་བུམ་བཟང་ལ་ལྡེབ། ༨ 179-186 གཅོད་དམིགས་བདག་འཛིན་གཅོད་པའི་སྟ་རེ་ལ་ལྡེབ། ༡ 187-188 ཟབ་ལམ་གཅོད་ཀྱི་དམིགས་རིམ་ལ་ལྡེབ། ༣ 189-194 ཟབ་ལམ་གཅོད་ཀྱི་ངག་འདོན་བདག་འཛིན་གཅོད་པའི་སྟྭ་རེ་ལ་ལྡེབ། ༤ 195-202 གཅོད་དམིགས་བདག་འཛིན་རྩད་གཅོད་ལ་ལྡེབ། ༣ 203-208 ཕོ་བ་སྤྱི་གཙུག་འཇའ་གུར་མ་ལ་ལྡེབ། ༡ 209-210 ཚོགས་མཆོད་འདོད་དགུའི་ཆར་འབེབས་ལ་ལྡེབ། ༤ 211-217 ཚོགས་མཆོད་ཀུན་བཟང་མཆོད་སྤྲིན་ལ་ལྡེབ། ༦ 217-227 བསང་མཆོད་མདོར་བསྡུས་པ་ལ་ལྡེབ། ༡ 229-230 མནོལ་བསངས་མདོར་བསྡུས་ལ་ལྡེབ། ༡ 231-282 གཡང་འགུག་དབུལ་བ་ཀུན་

སེལ་ལ་ལྡེབ། ༣ 233-237 ཛམ་ནག་གི་མངོན་རྟོགས་འདོད་དགུའི་ཆར་འབེབས་ལ་ལྡེབ། ༣ 239-244 བླ་མ་ཡིད་བཞིན་ནོར་བུ་སོགས་ལ་ལྡེབ། ༡ 245 གཏོར་བསྔོ་མདོར་བསྡུས་ལ་ལྡེབ། ༣ 247-252 གཏོར་མ་བརྒྱ་རྩ་བསྡུས་པ་ལ་ལྡེབ། ༤ 253-260 མཁའ་འགྲོ་མཆེད་ལྔའི་སེར་སྐྱེམས་དངོས་གྲུབ་ཆར་འབེབས་ལ་ལྡེབ། ༡ 261-262 ཤར་ཐམས་ཅད་མཁྱེན་པ་བློ་བཟང་ཆོས་གྲགས་རྒྱ་མཚོའི་ཡང་སྤྲུལ་མྱུར་འབྱོན་ལ་ལྡེབ། ༡ 263- 264 རྒྱལ་བསྟན་འཛིན་མཁན་ཡོངས་ཀྱི་གཙུག་གི་རྒྱན་སོགས་མྱུར་འབྱོན་ལ་ལྡེབ། ༡ 264 རྩ་བརྒྱུད་བླ་མ་ཡི་དམ་ཞི་ཁྲོ་དང་སོགས་མྱུར་འབྱོན་ལ་ལྡེབ། ༡ 265 ཕན་བདེའི་འབྱུང་གནས་མདོ་རྒྱུད་རིན་པོ་ཆེ་སོགས་མྱུར་འབྱོན་ལ་ལྡེབ། ༡ 266 འཇིགས་བྲལ་ཕྱོགས་ལས་རྣམ་རྒྱལ་ཡོངས་འཛིན་རྗེ་སོགས་མྱུར་འབྱོན་ལ་ལྡེབ། ༡ 266-267 སྤྲུལ་སྐུ་མྱུར་བྱོན་སྤྱི་འགྲོ་ལ་ལྡེབ། ༡ 267-268 ཆོས་སྤྱོད་སྨོན་ལམ་རིམ་པ་བདེ་སྐྱིད་ཉི་མ་རང་འཆར་ལ་ལྡེབ། ༨ 269-284 བླ་མ་རྡོ་རྗེ་སེམས་དཔར་གུས་ཕྱག་

འཚལ་སོགས་སྨོན་ལམ་ལ་ལྡེབ། ༢ 285-288 སྨོན་ལམ་སངས་རྒྱས་ཞིང་ཁམས་གྲངས་མེད་ཀྱི་སྒོ་རྣམས་འབྱེད་པའི་ལྡེ་མིག་ལ་ལྡེབ། ༤ 289-296 རིགས་ལྔའི་ཞིང་སྦྱོང་སྨོན་ལམ་ལ་ལྡེབ། ༡༧ 297-310 སྨོན་ལམ་རིན་ཆེན་གསེར་གྱི་ཕྲེང་བ་ལ་ལྡེབ། ༢ 311-314 ཁ་ཏོན་བྱས་པའི་མཇུག་ཏུ་འདོན་རྒྱུའི་སྨོན་ལམ་ལ་ལྡེབ། ༡ 315-316 རྒྱལ་ཁམས་བདེ་ཞིང་སྐྱིད་པའི་གསོལ་འདེབས་ལ་ལྡེབ། ༡ 316 བསླུ་མེད་དཀོན་མཆོག་གསུམ་གྱི་བྱིན་རླབས་ཀྱིས་སོགས་སྨོན་ལམ་ལ་ལྡེབ། ༡ 317 མར་མེའི་སྨོན་ལམ་ལ་ལྡེབ། ༡ 318 བླ་མ་དཀོན་མཆོག་གསུམ་ལ་ཕྱག་འཚལ་ལོ་སོགས་སྨོན་ལམ་ལ་ལྡེབ། ༡ 319-320 ཅི་བསམ་འགྲུབ་པའི་སྨོན་ལམ་ལ་ལྡེབ། ༡ 321 ཕུན་སུམ་ཚོགས་པའི་བཀྲ་ཤིས་ལ་ལྡེབ། ༡ 323-324 བཀྲ་ཤིས་རིན་ཆེན་ཕྲེང་བ་ལ་ལྡེབ། ༤ 325-332 ༈ དཀར་ཆག་གསལ་བའི་མེ་ལོང་ལས་སྐྱབས་མགོན་ཞབས་དཀར་པའི་གསུང་འབུམ་གྱི་ཐོ་ཡིག་སྔོན་དུ་གཡ་མ་བཀྲ་ཤིས་དཀྱིལ་དུ་བཞུགས་པའི་ཕྱག་དཔེའི་ཐོ་ལ་ལྡེབ། ༧ 333-345 འགྲོ་བའི་མགོན་པོ་ཞབས་

དཀར་ཚོགས་དྲུག་རང་གྲོལ་གྱི་གསུང་འབུམ་གྱི་བཞུགས་བྱང་མ་ཎིའི་ཕྲེང་བ་ལ་ལྡེབ། ༡༠ 347-369 ༈ རྒྱབ་ཆོས་སྐོར་ལ། གཏེར་སྟོན་ཀུན་བཟང་བདེ་ཆེན་རྒྱལ་པོའི་ཟག་གཏེར་ཡང་གསང་རྟ་ཕག་ཡིད་བཞིན་ནོར་བུའི་ཆོས་སྐོར་ལས། རྟ་ཕག་ཡིད་བཞིན་ནོར་བུའི་ལས་བྱང་དངོས་གྲུབ་རྒྱ་མཚོ་དང་། ཟུར་རྒྱན་འདོད་འབྱུང་ནོར་བུ་བཀླག་ཆོག་ཏུ་བཀོད་པ་པུཎྜ་རཱི་ཀའི་དོ་ཤལ་ལ་ལྡེབ། ༢༣ 367-411 གཏེར་སྟོན་རིག་འཛིན་ཆེན་པོ་ཀུན་བཟང་བདེ་ཆེན་རྒྱལ་པོ་རྩལ་གྱི་ཟབ་གཏེར་ཡང་བསང་རྟ་ཕག་ཡིད་བཞིན་ནོར་བུའི་དབང་ཆོག་ཡེ་ཤེས་བདུད་རྩིའི་བུམ་བཟང་ལ་ལྡེབ། ༣༤ 413-480 བཅས་༧སྐྱབས་རྗེ་འཁྲུལ་ཞིག་རིན་པོ་ཆེ་ངག་དབང་ཆོས་ཀྱི་བློ་གྲོས་ཀྱིས་མཛད་པ། ༈ ཡང་གསང་རྟ་ཕག་གི་ལས་བྱང་དངོས་གྲུབ་རྒྱ་མཚོ་ལ་ལྡེབ། ༡༤ 481-508 མགོན་དཀར་གྱི་སྒྲུབ་ཐབས་བླ་མ་མགོན་པོའི་ཞལ་ལུང་དངོས་གྲུབ་རོལ་མཚོ་ལ་ལྡེབ། ༩ 509-525 བཅས་དགུ་རོང་ང་སྣ་ཚོགས་རང་གྲོལ་གྱིས་མཛད་པ། ཡང་གསང་རྟ་ཕག་ཡིད་བཞིན་ནོར་བུའི་སྐོང་བཤགས་ཀྱི་ཆོ་ག་པདྨ་རཱ་གའི་ཕྲེང་བ་ལ་ལྡེབ།

༡༤ 527-553 དགུ་རོང་དགེ་འདུན་འཇིགས་མེད་རྣམ་གྲོལ་གྱི་གསུང་། རྟ་ཕག་ཡིད་བཞིན་ནོར་བུའི་ཞི་བའི་སྦྱིན་སྲེག་ཡེ་ཤེས་མེ་འོད་ལ་ལྡེབ། ༨ 555-570 ཉང་སྐྱེས་མཚམས་པའི་གསུང་། ཡང་གསང་རྟ་ཕག་གི་བསྙེན་པའི་ཁ་སྐོང་གི་སྦྱིན་སྲེག་འཁྱེར་བདེར་བཀོད་པ་སྒྲིབ་མུན་འཇོམས་པའི་ཉི་མ་ལ་ལྡེབ། ༢ 571-573 དགུ་རོང་སྣ་ཚོགས་རང་གྲོལ་གྱི་གསུང་། ཡང་གསང་རྟ་ཕག་ལས་ཆར་འབེབས་ཀྱི་ཆོ་ག་ཕན་བདེའི་དཔལ་སྦྱིན་ལ་ལྡེབ། ༡༡ 575-596 མཛད་བྱང་མེད། གཏེར་གསར་རྟ་ཕག་ཡིད་བཞིན་ནོར་བུའི་བསྙེན་ཡིག་ཉམས་ཆུང་ཡིད་ཀྱི་མུན་སེལ་ལ་ལྡེབ། ༧ 597-609 བྱ་བྲལ་སྐལ་ལྡན་རིག་གྲོལ་གིས་མཛད་པ། རྟ་ཕག་ཡིད་བཞིན་ནོར་བུའི་སྐྱེད་རྫོགས་ལ་ལྡེབ། ༢ 611-613 མཛད་བྱང་མེད། རྟ་ཕག་ཡིད་བཞིན་ནོར་བུ་ལས་རྩ་རླུང་སེངྒེའི་ཉམས་རྟོགས་བདེ་ཆེན་འོད་འབར་ལ་ལྡེབ། ༦ 615-625 གཏེར་སྟོན་བདེ་ཆེན་རྒྱལ་པོས་ཕབ་པའོ། ༈ རྫོགས་པ་ཆེན་པོ་མ་རིག་མུན་སེལ་གྱི་སྔོན་འགྲོའི་ཟུར་བརྒྱན་ལ་ལྡེབ། ༡༧ 627-659 མཛད་བྱང་མེད། གཏེར་གསར་རྫོགས་ཆེན་གྱི་ཁྲིད་རིམ་མ་རིག་མུན་སེལ་ཡེ་ཤེས་སྒྲོན་མེ་ལ་

ལྡེབ། ༡༠༡ 661-861 ༧་ཆོས་རྒྱལ་ངག་གི་དབང་པོས་མཛད་པ། བཅས་བཞུགས། ༈ །བཀའ་འབུམ་རིན་ཆེན་དབང་གི་རྒྱལ་པོ་འདིས། བདག་དང་མ་རྒན་ལུས་ཅན་མཐའ་དག་ཀུན། །སྒྲིབ་གཉིས་བག་ཆགས་བཅས་པ་མྱུར་སྤངས་ནས། །དོན་གཉིས་མཐར་ཕྱིན་སངས་རྒྱས་ཐོབ་པར་ཤོག །རྒྱལ་བསྟན་ཡོངས་སུ་རྫོགས་པའི་རྒྱལ་མཚན་མཆོག །ནམ་ཡང་མི་ནུབ་རིང་དུ་གནས་གྱུར་ནས། །འཇིག་རྟེན་ཀུན་ཏུ་བདེ་ལེགས་དཔལ་འབྱོར་གྱི། །བཀྲ་ཤིས་ཆེན་པོས་ཡོངས་སུ་ཁྱབ་གྱུར་ཅིག། །།

རྟ་ཕག་ཡིད་བཞིན་ནོར་བུའི་ལས་བྱང་དངོས་གྲུབ་རྒྱ་མཚོ་དང་། ཟུར་རྒྱན་འདོད་འབྱུང་ནོར་བུ་བཀླག་ཆོག་ཏུ་བཀོད་པ་པུཎྜ་རཱི་ཀའི་དོ་ཤལ།

༄༅། །རྟ་ཕག་ཡིད་བཞིན་ནོར་བུའི་ལས་བྱང་དངོས་གྲུབ་རྒྱ་མཚོ་དང་། ཟུར་རྒྱན་འདོད་འབྱུང་ནོར་བུ་བཀླག་ཆོག་ཏུ་བཀོད་པ་པུཎྜ་རཱི་ཀའི་དོ་ཤལ་ཞེས་བྱ་བ་བཞུགས་སོ།།

གདོད་མའི་མགོན་པོ་ཀུན་བཟང་སྣང་མཐའ་ཡས། །དབྱེར་མེད་རྩ་གསུམ་གཅིག་འདུས་བླ་མ་རྗེ། །ཡོངས་གྲགས་འཇམ་གླིང་རྒྱན་གཅིག་ཞབས་དཀར་བ། །ཚོགས་དྲུག་རང་གྲོལ་ཞབས་ལ་གུས་བཏུད་དེ། །རྟ་ཕག་ལས་བྱང་དངོས་གྲུབ་རྒྱ་མཚོ་དང་། །ཟུར་རྒྱན་འདོད་འབྱུང་ནོར་བུ་བཀླག་ཆོག་མར། །བསྡེབས་ལ་ཆོས་སྲུང་རྣམས་ཀྱིས་བཀའ་གནང་སྟེ། །གེགས་མེད་མྱུར་དུ་སྒྲུབ་པའི་གྲོགས་མཛོད་ཅིག །འདིར་རིག་འཛིན་ཆེན་པོ་ཀུན་བཟང་བདེ་ཆེན་རྒྱལ་པོའི་གཏེར་སྒྲོམ་མཚོ་རྒྱལ་གསང་ཕུག་ནས་སྤྱན་དྲངས་

པའི་ཡང་གསང་རྟ་ཕག་གི་ལས་བྱང་དངོས་གྲུབ་རྒྱ་མཚོ་ཞེས་བྱ་བ་ཚིག་ཉུང་ལ་དོན་འདུས་ཤིང་ཟབ་ལ་རྒྱུན་དུ་ཉམས་སུ་ལེན་པར་ཁྱེར་བདེ་བ་ཉིད་ལ་ཤིན་ཏུ་རྣམ་དཔྱོད་ལེགས་པའི་ལྷན་ཐབས་ཟུར་རྒྱན་སོགས་ཀྱི་དགོས་རྒྱུ་ཆུང་ཡང་། དེང་སང་དུས་དབང་གི་ཕལ་ཆེར་སྤྲོས་བཅས་ཁོ་ནར་མོས་པ་ཤས་ཆེ་སྟབས་སྤྲོས་མེད་གཏེར་ཚིག་ལས་ཅུང་ཟད་རྒྱས་པ་ཞིག་བྱུང་ན་ཚེས་བཅུའི་མཆོད་པ་སོགས་ཀྱི་སྐབས་གཞན་ངོར་མཛེས་ཤིང་དང་བ་འདྲོངས་པ་ཙམ་དུ་མ་ཟད། རང་རེ་ལྟ་བུའི་བློ་དམན་རྣམས་ལའང་ཚིག་གི་གསལ་འདེབས་རྒྱས་པ་རེ་བྱུང་ན་ཚིག་ཕྱིར་དུ་དོན་འབྲངས་པས་དམིགས་རིམ་སོགས་གང་ཅིར་བློ་ཆོད་ཆེ་བར་ཡོང་བ་ཆོས་ཉིད་དེ། གསང་སྔགས་ལུང་གི་སྒོ་བཞིར། དོན་དམ་གསལ་འདེབས་བརྗོད་པ་

ཚིག་གི་སྒོ །ཞེས་གསུངས་པ་དང་མི་འགལ་བ་བྱས་ཏེ་བརྗོད་ཚིག་རྣམས་ཀྱང་རང་སྣང་གང་ཤར་གྱིས་ཕལ་ཚིག་གསར་རྩོམ་ལྟ་བུ་མ་ཡིན་པར་རིགས་མཐུན་གུ་རུ་རིན་པོ་ཆེའི་གསུང་གཏེར་ཁ་གོང་འོག་རྣམས་དང་། མཚན་ལྡན་སྐྱེས་ཆེན་དམ་པ་གོང་མ་རྣམས་ཀྱི་གསུང་ཕྱོགས་ཕྱོགས་ནས་བསྡུས་ཏེ་གཏེར་གཞུང་གབ་དཀྲུགས་བསལ་བའི་ལས་བྱང་དངོས་གྲུབ་རྒྱ་མཚོ་དང་། ཟུར་རྒྱན་འདོད་འབྱུང་ནོར་བུ་བཀླག་ཆོག་ཏུ་བཀོད་པ་ལ། ཐོག་མར་རང་གི་བླ་མའི་ཕྱག་བཞེས་ལྟར་བླ་མ་སྐུ་བཞིའི་གསོལ་འདེབས་བྱ། དེ་ནས་གཞུང་ལས་ཉན་ཐོས་ཀྱི་ཐེག་པ་དང་བསྟུན་ཏེ་དལ་འབྱོར་གྱི་མི་ལུས་རྙེད་དཀའ་བསམ་པ། དེ་མི་རྟག་པའི་ཚུལ། དཀར་ནག་ལས་འབྲས་སྨིན་ཚུལ། འཁོར་བའི་སྡུག་བསྔལ། ཞི་བ་མྱ་ངན་ལས་འདས་པའི་ཕན་ཡོན་ལ་བལྟ་བ་

དང་བཅས་བསམས་ནས་གསུངས་པས། དེ་དག་གི་དོན་བསམ་པ་ལ་ཉམས་ལེན་དུ་ཁྱེར་བདེ་ཕྱིར་ཚིག་གི་གསལ་འདེབས་པར་སྤྲོ་ན་འདི་ལྟར་བྱ་སྟེ། །དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པད་ཟླའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་རྩལ་དུ་གསོལ། །དལ་འབྱོར་རྙེད་དཀའ་རྙེད་པ་ད་རེས་ཙམ། །རྙེད་ནས་དོན་ཆེའི་ཚུལ་བསམ་དོན་ཆུང་གིས། །འདིར་སྣང་ཆོས་བརྒྱད་བྱ་བྱེད་ཀུན་སྤངས་ནས། །དབེན་པར་དོན་ཆེན་བྱང་ཆུབ་ཅིས་མི་སྒྲུབ། །འཆི་

ངེས་ནམ་འཆི་ཆ་མེད་འཆི་རྐྱེན་མང་། །འཚོ་བའི་ཐབས་ཉུང་རྒན་གཞོན་གོ་རིམ་མེད། །འཆི་དུས་ཆོས་མིན་ཅིས་ཀྱང་ཕན་ཐབས་བྲལ། །མྱུར་དུ་ཉམས་ལེན་བྱེད་པའི་དུས་ལ་བབས། །མངར་སྐྱར་ས་བོན་གང་བཏབ་འབྲས་སྨིན་ལྟར། །དཀར་ནག་ལས་འབྲས་འཆི་བའི་རྗེས་སུ་འབྲངས། །བདེ་སྡུག་འབྲས་བུ་མ་ནོར་སྨིན་ཚུལ་ལ། །ངེས་པ་རྙེད་ནས་སྡིག་སྤོངས་དགེ་ལ་འབད། །ཤི་ནས་རིགས་དྲུག་མཐོ་དམའ་གར་སྐྱེས་ཀྱང་། །བདེ་མེད་སྡུག་བསྔལ་རང་བཞིན་འདི་དག་ལ། །སྐྱོབས་ཕྱིར་སྙིང་ནས་མཆོག་གསུམ་སྐྱབས་འགྲོ་ཞིང་། །མ་ནོར་བསླབ་བྱ་ཉམས་པ་མེད་པར་བྱ། །འཇིགས་རུང་འཁོར་བ་མེ་འོབས་སྲིན་གླིང་ལྟར། །མཐོང་ནས་འཁོར་བའི་དཔལ་འབྱོར་ཕུན་ཚོགས་ལ། །མངོན་ཞེན་གཏིང་ལོག་ཐར་འདོད་ཤུགས་དྲག་བློས། །བསླབ་གསུམ་རྣམ་དག་རྩེ་གཅིག་སྒྲུབ་ལ་གཞོལ། །རང་ཉིད་ཡང་ཡང་དྲིན་གྱིས་བསྐྱངས་པའི་མ། །འགྲོ་ཀུན་སྡུག་བསྔལ་གསུམ་གྱིས་མནར་ཚུལ་ལ། །བསམས་ནས་འདི་དག་སྲིད་པའི་རྒྱ་མཚོ་ལས། །སྒྲོལ་ཕྱིར་སངས་རྒྱས་གོ་འཕང་ཐོབ་པར་བྱ། །དེ་ཡི་ཆེད་དུ་ཡང་གསང་

རྟ་ཕག་གི །སྒྲུབ་པ་ཟབ་མོ་ཉམས་སུ་བླང་བར་བགྱི། །དེ་ནས་གཞུང་ལས། དང་པོ་སྐྱབས་ཡུལ་འདི་ལྟར་བསྒོམ་ལ། རང་གི་མདུན་གྱི་ནམ་མཁའ་ལ༔ པདྨ་སྟོང་བརྩེགས་འཇའ་འོད་ཀྱི༔ དབུས་དང་ཕྱོགས་བཞིར་གྱེས་པའི་ཀློང་༔ དབུས་སུ་ཆོས་སྐུ་ཀུན་བཟང་ལ༔ དགོངས་བརྡ་སྙན་བརྒྱུད་བླ་རབས་བསྐོར༔ གཡས་སུ་རྫོགས་པའི་སངས་རྒྱས་ལ༔ བྱང་ཆུབ་སེམས་དཔའི་ཚོགས་ཀྱིས་བསྐོར༔ གཡོན་དུ་པདྨ་རྒྱལ་པོ་ཡི༔ གཡས་སུ་རྡོར་སེམས་ཡབ་ཡུམ་དང་༔ གཡོན་དུ་མུ་ཁྲི་བཙན་པོ་ལ༔ སྔགས་འཆང་གྲུབ་ཐོབ་རྒྱ་མཚོས་བསྐོར༔ མདུན་དུ་ཐུགས་རྗེ་ཆེན་པོ་ལ༔ ཡུམ་མཆོག་གསང་བ་ཡེ་ཤེས་འཁྲིལ༔ ཡི་དམ་དཀྱིལ་འཁོར་ལྷ་ཚོགས་བསྐོར༔ རྒྱབ་ཏུ་ཐེག་ཆེན་མདོ་ལུང་ཆོས༔ གང་འདུལ་ཆོས་ཀྱི་སྒྲ་དབྱངས་སྒྲོགས༔ མཐའ་སྐོར་མཁའ་འགྲོ་ཆོས་སྐྱོང་རྣམས༔ མ་ལུས་སྤྲིན་ལྟར་གཏིབས་པར་གྱུར༔ བདག་དང་མཁའ་ཁྱབ་སེམས་ཅན་རྣམས༔ མི་བཟད་འཁོར་བའི་དུཿཁ་ལས༔ སྒྲོལ་ཕྱིར་བདག་གིས་སེམས་མཆོག་བསྐྱེད༔ སྐབས་འདིར་སྔོན་བསྐལ་མ་གཏོང་བ་གཞུང་ལ་མེད་ཀྱང་བླ་མའི་ཕྱག་

རྒྱུན་ཡིན། དེ་ནས་སྐྱབས་འགྲོ་ནི། ན་མོ༔ སྐྱབས་ཡུལ་དཀོན་མཆོག་བདེ་གཤེགས་གསུམ༔ དངོས་གྲུབ་རྩོལ་མཛད་ཡི་དམ་ལྷ༔ མཁའ་འགྲོ་དམ་ཅན་སྲུང་མར་བཅས༔ སྐྱབས་སུ་མཆིའོ་བྱིན་གྱིས་རློབས༔ ལན་གསུམ། གཉིས་པ་བྱང་ཆུབ་སེམས་དཔའི་ཐེག་པ་དང་བསྟུན་ཏེ་སེམས་ཅན་གྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་པ་ནི། ཧོ༔ དབྱིངས་རིག་ངོ་བོ་མ་བཅོས་པའི༔ གཅིག་ཏུ་ཤར་བ་སྙིང་རྗེའི་ཡུལ༔ ཅིར་སྣང་མ་གྱུར་སངས་རྒྱས་ཞིང་༔ བྱང་ཆུབ་ལམ་ལ་སེམས་མཆོག་བསྐྱེད༔ ལན་གསུམ། གསུམ་པ་སྔགས་ནང་པ་དང་བསྟུན་ཏེ་སྒྲིབ་སྦྱོང་རྡོ་རྗེ་སེམས་དཔའི་སྒོམ་བཟླས་ནི། རང་ཉིད་ཐ་མལ་གནས་པ་ལས༔ སྤྱི་བོར་པདྨ་ཟླ་བའི་སྟེང་༔ ཧཱུྃཿཡིག་དཀར་པོའི་འཕྲོ་འདུ་ལས༔ རྡོ་རྗེ་སེམས་དཔའ་གངས་རིའི་མདོག༔ ལོངས་སྐུའི་རྒྱན་སྤྲས་ཡུམ་དང་སྦྱོར༔ ཐུགས་ཀར་ཟླ་སྟེང་རྡོ་རྗེ་ལ༔ ཧཱུྃ་མཚན་ཡིག་བརྒྱའི་སྔགས་ཕྲེང་བསྐོར༔ འོད་འཕྲོས་རང་གཞན་སྡིག་སྒྲིབ་སྦྱངས༔ སྡིག་ལྟུང་ཉེས་ཚོགས་དག་པར་གྱུར༔ ཨོཾ་གུ་རུ་བཛྲ་སཏྭ་ས་མ་ཡ་ནས། མ་ཧཱ་ས་མ་ཡ་སཏྭ་ཨཱཿ རྡོར་སེམས་འོད་ཞུ་རང་ལ་བསྟིམ༔ རང་ཉིད་རྡོ་རྗེ་སེམས་དཔར་གྱུར༔ རང་ལས་

འོད་འཕྲོས་འགྲོ་ལ་ཕོག༔ འགྲོ་ཀུན་རྡོ་རྗེ་སེམས་དཔར་གྱུར༔ བཞི་པ་ཚོགས་བསགས་མཎྜལ་དང་བླ་མའི་རྣལ་འབྱོར་མོས་གུས་བྱིན་རླབས་ལ་བརྟེན་པ་མངོན་སུམ་དུ་བྱ་ཕྱིར་ཏིང་ངེ་འཛིན་གྱི་དབང་བླང་བ་ཞེས་དོན་གསུམ་པའི་དང་པོ་ཕྱི་ནང་གསང་གསུམ་གྱི་མཎྜལ་ནི། ཧཱུྃ༔ ཆོས་དབྱིངས་རང་བྱུང་རོལ་པའི་རྩལ༔ ཕྱི་ནང་སྣོད་བཅུད་སྣང་སྲིད་ཆོས༔ ཁྱབ་བརྡལ་ཞིང་ཁམས་མཆོད་སྤྲིན་བཅས༔ འཁོར་གསུམ་ཡོངས་དག་ཉིད་དུ་རོལ༔ སརྦ་པཱུ་ཛ་རཏྣ་མཎྜལ་ཧཱུྃ༔ སྐྱབས་ཡུལ་གྱི་ལྷ་ཚོགས་རྣམས་རང་ལ་ཛཿཧཱུྃ་བཾ་ཧོཿ བླ་མའི་རྣལ་འབྱོར་ནི། རང་ཉིད་རྟ་ཕག་ཡབ་ཡུམ་སྐུ༔ མེ་ལོང་གཟུགས་བཞིན་གསལ་བ་ཡི༔ སྤྱི་བོར་པདྨ་ཉི་ཟླའི་སྟེང་༔ འཇའ་འོད་གུར་ཁང་ཆེན་པོའི་ཀློང་༔ ཆོས་སྐུ་ཀུན་ཏུ་བཟང་པོ་ཉིད༔ དགྱེས་འཛུམ་འོད་ཟེར་འཕྲོ་བའི་སྐུ༔ རྡོ་རྗེ་སྐྱིལ་ཀྲུང་བཞུགས་པའི་མཐར༔ བརྒྱུད་པའི་བླ་མ་སྐར་ཚོགས་བཞིན༔ མངོན་སུམ་ལྟ་བུར་བཞུགས་པར་གསལ༔ མོས་གུས་གདུང་ཤུགས་དྲག་པོ་ཡིས༔ ཨེ་མ་ཧོཿ སྐྱེ་མེད་ཀ་དག་ཆོས་དབྱིངས་ཞིང་ཁམས་སུ༔ ཐོག་མའི་སངས་རྒྱས་ཀུན་བཟང་ཡབ་ཡུམ་ལ༔ གསོལ་བ་འདེབས་སོ་སྨིན་ཅིང་གྲོལ་

བར་མཛོད༔ མདངས་རྩལ་མ་འགགས་སྐྱེ་མེད་ཀློང་ཡངས་ནས༔ ལོངས་སྐུའི་གཙོ་མཆོག་རྡོ་རྗེ་སེམས་དཔའ་ལ༔ གསོལ་བ་འདེབས་སོ་སྨིན་ཅིང་༴ དུར་ཁྲོད་སོ་ས་གླིང་གི་གནས་མཆོག་ཏུ༔ མཁའ་འགྲོའི་གཙོ་མཆོག་ལས་ཀྱི་དབང་མོ་ཆེར༔ གསོལ་བ༴ དྷ་ན་མི་དྷིའི་ཞིང་ཁམས་ཡངས་པ་རུ༔ སློབ་དཔོན་ཆེན་པོ་ཧཱུཾ་ཆེན་ཀཱ་ར་ལ༔ གསོལ་བ༴ རྒྱ་ནག་རི་བོ་ཆེན་པོའི་ཤར་ཕྱོགས་སུ༔ མཁའ་འགྲོའི་གཙོ་མོ་ལབ་ཀྱི་སྒྲོན་མ་ལ༔ གསོལ་བ༴ མཆོད་རྟེན་བདེ་བྱེད་བརྩེགས་པའི་ཕོ་བྲང་དུ༔ ཨོ་རྒྱན་གུ་རུ་མཚོ་སྐྱེས་རྡོ་རྗེ་ལ༔ གསོལ་བ༴ གར་བཞུགས་དམ་གཙང་ཞིང་ཁམས་ཡངས་པ་རུ༔ ཡེ་ཤེས་མཚོ་རྒྱལ་ཨ་མ་ཀུན་སྟོབས་ལ༔ གསོལ་བ༴ སྦས་ཡུལ་པདྨ་བཀོད་ཀྱི་གནས་མཆོག་ཏུ༔ དྲེགས་པའི་མངའ་བདག་རིག་འཛིན་དཔལ་སེང་ལ༔ གསོལ་བ༴ གཞུ་སྟོད་གཏེར་སྒྲོམ་མཚོ་རྒྱལ་གསང་ཕུག་ཏུ༔ བཀའ་བབས་ལས་སད་བདེ་ཆེན་རྒྱལ་པོ་ལ༔ གསོལ་བ༴ བདེ་ཆེན་གླིང་མཆོག་རི་སྣ་དགོན་པ་རུ༔ གཏེར་སྟོན་དངོས་སློབ་ཨོ་རྒྱན་བསྟན་འཛིན་ལས། །གསོལ་བ༴ རྩེ་གཞུང་མཐའ་

རྒྱས་ཕོ་བྲང་དཀར་པོ་རུ། །ཀརྨ་གུ་རུ་ཆོས་ཀྱི་རྒྱལ་པོ་ལ། །གསོལ་བ༴ ཕྱོགས་མེད་དབེན་པའི་རི་ཁྲོད་དགའ་ཚལ་དུ། །སྐུ་བཞི་མངོན་གྱུར་ཚོགས་དྲུག་རང་གྲོལ་ལ། །གསོལ་བ༴ རིས་བྲལ་གར་བཞུགས་དག་པའི་ཞིང་མཆོག་ཏུ། །ཐུགས་སྲས་སྐྱབས་མགོན་པདྨ་རྒྱ་མཚོ་ལ། །གསོལ་བ༴ འོག་མིན་ཤུག་གསེབ་ཌཱ་ཀིའི་གྲོང་ཁྱེར་དུ། །མ་གཅིག་རིག་འཛིན་ཆོས་ཉིད་བཟང་མོ་ལ། །གསོལ་བ༴ སྤྱི་གཙུག་པདྨ་ཉི་ཟླའི་གདན་སྟེང་དུ། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་སྨིན་ཅིང་གྲོལ་བར་མཛོད། །ན་མོཿ མཆོག་གསུམ་རྩ་གསུམ་སྐུ་གསུམ་འདུས་པའི་དཔལ༔ སངས་རྒྱས་ཀུན་དངོས་རྩ་བའི་བླ་མ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་ནས༔ འཁོར་བ་དོང་སྤྲུགས་ཕྲིན་ལས་མཐར་ཕྱིན་ཤོག༔ དེང་ནས་བདག་སོགས་མཁའ་མཉམ་འགྲོ་བ་ཀུན༔ སེམས་དང་སེམས་ཉིད་བདེ་ཆེན་ཆོས་སྐུའི་ཀློང་༔ གདོད་མའི་དབྱིངས་སུ་མངོན་པར་བྱང་ཆུབ་ནས༔ མཐའ་ཡས་འགྲོ་ཀུན་འདྲེན་པར་བྱིན་གྱིས་རློབས༔ ཞེས་པའི་གསོལ་བཏབ་བླ་མ་ཡི༔

གནས་གསུམ་འབྲུ་གསུམ་གནས་པ་ལས༔ དཀར་དམར་སྔོ་བའི་འོད་ཟེར་འཕྲོས༔ བདག་གི་གནས་གསུམ་ཐིམ་པ་ཡིས༔ དབང་བཞི་ཐོབ་ནས་སྒྲིབ་བཞི་སྦྱངས༔ སྐུ་བཞི་མངོན་དུ་འགྱུར་བར་ཤོག༔ ཞེས་པ་ལྟར་ལ་དབང་བཞིའི་འགོར་མཆོག་གསུམ་རྩ་གསུམ་མ་གྲངས་གསོག་བྱ། དེ་ནས་གཞི་བགེགས་ལ་གཏོར་མ་བསྔོ་བ་ནི། དང་པོ་དཀར་གཏོར་ལ་ཆབ་ཀྱིས་བྲན་ཏེ། ཨོཾ་བཛྲ་ཨ་མྲྀ་ཏས་བསང་། སྭ་བྷ་ཝས་སྦྱངས། སྟོང་པ་ཉིད་དུ་གྱུར། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་གཏོར་མ་དཀར་གསུམ་མངར་གསུམ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུཾ། ལན་གསུམ་གྱིས་བྱིན་བརླབས་ནས། སངས་རྒྱས་ཆོས་དང་དགེ་འདུན་རྐང་གཉིས་གཙོ༔ བདེན་གཉིས་དཀོན་མཆོག་རྩ་གསུམ་བཀའ་ལ་ཉོན༔ གླིང་བཞིར་མི་གནས་རྒྱ་མཚོ་མི་འཐུང་མེད༔ སྲོག་ལ་མི་འཇིགས་ལུས་ལ་མི་འཕང་མེད༔ ཁྲིམས་ལ་མི་འཇིགས་བདེན་པས་མི་དོར་མེད༔ ལྷ་སྲིན་སྡེ་བརྒྱད་འབྱུང་པོ་བཀའ་ལ་ཉོན༔ བཟང་ངན་ལས་ལ་ཕྲིན་ལས་བཅོལ་བའི་ཕྱིར༔ འདོད་ཡོན་ལྔ་ལྡན་

རིན་ཆེན་གསེར་སྐྱེམས་འདི༔ སློབ་དཔོན་པདྨའི་བཀའ་དང་དམ་གནས་པའི༔ དཔལ་མགོན་བདུན་ཅུ་ཕྱི་ནང་སྡེ་བརྒྱད་དང་༔ སྡེ་དཔོན་སུམ་ཅུ་ཡང་འཁོར་སྤྲུལ་པ་འབུམ༔ སྔགས་བདག་བཅོ་བརྒྱད་བཀའ་ཡི་ལས་མཁན་བཅས༔ ཡུལ་གྱི་ཞིང་སྐྱོང་གནས་ཀྱི་མཁའ་འགྲོ་དང་༔ ལྷ་བརྒྱད་ཀླུ་བརྒྱད་གཟའ་བརྒྱད་རྒྱུ་སྐར་བརྒྱད༔ དབང་ཕྱུག་བརྒྱད་དང་ཕྱོགས་སྐྱོང་ཡང་འཁོར་བཅས༔ སྐྱེས་ལྷ་ཡུལ་ལྷ་དགྲ་ལྷ་ཟོ་དོར་ལྷ༔ ཁྱད་པར་བཀའ་སྲུང་གཏེར་སྲུང་དྲེགས་རྩལ་ཅན༔ ཡུལ་རིས་གཞི་བདག་དབེན་གནས་སྐྱོང་བའི་ལྷ༔ འདིར་གཤེགས་གསེར་སྐྱེམས་ཕུད་དང་གཏོར་མ་འབུལ༔ ཞི་རྒྱས་དབང་དྲག་ཕྲིན་ལས་གང་བཅོལ་ཀྱང་༔ ཀོ་ལོང་རུ་ང་ཕྲག་དོག་མ་མཛད་པར༔ བདག་གི་བསམ་པ་སྒྲུབ་ལ་རེ་བ་སྐོངས༔ དམག་ཇག་འཁྲུག་རྩོད་ནད་ཡམས་ཞི་བ་དང་༔ ཟབ་ཆོས་བསྟན་པ་རྒྱས་པའི་མཐུན་རྐྱེན་གྲོགས༔ ཡར་ངོའི་ཟླ་ལྟར་འཕེལ་ཞིང་རྒྱས་པའི་དོན༔ སློབ་དཔོན་པདྨའི་བཀའ་ལས་མ་འདའ་བར༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཅེས་དཀར་གཏོར་གཙང་སར་

ཕུལ། དེ་ནས་བགེགས་གཏོར་བསང་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བགེགས་ཀྱི་གཏོར་མ་དྭངས་ཤིང་ཐོགས་པ་མེད་པ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པ་འདོད་པའི་ཡོན་ཏན་ལྔ་དང་ལྡན་པར་གྱུར། ཨོཾ་ཨཱཿཧཱུྃ་ལན་གསུམ། ༀ། སརྦ་བྷཱུ་ཏ་ཨ་ཀརྞ་ཡ་ཛཿས་མགྲོན་བཀུག་ལ། ཨོཾ་སརྦ་བིགྷན་ན་མཿ སརྦ་ཏ་ཐཱ་ག་ཏ་བྷྱོཿ་བི་ཤྭ་མུ་ཥེབྷྱ་སརྦ་ཏཏཁཾ་ཨུངྒ་ཏེ་སྤ་ར་ཎ་ཨི་མཾ་ག་ག་ན་ཁཾ་གྲྀ་ཧྣནཾ་བ་ལིངྷ་ཡེ་སྭཱ་ཧཱ། ཞེས་ལན་གསུམ་གྱིས་བསྔོས་ནས། ན་མོ༔ རིག་འཛིན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི༴ དགེ་འདུན་གྱི༴ ཡི་དམ་རྒྱལ་བ་ཞི་ཁྲོའི་ལྷ་ཚོགས་རྣམས་ཀྱི༴ ཁྱད་པར་དུ་ཡང་རྟ་ཕག་ཡིད་བཞིན་ནོར་བུའི་ལྷ་ཚོགས་འཁོར་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་པ་ལ་བརྟེན་ནས། རྣལ་འབྱོར་པ་བདག་ཅག་ལུས་ལྷར་བསྒོམ་པ། ངག་སྔགས་བཟླ་བ། སེམས་ཏིང་ངེ་འཛིན་བསྒོམ་པ་སོགས་དམ་པའི་ཆོས་སྒྲུབ་པ་ལ་བར་དུ་གཅོད་པའི་གདོན་བགེགས་

འབྱུང་པོ་གདུག་པ་ཅན་ཐམས་ཅད་བགེགས་ཀྱི་གཏོར་མ་ཁ་དོག་དྲི་རོ་རེག་བྱ་ཕུན་སུམ་ཚོགས་པ་འདིས་ཚིམ་པར་གྱིས་ལ་རང་རང་སོ་སོའི་གནས་སུ་དེངས་ཤིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བས་མགོ་བོ་ཚལ་པ་བརྒྱར་འགས་པར་འགྱུར་རོ། ཧྲཱིཿ ང་ནི་འཇིགས་བྱེད་ཁྲོ་བོའི་རྒྱལ༔ བར་གཅོད་བགེགས་ལ་གཏོར་མ་བསྔོ༔ ནམ་ཡང་འདའ་བར་མི་ནུས་པའི༔ རྡུལ་ཕྲན་བརླག་པར་གདོན་མི་འཚལ༔ ཨོཾ་པ་ཏེ་པ་ཏེ་ཧྱ་གྲྀ་ཝ་ཧཱུཾ༔ གནོད་བྱེད་གདོན་བགེགས་འབྱུང་པོ་ཨུ་ཙ་ཏ་ཡ་ཕཊ༔ ཅེས་པས་བགེགས་བསྐྲད། དེ་ནས་སྲུང་འཁོར་བསྒོམ་པ་ནི། ཧཱུཾ ཡེ་ཤེས་འབར་བའི་རྒྱ་གྲམ་གུར༔ སྣང་སྟོང་མཚོན་ཆ་འོད་དུ་འཆར༔ སྟེང་འོག་བར་གཅོད་འབྱུང་པོ་ཀུན༔ སྲུང་བའི་འཁོར་ལོས་མཚམས་བཅད་དོ༔ རཀྵ་རཀྵ་ཧཱུཾཿ ཡན་ལག་བདུན་པ་ནི། བླ་མ་ཡི་དམ་ལྷ་ཚོགས་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་

ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་མྱུར་ཐོབ་ཤོག༔ བཤགས་ཡུལ་རང་ལ་བསྡུ་ཞིང་། ཛཿཧཱུྃ་བྃ་ཧོཿ བྱིན་འབེབ་པ་ནི༔ ཧཱུཾཿ ཆོས་དབྱིངས་ཕོ་བྲང་དམ་པ་ནས༔ དངོས་གྲུབ་ཀུན་འབྱུང་རྟ་མཆོག་དཔལ༔ རྡོ་རྗེ་ཕག་མོ་མཁའ་འགྲོའི་གཙོ༔ འཁོར་དུ་མཁའ་འགྲོ་མང་པོས་བསྐོར༔ ཆོས་ཀྱི་དབྱིངས་ནས་གནས་འདིར་གཤེགས༔ དཀྱིལ་འཁོར་འདི་ལ་བྱིན་ཅིག་ཕོབ༔ རྣལ་འབྱོར་སྒྲུབ་པོར་དབང་བསྐུར་སྩོལ༔ ཨོཾ་ཨཱཿཧཱུྃ་སིདྡྷི་ས་མ་ཡ་ཕེཾ་ཕེཾ་ཧཱུཾ་ཧཱུཾ༔ མཆོད་པ་བྱིན་བརླབ་པ་ནི༔ ཧཱུཾཿ འཇིག་རྟེན་དག་པའི་གཞལ་ཡས་འདིར༔ འདོད་པ་ལྔ་ཡི་ཡོན་ཏན་རྣམས༔ དངོས་དང་ཡིད་ཀྱིས་ཀུན་སྤྲུལ་ཏེ༔ ཐམས་ཅད་དག་པའི་བདུད་རྩི་ཆེ༔ རོ་བཅུད་མདངས་ལྡན་འོད་ཕུང་འཁྱིལ༔ ཨོཾ་ཨཱཿཧཱུྃ་སརྦ་པཉྩ་རཀྟ་བ་ལིངྟ་ཛྭ་ལ་བ་ལིངྟ་བ་ལ་ཝ་ཏེ་གུ་ཧྱ་ས་མ་ཡ་ཧཱུཾ་ཧྲཱིཿཋཿ དངོས་གཞི་ལྷ་བསྐྱེད་པ་ནི༔ ༀ། ཆོས་སྐུ་སྐྱེ་བ་མེད་པ་ལས༔ མ་བཅོས་ནམ་མཁའ་ལྟ་བུའི་ངང་༔ ཨཱཿ སྙིང་རྗེ་ཆེན་པོའི་འོད་ཀྱིས་ནི༔ འགྲོ་དྲུག་ཀུན་ལ་

ཡོངས་སུ་ཁྱབ༔ ཧཱུཾཿ རྒྱུ་ལས་ཀུན་ཏུ་བསྐྱེད་བྱེད་པའི༔ གསལ་མདངས་ཧྲཱིཿཡིག་དམར་པོ་ཤར༔ ཧྲཱིཿལས་འོད་འཕྲོས་འབྱུང་བ་བཞི༔ ཨེ་ཡཾ་ར་སུཾ་ཀེམ་རཾ་ལས༔ ནམ་མཁའ་རླུང་མེ་ཆུ་སའི་སྟེང་༔ བྷཱུཾཿལས་ཡེ་ཤེས་ཕོ་བྲང་གསལ༔ རིན་ཆེན་སྣ་ཚོགས་ལས་གྲུབ་པའི༔ གྲུ་བཞི་སྒོ་བཞི་རྩིག་པ་ལྔ༔ རྟ་བབ་བཞི་ལྡན་འདོད་སྣམ་དང་༔ ཕ་གུ་དྲ་བ་དྲ་ཕྱེད་དང་༔ མདའ་ཡབ་ཕྱུར་བུར་ཏོག་གིས་མཛེས༔ ལྔ་ལྡན་འཇའ་མཚོན་ལུག་རྒྱུད་གཏིབས༔ དབུས་སུ་ཆོས་དབྱིངས་ཟླ་གམ་ཞིང་༔ ཕྱི་འཁོར་པད་ཕྲེང་དུར་ཁྲོད་དང་༔ རྡོ་རྭ་ཡེ་ཤེས་མེ་དཔུང་འབར༔ ལྟེ་བར་པདྨ་ཉི་ཟླའི་སྟེང་༔ ཧྲཱིཿལས་དབང་ཆེན་རྟ་མཆོག་ནི༔ སྐུ་མདོག་དམར་ལ་སྔོ་མདངས་འཚེར༔ ཞལ་གཅིག་ཕྱག་གཉིས་སྐྱིལ་མོ་ཀྲུང་༔ ཁྲོ་འཛུམ་སྤྱན་གསུམ་ཕྱོགས་བཅུར་གཟིགས༔ དབུ་སྐྲ་གྱེན་གཡེང་ཐོད་སྐམ་བརྒྱན༔ སྤྱི་གཙུག་རྟ་གདོང་ཧཱུཾ་སྒྲ་ལྡིར༔ ཕྱག་གཡས་རྡོ་རྗེ་ཐོ་བ་དང་༔ གཡོན་པ་ཐོད་ཕྲག་ཕུར་བུ་འཛིན༔ དུར་ཁྲོད་ཆས་བརྒྱད་སྐུ་ལ་རྫོགས༔ པང་དུ་ཧྲཱིཿལས་གསང་བའི་ཡུམ༔ རྡོ་རྗེ་ཕག་མོ་སྔོ་

དམར་མདངས༔ གཅེར་བུ་གཞོན་ཚུལ་ལང་ཚོ་རྒྱས༔ སྐྲ་གྲོལ་ཕྱག་རྒྱ་ལྔ་ཡིས་མཚན༔ ཆགས་པའི་སྤྱན་གསུམ་ཡབ་ལ་གཟིགས༔ ཤེལ་བུམ་གཏེར་སྒྲོམ་འཛིན་པས་འཁྱུད༔ ཞབས་གཉིས་ཡབ་འཁྱུད་མཉམ་པར་སྦྱོར༔ སྤྱི་གཙུག་ཕག་གདོང་ཕེམ་སྒྲ་སྒྲོགས༔ ཡབ་ཡུམ་མཉམ་པར་སྦྱོར་བ་ལས༔ སྲས་མཆོག་ཚུལ་དུ་ཧྲཱིཿཞིག་འཕྲོས༔ མདུན་དུ་སྐུ་སྟོད་རྟ་གདོང་དང་༔ སྐུ་སྨད་ཕུར་བུའི་དབལ་ཤམ་ཅན༔ མེ་དཔུང་འབར་བའི་ཀློང་དུ་གསལ༔ དུས་གསུམ་བདེ་གཤེགས་སྤྲིན་ལྟར་གཏིབས༔ མ་ཚོགས་ཌཱཀྐི་བྲན་ལྟར་འདུ༔ ཕྱི་རོལ་དཔའ་བོ་གིང་ལངྐ༔ དམ་ཅན་སྲུང་མའི་ཚོགས་ཀྱིས་བསྐོར༔ ཀུན་ཀྱང་ཡེ་ཤེས་རོལ་པའི་རྩལ༔ སྣང་སྟོང་མ་འགགས་ལྷང་ངེར་གསལ༔ གནས་གསུམ་ས་བོན་འོད་ཟེར་འཕྲོས༔ ཡེ་ཤེས་ཞིང་ཁམས་སོ་སོ་ནས༔ ལྷ་ཚོགས་འཁོར་བཅས་སྤྱན་དྲངས་གྱུར༔ སྤྱན་འདྲེན་པ་ནི། ཧཱུཾཿ རྔ་ཡབ་ཡུལ་གྱི་ནུབ་བྱང་ནས༔ དུས་གསུམ་རྒྱལ་ཀུན་འདུས་པའི་གཙོ༔ དབང་ཆེན་རྟ་མཆོག་གཤེགས་སུ་གསོལ༔ རྒྱ་གར་དུར་ཁྲོད་བསིལ་ཚལ་ནས༔ རྡོ་རྗེ་ཕག་མོ་གཤེགས་སུ་

གསོལ༔ བཀའ་དང་དམ་ཚིག་གཉན་པོ་ནས༔ བཀའ་སྡོད་འཁོར་བཅས་གཤེགས་སུ་གསོལ༔ དུས་ལས་མི་འདའ་ལྷ་ཚོགས་རྣམས༔ ཐུགས་དམ་བརྩེར་དགོངས་གཤེགས་སུ་གསོལ༔ གུ་རུ་དེ་ཝཱ་ཌཱཀྐི་ནི་བཛྲ་ས་མ་ཡ་ཛཿཛཿ བཞུགས་སུགསོལ་བ་ནི། ཧྲཱིཿ ལྷུན་གྲུབ་གསང་བའི་ཕོ་བྲང་འདིར༔ པདྨ་ཉི་ཟླའི་གདན་གྱི་སྟེང་༔ བླ་མ་ཡི་དམ་མཁའ་འགྲོ་བཅས༔ མི་གཡོ་བརྟན་པར་བཞུགས་སུ་གསོལ༔ བཛྲ་ས་མ་ཡ་ཏིཥྛ་ལྷན༔ ཕྱགའཚལ་བ་ནི། ཧྲཱིཿ ཆོས་སྐུ་མི་འགྱུར་དབང་ཆེན་ལྷ༔ རྡོ་རྗེ་ཕག་མོ་ཤེས་རབ་རྩལ༔ བདེ་སྟོང་ཡེ་ཤེས་སྤེལ་མཛད་པའི༔ རྩ་གསུམ་ལྷ་ལ་ཕྱག་འཚལ་བསྟོད༔ མཆོད་ཚིག་ཅུང་ཟད་རྒྱས་པར་སྤྲོ་ན། ཧྲཱིཿ བླ་མ་ཡི་དམ་མཁའ་འགྲོ་ལ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སྒྲ་སྙན་ཕྱི་མཆོད་འབུལ༔ གཟུགས་སྒྲ་དྲི་རོ་རེག་བྱ་སོགས༔ དངོས་བཤམས་ཡིད་སྤྲུལ་འདོད་ཡོན་གྱི༔ ཀུན་བཟང་མཆོད་སྤྲིན་རྒྱ་མཚོར་འབུལ༔ ཁྲག་ཞག་དབང་པོའི་མེ་ཏོག་དང་༔ བསུར་ཆེན་བདུག་སྤོས་ཞུན་ཆེན་མེ༔ རྡོ་རྗེ་དྲི་ཆུ་མཁྲིས་པའི་དྲི༔ དྲི་ཆེན་མཾ་ས་ཞལ་ཟས་

མཆོག༔ རྐང་གླིང་ཐོད་རྔ་གླུ་གར་དབྱངས༔ རང་བྱུང་ལུས་ཀྱི་ནང་མཆོད་འབུལ༔ རྩ་བརྒྱད་སྟོང་སྦྱར་བདུད་རྩི་སྨན༔ མཾ་ས་སྦྱར་བའི་རཀྟ་དང་༔ རྨད་བྱུང་བྷ་ལིང་གཏོར་མཆོད་འབུལ༔ གཉིས་མེད་སྙོམས་པར་འཇུག་པ་ཡི༔ བྱང་སེམས་མཁའ་གསང་བདེ་བའི་མཆོག༔ དུག་ལྔ་རང་གྲོལ་གསང་མཆོད་འབུལ༔ མཆོད་བྱ་མཆོད་བྱེད་མཆོད་ཡུལ་ཀུན༔ ཀ་དག་ལྷུན་གྲུབ་ཆེན་པོར་བཞེས༔ བདེ་སྟོང་འགག་མེད་དངོས་གྲུབ་སྩོལ༔ བཛྲ་པུཥྤ་ནས་ཤཔྟ་མཧཱ་པཉྩ་རཀྟ་བྷ་ལིངྟ་སུ་ཁ་དྷརྨ་པཱུ་ཛ་ཧོ༔ ཞེས་མཆོད་ནས་སྨན་མཆོད་རྒྱས་པར་སྤྲོ་ན། ཆོས་སྐུ་ཀུན་བཟང་ལོངས་སྐུ་རྡོ་རྗེ་སེམས། །སྤྲུལ་སྐུ་ཕག་མོ་ལས་ཀྱི་དབང་མོ་ཆེ། །སློབ་དཔོན་ཆེན་པོ་ཧཱུཾ་ཆེན་ཀཱ་ར་ལ། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། །མཁའ་འགྲོ་ཆེན་མོ་ལབ་ཀྱི་སྒྲོལ་མ་དང་། །ཨོ་རྒྱན་མ་ཧཱ་གུ་རུ་པདྨ་འབྱུང་། །ཡེ་ཤེས་མཚོ་རྒྱལ་དཔལ་གྱི་སེངྒེ་ལ། སྨན་མཆོད༴ སརྦ༴ བཀའ་བབས་ལས་སད་བདེ་ཆེན་རྒྱལ་པོ་དང་། ཨོ་རྒྱན་བསྟན་འཛིན་ཆོས་རྒྱལ་ངག་གི་དབང་། སྐྱབས་མགོན་བླ་མ་ཞབས་

དཀར་ཡབ་སྲས་ལ། སྨན་མཆོད༴ སརྦ༴ འདྲེན་མཆོག་མཚུངས་མེད་པདྨ་རྒྱ་མཚོ་དང་། མ་གཅིག་རིག་འཛིན་ཌཱ་ཀི་དྷརྨའི་མཚན། བཀའ་དྲིན་མཉམ་མེད་རྩ་བའི་བླ་མ་ལ། སྨན་མཆོད༴ སརྦ༴ མཆོག་ཐུན་དངོས་གྲུབ་སྩོལ་མཛད་ལྷག་པའི་ལྷ། བདེ་གཤེགས་ཀུན་འདུས་རྟ་ཕག་ཡབ་ཡུམ་སྲས། བཀའ་སྡོད་སྤྲུལ་པ་ཡང་སྤྲུལ་འཁོར་བཅས་ལ། སྨན་མཆོད༴ སརྦ༴ མགོན་དཀར་ཡབ་ཡུམ་གསང་བ་སྡེ་བཞི་དང་། སྨན་མོ་ཤ་ཟ་རཱ་ཧུ་ལ་སོགས་པའི། བཀའ་སྲུང་གཏེར་སྲུང་དམ་ཅན་རྒྱ་མཚོ་ལ། སྨན་མཆོད༴ སརྦ༴ རྣམ་ཐོས་སྲས་དང་དབང་ཕྱུག་ཛམྦྷ་ལྷ། ཚོགས་བདག་གླང་སྣ་ཡུམ་མཆོག་གྲུལ་བུམ་དང་། ཕྱྭ་སྤེལ་ནོར་གཡང་གཏེར་བདག་ཐམས་ཅད་ལ། སྨན་མཆོད༴ སརྦ༴ རི་རྒྱལ་ལྷུན་པོའི་རྩེ་དང་དམྱལ་ཁམས་ཡན། ཆོས་ལྡན་དམ་ཚིག་ཅན་གྱི་ཡེ་ཤེས་ལྷ། གནས་གསུམ་དཔའ་བོ་ཌཱཀྐི་ངོས་སྲུང་ལ། སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་སྨན་མཆོད་ཕུལ་ནས་ཨོཾ་ཨཱཿཧཱུྃ་གིས་བདུད་རྩི་ལྕེ་ཐོག་ཏུ་མྱངས། བསྟོད་པ་ནི།

ཧྲཱིཿ ཆོས་དབྱིངས་སྐྱེ་མེད་ངང་ཉིད་ལས༔ འགག་མེད་གཟུགས་སྐུའི་རོལ་པར་ཤར༔ བདེ་གཤེགས་ཀུན་འདུས་རྟ་མཆོག་དཔལ༔ རྒྱལ་བ་རྒྱ་མཚོའི་སྐུ་ལ་བསྟོད༔ སྟོང་ཉིད་སྙིང་རྗེའི་བདག་ཉིད་མ༔ དུས་གསུམ་རྒྱལ་བ་བསྐྱེད་པའི་ཡུམ༔ འགྲོ་བ་རྣམས་ཀྱི་མགོན་གཅིག་མ༔ རྡོ་རྗེ་ཕག་མོའི་སྐུ་ལ་བསྟོད༔ སྐུ་མདོག་དམར་ལ་སྔོ་མདངས་ནི༔ ཆོས་དབྱིངས་ཀུན་བཟང་དགོངས་པའི་བརྡ༔ རྟ་གདོང་ཧཱུཾ་སྒྲ་ལྡིར་བ་ནི༔ ལོག་འདྲེན་བར་ཆད་འདུལ་བའི་བརྡ༔ ཁྲོ་ཞལ་སྤྱན་གསུམ་གཟིགས་པ་ནི༔ མཐའ་བྲལ་འགྲོ་བ་འདྲེན་པའི་བརྡ༔ ཕྱག་གཡས་རྡོ་རྗེ་ཐོ་བ་ནི༔ དམ་སྲི་བགེགས་དཔུང་འཇོམ་པའི་བརྡ༔ ཕྱག་གཡོན་ཐོད་པ་ཕུར་བུ་ནི༔ ཟུང་འཇུག་བདེ་སྟོང་རོལ་པའི་བརྡ༔ ཐོད་སྐམ་ལྔ་ཡི་དབུ་བརྒྱན་ནི༔ རིགས་ལྔས་འགྲོ་དོན་མཛད་པའི་བརྡ༔ དུར་ཁྲོད་ཆས་བརྒྱད་རྫོགས་པ་ནི༔ སྣང་སྟོང་ཆ་ལུགས་རྫོགས་པའི་བརྡ༔ ཞབས་གཉིས་རྡོ་རྗེ་སྐྱིལ་ཀྲུངནི༔ ཏིང་འཛིན་འགྱུར་མེད་རྡོ་རྗེའི་བརྡ༔ པང་ན་ཕག་མོ་སྦྱོར་བ་ནི༔ ཐབས་ཤེས་ཟུང་དུ་འཇུག་པའི་བརྡ༔ ཡབ་ཀྱི་མགུལ་ལ་འཁྱུད་པ་ནི༔

ཡབ་ཡུམ་འདུ་འབྲལ་མེད་པའི་བརྡ༔ རྡོ་རྗེ་པདྨར་གཉིས་མེད་རོལ༔ དགའ་བཞི་བདེ་ཆེན་སྤྱོད་པའི་བརྡ༔ ཕྱག་གཡས་ཤེལ་བུམ་འཛིན་པ་ནི༔ ཚེ་ཡི་དངོས་གྲུབ་སྩོལ་བའི་བརྡ༔ ཕྱག་གཡོན་གཏེར་གྱི་སྒྲོམ་བུ་ནི༔ འགྲོ་ལ་དངོས་གྲུབ་སྩོལ་བའི་བརྡ༔ ཕག་གདོང་མཐིང་ཁས་ཕེམ་སྒྲ་སྒྲོགས༔ ཆོས་ཀྱི་སྒྲ་དབྱངས་སྒྲོགས་པའི་བརྡ༔ དཀྱིལ་འཁོར་བཀྲམ་པར་བཞུགས་པ་ནི༔ མཆོག་ཐུན་དངོས་གྲུབ་སྩོལ་བའི་བརྡ༔ རྟ་ཕག་སྐུ་ལ་ཕྱག་འཚལ་བསྟོད༔ དཀྱིལ་འཁོར་ལྷ་ལ་ཕྱག་འཚལ་བསྟོད༔ འཁོར་དང་བཅས་ལ་ཕྱག་འཚལ་བསྟོད༔ ཛ྄པ་བཟླས་ནི། ཧྲཱིཿ གཙོ་བོའི་ཐུགས་ཁར་ཉི་ཟླའི་གའུ་ཁ་སྦྱོར་གྱི་ནང་དུ་ཐུགས་སྲོག་ཧྲཱིཿཡིག་སྔོ་དམར་གྱི་མཐར་སྔགས་ཕྲེང་རྣམས་གཡས་སུ་འཁོར་ཏེ་གནས་པ་ལས་འོད་ཟེར་འཕྲོས་པས་ཕྱོགས་བཅུའི་ཞིང་ཁམས་ཀྱི་རྒྱལ་བ་རབ་འབྱམས་རྣམས་མཆོད་པས་མཉེས་ཏེ་བྱིན་རླབས་ནུས་རྩལ་ཐམས་ཅད་ཐིག་ལེ་ཐིག་ཕྲན་ལུ་གུ་རྒྱུད་ཀྱི་རྣམ་པར་ཚུར་བསྡུས་ནས་རང་ལ་ཐིམ་པས་སྒྲིབ་པ་དག་ཚོགས་རྫོགས༔ དབང་བཞི་ཐོབ་ནས་འཇའ་ལུས་འོད་སྐུར་གྲོལ་

བར་བསམ༔ ཡང་མཁའ་ཁྱབ་ཀྱི་སེམས་ཅན་ལ་ཕོག་པས་ལས་ཉོན་སྡིག་སྒྲིབ་ཐམས་ཅད་སྦྱངས་ནས་རྡོ་རྗེ་མི་ཤིགས་པ་གསུམ་གྱི་ངོ་བོར་སངས་རྒྱས་ཏེ་སྣོད་བཅུད་ཀྱི་སྣང་བ་ཐམས་ཅད་འཇའ་འོད་ཐིག་ལེ་ལྷ་དང་གཞལ་ཡས་ཁང་༔ སྒྲར་གྲགས་པ་ཐམས་ཅད་སྔགས་ཀྱི་རང་སྒྲ༔ དྲན་རྟོག་ཐམས་ཅད་མཐའ་བྲལ་ནམ་མཁའ་ལྟ་བུའི་ངང་ནས་ཛ྄པ་བཟླའོ༔ ཨོྃ་བཛྲ་ཀྲོ་དྷ་པ་ཏེ་པ་ཏེ་ཧཱུྃ་ཕཊ་༔ མཐར་ཡིག་བརྒྱ་དང་དབྱངས་གསལ་གྱི་ཤམ་བུར། རྟ་ཕག་ཡིད་བཞིན་ནོར་བུའི་ལྷ་ཚོགས་འགྲུབ་པར་གྱུར་ཅིག་སྭཱ་ཧཱ། ཞེས་ལན་གསུམ་བཟླ། གཅིག་བཅུ་བརྒྱ་སྟོང་ཁྲི་འབུམ་བྱེ་བ་ས་ཡ་དུང་ཕྱུར་ཐེར་འབུམ་འགྱུར་བར་བྱིན་གྱིས་བརླབ་ཏུ་གསོལ། རྟ་ཕག་ཡིད་བཞིན་ནོར་བུའི་ལྷ་ཚོགས་འཁོར་དང་བཅས་པ་ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་གཞན་སེམས་ཅན་ཐམས་ཅད་ཀྱི་ཞི་བའི་ལས་དང་། རྒྱས་པའི༴ དབང་གི༴ དྲག་པོའི༴ ལས་གང་བརྩམ་པ་ཐམས་ཅད་ཐོགས་མེད་དུ་འགྲུབ་པ་དང་། ཁྱད་པར་དུ་གྲུབ་པ་ཆེན་པོ་བརྒྱད་

ཐོབ་པ་ལ་སོགས་པའི་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་བྱིན་གྱིས་བརླབ་ཏུ་གསོལ། སླར་ཡང་མཆོད་ཅིང་བསྟོད་པ་ནི། བླ་མ་ཡི་དམ་མཁའ་འགྲོ་ལ༔ ཞེས་པ་ནས་སུ་ཁ་དྷརྨ་པཱུ་ཛ་ཧོཿ ཧྲཱིཿ ཆོས་སྐུ་མི༴ རྡོ་རྗེ་ཕག༴ བདེ་སྟོང་༴ རྩ་གསུམ་ལྷ་ལ་ཕྱག་འཚལ་བསྟོད༔ མཚམས་འདིར་བཀའ་གཏེར་སྲུང་མའི་གསོལ་མཆོད་སྤྱི་དང་། བྱེ་བྲག་མགོན་དཀར་ཡིད་བཞིན་ནོར་བུ། གསང་བ་སྡེ་བཞི་སོགས། རྒྱས་བསྡུས་ཇི་ལྟར་རིགས་པ་བྱ། རྗེས་ཀྱི་ལས་རིམ་ཚོགས་བསང་སྦྱངས་བྱིན་རླབས་ནི། ཧྲཱིཿ རྟ་ཕག་ཡབ་ཡུམ་ཐུགས་ཀ་ནས༔ རཾ་ཡཾ་ཁཾ་འཕྲོས་དངོས་འཛིན་སྦྱངས༔ ཨོཾ་ཨཱཿཧཱུཾ་འཕྲོས་བདུད་རྩིར་ཞུ༔ ཟག་མེད་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཚོགས་ཞིང་སྤྱན་འདྲེན་པ་ནི། ཧྲཱིཿ ལྷོ་ནུབ་དགའ་བ་ཚམ་གྱི་དུར་ཁྲོད་ནས༔ ཁྲོ་བོའི་རྒྱལ་པོ་རྟ་མགྲིན་དབང་གི་ལྷ༔ གཉིས་མེད་ཡུམ་མཆོག་རྡོ་རྗེ་ཕག་མོ་ཉིད༔ བདེ་གཤེགས་སྤྱི་འདུས་པདྨ་ཐོད་ཕྲེང་རྩལ༔ ཡི་དམ་ཞི་ཁྲོ་དཔའ་བོ་མཁའ་འགྲོའི་ཚོགས༔ བྱིན་རླབས་མཁའ་ལ་སྤྲིན་ལྟར་གཏིབས་ནས་ཀྱང་༔ ཐུགས་རྗེ་བརྩེར་དགོངས་ཚོགས་ལ་རབ་གཤེགས་ནས༔ སྐལ་ལྡན་

བདག་ལ་མཆོག་ཐུན་དངོས་གྲུབ་རྩོལ༔ ཨོཾ་གུ་རུ་དེ་ཝ་ཌཱཀྐི་ནི་ཨེ་ཧྱ་ཧི་ཕེཾ་ཕེཾ་ཕེཾ༔ ས་མ་ཡ་སྟྭཾ༔ ཞེས་པས་སྤྱན་དྲངས་ལ། ཨརྒྷཾ་པཱདྱཾ་སོགས་ནས་ཤབྡས་ཉེར་སྤྱོད་དང་འདོད་ཡོན་ལྔས་སྤྱིར་མཆོད་ནས། ཚོགས་ཕུད་རིམ་པ་གསུམ་དུ་སྤྲོས་ལ། དང་པོ་མཆོད་པ་ནི། ཧྲཱིཿ བླ་མ་ཡི་དམ་ལྷ་ཚོགས་ལ༔ འདོད་ཡོན་མ་སྤང་ཡེ་ཤེས་རྒྱན༔ ཞལ་ཟས་ཚོགས་ཀྱི་མཆོད་པ་འབུལ༔ མཆོག་ཐུན་དངོས་གྲུབ་རྩལ་དུ་གསོལ༔ གུ་རུ་དེ་ཝ་ཌཱཀྐི་ནི་ག་ཎ་ཙཀྲ་པཱུ་ཛ་ཧོ༔ ཚོགས་བར་པ་བཤགས་པ་ནི༔ ཧྲཱིཿ བླ་མ་ཡི་དམ་མཁའ་འགྲོ་ཡི༔ སྐུ་གསུང་ཐུགས་དང་རྩ་བ་རྣམས༔ དམ་ཚིག་ཉམས་ཆག་ཅི་མཆིས་པ༔ ཚོགས་ཀྱི་མཆོད་པས་མཐོལ་ཞིང་བཤགས༔ ཡིག་བརྒྱ་འདོན་ཞིང་བཤགས་པ་ནི། རྗེ་བཙུན་བླ་མ་རྣམས་ཀྱི་སྤྱན་ལམ་དུ། །ཡོ་བྱད་འབྱོར་ཚོགས་ཆུང་བ་མཐོལ་ལོ་བཤགས། །ཡི་དམ་ལྷ་ཚོགས་རྣམས་ཀྱི་སྤྱན་ལམ་དུ། །མངོན་རྟོགས་སྤོང་ལེན་བགྱིས་པ༴ མཁའ་འགྲོ་སྡེ་བཞི་རྣམས་ཀྱི་སྤྱན་ལམ་དུ། ཁས་བླངས་དམ་ཚིག་ཉམས་པ༴ ཆོས་སྐྱོང་སྲུང་མ་རྣམས་ཀྱི༴ གཏོར་མ་ལོ་ཟླར་འགྱངས་པ༴ དུས་གསུམ་ཕ་མ་རྣམས་ཀྱི༴ དྲིན་ལན་ལན་གྱིས་མ་འཁོར་མཐོལ༴

མཆེད་དང་ལྕམ་དྲལ་རྣམས༴ དམ་ཚིག་བརྩེ་གདུང་ཆུང་བ༴ རིག་དྲུག་སེམས་ཅན་རྣམས་ཀྱི་སྤྱན་ལམ་དུ: སྙིང་རྗེ་ཕན་སེམས་ཆུང་བ༴ སོ་སོར་ཐར་པ་རྣམས་ཀྱི་སྡོམ་པ་དང་། །བྱང་ཆུབ་སེམས་དཔའ་རྣམས་ཀྱི་བསླབ་བྱ་དང་། །རིག་པ་འཛིན་པ་སྔགས་ཀྱི་དམ་ཚིག་སོགས། །ཉམས་པ་ཐམས་ཅད་མཐོལ་བཤགས་མི་འཆབ་བོ། །མི་སྦེད་སླན་ཆད་གཅོད་ཅིང་སྡོམ་པར་བགྱི། །དུས་གསུམ་བྱས་པའི་སྡིག་སྒྲིབ་མཐོལ་བཤགས་ན། །ཚངས་པར་མཛད་ནས་སྐུ་གསུང་ཐུགས་ལ་སོགས། །མཆོག་དང་ཐུན་མོང་དངོས་གྲུབ་རྩལ་དུ་གསོལ། །ཞེས་གནོང་འགྱོད་དྲག་པོས་བཤགས་ཤིང་ཐ་མ་བསྒྲལ་བ་ནི། ཚོགས་ཞབས་སམ། ཡང་ན་དམིགས་བྱའི་རཱུ་པ་བཅས་མདུན་དུ་བཀོད་དེ། ཨེ་ནྲྀ་ཏྲི་ཛཿ མདུན་དུ་གནམ་ལྕགས་ཁང་སྒྲོམ་ཟུར་གསུམ་པ༔ གཏིང་དོག་ཁ་ཁྱེར་མཐོ་ཞིང་དུག་གསུམ་འཁྲིགས༔ ལས་བྱེད་ཕོ་ཉའི་བཤན་ར་ཆེན་པོའི་ནང་༔ ཞིང་བཅུའི་དགྲ་བགེགས་མ་ལུས་བཀུག་པར་གྱུར༔ ཧཱུཾ་མཛད་ཀྱི་ཕྱག་རྒྱས་འཆིངས་ལ། ན་མོཿ རིག་འཛིན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་

ཞེས་པ་ནས། སེམས་ཏིང་ངེ་འཛིན་བསྒོམ་པ་སོགས་དམ་པའི་ཆོས་སྒྲུབ་པ་ལ་བར་དུ་གཅོད་པར་བྱེད་པའི་གཟུང་འཛིན་རྣམ་རྟོག་དགྲ་བགེགས་འབྱུང་པོ་བསམ་སྦྱོར་ལོག་པར་ལྟ་བར་བྱེད་པའི་རྣམ་པར་ཤེས་པ་མཐོ་སྲིད་པའི་རྩེ་མོ་ནས་དམའ་འོག་གཞི་རླུང་གི་དཀྱིལ་འཁོར་ལ་ཐུག་གི་བར་སྟེང་འོག་ཕྱོགས་བཞི་མཚམས་བརྒྱད་སྲུང་བའི་གུར་ཁང་གང་ན་གནས་ཀྱང་སྐད་ཅིག་ཐང་ཅིག་ཡུད་ཙམ་ཞིག་ལ་རང་དབང་མེད་པར་དམིགས་རྟེན་འདི་ལ་ཁུག་ཅིག །རྩ་སྔགས་མཐར། ཆེ་གེ་མོ་ཨ་ཀཪྵ་ཡ་ཛཿཛཿ ཞེས་བདེན་སྟོབས་ལན་གསུམ་བརྗོད་ལ། ཧྲཱིཿ འཇིགས་བྱེད་རྟ་ཕག་ཁྲོ་བོའི་རྒྱལ༔ བཀའ་སྡོད་དམ་ཅན་ཕོ་ཉར་འགྱེད༔ གནོད་བྱེད་དགྲ་བགེགས་འབྱུང་པོ་ཀུན༔ ལྕགས་ཀྱུས་ཟུངས་ལ་ཞགས་པས་སྡོམས༔ ལྕགས་སྒྲོག་དྲྭ་བའི་ནང་དུ་བཅུག༔ དྲིལ་བུས་མྱོས་ཤིང་ལྷ་དང་ཕྱེ༔ དབྱེར་མེད་བསྟིམས་ཏེ་མཐུན་བྲབ་པས༔ ཚེ་བསོད་བཀྲག་མདངས་ཉམས་པར་གྱུར༔ བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུྃ༔ བཛྲ་སྤོ་ཊ་བཾ༔ བཛྲ་གྷནྜཻ་ཧོཿ པྲ་པེ་ཤ་ཡ་ཕཊཿ ཨ་བེ་ཤ་ཡ་ཨ༔ ཅེས་འགུགས་བཅིངས་སྡོམ་མྱོས་ཀྱི་ཕྱག་རྒྱ་བཅས་བཀུག་ལ་དགྲ་བགེགས་དངོས་སུ་བསམ་སྟེ།

ཕུར་བུ་ལག་གཉིས་ཐལ་སྦྱར་གྱིས་བར་དུ་བཟུང་ནས་དམིགས་པ་དང་ལྡན་པས། ཧཱུཾ། ང་ནི་འཇིགས་བྱེད་ཁྲོ་བོའི་རྒྱལ༔ གཡས་པ་ཐབས་ཀྱི་རང་བཞིན་ཅན༔ རིགས་ལྔ་ཡབ་ལྔའི་ངོ་བོར་གསལ༔ གཡོན་པ་ཤེས་རབ་རང་བཞིན་ཅན༔ རིགས་ལྔ་ཡུམ་ལྔའི་ངོ་བོར་གསལ༔ ཐབས་དང་ཤེས་རབ་སྦྱར་བ་ལས༔ དམར་ནག་ཧྲཱིཿལས་སྤྲུལ་པ་ཡི༔ སྲས་མཆོག་པདྨ་ཀཱི་ལ་ཡཱ༔ སྐུ་སྟོད་ཁྲོ་རྒྱལ་རྟ་མཆོག་ལ༔ སྐུ་སྨད་གནམ་ལྕགས་ཕུར་བུའི་ཚུལ༔ དུས་གསུམ་བདེ་གཤེགས་འདུས་པའི་སྐུ༔ ཁམས་གསུམ་སྒྲོལ་མཛད་ཀཱི་ལ་ཡཱ༔ དགྲ་བགེགས་དུག་ལྔ་དུག་གསུམ་དང་༔ ལས་ཉོན་བག་ཆགས་དྲི་མ་སྦྱངས༔ ཚེ་བསོད་བདག་གི་ཐུགས་ཀར་བྷཱུཾ༔ རྣམ་ཤེས་ཆོས་ཀྱི་དབྱིངས་སུ་སྤོར༔ ལྔ་ཕུང་ཐལ་བའི་རྡུལ་དུ་རློག༔ པདྨ་ཀྲོ་ཏ་ནྲྀ་ཏྲི་ཤ་ཏྲཾ་མཱ་ར་ཡ་རྦད༔ ཅེས་རྒྱས་པའམ་བསྡུ་ན། ཧྲཱིཿ འཇིགས་བྱེད་རྟ་ཕག་ཁྲོ་བོའི་རྒྱལ༔ བཀའ་སྡོད་དམ་ཅན་ཕོ་ཉར་འགྱེད༔ བདུད་དང་རུ་ཊ་ཀུན་སྒྲོལ་ཅིག༔ རྣམ་ཤེས་ཆོས་ཀྱི་དབྱིངས་སུ་སྤོར༔ པདྨ་ཀྲོ་དྷ་ནྲྀ་ཏྲི་ཤ་ཏུཾ་མཱ་ར་ཡ་རྦད༔ མཐར་ཚེ་ཁྲུས་ཀྱི་དགོངས་པ་དང་བཅས་རཱུ་པ་

དུམ་བུར་བཅད་པའི་སྙིགས་མའི་ཤ་ཁྲག་གི་ལོངས་སྤྱོད་རྣམས་རྡོ་རྗེ་བཟའ་བའི་དམ་ཚིག་ཏུ་སྤྱད་པས་ལྷ་ཚོགས་ཐམས་ཅད་ཚིམ་པར་མོས་ལ། ཧྲཱིཿ རྟ་ཕག་ལྷ་ཚོགས་ཞལ་ཕྱེ་ཞིག༔ དགྲ་བགེགས་བསྒྲལ་བའི་ཤ་ཁྲག་རུས༔ ཟག་མེད་བདུད་རྩིར་བྱིན་རློབས་ནས༔ མཆོད་པ་འབུལ་ལོ་དགྱེས་པར་རོལ༔ མ་ཧཱ་མཾ་ས་རཀྟ་ཀེ་ནི་རི་ཏི་ཨ་མྲྀ་ཏ་ཁཱ་ཧི༔ ཞེས་སྨན་རཀ་སྦྲན་ལ་འབུལ། བསྒྲལ་ཐ་ནི་ལྷ་ཚོགས་ཐམས་ཅད་རང་རང་གི་ཕྱག་རྒྱ་དང་སྙོམས་པར་འཇུག་པའི་སྦྱོར་བས་དགའ་བ་བཞིས་རོས་ཚིམ་པར་བལྟས་ལ་ཐུགས་དམ་བསྐང་བ་ནི། ཧྲཱིཿ དུས་གསུམ་རྒྱལ་བ་མ་ལུས་འདུས་པའི་སྐུ། །ཟབ་དང་རྒྱ་ཆེ་དམ་ཆོས་འདུས་པའི་གསུང་། །འཕགས་ཚོགས་དགེ་འདུན་ཀུན་གྱི་རྒྱན་གཅིག་པོ། །བརྒྱུད་གསུམ་རྩ་བརྒྱུད་བླ་མའི་ཐུགས་དམ་བསྐང་། །རྒྱལ་བའི་རྒྱལ་ཚབ་ཆེ་བའི་ཡོན་ཏན་རྫོགས། །སྐྱེ་འཆི་མཚན་མ་བྲལ་བ་རྡོ་རྗེའི་སྐུ། །འཁོར་འདས་ཀུན་གྱི་མགོན་པོ་པདྨ་སྐྱེས། །ཨོ་རྒྱན་མ་ཧཱ་གུ་རུའི་ཐུགས༴ ཐོད་ཕྲེང་རིགས་ལྔ་སྤྲུལ་པའི་མཚན་བརྒྱད་དང་། །རྗེ་འབངས་ཉེར་ལྔ་གཏེར་སྟོན་བརྒྱ་རྩ་བརྒྱད། །དབང་ལུང་མན་ངག་ཟབ་ཁྲིད་བརྒྱུད་པར་བཅས། །དགུ་ལྡན་བརྒྱུད་པ་བླ་མའི་ཐུགས༴ མ་ཧཱ་གུ་རུ་རྡོ་རྗེ་དྲག་པོ་

རྩལ། །བདུད་འདུལ་པདྨ་དྲག་པོ་གྲོ་བོ་ལོད། །ཡཀྵ་མེ་དབལ་གཤིན་རྗེ་རྟ་མགྲིན་རྒྱལ། །གསང་བདག་ཡང་སྤྲུལ་ཚོགས་ཀྱི་ཐུགས༴ འཇམ་དཔལ་པདྨ་ཡང་དག་བདུད་རྩི་ལྷ། །ཕུར་པ་མ་མོ་རིག་འཛིན་མཆོད་བསྟོད་དང་། །དམོད་པ་དྲག་སྔགས་དཀྱིལ་འཁོར་ལྷ་ཡི་ཚོགས། །སྒྲུབ་པ་ཆེན་པོ་སྡེ་དགུའི་ཐུགས༴ ཁྱད་པར་དུས་གསུམ་རྒྱལ་ཀུན་འདུས་པའི་གཙོ། །ཆེ་བའི་ཆེ་མཆོག་དབང་ཆེན་རྟ་མཆོག་དཔལ། །གསང་བའི་ཡུམ་མཆོག་རྡོ་རྗེ་ཕག་མོ་སོགས། །ཡིད་བཞིན་ནོར་བུའི་ལྷ་ཚོགས༴ ཡེ་ཤེས་ཌཱཀྐིའི་གཙོ་མོ་གསང་ཡེ་གར། །འགྲོ་ཀུན་ཐུགས་རྗེས་འཚོ་བ་རྒྱལ་བའི་ཡུམ། ཁྲོས་མ་ནག་མོ་བདུད་འདུལ་སེངྒེ་གདོང་། །མ་སྲིང་མཁའ་འགྲོ་རྒྱ་མཚོའི་ཐུགས༴ ལེགས་ལྡན་ནག་པོ་མགོན་པོ་སྡེ་ལྔ་དང་། །ཕྱག་བཞི་བདུད་མགོན་སྨན་བཙུན་ཉི་ཟླའི་ཕྲེང་། །ཀུན་དགའ་གཞོན་ནུ་གནོད་སྦྱིན་དམར་ནག་སོགས། །ཕོ་རྒྱུད་མགོན་པོའི་ཚོགས་ཀྱི་ཐུགས༴ མ་མོ་མུ་ཁ་ལེ་ཀ་ཙ་ཏི་དང་། །འདོད་ཁམས་དབང་མོ་ཤ་ཟ་ཁ་མོ་ཆེ། །ཙིཏྟ་དུག་འཐུང་ཚེ་རིང་མཆེད་ལྔ་སོགས། །མོ་

