མེད་པ། །དང་པོའི་རྣལ་འབྱོར་དུ་བཤད་དོ། །ཞེས་དང་། དོན་བསྡུས་ལས་ཀྱང་། ཀུན་བཟང་ཐུགས་རྗེས་འགྲོ་དོན་དུ། །ཐེག་པ་གསུམ་སྣང་འདུལ་མཛད་པའི། །དོན་དམ་ངེས་པའི་ཐེག་པ་ལས། །གསང་སྒོ་མཚོན་པའི་མདོ་རྒྱུད་དོན། །རྣམ་པ་གསུམ་དུ་ཤེས་བྱ་སྟེ། །བྱ་བ་རྒྱུ་དང་བྱེད་པ་རྐྱེན། །བྱ་བྲལ་འབྲས་བུའི་རྣལ་འབྱོར་དག །ཇི་སྙེད་ཆོས་ཀྱི་རྩ་བར་བཤད། …

ཏེ༑ དེ་ལས། རོལ་པའི་ཀ་ར་ལ་སོགས་པ། །མན་ངག་ཐབས་ཀྱིས་དེར་འཇུག་དང་། །ཞེས་གསུངས། གཉིས་པ་ནི། དེའི་འཕྲོས་ལས། ཐོས་བསམ་སྒོམ་པའི་ཚུལ་འགྲོ་བའོ། །དེར་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དང་ཡི་གེ་ཡི། །རྗེས་འཇུག ཅེས་པས། རྟོག་དཔྱོད་ཀྱི་རྗེས་སུ་འཇུག་པ་ལྟ་བ་གཏན་ལ་དབབ་པ་ནི། ལམ་སྒོམ་པའི་སྔོན་དུ་འགྲོ་དགོས་ཏེ༑ དེ་ཡང་…

པས་འབྲས་བུ་སྐྱེ་བའི་ས། བརྒྱད་པ་གནས་པ་མི་འགྱུར་བའི་ས། དགུ་པ་བརྡལ་བ་ཆོས་ཉིད་ཀྱི་ས། བཅུ་པ་རྫོགས་པ་ཅིར་ཆིབ་ཀྱིི་ས་རྣམས་སོ། །དེ་དག་ཀྱང་། འདུན་པ་སྐྱེ་བའི་སྐབས་སོགས་ས་བཅུ་པོ་རེ་རེ་དང་སྦྱར་བའི་གནས་སྐབས་བཅུར། ཆོས་ཉིད་སྙིང་པོ་ཇི་བཞིན་པའི་རྗེས་སུ་འཇུག་པའི་རང་སའི་ལམ་ན་འཕར་བའི་རིམ་པ་ལྟར་བསྒོམས་པས། ས་བཅུ་རང་རང་གི…

ཞིང་བགྲོད་ནས་ཆོས་ཉན་པ་སོགས་མཐོང་ལམ་གྱི་ཡོན་ཏན་ཐམས་ཅད་འཆར་རོ། །དེ་ནས་མཐོང་ལམ་འོད་གསལ་ལས་ལངས་པའི་རྗེས་ལ་མངོན་རྟོགས། བདུན་པ་དམིགས་པས་འབྲས་བུ་སྐྱེ་བའི་ས་སྒོམ་ལམ་ལུང་ཆེན་ཐོབ་པའི་རྣལ་འབྱོར་གྱིས་བསྡུས་པ་ཐོབ་པས། ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་ཆད་པ་ཟུང་འཇུག་གི་སྐུ་གྲུབ་ཅིང་། དེ་ནས་ས…

དུ་ཐོབ་པ་ལྟར་སྣང་སྟེ། མི་སློབ་པའི་ཟུང་འཇུག་འབྲས་བུའི་ཆོས་ལྔའམ་ཉི་ཤུ་རྩ་ལྔ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞི་ཡེ་ཤེས་ལྔའི་བདག་ཉིད་དཔལ་ཀུན་ཏུ་བཟང་པོའི་གོ་འཕང་ལ་དབང་འབྱོར་བས། རྟག་ཁྱབ་ལྷུན་གྱིས་གྲུབ་པའི་ཕྲིན་ལས་ཀྱིས་དོན་མཛད་དོ། །དེ་ལྟར་ཡང་དོན་བསྡུས་ལས། འབྲས་བུ་ཉིད་ནི་རྫོགས་སངས་རྒྱས། །སྐུ་གསུང་ཐུགས་དང…

