ཅེས་དང་། ད་ནས་གདུང་རབས་ལྔ་པ་ན། །ང་ཡི་མིང་ལ་ལྡེ་བཏགས་པ། །ཆོས་སྐྱོང་བ་ཡི་རྒྱལ་པོ་འབྱུང་། །འཇམ་དཔལ་དབྱངས་ཀྱི་སྤྲུལ་པ་སྟེ། །དེ་ཡིས་དམ་ཆོས་རྒྱས་པར་བྱེད། །མཐའ་མར་མངོན་པར་འཚང་ཡང་རྒྱ། །དེ་ནས་གདུང་རབས་གཉིས་པ་ལ། །ཕྱག་ན་རྡོ་རྗེའི་སྤྲུལ་པ་སྟེ། །རྒྱལ་པོ་ཁྲི་ཞེས་བྱ་བ་འབྱུང་། །དེས་ཀྱང་དམ་ཆོས་རྒྱས་པར་བྱེད། །དེ་ནས་བ…

མར་མེ་འཆི་ཁར་གསལ་བ་བཞིན། །བསྟན་པ་ཤིན་ཏུ་རྒྱས་པར་འགྱུར། །ཟབ་མོའི་ཆོས་རྣམས་ཤིན་ཏུ་དར། །ཞེས་དང་། ངའི་དམ་ཆོས་ཟླ་བ་སྒྲོན་མེ་དང་། དཀོན་མཆོག་སྤྲིན་དང་། སྤང་ཀོང་ཕྱག་རྒྱ་པ་དང་། མྱ་ངན་ལས་འདས་པ་དང་། ལས་རྣམ་པར་འབྱེད་པ་དང་ལྔ་པོ་འདི་ཁྱོད་ལ་གཏད་ཀྱི། ཁྱོད་ཀྱིས་ཆོས་སྐྱོང་བའི་རྒྱལ་པོ་ཁྲི་སྲོང་ལྡེའུ་བཙན་ལ་རིམ་པར་གཏོད་…

ཆེན་པོ་ལ་ཕྱག་དང་མཆོད་པ་འབུལ་དུ་འགྲོའོ། །ཞེས་གསུངས་ཏེ་ཐུགས་རྗེ་ཆེན་པོ་བཞུགས་པའི་གཙང་ཁང་དུ་བྱོན་ནས་ཕྱག་དང་མཆོད་པ་མཛད། རྒྱལ་པོ་ཉིད་ཐུགས་རྗེ་ཆེན་པོའི་སྐུ་མདུན་དུ་བཞེངས་པའི་གཡས་སུ་ཁྲི་བཙུན། གཡོན་དུ་ཀོང་ཇོ། སྐུ་རྒྱབ་ན་མོང་བཟའ་རྣམས་བཞེངས། བློན་པོ་སྣ་ཆེན་པོ་ཐེམ་པའི་ཁར་རྐང་པ་ཕྱི་ན་བཞག །ལག་པ་སྒོའི་རུ་གཉིས་ལ་བ…

སུ་གསོལ་ནས་སྒོ་བརྩིགས་ཤིང་ཞལ་བ་གྱིས་ལ་འཇམ་དབྱངས་ཀྱི་སྐུ་བྲིས་ཤིག །བོད་འབངས་བློ་ཉེ་བ་རྣམས་ལྷ་གཅིག་ཀོང་ཇོ་དང་མ་མཇལ་ཟེར་ན་ངའི་ལྷ་ཐུགས་རྗེ་ཆེན་པོ་ལ་གསོལ་བ་ཐོབ་ཅིག་གསུངས། དེ་ནས་རྒྱལ་པོས། ལྷ་གཅིག་གཉིས་ཀྱི་སྤྱི་བོར་ཕྱག་བཞག་པ་དང་བལ་མོ་བཟའ་ཁྲི་བཙུན་པདྨ་དཀར་པོ་འདབ་མ་བརྒྱད་པ་ཧཱུཾ་ཡིག་གིས་མཚན་པ་ཞིག་ཏུ་གྱུར་ཅིང་…

