ཡིན་ཞིང་སངས་རྒྱས་དེའང་གནས་ལུགས་ཀྱི་དོན་འདི་ལས་ལོགས་སུ་ཡོད་པ་མ་ཡིན་ནོ། །དེས་ན་གནས་ལུགས་སྟོང་པ་ཉིད་གདོད་ནས་སངས་རྒྱས་ཀྱི་རང་བཞིན་དུ་བཞུགས་པ་འདིས་ཆོས་ཐམས་ཅད་ལ་ཁྱབ་པས་ཐམས་ཅད་འདི་ཡིན་ལ་འདི་མ་ཡིན་པའི་ཆོས་ཞིག་གང་དུ་བཙལ་ཀྱང་མི་རྙེད་དོ། །དེའང་ཆོས་རྣམས་རྟེན་ཅིང་འབྲེལ་པར་འབྱུང་བའི་རྒྱུ་མཚན་གྱིས་སྟོང་པ་ཉིད་དུ་བས…

ལས་ལོགས་སུ་སྟོང་ཉིད་མ་གྲུབ་པས་ཟུང་འཇུག་ཏུ་འཐད་པ་ཡིན་ནོ། །དེ་ལྟར་ཆོས་ཐམས་ཅད་ཀྱི་ཆོས་ཉིད་དུ་གྱུར་པས་དེ་བཞིན་ཉིད་ལ་ཀུན་གཞིའི་སྒྲར་གསུངས་པ་ཡིན་པས་དེའི་མཚང་སྟེ་གནད་ཐམས་ཅད་རིག་པར་ཤོག་ཅེས་པའོ། །དེས་ན་འདིར་ཀུན་གཞི་ཞེས་པ་སེམས་རང་བཞིན་གྱིས་དག་པ་ཉིད་དེ། རྒྱན་སྟུག་པོ་བཀོད་པར། ཀུན་གཞི་ངང་ལུགས་དགེ་བ་ནི། །རྒྱལ་སྲས…

སྣང་སྟོང་། རྟོག་འཁྲུལ། སྐྱེ་འགག་ཐམས་ཅད་སྔར་སྨོས་པའི་རྒྱུ་མཚན་དེ་དག་ངེས་པའི་སྒོ་ནས་རང་བཞིན་མེད་པར་གཏན་ལ་ཕབ་པས་གནས་ལུགས་ཀྱི་སྒྲོ་འདོགས་ཐམས་ཅད་གཅད་དགོས་པར་སྨོན་པའི་ཚུལ་གྱི་གདམས་པའོ། །འོ་ན་རྣམ་རིག་སྨྲ་བ་ལྟར་ཆོས་ཐམས་ཅད་སེམས་སུ་རྟོགས་པ་དེ་མཐར་ཐུག་གི་དོན་རྟོགས་པ་ལྟར་གསུངས་པ་ཅི་ཞེ་ན། འདི་སྐབས་གོང་སྨོས་ལྟར་ག…

སྒོམ་ལ་འཇུག་ཚུལ། བར་དུ་མཉམ་པར་འཇོག་ཚུལ། མཐར་དེ་བསྐྱང་ཚུལ་ལོ།། ༈ །།དང་པོ་ནི་བླ་མ་མཆོག་གིས་བྱིན་གྱིས་བརླབས་ཤིང་། ཟབ་མོའི་ཆོས་བློར་ཤོང་པ། དད་བརྩོན་ཤེས་བཟོད་བཞི་དང་ལྡན་པའི་སྐལ་ལྡན་གྱིས་ཕྱག་རྒྱ་ཆེན་པོའི་རྣལ་འབྱོར་ཉམས་སུ་ལེན་པ་ལ། དང་པོར་ལུས་ངག་ཡིད་གསུམ་ཐ་མལ་གྱི་འདུ་འཛིས་དབེན་པ་ཞིག་གལ་ཆེ་སྟེ། འདུ་འཛི་ཞེས་པ…

རྣམས་སུ། །རང་དབང་སྤྱོད་ཅིང་ཆགས་མེད་པར། །ནམ་ཞིག་བདག་ནི་གནས་པར་འགྱུར། །ཞེས་སྤྱོད་འཇུག་ཏུ་གསུངས་པ་ལྟར་དབེན་པའི་གནས་སུ་ཁྲིད་རིམ་ནས་འབྱུང་བ་ལྟར་ཐུན་མོང་གི་སྔོན་འགྲོས་བློ་ལེགས་པར་སྦྱངས་ཏེ་གནས་པར་བྱའོ། །དེ་ལྟར་ཕྱི་རོལ་གྱི་དབེན་པ་བསྟེན་པ་དང་ཐུན་མོང་གི་ལམ་ལ་བློ་སྦྱོང་བ་དེས་འདུ་འཛིའི་ཚོགས་ངང་གིས་འགག་པར་འགྱུར་…