གྲུབ་སྟེ། རྡོ་རྗེ་རྩེ་མོ་ལས། སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་གསུངས་པའི་ཕྱིར། གཉིས་པ་གྲུབ་སྟེ། ཀུན་འདུས་ལས། དབང་རྣམས་ལེགས་པར་རྫོགས་གྱུར་པས། །རྩ་བ་ཡན་ལག་དམ་ཚིག་ཀུན། །མ་ཉམས་རབ་ཏུ་བསྲུང་བར་བྱ། །དེས་ནི་དངོས་གྲུབ་མཆོག་ཐོབ་འགྱུར། །ཞེས་དང་། གསང་མཛོད་ལས། དབང་བསྐུར་ཡང་དག་བྱིན་ལྡ…

པོའི་དགོངས་པ་ཇི་ལྟ་བ་བཞིན་དུ་མ་འདྲེས་གཙང་དག་གི་སྒོ་ནས་སོ། །དེ་ལ་དྲུག་གསུམ་བཅོ་བརྒྱད་ཀྱི་མན་ངག་གང་ཞེ་ན། གཏད་རྒྱའི་རྩ་བ་ལས། དང་པོ་གབ་པའི་དབང་ལེ་དྲུག །སྤྱི་དབང་ཆེན་པོའི་གླེང་གཞི་དང་། །འདྲེན་པའི་ལས་བྱང་ཆེ་ལེ་དང་། །འདྲེན་པའི་ལས་བྱང་ཆུང་ལེ་དང་། །ཡོངས་སུ་གྲུབ་པའི་དབང་ལེ་དང་། །ལྟ་བ་ཡེ་འབྱམས་དབང་ལེ་དང་། །ཀུན…

དེ་ཚིག་ཏུ་གྲགས་པས་ལྷ་དང་མིའི་འཇིག་རྟེན་དུ་སྣང་བར་གྱུར་པ་ཡིན་ནོ། །ཞེས་གསུངས་པའི་དོན། ཇི་སྐད་དུ། རྒྱལ་བ་སེམས་དཔའ་རྣལ་འབྱོར་དང་། །དགོངས་རིག་རྣ་བར་བརྒྱུད་པ་སྟེ། །གང་ལ་ཐུག་གི་བར་དུའོ། །ཞེས་པས་གསུམ་སྟེ། རྒྱལ་བ་དགོངས་པས་བརྒྱུད་པ། རིག་འཛིན་རིག་པས་བརྒྱུད་པ། གང་ཟག་རྣ་བར་བརྒྱུད་པའོ། །དང་པོ་ནི། བདག་ཅག་གི་སྟོན་པ…

དེ་དག་གིས་ཀྱང་རང་གི་སྟོན་པ་ལ་ཉན་ནས། དེ་ཉིད་རང་བཞིན་སྤྲུལ་པའི་དག་ཞིང་རྣམས་སུ༑ རང་གི་ཉེ་བའི་འཁོར་གདུལ་བྱ་དག་པ་རྣམས་ལ་སྟོན་པར་བྱེད་ཅིང་། དེར་མ་ཟད་སྤྲུལ་པའི་སྐུ་ཡོངས་སུ་མྱ་ངན་ལས་འདས་པའི་འཁོར་རྣམས་ལའང་། ཆོས་ཉིད་མ་བཅོས་པའི་དོན་ཉིད་བརྡ་དང་ཚིག་གི་སྒོ་ནས་བགྲོ་བར་བྱེད་དེ། སྤྱི་མདོ་ལས། སངས་རྒྱས་མི་བསྐྱོད་པའི་ཞ…

གསུམ་དབྱེར་མི་ཕྱེད་པའི་རང་སྣང་གི་སྟོན་པ་ཆོས་ཀྱི་སྐུ་དང་། གཞན་སྣང་ལོངས་སྐུ་རིགས་ལྔ་དང་། སྤྲུལ་སྐུ་ཐུབ་པའི་དབང་པོ་རྣམས་ཀྱིས་ཀྱང་གསང་སྔགས་ཀྱི་དོན་དེ་ཉིད་དུས་ཐ་དད་པ་མ་ཡིན་པར་སྟོན་པར་མཛད་པ་ཡིན་ཏེ། སྒྱུ་འཕྲུལ་རྩ་རྒྱུད་ལས། དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ཀྱིས་མ་བཅོས་ཀྱང་། །ལས་…