རྒྱུད་སྲུང་མ་རྒྱ་མཚོའི་ཐུགས། ཁྱབ་འཇུག་ཆེན་པོ་བཛྲ་ཐིག་ལེ་རྩལ། །འབར་བ་སྤུན་བདུན་གནོད་སྦྱིན་རྩིའུ་དམར་བ། །བདུད་བཙན་ཀླུ་གསུམ་ལྷ་བདུད་བཙན་ཀླུ་བདུད། །ཕུར་སྲུང་དམ་ཅན་རྒྱ་མཚོའི་ཐུགས༴ རྣམ་མང་ཐོས་སྲས་འཛམ་ལྷ་དམར་པོ་དང་། །རིག་བྱེད་ལྷ་མོ་ལྷ་ཆེན་མ་ཧཱ་དྷེབ། །ཚོགས་ཀྱི་བདག་པོ་གཏེར་བདག་མཆེད་བརྒྱད་སོགས། །ནོར་ལྷ་དབང་མཛད་རྣམས་ཀྱི་ཐུགས༴ ཨོ་རྒྱན་ཆེན་པོའི་བཀའ་ཡི་གཉེར་བསྐོས་པའི། །ཚུལ་བཞིན་སྒྲུབ་པ་མཛད་པའི་གྲོགས་མཛད་པའི། །ཟབ་མོ་གཏེར་གྱི་བསྟན་པ་སྲུང་བ་ཡི། །དམ་ཅན་རྒྱ་མཚོ་ཡོངས་ཀྱི་ཐུགས༴ ཚེ་རབས་ལན་ཆགས་ཤ་འཁོན་གཉེར་བའི་རིགས། ཁམས་གསུམ་རིགས་དྲུག་གློ་བུར་ལྷགས་པའི་མགྲོན། །ས་ཆུ་མེ་རླུང་འབྱུང་བ་ཁམས་ལྔའི་བདག །འཁོར་འདས་རོ་གཅིག་གདོད་ནས་དག་པར་བསྐང་། །ཀུན་ཀྱང་མཉམ་ཉིད་རོལ་པ་ཆེན་པོ་ལ། །བསྐང་དང་བཤགས་བྱའི་ངོ་བོ་མི་དམིགས་ཀྱང་། །མ་རྟོགས་གཉིས་སྣང་འཁྲུལ་པ་འཛད་པའི་ཕྱིར། །ཡེ་གྲོལ་ཁྱབ་བརྡལ་ཀློང་ཡངས་ཆེན་པོར་བཤགས། ཧཱུཾ། བཀའ་གསང་རྨད་

དུ་བྱུང་བའི་དཀྱིལ་འཁོར་དུ། །བླ་མ་ཡི་དམ་མཁའ་འགྲོ་ཡོངས་རྫོགས་ལ། །རང་བྱུང་ཆོས་ཀྱི་དབྱིངས་ཀྱི་ཀོང་བུ་རུ། །རིག་པ་ཡེ་ཤེས་མར་མེ་གཏམས་ཏེ་འབུལ། །རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ། །དུག་ལྔ་ཡེ་ཤེས་ལྔ་རྫོགས་མཆོད་པ་འབུལ། །གཏོར་གཞོང་རྣམ་དག་དཔལ་གྱི་གཏོར་མས་གཏམས། །འདོད་ཡོན་ཡོངས་སུ་རྫོགས་པའི་མཆོད་པ་འབུལ། །ཁམས་གསུམ་འཁོར་བ་ཡོངས་སྒྲོལ་མཁའ་ཀློང་དུ། །ཆགས་མེད་རཀྟ་དམར་གྱི་དགྱེས་མཆོད་འབུལ། །ཨ་ལ་ལ་སྟེ་དགྱེས་པར་བཞེས་སུ་གསོལ། །ཉམས་ཆག་སྐོང་ཞིང་རྟོག་སྒྲིབ་དག་གྱུར་ཅིག །ཧ་ཧོ་ཧྲཱིཿ རྩ་བ་གསུམ་གྱི་དཀྱིལ་འཁོར་ལྷ་ཚོགས་ལ། །སྨན་རཀ་གཏོར་མ་ཤ་ལྔ་བདུད་རྩི་ལྔ། །བཟའ་དང་བཅའ་དང་བཏུང་བའི་བྱེ་བྲག་སོགས། །སོ་སོར་དགྱེས་པ་ཇི་རྙེད་མཆོད་པའི་ཚོགས། །བདུད་རྩིའི་རྒྱ་མཚོ་ཆེན་པོར་བྱིན་བརླབས་འདིས། །རྩ་བརྒྱུད་བླ་མའི་ཐུགས་དམ་བསྐང་གྱུར་ཅིག །ཡི་དམ་ལྷ་ཚོགས་ཐུགས་དམ་བསྐང་གྱུར་ཅིག །མཁའ་འགྲོ་རྒྱ་མཚོའི་ཐུགས་དམ་བསྐང་གྱུར་

ཅིག །ཆོས་སྲུང་གཏེར་བདག་ཐུགས་དམ་བསྐང་གྱུར་ཅིག །ཧཱུཾ་ཧྲཱིཿ སྐུ་ཡི་དམ་ཚིག་ཉམས་པ་གསོ་བའི་ཕྱིར༔ དུས་གསུམ་རིག་འཛིན་སློབ་དཔོན་ཐུགས་དམ་བསྐང་༔ གསུང་གི་དམ་ཚིག་ཉམས་པ་གསོ་བའི་ཕྱིར༔ ཡི་དམ་དཀྱིལ་འཁོར་ལྷ་ཚོགས༴ ཐུགས་ཀྱི་དམ་ཚིག་ཉམས་པ་གསོ་བའི་ཕྱིར༔ མ་མོ་མཁའ་འགྲོའི་ཚོགས་ཀྱི༴ ཡོན་ཏན་དམ་ཚིག་ཉམས་པ༴ མཆེད་དང་ལྕམ་དྲལ་རྣམས་ཀྱི་ཐུགས༴ ཕྲིན་ལས་དམ་ཚིག་ཉམས་པ༴ བཀའ་སྲུང་དམ་ཅན་རྒྱ་མཚོའི༴ དམ་ཚིག་ཉམས་ཆག་འགལ་འཁྲུལ་གསོ་བའི་ཕྱིར༔ འཁོར་འདས་གཉིས་མེད་ཆེན་པོར༴ མི་སྤང་བླང་བྱའི་དམ་ཚིག་གསོ༴ བླང་དོར་གཉིས་སུ་མེད་པའི་ཐུགས༴ དང་དུ་བླང་བའི་དམ་ཚིག་གསོ༴ དམ་རྫས་བདུད་རྩི་ལྔ་ཡི༴ སྤྱད་པར་བྱ་བའི་དམ་ཚིག་གསོ༴ ཡེ་སྦྱོར་ཡེ་སྒྲོལ་ཆེན་པོའི་ཐུགས༴ ཤེས་པར་བྱ་བའི་དམ་ཚིག་གསོ༴ ཕུང་པོ་ཞིང་སྒྲོལ་འདི་ཡི༴ བསྒྲུབ་པར་བྱ་བའི་དམ་ཚིག་གསོ༴ རིགས་ལྔ་རྣམ་པར་དག་པའི༴ ཉིང་ལག་ཉེ་བའི་དམ་ཚིག་གསོ༴ གདོད་ནས་ཡང་དག་ཆེན་པོའི༴ སྐུ་ཡི་དམ་ཚིག་ཉམས་པ་སོར་ཆུད་

ནས༔ སྐུ་ཡི་དངོས་གྲུབ་ལུས་ལ་སྩལ་དུ་གསོལ༔ གསུང་གི་དམ་ཚིག་ཉམས་པ་སོར་ཆུད་ནས༔ གསུང་གི་དངོས་གྲུབ་ངག་ལ་སྩལ་དུ་གསོལ༔ ཐུགས་ཀྱི་དམ་ཚིག་ཉམས་པ་སོར་ཆུད་ནས༔ ཐུགས་ཀྱི་དངོས་གྲུབ་སེམས་ལ་སྩལ་དུ་གསོལ༔ ཡོན་ཏན་དམ་ཚིག་ཉམས་པ་སོར་ཆུད་ནས༔ ཡོན་ཏན་དངོས་གྲུབ་དབང་པོ་ལྔ་ལ་སྩོལ༔ ཕྲིན་ལས་དམ་ཚིག་ཉམས་པ་སོར་ཆུད་ནས༔ འཕྲིན་ལས་དངོས་གྲུབ་ཐོགས་མེད་རླུང་ལ་སྩོལ༔ དམ་ཚིག་ཉམས་ཆག་འགལ་འཁྲུལ་སོར་ཆུད་ནས༔ དངོས་གྲུབ་མ་ལུས་མྱུར་དུ་སྩལ་དུ་གསོལ༔ དེནས་གཙང་ལྷག་གཅིག་བཅད་ལ་སྣོད་གཅིག་ཏུ་བཞག་སྟེ་ཚོགས་རྫས་སློབ་དཔོན་ལ་བརྡ་ཡིས་འབུལ་བ་ནི། བཟའ་བ་གཡས་དང་བཏུང་བ་གཡོན་དུ་ཐོགས་ཏེ། ཧོཿ དྲིས་ཤིང་བརྟགས་ན་ཆོས་རྣམས་ལ༔ རང་བཞིན་རྙེད་པ་མ་ལགས་པས༔ བྲམ་ཟེ་གདོལ་པ་ཁྱི་དང་ཕག༔ རང་བཞིན་གཅིག་པ་ཉིད་དུ་རོལ༔ ཨ་ལ་ལ་ཧོཿ ཞེས་ཕུལ་བས་སློབ་དཔོན་གྱིས་པད་སྐོར་སྔོན་དུ་འགྲོ་བས་རྩེ་གསུམ་གྱི་ཕྱག་རྒྱས་བླངས་ཏེ་སློབ་དཔོན་གྱིས་བྱང་དྲངས་པའི་རིག་པ་འཛིན་པ་རྣམས་ཀྱིས་མགྲིན་གཅིག་ཏུ། རིན་ཐང་མེད་ཆོས་ལེགས་པར་འོང་༔

འདོད་ཆགས་ལ་སོགས་དྲི་མ་སྤངས༔ གཟུང་དང་འཛིན་པ་ལས་གྲོལ་བ༔ དེ་ཉིད་འབུལ་བ་ངོ་མཚར་ཆེ༔ ཨ་ཧོ༔ མ་ཧཱ་སུ་ཁཾ༔ ཞེས་བླངས་ཏེ་རོལ། དེ་ནས་སྒྲུབ་པ་པོ་ཐམས་ཅད་ལ་བཟའ་བ་གཡས་བསྐོར་དང་བཏུང་བ་གཡོན་བསྐོར་དུ་འབུལ་ཞིང་ཚོགས་རྫས་ལོངས་སྤྱད་པའི་དྭངས་མས་ལུས་དཀྱིལ་གྱི་རྣམས་ཚིམ་པར་བསམ་ལ་ནང་གི་སྦྱིན་སྲེག་གི་ཚུལ་དུ་ལོངས་སྤྱད། འཁོར་གསུམ་མི་དམིགས་པའི་ངང་ནས་སྨོན་ལམ་གདབ་པ་ནི། གདོད་ནས་ལྷུན་གྲུབ་སྒོ་གསུམ་དཀྱིལ་འཁོར་འདིར༔ མི་ཟད་ལོངས་སྤྱོད་བདེ་ཆེན་ཀློང་རོལ་མཐུས༔ ཚོགས་གཉིས་རབ་རྫོགས་ཆོས་དབྱིངས་བརྗོད་བྲལ་ཀློང་༔ འགྲོ་ཀུན་ཡེ་དག་ཡེ་རྫོགས་རྟོགས་པར་ཤོག༔ ཅེས་སྨོན་ལམ་གདབ། དེ་ནས་ཚོགས་ལྷག་བསྡུས་གཙང་ཕུད་དང་བསྲེས་ལ་སློབ་དཔོན་གྱིས་དམ་ཚིག་གི་བཕྲུ་བཏབ་སྟེ། ཨོཾ་ཨཱཿཧཱུྃ་པཉྩ་ཨ་མྲྀ་ཏ་ཧཱུྃ་ཧ་ཧོ་ཧྲཱིཿ ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་བལྟས་ལ། ཕེཾཿ ལྷག་སྡུད་ཀྱི་ཕོ་ཉ་རྣམས་ཨེ་ཨ་རལླི་ཧྲིཾ་ཧྲིཾ་ཛཿ ཞེས་སྤྱུགས་པའི་སྒྲ་དྲག་པོས་སྤྱན་དྲངས། མེ་ཏོག་པཱུཥྤེ། རྡཱུ་པེ་ལ་སོགས་པས་མཆོད་ནས། ཧྲཱིཿ དབང་ཆེན་རྟ་ཕག་དཀྱིལ་འཁོར་དུ༔ མུ་རན་སྐྱོང་ཞིང་བྱ་ར་བྱེད༔ ཐམས་ཅད་འདིར་བྱོན་ལྷག་གཏོར་བཞེས༔

བཅོལ་བའི་ཕྲིན་ལས་སྒྲུབ་པར་མཛོད༔ མ་ཧཱ་སརྦ་པཱུ་ཛ་ཁཱ་ཧིཿ ཞེས་བསྔོས་ཏེ་མཁའ་ལྡིང་གི་ཕྱག་རྒྱས་བཏེགས་ནས་གོམ་པ་བདུན་ཅུའི་སར་བསྐྱལ་ལ། མ་གྲུབ་ན་ཁང་ཐོག་སོགས་གཙང་པར་དོར། འདིར་བཀའ་སྲུང་གི་གཏོར་མ་འབུལ་འོས་རྣམས་ཁང་ཐོག་སོགས་གཙང་སར་ཕུལ་ལ་ཕྲིན་ལས་བཅོལ། དེ་ནས་མཆོག་ཏུ་གུས་པས་གདུང་ཤུགས་དྲག་པོས་ཐུགས་དམ་བསྐུལ་བ་ནི། ཧཱུྃ་ཧྲཱིཿཕཊཿ བླ་མ་ཡི་དམ་མཁའ་འགྲོའི་ཚོགས༔ མཁའ་མཉམ་རྒྱལ་བ་ཐུགས་རྗེ་ཅན༔ དུས་གསུམ་སངས་རྒྱས་ཀུན་གྱི་གཙོ༔ བདེ་གཤེགས་དབང་ཆེན་ཡབ་ཡུམ་དང་༔ བཀའ་སྡོད་སྤྲུལ་པ་འཁོར་དང་བཅས༔ ཐུགས་དམ་བསྐུལ་ལོ་དབྱིངས་ནས་བཞེངས༔ ཕྱི་ཡི་སྣང་བ་དབང་དུ་བསྡུས༔ ནང་གི་རྩ་རླུང་ཐིག་ལེ་བསྐྱེད༔ གསང་བ་རིག་རྩལ་ཉམས་རྟོགས་སྤོར༔ མཆོག་ཐུན་དངོས་གྲུབ་ཐམས་ཅད་རྩོལ་༔ ཞེས་བསྐུལ་ཏེ་ཐ་ཚིག་ཆད་ཐོ་སྒྲོགས་པ་ནི། གཏོར་མ་སྨན་རཀ་གིས་སྦྲན་ཏེ། ཨོཾ་ཨཱཿཧཱུྃ་གིས་བདུད་རྩིར་སྤེལ་བའམ་ཡང་ན། གཏོར་མ་དགྲ་བགེགས་བསྒྲལ་བའི་ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད་ཆེན་པོར་གྱུར་སོང་སྙམ་པའི་མོས་པ་དང་བཅས། ཧྲཱིཿ༔ སྔོནཚོ་གོངནས་བསྐལ་པའི་བར༔ ཀུན་བཟང་

ཡབ་ཡུམ་པདྨ་འབྱུང་༔ ཡེ་ཤེས་མཚོ་རྒྱལ་དཔལ་གྱི་སེང་༔ རིམ་གྱིས་དཀྱིལ་འཁོར་ཞལ་ཕྱེ་ཚེ༔ མཁའ་འགྲོ་གིང་ལང་ཤུགས་འགྲོའི་ཚོགས༔ སོ་སོའི་གཟུགས་མཆོག་བསྟན་ནས་ཀྱང་༔ བཀའ་ཡི་གཏོར་མ་ལེན་པ་དང་༔ སངས་རྒྱས་བསྟན་སྐྱོངས་དགྲ་བགེགས་སྒྲོལ༔ རྣལ་འབྱོར་ཚེ་བསྲིངས་བར་གཅོད་བཟློག༔ ཤ་ཕྲག་དམར་གྱི་གཏོར་མ་བཞེས༔ ཁས་བླངས་དམ་བཅས་ཕྲིན་ལས་མཛོད༔ ཧྲཱིཿ དེ་འོག་བསྐལ་པ་ཡང་མཐའི་དུས༔ ཌཱཀྐིའི་ཚོགས་ཁང་གཏེར་སྒྲོམ་དུ༔ སྐལ་ལྡན་བདེ་ཆེན་རྒྱལ་པོ་ཡིས༔ རྟ་ཕག་དཀྱིལ་འཁོར་ཞལ་ཕྱེ་ཚེ༔ ལྷ་མགོན་སྨན་མོ་གསང་བ་དང་༔ ཤ་ཟ་རཱ་ཧུའི་ཚོགས་བཅས་ཀྱིས༔ སོ་སོའི༴ བཀའ་ཡི༴ སངས་རྒྱས༴ རྣལ་འབྱོར༴ ཤ་ཕྲག༴ ཁས་བླངས་དམ་བཅས་ཕྲིན་ལས་མཛོད༔ བསྟན་སྐྱོངས་ནི། སྨན་རཀ་སྦྲན་ཏེ་འབྲུ་གསུམ་གྱི་བྱིན་གྱིས་བརླབས་ཤིང་མང་པོར་སྤེལ་ལ། བྷྱོཿ བསྟན་སྐྱོང་མ་ལུས་འཁོར་དང་བཅས༔ འཇའ་ཚོན་ཆར་བསིལ་སྒྲ་དང་བཅས༔ འདིར་གཤེགས་དམ་རྫས་གཏོར་མ་བཞེས༔ འཇིག་རྟེན་ཁམས་བདེ་ལོ་ཕྱུགས་ལེགས༔ རྣལ་འབྱོར་རྩ་རླུང་

ཉམས་རྟོགས་སྤེལ༔ མཐོང་ཐོས་དྲན་རེག་སྨིན་གྲོལ་ནས༔ གསང་སྔགས་བསྟན་པ་རྒྱས་པར་མཛོད༔ ཅེས་བསྔོས། བྲོ་བརྡུང་བ་ནི། སྣོད་བཅུད་ཐམས་ཅད་རྟ་མཆོག་རོལ་པའི་རང་བཞིན་དུ་བསམ་ཞིང་གཏོར་གཞོང་ཁ་སྦུབ་པ་རི་རབ་ཏུ་བསམ་པའི་འོག་ཏུ་འབར་བའི་ཨེ་གསང་དྲག་པོར་ཞིང་བཅུའི་ལོག་འདྲེན་ཐམས་ཅད་མནན་གཟིར་མཐའ་བཅད་ཀྱི་ལས་བྱས་པར་བསམ་ལ། ཧཱུཾཿ ང་ནི་འཇིགས་བྱེད་ཆེན་པོ་སྟེ༔ ཁམས་གསུམ་ཐམས་ཅད་སྤྱི་ནས་མནོན༔ དགྲ་བགེགས་སྡིག་ཅན་འབྱུང་པོ་རྣམས༔ དུག་གསུམ་ལས་ཀྱི་ཁུང་བུར་མནན༔ མནན་ནོ་བཅིངས་སོ་སྟམ་བྷ་ཡ༔ རྡོ་རྗེ་བྲོ་ཡི་རྒྱས་བཏབ་པས༔ སུས་ཀྱང་འཇིགས་པར་ནུས་མ་ཡིན༔ ཨོཾ་ལཾ༔ ཨཱཿལཾ༔ ཧཱུཾ་ལཾ༔ སྟམ་བྷ་ཡ་ལཾ་ནན༔ དྷརྨ་དྷཏུ་ཨཱཿ དངོས་གྲུབ་བླང་བ་ནི། དཀྱིལ་འཁོར་གྱི་ལྷ་ཚོགས་རྣམས་ཀྱི་གནས་གསུམ་ནས་མཆོག་ཐུན་གྱི་དངོས་གྲུབ་ཐམས་ཅད་འོད་ཟེར་གྱི་རྣམ་པར་བྱུང་བ་བདག་གི་ལུས་ངག་ཡིད་གསུམ་ལ་ཞུགས་པར་བསམ་ཞིང་། ཧྲཱིཿ བདེ་མཆོག་བདེ་སྤྱོད་ནམ་མཁའི་ཀློང་༔ དབང་ཆེན་རྟ་མཆོག་ཐུགས་རྗེ་ཅན༔ བསྐྱེད་རྫོགས་བསྙེན་སྒྲུབ་མཐར་ཕྱིན་པའི༔ སྐུ་གསུང་ཐུགས་ཡོན་དངོས་གྲུབ་རྩོལ༔ ཨོཾ་ཨཱཿཧཱུྃ་གུ་རུ་དེ་

ཝ་ཌཱཀྐི་ནཱི་བཛྲ་ཀྲོ་ཏ་སརྦ་སིདྡྷི་ཕ་ལ་ཧོཿ ཞེས་དཀྱིལ་འཁོར་གྱི་བདུད་རྩི་མྱང་། དེ་ནས་གཏང་རག་གི་མཆོད་པ་གསར་དུ་བཤམས་པའམ་གསོས་ཤིང་བརླབས་ལ། ཧྲཱིཿ ལྷ་རྫས་ཕྱི་ནང་གསང་བ་ཡི། །དངོས་བཤམས་ཡིད་སྤྲུལ་མཆོད་པའི་ཚོགས། །དཀྱིལ་འཁོར་ལྷ་ཚོགས་དགྱེས་ཕྱིར་འབུལ། །འཁོར་གསུམ་ཡོངས་དག་ཆེན་པོར་བཞེས། །ༀ་གུ་རུ་དེ་ཝ་ཌཱཀྐི་ནཱི་ས་པ་རི་ཝཱ་ར་པུཥྤ་ནས་ཤཔྟའི་བར་མཆོད། བསྟོད་པ་ནི། ཧྲཱིཿ ཕྱི་སྣོད་དག་པ་གཞལ་ཡས་ཁང་། །ནང་བཅུད་དག་པ་རྩ་གསུམ་ལྷ། །གདོད་ནས་དག་པ་དམིགས་སུ་མེད། །སྣང་སྟོང་སྒྱུ་མ་ཙམ་དུ་བསྟོད། །ཅེས་བསྟོད། བཟོད་གསོལ་ནི། ཧྲཱིཿ རྩ་གསུམ་ཡོངས་འདུས་དཀྱིལ་འཁོར་དུ༔ ཆོ་ག་ལྷག་ཆད་གྱུར་པ་དང་༔ ལྷ་བསྙེན་བྱིང་རྨུགས་ལ་སོགས་པ༔ འགལ་འཁྲུལ་མ་ལུས་དག་པར་མཛོད༔ དབྱངས་གསལ་དང་། ཡིག་བརྒྱ་བཟླས། གཤེགས་བསྡུ་ནི། ཧྲཱིཿ སྣང་སྲིད་ཐམས་ཅད་དབང་ཆེན་ཞིང་༔ རང་ལུས་འབྱུང་བ་གདོས་བཅས་བྲལ༔ སྒྲ་རྣམས་བྲག་ཆའི་གདངས་བཞིན་སྣང་༔ འགྱུ་དྲན་ཀ་དག་རོལ་རྩལ་དུ༔ གང་འདུལ་ཕྲིན་ལས་མཐར་ཕྱིན་ནས༔ ཆོས་དབྱིངས་སྐྱེད་མེད་ཀློང་དུ་ཨཱཿ

དེ་ནས་གཟུགས་སྐུར་ལངས་ཏེ་སྨོན་ལམ་གདབ་པ་ནི། ཧྲཱིཿ སླར་ཡང་མཁའ་ལ་འཇའ་ཤར་བཞིན། བདག་ཉིད་རྟ་ཕག་སྐུ་རུ་གསལ། དགེ་བ༴ རྟ་ཕག་ཡབ་ཡུམ༴ འགྲོ་བ༴ དེ་ཡི་ས་ལ༴ ཧོཿ བདག་ཅག་འདིར་འདུས་མཆེད་ལྕམ་རྣམས༔ དམ་ཚིག་གཡེལ་མེད་ཏིང་འཛིན་གྱིས༔ འཇའ་ལུས་རྡོ་རྗེའི་སྲོག་བསྒྲུབ་ནས༔ ཁམས་གསུམ་འོད་སྐུར་ཡོངས་གྲོལ་བསྔོ༔ ཞེས་དང་ལོང་བྱུང་ཞིང་སྤྲོ་ན་སྨོན་ལམ་གང་ཤེས་འདོན། བཀྲ་ཤིས་ནི། ཧཱུྃ་ཧྲཱི༔ བྱིན་རླབས་ཆར་ལྟར་འབེབས་མཛད་པའི༔ བླ་མ་རྣམས་ཀྱི་བཀྲ་ཤིས་ཤོག༔ དངོས་གྲུབ་ཆར་ལྟར་སྙིལ་མཛད་པའི༔ ཡི་དམ་རྟ་ཕག་བཀྲ་ཤིས་ཤོག༔ བར་གཅོད་ཀུན་སེལ་ལས་རྣམས་འགྲུབ༔ མཁའ་འགྲོ་སྲུང་མའི་བཀྲ་ཤིས་ཤོག༔ འཇའ་ལུས་འོད་སྐུར་སྨིན་མཛད་པའི༔ འགྲོ་ཀུན་མཁའ་ཁྱབ་བཀྲ་ཤིས་ཤོག༔ ཅེས་དང་ཆེར་རྒྱས་སུ་སྤྲོ་ན་སྐྱབས་རྗེ་རྡོ་རྗེ་འཆང་ཚོགས་དྲུག་རང་གྲོལ་གྱིས་མཛད་པ་འདི་ལྟར། མ་ནོར་ལམ་བཟང་གསང་ཆེན་རྡོ་རྗེ་ཐེག །ཐེག་པའི་ཡང་རྩེ་རྫོགས་པ་ཆེན་པོའི་ཁྲིད། །ཁྲིད་པའི་མཚན་ལྡན་རྩ་བའི་བླ་མའི་སྐུ། །སྐུ་ཚེ་བསྐལ་བརྒྱར་བརྟན་པའི་བཀྲ་ཤིས་

ཤོག །རྒྱལ་དབང་པད་འབྱུང་བཱི་མ་ལ་སོགས་བཀའ། །བཀའ་གཏེར་ལས་འོང་སྔ་འགྱུར་གསང་ཆེན་བསྟན། །བསྟན་པའི་སྒོར་ཞུགས་རྡོ་རྗེ་མཆེད་ལྕམ་ཀུན། །ཀུན་གྱི་ཞབས་པད་བརྟན་པའི་བཀྲ་ཤིས་ཤོག །རྒྱལ་བ་ཀུན་གྱི་ཉེ་ལམ་གཅིག་པུ་རུ། །རྒྱལ་བས་ཡོངས་བསྔགས་ཐེག་མཆོག་རྫོགས་པ་ཆེ། །རྒྱལ་དབང་པདྨའི་རིང་ལུགས་རྙིང་མ་པའི། །རྒྱལ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །གཏེར་བཏོན་བདེ་ཆེན་རྒྱལ་པོས་སྤྱན་དྲངས་པའི། །གཏེར་ཆོས་ཀུན་བཟང་ཐུགས་ཀྱི་སྙིང་ཁུ་འདི། །གཏེར་ཁ་བརྡོལ་ལྟར་གང་ཞིག་སྲིད་མཐའི་བར། །གཏེར་གསར་བསྟན་པ་རྒྱས་པའི་བཀྲ་ཤིས་ཤོག །མ་རིག་ཉོན་མོངས་དུག་ལྔ་རྒྱང་བསྲིངས་ནས། །མ་རྣམས་དོན་དུ་བྱང་ཆུབ་སྒྲུབ་པའི་ཚེ། །མ་དང་མཁའ་འགྲོས་བར་གཅོད་ཉེར་འཚེ་ཀུན། །མ་བསྐུལ་ན་ཡང་སྒྲོལ་བའི་བཀྲ་ཤིས་ཤོག །གངས་རྫ་གཡའ་དང་ནགས་ཚལ་བྱིན་ལྡན་ས། །ས་ཕྱོགས་དབེན་ཞིང་ཉམས་དགའ་རི་བརྒྱུད་བཟང་། །བཟང་ཞིང་མ་དང་མཁའ་འགྲོ་འདུ་བའི་གནས། །གནས་ཀུན་རྟག་ཏུ་བརྟེན་པའི་བཀྲ་ཤིས་ཤོག །བླ་མ་མཆེད་

གྲོགས་སློབ་མ་ཡོན་བདག་འཛོམ། །ཕ་མ་བུ་གསུམ་མི་ནོར་ཟས་གསུམ་འཛོམ། །ལྷ་ཆོས་མི་ཆོས་བདེ་སྐྱིད་སྙན་གསུམ་འཛོམ། །རྟག་ཏུ་འདོད་དགུ་འཛོམ་པའི་བཀྲ་ཤིས་ཤོག །ཅེས་མེ་ཏོག་གིས་ཕྱོགས་ཀུན་ཏུ་ཁྱབ་པར་བྱའོ། སྨྲས་པ། ལས་བྱང་དངོས་གྲུབ་འབྱུང་བའི་རྒྱ་མཚོ་ལ། །ཟུར་རྒྱན་འདོད་འབྱུང་ནོར་བུ་བཀླག་ཆོག་སྤེལ། །བདེ་སྐྱིད་སྙན་གསུམ་འབྱུང་བའི་དབེན་གནས་སུ། །མཆོག་ཐུན་དངོས་གྲུབ་འབྱུང་བའི་ཉམས་ལེན་འཚལ། །ཞེས་རྟ་ཕག་ཡིད་བཞིན་ནོར་བུའི་ལས་བྱང་དངོས་གྲུབ་རྒྱ་མཚོ་ལ་ཟུར་རྒྱན་འདོད་འབྱུང་ནོར་བུ་ཞེས་བྱ་བ་འདི་ནི་མེ་ཕག་ལོ་ལྷན་ཐབས་གངྒའི་ཆུ་རྒྱུན་ཟེར་བ་ཞིག་སྒྲིགས་ཀྱང་རང་ཉིད་ཐོས་ཆུང་བློ་གྲོས་ཞན་ཁར་སྔ་གོང་ནས་སྔ་འགྱུར་འདི་ཕྱོགས་ལ་འདྲིས་པ་ཆུང་ལྟབས་ཆོ་ག་ཚིག་གི་འདོན་ཆ་མང་ལ་དོན་ཁུ་མ་འདུས་ཀྱིས་མགར་ངན་གྱིས་ལྕགས་ཞུན་འདྲེས་མ་ཐུབ་པ་ལྟ་བུ་ཞིག་འབྱུང་བར་མ་ཟད། ཆོ་ག་གཞུང་དང་ལྷན་ཐབས་དཔེ་སོ་སོར་མ་ཕྱེ་བའི་བླུན་རྟགས་ཀྱིས་དཀྱུས་གཅིག་ཏུ་བྲིས་པས་མ་མཛེས་ཤིང་། གཞན་ཡང་སྟོད་སྨད་བར་གསུམ་ནས་རྟ་ཕག་གི་ལས་བྱང་འདི་ལ་ཟུར་རྒྱན་སྒྲོས་གཙང་མིན་གྱིས་དཔེ་ཉོག་མང་དག་ཞིག་མཐོང་བའི་རྐྱེན་བྱས། ཉེ་ཆར་ལམ་འདིར་མོས་པའི་བསླབ་གསུམ་རྒྱན་གྱིས་མཛེས་པར་བྱས་པ་རིན་པོ་ཆེ་སྒོ་གསུམ་ཞི་ཞིང་དུལ་བའི་སངས་རྒྱས་བསྟན་འཛིན། ཤེས་རབ་ཀྱི་བློ་རྩལ་ཆེ་བའི་སངས་རྒྱས་རིན་ཆེན་རྣམས་ཀྱིས་གཙོ་མཛད་དད་གུས་དག་སྣང་ཆེ་ཞིང་ཐར་པ་དོན་དུ་གཉེར་བའི་

བྱང་ཆུབ་ལམ་གྱི་གྲོགས་མཆོག་མཆེད་ལྕམ་རྡོ་རྗེ་སྤུན་གྲོགས་ཉི་ཤུ་ཙམ་གྱིས་འདི་ལྟ་བུའི་ཟུར་རྒྱན་ཁྱེར་བདེ་སྒྲོས་གཙང་ཞིག་དགོས་ཞེས་ལན་གཅིག་ཙམ་མིན་པར་ཡང་ཡང་བསྐུལ་བ་དོན་ཡོད་པར་བྱས་ཏེ་ལྷན་ཐབས་གང་རྒྱུན་ནང་དུ་ཚིག་དོན་འདྲ་མིན་ཁུ་མ་འདུས་ཀྱིས་ཉག་ཉོག་སྡེབ་འཁྲུགས་སུ་སོང་བ་རྣམས་སླར་བསྐྱར་སྒྲིགས་བྱས་ཏེ་ཚེས་བཅུའི་མཆོད་པ་སོགས་དང་། ལོངས་སྐབས་ཡོད་ཅིང་སྤྲོ་ལ་རྒྱས་པར་འདོད་ན་ཆོག་སྒྲིགས་འདི་ནང་ལྟར་མཛད་ཅིང་རྒྱུན་གྱི་ཉམས་ལེན་མི་ཁོམས་པའི་དུས་རྣམས་སུ་ལས་གཞུང་ལྟར་བགྱིས་པས་དོན་འགྲུབ་པར་བྱས་པ་འདི་ནི་སྐྱབས་མགོན་ཞབས་དཀར་རྡོ་རྗེ་འཆང་ཡབ་སྲས་ཀྱི་ཞབས་རྡུལ་སྤྱི་བོར་ལོན་པའི་རྒྱལ་ཁམས་ཀྱི་སྤྲང་པོ། འདོ་མེད་ཀྱི་སྨྱོན་པ། ནོར་མེད་ཀྱི་ཕྱུག་པོ། ཆོས་མེད་ཀྱི་ཟོག་པོ། སྒོམ་མེད་ཀྱི་དྲེད་པོ། ཡུལ་མེད་ཀྱི་འཁྱམས་པོ་སྟོད་གངས་རི་ཕྱོགས་ཀྱི་བྱ་བྲལ་གང་བདེ་གུ་ཡངས་པ་སུ་མ་ཏི་ཤཱི་ལའི་བདེ་མཆོག་འཁོར་ལོའི་ཕོ་བྲང་། དཔའ་བོ་མཁའ་འགྲོའི་འདུན་ས་གནས་ཆེན་གོ་ཏ་ཝ་རིར་བཱི་ཛ་ཡ་ཞེས་པ་ཆུ་མོ་སྦྲུལ་གྱི་ལོ་རྒྱལ་ཟླ་བའི་ཡར་ཚེས་དགེ་བ་ཟླ་བ་གྲོ་བཞིན་གྱི་འགྲུབ་སྦྱོར་ཉིན་སྦྱར་བའི་ཡི་གེ་པ་ནི་བུདྷ་རཏྣའོ། །སླར་ཡང་འཇམ་མགོན་བླ་མ་མཁྱེན་བརྩེའི་སྒྱུ་འཕྲུལ་འཁོར་ལོའི་མགོན་པོ་པདྨ་གར་དབང་འོད་གསལ་མདོ་སྔགས་གླིང་པ་མཆོག་ནས་དོན་གཉེར་ཅན་ཀུན་གྱི་གཟིགས་བདེའི་ཆོག་ཁྲིགས་ཤིག་གྱིས་ཞེས་བཀའ་ལུང་ལྷ་རྫས་རིན་པོ་ཆེའི་དོ་ཤལ་བཅས་ཡང་ཡང་ཕེབས་པ་སྤྱི་བོས་མཆོད་དེ། རྗེ་མ་གཅིག་དྷརྨའི་ཕྱག་བཞེས་སུ་འདི་ཉིད་ཀྱི་དབང་མ་ཐོབ་པའི་གང་ཟག་གིས་སྒྲུབ་ཕྲིན་ཚོགས་འཁོར་གྱི་ལས་མཐོང་

ཐོས་དང་། ཚོགས་རྫས་མྱང་མི་ཆོག་པས་མཚོན་བཀའ་ཤིན་ཏུ་དོག་པས་ན། ཟུར་རྒྱན་འདོད་འབྱུང་ནོར་བུའི་ཚིག་དོན་གྱི་ཆ་རང་སོར་བཞག །མ་བུ་འཕྲུལ་བསྡེབས་བློ་དམན་འཇུག་པ་མི་བདེ་བའི་ཕྱིར་གངྒའི་ཆུ་རྒྱུན་ནས་ཀྱང་ལེགས་ཆ་བཏུས། ཕྱོགས་འདིར་རྙེད་པའི་གཏེར་གཞུང་དང་། ཟུར་རྒྱན་དག་གི་མ་ཕྱི་མ་དག་རྒྱུན་འབྱམས་ཆེ་བར་དཔྱད་བཟོད་ཞུས་དག་དང་། བརྒྱུད་པའི་ཁ་སྐོང་སོགས་མི་འགལ་བས་ཀྱང་བརྒྱན་པར་བྱས་ཏེ་བཀླག་ཆོག་ཏུ་ཆོས་འདིའི་སྐལ་བ་དགེ་བ་ཅན་དགེ་སྦྱོང་དྷརྨ་མ་ཏིས་དབེན་པའི་ནགས་ཕྲོད་ཐུབ་བསྟན་ཆོས་གླིང་དུ་འདུ་བགྱིས་པས་ཟབ་གཏེར་འདི་ཉིད་ནམ་ཡང་མི་ནུབ་པའི་རྒྱུར་གྱུར་ཅིག །སརྦ་མངྒ་ལཾ༎ ༎

གཏེར་སྟོན་རིག་འཛིན་ཆེན་པོ་ཀུན་བཟང་བདེ་ཆེན་རྒྱལ་པོ་རྩལ་གྱི་ཟབ་གཏེར་ཡང་གསང་རྟ་ཕག་ཡིད་བཞིན་ནོར་བུའི་དབང་ཆོག་ཡེ་ཤེས་བདུད་རྩིའི་བུམ་བཟང་། འཁྲུལ་ཞིག་ངག་དབང་ཆོས་ཀྱི་བློ་གྲོས།

༄༅། །གཏེར་སྟོན་རིག་འཛིན་ཆེན་པོ་ཀུན་བཟང་བདེ་ཆེན་རྒྱལ་པོ་རྩལ་གྱི་ཟབ་གཏེར་ཡང་གསང་རྟ་ཕག་ཡིད་བཞིན་ནོར་བུའི་དབང་ཆོག་ཡེ་ཤེས་བདུད་རྩིའི་བུམ་བཟང་ཞེས་བྱ་བ་བཞུགས་སོ།།

ཨོཾ་སྭ་སྟི། གྲུ་འཛིན་བདག་དང་ཕོངས་སྐྱོབ་ཏཱ་རེ་མ། །སྙིགས་དུས་རྒྱལ་བསེན་གཤེད་དུ་ཁྲོས་པའི་གར། །རྟ་ཕག་ཡབ་ཡུམ་ཉིད་དང་དབྱེར་མེད་མགོན། །མ་གཅིག་དྷརྨའི་མཚན་དེ་སྤྱི་བོས་མཆོད། །གང་གི་ལམ་དུ་སྐལ་བཟང་སྨིན་པའི་ཐབས། །གཏེར་གཞུང་རྡོ་རྗེའི་ཚིག་གི་ལྟེ་བ་རུ། །འཐད་ལྡན་འཇུག་བདེའི་རྩིབས་ཀྱི་ལེགས་བཤད་བཅུད། །མཁས་གྲུབ་གསུང་བཞིན་བསྡེབས་ལ་གནང་བ་རྩོལ། དེ་ཡང་ལྷ་དང་བཅས་པའི་སྐྱེ་འགྲོ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོར་གྱུར་པ་བདག་ཅག་གི་སྟོན་པ་ཐབས་

མཁས་ལ་ཐུགས་རྗེའི་བདག་ཉིད་ཅན་དེས། རང་ཉིད་གང་ནས་གཤེགས་པའི་ལམ་ལ་འགྲོ་བ་ཀུན་ཀྱང་བཀྲི་བར་བཞེད་ནས་དམ་པའི་ཆོས་ཚུལ་ཟབ་ཅིང་རྒྱ་ཆེ་བ་ཇི་སྙེད་ཅིག་སྟོན་པར་མཛད་པ་ལས། འདིར་རྒྱལ་བ་ཐམས་ཅད་ཀྱི་སྤྱི་གཟུགས་རིག་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཇོ་མོ་ཡེ་ཤེས་མཚོ་རྒྱལ་དང་། རླངས་ཆེན་དཔལ་གྱི་སེང་གེ་སོགས་ལས་ཅན་གྱི་གདུལ་བྱ་མང་པོ་ལ་མནོག་ཆོས་སུ་རྩལ་བའི་གདམས་ཟབ་ཁྱད་པར་ཅན་གཏེར་སྟོན་ཀུན་བཟང་བདེ་ཆེན་རྒྱལ་པོ་རྩལ་གྱིས་གཏེར་སྒྲོམ་མཚོ་རྒྱལ་གསང་ཕུག་ནས་སྙན་བརྒྱུད་དུ་སྤྱན་དྲངས་པའི་ཡང་གསང་རྟ་ཕག་ཡིད་བཞིན་ནོར་བུའི་སྨིན་བྱེད་དབང་བསྐུར་བའི་རིམ་པ་ཁྲིགས་སུ་སྡེབ་པ་ལ། ལྷག་གནས་དང་། དབང་བསྐུར་བ་

དངོས་གཉིས་ལས། དང་པོ་ལ། ས་ཆོག་དང་། ལྷ་དང་། བུམ་པ། སློབ་མ་སྟ་གོན་དང་བཞི་ལས། དང་པོ་ལ་རྒྱས་པ་སྒྲུབ་ཆེན་དང་སྦྲེལ་ན་དེ་དང་དེར་ཤེས་པར་བྱ་ལ། དབང་རྐྱང་ཙམ་ལ་བདག་བསྐྱེད་མཆོད་གཏོར་སྨན་རཀ་དང་། དཀར་གཏོང་བཅས་བཤམས་ལ། བདག་གི་རྣལ་འབྱོར་རྒྱས་བསྡུས་ལོང་སྐབས་དང་བསྟུན་སྔོན་དུ་འགྲོ་བས། ལས་བྱང་ནག་འགྲོས་བཞིན་གཞི་བདག་དཀར་གཏོར་བཏང་བས་གྲུབ་བོ། གཉིས་པ་ལྷ་སྟ་གོན་ནི། རས་བྲིས་ཀྱི་དབང་དུ་བྱས་ནས་རིན་པོ་ཆེའི་མཎྜལ་ལ་དྲིས་ཐིག་ལེ་བྱས་པར་གཙོ་བོ་ཡབ་ཡུམ་གྱི་ཚོམ་བུ་ཆེ་བ་གཅིག་དང་དེའི་མདུན་དུ་སྲས་མཆོག་གི་ཚོམ་བུ་གཅིག་བཀོད། མཐར་ཉེར་སྤྱོད་བསྐོར་བཤམས་མཐོང་བརྒྱུད་ལྟར་འདུ་བྱས་ལ། ལས་སྔགས་རྟས་བསངས། སྭ་བྷཱ་ཝས་སྦྱང་།

ཐམས་ཅད་སྟོང་ཉིད་ནམ་མཁའི་ངང་། བྷཱུཾ་ལས་རིན་ཆེན་སྣོད་ནང་དུ། །ཨོཾ་ལས་ཕྱི་ནང་མཆོད་པའི་ཚོགས། །སོ་སོའི་ལྷ་མོའི་རོལ་པ་བཅས། །རབ་འབྱམས་ནམ་མཁའི་ཁམས་གང་གྱུར། །ཨོཾ་བཛྲ་ཨརྒྷཾ་སོགས་དང་། ཨོཾ་ཨཱཿཧཱུཾ་སརྦ་པཉྩ་རཀྟ་བ་ལིངྷ་ཏེ་ཛྭ་ལ་བ་ལིངྷ་བཱ་ལ་ཝ་ཏེ་གུ་ཧྱ་ས་མཱ་ཡ་ཧཱུྃ་ཧྲཱིཿཋ༔ ཞེས་བརླབ། ལས་བྱང་གི་སྤྱན་འདྲེན། ཧཱུྃ། རྔ་ཡབ་ཡུལ་གྱི་ནུབ་བྱང་ནས༔ དུས་གསུམ་རྒྱལ་ཀུན་ནས། ཛཿཧཱུཾ་བཾ་ཧོཿ ཞེས་དང་། གདོད་ནས་གྲུབ་པའི་དབང་ཆེན་རྟ་ཕག་གི་དཀྱིལ་འཁོར་གྱི་

འཁོར་ལོ་གཞིའི་སྟེང་གི་ནམ་མཁའ་ལ་བཞུགས་པར་བསམ་ཞིང་། ཧྲཱིཿ བླ་མ་ཡི་དམ་ནས། པཱུ་ཛ་ཧོ། ཞེས་པས་མཆོད། ཧྲཱིཿ ཆོས་དབྱིངས་སྐྱེ་མེད་ནས། རྡོ་རྗེ་ཕག་མོའི་སྐུ་ལ་བསྟོདཿ༔ ཡན་དང་། གཤམ་གྱི། དཀྱིལ་འཁོར་ལྷ་ལ་ཕྱག་འཚལ་བསྟོད། འཁོར་དང་བཅས་ལ་ཕྱག་འཚལ་བསྟོད། ཅེས་པས་བསྟོད་དོ། གསུམ་པ་བུམ་པ་སྟ་གོན་ནི། གཙོ་ལས་ཀྱི་བུམ་པ་སོ་སོ་དྲི་བཟང་ཆུ་དང་སོ་ལྔའི་བཅུད་ཀྱིས་བཀང་བ་གུ་གུལ་གྱིས་བདུག །ལས་སྔགས་བཟླས་ཏེ་ཡུངས་ཐུན་གྱིས་བྲབ་ལ་གཞིའི་དབུས་སུ་གཙོ་བོའི་བུམ་པ་དང་། བྱང་ཤར་མཚམས་སུ་ལས་བུམ་སོ་སོར་ཁ་རྒྱན་དང་བཅས་བཀོད། གཞན་ཡང་འོག་ཏུ་མཁོ་བའི་སྟ་གོན་གྱི་ཡོ་བྱད། དྲིའི་ཆུ། ཉེར་སྤྱོད་བཞི། སོ་ཤིང་། ཁྱོར་ཆུ། དཔུང་སྐུད་དམར་པོ། ཀུ་ཤ་སོགས་འདུ་བྱ། བུམ་པ་ལས་སྔགས་ཀྱིས་བསང་། སྭ་བྷཱ་ཝས་སྦྱངས། །མི་དམིགས་སྟོང་པའི་ངང་ཉིད་ལས། །པདྨ་ཉི་ཟླའི་དཀྱིལ་འཁོར་སྟེང་། །བྷཱུཾ་ལས་རིན་ཆེན་བུམ་པ་ནི། །ཕྱི་ནི་བུམ་པའི་རྣམ་པ་ལ། །ནང་ནི་ཡེ་ཤེས་གཞལ་ཡས་ཁང་། །དྭངས་གསལ་སྒྲིབ་མེད་འོད་ལྔའི་ཀློང་། །པདྨ་ཉི་ཟླའི་དཀྱིལ་འཁོར་ལ། །ཧྲཱིཿལས་དབང་ཆེན་རྟ་མཆོག་ནི། །སྐུ་མདོག་དམར་ལ་སྔོ་མདངས་འཚེར། ཞེས་པ་ནས། མེ་དཔུང་འབར་བའི་ཀློང་དུ་

གསལ༔ ཞེས་པའི་བར་ལས་བྱང་བཞིན་དང་། དེ་ནས། ལས་བུམ་ནང་དུ་རྟ་མགྲིན་ནི༔ རྟ་ཞལ་ལྗང་ནག་ཕྱག་གཉིས་ཀྱི༔ རྡོ་རྗེ་ཐོ་བ་ཐོད་ཕུར་འཛིན༔ སྐུ་སྨད་གནམ་ལྕགས་ཕུར་ཤམ་ཅན༔ དུར་ཁྲོད་དཔའ་བོའི་ཆས་ཀྱིས་བརྒྱན༔ རབ་འཇིགས་བསྐལ་པའི་མེ་ལྟར་འབར༔ དེ་ལྟར་བུམ་ལྷ་སོ་སོ་ཡི། །གནས་གསུམ་ས་བོན་འོད་ཟེར་འཕྲོས། །ཡེ་ཤེས་ཞིང་ཁམས་སོ་སོ་ནས། །ལྷ་ཚོགས་འཁོར་བཅས་སྤྱན་དྲངས་གྱུར། །ཞེས་པ་ནས། སྤྱན་འདྲེན། ཕྱག་མཆོད། བསྟོད་པའི་བར་ལས་བྱང་བཞིན་བྱ། གཟུངས་ཐག་བུམ་པ་ལ་གཏད་དེ། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་གཉིས་མེད་རོ་གཅིག་གྱུར། །ཞེས་གཙོ་བུམ་ལ། ཨོཾ་བཛྲ་ཀྲོ་དྷ་པ་ཏེ་པ་ཏེ་ཧཱུྃ་ཕཊ༔ དང་ལས་བུམ་ལ། ཨོཾ་བཛྲ་ཀྲོ་དྷ་ཧ་ཡ་གྲྀ་ཝ་ཧཱུྃ་ཕཊ༔ བཟླ། ཨོཾ་ཨཱཿཧཱུྃ་གིས་མཆོད་ཡོན་ཕུལ་བས། ལྷ་རྣམས་བདེ་བ་ཆེན་པོའི་ངོ་བོར་ཞུ་ནས་བུམ་ཆུ་དང་རོ་གཅིག་ཏུ་གྱུར་པར་བསམ་པས་དཀྱིལ་འཁོར་ཡོལ་བས་བསྒྲིབས་ཏེ་དེས་གྲུབ་བོ། གསུམ་པ་སློབ་མ་སྟ་གོན་ནི། རྩ་གཞུང་ལས།

སློབ་བུ་དམ་ཚིག་གཙང་མ་ཡི༔ ལྔའམ་བཅོ་ལྔ་ལས་མི་མང་༔ ཞེས་གསུངས་པ་ལྟར་ལས་མི་མང་བ་ལ་ཇི་ལྟར་བལྟམས་པ་སོགས་ཀྱིས་ཁྲུས་དང་། ཕྱག་བྱས་ཏེ་གྲལ་ལ་འཁོད། བགེགས་གཏོར་རྟས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་བྷྲཱུཾ་ལས་རིན་པོ་ཆེ་སོགས་དང་། ཨོཾ་ཨཱཿཧཱུྃ་ཧོཿས་རློབ། ཕེཾ་ཞེས་མགྲོན་དགུག །ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏེ་བྷྱོ་སོགས་དང་། སྤྲོ་ན། ལས་བྱང་གི་བཀའ་བསྒོ་གྱེར། ན་མོ། རིག་འཛིན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས༴ ཆོས༴ དགེ་འདུན༴ ཡི་དམ་ཞི་ཁྲོའི་ལྷ་ཚོགས་རྣམས༴ ཁྱད་པར་དུ་ཡང་རྟ་ཕག་ཡིད་བཞིན་ནོར་བུའི་ལྷ་ཚོགས་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས་སློབ་མ་འདི་རྣམས་ལ་ལྷག་གནས་ཀྱི་ཆོ་ག་སྒྲུབ་པར་བྱེད་པ་ལ་བར་དུ་གཅོད་པའི་བགེགས་ཚོགས་ཐམས་ཅད་གཏོར་མ་འདིས་ཚིམ་པར་གྱིས་ལ་འདིར་མ་གནས་པ་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་མེ་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་གྱུར་ཏ་རེ། ཞེས་ལས་སྔགས་དང་། སུམྦྷའི་སྔགས་སྤོས་རོལ་དང་བཅས་པས་བགེགས་བསྐྲད། ཧཱུཾ།

ཡེ་ཤེས་འབར་བའི་རྒྱ་གྲམ་སོགས་ལས་བྱང་བཞིན་ནས། རཀྵ་རཀྵ་ཧཱུཾ་ཞེས་པས། ཕྱོགས་མཚམས་ཐམས་ཅད་རྡོ་རྗེའི་རཱ་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་མཐའ་མེད་དུ་འཕྲོ་བས་བཅིངས་ཏེ་ཅིས་ཀྱང་མི་ཤིགས་པའི་མོས་པ་མཛོད། དེ་ནས་ལས་རྡོར་གྱིས་མེ་ཏོག་བཀྱེ་བསྡུ་བྱ་ཞིང་། སློབ་དཔོན་གྱིས་འདི་སྐད་ཅེས། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་ཡང་དག་པ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་མངོན་པར་དབང་བསྐུར་བ་ཟབ་མོ་གསན་ནས་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་ནས་གསན་པར་ཞུ། ཆོས་གསན་པའི་ཀུན་ཏུ་སྤྱོད་པ་ཡང་། སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ནད་པ་སྨན་པའི་ཚིག་ཉན་བཞིན། །རིམ་གྲོར་བཅས་ཏེ་ཆོས་ཉོན་ཅིག །ཅེས་དང་། ཆོས་བཅུ་པའི་མདོ་ལས། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་

ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་གསུངས་པ་ལྟར་བག་མེད་ཀྱི་སྐྱོན་སྤངས་ཏེ་ཞི་ཞིང་དུལ་ལ་སྣོད་ཀྱི་སྐྱོན་གསུམ་དང་བྲལ་ཞིང་། འདུ་ཤེས་དྲུག་དང་ལྡན་པ་མདོ་རྒྱུད་རྣམས་ལས་ཇི་ལྟར་འབྱུང་བ་བཞིན་གསལ་བཏབ་ནས་གསན་འཚལ། གང་གསན་པར་བྱ་བ་ནི། དེ་ཡང་རང་ཅག་རྣམས་ཐོག་མ་མེད་པ་ནས་ད་ལྟའི་བར་དུ་སྤྱིར་འཁོར་བ་དང་ཁྱད་པར་ངན་སོང་གསུམ་གྱི་སྡུག་བསྔལ་བསམ་གྱིས་མི་ཁྱབ་པ་མྱོང་དུ་ཟིན་ཀྱང་། ད་དུང་སྡུག་བསྔལ་གྱི་མཐའ་རྟོགས་པར་དཀའ། ད་རེས་མི་ཁོམས་པའི་གནས་རྣམས་སུ་མ་སྐྱེས་པ་དལ་འབྱོར་གྱི་ཆོས་བཅོ་བརྒྱད་ཚང་ཞིང་ཁམས་དྲུག་ལྡན་གྱི་མི་ལུས་རིན་པོ་ཆེ་ཐོབ་པ་འདི་ནི། དཔེར་ན། ལོང་བ་ཞིག་གིས་ནོར་བུ་རྙེད་པ་ལས་ཀྱང་ངོ་མཚར་ཆེ་སྟེ། ཇི་སྐད་དུ། ཡང་ཡང་རྙེད་དཀའ་ཨུ་དུམ་ཝ་ར་འདྲས། །རྙེད་པ་དོན་ཆེན་ཡིད་བཞིན་ནོར་བུ་འདྲ། །ཞེས་གསུངས་པ་ལྟར་ཤིན་ཏུ་རྙེད་པ་དཀའ་ཞིང་། རྙེད་ན་འདི་ལས་ལྷག་པའི་ཆོས་སྒྲུབ་པའི་རྟེན་གཞན་མེད་པས་དོན་ཆེན་པོ་དང་ལྡན་པ་སྟེ། སློབ་སྤྲིང་ལས། བདེ་གཤེགས་ལམ་སྟོན་འགྲོ་བ་འདྲེན་པར་ཆས་གྱུར་པ། །

སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་མི་རྙེད་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་གསུངས་ཤིང་། དེ་ལྟར་ཆོས་སྒྲུབ་པའི་མཐུན་རྐྱེན་ཐམས་ཅད་ཚང་བའི་རྟེན་མི་ལུས་རིན་པོ་ཆེ་དེ་ཡང་གཏན་དུ་མི་སྡོད་ཅིང་རང་དབང་མེད་པར་མྱུར་དུ་འཆི་དགོས་པས་ན། ད་ལྟ་སོས་དལ་གྱི་དབང་དུ་མ་སོང་བ་མྱུར་དུ་སྙིང་པོ་ལེན་པའི་ཐབས་ལ་འབད་དགོས་ཏེ། ཚོམ་ལས། སང་དང་འཇིག་རྟེན་ཕྱི་མ་གཉིས། །སྔོན་ལ་གང་འོང་གཏོད་མེད་པའི། །སང་གི་ཚིས་ལ་མི་འབད་པར། །ཕྱི་མའི་དོན་ལ་འབད་པར་རིགས། །ཞེས་གསུངས་པ་ལྟར་ཡིན་ལ། ད་དུང་འཆི་བར་ངེས་ནས་ཚེའི་དུས་བྱས་ཀྱང་སླར་སྐྱེས་ནས་འོང་སྙམ་ན་ཤི་ནས་གར་སྐྱེ་ལས་ལ་རག་ལས་པས། ལས་དགེ་བ་བྱས་པས་མངོན་མཐོ་ལྷ་མིའི་གོ་འཕང་ཐོབ་ལ། མི་དགེ་བས་ངན་འགྲོར་སྐྱེ་བར་འགྱུར་ཏེ། རིན་ཆེན་ཕྲེང་བ་ལས། དགེ་བ་ལས་ནི་བདེ་བ་དང་། །དེ་བཞིན་བདེ་འགྲོ་ཐམས་ཅད་དོ། །མི་དགེ་བ་ལས་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་

དོ། །ཞེས་གསུངས་པ་ལྟར་འཇིག་རྟེན་ཕ་རོལ་ཏུ་རྣམ་པར་ཤེས་པ་ལས་དཀར་ནག་གི་རྗེས་སུ་འབྲངས་ཤིང་། གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་ལས་མ་འདས། དེ་ཡང་དམྱལ་བ་སོགས་ཀྱི་སྡུག་བསྔལ་ནི་ཐོས་སམ་གཟུགས་བརྙན་རི་མོར་བྲིས་པ་མཐོང་ནའང་བཟོད་པར་དཀའ་ཙམ་ན་ཇི་བཞིན་ཐོག་ཏུ་བབས་ན་ཅི་ལ་བཟོད། མ་ཟད་རང་རེ་མིའི་གནས་ནའང་སྤྱི་མཐུན་ལ་སྐྱེ་རྒ་ན་འཆི་དང་། དབུལ་ཕོངས་འབྱོར་རྒུད། འདུ་འབྲལ། སྡིག་ལྟུང་སྲོག་གཅོད་སོགས་བསམ་ལས་འདས་ཤིང་། ལྷ་མིན་རྣམས་ལྷའི་དཔལ་ལ་ཕྲག་དོག་པས་འཐབ་རྩོད་ཀྱི་སྡུག་བསྔལ་དཔག་ཏུ་མེད་ཅིང་། འདོད་པའི་ལྷ་ལའང་བག་མེད་པའི་འཆི་འཕོ་ལྟུང་གི་སྡུག་བསྔལ། འཐབ་རྩོད་སོགས་ཀྱི་སྡུག་བསྔལ་ཡང་ཡོད། ཁམས་གོང་མ་གཉིས་ན་རེ་ཞིག་སྡུག་བསྔལ་མངོན་གྱུར་མེད་ཀྱང་ཟག་བཅས་ཀྱི་དགེ་བའི་འཕེན་ཤུགས་ཟད་ནས་སླར་ངན་འགྲོར་ལྟུང་བར་འགྱུར་ཏེ། བཤེས་སྤྲིང་ལས། ལྷ་ཡུལ་འདོད་བདེ་ཤིན་ཏུ་ཆེན་པོ་དང་། །ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་འགྱུར་བ་ཡི། །

སྡུག་བསྔལ་རྒྱུན་མི་ཆད་པ་བསྟེན་འཚལ་ལོ། །ཞེས་གསུངས་པ་ལྟར་ཁམས་གསུམ་འཁོར་བའི་གནས་འདིར་གང་དུ་སྐྱེས་ཀྱང་སྡུག་བསྔལ་གྱི་རང་བཞིན། སུ་དང་འགྲོགས་ཀྱང་སྡུག་བསྔལ་གྱི་གྲོགས། ཅི་ལ་ལོངས་སྤྱད་ཀྱང་སྡུག་བསྔལ་གྱི་རང་བཞིན་ལས་མ་འདས་ཤིང་། བདེ་བའི་གོ་སྐབས་ཅུང་ཟད་ཀྱང་མེད་པ་སྟེ། དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །མི་རྣམས་འཚོ་བ་ཐུང་བས་ཉམས། །ལྷ་མིན་འཐབ་ཅིང་རྩོད་པས་ཉམས། །ལྷ་རྣམས་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ན། །བདེ་བ་ནམ་ཡང་ཡོད་མ་ཡིན། །ཞེས་གསུངས་པ་ལྟར་ད་རེས་འདི་ནས་ངེས་པར་ཐར་པ་ཞིག་བྱ་དགོས་ཏེ། སློབ་དཔོན་ཆེན་པོས། འཇིག་རྟེན་བྱ་བ་བརྩོན་ཡང་ཟིན་པ་མེད། །ཆོས་ལ་འབད་ན་ལས་ཐབས་མྱུར་དུ་ཟིན། །འཁོར་བའི་བྱ་བ་ལེགས་ཀྱང་མཐའ་མ་ཕུང་། །དམ་ཆོས་སྤྱད་པའི་འབྲས་བུ་ཉམས་མི་སྲིད། །དེ་ཕྱིར་འཁོར་བའི་སྡུག་བསྔལ་ཡོངས་ཤེས་ནས། །སྟོང་ཉིད་སྙིང་རྗེ་ཟུང་འཇུག་གོམས་པར་

མཛོད། །ཅེས་གསུངས་པ་ལྟར། །དེ་ལ་བདག་ཅག་གི་སྟོན་པ་ཐབས་མཁས་ཐུགས་རྗེ་ཆེན་པོ་མངའ་བ་དེ་ཉིད་ནས་གདུལ་བྱའི་བསམ་པ་དང་། དབང་པོ། སྐལ་བའི་ཁྱད་པར་དང་རྗེས་སུ་མཐུན་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དུ་གསུངས་པ་ཐམས་ཅད་མདོར་བསྡུ་ན་ཐེག་པ་རིམ་པ་དགུའམ། རྒྱུ་ཕ་རོལ་ཏུ་ཕྱིན་པའི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སུ་བསྡུ་སྟེ། ཀུན་བྱེད་ལས། ཐེག་པ་རིམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་སྔགས་ཀྱི་ཐེག་པའོ། །ཞེས་གསུངས་པ་ལྟར་ཐེག་ཆེན་ཕ་རོལ་ཏུ་ཕྱིན་པ་བདེན་པ་གཉིས་ལ་བཟང་ངན་བླང་དོར་དུ་བལྟ་བ་ལས། འདིར་ཀུན་རྫོབ་ཏུའང་ཆོས་རྣམས་ལ་མི་གཉིས་པའི་བསམ་སྤྱོད་དང་ལྡན་པས་འབྲས་བུའི་ངོ་བོ་སྣང་སྟོང་ཟུང་འཇུག་གི་ཆོས་སྐུར་རྟོགས་པར་བྱས་ལ། ཏིང་ངེ་འཛིན་གྱི་གོམས་པར་བྱས་པའི་ཕྱིར་འབྲས་བུ་ལམ་བྱེད་ཀྱིས་འཕགས་པ་གསང་སྔགས་རྡོ་རྗེ་ཐེག་པ་ཡིན། དེ་ལྟར་ཡང་སྒྱུ་འཕྲུལ་གསང་སྙིང་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་གསུངས་ཤིང་། དེའང་བསྒྱུར་སྔ་ཕྱི་ལ་བརྟེན་

ནས་གསར་རྙིང་གཉིས་ལས། འདིར་གསར་མ་ལས་ཆེ་བ་དྲུག་ལྡན་གྱི་ཁྱད་པར་དུ་འཕགས་པ་གསང་སྔགས་རྙིང་མ་ཡིན། དེ་ལའང་ཕྱི་ཐུབ་པ་རྒྱུད་ཀྱི་ཐེག་པ་ཀྲི་ཡོག་སྡེ་གསུམ་དང་། ནང་པ་ཐབས་ཀྱི་ཐེག་རྒྱུད་བསྐྱེད་རྫོགས་རྣམ་པ་གསུམ་སྟེ་དྲུག་ཏུ་དབྱེ་བའི་རང་སྐད་ཐུན་མོང་མིན་པ་ལས་ནང་རྒྱུད། དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས། །འདིར་སྒྲུབ་སྡེའི་སྡེ་ཚན་དུ་གཏོགས་ཤིང་རྒྱུད་ལུང་མན་ངག་གསུམ་ཀའི་སྙིང་པོ་གཅིག་དྲིལ་ཟབ་པ་ལས་ཀྱང་ཆེས་ཟབ་པའི་གདམས་པ་ཡིན། དེ་ཡང་སྤྱིར་སྔ་འགྱུར་རྙིང་མ་ལའང་རིང་རྒྱུད་བཀའ་མ། ཉེ་བརྒྱུད་གཏེར་མ་ཟབ་མོ་དག་སྣང་གི་བཀའ་སྲོལ་གསུམ་དུ་བཞུགས་པ་ལས། འདི་ནི་ཉེ་བརྒྱུད་ཟབ་མོ་གཏེར་གྱི་ཕྱོགས་སུ་གཏོགས་པ། བཀའ་མ་ལས་བརྒྱུད་པ་དྲུག་ལྡན་གྱི་ཁྱད་པར་དུ་འཕགས་པ་བོད་ཡུལ་གཙང་གི་ཇོ་མོ་ཁ་རག་པའི་གཏེར་སྟོན་ཀུན་བཟང་བདེ་ཆེན་རྒྱལ་པོ་རྩལ་གྱི་ཟབ་གཏེར་ཡང་གསང་རྟ་ཕག་ཡིད་བཞིན་ནོར་བུའི་དཀྱིལ་འཁོར་དུ་དབང་བསྐུར་བར་བྱེད་པ་ལ། ཇི་སྐད་དུ། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་

འཆང་གི་གསུངས་པ་སྟེ། །ཞེས་གསུངས་པ་ལྟར་དབང་བསྐུར་བ་དེ་ཡང་དཀྱིལ་འཁོར་སྔོན་དུ་འགྲོ་བ་ཅན་ཡིན་ལ། དཀྱིལ་འཁོར་ལ་དབྱེ་ན་དཀྱིལ་འཁོར་རྣམ་པ་གསུམ་དུ་གསུངས་པ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ཅིང་། འདིར་ཏིང་ངེ་འཛིན་ལ་བརྟན་པ་རྗེས་མཐུན་ཙམ་ཐོབ་པ་ལ་སོགས་པའི་སློབ་དཔོན་གྱིས་ནི་གདུལ་བྱ་དམན་འབྲིང་རབ་དང་། ཡང་རབ་སོ་སོར་རྡུལ་ཚོན། རས་བྲིས། ཚོམ་བུ། བླ་མའི་ལུས་དཀྱིལ་ལ་བརྟེན་པའི་ཚུལ་བཞི་ལས། ད་ལམ་རས་བྲིས་ལ་བརྟེན་པ་སྟེ། དེ་ཡང་ནུབ་དང་པོ་སྟ་གོན་གྱི་ཆོ་ག་སྟེ། དེ་ལ་གསུམ་ལས་ལྷ་དང་བུམ་པའི་སྟ་གོན་བདག་གི་བྱ་བ་སོང་ནས། ད་སློབ་མ་སྟ་གོན་དེ་སྐབས་སུ་བབས་པ་ཡིན་པས་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ། ལྷག་གནས་ཀྱི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྡ་སྦྱར་ལ། སློབ་མ་རྣམས་ཀྱིས་སྔར་མེ་ཏོག་བཀྲམ་བསྡུ་བྱས་པའི་མཎྜལ་ཕུལ། དེ་ནས་བློ་བཅོས་པ་ནི། ཁྱེད་ཅག་ཟུང་འཇུག་སྐུ་བཞི་དང་ཡེ་ཤེས་ལྔ་ཡི་བདག་ཉིད་མི་སློབ་པའི་གོ་འཕང་མངོན་དུ་བྱ་བའི་ཆེད་དུ་དཀྱིལ་འཁོར་འདིར་འཇུག་པ་བྱ་ཡི། དེ་ལས་གཞན་དུ་སྲིད་པ་མངོན་

མཐོའི་བདེ་འབྱོར་དང་། ཞི་བདེ་ཉན་རང་གི་འབྲས་བུ་ཡང་དོན་དུ་གཉེར་བྱ་མ་ཡིན། དེ་བས་ན་སེམས་ཅན་ཐམས་ཅད་གདོད་ནས་རང་བཞིན་གྱི་རྣམ་པར་དག་པས་འཁོར་བ་མེད་བཞིན་སྣང་བའི་ཆོས་ཡིན་ཀྱང་། དེ་ལྟར་མ་རྟོགས་པ་འཁོར་བར་འཁྱམས་པའི་སེམས་ཅན་འདི་རྣམས་ཕན་ཚུན་མ་བུ་ཁྱོ་ཤུག་སོགས་ལན་གྲངས་ཇི་སྙེད་པ་བྱས་ནས་ཕན་བཏགས་ཏེ་ཚད་མེད་པའི་དྲིན་ཅན་ཤ་སྟག་ཡིན་ལ། འདི་དག་ཐམས་ཅད་འཁོར་བ་སྤྱི་བྱེ་བྲག་གིས་སྡུག་བསྔལ་གྱིས་ནི་མནར། བདེ་བའི་ཐབས་ནི་མི་ཤེས། བདེ་བར་སེམས་ཀྱང་སྡུག་བསྔལ་གྱི་རྒྱུ་ཁོ་ནར་བརྩོན་པས། ཞེ་འདོད་དང་། ལག་ལེན་གོ་ལྡོག་ཏུ་གྱུར་པའི་སྨྱོན་པ་ལྟ་བུ་འདི་རྣམས་ལ་བུ་སྡུག་ཤི་བའི་དུས་ཀྱི་མ་བཞིན་དུ་སྙིང་རྗེ་ཚད་མེད་པ་དུང་དུང་བ་དང་བཅས་ཏེ། ཤེས་རབ་དང་སྙིང་རྗེ་ཆེན་པོས་སྲིད་ཞིའི་མཐར་མི་ལྟུང་བའི་མྱང་འདས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྡོ་རྗེ་ཐེག་པའི་ལམ་གྱི་རྩ་བ་སྨིན་བྱེད་ཀྱི་ལམ་ལ་རིམ་བཞིན་དུ་བསླབ་པར་བྱ་སྙམ་དུ་རྙོག་པ་དང་བྲལ་བའི་བྱང་ཆུབ་ཀྱི་སེམས་ཡང་དག་པ་ཞིག་

བསྐྱེད་པ་བྱ་སྙམ་ལ་འདིའི་རྗེས་ཟློས་མཛོད། ཀྱེ་ཧོ། རྡོ་རྗེ་འཛིན་པ་དགོངས་སུ་གསོལ༔ མཁའ་ཁྱབ་འགྲོ་རྣམས་བསྒྲལ་བ་དང་༔ སྨིན་གྲོལ་ལམ་ལ་འགོད་ཕྱིར་དུ༔ བྱང་ཆུབ་ལམ་ལ་སེམས་བསྐྱེད་དོ༔ ཞེས་ལན་གསུམ། དེ་ནས་སྡོམ་གཟུང་དང་། སྐྱབས་སེམས་སོགས་དངོས་གཞིའི་སྐབས་བཞིན་འོག་ནས་ལེན་པར་བྱ། དེ་ནས་སློབ་མ་ལྷར་བསྐྱེད་པ་ནི། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་ཁྱེད་རང་རྣམས་ལ་ཕོག་པས་འོད་དུ་ཞུ་བ་ལས་དབང་ཆེན་རྟ་ཕག་ཡབ་ཡུམ་གྱི་སྐུར་གྱུར། སློབ་དཔོན་གྱི་རྡོ་རྗེ་དང་བཅས་པའི་དྲིའི་ཆུས་ཁྱེད་རང་རྣམས་སྤྱི་མགྲིན་སྙིང་གར་རེག་ལ་ཐིག་ལེ་བྱ་སྟེ། ཨོཾ་ཨཱཿཧཱུཾ་ཞེས་བརྗོད་པས་གནས་གསུམ་དུ་འབྲུ་གསུམ་བྱུང་། ཡང་མས་ནས་ཡར་སྙིང་མགྲིན་དཔྲལ་བ་རྣམས་སུ་རེག་སྟེ་ཧཱུྃ་ཨཱཿཨཾཨོཾ་ཞེས་བརྗོད་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་གྱུར་པར་བསམ། སླར་ཡང་དཔྲལ་བ་ནས་མར་རེག་སྟེ་ཨོཾ་ཨཱཿཧཱུཾ་ཞེས་བརྗོད་པས་སྒོ་གསུམ་རྡོ་རྗེ་གསུམ་དུ་བརྟན་པར་བྱས་པའི་མོས་པ་མཛོད། དེ་ལྟར་བསྐྱེད་པ་མཆོད་པའི་ཡུལ་དུ་བཟུང་བ་ཡིན་པས། ཉེར་སྤྱོད་བཞི་བཏེག་སྟེ་དབང་པོ་སོ་སོར་མཆོད་པའི་

མོས་པ་མཛོད་ཅིག །ཨོཾ་བཛྲ་པུཥྤ་པྲ་ཏཱིཙྪ་སྭཱ་ཧཱ། དེ་བཞིན་དུ། དྷཱུ་པེ། ཨ་ལོ་ཀེ། གནྡྷེ་ཞེས་སྦྱིནནོ། དེ་ནས་དངོས་གྲུབ་ཀྱི་སྐལ་བ་བརྟག་པ་ལ་གཉིས་ལས། དང་པོ་སོ་ཤིང་དོར་ཏེ་བརྟག་པ་ནི། ཧཱུཾ་ལས་སོ་ཤིང་བྱང་ཆུབ་ཀྱི་ཤིང་གི་རང་བཞིན་སོར་བཅུ་གཉིས་དྲིས་བྱུག་ཅིང་རྩེར་མེ་ཏོག་གི་ཅོད་པན་ཅན་དངོས་གྲུབ་ཀྱི་ལྟས་བརྟག་པའི་ནུས་པ་དང་ལྡན་པར་གྱུར། དེ་བཞིན་ཐལ་མོའི་བར་དུ་བྱིན་པ་ལ་རྩེ་མོས་སོ་དྲུད་ནས་དོར་བ་དང་བཅས་འདིའི་རྗེས་ཟློས་མཛོད། ཧོ། བླ་མས་གནང་བའི་སོ་ཤིང་འདི༔ ཡི་དམ་ལྷ་ཚོགས་ངོས་འཛིན་ཕྱིར༔ དཀྱིལ་འཁོར་དབུས་སུ་བདག་དོར་རོ༔ བཀའ་བབས་ལྷ་དེར་བབ་པར་ཤོག༔ ཨོཾ་བཛྲ་ཧ་ས། ཞེས་རབ་ཕྲུ་གང་གྲུ་བཞིར་བ་བྱུང་དྲི་བཟང་བཅས་བྱུགས་པར་ཚོམ་བུ་བཀོད་པའི་ཁར་དོར་དུ་བཅུག་ནས་རྩེ་མོ་སྟེང་དུ་བསྟན་ན་མཆོག་དང་། ཕྱོགས་བཞིར་ལས་བཞི། མཚམས་བཞིར་བུམ་བཟང་སོགས་ཕྲ་མོའི་དངོས་གྲུབ་འགྲུབ་པའི་ལྟས་སོ། ཞེས་ལུང་བསྟན། གཉིས་པ་རྨི་ལམ་བརྟག་པ་ལ་སྦྱོར་དངོས་གཉིས་ཀྱི་སྦྱོར་བ་ལའང་གསུམ་ལས། དང་པོ་རྨི་ལམ་གསལ་བའི་ཕྱིར་ཁྱོར་ཆུ་བླུད་པ་ནི། དྲིའི་ཆུ་ཁྱོར་བར་ལན་གསུམ་བྱིན་པ་འཐུང་ལ་

ལྷག་མ་རྒྱབ་ཏུ་དོར་ཅིག་ཅེས། ཨོཾ་ཧྲཱིཿ བི་ཤུདྡྷ་སརྦ་པཱ་པཾ་ནི་ཙ་ཨཱ་སྱ་ཤོ་དྷ་ཡ་སྭཱ་ཧཱ༔ ཞེས་ལན་གསུམ་བླུད་དོ། གཉིས་པ་རྨི་ལམ་མི་སྒྲིབ་པའི་ཕྱིར་སྲུང་སྐུད་གདགས་པ་ནི། ལུས་ཚད་དང་མཉམ་པའི་སྲུང་སྐུད་ཁ་དོག་ལྔ་ལྡན་རྡོ་རྗེའི་མདུད་པ་གསུམ་དང་བཅས་པ་ལ་ཡེ་ཤེས་ཀྱི་སྲད་བུ་སྤྱན་དྲངས་ཏེ་ཐིམ་པས་རྡོ་རྗེ་སློབ་མའི་སྒོ་གསུམ་གྱི་བར་ཆད་སྲུང་བའི་ནུས་པ་དང་ལྡན་པར་གྱུར་པར་བསམ་ལ་རྩ་སྔགས་ཀྱིས་བཏབ་ལ་ཕོའི་དཔུང་པ་གཡོན་དང་། མོའི་གཡས་སུ་བཅིངས་ལ། ཧཱུཾ། ཡེ་ཤེས་ལྔ་ལྡན་སྲད་བུ་འདི༔ ལུས་ཀྱི་སྒྲིབ་པ་བསལ་བའི་ཕྱིར༔ ཡི་དམ་སྙིང་པོའི་སྔགས་ཀྱིས་བཏབ༔ བར་གཅོད་བདུད་ལས་རྒྱལ་གྱུར་ཅིག༔ ཅེས་དང་། རྩ་སྔགས་དང་བཛྲ་རཀྵ་ཧཱུཾ་ཕཊ༔ བཛྲ་ཨ་མྲྀ་ཏེ་ཧཱུཾ༔ ཀུཎྜ་ལི་ཧཱུྃ༔ བརྗོད་བཞིན་དུ་ལས་ཆུས་ཁྲུས་དང་། རྡོ་རྗེ་རྒྱ་གྲམ་དུ་བྱའོ། །གསུམ་པ་རྨི་ལམ་མི་འཁྲུགས་པའི་ཕྱིར་ཀུ་ཤའི་སྔས་གདན་བྱིན་པ་ནི༔ ཀུ་ཤ་སྔོ་ལྗང་རྩ་རྩེ་མ་ཉམས་པ་རྨི་ལམ་མི་འཁྲུགས་པར་བྱེད་པའི་ནུས་པ་ཅན་དུ་གྱུར་བསམ་པས། དྡྷཱི་བཟླས་པའི་ཀུ་ཤ་ཆུང་བ་སྔས་ཀྱི་དོན་དུ་ལག་གཡས་དང་། ཧཱུཾ་བཟླས་པའི། ཆེ་བ་སྟན་གྱི་དོན་དུ་གཡོན་དུ་གཏད། མི་ལྡོག་པའི་དོན་དུ་ཆོས་བཤད་པས་སྤྲོ་བ་བསྐྱེད་པ་

ནི། རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གི་ཉམས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །ཞེས་བྱ་བ་སོགས་གསུངས་ཏེ། དེའང་འཇིག་རྟེན་ན་ཨུ་དུམ་ཝཱ་རའི་མེ་ཏོག་དཀོན་པ་ལྟར་སངས་རྒྱས་འཇིག་རྟེན་དུ་འབྱོན་པའང་དཀོན། བྱོན་ཀྱང་ཆོས་གསུངས་པ་དང་། ཁྱད་པར་ཐེག་ཆེན་དེ་བས་ཀྱང་རྡོ་རྗེ་ཐེག་པ་གསུངས་པ་དཀོན། དེ་བཞིན་དཀོན་པ་ཙམ་དུ་མ་ཟད་དཀོན་ལ་རྙེད་ན་དེ་བས་ཀྱང་ཕུལ་དུ་ཆེ་སྟེ། དེའི་རྒྱུ་མཚན་བསྐལ་པ་བྱེ་བ་དུ་མར་བསགས་པའི་སྡིག་སྒྲིབ་དཀྱིལ་

འཁོར་མཇལ་བ་ཙམ་གྱིས་འདག་པར་འགྱུར་ན། དབང་ཐོབ་ཅིང་ཉམས་སུ་བླངས་ན་སྲིད་པ་ལས་ཐར་བ་སྨོས་ཅི། དེའི་ཕྱིར་ཁྱེད་ཅག་བདེ་ཞིང་མྱུར་བའི་ལམ་འདི་ལ་བརྟེན་ནས་བླ་ན་མེད་པའི་བྱང་ཆུབ་མྱུར་དུ་འཐོབ་པ་གདོན་མི་ཟ་བས་རྙེད་པའི་མཆོག་རྙེད་པར་དགའ་བ་སྒོམ་པར་འཚལ། ཧོ། ལས་འཕྲོ་སྐལ་ལྡན་རིགས་ཀྱི་བུ༔ ཀུ་ཤ་གཙང་མའི་རྩ་མཆོག་འདི༔ དངོས་གྲུབ་མཚན་བརྟགས་གསལ་བའི་ཕྱིར༔ ཁྱེད་ཀྱི་ཉལ་བའི་སྔས་གདན་གྱིས༔ རྨི་ལམ་བཟང་ངན་བདག་ལ་སྨོས༔ ཨོཾ་བཛྲ་ཏིཀྵ་ཋ་སིདྡྷི་ཧཱུཾ༔ ཞེས་བརྗོད། དེ་ནས། དོ་ནུབ་བླ་མ་དང་དཀྱིལ་འཁོར་ལ་མགོ་ཕྱོགས་པས་ཀུ་ཤའི་སྔས་གདན་ལ་སེང་གེ་ཉལ་སྟབས་ཀྱིས་སེམས་དགེ་བ་དང་ལྡན་པས་ཉོལ་ལ་ཐོ་རངས་ཀྱི་རྨི་ལམ་བཟང་ངན་ཇི་ལྟར་བྱུང་ཡང་ནང་པར་ཁོ་བོ་ལ་སྨོས་ཤིག །དེས་སྔོན་འགྲོ་སྟ་གོན་གྱི་ཆོ་ག་གྲུབ་པ་ལགས། སང་ཉིན་དངོས་གཞི་དབང་བསྐུར་བའི་ཆོ་ག་འབྱུང་བ་ལགས་སོ། །ཞེས་བརྡ་སྤྲད་དེ་དགེ་བ། བསོད་ནམས་འདི་ཡིས་སོགས་ཀྱིས་རྫོགས་བྱང་དུ་བསྔོས་ནས་རང་གནས་སུ་བཏང་ངོ་། །སློབ་དཔོན་གྱིས་ལྷ་སྟ་གོན་གྱི་འཕྲོས་སྙན་གསན་དབབ་པ་ནི། པུས་གཡས་བཙུགས། སྤོས་དྲིལ་གསིལ་དང་བཅས་

ཏེ། ཨོཾ། དབང་ཆེན་རྟ་ཕག་དཀྱིལ་འཁོར་ལྷ། །སྔོན་གྱི་ཞལ་བཞེས་དགོངས་མཛོད་ལ། །བདག་དང་སློབ་མ་རྣམས་དོན་དུ། །བཅོམ་ལྡན་ཁྱེད་ལ་མཆོད་བགྱིད་ན། །དགྱེས་མཛད་བརྩེ་བས་དགོངས་ནས་ནི། །ནང་པར་འདི་ལ་འབྱོན་པར་མཛོད། །ཅེས་ལན་གསུམ་བརྗོད་ལ། མཐར་གོང་བཞིན་མཆོད་དེ། བཛྲ་མུཾཿ སེ་གོལ་དང་བཅས་གཤེགས་གསོལ་བྱ་བས་གྲུབ་བོ། །ནང་པར་རྨི་ལམ་དགེ་ན་གཟེང་བསྟོད་དང་། ངན་ན་བཟློག་ཐབས་ལ་སློབ་པར་བྱའོ། །དེ་ནས་དངོས་གཞི་ལ་སྦྱོར་དངོས་གཉིས་ལས། སྦྱོར་བ་གཤམ་བཀོད་ནི། གཏེར་གཞུང་ལས། གང་དུ་དབང་གི་དཀྱིལ་འཁོར་ནི༔ སྟེགས་བུ་ཟླ་གམ་གྲུ་བཞི་པར༔ སྒོ་རྫོགས་གཞུང་བཞིན་བྲིས་པའི་དབུས༔ ལྟེ་བར་མེ་ཤེལ་གསུམ་སྒྲོམ་སྟེང་༔ བུམ་པ་དབང་ཆེན་ཆས་རྫོགས་ཀྱི༔ སྟེང་དུ་དར་དམར་མེ་ཤེལ་གུར༔ གཡས་གཡོན་བདུད་རྩིའི་དབང་གཏོར་དང་༔ སྨན་རཀ་གཏོར་ཚོགས་ཅི་འབྱོར་བཤམས༔ ཞེས་གསུངས་པ་བཞིན་ཕྱག་ལེན་དུ། རས་བྲིས་དཀྱིལ་འཁོར་ངེས་པར་འདུ་བྱ་ཞིང་། ཅི་སྟེ་མ་འབྱོར་ན་མཎྜལ་ཚོམ་བུ་སྟ་གོན་བཞིན་བཀོད་པའི་ཁར་མཉྫི་ལ་གཙོ་བོའི་བུམ་པ་བཀོད། དེའི་གཡས་གཡོན་དུ་གསང་དབང་གི་བྷནྡྷ་དང་། དབང་གཏོར། སྔགས་ཕྲེང་རིག་ཙཀ། མེ་ལོང་། ཤེལ་རྡོ་རྣམས་དང་། མདུན་རྒྱབ་གང་བདེར་སྨན་རཀ་གཏོར་གསུམ་དང་། ཉེར་སྤྱོད་བསྐོར་བཤམས། །གཞན་ཡང་ཚོགས་ཀྱི་ཡོ་བྱད་