སེམས་ཅན་རྣམས་ལ་གཟིགས་སུ་གསོལ། །འགྲོ་བ་ཡོངས་ཀྱི་སྐྱབས་གནས་ཁྱེད། །སྡུག་བསྔལ་དུ་མས་རྣམ་གཙེས་པའི། །ཉམ་ཐག་ཕོངས་པའི་སེམས་ཅན་ལ། །ཐུགས་རྗེའི་སྤྱན་གྱིས་གཟིགས་སུ་གསོལ། །མ་རིག་འཁྲུལ་པའི་སེམས་ཅན་རྣམས། །ལས་ངན་བསགས་པས་ལུས་ངན་བླངས། །ངན་སོང་གསུམ་དུ་ལྷུང་བ་རྣམས། །ཐུགས་རྗེའི་ལྕགས་ཀྱུས་བཟུང་དུ་གསོལ། །ཞེས་གསུངས་ནས་ཐུགས…

ཡུམ་ཨ་ཙ་མ་འདི་རྣམས་མི་བདེན་པ་ལ་བདེན་པར་འཛིན་མི་རྟག་པ་ལ་རྟག་པར་འཛིན་ནོ་སྙམ་ནས་ཐུགས་རྗེ་ཆེན་པོའི་ཐུགས་ཀ་ནས་རྒྱལ་པོས་དབུ་ཉུག་མཛད་དེ། ཁ་བ་ཅན་གྱི་སེམས་ཅན་རྣམས་སྔར་སྐྱེས་པ་ལ་མ་ཤི་བ་མེད་པ་དང་གཅིག །ལུས་འདུས་བྱས་ཡིན་པས་འཆི་ངེས་པ་དང་གཉིས། ཚེ་སྐད་ཅིག་ཀྱང་མི་སྡོད་པར་མྱུར་དུ་འཆི་བ་དང་གསུམ་ཡིན་ནོ། །ད་ལྟའི་སྤྱོད་པ…

དེ་ལྟར་བཞུད་ན་ངེད་ཤུལ་ན་ཡོད་པ་རྣམས་ཇི་ལྟར་བགྱི་ཞུས་པས། སླར་ཡང་ཞལ་གདམས་དང་ལུང་བསྟན་འགའ་ཞིག་གསུངས་ནས་ཐུགས་ཀར་ཐིམ་མོ། །དེ་མ་ཐག་རང་བྱུང་ཐུགས་རྗེ་ཆེན་པོའི་ཐུགས་ཀ་ནས་འོད་ཟེར་ཚེས་བཅོ་ལྔའི་ཟླ་འོད་ལྟ་བུ་བྱུང་སྟེ་འཕྲུལ་སྣང་གི་ཕྱི་ནང་ཐམས་ཅད་དུ་ཁྱབ་ཅིང་། ཁྱད་པར་དུ་བྱམས་པ་ཆོས་ཀྱི་འཁོར་ལོ་དང་། ཇོ་བོ་མི་བསྐྱོད་རྡོ…

ལས་འོད་ཟེར་ལྕགས་ཀྱི་རལ་གྲི་ལྟ་བུའི་སྣེ་ལ་ཁྲོ་ཆུང་དཔག་ཏུ་མེད་པ། མར་མེ་མཛད་ལས་འོད་ཟེར་འཇའ་ཚོན་ལྟ་བུ། མི་འཁྲུགས་པ་ལས་འོད་ཟེར་གསེར་བཙོ་མ་ལྟ་བུ་རྣམས་བྱུང་སྟེ། དེ་རྣམས་ལ་འོད་ཟེར་འཕྲོ་བའི་ལྷ་བརྒྱད་ཅེས་གྲགས། འོད་ཟེར་དེ་རེ་རེས་ཀྱང་ར་སའི་ཕྱི་ནང་ཐམས་ཅད་ཁྱབ་ཅིང་འོད་ཀྱི་དྲ་བར་སྦྲེལ། ནམ་མཁའི་ཁམས་ཐམས་ཅད་དཔའ་བོ་མཁའ…