གྲགས་ལྡན་ཕྱོགས་སྐྱོང་ལ། དེས་གནོད་སྦྱིན་སྐར་མདའ་གདོང་ལ། དེས་གནོད་སྦྱིན་ཚོམ་བུ་འབུམ་སྡེ་ལ་བཤད་ཅིང་དར་བར་བྱས་ཏེ། ལྷ་ཀླུ་གནོད་སྦྱིན་དེ་དག་ཀྱང་བྱང་ཆུབ་སེམས་དཔའི་རིགས་འཛིན་ཅིང་སངས་རྒྱས་རྣམས་ཀྱི་གདུང་འཚོབ་པར་གྱུར་ཏོ། །གཉིས་པ་ནི། ཐོག་མར་ལུང་བསྟན་བརྒྱུད་པའི་འབྲེལ་བསླང་བར་བྱ་སྟེ། སྤྱི་མདོ་ལས། འདི་ལྟར་མི་མཇེད་…

མ་ཆོད་པ་རྣམས་དྲི་བ་གྱིས་ཤིག ཅེས་བཀའ་སྩལ་པ་དང་། འཁོར་གྱི་ནང་ནས་རིག་འཛིན་གྱི་རྒྱལ་པོ་ཀུཉྫ་ར་ཞེས་བྱ་བ་སྟན་ལས་ལངས་ཏེ། སེང་གེའི་ལྟ་སྟངས་ཀྱིས་སྟོན་པའི་ཞལ་ལ་བལྟས་ཏེ་འདི་སྐད་ཅེས། ཁྱོད་ནི་ནམ་མཁའི་རང་བཞིན་ཏེ། །འདའ་དང་མི་འདའ་ཡོངས་མི་མངའ། །འཇིག་རྟེན་པ་ལ་མཐུན་འཇུག་ཏུ། །འདའ་བས་ཡོངས་སུ་འདུལ་བར་དགོངས། །ཁྱོད་ནི་འཇིག…

ལྡན་མཆོག་སྐྱོང་བློ་གྲོས་མཐའ་ཡས་དང་། ཀླུ་རྒྱལ་འཇོག་པོ་བློ་གྲོས་རྒྱ་མཚོ་དང་། གནོད་སྦྱིན་སྐར་མདའ་གདོང་བློ་གྲོས་དད་སེལ་དང་། སྲིན་པོ་ལངྐའི་བདག་པོ་མགྲིན་བཅུ་བློ་གྲོས་ཐབས་ལྡན་དང་། མིའི་དགེ་བསྙེན་ལི་ཙ་བཱི་དྲི་མེད་གྲགས་པ་བློ་གྲོས་རབ་ཞི་སྟེ། དམ་པའི་རིགས་ཅན་དྲྭ་མ་ལྔ་པོ་ནང་དུ་ཡང་དག་འཇོག་ལས་ལངས་པ་དང་། སྟོན་པ་ཐུབ…

པ་ཡི། །རྒྱལ་བ་དཔག་ཏུ་མེད་པ་ཡིས། །དམ་པའི་དགོན་གནས་ཆེན་པོ་དེར། །སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་བདག་གིས་ཀྱང་། །ཐོག་མ་ཐ་མ་མེད་པ་རུ༑ ༑བདག་གི་དམ་བཅའ་མི་འདོར་བས། །བསྐུལ་བའི་དུས་ནི་གང་བྱུང་བ། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་གསུངས་ནས་རྨད་དུ་བྱུང་བའི་ཆོ་འཕྲུལ་གྱིས་གཤེགས་ཏེ། གནས་ལངྐའི་ཡུལ…

བཅུས་སྤྱན་དྲངས་ནས། བློ་གྲོས་ཆེན་པོས་ཞུས་པ་ལངྐར་གཤེགས་པའི་མདོ་གསུངས་པའི་གནས་དེ་ཡིན་ལ། ཕྱིས་དེད་དཔོན་སེང་གེས་བཟུང་བས་དེང་སང་སིདྒ་ལའི་གླིང་དུ་གྲགས་སོ༑ ༑ཡུལ་དེའི་མཚན་ཉིད་ནི། རྒྱ་མཚོའི་དོ་ལ་གནས་པའི་གླིང་ས་པདྨ་འདབ་བཞིའི་རྣམ་པ་ཅན་གྱི་དབུས་སུ་དྲག་ཤུལ་ཅན་ཞེས་བྱ་བའི་རི་བོ་མ་ལ་ཡ་སྟེ། ད་ལྟ་ཡུལ་དེར་ཁ་སྐད་དུ་སུ་མ…

