ཀྱཻཿ གསང་བདག་ཐུགས་སྤྲུལ་རྡོ་རྗེ་ལེགས། །མཆེད་འཁོར་ཡུམ་སྲས་བློན་པོ་བཅས། །དགྱེས་པ་ཆེན་པོའི་མཐུན་རྫས་འདི། །བཞེས་ལ་བསམ་དོན་ལྷུན་གྲུབ་མཛོད། །རྫོགས་སྤྲུལ་ལྔ་པས་སོ། །

ཧཱུྃཿ གངས་དཀར་ཏི་སེའི་ཞིང་སྐྱོང་དཔལ་མགོན་ཆེ། །ལྷ་བཙན་ཆེན་པོ་ཇོ་བོ་རྡོ་རྗེ་འབར། །བཙན་རྒོད་ཆེན་པོ་མཆེད་བདུན་འཁོར་བཅས་རྣམས། །དམ་རྫས་ཕུད་ཀྱི་མཆོད་པ་འདི་བཞེས་ལ། །ཐུགས་དམ་བསྐང་ལ་བསམ་དོན་ལྷུན་གྲུབ་མཛོད། །ཅེས་པའང་རྫོགས་སྤྲུལ་ལྔ་པས་སོ། །

ཀྱཻ །དམ་ཅན་ནོར་བདག་དགེ་བསྙེན་སྤྲུལ་འཁོར་བཅས། །ཀུན་བཟང་མཆོད་པའི་སྤྲིན་ལྟར་འབུལ་ལགས་ན། །མི་མཐུན་འགལ་རྐྱེན་གནོད་པ་ཀུན་ཞི་ནས། །མཐུན་རྐྱེན་ཡར་ངོའི་ཟླ་ལྟར་འཕེལ་རྒྱས་མཛོད། །མཆོད་རིག་འཛིན་ངག་དབང་ནས་བསྐུལ་བའི་ངོར་རྫོགས་སྤྲུལ་ལྔ་པས་སྨྲས་པའོ། །

ཧྲཱིཿ གཏེར་སྲུང་བཙན་རྒོད་འབར་བ་མཆེད་བདུན་དང་། །གནོད་སྦྱིན་ནོར་བདག་བསམ་མི་ཁྱབ་པའི་འཁོར། །རང་རང་མཐུན་པའི་དམ་རྫས་འདི་འབུལ་བས། །ཐུགས་དམ་བསྐང་ལ་ཕྲིན་ལས་མ་གཡེལ་ཞིག །རྫོགས་སྤྲུལ་ལྔ་པས་སོ།།

ཧཱུྃ། སྔོན་ཚེ་པདྨའི་བཀའ་ཉན་ཐ་ཚིག་ཅན། །ལྷ་ཡི་དགེ་བསྙེན་རྡོ་རྗེ་དྲག་པོ་རྩལ། །བཙན་རྒོད་བྱ་ར་སྟོང་གི་ཚོགས་དང་བཅས། །དམ་རྫས་ཕུད་ཀྱི་མཆོད་པ་རྒྱ་ཆེན་འདིས། །ཐུགས་དམ་གཉན་བསྐང་རྣལ་འབྱོར་དབུ་འཕང་བསྟོད། །རྫོགས་སྤྲུལ་ལྔ་པས་སོ། །

ཛཿ དྲེགས་པའི་ཡོངས་རྗེ་དྲག་རྩལ་དབང་པོ་ཡིས༔ དམ་རྫས་བྷ་ལིང་མཆོད་གཏོར་འདི་བཞེས་ལ༔ རྣལ་འབྱོར་བསམ་དོན་ཆོས་བཞིན་འགྲུབ་པ་དང༔ ཚེ་དཔལ་སྟོབས་འབྱོར་ལུང་རྟོགས་སྣང་བ་རྒྱས༔ སྨྱོ་འདྲེ་རྒྱལ་འགོང་རྡུལ་དུ་བརླག་པ་དང༔ ལྷ་འདྲེ་མི་གསུམ་དབང་སྡུད་ཕྲིན་ལས་མཛོད༔ཅེས་པ་འདི་ནི་གཏེར་གཞུང་གཞིར་བཞག་ནས་ཚིག་རྐང་གཉིས་ནི་མཁན་དཀོན་བཟང་ན…