ཡབ་ཡུམ་གསུམ་གར་གཤེགས་ཞེས་ལན་གསུམ་དུ་དྲིས་པ་ལ། སྣ་ཆེན་པོའི་བསམ་པར། རྒྱལ་པོ་ཡབ་ཡུམ་གསུམ་ལྷ་ལ་ཐིམ་བྱས་ཀྱང་ཡིད་ཆེས་མི་སྐྱེའོ་སྙམ་ནས་ཅང་སྨྲ་མ་ནུས་པར་ཁ་རོག་བསྡད་པ་ན། སྦས་སྒྱིད་ཅག་རིང་མོ་ན་རེ། ཞང་བློན་ཆེན་པོ་འདིས་ལན་གསུམ་དུ་དྲིས་ཀྱང་ལན་མི་སྟེར་བས་སྣ་ཆེན་པོ་ཁྱོད་ཀྱི་སྐེ་གཅོད་པར་རིགས་སོ་ཟེར་ནས་རལ་གྲི་ཕྱུངས་པ…

ཅད་ཡིད་ཆེས་ཏེ་ངོ་མཚར་རེ་ཆེ། རྒྱལ་པོ་ནི་སངས་རྒྱས་ཀྱི་སྤྲུལ་པ་ཡིན་ངེས་པར་འདུག །སྔོན་རྒྱ་རྗེ་དང་བལ་རྗེས་ཇི་སྐད་ཟེར་བ་ཡང་ཁོང་གིས་སྔ་ནས་མཁྱེན་ཏེ་བཀའ་འཕྲིན་གྱི་སྒྲོམ་བུ་བསྐུར་བར་མཛད་དོ་ཟེར། ཐོན་མི་ན་རེ། རྒྱལ་པོ་ནི་སྤྱན་རས་གཟིགས་དབང་ཕྱུག་དངོས་ཡིན་ཏེ་དབུ་ལ་འོད་དཔག་མེད་མངོན་སུམ་དུ་བཞུགས་པའི་ཕྱིར་དང་། ལི་ཡུལ་…

དུ་འོང་གི ། སྤུར་སྦྱང་བའི་ཚུལ་མ་བྱས་ན་མི་རུང་ངོ་ཞེས་བགྲོས་ཏེ་ལྷ་ལ་ཐིམ་པ་གསང་ནས། རྒྱལ་པོ་འཕན་ཡུལ་གཟན་མོའི་སྒང་འོད་ཟེར་དམ་པའི་ཕོ་བྲང་དུ་བཞུགས་དུས་མགུར་ཆམ་བྱུང་བ་ལོག་སྟེ་ཚད་པར་ཤོར། ཞབས་ཏོག་ལྷ་གཅིག་གཉིས་ཀྱིས་མཛད་པས་ལྷ་གཅིག་གཉིས་ཀྱང་བསྙུང་སྟེ་སྐུ་འདས་སོ་ཞེས་བསྒྲགས་ནས། དར་སྨན་དང་ས་སྤྱིན་ལས་རྒྱལ་པོ་ཡབ་ཡུམ་…

པ་དང་། ཀོང་ཇོ་ཤུལ་དུ་ཡུན་རིང་དུ་བཞུགས་པ་སོགས་འཆད་ཚུལ་གྱི་རྣམ་གྲངས་མི་འདྲ་བ་མང་པོ་ཡོད་མོད་ཀྱི། དོན་དུ་འཕགས་མཆོག་སྤྱན་རས་གཟིགས་དང་འཕགས་མ་སྒྲོལ་མ་ཟུང་ཞིག་མིའི་གདུལ་བྱ་འདུལ་བའི་ཆེད་དུ་མིའི་བརྫུ་བག་ཏུ་སྟོན་པ་ཙམ་སྟེ། བསམ་གྱིས་མི་ཁྱབ་པའི་རྫུ་འཕྲུལ་མངོན་པར་འདུ་མཛད་པའི་རྣམ་པར་ཐར་པ་ལགས་ན། གདུལ་བྱའི་བློ་གྲོས་ད…