ཞབས་རྗེས་དང་། རིའི་རྩ་བ་དང་ཉེ་བའི་བྱང་ངོས་སུ་གུ་ཎ་ཝེ་ར་ཞེས་པའི་མཆོད་རྟེན་ཆེན་པོ་སོགས་དེ་བཞིན་གཤེགས་པའི་གདུང་རིང་བསྲེལ་བཞུགས་པའི་མཆོད་རྟེན་མང་པོ་དང་། གུ་ཎ་ཝེ་རའི་ནུབ་ཕྱོགས་ན་བུདྡྷ་ཤ་ར་ཎ་ཞེས་པ་དེ་བཞིན་གཤེགས་པས་ཞག་བདུན་རྩ་བར་མཉམ་བཞག་ལ་བཞུགས་པའི་བོ་དེ་ཙེའི་ཤིང་གི་སྡོང་པོ་དང་། ནགས་ཚལ་ཐམས་ཅད་གླང་པོ་ཆེ་དང་།…

ནི༑ བདག་ཉིད་ལ་ལྟས་བདུན་ཤར་བ་སྟེ། འདི་ཡང་། སྐུ་གསུང་ཐུགས་རྟགས་ཐིམ་པ་དང་། །རིན་ཆེན་གླེགས་བམ་བབས་པ་དང་། །ཆོས་ཀྱི་བགྲོ་བ་བྱས་པ་དང་། །ཀུན་གྱིས་དམ་པར་བསྒྲགས་པ་དང་། །མཆོད་པ་ཆེན་པོ་བྱས་པ་དང་། །རིན་ཆེན་ཆར་དུ་བབས་པ་དང་། །སངས་རྒྱས་ས་ལ་ལུང་བསྟན་པའོ། །ཞེས་གསུངས་པ་ལྟར་རྨི་ལྟས་བདུན་ལས་གཉིས་པ་དང་གསུམ་པ་གོ་བརྗེས་པ་ཙ…

མངོན་སུམ་བབ་པ་རྨིས་ཏེ་ལྔ་པ་ཡིན། །ཆོས་ཀྱི་རྒྱལ་པོར་དབང་ནི་བསྐུར་བའི་རྟགས། །དྲུག་པའི་རྨི་ལམ་གླེགས་བམ་དེ་དག་ལ། །སངས་རྒྱས་བྱང་སེམས་རིག་འཛིན་ཚོགས་མང་པོས། །ཡོན་ཏན་སྒྲོག་ཅིང་མཆོད་བསྟོད་སྐོར་བྱེད་རྨིས། །རྨད་བྱུང་ཆེན་པོར་སྟོན་པའི་སྔ་ལྟས་ཡིན། །ཐ་མ་ནམ་མཁའི་དབྱིངས་ཀྱི་སྤྲིན་གསེབ་ནས། །ཆོ་འཕྲུལ་རང་སྒྲས་བདག་ལུང་སྟ…

ལུང་བསྟན་པ་ལྟར། མ་ཧཱ་ཡོ་གའི་རྒྱུད་སྡེ་ཆེན་པོ་བཅོ་བརྒྱད་ནི་ཟ་ཧོར་གྱི་ཡུལ་དང་། མདོ་དགོངས་འདུས་སོགས་ལུང་ཨ་ནུ་ཡོ་གའི་རྒྱུད་རྣམས་ནི་ལངྐའི་ཡུལ་དུ་གྲགས་པ་སིངྒ་ལའི་གླིང་དུ་བབས་སོ། །དེར་རྒྱལ་པོས་གླེགས་བམ་རྣམས་ལ་བརྟགས་པས་རྟོགས་པར་འདུག་ཀྱང་། གདུལ་བྱ་རྒྱུད་ལ་རང་གར་འཇུག་པ་དགག་པའི་ཕྱིར། བརྡའ་མ་འཕྲོད་པའི་ཚུལ་མཛད་ད…

ལུགས་གཉིས་འབྱུང་བ། གང་ལྟར་བཤད་ཀྱང་མི་འགལ་ཏེ། རྒྱལ་པོ་ཉིད་ཀྱིས་རྟོགས་ཀྱང་གཟུ་ལུམ་ཅན་རྣམས་རང་གར་འཇུག་པ་དགག་པའི་ཕྱིར་ཀུ་ཀུ་རཱ་ཛ་ལ་བརྟེན་ནས་རྟོགས་པ་ལྟར་མཛད་པའི་ཕྱིར་རོ། །དེ་བས་ན་གཉིས་པོ་དྲང་ངེས་ཀྱི་ཁྱད་པར་ཡིན་པས། འདིར་ཕྱི་མ་ལྟར་རྒྱལ་པོ་རང་ཉིད་ཀྱིས་རྟོགས་པའི་ཕྱོགས་ལེགས་པ་ཡིན་ཏེ། ཉིད་ཀྱིས་མཛད་པའི་སྒྱུ་འཕྲ…