སྡུག་བསྔལ་ཞིང་ནམ་སྨད་མི་འོང་བར་ཁོ་ཐག་ཆོད་པས་བདེ་བར་གཉིད་ལོག་པ་གཟིགས་པས་རེ་བ་སྤང་དགོས་པར་མཁྱེན་པ་དང་། ཡང་ཆུ་སྐྱར་ཞིག་གིས་ཉ་ཆེན་པོ་ཞིག་ཁྱེར་ནས་སོང་བ་ཆུ་སྐྱར་གཞན་རྣམས་ཀྱིས་བདས་པས་ཉ་དེ་བོར་བ་དང་ཡང་ཆུ་སྐྱར་གཞན་ཞིག་གིས་བླངས་པ་དང་། ཡང་དེ་བཞིན་དུ་གྱུར་པ་སོགས་རིམ་པར་གཟིགས་པས། སུའི་ལག་ཏུ་ཡོད་ཀྱང་རྩོད་པའི་གཞིར…

པོ་དཔུང་བཅས་མདུན་ནས་འགྲོ་བ་མ་མཐོང་བ་གཟིགས་པས། སེམས་རྩེ་གཅིག་པ་དགོས་པར་མཁྱེན་པ་དང་། གཞོན་ནུ་མ་ཞིག་སྤོས་བདར་བ་ན་གདུ་བུ་མང་པོ་འཁྲོལ་བས་མ་བདེ་ནས་མཐར་ཐམས་ཅད་ཕུད་པ་དང་བདེ་བ་གཟིགས་པས་གྲོགས་སྤངས་ནས་གཅིག་པུར་སྡོད་དགོས་བར་མཁྱེན་པ་རྣམས་ལ་བརྟེན་ནས་དེ་བཞིན་དུ་མཛད་པས་ཏིང་ངེ་འཛིན་ཕུལ་དུ་བྱུང་བ་འཁྲུངས་པ་ཡིན་ནོ། །དེ…

རྐན་སྦྱར། །སོ་དང་མཆུ་ནི་བདེ་བར་བཞག །དབུགས་ཀྱི་དབྱུང་རྔུབ་ཀློད་ནས་ནི། །ཅུང་ཟད་རྩོལ་བ་བྲལ་བ་ཡིས། །རྡོ་རྗེ་སྐྱིལ་ཀྲུང་ལེགས་གནས་ཤིང་། །ཞེས་དང་། རྡོ་རྗེ་རྩེ་མོ་ལས། འདུ་འཛི་མེད་པའི་གནས་གཙང་མ། །དེར་ནི་སྐྱིལ་ཀྲུང་བཅའ་བར་བྱ། །ཇི་ལྟར་བྱང་ཆུབ་སེམས་དཔའ་ཡིས། །བྱང་ཆུབ་སྙིང་པོར་བཞུགས་པ་བཞིན། །མིག་བཙུམ་སོ་ལ་སོ་བཞག་…

མེད་ལ་སྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །ཞེས་དང་། ཧེ་བཛྲ་ལས། གང་ཕྱིར་ཡིད་ཀྱིས་མ་བསྒོམས་པར། །འགྲོ་བ་ཐམས་ཅད་བསྒོམ་པར་བྱ། །ཞེས་དང་། ལྷན་ཅིག་སྐྱེས་གྲུབ་ལས། བུམ་པ་བཞིན་དུ་ཁོང་སྟོང་དུ། །དེ་ལྟར་གང་ཞིག་རྟོག་བྱེད་པ། །ཡང་ན་སྟོང་པར་སྨྲ་བའི་བློ། །དེ་ནི…

བརྒྱ་པ་ལས། ཆོས་གང་ལའང་བླང་བའམ། གཟུང་བའམ། དོར་བ་མ་མཆིས་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །གང་ཅི་ལའང་མི་གནས་པ་དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །གང་ལའང་མི་སེམས་རྣམ་པར་མི་རིག་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་ལགས་སོ། །ཞེས་དང་། བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ…