གནམ་གྱི་ཆོས་དང་མཚུངས་པར་ནི་བཀའ་བཙན་ཏེ་ཐུགས་སྒམ་པོའི་རླབས་དང་། བཀའ་ལུང་བཟང་པོའི་ལུགས་ཀྱིས། ཕྱི་ནང་གཉིས་སུ་ལེགས་ཤིང་། ཆབ་སྲིད་ཆེ་བའི་ཚུལ། ནམ་དུ་ཡང་མི་ཡོངས་ཀྱི་ཤེས་པར། མདོ་ཙམ་ཞིག་རྡོ་རིང་ལ་བྲིས་པའོ། །༄། བཙན་པོ་ལྷ་སྲས། ཁྲི་ལྡེ་སྲོང་བཙན། ལྷ་འཕྲུལ་གྱི་ཞལ་སྔ་ནས། ཐུགས་སྒམ། ཁོང་ཡངས། བཀའ་བརྟན། ཟུང་ཐུབ། ཐུགས་ས…

རྒྱའི་ཡུལ་ཐོག་ཕྱོགས་སུ་དྲངས་པས་སྤ་བའོ། །དེ་ཚུན་ཆད་ཀྱི་ཆབ་སྲིད་ཀྱི་མངའ་བདག་མཛད་མ་ཐོག་ལ་བར་དུ་ལན་འགའ་རྒྱས་ཆབ་སྲིད་ལ་མ་བསྡོ་སྟེ། རྟག་ཏུ་མཇལ་དུམ་གསོལ་ལོ། །ལྷོ་ཕྱོགས་ཀྱི་རྒྱལ་པོ་ཆེན་པོ་རྒྱ་གར་དུ་འདུག་པ་ཡང་། འདིར་བྲིས་པ་ཡན་ལ་ཡི་གེ་ཕྲེང་ཉི་ཤུ་རྩ་དགུ ། མི་གསལ་བ་མན་ལ་ཡིག་ཕྲེང་བཅུ་བཞི། དེ་ནས་ས་འོག་ཏུ་ཚུད་པ་ལ་…

དེའི་ལན་དུ་མགར་གྱིས་བོད་དམག་འབུམ་ཚོ་ཁྲིད་ནས་རྒྱ་རྣམས་བཅོམ་རྗེས་འ་ཞ་དང་ཞང་ཞུང་གི་ཡུལ་དུ་འཁོས་བགྱིས་པར་ལོ་བརྒྱད་དུ་འགོར། མཐར་སྟོད་ལུང་རི་ཕུར་གྲོངས་སོ། །དེ་ནས་སླར་ཡང་རྒྱ་ནག་གི་དམག་སྐད་ཆེན་པོ་བྱུང་བས་ཇོ་བོ་ཤཱཀྱ་མུ་ནེ་ལྷོ་སྒོ་མེ་ལོང་ཅན་དུ་བཅུག་སྟེ་སྒོ་ལ་ཞལ་བ་བྱས་ནས་འཇམ་དབྱངས་ཀྱི་སྐུ་བྲིས། མི་རིང་བར་རྒྱ་ད…

ལྡེམ་བུ་དང་དབས་ཏར་ཁོང་ལོད་ཀྱིས་བློན་པོ་བྱས། འདིའི་རིང་ལ་རྩལ་པོ་ཆེའི་མི་བདུན་ཞེས་གྲགས་པ་བྱུང་སྟེ། རྔོག་རིང་ལ་ནག་པོས་གླང་པོ་ཆེ་ཐེག་པ། རྔོག་གླིང་ཁམས་ཀྱིས་གཡག་དྲུས་པོ་ཆེ་ཐེག་པ། གནོན་རྒྱལ་མཚན་གྱིས་མདའ་སྟེའུ་ཁ་མས་བྱ་ཁྲའི་སྐེད་པ་བཅད་པ། སྦས་རྒོད་མདོངས་ཅན་གྱིས་མིག་རྒྱང་གསུམ་གྱི་སར་མདའ་རྒྱང་རེས་སླེབས་པ། མགོས་…