སོགས་འོག་ཏུ་དགོས་པ་མ་ཚང་བ་མེད་པ་དང་། མདུན་དུ་རྡོར་དྲིལ་ནང་མཆོད་འཐོར་ནས་སོགས་ཀྱང་འདུ་བྱས་ལ། སྔོན་འགྲོ་ནས་བཟུང་དངོས་གཞི་བདག་མདུན་བུམ་གསུམ་གྱེར་ཚིག་གཅིག་གིས་སྒྲུབ་པ་སོགས་ལས་བྱང་མཐར་ཆགས་ལ། རྩ་བཟླས་རྗེས་གཙོ་ལས་ཀྱི་བུམ་བཟླས་གཟུངས་ཐག་དང་བཅས་སྟ་གོན་བཞིན་བྱ་བ་དང་། སྤྱི་དང་བྱེ་བྲག་གི་སྲུང་མར་གཏོར་བསྔོ། ཚོགས་བསྐང་བཤགས་ཀྱིས་མཐར་དབྱུང་། སྤྲོ་ན་བདག་འཇུག་ཀྱང་སློབ་མ་ལ་ཇི་ལྟར་བྱ་བ་ལྟར་ལེན། བསྡུ་ན་རྙིང་མ་སྤྱིའི་ཕྱག་བཞེས་བཞིན་རིག་པའི་མེ་ཏོག་དོར་བས་ཀྱང་གྲུབ། སློབ་བུ་རྣམས་ཁྲུས་དང་། ཕྱག་བྱས་ལ་གྲལ་དུ་འཁོད། བགེགས་གཏོར། སྲུང་འཁོར། ལས་རྡོར་གྱི་མེ་ཏོག་བཀྲམ་བསྡུ་རྣམས་སྟ་གོན་བཞིན་དང་། དེ་ནས་སློབ་དཔོན་གྱིས། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་སོགས་ནས། རྟ་ཕག་ཡིད་བཞིནནོར་བུའི་དཀྱིལ་འཁོར་དུ་དབང་བསྐུར་བར་བྱེད་པ་ཡིན་ཏེ། ཞེས་པའི་བར་སྟ་གོན་ལྟར་ལ། དེ་ཡང་ཐོག་མར་ལོ་རྒྱུས་ཀྱི་སྒོ་ནས་ངེས་ཤེས་བསྐྱེད་དགོས་པ་སྟེ། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤདན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་གསུངས་པའི་ཕྱིར་མདོ་ཙམ་ཞིག་སྨོས་ན། འཛམ་གླིང་སྤྱི་དང་གངས་ཅན་པར་བཀའ་དྲིན་ལྷག་པར་ཆེ་བ་སངས་རྒྱས་གཉིས་པ་ཨོ་

རྒྱན་གྱི་སློབ་དཔོན་ཆེན་པོ་པདྨ་ཀཱ་རའི་བོད་ཀྱི་ཐུགས་སྲས་རྗེ་འབངས་ཉེར་ལྔའི་ནང་ཚན་ཡེ་ཤེས་མཚོ་རྒྱལ་གྱི་རྡོ་རྗེ་ཕུར་པའི་སྒྲུབ་གྲོགས་རླངས་དཔལ་གྱི་སེངྒེའི་སྐྱེས་མཐའ་རིག་འཛིན་སྟོབས་ལྡན་རྡོ་རྗེའི་སྤྲུལ་སྐུ་གཏེར་སྟོན་བདེ་ཆེན་རྒྱལ་པོ་རྩལ་ཞེས་པ་ཉིད་དགུང་གྲངས་སོ་གཉིས་སུ་ཕེབས་པ་མེ་མོ་ཕག་གི་ལོ་བོད་ཡུལ་དབུས་ཀྱི་དཔལ་ཆུ་བོ་རིར་ཐུགས་དམ་བཅད་རྒྱ་ཤིན་ཏུ་དམ་པོར་བཞུགས་པའི་དུས་ཁྲུམས་ཟླའི་ཚེས་བཅོ་ལྔའི་ཐོ་རངས་བུད་མེད་རྒྱན་ཆས་ཤིན་ཏུ་མཛེས་པར་བཀླུབས་པ་ཞིག་གིས་ཁྱེད་རང་འདི་ནས་ཤར་ཕྱོགས་ཟངས་ཡག་བྲག་ཏུ་བཞུད་ན། གུ་རུའི་ལུང་བསྟན་ཞིག་ཡོང་བ་ཡོད་ཅེས་གླེང་ཡང་ཉིད་ནས་ཐུགས་སྣང་མ་མཛད་རུང་། སླར་ཡང་བུད་མེད་དེ་གས་བསྐུལ་མ་ཡང་དང་ཡང་དུ་བྱུང་བར་བརྟེན་ས་བྱི་དབོ་ཟླ་ར་བར་ཟངས་ཡག་བྲག་ཏུ་ཕེབས་བཞིན་བཞུགས་པའི་ཚེ་དཀར་ཕྱོགས་ཀྱི་རྫོགས་པ་གསུམ་པའི་ཐོ་རངས་ཀྱི་ཆར་འཇའ་ཚོན་ཁ་དོག་ལྔ་ལྡན་གྱི་ཀློང་ན་གུ་རུ་པདྨ་འབྱུང་གནས་རྒྱལ་པོའི་ཆས་དང་། མནྡྷ་ར་བ་རབ་བྱུང་གི་ཆས། མཚོ་རྒྱལ་བོད་མོའི་ཆས་སུ་ཡོད་པ་དང་བཅས་

དཔའ་བོ་མཁའ་འགྲོ་མང་པོས་མཆོད་པ་སྣ་ཚོགས་པ་ཐོགས་ནས་གླུ་གར་མཛད། གཞན་ཡང་མ་ངེས་པའི་རྣམ་འགྱུར་སྣ་ཚོགས་དང་། པེ་ཧར་རྒྱལ་པོའི་སྤོས་སྣ་དྲངས་པའི་གསེར་སྦྲེང་ཚར་དུ་དངར་ཞིང་། ལྷ་སྲིན་མཁའ་ལ་སྤྲིན་ཕུང་གཏིབས་པ་བཞིན་མངོན་སུམ་དུ་གཟིགས་པར་མོས་གདུང་དྲག་པོས་གསོལ་བ་འདེབས་པར་མཛད་པས་གུ་རུའི་ཞལ་ནས། ཨ་ཧོ། ང་ཡི་བུ་ཆུང་སྙིང་དང་འདྲ་བ་ཉོན༔ བདག་འདྲ་ཨོཾ་ཌཱི་པདྨ་ཀཱ་ར་ཡི༔ ལས་འབྲས་བསླུ་མེད་ང་ཡིས་སྨྲ་བའི་ཚིག༔ ཙིཏྟར་སྟིམས་ཤིག་སྐལ་ལྡན་རིགས་ཀྱི་བུ༔ སྔོན་གྱི་བག་ཆགས་བཟང་པོ་དྲན་དུས་ཡིན༔ སྦས་ཡུལ་པདྨ་བཀོད་ཀྱི་གནས་མཆོག་ཏུ༔ ང་ཉིད་སྨན་བླའི་ཚུལ་བཟུང་ཁྲི་ཡི་གཡོན༔ སྟོབས་ལྡན་རྡོ་རྗེའི་དངོས་གྲུབ་སྐལ་བ་ཞིག༔ སྦས་པའི་རྒྱ་ཡི་རིམ་པར་བསྡམས་ནས་ཡོད༔ མ་འོངས་དུས་སུ་སྐྱེས་མཐའ་ཁྱེད་ཉིད་ལ༔ དངོས་གྲུབ་དེ་ཡི་སྐལ་བ་མཆིས་པའི་དུས༔ སྐྱེ་སྔོན་རྟེན་འབྲེལ་དག་པའི་འཕེན་ཤུགས་ཀྱིས༔ ཤོག་སེར་དངོས་ནི་པདྨ་བཀོད་ཞིང་ནས༔ སྔོན་སྨོན་མཐུ་ཡིས་མཁའ་འགྲོས་སྟེར་ནས་འོང་༔ འདི་ནས་བརྩམས་པས་

བྱང་ཤར་གཏེར་སྒྲོམ་དུ༔ ཤོག་སེར་མཚོ་རྒྱལ་ལག་ཏུ་བཟུང་བྱས་ནས༔ མཚོ་རྒྱལ་དངོས་ཀྱིས་བརྡ་ཚིག་བཤད་པ་འབྱུང་༔ རྒྱ་བོད་ཧོར་སོག་ཡུལ་དུ་སྤེལ་བྱས་ནས༔ ཆོས་འདིས་འགྲོ་དོན་དཔག་མེད་འོང་བར་གྱིས༔ ཞེས་གསུངས་ནས་གནས་དེར་ཉིན་ཞག་བདུན་གྱི་རིང་ལ་ནམ་མཁའ་འཇའ་འོད་ཀྱིས་གང་བ་ཀུན་གྱིས་མཐོང་བ་བྱུང་། མཐར་ལུང་བསྟན་ལྟར་སརྒ་མ་འཆོལ་བར་ཟབ་གཏེར་དངོས་སུ་སྤྱན་འདྲེན་པའི་ཚེ་ངོ་མཚར་བའི་ལྟས་མཐའ་ཡས་པ་དང་བཅས་རྔ་ཡབ་པདྨ་འོད་དུ་གུ་རུ་པདྨ་རྒྱལ་པོ་སྐུ་གཟི་བརྗིད་མཆོག་ཏུ་འབར་བའི་དྲུང་དུ་དཀྱིལ་འཁོར་ལྟ་བའི་ཆོག་མི་ཤེས་པ་དང་བཅས་གུ་རུ་དངོས་ལས་དབང་དང་གདམས་ངག་ཡོངས་རྫོགས་གསན་པའི་ཟབ་གསང་མཁའ་འགྲོའི་སྙིང་ཁྲག་དྭངས་མའི་ཡངས་བཅུད་གཞན་ལས་ཁྱད་པར་དུ་གྱུར་པ་འདི་ཉིད་ཀྱི་བརྒྱུད་པ་ནི་སྐུ་གསུམ་བརྒྱུད་པ་དྲུག་ལྡན་གཅིག་འདུས་ཀྱི་ངོ་བོ་གཏེར་སྟོན་རིག་འཛིན་ཆེན་པོ་ཀུན་བཟང་བདེ་ཆེན་རྒྱལ་པོ། དེས་གཏེར་སློབ་ཨོ་རྒྱན་བསྟན་འཛིན། དེས་ཆོས་བདག་སྟོབས་ཀྱིས་འཁོར་ལོས་བསྒྱར་བ་ཆོས་རྒྱལ་ངག་གི་

དབང་པོའམ། མཚན་གཞན་ཏཱ་ལེ་ཏེའི་ཆིང་ཝང་ངག་དབང་དར་རྒྱས་དཔལ་བཟང་པོ། དེས་མཁས་གྲུབ་ཆེན་པོ་ཞབས་དཀར་རྡོ་རྗེ་འཆང་ཚོགས་དྲུག་རང་གྲོལ། དེས་སྐྱབས་མགོན་པདྨ་རྒྱ་མཚོ། དེས་དཀྱིལ་འཁོར་རྒྱ་མཚོའི་ཁྱབ་བདག་ཌཱ་ཀིའི་གཙོ་མོ་མ་གཅིག་རིག་འཛིན་ཆོས་ཉིད་བཟང་མོ། དེས་བདག་ཀུན་བཟང་ཕྲིན་ལས་འགྲོ་འདུལ་རྩལ་ལམ། དྷརྨ་མ་ཏི་ལ་ཕྱི་མཐའ་གཟིགས་པའི་དབུགས་དབྱུང་དང་བཅས་དགྱེས་པ་ཆེན་པོས་རྗེས་སུ་བཟུང་ཞིང་ཁོ་བོ་ཙམ་མ་གཏོགས་རིག་པ་འཛིན་པའི་ས་ལམ་ཐོན་པོར་གཤེགས་པའི་སྐྱེས་བུ་ཆེན་པོ་ཤ་སྟག་བྱོན་པ་སྟེ། གནམ་ལ་རིག་འཛིན་གྱི་གྲལ་མ་ཞིག །ས་ལ་དཀྱིལ་འཁོར་གྱི་ཐིག་ཚོན་མ་ཡལ། བར་དུ་སྒྲུབ་རྫས་ཚོམ་བུའི་རྒྱ་མ་ཉམས། དམ་ཉམས་དང་འདྲེས་ཁྱེར་གྱིས་བསེ་བསླད་མ་ཞུགས། མ་དང་མཁའ་འགྲོའི་ཞལ་རླངས་ཐོ་ལེ་བའི་ཟབ་ཆོས་ཁྱད་པར་ཅན་མཆོག་དང་ཐུན་མོང་གི་དངོས་གྲུབ་གཅིག་ཅར་དུ་ཆོས་ཁ་ཞལ་ཕྱེ་བ་ཙམ་གྱིས་ཀྱང་ཐོབ་པའི་ལོ་རྒྱུས་རྨད་དུ་བྱུང་བ་ཇི་སྙེད་པ་བྱུང་དང་འབྱུང་བཞིན་པ་འདི་ཉིད་ལགས་ཏེ། དེ་ལ་སྤྱིར་དབང་གི་ངོ་བོ་ནི། ཐུགས་

ཐིག་ལས། རྒྱུ་གཉིས་རྐྱེན་བཞི་ཡན་ལག་སྙེད། །དྲུག་ལ་གནས་པའི་ཐོབ་བྱ་སྟེ། །ངོ་བོ་ཉིད་ཀྱི་རྣམ་པར་བཤད། །ཅེས་གསུངས་པ་ལྟར། རྒྱུ་གཉིས་དང་། རྐྱེན་བཞི་ཚོགས་པ་ལ་བརྟེན་ནས་དབང་གི་ཡེ་ཤེས་ཐོབ་བྱའི་ནུས་པ་ཁྱད་པར་ཅན་རྒྱུད་ལ་འཇོག་པའི་ལས་ཀྱི་བདག་ཉིད་ཅན་ཡིན་ལ། ངེས་ཚིག་ནི་ཨ་བྷི་ཥིཉྩའི་སྒྲ་ལས་དྲངས་ན་མངོན་པར་གཏོར་བ་ཞེས་བྱ་སྟེ། དངོས་སུ་ལུས་ངག་ཡིད་གསུམ་གྱི་དྲི་མ་ཁྲུད་པ་དང་། བརྒྱུད་ནས་སྐལ་བར་འཇོག་པ་ལ་འཇུག་སྟེ། ཧེ་རུ་ཀ་འདུས་པའི་རྒྱུད་ལས། རྒྱུད་དག་ནུས་པ་ཐོབ་ཕྱིར་དབང་། །ཞེས་གསུངས། དབྱེ་བ་རྒྱུད་སྡེ་བཞི་དང་འབྲེལ་བའི་རྣམ་བཞག་མཐའ་ཡས་ཀྱང་། སྐབས་སུ་བབ་པ་གསང་བ་བླ་མེད་ཀྱི་ཕྱོགས་སུ་གཏོགས་པའི་དབང་ལ། སྙིང་པོའི་རྒྱུད་ཕྱི་མ་ལས། །སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་པའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་པས་དབང་བཞིར་འགྱུར། །དེའི་རྒྱུ་མཚན་ཀྱང་། དབང་བཞི་བསྐུར་བའི་ནུས་པས་སྦྱང་བྱ་ལུས་ངག་ཡིད་གསུམ་ཆ་

མཉམ་དང་བཅས་པའི་དྲི་མ་བཞི་ཡོད་པ། དེ་སྦྱོང་བྱེད་ཀྱི་ལམ་བསྐྱེད་པའི་རིམ་པ་དང་། གཏུམ་མོ། ཕོ་ཉའི་ལམ། དེ་ཁོ་ན་ཉིད་རྫོགས་པ་ཆེན་པོ་དང་བཞིས་སྦྱངས་པས། སྦྱངས་འབྲས་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་མངོན་དུ་བྱེད་པའི་ཕྱིར་དབང་བཞིར་ངེས་པ་ལས། འདིར་ནི་དགོས་པ་དེ་ལྡན་གྱི་དབང་བཞི་རྗེས་འབྲེལ་དང་བཅས་པ་བསྐུར་བའི་རིམ་པ་དེ་སྒྲུབ་པ་སྐབས་སུ་བབས་པ་ཡིན། དེ་ལ་སྟ་གོན་དུ་གནས་པ་ཡན་ཆད་སྔོན་དུ་གྲུབ་ནས། དངོས་གཞིའི་ཆོ་ག་ལའང་རྡོ་རྗེ་སློབ་དཔོན་གྱི་བྱ་བ་དང་། རྡོ་རྗེ་སློབ་མའི་བྱ་བ་གཉིས་ལས། སློབ་དཔོན་གྱི་བགྱི་འོས་ནི་བདག་མདུན་གྱི་དཀྱིལ་འཁོར་སྒོམ་ཞིང་སྒྲུབ་པ། བདག་ཉིད་འཇུག་ཅིང་དབང་བླང་བ། སྲུང་མའི་དབང་པོ་རྣམས་ལ་མཆོད་གཏོར་ཕུལ་ནས་ཆོས་ཀྱི་སྐལ་བ་བྱེད་པ་ལ་བར་ཆད་མི་འབྱུང་བའི་གནང་བ་ཞུ་བ་སོགས་བླ་མ་དམ་པའི་ཕྱག་བཞེས་ལས་ཇི་ལྟར་བྱུང་བ་ལྟར་ཆད་ལྷག་མེད་པ་སྔོན་དུ་སོང་གྲུབ། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལྷ་དང་སྐལ་བ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོས་དང་། ཞུགས་ནས་དབང་བསྐུར་བའི་ཆོ་ག་

གཉིས་ཡོད་པ་ལས་འཇུག་པའི་སྐབས་སུ་ཕྱི་མཚན་མའི་དཀྱིལ་འཁོར་དུ་འཇུག་པ་དང་། ནང་ཡེ་ཤེས་ཀྱི་དཀྱིལ་འཁོར་དུ་འཇུག་པ་གཉིས་ལས། ཕྱི་འཇུག་གི་ཡན་ལག་ཁྲུས་དང་། བགེགས་བསལ་ཅིང་བསྲུང་འཁོར་སྒོམ་པ་སོང་ནས། འདིར་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ་མཛོད་བྱས་ལ། སློབ་མས་མཎྜལ་ཕུལ། དེ་ལྟར་མཎྜལ་ཕུལ་ནས་དཀྱིལ་འཁོར་དུ་འཇུག་པའི་ཆས་སུ་འཇུག་པ་ནི། སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་ལྗོངས་ཏེ་དཀྱིལ་འཁོར་གྱི་ལྷ་མ་མཇལ་བའམ། མཇལ་ནའང་དཀྱིལ་འཁོར་སོ་མ་འདི་ཉིད་མ་མཇལ་བ་མཚོན་བྱེད་དུ་རས་དམར་པོ་རེས་གདོང་བཅིངས་པའི་མོས་པ་མཛོད་ཅིག །ཨོཾ་ཨཱཿཧཱུྃ། ཞེས་མིག་དར་འཆིངས། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མི་རུང་བས་ཕྱག་རྟེན་ཨུ་དུམ་ཝཱ་རའི་མེ་ཏོག་གི་ཕྲེང་བ་ཁ་དོག་ལྔ་པ་རེ་བྱིན་པའི་མོས་པ་མཛོད། ཨ་ཁཾ་ཝི་ར་ཧཱུཾ། ཞེས་མེ་ཏོག་གཏད། དེ་ནས་གསོལ་བ་འདེབས་པའི་སླད་དུ་དམིགས་པ་འདི་བཞིན་དུ་མཛོད། ས་ཕྱོགས་འདི་ཉིད་དག་པ་རབ་

འབྱམས་ཡེ་ཤེས་ཀྱི་དཀྱིལ་འཁོར་ཆེན་པོར་གྱུར་པའི་ནང་དུ། སློབ་དཔོན་ཉིད་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བཅོམ་ལྡན་འདས་དབང་ཆེན་རྟ་ཕག་ཡབ་ཡུམ་གྱི་རྣམ་པར་བཞུགས་པ་ལ་མི་ཕྱེད་པའི་དད་གདུང་དྲག་པོས་གསོལ་བ་འདེབས་པ་འདིའི་རྗེས་བཟློས་མཛོད། ཀྱེ་ཧོ། བླ་མ་སངས་རྒྱས་ཀུན་གྱི་རྗེ༔ དབང་གི་བདག་ཉེད་ཆེ་བའི་མཆོག༔ བདག་ཅག་གསང་བའི་དཀྱིལ་འཁོར་དུ༔ འཇུག་ཅིང་སྨིན་པར་མཛད་དུ་གསོལ༔ ཅེས་ལན་གསུམ་ཞུས་པའི་ལན་དུ་སློབ་དཔོན་གྱིས། ཧོ། བུ་ཁྱོད་སུ་ཡིན་དཀྱིལ་འཁོར་དུ༔ འཇུག་པ་སླ་སྟེ་ཉེས་དམིགས་ཆེ༔ སྐལ་མེད་གང་ཞིག་ཕྱིར་དེངས་ཤིག༔ བླ་མ་ལྷ་དང་མཆེད་ལྕམ་ལ༔ དམ་ཚིག་ཚུལ་བཞིན་སྲུང་གྱུར་ན༔ ཚུར་ཤོག་དབང་དུ་སྨིན་པར་བྱ༔ ཞེས་གནང་བ་བྱིན་པར་མོས་ཤིག །དེ་ནས་སྐྱབས་སུ་འགྲོ་བའི་སླད་དུ་མདུན་གྱི་ནམ་མཁར་བླ་མ་དང་དཀྱིལ་འཁོར་གྱི་གཙོ་བོ་གཉིས་སུ་མེད་པ་དབང་ཆེན་རྟ་ཕག་ཡབ་ཡུམ་གྱི་རྣམ་པར་བཞུགས་པ་ལ་རྩ་གསུམ་རྒྱལ་བ་རབ་འབྱམས་ཀྱིས་བསྐོར་བ་མངོན་སུམ་དུ་བཞུགས་པའི་སྤྱན་སྔར་དུས་འདི་ནས་བཟུང་བྱང་

ཆུབ་ཀྱི་བར་དུ་སྐྱབས་སུ་འགྲོ་སྙམ་པས་འདིའི་རྗེས་ཟློས་མཛོད། ན་མོ། སྐྱབས་ཡུལ་དཀོན་མཆོག་བདེ་གཤེགས་གསུམ༔ དངོས་གྲུབ་རྩོལ་མཛད་ཡི་དམ་ལྷ༔ མཁའ་འགྲོ་དམ་ཅན་སྲུང་མར་བཅས༔ སྐྱབས་སུ་མཆིའོ་བྱིན་གྱིས་རློབས༔ ལན་གསུམ། དེ་ནས་མཁའ་མཉམ་གྱི་སེམས་ཅན་སྡུག་བསྔལ་གྱི་རྒྱུ་འབྲས་ལ་རྟག་པར་སྤྱོད་པ་འདི་རྣམས་སྡུག་བསྔལ་ལས་བསྒྲལ་ནས་གཏན་གྱི་བདེ་བ་ལ་དགོད་པར་བྱ། དེའི་ཆེད་དུ་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པའི་འདིའི་རྗེས་ཟློས་མཛོད། ཧོ། དབྱིངས་རིག་ངོ་བོ་མ་བཅོས་པའི༔ གཅིག་ཏུ་ཤར་བ་སྙིང་རྗེའི་ཡུལ༔ ཅིར་སྣང་མ་གྱུར་སངས་རྒྱས་ཞིང་༔ བྱང་ཆུབ་ལམ་ལ་སེམས་མཆོག་བསྐྱེད༔ ལན་གསུམ། དེ་ལྟར་སྐྱབས་སུ་འགྲོ་བ་ནི་ཉན་རང་དང་། སེམས་བསྐྱེད་པ་ནི་ཕར་ཕྱིན་ཐེག་པ་དང་ཐུན་མོང་ཡིན་པས་དེ་གཉིས་ཐུན་མོང་གི་སྡོམ་པ་བཟུང་བ་ཡིན། དེ་ནས་ཚོགས་བསགས་པའི་ཕྱིར་ཚོགས་ཞིང་ཁྱད་པར་ཅན་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་འཁོད་དེ་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་

འཚལ་བ། མཆོད་སྤྲིན་སྤྲོ་བ། སྡིག་པ་བཤགས་པ། དགེ་བ་ལ་ཡི་རང་བ། མྱ་ངན་མི་འདའ་བར་གསོལ་བ་གདབ་པ། ཆོས་ཀྱི་འཁོར་ལོ་བསྐོར་བར་བསྐུལ་བ། དགེ་ཚོགས་བླ་མེད་ཀྱི་བྱང་ཆུབ་ཏུ་བསྔོ་བ་སྟེ་ཚིག་ཕྱིར་ཐུགས་གཞོལ་བའི་ངང་ནས་ཡན་ལག་བདུན་པ་འདིའི་རྗེས་བཟློས་མཛོད། བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་མྱུར་ཐོབ་ཤོག༔ ལན་གསུམ། དེ་ནས་དབང་བསྐུར་བ་དེ་ཡང་རྟེན་དཀྱིལ་འཁོར་ལ་བརྟེན་ནས་ཐོབ་ནའང་། དབང་འཛིན་པ་ནི་དམ་ཚིག་དང་སྡོམ་པ་ལ་རག་ལུས་པས་སྨིན་བྱེད་ཀྱི་རྟེན་སྡོམ་ལྡན་དུ་སྒྲུབ་པའི་ཕྱིར། སྤྱི་དང་ཁྱད་པར་གྱི་དམ་ཚིག་དང་སྡོམ་པ་མ་ལུས་པ་བཟུང་བར་བྱ་སྙམ་པའི་འདིའི་རྗེས་ཟློས་མཛོད། ཧཱུཾ། བླ་མ་ཡི་དམ་ལྷ་

ཚོགས་དགོངས༔ ཕྱི་ནང་ཐེག་པའི་སྡོམ་པ་དང་༔ རྩ་གསུམ་བདག་གིས་ཡང་དག་བསྲུང་༔ སྔོན་གྱི་འགལ་འཕྲུལ་དམ་ཉམས་བཤགས༔ ཕྱིན་ཆད་མི་བགྱིད་གནོང་འགྱོད་དོ༔ སེམས་ཅན་ཀུན་གྱི་དོན་འགྲུབ་ཕྱིར༔ བདག་གི་སྡོམ་པ་རྣམ་དག་ཤོག༔ ལན་གསུམ། དེ་ནས་གསང་སྔགས་ནང་གི་སེམས་བསྐྱེད་པའི་སླད་དུ་ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་རེས་མཚན་པར་བསྒོམས་ལ་བདེན་གཉིས་དབྱེར་མེད་དུ་སེམས་བསྐྱེད་པར་མོས་ཏེ་འདིའི་རྗེས་ཟློས་མཛོད། ཨོཾ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། ལན་གསུམ། རྡོ་རྗེ་མེ་ཏོག་དང་བཅས་སྙིང་གར་བཞག་ལ་སེམས་བསྐྱེད་པ་དེ་བརྟན་པར་བྱས་པར་མོས་ཤིག །སུ་ར་ཏ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ༔ གསང་བའི་དེ་ཁོ་ན་ཉིད་བསྒོ་བའི་དོན་ཐུགས་ལ་ངེས་པ་མཛོད་ཅིག དེ་ནས་སློབ་དཔོན་གྱིས་དབྱེ་རྒྱ་དང་བཅས་ཏེ། ཛཿཧཱུཾ་བཾ་ཧོཿཔྲ་བེ་ཤ་ཡ་ཕཊ། དཀྱིལ་འཁོར་གྱི་སྒོ་བཞི་ཕྱེ་བར་གྱུར། ཞེས་བརྗོད་ལ་ཡོལ་བ་བསལ། ཁྱེད་རང་རྣམས་ལས་ཀྱི་རྡོ་རྗེའི་ཕྱག་

གི་རྡོ་རྗེ་ལ་འཇུས་ཏེ་ཚད་མེད་བཞིའི་འཇུག་པས་བསྐོར་ཕྱོགས་སུ་དཀྱིལ་འཁོར་གྱི་སྒོ་བཞི་དང་། སླར་ཡང་ཤར་སྒོ་ནས་ཞུགས་པའི་མོས་པ་མཛོད། སློབ་དཔོན་གྱི་ཕྱག་གི་རྡོ་རྗེ་ལ་འཇུར་བཅུག་སྟེ། ཧཱུཾ་ཛཿ དེ་ལྟར་དཀྱིལ་འཁོར་གྱི་ཤར་སྒོའི་ནང་གི་ཁྱམས་ལ་གནས་པའི་གནས་གསུམ་དུ་ཐལ་མོ་སྦྱར་ཏེ་འདིའི་རྗེས་ཟློས་མཛོད། ཨོྃ་ན་མ་སྟེ་ཧཱུཾ། ཨོཾ་ན་མ་མེ་ཧཱུཾ། ཨོཾ་ན་མོ་ན་མ་ཧཱུཾ། དེ་བཞིན་གཡས་བསྐོར་གྱིས་ལྷོའི་ཁྱམས་ལ་གནས་པ་སོགས་ཕྱོགས་བཞི་ནས་སྔར་ལྟར་ཕྱག་བྱ། དེ་དག་ནི་ཕྱི་མཚན་མའི་དཀྱིལ་འཁོར་དུ་འཇུག་པའོ། །དེ་ནས་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་སླད་དུ་སྦྱོར་བ་དམ་ལ་བཞག་པ་ལ་བཞི་ལས། དང་པོ་ཕན་ཡོན་གྱི་སྒོ་ནས་དམ་ལ་བཞག་པ་ནི། རྡོ་རྗེ་སྤྱི་བོར་བཞག་སྟེ། ཧོ། ཨེ་མ་སྐལ་ལྡན་རིགས་ཀྱི་བུ༔ སྔོན་གྱི་ལས་སད་འཁྲུལ་པ་ཞིག༔ དལ་དུ་གཞུག་ཅིང་ཡེ་ཤེས་དབབ༔ དངོས་གྲུབ་མ་ལུས་ཁྱེད་ཀྱིས་ཐོབ༔ ཅེས་བརྗོད། གཉིས་པ་ཉེས་དམིགས་ཀྱི་སྒོ་ནས་དམ་ལ་བཞག་པ་ནི། རྡོ་རྗེ་སྙིང་གར་གཏུགས་ལ། ཧོ། ཚུལ་བཞིན་མིན་ལ་སྨྲ་བ་དང་༔ དམ་ཚིག་ཉམས་ན་དམྱལ་བར་ལྟུང་༔ འདི་སྨྲས་ཡེ་ཤེས་ལྷ་

དང་བྲལ༔ ཚུལ་གནས་ལྷ་དང་གཉིས་སུ་མེད༔ དེ་བས་སྙིངནས་བྲོ་བོར་ཞིག༔ བཛྲ་ས་མ་ཡ་ཨི་དན་སིདྡྷི་ཧཱུཾ༔ གསུམ་པ་ཁེ་ཉེན་གཉིས་ཀའི་སྒོ་ནས་དམ་ལ་བཞག་པ་ནི། བུམ་བའི་ཆུ་དང་ནང་མཆོད་ནས་བདུད་རྩི་དུང་ཆོས་སུ་བླུག་པ་བྱིན་ལ། ཧཱུཾ། འདི་ནི་ཁྱོད་ཀྱི་དམ་ཚིག་ཆུ༔ བསྲུངས་ན་དངོས་གྲུབ་ཐམས་ཅད་ཐོབ༔ ཉམས་ན་ན་རཀ་དམྱལ་བར་འགྲོ༔ དེ་བས་དམ་བསྲུང་ཆུ་འདི་འཐུངས༔ ཨོཾ་ཨ་མྲྀ་ཏ་ཨུ་ད་ཀ་ཋ༔ དེ་ལྟར་ཆུ་དེ་ལྕེ་ལ་བཞག་ཀྱང་སྙིང་གི་དཀྱིལ་དུ་བབས་ཏེ། གལ་ཏེ་དམ་ཚིག་ལས་འདས་ན་བཛྲ་ཡཀྵ་ཀྲོ་དྷ་ཞེས་བྱ་བ་སྡིག་པ་མགོ་དགུ་པར་གྱུར་ནས་སྙིང་ཁྲག་འཇིབས་པས་མཐོང་ཆོས་སུའང་ཚེ་ཐུང་ཞིང་ནད་མང་བ། ཕྱི་མར་དམྱལ་བའི་གནས་སུ་ལྟུང་ནས་ཉམ་ཐག་ལ། དམ་ཚིག་བསྲུངས་ན་ལྷ་ཡེ་ཤེས་སེམས་དཔར་གྱུར་ནས་རྟག་ཏུ་བྱིན་གྱིས་རློབ་ཅིང་འདི་ཕྱིའི་ཕན་བདེ་མ་ལུས་པ་སྟེར་བར་འགྱུར་རོ། ཞེས་བརྗོད། བཞི་པ་རྡོ་རྗེ་སློབ་དཔོན་བཀའ་གཉན་པའི་སྒོ་ནས་དམ་ལ་བཞག་པ་ནི། རྡོ་རྗེ་སྤྱི་བོར་བཞག་སྟེ། ཧཱུཾ། དེ་རིང་ཕྱིན་ཆད་བུ་ཁྱོད་ཀྱི༔ རྡོ་རྗེ་སློབ་དཔོན་ང་ཡིན་གྱི༔

ང་ཡིས་ཇི་ལྟར་བསྒོ་བ་བཞིན༔ ཁྱེད་ཀྱིས་ནམ་ཡང་བཅག་མི་རུང་༔ ས་མ་ཡ་ཨི་དན་ན་ར་ཀན༔ ཞེས་བརྗོད། དེ་ལྟར་དམ་ལ་བཞག་པ་བཞིའི་སྒོ་ནས་རྒྱུད་བརྟན་པར་བྱས་ནས་ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ་གསོལ་བ་འདེབས་པ་འདིའི་རྗེས་ཟློས་བྱས་ལ། ཨེ་མ། བླ་མ་བདེ་གཤེགས་འདུས་པའི་སྐུ༔ ཐུགས་རྗེ་བརྩེ་བས་རབ་དགོངས་ནས༔ རྩ་གསུམ་རྒྱལ་བ་རབ་འབྱམས་ཀྱི༔ བྱིན་རླབས་ཡེ་ཤེས་དབབ་ཏུ་གསོལ༔ ཅེས་ལན་གསུམ་བྱ། དེ་ལྟར་གསོལ་བ་བཏབ་པས་ཡེ་ཤེས་དབབ་པའི་སླད་དུ། ཁྱེད་རང་རྣམས་ལུས་ཀྱི་གནད་སྐྱིལ་ཀྲུང་དྲང་པོར་སྲོངས། ངག་གནད་རླུང་ཁ་སྦྱོར་དུ་ཆིངས། སེམས་ཀྱི་གནད་གཞན་དུ་མ་ཡེངས་པའི་སྒོ་ནས་དམིགས་པ་འདི་བཞིན་དུ་མཛོད། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ལ་ཕོག་པས་རྣམ་སྨིན་ཤ་ཁྲག་གདོས་བཅས་ཀྱིས་མཚོན་པའི་མ་དག་པའི་སྣང་བ་ཐམས་ཅད་མེ་ལོང་ལ་རླངས་ཡལ་བ་ལྟར་མི་དམིགས་པ་སྟོང་པར་སྦྱང་། སྟོང་པའི་ངང་ལས་ཆུ་ལས་ཉ་ལྡང་བ་ལྟར་ཁྱེད་རང་རྣམས་དབང་ཆེན་རྟ་མཆོག་རོལ་པ་སྐུ་མདོག་དམར་ལ་སྔོ་

མདངས་འཚེར་ཞིང་། ཞལ་གཅིག་ཕྱག་གཉིས། ཞབས་སྐྱིལ་མོ་ཀྲུང་དུ་བཞུགས་པ་ཁྲོ་འཛུམ་སྤྱན་གསུམ་ཕྱོགས་བཅུར་གཟིགས་ཤིང་། དབུ་སྐྲ་གྱེན་དུ་གཡེངས་པར་ཐོད་སྐམ་རིགས་ལྔའི་རྩེ་ཕྲན་གྱིས་བརྒྱན་པའི་སྤྱི་གཙུག་རྟ་གདོང་ཧཱུཾ་སྒྲ་ལྡིར་བ། ཕྱག་གཡས་རྡོ་རྗེ་དང་ཐོ་བ། གཡོན་ཐོད་ཁྲག་ཕུར་བུ་འཛིན་པ། སྐུ་ལ་དུར་ཁྲོད་ཆས་བརྒྱད་གསོལ་བའི་པང་དུ་ཡུམ་རྡོ་རྗེ་ཕག་མོ་སྔོ་དམར་མདངས་ཅན་གཅེར་བུ་གཞོན་ཚུལ་ལང་ཚོ་རྒྱས་ཤིང་སྐྲ་གྲོལ་བར་ཕྱག་རྒྱ་ལྔས་བརྒྱན་པ་ཆགས་པའི་སྤྱན་གསུམ་ཡབ་ལ་གཟིགས་ནས་ཕྱག་གཉིས་ཤེལ་བུམ་དང་གཏེར་སྒྲོམ་འཛིན་པས་ཞབས་གཉིས་ཡབ་ལ་འཁྱུད་ཅིང་། སྤྱི་གཙུག་ཕག་གདོང་ཕེཾ་སྒྲ་སྒྲོགས་པ་ཡབ་ཡུམ་མཉམ་པར་སྦྱོར་ཞིང་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བདེ་བ་ཆེན་པོའི་འོད་ཟེར་འཕྲོ་བཞིན་དུ་གསལ་བའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོས་མཚན་པའི་དབུས་སུ་ཧྲཱིཿཡིག་སྔོ་དམར་འོད་འཕྲོ་བཞིན་པར་སེམས་རྩེ་གཅིག་ཏུ་གཏོད་མཛོད། དེ་ནས་ཡེ་ཤེས་ལྷའི་གཟི་བྱིན་དབབ་པའི་སླད་དུ་ཡབ་

ཡུམ་སྙོམ་པར་ཞུགས་པའི་བདེ་བའི་སྒྲ་དང་འོད་ཟེར་ནམ་མཁའ་གང་བ་དང་། བླ་མ་དང་དཀྱིལ་འཁོར་གྱི་ལྷ་ལ་མོས་གུས་ཚད་མེད་པས་ཐུགས་དམ་བསྐུལ་པས་ཕྱོགས་དུས་རྒྱལ་བ་སྲས་དང་བཅས་པ་རྣམས་དང་། ཁྱད་པར་དུ་བཅོམ་ལྡན་འདས་དཔལ་ཆེན་རྟ་ཕག་ཡབ་ཡུམ་ལྷ་ཚོགས་ཀྱི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་མ་ལུས་པ་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན། འཇའ་ཐིག་འོད་ཟེར་གྱི་རྣམ་པ་དཔག་ཏུ་མེད་པའི་ཆར་ཆེན་པོ་བབ་བཞིན་དུ་བྱོན་ནས་ཁྱེད་རང་རྣམས་ལ་དབྱེར་མེད་དུ་ཐིམ་པས་ཡེ་ཤེས་ཆེན་པོའི་བྱིན་རླབས་རྒྱུད་ལ་ཞུགས་པར་མོས་མཛོད། ཅེས་བྱས་ལ་འབེབས་པའི་རྫས་བསྲེག །དབྱངས་དང་རོལ་མོས་བསྐུལ་ལ། ཧྲཱིཿ ལྷོ་ནུབ་དགའ་བ་ཚལ་གྱི་དུར་ཁྲོད་ནས༔ ཁྲོ་བོའི་རྒྱལ་པོ་རྟ་མགྲིན་དབང་གི་ལྷ༔ གཉིས་མེད་ཡུམ་མཆོག་རྡོ་རྗེ་ཕག་མོ་ཉིད༔ བདེ་གཤེགས་སྤྱི་འདུས་པདྨ་ཐོད་ཕྲེང་རྩལ༔ ཡི་དམ་ཞི་ཁྲོ་དཔའ་བོ་མཁའ་འགྲོའི་ཚོགས༔ བྱིན་རླབས་མཁའ་ལ་སྤྲིན་ལྟར་གཏིབས་ནས་ཀྱང་༔ ཐུགས་རྗེས་བརྩེར་དགོངས་གནས་འདིར་བྱིན་ཆེན་ཕོབ༔ སྐལ་ལྡན་བུ་ལ་མཆོག་ཐུན་དངོས་གྲུབ་

རྩོལ༔ ཨོཾ་བཛྲ་ཀྲོ་དྷ་པ་ཏེ་པ་ཏེ་ཧཱུྃ་ཕཊ༔ ཅེས་རྩ་སྔགས་དང་། ཛྙཱ་ན་ཨ་བེ་ཤ་ཡ་ཨ། ཞེས་བྱིན་དབབ་ལ། སྐུ་གསུང་ཐུགས་ཀྱི་ཡེ་ཤེས་དབབ་པ་དེ་དག་བརྟན་པར་བྱས་པའི་མོས་པ་མཛོད། ཏིཥྛ་བཛྲ་སྭཱ་ཧཱ༔ ཞེས་བརྗོད་ལ་སྤྱི་བོར་རྡོ་རྗེ་རྒྱ་གྲམ་དུ་བཞག །སྔར་བྱིན་པའི་མེ་ཏོག་དེ་ཉིད་དཀྱིལ་འཁོར་གྱི་གཙོ་བོའི་དབུ་གཙུག་ཏུ་ཕུལ་བར་མོས་ལ་འདིའི་རྗེས་ཟློས་དང་བཅས་དཀྱིལ་འཁོར་འདིར་ལྟོས་པ་མེད་པར་དོར་མཛོད། ཨེ་མ། ཡེ་ཤེས་ལྷ་ཡི་དཀྱིལ་འཁོར་དུ༔ རིག་པའི་མེ་ཏོག་འདི་དོར་བས༔ ཚེ་རབས་སྔོན་ནས་སྦྱངས་པ་ཡི༔ འབྲེལ་པ་གང་ཡོད་ལྷ་དེར་སྤྲོད༔ པུཥྤེ་པྲ་ཏཱིཙྪ་ཧོ༔ ཞེས་མེ་ཏོག་ཕུལ། མེ་ཏོག་དེ་ཉིད་དཀྱིལ་འཁོར་གྱི་གཙོ་བོས་བཞེས་ཏེ་སླར་ཡེ་ཤེས་ཀྱི་ཅོད་པན་དུ་བྱིན་གྱིས་བརླབས་ནས་ཁྱེད་རང་རྣམས་ཀྱི་སྤྱི་གཙུག་ཏུ་བཅིངས་པའི་མོས་པ་མཛོད་ཅིག ཧཱུཾ། རྟ་ཕག་ཡབ་ཡུམ་དཀྱིལ་འཁོར་དུ༔ མེ་ཏོག་ཕུལ་བས་རབ་མཉེས་ཏེ༔ སྐུ་གསུང་ཐུགས་ལས་བྱུང་བ་ཡིས༔ དངོས་གྲུབ་དམ་པ་ཁྱེད་ལ་སྦྱིན༔ ཀཱ་ཝཱ་ཙི་པྲ་ཏི་གྷྲྀ་ཧྞ་ཧི་མཾ་སརྦ་མ་ཧཱ་པ་ལ༔ ཞེསམེ་ཏོག་གནས་གསུམ་དུ་གཏུགས་ལ། མེ་ཏོག་

གང་དུ་ཕོག་ཀྱང་དབང་ཆེན་རྟ་ཕག་ཡབ་ཡུམ་གྱི་ཡེ་ཤེས་རང་སྣང་ཁོ་ན་ལས་གུད་དུ་མ་གྲུབ་པས་ན། ཁྱེད་རང་རྣམས་ཀྱི་གསང་མཚན་རྡོ་རྗེ་པདྨ་དབང་ཆེན་རྩལ་ཞེས་བྱ་བ་ཡིན་ནོ། །བུད་མེད་ལ་རྡོ་རྗེ་པདྨ་དབྱིངས་ཕྱུག་རྩལ་བསྒྱུར། ཞེས་མེ་ཏོག་མིང་གི་དབང་བསྐུར་བྱིན། དེ་ནས་མ་རིག་པའི་ལིང་ཏོག་མིག་དར་དང་ལྷན་ཅིག་ཏུ་བསལ་བའི་མོས་པ་མཛོད་ཅིག ཧོཿ ང་ནི་ཡེ་ཤེས་རིག་པའི་རྒྱལ༔ ཁྱེད་ཀྱི་མ་རིག་ཆུ་བུར་མིག༔ ཐུགས་རྗེ་ཐབས་ཀྱི་ཐུར་མས་བསལ༔ བུ་ཁྱེད་ཡི་དམ་ལྷ་ཞལ་ལྟོས༔ ཙཀྵུ་པྲ་ཝེ་ཤ་ཡ་ཧོཿ མིག་ངང་བསལ། གདོང་གཡོགས་དང་ལྷན་སྐྱེས་སྒྲིབ་པའི་མུན་པ་ཆབས་ཅིག་ཏུ་བསལ་བས་ཡེ་ཤེས་ཀྱི་དཀྱིལ་འཁོར་གསར་དུ་ཐོབ་པ་དེ་ལ་མཐོང་བར་བསྟན་པར་བྱ་སྟེ། ཧོ༔ རིགས་ཀྱི་བུ་རྣམས་དཀྱིལ་འཁོར་ལྟོས༔ འདི་ནི་ཐར་པ་མཆོག་གི་ལྷ༔ འདི་མཐོང་སྒྲིབ་གཉིས་ཀུན་བྱང་ནས༔ མཆོག་གི་དངོས་གྲུབ་ཐོབ་པར་འགྱུར༔ ཞེས་བལྟ་བར་བསྐུལ་ཏེ་སྤྲོ་བ་བསྐྱེད་ནས། འདི་ནི་སློབ་དཔོན་གྱི་སྐུ་རང་བཞིན་ལྷུན་གྲུབ་ཀྱི་དཀྱིལ་འཁོར་དུ་བཞུགས་པ་མཚན་མའི་རྟེན་རང་སྣང་དབྱེར་མེད་ཀྱི་དཀྱིལ་འཁོར་དུ་མངོན་པར་

གསལ་བ་གཟུགས་བརྙན་འདིས་མཚོན་པ་ཡིན་ཏེ། དེ་ཡང་གཉིས་འཛིན་གྱི་རྟོག་པ་བསལ་བའི་བརྡར། ཕྱི་རོལ་དུ་ཡེ་ཤེས་ཀྱི་མེ་རབ་ཏུ་འབར་བ་དེའི་ནང་དུ་མི་རྟོག་པའི་ཡེ་ཤེས་ཅིས་ཀྱང་མི་ཤིགས་པའི་བརྡར་རྡོ་རྗེའི་རྭ་བ་ཚོགས་བརྒྱད་གནས་སུ་དག་ཅིང་སྒྱུ་མའི་དཔེ་བརྒྱད་མཚོན་པའི་བརྡར་དུར་ཁྲོད་ཆེན་པོ་བརྒྱད། འཁོར་བའི་ཉེས་སྐྱོན་གྱིས་མ་གོས་པའི་བརྡར་པདྨའི་ཕྲེང་བ། ཆོས་ཉིད་རང་བཞིན་གྱི་འོད་གསལ་བའི་བརྡར་ཉི་གདན། རྟེན་འབྲེལ་བཅུ་གཉིས་རྣམ་པར་དག་པའི་བརྡར་འོག་གཞི་སྣ་ཚོགས་རྡོ་རྗེ་རྭ་བཅུ་གཉིས་པ། སངས་རྒྱས་ཀྱི་ཡེ་ཤེས་ཉིད་དབྱིབས་དང་ཁ་དོག་ཏུ་རང་སྣང་བས་གདུལ་བྱའི་རེ་བ་སྐོང་བའི་བརྡར་གཞལ་ཡས་ཁང་རྒྱུ་རིན་པོ་ཆེ་ལས་གྲུབ་པ། ཆེ་བའི་ཡོན་ཏན་ཐམས་ཅད་རྒྱས་པའི་བརྡར་གྲུ་བཞི་པ། ཡེ་ཤེས་བཞིའི་བརྡར་སྒོ་ཁང་སོགས་ཕྱོགས་མདོག །ཚད་མེད་བཞིས་བདེ་བ་ཆེན་པོར་འདྲེན་པའི་བརྡར་སྒོ་བཞི། ཐེམ་སྐས་བརྒྱད་ནི་ལམ་སྟེགས་ཀྱི་ཐེག་པ་བརྒྱད། རྟ་བབ་བཞི་ནི་བསྡུ་བའི་དངོས་པོ་བཞི། ཆོས་འཁོར་རྒྱུན་མི་ཆད་པར་བསྐོར་བའི་བརྡར་ཆོས་ཀྱི་འཁོར་ལོ།

རྟོག་པའི་མཚན་མས་དབེན་པའི་བརྡར་རི་དྭགས་ཕོ་མོ། དྲན་པ་ཉེ་བར་བཞག་པ་བཞི་མཚོན་པའི་བརྡར་འདོད་སྣམ་དུམ་བུ་བཞི། རྟ་བབ་འདེགས་བྱེད་ཀྱི་ཀ་བ་བཞི་ནི་ཡང་དག་སྤོང་བ་བཞི། སྒོ་ཁང་བཞི་ནི་རྫུ་འཕྲུལ་གྱི་རྐང་པ་བཞི་ནང་ནས་རིམ་བཞིན་དམར་དཀར་སེར་སྔོ་ལྗང་བའི་རྩིག་པ་ལྔ་ནི་དབང་པོ་ལྔ། ཕ་གུ། བྲེ་ཕུལ། ཤར་བུ། མདའ་ཡབ། འཕྱུར་བུ་ལྔ་ནི་སྟོབས་ལྔ༔ རིན་པོ་ཆེའི་དྲྭ་བ་དང་། དྲྭ་ཕྱེད། མེ་ཏོག་ཕྲེང་བ། དར་དཔྱང་། མེ་ལོང་། ཟླ་གཟུགས། རྔ་ཡབ་སྟེ་རྒྱན་རྣམས་ནི་འཕགས་ལམ་བརྒྱད། ཀ་གཞུ་རྣམས་ནི་རྣམ་པར་ཐར་པ་བརྒྱད། གདུང་བཞི་ནི་མི་འཇིགས་པ་བཞི། ནང་ལྕམ་ཉེར་བརྒྱད་ནི་སྟོང་ཉིད་བཅོ་བརྒྱད་དང་། ཕར་ཕྱིན་བཅུ། འཕྱུར་བུའི་ཀ་བ་བཞི་ནི་སོ་སོ་ཡང་དག་པའི་རིག་པ་བཞི། རྩེ་མོའི་ཏོག་ནི་སངས་རྒྱས་ཀྱི་དཀྱིལ་འཁོར་ཐམས་ཅད་རང་རིག་པའི་ཡེ་ཤེས་ཀྱི་ཀློང་དུ་འཁྱིལ་བ། ཆོས་ཉིད་རྣམ་པར་དག་པའི་བླ་བྲེ། འགྲོ་བ་སྐྱོབ་པའི་གདུགས། སྙིང་རྗེ་ཆེན་པོའི་བ་དན། བདུད་ལས་རྒྱལ་པའི་རྒྱལ་མཚན། སྟོང་ཉིད་ཀྱི་ཆོས་སྒྲ་སྒྲོགས་པའི་དྲིལ་བུ་སོགས་མ་འདྲེས་

ཤིང་མི་སྒྲིབ་པ་གསལ་བའི་ནང་དུ། སྙིང་པོའི་ཕོ་བྲང་གི་ནང་ཆོས་དབྱིངས་ཡེ་ཤེས་མཚོན་པའི་ཟླ་གམ་མཐིང་གའི་དབུས་སུ་རྣམ་ཐར་སྒོ་གསུམ་གྱི་འགྲོ་བའི་དོན་ལྷུན་གྲུབ་རྒྱུན་མི་ཆད་དུ་འབྱུང་བའི་བརྡར་ཆོས་འབྱུང་གྲུ་གསུམ་པ། ནང་གི་གཞི་དམར་པོས་ཁྱབ་པ་ནི་པདྨའི་རིགས་སུ་སྣང་བ། དེའི་དབུས་སུ་མ་ཆགས་སྐྱོན་གྱིས་མ་གོས་པའི་བརྡར་པདྨ་འདབ་བརྒྱད་གེ་སར་ཟིལ་ཕོ་དང་བཅས་པ། ཐུགས་རྗེའི་འོད་ཀྱིས་སེམས་ཅན་ཐམས་ཅད་ལ་ཉེ་རིང་མེད་པར་ཀུན་ལ་སྙོམས་ཤིང་མ་རིག་པའི་མུན་པ་སེལ་བའི་བརྡར་ཉི་མའི་གདན། བྱང་ཆུབ་ཀྱི་སེམས་རྒྱུན་ཆད་མེད་པའི་སྙིང་རྗེས་ཟག་མེད་ཀྱི་ཐུགས་རྒྱུད་ཡོངས་སུ་གང་བའི་བརྡར་ཟླ་བའི་གདན། དེ་དག་ནི་རྟེན་གཞལ་ལས་ཁང་གི་དོན་རྟགས་སོ། །བརྟེན་པ་ལྷའི་དོན་རྟགས་ནི། དཀྱིལ་འཁོར་གྱི་དབུས་སུ་ཐབས་མཆོག་རང་རིག་ཡེ་ཤེས་མཆོག་ཏུ་མི་འགྱུར་བའི་བདེ་བ་ཆེན་པོའི་སྣང་

བརྙན་དུ་བཞེངས་པ་དུས་གསུམ་གྱི་བདེ་བར་གཤེགས་པ་ཐམས་ཅད་འདུས་པའི་སྤྱི་གཟུགས་བཅོམ་ལྡན་འདས་དཔལ་རྟ་མགྲིན་དབང་གི་རྒྱལ་པོ། དེ་ཡང་འདོད་ཆགས་རྣམ་པར་དག་པ་བདེ་ཆེན་འགག་མེད་ཀྱི་ཆོ་འཕྲུལ་ལས་རང་བྱུང་ཞིང་ཆགས་པ་ཆེན་པོས་འགྲོ་བ་རྣམས་དབང་དུ་སྡུད་ཅིང་འདུལ་བའི་བརྡར་སྐུ་མདོག་དམར་པོ། ཆོས་དབྱིངས་ཀུན་ཏུ་བཟང་པོའི་དགོངས་པ་མངོན་དུ་གྱུར་པའི་བརྡར་སྔོ་མདངས་འཚེར་བ། ཞེ་སྡང་ཅན་རྣམས་འདུལ་ཞིང་གཉིས་མེད་ཡེ་ཤེས་ཀྱིས་མཚན་འཛིན་གྱི་རྟོག་པ་ཚར་གཅོད་པའི་བརྡར་ཡིད་ཙམ་ཁྲོ་བ། གཏི་མུག་ཅན་རྣམས་འདུལ་ཞིང་ཞི་བའི་ཕྲིན་ལས་ལ་དབང་འབྱོར་བ་དང་། འགྲོ་བའི་རེ་བ་མ་ལུས་པ་སྐོང་བའི་བརྡར་འཛུམ་པའི་མདངས་དང་ལྡན་པ། ཆོས་རྣམས་རོ་གཅིག་པའི་བདེ་བ་ཆེན་པོའི་ཡེ་ཤེས་ཉག་ཅིག་ལས་ཤར་བའི་བརྡར་ཞལ་གཅིག་པ། དུས་གསུམ་ཆགས་ཐོགས་མེད་པར་གཟིགས་ཤིང་མཐའ་བྲལ་འགྲོ་བ་འདྲེན་པའི་བརྡར་སྤྱན་གསུམ་ཕྱོགས་བཅུར་གཟིགས་པ། ཚོགས་གཉིས་མཐར་ཕྱིན་འབྲས་བུ་སྐུ་གཉིས་ཐོབ་པའི་བརྡར་ཕྱག་གཉིས་ཀྱི་གཡས་པས་གཉིས་སྣང་གི་རྟོག་ཚོགས་ལས་བྱུང་བའི་དམ་སྲི་བགེགས་དཔུང་འཇོམས་པའི་བརྡར་རྡོ་རྗེ་ཐོ་བ་དང་། གཡོན་ཟུང་འཇུག་བདེ་སྟོང་དུ་རོལ་ཞིང་བདུད་བཞི་བཅོམ་པའི་བརྡར་ཐོད་པ་ཁྲག་གིས་གང་

བ་དང་། ཕུར་པ་འཛིན་པ། ཟུང་འཇུག་རྡོ་རྗེའི་ཏིང་ངེ་འཛིན་ལ་ནམ་ཡང་འགྱུར་བ་མེད་པའི་བརྡར་ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། གཟུང་འཛིན་གྱི་རྟོག་ཚོགས་དབྱིངས་སུ་གྲོལ་ནས་མྱང་འདས་ཀྱི་གོ་འཕང་མཐར་ཕྱིན་པའི་བརྡར་དབུ་སྐྲ་ཁམས་སེར་གྱེན་དུ་གཡེང་བ། སྲིད་གསུམ་ཟིལ་གྱིས་གནོན་པའི་བརྡར་རྟ་མགོ་ལྗང་ནག་ཧཱུཾ་སྒྲ་ལྡིར་བ། ཡེ་ཤེས་ལྔའི་རང་གཟུགས་རིགས་ལྔར་ཤར་ཏེ་འགྲོ་དོན་རྒྱུན་མི་ཆད་པའི་བརྡར་ཐོད་སྐམ་ལྔའི་དབུ་རྒྱན། མཁྱེན་པའི་སྟོབས་བཅུས་གཏི་མུག་བཅོམ་པའི་བརྡར་གླང་ཆེན་གྱི་ཀོ་རློན། བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་ཞིང་ལྤགས་ཀྱི་སྟོད་གཡོགས་དང་། ང་རྒྱལ་བཅོམ་པའི་སྟག་ལྤགས་ཀྱི་ཤམ་ཐབས། ཕྲག་དོག་བཅོམ་པའི་སྦྲལ་གྱི་ཆུན་པོ་དང་ཐོད་པ་སྐམ་རློན་གྱི་ཕྲེང་བ་དང་གཞན་ཡང་སྣང་སྟོང་གི་ཆ་ལུགས་ཡོངས་རྫོགས་རང་ལ་རྫོགས་པའི་བརྡར་ཐལ་ཆེན་གྱི་ཚོམ་བུ། རཀྟའི་ཐིག་ལེ། ཞག་གི་ཟོ་རིས་དང་། ཕར་ཕྱིན་དྲུག་རྫོགས་པའི་བརྡར་རུས་པའི་རྒྱན་དྲུག་གིས་བརྒྱན་པའོ། །དེའི་པང་དུ་ཤེས་རབ་སྟོང་པ་ཉིད་ཀྱི་རང་རྩལ་

ཆེ་བའི་ཡོན་ཏན་གྱི་ཡེ་ཤེས་མ་འགགས་པའི་བརྡར་ཡུམ་རྡོ་རྗེ་ཕག་མོ་སྐུ་མདོག་སྔོ་དམར། མཚན་འཛིན་གྱི་སྒྲིབ་གཡོགས་བྲལ་བའི་ཕྱིར་གཅེར་བུ། དགའ་བ་བཅུ་དྲུག་མཐར་ཕྱིན་པའི་བརྡར་བཅུ་དྲུག་ལོན་པའི་ལང་ཚོ་རྒྱས་པ། དབྱིངས་ལས་ཡེ་ཤེས་ཕྱོགས་མེད་དུ་རྒྱས་པའི་བརྡར་སྐྲ་གྲོལ་ཞིང་མི་རུས་ལས་གྲུབ་པའི་དབུ་རྒྱན་ཆོས་དབྱིངས་ཡེ་ཤེས་ཀྱི་རང་བཞིན། དེ་བཞིན་དུ་རྣ་ཆ་སོར་རྟོག །མགུལ་རྒྱན་མཉམ་ཉིད། ཕྱག་ཞབས་ཀྱི་གདུབ་བུ་མེ་ལོང་། སྐ་རགས་བྱ་གྲུབ་ཡེ་ཤེས་ཀྱི་རང་བཞིན་ཏེ་ཕྱག་རྒྱ་ལྔ་ཡིས་མཚན་པ། ཐབས་ཤེས་ཕྱོགས་རེ་བ་མ་ཡིན་པ་ཟུང་འཇུག་གཉིས་མེད་ཀྱི་བརྡར་ཞལ་གཅིག་མ། དུས་གསུམ་གཟིགས་ཤིང་ཆགས་ཅན་ཁམས་གསུམ་དབང་དུ་སྡུད་པའི་བརྡར་རྗེས་ཆགས་ཀྱི་སྤྱན་གསུམ་ཡབ་ལ་གཟིགས་པ། ཚེའི་དངོས་གྲུབ་རྩོལ་བའི་བརྡར་ཕྱག་གཡས་ཤེལ་བུམ་དང་། དགོས་འདོད་རྩོལ་བའི་བརྡར་གཡོན་པས་གཏེར་སྒྲོམ་འཛིན་པ། རང་སྣང་ཡབ་ཡུམ་འདུ་འབྲལ་མེད་པའི་བརྡར་ཡབ་ཀྱི་མགུལ་ནས་འཁྱུད་པ། བདེན་གཉིས་མཚོན་པའི་ཞབས་གཉིས་པདྨོའི་འདུག་སྟངས་ཀྱིས་འཁྱུད་ཅིང་

དགའ་བཞིའི་བདེ་བ་ཆེན་པོར་རྟག་ཏུ་སྤྱོད་པའི་བརྡར་རྡོ་རྗེ་པདྨར་རོལ་པ། འགྲོ་བ་སོ་སོའི་སྐད་དུ་ཆོས་སྒྲ་སྒྲོགས་པའི་བརྡར་སྤྱི་བོར་ཕག་གདོང་མཐིང་གས་ཕེཾ་སྒྲ་སྒྲོག་པའོ། ཡབ་ཡུམ་གཉིས་ཀྱི་མདུན་དུ་པདྨ་ཉི་ཟླའི་གདན་ལ་སྲས་མཆོག་སྐུ་མདོག་དམར་པོ་མགྲིན་པ་ཡན་ཆད་རྟ་མགོ་ལྗང་ནག །ཞུ་དཀར་པོ། ཁྲུམ་ཁྲུམ་སེར་པོ། རྔོག་མ་དམར་པོ་སྟེ་རྟ་སྐད་འཚེར་བ་ཞལ་གཅིག་ཕྱག་གཉིས། གཡས་རྡོ་རྗེས་མཚན་པའི་ཐོ་བ་དང་། གཡོན་ཐོད་ཁྲག་ཕུར་བུ་འཛིན་པ། སྐུ་ལ་དུར་ཁྲོད་ཆས་གསོལ་བ། སྨད་གནམ་ལྕགས་ཕུར་བུའི་དབལ་ཤམ་ཅན་ཏེ། ཀུན་ཀྱང་ཞིང་བཅུ་ཚར་གཅོད་ཅིང་གཉིས་འཛིན་གྱི་བག་ཆགས་མ་ལུས་བསྲེག་པའི་བརྡར་ཡེ་ཤེས་ཀྱི་མེ་དཔུང་འབར་བའི་ཀློང་དུ་གསལ་བའི་སྟེང་འོག་ཕྱོགས་མཚམས་སུ་འཇའ་ཟེར་འཁྲུགས་པའི་གསེབ་ན་དུས་གསུམ་གྱི་བདེ་བར་གཤེགས་པ་ཐམས་ཅད་སྤྲིན་ལྟར་གཏིབས་པ། མ་ཚོགས་ཌཱ་ཀི་བྲན་དུ་འདུ་ཞིང་། དེའི་ཕྱི་རོལ་དུ་དཔའ་བོ་དཔའ་མོ་གིང་ཆེན་བཅོ་བརྒྱད་ལངྐ་ཚར་གསུམ་སོགས་དམ་ཅན་སྲུང་མའི་ཚོགས་ཀྱིས་བསྐོར་བ། ཐམས་ཅད་ཀྱང་

སེམས་ཉིད་རང་བྱུང་གི་ཡེ་ཤེས་འགག་མེད་སྒྱུ་འཕྲུལ་གྱི་རོལ་པར་འཆར་བའི་ཡེ་ཤེས་ཀྱི་སྣང་བརྙན་ཉིད་ད་རེས་མཚན་མའི་རྟེན་འདིས་མཚོན་ཏེ་བཅོམ་ལྡན་འདས་དཔལ་ཆེན་རྟ་ཕག་ཡབ་ཡུམ་གྱི་དཀྱིལ་འཁོར་མངོན་སུམ་བཞིན་དུ་མཐོང་བར་འགྱུར་སྙམ་པའི་མོས་པ་མཛོད། དེ་དག་ནི་ལྷ་དང་སྐལ་བ་མཉམ་པའི་ཕྱིར་དུ་འཇུག་པའི་ཆོས་རྣམས་སོང་ནས་ཞུགས་པའི་དཀྱིལ་འཁོར་དེར་མངོན་པར་དབང་བསྐུར་བའི་དོན་དུ་མཎྜལ་ཕུལ་མཛོད། དེ་ལྟར་མཎྜལ་ཕུལ་ནས་མི་ཕྱེད་པའི་དད་གདུང་ཤུགས་དྲག་པོས་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཧོ། བླ་མ་གསང་སྔགས་ཆེ་བའི་མཆོག༔ བདག་སོགས་གསང་བའི་དཀྱིལ་འཁོར་དུ༔ དབང་བཞི་ཡོངས་སུ་རྫོགས་པ་དང་༔ སྨིན་ཅིང་གྲོལ་བར་མཛད་དུ་གསོལ༔ ཞེས་ལན་གསུམ་གསོལ་བའི་ལན་དུ། སློབ་དཔོན་གྱིས་འདི་སྐད་ཅེས། ཧོ། ཁྱེད་རྣམས་རྟ་ཕག་ཡབ་ཡུམ་གྱི༔ སྐུ་གསུང་ཐུགས་དང་གཉིས་སུ་མེད༔ བསྒྲུབ་འགྱུར་འདི་ལ་ཐེ་ཚོམ་མེད༔ སློབ་དཔོན་ལ་ནི་གུས་པ་བསྐྱེད༔ ཅེས་བརྗོད། དེ་ཡང་དབང་གི་ངོ་བོ་ཐོབ་བྱའི་ནུས་པ་ཁྱད་པར་ཅན་དེ་ནི་སྒྲུབ་གཞི་ཇི་ལྟ་བུ་ཞིག་ཡིན་ཞེ་ན།

ཁམས་བདེ་བར་གཤེགས་པའི་སྙིང་པོ་རང་བཞིན་གྱིས་རྣམ་པར་དག་པས་ཡེ་ནས་འཁོར་འདས་མཉམ་པ་ཉིད་དུ་བཞུགས་པ་ནི་སྦྱང་གཞི། དེ་མ་རྟོགས་པའི་གློ་བུར་འཁྲུལ་རྟོག་གི་དབང་གིས་འཁོར་བར་སྣང་ཞིང་ཞེན་པ་འདི་དག་སྦྱང་བྱ། དེ་ཉིད་དྲི་མ་ཡིན་པའི་ཕྱིར་སྦྱང་དགོས་ལ། སྦྱོང་བྱེད་སྨིན་གྲོལ་གྱི་ལམ་ཟབ་མོ་བཞི་དང་རྗེས་སུ་མཐུན་པར་རྟོགས་གོམས་ཀྱི་སྦྱོར་བ་ལ་རང་བྱན་ཚུད་པ་ལས་མི་འདའ་བར་བསླབ་དགོས་པས། དེ་ཡང་བརྡ་སྤྲོད་པའི་ཚིག་གིས་མཚོན་ཏེ། དབང་དོན་གྱི་དག་བྱ་དག་བྱེད་ངོ་འཕྲོད་པར་བྱས་པས་སྦྱངས་འབྲས་མངོན་དུ་འགྱུར་རུང་གི་རྟེན་འབྲེལ་ཐམས་ཅད་སྨིན་བྱེད་ཀྱི་དབང་མོས་གུས་བསྐྱེད་པ་ལ་བརྟེན་ནས་བསྒྲིག་དགོས་པ་ཡིན་ནོ་ཞེས་ངེས་ཤེས་བསྐྱེད་པའི་སྒོ་ནས་གནང་བ་སྦྱིན་པ་སོང་ནས། འདིར་དབང་བསྐུར་བའི་རིམ་པ་དངོས་ལ་བཞི་ལས། དང་པོ་བུམ་པའི་དབང་བསྐུར་བ་ནི། སློབ་དཔོན་སྐུ་རྡོ་རྗེའི་བདག་ཉིད་དུ་བཞུགས་པར་མོས་ཏེ། དཀྱིལ་འཁོར་གྱི་ཤར་ཕྱོགས་སུ་དབང་སྟེགས་ཀྱི་དཀྱིལ་འཁོར་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་

སུ་པདྨ་ཉི་མ་ཟླ་བའི་གདན་ལ་ཁྱེད་རང་རྣམས་རྟ་ཕག་ཡབ་ཡུམ་གྱི་རྣམ་པས་འཁོད་པའི་མོས་པ་མཛོད། བླ་མ་དང་གཉིས་སུ་མེད་པའི་དཀྱིལ་འཁོར་གྱི་གཙོ་བོའི་གནས་གསུམ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་གདན་གསུམ་ཚང་བའི་དབང་གི་ལྷ་ཚོགས་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲངས། ཨོཾ་བཛྲ་ཨརྒྷཾ་སོགས་ཆུ་གཉིས་ཉེར་སྤྱོད་རོལ་མོར་བཅས་པས་མཆོད། ཨོཾ་སརྦ་ཏ་ཐཱ་ག་ཏ་ཨ་བྷིཥིཉྩ་ཏུ་མཾ། ཞེས་གསོལ་བ་བཏབ་པས་བླ་མ་དང་གཉིས་སུ་མེད་པའི་དེ་བཞིན་གཤེགས་པ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་རིན་པོ་ཆེའི་བུམ་པ་ཡེ་ཤེས་ལྔའི་བདུད་རྩིས་གང་བ་ཐོགས་ནས་དབང་བསྐུར་བའི་བྱ་བ་མཛད། འཁོར་གྱི་སེམས་དཔའ་སེམས་མ་ལྷ་དང་བླ་མ་རྣམས་ཀྱིས་ཤིས་པ་བརྗོད་ཅིང་མེ་ཏོག་ལ་སོགས་པའི་མཆོད་རྫས་ཀྱིས་ཆར་འབེབ། ཕོ་ཉ་བཀའ་སྡོད་རྣམས་ཀྱིས་བགེགས་བསྐྲོད་པའི་སྦྱོར་བ་དང་བཅས་ཏེ་རྡོ་རྗེའི་བུམ་པ་ལྔ་ཚན་ལྔའི་བཅུད་དང་ལྡན་པས་དབང་བསྐུར་བས། རིགས་ལྔའི་རང་བཞིན་ཅན་གྱི་རིག་པའི་དབང་ལྔ་ཐོབ། ཉོན་མོངས་པ་དུག་ལྔའི་སྒྲིབ་པ་

དག །ཕུང་པོ་ལྔ་རིགས་ལྔར་གནས་བསྒྱུར། ཡེ་ཤེས་ལྔ་མངོན་དུ་བྱས་པའི་མོས་པ་མཛོད་ཅིག ཧྲཱིཿ དག་བྱེད་ཡེ་ཤེས་བདུད་རྩི་ལྷ་ཡི་ཆུ༔ བདེ་གཤེགས་དབང་ཆེན་འདུས་པའི་བུམ་པ་ཡིས༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ ཕུང་ཁམས་ལྷ་ཡི་སྐུ་རུ་གྲོལ་བར་ཤོག༔ ཧྲཱིཿ པདྨ་ཀྲོ་དྷ་ཧ་ཡ་གྲཱྀ་ཝ་ཧཱུྃ་ཕཊཿ༔ ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་ཨ་བྷི་ཥིཉྩ་ཧཱུཾ། ཞེས་སྤྱི་བོར་དབང་བསྐུར། བུམ་ཆུ་བླུད་དོ། དེ་ནས་བུམ་དབང་གི་རྗེས་འབྲེལ་དཔལ་ཆེན་པོའི་ཆས་དབང་ལུས་ལ་བཀོད་ཅིང་ཕྱག་མཚན་ལག་ཏུ་གཏད་པ་ནི། དུར་ཁྲོད་ཀྱི་ཆས་དངོས་སམ་ཙཀླི་ཐོགས་ལ། ཁམས་གསུམ་གྱི་གདུག་པ་ཅན་ཐམས་ཅད་ཚར་གཅོད་ཅིང་མ་མོ་རྣམས་དབང་དུ་བསྡུ་བའི་ཕྱིར་དུར་ཁྲོད་ཀྱི་ཆས་བརྒྱད་ཀྱིས་དབང་བསྐུར་བའི་མོས་པ་མཛོད་ཅིག། ཧྲཱིཿ ཐོད་སྐམ་དབུ་རྒྱན་ཞིང་གླང་གོས༔ རུས་རྒྱན་སྟག་ཤམ་མགོ་ཕྲེང་སྦྲུལ༔ ཁྲག་ཞག་ཐལ་ཆེན་མེ་དཔུང་གོ༔ སྐལ་ལྡན་བུ་ཡི་ལུས་ལ་བརྒྱན༔ བདུད་འདུལ་དཔལ་གྱི་ཆས་རྫོགས་ཤོག༔ ཨོཾ་པདྨ་ཙཎྜ་ཧ་ཡ་གྲྀ་ཝ་ཤ་མ་ཤཱན་ཀན་ཏི་ཀ་སརྦ་ཨ་བྷི་ཥིཉྩ་ཧཱུཾ། དེ་ལྟར་ཆས་དབང་

ལུས་ལ་བསྐོན་པས་དཔལ་ཧེ་རུ་ཀའི་གནས་ཐོབ་སྟེ་མ་མོ་དང་མཁའ་འགྲོ་ཡོངས་ཀྱི་རྗེ་བོར་མངའ་དབང་བསྒྱུར་བ་ཡིན་ནོ། །ཕྱག་མཚན་ཐོགས་ལ། ཧྲཱིཿ གདུག་པ་ཚར་གཅོད་རྡོ་རྗེ་ཐོ་བ་དང་༔ དངོས་གྲུབ་རྩོལ་བྱེད་ཐོད་ཁྲག་ཕུར་བུ་རྣམས༔ སྐལ་ལྡན་རིགས་ཀྱི་བུ་ཡི་ལག་ཏུ་གཏདཿ༔ དབང་བསྒྱུར་བརྟུལ་ཞུགས་ནུས་རྩལ་རྫོགས་པར་ཤོག༔ ཧྲཱིཿ པདྨ་ཙཎྜ་ཧ་ཡ་གྲྀ་ཝ་སརྦ་ཨ་བྷི་ཥིཉྩ་ཨ༔ ཞེས་ལག་ཏུ་གཏད་ཅིང་། དེ་ལྟར་ཕྱག་མཚན་ལག་ཏུ་གཏད་པ་ཙམ་གྱིས་གཟུང་འཛིན་རྟོག་ཚོགས་ཀྱི་སྣང་ཆ་ལས་བྱུང་བའི་དམ་སྲིད་རྒྱལ་འགོང་མ་རུངས་པའི་ཚོགས་མ་ལུས་པ་རྩད་ནས་གཞོམ་ཞིང་། བདུད་བཞི་བཅོམ་པའི་བཅུད་ཀྱིས་ཟུང་འཇུག་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེ་བའི་མོས་པ་མཛོད་ཅིག །དེ་ལྟར་ཕྱི་མཚན་མའི་དཀྱིལ་འཁོར་དུ་བུམ་པའི་དབང་བསྐུར་བ་ཐོབ། ལུས་རྩ་ཡི་སྒྲིབ་པ་དག །ཕུང་པོའི་བདུད་བཅོམ། བསྐྱེད་རིམ་དབྱིབས་ཀྱི་རྣལ་འབྱོར་བསྒོམ་པ་ལ་དབང་༔ རྒྱུའི་ས་བརྒྱད་པ་དང་སྐལ་བ་མཉམ་ཞིང་། ཞི་བའི་ལས་དང་རྣམ་སྨིན་རིག་འཛིན་འགྲུབ། འབྲས་བུ་སྐུ་རྡོ་རྗེ་སྤྲུལ་པའི་སྐུ་འགྲུབ་པའི་སྐལ་བ་

ཅན་དུ་བྱས་པ་ཡིན་ནོ། །གཉིས་པ་གསང་བའི་དབང་ནི། སླར་ཡང་ཁྱེད་རང་རྣམས་དཀྱིལ་འཁོར་གྱི་ལྷོ་ཕྱོགས་སུ་འཁོད་པར་མོས་ཏེ། སློབ་དཔོན་གསུང་རྡོ་རྗེའི་བདག་ཉིད་དུ་བཞུགས་པ་ལ། དཀྱིལ་འཁོར་གྱི་གཙོ་བོ་ཡབ་ཡུམ་དུ་གསལ་བའི་སྐུ་ལ་ཞི་ཁྲོའི་ལྷ་ཚོགས་ཡབ་ཡུམ་ཏིལ་གྱི་གོང་བུ་བཞིན་གང་བར་བཞུགས་པའི་ཡབ་ཀྱི་གསང་གནས་ཧཱུཾ་ལ་རྡོ་རྗེ་ནོར་བུའི་བུ་གར་ཨོཾ། ཡུམ་གྱི་གསང་གནས་ཨཱཿལས་པདྨ་འདབ་བརྒྱད་དམར་པོའི་ཟེའུ་འབྲུར་ཧྲཱིཿཡིག་གིས་མཚན་པར་མོས་ཏེ་རྗེས་ཆགས་ཀྱིས་སྙོམས་པར་ཞུགས་པས་མཁའ་ཁྱབ་ཀྱི་དེ་བཞིན་གཤེགས་པ་ཐམས་ཅད་དང་རོ་མཉམ་པའི་ལུས་དཀྱིལ་གྱི་ལྷ་ཚོགས་ཐམས་ཅད་ཀྱང་འདོད་ཆགས་ཆེན་པོའི་སྦྱོར་བ་མཛད་པས་བྱང་ཆུབ་སེམས་ཀྱི་ངོ་བོར་ཞུ་བ་རྡོ་རྗེའི་རྩེ་མོར་འདུས་ནས་ལྷན་སྐྱེས་ཀྱི་བདེ་ཆེན་ཉམས་སུ་མྱོང་བར་མཛད་པའི་བྱང་སེམས་བདུད་རྩི་དཀར་དམར་རོ་གཅིག་ཏུ་འདྲེས་པར་མོས་པའི་དམ་རྫས་བྷནྡྷའི་ནང་དུ་གཏམས་པ་འདི་ཉིད་ཀྱིས་ཁྱེད་རང་རྣམས་ལ་དབང་བསྐུར་ཅིང་མྱང་བས། འཆིང་བྱེད་རྩ་ཡི་མདུད་པ་གྲོལ། གཡོ་བའི་རླུང་ལྔ་

དབུ་མར་ཐིམ། ཐིག་ལེའི་འཕོ་བ་ཟག་མེད་བདེ་བ་ཆེན་པོའི་རང་བཞིན་དུ་བརྟན་པར་བྱས་པར་མོས་ལ། བྷནྡྷ་བདུད་རྩིས་གང་བ་ཐོགས་ཏེ། ཧཱུྃ། ཆོས་སྐུ་སྣང་མཐའི་ངང་ལས་མ་གཡོས་ཀྱང་༔ ལོངས་སྤྱོད་རྫོགས་སྐུའི་སྣང་ཚུལ་ཅིར་ཡང་སྟོན༔ སྤྲུལ་སྐུ་ཁྲོ་རྒྱལ་དབང་ཆེན་ཡབ་ཡུམ་གྱིས༔ ཀུན་འདུས་བྱང་སེམས་བདུད་རྩིའི་དབང་ཐོབ་ཤོག༔ ཧྲཱིཿ པདྨ་ཙཎྜ་ཧ་ཡ་གྲཱྀ་ཝ་ཨ་ཧ་རི་ནི་ས་ར་ཙ་ཧྲི་ཡ་བྷོ་དྷི་ཙིཏྟ་ཨ་མྲྀ་ཏ་ཝཱ་ཀ་ཨ་བྷི་ཥིཉྩ་ཨཱཿ ཞེས་བསྐུར་ལ་བདུད་རྩི་བྱིན། གསང་དབང་གི་རྗེས་འབྲེལ་དུ་བཟླས་ལུང་བྱིན་པ་ནི། འཁོར་ལོ་ལྔ་དང་བཅས་པའི་རྩ་ཁམས་ཐམས་ཅད་དཔའ་བོ་མཁའ་འགྲོས་གང་ཞིང་། བདེ་སྟོང་གི་ཡེ་ཤེས་འབར་བ་ལས་སློབ་དཔོན་དང་དཀྱིལ་འཁོར་གྱི་འཁོར་ལོ་ལྔའི་གཙོ་བོའི་ཐུགས་ཀར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་གྱི་སྟེང་དུ་དོན་དམ་བྱང་ཆུབ་ཀྱི་སེམས་རྡོ་རྗེ་རྩེ་ལྔ་པའི་ལྟེ་བར་ཐབས་ཤེས་ཉི་ཟླའི་གའུ་ཁ་སྦྱོར་གྱི་ནང་དུ་ཐུགས་སྲོག་ཧྲཱིཿཡིག་སྔོ་དམར་འོད་ཟེར་འབར་བའི་མཐའ་བསྐོར་དུ་སྔགས་ཕྲེང་གིས་བསྐོར་བར་མོས་གུས་བསྐྱེད་པས་སྔགས་ཕྲེང་ལས་སྔགས་ཕྲེང་གཉིས་པ་འཕྲོས།

ཞལ་ནས་ཐོན། ཁྱེད་རང་རྣམས་རྟ་ཕག་ཡབ་ཡུམ་དུ་གསལ་བའི་ཞལ་དུ་བཞུགས། ཐུགས་ཀར་ཟླ་སྟེང་རྡོ་རྗེ་རྩེ་ལྔ་པའི་ལྟེ་བར་ཉི་ཟླའི་གའུ་ཁ་སྦྱོར་གྱི་ནང་དུ་ཐུགས་སྲོག་ཧྲཱིཿཡིག་སྔོ་དམར་འོད་ཟེར་འབར་བའི་མཐར་འཁོད་པ་ལས་འོད་ཟེར་འཕྲོས། སྲས་བཅས་རྒྱལ་བ་མཆོད་པས་མཉེས། སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་བྱིན་རླབས་འོད་ཟེར་སྣ་ལྔ་འཇའ་ཐིག་གི་རྣམ་པས་གནས་ལྔར་ཐིམ། སྒྲིབ་བཞི་དག །དབང་བཞི་གཅིག་ཅར་དུ་ཐོབ། ཡང་འོད་ཟེར་མཁའ་ཁྱབ་ཀྱི་སེམས་ཅན་ལ་ཕོག །ལས་ཉོན་བག་ཆགས་སྦྱངས། ཐམས་ཅད་ལྷ་སྔགས་ཆོས་སྐུར་བརྟས། སླར་འོད་ཟེར་འཕྲོས། །རྩ་གསུམ་རྒྱལ་བ་རབ་འབྱམས་སྔགས་སྒྲ་སྒྲོགས་བཞིན་པའི་བྱིན་རླབས་ནུས་མཐུ་ཐམས་ཅད་ཐུགས་སྲོག་སྔགས་ཕྲེང་ལ་ཐིམ་པས་ཕྲིན་ལས་རབ་འབྱམས་ལ་དབང་འབྱོར་བར་མོས་ལ་སྔགས་འདིའི་རྗེས་ཟློས་མཛོད། ཨོཾ་བཛྲ་ཀྲོ་དྷ་པ་ཏེ་པ་ཏེ་ཧཱུྃ་ཕཊ༔ ཞེས་གཙོ་བོ་ཡབ་ཡུམ་དང་། ཨོྃ་བཛྲ་ཀྲོ་དྷ་ཧ་ཡ་གྲྀ་ཝ་ཧཱུྃ་ཕཊཿ་༔ ཞེས་སྲས་མཆོག་གི་སྔགས་ཏེ། ལན་གསུམ་རེ་རྗེས་ཟློས་བྱར་གཞུག་སྟེ་བཟླས་ལུང་ཕོག །སྔགས་ཕྲེང་ལག་ཏུ་