ཧྲཱིཿ རྒྱལ་ཆེན་སྐུ་ལྔ་ཡབ་ཡུམ་བློན་པོ་དང་། །རུ་འདྲེན་སྡེ་བཞིའི་འཁོར་ཚོགས་བསམ་མི་ཁྱབ། །མཆོད་པ་འབུལ་ལོ་ཐུགས་དམ་དགྱེས་སྐོངས་ཤིག །རྣལ་འབྱོར་བསམ་པ་ཡིད་བཞིན་སྒྲུབ་ཏུ་གསོལ། །ཅེས་པ་འདི་ཡང་རྫོགས་སྤྲུལ་ལྔ་པས་གསུངས་པའོ། །

ཧྲཱིཿ རྒྱལ་ཆེན་སྐུ་ལྔ་ཡབ་ཡུམ་ནི། །བློན་པོ་རུ་འདྲེན་འཁོར་དང་བཅས། །བཟའ་བཅའ་བཏུང་བའི་བྱེ་བྲག་འདི། །ཕུལ་བས་ཅི་འདོད་འགྲུབ་པར་མཛོད། །རྫོགས་སྤྲུལ་ལྔ་པས་སོ། །

ཧྲཱིཿ ཁམས་གསུམ་དབང་སྒྱུར་སྲིད་གསུམ་སྲོག་གི་གཤེད། །བློན་པོ་རྡོ་རྗེ་གྲགས་ལྡན་འཁོར་དང་བཅས། །མཐུན་པའི་དམ་རྫས་ནམ་མཁའི་ཁྱོན་བཀང་སྟེ། །ཐུགས་དམ་བསྐང་ལ་ལས་རྣམས་མྱུར་དུ་སྒྲུབས། །རྫོགས་སྤྲུལ་ལྔ་པས་སོ། །

ཧྲཱིཿ རྒྱལ་ཆེན་རྡོ་རྗེ་གྲགས་ལྡན་ནི། །ཡུམ་དང་སྲས་བློན་སྤྲུལ་འཁོར་བཅས། །རྣམ་མང་དགྱེས་པའི་མཆོད་སྤྲིན་འདི། །ཕུལ་བས་བསམ་དོན་ལྷུན་གྲུབ་མཛོད། །རྫོགས་སྤྲུལ་ལྔ་པས་སོ། །

ཧྲཱིཿ དབང་ཆེན་ཐུགས་སྤྲུལ་གྲི་བཙན་དགྲ་འཇོམས་རྩལ། །མཆེད་ཟླ་ཡུམ་སྲས་བློན་འཁོར་རྒྱ་མཚོའི་ཚོགས། །མཆོད་པའི་བྱེ་བྲག་རྣམ་མང་རྒྱ་མཚོ་ཡིས། །ཐུགས་དམ་བསྐང་ལ་དངོས་གྲུབ་མ་ལུས་སྩོལ། །རྫོགས་སྤྲུལ་ལྔ་པས་སོ། །

ཧྲཱིཿ དབང་ཆེན་བཀའ་སྡོད་དྲེགས་པའི་གཙོ། །གྲི་བཙན་རྡོ་རྗེ་དགྲ་འཇོམས་རྩལ། །འཁོར་བཅས་མཆོད་པ་འདི་བཞེས་ལ། །བསམ་དོན་ལྷུན་གྱིས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །

བཻ། ནོར་བདག་ཡིད་བཞིན་ནོར་བུ་རྣམ་ཐོས་སྲས། །དགྱེས་སྡེ་ཡུམ་སྲས་ནོར་ལྷ་རྒྱ་མཚོའི་ཚོགས། །རྣམ་མང་མཆོད་སྤྲིན་རྒྱ་མཚོ་འདི་བཞེས་ལ། །ཐུགས་དམ་བསྐང་ལ་ནོར་གྱི་དངོས་གྲུབ་སྩོལ། །རྫོགས་སྤྲུལ་ལྔ་པས་སོ། །