མའི་ངང་ལ་རང་བབས་སུ་འཇོག་པ་ཁོ་ན་སྟེ། དེའི་ཚུལ་ཡང་བཀའ་བརྒྱུད་འདི་པའི་མན་ངག་རིག་པ་རྣམས་ཀྱི་གསུངས་ལས། འདས་པའི་རྗེས་མི་བཅད། མ་འོངས་པའི་མདུན་མི་བསུ། ད་ལྟར་གྱི་ཤེས་པ་བཟོ་བཅོས་མེད་པར་རང་བབས་སུ་འཇོག །ཅེས་འབྱུང་བ་སྟེ། ཆོས་ཀྱི་རྗེ་སྒམ་པོ་པས། འདས་པའི་རྗེས་མི་བཅད་ཟེར་ཙ་ན། འོ་སྐོལ་གྱི་བློ་རྣམ་རྟོག་སྔ་མའི་ཕྱིར་མི་…

གྲུབ་པ་ཡིན་ནོ། །དེའང་གྲུབ་ཆེན་དབང་པོའི་བློས། ཇི་སྲིད་ཇི་སྲིད་རྣམ་རྟོག་པ། །དེ་སྲིད་ཐམས་ཅད་ཀུན་ནས་བརྫུན། །གང་ཞིག་དེ་ཉིད་མ་བརྟགས་པ། །དེ་བཞིན་ཡང་དག་དེ་བདེན་པ། །ཞེས་དང་། ས་ར་ཧས། འདི་ལྟར་དུས་གསུམ་རྣམ་པ་ཐམས་ཅད་དུ། །ཡིད་ལ་བྱར་མེད་མ་བྲལ་གཉུག་མའི་ངང་། །དེ་ཉིད་སྐྱོང་ལ་སྒོམ་ཞེས་ཐ་སྙད་གདགས། །ཞེས་གསུངས་པ་ཡིན་ནོ། …

ཤང་གི་སྒོམ་པར་འགྱུར་རོ་ཞེས་སྨྲ་པ་ཡོད་མོད་ཀྱི་དེ་ནི་མ་བརྟགས་པར་སྨྲས་པ་སྟེ། བཀའ་བརྒྱུད་འདི་པས་ཡིད་བྱེད་ཆེད་དུ་བཀག་ནས་འགགས་པའི་རྣམ་རྟོག་དེའི་སྟེང་དུ་སྡོད་པ་ཡིན་ནོ་ཞེས་མི་བཞེད་པའི་ཕྱིར་ཏེ་བཤད་མ་ཐག་པ་ལྟར་ཤེས་པ་ད་ལྟ་བ་བཟོ་མེད་དུ་སྐྱོང་བར་བཞེད་པའི་ཕྱིར། དེ་ལྟ་ནའང་སྐྱོན་དེ་ཉིད་ལས་མ་འདས་ཏེ། ཤེས་པ་ད་ལྟ་བ་བཟོ་…

ཉིན་བྱེད་གཅིག་ཉིད་རྡོ་རྗེ་ཅན་གྱི་གདན་མིན་ཞིང་། །ཧཱུྃ་ཡིག་ཉིད་ཀྱིས་མཚན་མ་དང་ནི་ཡོངས་སུ་གྱུར་པ་གཞན་པ་ཁ་དོག་གཟུགས་དག་མི་འདོད་དེ། །འགྱུར་མེད་དག་གིས་བསྐྱེད་ཅིང་འགྱུར་བ་ཉམས་པར་གྱུར་པ་མཆོག་གི་དབང་པོ་དག་དང་ལྡན་པ་ནི། །རྣམ་པ་ཀུན་ལྡན་ཐིག་ལེ་མཐའ་དག་རྒྱལ་བའི་བདག་པོ་སྣ་ཚོགས་སྒྱུ་མ་འཛིན་པ་འདི་ལའོ། །ཞེས་རྣམ་པར་རྟོག…

རྣམ་སྤངས་ནས། །ཆོས་རྣམས་ཀུན་གྱི་རང་བཞིན་ཉིད། །ཆོས་ཀྱི་དབྱིངས་སུ་བསྒོམ་པར་བྱ། །ཞེས་དང་། དཔའ་བོ་རྡོ་རྗེའི་ཕྱག་རྒྱ་བཞི་རིམ་ལས། མངོན་སུམ་རྟོག་བྲལ་རྒྱུན་བསྲིངས་ན། །བསྒོམས་སོ་ཞེས་ནི་ཐ་སྙད་འདོགས། །ཞེས་དང་སློབ་དཔོན་བཛྲ་པཱཎིའི་གསུང་བླ་མ་བརྒྱུད་པའི་རིམ་པའི་མན་ངག་ཅེས་བྱ་བ་འབྲོག་མིའི་འགྱུར་ལས། དེའང་སྒོམ་པ་པོ་མེད…