ཐོགས་ལ། ཨཱཿ སྐྱེ་མེད་གསལ་དྭངས་དྲན་འཛིན་ཞིག༔ སྔགས་བཟླས་ཆུ་བོའི་གཞུང་བཞིན་མཚུངས༔ གསལ་ཆ་མ་འགགས་ལྷ་སྔགས་དབང་༔ སྐལ་ལྡན་བུ་ཡིས་ཐོབ་པར་ཤོག༔ གོང་གི་རྩ་སྔགས་ཀྱི་ཤམ་བུར་དབྱངས་གསལ་རྟེན་སྙིང་སྦྲེལ་བ་བཟླ་བཞིན་དུ་ལག་ཏུ་གཏད། དེ་ལྟར་ནང་ལུས་ཀྱི་དཀྱིལ་འཁོར་ལ་བརྟེན་ནས་གསང་བའི་དབང་བསྐུར་བ་ཐོབ། ངག་རླུང་གི་སྒྲིབ་པ་དག །ཉོན་མོངས་པའི་བདུད་འཇོམས། ཤ་ལྔ་བདུད་རྩི་ལྔ་ལ་བརྟེན་པ་དང་། བདག་བྱིན་བརླབ་པ་གཏུམ་མོའི་རྣལ་འབྱོར་སྒོམ་པ་ལ་དབང་། རྒྱུའི་ས་དགུ་པ་དང་སྐལ་བ་མཉམ་ཞིང་། རྒྱས་པའི་ལས་དང་ཚེ་དབང་རིག་འཛིན་གྲུབ། འབྲས་བུ་གསུང་རྡོ་རྗེ་ལོངས་སྤྱོད་རྫོགས་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། གསུམ་པ་ཤེས་རབ་ཡེ་ཤེས་ཀྱི་དབང་ནི། སླར་ཡང་ཁྱེད་རང་རྣམས་དཀྱིལ་འཁོར་གྱི་ནུབ་ཕྱོགས་སུ་འཁོད་པར་མོས་ལ། སློབ་དཔོན་ཐུགས་རྡོ་རྗེའི་བདག་ཉིད་དུ་བཞུགས་པས་རང་སྣང་རེག་ན་བདེ་བའི་གཟུང་མ་སྣང་ལ་རང་བཞིན་མེད་པའི་མཚོན་བྱེད་དྭངས་ཤིང་གསལ་བའི་མེ་ལོང་སྙིང་གར་གཏད་པ་ལས། སློབ་མ་བཅོམ་ལྡན་འདས་རྟ་མགྲིན་

དབང་གི་རྒྱལ་པོ་ཡབ་དང་། ཕྱག་རྒྱ་མ་རྡོ་རྗེ་ཕག་མོ་ཡུམ་དུ་གསལ་བས་གཉིས་ཀའི་ལུས་ཀྱི་རྩ་འཁོར་ལྔ་ལ་རང་འདྲའི་ལྷ་ཡབ་ལ་ཡབ་དང་། ཡུམ་ལ་ཡུམ་རྣམས་སོ་སོར་བསྐྱེད་པ་ལྷའི་འདུ་ཤེས། ཡབ་ཀྱི་གསང་གནས་ཧཱུཾ་ལས་རྡོ་རྗེ་ནོར་བུའི་བུ་གར་ཨོཾ། ཡུམ་གྱི་གསང་གནས་ཨཱཿལས་པདྨ་འདབ་བརྒྱད་འོད་ཟེར་འབར་བའི་ཟེའུ་འབྲུར་ཧྲཱིཿཡིག་གིས་མཚན་པར་མོས་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་བདེ་ཆེན་གྱི་ཡེ་ཤེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས། དེ་ལྟར་འདུ་ཤེས་གསུམ་ལྡན་གྱིས་སྙོམས་པར་ཞུགས་པས་རྗེས་ཆགས་ཀྱི་རླུང་གཡོས། གཏུམ་མོའི་མེ་འབར་བས་སྤྱི་བོའི་ཧཾ་ཡིག་ཞུ་བའི་བྱང་སེམས་རིམ་པར་བབས་པས་མགྲིན་པར་དགའ་བ། སྙིང་གར་མཆོག་དགའ། ལྟེ་བར་ཁྱད་པར་གྱི་དགའ་བ། ནོར་བུར་ལྷན་སྐྱེས་ཀྱི་དགའ་བ་རྣམས་ཉམས་སུ་མྱོང་བར་བསམ། སླར་ཡང་ཧཱུྃ་ཞེས་རླུང་གིས་སྦྱོར་བས་གྱེན་དུ་དྲངས་པས་ལྟེ་བ་ལ་སོགས་པ་འཁོར་ལོ་བཞིར་མས་བརྟན་གྱི་དགའ་བ་བཞི་ཤར་ཏེ་སྤྱི་བོར་རང་བཞིན་ལྷན་ཅིག་སྐྱེས་པའི་ཡེ་ཤེས་རང་རིག་འོད་གསལ་བདེ་

ཆེན་མཆོག་ཏུ་མི་འགྱུར་བའི་ངོ་བོར་ཆོས་ཐམས་ཅད་རོ་མཉམ་པར་བལྟ་བ་མོས་ལ། མེ་ལོང་གཡའ་བྲལ་ཐོགས་ཏེ། རེག་བྱའི་བདེ་བ་འཇམ་ཞིང་ཡིད་དུ་འོང་༔ སྟོང་གསལ་ཉམས་དབྱངས་ཡེ་ཤེས་གསལ་སྒྲིབ་མེད༔ སྣ་ཚོགས་འབར་བའི་ཤེས་རབ་ཡེ་ཤེས་དབང་༔ སྐལ་ལྡན་གསང་སྔགས་དམ་པར་དབང་བསྐུར་རོ༔ རྩ་སྔགས་མཐར། ཀརྨ་མུ་དྲ་ཙིཏྟ་ཨ་བྷི་ཥིཉྩ་ཧཱུཾ། ཞེས་སྙིང་གར་བཞག །དེས་གསང་བ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ༔ ཡིད་ཐིག་ལེའི་སྒྲིབ་པ་དག འཆི་བདག་གི་བདུད་འཇོམས། ལས་ཀྱི་ཕྱག་རྒྱ་བསྟེན་པའམ། ཡེ་ཤེས་ཀྱི་ཕྱག་རྒྱ་སྒོམ་པ་ལ་དབང་། རྒྱུའི་ས་བཅུ་པ་དང་སྐལ་བ་མཉམ། དབང་གི་ལས་དང་ཕྱག་རྒྱའི་རིག་འཛིན་གྲུབ། འབྲས་བུ་ཐུགས་རྡོ་རྗེ་ཆོས་སྐུ་འགྲུབ་པའི་སྐལ་བ་ཅན་དུ་བྱས་པ་ཡིན་ནོ། །བཞི་པའི་དབང་ནི་སྔོན་དུ་འགྲོ་བ་ཡོངས་རྫོགས་གཏོར་མའི་དབང་དང་། དངོས་གཞི་ཚིག་དང་དཔེ་ཙམ་ལ་བརྟེན་ནས་རིག་པའི་རྩལ་དབང་བསྐུར་བ་ལས། སླར་ཡང་ཁྱེད་རང་རྣམས་དཀྱིལ་འཁོར་གྱི་བྱང་ཕྱོགས་སུ་འཁོད་པར་མོས་པས་བླ་མ་ཡེ་ཤེས་རྡོ་རྗེའི་བདག་ཉིད་དུ་

བཞུགས་པར་བསམ་པར་མཛོད་ལ། དབང་གཏོར་ཐོགས་ཏེ། དཔལ་གྱི་གཏོར་མ་ཕྱི་སྣོད་དབང་ཆེན་ཟླ་གམ་འབར་བ་དང་འོག་མིན་མཁའ་ལ་སྤྱོད་པའི་ཞིང་ཁམས་ཐ་མི་དད་པ་ཆོས་དབྱིངས་བརྡལ་བ་ཆེན་པོའི་ཕོ་བྲང་གཞལ་མེད་ཁང་འཇའ་ཟེར་ཐིག་ལེ་འོད་ལྔའི་དྲྭ་བ་འཁྱིལ་བའི་ཀློང་དུ། གཏོར་མ་ཉིད་སྣང་ཆ་དབང་ཆེན་རྟ་མཆོག་རོལ་པ་རྩལ་དང་། སྟོང་ཆ་ཡུམ་རྡོ་རྗེ་ཕག་མོ་གཉིས་མེད་ཟུང་འཇུག་བླ་མ་སྐུ་གསུམ་ཞི་ཁྲོ་སྒྱུ་འཕྲུལ་དྲྭ་བའི་རོལ་གར་ཅིར་ཡང་འཆར་བའི་གནས་བཞི་ནས་མི་ཤིགས་པ་རྡོ་རྗེ་བཞིའི་ཡེ་ཤེས་ཀྱི་འོད་ཟེར་དཀར་དམར་མཐིང་ལྗང་བཞི་རིམ་པར་བྱུང་། ཁྱེད་རང་རྣམས་ཀྱི་གནས་བཞིར་ཐིམ་པས་སྐུ་བཞིའི་དབང་དང་བྱིན་རླབས་དངོས་གྲུབ་མ་ལུས་པ་ཐོབ། སྣང་གྲགས་རྟོག་ཚོགས་ལྷ་སྔགས་ཆོས་ཉིད་འོད་གསལ་ཡེ་ཤེས་ཀྱི་འཁོར་ལོར་རྫོགས་པས་འཁྲུལ་སྣང་རང་སངས་སུ་གྱུར་པར་མོས་ཤིག ཧྲཱིཿ སྣོད་བཅུད་རྣམ་དག་རྟེན་དང་བརྟེན་པར་བཅས༔ རང་ལུས་ཕུང་ཁམས་དང་བཅས་གཞལ་ཡས་ཁང་༔ དོན་དམ་རིག་སྟོང་འགྱུར་མེད་བཞི་པའི་དབང་༔ སྐལ་ལྡན་བུ་ཡི་

རང་གསལ་རྟོགས་པར་ཤོག༔ རྩ་སྔགས་མཐར། ཏི་ལ་ཀ་ཛྙཱ་ན་བ་ལིངྷ་ཨ་བྷི་ཥིཉྩ་ཧཱུྃ༔ ཞེས་གཏོར་མ་གནས་བཞིར་གཏད་དོ། དངོས་གཞི་དཔེ་ཚིག་ལ་བརྟེན་ནས་རིག་པ་རྩལ་གྱི་དབང་བསྐུར་བ་ནི། སློབ་དཔོན་གྱིས་མན་ཤེལ་མིག་ལམ་དུ་བསྟན་ཏེ། འདི་ནི་རང་བྱུང་བློ་བྲལ་རིག་པའི་ཡེ་ཤེས་བཅོས་སླད་མེད་པ་དཔེ་འདིས་མཚོན་ནས་རྟོག་པའི་འཕྲང་བསལ། མི་རྟོག་པའི་སྒོ་ཕྱེ། རང་རིག་ཡེ་ཤེས་མངོན་དུ་བསྟན། འཁོར་འདས་ཀྱི་ཤན་ཕྱེ། ཆོས་ཀྱི་གནད་མ་ལུས་པ་བསྟན་ཏེ། མན་ཤེལ་འདི་ཡེ་ནས་རང་བྱུང་བཅོས་བསླད་མེད་པ་ནི་ཀུན་གཞི་ཡེ་ནས་རྣམ་པར་དག་ཅིང་མ་བཅོས་པའི་བརྡ་ཡིན་ལ། དེ་ཉིད་ཉི་ཟེར་གྱི་རྐྱེན་དང་འཕྲད་པས་ཁ་དོག་སྣ་ཚོགས་འཇའ་ཚོན་དུ་སྣང་བ་བཞིན་དུ་འཁོར་འདས་ཐམས་ཅད་རང་སྣང་དུ་འཆར་ཡང་དེས་མ་གོས་པའི་བརྡ་ཡིན་ལ། དེས་ན་གཞི་དབྱིངས་ཀ་དག་ཤེལ་གྱི་ངོ་བོ་ལྟ་བུ་དང་། ལམ་སྣང་ལྷུན་གྲུབ་འཇའ་ཚོན་ལྟ་བུ་ཟུང་དུ་འབྲེལ་བའི་དོན་སྒོམ་པ་དང་རྟག་ཏུ་མ་བྲལ་བར་གྱིས་ཤིག ཀྱཻ སྐལ་ལྡན་དམ་པའི་རིགས་ཅན་རྣམས༔ སྔོན་འགྲོ་ནས་བརྩམས་བུམ་དབང་དང་༔ ཡོངས་རྫོགས་དཀྱིལ་འཁོར་དབང་གི་བར༔

བསྐུར་དང་བསྐུར་བའི་བརྗོད་ཚིག་རྣམས༔ བློ་འདས་སྤྲོས་བྲལ་བརྗོད་མེད་དུ༔ ཐམས་ཅད་རིག་པའི་ཆོ་འཕྲུལ་ཆེ༔ སེམས་རིག་བསམ་བརྗོད་བྲལ་བའི་ངང་༔ འདི་ནི་མཉམ་རྫོགས་ཆེན་མོའི་དབང་༔ རྗེས་སུ་སྐྱོངས་ཤིག་སྐལ་ལྡན་རྣམས༔ བསྐྱང་བྱ་སྐྱོང་བྱེད་བཟོ་བཅོས་བྲལ༔ བློ་བྲལ་རིག་པའི་ཡེ་ཤེས་འདི༔ ཁྱོད་ཀྱིས་ད་ལྟ་རྟོགས་གྱུར་ཅིག༔ རང་རིག་རྗེན་པ་འདི་ལ་ལྟོས༔ བལྟ་བྱ་ལྟ་བྱེད་བྲལ་བས་ན༔ ཡེངས་མེད་རྗེན་པའི་ངང་དུ་ཞོག༔ ཅེས་དཔོན་སློབ་གཉིས་ཀ་ཤེས་པ་དུས་གསུམ་གྱི་སྤྲོས་པ་བཅད་དེ་དར་ཅིག་མཉམ་པར་བཞག་པར་བྱའོ། །དེ་ལྟར་དོན་དམ་བྱང་ཆུབ་ཀྱི་སེམས་འོད་གསལ་རྫོགས་པ་ཆེན་པོའི་དཀྱིལ་འཁོར་དུ་རིག་པ་རྩལ་གྱི་དབང་ཐོབ་པས་ཆ་མཉམ་གྱི་སྒྲིབ་པ་དག །ལྷའི་བུའི་བདུད་འཇོམས། ཟབ་མོའི་དོན་དབང་ཐོབ་པས་ཆོས་ཐམས་ཅད་བཟང་ངན་བླང་དོར་བྲལ་བའི་ལམ་རྫོགས་པ་ཆེན་པོ་ཡེ་ཤེས་སྤྱི་གཟུགས་སྒོམ་པ་ལ་དབང་། རྒྱུའི་ས་བཅུ་གཅིག་པ་དང་སྐལ་བ་མཉམ། དྲག་པོའི་ལས་དང་ལྷུན་གྲུབ་རིག་འཛིན་གྲུབ། འབྲས་བུ་མཐར་ཐུག་མི་འགྱུར་ཡེ་ཤེས་རྡོ་རྗེའི་ངོ་བོ་ཉིད་སྐུ་ཐོབ་པའི་

སྐལ་བ་ཅན་དུ་བྱས་པ་ཡིན་ནོ། དེ་ལྟར་ཁྱེད་རང་རྣམས་ཀྱི་ལུས་ངག་ཡིད་གསུམ་བཅོམ་ལྡན་འདས་དཔལ་རྟ་ཕག་ཡབ་ཡུམ་གྱི་གསང་བ་གསུམ་དབྱེར་མི་ཕྱེད་པར་གྱུར་པ་ནས། སྐུ་གསུང་ཐུགས་ཡོན་ཏན་ཕྲིན་ལས་རྒྱ་མཚོར་དབང་འབྱོར་བ་ལ་སློབ་དཔོན་མདུན་བསྐྱེད་དང་བཅས་པས་མེ་ཏོག་གི་ཆར་འབེབས་ཤིང་ཤིས་པ་བརྗོད་པའི་ཚིགས་སུ་བཅད་པས་མངའ་གསོལ་བར་མོས་མཛོད། ཅེས་བརྗོད་ནས་བཀྲ་ཤིས་པའི་ཚིགས་སུ་བཅད་པ་ཅི་རིགས་བརྗོད་ལ་མེ་ཏོག་འཐོར་བར་བྱའོ། །དེ་དག་གིས་ནི་བཅོམ་ལྡན་འདས་དཔལ་ཆེན་པོ་རྟ་ཕག་ཡིད་བཞིན་ནོར་བུའི་དཀྱིལ་འཁོར་དུ་དབང་བཞི་ཡོངས་སུ་རྫོགས་པ་ལེགས་པར་ཕུལ་གྲུབ་པ་ལགས་པས། གཞུང་ལས་ཀྱང་། ཧོཿ གསང་སྔགས་དབང་གི་སྒོར་ཞུགས་ནས༔ དམ་ཚིག་བསྲུང་བ་མཆོག་ཏུ་གཅེས༔ དམ་མེད་ས་བོན་རུལ་པ་འདྲ༔ བྱང་ཆུབ་མྱུ་གུ་སྐྱེ་མི་སྲིད༔ དམ་ལྡན་ནོར་བུ་ཐོབ་པ་བཞིན༔ ཅི་འདོད་དངོས་གྲུབ་རྒྱང་མི་རིང་༔ དབང་ཐོབ་དམ་ཚིག་འགྲོ་བ་འདྲེན༔ དེ་ཕྱིར་རྩ་བ་ཡན་ལག་གི༔ བླ་མ་ལྷ་དང་རྡོ་རྗེའི་མཆེད༔ དམ་ཚིག་སྲོག་བཞིན་བཙའ་བ་བྱ༔ ཁྱད་པར་འདི་ཡི་དམ་ཚིག་ཏུ༔

བྱིན་རླབས་བཀའ་བབ་མ་ཆད་པའི༔ རིག་འཛིན་རྩ་བརྒྱུད་བླ་མ་ལ༔ གསོལ་བ་རྒྱུན་ཆད་མེད་པར་ཐོབ༔ དབང་བཞིའི་བཀའ་བབ་མ་ཆད་པའི༔ བསྐྱེད་རྫོགས་ཆུ་བོའི་རྒྱུན་བཞིན་སྒོམས༔ དངོས་གྲུབ་བཀའ་བབ་མ་ཆད་པའི༔ ཚོགས་གཏོར་མེ་མཆོད་རྒྱུན་དུ་བྱ༔ ནུས་པའི་བཀའ་བབ་མ་ཆད་པའི༔ ཐིག་ལེ་རང་གི་སྲོག་ལྟར་གཅེས༔ དམ་ཚིག་བཀའ་བབ་མ་ཆད་པའི༔ འཁྲི་བ་བཅད་ཅིང་ཞེན་པ་ཟློག༔ ཕྲིན་ལས་བཀའ་བབ་མ་ཆད་པའི༔ སྙིང་རྗེས་འགྲོ་ཀུན་རྗེས་སུ་བཟུང་༔ སྤྱོད་པའི་བཀའ་བབ་མ་ཆད་པའི༔ མ་དང་ཌཱ་ཀི་དབང་དུ་སྡུད༔ བདེ་ཆེན་འདུ་འབྲལ་མེད་པར་སྦྱོར༔ ཐུགས་རྒྱུད་དམ་ཚིག་མི་ཆད་པའི༔ འོད་གསལ་རྫོགས་ཆེན་ངང་དུ་འདའ༔ སྲུང་མཚམས་བྲལ་བའི་དབྱིངས་སུ་བསྐྱལ༔ དམ་ཚིག་ཅེས་ནི་དེ་ལ་བྱ༔ ཞེས་གསུངས་པ་ལྟར་རྡོ་རྗེ་ཐེག་པའི་དམ་ཚིག་སྤྱི་དང་། ཁྱད་པར་གྱིས་བསྡུས་པ་མཐའ་དག་སྲོག་དང་བདོས་ནས་ཚུལ་བཞིན་བསྲུང་བར་བྱའོ་སྙམ་པའི་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ་གྱིས་ཁས་བླང་དུ་བཅུག །དེ་ལྟར་

ལེགས་པར་ཐོབ་པའི་གཏང་རག་གི་སླད་མཎྜལ་ཕུལ་མཛོད་བྱས་ལ། སློབ་མས་ཀྱང་མཎྜལ་ཕུལ། སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོའི་བསྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ནས་འབུལ་ན་ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། སོགས་དང་། དེ་ལྟར་ཐོབ་པའི་དགེ་བ་སེམས་ཅན་ཐམས་ཅད་ཀྱི་དོན་དུ་བསྔོ་བར་མཛོད། བསོད་ནམས་འདི་ཡིས་ཐམས་ཅད་གཟིགས་པ་ཉིད། ཅེས་སོགས་ཀྱིས་དགེ་བ་བསྔོས་ལ་སློབ་མ་རང་གནས་སུ་ལྡོག །རྗེས་ཀྱི་བྱ་བ་ནི། སློབ་དཔོན་གྱིས་ཚོགས་ལ་རོལ་ཞིང་ལྷག་ཆོག་བཏང་། གཏོར་སྐྱོང་སོགས་ནས་དཀྱིལ་འཁོར་ལ་གཏང་རག་མཆོད་བསྟོད། ནོངས་བཤགས། རྟེན་དང་བསྟུན་པའི་གཤེགས་བསྟིམ་གང་འོས། བདག་བསྐྱེད་བསྡུ་ལྡང་། བསྔོ་སྨོན་དང་། ཤིས་བརྗོད་རྒྱས་པར་སྤེལ་ལ་མཐའ་རྒྱས་སུ་བྱའོ། པདྨའི་ཞལ་ཚབ་བདེ་ཆེན་རྒྱལ་པོ་ཡི། པདྨའི་ལུང་བཞིན་ཟབ་གཏེར་གསང་བའི་མཛོད། པདྨའི་སྙིང་ཐིག་ཡང་གསང་རྟ་ཕག་ཅེས། པདྨའི་རྗེས་འཇུག་ཡོངས་ཀྱི་གཅེས་དགུའི་དབྱིག །འདི་ནི་ཟབ་ཅིང་གཉན་ལ་བཀའ་དོག་སྟེ། བསྙེན་ཙམ་ལ་ཡང་མཆོག་ཐུན་དངོས་གྲུབ་དཔལ། ཆེར་སྙིགས་འདི་ཙམ་དུ་ཡང་བྱུང་དང་འབྱུང་། དཔྱོད་ལྡན་གླིང་བུ་བསྒྱུར་བའང་བདེན་པའི་གནས། གང་གི་སྨིན་བྱེད་ཁྲིགས་ཆགས་དམ་པའི་

གསུང་། ཟབ་རྒྱས་ཆུ་གཏེར་འཇིང་དུ་བརྡལ་མོད་ཀྱང་། དུས་གནས་བསྐལ་བས་ཕོངས་ལ་སྨན་ཐབས་སུ། བ་ཚའི་ཁྲོན་པ་འདྲུ་བ་ངལ་ལས་ཅི། འོན་ཀྱང་བཀའ་ལུང་དོ་ཤལ་གཙུག་བསྙེན་ནས། རིགས་མཐུན་མཁས་གྲུབ་གསུང་གི་རྗེས་བསྙེགས་ཏེ། ཇི་ལྟར་འབད་པ་སྐལ་བཟང་སྐྱེ་བོའི་ཚོགས། སྐུ་བཞིའི་ས་བོན་བསྐྲུན་པའི་རྒྱུར་གྱུར་ཅིག །དེ་ལྟར་དབང་ཆོག་བདུད་རྩིའི་བུམ་བཟང་ཞེས་པ་འདི་ཡང་མ་གཅིག་རིག་འཛིན་ཆོས་ཉིད་བཟང་མོའི་ཞལ་སྔ་ནས་སྨིན་གྲོལ་རྒྱབ་བརྟེན་དང་བཅས་པ་བཀའ་དྲིན་དུ་ཐོབ་པ་ལས། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་ཤིང་མཚུངས་མེད་ཐུགས་རྗེའི་གཏེར་ཆེན་འཇམ་མགོན་མཁྱེན་བརྩེ་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན་དཔལ་བཟང་པོ་མཆོག་ནས་འདི་ཡི་རྒྱུན་ཆུ་ལྷའི་ཕང་པར་གཤེགས་སུ་ཉེ་བར་བརྟེན་སྨིན་གྲོལ་གྱི་ཕྲིན་ལས་རྗེ་ཉིད་ནས་སྤེལ་བའི་མཛད་འཁུར་དགྱེས་བཞེས་བཀའ་དྲིན་ཆེ་བཞེད་ཀྱིས་ཁྱེད་ནས་དབང་ཁྲིད་སོགས་འཇུག་བདེ་ཞིག་ཅིས་ཀྱང་གྱིས་ཞེས་ལྷ་རྫས་ཀྱིས་སྤུད་པའི་མཎྜལ་རྟེན་དོད་རིན་ཆེན་གཉིས་པའི་ཙཀྲ་དང་བདོག་པའི་གནང་སྐྱེས་གྱ་ནོམས་དང་བཅས་རྡོ་རྗེའི་བཀའ་ལུང་སྤྱི་བོར་ཕེབས་པ་ལྡོག་ཏུ་མ་བཟོད་དེ། རྩ་བའི་གཏེར་གཞུང་དང་། ནང་མཐུན་གཏེར་ཁ་མཁའ་འགྲོའི་དབང་ཆོག །བླ་སྒྲུབ་པདྨ་རྒྱལ་པོའི་མཚམས་སྦྱོར་གཏེར་སྟོན་གྱི་ལྗགས་སྒྲིགས་སུ་གྲགས་པའི་ཡི་གེ་ཉུང་ངུ་རྙེད་པ་དག་གཞིར་བཟུང་། སྐབས་སུ་བློ་དམན་དག་ལ་དབང་བརྡ་སྤྲོད་པའི་མཚམས་སྦྱོར་དངོས་གྲུབ་བརྙེས་པའི་སློབ་དཔོན་རྣམས་ཀྱིས་ཇི་ལྟར་བཀྲལ་བས་

ཀྱང་མི་འགལ་བར་བརྒྱན་ཏེ། རྗེ་མ་གཅིག་གིས་རྩལ་མིང་ཀུན་བཟང་ཕྲིན་ལས་འགྲོ་འདུལ་རྩལ་ལམ། གཞན་དུ་རྨོངས་བརྟུལ་དགེ་སྦྱོང་ཝཱ་གིནྡྲ་དྷརྨ་མ་ཏིར་འབོད་པས་ལྷོ་མོན་ཤིང་ལོའི་ཚལ་གྱི་རི་ཁྲོད་ཐུབ་བསྟན་ཆོས་གླིང་དུ་དོན་གྲུབ་ཀྱི་ལོ་སྨིན་ཟླའི་དམར་ཕྱོགས་ཀྱི་དགའ་བ་གསུམ་པར་གྲུབ་པར་སྦྱར་བའི་ཡི་གེ་པ་ནི་བྲིས་ལ་བྱང་ཞིང་གཅིག་ཏུ་བརྩོན་པའི་གོ་ཆ་ཅན་དགེ་སློང་ངག་དབང་བློ་གྲོས་ཀྱིས་བགྱིས་པ་འདིས་ཀྱང་ཟབ་གཏེར་འདི་ཉིད་ཇི་སྲིད་ཉི་ཟླའི་བགྲོད་པ་མི་འཛད་བར་མི་ནུབ་པའི་ཕྲིན་ལས་མཁའ་ཁྱབ་ཏུ་བརྡལ་བའི་དཔལ་དུ་གྱུར་ཅིག། །།སརྦ་མངྒ་ལཾ།། ཤུ་བྷཾ།།

ཡང་གསང་རྟ་ཕག་གི་ལས་བྱང་དངོས་གྲུབ་རྒྱ་མཚོ།

༄༅། །ཡང་གསང་རྟ་ཕག་གི་ལས་བྱང་དངོས་གྲུབ་རྒྱ་མཚོ་བཞུགས་སོ།།

བླ་མ་དང་རྟ་ཕག་ཡབ་ཡུམ་གཉིས་སུ་མེད་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །འདིར་ཀུན་བཟང་བདེ་ཆེན་རྒྱལ་པོས་གཏེར་སྒྲོམ་མཚོ་རྒྱལ་གསང་ཕུག་ནས་སྙན་བརྒྱུད་དུ་སྤྱན་དྲངས་པའི་ཡང་གསང་རྟ་ཕག་གི་ཆོ་ག་སྔོན་འགྲོ་ནས་བཟུང་ནག་འགྲོས་བཀླག་ཆོག་ཏུ་བཀོད་པ་ལ། ཉན་ཐོས་ཀྱི་ཐེག་པ་དང་བསྟུན་ཏེ་དལ་འབྱོར་གྱི་མི་ལུས་རྙེད་དཀའ་བསམ་པ། དེ་མི་རྟག་པའི་ཚུལ། དཀར་ནག་ལས་འབྲས་སྨིན་ཚུལ། འཁོར་བའི་སྡུག་བསྔལ་དང་། ཞི་བ་མྱ་ངན་ལས་འདས་པའི་ཕན་ཡོན་ལ་བལྟ་བ་དང་བཅས་བསམས་ནས། རང་གི་སྤྱི་བོར་འཇའ་འོད་སེང་ཁྲི་ཉི་ཟླའི་གདན་ལ་བླ་མ་བསྒོམ་ལ། ངག་ཏུ་འདི་ལྟར། དཔལ་ལྡན་རྩ་བའི་བླ་

མ་རིན་པོ་ཆེ། །བདག་གི་སྤྱི་བོར་པད་ཟླའི་སྟེང་བཞུགས་ནས། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །དལ་འབྱོར་རྙེད་དཀའ་རྙེད་པ་ད་རེས་ཙམ། །རྙེད་ནས་དོན་ཆེའི་ཚུལ་བསམ་དོན་ཆུང་གི །འདིར་སྣང་ཆོས་བརྒྱད་བྱ་བྱེད་ཀུན་སྤངས་ནས། །དབེན་པར་དོན་ཆེའི་བྱང་ཆུབ་ཅིས་མི་སྒྲུབ། །འཆི་ངེས་ནམ་མཆི་ཆ་མེད་འཆི་རྐྱེན་མང་། །འཚོ་བའི་ཐབས་ཉུང་རྒན་གཞོན་གོ་རིམ་མེད། །འཆི་དུས་ཆོས་མིན་ཅིས་ཀྱང་ཕན་ཐབས་

བྲལ། །མྱུར་དུ་ཉམས་ལེན་བྱེད་པའི་དུས་ལ་བབ། །མངར་སྐྱུར་ས་བོན་གང་བཏབ་འབྲས་སྨིན་ལྟར། །དཀར་ནག་ལས་འབྲས་འཆི་བའི་རྗེས་སུ་འབྲང་། །བདེ་སྡུག་འབྲས་བུ་མ་ནོར་སྨིན་ཚུལ་ལ། །ངེས་པ་རྙེད་ནས་སྡུག་སྤངས་དགེ་ལ་འབད། །ཤི་ནས་རིགས་དྲུག་མཐོ་དམའ་གར་སྐྱེས་ཀྱང་། །བདེ་མེད་སྡུག་བསྔལ་རང་བཞིན་འདི་དག་ལས། །སྐྱོབ་ཕྱིར་སྙིང་ནས་དཀོན་མཆོག་སྐྱབས་འགྲོ་ཞིང་། །མ་ནོར་བསླབ་བྱ་ཉམས་པ་མེད་པར་བྱ། །འཇིགས་རུང་འཁོར་བ་མེ་འོབས་སྲིན་གླིང་ལྟར། །མཐོང་ནས་འཁོར་བའི་དཔལ་འབྱོར་ཕུན་ཚོགས་ལ། །མངོན་ཞེན་གཏིང་ལོག་ཐར་འདོད་ཤུགས་དྲག་བློས། །བསླབ་གསུམ་རྣམ་དག་རྩེ་གཅིག་སྒྲུབ་ལ་གཞོལ། །རང་ཉིད་ཡང་ཡང་དྲིན་གྱིས་བསྐྱངས་པའི་མ། །འགྲོ་ཀུན་སྡུག་བསྔལ་གསུམ་གྱིས་མནར་ཚུལ་ལ། །བསམས་ནས་འདི་དག་སྲིད་པའི་རྒྱ་མཚོ་ལས། །སྒྲོལ་ཕྱིར་སངས་རྒྱས་གོ་འཕང་འཐོབ་པར་བྱ། །དེ་ཡི་ཆེད་དུ་ཡང་གསང་རྟ་ཕག་གི །སྒྲུབ་པ་ཟབ་མོ་ཉམས་སུ་བླང་བར་གྱི། །ཞེས་དང་། སླར་ཡང་སྤྱི་བོའི་བླ་མར་གདུང་ཤུགས་དྲག་པོས་གསོལ་བ་འདི་ལྟར་བཏབ། དུས་

གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་མཁྱེན། བླ་མ་མཁྱེན། བླ་མ་མཁྱེན། ཁྱེད་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་འཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། བདག་སོགས་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཀྱི་བློ་ཆོས་སུ་འགྲོ་བར་བྱིན་གྱིས་བརླབ་ཏུ་གསོལ། ཆོས་ལམ་དུ་འགྲོ་བར་བྱིན་གྱིས་བརླབ་ཏུ་གསོལ། ལམ་ལ་བར་ཆད་མེད་པར་བྱིན་གྱིས་བརླབ་ཏུ་གསོལ། འཁྲུལ་བའི་གཞི་རྩ་ཆོད་པར་བྱིན་གྱིས་བརླབ་ཏུ་གསོལ། ཕྱིན་ཅི་ལོག་གི་བློ་སྣ་མཐའ་དག་འགག་པར་བྱིན་གྱིས་བརླབ་ཏུ་གསོལ། ཕྱིན་ཅི་མ་ལོག་གི་བློ་སྣ་མཐའ་དག་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཁྱད་པར་དུ་ལམ་རིམ་པ་གཉིས་དང་འོད་གསལ་རྫོགས་པ་ཆེན་པོའི་ཁྲེགས་ཆོད་ཐོད་རྒལ་སྣང་བཞིའི་རྟོགས་པ་ཁྱད་པར་ཅན་རིང་པོ་མ་ཐོགས་པར་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ད་ལྟ་ཉིད་དུ་བྱིན་

གྱིས་བརླབ་ཏུ་གསོལ། མྱུར་བ་ཉིད་དུ་བྱིན་གྱིས་བརླབ་ཏུ་གསོལ། འདུག་ས་འདི་རུ་བྱིན་གྱིས་བརླབ་ཏུ་གསོལ། ཞེས་ལན་གསུམ་གསོལ་བ་བཏབ་མཐར་བླ་མ་འོད་དུ་ཞུ་ནས་རང་ལ་ཐིམ་པས་རང་སེམས་དང་བླ་མ་དབྱེར་མེད་དུ་འདྲེས་པའི་ངང་ལ་དར་གཅིག་མཉམ་པར་བཞག །དེ་ནས་དང་པོ་སྐྱབས་ཡུལ་འདི་ལྟར་བསྒོམ་ལ། རང་གི་མདུན་གྱི་ནམ་མཁའ་ལ༔ པདྨ་སྟོང་བརྩེགས་འཇའ་འོད་ཀྱི༔ དབུས་དང་ཕྱོགས་བཞིར་གྱེས་པའི་ཀློང་༔ དབུས་སུ་ཆོས་སྐུ་ཀུན་བཟང་ལ༔ དགོངས་བརྡའ་སྙན་བརྒྱུད་བླ་རབས་བསྐོར༔ གཡས་སུ་རྫོགས་པའི་སངས་རྒྱས་ལ༔ བྱང་ཆུབ་སེམས་དཔའི་ཚོགས་ཀྱིས་བསྐོར༔ གཡོན་དུ་པདྨ་རྒྱལ་པོ་ཡི༔ གཡས་སུ་རྡོར་སེམས་ཡབ་ཡུམ་དང་༔ གཡོན་དུ་མུ་ཁྲི་བཙན་པོ་ལ༔ སྔགས་འཆང་གྲུབ་ཐོབ་རྒྱ་མཚོས་བསྐོར༔ མདུན་དུ་ཐུགས་རྗེ་ཆེན་པོ་ལ༔ ཡུམ་མཆོག་གསང་བ་ཡེ་ཤེས་འཁྲིལ༔ ཡི་དམ་དཀྱིལ་འཁོར་ལྷ་ཚོགས་བསྐོར༔ རྒྱབ་ཏུ་ཐེག་ཆེན་མདོ་ལུང་ཆོས༔ གང་འདུལ་ཆོས་ཀྱི་སྒྲ་དབྱངས་སྒྲོགས༔ མཐའ་བསྐོར་མཁའ་འགྲོ་ཆོས་སྐྱོང་རྣམས༔ མ་ལུས་སྤྲིན་ལྟར་གཏིབས་པར་གྱུར༔ བདག་དང་འགྲོ་དྲུག་སེམས་ཅན་རྣམས༔ མི་བཟད་འཁོར་

བའི་དུཿཁ་ལས༔ སྒྲོལ་ཕྱིར་བདག་གིས་སེམས་མཆོག་བསྐྱེད༔ ན་མོ་སྐྱབས་ཡུལ་དཀོན་མཆོག་བདེར་གཤེགས་གསུམ༔ དངོས་གྲུབ་སྩོལ་མཛད་ཡི་དམ་ལྷ༔ མཁའ་འགྲོ་དམ་ཅན་སྲུང་མར་བཅས༔ སྐྱབས་སུ་མཆིའོ་བྱིན་གྱིས་རློབས༔ གཉིས་པ་བྱང་ཆུབ་སེམས་དཔའི་ཐེག་པ་དང་སྒོ་བསྟུན་ཏེ། སེམས་ཅན་ཐམས་ཅད་ཀྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་པ་ནི། ཧོ༔ དབྱིངས་རིག་ངོ་བོ་མ་བཅོས་པས༔ གཅིག་ཏུ་ཤར་བ་སྙིང་རྗེའི་ཡུལ༔ ཅིར་སྣང་མར་གྱུར་སངས་རྒྱས་ཞིང་༔ བྱང་ཆུབ་ལམ་ལ་སེམས་མཆོག་བསྐྱེད༔ གསུམ་པ་གསང་སྔགས་ནང་བ་དང་བསྟུན་ཏེ་སྒྲིབ་སྦྱོང་རྡོ་རྗེ་སེམས་དཔའི་བསྒོམ་བཟླས་ནི། རང་ཉིད་ཐ་མལ་གནས་པ་ལ༔ སྤྱི་བོར་པདྨ་ཟླ་བའི་སྟེང་༔ ཧཱུཾ་ཡིག་དཀར་པོའི་འཕྲོ་འདུ་ལསཿ རྡོ་རྗེ་སེམས་དཔའ་གངས་རིའི་མདོག༔ ལོངས་སྐུའི་རྒྱན་སྤྲས་ཡུམ་དང་སྦྱོར༔ ཐུགས་ཀར་ཟླ་སྟེང་རྡོ་རྗེ་ལ༔ ཧཱུཾ་མཚན་ཡིག་བརྒྱའི་སྔགས་ཕྲེང་བསྐོར༔ འོད་འཕྲོས་རང་གཞན་སྡིག་སྒྲིབ་སྦྱངས༔ སྡིག་ལྟུང་ཉེས་ཚོགས་དག་པར་གྱུར༔ ༀ་གུ་རུ་བཛྲ་ས་ཏྭ་ས་མ་ཡ་མ་ནུ་པཱ་ལ་ཡ༔ བཛྲ་ས་ཏྭ་ཏྭེ་ནོ་པ་ཏིཥྛ༔ དྲྀ་ཎྷོ་མེ་བྷ་ཝ༔ སུ་ཏོ་ཥྱོ་

མེ་བྷ་ཝ༔ སུ་པོ་ཥྱོ་མེ་བྷ་ཝ༔ ཨ་ནུ་རཀྟོ་མེ་བྷ་ཝ༔ སརྦ་སིདྡྷི་མྨེ་པྲ་ཡ་ཙྪ༔ སརྦ་ཀརྨ་སུ་ཙ་མེ་ཙིཏྟཾ་ཤྲཱི་ཡཾ་ཀུ་རུ་ཧཱུྃ༔ ཧ་ཧ་ཧ་ཧ་ཧོ༔ བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ༔ མ་ཧཱ་ས་མ་ཡ་ས་ཏྭ་ཨཱ༔ མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའི་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་ཆག་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཅེས་གསོལ་བ་བཏབ་པས་རྡོ་རྗེ་སེམས་དཔའ་དགྱེས་བཞིན་ཞལ་འཛུམ་པ་དང་བཅས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པ་ཡིན་ནོ། །ཞེས་གསུངས་ཤིང་འོད་དུ་ཞུ་ནས་རང་ལ་ཐིམ་པའི་རྐྱེན་ལས་རང་ཉིད་ཀྱང་རྡོ་རྗེ་སེམས་དཔའ་སྣང་སྟོང་མེ་ལོང་གི་གཟུགས་བརྙན་ལྟ་བུའི་སྐུར་གྱུར་པའི་ཐུགས་སྲོག་གི་མཐའ་མར་ཡི་གེ་འབྲུ་དྲུག་པོ་གསལ་བ་ལས་འོད་ཟེར་འཕྲོས་པས་ཕྱི་

སྣོད་ཐམས་ཅད་འཇའ་འོད་ཐིག་ལེ་གཞལ་ཡས་ཁང་དང་ནང་བཅུད་ཀྱི་སེམས་ཅན་ཐམས་ཅད་རྡོར་སེམས་རིགས་ལྔའི་རང་བཞིན་དུ་སངས་རྒྱས་པར་གྱུར། ༀ་གུ་རུ་བཛྲ་ས་ཏྭ་ཧཱུཾ༔ ཞེས་ཡང་སྙིང་འབྲུ་དྲུག་པ་བཟླས་མཐར། དགེ་བ་འདི༴ འགོད་པར་ཤོག །ཅེས་དང་། བཞི་པ་ཚོགས་བསགས་མཎྜལ་དང་། བླ་མའི་རྣལ་འབྱོར། མོས་གུས་བྱིན་རླབས་ཀྱི་རྟོགས་པ་མངོན་སུམ་བྱ་ཕྱིར་ཏིང་ངེ་འཛིན་གྱིས་དབང་བླངས་པ་ཞེས་དོན་གསུམ་གྱི་དང་པོ་ཕྱི་ནང་གསང་བའི་མཎྜལ་ནི། ཧོ༔ ཆོས་དབྱིངས་རང་བྱུང་རོལ་བའི་རྩལ༔ ཕྱི་ནང་སྣོད་བཅུད་སྣང་སྲིད་ཆོས༔ ཁྱབ་བརྡལ་ཞིང་ཁམས་མཆོད་སྤྲིན་བཅས༔ འཁོར་གསུམ་ཡོངས་དག་ཉིད་དུ་རོལ༔ སརྦ་པཱུ་ཙ་རཏྣ་མཎྜལ་ཧཱུྃ༔ སྐྱབས་ཡུལ་གྱི་ལྷ་ཚོགས་རྣམས་རང་ལ་ཛཿཧཱུྃ་བཾ་ཧོ༔ བླ་མའི་རྣལ་འབྱོར་ནི། རང་ཉིད་རྟ་ཕག་ཡབ་ཡུམ་སྐུ༔ མེ་ལོང་གཟུགས་བཞིན་གསལ་བ་ཡི༔ སྤྱི་བོར་པདྨ་ཉི་ཟླ་དང་༔ འཇའ་འོད་གུར་ཁྱིམ་ཆེན་པོའི་ཀློང་༔ ཆོས་སྐུ་ཀུན་ཏུ་བཟང་པོ་ཉིད༔ དགྱེས་འཛུམ་འོད་ཟེར་སྤྲོ་བའི་སྐུ༔ རྡོ་རྗེའི་སྐྱིལ་ཀྲུང་བཞུགས་པའི་མཐར༔ བརྒྱུད་པའི་བླ་མ་སྐར་ཚོགས་བཞིན༔ མངོན་སུམ་ལྟ་བུར་

བཞུགས་པར་གསལ༔ བླ་མ་ཡིད་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རང་༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདར་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་མྱུར་ཐོབ་ཤོག༔ མོས་གུས་གདུང་ཤུགས་དྲག་པོ་ཡི། ཨེ་མ་ཧོ༔ སྐྱེ་མེད་ཀ་དག་ཆོས་དབྱིངས་ཞིང་ཁམས་སུ༔ ཐོག་མའི་སངས་རྒྱས་ཀུན་བཟང་ཡབ་ཡུམ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ མདངས་རྩལ་མ་འགག་སྐྱེ་མེད་ཀློང་ཡངས་སུ༔ ལོངས་སྐུའི་གཙོ་མཆོག་རྡོ་རྗེ་སེམས་དཔའ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ དུར་ཁྲོད་སོ་ས་གླིང་གི་གནས་མཆོག་ཏུ༔ མཁའ་འགྲོའི་གཙོ་མོ་ལས་ཀྱི་དབང་མོ་ཆེར༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ དྷ་ན་མི་དྷིའི་ཞིང་ཁམས་ཡངས་པ་རུ༔ སློབ་དཔོན་ཆེན་པོ་ཧཱུཾ་ཆེན་ཀ་ར་ལ༔ གསོལ་བ་འདེབས་སོ་སྨིན་ཅིང་

གྲོལ་བར་མཛོད༔ རྒྱ་ནག་རི་བོ་ཆེན་པོའི་ཤར་ཕྱོགས་སུ༔ མཁའ་འགྲོའི་གཙོ་མོ་ལབ་ཀྱི་སྒྲོལ་མ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ མཆོད་རྟེན་བདེ་བྱེད་བརྩེགས་པའི་ཕོ་བྲང་དུ༔ ཨོ་རྒྱན་གུ་རུ་མཚོ་སྐྱེས་རྡོ་རྗེ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ གར་བཞུགས་དམ་གཙང་ཞིང་ཁམས་ཡངས་པ་རུ༔ ཡེ་ཤེས་མཚོ་རྒྱལ་ཨ་མ་ཀུན་སྟོབས་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ སྦས་ཡུལ་པདྨ་བཀོད་ཀྱི་གནས་མཆོག་ཏུ༔ དྲེགས་པའི་མངའ་བདག་རིག་འཛིན་དཔལ་སེང་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ གཞུ་སྟོད་གཏེར་སྒྲོམ་མཚོ་རྒྱལ་གསང་ཕུག་ཏུ༔ བཀའ་བབས་ལས་སད་བདེ་ཆེན་རྒྱལ་པོ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ བདེ་ཆེན་གླིང་མཆོག་རི་སྣ་དགོན་པ་རུ༔ གཏེར་སྟོན་དངོས་སློབ་ཨོ་རྒྱན་བསྟན་འཛིན་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ རྩེ་གཞུང་མཐའ་རྒྱས་ཕོ་བྲང་དཀར་པོ་རུ༔ ཀརྨ་གུ་རུ་ཆོས་ཀྱི་རྒྱལ་པོ་ལ༔ གསོལ་བ་འདེབས་སོ་སྨིན་ཅིང་

གྲོལ་བར་མཛོད༔ ཕྱོགས་མེད་རི་ཁྲོད་དབེན་པའི་དགའ་ཚལ་དུ༔ རྣལ་འབྱོར་དབང་ཕྱུག་ཚོགས་དྲུག་རང་གྲོལ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ རང་སྣང་དག་པ་དོན་གྱི་ཞིང་ཁམས་སུ༔ གྲུབ་བརྒྱའི་གཙུག་རྒྱན་སྣ་ཚོགས་རང་གྲོལ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ དབེན་གནས་བཀྲ་ཤིས་འཁྱིལ་བའི་དགོན་པ་རུ༔ གཡའ་མ་བཀྲ་ཤིས་འཁྱིལ། འཇིགས་མེད་ཐེག་མཆོག་བསྟན་པའི་རྒྱལ་མཚན་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ རྗེ་བཙུན་བློ་བཟང་བྱམས་པ་ཆོས་འཕེལ་ལ༔ གནམ་རྫོང་། གསོལ་བ་འདེབས་སོ་སྨིན་ཅིང་གྲོལ་བར་མཛོད༔ སྤྱི་གཙུག་པདྨ་ཉི་ཟླའི་གདན་སྟེང་དུ༔ བཀའ་དྲིན་མཉམ་མེད་རྩ་བའི་བླ་མ་ལ༔ གསོལ་བ་འདེབས་སོ་སྨིན་ཅིང་གྲོལ་བར་མཛོད༔ ན་མོ་མཆོག་གསུམ་རྩ་གསུམ་སྐུ་གསུམ་འདུས་པའི་དཔལ༔ སངས་རྒྱས་ཀུན་དངོས་རྩ་བའི་བླ་མ་ལ༔ གསོལ་བ་འདེབས་སོ་བདག་རྒྱུད་སྨིན་གྲོལ་ནས༔ འཁོར་བ་དོང་སྤྲུགས་འཕྲིན་ལས་མཐར་ཕྱིན་ཤོག༔ དེང་ནས་བདག་སོགས་མཁའ་མཉམ་འགྲོ་བ་ཀུན༔ སེམས་དང་སེམས་ཉིད་

བདེ་ཆེན་ཆོས་སྐུའི་ཀློང་༔ གདོད་མའི་དབྱིངས་སུ་མངོན་པར་བྱང་ཆུབ་སྟེ༔ མཐའ་ཡས་འགྲོ་ཀུན་འདྲེན་པར་བྱིན་གྱིས་རློབས༔ རྩེ་གཅིག་གསོལ་བཏབ་བླ་མ་ཡི༔ གནས་གསུམ་འབྲུ་གསུམ་མཚན་པ་ལས༔ དཀར་དམར་སྔོ་བའི་འོད་ཟེར་འཕྲོས༔ བདག་གི་གནས་གསུམ་ཐིམ་པ་ཡིས༔ དབང་བཞི་ཐོབ་ནས་སྒྲིབ་བཞི་སྦྱངས༔ སྐུ་བཞི་མངོན་དུ་འགྱུར་བར་ཤོག༔ བླ་མ་འོད་ཞུ་རང་གི་སྙིང་གར་ཐིམ༔ བླ་མའི་ཐུགས་དང་རང་སེམས་དབྱེར་མེད་འདྲེས༔ ཀ་དག་གནས་ལུགས་རྫོགས་ཆེན་ངང་དུ་བཞག༔ ཚེ་འདིར་བླ་མ་ཀུན་བཟང་མངོན་གྱུར་ཤོག༔ རང་ལྷར་གསལ་བའི་ཐུགས་ཀའི་འོད་ཀྱིས་རྩ་གསུམ་ཞི་ཁྲོའི་ལྷ་ཚོགས་རྣམས་མདུན་གྱི་ནམ་མཁར་བཛྲ་ས་མ་ཡ་ཛ༔ རྩ་གསུམ་ཀུན་འདུས་དབང་ཆེན་ལྷར། །སྒོ་གསུམ་གུས་པས་སྐྱབས་སུ་མཆི། །འགྲོ་རྣམས་སྲིད་མཚོ་ལས་བསྒྲལ་ཕྱིར། །ཡང་གསང་རྟ་ཕག་བསྒྲུབ་པར་བགྱི། །ལན་གསུམ། བླ་མ་ཡི་དམ་མཁའ་འགྲོ་གཤེགས༔ ཉི་ཟླ་པདྨའི་གདན་ལ་བཞུགས༔ ལུས་ངག་ཡིད་གསུམ་གུས་ཕྱག་འཚལ༔ ཕྱི་ནང་གསང་

བའི་མཆོད་པ་འབུལ༔ ཉམས་ཆག་སྡིག་སྒྲིབ་མཐོལ་ལོ་བཤགས༔ གསང་སྔགས་སྒྲུབ་ལ་རྗེས་ཡི་རངས༔ སྨིན་གྲོལ་ཆོས་འཁོར་བསྐོར་དུ་གསོལ༔ མྱ་ངན་མི་འདའ་གསོལ་བ་འདེབས༔ དགེ་བ་བྱང་ཆུབ་ཆེན་པོར་བསྔོ༔ ཐམས་ཅད་སངས་རྒྱས་མྱུར་འཐོབ་ཤོག༔ ཚོགས་ཞིང་རྣམས་རང་ལ་ཐིམ་པར་གྱུར། ཛཿཧཱུྃ་བཾ་ཧོ༔ དཀར་གཏོར་ཨ་མྲྀ་ཏས་བསངས། བྷཱུཾ་ཨོཾ་ཨཱཿ༔ཧཱུྃ༔ ཞེསབརླབས་ལ། རང་གི་ཐུགས་ཀའི་འོད་ཟེར་གྱིས་རྒྱལ་ཆེན་བཞི་དང་ཕྱོགས་སྐྱོང་ཞིང་སྐྱོང་ལྷ་ཀླུ་སྡེ་བརྒྱད་འབྱུང་པོ་ཡུལ་གཞིའི་བདག་པོའི་ཚོགས་དང་བཅས་པ་མདུན་འདིར་བཛྲ་ས་མ་ཡ་ཛ༔ ཨ་ཀ་རོ་མུ༴ ལན་གསུམ་གྱིས་ཕུལ་ལ། རྒྱལ་ཆེན་ཕྱོགས་སྐྱོང་ལྷ་ཀླུ་གཞི་བདག་ཚོགས། །དམ་རྫས་གཏོར་མ་རྒྱ་ཆེན་འདི་བཞེས་ལ། །ཕྱི་ནང་གསང་བའི་བར་ཆད་ཀུན་ཞི་ཞིང་། །བསྙེན་སྒྲུབ་མཐའ་རུ་ཕྱིན་པའི་འཕྲིན་ལས་མཛོད། །བགེགས་གཏོར། རཾ་ཡཾ་ཁཾ། ཨོཾ་ཨཱཿཧཱུྃ། སྒྲུབ་པ་ལ་བར་དུ་གཅོད་པའི་བགེགས་རྣམས་མདུན་འདིར་བཀུག་པར་གྱུར། སརྦ་བིགྷྣན་ཨཀརྞ་ཡ་ཛ། སརྦ་བིགྷྣིན་ཨེ་དཾ་བ་ལིངྟ་ཁཱ་ཧི། ལན་གསུམ། ཧྲཱིཿ ང་ནི་འཇིགས་བྱེད་ཁྲོ་བོའི་རྒྱལ༔ བར་གཅོད་བགེགས་ལ་གཏོར་མ་བསྔོ༔

ནམ་ཡང་འདའ་བར་མི་ནུས་པས༔ རྡུལ་ཕྲན་བརླག་པར་གདོན་མི་ཟ༔ ཨོཾ་པ་ཏེ་པ་ཏེ་ཧྱ་གྷྲི་ཝ་ཧཱུྃ་ཕཊ༔ བསྲུང་འཁོར་ནི༔ ཧཱུྃ༔ ཡེ་ཤེས་འབར་བའི་རྒྱ་གྲམ་གུར༔ སྣང་སྟོང་མཚོན་ཆ་འོད་དུ་འབར༔ སྟེང་འོག་བར་ཆད་འབྱུང་བོ་ཀུན༔ བསྲུང་བའི་འཁོར་ལོས་མཚམས་བཅད་དོ༔ རཀྵ་རཀྵ་ཧཱུྃ༔ བྱིན་དབབ་ནི༔ ཧཱུྃ༔ ཆོས་དབྱིངས་ཕོ་བྲང་དམ་པ་ནས༔ དངོས་གྲུབ་ཀུན་འབྱུང་རྟ་མཆོག་ལྷ༔ རྡོ་རྗེ་ཕག་མོ་མཁའ་འགྲོའི་གཙོ༔ འཁོར་དུ་མཁའ་འགྲོ་མང་པོས་བསྐོར༔ ཆོས་ཀྱི་དབྱིངས་ནས་གནས་འདིར་གཤེགས༔ དཀྱིལ་འཁོར་འདི་ལ་བྱིན་ཅིག་ཕོབ༔ རྣལ་འབྱོར་སྒྲུབ་པོར་དབང་བསྐུར་སྩོལ༔ ཨོཾ་ཨཱཿཧཱུྃ༔ སིདྡྷི་ས་མ་ཡ་ཕེཾ་ཕེཾ་ཧཱུྃ་ཧཱུྃ༔ མཆོད་པ་བྱིན་རླབས་ནི། ཧྲཱིཿ འཇིག་རྟེན་དག་པའི་ཞལ་ཡས་འདིར༔ འདོད་པ་ལྔ་ཡི་ཡོན་ཏན་རྣམས༔ དངོས་དང་ཡིད་ཀྱིས་ཀུན་སྤྲལ་ཏེ༔ ཐམས་ཅད་དག་པའི་བདུད་རྩི་ཚེ༔ རོ་བཅུད་མདངས་ལྡན་འོད་ཕུང་འཁྱིལ༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ སརྦ་པཉྩ་ཨམྲྀ་ཏ་རཀྟ་བ་ལིནྟ་བྷ་ལ་ཝ་ཏེ་གུ་ཧྱ་ས་མ་ཡྀ་ཧཱུྃ་ཧྲཱི་ཋ༔ དངོས་གཞི་ལྷ་བསྐྱེད་པ་ནི༔ ཨོཾ༔

ཆོས་སྐུ་སྐྱེ་བ་མེད་པ་ལས༔ མ་བཅོས་ནམ་མཁའ་ལྟ་བུའི་ངང་༔ ཨཱཿསྙིང་རྗེ་ཆེན་པོའི་འོད་ཀྱིས་ནི༔ འགྲོ་དྲུག་ཀུན་ལ་ཡོངས་སུ་ཁྱབ༔ ཧཱུཾ་རྒྱུ་ལས་ཀུན་ཏུ་སྐྱེད་བྱེད་པའི༔ གསལ་མདངས་ཧྲཱིཿཡིག་དམར་པོ་ཤར༔ ཧྲཱིཿལས་འོད་འཕྲོས་འབྱུང་བ་བཞི༔ ཨེ་ཡཾ་ར་སུཾ་ཀེཾ་རཾ་ལས༔ ནམ་མཁའ་རླུང་མེ་ཆུ་སའི་སྟེང་༔ བྷཱུཾ་ལས་ཡེ་ཤེས་ཕོ་བྲང་གསལ༔ རིན་ཆེན་སྣ་ཚོགས་ལས་གྲུབ་པའི༔ གྲུ་བཞི་སྒོ་བཞི་བརྩིགས་པ་ལྔ༔ རྟ་བབས་བཞི་ལྡན་འདོད་སྣམ་དང་༔ ཕ་གུ་དྲ་བ་དྲ་ཕྱེད་དང་༔ མདའ་ཡབ་ཕྱུར་བུ་ཏོག་གིས་མཛེས༔ ལྔ་ལྡན་འཇའ་ཚོན་ལུག་རྒྱུད་གཏིབས༔ དབུས་སུ་ཆོས་དབྱིངས་ཟླ་གམ་ཞིང་༔ ཕྱི་འཁོར་པད་ཕྲེང་དུར་ཁྲོད་དང་༔ རྡོ་རྗེ་ཡེ་ཤེས་མེ་དཔུང་འབར༔ ལྟེ་བར་པདྨ་ཉི་ཟླའི་སྟེང་༔ ཧྲཱིཿལས་དབང་ཆེན་རྟ་མཆོག་ནི༔ སྐུ་མདོག་དམར་ལ་སྔོ་མདངས་འཚེར༔ ཞལ་གཅིག་ཕྱག་གཉིས་སྐྱིལ་མོ་ཀྲུང་༔ ཁྲོ་འཛུམ་སྤྱན་གསུམ་ཕྱོགས་བཅུར་གཟིགས༔ དབུ་སྐྲ་གྱེན་གཡེངས་ཐོད་སྐམ་བརྒྱན༔ སྤྱི་གཙུག་རྟ་གདོང་ཧཱུྃ་སྒྲ་ལྡིར༔ ཕྱག་གཡས་རྡོ་རྗེ་ཐོ་བ་དང་༔ གཡོན་པ་ཐོད་ཁྲག་ཕུར་བུ་འཛིན༔

དུར་ཁྲོད་ཆས་བརྒྱད་སྐུ་ལ་རྫོགས༔ པང་དུ་ཧྲཱི་ལས་གསང་བའི་ཡུམ༔ རྡོ་རྗེ་ཕག་མོ་སྔོ་དམར་མདངས༔ གཅེར་བུ་གཞོན་ཚུལ་ལང་ཚོ་རྒྱས༔ སྐྲ་གྲོལ་ཕྱག་རྒྱ་ལྔ་ཡིས་མཚན༔ ཆགས་པའི་སྤྱན་གསུམ་ཡབ་ལ་གཟིགས༔ ཤེལ་བུམ་གཏེར་སྒྲོམ་འཛིན་པས་འཁྱུད༔ ཞབས་གཉིས་ཡབ་འཁྱུད་མཉམ་པར་སྦྱོར༔ སྤྱི་གཙུག་ཕག་གདོང་ཕེཾ་སྒྲ་སྒྲོགས༔ ཡབ་ཡུམ་མཉམ་པར་སྦྱོར་བ་ལས༔ སྲས་མཆོག་ཚུལ་དུ་ཧྲཱི་ཞིག་འཕྲོས༔ མདུན་དུ་སྐུ་སྟོད་རྟ་གདོང་དང་༔ སྐུ་སྨད་ཕུར་བུའི་དབལ་ཤམས་ཅན༔ མེ་དཔུང་འབར་བའི་ཀློང་དུ་གསལ༔ དུས་གསུམ་བདེ་གཤེགས་སྤྲིན་ལྟར་གཏིབས༔ མ་ཚོགས་ཌཱཀྐི་བྲན་ལྟར་འདུ༔ ཕྱི་རོལ་དཔའ་བོ་ཀིང་ལངྐ༔ དམ་ཅན་སྲུང་མའི་ཚོགས་ཀྱིས་བསྐོར༔ ཀུན་ཀྱང་ཡེ་ཤེས་རོལ་བའི་རྩལ༔ སྣང་སྟོང་མ་འགགས་ལྷང་ངེར་གསལ༔ གནས་གསུམ་ས་བོན་འོད་ཟེར་འཕྲོས༔ ཡེ་ཤེས་ཞིང་ཁམས་སོ་སོ་ནས༔ ལྷ་ཚོགས་འཁོར་བཅས་སྤྱན་དྲངས་གྱུར༔ སྤྱན་དྲེན་ནི༔ ཧཱུྃ༔ རྔ་ཡབ་ཡུལ་གྱི་ནུབ་བྱང་ནས༔ དུས་གསུམ་རྒྱལ་ཀུན་འདུས་

པའི་གཙོ༔ དབང་ཆེན་རྟ་མཆོག་གཤེགས་སུ་གསོལ༔ རྒྱ་གར་དུར་ཁྲོད་བསིལ་ཚལ་ནས༔ རྡོ་རྗེ་ཕག་མོ་གཤེགས་སུ་གསོལ༔ བཀའ་དང་དམ་ཚིག་གཉན་པོ་ནས༔ བཀའ་སྡོད་འཁོར་བཅས་གཤེགས་སུ་གསོལ༔ དུས་ལས་མི་འདའ་ལྷ་ཚོགས་རྣམས༔ ཐུགས་དམ་བརྩེར་དགོངས་གཤེགས་སུ་གསོལ༔ གུ་རུ་དེ་ཝ་ཌཱཀྐི་ནི་བཛྲ་ས་མ་ཡ་ཛ་ཛ༔ བཞུགས་གསོལ་ནི༔ ཧྲཱི༔ ལྷུན་གྲུབ་གསང་བའི་ཕོ་བྲང་འདིར༔ པདྨ་ཉི་ཟླའི་གདན་གྱི་ཁྲིར༔ བླ་མ་ཡིད་དམ་མཁའ་འགྲོ་བཅས༔ མི་གཡོ་བརྟན་པར་བཞུགས་སུ་གསོལ༔ བཛྲ་ས་མ་ཡ་ཏིཥྛ་ལྷན༔ ཕྱག་འཚལ་བ་ནི༔ ཧྲཱི༔ ཆོས་སྐུ་མི་འགྱུར་དབང་ཆེན་ལྷ༔ རྡོ་རྗེ་ཕག་མོ་ཤེས་རབ་རྩལ༔ བདེ་སྟོང་ཡེ་ཤེས་སྤེལ་མཛད་པའི༔ རྩ་གསུམ་ལྷ་ལ་ཕྱག་འཚལ་ལོ༔ ཨ་ཏི་པུ་ཧོ༔ པྲ་ཏི་ཙྪ་ཧོ༔ མཆོདཔ་ནི ཧྲཱི༔ བླ་མ་ཡིད་དམ་འཁའ་འགྲོ་ལ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་སྒྲ་སྙན་འདོད་ཡོན་ལྔ༔ དམ་རྫས་སྨན་རཀ་གཏོར་མ་དང་༔ སྦྱོར་སྒྲོལ་གསང་བའི་མཆོད་པ་འབུལ༔ མཆོག་དང་ཐུན་མོང་དངོས་གྲུབ་སྩོལ༔ བཛྲ་པུཥྤེ། དྷུ་པེ། ཨ་ལོ་ཀེ

གནྡེ། ནེ་ཝི་དཱི། ཤཔྟ། མ་ཧཱ་པཉྩ་ཨ་མྲྀ་ཏ་རཀྟ་བ་ལིངྟ་སུ་ཁ་དྷརྨ་པཱུ་ཙ་ཧོ༔ བསྟོད་པ་ནི༔ ཧྲཱི༔ ཆོས་དབྱིངས་སྐྱེ་མེད་ངང་ཉིད་ལས༔ འགགས་མེད་གཟུགས་སྐུའི་རོལ་བར་ཤར༔ བདེ་གཤེགས་ཀུན་འདུས་རྟ་མཆོག་དཔལ༔ རྒྱལ་བ་རྒྱ་མཚོའི་སྐུ་ལ་བསྟོད༔ སྟོང་ཉིད་སྙིང་རྗེའི་བདག་ཉིད་མ༔ དུས་གསུམ་རྒྱལ་བ་སྐྱེད་པའི་ཡུམ༔ འགྲོ་བ་རྣམས་ཀྱི་མགོན་གཅིག་མ༔ རྡོ་རྗེ་ཕག་མོའི་སྐུ་ལ་བསྟོད༔ སྐུ་མདོག་དམར་ལ་སྔོ་མདངས་ནི༔ ཆོས་དབྱིངས་ཀུན་བཟང་དགོངས་པའི་བརྡ༔ རྟ་གདོང་ཧཱུྃ་སྒྲ་སྒྲོགས་པ་ནི༔ ལོག་འདྲེན་བར་ཆད་འདུལ་བའི་བརྡ༔ ཁྲོ་འཛུམ་སྤྱན་གསུམ་གཟིགས་པ་ནི༔ མཐའ་བྲལ་འགྲོ་བ་འདྲེན་པའི་བརྡ༔ ཕྱག་གཡས་རྡོ་རྗེ་ཐོ་བ་ནི༔ དམ་སྲིད་བགེགས་དཔུང་འཇོམས་པའི་བརྡ༔ ཕྱག་གཡོན་ཐོད་ཁྲག་ཕུར་བུ་ནི༔ ཟུང་འཇུག་བདེ་སྟོང་རོལ་བའི་བརྡ༔ ཐོད་སྐམ་ལྔ་ཡི་དབུ་རྒྱན་ནི༔ རིགས་ལྔས་འགྲོ་དོན་མཛད་པའི་བརྡ༔ དུར་ཁྲོད་ཆོས་བརྒྱད་རྫོགས་པ་ནི༔ སྣང་སྟོང་ཆ་ལུགས་རྫོགས་པའི་བརྡ༔ ཞབས་གཉིས་རྡོ་རྗེ་སྐྱིལ་ཀྲུང་ནི༔ ཏིང་

འཛིན་འགྱུར་མེད་རྡོ་རྗེའི་བརྡ༔ པང་ན་ཕག་མོ་སྦྱོར་བ་ནི༔ ཐབས་ཤེས་ཟུང་དུ་འཇུག་པའི་བརྡ༔ ཡབ་ཀྱི་མགུལ་ལ་འཁྱུད་པ་ནི༔ ཡབ་ཡུམ་འདུ་འབྲལ་མེད་པའི་བརྡ༔ རྡོ་རྗེ་པདྨ་གཉིས་མེད་རོལ༔ དགའ་བཞིའི་བདེ་ཆེན་སྤྱོད་པའི་བརྡ༔ ཕྱག་གཡས་ཤེལ་བུམ་འཛིན་པ་ནི༔ ཚེ་ཡི་དངོས་གྲུབ་སྩོལ་བའི་བརྡ༔ ཕྱག་གཡོན་གཏེར་གྱི་སྒྲོམ་བུ་ནི༔ འགྲོ་ལ་དགོས་འདོད་སྩོལ་བའི་བརྡ༔ ཕག་གདོང་མཐིང་ཀས་ཕེཾ་སྒྲ་སྒྲོགས༔ ཆོས་ཀྱི་སྒྲ་དབྱངས་སྒྲོགས་པའི་བརྡ༔ དཀྱིལ་འཁོར་བཀྲམ་པར་བཞུགས་པ་ནི༔ མཆོག་ཐུན་དངོས་གྲུབ་སྩོལ་བའི་བརྡ༔ རྟ་ཕག་སྐུ་ལ་ཕྱག་འཚལ་བསྟོད༔ དཀྱིལ་འཁོར་ལྷ་ལ་ཕྱག་འཚལ་བསྟོད༔ འཁོར་དང་བཅས་ལ་ཕྱག་འཚལ་བསྟོད༔ འཛབ་བཟླ་པ་ནི། གཙོ་བོའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་ནང་དུ་ཐུགས་སྲོག་ཧྲཱི་ཡིག་སྔོ་དམར་གྱི་མཐར་སྔགས་ཕྲེང་རྣམས་གཡས་སུ་འཁོར་ཏེ་གནས་པ་ལས་འོད་ཟེར་འཕྲོས་པས་ཕྱོགས་བཅུའི་ཞིང་ཁམས་ཀྱི་རྒྱལ་བ་རབ་འབྱམས་རྣམས་མཆོད་པས་མཉེས་ཏེ་བྱིན་རླབས་ནུས་རྩལ་ཐམས་ཅད་ཐིག་ལེ་ཐིག་ཕྲན་ལུ་གུ་རྒྱུད་ཀྱི་རྣམ་པར་ཚུར་འདུས་ནས་རང་ལ་

ཐིམ་པས་སྒྲིབ་པ་དག །ཚོགས་རྫོགས་དབང་བཞི་ཐོབ་ནས་འཇའ་ལུས་འོད་སྐུར་གྲོལ་བར་བསམ། ཡང་མཁའ་ཁྱབ་ཀྱི་སེམས་ཅན་ཐམས་ཅད་ལ་ཕོག་པས་ལས་ཉོན་སྡིག་སྒྲིབ་ཐམས་ཅད་སྦྱངས་ནས་རྡོ་རྗེ་མི་ཤིགས་པ་གསུམ་གྱི་ངོ་བོར་སངས་རྒྱས་ཏེ་སྣོད་བཅུད་ཀྱི་སྣང་བ་ཐམས་ཅད་འཇའ་འོད་ཐིག་ལེ་ལྷ་དང་གཞལ་ཡས་ཁང་སྒྲ་གྲག་ཐམས་ཅད་སྔགས་ཀྱི་རང་སྒྲ། དྲན་རྟོག་ཐམས་ཅད་མཐའ་བྲལ་ནམ་མཁའ་ལྟ་བུའི་ངང་ནས་འཛབ་བཟླའོ༔ ཨོྃ་བཛྲ་ཀྲོ་དྷ་པ་ཏེ་པ་ཏེ་ཧཱུྃ་ཕཊཿ༔ ཅེས་ཅི་ནུས་བཟླས་མཐར། དབྱངས་གསལ་རྟེན་སྙིང་ཡིག་བརྒྱ་རྣམས་ལན་གསུམ་རེ་བཟླས་མཐར། མཆོད་བསྟོད་བྱ་བ་ནི། རཾ་ཡཾ་ཁཾ། ཨོཾ་ཨཱཿཧཱུྃ༔ ཧྲཱི༔ ལྷ་རྫས་ཕྱི་ནང་གསང་བ་ཡི། །དངོས་བཤམས་ཡིད་སྤྲུལ་མཆོད་པའི་ཚོགས། །དཀྱིལ་འཁོར་ལྷ་ཚོགས་དགྱེས་ཕྱིར་འབུལ། །འཁོར་གསུམ་ཡོངས་དག་ཆེན་པོར་བཞེས། །ཨོཾ་ཨཱཿཧཱུྃ་གུ་རུ་དེ་ཝ་ཌཱཀྐི་ནི་ས་པཱ་རི་ཝ་ར་པུཥྤེ་ནས་ཤཔྟ་པཱུ་ཙ་ཧོ༔ ཞེས་པའི་བར་མཆོད་ལ། བསྟོད་པ་ནི། ཧྲཱིཿ ཕྱི་སྣོད་དག་པ་གཞལ་ཡས་ཁང་། །ནང་བཅུད་དག་པ་རྩ་གསུམ་ལྷ། །གདོད་ནས་དག་པ་དམིགས་སུ་མེད། །

སྣང་སྟོང་སྒྱུ་མ་ཙམ་དུ་བསྟོད། །ཅེས་བསྟོད། རྗེས་ཀྱི་རིམ་པ་ལ་ཚོགས་སྦྱངས་བྱིན་རླབས་ནི། ཧྲཱི༔ རྟ་ཕག་ཡབ་ཡུམ་ཐུགས་ཀ་ནས༔ རཾ་ཡཾ་ཁཾ་འཕྲོས་དངོས་འཛིན་སྦྱངས༔ ཨོཾ་ཨཱཿཧཱུྃ་འཕྲོས་བདུད་རྩིར་ཞུ༔ ཟག་མེད་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ སྤྱན་འདྲེན་ནི། ཧྲཱི༔ འོག་མིན་གནས་དང་རྔ་ཡབ་གླིང་། །གནས་ཡུལ་དུར་ཁྲོད་ཞིང་ཁམས་ནས། །རྟ་ཕག་དཀྱིལ་འཁོར་ལྷ་ཚོགས་རྣམས། །ལོངས་སྤྱོད་ཚོགས་ལ་གཤེགས་སུ་གསོལ། །བཛྲ་ས་མ་ཡ་ཛ༔ པདྨ་ཀམཱ་ལ་ཡེ་སྟཱཾ། ཚོགས་ཕུད་དང་པོ་ནི༔ ཧྲཱིཿ བླ་མ་ཡི་དམ་ལྷ་ཚོགས་ལ༔ འདོད་ཡོན་མ་སྤངས་ཡེ་ཤེས་བརྒྱན༔ ཞལ་ཟས་ཚོགས་ཀྱི་མཆོད་པ་འབུལ༔ མཆོག་ཐུན་དངོས་གྲུབ་སྩལ་དུ་གསོལ༔ གུ་རུ་དེ་ཝ་ཌཱཀྐི་ནི་ག་ཎ་ཙཀྲ་པཱུ་ཙ་ཧོ༔ ཚོགས་བར་བ་བཤགས་པ་ནི༔ ཧྲཱི༔ བླ་མ་ཡི་དམ་མཁའ་འགྲོ་ཡི༔ སྐུ་གསུང་ཐུགས་དང་རྩ་བ་ཡི༔ དམ་ཚིག་ཉམས་ཆག་ཅི་མཆིས་པ༔ ཚོགས་ཀྱི་མཆོད་པས་མཐོལ་ཞིང་བཤགས༔ བཛྲ་ས་མ་ཡ་ཨ༔ ཡིག་བརྒྱ་བཟླ། ཐ་མ་བསྒྲལ་བ་ནི། ཨེ་ནྲི་ཏྲི་ཁུག་ཛ། ཛཿཧཱུྃ་བཾ་ཧོ། པྲ་བེ་ཤ་ཡ་ཕཊ། ཨ་བེ་ཤ་ཡ་ཨ། ཧྲཱི༔ འཇིགས་བྱེད་རྟ་

ཕག་ཁྲོ་བོའི་རྒྱལ༔ བཀའ་སྡོད་དམ་ཅན་ཕོ་ཉར་འགྱེད༔ བདུད་དང་རུ་ཏྲ་ཀུན་སྒྲོལ་ཅིག༔ རྣམ་ཤེས་ཆོས་ཀྱི་དབྱིངས་སུ་སྤོར༔ པདྨ་ཀྲོ་དྷ་ནྲི་ཏྲི་ཤ་ཏྲུཾ་མ་ར་ཡ་རྦད༔ ཅེས་བསྒྲལ། བསྟབ་པ་ནི། ལིང་རོར་སྨན་རཀ་བྲན་ལ། རཾ་ཡཾ་ཁཾ། ཨོཾ་ཨཱཿཧཱུཾ། ཧྲཱི༔ རྟ་ཕག་ལྷ་ཚོགས་ཞལ་ཕྱེ་ཞིག༔ དགྲ་བགེགས་བསྒྲལ་བའི་ཤ་ཁྲག་རུས༔ ཟག་མེད་བདུད་རྩིར་བྱིན་བརླབས་ནས༔ མཆོད་པར་འབུལ་ལོ་དགྱེས་པར་རོལ༔ མ་ཧཱ་མཾ་ས་རཀྟ་ཀེ་ནི་རི་ཏི་ཨ་མྲི་ཏ་ཁཱ་ཧི༔ ཞེས་ཕུལ་མཐར། ལྷ་ཚོགས་རྣམས་རང་རང་གི་ཕྱག་རྒྱ་དང་སྙོམས་པར་ཞུགས་པའི་སྦྱོར་བས་དགའ་བ་བཞིའི་རོས་ཚིམ་པར་བལྟས་ལ། ཐུགས་དམ་བསྐང་བ་ནི། ཨོཾ་ཨཱཿཧཱུྃ༔ བདེ་སྟོང་ཏིང་འཛིན་རོལ་བ་ལས་བྱུང་བའི། །སྲིད་ཞིའི་མཆོད་ཚོགས་ནམ་མཁའ་མཛོད་ཀྱི་སྒོ། །ཅིར་ཡང་འཆར་བ་ཀུན་བཟང་མཆོད་པའི་སྤྲིན། །འཁོར་འདས་དཔལ་ཡོན་མ་ཚང་མེད་པ་དང་། །ཚོགས་ཀྱི་ལོངས་སྤྱོད་རྒྱ་ཆེན་འདི་དག་གིས༔ སྐྱེས་མཆོག་བླ་མ་རྣམས་ཀྱི་ཐུགས་དམ་བསྐང་༔ ཡི་དམ་ལྷ་ཚོགས་རྣམས་ཀྱི་ཐུགས་དམ་བསྐང་༔ མ་དང་མཁའ་འགྲོ་རྣམས་ཀྱི་ཐུགས་དམ་བསྐང་༔ གཏེར་བདག་

གཏེར་སྲུང་རྣམས་ཀྱི་ཐུགས་དམ་བསྐང་༔ གཞི་བདག་གཞི་སྲུང་རྣམས་ཀྱི་ཐུགས་དམ་བསྐང་༔ མཆོད་ཡུལ་གོང་མ་རྣམས་ཀྱི་ཐུགས་དམ་བསྐང་༔ སྦྱིན་ཡུལ་འོག་མ་རྣམས་ཀྱི་ཐུགས་དམ་བསྐང་༔ རིགས་དྲུག་ཕ་མ་རྣམས་ཀྱི་ཐུགས་དམ་བསྐང་༔ ལན་ཆགས་མགྲོན་གྱུར་རྣམས་ཀྱི་ཐུགས་དམ་བསྐང་༔ ཐམས་ཅད་ཐུགས་དམ་གཉན་པོ་དེར་སྐོང་ལ༔ གཡར་དམ་སོར་ཆུད་དངོས་གྲུབ་སྩལ་དུ་གསོལ༔ ཅེས་བརྗོད་ལ་གནམ་ཕུད་ཀྱང་གཙང་སར་གཤེགས། དེ་ནས་ཚོགས་རྫས་ལ་བརྡ་དང་བརྡའི་འབུལ་ལན་གྱི་སྒོ་ནས་རོལ་མཐར། སྨོན་ལམ་ནི། གདོད་ནས་ལྷུན་གྲུབ་སྒོ་གསུམ་དཀྱིལ་འཁོར་འདིར༔ མི་ཟད་ལོངས་སྤྱོད་བདེ་ཆེན་ཀློང་རོལ་མཐུས༔ ཚོགས་གཉིས་རབ་རྫོགས་ཆོས་དབྱིངས་བརྗོད་བྲལ་ཀློང་༔ འགྲོ་ཀུན་ཡེ་དག་ཡེ་རྫོགས་རྟོགས་པར་ཤོག༔ ལྷག་མནི། གཙང་དམེ་ལྷག་མ་སྣོད་དུ་བསགས་ལ། བདུད་རྩི་བྲན་ཏེ། ཚོགས་གཞོང་བྷན་དྷ་འབར་བའི་སྣོད་ཡངས་ཤིང་རྒྱ་ཆེ་བའི་ནང་དུ་ཚོགས་ཀྱི་ལྷག་མ་འདོད་པའི་ཡོན་ཏན་ལྔའི་རང་བཞིན་ཅན་དུ་གྱུར། ཨོཾ་ཨཱཿཧཱུྃ་ཧ་ཧོ་ཧྲཱི༔ ཞེས་བརླབས་ལ། ཕེཾ་ལྷག་སྡུདཀྱི་ཕོ་ཉརྣམས་ཨེ་ཨ་ར་ལི་ཧྲཱིཾ་ཧྲཱིཾ་ཛ་ཛ༔ ཧྲཱི༔ དབང་ཆེན་རྟ་ཕག་དཀྱིལ་འཁོར་གྱི༔ མུ་རན་སྐྱོང་ཞིང་བྱ་ར་

བྱེད༔ ཐམས་ཅད་འདིར་བྱོན་ལྷག་གཏོར་བཞེས༔ བཅོལ་བའི་འཕྲིན་ལས་བསྒྲུབ་པར་མཛོད༔ མ་ཧཱ་སརྦ་པཱུ་ཙ་ཁཱ་ཧི། ཐུགས་དམ་བསྐུལ་བ་ནི ཧཱུྃ་ཧྲཱིཿཕཊཿ༔ བླ་མ་ཡི་དམ་མཁའ་འགྲོའི་ཚོགས༔ མཁའ་མཉམ་རྒྱལ་བ་ཐུགས་རྗེ་ཅན༔ དུས་གསུམ་རྒྱལ་ཀུན་འདུས་པའི་གཙོ༔ བདེ་གཤེགས་དབང་ཆེན་ཡབ་ཡུམ་དང་༔ བཀའ་སྡོད་སྤྲུལ་བ་འཁོར་དང་བཅས༔ ཐུགས་དམ་བསྐུལ་ལོ་དབྱིངས་ནས་བཞེངས༔ ཕྱི་ཡི་སྣང་བ་དབང་དུ་སྡུས༔ ནང་གི་རྩ་རླུང་ཐིག་ལེ་སྐྱེད༔ གསང་བ་རིག་རྩལ་ཉམས་རྟོགས་སྤོར༔ མཆོག་ཐུན་དངོས་གྲུབ་ཐམས་ཅད་སྩོལ༔ ཆད་ཐོ་ནི། གཏོར་མ་རྣམས་ལ་སྨན་རཀ་བྲན་ཏེ། རཾ་ཡཾ་ཁཾ། གཏོར་མ་རྣམས་ཟག་མེད་ཀྱི་བདུད་རྩིའི་རྒྱ་མཚོ་འདོད་ཡོན་གྱི་སྤྲིན་ཕུང་ནམ་མཁའ་གང་བར་གྱུར། ༀ་ཨཱཿཧཱུྃ༔ ལན་གསུམ་གྱིས་བརླབས། ཧྲཱི༔ སྔོན་ཚེ་གོང་ནས་བསྐལ་བའི་བར༔ ཀུན་བཟང་ཡབ་ཡུམ་པདྨ་འབྱུང་༔ ཡེ་ཤེས་མཚོ་རྒྱལ་དཔལ་གྱི་སེང་༔ རིམ་གྱིས་དཀྱིལ་འཁོར་ཞལ་ཕྱེས་ཚེ༔ མཁའ་འགྲོ་གིང་ལང་ཤུགས་འགྲོའི་ཚོགས༔ སོ་སོའི་གཟུགས་མཆོག་བསྟན་ནས་ཀྱང་༔ བཀའ་ཡི་གཏོར་མ་ལེན་པ་དང་༔