གི་གཡོན་དུ་བརྩིགས་སོ། །རྗེ་དེ་དང་མཆིམས་བཙན་མེ་ཏོག་གི་སྲས་ཁྲི་ལྡེ་གཙུག་བརྟན་ཞེས་བྱ་བ་ཡབ་གཤེགས་པའི་ལོ་དེ་ཉིད་ལ་ཕོ་བྲང་ལྡན་དཀར་དུ་སྐུ་འཁྲུངས་པ་རྒྱལ་པོར་མངའ་གསོལ་ནར་སོན་པ་ན་བཙུན་མོ་ལྗང་མོ་ཁྲི་བཙུན་ཁབ་ཏུ་བསུས། བློན་པོ་སྦས་སྐྱེས་བཟང་སྟོང་བཙན་དང་། མཆིམས་རྒྱལ་གཟིག་ཤུ་ཏིང་དང་། འབྲོ་ཆུ་བཟང་དར་མ་གསུམ་གྱིས་བྱས་…

སྤྱན་དྲངས་ནས་རྒྱལ་པོའི་མཆོད་གནས་སུ་ཕུལ་བས། དེའི་བཞུགས་ཁང་དུ། ལྷ་སར་མཁར་བྲག །བྲག་དམར་མགྲིན་བཟང་། མཆིམས་ཕུ་ནམ་རལ། བྲག་དམར་ཀེ་རུ། མས་གོང་གི་གནས་ཏེ་ལྷ་ཁང་ལྔ་བཞེངས། ལྷ་ཆོས་མཛད་པའི་བྱིན་རླབས་ཀྱིས་སྔོན་ནུབ་ཕྱོགས་ཟླ་བ་ཚེས་པའི་མཐའ་ལ་ཀེམ་གཡག་མིག་ལས་མ་མཆིས་པ་ལ། འདིས་ཏང་ཏང་དང་སིང་གུར་བཏུལ་ཏེ་རྦ་སྟག་ཤ་དུང་གི་སྒོ…

མཚན་ཡང་ལྗང་ཚ་ལྷ་དབོན་དུ་གསོལ། དེ་ལ་ཁབ་རན་པ་ན་བོད་ཀྱི་མི་སྤྲེའུ་དང་བྲག་སྲིན་གྱི་བརྒྱུད་པས་བུ་འདིའི་ཇོ་མོར་མི་འོས། མེས་པོ་སྲོང་བཙན་སྒམ་པོའི་ལུགས་སུ་བྱ་ཟེར་ནས། རྒྱ་རྗེ་ལི་ཁྲིར་བཞེར་མང་མའི་སྲས་མོ་གྱིམ་ཤིང་ཀོང་ཇོ་བྱ་བ་ཡོད་ཟེར་བ་དེ་ལེན་པར་ཞལ་འཆམ། གཉགས་ཁྲི་བཟང་ཡང་སྟོན་ལ་འཁོར་སུམ་ཅུ་དང་བཅས་གཉེ་བོར་བཏང་ནས་རྒ…

བོད་ཀྱི་རྒྱལ་པོས་ཕོ་ཉ་མངགས་ནས་ཁྱོད་ཀྱི་གྲོགས་སུ་འོས་པ་ངའི་བུ་ལྷ་འདྲ་བ་དེ་ནི་འདས་སོ། །ད་ཁྱོད་རང་ང་ལ་བལྟས་ནས་འོང་ངམ་ཕྱིར་ལྡོག་པ་གང་མོས་གྱིས་ཤིག་ཅེས་བྱུང་བ་ན། བུ་མོའི་འདུན་མ་ལན་གཅིག་ཡིན་གསུངས་ཏེ་བོད་དུ་བྱོན་ནས་ཡབ་རྒྱལ་པོ་མེས་ཨག་ཚོམ་གྱི་བཙུན་མོ་མཛད། དེས་ངའི་ནེ་ནེ་མོ་ཀོང་ཇོའི་ལྷ་གསེར་གྱི་ཤཱཀྱ་མུ་ནེ་བལྟའོ…