ཐམས་ཅད་གློ་བུར་དུ་རྐྱེན་གཞན་ལ་བརྟེན་ནས་བསྐྱེད་དེ། རང་བཞིན་ངོ་བོ་ནི་མ་སྐྱེས་ལ་གང་དུ་རྟོག་པའི་རྐྱེན་མ་ཚོགས་པ་ན་ཤེས་པ་རྐྱེན་གྱིས་མ་བསླད་པ་མ་བཅོས་པའི་གཉུག་མ་སྒྲོ་སྐུར་དང་བྲལ་བ་ནི་ཕྱག་རྒྱ་ཆེན་པོ་སྟེ། ཞེས་སོགས་ལུང་དང་བཅས་ནས་རྒྱས་པར་འབྱུང་ཞིང་། ཟབ་མོའི་མདོ་སྡེ་རྣམས་ནས་ཀྱང་འདི་དང་མཐུན་པར་གསུངས་ཏེ། མཚན་མོ་བཟ…

འབྱུང་བ་ལ་ཚད་མར་བྱེད་པའི་ཕྱིར་རོ། །འོ་ན་ཐོག་མ་ཉིད་ནས་གཉུག་མ་བཟོ་མེད་དུ་སྐྱོང་བ་ཉིད་ལ་འཇུག་གམ་ཞེ་ན། གང་ཟག་གི་སྐལ་བའི་རིམ་པས་འཇུག་པར་ནུས་ན་ནི་ཆེས་ལེགས་ཤིང་གལ་ཏེ་འཇུག་པར་མི་ནུས་ན་སེམས་ཀྱི་གླང་པོ་དམིགས་པའི་ཀ་བ་ལ་དྲན་ཤེས་ཀྱི་ཐག་པས་གདགས་ཅེས་མན་ངག་རིག་པ་རྣམས་གསུང་བ་ལྟར་ཕྱིར་སེམས་འཛིན་པ་དང་ནང་དུ་སེམས་འཛིན་པ…

བྱིང་རྒོད་ལ་སོགས་པའི་སྐྱོན་སེལ་བ་དང་། གོལ་ས་གཅོད་པ་དང་། བོགས་འདོན་པ་ལ་སོགས་པའི་ཚུལ་ལའང་མཁས་པས་འབྲས་བུའི་ཕྱག་རྒྱ་ཆེན་པོ་ཇི་ལྟ་བ་བཞིན་མངོན་དུ་མ་གྱུར་ཀྱི་བར། ཇི་སྐད་དུ། ཆུ་བོ་ཀླུང་འབབ་གཞུང་དང་ནི། །མར་མེ་འབར་བའི་རྩེ་མོ་ལྟར། །སྔགས་ཀྱི་དེ་ཉིད་རྗེས་འབྲང་གནས། །རྒྱུན་མི་ཆད་པའི་བསམ་གཏན་འཐོབ། །ཅེས་པ་ལྟར་སྐྱོང་…

བརྟན་པར་ཤོག །ཅེས་པ་སྟེ་གོང་དུ་བཤད་པ་ལྟར་དབང་པོའི་རིམ་པས་དམིགས་བཅས་དམིགས་མེད་ཀྱི་མཉམ་བཞག་རིམ་གྱིས་ཉམས་སུ་ལེན་པའམ་ཐོག་མ་ནས་དམིགས་མེད་ལ་འཇུག་པ་གང་རུང་གིས་སྒོམ་པ་ན་ཐོག་མར་ཞི་གནས་ཀྱི་ཏིང་ངེ་འཛིན་འཐོབ་པར་འགྱུར་བ་ཡིན་ནོ། །དེའང་ཞི་གནས་ཀྱི་སྒྲ་དོན་ནི་སེམས་ཉོན་མོངས་པའི་རྣམ་པར་རྟོག་པ་ཞི་ཞིང་དགེ་བའི་ངོ་བོར་རྩེ་…

རྟོག་པ་ལ་དབྱེ་ན་རགས་པ་དང་ཕྲ་བ་གཉིས་ཡིན་ལ། རགས་པ་ནི་ཡིད་ཀྱིས་ཡུལ་ལ་རྟོག་པ་ཙམ་དང་། ཕྲ་བ་ནི་སླར་ཡང་རྟོག་པ་དེ་ལ་དཔྱོད་པར་བྱེད་པ་སྟེ། མཛོད་ལས། རྟོག་དང་དཔྱོད་པ་རྩིང་ཞིབ་ཉིད། །ཅེས་བཤད་མོད། འདིར་མན་ངག་གི་དབང་དུ་ན་ཡུལ་ལ་འཇུག་པའི་རྟོག་དཔྱོད་མངོན་གྱུར་དུ་ཚོར་བ་དེ་རགས་པ་དང་། ཡུལ་ལ་དངོས་སུ་འཇུག་པ་མི་ཚོར་བ་དེ་ཕྲ་…