སངས་རྒྱས་བསྟན་སྐྱོང་དགྲ་བགེགས་སྒྲོལ༔ རྣལ་འབྱོར་ཚེ་བསྲིངས་བར་ཆད་ཟློག༔ ཤ་ཁྲག་དམར་གྱི་གཏོར་མ་བཞེས༔ ཁས་བླངས་དམ་བཅས་འཕྲིན་ལས་མཛོད༔ ཧྲཱི༔ དེ་འོག་བསྐལ་བ་ཡང་མཐིལ་དུ༔ ཌཱཀྐིའི་ཚོགས་ཁང་གཏེར་སྒྲོམ་དུ༔ སྐལ་ལྡན་བདེ་ཆེན་རྒྱལ་པོ་ཡིས༔ རྟ་ཕག་དཀྱིལ་འཁོར་ཞལ་ཕྱེས་ཚེ༔ ལྷ་མགོན་སྨན་མོ་གསང་བ་དང་༔ ཤ་ཟ་རཱ་ཧུའི་ཚོགས་བཅས་ཀྱིས༔ སོ་སོའི་གཟུགས་མཆོག་བསྟན་ནས་ཀྱང་༔ བཀའ་ཡི་གཏོར་མ་ལེན་པ་དང་༔ སངས་རྒྱས་བསྟན་སྐྱོང་དགྲ་བགེགས་སྒྲོལ༔ རྣལ་འབྱོར་ཚེ་བསྲིངས་བར་ཆད་ཟློག༔ ཤཁྲག་དམར་གྱི་གཏོར་མ་བཞེས༔ ཁས་བླངས་དམ་བཅས་འཕྲིན་ལས་མཛོད༔ བསྟན་མ་སྐྱོང་པ་ནི། རཾ་ཡཾ་ཁཾ། བསྟན་མའི་གཏོར་མ་ཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ༔ བྷྱོ༔ བསྟན་སྐྱོང་མ་ལུས་འཁོར་དང་བཅས༔ འཇའ་ཚོན་ཆར་སིལ་སྒྲ་དང་བཅས༔ འདིར་གཤེགས་དམ་རྫས་གཏོར་མ་བཞེས༔ འཇིག་རྟེན་ཁམས་བདེ་ལོ་ཕྱུགས་ལེགས༔ རྣལ་འབྱོར་རྩ་རླུང་ཉམས་རྟོགས་སྤེལ༔ མཐོང་ཐོས་དྲན་རེག་སྨིན་གྲོལ་ནས༔ གསང་སྔགས་བསྟན་

པ་རྒྱས་པར་མཛོད༔ བྲོ་བརྡུང་ནི། ཨེ་ནྲྀ་ཏྲི་ཁུག་ཛ། པྲ་བེ་ཤ་ཡ་ཕཊ། ཨ་བེ་ཤ་ཡ་ཨ། ཧྲཱི༔ མ་ཆགས་པདྨའི་དཀྱིལ་འཁོར་ནས༔ རྣམ་རྟོག་བགེགས་ཀྱི་ཕུང་པོ་ལ༔ གཉིས་མེད་རོལ་བའི་བྲོ་བརྡུངས་པས༔ གཉིས་འཛིན་གདོན་གྱི་ཚོགས་ཆེན་ཆོམས༔ ༀ་ལམ་ཨཱ་ལམ་ཧཱུྃ་ལམ༔ སྟམ་བྷ་ཡ་ནན༔ དྷརྨ་དྷ་ཏུ་ཨ༔ དངོས་གྲུབ་བླངས་པ་ནི༔ ཧྲཱི༔ བདེ་མཆོག་བདེ་སྤྱོད་ནམ་མཁའི་ཀློང་༔ དབང་ཆེན་རྟ་ཕག་ཐུགས་རྗེ་ཅན༔ བསྐྱེད་རྫོགས་བསྙེན་སྒྲུབ་མཐར་ཕྱིན་པས༔ སྐུ་གསུང་ཐུགས་ཡོན་དངོས་གྲུབ་སྩོལ༔ ཨོཾ་ཨཱཿཧཱུྃ༔ གུ་རུ་དེ་ཝ་ཌཱཀྐི་བཛྲ་པདྨ་ཀྲོ་དྷ་སརྦ་སིདྡྷི་ཕ་ལ་ཧོ༔ གཏང་རག་གི་མཆོད་བསྟོད་བྱ། བཟོད་གསོལ་ནི། ཧྲཱི༔ རྩ་གསུམ་ཡོངས་འདུས་དཀྱིལ་འཁོར་དུ༔ ཆོ་ག་ལྷག་ཆད་གྱུར་པ་དང་༔ ལྷ་བསྙེན་བྱིང་རྨུགས་འཐིབས་ལ་སོགས༔ འགལ་འཁྲུལ་མ་ལུས་དག་པར་མཛོད༔ དབྱངས་གསལ་ཡིག་བརྒྱ་སོགས་བཟླ༔ འདི་ནས་རྟེན་དང་ཞེས་བརྟན་བཞུགས་བྱ། གཤེགས་བསྡུ་ནི། ཧྲཱི༔ སྣང་སྲིད་ཐམས་ཅད་དབང་ཆེན་ཞིང༔ རང་ལུས་འབྱུང་བ་རྡོས་བཅས་བྲལ༔ སྒྲ་རྣམས་བྲག་ཆའི་གདངས་བཞིན་སྣང༔ འགྱུ་དྲན་ཀ་དག་

རོལ་རྩལ་དུ༔ གང་འདུལ་འཕྲིན་ལས་མཐར་ཕྱིན་ནས༔ ཆོས་དབྱིངས་སྐྱེ་མེད་ཀློང་དུ་ཨ༔ སྨོན་ལམ་ནི། ཧོ༔ བདག་ཅག་འདིར་འདུས་མཆེད་ལྕམ་རྣམས༔ དམ་ཚིག་གཡེལ་མེད་ཏིང་འཛིན་གྱིས༔ འཇའ་ལུས་རྡོ་རྗེའི་སྲོག་འགྲུབ་ནས༔ ཁམས་གསུམ་འོད་སྐུར་ཡོངས་གྲོལ་བསྔོ༔ བཀྲ་ཤིས་ནི༔ ཧཱུྃ་ཧྲཱི༔ བྱིན་རླབས་ཆར་ལྟར་འབེབས་མཛད་པའི༔ བླ་མ་རྣམས་ཀྱི་བཀྲ་ཤིས་ཤོག༔ དངོས་གྲུབ་ཆར་ལྟར་སྙིལ་མཛད་པའི༔ ཡི་དམ་རྟ་ཕག་བཀྲ་ཤིས་ཤོག༔ བར་ཆད་ཀུན་སེལ་ལས་རྣམས་སྒྲུབ༔ མཁའ་འགྲོ་སྲུང་མའི་བཀྲ་ཤིས་ཤོག༔ འཇའ་ལུས་འོད་སྐུར་སྨིན་མཛད་པའི༔ འགྲོ་ཀུན་མཁའ་ཁྱབ་བཀྲ་ཤིས་ཤོག༔ དེ་ལྟར་རྟ་ཕག་གི་ལས་བྱང་སོགས། སྔོན་དུ་གཏེར་གཞུང་གི་དགོངས་དོན་བཞིན་ལྷན་ཐབས་སུ་སྦྱར་ཀྱང་། གབ་དཀྲུགས་དང་བརྡའ་འཐོར་བར་བརྟེན་ཤིན་ཏུ་རྟོགས་དཀའ་བ་བཅས་སླར་ཡང་གཞན་ཕན་གྱི་བློས་འཕར་བའི་ལོར་གབ་སྦས་དཀྲུགས་མེད་པར་གོ་བདེ་བའི་ཆེད་དུ་སྔོན་འགྲོ་ལས་རིམ་དང་བཅས་བསྐྱར་བསྒྲིགས་སུ། ༧བདེ་ཆེན་རྒྱལ་པོས་སྦྱར་བའོ། །ཤཱཀྱའི་བཙུན་མིང་གིས་བྲིས་པའོ། །གཏེར་གཞུང་རྩ་ཚིག་དཔག་བསམ་འབྲས་བཟང་མཆོག །ཧ་ཅང་སྤྲོས་པའི་ཚིག་གི་ལོ་འདབ་ཀྱིས། །སྒྲིབ་མིན་ཤིན་ཏུ་གོ་བདེར་བཀོད་པ་པོ། །དགུ་རོང་སྤྲུལ་མིང་སྣ་ཚོགས་རང་གྲོལ་ལོ། །སརྦ་མངྒ་ལཾ།། །།

མགོན་དཀར་གྱི་སྒྲུབ་ཐབས་བླ་མ་མགོན་པོའི་ཞལ་ལུང་དངོས་གྲུབ་རོལ་མཚོ། དགུ་རོང་སྣ་ཚོགས་རང་གྲོལ།

༄༅། །མགོན་དཀར་གྱི་སྒྲུབ་ཐབས་བླ་མ་མགོན་པོའི་ཞལ་ལུང་དངོས་གྲུབ་རོལ་མཚོ་ཞེས་བྱ་བ་བཞུགས་སོ།།

རྒྱལ་ཀུན་གསང་གསུམ་རོལ་མོའི་གར། །གྲུབ་དབང་སྐྱབས་མཆོག་བླ་མ་དང་། །དབྱེར་མེད་ཡིད་བཞིན་མགོན་པོའི་ཞལ། །གཉིས་མེད་རང་རིག་ཐིག་ལེར་འདུད། །གཏེར་མགོན་ཡིད་བཞིན་ནོར་བུ་ཡི། །སྒྲུབ་ཐབས་ཉམས་སུ་ལེན་པ་ལ། །སྒྲུབ་རྗེས་གཏོར་མ་ལ་སོངས་པའི། །བཤམས་བཀོད་མཐོང་བརྒྱུད་བཞིན་དུ་བཤམས། །དངོས་གཞི་ངག་འདོན་རིམ་པ་ལ། །བདག་གི་རྣལ་འབྱོར་སྔོན་འགྲོ་བར། །མཆོད་རྫས་བརླབ་པ་ནི། ཧྲཱི༔ འཇིག་རྟེན་དག་པའི་གཞལ་ཡས་འདིར༔ འདོད་པ་ལྔ་ཡི་ཡོན་ཏན་རྣམས༔ དངོས་དང་ཡིད་ཀྱིས་ཀུན་སྤྲུལ་ཏེ༔ ཐམས་

ཅད་དག་པའི་བདུད་རྩི་ཆེ༔ རོ་བཅུད་མདངས་ལྡན་འོད་ཕུང་འཁྱིལ༔ རཾ་ཡཾ་ཁཾ། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བ་ལིངྟ་ཧཱུྃ་ཧྲཱིཿཋ༔ རྟེན་བསྐྱེད་པ་ནི། སྭཱ་བྷ་ཝས་སྦྱངས། སྟོང་པའི་ངང་ལས་རང་གི་མདུན་དུ་པདྨ་འདབ་མ་འབུམ་དང་ལྡན་པའི་ཟེའུ་འབྲུ་དང་ཁོད་མཉམ་པར་རིན་པོ་ཆེའི་ས་གཞི་རྒྱ་ཆེ་ཞིང་ཁོད་སྙོམ་པོར་བརྡལ་བ་ལ༔ དུར་ཁྲོད་ཆེན་པོ་འཇིགས་སུ་རུང་བ་བརྒྱད་ཀྱིས་ཡོངས་སུ་བསྐོར་བའི་དབུས་སུ༔ ནེའུ་གསིང་སྨན་དང་ལྗོན་ཤིང་ནགས་ཚལ་མེ་ཏོག་སྣ་ཚོགས་པས་རབ་ཏུ་བརྒྱན་པ༔

འདོད་ཡོན་འཛིན་པའི་ལྷ་དང་ལྷ་མོ་འབྱམས་ཀླས་པའི་དབུས་སུ་བྱང་སེམས་དཀར་པོའི་རྒྱ་མཚོ་འཁྱིལ་བའི་ཀློང་དུ་རིན་པོ་ཆེ་སྣ་ཚོགས་ལས་གྲུབ་པའི་བྲག་རི་ཕྱོགས་བཞི་ནས་ཡིད་ལ་གང་འདོད་ཀྱི་རིན་པོ་ཆེ་རྒྱན་གོས་ཟས་སྣ་ཕོ་བྲང་ཡུལ་གླིང་སོགས་ཅི་འདོད་ཀྱི་ཆར་འབེབས་པ༔ དེའི་སྟེང་དུ་བྱང་སེམས་དམར་པོའི་མཚོ་ཆེན་རྦ་ཀློང་འཁྲུགས་པའི་དབུས་སུ༔ རིན་པོ་ཆེ་སྣ་ལྔ་ལས་གྲུབ་པའི་ཕོ་བྲང་གཞལ་མེད་ཁང་རྒྱ་ཁྱོན་མཐའ་ལས་འདས་ཤིང་འོད་ཟེར་འབར་བའི་ནང་ཀུན་ལྷ་ཀླུ་མིའི་ཡིད་བཞིན་གྱི་ནོར་བུ་དང་རིན་པོ་ཆེ་གཏེར་གྱི་བུམ་པ་ལ་སོགས་པས་གཏམས་པའི་དབུས་སུ༔ པཾ་ལས་པདྨ་རཾ་ལས་ཉི་མ༔ ཨ་ལས་ཟླ་བའི་དཀྱིལ་འཁོར་གྱི་སྟེང་དུ༔ ཧཱུཾ་ཡིག་དཀར་པོ་གསལ་བ་ལས་འོད་ཟེར་འཕྲོས་འཕགས་པ་མཆོད༔ སེམས་ཅན་གྱི་དབུལ་ཕོངས་དང་སྡུག་བསྔལ་བསལ་ཏེ་སྲིད་བཅུད་ཐམས་ཅད་བསྡུས་ནས་སྲོག་ཡིག་ལ་ཐིམ༔ དེ་ཡོངས་སུ་གྱུར་པ་ལས་མགོན་པོ་ཆེན་པོ་སྐུ་མདོག་དཀར་ལ་དམར་བའི་མདངས་ཆགས་པ༔ ཅུད་ཟད་ཁྲོ་འཛུམ་སྒེག་པའི་ཉམས་ཅན༔ ཞལ་གཅིག་ཕྱག་བཞི་ཞབས་གཉིས་དོར་སྟབས་སུ་བཞུགས་

པ༔ སྤྱན་གསུམ་སྨིན་མ་ཨག་ཚོམ་དམར་སེར་མེ་ལྟར་འབར་ཞིང་༔ དབུ་སྐྲ་ཁམ་ནག་གྱེན་དུ་བརྫེས་པའི་ཟུར་ཕུད་ལ་ཉི་མ་དང་ཟླ་བས་བརྒྱན་ཅིང་༔ ཐོད་སྐམ་ལྔས་དབུ་བརྒྱན་ལ་རིན་པོ་ཆེའི་རྩེ་ཕྲན་དུ་མས་སྤྲས་པ་དབང་རྟགས་སུ་འོད་དཔག་མེད་ཀྱིས་མཚན་པ༔ ཕྱག་གཡས་ཀྱིས་ནོར་གཞོང་དང་མདའ་གཞུ༔ གཡོན་རཏྣའི་ཕྲེང་བ་དང་རལ་གྲི་འཛིན་པ༔ ལྷ་རྫས་ཀྱི་ན་བཟའ་གསང་བའི་གོས་ལྷབ་ལྷབ་ཏུ་གསོལ་ཞིང་༔ རཏྣའི་ཕྲེང་བ་དང་དྲིལ་གཡེར་ཟླ་ཕྱེད་ཀྱིས་མཚན་པ༔ སྐུ་ལྟ་བས་ཆོག་མི་ཤེས་པ་ཞིག་ཏུ་གྱུར༔ དེའི་གཡས་སུ་གཉིས་མེད་ཀྱི་ཡུམ་གསང་བའི་ལྷ་མོ་དཀར་གསལ་མཛེས་འཛུམ་མདངས་ལྡན༔ ཞལ་གཅིག་ཕྱག་གཉིས་མ་གཡས་མདའ་དར་དང་གཡོན་ཐོད་པ་འཛིན་པ༔ གསང་བའི་གནས་ནས་འདོད་ཆགས་ཀྱི་མཚལ་འབབ་པ༔ རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ༔ དྲེའུ་དཀར་ལ་ཆིབས་པ༔ མགོན་པོའི་མདུན་དུ་མཁའ་འགྲོ་གསང་བ་སྡེ་བཞི་ཞི་འཛུམ་ལས་བཞིའི་མདོག་ཅན༔ ཞལ་གཅིག་ཕྱག་གཉིས་མ་གཡས་རྣམས་ཀྱིས་ལྕགས་ཀྱུ་ཞགས་པ་

ལྕགས་སྒྲོག་དྲིལ་བུ་འཛིན་ཅིང་༔ གཡོན་རྣམས་ཀྱིས་བུམ་པ་མདའ་དར་མདུང་དམར་རལ་གྲི་འཛིན་པའོ༔ དེའི་གཡོན་དུ་སྨན་མོ་སྡེ་བཞི་དཀར་སེར་དམར་ལྗང་མཛེས་ཆགས་སྒེག་པའི་ཉམས་ཅན༔ གཡས་རྣམས་ཀྱིས་མདའ་དར་ནོར་བུ་ཟས་གཞོང་པདྨ༔ གཡོན་རྣམས་ཀྱིས་སྨན་སྒྲོམ་དང་ཐོད་པ་ཌ་མ་རུ་དང་རལ་གྲི་འཛིན་པ༔ ལྷ་མོའི་གཡས་སུ་མ་མོ་ཤ་ཟ་སྡེ་བཞི་དམར་ནག་གཅེར་བུ་རལ་བ་གཟེངས་པ༔ ཞལ་གཅིག་ཕྱག་གཉིས་མ༔ ཕྱག་གཡས་རྣམས་ཀྱིས་ལྕགས་སྒྲོག་སྤྲུལ་ཞགས་མདའ་དར་རལ་གྲི་འཛིན་ཅིང་༔ གཡོན་རྣམས་ཀྱིས་ཞགས་པ་དང་ནད་ཀྱི་རྐྱལ་བ་ལྕགས་ཀྱུ་མདུང་དམར་འཛིན་པའོ༔ མགོན་པོའི་རྒྱབ་ཏུ་གཟའ་བདུད་རཱ་ཧུ་ལ་གཞོན་ནུའི་ཚུལ་གྱིས་མདའ་གཞུ་འགེངས་པ༔ ཐམས་ཅད་ཀྱང་ཞབས་གཉིས་བཞེངས་སྟབས་སུ་བཞུགས་་འི་མཐའ་བསྐོར་དུ་ནོར་ལྷ་གཏེར་བདག་དམ་ཅན་རྒྱ་མཚོ་གཙང་རིས་ཀྱི་དཔལ་མགོན་བདུན་ཅུ་རྩ་ལྔ་སོགས་སྣང་སྲིད་ཀྱི་དྲེགས་པ་ཅན་ཐམས་ཅད་ཏིལ་གྱི་གོང་བུ་ལྟར༔ གཞལ་ཡས་ཁང་མེར་གྱིས་གང་བར་བཞུགས་པའི་གཙོ་འཁོར་ཐམས་ཅད་ཀྱི་སྐུ་ལས་འོད་ཟེར་གྱི་

ཚོགས་སྲིད་གསུམ་ཁྱབ་པར་འཕྲོ་ཞིང་གནས་གསུམ་ཡེ་གེ་གསུམ་གྱིས་མཚན་པར་གྱུར༔ དེ་ལྟར་གསལ་བའི་གནས་གསུམ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས༔ གནས་གསུམ་མཁའ་འགྲོ་འདུ་བའི་གླིང་དུར་ཁྲོད་ཆེན་པོ་བརྒྱད་ལ་སོགས་པ་གར་བཞུགས་ཆོས་དབྱིངས་ཕོ་བྲང་སོ་སོ་ནས་མགོན་པོ་འཁོར་བཅས་ནམ་མཁའ་ལ་སྤྲིན་ཕུང་གཏིབས་པ་ལྟར་སྤྱན་དྲངས་པར་གྱུར༔ བཛྲ་ས་མ་ཡ་ཛ༔ ཞེས་སྤྱན་འདྲེན་པ་ནི། ཧཱུྃ༔ ཀུན་ཏུ་བཟང་པོའི་ཐུགས་སྤྲུལ་ཏེ༔ སྲིད་པ་གསུམན་བཀའ་ཉན་པ༔ ཡེ་ཤེས་ཕྱག་རྒྱ་གར་གྱི་མགོན༔ མགོན་པོ་ཆེན་པོ་གཤེགས་སུ་གསོལ༔ འོག་མིན་བྱེ་བ་སུམ་ཅུའི་ཡུལ༔ རྒྱ་ནག་རི་བོ་རྩེ་ལྔ་དང་༔ གནས་གསུམ་དུར་ཁྲོད་ཁྲག་མཚོ་ནས༔ རྒྱལ་བའི་བསྟན་པ་སྲུང་ཕྱིར་གཤེགས༔ མ་ཆགས་པདྨའི་མཚོ་ཀློང་ནས༔ ཡུམ་མཆོག་ལྷ་མོ་ཆེན་མོ་ནི༔ ཤིན་ཏུ་ཆགས་པའི་མྱོས་བྱེད་མ༔ ཁམས་གསུམ་དབང་དུ་སྡུད་ཕྱིར་གཤེགས༔ བསིལ་བའི་ཚལ་དང་རི་རབ་རྩེ་༔ རྒྱ་གར་ཡུལ་དང་ཀོང་པོ་ནས༔ གསང་བ་སྡེ་བཞི་འཁོར་དང་བཅས༔ ཁམས་གསུམ་

དབང་དུ་སྡུད་ཕྱིར་གཤེགས༔ རྒྱ་མཚོའི་གནས་དང་དུར་ཁྲོད་བརྒྱད༔ འོག་མིན་གནས་དང་རྔ་ཡབ་ཞིང་༔ སྨན་མོ་སྡེ་བཞི་འཁོར་དང་བཅས༔ ཁམས་གསུམ་དབང་དུ་སྡུད་ཕྱིར་གཤེགས༔ རྒྱ་གར་རྒྱ་ནག་བལ་པོའི་ཡུལ༔ སོ་ས་གླིང་དང་ཀུན་དགའི་གླིང་༔ ཤ་ཟ་སྡེ་བཞི་འཁོར་དང་བཅས༔ ཁམས་གསུམ་དབང་དུ་སྡུད་ཕྱིར་གཤེགས༔ སྲིན་ཡུལ་ལངྐ་པུ་རི་དང་༔ དབུ་རུ་ཞ་ཡི་ལྷ་ཁང་ནས༔ གཟའ་བདུད་ཆེན་པོ་འཁོར་དང་བཅས༔ ཁམས་གསུམ་དབང་དུ་སྡུད་ཕྱིར་གཤེགས༔ བསྟན་པ་སྤེལ་ཕྱིར་གཤེགས་སུ་གསོལ༔ ནད་གདོན་ཞི་ཕྱིར་གཤེགས་སུ་གསོལ༔ ཚེ་བསོད་རྒྱས་ཕྱིར་གཤེགས་སུ་གསོལ༔ དབང་དུ་སྡུད་ཕྱིར་གཤེགས་སུ་གསོལ༔ ཟིལ་གྱིས་གནོན་ཕྱིར་གཤེགས་སུ་གསོལ༔ དགྲ་བགེགས་སྒྲོལ་ཕྱིར་གཤེགས་སུ་གསོལ༔ ཨེ་ཧྱཧི་ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར༔ པདྨ་ཀ་མཱ་ལ་ཡེ་སྟྭཾ༔ མཆོད་པ་ནི༔ ཧཱུྃ༔ མགོན་པོ་ཡབ་ཡུམ་འཁོར་བཅས་ལ༔ ཕྱི་ནང་གསང་བའི་མཆོད་པའི་སྤྲིན༔ དངོས་བཤམས་ཡིད་ཀྱིས་རྣམ་སྤྲུལ་ལས༔ ས་སྟེང་མ་ལུས་བཀང་ནས་

ཀྱང་༔ འབུལ་ལོ་དགྱེས་པར་བཞེས་སུ་གསོལ༔ བཛྲ་པུཥྤེ་ནསཤཔྟ་རུ་པ་ནས་དྷརྨ་དྷ་ཏུ་པཱུཙ་ཧོ༔ སརྦ་པཉྩ་ཨ་མྲྀ་ཏ་ཁཱ་ཧི༔ མ་ཧཱ་རཀྟ་ཁཱ་ཧི༔ མགོན་པོ་འཁོར་བཅས་ཀྱི་ལྗགས་རྡོ་རྗེའི་སྦུ་གུ་ཅན་གྱི་འོད་ཟེར་གྱིས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། རྩ་སྔགས་མཐར། ས་པཱ་རི་ཝ་ར་ཨེ་དམ་བ་ལིངྟ་ཁ་ཁ་ཁཱ་ཧི་ཁཱ་ཧི༔ ཞེས་ལན་གསུམ་མམ་བདུན་སོགས་ཀྱིས་འབུལ༔ བསྟོད་པ་ནི། ཧྲཱི༔ ཀུན་བཟང་ཐུགས་སྤྲུལ་མགོན་པོ་ཆེ༔ སྲིད་གསུམ་ཀུན་བདག་གཙོ་བོ་སྟེ༔ དབང་མཛད་དབང་གི་རྒྱལ་པོ་ཆེ༔ ཁམས་གསུམ་དབང་སྡུད་ཁྱོད་ལ་བསྟོད༔ ཐབས་ཤེས་བདེ་སྟོང་ཟུང་འཇུག་གི༔ ཡིད་འོང་ལྷ་མོ་དཀར་གསལ་མཛེས༔ ཆགས་པའི་མྱོས་ཤིང་ལང་ཚོ་རྒྱས༔ ས་གསུམ་ཀུན་ཡིད་འཕྲོག་ལ་བསྟོད༔ ཤིན་ཏུ་མཚར་སྡུག་མཛེས་འཛུམ་མ༔ བརྩེ་གདུང་འགྲོ་བའི་ཡིད་འགུགས་ཤིང་༔ དམ་ལྡན་རྣལ་འབྱོར་སྐྱོང་མཛད་པའི༔ གསང་བ་སྡེ་བཞི་བདག་བསྟོད་དོ༔ ཞི་ཞིང་འཛུམ་པའི་ངང་ཚུལ་གྱིས༔ རྣམ་འཕྲུལ་མཐའ་ཡས་སྟོན་མཛད་ཅིང་༔ འཕྲིན་ལས་བཞི་ལྡན་གཙོ་མོ་སྟེ༔

སྨན་མོ་སྡེ་བཞི་བདག་བསྟོད་དོ༔ ཤིན་ཏུ་ཁྲོ་གཏུམ་མཆེ་བ་གཙིགས༔ ང་རོས་ས་གསུམ་གཡོ་ཞིང་འཁྱོམས༔ ལས་སུ་དགྲ་བགེགས་སྒྲོལ་མཛད་པའི༔ ཤ་ཟ་སྡེ་བཞི་བདག་བསྟོད་དོ༔ སྲིན་པོའི་གཟུགས་ཀྱི་གདུག་པ་ཅན༔ ཚར་གཅོད་བྱང་ཆུབ་སེམས་དཔའ་སྟེ༔ མཚན་གསོལ་གཟའ་མཆོག་རཱ་ཧུ་ལ༔ དམ་ཚིག་ཅན་ལ་བདག་བསྟོད་དོ༔ གཞན་ཡང་དཔལ་ལྡན་མགོན་པོ་ཡི༔ བཀའ་དང་འཁོར་ན་ལེགས་གནས་ཤིང་༔ དམ་ལྡན་རྣལ་འབྱོར་སྐྱོང་མཛད་པའི༔ དམ་ཅན་རྒྱ་མཚོའི་ཚོགས་ལ་བསྟོད༔ ཅེས་བསྟོད་ལ་བཟླས་པ་བྱ་བ་ནི། བདག་གི་ཐུགས་ཀ་ནས་འོད་ཟེར་འཕྲོས་མགོན་པོའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་གི་མཐར་སྔགས་ཀྱི་ཕྲེང་བས་བསྐོར་ཏེ་གནས་པ་ལ་ཕོག་པས་མགོན་པོ་འཁོར་དང་བཅས་པའི་ཐུགས་དམ་གྱི་རྒྱུད་བསྐུལ་བས་གཟི་བྱིན་འབར་ཞིང་སྔོན་གྱི་དམ་ཚིག་རྗེས་སུ་དྲན་ནས་འདར་ཡེངས་ཡེངས་གནས་པ་ལ་སླར་ཡང་འོད་ཟེར་གྱིས་བསྐུལ་བས་མགོན་པོའི་ཐུགས་ཀ་ནས་འོད་ཟེར་ཁ་དོག་སྣ་ལྔའི་ཚོགས་བསམ་གྱིས་མི་ཁྱབ་པ་འཕྲོས་རྒྱལ་བ་ཀུན་མཆོད་ཅིང་ཐུགས་རྒྱུད་བསྐུལ་འོག་མིན་ལ་

སོགས་པའི་དེ་བཞིན་གཤེགས་པ་ཐམས་ཅད་དང་མགོན་པོའི་རྟེན་དང་བརྟེན་པ་ལ་ཐིམ་པས་མཐུ་སྟོབས་དང་ནུས་པ་གཟི་བྱིན་ཕུན་སུམ་ཚོགས་པར་གྱུར། མགོན་པོའི་གནས་གསུམ་ལས་བདུད་རྩི་འོད་ཟེར་དཀར་དམར་མཐིང་གསུམ་དང་ལྷ་སྐུ་ཡིག་འབྲུ། ཕྱག་མཚན་དུ་མ་འཕྲོས་རང་གི་གནས་གསུམ་དུ་ཐིམ་པས་ཐོག་མེད་ནས་བསགས་པའི་ལས་ཉོན་སྡིག་སྒྲིབ་ཐམས་ཅད་སྦྱངས་བྱིན་རླབས་དང་དངོས་གྲུབ་ཐམས་ཅད་ཐོབ། སླར་ཡང་གཙོ་འཁོར་ཐམས་ཅད་ཀྱི་ཞལ་དང་བ་སྤུའི་བུ་ག་ཕྱག་ཞབས་སོགས་སྐུའི་ཆ་ཐམས་ཅད་ནས་འདོད་དགུའི་ཆར་བབས་ཏེ་གནས་ཁང་བང་མཛོད་དང་བཅས་པ་ཕྱུར་བུར་གང་ཞིང་མཆོག་ཐུན་གྱི་དངོས་གྲུབ་ཐམས་ཅད་སྐད་ཅིག་ལ་སྩོལ་བར་གྱུར་པར་བསམ་ལ། ཨོཾ་བཛྲ་སེང་པདྨ་རཀྴ་ཤྲཱི་ཧེ་རུ་ཀ་ཧཱུྃ་ཕཊ༔ ཅེས་གང་མངབཟླས་མཐར་ཡིག་བརྒྱས་ལྷག་ཆད་བསྐངས་ལ་མཆོད་བསྟོད་བྱ་བ་ནི། རཾ་ཡཾ་ཁཾ་ཨོཾ་ཨཱཿཧཱུྃ་བཛྲ་པུཥྤེ་ནས་ཤཔྟ་མ་ཧཱ་པཉྩ་ཨ་མྲྀ་ཏ་རཀྟ་བ་ལིངྟ་པཱུ་ཛ་ལ་ཁ་རཾ་ཁཱ་ཧི ཧཱུྃ༔ གང་ཞིག་ཡིད་ལ་དྲན་པ་ཙམ་གྱིས་ཀྱང་༔ ཅི་འདོད་དངོས་གྲུབ་མ་ལུས་སྟེར་མཛད་པའི༔ བླ་མགོན་དབྱེར་

མེད་ཡིད་བཞིན་ནོར་བུ་ལ༔ གུས་པས་འདུད་དོ་མཆོག་ཐུན་དངོས་གྲུབ་སྩོལ༔ བསྐང་རྫས་བྱིན་གྱིས་བརླབས་པ་ནི། སྭ་བྷ་ཝས་སྦྱངས། སྟོང་པའི་ངང་ལས་གནས་ཁང་བྷཱུཾ་ལས་རིན་པོ་ཆེ་སྣ་བདུན་ལས་གྲུབ་པའི་གཞལ་མེད་ཁང་ཕུན་སུམ་ཚོགས་པའི་ནང་དུ་ཕྱི་ནང་གསང་བའི་མཆོད་པ་སྤྱན་གཟིགས་མཐུན་རྫས་རྟེན་རྫས་བསྐང་རྫས་ལ་སོགས་པའི་སྲིད་ཞིའི་འདོད་ཡོན་གྱི་རྣམས་པ་མཁོ་དགུ་ཚང་བ་བཟང་དགུས་འབྱོར་བ་མཛེས་དགུས་བརྒྱན་པ་ངོ་བོ་ཡེ་ཤེས་སྒྱུ་མའི་རང་བཞིན་ཅན་རྣམ་པ་བདེ་བའི་མཆོད་པའི་ཚོགས་བསམ་གྱི་མི་ཁྱབ་པས་ས་དང་བར་སྣང་ནམ་མཁའ་ཐམས་ཅད་གང་བར་གྱུར། ན་མཿསརྦ་ཏ་ཐཱ་ཞེས་སོགས་ནམ་མཁའ་མཛོད་ཀྱི་སྔགས་རྒྱས་སྤེལ་ལ། ཐུགས་དམ་བསྐང་བ་ནི། ཧཱུྃ༔ སྤྲོས་བྲལ་བདེ་བ་ཆེན་པོ་ཡི༔ རང་མདངས་སྒྱུ་འཕྲུལ་རོལ་མོའི་གར༔ གང་འདོད་འཆར་བ་མཆོད་པའི་སྤྲིན༔ འཛད་མེད་ནམ་མཁའ་མཛོད་ཀྱི་སྒོ༔ ཕྱི་ནང་ཉེར་སྤྱོད་འདོད་ཡོན་ལྔ༔ དམ་རྫས་སྨན་རཀ་གཏོར་མ་དང་༔ རྒྱན་དང་བཀོད་པ་ཡོངས་རྫོགས་པའི༔ ཕོ་བྲང་པདྨ་ཉི་ཟླའི་གདན༔ རིན་ཆེན་རུས་རྒྱན་ལྷ་མིའི་གོས༔ དྲིལ་གཡེར་དར་དཔྱངས་སྣ་ཚོགས་

དང་༔ ནོར་གཞོང་མདའ་གཞུ་དར་སྣའི་ཕྲེང་༔ རལ་གྲི་མདའ་དར་བྷན་དྷ་སོགས༔ སྣ་ཚོགས་ཕྱག་མཚན་དུ་མ་དང་༔ རིན་ཆེན་མེ་ཏོག་རྒྱན་ཕྲེང་དང་༔ ལྷ་རྫས་ན་བཟའ་གོ་ཁྲབ་རྨོག༔ འཕན་གདུགས་བླ་བྲེ་རྒྱལ་མཚན་དང་༔ སེངྒེ་གླང་ཆེན་ཁྱུང་འབྲུག་སྟག༔ རྟ་མཆོག་དྲེའུ་ལ་སོགས་པའི༔ སྣ་ཚོགས་བཞོན་པ་རྒྱལ་སྲིད་བདུན༔ བཀྲ་ཤིས་རྟགས་རྫས་རི་གླིང་གི༔ བཀོད་པ་ལྷ་ཀླུ་མིའི་འབྱོར་བ༔ སྲིད་ཞིའི་འདོད་ཡོན་མཆོད་པའི་ཚོགས༔ མ་ལུས་མ་ཚང་མེད་པ་འདིས༔ བླ་མ་མགོན་པོའི་ཐུགས་དམ་བསྐང་༔ ཡུམ་མཆོག་ལྷ་མོའི་ཐུགས་དམ་བསྐང་༔ གསང་བ་སྡེ་བཞིའི་ཐུགས་དམ་བསྐང་༔ སྨན་མོ་སྡེ་བཞིའི་ཐུགས་དམ་བསྐང་༔ ཤ་ཟ་སྡེ་བཞིའི་ཐུགས་དམ་བསྐང་༔ མིག་མང་འོད་འཕྲོའི་ཐུགས་དམ་བསྐང་༔ བཀའ་ཉན་འཁོར་ཚོགས་ཐུགས་དམ་བསྐང་༔ སྐུ་གསུང་ཐུགས་དང་འགལ་བ་ཡི༔ དམ་ཚིག་ཉམས་ཆག་ཐམས་ཅད་བཤགས༔ མཆོག་དང་ཐུན་མོང་དངོས་གྲུབ་སྩོལ༔ ཞེས་ཡིག་བརྒྱ་བཟླ། བསྐང་བ་གྲངས་གསོག་ཆེ། ཧཱུྃ༔ བདེ་སྟོང་ཡེ་ཤེས་མཆོད་པའི་སྤྲིན༔

ཕྱི་ནང་གསང་བ་ཡང་གསང་གི༔ ཐུགས་དམ་བསྐང་བའི་དམ་ཚིག་རྫས༔ སྲིད་ཞིའི་མཆོད་ཚོགས་རྒྱ་མཚོ་འདིས༔ ཐུགས་དམ་བསྐང་ཞིང་ཉམས་ཆག་བཤགས༔ འཕྲིན་ལས་འདོད་རྒུའི་དངོས་གྲུབ་སྩོལ༔ འཕྲིན་ལས་བཅོལ་བནི། ཧྲཱི༔ འཇིག་བྱེད་དྲེགས་སྡེ་ཀུན་གྱི་བདག༔ མགོན་པོ་ཆེན་པོ་ཕྱག་བཞི་པ༔ ཡུམ་མཆོག་ལྷ་མོ་མཛེས་འཛུམ་མ༔ གསང་བ་སྡེ་བཞི་མཁའ་འགྲོ་དང་༔ སྨན་མོ་ཤ་ཟ་རཱ་ཧུ་སོགས༔ སྤྲུལ་པ་འཁོར་ཚོགས་འབུམ་སྡེ་བཅས༔ རྒྱན་གྱི་མཆོད་གཏོར་འདི་བཞེས་ལ༔ རྣམ་བཞི་འཕྲིན་ལས་སྒྲུབ་པ་དང་༔ སྲིད་གསུམ་འགྲོ་ཀུན་ཟིལ་གྱིས་གནོན༔ ལྷ་འདྲེ་མི་གསུམ་བྲན་དུ་བཀོལ༔ ཁམས་གསུམ་མ་ལུས་དབང་དུ་བསྡུས༔ སྔོན་ལས་འཕྲལ་རྐྱེན་མི་མཐུན་བགེགས༔ ཉེར་འཚེ་བར་ཆད་ཞི་བ་དང་༔ ཚེ་བསོད་མངའ་ཐང་སྙན་གྲགས་རྒྱས༔ བཅོལ་བའི་འཕྲིན་ལས་འགྲུབ་པར་མཛོད༔ ཅེས་དང་། ཧཱུྃ༔ ཀུན་བཟང་ཡབ་ཡུམ་རྡོ་རྗེ་སེམས་དཔའ་དང་༔ ཡེ་ཤེས་ཌཱཀྐི་ལས་ཀྱི་དབང་མོ་ཆེ༔ ཧཱུཾ་ཆེན་ཀ་ར་ལབ་ཀྱི་སྒྲོན་མ་དང་༔ པད་འབྱུང་མཚོ་རྒྱལ་དཔལ་སེང་བདེ་ཆེན་རྒྱལ༔

ཨོ་རྒྱན་བསྟན་འཛིན་ཆོས་རྒྱལ་ངག་གི་དབང་༔ རྣལ་འབྱོར་དབང་ཕྱུག་ཚོགས་དྲུག་རང་གྲོལ་སོགས༔ རྩ་བརྒྱུད་རིག་འཛིན་བླ་མའི་ཚོགས་རྣམས་ཀྱི༔ སྤྱན་སྔར་ཁས་བླངས་དམ་བཅས་ཅི་བཞིན་དུ༔ རྩ་བརྒྱད་སྟོང་སྦྱར་ཛ་གད་བདུད་རྩི་སྨན༔ དམར་ཆེན་ལྦུ་ཕྲེང་འཁྲུགས་པ་རཀྟའི་མཚོ༔ རོ་བརྒྱའི་དཔལ་དང་སྦྱར་བའི་གཏོར་མ་སོགས༔ དངོས་འབྱོར་ཡིད་སྤྲུལ་མཆོད་ཚོགས་འདི་བཞེས་ལ༔ སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད༔ དགེ་འདུན་སྡེ་སྐྱོང་རྣལ་འབྱོར་ཚེ་དཔལ་སྤེལ༔ སྙན་པའི་དར་ཕྱོར་གྲགས་པའི་དུང་བུས་ལ༔ འཁོར་དང་ལོངས་སྤྱོད་རྒྱས་པ་ཉིད་དུ་མཛོད༔ རྒས་མེད་ལང་ཚོ་རྒྱས་པའི་ལུས་སྟོབས་ལྡན༔ མིག་ལ་ཡ་མཚན་ལྟད་མོ་དགའ་བོས་གང་༔ རྣ་བར་རྟག་ཏུ་སྙན་པའི་གཏམ་ཐོས་ཤིང་༔ དྲི་ཞིམ་ངད་པ་སྣ་དང་མི་འབྲལ་བར༔ ཟས་སྐོམ་འབྱོར་བས་རོ་འཛིན་ཚིམ་པར་མཛོད༔ ལུས་ལ་རེག་བྱའི་བདེ་བ་ཁོ་ནས་འཚོ༔ ཡིད་ལ་རྣམ་པར་གྲོལ་བའི་ཤེས་རབ་དང་༔ ཟག་མེད་བདེ་བས་ནམ་ཡང་ངོམ་པར་མཛོད༔ ཁྱོད་གསོལ་ཁྱོད་སྒྲུབ་ཁྱོད་

བསྟེན་ཁྱོད་རྦད་ན༔ མཐུ་རྩལ་མ་ཆུང་བརྩེ་གདུང་ཆེ་བར་མཛོད༔ གཞིས་སུ་བཀྲ་ཤིས་ཚེ་རིང་ལོངས་སྤྱོད་སྤེལ༔ བྱེས་སུ་ལམ་འཕྲང་ཆུ་ལས་སྒྲོལ་འདོན་མཛོད༔ འཇིགས་སར་དགྲ་ཇག་ཆོམ་རྐུན་འཚེ་ལས་སྐྱོབས༔ མདོར་ན་བསམ་དོན་ཡིད་བཞིན་འགྲུབ་པ་དང་༔ བདག་དང་ཁམས་གསུམ་སེམས་ཅན་ཐམས་ཅད་ཀྱིས༔ བླ་མེད་རྫོགས་པའི་བྱང་ཆུབ་སྒྲུབ་པ་ལ༔ འགལ་རྐྱེན་ནད་གདོན་བར་ཆད་ཞི་བ་དང་༔ མཐུན་རྐྱེན་བསམ་དོན་མ་ལུས་འགྲུབ་པར་མཛོད༔ དུང་དུང་སྙིང་ནས་མི་ཕྱེད་དད་པ་ཡིས༔ ཡང་ཡང་མཆོད་ཅིང་གསོལ་བ་འདེབས་ལགས་ན༔ འཛུམ་འཛུམ་དགྱེས་བཞིན་ཞལ་བཟང་བསྟན་ནས་ཀྱང་༔ མྱུར་མྱུར་ལས་བཞིའི་འཕྲིན་ལས་འགྲུབ་པར་མཛོད༔ མི་བསྲུན་སྙིགས་མ་ལྔ་བདོའི་འགྲོ་བའི་མགོན༔ སྐྱབས་གཅིག་འཁོར་ལོའི་མགོན་པོ་ཡབ་སྲས་ཀྱི༔ སྐུ་ཚེ་བརྟན་ཅིང་མཛད་འཕྲིན་དབྱར་མཚོ་ལྟར༔ མི་ཉམས་འཕེལ་ཞིང་རྒྱས་པའི་འཕྲིན་ལས་མཛོད༔ མདོར་ན་རྣལ་འབྱོར་བདག་ཅག་འཁོར་བཅས་ཀྱི༔ གནས་སྐབས་མཐར་ཐུག་ཡིད་ལ་རེ་བའི་དོན༔ མཐའ་དག་འབད་པ་མེད་པར་

འགྲུབ་པ་དང་༔ བཅོལ་བའི་འཕྲིན་ལས་མ་ལུས་འགྲུབ་པར་མཛོད༔ ཅེས་ཅི་ལྟར་འཕྲིན་ལས་བཅོལ་བ་བཞིན་ཞལ་གྱིས་བཞེས་པར་བསམ་ལ། མཆོད་གཏོར་རྣམས་གཙང་སར་གཤེགས། གསོལ་བ་འདེབས་པ་ནི། ཧཱུྃ༔ སྐྱབས་གནས་ཀུན་འདུས་རྩ་བའི་བླ་མ་དང་། །དབྱེར་མེད་མགོན་པོ་ཡིད་བཞིན་ནོར་བུ་ལ། །གསོལ་བ་འདེབས་སོ་རྣལ་འབྱོར་བདག་ཅག་གི །ཚེ་འདིའི་འགལ་རྐྱེན་བར་ཆད་ཞི་བ་དང་། །ཚེ་བསོད་ཆོས་འབྱོར་རྒྱས་ཤིང་ཁམས་གསུམ་གྱི། །ལེགས་ཚོགས་དབང་བསྡུས་མི་མཐུན་གཡུལ་ངོ་ལས། །རྒྱལ་ཏེ་གང་བསམ་དོན་རྣམས་འགྲུབ་པ་དང་། །ཕྱི་མ་འོག་མིན་གནས་སུ་དྲངས་དུ་གསོལ། །ཞེས་གདུང་ཤུགས་དྲག་པོས་གསོལ་བ་འདེབས་སོ། །སྨྲས་པ། ཆོས་ཚུལ་འདི་ཡི་བཀའ་བབས་ཤིང་། །ལྷ་མཆོག་འདི་ཡི་དངོས་གྲུབ་ཐོབ། །ལོངས་སྤྱོད་ལ་ནི་སྐལ་བ་ཅན། །རིག་འཛིན་སྣ་ཚོགས་རང་གྲོལ་གྱིས། །ཤིང་བྱའི་ཟླ་ཚེས་གནམ་རྫོང་གི །ཡང་རྩེའི་བསམ་གཏན་ཁང་བུ་རུ། །བཅད་རྒྱའི་ཐུན་མཚམས་ཤིག་ལ་བྲིས། །ཉམས་སུ་ལོངས་དང་དངོས་གྲུབ་ཐོབ། །འདི་བྲིས་དགེ་ཚོགས་ཅི་མཆིས་པ། །རྒྱལ་བསྟན་རིན་ཆེན་རྒྱས་ཕྱིར་བསྔོ། །སརྦ་མངྒ་ལཾ།།

ཡང་གསང་རྟ་ཕག་ཡིད་བཞིན་ནོར་བུའི་སྐོང་བཤགས་ཀྱི་ཆོ་ག་པདྨ་རཱ་གའི་ཕྲེང་བ། དགུ་རོང་དགེ་འདུན་འཇིགས་མེད་རྣམ་གྲོལ།

༄༅། །ཡང་གསང་རྟ་ཕག་ཡིད་བཞིན་ནོར་བུའི་སྐོང་བཤགས་ཀྱི་ཆོ་ག་པདྨ་རཱ་གའི་ཕྲེང་བ་ཞེས་བྱ་བ་བཞུགས་སོ།།

མཐའ་བརྒྱད་སྤྲོས་པ་ཀུན་བྲལ་ཆོས་ཀྱི་སྐུ། །མ་འགགས་རང་མདངས་གསལ་ལ་ལོངས་སྤྱོད་རྫོགས། །གང་འདུལ་མོས་ངོར་སྣ་ཚོགས་སྤྲུལ་བའི་སྐུ། །སྐུ་གསུམ་དབྱེར་མེད་བླ་མས་ཤིས་པ་སྩོལ། །ཨོ་རྒྱན་ཐུགས་སྲས་རླངས་ཆེན་དཔལ་སེང་ཉིད། །སྙིགས་དུས་རྩོད་བྲལ་གཏེར་སྟོན་ཆེན་པོའི་སྐུར། །ཡོངས་བཞེངས་བསྟན་པའི་རྩ་ལག་བདེ་ཆེན་རྒྱལ། །ཡབ་སྲས་བརྒྱུད་པར་བཅས་ལ་གུས་བཏུད་ནས། །ཟབ་གཏེར་སྙན་བརྒྱུད་རྒྱ་མཚོའི་སྙིང་པོ་མཆོག །ཡང་གསང་རྟ་ཕག་

ཡིད་བཞིན་ནོར་བུ་ཡི། །སྐོང་བཤགས་རིམ་པ་དམ་པའི་ཕྱག་བཞེས་བཞིན། །ཡི་གེར་འགོད་ལ་བཀའ་ཡིས་གནང་བ་སྩོལ། །དེ་ལ་འདིར་ཡངགསང་རྟ་ཕག་ཡིད་བཞིན་ནོར་བུའི་དབང་བསྐུར་ལེགས་པར་ཐོབ་ཅིང་། བླན་མེད་པའི་མཆོག་གི་དངོས་གྲུབ་དོན་དུ་གཉེར་བ་དག་གི་དམ་ཚིག་ཉམས་ཆག་དང་སྡིག་སྒྲིབ་སྦྱངས་ཤིང་ཚོགས་གཉིས་ཀྱིས་འབྱོར་བ་གོང་ནས་གོང་དུ་སྤེལ་བར་བྱེད་པའི་ཐབས་ཕུལ་དུ་བྱུང་བ་ནི། བསྐོང་བཤགས་ཀྱི་རིམ་པ་འདི་ཡིན་ཏེ། དེ་ལ་སྦྱོར་དངོས་རྗེས་གསུམ་ལས། དང་པོ་སྦྱོར་བ་ནི་ཡིད་དང་མཐུན་པའི་སར་ཚེས་བཅུ་ལ་སོགས་པ་དཔའ་བོ་མཁའ་འགྲོ་རང་བཞིན་གྱིས་འདུ་བའི་དུས་ཁྱད་པར་ལ་གནས་ཁང་གཙང་མར་

བྱི་དོར་བྱས་ཤིང་སྐུ་གསུང་ཐུགས་ཀྱི་རྟེན་བཀྲམ་པའི་མདུན་དུ་སྟེགས་བུ་གྲུ་བཞི་བདུད་རྩི་ལྔས་ཆག་ཆག་གདབ་ལ། དར་དམར་གྱི་ཁེབ་གཡོག་པའི་ཁར་རས་བྲིས་ཀྱི་དཀྱིལ་འཁོར་བཀྲམ་པའམ། མ་འབྱོར་ན་འབྲུ་ཚོམ་དང་། དཔལ་གཏོར་བཤམས། དེའི་ཕྱོགས་བཞིར་དཔལ་བཤོས་དམར་པོ་ཉེར་བདུན་རེ་སྒྲེང་ཆགས་སུ་བཤམས་པའི་ཟུར་བཞིར་རྨད་བྱུང་བསྐང་བའི་གཏོར་མ་རི་རབ་བང་རིམ་བཞི་བ་སྟེང་དུ་དཔལ་བཤོས་གྲུ་གསུམ་པད་འདབ་བཞིས་བསྐོར་བ་ལ་བསྐང་རྫས་ཀྱི་རྒྱན་སྤྲོས་དང་ལྡན་པ། དེའི་ཕྱིར་ནང་ནས་རིམ་པ་བཞིན་ཕྱོགས་རེར་ཟན་ཀོང་དཀར་པོ་ཟླུམ་པོའིནང་དུ་བདུད་རྩི་བླུགས་པ་ཉེར་བདུན་རེ་དང་། ཟན་ཀོང་གྲུ་གསུམ་གྱི་ནང་དུ་རཀྟ་བླུགས་པ་ཉེར་བདུན་རེ་དང་། དེ་ལས་ཅུང་ཟད་སྟེགས་དམར་བར་མར་མེ་ཉེར་བདུན་རེ་བཤམས་པའི་རང་རང་གི་ཟུར་བཞིར་སྨན་རཀ་མར་མེའི་རྐོང་ཆེན་རེ་བཤམ་མོ། །དེའི་མདུན་དུ་མཆོད་སྟེགས་ཅི་བདེ་བར་བཀའ་སྲུང་གི་གཏོར་མ་ཆད་བསྟན། ཕྱི་ནང་གི་ཉེར་མཆོད། ཚོགས་ཀྱི་འཁོར་ལོའི་ཡོ་བྱད། འབུད་དཀྲོལ་གྱི་རོལ་མོའི་བྱེ་བྲག་སོགས་དམ་ཚིག་གི་ཡོ་བྱད་རྣམས་འདུ་བྱའོ། །གཉིས་པ་དངོས་གཞི་ལ་གསུམ། འགྱོད་ཚངས་བཤགས་པའི་རིམ་པ། ཐུགས་དམ་བསྐང་བའི་རིམ་པ། འདོད་གསོལ་སྨོན་ལམ་གྱི་རིམ་པའོ། །དང་པོ་ལ་བཞི། ཕྱག་འཚལ་བ། སྔགས་བཟླ་བ། ཆོས་ཉིད་ཀྱི་ཀློང་དུ་བཤགས་པ་དང་། རྗེས་འབྲེལ་མཆེད་ནང་བཤགས་པ། དམ་བཅའ་བའི་ཚུལ་ལོ། །དང་པོ་ནི། སྒྲུབ་པ་པོ་རྣམས་གྲལ་དུ་འཁོད་དེ། རྟ་ཕག་གི་ལས་གཞུང་སྐྱབས་སེམས་ནས་ཉེ་བར་བཟུང་སྟེ་འཛབ་བཟླས་

མཆོད་བསྟོད་བཀའ་སྲུང་གི་གཏོར་བསྔོ་ཡན་གྲུབ་རྗེས། མདུན་བསྐྱེད་དཀྱིལ་འཁོར་ལྷ་ཚོགས་རྣམས་ཀྱི་སྤྱན་སྔང་ལུས་ཞིང་གི་རྡུལ་སྙེད་དང་མཉམ་པར་སྤྲུལ་ནས་ཕྱག་འཚལ་བ་ནི། ན་མོ། མཆོག་གསུམ་རྩ་གསུམ་སྐུ་གསུམ་འདུས་པའི་དཔལ། །སངས་རྒྱས་ཀུན་དངོས་རྩ་བའི་བླ་མ་ལ། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །སྐྱེ་མེད་ཀ་དག༴ སོགས་བརྒྱུད་འདེབས་བཞིན་དང་། མཆོག་ཐུན་དངོས་གྲུབ་ཀུན་སྩོལ་ལྷག་པའི་ལྷ། །བདེ་གཤེགས་ཀུན་འདུས་རྟ་ཕག་ཡབ་ཡུམ་ལ། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་བའི་སྐུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། དུས་གསུམ་རྒྱལ་བ་ཀུན་གྱིས་སྒྲུབ་པ་ཡི། །ཚོགས་གཉིས་རྫོགས་ཤིང་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །སོགས་ཀྱིས་བརྒྱ་ཕྱག་ལོངས་པ་འཚལ་ལོ། །གཉིས་པ་ནི་གདན་དུ་འཁོད་ལ། རང་ཉིད་ཐ་མལ་གནས་པ་ལ༔

སྤྱི་བོར་པདྨ་ཟླ་བའི་སྟེང་༔ ཧཱུྃ་ཡིག་དཀར་པོའི་འཕྲོ་འདུ་ལས༔ རྡོ་རྗེ་སེམས་དཔའ་གངས་རིའི་མདོག༔ ལོངས་སྐུའི་རྒྱན་སྤྲས་ཡུམ་དང་སྦྱོར༔ ཐུགས་ཀར་ཟླ་སྟེང་རྡོ་རྗེ་ལ༔ ཧཱུྃ་མཚན་ཡིག་བརྒྱའི་སྔགས་ཕྲེང་བསྐོར༔ འོད་འཕྲོས་རང་གཞན་སྡིག་སྒྲིབ་སྦྱངས༔ སྡིག་ལྟུང་ཉེས་ཚོགས་དག་པར་གྱུར༔ དམིགས་པ་གསལ་གདབ་སྟེ། ཡི་གེ་བརྒྱ་བ་གསལ་དག་སྒྲ་ཟུར་མ་ཉམས་པར་བརྒྱ་རྩ་བརྒྱད་བཟླ་བར་བྱའོ། །གསུམ་པ་ནི། ༀ་ཨཱཿཧཱུྃ༔ སྣང་སྲིད་ཐམས་ཅད་གདོད་ནས་ཀ་དག་ཀློང་༔ དྲན་རིག་རྗེན་པ་འོད་གསལ་གཉུག་མའི་གཤིས༔ མ་འགགས་དབྱིངས་རིག་ཟང་ཐལ་ཡི་དམ་ལྷ༔ གཟུང་འཛིན་བག་ཆགས་འཁྲུལ་བའི་བློ་ལས་འདས༔ ཡེ་ཤེས་རང་སྣང་འོད་ཀྱི་དཀྱིལ་འཁོར་གསལ༔ དུག་ལྔ་མ་སྤངས་རང་གྲོལ་བྱ་རྩོལ་རྫོགས༔ དངོས་དང་དངོས་མེད་མཚན་མའི་མཐའ་ལས་འདས༔ ཡེ་དག་ཡོངས་གྲོལ་ངང་གི་ཡེ་ཤེས་ལས༔ གཅིག་དང་དུ་མའི་ཀུན་རྟོག་བག་ཆགས་འཕྲོས༔ རིམ་གྱིས་བརྩེགས་པའི་ལས་རླུང་མཐུག་པོས་བསྒྲིབས༔ དབྱིངས་ལས་འོད་ལྔ་ཡུལ་དང་སེམས་སུ་འཁྲུལ༔ འབྱུང་བ་ལྔ་ཤར་སྲིད་པ་རགས་པ་གྲུབ༔

དེ་ལ་ཀུན་གཞིའི་བག་ཆགས་འཐས་པ་ལས༔ ཁམས་གསུམ་སེམས་ཅན་རིགས་དྲུག་ས་བོན་ཤར༔ འབྱུང་ལྔའི་སྟོབས་ཀྱི་བཅུད་དུ་སྨིན་པ་ལས༔ འདོད་ཆགས་ཞེ་སྡང་གཏི་མུག་ང་རྒྱལ་དང་༔ ཕྲག་དོག་ལ་སོགས་དུག་ལྔའི་སྟོབས་རྩལ་རྫོགས༔ ཨ་འཐས་རང་ག་མཐའ་མེད་འཁོར་བར་བྱིང་༔ ལས་དང་ཉོན་མོངས་རྣམ་སྨིན་དུཿཁས་གཟིར༔ མེད་བཞིན་སྣང་བ་བག་ཆགས་འཁྲུལ་བའི་ལམ༔ རིག་ཅིང་རྟོགས་ན་ཡེ་ཤེས་ཟང་ཐལ་ཏེ༔ ཞེ་སྡང་རྣམ་དག་མེ་ལོང་ཡེ་ཤེས་ངང་༔ གསལ་འགྲིབ་མཐའ་འདས་སྣང་སྟོང་འགྲོ་འོང་བྲལ༔ ང་རྒྱལ་རྣམ་དག་མཉམ་ཉིད་ཡེ་ཤེས་ངང་༔ དག་དང་མ་དག་འཛིན་པ་རང་སར་ཡལ༔ འདོད་ཆགས་རྣམ་དག་སོར་རྟོག་ཡེ་ཤེས་ངང་༔ ཆགས་མེད་སྐྱོན་བྲལ་རང་བྱུང་རྣམ་པར་དག༔ ཕྲག་དོག་རྣམ་དག་བྱ་གྲུབ་ཡེ་ཤེས་ངང་༔ གདོད་ནས་བྱ་རྩོལ་རྫོགས་པ་ཐིག་ལེ་ཆེ༔ གཏི་མུག་རྣམ་དག་ཆོས་དབྱིངས་ཡེ་ཤེས་ངང་༔ ཤེས་རབ་རང་གསལ་སྟོང་ཉིད་བློ་ལས་འདས༔ དེ་ལྟར་རྟོགས་ན་དུག་ལྔ་ཡེ་ཤེས་ལྔ༔ སྐུ་ལྔ་ལྷུན་གྲུབ་འབྱུང་ལྔ་ཡུམ་ཆེན་ལྔ༔

རང་བཞིན་ཀློང་ལྔ་ཐུགས་རྗེས་ཀུན་ལ་ཁྱབ༔ རྟག་ཆད་མཐའ་འདས་སངས་རྒྱས་སེམས་ཅན་མེད༔ བདེ་སྡུག་ལས་འདས་རྒྱུ་འབྲས་རྣམ་པར་དག༔ ཀུན་ཀྱང་ཡུལ་མེད་བརྗོད་པའི་ཡུལ་ལས་འདས༔ མ་བཅོས་སོ་མའི་ཤེས་པ་འདི་ཁོ་ན༔ རང་གྲོལ་ཀློང་དབྱིངས་གཉུག་མའི་བྷ་ག་ལ༔ འཁོར་འདས་སོ་སོར་བཟུང་བ་མཐོལ་ལོ་བཤགས༔ ཡེ་གྲོལ་ཡོངས་དག་ངང་གི་གཤིས་ལུགས་ལ༔ སངས་རྒྱས་གཞན་ནས་བཙལ་བ་མཐོལ་ལོ་བཤགས༔ རིག་རྩལ་ཀློང་ལྔ་ལྷུན་གྲུབ་རང་རྩལ་ལ༔ ཞིང་ཁམས་ཕྱི་ནས་སྒྲུབ་པ་མཐོལ་ལོ་བཤགས༔ སྣོད་བཅུད་སྣང་བ་རྒྱུ་འབྲས་དབྱེར་མེད་ལ༔ བག་ཆགས་རང་རྒྱུད་བཟུང་བ་མཐོལ་ལོ་བཤགས༔ ཤེས་རིག་ཟང་ཐལ་བདེ་གཤེགས་ཀུན་གྱི་ངང་༔ ཞལ་ཕྱག་གཟུགས་སུ་ལྟ་བ་མཐོལ་ལོ་བཤགས༔ བརྡལ་ཁྱབ་འོད་གསལ་རང་རིག་དཀྱིལ་འཁོར་ལ༔ མཚན་བཅས་དོགས་པ་བསྒྲུབ་པ་མཐོལ་ལོ་བཤགས༔ སྒྲ་རྣམས་གྲགས་སྟོང་སྐྱེ་འགགས་མེད་པ་ལ༔ བཟང་ངན་ཚིག་ཏུ་ཞེན་པ་མཐོལ་ལོ་བཤགས༔ བདེ་སྟོང་ཟུང་འཇུག་ས་ལམ་དྲན་རྫོགས་ལ༔ ཐེག་པ་རིམ་གྱིས་བགྲོད་པ་

མཐོལ་ལོ་བཤགས༔ དྲན་རིག་རང་གསལ་མ་བཅོས་ལྷུན་གྲུབ་ལ༔ རང་བཅིངས་བསྲུང་སྡོམ་སློབ་པ་མཐོལ་ལོ་བཤགས༔ ཡེ་དག་རང་རིག་བྱ་རྩོལ་འདས་པ་ལ༔ དམིགས་གཏད་སྒོམ་སྒྲུབ་བགྱིས་པ་མཐོལ་ལོ་བཤགས༔ ཧོ༔ ལྟ་བ་ཡེ་སངས་རྒྱས་པའི་ཀློང་དུ་བཤགས༔ སྒོམ་པ་འཁོར་འདས་རོ་གཅིག་ཀློང་དུ་བཤགས༔ སྤྱོད་པ་ཤར་གྲོལ་གཅེར་སྣང་ཀློང་དུ་བཤགས༔ འབྲས་བུ་ལྷུན་གྲུབ་ཐིག་ལེའི་ཀློང་དུ་བཤགས༔ རྣམ་རྟོག་ཐམས་ཅད་ཆོས་སྐུའི་ཀློང་དུ་བཤགས༔ འཁོར་བ་མྱ་ངན་འདས་པའི་ཀློང་དུ་བཤགས༔ སྡུག་བསྔལ་ཐམས་ཅད་བདེ་བ་ཆེན་པོར་བཤགས༔ རེ་དོགས་སྤང་བླངས་ཡེ་ནས་གྲོལ་བར་བཤགས༔ བཟང་ངན་བག་ཆགས་བློ་ལས་འདས་པར་བཤགས༔ བཤགས་དང་བཤག་བྱ་དམིགས་མེད་ཀློང་ཆེན་པོ༔ གདོད་མའི་གཤིས་ལུགས་གཉུག་མར་ཡོངས་གནས་ཤོག༔ ཧོ༔ བདག་དང་མཐའ་ཡས་པའི་སེམས་ཅན་ཐམས་ཅད་ཡེ་ནས་ཆོས་ཉིད་རོལ་བ་ཆེན་པོའི་ཀློང་དུ་ཕྱིན་ནས་མ་གྲུབ་ཅིང་༔ བདག་འདུན་གཉིས་མེད༔ ལྷ་དང་འདྲེ་ཞེས་བྱ་

བའི་མིང་ཡང་མེད་ཅིང་༔ དགེ་སྡིག་བླང་དོར་འཁོར་འདས་གཉིས་མེད༔ དངོས་པོ་མཚན་མའི་ཆོས་ཐམས་ཅད་ཡེ་གྲོལ་ཟང་ཐལ་རང་རིག་སེམས་ཉིད་ངོས་བཟུང་མེད་པ་འདི་ག་ཡིན་པ་ལ༔ འདི་ཉིད་མ་རྟོགས་པའི་འགྱུ་བ་བན་བུན་ལས་རྣམ་རྟོག་རབ་རིབ་ཨ་འཐས་དངོས་འཛིན་དབང་གིས་ལས་བསགས་ཤིང་༔ འབྲས་བུ་བདེ་སྡུག་སྣ་ཚོགས་ཀྱི་འཁོར་ལོ་བསྐོར་བ་ཨ་ཐང་ཆད༔ དེ་བས་ན་མ་བཅོས་ལྷན་གྲུབ་ཆེན་པོའི་ངང་དུ་ཅི་གནས་སུ་མཉམ་པར་བཞག་པར་བྱའོ༔ ཨ་ཨ་ཨཱ༔ ཞེས་སྡིག་སྒྲིབ་ཐམས་ཅད་ཡེ་ནས་རང་བཞིན་མེད་པའི་དབྱིངས་སུ་དག་པར་བསམ་ལ་དར་ཅིག་མཉམ་པར་བཞག་པར་བྱའོ། །རྗེས་འབྲེལ་དུ་མཆེད་ནང་བཤགས་པ་ནི། ཕན་ཚུན་ཕྱག་ལན་གསུམ་སྔོན་དུ་འགྲོ་བས: ཧོ༔ ཐམས་ཅད་རྡོ་རྗེ་མཆེད་དང་ལྕམ་དྲལ་ཏེ༔ བདེ་བར་གཤེགས་པའི་སློབ་མར་དམ་མནོས་ནས༔ ཀུན་ཀྱང་མཐུན་པར་སྤྱོད་པའི་དམ་ཚིག་ལ༔ མཉམ་ཉིད་ངང་དུ་ལེགས་ཉེས་དབྱེར་མེད་ཀྱང་༔ ལུས་ངག་རྣམ་པར་མ་དག་ཚུལ་འཛིན་དུ༔ གཞུང་ལས་ཉམས་ཤིང་ཐུགས་དང་འགལ་བ་རྣམས༔ རྣམ་དག་བསམ་པས་མི་མནལ་ཚིག་འདིས་བཤགས༔ འཛིན་མེད་ངང་དུ་བཟོད་པར་

བཞེས་མཛོད་ལ༔ རང་བཞིན་དག་པའི་ཚངས་པ་སྩལ་དུ་གསོལཿ༔ ཨ་ཨ་ཨཱ༔ ལན་གསུམ། བཞི་བ་ནི། ༀ༔ བདེ་བར་གཤེགས་པ་ཁྱེད་ཅི་འདྲ༔ དེ་འདྲ་ཁོ་ནར་བདག་གྱུར་ཅིག༔ སྤྱོད་པ་རྨད་བྱུང་བསམ་ཡས་པ༔ འགྲོ་ལ་ཕན་ཕྱིར་བདག་གིས་སྤྱད༔ བྱང་ཆུབ་སེམས་མཆོག་དམ་པ་དང་༔ སྐུ་གསུང་ཐུགས་ཀྱི་ཕྱག་རྒྱ་འདི༔ སྲོག་གི་ཕྱིར་ཡང་མི་གཏོང་ན༔ རྡོ་རྗེ་རྒྱལ་པོའི་བྱིན་རླབས་མཛོད༔ དུས་ངན་ཐ་མའི་འཇིག་རྟེན་འདིར༔ སངས་རྒྱས་མཛད་དཀའ་བདག་གིས་སྒྲུབ༔ བྱང་ཆུབ་སྤྱོད་དཀའ་བདག་གིས་སྤྱད༔ རྡོ་རྗེའི་རྣལ་འབྱོར་དཀྱིལ་འཁོར་འདིར༔ བདག་ཅག་བསམ་པ་འགྲུབ་གྱུར་ཅིག༔ ཅེས་ལྷག་བསམ་རྩེ་གཅིག་པས་དམ་བཅའོ། །གཉིས་པ་ཐུགས་དམ་བསྐང་བའི་རིམ་པ་གསུམ་སྟེ། སྦྱོར་བ་བྱིན་གྱིས་རླབས་པ་དང་། དཀྱིལ་འཁོར་གྱི་འཁོར་ལོ་སྤྱན་དྲངས་པ། བསྐང་བ་དངོས་ཀྱི་རིམ་པའོ། །དང་པོ་ཡོ་བྱད་རྣམས་ལ་བདུད་རྩི་འཐོར་ཏེ། ཧྲཱིཿ༔ རྟ་ཕག་ཡབ་ཡུམ་ཐུགས་ཀ་ནསཿ རཾ་ཡཾ་ཁཾ་འཕྲོས་དངོས་འཛིན་སྦྱངས༔ ཨོཾ་ཨཱཿཧཱུྃ་འཕྲོས་བདུད་རྩིར་ཞུ༔ ཟག་མེད་བདུད་རྩིའི་རྒྱམཚོར་གྱུར༔ ཨོཾ་ཨཱཿཧཱུྃ སྤྱན་འདྲེན་ནི། ཧྲཱི༔ འཇིག་

རྟེན་དག་པའི་གཞལ་ཡས་འདིར༔ འདོད་པ་ལྔ་ཡི་ཡོན་ཏན་རྣམས༔ དངོས་དང་ཡིད་ཀྱིས་ཀུན་སྤྲུལ་ཏེ༔ ཐམས་ཅད་དག་པའི་བདུད་རྩི་ཆེ༔ རོ་བཅུད་མདངས་ལྡན་འོད་ཕུང་འཁྱིལ༔ རཾ་ཡཾ་ཁཾ་ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་རཀྟ་བ་ལིངྟ་ཧཱུྃ་ཧྲཱིཿཋ༔ ཞེས་སོགས་ཀྱི་ཕྱི་ནང་གསང་བའི་མཆོད་རྫས་སྨན་རཀ་གཏོར་མ་བསྐང་རྫས་བཅས་བྱིན་གྱིས་བརླབ། ཚོགས་ཕུད་རྣམས་སོ་སོར་ལག་ལེན་བཞིན་བཅས་ནས་འཇོག་གོ །གཉིས་པ་ནི། རང་ཉིད་རྟ་ཕག་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས་པས། ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་བཞུགས་པའི་བླ་མ་ཡི་དམ། སངས་རྒྱས་བྱང་སེམས། དཔའ་བོ་མཁའ་འགྲོ། ཆོས་སྐྱོང་བཀའ་སྲུང་གཏེར་བདག་ཐམས་ཅད་དང་། ཁྱད་པར་དུ་རང་གི་དྲིན་ཅན་རྩ་བའི་བླ་མ་སྐྱབས་མགོན་ཡིད་བཞིན་ནོར་བུ། བསྙེན་སྒྲུབ་བྱས་པའི་ཡི་དམ་རྟ་ཕག་ཡིད་བཞིན་ནོར་བུ། རྟེན་མཆོད་སྒྲུབ་པའི་སྲུང་མ་མགོན་པོ་ཡིད་བཞིན་ནོར་བུ་སོགས་མདོར་ན་མཆོད་འོས་སྐྱབས་གྱུར་གྱི་མགྲོན་མ་ལུས་པ་ཐམས་ཅད་གར་བཞུགས་ཆོས་དབྱིངས་དག་པའི་ཞིང་ཁམས་སོ་སོ་ནས་ནམ་མཁའ་འཇའ་འོད་ཀྱི་གུར། མེ་ཏོག་གི་ཆར།

རོལ་མོའི་སྒྲ། བཟང་པོའི་དྲི་ཐུལ་བ་ལ་སོགས་པའི་ངོ་མཚར་བའི་ལྟས་དང་ཆོ་འཕྲུལ་དཔག་ཏུ་མེད་པ། འཕྲིན་ལས་འདོད་དགུར་བསྒྱུར་བའི་རྣམ་རོལ་བསམ་གྱིས་མི་ཁྱབ་པའི་བཀོད་པ་ཆེན་པོའི་གནས་འདིར་སྤྱན་དྲངས། ཨོཾ་བཛྲ་ས་མ་ཡ་ཛཿ ཞེས་དམིགས་འདུན་དྲག་པོས། ཧྲཱིཿ ལྷོ་ནུབ་དགའ་བ་ཚལ་གྱི་དུར་ཁྲོད་ནས༔ ཁྲོ་བོའི་རྒྱལ་པོ་རྟ་མགྲིན་དབང་གི་ལྷ༔ གཉིས་མེད་ཡུམ་མཆོག་རྡོ་རྗེ་ཕག་མོ་ཉིད༔ བདེ་གཤེགས་སྤྱི་འདུས་པདྨ་ཐོད་ཕྲེང་རྩལ༔ ཡི་དམ་ཞི་ཁྲོ་དཔའ་བོ་མཁའ་འགྲོའི་ཚོགས༔ བྱིན་རླབས་མཁའ་ལ་སྤྲིན་ལྟར་གཏིབས་ནས་ཀྱང༔ ཐུགས་རྗེས་བརྩེར་དགོངས་ཚོགས་ལ་རབ་གཤེགས་ནས༔ སྐལ་ལྡན་བདག་ལ་མཆོག་ཐུན་དངོས་གྲུབ་སྩོལ༔ ཨོཾ་ཨཱཿཧཱུྃ་གུ་རུ་དེ་ཝ་ཌཱཀྐི་ནི་ཨེ་ཧྱ་ཧེ་ཕེཾ་ཕེཾ་ས་མ་ཡ་སྟྭཾ༔ ཞེས་སྤྱན་དྲངས་པའི་ལྷ་ཚོགས་རྣམས་མདུན་བསྐྱེད་དང་དབྱེར་མེད་དུ་བཞུགས་པར་བསམ་མོ། །གསུམ་པ་ལ་བདུན་ལས། དང་པོ་ཀུན་བཟང་མཆོད་སྤྲིན་གྱི་བསྐང་བ་ནི། དངོས་འབྱོར་ཡིད་སྤྲུལ་གྱི་ཕྱི་ནང་གསང་བའི་མཆོད་པའི་ཚོགས་བསམ་གྱིས་མི་ཁྱབ་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུར་དམིགས་ནས་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ་བས་ཐུགས་

དམ་བསྐངས་པར་བསམ་ལ། ཧོཿ སྣང་སྲིད་ཡོངས་རྫོགས་རྟ་མཆོག་རོལ་བའི་སྐུ༔ སྣོད་བཅུད་མ་ལུས་འདོད་ཡོན་རོལ་བའི་རྒྱན༔ ཀུན་བཟང་མཆོད་པའི་སྤྲིན་ཕུང་འབྱམས་ཀླས་པ༔ ཆོས་ཉིད་མངོན་སུམ་དོན་གྱི་ལྷ་ལ་འབུལ༔ ཉམས་སྣང་གོང་འཕེལ་ངང་དུ་བཞེས་ནས་ཀྱང་༔ རིག་པ་ཚད་ཕེབས་ཀློང་དུ་ཚོགས་རྫོགས་ཤིང་༔ ཆོས་ཟད་བློ་འདས་ཆེན་པོར་སངས་རྒྱས་ཏེ༔ འཁོར་བ་དོང་ནས་སྤྲུགས་པའི་དངོས་གྲུབ་སྩོལ༔ ནམཿ སརྦ་ཏ་ཐ༴ སྭཱ་ཧཱ༔ གཉིས་པ་བདུད་རྩི་སྨན་གྱིས་བསྐང་བ་ནི། ལས་པ་རྣམས་ཀྱིས་སྨན་ལག་པ་གཡས་སུ་ཐོགས་ཏེ་གཡོན་པའི་མཐེབ་སྲིན་གྱིས་འཐོར་ལ། ཧཱུྃ་ཧྲཱི༔ བདི་ཆེན་འཁོར་ལོའི་བྷན་དྷ་རུ༔ ཧཾ་ཡིག་རང་བྱུང་བདུད་རྩི་བསྐྱིལ༔ སྲོག་འཛིན་ཡེ་ཤེས་ཐིག་ལེ་འདིས༔ སྤྲུལ་སྐུའི་ལྷ་ཚོགས་ཐུགས་དམ་བསྐང༔ བསྐངས་གྱུར་དབང་དང་དངོས་གྲུབ་སྩོལ༔ ལོངས་སྤྱོད་འཁོར་ལོའི་བྷན་དྷ་རུ༔ བཟའ་བཏུང་ལྷུན་གྲུབ་བདུད་རྩི་བསྐྱིལ༔ རྩ་མདུད་རང་གྲོལ་ཐིག་ལེ་འདིས༔ ལོངས་སྐུའི་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ཆོས་ཀྱི་འཁོར་ལོའི་བྷན་དྷ་རུ༔ དྲན་བསམ་རྣམ་དག་

བདུད་རྩི་བསྐྱིལ༔ དུག་གསུམ་རང་གྲོལ་ཐིག་ལེ་འདིས༔ ཆོས་སྐུའི་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ སྤྲུལ་པའི་འཁོར་ལོའི་བྷན་དྷ་རུ༔ འབར་འཛག་བཅུད་ཀྱི་བདུད་རྩི་བསྐྱིལ༔ བདེ་བ་ཆེན་པོའི་ཐིག་ལེ་འདིས༔ མི་འགྱུར་རྡོ་རྗེའི་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ བདེ་སྐྱོང་འཁོར་ལོའི་བྷན་དྷ་རུ༔ བྱང་ཆུབ་སེམས་ཀྱི་བདུད་རྩི་བསྐྱིལ༔ དགའ་བཞི་དབྱིངས་གྲོལ་ཐིག་ལེ་འདིས༔ མངོན་པར་བྱང་ཆུབ་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ གསུམ་པ་སྒྲོལ་བ་རཀྟའི་བསྐང་བ་ནི། རཀྟའི་སྣོད་ལག་པ་གཡོན་དུ་ཐོགས་ཤིང་གཡས་པས་འཕྱར་ལ། ཧཱུྃ་ཧྲཱི༔ ཀློང་ལྔ་དབྱིངས་ཀྱི་ཀ་པ་ལར༔ སྣང་སྲིད་ཡུམ་གྱི་རཀྟ་བསྐྱིལ༔ ཀུན་ཏུ་བཟང་པོའི་རྫས་མཆོག་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ སྟོང་ཆེན་ཡུམ་གྱི་ཀ་པཱ་ལར༔ སྣང་སྲིད་བཅུད་ཀྱི་རཀྟ་བསྐྱིལ༔ གཙང་དམེ་བྲལ་བའི་རྫས་མཆོག་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔

བསྐངས་གྱུར་དབང་དང་དངོས་གྲུབ་སྩོལ༔ ཨེ་དབྱིངས་ཆོས་འབྱུང་ཀ་པཱ་ལར༔ ཞིང་བཅུའི་སྙིང་ཁྲག་རཀྟ་བསྐྱིལ༔ འཁོར་བ་ལུགས་ལྡོག་རྫས་མཆོག་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ དབུ་མ་རྩ་ཡི་ཀ་པཱ་ལར༔ དུག་གསུམ་རྣམ་རྟོག་རཀྟ་བསྐྱིལ༔ རྒྱུད་དྲུག་ཀུན་གྲོལ་རྫས་མཆོག་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ སྒྲ་གཅན་རླུང་གི་ཀ་པཱ་ལར༔ ཙནྜ་ལི་ཡི་རཀྟ་བསྐྱིལ༔ དགའ་བཞི་བདེ་སྟོང་རྫས་མཆོག་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ བཞི་བ་ཟུང་འཇུག་གཏོར་མའི་བསྐང་བ་ནི༔ རྨད་བྱུང་བསྐང་བའི་གཏོརམ་བཏེགས་ལ། ཧཱུྃ་ཧྲཱིཿ མ་བཅོས་ཀློང་ཡངས་གཏོར་གཞོང་དུ༔ སྣང་སྲིད་ཡོངས་གྲོལ་གཏོར་མ་བཤམས༔ དངོས་འཛིན་བྲལ་བའི་དམ་རྫས་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ བདེ་ཆེན་སྒྱུ་མའི་གཏོར་གཞོང་དུ༔ གཏད་མེད་ཆོས་སྐུའི་གཏོར་མ་བཤམས༔

ཚོགས་དྲུག་རང་ཡན་དམ་རྫས་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ལྷུན་གྲུབ་ཕུང་པོའི་གཏོར་གཞོང་དུ༔ དོན་སྣོད་རང་བྱུང་གཏོར་མ་བཤམས༔ ཁྱད་པར་རྨད་བྱུང་དམ་རྫས་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ལྔ་ཕུང་སྒྱུ་མའི་གཏོར་གཞོང་དུ༔ བདུད་རྩི་ལྔ་ཡི་གཏོར་མ་བཤམས༔ རིགས་ལྔ་བཅུད་ཀྱི་དམ་རྫས་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ བྷ་ག་དབྱིངས་ཀྱི་གཏོར་གཞོང་དུ༔ ལིང་ག་རིག་པའི་གཏོར་མ་བཤམས༔ ཟུང་འཇུག་བདེ་ཆེན་དམ་རྫས་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ལྔ་བ་འབྱོར་ཚོགས་ཀྱི་བསྐང་བ་ནི། ཚོགས་ཕུད་དང་པོ་གཏོར་མའི་མདུན་དུ་ཕུལ་ལ་སྨན་རཀ་བྲན་ཏེ། ཧྲཱི༔ བླ་མ་ཡི་དམ་ལྷ་ཚོགས་ལ༔ འདོད་ཡོན་མ་སྤངས་ཡེ་ཤེས་རྒྱན༔ ཞལ་ཟས་ཚོགས་ཀྱི་མཆོད་པ་འབུལ༔ མཆོག་ཐུན་དངོས་གྲུབ་སྩལ་དུ་གསོལ༔ གུ་རུ་དེ་ཝ་ཌཱཀྐི་ནི་ག་ཎ་ཙཀྲ་པཱུ་ཙ་

ཧོ༔ ཚོགས་བར་བ་བཤགས་པ་ནི། ཧྲཱི༔ བླ་མ་ཡི་དམ་མཁའ་འགྲོ་ཡི༔ སྐུ་གསུང་ཐུགས་དང་རྩ་བ་ཡི༔ དམ་ཚིག་ཉམས་ཆག་ཅི་མཆིས་པ༔ ཚོགས་ཀྱི་མཆོད་པས་མཐོལ་ཞིང་བཤགས༔ བཛྲ་ས་མ་ཡ་ཨཱཿ ཡིག་བརྒྱ་བཟླ། ཐམ་བསྒྲལ་བ་ནི། ཨེ་ནྲི་ཏྲི་ཁུག་ཛ༔ ཛཿཧཱུྃ་བཾ་ཧོ༔ པྲ་བེ་ཤ་ཡ་ཕཊ༔ ཨ་བེ་ཤ་ཡ་ཨ༔ ཚོགས་ཐ་མ་ཟན་ལིང་གང་བརྒྱུད་སློབ་དཔོན་གྱི་མདུན་དུ་བཀོད་ལ་རཀྟ་བྲན་ཏེ། ལྕགས་ཁང་དམིགས་བྱ་དང་བཅས་པ་བསྐྱེད་ལ། ཧྲཱི༔ འཇིགས་བྱེད་རྟ་ཕག་ཁྲོ་བོའི་རྒྱལ༔ བཀའ་སྡོད་དམ་ཅན་ཕོ་ཉར་འགྱེད༔ བདུད་དང་རུ་ཊ་ཀུན་སྒྲོལ་ཅིག༔ རྣམ་ཤེས་ཆོས་ཀྱི་དབྱིངས་སུ་སྤོར༔ པདྨ་ཀྲོ་དྷ་ནྲྀ་ཏྲི་ཤ་ཏྲུན་མཱ་ར་ཡ་རྦད༔ ཅེས་བསྒྲལ་བསྟབས་པ་ན་ཚེ་ཁྲུས་ཀྱི་དགོངས་པ་དང་ལྡན་པས་བསྒྲལ་ལ་ལིང་རོ་བདུད་རྩི་བྱིན་གྱིས་བརླབས་ལ་ཚོགས་ཕུད། ཧྲཱི༔ རྟ་ཕག་ལྷ་ཚོགས་ཞལ་ཕྱེ་ཞིག༔ དགྲ་བགེགས་བསྒྲལ་བའི་ཤ་ཁྲག་རུས༔ ཟག་མེད་བདུད་རྩིར་བྱིན་རླབས་ནས༔ མཆོད་པར་འབུལ་ལོ་དགྱེས་པར་རོལ༔ མ་ཧཱ་མཾ་ས་རཀྟ་ཀེཾ་ནི་རི་ཏི་ཨ་མྲྀ་ཏ་ཁཱ་ཧི༔ ཞེས་ཕུལ་མཐར། ལྷ་ཚོགས་རྣམས་རང་རང་གི་ཕྱག་རྒྱ་དང་སྙོམས་པར་ཞུགས་པའི་སྦྱོར་བས་དགའ་བ་བཞིའི་རོས་ཚིམ་པར་བལྟས་ལ། ཐུགས་