བཻ། རྣམ་མང་ཐོས་སྲས་འཁོར་བཅས་ཀྱིས། །རྣམ་དག་མཆོད་པ་འདི་བཞེས་ལ། །རྣམ་ཀུན་ཐུགས་དམ་དགྱེས་བསྐང་བས། །རྣམ་བཞིའི་ཕྲིན་ལས་བདག་ལ་སྩོལ། །རྫོགས་སྤྲུལ་ལྔ་པས་སོ། །

ཧཱུྃ། རྟ་ལྷའི་རྒྱལ་པོ་ཨཱརྱ་རེ་མནྟ། །རང་འདྲ་ལྔ་བརྒྱའི་འཁོར་ཚོགས་བཅས་པ་རྣམས། །ཁྱེད་དང་མཐུན་པའི་དམ་རྫས་འབུལ་ལགས་ན། །ཐུགས་དམ་བསྐང་ལ་གཞི་བྱེས་ལམ་གསུམ་གྱི། །རྟ་དྲེལ་གོད་ཁ་བཟློག་པའི་ཕྲིན་ལས་མཛོད། །ཅེས་པ་འདི་ཡང་རྫོགས་སྤྲུལ་ལྔ་པས་སོ། །

ཀྱཻ། ས་བརྒྱད་སེམས་དཔའ་ཡུལ་ལྷའི་ཚུལ། །གཉན་ཆེན་རྡོ་རྗེ་འབར་བ་རྩལ། །འཁོར་བཅས་མཆོད་པ་འདི་བཞེས་ལ། །བསམ་དོན་ལྷུན་གྱིས་འགྲུབ་པར་མཛོད། །རྫོགས་སྤྲུལ་ལྔ་པས་སོ། །

ཀྱཻ། རྒྱལ་དབང་པདྨའི་བཀའ་ཉན་ཡུལ་སྐྱོང་གཙོ། །ལྷ་གཉན་ཆེན་པོ་རྡོ་རྗེ་གཡུང་དྲུང་རྩལ། །བཙུན་མོ་སྲས་བློན་རུ་འདྲེན་འཁོར་ཚོགས་བཅས། །དམ་རྫས་ཕུད་ཀྱི་མཆོད་པ་རྒྱ་ཆེན་འདིས། །ཐུགས་དམ་བསྐང་ལ་བཀྲ་ཤིས་བདེ་ལེགས་སྩོལ། །རྫོགས་སྤྲུལ་ལྔ་པས་སོ། །

ཧཱུྃ། སྨན་བཙུན་ཆེན་མོ་རྒོད་ལྕམ་ཤེལ་རུ་སྨན། །དཀོར་བདག་ཚུལ་འཛིན་ཀླུ་གཉན་སྨན་མོའི་གཙོ། །འཁོར་བཅས་དམ་རྫས་མཆོད་པ་འདི་བཞེས་ལ། །ཐུགས་དམ་བསྐང་ལ་འདོད་དོན་མྱུར་དུ་སྒྲུབས། །རྫོགས་སྤྲུལ་ལྔ་པས་སོ།།

ཧཱུྃ། གནས་བདག་ཆེན་པོ་ཟོ་དོར་ཡོངས་ཀྱི་གཙོ། །ལྷ་ཀླུ་གཉན་བཅས་འཁོར་ཚོགས་བསམ་མི་ཁྱབ། །ནམ་མཁའི་ཁམས་བཀང་མཆོད་སྤྲིན་རྒྱ་མཚོ་ཡིས། །ཐུགས་དམ་གཉན་བསྐང་རྣལ་འབྱོར་བསམ་དོན་སྒྲུབས། །རྫོགས་སྤྲུལ་ལྔ་པས་སོ། །

ཧཱུྃ། གནས་བདག་ནོར་བུ་གཡུལ་རྒྱལ་ནི། །ཡུམ་དང་བློན་པོ་དམག་དཔུང་བཅས། །བཟའ་བཏུང་མཆོད་པ་འདི་བཞེས་ལ། །ཡིད་ལ་ཅི་འདོད་ལྷུན་གྲུབ་མཛོད། །རྫོགས་སྤྲུལ་ལྔ་པས་སོ། །