དམ་བསྐང་བ་ནི། ཨོཾ་ཨཱཿཧཱུྃ༔ བདེ་སྟོང་ཏིང་འཛིན་སོགས་ཞེས་བརྗོད་ལ་ག་ནམ་ཕུད་ཀྱང་གཙང་སར་གཤེགས། དེ་ནས་ཚོགས་རྫས་ལ་བརྡ་དར་བརྡའི་འབུལ་ལེན་གྱི་སྒོ་ནས་རོལ་མཐར་ཚོགས་བསྔོ་བྱ། དེ་ནས་གཙང་མའི་ལྷག་མ་བསྲེས་ལ་སློབ་དཔོན་གྱི་ཁ་ཕྲུས་བཏབ་སྟེ་བྱིན་གྱིས་བརླབས། ཧྲཱི༔ དབང་ཆེན་རྟ་ཕག་དཀྱིལ་འཁོར་གྱི༔ མུ་རན་སྐྱོང་ཞིང་བྱ་ར་བྱེད༔ ཐམས་ཅད་འདིར་བྱོན་ལྷག་གཏོར་བཞེས༔ བཅོལ་བའི་འཕྲིན་ལས་འགྲུབ་པར་མཛོད༔ མ་ཧཱ་སརྦ་པཱུ་ཙ་ཁཱ་ཧི༔ ཞེས་ཕྱི་རོལ་དུ་བསྔོ། དྲུག་པ་སྣང་གསལ་མར་མེའི་བསྐང་བ་ནི། ཟུར་ཀོང་བཞི་བཏེགས་ལ། ཨཱ༔ ཀུན་གཞིའི་ཀློང་ཡངས་ཀོང་བུ་རུ༔ རྣམ་ཤེས་རྣམ་དག་སྡོང་བུ་བཙུགས༔ ཆོས་དབྱིངས་ཡེ་ཤེས་མར་ཁུས་གཏམས༔ རིག་པ་རང་གསལ་སྒྲོན་མེ་སྦར༔ ཀ་དག་བཞི་ཡི་སྣང་བ་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ དབྱིངས་རིག་སྟོང་པའི་ཀོང་བུ་རུ༔ ལྷུན་གྲུབ་གཟུགས་སྣང་སྡོང་བུ་བཙུགས༔ མེ་ལོང་ཡེ་ཤེས་མར་ཁུས་གཏམས༔ ཤེས་རབ་རང་བྱུང་སྒྲོན་མེ་སྦར༔ ཆོས་ཉིད་མངོན་གསུམ་སྣང་བ་འདིས༔ རྟ་ཕག་ལྷ་ཚོགས་

ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ཀ་ཏི་ཤེལ་གྱི་ཀོང་བུ་རུ༔ ཚོར་བ་རྣམ་དག་སྡོང་བུ་བཙུགས༔ མཉམ་ཉིད་ཡེ་ཤེས་མར་ཁུས་གཏམས༔ རྒྱངས་ཞགས་འོད་གསལ་སྒྲོན་མེ་སྦར༔ ཉམས་སྣང་གོང་འཕེལ་སྣང་བ་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ འཇའ་ཟེར་ཐིག་ལེའི་ཀོང་བུ་རུ༔ འདུ་ཤེས་རྣམ་དག་སྡོང་བུ་བཙུགས༔ སོར་རྟོག་ཡེ་ཤེས་མར་ཁུས་གཏམས༔ དག་པ་དབྱིངས་ཀྱི་སྒྲོན་མེ་སྦར༔ བློ་བྲལ་ཆོས་ཟད་སྣང་བ་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ གཞོན་ནུ་བུམ་སྐུའི་ཀོང་བུ་རུ༔ འདུ་བྱེད་རྣམ་དག་སྡོང་བུ་བཙུགས༔ བྱ་གྲུབ་ཡེ་ཤེས་མར་ཁུས་གཏམས༔ ཐིག་ལེ་སྟོང་བའི་སྒྲོན་མེ་སྦར༔ བློ་བྲལ་ཆོས་ཟད་སྣང་བ་འདིས༔ རྟ་ཕག་ལྷ་ཚོགས་ཐུགས་དམ་བསྐང་༔ བསྐངས་གྱུར་དབང་དང་དངོས་གྲུབ་སྩོལ༔ ཞར་བྱུང་མར་མེའི་སྨོན་ལམ་བྱ་བ་ནི། འདུས་པ་རྣམས་ལག་གཉིས་བསྣོལ་ལ་སྲིན་མཛུབ་སྦྲེལ་ནས་གཡོན་པ་མར་མེའི་ཀུང་བུ་དང་གཡས་སྤོས་རིང་བཟུང་སྟེ། ཧོ༔

སྟོན་པ་རྡོ་རྗེ་རྒྱལ་པོ་རྒྱལ་ཚབ་དང་༔ གཟུངས་མ་རྒྱལ་ཐེབ་མཆེད་དང་ལྕམ་དྲལ་ཀུན༔ འདི་བཟུང་བྱང་ཆུབ་སྙིང་བོར་མཆིས་ཀྱི་བར༔ མི་འབྲལ་འགྲོགས་པའི་ཏིང་འཛིན་རྩེ་གཅིག་གིས༔ འཁྲུལ་མེད་འོད་གསལ་རྡོ་རྗེ་ཟུང་ཐོབ་ནས༔ རྟེན་འབྲེལ་ཟབ་མོ་ལྷུན་གྱིས་འགྲུབ་གྱུརཅིག༔ བདག་སོགས་ཁམས་གསུམ་རིགས་དྲུག་སེམས་ཅན་ཀུན༔ མ་རིག་གཏི་མུག་རྨོངས་པའི་སྡུག་བསྔལ་གྱིས༔ གླེན་ལྐུགས་དུད་འགྲོའི་གནས་སུ་ལྷུང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ ཆོས་དབྱིངས་ཡེ་ཤེས་ལམ་ལ་དྲང་དུ་གསོལ༔ ཞེ་སྡང་མནར་བའི་ལས་ཀྱི་སྡུག་བསྔལ་གྱིས༔ ཚ་གྲང་དམྱལ་བའི་གནས་སུ་ལྷང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ མེ་ལོང་ཡེ་ཤེས་ལམ་ལ་དྲང་དུ་གསོལ༔ འདོད་ཆགས་སེར་སྣའི་ཞེན་པའི་སྡུག་བསྔལ་གྱིས༔ བཀྲེས་སྐོམ་ཡི་དྭགས་གནས་སུ་ལྷུང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ སོར་རྟོག་ཡེ་ཤེས་ལམ་ལ་དྲང་དུ་གསོལ༔ ཕྲག་དོགས་ཁྲོ་གཏུམ་འཕྲོག་བཅོམ་སྡུག་བསྔལ་གྱིས༔ འཐབ་རྩོད་

ལྷ་མིན་གནས་སུ་ལྷུང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ བྱ་གྲུབ་ཡེ་ཤེས་ལམ་ལ་དྲང་དུ་གསོལ༔ ཆགས་སྡང་ཨ་འཐས་འཛིན་པའི་སྡུག་བསྔལ་གྱིས༔ སྐྱེ་འཆི་མིི་དག་མངལ་དུ་ལྷུང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ འདའ་ཀ་ཡེ་ཤེས་ལམ་ལ་དྲང་དུ་གསོལ༔ ང་རྒྱལ་འགྲན་སེམས་ཁེངས་པའི་སྡུག་བསྔལ་གྱིས༔ འཕོ་ལྟུང་ལྷ་ཡི་གནས་སུ་ལྷུང་སྲིདན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ མཉམ་ཉིད་ཡེ་ཤེས་ལམ་ལ་དྲང་དུ་གསོལ༔ ལས་དང་ཉོན་མོངས་བརྩེགས་པའི་སྡུག་བསྔལ་གྱིས༔ རིགས་དྲུག་འཁོར་བའི་གནས་སུ་ལྷུང་སྲིད་ན༔ འོད་གསལ་མར་མེའི་ཐུགས་རྗེ་དེར་མ་ཆུང་༔ བཀོད་པ་རབ་རྫོགས་ཞིང་དུ་དྲང་དུ་གསོལ༔ ཐིག་ལེ་ཆེན་པོའི་ངང་དུ་བྱང་ཆུབ་ཅིང་༔ འཕོ་ཆེན་ཆོས་སྐུ་སྐྱེ་མེད་གདེངས་ཐོབ་ནས༔ རོལ་རྩལ་ཐུགས་རྗེ་ལྷུན་གྲུབ་ལོངས་སྤྱོད་རྫོགས༔ ཟུང་འཇུག་གང་ལ་ཅི་འདོད་འཕྲིན་ལས་ཀྱིས༔ ཁམས་གསུམ་འཁོར་བ་དོང་ནས་སྤྲུགས་པར་ཤོག༔ ལན་གསུམ། བདུན་པ་དབྱིངས་གྲོལ་ལྟ་བའི་བསྐང་བ་ནི། རྣལ་འབྱོར་པ་རྣམས་རང་རྩལ་མ་འགགས་རོལ་བ་

ཆེན་པོའི་ལྟ་བའི་གདེངས་ལྡན་པས། ཧོ༔ མཆོད་དུ་མེད་དེ་ལྟ་བའི་ཀློང་༔ རྟག་ལྟ་ཆོས་ཀྱི་དབྱིངས་སུ་བསྐངས༔ བསྐང་དུ་མེད་དེ་སྒོམ་པའི་ངང་༔ ཆད་ལྟ་གཟུགས་སྐུའི་ཀློང་དུ་བསྐངས༔ སྤྱོད་དུ་མེད་དེ་ཆོས་ཉིད་གཤིས༔ མ་བཅོས་རྫོགས་པ་ཆེན་པོར་བསྐངས༔ སྦྱོར་དུ་མེད་དེ་ཟུང་འཇུག་ཀློང་༔ སྡུག་བསྔལ་བདེ་བ་ཆེན་པོར་བསྐངས༔ བསྒྲལ་དུ་མེད་དེ་མཉམ་ཉིད་དབྱིངས༔ ཡེ་སྒྲོལ་ཡེ་སྦྱོར་ཆེན་པོར་བསྐངས༔ མདོར་ན་ཉམས་ཆག་ཉེས་ལྟུང་དང་༔ ཁམས་གསུམ་རྒྱུད་དྲུག་སྡུག་བསྔལ་གྱི༔ རྒྱུ་དང་འབྲས་བུ་བཅས་པ་རྣམས༔ ཀུན་བཟང་ཡངས་པ་ཆེན་པོའི་ཀློང་༔ བྱང་ཞིང་དག་ནས་སོར་ཆུད་དེ༔ བདེ་བ་ཆེན་པོའི་ཀློང་དུ་ཨ༔ གསུམ་པ་འདོད་གསོལ་སྨོན་ལམ་གྱི་རིམ་པ་ནི། གུས་པ་ཆེན་པོས་ཐལ་མོ་སྦྱར་ཏེ། ཧོ༔ སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བྱེ་བྲག་དང་ལྡན་པ་དཔལ་རྩ་བ་གསུམ་གྱི་ལྷ་ཚོགས་ཡེ་ཤེས་ཆེན་པོའི་དབང་ཕྱུག་ཐབས་ལ་མཁས་པའི་

བདག་ཉིད། སྒྲོལ་བའི་དཔའ་བོ། རང་བཞིན་གྱི་རྣལ་འབྱོར་ངོ་བོ་ཉིད་སྐུ་མ་ལུས་ཤིང་ལུས་པ་མེད་པ་ཐམས་ཅད་དགོངས་སུ་གསོལ། བདག་ཅག་གསང་བའི་དཀྱིལ་འཁོར་འདིར་ཚོགས་པ་རྣམས་ཀྱིས་དང་པོ་གསང་སྔགས་རྡོ་རྗེ་ཐེག་པའི་སྒོར་ཁས་འཆེས་ཏེ། དམ་ཚིག་གཉན་པོ་མ་ནོར་བར་མནོས་པ་ལས་རྩ་བ་དང་ཡན་ལག་གི་ཉམས་ཆག་དང་འགལ་འཁྲུལ་དུ་གྱུར་པ་ལྷ་ཉེ་བར་མ་བསྒོམ་པ། སྙིང་པོ་དག་པར་མ་བགྲང་བ། སྦྱོར་བ་མང་པོའི་བར་བརྐུས་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུགས་པ། མཆོད་པ་ལོ་ཟླ་ལས་འདས་པ། དམ་རྫས་ལག་ལེན་རྔོ་མ་ཐོགས་པ། འཛབ་བཟླས་གྲངས་ཉུང་བ། བསྙེན་པ་ཡུན་ཐུང་བ། ཏིང་ངེ་འཛིན་ཐང་ལྷོད་དུ་གྱུར་པ། དེ་བཞིན་གཤེགས་པའི་མཛད་སྤྱོད་དམ་པ་ཀློང་དུ་མ་གྱུར་ཅིང་། སེམས་ཀྱི་སྤྱོད་པ་རང་ཐད་དུ་གྱུར་པ་དང་། ཁྱད་པར་དུ་སྒྲུབ་པའི་དམ་ཚིག་དང་། ཁྱད་པར་གྱི་དམ་ཚིག་མངོན་པར་མནོས་པ་ལས་ཉམས་ཤིང་ཞིག་རལ་དུ་གྱུར་པ་ཅི་མཆིས་པ་ཤིན་ཏུ་གནོང་ཞིང་འགྱོད་པའི་སེམས་ཀྱིས་མཐོལ་ཞིང་བཤགས་པར་མཆིས་ན་

དབྱིངས་ཉིད་ནམ་མཁའ་དང་འདྲ་བའི་ངང་གིས་བཟོད་པ་ཆེན་པོའི་དང་དུ་བཞེས་ནས་ཚངས་པ་མཆོག་གི་དངོས་གྲུབ་ཡིད་བཞིན་ལྟར་ཐོབ་པར་སྩལ་དུ་གསོལ། ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེའི་ཚེ། གཡུང་དྲུང་ལྟ་བུའི་ལུས་དཔའ་རྩལ་གསུམ་གྱི་སྐུ་གསུང་ཐུགས་ཀྱི་བླ་མན་ཆད་ནས་དངོས་གྲུབ་ཀྱི་སྐལ་བ་དང་རིང་བརྒྱུད་གང་ལགས་པ་ཐམས་ཅད་ཕྱི་མར་བསྡད་མི་འཚལ་བར། ད་ལྟ་ཉིད་དུ་སྩལ་དུ་གསོལ། རྣལ་འབྱོར་པ་ལ་བར་དུ་གཅོད་པར་བྱེད་པའི་སྡང་བའི་དགྲ་དང་། གནོད་པའི་བགེགས། གདུག་པའི་དབལ། སྦྱོར་བའི་དུག །རྣོ་བའི་མཚོན། ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། སོ་སོའི་རྨི་ལམ་ངན་པ་དང་ལྟས་ངན་པ་བཀྲ་མི་ཤིས་པའི་རྐྱེན་དེ་དག་ཐམས་ཅད་ཕྱིར་བཟློག་ཅིང་མིང་ཙམ་ཡང་མི་གྲགས་པར་ཞི་བ་ཆེན་པོར་མཛད་དུ་གསོལ། གལ་ཏེ་ཞི་བས་བསྒྱུར་དུ་མི་བཏུབ་པ་མཆིས་ན་ཡང་། དྲག་པོའི་འཕྲིན་ལས་ཀྱིས་དབང་དུ་བསྡུ་པ་དང་། གཟིར་ཞིང་མནན་

པ་དང་། བསྒྲལ་ཞིང་སྤར་བ་ལེགས་ཏེ་འཕྲིན་ལས་དྲག་ཐབས་རྣམ་བཞིས་ཅི་ལྟར་འདུལ་བར་མཚམས་པ་བཞིན་མཛད་ནས་མིང་ཙམ་ཡང་མི་གྲགས་པར་མཛད་དུ་གསོལ། བདག་ཅག་དམ་ཚིག་འདི་ལ་མངོན་དུ་ཞུགས་པ་རྣམས། །བཅད་གཏུབ་སྡུག་བསྔལ་ལུས་ལ་འབྱུང་བར་མི་འགྱུར་ཡང་། །གྲིབ་མ་ཕོག་པའི་སྡུག་བསྔལ་ཤིན་ཏུ་མི་བཟོད་པས། །སྐུ་ཡི་ཕྱོགས་ཙམ་མཐོང་བའི་མོད་ལ་འཚོ་བ་དང་། །གཟི་མདངས་ལུས་ལ་འཇུག་པའི་ཉི་མ་སྟོང་ཕྲག་གི །འདི་བཞིན་འཇིག་རྟེན་ཁམས་འདིར་རྟག་ཏུ་འབྱུང་བ་དང་། །ལུས་ངག་སེམས་ལ་ཚེ་འདིར་རྡོ་རྗེ་རབ་སྣང་སྟེ། །རེ་སྨོན་ཐམས་ཅད་དུས་འདི་ཉིད་དུ་སྩལ་དུ་གསོལ། །ཅེས་སྨོན་ལམ་བཏབ་པོ། །དེ་ནས། ཧཱུྃ་ཧྲཱིཿཕཊ༔ བླ་མ་ཡི་དམ་མཁའ་འགྲོའི་ཚོགས༔ ཞེས་ཐུགས་དམ་བསྐང་བ་སོགས་རྗེས་ཀྱི་རིམ་པ་རྣམས་ལས་གཞུང་བཞིན་ནོ། །སྨྲས་པ། བརྒྱུད་ལྡན་བླ་མའི་ཕྱག་བཞེས་མནྜལ་ལ། །རིགས་མཐུན་ཆོ་ག་གཞན་གྱིས་ཁ་སྐོང་བའི། །སྐོང་བཤགས་པདྨ་རཱ་གའི་ཕྲེང་བ་ནི། །རང་གཞན་ཉམས་ལེན་འཇུག་བདེའི་རྒྱན་དུ་སྤེལ། །དགེ་འདིས་རང་གཞན་འགྲོ་བ་མ་ལུས་པའི། །ལས་དང་ཉོན་མོངས་བག་ཆགས་ཀུན་བྱང་ནས། །ཁ་སྦྱོར་ཡན་ལག་བདུན་ལྡན་དབང་ཆེན་ལྷའི། །གོ་འཕང་མཆོག་དེ་རིང་མིན་

ཉིད་ཐོབ་ཤོག །ཅེས་ཡང་གསང་རྟ་ཕག་ཡིད་བཞིན་ནོར་བུའི་སྐོང་བཤགས་ཀྱི་ཆོ་ག་པདྨ་རཱ་གའི་ཕྲེང་བ་ཞེས་བྱ་བ་འདི་ནི་གཏེར་གཞུང་གི་དགོངས་པ་དང་མི་འགལ་བར་བྱས་ཏེ་སློབ་དཔོན་ཆེན་པོའི་ཟབ་གཏེར་གསར་རྙིང་འགའ་ཞིག་ནས་ཁ་བསྐང་སྟེ་རང་གཞན་ལ་ཕན་པའི་བློས་དགུ་རོང་སྤྲུལ་མིང་དགེ་འདུན་འཇིགས་མེད་རྣམ་གྲོལ་དུ་འབོད་པས་རང་ལོ་ཉེར་གཅིག་པ་ལ་དཔའ་བོ་མཁའ་འགྲོ་སྤྲིན་བཞིན་འདུ་བའི་གནས་མཆོག་བཀྲ་ཤིས་འཁྱིལ་བའི་རི་རྩེའི་བདེ་བ་ཅན་གྱི་ལྷ་ཁང་ཉམས་དགའ་བར་བྲིས་པའོ། །སརྦ་མངྒ་ལཾ།། །།

རྟ་ཕག་ཡིད་བཞིན་ནོར་བུའི་ཞི་བའི་སྦྱིན་སྲེག་ཡེ་ཤེས་མེ་འོད། ཉང་སྐྱེས་མཚམས་པ།

༄༅། །རྟ་ཕག་ཡིད་བཞིན་ནོར་བུའི་ཞི་བའི་སྦྱིན་སྲེག་ཡེ་ཤེས་མེ་འོད་ཅེས་བྱ་བ་བཞུགས་སོ།།

རབ་འབྱམས་རྒྱལ་ཀུན་འདུས་ཞལ་པད་འབྱུང་དང་། །དབྱེར་མེད་སྐྱབས་མགོན་ཞབས་དཀར་རྡོ་རྗེ་འཆང་། །བྱང་ཆུབ་བར་དུ་རིགས་ཀྱི་བདག་པོར་བསྟེན། །བདག་སོགས་འགྲོ་ལ་བྱིན་རླབས་དངོས་གྲུབ་སྩོལ། །རྒྱལ་ཀུན་གསུང་གི་འཕྲིན་ལས་བྱིན་ཟའི་མེས། །ཉོན་མོངས་བུད་ཤིང་བསྲེག་མཛད་དབང་གི་ལྷ། །རྟ་ཕག་ཡིད་བཞིན་ནོར་བུའི་སྦྱིན་སྲེག་གི །ཆོ་ག་བླ་མའི་ཞལ་ལུང་བཞིན་དུ་བྲི། །དེ་ལ་འདིར་རྟ་ཕག་ཡིད་བཞིན་ནོར་བུའི་བསྙེན་སྒྲུབ་ཀྱི་ཁ་སྐོང་ཞི་བའི་སྦྱིན་སྲེག་བྱ་བའི་ཚུལ་ལ་གསུམ། དཀྱིལ་འཁོར་བྲི་བ།

ཡོ་བྱད་བཤམས་པ། ཆོ་ག་དངོས་སོ། །དང་པོ་དཀྱིལ་འཁོར་བྲི་བ་ནི། སྔ་མ་སྦྱངས་པའི་ས་ཡིན་ན་ས་ཆོག་བྱས་ལ་སྟེགས་བུ་མདའ་གང་ལ་ཚངས་ཟུར་གྱི་ཐིག་སྤྱི་ལྟར་བཏབ་པས་ཐིག་སྐུད་ཁྲུ་ཕྱེད་ཀྱི་ཟླུམ་པོར་བསྐོར་བ་ཐབ་ཀྱི་ནང་དང་། དེ་ལ་སོར་བཞི་བསྣན་ཏེ་བསྐོར་བས་མུ་རན་ཁ་ཁྱེར་དང་། དེའི་ཕྱི་རོལ་དུ་སོར་དོ་བསྣན་ཏེ་དབུས་ཚད་ཀྱི་ཚངས་ཐིག་ནས་ཟུར་ཐིག་ལ་བྱ་རྗེས་བཙལ་ལ་གྲུ་བཞིར་བཅད་པ་སྟེགས་བུའི་ཐིག་གོ །ཐབ་ཀྱི་དབུས་སུ་པདྨ་འདབ་བརྒྱད་ཀྱི་ལྟེ་བར་རྡོ་རྗེ་རྩེ་ལྔ་བ་དང་ཁ་ཁྱེར་ལ་རྡོ་རྗེ་ཕྲེང་བས་བསྐོར་བ། སྟེགས་བུའི་གྲྭ་བཞིར་ཟླ་ཕྱེད་རྡོ་རྗེ་རྩེ་ནང་བསྟན་བྲི། མུ་རན་གྱི་སྟེང་དུ་ཙནྡན་དཀར་པོ་བྱུགས་པ་སོགས་འོ་མ་ཅན་གྱི་ཤིང་ངམ་སྲོག་ཆགས་མེད་པའི་བ་གླང་གི་ལྕི་བ་སྐམ་པོས་

བུད་ཤིང་ཟླུམ་པོ་བརྩིགས་པའི་མེ་ཚང་ཏིང་ལོ་དང་བཅས་པ་བཞག་གོ །གཉིས་པ་ནི་རང་ཁ་ཤར་དུ་ཕྱོགས་པའི་གདན་གྱི་གཡས་སུ་བསྲེག་རྫས། འོམ་ཅན་གྱི་ཤིང་ལྔ་དངོས་སུ་མི་འབྱོར་བས་ཚབ་རུང་བ་ལུ་ཤུག་པ་ལྕང་སྐྱ་འོམ་བུ་ཁམ་བུ་སྟེ་ལྔ་བོ་གང་རིགས་ཀྱི་རྩེ་མོའི་ཆ་ལས་བྱུང་བའི་ཡམ་ཤིང་སྦོམ་ཕྲ་མཐེའུ་ཆུང་གི་ཚད་སྲིད་དུ་སོར་བརྒྱད་པའམ་བཅུ་གཉིས་པ་རྩེ་མར་ཁུས་སྦགས་པ་གང་མང་། མེ་སྲོག་འཛིན་པའི་རྫས་མར་ཁུ། ཏིལ། ཞོ་ཟན། འབྲས། སོ་བ། ནས། སྲན་མ། གྲོ། དུརྺ། ཀུ་ཤ། ཡུངས་དཀར། ཤིང་ཏོག །ཁྱད་པར་བའི་རྫས་མེ་ཏོག་སྣ་ཚོགས་འབྲུ་སྨན་དར་ཐབ་བསྲེས་པ། ཀོ་ཡུ་སྟོད་ཇ་སྦྱར་བའི་སོ་རྩི། གོས་ཟུང་དཀར་པོ་སོགས་རྫས་རྣམས་སོ་སོར་འཇིག་རྟེན་པ་དང་འདས་ལྷ་སོ་སོར་ཆ་བགོས་ཏེ་བཤམས། ཐབ་ཀྱི་གཡོན་དུ་འདས་མ་འདས་ཀྱི་དཀར་གཏོར་ཟླུམ་པོ་པད་འདབ་བཞི་བ་ཆེ་ཆུང་གཉིས། སྨན་རཀ །ཉེར་སྤྱོད་ལྔ་ཚར་གཉིས་བཅས་སྟེང་འོག་གམ་རྒྱབ་མདུན་དུ་བསྒྲིགས། མདུན་དུ་མེ་ཡོལ་ལ་གངས་རི་མཚོ་བཅས་བཾ་ཡིག་གིས་མཚན་པ་མེ་དུག་གཞིལ་བའི་ཕྱིར་ཁ་ཕར་བསྟན་པའི་ནང་ལྕོག་རྩེའི་ཁར་ལས་བུམ། རྡོ་དྲིལ་གྱི་བར་དུ་དགང་བླུགས་ཁ་སྦྱར་བ། ཌ་མ་རུ། འཐོར་ནས། དཔལ་འབར། རླུང་གཡབ། ཁ་ཁྱེར་ལ་བཀྲམ་རྒྱུའི་ཀུ་ཤ་བརྒྱད་སོགས་མ་ཚང་བ་མེད་པར་བཤམས། དཀྱིལ་འཁོར་དང་འབྲེལ་ན་རབ། ཡང་ན་སྨན་གཏོར་རཀྟ་ཉེར་སྤྱོད་ཚོགས་ཆད་བསྟན་སོགས་བཤམས་པ་ལ་བརྟེན་ཏེ། བདག་གི་རྣལ་འབྱོར་གྱི་ངང་ནས་ལས་བྱང་གཞུང་བསྲང་ནས་བཟླས་པ་ཚོགས་ཀྱི་བར་གཏང་། གསུམ་པ་ཆོ

ག་དངོས་ནི་ཆས་གོས་དཀར་པོ་ལྡན་པས་འཁོད་ལ་ངག་བསྡམས། ལས་བུམ་བསངས་སྦྱངས། ལས་བུམ་དུ་སྐད་ཅིག་གིས་བདུད་རྩི་འཁྱིལ་བ་གསལ་བའི་ཐུགས་ཀའི་འོད་ཟེར་འཕྲོ་འདུས་དོན་གཉིས་བྱས་སྐུའི་ཆ་ཐམས་ཅད་ནས་དག་བྱེད་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊ༔ ཅེས་བརྒྱ་བཟླས། ཨོཾ་བཛྲ་ཨརྒྷཾ་ནས་ཤཔྟའི་བར་གྱིས་མཆོད། བསྟོད་པ་ནི། སྐུ་གསུང་ཐུགས་ལྡན་མཉམ་ཉིད་བདུད་རྩི་འཁྱིལ༔ དུག་གསུམ་བདུད་རྩིར་བསྒྱུར་མཛད་སྨན་པའི་མཆོག༔ བདུད་རྩི་ལྟ་བུའི་འགྲོ་བའི་དོན་མཛད་པའི༔ ཁྲོ་རྒྱལ་བདུད་རྩི་འཁྱིལ་བར་ཕྱག་འཚལ་བསྟོད༔ ལྷ་འོད་དུ་ཞུ་བ་ལས་བྱུང་བའི་བུམ་པའི་ཆུ་ནུས་པ་དང་ལྡན་པར་གྱུར༔ ཞེས་སྒྲུབ། རྡོར་དྲིལ་བྱིན་རླབསནི། རྡོ་རྗེ་ཐོགས་ལ། ཧཱུྃ༔ མི་འགྱུར་ཐུགས་ཀྱི་རྡོ་རྗེ་ནི༔ ཐུགས་ཀར་རྟག་ཏུ་བསྟེན་བྱས་ལས༔ ཐུགས་ཀྱི་ཡེ་ཤེས་རྡོ་རྗེ་ཡིན༔ གསོར་བས་གདོན་བགེགས་ཐམས་ཅད་འཇོམས༔ ཨོཾ་ཨཱཿཧཱུྃ་བཛྲ་ཏིཥྛ་ཛྙཱ་ན་ས་མ་ཡེ་སྭཱ་ཧཱཿ ཞེས་ཐུགས་ཀར་གསོར། དྲིལ་བུ་ལ། ཧཱུྃ༔ ཤེས་རབ་དབྱིངས་ཀྱི་སྒྲ་སྒྲོགས་པ༔ མཚན་མའི་དངོས་པོ་

སྒྲོགས་མཐར་སྟོང་༔ སྲིད་གསུམ་རང་བཞིན་ཉིད་ཀྱི་ངང་༔ དངོས་པོ་ཐམས་ཅད་སྟོང་ཉིད་ངང་༔ ཨོཾ་ཨཱཿཧཱུྃ་མུཾ་ཀུ་ལན་དྷ་རི་གན་ཊེ་ཨཱཿཧཱུྃ༔ ཌ་མ་རུ་ལ། ཧཱུྃ༔ རྣལ་འབྱོར་མཆོག་གི་ཌ་མ་རུ༔ ཡུལ་ཉིད་མ་སྐྱེས་ཆོས་ཀྱི་དབྱིངས༔ འཛིན་རྟོག་བྲལ་བའི་ཡེ་ཤེས་ཀྱི༔ ཐེག་ཆེན་ཆོས་ཀྱི་སྒྲ་ཆེན་སྒྲོགས༔ ཨོཾ་ཨཱཿཧཱུཾ་དྷརྨ་ཌ་མ་རུ་ཧཱུྃ་ཧཱུྃ༔ རྡོ་དྲིལ་དང་བཅས་བླུགས་གཟར་ཐོགས་ལ། ཨོཾ༔ ཐབས་ཀྱི་རོལ་བ་ལས་བྱུང་ཏིང་འཛིན་གྱི༔ དཔའ་བོ་རྡོ་རྗེ་སྣོད་མཆོག་གཡས་སུ་ཐོགས༔ ཨོཾ་ཨཱཿཧཱུྃ་ཏྲཾ་ཧྲཱིཿཨཱཿ ཨཾ་ཝི་ཤྲི་རོད་བི་ཤུ་ཏ་ཡེ་སྭཱ་ཧཱ༔ གཡོན་པས་དགང་གཟར་ཐོགས་ལ། ཨཱ༔ ཤེས་རབ་བདེ་སྟོང་དགའ་བཞི་སྙོམས་འཇུག་གི༔ དཔའ་མོ་ཟབ་ལམ་ཆོས་འབྱུང་གཡོན་དུ་ཐོགས༔ ཨོཾ་མཱུཾ་ལཱཾ་མཱཾ་པཱཾ་ཏཾ་ཨྃ་ཨེ་ཤྲི་ཏྲི་ཏྲ་ཏི་ཤུ་སྭཱ་ཧཱ༔ ཞེས་ཁ་སྦྱར། དེ་ནས་མཆོད་རྫས་དང་བསྲེག་རྫས་བསངས་སྦྱངས། སྟོང་བའི་ངང་ལས་མཆོད་རྫས་དང་བསྲེག་རྫས་རྣམས་ཡེ་ཤེས་ཀྱི་བདུད་རྩིའི་རང་བཞིན་འདོད་ཡོན་གྱི་འོད་ཟེར་འཕྲོ་བར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་སོགསཤཔྟ་ཨཱཿཧཱུྃ་མ་ཧཱ་པཉྩ་རཀྟ་བྷ་ལིངྟ་ཨཱཿཧཱུྃ་ལག་གཉིས་རྡོརྗེ་རྩེ་གཅིག་གི་ཕྱག་རྒྱས་རྫས་རྣམས་ལ་གཡས་བསྐོར་དུ་རེག་པས་ཨོཾ་ཨོཾ་སྭཱ་ཧཱ༔

ཨོཾཨཱཿསྭཱ་ཧཱ༔ ཨོཾཤྲི་སྭཱ་ཧཱ༔ ཨོཾ་ཛྲིཾ་སྭཱ་ཧཱ༔ ཨོཾ་ཀུ་རུ་ཀུ་རུ་སྭཱ་ཧཱ༔ ཨོཾ་ཨཱཿཧཱུྃ༔ ཞེས་ལན་གསུམ་གྱིས་བྱིན་གྱིས་བརླབ་པོ། །དེ་ནས་དཔལ་འབར་གྱི་མེས་བརྩེན་པ་བསངས་སྦྱངས་ཡེ་ཤེས་ཀྱི་མེ་ལྕེ་འོད་གསལ་བར་གྱུར། ཨོཾ་བཛྲ་ཛྭ་ལ་ཛྭ་ལ་ཧཱུྃ༔གིས་བརླབས་ནས་མེ་ཚང་གི་མདུན་ནས་བསྐོར་བས་མདུན་དུ་བཅུག་སྟེ་སྦར་ལ་རླུང་གཡབ་ཀྱིས་གཡབ་ཅིང་། ཧཱུྃ༔ ཤར་གྱི་ཕྱོགས་ནས་མེ་སྦར་མས༔ དྲི་ཟའི་ལག་ནས་མེ་ལོངས་ལ༔ ཞི་བའི་མེ་ནི་སྦར་བར་མཛོད༔ ལྷོ་ནུབ་མཚམས་ནས་ཤིང་འཐུ་མས༔ རླུང་ལྷའི་ཡུལ་ནས་ཤིང་འཐུས་ལ༔ རླུང་གི་ལྷ་མོས་རླུང་གཡོབ་ཅིག༔ ཨོཾ་ཨགྣེ་ཡེ་ཛྭ་ལ་རཾ་རཾ༔ ཞེས་བརྗོད། ༀ་ཨགྣེ་ཡེ་སྭཱ་ཧཱ༔ ལན་གསུམ་གྱིས་མེ་གསོ། མེ་ཐབ་བསངས་སྦྱངས། སྟོང་བའི་ངང་ལས་ཞི་བའི་ཐབ་ཁུང་ཟླ་བ་ཆུ་ཤེལ་གྱི་རང་བཞིན་དཀར་ཟླུམ་དྭངས་ཤིང་དྲི་མ་མེད་པའི་འོད་ཟེར་འཕྲོ་བ། ཁ་ཁྱེར་རིམ་པ་གསུམ་ལྡན་གྱི་མཆུར་པད་འདབ་བརྒྱད་པ། གྲྭ་བཞིར་ཟླ་ཕྱེད་རྡོ་རྗེས་མཚན་པ། ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་མེ་རབ་ཏུ་འབར་བའི་དབུས་སུ་པད་ཉིའི་གདན་ལ་རཾ་ཡིག་ལས་བྱུང་བའི་དྲང་སྲོང་མེ་ལྷ་

དཀར་གསལ་ཞལ་གཅིག་ཕྱག་གཉིས་པ་གཡས་རིལ་བ་སྤྱི་བླུགས་དང་གཡོན་སྐྱབས་སྦྱིན་གྱི་ཕྱག་རྒྱས་བགྲང་ཕྲེང་འཛིན་པ་དྲང་སྲོང་གི་ཆས་ཅན་ར་སྐྱེས་ལ་གནས་པ་འཁོར་ཚོགས་དུ་མས་བསྐོར་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དེ་ལས་འོད་ཟེར་འཕྲོས་པས་ཡེ་ཤེས་ཀྱི་མེ་ལྷ་འཁོར་དང་བཅས་པ་སྤྱན་དྲངས་པར་གྱུར། མེ་དར་དབྱུ་གུ་རྩེ་གསུམ་པའི་ཕྱག་རྒྱས་གཡབ་ཅིང་། ཨོཾ༔ ཚུར་བྱོན་ཚུར་བྱོན་འབྱུང་བོ་ཆེ༔ མེ་ལྷའི་རྒྱལ་བོ་དྲང་སྲོང་མཆོག༔ བསྲེག་བླུགས་ཞལ་ཟས་བཞེས་སླད་དུ༔ འབར་བའི་གནས་འདིར་གཤེགས་སུ་གསོལ༔ ཨོཾ་ཨགྣེ་ཡེ་ཨ་ཀརྵ་ཡ་ཛ་ཛཿ ཞེས་སྤྱན་དྲངས་ལ། ཀུ་ཤ་ཐོགས་ཏེ། ༀ༔ ཀུ་ཤ་འདི་ནི་གཙང་ཞིང་དགེ༔ ཚངས་པ་ལྷ་རྣམས་དག་བྱེད་ཡིན༔ དཀོན་མཆོག་གསུམ་པོ་མཉེས་བྱེད་པ༔ ས་ལས་སྐྱེས་པའི་འདབ་མའི་སྙིང་༔ བདག་གི་བགེགས་རྣམས་ཐམས་ཅད་ནི༔ ཞི་དང་བཀྲ་ཤིས་མཛད་དུ་གསོལ། སྭཱ་ཧཱ༔ ཞེས་ཐབ་ཀྱི་མཐར་བཀྲམ། ཨོཾ་ཨགྣེ་ཡེ་ས་པཱ་རི་ཝ་ར་ཨརྒྷཾ་པྲ་ཏིཙྪ་ཡེ་སྭཱ་ཧཱ༔ མཆོད་ཡོན་དང་། དེ་བཞིན་དུ་པཏྱཾ་སྦྱར་བའི་ཞབས་བསིལ་ཕུལ། ཨོཾ་ཨསྣེ་ཡེ་ས་མ་ཡ་སྟྭཾ༔ ཞེས་དམ་ལ་བཞག ཛཿཧཱུྃ་བཾ་

ཧོཿ༔ དམ་ཚིག་པ་དང་གཉིས་སུ་མེད་པར་གྱུར། ཨོཾ་ཨསྣེ་ཡེ་ས་པ་རི་ཝཱ་ར་པུཥྤེ་ནས་ཤཔྟའི་བར་གྱིས་ཉེར་སྤྱོད་འབུལ། ཧཱུྃ༔ གཟི་བརྗིད་ཆེན་པོ་མེ་ཡི་ལྷ༔ འདོད་པ་ཐམས་ཅད་གསལ་མཛད་པ༔ བདག་གཞན་དོན་སྒྲུབ་ས་ལ་བཞུགས༔ འཛིན་བྱེད་མེ་ལྷ་ཉིད་ལ་བསྟོད༔ ཅེས་བསྟོད། བྱོན་སྐྱེམསནི། དགང་བླུགས་ཁ་ལ་ཧཱུཾ་ཡིག་མཚན༔ མེ་ལྷ་ཅུང་ཟད་ཞལ་གདངས་པའི༔ ལྗགས་ལ་རཾ་ཡིག་གིས་མཚན་པས༔ བསྲེག་རྫས་བདུད་རྩི་བཞེས་པར་གྱུར༔ ཨོཾ་ཨགྣེ་ཡེ་སྭཱ་ཧཱ༔ ཞེས་ལན་བདུན་གྱིས་བཀང་བའི་དགང་གཟར་ཁ་སྤྲད་པ་གཡས་སུ་བསྐོར་ལ་ཨོཾ་ཨགྣེ་ཡེ༔ ཨ་ཏི་བྷྱ༔ པ་ཏེབྷྱ༔ ཨ་བེ་ཤ་ཡ་མ་ཧཱ་ཤྲི་ཡ་ཧ་བཻ་བཱ་ཧ་ན་ཡེ་སྭཱ་ཧཱ༔ འདོད་གསོལ། བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ ཞེས་ལན་གསུམ་ཕུལ། དེ་ནས་ཡམ་ཤིང་ཕུལ་ལ། ཨོཾ་ཨསྣེ་ཡེ་ཨ་ཏི་བྷྱཿ སོགས་མེ་ལྷའི་སྔགས་མཐར། ཨོཾ་བོ་དྷི་བྲིཀྵ་ཡེ་བདག་ཅག་སོགས་མི་མཐུན་པའི་ཕྱོགས་ཐམས་ཅད་དང་ཁྱད་པར་དུ་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔

བསྙེན་པའི་ཁ་སྐོང་ལ། བདག་ཅག་སོགས་མི་མཐུན་པའི་ཕྱོགས་ཐམས་ཅད་དང་ཁྱད་པར་དུ་ཏིང་ངེ་འཛིན་མི་གསལ་ཞིང་བཟླས་བརྗོད་ལྷག་ཆད་དུ་གྱུར་པ་དང་སོགས་བསྒྱུར་བ་ཐམས་ཅད་ལ་འདྲ། མར་ཁུ་ལ། མེ་ལྷའི་སྔགས་དང་། ཨོཾ་ཨགྣེ་ཡེ་བདག་ཅག༴ ཁྱད་པར་དུ་འབྱོར་བ་ཕུན་སུམ་ཚོགས་པ་ལ༴ ཏིལ་ལ། ༀ་སརྦ་པཱ་པཾ་ད་ཧ་ན་བཛྲ་ཡེ༔ བདག་ཅག༴ སྡིག་སྒྲིབ་ཞི་བ་ལ༴ ཞོ་ཟན་ལ། ཨོཾ་སརྦ་སཾ་བྷ་དེ། བདག་ཅག༴ བདེ་བ་མཆོག་ལ༴ འབྲས་ལ། ཨོཾ་བཛྲ་པུཥྚ་ཡེ། བདག་ཅག༴ དཔལ་འབྱོར་ཕུན་སུམ་ཚོགས་པསོ་བ་ལ། ཨོྃ་བཛྲ་བི་ཛ་ཡེཿ བདག་ཅག༴ ནོར་དང་འབྲུ་ཕུན་སུམ་ཚོགས༴ ནས་ལ་ཨོཾ་མ་ཧཱ་བེ་ག་ཡཿེ བདག་ཅག༴ མྱུར་བའི་ཤུགས་འཕེལ་བ་ལ༴ སྲན་མ་ལ། ༀ་མ་ཧཱ་བ་ལ་ཡེ༔ བདག་ཅག: སྟོབས་རྒྱས་པ་ལ༴ གྲོ་ལ། ༀ་བཛྲ་གསྨ་རིཿ བདག་ཅག༴ ནད་ཞི་བར་བྱེད་པ་ལ༴ དུརྺ༴ ཨོྃ་བཛྲ་ཨཱ་ཡུ་ཥེ༔ བདག་ཅག: ཚེ་ཕུན་ཚོགས༴ ཀུ་ཤ་ལ། ཨོཾ་ཨ་པྲ་ཏི་ཧ་ཏ་བཛྲ་ཡེཿ བདག་ཅག༴ མི་མཐུན་པའི་བསྲུང་བ་ཕུན་སུམ་ཚོགས་པ༴ ཡུངས་དཀར་ལ། ༀ་སརྦ་ཨརྠ་ས་དྷ་ཡེ༔ བདག་ཅག༴ གདོན་བགེགས་

འཇོམས་པ་ལ༴ ཤིང་ཏོག་ལ། ཨོྃ་བཛྲ་ཥི་ཝ་ཡེ༔ བདག་ཅག༴ རིགས་རྒྱུད་ཕུན་སུམ་ཚོགས་པ༴ ཁྱད་པར་བ་ལ། ཨོཾ་ཀུ་རུ་ཀུ་རུ་སྭཱ་ཧཱ༔ བདག་ཅག༴ འཇིགས་པ་བརྒྱད་དང་བཅུ་དྲུག་སོགས་མི་མཐུན་པའི་ཕྱོགས་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ༔ དེ་ནས། ཨོཾ་ཨགྣེ་ཡེ་ཨརྒྷཾ་སོགས་དང་མ་ཧཱ་པཉྩ་རཀྟ་བྷ་ལིངྟ་ཁཱ་ཧི༔ བསྟོད་པནི། ཧཱུྃ༔ གཟི་བརྗིད་ཆེན་པོ་མེ་ཡི་ལྷ། །འདོད་པ་ཐམས་ཅད་གསལ་མཛད་པ། །བདག་གཞན་དོན་སྒྲུབ་ས་ལ་བཞུགས། །འཛིན་བྱེད་མེ་ལྷ་ཉིད་ལ་བསྟོད། །འདོད་གསོལ་ནི། ཧོ༔ དྲང་སྲོང་ཆེན་པོ་ཁྱེད་ལ་ཕྲིན་ལས་སུ་བཅོལ་བ་ནི་བདག་ཅག་དཔོན་སློབ་རྒྱུ་སྦྱོར་འཁོར་དང་བཅས་པ་རྣམས་ལ་སྡང་བའི་དགྲ། གནོད་པའི་བགེགས། གདུག་པའི་མཚོན། སྦྱོར་བའི་དུག །ནད་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། ཡེ་འབྲོག་སུམ་བརྒྱ་དྲུག་ཅུ། རྨི་ལམ་ངན་པ། ལྟས་ངན་པ། མཚན་མ་ངན་པ། སྦྱོར་བ་རྩུབ་པ། ལོ་ཟླ་ཞག་ཀེག་མོ་ངན་རྩིས་རྩུབ། མི་ཁ་བྲ་མཆུ་ལ་སོགས་པ་མདོར་ན་བཀྲ་མི་ཤིས་པའི་དངོས་པོ་ཐམས་ཅད་ཞི་བར་མཛད་དུ་གསོལ་ཤཱནྟིང་ཀུ་རུ་ཡེ་

སྭཱ་ཧཱ། བླུགས་གཟར་གྱི་མར་ཁུ་འབུལ་ཞིང་ཨོཾ་བཛྲ་ཛྭ་ལ་རཾ་མེ་ལྷ་མེ་འབར་བའི་རྣམ་པར་གྱུར། དེནས་བུད་ཤིང་བསྣན་ནས་བསངས་ཆུ་འཐོར་ལ། ཡེ་ཤེས་མེ་དཔུང་འབར་བའི་ཀློང་༔ བྷཱུཾ་ལས་ཡེ་ཤེས་ཕོ་བྲང་གསལ༔ རིན་ཆེན་སྣ་ཚོགས་ལས་གྲུབ་པའི༔ གྲུ་བཞི་སྒོ་བཞི་བརྩིགས་པ་ལྔ༔ ཞེས་པ་ནས། རྩ་གསུམ་ལྷ་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ ཞེས་པའི་བར་ལས་བྱང་བཞིན་དང་། ༀ་པདྨ་མ་ཧཱ་ཀྲོ་དྷ་ཨརྒྷཾ་པྲ་ཏིཙྪ་ཡེ་སྭཱ་ཧཱ། ཨོཾ་པདྨ་མ་ཧཱ་ཀྲོ་དྷ་པ་ཏྱཾ་པྲ་ཏིཙྪ་ཡེ་སྭཱ་ཧཱ༔ ཞེས་པས་མཆོད་ཡོན་དང་ཞབས་བསིལ་ཕུལ་ལ་བཞུགས་གསོལ་བྱ། བྱོན་སྐྱེམས་ནི་དགང་བླུགས་ཁ་ལ་ཧཱུྃ་ཡིག་མཚན། །དཀྱིལ་འཁོར་ལྷ་ཚོགས་ལྗགས་ལ་ཡང་། ཧཱུཾ། ཡིག་དག་གིས་མཚན་པ་ལས། །བསྲེག་རྫས་བདུད་རྩི་བཞེས་པར་གྱུར། །དགང་བླུགས་མར་ཁུ་རྩ་སྔགས་བདུན་གྱིས་བཀང་ལ། ཨོཾ་པདྨ་མ་ཧཱ་ཀྲོ་དྷ་ཨ་ཏི་བྷྱ༔ པ་ཏི་བྷྱ༔ ཨ་བེ་ཤ་ཡ་མ་ཧཱ་ཤྲི་ཡ་ཧ་བཻ་བཱ་ཧན་ཡ་སྭཱ་ཧཱ༔ ལན་གསུམ་གྱིས་འབུལ། འདོད་གསོལ་བདག་ཅག་རྒྱུ་སྦྱོར་འཁོར་དང་བཅས་པའི་ནདགདོན་སྡིག་སྒྲིབ་རྐྱེན་ངན་ཕྱི་ནང་གི་བར་དུ་གཅོད་པ་དང་བསྙེན་སྒྲུབ་མི་གསལ་ཞིང་བཟླས་བརྗོད་ལྷག་ཆད་དུ་གྱུར་པ་ཐམས་ཅད་ཤཱནྟིངཀུ་རུ་ཡེ་

སྭཱ་ཧཱ་ཞེས་ཡུངས་དཀར་འཐོར། དེ་ནས་བསྲེགས་རྫས་འབུལ་བ་ནི། དགང་བླུགས་ཐོགས་ལ། ཧཱུྃ༔ ཨ་ཡིག་རང་བྱུང་མེ་ཧོམ་དུ༔ ཧཾ་ཡིག་བྱང་ཆུབ་བདུད་རྩིའི་རྒྱུན༔ རིགས་ལྔ་ཡབ་ཡུམ་སྙོམས་འཇུག་གི༔ བདེ་བ་ཆེན་པོའི་མཆོད་པ་འབུལ༔ བྱང་ཆུབ་ཤིང་དང་རྩི་མངར་བཅུད༔ འབྲུ་སྣ་ཟས་མཆོག་ཏིལ་དུརྺ༔ དར་ཟབ་སྨན་སྣ་རིན་ཆེན་སོགས༔ འདོད་དགུའི་རྫས་མཆོག་མ་ལུས་པ༔ ཡེ་ཤེས་ལྔ་ཡི་རང་བཞིན་བཅུད༔ ཐོགས་མེད་ནམ་མཁའ་མཛོད་བཞིན་དུ༔ གུས་པའི་བློ་ཡིས་འབུལ་ལགས་ན༔ གཉིས་སུ་མེད་པར་བཞེས་ནས་ཀྱང་༔ ནད་གདོན་སྡིག་སྒྲིབ་དགྲ་བགེགས་སོགས༔ མི་མཐུན་ཕྱོགས་རྣམས་ཞི་བར་མཛོད༔ དེ་ནས་ཡམཤིང་ལ། ཨོྃ་བཛྲ་ཀྲོདྷ་པ་ཏེ་པ་ཏེ་ཧཱུྃ་ཕཊཿ༔ ཨོཾ་བོ་དྷི་བྲིཀྵ་ཡེ། སོགས་ཡམ་ཤིང་ནས་ཤིང་ཏོག་དང་ཁྱད་པར་བའི་བར་གོང་ལྟར་འབུལ། དེ་ཡང་རྒྱས་པར་བྱེད་ན་ལྷ་སྔགས་རྫས་སྔགས་འདོད་གསོལ་བཅས་ལ་གྲངས་འཛིན། འབྲིང་ཐོག་མཐའ་གཉིས་ལ་ལྷ་སྔགས་འདོད་གསོལ་དང་། བར་དུ་ལྷ་སྔགས་དང་རྫས་སྔགས་ལ་གྲངས་འཛིན། ཐ་མ་ཐོག་མཐའ་གཉིས་ལ་ལྷ་སྔགས་རྫས་སྔགས་འདོད་གསོལ་རེ་དང་ལྷ་སྔགས་ཁོ་ནས་འབུལ་བའོ། །ཡངན་བསྲེག་རྫས་རྣམས་བསྲེས་ནས་ལྷ་སྔགས་ཀྱིས་

ཕུལ་ནའང་ཆོག་ཅིང་། བསྙེན་སྒྲུབ་ཀྱི་བཅུ་ཆའི་ཁ་སྐོང་དུ་ཏིལ་ཁོ་ན་ཕུལ་བས་ཚར་བཅུ་རེའི་མཚམས་སུ་འདོད་གསོལ་བྱས་ནས་ཚར་གསོག་པས་འཐུས། དེ་ནས་ཨོཾ་བཛྲ་ཏཾ་བུ་ལ་ཡེ་སྭཱ་ཧཱ༔ ཞེས་སོ་རྩི་ཕུལ། ཨོཾ་བཛྲ་ཝས་ཏྲ་ཡེ་སྭཱ་ཧཱ ཞེས་གོས་ཟུང་འབུལ་ལོ། །མཐར་མར་ཁུ་ལན་གསུམ་དང་། ཧྲཱི༔ བླ་མ་ཡི་དམ་མཁའ་འགྲོ་ལ༔ སོགས་མཆོད་པའི་འཇུག་ཏུ། གཏོར་མ་སྨན་རཀ་བཅས་སྔགས་ཚིག་གིས་དགང་གཟར་གྱིས་འབུལ་དེ་ནས་ག་ཎ་ཙཀྲ་པཱུ་ཛ་ཁ་ཧི་ཞེས་ཚོགས་ཕུད་འབུལ། ཧྲཱི༔ ཆོས་སྐུ་སྐྱེ་མེད་ངང་ཉིད་ལས༔ སོགས་ཀྱིས་བསྟོད། བཟླས་པ་ནི། དཀྱིལ་འཁོར་ལྷ་ཚོགས་རྣམས་སྐུ་མདོག་ཀུནྡ་ལྟར་དཀར་བའི་ཐུགས་ཀའི་སྔགས་ཕྲེང་ཟླ་བའི་འོད་ཟེར་ལྟ་བུ་འཕྲོས་པས་བདག་སོགས་ཀྱི་ནད་གདོན་སྡིག་སྒྲིབ་ཉེས་ལྟུང་དྲི་མའི་ཚོགས་མ་ལུས་པ་ཞི་བར་གྱུར། རྩ་སྔགས་ཀྱི་མཇུག་ཤཱནྟིང་ཀུ་རུ་ཡེ་སྭཱ་ཧཱ༔ བཏགས་པ་བརྒྱ་རྩ་བཟླ། མཆོད་བསྟོད་བྱ། ཧོ༔ དཀྱིལ་འཁོར་གྱི་ལྷ་ཚོགས་རྣམས་ལ་འཕྲིན་ལས་བཅོལ་བ་ནི། བདག་ཅག་སོགས་གོང་ལྟར་འདོད་དོན་གསོལ། སྐབས་འདིར་མར་ཁུ་འོ་ཐུག་ཟས་སྣ་རྣམས་ཐབ་ཀྱི་སྟེང་ནས་བཟུང་ལ། ཧཱུྃ༔ བདེ་མཆོག་བདེ་སྤྱོད་ནམ་མཁའི་ཀློང་༔ སོགས་ཀྱིས་དངོས་གྲུབ་ལེན། ཡིག་བརྒྱ་ལན་གསུམ་བཟླ་ཞིང་། ཧྲཱི༔ རྩ་གསུམ་ཡོངས་འདུས་དཀྱིལ་

འཁོར་དུ༔ སོགས་ཀྱིས་བཟོད་པར་གསོལ། བརྟན་བཞུགས་བྱ། ཨོཾ༔ ཁྱེད་ཀྱི་སེམས་ཅན་དོན་ཀུན་མཛོད་སོགས་ཀྱིས་ཡེ་ཤེས་པ་གཤེགས་དམ་ཚིག་རང་ལ་ཐིམ་པར་མོས། སླར་ཡང་མར་ཁུ་ལན་གསུམ་གྱིས། ཨོྃ་བཛྲ་ཛྭ་ལ་རཾ་ཞེས་མེ་གསོ། མེ་ལྷ་ཆ་བྱད་ཡོངས་སུ་རྫོགས་པར་གྱུར་པ་ལ། ཨོཾ་ཨགྣེ་ཡེ་སྭཱ་ཧཱ༔ ཞེས་མར་ཁུ་ལན་གསུམ་དང་། ཡམ་ཤིང་ནས་བཟུང་རྫས་ལྷག་རྣམས་འབུལ། གཏོར་མ་དགང་བླུགས་ཁར་བཞག་པ་ལ་སྔགས་ཀྱིས་བསངས་ཨ་ཀ་རོས་བརླབ། མེ་སྟེ་སྲེག་བྱ་ཟ་བའི་ལྷ༔ དྲང་སྲོང་རྒྱལ་བོ་གདོན་གྱི་བདག༔ ཤར་ལྷོ་མེ་ལྷའི་ཚོགས་བཅས་རྣམས༔ མཆོད་སྦྱིན་གཏོར་མ་འདི་བཞེས་ལ༔ རྣལ་འབྱོར་བདག་ཅག་སོགས་ནས་ཡིད་ལ་འདོད་པ་ཀུན་འགྲུབ་ཤོག་ཅེས་གཏོར་མ་མེ་ནང་དུ་འབུལ་ཨོཾ་བཛྲ་ཏཾ་བུ་ལ་ཡེ་སྭཱ་ཧཱ༔ ཨོཾ་བཛྲ་ཝས་ཏྲ་ཡེ་སྭཱ་ཧཱ༔ ཞེས་སོ་རྩི་དང་གོས་ཟུང་འབུལ། མཆོད་བསྟོད་བྱ་ཡིག་བརྒྱ་ཚར་གསུམ་དང་མ་འབྱོར་བ་དང་སོགས་ནས། བདག་གི་དོན་དང་གཞན་གྱི་དོན། །སྒྲུབ་བྱེད་སྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་བྱོན་ལ། །བདག་གི་འདོད་པ་ཐམས་ཅད་སྒྲུབས། །ཡ་ཧི་གཙྪ། རང་གནས་སུ་གཤེགས། །དམ་ཚིག་པ་ལྟེ་བའི་ཨ་ཤད་ལ་ཐིམ་པར་

བསམ། མེ་དལ་གྱིས་གཞིལ་ནས་ཕན་བྱེད་ཐེབས་སམ་ཆུ་ཀླུང་དུ་དོར། ཚོགས་ལྷག་ཐུགས་དམ་བསྐུལ་བ་སོགས་མཐར་ཆགས་སུ་བྱ་བ་ཡིན་ནོ། །སྨྲས་པ། དེ་ལྟར་རྟ་ཕག་ཡིད་བཞིནནོར་བུ་ཡི། །སྦྱིན་སྲེག་ཆོ་ག་བླ་མས་བཀས་གནང་ལྟར། །སྦྱར་བ་འདིའི་དགེས་འགྲོ་བའི་ལས་ཉོན་སྦྱངས། །རྣམ་མཁྱེན་གདོད་མའི་ས་ལ་འགོད་པར་ཤོག །ཅེས་རྟ་ཕག་ཡིད་བཞིན་ནོར་བུའི་སྦྱིན་སྲེག་ཡེ་ཤེས་མེ་འོད་ཅེས་བྱ་བ་འདི་ནི། ལྷ་འདིའི་བསྙེན་པ་ཚད་དུ་འཁྱོལ་བ་སོག་ཚའི་རི་ཁྲོད་པ་སངས་རྒྱས་རིན་ཆེན་གྱིས་འདི་ལྟ་བུ་ཞིག་དགོས་ཞེས་བསྐུལ་བ་དང་། སྐྱབས་མགོན་ཞབས་དཀར་རྡོ་རྗེ་འཆང་རིན་པོ་ཆེའི་གསུང་གིས་འདི་ལྟར་བསྒྲིགས་དགོས་ཞེས་གནང་བ་ཐོབ་པ་ལ་བརྟེན། ཉང་སྐྱེས་མཚམས་མིང་སྣང་མཛད་རྡོ་རྗེས་གཏེར་ཁ་གོང་མའི་ཕུར་བའི་བསྲེགས་བླུགས་བདུད་རྩི་ཟིལ་མངར་ལ་གཞི་བྱས་རིགས་མཐུན་གྱིས་ཁ་ཅུང་ཟད་བསྐང་ཏེ་སྦྱརབའོ། །སརྦ་མངྒ་ལཾ།། །།

ཡང་གསང་རྟ་ཕག་གི་བསྙེན་པའི་ཁ་སྐོང་གི་སྦྱིན་སྲེག་འཁྱེར་བདེར་བཀོད་པ་སྒྲིབ་མུན་འཇོམས་པའི་ཉི་མ། དགུ་རོང་སྣ་ཚོགས་རང་གྲོལ།

༄༅། །ཡང་གསང་རྟ་ཕག་གི་བསྙེན་པའི་ཁ་སྐོང་གི་སྦྱིན་སྲེག་འཁྱེར་བདེར་བཀོད་པ་སྒྲིབ་མུན་འཇོམས་པའི་ཉི་མ་ཞེས་བྱ་བཞུགས་སོ་། །བླ་མ་དང་བཅོམ་ལྡན་འདས་རྟ་ཕག་ཡིད་བཞིན་ནོར་བུ་དབྱེར་མ་མཆིས་པའི་ཞབས་ལ་ཕྱག་འཚལ་ལོ། །དེ་ལ་འདིར་བསྙེན་པའི་ཁ་སྐོང་གི་སྦྱིན་སྲེག་བྱེད་པར་འདོད་པས་ཉིན་རེ་བཞིན་ཐུན་བཞིའི་མཇུག་གམ། ཐུན་ཐ་མའི་མཇུག་ཏུ་བཅུ་ཆ་ཞེས་སྔགས་བརྒྱ་སྟོང་ཁྲི་འབུམ་སོགས་གང་འགྲུབ་ཀྱི་བཅུ་ཆའི་ཏིལ་ཡུངས་མེ་སླང་བཅས་སྣོད་དུ་བཤམས་ལ། ཨམྲྀ་ཏས་བསངས། སྭ་བྷ་ཝས་སྦྱངས། སྟོང་བའི་ངང་ལས་ཡེ་ཤེས་ཀྱི། །མེ་ཐབ་དཀར་པོ་འོད་ཟེར་འཕྲོ། །ཟླུམ་པོ་མུ་རན་ཁ་ཁྱེར་བཅས། །དེ་ནང་རཾ་ལས་ཡེ་ཤེས་མེ། །རབ་ཏུ་འབར་ཞིང་བསྲེགས་པའི་ཀློང་། །ཕོ་བྲང་གཞལ་ཡས་མཚན་རྫོགས་དབུས། །ཆོས་འབྱུང་པདྨ་ཉི་ཟླའི་སྟེང་། །ཧྲཱིཿ ལས་དབང་ཆེན་རྟ་མཆོག་ནི། །སྐུ་མཆོག་དམར་ལ་སྔོ་མདངས་འཚེར། །ཞེས་པ་ནས། ཡེ་ཤེས་ཞིང་ཁམས་སོ་སོ་ནས། །ལྷ་ཚོགས་འཁོར་བཅས་སྤྱན་དྲངས་གྱུར། །གུ་རུ་དེ་ཝ་ཌཱཀྐི་ནི་བཛྲ་ས་མ་ཡ་ཛ་ཛ༔ ཛ་ཧཱུཾ་བཾ་ཧོ༔ བཛྲ་ས་མ་ཡ་ཏིཥྛ་ལྷན་ཨ་ཏི་པཱུ་ཧོ༔ པྲ་ཏཱི་ཙྪ་ཧོཿ བཛྲ་པཱུཧྨེ་ནས་པཱུཙཧོ༔ ཧྲཱི༔ ཆོས་དབྱིངས་སྐྱེ་མེད་ངང་ཉིད་ལས། །ཞེས་

པ་ནས། རྟ་ཕག་སྐུ་ལ་ཕྱག་འཚལ་བསྟོད། །ཅེས་སོགས་ཀྱིས་བསྟོད། དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་སྐུའི་ཆ་ལས་འོད་ཟེར་དཀར་པོའི་ཚོགས་ཕྱོགས་བཅུར་འཕྲོ་བའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་གིས་མཚན་པར་གྱུར། དེ་ནས་ཏིལ་ཡུངས་ལ་དམིགས་ཏེ། རང་གི་སྒོ་གསུམ་གྱི་ནད་གདོན་སྡིག་སྒྲིབ་དམ་ཚིག་ཉམས་ཆག་སྔགས་སྒྲ་མ་དག་ཅིང་ཆད་ལྷག་གི་ཉེས་པ་ཐམས་ཅད་འོད་ནག་པོའི་རྣམ་པར་སྣ་བུག་ནས་ཐོན་ཏེ་ཏིལ་ཡུངས་ལ་ཐིམ་པ་ཡེ་ཤེས་ཀྱི་བདུད་རྩི་དཀར་པོའི་རང་བཞིན་ཅན་དུ་གྱུར། ཨོཾཨཱཿ ཧཱུྃ་ཧ་ཧོ་ཧྲཱིཿ༔ ལན་བདུན་བརྗོད་པས་བརླབས་ལ་རྫས་འབུལ་བ་ནི། རྩ་སྔགསམཐར། བདག་ཅག་དཔོན་སློབ་འཁོར་དང་བཅས་པ་རྣམས་ཀྱིས་ཐར་བ་དང་ཐམས་ཅད་མཁྱེན་པའི་གོ་འཕང་སྒྲུབ་པ་ལ་བར་དུ་གཅོད་པའི་ནད་གདོན་སྡིག་སྒྲིབ་འགལ་རྐྱེན་བར་ཆད་མི་མཐུན་པའི་ཕྱོགས་ངན་པ་ཐམས་ཅད་དང་ཁྱད་པར་དུ་ཡང་དམ་ཚིག་གི་ཉམས་ཆག་དང་ལྷའི་ཏིང་འཛིན་མ་གསལ་ཞིང་སྔགས་ཆད་ལྷག་ལ་སོགས་པའི་ཉེས་པ་ཐམས་ཅད་ཤཱནྟིང་ཀུ་རུ་ཡེ་སྭཱ་ཧཱ། ཞེས་སྤེལ་ཚིག་བཏགས་པ་ལན་བདུན་གྱིས་ཕུལ་མཐར་ཏིལ་ཡུངས་ཆ་མཉམ་རེ་དང་རྩ་སྔགས་ཁོན་སྦྲགས་ཏེ་འབུལ།

སྔགས་བརྒྱ་རྩ་རེའི་མཚམས་སྔར་གྱི་སྤེལ་ཚིག་བཏགས་ལ་གྲངས་སྐབས་དང་བསྟུན་ལ་བསགས་མཐར། ཡི་གེ་བརྒྱ་པ་ལན་གསུམ་གྱིས་ནོངས་པ་བཤགས། བཛྲ་པུཥྤ་ནས་པཱུ་ཙ་ཧོ༔ ཞེས་པས་མཆོད། ཧྲཱི༔ ཆོས་དབྱིངས་སྐྱེ་མེད་སོགས་ཀྱིས་གོང་བཞིན་བསྟོད་པ་བྱ། བཛྲ་མུ༔མེ་ལྷའི་ཡེ་ཤེས་པ་རང་ལ་ཐིམ། དམ་ཚིག་པ་མེ་འབར་པའི་རྣམ་པ་ཅན་དུ་གྱུར་པར་བསམ་མོ། ། མེ་མ་ཤི་བར་དུ་མི་བསྒུལ་ཞིང་། མཐར་ཐལ་བ་རྣམས་གཙང་སར་དོར་རོ། །དེ་ལྟར་བསྙེན་པའི་ཁ་སྐོང་གི་སྦྱིན་བསྲེགས་འཁྱེར་བདེ་འདི་ནི། གསང་སྔགས་ཀྱི་དམ་ཚིག་ཉམས་ཆག་གསོ་བ་དང་། སྔགས་ཆད་ལྷག་པའི་ཁ་བསྐང་བ་དང་། ལྷ་མཉེས་ཤིང་དངོས་གྲུབ་རྣམ་གཉིས་སྩོལ་བའི་ཐབས་མཆོག་ཏུ་གྱུར་པ་ཡིན་པར་གསུངས་སོ། །ཞེས་པའང་ཀུན་མཁྱེན་ལྔ་བ་ཆེན་པོའི་རྟ་མགྲིན་གསང་སྒྲུབ་ཀྱི་ཁ་སྐོང་སྦྱིན་སྲེག་བསྡུས་པ་ལྟར་ཚིག་ཕྲད་བསྒྱུར་ཏེ། ༧སྣ་ཚོགས་རང་གྲོལ་གྱིས་དབེན་གནས་འཇིགས་མེད་བསམ་གཏན་གླིང་དུ་བྲིསཔའོ། ཨངྒ་ལཾ།། །།

ཡང་གསང་རྟ་ཕག་ལས་ཆར་འབེབས་ཀྱི་ཆོ་ག་ཕན་བདེའི་དཔལ་སྦྱིན།

༄༅། །ཡང་གསང་རྟ་ཕག་ལས་ཆར་འབེབས་ཀྱི་ཆོ་ག་ཕན་བདེའི་དཔལ་སྦྱིན་ཞེས་བྱ་བ་བཞུགས་སོ།།

མཁྱེན་བརྩེའི་ཆུ་འཛིན་གསར་བའི་ལྡིང་ཁང་ནས། །བྱིན་རླབས་ཐུགས་རྗེའི་གྲུ་ཆར་རབ་གཡོས་པས། །ཕན་བདེ་ལོ་ཏོག་སྤེལ་མཛད་བླ་མ་དང་། ། དབྱེར་མེད་ལྷག་པའི་ལྷ་ལ་གུས་བཏུད་ནས། །བཀའ་ཡི་སྲུང་མ་དྲང་སྲོང་རཱ་ཧུ་ལའི། །འཕྲིན་ལས་ཆར་འབེབ་འཁོར་ལོའི་ཆོ་ག་ཡི། །ལག་ལེན་མན་ངག་ཟབ་མོའི་རིམ་པ་འདི། །ཡི་གེར་འགོད་ལ་བཀའ་ཡི་གནང་བ་སྩོལ། །དེ་ཡང་བླ་མ་ལྷག་པའི་ལྷར། །ཡིད་ཆེས་དད་པའི་སྟོབས་ལྡན་པའི། །ལོག་ལྟས་བརྫི་བར་མི་ནུས་ཤིང་། །ཟབ་མོའི་དབང་གིས་རྒྱུད་སྨིན་ནས། །བསྙེན་བསྒྲུབ་ཚད་དུ་འཁྱོལ་བ་ཡི། །གཞན་ཕན་སེམས་ལྡན་རྣལ་འབྱོར་པས། །བསྟན་འགྲོར་སྨན་པའི་ལྷག་བསམ་གྱིས། །ལས་ཀྱི་རིམ་པ་འདིར་འཇུག་བྱ། །སྤྱིར་ན་གཟའ་སྐར་ཚེས་

བཟང་ཞིང་། །ཁྱད་པར་ཆུ་གཟའ་ཆུ་སྐར་སོགས། །འཛོམ་པའི་དུས་ཚོད་དགེ་བའི་ཉིན། །དཀར་ཕྱོགས་སྟོབས་དང་ལྡན་པའི་ཀླུ། །གནས་པའི་མཚོ་འམ་ཆུ་མིག་ཁར། །ཕྱིན་ཏེ་ལྷག་ལྷའི་ཏིང་འཛིན་དང་། །ལྡན་པའི་བསངས་བརྔན་སྡེ་བརྒྱད་མཆོད། །ཆ་གསུམ་བརྒྱ་རྩ་ཀླུ་གཏོར་བསྔོ། །བྱིན་རྟེན་འཁོར་ལོ་ཁྲུས་གསོལ་སོགས། །རིམ་འགྲོས་རྒྱབ་དཔུང་ཆེར་བསྐྱེད་དེ། །གཙང་མའི་སྟེགས་ལ་བདག་བསྐྱེད་ཀྱི་རྟ་མགྲིན་དབྱེར་མེད་གསུངས། །གཏོར་མཆོད་རྒྱས་བསྡུས་སྐབས་བསྟུན་བཤམས། །ལས་བུམ་སྒྲུབ་ཅིང་བདག་གཞུང་བསྲངས། །བཟླས་དམིགས་སྤྱི་དང་འདི་ལྟར་བསྒོམ། །བདག་གི་ཐུགས་སྲོག་སྔགས་ཕྲེང་སྐུའི་ཆ་ལས། །བདུད་རྩི་འོད་ཟེར་ཁ་དོག་སྣ་

ལྔ་འཕྲོས། །གནས་འདིའི་ཀླུ་ཡིས་གཙོ་བྱས་ཀླུ་རྣམས་ལ། །ཕོག་པས་ནད་གདོན་སྡིག་སྒྲིབ་ཐམས་ཅད་སྦྱངས། །བྱེ་ཚན་མཁའ་ལྡིང་འཇིགས་པ་ཀུན་ཞི་སྟེ། །ཀླུ་རྣམས་བདེ་དགའི་དཔལ་གྱིས་འཚོ་གྱུར་ནས། །བཀའ་བཞིན་སྒྲུབ་ལ་དགའ་མགུའི་སེམས་ལྡན་ཞིང་། །ཆར་གྱི་དངོས་གྲུབ་མྱུར་དུ་སྩོལ་བར་གྱུར། །ཅེས་བསམ་ལ་སྤེལ་ཚིག་གི་སྔགས་བཏགས་རྩ་སྔགས་གཤམ་དུ། ཨོཾ་ཀེ་ཏ་ཀེ་ཏ་རཱ་ཧུ་ལ་སརྦ་ན་ག་རཱ་ཛ་ཆར་ཆེན་པོ་ཕོབ་ཅིག །སླར་ཡང་ཐུགས་སྲོག་སྔགས་ཕྲེང་སྐུའི་ཆ་ལས། །བདུད་རྩི་འོད་ཟེར་ཁ་དོག་སྣ་ལྔ་འཕྲོས། །རིགས་དྲུག་སེམས་ཅན་སྤྱི་དང་ཁྱད་པར་དུ། །ཐན་པ་མྱོང་ཡུལ་ལུས་ཅན་ཀུན་ལ་ཕོག །ཐོག་མེད་ནས་བསགས་ལས་ངན་སྡིག་སྒྲིབ་དང་། །ཡང་སྒོས་ཐན་པའི་འབྲས་བུ་མྱོང་འགྱུར་གྱི། །ལས་ངན་སྦྱངས་ཏེ་བདེ་སྐྱིད་ཕུན་ཚོགས་ལ། །ལོངས་སུ་སྤྱད་པའི་སྐལ་བཟང་ཐོབ་པར་གྱུར། །ཅེས་བསམ་སྔགས་བཟླས་གོང་དང་མཚུངས། སླར་ཡང་ཐུགས་སྲོག་ཧྲཱི་ཡིག་སྐུའི་ཆ་ལས། །བདུད་རྩི་འོད་ཟེར་ཁ་དོག་སྣ་ལྔ་འཕྲོས། །ཆར་སྤྲིན་འདུ་དང་ཆར་བ་འབབ་པ་དང་། །རྩི་བཅུད་ལོ་ཏོག་རྒྱས་པར་བྱེད་པ་ལ། །བར་

གཅོད་རྩོམ་པའི་གདོན་བགེགས་ཀུན་ལ་ཕོག །བསམ་ངན་སྦྱོར་རྩུབ་ཐམས་ཅད་ཞི་གྱུར་ཏེ། །བྱམས་པའི་སེམས་ཀྱིས་མཐུན་པའི་རྐྱེན་སྒྲུབ་ཅིང་། །བཀའ་དང་དམ་ལ་ཚུལ་བཞིན་གནས་པར་གྱུར། །ཅེས་བསམ་བཟླས་དམིགས་གོང་དང་མཚུངས། །དེ་ནས་ཐུན་བསྡུ་མཆོད་བསྟོད་བྱ། །རྩ་གསུམ་གཏོར་འབུལ་སྲུང་མ་མཆོད། །ཆར་འབེབས་ཕྲིན་ལས་བཅོལ་བའི་རྗེས། །སྒོ་དྲུང་ངམ་ནི་མལ་འོག་ཏུ། །གྲུ་གསུམ་དོང་བྲུས་ཆར་འགོང་དང་། །ནུབ་བྱང་མཚམས་སུ་རླུང་ལྷ་གཞོན། །དེ་སྟེང་བྱིན་རྟེན་ཚ་ཚ་བཞག །དེནས་མན་ངག་ཡེ་གེ་བཞིན། །ལེགས་པར་བྲིས་པའི་འཁོར་ལོ་ནི། །ཆུ་ལ་གཡོན་དུ་བསྐོར་བའི་མདུན། །གཙང་མའི་སྟེང་ལ་ཁེབས་སྔོན་གཡོགས། །དེ་སྟེང་རིན་ཆེན་སྣོད་ནང་དུ། །དཀར་མངར་ཀླུ་སྨན་གྱིས་བརྒྱན་པའི། །མཆོད་གཏོར་ཉེར་སྤྱོད་བཟང་དུ་བཤམས། །ལས་བུམ་ཆུ་ཡིས་བསངས་བྱས་ལ། །ཏིང་འཛིན་སྔགས་ཀྱིས་འདི་ལྟར་བརླབ། །སྭ་བྷ་ཝས་སྦྱངས། སྟོང་བའི་ངང་ལས་བྷཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ཁ་ཟས་རོ་བརྒྱ་བ། ལྷའི་ཉེར་སྤྱོད་བཟང་དགུའི་སྤེལ་བ་མིའི་ཟས་མཆོག་གང་མོས་སུ་སྦྱར་བ་བཟང་ཞིང་གཙང་མ་མཁོ་དགུ་ཚོགས་པ། ལྷ་དང་ཀླུ་དང་མི་དང་གནོད་སྦྱིན་གྱི་དབང་པོ་རྣམས་ཀྱི་མཐུན་

རྐྱེན་དུ་འོས་པའི་ཡོ་བྱད་མཛེས་དགུས་ཕྱུག་པ། གཞན་ཡང་ཕྱི་ནང་གསང་བའི་ཡོ་བྱད་དུ་འོས་པ་སྔགས་དང་ཕྱག་རྒྱ་ཏིང་འཛིན་གྱིས་ཁྱད་པར་དུ་སྒྲུབ་པ་རྒྱ་ནམ་མཁའ་དང་མཉམ་ཞིང་ཡུལ་དུས་ཐམས་ཅད་དུ་ཟད་མི་ཤེས་པར་འབྱུང་བ་བདེ་སྟོང་གཉིས་སུ་མེད་པའི་ངོ་བོར་རོ་གཅིག་ཏུ་དག་པ་རྣམས་སུ་གྱུར། ན་མཿསརྦ་ཏ་ཐ་ག་ཏ་ནས་སྭཱ་ཧཱ༔ ལན་གསུམ་སྔགས་དང་ཕྱག་རྒྱས་བརླབས། །དེ་ནས་མདུན་གྱི་འཁོར་ལོ་ལ། །ལས་བུམ་ཆུ་དང་སྔགས་ཀྱིས་བསངས། །ལྷར་བསྐྱེད་དམིགས་པ་འདི་ལྟར་བྱ། ཨོཾ་སྭཱ་བྷ་ཝས་སྦྱངས། འཁོར་ལོ་མི་དམིགས་པ་སྟོང་བ་ཉིད་དུ་གྱུར། སྟོང་པའི་ངང་ལས་རང་གི་མདུན་དུ་རིན་པོ་ཆེ་བཻཌཱུརྱའི་ས་གཞི་ཡངས་ཤིང་རྒྱ་ཆེ་བ་ཁོར་ཡུག་ཀུན་ཏུ་ནེའུ་གསིང་དང་གསེར་གྱི་བྱེ་མ་བརྡལ་བ་ལ། མཚོ་དང་རྫིང་བུ་ལྟེང་ཀ་ཆུ་ཀླུང་འབུམ་ཕྲག་དུ་མས་མཛེས་པར་ཆུ་བྱ་སྣ་ཚོགས་སྐད་སྙན་པར་སྒྲོག་ཅིང་རིན་པོ་ཆེ་སྣ་ཚོགས་གཅལ་དུ་བཀྲམ་པ། དྲི་ཞིམ་པའི་ངད་པ་ཁོར་ཡུག་ཏུ་ལྡང་བའི་ཁ་དོག་སྣ་ལྔའི་མེ་ཏོག་དང་དཔག་བསམ་གྱི་ཤིང་ལ་སོགས་པའི་སྐྱེད་མོས་ཚལ་དང་། རིན་པོ་ཆེའི་བྲག་རི་སྣ་ཚོགས་པས་ཡོངས་སུ་བསྐོར་བའི་དབུས་སུ་དྭངས་བསིལ་

རྙོག་མེད་ཀྱི་རྒྱ་མཚོ་ཆེན་པོ་ཡན་ལག་བརྒྱད་ལྡན་པ། གཏིང་མཐའ་མེད་པ་མེ་འབར་ཞིང་འཁྱིལ་བ་རབ་ཏུ་གཡོ་བའི་རྦ་རླབས་ཁོར་ཡུག་ཏུ་འཁྲུགས་པ་ལས་ཆར་སྤྲིན་ན་བུན་གྱི་ཚོགས་བསམ་གྱིས་མི་ཁྱབ་པ་ནམ་མཁར་ལྡིང་ཞིང་ཆར་རྒྱུན་དྲག་པོ་ཁོར་ཡུག་ཏུ་འབབ་པའི་ཆུ་འཛིན་གྱི་གུར་ཁང་ཆེན་པོ་མུ་མཐའ་མེད་པར་བརྡལ་ཞིང་གཡོ་བའི་ཆུ་གཏེར་ཆེན་པོ་དེའི་དབུས་སུ། རང་གི་ཐུགས་ཀའི་སྲོག་ཡིག་ལས་ར་ཡིག་དུ་བའི་མདོག་ཅན་ཞིག་སྤྲོས་ཏེ་གནས་པ་ལས་འོད་ཟེར་དཔག་ཏུ་མེད་པ་འཕྲོས། རྒྱལ་བ་རྣམས་མཆོད་ཅིང་བདེ་གཤེགས་ཞི་ཁྲོའི་བྱིན་རླབས་བསྡུས། སེམས་ཅན་རྣམས་ཀྱི་ཐན་འབྲས་མྱོང་འགྱུར་གྱི་ལས་ངན་སྦྱངས། རྩི་བཅུད་ལོ་ཏོག་ལ་བར་དུ་གཅོད་པའི་བགེགས་ཚོགས་ཐམས་ཅད་ཚར་བཅད། ཆར་བདག་ལྷ་ཀླུ་དྲེགས་པ་ཅན་རྣམས་ཀྱི་མཐུ་སྟོབས་ནུས་པ་ཐམས་ཅད་རང་དབང་མེད་པར་བསྡུས་རཱ་ཡིག་ལ་ཐིམ་པ་ཡོངས་སུ་གྱུར་པ་ལས་དབང་ཆེན་ཐུགས་ཀྱི་སྤྲུལ་བ་ཁྱབ་འཇུག་གཟའི་རྒྱལ་བོ་རཱ་ཧུ་ལ་སྐུ་མདོག་དུད་ཁ་ཀླུ་སྲིན་ཁྲོས་པའི་གཟུགས་ཅན་ནམ་མཁའི་དབྱིངས་དང་མཉམ་

པ་ཞལ་གསུམ་ཕྱག་གཉིས་པ། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ། ཞལ་གདངས་ཤིང་མཆེ་བ་གཙིགས་པ་ལྗགས་འདྲིལ་ཞིང་སྨིན་མ་དང་ཨག་ཚོམ་དམར་སེར་དུ་འཁྱུག་ཅིང་དབུ་སྐྲ་ཁམ་སེར་གྱེན་དུ་བརྫེས་པ། ནོར་བུ་རིན་པོ་ཆེ་སྣ་ཚོགས་ཀྱི་རྒྱན་ཕྲེང་དུ་མས་སྤྲས་པ། སྲིད་གསུམ་གསལ་བའི་མིག་གིས་ལུས་ཀུན་གང་ཞིང་ཞལ་དང་བ་སྤུའི་བུ་ག་ཐམས་ཅད་ནས་ཆར་སྤྲིན་ན་བུན་གྱི་ཚོགས་དཔག་ཏུ་མེད་པ་འཕྲོས། ལྟོ་ཞལ་རབ་ཏུ་གདངས་པས་ཆར་འགོང་འབྱུང་བོ་རྣམས་ཟས་སུ་ཟ་ཞིང་མཐུ་སྟོབས་ནུས་པའི་རྩལ་གྱིས་རླུང་བདག་ཕོ་མོ་རི་རབ་ཆེན་པོའི་རྨང་དུ་གནོན་པ། སྐུ་སྨད་སྦྲུལ་གྱི་མཇུག་མས་རྒྱ་མཚོ་ཆེན་པོ་གཏིང་ནས་དཀྲུགས་ཏེ་ཀླུ་གཉན་ས་བདག་ཐམས་ཅད་རང་དབང་མེད་པར་ཆར་གྱི་ལས་ལ་བསྐུལ་བ། དབུ་དང་ཕྱག་གཉིས་རྒྱ་མཚོ་ཆེན་པོ་ནམ་མཁའི་དབྱིངས་སུ་བཏེགས་ཏེ་ཆར་གྱི་རྒྱུན་དྲག་པོ་འཛམ་གླིང་གཡོ་བ་ཙམ་དུ་འབེབ་པའི་མཐའ་བསྐོར་དུ་ཡབ་སྲིན་པོ་ཆེན་པོ་དང་ཡུམ་ཀླུ་མོ་ཆེན་མོ་སྤྲུལ་བའི་གཟའ་བརྒྱད་གདོང་མོ་མཆེད་བཞི་ཆུ་བདག་ཝ་རུ་ཎ་དང་ཀླུ་ཆེན་བརྒྱད་སའི་ལྷ་མོ་བསྟན་

མ་གཙང་རིས་ཀྱི་མགོན་པོ་བདུན་ཅུ་རྩ་ལྔ་དྲེགས་པ་སྡེ་བརྒྱད་ཀླུ་གཉན་ས་བདག་ཡུལ་རིས་ཀྱི་གཞི་བདག་ལ་སོགས་དང་མདོར་ན་སྤྲིན་སྡུད་ཆར་འབེབས་ལ་དབང་བའི་སྲིད་པ་གསུམ་གྱི་ལྷ་ཀླུ་སྡེ་བརྒྱད་མཐུ་སྟོབས་ཆེ་ཚོགས་བསམ་གྱིས་མི་ཁྱབ་པས་བསྐོར་བ་ཐམས་ཅད་ཀྱང་སྒྲུབ་པ་པོའི་རེ་འདོད་ཡིང་བཞིན་དུ་སྐོང་བ་ལ་དགའ་མགུ་ཡི་རང་བའི་སེམས་དང་ལྡན་པའི་རང་རང་གི་མཐུ་སྟོབས་ནུས་པའི་རྩལ་ཕྱུང་སྟེ། སྤྲིན་སྡུད་ཆར་འབེབས་རླུང་གནོན་གྱི་ལས་ལ་བརྩོན་བཞིན་བཞུགས་པའི་གཙོ་བོའི་ཐུགས་སྲོག་དང་། བདག་གི་ཐུགས་ཀའི་ས་བོན་ལས་འོད་ཟེར་དམར་པོ་ལྕགས་ཀྱུའི་དབྱིབས་ཅན་དཔག་ཏུ་མེད་པ་ཕྱོགས་བཅུར་འཕྲོས་པས་ནམ་མཁའི་དབྱིངས་ཀྱི་ཕོ་བྲང་སོགས་རང་བཞིན་གྱི་གནས་དང་། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནས་ཁྱབ་འཇུག་གཟའི་རྒྱལ་བོ་རཱ་ཧུ་ལ་ཡབ་ཡུམ་སྤྲུལ་བ་གདོང་མོ་མཆེད་བཞི་ཆུ་བདག་ཝ་རུ་ཎ་དང་ཀླུ་ཆེན་བརྒྱད་སོགས་ཆར་བདག་ལྷ་ཀླུ་སྡེ་བརྒྱད་ཡུལ་ལྷ་གཞིའི་བདག་པོའི་ཚོགས་དང་བཅས་པས་བསྐོར་བ་སྐད་ཅིག་ཉིད་ལ་སྤྱན་དྲངས་པར་གྱུར།

ཨོཾ་བཛྲ་ས་མ་ཡ་ཛཿཛ། ཞེས་བསྐྱེད་རོལ་མོ་དབྱངས་དང་བཅས། ཧཱུྃ༔ མི་དམིགས་སྤྲོས་བྲལ་ཁྱབ་བརྡལ་ཆོས་ཀྱི་དབྱིངས། །རབ་འབྱམས་ནམ་མཁའ་ཡངས་པའི་དཀྱིལ་འཁོར་ནས། །ཁྱབ་འཇུག་གཟའ་ཡི་རྒྱལ་བོ་རཱ་ཧུ་ལ། །ཡབ་ཡུམ་སྤྲུལ་བ་གདོང་མོ་ཆར་བདག་ཀླུ། །གཙང་རིས་དཔལ་མགོན་སྡེ་བརྒྱད་དྲེགས་པའི་ཚོགས། །ས་བདག་ཀླུ་གཉན་ཡུལ་རིས་གཞི་བདག་རྣམས། །དེང་འདིར་ཆར་གྱི་དངོས་གྲུབ་སྩོལ་བའི་ཕྱིར། །རང་རང་གནས་ནས་ཐོགས་མེད་རྫུ་འཕྲུལ་གྱིས། །ཆར་སྤྲིན་ནག་པོ་རླུང་གིས་བསྐྱོད་པ་བཞིན། །འདིར་གཤེགས་དགྱེས་པའི་གདན་ལ་འདོད་པའི་དོན། །མ་གྲུབ་དེ་སྲིད་རྟེན་དང་དབྱེར་མེད་དུ། །དཔལ་གྱི་བཀའ་བཞིན་བརྟན་པར་བཞུགས་སུ་གསོལ། ཨོཾ་ཀེ་ཏ་ཀེ་ཏ་རཱ་ཧུ་ལ་མ་ར་ཙ་ཤ་ནཱ་ག་རཱ་ཛ༔ ཨ་ཡ་མ་དུ་རུ་ཙ་ཤ་ན་བྷུ་མི་པ་ཏི་ས་པ་རི་ཝཱ་ར་བཛྲ་ས་མ་ཡ་ཛཿཛཿ༔ ཛ་ཧཱུཾ་བཾ་ཧོ༔ ས་མ་ཡ་ཏིཥྛ་ལྷན། ཞེས་པས་སྤྱན་དྲངས་དབྱེར་མེད་བསྟིམ། །མཆོད་ཅིང་ཕྲིན་ལས་བཅོལ་བ་ནི། ཧཱུཾ༔ དངོས་བཤམས་ཡིད་སྤྲུལ་ཀུན་བཟང་མཆོད་པའི་སྤྲིན། །དམ་རྫས་མཆོད་གཏོར་སྤྱན་གཟིགས་མཐུན་པའི་རྫས། །ཇི་

སྙེད་མ་ཚང་མེད་པའི་འདོད་ཡོན་སྤྲིན། །གང་འདོད་གཟུགས་སུ་འཆར་བའི་མཆོད་ཚོགས་འདི། །བདག་གིས་དང་བའི་སེམས་ཀྱིས་འབུལ་ལགས་ན། །ལྷ་ཆེན་འཁོར་བཅས་དགྱེས་པར་བཞེས་ནས་ཀྱང་། །མཚོ་སྐྱེས་རྡོ་རྗེ་དབང་ཆེན་ཧེ་རུ་ཀའི། །བཀའ་དང་དམ་ཚིག་གཉན་ལས་མ་འདའ་བར། །རྩི་བཅུད་ལོ་ཏོག་གསོས་གྱུར་ཆར་གྱི་རྒྱུན། །འབབ་ལ་གདོན་བགེགས་འབྱུང་བོའི་བར་གཅོད་སོགས། །ཉེ་བར་ཞི་ཞིང་སྤྲིན་ཕུང་འཐོར་བྱེད་པའི། །མི་མཐུན་དྲག་པོའི་རླུང་རྣམས་མི་ལྡང་བར། །མཐུན་པའི་རླུང་གིས་ཕྱོགས་བཞི་མཚམས་བརྒྱད་ནས། །ཆར་སྤྲིན་ནག་པོ་བསྡུས་ཏེ་ལང་ལོང་འཁྲིགས། །འབྲུག་སྒྲ་དལ་བུར་དགོད་ཅིང་གློག་རྣམས་རྩེད། ། རི་བོ་ཐམས་ཅད་ན་བུན་གོས་ཀྱིས་བཀླུབས། །ཆར་རྒྱུན་དྲག་པོ་བར་མ་ཆད་པའི་རྒྱུན། །འཁོར་ཡུག་ཀུན་ཏུ་སྙོམས་པར་འབབ་པ་ཡིས། །རི་ལུང་རྨོས་ཞིང་ཐམས་ཅད་བརླན་ཅིང་གཤེར། །ལོ་ཏོག་འབྲས་བུ་རྩི་སྨན་ཐམས་ཅད་རྒྱས། །འགྲོ་ཀུན་བདེ་སྐྱིད་དཔལ་ལ་སྤྱོད་པ་ཡི། །འཕྲིན་ལས་དུས་ལས་ཡོལ་མེད་འགྲུབ་པར་མཛོད། །ཨོཾ་ཀེ་

ཏ་ཀེ་ཏ་རཱ་ཧུ་ལ་མ་ར་ཙ་ཤ་ནཱ་ག་རཱ་ཛ༔ ཨ་ཡ་མ་དུ་རུ་ཙ་ཤ་ན་བྷུ་མི་པ་ཏི་ས་པ་རི་ཝ་ར་ཨརྒྷཾ་ནས་ཤཔྟ་པཱུ་ཙ་ཧོ༔ ཞེས་མཆོད་གཏོར་འབུལ་བ་ནི། རཱ་ཧུ་ལ་དང་གཙོ་འཁོར་རྣམས་ཀྱི་ལྗགས་འོད་ཀྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། །ཨོཾ་ཀེ་ཏ་ཀེ་ཏ་རཱ་ཧུ་ལ་མ་ར་ཙ་ཤ་ནཱ་ག་རཱ་ཛ༔ ཨ་ཡ་མ་དུ་རུ་ཙ་ཤ་ན་བྷུ་མི་པ་རི་ཝཱ་ར་ཨི་དམ་བ་ལིངྟ་ཁ་ཁ་ཁཱ་ཧི་ཁཱ་ཧི། ལན་བདུན་བརྗོད་ཅིང་བསྟོད་པ་ནི། ཧཱུྃ༔ དབང་ཆེན་ཐུགས་སྤྲུལ་སྲིད་གསུམ་དྲེགས་པའི་གཙོ། །ཀླུ་སྲིན་ཚོགས་པའི་སྲས་མཆོག་རཱ་ཧུ་ལ། །མཐུ་སྟོབས་ནུས་པ་སྟོན་ལ་ཕན་བདེ་སྤེལ། །བསྟན་སྲུང་དྲེགས་པའི་རྗེ་དཔོན་ཁྱོད་ལ་བསྟོད། །གཏིང་མཐའ་མི་མངོན་ཆུ་གཏེར་ཆེན་པོའི་དབུས། །མི་བཟད་འཇིགས་གཟུགས་གར་གྱིས་འགྱིང་བ་ཡིས། །ཆར་བདག་ཀླུ་དབང་སྡེ་བརྒྱད་དབང་དུ་སྡུད། །ལྷ་ཆེན་མཐུ་སྟོབས་ཅན་ལ་ཕྱག་འཚལ་བསྟོད། །སྦྲུལ་གྱི་མཇུག་མས་རྒྱ་མཚོ་དཀྲུགས་ཤིང་གཡོ། །ལྷ་ཀླུ་སྡེ་བརྒྱད་ཆར་བདག་ལས་ལ་བསྐུལ། །ཅི་འདོད་ཆར་གྱིས་འགྲོ་བའི་རེ་སྐོང་བའི། །ཆར་བདག་ཆེན་པོ་ཁྱོད་ལ་ཕྱག་འཚལ་བསྟོད། །མཐུ་སྟོབས་ཤུགས་

ཀྱིས་རླུང་བདག་ཕོ་མོ་གནོན། །ཆར་རྐུན་འབྱུང་བོ་ལྟོ་བའི་ཞལ་དུ་གསོལ། །གདོན་བགེགས་འབྱུང་བོའི་ཚོགས་ཀུན་གཞོམ་མཛད་པའི། །ཁྱབ་འཇུག་རཱ་ཧུ་ལ་ལ་ཕྱག་འཚལ་བསྟོད། །ཀླུ་སྲིན་ཡབ་ཡུམ་སྤྲུལ་བ་གདོང་མོ་བཞི། །གཙང་རིས་དཔལ་མགོན་ལྷ་ཀླུ་སྡེ་བརྒྱད་དང་། །ཡུལ་རིས་གཞི་བདག་ཆར་ལ་དབང་མཛད་པའི། །གྲངས་མེད་སྤྲུལ་འཁོར་རྒྱ་མཚོའི་ཚོགས་ལ་བསྟོད། །ཅེས་བསྟོད་བཟླས་པའི་དམིགས་པ་ནི། བདག་གི་ཐུགས་ཀ་ནས་འོད་ཟེར་འཕྲོས་མདུན་གྱི་རཱ་ཧུ་ལའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཐུགས་སྲོག་རཱ་ཡིག་གི་མཐར་སྔགས་ཀྱི་ཕྲེང་བས་བསྐོར་ཏེ་གནས་པ་ལ་ཕོག་པས་ཐུགས་དམ་གྱི་རྒྱུད་བསྐུལ་བས་སྔོན་གྱི་དམ་ཚིག་གཉན་པོ་རྗེས་སུ་དྲན་ཏེ་འོད་ཟེར་ཡང་ཡང་གནས་པར་བསམ། སླར་ཡང་འོད་ཟེར་གྱིས་བསྐུལ་པས་རཱ་ཧུ་ལའི་ཐུགས་ཀའི་འོད་ཀྱིས་འཁོར་གྱི་ཆར་བདག་དྲེགས་པ་མཐུ་བོ་ཆེ་རྣམས་རང་དབང་མེད་པར་སྤྲིན་སྡུད་ཆར་འབེབས་ཀྱི་ལས་ལ་བསྐུལ་ཏེ། གཙོ་འཁོར་ཐམས་ཅད་ཀྱི་ཞལ་དང་བ་སྤུའི་བུ་ག་ཐམས་ཅད་ནས་ཆར་སྤྲིན་ན་བུན་གྱི་ཚོགས་བསམ་གྱིས་མི་ཁྱབ་

པ་འཕྲོས་པས་ནམ་མཁའི་ཁམས་ལ་མི་ཤོང་བ་ཙམ་དུ་འཁྲིགས་པ་དང་། གཙོ་བོའི་དབུ་ཕྱག་གིས་བཏེགས་པའི་རྒྱ་མཚོ་ཆེན་པོ་གནམ་ནས་ཀྱང་འཛམ་གླིང་གཡོ་བ་ཙམ་གྱི་ཆར་རྒྱུན་དྲག་པོའི་བར་མ་ཆད་པར་ཡུལ་ཕྱོགས་འདིའི་མཚོན་པའི་འཇིག་རྟེན་གྱི་ཁམས་ཐམས་ཅད་ལ་ཉིན་མཚན་ཁོར་མོ་ཡུག་ཏུ་འབབ་པར་གྱུར། དམིགས་གནད་དང་བཅས་རྩ་སྔགས་མཐར། ཨོཾ་ཀེ་ཏ་ཀེ་ཏ་རཱ་ཧུ་ལ་མ་ར་ཙ་ཤ་ནཱ་ག་རཱ་ཛ། ཨ་ཡ་མ་དུ་རུ་ཙ་ཤ་ན་བྷུ་མི་པ་ཏི་ཛ་ཕུ་ཏ་ཡར་ནོན་འདུས་འདུས་ནག་པོ་མ་བྷྱོ། ཆར་ཆར་བླ་བླ་ཐིབས་ཐིབས་ཟིལ་ཟིལ་ཧུར་ཐུམ་ཕྲོམ་ཕྲོམ་ཤར་ཤར་ཕོབ་ཕོབ་ཧ་ཟུར་ཐུམ་རིལ་ནན་ཐུམ་སྭཱ་ཧཱ། ཞེས་སྨྲ་བཅད་ཁྲི་སོགས་བཟླས་རྗེས་སྔགས་འདི་བརྒྱ་སྟོང་བཟླ། རྩེ་གཅིག་མ་གཡེང་བཟླས་ལ་བརྩོན། ཐུན་མཐར་མཆོད་བསྟོད་བྱ་བ་ནི། ཨོཾ་ཀེ་ཏ་ཀེ་ཏ་རཱ་ཧུ་ལ་སརྦ་ན་ག་རཱ་ཛ་ཆར་ཆར་ཕོབ་ཕོབ། སརྦ་ཕུ་ན་ག་རཱ་ཛ་ཁྲོམ་ཁྲོམ་ཕོབ་ཕོབ་སརྦ་ཕུ་ན་ག་ར་ཛ་ཤར་ཤར་ཕོབ་ཕོབ། སརྦ་ཕུན་ག་རཱ་ཛ་ཧྲིང་ཧྲིང་ཕོབ་ཕོབ། སརྦ་ཕུ་ན་ག་རཱ་ཛ་ཆར་དྲག་ཏུ་ཕོབ་དྲག་ཏུ་ཕོབ། ཆར་མྱུར་དུ་ཕོབ་མྱུར་དུ་ཕོབ། ཤུ་ཤུ་ཕོབ་ཕོབ། མཆོད་བསྟོད། ༀ་ཨཱཿཧཱུྃ་ཀེ་ཏ་ཀེ་ཏ་རཱ་ཧུ་ལ་ས་པ་རི་ཝཱ་ར་ཨརྒྷཾ་ནས་ཤཔྟ་པཱུཙ་

ཧོ། ཧཱུཾ༔ སངས་རྒྱས་བསྟན་དང་འགྲོ་བའི་དོན་མཛད་ཕྱིར། །གང་བཅོལ་ལས་རྣམས་ཐོགས་མེད་སྒྲུབ་མཛད་པའི། །སྣང་སྲིད་དྲེགས་པའི་སྡེ་དཔོན་རཱ་ཧུ་ལ། །འཁོར་དང་བཅས་ལ་གུས་པས་བསྟོད་པར་བགྱི། །བཅས་བརྗོད་བསྒྲུབ་པའི་འབྲས་བུ་ནི། །མ་གྲུབ་བར་དུ་མདུན་དེ་ལ། །གཤེགས་བསྡུ་མི་བྱ་མཆོད་གཏོར་འབད། །ཏིང་འཛིན་དམིགས་པས་ལས་ལ་གཅུན། །ཐུན་མཚམས་རང་ཉིད་ཡི་དམ་ལྷའི། །ཞལ་གྱི་རླངས་པ་སྤྲིན་ཕུང་དུ། །གྱུར་བས་ནམ་མཁའ་གང་བར་བསམ། །རྩ་སྔགས་དང་འབྲེལ་སྔགས་འདི་བཟླས། ཨོཾ་སབ་སབ་ཧཱུྃ་ཧཱུྃ་སོབ་སོབ། ཅེས་དང་ཆར་སྤྲིན་བསྡུས་པ་རྣམས། །མི་འཐོར་འཛིན་པའི་སྔགས་འདི་བཟླ། ཨོཾ་བཛྲ་ཏུནྟ་མི་ལི་མི་ལི་སྭཱ་ཧཱ། སྐབས་འདིར་དར་རས་སྔོན་པོ་ལ། །སྤྲིན་སྡུད་སྔགས་བྲིས་ཕྱོགས་ཀུན་གཡབ། །སྤྲིན་ཆེན་མདོ་ཡང་དག་པར་འདོན། རེས་འགའ་རང་ཉིད་གཡུ་འབྲུག་གསལ། སྐད་ཀྱིས་སྟོང་ཁམས་གང་བར་བསམ་ལ་འབྲུག་སྐད་སྔགས་འདི་བཟླ། ཨོཾ་དྲ་ཞི་ཞིམ་གྱི་ཚ་བ་རན་ལོ་བྷི་ཤ་པ་ཚ་པ་ཚ་ཧཱུྃ་ཕཊ། གཙང་མའི་གཟར་བུས་ཕྱོགས་ཀུན་ཏུ། །ཆུ་གཙང་འཐོར་ཞིང་སྐད་མཐོན་པོས། །སློབ་དཔོན་ཆེན་པོའི་གསུང་གསང་འདི། །ཕྱོགས་བཅུའི་ལྷ་ཀླུ་ཀུན་ལ་བསྒྲགས། རྒྱལ་བོ་ཆེན་པོ་སྡེ་བཞི་འཁོར་དང་བཅས་པས་རླུང་དང་རླུང་ལྷ་རླུང་བདག་ཐམས་ཅད་རི་རབ་ཆེན་པོའི་

འོག་ཏུ་ནོན་ཅིག༔ ཆར་འབབ་པ་ལ་བར་དུ་གཅོད་པ་ཐམས་ཅད་ཐུལ་ཅིག །ཕྱོགས་སྐྱོང་ཆེན་པོ་བཅུ་འཁོར་དང་བཅས་པས་བར་སྣང་གི་ཁམས་སུ་སྤྲིན་དང་ན་བུན་གྱི་ཚོགས་ཆེན་པོ་རབ་ཏུ་གཏིབས་ཤིག༔ ཀླུ་ཆེན་པོ་བརྒྱད་འཁོར་དང་བཅས་པ་རྣམས་ཀྱིས་འཛམ་བུའི་གླིང་དང་༔ ཡུལ་ཕྱོགས་འདི་དག་ལ་ཆར་གྱི་རྒྱུན་རབ་ཏུ་ཕོབ་ཅིག༔ མྱུར་དུ་ཕོབ་ཅིག༔ དྲག་ཏུ་ཕོབ་ཅིག༔ ལོ་འབྲས་འབྲུ་བཅུད་ཕུན་སུམ་ཚོགས་པ་སྤེལ་ཅིག༔ ཡུལ་རིགས་དང་རྒྱལ་ཁམས་ཐམས་ཅད་ཀྱི་བཀྲ་ཤིས་དཔལ་འབྱོར་དར་ཞིང་རྒྱས་པར་མཛོད་ཅིག༔ ཅེས་གསུམ་མམ་བདུན་བརྗོད། དམ་སྡོམ་དག་ལ་གཅེས་སྤྲས་དང་། །ཀུན་སློང་ཁེ་གྲགས་སྐྱོན་ཅན་སྤངས། །འགྲོ་ལ་བཅོས་མིན་སྙིང་རྗེ་སྒོམ། །ལྷ་དང་བླ་མའི་གདམས་ངག་ལ། །ལོག་ལྟ་ཐེ་ཚོམ་མི་བྱ་སྟེ། །ཡིད་ཆེས་དད་པས་དཔའ་གདེང་བསྐྱེད། །གྲིབ་ཅན་མི་དང་ཟས་ལ་འཛེམ། །ཤ་དང་སྒོག་ཙོང་ལ་སོགས་སྤངས། །ཆར་པ་འབབ་དང་མི་འབབ་ཀྱི། །རེ་དོགས་རྣམ་རྟོག་མི་མང་བར། །རྒྱུ་ལས་འབྲས་བུ་འབྱུང་བ་ལ། །ཐེ་ཚོམ་མེད་པའི་ཡིད་ཆེས་བྱ། ། ལས་སྦྱོར་འགྲུབ་ཚེ་གཏང་རག་གི །མཆོད་པས་ལྷ་ཚོགས་མཉེས་བྱས་ལ། །བཟོད་གསོལ་རྟེན་ལ་བརྟན་བཞུགས་དང་། །བཀྲ་ཤིས་དགའ་སྟོན་མཐའ་རྒྱས་བྱ། །ཞེས་པ་འདི་ནི་ཌཾ་བྷི་བའི། །ཐུགས་བཅུད་གདམས་པ་ཟབ་མོ་ལ། །བླ་མའི་མན་ངག་

གིས་བརྒྱན་ཏེ། །ཟབ་ཆོས་འདི་ཡིན་ལག་ཏུ་བླངས། །བྱ་བཏང་སྣ་ཚོགས་རང་གྲོལ་གྱིས། །འཇིགས་མེད་བསམ་གཏན་གླིང་དུ་སྦྱར། །དགེ་བས་འཇིག་རྟེན་ཁམས་རྣམས་སུ། །བཀྲ་ཤིས་ལོ་ལེགས་འབྱུང་གྱུར་ཅིག ༈ །དབང་ཆེན་ཧེ་རུ་ཀ་ལ་འདུད། །ཆར་འགོང་མནན་པའི་མན་ངག་ནི། །དུག་ཤོག་ངོས་ལ་དམ་སྲིའི་གཟུགས། །མི་ཡི་ལུས་ལ་བྱ་མཆུ་ཅན། །སྐེམ་རིད་ཡན་ལག་ལྕགས་སྒྲོག་བཅུག །སྙིང་གར་ཏྲི་ཡིག་ཛས་ལྟེམས་མཐར། །ཡ་མ་དམ་སྲི་གམ་པ་རི་མ་ར་ཡ་ཛ༔ ཆར་འགོང་མཱ་ར་ཡ་ནན་ནན། ཞེས་དང་གཟུགས་ཀྱི་ཕྱི་རོལ་ཏུ་མགོ་ནས་བརྩམས་ཏེ་གཡོན་བསྐོར་ལ་ཡ་མ་དམ་སྲི་གམ་པ་རི་མ་ར་ཡ་ཛཿ ཡུལ་ཕྱོགས་འདིར་ཆར་འབེབས་པ་ལ་བར་དུ་གཅོད་པའི་དམ་སྲི་ཆར་འགོང་སྡོངས་ཟླ་རྒྱབ་རྟེན་དང་བཅས་པའི་ལུས་ངག་ཡིད་གསུམ་ཁ་རྗེ་དབང་ཐང་མཐུ་སྟོབས་རྫུ་འཕྲུལ་དང་བཅས་པ་སྟཾ་བྷ་ཡ་ནན་ཞེས་བྲིས་ཕྱི་མ་ཛཿཁྲམ་བསྐོར། ཚིག་བཞིར་ཛཿཧཱུྃ་བཾ་ཧོཿ ཉྭ་བཞིར་མཱ་ར་ཡ་རྦད་བྲིས། །དེ་ནས་ལིངྒ་བྲུབ་ཁུང་བཅུག །རང་ཉིད་བདག་བསྐྱེད་ཏིང་འཛིན་གྱིས། །གསེར་སྐྱེམས་གཟུ་དཔང་གསོལ་བའི་རྗེས། ཨེ་ཡཾ་རཾ་ཛྭ་ལ་རཾ། བྲུབ་ཁུང་ཡངས་ཤིང་གཏིང་ཟབ་པའི་ནང་དུ་ཏྲི་ལས་ཆར་འབེབས་པ་ལ་བགེགས་བྱེད་པའི་དམ་སྲིད་ཆར་འགོང་རིད་ཅིང་ཉམ་ཐག་པའི་ལུས་ཅན་དུ་གྱུར༔

ན་མོ་རྩ་བརྒྱུད་བླ་མ་ཡི་དམ་དཀོན་མཆོག་གསུམ༔ ཁྱད་པར་རྟ་མཆོག་རོལ་བའི་ལྷ་ཚོགས་དང་༔ དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས༔ སྔགས་དང་ཏིང་འཛིན་བསླུ་མེད་རྟེན་འབྱུང་གིས༔ བདེན་པའི་མཐུ་ཡིས་ཡུལ་འདིའི་སྐྱེ་འགྲོ་ཡི༔ བདེ་སྐྱིད་འཕྲོག་པའི་གདོན་བགེགས་ཐམས་ཅད་དང་༔ ཁྱད་པར་ཆར་པ་འབབ་ལ་བར་གཅོད་པའི༔ ཆར་འགོང་འབྱུང་བོ་སྡོངས་ཟླ་རྒྱབ་རྟེན་བཅས༔ གང་ལ་གནས་ཀྱང་ལིངྒ་འདི་ཉིད་ལ༔ ཁུག་ཅིག་བཛྲ་ཨངྐུ་ཤ་ཡ་ཛ༔ སྐེད་ནས་འཆིངས་ཤིག་བཛྲ་པཱ་ཤ་ཧཱུྃ༔ ཡན་ལག་སྡོམས་ཤིག་བཛྲ་སྥོ་ཊ་བཾ༔ མྱོས་པར་གྱིས་ཤིག་བཛྲ་གྷན་ཌེ་ཧོ༔ ཕྱེས་ཤིག་བཛྲ་པྲ་བེ་ཤ་ཡ་ཕཊ༔ དབྱེར་མེད་སྟིམ་ཅིག་ཨ་བེ་ཤ་ཡ་ཨ༔ ཞེས་པ་དགུའམ་ཉེར་གཅིག་གིས། བཀུག་ལ་སྙིང་གའི་ཏྲི་ཡིག་བཅག །ལིང་ལྟེབ་སྔོ་དམར་སྐུད་པས་བཅིངས། །སྟེང་དུཐུན་རྫས་དུམ་གཅིག་བཞག །གྲུ་གསུམ་བྲུས་དོང་ནང་དུ་བཅུག །དེ་སྟེང་རོ་ཡམ་སྟེང་འོག་ལ། །རི་རབ་རྒྱ་གྲམ་བྲིས་པས་བཀབ། །ས་ཁེམ་ཆུ་ཕོར་བྲོ་སོགས་ཀྱི། །ཆུན་པོ་མེ་སྦར་བཅུ་གསུམ་རེ། །རིམ་པར་གཡོགས་སྟེང་སས་བཀབ་ཅིང་། །རྟ་བྲོ་ལས་བྱང་བཞིན་བརྡུངས་ལ། །ཆར་འབེབས་པ་ལ་བར་དུ་གཅོད་པའི་བགེགས་དང་འབྱུང་པོ་ཐམས་ཅད་

མཱ་ར་ཡ་ནན། སྟ་བྷ་ཡ་ནན། ན་ཤ་ཡ་ནན། བྷན་དྷ་ཡ་ནན། ཨོཾ་ལཾ་ཨ་ལཾ་ཧཱུྃ་ལཾ་སྟཾ་བྷ་ཡ་ནན། ཞེས་བརྗོད་དམིགས་མེད་རྒྱ་ཡིས་བཏབ། །ཅེས། རླུང་གནོན་བྱ་ཚུལ་འདི་ལྟ་སྟེ། །གྲོ་ཤོག་ངོས་ལ་རླུང་ལྷའི་གཟུགས། །ངག་འདོན་ལྟར་བྲིས་སྙིང་ཁ་རུ། །སྲོག་གི་ངོ་བོ་ཡཾ་ཡིག་མཐར། །རླུང་ལྷ་རླུང་དང་བཅས་པ་ནན་ནན་སྟཾ་བྷ་རཀྵ་ཧཱུྃ། ཞེས་བྲིས་གཟུགས་མཐར་ཡཾ་ཡིག་ནི། །བརྒྱད་ཀྱིས་བསྐོར་བའི་མཐར་འདི་བྲི། ཨོཾ་བྷ་ཡ་བྷྱེ་ཨོཾ་སྟྭཾ་བྷ་ཡ་སྟྭཾ་བྷ་ནན། རླུང་ལྷ་སྟྭཾ་བྷ་ནན་བྷ་ཡ་བྷེ་བྷན་དྷ་བྷན་དྷ་བྷན་དྷ་ཡ་བྷན་དྷ་ཡ་སྟྭཾ་བྷ་རཾ་བྷ། སྟྭཾ་བྷ་ཡ་སྟཾ་བྷ་ཡ་ཡཾ་ཡཾ་ནན་ལཾ་ནན་ཧཱུྃ་བྷ་ཡུ་སྟཾ་བྷ་ཛ་ཛ༔ ནན་ནན། ཕཊ་ཕཊ། ཅེས་པའི་ཚར་གསུམ་ཡིག་མགོ་ནི། ཕྱིར་བསྟན་གཡས་བསྐོར་བྲིས་པ་ལ། །བསྐྱེད་བསྟིམ་དམིགས་པ་འདི་ལྟར་བྱ། །གཟུགས་བརྙན་མི་དམིགས་པ་སྟོང་པ་ཉིད་དུ་གྱུར༔ སྟོང་བའི་ངང་ལས་ཡཾ་དུད་ཁ་ཡོངས་སུ་གྱུར་པ་ལས་རླུང་ལྷ་དུད་པའི་མདོག་ཅན་ཤྭ་བ་ཡུ་མོའི་སྟེང་ན་འཁོད་པ་ལག་པ་གཉིས་ཀྱིས་རླུང་རས་དྲིལ་ཏེ་པང་དུ་འཕྲེད་ལ་འཛིན་པཿ རླུང་ལྷ་ཤྭ་བ་དང་བཅས་གཉིད་ལོག་པའི་རྣམ་པ་ཅན་དུ་གྱུར༔ རང་གི་ཐུགས་ཀའི་ས་བོན་ལས་ཁྲོ་བོ་ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་འཕྲོས་ཏེ་

ནུབ་བྱང་ནས་རླུང་ལྷ་འཁོར་བཅས་དང་གཞན་ཡང་ཆར་སྤྲིན་འཐོར་བར་བྱེད་པའི་རླུང་གི་བདག་པོ་ཐམས་ཅད་བཀུག་སྟེ་གཟུགས་བརྙན་ལ་ཐིམ་པར་གྱུར༔ ན་མོ་རྩ་བརྒྱུད་བླ་མ་ཡི་དམ་དཀོན་མཆོག་གསུམ༔ ཁྱད་པར་རྟ་མཆོག་རོལ་བའི་ལྷ་ཚོགས་དང་༔ དཔའ་བོ་མཁའ་འགྲོ་ཆོས་སྐྱོང་སྲུང་མར་བཅས༔ སྔགས་དང་ཏིང་འཛིན་བསླུ་མེད་རྟེན་འབྱུང་གི༔ བདེན་པའི་མཐུ་ཡིས་རླུང་ལྷ་འཁོར་བཅས་དང་༔ ཆར་སྤྲིན་འཐོར་བར་བྱེད་པའི་རླུང་གཏོང་བའི༔ འབྱུང་བོ་ཐམས་ཅད་ཨཀྵར་ཡ་ཛ༔ ཛཿཧཱུྃ་བཾ་ཧོ༔ གཟུགས་དང་དབྱེར་མེད་གྱུར༔ ཞེས་ལན་མང་རྩ་སྔགས་མཐར། བྷ་ཡུ་ཨཀྵར་ཡ་ཛ༔ ཞེས་སྔགས་བརྒྱ་རྩས་བཀུག་ནས་ནི། ལྟེ་བར་སྲོག་ཡིག་མ་བཅག་པར། །ལྟེ་བ་ལ་ཚོན་སྐུད་སྣ་ལྔས་བཅིངས། །ཤྭ་བའི་སྙིང་ཤུན་རྙེད་ན་རབ། །མ་རྙེད་ཤྭ་སྤུས་དྲིལ་བྱས་ཏེ། །རྫ་གསར་གའུ་ཁ་སྦྱོར་དུ། །བཅུག་ལ་ཚོན་སྐུད་སྣ་ལྔས་བཅིང་། །ནུབ་བྱང་མཚམས་སུ་གྲུ་གསུམ་དོང་བཅུག་ལ། །གཡའ་མ་རྒྱ་གྲམ་བྲིས་ནས་དོང་ཁ་གཅོད། །སཙྪཱ་སེར་པོ་རབ་གནས་ལྡན་པ་བཞག །རླུང་ལྷ་རླུང་དང་བཅས་པ་རྣམས། །རི་རབ་ཆེན་པོའི་རྨའ་ཞབས་སུ། །དབང་མེད་འཐིབས་ཀྱིས་མནན་བསམ་ལ། །ཨོཾ་ཆུར་ཡ་བྷ་ཡུ་སྟཾ་བྷ་ཡ་ནན། ཞེས་པ་བརྒྱ་སྟོང་བཟླས་པའི་རྗེས། །དམིགས་པ་མེད་པས་རྒྱས་བཏབ་

བོ། །དོན་འབྲས་འགྲུབ་ནས་རླུང་ལྷའི་གཟུགས། །དོང་ནས་བླང་ལ་འོ་མས་བཀྲུ། །སྤྱན་མའི་སྔགས་མང་བཟླས་པས་གསོ། །ཞེས་པ་དང་དེ་ལྟ་བུའི་ཆར་འབེབས་ཀྱི་གདམས་པ་ཟབ་མོ་འདིའི་སྒོ་ནས་ཆར་ཤིན་ཏུ་དཀའ་བའི་ལོ་མང་བོར་ཆར་འབེབས་བྱས་པའི་ཉིན་གསུམ་བཞི་ལས་མི་འགྱངས་པར་བབས་པ་ལན་གྲངས་མང་བོར་མྱོང་བས་གྲུབ་པ་ཡིན་པས་གདམས་ཟབ་འཁོར་ལོ་འདི་གཉིས་དམ་མེད་པ་སྲེད་ཅན་རྣམས་ལ་མ་སྟོན་ཅིག །ས་མ་ཡ རྒྱ་རྒྱ་རྒྱ། སྡེ་བརྒྱད་མཆོད་པའི་མཇུག་ཏུ། རླུང་ལྷ་བཻཌཱུར་རཾ་པ་དང་། །ཕྲེང་ལྡན་འཇིག་བྱེད་འཇིག་རྟེན་སྤྲིན། །ཚངས་ཆེན་ཀུན་མགྱོགས་རྣམས་འཐོར་བྱེད། །འཁོར་དང་བཅས་པ་ཁྱེད་རྣམས་ལ། །མཆོད་པ་དམ༴ །གསེར་སྐྱེམས༴ །ཆར་སྤྲིན་བཟང་བོ་འཐོར་བྱེད་པའི། །མི་མཐུན་རླུང་རྣམས་ཞི་བ་དང་། །མཐུན་པའི་རླུང་གིས་ཕྱོགས་ཀུན་ནས། །ཆར་སྤྲིན་བཟང་བོ་མྱུར་བསྡུས་ཏེ། །ཡུལ་ཕྱོགས་འདི་ཡི་ལོ་ཏོག་ལ། །ཕན་པའི་ཆར་རྒྱུན་མྱུར་བབས་ཏེ། །རྩི་སྨན་ལོ་འབྲས་ལེགས་སྨིན་པས། །འགྲོ་ཀུན་བདེ་སྐྱིད་ལྡན་པར་མཛོད། །ལན་བདུན་མར་མཆོད། ཨ་ཡང་མེ་འདུ་ལིང་ལིང་ཐིབ་ཐིབ་ཛ་ཛ་ནཱ་ག་ཕོབ་ཕོབ་ཟུ་ར་ཕོབ་ཀ་ར་ཕོབ་སྤྲིན་བསྡུས་ཆར་ཕོབ་ཅིག་སྭཱ་ཧཱ། ནཱ་ག་རཱ་ཛ་ས་མ་ཡ་ཧཱུྃ་པ་ཤཾ་ཀུ་རུ་སྭཱ་

ཧཱ། སརྦ་མངྒ་ལཾ། ཆུ་མིག་གནས་པ་ཅན་གྱི་སར། རང་གི་མདུན་འཁོར་ལོ་གཡོན་དུ་བསྐོར་བའི་མདུན་ས་སྟེགས་ཁེབས་སྔོན་ཅན་གྱི་སྟེང་དུ། དབུས་སུ་གཟའ་ཡབ་ཡུམ་གསུམ་ལ་གཏོར་མ་གཡས་གཅུས་གཉིས་དང་གཡོན་གཅུས་མཐའ་བསྐོར་གཟའ་བརྒྱད་ལ་གཡས་གཅུས་བརྒྱད་གདོང་མོ་བཞི་ལ་གཡོན་གཅུས་བཞི་དང་མཐའ་ཐེབ་ཀྱུ་སྨན་རཀ་སོགས་ཀྱིས་བསྐོར། དེའི་གཡས་ཕྱོགས་སྡེ་བརྒྱད་མཆོད་པ་རིལ་བུས་གཏམས་པ་དང་། གཡོན་ཕྱོགས་ཀླུཆེན་དགུ་ལ་ཁམ་ཕོར་དགུ་ཀླུ་སྨན་ར་སྔོན་གྱི་འོ་མས་སྦགས་པ། མདུན་ཉེར་སྤྱོད་དང་མཆོད་གཏོར་གང་དགོས་རྣམས་ཚོགས་གཏོར་ཆད་ཐོ་བསྟན་མ་སོགས་དང་བདག་བསྐྱེད་ཀྱི་གཏོར་མ་སོགས་གྲུབ་ན་རབ། གྲོགས་གཞན་རྣམས་ཡོད་ན་ཀླུ་བསངས་ཀླུ་གཏོར་ཀླུའི་སྤང་སྐོང་མདོ། སྤྲིན་ཆེན་པོའི་མདོ་དང་ཆོས་སྐྱོང་དང་ཡུལ་ལྷ་རྣམས་ཀྱི་བསངས་གཏོར་བསྔོས་རྣམས་རྒྱུན་དུ་རྒྱས་པར་བྱེད། རང་གཅིག་པུ་ཡིན་ན་ཐམས་ཅད་ལ་མ་ཆད་པ་ཙམ་རྒྱུན་དུ་དགོས། འདི་ནི་ཞལ་རྒྱུན་གྱི་ལག་ལེན་ཡིན་ནོ། །ཆར་ཆུ་དུས་སུ་འབབས་པར་ཤོག །

གཏེར་གསར་རྟ་ཕག་ཡིད་བཞིན་ནོར་བུའི་བསྙེན་ཡིག་ཉམས་ཆུང་ཡིད་ཀྱི་མུན་སེལ། བྱ་བྲལ་སྐལ་ལྡན་རིག་གྲོལ།

༄༅། །གཏེར་གསར་རྟ་ཕག་ཡིད་བཞིན་ནོར་བུའི་བསྙེན་ཡིག་ཉམས་ཆུང་ཡིད་གྱི་མུན་སེལ་ཞེས་བྱ་བ་བཞུགས་སོ།།

ན་མོ་གུ་རུ་དེ་ཝ་ཌཱཀྐི་ཡེ། དམིགས་མེད་ཁྱབ་བརྡལ་ཆོས་སྐུའི་ངང་ཉིད་ལས། །འགགས་མེད་གཟུགས་སྐུར་འཆར་བའི་རྩ་གསུམ་ལྟར། །བཏུད་དེ་ལྷ་བསྙེན་བཟླས་བྱའི་དམིགས་རིམ་གནང་། །ཆོས་གྲོགས་ཆེད་དུ་འདི་ལ་སྣང་བ་རྩོལ། །དེ་ལ་འདིར་གཏེར་གཏོན་ཆེན་པོ་བདེ་ཆེན་རྒྱལ་པོས་སྤྱན་དྲངས་པའི་ཡི་དམ་ཁྱད་འཕགས་རྟ་ཕག་ཡིད་བཞིན་ནོར་བུའི་བསྙེན་པ་བྱེད་པ་ལ། སྤྱིར་སྔོན་འགྲོ་དངོས་གཞི་རྗེས་ཀྱི་རིམ་པ་སྤྱི་དང་། ཁྱད་པར་སྔོན་འགྲོ་བཞི་སྦྱོར་གྱི་དམིགས་གནང་།

བགེགས་གཏོར་ནས་མཚམས་གཅོད་སྲུང་འཁོར་བསྒོམ་པ། བྱིན་འབེབས་མཆོད་པ་བྱིན་རླབས། དེ་དག་གི་ཚེ་དམིགས་པ་ཇི་ལྟར་བྱ་ཚུལ་དང་། དངོས་གཞི་གསར་མའི་སྔགས་ལམ་དུ་མ་བསྒྲགས་པའི་སྔ་འགྱུར་བའི་ཁྱད་ཆོས་ཏིང་ངེ་འཛིན་རྣམ་པ་གསུམ་གྱི་གཞི་བཟུང་ཚུལ་སོགས་ཀྱི་མཚོན། རྒྱུ་ཡིག་ལས་དབྱིངས་ལྔའི་དཀྱིལ་འཁོར་སོགས་གསལ་བཏབ་ཅིང་། རྟེན་པའི་དཀྱིལ་འཁོར་བསྒོམས་ནས་བསྟོད་པའི་བར་ཇི་ལྟར་བྱ་ཚུལ་གྱི་དམིགས་གནད་རྣམ་ངེས་པར་བྱས་ནས། འདིར་

གལ་ཆེ་བ་བཟླས་པའི་ཚེ་ཅུང་ཟད་སྤྲོས་ཏེ་བཤད་པ་ལ། དེ་ཡང་བསྐྱེད་རིམ་གསལ་བཏབ་ཅིང་། རང་ཉིད་ལྷ་རུ་སྣང་ཡང་། རང་བཞིན་སྟོང་པ་ཞེན་མེད་སྒྱུ་མ་ཙམ་དུ་ཆུ་སྣོད་དང་མེ་ལོང་གི་གཟུགས་བརྙན་བཞིན་བསྐྱེད་དེ། སེམས་ཉིད་སྟོང་པ་ལྷ་སྐུར་ཤར་ཞིང་། ལྷ་སྐུའི་ངོ་བོ་སེམས་ཉིད་སྟོང་པ་ལས་མ་གཡོས་པ་ཞིག་གསལ་ཡང་ཡང་འདེབས་པ་ནི། ལུས་ལྷར་ཉེ་བའི་བསྙེན་པའི་གཙོ་བོ་ཡིན་པ་བླ་མ་མང་པོའི་ཞལ་ལས་ཐོས། གསར་མའི་རྒྱུད་སྡེ་ལས་ཀྱང་། །ཐུན་མོང་མཆོག་གི་དབྱེ་བ་ཡི། །བསྙེན་པ་རྣམ་པ་གཉིས་སུ་གསུངས། །ཞེས་གསུངས་སོ། དེ་ནས་ཐུན་སྒོར་ཀུན་མཁྱེན་ལྔ་པས་ཡང་གསང་རྒྱ་ཅན་དུ་རྩ་ལ་བའི་ངག་བྱིན་རླབས་འདི་ཡང་འབྲེལ་ཆགས་པའི་འདི་ལྟར། བདག་གི་ལྕེ་སྟེང་རམ་ཡིག་དམར་པོ་ལས། འབར་བའི་མེས་བསྲེགས་འོད་ཀྱི་རྣམ་པའི་ངང་། །མི་ཤིགས་མི་ཚུགས་རྡོ་རྗེ་ཕ་ལམ་གྱི། །རྒྱ་གྲམ་དམར་པོ་དྭངས་གསལ་ལྟེ་བའི་སྦུབས། །དབྱངས་གསལ་དཀར་པོ་མུ་ཏིག་འཕྲེང་ལྟར་བསྐོར། །རྒྱ་གྲམ་མཐའ་མར་ཡེ་རྡར་འཕྲེང་བས་བསྐོར། །སྔགས་འཕྲེང་རྣམས་ལས་འོད་ཟེར་

ཕྱོགས་བཅུར་འཕྲོས། །རྩ་བརྒྱུད་བླ་མ་རྒྱལ་བ་སྲས་བཅས་ཀྱི། །སྐུ་གསུང་ཐུགས་ཀྱི་བྱིན་རླབས་མ་ལུས་པ། །འོད་དམར་ཚུར་བཀུག་རྡོ་རྗེ་སྔགས་འཕྲེང་ལ། །ཐིམ་པས་དབྱེར་མེད་གཅིག་གྱུར་ངག་སྒྲིབ་སོགས། །དག་ཅིང་གསུང་གི་དངོས་གྲུབ་ཐོབ་པར་བསམ། །ཅེས་དམིགས་པ་དང་བཅས་དབྱངས་གསལ་བདུན་དང་། རྟེན་སྙིང་བརྒྱ་འམ་ཉེར་གཅིག་སོགས་བཟླས་ཏེ་བྱིན་རླབས་པས། ཕ་རོལ་བན་སྔགས་བོན་འདྲེ་སོགས་ཀྱི་སྔགས་ངག་མནན་སོགས་སྒྲོལ་ཞིང་། ཤ་ཆང་སྒོག་བཙོང་ལ་ཕུག་སོགས་ཀྱི་སྔགས་ནུས་མི་འཕྲོག་ཅིང་སྔགས་ཀྱི་ནུས་པ་མྱུར་དུ་བསྐྱེད་པ་སོགས་ཕན་ཡོན་མཐའ་ཡས་སོ། ཉི་མ་རེ་རེ་བཞིན་གྱི་ཐོག་མར་མ་བཏོགས་ཐུན་ཐམས་ཅད་ལ་འདི་མི་དགོས། དེ་ནས་རིགས་ཐུན་གཞན་ནས་བྱུང་བའི་བགྲང་འཕྲེང་བྱིན་རླབས་སོགས་བྱས་ན་བཟླས་པ་བྱེ་བ་ཕྲག་བརྒྱའི་འགྱུར་ཡོད་པར་གསུངས་པས་མན་ངག་བཞིན་གཞན་ནས་བླངས་ཀྱང་ཐུས། དེ་ལྟར་བྱིན་གྱི་བརླབས་པའི་འཕྲེང་བ་མིའི་ལག་མི་རྒྱུད་ས་རྗེན་ལ་མི་བཞག་འགོམས་ཡུག་མི་བྱ། འཕྲེང་ཐག་སྲ་ཞིང་མ་འཁྲུགས་པ་

དང་། སྤྱོད་ལམ་གྱི་ཚེ་རྡོར་མདུད་རྒྱབ་སྟེ་ལྷར་གསལ་ནས་མལ་སྲུང་བྱེད་པ་ཡང་གསུངས་སོ། འཕྲེང་བ་འདྲེན་པའི་ཚེ་ལྷ་དབབ་པའི་དམིགས་པ་དང་བཅས། རང་གི་སྙིང་ཁའི་ཐད་ཙམ་དུ། རྒྱུད་ལས། ཐེ་བོང་དང་ནི་སྲིན་ལགས་གིས། །ལས་རྣམས་ཀུན་ལ་ནོར་བུ་བགྲངས། །ཞེས་གསུངས་པ་ལྟར་བྱའོ། བཟླས་དམིགས་དངོས་གཞི་ནི། རང་གི་ཐུགས་ཀར་ཐབས་ཤེས་མཚོན་བྱེད་ཉི་ཟླའི་གའུ་ཁ་སྦྱོར་གྱི་ནང་དུ་ཐུགས་སྲོག་ཧྲཱིཿཡིག་སྔོ་དམར་གྱེན་སྒྲེང་རིང་ཆ་ཚགས་དྲག་འོད་ཟེར་འབར་བ་དང་བཅས་པའི་མཐའ་སྐོར་དུ་སྔགས་འཕྲེང་མདུན་ནས་བརྩམ་སྟེ་གཡས་བསྐོར་དུ་འཁོར་ཞིང་གནས་པ་ལས་འོད་ཟེར་འཕྲོས་པའི་སྣེ་ལ་མཆོད་པའི་ལྷ་མོ་ཕྱག་ན་མཆོད་རྫས་དཔག་མེད་ཐོགས་པ་བསམ་གྱིས་མི་ཁྱབ་པ་ཕྱོགས་བཅུར་འཕྲོས། ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་མུ་མེད་པ་ན་བཞུགས་པའི་རྒྱལ་བ་ཞི་ཁྲོ་སྐྱབས་ཡུལ་གྱུར་པ་དེ་ཅོག་ཐམས་ཅད་ལ། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པས་མཉེས་པར་བྱས་པས། གདུལ་བྱའི་ཚོགས་རྫོགས། དེ་དག་གི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་

བྱིན་རླབས་ཐམས་ཅད། ཐིག་ལེ་ཐིག་ཕྲན་ལུ་གུ་རྒྱུད་དང་འོད་ཟེར་སྣ་ལྔའི་རྣམ་པར་བདག་གིས་གནས་ལྔར་ཐིམ་པས། ལུས་ངག་ཡིད་གསུམ་བྱ་བ་སྤྱོད་ལམ་དང་བཅས་པའི་སྡིག་སྒྲིབ་ནད་གདོན་དང་བཅས་པ་དག་དབང་བཞི་གཅིག་བཅར་དུ་ཐོབ་ནས། ཡི་དམ་གྱི་ལྷ་དངོས་དང་ཁྱད་པར་མེད་པའི་འཕོ་མེད་འཇའ་ལུས་རྡོ་རྗེའི་ལུས་སུ་གྲོལ་བར་བསམ་པ་དང་། ཡང་ཐུགས་སྲོག་སྔགས་འཕྲེང་དང་བཅས་པ་ལས་འོད་ཟེར་འཕྲོས་སྟེ། མཁའ་ཁྱབ་ཀྱི་སེམས་ཅན་རྣམས་ལ་ཕོག་པས། བ་མོ་ཉི་འོད་ཀྱི་བཅོམ་པ་ལྟར། ལས་ཉོན་སྡིག་སྒྲིབ་བག་ཆགས་དང་བཅས་པ་སྐད་ཅིག་ཉིད་ལ་སྦྱངས་སྟེ། ལུས་སྣང་སྟོང་ལྷ་སྐུ། སེམས་སྐྱེ་མེད་ཆོས་སྐུར་སངས་རྒྱས་ཏེ་རྟ་མཆོག་རོལ་པའི་གོ་འཕང་ལ་བཀོད། ཡང་འོད་ཟེར་འཕྲོས་པའི་རྩ་གསུམ་རྒྱལ་བ་རབ་འབྱམས་ཐམས་ཅད་སྤྱན་དྲངས་ཏེ། མདུན་གྱི་ནམ་མཁར་བྱོན། དེ་དག་གི་ཀྱང་འཛབ་སྔགས་སྒྲོགས་པའི་གྲོགས་མཛད་ནས་བྱིན་རླབས་ནུས་མཐུ་ཐམས་ཅད་བདག་གི་སྔགས་འཕྲེང་ས་བོན་དང་བཅས་པ་ལ་ཐིམ་ཞིང་། སྔགས་ཀྱི་ནུས་པས་མཐའ་ཡས་

པའི་སེམས་ཅན་རྣམས་སངས་རྒྱས་ཀྱི་གོ་འཕང་ལ་མྱུར་དུ་འགོད་ནུས་པར་བསམ་ཞིང་། སྣང་བ་ཐམས་ཅད་འཇའ་འོད་ཐིག་ལེ་ལྷ་དང་གཞལ་ཡས་ཁང་། སྒྲ་གྲགས་པ་ཐམས་ཅད་སྔགས་ཀྱི་རང་སྒྲ། དྲན་རྟོག་ཐམས་ཅད་མཐའ་བྲལ་ནམ་མཁའ་ལྟ་བུ་སྟེ། ལྷ་སྔགས་ཡེ་ཤེས་རོལ་པའི་འཁྱེར་སོ་དང་ལྡན་པའི་སྒོ་ནས་བཟླས་པའི་སྐྱོན་དང་བྲལ་བར་བྱས་ཏེ་བཟླའོ། །བཟླས་པའི་སྐྱོན་ནི་དཔུང་བཟང་གི་རྒྱུད་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང་། །སྒྲ་ཆེར་མི་བྱ་ཧ་ཅང་ཆུང་བ་འང་མིན། །སྨྲ་བཞིན་མ་ཡིན་གཞན་དུ་གཡེང་བཞིན་མིན། །འགུག་སྐྱེད་གླད་སྐོར་ཚག་རྣམས་ཉམས་པ་མིན། །ཞེས་གསུངས་སོ། །གཞན་ཡང་གནད་མང་དུ་ཡོད་པའི་ངེས་པ་གལ་ཆེ། ཐུན་འཇུག་ཏུ་ཡང་འོད་ཟེར་འཕྲོས་པས་ཕྱོགས་བཅུའི་རྒྱལ་བ་མ་ལུས་པའི་སྐུ་ཡི་བྱིན་རླབས་ཐམས་ཅད་ཡི་དམ་ཡབ་ཡུམ་གྱི་རྣམ་པ་ཆེ་ཆུང་གྲངས་ལས་འདས་པ། གསུང་གི་བྱིན་རླབས་སྙིང་པོ་གཟུང་སྔགས་ཀྱི་རྣམ་པ། ཐུགས་ཀྱི་བྱིན་རླབས་ཕྱག་མཚན་རྡོ་རྗེ་ཐོ་བ། ཐོད་ཁྲག་ཕུར་བུ་ལ་སོགས་པའི་རྣམ་པ་ཉི་ཟེར་གྱིས་རྡུལ་ལྟར་བྱོན་ནས་རང་ལ་ཐིམ་པའི་མོས་

པ་བྱེད། དེ་ནས་ཐུན་བསྡུ་ཞིང་ལྷག་ཆད་སྐངས་བ། མཆོད་བསྟོད་བྱ་ཚུལ་སོགས་ཀྱང་ཤེས་པར་བྱ། དེ་རྣམས་དམིགས་པའི་གཙོ་བོ་ཡིན་ཅིང་། དགོས་པའི་དབང་གི་ཁ་ཚར་སོགས་བྱེད་ན། སྔགས་འཕྲེང་ལས་འོད་ཟེར་སྤྲོས་ཏེ་སྣོད་བཅུད་ཐམས་ཅད་ལ་ཕོག་པས་དག་པ་རམ་འབྱམས་ཀྱི་འཁོར་ལོ་གྱུར་པས་ནད་གདོན་སྒྲིབ་གཉིས་བག་ཆགས་དང་བཅས་པ་ཞི་བར་བསམ་པ་ནི་ཞི་བའི་དམིགས་པ། སྔར་བཞིན་འོད་ཟེར་སྤྲོས་པས་སྣོད་བཅུད་ཀྱི་ཡོན་ཏན་ཐམས་ཅད་བསྡུས་ཏེ་རང་ལ་ཐིམ་པའི་ཚེ་བསོད་ལུང་རྟོགས་ཀྱི་ཡོན་ཏན་ལེགས་ཚོགས་ཐམས་ཅད་རྒྱས་པར་མོས་པ་ནི་རྒྱས་པ། ཡང་འོད་ཟེར་སྤྲོས་པས་སྣང་སྲིད་ཀྱི་ཡོན་ཏན་ཐམས་ཅད་རང་གི་དབང་དུ་འདུས་པར་བསམ་པ་ནི་དབང་། འོད་ཟེར་མེ་ལྕེའི་འཕྲེང་བ་ལྟ་བུ་འཕྲོས་རང་ལ་གནོད་བྱེད་དམིགས་གསལ་ཡོད་ན་དེ་དང་། གནོད་བྱེད་གཟུགས་ཅན་གཟུགས་མེད་མཐའ་དག་གཞོབ་ཐུལ་གྱི་བསྲེགས་ལྷག་མ་རྣམས་རྒྱ་མཚོའི་ཕ་རོལ་མཐར་བསྐྲད་པར་བསམ་པ་དྲག་པོའི་དམིགས་པ། གཞན་ཡང་དོ་ལའི་འཁྱོགས་ཀྱི་བཟླས་པའམ། རྡོ་རྗེ་ལུ་གུ་

རྒྱུད་ཀྱི་བཟླས་པ་དང་། རྨི་ལམ་མཚན་ལྟས་ངན་པ་སོགས་བྱུང་ན་བཟློག་ཐབས་ཐོག་རྗིས་བྱ་ཚུལ་སོགས་ཀྱང་ཤེས་པར་བྱའོ། །ལྷ་འདྲེའི་ཆོ་འཕྲུལ་སོགས་བར་གཅོད་རྩམ་པ་བྱུང་ན། རང་གི་གནས་ལྔར་ཨོཾ་ཨཱཿཧཱུྃ་སྭཱ་ཧཱ། ཞེས་དཔའ་བོ་འབྲུ་ལྔ་གསལ་བཏབ་སྟེ། ཧཱ་ལས་ཡར་རིམ་བཞིན། བྱ་གྲུབ་མཉམ་ཉིད་ཆོས་དབྱིངས་སོར་རྟོག་མེ་ལོང་ཡེ་ཤེས་ཀྱི་ངོ་བོའི་མེ་ཁ་དོག་ལྔ་ལྡན་བྱུང་སྟེ་རང་གི་སྐང་མཐིལ་ནས་སྤྱི་གཙུག་གི་བར་རིམ་བཞིན་བསྲེགས་པ་དང་མཉམ་དུ་འགྲོ་བ་ལྔ། དུག་ལྔ། ཕུང་པོ་ལྔ། ཁམས་ལྔ་སོགས་ཀྱི་གནས་རིགས་བག་ཆགས་ཐམས་ཅད་བཅོམ་སྟེ་ཕྱིར་འཕྲོས་སྣོད་བཅུད་ཐམས་ཅད་གཞོབ་ཐུལ་གྱིས་བསྲེགས་པས་ཡེ་ཤེས་ལྔའི་རང་འོད་ཀྱི་མེའི་ཕུང་པོ་གཅིག་དུ་གྱུར་བར་མོས་ཤིང་། མཐར་མེ་ཐམས་ཅད་རང་ཞི་སྟེ་དམིགས་མེད་འོད་གསལ་གྱི་ངང་དུ་གློད་ནས་བཞག་པས་བར་གཅོད་གྱི་གཡུལ་ལས་རྒྱལ་བར་འགྱུར་རོ། །འདི་རྣམས་ཟླས་དམིགས་རག་རིམ་ཙམ་ཞིག་བཀོད་པ་ཡིན་ཅིང་། ཞིབ་པར་བླ་མའི་ཞལ་ལས་ཤེས་པར་བྱའོ། །གཞན་ཡང་གཙོ་ཆེ་བ་བསྙེན་པའི་སྐབས་སུ་ཡོན་ཏན་སྐྱེད་བྱེད།

དམ་ཚིག་གསུམ་དང་། སྲུང་བྱ་གསུམ་དང་། མ་ཉམས་པར་དགོས་ཚུལ་དང་། སྲོད་ཐུན་འཇུག་དབྱངས་གསལ་ཞབས་བཏགས་ལ་འདོན་ཚུལ་དང་། རྗེས་ཆོག་ཚོགས་བྱིན་རླབས་ནས། དང་པོ་འདོད་ཡོན་གྱི་མཆོད་པ་བླ་མ་ལྷ་སོགས་ལ་འབུལ་ཚུལ། བར་པས་དམ་ཚིག་གྱི་ཉམ་ཆགས་གསོ་ཚུལ། ཐ་མ་ཉ་བོ་སྐྱེང་ཅིང་རྫོང་ཕྲང་སྲོག་གསུམ་གྱི་རྩིས་ཟིན་ཅིང་། གསལ་བ་གསུམ་དང་། ཚེ་ཁྲུས་གནས་ལུང་གི་དགོངས་པ་སོགས་ལྡན་ན། འཚེང་གསུམ་གྱི་དོན་དུ་འགྱུར་ཚུལ་སོགས་དང་། གཞན་ཡང་ལྷག་ལ། བསྐུལ་ཆད་བསྟན་བསྡུ་ཆོག་སོགས་དང་། མཚམས་གྲོལ་བའི་ཚེ་དངོས་གྲུབ་ཇི་ལྟར་ལེན་ཚུལ་སོགས་ཟབ་གནད་རྣམས་ཀྱང་ཤེས་པ་གལ་ཆེའོ། འདོར་ན་བསྙེན་པ་ལ་འབད་པས་ལུས་མདངས་རྒྱས་ཤིང་། ངེས་འབྱུང་བྱང་སེམས། ཡང་དག་པའི་ལྟ་བ་རྣམས་ལ་བློ་ཇེ་རྒྱས་སུ་འགྲོ་ན། བསྙེན་པ་གནད་དུ་སོང་བ་ཡིན་ཅིང་། གཞན་ཡང་ཡང་གསང་བདུད་རྩིའི་རྒྱ་མཚོ་ལས། ཟླ་བ་གཅིག་གི་ཡི་དམ་མཐོང་། །འཕྲིན་ལས་རྣམ་བཞི་ངེས་པར་འགྲུབ། །རྟགས་དང་མཚན་མ་བཟང་པོ་

ཡང་། །ཉིན་རེ་མཚན་རེ་རིམ་པ་བཞིན། །དངོས་དང་རྨི་ལམ་ཉིད་དུ་གསལ། །ལོག་འདྲེན་བདུད་དང་བར་ཆད་འཇིགས། །ཀེག་དང་སྲིད་ངན་འཇིགས་བརྒྱད་སྒྲོལ། །ཅེས་དང་། སྐུ་ཡི་དངོས་གྲུབ་ཞལ་མཐོང་བ། །གསུང་གི་དངོས་གྲུབ་གསུང་ཐོས་པ། །ཐུགས་ཀྱི་དངོས་གྲུབ་གནས་ལུགས་ཀྱི། །དོན་མཆོག་ཕྱིན་ཅི་མ་ལོག་མཐོང་། ཐུན་མོངས་དངོས་གྲུབ་བརྒྱད་ལ་སོགས། །ལུས་ཉམས་ཉོན་མོངས་ཀུན་ལས་གྲོལ། །ཅེས་གསུངས་པས་མྱུར་ལམ་ལྷག་པའི་ལྷ་མཆོག །འདི་ལྟ་བུའི་སྒྲུབ་པ་ལ་སྤྱོད་ཅིང་སྤྲོ་བ་སྐྱེད་པར་རིགས་སོ། སྤྱིར་གསང་སྔགས་འགྲུབ་མི་འགྲུབ་དམ་ཚིག་དང་སྡོམ་པ་ལ་རག་ལས་པས། ལྷ་སྒྲུབ་མི་དགོས་དམ་ཚིག་སྲུང་། །དམ་ཚིག་སྲུང་ན་ལྷ་འགྲུབ་འགྱུར། །དམ་ཉམས་མཆོད་པ་ལྷས་མི་བཞེས། །ཞེས་དང་། །འཇམ་དཔལ་རྩ་རྒྱུད་ལས། །ཚུལ་ཁྲིམས་ཆལ་ལ་ཐུབ་དབང་གི །སྔགས་འགྲུབ་པ་ནི་མ་གསུངས་སོ། །མྱ་ངན་འདས་གྲོང་འགྲོ་བ་ལ། །ཡུལ་དང་ཕྱོགས་ཀྱང་མ་ཡིན་ནོ། །གསུངས་པས། རྩ་བ་དང་ཡན་ལག་གི་དམ་ཚིག་ཚུལ་བཞིན་དུ་བསྲུང་བ་དང་། ཆོས་འདི་སྟོན་པའི་བླ་

མ་དང་ཡི་དམ་སོགས་ལ་ཡིད་མི་ཆེད་པའི་ལོག་ལྟ་དང་ཐེ་ཚོམ་སྤངས་ཏེ་ཚུལ་བཞིན་དུ་གུས་པར་བགྱིས་ཅིང་། བསྙེན་སྒྲུབ་ལ་འབད་ན་རིང་པོར་མི་ཐོགས་པར། དངོས་གྲུབ་མྱུར་བ་དམ་པ་མང་པོས་གསུངས་སོ། །འདིར་སྨྲས་པ། རྣམ་པར་བཀྲ་བའི་བླངས་དོར་གནས་རིག་ནས། དགེ་ལ་ཤེས་པའི་གྲོགས་པོས་བསྐུལ་བའི་ཆེས། སྔ་འགྱུར་བསྟན་པ་འཛིན་ལ་རབ་དགའ་ཞིང་། ཕྱོགས་ཀུན་རྒྱས་ཕྱིར་བྱ་བྲལ་འཁྱམས་པོས་བྲིས། ཅེས་འདི་ཡང་རྗེ་བཙུན་གྲུབ་པའི་དབང་ཕྱུག་སྐལ་ལྡན་རང་གྲོལ་གྱི་ཞལ་གི་བདུད་རྩིའི་འཚོ་བའི་བྱ་བྲལ་སྐལ་ལྡན་རིག་གྲོལ་ལམ། མིང་གཞན་བསྟན་རབ་གྱིས་གྲོགས་མཆེད་བཀྲ་ཤིས་སོགས་ཀྱི་ངོ་མ་ལྡོག་བར་འགྲོ་མགོན་བླ་མའི་གདན་ས་ཀུན་བཟང་དགེ་བའི་ནགས་ཁྲོད་དུ་རང་གི་མཚམས་མལ་ནས་བྲིས་པའོ། །བཀྲིས།། །།

རྟ་ཕག་ཡིད་བཞིན་ནོར་བུའི་སྐྱེད་རྫོགས།

༄༅། །རྟ་ཕག་ཡིད་བཞིན་ནོར་བུའི་སྐྱེད་རྫོགས་བཞུགས་སོ། ཧྲཱིཿཡིག་སྔོ་དམར་ལས་འོད་ཟེར་ཕྱོགས་བཅུར། ཞེས་པའི་སྐབས་འདོད་ཁམས་ཀྱིས། སྣོད་བཅུད་ཐམས་ཅད་འོད་ཟེར་སྔོན་པོར་གྱུར་ནས། ཕྱི་སྣོད་འཇིག་རྟེན་རྣམས། ནང་བཅུད་སེམས་ཅན་ལ་ཐིམ། དེའང་རང་གི་ལྟེ་བར་ཐིམ། གཟུགས་ཁམས་གྱི་སྣོད་བཅུད་འོད་ཟེར་དམར་པོར་གྱུར་ནས་རང་གི་སྙིང་ཁར་ཐིམ། གཟུགས་མེད་ཁམས་འོད་ཟེར་དཀར་པོར་གྱུར་ནས་རང་གི་དཔྲལ་བར་ཐིམ་༡། ཡབ་ཡུམ་ལ་ཐིམ་༢། རང་ལུས་ཀྱང་མེ་ལོང་ལ་ཧས་བཏབ་པའི་ཀྱང་མདངས་དབུས་སུ་ཐིམ་པ་ལྟར་༢། སྙིང་ཁའི་ཧྲཱིཿཡིག་ལ་ཐིམ་པ་ནི། སྔ་འགྱུར་ལྟར་ན་ཁམས་༣་གསུམ་སྦྱོངས་བྱེད་ཞེས་དང་། གསར་མ་ལྟར་ན་མ་དག་པའི་ཕྱི་སྲིད་འོད་གསལ་དུ་སྦྱངས་བ་ཟེར། ཧྲཱིཿའ་འཆུང་ར་སྟ་ལ་ཐིམ་པས་སོས་ཀའི་ཐང་ལ་དམིགས་ཀྱུ་རྒྱུ་བ་ལྟ་བུའི་སྣང་བ་ཆར། ས་ཆུར་ཐིམ་པའི་རྟགས་༡། ར་སྟ་ཧ་ལ་ཐིམ་པས། ལུང་པ་དུ་བའི་ཁང་པའི་སྣང་བ་ཆར། ཆུ་མེར་ཐིམ་པའི་རྟགས། ཧའི་ལུས་མགོ་བོ་ལ་ཐིམ་པས། སྲིན་བུ་མེ་ཁྱེར་ལྟ་བུའི་སྣང་བ་ཆར། མེ་རླུང་

ལ་ཐིམ་པའི་རྟགས་༣། མགོ་བོ་གི་གུ་ལ་ཐིམ་པས། རླུང་ནམ་མཁའ་ལ་ཐིམ་༤། ནམ་མཁའ་སྤྲིན་མེད་ལ་ཟླ་འོད་ཀྱི་ཁྱབ་པ་ལྟ་བུའི་དཀར་ལམ་ཆར། གི་གུ་ཐིག་ལེ་ལ་ཐིམ་པས། ཉི་ཟེར་ལྟ་བའི་གདོང་དར་དམར་གྱི་གཡོགས་པའི་སྣང་བ་ལྟ་བུ་ཆར་ ཐིག་ལེ་སྣང་བ་༡ ན་ད་ལ་ཐིམ་པས། མུན་ཁུང་དྲག་པོར་སྣང་བའི་སེང་ཁུང་ཅུང་ཟད་ཙམ་ཡང་མེད་པའི་མུན་པ་ལྟ་བུའི་ནག་ལམ་ཆར། ཆེད་པ་དམར་ལམ་ ཤིན་ཏུ་ཕྲ་བའི་ན་ད་ཡང་འཇའ་ཡལ་བ་ལྟར་གྱུར་བས། ཨོཾ་ཆོས་སྐུ༴ གཡར་མ་སྟོན་གྱི་ནམ་མཁའ་སྒྲིབ་ ཉེར་ཐོབ་༣ བྱེད་ཀྱི་རྐྱེན་ཀུན་དང་བྲལ་བ་ལ་ཉི་འོད་ཀྱི་ཁྱབ་པ་ལྟ་བུའི་སྟོང་ཆེན་སྒྲིབ་གཡོགས་དང་བྲལ་བའི་འོད་གསལ་ཆར། སྔ་འགྱུར་ལྟར་ན། ཆོས་སྐུ་༡་དེ་བཞིན་ཉིད་ཀྱི་ཏིང་ངེ་འཛིན་དང་། ཕྱི་འགྱུར་གསར་མ་ལྟར་ན། མཆི་༡་བ་ཆོས་སྐུའི་ལམ་ཁྱེར་གྱི་འོད་གསལ་དེ་ཉིད་ལ་ཡུན་ཅི་གནས་སུ་མཉམ་པར་བཞག །ཨཱཿསྙིང་༴ འོད་གསལ་དེའི་ངང་ལས་ཆུ་ལས་ཉ་སྡང་བའི་ཚུལ་གྱི། རང་སེམས་ན་དར་ཀྲང་ཀྱི་ལང་ལུང་སྡོག་ནག་ལམ་ཆར། དེ་ནས་ཐིག་ལེར་སྡང་དམར༴ དེ་ལས་གི་གུ་དཀར་ལམ༴

དེ་ལས་ཧ་མེ་ཁྱེར༴ དེ་ལས་ར་སྟགས་དུ་བ༴ དེ་ལས་དམིགས་འགྱུ་ལྟ་བུའི་སྣང་བ་ཆར། སྔ་འགྱུར་ལྟར་ན། ལོངས་སྐུ་ཀུན་ཏུ་སྣང་ཏིང་ངེ་འཛིན་དང་། ཕྱི་འགྱུར་ལྟར་ན་བར་དོ་ལོངས་སྐུའི་ལམ་ཁྱེར། ཧཱུཾ་རྒྱུ་ལས་ཧྲཱིཿཡིག་དུ་ལམ་གྱི་གསལ་བ་དེ་ལས་ཨེ་ཡཾ་ར་སུཾ་ཀེཾ་རཾ། ཞེས་པ་ནས་རིམ་བཞིན་སྣོད་གཞལ་ཡས་ཁང་ནས་ནང་བཅུད་ལྷ་དང་ལྷ་ྈ་གཙོ་འཁོར་ཡོངས་རྫོགས་གསལ་བ་ནི། ཧཱུྃ་རྒྱུ་ལས་ཞེས་པ་ནས་འདིའི་བར་ལ། སྔ་འགྱུར་ལྟར་ན་སྤྲུལ་སྐུ་རྒྱུའི་ཏིང་ངེ་འཛིན་དང་། ཕྱི་འགྱུར་གསར་མ་ལྟར་ན་སྐྱེ་བ་དག་པ་སྤྲུལ་པའི་སྐུའི་ལམ་ཁྱེར་གྱི་སྐྱེད་པའི་རིམ་པ་ཡོངས་སུ་ཚངས་བའོ།། །།བཀྲིས།།

རྟ་ཕག་ཡིད་བཞིན་ནོར་བུ་ལས་རྩ་རླུང་སེངྒེའི་ཉམས་རྟོགས་བདེ་ཆེན་འོད་འབར། གཏེར་སྟོན་བདེ་ཆེན་རྒྱལ་པོ།

ཨོཾ༔ རྟ་ཕག་ཡིད་བཞིན་ནོར་བུ་ལས༔ རྩ་རླུང་སེངྒེའི་ཉམས་རྟོགས་བདེ་ཆེན་འོད་འབར་བཞུགས་སོ༔

ཨེ་ཝཾ་བདེ་སྟོང་ཟུང་འཇུག་རོལ་རྩེད་ཀྱིས༔ ཐར་འདོད་འགྲོ་རྣམས་ཀུན་བཟང་གོ་འཕང་ལ༔ དཀའ་བ་མེད་པར་ཚེ་གཅིག་བསྒྲོད་པའི་ཐབས༔ རྩ་རླུང་སེངྒེའི་ཉམས་རྟོགས་འདིར་བཤད་བྱ༔ གནས་གྲོགས་དུས་དང་ཡོ་བྱད་འཛོམས་པར་བསག༔ ཐུན་མོང་རྩ་བའི་སྔོན་འགྲོ་ཁྲིད་བཞིན་དང་༔ ཐེག་པ་ཆེན་པོའི་རླུང་གི་སྔོན་འགྲོ་ནི༔ དང་པོ་ལུས་གནད་རྣམ་སྣང་ཆོས་བདུན་གྱིས༔ རང་ལུས་ལྷ་སྐུ་འཇའ་མཚོན་ལྟ་བུར་བསྒོམ༔ ཐུགས་སྲོག་ཧྲཱིཿལས་འོད་ཟེར་མཚོན་ཆའི་མེ༔ སྤྲོས་པས་བགེགས་བསྐྲད་བསྲུང་

བའི་འཁོར་ལོས་བཅིང་༔ ནད་གདོན་སྡིག་སྒྲིབ་བར་གཅོད་ལྷག་མེད་སྦྱངས༔ ཐུན་མོངས་མིན་པའི་རྩ་རླུང་སྦྱངས་པ་ནི༔ རོ་རྐྱང་དབུ་གསུམ་མཚན་ཉིད་ཀུན་རྫོགས་ཀྱི༔ སྟེང་འོག་ཐབས་ཤེས་ཡི་གེ་ཨ་ཧཾ་གསལ༔ རླུང་རོ་དགུ་འཕྲུག་དམིགས་རིམ་བཅས་པས་དབྱུང་༔ རྩ་ཁམས་བྱིན་གྱིས་བརླབས་པའི་རིམ་པ་ལ༔ རྩ་གསུམ་འཁོར་བཅས་སྤྱི་བོ་བདེ་ཆེན་ན༔ རྩ་འདབ་སུམ་བརྒྱ་དྲུག་ཅུ་དག་ཏུ་གྱེས༔ གསང་གནས་རྩ་འདབ་ཉི་ཤུ་རྩ་བརྒྱད་བཅས༔ གསལ་བཏབ་རོ་སྐྱང་དབུ་གསུམ་འདུས་མདོ་རུ༔

ཉི་མའི་དཀྱིལ་འཁོར་གདན་ལ་ཐོ་རྩེགས་སུ༔ རྡོ་རྗེ་རྣལ་འབྱོར་དམར་མོ་གྲི་ཐོད་འཛིན༔ དེ་ཡི་སྤྱི་བོར་རིམ་བཞིན་མཐོ་རྩེགས་སུ༔ བདེ་ཆེན་རྒྱལ་པོ་དཔལ་སེང་མཚོ་རྒྱལ་དང་༔ པདྨ་འབྱུང་གནས་མཁའ་འགྲོ་ལས་ཀྱི་དབང་༔ མི་སྐྱོད་ཀུན་བཟང་ཡབ་ཡུམ་ཚང་བུག་ཏུ༔ སྐུ་ཕྱེད་ཐོན་ཙམ་འཇའ་འོད་ཀློང་དུ་གསལ༔ མོས་གུས་གདུང་ཤུགས་དྲག་པོས་གསོལ་འདེབས་ནི༔ ཨོཾ་ཨཱཿཧཱུཾ༔ འོག་མིན་དམ་པ་ཆོས་དབྱིངས་ཞིང་ཁམས་སུ༔ ཆོས་སྐུ་ཀུན་ཏུ་བཟང་པོ་ཡབ་ཡུམ་ལ༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་རྩོལ༔ འོད་ལྔ་བདེ་བ་ཆེན་པོའི་ཕོ་བྲང་དུ༔ ལོངས་སྐུ་རྡོ་རྗེ་སེམས་དཔའ་ཡབ་ཡུམ་ལ༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ རབ་འཇིག་སོ་ས་གླིང་གི་དུ་ཁྲོད་དུ༔ མཁའ་འགྲོའི་གཙོ་མཆོག་ལས་ཀྱི་དབང་མོ་ཆེར༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ མཆོད་རྟེན་ཆེན་པོ་བདེ་བྱེད་བརྩེགས་པ་རུ༔ མཚོ་སྐྱེས་རྡོ་རྗེ་པདྨ་འབྱུང་གནས་ལ༔

གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ དགའ་བཞིའི་བདེ་ཆེན་རྫོགས་པའི་ཞིང་ཁམས་སུ༔ ཡེ་ཤེས་མཚོ་རྒྱལ་ཨ་མ་གུན་སྟོབ་ལ༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ གཞུ་སྟོད་གཏེར་སྒྲོམ་མཚོ་རྒྱལ་གསང་ཕུག་ཏུ༔ ཟབ་གཏེར་བཀའ་བབས་བདེ་ཆེན་རྒྱལ་པོ་ལ༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ བདེ་ཆེན་ཨ་ཐུང་མེ་འོད་འཁྲུག་པའི་ཀློང་༔ མཁའ་འགྲོའི་གཙོ་མོ་རྡོ་རྗེ་རྣལ་འབྱོར་མར༔ གསོལ་བ་འདེབས་སོ་བདེ་དྲོད་འབར་བ་དང་༔ ཨ་ཧཾ་རྒྱུན་ཆད་མེད་པའི་དངོས་གྲུབ་སྩོལ༔ ལྷུན་གྲུབ་འོད་གསལ་རྟོགས་པར་བྱིན་གྱིས་རློབས༔ བདེ་སྟོང་རྒྱུན་ཆད་མེད་པར་བྱིན་གྱིས་རློབས༔ རང་སེམས་ཆོས་སྐུ་རྟོགས་པར་བྱིན་གྱིས་རློབས༔ སྙིང་ནས་མོས་གུས་རྩེ་གཅིག་གསོལ་བཏབས་པས༔ གོང་མ་རྣམས་ནས་འོག་མར་རིམ་ཞུ་ཐིམ༔ རྡོ་རྗེ་རྣལ་འབྱོར་མ་ཡང་འོད་ཞུ་ནས༔ ཨ་ཡིག་ལ་ཐིམ་མེ་འོད་འཕྲོ་བ་ལ༔ ཤེས་པ་གཏད་

ལ་ཞག་གསུམ་བུམ་ཅན་སློབ༔ བློ་རྨོངས་རྩ་གསུམ་ལ་རྟེན་འབར་འཛག་ནི༔ སྟེང་འོག་ཐབས་ཤེས་ཡི་གེ་གསལ་བ་ལ༔ རོ་སྐྱང་ནས་ཞུགས་ཨ་ཡིག་མེ་འབར་བས༔ ཧཾ་ཡིག་ཞུ་བ་བ་མོ་ལྟར་འཛག་ཅིང་༔ བུམ་ཅན་བརྒྱ་ཕྲག་ལས་ནི་མི་ཉུང་བར༔ འབར་འཛག་ཞུ་བདེས་རླུང་ཁུག་བརྒྱ་རྫོགས་སྦྱངས༔ སྤྲོས་བཅས་བློ་ཆེན་རྩ་འཁོར་ཡོངས་རྫོགས་ལ༔ རྟེན་ནས་ཐུན་མོང་མིན་པའི་འབར་འཛག་ནི༔ རོ་རྐྱང་དབུ་གསུམ་མ་འཁྱོག་ལ་ཁུམས་པར༔ མདུད་བྲལ་ལུས་ཀྱི་ཀ་བའི་ཚུལ་དུ་གནས༔ ཁར་བཅས་སྤྱི་བོའི་བདེ་ཆེན་འཁོར་ལོ་ན༔ རྩ་འདབ་སུམ་བརྒྱ་དྲུག་ཅུ་གྱེས་པ་ལ༔ ར་དང་ཧ་ལས་རྡོ་རྗེ་མཁའ་འགྲོ་ནི༔ སྐུ་མདོག་དཀར་གསལ་མེ་ལོང་ཡེ་ཤེས་སྐུ༔ ཞེས་སྡང་འཇོམས་ཕྱིར་རྡོ་རྗེ་གྲི་ཐོད་འཛིན༔ གཙོ་འཁོར་ཡབ་ཡུམ་སུམ་བརྒྱ་དྲུག་ཅུ་བཞུགས༔ མགྲིན་པ་ལོངས་སྤྱོད་འཁོར་ལོའི་གནས་ཉིད་དུ༔ རྩ་འདབ་བཞི་གྱེས་བརྒྱད་གཉིས་བཅུ་དྲུག་སྟེ༔ ཙ་དང་རི་ལས་རིན་ཆེན་ཌཱཀྐི་ནི༔ སྐུ་མདོག་སེར་གསལ་མཉམ་ཉིད་ཡེ་ཤེས་སྐུ༔ ང་རྒྱལ་འཇོམས་ཕྱིར་རིན་ཆེན་གྲི་ཐོད་འཛིན༔ གཙོ་འཁོར་

ཡབ་ཡུམ་བརྒྱད་གཉིས་བཅུ་དྲུག་བཞུགས༔ སྙིང་ཁ་དྲན་པ་རྣམ་བཀོད་འཁོར་ལོ་ན༔ རྩ་འདབས་སུམ་ཅུ་རྩ་གཉིས་གྱེས་པ་ལ༔ ཧྲཱིཿདང་མ་ལས་སངས་རྒྱས་ཌཱཀྐི་ནི༔ སྐུ་མདོག་མཐིང་གསལ་ཆོས་དབྱིངས་ཡེ་ཤེས་སྐུ༔ གཏི་མུག་འཇོམས་ཕྱིར་འཁོར་ལོ་གྲི་ཐོད་འཛིན༔ གཙོ་འཁོར་ཡབ་ཡུམ་སུམ་ཅུ་རྩ་གཉིས་བཞུགས༔ ལྟེ་བ་བསྐྱེད་བྱེད་སྤྲུལ་པའི་འཁོར་ལོ་ན༔ རྩ་འདབ་དྲུག་ཅུ་རྩ་བཞི་དག་ལ་ནི༔ ཧྲཱིཿདང་ནི་ལས་པདྨ་ཌཱཀྐི་ནི༔ སྐུ་མདོག་དམར་གསལ་སོར་རྟོགས་ཡེ་ཤེས་སྐུ༔ འདོད་ཆགས་འཇོམ་ཕྱིར་པདྨ་གྲི་ཐོད་འཛིན༔ གཙོ་འཁོར་ཡབ་ཡུམ་དྲུག་ཅུ་རྩ་བཞི་བཞུགས༔ གསང་གནས་མྱོང་བྱེད་བདེ་ཆེན་འཁོར་ལོ་ན༔ རྩ་འདབ་ཉི་ཤུ་རྩ་བརྒྱད་གྱེས་པ་ལ༔ ཡ་དང་ས་ལས་ལས་ཀྱི་ཌཱཀྐི་ནི༔ སྐུ་མདོག་ལྗང་གསལ་བྱ་གྲུབ་ཡེ་ཤེས་སྐུ༔ ཕྲག་དོག་འཇོམས་ཕྱིར་རྒྱ་གྲམ་གྲི་ཐོད་འཛིན༔ གཙོ་འཁོར་ཡབ་ཡུམ་ཉི་ཤུ་རྩ་བརྒྱད་བཞུགས༔ བ་སྤུའི་བུ་ག་ས་ཡ་དྲུག་འབུམ་ལ༔ སྣ་ཚོགས་མཁའ་འགྲོ་ས་ཡ་དྲུག་འབུམ་ནི༔ སྐུ་མདོག་སྣ་ཚོགས་གྲི་གུག་ཐོད་ཁྲག་འཛིན༔ ཡབ་ཡུམ་གཉིས་མེད་བདེ་

ཆེན་དབྱེར་མེད་འཁྲིལ༔ སྟེང་འོག་ཐབས་ཤེས་ཨ་དང་ཧཾ་ཡིག་གསལ༔ རོ་རྐྱང་ལཾ་རྒྱུད་ལྟེ་འོག་ཨ་ཐུང་ལ༔ མེ་འབར་གསང་བའི་ཌཱཀྐི་ཡབ་ཡུམ་ལ༔ ཕོག་པའི་གཙོ་འཁོར་ཐམས་ཅད་རྗེས་སུ་ཆགས༔ སྦྱོར་བ་མཛད་པས་སྦྱོར་མཚམས་དཀར་དམར་སྤྲིན༔ རྩ་ཡི་ནང་ཀུན་ཞུ་བདེས་མེར་གྱི་གང་༔ ཨ་ཐུང་ལ་ཕོག་མེ་ལྕེ་ཡར་འཕྲོས་པས༔ ཧཾ་ཡིག་ལ་ཕོག་བྱང་སེམས་རྒྱུན་འཛག་པས༔ སྤྱི་བོར་རྡོ་རྗེ་ཌཱཀྐི་ཡབ་ཡུམ་ལ༔ ཕོག་པས་གཙོ་འཁོར་རྗེས་ཆགས་སྦྱོར་བ་མཛད༔ སྦྱོར་མཚམས་བྱང་སེམས་དཀར་དམར་རྩ་འཁོར་གང་༔ ཨ་ཡིག་མེ་འབར་ལྟེ་བའི་ཌཱཀྐི་ལ༔ ཕོག་པས་རྒྱུད་བསྐུལ་གཙོ་འཁོར་རྗེས་ཆགས་མཛད༔ སྦྱོར་མཚམས་བྱང་སེམས་དཀར་དམར་རྩ་ནང་ཁྱབ༔ མེ་ལྕེའི་འོད་ཀྱིས་ཧཾ་ཞུ་བདེ་བའི་རྒྱུན༔ མགྲིན་པའི་མཁའ་འགྲོ་ཡབ་ཡུམ་ལ་ཕོག་པས༔ གཙོ་འཁོར་རྗེས་ཆགས་སྦྱོར་བ་མཛད་པའི་རྒྱུན༔ སྦྱོར་མཚམས་བྱང་སེམས་དཀར་དམར་རྩ་ཁམས་ཁྱབ༔ མེ་ལྕེའི་འོད་ཀྱིས་སྙིང་གའི་ཌཱཀྐི་ལ༔ ཕོག་པས་གཙོ་འཁོར་རྗེས་ཆགས་སྦྱོར་བ་མཛད༔ སྦྱོར་མཚམས་བྱང་སེམས་བབ་པས་རྩ་

ཁམས་ཁྱབ༔ སྣ་ཚོགས་མཁའ་འགྲོ་ཡབ་ཡུམ་ལ་ཕོག་པས༔ ས་ཡ་དྲུག་འབུམ་རྗེས་ཆགས་སྦྱོར་བ་མཛད༔ སྦྱོར་མཚམས་བྱང་སེམས་རྒྱུན་བབས་ལུས་ཀུན་ཁེངས༔ ཧཾ་ཡིག་ལས་འཕྲོས་བྱང་སེམས་དཀར་བསིལ་དང་༔ ཨ་ཐུང་ལས་འཕྲོས་དམར་ལ་ཚ་བ་གཉིས༔ དཀར་དམར་ཞུ་བདེས་སྙིང་གར་ཞལ་འཇལ་བར༔ ཤེས་པ་གཏད་དེ་ཡུག་གཅིག་མཉམ་པར་བཞག༔ འཁོར་ལོ་རེ་ལ་རླུང་ཐུན་དམིགས་བསྐོར་རེ༔ བདེ་སྟོང་གཉིས་མེད་བུམ་ཅན་ཁ་སྦྱོར་འཆིང་༔ དེ་ལྟར་ལུས་གཅུས་རླུང་སྤྲུག་དྲག་པོ་ཡིས༔ དཀར་དམར་གཉིས་པོ་ཞོ་ཁྲག་བསྲེས་པ་ལྟར༔ འདྲེས་ཏེ་རྩ་ཁམས་བ་སྤུའི་བུ་ག་ཚུན༔ དཀར་དམར་ཞུ་བདེས་ཡོངས་སུ་ཁྱབ་པར་ལྟ༔ དེ་ལྟར་བརྒྱ་འམ་ལྔ་བཅུ་ཉེར་ལྔ་ཡིས༔ མཐའ་བྱས་ཐོ་རེངས་ཉི་དྲོས་དགོངས་ཁ་རྣམས༔ དུས་ཀྱི་གནད་དང་བསྟུན་ནསའབད་དེ་སྒོམ༔ ལྷ་སྐུ་ལ་རྟེན་འབར་འཛག་དམིགས་རིམ་མོ༔ དེ་ནས་འབྱུང་ལྔའི་བཅུད་ལེན་ཟབ་མོ་ནི༔ གསང་བའི་ལས་ཀྱི་ཌཱཀྐིའི་ཐུགས་སྲོག་ལས༔ འོད་འཕྲོས་འབྱུང་བ་རླུང་གི་དྭངས་བཅུད་བསྡུས༔ ཐིམ་ཞིང་བདེ་སྦྱོར་

བྱང་སེམས་གྱེན་དུ་འཕྱུར༔ ལྟེ་འོག་པདྨ་མཁའ་འགྲོའི་ཐུགས་སྲོག་ལས༔ འོད་འཕྲོས་འབྱུང་བ་མེ་ཡི་དྭངས་བཅུད་བསྡུས༔ ཐིམ་ཞིང་བདེ་ཆེན་བྱང་སེམས་གྱེན་དུ་འཕྱུར༔ སྙིང་གའི་སངས་རྒྱས་ཌཀྐིའི་ཐུགས་སྲོག་ལས༔ འོད་འཕྲོས་འབྱུང་བ་ནམ་མཁའི་དྭངས་བཅུད་བསྡུས༔ ཐིམ་ཞིང་བདེ་སྦྱོར་བྱང་སེམས་གྱེན་དུ་འཕྱུར༔ མགྲིན་པར་རིན་ཆེན་ཌཱཀྐའི་ཐུགས་སྲོག་ལས༔ འོད་འཕྲོས་འབྱུང་བ་ས་ཡི་དྭངས་བཅུད་བསྡུས༔ ཐིམ་ཞིང་བདེ་སྦྱོར་བྱང་སེམས་གྱེན་དུ་འཕྱུར༔ སྤྱི་བོར་རྡོ་རྗེ་ཌཱཀྐིའི་ཐུགས་སྲོག་ལས༔ འོད་འཕྲོས་འབྱུང་བ་ཆུ་ཡི་དྭངས་བཅུད་བསྡུས༔ ཐིམ་ཞིང་བདེ་སྦྱོར་བྱང་སེམས་གྱེན་དུ་འཕྱུར༔ དེ་ལྟར་འཁོར་ལོ་རེ་ལ་རླུང་ཐུན་ནི༔ གསུམ་ལྔ་བདུན་སོགས་སྐབས་སྦྱར་བརྩོན་འགྲུས་སྒོམ༔ ཡོན་ཏན་བསམ་བརྗོད་བགྲང་བར་མི་ནུས་སོ༔ རྩ་བའི་རླུང་ལྔ་མ་ཟིན་ཟིན་བྱེད་པ༔ དམ་ཚིག་རླུང་གི་རྡོ་རྗེའི་བཟླས་པར་བསླབ༔ ཟིན་པ་བརྟན་པར་བྱེ་རགས་(ཡི་གེ་མི་གསལ་མཆན)རླུང་༔ བར་རླུང་ལ་བསྟེན་རྡོ་རྗེའི་བཟླས་པར་བསླབ༔ དེ་བཞིན་དབྱེར་མེད་རྡོ་རྗེའི་བཟླས་པ་ནི༔ ཚད་ལྡན་བླ་

མའི་ཞལ་ལས་ཤེས་པར་བྱ༔ རང་ལུས་ཐབས་ལྡན་བདེ་བ་ཆེན་པོ་དང་༔ གཞན་ལུས་ཤེས་རབ་ཟབ་ལམ་ཟུང་འཇུག་སོགས༔ བླ་མའི་ཞལ་ཤེས་ནང་བཞིན་ཉམས་སུ་ལོངས༔ རྗེས་ཀྱི་ལམ་རྟགས་ཐུན་མོང་སྤྱི་ལྟར་མཐུན༔ ཤིན་ཏུ་ཟབ་པོ་བརྡའ་དགོངས་བརྒྱུད་པ་ཡིན༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་རླུང་གི་རིམ་པ་འདི་བཞིན་གོང་འོག་དཀྲུག་པ་དང་བརྡ་ཐོར་རྒྱ་ཆེ་ཞིང་མཁའ་འགྲོའི་བཀའ་རྒྱ་མ་གྲོལ་བའི་སྟབས་ཀྱི་སླར་འཕར་བའི་ལོ་ཚོགས་དང་བདུད་རྩི་སྨན་མཆོད་ཀྱི་དགྱེས་པ་བསྐོང་ཏེ་བཀའ་རྒྱ་ལས་གྲོལ་ནས་ཡང་སྐྱར་བདེ་ཆེན་རྒྱལ་པོས་ཕབ་པའོ། །བཀྲིས།། །།

རྫོགས་པ་ཆེན་པོ་མ་རིག་མུན་སེལ་གྱི་སྔོན་འགྲོའི་ཟུར་བརྒྱན།

༄༅། །རྫོགས་པ་ཆེན་པོ་མ་རིག་མུན་སེལ་གྱི་སྔོན་འགྲོའི་ཟུར་བརྒྱན་བཞུགས་སོ།།

ན་མོ་གུ་རུ། སྐྱབས་མགོན་བླ་མ་རིན་པོ་ཆེའི་ཞབས་ལ་གསོལ་བ་འདེབས་སོ་བྱིན་གྱིས་རླབས་དུ་གསོལ། །སྔོན་འགྲོའི་འཁྲིད་རིམ་གྱི་ཐོག་མར། རང་གི་སྤྱི་བོར་འཇའ་ཟེར་འོད་ཕུང་གི་ཀློང་དུ། པད་ཟླའི་གདན་ལ་ངོ་བོ་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་ཆོས་སྐུ་ཀུན་ཏུ་བཟང་པོ་སྐུ་མདོག་ནམ་མཁའི་མདོག་ལྟར་སྔོ་བ། རྒྱན་མེད་གཅེར་བུ་ཞལ་གཅིག་ཕྱག་གཉིས་མཉམ་བཞག་ཞབས་རྡོ་རྗེ་སྐྱིལ་ཀྲུང་གི་བཞུགས་པ། ཡུམ་ཀུན་བཟང་དཀར་མོ་གྲི་ཐོད་འཛིན་པའི་ཡབ་ལ་འཁྱུད་པ།

མཐའ་བསྐོར་དུ་རྩ་རྒྱུད་ཀྱི་བླ་མ་ཡི་དམ་རྒྱལ་བ་ཞི་ཁྲོ་ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ། དཔའ་བོ་མཁའ་འགྲོ་ཆོས་སྐྱོངས་བསྲུངས་མའི་ཚོགས་ཀྱི་བསྐོར་བ་དམིགས་ལ། མཐར་ལྷ་ཚོགས་ཐམས་ཅད་འོད་དུ་ཞུ་ནས་བླ་མ་ཀུན་བཟང་ཡབ་ཡུམ་ལ་ཐིམ། དེ་འོད་དུ་ཞུ་ནས་ཚོན་གང་པ་ཞིག་ཏུ་གྱུར་ནས། རང་གི་ཚངས་བུག་ནས་ཞུགས་རྩ་དབུ་མའི་ལམ་རྒྱུད་སྙིང་པདྨ་དཀར་པོ་འདབ་མ་བརྒྱད་དུ་གྱུར་པའི་ཟེའུ་འབྲུའི་དབུས་སུ་ཡེ་ཤེས་སེམས་དཔའི་ཚུལ་དུ་

བཞུགས་པར་བསམ་ལ། དཔལ་ལྡན་རྩ་བའི་བླ་མ་རིན་པོ་ཆེ། ཞེས་པ་ནས། དངོས་གྲུབ་སྩལ་དུ་གསོལ། ཞེས་པའི་བར་འདོན། དེ་ནས་སྙིང་པདྨ་འདབ་མ་བརྒྱད་པ་ཁ་ཟུམ་པ། སྣང་ལ་རང་བཞིན་མེད་པའི་རྣམ་པ་ཅན་དུ་བསྒོམས་ལ། ལོག་གཡས་ཕབ་སྟེ་ཉལ་བ་ནི། ཉལ་བའི་རྣལ་འབྱོར་རོ། །ལྡང་བའི་རྣལ་འབྱོར་ནི། སྙིང་ཀའི་རྩ་བའི་བླ་མའི་ཞལ་ནས། རིགས་ཀྱི་བུ་ཉལ་བའི་དུས་མ་ཡིན་ཡར་ལོངས་ཞེས་གསུངས་པའི་རྐྱེན་བྱས་སྟེ། ཧར་རེ་ལངས་ནས། ལུས་གུས་པས་ཐལ་མོ་སྙིང་ཁར་མ་རེག་ཙམ་དུ་སྦྱར། ངག་གུས་པས་གདུང་བའི་དབྱངས་ཀྱི་གསོལ་བ་འདེབས། ཡིད་གུས་པས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་མཁྱེན་མཁྱེན་མཁྱེན་ལན་གསུམ་བྱ། དང་པོའི་སྐབས་སུ་སྙིང་གའི་པདྨའི་ཁ་ཕྱེ། གཉིས་པའི་སྐབས་སུ་རྩ་དབུ་མའི་ལམ་ནས་ཡར་བྱོན། གསུམ་པའི་སྐབས་སུ་སྤྱི་བོར་འཇའ་ཟེར་འོད་ཕུང་གི་ཀློང་དུ་གསལ་བ་ལས། ཁྱེད་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ་ཞེས་པ་ནས། སྐུ་གསུངས་ཐུགས་ཀྱི་དངོས་གྲུབ་སྩལ་དུ་གསོལ། ཞེས་པའི་བར་འདོན། དེ་ནས་ལུས་རྣམ་སྣང་གི་ཆོས་བདུན་

བྱས་ཏེ། ལུས་ཕྲུ་མ་ཕུས་བཏབ་པ་ལྟ་བུའི་དབུས་སུ་རྩ་དབུ་མ་སྤ་ལྕགས་འབྲིང་པོ་ཙམ། མར་སྣ་ལྟེ་འོག་སོར་བཞིའི་ཐད་དུ་ཕུག་རྡུགས་ཏུ་ཡོད་པ། ཡར་སྣེ་སྤྱི་གཙུག་ཏུ་ཐལ་ལེར་ཡོད་པ། གཡས་སུ་རོ་མ་དཀར་མོ་གྲོ་སོག་འབྲིང་པོ་ཙམ། མར་སྣ་དབུ་མར་ཟུག་པ་ཡར་སྣེ་སྣ་བུག་གཡས་སུ་ཟུག་པ་གཡོན་དུ་རྐྱང་མ་དམར་མོ་གྲོ་སོག་འབྲིང་པོ་ཙམ། མར་སྣ་དབུ་མར་ཟུག་པ་ཡར་སྣེ་སྣ་བུག་གཡོན་དུ་ཟུག་པ། རོ་མའི་ནང་དུ་ཞེ་སྡང་གི་རླུང་དཀར་མགོ །རྐྱང་མའི་ནང་དུ་འདོད་ཆགས་ཀྱི་རླུང་དམར་མོག །དབུ་མའི་ནང་དུ་གཏི་མུག་གི་རླུང་སྔོ་མོག །དུག་གསུམ་རླུང་གསུམ་གྱི་རྣམ་པར་གནས་པ་ལས། སེམས་ཅན་ཐམས་ཅད་ཀྱི་དོན་དུ་གསལ་ལོ་སྙམ་པའི་སྒོ་ནས་རླུང་རོ་དགུ་ཀྲུག་ཏུ་བྱ། དེ་ནས་དལ་འབྱོར་རྙེད་དཀའ་བསམ་པ་ལ། དལ་བ་བརྒྱད་དང་འབྱོར་བ་བཅུ་སྟེ། དལ་བ་བརྒྱད་ནི། དམྱལ་བར་སྐྱེས་ན་ཚ་གྲང་གི་སྡུག་བསྔལ་ལ་སྤྱོད་པའི་ཆོས་བྱེད་དུ་མི་ཁོམས། ཡི་དྭགས་སུ་སྐྱེས་ན་བཀྲེས་སྐོམ་གྱི་སྡུག་བསྔལ་ལ་སྤྱོད་པའི་ཆོས་བྱེད་དུ་མི་ཁོམས། དུད་འགྲོར་སྐྱེས་ན་བཀོལ་སྤྱོད་དང་།

ཕན་ཚུན་འཚེ་བའི་སྡུག་བསྔལ་ལ་སྤྱོད་པའི་ཆོས་བྱེད་དུ་མི་ཁོམས། ལྷ་ཚེ་རིང་དུ་སྐྱེས་ན་འདུ་ཤེས་པའི་ངང་ནས་དུས་འདས་ཏེ་ཆོས་བྱེད་དུ་མི་ཁོམས། ཡུལ་མཐའ་ཁོབ་ཏུ་སྐྱེས་ན་སངས་རྒྱས་ཀྱི་བསྟན་པ་མེད་པས་ཆོས་བྱེད་དུ་མི་ཁོམ། མུ་སྟེགས་བྱེད་དམ་དེ་དང་བསམ་པ་ཕྱོགས་མི་མཐུན་པའི་སྐལ་པ་ངན་པར་སྐྱེས་ན། རང་བརྒྱུད་ལོག་ལྟས་སླད་པའི་ཆོས་བྱེད་དུ་མི་ཁོམས། མུན་པའི་བསྐལ་པར་སྐྱེས་ན་དཀོན་མཆོག་གསུམ་གྱི་སྒྲ་མི་ཐོས་ཤིང་། དགེ་སྡིག་ངོ་མི་ཤེས་པའི་ཆོས་བྱེད་དུ་མི་ཁོམས། ལྐུག་པར་སྐྱེས་ན་ཡིད་ཀྱི་རྣམ་པར་ཤེས་པ་ལས་སུ་མ་རུང་བའི་ཆོས་བྱེད་དུ་མི་ཁོམས་པའི་གནས་བརྒྱད་པོ་དེ་དག་དང་བྲལ་བ་ལ་དལ་བ་ཞེས་བྱའོ། ༈ འབྱོར་བ་བཅུ་ནི། མི་ལུས་མ་ཐོབ་ན་ཆོས་དང་མི་འཇལ་བའི་ད་རེས་མི་ལུས་རྟེན་གྱི་འབྱོར་པ། ཡུལ་མཐའ་ཁོབ་ཏུ་སྐྱེས་ན་སངས་རྒྱས་ཀྱི་བསྟན་པ་དང་འགལ་བའི་ད་ལན་ཆོས་ཚིགས་ཀྱི་ཡུལ་དབུས་སུ་སྐྱེས་པ་ནི་ཡུལ་གྱི་འབྱོར་བ། དབང་པོ་སྐྱོན་དང་བྲལ་བ་ནི་དབང་པོ་ཡོན་ཏན་གྱི་འབྱོར་པ། རྟག་ཏུ་མི་དགེ་བ་བཅུ་ལ་སྤྱད་ན་ཆོས་དང་འགལ་བའི། ད་རེས་དགེ་བ་ལ་མོས་པ་

བསམ་པའི་ཁྱད་པར་གྱི་འབྱོར་པ། བསྟན་པ་ལ་མ་དད་ན་མི་ཕན་པ་ལས། ད་རེས་བློ་ཆོས་ལ་ཕྱོགས་ནུས་པ་རང་གི་དད་པའི་འབྱོར་པ་སྟེ་རང་འབྱོར་ལྔ། ༈ སངས་རྒྱས་བྱོན་པའི་སྐལ་པ་དང་ལྡན་པས་ཐུབ་པའི་བསྟོན་པའི་ཁྱད་པར་གྱི་འབྱོར་པ། ཆོས་འཁོར་རིམ་པ་གསུམ་དུ་བསྐོར་བའི་ཆོས་ཀྱི་འབྱོར་པ། ད་ལྟ་བསྟན་པའི་གནས་ཚད་མ་རྫོགས་པའི་དུས་ཀྱི་འབྱོར་པ། རང་ཉིད་བསྟན་པའི་སྒོར་ཞུགས་པའི་རང་གི་སྐལ་བའི་འབྱོར་པ། དགེ་བའི་བཤེས་གཉེན་གྱི་རྗེས་སུ་འཛིན་པའི་ལྷག་པའི་འབྱོར་པ། དེ་རྣམས་གཞན་འབྱོར་ལྔ་སྟེ་བཅུའོ། ༈ དེ་ཡང་དཔེ་དང་གྲངས་དང་། རྒྱུའི་སྒོ་ནས་རྙེད་པར་དཀའ་ཚུལ་བསམ་པ་གསུམ་ལས། དང་པོ་ནི། རྒྱ་མཚོ་ཆེར་གཡེང་གཉའ་ཤིང་གིས། །བུ་གར་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་ཐོབ་དཀའ་གསུངས། །ཞེས་པའོ། གཉིས་པ་ནི། ངན་འགྲོ་ནི་ས་ཆེན་པོའི་རྡུལ་ཙམ་ལས། བདེ་འགྲོ་ནི་ཕྱག་སེན་གྱི་སྟེང་གི་རྡུལ་ཙམ་མོ། །ཡང་ངན་འགྲོ་ནས་ངན་འགྲོར་འགྲོ་བ་ནི་ས་ཆེན་པོའི་རྡུལ་ཙམ་ལས། ངན་འགྲོ་ནས་བདེ་འགྲོར་འགྲོ་བ་ནི་

ཕྱག་སེན་སྟེང་གི་རྡུལ་ཙམ་མོ། །རིན་ཆེན་འཕྲེང་བ་ལས། དགེ་བའི་ལས་ནི་བདེ་བ་དང་། །དེ་བཞིན་བདེ་འགྲོ་ཐམས་ཅད་དོ། །མི་དགེ་ལས་ནི་སྡུག་བསྔལ་དང་། །དེ་བཞིན་ངན་འགྲོ་ཐམས་ཅད་དོ། །ཞེས་པས་ལས་དགེ་སྡིག་གི་འབྲས་བུ་སོ་སོར་སྨིན་པས་བླང་དོར་བྱེད་དགོས། དེ་ཡང་སྡིག་པ་མི་དགེ་བ་རྣམ་བསྡུ་ན་བཅུར་འདུ་སྟེ། ལུས་ཀྱི་སྒོ་ནས་སྲོག་གཅོད་པ་མ་སྦྱིན་པར་ལེན་པ། མི་ཚངས་པར་སྤྱོད་པ་ཏེ་གསུམ། ངག་གི་སྒོ་ནས་རྫུན། ཕྲ་མ་ཚིག་བརྩུབ། ངག་བཀྱལ་སྟེ་བཞི། ཡིད་ཀྱི་སྒོ་ནས། བརྣབ་སེམས། གནོད་སེམས། ལོག་ལྟ་སྟེ་བཅུའོ། །དེ་ལྟར་མི་དགེ་བཅུ་པོ་ཆུང་ངུར་སྤྱད་པས་ཀྱང་འབྲས་བུ་ཆེན་པོ་འབྱིན་ཏེ། ཚོམས་ལས། སྡིག་པ་ཆུང་ངུ་དག་ལ་ཡང་། །མི་གནོད་སྙམ་དུ་བརྙས་མི་བྱ། །མེ་སྟག་ཆུང་ངུ་དག་གི་ཀྱང་། །རྩ་ཕུང་རི་ཙམ་སྲེག་པར་བྱེད། །ཅེས་པ་ལྟར་རོ། །དགེ་བཅུ་དང་དུ་བླངས་བ་ནི། སེམས་ཅན་གཞན་གྱི་སྲོག་སྐྱོབ་པ། མ་ཆགས་པར་སྦྱིན་པ་གཏོང་བ། ཚངས་སྤྱོད་ལ་གནས་པ་སྟེ་ལུས་ཀྱི་ལས་གསུམ། བདེན་པར་སྨྲ་བ། ཞི་ཞིང་ངེས་པར་སྨྲ་བ། མི་མཐུན་པ་

བསྡུམ་པ། གཞན་གྱི་ཡོན་ཏན་བརྗོད་པ་སྟེ་ངག་གི་བཞི། ཆོག་ཤེས་པ། གཞན་ལ་བྱམས་པ། ལས་འབྲས་ལ་ཡིད་ཆེས་པ་སྟེ་ཡིད་ཀྱི་ལས་གསུམ་མོ། ཡང་སླབ་བྱ་སློབ་ཚུལ་ལྟོས་ཀྱང་བཅུ་སྟེ། དབུས་མཐའ་ལས། ཡི་གེ་འབྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་བསྒོམ་པ་སྟེ། །སྤྱོད་པ་འདི་བཅུའི་བདག་ཉིད་ནི། །བསོད་ནམས་ཕུང་པོ་དཔག་ཏུ་མེད། །ཅེས་སོ། །དེ་ལྟ་བུའི་དགེ་བ་དེ་དག་ཕྲ་ཞིང་ཕྲ་བའང་ཁྱད་དུ་མི་གསོད་པར་དང་དུ་བླངས་བར་བྱ་སྟེ། ཚོམས་ལས། །དགེ་བ་ཆུང་ངུ་དག་ལ་ཡང་། །མི་ཕན་སྙམ་དུ་བརྙས་མི་བྱ། །ཆུའི་ཐིག་པ་བསགས་པས་ཀྱང་། །སྣོད་ཆེན་ཁད་ཀྱི་འགེངས་བར་འགྱུར། །ཞེས་པ་ལྟར་ལས་འབྲས་ལ་ཡིད་ཆེས་ཀྱི་དད་པ་བསྐྱེད་ཅིང་བླང་དོར་ལ་འབད་པར་བྱའོ། །དེ་ལྟར་དགེ་སྡིག་རྒྱུ་འབྲས་ལ་བླང་དོར་བྱས། འཁོར་བའི་ཉེས་དམིགས་མ་བསམ་ན། ཐར་འདོད་ཀྱི་བློ་བཅོས་མིན་མི་སྐྱེ་བས། འཁོར་བ་སྤྱི་དང་བྱེ་བྲག་གི་སྡུག་བསྔལ་བསམ་པའོ། །དེ་ཡང་འཁོར་བ་སྤྱིའི་སྡུག་

བསྔལ་བསམ་པ་ལ། དང་པོ་ཚ་དམྱལ་བརྒྱད་ནི། ཡང་གསོས། ཐིག་ནག །བསྡུས་འཇོམས། ངུ་འབོད། ངུ་འབོད་ཆེན་པོ། ཚ་བ། རབ་ཏུ་ཚ་བ། མནར་མེད་རྣམས་སོ། །གྲང་དམྱལ་བརྒྱད་ནི། ཆུ་བུར་ཅན། ཆུ་བུར་བརྡོལ། ཨ་ཆུ། ཀྱེ་ཧུད། སོ་ཐམས། པདྨ་ལྟར་གས་པ། ཨུཏྤལ་ལྟར་གས་པ། པདྨ་ཆེན་པོ་ལྟར་གས་པའོ། །ཉེ་འཁོར་བ་ནི། མདག་མེ་འབར་བའི་འོབས། རོ་མྱག་གི་འདམ། སྤུ་གྲི་ལོ་མའི་ཐང་། ཤལ་མ་ལིའི་སྡོང་པོ་ཐལ་ཚན་གྱི་ཆུ་བོ་རབ་མེད་རྣམས་སོ། །ཉི་ཚེ་བ་ནི། ཀ་བ་ལྟ་བུ། ཐག་པ་ལྟ་བུ། ཐག་ཀ་ལྟ་བུའོ། །ཡི་དྭགས་ལ་ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། མེ་ལྕེའི་འཕྲེང་བ་ཅན། མཁའ་ལ་རྒྱུ་བའི་ཡི་དྭགས་རྣམས་སོ། །དུད་འགྲོ་ལ་བྱིང་ན་མུན་པར་གནས་པ་དང་། ཁ་ཐོར་བ་རྣམས་སོ། །དེ་ལྟར་དམྱལ་བ་ལ་ཚ་གྲངས་དང་། ཡི་དྭགས་ཀྱི་བཀྲེས་སྐོམ། དུད་འགྲོའི་བཀོལ་སྤྱོད་ལ་སོགས་པ་ངན་འགྲོའི་སྡུག་བསྔལ་སྔ་མ་མ་སངས་པའི་སྟེང་དུ་ཕྱི་མ་འབྱུང་བའི་སྡུག་བསྔལ་གྱི་སྡུག་བསྔལ་ཡུན་རིང་ལ་བཟོད་གླག་མེད་པ་དེ་དག་བཟོད་པར་འདུག་གམ་སྙམ་དུ་བསྒོམ་

པར་བྱའོ། །བདེ་འགྲོ་གསུམ་ན་ཡང་། ངན་སོང་གི་སྡུག་བསྔལ་ཙམ་མེད་ཀྱང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་སོགས་བསམ་གྱི་མི་ཁྱབ་སྟེ། མི་ལ་སྐྱེ་རྒས་ན་འཆི་ཡོད་མེད་འདུ་འབྲལ། ལྷ་མ་ཡིན་ལ་འཐབ་རྩོད། ལྷ་ལ་འཆི་འཕོ་ལྟུང་བའི་སྡུག་བསྔལ་དམྱལ་བའི་སྡུག་བསྔལ་བཅུ་དྲུག་འགྱུར་གྱི་ཆེ་བའོ། །དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཐུང་བས་ཉམས། །ལྷ་མིན་འཐབ་ཅིང་རྩོད་པས་ཉམས། །ལྷ་རྣམས་བག་མེད་པ་ཡི་ཉམས། །འཁོར་བ་ཁབ་ཀྱི་རྩེ་ཙམ་ན། །བདེ་བ་ནམ་ཡང་ཡོད་མ་ཡིན། །ཞེས་གསུངས་པ་བཞིན་དུ། འཁོར་བའི་གནས་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་གནས། སུ་དང་འགྲོགས་ཀྱང་སྡུག་བསྔལ་གྱི་གྲོགས། ཅི་ལ་ལོངས་སྤྱད་ཀྱང་སྡུག་བསྔལ་གྱི་རང་བཞིན་ལས་མ་འདས་པའི་ཕྱིར། མི་ལུས་རིན་པོ་ཆེ་རྙེད་དཀའ་བ་འཇིགས་རུང་འཁོར་བའི་རྒྱ་མཚོ་ལས་སྒྲོལ་བའི་དལ་འབྱོར་གྱི་གྲུ་

བོ་ཆེ་འདི་དོན་ཡོད་པར་བྱ་སྙམ་དུ་སྒོ་གསུམ་གྱི་སྡིག་པ་མི་དགེ་བའི་ལས་སྲོག་ལ་བབས་ཀྱང་མི་བྱེད་པར་དམ་བཅས་སྟེ། བརྩོན་འགྲུས་དྲག་པོས་དགེ་བའི་ལས་ལ་འབད་ཅིང་། ཚེ་འདི་ཉིད་ལ་གཏན་གྱི་ལམ་སྣ་ཟིན་པ་ཞིག་བྱའོ། །སྙམ་པའི་ཞེ་དམ་ཡང་ཡང་བྱའོ། །དེ་ལྟར་འཁོར་བའི་ཉེས་དམིགས་ལེགས་པར་བསམ་ནས་ངེས་པར་ཐར་འདོད་ཀྱི་བློ་བཅོས་མིན་བསྐྱེད་ནས། སངས་རྒྱས་ཀྱི་གཞི་མ་ཐེག་པ་སྤྱིའི་རྨང་རྡོ་ལྟ་བུའི་དཀོན་མཆོག་གསུམ་ལ་སྐྱབས་སུ་འགྲོ་དགོས་ཏེ། སློབ་དཔོན་ཆེན་པོས། འཁོར་བའི་དཔོན་ནི་ཇི་ལྟར་བཟང་ཡང་བསླུ། སྐྱབས་གནས་དཀོན་མཆོག་གསུམ་ལ་བསླུ་བ་མེད། །ཞེས་གསུངས་པའི་ཕྱིར། དཀོན་མཆོག་རིན་པོ་ཆེ་རྣམ་པ་གསུམ་ཁོ་ན་ལ་སྐྱབས་དང་རམ་ཟླ་ཞུ་སྙམ་དུ་ཞེ་ཐག་པ་ནས་བསམ་ལ་སྐྱབས་སུ་འགྲོ་སྟེ། དབེན་པའི་གནས་སུ་བདེ་བའི་སྟན་ལ་ལུས་གནད་བསྲང་སེམས་རྣལ་དུ་ཕབ་སྟེ། རང་གང་ན་གནས་པའི་ས་ཕྱོགས་འདི་ཉིད་རིན་པོ་ཆེའི་རང་བཞིན་ལས་གྲུབ་པ་ལག་མཐིལ་ལྟར་སྙོམས་ཤིང་། འཇམ་ལ་ཡིད་དུ་འོང་བའི་ཞིང་ཁམས་རྣམ་པར་དག་པ་ཡངས་ཤིང་རྒྱ་ཆེར་གྱུར་པའི་

དབུས་སུ་རང་ཉིད་ཐ་མལ་དུ་གནས་པའི། མདུན་གྱི་ནམ་མཁར་འཇའ་འོད་ཀྱི་གུར་ཁང་མཐའ་དབུས་མེད་པར་བྲལ་བའི་དབུས་སུ། འོད་སྣང་ལས་སྣ་ཚོགས་པདྨ་འབུམ་ཕྲག་དང་། ཉི་ཟླ་བརྩེགས་པའི་གདན་རྒྱ་ཆེའི་དབུས་སུ། ངོ་བོ་དྲིན་ཅན་རྩ་བའི་བླ་མ་ལ་རྣམ་པ་ཆོས་སྐུ་ཀུན་ཏུ་བཟང་པོ་གཅེར་བུ་སྐུ་མདོག་མཐིང་ཞུན་ལྟར་འཚེར་བ་ཞལ་གཅིག་ཕྱག་གཉིས། ཞབས་རྡོ་རྗེ་སྐྱིལ་ཀྲུངས་དང་ཕྱག་མཉམ་བཞག་གི་ཕྱག་རྒྱས་ཡུམ་ཀུན་བཟང་དཀར་མོ་གྲི་ཐོད་འཛིན་པས་འཁྱུད་པ། མཐའ་བསྐོར་དུ་དགོངས་བརྡ་བསྙན་བརྒྱུད་ཀྱི་བླ་རབ་ཉི་ཟེར་གྱི་རྡུལ་ལྟར་འཁྲིགས་པ། དཀོན་མཆོག་གསུམ་འདུས་ཀྱི་ངོ་བོར་བཞུགས་པར་བསམ། གཡས་ཀྱི་པད་ཟླའི་གདན་ལ། བཅོམ་ལྡན་འདས་ཐུབ་པའི་དབང་པོ་ལ་ཕྱོགས་བཅུ་དུས་གསུམ་གྱི་སངས་རྒྱས་མཆོག་གི་སྤྲུལ་སྐུའི་བསྐོར་བ། གཡོན་གྱི་པད་ཟླ་གུ་རུ་པདྨ་རྒྱལ་པོ་སྐུ་མདོག་དཀར་ལ་དམར་བའི་མདངས་ལྡན་ལོངས་སྐུའི་ཆ་བྱད་ཅན་གྱི་གཡས་སུ་རྡོ་རྗེ་སེམས་དཔའི་སྐུ་མདོག་དཀར་པོ་ཡུམ་སྙེ་མ་དཀར་མོ་འཁྲིལ་བ། གཡོན་དུ་རྒྱལ་སྲས་མུ་ཁྲི་བཙན་པའི་ཆ་བྱད་

ཅན་ལ་སྔགས་འཆང་གྲུབ་ཐོབ་རྒྱ་མཚོའི་བསྐོར་བ། མདུན་དུ་ཐུགས་རྗེ་ཆེན་པོ་ཞལ་གཅིག་ཕྱག་གཉིས་སྐུ་མདོག་དམར་པོ། ཕྱག་གཡས་པད་རག་གི་འཕྲེང་བ། གཡོན་མེ་ཏོག་ཨུཏྤལའི་སྡོང་པུ་འཛིན་པ། ཡུམ་གསང་བ་ཡེ་ཤེས་དང་སྙོམས་པར་བཞུགས་པའི་མཐའ་བསྐོར་དུ་གསང་སྔགས་ཕྱི་ནང་གི་རྒྱུད་སྡེའི་ལྷ་ཚོགས་དཀྱིལ་འཁོར་གྱི་བཀྲ་བ། རྒྱབ་ཏུ་འོད་སྣང་འཇའ་ཕུང་གི་དྲ་མིག་ལ་ཐེག་ཆེན་མདོ་ལུང་གི་ཆོས་རྣམས་གླེག་བམ་བརྩེགས་པའི་ཚུལ་གྱི་གང་འདུལ་ཆོས་སྒྲ་ལྷང་ལྷང་སྒྲོགས་ཤིང་མཐའ་བསྐོར་དུ་མཁའ་འགྲོ་ཆོས་སྐྱོངས་བསྲུངས་མ་ཡེ་ཤེས་སྤྱན་ལྡན་གྱི་ཚོགས་རྣམས་སྤྲིན་ཕུང་གཏིབས་པ་ལྟར་རང་དང་སེམས་ཅན་ཐམས་ཅད་སྐྱོབ་པའི་ཚུལ་དུ་བཞུགས་པར་བསམ་ལ། དེ་ནས་རང་གི་གཡས་སུ་ཕ་གཡོན་དུ་མ་སོགས་དགྲ་གཉེན་ཕྱོགས་རིས་མེད་པའི་རིགས་དྲུག་གྱི་སེམས་ཅན་ས་ཆེན་པོའི་དྲེགས་པ་ལྟར་གང་བར་བསམ་ནས་རང་གི་བྱང་དྲངས་སྟེ། ཐམས་ཅད་ཀྱང་ལུས་གུས་པའི་ཐལ་མོ་སྦྱར། ངག་གུས་པའི་སྐྱབས་འགྲོའི་ཚིག་འུར་འུར། ཡིད་གུས་པས་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར།

དེ་སྲིད་དུ་རེ་ས་ལྟོས་ས་སྐྱབས་གནས་དམ་པ་ཁྱེད་རྣམས་མ་གཏོགས་གཞན་ན་མེད་སྙམ་དུ་བློ་སྙིང་བྲང་གསུམ་དཀོན་མཆོག་གསུམ་ལ་ལིང་གི་བཀལ་ཏེ་གདུངས་ཤུགས་དྲག་པོས་སྐྱབས་འགྲོ་བྱེད་པར་བསམ་ཞིང་། ཁྱད་པར་སེམས་ཅན་ཐམས་ཅད་ལ་སྙིང་རྗེ་ཆེན་པོས་ཀུན་ནས་བསླང་ཏེ། འདི་རྣམས་འཇིགས་རུང་འཁོར་བའི་སྡུག་བསྔལ་ལས་སྐྱོབས་དུ་གསོལ་སྙམ་པས་ངག་ཏུ། ན་མོ་སྐྱབས་ཡུལ་དཀོན་མཆོག་བདེ་གཤེགས་གསུམ༔ ཞེས་བཞུང་ལྟར་ལ་བརྒྱ་སྟོང་ལ་སོགས་པར་བློ་དང་འདྲེས་ངེས་སུ་འབད་ནས། ཐུན་བསྡུ་བ་དང་སྐྱབས་ཡུལ་རྣམས་ཀྱི་སྐུ་ལས་འོད་ཟེར་བྱུང་བ་རེག་པ་ཙམ་གྱིས་སྡིག་སྒྲིབ་ཐམས་ཅད་སྦྱངས་སྟེ་སེམས་ཅན་ཐམས་ཅད་འུར་དེང་གི་དག་པའི་ཞིང་དུ་སོང་། སྐྱབས་ཡུལ་རྣམས་འོད་དུ་ལྟེམ་གྱི་ཞུ་ནས། རང་ལ་ཐིམ་པར་བསམ། དགེ་བ་བསྔོ། ཉལ་བའི་ཚེ་དམིགས་པའི་བརྟེན་མ་བཤིག་པར་དེ་ཉིད་ལ་མགོ་ཕྱོགས་ཏེ་ཉལ་བར་མོས་ཏེ་མོས་གུས་བསྒོམ་བཞིན་གཉིད་དུ་འགྲོ། རྗེས་རྒྱུད་ལ་བསྟན་ཕྱིར་བསླབ་བྱ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་

ལ་སྐྱབས་བཅོལ་བ་དང་ཕྱག་མི་འཚལ། སངས་རྒྱས་བརྟེན་སཙྪ་དུམ་ཙམ་ལ་གུས་པས་མཆོད། ཆོས་ལ་སྐྱབས་སུ་སོང་ནས་ཡི་གེ་ཚིག་ཟུར་ཙམ་ལ་གུས་པས་མཆོད་ཅིང་སེམས་ཅན་འཚེ་བ་ཅུང་ཟད་ཙམ་མི་བྱ། དགེ་འདུན་ལ་སྐྱབས་སུ་སོང་ནས་དགེ་འདུན་གྱི་རྟགས་སྤུ་ཙམ་ལ་གུས་པར་བྱ་ཞིང་གྲོགས་མུ་སྟེགས་ཅན་དང་བླ་གབ་གཅིག་པར་མི་འགྲོགས། བླ་མ་ལ་སྐྱབས་སུ་སོང་ནས་མཛད་སྤྱོད་ལ་ལོག་ལྟ་སྤུ་ཙམ་མི་བྱེད་ཅིང་སངས་རྒྱས་ལས་ལྷག་པའི་འདུ་ཤེས་ཉིན་མཚན་འཁོར་ཡུག་ཏུ་བསྒོམ། ཡི་དམ་ལ་སྐྱབས་སུ་སོང་ནས་སྒོ་གསུམ་ལྷ་སྔགས་ཀྱི་ཏིང་ངེ་འཛིན་ལས་མི་འདའ་ཞིང་འཕྲིན་ལས་རྣམ་བཞིས་འགྲོ་དོན་མཐར་ཁྱོལ་བ་དང་། ཆོས་སྐྱོངས་ལ་སྐྱབས་སུ་སོང་ནས་ཚོགས་གཏོར་གྱི་དགྱེས་པ་བསྐོང་རྣམ་བཞིའི་འཕྲིན་ལས་སྐུལ་ལོ། །སྐུ་གསུམ་ལ་སྐྱབས་སུ་སོང་ནས་རིག་པ་ངོ་བོ་རང་བཞིན་ཐུགས་རྗེ་གསུམ་པོ་གཅིག་འཆར་ཟུང་འཇུག་ཏུ་སྤྱོད་པའི་དེ་ཁོ་ན་ཉིད་དོ། །བྱང་ཆུབ་མཆོག་ཏུ་སེམས་བསྐྱེད་པ་ནི། ཕྱོགས་བཅུ་གང་ནས་གཞལ་ཀྱང་ནམ་མཁའ་ལ་མཐའ་དབུས་མེད་པ་ལྟར་འཇིག་རྟེན་གྱི་ཁམས་ལའང་མཐའ་

མེད་པར་ཐམས་ཅད་རིགས་དྲུག་གི་སེམས་ཅན་གོ་མཚམས་མེད་པར་ཁྱབ། སེམས་ཅན་དེ་ཐམས་ཅད་ཀྱང་བདག་གི་ཕ་མ་མ་བྱས་པ་ནི་གཅིག་ཀྱང་མེད། ལན་གྲངས་དཔག་ཏུ་མེད་པ་ཞིག་བྱས་ནས་ཕན་ཚད་མེད་བཏགས་ཤིང་གནོད་པ་ཚད་མེད་པ་ལས་སྐྱོབ་པའི་དྲིན་ཅན་ཤ་སྟག་ཡིན། དེ་ཐམས་ཅད་འདོད་པ་བདེ་བ་འདོད་ཀྱང་ཐབས་མི་ཁས་པས་སྒྲུབ་པ་སྡུག་བསྔལ་ཁོ་ན་སྒྲུབ་ཏེ་ཞེས་འདོད་དང་ལག་ལེན་ཕྱིན་ཅི་ལོག་ཏུ་གྱུར་པའི་ཁམས་གསུམ་གྱི་སྨྱོན་པ་འདི་རྣམས་སྙིང་རེ་རྗེ་སྙམ་དུ་བསམ་པ་དང་སྙིང་གས་ཀྱང་སྡོད་མི་ཚུགས་པ་ཙམ་དུ་སྙིང་རྗེ་བསྐྱེད་ནས། འདི་རྣམས་འཁོར་བའི་སྡུག་བསྔལ་ལས་དྲངས་ནས་ཐར་པ་བླ་ན་མེད་པ་རྫོགས་པའི་སངས་རྒྱས་ཀྱི་ས་ལ་མྱུར་དུ་འགོད་པར་བྱ། དེའི་ནུས་པ་ད་ལྟ་བདག་ལ་མི་འདུག་པས། བདག་གི་འགྲོ་ཀུན་ཐམས་ཅད་སྒྲོལ་ནུས་པའི་སངས་རྒྱས་ཀྱི་གོ་ཕང་མྱུར་དུ་ཐོབ་པར་བྱ། དེའི་མཆེད་དུ་ཟབ་ལམ་རྡོ་རྗེ་གསུམ་གྱི་རྣལ་འབྱོར་ཉམས་སུ་བླངས་ངོ་སྙམ་པའི་འདུན་པ་སྐམ་སྐམ་པ་བསྐྱེདནས་ངག་ཏུ། ཧོཿ དབྱིངས་རིགས་ངོ་བོ་མ་བཅོས་པའི༔ ཞེས་གཞུང་ལྟར་

རོ། བརྒྱ་སྟོང་ལ་སོགས་པར་སྙིང་ཐག་པ་ནས་བརྗོད་ཅིང་། དབུགས་འབྱུང་འཇུག་དང་སྦྱར་ནས་སེམས་ཅན་ཐམས་ཅད་ཀྱི་སྡིག་པ་དང་སྡུག་བསྔལ་ཐམས་ཅད་བདག་ལ་སྨིན་པར་གྱུར་ཅིག །བདག་གི་བདེ་བ་དང་དགེ་བ་ཐམས་ཅད་སེམས་ཅན་ལ་སྨིན་པར་གྱུར་ཅིག །ཅེས་སྨོན་ལམ་རྒྱ་ཆེར་གདབ་སྟེ་སྙིང་རྗེའི་རྩལ་འདོན་ནོ། །དེ་ལྟར་བྱམས་སྙིང་རྗེ་བྱང་ཆུབ་ཀྱི་སེམས་དཔར་དྲག་ལ་ཡུན་རིང་བར་བསྒོམ་པས་མཐར་མི་དམིགས་པའི་ངང་ནས་དགེ་བ་བསྔོའོ། ༈ རྡོར་སེམས་བསྒོམ་བཟླས་ནི། རང་ཉིད་ཐ་མལ་དུ་གནས་པའི་སྤྱི་བོར་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དཀར་པོ་གསལ་ཞིང་བསྣུམ་ལ་འཚེར་བ་དེ་ཡོངས་སུ་གྱུར་པ་ལས། རྩ་བའི་བླ་མ་དང་དབྱེར་མེད་པའི་དཔལ་རྡོ་རྗེ་སེམས་དཔའི་སྐུ་མདོག་གངས་རི་ལྟར་དཀར་བ་ཆུ་ཤེལ་ལྟར་དངས་ཞིང་འཚེར་བ། ཞལ་གཅིག་ཕྱག་གཉིས་གཡས་གསེར་གྱི་རྡོ་རྗེ་རྩེ་ལྔ་ཐུགས་དཀར་འཛིན་ཅིང་གཡོན་དངུལ་དཀར་གྱི་དྲིལ་བུ་དཀུར་བརྟེན་པ། ཡུམ་སྙེ་མ་དཀར་མོ་གྲི་ཐོད་འཛིན་པས་ཡབ་ལ་འཁྱུད་པ། ཞབས་སེམས་པའི་སྐྱིལ་ཀྲུང་གི་བཞུགས་པའི་ཐུགས་དཀར་

ཟླ་བའི་དཀྱིལ་འཁོར་གྱི་སྟེང་དུ་ཤེལ་གྱི་རྡོ་རྗེ་ནས་འབྲུ་ཙམ་རྩེ་ལྔ་བགྲེངས་སྟབས་སུ་ཡོད་པའི་ལྟེ་བར་ཧཱུཾ་ཡིག་དཀར་པོ་ཡུངས་འབྲུ་ཙམ་གྱི་མཐའ་བསྐོར་དུ་རྒྱས་པར་ཡི་གེ་བརྒྱ་པ། བསྡུ་ན་འབྲུ་དྲུག་སྤུ་ཤད་ཀྱི་བྲིས་པ་ལྟ་བུ་འོ་མའི་མདོག་ལྟར་ནར་ནར་གཡས་སུ་རང་སྒྲས་འཁོད་པར་བསམ་ལ། སྐྱེ་བ་ཚེ་རབས་ཐོག་མེད་ཏུ་བསགས་པའི་སྡིག་སྒྲིབ་ཉེས་ལྟུང་གི་ཚོགས་ལ་གནོང་ཞིང་འགྱོད་པ་དང་། ཕྱིན་ཆད་སྲོག་ལ་བབས་ཀྱང་སྡིག་པའི་ཆ་ཙམ་མི་བགྱིད་སྙམ་པའི་བསམ་པ་དྲག་པོ་དང་ལྡན་པའི་སྒོ་ནས། སྤྱི་བོའི་བླ་མ་རྡོ་རྗེ་སེམས་དཔའ་ཉིད་དུས་གསུམ་སངས་རྒྱས་ཐམས་ཅད་ཀྱི་ངོ་བོར་བལྟས་ལ། མོས་གུས་ཚད་མེད་པ་མཆིལ་མ་འབྲུལ་བ་ཙམ་བསྐྱེད་ནས། ཐུགས་ཀའི་སྔགས་འཕྲེང་ལ་ཀློག་པའི་ཚུལ་གྱིས་དམིགས་པ་བཏད་དེ། གཙོ་བོ་བླ་མ་རྡོ་རྗེ་སེམས་དཔས་མཁྱེན་སྙམ་པའི་གསོལ་འདེབས་ཀྱི་ཚུལ་དུ། ཨོཾ་གུ་རུ་བཛྲ་སཏྭ་ས་མ་ཡ། མནུ་པཱ་ལ་ཡ། ཞེས་པ་ནས། མ་ཧཱ་ས་མ་ཡ་སཏྭ་ཨ་ཧཱུཾ། ཅེས་ཅི་མང་བཟླས། བསྡུ་ན། ཨོཾ་གུ་རུ་བཛྲ་སཏྭ་ཧཱུཾ༔ ཞེས་བཟླས། སྔགས་འཕྲེང་དང་བཅས་པ་ལས་

བདུད་རྩིའི་རྒྱུན་འོ་མའི་ཁ་དོག་ལྟ་བུ་སྐྱ་ཆིལ་ལི་ལི་བབས་སྟེ། རང་གི་སྤྱི་བོར་ཚངས་པའི་བུག་ག་ནས་ཞུགས་པའི་ཕུ་ཆུ་དྲག་པོས་ཐལ་བ་བདས་པ་ལྟར་ནད་གདོན་སྡིག་སྒྲིབ་ཐམས་ཅད་དུད་ཁུ་དང་། སྣག་ཁྲག་དང་། སྲོག་ཆགས་ཕྲ་མོའི་རྣམ་པར། བཤང་ལམ་དང་། བ་སྤུའི་བུ་ག་ཐམས་ཅད་ནས་ནག་ཉི་ལི་ལི་ཐོན་པར་བསམ། བརྒྱ་སྟོང་ལ་སོགས་པར་ཅི་ནུས་བཟླས་པའི་མཐར། བདག་ནི་མི་ཤེས་རྨོངས་པ་ཡིས་སོགས་བརྗོད། ཞེས་གསོལ་བ་བཏབ་པས་རང་ལུས་ཤེལ་བུམ་གང་བ་ལྟར་བདུད་རྩིའི་རྒྱུན་དེས་ཁེངས་པར་བསམ་ལ། སྡིག་སྒྲིབ་ཐམས་ཅད་སངས་ཀྱིས་དག་ནས། རྡོ་རྗེ་སེམས་དཔའི་ཐུགས་དགྱེས་པའི་ཞལ་འཛུམ་པར་མཛད་ནས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ། །ཞེས་གསུངས་ཞིང་རྡོར་སེམས་འོད་དུ་ཞུ་ནས་རང་ལ་སྟིམ། འཁོར་གསུམ་ཡོངས་དག་བརྗོད་བྲལ་བདེ་བ་ཆེན་པོའི་ངང་ལ་གློད་ལ་བཞག་ཅིང་། མཐར་དགེ་བ་འདི་ཡི་སོགས་ཀྱི་བསྔོ་བ་བྱ། འདི་ཉིད་སྡིག་སྒྲིབ་དག་པའི་རྟགས་མ་བྱུང་གི་བར། སེམས་ཤིན་ཏུ་འཇུར་བའི་བཟླ་དགོས་སྟེ། སློབ་དཔོན་

ཆེན་པོས། གཞན་དུ་གཡེངས་པར་གྱུར་ན་ནི། སྐལ་པར་བཟླས་ཀྱང་འབྲས་མི་འབྱིན། ཞེས་གསུངས་པའི་དམིགས་པ་བཅུན་ལ་མ་ཡེངས་པ་གལ་ཆེའོ། །སྒྲིབ་པ་དག་པའི་རྟགས་སྤྱི་དང་མཐུན། ༈ མཎྜལ་གྱི་འཁྲིད་ནི། རང་གི་མདུན་གྱི་ནམ་མཁར་བླ་མ་ཡི་དམ་སངས་རྒྱས་ཆོས་དང་དགེ་འདུན་མཁའ་འགྲོ་ཆོས་སྐྱོང་རྣམས་སྐྱབས་ཡུལ་གྱི་སྐབས་ལྟར་གསལ་གདབ་ནས་དངོས་སུ་འབྱོར་དང་ཡིད་སྤྲུལ་གྱི་མཎྜལ་འབྱོར་ཚོགས་དང་བསྟུན་ལེགས་པར་ཕྱིས་སྟེ། དྲི་བཟང་དང་བ་བྱུང་གི་དྲིས་བྱུགས། མེ་ཏོག་གི་ཚོམ་བུ་སོ་བདུན་ལག་ལེན་ལྟར་བཀོད་བཞིན་པར་ཡིད་ཀྱི་དབང་ཆེན་གྱི་ས་གཞི་ལ་བསྟེན་པའི་ལྷུན་པོ་གླིང་བཞི་རི་མཚོ་འཁོར་ཡུག་དང་བཅས་པ། གླིང་བཞིའི་སྟེང་དུ་ཉི་ཟླ་གཟའ་སྐར་སོགས་སྲིད་རྩེ་མན་ཆད་ནས་ཁམས་གསུམ་རྫོགས་པའི་འཇིག་རྟེན་གྱི་ཁམས་འདི་ལྷ་མིའི་ལོངས་སྤྱོད་ཕུན་སུམ་ཚོགས་པས་བཀང་བར་དམིགས་ཏེ་འབུལ་བ་ཕྱིའི་མཎྜལ། རང་གི་ཡོངས་སུ་བཟུང་བའི་བུ་དང་ཆུང་མ་འཁོར་གཡོག་ལོངས་སྤྱོད་སོགས། གཅེས་དགུ་མ་ལུས་པ་གཅིག་ཏུ་བསྡུས་ནས་ལྟོས་

མེད་དུ་འབུལ་བ་ནང་གི་མཎྜལ། རང་གི་ལུས་འདི་རིན་པོ་ཆེ་སྣ་ཚོགས་ཀྱི་འབྱུང་གནས་སུ་དམིགས་སྟེ་ཞེན་པ་མེད་པར་འབུལ་བ་གསང་བའི་མཎྜལ། དེ་ཐམས་ཅད་ཀྱང་འཁོར་གསུམ་ཡོངས་དག་བདེ་བ་ཆེན་པོའི་ངང་ལས་མི་འདའ་བའི་ཤེས་རབ་ཀྱི་ཟིན་པར་བྱས་ལ་ངག་ཏུ། ཆོས་དབྱིངས་རང་བྱུང་སོགས་གཞུང་ལྟར་ལ། བརྒྱ་སྟོང་ལ་སོགས་པ་སྙིང་ཐག་པ་ནས་ཕུལ་ལ་མྱུར་དུ་སངས་རྒྱས་ཐོབ་པ་དང་། ཉམས་རྟོགས་ཁྱད་པར་ཅན་སྐྱེ་བར་གསོལ་བ་གདབ་མཐར་ཚོགས་ཞིང་མཆོད་རྫས་དང་བཅས་པ་འོད་དུ་ཞུ་ནས་རང་ལ་བསྟིམ་དགེ་བ་བསྔོའོ། །རྟགས་སྤྱི་དང་མཐུན། ༈ བླ་མའི་རྣལ་འབྱོར་གྱི་འཁྲིད། གཞུང་དུ་རང་ཉིད་རྟ་ཕག་ཡབ་ཡུམ་སྐུ༔ ཞེས་པ་ནས། མོས་གུས་གདུངས་ཤུགས་དྲགས་པོ་ཡི༔ ཞེས་གཞུང་ལྟར། རང་གནས་ས་ཕྱོགས་ཐམས་ཅད་དག་པའི་ཞིང་ཁམས་རྣམ་དག་ཏུ་གྱུར་པའི་རང་ཉིད་རྟ་ཕག་ཡབ་ཡུམ་དུ་གསལ་བའི་སྤྱི་བོར་ཡེ་ཤེས་ལྔའི་རང་མདངས་འོད་ལྔ་འཁྲུག་པའི་ཀློང་ན། པདྨ་ཉི་ཟླ་ལ་སོགས་པའི་གདན་ལ་དྲིན་ཅན་རྩ་བའི་བླ་མ་རྣམ་པ་ཆོས་སྐུ་ཀུན་ཏུ་བཟང་པོ་ལ། བརྒྱུད་པའི་བླ་མ་ཡི་

དམ་དཀྱིལ་འཁོར་གྱི་ལྷ་ཚོགས། སངས་རྒྱས་དང་བྱང་ཆུབ་སེམས་དཔའ། འཕགས་པ་ཉན་ཐོས་དང་རང་སངས་རྒྱས། ཆོས་སྐྱོང་སྲུང་མའི་ཚོགས་ཐམས་ཅད་མངོན་སུམ་ལྟ་བུར་བཀྲ་ལམ་གྱི་བཞུགས་པར་བསམ་མོ། །བླ་མ་ནི་ཕྱོགས་བཅུ་དུས་གསུམ་གྱི་སངས་རྒྱས་འདུས་པའི་ངོ་བོ། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཀུན་གྱི་རང་བཞིན་ཅན་ཡིན་པར་མ་ཟད། བདག་ལ་སངས་རྒྱས་ཐམས་ཅད་ཀྱི་ཞལ་མཇལ་བ། གསུང་དངོས་སུ་ཐོས་པའི་སྐལ་བ་མེད་པའི་དུས་འདིར། དེ་རྣམས་ཀྱི་མཛད་རྒྱུ་བླ་མ་དམ་པས་མཛད་དེ་རང་རྒྱུད་ལ་སངས་རྒྱས་ཀྱི་བྱིན་རླབས་སྟེར་བར་མཛད་པ་པོ་ཡིན་པའི་ཕྱིར་རང་རེའི་སྣང་ངོར་སངས་རྒྱས་ཀུན་ལས་ཀྱང་ལྷག་ཅིང་བཀའ་དྲིན་ཆེ་སྙམ་དུ་བློ་སྣ་མོས་གུས་སུ་ཧྲིལ་གྱིས་དྲིལ་ཏེ། ལུས་ཞིང་གི་བརྡུལ་རྙེད་ལྟར་སྤྲུལ་ནས་སེམས་ཅན་རྣམས་དང་། ལྷན་གཅིག་པར་སྤྲུལ་ནས་ཕྱག་འཚལ་བ་དང་། མཆོད་སྤྲིན་མཐའ་ཡས་པ་སྤྲོས་ཏེ་འབུལ་བ། ཉེས་བྱས་ལ་དུག་འཐུང་བ་ལྟ་བུའི་འགྱོད་སྡོམ་གྱི་མཐོལ་བཤགས། རྨད་དུ་བྱུང་བའི་

མཛད་པ་ལ་ཡི་རང་བ། གཟུགས་སྐུ་མྱ་ངན་ལས་མི་འདའ་བར་གསོལ་བ་འདེབས་པ། ཆོས་འཁོར་བསྐོར་བར་བསྐུལ་བ། འདིས་མཚོན་པའི་བདག་གཞན་གྱི་དགེ་བ་ཐམས་ཅད་བླ་མེད་བྱང་ཆུབ་ཏུ་བསྔོ་བ་བཅས་དོན་བསམ་བཞིན། བླ་མ་སངས་རྒྱས་སུ་ཤེས་པའི་ཡོན་ཏན་དང་བཀའ་དྲིན་དྲན་པས་བློ་སྣ་མོས་གུས་གྱི་འཕྲོག་པའི་གདུངས་ཤུགས་སྙིང་གི་དཀྱིལ་རྐང་གི་ཁོང་རུས་པའི་གཏིངས་ནས་སྐམ་སྐམ་པ་བསྐྱེད་དེ། ཅི་བྱེད་ཁྱེད་ཤེས་ཀྱི་རེ་ལྟོས་ལིང་གི་བསྐྱུར་ལ། རང་གི་བྱང་དྲངས་སྟེ་སེམས་ཅན་ཐམས་ཅད་ཀྱི་ཀྱང་གསོལ་བ་ཆིག་དྲིལ་དུ་འདེབས་པར་མོས་ལ། སེམས་བསྐྱེད་རྣམ་པར་དག་པས་ངག་ཏུ། ༈ ཨེ་མ་ཧོ༔ སྐྱེ་མེད་ཀ་དག་ཆོས་དབྱིངས་ཞིང་ཁམས་སུ༔ ཞེས་པ་ནས། མཐའ་ཡས་འགྲོ་ཀུན་སྤྲུལ་པས་འདྲེན་པར་ཤོག༔ ཅེས་པའི་བར་དང་། བླ་མ་ཡབ་ཡུམ་གྱི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་དཀར་ཧཱུཾ་སྔོན་པོ་རྣམས་དུས་གསུམ་རྒྱལ་བ་སྲྀས་བཅས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོར་བཞུགས་པ་ལས། ཨོཾ་ལས་འོད་ཟེར་དཀར་པོ་དང་། རྒྱལ་བའི་སྐུ་ཆེ་ཆུང་གྲངས་

ལས་འདས་པ་འཕྲོས། རང་གི་དཔྲལ་བར་ཐིམ་པས། ལུས་ཀྱི་སྡིག་སྒྲིབ་ཐམས་ཅད་སྦྱངས། དུས་གསུམ་སངས་རྒྱས་ཐམས་ཅད་ཀྱི་སྐུ་འཇའ་ལུས་ཟང་ཐལ་བུམ་པའི་དབང་ཐོབ། ལམ་མ་ཧཱ་ཡོ་ག་ལྷ་སྐུ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུའི་གོ་འཕང་ཐོབ་པར་བྱས། ཨཱཿལས་འོད་ཟེར་དམར་པོ་དང་། གསང་སྔགས་ཡིག་འབྲུ་ཨ་ལི་ཀ་ལིའི་རྣམ་པར་རང་སྒྲ་དང་བཅས་ཉི་ཟེར་རྡུལ་ལྟར་འཕྲོས། རང་གི་མགྲིན་པར་ཐིམ་པས། ངག་གི་སྡིག་སྒྲིབ་ཐམས་ཅད་སྦྱངས། དུས་གསུམ་སངས་རྒྱས་ཐམས་ཅད་ཀྱི་གསུང་གསང་བའི་དབང་ཐོབ། ལམ་ཨ་ནུ་ཡོ་ག་རྩ་རླུང་བསྒོམ་ཞིང་བཟླས་བརྗོད་ལ་དབང་། འབྲས་བུ་ལོངས་སྤྱོད་རྫོགས་སྐུའི་གོ་འཕང་མངོན་དུ་བྱས། ཧཱུཾ་ལས་འོད་ཟེར་སྔོན་པོ་དང་། རྒྱལ་བའི་ཕྱག་མཚན་དུ་མ་འཕྲོས། རང་གི་སྙིང་ཁར་ཐིམ་པས། ཡིད་ཀྱི་སྡིག་སྒྲིབ་སྦྱངས། དུས་སུམ་སངས་རྒྱས་ཐམས་ཅད་ཀྱི་ཐུགས་བདེ་སྟོང་ཤེས་རབ་ཡེ་ཤེས་ཀྱི་དབང་ཐོབ། ལམ་ཨ་ཏི་ཡོ་ག་ཟུང་འཇུག་ཕྱག་རྒྱ་ཆེན་པོ་བསྒོམ་པ་ལ་དབང་། དུས་གསུམ་སངས་རྒྱས་ཐམས་ཅད་

ཀྱི་འབྲས་བུ་ཆོས་སྐའི་གོ་འཕང་ཐོབ་པར་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་ཐིག་ལེ་ཐིག་ཕྲན་དང་སྐུ་ཆེ་ཆུང་ངེས་མེད་བུ་ཡུག་འཚུབ་པ་ལྟར་རང་གི་གནས་གསུམ་དུ་ཐིམ་པས། སྒོ་གསུམ་གྱི་སྡིག་སྒྲིབ་བག་ཆགས་དང་བཅས་པ་སྦྱངས། དུས་གསུམ་སངས་རྒྱས་ཐམས་ཅད་ཀྱི་དབང་བཞི་ཚིག་དབང་རིན་པོ་ཆེ་ཐོབ། ལམ་འོད་གསལ་རྫོགས་པ་ཆེན་པོ་ཁྲེགས་ཆོད་ཐོད་རྒལ་བསྒོམ་པ་ལ་དབང་། ཡེ་ཤེས་རྡོ་རྗེའི་ངོ་བོར་ཉིད་སྐུའི་གོ་འཕང་མངོན་དུ་བྱས་པར་བསམ་མོ། སླར་ཡང་མོས་གུས་གདུང་ཤུགས་དྲག་པོས་ཡིད་ཀྱི་གསོལ་བ་བཏབ་པས། བརྒྱུད་པའི་བླ་མ་ཐམས་ཅད་ཀྱང་རྩ་བའི་བླ་མ་ལ་ཐིམ། དེ་ཉིད་རང་ལ་ཤིན་ཏུ་དགྱེས་པའི་འཛུམ་ཉམས་ཀྱི་རང་གི་སྤྱི་བོར་བྱོན་ནས་འོད་དུ་ཞུ་རང་ལ་ཐིམ་ནས་རང་སེམས་བླ་མ་དང་དབྱེར་མེད་བསྲེས་ལ་བཞག །སྐྱེ་བ་ཀུན་ཏུ་ཡང་དག་བླ་མ་དང་། སོགས་ཀྱིས་བསྔོ་བ་ཤིས་བརྗོད་ཀྱང་བྱའོ། །དེ་དག་རྣམས་ནི་མདོ་སྔགས་གཉིས་ཀའི་སྔོན་འགྲོ་ཐུན་མོང་པའི་དབང་དུ་བྱས་པའོ། ༈ །ད་ནི་ཐུན་མོང་མ་ཡིན་པའི་སྔོན་འགྲོ་ལ། འཁོར་འདས་རུ་ཤན་དབྱེ་བ། སྒོ་གསུམ་

གྱི་སྔོན་འགྲོ་དང་། རྣལ་དུ་དབབས་པའོ། དགོངས་གཏེར་ལས། ཕྱི་འཁོར་འདས་རུ་ཤན་དབྱེ་བ། ནང་འཁོར་འདས་རུ་ཤན་དབྱེ་བའོ། །གསུངས་པ་ལྟར་དང་པོ་ནི། རི་ངོག་ལུང་སྟོང་སོགས། མིའི་རྒྱུ་འགྲུལ་མེད་པའི་གནས་དབེན་པར་སོར་སྟེ། གཞི་བདག་ལ་དཀར་གཏོར་སྦྱིན་ཞིང་འཕྲིན་ལས་བཅོལ་ལ། དགོངས་གཏེར་ལས། དེ་ཡང་ཆོས་ཉིད་ཀྱི་གནས་ལུགས་གདོད་ནས་རང་ལ་ཡོད་ཀྱང་གནས་སྐབས་སུ་མ་རིག་པའི་སྒྲིབ་པས་སྒྲིབ་ནས་འགྲོ་བ་རིགས་དྲུག་གི་གནས་སུ་བར་མེད་དུ་འཁྱམས་ཏེ་སྡུག་བསྔལ་སྣ་ཚོགས་ཀྱི་མནར་མེད། ད་ནི་སེམས་ཅན་གྱི་དོན་དུ་ད་རན་ནས་བཟུང་འཁོར་འདས་རུ་ཤན་ཕྱེ་ལ་ཕྱིན་ཆད་འཁོར་བར་མི་ལྡོག་པར་བྱ་སྙམ་ནས་འགྲོ་བ་རི་དྲུག་སོ་སོའི་བདེ་སྡུག་སྤྱོད་ཚུལ་ཐམས་ཅད་སེམས་ཀྱིས་མྱོང་བར་བསམ་ཞིང་། ལུས་ཀྱིས་འཆོང་རྒྱུག་འགྲོ་འདུག་སོགས་རྣམ་འགྱུར། ངག་གི་སྒྲ་སྐད་སྣ་ཚོགས་བརྗོད་པ་སོགས་རྟོགས་པའི་སྣ་མི་སྐྱེལ་བར་ཤུགས་འབྱུང་འགགས་མེད་དུ་སྤྱད་པས་འགྱུ་བ་སྤུན་ཐག་མ་ཆད་ཀྱི་བར་དུ་བྱས་ནས་རྗེས་ཤེས་རིག་གི་རང་ངོ་ལ་བལྟ་ཞིང་

ངལ་གསོ། དེ་ནས་ཡང་ལུས་ཀྱིས་བདེ་གཤེགས་ཞི་ཁྲོའི་རྣམ་འགྱུར་བྱ། དགོས་པ་ནི་སྒོ་གསུམ་གྱི་སྡིག་སྒྲིབ་དག་བར་ཆད་ཞི་མངོན་ཞེན་ལྡོག་རྡོ་རྗེ་གསུམ་གྱི་གོ་ཕང་འགྲུབ་པར་བྱེད་དོ། ༈ གཉིས་པ་ནང་འཁོར་འདས་རུ་ཤན་དབྱེ་བར་བྱ་སྟེ། ཀློང་གསལ་ལས། ནང་གི་འཕྲུལ་རྒྱུ་ཟད་བྱའི་ཕྱིར། །འཁོར་འདས་རུ་ཤན་ནང་ལྟར་དབྱེ། །ཞེས་གསུངས་པས་སྦྱངས་གཞི་རང་གི་ལུས་ཀྱི་གནས་དྲུག་ཏུ་རིགས་དྲུག་ཏུ་སྐྱེ་བའི་ས་བོན་ཡོད་དོ། །དེ་ཡང་སྤྱི་བོར་ལྷ་ཡི་ས་བོན་ཨ་དཀར་པོ། མགྲིན་པར་ལྷ་མིན་ས་བོན་སུ་ལྗང་སེར། སྙིང་ཁར་མིའི་ས་བོན་ནི་སྔོ་སྐྱ། ལྟེ་བར་དུད་འགྲོའི་ས་བོན་ཏྲི་དམར་ནག །གསང་བར་ཡི་དྭགས་ཀྱི་ས་བོན་པྲེ་ལྗང་ནག །རྐང་མཐིལ་དུ་དམྱལ་བའི་ས་བོན་དུ་དུད་ཁ་རྣམས་བག་ཆགས་དང་བཅས་པ་ལྷན་སྐྱེས་སུ་གནས་པ། དེ་སྦྱོང་བྱེད་རིག་པའི་ཡེ་ཤེས་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་ངོ་བོ། སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་ཁར་ཧཱུཾ་སྔོན་པོ། དེ་ལས་ཐུགས་རྗེའི་ཟེར་ཐག་འཕྲོས། རིགས་དྲུག་གི་ས་བོན་བག་ཆགས་དང་བཅས་བཞོབ་ཏུ་བསྲེགས། རིགས་དྲུག་གི་

རྒྱུ་འབྲས་དྲུང་ནས་བྱུང་སྟེ། ལུས་ཤེལ་གོང་གཡའ་བྲལ་ལྟ་བུར་བསྒོམ། འབྲུ་གསུམ་གྱི་བསྙེན་པ་འབུམ་ཕྲག་བདུན་བྱའོ། །དགོས་པ་ནི། ཐལ་འགྱུར་ལས། །འོད་གསལ་དགོངས་པ་རྣམ་པ་གཉིས། །མཐུན་མོང་མཆོག་གི་དབྱེ་བས་བསྟན། །ཞེས་གསུངས་སོ། ༈ གཉིས་པ་སྒོ་གསུམ་གྱི་སྔོན་འགྲོ་ནི། དགོངས་གཏེར་ལས། །ལུས་རྡོ་རྗེའི་འདུག་སྟངས་བྱ་ཞིང་། ངག་རླུང་ཤེས་པ་ཧཱུྃ་གསུམ་གཅིག་ཏུ་བྱས་ནས་ཕྱི་ནང་དུ་འགྲོ་ལྡོག་ལ་སྦྱངས། ཞེས་གསུངས་པས་རྐངས་མཐིལ་གཉིས་སྦྱར་སོར་མོ་བཅུ་ས་ལ་བཙུགས། པུས་མོ་ཕྱིར་བརྒྱང་སྒལ་ཚིག་དྲང་པོར་བསྲངས། ལག་པ་གཉིས་སྤྱི་བོར་མ་རེག་པར་ཐལ་མོ་སྦྱར། གྲུ་མོ་གཉིས་ཐད་སོར་ཕྱིར་བརྒྱངས། མགྲིན་པ་ཨོལ་འདུད་ནོན་པར་བྱས། ཉ་བཞི་སྒྲིམ། མིག་བར་སྣང་ལ་ཧ་རེས་བལྟས་ལ་ལུས་རྡོ་རྗེའི་འདུག་སྟངས་བྱས་པ་བཞིན་དུ། ལུས་རྡོ་རྗེ་སྔོན་པོ་རྩེ་གསུམ་པ་མེ་འབར་བ་ཞིག་ཏུ་བསྒོམ། དེ་ལྟར་བྱས་པས་ལུས་ཁོལ་བུར་ན་ཞིང་ཚུགས་མི་ཐུབ་པ་དང་། ལུས་རང་བབས་སུ་ཕྲེས་སེ་སྐྱར་ལ་སེམས་རྟོགས་མེད་ཀྱི་རང་

ངོ་སྐྱང་ངོ་། ༈ གཉིས་པ་ངག་གི་སྔོན་འགྲོ་ཧཱུཾ་སྦྱངས་ལ། ཕྱི་སྣང་བ་ལ་རྒྱས་གདབ་པ་དང་། ནང་ཕུང་པོ་ལ་རྒྱས་གདབ་པའོ། །དང་པོ་ནི། གནས་དབེན་པར་ལུས་རྣམ་སྣང་གི་ཆོས་བདུན་བྱས་སྟེ་སྙིང་གར་ཧཱུཾ་སྔོན་པོ་ཞིག་བསྒོམ། དེ་ཉིད་གསལ་སྣང་ཐོན་པ་དང་། སོ་དང་ཆུ་མ་རེག་ཙམ་དུ་རླུང་དང་ཤེས་པ་ཧཱུཾ་གསུམ་གཅིག་ཏུ་བསྲེས་ནས། ཧཱུྃ་གི་གླུ་སྙན་ལ་རིངས་བ་བླངས་པས་སྙིང་གའི་ཧཱུཾ་ལ་ཧཱུཾ་ཡིག་དེ་འདྲ་བ་རྒྱུན་མི་ཆད་དུ་བྱུང་། སྣ་བུག་ནས་ཐོན་ཕྱིའི་སྣང་བ་ཐམས་ཅད་ཧཱུཾ་གི་མེ་རེ་རེ་ཁེངས་པར་སྣང་བ་ཐམས་ཅད་ཧཱུཾ་གི་བཀང་བར་བསམ་ཞིང་། དེ་ཐམས་ཅད་ཀྱང་བུང་བ་ཚང་ལ་ཞུགས་པ་ལྟ་བུར་ཧཱུཾ་གི་སྒྲ་དི་རི་རི་སྒྲོག་པར་བསམ་མོ། །དེ་སྣང་བ་རང་བཞིན་མེད་པར་གྲོལ་བའི་དགོས་པ་ཡོད་དོ། །ནང་ཕུང་པོ་ལ་རྒྱས་གདབས་པ་ནི། ལུས་གནད་ལྟ་སྟངས་སྔར་ལྟར་བྱས་ལ། ཧཱུཾ་ཞེས་བརྗོད་པའི། ཕྱི་རོལ་གྱི་ཧཱུཾ་རྣམས་སྣ་བུག་གཡས་གཡོན་ནས་ཐོགས་པ་མེད་པར་ཞུགས་པས་ལུས་ཀྱི་ནང་ཐམས་ཅད་རང་སྒྲ་དང་བཅས་སྟེ་མེ་རེ་རེ་བཀང་བར་བསམ་ཞིང་། རང་གི་གདོས་བཅས་ཤ་ཁྲག་གི་ལུས་རྣམས་མེད་པར་བྱས།

རང་ལུས་སྣང་སྟོང་བར་སྣང་ལ་ཡོམ་ཡོམ་འདུག་པར་བསམ་ལ། རླུང་བུམ་པ་ཅན་བཟུང་དེ་ཆད་པ་དང་ཕཊ༔ ཅེས་བརྗོད་པའི་རང་བབས་སུ་བཞག །དེས་ཕུང་པོ་རང་བཞིན་མེད་པར་གྲོལ་བའི་དགོས་པ་ཡོད་དོ། ༈ །གཉིས་པ་རྩལ་སྦྱངས་བ་ལ་གཉིས་ལས། དང་པོ། ཕྱི་སྣང་བ་ལ་རྩལ་སྦྱངས་ནི། ཧཱུཾ་དྲག་པོ་ངར་དང་ལྡན་པ་བརྗོད་པས། སྙིང་གི་ཧཱུཾ་མཐིང་ནག་དྲག་ལ་རྩུབ་པ་ཤུགས་དང་ལྡན་པ་གང་ལ་སྤྲོ་བ་དེ་དང་མཚམ་པ་ཞིག་མང་པོ་ཐོལ་ཐོལ་བྱུང་བའི། ཕྱི་རོལ་གྱི་སྣང་བ་ཐམས་ཅད་ཐལ་བྱུང་དུ་ཕུག་ནས། སང་སེང་ཁྲལ་ཁྲོལ་བཏང་བར་བསམ། ཕྱིའི་ཡུལ་སྣང་རྣམས་ལ་ཨ་མཐས་ཀྱི་སྣང་བ་དག་པར་འཆར་བར་ཙལ་སྦྱང་བའོ། །དེ་ནི་སྣང་བ་བདེན་མེད་དུ་རྟོགས་པའི་དགོས་པ་ཡོད་དོ། ༈ །གཉིས་པ་ནང་ཕུང་པོ་ལ་རྩལ་སྦྱངས་བ་ནི། སྔར་ལྟར་ཧཱུཾ་སྦྱངས་ཞིང་སྤྲོས་པའི་རང་ལུས་ཀྱི་རྒྱབ་མདུན་སྟོད་སྨད་ཐམས་ཅད་ཐལ་ཕྱུང་ཕུག་སང་སེང་ཁྲལ་ཁྲོལ་དུ་ལུས་ཀྱི་ཕྱི་ནང་ཐམས་ཅད་ཕུག་ནས། དངོས་པོར་གྲུབ་པ་ཡུངས་འབྲུ་ཙམ་ཡང་མེད་པར་བསམ། ལུས་ཁོལ་བུར་ན་བ་དང་རང་

བཞིན་མེད་པའི་ཉམས་འཆར་ན་འབྱོངས་པའོ། །དེས་ཕུང་པོ་འཇའ་ལུས་འོད་སྐུར་གྲོལ་བའི་དགོས་པ་ཡོད་དོ། ༈ །གསུམ་པ་གཉེན་བརྩལ་བ་ནི། རང་གི་མདུན་དུ་ཤིང་བུ་ལྟ་བུའི་དམིགས་བརྟེན་བཙུགས་ཏེ་ངག་ཧཱུྃ་གི་གླུ་རིང་པོ་བརྗོད་པའི་སྙིང་གི་ཧཱུྃ་གི་འཕྲེང་བ་བར་མ་ཆད་དུ་བྱུང་བར་དམིགས་བརྟེན་གྱི་རྩ་བ་ནས་རིམ་པར་དཀྲིས་ཏེ། རྩེ་མོར་སླེབ་པ་དང་ངལ་བསོ། ཡང་རིམ་བཞིན་ཧཱུཾ་ཞེས་བརྗོད་པའི་ཧཱུྃ་གི་ཐག་པ་རྣམས་རིམ་བཞིན་བཤིག་ནས། གཅིག་ལ་གཅིག་རིམ་གྱིས་ནང་དུ་བསྡུས་ཏེ་སྙིང་གའི་ཧཱུཾ་ལ་རྫོགས་པར་སྟིམ་ནས་ངལ་བསོ། དེ་ལྟར་རླུང་སེམས་ཧཱུཾ་གསུམ་གཅིག་ཏུ་བྱས་ནས་ཕྱི་ནང་འགྲོ་ལྡོག་ལ་སྦྱངས་ནས་རྣམ་རྟོག་གི་ངར་ཞི་ནས་སེམས་ཤིན་སྦྱངས་ཐོབ་སྟེ་དམིགས་པ་གང་དུ་ཡང་བསྒྱར་ཐུབ་པ་ནི་གཉེན་བཙལ་བའི་དགོས་པ་ཡོད་དོ། ༈ །བཞི་པ་ལམ་དུ་གཞུགས་པ་ནི། རང་གི་ལུས་དང་རླུང་སེམས་གཅིག་དྲིལ་ཧཱུཾ་ཡིག་སྔོན་པོའི་རྣམ་པ་ཅན་བྱས་སྟེ། མདུན་ན་ཕར་སྲིན་འགྲོས་ལྟ་བུའི་རྣམ་པ་ཅན་བྱས་པའི་ལམ་ལ་ཞུགས་ནས་སོང་ཞིང་འཕྱོག་མཚམས་སུ་ཅུང་ཟད་ངལ་བསོ། རྒྱང་རིང་པོར་ཕ་རོལ་ཏུ་སོང་བར་

བསམ་ཞིང་། ངག་ཏུ་ཧཱུཾ་རིང་པོ་བརྗོད་དེ། ཡང་སྔར་བཞིན་ཚུར་ལོགས་ནས་རང་སོར་གནས་པར་བསམ། བར་བར་དུ་ངལ་བསོ། དེའི་ཐོག་མར་དགའ་བ་དང་སྐྱོ་བ་ལ་སོགས་པའི་ཉམས་མཐོ་མན་ཅན་དང་། མཐར་ལུས་སེམས་བདེ་བས་ཁྱབ་པར་འཆར། དགོས་པ་ནི། ཐུན་མོང་ངག་གི་སྡིག་སྒྲིབ་དག་མངོན་ཞེན་སྦྱོངས། མཐར་ཐུགས་གསུང་རྡོ་རྗེ་འགྲུབ་པར་འགྱུར་རོ།། །།བཀྲིས།།